####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00130
Uniform title: bhūtaśuddhitantra
Editor : chatterjee

Description: 
E-text transcribed from Chatterjee's edition late 19th century in Bengali script.


Notes: 
This e-text was transcribed by the staff of Muktabodha under the supervision of Mark S.G. Dyczkowski.      

Revision 0: Sept. 18, 2008      


Publisher : Unknown: late 19th century
Publication year : 2000
Publication city : 
Publication country : India
####################################################


bhūtaśuddhitantre

prathamaḥ paṭalaḥ

śrīdevī uvāca


deva deva mahādeva sāmprataṃ kathaya prabho ! |

bhūtaśuddhiṃ dehaśuddhiṃ prāṇāyāmaṃ tataḥ param || 1 ||

krameṇa kathyatāṃ deva śūlapāṇe piṇākadhṛk |

mantraṃ yantraṃ mahādeva yena śudhyati bhūtale || 2 ||


śrī-īśvara uvāca


kathayāmi varārohe khañjanākṣi śucismite |

tattvatrayaṃ pravakṣyāmi guhyād guhyataraṃ mahat || 3 ||

tattvatrayaṃ vinā devi ! siddhividyāṃ japet tu yaḥ |

tasya sarvārthahāniḥ syājjapaṃ ca viphalaṃ priye || 4 ||

bhūtaśuddhiṃ maheśāni ! nyāsaṃ paramadurlabham |

prāṇāyāmaṃ tataḥ kuryāt tattvatrayamidaṃ smṛtam || 5 ||

sarvaṃ kuryānmaheśāni ! mātṛkākṣarasaṃyutam |

akārādikṣakārāntāṃ mātṛkākṣararūpiṇīm || 6 ||

vaidikaṃ tāntrikaṃ snānaṃ kṛtvā sandhyāmupāśrayet |

āgatya devadeveśi ! yāgamaṇḍalasanīdhim || 7 ||

antaḥsnānaṃ tataḥ kṛtvā antaḥsandhyāmupāśrayet |

antaḥsnānaṃ ca sandhyāṃ ca kathayāmi śṛṇu priye ! || 8 ||

gurudhyānaṃ prathamatastataḥ snānaṃ samācaret |

praṇavena maheśāni ! jīvaṃ dhṛtvā śucismite || 9 ||

mūlādhārāt samākṛṣya dvādaśārṇaṃ nayet sudhīḥ |

snāyācca vimale tīrthe puṣkare hṛdayānvite || 10 ||

mūlādhārāt maheśāni saha sradalamānayet |

saṅgaṃ paraśive kṛtvā ānanda upajāyate || 11 ||

tenānandena deveśi snāyājjīvamanāhate |

tatastu parameśāni ajapāṃ prāṇarūpiṇīm || 12 ||

aṣṭottaraśataṃ japtvā snāto bhavati pārvati ! |

antaḥsandhyāṃ maheśāni ! kuru yatnena pārvati || 13 ||

śivaśaktisamāyogo yasmin kāle prajāyate |

sā sandhyā kulasādhūnāṃ samādhisthaḥ pratīyate || 14 ||

evaṃ tu te maheśāni ! sandhyāpūto bhaved dhruvam |


śrīdevī uvāca


ajapāṃ parameśāna ! kathyatāṃ me dayānidhe ! || 15 ||


śrī-īśavara uvāca


śṛṇu vakṣyāmi deviśi ! guhyād guhyataraṃ priye |

dhyānamasyāḥ pravakṣyāmi yathā dhyātvā japennaraḥ || 16 ||

haṃsaṃ nityamanantamakṣayaguṇaṃ svābhāvato nirgatā |

yāntī svāśrayamarkakoṭirucirā dhyeyā jaganmohinī
iti dhyānaṃ maheśāni kṛtvā samārabhet japam |

