####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00151
Uniform title: ṣaṭtriṃśāttattvasandoha
Main title: ṣaṭtriṃśāttattvasandoha with commentary by rājānakānanda
Commentator : rājānakānanda
Editor : śāstrī m r

Description: 
E-text transcribed from volume 13 of the Kashmir Series of Texts and Studies.


Notes: 
This e-text was transcribed by the staff of Muktabodha under the supervision of Mark S.G. Dyczkowski.      Revision 0: March 19, 2005      

Publisher : Research Department, Jammu and Kashmir State
Publication year : 1918
Publication city : Srinagar
Publication country : India
####################################################




yadayamanuttaramūrtir
nijecchayākhilamidaṃ jagatsraṣṭum |
paspande sa spandaḥ
prathamaḥ śivatattvamucyate tajjñaiḥ || 1 ||

iha hi svatantraśivādvayadarśane parameśvaraḥ 
svatantraścidghanasaṃvitsvabhāvaḥ svayā svātantryākhyayā 
śaktyā satataṃ śivādidharaṇyantatattadbhuvanabhūtatattvātmanā 
krīḍanādiśīlatvāt kṛtyapañcakavidhāyī, vastutaḥ kramarāhitye'pi 
viśvasṛṣṭau ābhāsanamātrasāreṇa 
pāramārthikakāryakāraṇabhāvena kramamapi udbhāvayan, 
anākhyatve'pi svecchayaiva svātmabhittau 
tattacchivāditattvābhikhyām avabhāsayati |
tathātve'pi ṣaṭtriṃśattattvamayakulasvarūpaparāmarśanāt 
ākhaṇḍyena viśvabharitāṃ svacamatkāravimarśasārām 
anuttarānandaghanāvasthāṃ nojjhati, iti vāstavāśayāvabodhanāya 
kaścinmahāmāheśvaraḥ parameśaśaktipātānugṛhītaḥ 
tattvakramaprakriyām āryābhirekaviṃśatyā samupa nibabandha, - 
yadayamityādinā |
anuttaramūrterbhagavataḥ parameśvarasya 
prakāśaghanasvātmaikātmyena avasthitaṃ viśvaṃ sisṛkṣoḥ 
darpaṇanagaravat svecchayaiva svātmani ādyā pronmimīlayiṣāvasthā 
śivatattvavyapadeśyā pañcaśaktinirbharatvāt svātantryāt 
cidādiprādhānyena kramaśaḥ śuddhādhvani 
tattvasṛṣṭyavabhāsanam, māyāvidyādeḥ 
saṃvitprakāśaghanaparamaśivāt 
vyatirekānatirekavikalpairupahatatvāt svātantryameva kevalaṃ 
viśvotpattisaṃharaṇādau mūrdhābhiṣiktaṃ - 
tattadanantaśaktinicayānāṃ kroḍīkāritvāt, vakṣyamāṇe'pi 
tattadrūpopagrahaṇe svātantryāmuktatvānna prācyasvabhāvāpāyaḥ 
|| 1 ||

icchā saiva svacchā
saṃtatasamavāyinī satī śaktiḥ |
sacarācarasya jagato
bījaṃ nikhilasya nijanilīnasya || 2 ||

p. 3) tasya svābhinnā svatantrecchāśaktireva udbhaviṣyato viśvasya 
svāntarnilīnatvāt bījabhūtā śaktitattvatāṃ yāti, śakteḥ 
śāktimaddharmatve'pi na anyadarśanābhimatavat tasmāt vyatirekaḥ, 
naiṣkarmyeṇa atra icchāyāḥ svacchatvāt hṛdaya-vimarśa-sārormi-
prabhṛtibhiḥ saṃjñābhiḥ tattaddarśaneṣu abhidhānam |
parameśvara eva hi svaiśvaryocchalattayā 
pūrṇāhantācamatkāratāratamyena śaktidaśāmadhiśete, ityatra 
ānandaśaktiprādhānyam || 2 ||

svecchāśaktyudgīrṇaṃ
jagadātmatayā samācchādya |
nivasansa eva nikhilā-
nugrahanirataḥ sadāśivo'bhihitaḥ || 3 ||

tasyaiva parameśvarasya svasvātantryodbhāsitasya viśvasya 
viśuddhasaṃvinmātrādhikaraṇyena svātmanyeva samullāsanāt 
sadityākhyānāt sadāśivatattvāvasthā, tatra 
pronmīlitamātracitrakalpatayā idamaṃśasya asphuṭatvāt 
icchāprādhānyam, ataḥ sa bhāvinaḥ samastabhāvarāśeḥ samyak 
bahiravabibhāsayiṣālakṣaṇakrīḍārasikatvāt 
anugrahaniratastadbhūmikāṃ gṛhṇāti ityato nivasannityuktam || 3 ||

