####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00167
Uniform title: bhagavadgītā
Main title: bhagavadgītā with commentary sarvatobhadra
Commentator : ramakaṇṭha
Editor : śāstrī kṛṣṇa

Description: 
Photographic facsimiles from vol 64 of the Kashmir Series of Texts and Studies.


Notes: 


Publisher : Research Department Jammu and Kashmir State
Publication year : 1943
Publication city : Bombay
Publication country : India
####################################################





oṃ

kāśmīra saṃskṛtagranthāvaliḥ |

granthāṅkaḥ 64

śrīmadbhagavadgītā

rājānakarāmakaṇṭhaviracitasarvatobhadrākhyavivaraṇopetā |

śrīrājarājeśvara mahārājādhirāja kāśmīranarendra śrīharisiṃhajī-
bahādurājñayā

risarca kāryālayādhyakṣa- paṇḍita madhusūdanakaula śāstriṇā

uddiṣṭakāryālayasthetarapaṇḍitasahāyena

saṃśodhanādisaṃskaraṇottaraṃ

saṃpādya

mumbayyāṃ nirṇayasāgara mudraṇālaye mudrāpayitvā 
prākāśyamupanītā |

saṃvat 2000,		kāśmīra śrīnagara		sraistābdaḥ 1943,

(asya granthasya mudrāpaṇādyadhikārāḥ proktamahārājacaryaiḥ 
svāyattīkṛtāḥ santi)






śrīsomānandanāthaprabhṛtiguruvarādiṣṭasannītimārgo
labdhvā yatraiva samyakpaṭimani ghaṭanāmīśvarādvaitavādaḥ |
kāśmīrebhyaḥ prasṛtya prakaṭaparimalo rañjayansarvadeśān
deśe'nyasminnadṛṣṭo ghusṛṇayisaravatsarvavandyatvamāpa || 1 ||

tarata tarasā saṃsārābdhiṃ vidhatta pare pade
padamavicalaṃ nityālokapramodasunirbhare |
vimṛśata śivādiṣṭādvaitāvabodhasudhārasaṃ
prasabhavilasatsadyuktyāntaḥsamutplavadāyinam || 2 ||


atha

śrīmadbhagavadgītā |

śrīrājānakarāmakaṇṭhaviracitavivaraṇopetā |

prathamo'dhyāyaḥ |


svajyotirdyotitānantanāmarūpāya te namaḥ |
anāmarūpacinmātravapuṣe paramātmane || 1 ||

pramātṝṇāmudyadvividharucibhedācchuraṇayā
vicitrābhāsatvaṃ sphaṭikataṭavatsaṃśrayati yat |
svarūpaṃ (k, g: svarūpaṃ sarveśamiti pāṭhaḥ |) sarveṣāṃ 
vigalitavikalpābhrapaṭala-
prasanne hṛdvyomni sphuratu jagatāṃ tatsvavapuṣā || 2 ||

yasmādvyomna ivāprameyavimalābhogājjagadvyaktayo
nānādarśanavādavistaragiraḥ sthātuṃ bahirna kṣamāḥ |
tadbrahmaiva paraṃ parāśarasutasyaivaṃ maharṣermataṃ
santaḥsantatasanniveśitadhiyo dhyāyantu bandhacchide || 3 ||

sakalavibudhamadhye ke'pi gītāpadānāṃ
viditaguṇaviśeṣā hantaḥ santaḥ kṛtārthāḥ |
katicidaliṣu loke te hi valganti lakṣmī-
karakamalamadhūnāṃ carvaṇe ye rasajñāḥ || 4 ||

prakṛtigurubhirgāḍhodyogairavandhyasamādhibhi-
rbahubhiramalaprajñairetāḥ kṛtāḥ kila vṛttayaḥ |
p. 2) kimadhikamiha brūyānmādṛkkimatra tu kurmahe
svamatisuhṛdo mugdhānāṃ no yadatra viḍambakāḥ || 5 ||

prasannatvādasminsugama iti sarvaḥ praviśati
praviṣṭo gāmbhīryādanadhigatagādho'tra patati |
tadevaṃ gītārthārṇavamavatitīrṣuṃ prati janaṃ
vidhāsye vākyārthānvayamiṣamimaṃ potamabhayam || 6 ||

nityānyonyaviruddhadarśanakathākṣepādinā kaḥ kṣamaḥ
saṃmugdhapratikūladurmadadhiyāṃ prauḍho'pi saṃbodhane |
tatsiddhāntatayaiva bhaktyatiśayavyakteśvarānugraha-
grastaprāyasamagrasaṃśayamalaḥ ko'pyatra bodhyo janaḥ || 7 ||

	iha khalu 
nikhilavedavedāntasiddhāntaramṛtītihāsapurāṇādivividhaśāstravistaravip
rakīrṇaṃ caturvargopadeśaṃ 
kālāpacitaprajñādyupadeśyapuruṣapratipattisaukaryāya sārataḥ 
saṃkṣipya, mahābhāratākhyamitihāsaṃ bhagavān kṛṣṇadvaipāyano 
yadivā tanmūrtimāviṣṭaḥ parameśvara eva sākṣāt nibabandha | tatrāpica 
apavargasya parapuruṣārthatvādupādeyatamasya 
mokṣadharmādiprakaraṇeṣu vividhaiḥ prakārabhedaiḥ pratipādyasya api 
vineyabuddhibhiḥ samyak pratipattumaśakyatvamāśaṅkamāno 
mṛdutaramatīnāmapi hṛdayaṃgamena prasannagambhīreṇa vākprabandhena 
itihāsakramāgatasuhṛtsaṃvādakathārūpeṇa yogyākhilalokopadeśāya 
bhagavadvaktṛkamapavargapratipādakaṃ gītākhyaṃ prakaraṇaṃ 
pratipādayāṃcakāra | yasya ayaṃ 
samastādhyātmaśāstropaniṣadbhūtaḥ siddhāntaḥ ātmaivedaṃ | 
sarvamiti yataḥ paramarṣirayamasminneva mahābhārate 
dehasaṃnyāsāvasarasamāhṛtaniruttarasamādhidaśānubhūtaparamārthā
modādhivāsitasuvimalamativacanagāṅgeyagītastavarājābhidhānabhagava
tstotraddhāreṇa tatsvarūpaṃ samastavyastamabhidhāya api upasaṃhāre

p. 3) yasminsarvaṃ yataḥ sarvaṃ yaḥ sarvaṃ sarvataśca yaḥ |
yaśca sarvamayo nityaṃ tasmai sarvātmane namaḥ ||

iti ślokena paramasārasaṃgraharūpaṃ yamarthamuddiṣṭavān, tameva iha 
prakaraṇe garbhīcakāra |  tathāca imaṃ ślokaṃ 
paramārthavivecanavicakṣaṇā evaṃ vyācakṣate- tasmai 
yacchabdapañcakaviśiṣṭaviśeṣaṇapratipādyasvarūpāya sarvātmane 
namaḥ sarvasya ātmane, sarvamātmā yasya iti 
ubhayathāvṛttisamāśrayaṇena paramakāraṇasya ātmana eva 
parameśvarasya vāstavamadvitīyatvamasahāyatvaṃ ca anena padena 
pratipāditam | yaduktamiha

yo māṃ paśyati sarvatra sarvaṃ ca mayi paśyati |
tasyāhaṃ na praṇaśyāmi sa ca me na praṇaśyati || (6/31)

iti,

sarvabhūtasthamātmānaṃ sarvabhūtāni cātmani |
īkṣate yogayuktātmā sarvatra samadarśanaḥ || (6/30)

ityādi | kasmai tasmai nama iti ekatve'pi 
sarvajñatvādiniratiśayaiśvaryapratipādakāni yacchabdaviśiṣṭāni 
viśeṣaṇāni krameṇa vyākhyāyante | tatra tasmai bhagavate namo yasmin 
sarvam idamatyantabhinnānantābhāsamayaṃ bhāvajātaṃ 
saṃvedyamānatāmātranibandhanatattatsvātmalābhaṃ sat 
sukhādisarvāvasthānugataikasaṃveditṛtvamātrasvabhāve prakāśātmani 
yasmin sthitamiti śeṣaḥ, nānātvameva idaṃ yadvaśāditthaṃ 
parisphuratītyarthaḥ | tasmai nama iti saṃbandhaḥ | anena 
samastasaṃvedyapadārthasārthaikasaṃvedakatvapratipādanapareṇa 
viśeṣaṇena īśvarasya ātmanaḥ sarvajñatvalakṣaṇo dharmaḥ śaktiviśeṣo 
vā pratipāditaḥ | tadetadihaiva uktaṃ sarvajñatvamekamātmānaṃ (k, g: 
sarvajñamekamiti pāṭhaḥ) vyapadiśatā bhagavatā

p. 4) sarvasya cāhaṃ hṛdi saṃniviṣṭo
mattaḥ smṛtirjñānamapohanaṃ ca | (15/15)

ityādinā, tathā

	matsthāni sarvabhūtāni ---------------- | (9/4)

ityādinā ca | etena ca nānājñātṛtvavādaḥ, kṣaṇike jñāne eva 
jñātṛbhramavādaḥ, tathā caitanyaviśiṣṭe śarīre eva jñātṛtvavādo 
nirastaḥ | nanu astu nāma kaścidekaḥ sarvajño yena saṃvedyamānamidaṃ 
sarvamavatiṣṭhate, kiṃtu yadidaṃ sarvaṃ tena saṃvedyate, tat kuto jātaṃ ? 
kastasya kartā ? iti saṃśayanirāsāya tasyaiva 
sarvakartṛtvapratipādanārthaṃ viśeṣaṇamāha yataḥ sarvam iti | yato 
yasmādekasmāt kartuḥ sarvamidaṃ kāryaṃ prabhavatīti śeṣaḥ | anena 
vakṣyamāṇayā yuktyā ekasya ca uktasya tattvasya sarvakartṛtvaṃ 
pratipāditam | tathāca ihaiva uktaṃ bhagavatā

mayā tatamidaṃ sarvaṃ jagadavyaktamūrtinā | (9/4)

ityādinā, tathā

na tadasti vinā yatsyānmayā bhūtaṃ carācaram || (10/39)

ityādinā ca, tathāca 
bhagavadanugrahonmiṣitadivyadṛgdṛṣṭavaiśvarūpyaparāmarśaprathitapara
vācaḥ savyasācino vacanādapi

nānyo'sti kartā jagatastvameko
dhātā vidhātā ca vibhurbhavaśca || (11/47)

ityādināpica | etena sarvajñasya akartṛtvavādo'pi nirastaḥ | nanu 
sarvakartā yadidaṃ karoti, tatkimupādāya karoti, ityāśaṃkāṃ nirasituṃ 
tasyā nirupādānaṃ sarvakartṛtvaṃ pratipādayitumanyadviśeṣaṇamāha 
yaḥ sarvam iti | sarvatvena nānābhāvabhedātmanā prasṛtamapi idaṃ 
kāryaṃ ya eva yata uktalakṣaṇāt vastuno na vyatiriktamityarthaḥ,

p. 5) tasmai namaḥ | anena 
svecchāmātravyatiriktopādānarūpavastvantaranirapekṣatvamasya 
pratipāditam | uktaṃ ca etadarjunoktyaiva iha

kartāsi sarvasya yataḥ svayaṃ vai
vibho tataḥ sarvamidaṃ tvameva || (11/48)

ityādi | etena ca māyāprakṛtyādyupādānādhīnakartṛtvavādo nirastaḥ | 
nanu bhavatu nāma evaṃ nirupādānamasya kartṛtvaṃ, kiṃtu yadidaṃ 
kāryamitthaṃ parasparavilakṣaṇabhaṅgurabhāvabhedātmanā avabhāsate, 
tat tasya svarūpavikriyāṃ kasmāt na karotītyāha sarvataśca yaḥ iti | 
sarvasmin vedye vastuni ya eva ekaḥ sphurati, tasmai namaḥ iti | anena 
tadīyādbhutamāyāśaktijanitavyāvyāmohāvasthāyāmeva sarvamidaṃ 
kāryaṃ saṃsāriṇā janena nānātvena pratipadyate, 
paramakāraṇānugrahaśaktyunmīlitavidyātmakadivyacakṣuṣā tu 
prabuddhena nirūpyamāṇe'smin sarvasmin kārye tadekatattvavyatiriktaṃ na 
kiñcit prakāśate, iti pratipāditam | yathā tattadarthakriyāviśiṣṭena 
bālādinā lokena vilokyamānāḥ kaṭakakuṇḍalakeyūrādayo 
guṇībhūtakāñcanamayasvabhāvāḥ parasparabhinnatvenaiva 
pratibhāsante, utpannatatprakṛtijijñāsairnirūpyamāṇeṣu teṣu sarveṣu 
guṇībhūtakaṭakādibhinnavyaktikāñcanamayaikasvarūpavyatiriktaṃ 
paramāṇumātramapi na upalabhyate, tathaiva māyādaśāyāṃ 
bhinneṣvapi prabodhāvasthāyāṃ pratyavamṛśyamāneṣu kāryeṣu 
sarvabhāveṣu viśuddhasaṃvinmātrasvabhāvatāvyatiriktaṃ na 
kiñcidupalabhyate- iti vāstavena rūpeṇa itthamapi sphuradidaṃ sarvaṃ 
kāryaṃ karturmanāgapi svarūpavikriyāṃ na āvahatīti pratipāditam | 
tadetadihaiva uktam

avyakto'yamacintyo'yamavikāryo'yamucyate | (2/26)

ityādinā | etena aupādhikaśaṅkāsaṃparkavādo'pi apākṛtaḥ | nanu

p. 6) evaṃ satyapi kārye nirupādhirayamātmā bhavatu nāma, yadā 
punaridaṃ kāryaṃ na ārabhate, tadā asya kiṃ 
rūpamityāśaṅkānirākaraṇāya sadā sarvātmakatvapratipādanārthaṃ 
viśeṣaṇāntaramāha yaśca sarvamayo nityam iti | 
pūrvoktaviśeṣaṇapratipāditena prakāreṇa yo nityaṃ satatameva 
sarvamayaḥ sarvātmakaḥ, tasmai nama iti | anena sphuratyapi tasmin 
anantadevatādbhutarūpe kāryakalāpe 
paranirmalasusaṃpūrṇacinmātrasvarūpāparicyuterīśvarasya ātmanaḥ 
prayojanavicāravādo'pi parihṛtaḥ | yaduktaṃ

na me pārthāsti kartavyaṃ ----------------|
----------------------pravarte'thaca karmaṇi || (3/21)

iti, tathā

na māṃ karmāṇi limpanti na me kāmaḥ phaleṣvapi |
iti māṃ yo'bhijānāti karmabhirna sa badhyate || (4/14)

ityādyapica | sarvamekaḥ sarvajñaḥ sarvakartā nirupādāno 
nirupādhirnityaṃ sarvātmakatvena avabhāsate iti | anena ślokena ātmana 
eva parameśvarasya svarūpaṃ yat tatra paramarṣiṇā pratipāditam, tadeva 
iha siddhāntatayā garbhīkṛtamiti veditavyam | tadayamevaṃsvabhāvo 
bhagavānātmā svecchāmātropakaraṇo yogīndrasargavat 
svapnapadārthavat manorājyaviracyamānavicitrabhāvābhāsavadvā 
ananyasādhāraṇaniratiśayakrīḍāmātraprayojano yadidamatyadbhutaṃ 
jagaccitramullikhati, tatra tadicchayaiva niyamitā prakriyā iyaṃ 
prakaraṇe'smin garbhīkṛtetyapi veditavyam | tathāhi 
svecchāmātrādhīnakartṛtvāt tasyaiva parasya tattvasya mukhyayā vṛttyā 
vedyatāvabhāsanamātreṇa jagataḥ kāraṇatvaṃ vyavasthitam | yadāha 
bhagavāneva

bījaṃ māṃ sarvabhūtānāṃ viddhi pārtha sanātanam | (7/10)

p. 7) ityādi, tathā

yadā bhūtapṛthagbhāvamekasthamanupaśyati |
tata evaca vistāraṃ brahma saṃpadyate tadā || (13/31)

iti, tathā

------------------ahaṃ bījapradaḥ pitā | (14/4)

iti, tathā

ahaṃ kṛtsnasya jagataḥ prabhavaḥ pralayastathā || (7/6)

ityādi | tatastadīya eva yathāpratipāditaḥ svabhāvo 
vedyatvamātrasāmānyalakṣaṇaṃ jagat 
jaḍacetanavibhaktasthūlasūkṣmaprakṛtyātmakatayā dvidhā avabhāsayati | 
yadāha

bhūmirāpo'nalo vāyuḥ khaṃ mano buddhirevaca |
ahaṃkāra itīyaṃ me bhinnā prakṛtiraṣṭadhā ||

apareyamitastvanyāṃ prakṛtiṃ viddhi me parām |
jīvabhūtāṃ mahābāho yayedaṃ dhāryate jagat || (7/5)

iti | etayośca prakṛtyorjaḍātmako yaḥ sthūlo bhedastamapi kāraṇātmanā 
kāryātmanā ca dvidhā sa eva bhagavānābhāsayati | tatra sarvasya 
vedyasya vastunaḥ sukhādyātmanā paryavasitasvarūpatvāt 
sattvādiguṇatrayamayamekaṃ sāmānyamanugatatvena yadavasthitaṃ, 
tadavāntarakāraṇatayā avabhāsayati | yacca 
mahadādipṛthivyantamanugamya kāryakāraṇakalāpātmakaśarīrabhāvena 
śabdādiviṣayabhāvena ca pariṇataṃ, tat kāryatayā avabhāsayati | 
yaduktaṃ

mayādhyakṣeṇa prakṛtiḥ sūyate sacarācaram || (9/11)

iti | yaśca cetanātmako bhedastamapi āsurasargatayā daivasargatayā ca 
dviprakāraṃ tāvadavabhāsayati | yaduktaṃ

dvau bhūtasargau loke'smindaiva āsura evaca || (16/6)

p. 8) ityādi | tatra āsurasargo'dhamottamabhedena dviprakāraḥ | 
tayoratyantanyagbhūtasattvarajaskatamomātrabahalo mlecchādirūpo 
nikṛṣṭa āsurasargaḥ, yaṃ rākṣasasaṃjñayā vakṣyati | tadapekṣayā 
rajoleśānugatatamaḥpradhāno manuṣyātmakaḥ kiṃcitprakṛṣṭo'paraḥ, 
yasya evaṃ lakṣaṇamuktaṃ

pravṛttiṃ ca nivṛttiṃ ca janā na vidurāsurāḥ |
na śaucaṃ nāpicācāro na satyaṃ teṣu vidyate ||

asatyamapratiṣṭhaṃ te jagadāhuranīśvaram |
aparasparasaṃbhūtamakiṃcitkamahetukam || (16/8)

ityādi

--------------------pradviṣanto'bhyasūyakāḥ | (16/18)

ityantam | svakrīḍāmapi yadviṣayāmevamāha bhagavān

tānahaṃ dviṣataḥ krūrānsaṃsāreṣu narādhamān |
kṣipāmyajasramaśubhāsvāsurīṣveva bhūmiṣu ||