ṣaṭcakraṃ madhyagaṃ kṛtvā ajapāṃ paramākṣarām || 17 ||

śivabījaṃ samuddhṛtya bhṛgubījaṃ tataḥ param |

bindvarddhaṃ candrasaṃyuktaṃ kuru yatnena sundari ! || 18 ||

eṣā vidyā varārohe ! cāturvarṇeṣu śasyate |

etajjapaṃ vinā devi bhūtaśuddhiśca niṣphalā || 19 ||

tasmādādau japed vidyāmajapāṃ prāṇarūpiṇīm |

aṣṭottaraśataṃ japtvā bhūtaśuddhiṃ samācaret || 20 ||

ṣaṭcakradalasaṃsthāne yāni varṇāni pārvati ! |

tāni sarvāṇi deveśi jīvaṃ saṃnyasya pārvati || 21 ||

bhūtaśuddhiṃ maheśāni yatnataḥ samupāsmahe |

mūlādhārānmaheśāni ! mūlapadmaṃ śucismite || 22 ||

caturdalayutaṃ mūlaṃ daśavarṇena saṃyutam |

raktavarṇaṃ sadā sevyaṃ yogibhiḥ parameśvari ! || 23 ||

trikoṇaṃ sundaraṃ śuddhaṃ pṛthvībījaṃ tu madhyagam |

tanmadhye bhāvayed devaṃ śivaṃ śyāmalasundaram || 24 ||

atra kuṇḍalīnī devi paraṃ prakṛtirūpiṇī |

śivaṃ veṣṭya maheśāni ! sarvadā tatra tiṣṭhati || 25 ||

prasuptabhujagākāraṃ vidyutkoṭinibhāṃ parām |

brahmaviṣṇustutāṃ devīṃ kuṇḍalīṃ brahmarūpiṇīm || 26 ||

mūlādhāre mano devi vinyasya bhāvayet sadā |

caturdalayutaṃ varṇaṃ tāraṇaṃ vighnanāśanam || 27 ||

bindvardhasaṃyutaṃ kṛtvā daśadhā prajapet tataḥ |

ajapānāṃ maheśāni ! caturdalagataṃ kuru || 28 ||

svādhiṣṭhāne tato nītvā puṣpahaṃsasamanvitam |

tatpurīṃ ca maheśāni ! nīreṇa paripūritam || 29 ||

mūlādhāraṃ yathā pṛthvyā śobhate parameśvari |

nīreṇa śobhitaṃ devi ! svādhiṣṭhānaṃ śucismite || 30 ||

ṣaḍaṅgavidyudādhāraṃ ṣaḍakṣarasamanvitam |

va - bha - ma - ya - ra - lairyuktaṃ kundapuṣpasamanvitam || 31 ||

svādhiṣṭhānasthitaṃ devi śivaṃ sarvajñabhāvanam |

mūlādhārāt samutthāpya kuṇḍalīṃ brahmarūpiṇīm || 32 ||

nītvā maṇipuraṃ devi ! tadvarṇaṃ japamācaret |

bindvardhasaṃyutaṃ kṛtvā śobhitaṃ śivamarcayet || 33 ||

tatraiva parameśāni ! ṣaḍakṣarajapaṃ kuru |

ṣaṭpāpaṃ nāśayed devi ! tatkṣaṇāt parameśvari ! |

ṣaḍdalaṃ ṣaḍguṇaṃ devi ! gudaṃ ca caturaṅgulam || 34 ||

|| iti śrībhūtaśuddhitantre haragaurīsaṃvāde prathamaḥ paṭalaḥ || 1 ||

atha dvitīyaḥ paṭalaḥ

tatastu prameśāni ! maṇipūraṃ vibhidyate |

vāyuṃ ca tatra vai nītvā manasā parameśvari || 1 ||

samānaṃ saṃyutaṃ kuryādapānaṃ parameśvari ! |

tato brahmanadīṃ bhittvā vāyurmaṇipuraṃ yayau || 2 ||

tatrasthaṃ śivaliṅgaṃ tu nīlanīradasannibham |

tatpātraṃ kṛṣṇavarṇaṃ ca akṣaraṃ kṛṣṇarūpakam || 3 ||

tanmadhyasthaṃ mahādevaṃ sarvadevādikāraṇam |

maṇipūraṃ maheśāni ! mahāmarakataprabham || 4 ||

śivaṃ sambhāvya deveśi ! daśavarṇaṃ manuṃ japet |

ḍakārādikakārāntaṃ bindvardhasaṃyutaṃ kuru || 5 ||

daśapatrasthitaṃ varṇaṃ pūrvādikramato japet |

daśapatraṃ kṛṣṇavarṇaṃ akṣaraṃ kṛṣṇarūpakam || 6 ||

tanmadhyasthaṃ mahādevaṃ sarvadevādikāraṇam |

daśākṣarajapād devi daśajanmāghanāśadam || 7 ||

tato vāyurmaheśāni ! anāhatapurīṃ yayau |

ādityapatrasaṃyuktaṃ varṇairdvādaśabhiryutam || 8 ||

tatpatraṃ parameśāni ! varṇaṃ ca śuklarūpakam |

kādiṭhāntākṣarairvarṇaiḥ śobhitaṃ paramākṣaram || 9 ||

hṛtpadmaṃ parameśāni śuddhasattvātmakaṃ sadā |

pradīpakalikākāraṃ tanmadhye brahmarūpiṇam || 10 ||

veṣṭitaṃ dvādaśavarṇaiḥ sarvaśaktimayaṃ priye |

sammukhe tasya deveśi ! jīvastiṣṭhati sarvadā || 11 ||

tatra jīvo maheśāni sadā tiṣṭhati pārvati ! |

vāyuṃ tejoyutaṃ jīvaṃ dṛṣṭvā manolayaṃ kuru || 12 ||

ātmarūpaṃ vāyurūpaṃ nirīhaṃ nirmalaṃ sadā |

yakārasyāṣṭasaṃbījaṃ jīvaṃ hemaprabhaṃ sadā || 13 ||

tatrādityākṣaraṃ devi bindvardhasaṃyutaṃ kuru |

kṛtvā japaṃ maheśāni ! yatnena kuru sundari || 14 ||

janmabhiśca dvādaśabhirdevi yat [kṛtam] pāpamarjitam |

tatsarvaṃ nāśayatyeva tatkṣaṇāt parameśvari || 15 ||

evaṃ hi maruto bhittvā viśuddhaṃ pratigacchati |

viśuddhaṃ nirmalaṃ śuddhaṃ ṣoḍaśasvarasaṃyutam || 16 ||

dhūmravarṇaṃ maheśāni ! viśuddhākhyaṃ manoharam |

tasya madhye sthitaṃ devi ākāśaṃ śaktirūpiṇam || 17 ||

kramājjīvaṃ kuṇḍalinyā praṇaveṇa samāharet |

manastatra maheśāni ! sārathiḥ sarvataḥ sadā || 18 ||

sarvaṃ manasi kartavyaṃ bhūtaśuddhyādikaṃ priye ! |

svaraṃ ca ṣoḍaśaṃ devi bindvardhasaṃyutaṃ kuru || 19 ||

tatastu parameśāni ! japet ṣoḍaśamakṣaram |

pūrvādikramato devi daśadhā prajapet priye || 20 ||

janmabhiḥ ṣoḍaśabhiryat tu (kṛtaṃ) pāpaṃ śubhāśubham |

dahet tasya japād devi tṛṇaṃ vahniryathā dahet || 21 ||

tato vāyuṃ maheśāni ! drutamājñāpurīṃ nayet |

tatpurīṃ parameśāni dvidalaṃ yugavarṇakam || 22 ||

varṇaṃ hemaprabhaṃ devi ! purīṃ candraprabhaṃ sadā |

bindvardhasaṃyutaṃ kṛtvā sādhako japamācaret || 23 ||

manaḥsārathinā devi ! jīvaṃ kuṇḍalinīṃ priye |

ājñāṃ purīṃ nayet śīghraṃ mano manasi bhāvanam || 24 ||

manasaḥ parameśāni ! ājñāpuryāṃ sthitiḥ sadā |

gurorājñādhāraṇāt tu ājñāpuramimaṃ smṛtam || 25 ||

sadāśivapuradvāraṃ gavākṣaṃ parameśvari ! |

evaṃ prapañcaṃ bhittvā vai kuṇḍalīṃ jīvasaṃyutām || 26 ||

manaḥsārathinā devi sadāśivapuraṃ nayet |

pañcaprāṇasamāyuktā caturviṃśatisaṃyutā || 27 ||

indriyāṇi daśaikaṃ ca mahābhūtāni pañca ca |

buddhyahaṅkāracittāni nayet śivapuraṃ prati || 28 ||

sahasrāre tato nītvā manasā yojayet sadā |


śrīdevī uvāca


tatra gatvā maheśāna kuṇḍalī kimakarot prabho || 29 ||


śrī-īśvara uvāca


caturviṃśatitattvena pañcaprāṇena sundari |

indriyairakṣarairdevi ! ekatvaṃ jāyate yadā || 30 ||

tatra devi maheśāni kuṇḍalīṃ bhāvatatparām |

pūrvoktadhyānamārgeṇa parāṃ tatra vibhāvayet ||

sarvātmasampuṭaṃ devi ! sarvavidyābhidhāraṇam || 31 ||

iti śrībhūtaśuddhitantre haragaurīsaṃvāde dvitīyaḥ paṭalaḥ || 2 ||

atha tṛtīyaḥ paṭalaḥ



śrī-īśvara uvāca


śṛṇu pārvati ! vakṣyāmi rahasyaṃ paramādbhutam |

guhyād guhyataraṃ devi sugopyaṃ bhuvanatraye || 1 ||

brahmarandhre sahasrāre yatra devaḥ sadāśivaḥ |

saṃveṣṭya paramā devī yatrāste parameśvari ! || 2 ||

kuṇḍalīṃ yojayet tatra ekatvaṃ jāyate tadā |

akārādikṣakārāntāḥ sarvabīje niyojayet || 3 ||

ādau manasi deveśi ! prāṇavidyāṃ varānane |

prajapya daśadhā devi ! kuṇḍalīṃ paramāṃ vrajet || 4 ||

purīṃ śaktimayīṃ devi nityānandamayaṃ sadā |

sahasradalasaṃyuktaṃ padmaṃ nityāgamaṃ priye || 5 ||

padmamadhye maheśāni ! purīṃ śaktimayīṃ priye |

sadāśivo maheśāni ! yatrāste parameśvari || 6 ||

śuddhatattvādikaṃ devaṃ nirmalaṃ niścalaṃ sadā |

śivaṃ prāpya maheśāni ! kuṇḍalī śivasannidhau || 7 ||

śivasya mukhapadmaṃ hi cucumbe kuṇḍalī priye |

sarvatra sampuṭaṃ dattvā mohayet paramaṃ śivam || 8 ||

sadāśivaḥ śivastatra śānto bhavati supriye |

padmamadhye sthitaṃ devaṃ nirīhaṃ śavarūpavat || 9 ||

śavarūpo mahādevo hṛdyo nāsti kadācana |

śaktisaṃyogamātreṇa karmakartā sa ucyate || 10 ||

tasmāt tat parameśvāni ! śakteḥ prādhānyamucyate |

śaktiṃ vinā maheśāni na kiñcidapi vartate || 11 ||

sadāśivo mahāpretaḥ kevalaṃ niścayaṃ priye |

sadāśivapuraṃ devi vaikuṇṭhaṃ paramaṃ padam || 12 ||

sadāśivapuraṃ gatvā kuṇḍalī paradevatā |

sadāśivena ca samaṃ kṣaṇamātraṃ ramet priye ! || 13 ||

sadāśivena deveśi saṅgamaṃ jāyate priye |

amṛtaṃ jāyate devi tatkṣaṇāt parameśvari |

tenāmṛtena deveśi ṣaṭcakraṃ plāvayet kramāt || 14 ||


śrī-īśvara uvāca


śṛṇu pārvati ! vakṣyāmi rahasyaṃ bhuvi durlabham |

guhyād guhyataraṃ ramyaṃ triṣu lokeṣu durlabham || 15 ||

apānamūrdhagaṃ kṛtvā divyamarthaṃ prapūrya ca |

prāṇamantreṇa deveśi ! śaktiṃ kuṇḍalinīṃ parām || 16 ||

kramāccakrāṇi nirbhidyaṃ jīvātmānamanoharāt |

sahasrāre śiraḥpadme pare brahmaṇi yojayet || 17 ||

buddhyahaṅkāracittāni tattvāni prakṛtirvapuḥ |

tasmāt sarvāṇi tattvāni bījarūpeṇa bhāvayet || 18 ||

tataḥ śūnye śarīre ca kukṣau vāme vicintayet |

sarvapāpātmakaṃ krūraṃ puruṣaṃ piṅgamūrdhajam || 19 ||

tato nābhau vāyubījaṃ dhūmraṃ sañcintya tajjapet |

daśadhā vāyumutṣādya vapuḥ pāpaṃ viśodhayet || 20 ||

sa pāpaṃ tu tato mantrī hṛdaye vahnibījakam |

raktaṃ vibhāvya daśadhā tajjapācca hutāśanam || 21 ||

samutpādya dahatyenaṃ sapāpaṃ tadvapuḥ priye |

lalāṭe vāruṇaṃ bījaṃ śuddhaṃ sañcintya tajjapāt || 22 ||

daśadhāmṛtaviṣṭintu samutpādya śucismite |

sarvavyathāvinirmuktaṃ jātaṃ divyavapustataḥ || 23 ||

niṣpāpaṃ plāvayet tasmāt tathā bhāvena tatparaḥ |

avagatya dharābījaṃ mūlādhāre vicintayet || 24 ||

daśadhā tajjapād devi ! pṛthvīmutpādya sundari |

tataḥ sarvāṇi bījāni tattvāni ca śucismite || 25 ||

yathāsthāne nyased bījaṃ ājñācakrāt śucismite |

ājñādiguṇapadmāntaṃ saṃsthāpya parameśvari ! || 26 ||

kramaṃ tasya pravakṣyāmi sāvadhānā'vadhāraya |

etad rahasyaṃ paramaṃ sadā mama hṛdi sthitam || 27 ||

yanmantrasahitaṃ devi kramāt sundari tat śṛṇu |

bījaṃ kuṇḍalinīṃ devi ājñācakraṃ samānayet || 28 ||

tasmin cakre maheśāni ātmā manaḥsamanvitaḥ |

pañcāśanmātṛkāmantraṃ daśadhā prajapet priye || 29 ||

tatra yugmakalāṃ dhyātvāṃ mūlamantreṇa tarpayet |

lambayet parameśāni jīvaṃ kuṇḍalinīsaha || 30 ||

manasā saṃyutaṃ kṛtvā viśuddhau lambayet priye ! |

taccakre parameśāni mātṛkāvarṇamuttamam || 31 ||

prajaped daśadhā devi ! manaḥsārathinā priye |

sarvaṃ hi manasā kāryaṃ manaḥ sarvārthasādhakam || 32 ||

tatrasthāṃ ṣoḍaśakalāṃ mūlamantreṇa tarpayet |

