####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00009
Uniform title: āṣṭaprakaraṇa ratnatrayaparīkṣā
Main title: āṣṭaprakaraṇam ratnatrayaparīkṣā
Secondary title: ratnatraya bhogakārikā nādakārikā mokṣakārikā paramokṣanirasakārikāḥ
Author : śrīkaṇṭha
Commentator : aghoraśiva
Editor : kṛṣṇa śāstrī

Description: 
E-text of the ratnatrayaparīkṣā from the ratnatraya bhogakārikā nādakārikā mokṣakārikā paramokṣanirasakārikāḥ in the devakottai series.


Notes: 
Data-entered by the staff of Muktabodha under the supervision of Mark Dyczkowski.    Revision 0: December 12, 2007  .

Publisher : śivāgama siddhānta paripalana saṅgham
Publication year : 1925
Publication city : <devakottai>
Publication country : India
####################################################


ratnatrayaparīkṣā

śrīkaṇṭhasūripraṇītā

aghoraśivācāryakṛtaratnatrayollekhinyā sametā

	śivaṃ śivakaraṃ natvā siddhāntārthaprakāśakam |
	ratnatrayaparīkṣārthaḥ saṃkṣepeṇa prakāśyate ||
	kaiścid vedadṛśā'paraiḥ kuladhiyā nyāyānuvṛttyetarai-
	ranyaiśca svamanīṣayā malinitaṃ mohena ratnatrayam |
	tasmāt karṇavibhūṣaṇāya viduṣāṃ bhūyo'pi sadvyākriyā-
	śāṇollekhanasaṃskṛtaṃ tadadhunā so'haṃ karomyujjvalam ||

	namaḥ śivāya śaktyai ca bindave śāśvatāya ca |
	gurave ca gaṇeśāya kārtikeyāya dhīmate || 1 ||

	atra ca pūrvārddhena prakaraṇapratipādyaṃ ratnatrayaṃ prastāvayan praṇamati | 
uttarārdhena sakalasaṃhitānāmavatārakatvena guruṃ bhagavantaṃ śrīkaṇṭhanāthaṃ 
sarvavighnāpahaṃ ca gaṇapatiṃ siddhāntaśāstraśravaṇaviśeṣitajñānaṃ ca 
kārtikeyamasyaivāvighnaparisamāptyarthamabhivandate || 1 ||

	tadeva vastutrayaṃ vyākhyeyatayā pratijānīte-

	binduśaktiśivākhyāni trīṇi siddhāntasāgarāt |
	samuddhṛtya satāṃ dhartuṃ hṛtkaṇṭhaśravaṇe sadā || 2 ||

	karṇayoḥ śravaṇena, kaṇṭhopalakṣitavāgindriye pāṭhena, hṛdyavadhānena satāṃ 
dhartuṃ bindvādīni ratnāni siddhāntasamudrāduddhṛtya || 2 ||

	ratnāni vāṅmayaiḥ sutrairnibadhyante mayā tataḥ |
	kṣantumarhanti tatsanto nāsūyā paricārake || 3 ||

	vāṅmayaiḥ sūtrairmayā nibaddhyante | loke hi karṇādyavayaveṣu dhāraṇārthaṃ 
ratnāni sūtrairbaddhyante | tasmāt sadārādhanapravṛtte mayyasūyā na kartavyeti || 3 ||

	eṣāṃ ca bindvādīnāṃ ratnasādharmyād ratnaśabdavācyatvamityāha-

	rañjanāt sarvatattveṣu rāgādebhyo'dhikārayoḥ |
	īśvarāṇāṃ śivānāṃ ca dhāraṇīyatayā dhiyā || 4 ||

	puṃsāmapratighodāramarīcinicayena ca |
	ratnānīṣṭavidhānācca bindvādyāḥ śivaśāsane || 5 ||

	ratnāni yathā loke rājante mahārghatayā prakāśante, samīpavartināṃ ca 
rāgamutpādayanti, puruṣaiścāvayavairdhāryante, dīptimantīṣṭavidhāyīni ca bhavanti; yathā 
bindvādayaḥ padārthāḥ sarveṣu śaktyādiṣu tattveṣūpādānatayā'dhiṣṭhātṛtvena ca 
prakāśante, īśvarāṇāmanantādīnāṃ śivānāṃ ca sadāśivādipadasthānāmātmanāmebhyo 
hetubhūtebhyo yathāsvamadhikārayoranugrāhyānugrāhakatvarūpayoḥ sadā rāgo bhavati, 
puruṣāṇāṃ caite dhiyā dhyeyatayā dhāryante, apratihatavilakṣaṇatejaso 
bhuktimuktyākhyābhīṣṭapradāyinaśca bhavanti | tasmādete'pi śivaśāstre ratnāni, procyanta 
ityadhyāhāraḥ | apratihatavilakṣaṇatejastayā caiṣāmatiśayaṃ darśitam || 4-5 ||

	ratnatrayaṃ samāśritya vartate tattvasaṃhatiḥ |
	adhvaitatprāptaye ṣoḍhā karṇyate parameṣṭhinā || 6 ||

	tatra śuddhatattvasaṃhatirbindumupādānatvena, śivaṃ kartṛtayā, śaktiṃ ca 
tatkaraṇatayā saṃśritya vartate, upādānādi vinā kāryotpattyasaṃbhavāt | aśuddhāyāṃ ca 
śivaśakto eva paramparayā kartṛkaraṇe, binduśca nivṛttyādikalādvāreṇādhāra iti vakṣyāmaḥ 
| atra bubhukṣūṇāṃ bhautikadīkṣābhājāṃ sādhakānāṃ vicitrabhuvanabhogātmanā 
pariṇato binduḥ prāpyaḥ, śivastu śaktyavinābhūto naiṣṭhikadīkṣābhājāṃ mumukṣūṇām | 
tatprāptaye ca kalādiṣatprakāro'dhvā śivena śāstreṣu varṇyate || 6 ||

	eṣāṃ cādhvatvamupariṣṭāt sādhayiṣyati, idānīmasya dīkṣādāvupayogaṃ darśayati-

	etadeva mataṃ bījaṃ trayaṃ dīkṣāpratiṣṭhayoḥ |

	etadaparijñāne dīkṣāpratiṣṭhayoraśakyānuṣṭhānatvādida-meva tayormūlamityarthaḥ ||

	etadeva sphuṭīkaroti-

	yogāśca vividhāḥ karma nityanaimittikaṃ yathā || 7 ||
	jñānāni siddhayo mokṣā api tasyāvabodhanāt |
	etadeva parā kāṣṭhā mokṣākhyāṇorvicārataḥ || 8 ||

	yogāḥ sālambanādayaḥ | nityaṃ pūjādi | naimittikaṃ dīkṣādi | jñānāni 
tadviṣayāṇi paśupāśapativiṣayāṇi ca | siddhayaḥ aṇimādyāḥ | mokṣaḥ śivasāmyaṃ 
sadāśivādipadaprāptiśca | yaduktaṃ śrīmanmataṅge- mokṣaḥ saptaprakāro'yam, (yo0 5|67) iti 
| etatsarvaṃ tajjñānāt siddhyatīti | kiñca, etatprāptirevāṇoḥ parā kāṣṭhā, paramokṣa 
ityarthaḥ || 7-8 ||

	tataśca-

	śrotavyametadāptoktyā mantavyaṃ copapattibhiḥ |
	dhyeyaṃ ca yogamārgeṇa śaktipātoditātmabhiḥ || 9 ||

	śaktinipātānmalaparipākāvinābhūtāduditātmabhirūrdhva-padonmukhacetobhiḥ | anena 
caiṣāmāgamānumānayogipratyakṣa-siddhatvaṃ sūcayati || 9 ||

	kā punaratrāptoktirata āha-

	āptoktiratra siddhāntaḥ śiva evāptimān yataḥ |
	na tābhyāṃ sadṛśaḥ kaścicchreya āptividhāyakaḥ || 10 ||

	siddhāntaśabdaḥ paṅkajādiśabdavadyogarūḍhyā śivapraṇīteṣu kāmikādiṣu 
daśāṣṭādaśasu tantreṣu prasiddhaḥ | tatastānyevābādhitatvāt pramāṇānīti bhāvaḥ | kuta 
ityatrāha- śiva evāptimān yata iti | nanu kaṇādapatañjaliprabhṛtayo'pyāptā evetyata āha- na 
tābhyāmiti | satyam, te'pi svaviṣaye vastunyāptā eva, kintvasarvajñatvāt teṣāṃ tatpraṇītāni 
ca śāstrāṇi tadaviṣayeṣu bindvādiṣu vastuṣu na pramāṇībhavitumarhanti, śivastu 
niratiśayasarvārthajñānakriyatvāt paramāptaḥ, tatpraṇītāni ca śāstrāṇi 
sārvā'nyāgamaprāpyasthānapradarśanapūrvakaṃ tadanadhigatārthagantṛtvādabādhitatvācca 
pramāṇānyeva | yadāhuḥ- anadhigatārthagantṛ pramāṇam iti | tatastena śivena tadāgamena 
ca sadṛśaṃ na kiñcicchreyasaḥ sādhakamasti | nanu nityatvādevāgamānāṃ prāmāṇyaṃ 
nāptapraṇītatayeti mīmāṃsakāḥ, tadayuktam, racanāyāḥ kartāraṃ vinā 
ghaṭādivadutpattyadarśanāt | ityādi vistareṇa sādhitamasmābhirmṛgendravṛttidīpikāyāmiti tata 
evāvadhāryam || 10 ||
	yadyevaṃ vāmādayo'pi śaivatvena prasiddhāḥ śivakṛtā eva, tanna, 
parasparaviruddhārthābhidhāyitvena teṣāṃ śivākṛtatvāt | yadāhuḥ- (pūrvatanī 135 
pṛṣṭhasthā prathamā ṭippaṇī draṣṭavyā |) sugato yadi sarvajñaḥ kapilo neti kā pramā | 
athobhāvapi sarvajñau matibhedaḥ kathaṃ tayoḥ || iti | prasiddhistu teṣāṃ 
śivādhiṣṭhitātmāntarapraṇītatvenetyavirodhaḥ | etadevāha-

	siddhānta eva siddhāntaḥ pūrvapakṣāstataḥ pare |
	āptastu śiva evaikaḥ śivānye tvaśivā matāḥ || 11 ||

	śivatvaṃ cātra sarvajñatvasarvakartṛtvamabhipretam || 11 ||

	tataśca-

	siddhāntaḥ sevyate sadbhiḥ śaktipātapavitritaiḥ |
	kāmakāritayā'nyaistu nindyate paśuśāstravat || 12 ||

	etadeva śaktipātacihnatvenoktaṃ śrīmanmṛgendre- yeṣāṃ śarīriṇāṃ śaktiḥ 
patatyavinivṛttaye |

	vinivṛttaye | teṣāṃ talliṅgamautsukyaṃ muktau dveṣo bhavasthitau || bhaktiśca 
śivabhakteṣu śraddhā tacchāsake vidhau | (vi0 5|4-5) iti | tataśca śaktipātānantarabhāvinyā 
dīkṣayā pavitritaiḥ śodhitaiḥ siddhāntaḥ sevyate | yaduktaṃ śrīmatkiraṇe- tīvraśaktinipātena 
guruṇā dīkṣito yadā | sarvajñaḥ sa śivo yadvat (vi0 1|21) iti || 12 ||

	asya ca paśujananindayā na prāmāṇyavyāhatirastīti dṛṣṭāntenāha-

	nahi kastūrikāmodaḥ puruṣaiḥ pratihanyate |
	hetubhiḥ sādhyate kintu dhanyairāghrāyate sadā || 13 ||

	tadīyadīkṣādyupayogitayā śivādiparijñānaṃ bhogamokṣārthibhiḥ kāryam | tajjñānaṃ 
ca siddhāntābhyāsena, tadabhyāsaśca śaktipātāvinābhāvinyā dīkṣayā siddhyatītyuktam || 
13 ||
	atra kecidāhuḥ- mimanenāsatyabhūtena śivādivastukathanena 
tatparijñānasādhanakathanena vā, sarvaṃ khalvidaṃ brahma (chā0 u0 3|14|1), eko vaśī 
sarvabhūtāntarātmā (kaṭho0 5|12) ityādiśrutibhiḥ paramātmaiva cidākāraḥ satyabhūtaḥ | sa 
eva śivādiśabdavācyo nānyatkiñcidasti | tataḥ paramānandasvarūpasya tasya 
yathāvadavabodha eva mokṣaheturiti | tān pratyāha-

	vedāntaiśca kulāmnāyaistathānyaiḥ pratipādyate |
	ānandavipralabdhānāmānandopahitā citiḥ || 14 ||

	yadetadvedāntādiśāstrairanyaiśca śāktādibhiścitiścaitanyāt-makameva vastu 
pāramārthikam, tasyāściterānandopahitāyāḥ paramānandasvarūpāyā avabodha eva 
mokṣaheturiti pratipādyate; tadānandavipralabdhānām ānandaṃ brahma (bṛ0 u0 3|9|34) iti 
śrutigatasyānandaśabdasya paripūrṇatārthasya sukhārthatābhrāntyā 
vipralabdhānāmapariṇatamalānāmeva śobhate, nānyeṣāmasmadā-dīnāṃ śivānugṛhītānāmiti 
bhāvaḥ | tathā hyātmaikatvaṃ tāvat sādhayitumaśakyam, anekatvapratipādakānāṃ 
śrutīnāṃ sambhavāt, ekatvaśrutīnāmanyaparatvādanekatvajñāpakasya dṛśyamānasya 
jananamaraṇādipratiniyamasyānapahnavanīyatvācca | teṣāṃ cātmanāmasvātantryasya darśanād 
baddhatve sati teṣāṃ bhogamokṣakartā śivaḥ, tadupādānādayaścāgamenānumānena siddhā 
ityādivistareṇāsmābhirmṛgendravṛttidīpikāyāṃ darśitam, sādhitaṃ ca 
rāmakaṇṭhādibhirmataṅgavṛttyādāviti tato'vadhāryam | granthavistarabhayānnātra prapañcyate 
|| 14 ||

	ata evātmaviṣayaṃ vijñānamapi tattacchāstraprasaktānāṃ yathāvanna 
saṃbhavatītyāha-

	cinmahodadhigāmbhīryamavasīyeta sūribhiḥ |
	avagāhya parānandalaharī yadi notkṣipet || 15 ||

	yadi hi proktavatparamānandabhrāntikallolastānnotkṣipati, tato 
vidvadbhiścinmahodadherātmavargasamudrasya gāmbhīryaṃ sarvajñatvasarvakartṛtvātmasvarūpaṃ 
nityatvavyāpakatvānekatvādi

cāvagāhya pramāṇairviṣayīkṛtyāvasīyeta, nānyathā | tattacchāstrakartṛṇāmasarvajñatvāt 
tadvacanādetanna saṃbhavatītyarthaḥ || 15 ||

	kutaḥ punaretajjñāyate ? ata āha-

	tadatra kathitaṃ sarvasrotasāṃ jyāyasi prabhoḥ |
	udakṣeṇordhvavaktreṇa tatastadavadhārayet || 16 ||

	taccātmasvarūpaṃ vāmādisamastaśāstrasrotasāṃ madhyādutkṛṣṭe siddhāntākhye 
srotasi kathitamiti tata evāvadhāryam | śivakṛtatvena jyāyastvamevāsya sādhayati- 
prabhorudakṣeṇordhvavaktreṇeti | kathitamiti | vaktraśabdena vacanatrāṇarūpā śaktirucyate, 
paramārthataḥ śivasya dehābhāvāt | ataścodakṣeṇodaṅmukhenānugrahapravṛttenordhvasthitena 
ca śaktyātmanā vaktreṇa | binduśakternādādikrameṇotpādite śāstre prakāśitamityarthaḥ | 
nanvaśarīrasya śāstropadeśānupapattiḥ ? tanna, jagatsṛṣṭyādivat saṅkalpamātreṇa 
vidyeśvarādīnāṃ śāstrāvabodhakatvāt || 16 ||

	kiñca-

	hetūnapi parīkṣāyai lakṣayet tasya śāstrataḥ |
	nahyatra śemuṣī śuddhā vipulāpi pragalbhate || 17 ||

	tasyātmasvarūpasya parīkṣaṇamapi siddhāntoktaireva hetubhiḥ kāryamiti bhāvaḥ || 17 ||

	itthaṃ prasaṅgādātmasvarūpasya siddhāntaikagamyatvaṃ prasādhya prakṛtānāṃ 
śivādiratnānāṃ śravaṇamanananididhyāsanāni siddhāntādeveti prāguktaṃ prapañcayati-

	alaukikāni sūkṣmāṇi gopitāni śivena ca |
	trīṇi ratnāni ko vetti siddhānteta vinā svayam || 18 ||
	hetūnapi kutarkāndhatamasārīn manīṣayā |
	tadvad yogaṃ ca ko vetti sabījābījalakṣaṇam || 19 ||

	tatra sabījayogaḥ sadāśivādyākāraḥ sakalaviṣayaḥ, nirbījastu niṣkalaviṣayaḥ | 
anenaiṣāmāgamānumānayogipratyakṣagamyatvamapi darśayati || 18-19 ||

	api ca-

	siddhāntaḥ sevitaḥ sadbhirapi kānān prayacchati |
	sarvān sādhakacittasthānāptaścintāmaṇiryathā || 20 ||

	siddhāntādeva sādhakānāṃ tattatsiddhasādhanajñānaṃ tadanuṣṭhānāt 
phalāvāptiścetyarthaḥ || 20 ||

	itthaṃ siddhāntajñānaphalaṃ pradarśya tadabhidheyārtha-prakāśakatvādasyāpi 
prakaraṇasya tadeva prayojanamiti sūcayan abhidheyaparīkṣāṃ pratijānīte-

	tamāsevya mayāpyeṣā binduśaktiśivāśrayā |
	parīkṣā kriyate tatra bindurādau nirūpyate || 21 ||

	tatra bindusiddhimāha-

	jāyate'dhvā yataḥ śuddho vartate yatra līyate |
	sa binduḥ paranādākhyaḥ nādabindvarṇakāraṇam || 22 ||

	vakṣyamāṇavadvicitrabhuvanādirūpatvena śuddhādhvanaḥ kāryatvāt tadupādānaṃ 
binduḥ siddhyati | kiñca, śabdopādānatayāpi tasya siddhirityāha- nādavindvarṇakāraṇamiti | 
tatra nādo nāmābhidheyabuddhiheturbindoḥ prathamaprasararūpaḥ sūkṣmo nādaścintayā 
rahitatvena śrīmatkālottarādyuktaḥ | binduśca tatkāryaṃ mayūrāṇḍarasabinduvadavyapadeśyaḥ 
parāmarśajñānarūpo'kṣara-bindustatraiva sūkṣmatvenoktaḥ | arṇaśca varṇaṃ 
ākāśavāyupra-bhavaḥ śrotragrāhyaḥ sthūlaśabdaḥ | taduktaṃ tatra- sthūlaṃ śabda iti 
proktaṃ sūkṣmaṃ cintāmayaṃ bhavet | cintayā rahitaṃ yattu tatparaṃ parikīrtitam || (1|8) || 
22 ||

	tatra śuddhādhvano bhuvanādyādhāratvaṃ darśayitumāha-

	uttīrṇamāyāmbudhayo bhagnakarmamahārgalāḥ |
	aprāptaśivadhāmānastridhā vijñānakevalāḥ || 23 ||

	trividhā hi paśvātmānaḥ- tatra malakarmamāyāyuktāḥ sakalāḥ, 
pralayādyupasaṃhṛtakalādayo malakarmayuktāḥ pralayākalāḥ, vijñānādibhyaḥ karmaṇo'pi 
kṣayānmalamātrayuktā vijñānakalāḥ | te punaḥ malaparipākatāratamyāt śivaprasādena 
bhagnakarmamalākhya-mahārodhāḥ kiñcidavaśeṣitādhikāramalatvādasaṃprāptaśiva-
sāmyāstrividhā eva vijñānakevalino bhavanti || 23 ||

	ke te bhedā ityāha-

	vidyāvidyādhipatayaḥ paśupūrvāḥ sadāśivāḥ |
	tatra vidyābhujaḥ pūrve mantrā vidyāśca nāmataḥ || 24 ||

	tatra prathame vidyātattvanivāsina ityāha- tatra vidyābhuja iti || 24 ||

	vidyeśvaraniyojyāste saṃkhyayā saptakoṭayaḥ |
	teṣāṃ purāṇi vidyāyāṃ vāmādīni yathottaram || 25 ||

	vidyeśvaraniyojyatvaṃ caiṣāmanugrahakaraṇatvāt, vidyeśvarāṇāṃ ca 
pañcavidhakṛtyādhikāritvāt || 25 ||