āsurīṃ yonimāpannā mūḍhā janmani janmani |
māmaprāpyaiva kaunteya tato yāntyadhamāṃ gatim || (16/20)

iti | evaṃ tāvat dviprakāra āsuraḥ sargaḥ | daivamapi sargaṃ 
devādimanuṣyabhedena dviprakāraṃ tāvadavabhāsayati | tatrāpi 
devādyātmakaḥ prakāro dvividhaḥ | ekaḥ indrādidevatāviśeṣātmako 
yastattadadhikāranirvartanāvadhistāsu tāsu kriyāsu niyuktaḥ 
svādhikārāvasānaṃ kālamativāhya svakāraṇe pariṇamati | dvitīyo 
manuṣyatvopāttatattadyajñādikriyāphalabhūtasukhamātrānubhavamaya.
m teṣu teṣu lokāntareṣu bhogamupabhuñjānaḥ svakarmaphalāvasānaṃ 
kālamativāhya punaḥ punaḥ karmabhūmiṃ pratipadyate | ubhayarūpo'pi 
ayaṃ sattvaguṇapradhānaḥ | evaṃ guṇaviśeṣasya tāratamyādānantyācca 
sarvasargabhedānāmānantyamavaseyam | manuṣyarūpo'pi daivaḥ sargo 
dvividhaḥ | tatra ekaḥ 

p. 9) sattvaleśānugatarajoguṇapradhāno yaḥ pravṛttimārgonmukhatvāt 
tattvajñānānunmeṣe sati sattvaleśānugatarajoguṇavaśāt 
trayyādiśāstracoditayajñadānatapaḥprabhṛtikriyaikapradhānaḥ (k, g: 
pravaṇaḥ iti pāṭhaḥ |) saṃsāramanubhavati | yasya 
jñānānarhatvādevamupakramya lakṣaṇamuktaṃ

vyavasāyātmikā buddhirekaiva kurunandana |
bahuśākhā hyanantāśca buddhayo'vyavasāyinām ||

yāmimāṃ puṣpitāṃ vācaṃ pravadantyavipaścitaḥ |
vedavādaratāḥ pārtha nānyadastītivādinaḥ ||

kāmātmānaḥ svargaparā janmakarmaphalepsavaḥ |
kriyāviśeṣabahulā bhogaiśvaryagatīḥ prati ||

bhogaiśvaryaprasaktānāṃ tayāpahatacetasām |
vyavasāyātmikā buddhiḥ samādhau na vidhīyate || (2/45)

iti | tathā kriyāmātranirdiṣṭatvamuddiśya uktaṃ

traividyā māṃ somapāḥ pūtapāpā
yajñairiṣṭvā svargatiṃ prārthayante |
te puṇyamāsādya surendraloka-
maśnanti divyāndivi devabhogān ||

te taṃ bhūktvā svargalokaṃ viśālaṃ
kṣīṇe puṇye martyalokaṃ viśanti |
evaṃ trayīdharmamanuprapannā
gatāgataṃ kāmakāmā labhante || (9/22)

iti | tathā tānprati svakriyākrīḍāmapi bhagavānanenaiva āha yata 
īśvarecchayaiva te tathā saṃsāritāṃ saṃprati anubhavanti | dvitīyo 
manuṣyātmako daivaḥ sargabhedo rajoleśānugatasattvapradhāno yaḥ

p. 10) prabalavikalpānilaniścalatvāt kulaśailasthairyābhyāṃ 
puraḥsarībhyāṃ 
bhaktiśraddhābhyāmutsāryamāṇasandehādighoravighnaughāvaraṇatvād
abhivyañjitapratyāsannaparameśvaradarśanamahotsava eva 
evaṃkṛtalakṣaṇatayā iha nirdiṣṭaḥ

abhayaṃ sattvasaṃśuddhirjñānayogavyavasthitiḥ |
dānaṃ damaśca yajñaśca svādhyāyastapa ārjavam ||

ahiṃsā satyamakrodhastyāgo'saktirapaiśunam |
dayā bhūteṣvalaulyaṃ ca mārdavaṃ hrīracāpalam ||

tejaḥ kṣamā dhṛtistuṣṭiradroho'nabhimānitā |
bhavanti sampadaṃ daivīmabhijātasya bhārata || (16/3)

ityādinā | tathāvidha eva hi 
prārabdhaprakaraṇapratipādyaparamarahasyopadeśaviṣayatayā iha 
parigṛhītaḥ | yadāha upadeśyaṃ prati

evaṃ vivasvate yogaṃ proktavānahamavyayam || (4/1)

ityādi upakramya

sa evāyaṃ mayā te'dya yogaḥ proktaḥ purātanaḥ |
bhakto'si me sakhā ceti rahasyaṃ caitaduttamam || (4/3)

ityādi, tathā

caturvidhā bhajante māṃ janāḥ sukṛtinaḥ sadā || (7/16)

ityādi, tathā prakaraṇaparisamāptau

siddhiṃ prāpto yadā brahma samāsena nibodha me |
samāsena tu kaunteya niṣṭhā jñānasya yā parā || (18/50)

iti upakramya

samaḥ sarveṣu bhūteṣu madbhaktiṃ labhate parām | 
bhaktyā māmabhijānāti so'haṃ yaścāsmi tattvataḥ || (18/55)

iti, tathā śraddhādiviṣayamapi āha

p. 11) śraddhāvā/llabhate jñānaṃ saṃyatastatparendriyaḥ |
jñānaṃ labdhvā parāṃ śāntimacireṇādhigacchati || (4/39)

iti, tathā

śraddhāvanto'nasūyanto mucyante sarvakilviṣaiḥ | (3/31)

iti, tathā

śraddadhānā matparamā bhaktāste'tīva me priyāḥ || (13/20)

ityādi ca | itthaṃ sargabhedeṣu avasthiteṣu ayaṃ samanantarapratipādito 
daivasargabhedo manuṣyātmako yādṛgasya upadeśasya viṣayatvena 
parigṛhītaḥ, tasya tāvat svarūpamupakṣipyate

dhṛtarāṣṭra uvāca

dharmakṣetre kurukṣetre sarvakṣatrasamāgame |
māmakāḥ pāṇḍavāścaiva kimakurvata sañjaya || 1 ||

sañjaya uvāca

dṛṣṭvā tu pāṇḍavānīkaṃ vyūḍhaṃ duryodhanastadā |
ācāryamupasaṃgamya rājā vacanamabravīt || 2 ||

paśyaitāṃ pāṇḍuputrāṇāmācārya mahatīṃ camūm |
vyūḍhāṃ drupadaputreṇa tava śiṣyeṇa dhīmatā || 3 ||

atra śūrā maheṣvāsā bhīmārjunasamā yudhi |
yuyudhāno virāṭaśca drupadaśca mahārathaḥ || 4 ||

dhṛṣṭaketuścekitānaḥ kāśirājaśca vīryavān |
purujitkuntibhojaśca śaivyaśca narapuṅgavaḥ || 5 ||

yudhāmanyuśca vikrānta uttamaujāśca vīryavān |
saubhadro draupadeyāśca sarva eva mahārathāḥ || 6 ||

asmākaṃ tu viśiṣṭā ye tānnibodha dvijottama |
nāyakā mama sainyasya saṃjñārthaṃ tānbravīmi te || 7 ||

p. 12) sainye mahati ye sarve netāraḥ śūrasaṃmatāḥ |
bhavānbhīṣmaśca karṇaśca kṛpaḥ śalyo jayadrathaḥ || 8 ||

aśvatthāmā vikarṇaśca saumadattiśca vīryavān |
anye ca bahavaḥ śūrā madarthe tyaktajīvitāḥ || 9 ||

nānāśastrapraharaṇā nānāyuddhaviśāradāḥ |
aparyāptaṃ tvidameteṣāṃ balaṃ bhīṣmābhirakṣitam || 10 ||

paryāptaṃ tvidameteṣāṃ balaṃ bhīṣmābhirakṣitam | 
ayaneṣu ca sarveṣu yathābhāgamavasthitāḥ || 11 ||

bhīṣmamevābhirakṣantu bhavantaḥ sarva eva hi |
tasya saṃjanayanharṣaṃ kuruvṛddhaḥ pitāmahaḥ || 12 ||

siṃhanādaṃ vinadyoccaiḥ śaṃkhaṃ dadhmau pratāpavān |
tataḥ śaṃkhāśca bheryaśca paṇavānakagomukhāḥ || 13 ||

sahasaivābhyahanyanta sa śabdastumulo'bhavat |
tataḥ śvetairhayairyukte mahati syandane sthitau || 14 ||

mādhavaḥ pāṇḍavaścaiva divyau śaṃkhau pradadhmatuḥ |
pāṃcajanyaṃ hṛṣīkeśo devadattaṃ dhanaṃjayaḥ || 15 ||

pauṇḍraṃ dadhmau mahāśaṃkhaṃ bhīmakarmā vṛkodaraḥ |
anantavijayaṃ rājā kuntīputro yudhiṣṭhiraḥ || 16 ||

nakulaḥ sahadevaśca sughoṣamaṇipuṣpakau |
kāśyaśca parameṣvāsaḥ śikhaṇḍī ca mahārathaḥ || 17 ||

dhṛṣṭadyumno virāṭaśca sātyakiścāparājitaḥ |
pāñcālaśca maheṣvāso draupadeyāśca paṃca ye || 18 ||

saubhadraśca mahābāhuḥ śaṃkhāndadhmuḥ pṛthak pṛthak |
sa ghoṣo dhārtarāṣṭrāṇāṃ hṛdayāṇi vyadārayat || 19 ||

p. 13) nabhaśca pṛthivīṃ caiva tumulo vyanunādayat |
atha vyavasthitān dṛṣṭvā dhārtarāṣṭrān kapidhvajaḥ || 20 ||

pravṛtte śastrasaṃpāte dhanurudyamya pāṇḍavaḥ |
hṛṣīkeśaṃ tadā vākyamidamāha mahīpate || 21 ||

arjuna uvāca 

senayorubhayormadhye rathaṃ sthāpaya me'cyuta |
yāvadetānnirīkṣe'haṃ yoddhukāmānavasthitān || 22 ||

kairmayā saha yoddhavyamasmin raṇasamudyame |
yotsyamānānavekṣe'haṃ ya ete'tra samāgatāḥ || 23 ||

dhārtarāṣṭrasya durbuddheryuddhe priyacikīrṣavaḥ |

saṃjaya uvāca

evamukto hṛṣīkeśo guḍākeśena bhārata || 24 ||

senayorubhayormadhye sthāpayitvā rathottamam |
bhīṣmadroṇapramukhataḥ sarveṣāṃ ca mahīkṣitām || 25 ||

uvāca pārtha paśyaitānsamavetānkurūniti |
tatrāpaśyatsthitānpārthaḥ pitṛnatha pitāmahān || 26 ||

ācāryānmātulānbhrātṛnputrānpautrānsakhīṃstathā |
śvaśurānsuhṛdaścaiva senayorubhayorapi || 27 ||

tānsamīkṣya sa kaunteyaḥ sarvānbandhūnavasthitān |
kṛpayā parayāviṣṭaḥ sīdamāno'bravīdidam || 28 ||

arjuna uvāca 

dṛṣṭvemānsvajanānkṛṣṇa yuyutsūnsamavasthitān |
sīdanti mama gātrāṇi mukhaṃ ca pariśuṣyati || 29 ||

vepathuśca śarīre me romaharṣaśca jāyate |
gāṇḍīvaṃ sraṃsate hastāttvakcaiva paridahyate || 30 ||

p. 14) na ca śaknomyavasthātuṃ bhramatīva ca me manaḥ |
nimittāni ca paśyāmi viparītāni keśava || 31 ||

naca śreyo'nupaśyāmi hatvā svajanamāhave |
na kāṃkṣe vijayaṃ kṛṣṇa naca rājyaṃ sukhāni ca || 32 ||

kiṃ no rājyena govinda kiṃ bhogairjīvitena kim | 
yeṣāmarthe kāṃkṣitaṃ no rājyaṃ bhogāḥ sukhāni ca || 33 ||

ta ime'vasthitā yuddhe prāṇāṃstyaktvā dhanāni ca |
ācāryāḥ pitaraḥ putrāstathaiva ca pitāmahāḥ || 34 ||

mātulāḥ śvaśurāḥ pautrāḥ syālāḥ saṃbandhinastathā | 
etānna hantumicchāmi ghnato'pi madhusūdana || 35 ||

api trailokyarājyasya hetoḥ kimu mahīkṛte |
nihatya dhārtarāṣṭrānnaḥ kā prītiḥ syājjanārdana || 36 ||

pāpamevāśrayedasmānhatvaitānātatāyinaḥ |
tasmānnārhā vayaṃ hantuṃ dhārtarāṣṭrānsvavāndhavān || 37 ||

svajanaṃ hi kathaṃ hatvā sukhinaḥ syāma mādhava | 
yadyapyete na paśyanti lobhopahatacetasaḥ || 38 ||

kulakṣayakṛtaṃ doṣaṃ mitradrohe ca pātakam |
kathaṃ na jñeyamasmābhiḥ pāpādasmānnivartitum || 39 ||

kulakṣayakṛtaṃ doṣaṃ prapaśyadbhirjanārdana |
kulakṣaye praṇaśyanti kuladharmāḥ sanātanāḥ || 40 ||

dharme naṣṭe kulaṃ kṛtsnamadharmo'bhibhavatyuta |
adharmābhibhavāt kṛṣṇa praduṣyanti kulastriyaḥ || 41 ||

strīṣu duṣṭāsu vārṣṇeya jāyate varṇasaṃkaraḥ |
saṃkaro narakāyaiva kulaghnānāṃ kulasya ca || 42 || 

p. 15) patanti pitaro hyeṣāṃ luptapiṇḍodakakriyāḥ |
doṣairetaiḥ kulaghnānāṃ varṇasaṃkarakārakaiḥ || 43 ||

utsādyante jātidharmāḥ kuladharmāśca śāśvatāḥ |
utsannakuladharmāṇāṃ manuṣyāṇāṃ janārdana || 44 ||

narake niyataṃ vāso bhavatītyanuśuśruma |
aho bata mahatpāpaṃ kartuṃ vyavasitā vayam || 45 ||

yadrājyasukhalobhena hantuṃ svajanamudyatāḥ |
yadi māmapratīkāramaśastraṃ śastrapāṇayaḥ || 46 ||

dhārtarāṣṭrā raṇe hanyustanme kṣemataraṃ bhavet |

saṃjaya uvāca

evamuktvārjunaḥ saṃkhye rathopastha upāviśat || 47 ||

visṛjya saśaraṃ cāpaṃ śokasaṃvignamānasaḥ |

	iha khalu pratipāditasvarūpasya sarvakartuḥ parameśvarasya satataṃ 
kartṛtvāvilopāt kriyāśaktinityāvirahe suvyavasthite 
tanmāyāvaibhavodbhāvitabhedānāmapi jīvānāṃ 
paramārthatastadātmakatvāt tadvadeva kriyāśaktyavirahaḥ sarvadaiva 
sthitaḥ, iti sarvātmanā karmaṇāṃ parityāgānupapatteḥ 
śāstracoditānāṃ teṣāṃ 
bandhakatvaśaktipratiṣṭambhahetuvakṣyamāṇajñānasaṃskṛtānāmadhik
ārideśakālāvasthādyapekṣaṃ mukhyakalpānukalpakrameṇa yathāśakti 
yathāvidhi ca anuṣṭhānameva sakalasya upadeśaviṣayabhūtasya janasya 
paramārthasvarūpasamāpattilakṣaṇamokṣādhigamaheturityayamiha 
upadeśo vivakṣitaḥ | ataśca kasyacidapi adhikāriṇaḥ kasyāṃcidapi 
avasthāyāṃ ghorasya api śāstracoditasya karmaṇaḥ parihārānupapattau 
sthitāyāṃ tādṛśameva 
ghorakarmādhikṛtamuktopadeśyalakṣaṇaviśiṣṭamarjunamuddiśya 
bhagavatkartṛkaṃ rahasyamidamupadeṣṭuṃ munipuṅgavaḥ prakramate | tatra 
dharmakṣetre

p. 16) ityādi kimakurvata sañjaya ityantaṃ 
dhṛtarāṣṭrapraśnacoditasaṃjayavākyāni | dṛṣṭvā tu pāṃḍavānīkam 
ityādīni tumulo vyanunādayat ityantāni 
parasparavadhādhyavasāyasaṃrabdhasakalakurupāṇḍavasainyasamāgatasu
bhaṭaghorasamarasaṃrambhodyogasūcakatvāt 
karmaghoratvapratipādanatātparyāṇi nigadavyākhyātāni | tathā atha 
vyavasthitāndṛṣṭvā ityādi upakramya saṃjayoktānyeva arjunavākyāni 
sainyanirūpaṇopakramāṇi ubhayoḥ senayormadhye ityādīni subodhāni | 
tataḥ saṃjayoktānyeva hṛṣīkeśavākyānyapi sphuṭārthānyeva | tataḥ 
tatrāpaśyatsthitānpārthaḥ ityādi sīdamāno'bravīt ityantamarjunasya 
pitṛpitāmahādibandhuvargadarśanakriyātmakaṃ saṃjayavākyamapi 
vyaktārtham | tataḥ 
prastutopadeśapratiṣedhyatattvājñānasamudbhūtapitṛpitāmahādibandhuv
adhaparyavasāyisaṅgrāmakarmavicikitsasya karuṇāveśavivaśasya 
arjunasya adharmameva dharmatvena vyapadiśato dṛṣṭvemānsvajanān 
kṛṣṇa ityādīni tanme kṣemataraṃ bhavet ityantāni 
manuṣyasvabhāvasulabhamithyājñānapratipādakavākyāni 
nigadavyākhyātānyeva | tataśca evamuktvā hṛṣīkeśam ityādi 
saṃjayavākyamapi gatārthameveti tātparyataḥ prathamo'dhyāyo 
vyākhyātaḥ, nanu gauravabhayāt prātipadyena | evamayaṃ 
prathamo'dhyāyo yathopakrānta 
upadeśyabhagavatpravṛttihetvarjunaviṣādapratipādanārthaḥ samāptaḥ || 1 
||

yogyānugrahanītināṭakavidhiprastāvaneyaṃ prabho-
rgītāsu prathamasya yā viracanādhyāyasya tāṃ dhyāyatām |
divyāsvādasudhārdravastuvikasatkautūhalānāṃ manaḥ
sabhyānāmavadhānamatra niviḍaṃ vadhnātu baddhādaram ||

iti śrīrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe prathamo'dhyāyaḥ || 1 ||



atha dvitīyo'dhyāyaḥ 

kvacit ṣaḍbhiḥ pādaiḥ, dvacidardhaślokena 
munervākyārthaparisamāptistatra tatra itihāsabhāge dṛśyate | tadiha 
prakaraṇe tatra tatra tathaiva avagantavyam | atha evaṃ 
vyāmohavaśavisaṃsthulamarjunaṃ prati saṃjātānujipṛkṣasya bhagavataḥ 
paramārthopadeśaprakramapiśunāni vākyāni upakṣeptuṃ 

saṃjaya uvāca

taṃ tathā kṛpayāviṣṭamaśrupūrṇākulekṣaṇam |
sīdamānamidaṃ vākyamuvāca madhusūdanaḥ || 1 ||

spaṣṭārthaḥ ślokaḥ || 1 ||

yaduvāca bhagavāṃstadāha

kutastvā kaśmalamidaṃ viṣame samupasthitam |
anāryajuṣṭamasvargyamakīrtikaramarjuna || 2 ||

idam evaṃ 
vidhaprastutāvaśyakaraṇīyasvakarmakaraṇāvasādakāraṇavyāmohātmak
aṃ kaśmalaṃ pāpaṃ tvā bhavantaṃ kutaḥ kasmāt nimittāt viṣame 
saṃkaṭe upasthitam upāgatam arjuna | kīdṛśaṃ kaśmalam | anāryajuṣṭam 
aśiṣṭasevitam, ata eva asvargyaṃ svargaprāptipratikūlam akīrtikaram 
apavādasaṃpādakamiti padasaṃgatiḥ sphuṭaiva | arthaviśeṣaṃ tu imaṃ 
garbhīkṛtya bhagavānetadāha arjunaśadbo'tra na 
saṃjñimātrasambodhanārthaḥ, kiṃtu 
tadgataprakṛṣṭābhijanaprajñāparākramādiguṇagarimapratyāyanārthaḥ | 
tvacchabdo'pi paramārthato mohādimalaviviktasvabhāvasya ātmanaḥ 
pratyāyakatvena prayuktaḥ | tena vastuto yastvaṃ, tasya anena 
vyāmohakalaṅkena sambandhaḥ prakāśasya tamasā iva 
atyantamasambhāvyaḥ, iti kutastvāmidamupasthitamityanena

p. 18) vākyena garbhīkṛtam | ata evaca 
etatpāpamanāryairatattvavidbhirasādhubhiḥ sevitamityādi uktam || 2 ||

anenaiva krameṇa etat viśeṣayitumāha

mā klaivyaṃ gaccha kaunteya naitattvayyupapadyate |
kṣudraṃ hṛdayadaurbalyaṃ tyaktvottiṣṭha parantapa || 3 ||

he parantapa ! śatrujanajvarajanaka klaivyaṃ kāpuruṣatvaṃ mā 
gāḥ, yataḥ tvayi jagadvikhyātavikramādiguṇamahimni na etat 
evaṃvidhamalpasattvajanocitam upapadyate | tasmāt kṣudram asāraṃ 
hṛdayadaurbalyam āśayakārśyaṃ vihāya uttiṣṭha svaprastute ślāghye 
saṃgrāmakarmaṇi udyamaṃ gṛhṇīṣva | atrāpi tvacchabdasya 
pūrvoktārthagarbhīkāreṇa prayogo mantavyaḥ, klaivyaśabdasya ca 
vivekaśūnyatvagarbhīkāreṇa, iti | anyadapi viśeṣaṇamevaṃ yojanīyamiti 
|| 3 ||

	atha saṃprati 
anāvirbhūtātmānātmasvarūpavivecanakṣamaprajñatvāt dehādikameva 
ātmatvena pratipadyamāno 
gurvādivadhamahāpātakaparyavasāyisamarānuṣṭhānaṃ 
doṣodbhāvanena pratiṣeddhumarjuna uvāca

kathaṃ bhīṣmamahaṃ saṃkhye droṇaṃ ca madhusūdana |
iṣubhiḥ pratiyotsyāmi pūjārhāvarisūdana || 4 ||

	madhusūdana ! kathaṃ kena śāstropapannena prakāreṇa bhīṣmaṃ 
pitāmahaṃ guruṃ ca droṇaṃ brāhmaṇaṃ saṃgare sāyakaiḥ pratīpaṃ 
saṃprahāreṇa yojayiṣyāmi | yadivā pratiśabdayoge dvitīyā vyākhyeyā | 
yudhiśca akarmaka eva | parasmaipadamatra cchāndasam | anyatrāpi evaṃ 
draṣṭavyam | yatastau vidyābhidhānadhanapradānaparamopakāriṇau 
prāṇairapi paritoṣaṇīyahṛdayau pūjanameva arhataḥ | atra etena 
kathamitiprakārapraśnena prastutaraṇaparijihīrṣāyāḥ kaśmalatvaṃ 
bhagavatā upanyastaṃ dharmavirodhādanupapannameveti abhiprāyaḥ 
sūcito'rjunena || 4 ||

p. 19) atha āha

gurūnahatvā hi mahānubhāvān
śreyaścartuṃ bhaikṣyamapīha loke |
natvarthakāmastu gurūnnihatya
bhūñjīya bhogān rudhirapradigdhān || 5 ||

	yasmāt saṃgrāmaparihāreṇa gurūṇāṃ vadhaḥ parihṛto bhavati, 
tāṃśca ahatvā bhikṣānnamapi abhyavahartuṃ praśasyaṃ syānmama, na 
punarahaṃ dharmalipsustān vyāpādya tacchoṇitopacitān iṣṭān viṣayān 
samaśrīyām || 5 ||

kiṃca

naitadvidmaḥ karatanno garīyo
yadvā jayema yadi vā no jayeyuḥ |
yāneva hatvā na jijīviṣāma-
ste naḥ sthitāḥ pramukhe dhārtarāṣṭrāḥ || 6 ||