lambayet praṇavairdevi purīṃ[prati]dhvanimayīṃ prati || 33 ||

tatrasthaṃ devadeveśaṃ mahādevaṃ ca tarpayet |

praṇavena tu mantreṇa tarpayet śivarūpiṇam || 34 ||

tatrasthāṃ dvādaśakalāṃ taḍitkotisamaprabhām |

tarpayet mūlamantreṇa mātṛkājapapūrvakam || 35 ||

lambayet maṇipūre ca śivaṃ tatra pratarpayet |

tatrasthāṃ daśakalāṃ devi ! mūlamantreṇa tarpayet || 36 ||

mātṛkāṃ prathame japtvā tarpayet paramāṃ kalām |

tadadhaḥ parameśāni ! svādhiṣṭhāneṣu lambayet || 37 ||

svādhiṣṭhānaṃ maheśāni ! śuklaṃ hīrakasannibham |

tatrasthaṃ śivadevaṃ ca mūlamantreṇa tarpayet || 38 ||

mūlamantraṃ maheśāni ! prāsādaṃ paramaṃ śivam |

tatrasthāṃ ṣaṭkalāṃ divyāṃ māyābījena tarpayet || 39 ||

mūlādhāraṃ tato nītvā bījaṃ kuṇḍalinīsaha |

manaḥsārathinā devi ! śivaṃ sambhāvya yatnataḥ || 40 ||

tarpayenmūlamantreṇa prāsādena śivaṃ priye ! |

tato yugakalāṃ nityāṃ mūlamantreṇa tarpayet || 41 ||

mātṛkāṃ daśadhā japtvā śivaṃ santoṣayet sadā |

svasthānaṃ prāpya deveśi ! kuṇḍalī paradevatā || 42 ||

brahmaviṣṇuśivayutā viṣatantutanīyasīm |

javāsindūrasaṅkāśāmudyadbhāskarasannibhām || 43 ||

śivasya yuvatīṃ yogyāṃ vahnirūpadharāṃ priye ! |

tatastu parameśāni ! jīvaṃ puṣkaramānayet || 44 ||

hṛdisthaṃ puṣkaraṃ padmaṃ jīvasthāṃ sadā smṛtam |

brahmasthānaṃ ca tad devi ! sūryamaṇḍalasannibham || 45 ||

śabdabrahma paraṃ brahma śabdāstiṣṭhanti tatra vai |

pradīpakalikākāraṃ śabdabrahma śucismite || 46 ||

pradīpakalikākāraṃ jīvaṃ ca parameśvari ! |

śabdabrahma paraṃ brahma śaktiyuktaṃ sadā priye ! || 47 ||

jalasūryāgnicandreṣu śaktiḥ sarvatra vartate |

śaktiḥ sarveṣu deveṣu devīṣu ca śucismite || 48 ||

śaktiyuktaṃ jāyate sarvaṃ yo na jānāti pāmaraḥ |

pretalokaṃ sa gatvā vai śūkaratvaṃ prajāyate || 49 ||

|| iti śrībhūtaśuddhitantre harapārvatīsaṃvāde tṛtīyaḥ paṭalaḥ || 3 ||

atha caturthaḥ paṭalaḥ

śrī-īśvara uvāca


nābhimadhye tu vāmā ca jyeṣṭhā ca hṛdi saṃsthitā |

raudrī ca parameśāni ! sadā śirasi saṃsthitā || 1 ||

vāmā brahmā maheśāni ! jyeṣṭhā ca viṣṇurīritā |

raudrī rudraṃ tu vijñeyā bindutrayamitīritā || 2 ||

brahmā viṣṇuśca rudraśca sadā prakṛtirūpiṇī |

bindunā parameśāni ! karmakartā sadā priye || 3 ||

brahmaviṣṇumaheśānāṃ bindubījaṃ śucismite ! |

bindunā jāyate sṛṣṭiḥ pālanaṃ ca śucismite || 4 ||

bindunā harate sṛṣṭiṃ kramataḥ parameśvari ! |

binduṃ vinā maheśāni ! sakalaṃ pretavat priye || 5 ||

ataḥ paraṃ pravakṣyāmi rahasyaṃ paramādbhutam |

mūlādhāre maheśāni ! tryakṣarīṃ daśadhā japet || 6 ||

tryakṣarīṃ śṛṇu deveśi ! sāvadhānā'vadhāraya |

śivabījaṃ samuddhṛtya pṛthvībījapuṭaṃ kuru || 7 ||

bindvardhasaṃyutaṃ kṛtvā sādhako japamārabhet |

hṛtpadme rañjitaśivā samuddhṛtya śucismite || 8 ||

śivabīje puṭīkṛtya bindvardhasaṃyutaṃ kuru |

lalāṭe parameśāni ! ralabījaṃ samuddhara || 9 ||

kalāvatī puṭīkṛtvā bindvardhasaṃyuktaṃ kuru |

etā vidyā maheśāni ! bhūtaśuddhestu kāraṇam || 10 ||


śrīdevī uvāca


kathyatāṃ devadeveśa ! jñānacakṣustapomayam |

kṛpayā kathayeśāna ! yadyahaṃ tava vallabhā || 11 ||

vāmapārśve sthitaṃ devaṃ saṃdahya parameśvara ! |

jīvaḥ śuddhātmako bhūtvā manasā parameśvara || 12 ||

pūjayediṣṭadevaṃ ca japed vidyāṃ prasannadhīḥ |

punastu puruṣaṃ pāpaṃ kathamutpadyate tathā || 13 ||

etattu saṃśayaṃ deva hṛdaye śālyavanmama |

saṃśayaṃ me mahādeva ! chindhi deva dayānidhe || 14 ||


śrī-īśvara uvāca


śṛṇu kamalapatrākṣi ! rahasyaṃ paramādbhutam |

śoṣaṇairdahanairdevi ! puruṣaṃ pāparūpakam || 15 ||

saṃdahya parameśāni ! punarutpadyate sadā |

iḍā tu vāmadeśe hi sadā tiṣṭhati pārvati || 16 ||

vāmanāḍyā kṛtaṃ pāpaṃ vāmakukṣau sthitaṃ priye |

nāḍīsaṃyogamātreṇa pāpamūlaṃ nikṛntati || 17 ||

ata eva maheśāni ! puruṣaṃ kṛṣṇamūrdhajam |

punarutpadyate devi ! japapūjāvidheranu || 18 ||

śṛṇu kamalapatrākṣi ! rahasyaṃ hṛdaye sthitam |

dahantaṃ śeṣapāpaṃ ca nāśanaṃ yadi cecchasi || 19 ||

tat pāpasyāpanode ca vidyāmenāṃ japaṃ kuru |

kāmanayā tathā devi ! manmathaṃ parameśvari || 20 ||

aṣṭottaraśataṃ japtvā tasmāt pāpād vimucyate |

mano jīvātmanoḥ śuddhiḥ prāṇayāmena sundari || 21 ||

etat śuddhirmaheśāni sarvatantreṣu śasyate |

sarveṣu viṣṇumantreṣu śivamantre gaṇādhipe || 22 ||

śaktau sūrye maheśāni ! anyadevagaṇeṣu ca |

evaṃ te kathitaṃ devi ! rahasyaṃ paramādbhutam || 23 ||

ādhāraṃ pṛthvītattvaṃ vai svādhiṣṭhānaṃ jalaṃ priye |

maṇipuram agnitattvaṃ vāyutattvamanāhate || 24 ||

kaṇṭhe ca parameśāni ! śūnyatattvaṃ sadā smṛtam |

manastattvaṃ tadūrdhvaṃ ca manaḥ sarvatra vyāpakam || 25 ||

vibhutvād vyāpakatvācca sākṣād bindumayaṃ manaḥ |

yāvasti parameśāni bhūtaśuddhyāṃdi yāni ca || 26 ||

tāni sarvāṇi deveśi ! manasaiva praṇīyate |

sarvagāmī sarvavettā sarvasākṣī sadā manaḥ || 27 ||

pāpapuṇye maheśāni rakṣakaṃ syāt manaḥ priye |

manasā vākyamutpannaṃ manasaiva praṇīyate |

mantraṃ vidyā maheśāni ! manasā japamācaret || 28 ||

|| iti śrībhūtaśuddhitantre harapārvatīsaṃvāde caturthaḥ paṭalaḥ || 4 ||

atha pañcamaḥ paṭalaḥ

śrī-īśvara uvāca


manasā jīvansaṃyuktaḥ karmakartā sadā priye |

manaḥ pravibhave devi ! unmanīsahitā yataḥ || 1 ||

unmanī ca maheśāni ! bhavapāpanikṛntanī |

jīvasya parameśāni ! guptatattvaṃ śṛṇu priye || 2 ||

mūlādhāre sthitaṃ jīvaṃ pradīpakalikākṛtim |

praṇavena samākṛṣya dvādaśāntaṃ layet sudhīḥ || 3 ||

ākāśe ca maheśāni ! sukhamokṣamavāpnuyāt |

hṛtpadme ca maheśāni paraṃ brahma nirīkṣaṇam || 4 ||

ājñāyāṃ parameśāni prathamaṃ gurudarśanam |

maṇipūraṃ tato gatvā snāpayenmanasā saha || 5 ||

svādhiṣṭhānaṃ tato gatvā agnisparśaṃ samācaret |

tato jīvaṃ maheśāni ! mūlādhāraṃ layet priye || 6 ||

manaḥsārathinā devi ! unmanī bhavanāśinī |

saṃhatya sadasatkarma jīvaḥ sarvaṃ karoti hi || 7 ||

śuddhasattvātmako jīvaḥ sadasatkarmavarjitaḥ |

vāmapārśve sthitaṃ pāpaṃ puruṣeṇa yadā priye || 8 ||

saṃyogo jāyate tatra asatkarma tadā'karot |

pāpasya parameśāni ! saṃyogo yadi jāyate || 9 ||

manasā jīvasaṃyogāt satkāryaṃ kurute tadā |

śuddhasattvātmako jīvastasya kāryaṃ kutaḥ priye || 10 ||

manaśca parameśāni unmanī saṃyutā yadi |

jīvasya vāmapārśve tu tadā tiṣṭhati pāpadhṛk || 11 ||

dakṣiṇe parameśāni manaśca unmanī yataḥ |

unmajjanti nimajjanti prapañceṣu śucismite || 12 ||

unmanīkaraṇaṃ devi ! daśāsu parameśvari |

jāgratsvapnasuṣuptyavasthāṃ cāpi parameśvari || 13 ||

suṣumnāntargatā citrā candrakoṭisamaprabhā |

tatra kuṇḍalinī devi yātāyātaṃ karoti hi || 14 ||

kadācit māsi taṃ padmaṃ kadācit raktapaṅkajam |

kadācit śuklapadmaṃ hi vahnipadmaṃ kadā priye || 15 ||

bhitvā purīṃ yāti punarāyāti kuṇḍalī sadā |

prapañcānāṃ maheśāni ! devānucaramuttamam || 16 ||

kathayāmi maheśāni sarvatantreṣu gopitam |

yajjñātvā sādhako devi sarvasiddhimavāpnuyāt || 17 ||

dharmārthakāmamokṣāṇāṃ phalabhāg vaiṣṇavo yataḥ |

tava snehānmaheśāni ! nigadāmi śucismite || 18 ||

brahmāṇī caṇḍikā raudrī gaurīndrāṇī tathaiva ca |

kaumārī vaiṣṇavī durgā nārasiṃhī ca kālikā || 19 ||

śivadūtī ca vārāhī māheśī kauśikī tathā |

śāṅkarī ca jayantī ca viśuddhapadmasaṃsthitā || 20 ||

maṅgalā kapālikā caiva medhā ca śivarūpikā |

śākambharī ca bhīmā ca gāṇḍā ca bhrāmarī tathā || 21 ||

rudrarupiṇyambikā ca kṣamā ca vahnirūpiṇī |

etāstu parameśāni ! hṛtpadme saṃsthitāḥ sadā || 22 ||

dhātrī ca vahnirūpā ca madhyamā ca śucismite ! |

aparṇā ca maheśāni tathā vāmā mahodarī || 23 ||

ghorarūpā mahākālī tathā caiva bhayaṅkarī |

kṣemaṅkarī ca deviśi ! maṇipūre sthitā sadā || 24 ||

ugracaṇḍā ca deveśi tathā caṇḍāvatī priye |

caṇḍā caiva pracaṇḍā ca caṇḍanāyakasevitā || 25 ||

caṇḍikā caiva deveśi ! svādhiṣṭhāne sthitā sadā |

mahādevī maheśāni tathaiva moharupiṇī || 26 ||

tathā priyaṅkarī caiva tathā caiva sanātanī |

etāstu parameśāni mūlādhāre sthitāḥ sadā || 27 ||

phalavikariṇīrūpā balapramathinī tathā |

akṣaraṃ yugalaṃ devi ājñācakre sthitā sadā || 28 ||

asyāstu parameśāni viśeṣaṃ śṛṇu pārvati |

etajjñānaṃ maheśāni sadāśivavyavasthitam || 29 ||

asya jñānaprabhāveṇa saṃharāmi jagat trayam |

sthitikartā bhaved viṣṇurbrahmā sṛṣṭikaraṃ sadā || 30 ||

yasya yasya ca deveśi ! yad bījaṃ pūrvasūcitam |

tadbīje puṭitaṃ kṛtvā devānāṃ japamācaret || 31 ||

bhūtaśuddhistadā devi ! siddho bhavati pārvati |

anyathā pretavacchuddhirjāyate kamalekṣaṇe || 32 ||

pañcāśanmātṛṇāṃ devi ṣaṭcakre kramato japet |

ṣaṭcakre parameśāni ! yatnato japamācaret || 33 ||

tadaiva mahatī siddhiḥ sādhakasyāṣi jāyate |

kalāvṛkṣe samo bhūtvā sādhakaḥ khecaro bhavet || 34 ||

aṇimādiguṇādhāraṃ tathā bhavati sādhakaḥ |

aṇimā sūkṣmarūpaṃ ca laghimā sthūlarūpakam || 35 ||

sarvaiśvaryapadaprāptiṃ prāptiṃ paramamucyate |

manaḥkleśakaraṃ caiva prākāśyaṃ kamalānane || 36 ||

mahimā sarvalokeṣu gīyate kamalānane |

tadaiva mahimā devi ! mama jñāneṣu vartate || 37 ||

brahmāṇḍavyāpakaṃ rūpaṃ īśitvaṃ ca prakīrtitam |

brahmāṇḍavaśarūpaṃ ca vaśitvaṃ kathitaṃ priye ! || 38 ||

kandarpadhvaṃsajananametat kāmavaśāyitā |

