####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00102
Uniform title: advayatārakopaniṣat
Main title: yoga upaniṣads with the commentary of śrī upaniṣad brahmayogin
Secondary title: advayatārakā upaniṣat
Commentator : brahmayogin
Alternate name : śrī upaniṣad brahmayogin
Editor : śāstrī mahādeva

Description: 



Notes: 
Transcribed by the staff of Muktabodha under the supervision of Mark S. G. Dyczkowski.

Revision 0: January 29, 2007


Publisher : Adyar library and research centre
Publication year : 1920
Publication city : Madras
Publication country : India
####################################################


advayatārakopaniṣat

pūrṇamadaḥ - iti śāntiḥ

tārakayogādhikāraḥ

	athāto'dvayatārakopaniṣadaṃ vyākhyāsyāmo yataye jitendriyāya śamādiṣaḍaguṇapūrṇāya || 1 ||

upaniṣadbrahmayogiviracitaṃ vivaraṇam

oṃ śrīmadviśvādhiṣṭhānaparamahaṃsasadgururāmacandrāya namaḥ 

dvaitāsaṃbhavavijñānasaṃsiddhādvayatārakam |
tārakabrahmeti gītaṃ vande śrīrāmavaibhavam ||

	iha khalu śuklayajurvedapravibhakteyamadvayatārakopaniṣat rājayogasarvasvaṃ prakaṭayantī brahmamātraparyavasannā dṛśyate | asyāḥ svalpagranthato vivaraṇamārabhyate | atra yathoktādhikāryuddeśena śrutayaḥ tārakayogamupadiśantītyāha- atheti | atha karmopāsanākāṇḍadvayanirūpaṇānantaraṃ, yataḥ tena puruṣārthāsiddhiḥ ataḥ

p. 2) tadarthaṃ yatra svātirekeṇa dvayaṃ na vidyate tat advayaṃ brahma, tanmātrabodhinī vidyā tārakopaniṣat, tāṃ śrutayo vayaṃ vyākhyāsyāmaḥ | kasmā adhikāriṇa ityata āha- yataya iti | svāśramadharmānuṣṭhānapūrvakaṃ deśikamukhato vedāntaśravaṇaṃ tato yuktibhiḥ śrutyaviruddhābhiḥ mananaṃ ca kṛtvā nididhyāsanāya yatata iti yatiḥ | ajitendriyasya yatitvaṃ kuta ityata āha- jitendriyāyeti | jitendriyasya yatitvopapatteḥ | ariṣaḍvargākrāntasya jitendriyatā kuta ityata āha- śamādiṣaḍguṇapūrṇāyeti | sāmādiṣaḍguṇasaṃpatteḥ ariṣaḍvargoparatipūrvakatvāt | evaṃ sādhanavate śrutayaḥ tārakayogamupadiśantītyarthaḥ || 1 ||

yogopāyatatphalam

	citsvarūpo'hamiti sadā bhāvayan samyaṅ nimīlitākṣaḥ kiṃcidunmīlitākṣo vā antardṛṣṭyā bhrūdaharādupari saccidānandatejaḥkūṭarūpaṃ paraṃ brahmāvalokayan tadrūpo bhavati || 2 ||

	evaṃ nididhyāsanopāyatatphalamāha- ciditi | yogī svāntaḥ cidrūpo'smīti bhāvayan ardhonmīlitalocanaḥ bhrūmadhyādau saccidānandamātraṃ brahmāhamasmītyālokayan tadrūpaḥ tārakarūpo bhavati || 2 ||

tārakasvarūpam

	garbhajanmajarāmaraṇasaṃsāramahadbhayāt saṃsārayati, tasmāt tārakamiti | jīveśvarau māyikāviti vijñāya sarvaviśeṣaṃ neti netīti vihāya yadavaśiṣyate tadadvayaṃ brahma || 3 ||

	kiṃ tārakamityata āha - garbheti | jyotirliṅgaṃ bhruvormadhye nityaṃ dhyāyet sadā yatiḥ iti śrutisiddhajyotirliṅgasya pratyagrūpatvena

p. 3) svājñavikalpitagarbhavāsādisaṃsāratārakatvāt tārakaṃ pratyagātmetyarthaḥ | jīveśabhede sati pratyagabhinnabrahmabhāvaḥ kuta ityāśaṅkya, tayorbhedasya māyikatvena mithyātvāt tato yacchiṣyate, tadeva brahmetyāha- jīveti || 3 ||

