####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00004
Uniform title: anuttaraprakāśapañcāśikā
Main title: anuttaraprakāśapañcāśikā  by ādyanātha from the KSTS series vol. 14 -- The bhāvopahāra of cakrapāṇinātha with commentary by ramyadevabhaṭṭa -- where it follows bhāvopahāra and bodhapañcadaśikā
Author : ādyanātha
Editor : śāstri, mukundarāma

Description: 
The anuttaraprakāśapañcāśikā  by ādyanātha from the KSTS series vol. 14 where it follows bhāvopahāra and bodhapañcadaśikā


Notes: 
This e-text was data-entered by the staff of Muktabodha under the supervision of Mark Dyczkowski. .   Revision 0: October 18, 2007

Publisher : Research Deaprtment Jammu and Kashmir State
Publication year : 1918
Publication city : Bombay
Publication country : India
####################################################



śrī ādyanāthaviracitā

[sarvasaṃvinnadībhedabhinnaviśrāntibhūmaye |
namaḥ pramātṛvapuṣe śivacaitanyasindhave ||]

akṛtrimāhamāmarśaprakāśaikaghanaḥ śivaḥ |
śaktyā vimarśavapuṣā svātmano'nanyarūpayā || 1 ||
śivādikṣitiparyantaṃ viśvaṃ vapurudañcayan |
pañcakṛtyamahānāṭyarasikaḥ krīḍati prabhuḥ || 2 ||
na pārthyagā(rthakyā)tmavārtā'pi viśvaśaktiśarīrayoḥ |
na viśvaviśvavapuṣorbhinnatā kāpi tāttvikī || 3 ||
bhede sattāsphurattābhyāṃ bhinnaṃ kiṃ nu jagad bhavet |
sattāsphurattāsambandhāt sattābhānaṃ tu tatra cet || 4 ||
asataḥ kiṃ satastābhyāṃ sambandhaḥ so'yamiṣyate |
svarūpalābhasulābhaḥ sambandho nahyavastunaḥ || 5 ||
na labdharūpasambandhastābhyāṃ kiñcidapekṣate |
apekṣāyāmavasthānaṃ na syādetasya kiñcana || 6 ||
svabhāvataḥ sphurattā ca sattā ca na vināśinī |
vināśānabhyupagame jaḍatā'pi nivartate || 7 ||
tato gatyantarābhāvāccideva pariśiṣyate |
tataścidaikyaṃ prakṛtaṃ jagato na nivartate || 8 ||
prakāśādanyatābhāsaḥ svātantryollāsakevalaḥ |
paricchinatti kaḥ śaktiṃ śambhorviśvātiśāyinaḥ || 9 ||
svaprakāśātmakaṃ sarvaṃ tamaḥkevalatāṃ gatam |
yacca kiñcijjagatyasmin prakāśānnātiricyate || 10 ||
vimarśasaraṇīṃ prāptamityeṣā tāttvikī gatiḥ |
avadhānaikatānānāṃ matirevātra sākṣiṇī || 11 ||
kiṃ pramāṇairvarākaistaiścidanuprāṇitātmabhiḥ |
nahi vaikartanaṃ jyotirdīpālokamapekṣate || 12 ||
śaktipātapavitre'smin dhītattve ca parīkṣyatām |
ādarśe vimalābhoge nanu sarvaṃ prakāśate || 13 ||
itthaṃ cidātmakaṃ sarvaṃ ṣaṭtriṃśadbhedamudritam |
ādau śuddhātmakaṃ tattvaṃ pañcadhā tamasaḥ param || 14 ||
śivaḥ śaktiśca sādākhyamīśo vidyeti bhidyate |
akṣādiśāntavarṇātmā niraṇāyi śivena tu || 15 ||
kalāvidye rāgakālau niyatirbandha ucyate |
māyāpūrvovakārādiyakārāntākṣarātmakaḥ || 16 ||
pumān śaktirmano buddhirahaṅkṛnmādipañcakam |
śrotrādipañcakaṃ nādi ṇādi vāgādipañcakam || 17 ||
tanmātrapañcakaṃ ñādi ṅādi vyomādipañcakam |
sisṛkṣoḥ prathamaspandaḥ śivatattvaṃ prabhoḥ smṛtam || 18 ||
icchaivā'sya parimlānā śaktitattvamiti smṛtam |
svecchayā racitaṃ viśvamācchādyā'hantayā sthitam || 19 ||
tadeva tattvaṃ sādākhyaṃ sarvānugrahaṇonmukham |
tadeveśvaratattvaṃ syāt paśyad viśvamidantayā || 20 ||
ahantedantayoraikyamitirvidyā nigadyate |
svāṅgakalpeṣu bhāveṣu māyātattvaṃ vibhedadhīḥ || 21 ||
māyāgṛhītasaṃkocaḥ śivaḥ puṃstattvamucyate |
ayameva hi saṃsārī jīvo bhokteti gadyate || 22 ||
jñatva-kartṛtva-pūrṇatva-nityatvādyāśca śaktayaḥ |