aṇimādiguṇaṃ devi ! tava bhaktyā prakāśitam || 39 ||

na kasmaicit pravaktavyaṃ tava yoniṃ yathā priye |

śṛṇu devi pravakṣyāmi bhūtaśuddhestu kāraṇam || 40 ||

-------maheśāni ! aṣṭottaraśataṃ japet |

tāraṃ vyomāgni guṇḍī tathā jyotirmanuḥ smṛtaḥ |

etajjñānaprabhāveṇa bhūtaśuddheḥ phalaṃ bhavet || 41 ||


|| iti śrībhūtaśuddhitantre harapārvatīsaṃvāde pañcamaḥ paṭalaḥ || 5 ||

atha ṣaṣṭhaḥ paṭalaḥ

śrī-īśvara uvāca


śṛṇu jñānaṃ maheśāni ! viśeṣaṃ kathayāmi te |

yajjñātvā parameśāni śivo'haṃ mṛtyunāśakaḥ || 1 ||

yajjñātvā parameśāni ! brahmā sṛṣṭikaraḥ sadā |

yajjñātvā viṣṇudevaśca sthitikartā śucismite || 2 ||

yajñātvā tu maheśāni ! nāśako'haṃ maheśvari |

candraḥ sūryo maheśāni yajjñātvā parameśvari || 3 ||

prakāśaṃ kurute viśvaṃ brahmāṇḍaṃ sacarācaram |

avyaktarūpiṇīṃ ramyāṃ yogagamyāṃ sadā priye || 4 ||

sadā śarīramāśritya vasate kāmarūpiṇī |

śarīraṃ dvividhaṃ devi ! sthūlaṃ sūkṣmaṃ śucismite || 5 ||

māṃsāsthilomaraktāni medo majjā varānane ! |

viṇmūtrasthe haraṃ caiva vātapitte tu saṅgatam || 6 ||

etat sthūlamayaṃ devi sūkṣmaṃ ca kathayāmi te |

iḍā vāme sthitā nāḍī śuklā tu candrarūpiṇī || 7 ||

dakṣiṇe piṅgalā nāmnī puṃrūpā sūryavigrahā |

tanmadhye parameśāni ! suṣumnā brahmarūpiṇī || 8 ||

vāmāvartakrameṇaiva veṣṭanaṃ viṣatantuvat |

mūlādibrahmarandhrāntaṃ vyāpya tiṣṭhati sarvadā || 9 ||

icchājñānakriyārūpā trināḍī sarvatantuṣu |

tisraḥ koṭyaḥ sahasraṃ tu śarīre nāḍyo matāḥ || 10 ||

tāsu mukhyā daśa proktā tāsu tisro vyavasthitāḥ |

vāmanāḍyāṃ maheśāni ! vāyubījena pūrayet || 11 ||

vāyuṃ ṣoḍśadhā japtvā pūrayed vāmavartani |

maṇipūre maheśāni catuḥṣaṣṭhī ca dhārayet || 12 ||

recayet kumbhakārdhena dakṣanāḍyāṃ śucismite |

vahnibījaṃ maheśāni ! hṛtpadme pūrvavat priye || 13 ||

saṃśodhya vāyubījena vahnibījena sandahet |

lalāṭe vāruṇaṃ bījaṃ śuklaṃ sañcintya sundari || 14 ||

kumbhakārdhaṃ japitvā vai recayed dakṣiṇe pathe |

evaṃ dvādaśadhā devi bhūtaśuddhiṃ samācaret || 15 ||

bṛhacchuddhiṃ maheśāni pañcabhūtasya pārvati ! |

pūrvoktaṃ parameśāni sāmānyaṃ śuddhimeva ca || 16 ||

dehasya parameśāni bhūtaśuddhiritīritā |

dehasya sūkṣmarūpasya bhūtaśuddhiriyaṃ priye || 17 ||

manasaḥ parameśāni ! unmanīsahitā yadi |

jīvena saha deveśi suṣumnāyāṃ nimajjayet || 18 ||

dhyānadhāraṇayogena brahma sākṣānna saṃśayaḥ |

prajapet parayā bhaktyā mālayā varṇasaṅkhyayā || 19 ||

muhūrtaṃ bhāvayed vidyāṃ manonmanīyutā priye |

manonmanīyute jīvaḥ brahmarandhre ca saṃjapet || 20 ||

tato brahmanadīṃ prāpya snānaṃ kṛtvā varānane ! |

jīvaḥ śuddho bhaved devi gaṇaiḥ parikaraiḥ saha || 21 ||

jīvasya parameśāni parivāraṃ śṛṇu priye |

akṣiṇī nāsike karṇau jihvā ca kamalekṣaṇe || 22 ||

hastapādau maheśāni guhyopasthau kramāt priye |

nābhiṃ ca parameśāni ! manaśca parameśvari || 23 ||

sarveṣāmindriyāṇāṃ ca manaḥ sarvatra sārathiḥ |

manaśca parameśāni ! unmanī bhavanāśinī || 24 ||

unmanī sārathirdevi daśā tu nirguṇāḥ priye |

jāgratsvapnasuṣuptyavasthā etad devi trayaṃ smṛtam || 25 ||

tataḥ paraṃ maheśāni tu [sū] ryāvasthā vidhīyate |

indriyāṇāṃ tu sarveṣāṃ manaḥ paramasārathiḥ || 26 ||

sadasatkarmakartṛtvājjīvasya sārathirmanaḥ |

svakarma bhajate devi ! unmanī satataṃ priye || 27 ||

asatkarma maheśāni pāpayogāt prajāyate |

rodanaṃ mohamūrcche ca kṣudhā tṛṣṇā śucismite || 28 ||

puruṣāt pāpamu[syo]tpattirjāyate kamalekṣaṇe |

jobo nityo'vyayaḥ sūkṣmaḥ sarvagaḥ sarvavit paraḥ || 29 ||

yathā brahma tathā jīvaḥ pradīpakalikā iva |

pradīpakalikākāraḥ sarvaḥ prāpya vijṛmbhate || 30 ||

manasā parameśāni dhyātvā nāḍīṃ parāṃ śivām |

koṭisūryapratīkāśāṃ svarṇadīṃ pāpanāśinīm || 31 ||

tanmadhye parameśāni suṣumnāṃ bhuvi tatparām |

sākṣād brahmahradākārāṃ nānāsukhavihāriṇīm || 32 ||

sukhasevyāṃ sadārādhyāṃ sākṣād brahmasvarūpiṇīm |

jñānavijñānasaṃyuktāṃ cidākārāṃ sanātanīm || 33 ||

paraṃ brahma maheśāni yasyāḥ pālaṅkamicchati |

vāmapārśve sthitāṃ nityāṃ brahmarūpāṃ taḍinmayīm || 34 ||

dakṣiṇe piṅgalāṃ devīṃ puṃrūpāṃ sūryasannibhām |

tanmadhyasthāṃ maheśāni amṛtabhavapūritām || 35 ||

vicitrāṃ paramāṃ sūkṣmāṃ mahāmokṣapradāyinīm |

vāmanāḍī maheśāni suptirūpā puraḥsthitā || 36 ||

svapnantu parameśāni turīyā parigīyate |

---------------dakṣiṇe piṅgalāśritā || 37 ||

suṣumnā parameśāni jāgadrūpā sanātanī |

vicitrā parameśāni turīyā parigīyate || 38 ||

citrā madhyagatā bhūtvā jīvaḥ śuddhamanā bhavet |

śuddhaḥ sattvātmako jīva iṣṭadevīṃ hṛdi nyaset || 39 ||

hṛdi dhyātvā maheśāni jīvo brahmaparaṃ bhavet |

vāratrayaṃ maheśāni yātāyātaṃ karoti hi || 40 ||

etadrahasyaṃ paramaṃ brahmaloke sudurlabham |

na kasmaicit pravaktavyaṃ paśave kamalekṣaṇe || 41 ||

etat prakāśanāddevi hāniḥ syāduttarottaram |

etattatvaṃ maheśāni hṛdaye kuru yatnataḥ || 42 ||

etattatvaṃ maheśāni brahma jānāti keśavaḥ |

etattattvaṃ vinā devi mantrasiddhirna jāyate |

etattattvaṃ maheśāni brahmaviṣṇuśivātmakam || 43 ||

|| iti śrībhūtaśuddhitantre haragaurīsaṃvāde ṣaṣṭhaḥ paṭalaḥ || 6 ||

atha saptamaḥ paṭalaḥ


śrīdevī uvāca


bhūtaśuddhermaheśāna rahasyaṃ paramādbhutam |

anyad vada maheśāna yadyahaṃ tava vallabhā || 1 ||

yadi na kathyate deva vimuñcāmi tadā tanum |

śūlapāṇe mahādeva kṛpayā kathaya prabho || 2 ||

gaṇasundara deveśa hṛdayānmama sāmpratam |

rahasyaṃ na hi deveśi sampuṭaṃ hṛdaye mama |

tava snehānmaheśāni nigadāmi punaḥ punaḥ || 3 ||

hṛdaye sampuṭe devi brahmarandhre ca varttate |

yāni yānīha tiṣṭhanti rahasyaṃ kamalekṣaṇe || 4 ||

sadā mayi maheśāni gauravaṃ vihitaḥ priye |

trayodaśātmakaṃ [devi] bindvarddhacandrasaṃyutam || 5 ||

kuru brahmaviṣṇuśivātmakaṃ praṇavaṃ triguṇānvitaṃ tattvasukham |

brahmasthānaṃ sadā sevyamānaṃ parameśvari || 6 ||

------------------------brahmā viṣṇuśivopari sthitam |

arddhayoniṃ tadupari binduṃ nirvikāraṃ nirīham || 6 ||

jyotirmayī sadā saṃsevyamānaṃ brahmādibhiryā mūrdhni dhatte parameśvari |

taṃ binduṃ sadā bhāvaya pārvati || 7 ||

nānyathā vacanaṃ mama hṛdi saṃsthitaṃ nirañjanaṃ puraṃ bindum |

binduṃ bhāvaya deveśi kiṃ japena śucismite || 8 ||


śrī-īśvara uvāca


iti sañcintya hṛdaye sarvaṃ pūjāphalaṃ labhet |

pūjābhāve maheśāni hṛdaye cintayet śivām || 9 ||

sarvapūjāphalaṃ devi prāpnoti pūjakaḥ priye |

kiṃ tasya dhyānapūjāyāṃ binduṃ bhāvaya pārvati || 10 ||

sarveṣāmindriyāṇāñca tattvānāñca śucismite |

jīvonmanī ca deveśi sarvāṇi brahma kāraṇam || 11 ||

yāni yānīha deveśi indriyāṇīha pārvati |

tāni sarvāṇi deveśi prakṛteḥ paramaṃ vapuḥ || 11 ||

brahmaṇaḥ kāraṇaṃ devi sadā prakṛtirūpiṇī |

prakṛtiḥ parameśāni brahmaṇo'vyaktamavyayam || 12 ||

svastyarthe parameśāni bhinnatāṃ satataṃ gatā |

śaktiṃ vinā maheśāni brahma vai śavarūpavat || 13 ||

nirañjanaṃ nirākāraṃ sadā paśyanti yoginaḥ |

prakṛtyā saha saṃyogaṃ sadā yāti nirañjanaḥ || 14 ||

sṛṣṭikartā sadā nityaṃ jāyate kamalānane |

ata eva maheśāni śaktiprādhānyamucyate || 15 ||

anantāḥ śaktayaḥ proktā vyāpya te sacarācaram |

śaktiṃ binā maheśāni brahmāṇḍaṃ śavarūpavat || 16 ||

yā śaktiḥ parameśāni muktistu parigīyate |

sā strīrūpā mahādevi hetubhūtā sanātanī || 17 ||

yatkiñcit kriyate kāryaṃ sarvaṃ tejasi līyate |


śrī-īśvara uvāca


śṛṇu vakṣyāmi deveśi rahasyaṃ paramādbhutam |

sārātsārataraṃ ramyaṃ ātmamadhyasthitaṃ sadā || 18 ||

tato jīvo maheśāni dhyāyet paramasundarīm |

śivasya yuvatīṃ bhadrāṃ koṭikandarpasaṃyutām || 19 ||

tasyā kaṭākṣamātreṇa brahmādyā jaḍavat priye |

tantroktavidhinā devi dhyāyet paramasundarīm || 20 ||

iṣṭavidyāṃ maheśāni aṣṭottaraśataṃ japet |

mūlādibrahmarandhrāntaṃ nadīṃ brahmasvarūpiṇīm || 21 ||

tatra nadyāṃ maheśāni snāto jīvaḥ sadā śuciḥ |

vāyuṃ vahniṃ tadā devi varuṇaṃ tadanantaram || 22 ||

bindvarddhasaṃyutaṃ kṛtvā sadā manasi bhāvayet |

bhūtaśuddhirmaheśāni tatkṣaṇādapi jāyate || 23 ||

tato jīvaḥ prasannātmā sūkṣmaśuddhimavāpnuyāt |

indriyāṇāñca sarveṣāṃ sarvatattvaṃ śucismite || 24 ||

tāni sarvāṇi sūkṣmāṇi prakṛtisthā sadā śive |

śarīraṃ dvividhaṃ devi sthūlaṃ sūkṣmamidaṃ smṛtam || 25 ||

sūkṣmañca prakṛte rūpaṃ sthūlañca parameśvari |

sūkṣmaṃ saṃśodhya vidhivat sthūlañca tadanantaram || 26 ||

śṛṇu kamalapatrākṣi bhāvayediṣṭadevatām |

jīvañca parameśāni brahmanadyāṃ śucismite || 27 ||

snānaṃ hi vidhivat kṛtvā sadā śivapuraṃ vrajet |

tato jīvo maheśāni vāmanāsāpuṭe priye || 28 ||

viśuddhāṃ paramāṃ sukṣmāṃ viṣatantutanīyasīm |

samānīya vahnirūpaṃ sākṣāt paramasundarīm || 29 ||

sadā śivapure bhadre bhāvayet paradevatām |

tatra gatvā maheśāni bhāvayediṣṭadevatām || 30 ||

tantroktavidhinā devi dhyātvāmṛtamayīṃ śivām |

sadā ṣoḍaśavarṣīyāṃ navayauvanasaṃyutām || 31 ||

pūrṇacandranibhāṃ raktāṃ sadā cañcalalocanām |

śuklakṛṣṇāruṇayutāṃ pītāṃ nīlasamāvṛtām || 32 ||

nānāratnayutāṃ ramyāṃ pādau nūpuraśobhitām |

kiṅkiṇī ca tathā kaṭyāṃ ratnakāñcanamaṇḍitām || 33 ||

yoginīkoṭibhiryuktāṃ nānāsukhavihāriṇīm |