takṣyatrayānusaṃdhānavidhiḥ

	tatsiddhyai lakṣyatrayānusaṃdhānaṃ kartavyam || 4 ||

	tadadhigamopāyaḥ kathamityata āha- tatsiddhyā iti || 4 ||

antarlakṣyalakṣaṇam

	dehamadhye brahmanāḍī suṣumnā sūryarūpiṇī pūrṇacandrāmā vartate | sā tu mūlādhārādārabhya brahmarandhragāminī bhavati | tanmadhye taṭitkoṭisamānakāntyā mṛṇālasūtravat sūkṣmāṅgī kuṇḍalinīti prasiddhāsti | tāṃ dṛṣṭvā manasaiva naraḥ sarvapāpavināśadvārā mukto bhavati | phālordhvagalalāṭaviśeṣamaṇḍale nirantaraṃ tejastārakayogavisphuraṇena paśyati cet siddho bhavati | tarjanyagronmīlitakarṇarandhradvaye tatra phūtkāraśabdo jāyate | tatra sthite manasi cakṣurmadhyagatanīlajyotiḥsthalaṃ vilokya antardṛṣṭyā niratiśayasukhaṃ prāpnoti | evaṃ hṛdaye paśyati | evamantarlakṣyalakṣaṇaṃ mumukṣubhirupāsyam || 5 ||

	antarbāhyamadhyabhedena lakṣyaṃ trividham | tatra antarlakṣyalakṣaṇaṃ tadabhyāsaphalaṃ cāha- deheti | yadā kuṇḍalinī prāṇadṛṣṭimano'gnibhiḥ mūlādhāratrikoṇāgrālaṃkārasuṣumnādhovaktraṃ

p. 4) trikoṇāgrālaṃkārasuṣumnādhovaktraṃ vibhidya tanmadhye praviśati tadā bāhyantaḥ- prapañcavismaraṇapūrvakaṃ munyantaḥkaraṇaṃ nirvikalpabrahmapadaṃ bhajati | muniḥ nirvikalpajñānāt vikalpāt mukto bhavatītyarthaḥ | tatsiddhyupāyaḥ ka ityata āha- phāleti | tadgatasukhānubhavopāyaṃ vadan antarlakṣmyam upasaṃharati- tarjanīti | sukhaṃ prāpnoti | na kevalaṃ karṇarandhradvaye; evaṃ hṛdaye || 5 ||

bahirlakṣyalakṣaṇam

	atha bahirlakṣyalakṣaṇam | nāsikāgre caturbhiḥ ṣaḍbhiraṣṭabhiḥ daśabhiḥ dvādaśabhiḥ kramāt aṅgulānte nīladyutiśyāmatvasadṛgraktabhaṅgīsphuratpītavarṇadvayopetaṃ vyoma yadi paśyati sa tu yogī bhavati | caladṛṣṭyā vyomabhāgavīkṣituḥ puruṣasya dṛṣṭyagre jyotirmayūkhā vartante | taddarśanena yogī bhavati | taptakāñcanasaṃkāśajyotirmayūkhā apāṅgānte bhūmau vā paśyati taddṛṣṭiḥ sthirā bhavati | śīrṣopari dvādaśāṅgulasamīkṣituḥ amṛtatvaṃ bhavati | yatra kutra sthitasya śirasi vyomajyotirdṛṣṭaṃ cet sa tu yogī bhavati || 6 ||

	bahirlakṣyalakṣaṇamāha- atheti | yogī bhavati ityādikṛtsnopaniṣat prāyaśo maṇḍalabrāhmaṇopaniṣadvyākhyānena vyākhyātaṃ syāditi mantavyam || 6 ||

madhyalakṣyalakṣaṇam

	atha madhyalakṣyalakṣaṇaṃ prātaścitrādivarṇākhaṇḍasūryacakravat vahnijvālāvalīvat tadvihīnāntarikṣavat paśyati | tadākārākāritayā

p. 5) avatiṣṭhati | tadbhūyodarśanena guṇarahitākāśaṃ bhavati | visphurattārakākāradīpyamānagāḍhatamopamaṃ paramākāśaṃ bhavati | kālānalasamadyotamānaṃ mahākāśaṃ bhavati | sarvotkṛṣṭaparamadyutipradyotamānaṃ tattvākāśaṃ bhavati | koṭisūryaprakāśavaibhavasaṃkāśaṃ sūryākāśaṃ bhavati | evaṃ bāhyābhyantarasthavyomapañcakaṃ tārakalakṣyam | taddarśī vimuktaphalastādṛgvyomasamāno bhavati | tasmāt tāraka eva lakṣyaṃ amanaskaphalapradaṃ bhavati || 7 ||

	antarbāhyalakṣyasvarūpamuktvā madhyalakṣyasvarūpamāha- atheti | taddarśī vimuktasvājñānatatkāryaphalaḥ | yasmādevaṃ tasmāt || 7 ||