tatsaṃkocāt saṃkucitāḥ kalādyātmatayā matāḥ || 23 ||
māyātmanaḥ kalā nāma kiñcitkartṛtvakāraṇam |
vidyā kiñcijjñatāhetū rāgo'bhiṣvaṅgakāraṇam || 24 ||
kālaḥ pariccheda karo niyatiścedameva me |
kartavyaṃ nānyadityeṣā vyavasthā yantraṇākṛtiḥ || 25 ||
prakṛtirguṇasāmyaṃ syādahaṅkārādijanmabhūḥ |
ahaṃ mamedamityetadbuddhiheturahaṅkṛtiḥ || 26 ||
buddhiradhyavasāyasya kāraṇaṃ niścayātmanaḥ |
saṃkalpasya vikalpasya bījaṃ mana udīryate || 27 ||
vacanādeśca śabdādervāgādiśravaṇādikam |
kāraṇaṃ śravaṇādīnāṃ grāhyaṃ tanmātrapañcakam || 28 ||
prakāśādyavakāśādikāraṇaṃ bhūtapañcakam |
parāparāśaktimayaṃ śuddhavidyādipañcakam || 29 ||
tadanyadaparā śaktirityetat tattvamīritam |
iyaṃ devī parā śaktiḥ śuddhāśuddhādhvagarbhiṇī || 30 ||
pṛthivyādīni tattvāni yadā līnāni kāraṇe |
tadā kāraṇamātrāṇi bahirudvamate vibhuḥ || 31 ||
anuttarecche unmeṣa ānandeśanamūnatā |
kriyecchājñānaśaktīnāṃ sattā cocchūnatā ca ṣaṭ || 32 ||
iccheśanāntarārūḍhāḥ sphuṭāsphuṭajaganmayāḥ |
catvāraḥ parato varṇāḥ ṣaṇḍhātmānaḥ pracoditāḥ || 33 ||
anuttarānandacitī icchāśakti niyojite |
trikoṇamatha ṣaṭkoṇamicchāyāṃ rūḍhimāgate || 34 ||
anuttarānandaśaktitrikoṇadvitvayogataḥ |
tathaivonmeṣayogena kriyāśakteḥ sphuṭaṃ vapuḥ || 35 ||
ukta triśaktisaṃghaṭṭa triśūlaṃ dvaitaghasmaram |
parasparā virodhena kāryeṣu prasare gate || 36 ||
na kathañcidupādeyamāsāṃ rūpamidaṃ bhavet |
bindurvedyasya saṃskāro vimarśaḥ sarga ityasau || 37 ||
kalāṣoḍaśakākārā śaktirviyate parā |
tithayaḥ pratipatpūrvāḥ pañcadaśyantimā yathā || 38 ||
sūryācandramasorantaścaratni sthitihetavaḥ |
tathā vimarśavapuṣaḥ sargasyādyāḥ kalāḥ smṛtāḥ || 39 ||
dvidheyaṃ mātṛkā devī bījayonyātmanā sthitā |
nityapravṛttā śṛṅgāṭavapurviśvasya janmabhūḥ || 40 ||
hṛdayaṃ bījametasyāṃ sāraṃ yattatparaṃ mahaḥ |
baṭabīje yathā vṛkṣastathātra nihitaṃ jagat || 41 ||
vicāryamāṇe naivedaṃ kāraṇādatiricyate |
mṛdādeḥ kalaśādīnāṃ tattvaṃ nānyannirūpaṇe || 42 ||
ityāhustattvavādinyaḥ śrutīnāmantimā giraḥ |
iha sarvaṃ sadevāgra āsīditi viniścayāt || 43 ||
sattāvācini bīje'smin bhāti māyāntimaṃ jagat |
viluptapratyayākāramevaitat pariśiṣyate || 44 ||
tato jñānakriyāsārā vidyeśvarasadāśivāḥ |
śaktiśūle vilīyante caturdaśakalātmani || 45 ||
ūrdhvādhaḥ sṛṣṭivapuṣi sarvaṃ līnamataḥ param |
itthaṃ parasyāṃ saṃvittau sarvaṃ saṃkucitaṃ kramāt || 46 ||
atha vāṅmanasātīte yatra kvāpi nirañjane |
ṣaṭtriṃśattattvalaharīkalahātītagocare ||
viśvātmani mahāmantrasvabhāve sā vilīyate || 47 ||

 [śuddhavidyādikaṃ sarvaṃ sādākhye pakṣasaṃgrahāt ||
madhyaśaktiparāmarśa iti vāpi layakramaḥ |
anyaḥ pakṣo'pi yaḥ kaścit pramāṇaṃ cennabādhate ||]

kutaścinmathite dhāmni dīpte kenāpi hetunā |
sarvaṃ haviridaṃ juhvanna dāridryeṇa pīḍyate || 48 ||
pañcapañcātmakaṃ viśvaṃ pañcaspandavijṛmbhitam |
saṃkocayan parāmarśāt sāmānyaspandakevalaḥ || 49 ||
ahami pralayaṃ kurvannidamaḥ pratiyoginaḥ |
parākramaparo bhuṅkte svabhāvamaśivāpaham || 50 ||

iti ṣaḍadhikatriṃśadbheda prasaktajagattanuḥ
prasarati mahāśaktyullekhavicitramahāpaṭī |
jayati bahuśaḥ spandākārā parā cidanuttarā
vimṛśata janāḥ kiṃ no bhūyaḥ svabhāvavijṛmbhitam || 51 ||

iti śrīmadādyanāthaviracitā anuttaraprakāśapañcāśikā

samāptā ||


###########   END OF FILE  #######