kandarpakoṭilāvaṇyāṃ sadāmṛtavivarddhinīm || 34 ||

praphullacañcalāpāṅgi prabodhya paramaṃ śivam |

mukhāravindagandhenāmoditaṃ paramaṃ śivam || 35 ||

prabodhya parameśāni tatropa(copa)viśet priye |

śaktisaṃyogamātreṇa sāratvaṃ tasya naśyati |

śivaśaktisamāyogādānandaṃ jāyate drutam || 36 ||

|| iti śrībhūtaśuddhitantre haragaurīsaṃvāde saptamaḥ paṭalaḥ || 7 ||

atha athāṣṭamaḥ paṭalaḥ

śrī-īśvara uvāca


etasmin samaye devi svavidyāṃ prajapet sudhīḥ |

aṣṭottaraśataṃ japtvā siddho bhavati nānyathā || 1 ||

manaḥsārathinā jīvaḥ unmanī manasārathiḥ |

tasmin kṣaṇe maheśāni puruṣaṃ pāparupiṇam || 2 ||

sakhāvat manasā devi jīvo brahmapuraṃ yadā |

pāpasya gamanaṃ nāsti sadāśivapuraṃ priye || 3 ||

sadāśivapuraṃ devi sarvaśaktimayaṃ smṛtam |

ṣaṭcakre parameśāni kṣaṇaṃ dhyātvā japenmanum || 4 ||

tadanu parameśāni praticakreṣu saṃjapet |

ṣaṭcakraṃ paramaṃ divyaṃ sadā śivapurīsamam || 5 ||

ṣaṭcakre parameśāni ṣaṭśaktirvidyate nṛṇām |

muhūrtābhyantare devi yātāyātaṃ karoti yaḥ || 6 ||

sa śivaḥ sa ca viṣṇuśca sa siddhaḥ parameśvari |

yaḥ karoti prasannātmā suṣumnāmadhyavartini || 7 ||

yo japet parayā bhaktyā svavidyāṃ kamalekṣaṇe |

ekoccāreṇa girije koṭipūjāphalaṃ labhet || 8 ||

kiṃ tasya bāhyapūjāyāṃ sarvaṃ vyarthaṃ kadarthanam |

mānasoccāraṇād devi japāt siddhiḥ prajāyate || 9 ||

manasā dhyānamātreṇa sarvasiddhirna saṃśayaḥ |

antaḥpūjā maheśāni bāhyakoṭisamaṃ smṛtam || 10 ||

pūjā hi parameśāni dvividhaṃ kamalānane |

antaḥ sūkṣmaṃ bahiḥ sthūlaṃ sarvāgamamataṃ priye || 11 ||

ekaṃ hi sūkṣmapūjāyāṃ koṭisthūlaṃ bhavet priye |

na śuddhiṃ parameśāni vastrādīni śucismite || 12 ||

sarvāsu bāhyapūjāsu antaḥpūjā vidhīyate |

antaḥpūjā maheśāni tejaḥpuñjasya bhāvanam || 13 ||

tejaḥpuñjaṃ maheśāni anantaśaktisaṃyutam |

sūkṣmadehe maheśāni sūkṣmapūjā vidhīyate || 14 ||

sthūlapūjā sthūladehe pūjādvayamihocyate |

sukṣmā tu paramā pūjā sākṣāt prakṛtirūpiṇī || 15 ||

yā pūjā parameśāni strīrūpā śaktirūpiṇī |

brahmaviṣṇuśivādīnāṃ sā pūjā iṣṭadevatā || 16 ||

viṣṇuṃ vā pūjayed yastu śivaṃ vā kamalekṣaṇe |

sarvaṃ hi parameśāni paratejasi līyate || 17 || 

yāni yāni maheśāni naivedyaṃ dīpamuttamam |

sarvaṃ tadakṣayaṃ yāti paratejasi arpaṇāt || 18 ||

niścayaṃ paramaṃ brahma kutaḥ prītiḥ kutaḥ sukham |

nirākāraṃ nirīhañca rahitamindriyeṇa ca || 19 ||

sarvaṃ hi parameśāni vyāpya tiṣṭhati mohinī |

yad yat karmakṛtaṃ puṇyaṃ tattadakṣayamāpnuyāt || 20 ||

brahmarūpaṃ maheśāni śaktiśca niścayaṃ priye |

tasya pūjā maheśāni kadācinnāsti pārvati || 21 ||

ata eva maheśāni brahmaṇaḥ śaktikāraṇam |

kāryañca parameśāni śaktiśca satataṃ priye || 22 ||

ataḥ paraṃ maheśāni na kāryakāraṇaṃ priye |

yastu satataṃ devi īśvare niścalaḥ sadā || 23 ||

śaktiyuktaṃ japed devaṃ īśvaraṃ satataṃ priye |

ata eva maheśāni brahmaśaktiḥ parā sadā || 24 ||

śaktyā binā maheśāni na hi muktiḥ prajāyate |

tasmācchaktiśca muktiśca strīrūpī śaktirūpiṇī || 25 ||

bhaktyā binā maheśāni na hi muktiḥ prajāyate |

muktestu kāraṇaṃ devi bhaktiḥ paramadurlabhā || 26 ||

atastrayaṃ maheśāni strīmayaṃ sacarācaram |


śrī-īśvara uvāca


ṣaṭcakrāṇāṃ maheśāni kramād vakṣyāmi śodhanam |

mūlādhārasthitaṃ bhūmiṃ svādhiṣṭhānasvarūpakam || 27 ||

maṇipūre jalaṃ devi tataśca marutaṃ tathā |

viśuddhau ca maheśāni ākāśaṃ kamalānane || 28 ||

ājñācakre maheśāni manaḥ sarvārthasādhakam |

tadūrdhve parameśāni padmamūrdhvamukhaṃ tathā || 29 ||

śaktipuraṃ maheśāni sadāśivapuropari |

sadāśivapuraṃ prāpya śuddhasphaṭikasannibham || 30 ||

sahasrādityasaṅkāśaṃ mahākālena saṅgatam |

mahānandigaṇākīrṇaṃ manasā bhāvayet sadā || 31 ||

|| iti śrībhūtaśuddhitantre harapārvatīsaṃvāde aṣṭamaḥ paṭalaḥ ||

atha navamaḥ paṭalaḥ


śrī-īśvara uvāca


evaṃ hi manasā jīvaṃ dṛṣṭvā hi paramaṃ śivam |

ānandapulakodbhūte jīvo bhavati sundari || 1 ||

sadāśivaṃ maheśāni śuddhasphaṭikasannibham |

bahuratnasamākīrṇaṃ dīrghabāhuṃ manoharam || 2 ||

sukhaprasannavadanaṃ svairāpyaṃ satataṃ priye |

śravaṇe kuṇḍalopete ratnahāreṇa śobhitam || 3 ||

golapadmasahasreṇa mālayā śobhitaṃ vapuḥ |

aṣṭabāhu/ trinayanaṃ śivaṃ padmadalekṣaṇam || 4 ||

pādayornūpuraṃ ramyaṃ śabdañca śabdabrahmavat |

evaṃ sthūlavapustasya bhāvayet kamalānane || 5 ||

śirasopari deveśi bhāvayejjīvaśataṃ śivam |

sūkṣmantu paramaṃ divyaṃ nirīhaṃ jaḍavat sadā || 6 ||

sūkṣme dhyānaṃ maheśāni kadācinna hi jāyate |

sthūladhyānaṃ maheśāni kṛtvā mokṣamavāpnuyāt || 7 ||

sthūlaṃ hi prakṛte rūpaṃ dhyānañca prakṛteḥ priye |

ādau sthūlatanuṃ devi sampūjya kamalānane || 8 ||

tatastu parameśāni paratejaśca bhāvayet |

tejaśca parameśāni prakṛtirmohinīti ca || 9 ||

prādhānyaṃ parameśāni prakṛteḥ śivapūjane |

tasmāt sarvāsu pūjsāsu śaktiḥ prādhānyamucyate || 10 ||

yadā tu parameśāni hṛdaye cintayeddharim |

dhyānaṃ kṛtvā sūkṣmatanoḥ sthūlaṃ vinyasya tatra vai || 11 ||

tataḥ sthūlatanuṃ dhyātvā hariṃ padmadalekṣaṇam |

śyāmalaṃ pītavāsañca vanamālāvibhūṣitam || 12 ||

kirīṭinaṃ kuṇḍalinaṃ prasannamukhapaṅkajam |

śrīvatsaśobhitaṃ vakṣo ratnahāreṇa śobhitam || 13 ||

kaustubhodbhāsi varadaṃ dīrghabāhumarindamam |

prasannanetrakamalaṃ caraṇe nūpuraṃ priye || 14 ||

veṇuvīṇāninādena śabdabrahmeṇa sundari |

pūrayantaṃ jagad devi satataṃ kamalānane || 15 ||


śrī-īśvara uvāca


hareḥ sūkṣmaṃ maheśāni vibhāvya dhyānamācaret |

sūkṣmaṃ hi niścalaṃ dehaṃ sūkṣmā prakṛtirūpiṇī || 16 ||

tathāpi haripūjāyāṃ śaktiprādhānyamucyate |

yattu dhyānaṃ dhāraṇañca samādhiśca śucismite || 17 ||

sarvaṃ hi prakṛte rūpaṃ nānyathā vacanaṃ mama |

dhyānañca parameśāni sarvāṅgacintanaṃ priye || 18 ||

tadanu parameśāni ekāṅgacintanaṃ priye |

idantu dhāraṇākhyātaṃ śṛṇu pārvati sādaram || 19 ||

dhyāñca dhāraṇaṃ devi tyaktvā yadbhāvayet hṛdi |

eṣā samādhirvijñeyo nātra kāryā vicāraṇā || 20 ||

dhyānañca dhāraṇañcaiva samādhiśca śucismite |

mayoktaṃ yat tad deveśi sarvaṃ śaktimayaṃ smṛtam || 21 ||

sūkṣmaṃ sthūlaṃ maheśāni tathā śaktidvayaṃ priye |


śrīdevyuvāca


devadeva mahādeva ṣaṭcakre parameśvara |

yathā pūjāṃ yathā dhyānaṃ kṛtvā japaṃ samācaret || 22 ||

rahasyaṃ paramaṃ guhyaṃ mama harṣavivarddhanam |

kṛpayā kathaya me nātha tavāhaṃ paricārikā || 23 ||


śrī-īśvara uvāca


deveśi tava dāso'haṃ kathayāmi śucismite |

kṣaṇārddhaṃ na hi jīvāmi tvāṃ vinā kamalekṣaṇe || 24 ||

tvadvaktrāmbujapānena amṛtena śucismite |

śivo'haṃ parameśāni mṛtyuṃ jitvā varānane || 25 ||

śṛṅgārarasasaṃyogāt kālakūṭaṃ pibāmyaham |

mamāpi parameśāni tanuvajrasamaṃ sadā || 26 ||

deveśi tava dāsoha'mantarbāhye śucismite |

antare tvāṃ maheśāni vibhāvya sūkṣmarūpiṇī || 27 ||

bhāvanāt parameśāni lakṣavarṣo gato mama |

bāhyajñānaṃ mayā devi jāyate mama yoginī || 28 ||

mayi ca parameśāni tvameva sūkṣmarūpiṇī |

dṛṣṭvā taccaraṇadvandvaṃ tava vaktraṃ varānane || 29 ||

ātmajñānaṃ parityajya caraṇe patito hyaham |

prakārācca maheśāni śṛṇu samprati madvacaḥ || 30 ||

yaduktaṃ bhūtaśuddhyādi sarvaṃ tvaṃ naganandini |

sadyogatvaṃ maheśāni svāgamaṃ kathayāmi te || 31 ||

sghāgamaṃ paramaṃ jñānaṃ cakṣuḥ prajñānasaṃyutam |

vijñānena mataṃ devi devamātarameva ca || 32 ||

vedāśca parameśāni yāni yāni yathā tathā |

darśanāni tathā devi sakalāni pṛthak pṛthak || 33 ||

caturdaśāni tantrāṇi tathā nānāvidhāni ca |

svāgamāśca prasūyante satataṃ parameśvari || 34 ||

mama prāṇasamaṃ devi svāgamaṃ mama sampuṭam |

hṛdaye mama deveśi saṃsthitaṃ kamalānane || 35 ||

yasmin kṣaṇe maheśāni antardhyātvā haro hyaham |

svāgamaṃ bhāvitaṃ devi tatkṣaṇe parameśvari || 36 ||

antardhyānaṃ hṛtaṃ devi svāgamaṃ hṛdaye sthitam |

antardhyānaṃ samāhṛtya bāhyadṛṣṭiṃ sadā mama || 37 ||

tadāhaṃ sahasā devi kathayāmi tavāgrataḥ |

vibhāvya parameśāni svāgamaṃ hṛdayātmani || 38 ||

anyathā parameśāni svāgamaṃ kathayāmi te |

svāgamaṃ lakṣagranthaṃ hi nānā vidyā śucismite || 39 ||

maheṣu parameśāni nirmitaṃ brahmarūpiṇam |

svāgamaṃ paramaṃ puṇyaṃ brahmāṇḍabījamavyam || 40 ||

svāgamaṃ śṛṇu vakṣyāmi girijā ca trilocane |

nānāśāstre ca vidyāsu svāgamastu praśasyate || 41 ||

svāgamaṃ paramāṃ vidyāṃ nānātantravinirmitām |

śive viṣṇau maheśāni sūrye ca naganandini || 42 ||

tathā ca sarvadeveṣu vanhyādiṣu śucismite |

tathā ca sarvaśāstreṣu śakteḥ prādhānyamucyate |

śaṅkhāva(saṃkhyayaiva)kramāddevi śaktiḥ sarvatra gīyate || 43 ||

|| iti śrībhūtaśuddhitantre harapārvatīsaṃvāde navamaḥ paṭalaḥ || 9 ||


atha daśamaḥ paṭalaḥ


śrī-īśvara uvāca


vanamālādikaṃ devi viṣṇormataṃ śucismite |

tatsarvaṃ parameśāni śaktirūpaṃ na cānyathā || 1 ||

sahasrāre śaktipure bhāvayet parameśvari |

jīvasya brahmaṇaścāpi ekatāṃ yatnataścaret || 2 ||

tato dhyānaṃ prakurvīta svāgame rūḍhitañca yat |

japañca parameśāni manasā ca samācaret || 3 ||

japet samāhito bhūtvā mālayā varṇasaṅkhyayā |

tata ājñāpurīṃ nītvā bhāvayediṣṭadevatām || 4 ||

dhyātvā japtvā ca deveśi sākṣāt suragururbhavet |

viśuddhaṃ prati deveśi lambayenmano vidyayā || 5 ||

