####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M0511
Uniform title: anuttaraprakāśapañcāśikā
Author : ādinātha

Description: 
K.S.T.S. volume 13


Notes: 


Publisher : 
Publication year : 1918
Publication city : 
Publication country : India
####################################################



ओं नमो ऽनुत्तरप्रकाशशङ्कराय



अकृत्रिमाहमामर्शप्रकाशैकघनः शिवः | 

शक्त्या विमर्शवपुषा  स्वात्मनो ऽनन्यरूपया || १ ||

शिवादिक्षितिपर्यन्तं  विश्वं वपुर् उदञ्चयन् |

पञ्चकृत्यमहानाट्यरसिकः क्रीडति प्रभुः || २ ||

पृथगर्थम् अर्थवत्ता  विश्वविश्वशरीरयोः |

न विश्वविश्ववप्षोर्  भिन्नता कापि तात्त्विकी || ३ ||

भेदे सत्तास्फुरत्ताभ्यां  भिन्नं किं तु जगद् भवेत्|

सत्तास्फुरत्तासंबन्धात्  सत्ता�भानं च तन् न चेत् || ४ ||

असतः किम् सतस् ताभ्यां  संबन्धः सो ऽयम् इष्यते |

स्वरूपलाभसुलभः  संबन्धो न ह्य अवस्तुनः || ५ ||

न लब्धरूपसंबन्धे  ताभ्यां किं चिद् उपेक्ष्यते |

उपेक्षायाम् अवस्थानं  न स्याद् एतस्य किं चन || ६ ||

स्वभावतः स्फुरत्ता च  सत्ता च न विनाशिनी | 

विनाशानभुपगमे  जडतापि निवर्तते || ७ ||

ततो गत्यन्तराभावाच्  चिद् एव परिशिष्यते |

सतश् चिदैक्यं प्रकृतं  कदा चिन् न निवर्तते || ८ ||

प्रकाशे ऽनन्यतो भावः  स्वातन्त्र्योल्लासकेवलः |

परिछिन्नात्मिका शक्तिः  शम्भोर् विश्वातिशायिनः || ९ ||

यत् प्रकाशात्मकं सर्वं  तमःकेवलतां गतम् |

यच् च किम् चिज् जगद् एतत्  प्रकाशाद् अतिरिच्यते || १० ||

विमृश्यसरणीं प्राप्तम्  इत्य एषा तात्त्विकी मतिः |

अवभासैकतानानां  मतिर् एकात्र साक्षिणी || ११ ||

किं प्रमाणाइर् वराकैस् तैश्  चिदानुप्राणितात्मभिः |

न हि वैकर्तनं ज्योतिर्  दीपालोकम् अपेक्षते || १२ ||

शक्तिपातपवित्रे ऽस्मिन्  धीतत्त्वे च परीक्ष्यताम् |

आदर्शविमलाभोगे  न तु सर्वं प्रकाशते || १३ ||

इत्थं चिदात्मकं सर्वं  षट्त्रिंशद्भेदतत्त्वतः |

आदौ शुद्धात्मकं तत्त्वं  पञ्चधा�तमसः परम् || १४ ||

शिवः शक्तिश् च सादाख्यम्  ईशो विद्येति भिद्यते |

अक्षादिशान्तवर्णात्मा� निरमायि शिवेन तु || १५ ||

कलाविद्यारागकालनियतिर् बन्ध उच्यते |

मायापूर्वो वकारादिक्षकारान्ताक्षरात्मकः || १६ ||

पुमाञ् शक्तिर् मनो बुद्धिर्  अहंकारादिपञ्चकम् |

श्रोत्रादिपञ्चकं तादि  टादि वागादिपञ्चकम् || १७ ||

तन्मात्रपञ्चकं चादि  कादि व्योमादिपञ्चकम् |

सिसृक्षोः प्रथमस्पन्दः  शिवतत्त्वं विभोः स्मृतम् || १८ ||

इच्छैव सापरिम्लाना  शक्तितत्त्वम् उदञ्चयन् |

स्वेच्छया�सूचितम् विश्वम्  आच्छाद्याहन्तया स्थितम् || १९ ||

स एव तत्त्वं सादाख्यं  सर्वानुग्रहणोद्यतम् |

स एवेश्वरतत्त्वं स्यात्  पश्यन् विश्वम् इदन्तया || २० ||

इदन्ताहन्तयोर् ऐक्यम्  इति विद्या निगद्यते |

स्वाङ्गकल्पेषु भावेषु  मायातत्त्वं विभेदधीः || २१ ||

मायागृहीतसंकोचः  शिवः पुंतत्त्वम् उच्यते |

अयम् एव हि संसारी  जीवो भोक्तैव दृश्यते || २२ ||

ज्ञत्वकर्तृत्वपूर्णत्वनित्यत्वान्यस्य शक्तयः | 

तत्संकोचात् संकुचितः  कलाद्यात्मतया मतः || २३ ||

मायात्मकं कला नाम  किंचित्कर्तृत्वकारणम् |

कालः परिच्छेदकरो  नियतिश् चेदम् एव मे || २४ ||

कर्तव्यं नान्यद् इत्य एषा  व्यवस्था यन्त्रणाकृइतिः |

