####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00026
Uniform title: kaṅkālamālinītantra
Main title: kaṅkālamālinītantram
Editor : Chatterjee

Description: 
From the edition by Chatterjee published in Calcutta end of 19th century  Script Bengali


Notes: 
Transcribed by the staff of Muktabodha under the supervision of Mark S.G. Dycskowski.  Revision 0: 28/01/2007  

Publisher : 
Publication year : Pre-1900
Publication city : Calcutta
Publication country : India
####################################################

******************************************************************************************
* ट्रन्स्च्रिबेद् ब्य थे स्तff ओf ंउक्तबोध 
* fरोम् थे एदितिओन् ब्य Cहत्तेर्जेए पुब्लिस्हेद् इन् Cअल्चुत्त एन्द् ओf १९थ् चेन्तुर्य
* उन्देर् थे सुपेर्विसिओन् ओf ंअर्क् ष्.ङ्. ड्यच्श्कोwस्कि
* ष्च्रिप्त् Bएन्गलि
* रेविसिओन् ० ञनुअर्य २८, २००७
* ःअर्वर्द्-Kयोतो त्रन्स्लितेरतिओन्
*****************************************************************************************

कङ्कालमालिनीतन्त्रम्


ओं नमः श्रीगुरवे


श्रीभैरवी उवाच


त्रिपुरेश महेशान पार्वतीप्राणवल्लभ |

जगद्वन्द्य शूलपाणे वर्णानां कारणं वद || १ ||


श्रीभैरव उवाच


कथयामि वरारोहे वर्णानां भेदमुत्तमम् |

न प्रकाश्यं महादेवि ! तव स्नेहात् सुभाषिणि || २ ||

यज्ज्ञात्वा योगिनो यान्ति निर्गुणत्वं मम प्रिये !