	etat eva na jānīmaḥ dvayormadhyāt katarat vastu asmākaṃ 
prayojanavattayā garīyo gurutaraṃ syāt | kayostayorvastunorityāha yadivā 
vayaṃ tān pratidvandvino jayema tiraskurvīmahi, yadivā asmān te 
tiraskurvīran | etayorarthayorekatarasya garīyastvāparijñāne kāraṇamāha- 
yasmāt yān kurūn vyāpādya vayaṃ bandhuvirahāt prāṇāneva 
dhārayituṃ na icchāmaḥ te dhṛtarāṣṭraputrā bhrātaro'smākaṃ puraḥ 
sthitāḥ | kimuktaṃ bhavati | yadi tāvadasmābhiḥ kuravo hatāḥ syuḥ, 
tadasya pakṣasya kā garīyastā duḥkhamātraphalatvāt | evaṃca 
arthādidamuktaṃ syāt yadi te'smān jayeyuḥ, sa pakṣo garīyān bhavediti || 
6 ||
	atha samarakarmānuṣṭhānaṃ dharmasukhabādhakatvāt 
parihāryatayā pratipādya api,

p. 20) svātmani vaiduṣyābhimānadoṣamāśaṅkamāno bhagavati 
saṃśayānamātmānamāvedayan sa āha

kārpaṇyadoṣopahatasvabhāvaḥ
pṛcchāmi tvāṃ dharmasaṃmūḍhacetāḥ |
yacchreyaḥ syānniśritaṃ brūhi tanme
śiṣyaste'haṃ śādhi māṃ tvāṃ prapannam || 7 ||

	he bhagavannahaṃ kārpaṇyadoṣeṇa bandhuhiṃsājanitena dainyena 
upahatasvabhāvaḥ pradhvaṃsitakṣatradharmā ata eva dharmeṣu 
śāstroditeṣu ācāreṣu saṃmūḍhacetāḥ saṃśayitamanasko bhavantaṃ 
pṛcchāmi | ataśca yat me vastu śreyaḥ praśasyataraṃ syāt, tat niścitaṃ 
niḥsandehamādiśa | yataḥ śiṣyaḥ śāsanīyastava aham | etena prapannam 
upapannaṃ santaṃ gururbhūtvā māṃ śādhi vyutpādayeti || 7 ||

kiṃca

na taṃ prapaśyāmi mamāpanudyāt
yaḥ śokamucchoṣaṇamindriyāṇām |
avāpya bhūmāvasapatamṛddhaṃ
rājyaṃ surāṇāmapi cādhipatyam || 8 ||

	yasmāt tam ahaṃ kaṃcit tvāṃ varjayitvā na tarkayāmi, yo mama 
śokaṃ śocanamapasārayet | kīdṛśam | indriyāṇāṃ 
bāhyābhyantarāṇāṃ karaṇānām ucchoṣaṇaṃ santāpakam | kiṃ kṛtvā 
| nirvipakṣaṃ sphītaṃ bhūpālādhipatyaṃ labdhvā api | athavā 
atyalpamidamucyate, devānāmapi aiśvaryamadhigamya mama 
kārpaṇyadoṣopahatasvabhāvasya śocanameva syāt, ato māṃ śādhi, iti | 
evaṃ śocanakriyāpekṣamavāptikriyāyāḥ paurvakālyamavaseyam, natu 
apanodanakriyāpekṣam;

p. 21) tathāhi sati bhinnakartṛkatvāt śabdadoṣaḥ samanvayābhāvācca 
arthadoṣo durnivāraḥ syāditi || 8 ||
	atha yuddhaniṣedhaniścitabuddhitvaṃ dhanañjayasya pratipādayituṃ

saṃjaya uvāca

evamuktvā hṛṣīkeśaṃ guḍākeśaḥ parantapa |
na yotsyāmīti govindamuktvā tūṣṇīṃ babhūva ha || 9 ||

tamuvāca hṛṣīkeśaḥ prahasanniva bhārata |
senayorubhayormadhye sīdamānamidaṃ vacaḥ || 10 ||

	ślokadvayametat gatārtham, kiṃtu hṛṣīkāṇi indriyāṇi teṣāmīśo 
niyantā bhagavān | guḍākāṃ nidrāmācakṣate, tasyā īśastayā 
anabhibhavanīya iti arjunaviśeṣaṇaṃ vyākhyeyamiti || 10 ||

	evamavidyāvyāmohaparityaktasaṃgrāmādhyavasāyamarjunaṃ 
samyak jñānopadeśena atra svakarmaṇi pravivartayiṣuḥ

bhagavānuvāca

tvaṃ mānuṣyeṇopahatāntarātmā
viṣādamohābhibhavādvisaṃjñaḥ |
kṛpāgṛhītaḥ samavekṣya bandhū-
nabhiprapannānmukhamantakasya || 11 ||

	upadeśābhāvāt saṃprati anuditadaivasargocitaprajñaḥ tvaṃ 
mānuṣyeṇa manuṣyabhāvena saṃśayaviparyajñānabahulena 
upahatāntarātmā pratyabhijñānābhāvāt tiraskṛtasatyātmasvarūpo 
vartase iti śeṣaḥ | yasmāt viṣādena śokajena anadhyavasāyena mohena ca 
viparyayapratyayahetunā vaicittyena yaste abhibhavaḥ sāmarthyabhaṃgaḥ 
kṛtaḥ, tasmāt hetoḥ visaṃjñaḥ vigatavakṣyamāṇasamyagjñāno'si | kuta 
etadavagatamityāha yatastvaṃ durnivāraprasarasya kṛtāntasya vadane 
praviṣṭān

p. 22) bāndhavān nirūpya kṛpāgṛhītaḥ gṛhītakṛpaḥ svīkṛtakaruṇaḥ 
saṃvṛttaḥ | āhitāgryāderākṛtigaṇatvāt gṛhītaśabdasya 
pūrvanipātābhāvo'tra avaseyaḥ | tena bahubrīhireva ayaṃ, na tatpuruṣaḥ, 
tasmin sati bhinnakartṛkatvaprasaṅgaḥ | anena ślokena vakṣyamāṇasya 
ātmajñānasya prathamapratipādyaṃ 
śarīraśarīrivyatirekajñānamāsūtritam || 11 ||
	yata 
ekāntavinaśvaraśarīrasaṃniveśaviśeṣabaddhabandhubuddhitvamidaṃ 
śarīrisvarūpāparāmarśanibandhanam, ata eva āha

aśocyānanuśocaṃstvaṃ prājñavannābhibhāṣase |
gatāsūnagatāsūṃśca nānuśocanti paṃḍitāḥ || 12 ||

	tvaṃ jñātigurvādivadhaparyavasāyinaḥ samaravyāpārasya 
adharmyatvaduḥkhodarkatvādupanyasyan lokadvayabādhakatvaṃ prājñavat 
buddhimāniva na jalpasi | naiṣā naiṣṭhikī buddhiḥ, 
śarīraśarīrivivekajñānābhāvajanitā vimatireva eṣā | na hi ete 
gurvādayo'vaśyaṃ vināśiśarīramātrātmakāḥ, kiṃtu nityāḥ 
śarīriṇaḥ ete tadvyatiriktāḥ | ata eva kiṃ kurvan tvaṃ 
prājñavannābhibhāṣase aśocyān vināśābhāvāt paramārthataśca 
duḥkhayogābhāvādaśocanīyān paridevanasya aviṣayabhūtān anuśocan 
śokaviṣayatvena bhāvayan | yataśca ete nityāḥ, ata eva tān gatāsūn 
tebhyastebhyaḥ śarīrebhyaḥ utkrāntaprāṇān mṛtavyapadeśabhājaḥ, 
tathāca agatāsūn teṣu teṣu śarīreṣu avasthitaprāṇatvāt 
jīvadvyapadeśabhājaḥ paṇḍitāḥ vijñātaparamārthāḥ na anuśocanti || 
12 ||
	tathāca jīvāvasthāyāmeva eṣāṃ tāvat nityatvaṃ 
pratipādayitumāha

na hyevāhaṃ jātu nāsaṃ na tvaṃ neme janādhipāḥ |
na caiva na bhaviṣyāmaḥ sarve vayamitaḥ param || 13 ||

p. 23) yaṃ māṃ vartamānaṃ manyasesaḥ ahaṃ na jātu na āsaṃ 
nañdvayena pūrvakālabhāvameva prakṛtaṃ pratipādayati 
nāhamabhūtvā bhavāmi, kiṃtu prāgapi bhūtvā idānīmapi bhavāmi | 
yathā ahaṃ, tathā tvamapi saṃprati vartamānatvena pratibhāsamānaḥ 
pūrvamapi āsīreva, natu abhūtvā bhavasi | yathāca tvaṃ, evamime'pi 
vartamānatvena pratibhāsamānāḥ sarve rājānaḥ pūrvamāsanneva, na 
punarabhūtvā bhāva eṣām | na ca sarve eva vayamitaḥ param asmāt 
śarīrādanantaraṃ na bhaviṣyāmaḥ bhaviṣyāma eveti | anena 
yuṣmadasmatparabhedena vyavasthitasya jīvalokasya kālatraye'pi 
sattāsaṃbhavāt nityatvaṃ pratijānīte | āsam ityādi tu 
bhūtādikriyākartṛtvavyapadeśo 
vināśadharmakaśarīrasāmānādhiakaraṇyabhramakṛtaḥ, natu nityasya 
bhūtādivyapadeśa upapadyate iti || 13 ||
	nanu dehaniṣṭhasya jīvasya kartṛtvajñātṛtvādyupalambhaḥ tat 
kathaṃ tadvināśe tasya nityatvaṃ syāditi durāśaṃkāṃ 
pratyakṣopalabhyanidarśanapratipādanena parihartumāha

dehino'sminyathā dehe kaumāraṃ yauvanaṃ jarā |
tathā dehāntaraprāptirdhīrastatra na muhyati || 14 ||

	asmin vartamānabuddhyā parigṛhīte dehe yathā asya dehinaḥ 
tatsaṃvediturātmanaḥ kaumāraṃ kumārabhāvo bālyaṃ, tathā yauvanaṃ 
tāruṇyaṃ, tathā jarā vṛddhabhāvaḥ ityavasthātrayamanityaṃ tena dehinā 
bhūtāditvena anusandhīyamānaṃ sambadhyate, tathā tenaiva nidarśanena 
ito dehādanyasya dehasya prāptistasya ātmano dehadvayavyāpakasya 
sthitaiva | tatra atattvajño mohaṃ gacchati śarīravināśe śarīriṇamapi 
vinaṣṭaṃ manyate, dhīrastu paṇḍitastattvavit tatra na muhyati na taṃ

p. 24) śarīravināśe naṣṭaṃ manyate nityameva tamavagacchati | kimanena 
uktaṃ bhavati | yathā bālyādyavasthāvināśe na kaścidātmavināśaṃ 
manyate pratipattāramātmānamekaṃ sthitaṃ manyate, tathaiva 
nānādehasambandhamatītānāgatatvena anusandadhānaḥ kiṃtu sarvaḥ 
kaścit pratipattā bālyādyavasthā atītānāgatatvena anusandadhānaḥ 
prabuddho nityamātmānamavagacchati | etābhiśca sthūlābhiḥ 
kaumārādyavasthābhistadgatāḥ sūkṣmā jāgarādayo'pi avasthāḥ 
pratipāditā veditavyāḥ | tathāhi tāsu anyonyabhinnarūpāsu 
pravartamānāsu utpādavināśavatīṣu upalabdhṛtvena ekena lakṣaṇena 
yuktastābhyo'tyantavilakṣaṇasvabhāva ātmā sarvasya 
svasaṃvedanasiddho vyāpakatvena vyavasthitaḥ || 14 ||
	tadanena māyaikīkṛtadehadehivyatirekopapattipratipādanadvāreṇa 
pāramārthikamātmādvaitamupakramya idānīṃ yathāpratipādite 
ātmasvarūpe yena hetunā sarvajantavo muhyanti anyathaiva taṃ 
pratipadyante, tatpratipādanapūrvaṃ tatpratiṣedhopāyamapi upadeṣṭumāha

mātrāsparśāstu kaunteya śītoṣṇasukhaduḥkhadāḥ |
āgamāpāyino'nityāstāṃstitikṣasva bhārata || 15 ||

	mīyante etābhiriti kṛtvā dehitvaviśiṣṭasya pramātuḥ 
prameyārthaparicchedasādhanaṃ mātrā indriyārthaśaktaya ucyante | 
spṛśyante vedyatayā parāmṛśyante iti sparśāḥ indriyārthāḥ | te ca 
dviprakārāḥ śrotrādibāhyendriyaspṛśyamānāḥ śabdādirūpāḥ, 
kevalāntaḥkaraṇaspṛśyamānāḥ sukhādirūpāḥ | tuśabdo vyatireke | 
paramārthato nityasya ātmano mātrāsparśāḥ punaḥ 
śītoṣṇasukhaduḥkhadāḥ iti sambandhaḥ | te ca śarīreṇa 
sambadhyamānāḥ śītamanubhavāmi uṣṇamanubhavāmi, iti pratyayaṃ 
dadati; antaḥkaraṇena sambadhyamānāḥ

p. 25) sukhamanubhavāmi duḥkhamanubhavāmi, iti pratyayaṃ dadati | 
tataśca śītoṣṇasukhaduḥkhādiṣu ātmadharmatvamāropayantaḥ 
utpādavināśasvabhāvatvāt anityāḥ ātmani 
anityatābhramamutpādayantaḥ sarvaprāṇabhṛto mohayantītyarthaḥ | 
yataśca te paramārthataḥ pratikṣaṇavināśinaḥ, tataḥ proditopapattyā 
nityamātmānaṃ pratyavamṛśan tān titikṣasva sahasva tatsamarpitena 
anityasukhādisparśamātreṇa 
nityanirvikārasvātmāvaṣṭambhapratiṣṭhāṃ mā tyākṣīḥ | yathā 
trailokyaikavīreṇa tvayā durvāradarpodbhuramāpatantaḥ pratidvandvino 
niṣprakampanijapauruṣaparispandasusthitena mānagapi 
antaranupajātavikriyeṇa asakṛt sāvajñamudvyūḍhabharatayā soḍhāḥ, 
tathaiva nisarganirvikāre svātmani ahaṅkāramāropya te'pi sparśākhyāḥ 
pratidvandvinaḥ prakṛtinissāratatsarūpanirūpaṇamātreṇa sahyantām | 
yathāsthitavastuvimarśābhāvamātrajanito'yaṃ vyāmohaḥ yadātmani 
dehabuddhyādidharmāropeṇa kṛśo'haṃ pūrṇo'haṃ sukhito'haṃ 
duḥkhito'ham ityādayaḥ pratyayāstatsāmānādhikaraṇyena 
prādurbhavanti, tattvataḥ punaste svātmaikyena avasthitā 
bahirantaḥkaraṇaśaktibhiḥ kevalaṃ spṛśyante, natu tāvatā kāṃcidapi 
ātmano vikārakaṇikāṃ sampādayituṃ kṣamāḥ | sphaṭikadarpaṇopamo hi 
ayamātmā nīlapītādyābhāsatulyābhiḥ sphurantībhirapi 
nikaṭasukhādipratītibhirna anyathākartuṃ śakyate | yaduktam

āsaktisāmarthyavaśādvicitrāḥ padārthajātasya vibhānti bhāsaḥ 
prapadyate'ntarnatu (kha, ga, pu0 prapadyate tannatviti pāṭhaḥ |) jātu 
dhīmān vikāramādarśa iva(kha, ga, pu0 ivāprasanna iti pāṭhaḥ |) 
prasannaḥ ||

iti | ata eva mātrāsparśaśabdena indriyārthavyapadeśaḥ kṛtaḥ |

p. 26) tadanena ślokena 
sarvasaṃvedyabhaṅgurasvabhāvakaumārajāgarādyavasthāvat 
sukhādyavasthāsvapi sarvaprāṇigatāsu saṃvedakatvenaiva ekena 
svabhāvena yukto nityo vyāpaka eka eva ātmā pratipāditaḥ | naca 
evatāvatā ekasya sukhitvādau sati sarvasukhitvādiprasaṃgaḥ, yato 
māyodbhāvitānyonyabhedābhāsā eva pramātāraḥ satataṃ 
parasparavibhaktamātmānamavagacchanti, natu pāramārthikaḥ paraḥ 
pramātā | tatra hi ekasmin sarvadā sarvatra sarvathā nirviśeṣasvabhāve 
sarvamidaṃ pratibaddham | yathoktaṃ

--------------------taṃ prapadye prajāsṛjam |

iti upakramya

yasminnitye tate tantau dṛḍhe saṃvyavatiṣṭhati |
sadasadgrathitaṃ viśvaṃ viśvāṅge viśvakarmaṇi ||

iti || 15 ||

tadevaṃsvabhāve satye svātmani suvyavasthitamuktalakṣaṇamiti (ka0 ga0 
gha0 gu0 suvyavasthitatvaṃ muktalakṣamiti pāṭhaḥ |) pratipādayitumāha

yaṃ hi na vyathayantyete puruṣaṃ puruṣarṣabha |
samaduḥkhasukhaṃ dhīraṃ so'mṛtatvāya kalpate || 16 ||

	yaṃ puruṣam uktalakṣaṇaṃ jñānaikatānanirvikalpakaprajñatayā 
mumukṣvavasthāyāṃ vartamānam, ata eva dhīraṃ 
parijñātasadasatpadārthaparamārtham, ata evaca samaduḥkhasukhaṃ same 
manovedyatvamātreṇa ekena rūpeṇa spṛśyamāne tulye duḥkhasukhe yasya 
tathāvidhaṃ ghaṭādivat vedyatvamātrāviśiṣṭarūpaiḥ 
sukhādibhirantaranupajanitavikāraṃ santam ete 
janmavināśadharmayogādanityāḥ sukhito'ham 
ityādiviparyayapratyayahetavaḥ sparśaśabdābhihitā viṣayāḥ śabdādayo 
na

p. 27) vyathayanti tadviviktavedakaikasvabhāvāt satyādātmano na 
pracyāvayanti, saḥ amṛtatvāya paramātmasamāpattivaśādavināśatvāya 
kalpate sampadyate mukto bhavatītyarthaḥ || 16 ||
	atha upapattyupanyāsapūrvamātmano vedakaikasvabhāvasya 
pāramārthikīṃ sattāṃ, tathā tatprameyasvarūpasya dehādeśca 
janmavināśavatastadabhāvaṃ pratipādayitumāha

nāsato vidyate bhāvo nābhāvo vidyate sataḥ |
ubhayorapi dṛṣṭo'ntastvanayostattvadarśibhiḥ || 17 ||

	iha svabhāvādeva yadavidyamānaṃ vastu tasya asato bhāvaḥ sattā 
na asti tathaiva svabhāvataḥ sato nityasya abhāvo vināśo na asti etayoḥ 
sadasatoḥ prakāśatamasoriva atyantaparasparavirodhāt; kiṃtu 
etayordvayorapi tattvavidbhiḥ sākṣātkṛtaparamārthaiḥ anto niṣṭhā 
niścayo dṛṣṭo vijñātaḥ, na tu atattvavidbhiḥ | te hi 
acintyādbhutasvabhāvaparameśvaramāyāśaktyudbhāvitaviṣayapratyayata
yā satyamātmānamapratyavamṛśanta eva asadanityatvādinā 
vāstavasadbhāvarahitaṃ dehādivastu idantayā saṃvedyamānatvāt 
sattvena pratipadyante, paramārthatastu sat 
nityamātmatattvamapratyabhijñāyamānatvādasattvena pratipadyante || 17 ||

tataśca tattvataḥ kiṃ sat, kimasaditi upadeṣṭumāha

avināśi tu tadviddhi yena sarvamidaṃ tatam | 
vināśamavyasyāsya na kaścitkartumarhati || 18 ||

	etayoḥ sadasatormadhyāt tadavināśi vināśadharmarahitatvāt 
paramārthataḥ sat viddhi jānīhi | kiṃ tat | yena ekena idam 
anyonyabhinnābhāsamayaṃ sarvaṃ carācaraṃ vastujātaṃ tataṃ 
kartṛtvavivakṣayā visphāritam, jñātṛtvavivakṣayā vā vyāptam | eka eva

p. 28) hi paramārthataḥ sarvakartā sarvajñaḥ parameśvaraḥ paramātmā 
tadavabhāsitānyonyabhedānāṃ tu kṣetrajñānāṃ dehādikameva 
ātmatvena pratipadyamānānāṃ parimitaviṣayaṃ kartṛtvaṃ jñatvaṃ ca 
na vāstavam | evaṃ asya ātmatattvābhidhānasya vastunaḥ avyayasya 
deśakālādyavacchedarahitatvādakṣayasvabhāvasya, tadvilakṣaṇaḥ 
karyajñeyarūpo na kaścidartho vināśam abhāvaṃ kartumarhati | nahi 
nityasya sarvathānavacchinnamahimno'rthasya anityo'vacchedyaḥ padārtho 
vināśāya prabhavatīti || 18 ||

sattvarūpaṃ pratipādya, asattvarūpaṃ pratipādayitumāha

antavanta ime dehā nityasyoktāḥ śarīriṇaḥ |
vināśino'prameyasya tasmādyuddhyasva bhārata || 19 ||

	sarvaśarīreṣu sarvāvasthāsu ca 
aviluptopalabdhṛtvamātraikalakṣaṇatvāt nityasya avināśinaḥ, tathā 
dehādibhiravacchettumaśakyatvāt aprameyasya 
iyattādikalanāviṣayabhūtasya śarīriṇaḥ ātmanaḥ ime 
dehāstadvilakṣaṇā anyonyabhinnāgamāpāyadharmakatvāt vināśino 
vinaśvarasvabhāvatvāt, tathā deśakālādiparicchedyatvāt antavantaḥ 
iyattādikalanāviṣayabhūtā vedyatvamātreṇa sambaddhāḥ, iti 
deharūpasya vastunaḥ paramārthavinaśvarasya jñeyatvamātrādinā 
hetunā ātmasambaddhasya vināśe sati ātmano'pi 
vināśapratipattiravidyāvijṛmbhitam | tacca tvayi na upapannam | ato 
yathāpratipāditātmatattvapratiṣṭhāhaṃkāro vakṣyamāṇayā upapattyā 
duṣpariharaṃ svakarma anutiṣṭhan yuddhyasva prastutaṃ samarakarma 
samācareti || 19 ||
	atha yuddhaṃ nāma parahananarūpatayā hiṃsātmakaṃ karma, tat 
kathamahaṃ gurujñātyādivadhalakṣaṇe ghore karmaṇi pravarteya, iti tat