	sphītāni nava jātāni tanubhogendriyādibhiḥ |

	etāni bhuvanānyuttarottaraṃ viśiṣṭabhogādimantītyarthaḥ ||

	athaitebhyo viśiṣṭā vidyeśā ityāha-

	madhyāḥ praśāntakaluṣā vidyeśāḥ śivatejasaḥ || 26 ||
	adhikāramalopetāstattvamaiśaṃ samāśritāḥ |
	śivārkakarasaṃparkavikāsātmīyaśaktayaḥ || 27 ||

	praśāntamalatvamadhikāramalayogitvaṃ śivānugṛhītatvaṃ ca mantrāṇāmapi 
samānameva | śivatejasaḥ pañcavidhakṛtyakāriṇaḥ | yaduktaṃ śrīmadraurave- 
sṛṣṭisaṃrakṣaṇādānabhāvānugrahakāriṇaḥ (1|15) iti || 26-27 ||

	aṣṭāvanantapūrvāste yathāpūrvaṃ guṇādhikāḥ |
	tathā purāṇi tatraiṣāmanantaḥ parameśvaraḥ || 28 ||

	aṣṭāvanantapūrvā iti | ananta-sūkṣma- śivottama- ekanetra- ekarudra- trimūrti- 
śrīkaṇṭhaśikhaṇḍisaṃjñāḥ | tatreśvaratattve teṣāmaṣṭau bhuvanāni prāgvadeva | ata 
eṣāmananta eva parameśvaraḥ || 28 ||

	tatrāṇavaḥ pureṣvāsan nāpyanye tadvibhūtayaḥ |
	pare sadāśivasamāḥ patikṛtyādhikāriṇaḥ || 29 ||

	tattadbhuvaneśvarārādhanādinā dīkṣayā vā teṣu bhuvaneṣu yojitā ātmānaśca 
vidyante | ayaṃ ca nyāyo vidyābhuvaneṣu sadāśivādibhuvaneṣu ca vijñeyaḥ | yaduktaṃ 
sūkṣmasvāyambhuve- yo yatrābhilaṣed bhogān sa tatraiva niyojitaḥ | 
siddhibhāṅmantrasāmarthyāt (39|2) iti | atha paśusadāśivānāha- pare sadāśivasamā iti || 29 
||

	mūrdhānamadhvanaḥ prāptāḥ prasanne parameśvare |

	sadāśivaścātrādhikārāvasthaḥ śiva eva | tasya ca adhikārādayo'vasthā 
aupacārikā ityuktam- adhikārī sa bhogī ca layī syādupacārataḥ  iti | 
saṃskāryasadāśivādīnāṃ tu bhedo vāstava eva |

	ete ca sadāśivatattvasthasadāśivabhuvanavāsina ityāha-

	tattvameṣāmasūtāṅgapurabhogādiśobhitam || 30 ||
	sadāśivamadhiṣṭhātṛnāmnā te'pi sadāśivāḥ |

	ata evaiṣāṃ dehādayo'vāstavā eva, adhiṣṭhātustasya śivasya na pāramārthikā 
ityuktaṃ śrīmatpauṣkare- sādhakasya tu lakṣyārthaṃ tasya rūpamidaṃ smṛtam iti || 30 ||

	uktārthamupasaṃharati-

	aṣṭādaśabhiradhvāyaṃ bhuvanaiḥ saha bhoktṛbhiḥ || 31 ||
	tribhiśca tattvairuddiṣṭo viśuddhaḥ śivakartṛkaḥ |

	eṣa cādhvā kāryatvāt śivakartṛka ityarthaḥ | atra ca nivṛttyādibhuvanānāṃ 
śaktiśivatattvayośca sadāśivatattva evāntarbhāvo vijñeyaḥ || 31 ||

	kāryatvādevāsya śuddhādhvanaḥ kenāpi nityena kāraṇena bhavitavyam, tacca 
bindvākhyamityāha-
	
	sadāśivāditattvaugho nityopādānakāraṇaḥ || 32 ||
	vikāritvādyathā kumbhastathā caiṣa tatastathā |

	eṣo'pi sadāśivādiradhvā vikārī, tato nityopādānakāraṇa iti || 32 ||

	nanu ghaṭopādānakāraṇasya mṛtpiṇḍasyānityatvādanenāpi 
śuddhādhvopādānenānityena bhavitavyamiti dharmisvarūpaviparīta-sādhakatvād viruddho'yaṃ 
vikāritvāditi hetuḥ ? ata āha-

	pārthivo'pi bhavet kumbho māyopādānakāraṇaḥ || 33 ||

	sākṣānmṛdupādānatve'pi ghaṭasya paramparayā māyaivopādānakāraṇamiti || 33 ||

	kuta ityāha-

	vināśotpattimattvābhyāṃ pariṇāmitayā tathā |

	ayamabhiprāyaḥ- utpattivināśadharmiṇāṃ hi vastūnāṃ 
ghaṭakapālādyavāntarapariṇāmatvenāvāntarakāryakāraṇabhāve satyapi pṛthivyāditattvānāṃ 
paramparayopādānaṃ māyākhyaṃ nityaṃ paramakāraṇamabhyupagantavyam, 
anyathā'navasthāprasaṅgāt | uktaṃ ca śrīmatsvāyambhuve- māyātattvaṃ 
jagadbījamavināśyavyayātmakam iti ||

	etadeva prapañcena sādhayati-

	yadyadutpadyate vastu tanmāyeyaṃ yathā kalā || 34 ||
	utpattināśau māyeyadharmāvāha maheśvaraḥ |

	āptavākyenāpyetatsiddhamiti bhāvaḥ || 34 ||

	idānīṃ satkāryavādadṛṣṭyā kalādyavasthābhedenotpatti-vināśavyapadeśaṃ bhajantī 
māyaiva kalādikāryadvāreṇa pariṇamata iti darśayituṃ pariṇāmaśabdārthamāha-

	pariṇāmo hi vastūnāṃ pūrvāvasthāparicyuteḥ || 35 ||

	avasthāntarasaṃprāptiḥ kṣīrasya dadhibhāvavat |
	dadhnaśca takravat tatra takrāvasthā nirūpyate || 36 ||

	dṛṣṭāntasvarūpanirūpaṇāyāha- tatreti || 35-36 ||

	sā hi-

	na dadhno nāpi dugdhasya pūrvāvasthe hi te mate |

	dadhyavasthāyāṃ kṣīrāvasthāyāṃ vā takrāvasthā nāstītyarthaḥ | tathā hi 
kṣīrameva dadhyādirūpeṇa pariṇamate, kṣīraṃ naṣṭaṃ dadhyutpannamityādivyapadeśaśca 
dṛśyate |
	etadevāha-

	sadavasthaṃ hi vastvekaṃ pūrvaṃ kṣīraṃ tato dadhi || 37 ||

	asata utpattyasaṃbhavāt sadeva dadhi kṣīrādabhivyajyate, sadeva takraṃ 
dadhno'bhivyajyata iti bhāvaḥ | ayaṃ ca satkāryavādo'smābhir-mṛgendravṛttidīpikāyāṃ 
vistareṇa darśitaḥ || 37 ||
	
	yathā caiṣāṃ dadhinavanītādyavasthāpariṇāmabhedena vicitrārthakriyāṇāṃ 
kāryāṇāṃ kṣīramevopādānam, evaṃ tattvabhuvanādibhedena vicitrapariṇāmavatāṃ 
vicitrārthakriyāṇāṃ ca kalādikāryāṇāṃ sākṣāt paramparayā ca māyaiva 
paramakāraṇamityāha-

	paścāt takraṃ tathā māyā vicitrapariṇāmataḥ |
	tattvatāttvikabhāvānāmupādānamanaśvaram || 38 ||

	yadyevaṃ kṣīravat satvātmanā pariṇāmādanityatvaṃ māyāyāḥ, tanna, sarvathā 
dṛṣṭāntāsaṃbhavāt, pariṇāmitvamātra evāsya dṛṣṭāntatvam | tataśca 
ghṛtakīṭanyāyenaikadeśenaiva māyā pariṇamata ityadoṣaḥ || 38 ||

	itthaṃ ghaṭasyāpi paramparayā nityopādānatvaṃ prasādhyopasaṃharati-

	tato nidarśanaṃ sādhu prasiddhoktaviśeṣaṇam |

	prakarṣeṇa siddhamuktaṃ nityopādānatvarūpaṃ viśeṣaṇaṃ yasya tat tathāvidhamiti |

	pāriśeṣikānumānenāpi bindusiddhimāha-

	na māyā neśvaro nāṇurna śaktiḥ śuddhavartmanaḥ || 39 ||
	upādānamato binduḥ pariśeṣeṇa labhyate |

	tatra māyāyā anupādānatvaṃ sādhayati-

	tathāhi māyā yā teṣāṃ kṣobhitā'nantatejasā || 40 ||
	jalādikṣitiparyantaṃ tattvajātamasūta sā |

	teṣāṃ madhyād yā māyā, sā hyacetanatvādanantasāmarthya-kṣobhitaiva 
svakāryamutpādayati | yaduktaṃ śrīmatkiraṇe- śuddhe'dhvani śivaḥ kartā prokto'nanto'site 
prabhuḥ (vi0 3|27) iti || 40 ||

	tatraiva hetūnāha-

	aviśuddhajaḍatvena māyāmārgatayā tathā || 41 ||
	duḥkhānuṣaṅgānmāyeyakārmāṇavamalānvayaiḥ |
	sakalāṇūpabhogyatvāt pariṇāmodayairapi || 42 ||

	yato'syā aśuddhādhvano'śuddhatve sati jaḍatvam, yataśca māyāmārgatvaṃ 
mohahetutvam, yasmācca duḥkhānuṣaṅgaḥ, yataśca māyeyairanātmani 
ātmābhimānādibhirmalaiḥ, kārmeṇa sukhaduḥkhamohahetunā 
viparyayāsaktyādibhāvapratyayātmanā malenāṇavena cāṇoranādyāvārakeṇa paśutvākhyena 
saṃbandhaḥ, bandhatrayayogināmeva dehendriyādijanakatvāt | ata eva yataśca 
sakalāṇūpabhogyatvaṃ bhuvanādidvāreṇa, yasmācca vicitrakarmaphalabhogasādhanatvena vicitrā 
anekavidhāḥ pariṇāmodayāḥ pariṇāmavṛddhayaḥ, tasmādanantena kṣobhitā māyā 
tādṛśaṃ kāryaṃ janayati, śuddhasya śivasya aśuddhaviṣaye kartṛtvāyogāt | yadyevaṃ 
śivasyāsarvakartṛtvaprasaṅgaḥ ? tanna, sākṣātkartṛtvamatra niṣiddhaṃ na tu prayojakakartṛtvam, 
anantāderapi tadadhiṣṭhānaṃ vinā kartṛtvāsaṃbhavāt || 41-42 ||

	etadeva prapañcayati-

	māyā jaḍāntaravyāptā pariṇāmavatī ca yat |
	niṣpādane kalādīnāṃ śarīrādisamanvitam || 43 ||
	puruṣaṃ gamayedeva parādhīnamasaṃśayam |
	suvarṇamiva karmāraṃ makuṭotpādakarmaṇi || 44 ||

	yadyevaṃ śivasyāpi śuddhaviṣaye kartṛtvāt śarīrendriyayogādi-prasaṅgaḥ ? tanna, tasya 
nityanirmalaniratiśayasarvārthajñānakriyā-yuktatvāt, aśarīrasyāpyātmanaḥ svadehaspandādau 
kartṛtvadarśanācca | anantasya tvadhikāramalayogāccharīrādyapekṣetyavirodhaḥ || 43-44 ||

	ataśca-

	saiṣā vikalpavijñānagocaraiva satī ca yat |
	kṣobhyate'nantanāthena kumbhakāreṇa mṛd yathā || 45 ||

	savikalpajñānaviṣaya eva śarīriṇāṃ kartṛtvaṃ dṛṣṭamiti bhāvaḥ || 45 ||

	kimata ityata āha-
	
	savikalpavijñānaṃ citeḥ śabdānuvedhataḥ |

	savikalpakavijñānamayaṃ ghaṭa iti parāmarśarūpāt śabdollekhādevāt-mano dṛśyate ||

	ki~cātaḥ ? ityata āha-

	sa tu śabdaścaturdhā vāgvaikharyādivibhedataḥ || 46 ||
	jāyate bindusaṃkṣobhādanantasyārthadarśane |

	anantasya savikalpakajñānotpattyarthamavaśyaṃ śabdo'pekṣitaḥ | tadānīṃ 
cāśuddhādhvano'nutpatteḥ sthūlākāśābhivyaṅgyatvaṃ na śabdasyopapadyata iti 
śivakṣubhitabindujanya eva śabdo'bhyupagantavyaḥ | tasya ca vaikharyādyāścatasro vṛttīrvakṣyati 
| tatra śabdopādānatvenāpi bindusiddhiḥ || 46 ||

	kiñca-

	vidyāśarīro bhagavānanantaḥ kṣobhako mataḥ || 47 ||
	māyāyāḥ sā ca vidvadbhirbaindavaṃ tattvamucyate |

	anantasya baindavaśarīrayogaḥ śrūyate, tadupādānatayā binduḥ siddhyatīti bhāvaḥ || 
47 ||

	atropasaṃhāraḥ-

	ato na māyopādānaṃ tathaivāyaṃ maheśvaraḥ || 48 ||

	bindurevātra śuddhādhvanyupādānamityarthaḥ | kimanenāprasiddhena bindvākhyena 
kalpitena, īśvara ātmā tacchaktirvā śuddhādhvanyupādānamastu, ata āha- tathaivāyamiti || 48 
||

	cetanatvādavṛttitvāt pariṇāmāt tatastathā |
	ātmā śaktiśca vijñeyau vistaro'trai?va vakṣyate || 49 ||

	mṛdādīnāṃ hyapādānānāmacetanatvaṃ dṛṣṭam | cetanāśca śivātmaśaktayaḥ | 
tataste nopādānaṃ bhavitumarhanti | kiñca, upādānaṃ hi pariṇāmena vā kāryamutpādayati, 
yathā kṣīrasya dadhibhāvaḥ, vṛttirūpeṇa vā, yathā paṭasya gṛhādibhāvaḥ | 
śivādīnāmeṣāṃ tu vṛttipariṇāmau na saṃbhavataḥ, avikāritvāt, vikāritve 
jaḍatvāniyatvādidoṣaprasaṅgāt | asya prapañco'traiva bhaviṣyati | proktaṃ 
cāsmābhistattvaprakāśavṛttau || 49 ||

	anyathā bindusiddhimāha-

	ito'pi lakṣyate binduraṇuvaiṣamyadarśanāt |

	kuta ityatrāha- aṇuvaiṣamyadarśanāditi | aṇūnāmātmanāṃ 
jñānādivaiṣamyadarśanāt ||

	vaiṣamyamevāha-

	dṛśyante pudgalāḥ kecidalpajñānakriyānvitāḥ || 50 ||
	tebhyo'dhikāḥ pare'nye tu sarvajñā balaśālinaḥ |

	etacca vaicitryaṃ teṣāṃ na svataḥ saṃbhavatītyāha-
	
	pudgalaścetano nityo vikārarahito mataḥ || 51 ||

	ātmano hi sarvadā'nantaghaṭapāṭādyadhyavasāyajñānānu-saṃdhātṛtvena 
svasaṃvedanasiddhatvād dehāntaraphalakarmabhoktṛtayā ca cetanatvaṃ nityatvaṃ ca 
siddhamāgameṣu śrūyate | ityato'sya na vikāraḥ saṃbhavati || 51 ||

	anyathā hi-

	vikāritve jaḍānityabhāvaḥ syād ghaṭakuḍyavat |

	ayaṃ ca nyāyaḥ śakterapi samānaḥ, dharmadharmiṇoravyatirekādityāha-

	tathaiva ca citiḥ śaktistayorapyavikāriṇoḥ || 52 ||

	idaṃ ca prāgeva darśitam | uktaṃ ca nādakārikāsu- 
avikāryatrātmoktastacchaktiścāpyato na yogyau tau | bahudhā sthātuṃ yadvā caitanyavinākṛtau 
vikāritvāt || (ślo0 19) iti | ata eva tayoraupādhikameva vaicitryamityāha- tayorapīti || 52 ||

	bahudhā yadavasthānaṃ tadupādhivaśād bhavet |

	tataśca-

	saṃpṛktā cidaṇoryena māyādyarthāvalokane || 53 ||
	yadupādhervicitrā ca sa bindurbahuvṛttikaḥ |

	atrātmanāṃ cicchaktiryena nādātmanā pariṇatenābhidheya-buddhibījena saṃpṛktā 
māyeyasavikalpārthāvalokane pravartate, yasya ca 
pratyātmaniyatairnādākhyairvicitrairvṛttibhedairupahitā vicitraiva prakāśate, sa binduḥ | etacca 
vistareṇoktaṃ tatrabhavatā rāmakaṇṭhena nādakārikāsu | proktaṃ ca śrīmatkālottare- 
nādākhyaṃ yatparaṃ bījaṃ sarvabhūreṣvavasthitam (1|5) iti || 53 ||
	nanu karmaṇaiva pratyātmaniyatenātmanāṃ bhogavaicitryavad jñānādivaicitryamapyastu ? 
ata āha-

	na karmaṇā'ṇorvaicitryamanapekṣeṇa jāyate || 54 ||
	vaicitryamapi bhogasya sāpekṣeṇaiva tena yat |

	karma hi kalāditattvabhuvanādisāpekṣameva bhogavaicitryaṃ karoti, anyathā 
pṛthivyādīnāmapyanupayogāt || 54 ||
	evaṃ jñānavaicitryamapi nādasahakṛtameva karoti na kevalam | tadeva sāpekṣatvaṃ 
darśayati-

	karmopabhogaṃ kurute vaicitryaṃ candanādayaḥ || 55 ||
	tadeva yadi tatkuryāt kiṃ tairiti vilupyatām |

	karma paraṃ phalajananameva karoti, tasya tu vaicitryaṃ sahakārivaicitryādeva bhavatīti 
bhāvaḥ | nanu karmataśca śarīrāṇi vividhāni (viṣayāḥ kārakāṇi ceti tatratyaḥ pāṭhaḥ |) 
śarīriṇām (svā0 32|13) iti śrīmatsvāyambhuvaśruteḥ karmaiva sādhanavaicitryamapi karoti | 
satyam, sādhanavaicitryadvāreṇaiva karma phalavaicitryaṃ karoti na kevalamityavirodhaḥ || 55 ||

	etadeva draḍhayati-

	pravṛttiḥ sarvabhūtānāṃ tyāgopādānakāraṇam || 56 ||

	apekṣyavastusadbhāve hi heyānāṃ tyāgārtham upādeyānāṃ copādānārthaṃ 
bhūtānāṃ pravṛttiḥ saṃbhavati, nānyathā || 56 ||

	prakārāntareṇa bindusiddhimāha-

	kiñcātiśāyikaṃ prāhustamambaramanaśvaram |
	śivānāmasamaiśvaryabhājāṃ bhogādhikārayoḥ || 57 ||
	jyotirgaṇānāmākāśamiva bhūtādikāraṇam |

	yathā hi pañcabhūtādibhūtamākāśamavakāśadāyitvena 
sthūlaśabdābhivyañjakatvena ca sūryādīnāṃ jyotiṣāṃ bhogādhikārayoḥ kāraṇam, evaṃ 
śuddhādhvavāsināṃ śivānāṃ sarvajñatvasarvakartṛtvātmakaśivatvayogināṃ 
vidyeśvarādīnāmava-kāśadānena śabdotpādanena ca bhogādhikārayoḥ kāraṇaṃ binduḥ 
siddhaḥ | taṃ cānaśvaratvenāparākāśamātiśayikaṃ paramavyomā-khyamāgamajñāḥ 
prāhuḥ, aparasya tatra pragamāsambhavāt || 57 ||

	adhunā prāguktaṃ bindoḥ savikalpakajñānopayogitvamupasaṃharati-

	bindureva vikalpākhyāṃ savikalpakabuddhiṣu || 58 ||
	svavṛttibhedasaṃbhedairullikhan labhate citim |

	bindureva śabdopādānatvāt sūkṣmādivaikharyantaśabdātmaka-svavṛttibhedasaṃbandhād 
ghaṭo'yaṃ lohitaḥ parivartula ityādiparāmarśavikalpollekhanena savikalpajñāneṣvātmanaścitiṃ 
savikalpakānubhavamutpādayati | śabdānuvedhena hi jātyādiviśeṣaṇa-viśiṣṭaṃ 
savikalpajñānamutpadyate | yadāhuḥ- asti hyālocanaṃ jñānaṃ prathamaṃ nirvikalpakam | 
balamūkādivijñānasadṛśaṃ śuddhavastujam | tataḥ paraṃ punarvastu dharmairjātyādibhiryayā 
| buddhyā'vasīyate sāpi pratyakṣatvena saṃmatā || (ślo0 vā0 pratyakṣa0 112, 120) iti || 58 
||