तच्छृणुश्व स्वरूपेण महायौवनगर्विते || ३ ||

शब्दब्रह्मस्वरूपं तद् आदिक्षान्तं जगत्प्रभुः |

विद्युद्जिह्वा करालास्या गर्जिनी धूम्रभैरवी || ४ ||

कालरात्रिर्विदारी च महारौद्री भयंकरी |

संहारिणी करालिनी ऊर्ध्वकेश्युग्रभैरवी || ५ ||

भीमाक्षी डाकिनी रुद्रडाकिनी चण्डिकेति च |

एते वर्णाण् स्वरा ज्ञेयाः कौलिनि व्यंजनान् शृणु || ६ ||

क्रोधीशो वामनश्चण्डो विकार्युन्मत्तभैरवः |

ज्वालामुखो रक्तदंष्ट्रो हसिताङ्गो वडवामुखः || ७ ||

विद्युन्मुखो महाज्वालः कपाली भीषणो रुरुः |

संहारी भैरवो दण्डी वलिभुगुग्रशूलधृक् || ८ ||

सिंहनादी कपर्दी च करालाग्निर्भयङ्करः |

बहुरूपी महाकालो जीवात्मा क्षतजोक्षितः || ९ ||

बलभेदी रक्तपश्च चण्डीशो ज्वलनध्वजः |

वृषध्वजो व्योमवक्त्रस्त्रैलोक्यग्रसनात्मकः || १० ||

एते च व्यञ्जना ज्ञेयाः कादिक्षान्ताः क्रमादिताः |

अकारादिक्षकारान्ता वर्णास्तु शिवशक्तयः || ११ ||

पञ्चाशच्च इमे वर्णा ब्रह्मरूपाः सनातनाः |

येषां ज्ञानं विना वामे सिद्धिर्न स्याद् गुरुस्तनि || १२ ||

ते वर्णसागराः प्रोक्ता गुणत्रयमयाः शुभे |

विद्युद्जिह्वा मुखं कृत्वा चण्डिकान्तं नगात्मजे || १३ ||

सत्त्वगुणमया वर्णा रजोगुणमयान् शृणु |

क्रोधीशाद् दण्डिपर्यन्ता व्यञ्जना राजसाः स्मृताः || १४ ||

बलिभुग्वर्णमारभ्य त्रैलोक्यग्रसनावधि |

ज्ञेयास्तमःस्वरूपास्ते तेभ्यो जातान् शृणु प्रिये || १५ ||

गुशब्दश्चान्धकारः स्याद् रुशब्दस्तन्निरोधकृत् |

अन्धकारनिरोधित्वाद् गुरुरित्यभिधीयते || १६ ||

गकारः सिद्धिदः प्रोक्तो रकारः पापहारकः |

उकारस्तु भवेद् विष्णुस्त्रितयात्मा गुरुः स्वयम् || १७ ||

आदावसौ जायते च शब्दब्रह्मसनातनः |

वसुजिह्वा कालरात्र्या रुद्रडाकिन्यलङ्कृता || १८ ||

विषबीजं श्रुतिमुखं ध्रुवं हालाहलं प्रिये |

ओं चण्डीशः क्षतजारूढो धूम्रभैरव्यलङ्कृतः || १९ ||

नादबिन्दुसमायुक्तं लक्ष्मीबीजं प्रकीर्तितम् |

श्रीं | क्रोधीशं क्षतजारूढं धूम्रभैरव्यलङ्कृतम् || २० ||

नादबिन्दुयुतं देवि नामबीजं प्रकीर्तितम् |

ध्रीं (क्रोधीशोवलभृद्)(वलिभुग्) धूम्रभैरवीनादबिन्दुभिः || २१ ||

त्रिमूर्तिर्मन्मथः कामबीजं त्रैलोक्यमोहनम् |

क्री/ | क्षतजस्थो व्योमवक्त्रो थूम्रभैरव्यलङ्कृतः || २२ ||

नादबिन्दुसुशोभाढ्य मायालज्जाह्वयं स्मृतम् |

क्रीं | व्योमास्यञ्ज विदारीस्थं नादबिन्दुविराजितम् || २३ ||

कूर्चकालं क्रोधबीजं जानीहि वीरवन्दिते |

हू/ | व्योमास्यः कालरात्र्याढ्यो वर्मबिद् बिन्दुसंयुतः || २४ ||

कथितं वचनं बीजं कुलाचारप्रियेऽमले |

दू/ | व्योमास्यं क्षतजारूढं डाकिन्या नादबिन्दुभिः || २५ ||

ज्योतिर्मन्त्रं समाख्यातं महापातकनाशनम् |

द्रा/ | नादबिन्दुसमायुक्तां समादायोग्रभैरवीम् || २६ ||

भौतिकं वाग्भवं बीजं विद्धि सारस्वतं प्रिये |

ऐं प्रलयाग्निर्महाजालः ख्यातोऽस्त्रमनुः शिवे || २७ ||

रक्तक्रोधीशभीमाख्योऽङ्कुशोऽयं नादबिन्दुमान् |

क्रौ/ | द्विठः शिवो वह्नि जाया स्वाहा ज्वलनवल्लभा || २८ ||

स्वाहास्वाहासंयुतं धूम्रभैरव्या रक्तस्य बलिभोजनम् |

नादबिन्दुसमायुक्तं किङ्किणीबीजमुत्तमम् || २९ ||

द्री/ | नादबिन्दुसमायुक्तं रक्तस्थं बलिभोजनम् |

करालास्यासनोपेतं विशिकाख्यं महामनुम् || ३० ||

दू/ | विदार्या नेक्षितो गुह्ये वलिभुक् क्षतजोक्षितः |

नादबिन्दुसमायुक्तो विज्ञेयः पिशिताशनः || ३१ ||

धूमोज्ज्वलकरालाग्नि ऊर्ध्वकेशीन्दुबिन्दुभिः |

युगान्तकारकं बीजं वीरपत्निप्रकाशितम् || ३२ ||

संहारिण्या स्थितञ्चोर्ध्वं कशिनन्तु कपर्दिनम् |

नादबिन्दुसमायुक्तं बीजं बैतालिकं स्मृतम् || ३३ ||

सनादबिन्दुक्रोधीशं गुह्ये संहारिणीस्थितम् |

कम्पिनीबीजमित्युक्तं चण्डिकाख्यं मनोहरम् || ३४ ||

कपर्दिनं समादाय क्षतजोक्षितसंस्थितम् |

संयुक्तं धूम्रभैरव्या ध्वाङ्क्षोऽयं नादबिन्दुमान् || ३५ ||

प्रीं | कदलीद्वयमादाय महाकालेन मण्डितम् |

सनादस्तु नमित्युक्तं चण्डिकाख्यं पयोधरम् || ३६ ||

ठ/ ठ/ | प्रलयाग्निस्थितो धूमध्वजो गुह्येशबिन्दुमान् |

संयुक्तो धूम्रभैरव्या स्मृता फेत्कारिणी प्रिये || ३७ ||

स्फीं | क्षतजस्थं व्योमवक्त्रं बिन्दुखण्डेन्द्वलङ्कृतम् |

खद्योतमिति विख्यातं ग्रसिनीकालरात्रियुक् || ३८ ||

द्रू/ | क्षतजोक्षितमारूढं नादबिन्दुसमन्वितम् |

विदारीभूषितं देवि बीजं वैवस्वतात्मकम् || ३९ ||

|| इति दक्षिणाम्नाये सार्घलक्षग्रन्थे कङ्कालमालिनीतन्त्रे 
प्रथमः पटलः || १ ||

अथ द्वितीयः पटलः


श्रीपार्वती उवाच


देव देव महादेव नीलकण्ठ तपोधन |

योनिमुद्रां महादेव तत्त्वत्रयं परात्परम् |

एतदेव महादेव कथ्यतां मे पिनाकधृक् || १ ||


श्री-ईश्वर उवाच


शृणु वक्ष्यामि देवेशि दासोऽहं तव सुव्रते |

अतिगुह्यं महापुण्यं तत्त्वत्रयं वरानने || २ ||

सारात् सारं परं गुह्यमतिगोप्यं सुनिश्चितम् |

शङ्कापि जायते देवि कथं तत्कथयाम्यहम् || ३ ||

कथयामि महेशानि आज्ञया तव भामिनि |

न चेत् तत् कथ्यते देवि तव क्रोधः प्रजायते || ४ ||

त्वया क्रोधे कृते देवि हानिः स्यान्मम कामिनि |

मन्त्रार्थं मन्त्रचैतन्यं धर्मार्थकामदं प्रिये || ५ ||

योनिमुद्रा महेशानि तृतीयं ब्रह्मरूपिणी |

अज्ञात्वा यो जपेन्मन्त्रं नहि सिद्धिः प्रजायते || ६ ||

ज्ञात्वा प्रारभ्य कुर्वीत ह्यकुर्वाणो विनश्यति |

योनिमुद्रा महेशानि साक्षान्मोक्षप्रसाधिनी || ७ ||

ततो योनिर्महेशानि प्रिया मम यथा प्रिये |

सततं परमेशानि दासोऽहं तव योनिना || ८ ||

तव योनिप्रसादेन मृत्युं जित्वा वरानने |

मृत्युज्जयोऽहं देवेशि सततं कमलानने || ९ ||

तव योनौ महेशानि ब्रह्माण्डं सचराचरम् |

तिष्ठन्ति सततं देवि ब्रह्माद्यास्त्रिदिवौकसः || १० ||

मयूरस्य महेशानि पुच्छे कृत्वा च अद्भुतम् |

योन्याकारं महेशानि दृष्ट्वा कृष्णः शुचिस्मिते || ११ ||

शिरे धृत्वा वरारोहे त्रैलोक्यं वशमानयेत् |

तव योनिं महेशानि भावयामीत्यहर्न्निशम् || १२ ||

तत्रैव दृष्ट्वा ब्रह्माण्डं नान्यं पश्यामि कामिनि |

कर्पूरपुलकोद्भूतं तव योनिपुरं परम् || १३ ||

तव योनिर्महेशानि तत्त्वत्रयसुपूजितम् |

रेतोरजःसमायुक्तं साक्षान्मन्मथमन्दिरम् || १४ ||

न जाने किं कृतं कर्म कालिके कमलेक्षणे |

तव योनौ महादेवि अत एव वरानने || १५ ||

योनिमुद्रां योनिबीजं सततं परमेश्वरि |

अहं मृत्युज्जयो देवि योनिमुद्राप्रसादतः || १६ ||

योनिबीजं महेशानि निगदामि शृणु प्रिये |

प्रथमे परमेशानि योगिनीं रुद्रयोगिनीम् || १७ ||

उत्कृत्य वहुयत्नेन बलबीजयुतं कुरु |

विन्द्वर्धचन्द्रसंयुक्तं बीजं त्रैलोक्यमोहनम् || १८ ||

बद्ध्वा तु योनिमुद्रां वै पूर्वोक्तक्रमतः प्रिये |

योनिबीजं महेशानि अष्टोत्तरशतं जपेत् || १९ ||

अष्टोत्तरशतं जप्त्वा यत् फलं लभते प्रिये |

माहात्म्यं तस्य देवेशि वक्तुं को वा क्षमो भवेत् || २० ||

यः करोति प्रसन्नात्मा रहस्ये योनिरूपिणीम् |

ब्रह्माण्डं पूजयेत् ते न ब्रह्माद्यास्त्रिदिवौकसः || २१ ||

तव योनिर्महेशानि परं ब्रह्मस्वरूपिणी |

तव योनिर्महेशानि भवस्य मोहिनी प्रिये || २२ ||

तव योनिर्महेशानि सिद्धिसूत्रेण वेष्टयेत् |

सिद्धिसूत्रं महेशानि त्रिप्रकारं वरानने || २३ ||

ईडा च पिङ्गला चैव सुषुम्नात्रितयं तथा |

सदानन्दमयीं योनिं नानासुखविलासिनीम् || २४ ||

शृङ्गारसमये देवि नान्तं गच्छामि पार्वति |

मम लिङ्गो महेशानि भिनत्ति सकलं जगत् || २५ ||

तथापि परमेशानि नान्तं गच्छामि कामिनि |

तव योनिर्महेशानि न जाने कीदृशीं गतिम् || २६ ||

तव योनिर्महेशानि  आद्या प्रकृतिरूपिणी |

सदा कुण्डलिनीं योनिमहाकुण्डलिनीं पराम् || २७ ||