p. 29) manyase, tadetadātmasvarūpānabhijñatvajanitamohavilasitameva | 
yataḥ

ya enaṃ vetti hantāraṃ yaścainaṃ manyate hatam |
ubhau tau na vijānīto nāyaṃ hanti na hanyate || 20 ||

	yo 
māyāvaśādatyantanirvikāraparamārthasantamātmānamapratyavamṛśan 
tadvilakṣaṇaṃ dehameva ātmatvena manyamāno 
hananādidehadharmādhiropaṇena enaṃ satyamātmānaṃ hantāraṃ 
hananakriyākartāraṃ vetti pratipadyate; yaśca enameva 
pratipāditalakṣaṇamavināśinamātmānaṃ 
vināśalakṣaṇadehadharmādhyāropaṇena hataṃ hiṃsitaṃ manyate; tau 
ubhau api mohavaśādanātmani ātmābhimānagrahagrastasamyagjñānau 
na jānītaḥ satyasya ātmanaḥ svarūpaṃ na buddhyete | yataḥ ayaṃ 
paramātmā sarvameva idaṃ paramanirvikāracinmātrasvabhāvaḥ 
svātmatayā sarvadā vimṛśan na hanti, naca hanyate hantṛtānibandhanaṃ 
hananakriyākartṛtvaṃ na pratipadyate, nāpi hantavyatānibandhanaṃ 
hananakriyāyāḥ karmatvam || 20 ||
	ete hi vikalpaviparyayajñānātmakavyavahārāṇāṃ 
kṣetrajñānāmeva sambhavanti, na paramātmanaḥ

na jāyate mriyate vā kadāci-
nnāyaṃ bhūtvā bhavitā vā na bhūyaḥ |
ajo nityaḥ śāśvato'yaṃ purāṇo 
na hanyate hanyamāne śarīre || 21 ||

	ayam uktalakṣaṇa ātmā 
deśakālākārāvasthādyavacchedarahitacinmātrasvarūpatvāt na jāyate 
utpadyate nityamanutpannarūpatvāt nāpi mriyate vinaśyati nāpi 
janmamaraṇāntarālavartisthityavasthārūpaṃ bhāvavikāramanubhavati | te 
hi janmasthitivināśātmakā avasthābhedā dehādyanityabhāvāśrayāḥ | 
te hi bhāvā abhūtapūrvadharmāvirbhāve

p. 30) jātā iti ucyante, bhūtapūrvadharmatirobhāve ca vinaṣṭā iti ucyante, 
tadantarāle ca tattatpratyayapravāhasādṛśyabhramāt sthitā iti ucyante | sa 
ca teṣāmapunarbhāvībhāvaḥ, ātmanastu sadābhūtasya na 
abhāvasambandhaḥ | saca ekalakṣaṇāvyabhicārācca na 
dhamāntarāvirbhāvatirobhāvāveti | 
janmasthitivināśalakṣaṇāvasthātrayapratiṣedho'sya anena ślokena 
pratipāditaḥ | idānīmeta eva bhāvavikārā viśeṣaṇairasya (kha: 
viśeṣyasya pratīti pāṭhaḥ |) pratiṣidhyante | tatra ayam ātmā na jāyate 
uktena krameṇa notpadyate iti ajaḥ janmalakṣaṇānityabhāvavikārarahitaḥ, 
tathā nityaḥ sadaikasvabhāvāviyukta ityanena asya pratikṣaṇaṃ 
dharmāntarāvirbhāvatirobhāvalakṣaṇo vipariṇāmākhyo vikāraḥ 
pratiṣidhyate | śāśvataḥ śaśvat saṃpūrṇena rūpeṇa yukta ityanena 
vivṛddhilakṣaṇo vikāro'sya pratiṣidhyate | nahi ayamanityabhāvavat 
pūrvamapacito bhūtvā upacayarūpaṃ vikāramāpadyate | tathā purāṇaḥ 
pūrvakoṭerasambhavāt satatameva cirantana ityanena apakṣayalakṣaṇo 
vikāraḥ pratiṣidhyate | nahi ayamupacito bhūtvā punarapacīyate 
dehādibhāvavat | tathā śarīre hanyamāne na ayamātmā hanyate 
śarīrasyaiva anityatvāt janmādyavasthājuṣo vināśāvasthāpi sambhavati, 
natu nityasya ātmana ityanena vināśalakṣaṇo vikāro'sya pratiṣiddhaḥ | 
astitvalakṣaṇastu ṣaṣṭho vikāraḥ prāguktāvasthātrayamadhye 
bhūtvābhāvaśabdena pratipāditaḥ ityadhunā na uktaḥ, yadivā 
kecidastitvaṃ vikāratvena necchanti iti na uktaḥ || 21 ||

evaṃ sakalabhāvavikārarahitaṃ

vedāvināśinaṃ nityaṃ ya enamajamavyam |
kathaṃ sa puruṣaḥ pārtha hanyate hanti vā katham || 22 ||

enaṃ pratipāditasvarūpaṃ avināśinam ātmānaṃ yaḥ puruṣaḥ

p. 31) pramātā nityaṃ sadaiva jānāti, sa tadabhinnamātmānaṃ 
pratipadyamānaḥ kathaṃ kena prakāreṇa hanyate vināśyate hanti vā 
katham paraṃ vināśayati | hananakriyākartṛkarmabhāvo'yaṃ 
śarīramātrapratibaddhātmābhimāneṣu apratibuddheṣu kṣetrajñeṣu eva 
vyavasthitaḥ || 22 ||

	nanu hananādinā dehavināśe sati cetanadharmānupalambhaḥ, 
tadātmano dehavināśe sati kathamavināśitvamavagamyate iti 
vyāmohavyapohāya dṛṣṭāntanidarśanapūrvaṃ punarapi nityatvaṃ 
draḍhayitumasya āha 

vāsāṃsi jīrṇāni yathā vihāya
navāni gṛhṇāti naro'parāṇi |
tathā śarīrāṇi vihāya jīrṇā-
nyanyāni saṃyāti navāni dehī || 23 ||

	yathā kaścit puruṣo jīrṇāni upabhuktāni vastrāṇi tyaktvā sa eva 
san anyāni navāni upabhogakṣamāni gṛhṇāti upādatte ityanena 
janmādivividhavikārākrāntanānāśarīrasaṃyogaviyogavaśāt na asya 
tatsaṃveditṛtvamātraikalakṣaṇaviyoga iti || 23 ||

nitya eva ayamanityaiḥ śarīradharmairmanāgapi asaṃspṛṣṭaḥ, yataḥ

nainaṃ chindanti śastrāṇi nainaṃ dahati pāvakaḥ |
na cainaṃ kledayantyāpo na śoṣayati mārutaḥ || 24 ||

	enam ātmānaṃ śastrāṇi khaḍgādīni śarīramiva na cchindanti 
dvidhā kurvanti, tathaiva agnirnainaṃ dahati na āpaḥ kledayanti naca 
mārutaḥ śoṣamupanayati || 24 ||
	chedādibhirvikriyamāṇe śarīre na tasya nisarganirvikārasya 
vikārasaṃsparśaḥ | tathāhi

acchedyo'yamadāhyoyamakledyo'śoṣya evaca |
nityaḥ sarvagataḥ sthāṇuracalo'yaṃ sanātanaḥ || 25 ||

p. 32) ayamātmā chedādikriyāvikāryo na bhavati | pūrvoktasyaiva 
nirvacanametat | tathā nityaḥ ityādīni viśeṣaṇāni avināśitvārthāni 
parasparasahāyabhūtāni pratipattidārḍhyāya bahūni prayuktāni 
veditavyāni || 25 ||

tathāca ayam

avyakto'yamacintyo'yamavikāryo'yamucyate |
tasmādevaṃ viditvainaṃ nānuśocitumarhasi || 26 ||

	śabdādivyaktaviṣayāṇāṃ 
śrotrādīnāmindriyāṇāmaviṣayabhūtatvāt ayam avyaktaḥ iti ucyate; 
tathā vedakaikasvabhāvatvādantaḥkaraṇena api idantayā 
viṣayīkartumaśakya iti acintyaḥ cintanakriyāyā agocaraḥ; tathā sarvathā 
caitanyamātrātiriktadharmāntarāsaṃsparśāt avikāryo vikriyāṃ 
netumaśakyaḥ | tasmāt evam uktena prakāreṇa sarvataḥ 
sarvendriyagocarādarthādatyantavyatiriktaṃ vedakatvena 
sarvārthavyāpakam enam ātmānaṃ buddhvā śarīravināśena 
tadvināśabhrameṇa na anuśocitumarhasi || 26 ||

	evaṃ tvaṃ mānuṣyeṇa (2/11) ityādigranthena vitatya 
pratipāditāmapi sakalaprakaraṇapratipādyasya brahmādvaitajñānasya 
śarīraśarīrivyatirekopapattipratipādanarūpāṃ prathamāṃ 
bhūmikāmapi susūkṣmanirmalaprajñāvadhānaviśeṣāvaseyatvāt 
saṃprati apratipadyamānamarjunaṃ manvāno bhagavān 
sarvapakṣāntarākṣepeṇa bodhayitumāha

athavainaṃ nityajātaṃ nityaṃ vā manyase mṛtam |
tathāpi tvaṃ mahābāho nainaṃ śocitumarhasi || 27 ||

	athavā madupadiṣṭopapattikrameṇa 
yathoktamarthamapratipadyamānaḥ tvam enam ātmānaṃ nityajātaṃ 
nityaṃ vā mṛtaṃ manyase tathāpi

p. 33) tenāpi prakāreṇa nainaṃ vināśitvena śocitumarhasi | idamatra 
tātparyam- ātmaviṣayā dvayī pratipattiḥ saṃbhāvyate nityo vā 
syādanityo vā, tṛtīyaḥ pakṣo na saṃbhavati | tatra nityatvapratipattyā yadi 
enaṃ nityajātameva sadaiva utpannaṃ vināśarahitaṃ manyase, tathāpi asya 
avināśitvāt śokasya ko'vasaraḥ | atha vināśitvapratipattyā nityameva 
mṛtaṃ sattārahitamenaṃ manyase, tathāpi nityavinaṣṭatvādasya 
śocanīyatvābhāvaḥ | anye tu evaṃ vyācakṣate- yadyenamātmānaṃ 
nityaṃ sadaiva janmamaraṇābhyāmanuṣaktamanityatvāt manyase, tathāpi 
enaṃ śocituṃ na arhasi || 27 ||

	etameva janmamaraṇapravāhāvicchedaṃ kaiścinnityatvena (ka0 ga0 
pu0 kaiścidanityatvena avagamyamānasyāpi ātmana iti pāṭhaḥ |) avagamya 
mānamasya ātmanaḥ pratipādayitumāha

jātasya hi dhruvo mṛtyurdhruvaṃ janma mṛtasya ca |
tasmādaparihārye'rthe na tvaṃ śocitumarhasi || 28 ||

	hiśabdo hetau | yasmāt jātasya janmalakṣaṇavikārabhājo dehasyaiva 
ātmatvena pratipannasya dhruvaḥ avaśyaṃbhāvī mṛtyuḥ vināśākhyo 
vikāraḥ; evameva mṛtasya vinaṣṭasya janma avaśyaṃbhāvīti kasya eṣa 
janmamaraṇalakṣaṇavikārayoga iti tattvamavicārayato'pi lokasya ayaṃ 
pravādaḥ sthita eva jāto mriyate, mṛto jāyate ityevaṃvidhaḥ, tasmāt 
lokapravādadṛṣṭyā api śokasya anupapattireva || 28 ||

	anyamapi prakāraṃ śokaparihārāya āha

avyaktādīni bhūtāni vyaktamadhyāni bhārata |
avyaktanidhanānyeva tatra kā paridevanā || 29 ||

p. 34) pṛthivyādibhūtasaṃniveśaviṣayaśarīrātmakatvāt 
sarvaprāṇabhṛto bhūtaśabdena atra ucyante | tāni etāni bhūtāni 
avyaktādīni apratyakṣapūrvarūpāṇi, tathaiva avyaktanidhanāni 
parokṣaparyantāni | nahi etāni pūrvamevaṃvidhāni āsan, punaśca 
evaṃvidhāni bhaviṣyanti, iti jñāyate | tato dvayorapi etayoḥ kāṣṭayostāni 
aśocyāni | yadyapi vyaktamadhyāni vyaktā tena tena rūpeṇa vedyamānā 
madhyāvasthā janmavināśāntarālavartinī daśā yeṣāṃ, 
tathāvidhānyapi aśocyāni eva | vyaktāvasthāyāmeṣāṃ hi 
bhramamātrameva sthairyapratipattiḥ | etāni hi yena yena prakāreṇa 
kalpyante, tena tena vinaśvarāṇi eva | kṣaṇikāni vā bhavantu, 
pariṇāmitvādāvirbhavattirobhavaddharmākrāntāni vā bhavantu, sarvathā 
vikalpyamānāni ekasya sthirasya rūpasya asaṃbhavādaśocyāni eva, iti 
dehātmakabhūtasanniveśamātratvena pratipanneṣu śarīreṣu kaḥ 
paridevanāvasaraḥ iti || 29 ||
	idānīṃ bahuprakāraṃ pratipādyamāno'pi 
ayamartho'tigambhīratvāt manasi dhārayitumanuṣṭhātuṃ ca aśakya iti 
arjunasya etadarthaviṣayamanadhyavasāyaṃ parihartuṃ 
prakṛṣṭaprayatnapratipattavyatāmasya arthasya darśayitumāha

āścaryavatpaśyati kaścidena-
māścaryadvadati tathainamanyaḥ | 
āścaryavaccainamanyaḥ śṛṇoti
śrutvāpyenaṃ veda na caiva kaścit || 30 ||

	enam ātmānaṃ yathāpratipāditasvarūpaṃ kaścit 
manuṣyasahasreṣu madhye prakṛṣṭapuṇyaparipākavaśāt bahūnāṃ 
janmanāmante paśyati tattvataḥ pratyabhijñānena sākṣātkurute | yo'pi 
paśyati, sa āścaryavat |

p. 35) yathā āścaryaṃ kaścidadṛṣṭapūrvamadbhutaṃ kadācit kathaṃcit 
kṣaṇamātraṃ paśyati, tadvadenaṃ kaścit kṛtapuṇyaḥ kṣaṇamātraṃ 
paśyati | tathaiva adbhutarūpamiva pratibhāsamānaṃ kaścideva tathāvidha 
enaṃ vadati paraprabodhanāya ācaṣṭe | tathaiva kaścit tādṛśa eva pareṇa 
pratipādyamānaṃ śṛṇoti avadhārayati | kaścit 
saṃpratibhagavadanugraheṇa anadhiṣṭhitatvādavidyopahatāntaḥkaraṇaḥ 
enaṃ yathāpratipāditasvarūpamātmānaṃ śrutvāpi kutaścit 
tatpratipādanakuśalādākarṇya api na veda tattvato na jānāti | sa ca 
tathāvidho'nupadeśya eva | tvaṃ 
punarbhaktiśraddhādiguṇagaṇasūcitabhagavadanugrahatvāt pātrameva 
etattattvopadeśasyeti atra udyukto bhavetyarthaḥ | idamatra tātparyam asya 
ātmano guruśiṣyakrameṇa svayamanubhavena vā santu jātu 
kecitpuṇyabhājaḥ pratipattāraḥ, kiṃtu 
nirantarābhyāsapariśīlanaviśīrṇakalpasakalavikalpāvaraṇatāṃ vinā 
avaimalyena sarvakālamasthiratayā ca asya pratipattimātramiti viralaviralo 
lakṣeṣu ekaḥ kaścideva caramajanmā bhavediti yathoktena krameṇa 
samyagavadhāraṇīyaṃ, natu mandotsāhena atra yogyena api bhavatā 
bhāvyam || 30 ||

	tadayamatra niścaya ityāha

dehī nityamavadhyo'yaṃ dehe sarvasya bhārata |
tasmātsarvāṇi bhūtāni na tvaṃ śocitumarhasi || 31 ||

	ayaṃ 
samanantarapratipāditadehādisamastavedyapadārthātyantavyatiriktavedakatv
amātraikalakṣaṇo dehī dehasya vedyatvamātreṇa svasya vedakatvamātreṇa 
svāmī paraḥ pramātā sarvasya dehamātrameva ātmatvena 
abhimanyamānasya māyīyasya pramāturjantujātasya tatra tatra nānārūpe 
dehe śarīre eka eva vyāpakatayā tiṣṭhan nityaṃ satatameva

p. 36) avadhyo hantuṃ vināśayitumaśakyaḥ | na hi 
āgamāpāyidharmakāṇāṃ nānāvidhānāṃ sarvadā 
vedyatvamātrasvabhāvānāṃ śarīrāṇāṃ vināśe tadvyāpakasya ekasya 
anavacchinnamahimno vedakatvamātrāvyabhicāryekalakṣaṇasya satyasya 
ātmano vināśaḥ sambhavati | yata evamatastasya avināśitvena nityasya 
anuśocyatvaṃ tāvat na astyeva | tasmāt vināśaikasvabhāvāni bhūtāni 
pṛthivyādibhūtasaṃniveśaviśeṣātmakāni śarīrāṇi eva śarīritvena 
pratipannāni vinaśyanti paśyan anuśocituṃ paridevituṃ na arhasi naṣṭasya 
nāśe vivekinaḥ kaḥ śokasya avasara ityarthaḥ || 31 ||
	atha pratipāditopapattyā tāttvikamātmasvarūpaṃ 
saṃpratipattumaśaktamarjunaṃ manyamāno bhagavān 
kṣatriyajātyucitābhimānoddīpanena avaśyānuṣṭheye svakarmaṇi 
pravartayitumāha

svadharmamapicāvekṣya na vikampitumarhasi |
dharmyāddhi yuddhācchreyo'nyatkṣatriyasya na vidyate || 32 ||

yadṛcchayā copapannaṃ svargadvāramapāvṛtam |
sukṛtātkṣatriyāḥ pārtha labhante yuddhamīdṛśam || 33 ||

atha cettvamimaṃ dharmyaṃ saṃgrāmaṃ na kariṣyasi |
tathā svadharmaṃ kīrtiṃ ca hitvā pāpamavāpsyasi || 34 ||

akīrtiṃ cāpi bhūtāni kathayiṣyanti te'vyayām |
saṃbhāvitasya cākīrtirmaraṇadatiricyate || 35 ||

bhayādraṇāduparataṃ maṃsyante tvāṃ mahārathāḥ |
yeṣāṃ ca tvaṃ bahumato bhūtvā yāsyasi lāghavam || 36 ||

avācyavādāṃśca bahūnvadiṣyanti tavāhitāḥ |
nindantastava sāmarthyaṃ tato duḥkhataraṃ nu kim || 37 ||

p. 37) hato vā prāpsyasi svargaṃ jitvā vā bhokṣyase mahīm |
tasmāduttiṣṭha kaunteya yuddhāya kṛtaniścayaḥ || 38 ||