na cāyaṃ bhāvanāsaṃjñaḥ saṃskāro'dhyakṣabhāvataḥ || 59 ||
saṃskārāḥ smṛtiliṅgā hi nāsmatpratyakṣagocarāḥ |

	nāyaṃ savikalpānubhavaḥ pūrvānubhūtavāsanātmakaḥ saṃskāro mantavyaḥ, 
tasyānumeyatvāt, asya ca pratyakṣānubhava-rūpatvāt | smṛtyanyathānupapattyā hi saṃskāraḥ 
kalpyate || 59 ||

	nanvadhyavasāyasya buddhikāryatvād buddhipariṇāmabheda eva savikalpānubhavaḥ ? ata 
āha-

	na buddheḥ pariṇāmo vā māyordhvamapi sambhavāt || 60 ||

	buddheradhyavasāyahetutve'pi bindukāryaśabdasahakārādeva savikalpakajñānaṃ janyata 
ityuktam | ata eva śuddhādhvano buddhyabhāve'pi vākśaktidvāreṇa vidyeśvarādīnāṃ 
savikalpānubhavaḥ siddhaḥ || 60 ||

	tataśca-

	tathā vidyeśvaro'nanto māyāmākramya tejasā |
	tataḥ sṛṣṭiṃ prakurute savikalpakabodhavān || 61 ||
	aṇutve sati kartṛtvādasmatpreṣyo yathā janaḥ |

	anantasya aṇupakṣatayā'dhikāramalaśeṣeṇa preryatvāt savikalpakajñānayogādeva 
māyākṣobhakatvam, na tu śivasya bindukṣobhavannirvikalpakamātreṇeti bhāvaḥ || 61 ||
	itthamanantasya savikalpakajñānayogena kartṛtvācchabdadvāreṇa vidyeśvarādīnāṃ 
taddhetutvena bindusiddhirityuktvā adhunā'smannevārthe'nyeṣāṃ matamāha-

	anye vṛttiparīṇāmabhedavādaviśāradāḥ || 62 ||
	guravaḥ kathayantyenamanyathoktaviśeṣaṇam |

	uktaviśeṣaṇamenamarthamanantasya savikalpakajñānayogena kartṛbhāvamanye 
guravo'nyathā sādhayanti || 62 ||

	pariṇāmasya kartā'yaṃ na tu vṛttestatastathā || 63 ||

	yato'yamanantaḥ pariṇāmasya kartā tatastathāvidhasavikalpakajñānavānityarthaḥ || 63 ||

	etadeva sādhayati-

	idamevaṃ mayā kṣubdhamiṣṭaṃ saṃpādayed dhruvam |
	iti jānāti yaḥ śaktaḥ sa kartā pariṇāminām || 64 ||

	vṛttikartustu na tadapekṣetyāha-

	pariṇāmiṣvayaṃ dharmo vṛttimatsvanyathā bhavet |

	etadeva prapañcayituṃ savikalpakajñānasya nirvikalpakajñānapūrvakatvamāha-

	tathāhi sarvo nirdhūtavikalpamavalokayan || 65 ||
	vastu loko vijānāti savikalpakamanyathā |

	nirvikalpakajñānānantaraṃ savikalpakajñānaṃ bhavatītyuktaṃ prāgeva | anyathā 
jñānā'navasthā | savikalpakajñānānabhyupagame nirvikalpakasya vastumātrāvabhāsakatvena 
sarvavastusādhāraṇatvād jñānānavasthā syāt | ghaṭajñānamityādiniyamo'nupapanna 
ityarthaḥ || 65 ||

	tataśca-

	anantenāpi śabdānuviddhavijñānapūrvakam || 66 ||
	sarvaṃ cediha vijñātamiṣyetaiṣa karoti ca |
	savikalpaṃ vijānāmītyavabodhābhimānataḥ || 67 ||

	yasmāt savikalpaṃ jñānaṃ jānāmītyavabodharūpatvāt 
parāmarśarūpeṇāntaḥsaṃjalpātmake śabdenānuviddhaṃ jāyate, 
tasmācchabdānuviddhasavikalpakajñānapūrvaṃ māyādi vastu jñātvā anantaḥ kṣobhādikaṃ 
karoti, ajñātasya karaṇādarśanāt || 66-67 ||

	śivasya tu vṛttikarturbindukṣobhena tadapekṣetyāha-

	vṛttireva matā bindoḥ paṭasyeva kuṭī tataḥ |
	nirvikalpakabodhe'pi bindumīśo'dhitiṣṭhati || 68 ||

	anantasya ca pariṇāmakarturastyeva savikalpakajñānāpekṣetyupasaṃharati-

	naivaṃ vidyeśvaro māyāmeṣā hi pariṇāminī |

	itthaṃ paramatamupanyasya dūṣayati-

	na vṛttipariṇāmābhyāṃ kartṛbhedo'vadhāryate || 69 ||
	kurvato'pi kuṭīṃ buddhiḥ savikalpā hi dṛśyate |

	hīti yasmādarthe | etacca paramathābhyupagamanadūṣaṇamuktam, na tu siddhāntatayā, 
bindorapi tattvabhuvanādirūpeṇa pariṇāmaśrutervṛttipariṇāmayoratyantabhedābhāvācca || 69 ||

	idānīṃ bindoḥ paryāyanāmānyāha-

	śabdatattvamaghoṣā vāg brahma kuṇḍalinī dhruvam || 70 ||
	vidyā śaktiḥ parā nādo mahāmāyeti deśikaiḥ |
	bindurevaṃ samākhyāto vyomānāhatamityapi || 71 ||

	idānīṃ bindoḥ sūkṣmādiśabdavṛttīḥ saṃhārakrameṇa darśayati-

	catasro vṛttayastasya yābhirvyāptāstridhāṇavaḥ |

	yābhirvyāptā aṇavaḥ proktavaduttamamadhyamāpakṛṣṭajñānādimanto bhavanti || 70-71 
||

	kāstā ityatrāha-

vaikharī madhyamābhikhyā paśyantī sūkṣmasaṃjñitā || 72 ||

	ata āsāṃ kāraṇatvena binduḥ siddha ityarthaḥ || 72 ||

	vaikharīsvarūpamāha-

	tatra sā vaikharī śrotragrāhyā yā'rthasya vācikā |

	sā ca-

	sthāneṣu vidhṛte vāyau kṛtavarṇaparigrahā || 73 ||
	prayoktaṇāmiyaṃ prāyaḥ prāṇavṛttinibandhanā |

	tadāhuḥ-

ākāśavāyuprabhavaḥ śarīrāt samuccaran vaktramupaiti nādaḥ |
sthānāntareṣu pravibhajyamāno varṇatvamāgacchati yaḥ sa śabdaḥ || iti |

	madhyamāmāha-

	kevalaṃ buddhyupādānā kramād varṇānupātinī || 74 ||
	antaḥsaṃjalparūpā tu na śrotramupasarpati |
	prāṇavṛttimatikramya vartate madhyamāhvayā || 75 ||

	eṣā ca parāmarśajñānasvarūpā sthūlaśabdasyāpi kāraṇamityuktam || 74-75 ||

	avibhāgena varṇānāṃ sarvataḥ saṃhṛtikramāt |
	svayaṃprakāśā paśyantī māyūrāṇḍarasopamā || 76 ||

	iyaṃ cākṣarabindurūpetyuktam || 76 ||

	idānīmabhidheyabuddhibījatvena prāguktāṃ nādāparaparyāyāṃ sūkṣmāvasthāmāha-

	svarūpajyotirevāntaḥ sūkṣmā vāganapāyinī |

	anapāyinītvaṃ cāsyāḥ suṣuptyādyavasthāsvapi saṃbhavāt, na tu nityatvena | asyā 
api pratipuruṣaṃ bhedenānekatvādacetanatvācca kāryatvāt | tasyāśca kāraṇaṃ 
parabindurevetyuktam ||

	tāmeva viśeṣayati-

	yasyāṃ dṛṣtasvarūpāyāmadhikāro nivartate || 77 ||

	yasyāṃ puruṣasvarūpād vivekena dṛṣṭasvarūpāyāṃ puruṣasya bhogādhikāro 
nivartate | yadyevaṃ vivekajñānādeva mokṣasiddherdīkṣānarthakyaprasaṅgaḥ ? tanna, malasya 
dravyatvāccakṣuḥpaṭalasya cakṣurvaidyavyāpāreṇeva īśvaravyāpāreṇa dīkṣākhyenaiva 
nivṛttisiddheḥ || 77 ||

	tataśca tadviṣayavivekavijñānābhāvādeva śabdabrahmavādinaḥ puruṣasamavāyinīṃ 
tāṃ manyanta ityāha-

	puruṣe ṣoḍaśakale tāmāhuramṛtāhvayām |

	evaṃ hi teṣāṃ bhrama ityāha-

	kevalaḥ paramānando dhīro nityoditaḥ prabhuḥ || 78 ||
	nāstameti na codeti na śrānto na vikāravān |
	sarvabhūtāntaracaraḥ śabdabrahmātmako raviḥ || 79 ||
	bhitvā yaṃ bodhakhaḍgena nirgacchantyaviśaṅkitāḥ |

	yamenaṃ samyagjñānākhyena khaḍgena bhitvā vivicya yathāvad jñātvā 
saṃsārānnirgacchantyātmānaḥ, so'yaṃ śabdabrahmākhyo ravirasmād ravervilakṣaṇa iti 
teṣāṃ bhramaḥ || 78-79 ||

	atra siddhāntamāha-

	tāmeva vāṇīṃ sūkṣmākhyāmāhurātmavido janāḥ || 80 ||

	evaśabdo bhinnakramaḥ | ātmasvarūpavidastu śaivāstāṃ sūkṣmākhyāṃ 
bindukāryabhūtāṃ śabdavṛttimeva manyante, na tu puruṣasamavāyinīm, tasyāvikāritvena 
jaḍatvāt, tatsamavāye puruṣasyāpi vikāritvā'cetanatvādidoṣaprasaṅgāt || 80 ||

	itthaṃ bindukāryarūpāḥ śabdavṛttīḥ pradarśyopasaṃharati-

	pratyātmaniyatā etā vṛttayo bandhanātmikāḥ |

	āsāṃ ca kāryatvena jaḍatvānna citsamavāyo yujyate, api tu bandhanatvamevetyarthaḥ ||

	tathāpi-

	ābhyo viviktamātmānaṃ nahi paśyanti pudgalāḥ || 81 ||

	pudgalā malayuktātmāna ityarthaḥ | malāvṛtatvādātmanāṃ tadvivekajñānābhāvena 
tāsvevātmabhrāntiriti bhāvaḥ || 81 ||

	kuta evameṣāmayaṃ bhrama ityatrāha-

	paramātmaiva vāgātmā vāgevātmeti ca śruteḥ |

	ātmano vākśaktyādisaṃbandhasyārthavādabhūtānāmāsāṃ 
śrutīnāmarthāparijñānādevaṃ te manyante pudgalāḥ, malayuktātmāna ityarthaḥ |

	vaikharī śrotraje bodhe madhyamā savikalpake || 82 ||
	paśyantī madhyamotpādasamudyogeṣu lakṣyate |

	vaikharī śrotragrāhyaiva | madhyamā parāmarśajñānarūpatvāt savikalpe lakṣyate | 
tasyā api samutpādanahetuḥ paśyantī || 82 ||

	anyā tu -

	yadāvṛttiraśeṣeṇa vilīnā cittasaṃśrayā || 83 ||

	tadā sūkṣmā viśuddheva cidābhātyavivekataḥ |

	sūkṣmā tvabhidheyabījatvena sarvabhūteṣvavasthitā paśyantyā api kāraṇabhūtā cidā 
atyantasaṃśleṣāt tadrūpeva bhātītyuktam || 83 ||

	uktanyāyena ca-

	na so'sti pratyayo'ṇūnāṃ yaḥ śabdānugamādṛte || 84 ||
	anuviddhamiha jñānaṃ sarvaṃ śabdena jāyate |

	kiñca-

	saiṣā caturvidhā vṛttirnivṛttyādikalāśrayāt || 85 ||
	pañcadhā bhidyate bhūyaḥ kalāstā binduvṛttayaḥ |

	saiṣā śabdātmikā binduvṛttirnivṛttyādikalāśrayāṇāmāt-manāṃ tāratabhyena 
pañcadhā jñānādyupakāriketyarthaḥ | nivṛttyā-dayaḥ punaḥ kuta utpannā ityatrāha- 
kalāstā iti | bindorevāvasthā-bhūtāḥ kalākāravṛttayaḥ | tataḥ kalopādānatvenāpi 
bindusiddhiriti bhāvaḥ || 85 ||

	tā eva nāmato darśayati-

	nivṛttiśca pratiṣṭhā ca vidyā śāntiśca pañcamī || 86 ||
	śāntyatītāḥ kalā etā yābhirvyāpto'dhvapañcakam |

	etāśca sadāśivabhuvanordhvaṃ bhuvanatvena sthitā api śaktirūpeṇa 
samastādhvavyāpikāḥ sthitā ityāha- yābhirvyāpto'dhvapañcakamiti || 86 ||

tattvādhvā bhuvanādhvā ca varṇādhvā ca padātmakaḥ || 87 ||
mantrādhvā vyāpakasteṣāṃ kalādhvā bindumāśritaḥ |

	tattvādipañcādhvavyāpakaḥ proktarūpakalādhvā bindumupādānatvenāśrita ityarthaḥ | 
tatra tattvādhvā śivādipṛthivyantaśuddhāśuddhatattvarūpaḥ | bhuvanādhvā tu 
anāśritādikālāgnyantabhuvanātmakaḥ | varṇādhvā ca mātṛkaiva | padādhvā 
vyomavyāpisaṃjñaḥ | mantrādhvā punaḥ saṃhitāmantrā eva || 87 ||

	kathaṃ punareṣāmadhvasaṃjñā ? ata āha-

	tyaktvaikamekaṃ saṃprāpya kalādiṣvajarāmaram || 88 ||
	padamāsādyate puṃbhirato'dhvānaḥ kalādayaḥ |

	yathā hi loke'dhvasu kramādekapadāvaṣṭabdhaṃ bhūpradeśaṃ 
muktvā'nyapadāvaṣṭabdhaṃ bhūpradeśamāsādya grāmādi prāpyate, tathā kalāsu tattveṣu 
varṇeṣu padeṣu mantreṣu vā'śuddhaviṣayeṣu

karmabhogārtham, śuddhaviṣayeṣu sarvajñatvādiprāptyarthaṃ dīkṣāyāṃ 
viśiṣṭasaṃbandhātmakaṃ yojanaṃ kriyate | tataḥ kalādivastupaddhatayo'dhvāna ityucyante || 88 
||

	teṣu ca-

	kalādhvā varṇitaḥ  pūrvaṃ nivṛttyādivibhedataḥ || 89 ||
	vyāptiṃ tasyābhidhāsyāmi sādhārāṅkādhidevatām |
	sākārakāraṇāmātmabinduśaktiśivāśrayām || 90 ||

	ādhārā hṛdayādayaḥ, aṅkāni cihnāni vajrādīni, adhidevatā adhiṣṭhātṛdevatāḥ 
sadyojātādayaḥ, ākāraścaturaśrādiḥ, kāraṇānyadhipatayo brahmādayaḥ | 
ātmabinduśaktiśivāśrayāmitya-trātmanāṃ bhogādhikaraṇatvena āśrayabhūtānām | kiñca, 
bindurupādānatayā, śaktiḥ karaṇatayā ādhārakatvena ca, śivaḥ kartṛtayā āśrayo yasyāḥ 
kalāvyāptestām || 89-90 ||

	tatra tāvannivṛttivyāptiṃ saṃhārakrameṇāha-

	nivṛttau pārthivaṃ tattvaṃ purāṇyaṣṭottaraṃ śatam |
	teṣu kālānalādīnāmanantāṇḍasya ṣaḍ bahiḥ || 91 ||
	prācyādiṣu daśasvāsannāśāsvekaikaśo daśa |
	rudrāṇāṃ śatasaṃkhyānāṃ vīrabhadrasya copari || 92 ||
	bhadrakālyāśca bhuvane kṣakāro'rṇeṣu kīrtitaḥ |

	tatra rudranāmānyeva bhuvanānāmapi nāmāni | bhuvanādayaśca 
paddhatyāmevāsmābhirvivicya darśitāḥ | granthavistarabhayāt paddhatyantareṣu bahuśaḥ 
prasiddhatvācca nātra likhyante || 91-92 ||

	ekāśītipadā devī pratisargapadakramāt || 93 ||
	aṣṭāviṃśatisaṃkhyaistu padairatra pratiṣṭhitā |

	ekāśītipadā devī vyomavyāpilakṣaṇā śaktiḥ | sā ca pratisarga-padakramāt 
saṃhārakrameṇāntyapraṇavādārabhyāṣṭāviṃśatipadai-ratra nivṛttikalāyāṃ vyavasthitā || 93 
||

	kiñca-

	mantrāvajātahṛdayau tatra sā tu parā kalā || 94 ||
	bhuvanādīnabhivyāpya pañca pañcasu vartate |

	pañcādhvano vyāpya teṣveva vartata ityarthaḥ || 94 ||

	itthaṃ nivṛttivyāptimabhidhāya etasyākārādīnāha-

	pītaiṣā caturaśrā ca kaṭhinā vajralāñchitā || 95 ||

	dhyātavyodyadanekārcirmāṃsalā hṛdayāmbuje |

	tasyā nivṛttisaṃjñākāraṇamāha-

	tatpralīnāṇusaṃghasya saṃkalpo vinivartate || 96 ||
	anāsādya phalaṃ tena nivṛttirabhidhīyate |

	kiñca-

	brahmā'tra kāraṇaṃ mantraḥ sadyojāto'dhidevatā || 97 ||

	pratiṣṭhāyā apyāha-

	pratiṣṭhāyāṃ tu catvāri kalāyāmavanīṃ vinā |
	bhūtāni pañca tanmātrāḥ pañca karmendriyāṇi ca || 98 ||
	pañca buddhīndriyāṇyāsan mano'haṅkārabuddhayaḥ |
	avyaktamapi varṇāśca hādiṭāntā vilomataḥ || 99 ||
	trayoviṃśatirāmnātāḥ ṣaṭpañcāśat purāṇi ca |
	jalatejo'nilākāśabuddhyavyakteṣvahaṅkṛtau || 100 ||
	aṣṭāvaṣṭau padānyekaviṃśatistatra saṃkhyayā |
	śiro vāmaśca mantrau dvau viṣṇuḥ kāraṇamucyate || 101 ||
	sā tu śuklārdhacandrābhā nīlotpaladalāṅkitā |
	dhyātavyā galapadmāntarbahulālokaśālinī || 102 ||
	tatpralīnāṇusaṃghasya saṃkalpo'rthaprasiddhaye |
	pratiṣṭhito yatastena pratiṣṭhā nāma sā kalā || 103 ||
	vāmadevo hyadhiṣṭhātā vācyamantrātmako mataḥ |

	mananaṃ sarvaveditvaṃ trāṇaṃ saṃsāryanugrahaḥ | mananatrāṇadharmitvānmantra 
ityabhidhīyate || iti nyāyāt śivaśaktitadanugṛhīteṣu mantraśabdo vartate, upacārāttu 
vācakaśabde prasiddhaḥ | tato'trāpi sadyojātavāmadevādiśaktibhedā eva 
adhidevatātvenocyante | ata eva tāsu nivṛttyādiṣu bhuvanarūpāsu sadyojātādivigrahaḥ 
śivo'bhidhyeyastatpadaprāptikāmairiti guravaḥ || 98-103 ||

	vidyāyāstvāha-

	vidyāyāṃ sapta puruṣo rāgo niyatisaṃyutaḥ || 104 ||
	vidyā kalā ca kālaśca māyātattvāni tatra tu |
	māyādibhuvanānāṃ ca vijñeyāḥ saptaviṃśatiḥ || 105 ||

	ñādayo'tra ghakārāntā varṇāḥ sapta vilomataḥ |
	padāni viṃśatirmantrau śikhāghorau vyavasthitau || 106 ||
	rudro'tra kāraṇaṃ mantro bahurūpo'dhidevatā |
	sā tu sphuradanekārcistrikoṇā svastikāṅkitā || 107 ||
	dhyātavyā tālupadmāntarnīlāñjanasamadyutiḥ |
	tatpralīnāṇusaṃghasya saṃkalpo'śeṣagocaraḥ || 108 ||
	sarvārthadyotako yena tena vidyeti gīyate |

	aśeṣagocaraḥ svabhuvanādhovartisamastādhvaviṣayaḥ, na tu sarvaviṣayaḥ, tasya 
malābhāva eva saṃbhavāt || 104-108 ||