यः सदा परमेशानि योनिं दृष्ट्वा वरानने |

जपेद् बीजं वरारोहे भगारव्यं भगरूपिणीम् || २८ ||

योनिं बद्ध्वा महेशानि भगबीजेन पार्वति |

अष्टोत्तरशतं जप्त्वा मम तुल्यो भवेत् प्रिये || २९ ||

तव योनौ महेशानि रमणं यत्नतश्चरेत् |

तस्या रमणमात्रेण ब्रह्मविष्णुशिवात्मकः |

स एव धनवान् वाग्मी वागीशसमतां व्रजेत् || ३० ||


श्रीदेवी उवाच


नीलकण्ठ महादेव रहस्यं कृपया वद |

यदि नो कथ्यते देव विमुञ्चामि तदा तनुम् || ३१ ||


श्री ईश्वर उवाच


शृणु पार्वति कृ.प्णाङ्गि खज्जनाक्षि सुलोचने |

गोपनीयं रहस्यं हि सर्वकामफलप्रदम् || ३२ ||

तिस्रः कोट्यस्तदर्धेन शरीरे नाडिका मताः |

तासु मध्ये दश प्रोक्तास्तासु तिस्रो व्यवस्थिताः || ३३ ||

प्रधाना मेरुदण्डाग्रे चन्द्रसूर्याग्निरूपिणी |

मज्जयित्वा सुषुम्नायामहं योगी सुरेश्वरि || ३४ ||

षट्चक्रे परमेशानि भावयेद् योनिरूपिणीम् |

प्रथमं परमेशानि आधारयुगपत्रकम् || ३५ ||

वादिसान्त्यैश्चतुर्वर्णैर्द्रुतहेमसमप्रभम् |

तडित्कोटिप्रभाकारं स्थानं परमदुर्लभम् || ३६ ||

तत् कर्णिकायां देवेशि त्रिकोणमतिसुन्दरम् |

इच्छाज्ञानक्रियारूपं ब्रह्मविष्णुशिवात्मकम् || ३७ ||

मध्ये स्वयं भूलिङ्गं च कुण्डलीवेष्टितं सदा |

त्रिकोणाख्यं तु देवेशि लकारं चिन्तयेत् तथा || ३८ ||

ब्रह्माण्डं तत्र संचिन्त्य कामदेवं च चिन्तयेत् |

बीजं तत्रैव निश्चिन्त्यं  योनावादानमेव च || ३९ ||

पदे च गमनं पायौ विसर्गं नसि कामिनि |

घ्राणं संचिन्त्य देवेशि महेशि प्राणवल्लभे || ४० ||

डाकिनीं परमाराध्यां शक्तिं च भावयेत् ततः |

एतानि गिरिजे मातः पृथ्वीं नीत्वा गणेश्वरि || ४१ ||

तन्मध्ये लिङ्गरूपं हि कुण्डलीवेष्टितं प्रिये |

तत्र कुण्डलिनीं नित्यां परमानन्दरूषिणीम् || ४२ ||

तत्र ध्यानं प्रकुर्वीत सिद्धिकामो वरानने |

कोटिचन्द्रप्रभाकारां परंब्रह्मस्वरूपिणीम् || ४३ ||

चतुर्भुजां त्रिनेत्राञ्च वराभयकरां तथा |

तथा च पुस्तकं वीणां धारिणीं सिंहवाहिनीम् || ४४ ||

गच्छन्ति स्वासनं भीमां नानारूपधरां पराम् |

पूर्वोक्तां पृथ्वीं धन्यां गन्धे नीत्वा महेश्वरि || ४५ ||

आकृष्य प्रणवेनैव जीवात्मानं नगेन्द्रजे |

कुण्डलिन्या सह प्रेमे गन्धमादाय साधकः || ४६ ||

सोऽहमिति मनुना देवि स्वाधिष्ठाने प्रवेशयेत् |

तत्पद्मं लिङ्गमूलस्थं सिन्दूराभं च षड्दलम् || ४७ ||

स्फुरद्विक्रमसंकाशैर्वादिनान्तैः सुशोभितम् |

तत्कर्णिकायां वरुणं तत्रापि भावयेद्धरिम् || ४८ ||

युवतिं राकिणीं शक्तिं चिन्तयित्वा वरानने |

रसनेन्द्रिययूपस्थं जलञ्च कामलालसे || ४९ ||

एतानि गन्धञ्च शिवे रसे नीत्वा विनोदिनीं |

जीवात्मानं कुण्डलिनीं रसञ्च मणिपूरके || ५० ||

नीत्वा परमयोगेन तत्पद्मं दिग्दलं प्रिये |

नीलवर्णं तडिद्रूपं डादिफान्तैश्च मण्डितम् || ५१ ||

तत्कर्णिकायां सुश्रोणि वह्निं सञ्चिन्त्य साधकः |

तत्र रुद्रः स्वयं कर्ता संहारे सकलस्य च || ५२ ||

लाकिनीशक्तिसंयुक्तो भावयेत् तं मनोहरे |

तत्र चक्षुरिन्द्रियञ्च कृत्वा तेजोमयं यजेत् || ५३ ||

एतं रसञ्च सुभगे रूपं नीत्वा महाभागे |

जीवात्मानं कुण्डलिनीरूपञ्चानाहते नयेत् || ५४ ||

बन्धूकपुष्पसंकाशं तत्पद्मं द्वादशारकम् |

कादिठान्तैः स्फुरद्वर्णैः शोभितां हरवल्लभाम् || ५५ ||

तत्कर्णिकायां वायुञ्च जीवस्थाननिवासिनम् |

तत्र योनेर्मण्डलञ्च बाणलिङ्गविराजितम् || ५६ ||

काकिनीशक्तिसंयुक्तं तत्र वायोस्त्वगिन्द्रियम् |

एतद् रूपञ्च संयोज्य स्वर्गे रमणकामिनि || ५७ ||

जीवकुण्डलिनीं स्पर्शं विशुद्धौ स्थापयेत् ततः |

धूम्रवर्णं कण्ठपद्मं षोडशस्वरमण्डितम् || ५८ ||

तत्कर्णिकायामाकाशं शिवञ्च कारिणीयुतम् |

वाचं श्रोत्रं च आकाशे संस्थाप्य नगनन्दिनि || ५९ ||

एतानि स्पर्शं शब्दे च नीत्वा शाङ्करि मत्प्रिये |

जीर्व कुण्डलिनीं शब्दञ्चाज्ञापत्रे निधापयेत् || ६० ||

नेत्रपद्मं शुक्लवर्णं द्विदलमक्षभूषितम् |

तत्कर्णिकायां त्रिकोणं यद् बाणलिङ्गञ्च सङ्गतम् || ६१ ||

मनश्चात्र सदा भाति हाकिनीशक्तिलाञ्छितम् |

बुद्धिप्रकृत्यहङ्कारलक्षितं तेजसा परम् || ६२ ||

जीवात्मानं कुण्डलिनीं मनश्चापि महेश्वरि |

सहस्रारे महापद्मे मनश्चापि नियोजयेत् || ६३ ||

सहस्रारं नित्यपद्मं शुक्लवर्णमधोमुखम् |

अकारादिक्षकारान्तैः स्फुरद्वर्णैर्विराजितम् || ६४ ||

तत्कर्णिकायां देवेशि अन्तरात्मा ततो गुरुः |

सूर्यस्य मण्डलञ्चैव चन्द्रमण्डलमेव च || ६५ ||

ततो वायुर्महानादो ब्रह्मरन्ध्रं ततः स्मृतम् |

तस्मिन् रन्ध्रे विसर्गञ्च नित्यानन्दं निरञ्जतम् || ६६ ||

तदूर्ध्वे शंखिनी देवी सृष्टिस्थित्यन्तकारिणी |

तस्याधःस्था च देवेशि चतुर्मण्डलमध्यगम् || ६७ ||

त्रिकोणं तत्र संञ्चिन्त्य कैलासमत्र भावयेत् |

इह स्थाने महादेवि स्थिरचित्तं विधाय च || ६८ ||

जीवजीवी गतव्याधिर्न पुनर्जन्मसंभवः |

अत्र नित्योदिता वृद्धिक्षयहीना अमाकला || ६९ ||

तन्मध्ये कुटिला निर्वाणाख्या सप्तदशी कला |

निर्वाणाख्यान्तर्गता वह्निरूपा निरोधिका || ७० ||

नादोऽव्यक्तस्तदुषरि कोट्यादित्यसमप्रभा |

निर्वाणशक्तिः परमा सर्वेषां योनिरूपिणी || ७१ ||

अस्यां शक्तौ शिवं ज्ञेयं निर्विकारं निरञ्जनम् |

अत्रैव कुण्डलीशक्ति र्मुद्राकारा सुरेश्वरि || ७२ ||

पुनस्तेन प्रकारेण गच्छन्त्याधारपङ्कजे |

कथिता योनिमुद्रेयं मया ते परमेश्वरि || ७३ ||

विना येन न सिद्धेन निहरेत् परमात्मना |

तद् दिव्यामृतधाराभिर्लाक्षाभाभिर्महेश्वरि || ७४ ||

तर्पयेद् देवतां योगी योगेनाऽनेन साधकः |

कुण्डलीशक्तिसिद्धिः स्याद् वर्णकोटिशतैरपि || ७५ ||

तस्मात् त्त्वयापि गिरिजे गोपनीयं प्रयत्नतः |

मन्त्ररूपां कुण्डलिनीं ध्यात्वा षट्चक्रमण्डले || ७६ ||

कन्दमध्यात् सुमधुरं कूजन्तीं सततोत्थिताम् |

गच्छन्तीं ब्रह्मरन्ध्रेण प्रविशन्तीं स्वकेतनम् || ७७ ||

मूलाधारे च तां देवीं संस्थाप्य वीरवन्दिते |

चित्रिणीग्रथिता मालाजापं ब्रह्माण्डसुन्दरि || ७८ ||

रहस्यं परमं दिव्यं मन्त्रचैतन्यमीरितम् |

मुद्राचैतन्ययोर्ज्ञानं वर्णानां ज्ञानमेव च || ७९ ||

मन्त्रार्थं कथितं देवि तव स्नेहात् प्रियंवदे |

अस्य ज्ञानं विना भद्रे सिद्धिर्न स्यात् सुलोचने |

इति ते कथितं देवि योनिक्रीडेदमुत्तमम् || ८० ||


श्री-ईश्वर उवाच


सुरासुरजगद्वन्द्य पार्वतीभगसेवक |

इदानीं श्रोतुमिच्छामि योनेः कवचमुत्तमम् || ८१ ||


श्री-ईश्वर उवाच


यद् धृत्वा पठनात् सर्वाः शक्तयो वरदाः प्रिये |

एतस्य कवचस्यापि ऋषिश्च श्रीसदाशिवः || ८२ ||

छन्दो गायत्री देवता योनिरूपा सनातनी |

चतुर्वर्गेषु देवेशि विनियोगः प्रकीर्तितः || ८३ ||

ओं मम् माम् मिम् मीम् मुम् मूम् मेम् मैम् मोम् मौम् मं मः |
(दक्षपादम्) मम शिरो रक्षन्तु स्वाहा |

ओं मम् माम् मिम् मीम् मुम् मूम् मेम् मैम् मोम् मौम् मं मः
ओं माम् ओं आकुटाम् मम रक्षन्तु स्वाहा मम् माम् |

ओं मम् माम् मिम् मीम् मुम् मूम् मेम् मैम् मोम् मौम् मंमः मम हृदयादिदक्षबाहुं रक्षन्तु |

ओं मं मां मिं मीं मुम् मूम् मेम् मैम् मोम् मौं मः

ओं मम् माम् मिम् मीम् मुम् मूम् मेम् मैम् मोम् मौम् मं मः

मम हृदयादिवामबाहु रक्षन्तु मम | ओं मम् माम् मिम् मीम् मुम् मूम् मेम् मैम् मोम् मौम् मं मः दक्षपादं रक्षन्तु मम | वामपादं रक्षन्तु मम सदा स्वाहा स्वाहा स्वाहा |

ओं मम् माम् मिम् मीम् मुम् मूम् मेम् मैम् मोम् मौम् मं मः
मम हृदादिषु नासां रक्षन्तु स्वाहा | ओं मम् माम् मिम् मीम् मुम् मूम् मेम् मैम् मोम् मौम् मं मः उपस्थं रक्षन्तु मम सदा स्वाहा | ओं मम् माम् मिम् मीम् मुम् मूम् मेम् मैम् मोम् मौम् मं मः ||