p. 4) viśvaṃ paścātpaśyan-
idantayā nikhilamīśvaro jātaḥ |
sā bhavati śuddhavidyā
yedantāhantayorabhedamatiḥ || 4 ||

evaṃ kramāvabhāsanāt viśvasya śuddhasaṃvinmātrādhikaraṇa eva 
sphuṭatayā parāmṛśyamānasya ahamaṃśe'bhiṣecanāt sa eva 
parameśvaraḥ īśvaratattvadaśāmadhiśrayati, atra vedyajātasya 
sphuṭāva bhāsanāt jñānaśaktyudrekaḥ |
āntaradaśāyā udriktatvāt sadāśivāvasthā, bahirbhāvaparatodrekāt 
tu īśvarāvasthā ityanayorviśeṣaḥ |
prarūḍhabhedasya idantāṃśasya samadhṛtatulāpuṭanyāyena 
ahamaṃśasphuraṇāyāṃ śuddhavidyātattvam |
atra viśvasya sphuṭataraṃ parāmarśanāt kriyāśaktiḥ pradhānā |
iyati ca śuddhasvātantryameva tattadvaicitryeṇa prasphurati, iti 
śuddho'dhvā || 4 ||

māyā vibhedabuddhi-
rnijāṃśajāteṣu nikhilajīveṣu |
nityaṃ tasya niraṅkuśa-
vibhavaṃ veleva vāridhe rundhe || 5 ||

p. 5) aśuddhe punaradhvani parameśvara eva 
svātmapracchādanakrīḍayā aghorabhaṭṭārakabhūmiṃ 
mantramaheśvararūpāṃ gṛhītvā durghaṭasaṃpādanasāmarthyena 
māyāśaktyā svato'nyonyaśca bhinnam aṇūnāṃ bhogasiddhaye 
kalādikṣityantaṃ jaḍājaḍavargaṃ kramato'kramato'pi avabhāsayati, 
tatra bhinnabhinnaprathātmakamāyīyamalena svāṅgakalpeṣvapi 
jaḍavedyavargeṣu vibhinnatayā buddhireva māyākhyaṃ tattvaṃ, yena 
tasya nirargalaṃ svātantryaṃ pratihanyate, velayeva 
abdhitaraṅgāṇāṃ vaibhavam || 5 ||

sa tayā parimitamūrtiḥ
saṃkucitasamastaśaktireṣa pumān |
raviriva saṃdhyāraktaḥ
saṃhṛtaśaktiḥ svabhāsane'pyapaṭuḥ || 6 ||

avikāryasyāpi tasya cidātmanaḥ svaśaktīnāṃ 
saṃkocanapuraḥsaraṃ śaktidāridryamāpannasya aṇvaparaparyāyā 
puruṣasaṃjñā, saṃhṛtaśaktitvena parimitātmā sa 
svātmaiśvaryamapi pratyabhijñātumapaṭuḥ saṃcarati vicitrayoniṣu |
yadā punaḥ śaktipātatāratamyāt vidyābhijñāpitaiśvaryaḥ 
svāṅgakalpameva viśvaṃ pratyabhijānīyāt tadā jīvacchivabhāvaṃ 
pratyāpadyate || 6 ||

p. 6) saṃpūrṇakartṛtādyā
bahvyaḥ santyasya śaktayastasya |
saṃkocātsaṃkucitāḥ
kalādirūpeṇa rūḍhayantyevam || 7 ||

śaktyantarakroḍīkāriṇyā svātantryaśaktyāviyuktatvādeva 
parameśvarasya bahuśaktitvaṃ, saṃkocagrahaṇādeva 
sarvāstacchaktyaḥ saṃkucitībhūya kalāditattvapañcakena 
prarohamupagacchanti |
tā yathāsarvakartṛtā sarvajñatā tṛptiḥ nityatā svātantryamiti, 
etatpañcakaṃ śuddhāśuddhabhedena dvidhā,-parameśaviṣayatayā 
śuddhaṃ, saṃsāraviṣayatayā tu aśuddham || 7 ||

tatsarvakartṛtā sā
saṃkucitā katipayārthamātraparā |
kiṃcitkartāramamuṃ
kalayantī kīrtyate kalā nāma || 8 ||