viśuddhaṃ paramaṃ padmaṃ ṣaṭcakraṃ tattu gamyate |

ṣaṭcakre parameśāni dhyātvā jaganmayīṃ śivām || 6 ||

taḍitkoṭiprabhāṃ tanvīṃ brahmāṇḍarūpiṇīṃ śivām |

nirīhāṃ niścalāṃ ramyāṃ mahāyogamayīṃ parām || 7 ||

mohinīṃ sarvadevānāṃ ānandārthiyutāṃ parām |

viṣatantumayīṃ devīṃ sākṣādamṛtarūpiṇīm || 8 ||

śivasya yuvatīṃ yogyāṃ vibhāvya śuddhavartini |

manasā parameśāni japedaṣṭaśataṃ priye || 9 ||

hṛtpadmaṃ prati deveśi na svapet paramāṃ parām |

śuddhadhyānañca varṇānāṃ yogapadmasthitāṃ parām || 10 ||

yogapadme maheśāni jīvo manasi bhāvayet |

bhujaṅgarūpiṇīṃ devīṃ nityāṃ kuṇḍalinīṃ parām || 11 ||

avyaktarūpiṇīṃ ramyāṃ dhyānagamyāṃ varānane |

yogapathe maheśāni japedaṣṭaśataṃ punaḥ || 12 ||

na svapejjīvamanasā maṇipūraṃ prati priye |

bhujaṅgabhṛṅgasaṅkāśaṃ maṇipūraṃ mahāprabham || 13 ||

tatrasthaśivaliṅgena yojayet kuṇḍalīṃ parām |

tato jīvo maheśāni tatkṣaṇād brahmacāpnuyāt || 14 ||

tatastu parameśāni jīvastu manasā vṛtaḥ |

dhyātvā brahmamayīṃ śuddhāṃ japedaṣṭaśataṃ priye || 15 ||

tadanu parameśāni svādhiṣṭhānaṃ layet parām |

svādhiṣṭhānaṃ maheśāni śuddhasphaṭikasannibham || 16 ||

bhāvayet tatra deveśaṃ śaṅkhakundasamaprabham |

saṃyojya paramāṃ divyāṃ śivena saha pārvati || 17 ||

sarvaṃ hi parameśāni manasā kuru yatnataḥ |

indriyāṇāṃ pradhānaṃ hi manaḥ sarvatra gīyate || 18 ||

tatra devaṃ śivaṃ śāntaṃ vicintya manasā kṣaṇāt |

paraṃ brahmamayaṃ bhūtvā japedaṣṭaśataṃ tathā || 19 ||

tadanu parameśāni mūlādhārāt vrajet param |

gudapadmaṃ maheśāni mūlādhāraṃ prakīrtitam || 20 ||

caturdalayutaṃ ramyaṃ taruṇāruṇavigraham |

bhāvayet parameśānaṃ sindhuvaruṇavigraham || 21 ||

saṃyojya paramāṃ nityāṃ niṣphalāṃ jñānarūpiṇīm |

śivasaṃyogamātreṇa jīvo brahmamayo bhavet ||

manasā saṃyuto bhūtvā japedaṣṭaśataṃ tathā || 22 ||

|| iti śrībhūtaśuddhitantre haragaurīsaṃvāde daśamaḥ paṭalaḥ || 10 ||

atha ekādaśaḥ paṭalaḥ

śrī-īśvara uvāca


evaṃ dvādaśadhā devi yatāyātaḥ karoti yaḥ |

sa siddhaḥ sa gamaḥ so'pi mama tulyaḥ sadā priye || 1 ||

vacomātreṇa deveśi tasya vidyā hi siddhaye |

saptānāṃ koṭividyānāṃ mantrāṇāñca varānane || 2 ||

siddhamādhyādikaṃ devi atiguhyataraṃ priye |

aprakāśyamidaṃ tattvaṃ paśorgopyaṃ sadā priye || 3 ||

hṛdaye mama deveśi ajapā sampuṭe sthitam |

sarvāsāṃ naranārīṇāṃ sampuṭaṃ haṃsapakṣiṇam || 4 ||

niḥsaranti maheśāni vidyāmantrāṇi pārvati |

śaktiprasādād deveśi lakṣavarṣaṃ gatastadā || 5 ||

lakṣavarṣaṃ maheśāni bhāvayāmi śucismite |

sampuṭe paramāṃ vidyāṃ sarvavidyāsvarūpiṇīm || 6 ||

puṃrūpāṃ prakṛtirūpāṃ candrasūryasamaprabhām |

vedamātāṃ sadā vandhyāṃ yoginīṃ yogarūpiṇīm || 7 ||

saṃsāratāriṇīṃ devīṃ mahāmokṣapradāyinīm |

praṇamāmi sadā śuddhāṃ nityāṃ vigraharūpiṇīm || 8 ||

praṇamya paramāṃ divyāṃ nigadāmi śucismite |


īśvara uvāca


kāñcanākhyaṃ samuddhṛtya romañca tadanantaram |

sarihariṃ samuddhṛtya tadanu kāñcanaṃ priye || 9 ||

bindvarddhasaṃyutaṃ kṛtvā ṣaṭpadme japamācaret |

aṣṭottaraśataṃ japtvā ṣaṭpadme kamalekṣaṇe || 10 ||

daśadhā prajaped vāpi bhūtaśuddhiphalaṃ labhet |

ekadhā tu samuddhṛtya bhūtaśuddhiṃ samācaret || 11 ||

bhūtaśuddhiṃ maheśāni tadā sāṅgaṃ bhavet priye |

anyathā viphalā pūjā japañca viphalaṃ priye || 12 ||

yugākṣaraṃ japed devi caturyugaphalaṃ labhet |

caturyugajapāddevi yatphalaṃ labhate nṛṇām || 13 ||

tatphalaṃ samavāpnoti ekoccāreṇa pārvati |

ekoccāreṇa deveśi mama toṣo na saṃśayaḥ || 14 ||

sampuṭaṃ parameśāni nityāṃ sarvasvarūpiṇīm |

vibhāvya satataṃ devi ṣaṭcakraṃ satataṃ śive || 15 ||

ekāmupāsya deveśi mahāvidyāmupāsmahe |

anyathā parameśāni mahāvidyāṃ varānane || 16 ||

tadanu parameśāni mahāvidyāmupāsmahe |

anyathā parameśāni pretavat sakalaṃ bhavet || 17 ||


śrī-īśvara uvāca


anyatantraṃ maheśāni nigadāmi punaḥ priye |

tantraṃ tantrasya vakṣyāmi bhūtaśuddhiṃ bhaved yathā || 18 ||

pāpasya kāraṇaṃ devi puruṣaṃ pāpasaṃyutam |

krodhamohayutaṃ kṛṣṇaṃ īṣatpiṅgaṃ varānane || 19 ||

tasya śuddhiṃ pravakṣyāmi nīrajāyatalocane |

pañcānāmapi vāyūnāṃ śuddhiṃ nāsti varānane || 20 ||

svabhāvataḥ sadā śuddhiṃ pañcabhūtātmakaṃ vapuḥ |

rodanañca tathāmūrcchāṃ bhramañca kamalānane || 21 ||

puruṣāt pāparūpācca jāyate kamalānane |

bhūtaśuddhestu mantrāṇi nigadāmi śṛṇu priye || 22 ||

praṇavaṃ trividhaṃ devi vāmā jyeṣṭhā ca pārvati |

tato raudrī maheśāni triprakāraṃ varānane || 23 ||

ādyante praṇavaṃ dattvā pañcāśanmātṛkāṃ japet |

bindvarddhasaṃyutaṃ kṛtvā vidyāṃ bhava vimocinīm || 24 ||

mātā hi mantravidyānāṃ pitā caiva śucismite |

sarvāsāṃ mantravidyānāṃ pitā mātā ca mātṛkā || 25 ||

pitā mātā ca santuṣya anyakrodho nirarthakaḥ |

purātanīmavijñāya bhūtaśuddhiṃ karoti yaḥ || 26 ||

viphalaṃ tasya deveśi bhūtaśuddhiṃ varānane |

bhūtaśuddhiṃ maheśāni japapūjāṃ na śaṃśate || 27 ||

|| iti śrībhūtaśuddhitantre haragaurīsaṃvāde ekādaśaḥ paṭalaḥ || 11 ||

atha dvādaśaḥ paṭalaḥ

śrī-īśvara uvāca


etajjñānaṃ maheśāni yaḥ kuryāt satataṃ priye |

mahāyogeśvaraḥ so'pi mama tulyo na saṃśayaḥ || 1 ||

tasya sarvāṇi mantrāṇi vidyā ca parameśvari |

śīghraṃ sidhyati deveśi nātra kāryā vicāraṇā || 2 ||

etadrahasyaṃ paramaṃ sadā brahmavinirṇayam |

yogajñānaṃ tapaḥ śāstraṃ vidyā śilpāni yāni ca || 3 ||

sarvaṃ hi prakṛte rūpaṃ niścayaṃ vacanaṃ mama |

śṛṇu pārvati vakṣyāmi rahasyaṃ paramavyam || 4 ||

bhūtaśuddhermaheśāni vidyāṃ paramagopitām |

nigadāmi śṛṇu prājñe nīrajāyatalocane || 5 ||


śrī-īśvara uvāca


avaśyaṃ bhāvayed devi vidyāṃ bhāgavatābhidhām |

kāmabījaṃ maheśāni triruccārya śucismite || 6 ||

dhīmahīti tato devi vahnijāyāṃ samuddharet |

tatastu parameśāni trividhaṃ kāmamuddharet || 7 ||

bhagavatyā idaṃ devi tena bhāgavataṃ smṛtam |

bhāgavatākhyāṃ mahāvidyāṃ daśadhā japamācaret || 8 ||

divase divase devi prajapet yadi mānavaḥ |

tadeva parameśāni dīkṣāphalamavāpnuyāt || 9 ||

nityāṃ karma maheśāni vidyāṃ bhāgavatābhidhām |

vidyāṃ kalpadrumākārāṃ dharmakāmārthamokṣadām || 10 ||

sarvavedeṣu tantreṣu vidyāṃ bhāgavatābhidhām |

gīyate parameśāni nityā prakṛtirūpiṇī || 11 ||

ata eva maheśāni vidyāṃ bhāgavatābhidhām |

ajñānād yadi vā mohāt kāmādvā kamalekṣaṇe || 12 ||

na japed yadi deveśi dvijaḥ śūdratvamāpnuyāt |

sarvaṃ tasya vṛthā devi kutaḥ pūjā kutaḥ sukham || 13 ||

kṣatriyo'pi varārohe na japed yadi pāmaraḥ |

vaiśyatvaṃ sahasāyāti vaiśyaḥ śūdratvamāpnuyāt || 14 ||

kṣatriyo'pi varārohe prajapedyadekadhā |

brāhmaṇatvaṃ tato yāti sahasā parameśvari || 15 ||

vaiśyastu parameśāni kṣātratvaṃ yāti tatkṣaṇāt |

brāhmaṇo'pi naraśreṣṭhaḥ sākṣād brahma na saṃśayaḥ || 16 ||

śūdrastu parameśāni vaiśyatvaṃ yāti pārvati |

iyaṃ vidyā varārohe sadā bhāgavatābhidhā || 17 ||

imāṃ vidyāṃ maheśāni mātrāmekādaśākṣarīm |

ajñātvā parameśāni purāṇaṃ yastu vācayet || 18 ||

sa yāti narakaṃ ghoraṃ sadā saṃsargiṇā saha |

tasmād yatnena deveśi varjanīyaḥ sa tu dvijaḥ || 19 ||


śrīdevyuvāca


śūdrasya parameśāni nādhikāro vṛṣadhvaja |

vahnijāyānvitāṃ vidyāṃ śūdrasya kathamuccaret || 20 ||


śrī-īśvara uvāca


tantroktaṃ praṇavaṃ devi vahnijāyāñca sundari |

prajapet satataṃ devi nātra kāryā vicāraṇā || 21 ||

śaktividyānvitā devi jāyate yadi pārvati |

prajapet sahasā devi tadā siddhiśca jāyate || 22 ||

gāyatryakṣarasaṃyuktaṃ na japed bhāgavatābhidhām |

śūdrasya parameśāni vidyāṃ bhāgavatīṃ śṛṇu || 23 ||

manmathaṃ triguṇaṃ devi samuddhṛnya varānane |

prathamaṃ caturdaśaṃ dattvā svayaṃ praṇavarūpiṇīm || 24 ||

vahnijāyāṃ pare dattvā prajapet daśadhā yadi |

śūdro'pi parameśāni vaiśyatvaṃ yāti tatkṣaṇāt || 25 ||

tadaiva mahatī siddhiḥ śūdrasya kamalekṣaṇe |

imāṃ bhāgavatīṃ vidyāṃ svāgamaṃ viddhi pārvati || 26 ||

svāgamaṃ paramaṃ brahma anantaśaktisaṃyutam |

tava snehāt samākhyātaṃ sugopyaṃ kamalekṣaṇe || 27 ||

sārātsāraṃ maheśāni vidyāṃ bhāgavatābhidhām |

śūdrasya sakalaṃ devi kathayāmi varānane || 28 ||

manmathatrayamuddhṛtya dhīkāraṃ tadanantaram |

vahnijāyāṃ pare dattvā manmathatrayamuddharet || 29 ||

iyaṃ bhāgavatī vidyā śūdravācyā vidhīyate |

iti te kathitaṃ tattvaṃ mahābhaktyā varānane || 30 ||

kasmaicit pravaktavyaṃ yadīcchedātmanaḥ sukham |

śāntāya ṛjave devi bhaktiścāṇḍālajātiṣu || 31 ||

abhaktāya maheśāni brāhmaṇāya na dāpayet |

abhaktabhyo'pi putrebhyo na dadyāt kamalekṣaṇe || 32 ||

bhaktāya śāntacittāya dadyād vidyāṃ varānane |

abhaktebhyo'pi putrebhyastatra mṛtyumavāpnuyāt || 33 ||

yat kiñcid dṛśyate devi trailokyaṃ sacarācaram |

tatsarvaṃ parameśāni śaktiyuktaṃ suniścitam || 34 ||

sarvatattvaṃ maheśāni parā śaktiśca mohinī |

rūpādi yāni tattvāni tāni tattvāni kuṇḍalī || 35 ||

rūpaṃ hi ṣaḍvidhaṃ devi sarvatantreṣu niścitam |

rasastu ṣaḍvidhaḥ svāhā nānāsvādaḥ syānniścitam || 36 ||

gandhaṃ hi dvividhaṃ devi sarvaśaktiyutaṃ priye |

anyāni yāni tattvāni caturviṃśati sundari || 37 ||

sarvaṃ śaktimayaṃ vijñe krameṇa kamalekṣaṇe |

śuklaṃ raktaṃ tathā pītaṃ haritaṃ kṛṣṇameva ca || 38 ||

