####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00133
Uniform title: kāmadhenutantra
Editor : r m caṭṭopādhyāya

Description: 
Transcribed by the staff of Muktabodha.


Notes: 
Transcribed by the staff of Muktabodha under the supervision of Mark S. G. Dyczkowski.

Revision 0: Sept. 22, 2008

Publisher : unknown-pree 1900 Bengali Script
Publication year : 
Publication city : 
Publication country : India
####################################################



ओं नमः परदेवतायै

कामधेनुतन्त्रम्

प्रथमः पटलः

श्रीपार्वती उवाच

देवदेव महादेव सर्वागमविशारद |
अधुना देवदेवेश पञ्चाशद्वर्णमुत्तमम् || १/१ ||
तत्त्वरूपं महादेव कथयस्व दयानिधे |
कृपया कथयेशान यद्यहं तव वल्लभा || १/२ ||

श्रीमहादेव उवाच

अधुना संप्रवक्ष्यामि रहस्यमतिगोपनम् |
येन विज्ञातमात्रेण जीवन्मुक्तो भवेन्नरः || १/३ ||
अज्ञात्वा मन्त्रतत्त्वानि महाविद्यां जपेत्तु यः |
सर्वं तस्य वृथा देवि किं तस्य जपपूजनैः || १/४ ||
ध्यानावधारणे चैव तथा योगसमाधिना |
वर्णज्ञानं यदा नास्ति किं तस्य जपपूजनैः || १/५ ||
मम कण्ठे स्थितं बीजं पञ्चाशद्वर्णमद्भुतम् |
नानावर्णयुतं शुद्धं तन्त्राणां सारमुत्तमम् || १/६ ||
पञ्चाशन्मातृकां देवीं नानाविद्यामयीं सदा |
नानाविद्यामयीं देवीं महाविद्यामयीं तथा || १/७ ||
सर्ववर्णमयीं देवीं सर्वदेवमयीं पराम् |
सर्वदेवमयीं सौम्यां ब्रह्माण्डजननीं पराम् || १/८ ||
प्रणम्य बहुधा भक्त्या निगदामि शृणु प्रिये |
अकारादिक्षकारान्ता मातृका बीजरूपिणी || १/९ ||
विसर्गश्चैव बिन्दुश्च त्रिशक्तिब्रह्मविग्रहः |
वर्णात्तु जायते ब्रह्मा तथा विष्णुः प्रजायते || १/१० ||
रुद्रश्च जायते देवि जगत्संहारकारकः |
मम कण्ठस्थिता या सा शारदा वामलोचना || १/११ ||
तस्या गर्भस्थिता देवि बीजानि विविधानि च |
विधृत्य कण्ठदेशे तु शिवोऽहं कमलानने || १/१२ ||
शृणु तत्त्वमकारस्य अतिगोप्यं वरानने |
शरच्चन्द्रप्रतीकाशं पञ्चकोषमयं सदा || १/१३ ||
पञ्चदेवमयं वर्णं शक्तित्रयसमन्वितम् |
निर्गुणं त्रिगुणोपेतं स्वयं कैवल्यमूर्तिमान् ||
बिन्दुतत्त्वमयं वर्णं स्वयं प्रकृतिरूपिणी || १/१४ ||

इति श्रीकामधेनुतन्त्रे देवदेवीसंवादे प्रथमः पटलः ||



द्वितीयः पटलः

श्रीमहादेव उवाच

आकारं परमाश्चर्यं शङ्खज्योतिर्मयं प्रिये |
ब्रह्मविष्णुमयं वर्णं तथा रुद्रं स्वयं प्रिये || २/१ ||
पञ्चप्राणमयं वर्णं स्वयं परमकुण्डली |
इकारं परमानन्दं सुगन्धकुसुमच्छविम् || २/२ ||
हरिब्रह्ममयं वर्णं सदा रुद्रयुतं प्रिये |
सदा शक्तिमयं देवि गुरुब्रह्म स्वयं तथा || २/३ ||
सदाशिवमयं वर्णं परंब्रह्म समन्वितम् |
हरिब्रह्मात्मकं वर्णं गुणत्रयसमन्वितम् || २/४ ||
इकारं परमेशानि मूर्तिर्वै कुण्डली स्वयम् |
ईकारं परमेशानि स्वयं परमकुण्डली || २/५ ||
ब्रह्मविष्णुमयं वर्णं तथा रुद्रमयं सदा |
पञ्चदेवमयं वर्णं पीतविद्युल्लताकृतिम् || २/६ ||
चतुर्ज्ञानमयं वर्णं पञ्चप्राणमयं सदा |
उकारं परमेशानि तार कुण्डलीनी स्वयम् || २/७ ||
पीतचम्पकसंकाशं पंचदेवमयं सदा |
पञ्चप्राणमयं देवि चतुर्वर्गप्रदायकम् || २/८ ||
अकारं देवदेवेशि बीजं परमदुर्लभम् |
शङ्खकुन्दसमाकारं स्वयं परमकुण्डली || २/९ ||
पञ्चप्राणमयं वर्णं पञ्चदेवमयं सदा |
पञ्चप्राणयुतं वर्णं तथा त्रयगुणात्मकम् || २/१० ||
बिन्दुत्रययुतं वर्णं पीतविद्युल्लता यथा |
धर्मार्थकाममोक्षं च सदा सुखप्रदायकम् || २/११ ||
ऋकारं परमेशानि कुण्डली मूर्त्तिमान् स्वयम् |
अत्र ब्रह्मा च विष्णुश्च रुद्रश्चैव वरानने || २/१२ ||
सदाशिवयुतं वर्णं सदा ईश्वरसंयुतम् |
पञ्चप्राणमयं वर्णं चतुर्ज्ञानमयं सदा || २/१३ ||
रक्तविद्युल्लताकारं ऋकारं प्रणमाम्यहम् |
ॠकारं परमेशानि स्वयं परमकुण्डली || २/१४ ||
पीतविद्युल्लताकारं पञ्चदेवमयं सदा |
चतुर्ज्ञानमयं वर्णं पञ्चप्राणमयं सदा || २/१५ ||
त्रिशक्तिसहितं वर्णं प्रणमामि सदा प्रिये |
ऌकारं चञ्चलापाङ्गि कुण्डली परदेवता || २/१६ ||
अत्र ब्रह्मादयः सर्वे तिष्ठन्ति सततं प्रिये |
पञ्चदेवमयं वर्णं चतुर्ज्ञानमयं सदा || २/१७ ||
पञ्चप्राणयुतं वर्णं तथा गुणत्रयात्मकम् |
बिन्दुत्रयात्मकं वर्णं पीतविद्युल्लता यथा || २/१८ ||
ॡकारं परमेशानि पूर्णचन्द्रसमप्रमम् |
पञ्चदेवात्मकं वर्णं पञ्चप्राणात्मकं सदा || २/१९ ||
गुणत्रयात्मकं वर्णं तथा बिन्दुत्रयात्मकम् |
चतुर्वर्गप्रदं देवि स्वयं परमकुण्डली || २/२० ||
एकारं परमं दिव्यं ब्रह्मविष्णुशिवात्मकम् |
बन्धूककुसुमप्रख्यं पञ्चदेवमयं सदा || २/२१ ||
पञ्चप्राणात्मकं वर्णं तथा बिन्दुत्रयात्मकम् |
चतुर्वर्गप्रदं देवि स्वयं परमकुण्डली || २/२२ ||

इति श्रीकामधेनुतन्त्रे द्वितीयः पटलः ||



तृतीयः पटलः

ऐकारं परमं दिव्यं महाकुण्डलिनी स्वयम् |
कोटिचन्द्रप्रतीकाशं पञ्चप्राणमयं सदा || ३/१ ||
ब्रह्मविष्णुमयं वर्णं तथा रुद्रमयं प्रिये |
सदाशिवमयं वर्णं बिन्दुत्रयसमन्वितम् || ३/२ ||
ओकारं चञ्चलापाङ्गि पञ्चदेवमयं सदा |
रक्तविद्युल्लताकारं त्रिगुणात्मानमीश्वरम् || ३/३ ||
पञ्चप्राणमयं वर्णं नमामि देवमातरम् |
एतद्वर्णं महेशानि स्वयं परमकुण्डली || ३/४ ||
रक्तविद्युल्लताकारं औकारं कुण्डला स्वयम् |
अत्र ब्रह्मादयः सर्वे तिष्ठन्ति सततं प्रिये || ३/५ ||
पञ्चप्राणमयं वर्णं सदाशिवमयं सदा |
सदा ईश्वरसंयुक्तं चतुर्वर्गप्रदायकम् || ३/६ ||
अंकारं बिन्दुसंयुक्तं पीतविद्युत्समप्रभम् |
पञ्चप्राणात्मकं वर्णं ब्रह्मादिदेवतामयम् || ३/७ ||
सर्वज्ञानमयं वर्णं बिन्दुत्रयसमन्वितम् |
शक्तित्रयमयं वर्णं स्वयं परमकुण्डली || ३/८ ||
अःकारं परमेशानि विसर्गसहितं सदा |
अःकारं परमेशानि रक्तविद्युत्प्रभामयम् || ३/९ ||
पञ्चदेवमयो वर्णः पञ्चप्राणमयः सदा |
सर्वज्ञानमयो वर्ण आत्मादितत्त्वसंयुतः || ३/१० ||
बिन्दुत्रयमयो वर्णः शक्तित्रयमयः सदा |
किशोरवयसः सर्वा गीतवाद्यादितत्पराः ||
शिवस्य युवती एता मूर्त्तिमत् कुण्डली स्वयम् || ३/११ ||
अधुना संप्रवक्ष्यामि कारतत्त्वमुत्तमम् |
रहस्यं परमाश्चर्यं त्रैलोक्यानां च संशृणु || ३/१२ ||
वामरेखा भवेद् ब्रह्मा विष्णुर्दक्षिणवीथिका |
अधोरेखा भवेद्रुद्रो मात्रा साक्षान्महेश्वरी || ३/१३ ||
कुण्डली अङ्कुशाकारा मध्ये शून्यः सदाशिवः |
जवायावकसंकाशा बामरेखा वरानने || ३/१४ ||
शरच्चन्द्रप्रतीकाशा दक्षरेखा च मूर्तिमान् |
अधोरेखा वरारोहे महामारकतद्युतिः || ३/१५ ||
शङ्खकुन्दसमा कीर्तिर्मात्रा साक्षात् सरस्वती |
कुण्डली अङ्कुशा या तु कोटिविद्युल्लताकृतिः || ३/१६ ||
कोटिचन्द्रप्रतिकाशा मध्ये शून्यः सदाशिवः |
शून्यगर्भे स्थिता काली कैवल्यपददायिनी || ३/१७ ||
ककाराज्जायते सर्वं कामं कैवल्यमेव च |
अर्थश्च जायते देवि तथा धर्मश्च नान्यथा || ३/१८ ||
ककारः सर्ववर्णानां मूलप्रकृतिरेव च |
ककारः कामदा कामरूपिणी स्फुरदव्यया || ३/१९ ||
कामिनी या महेशानि स्वयं प्रकृतिसुन्दरी |
माता सा सर्वदेवानां कैवल्यपददायिनी || ३/२० ||
ऊर्ध्वकोणे स्थिता कामा ब्रह्मशक्तिरितीरिता |
वामकोणे स्थिता ज्येष्ठा विष्णुशक्तिरितीरिता || ३/२१ ||]
दक्षकोणे स्थितो बिन्दू रौद्रीसंहाररूपिणी |
ज्ञानार्था सातु चार्वङ्गि केन चतुष्टयात्मिका || ३/२२ ||
इच्छाशक्तिर्भवेद् ब्रह्मा विप्णुश्च ज्ञानशक्तिमान् |
क्रियाशक्तिर्भवेद् रुद्रः सर्वं प्रकृतिमूर्त्तिमान् || ३/२३ ||
आत्मविद्याशिवैस्तत्त्वैः सदासाराप्रतिष्ठितैः |
आसनं त्रिपुरादेव्याः ककारं पञ्चदेवताम् || ३/२४ ||
ईश्वरो यस्तु देवेशि त्रिकोणे तस्य संस्थितिः |
त्रिकोणमेतत् कथितं योनिमण्डलमुत्तमम् || ३/२५ ||
केवलं प्रपदे यस्याः कामिनी सा प्रकीर्त्तिता |
ओं शयनागारसिन्दूरसदृशीं कामिनीं पराम् || ३/२६ ||
चतुर्भुजां त्रिनेत्राञ्च बाहुवल्लीविराजिताम् |
कदम्बकोरकाकारस्तनद्वयविभूषिताम् || ३/२७ ||
रत्नकेयूराङ्गदैश्च भूषणैरुपशोभिताम् |
रत्नहारैः पुष्पहारैः शोभितां परमेश्वरीम् || ३/२८ ||
एवं हि कामिनीं ज्ञात्वा ककारं दशधा जपेत् |
प्रफुल्लञ्च ततो ध्यात्वा जपस्य फलभाग् भवेत् |
एतत्ते कथितं देवि ककारतत्त्वमुत्तमम्  || ३/२९ ||

इति श्रीकामधेनुतन्त्रे देवदेवीसंवादे तृतीयः पटलः ||



चतुर्थः पटलः

श्रीमहादेव उवाच

ककारं परमेशानि कुण्डलीत्रयसंयुतम् |
खकारं परमाश्चर्यं शङ्खकुन्दसमप्रभम् || ४/१ ||
कोणत्रययुतं शून्यं बिन्दुत्रयसमन्वितम् |
गुणत्रययुतं देवि पञ्चदेवमयं सदा || ४/२ ||
त्रिशक्तिसंयुतं वर्णं खकारं प्रणमाम्यहम् |
गकारं परमेशानि पञ्चदेवात्मकं सदा || ४/३ ||
निर्गुणं त्रिगुणोपेतं निरीहं निर्मलं सदा |
पञ्चप्राणमयं वर्णं सर्वशक्त्यात्मकं प्रिये || ४/४ ||
अरुणादित्यसङ्काशं कुण्डलीं प्रणमाम्यहम् |
घकारं चञ्चलापाङ्गि चतुष्कोणात्मकं सदा || ४/५ ||
पञ्चदेवमयं वर्णं अरुणादित्यसन्निभम् |
निर्गुणं त्रिगुणोपेतं सदा त्रिगुणसंयुतम् || ४/६ ||
सर्वगं सर्वदं शान्तं घकारं प्रणमाम्यहम् |
ङकारं परमेशानि स्वयं परमकुण्डली || ४/७ ||
सर्वदवमयं वर्णं त्रिगुणं लोललोचने |
पञ्चप्राणमयं वर्णं ङकारं प्रणमाम्यहम् || ४/८ ||
चवर्णं शृणु सुश्रोणि चतुर्वर्गप्रदायकम् |
कुण्डलीसहितं देवि स्वयं परमकुण्डली || ४/९ ||
सततं कुण्डलीयुक्तं पञ्चदेवमयं सदा |
पञ्चप्राणमयं वर्णं पञ्चप्राणात्मकं सदा || ४/१० ||
त्रिशक्तिसहितं वर्णं त्रिबिन्दुसहितं प्रिये |
छकारं परमाश्चर्यं स्वयं परमकुण्डली || ४/११ ||
सततं कुण्डलीयुक्तं पञ्चदेवमयं सदा |
पञ्चप्राणमयं वर्णं त्रिशक्तिसहितं सदा || ४/१२ ||
त्रिबिन्दुसहितं वर्णं सदा ईश्वरसंयुतम् |
पीतविद्युल्लताकारं छकारं प्रणमाम्यहम् || ४/१३ ||
जकारं परमेशानि या स्वयं मध्यकुण्डली |
शरच्चन्द्रप्रतीकाशं सदा त्रिगुणसंयुतम् || ४/१४ ||
पञ्चदेवमयं वर्णं पञ्चप्राणमयं सदा |
त्रिशक्तिसहितं वर्णं त्रिबिन्दुसहितं प्रिये || ४/१५ ||
झकारं परमेशानि कुण्डली मोक्षरूपिणी |
रक्तविद्युल्लताकारं सदा त्रिगुणसंस्थितम् || ४/१६ ||
पञ्चदेवमयं वर्णं पञ्चप्राणात्मकं सदा |
त्रिबिन्दुसहितं वर्णं त्रिशक्तिसहितं सदा || ४/१७ ||
सदा ईश्वरसंयुक्तं ञकारं शृणु सुन्दरि |
रक्तविद्युल्लताकारं स्वयं परमकुण्डली || ४/१८ ||
पञ्चदेवमयं वर्णं पञ्चप्राणमयं सदा |
त्रिशक्तिसहितं वर्णं त्रिबिन्दुसहितं सदा || ४/१९ ||
टकारं चञ्चलापाङ्गि स्वयं परमकुण्डली |
कोटिविद्युल्लताकारं पञ्चदेवमयं सदा || ४/२० ||
पञ्चप्राणयुतं वर्णं गुणत्रयसमन्वितम् |
त्रिशक्तिसहितं वर्णं त्रिबिन्दुसहितं सदा || ४/२१ ||
ठकारं चञ्चलापाङ्गि कुण्डली मोक्षरूपिणी |
पीतविद्युल्लताकारं सदा त्रिगुणसंयुतम् || ४/२२ ||
पञ्चप्राणात्मकं वर्णं पञ्चप्राणमयं सदा |
त्रिबिन्दुसहितं वर्णं त्रिशक्तिसहितं सादा || ४/२३ ||
डकारं चञ्चलापाङ्गि सदा त्रिगुणसंयुतम् |
पञ्चदेवमयं वर्णं पञ्चप्राणमयं सदा || ४/२४ ||
त्रिशक्तिसहितं वर्णं त्रिबिन्दुसहितं सदा |
चतुर्ज्ञानमयं वर्णं आत्मादितत्त्वसंयुतम् || ४/२५ ||
पीतविद्युल्लताकारं डकारं प्रणमाम्यहम् |
ढकारं परमाराध्यं या स्वयं कुण्डली परा || ४/२६ ||
पञ्चदेवात्मकं वर्णं पञ्चप्राणमयं सदा |
सदा त्रिगुणसंयुक्तं आत्मादितत्त्वसंयुतम् |
रक्तविद्युल्लताकारं ढकारं प्रणमाम्यहम् || ४/२७ ||
णकारं परमेशानि स्वयं परमकुण्डली |
पीतविद्युल्लताकारं पञ्चदेवमयं सदा || ४/२८ ||
पञ्चप्राणमयं देवि सदा त्रिगुणसंयुतम् |
आत्मादितत्त्वसंयुक्तं महामोहप्रदायकम् || ४/२९ ||