	śāntau tu trīṇi tattvāni daśāṣṭau bhuvanāni ca || 109 ||
	kathitānyatra varṇāstu gādikāntāstrayo matāḥ |
	padānyekādaśā'trāsan mantrau vaktratanucchadau || 110 ||
	bhuvanādīnyabhivyāpya pañca ṣaḍbindulāñchitā |
	ṣaṭkoṇoditamalpāntasahasrakiraṇadyutiḥ || 111 ||
	dhyātavyā sā parā śaktirbhrūmadhyakamalodare |
	tatpralīnāṇusaṃghasya dveṣarāgādyabhāvataḥ || 112 ||
	saṃkalpasya praśāntatvācchāntireṣā nigadyate |
	īśvaraḥ kāraṇaṃ tatra mantrastatpuruṣāhvayaḥ || 113 ||
	tadadhiṣṭhāyako jñeyaḥ puruṣastvadhidevatā |
	atra ca trīṇi tattvāni pañcamī tu parā kalā || 114 ||
	śivatattvātmakaṃ tatra purāṇi daśa pañca ca |
	varṇā visargapūrvā ye ṣoḍaśa svarasaṃjñitāḥ || 115 ||
	omityādyaṃ padaṃ mantrāḥ śivāstreśānaśabditāḥ |
	śāntyatītā ca pañcādhvāgarbhiṇī paramā kalā || 116 ||
	cintanīyā mahākāśasvarūpā mūrdhapaṅkaje |
	īśāno mantrarāḍenāmadhitiṣṭhati kāraṇam || 117 ||
	devaḥ sadāśivastatra kalādhveti prakīrtitaḥ |
	vyāpako bhuvanādīnāmabhivyāptaḥ sa bindunā || 118 ||
	binduḥ śaktyā śivenaiṣā nānyena vyāpyate śivaḥ |

	trīṇīti | vidyeśvarasadāśivākhyānītyarthaḥ | ata eva śaktitattvasya 
śivatattve'ntarbhāvaṃ manyamānaḥ śāntyatītāvyāptimāha- pañcamī tviti | vyāpaka iti | 
uktaditarādhvanāṃ vyāpakaḥ kalādhvā bindūpādānaka ityuktaḥ | kartṛbhūtaḥ śivaḥ 
karaṇabhūtayā samavāyinyā śaktyā bindumadhitiṣṭhati, śivasya tu nādhiṣṭhātā'stītyarthaḥ 
|| 109-118 ||

	etadevāha-

	sa hi devaḥ samāvṛtya svaśaktyā'nanyabhūtayā || 119 ||
	sarvamākramya ca tayā vijānāti karoti ca |

	ataḥ śakteḥ sarvajñānakriyārūpatvaṃ siddham || 119 ||

	idānīṃ vyāptisvarūpaṃ vicārayati-

	anyasyānyatra sadbhāvaḥ sarvadā'vyabhicāriṇī || 120 ||
	vyāptirāptapadārthātmalābhasthitinibandhanam |

	anyasya ākāśādeḥ, anyatra kuḍyādāvastitvaṃ sarvakālamavyabhicāriṇī vyāptiḥ | 
sā ca āptasya padārthasya ātmalābhanibandhamutpattinibandhanaṃ sthitinibandhanaṃ ca bhavati 
|| 120 ||

	ata eva-

	dvidhā sā sannidhāvekā paramātmavidhānataḥ || 121 ||

	tadeva darśayati-

	tatra sannidhimātreṇa vidadhātyakhilaṃ citiḥ |
	yathārko dinaceṣṭānāṃ sannidherupakārakaḥ || 122 ||

	citiścaitanyātmikā śivasya samavāyinī śaktiḥ, saṃkalpamātreṇa sṛṣṭyādikṛtyaṃ 
vidadhāti, sūrya iva kamalavikāsādi | tathā hyātmano'pi svadehaspandanādau 
saṅkalpamātreṇa kartṛtvaṃ dṛṣṭam || 122 ||

	tataśca cidadhiṣṭhānenaiva jaḍasyātmani vidhānarūpā vyāptirityāha-

	bindurātmani nādādīnadhvanaḥ ṣaḍapi kramāt |
	vicitraiḥ pariṇāmaistairvidadhāti śiveritaḥ || 123 ||
	yathā mṛtkalaśādīni kulālādhiṣṭhitā satī |

	adhvanaḥ ṣaḍapīti | kalāvarṇapadamantratattvabhuvanātmanaḥ sarvāneva bindurutpādayati 
| tattvabhuvanādhvānau śuddharūpāveva, aśuddhayostu tattvabhuvanādhvanormāyotpannatvāt || 
123 ||

	kiñca-

	yena yad vyāpyate vastu pariṇāmitayā svayam || 124 ||
	sā tasya vikṛtiḥ proktā hemnastu makuṭo yathā |

	enamevārthaṃ sādhyaviṣaye yojayati-

	bindunā vyāpyate yo'sau ṣaḍvidho'dhvā kalādikaḥ || 125 ||
	sā tasya vikṛtistena vyāptatvānnādabinduvat |

	aśuddhatattvabhuvanavyatiriktaḥ ṣaḍvidho'dhvā kāryatvena nādabinduvat svakāraṇaṃ 
binduṃ gamayatīti bhāvaḥ || 125 ||

	idānīṃ bindusamavāyavādināṃ matamupanyasyati-

	kecidācakṣate binduḥ samavaiti śive tataḥ || 126 ||
	dṛkśaktivat kriyāśaktiriyaṃ kuṇḍalinī parā |

	jñānaśaktivadanyāpi bindvātmikā kriyāśaktiḥ śive samavaiti, na tu māyāvat tato 
vyatirikteti bhāvaḥ || 126 ||

	evaṃ ca-

	dve śaktī samavāyinyau śive jñānakriyātmike || 127 ||

	etadeva prapañcayati, tatra-

	ādyā tu saṃvid vijñānaṃ kriyā kuṇḍalinī parā |

	ādyāyāḥ saṃvid vijñānamiti ca vyapadeśaḥ | anyasyāstu kriyā kuṇḍalinīti ca || 
127 ||

	tayostu-

	jñānaśaktyā vijānāti kriyayā kurute jagat || 128 ||

	śiva ityadhyāhāraḥ || 128 ||

	kuta ityatrāha-

	kriyā hi phaladā puṃsāṃ na jñānaṃ syāt phalapradam |

	yataḥ kulālādīnāmapi kriyāśaktireva prayatnātmikā ghaṭādyutpādanarūpaṃ 
phalamāvahati, jñānaśaktistu tattadarthaviṣayīkaraṇa eva caritārthā | tataḥ śivo'pi 
jñānaśaktyā vijānan kriyāśaktyā sarvaṃ karotīti ||

	tataśca-
	
	tābhyāṃ na virahastasya te ca na staḥ śivaṃ vinā || 129 ||

	itthaṃ matāntareṇa bindoḥ śivasamavāyaṃ pradarśya tanmatenaiva 
sadāśivāditattvānyapi darśayati-

	tayoḥ prasaratoḥ sāmye tattvātmā syāt sadāśivaḥ |
	īśā'dhikakriyāśaktyorvidyājñānātiriktayoḥ || 130 ||

	tayoḥ kriyājñānayoḥ sāmyena prasaratoḥ satoḥ kriyāśakteriva 
sadāśivatattvātmapariṇāmo bhavati, kriyāśaktyādhikye tvīśvaratattvātmā, 
jñānaśaktyādhikye'pi vidyātattvātmā || 130 ||

	kiñca-

	tattveṣu teṣu vijñānakevalānāṃ mahātmanām |
	bhuvanāni vicitrāṇi svabhāvalalitāḥ priyāḥ || 131 ||
	bhogānapyaparimlānānaṅgāni karaṇāni ca |
	vidadhāti śivaḥ śakterananyāyāḥ kriyātmanaḥ || 132 ||
	nādādīnapi tenaiṣa kartā śuddhādhvano mataḥ |

	uktārthamupasaṃharati-

	ato nāyaṃ pṛthak śakteḥ śaktireva kriyātmikā || 133 ||
	samavetā śive binduriti tatrābhidhīyate |

	ato'yaṃ binduḥ śivasamavāyinyā jñānaśakternātyantaṃ pṛthagbhūto'pi tatsamavetā 
kriyāśaktireveti kecinmanyante | atha tannirāsāyāha- tatreti | siddhānto'bhidhīyata ityarthaḥ || 
133 ||

	tamevāha-

	so'yamātmani tattvaughamanekabhuvanāvalim || 134 ||
	vidadhad vividhānalpatanubhogendriyādikam |
	bindurākhyāyate yuktyā pariṇāmī pradhānavat || 135 ||

	bindostattvabhuvanādyupādānatvena śruteḥ pradhānavad mṛdādivad vā 
pariṇāmitvamavaśyamabhyupeyam || 134-135 ||

	kimata ityatrāha-

	pariṇāmi ca yadvastu tadavaśyaṃ jaḍātmakam |
	yathā kṣīraṃ jaḍatve'sya samavāyaḥ kathaṃ śive || 136 ||

	pariṇāmitvāccāsya kṣīrādivajjaḍatvaṃ siddham | tataśca nāsya citsamavāyo yujyata 
ityāha- jaḍatva iti || 136 ||

	tatsamavāyābhyupagame śivasyāpyacetanatvaṃ prasajyata ityāha-

	sa hi tādātmyasaṃbandho jaḍena jaḍimāvahaḥ |
	śivasyānupamākhaṇḍacidghanaikasvarūpiṇaḥ || 137 ||

	nityamuktatvādanupamaṃ sarvaviṣayatvādakhaṇḍaṃ cidghanaṃ jñānakriyātmakaṃ 
ghanaṃ śarīramekameva svarūpaṃ yasya tasya śivasya | ayamarthaḥ- cetanātmikā śaktireva 
śivasya dehaḥ | sā caikā'pi jñeyakāryādyupādhibhedādupacāreṇa jñānakriyāśaktyā-
divyapadeśaṃ bhajate | pañcakṛtyopakāribhirīśānādyavasthābhedaiḥ śarīrakāryaṃ 
kurvāṇopacāreṇa śarīratvenāpyupacaryata iti nāsyācetanabindusamavāyo yujyate, tatsamavāye 
tvacetanatvādidoṣaprasaṅgāt || 137 ||

	astvacetanaḥ ko doṣa iti cet-

	yastvenaṃ manyate mohājjaḍadhīrjaḍamīśvaram |
	na tasya yuktiḥ śāstraṃ vā nātmā nāsti ca devatā || 138 ||

	īśvarasyācetanatvābhyupagame jagatkartṛtveneśvaraṃ sādhayatā'numānena, tasya 
cetanatvādisvarūpapratipādakairāgamai-śca bādhaḥ | kiñca, nyāyasya 
samānatvācchivasamānajātīyātmāno-'pyacetanāḥ prasajyeran | teṣāṃ ca 
bhogamokṣakartṛtayā devatāpi na siddhyati || 138 ||

	tataśca-

	sa varjanīyo vidvadbhiḥ sarvāstikabahiṣkṛtaḥ |

	nanu yuṣmatpakṣe'pi śivasya kartṛtvenābhyupagamāt kriyāveśena 
pariṇāmitāprasaṅgaḥ ? ata āha-

	kriyayā hetubhūtatvāt kriyāśaktiścideva yat || 139 ||

	nātra kriyāveśaḥ, kartṛtvamapi tu kriyāyāṃ śaktatvameva | 
tataścāyaskāntaśakterivāyasi śivaśakteḥ sannidhimātreṇa bindāveva kriyāveśaḥ, ataḥ 
kriyāhetubhūtatvād jñānaśaktireva kriyāśaktirucyata ityavirodhaḥ || 139 ||

	atra parāśaṅkāpūrvakaṃ jāyate'dhvā yataḥ śuddhaḥ (ślo0 22) ityādi prāguktameva 
samarthayati-

	binduranyo na māyordhvamacidastīti cenmatam |
	jāyate'dhvā kutaḥ śuddhaḥ kva vā līyeta kena vā || 140 ||
	ṣoḍhā bhavedayaṃ tattvabhuvanādivibhedataḥ |
	vijñānakevalāstredhā kathaṃ kasmācca te punaḥ || 141 ||

	vimucyerannṛte bindostadvaicitryavidhāyinaḥ |

	nanu cidrūpā śivaśaktireva tasya sarvasya heturata āha-

	nahi cit pariṇāmena kurute tadaśeṣataḥ || 142 ||
	caitanyabhāvādityagre vakṣyate śaktinirṇaye |

	etatprāgeva darśitam | sādhitaṃ cāsmābhistattvaprakāśavṛttau vistareṇa || 142 ||

	atra parāśaṅkā-

	syādeṣa kalpitānekabhedaḥ kāryaviśeṣataḥ || 143 ||
	eka eva śivo naikaśaktimāniti cenmatam |

	nanūktavaccetanasya śivasya tattvādirūpeṇa pariṇāmo na yujyate, kintvekasyāpi 
śivasyānekaśakteḥ kāryabhedādaupacārikaḥ sadāśivāditattvabhedaḥ kālpanika eva, na tu 
pāramārthika eveti yadyevaṃ bhavato'bhimatam, tatsatyameva, adhiṣṭhātṛviṣaye 
śivasyādhiṣṭhāturavasthābhedasyādhiṣṭheyabhedakṛtatvenaupacāri-katvāt | adhiṣṭheyasya 
śuddhādhvanastattvabhuvanādibhedaḥ satya eva, anyathopacārasyāpyayogāt || 143 ||

	atha cidvivartatayā so'pyasatya eveṣyate, tadānīm-

	māyeyo'pi tathā tu syādadhvā yuktyaviśeṣataḥ || 144 ||

	vivartābhyupagamasyāśuddhādhvani saṃbhavāt so'pyasatyatāmāpādyetetyarthaḥ || 144 
||

	astu so'pyasatyaḥ, ko doṣa iti cet, tadayuktam, pramāṇabādhādityāha-

yathāsvaṃ hetubhiḥ śāstraiḥ pratyakṣairapi yoginām |
prasiddhānadhvanaḥ śuddhān pratyācaṣṭe kathaṃ sudhīḥ || 145 ||

	atra ca śuddhādhvana ityupalakṣaṇamaśuddhānāmapi tattvādī-nām | tataśca 
śuddhāśuddharūpasya jagato'satyatābhyupagamaḥ sarvapramāṇabādhita iti tadvādino 
durbuddhaya eveti bhāvaḥ || 145 ||

	tathāhi-

	viśiṣṭe paramodāradātarīśe yathāgamam |
	pravṛttirupabhogāya mokṣāya ca nigadyate || 146 ||

	śāstratastāvadbhogamokṣaprade śive siddhe sati śāstropadiṣṭakrameṇaiva bhogārthaṃ 
mokṣārthaṃ vā''tmanāṃ pravṛttiryathā'dhikāraṃ dṛśyate || 146 ||

	kiñca, bhogasthānamapi sākṣācchivakartṛkamatyantaśuddhaṃ śāstreṣu śrūyata iti 
darśayituṃ śrīmanmataṅgasūtraṃ (vi0 26|63) paṭhati-

	sadāśivapadaṃ yogāccaryāto vā'tha dīkṣayā |
	prāpyate cittabhedena mokṣo vā'tha catuṣṭayāt || 147 ||

	cittabhedaśabdenātra jñānaṃ vivakṣitam | tataśca śuddhādhvani karmaṇaḥ 
pragamāsaṃbhavāt tajjanyasya ca bhogasya sukhaduḥkhamoha-rūpatvenāśuddhatvāt 
sadāśivādibhuvanavartyaparamokṣasaṃjñaḥ śuddhabhogaḥ, paramokṣaśca śivasāmyarūpo 
yogādisahakṛtadīkṣayā prāpyate | tatra malaparipākamāndye bhautikadīkṣābhājāṃ 
bhogānantaraṃ mokṣaprāptiḥ, viśiṣṭamalaparipākavatāṃ naiṣṭhika-dīkṣābhājāṃ 
śarīrapātānantaram, sadyonirvāṇadīkṣābhājāṃ ca tadanantarameva mokṣaprāptiḥ | nanvasmin 
sūtre dīkṣācaryājñāna-yogākhyāni catvāryapi samavikalpāni bhogamokṣasādhanānīti 
pratīyante ? naivam, vākyārthānabhijñānāt | evaṃ hi tatra vākyārthaḥ- 
sadāśivapadasyātropalakṣaṇatvāt tattadbhuvaneśvara-sākṣātkāraphalād yogāt, 
tattadārādhanātmikayā vā caryayā, tattadbhuvanayojanātmikayā dīkṣayā ca, 
tattadbhuvaneśvarasvarūpa-niṣṭhena ca jñānena tattadbhuvaneṣu prāptirbhavatyeva, na tu 
samavikalpatayā | jñānādiṣvapi dīkṣayā vinā'nadhikārāt tasyā eva prādhānyaṃ yataḥ | 
mokṣo vā'tha catuṣṭayāt | asmāt samuccitān-naikasmād bhogo veti vāśabdārthaḥ | tathā 
ca caryāyogayostāvaj-jñānaṃ vinānuṣṭhānameva nopapannam, nahyajñāte'rthe yogaś-caryā 
vā saṃbhavati | jñānamapi dravyatvānmalādibandhānāṃ cakṣuṣaḥ paṭalānāmiva 
cakṣurvaidyavyāpārād dīkṣākhyamīśvara-vyāpāraṃ vinā na tebhyaḥ puṃsāṃ mokṣaṃ 
kartuṃ kṣamamityuktam | ato dīkṣaiva mokṣahetuḥ | uktaṃ ca tatraiva prakaraṇāntare- 
tasmānmantrakriyā mukhyā seśvarī mukti muktidā (ma0 vi0 7|74) iti | 
śrīmatṣaṭsāhasrikāyāmapi- dīkṣaiva mokṣadā puṃsāṃ cidabhivyaktikāriṇī iti || 147 ||

	atra ca sadāśivapadasya bhogādhikaraṇatvaṃ śrūyata ityāha-

	iti bhogaḥ samākhyātaḥ sadāśivapadaṃ mahat |

	bhogaśabdenopacārād bhogādhikaraṇamucyate | sadāśivapadamityapi 
śuddhādhvabhuvanopalakṣaṇamityuktam ||

	asya ca bhuvanarūpatvena kāryatvāt śuddhādhvatvācca bindurevopādānakāraṇatayā 
siddha ityuktamityabhiprāyeṇāha-

	na tatra māyopādānaṃ tanubhogādi jāyate || 148 ||
	viśuddhatvādataḥ siddhaḥ śuddhādhvā copabhuktaye |

	tatra sadāśivapada iti || 148 ||

	anyathā'pi śuddhādhvasādhanāyāha-

	kiñca māyā prayojyena kartrā kenāpyadhiṣṭhitā || 149 ||

	upādānaṃ kalādīnāṃ kalāvyāptasvarūpiṇī |
	yathā mṛtkalaśādīnāṃ kulālena tathā hyasau || 150 ||

	satkāryapakṣāśrayaṇena kalādipṛthivyantaṃ kāryaṃ kalāḥ, tābhiḥ 
śaktirūpābhirāśrayatvena vyāpyata iti kalāvyāptasvarūpiṇī māyā mṛdādivadaśuddhatvāt 
śivaprayojyena kartrā kṣobhyate, na tu binduvat sākṣācchivenetyuktam- śuddhe'dhvani śivaḥ 
kartā prokto'nanto'site prabhuḥ || (ki0 vi0 3|27) iti | kulālasyāpi śivaprayojyatvaṃ darśayati- 
tathā hīti || 149-150 ||

	prayojyaḥ paśubhāvena kartā heturmaheśvaraḥ |

	paśutvādeva kulālaḥ prayojyaḥ kartā, nirmalatvācchivaḥ prayojakakartetyarthaḥ ||

	tathāhi-

	ajño janturanīśo'yamātmakārye'pi kīrtitaḥ || 151 ||
	īśvarapreritaḥ kuryācchubhaṃ vā yadi vā'śubham |

	itthaṃ dṛṣṭāntaṃ prasādhya dārṣṭāntike yojayati-

	prayojyatvāccharīrādiyukto'nantaḥ kulālavat || 152 ||
	māyāyāḥ kṣobhako yena śarīreṇendriyeṇa ca |
	deśādinā sa siddho'dhvā viśuddhaḥ śivaśāsane || 153 ||

	yeneti yanmayenetyarthaḥ | deśādineti bhuvanādyātmanā''śrayeṇa | ādigrahaṇāt 
prāguktena savikalpakajñānahetunā śabdena ca yukto'nantaḥ kartā | sa śuddho'dhvā 
śivaśāstre siddha iti || 152-153 ||