dvividhaṃ tārakam

	tat tārakaṃ dvividhaṃ pūrvārdhaṃ tārakam uttarārdham amanaskaṃ ceti |
tadeṣa śloko bhavati-

tadyogaṃ ca dvidhā viddhi pūrvottaravidhānataḥ |
pūrvaṃ tu tārakaṃ vidyādamanaskaṃ taduttaram || 8 ||

iti |

tārakayogasiddhiḥ

	akṣyantastārayoḥ candrasūryapratiphalanaṃ bhavati | tārakābhyāṃ sūryacandramaṇḍaladarśanaṃ brahmāṇḍamiva piṇḍāṇḍaśiromadhyasthākāśe ravīndumaṇḍaladvitayamastīti niścitya tārakābhyāṃ taddarśanam | atrāpi

p. 6) ubhayaikyadṛṣṭyā manoyuktaṃ dhyāyet, tadyogābhāve indriyapravṛtteranavakāśāt | tasmāt antardṛṣṭyā tāraka evānusaṃdheyaḥ || 9 ||

	brahmāṇḍavat piṇḍāṇḍe'pi ravīndū vidyete iti niścitya tārakābhyāṃ tadaikyadarśanataḥ tārakayogasiddhiḥ bhavedityāha- akṣīti | ayogī yathā brahmāṇḍasthacandrasūryau manaḥsahakṛtatārakābhyāṃ paśyati tathā yogī svamastakākāśavibhātaravīndudvayaṃ manaḥsahakṛtatārābhyāmavalokayedityarthaḥ | rūpadarśanasya cakṣuradhīnatvāt kiṃ manasetyata āha- taditi | manasi anyatra vyāpṛte rūpādigrahaṇaśaktiḥ cakṣurādeḥ nāstītyatra anyatramā abhūvaṃ nādarśanam, anyatramanā abhūvaṃ nāśrauṣam ityādiśruteḥ | yasmādevaṃ tasmāt || 9 ||

mūrtāmūrtabhedena dvividhamanusaṃdheyam

	tat tārakaṃ dvividhaṃ, mūrtitārakam amūrtitārakaṃ ceti | yat indriyāntaṃ tat mūrtimat | yat bhrūyugātītaṃ tat amūrtimat | sarvatra antaḥpadārthavivecane manoyuktābhyāsa iṣyate | tārakābhyāṃ tadūrdhvasthasattvadarśanāt manoyuktena antarīkṣaṇena saccidānandasvarūpaṃ brahmaiva | tasmāt śuklatejomayaṃ brahmeti siddham | tadbrahma manaḥsahakāricakṣuṣā antardṛṣṭyā vedyaṃ bhavati | evamūrtitārakamapi | manoyuktena cakṣuṣaiva daharādikaṃ vedyaṃ bhavati, rūpagrahaṇaprayojanasya manaścakṣuradhīnatvāt bāhyavadāntare'pi ātmamanaścakṣuḥasaṃyogenaiva rūpagrahaṇakāryodayāt | tasmāt manoyuktā antardṛṣṭiḥ tārakaprakāśāya bhavati || 10 ||

p. 7) yadanusaṃdheyaṃ tat katividham ityatra tattārakam | bāhyapadārthavivecanavat antaḥpadārthavivecanamapi manaścakṣuradhīnamityāha- sarvatreti | tadūrdhvasthasattvadarśanāt; bhrūmadhyordhvavilasitottaratārakalakṣyadarśanāt | kenaitaddarśanīyamityatra manoyukteneti | brahmaiva uttaratārakalakṣyamityanusaṃdheyam | yasmādevaṃ tasmāt | bhrūmadhyādisthalavilasitaśuklatejaso manaḥkalpitatve'pi brahmaṇaḥ sarvavyāpakatvena tatrāpi vidyamānatvāt tadeva brahmeti abhimatidraḍhimnā līne tatra manasi kalpakasāpekṣakalpanāvairalye nirvikalpakaṃ brahmaiva avaśiṣyata ityarthaḥ | yattejo manaḥ- kalpitaṃ tadbrahma | yasmādevaṃ tasmāt || 10 ||

tārakayogasvarūpam

	bhrūyugamadhyabile dṛṣṭiṃ taddvārā ūrdhvasthitateja āvirbhūtaṃ tārakayogo bhavati | tena saha manoyuktaṃ tārakaṃ susaṃyojya prayatnena bhrūyugmaṃ sāvadhānatayā kiṃcidūrdhvamutkṣepayet | iti pūrvatārakayogaḥ | uttaraṃ tu amūrtimat amanaskamityucyate | tālumūlordhvabhāge mahān jyotirmayūkho vartate | tat yogibhirdhyeyam | tasmāt aṇimādisiddhirbhavati || 11 ||

	ko'yaṃ tārakayoga ityatra bhrūyugamadhyabile tatratyājñācakre dṛṣṭiyugmaṃ saṃniveśya, sāvadhānatayā vilokayan, dhyeyam, tajjyotiḥ brahmeti yogibhiścintyamityarthaḥ | tataḥ kiṃ bhavatītyatra tasmāditi || 11 ||