इति श्रीकामधेनुतन्त्रे देवदेवीसंवादे चतुर्थः पटलः ||



पञ्चमः पटलः

श्रीमहादेव उवाच

तकारं चञ्चलापाङ्गि स्वयं परमकुण्डली |
पञ्चदेवात्मकं वर्णं पञ्चप्राणम्यं तथा || ५/१ ||
त्रिशक्तिसहितं वर्णमात्मादितत्त्वसंयुतम् |
त्रिबिन्दुसहितं वर्णं पीतविद्युत्समप्रभम् || ५/२ ||
थकारं चञ्चलापाङ्गि कुण्डली मोक्षरूपिणी |
त्रिशक्तिसहितं वर्णं त्रिबिन्दुसहितं सदा || ५/३ ||
पञ्चदेवमयं वर्णं पञ्चप्राणात्मकं सदा |
अरुणादित्यसंकाशं थकारं प्रणमाम्यहम् || ५/४ ||
दकारं शृणु चार्वङ्गि चतुर्वर्गप्रदायकम् |
पञ्चदेवमयं वर्णं पञ्चप्राणमयं सदा || ५/५ ||
त्रिशक्तिसहितं देवि त्रिबिन्दुसहितं सदा |
आत्मादितत्त्वसंयुक्तं स्वयं परमकुण्डली || ५/६ ||
रक्तविद्युल्लताकारं दकारं हृदि भावय |
धकारं परमेशानि कुण्डली मोक्षरूपिणी || ५/७ ||
आत्मादितत्त्वसंयुक्तं पञ्चदेवमयं सदा |
पञ्चप्राणमयं देवि त्रिशक्तिसहितं सदा || ५/८ ||
त्रिबिन्दुसहितं वर्णं धकारं हृदि भावय |
पीतविद्युल्लताकारं चतुर्वर्गप्रदायकम् || ५/९ ||
नकारं शृणु चार्वङ्गि रक्तविद्युल्लताकृतिम् |
पञ्चदेवमयं वर्णं स्वयं परमकुण्डली || ५/१० ||
पञ्चप्राणात्मकं वर्णं हृदि भावय पार्वति |
अतः परं प्रवक्ष्यामि पकारं मोक्षदायकम् || ५/११ ||
चतुर्वर्गप्रदं वर्णं शरच्चन्द्रसमप्रभम् |
पञ्चदेवमयं वर्णं स्वयं परमकुण्डली || ५/१२ ||
पञ्चप्राणमयं वर्णं त्रिशक्तिसहितं सदा |
त्रुगुणै रहितं वर्णमात्मादितत्त्वसंयुतम् || ५/१३ ||
महामोक्षप्रदं वर्णं हृदि भावय पार्वति |
फकारं शृणु चार्वङ्गि रक्तविद्युल्लतोपमम् || ५/१४ ||
चतुर्वर्गप्रदं वर्णं पञ्चदेवमयं सदा |
पञ्चप्राणमयं वर्णं सदा त्रिगुणसंयुतम् || ५/१५ ||
आत्मादितत्त्वसंयुक्तं त्रिबिन्दुसहितं सदा |
बकारं शृणु चार्वङ्गि चतुर्वर्गप्रदायकम् || ५/१६ ||
शरच्चन्द्रप्रतीकाशं पञ्चदेवमयं सदा |
पञ्चप्राणात्मकं वर्णं त्रिबिन्दुसहितं सदा || ५/१७ ||
त्रिशक्तिसहितं वर्णं सदा चामृतनिर्मितम् |
स्वयं कुण्डलिनी साक्षात् सततं प्रणमाम्यहम् || ५/१८ ||
भकारं शृणु चार्वङ्गि स्वयं परमकुण्डली |
महामोक्षप्रदं वर्णमरुणादित्यसन्निभम् || ५/१९ ||
पञ्चप्राणमयं वर्णं पञ्चदेवमयं सदा |
त्रिशक्तिसहितं वर्णं त्रिबिन्दुसहितं प्रिये || ५/२० ||
मकारं शृणु चार्वङ्गि स्वयं परमकुण्डली |
अरुणादित्यसंकाशं चतुर्वर्गप्रदायकम् || ५/२१ ||
त्रिशक्तिसहितं वर्णं त्रिबिन्दुसहितं सदा |
आत्मादितत्त्वसंयुक्तं हृदिस्थं प्रणमाम्यहम् || ५/२२ ||
यकारं शृणु चार्वङ्गि चतुष्कोणमयं सदा |
पलालधूमसंकाशं स्वयं परमकुण्डली || ५/२३ ||
पञ्चप्राणमयं वर्णं पञ्चदेवमयं सदा |
त्रिशक्तिसहितं वर्णं त्रिबिन्दुसहितं तथा || ५/२४ ||
प्रणमामि सदा वर्णं मूर्तिमान् (?)मोक्षमव्ययम् |

इति श्रीकामधेनुतन्त्रे देवद्वीसंवादे पञ्चमः पटलः ||



षष्ठः पटलः

श्रीमहादेव उवाच

रकारं चञ्चलापाङ्गि कुण्डलीद्वयसंयुतम् |
रक्तविद्युल्लताकारं पञ्चदेवात्मकं सदा || ६/१ ||
पञ्चप्राणमयं वर्णं त्रिबिन्दुसहितं सदा |
त्रिशक्तिसहितं देवि आत्मादितत्त्वसंयुतम् || ६/२ ||
सर्वतेजोमयं वर्णं सततं प्रणमाम्यहम् |
लकारं चञ्चलापाङ्गि कुण्डलीत्रयसंयुतम् || ६/३ ||
पीतविद्युल्लताकारं सर्वरत्नप्रदायकम् |
पञ्चदेवमयं वर्णं पञ्चप्राणात्मकं सदा || ६/४ ||
त्रिशक्तिसहितं वर्णं त्रिबिन्दुसहितं हि सा |
आत्मादितत्त्वसहितं हृदि भावय सर्वदा || ६/५ ||
वकारं चञ्चलापाङ्गि कुण्डली मोक्षमव्ययम् |
पञ्चप्राणमयं वर्णं त्रिशक्तिसहितं सदा || ६/६ ||
त्रिबिन्दुसहितं वर्णमात्मादितत्त्वसंयुतम् |
पञ्चदेवमयं वर्णं पीतविद्युल्लतोपमम् || ६/७ ||
चतुर्वर्गमयं वर्णं सर्वसिद्धिप्रदायकम् |
त्रिशक्तिसहितं देवि त्रिशक्तिसहितं सदा || ६/८ ||
शकारं परमेशानि स्वर्णवर्णं शुचिस्मिते |
रक्तवर्णप्रभाकारा स्वयं परमकुण्डली || ६/९ ||
चतुर्वर्गप्रदं देवि शकारं ब्रह्मविग्रहम् |
पञ्चदेवमयं वर्णं पञ्चप्राणात्मकं प्रिये || ६/१० ||
रजःसत्त्वतमोयुक्तं त्रिबिन्दुसहितं सदा |
त्रिशक्तिसहितं वर्णमात्मादितत्त्वसंयुतम् || ६/११ ||
षकारं शृणु चार्वङ्गि कोणषट्कमयं सदा |
रक्तचन्द्रप्रतीकाशं स्वयं परमकुण्डली || ६/१२ ||
चतुर्वर्गप्रदं वर्णं सुधानिर्मितविग्रहम् |
पञ्चदेवमयं वर्णं पञ्चप्राणमयं सदा || ६/१३ ||
रजःसत्त्वतमोयुक्तं त्रिबिन्दुसहितं परम् |
सर्वदेवमयं वर्णं हृदि भावय पार्वति || ६/१४ ||
सकारं शृणु चार्वङ्गि शक्तिबीजं परात्परम् |
कोटिविद्युल्लताकारं कुण्डलीत्रयसंयुतम् || ६/१५ ||
पञ्चदेवमयं देवि पञ्चप्राणमयं सदा |
रजःसत्त्वतमोयुक्तं त्रिबिन्दुसहितं सदा || ६/१६ ||
त्रिशक्तिसहितं वर्णमात्मादितत्त्वसंयुतम् |
प्रणम्य सततं देवि हृदि भावय सुन्दरि || ६/१७ ||
हकारं शृणु चार्वङ्गि चतुर्वर्गप्रदायकम् |
कुण्डलीत्रयसंयुक्तं रक्तविद्युल्लतोपमम् || ६/१८ ||
रजःसत्त्वतमोयुक्तं पञ्चदेवमयं सदा |
पञ्चप्राणात्मकं वर्णं त्रिशक्तिसहितं सदा || ६/१९ ||
त्रिबिन्दुसहितं वर्णं हृदि भावय सुन्दरि |
क्षकारं शृणु चार्वङ्गि कुण्डलीत्रयसंयुतम् || ६/२० ||
चतुर्वर्गमयं वर्णं पञ्चदेवमयं सदा |
पञ्चप्राणात्मकं वर्णं त्रिशक्तिसहितं सदा || ६/२१ ||
त्रिबिन्दुसहितं वर्णमात्मादितत्त्वसंयुतम् |
शरच्चन्द्रप्रतीकाशं हृदि भावय सुन्दरि || ६/२२ ||
अकारादिक्षकारान्तं स्वयं परमकुण्डली |
सर्वं चराचरं विश्वं वर्णात्तु जायते ध्रुवम् || ६/२३ ||
नानाशास्त्रं पुराणञ्च इतिहासञ्च सुन्दरि |
वेदञ्च स्मृतिशास्त्रञ्च अन्यानि यानि कानि च || ६/२४ ||
अक्षराज्जायते सर्वं परं ब्रह्म स्वयं प्रिये |

इति कामधेनुतन्त्रे देवदेवीसंवादे षष्ठः पटलः ||



सप्तमः पटलः

श्रीमहादेव उवाच

रहस्यं परमाश्चर्यं सदाअ मम हृदि स्थितम् |
अतः परं प्रवक्ष्यामि मन्त्रतत्त्वं पृथक् पृथक् || ७/१ ||
मातृकाया वरारोहे सावधानावधारय |
अतः परं जपेन्मन्त्रं पञ्चाशन्मातृकां पृथक् || ७/२ ||
अतस्त्वमधिकारी स्यान्नात्र कार्या विचारणा |
इति ते कथितं देवि प्रयोगं मन्त्रमुत्तमम् || ७/३ ||
एतन्मन्त्रं विना देवि इष्टं मन्त्रं जपेन्नरः |
सर्वं तस्य भवेद्व्यर्थं सर्वं व्यर्थकदर्थनम् || ७/४ ||
एतन्मन्त्रं प्रथमतो दशधा प्रजपेत् प्रिये |
ततस्तु प्रणवं दत्त्वा मातृकां प्रजपेत् पृथक् || ७/५ ||
प्रयोगं परमाश्चर्यं सावधानावधारय |

तद्यथा - ओं, अ/ ओं, ओं आं ओं, ओं इ/ ओं, ओं ई/ ओं, ओं उ/ ओं, ओं ओं ओं, ओं ऋ/ ओं, ओं ऋ/ ओं, ओं 
ऌ/ ओं, ओं ॡ ओं, ओं ए/ ओं, ओं ऐ/ ओं, ओं ओ/ ओं, ओं औ/ ओं, ओं अं ओं, ओं अः ओं, ओं कं ओं |

एवं क्षकारपर्यन्तं प्रणवैः पुटितं सदा |
प्रत्येकमेवं चार्वङ्गि दशधा दशधा जपेत् || ७/६ ||
प्रत्येकं जपमात्रेण प्रत्येकं ध्यानमाचरेत् |
अथवा सर्ववर्णानामेकीकृत्य वरानने || ७/७ ||
प्रजपेद् दशधा मन्त्रं स्वमन्त्रं प्रजपेत्ततः |
तथा च सर्ववर्णानां ध्यानं वक्ष्यामि संशृणु || ७/८ || 
कोटिचन्द्रपतीकाशां पुण्डरीकोपरिस्थिताम् |
भ्रमद्भ्रमरलीलाभां नयनत्रयराजिताम् || ७/९ ||
नानाशास्त्रप्रवक्त्रीं च विद्याभ्यासमयीं सदा |
नानावाद्यमयीं देवीं श्वेतांशुकपरिष्कृताम् || ७/१० ||
शुक्लाभरणदीप्ताङ्गी शुक्लवस्त्रोत्तरीयिणीम् |
ब्रह्माण्डं दर्पणे यस्या वामहस्तस्य पार्वति || ७/११ ||
तद्वच्छुकशिशुं प्रेक्ष्य क्षुद्रदर्पणमुच्यते |
एवं ध्यात्वा जगद्धात्रीं मातृकां जगदम्बिकाम् || ७/१२ ||
प्रजपेद्दशधा मन्त्रमेकधा वा जपेत्तु यः |
सर्वसिद्धिमवाप्नोति नात्र कार्या विचारणा || ७/१३ ||
एषा ते कथिता विद्या मातृका परमात्मिका |
यत् कृत्वा साधको याति दुर्लभं मोक्षमव्ययम् || ७/१४ ||
प्रत्येकेनाथवा देवि एकैकैव वरानने |
रहस्यं शृणु चार्वङ्गि सुगोप्यं भुवनत्रये || ७/१५ ||
इष्टविद्यां सकृत् स्मृत्वा मनसा परमेश्वरि |
यस्य मन्त्रस्य यद्ध्यानं कृत्वा देवि प्रयत्नतः || ७/१६ ||
तन्मन्त्रं दशधा जप्त्वा इष्टध्यानं ततः प्रिये |
इष्टमन्त्रं प्रजप्त्वा वै सर्वसिद्धिं ततो लभेत् || ७/१७ ||
अनेन विधिना देवि मन्त्रश्चैतन्यमाप्नुयात् |
चैतन्यरहितं मन्त्रं विद्या वा सुरपूजिते || ७/१८ ||
सर्व व्यर्थं भवेद्देवि बिफलं स जपो भवेत् |