इदं हि योनिकवचं रहस्यं परमाद्भुतम् |

अज्ञात्वा यो जपेन्मन्त्रं सर्वं निष्फलतां व्रजेत् || ८४ ||

रहस्यं परमं दिव्यं सावधानाऽवधारय |

मूलाधारे महेशानि जपेद् यन्त्रं वरानने || ८५ ||

मूलाधारे महेशानि वरारोहेऽन्तरात्मनि |

प्रतिचक्रे महेशानि पठेद् योनिं सनातनीम् || ८६ ||

चन्द्रसूर्योपरागे च पठेद् वा कवचं प्रिये |

स्वनारीं रमयेद् यन्त्रे परनारीमथापि वा || ८७ ||

कवचस्य प्रसादेन योनिमुद्रा हि सिद्ध्यति |

इदं हि कवचं देवि पठित्वा कमलानने || ८८ ||

मैथुनं महदाख्यानं त्वया सह मया कृतम् |

कवचस्य प्रसादेन जना यान्ति परां गतिम् || ८९ ||

भूर्जपत्रे समालिख्य स्वयंभूकुसुमेन तु |

शुक्लेन कुसुमेनापि रोचनालक्तकेन च || ९० ||

स्वर्णस्थां गुटिकां कृत्वा धारयेद् यन्त्रमानवः ? |

इह लोके परत्रे च स एव श्रीसदाशिवः || ९१ ||

अष्टोत्तरशतञ्चास्य प्रपठेत् सिद्धि वाञ्छया |

किमत्र बहुनोक्तेन अस्मात् परतरो नहि |

नमो योन्यै नमो योन्यै कुण्डलिन्यै नमो नमः || ९२ ||

इति दक्षिणाम्नाये सार्धलक्षग्रन्थे कङ्कालमालिनीतन्त्रे योनिमुद्रादिकथनं द्वितीयः पटलः || २ ||

अथ तृतीयः पटलः


श्रीदेवी उवाच


इदानीं श्रोतुमिच्छामि गुरुपूजनमुत्तमम् ||


श्री-ईश्वर उवाच


कथयामि महादेवि अप्रकाश्यं वरानने |

निर्गुणञ्च परं ब्रह्म गुरुरित्यक्षरद्वयम् || १ ||

महामन्त्रं महेशानि गोपनीयं परात्परम् |

तत्र ध्यानं प्रवक्ष्यामि शृणु पार्वति सादरम् || २ ||

सहस्रदलपद्मस्थमन्तरात्मानमुज्ज्वलम् |

तस्योपरि नादबिन्दोर्मध्ये सिंहासनोज्ज्वले || ३ ||

चिन्तयेन्निजगुरुं नित्यं रजताचलसन्निभम् |

वीरासनसमासीनं मुद्राभरणभूषितम् || ४ ||

शुभ्रमाल्याम्बरधरं वरदाभयपाणिनम् |

वामोरुशक्तिसहितं कारुण्येनावलोकितम् || ५ ||

प्रियया सव्यहस्तेन धृतचारुकलेवरम् |

वामेनोत्पलधारिण्या रक्ताभरणभूषया || ६ ||

ज्ञानानन्दसमायुक्तं स्वरेत्तन्नामपूर्वकम् |

मानसैस्तूपचारैश्च संपूज्य कल्पयेत् सुधीः || ७ ||

गन्धं भूम्यात्मकं दद्याद् भावपुष्पैस्ततः परम् |

धूपं वायवात्मकं देवि तेजसा दीपमेव च || ८ ||

नैवेद्यममृतं दद्यात् पानीयं वरुणात्मकम् |

अम्बरं मुकुटं दद्यात् वस्त्रञ्चैव मम प्रिये || ९ ||

चामरं पादुकाच्छत्रं तथालङ्कारभूषणैः |

तत्तन्मुद्राविधानेन संपूज्याथ गुरुं यजेत् || १० ||

यथाशक्ति जपं कृत्वा समर्प्य कवचं पठेत् |

इति ते कथितं सम्यग् गुरुपूजनमुत्तमम् || ११ ||


श्रीदेवी उवाच


भूतनाथ महादेव कवचं तस्य मे वद || १२ ||


श्री-ईश्वर उवाच


अथ ते कथयामीशे कवचं मोक्षदायकम् |

यस्य ज्ञानं विना देवि न सिद्धिर्न च सद्गतिः || १३ ||

ब्रह्मादयोऽपि गिरिजे सर्वत्र जयिनः स्मृताः |

अस्य प्रसादात् सकला वेदागमपुरःसराः || १४ ||

कवचस्यास्य देवेशि ऋषिर्विष्णुरुदाहृतः |

छन्दो विराड् देवता च गुरुदेवः स्वयं शिवः || १५ ||

चतुर्वर्गे ज्ञानमार्गे विनियोगः प्रकीर्तितः |

सहस्रारे महापद्मे कर्पूरधवलो गुरुः || १६ ||

वामोरुगतशक्तिर्यः सर्वतः परिरक्षतु |

परमाख्यो गुरुः पातु शिरसं म वल्लभे || १७ ||

परापराख्यो नासां मे परमेष्ठिर्मुखं मम |

कण्ठं मम सदा पातु प्रह्लादानन्दनाथकः || १८ ||

बाहू द्वौ सनकानन्दः कुमारानन्दनायकः |

वशिष्ठनन्दनाथश्च हृदयं पातु सर्वदा || १७ ||

क्रोधानन्दः कटिं पातु सुखानन्दः पदं मम |

ध्यानानन्दश्च सर्वाङ्गं बोधानन्दश्च कानने || २० ||

सर्वत्र गुरवः पान्तु सर्वे ईश्वररूपिणः |

इति ते कथितं भद्रे कवचं परमं शिवे || २१ ||

भक्तिहीने दुराचारे दद्यान्मृत्युमवाप्नुयात् |

अस्यैव पठनाद् देवि धारणाच्छ्रवणात् प्रिये || २२ ||

मन्त्राः सिद्धाश्च जायन्ते किमन्यत् कथयामि ते |

कण्ठे वा दक्षिणे बाहौ शिखायां वीरवन्दिते || २३ ||

धारणान्नाशयेत् पापं गङ्गायां कलुषं यथा |

इदं कवचमज्ञात्वा यदि मन्त्रं जपेत् प्रिये || २४ ||

तत् सर्वं निष्फलं कृत्वा गुरुर्याति सुनिश्चितम् |

शिवे रुष्टे गुरुस्त्राता गुरौ रुष्टे न कश्चन || २५ ||


श्रीपार्वती उवाच


लोकेश कथ्यताम् देव गुरुगीता मयि प्रभो || २६ ||


श्रीशिव उवाच


शृणु तारिणि वक्ष्यामि गीतां ब्रह्ममयीं पराम् |

गुरुः स्वयं सर्वशास्त्राणामहमेव प्रकाशकः || २७ ||

त्वमेव गुरुरूपेण लोकानां प्राणकारिणी |

गया गङ्गा काशिका च त्वमेव सकलं जगत् || २८ ||

कावेरी यमुना रेवा करतोया सरस्वती |

चन्द्रभागा गौतमी च त्वमेव कुलपालिका || २९ ||

ब्रह्माण्डं सकलं देवि कोटिब्रह्माण्डमेव च |

नहि ते वक्तुमर्हामि क्रियाजालं महेश्वरि || ३० ||

उक्त्वा उक्त्वा भावयित्वा भिक्षुकोऽयं नगात्मजे |

कथं त्वं जननी भूत्वा बधूस्त्वं मम देहिनाम् || ३१ ||

तव चक्रं महेशानि अतीतं परमात्मनः |

इति ते कथिता गीता गुरुदेवस्य ब्रह्मणः || ३२ ||

संक्षेपेण महेशानि प्रभुरेव गुरुः स्वयम् |

जगत् समस्तमस्थेयं गुरुस्थेयो हि केवलम् || ३३ ||

तं तोषयित्वा देवेशि नतिभिस्तत्त्रिभिस्तथा |

नानाविधद्रव्यदानैः सिद्धिः स्यात् साधकोत्तमः || ३४ ||

इति श्रीदक्षिणाम्नाये सार्धलक्षग्रन्थे कङ्कालमालिनीतन्त्रे श्रीगुरुपूजनकवचगुरुगीता नाम तृतीयः पटलः || ३ ||

