####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00505
Uniform title: bhairavastava
Secondary title: śivastuti
Author : abhinavagupta

Description: 



Notes: 
Published as the final appendix of the nityakarmavidhiḥ. 
Data-entered by the staff of Muktabodha under the supervision of Mark S.G. Dyczkowski.

Revision 0: August 14 2021.

Publisher : 
Publication year : 1917
Publication city : Mumbai
Publication country : India
####################################################




ओं व्याप्तचराचरभावविशेषं चिन्मयम् एकमनन्तम् अनादिम् |
भैरवनाथम् अनाथशरण्यं त्वन्मयचित्ततया हृदि वन्दे || १ ||

त्वन्मयम् एतद् अशेषम् इदानीं भाति मम त्वदनुग्रहशक्त्या |
त्वं च महेश ! सदैव ममाऽत्मा स्वात्ममयं मम तेन समस्तम् || २ ||

स्वात्मनि विश्वगते त्वयि नाथे तेन न संसृतिभीतेः कथास्ति |
सत्स्वपि दुर्धरदुःखविमोहत्रासविधायिषु कर्मगणेषु || ३ ||

अन्तक ! मां प्रति मा दृशमेनां क्रोधकरालतमां विदधीहि |
शङ्करसेवनचिन्तनधीरो भीषणभैरवशक्तिमयोऽस्मि || ४ ||

इत्थमुपोढभवन्मयसंविद्दिधितिदारितभूरितमिस्रः |
मृत्युयमान्तककर्मपिशाचैर्नाथ ! नमोऽस्तु न जातु बिभेमि || ५ ||

प्रोदितसत्यविबोधमरीचिप्रेक्षितविश्वपदार्थसतत्त्वः |
भावपरामृतनिर्भरपूर्णे त्वययहमात्मनि निर्वृतिमेमि || ६ ||

मानसगोचरमेति यदैव क्लेशदशातनुतापविधात्री |
नाथ ! तदैव मम त्वदभेदस्तोत्रपरामृतवृष्टिरुदेति || ७ ||

शंकर ! सत्यमिदं व्रतदानस्नानतपो भवतापविनाशि |
तावकशास्त्रपरामृतचिन्ता स्यन्दति चेतसि निर्वृतिधाराम् || ८ ||

नृत्यति गायति हृष्यति गाढं संविदियं मम भैरवनाथ |
त्वां प्रियमाप्य सुदर्शनमेकं दुर्लभमन्यजनैः समयज्ञम् || ९ ||

वसुरसपौषे कृष्णदशम्यामऽभिनवगुप्तः स्तवैदमकरोत् |
येन विभुर्भवमरुसन्तापं शमयति झटिति जनस्य दयालुः || १० ||

समाप्तम् स्तवम् इदम् अभिनवाख्यम् पद्यनवकम् ||






###########   END OF FILE  #######