श्रीमाहदेव उवाच

अपरं शृणु चार्वङ्गि वर्गाष्टकमनुत्तमम् || ७/१९ ||
वर्गाष्टकं विना देवि कोटिपुरश्चरं यदि |
सर्वं तस्य वृथा देवि अन्ते च नरकं ब्रजेत् || ७/२० ||
अकचटतपयशा इत्येतदष्टवर्गकम् |
मन्त्रस्यादौ च अन्ते च अकारं बिन्दुसंयुतम् || ७/२१ ||
दत्त्वा तमेव भक्त्या च अष्टोत्तरशतं जपेत् |
अनेन विधिना देवि आदित्याभं समाचरेत् || ७/२२ ||
तावज्जपेद् वरारोहे यावल्लक्षं समाप्यते |
ततो मन्त्रं वरारोहे ध्रुवं जीवत्वमाप्नुयात् || ७/२३ ||
जीवत्वं हि विना देवि न पुरश्चरणं चरेत् |
जीवत्वं हि विना देवि यदि कुर्यात् पुरश्चरम् || ७/२४ ||
विफला तस्य सा सर्वा पूर्वपुण्यं विनश्यति |
वर्गाष्टकेन सहितं प्रत्यहं प्रजपेत् शतम् || ७/२५ ||
सदैव सहसा भद्रे सर्वं मन्त्रञ्च सिध्यति |
किं तस्य ध्यानपूजायां पुरश्चर्याञ्च किं पुनः || ७/२६ ||
कृत्वा तु जीवं मन्त्रस्य विद्याञ्च वरवर्णिनी |
विद्यायाश्च तथा देवि यः कुर्यात् प्राणनिर्णयम् || ७/२७ ||
तत्क्षणाद् यान्ति चार्वङ्गि पुरश्चर्यां शतं शतम् |
विशेषतः कलियुगे जम्बूद्वीपस्य भारते || ७/२८ ||
प्राणन्यासं विना देवि न जपेत् साधकः क्वचित् |
वैष्णवेषु च मन्त्रेषु शैवेषु शक्तिमन्त्रके || ७/२९ ||
गणेशसौरमन्त्रे च प्राणन्यासः प्रशस्यते |
किं तस्य जपपूजासु होमादिषु च किं प्रिये || ७/३० ||
प्राणतत्त्वं महेशानि यो जानाति स पूजकः |
प्राणतत्त्वं विना देवि देहन्यासं करोति यः || ७/३१ ||
स भ्रष्टः स च पापिष्ठो रौरवं नरकं व्रजेत् |
आलोक्य तन्मुखं देवि सूर्यदर्शनमाचरेत् || ७/३२ ||

इति कामधेनुतन्त्रे देवदेवीसंवादे सप्तमः पटलः



अष्टमः पटलः

श्रीमहादेव उवाच

एतत्ते कथितं भद्रे रहस्यं परमाद्भुतम् |
यन्नोक्तं सर्वतन्त्रेषु मातृकायाः पृथक् पृथक् || ८/१ ||
पञ्चाशद्वर्णसंकेतं पञ्चाशत्तत्त्वमुत्तमम् |
सर्वदेवमयं तत्त्वं सर्वज्ञानमयं तथा || ८/२ ||
बिन्दुतत्त्वमयं देवि अहंतत्त्वमयं तथा |
सर्वशक्तिमयं तत्त्वं सर्वप्राणमयं तथा || ८/३ ||
गर्भतत्त्वमयं देवि केवलं कलिका तथा |
कुसुमस्य यदा देवि कलिकां गन्धसंयुताम् || ८/४ ||
अदृश्यं सर्वभूतानां तथा गन्धं सुचिस्मिते |
पुष्पस्य कलिकामध्ये यथा ज्योतिः प्रदीप्यते || ८/५ ||
तथैव कलिकाबीजे नवतत्त्वञ्च विद्यते |
कोटिविद्युत्प्रतीकाशां मातृकां प्रणमाम्यहम् || ८/६ ||
निराबाधां निर्गुणाञ्च गुणानां गुणमातृकाम् |
माता सा सर्वविद्यानां सर्वागमप्रतिष्ठिता || ८/७ ||
सर्वासां वेदविद्यानां ब्रह्माण्डानाञ्च पार्वति |
माता सा गीयते देवि पञ्चाशन्मातृका च सा || ८/८ ||
मन्त्रतत्त्वञ्च विद्याञ्च सर्ववर्णविनिश्चयम् |
पञ्चाशद्युवतीरूपा मातृका शवमव्यया || ८/९ ||
मातृका परमेशानि काली साक्षान्न संशयः |
कुतो ब्रह्मा कुतो विष्णुः कुतो रुद्रश्च ईश्वरः || ८/१० ||
सदाशिवः कुतो देवि ते सर्वे शववत् प्रिये |
शववत् सर्वदेवाश्च ब्रह्माण्डं शववत् सदा || ८/११ ||
अत एव वरारोहे विष्णुमन्त्रं यथा तथा |
शिवमन्त्रं यथा देवि गणेशं सौरमेव च || ८/१२ ||
शक्तिमन्त्रञ्च विद्याञ्च पञ्चाशद्युवतीमयम् |
पुराणञ्च तथा वेदं स्मृतिशास्त्रं तथैव च || ८/१३ ||
एतत्तत्त्वं वरारोहे युवतीरूपमद्भुतम् |
ब्रह्मा विष्णुश्च रुद्रश्च ईश्वरश्च सदाशिवः || ८/१४ ||
ते सर्वे चञ्चलापाङ्गि मातृकाज्जायते (?) प्रिये |
समस्तजननी देवि मातृका जननी परा || ८/१५ ||
कटाक्षलक्षसंयुक्ता महाशक्तिः प्रगीयते |
मातृकावर्णरहितं ब्रह्माण्डं शववत् प्रिये || ८/१६ ||
गीतं वाद्यं श्रुतिर्नाट्यमालापं वरवर्णिनी |
सर्वं हि युवतीरूपं ध्यानमार्गे प्रतिष्ठितम् || ८/१७ ||
एतत्ते कथितं देवि कालिकाबीजमुत्तमम् |
उभयोः संगमं देवि प्रफुल्लं भवति प्रिये || ८/१८ ||
बहवः सङ्गमे देवि प्रफुल्लं मोक्षमव्ययम् |
यन्न मन्त्रेषु विद्यासु प्रफुल्लं भवति ध्रुवम् || ८/१९ ||
प्रफुल्लं शृणु चार्वङ्गि जपयज्ञं समाचरेत् |
प्रफुल्लरहितं देवि विद्यामन्त्रं यदि प्रिये || ८/२० ||
केवलं कालिकाबीजं वर्णैर्वर्णैः पृथक् पृथक् |
ध्यात्वा सिद्धिमवाप्नोति नान्यथा सुरपूजिते || ८/२१ ||
प्रफुल्लात् कलिकाद्वापि कृष्णादि जायते ध्रुवम् |
युवती या समाख्याता सा महाकुण्डली परा || ८/२२ ||
वर्णरूपमयी देवी कुण्डली परदेवता |
पञ्चाशद्वर्णतत्त्वं च विद्यामन्त्रं जपेत्तु यः || ८/२३ ||
सर्वं हि विफलं तस्य शववत् तज्जपो भवेत् |
चैतन्यरहितं देवि तज्जपं शवमेव तत् || ८/२४ ||
ज्ञात्वा प्रणम्य कुर्वीत जपपूजादिकं प्रिये |
हरिर्हि निर्गुणः साक्षात् सगुणा परकुण्डली || ८/२५ ||
तस्मात्तु युवतीदेहात् हरेरुत्पत्तिरेव च |
सर्वासां देवदेवीनां बीजं जन्मस्थलं सदा || ८/२६ ||
बीजात्तु जायते ब्रह्मा शून्यरूपी सनातनः |
अत एव महेशानि ब्रह्मणः कारणं परा || ८/२७ ||
ज्ञात्वा तन्त्रमिदं देवि जपपूजां करोति यः |
प्राणन्यासविधिं कृत्वा जपपूजां करोति यः || ८/२८ ||
स शिवः परमं ब्रह्म स एव पुरुषोत्तमः |
स एव दिव्यो वीरश्च स एव भैरवः स्वयम् || ८/२९ ||
स एव धन्यो देवेशि त्रैलोक्ये सचराचरे |
स सूर्यो देवि पूज्यश्च सद्गुरुश्च न चान्यथा || ८/३० ||
उद्धर्तुं चैव संहर्तुं समर्थः सोऽपि नान्यथा |
अज्ञात्वा तन्त्रमेतत्तु जपयज्ञं करोति यः || ८/३१ ||
सर्वं तस्य वृथा देवि पशुरेव न संशयः |
सर्वेषु च गुरुर्देवि शिष्योऽपि पशुवत् सदा || ८/३२ ||
श्रुत्वा तस्य मुखे विद्यां मन्त्रं वा नगनन्दिनि |
सिक्तो भवति चार्वङ्गि किं तस्य जपपूजनैः || ८/३३ ||
एवं विधं गुरुं त्यक्त्वा श्रुत्वा पशुमुखात् प्रिये |
पूर्वमन्त्रं परित्यज्य गृह्णीयाद् गणनापरम् || ८/३४ ||
स भ्रष्टः स च पापिष्ठः कथं मन्त्रमुपास्महे(?) |
मन्त्रस्य गणनाद्देवि यत् पापं प्राप्नुयान्नरः || ८/३५ ||
तत् पापं शृणु चार्वङ्गि नरकञ्चोत्तरोत्तरम् |
यत् पापं प्राप्नुयाद् देवि स्वयंभूलिङ्गचालने || ८/३६ ||
तत् पापं कोटिगुणितं गणनाद्देवमन्त्रयोः |
तस्मात्तु गणनां देवि वर्जयेन्मतिमान्नरः || ८/३७ ||
त्यक्त्वा शैववैष्णवेषु सौरे गाणपते तथा |
अन्यत् सर्वासु विद्यासु गणनां वर्जयेन्नरः || ८/३८ ||

इति श्री कामधेनुतन्त्रे देवदेवीसंवादे अष्टमः पटलः ||



नवमः पटलः
श्रीमाहादेव उवाच

अधुना संप्रवक्ष्यामि रहस्यं गुह्यमुत्तमम् |
यज्ज्ञात्वा साधको याति दुर्लभं ब्रह्ममन्दिरम् || ९/१ ||
इडया पूरयेद् वायुं सुषुम्नान्तर्गतं ततः |
रेचयेत् पिङ्गलामार्गे प्राणायामक्रमात् प्रिये || ९/२ ||
अनुलोमेन चार्वङ्गि मातृकां युवतीं स्मरेत् |
पञ्चाशन्मातृकावर्णं सबिन्दुं नादसंयुतम् || ९/३ ||
उच्चार्य पूरकेणैव तत इष्टं समुच्चरेत् |
ततस्तु मातृकावर्णं विलोमेन जपेत् प्रिये || ९/४ ||
सुषुम्नामध्यदेशे तु चित्रिणी सुवरानने |
अनुलोमविलोमेन मातृकां युवतीं स्मरेत् || ९/५ ||
इष्टमन्त्रं ततो जप्त्वा विलोमं कुरु यत्नतः |
अनेनैव विधानेन रेचयेत् पिङ्गलापथे || ९/६ ||
एवं द्वादशधा कृत्वा प्रत्यहं वरवर्णिनि |
त्रिसन्ध्यां चञ्चलापाङ्गि यः कुर्यात् कमलानने || ९/७ ||
जीवन्यासं भवेत्तस्य मन्त्रसिद्धिश्च नान्यथा |
एकधा वा महेशानि कलौ संख्या चतुर्गुणा || ९/८ ||
प्रत्यहं दशधा कृत्वा शिवतुल्यो भवेन्नरः |

इति श्रीकामधेनुतन्त्रे देवदेवीसंवादे नवमः पटलः ||



दशमः पटलः

श्रीमहादेव उवाच

ललाटतत्त्वं चार्वङ्गि अकारं सर्वदा प्रिये |
आकारं मुखतत्त्वन्तु शृणुष्व वरवर्णिनि || १०/१ ||
इकारं दक्षनेत्रञ्च ईकारं वामनेत्रके |
उकारं दक्षकर्णे स्यादूकारं वामकर्णके || १०/२ ||
ऋकारं दक्षनासा च ऋकारं वामनासिके |
ऌकारं दक्षगण्डं स्यात् ॡकारं वामगण्डकम् || १०/३ ||
एकारं अधरं तत्त्वं ऐकारं ओष्ठ एव च |
ओकारं ऊर्ध्वदन्तं स्यात् औकारश्चाधोदन्तकम् || १०/४ ||
अंकारं शिरसस्तत्त्वं अःकारं मुखमण्डलम् |
ककारादि पञ्चतत्त्वं दक्षबाहौ प्रशस्यते || १०/५ ||
वामबाहौ चकारादि पञ्चतत्त्वञ्च तिष्ठति |
दक्षपादे टकारादि पञ्चतत्त्वं वरानने || १०/६ ||
तकारादि पञ्चतत्त्वं वामपादे पशस्यते |
पकारं दक्षपार्श्वञ्च फकारं वामपार्श्वके || १०/७ ||
बकारं पृष्ठतत्त्वञ्च भकारं नाभिरेव च |
मकारं उदरं तत्त्वं यकारं हृदयं तथा || १०/८ ||
रकारं स्कन्दतत्त्वञ्च लकारं वाममेव च |
घटितत्त्वं वकारञ्च शकारं दक्षबाहुषु || १०/९ ||
वामबाहौ षकारञ्च सकारं दक्षपादकम् |
वामपादं हकारञ्च क्षकारं शिरसोपरि || १०/१० ||
अकारं बीजतत्त्वञ्च तकारं प्रणवेन च |
मकारञ्च सकारञ्च मण्डितं हि तथैव च || १०/११ ||
अहङ्कारः पकारं स्यात् फकारो मनसस्तथा |
नकारं शब्दतत्त्वञ्च दं धं रूपं प्रशस्यते || १०/१२ ||
गकारं पादतत्त्वञ्च छकारोपस्थमेव च |
उकारमाकाशतत्त्वञ्च ऊकारं श्रोत्रमेव च || १०/१३ ||
त्वक्तत्त्वञ्च जकारः स्याद् झकारः पादमेव च |
ककारः पृथ्वीतत्त्वं खकारो ज्ञानतत्त्वकम् || १०/१४ ||
शकारं हृत्पुण्डरीकं षकारं तत्त्वमण्डलम् |
सकराञ्च तथा चन्द्रं रकारं वह्निमण्डलम् || १०/१५ ||
परमेष्ठि तथा तत्त्वं षकारः सुरपूजिते |
लकारं पृथ्वीतत्त्वं हकारञ्च शिरस्तथा || १०/१६ ||
यकारं वायुतत्त्वञ्च ककारं स्वर्गमेव च |
एतयोर्योगमासाद्य क्षकारं तत्त्वविग्रहम् || १०/१७ ||