ślokasaptakametat nigadavyākhyātam || 32-38 ||

	evaṃ svargādyanityaphalahetupravṛttilakṣaṇadharmasamāśrayaṇena 
api sarvaprakāraṃ svakarmāparityāge vyavasthite, 
niratiśayanityaphalaprāptihetunivṛttilakṣaṇadharmasamāśrayaṇena 
etadaparityāge ko doṣa iti prakṛtameva jñānopadeśaṃ punarapi 
siddhāntīkurvannāha

sukhaduḥkhe same kṛtvā lābhālābhau jayājayau |
tato yuddhāya yujyasva naivaṃ pāpamavāpsyasi || 39 ||

	evam anena prakāreṇa vartamānaḥ pāpaṃ jñātivadhāditaḥ 
sambhāvyamānaṃ kilviṣaṃ na avāpsyasi na lapsyase | kathaṃ vartamānaḥ 
| prathamaṃ tāvat 
yathopadiṣṭārthaniḥsaṃśayapratipattiprarūḍhaniṣprakampaprajñāpratyab
hijñātasamastaprāṇabhṛtsarvāvasthāvyāpakasāmānyasaṃvinmātrasva
bhāve nityaniruttarānandanirbharatayā 
svarūpavyatiriktaprāpyapadārthāntaraprepsāvirahite satye svāmini 
akṛtrimātmābhimānamāsthāya 
māyāvyāmohajanitadehādyanātmabhūtabhāvātmapratyayalakṣaṇavipar
yayajñānaiḥ sarvaprāṇibhirupādeyatayā heyatayā ca parikalpitabhede 
pratikṣaṇavinaśvare sukhaduḥkhe harṣaviṣādau same draṣṭari ātmani 
dṛśyatāmātreṇa sambaddhatvādanupajanitaviśeṣātmakavikāratayā 
nirviśeṣe kṛtvā samyak pratipattyā sampādya, evameva taddhetubhūtau 
rājyādilipsitārthalābhālābhau, tayorapi hetubhūtau jayaparājayau tathaiva 
samau nirviśeṣau sampādya tattvato yathāvasthitena rūpeṇa 
niścityetyarthaḥ | ete hi sukhaduḥkhādayo vedyatvamātreṇa saṃbaddhā 
vedakasya ātmano na kaṃcit vikāraleśamarpayituṃ kṣamāḥ | yathā 
nīlapītādayaḥ prakāśyatvamātreṇa sambaddhāḥ prakāśakasya 
ālokasya

p. 38) na kaṃcidviśeṣaṃ nīlapītādikamunmeṣayituṃ śaktāḥ, kevalaṃ 
prakāśyatvamātreṇa ekena rūpeṇa tatra sambaddhāḥ | tadetat 
sukhādīnāṃ vedyatvamātrarūpaṃ sāmyam | evaṃ sukhādīni samīkṛtya 
tataḥ 
etatsamādhipratipatteranantarametatsamādhisupratiṣṭhitamatiryuddhaśabdopa
lakṣitāya (kha0 ga0 pu0 yuddhadharmopalakṣiteti pāṭhaḥ |) svakarmaṇe 
yujyasva saṃbadhyasva yathoktajñānaniṣṭhatayā svakarma 
anutiṣṭhetyarthaḥ || 39 ||
	evaṃ jñānakriyāsamuccayameva upadeśyatayā viniścitya, 
jñānaviṣayāṃ matimuktakalpāṃ matvā, tāṃ kriyāviṣayāṃ 
vaktumupakramamāṇasta eva jñānakarmaṇī sāṃkhyayogaśabdābhyāṃ 
vyavaharannāha

eṣā te'bhihitā sāṃkhye buddhiryoge tvimāṃ śṛṇu |
buddhyā yukto yayā pārtha karmabandhaṃ prahāsyasi || 40 ||

	idamātmādi sat, idaṃ dehādi asat iti 
heyopādeyapadārthaparigaṇanā saṃkhyā | tāmadhikṛtya kṛtaṃ 
śāstramanvarthatayā mukhyaṃ sāṃkhyamiha ucyate, taddhetukaṃ 
jñānamapi sāṃkhyaṃ natu kapilādipraṇītaṃ tasya 
nānātmavādaparamārthatvāt | tasmin sāṃkhye viṣaye eṣā prabandhena 
pratipāditā buddhiḥ prajñā tava upadiṣṭā, yayā prajñayā tat 
sāṃkhyaṃ samyak yujyate budhyate vā | uktajñānasamadhigamyena 
paramārthalakṣaṇena arthena sambandho yogaḥ, taddhetukatvāt karmaiva iha 
yogaśabdena uktam | nahi kevalasya jñānasya yogārthasambandhahetutvaṃ 
saṃbhavati, kiṃtu tadanugatasya karmaṇa eveti prabandhena vakṣyate | 
ityevaṃvidhe yoge karmaṇi imāṃ vakṣyamāṇāṃ buddhiṃ śṛṇu 
avadhāraya yayā (kha0 pu0 yayā kiṃ karma kimakarmeti karmatattvaṃ 
mokṣakāraṇatayā vijñāyata iti pāṭhaḥ |) karmaiva tattvato 
mokṣakāraṇatayā vijñāyate | ata eva āha yayā vakṣyamāṇayā 
buddhyā yuktaḥ sambaddhastvaṃ karmakṛtaṃ

p. 39) jñānaśūnyajanaviṣayaṃ bandhamasvātantryaṃ prahāsyasi 
tyakṣyasi | tādṛśaṃ hi karmānuṣṭhānamiha upadekṣyate, yena 
sakalasaṃmūḍhajanabandhahetorapi karmaṇo mokṣahetutvameva 
paryavasyati || 40 ||
	ata eva asya karmayogasya 
cittavṛttinirodhalakṣaṇayogātiriktaśaktitāṃ pratipādayitumāha

nehātikramanāśo'sti pratyavāyo na vidyate |
svalpamapyasya dharmasya trāyate mahato bhayāt || 41 ||

	iha vaktuṃ prakrānte karmayoge cittavṛttinirodhalakṣaṇayogavat 
atikramanāśo nāsti | sa hi 
yathopadiṣṭakramasvabhyastasamastabhūmikābhirnirvartyasvarūpatvāt 
pūrvapūrvabhūmikānāmanavāptāvuttarottarabhūmikārohaṇarūpakram
ollaṃghanalakṣaṇe'tikrame sati vinaśyati svarūpameva na labhate | sa 
tādṛśo vināśa iha yoge samanantaravakṣyamāṇopapattyā na vidyate | 
tathā tatra tattadaṃgavaikalyādasamyaganuṣṭhite 
vyādhyādirvartamānaśarīrānubhavanīyaḥ 
punargarbhavāsaduḥkhādirbhaviṣyaccharīrānubhavanīyaḥ pratyavāyaḥ 
aniṣṭayogaḥ saṃbhavati, iha tu pūrvavat so'pi na vidyate yataḥ asya 
dharmasya yathoktajñānapūrvatayā 
śāstracoditasvakarmānuṣṭhānasamādhirūpasya sadācāraviśeṣasya 
sambandhi svalpamapi parimitakālalavānubhūtasvarūpaṃ mahataḥ 
samastabhavahenoranātmanyātmapratyayalakṣaṇāt bhayāt 
sādhvasādanuṣṭhātāraṃ yoginaṃ trāyate parirakṣati 
punastatsambandhaṃ tiraskarotītyarthaḥ | atra hi dharme 
satatamanastamitasamastavastuprathaikahetusāmānyasaṃvidrūpaparaprakā"
saikalakṣaṇasvātmapratyavamarśo niruttaraḥ samādhiḥ 
sakṛdvibhātatvenaiva nirvartyasaṃpūrṇasvarūpo vidhīyate | saca 
vibhātamātraḥ saṃpūrṇaṃ phalaṃ sampādayati | tathāca vakṣyati

sthitvāsyāmantakāle'pi brahma nirvāṇamṛcchati | (2/74)

p. 40) iti | tato'smin 
pūrvāparakramābhyastabhūmikāsaṃpādyacittavṛttinirodhalakṣaṇayogav
at vināśapratyavāyau na sambhavataḥ | naca asya prastutasya 
karmayogalakṣaṇasya dharmasya prakarṣapratipādanān nirodhayogasya iha 
sarvātmanā parihāro'vagantavyaḥ | sa hi atra tatatsnānādikriyāviśeṣavat 
(kh: tattatsthānādīti pāṭhaḥ) pūrvāpararātrādiniyatakālānuṣṭheyatayā 
niyatetikartavyatāko'ntarbhavatyeva || 41 ||

	asmiṃśca 
viśuddhabhaktiśraddhādiguṇavyaktisūcitavivekajñānāvirbhāvo 
bhavādṛśo'dhikṛtaḥ, na sarvaḥ kaściditi pratipādayitumāha

vyavasāyātmikā buddhirekaiva kurunandana |
bahuśākhā hyanantāśca buddhayo'vyavasāyinām || 42 ||

	vyavasāyo niścayaḥ, sa ātmā svarūpaṃ yasyāḥ, sā tathārūpā 
svabhāvato buddhirekalakṣaṇaiva | niścayaḥ ātmādisadarthaviṣayo'pi 
saṃbhavati, dehādyasadarthaviṣayo'pi saṃbhavati | tatra 
yo'sadarthatriṣayaḥ, sa niścayābhāso niścaya eva na saṃbhavati | ataḥ 
sadarthaviṣayamukhyavyavasāyarahitānām avyavasāyināṃ buddhyo 
bahuśākhāḥ ekasminnapi arthe nānāvikalpajālākulā aparyavasitāśca | 
yataḥ sarvābhikāṃkṣāparikṣayaikahetau paramārthasatyātmani 
alabdhabuddhipratiṣṭhā idaṃ prāptamidaṃ prāpyamiti anityamarthaṃ 
prāpyatayā ālambamānā na kacit viśrāntiṃ labhante iti || 42 ||
	evaṃvidhānāṃ puruṣāṇāṃ svargādibhogamātraparatvena 
pratipannānāṃ yā buddhiḥ, sā vaktuṃ prakrānte parasmin dharme na 
niyujyate ityāha

yamimāṃ puṣpitāṃ vācaṃ pravadantyavipaścitaḥ |
vedavādaparāḥ pārtha nānyadastītivādinaḥ || 43 ||

p. 41) kāmātmānaḥ svargaparā janmakarmaphalepsavaḥ |
kriyāviśeṣabahulā bhogaiśvaryagatīḥ prati || 44 ||

bhogaiśvaryaprasaktānāṃ tayāpahṛtacetasām |
vyavasāyātmikā buddhiḥ samādhau na vidhīyate || 45 ||

	saiṣā vyavasāyātmikā niścayasvabhāvā 
buddhirbhogaiśvaryaprasaktānāṃ puṃsāṃ samādhau 
ātmalakṣaṇaparamārthasatattvaviṣaye praṇidhāne na vidhīyate na 
anuśiṣyate tasyāstadarthapratipattiyogyatābhāvāt | ye hi 
bhogānāmiṣṭānāṃ viṣayāṇāmaiśvarye svāmye prakarṣeṇa 
vastvantaraparihārarūpeṇa atiśayena āsaktāstatparā eva, teṣāṃ 
bhogātmakānityavastuviṣayā vyavasāyātmikā buddhiḥ samādhiviṣayaṃ 
vyavasāyaṃ na avalambate eva | kīdṛśānāṃ teṣāṃ 
bhogaiśvaryaprasaktānāṃ samādhau buddhirna vidhīyate | tayā vācā 
apahṛtacetasāṃ svīkṛtamānasām | kayā vācā | yāmimāṃ puṣpitāṃ 
paramārthabodhalakṣaṇaphalarahitatvāt 
bhogarūpapuṣpamātrasaṃyuktāṃ prasiddhāṃ vācaṃ vedavādaparā 
avipaścito vadanti vyācakṣate | vedaśabdo'tra 
jñānaśūnyakriyāmātravidhāyakavedaikadeśavacano'vagantavyaḥ | 
tasya tathāvidhasya vedasya vādo'bhidhānaṃ paraṃ prakṛṣṭaṃ tadeva 
tattvaṃ yeṣāṃ te tathoktāḥ | ata eva nānyadastītivādinaḥ 
svargādiphalaprāptihetubhūtānāṃ kriyāviśeṣāṇāṃ vidhāyakāt 
vedādṛte'nyat śāstraṃ nāstyeveti vadanaśīlāḥ | ata eva avipaścitaḥ 
yajñādikriyāphalabhūtānityāśucisātiśayabhogamātrarūpamarthaṃ 
puruṣārthaphalatvena pratipannāḥ santo na vidvāṃsaḥ | ye hi 
avināśiviśuddhaniratiśayamātmatattvalakṣaṇametadviparītamarthaṃ 
phalatvena pratipadyante, te vipaścittvaṃ bhajante | ata eva 
avipaścittvapratipādakāni teṣāṃ viśeṣaṇāni āha | athāca 
kāmātmānaḥ kāmāḥ priyāḥ śabdādayaḥ

p. 42) sarvasvabhūtatvādātmā yeṣām, ata eva kāmātmakatvāt 
svargaparāḥ uttamabhogādhikaraṇaṃ svargaḥ prāpyatayā paraḥ prakṛṣṭo 
yeṣāṃ te tathāvidhāḥ, tathā janmakarmaphalepsavaḥ bhogaprakṣaye 
avaśyaṃbhāvi janma kvacidapi yonyantare sambhavati, tasmiṃśca sati 
dharmādharmātmakaṃ karma, tasmiṃśca sati sukhādilakṣaṇaṃ 
phalamityetāni āptumicchavaḥ | ata eva bhogaiśvaryasya 
iṣṭaviṣayādhipatyasya gatīrvividhamārgān (ka0 ga0 pu0 
mārgānphalabhūtānpratīti pāṭhaḥ |) prati sādhanabhūtāḥ 
kriyāviśeṣā nānāvidhā yajñadānatapaḥprabhṛtayaḥ karmabhedā 
bahulā bhūyāṃso yeṣām | na kevalaṃ nityanaimittikakriyāmātrasaktāḥ, 
yāvat kāmyānapi kriyāviśeṣān vistārayantaḥ iti evaṃvidhāḥ 
pravaktāro yāṃ vācaṃ vadanti, tayā āvarjitacittānāṃ 
bhogāsaktānāṃ buddhiḥ samādhau na vidhīyate iti sambandhaḥ | idamatra 
tātparyam- ye svayameva prabodhaśūnyatvāt bhogamātraparāḥ, 
te'nyaistathāvidhaireva tameva arthaṃ praśaṃsadbhiḥ 
paripoṣyamāṇatādṛksaṃkalpāḥ paramārthaprāptivyavasāyāt 
dūramapākṛṣyante iti tathāvidhānāṃ buddhiḥ kathaṃ samādhau 
vidheyatāmarhati || 45 ||

	ataśca svabhāvataḥ 
prastutavijñānopadeśapātrabhūtastvamavipaścitprarocanāvacanavahnaya
mānacittatāṃ (kha0 pu0 vacanavaśyamānacittatāmiti pāṭhaḥ |) vihāya 
yathopadiṣṭavijñānaniṣṭho bhavetyāha

traiguṇyaviṣayā vedā nistraiguṇyo bhavārjuna |
nirdvandvo nityasattvastho niryogakṣema ātmavān || 46 ||

	sattvarajastamāṃsi trayo guṇā eva traiguṇyam | 
sukhaduḥkhamohamayabuddhimayatvāt traiguṇyaṃ viṣaya āśrayo yasya sa 
traiguṇyaviṣayaḥ | saṃsāripuruṣavargaḥ upacārāt traiguṇyaśabdena atra 
ucyate | tadevaṃvidhaṃ

p. 43) traiguṇyaṃ viṣayo gocaro yeṣāṃ, te tathābhūtā vedāḥ | ye hi 
sukhādyarthinaḥ, te tatprāptihetuṣu kriyāviśeṣeṣu vedairniyujyante | 
yatastaiḥ sarvatovyatiriktasvarūpaḥ sarvagata eko yathoktaviśeṣaṇaḥ satya 
ātmā ātmatvena na pratipadyate, tatasteṣāṃ sanneva ātmā nāsti | tvaṃ tu 
nistraiguṇyaḥ sannātmavān bhava niṣkrāntastraiguṇyāt nistraiguṇyo 
guṇatrayātīto vedyatvamātreṇa 
sukhādyātmabhirguṇairvedakaikasvabhāvaḥ saṃbandhī, natu taddharmako 
guṇebhyo'tyantaviviktasvabhāvaḥ paramārthato'yamātmā 
tamīdṛśamātmatvena pratyavamṛśan ātmavān bhava 
paramārthasantameva ātmānamuktopadeśapratipattiśaithilyādasantamiva 
mā kārṣīrityarthaḥ | yadāca 
guṇatrayātītasvabhāvamātmānamātmatayā pratipadyase, tadā nirdvandvo 
dvandvebhyaḥ sukhaduḥkhatṛṣṇājarāmaraṇādibhyaḥ kleśebhyo 
niṣkrānto bhava | etāni hi dvandvāni anātmani triguṇe 
dehādāvātmapratyayanibandhanāni | yataśca nirdvandvaḥ, tato 
nityasattvasthaḥ api bhava nityamavināśi yat sattvaṃ sadbhāvastatra sthita 
upalabdhapratiṣṭhaḥ | tādṛśaḥ san niryogakṣemo'pi bhava aprāptasya 
prāpyasya vastunaḥ prāptiryogaḥ, prāptasya parirakṣaṇaṃ kṣemaḥ, 
niṣkrāntastābhyāṃ niryomakṣemaḥ, tathāvidho bhava | nahi 
nityasaṃpūrṇatvāt sarvato nirabhilāṣātmanaḥ prāpyaṃ kiṃcit 
sambhavati | na ca apūrvatayā prāptasya kasyacidarthasya 
vināśāśaṃkayā parirakṣaṇam | ato 
viparyayapratyayagṛhītātmābhāsadehādinibandhane eva yogakṣeme iti tato 
vyāvṛttātmapratyayatayā satyātmapratyavamarśādātmavān bhava || 46 ||
	naca bhogaiśvaryaprasaktatvāt 
pravṛttidharmānuṣṭhānaikaniṣṭhopadeśyapuruṣaviṣayatvena 
vidhīyamānakriyāviśeṣetikartavyatopadeśaśatasaṃkule

p. 44) kule vedaśāstre sarvamanuṣṭheyatayā avagantavyam, kiṃtu yāvatā 
paramārthabodhalakṣaṇasvābhipretārthakriyāsiddhirbhavati, tāvadeva 
tataḥ pratipattavyamupādeyatayā budhenetyāha

yāvānartha udapāne sarvataḥ saṃplutodake |
tāvānsarveṣu vedeṣu brāhmaṇasya vijānataḥ || 47 ||

	sarvataḥ sarvāsu dikṣu saṃplutodake samṛddhasalile udapāne 
hradaprasravaṇādāvarthino yāvānarthaḥ yāvanmātramekadeśāt 
tṛṣṇāpraśamanādyarthakriyāsamarthasalilalavopayogamātraṃ 
prayojanaṃ, tāvān eva vijānato vijñānavato brāhmaṇasya brahmavedinaḥ 
sarveṣu nikhileṣu sarahasyeṣu vedeṣu arthaḥ prayojanam | yāvatā 
śāstraikadeśena paramārthopalabdhilakṣaṇārthakriyānirvṛttirbhavati, 
tāvadeva tena tato vidhisahasrasaṃkulādapi upādātavyam | kimuktaṃ 
bhavati | yathā tṛṣitena arthinā susaṃpūrṇāt samudrakalpādapi 
jalāśayāt svārthakriyāsaṃpattimātrakṣamamudakaṃ stokaṃ 
samupādīyate, na sarvo jalāśayaḥ | evaṃ 
jñānakriyāviṣayavividhārthasārthasaṃpūrṇādapi vedaśāstrāt 
tattvajijñāsunā tadavagamamātropayogī eva arthaḥ upādātavyaḥ, natu 
sarvameva vedaśāstramiti || 47 ||
	atha vijānatā sarvaśāstrebhyo yadupādeyaṃ, tadarjunaṃ puraskṛtya 
upadeṣṭumāha

karmaṇyastvadhikāraste mā phaleṣu kadācana |
mā karmaphalaheturbhūrmā te saṃgo'stvakarmaṇi || 48 ||

	tava saṃpratyeva 
upadiṣṭatattvajñānopapattiprarūḍhadṛḍhapratipattivaśādanityebhyo 
dehādibhyo vyāvartamānātmapratyayatve sati advaitacinmayajyotīrūpaṃ 
paraṃ tattvamahamiti ātmatvena pratipadyamānasya sataḥ 
karmaṇyadhikāro'stu yat karma 
kāyavāṅmanobhirnirvartyavyāpāraviśeṣātmakaṃ

p. 45) varṇāśramavibhāgena 
deśakālāvasthāpekṣamukhyagauṇavividhetikartavyatākalāpena 
nityādibhedena avaśyakartavyatayā śāstreṣu vihitaṃ, tasminnadhikāraḥ 
kartṛtvaṃ bhavati; tadadhikṛtaḥ svārthasiddhaye pravartasvetyarthaḥ | yataḥ 
karma tāvat śarīratvāvyabhicāri na kenacit tyaktuṃ śakyam | atha 
yatyādyavasthāyāṃ kaścit niyamaviśeṣo'valambanīya eva, tataśca sa eva 
karmaviśeṣatāṃ prāpnoti āśramāntarakarmaniyamavat; itthamaśakyaḥ 
sarvātmanā karmatyāgaḥ | kiṃca gṛhyatāṃ nāma atyāgo'pi 
tyāgābhidhānaḥ | sa tu tattvajñānabāhyatāmeva āviṣkaroti 
tathāvidhasya | yato dveṣyatāṃ vinā dveṣyatā saṃbhavati, iti 
karmatyāgābhidhāne rāgadveṣaprasaṃgo durnivāraḥ | yadica tattvasya 
ekatvāt karmaṇāṃ yatheṣṭamaniyamena anuṣṭhānameva tyāgatvena 
abhimatam, tathāpi pūrvavadrāgadveṣānyathānupapattyā so'pi 
atattvajñatāmeva anuṣṭhāturabhivyanakti, iti akarmatā vā 
aviruddhakarmatā vā niruttarānantanijānandanirbharaṃ paraṃ 
tattvamātmatvena pratipadyamānasya sarvasāmyalakṣaṇaṃ paramaṃ 
samādhimadhirurukṣatastattvajñānābhiniveśino yogino dvayamapi 
anupapannamiti tathāvidhasya tava karmaṇyeva adhikāro'stu, kiṃtu teṣāṃ 
karmaṇāmanātmajñajanasamucitanānābhisandhānaprārthiteṣu 
dṛṣṭānuśravikavividhabhogātmakeṣu bandhahetuṣu phaleṣu adhikāro mā 
bhūt | ye hi atattvajñatayā phalāni adhikṛtya teṣu teṣu karmasu pravartante, 
teṣāṃ tāni kriyamāṇāni eva karmāṇi vāsanārūpatayā 
antaḥkaraṇabhūmau bījabhūtānyeva tiṣṭhante, ataśca 
anityakriyāphalopabhogaprakṣaye vividhavāsanārūpasya teṣu teṣu 
yonyantareṣu tasya tasya janmanaḥ punaḥ punaḥ kāraṇatāṃ pratipadyante, 
janma ca tasya tasya karmaṇaḥ, karma ca

p. 46) tasya tasya phalasya hetutvaṃ bhajate iti 
vāsanājanmakarmaphalacakrametadaniśamāvartamānamajñānāṃ 
bandhāya kalpate iti tvamapi sāmānyapuruṣavat karmaphalaheturmā bhūḥ 
uktayā prakriyayā karmaṇāṃ śubhāśubhānāṃ phalāni 
sukhādyātmakāni heturjanmano nimittaṃ yasya sa tathāvidho yathā na 
bhavasi uktajñānaniṣṭhaḥ san kurvanneva karmāṇi tena jñānāgninā 
dagdhabījatāmāpādayan parameśvarasvabhāvasamāpattilakṣaṇaṃ 
mokṣamavāpnuhītyarthaḥ | anyacca kasyāṃcidavasthāyāṃ prastutasya 
karmaparihārasya vidhīyamānatvāt yadakarmeti manyase, tatra tādṛśe'pi 
akarmaṇi te tava saṅgaḥ mābhūt | tatrāpi hi saṅgaḥ karmāntaravat 
bandhahetureveti uktameva prāk || 48 ||