अथ चतुर्थः पटलः


श्रीपार्वती उवाच


कथयस्व विरूपाक्ष महाकालीमनुं प्रभो |


श्री-ईश्वर उवाच


अथातः संप्रवक्ष्यामि महाकालीमनुं प्रिये |

यस्य विज्ञानमात्रेण सर्वसिद्धीश्वरो भवेत् || २ ||

श्रिया विष्णुं मम कान्त्या सम्मुखेन समः सुखी |

शौचेन शुचिना तुल्यो बलेन पवनोपमः || ३ ||

वागीश्वरः समो वाचि धनेन धनपः स्वयम् |

सार्वज्ञे शम्भुना तुल्यो दाने दाधीचिना समः || ४ ||

आज्ञया देवराजोऽसौ ब्राह्मण्येन प्रजापतिः |

भृगोरिव तपस्वी च चन्द्रवत् प्रीतिवर्धनः || ५ ||

तेजसाग्निसमो भक्त्या नारदः शिवकृष्णयोः |

रूपेण मदनः साक्षात् प्रतापे भानुसन्निभः || ६ ||

शास्त्रचर्चास्वाङ्गिरसो जामदग्न्यः प्रतिज्ञया |

सिद्धानां भैरवः साक्षात् गङ्गेव मलनाशकः || ७ ||

अथवा बहुनोक्तेन किं वा तेन वरानने |

न तस्य दूरितं किञ्चित् महाकालीं स्मरेद्धिया || ८ ||

शब्दब्रह्ममयीं स्वाहां भोगमोक्षैकदायिकाम् |

भोगेन मोक्षमाप्नोति श्रुत्वा गुरुमुखात् पराम् || ९ ||

तां विद्यां शृणु वक्ष्यामि यया भैरवतां व्रजेत् |

क्रोधीशं क्षतजारूढं धूम्रभैरव्यलक्षितम् || १० ||

नादबिन्दुसमायुक्तं मन्त्रं स्वर्गेऽपि दुर्लभम् |

एकाक्षरीसमा नास्ति विद्या त्रिभुवने प्रिये || ११ ||

महाकाली गुह्यविद्या कलिकाले च सिद्धिदा |

अथान्यत् संप्रवक्ष्यामि दक्षिणां कालिकां पराम् || १२ ||

वाग्भवं बीजमुच्चार्य कामराजं ततः परम् |

मायाबीजं ततो भद्रे त्र्यक्षरं मन्त्रमीरितम् || १३ ||

कामराजं ततो कूर्चं मायाबीजमतः परम् |

अपरं त्र्यक्षरं प्रोक्तं पूर्वोक्तं फलदं प्रिये || १४ ||

हालाहलं समुच्चार्य मायाद्वयमतः परम् |

एतत्तु त्र्यक्षरं देवि सर्वकामफलप्रदम् || १५ ||

एतेषाञ्चैव मन्त्राणां फलमन्यत् शृणु प्रिये |

न कालनियमोऽत्रास्ति नारिमित्रादिदूषणम् || १६ ||

कायक्लेशकरं नैव प्रयासो नास्य साधने |

दिवा वा यदि वा रात्रौ जपः सर्वत्र शोभनः || १७ ||

भोगमोक्षविरोधोऽत्र साधने नास्ति निश्चितम् |

भोगेन लभते मोक्षं नरोऽपि विद्ययानया || १८ ||

अस्या जपात्तथा ध्यानात् लभेन्मुक्तिं चतुर्विधाम् |

नानया सदृशी विद्या नानया सदृशो जपः || १९ ||

नानया सदृशं ध्यानं नानया सदृशं तपः |

सत्यं सत्यं पुनः सत्यं सत्यपूर्वं वदाम्यहम् || २० ||

अनया सदृशी विद्या नास्ति सिद्धिः सुगोचरे |

अथ संक्षेपतो वक्ष्ये पूजाविधिमनुत्तमम् || २१ ||

विस्तारे कस्य वा शक्तिः को वा जानाति तत्त्वतः |

पूजा च त्रिविधा प्रोक्ता नित्यनैमित्तिकाम्यतः || २२ ||

तत्रैव नित्यपूजाञ्च वक्ष्ये ताञ्च निशामय |

भैरवोऽस्य ऋषिः प्रोक्त उष्णिक् छन्द उदाहृतम् || २३ ||

देवता मुनिभिः प्रोक्ता महाकाली पुरातनी |

विनियोगस्तु विद्यायाः पुरुषार्थचतुष्टये || २४ ||

पञ्चशुद्धिविहीनेन यत्कृतं न च तत्कृतम् |

पञ्चशुद्धिं विना पूजा अभिचाराय कल्प्यते || २५ ||

आत्मशुद्धिः स्थानशुद्धिर्द्रव्यस्य शोधनस्तथा |

मन्त्रशुद्धिर्देवशुद्धिः पञ्चशुद्धिरितीरिता || २६ ||

भूप्रदेशे समे शुद्धिः पुष्पः प्रकरसंकुले |

आसनं कल्पयेदादौ कोमलं कम्बलन्तु वा || २७ ||

वामे गुरून् पुनर्नत्वा दक्षिणे गणपतिं विभुम् |

भूतशुद्धिं तथा कुर्यात् पूजायोग्या यथा भवेत् || २८ ||

प्राणायामादि विधिवत् ऋण्यादिन्यासमाचरेत् |

आदौ शुद्धिभैरवाय ऋषये नम इत्यथ || २९ ||

उष्णिक् छन्दसे नमसा मुखे छन्दो विनिर्दिशेत् |

मम प्रिये महाकाली देवतायै नमो हृदि || ३० ||

ह्रीं बीजाय नमः पूर्वं हुं शक्तये नमोऽप्यथ |

कवित्वार्थे विनियोग इति विन्यस्य वाञ्छया || ३१ ||

केवलां मातृकां न्यस्य बीजन्यास समाचरेत् |

ओं क्रा/ अङ्गुष्ठयोर्न्यस्य ओं क्री/ तर्जन्योर्नमः || ३२ ||

ओं क्र/ मध्यमयोर्न्यस्य ओं क्रै/ अनामिकाद्वयोः |

ओं क्रौ/ कनिष्ठायुगले ओं क्रः करतले तथा || ३३ ||

पुनर्हृदयादिष्वेतैर्जातियुक्तैः षडङ्गकम् |

षडदीर्घभावं स्वबीजैः प्रणवाद्यैस्तु विन्यसेत् || ३४ ||

वर्णन्यासं तथा कुर्याद् येन देवीमयो भवेत् |

अ आ इ ई उ ऊ ऋ ॠ ऌ ॡ च हृदये न्यसेत् || ३५ ||

ए ऐ ओ औ अं अः क ख ग घ वै दक्षिणे भुजे |

ङ च छ ज झ ञ ट ठ ड ढ वै वामके भुजे || ३६ ||

ण त थ द ध न प फ ब भ दक्षजङ्घके न्यसेत् |

म य र ल व श ष स ह ल क्ष वामजङ्घके || ३७ ||

पञ्चधा सप्तधा वापि मूलविद्यां समुच्चरन् |

शिर-आदि च पादान्तं न्यसेद् व्यापकमुत्तम् || ३८ ||

नित्यन्यास इति प्रोक्तः सर्व एव सुखावहः |

अथ ध्यानं प्रवक्ष्यामि भैरवाकारदायकम् || ३९ ||

हिमालयगिरेर्मध्ये नगरे भैरवस्य च |

दिव्यस्थाने महापीठे मणिमण्डपराजिते || ४० ||

नारदाद्यैर्मुनिश्रेष्ठैः संसेवितपदाम्बुजाम् |

तत्र ध्यायेन्महाकालीमाद्यां भैरवन्दिताम् || ४१ ||

नीलेन्दीवरवर्णिनीं युग्मापीनतुङ्गस्तनीम्
सुप्तश्रीहरिपीठराजितवतीं भीमां त्रिनेत्रां शिवाम् |
मुद्राखड्गकरां वराभययुतां चित्राम्बरोद्दीपनीं
वन्दे चञ्चलचन्द्रकान्तमणिभिर्मालां दधानां पराम् || ४२ ||

ध्यानान्तरं प्रवक्ष्यामि शृण गौरि गिरेः सुते |

तत्र पीठे महादेवीं कालीं दानवसेविताम् || ४३ ||

मेघाङ्गी विगताम्बरां शवशिरारूढां त्रिनेत्रां परां
कर्णालम्बितबाणयुग्मलसितां मुण्डावलीमण्डिताम् |

वामाधोर्ध्व कराम्बुजे नरशिरःखड्गञ्च सव्येतरे |

दानाभीतिविमुक्तकेशनिचया ध्येया सदा कालिका || ४४ ||

अपरञ्च प्रवक्ष्यामि ध्यानं परमदुर्लभम् |

कालीं करालवदनां घोरदंष्ट्रां त्रिलोचनाम् || ४५ ||

स्मरेच्छरकरश्रेणिकृतकाञ्चीं दिगम्बराम् |

वीरासनसमासीनां महाकालोपरि स्थिताम् || ४६ ||

श्रुतिमूलसमाकीर्णां सृक्कणीं घोरनादिनीम् |

मुण्डमालागलद्रक्तचर्चितां पीवरस्तनीम् || ४७ ||

मदिरामोदितास्फालकम्पिताखिलमेदिनीम् |

वामे खड्गं छिन्नमुण्डं धारिणीं दक्षिणे करे || ४८ ||

वराभययुतां घोरवदनां लोलजिह्विकाम् |

शकुन्तपक्षसंयुक्तवाणकर्णविभूषिताम् || ४९ ||

शिवाभिर्घोररावाभिः सेवितां प्रलयोदिताम् |

चण्डहासचण्डनादचण्डाख्यानैश्च भैरवैः || ५० ||

गृहीत्वा नरकङ्कालं जयशब्दपरायणैः |

सेविताखिलसिद्धौघैर्मुनिभिः सेवितां पराम् || ५१ ||

एषामन्यतमं ध्यानं कृत्वा च साधकोत्तमः |

मानसैरुपचारैश्च सोऽहमात्मानमर्चयेत् || ५२ ||

ततो देवीं समभ्यर्च्य अर्घ्यद्वयं निवेदयेत् |

दशपञ्चारपद्मेषु पीठपूजां समाचरेत् || ५३ ||

तत्रावाह्य महादेवीं नियमेन समाहितः |

ततो ध्यायेन्महादेवीं कालिकां कुलभूषणाम् || ५४ ||

महाकालं यजेद्द्यत्नात् पीठशक्तिं ततो यजेत् |

कालीं कपालिनीं कुल्लां कुरुकुल्लां विरोधिनीम् || ५५ ||

विप्रचित्तां तथा चैव वहिः षट्कोणके पुनः |

उग्रामुग्रप्रभां दीप्तां तत्र त्रिकोणके पुनः || ५६ ||

महाकालं यजेद्यत्नात्पीठशक्तिं ततोयजेत् |

कालीं कृपालिनी कुल्लां कुरुकुल्लां विरोधिनीम् || ५७ ||

विप्रचिंत्तां तथा चैव वहिः षट्कोणके पुनः |

उग्रामुग्रेप्रभां दीप्तां तत्र त्रिकोणके पुनः || ५८ ||

नीलां घनां वलाकाञ्च तथा परत्रिकोणके |

मात्रां मुद्रां नित्याञ्चैव तथैवान्तस्त्रिकोणके || ५९ ||

सर्वा श्यामा असिकरा मुण्डमालाविभूषणा |

तर्जनीं वामहस्तेन धारयन्ती शुचिस्मिता || ६० ||

ब्राह्म्याद्यास्तथावाह्य यजेत् पूर्वदलक्रमात् |

ब्राह्मी नारायणी चैव तथैव च महेश्वरी || ६१ ||

चामुण्डापि च कौमारी तथा चैवात्र राजिता |

वाराही च तथा पूज्या नारसिंही तथैव च || ६२ ||

सर्वासामपि दातव्या बलिः पूजा तथैव च |

अनुलेपनकं गन्धं धूपदीपौ च पानकम् || ६३ ||

त्रिस्त्रिः पूजा च कर्तव्या सर्वासामपि साधकैः |

पुनर्गन्धादिभिः पूज्य जप्त्वा शेषं समर्पयेत् || ६४ ||

समयं चार्चयेद् देव्या योगिनीयोगिभिः सह |

मधु मांसं तथा मत्स्यं यत् किञ्च कुलसाधनम् || ६५ ||

शक्त्यै दत्वा ततः पश्चाद् गुरवे विनिवेदयेत् |

तदनुज्ञां मूर्ध्नि कृत्वा शेषं चात्मनि योजयेत् || ६६ ||

मधु मांसं विना यस्तु कुलपूजां समाचरेत् |

जन्मान्तरसहस्रस्य सुकृतिस्तस्य नश्यति || ६७ ||

तस्मात् सर्वप्रयत्नेन मकारपञ्चकैर्यजेत् |

मधुना न विना मन्त्रं न मन्त्रेण विना मधु || ६८ ||

परस्परविरोधेन कथं सिध्यन्ति साधकाः |

कुण्डकुम्भकपालादिपदार्थानां निषेवणम् || ६९ ||

सौरे तन्त्रे विरुद्धं च शैवे शाक्ते महाफलम् |

ब्रह्माण्डखण्डसम्भूतमशेषरत्नसम्भवम् || ७० ||

श्वेतं पीतं सुगन्धं च निर्मलं भूरितेजसम् |

अथवा कुम्भमध्येऽस्मिन् स्रवन्तं परमामृतम् || ७१ ||

अन्तर्लयो बहिर्मध्ये त्रिकोणोदरवर्तिनि |

तद् वाह्यं स्फाटिकोदारमणिचन्द्रं च मण्डलम् || ७२ ||

तेनामृतेन तद्बाह्ये चिन्तयेत् परमामृतम् |

आरम्भस्तरुणः प्रौढस्तदन्ते तरुणः पुनः || ७३ ||

एभिरुल्लासवान् योगी स्वयं शिवमयो यतः |

सर्वशेषे च देवेशि सामान्यार्घ्यं पदेऽर्पयेत् || ७४ ||

विशेषार्घ्यं शिवे दत्वा देव्याः प्रियतमो भवेत् |

साङ्गक्रियां पदे दत्वा सामान्यार्घ्यं शिवे भवेत् || ७५ ||

इत्युक्त्वा स परामर्षी[र्शी] शक्तितोषणकारकः |

भोगेन लभते मोक्षं बहुना जल्पितेन किम् || ७६ ||

नियमः पुरुषे ज्ञेयो न योषित्सु कदाचन |

यद्वा तद्वा येन केन सर्वदा सर्वतोऽपि च || ७७ ||

योषितां ध्यानयोगेन शुद्धशेषं न संशयः |

बालां वा यौवनोन्मत्तां वृद्धां वा युवतीं तथा || ७८ ||

कुत्सितां वा महादुष्टां नमस्कृत्य विसर्जयेत् |

तासां प्रहारो निन्दा च कौटिल्यमप्रियं तथा || ७९ ||

सर्वथा न च कर्तव्यमन्यथा सिद्धिरोधकृत् |

इति ते कथितं शेषमाचरेद् लक्षणं प्रिये ||

नित्यपूजाक्रमं भक्त्या ज्ञात्वा सिद्धिमवाप्नुयात् || ८० ||


इति दक्षिणाम्नाये कङ्कालमालिनीतन्त्रे सार्धलक्षग्रन्थे महाकालीमन्त्रपूजाकथनं नाम चतुर्थः पटलः || ४ ||