vicitrāṇi kramato varṇaṃ kṛṣṇavarṇaṃ prakīrtitam |

rasastu dvividhaṃ devi sugandhi pratigandhakam ||

evaṃ sarvaṃ vijānīyāt sadā śaktimayaṃ priye || 39 ||

|| iti śrībhūtaśuddhitantre haragaurisaṃvāde dvādaśaḥ paṭalaḥ || 12 ||

atha trayodaśaḥ paṭalaḥ


śrī-īśvara uvāca


atha vakṣyāmi deveśi vidyāṃ śaktimayīṃ priye |

praṇavaṃ prathamaṃ devi uddhṛtya kamalānane || 1 ||

tataḥ kāmaṃ samuddhṛtya praṇavaṃ tadanantaram |

tataḥ praṇavamuddhṛtya māyābījaṃ samuddharet || 2 ||

praṇavaṃ punaruccārya śṛṇu devi varānane |

kāmabījaṃ samuddhṛtya praṇavamuddharet tataḥ || 3 ||

tato māyāṃ samuddhṛtya (vittoddhāraṃ) varānane |

tataḥ paraṃ maheśāni kandarpamuddharet priye || 4 ||

sarvānte vahnilalanāṃ dattvā japaṃ samārabhet |

eṣā tu parameśāni vidyā saptadaśākṣarī || 5 ||

vaiṣṇave gāṇapatye ca śaive ca parameśvari |

śākteṣu parameśāni daśavidyā suśasyate || 6 ||

eṣā vidyā varārohe sarvaśaktimayī priye |

sarvaśaktimayīṃ vidyāṃ na japet yadi pāmaraḥ || 7 ||

sarvaṃ tasya vṛthā devi hāniḥ syāduttarottaram |

vṛthā pūjā maheśāni japastasya vṛthā bhavet || 8 ||

nyāsañca viphalaṃ tasya bhūtaśuddhiśca pārvati |

prāṇāyāmaṃ maheśāni tathaivācamanaṃ priye || 9 ||

sarvāṇi tasya viphalaṃ jāyate kamalānane |

tasmādādau japed vidyāṃ saptadaśākṣarīṃ priye || 10 ||

na japed yadi deveśi jñātvā pūjāṃ samācaret |

sarvaśāstreṣu deveśi vaiṣṇave ca viśeṣataḥ || 11 ||

śaive ca gāṇapatye ca praśastā śaktirūpiṇī |

ādau vidyā maheśāni daśadhā japamācaret || 12 ||

bhūtaśuddhyādikaṃ sarvaṃ tataḥ sādhaka ārabhet |


śrī-īśvara uvāca


bhūtaśuddhi vidhāyetthaṃ mātṛkānyāsamācaret |

tataḥ paraṃ maheśāni prāṇāyāmaṃ varānane || 13 ||

prāṇāyāmaṃ vinā devi nahi pūjāṃ samācaret |

prāṇāyāmatrayaṃ dattvā āsanāni samācaret || 14 ||

|| iti śrībhūtaśuddhitantre harapārvatīsaṃvāde trayodaśaḥ paṭalaḥ || 13 ||


atha caturdaśaḥ paṭalaḥ

mantrārthaṃ mantracaitanyaṃ yoniñcāpi na vetti yaḥ |

śatakoṭi japenāpi tasya vidyā na sidhyati || 1 ||

devadeva mahādeva rahasyaṃ pūrvasūcitam |

etattattvaṃ mahādeva kṛpayā vada śaṅkara || 2 ||


śrī-īśvara uvāca


mantrārthaṃ parameśāni sāvadhānāvadhāraya |

tathā ca mantracaitanyaṃ nirvāṇapadamuttamam || 3 ||

prasaṅgāt parameśāni nivadāmi tavājñayā |

mūlādhāre mūlavidyāṃ bhāvayediṣṭadevatām || 4 ||

śuddhasphaṭikasaṅkāśāṃ bhāvayet paramākṣarīm |

bhāvayedakṣaraśreṇīmiṣṭavidyāṃ sanātanīm || 5 ||

mūhūrttārddhaṃ vibhāvyaitāṃ pañcadhyānaparo bhavet |

dhyānaṃ kṛtvā maheśāni muhūrttārddhaṃ tataḥ param || 6 ||

tato jīvo maheśāni manasā kamalekṣaṇe |

svādhiṣṭhānaṃ tato gatvā bhāvayediṣṭadevatām || 7 ||

bandhūkāruṇasaṅkāśāṃ japāsindūra ākṛtim |

vibhāvya akṣaraśreṇīṃ padmamadhyagatāṃ śubhām || 8 ||

tato jīvaḥ prasannātmā pakṣiṇā saha sundarī |

maṇipūraṃ tato gatvā bhāvayediṣṭadevatām || 9 ||

vibhrāma akṣaraśreṇīṃ padmamadhyagatāṃ parām |

śuddhasphaṭikasaṅkāśāṃ śivavakṣopari sthitām || 10 ||

tato jīvo maheśāni pakṣiṇā saha pārvati |

hṛtpadmaṃ prayayau śīghraṃ nīrajāyatalocane || 11 ||

iti vidyāṃ maheśāni bhāvayet kamalopari |

vibhāvya akṣaraśreṇīṃ mahāmarakataprabhām || 12 ||

tato jīvo varārohe viśuddhaṃ prayayau priye |

tatpadmagahanaṃ gatvā pakṣiṇā jīva pārvati || 13 ||

iṣṭavidyāṃ maheśāni ākāśopari bhāvayet |

vibhāvya akṣaraśreṇīṃ haridvarṇaṃ varānane || 14 ||

tatra ājñāpuraṃ devi prayayau jīva pārvati |

pakṣiṇā saha deveśi khañjanākṣi śucismite || 15 ||

iṣṭavidyāṃ maheśāni sākṣād brahmasvarūpiṇīm |

vibhāvya akṣaraśreṇīṃ caturvarṇānurañjitām || 16 ||

ājñācakrāṇi (sambhāvya) vibhāvya varavarṇini |

ṣaṭcakre parameśāni dhyānaṃ kṛtvā śucismite || 17 ||

dhyānena parameśāni yadrūpaṃ samupasthitam |

tadeva parameśāni mantrārthaṃ viddhi pārvati || 18 ||

praṣañcāni tato'tītya jīvastu pakṣiṇā saha |

prayayau paramaṃ ramyaṃ nirvāṇaṃ paramaṃ padam || 19 ||

sahasrāraṃ śivapuraṃ tanmadhye sāttvikīṃ purīm |

kauśikīṃ satataṃ devi purīṃ śaktimayīṃ priye || 20 ||

pakṣiṇā saha deveśi jīvaḥ śīghraṃ prayāti hi |

vibhāvya akṣaraśreṇīmamṛtāntu rasāyanīm || 21 ||

tat sadā śivapuraṃ ramyaṃ kalpavṛkṣatalasthitam |

nānāratnasamākīrṇaṃ tanmūlaṃ kamalānane || 22 ||

vṛkṣañca parameśāni satataṃ triguṇātmakam |

pañcabhūtātmakaṃ vṛkṣaṃ pañcaśākhāsamanvitam || 23 ||

catuḥśākhā caturvedaṃ cakratattvasamanvitam |

caturvarṇayutaṃ puṣpaṃ śuklaṃ raktaṃ śucismite || 24 ||

pītaṃ kṛṣṇaṃ maheśāni puṣpadvayaṃ paraṃ śṛṇu |

haritañca maheśāni vicitraṃ sarvamohanam || 25 ||

ṣaṭpuṇyañca maheśāni------------- midaṃ smṛtam |

anyāni yāni śākhāni kṣudrāṇi nīlalocane || 26 ||

tāni sarvāṇi patrāṇi sarvaśāstrāṇi sundari |

tvagasthimedhāmajjāni vṛkṣaśākhāni ca priye || 27 ||

tāni sarvāṇi deveśi indriyāṇi prakīrtitam |

sarvaśaktimayīṃ devi divyāṃ nīrajalocane || 28 ||

evaṃbhūtaṃ mahāvṛkṣaṃ bhramaraiḥ pariśobhitam |

itihāsapurāṇāni sarvāṇi vṛkṣasaṃsthitam || 29 ||

kokilaiḥ parameśāni śobhitaṃ bahupakṣibhiḥ |

nānāpakṣiyutaṃ ramyaṃ divyastrīgaṇasaṃyutam || 30 ||

devadānavagandharvaśobhitaṃ kamalānane |

bandhubhiḥ śobhitaṃ devi gaṇairatnādikāṅkṣabhiḥ || 31 ||

sūkṣmaṃ hi paramaṃ divyaṃ paryaṅkaṃ sarvamohanam |

candrakoṭisamaṃ devi sarvakoṭisamaprabham || 32 ||

śītāṃśuraśmisaṃyuktaṃ nānāgandhānumoditam |

nānāpuṣpasamūhena racitaṃ hemamālayā || 33 ||

tataḥ paraṃ maheśāni sadāśivaḥ svayaṃ punaḥ |

jīvaḥ pakṣiyuto devi bhāvayet tatra pārvati || 34 ||

sadāśivo maheśāni mahākuṇḍalinīyutaḥ |

evaṃ kalpadrumaṃ dhyātvā tadadho ratnavedikām || 35 ||

tatropari maheśāni paryaṅkaṃ bhāvayet priye |

kāminīkoṭisaṃyuktaṃ cāmarairhastasaṃsthitam || 36 ||

evaṃ vibhāvya manasi sadājīvaṃ śucismite |

yasya yasya maheśāni yadiṣṭaṃ kamalānane || 37 ||

tasya dhyānasamāyukto manasā parameśvari |

jīvo dhyānaparo bhūtvā japedaṣṭaśataṃ priye || 38 ||

mantrākṣarāṇi deveśi mātṛkāpuṭitaṃ kramāt |

kṛtvā jīvaḥ prasannātmā japedaṣṭaśataṃ priye || 39 ||

anulomavilomena kuryāt paramayatnataḥ |

anena kramato devi caitanyaṃ viddhi sundari || 40 ||

mantrārthaṃ mantracaitanyaṃ kathitaṃ tava bhaktitaḥ |

na kasmaicit pravaktavyaṃ yadīcchecchubhamātmanaḥ || 41 ||

idaṃ rahasyaṃ paramaṃ gopanīyaṃ varānane |

śiṣyāya bhaktiyuktāya sādhakāya prakāśayet || 42 ||

vaiṣṇave'pi maheśāni kuryāccaitanyamadtam |

viṣṇumantre maheśāni śivamantre'pyupāsate || 43 ||

caitanyaṃ bahuratnena vaiṣṇavo yatnataścaret |

tataḥ siddho bhavenmantro vidyā ca kamalānane || 44 ||

siddhamantrastu yaḥ kuryāt sa śivo nātra saṃśayaḥ |

brahmāṇḍabhāṇḍamadhye tu viharet sa ca sādhakaḥ || 45 ||

śatakoṭi maheśāni tatpuraścaraṇaṃ smṛtam |

caitanyarahitaṃ devi yo japet na ca pāpakṛt || 46 ||

mantrārthaṃ mantracaitanyaṃ sugopyaṃ bhuvanatraye |

tava bhaktyā mayākhyātaṃ dāso'haṃ tava sundari || 47 ||

ahaṃ mṛtyuñjayo devi prasādāt tava sundari |

tvadvaktrāmbujapīyūṣapānena kamalānane || 48 ||

vajratulyaṃ mama vapuḥ sadāvibhavavarddhanam |

brahmāṇḍaṃ sakalaṃ devi tava rūpamayaṃ sadā || 49 ||

yā śaktiḥ parameśāni sā tvaṃ bhavasi sarvadā |

kṛpāmayi maheśāni prakṛtiḥ śarīramāśritā || 50 ||

satī tvaṃ parameśāni pārvatītvaṃ gatā priye |

satītvaṃ paramaṃ prāptā idānīṃ pārvatī priye || 51 ||

satī snehaṃ maheśāni tyaktvā sundari yat kṛtā |

pārvaṃtītvaṃ gatā bhadre menakāyāṃ śucismite || 52 ||

etasminnantare kāle sadā dhyānaparo hyaham |

iti dhyānaṃ samāgacchan bhūtvā tiṣṭhāmi sundari || 53 ||

dhyānamārgaparo bhūtvā karomi svāgamaṃ japam |

svāvāsaṃ śaktirūpaṃ sadā yat hṛdi saṃsthitam || 54 ||

svāvāsaṃ varṇapuñjāni nānāvidyāni pārvati |

nānāvidyāsu deveśi daśa vidyā pragīyate || 55 ||

etāni svāgamaṃ devi sārātsāraṃ parātparam |

japitvā lakṣavarṣāṇi svāgamaṃ śaktirūpiṇam || 56 ||

siddhiṃ gatā maheśāni svāgame parameśvari |

dhyānamārgaṃ parityajya tava pādeṣu gīyate || 57 ||

yadiṣṭaṃ dhyānamārgeṇa tatsarvaṃ kathayāmi te |

svāgamaṃ hi vinā devi na kiñcid varttate priye || 58 ||

sarvaṃ hi parameśāni brahmāṇḍaṃ svāgame sthitam |

svāgamācca prasūyante koṭiśaḥ kuṇḍa (ma) gnayaḥ || 59 ||

brahmāṇḍaṃ koṭiśo devi nirmāṇaṃ svāgamāt priye |

purāṇāni maheśāni tandraṇi vividhāni ca || 60 ||

yat kiñcid dṛśyate devi sthūlasūkṣmaṃ śucismite |

tat sarvaṃ parameśāni svāgamāt kamalānane || 61 ||

sṛṣṭiñca kurute devi brahmā svāgamāt kamalānane |

sthitiñca kurute viṣṇuḥ svāgamāt naganandini || 62 ||

saṃharāmi jagat sarvaṃ trailokyaṃ sacarācaram |

brahmā viṣṇuśca rudraśca sarve svāgamarūpiṇaḥ || 63 ||

svāgamo brahmaṇo rūpaṃ svāgamaṃ paramaṃ padam |

tejaḥpuñjaṃ maheśāni yaduktaṃ kamalānane || 64 ||

tejaḥpuñjantu deveśi strīrūpaṃ svāgamaṃ priye |

svāgamaṃ muktikaivalyaṃ nirvāṇapadamavyayam || 65 ||

svāgamantu vinā devi sadevāsuramānuṣam |

svāgamaṃ parameśāni mama iṣṭaṃ sadā priye ||

rahasyaṃ svāgamopetaṃ prasaṅgāt kathitaṃ mayā || 66 ||

|| iti śrībhūtaśuddhitantre harapārvatīsaṃvāde caturdaśaḥ paṭalaḥ || 14 ||

atha pañcadaśaḥ paṭalaḥ


śrī-īśvara uvāca


dhanyaṃ yaśasyamāyuṣyaṃ kalikalmaṣanāśanam |