yata evam, ataḥ

yogasthaḥ kuru karmāṇi saṅgaṃ tyaktvā dhanañjaya |
siddhyasiddhyoḥ samo bhūtvā samatvaṃ yoga ucyate || 49 ||

	iha śāstravihitānāṃ karmaṇāmanuṣṭhāne 
yathoktātmādvaitajñānaniṣṭhatvalakṣaṇaḥ samādhiryoga ucyate | yathā 
kapilādipraṇītasya sāṃkhyasaṃjñakasya jñānasya pātañjalādipraṇīte 
cittavṛttinirodhalakṣaṇe yoge niṣṭhā, tathā iha upadiṣṭasya 
ātmādvayajñānasya karmānuṣṭhānasamādhau niṣṭhā, iti yogaśabdena 
so'pi uktaḥ | tatra tādṛśe yoge sthitaḥ āśramāntaraparihāreṇa 
kṛtapratiṣṭhaḥ san yathoktāni karmāṇi anutiṣṭha | katham | saṅgaṃ 
tattadabhisaṃhitaphalaprāptihetutvapratipattyā 
tāvanmātropāyalīnacittattvaṃ parihṛtya, ata eva siddhau phalasampattau, 
asiddhau ca tadvighāte dvayorapi nirvikāratvāt samo nirviśeṣo bhūtvā 
yathoktajñānaniṣṭhatvāt 
nityaparipūrṇayathoktātmatattvapratyavamarśajanitānandatṛptasya 
karmaṇaḥ phalena anityena siddhena asiddhena vā na kaścit 
sukhaduḥkhātmako viśeṣa iti sarvasāmyadaśādhirūḍho

p. 47) bhūtvā yathoktayoganiṣṭho bhava | yataḥ samatvaṃ sarvāsu 
avasthāsu vikāraleśāsaṃspṛṣṭatvameva yoga ucyate sāmyaprāptireva 
asya niṣṭhetyarthaḥ || 49 ||
	ata eva etadyoganiṣṭhasya yogino lakṣaṇamāha

yasya sarve samārambhā nirāśīrbandhanāstviha |
tyāge yasya hutaṃ sarvaṃ sa tyāgī sa ca buddhimān || 50 ||

	yasya yathoktayogādhikāriṇaḥ puruṣasya sarve samārambhāḥ 
sarvāsu kriyāsu pravṛttayo'vaśyaṃbhāvino'pi nirāśīrbandhanāḥ 
bhavanti, sa tyāgī iti sambandhaḥ | āśīranityabhogaviṣayā ākāṃkṣā, 
tadeva bandhanaṃ saṃsārahetutvādasvātantryamāśīrbandhanam, 
niṣkrāntā āśīrbandhanāt nirāśīrbandhanā bhogātmakabandharahitā 
ityarthaḥ | ata eva avaśyānuṣṭheyakarmarūpaṃ sarvaṃ śubhamaśubhaṃ 
ca tyāge phalāśāsaṃnyāse hutam agrāviva bījajātaṃ 
phalaprasavasāmarthyavināśāya nikṣiptaṃ, sa evaṃvidho 
nityakarmānuṣṭhātaiva tyāgī tyāgavān, na punaḥ kleśabhīrutvādinā 
karmāṇi eva tyajan tyāgī bhavati iti | yuktiratra prāgeva uktā | sa evaca 
evaṃvidhaḥ praśasyajñānayuktaḥ, natu yaḥ karmatyāgādimātraṃ 
jñānaṃ manyate || 50 ||
	ata evaṃvidhotkṛṣṭabuddhiyuktaṃ karma samācaret, na kevalamiti 
āha

dūreṇa hyavaraṃ karma buddhiyogāddhanañjaya |
buddhau śaraṇamanviccha kṛpaṇāḥ phalahetavaḥ || 51 ||

	yasmāt buddhiyogāt yathoktajñānasamādhānāt dūreṇa atiśayena 
kevalaṃ tadvirahitaṃ karma avaraṃ nikṛṣṭaṃ jñānaśūnyaṃ karma 
saṃsārahetutvāt tato'tyantādhamamityarthaḥ | ataśca buddhau yathokte 
samyagjñāne śaraṇam āśrayam anviccha abhikāṅkṣitāmeva 
upāyatayā avalambasvetyarthaḥ |

p. 48) yato ye phalahetavaḥ anityaṃ bhogalakṣaṇaṃ phalameva 
hetustatsādhanabhūtāsu kriyāsu prayojakaṃ kāraṇaṃ yeṣāṃ, te 
jñānaśūnyakarmamātrānuṣṭhāyinaḥ kṛpaṇāḥ tucchaphalārthitvāt 
dīnāstattajjātiśarīrādyabhimānāvacchinnam, ata eva 
anityabhogātmakaphalatṛṣṇāturamātmānaṃ manyamānāḥ santo 
durācārāḥ || 51 ||
	ata eva tadvilakṣaṇasya jñāninaḥ svarūpaṃ pratipādayitumāha

buddhiyukto jahātīha ume sukṛtaduṣkṛte |
tasmādyogāya yujyasva yogaḥ karmasu kauśalam || 52 ||

	iha ātmaiva parameśvara ekaṃ tattvam | sa evaca svamāyāmahimnā 
jñeyabhāvāpādanena sarvasya kāryajātasya ekaḥ kartā pāramārthikaḥ, 
vicitraṃ ca idaṃ kāryaṃ nirmimāṇaḥ svecchāmātravyatiriktaṃ na tasya 
upādānamapekṣate, nāpi sahakāriṇam | naca 
idamitthamavabhāsamānamapi kāryaṃ cinmātrasvarūpatvādatiriktaṃ 
vikāraleśaṃ kaṃcidarpayituṃ prabhavati | 
tadevaṃvidhanityaniratiśayaiśvaryayuktamekaṃ tattvamātmatvena 
niṣprakampayā pratipattyā yaḥ pratyavamṛśati, sa buddhyā parameṇa 
prabodhena samyagjñānena yuktaḥ saṃbaddhaḥ iha ucyate | saca evaṃvidha 
iha upadiśyamāne karmayoge'dhikṛtaḥ kurvannapi karmāṇi 
īśvarabhāvānupraveśāt sarvaṃ samatvena paśyan, idaṃ 
svargādisukhaphalahetutvāt sukṛtaṃ satkarma, idaṃ duḥkhahetutvāt 
duṣkṛtaṃ duṣṭakarma, iti anutpannavivekajñānairviṣamadarśibhiḥ 
parikalpitabhede sukṛtaduṣkṛte dve api jahāti tyajati na tasya yoginaḥ 
sarvasamatvasamāhitasya kriyamāṇamapi karma sukṛtaduṣkṛtalakṣaṇaṃ 
bhedaṃ bhajatītyarthaḥ | evamanena ślokārdhena tattvajñānavān niyataṃ 
karma kuryādeva, naca tatra apāramārthikaṃ sadasadvikalpamāropayediti 
upadiṣṭaṃ bhavati | yata evaṃ tasmāttvaṃ 
yathoktatattvajñānābhiniviṣṭaḥ san yogāya

p. 49) samādhaye yujyasva karmānuṣṭhānadvāreṇa yukto bhava, yataḥ 
karmasu kriyamāṇeṣu yat kauśalam uktajñānaniṣṭhatvena 
sādhukāritvaṃ tadeva yogaḥ samādhiriha, na anyaḥ || 52 ||

	etameva arthaṃ hetūpanyāsapūrvaṃ vivarītumāha

karmajaṃ buddhiyuktā hi phalaṃ tyaktvā manīṣiṇaḥ |
janmabandhavinirmuktāḥ padaṃ gacchantyanāmayam || 53 ||

	yataḥ karmajam atattvajñaiḥ kriyamāṇāt karmaṇo'vaśyambhāvi 
sukhādyātmakaṃ phalaṃ sarvadā sarvato nirabhikāṃkṣasya 
ātmaniṣṭhatvādanabhisandhānena tyaktvā vihāya 
phalābhisandhyanuṣṭhīyamānakarma(kha0 bha0 pu0 pratibaddhājjanmana iti 
pāṭhaḥ |)pratibaddhatvāt  janmanaḥ punarbhavalakṣaṇāt 
bandhanādasvātantryāt nirmuktāḥ santo nirvighnatayā anāmayam 
anityasukhādisaṃkalpadoṣarahitaṃ padaṃ 
pāramārthikasvarūpapratiṣṭhātmakaṃ dhāma gacchanti prāpnuvanti | 
atastvaṃ buddhiyukto yogāya yujyasveti pūrveṇa sambandhaḥ || 53 ||
	yadāca etat paramaduravagāhaṃ tattvajñānamuktamapi jhagiti 
manasi pratiṣṭhāṃ na nibadhnāti, tadā tvayā atra śithilotsāhena na 
bhavitavyaṃ yataḥ krameṇa etat jñāsyase, ityāha

yadāsya mohakalilaṃ buddhyā vyatitariṣyasi |
tadā gantāsi nirvedaṃ śrotavyasya śrutasya ca || 54 ||

śrutivipratipannā te yadā sthāsyati niścitā |
samādhāvacalā buddhistadā yogamavāpsyasi || 55 ||

	yadā yasmin kāle tvam asya upadiṣṭasya jñānasya 
upapannatvamātrapratipattyā mohakalilaṃ 
anādijanmābhyastadehādyātmapratyayasvarūpamajñānakardamaṃ 
vyatitariṣyasi viparyayatvapratipattyā laṅghayiṣyasi tadā idaṃ śrutam, 
idaṃ śrotavyamitisaṃśayāviṣṭajanocitayornānāśāstraviṣayayoḥ 
śrotavyaśrutayoḥ nirvedaṃ virāgaṃ

p. 50) gamiṣyasi || tataśca niścayābhāvāt, idaṃ śrutam, idaṃ 
śrotavyamitivicikitsāviṣṭatayā yā śrutirnānāśāstraśravaṇaṃ, tasyā 
anupādeyatvāt vipratipannā pratikūlā satī tava matiḥ niścitā 
yathoktātmajñānanivṛttasaṃdehā, ata eva acalā vikalpairbalavadbhirapi 
aprakampyā satī yadā sthāsyati asmin samādhau sthitiṃ pratiṣṭhāṃ 
lapsyate tadā anena krameṇa yathoktaṃ yogaṃ karmasamādhilakṣaṇam 
avāpsyasi pratipatsyase || 55 ||
	atha te tadā matiḥ sthāsyati iti bhagavadvacanaṃ śrutvā, 
sthitaprajñatvasya samyak tattvamanavagacchan

arjuna uvāca

sthitaprajñasya kā bhāṣā samādhisthasya keśava |
sthitadhīḥ kiṃ prabhāṣeta kimāsīta vrajecca kim || 56 ||

	he bhagavan keśava ! karmasu kila kauśalaṃ yoga uktaḥ, 
niścalaprajñatā ca sthitaprajñatā | tadevaṃvidhasya asya sthitaprajñasya 
kā bhāṣā kathamasau bhāṣate, kimasya vyākhyānaṃ ? viruddhamiva asya 
ceṣṭitaṃ yato vāṅmanaḥkāyaistribhirvyāpāraṇaṃ karma ucyate 
tāstisro'pi ceṣṭā na asya upapadyante | kim asau prabhāṣeta ! 
bhāṣaṇakriyāṃ ca anutiṣṭhet, nahi asya ekatattvaniścalaprajñatvāt 
bhāṣaṇaṃ vacanakarma upapadyate | kimasau vrajet gamanakriyopalakṣitaṃ 
kāyavyāpāramācaret, so'pi asya pūrvavat na upapadyate | kimāsīta 
vāṅmanasapracāraparihāreṇa āntaryaiva vṛttyā tiṣṭhet, sāpi asya 
karmakauśalalakṣaṇe yoge vartamānasya ubhayakarmavṛttyātmikā na 
upapadyate- iti svarūpānavadhāraṇāt kā asya bhāṣeti uktam | etacca 
praśnatrayamavivakṣitakarmakakriyāmātraviṣayaṃ veditavyam || 56 ||

atha

yasya sarve samārambhāḥ------------------ | (50)

p. 51) ityādau buddhimacchabdena uktasya sthitaprajñasya 
svarūpamuktaprāyamapi duradhigamatvāt samyaganavadhāritam, idānīṃ 
kenāpi aṃśena viśeṣya punarucyamānamavadhārayeti arjunaṃ 
bodhayituṃ

bhagavānuvāca

prajahāti yadā kāmānsarvānpārtha manogatān |
ātmanyevātmanā tuṣṭaḥ sthitaprajñastadocyate || 57 ||

	iha khalu sarvarahasyānāmupaniṣadbhūte'smin vijñāne kaścideva 
lakṣeṣu eko 
janmasahasrapariśīlitaparyavabhātaikātmatāparāmṛṣṭarajastamomayamala
tayā sattvamātraśeṣatve sati, 
samupajātasvarūpapratyavamarśayogyaprajñaścaramajanmā 
puruṣātiśayo'dhikārī 
yastathāvidhāvasaropajātānujighṛkṣaparameśvarapreṣitābhyāṃ 
satatasahacarībhyāṃ bhaktiśraddhābhyāṃ dattadṛḍhahastāvalambo 
yathoktajñānaniḥśreṇīsthiraniveśitapadaḥ 
paramakāraṇasamāpattipratibimbarūpaṃ paramaṃ dhāma 
adhiroḍhumadhyavasitaḥ, yamuddiśya ātmatattvameva ahantayā vyapadiśan 
vakṣyati

manuṣyāṇāṃ sahasreṣu kaścidyatati siddhaye |
yatatāmapi siddhānāṃ kaścinmāṃ vetti tattvataḥ || (7/3)

iti, tathā

	bahūnāṃ janmanāmante jñānavānmāṃ prapadyate | (7/19)

ityādi | tādṛśaśca san yadā idamācarati tadā sthitaprajñobhavati | 
kimācarati | yadā manogatān saṃkalpavartinaḥ kāmān 
atattvajñānuṣṭheyakarmaphalabhūtān sukhādīn prajahāti prakarṣeṇa 
tyajati manāgapi tān na saṃkalpayati, natu karmāṇi prajahāti | kathametat 
saṃbhavati karmāṇi ca karoti phalaṃ ca prajahāti, iti | etadupapādayituṃ 
viśeṣaṇamāha ātmanyevātmanā tuṣṭaḥ iti | na sarvaḥ kaścit 
svasaṃvidadhikaraṇaṃ toṣaṃ prītimanubhavati, kiṃtu aprāptapūrveṇa 
kenacidanityena prāpyena sukhasādhanabhūtena vastunā prāptena 
anityameva

p. 52) toṣaṃ prāpnoti | ayaṃ tu yogī 
satatasannihitānastamitacitprakāśātmanā parāmarśābhāvamātrāt 
vyavadhānamiva prāptena sarvadā 
susaṃpūrṇasvamahimatvādakhilavastuspṛhāvicchedakāriṇā 
svayaṃnihitavismṛtena mahānidhānena iva punaḥ pratyuditasmṛtivaśāt 
pratilabdhena ātmanaiva satyena svabhāvena niruttareṇa lābhena 
labdhasahajānandaḥ | evaṃvidhaśca ayaṃ 
kṛpaṇaprārthanīyānutpādavināśadharmakān kāmān kathaṃ na 
prajahyāt || 57 ||
	yadāca itthaṃbhūtaḥ san sarvakarmāṇi kurvannapi kāmān 
prajahāti, tadā sthitaprajño yathoktasvabhāvalabdhapratiṣṭhabuddhirbhavati, 
iti sāmānyena sthitaprajñalakṣaṇamuktvā tadeva viśeṣato vaktumāha

duḥkheṣvanudvignamanāḥ sukheṣu vigataspṛhaḥ |
vītarāgabhayakrodhaḥ sthitadhīrmunirucyate || 58 ||

	iha karmaphalabhūte sukhaduḥkhe prāpsyamāne prāpte ca 
dviprakāratayā sarvaprāṇināṃ vikārahetutvamāpadyete | ayaṃ tu 
uktalakṣaṇaḥ sthitaprajñaḥ prāpsyamāneṣu satsu duḥkheṣu 
anudvignamanāḥ nirbhayacitta eva bhavati, 
yathoktaparipūrṇātmasvarūpalabdhapratiṣṭhatvāt 
sarvasāmyasamādhimāpannaḥ, tathā bhayaṃ 
sukhapratīghātahetoraśakyapratīkārāt santrāsaḥ, tathā krodhaḥ 
śakyapratīkāraṃ tathāvidhaṃ prati roṣaḥ, ete vītā vigatā yasya, sa 
tathāvidhaḥ sthitaprajñaḥ ucyate || 58 ||
	evaṃ prāpsyamānasukhaduḥkhanirvikāratayā sthitaprajñasya 
lakṣaṇaviśeṣamuktvā, prāptasukhaduḥkhasya nirvikāratayā taṃ 
pratipādayitumāha

yaḥ sarvatrānabhisnehastattatprāpya śubhāśubham |
nābhinandati na dveṣṭi tasya prajñā pratiṣṭhitā || 59 ||

yogī tattat anantabhedaṃ sukhasādhanabhūtaṃ duḥkhasādhanabhūtaṃ 
vā

p. 53) sukhātmakaṃ duḥkhātmakameva vā śubhāśubhaṃ prāpya 
nābhinandati na apūrvakṣaṇikaharṣalakṣaṇaṃ kṣobhaṃ śrayati, yataḥ 
sarvasmin vastuni anabhisnehaḥ idaṃ mama sarvasvam, etena vinā mama 
sarvamanyat duḥkhakāraṇamiti abhīṣṭheṣu vastuṣu anurāgo'bhisnehaḥ, sa 
yasya nāsti, sa tathoktaḥ | tathā na dveṣṭi na tatpratiṣedhaprayatnalakṣaṇaṃ 
kṣobhamupayāti | ya evaṃvidhaḥ prāptayorapi 
priyāpriyayornityanirvikārasvātmamātrasuvyasthitabuddhiḥ, tasya 
pratiṣṭhitā prajñā ucyate || 59 ||
	evaṃ pratiṣṭhitaprajñatvaṃ yena karmaṇā upāyabhūtena 
niṣpadyate, tadvānapi sthitaprajña eveti pratipādayitumāha

yadā saṃharate cāyaṃ kūrmo'ṅgānīva sarvataḥ |
indriyāṇīndriyārthebhyaḥ sthitaprajñastadocyate || 60 ||

caśabdo vyatireke | yadā punarayaṃ yogī sarvataḥ sarvebhya 
indriyārthebhyaḥ śabdādibhya indriyāṇi śrotrādīni saṃharate 
vyatirecayati svabhāvataścidarkaraśmirūpāṇi tanniṣṭhānyeva karoti | 
katham | kūrmaḥ kacchapo yathā svāvayavān svaśarīraniṣṭhāneva karoti | 
tadā asau sthitaprajña iti ucyate || 60 ||
	atho viṣayebhya indriyasaṃhāraḥ kiṃ śabdādyagrahaṇena, kiṃvā 
gṛhyamāṇeṣu api śabdādiṣu nirvikāratvena atra uktaḥ, iti 
pakṣadvayasambhāvanāyāṃ 
pūrvapakṣasthairyapratipādanapūrvamuttarameva pakṣaṃ 
samarthayitumāha

viṣayā vinivartante nirāhārasya dehinaḥ |
rasavarjaṃ raso'pyasya paraṃ dṛṣṭvā nivartate || 61 ||

	abhyupagamya idamucyate astyetat nirāhārasya śāstravihitānapi 
śabdādīnanāharatastān dūrataḥ pariharato viṣayāḥ iṣṭāḥ śabdādayo 
vinivartante pratyāsattyabhāvāt svakāryaṃ rāgādikaṃ na ārabhante, 
kiṃtu rasavarjaṃ tadviṣayaṃ rasamabhilāṣaṃ rāgākhyaṃ kleśaṃ

p.54) varjayitvā, sa hi tadānīṃ prasuptastanurvā vartate | yadivā 
paramanaiṣṭhikasya raso'pi nivartate nāma paraṃ prakṛṣṭaṃ 
samādhyupeyaṃ vastu dṛṣṭvā sākṣātkṛtya | yadivā eṣa yogī yadā 
paraṃ tattvaṃ viṣayaparihārasamādhikrameṇa paśyati, tadā tat 
dṛṣṭavatastasya raso'pi jātu nivartate iti katvāntaṃ niṣṭhārthatvena 
vyākhyeyam || 61 ||
	evaṃ viṣayaparihāraparamasamādheḥ parāmapi kāṣṭhāṃ 
prāptasya sacchalatvaṃ pratipādayan, 
yathoktajñānapūrvamaniṣiddhaviṣayasevātmakamacchalaṃ samādhiṃ 
siddhāntīkurvannāha

yattasyāpi hi kaunteya puruṣasya vipaścitaḥ |
indriyāṇi pramāthīni haranti prasabhaṃ manaḥ || 62 ||

tāni saṃyamya manasā yukta āsīta tatparaḥ |
vaśe hi yasyendriyāṇi tasya prajñā pratiṣṭhitā || 63 ||