तेन अ त म स प फ न द ध ग छ उ ऊ ज झ क ख श ष स र य ल ह क्ष 
||

अकारादिक्षान्तवर्णं तत्त्वञ्च पञ्चविंशतिः |
सर्वतत्त्वमतिगुह्यं परमात्मा सुलोचने || १०/१८ ||
मातृकाया वरारोहे क्रमान्नामानि संशृणु |
ब्रह्माणी चण्डिका रौद्री गौरीन्द्राणी तथैव च || १०/१९ ||
कौमारो वैष्णवी दुर्गा तथैव नारसिंहिका |
कालिका मुण्डमाला च शिवदूती तथा परा || १०/२० ||
वराही कौषिकी चैव तथा माहेश्वरी प्रिये |
शङ्करी च जयन्ती च मंगला कलिमर्दिनी || १०/२१ ||
पालिका चैव मेधा च शिवरूपा च शाम्भवी |
भीमा शान्ता च उग्रा च भ्रामरी रुद्ररूपिणी || १०/२२ ||
अम्बिका बहुरूपा च क्षेमा क्षेमङ्करी तथा |
धात्रीरूपा स्वधा स्वाहा तथैव वह्निरूपिणी || १०/२३ ||
अपर्णा च तथा माया घोररूपा प्रियंवदा |
ब्रह्माण्डवाणी ब्राह्मी च पञ्चाशन्मातृकाः स्मृताः || १०/२४ ||
इत्येतत् कथितं सम्यक् केवलं तव भक्तितः |
एतास्तु मातृकादेव्यो ब्रह्माण्डं सचराचरम् || १०/२५ ||
व्याप्य तिष्ठन्ति चार्वाङ्गि नानामूर्त्तिधराव्ययाः |
शक्तिमन्त्रे विष्णुमन्त्रे शैवे सौरे च पार्वति || १०/२६ ||
अन्यसर्वेषु मन्त्रेषु गणेशे वरवर्णिनि |
मातृका युवतीरूपा मन्त्रविग्रहरूपिणी || १०/२७ ||
ब्रह्मा विष्णुश्च रुद्रश्च ईश्वरश्च सदाशिवः |
ते सर्वे चञ्चलापाङ्गि निश्चलाश्च निरिन्द्रियाः || १०/२८ ||
देवादीनां वरारोहे मन्त्रं नास्ति कदाचन |
शब्दब्रह्म यदा याति तन्त्रं मन्त्रं तदा भवेत् || १०/२९ ||
पञ्चाशद्युवती सर्वा शब्दब्रह्मस्वरूपिणी |
ब्रह्मणः कारणं नास्ति प्रकृतेरस्ति भाविनि || १०/३० ||
प्रकृतेर्या वरारोहे सा दीक्षा सर्वसम्मता |
दीक्षायां चञ्चलापाङ्गि प्रशस्ता युवतीकला || १०/३१ ||
पञ्चाशन्मातृका या सा युवती परिगीयते |
युवतीरहितं देवि कुतो विद्या कुतो मनुः |
निर्गुणं परमं ब्रह्म प्रधाना युवतीगणाः || १०/३२ ||

इति श्रीकामधेनुतन्त्रे देवदेवीसंवादे दशमः पटलः ||



एकादशः पटलः

श्रीशिव उवाच

यथा जले सूर्यतत्त्वं तथा मन्त्रे प्रतिष्ठितम् |
देवीनां ज्योतिषः पुञ्जो वर्तन्ते प्रकृतेः कलाः || ११/१ ||
अथान्तरात्मा परमं ज्ञानात्मा सुवरानने |
वर्तन्ते युवतीरूपाः षोडश प्रकृ(तिः?तेः) पराः || ११/२ ||
प्रकृतिं हि विना देवि ज्ञाता ब्रह्मा सनातनः |
अत एव वरारोहे स एव श्रीसदाशिवः || ११/३ ||
जाग्रत् स्वप्नसुषुप्तिर्या तुरीया वरवर्णिनि |
तास्ताः सर्वा वरारोहे युवती परमापरा || ११/४ ||
कार्यकारणकाले च गणनीया वरानने |
शून्यात् शून्यं परं शून्यं शून्यरूपं निरञ्जनम् || ११/५ ||
कोटिसूर्यप्रतीकाशं निर्मलं ज्ञानमुत्तमम् |
हृदि भावय चार्वङ्गि तेजःपुञ्जं महाप्रभम् || ११/६ ||
दलिताञ्चनपुञ्जाभं वर्णराजं वरानने |
त्रिभङ्गललिताकारं चारुचूडाविराजितम् || ११/७ ||
शिखिपुच्छयुतं चूडं भ्रमरैः शोभितं परम् |
पीतांशुकपरीधानं वनमालाविभूषितम् || ११/८ ||
रत्नकुण्डलसंयुक्तं स्फुरद्गण्डमनोहरम् |
कदम्बकुसुमोपेतं श्रवणं जनमोहितम् || ११/९ ||
श्रीवत्सकौस्तुभोद्दीप्तं आजानुबाहुराजितम् |
आरक्तनयनद्वन्द्वं कोटिविद्युत्समद्युतिम् || ११/१० ||
आरक्तचरणद्वन्द्वं नूपुरारावसंयुतम् |
आरक्तकरतलस्वच्छं गुञ्जमालाविराजितम् || ११/११ ||
शब्दब्रह्ममयं विष्णुं इकारं शब्दजल्पितम् |
एवंरूपं समुत्पन्नं हृदि मध्ये वरानने || ११/१२ ||
जायते कामबीजात्तु शून्यमध्ये सुलोचने |
शून्यमध्ये स्थिता देवि कामबीजस्वरूपिणी || ११/१३ ||
लकारसंयुता या सा कृष्णमाता प्रगीयते |
सर्वेषु विष्णुमन्त्रेषु कामबीजं परात्परम् || ११/१४ ||
हृदि शून्ये महेशानि विष्णोर्मन्त्रं जपेत् प्रिये |
ततो वै कामबीजात्तु जायते विष्णुविग्रहम् || ११/१५ ||
अतं काममयं विष्णुं हृदि भावय पार्वति |
कामिनी या महेशानि विष्णुमाता प्रगीयते || ११/१६ ||
अतो विष्णुमातृवर्णं वर्णराजमवाप्नुयात् |
ककारः कामिनी साक्षाद् लकारः पृथिवीश्वरी || ११/१७ ||
रतिस्तु मर्दिनी साक्षाद् नादस्तु योनिरूपिणी |
बिन्दुः कुण्डलिनीरूपं शिवशक्तिमयं प्रिये || ११/१८ ||
इदं बीजं महेशानि विष्णुमाता पराक्षरा |
निरक्षरो विष्णुदेवो ह्यक्षराज्जायते ध्रुवम् || ११/१९ ||
अत एव वरारोहे ब्रह्मणः कारणं परा |
क्लींकारबीजरूपा या सा परा परिगीयते || ११/२० ||
परात्परतरा साऽपि वह्निमण्डलसंयुता |
कामिनी सा महेशानि पृथिवी तस्य आसनम् || ११/२१ ||
कदाचित् पृथिवीमध्ये कदाचिद् वह्निमण्डले |
वसते कामिनी देवी बिन्दुत्रयसमन्विता || ११/२२ ||
जन्मलब्धा महाविष्णुः कूर्चबीजं जपेत् प्रिये |
अनेन प्रजपेन्मन्त्रं हुंकारं वरवर्णिनि || ११/२३ ||
विष्णोर्विग्रहणे तत्तु स्वयं प्रकृतिमूर्तिमान् |
प्रकृतिः परमाराध्या देवानां नगनन्दिनि || ११/२४ ||
हुंकारं परमाश्चर्यं बीजरन्तं शृणु प्रिये |
षष्ठस्वरः परिचयो वियद्बीजं शशिप्रभम् || ११/२५ ||
तस्योपरि वरारोहेसदाबिन्दुं विभावय |
काममन्मथकन्दर्पम् अक्षरध्वजसंज्ञकम् || ११/२६ ||
मीनकेतुर्महेशानि पञ्चबीजं प्रकीर्तितम् |
मायाकूर्चं वधूबीजं लक्ष्मीबीजञ्च पार्वति || ११/२७ ||
प्रणवञ्च महेशानि स्वयं चतुर्दशं तथा |
सपिण्डवत्तथा देवि येषु यासु च विद्यते || ११/२८ ||
तन्मन्त्रमतिसिद्धं स्यात् परः प्रकृतिरूपिणी |
एवं बीजं सकृद् ध्यात्वा सर्वासां भवति प्रियः || ११/२९ ||
तन्मन्त्रं प्रजपेद्देवि बीजध्यानं पुनः प्रिये |
एवं हि दशधा कृत्वा मन्त्राणां बीजसाधनम् || ११/३० ||
तस्माद् बीजात् समाकृष्य देवतारूपमुद्भवम् |
देवध्यानं ततः कृत्वा इष्टमन्त्रं ततो जपेत् || ११/३१ ||
पुनर्ध्यानं देवतायाः पुनर्जापं कुरु प्रिये |
एवं हि दशधा कृत्वा देवाधिष्ठानमेव च || ११/३२ ||
ततः सप्तच्छदां जप्त्वा कुल्लुकां दशधा जपेत् |
आद्यन्ते सेतुमन्त्रञ्च दत्वा अष्टोत्तरं जपेत् |
तन्मन्त्रं प्रजपेद्देवि एवं सिद्धिमुपालभे || ११/३३ ||

इति कामधेनुतन्त्रे देवदेवीसंवादे एकादशः पटलः ||



द्वादशः पटलः

श्रीमहादेव उवाच

अपरैकं प्रवक्ष्यामि रहस्यमतिगोपनम् |
अकृत्वा ध्यानतत्त्वञ्च अष्टतत्त्वं तथैव च || १२/१ ||
अकृत्वा व्यर्थतां याति नात्र कार्या विचारणा |
ततो जीवत्वमाप्नोति मन्त्रः सिध्यति तत्क्षणात् || १२/२ ||
अथवा परमेशानि मन्त्रवर्णं यथा तथा |
प्रणवपुटितं कृत्वा अनुलोमविलोमतः || १२/३ ||
तदैव परमेशानि जीवत्वं प्राप्यते मनुः |
एकधा वा त्रिधा कृत्वा यदि कुर्याद् वरानने || १२/४ ||
तदा सिद्धिमवाप्नोति नान्यथा सुरपूजिते |
जीवत्वं हि विना देवि यदि मन्त्रं जपेत् सुधीः || १२/५ ||
तज्जपं चञ्चलापाङ्गि शवमेव न संशयः |
सदा निद्रातुरो मन्त्री जीवहीनश्च पार्वति || १२/६ ||

श्रीं क्लीं ह्रीं हुं स्त्रीं श्रीं ओम् |

कथं सिद्धिमवाप्नोति निद्रायां वरवर्णिनि |
जीवन्यासेन चार्वङ्गि निद्राभङ्गो भवेद् ध्रुवम् || १२/७ ||
बिन्दुतत्त्वं प्रजप्याथ ज्ञानतत्वञ्च सुन्दरि |
प्राणतत्त्वञ्च चार्वङ्गि देवतत्त्वं तथैव च || १२/८ ||
जपतत्त्वं मन्त्रतत्त्वं ध्यानतत्त्वं सुलोचने |
अक्षरे अक्षरे देवि अज्ञात्वा प्रजपेद् यदि || १२/९ ||
संयोगं यद् भवेद् योगं प्रफुल्लं तदुदाहृतम् |
केवलं कलिकाबीजं तद्वर्णं सुरपूजिते || १२/१० ||
आगतं मम वक्त्राद् यद् गतं तव मुखे सदा |
मतं श्रीवासुदेवस्य इति ते कथितं प्रिये || १२/११ ||
एतन्मन्त्रं महागुह्यं ईशानमुखसंयुतम् |
एतन्मन्त्रप्रभावाद्धि कालकूटं पिबाम्यहम् || १२/१२ ||
एतास्तु मातृका वर्णाः सुषुम्नामध्यवर्तिनः |
एते वर्णा वरारोहे महायोगमयाः सदा || १२/१३ ||
अक्षरं हि विना देवि न योगो जायते मम |
योगमार्गे भक्तिमार्गे मुक्तिमार्गे च सुन्दरि || १२/१४ ||
ध्यानमार्गे तु पूजायां जपमार्गे तथैव च |
एतास्तु युवतीवर्णाः कार्यकारणरूपिणः || १२/१५ ||
एतन्मन्त्रमविज्ञाय न जप्तव्यं कदाचन |
एतन्मन्त्रमविज्ञाय पुराणं संहितां स्मृतिम् || १२/१६ ||
पठन्नरकमाप्नोति पितृभिः सह नान्यथा |
सर्वधर्मेषु यत्कर्म सर्वयज्ञेषु यत्फलम् || १२/१७ ||
सर्वदानेषु तीर्थेषु यत्फलं प्राप्नुयाद् द्विजः |
तत्फलं समवाप्नोति वर्णानां ध्यानमात्रतः || १२/१८ ||
वर्णध्यानमविज्ञाय वर्णतत्त्वं तथैव च |
पुराणवाचको यस्तु ध्रुवं नरकमाप्नुयात् || १२/१९ ||
कोटिवंशान् समादाय स द्विजो नरकं ब्रजेत् |
यथा वक्ता तथा श्रोता द्वयोरपि फलं समम् || १२/२० ||
कथमज्ञानतो मूर्खोऽज्ञात्वा वर्णविनिर्णयम् |
पुराणानि पठित्वा वै निश्चयं नरकं व्रजेत् || १२/२१ ||
निश्चयञ्च महेशानि दारिद्र्यं घोरमाप्नुयात् |
निश्चयं रोगमाप्नोति जम्बूद्वीपस्य भारते || १२/२२ ||
स स्यात् सनातनो देवो वाणी त्रिपुरसुन्दरी |
सर्वासां युवतीनाञ्च भवानी चाधिदेवता || १२/२३ ||
ध्यायेद् देवीं महामायां मातृकां जगदीश्वरीम् |
रक्तपद्मासनगतां रक्तांशुकपरिष्कृताम् || १२/२४ ||
रक्तचन्दनलिप्ताङ्गीं रक्तवस्त्रोत्तरीयिणीम् |
रक्तबिम्बफलाभासां राकाचन्द्रमुखीं पराम् || १२/२५ ||
भ्रमद्भ्रमरलीलाभनयनत्रयराजिताम् |
कटाक्षशतसंयुक्तां चारुचूडाविनोदिनीम् || १२/२६ ||
रक्तालङ्कारसुभगां त्रिभङ्गिललिताकृतिम् |
हास्ययुक्तां प्रफुल्लास्यां ज्योत्स्नाजालसमच्छविम् || १२/२७ ||
मृणालसदृशाकारबाहुवल्लीविराजिताम् |
कञ्चुलीसंयुतां रम्यां कदम्बकोरकस्तनीम् || १२/२८ ||
नखानां किरणोद्योतैर्भुवनं परिमोहयन् |
एवं ध्यात्वा महामायां भवानीं शिवमोहिनीम् || १२/२९ ||
अपरैकं प्रवक्ष्यामि रहस्यं प्रमाद्भुतम् |
हृत्पद्मे द्वादशदले वराहोपरि भावयेत् || १२/३० ||
यस्यदेवस्य यद्बीजं प्रफुल्लकलिकां तथा |
ध्यात्वादेवीं यथाशक्त्या तस्मादाविर्भवेत् स्वयम् || १२/३१ ||
शक्तिर्वा विष्णुदेवो वा शिवो वा सूर्य एव वा |
बीजादुत्पद्यते देवि परंब्रह्म निरञ्जनम् || १२/३२ ||
बीजध्यानं विना देवि कथमुत्पद्यते हरिः |
सदाशिवो महादेवः कथमुत्पद्यते स्वयम् || १२/३३ ||
सदाशिवस्य जननी बीजरूपा सनातनी |
इति यो वेत्ति स ज्ञानी स एव वीरसत्तमः || १२/३४ ||
गुरुर्योग्यः स एव स्यात् स एव परमः शिवः |
सर्वेषाञ्चैव बीजानामेवं ध्यानं समाचरेत् || १२/३५ ||
शुक्लविद्युत्समाकारां नयनत्रयधारिणीम् |
कटाक्षविशिखैर्युक्तां चतुर्बाहुसमन्विताम् || १२/३६ ||
त्रिभङ्गललिताकारां चारुचूडाविराजिताम् |
पुण्डरीकोपविष्टाञ्च राकाचन्द्रमुखीं पराम् || १२/३७ ||
नानागन्धप्रलिप्ताङ्गीं सुगन्धिमाल्यसंस्कृताम् |
नानाभरणदीप्ताङ्गीं मेघांशुकपरिष्कृताम् || १२/३८ ||
वीणावाद्यविनोदेन उल्लसन्तीं जगत्त्रयम् |
आद्यां ब्रह्ममयीं देवीमिष्टबीजस्वरूपिणीम् || १२/३९ ||
ब्रह्माद्या देवता यस्याश्चरणे पतिता भुवि |
भजेऽहं मातृकादेवीं वेदमाता सनातनीम् || १२/४० ||
अनेन विधिना ध्यात्वा सर्वासां भवति प्रियः |
बीजमेतन्महेशानि प्रथमं दशधा जपेत् || १२/४१ ||
तन्मन्त्रं चञ्चलापाङ्गि आनन्दपटले स्थितम् |
ततो ध्यात्वा पुनर्जप्त्वा दशधा वरवर्णिनि || १२/४२ ||
एतत्तत्त्वमविज्ञाय प्रजपेद् यदि पार्वति |
सर्वपापमयः सोऽपि भवेत् शूकरवद् द्विजः || १२/४३ ||
तत्त्वमेतन्महागुह्यं योगमार्गे स्थितं सदा |
तव भक्त्या मयाख्यातमतिगुह्यं सुलोचने || १२/४४ ||
तन्त्राणां सारमेतत्तु सर्वसिद्धिप्रदायकम् |
स योगी योगवेत्ता च योगात्मा योगनायकः ||
योगाचार्यो योगमाया योगानन्दप्रदायकः || १२/४५ ||