पञ्चमः पटलः

श्रीपार्वती उवाच


कथयस्व महाभाग पुरश्चरणमुत्तमम् |

कस्मिन् काले च कर्तव्यं कलौ सिद्धिदमद्भुतम् || १ ||


श्री-ईश्वर उवाच


सामान्यतः प्रवक्ष्यामि पुरश्चर्याविधिं शृणु |

नाशुभो विद्यते कालो नाशुभो विद्यते क्वचित् || २ ||

न विशेषो दिवारात्रौ न सन्ध्यायां महानिशि |

कालाकालं महेशानि भ्रान्तिमात्रं न संशयः || ३ ||

प्रलये महति प्राप्ते सर्वं गच्छति ब्रह्मणि |

तत्काले च महाभीमे को गच्छति शुभाशुभम् || ४ ||

कलिकाले महामाये भवन्त्यल्पायुषो जनाः |

अनिर्दिष्टायुषः सर्वे कालचिन्ता कथं प्रिये || ५ ||

यत्कालं ब्रह्मचिन्तायां तत्कालं सफलं प्रिये |

पुरश्चर्याविधौ देवि कालचिन्तां न चाचरेत् || ६ ||

नात्र शुद्ध्याद्यपेक्षास्ति न निषिद्धादिदूषणम् |

दिक्कालनियमो नात्र स्थित्यादिनियमो नहि || ७ ||

न जपे कालनियमो नार्चादिष्वपि सुन्दरि |

स्वेच्छाचारोऽत्र नियमो महामन्त्रस्य साधने || ८ ||

नाधर्मो विद्यते सुभ्रु प्रचरेद् हृष्टमानसः |

जम्बूद्वीपे च वर्षे च कलौ भारतसंज्ञके || ९ ||

षण्मासादपि गिरिजे जपात् सिद्धिर्न संशयः |

यन्नोक्तं सर्वतन्त्रेषु तदद्य कथयामि ते || १० ||

सुभगे शृणु चार्वङ्गि कल्याणि कमलेक्षणे |

कलौ च भारते वर्षे येन सिद्धिः प्रजायते || ११ ||

तत्सर्वं कथयाम्यद्य सावधानाऽवधारय |

कलिकाले वरारोहे जपमात्रं प्रशस्यते || १२ ||

न तिथिर्न व्रतं होमं स्नानं सन्ध्या प्रशस्यते |

पुरश्चर्यां विना देवि कलौ मन्त्रं न साधयेत् || १३ ||

सत्यत्रेतायुगं देवि द्वापरं सुखसाधनम् |

कलिकाले दुराघर्षं सर्वदुःखमयं सदा || १४ ||

सारं हि सर्वतन्त्राणां महाकालीषु कथ्यते |

प्रातःकृत्यादिकं कृत्वा ततः स्नानं समाचरेत् || १५ ||

कृत्वा सन्ध्यां तर्पणं च संक्षेपेण वरानने |

पूजां चैव वरारोहे यस्य यत् पटलक्रमात् || १६ ||

पूजाद्वारे च विन्यस्य बलिं दद्याद् यथाक्रमम् |

प्राणायामत्रयं चैव माषभक्तबलिं तथा || १७ ||

सङ्कल्प्योपास्य देवेशि बलिदानस्य साधकः |

आदौ गणपतेर्बीजं गमित्येकाक्षरं विदुः || १८ ||

भूमौ विलिख्य गुप्तेन बलिं पिण्डोपमं ततः |

ओं गं गणपतये स्वाहा इति मन्त्रेण साधकः || १९ ||

बलिमित्थं च सर्वत्र बीजोपरि प्रदापयेत् |

ओं भैरवाय ततः स्वाहा भैरवाय बलिं ततः || २० ||

ओं क्षं क्षेत्रपालाय स्वाहा क्षेत्रपालबलिं ततः |

ओं यां योगिनिभ्यो नमः स्वाहा च योगिनीबलिम् || २१ ||

संपूज्य विधिना दद्यात् पूर्ववत् क्रमतो बलिम् |

कथोपकथनं देवि त्यजेदत्र सुरालये || २२ ||

पूर्वे गणपतेर्भद्रे उत्तरे भैरवाय च |

पश्चिमे क्षेत्रपालाय योगिन्यै दक्षिणे ददेत् || २३ ||

इन्द्रादिभ्यो बलिं दद्यादात्मकल्याणहेतवे |

तदा सिद्धिमवाप्नोति चान्यथा हास्यकेवलम् || २४ ||

पलैकं माषकल्कञ्च पलमेकञ्च तण्डुलम् |

अर्द्धतोलं घृतञ्चैव दधि अर्द्धार्द्धतोलकम् || २५ ||

शर्करैकतोलकेन बलिं दद्यात् सुसिद्धये |

एतेषां सहयोगेन बलिर्भवति शाम्भवि || २६ ||

पूजास्थाने तथा भद्रे कूर्मबीजं लिखेत् ततः |

चन्द्रबिन्दुमयं बीजं कूमबीजं इतीरितम् || २७ ||

स्थापयेदासनं तत्र पूजयेत् पटलक्रमात् |

भूतशुद्धिं ततः कृत्वा प्राणायामं ततः परम् || २८ ||

अङ्गन्यासं करन्यासं मातृकान्यासमेव च |

यः कुर्यान्मातृकान्यासं स शिवो नात्र संशयः || २९ ||

ततस्तु भीमतिलकं रुद्राक्षं धारयेत्ततः |

रुद्राक्षस्य च माहात्म्यं भस्मनश्च शृणु प्रिये || ३० ||

आग्नेयमुच्यते भस्म दुग्धगोमयसम्भवम् |

शोधयेन्मूलमन्त्रेण अष्टोत्तरशतं जपन् || ३१ ||

शिरोदेशे ललाटे च स्कन्धयोर्भ्रूप्रदेशके |

बाह्वोः पार्श्वद्वये देवि कण्ठदेशे हृदि प्रिये || ३२ ||

श्रुतियुग्मे पृष्ठदेशे नाभौ तुण्डे महेश्वरि |

कूर्पराद् बाहुपर्यन्तं कक्षे ग्रीवासु पार्वति || ३३ ||

सर्वाङ्गे लेपयद् देवि किमन्यत् कथयामि ते |

मध्यमानामिकाङ्गुल्यङ्गुष्ठेन तिलकं ततः || ३४ ||

तिलकं तु त्रिरेखं स्याद् रेखाणां नवधा मतम् |

पृथिव्यग्निस्तथा शक्तिः क्रियाशक्तिर्महेश्वरः || ३५ ||

देवः प्रथमरेखायां भक्त्या ते परिकीर्तितः |

न भस्मांश्चैव सुभगे द्वितीया चैव देवता || ३६ ||

परमात्मा शिवो देवस्तृतीयायाश्च देवता |

एतान्नित्यं नमस्कृत्य त्रिपुण्ड्रं धारयेद् यदि || ३७ ||

महेश्वरव्रतमिदं कृत्वा सिद्धीश्वरो भवेत् |

ब्रह्मचारी गृहस्थो वा वनस्थो वा यतिस्तथा || ३८ ||

महापातकसंघातैर्मुच्यते सर्वपातकात् |

तथाऽन्यक्षत्रविट्शूद्रस्त्रीहत्यादिषु पातकैः || ३९ ||

वीरब्राह्मणहत्याभिर्मुच्यते सुभगेश्वरि |

अमन्त्रेणापि यः कुर्याद् ज्ञात्वा च महिमोन्नतिम् || ४० ||

त्रिपुण्ड्रभालतिलको मुच्यते सर्वपातकैः |

परद्रव्यापहरणं परदाराभिमर्षणम् || ४१ ||

परनिन्दा परक्षेत्रहरणं परपीडनम् |

असत्यवाक्यपैशुन्यं पारुष्यं देवविक्रयम् || ४२ ||

कूटसाक्ष्यं व्रतत्यागं कैतवं नीचसेवनम् |

गोमृगाणां हिरण्यस्य तिलकम्बलवाससाम् || ४३ ||

अन्नधान्यकुशादीनां नीचेभ्योऽपि परिग्रहम् |

दासीवेश्यासु कृष्णासु वृषलीसु नदीषु च || ४४ ||

रजस्वलासु कन्यासु विधवासु च सङ्गमे |

मांसचर्मरसादीनां लवणस्य च विक्रयम् || ४५ ||

एवंरूपाण्यसंख्यानि पापानि विविधानि च |

सद्य एव विनश्यन्ति त्रिदण्डस्य च धारणात् || ४६ ||

शिवद्रव्यापहरणात् शिवनिन्दाञ्च कुत्रचित् |

निन्दायाः शिवभक्तानां प्रायश्चित्तैर्न शुध्यति || ४७ ||

त्रिपुण्ड्रं शिरसा धृत्वा तत्क्षणादेव शुध्यति |

देवद्रव्यापहरणे ब्रह्मस्वहरणेन च || ४८ ||

कुलान्यग्नय एवात्र विनश्यन्ति सदाशिवे |

महादेवि महाभागे ब्राह्मणातिक्रमेण च || ४९ ||

कुलरक्षा भवत्यस्मात् त्रिपुण्ड्रस्य च सेवनात् |

रुद्राक्षं यस्य देहेषु ललाटेषु त्रिपुण्ड्रकम् || ५० ||

यदि स्यात् स च चाण्डालः सर्ववर्णोत्तमोत्तमः |

यानि तीर्थानि लोकेऽस्मिन् गङ्गाद्याः सरितश्च याः || ५१ ||

स्नातो भवति सर्वत्र यल्ललाटे त्रिपुण्ड्रकम् |

सप्तकोटिमहामन्त्रा उपमन्त्रास्तथैव च || ५२ ||

श्रीविष्णोः कोटिमन्त्राश्च कोटिमन्त्राः शिवस्य च |

ते सर्वे तेन जप्ता च यो बिभर्ति त्रिपुण्ड्रकम् || ५३ ||

सहस्रं पूर्वजातानां सहस्रं च जनिष्यताम् |

स्ववंशजातमर्त्यानामुद्धरेद् यस्त्रिपुण्ड्रकृत् || ५४ ||

षडैश्वर्यगुणोपेतः प्राप्य दिव्यवपुस्ततः |

दिव्यं विमानमारुह्य दिव्यास्त्रशतसेवितः || ५५ ||

विद्याधारणां सिद्धानां गन्धर्वाणां महौजसाम् |

इन्द्रादिलोकपालानां लोकेषु च यथाक्रमम् || ५६ ||

भुक्त्वा भोगान् सुविपुलं प्रदेशानां पुरेषु च |

ब्रह्मणः पदमासाद्य तत्र कल्पायुतं वसेत् || ५७ ||

विष्णुलोके च रमते आब्रह्मणः शतायुषम् |

शिवलोकं ततः प्राप्य रमते कालमक्षयम् || ५८ ||

शिवसायुज्यमाप्नोति न स भूयोऽपि जायते |

शैवे विष्णौ च सौरे च गाणपत्येषु पार्वति || ५९ ||

शक्तिरूपा च या गौः स्यात् तस्या गोमयसम्भवम् |

भस्म तेषु महेशानि विशिष्टं परिकीर्तितम् || ६० ||

शैवापि च वरारोहे साद्गुण्यं वरवर्णिनि |

शक्तौ प्रशस्तमोक्षं हि भस्म यौवनजीवने || ६१ ||

अन्येषां गोकरीषेण भस्म शक्त्यादिकेष्वपि |

सामान्यमेतत् सुश्रोणि विशेषं शृणु मत्प्रिये || ६२ ||

करीषभस्मादनघे हौमं भस्म महाफलम् |

हौमभस्मात् कोटिगुणं विष्णुहोमं महेश्वरि || ६३ ||

शिवहोमं तद्द्विगुणं भस्मात्तु शृणु सुन्दरि |

स्वीयेष्टदेवताहोममनन्तं प्रियवादिनि || ६४ ||

तन्माहात्म्यमहं वक्तुं कल्पकोटिशतैरपि |

न समर्थो योगमार्गो किमन्यत् कथयामि ते || ६५ ||

होमः कलियुगे देवि जम्बूद्वीपस्य वर्षके |

भारताख्ये महाकालि दशांशं क्रमतः शिवे || ६६ ||

नास्तिकास्ते महामोहे केवलं होममाचरेत् |

लक्षं वाप्ययुतं वापि सहस्रं वा वरानने || ६७ ||

अष्टाधिकशतं वापि काम्यहोमं प्रकल्पयेत् |

नित्यहोमं च कर्तव्यं शक्त्या च परमेश्वरि || ६८ ||

प्रजपेन्नित्यपूजायामष्टोत्तरसहस्रकम् |

अष्टोत्तरशतं वापि अष्टपञ्चाशतं चरेत् || ६९ ||

अष्टात्रिंशत्संख्यकं वा अष्टाविंशतिमेव च |

अष्टादशं द्वादशं च दशाष्टौ च विधानतः || ७० ||

होमं चैव महेशानि एतत्संख्याविधानतः |

एवं सर्वत्र देवेशि नित्यकर्ममहोत्सवः || ७१ ||

इत्थं प्रकारं यद् भस्म अङ्गे संलिप्य साधकः |

मालाञ्चैव महेशानि नरास्थ्यद्भुतपूजिताम् || ७२ ||

गले दद्याद् वरारोहे शक्तश्चेद् दिव्यनायिके |

रुद्राक्षमाल्यं संधार्यं ततः शृणु मम प्रिये || ७३ ||

एवं कृत्वा त्वया सार्द्धं पितृभूमौ स्थितं मया |

सुभगे शृणु सुश्रोणि रुद्राक्षं परमं पदम् || ७४ ||

सर्वपापक्षयकरं रुद्राक्षं ब्रह्मणीश्वरि |

अभुक्तो वाऽपि भुक्तो वा नीचान्नीचतरोऽपि वा || ७५ ||

रुद्राक्षं धारयेद् यस्तु मुच्यते सर्वपातकात् |

रुद्राक्षधारणं पुण्यं कैवल्यसदृशं भवेत् || ७६ ||

महाव्रतमिदं पुण्यं त्रिकोटितीर्थसंयुतम् |

सहस्रं धारयेद् यस्तु रुद्राक्षाणां शिचिस्मिते || ७७ ||

तं नमन्ति सुराः सर्वे यथा रुद्रस्तथैव सः |

अभावे तु सहस्रस्य बाह्वोः षोडश षोडश || ७८ ||

एकं शिखायां कवचयोर्द्वादश द्वादश क्रमात् |

द्वात्रिंशत् कण्ठदेशे तु चत्वारिंशत् शिरे तथा || ७९ ||

उभयोः कर्णयोः षट् षड् हृदि अष्टोत्तरं शतम् |

यो धारयति रुद्राक्षान् रुद्रवत् स च पूजितः || ८० ||

मुक्ताप्रवालस्फटिकैः सूर्येन्दुमणिकाञ्चनैः |

समेतान् धारयेद् यस्तु रुद्राक्षान् शिव एव सः || ८१ ||

केवलानपि रुद्राक्षान् यो बिभर्ति वरानने |

तं न स्पृशन्ति पापानि तिमिरानीव भास्करम् || ८२ ||

रुद्राक्षमालया जप्तो मन्त्रोऽनन्तफलप्रदः |

यस्याङ्गे नास्ति रुद्राक्ष एकोऽपि वरवर्णिनि || ८३ ||

तस्य जन्म निरर्थं स्यात् त्रिपुण्ड्ररहितं यथा |

रुद्राक्षं मस्तके बध्वा शिरःस्नानं करोति यः || ८४ ||

गङ्गास्नानफलं तस्य जायते नात्र संशयः |

रुद्राक्षं पूजयेद् यस्तु विना तोयाभिषेचनैः || ८५ ||

यत्फलं शिवपूजायां तदेवाप्नोति निश्चितम् |

एकवक्त्रैः पञ्चवक्त्रैस्त्रयोदशमुखैस्तथा || ८६ ||

चतुर्दशमुखैर्जप्त्वा सर्वसिद्धिः प्रजायते |

किं बहूक्त्या वरारोहे कृत्वा गतिकमद्भुतम् || ८७ ||

रुद्राक्षं यत्नतो धृत्वा शिव एव स साधकः |

भस्मना तिलकं कृत्वा पश्चाद् रुद्राक्षधारणम् || ८८ ||

प्राणायामं ततः कृत्वा संकल्प्योपास्य साधकः |

मूलमन्त्रसिद्धिकामः कुर्याच्च वर्णपूजनम् || ८९ ||

षट्त्रिंशद्वर्णमालार्चा विस्तारोन्नतिशालिनी |

विलिप्य चन्दनं शुद्धं सर्ववर्णात्मके घटे || ९० ||

सर्वावयवसंयुक्तान् विलिख्य मातृकाक्षरान् |

गुरुं संपूज्य विधिवद् घटस्थापनमाचरेत् || ९१ ||

पञ्चाशमातृकावर्णान् पूजयेद् विभवक्रमात् |

पञ्चोपचारैः संपूज्य ध्यानं कृत्वा प्रसन्नधीः || ९२ ||

शुक्लविद्युत्प्रतीकाशां द्विभुजां लोललोचनाम् |

कृष्णाम्बरपरिधानां शुक्लवस्त्रोत्तरीयिणीम् || ९३ ||

नानाभरणभूषाढ्यां सिन्दूरतिलकोज्ज्वलाम् |

कटाक्षविशिखोद्दीप्तामज्जनाञ्चितलोचनाम् || ९४ ||

मन्त्रसिद्धिप्रदां नित्यां ध्यायेत् सत्त्वस्वरूपिणीम् |

रक्तविद्युत्प्रतीकाशां द्विभुजां लोललोचनाम् || ९५ ||

शुक्लाम्बरपरीधानां कृष्णवस्त्रोत्तरीयिणीम् |

नानाभरणभूषाढ्यां सिन्दूरतिलकोज्ज्वलाम् || ९६ ||

कटाक्षविशिखोद्दीप्तामञ्जनाञ्चितलोचनाम् |

मन्त्रसिद्धिप्रदां नित्यां ध्यायेद् रजःस्वरूपिणीम् || ९७ ||

भ्रमद्भ्रमरसंकाशां द्विभुजां लोललोचनाम् |

रक्तवस्त्रपरीधानां कृष्णवस्त्रोत्तरीयिणीम् || ९८ ||

नानाभरणभूषाढ्यां सिन्दूरतिलकोज्ज्वलाम् |

कटाक्षविशिखोद्दीप्तां भ्रूलतापरिसेविताम् || ९९ || 

मन्त्रसिद्धिप्रदां नित्यां ध्यायेत् तमः स्वरूपिणीम् |

ध्यात्वा पाद्यादिकं दत्वा त्रिगुणां पूजयेत् क्रमात् || १०० ||

ओं ऊङ्काररूपिण्यै नमः पाद्यैः प्रपूजयेत् |

आदिध्यानेन सुभगे यजेत् सत्त्वमयीं पराम् || १०१ ||

ओं कङ्काररूपिण्यै नमः पाद्यादिभिर्यजेत् |

क्रमात् सप्तदशार्णं हि द्वितीयं ध्यानमाचरन् || १०२ ||

ओं दंकाररूपिण्यै नमः पाद्यादिभिर्यजेत् |

क्रमात् सप्तदशार्णं हि तृतीयं ध्यानमाचरन् || १०३ ||

एवं क्रमेण पञ्चाशद्ववर्णान् हि परिपूजयेत् |

इति ते कथितं भद्रे पञ्चाशद्वर्णपूजनम् || १०४ ||

वर्णानां पूजनाद् भद्रे देवपूजा प्रजायते |

अणिमाद्यष्टसिद्धीनां पूजा स्याद् वर्णपूजनात् || १०५ ||

सप्तकोटिमहाविद्या उपविद्या तथैव च |

श्रीविष्णोः कोटिमन्त्राश्च कोटिमन्त्राः शिवस्य च || १०६ ||

पूजनात् पूजितं सर्वं वर्णानां सिद्धिदायकम् |

प्रथमं प्रणवं दत्वा सहस्रं कुण्डलीमुखे || १०७ ||

मूलविद्यां ततो भद्रे सहस्रयुगलं जपेत् |

ततस्तु सुभगे मातर्जपेच्च दीपिनीं पराम् || १०८ ||

आदौ गायत्रीमुच्चार्य मूलमन्त्रं ततः परम् |

प्रणवं च ततो भीमे भयानां सहयोगतः || १०९ ||

सदैवैनां महेशानि दीपिनीं परिकीर्तिताम् |

एतामपि सहस्रं च प्रजपेत् कुण्डलीमुखे || ११० ||

प्रणवादौ जपेद् विद्यां गायत्र्यां दीपिनीं पराम् |

गायत्रीं शृणु वक्ष्यामि अ/ ङ/ म/ म/ ङ/ न/ प्रिये || १११ ||

षडक्षरमिदं मन्त्रं गायत्री समुदीरितम् |

अस्याश्च फलमाप्नोति तदैव वरवर्णिनि || ११२ ||

स्मरणं कुण्डलीमध्ये मनसा उन्मनी सह |

सहस्रारे कर्णिकायां चन्द्रमण्डलमध्यगाम् || ११३ ||

सर्वसंकल्परहिता कला सप्तदशी भवेत् |

उन्मनीनाम तस्य हि भवपाशनिकृन्तनी || ११४ ||

उन्मन्या सहितो योगी न योगी उन्मनीं विना |

बुद्धिमङ्कुशसंयुक्तामुन्मनीं कुसुमान्विताम् || ११५ ||

उन्मनीञ्च मनोवर्णं स्मरणात् सिद्धिदायिनीम् |

स्मरेत् कुण्डलीयोगादमृतं रक्तरोचिषम् |

उन्मनीकुसुमं तत्तु ज्ञेयं परमदुर्लभम् || ११६ ||

हंसं नित्यमनन्तमध्यमगुणं स्वाधारतो निर्गतां
शक्तिं कुण्डलिनी समस्तजननी हस्ते गृहीत्वा च ताम् |
कान्ता स्वाश्रममर्ककोटिरुचिरा नामामृतोल्लासिनी
देवीं तां गमनागमैः स्थिरमतिर्ध्यायेद् जगन्मोहिनीम् || ११७ ||