	itthaṃ matāntaranirākaraṇena parigrahaśaktirūpāṃ 
śuddhādhvopādānabhūtāmacetanāṃ parabindusaṃjñāṃ mahāmāyāṃ prasādhya 
matāntareṇā'śuddhādhvano'pi bindūpādānatvaṃ māyāyāśca kāryatvamupanyasyati-

	avasthāmapare bindormāyāmāhurvipaścitaḥ |
	kalāvyāptasvarūpā ca pudgalādhiṣṭhitā ca yat || 154 ||

	yadyasmācchuddhavidyātattvād māyā'pi baindavībhiḥ kalābhirvyāptā 
paścātmādhiṣṭhitā ca, tasmāt tāmapi bindorevāvasthāṃ kāryarūpāṃ sūkṣmāṃ 
pariṇatimāhuḥ || 154 ||

	tathaiva prakṛtisteṣāṃ sthūlā sūkṣmā paretyasau |
	mahāmāyā bhavet tredhā tatra sthūlā guṇātmikā || 155 ||
	buddhyādibhogyajananī prakṛtiḥ puruṣasya sā |

	prakṛtimapi tasyaiva sthūlamavasthāntaramāhuḥ | evaṃ teṣāṃ 
bindvekopādānavādināṃ sā mahāmāyā sthūlasūkṣmaparabhedena tridhā bhidyate | 
sthūlā sā bindvavasthā sattvarajastamorūpā puruṣasya buddhyādīni bhogasādhanāni tattvāni 
bhogyāṃśca viṣayān paramparayotpādayantī prakṛtirucyate || 155 ||

	sūkṣmā kalāditattvānāmavibhāgasvarūpiṇī || 156 ||
	jananī mohinī māyā sarvāśuddhādhvakāraṇam |

	sūkṣmā tu māyāsaṃjñā bhoktṛtvahetūnāṃ kalāditattvānāṃ sarvasya ca 
prakṛtyāderapi tattvabhuvanātmanastadvartinaśca sākṣāt paramparayā ca kāraṇaṃ bhavati || 
156 ||

	kiñca-

	mantrayoniḥ parā māyā nityā kuṇḍalinī tu yā || 157 ||
	upādānaṃ śarīrāṇāṃ vidyāvidyeśvarātmanām |

	parā tu māyopādānamiti | māyāyāścopādānabhūtā mahāmāyetyarthaḥ | sā ca 
nityā, paramakāraṇatvāt || 157 ||

	tataśca-

	kāryātmikā sā māyeyaṃ pariṇāmavatī ca yat || 158 ||
	śarīrendriyasaṃyuktaṃ kartāraṃ sādhayet tataḥ |

	evaṃ ca-

	viśuddhasyādhvanaḥ siddhiranivāryā'vatiṣṭhate || 159 ||
	yeṣāṃ māyā mate'nityā kalāvidyādikāraṇam |
	na teṣāmasito mārgaḥ kalāśuddhyā viśuddhyati || 160 ||

	itthaṃ paramatena māyāyāḥ kāryatvaṃ prasādhya māyāyā anityatve 
dūṣaṇamāha- yeṣāmiti | māyāyā anityatvena śuddhādhvo-pādānatvānabhyupagame 
bindukāryabhūtakalādhvaśuddhyā māyākāryasyāśuddhasyādhvanaḥ śuddhirna bhavet, anyasya 
śuddhyā'nyasya śuddhyayogāt | tatastacchuddhyanyathānupapattyā śuddhādhvāpi bindukārya 
evābhyupagantavyaḥ || 159-160 ||

	etadevāha-
	
	kalā hi śodhitāḥ pañca nivṛttyādyā viśuddhaye | 
	tattvādīnāmato bindoḥ kāryamadhvā viśeṣataḥ || 161 ||

	bindukāryatve hyapādānabhūtakalāśuddhyā sarvasya tattvādeḥ śuddhiranivāryeti 
bhāvaḥ || 161 ||

	nanu vyāpikānāṃ kalānāṃ śuddhyā vyāpyasya tattvādeḥ śuddhirbhaviṣyatītyata 
āha-

	na tu vyāpakamātrāṇāṃ śuddhyā śuddhirmatā'dhvasu |
	anupādānarūpāṇāṃ kalānāṃ nityaśuddhayoḥ || 162 ||
	śivaśaktyorviśuddhyaiva sadā śuddhiprasaṅgataḥ |
	ityākhyātā mahāmāyā sarvādhvaprakṛtiḥ parā || 163 ||
	ācāryaistairaśeṣādhvakāryavādavicakṣaṇaiḥ |

	atra ca māyāyā anityatve pramāṇābhāvāt, śuddhasya 
bindoraśuddhopādānatvāyogāt, nityatvaśrutivirodhāccāyaṃ pakṣaḥ prayatnena nirākṛta iti 
matvā siddhāntajñānināmācāryāṇāṃ matena māyāyā nityatvasādhanāyāha-

	anye tu kathayantyatra māyāmadhvasvanaśvarīm || 164 ||
	upādānaṃ kalādīnāmabhivyāptāṃ ca bindunā |

	taduktaṃ śrīmatsvāyambhuvādau- māyātattvaṃ jagadbījamavi-nāśyavyayātmakam ityādi 
| śrīmadraurave'pi- vidyārājādhirājeśo māyāṃ vikṣobhya mantrarāṭ | 
kalāmutpādayāmāsa (1|6-7) ityādi || 164 ||

	nanu māyāyā akāryatve'pyaśuddhādhvano vyāpakamātrakalā-śuddhyā 
śuddhirbhavediti cedatiprasaṅgādityuktam, ata āha-

	śuddhiśca tādṛśī jñeyā tayorāgamavedibhiḥ || 165 ||
	yayā vyāpakaśuddhyaiva viśuddhiritarāśrayā |

	vyāpakakalāśuddhyā vyāpyasyādhvamātrasya śuddhirdīkṣāyāṃ 
karmabhojanādidvāreṇopapadyata ityāgameṣu śrūyate | ayaṃ cātrābhiprāyaḥ- karmasadbhāve 
hyātmanāṃ kalādiko'śuddhādhvā bandhatvenāvatiṣṭhate, tasya śuddhistān prati 
bandhakatvanivṛttirevābhimatā | sā ca malaparipākayuktasya dīkṣayā karmakṣayādupajāyate | 
taduktaṃ śrīmatkiraṇe- anekabhavikaṃ karma dagdhabījamivāṇubhiḥ | bhaviṣyadapi saṃruddhaṃ 
yenedaṃ taddhi bhogataḥ || (vi0 6|19) iti | śrīmatsvāyambhuve'pi- dharmādharmakṣaya-karī 
dīkṣā iti | ataśca sarveṣvadhvasu pratyekamitarādhvāntarbhāvena bhogabhojanādirūpā 
dīkṣopapadyata iti vyāpakakalādhvaśuddhyā vyāpyasyāśuddhasyāpi tattvabhuvanāderadhvanaḥ 
sādhāraṇarūpasya taṃ prati bandhakatvanivṛttilakṣaṇā śuddhirupapadyata iti na kaściddoṣaḥ || 
165 ||

	itthaṃ māyāyā nityatve'pi doṣābhāvamuktvā punarapi bindumeva viśeṣayati-

	mantrayonirmahāmāyā yā parigrahavartinī || 166 ||
	śivasya śaktirākrāntā yayā sarve'pi pudgalāḥ |

	vācyamantrāṇāmutpattyayogād vācakamantrāṇāṃ śabdopādānatvena 
yonirmahāmāyā | sā ca śivasya parigrahaśaktirucyate, yayā sarve'pi paśavaḥ 
proktavannādādidvāreṇā'dhiṣṭhitāḥ || 166 ||

	kiñca-

	seyaṃ kriyātmikā śaktirīśvarī sarvadoditā || 167 ||
	vartamānā paśuṣveva pāśatvena vyavasthitā |

	eṣā ca sarvadeśvarasya kriyāśaktyadhiṣṭhitatvāt śuddhakāryot-pādanārthamātmanāṃ 
ca kriyāśaktyavivekena sthitatvācca kaiścid bhrāntyā kriyāśaktiraiśvarīti proktā, na tu 
paramārthataścitsama-vāyinī kriyāśaktiḥ, upādānatvenācetanatvādityuktam | ata eva 
muktāṇuṣu na pravartate, paśuṣveva vartamānatvāt | iyamapi pāśatayaiva sthitā, na tu 
pāśātītaśivasamavāyeneti || 167 ||

	ataśca-

	paśūn vartayate nityaṃ nānāyoniṣvaniścitā || 168 ||

	seyaṃ kriyāśaktiravyatirekeṇa jñātā satī paśūnaśuddhāsu yoniṣu yojayati | tadviveke 
tu nāśuddhayoniprāptirityarthaḥ || 168 ||

	kiñca-

	svaparāmarśavīryeṇa bhogamokṣau prayacchati |

	svakīyena parāmarśajñānātmanā vīryeṇa bhogamokṣau prayacchati, bhogamokṣayoḥ 
paramparayopakāriṇī bhavatītyarthaḥ ||

	māyā tu bhogopakārikā, anātmādiṣvātmādijñānahetutvāt, tatrāsya 
bhogopakāritvaṃ darśayati-

	sā bhogasādhanopāyapratyayodayahetunā || 169 ||
	śabdānuvedhena sadā mohayedavivecitā |

	avivecitasvarūpā mahāmāyā 
bhogasādhanagrahaṇopāyabhūtasavikalpakajñānotpattihetunā śabdānuvedhena sarvadā paśūn 
mohayati || 169 ||

	tadānīṃ ca-

	sarvathaivāmṛtaprāpteḥ pṛthakkāraṃ pratanvatī || 170 ||
	tato'bhūd viṣayābhogaprītilālasacetasaḥ |

	viṣayābhogaśraddhāloḥ puṃsaḥ sarvathā mokṣaprāpterbahirbhāvaṃ tadānīṃ 
karotītyarthaḥ || 170 ||

	mokṣopakārakatvamapi darśayati-

	jñānaṃ parāmṛtopāyahetuḥ parikaraḥ paśoḥ || 171 ||

	paramokṣaprāptyupāyasya dīkṣākhyasya taduttarakālānuṣṭheyasya ca nityādikarmaṇaḥ 
kāraṇaṃ paricchedajñānameva, ajñātaviṣaye'nuṣṭhānāsaṃbhavāt, 
nirbījadīkṣāyāmapyācāryasya jñānapradhānatvāt || 171 ||

	tasya ca śivādivastuviṣayakajñānasya śāstradvāreṇa bindureva saṃpādaka ityāha-

	tacca śabdānuvedhena śabdarāśerabhūdasau |
	śabdarāśiśca bindūttho bindurnādādasāvapi || 172 ||
	bindoranāhatādeṣa kāraṇaṃ śuddhavartmanaḥ |

	anāhatabinduriti śuddhādhvayonermahāmāyāyāḥ saṃjñā | tasyāśca 
nādabindvādikrameṇa śabdotpattirityuktam || 172 ||

	tatra bhoktṛtayā bhogaiḥ śarīrendriyagocaraiḥ || 173 ||
	malaḥ karma ca māyā ca viśuddhamanumīyate |

	tatra ca vidyeśvarādīnāṃ bhoktṛtvaśruterbhogasya 
śarīrādyavinābhāvādaśuddhabhogasādhanaśarīrādihetūnāṃ malamāyākarmaṇāṃ 
tatrāsaṃbhavāt śuddhabhogasādhanaiḥ śarīrādibhirbhoktṛtvahetuḥ śuddho'dhikāramalaḥ 
śuddhaṃ ceśvarasevātmakaṃ sahakāri karma, śuddhā ca māyā 
śarīrādyupādānamanumīyate | tayoścādhikāramaleśvarasevātmaka-
karmaṇormahāmāyābhuvanaprāptistatkāraṇabhūtadīkṣā vā saṃpādikā, māyottīrṇānāṃ 
vicchinnāvārakamalānāmeva tatsaṃbhavāt || 173 ||

	etadevāha-

	māyaiva kāraṇaṃ śuddhāśuddhayormalakarmaṇoḥ || 174 ||

	aśuddhasya tvanātmādāvātmādyabhimānarūpasya puṃstva-
malasyāśuddhabhogahetoścāśvamedhabrahmahatyātmādyanuṣṭhāna-rūpasya 
karmaṇo'śuddhamāyākāryasaṃparkaḥ kāraṇamityāha-

	aśuddhayoraśuddhaiva māyā'to dvividhā matā |

	na tvāṇavamalasya sā heturiti vyākhyeyam, tasyānādyāvārakatvena śravaṇāt, 
ādimattve ca āvaraṇakāraṇāsaṃbhavāt | nanu karmāpyevamanādikam (ki0 vi0 3|7) iti śruteḥ, 
karmasadbhāva eva māyāpravṛtteśca kathaṃ karmaṇo māyā kāraṇamucyate, satyaṃ 
pravāhānādireva karmaśarīraprabandhaḥ, karmābhāve māyāyāścāpravṛttireva, tathāpi 
karmānuṣṭhānasya dehavatāmeva saṃbhavād vāsanārūpasya ca karmaṇo buddhidvāreṇa 
māyāsthatvāt tathoktamityavirodhaḥ | karmāpi kṛṣyādikarmavat, prakṛtisaṃskārakatvāt 
puruṣasaṃskārakatve tasya vikāritvaprasaṅgād buddhau guṇatvena vartata iyuktaṃ 
śrīmanmataṅgādau | ataśca māyāmahāmāyātmakadvayaṃ nityasiddhamityāha- māyā'ta iti | 
evaṃ visadṛśakāryatvād māyāyā bindukāryatvaṃ na saṃbhavatīti bhāvaḥ ||

	bindorviveke sahasā cchidyate malakambukaḥ || 175 ||

	malasya dravyatvena jñānānivartyatāyā uktatvāt, dīkṣayā kṣapitamalānāmeva 
śuddhādhvabhuvanaprāpteḥ śāstradvāreṇa mahāmāyāpuruṣavivekajñānasya 
saṃbhavāccādhikāramalakṣayastadviveke bhavati || 175 ||

	māyāpuruṣaviveke tu dharmādharmatuṣakṣayaḥ |

	yadāhuḥ- jñānāgniḥ sarvakarmāṇi bhasmasāt kurute (bha0 gī0 4|37) iti | tataśca 
karmakṣaye'pi pariṇatamalānāṃ vijñānakevalatva-meva | prakṛtipuruṣaviveke tu tadapi nāstyeva 
| yaduktaṃ siddhagurubhiḥ- guṇatattvordhvabhogasya karmaṇo'nupalabdhitaḥ | kaivalyamapi 
sāṃkhyānāṃ naiva yuktamasaṃkṣayāt || (pa0 mo0 kā0 53) iti ||

	tataśca-

	uttīrṇamāyamātmānaṃ mahāmāyānuṣaṅgiṇam || 176 ||
	uddiśya śaktirīśasya bindoḥ kṣobhāya vartate |

	sādhakadīkṣābhājaṃ śuddhabhogābhilāṣiṇaṃ prati śivaśaktirbindoḥ kṣubdhāt 
śarīrādīnyutpādayatītyarthaḥ || 176 ||

	sa ca śaktyā kṣobhitaḥ-

	yathodadhiruparyeva vikarotyanileraṇāt || 177 ||
	tathaikadeśato binduḥ śaktervyāpnoti cākhilam |

	śakteḥ preraṇād ghṛtakīṭanyāyenaikadeśena bindurvikaroti, na tu kṣīradadhinyāyena 
sarvātmanā, tathā satyanityatvaprasaṅgādanavasthāprasaṅgāccetyarthaḥ | kiñca, 
svakāryarūpābhiḥ kalābhiḥ prāguktaṃ viśvaṃ vyāpnoti cetyarthaḥ || 177 ||

	ayaṃ ca nyāyo'nyatrāpi samāna ityāha-

	evaṃ māyaikadeśena vikaroti tathākhilam || 178 ||
	vyāpnoti kāryamātmīyaṃ tathaivāvyaktamiṣyate |

	ayamatra bindormāyāpradhānayorviśeṣo yat svakāryamevaite vyāpnuvataḥ, na tu 
svasmādūrdhvam, tatra pragamāsaṃbhavāt | ataḥ śuddhasya tvaśuddhādhvanyapi vyāpakatvāt 
pragamaḥ saṃbhavatyeva || 178 ||

	idānīṃ bindoravasthāntarādhiṣṭhānādaupādhikaḥ śivasya layādibheda ityāha-

	tatrākṣubdhe bhaved bhogo bindāvānandarūpiṇi || 179 ||
	kṣubdhe'dhikāro devasya layo'tikrāntabindukaḥ |

	tatrānandarūpiṇi samantādvyāptisamṛddhibhāji bindāvakṣubdhe śivaśaktyā 
kṣobhanimitte viṣayīkṛte prasavaunmukhyabhāji sati śivaśakterudyogāt pālanātmako bhogo

bhavati | kṣubdhe tūtpāditakārye śaktervyāpṛtatvādadhikāraḥ | upasaṃhṛtakārye 
svarūpaniṣṭhe śakterapyupasaṃhṛtavyāpāratvāllayaḥ || 179 ||

	tataśca śivaśaktyorvyāpārabhedādaupacāriko bheda ityāha-

	ekaiva khalu cicchaktiḥ śivasya samavāyinī || 180 ||
	trividhopādhisaṃbhedāllayabhogādhikāriṇī |
	tayaitayā'bhisaṃbandhādeko devastridhā bhavet || 181 ||
	śivaḥ sadāśivo'dhīśo layabhogādhikāravān |

	yaduktam- adhikārī sa bhogī ca layī syādupacārataḥ iti | anena 
binduparīkṣopasaṃhāreṇa śaktiparīkṣopakṣipteti mantavyam || 180-181 ||

	atha śaktilakṣaṇamāha-

	śaktirapratighodāramarīcinicayātmikā || 182 ||
	nityoditānavacchinnā nirvikalpasvarūpiṇī |
	nirāvaraṇanirdvandvanirupādānavaibhavā || 183 ||
	vividhopādhisambandhavivartabhidurodayā |
	śāntoditaprapañcādibinduvyāptipaṭīyasī || 184 ||
	parānapekṣānanyātmaprakāśyā sarvatomukhī |
	ādimadhyāntarahitā rahitā sarvabandhanaiḥ || 185 ||
	niṣṭhā kāṣṭhā parā sūkṣmā vastumātrātilālasā |

	marīcinicayo'tra jñānakriyāsamṛddhiḥ, layāvasthāyāmasyā 
aupacārikabhedasyāpyabhāvād nirvikalpasvarūpiṇī sā kathitā | vividheti 
vicitrakāryopādhisambandhādapāramārthikena bhedaśīlodayena yuktā, 
kṛtyabhedādhikārāvasthāyāṃ bhinneva lakṣyamāṇetyarthaḥ | kiñca, sā 
proktaprapañcādibhūtabinduvyāptidakṣā malarahitatvena parānapekṣatvādananyaprakāśyā | ata 
evātmaśaktivailakṣaṇyena sarvabandhanavirahādiguṇayuktā | kāṣṭhā niratiśayā | niṣṭhā 
atiśayāvadhibhūtā | parā sūkṣmā atyantasūkṣmā | atilālasā sarvānugrahaṇaśīlā ca 
boddhavyā || 182-185 ||

	sā ca śivasya jñānakriyātmakaṃ caitanyamevetyāha-

	citireva matāmlānamahimā parameṣṭhinaḥ || 186 ||
	śivasyānāhitāpūrvaviśeṣasyaiva sannidhau |
	tayaitayā'bhisambandhaviśeṣānnityarūpayā || 187 ||

	vikaroti vicitrābhirvṛttibhiḥ sthagayanniva |
	bindurāpūrayannādairāṇavaṃ cinnabho muhuḥ || 188 ||
	saridvānabhisambandhādindunārkasya sannidhau |
	vikaroti yathā lolaiḥ kallolairnādayannabhaḥ || 189 ||

	kartṛbhūtasya śivasya sannidhau karaṇabhūtayā śaktyā saṃbandhād binduḥ 
kāryotpādaka ityāha- śivasyeti | binduḥ pratipuruṣaṃ bhinnairnādairātmanāṃ 
caitanyamāpūrayatītyuktaṃ prāgeva || 186-189 ||

	nanvindriyādirahitasya kartṛtvaṃ na yujyate ? tanna, svadehaspandādāvātmanaḥ 
śaktimātrasya karaṇasya darśanāt, asyāśca śivasamavāyena pariṇāmābhāvāt 
kāryabhedādaupacārika evecchājñānakriyādibheda ityāha-

	saiṣā śivāśrayā śaktiramoghā balaśālinī |
	ekānekavibhāgeva kāryabhedād vibhāvyate || 190 ||
	yathaikā savituḥ śaktirdānādānādikarmabhiḥ |