इति श्रीकामधेनुतन्त्रे देवदेवीसंवादे द्वादशः पटलः ||



त्रयोदशः पटलः

श्रीमहादेव उवाच

अधुना संप्रवक्ष्यामि आनन्दपटलं प्रिये |
शृणु तत्त्वं प्रवक्ष्यामि सुन्दरं सुमनोहरम् || १३/१ ||
हृत्पद्मे द्वादशदले विद्युत्कोटिसमन्विते |
भावयेन्मन्त्रबीजानि यस्य या इष्टदेवता || १३/२ ||
भावयेत् प्रथमं बीजं वराटोपरि पार्वति |
अन्यानि सर्वबीजानि पत्रमध्ये पृथक् पृथक् || १३/३ ||
एवं हि दशधा जप्त्वा क्रमाद् बीजं जपेत् प्रिये |
दशधा दशधा देवि प्रजपेद् बीजमुत्तमम् || १३/४ ||
ततस्तु बीजमध्ये तु ध्यायेदिष्टं सुलोचने |
तस्माद् बीजाद् वरारोहे देवता जायते ध्रुवम् || १३/५ ||
तस्य देवस्य चार्वङ्गि निरीक्ष्य देहसुन्दरम् |
चरणात् केशपर्यन्तं नानावेशमयं प्रिये || १३/६ ||
निरीक्ष्य मनसा भक्त्या पुनर्ध्यानं समाचरेत् |
ततस्तु प्रजपेद् बीजं वर्णानन्दस्वरूपिणम् || १३/७ ||
प्रजपेत् प्रथमं बीजं बीजध्यानं ततः परम् |
एतत्तु प्रथमं बीजं साधनं दुर्लभं प्रिये || १३/८ ||
सर्वेषां बीजवर्णानां यदि जानाति साधकः |
ध्यानं परमकल्याणं वर्णे वर्णे पृथक् पृथक् || १३/९ ||
अज्ञात्वा चञ्चलापाङ्गि मातृकाध्यानमाचरेत् |
तदेवं सहसा देवि सर्वासां जायते ध्रुवम् || १३/१० ||
यस्य मन्त्रस्य यद्वर्णं तस्य ध्यानं पृथक् पृथक् |
बीजात्तु जायते विष्णुरवतारवरः प्रिये || १३/११ ||
बीजात्तु जायते रामो बीजात् कृष्णः प्रजायते |
स्थावरं जङ्गमं देवि सर्वं बीजात् प्रजायते || १३/१२ ||
आज्ञाचक्रे विशुद्धौ च मूलाधारे ततः प्रिये |
स्वाधिष्ठाने ततो देवि मणिपूरे च पार्वति || १३/१३ ||
अनेन विधिना देवि कुर्यात् साधकसत्तमः |
प्रत्यहं कुरुते यस्तु स सिद्धः शिव एव सः || १३/१४ ||
प्रत्यहं चञ्चलापाङ्गि षट्चक्रं भ्रामयेत्तु यः |
साधनाच्च महेशानि तस्मात् कुसुमवत् प्रिये || १३/१५ ||
नित्यञ्च हृदये कुर्यादवश्यं वद किं प्रिये |
बीजस्य चञ्चलापाङ्गि ध्यानं मन्त्रं पृथक् पृथक् || १३/१६ ||
साक्षात् श्रीः प्रकृतिर्देवी बीजरूपा सनातनी |
सनातनस्य जननी सर्ववर्णमयी प्रिये || १३/१७ ||
जपस्य प्रथमे काले बीजस्य तत्त्वमुच्चरेत् |
ततस्तु प्रजपेन्मन्त्रं ससेतु वरवर्णिनि || १३/१८ ||
बीजतत्त्वमविज्ञाय प्रजपेद् यदि कोटिधा |
सर्वं तस्य वृथा देवि अरण्ये रोदनं यथा || १३/१९ ||
तत्त्वत्रयं प्रवक्ष्यामि मन्त्राणां शृणु सुन्दरि |
विभाव्य नाभिपद्मेषु वायुबीजं सबिन्दुकम् || १३/२० ||
मन्त्रस्य प्रथमं वायुबीजं मध्ये विचिन्त्य वै |
ध्यात्वा बीजं महेशानि प्रजपेद् बीजमुत्तमम् || १३/२१ ||
दशधा प्रजपेद् बीजं दशधा ध्यानमेव च |
दशतत्त्वयुतं मन्त्रं तदैव सहसा भवेत् || १३/२२ ||
संशोष्य बीजं चार्वङ्गि वह्निबीजे विचिन्त्य वै |
हृत्पद्मे वह्निमध्ये तु ध्यात्वा बीजं हुताशनम् || १३/२३ ||
दशधा प्रजपेन्मन्त्रं दशधा ध्यानमेव च |
विंशतत्त्वयुतं मन्त्रं तदैव सहसा भवेत् || १३/२४ ||
मातृस्वरात्ततो देवि गलितामृतधारया |
आप्लाव्य बीजं चार्वङ्गि सर्वावयवसंयुतम् || १३/२५ ||
तदैव सहसा कृत्वा ललाटे वरुणालये |
वरुणस्य तु मध्ये तु तद्बीजं भावयेत् प्रिये || १३/२६ ||
दशधा च जपित्वा वै बीजञ्च दशधा स्मरेत् |
तदामृतमयं बीजं सहसा भवति प्रिये || १३/२७ ||
विष्णुमन्त्रेषु देवेशि चन्द्रबीजेषु भावयेत् |
अन्यत् सर्वेषु मन्त्रेषु भावयेद् वरुणालये || १३/२८ ||
त्रिंशत्तत्त्वयुतं मन्त्रं तदैव भवति प्रिये |
तत्त्वातीतं स्वधातीतं वाचा विद्यां जपेत् प्रिये || १३/२९ ||
अनेन विधिहीनञ्च तज्जपं विफलं सदा |
तत्त्वहीनं जपेद्यस्तु विफलं सततं प्रिये || १३/३० ||
शोषणं दहनं देवि अमृतं ज्ञानसंज्ञकम् |
एतत् तत्त्वमयं भद्रे शीघ्रं सिद्धिप्रदायकम् || १३/३१ ||
यो जपेत्तत्त्वरहितं तस्य हानिः पदे पदे |
तस्मात्तत्त्वं शुभाराध्य तस्मान्मन्त्रं जपेत् सुधीः || १३/३२ ||
अनेन विधिना देवि सर्वतत्त्वमयं मनुम् |
कृष्णमन्त्रेषु रामेषु अवतारवरेषु च || १३/३३ ||
सौरे गणपतौ देवि शक्तिमन्त्रे स्वयं प्रिये |
शिवमन्त्रेषु चार्वङ्गि अन्यतन्त्रे तथैव च || १३/३४ ||
त्रिंशत्तत्त्वयुतं कृत्वा मन्त्रं बीजं सुलोचने |
एवमेव विधानेन बीजे जीवत्वमाप्नुयात् || १३/३५ ||
तस्माद् बीजाद् वरारोहे रामकृष्णादयश्च ये |
उत्पद्यन्ते वरारोहे नान्यथा वरवर्णिनि || १३/३६ ||
एतन्मन्त्रं सकृत् कृत्वा प्रजपेदनिशं मनुम् |
प्रजपेदनिशं विद्यां शौचाशौचं न चाचरेत् || १३/३७ ||
मन्त्रे अक्षरबुद्धिः स्याद् गुरौ तु मानवः प्रिये |
देवतायां वरारोहे प्रतिमाबुद्धिर्जायते || १३/३८ ||
किं तस्य जपपूजायां सर्वं व्यर्थं कदर्थनम् |
इति ते कथितं देवि बीजतत्त्वं सुगोपनम् || १३/३९ ||
कस्यचिन्नैव वक्तव्यं यदि कल्याणमिच्छसि |
एतज्ज्ञानमविज्ञाय स कथं गुरुतां व्रजेत् || १३/४० ||

इति श्रीकामधेनुतन्त्रे देवदेवीसंवादे त्रयोदशः पटलः ||



चतुर्दशः पटलः

श्रीमहादेव उवाच

देवदेव महादेव संसारार्णवतारक |
कृपया कथयेशान वकारतत्त्वमुत्तमम् || १४/१ ||

श्रीमहादेव उवाच

पूर्वोक्तं चञ्चलापाङ्गि गायत्रीतत्त्वमुत्तमम् |
गायत्री या वरारोहे चतुर्वकारसंयुता || १४/२ ||
कान्तं शेषवकारञ्च वरुणं हृदि भावय |
यवर्गं वायुबीजञ्च हृदि भावय पार्वति || १४/३ ||
यवर्गं यत्तु देवेशि वायुबीजं तदुच्यते |
यकारस्य चतुर्थो यो वायुबीजं प्रकीर्तितम् || १४/४ ||
यवर्गञ्च वायुबीजं मयैतन्निश्चितं प्रिये |
सर्वविद्यासु मन्त्रेषु वरुणं भावय प्रिये || १४/५ ||
वह्निजायायुतानाञ्च पवर्गं हृदि भावय |
गायत्री संस्थिता देवि पापोच्चाटनकर्मणि || १४/६ ||
पूर्वोक्तध्यानमार्गेण भावना परिकीर्त्तिता |
ध्यानभेदेन चार्वङ्गि वकारं भावय प्रिये || १४/७ ||
अधुना संप्रवक्ष्यामि ककारध्यानमुत्तमम् |
विशेषं शृणु वक्ष्यामि ककारस्यातिदुर्लभम् || १४/८ ||
यन्नोक्तमानन्दपटले अधुना कथयामि ते |
तद् ध्यात्वा साधको याति दुर्लभं मोक्षमव्ययम् || १४/९ ||
येन ध्यानप्रकाशेन मन्त्रं तन्त्रञ्च सिध्यति |
एवं तद्ध्यानमात्रेण शिवतुल्यो भवेन्नरः || १४/१० ||
ककारध्यानमात्रेण सर्ववर्णं हि सिध्यति |
ककारभावनाच्चैव सर्वासां भावना भवेत् || १४/११ ||
तस्मात् सर्वप्रयत्नेन ककारं हृदि भावय |
ओम् प्रातरादित्यसंकाशां सिंहपृष्ठोपरिस्थिताम् || १४/१२ ||
रक्तपद्मोपविष्टाञ्च रक्तवस्त्रपरीवृताम् |
चतुर्भूजां त्रिनेत्राञ्च पञ्चबाणधनुर्धराम् || १४/१३ ||
वरदाभयदात्रीञ्च पीनतुङ्गपयोधराम् |
मृणालसदृशाकारचतुर्बाहुपरीवृताम् || १४/१४ ||
शङ्खकङ्कणकेयूरैरङ्गदैः परिशोभिताम् |
सुगन्धिमल्लिकाहारैः कबरीमध्यशोभिताम् || १४/१५ ||
त्रिभङ्गललिताकारां चारुचूडाविराजिताम् |
शिखिपुच्छयुतां चूडां नानारत्नसमन्विताम् || १४/१६ ||
ईषधास्यप्रसन्नास्यां मुक्तारञ्जितनासिकाम् |
माणिक्यकिरणोद्योतदन्तपङ्क्तिविराजिताम् || १४/१७ ||
पूर्णचन्द्रसमाभासनखपङ्क्तिमनुत्तमाम् |
स्वर्णसूत्रयुतहाररत्नचारुविनिर्मिताम् || १४/१८ ||
कटाक्षविशिखोद्दीप्तभ्रूलतापरिशोभिताम् |
तीर्थत्रययुतां रम्यां नयनत्रयराजिताम् || १४/१९ ||
रामरम्भासमाकार - ऊरुद्वयविराजिताम् |
बृहल्लतासुसंयुक्तरत्नकिञ्जल्कशोभिताम् || १४/२० ||
अष्टवर्गैः सेविताञ्च अष्टवर्गैः प्रपूजिताम् |
सिन्दूरतिलकोदीप्तामञ्जनाङ्कितलोचनाम् || १४/२१ ||
ललाटपट्टिकाशुभ्रामर्द्धचन्द्रपरीवृताम् |
ब्रह्मादिदेवतावृन्दैः शिरसि धार्यते च या || १४/२२ ||
किमाख्यां कामिनीं साक्षात् ककारवररूपिणीम् |
एवं ध्यात्वा वरारोहे प्रजपेद् यदि साधकः || १४/२३ ||
तदैव सहसा सिद्धिर्जायते तस्य सुन्दरि |
वर्णज्ञानं विना देवि न जपेत् पाशवः क्वचित् || १४/२४ ||
किं तस्य ध्यानपूजायां पुरश्चर्याशतं शतम् |
किं तस्य जपहोमेन चन्द्रसूर्यस्य पर्वणि || १४/२५ ||
वर्णज्ञानं विना देवि वैष्णवः शैव एव वा |
एकदा नोच्चरेद्देवि अज्ञात्वा व्र्णदीपनीम् || १४/२६ ||
सर्वासां मन्त्रविद्यानां दीपनी या प्रकीर्तिता |
सर्वेषां शास्त्रमध्ये तु प्रशस्ता वर्णदीपनी || १४/२७ ||
शक्तिमन्त्रे तथा सौरे गणेशमर्च्यते सदा |
ज्ञात्वा तन्त्रं प्रकुर्वीत दीक्षां पूजां शुचिस्मिते || १४/२८ ||