इति ते कथितं ध्यानं मृत्युञ्जयमनामयम् |

विना मनोन्मनीमन्त्रं विना ध्यानं जपं वृथा || ११८ ||

ततः संकल्प्य ध्यात्वैव मूलमन्त्रस्य सिद्धये |

गायत्रीमयुतं जप्त्वा तदर्धं प्रणवं जपेत् || ११९ ||

दीपनं प्रणवस्यार्धं जपेत् पञ्चदिनावधि |

शूद्राणां प्रणवं देवि चतुर्दशस्वरं प्रिये || १२० ||

नादबिन्दुसमायुक्तं स्त्रीणां चैव वरानने |

मनौ स्वाहा च या देवी शूद्रोच्चार्या न संशयः || १२१ ||

होमकार्ये महेशानि शूद्रः स्वाहां न चोच्चरेत् |

मन्त्रोऽप्यूहो नास्ति शूद्रे विषबीजं विना प्रिये || १२२ ||

गणपत्याद्यौ यद् दत्तं बलिदानं दिने दिने |

तेनैव बलिना भद्रे हविष्यं सम्मतं सदा || १२३ ||

शेष इष्टं प्रपूज्याथ हविष्याशी स्त्रिया सह |

जापकस्य च यन्मन्त्रमेकवर्णं ततः प्रिये || १२४ ||

तस्य पत्नी साभिरूपा प्रयतं प्रजपेत् यदि |

तदा फलमवाप्नोति साधकः शक्तिसङ्गतः || १२५ ||

शक्तिहीने भवेद् दुःखं कोटिपुरश्चरणेन किम् |

साधकश्च हविष्याशी साधिका तद्विवर्जिता || १२६ ||

यथेच्छाभोजनं तस्यास्ताम्बूलपूरितानना |

नानाभरणवेषाढ्या धूपामोदनमोदिता || १२७ ||

शिवहीना तु या नारी दूरे तां परिवर्जयेत् |


श्रीदेवी उवाच


गायत्रीजपकाले तु साधिका किं जपेत् प्रभो || १२८ ||


श्रीशिव उवाच

श्लोक नो. २९, ३०अ मिस्सिन्ग्

गायत्रीमजपाविद्यां प्रजपेद् यदि साधिका |

पूर्वोक्तेन विधानेन ध्यात्वा कृत्वा च पूजनम् || १३१ ||

मानसं परमेशानि जपेत् तद्गतमानसा |

ततः षष्ठदिनं प्राप्य प्रातः स्नानं समाचरेत् || १३२ ||

कुङ्कुमागुरुपङ्केन कस्तूरीचन्दनेन च |

कूर्मबीजं लिखेद् भद्रे अथवा श्वेतचन्दनैः || १३३ ||

तत्रासनं समास्थाय विशेत् साधकसन्निधौ |

एवं विधाय सा साध्वी साधकोऽपि प्रसन्नधीः || १३४ ||

संकल्प्य विधिना भक्त्या मूलमन्त्रस्य सिद्धये |

लक्षं जपेत् पुरश्चर्याविधौ विधिविधानतः || १३५ ||

तद्विधानं वदामीशे श्रुत्वा त्वमवधारय |

ओं ओं क/ हु/ भ/ स/ देवि प्रातः स्नानोत्तर परम् || १३६ ||

दशधा प्रजपेन्मन्त्रं जिह्वाशोधनकारकम् |

ततश्च प्रजपेन्मन्त्रं मौनी मध्यन्दिनावधि || १३७ ||

तस्य वामे तस्य पत्नी तस्य एकाक्षरं जपेत् |

साधकः शिवरूपश्च साधिका शिवरूपिणी || १३८ ||

अन्योन्यचिन्तनाच्चैव देवत्वं जायते ध्रुवम् |

आदावन्ते च प्रणवं दत्वा मन्त्रं जपेत् सुधीः || १३९ ||

दशधा वा सप्तदशं जप्त्वा मन्त्रं जपेत्तु सः |

प्रातःकालं समारभ्य जपेन्मध्यन्दिनावधि || १४० ||

एवं हि प्रत्यहं कुर्याद् यावल्लक्षं समाप्यते |

द्वितीयप्रहरादूर्ध्वं नित्यपूजादिकं चरेत् || १४१ ||

स्नानं कृत्वा ततो धीमान् हविष्यं बुभुजेत् ततः |

तत्पत्नी शक्तिरूपा च पातिव्रत्यपरायणा || १४२ ||

तस्याश्चेच्छा भवेद् येषु बुभुजेत् पानभूषिता |

दशदण्डगते रात्रौ शययायां प्रजपेन्मनुम् || १४३ ||

ताम्बूलपूरितमुखो धूपामोदेन मोदितः |

वामे श्रीशक्तिरूपा च जपेच्च साधकाक्षरम् || १४४ ||

दक्षिणे साधकः सिद्धो दिवामाने जपेन्मनुम् |

आद्यन्तगोपनं कृत्वा प्रत्यहं प्रजपेद् यदि || १४५ ||

ततः सिद्धिमवाप्नोति प्रकाशाद्धानिरेव च |

मातृकापुटितं कृत्वा चन्द्रबिन्दुसमन्वितम् || १४६ ||

प्रत्यहं प्रजपेन्मन्त्रमनुलोमविलोमतः |

जपादौ सुभगे प्रौढे प्रत्यहं प्रजपेन्मनुम् || १४७ ||

तेन हे सुभगे मातः पुरश्चरणमीरितम् |

समाप्ते पुरश्चरणे गुरुदेवं प्रपूजयेत् || १४८ ||

तदा सिद्धो भवेन्मन्त्रो गुरुदेवस्य पूजनात् |

जम्बूद्वीपस्य वर्षे च कलिकाले च भारते || १४९ ||

दशांशं वर्जयेद् भद्रे नास्ति होमः कदाचन |

दशांशं क्रमतो देवि पञ्चाङ्गविधिना कलौ || १५० ||

नाचरेत् कुत्रचिन्मन्त्री पुरश्चर्याविधिं शुभे |

भ्रमाद् यदि महेशानि कारयेत् साधकोत्तमः || १५१ ||

सिद्धिहानिर्महानिष्टं जायते भारतेऽनघ |

दशांशं जायते पूर्णं गुरुदेवस्य पूजनात् || १५२ ||

अत एव महेशानि भक्त्या गुरुपदं यजेत् |

दक्षिणां गुरवे दद्यात् सुवर्णं वाससान्वितम् || १५३ ||

धान्यं तिलं तथा दद्याद् धेनुं वापि पयस्विनीम् |

अन्यथा विफलं सर्वं कोटिपुरश्चरेण किम् || १५४ ||

कुमारीभोजनं सान्तं सर्वसिद्धिप्रदायकम् |

कुमारी भोजिता येन त्रैलोक्यं तेन भोजितम् || १५५ ||

पूजनाद् दर्शनाद् तस्या रमणात् स्पर्शनात् प्रिये |

सर्वं सम्पूर्णमायाति साधको भक्तिमानसः || १५६ ||

पुरश्चरणसम्पन्नो वीरसाधनमाचरेत् |

यस्यानुष्ठानमात्रेण मन्दभाग्योऽपि सिध्यति || १५७ ||

पुत्रदारधनस्नेहलोभमोहविवर्जितः |

मन्त्रं वा साधयिष्यामि देहं वा पातयाम्यहम् || १५८ ||

एवं प्रतिज्ञामासाद्य गुरुमाराध्य यत्नतः |

बलिदानादिना सर्वं मानसैः परिपूज्य च || १५९ ||

शरत्काले महापूजा क्रियते या च वार्षिकी |

तस्मिन् पक्षे विशेषेण पुरश्चरणमाचरेत् || १६० ||

देव्या विधिं समारभ्य यावत् स्यान्नवमी तिथिः |

प्रत्यहं प्रजपेन्मन्त्रं सहस्रं भक्तिभावतः || १६१ ||

होमपूजादिकं चैव यथाशक्त्या विधिं चरेत् |

सप्तम्यादौ विशेषेण पूजयेदिष्टदेवताम् || १६२ ||

अष्टम्यादि नवम्यान्तमुपवासपरो भवेत् |

अष्टमी-नवमीरात्रौ पूजां कुर्यात् महोत्सवम् || १६३ ||

इत्थं जपादिकं कुर्यात् साधकः स्थिरमानसः |

शक्त्या सह वरारोहे कुमारीपूजनं चरेत् || १६४ ||

दशम्यां पारणं कुर्यान्मत्स्यमांसादिभिः प्रिये |

एवं पुरस्क्रियां कृत्वा साधकः शिवतां व्रजेत् || १६५ ||

अथवान्यप्रकारेण पुरश्चरणमुच्यते |

शरत्काले महादेव्या बोधेन च महोत्सवे || १६६ ||

प्रतिपत्तिथिमारभ्य नवमान्तं मम प्रिये |

पूर्वोक्तविधिना मन्त्री कुर्यात् पुरस्क्रियां धिया || १६७ ||

अथवान्य प्रकारेण पुरश्चरणमुच्यते |

शरत्काले चतुर्थ्यादि नवम्यन्तं सहस्रकम् || १६८ ||

जपित्वा प्रत्यहं भद्रे सप्तम्यादौ प्रपूजयेत् |

तथा सर्वोपचारैस्तु वस्त्रालङ्कारभूषणैः || १६९ ||

महिषैश्छागलैर्मेषैश्चतुर्वर्गं लभेन्नरः |

अष्टमीसन्धिवेलायां तेनैन विधिना पशुम् || १७० ||

छित्त्वा तस्योपरि स्थित्वा मध्यनक्तं जपेत् सुधीः |

विभीर्ध्यानपरो भूत्वा वांछितां सिद्धिमाप्नुयात् || १७१ ||

नवम्यां नियतं जप्त्वा पूजयित्वा यथाविधि |

गुरवे दक्षिणां दद्याद् दशम्यां पारयेत्ततः || १७२ ||

एवं कृत्वा पुरश्चर्यां किं न साधयति साधकः |

अथवान्यप्रकारेण पुरश्चरणमुच्यते || १७३ ||

अष्टमीसन्धिवेलायामष्टोत्तरलतागृहे |

प्रविश्य मन्त्री विधिवत् तासामभ्यर्च्य यत्नतः || १७४ ||

पूर्वोक्तकल्पमासाद्य पूजादिकमथाचरन् |

केवलं कामदेवोऽसौ जपेदष्टोत्तरं शतम् || १७५ ||

महासिद्धो भवेत् सद्यो लतादर्शनपूजनात् |

लतागृहं शृणु प्रौढे कामकौतुकलालसे || १७६ ||

अष्टौ संख्या अतिक्रम्य नवसंख्यादिसांखिकाम् |

यौवनादिगुणैर्युक्ताः साधिकाः कामगर्विताः || १७७ ||

स्त्रियो यत्र गृहे सन्ति तद्गृहं हि लतागृहम् |

अथवान्यप्रकारेण पुरश्चरणमुच्यते || १७८ ||

पूर्वोक्तानि महेशानि हेमन्तादि-ऋतौ चरेत् |

साधकः पूर्णतां प्राप्य सर्वभोगेश्वरो भवेत् || १७९ ||

अथवान्यप्रकारेण पुरश्चरणमुच्यते |

चतुर्दशीं समारभ्य यावदन्या चतुर्दशी || १८० ||

तावज्जप्ते महेशानि मन्त्री वांछितमाप्नुयात् |

अथवान्यप्रकारेण पुरश्चरणमुच्यते || १८१ ||

कृष्णाष्टम्यां समारभ्य यावत् कृष्णाष्टमी भवेत् |

सहस्रसंख्याजप्ते तु पुरश्चरणमिष्यते || १८२ ||

यत् कृत्वा परमेशानि सिद्धिः स्यान्नत्र संशयः |

अथवान्यप्रकारेण पुरश्चरणमुच्यते || १८३ ||

कृष्णां चतुर्दशीं प्राप्य नवम्यन्तं महोत्सवे |

अष्टमी-नवमीरात्रौ पूजां कुर्याद् विशेषतः || १८४ ||

दशम्यां पारणं कुर्यान्मत्स्यमांसादिभिः प्रिये |

षट्सहस्रंजपेन्नित्यं भक्तिभावपरायणः || १८५ ||

अथवान्यप्रकारेण पुरश्चरणमुच्यते |

अष्टम्याञ्च चतुर्दश्यां नवम्यां वीरवन्दिते || १८६ ||

सूर्योदयं समारभ्य यावत् सूर्योदयो भवेत् |

तावज्जप्ते निरातङ्कः सर्वसिद्धीश्वरो भवेत् || १८७ ||

अथवान्यप्रकारेण पुरश्चरणमुच्यते |

अष्टम्याञ्च चतुर्दश्यां पक्षयोरुभयोरपि || १८८ ||

अस्तमारभ्य सूर्यस्य यावत् सूर्यास्तमं भवेत् |

तावज्जप्तो निरातंकः सर्वसिद्धीश्वरो भवेत् || १८९ ||

अथवा निर्जनस्थस्य अस्थिशययासनेन च |

उदयास्तं दिवा जप्त्वा सर्वसिद्धीश्वरो भवेत् || १९० ||

तेनासनेन वा देवी अस्तमारभ्य भस्वतः |

जपित्वा चास्तपर्यन्तं साधकः सिद्धिमाप्नुयात् || १९१ ||

जपान्ते पूजयित्वा च गुरवे दक्षिणां ददेत् |

अथवान्यप्रकारेण पुरश्चरणमुच्यते || १९२ ||

सूर्योदयं समारभ्य घटिका च दशक्रमात् |

ऋतवः स्युर्वसन्ताद्या अहोरात्रं दिने दिने || १९३ ||

वसन्तो ग्रीष्म वर्षा च शरधेमन्तशिशिराः |

वसन्तश्चैव पूर्वाह्णे ग्रीष्मो मध्यन्दिनं तथा || १९४ ||

अपराह्ने प्रावृषः स्युः प्रदोषे शरदः स्मृताः |

अर्द्धरात्रौ तु हेमन्तः सेषे च शिशिरः स्मृतः || १९५ ||

सूर्योदयं समारभ्य वसन्तान्तं समाहितः |

तावज्जप्ते महेशानि पुरश्चर्या हि सिध्यति || १९६ ||

ततः पूजादिकं कृत्वा शक्तियुक्तश्च साधकः |

गुरवे दक्षिणां दत्वा सर्वसिद्धीश्वरो भवेत् || १९७ ||

अथवान्यप्रकारेण पुरश्चरणमुच्यते |

ग्रीष्मादिषु महेशानि पञ्चस्वर्त्तुषु साधकः || १९८ ||

पृथग्जप्त्वा वरारोहे पुरश्चर्या हि सिध्यति |

पूर्वोक्तविधिना सर्वं कर्तव्यं वीरवन्दिते || १९९ ||

ऋतौ जप्त्वा समस्ते तु शक्तितः पूजयेत् पराम् |

एवमाचर्यकृत्यं वै धनानामीश्वरो भवेत् || २०० ||

अथवान्यप्रकारेण पुरश्चरणमुच्यते |

कुमारीपूजनादेव पुरश्चर्याविधिः स्मृतः || २०१ ||

अथवान्यप्रकारेण पुरश्चरणमुच्यते |

गुरुमानीय संस्थाप्य देववत् पूजयेद् विभुम् || २०२ ||

वस्त्रालंकारभूषाद्यैः स्वयं सन्तोषयेद् गुरुम् |

तत्सुतं तत्सुतं वापि तत्पत्नीञ्च विशेषतः || २०३ ||

पूजयित्वा मनुं जप्त्वा सर्वसिद्धीश्वरो भवेत् |

गुरुसन्तोषमात्रेण दुष्टमन्त्रोऽपि सिध्यति || २०४ ||

मासि मासि च मन्त्रस्य संस्कारान् दशधा चरेत् |

एवं क्रमविधानेन कृत्वा नित्यं हि साधकः || २०५ ||

षण्मासाभ्यन्तरे वापि एकवर्षान्तरेऽपि वा |

साधनैः सुभगे भद्रे यदि सिद्धिर्न जायते || २०६ ||

उपायास्तत्र कर्तव्याः सत्यमेतं मतं शृणु |

ख्यातिर्वाहनभूषादिलाभः सुचिरजीविता || २०७ ||

नृपाणां तत्कुलानाञ्च वात्सल्यं लोकवश्यता |

महदैश्वर्यनित्यञ्च पुत्रपौत्रादिसम्पदः || २०८ ||

अधमा सिद्धयो भद्रे षण्मासाभ्यन्तरे यदि |

एकवर्षान्तरे वापि सन्ति शङ्करवन्दिते || २०९ ||

साधकाश्च तदा सिद्धा नात्र कार्या विचारणा |

अत्रोपायान् प्रवक्ष्यामि यदि सिद्धिविलम्बनम् || २१० ||

भ्रामणं बोधनं वश्यं पाडनञ्च तथा प्रिये |

पोषणं तोषणञ्चैव दहनञ्च ततः परम् || २११ ||

उपायाः सन्ति सप्तैते कृत्वा त्रेतायुगेषु च |

द्वापरे च तथा भद्रे उपायं सप्तमं स्मृतम् || २१२ ||

न प्रशस्तं कलौ भद्रे सप्तशंकरभाषितम् |

डाकिन्यादियुतं कृत्वा लक्षञ्च प्रजपेन्मनुम् || २१३ ||

डाकिनीपुटितं कृत्वा यदि सिद्धिर्न जायते |

राकिणीपुटितं कृत्वा लक्षञ्च प्रजपेन्मनुम् || २१४ ||

राकिणीपुटितं कृत्वा यदि सिद्धिर्न जायते |

लाकिनीपुटितं कृत्वा लक्षञ्च प्रजपेन्मनुम् || २१५ ||

लाकिनीपुटितं कृत्वा यदि सिद्धिर्न जायते |

काकिनीपुटितं कृत्वा लक्षञ्च प्रजपेन्मनुम् || २१६ ||

काकिनीपुटितं कृत्वा यदि सिद्धिर्न जायते |

शाकिनीपुटितं कृत्वा लक्षञ्च प्रजपेन्मनुम् || २१७ ||

शाकिनीपुटितं कृत्वा जपेल्लक्षं समाहितः |

तदा सिद्धो भवेन्मन्त्रो नात्र कार्या विचारणा || २१८ ||

लाकिनीपुटितं कृत्वा यदि सिद्धिर्न जायते |

पुटितं सत्त्वरुपिण्या लक्षञ्च प्रजपेन्मनुम् || २१९ ||

पुटितं सत्त्वरूपिण्या यदि सिद्धिर्न जायते |

ककारादिक्षकारान्ता मातृका वर्णरूपिणी || २२० ||

तथा संपुटितं कृत्वा लक्षञ्च प्रजपेन्मनुम् |

छिन्नविद्यादयो मन्त्रास्तन्त्रे तन्त्रे निरूपिताः || २२१ ||

एते ते सिद्धिमायान्ति मातृकावर्णभावतः |

निश्चितं मन्त्रसिद्धिः स्यान्नात्र कार्या विचारणा || २२२ ||

वर्णमयी पुटीकृत्य यदि सिद्धिर्न जायते |

ततो गुरुपुटीकृत्य लक्षञ्च संजपेन्मनुम् || २२३ ||

गुरुदेवप्रसादेन अतुलां सिद्धिमाप्नुयात् |


श्रीपार्वती उवाच


आदिदेव महादेव आद्यन्तगोपनं वद |

यदि नो कथ्यते देव विमुञ्चामि तदा तनुम् || २२४ ||


श्री-ईश्वर उवाच


आद्यन्तगोपनं सूक्ष्मं कथं तत् कथयाम्यहम् |

जम्बूद्वीपस्य वर्षेषु कलौ लोकाधमाः स्मृताः || २२५ ||

गुरुभक्तिविहीनाश्च भविष्यन्ति गृहे गृहे |

दुष्क्रियायां रताः सर्वे परमज्ञानवर्जिताः || २२६ ||

लौकिकाचारिणः सर्वे भविष्यन्ति गृहे गृहे |

विना शब्दपरिज्ञानं मन्त्रदाता द्विजो भवेत् || २२७ ||

मम सः श्रीमतीमन्त्रः संसारोद्भवबन्धनात् |

कथ्यते देवदेवेशि मन्त्रः सर्वत्र सिद्धिदः ||

जायते तेन मे शङ्का कथं मे प्राणवल्लभे || २२८ ||


श्रीभैरवी उवाच


भूतनाथ महाभाग हृदये मे कृपां कुरु |

कथ्यतं कथ्यतां देव यतस्ते सेविका वयम् || २२९ ||


श्री-ईश्वर उवाच


सुभगे शृणु मे मातः कृपया कथयामि ते |

प्रथमे डाकिनी बीजं युवती षोडशाक्षरम् || २३० ||

अ/ आ/ इ/ ई/ उ/ ऊ/ ऋ/ ॠ/ ऌ/ ॡ/ ए/ ऐ/ ओ/ औ/ अ/ अ/ः
डाकिनी देवदेवस्य ईरितं बीजमुत्तमम् |
आद्यन्तपुटितं कृत्वा मन्त्रं लक्षं जपेद् यदि || २३१ ||