	etadeva prapañcayati-

	icchākāryamanicchāpi kurvāṇecchā cidavyayā || 191 ||
	jñānamajñānarūpaivamakriyāpi kriyā tathā |

	jñeyakāryādyupādhibhedāt tasyā jñānākriyādibheda ityarthaḥ || 191 ||

	kiṃ bahunā-

	yad yasyāḥ kāryamāmnāyalokābhyāmavadhāritam || 192 ||
	tadetadrūpiṇī śaktiḥ kurute'cintyavaibhavā |

	anenāsyāḥ sarvādhiṣṭhānamuktam | yadāhuḥ- na sā bhāvakalā kācit 
santānadvayavartinī | vyāptrī śivakalā yasyāmadhiṣṭhātrī na vidyate || iti |

	avikāreṇa sarvārthakāritvameva dṛṣṭāntena draḍhayati-

	kāmānapi bahūnekaḥ kalpavṛkṣaḥ prayacchati || 193 ||
	cintāmaṇiśca vividhānacintyamahimā yathā |
	tathā'nāhitasaṃskāraviśeṣaikasvarūpiṇī || 194 ||
	cidacintyā vibhoḥ śaktiraśeṣārthakriyāvidhau |

	cetanatvānnāsyā vikāra ityāha-

	na jāyate na mriyate kṣīyate na ca vardhate || 195 ||
	citiḥ śaktiḥ prakāśatvādajaḍatvācca 

	amumevārthaṃ vyatirekeṇa sādhayati-

						yat punaḥ |
	utpadyate naśyati vā cinotyapacinoti ca || 196 ||
	tadaprakāśarūpaṃ vā jaḍaṃ vā dṛśyate yathā |
	śarīrādi tathā nāsau tasmānnaiṣā vikāriṇī || 197 ||

	yato'sāvaprakāśarūpā jaḍā ca na bhavati, tato na vikāriṇītyarthaḥ || 196-197 ||

	evamasyāḥ kṣīradadhinyāyena sarvātmanā paraṃ vikāro nirākṛtaḥ, 
idānīmuktābhyāmeva hetubhyāmekadeśapariṇāmo'pi nāstītyāha-

	tābhyāmevopadeśābhyāṃ pariṇāmo nirākṛtaḥ |
	bodhaśakterabodhasya pariṇāmo hi dṛśyate || 198 ||

	etadeva prapañcayati-

	pariṇāmā'parimlānaṃ śāśvataṃ śivamāśritā |
	samavāyena tādātmyānnahi cit pariṇāminī || 199 ||

	pariṇāmahīnaṃ nityaṃ cetanaṃ śivaṃ samavāyena 
tādātmyalakṣaṇasambandhenāśritā cicchaktirna pariṇāminī bhavitumarhati | yacchrūyate- 
śaktirnā'cetanā citaḥ (mṛ0 vi0 3|4) iti || 199 ||

	tataśca-

	nityaiṣā'śeṣakāryāṇāṃ kāraṇatvād yatheśvaraḥ |
	sattve kāraṇaśūnyatvādapi binduvadiṣyate || 200 ||

	asyāścānityatve'navasthāprasaṅga iti bhāvaḥ || 200 ||

	tathāhi tāṃ samāśritya santo'nye śāśvatī satī |
	yatsiddhau jagataḥ siddhiryadasiddhau na kiñcana || 201 ||
	tatsattā sādhyate kasya kena vā pratipādyate |

	yasyā upādānabhūtabindvādyadhiṣṭhātṛkartṛśakteḥ sadbhāva eva 
śuddhāśuddhamayasya kāryarūpasya jagataḥ siddhirnānyathā, tasyāḥ sattā kenānyena 
pramāṇena sādhyate ? kāryotpattyanyathānupapattyaiva sā siddhetyabhiprāyaḥ || 201 ||

	itthaṃ śaktiṃ prasādhya cidacidadvaitavādināṃ matamupanyasyati-

	tāmetāmadvayāmeke kīrtayanti vipaścitaḥ || 202 ||
	citiṃ sadasadākāravivartollāsaśālinīm |

	vipaścita ityākṣepe | evaṃ hi te manyante- śaktireva cidrūpā satyabhūtā | sā ca 
vivartatayā śuddhāśuddhabhuvanādirūpānarthānasatyabhūtān prakāśayati | tataśca 
dvaitapratibhāso dvicandrādijñānavad bhrānta eveti || 202 ||

	etadeva dṛṣṭāntenāha-

	yathā rajjurahicchidramālāvibhramakāriṇī || 203 ||
	na tānutpādayatyarthānasataḥ prathayatyasau |
	jñānamātraṃ tathaiveyamekānekāyate bhramāt || 204 ||

	tataśca-

	seyaṃ bhrāntiranālambā sarvanyāyavirodhinī |
	vicārāllūnamūlatvādaheturbandhamokṣayoḥ || 205 ||
	tasmānna vaddho bandho'nyo bandhakaśca vicārataḥ |
	nityamuktādvayānantasaṃvidevāsti kevalam || 206 ||
	kathaṃ punarayaṃ bhedapratibhāso'pi dṛśyate |
	vyavahārastu bhedātmā vijñeyo vaṭayakṣavat || 207 ||

	kathamaprāmāṇyaṃ bhedāvabhāsasyāta āha-

	tathāhi bhedo bhāvānāṃ na pratyakṣo'kṣadhīryataḥ |

	kuta ityatrāha- akṣadhīriti |

	bālamūkādivijñānatulyaivākalpanārthajā || 208 ||

	nirvikalpavijñānasyaivārthasāmarthyajanitasya pratyakṣatvāt tasyaiva 
prāmāṇyābhyupagamād bhedasya ca vikalparūpatvānna pratyakṣasiddhatvamityarthaḥ || 208 ||

	kiñca-

	sā vidhātrī padārthānāṃ na niṣedhati kiñcana |

	taduktam- āhurvidhātṛ pratyakṣaṃ na niṣedhṛ vipaścitaḥ (bra0 si0 2|1) iti | tataśca 
bhedasyetaretarābhāvagrahaṇapūrvakatvād bhavāviṣayeṇa pratyakṣeṇa grahaṇaṃ nopapadyata 
iti bhāvaḥ ||

	savikalpakaṃ tu-

	yad viśeṣaṇavijñānaṃ śabdasaṃskārapūrvakam || 209 ||
	deśakālādyapekṣākṣairudapādi na tatpunaḥ |
	arthasāmarthyajaṃ jñānaṃ smṛtisaṅkalpavanmatam || 210 ||

	yatpunaḥ śabdānuvedhena savikalpaṃ jñānaṃ deśakālādyapekṣākṣairutpādyate, 
tadidaṃ deśakālādyapekṣatvānnārthasāmarthyajanyaṃ smṛtipratibhāsādivat, 
tatastatpramāṇamiṣyate | yadāhuḥ- kalpanāpoḍhamabhrāntaṃ pratyakṣam (nyā0 vi0 1|4) iti || 
209-210 ||

	ata eva-

	nānumānāgamau tatra pramāṇaṃ tadabhāvataḥ |

	pratyakṣaviṣayatvābhāvato bhāvānāṃ bhede nānumānāgamāvapi pramāṇaṃ 
bhavitumarhataḥ ||

	tathā hi-

	pratyakṣa eva tāvarthe vikalpaviṣayāvapi || 211 ||

	yatastāvapi pratyakṣasiddha evārthe vikalpamutpādayantau pramāṇībhavitumarhataḥ, 
saṃbandhagrahaṇādeḥ pratyakṣapūrvakatvādvikalparūpatvācca | bhedasya tu pratyakṣeṇa 
grahaṇaṃ na saṃbhavatītyuktam, ataḥ svapnādijñānavadasatyabhūta evāyaṃ 
bhedapratibhāsaḥ || 211 ||

	yata evāyam-

	svotthairnibadhyate tasmācchaṅkāpāśairvimūḍhadhīḥ |
	mucyate tebhya evāyaṃ bandhamokṣau na vastutaḥ || 212 ||

	itthaṃ tanmatamupanyasya siddhāntamupakṣipati-

	ityadvaitagrahāviṣṭāḥ pralapanto dayālubhiḥ |
	gurubhiḥ pratibodhyante siddhāntāgamadāyibhiḥ || 213 ||

	kathaṃ bodhyante ? ata āha-

	yadyadvayeyaṃ saṃvittiḥ pramāṇairvyāvahārikaiḥ |
	sādhyeta taireva dṛḍhaṃ tasyāḥ syāt sadvitīyatā || 214 ||

	yadi saṃvidaikyaṃ lokasya vyavahārasiddhaiḥ pramāṇairbhavadbhiḥ sādhyate, tatastaireva 
satyabhūtairadvaitahāniḥ | atha tānyapyasatyānīṣyante, niṣpramāṇakatvādadvaitāsiddhiriti 
bhāvaḥ || 214 ||

	etadeva prapañcayitumanumānasvarūpamāha-

	prasiddhāḥ pṛthagevālaṃ dharmidṛṣṭāntahetavaḥ |
	aprasiddhasya dharmasya siddhyai vyāptyupabṛṃhitāḥ || 215 ||

	dṛṣṭāntabhūte hi mahānase dhūmāgnyorvyāptimavinābhāvasambandhaṃ gṛhītvā'tha 
sādhyadharmiṇi parvatādau dhūmavattvena hetunā prasiddho vahnimattvarūpadharmo'numīyate | 
tataḥ pṛthageva bhedena dharmyādayaḥ siddhā abhyupagantavyāḥ || 215 ||

	tathā hi-

	na siddhaḥ sādhyate dharmo nāsiddhairapi taistathā |
	siddhyasiddhī ca saṃbhūya naikatra sthātumarhataḥ || 216 ||

	nahi siddhasya sādhakāntarāpekṣā, nāpyasiddhā hetvādayaḥ siddhaṃ sādhayanti || 
216 ||

	ataśca-

	sapakṣapakṣayorbhede pramāṇamanumā bhavet |
	aikye hi na tayorhetusādharmya

	yasmāt pakṣasapakṣayoraikye hetusādharmyaṃ dṛṣṭāntasiddhadhūmavattvākhyahetunā 
sādhyadharmiṇi dhūmavattvasya sādharmyaṃ na bhavati, tasmāt tayoraikye nānumānāt 
sādhyasiddhiḥ || 217 ||

	dṛṣṭāntābhāve tu vyāptigrahaṇamapi na saṃbhavatītyāha-

						tadabhāvataḥ || 217 ||
	kasya kena kathaṃ vyāptiḥ

	itthaṃ satyadvaitasiddhyarthamanumānāṅgīkāre bhedo'vaśyaṃ bhāvītyāha-

					ityadvaitaprasiddhaye |
	prayukto bhedamākhyāti prayogaḥ svāṅgasiddhaye || 218 ||

	svāṅgasya hetvādeḥ siddhyarthamityarthaḥ || 218 ||

	kiñca, saṃvidekaiveti saṃvidviṣayabhedaniṣedhe jaṣaviṣayo bhedo na niṣiddhyata ityāha-

	advayeti niṣedho'pi citiṃ yujyeta tanmate |
	dvaitabhāvastato'nyatra siddhyet siddhāvapi dhruvam || 219 ||
	pratijñā bhajyate teṣāmāśāmātravijṛmbhitā |

	āgamaprāmāṇyasvīkāre'pyadvaitahānirityāha-

	āgamo'pi tadaistaistaiḥ smāritārthaviśeṣataḥ || 220 ||
	padārthajātaṃ saṃsargaviśiṣṭaṃ kathayet katham |
	yadyadvayeyaṃ saṃvittiḥ svena syādabhidhitsitā || 221 ||

	yadi svenāgamenādvayā saṃvittirabhidhitsitā syāt, kathamasau 
jātiguṇakriyādravyavācibhirgauriyaṃ śvetā gacchati grāmamityādibhiḥ padaiḥ 
smāritārthaviśeṣā padārthajātasaṃsargarūpāṃ viśiṣṭāṃ buddhiṃ janayet | etaduktaṃ 
bhavati- āgamasya satyabhūtasya pramāṇatayā'bhyupagame

	tena tadavayavaistadarthaiśca dravyādibhiḥ satyaiśca bhāvyam, ato'yamevādvaitavirodha iti 
|| 220-221 ||

	ataśca-

	āgamaḥ kathamadvaitamanumānaṃ ca sādhayet |
	nivāryamāṇamaṅgaiḥ svairadvaitakṣapaṇakṣamaiḥ || 222 ||

	idānīṃ cicchaktirekaiva khalvityādīnāmadvaitaśrutīnāṃ 
pramāṇāntaravirodhānmukhyārthāsambhavaṃ darśayitumāha-

	kiñca śabdāḥ parityajya mukhyamarthaṃ virodhataḥ |
	vartamānā hi dṛśyante gauṇe'rthe lokavedayoḥ || 223 ||
	gaurbrāhmaṇo'yamadityo yūpa ityevamādayaḥ |

	anumānasya tvavinābhāvasambandhalakṣaṇe vyāptigrahaṇe sati 
pramāṇatvenārthasādhakatvamanivāryamevetyāha-

	naivaṃ heturaduṣṭāyāṃ vyāptau sādhyaṃ na sādhayet || 224 ||

	ataśca bhedasādhakairanumānairbādhitatvādekatvaśrutayaḥ saṃvido 
nityatvavyāpakatvādisādṛśyastotraparā ityāha-

	ato hetubalākrāntāḥ śrutayo dvaitamātmanām |
	mukhyamapyapahāyārthaṃ nutiṃ kurvanti saṃvidaḥ || 225 ||

	kiñca-

	pratyakṣamapi gṛhṇāti vastuno nirvikalpakam |
	bhedaṃ parebhyo vyāvṛttirūpaṃ yonopajāyate || 226 ||
	jāyamānena nāmādiviśeṣasmṛtipūrvakam |
	savikalpamasandigdhaṃ vyabhicāravivarjitam || 227 ||
	pratyakṣasaṃjñaṃ vijñānam

	atra hi nāmapramāṇādiviśeṣasmaraṇapūrvakamutpadyamānaṃ savikalpakamapi 
jñānamasaṃdigdhatvādabādhitatvācca pratyakṣatayā pramāṇameveṣyate | yadāhuḥ- tataḥ 
paraṃ punarvastu dharmairjātyādibhiryayā | buddhyā'vasīyate sā'pi pratyakṣatvena sammatā || 
(ślo0 vā0 pratyakṣa0 120) iti | tatastādṛśaṃ pratyakṣajñānaṃ yena jāyamānenotpadyate, 
tadapi nirvikalpakaṃ jñānaṃ vastunaḥ parebhyo vyāvṛttarūpaṃ bhedaṃ gṛhṇātyeva, kāryasya 
kāraṇaguṇānvayāt, satkāryavādābhyupagamācca || 226-227 ||

	tasya tu bhedagrāhitvānabhyupagame taduttarakālaṃ savikalpakajñānaṃ notpadyata 
ityāha-

					anyathā nopapadyate |
	agṛhītārthabhedasya tannāmādiviśeṣavat || 228 ||

	nanu bhedasyetaretarābhāvagrahaṇapūrvakatvād bhāvaviṣayeṇa pratyakṣeṇa grahaṇaṃ 
nopapadyata ityuktam, tadayuktam, siddhe hi bhede'sāvitaretarābhāvaḥ | anyathā payo'rthī 
pāvakamanudhāvediti sarva(masa)mañjasam || 228 ||

	anumānasya sāphalyamapi bhedagrahe sati |
	vyāptigrahaṇasaṃbandhe

	vyāptivijñānārthaṃ bhedagrahaṇasyāvaśyaṃbhāvāt tatsadbhāva 
evānumānapravṛttirityarthaḥ ||
	vastusāmānyamātragrahaṇe tu tasya prāgeva siddhatvād dharmiviśeṣaṇasya 
dharmaviśeṣasādhanārthamanumānaṃ na prarvatata ityāha-

				sāmānye siddhasādhanāt || 229 ||

	anyathā bhedasiddhimāha-

	api cānyatvamadvaitabhedayorabhyupaiti cet |
	bhedaḥ siddhyedathānanyabhāva evaṃ ca sādhyate || 230 ||

	advaitasya dvaitānyasyābhyupagame dvaitādvaitātmakasya vastudvayasyāsiddhiḥ | 
athādvaitabhedayordvaitādvaitātmakasya vastudvayasyāpyekatvamiṣyate, yadyevaṃ 
bhedasyaivādvaitasaṃjñā bhavadbhirucyata iti na vo nāmni vivādaḥ | yato'smābhirapyevaṃ 
bheda eva sādhyate || 230 ||

	nanvekasyāṃ rajjau sarpādibhramavadekasyāmeva saṃvidi satyabhūtāyāmasatyabhūto 
vastubhedapratibhāsa ityuktam ? ata āha-

	nahi dṛṣṭāntamātreṇa sādhyasiddhirbhavedataḥ |
	rajjūdāharaṇaṃ śiṣyasammohāyaiva kevalam || 231 ||

	kevalasya dṛṣtāntasya hetvādibhirvinā'rthasādhakatvābhāvād dṛṣṭāntamātrasya 
satyatve'pyadvaitavirodhāt tadasatyatve dārṣṭāntikabhūtāyāḥ saṃvido'pyasatyatvaprasaṅgād 
rajjūdāharaṇamanarthakamevetyarthaḥ || 231 ||

	kiñca-

	nāpi saṃvitsamā rajjorviśeṣānupalabdhitaḥ |
	vivartamānā tairbhāvairjñānamātranivartakaiḥ || 232 ||

	rajjvādau hi sarpādibhramāḥ samyagjñānodayānnivartante | tato bādhitatvāt 
sarpādyavabhāsastimirādidoṣakṛto'satya eva | ghaṭapaṭādyarthaprakāśasya tu 
kālāntaradeśāntarayorapi

	viśeṣādarśanājjñānamātravyatirekeṇa bhāsamānairabādhitatvādeva 
satyabhūtaistaistairghaṭapaṭādibhāvairupādhibhūtaiḥ saha vivartamānā svayamapi bhinneva 
bhāsamānā''tmasaṃvinna rajjusāmyaṃ bhajate | etaduktaṃ bhavati- 
ghaṭapaṭādibāhyārthabhedaḥ satya eva, ātmasaṃvidastu tattadarthasannidhau tattadākārāropo 
buddhyadhyavasāyabheda upādhikṛta iti | etaccottaratra prapañcayiṣyate | ataśca 
tattadarthasannidhau jāyamānasya tattadākārasya bauddhasyādhyavasāyātmano 
jñānasyāsakṛdbhede'pi tattadadhyavasātṛrūpāyāḥ sarvadaikarūpeṇa bhāsamānāyā 
grāhakasaṃvido na rūpāntaraparāvṛttiḥ, api tu nityatvameva, cetanatvenāvikāritvāt | 
tataścātmasaṃvido naikā eva, ekatve 
bhogasāmyavimokṣādidoṣaprasaṅgādityuktamasmābhiranyatra || 232 ||

	asyāścātmasaṃvido bauddhādhyavasāyāvivekādanekarūpatābhramo malahetuka eva 
paśvātmanāmityāha-

	sā tu saṃvidavijñātā taistairbhāvairvivartate |
	maloparuddhadṛkśakternarasyevoḍurāṭ paśoḥ || 233 ||

	yathā timiraruddhacakṣuṣa eko'pīnduraneka iva pratibhāti, evaṃ 
malaruddhajñānaśakterekaiva cetanātmikā saṃvidanekarūpeva vivartata iti || 233 ||

	yathā ca pramāṇāntarasiddhaikyasyāpīndoranekatvapratyayastimira-hetukaḥ, evaṃ 
śāstrādisiddhaikyasya gṛhītṛrūpasya jñānasyānekākāratā-bhramaḥ svakāraṇaṃ malaṃ 
gamayatītyāha-

	yathā taimiriko hetusahasreṇāpi tarkayan | 
	ekamindumanekāṃstān bhūyobhūyaḥ samīkṣate || 234 ||
	yathā vā pittasaṃduṣṭarasanaḥ svādu tarkayan |
	api tiktaṃ vijānāti payaḥ karaṇadoṣataḥ || 235 ||
	yathā vāñjanasaṃyukte kvathyamāne ca vāriṇi |
	viduṣāmapi nīloṣṇapratyayāvavivekataḥ || 236 ||
	tathā parīkṣitā samyagāgamaiḥ sopapattikaiḥ |
	vivartamānā jāteti naṣṭeti vividheti ca || 237 ||
	jñānānivṛttiṃ gamayet kāraṇaṃ timirādivat |

	sa ca malo dravyatvāccakṣuṣaḥ paṭalādiriva na jñānamātrānnivartate, api tu cakṣuṣo 
vaidyavyāpāreṇa paṭalādiriveśvaravyāpāreṇa dīkṣākhyenaiva nivartata ityāha-