	yat yasmāt tasyāpi viṣayānāharaṇasamāhitasya 
paratattvadarśanayogyatāmapi prāptasya viduṣo vipaścitaḥ 
jñānavighātajāgarūkatvāt chidrānveṣaṇaparāṇi pramathanaśīlāni 
indriyāṇi prasabhaṃ prasahyaiva kaṃcidavakāśaleśaṃ labdhvā manaḥ 
cittaṃ haranti labdhādapi samādhiphalāt vyapakarṣanti 
viṣayābhimukhatāṃ nayanti | śrūyante hi tathāvidhā 
viṣayapratiṣedhayoganiṣṭhā yoginaścirādapi indriyaiḥ kāmān prati 
pravartanena pramathitacittāḥ | yata evamayaṃ yathoktajñānaniṣṭhena 
cetasā saṃyamya ātmavaśāni kṛtvā yukto yathoktalakṣaṇe svātmatattve 
samāhitaḥ sarvāsu avasthāsu tadekaniṣṭhaḥ san tatparaḥ 
śāstrāniṣiddhaśabdādigrahaṇapravṛttendriyaniṣṭha eva āsīta | yasmāt 
yathoktena krameṇa yasya yogina indriyāṇi vaśe vidheyatve vartante, tasya 
pratiṣṭhitālabdhaniścalasthitiḥ prajñā ucyate | atra ayaṃ 

p. 55) dṛṣṭāntaḥ kaścit gāruḍikastādṛśaḥ saṃbhavati yo 
mantraprabhāveṇa bhujagān pratiṣeddhumalam | sa yadā 
tādṛṅmantropāsanaśaithilyalakṣaṇaṃ pramādamātiṣṭhati, tadā te 
cchidrānveṣiṇo bhujagāstaṃ vyāpādayanti eva | kaścittu 
gāruḍaśāstrarahasyaveditvāt tādṛśātiśayayukto bhavati yena taireva 
bhujagaiḥ sārdhaṃ sragdāmabhiriva krīḍati, taṃ ca te na kadācidapi 
abhibhavituṃ prabhavanti | evaṃ yo yogī kayācit yuktyā kaṃcitkālaṃ 
viṣayān parihṛtya samādhimabhyasyati, tasya manāgapi avadhānavicchedāt 
te labdhāvakāśā viṣayāścittaṃ pramathnanti eva | yastu yathokte 
pāramārthike svātmani eva sadā suvyavasthitāḥ, sa viṣayaiḥ krīḍannapi 
na kathaṃcit bādhituṃ śakyaḥ | yathoktaṃ

vasanviṣayamadhye'pi na vasatyeva buddhimān |
saṃvasatyeva durbuddhirasatsu viṣayeṣvapi ||

iti || 63 ||

	atha kūrmo'ṅgānīva iti upamānanirdeśāt 
viṣayebhyo'tyantavyāvartanameva indriyāṇāṃ saṃhāraḥ saṃyamo 
yastebhyo'nyathaiva (tebhyo viṣayebhyaḥ, tamindriyāṇāṃ saṃhāram, 
anyathā anyena prakāreṇa pratipādayan, rāgadveṣavimuktendriyāṇāṃ 
pravṛttireva saṃhāra ityanyathātvamityarthaḥ |) taṃ pratipādayan 
pratiṣṭhitaprajñatvasya ślokapañcakena mukhyaṃ lakṣaṇamāha

dhyāyato viṣayānpuṃsaḥ saṃgasteṣūpajāyate |
saṃgātsaṃjāyate kāmaḥ kāmātkrodho'bhijāyate || 64 ||

krodhādbhavati saṃmohaḥ saṃmohātsmṛtivibhramaḥ |
smṛtibhraṃśādbuddhināśo buddhināśātpraṇaśyati || 65 ||

	iha khalu acintyaparameśvaramāyāmuṣitasamyagjñānatayā 
śarīramātramātmatvena pratipannasya saṃsāriṇaḥ sataḥ puṃsaḥ 
sannihitamapi mukhyamavyayaṃ nirupamānantanijānandasudhāsāgaraṃ 
satyaṃ svātmānamavimṛśato 
duḥkhaikapariṇāmānityakṛttrimasukhasādhanaspṛhatayā śabdādīn 
viṣayān

p. 56) dhyāyataḥ satataṃ cintayataḥ teṣu saṅgo niviḍanimagnamānasatvam 
upajāyate utpadyate | tasmāt tathāvidhāt saṅgāt kāmaḥ 
tadviṣayo'bhilāṣo rāgākhyaḥ kleśaḥ saṃjāyate samudbhavati | tasmācca 
tatpratikūleṣu vastuṣu krodhaḥ dveṣākhyaḥ kleśaprakāraḥ abhijāyate 
prabhavati | tataśca saṃmohaḥ 
ātmānātmādivastuvivekavirahātmakamajñānaṃ prabhavati mohākhyaḥ 
kleśaḥ unmajjatītyarthaḥ | tataśca smṛtirvibhrāmyati- satyaṃ 
smartavyamātmānamaspṛśantī svarūpalopamiva āpnoti | tādṛśācca 
tasmāt smṛtibhraṃśāt buddhiḥ paramārthaniścayātmakaṃ jñānaṃ 
naśyati tirobhavati | tasmācca hetoḥ puruṣaḥ 
satyasvarūpapratiṣṭhābhāvalakṣaṇaṃ nāśamupagacchatīti || 64-65 ||
	saṃsāriṇaṃ puruṣamuddiśya apratiṣṭhitabuddhitvasya 
hetuparamparāṃ pratipādya, 
idānīmanujighṛkṣākṣaṇākṣipyamāṇasandehatiraskariṇītirodhānatayā 
prakāśamānayathoktasvasvabhāvaprakāśasya prāptaprabodhasya 
mumukṣoḥ puṃsaḥ pratiṣṭhitaprajñatvasya kāraṇakramaṃ 
pratipādayitumāha

rāgadveṣavimuktaistu viṣayānindriyaiścaran |
ātmavaśyairvidheyātmā prasādamadhigacchati || 66 ||

prasāde sarvaduḥkhānāṃ hānirasyopajāyate |
prasannacetaso hyāśu buddhiḥ paryavatiṣṭhate || 67 ||

nāsti buddhirayuktasya nacāyuktasya bhāvanā |
na cābhāvayataḥ śāntiraśāntasya kutaḥ sukham || 68 ||

indriyāṇāṃ hi caratāṃ yanmano'nuvidhīyate |
tadasya harati prajñāṃ vāyurnāvamivāmbhasi || 69 ||

	vidheyātmā pratyavamarśaviṣayabhūtatvāt svādhīna ātmā 
svabhāvo yasya sa tādṛśaḥ puruṣa ātmavaśyaiḥ tādṛśasya satyasya 
ātmanaḥ

p. 57) svaśaktitayā pratipādyamānatvāt 
vidheyaistadadhīnapravṛttisthitisaṃhṛtibhirbāhyantaraiḥ indriyaiḥ karaṇai 
kiraṇairiva arkaḥ padārthān viṣayān caran gacchan prasādaṃ 
sukhādikalaṅkasamparkābhāvarūpaṃ vaiṣadyam adhigacchati pratilabhate 
| ata eva kīdṛśairindriyairviṣayāṃścaran | rāgadveṣavimuktaiḥ 
rāgadveṣau hi viṣayamātradhyānasaṃprasaktasya vismṛtasyātmanaḥ 
puṃso viṣayān prati pravartamāneṣu indriyeṣu parisphurataḥ | yasya tu 
sarvataḥparipūrṇatvāt nityanirabhilāṣasvarūpapratyavamarśapūrvakaḥ 
sarvajñānakriyāvyavahāraḥ, syata rāgadveṣābhyāṃ vimuktāni 
indriyāṇi svaṃ svaṃ viṣayamabhipravartante iti 
tādṛśairindriyairviṣayāṃścaran prasādamadhigacchati, iti uktam | 
evaṃvidhe ca nisarganirmalasvarūpābhivyaktilakṣaṇe prasāde sati 
rāgādikleśanibandhanānāṃ 
sarveṣāmādhyātmikādidaivikādhibhautikānāṃ duḥkhānāṃ hāniḥ 
parikṣayaḥ asya puṃsaḥ upajāyate | yato yathoktena prakāreṇa prasannaṃ 
nīrāgadveṣakalaṅkaṃ ceto yasya tādṛśasya puṃsaḥ āśu 
prasādasamanantarameva buddhiḥ prajñā paryavatiṣṭhate paritaḥ samantāt 
satye svātmani nirviplavāṃ pratiṣṭhāṃ labhate || 66-69 ||

yata evaṃ

tasmādyasya mahābāho nigṛhītāni sarvataḥ |
indriyāṇīndriyārthebhyastasya prajñā pratiṣṭhitā || 70 ||

	tasmāt kāraṇāt yasya puruṣasya sarvataḥ sarvebhyaḥ sukhahetubhyo 
duḥkhahetubhyaśca indriyārthobhyaḥ viṣayebhyo duḥkhahetuṣvapi 
dveṣavirahitatvena sukhahetuṣvapi nīrāgatayā aprasṛtānyeva nigṛhītāni 
niyamitāni bāhyābhyantarāṇi indriyāṇi tasya tathāvidhasya 
pratyāsannaparameśvarasāyujyasya prajñā buddhiḥ pratiṣṭhitā svātmani 
labdhasthitiḥ, natu anyasya yaḥ pratanuprayatnalakṣaṇasamādhiniruddhāni

p. 58) anutkhātarāgadveṣamayamūlatvāt prasṛtāni kāryakarāṇyeva 
nigṛhītāni indriyāṇi manyate || 68 ||

	ata eva samastasaṃsāripuruṣavilakṣaṇāṃ prabuddhasya vṛttiṃ 
pratipādayitumāha

yā niśā sarvabhūtānāṃ tasyāṃ jāgarti saṃyamī | 
yasyāṃ jāgrati bhūtāni sā rātriḥ paśyato muneḥ || 71 ||

	sarvavastuprakāśakasvarūpaprakāśanirūpaṇarūpā vṛttireva iha 
saṃsāriṇaḥ prati niśāśabdena uktā, tadviṣayatvena hi sarvabhūtāni 
anunmiṣitadṛkśaktitvāt prasuptāni tiṣṭhanti | evaṃvidhā yā 
sarvabhūtānāṃ niśā tasyāṃ tadviṣaye saṃyamī yathoktaprakāreṇa 
nigṛhītasarvendriyaḥ prabuddho jāgarti 
pravikasitasvabhāvanirmalavijñānamayavilocanavibhāvyamānāṃ tāmeva 
avimuñcan vigatamohanidra āste | yasyāṃ tu 
pratikṣaṇavinaśvarasukhaduḥkhasādhanabhūtaviṣayagrahaṇotsargamātrav
yagrasamagrendriyagrāmāyāṃ saṃsāravyavahāravṛttau sarvabhūtāni 
samastaprāṇabhṛto jāgrati tāvanmātrāvahitatvāt vinidratāmiva 
anubhavanti, sā tādṛśī vṛttiḥ paśyataḥ 
sadasatpadārthasārthaparamārthamālokayato muneḥ saṃyaminaḥ 
prabuddhasya rātriḥ niśā tāṃ prati tasya niravadhānatvāt || 71 ||
	evaṃ satatamanastamitasāmānyasaṃvitprakāśātmani svabhāve 
suvyavasthitaprasannabuddhiḥ prabuddhaḥ pavana iva 
sadasadāmodairvividhaiḥ padārthaiḥ paricayamupagacchannapi 
tatsaṃparkasaṃjātaiḥ sukhādibhirmanāgapi na vikṛtiṃ nīyate iti 
upamānanidarśanena sphuṭataraṃ tatsvarūpaṃ pratipādayitumāha

āpūryamāṇamacalapratiṣṭhaṃ
samudramāpaḥ praviśanti yadvat |

p. 59) tadvatkāmā yaṃ praviśanti sarve
sa śāntimāpnoti na kāmakāmī || 72 ||

	sa prabuddhaḥ puruṣātiśayaḥ śāntiṃ 
sakalavikalpakallolakṣobhaparikṣayāt nistimitacittavṛttitām āpnoti 
adhigacchati | ko'sau | yaṃ kāmāḥ viṣayāḥ tadvat praviśanti 
nirabhilāṣameva avagāhante | katham | yathā samudraṃ 
nānādigantarāgatasaridrupā āpaḥ | kīdṛśam | tābhiḥ āpūryamāṇaṃ 
bhriyamāṇamapi acalapratiṣṭhaṃ 
niṣprakampāpāragambhīranijāvasthānam | anena upamānena 
pratyāsattisāmarthyāt sambadhyamānairapi sukhādihetubhiḥ 
śabdādibhiryaḥ kṣobhaṃ netuṃ na śakyate, sa eva śānta iti ucyate, natu 
yasteṣu sannihiteṣu aśāntaḥ | yathoktaṃ

vikārahetau sati vikriyante yeṣāṃ na cetāṃsi ta eva dhīrāḥ |
						(ku0 saṃ0 1/58)

iti | ata eva āha na kāmakāmī śāntimāpnoti iti || 72 ||

manasā kāmān sukhasādhanabhūtān viṣayān 
kāmayamāno'bhilaṣyanneva indriyavyāpāraparihāramātreṇa na 
śamamāpnoti, ityevamabhiprāyaṃ prakaṭayitumāha

vihāya kāmānyaḥ sarvānpumāṃścarati niḥspṛhaḥ |
nirmamo nirahaṃkāraḥ sa śāntimadhigacchati || 73 ||

	yaḥ sarvān aśeṣān kāmān iṣṭān śabdādiviṣayānabhilāṣān 
manasaiva vihāya parityajya indriyairviṣayān carati avagāhate sa śāntim 
uktarūpām adhigacchati prāpnoti | kīdṛśaḥ san | 
nityatṛptādvayacinmātrapratilabdhātmapratyayatvāt niḥspṛhaḥ spṛhāto 
viṣayasukhalolupatāyā niṣkrāntaḥ, tathā nirmamaḥ pratiniyateṣu 
dehendriyaviṣayādiṣu bhāveṣu mamaiva idamiti mamatvābhimānāt 
niṣkrāntaḥ, tathā nirahaṃkāraḥ dehabuddhiprāṇādiṣu 
ātmapratyayarūpādavacchinnādahaṃkārādapi niṣkrāntaḥ iti || 73 ||

p. 60) etadantena granthena apavargamārgapravaṇasya puṃsaḥ prathamameva 
sahajabhaktyādyavyabhicāricihnasūcitopadeśayogyabuddhitayā 
sadgurūpadiṣṭadehadehivyatirekajñānanirantarābhyāsavaśāt 
dehādivargavyāvartamānātmapratyayasya 
advaitasāmānyasaṃvitprarohādahaṃpratīteścidarkaraśmirūpāṇāmanta
rbahiṣkaraṇaśaktīnāṃ śāstracoditeṣu viṣayeṣu visṛṣṭatvameva 
nigrahaṃ niruttarapadaprāptihetuṃ siddhāntīkṛtya 
saptadaśādhyāyapradarśitaparamarahasyopadeśaprāṇabhūtārthapratipā
dakaṃ dvitīyamadhyāyamupasaṃharannāha

eṣā brāhmī sthitiḥ pārtha naināṃ prāpya vimuhyati | 
sthitvāsyāmantakāle'pi brahma nirvāṇamṛcchati || 74 ||

	eṣā vihāya kāmānyaḥ sarvān ityantena granthena pratipāditā, 
brahmaṇaḥ parasya tattvasya paramātmasaṃjñakasya sambandhinī sthitiḥ | 
etayā brahmaṇi sthīyate iti viṣayāntaranivṛttagatitayā pratiṣṭhā kriyate | 
ata eva enāṃ prāpya yathoktena krameṇa svātmīkāreṇa svīkṛtya 
abhiyukto na muhyati dehādiṣu ātmapratyayarūpaṃ vaicittyaṃ na bhajate, 
yataḥ asyām antakāle'pi uparamasamaye'pi sthitvā viśramya nirvāṇaṃ 
nānāvikalpakṣobhapratyayāt praśāntaṃ brahma paraṃ tattvaṃ svaṃ 
svabhāvamayam ṛcchati gacchati tadaikātmyamāpadyate iti || 72 ||

dvitīye'dhyāye'smin hṛdaya iva gambhīravimale
gṛhīte gītānāṃ vivudhadayitānāṃ praṇayataḥ |

tadāśleṣānandāmṛtarasamapūrvaṃ rasayatāṃ
sadā vaḥ pumbhāvo bhavatu kṛtakṛtyaḥ kṛtadhiyām ||

iti śrīmadrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe dvitīyo'dhyāyaḥ || 2 ||



atha tṛtīyo'dhyāyaḥ

	atha jñānasya karmaṇaśca bhagavadbhāṣitāni pṛthak 
praśaṃsāvacanāni anuvimṛśan samyak samuccayārthamanavadhārya 
kimetayorupādeyataraṃ syāditi saṃśayāno

bhagavantamarjuna uvāca

jyāyasī cetkarmaṇaste matā buddhirjanārdana |
tatkiṃ karmaṇi ghore māṃ niyojayasi keśava || 1 ||

vyāmiśreṇaiva vākyena buddhiṃ mohayasīva me |
tadekaṃ vada niścitya yena śreyo'hamāpnuyām || 2 ||

dūreṇa hyavaraṃ karma buddhiyogāt ---------- | (2/51)

ityādi vadatastava karmaṇaḥ sakāśāt yadi buddhirjyāyasī matā jñānaṃ 
prakṛṣṭataratvena abhipretaṃ, tat kiṃ kena hetunā bandhahetutvāt sarvasmin 
karmaṇi dāruṇavipākatvāt ghore viśeṣato'smin 
gurujñātighātādimahāpātakahetau saṃgrāmarūpe māṃ

karmaṇyastvadhikāraste----------------| (2/48)

ityādinā niyojayasi pravartayasi | itthaṃca 
parasparaviruddhajñānakarmapraśaṃsārūpatvāt vyāmiśreṇa 
saṃkīrṇena vākyena mama buddhiṃ prajñāṃ mohayasīva 
niścayopadeśena prabodhanamicchan saṃśayāpādakavacanapraṇayanāt 
vaicittyamiva māṃ prāpayasītyarthaḥ | tasmāt 
kāraṇādetayorjñānakarmaṇormadhyāt ekaṃ jñānaṃ karma vā 
idameva anuṣṭheyamiti niścitya nirṇīya brūhi, yena ekatareṇa sugṛhītena 
satā śreyaḥ apavargalakṣaṇamabhyudayam ahaṃ prāpnuyāṃ labheyeti || 
1-2 ||

p. 62) atha anyathaiva mayoktamanyathaiva tvayā pratipannamiti arjunaṃ prati 
upālambhamiva āviṣkurvan tatsaṃśayavyudāsāya

bhagavānuvāca

loke'smindvividhā niṣṭhā purā proktā mayānagha | 
jñānayogena sāṃkhyānāṃ karmayogena yoginām || 3 ||

	saṃkhyā 
yathāpratipāditalakṣaṇaśarīriśarīrādyupādeyaheyapadārthasaṃkhyāna.
m, tadvido mukhyatayā sāṃkhyā ucyante | yogo 
yathoktasāṃkhyaniścitārthasākṣātkārakaraṇaṃ kriyāviśeṣaḥ, sa 
vidyate yeṣāṃ, te'pi mukhyatayā yoginaḥ, kapilādayo 
hairaṇyagarbhādayaśca gauṇyā vṛttyā sāṃkhyā yoginaśca ucyante | 
yathoktalakṣaṇasya ātmāderarthasya teṣāmaniścayādasākṣātkārācca 
tadevaṃvidhānāṃ sāṃkhyānāṃ yogināṃ ca purā asmādadhyāyāt 
pūrvaṃ dvitīye'dhyāye mayā ekaiva niṣṭhā uktā niścayasiddhāntaḥ 
pratipāditaḥ | kīdṛśī niṣṭhā | dvividhā dve ekānuṣṭhātṛpuruṣaniṣṭhe 
yugapatprayojye vidhe vidhāne prakārau yasyāḥ, sā tathoktā | kena 
prakāreṇa dvividhā, ityāha jñānayogena sāṃkhyānāṃ karmayogena 
yoginām iti | yathāpratipāditādvayacinmātrasvarūpasya ātmatattvasya 
pratyabhijñānalakṣaṇā pratipattiriha jñānamucyate, tadviṣayo yogaḥ 
samādhiḥ karmaṇyapi sati yathoktasvarūpāpracyutilakṣaṇaṃ 
praṇidhānam | tena jñānayogena yathoktānāṃ mukhyānāṃ 
sāṃkhyānāṃ niṣṭhā mayā uktā | te hi naiṣṭhikāḥ sāṃkhyā yeṣāṃ 
karmaṇi pravṛttānāmapi yathoktātmajñānaviṣayaḥ samādhiraviplutaḥ | 
karma yathāvarṇaṃ yathāśramaṃ śāstracoditā sā sā kriyā, tatra yogaḥ 
samādhiryathoktajñānāparityāgena tadanuṣṭhānaniṣṭhatā | tena 
karmayogena mukhyānāṃ yogināṃ niṣṭhā uktā | evaṃ jñānayogasya 
karmāvinābhāvāt karmayogasya ca jñānāvinābhāvādekaiva 
prakāradvayanirvartyā

p. 63) niṣṭhā mayā pūrvamuktā | tatpratipādakaśca granthastatra uktaḥ 
kathaṃ vismṛto bhavataḥ | tathāca

dūreṇa hyavaraṃ karma------------------| (2/51)

ityādinā jñānasya prakarṣapratipādanamupakramya 
tatsamādhipratipādanāya uktaṃ tasmādyogāya yujyasva karmaniṣṭho 
bhava yataḥ karmasu yo yogastat kauśalaṃ sā buddhimattā jñānitvamiti | 
anena jñānayogena sāṃkhyānāṃ niṣṭheti tatra uktam | tathā 
karmaṇyastvadhikāraste tasmādyogāya yujyasva ityādinā 
karmaṇo'vaśyakaraṇīyatvaṃ vyavasthāpya tatsamādhipratipādanāya 
uktaṃ