प्रकृतिर् गुणसाम्यं स्याद्  अहंकारादिजन्मभूः || २५ ||

अहं ममेदम् इत्य एतद्  बुद्धिहेतुर् अहंकृतिः |

बुद्धिर् अध्यवसायस्य  कारणं निश्चयात्मनः || २६ ||

संकल्पस्य विकल्पस्य  बीजं मन उदीर्यते |

वचनादेश् च शब्दादेर्  वागादिश्रवणादिकम् || २७ ||

कारणं श्रवणादीनां  ग्राह्यं तन्मात्रपञ्चकम् |

आकाशाद्यवकाशादिकारणं भूतपञ्चकम् || २८ ||

परापराशक्तिमये  शुद्धे विद्यादिपञ्चकम् |

तदन्यद् अपराशक्तिर्  इत्य एतत् तत्त्वम् ईरितम् || २९ ||

इयं देवी परा शक्तिः  शुद्धाशुद्धाध्वगर्भिणी |

पृथिव्यादीनि तत्त्वानि  यदा�लीनानि कारणे || ३० ||

तदा कारणमात्राणि  बहिर् उद्वमते विभुः |

अनुत्तरेच्छे उन्मेषे  आनन्देशनम् ऊनता%? || ३१ ||

क्रियेच्छाज्ञानशक्तीनां  सत्ता षट् * * * * * |



(*अनुत्तरेत्यादित्रिपद्येष्व् अर्थासंगत्या पाठाशुद्धिः प्रतिभाति)



इच्छेशनान्तरारूढा  स्फुटास्फुटजगन्मयी || ३२ ||

चत्वारः परतो वर्णाः  षण्डात्मानः प्रचोदिताः | 

अनुत्तरानन्दशाक्तिस्  त्रिकोणाद् वृत्तियोगतः || ३३ ||

तथैवोनेषयोगेन  क्रियाशक्तेः स्फुटं वपुः | 

उक्तं त्रिशक्तिसंघट्टात्  त्रिशूलं द्वैतघस्मरम् || ३४ ||

परस्परविरोधे तु  कार्येषु प्रविरोहति |

न कथंचिद् उपादेयम्  आसां रूपम् इदम् भवेत् || ३५ ||

बिन्दुर् वेद्यस्य संस्कारो  विमर्शः सर्ग इत्य असौ |

कलाषोडशकाकारा  शक्तिर् विजयते परा || ३६ ||

तिथयः प्रतिपत्पूर्वाः  पञ्चदशेति मायया |

सूर्याचन्द्रमसौ स्वान्तश्चरन्तौ स्थितिहेतवे || ३७ ||

यथा�विमर्शवपुषः  सर्गस्याद्याः कलाः स्मृताः |

द्विधेयं मातृका देवी  बीजयोन्यात्मना स्थिता || ३८ ||

नित्यप्रवृत्तशृङ्गाटवपुर्विश्वस्य जन्मभूः |

हृदयं बीजम् एतस्यां  सारं यत् तत् परं महः || ३९ ||

वटबीजे यथा वृक्षस्  तथात्र निहितं जगत् |

विचार्यमाणे नैवेदं  कारणाद् अतिरिच्यते || ४० ||

मृदादेः कलशादीनां  तत्त्वं नान्यन् निरूपणे |

इत्य आहुस् तत्त्ववादिन्यः  श्रुतीनाम् अन्तिमा गिरः || ४१ ||

इदं सर्वं सद् एवासीद्  अग्रे इति विनिश्चयात् |

सत्तावाचिनि बीजे ऽस्मिन्  भाति माया त्व् इदम् जगत् || ४२ ||

विलुप्तप्रत्ययाकारम्  एतत् स परिशिष्यते |

ततो ज्ञानक्रियासारविद्येश्वरसदाशिवाः || ४३ ||

शक्तित्रिशूले लीयन्ते  चतुर्दशकलात्मनि |

ऊर्ध्वाधः सृष्टिवपुषि  सर्वं लीनम् अतः [परम्] || ४४ ||

इत्थं परस्यां संवित्तौ  सर्वं संकुचितं क्रमात् |

अथवा मनसातीते  यत्र क्वापि निरञ्जने || ४५ ||

षट्त्रिंशत्तत्त्वलहरीकलहातीतगोचरे |

विश्वात्मनि महामन्त्रे  स्वभावे सा विलीयते || ४६ || 

कृतश् चैन्मथिते धाम्नि  दीप्ते केनापि हेतुना |�

सर्वम् हविर् इदं जुह्वन्  न दारिद्र्येण पीड्यते || ४७ ||

पञ्चपञ्चात्मकं विश्वं  पञ्चस्पन्दविजृम्भितम् | 

संकोचयत्परामर्शात्  सामान्यस्पन्दकेवलम् || ४८ ||

अहमि प्रलयं कुर्वन्न्  इदमः प्रतियोगिनः |

पराक्रमपरो भुङ्क्ते  स्वभावम् अशिवापहम् || ४९ ||

इति षडधिकत्रिंशद्भेदप्रसक्तजगत्तनुः 

	प्रसरति महाशक्त्युल्लेखविचित्रमहापटी |

जयति बहुशः स्पन्दाकारा परा चिद् अनुत्तरा 

	विमृशत जनाः किं नो स्वभावविजृम्भितम् || ५० ||



इति श्रीमदाद्यनाथविरचिता अनुत्तरप्रकाशपञ्चाशिका समाप्ता 



सेयं काश्मीरभूपालसंश्रितेन प्रकाशिता 

सता मुकुन्दरामेण  सन्मुदे ऽस्तु शिवे ऽर्पिता





###########   END OF FILE  #######