	tacchivapraṇidhānena śivaśāstroditena ca || 238 ||
	karmaṇaiva nivartyeta nānyathā jñānakoṭibhiḥ |
	timirādiryathārogyaśāstroktenaiva karmaṇā || 239 ||

	tanmalaṃ śivadhyānenāṅgabhūtena sahakṛtayā śivaśāstroktayā dīkṣākhyayā 
kriyayaiva nivartate | yaduktaṃ śrīmatsvāyaṃbhuve- dīkṣaiva mocayatyūrdhvaṃ śaivaṃ dhāma 
nayatyapi iti | atra prayogaḥ-
	malo jñānānivartyo bhavati, ātmakaraṇācchādakatvāt, timiravat | paramārtho malaḥ, 
malinīkaraṇārthakriyākāritvāt, yathā kācatimirātmako malo bhramotpādakaḥ || 238-239 ||
	itthaṃ grāhakasaṃvido nityatvaprasaṅgānmalaṃ tannivṛttihetuṃ coktvā grāhyasya 
prapañcasya bhedo vāstava ityāha-

  	deśakālanarānyatve'pyanyathānavabhāsitaḥ |
	abādhitaḥ pramāṇaiśca vivartaḥ syāt kathaṃ citeḥ || 240 ||
	prapañcaḥ kiñca māyeyaḥ pramāṇaireva sādhitaḥ |

	saṃvidastvanekākāratā bhrāntyaivetyuktam, ityāha-

	tasmād vivartate saṃvidaṇūnāmeva bandhanāt || 241 ||

	etadeva prapañcayati-

	vivartaḥ khalu cicchaktermithyāpariṇatiryayā |
	atadrūpāpi tadrūparūpiṇīvā'nubhūyate || 242 ||

	sa ca vivarto buddhyavivekādātmanāṃ bhavatītyāha-

	sa parasparasaṃbaddhaścidacidgocarastayoḥ |
	anyonyādhyāsasādhyatvādavivekakṛtodayaḥ || 243 ||

	etadeva vyācaṣṭe-

	tatra cit svābhisambandhabuddhitattvāvivekataḥ |
	āropyātmani tadvṛttivikārānavikāriṇī || 244 ||
	janmādīnanu jāteti naṣṭeti vividheti ca |
	sasukheti saduḥkheti svātmānaṃ darśayatyaṇoḥ || 245 ||
	tadvajjaḍaṃ ca caitanyamāropyātmani cidguṇam |
	avivekena jānāti bālo'haṃ kṛśa ityataḥ || 246 ||
	sarveṣāmaviko'yamaṇūnāṃ malahetukaḥ |
	bhrāntipradhānasantānakandaścijjaḍavastunoḥ || 247 ||

	ya eṣo'nityāśuciduḥkhānātmasu nityaśucisukhātmapratipattirūpaḥ puṃsāmavivekaḥ, sa 
na nirhetukaḥ, muktasyā'pi prasaṅgāt | atastasya kenāpi kāraṇenā'nādinā bhavitavyam | 
avivekasyānādisiddhatvād yastasya hetuḥ, sa mala iti bhāvaḥ || 244-247 ||

	atraiva hetumāha-

	nahi saṃvidviśeṣāṇāṃ viśiṣṭairjaḍavastubhiḥ |
	vivartabhedā yujyerannantarā dṛḍhabandhanam || 248 ||

	idaṃ cātrākūtam- malāvṛtatvādevātmanāṃ kalādidvāreṇaiva jñānādyabhivyaktiḥ | 
sā ca māyāyā mohakatvādanātmādāvātmābhimānarūpeti || 248 ||

	bandhahetutvameva prapañcayati-

	tathā hi dehe'haṃbuddhirna loṣṭe sā'pi kasyacit |
	aṇoreva na sarveṣāmato bandhastayormataḥ || 249 ||

	tayościjjaḍayoranyonyaguṇādhyāse bandha eva niyāmaka iti śeṣaḥ || 249 ||

	kiñca-

	yāni yasyendriyāṇyāsan narasya jñānakarmaṇoḥ |
	na tāni punaranyasya karaṇāni tayostathā || 250 ||
	viśiṣṭaiva vivartāya cidviśeṣasya vāryate |
	buddhirna sarvā sarveṣāṃ tena bandhastayormataḥ || 251 ||
	buddhyārūḍhaṃ sukhaṃ duḥkhaṃ kiñcit kenacideva yat |
	puṃsopabhujyate tena tayorbandho niyāmakaḥ || 252 ||

	ayamarthaḥ- ātmanāṃ hi saṃsārāvasthāyāṃ sarvaviṣayasya jñānādeḥ 
svarūpatvena śāstreṣu śrūyamāṇasyādarśanāt tadāvārakeṇa tāvanmalena bhāvyam | 
teṣāṃ ca kiñcijjñatvadarśanāt kalādidvāreṇa tajjanakena mohahetutvād viparītapratipattihetunā 
māyākhyena bandhena bhāvyam | bhogasya sukhaduḥkhāderbhogasādhanānāṃ ca 
śarīrendriyāṇāṃ pratyātmaniyatatvena vicitratvād vaicitryakāraṇaṃ 
karmāpyavaśyamabhyupeyamiti || 250-252 ||
	atra sāṃkhyacchāyayā viveka evātra niyāmako'stu, kiṃ malākhyenāprasiddhena 
bandhena puruṣasya kalpiteneti codayati-

	aviveko niyantā cet

	pariharati-

					sa tayoreva kiṃkṛtaḥ |

	tayorbuddhisaṃvidoranyonyāvivekaḥ kena kṛtaḥ | nirhetukatve muktasyāpi bhavet ||

	tatastatkāraṇatayā'nādyāvārako malo'bhyupagantavyaḥ, yadabhāve muktasya na 
punaraviveko bhavati, tata eva ca bandhavimocakasyeśvarasyāpi siddhiruktetyāha-

	tena bandho'sti bandhaśca pṛthageveśiturmataḥ || 253 ||

	ataśca-

	bandhavartī vimūḍhātmā mokṣastadbandhamocanam |
	galite sarvathā bandhe vimukte cāṇave male || 254 ||
	sarvārthadyotikā śaktiḥ śivasyaiva vijṛmbhate |

	bandhamokṣaśca śivaprasādādevetyuktam || 254 ||

	sarvāvaraṇanirmuktā śaktireṣā mahīyasī || 255 ||
	alpīyāṃsaṃ samāvṛtya viṣayaṃ sā tu darśayet |

	kathaṃ darśayatītyatrāha-

	parasaṃvitsvarūpāyāḥ śakterasati bandhane || 256 ||
	paramātraṃ prakāśeta muktāṇūnāmanāratam |

	malarahitatvena svaparaprakāśikāyā muktātmasaṃvidaḥ paramātraṃ parasya vastunaḥ 
sattāmātraṃ prakāśate, na tu baddhātmavadasya viśeṣena bhogyatayā prakāśata ityarthaḥ, 
tathātve muktasyā'pi sukhaduḥkhādisaṃvedanena bhoktṛtvaprasaṅgāt || 256 ||

	ato vimuktāḥ sarvajñā na tu cinmātravedinaḥ || 257 ||

	na tu svasaṃvedanamātraniṣṭhāḥ, api tu śivavat sarvajñā eveti || 257 ||

	tataśca-

	sati bāhye tadajñānaṃ vastuni syāt tamaḥkṛtam |

	bāhye ca vastuni satyapi yadetadviṣayājñānamātraṃ baddhātmanāṃ dṛśyate, 
tanmalakṛtameva | tataśca asarvajñā na muktā ityāha-

	tamasācchādyamānā hi na te muktā bhavanti ca || 258 ||

	śabdānuvedhāpekṣitvaṃ ca savikalpakajñānasya bandhahetukamityāha-

	vikalpo bindusaṃkṣobhācchabdavedhena saṃvidām |
	jāyate malaruddhānāmaṇūnāmarthadarśane || 259 ||
	nirmalānāmasaṃkṣobhād bindostadbandhamokṣajā |
	nirvikalpārthasaṃvittistadaharjātabālavat || 260 ||

	muktānāṃ tu māyeyabaindavapāśottīrṇatvācchabdānuvedhasahakṛtaṃ bauddhaṃ 
savikalpakaṃ jñānaṃ na bhavet, kintu cicchaktirevānyānapekṣiṇī grāhyaṃ vastu viṣayīkaroti | 
tadaharjātabālavaditi ca śabdādivikalparahitatvamātre dṛṣṭānto jñeyaḥ || 259-260 ||

	vastuno bālasyāpi malāvṛtatvena vastūnāṃ yathāsvarūpānavabodhāt, muktānāṃ tu 
malarahitatvāt tacchaktiḥ samastaṃ vastu yathāvasthitameva gṛhṇātītyāha-

	yo yadā vartate bhāvo bhūto bhāvi ca tat tadā |
	yathārthasthitiṃ gṛhṇāti svasaṃvedyā cidavyayā || 261 ||

	taduktaṃ mokṣakārikāsu- śivārkaśaktidīdhityā samarthīkṛtaciddṛśā | śivaṃ 
śaktyādibhiḥ sārdhaṃ paśyatyātmā gatāvṛtiḥ || (ślo0 111) iti || 261 ||

	naiṣāṃ ca sarvajñatvasarvakartṛtvasaṃbhave'pi pravṛttirityāha-

	na te viśvasya kartāraḥ kartā'sya śiva eva yat |

	kuta ityatrāha-

	nahi kartṛbahutvasya gamakaṃ vidyate kvacit || 262 ||

	nahi rathādīnāmapyanekartṛkāṇāmekasthapatīcchānuvartanaṃ vinotpattirdṛṣṭā | 
yaduktam- bahavo yatra netāraḥ sarve paṇḍitamāninaḥ | sarve mahattvamicchanti 
tadvyaktamavasīdati || iti | anena pravāheśvarapakṣo'pi nirastaḥ, aiśvaryasya 
svarūpavyaktilābhātma-katvena vināśayogāt | tatastena nityamuktena śivenaiva kāryasya 
nirvartyamānatvād rāgadveṣādirahitatvācca na pravartante || 262 ||

	etadeva darśayati-

	nityamuktoditācintyaprabhāvā śaktisaṃjñitā |
	saṃvidāśrayate śaśvacchivaṃ paramakāraṇam || 263 ||
	sa tayā jaḍamākramya sṛjatyavati hanti ca |
	tirodadhāti bhagavānanugṛhṇāti cātmanaḥ || 264 ||

     anena śaktivicāropasaṃhāreṇa tadāśrayabhūtasya śivasya vicāropakṣepo'pi kṛto 
veditavyaḥ | tathāhi jagataḥ sanniveśādimattvena kāryatvāt tatkartṛtayā''tmanāṃ ca 
malāvṛtatvāt tanmokṣakartṛtvena ca śivaḥ siddha eva | yaduktam- vivādādhyāsitaṃ viśvaṃ 
viśvavitkartṛpūrvakam | kāryatvādāvayoḥ siddhaṃ kāryaṃ kumbhādikaṃ yathā || iti |

	idānīṃ tasya kṛtyabhedādupacāreṇa bhedamāha-
	
	kṛtyeṣu teṣu kartā'sau trividhaḥ pañcasūcyate |

	kathamityatrāha-

	śaktimānāhitodyogaḥ pravṛttaśceti deśikaiḥ || 265 ||

	etadeva prapañcayati-

	tatra śakto bhavedādyo niṣkalaḥ śivasaṃjñitaḥ |
	tasmin mukulitevāste kriyākhyā śaktiraiśvarī || 266 ||

	śakterekatvādaupādhiko jñānakriyābheda iti darśayituṃ jñānasyāpi 
kriyārūpatvāvyabhicārācchaktiḥ kriyāśabdenoktā | tasyāḥ sakteḥ sarvavyāpāropasaṃhāreṇa 
svarūpamātrāvasthāne sati śivaḥ śaktādiśabdavācyo bhavati | saiva tasya 
parabindusvarūpādhiṣṭhāturlayāvasthocyate || 266 ||

	atha bhogāvasthāyāmudyuktādiśabdavācyo'sāvityāha-

	saivonmiṣantī saṃprāptabindugarbhabharālasā |
	patyurāviṣkarotyuccaiḥ paramānandasantatim || 267 ||

	sā ca śaktirudyogena bindoḥ kāryasya prasavābhimukhyaṃ kurvāṇā yadā patyuḥ 
paramānandasantatiṃ jñānakriyāsamṛddhiṃ kāryotpādanenā''viṣkaroti, tadā tasya śivasya 
bhogaḥ pālanātmako bhavatīti bhāvaḥ | na tu śivasya paramānandaḥ sukhātiśayo bhogaśca 
sukhasaṃvedanarūpo vyākhyeyaḥ, nirmalatvena śivasyopādhibhūtayostayorasambhavāt || 267 ||

	tadānīṃ codyuktayā śaktyā sahā'yamudyuktādiśabdavācyaḥ prakāśata ityāha-

	sa tayā ramate nityaṃ samudyuktaḥ sadāśivaḥ |
	pañcamantratanuḥ śrīmān devaḥ sakalaniṣkalaḥ || 268 ||

	ataśca kāryopādhibhinnā īśānādipañcamantrātmikāḥ śaktaya eva tanukāryaṃ 
kurvāṇāḥ śivasya tanurucyante, na tu pāramārthiketi bhāvaḥ | taduktaṃ śrīmanmṛgendre- 
tadvapuḥ pañcabhirmantraiḥ pañcakṛtyopayogibhiḥ | īśatpuruṣāghoravāmājairmastakādikam || 
(vi0 3|8-9) | tato dhyānārthameva tasyāgameṣvākāraśravaṇamityuktaṃ śrīmatpauṣkare- 
sādhakasya tu lakṣyārthaṃ tasya rūpamidaṃ smṛtam iti | atra ca śivaśaktyorlayādibhedasya 
bindvavasthābhedakṛtatvāt tasya ca śāntyatītakalārūpasya layāvasthātvena śruteḥ 
śāntyādikalācatuṣṭayapariṇāmarūpaṃ bhogādhiṣṭhānam | tadadhiṣṭhānena śivasyāpi 
bhogaḥ procyata ityuktaṃ śrīmanmataṅge- caturmūrtimayaṃ śubhraṃ yattatsakalaniṣkalam | 
tasmin bhogaḥ samuddiṣṭaḥ patyurviśvasya sarvadā || (vi0 3|34) iti | yadyevaṃ 
sadāśivabhuvanādhiṣṭhāna eva devasya sadāśivatvāt tasyaiva pañcamantrarūpatvāt 
kathamatra bhogāvasthāyāṃ tatkathanam, nivṛttyādibhuvaneṣu kevalaṃ 
sadyojātādimantrākāratayā śivasya dhyeyatvādevamuktam | pañcamantrasamaṣṭirūpā 
mūrtistasyādhikārāvasthasya pravṛttasya sadāśivabhuvana eveti vakṣyati- sa bindoḥ (ślo0 279) 
ityādinā | eṣo'rthaśca śrīmanmataṅge vistareṇa darśita iti tata evāvadhārayitavyaḥ || 268 ||

	idānīṃ śaktermantratvamāha-

	mananāt sarvabhāvānāṃ trāṇāt saṃsārasāgarāt |
	mantrarūpā hi tacchaktirmananatrāṇadharmiṇī || 269 ||

	taduktam- mananaṃ sarvaveditvaṃ trāṇaṃ saṃsāryanugrahaḥ | 
mananatrāṇadharmitvānmantra ityabhidhīyate || iti |

     eṣā ca vyutpattiḥ śivasya śaktervidyeśvarādīnāṃ ca samānaiva, ataśca 
vācakaśabdānāmupacāreṇa mantraśabdaprayogaḥ || 269 ||

	asyāścaupādhika eva bheda ityāha-

	kāryabhedādadhiṣṭhānavaśādekaiva pañcadhā |
	sā bhāti binduśāntyādipañcādhiṣṭheyagocarā || 270 ||

	binduśāntyādibhuvanādhiṣṭhānādasya īśānādibheda ityuktaṃ prāgeva | etadeva 
prapañcayati-

	binduḥ śāntiḥ kalā vidyā pratiṣṭhā sanivṛttikā |
	bhogasthānāni pañcaiṣāṃ bindusaṃjñā śiveritā || 271 ||

	nanu śāntyādibhuvanacatuṣṭayameva bhogasthānamityuktam, satyam, śāntyatītarūpasya 
parabindorlayāvasthārūpatve'pi sṛṣṭyārambha eva tadbhuvanotpattestadapyatra 
bhogasthānatayetyuktamityavirodhaḥ || 271 ||

	ata evāsāṃ bindukalānāṃ kāraṇāvasthāyāṃ layarūpatvena parabindusaṃjñetyāha-

	kalānāmavibhāgo'yaṃ pañcānāṃ bindusaṃjñitaḥ |
	tadgocarā parā mūrtiraparā kāryagocarā || 272 ||

	parā mūrtirbindvadhiṣṭhātrī layāvasthā śaktiḥ, kāryādhiṣṭhātrī tvaparā śivasya 
mūrtirityarthaḥ || 272 ||

	evaṃ ca-

	yā tasya vimalā śaktiḥ śivasya samavāyinī |
	saiva mūrtiḥ kriyābhedāt sādākhyā tanurucyate || 273 ||

	samavetaśaktireva bindupariṇāmasya nivṛttibhuvanādhovartinaḥ 
sadāśivabhuvanasyādhiṣṭhānādadhikāraṃ kurvāṇopacāreṇa tasya sadāśivākhyā tanurucyata 
ityarthaḥ || 273 ||

	dīkṣādinā tattadbhuvanaprāptānāṃ satya eva bhedaḥ, tadadhiṣṭhātryostu śivaśaktyoḥ 
kāryabhedād bheda ityuktamityāha-

	mahāmāyā samākrāntā śivena balaśālinā |
	bhogasthānaniviṣṭānāṃ nirmalānāṃ śivātmanām || 274 ||
	tanubhogendriyasthānavijñānādi karoti yat |
	tatkāryaṃ sā kriyāśaktirasāvapi tathocyate || 275 ||

	śivaśaktikṣobhitā mahāmāyā yadyat kāryamutpādayati, tatra tadadhiṣṭhātryoḥ 
śivaśaktyoḥ kāryabhedena sthānabhedenopacārāt tattatsaṃjñā bhavati | yathā 
śāntibhuvanādhiṣṭhānena

tadutpāde ca śaktirapi śāntisaṃjñā, śivaśca śāntasaṃjñaḥ | ityevamanyatrāpi draṣṭavyam 
| taduktaṃ śrīmanmṛgendre- kintu yaḥ patibhedo'smin sa śāstre śaktibhedavat | 
kṛtyabhedopacāreṇa tadbhedasthānabhedataḥ || (vi0 13|164-165) iti || 274-275 ||

	etadeva prapañcayati-

	sarvajñānakriyārūpā śaktirekā hi śūlinaḥ |
	icchājñānakriyādyā yatprabhavāḥ kāryayonayaḥ || 276 ||

	yatprabhavā yadīyā icchājñānādyā avasthāḥ kāryayonayaḥ, kāryopādhikṛtā 
ityarthaḥ || 276 ||

	itthaṃ śaktireva śivasya mūrtistatkāryaviṣayetyuktam, idānīṃ 
bhogādhikāratattvavāsināmuktavad baindavānyeva śarīrādīnītyāha-