श्रीमहादेव उवाच

रहस्यं तत्र वक्ष्यामि अत्यन्तगोपनं शृणु |
यत्कृत्वा साधको याति परमं पदमुत्तमम् || १४/२९ ||
ललाटे तिलकं कृत्वा चन्दनेन सुगन्धिना |
कर्पूरागुरुकस्तूरीरोचनाकुङ्कुमैः प्रिये || १४/३० ||
तिलकं धारयेद् यत्नादेकीकृत्य मनोहरम् |
त्रिकोणं सुन्दरं स्वच्छं तिलकं जनमोहनम् || १४/३१ ||
एकीकृत्य पृथग् वापि नानावस्तुषु कारयेत् |
राज्यार्थी रक्तवर्णेन मोक्षार्थी श्वेतचन्दनैः || १४/३२ ||
वश्ये रोचनया देवि तिलकं कारयेत् सुधीः |
मोहने चञ्चलापाङ्गि अगुरुकुङ्कुमादिना || १४/३३ ||
कृष्णगन्धं वरारोहे शत्रोर्मारणकर्मणि |
ललाटे बाहुमूले च तथा स्कन्धद्वयेषु च || १४/३४ ||
हृत्पद्मपार्श्वयुगले पृष्ठे नाभौ च सुन्दरि |
ऊरुद्वये गण्डयुग्मे अधः पादद्वयेषु च || १४/३५ ||
विलिखेद् यत्नतो देवि ककारवर्णमुत्तमम् |
चन्द्रविन्दुयुतं कृत्वा विलिखेद् वरवर्णिनि || १४/३६ ||
तदैव सहसा देवि विद्या मन्त्रञ्च सिध्यति |
मोहयेदखिलान् लोकान् वशयेदिष्टदेवताम् || १४/३७ ||
इष्टदेवं वशं कृत्वा एकदा प्रजपेद् यदि |
तत्क्षणाच्चञ्चलापाङ्गि देवत्वमुपजायते || १४/३८ ||
देवत्वं हि विना देवि कुतः पूजा कुतो जपः |
अन्यथा प्रेतवत् पूजा वैष्णवे च विशेषतः || १४/३९ ||
ललाटे तिलकं कृत्वा रोचनासु शुचिस्मिते |
तन्मध्ये विलिखेद् वर्णं ककारं सुमनोहरम् || १४/४० ||
सामान्यमेतत् कथितं तिलकं जनमोहनम् |
एतत्तु तिलकञ्चैव वशयेदपि केशवम् || १४/४१ ||
जपासनं दशम्यान्तु तदारभ्य च प्रत्यहम् |
एतद्वर्णमविज्ञाय विषये समुपास्महे |
स भ्रष्टः स च पापिष्ठो रौरवं नरकं व्रजेत् || १४/४२ ||

इति श्रीकामधेनुतन्त्रे देवदेवीसंवादे चतुर्दशः पटलः ||



पञ्चदशः पटलः

श्रीदेवी उवाच

देवदेव महादेव नीलकण्ठ त्रिलोचन |
हृत्तत्वं कथयेशान यद्यहं तव वल्लभा || १५/१ ||

श्रीमहादेव उवाच

शृणु देवि प्रवक्ष्यामि ज्ञानं परमदुर्लभम् |
येन विज्ञानमात्रेण विष्णुः स्याद् वैष्णवः प्रिये || १५/२ ||
हृत्पद्मे द्वादशदले स्वविद्यां भावयेत् सुधीः |
ककारं भावयेदादौ वराटोपरि पार्वति || १५/३ ||
पत्रे पत्रे ततो देवि स्वविद्यां प्रजपेत् सुधीः |
मन्त्राणां प्रथमं बीजं ध्यात्वादौ प्रजपेत् सुधीः || १५/४ ||
तस्मान्मन्त्रात्ततो देवि जायते देवविग्रहम् |
देवताञ्च ततो ध्यात्वा तन्त्रोक्तध्यानवर्त्मना || १५/५ ||
ध्यानञ्च त्रिविधं देवि समानफलदायकम् |
कृत्वा ध्यानत्रयं देवि हृत्पद्मे परमेश्वरि || १५/६ ||
सहस्रदलपद्मान्तर्मध्यस्थाने गुरोर्मुखात् |
स्वविद्यां भावयेद्देवि कोटिविद्युत्समाकृतिम् || १५/७ ||
भावयेदनिशं भक्त्या सिद्धो भवति तत्क्षणात् |
जायन्ते देवि बीजात्तु रामकृष्णादयश्च ये || १५/८ ||
ते सर्वे चञ्चलापाङ्गि बीजात्तु प्रभवन्ति वै |
ज्ञात्वा सनातनं तत्त्वं आनन्दपटले स्थितम् || १५/९ ||
पूजा कार्या च चार्वङ्गि सर्वसिद्धिमयो भवेत् |
इदं सनातनं तत्त्वमज्ञात्वा नरकं व्रजेत् || १५/१० ||
शूद्रः शूद्रमुखाच्छ्रुत्वा विद्यां वा मन्त्रमुत्तमम् |
रौरवं नरकं यं यं तं तमाप्नोति निश्चितम् || १५/११ ||
न शूद्राय मतिं दद्याद् न च शूद्रं कदाचन |
उभयोर्नरकं देवि कोटिकुलसमायुतम् || १५/१२ ||
अनाचारो द्विजो यस्तु शूद्राणां गुरुरेव सः |
यदि शूद्रो भवेद्देवि सत्यवादी जितेन्द्रियः || १५/१३ ||
स धर्मे निरतो भूत्वा श्रुत्वा द्विजगुरोर्मुखात् |
सर्वसिद्धिमवाप्नोति शीघ्रं देवमवाप्नुयात् || १५/१४ ||
यद्देशे विद्यते शूद्रः पातकी मन्त्रविक्रयी |
तद्देशं पतितं मन्ये तस्य राजा च पातकी || १५/१५ ||
स कथं चञ्चलापाङ्गि जिह्वायां प्रजपेन्मनुम् |
तस्य जिह्वा वरारोहे मूत्रशोणितविड्यथा || १५/१६ ||
तन्मुखं मूत्रविट्कूपमन्नं विष्ठासमं सदा |
तज्जलं शोणितं साक्षाच्चाण्डालसमजातिषु || १५/१७ ||
पृथिव्यां यानि तीर्थानि सर्वदेवमयानि वै |
आलोक्य तन्मुखंतीर्थं तत्स्थानं त्यज्य(?)गच्छति || १५/१८ ||
तीर्थ कोटिः पलायन्ते दृष्ट्वा तन्मुखमण्डलम् |
गङ्गाजलं परित्यज्य द्रुतं स्वस्थानमवाप्नुयात् || १५/१९ ||
महापातकिनो ये च ब्रह्महत्यादिसंयुताः |
त्रैलोक्यपावनी गङ्गा तान् पुनाति न संशयः || १५/२० ||
मन्त्रविक्रयिणः शूद्राः सदा नरकगामिनः |
कलौ तु भारते वर्षे भविष्यन्ति न संशयः || १५/२१ ||
मन्त्रविक्रयिणः शूद्रा जायन्ते व्याघ्रयोनिषु |
तत्संसर्गश्च यो विप्रश्चर्मकारः स एव हि || १५/२२ ||
चाण्डालसदृशः सोऽपि स एव वर्णसङ्करः |
स्वधर्मनिरतः सूद्रो विद्यामन्त्रं शृणोति यः || १५/२३ ||
स धन्यः पृथिवीमध्ये स एव वैष्णवोत्तमः |
स शाक्तः शिवभक्तश्च गाणेशः सौर एव च ||
एतत्ते कथितं देवि वर्णज्ञानविनिर्णयम् || १५/२४ ||

इति श्रीकामधेनुतन्त्रे देवदेवीसंवादे ज्ञानानन्दे 
पञ्चदशः पटलः ||



षोडशः पटलः

श्रीमहादेव उवाच

अपरैकं प्रवक्ष्यामि रहस्यं परमाद्भुतम् |
यत्कृत्वा चञ्चलापाङ्गि रावणाद्या निशाचराः || १६/१ ||
अवाप्यमतिवृद्धिञ्च त्रैलोक्याधिपतिः प्रभुः |
सांकेतं परमं गुह्यमक्षराणां पृथक् पृथक् || १६/२ ||
एतत्तत्त्वं विजानाति हरिर्ब्रह्मा पुरन्दरः |
पञ्चाशद्वर्णसङ्केतं सावधानावधारय || १६/३ ||
अकृत्वा साधको याति रौरवं नरकं व्रजेत् |
रौरवं नरकं याति पुनरावृत्तिदुर्लभम् || १६/४ ||
विशेषं विष्णुमन्त्रेषु कुर्याद् वैष्णवसत्तमः |
अकृत्वा वैष्णवो याति नरकं कोटिकोटिशः || १६/५ ||
मासि मासि वरारोहे शनिभौमदिने प्रिये |
प्रातः स्नानं समासाद्य कृत्वा सन्ध्यां समाप्य च || १६/६ ||
सूर्यायार्घ्यं ततो दद्यात् पादप्रक्षालनाय च |
यागमण्डपमासाद्य भूतशुद्धिं विधाय च || १६/७ ||
कुर्यान्न्यासं मातृकायाः प्राणायामं ततः परम् |
न्यासानन्यांस्ततः कुर्यात्तन्त्रमार्गेण पार्वति || १६/८ ||
शुक्लाम्बरधरः स्रग्वी गन्धलिप्तकलेवरः |
रक्तासनं समासाद्य कुशासनमथापि वा || १६/९ ||
प्रलिप्य ताम्रपात्रेषु सिन्दूरं रक्तचन्दनम् |
विलिख्य मातृकावर्णं ह्यस्मिन् पात्रे पृथक् पृथक् || १६/१० ||
अकारादिक्षकारान्तं सबिन्दुं चन्द्रसंयुतम् |
महापद्मान्तरस्थानादानीय ब्रह्मवक्त्रकम् || १६/११ ||
वामनासापथेनैव श्वासं पुष्पाञ्जलौ क्षिपेत् |
तत्पुष्पं चञ्चलापाङ्गि कुर्यात् पुष्पस्य सञ्चयम् || १६/१२ ||
ध्यात्वा तु पूजयेद्दवीं क्रमेणैव पृथक् पृथक् |
गन्धैर्नानाविधैर्देवीं पुष्पैर्नानाविधैस्तथा || १६/१३ ||
धूपैर्नानाविधैर्देवि दीपैर्नानाविधैस्तथा |
नैवेद्यं विविधं देवि चतुर्विधमयं तथा || १६/१४ ||
दत्त्वा नानाफलादींश्च पूजयेत् परमेश्वरीम् |
नानापुष्पमयैर्हारैः शुक्रादिगन्धसंयुतम् || १६/१५ ||
महापद्मवनान्तस्थमष्टोत्तरशतं जपेत् |
प्रजपेद् मातृकावर्णं वर्णे वर्णे पृथक् पृथक् || १६/१६ ||
प्रतिपद्मे जपेन्मन्त्रं यस्मिन् पद्मे तु यत् स्थितम् |
तस्मिन् पद्मे वनान्तस्थः स्वविद्यां प्रजपेच्छतम् || १६/१७ ||
सुप्रसन्ना मातृका स्यात् तदैव सहसा प्रिये |
अकृत्वा मातृकापूजां मासि मासि वरानने || १६/१८ ||
इष्टविद्यां जपेद्यस्तु तस्य हानिं शृणु प्रिये |
चित्रानाडीगता भूत्वा मातृका जगदीश्वरी || १६/१९ ||
सर्वेषां वैष्णवानाञ्च शाक्तानां वरवर्णिनि |
शैवानाञ्च महेशानि अन्येषाञ्चैव सुन्दरि || १६/२० ||
हरन्ति वैष्णवाअदीनां नान्यथा वचनं मम |
प्रशस्ता मातृकापूजा दीक्षा या मत्त एव हि || १६/२१ ||
पुरश्चर्या हि चार्वङ्गि पूजनीया पृथक् पृथक् |
माता सा सर्वविद्यानां मन्त्राणाञ्च पृथक् पृथक् || १६/२२ ||
यस्मादुत्पद्यते विद्या मन्त्रञ्च सुरवन्दिते |
तस्मात्तु यत्नतो देवि तासां पूजा विधीयते || १६/२३ ||
नान्यथा निष्फला पूजा संवत्सरकृता च या |
अनेन विधिना देवि पूजयेद् यदि मातृकाम् || १६/२४ ||
प्रसन्ना मातृका देवि पुत्रत्वेनानुकल्पते |
रहितो मातृकापूजां जपपूजनतत्परः || १६/२५ ||
तस्य सर्वं महामाया मातृका जगदीश्वरी |
हरन्ति मन्त्रतेजांसि आयुर्विद्यायशोबलम् || १६/२६ ||
अपरैकं प्रवक्ष्यामि रहस्यं परमाद्भुतम् |
अनुलोमविलोमेन कथितं शृणु पार्वति || १६/२७ ||
अनुलोमविलोमञ्च तथैव हि महेश्वरि |
सर्वेषां जपयज्ञानां सहसा फलभाग् भवेत् || १६/२८ ||
सहसा सिद्धिमाप्नोति सहसा धर्ममाप्नुयात् |
सहसा अर्थमाप्नोति सहसा मोक्षमाप्नुयात् || १६/२९ ||
पौर्णमास्याममावस्यां मासि मासि प्रयत्नतः |
यः करोति प्रसन्नात्मा स एव श्रीसदाशिवः || १६/३० ||
ज्ञात्वा संदीपनीं विद्यां आनन्दपटले स्थिताम् |
अज्ञात्वा दीपनीं विद्यां चतुर्वर्गफलप्रदाम् |
रहस्यमेतदन्यच्च सर्वञ्च विफलं व्रजेत् || १६/३१ ||

इति श्रीकामधेनुतन्त्रे देवदेवीसंवादे 
षोडशः पटलः ||



सप्तदशः पटलः

श्रीमहादेव उवाच

एतत्तत्त्वमविज्ञाय न भावो जायते प्रिये |
न देवो विद्यते काष्ठे न पाषाणे च पार्वति || १७/१ ||
भावेषु विद्यते देवि भावो मोक्षस्वरूपधृक् |
दिव्यभावो वीरभावः सदैव सहसा भवेत् || १७/२ ||
अन्यथा चञ्चलापाङ्गि पशुभावमयः सदा |
स्वभावेन विना देवि कथं सिद्धिर्भवेत् प्रिये || १७/३ ||
तस्मात् प्रयत्नतो देवि वीरभावमयो भवेत् |
अनेनैव विधानेन मातृकां पूजयेत्तु यः || १७/४ ||
स एव दिव्यभावः स्याद् वीरभावः स एव हि |
स धनी गुणी लोके मातृकां यस्तु पूजयेत् || १७/५ ||