śāṃbhavī mudrā

	antarbāhyalakṣye dṛṣṭau nimeṣonmeṣavarjitāyāṃ satyāṃ śāṃbhavī mudrā bhavati | tanmudrārūḍhajñāninivāsāt bhūmiḥ pavitrā bhavati |

p. 8) taddṛṣṭyā sarve lokāḥ pavitrā bhavanti | tādṛśaparamayogipūjā yasya labhyate so'pi mukto bhavati || 12 ||

	yat yogibhiḥ dhyeyamuktaṃ paryavasāne tadeva śāmbhavī mudrā bhavatītyāha- antariti | mudrā bhavati ityatra-

antarlakṣyaṃ bahirdṛṣṭirnimeṣonmeṣavarjitā |
eṣā sā śāṃbhavī mudrā sarvatantreṣu gopitā ||

iti śruteḥ | tanmudrārūḍhayoginaṃ stauti- taditi | pavitrā bhavati ityatra svapādanyāsamātreṇa pāvayan vasudhātalam iti svarūpadarśanokteḥ | pavitrā bhavanti-

khecarā bhūcarāḥ sarve brahmaviddṛṣṭigocarāḥ |
sadya eva vimucyante koṭijanmārjitairaghaiḥ ||

iti śruteḥ || 12 ||

antarlakṣyavikalpāḥ

	antarlakṣyajvalajjyotiḥsvarūpaṃ bhavati | paramagurūpadeśena sahasrārajvalajjyotirvā buddhiguhānihitacijjyotirvā ṣoḍaśāntasthaturīyacaitanyaṃ vā antarlakṣyaṃ bhavati | taddarśanaṃ sadācāryamūlam || 13 ||

	antarlakṣyaṃ vikalpya nirdhārayati- parameti | uktavikalpānāmekārthaparyavasāyitvāt taddarśanamūlaṃ kimityatra- taddarśanamiti || 13 ||

p. 9) 				ācāryalakṣaṇam

ācāryo vedasaṃpanno viṣṇubhakto vimatsaraḥ |
yogajño yoganiṣṭhaśca sadā yogātmakaḥ śuciḥ || 14 ||

gurubhaktisamāyuktaḥ puruṣajño viśeṣataḥ |
evaṃ lakṣaṇasaṃpanno gururityabhidhīyate || 15 ||

guśabdastvandhakāraḥ syād ruśabdastannirodhakaḥ |
andhakāranirodhitvād gururityabhidhīyate || 16 ||

gurureva paraṃ brahma gurureva parā gatiḥ |
gurureva parā vidyā gurureva parāyaṇam || 17 ||

gurureva parā kāṣṭhā gurureva paraṃ dhanam |
yasmāt tadupadeṣṭāsau tasmād gurutaro guruḥ || 18 ||

iti |

ācāryalakṣaṇamuktvā guruśabdārthamāha- guśabdastviti || 14-18 ||

granthābhyāsaphalam

	yaḥ sakṛduccārayati tasya saṃsāramocanaṃ bhavati | sarvajanmakṛtaṃ pāpaṃ tatkṣaṇādeva naśyati | sarvān kāmānavāpnoti | sarvapuruṣārthasiddhirbhavati | ya evaṃ veda | ityupaniṣat || 19 ||

	granthatadarthapaṭhanānusaṃdhānaphalamāha- ya iti | kāmākāmadhiyāṃ paṭhanaphalaṃ sarvakāmāptiḥ paramapuruṣārthāptiśca | ityupaniṣacchabdaḥ advayatārakopaniṣatsamāptyarthaḥ || 19 ||

p. 10) śrīvāsudevendraśiṣyopaniṣadbrahmayoginā |
advayopaniṣadvyākhyā likhiteśvaragocarā |
advayopaniṣadvyākhyāgrantho'śītiritīritaḥ ||

iti śrīmadīśādyaṣṭottaraśatopaniṣacchāstravivaraṇe tripañcāśatsaṃkhyāpūrakam advayattārakopaniṣadvivaraṇaṃ saṃpūrṇam

oṃ śrīmadviśvādhiṣṭhānaparamahaṃsasadgururāmacandrārpaṇamastu


###########   END OF FILE  #######