gopitasvarūpatvānniruddhaśakteḥ parameśvarasya sarvakartṛtāśaktiḥ 
prāṇādiparimitapramātṛbhāve kiṃcitkartṛtodvalanātmanā kalanena 
adhaḥprakṣepāt kalātattvātmatāṃ yāti, yadvaśāt kiṃcideva 
kartumutsahate'ṇuḥ na sarvatra kartṛtvamiti || 8 ||

p. 7) sarvajñatāsya śaktiḥ
parimitatanuralpavedyamātraparā |
jñānamutpādayantī
vidyeti nigadyate budhairādyaiḥ || 9 ||

evaṃ tasyaiva sarvajñatāśaktiḥ saṃkocaṃ gṛhītavatī 
kiṃcijjñeyamātraparatvena jñānotpādanāt vidyātattvaṃ, 
vidyayaiva buddhidarpaṇe pratiphalitā bhāvā vivicyante-
guṇasaṃkīrṇatayā tasyā vivektumakṣamatvāt, tasmāt vidyayaiva 
arthavivekaḥ || 9 ||

nityaparipūrṇatṛptiḥ
śaktistasyaiva parimitā tu satī |
bhogeṣu rañjayantī
satatamamuṃ rāgatattvatāṃ yātā || 10 ||

parameśvarasya nityaparipūrṇatṛptirnāma śaktiḥ pārimityaṃ yātā 
yatra kvacana upādeyādyabhimate kiṃcinme bhūyāt iti 
sāmānyenābhiṣvaṅgamātrādāpadyate rāgatattvam |
p. 8) viśeṣābhiṣvaṅgastu asyaiva pallavitaprāya iti etadeva 
kalāvidyayoḥ prāguktayoḥ kiṃcidbhāge nimittam || 10 ||

sā nityatāsya śakti-
rnikṛṣya nidhanodayapradānena |
niyataparicchedakarī
kḷptā syātkālatattvarūpeṇa || 11 ||

akālakalitasya cidātmano nityatvākhyā śaktiḥ nyagbhāvamāśritya 
kāryārūṣitakartṛtvakalanayā aṇuṃ tuṭyādikramābhāsanātmanā 
kālena saṃyojya kālatattvavyapadeśyā kalpyate, yena ayamaṇuḥ 
bhūtādikriyākramakalitaḥ kālavaśatāmāpadyate || 11 ||

yāsya svatantratākhyā
śaktiḥ saṃkocaśālinī saiva |
kṛtyākṛtyeṣvavaśaṃ
niyatamamuṃ niyamamantyabhūnniyatiḥ || 12 ||

p. 9) svātantryameva asya parapramātuḥ saṃkucat 
niyatitattvatāmābhāsayati, yataḥ kāryākāryeṣu niyamādhānāt 
viśiṣṭe kārye viśiṣṭaṃ kāraṇameva ādadhyānnāniyatamiti |
etena kalādinā kañcukena āvṛto'yaṃ śaktidāridryamanubhūya 
kalādimukhenaiva svavaibhavāt prativitīrṇakiṃcidaṃśaḥ 
paśurityucyate || 12 ||

icchāditrisamaṣṭiḥ
śaktiḥ śāntāsya saṃkucadrūpā |
saṃkalitecchādyātmaka-
sattvādikasāmyarūpiṇī tu satī || 13 ||

buddhyādisāmarasya-
svarūpacittātmikā matā prakṛtiḥ |
icchāsya rajorūpā-
haṃkṛtirāsīdahaṃpratītikarī || 14 ||

asya śāntākhyā śaktirakṣubdhatvāt icchādīnāṃ śaktīnāṃ 
garbhīkaraṇāt samaṣṭirūpā, pārimityagrahaṇācca 
guṇānāmavibhāgāvasthā prakṛtitattvam |
guṇānāmicchādiśaktitrikena anvārabdhatvāt tritvaṃ - 
yatprakṣobhāt prākṛtikasargasya prasaraḥ |
p. 10) tatra cittātmake buddhyahaṃkṛnmanāṃsi 
sāmyāvasthāmadhiśrayanti |
atra tattvakramaprasare śivādisakalānteṣu pramātṛvargeṣu 
jñānakriyāśaktī eva mukhyamupakaraṇaṃ, te eva saṃkucadrūpe 
īśvara-śuddhavidye, saṃkucite vidyākale, atyantaṃ saṃkucite 
buddhikarmendriyāṇi, kriyāyāḥ saṃkocasīmni bhūtasūkṣmādi iti 
vijñeyam |
aṇoḥ rajaḥpariṇāmiṇī icchāśaktiḥ ahamityabhimānalakṣaṇā 
ahaṃkṛtiḥ || 13-14 ||