	īśvarāṇāṃ śivānāṃ ca mahāmāyāmayāstathā |
	dehendriyādayaḥ śuddhāḥ subhagāḥ svadhikārakāḥ || 277 ||

	tatkāriṇī tu-

	seyaṃ kriyātmikā śaktiḥ śivasyāvyabhicāriṇī |
	tatsaṃbandhācchivo'śeṣakāryāṇāṃ heturucyate || 278 ||

	adhikārāvasthocyate-

	sa bindoravatīryāṇusadāśivasamāvṛtaḥ |
	patikṛtyādhikāreṣu sadāśivamaheśvarān || 279 ||
	sampreṣayannaśeṣādhvamūrdhani bhrājate prabhuḥ |

	avatāraṇaṃ cātrodyogāvasthāparityāgena pravṛttatvam, pravṛttiśca saṃskārya 
sadāśivān vidyeśvarāṃśca yathākramaṃ svabhuvanabhogeṣvaśuddhādhvādhikāre ca 
niyojanam | ata eva prabhavanaśīlo'śeṣādhvādhiṣṭhātā bhrājate sadāśivākāreṇa 
dhyeyatāṃ prāpnotītyarthaḥ || 279 ||

	tadeva dhyeyākārādhiṣṭhānaṃ darśayati-

pañcasrotomukhaḥ śāntaḥ prabhuḥ śaktiśirāḥ śivaḥ || 280 ||
dṛkkriyecchāviśālākṣo vijñānendukalānvitaḥ |
īśānamūrdhā puṃvaktro daśadigbāhumaṇḍalaḥ || 281 ||
aghorahṛdayo vāmaguhyo jātatanūjjvalaḥ |
pravṛttimānayaṃ devaḥ sakalaḥ sarvapāvanaḥ || 282 ||

	atra ca pañcasrotaśśabdena mananatrāṇarūpāyāḥ śakteḥ pañcāvasthābhedā 
ucyante || 280-282 ||

	itthaṃ vindvavasthādhiṣṭhānabhede'pi śivaśaktyorekatvaṃ pradarśyopasaṃharati-

	eka eva śivastadvacchaktirapyavikāriṇī |
	layabhogādhikāreṣu tau hi cinmātrarūpiṇau || 283 ||

	idānīmanekatvamevaupacārikametayoḥ prakārāntareṇa darśayituṃ 
tattadavasthābhājāmātmanāṃ vāstavaṃ bhedamāha-

	tathāhi vimalodāragabhīre cinmahodadhau |
	svātmani pravilīyante tenaike samadhiṣṭhitāḥ || 284 ||

	pariṇatamalāḥ kecidātmānastena śivenānugrāhakeṇa samadhiṣṭhitā anugrahaśaktyā 
mocitāḥ santo vimalataraniratiśayasarvajñatvasarvakartṛtvasamudrarūpe svātmani svarūpe līyante 
tiṣṭhanti, tadanugrahāt tatsāmyarūpaṃ mokṣaṃ bhajantītyarthaḥ | na tu śivātmanyaikyaṃ te 
prayāntīti vyākhyeyam, advaitasya prāgeva niṣedhāt | ete ca 
layāvasthaśivasamatvāllayāvasthābhāja ucyante || 284 ||
	vijñānakevalino'pyapariṇatamalamāyottīrṇatvānmahāmāyā-śritatvādbhogahīnatvācca 
layāvasthābhājo nirvyāpāratvāducyanta ityāha-

	śivena nibhṛtātmīyaśaktayo'nye viśerate |

	bhogāvasthābhāja āha-

	samāliṅgya mahāmāyāmapare vṛttiśālinīm || 285 ||
	tatsaṃparkasukhaikāgrabuddhayo bhogalampaṭāḥ |

	śāntyādibhuvanarūpeṇa pariṇatāṃ mahāmāyāmāśritya vartanta ityarthaḥ || 285 ||
	adhikārabhājo'pyāha-

	tathā pare paravyoma samāśrityādhvamūrdhani || 286 ||
	kurvanti pañcakṛtyāni patyurājñānuvartinaḥ |

	anantādayaḥ śuddhādhvamūrdhani paravyomamahāmāyābhuvanānyāśritya 
śivājñayā pañcakṛtyakāriṇo bhavantītyuktam || 286 ||

	tataḥ sa teṣāmeko'pi layabhogādhikāriṇām || 287 ||
	adhiṣṭhātṛtayā bhedamaupacārikamṛcchati |
	tadvadeva matā śaktistayorbhedo'dhunocyate || 288 ||

	tayoḥ śivaśaktyoḥ parasparabhedaḥ kathyate || 287-288 ||

	tameva bhedamāha-

	śuddhe'dhvani śivaḥ kartā kāraṇaṃ śaktirāśritā |
	samāśrayaḥ sa vijñeyaḥ  svaniṣṭhaghanacinmayaḥ || 289 ||

	dharmadharmitayaivānayorbhedaḥ || 289 ||

	tatra ca dharmisvarūpaṃ jñānaṃ svaniṣṭhameva, viṣayagrahaṇasāmarthyarūpaṃ tu 
dharmatayocyata ityāha-

	sā tu saṃvidaśeṣārthagrahaṇe lampaṭodayā |
	paramaiśvaryarūpā ca mahimā vyāptirūpiṇī || 290 ||

	tataśca-

	maheśvaro mahāneṣa sarvārthavyāpakastayoḥ |

	sarvaviṣayavyāpakasāmarthyayuktatvācchivaḥ sarvārthavyāpakaḥ | uktārthameva 
prakaṭayati- tayoriti || 290 ||

	parānapekṣaṃ rūpaṃ yadvijñānaṃ śivasaṃjñitam || 291 ||
	tasya śaktiṃ parāpekṣaṃ rūpamāhurvipaścitaḥ |

	parāpekṣaṃ viṣayāpekṣamityarthaḥ || 291 ||

	kuta evaṃ kalpyata iti cedata āha-

	ākāradvayasaṃvittiraśeṣasyāpi vastunaḥ || 292 ||
	parāpekṣānapekṣābhyāmasti śaktiḥ śivāśrayā |

	jaḍaviṣaye dāhakasyāgnerdāhyasya sannidhau dahanasāmarthyadarśanāt, anyathā 
tadanabhivyakteḥ, cidviṣaye ca ātmani viṣayagrahaṇarūpasya svaniṣṭhasya grahītṛsvarūpasya 
svasaṃvedanasiddhatvādetat siddhamityarthaḥ | ataścāsti śaktiriti || 292 ||

	yadyevamātmaśakterasyāḥ śivaśakteḥ ko viśeṣo'ta āha-

	nityoditānavacchinnavibhūterīśvarasya yat || 293 ||
	jñeyādhiṣṭheyakāryādau na tu hetvādikaṃ param |
	tena śaktiḥ parāpekṣaṃ rūpamīśasya yujyate || 294 ||

	nityamuktvādīśvarasya jñeyādiviṣaye śaktivyatirekeṇa na buddhyādikaraṇāpekṣā, 
ālokādisahakāryapekṣā ca | ataḥ śaktireva tasya parāpekṣārūpaṃ nānyat | 
baddhātmanāṃ tu śaktyākhyaṃ viṣayāpekṣaṃ svarūpamātramevāsau kāryādiheturna 
bhavet, teṣāṃ kāryādau karaṇādyapekṣādarśanādityāha-

	na sarvasya parāpekṣaṃ rūpamātramasau bhavet |
	kāryaputrādirūpāṇāmanyathaivopalambhanāt || 295 ||

	śivasyeti pāṭhe kevalasya śambhorjñānaṃ na svarūpamātraniṣṭhameva, kintu 
viṣayāpekṣameva kāryādihetuḥ | na tu baddhātmanāṃ dṛṣṭakāryāṇāṃ putrādīnāṃ 
pitrāderviṣayādisāpekṣeṇaiva jñānādinotpattidarśanādityarthaḥ || 295 ||

     ato neśvarasyāpi nirviṣayaṃ grahaṇātmakaṃ jñānaṃ saṃbhavatītyāha-
     
     na tu nirviṣayaṃ jñānaṃ tadeva viṣayagrahaḥ |
     
     yadyevaṃ viṣayasannidhāna eva grahaṇarūpasyotpattidarśanād 
dharmasvarūpasyānityatvaprasaṅgaḥ ? tanna, śivasya sarvadā bindvādernityasya viṣayasya 
grāhyatvāt, grahaṇasāmarthyasya grahītṛsamavetatvena sarvadā'vasthānācca |
     
     nanvātmanāṃ nīlādijñānavināśena pītādijñānasya krameṇotpattidarśanāt 
tatsāmarthyasyāpyanityatvaṃ lakṣyate ? ata āha-
     
     virodhenātha paryāyānnaivamapyavināśi yat || 296 ||
     naśvarāṇāmayaṃ dharmo yaḥ kāle nānyathodayaḥ |
     
     nīlādyadhyavasāyarūpād bhinnasya pītādhyavasāyarūpasya bauddhasya jñānasya 
vināśitvāt parasparavirodhācca paryāyeṇotpattāvapi tattatsukhādirūpabuddhigrahaṇasāmarthyasya 
sarvadā grahītṛsamavetatvena saṃvedanādavināśitvameva, ato bauddhasyaivāyamanyathā | 
pariṇāmaḥ || 296 ||
     
     tataśca-
     
     avināśi ca tannityamiṣṭamasmād vibhidyate || 297 ||
     śaktirāśrayataḥ śambhoḥ sa ca tasyāstatastathā |
     
     tadapyātmasāmarthyaṃ śivasāmarthyavannityameṣṭavyam | evaṃ ca 
śivaśaktyorātmabhedābhāve'pi dharmidharmabhedaḥ satya evetyāha- asmāditi | tatastasmāt 
kāraṇāt tathā dharmātmikaiva śaktirityarthaḥ || 297 ||
     
     atra parāśaṅkā-
     
     kāryopādhivaśācchaktisaṃjñā syādapi cidghane || 298 ||
     na tu śaktiḥ parāpekṣā vastuto'stīti kecana |
     
     dharmirūpameva paramārthaṃ na tu dharmarūpamityarthaḥ || 298 ||
     
     atrottaram-

	karaṇena vinā kāryaṃ kurvan kartā bhavediti || 299 ||
	matireṣāmayuktaiva yuktipratyakṣabādhitā |

	kulālādīnāṃ hi kartṛṇāṃ karaṇena vinā kartṛtvādarśanāt śivasyā'pi kartṛtvāt 
kenāpi karaṇena bhavitavyam | tacchaktyātmakameva | yaduktaṃ śrīmanmṛgendre- karaṇaṃ ca 
na śaktyanyat (vi0 3|4) iti | evamātmanāmapi dehaspandādau śaktireva karaṇamityuktam || 299 ||

	kiñca, grahaṇarūpasya paramārthasyānabhyupagame 
sthitikāle'pyupādhibhūtasadāśivatattvādibindukāryaviṣayīkaraṇā-bhāvādasya 
sadāśivādibhedakalpanamayuktam | upādhyagrahaṇe'pyetadbhedopacārābhyupagame 
sarvadaivādhikārāvasthā bhavet, na tu layāvasthā, viśeṣābhāvādityāha-

	kiñcāgṛhītamapi cedupādhiḥ kāryamīśituḥ || 300 ||
	sadopahitabhāvena nirupādhiḥ kathaṃ śivaḥ |

	bindvādyagrahaṇe tatkṣobhādyapyasya na yuktam, ajñātasya karaṇāsaṃbhavāadityāha-

	kathaṃ vāyaṃ bhavet kartā kāraṇajñānavarjitaḥ || 301 ||

	kiñcā''tmanāmapi śivasamānaguṇatvāddharmirūpatvād-
dharmarūpajñānānabhyupagame sukhādisaṃvedanarūpo bhogo na sambhavatītyāha-

	puruṣo vā kathaṃ buddhiṃ paśyet śaktyā tayā vinā |

	evaṃ ca sati-

	idamandhatamaḥ kṛtsnamantarā śaktidīpikām || 302 ||
	jāyetānyacca bhagavānaśaktaḥ kiṃ kariṣyati |

	śaktyanabhyupagame bhogamokṣārthaṃ sarvapravṛttiśūnyaṃ jagad bhavedityarthaḥ || 302 
||

	tataśca-

	ananyāpi tathā śambhorvibhinnā śaktiriṣyate || 303 ||
	yathā masūrātva(rastva)ṅguṣṭhānnāpi bhinnoktahetubhiḥ |

	yathā masūrākhyo dhānyaviśeṣo'ṅguṣṭhākhyastajjātīyo'pi kenāpyākāreṇa bhidyate, 
evaṃ śivaśaktyorvastvantaratvābhāve'pi dharmidharmatayā bhedaḥ siddhaḥ | atra ca 
samānajātīyatvenaikyamabhyupagamya itthaṃ dṛṣṭāntatvamuktam, 
vastuto'ṅguṣṭhamasūrayorbhedāt | itthaṃ śivaśaktyordharmidharmatayā bhede'pi 
tādātmyasaṃbandhānnātmāntaravad bheda ityāha- nāpi bhinnokteti || 303 ||
	itthaṃ śaktiśaktimatorātmāntaratvābhāve'pi dharmidharmatayā bhedaṃ 
pratipādyopasaṃharati-

	ananyā'pi vibhinnā'taḥ śambhoḥ sā samavāyinī || 304 ||
	svābhāvikī ca tanmūlā prabhā bhānorivāmalā |

	nanu bindvākhyayaiva śaktyā śivaḥ kāryaṃ kariṣyati, kimanayā ? ata āha-

	nahyeṣa bhagavān śaktyā svātmano'tyantabhinnayā || 305 ||
	kadācit kurute kiñcinnāpi jānāti kiñcana |

	bindorupādānatvena bahiraṅgatvādacetanatvācca cidrūpayā svasamavāyinyā śaktyā 
vinā śivo na bindvādivastu viṣayīkartuṃ tatkṣobhādi cotpādayituṃ śaknoti, kumbhakārāderapi 
cicchaktiyuktatvenaiva darśanāt || 305 ||

	yadyevaṃ śaktyā vineśvarasyāpyakiñcitkaratvāt saiva jagatkāraṇatvenāstu | yadāhuḥ- 
yayā vinā na sarvajñaḥ so'pi tasyai namo'stu te iti, tanna, śakterdharmatvenāśrayaṃ 
vinā'vasthānāsaṃbhavāt | tadāśrayaḥ sa eṣa śaktimān saṅkalpamātreṇa viśvakartetyāha-

	anāhitaviśeṣo'pi heturdevo maheśvaraḥ || 306 ||

	idānīṃ kartṛśaktyā bhedopacāre upādhibhūtaṃ pāramārthikaṃ kāryabhedamāha-

	kāryabhedo'pi kāryasya syādavasthāviśeṣataḥ |

	etadeva prapañcayati-

	binduḥ pralīnakāryo'sau śivaśaktisamīritaḥ || 307 ||
	sargāya sthitaye sraṣṭṛprapañcavilayāya ca |
	cirasthāpitaviśvo hi bindureva pravartate || 308 ||
	avasthābhedamāsādya ghaṭamārabhate yathā |
	mṛdavasthāntarāpattyā pūrvamevamasāvapi || 309 ||
	prabhuśaktisamākrāntastattadvṛttiviśeṣataḥ |
	kāryabhedāya ghaṭate nirvikāre'pi śūlini || 310 ||
	anāpannavikāro'pi yathoktakramabhāvinām |
	bhedasaṃśoṣacūrṇānāmavasthābhedajanmanām || 311 ||
	vidhātā kamalasyoṣṇagabhastiḥ syāt tathā śivaḥ |
	kartā sargādikāryāṇāmavikāro'pi śaktimān || 312 ||

	nanu kimarthamasau sṛṣṭyādikāryaṃ karotīti cet, paśvanugrahāyeti brūmaḥ | yadyevaṃ 
sarvānugrāhakatve'pi śivaḥ kathaṃ keṣāñcideva mokṣaṃ karoti na sarveṣām, ayamevāsya 
svabhāvo vā tarhyantaḥ rāgadveṣayuktaḥ syāt | ata āha-

	yathā madhūcchiṣṭamṛdoranapekṣaḥ kṣaṇena ca |
	dravatāśuṣkatāheturavikāro'pi bhāskaraḥ || 313 ||
	tathā samāsamātmīyapuṇyāpuṇyākhyakarmaṇām |
	aṇūnāmavikāro'pi bandhamokṣakaraḥ śivaḥ || 314 ||

	satyaṃ sarvānugrāhakaḥ śivaḥ | na cāsya rāgādirvidyate, anādimalarahitatvāt | 
bandhamokṣakartṛtvaṃ cātmanāmeva, yogyatvādityuktam | tataśca yathaikākāra evārkaḥ 
svasannidhānena dravatvayogyasya madhūcchiṣṭasya dravatāṃ śoṣatvayogyāyā mṛdaḥ 
śuṣkatāṃ ca karoti, tathā śivo'pi pakvamalānāṃ mokṣayogyānāṃ mokṣaṃ karoti, 
apakvamalānāṃ bandhayogyānāṃ tatpākārthaṃ bandhaṃ karotītyavirodhaḥ | ataścātra 
puṇyāpuṇyākhyaśabdena- na hṛṣyatyupakāreṇa nāpakāreṇa kupyati | yaḥ samaḥ 
sarvabhūteṣu jīvanmuktaḥ sa ucyate || iti nyāyenopakārāpakārātmakaṃ

karmadvayamucyate | tayormalaparipākavaśāt sāmyabuddhau satyāṃ mokṣo bhavati, tadabhāve 
tu bandha eva | na tvaścamedhabrahmahatyādi-rūpau puṇyāpuṇyau, tayoḥ sāmyaṃ 
mokṣaheturiti vyākhyeyam, śāstravirodhāt, tādṛśasya karmasāmyasya saṃsārāvasthāyāmapi 
saṃbhavāt, svanāśamātra eva caritārthatvāt | samastakarmasāmyasyāpi 
vijñānakevalitvamātra eva hetutvāt, mokṣahetutvāsambhavāt, malaparipākasyaiva 
proktakarmasāmyacihnānumeyasya dīkṣādvāreṇa mokṣahetutvasambhavāccetyādi 
vistareṇāsmābhiruktaṃ mṛgendravṛtti-dīpikāyām | sādhitaṃ ca gurubhiḥ 
śrīmatsvāyaṃbhuvakiraṇamataṅ-gādivṛttiṣviti tato'vadheyam || 313-314 ||

	ataśca-

	parasparavirodhena nivāritavipākayoḥ |
	karmaṇoḥ sannipātena śaivī śaktiḥ patatyaṇau || 315 ||

     viruddhaphalayoraśvamedhabrahmahatyādidharmādharmarūpayoḥ 
svargabrahmalokaphalayordharmarūpayoravīcīrauravaphalayorvā'dharma-rūpayoḥ karmaṇoḥ 
sannipāte sati śaivī śivatvadāyikā'nugrāhikā śaktirātmani na patati, tasyā malaparipāka eva 
pātaśravaṇāt | kintu rodhaśaktireva niyatidvāreṇa viruddhakarmakṣayārthaṃ patati | taduktaṃ 
śrīmanmataṅge- dharmādharmavipāke'smin (vi0 13|15) ityādinā dīkṣāyā eva 
malaparipākāvinābhūtāyāḥ karmakṣayadvāreṇa mokṣahetutvam | yaduktaṃ śrīmatkiraṇe- 
anekabhavikaṃ karma dagdhabījamivāṇubhiḥ | bhaviṣyadapi saṃruddhaṃ yenedaṃ taddhi 
bhogataḥ || (6|19) iti | malaparipāke satyanugrāhikāyāḥ pātaḥ || 315 ||

	tasyāṃ patitamātrāyāṃ nirdhūtaghanasaṃvṛtiḥ |
	praśāntamalakāluṣyamātmānamanupaśyati || 316 ||

	malāvaraṇāpagamāt tadvimuktaṃ sarvajñatvādirūpamasya prakāśata ityarthaḥ || 316 ||

	tadaiva hi vimukto'sau yadāghrātaḥ śivecchayā |

	dīkṣākhyayā śivaśaktyā spṛṣṭo mukta eveti ||

	dīkṣottarakālaṃ cārabdhakāryabandhakṣayārtham-

	nityanaimittikenaiṣa karmaṇā vartate param || 317 ||

	tatrāpi-

	anenaiva śarīreṇa parāṃ vyāptimakhaṇḍitām |
	prāpnuvanti mahādhīrā dhanyā hi śivayoginaḥ || 318 ||

	yogābhyāsādatraiva sarvajñatvādiḥ prakāśata ityarthaḥ || 318 ||

	prasaṅgācchivayogimāhātmyamāha-

	sa punāti dṛśā vācā caraṇena kareṇa ca |
	nadījanapadodyānapurādīni svalīlayā || 319 ||

	kiṃ punaḥ śaraṇāyātaṃ bhavabhītamimaṃ janam |

	idānīṃ prakaraṇakartā svagurunamaskāraṃ karoti-

	namastathāvidhāyāsmadgurave śivatejase || 320 ||
	nidhaye yogaratnānāmanantaphaladāyinām |

	kenedaṃ prakaraṇamāracitamityatrāha-

	rāmakaṇṭhakṛtālokanirmalīkṛtacetasā || 321 ||
	ratnatrayaparīkṣeyaṃ kṛtā śrīkaṇṭhasūriṇā |
	śrīrāmakaṇṭhāsadvṛttiṃ mayaivamanukurvatā |
	ratnatrayaparīkṣārthaḥ saṃkṣepeṇa prakāśitaḥ || 322 ||

|| ratnatrayaparīkṣā samāptā ||

		yenākāri kavīśvareṇa rasavānāścaryasārāhvayaḥ 
		pāṣaṇḍāpajayaśca kāvyatilako bhaktaprakāśastathā |
		nāṭyeṣvabhyudayaśca sundaragirā śaiveṣu sadvṛttaya-
		stenāghoraśivena sādhu racitā ratnatrayollekhinī ||

ityaghoraśivācāryaviracitā ratnatrayollekhinī sampūrṇā ||


###########   END OF FILE  #######