yaḥ kuryānmātṛkānyāsaṃ sa eva śrīsadāśivaḥ || 1 ||

vinā nyāsaṃ maheśāni yo japenmātṛkākṣaram |

sa yāti narakaṃ ghoraṃ vighnastasya pade pade || 2 ||

brahmādayo'pi yāṃ kṛtvā sṛṣṭisthityantakārakāḥ |

dvārakānāyakaḥ kṛṣṇaḥyāṃ kṛtvāpi yuge yuge || 3 ||

yāṃ kṛtvā parameśāni śrīkṛṣṇaḥ strīṣu mohanaḥ |

mātṛkāvarṇamāśritya śrīkṛṣṇaḥ kamalānane || 4 ||

ṣoḍaśastrīsahasrāṇi sa reme mātṛkākāraṇāt |

śrīrāmaśca maheśāni ayodhyāyāṃ varānane || 5 ||

vīryādhikārī deveśi bhuṅkte rājyamakaṇṭakam |

daśavarṣasahasrāṇi rāmo rājyamācīkarat || 6 ||

hatvā ca trividhān vīrān vāraṇādiniśācarān |

mātṛkāvarṇamāśritya sarvaṃ kuryādraghūttamaḥ || 7 ||

pañcāśanmātṛkāṃ devīṃ jananīṃ viśvamohinīm |

pūrvoktatantravad devi sarvaṃ kuryād vicakṣaṇaḥ || 8 ||

prathamaṃ mātṛkāgāyatrīṃ dhyānapūrvāṃ śucismite |

tato japaṃ mātṛkāyāḥ kuryāt sādhakayatnataḥ || 9 ||

ṣaḍaṅgayugalaṃ devi tataḥ kuryāt samāhitaḥ |

tatastu mātṛkādhyānaṃ bahirnyāsaṃ tataḥ param || 10 ||

tataḥ paraṃ maheśāni mātṛkāpānamuttamam |

evamaṣṭamakaṃ devi mātṛkānyāsamācaret || 11 ||

paṭhitvā kavacaṃ devi deheṣu nyāsamācaret |

nyāsasya parameśāni varasya gururūpakam || 12 ||

yannoktaṃ sarvatantreṣu prasaṅgāt kathayāmi te |

triguṇasya maheśāni nyāsaṃ vakṣyāmi saṃśṛṇu || 13 ||

yaṃ vinā parameśāni vyartha-------------------------------|

śivaviṣṇubrahmayutaṃ bindvardhvacandrasaṃyutam || 14 ||

rajaḥ sattvaṃ tamo devi arddha yonī śucismite |

sarvopari maheśāni bindu brahmasvarūpiṇam || 15 ||

nyāsaśca triguṇopetaṃ vinyaset tasya sandhiṣu |

pañcāśanmātṛkāsthāne triguṇaṃ nyāsamācaret || 16 ||

tato bhāvaya deveśi nyāsaṃ trailokyamohanam |

nyāsasya parameśāni rahasyaṃ paramādbhutam || 17 ||

prapañcānāṃ maheśāni daleṣu triguṇaṃ nyaset |

gatañca parameśāni tridhā vartanato bhavet || 18 ||

aṣṭadhā triguṇaṃ devi sahasrāre tato nyaset |

aṣṭottaraśataṃ devi bhinnāyāṃ triguṇaṃ nyaset || 19 ||

nyāsādhikārī deveśi tato bhavati sādhakaḥ |

triguṇanyāsamātreṇa adhikārīti gīyate || 20 ||

anyathā viphalaṃ nyasyaṃ japañca viphalaṃ bhavet |

nyāsañca vividhaṃ devi nānātantreṣu gīyate || 21 ||

mātṛkāparamādhyānaṃ sadā brahmādibhiḥ priye |

nyāsānāṃ parameśāni mātṛkā viśvamohinī || 22 ||

sraṣṭā ca parameśāni gīyate āgamaiḥ priye |

tasmāttu yatnato devi mātṛkānyāsamācaret || 23 ||

rahasyaṃ paramaṃ divyaṃ triguṇanyāsakarmaṇi |

ataḥ paraṃ mātṛkāyāḥ ṣoḍhā mokṣapradāyinī || 24 ||

akṛtvā mātṛkāṃ ṣoḍhāṃ nyāsamanyaṃ karoti yaḥ |

ṣoḍhā ca viphalaṃ tasya mātṛkā viphalaṃ bhavet || 25 ||

kṛtvā tu parameśāni yāni nyāsāni ācaret |

saphalāni sadā tasya anyathā rodanaṃ vane || 26 ||

tasmāttu yatnataḥ ṣoḍhāṃ śṛṇu devi varānane |

ṣoḍhā tu parameśāni sākṣād brahmasvarūpiṇī || 27 ||

nirakṣarā sākṣarā vā koṭicandrasamaprabhām |

brahmaviṣṇunutāṃ ramyāṃ mama sampuṭasaṃsthitām || 28 ||

mama prāṇasamāṃ vidyāṃ sākṣājjyotirmayīṃ śivām |

mātṛṣoḍhāṃ varārohe sāvadhānāvadhāraya || 29 ||

mantrauṅkārakrameṇaiva prasaṅgāt kathayāmi te |

triguṇe puṭitāṃ kṛtvā pañcāśanmātṛkāṃ priye || 30 ||

parayatnena deveśi pañcāśat sthānasandhiṣu |

prathamamanulome tu vilomaṃ tadanantaram || 31 ||

tataḥ paraṃ varārohe triguṇaṃ nyāsamācaret |

aṣṭottaraśataṃ kṛtvā sarvasiddhīśvaro bhavet || 32 ||

nyāsamātreṇa deveśi jīvanmukto bhavennaraḥ |

prapañcānāṃ dale devi prathamaṃ nyāsamācaret || 33 ||

tataḥ paraṃ maheśāni bāhyanyāsaṃ samācaret |

śūdrastu parameśāni caturdaśasvaraṃ nyaset || 34 ||

kavacaṃ hi vinā devi prathamaṃ nyāsamācaret |

caturdaśasvaraṃ puṇyaṃ dīrghapraṇavamucyate ||

tasmāt sarvatra śūdrastu dīrghapraṇavamucyate || 35 ||

|| iti śrībhūtaśuddhitantre harapārvatīsaṃvāde pañcadaśaḥ paṭalaḥ || 15 ||

atha ṣoḍaśaḥ paṭalaḥ

śrī-īśvara uvāca


prāṇāyāmaṃ maheśāni prasaṅgāt kathayāmi te |

jīvaśuddhiṃ manaḥśuddhiṃ prāṇāyāmamidaṃ smṛtam || 1 ||

dvividhaṃ parameśāni prāṇāyāmaṃ samācaret |

prāṇāyāmaṃ vinā devi na pūjāṃ na japañcaret || 2 ||

sagarbhañca vigarbhañca prāṇāyāmaṃ varānane |

japadhyānādibhiryuktaṃ sagarbhaṃ kamalānane || 3 ||

vigarbhañca tathā devi varṇahīnaṃ bhaved dhruvam |

pūrayet ṣoḍaśairvāyumiḍayā parameśvari || 4 ||

catuṣaṣṭyā dhārayettu citrāmadhyagatāṃ priye |

recayet kumbhakārdhena nāḍyā madhyamayā sadā || 5 ||

evaṃ dvādaśād devi prāṇāyāmaṃ samācaret |

prāṇāyāmaṃ maheśāni mahāyogamayaṃ sadā || 6 ||

yogaṃ vinā maheśāni mantrasiddhirna jāyate |

dvayordvayornāmayogo brahmasaṃsiddhikāraṇam || 7 ||

evaṃ hi manasā devi sadā yogaṃ samabhyaset |

yasya yasya ca devasya yathā bhūṣaṇavāhanam || 8 ||

tadeva pūjane tasya cintayet pūrakādibhiḥ |

pūrakaṃ dhārakaṃ devi recakaṃ naganandini || 9 ||

sarvaśaktimayaṃ devi sarvatantreṣu niścitam |

---------------------vedānte brahma nirṇitam || 10 ||

vaiśeṣike tu deveśi paramāṇurnigīyate |

nyāse ca parameśāni īśvaraṃ nyāsasammatam || 11 ||

-------------- ------------------- --puruṣaṃ kūṭarūpiṇam |

mīmāṃsayā tathā devi brahmakarma pragīyate || 12 ||

vedādau turyacaitanyaṃ gīyate satataṃ priye |

tatpuro'pyasti deveśi guptabrahma sanātanam || 13 ||

nirindriyaṃ niścalaṃ hi sākṣāt suptamiva sthitam |

etat sarvaṃ maheśāni śavarūpaṃ nirindriyam || 14 ||

sarveṣāṃ parameśāni śaktiḥ prakṛtirūpiṇī |

tasmāt sarveṣu deveṣu śakteḥ prādhānyamucyate || 15 ||

śaktiḥ kuṇḍalinī samastajananī śatadhā vartanamayī |

sadā tāñca namāmyātmabhūtaye kamalekṣaṇe || 16 ||

tataḥ śaktiṃ vinā devi brahmādyāḥ śavarūpavat |

śavatvaṃ sarvadeveṣu vinā śaktiṃ śucismite || 17 ||

śavarūpa ivāyāti paraṃ brahma sadā priye |

śaktiyuktaṃ yadā brahma tadā devatvamāpnuyāt || 18 ||

svāgamaṃ hi maheśāni prakṛtiṃ viddhi pārvati |

svāgame sarvavedāni nānātantrāṇi vidyate || 19 ||

svāgamaṃ hi vinā devi na kiñcid vidyate priye |

tasmāttu parameśāni sarvaṃ prakṛtimayaṃ smṛtam || 20 ||

brahmāṇḍaṃ koṭinirmāṇaṃ sarvaśaktiyutaṃ sadā |

ādhārañca tathā deyaṃ pāṇḍityaṃ yastu pārvati || 21 ||

mūkatvaṃ kavitāṃ devi yadyadanyaṃ śucismite |

tatsarvaṃ parameśāni śaktiṃ vidyāt śucismite || 22 ||

śaktihiṃ parameśāni brahmadvandvaṃ sadā priye |

śabdabrahma paraṃbrahma śaktiyuktaṃ sadā priye || 23 ||

evaṃ brahmā maheśāni śabdabrahma praśasyate |

śabdasya kāraṇaṃ devi mātṛkāṃ brahmarūpiṇīm || 24 ||

ata eva maheśāni sadā mama hṛdi sthitam |

tava bhaktyā mayā khyātaṃ sugopyaṃ hi śucismite |

na kasmaicit pravaktavyaṃ yadīcchet śubhamātmanaḥ || 25 ||

iti śrībhūtaśuddhitantre harapārvatīsaṃvāde ṣoḍaśaḥ paṭalaḥ || 16 ||

atha saptadaśaḥ paṭalaḥ

śrī-īśvara uvāca


etat tantraṃ maheśāni svargamartyarasātale |

praśastaṃ syāt sadā devi nānyathā mama bhāṣitam || 1 ||

yasmin rājye maheśāni etat tantraṃ hi vartate |

notpātastatra deveśi na ca bhītiḥ kadācana || 2 ||

nāśayurvyādhayo devi tasmin rājye na kutracit |

na ca mārībhayaṃ tatra na ca rogastadā priye || 3 ||

sarvadharmeṣu yaddharmaḥ sarvayajñeṣu yat phalam |

tatphalaṃ labhate devi pustakasya ca pūjanāt || 4 ||

yadgṛhe vidyate devi pustakaṃ mama durlabham |

kāmarūpasamaṃ devi tadgṛhaṃ bhuvi durlabham || 5 ||

pustakañca maheśāni yadgṛhe vidyate sadā |

kāśyādīni ca tīrthāni sarvāṇi tasya mandire || 6 ||

yadgṛhe pustakaṃ devi vidyate kamalānane |

sarvadevamayaḥ sarvadevamayaḥ sadā || 7 ||

etat tantraṃ maheśāni satataṃ yasya mandire |

sarvāgamamayaṃ so'pi sa nānyathā tu kadācana || 8 ||

satataṃ mandire yasya etat tantraṃ varānane |

sarvaśāstrasamaḥ so'pi nānyathā vacanaṃ mama || 9 ||

saṃkṣepeṇa bhūtaśuddhivivaraṇam

	ramiti jaladhārayā vahniprākāraṃ vicintya svāṅke uttānau karau kṛtvā so'hamiti jīvātmānaṃ hṛdayasthaṃ dīpakalikākāraṃ mūlādhārastha kulakuṇḍalinyā saha suṣumnāvartmanā mūlādhārasvādhiṣṭhānamaṇipūrakānāhata viśuddhājñākhyaṣaṭ cakrāṇi bhitvā śiro'vasthitādhomukha sahasradalakamalakarṇikāntargataparamātmani saṃyojya tatraiva pṛthivyaptejovāyvākāśagandharasarūpasparśaśabda nāsikā - jihvā - cakṣustvakśrotravākpāṇipādapāyupasthaprakṛtimanobuddhyāhaṅkāra-rūpacaturviṃśatitattvāni līnāni vibhāvya yamiti vāyubījaṃ dhūmravarṇaṃ vāmanāsāpuṭe vicintya tasya ṣoḍaśavārajapena | vāyunā dehamāpūrya nāsāpuṭau dhṛtvā tasya catuḥṣaṣṭhivārajapena kumbhakaṃ kṛtvā vāmakukṣisthakṛṣṇavarṇaṃ pāpapuruṣeṇa saha dehaṃ saṃśoṣya tasya dvātriṃśadvārajapena dakṣiṇanāsayā vāyuṃ recayet, dakṣiṇanāsāpuṭe ramiti vahnibījaṃ raktavarṇaṃ dhyātvā tasya ṣoḍaśavārajapena vāyunā dehamāpūrya nāsāpuṭau dhṛvā tasya catuḥṣaṣṭivārajapena kumbhakaṃ kṛtvā pāpapuruṣeṇa saha dehaṃ mūlādhārotthitavahninā dagdhvā tasya dvātriṃśadvārajapena vāmanāsayā bhasmanā saha ṭhamiti candrabījaṃ śuklavarṇaṃ vāmanāsāyāṃ dhyātvā tasya ṣoḍaśavārajapena lalāṭe candraṃ nītvā nāsāpuṭau dhṛtvā ramiti varuṇabījasya catuḥṣaṣṭivārajapena tasmāllalāṭasthacandrād galitasudhayā mātṛkāvarṇātmikayā samastadehaṃ viracya lamiti pṛthvībījasya dvātriṃśadvārajapena dehaṃ sudṛrḍha vicintya dakṣiṇena vāyuṃ recayet |

iti śrībhūtaśuddhitantraṃ samāptam |





###########   END OF FILE  #######