तदा सिद्धो वरारोहे नान्यथा वचनं मम |
अधुना संप्रवक्ष्यामि डाकिनीबीजमद्भुतम् ||

एकोच्चारणमात्रेण सत्यत्रेतायुगे भवेत् || २३३ ||

क/ ख/ ग/ घ/ ङ/ च/ छ/ ज/ झ/ ञ/ दश तथा महेश्वरि |

इति ते कथितं भक्त्या राकिनीबीजमद्भुतम् || २३४ ||

ट/ ठ/ ड/ ढ/ ण/ त/ थ/ द/ ध/ न/ दशकं परमेश्वरि |

इति ते कथितं भक्त्या लाकिनीबीजनिर्णयम् || २३५ ||

अधुना संप्रवक्ष्यामि काकिनीं सिद्धिदायिनीम् |

प/ फ/ ब/ भ/ म/ य/ र/ ल/ आर्णः श्रीवीरवन्दिते || २३६ ||

कथितं काकिनीबीजं चतुर्वर्गफलप्रदम् |

अधुना संप्रवक्ष्यामि सुभगे शृणु शाकिनीम् || २३७ ||

व/ श/ ष/ स/ चतुर्वर्णं वाञ्छितार्थप्रदं प्रिये |

इदं तु शाकिनीबीजं चतुर्वर्गप्रदायकम् || २३८ ||

अधुना संप्रवक्ष्यामि सुभगे शृणु हाकिनीम् |

ह/ ल/ क्ष/ हाकिनीबीजं क्षिप्रं सिद्धिप्रदायकम् || २३९ ||

सत्त्वस्वरूपिणीबीजं शृणु सिद्धिप्रदायकम् |

अ/ आ/ इ/ ई/ उ/ ऊ/ ऋ/ ॠ/ ऌ/ ॡ/ ए/ ऐ/ ओ/ औ/ अ/ अ/ः || २४० ||

षोडशार्णमहाबीजं सत्त्वमध्ये प्रकीर्तितम् |

रजःस्वरूपिणीबीजं शीघ्रसिद्धिप्रदायकम् || २४१ ||

क/ ख/ ग/ घ/ ङ/ च/ छ/ ज/ झ/ ञ/ ट/ ठ/ ड/ ढ/ ण/ त/ थ/ |

इदं सप्तदर्शार्णं हि रजोमध्ये प्रकीर्तितम् || २४२ ||

रम्यं तमोमयीबीजमधुना ते वदाम्यहम् |

द/ ध/ न/ प/ फ/ ब/ भ/ म/ य/ र/ ल/ व/ श/ ष/ स/ ह/ क्ष/ || २४३ ||

इदं सप्तदशार्णं हि तमोमध्ये उदाहृतम् |

अधुना संप्रवक्ष्यामि मातृकाबीजमद्भुतम् || २४४ ||

अ/ आ/ इ/ ई/ उ/ ऊ/ ऋ/ ॠ/ ऌ/ ॡ/ ए/ ऐ/ ओ/ औ/ अ/ अ/ः
क/ ख/ ग/ घ/ ङ/ च/ छ/ ज/ झ/ ञ/ ट/ ठ/ ड/ ढ/ ण/ त/ थ/ द/ ध/ न/
प/ फ/ ब/ भ/ म/ य/ र/ ल/ व/ श/ ष/ स/ ह/ क्ष/

इदं पञ्चाशदर्णं हि मातृकायाः प्रकीर्तितम् |

अनुलोमविलोमेन पुटीकृत्य जपं चरेत् || २४५ ||

लक्षं यावन्महेशानि ततः सिद्धो न संशयः |

गुरुबीजं समुद्दिष्टं गुरुरित्यक्षरद्वयम् || २४६ ||

डाकिनी राकिनी देवि लाकिनी काकिनी ततः |

शाकिनी हाहिनी संज्ञा सत्त्वरूपा ततः || २४७ ||

रजोरूपा तमोरूपा मातृकारूपिणी गुरुः |

एतास्तु परमेशानि मूर्तिः पञ्चाशदक्षरम् || २४८ ||

डाकिनी च महादेवि अणिमासिद्धिदायिनी |

राकिणी लघिमासिद्धिदायिनी लाकिनी तथा || २४९ ||

प्राप्तिसिद्धिदायिनी च काकिनी काम्यदायिनी |

शाकिनी महिमासिद्धिदायिनी हाकिनी ततः || २५० ||

कामावशायितासिद्धिं जपादेव प्रयच्छति |

सत्त्वरूपा तमोरूपा रजोरूपा तथैव च || २५१ ||

एताश्चैव महादेवि चतुर्वर्गं ददन्ति हि |

पञ्चाशद्वर्णरूपा या निर्वाणं सा ददाति हि || २५२ ||

गुरुर्ददाति सकलं ब्रह्माण्डज्ञानमव्ययम् |

इति ते कथितं भक्त्या डाकिन्यादिविनिर्णयम् || २५३ ||

डाकीनी राकिणी चैव लाकिनी काकिनी तथा |

शाकिनी लाकिनी देवि वर्णानामत्र देवताः || २५४ ||

गुणानां सिद्धिवर्णानां षडेता अधिदेवताः |

डाकिन्यादेर्विना ज्ञानं वर्णे वर्णे पृथक् पृथक् || २५५ ||

अज्ञानात् प्रजपेन्मन्त्रं डाकिन्यादेश्च भक्षणम् |

विना वर्णपरिज्ञानं कोटिपुरश्चरणेन किम् || २५६ ||

तस्य सर्वं भवेद् दुःखमरण्ये रोदनं यथा |

शृणु ध्यानं प्रवक्ष्यामि डाकिनीनां शुचिस्मिते || २५७ ||


ध्यानानि यथा -


शरच्चन्द्रप्रतीकाशां द्विभुजां लोललोचनाम् |

सिन्दूरतिलकोद्दीप्तामञ्जनाञ्चितलोचनाम् || २५८ ||

कृष्णाम्बरपरीधानां नानालङ्कारभूषिताम् |

ध्यायेच्छशिमुखीं नित्यां डाकिनीमन्त्रसिद्धये || २५९ ||

अरुणादित्यसंकाशां द्विभुजां मृगलोचनाम् |

सिन्दूरतिलकोद्दीप्तामञ्जनाञ्चितलोचनाम् || २६० ||

शुक्लाम्बरपरीधानां नानाभरणभूषिताम् |

ध्ययेच्छशिमुखीं नित्यां राकिनीमन्त्रसिद्धये || २६१ ||

सिन्दूरवर्णसंकाशां द्विभुजां खञ्जनेक्षणाम् |

सिन्दूरतिलकोद्दीप्तामञ्जनाञ्चितलोचनाम् || २६२ ||

शुक्लाम्बरपरीधानां नानालङ्कारभूषिताम् |

ध्यायेच्छशिमुखीं नित्यां लाकिनीमन्त्रसिद्धये || २६३ ||

यवयावकसंकाशां द्विभुजां कञ्जनेक्षणाम् |

सिन्दूरतिलकोद्दीप्तामञ्जनाञ्चितलोचनाम् || २६४ ||

शुक्लाम्बरपरिधानां नानाभरणभूषिताम् |

ध्यायेच्छशिमुखीं नित्यां काकिनीमन्त्रसिद्धये || २६५ ||

शुक्लज्योतिप्रतीकाशां द्विभुजां मृगलोचनाम् |

सिन्दूरतिलकोद्दीप्ताम् अञ्जनाञ्चितलोचनाम् || २६६ ||

कृष्णाम्बरपरीधानां नीनालङ्कारभूषिताम् |

ध्यायेच्छशिमुखीं नित्यां शाकिनीमन्त्रसिद्धये || २६७ ||

शुक्लकृष्णारुणाभासां द्विभूजां लोललोचनाम् |

भ्रमद्भ्रमरसंकाशां कुटिलालककुन्तलाम् || २६८ ||

सिन्दूरतिलकोद्दीप्ताम् अञ्जनाञ्चितलोचनाम् |

रक्तवस्त्रपरीधानां शुक्लवस्त्रोत्तरीयिणीम् || 

ध्यायेच्छशिमुखीं नित्यां हाकिनीमन्त्रसिद्धये || २६९ ||

त्रिगुणायाश्च देवेशि ध्यानं पूर्वमुदाहृतम् |

अधुना संप्रवक्ष्यामि मातृकाध्यानमुत्तमम् || २७० ||

पञ्चाशल्लिपिभिर्विभक्तमुखदोःपन्मध्यवक्षस्थलीम् |

भास्वन्मौलिनिबद्धचन्द्रशकलामापीनतुङ्गस्तनीम् |

मुद्रामक्षगुणं सुधाढ्यकलशं विद्याञ्च हस्ताम्बुजै-
र्बिभ्राणां विशदप्रभां त्रिनयनां वाग्देवतामाश्रये || २७१ ||

गुरोरपि महेशानि पूर्वोक्तध्यानमाचरन् ||

पाद्यादिभिर्वरारोहे संपूज्य प्रजपेन्मनुम् |

पूर्वोक्तो यस्य यद्बीजं यन्मन्त्रस्तस्य निर्णयम् || २७२ ||

अं डाकिन्यै नमः स्वाहा कं काकिन्यै नमस्ततः |

टं लाकिन्यै नमः स्वाहा पं काकिन्यै नमस्ततः || २७३ ||

वं शाकिन्यै नमः स्वाहा हं हाकिन्यै नमस्ततः |

तत्तद्ध्यानेन इत्युक्त्वा पूजयेदुपचारतः || २७४ ||

उक्तबीजेन पुटितं कृत्वा मन्त्रं जपेद् यदि |

तदा सिद्धो भवेन्मन्त्रो शापादिदोषदूषितः || २७५ ||

इति ते कथितं दिव्यं कलिकालस्य सम्मतम् |

कलौ भारतवर्षे च नान्यद्वर्षे कदाचन || २७६ ||

शमादिषोडशभाण्डारं डाकिनीसिद्धिसंयुतम् |

चण्डिकादिदशभाण्डारं काकिनीसिद्धिसंयुतम् || २७७ ||

शमादिदशभाण्डारं लाकिनीसिद्धिनिर्णयम् |

गदादिदशभाण्डारं काकिनीसिद्धिनिर्णयम् || २७८ ||

कल्याणीत्यादिकीर्त्यन्तं शाकिनीसिद्धिनिर्णयम् |

बद्धादिविलक्षणान्तं हाकिनीसिद्धिनिर्णयम् || २७९ ||

गुरुदेवं विना भद्रे निष्फलं श्रमकेवलम् |

कलिकाले वरारोहे कलहं गुरुशिष्ययोः || २८० ||

भविष्यति न सन्देहः प्रहारं गुरुशिष्ययोः |

इति ते कथितं सर्वं कालिकायाः सुदुर्लभम् || २८१ ||

कालिका भैरवो देवो जागर्ति हि सदा कलौ |

तारा चैव महाविद्या तथा त्रिपुरसुन्दरी || २८२ ||

धनदा छिन्नमस्ता च मातङ्गी बगलामुखी |

त्वरिता अन्नपूर्णा च तथा वाग्वादिनी प्रिये || २८३ ||

महिषघ्नी विशालाक्षी तारिणी भुवनेशिका |

धूमावती भैरवी च तथा प्रत्यङ्गिरादिकाः || २८४ ||

दुर्गा शाकम्भरी चैव कलिकाले हि निद्रिता |

एतासां जपमन्त्रेण निद्राभङ्गोऽभिजायते || २८५ ||

निद्राभङ्गे कृते देवि सिद्धिहानिश्च जायते |

किं तासां जपपूजायां हानिः स्यादुत्तरोत्तरम् || २८६ ||

ब्राह्मणे क्षत्रिये वैश्ये शूद्रे विद्या प्रशस्यते |

सत्यादि च चतुर्युगे सर्वजातिषु कालिका || २८७ ||

प्रशस्ता कालिका विद्या अस्याश्च फलबोधिका |

उपायांस्तत्र वक्ष्यामि येन सिद्धिः प्रजायते || २८८ ||

सहस्रं डाकिनीमन्त्रं निशायां प्रजपेद् यदि |

बहुकाले तदा सिद्धिर्जायते नात्र संश्यः || २८९ ||

स्त्रीशूद्राणां पुरश्चर्या नास्ति भद्रे कदाचन |

जपपूजा सदैवासां प्रशस्ता वीरवन्दिते || २९० ||

चन्द्रसूर्योपरागे च शूद्राणां सिद्धिरुत्तमा |

जायते सुभगे मातर्गुरुभक्तिर्भवेत् यदि || २९१ ||

तदा सिद्धिमवाप्नोति गुरुभक्त्या विशेषतः |

इति दक्षिणाम्नाये श्रीकङ्कालमालिनीतन्त्रे पञ्चमः पटलः समाप्तः ||

ग्रन्थश्च समाप्तः


###########   END OF FILE  #######