jñānāpi sattvarūpā
nirṇayabodhasya kāraṇaṃ buddhiḥ |
tasya kriyā tamomaya-
mūrtirmana ucyate vikalpakarī || 15 ||

sattvapariṇāminī jñānaśaktireva arthādhyavasāyalakṣaṇā buddhiḥ 
|
tamaḥpariṇāminī kriyāśaktiḥ |
vikalpakaraṇalakṣaṇaṃ manastattvamucyate || 15 ||

vāmādipañcabhedaḥ
sa eva saṃkucitavigraho devaḥ |
jñānakriyoparāga-
prādhānyādvividhaviṣayarūpo'bhūt || 16 ||

p. 11) sa eva krīḍādisatattvo vāmadevādipañcamūrtitvāt saṃkucito 
bhūtvā jñānaśaktyuparañjanapradhānatayā 
jñānendriyatadviṣayaśarīratāṃ, kriyāśatyupādhiprādhānyāt 
karmendriyavyāpāravattvaṃ ca upādatte |
śaktipañcakopādānāt karaṇānāṃ pañcadhātvaṃ bodhyam || 16 ||

śrotraṃ cakṣuḥ sparśana-
jihvā-ghrāṇāni bodhakaraṇāni |
śabda-sparśau rūpaṃ
rasa-gandhau ceti bhūtasūkṣmāṇi || 17 ||

śrotrādīni jñānendriyāṇi, śabdādīni tanmātrāṇi || 17 ||

ayamevātinikṛṣṭo
jāto bhūtātmanāpi bhūteśaḥ |
gaganamanilaśca tejaḥ
salilaṃ bhūmiśca pañcabhūtāni || 18 ||

atyantasaṃkocagrahaṇāt acidrūpatāmavabhāsya ākāśādīni 
pañcabhūtāni || 18 ||

śrotrādikaraṇavedyāḥ
śabdādyāstāni vedakānyeṣām |
vacanakarī vāgāsīt
pāṇiḥ syātkaraṇabhūta ādāne || 19 ||

śabdādijñānasādhanāni śrotrādikaraṇāni, 
vacanādikriyāsādhanāni vāgādīni karmendriyāṇi || 19 ||

gamana-visargānanda-
tritaye pādādikaṃ karaṇam |
gandhavatī bhūmiḥ syā-
dāpaḥ sāṃsiddhikadravāstejaḥ || 20 ||
uṣṇasparśamarūpa-
sparśo vāyurambaraṃ saśabdam |
ṣaṭtriṃśattattvamayaṃ
vande kaulaṃ kulātigaṃ śaṃbhum || 21 ||

ādinā pāyūpasthau gṛhyete |
gandhavattvaṃ bhūmerlakṣaṇam, sāṃsiddhikadravatvamablakṣaṇam, 
uṣṇasparśena tejo lakṣyate, arūpasparśo vāyulakṣaṇam, śabda 
ākāśasya iti pratyekaṃ mukhyaguṇanirdeśaḥ |
tattvānāmuttarottaraṃ vyāpya-vyāpakabhāvena bhūmirvyāpyā 
jalādiśivāntaṃ vyāpakāni pañcatriṃśat, evaṃ bhūtasṛṣṭau 
bhūmau vyomādiguṇā vyāpakatvena anugatāḥ santi |
paramaśivatattvasya sarvatra anugatatvāt 
viśvamayataduttīrṇayāmalakaulasvarūpameva bhaktānāṃ 
samāveśārham, iti vandanopasaṃhāroktyā upakṣiptam iti śivam ||

iti ṣaṭtriṃśattattvasaṃdohaḥ śrīmadrājānakānandācārya-
viracitavivaraṇopetaḥ samāptaḥ ||

p. 14) sadvidyānāṃ saṃśraye granthavidvad-
vyūhe hrāsaṃ kālavṛttyopayāte |
tattatsaddharmoddidhīrṣaikatāna-
satprekṣaujaḥśālinā karmavṛttyai || 1 ||

śrīmatkaśmīrādhirājena mukhyai-
rdharmodyuktairmantribhiḥ svairvivecya |
pratyaṣṭhāpi jñānavijñānagarbha-
granthoddhṛtyai mukhyakāryālayo yaḥ || 2 ||
tatrājīvaṃ nirviśadbhirmukunda-
rāmādhyakṣattvāśritaiḥ sadbhireṣaḥ |
pūrtyā śuddhyā vyākhyayā saṃskṛtaḥ stāt
pūrṇo granthaḥ śreyase sajjanānām || 3 ||
tilakam ||

śrīśivārpaṇaṃ bhūyāt ||

###########   END OF FILE  #######