श्रीमहादेव उवाच

अपरैकं प्रवक्ष्यामि सामान्यं वरवर्णिनि |
पूर्वोक्तध्यानमाचर्य प्रजपेन्मातृकामनुम् || १७/६ ||
ककारध्यानमात्रेण सर्वसिद्धिः प्रजायते |
जप्त्वा ककारं चार्वङ्गि सर्वासां भवति प्रियः || १७/७ ||
सर्वासां मातृकां जप्त्वा ककारं केवलञ्च वा |
ककारं सर्ववर्णानां मूलप्रकृतिरूपिणीम् || १७/८ ||
तस्मात् प्रयत्नतो देवि ककारं पूजयेत् प्रिये |
प्रत्यहं पूजयेद्देवीं प्रथमं पूजयेत् सुधीः || १७/९ ||
सर्वासां फलमाप्नोति तदा भावमयो भवेत् |
ककारपूजनाद् भद्रे सर्वासां पूजनं भवेत् || १७/१० ||
प्रत्यहं कुरुते यस्तु प्रतिमासि वराअनने |
दिव्यवीरः स एव स्यात् सर्वपूजाफलं लभेत् || १७/११ ||
अकृत्वा चञ्चलापाङ्गि मनसापि च संस्मरेत् |
सर्वपूजामयः सोऽपि सर्वभावमयः सदा || १७/१२ ||
भावतत्त्वमविज्ञाय विष्णुमन्त्रं कथं जपेत् |
शक्तिमन्त्रं महेशानि स कथं पामरो जपेत् || १७/१३ ||
शिवमन्त्रञ्च सौरञ्च गाणेशं स कथं जपेत् |
भावतत्त्वं विना देवि प्रजपेद्यदि कोटिधा || १७/१४ ||
सर्वं तस्य वृथा देवि नरकञ्च पदे पदे |
स कथं चञ्चलापाङ्गि दिव्यवीरगुरुर्भवेत् || १७/१५ ||
पशुवत् सर्वदा देवि स एव पशुगुरुः प्रिये |
भावतत्त्वेन रहितः स कथं पञ्चमं यजेत् || १७/१६ ||
वैष्णवस्तु वरारोहे मकारं पञ्चमं यजेत् |
देवताया वरारोहे शरीरं जायते ध्रुवम् || १७/१७ ||
एवं मन्त्रं प्रवक्ष्यामि आनन्दपटले स्थितम् |
कालीं छिन्नादिविद्याञ्च त्रिंशद्वर्णमयीं सदा || १७/१८ ||
तदा सिद्धिमयं सोऽपि अन्यथा विफलं सदा |
इष्टध्यानं ततः कृत्वा हृदि मध्ये निरीक्षणम् || १७/१९ ||
प्रथमं कामिनीं ध्यात्वा प्रफुल्लां तदनन्तरम् |
प्रफुल्लाध्यानमात्रेण जायते देवविग्रहम् || १७/२० ||
पफुल्ला जायते देवि यस्य या इष्टदेवता |
तदिष्टं भावयेद् देवि मन्त्रोक्तध्यानवर्त्मना || १७/२१ ||
देवतायाः शरीरञ्च बीजादुत्पद्यते ध्रुवम् |
मन्त्रस्य प्रथमाद्बीजाज्जायते नगनन्दिनि || १७/२२ ||
पञ्चाशन्मातृका या सा सर्वा युवतिरूपिणी |
तस्मात्तु युवतीदेहाज्जायते कृष्णविग्रहम् || १७/२३ ||
रामः पद्मपलाशाक्षः प्रफुल्लो जायते ध्रुवम् |
बीजादुत्पद्यते देवि परं ब्रह्म सनातनम् || १७/२४ ||
बीजसंयोगमात्रेण शब्दब्रह्म सनातनम् |
अपरैकं प्रवक्ष्यामि रहस्यं परमाद्भुतम् || १७/२५ ||
पञ्चाशद्वर्णसंकेतं पञ्चाशत्तत्त्वमद्भुतम् |
वर्णतत्त्वं विना देवि प्रजपेद्यदि कोटिधा || १७/२६ ||
सर्वं तस्य वृथा देवि हानिस्तस्य पदे पदे |
हृत्पद्मे द्वादशदले वराटोपरि कामिनीम् || १७/२७ ||
ध्यात्वा प्रयत्नतो देवि तद्गर्भे वर्णभावनम् |
अकारादिक्षकारान्तं त्रिकोणमध्यमण्डले || १७/२८ ||
अनुलोमविलोमे न कामिन्या गर्भपञ्जरे |
एकैकं भावयेद् देवि प्रतिवर्गे पृथक् पृथक् || १७/२९ ||
सर्वांसां देवदेवीनां ककारं सुरपूजिते |
ध्यात्वा प्रयत्नतो देवि अनुलोमविलोमतः || १७/३० ||
पञ्चाशत्तत्त्वसङ्केतं पञ्चाशद्वर्णमेव हि |
यः करोति नरो ज्ञात्वा शीघ्रं विद्या प्रसीदति || १७/३१ ||
किमसाध्यं वरारोहे यस्मै विद्या प्रसीदति |
षट्चक्रे परमेशानि रहस्यं स्थानमुत्तमम् || १७/३२ ||
सहस्रारे गुरोः पादे पद्मं ध्यात्वा प्रयत्नतः |
पञ्चाशद्वर्णसङ्केतं यः कुर्यान्मानवः प्रिये || १७/३३ ||
केशवं वशयेद्देवि रहस्येनाधुना ध्रुवम् |
मोहयेच्चञ्चलापाङ्गि रुद्रं कालानलप्रभम् || १७/३४ ||
सर्वञ्चराचरं विश्वं सहसा मोहमानयेत् |
एतत्ते कथितं देवि वर्णमोहनमुत्तमम् || १७/३५ ||
अज्ञात्वा मोहनं तत्त्वं प्रजपेद् यदि पार्वति |
तस्मै लोका गन्धर्वाश्च वैरभावं ब्रजन्ति वै || १७/३६ ||
प्रत्यक्षरमयं देवि कथितं वर्णमोहनम् |
अज्ञात्वा मोहनं तत्त्वं यः कुर्यादन्यमोहनम् || १७/३७ ||
सर्वं तस्य वृथा देवि नान्यथा तु कदाचन |
एतत्तत्वप्रभावाद्धि अचिरात् सिद्धिमाप्नुयात् || १७/३८ ||
गर्भमध्ये जपेन्मन्त्रं अनुलोमविलोमतः |
जपित्वा वर्णमेकञ्च स्वस्थानमानयेच्च तम् || १७/३९ ||
पुनर्वर्णं समाकृष्य कामिनीगर्भमध्यतः |
प्रजपेदक्षरं देवि चन्द्रबिन्दुसमन्वितम् || १७/४० ||
पञ्चाशदक्षरञ्चैव भावयेच्च पृथक् पृथक् |
अनेन विधिना देवि यो जपेन्मन्त्रमुत्तमम् || १७/४१ ||
तस्य शीघ्रं भवेत् सिद्धिरन्यथा विफला भवेत् |
सम्भावं लिखितं देवि यथा भवति अक्षरम् || १७/४२ ||
तत्तदेव वरारोहे जपपूजा निरर्थकम् |
विशेषमन्त्रं वक्ष्यामि आनन्दपटले स्थितम् || १७/४३ ||
मन्त्रं श्रीमोहनं नाम पञ्चाशद्वर्णसंज्ञकम् |
ज्ञात्वा यः कुरुते देवि तस्य सिद्धिरदूरतः || १७/४४ ||
अन्यथा विफलं सर्वं रहस्यं सफलं नहि |

इति श्रीकामधेनुतन्त्रे देवदेवीसंवादे सप्तदशः पटलः ||



अष्टादशः पटलः
श्रीमहादेव उवाच

अथान्यत् संप्रवक्ष्यामि रहस्यं परमाद्भुतम् |
अज्ञात्वा वैष्णवो याति रौरवं वरवर्णिनि || १८/१ ||
एवं तत्त्वयुतं देवि यो जपेत् परमेश्वरीम् |
नवतत्त्वमयीं विद्यां यदा जपति पार्वति || १८/२ ||
तदैव सहसा सिद्धिर्जायते सुरसुन्दरि |
नवतत्त्वयुतं मन्त्रं ज्ञात्वा यः प्रजपेत् सकृत् || १८/३ ||
तदैव सहसा देवि विष्णुतुल्यो भवेद् ध्रुवम् |
प्रथमं कामिनीं ध्यात्वा हृत्पद्मे कमलेक्षणे || १८/४ ||
उच्चरेत् प्रथमं बीजं कामिनीं तदनन्तरम् |
पुनर्बीजं द्वितीयञ्च उच्चरेद् यत्नतः सुधीः || १८/५ ||
कामिनीञ्च ततो ध्यात्वा तृतीयं बीजमुच्चरेत् |
अनेन विधिना देवि कामिनीध्यानसंपुटम् || १८/६ ||
पुनर्ध्यानं ककारस्य अनुलोमेन पार्वति |
अनुलोमं यथा देवि विलोमञ्च तथा कुरु || १८/७ ||
एवं क्रमेण देवेशि यद्यदक्षरकं प्रिये |
कृत्वा यत्नाद् वरारोहे सर्वसिद्धीश्वरो भवेत् || १८/८ ||
सर्वेषां मन्त्रवर्णानां ध्यात्वा ध्यात्वा पृथक् पृथक् |
आद्यन्ते कामिनीं ध्यात्वा शिवशक्तिमयो भवेत् || १८/९ ||
अथवा चञ्चलापाङ्गि हृत्पद्मे कमलानने |
आदौ मध्ये तथा चान्ते बीजं दत्त्वा जपेत् प्रिये || १८/१० ||
तदैव सहसा देवि जायते देवविग्रहम् |
सदा निद्रातुरो मन्त्रः कलिकाले च भारते || १८/११ ||
रहस्यनेन चार्वङ्गि निद्राभङ्गो तदा भवेत् |
जपेदादौ वरारोहे त्रिवारमनुलोमतः || १८/१२ ||
विलोमेन त्रिवारञ्च ध्यात्वा जप्त्वा हृदम्बुजे |
अथान्यत् संप्रवक्ष्यामि निद्राभङ्गस्य लक्षणम् || १८/१३ ||
प्रथमं कामिनीं ध्यात्वा अन्ते च तदनन्तरम् |
दशधा प्रजपेन्मन्त्रं निद्राभङ्गाय पार्वति || १८/१४ ||
ततस्तु प्रजपेद् देवि प्रफुल्लं विश्वमोहनम् |
रहस्यनेन चार्वङ्गि जायते विष्णुविग्रहम् || १८/१५ ||
शङ्खचक्रधरं देवं शुद्धतत्त्वात्मकं प्रिये |
पीताम्बरधरं शान्तं प्रसन्नं मुखपङ्कजम् || १८/१६ ||
आजानुलम्बितकरं वनमालाविराजितम् |
त्रिभङ्गललिताकारं चारुचूडाविभूषितम् || १८/१७ ||
श्रीवत्सकौस्तुभोद्दीप्तं जायते विष्णुविग्रहम् |
अवतारं स्वयं कृष्णं ललिताञ्जनचिक्कणम् || १८/१८ ||
गोपीमण्डलमध्यस्थं नानासुखमयं हरिम् |
अथवा जायते देवि तस्माद्बीजाच्छुचिस्मिते || १८/१९ ||
कामिनीध्यानमात्रेण देवता जायते ध्रुवम् |
रहस्यमेतच्चार्वङ्गि कर्तव्यं हृदि मध्यतः || १८/२० ||
रहस्यानाञ्च सर्वेषां सारमेतन्न संशयः |
अथान्यत् संप्रवक्ष्यामि रहस्यं परमाद्भुतम् || १८/२१ ||
ध्यात्वा तु कामिनीनारीं प्रथमं हृदि मध्यतः |
तद्गर्भे भावयेन्मन्त्रं मनसा नगनन्दिनि || १८/२२ ||
तद्गर्भे भावयेद् देवं ध्यानमार्गेण सुन्दरि |
पुनश्च कामिनीं ध्यात्वा तस्मादाविर्भवेद् हरिः || १८/२३ ||
हरिरित्युपलक्षणं देवि सर्वेषामेव निर्मितम् |
निद्रायुक्तं महेशानि विद्यामन्त्रं भवेत् सदा || १८/२४ ||
तस्मात्तु निद्रारहितं प्रजपेद् यदि एकदा |
जपात् कोटिगुणं भद्रे सहसा लभते ध्रुवम् || १८/२५ ||
वामबाहोर्यदा वाहस्तदा निद्रातुरो मनुः |
चलते च यदा बाहोर्दक्षिणे वरवर्णिनि || १८/२६ ||
तदैव चञ्चलापाङ्गि त्यक्तनिद्रः सदा मनुः |
अत एव वरारोहे त्यक्तनिद्रं जपेत् सुधीः || १८/२७ ||

श्रीदेवी उवाच

पूजाकाले महादेव यदि निद्रातुरो भवेत् |
तत्कथं सिध्यते मन्त्रः किं कर्तव्यं तदा प्रभो || १८/२८ ||
प्रजपेत् केन विधिना न जपेद्वा वद प्रभो |

श्रीमहादेव उवाच

रहस्यमन्त्रं वक्ष्यामि आनन्दपटले स्थितम् || १८/२९ ||
द्वादशार्णमयं मन्त्रं निद्राभङ्गस्य दीपनम् |
रहस्यमन्त्रं चार्वङ्गि अज्ञात्वा विफलं भवेत् || १८/३० ||

इति श्रीकामधेनुतन्त्रे देवदेवीसंवादे अष्टादशः पटलः ||



ऊनविंशः पटलः

श्रीमहादेव उवाच

सन्देहो नैव कर्तव्यः पूजाकाले शुचिस्मिते |
सहसा कामिनीं ध्यात्वा तुरीयकूटमुच्चरेत् || १९/१ ||
तदैव सहसा देवि त्यक्तनिद्रो भवेन्मनुः |
प्रजपेद् दशधा देवि हृदये मनसापि वा || १९/२ ||
पूजाकाले महेशानि संत्यजेद् यदि दक्षिणम् |
प्रायश्चित्तं भवेत्तस्य मन्त्रस्य वरवर्णिनि || १९/३ ||
प्रायश्चित्तमिदं देवि कृत्वा मन्त्रं जपेद् यदि |
किं तस्य दक्षिणो बाहुस्तस्य निद्रातुरेण किम् || १९/४ ||
रहस्यमन्त्रं चार्वङ्गि पूजाकाले विनिर्णयम् |
रहस्यमेतच्चार्वङ्गि सर्वनिद्रासु मङ्ग्लम् || १९/५ ||
वामबाहोर्यदा वायुर्यदा च दक्षिणावहः |
रहस्यमेतच्चार्वङ्गि कृत्वा तु प्रजपेन्मनुम् || १९/६ ||
तदैव त्यक्तनिद्रा सा विद्या मन्त्रञ्च नान्यथा |
योगनिद्रामयी विद्या योगनिद्रामयो मनुः || १९/७ ||
विशेषमन्त्रं वक्ष्यामि आनन्दपटले स्थितम् |
अष्टाक्षरीं महाविद्यां दीपनीं मोक्षरूपिणीम् || १९/८ ||
सर्वसिद्धिमयो भूत्वा रहस्यफलमाप्नुयात् |
प्रजपेद् यदि निद्रायां किं तस्य जपपूजने || १९/९ ||
रहस्यनेन चार्वङ्गि निद्रां त्यक्त्वा सनातनी |
सुषुम्णामध्यमार्गेषु संस्थिता ब्रह्मरूपिणी || १९/१० ||
रहस्यमेतच्चार्वङ्गि अज्ञात्वा योजपेन्मनुम् |
तस्य पापमहं वक्ष्ये सावधानावधारय || १९/११ ||
शूद्रेण लिखितं देवि पटलं यत्तु पठ्यते |
यं यं नरकमाप्नोति तं तं प्राप्नोति मानवः || १९/१२ ||
द्वात्रिंशत्कोटिमध्येषु नरकेषु क्रमेण हि |
कोटिवंशान् समादाय पच्यन्ते मनुजाधमाः || १९/१३ ||
विप्रो वा क्षत्रियो वापि वैश्यो वा नगनन्दिनि |
पच्यन्ते नरके घोरे शूद्रस्य लिखनात् प्रिये || १९/१४ ||
तस्मात्तु शूद्रलिखितं पटलं न जपेत् सुधीः |
तस्मादावश्यकं देवि कामिनीध्यानमुच्चरेत् || १९/१५ ||
ततः सिद्धो भवेद् देवि विद्या मन्त्रं न चान्यथा |
कामिनीध्यानमात्रेण सर्वसिद्धिमयो भवेत् || १९/१६ ||
एकेनैव कृतार्थं स्याद् बहुभिः किमुपासते |
तव भक्त्या मयाख्यातं यद्गोप्यं भुवनत्रये || १९/१७ ||
कामधेनुमिदं ज्ञत्वा यदि पूजां समाचरेत् |
सफला सा भवेत् पूजा जपञ्च सफलं सदा || १९/१८ ||
अन्यथा प्रेतवद् दीक्षा पूजा च प्रेतवत् सदा |
प्रथमं कामिनीं ध्यात्वा जपपूजां समाचरेत् || १९/१९ ||
कामधेनोः फलं लब्ध्वा सदाशिवमयो भवेत् |
विष्णुरूपी स एव स्यान्महामाया स एव हि || १९/२० ||
शिवमन्त्रे विष्णुमन्त्रे शक्तिमन्त्रे शुचिस्मिते |
कामधेनुमिदं मन्त्रं प्रशस्तं सुरपूजिते || १९/२१ ||
एतत्ते कथितं देवि सारात्सारं परात्परम् |
यत् कृत्वा साधको याति दुर्लभं मोक्ष्मन्दिरम् || १९/२२ ||
विशेषमन्त्रं वक्ष्यामि विद्यां श्रीकामरूपिणीम् |
अज्ञात्वा कामिनीध्यानं सहसा व्यर्थतामियात् || १९/२३ ||
तद्ध्यानं चञ्चलापाङ्गि आनन्दपटले स्थितम् |
तस्मादवश्यं जप्तव्यं सततं कामदीपनीम् || १९/२४ ||

इति श्रीकामधेनुतन्त्रे देवदेवीसंवादे ऊनविंशः पटलः ||




विंशतितमः पटलः
श्रीदेवी उवाच

मन्त्रसमर्पणं तत्त्वं कथ्यतां देवपूजित |
कस्मै समर्पयेन्मन्त्रं वद देव पुरातन || २०/१ ||
अर्पयेन्मन्त्रतेजांसि देवेश यदि शूलधृक् |
निस्तेजा साधको देव तदैव सहसा भवेत् || २०/२ ||
किं जप्येन च पूजायां पुरश्चर्येण किं पुनः |
तन्मे वद महाभाग कृपया परमेश्वर || २०/३ ||

श्रीमहादेव उवाच

साधु पृष्टं त्वया भद्रे अधुना कथयामि ते |
जपित्वा चञ्चलापाङ्गि ध्यायेत् परमकामिनीम् || २०/४ ||
मन्त्रवर्णं वरारोहे कामिनीगजगह्वरे |
चन्द्रबिन्दुयुतं कृत्वा एकैकं दशधा जपेत् || २०/५ ||
अनुलोमे यथा देवि विलोमेन तथा कुरु |
अतः परं वरारोहे ज्ञात्वा तु कामिनीं पराम् || २०/६ ||
वियद्ब्रह्म महेशानि कामिनीं दशधा जपेत् |
कामिनीगर्भमध्ये तु वियद्वह्नियुतं प्रिये || २०/७ ||
प्रजपेद् दशधा भक्त्या बीजतत्त्वं तदा भवेत् |
ततस्तु कामिनीतत्त्वं ललाटे परिचिन्त्य वै || २०/८ ||
एवञ्च मातृकास्थाने कामिनीं भावयेत् प्रिये |
पञ्चाशन्मातृकास्थाने प्रजपेन्मातृकामनुम् || २०/९ || 
बीजस्य ज्योतिःपुञ्जेषु कामिनीं सत्वरं कुरु |
दशधा प्रजपेद् देवि कामिनीबीजमुत्तमम् || २०/१० ||
कामिनीगर्भमध्ये तु ज्योतिस्तत्त्वे जपं कुरु |
ज्योतिस्तत्त्वं वरारोहे स्वयं जीवः सनातनः || २०/११ ||
कामिनीजीवतत्त्वं च कृत्वा वै साधकः सुधीः |
सहस्रारे महापद्मे संस्थाप्य कामिनीं पराम् || २०/१२ ||
गुह्यातिगुह्यगोप्त्री त्वमिति मन्त्रेण मन्त्रवित् |
देवस्य दक्षिणे हस्ते बाह्यपूजादि चार्पयेत् || २०/१३ ||
देव्या वामे वरारोहे समर्प्य फलभाग् भवेत् |
जपस्य सर्वतेजांसि देवहस्ते यदि प्रिये || २०/१४ ||
समर्प्य परमेशानि तेज(स्य? स्वी) साधको भवेत् |
किं तस्य पूजने भद्रे किं जापेन वरानने || २०/१५ ||
यत्किञ्चिद् दीयते देवि सर्वं ब्रह्मणि लीयते |
विद्यामन्त्रं जपेद् देवि तत्तेज उपजायते || २०/१६ ||
जीवतत्त्वं विना देवि देवहस्ते कदाचन |
नार्पयेच्चञ्चलापाङ्गि देव्या हस्ते विशेषतः || २०/१७ ||
तस्मात् प्रयत्नतो देवि जीवतत्त्वं कुरु ध्रुवम् |
जीवतत्त्वं विना देवि यदि देवं समर्पयेत् || २०/१८ ||
जपञ्च विफलं देवि पूजा च विफला भवेत् |
गन्धपुष्पादिकं यद्यत् सर्वं देवे समर्पयेत् || २०/१९ ||
जपतत्त्वं वरारोहे सर्वतेजोमयं सदा |
यदि तेजो वरारोहे देव्यै देवाय अर्पयेत् || २०/२० ||
यस्तेजः सततं जीवः कथं सिद्धिः प्रजायते |
यस्तेजस्त्वर्पयेद् देवि पुनरागमनं प्रिये || २०/२१ ||
दुर्लभं चञ्चलापाङ्गि तत्तेजः साधकस्य च |
वृथा भयं वरारोहे कुरुते नरपामरः || २०/२२ ||
समर्पणमविज्ञाय प्रजपेद् यदि कोटि वा |
देवतातेजमध्ये तु तत्तेजोपविशेत् प्रिये || २०/२३ ||
भावयेद् बहुयत्नेन यथा सर्वस्वसंपुटम् |
एतत्ते कथितं देवि जीवतत्त्वं सुदुर्लभम् || २०/२४ ||
यत् कृत्वा साधको याति दुर्लभं ब्रह्मविग्रहम् |
श्रुत्वा तन्त्रमिदं देवि रहस्यफलमाप्नुयात् |
तन्त्रमेतद् वरारोहे शृणुयात् साधकः प्रिये || २०/२५ ||

इति कामधेनुतन्त्रे देवदेवीसंवादे विंशतितमः पटलः ||



एकविंशतितमः पटलः

श्रीमहादेव उवाच

चन्द्रसूर्योपरागे च प्रजपेद् यदि कामिनीम् |
तदैव सहसा सिद्धिर्जायते नात्र संशयः || २१/१ ||
प्रथमं कामिनीं जप्त्वा स्वविद्याः प्रजपेद् यदि |
ततस्तु कामिनीं जप्त्वा सर्वसिद्धीश्वरो भवेत् || २१/२ ||
अज्ञात्वा कामिनीतत्त्वं न जपेद् ग्रहणे प्रिये |
न जपेद् ग्रहणे भद्रे अज्ञानाद् यदि मूढधीः || २१/३ ||
सर्वं तस्य वृथा देवि पूर्वधर्मो विनश्यति |
चन्द्रपर्व सूर्यपर्व न विचार्यं कदाचन || २१/४ ||
सूर्यपर्व वरारोहे न पश्येद् यदि पामरः |
अस्तु तावत् परो धर्मः पूर्वधर्मो विनश्यति || २१/५ ||
न पश्येद् यदि अज्ञानात् सर्वारिष्टमवाप्नुयात् |
सर्वारिष्टमयः सोऽपि सर्वपापमयः सदा || २१/६ ||
तस्मादवश्यं कर्तव्यं चन्द्रपर्वनिरीक्षणम् |
सूर्यपर्व तथा देवि निरीक्ष्यमोक्षमाप्नुयात् || २१/७ ||
अज्ञात्वा यदि मूढात्मा राश्यादिगणनं प्रिये |
विचार्य चञ्चलापाङ्गि न पश्येद् ग्रहणं यदि || २१/८ ||
पूर्वपूर्वार्जितं पुण्यं तत्क्षणादेव नश्यति |
चन्द्रसूर्योपरागञ्च तस्माद् यत्नान्निरीक्षयेत् || २१/९ ||
किं तस्य कामिनीं भद्रे रम्याणि च पुनश्च किम् |
ग्रासादिमुक्तिपर्यन्तं जप्त्वा सिद्धीश्वरो भवेत् || २१/१० ||
न जपेद् यदि चार्वङ्गि रौरवं नरकं व्रजेत् |
तत्काले चञ्चलापाङ्गि परंब्रह्मस्वरूपिणी || २१/११ ||
तस्मिन् काले वरारोहे क्षत्रादिजातिभेदतः |
आचण्डालप्रभृतयो द्विजतुल्या भवन्ति हि || २१/१२ ||
द्विजास्तु चञ्चलापाङ्गि साक्षाद् ब्रह्म न संशयः |
तत्र का गणना देवि चाण्डालानां वरानने || २१/१३ ||
तस्माद् यत्नेन कर्तव्यं चन्द्रपर्वनिरीक्षणम् |
चन्द्रकोटिगुणं देवि सूर्यो दशगुणं भवेत् || २१/१४ ||
तत्र यद् यत् कृतं कर्म जपहोमादिकं प्रिये |
अक्षयं तद् भवेद् देवि वचनं मम निश्चितम् || २१/१५ ||
राश्यादिगणनं त्यक्त्वा यवनैर्दृश्यते यदि |
यवनस्य तथा सिद्धिर्जायते पृथिवीतले || २१/१६ ||
दीक्षितोऽदीक्षितो वापि दृष्ट्वा स्नानं समाचरेत् |
तदेवमक्षयं स्नानं गङ्गास्नानं भवेत् प्रिये || २१/१७ ||
विष्ठाकूपस्थितं तोयं गङ्गोदकसमं स्मृतम् |
प्रशस्तं ग्रहणे काले नान्यथा वचनं मम || २१/१८ ||
षष्ठमासाधिको बालो यदि स्याद् वरवर्णिनि |
ग्रहणे चन्द्रसूर्यस्य तस्य स्नानं प्रशस्यते || २१/१९ ||
अकृत्वा स्नानदानञ्च सहसा नरकं ब्रजेत् |
स भ्रष्टः स च पापिष्ठः सहसा सूकरः प्रिये || २१/२० ||
तस्यान्नमुदकं देवि मूत्रं शोणितवत् प्रिये |
जायते नात्र सन्देहो मम वाक्यं वरानने || २१/२१ ||
ब्राह्मणोऽब्राह्मणो वापि चन्द्रपर्वणि पार्वति |
चाण्डालप्रभृतिः सर्वो ब्रह्मगोत्रे प्रवर्तते || २१/२२ ||
ब्रह्मेति नाम सर्वेषां राश्यादिगणनं कुतः |
तस्मात्तु चञ्चलापाङ्गि संकल्पं नैव कारयेत् || २१/२३ ||
मासपक्षतिथीनां च निमित्तानि च पार्वति |
न विचार्यं वरारोहे ग्रहणे चन्द्रसूर्ययोः || २१/२४ ||
ग्रासादिमोक्षकाले तु कुतो मासः कुतस्तिथिः |
स कालः परमं ब्रह्म सर्वेषामक्षिगोचरम् || २१/२५ ||
तत् कथं पामरो लोको राश्यादिगणनं प्रिये |
उपरागं परित्यज्य यश्चान्यं परिचिन्तयेत् || २१/२६ ||
स भवेद्रौरवे मग्नो ब्रह्मणश्चानुमानतः |
रौरवात् पुनरागत्य पापयोनौ प्रवर्त्तते || २१/२७ ||
निष्कृतिर्नास्ति चार्वङ्गि तस्यापि च कदाचन |
तस्मात् सर्वं परित्यज्य चन्द्रपर्वनिरीक्षणम् || २१/२८ ||
चन्द्रपर्वे यथा देवि सूर्यपर्वे तथा प्रिये |
तत्र श्राद्धादिकं त्यक्त्वा विद्यां मन्त्रं जपेत् प्रिये || २१/२९ ||
अन्यथा नरकं याति पितॄन् सप्त नयत्यधः |
अपरैकं प्रवक्ष्यामि रहस्यं शृणु सुन्दरि || २१/३० ||
अकारादिक्षकारान्तं प्रतिपद्मे निरीक्षयेत् |
ततस्तु प्रजपेत् शून्यं चन्द्रबिन्दुकसंयुतम् || २१/३१ ||
ततस्तु हृदयाकाशे शून्ये ज्योतिर्मयेषु च |
अनुलोमविलोमेन मातृकां प्रजपेत् सुधीः || २१/३२ ||
ततस्तु साधकश्रेष्ठो वराटोपरि मातृकाम् |
पद्मबीजं यथा देवि वर्णबीजं प्रभावयेत् || २१/३३ ||
चन्द्रबीजं पुटं कृत्वा जपेद् वर्णं प्रसन्नधीः |
अनुलोमविलोमेन जप्त्वाऽमृतमयो भवेत् || २१/३४ ||
केवलं कामिनीं ध्यात्वा प्रफुल्लवदनान्तरम् |
बीजादुत्पद्यते देवो देवी वा कमलेक्षणे |
ततस्तु देवतां ध्यात्वा निरीक्ष्य देवविग्रहम् || २१/३५ ||

इति श्रीकामधेनुतन्त्रे महादेवमहादेवीसंवादे
एकविंशतितमः पटलः ||



त्रयोविंशतितमः पटलः

(ग्रन्थपातः)

....ष्यां च वरारोहे गङ्गायां स्नानमित्यहम् || २२/१० ||
करिष्ये इति सङ्कल्प्य शिरःस्नानं समाचरेत् |
अर्को धर्मपयो देवि अमाद्यर्थश्च मूर्तिमान् || २२/११ ||
श्रवणञ्च महेशानि साक्षात्कामश्च मूर्तिमान् |
व्यतीपाते महेशानि स्वयं मुक्तिः प्रगीयते || २२/१२ ||
माद्यस्तु चञ्चलापाङ्गि स्वयमेवेश्वरः प्रिये |
एतत्तु कथितं देवि पञ्चयोगं परात्परम् || २२/१३ ||
कायिकं वाचिकं चैव मानसं पापमुत्कटम् |
तत्सर्वं नाशमायाति गङ्गादर्शनमात्रतः || २२/१४ ||
कोटिजन्मार्जितं पापं जलस्पर्शाद्विनश्यति |
ततस्तु मौशलं स्नानं कोटिसूर्यग्रहैः समम् || २२/१५ ||
फलमाप्नोति चार्वङ्गि नात्र कार्या विचारणा |
आचम्य चञ्चलापाङ्गि वासं कुर्याद् विशालधीः || २२/१६ ||

इति कामधेनुतन्त्रे त्रयोविंशतितमः पटलः |



चतुर्विंशतितमः पटलः

श्रीमहादेव उवाच

मालारहस्यं योगेन्द्र कथयस्व कृपानिधे |
यदि पुच्छं जपेन्मन्त्रं हरेत्तेजांसि तन्मुखम् || २३/१ ||
मुखाद् यदि जपेन्मन्त्रं पुच्छं च चञ्चलं भवेत् |
चञ्चले सति चार्वङ्गि तज्जपं निष्फलं भवेत् || २३/२ ||

श्री-ईश्वर उवाच

पञ्चाशदक्षरं देवि ग्रथितं चित्रनाडिषु |
स्थाप्याक्षराणि पूर्वे वै सुमेरुं पुच्छं तर्पिणम् || २३/३ ||
सुमेरुं च परिचार्यय अकरादिकमाज्जपेत् |
मालारहस्यं चार्वङ्गि सुगोप्यं भुवनत्रये || २३/४ ||
जातिभेदं जीवभेदं सुगोप्यं च यथा प्रिये |
जीवमन्त्रं प्रवक्ष्यामि सावधानावधारय || २३/५ ||
जीवमन्त्रं जातिमन्त्रं समानमिति निर्णयः |
यथा ध्यानं महेशानि समानं याति जीवने || २३/६ ||
तद्ध्यानं शृणु चार्वङ्गि सावधानावधारय |
द्विभुजां स्वर्णगौराङ्गीं पीतपट्टपरिच्छदाम् || २३/७ ||
नानाभरणदीप्ताङ्गीं किशोरीं नवयौवनाम् |
कृष्णगन्धप्रलिप्ताङ्गीं सूर्यासनकृताश्रयाम् || २३/८ ||
तनुदीर्घाङ्गुलीं भास्वन्नखचन्द्रविराजिताम् |
कदम्बकोरकाकारस्तनद्वयविराजिताम् || २३/९ ||
कर्पूरसकलोन्मिश्रताम्बूलपूरिताननाम् |
कटाक्षलक्षसंयुक्तभूलतापरिशोभिताम् || २३/१० ||
सिन्दूरतिलकोद्दीप्तां कुटिलालकमण्डिताम् |
सर्वत्रैवं महेशानि जीवं तिष्ठति सर्वदा || २३/११ ||
द्विजादीनां च सर्वेषामानन्दपटले स्थिताम् |
एतत्ते कथितं सर्वं कामधेनोर्मतं प्रिये || २३/१२ ||

इति श्रीकामधेनुतन्त्रे देवीश्वरसंवादे चतुर्विंशतितमः पटलः ||

समाप्तमिदं कामधेनुतन्त्रम्

###########   END OF FILE  #######