karmajaṃ buddhiyuktā hi phalaṃ tyaktvā manīṣiṇaḥ | 
karmabandhavinirmuktāḥ padaṃ gacchantyanāmayam || (2/53)

tathā

rāgadveṣavimuktaistu viṣayānindriyaiścaran |
ātmavaśyairvidheyātmā prasādamadhigacchati || (2/66)

iti | anenāpi karmayogena yogināṃ niṣṭhā tatra uktā | kiṃ bahunā

dūreṇa hyavaraṃ karma-----------------| (2/51)

ityataḥ prabhṛti adhyāyaparisamāptiṃ 
yāvadekapuruṣānuṣṭheyadvividhaniṣṭhāpratipādanaparatvena sarvo 
granthastatra vyākhyātaḥ | tat kā me vyāmiśravacanatā yayā evaṃ te 
buddhimoha utpannaḥ || 3 ||
	atha manyase yathoktātmalakṣaṇaikārthāvahitatvaṃ jñānamiti 
uktam, karma ca nānāviṣayahānādānarūpavyāpārātmakaṃ; 
tadetayorjñānakarmaṇoḥ 
parasparaviruddhayoryugapadekapuruṣānuṣṭheyatvaṃ kathamupapadyate iti | 
atra ucyate samyaganavadhāritā jñānakarmānuṣṭhānaniṣṭhā tava

p. 64) evaṃvidhabuddhimohakāraṇam | atastāṃ 
punarucyamānāmavadhāraya, iti manasi kṛtvā āha

na karmaṇāmanārambhānnaiṣkarmyaṃ puruṣo'śrute |
naca saṃnyasanādeva siddhiṃ samadhigacchati || 4 ||

	agṛhītayathāpratipāditasamucitasamuccayārthaniścayatvāt sarvathā 
karmaṇāṃ jñānavirodhitvaṃ manvānasya tava yadetat naiṣkarmyam 
avidyamānakarmatvaṃ siddhihetutvena pratibhāti, tat siddhikāmaḥ puruṣaḥ 
karmaṇāṃ sarvakriyāṇām anārambhāt ananuṣṭhānāt na aśnute na 
prāpnoti vakṣyamāṇayā yuktyā śarīritvāvyabhicāriṇāṃ 
śāstrīyāṇāṃ ca karmaṇāṃ duṣpariharatvāt | ato na 
karmaṇāmeṣāmakaraṇamātramabhāvatvena iha vivakṣitam, kintu 
bandhalakṣaṇasvakāryasampādanasāmarthyabhaṅgena 
eṣāmabhāvāpādanamiha abhipretam | atha 
vihitakarmānanuṣṭhānamātraṃ karmatyāgaḥ saṃnyāse'bhimataḥ | 
tadevaṃvidhāt saṃnyasanamātrādeva kevalāt 
yathāpratipāditajñānaśūnyāt na puruṣaḥ siddhim apavargalakṣaṇāṃ 
sampattiṃ samadhigacchati samāsādayati ||
	yadi iha jñānarahitān vihitakarmaparihāramātrāt 
mohalakṣaṇaphalāvāptiḥ syāt, tat suṣuptādayo mohātmakatvāt 
naiṣkarmyamāvahanto'vasthāviśeṣāḥ siddhihetavaḥ syuḥ, naca 
vihitakarmānārambhamātrāt naiṣkarmyasiddhiriti yaduktaṃ, tatra 
hetumāha

nahi kaścitkṣaṇamapi jātu tiṣṭhatyakarmakṛt |
kāryate hyavaśaḥ karma sarvaḥ prakṛtijairguṇaiḥ || 5 ||

	hiśabdo hetau | yasmāt kaścit dehī jātu kadācit 
tattadavasthāviśiṣṭe kasmiṃścidapi kāle na kṣaṇamapi susūkṣmapi 
kālaṃ tadavayavam akarmakṛt tiṣṭhati karma akurvāṇaḥ sthitimanubhavati 
vartate ityarthaḥ | tathāca bālyayauvanavārdhakarūpāsu sthūlāsu 
avasthāsu manovākkāyaiḥ

p. 65) sarvaḥ kaścidehī karma kurvannāste iti suvyaktameva tadantargatāsu 
ca jāgarasvapnasuṣuptarūpāsu sūkṣmāsu avasthāsu na kaścidakarmakṛt | 
yato jāgarāvasthāyāṃ 
śabdādiviṣayagrahaṇavyagrendriyavyāpārarūpāyāṃ sarvasya 
tatkarmaniṣṭhatvaṃ sphuṭameva, svapnāvasthāyāmapi 
viṣayagrahaṇāvilopāt na kasyacidakarmatvena sthitiḥ, suṣuptāvasthāyāṃ 
tu tatkālavyatiriktaviṣayasaṃvedanābhāve'pi pratibodhakāle 
sukhaduḥkhamoharūpānubhūtaviṣayapratyavamarśānyathānupapattyā 
mānasaṃ karma vidyate eva | yā api yogiviṣayā etā jāgarādayo'vasthāḥ, 
tāsvapi eṣaiva vārtā | yato 
jāgarasvapnayorgrāhyagragītrādivikalpānuparamāt, 
suṣuptāvasthāyāmapi tatkālaṃ 
grāhyagrahaṇagrahītṛbhedasaṃvedanābhāve satyapi vyutthāne 
tathāvidhasamādhyavasthāpratyavamarśānyathānupapattiriti tisṛṣvapi 
yogyavasthāsu na kaścidakarmakṛt vartitumarhati, iti 
vihitakarmānārambhamātrāt na naiṣkarmyasiddhiriti pūrveṇa sambandhaḥ 
| itthaṃ sarvakarmābhāvasya anupapattau hetumāha kāryate iti | hiśabdo 
hetau | yasmāt sarvaḥ kaściddehabhṛt avaśaḥ paratantra eva san prakṛtijaiḥ 
pradhānabhavaiḥ guṇaiḥ sattvādibhiḥ karma śāstravihitaṃ 
śarīritvāvyabhicāri ca prāhyate'nuṣṭhāpyate | iha hi 
parameśvarecchāparikalpitakāraṇabhāvaṃ prakṛtyākhyaṃ 
tattvamanyonyaguṇapradhānabhāvapariṇatasattvādiguṇamayaṃ 
tattaccharīramaśeṣaśarīriṇāmārabhate, guṇāśca 
anyonyāvinābhāvavṛttitvāt rajoguṇānugatatve sati sarvaṃ 
kaṃciccharīriṇaṃ sāttvikādikarmādhikṛtaṃ kurvate iti prakṛtijairguṇaiḥ 
sarvaḥ karma kāryate iti uktam || 5 ||
	evaṃca sarvadehināṃ sarvāvasthāsu sarvakarmocchedānupapattau 
sthitāyāṃ vihitānāṃ karmaṇāmanārambhamātreṇa 
naiṣkarmyābhimānino yoginaḥ 
śarīritvāvyabhicāriduṣpariharakarmāntarasadbhāvāt 
kaivalyalakṣaṇasiddhyabhāvaḥ

p. 66) prasaktaḥ iti tathāvidhasya prāyeṇa ayogitvapratipādanārthamāha

karmendriyāṇi saṃyamya ya āste manasā smaran |
indriyārthānvimūḍhātmā mithyācāraḥ sa ucyate || 6 ||

	uktayā upapattyā mānasasya karmaṇaḥ uparamābhāvāt yo yogī 
manasā antaḥkaraṇena indriyārthān śabdādīn smaran cintayan āste 
naiṣkarmyabuddhimālambya avatiṣṭhate sa mithyācāra ucyate tādṛśaṃ 
yogācaraṇaṃ phalavisaṃvādāt vṛthaivetyarthaḥ | yataḥ karmendriyāṇi 
karmendriyaśabdena iha bahiṣkaraṇāni śrotrādīni vāgādīni ca gṛhyante, 
tena śabdādigrahaṇavyāpārādhikṛtāni śrotrādīni akṣāṇi niyamya 
prayatnaviśeṣeṇa svavyāpārāt pratiṣidhya asau kaṃcit kālaṃ tathā āste, 
natu tāvatā sarvātmanā sarvakleśocchedalakṣaṇakaivalyaphalaprāptiḥ | 
yatastathāvidhāyāṃ samādhyavasthāyāṃ yadi paraṃ kleśāḥ prasuptā 
bhaveyuḥ, tathāpi teṣāṃ vyutthāne punaḥ prabodhādanucchedo gamyate || 
6 ||
	yasmiṃstu samādhau dagdhabījakalpatāmāpādyamānāste 
kleśāḥ sati api ālambane prarohasāmarthyaṃ na bhajante, tadadhikṛtasya 
iha vivakṣitasya yoginaḥ pūrvasmāt viśeṣaṃ

rāgadveṣavimuktaistu viṣayānindriyaiścaran | (2/66)

ityādinā pūrvoktamapi smārayan punarāha

yastvindriyāṇi manasā niyamyārabhate'rjuna |
karmendriyaiḥ karmayogamasaktaḥ sa viśiṣyate || 7 ||

	tuśabdo vyatireke | sa punaḥ asaktaḥ saṃgarahito yogī pūrvasmāt 
yogino viśiṣyate prakarṣatvena vyatiricyate | ko'sau | yo manasā 
yathāpratipāditalakṣaṇasatyātmalabdhapratiṣṭhatvāt 
sarvasāmyadaśādhirūḍheṇa

p. 67) antaḥkaraṇena buddhyā śrotrādīni niyamya 
rāgādidoṣasaṃsparśāt, natu śabdāderviṣayāt, pratiṣidhya evaṃvidhaiḥ 
rāgādisparśaśūnyaiḥ karmendriyaiḥ karmasu śabdādigrahaṇarūpeṣu 
vyāpāreṣu adhikṛtairakṣaiḥ karmayogamārabhate karmaṇā 
śāstracoditaśabdādigrahaṇarūpayā kriyayā yogaṃ sambandhamārabhate 
prastauti || 7 ||
	rāgadveṣaparihāraḥ prakaraṇapratipādyasiddhisādhanaṃ, natu 
karmaṇāmanārambhaḥ | tasmāt

niyataṃ kuru karma tvaṃ karma jyāyo hyakarmaṇaḥ |
śarīrayātrāpi ca te na prasidhyedakarmaṇaḥ || 8 ||

	niyataṃ varṇavibhāgena āśramavibhāgena ca śāstreṇa 
niyantritaṃ karma tāṃ tāṃ kriyāṃ kuru anutiṣṭha mā kadācana 
tyākṣīḥ | yataḥ akarmaṇaḥ karmābhāvāt kriyātyāgāt karma 
vihitakriyānuṣṭhānaṃ jyāyaḥ śreṣṭhaṃ yataḥ keṣāṃcideva 
karmaṇāmanārambhe karmābhāvabhramo na siddhihetuḥ 
kleśānāmanucchedāt | yathoktena samādhinā tu anuṣṭhīyamānaṃ karma 
vyutthānahetuṣu viṣayeṣu satsu api kleśonmeṣābhāvāya paryavasyat 
praśasyataram | naca śarīritve sati sarvakarmābhāva upapadyate yatastava 
akarmaṇaḥ sarvātmanā karmarahitasya sthāṇukalpasya śarīrayātrāpi 
dehavṛttirapi na prasidhyet na ghaṭeta | naca 
pānāśanaśayanāsanāgamanākuñcanakaṇḍūyanādikriyākalāpamanta
reṇa kenacit vartituṃ śakyam || 8 ||
	itthaṃ ca karmaṇaḥ sarvathā abhāvānupapattau sthitāyāṃ na 
sarvaṃ nāma karma anuṣṭhīyamānaṃ siddhaye kalpate ityāha

yajñārthātkarmaṇo'nyatra loko'yaṃ karmabandhanaḥ | 
tadarthaṃ karma kaunteya muktasaṃgaḥ samācara || 9 ||

yajño yajanaṃ mukhyayā vṛttyā daivatapūjanaṃ; daivatamapi

p. 68) yasminsarvaṃ yataḥ sarvaṃ-------------|

ityādiślokavyākhyātasvarūpaḥ parameśvaraḥ paramātmaiva ekaṃ 
tattvamiha abhipretam, tasya pūjanamapi 
yathāpratipāditavijñānapariśīlanaviśuddhayā saṃvidā svabhāvatvena 
parāmarśalakṣaṇamārādhanam ; so'rthaḥ prayojanaṃ yasya tādṛśaṃ 
yat karma, tasmāt tathāvidhāt karmaṇo'nyatra tādṛśaṃ karma varjayitvā 
anyādṛśaṃ karma kurvāṇaḥ sarvaḥ ayaṃ lokaḥ karmabandhanaḥ bhavati 
karma śāstracoditamapi anuṣṭhānaṃ bandhanaṃ saṃsāradāyitvāt 
pāratantryaheturyasya, sa tathā | yathoktātmatattvajñānaśūnyatayā 
vidhivadanuṣṭhīyamānaṃ śāstrīyamapi karma bandhanāyaiva kalpate, 
yathāpratipāditavijñānaniṣṭhatayā anuṣṭhīyamānaṃ tu 
parameśvarārādhanamukhyayāgahetutvāt parasiddhidaṃ bhavatītyarthaḥ | 
tathā ca vakṣyati

yataḥ pravṛttirbhūtānāṃ yena sarvamidaṃ tatam |
svakarmaṇā tamevārcya siddhiṃ vindati mānavaḥ || (18/46)

iti | yata evaṃ, tatastvaṃ tadarthaṃ tādṛśasya yajñasya sampattaye 
karmaśāstracoditāṃ kriyāṃ samācara samyak kuru ityarthaḥ | 
kīdṛśastasya samyakkaraṇe'dhikṛta iti viśeṣaṇamāha muktasaṃgaḥ iti 
mukta asaṃkalpāt parihṛtaḥ saṃgo rāgadveṣādidoṣahetuviṣayeṣu 
nimajjanaṃ tadekanimagnacittatvaṃ yena, sa tathāvidhaḥ sanniti | anena 
mumukṣostāvat karmāparityāgaḥ pratipāditaḥ || 9 ||
	idānīṃ kaścit pravṛttilakṣaṇadharmādhikṛtaḥ, kaścit 
nivṛttilakṣaṇadharmādhikṛtaḥ iti dvividhaśāstropadeśaviṣayabhūte loke 
na kasyacidapi karmaparityāga upapadyate iti krameṇa pratipādayituṃ 
pravṛttidharmādhikṛtasyaiva tāvadāgamopanyāsapūrvaṃ 
karmāparityāgamupapādayitumāha

p. 69) sahayajñāḥ prajāḥ sṛṣṭvā purovāca prajāpatiḥ |

prajāśabdena atra karmabhūmijanmānaḥ parajñānarahitāḥ 
svargādigārthino manuṣyā eva gṛhyante teṣāmeva 
prakrāntaprajāpatyupadeśaṣayatvopapatteḥ | tena prajāpatiḥ 
parameśvarecchākalpitasargalakṣaṇarmādhikāro devatāviśeṣo yathoktāḥ 
prajāḥ sahayajñāḥ yajñena nādevatāyajanātmakena vidhiviśeṣeṇa saha 
sārdhaṃ sṛṣṭvā nirmāya vāca upadideśa ||

kimuvāca, ityāha

anena prasaviṣyadhvameṣa vo'stviṣṭakāmadhuk || 10 ||

devānbhāvayatānena te devā bhāvayantu vaḥ |
parasparaṃ bhāvayantaḥ śreyaḥ paramavāpsyatha || 11 ||

iṣṭānbhogān hi vo devā dāsyante yajñabhāvitāḥ |
tairdattānapradāyaibhyo yo bhuṃkte stena eva saḥ || 12 ||

anena sahajanmanā yajñena kriyamāṇena yūyaṃ prasaviṣyadhvaṃ 
savaṃ santānamavāpsyatha vṛddhiṃ gamiṣyathetyarthaḥ | 
prasaviṣyadhvatiprayogaśchāndasaḥ, anyatrāpi evaṃ draṣṭavyaḥ | eṣa ca 
yuṣmākanuṣṭhīyamānaḥ san iṣṭakāmadhuk bhavatu kriyāphalatvena 
abhimatān pumān svargādibhogān dugdhāṃ pūrayatu | kimanena kurma 
ityāha manena devān indraprabhṛtīn bhāvayata 
śāstropadiṣṭetikartavyatāviṣṭena yajñena tarpitān satastṛptilakṣaṇāṃ 
sattāṃ lambayatetyarthaḥ |  ? ca evaṃ bhavadbhiriṣṭatvāt tṛptāḥ santo 
yuṣmān bhāvayantu vardhantu 
narakatiryaktvādipatanalakṣaṇādabhāvāduttārayantu vā | 
evamyonyabhāvanaparāḥ santaḥ paraṃ śreyaḥ yathābhimatamabhyudayam 
avāpsyatha lapsyadhve | yasmāt yajñena yāgena bhāvitāḥ santo 
devāṣṭān? abhipretān kāmān bhogān yuṣmabhyaṃ dāsyante

p. 70) pratipādayiṣyanti | evaṃ taiḥ devaiḥ dattān bhogān ebhyaḥ devebhyo 
yajñavidhinā anupahṛtya yaḥ tān kāmānaśnāti, sa stenaḥ caura eva 
devadravyāpahāripratyavāyena yujyate ityarthaḥ | etadantaṃ 
prajāpativacanam, ataḥ paraṃ bhagavadvākyam || 12 ||

yajñaśiṣṭāśinaḥ santo mucyante sarvakilviṣaiḥ |
bhuñjate te tvadhaṃ pāpā ye pacantyātmakāraṇāt || 13 ||

	itthaṃ prajāpatiniyamamanatikramanto yathoktāt yajñādanuṣṭhitāt 
śiṣṭaṃ vighasasaṃjñamannamaśnanto bhuñjānāḥ sarvaiḥ 
samastairnityādiyajñānanuṣṭhānasambhavaiḥ kilviṣaiḥ pāpaiḥ mucyante 
tyajyante na te stenā bhavantītyarthaḥ | te punaḥ pāpāḥ pāpinaḥ aghaṃ 
pāpameva bhuñjate ye ātmakāraṇāt svahetornatu devādyarthaṃ pacanti 
paktiṃ sādhayanti, te tyaktaśāstrīyakriyāḥ santo nirayameva 
prāpnuvantītyarthaḥ || 13 ||
	yasmāt sarvametadakṣarasaṃjñāt parasmāt brahmaṇaḥ pravṛttam, 
tasmādanatikramaṇīyameveti kramamāha

annādbhavanti bhūtāni parjanyādannasambhavaḥ |
yajñādbhavati parjanyo yajñaḥ karmasamudbhavaḥ || 14 ||

karma brahmodbhavaṃ viddhi brahmākṣarasamudbhavam | 
tasmātsarvagataṃ brahma nityaṃ yajñe pratiṣṭhitam || 15 ||

	annāt prāṇasandhāraṇahetorodanāderabhyavahāryāt bhūtāni 
sarvaprāṇabhṛto bhavanti sattāṃ labhante | prāṇavṛttinibandhanaṃ hi 
bhūtānāṃ jīvitam, annanibandhanā ca prāṇavṛttiḥ | tadevaṃvidhasya 
annasya parjanyāt meghāt sambhavaḥ | sa ca evaṃvidhaḥ parjanyo yajñāt 
somārkāgnīndrādidevatāyajanātmakāt vidhiviśeṣāt bhavati | yajñe hi 
tarpitā devatā vrīhyādisampattaye parjanyaṃ niyuñjate | sa ca kāle 
varṣādinā brīhīn sampādayati | yathoktam

p. 71) agnau prāstāhutiḥ samyagādityamupatiṣṭhate |
ādityājjāyate vṛṣṭirvṛṣṭerannaṃ tataḥ prajāḥ || (ma0 smṛ0 3/76)

iti | īdṛśaśca yajñaḥ karmasamudbhavaḥ karmaṇo 
viśiṣṭetikartavyatārūpāt vidhānāt sambhavo yasya tathāvidhaḥ | tacca 
īdṛśaṃ karma brahmodbhavaṃ brahmaṇaḥ śāstrarūpādudbhavo yasya tat 
tathāvidham | apareṇa śabdātmakena vedādiśāstrarūpeṇa brahmaṇā 
yajñasampādanasādhakaṃ karma upadiśyate | tacca itthaṃbhūtaṃ 
śabdātmakaṃ brahma akṣarasamudbhavam na kṣarati saṃcalati, na 
svarūpāt cyavate iti akṣaraṃ paraṃ brahma paramakāraṇaṃ, 
tasmādudbhavo yasya, tat tādṛśam | parasmāddhi brahmaṇaḥ 
paramakāraṇāt svarūpamajahata eva śāstraṃ vastusthityā 
citsvarūpatāmavyabhicarat sūryādiva prakāśo 
vyapadeśamātrabhinnasvarūpaṃ prasarati, ata eva tadapi brahmaśabdena 
uktam | yata evaṃvidhā iyaṃ prakriyā pravṛttā, tataḥ paraṃ brahma 
sarvagatatvena samastavastuvyāpakatvena vyavasthitaṃ sat nityaṃ sadaiva 
yathoktasvarūpe yajñe pratiṣṭhitam yadarthameva prasṛtam, tasya arthasya 
yajñe kila pratiṣṭhā sthitiḥ || 15 ||

	yata evam, ataḥ

evaṃ pravartitaṃ cakraṃ nānuvartayatīha yaḥ |
aghāyurindriyārāmo moghaṃ pārtha sa jīvati || 16 ||

	evaṃ yathoktena prakāreṇa parabrahmasvarūpeṇa parameśvareṇaiva 
jagatkrīḍāsthitaye pravartitaṃ pravṛttilakṣaṇadharmaniṣṭhatayā 
āviṣkṛtaṃ cakraṃ śāstrādipadārthasamūhaṃ ya iha loke nānuvartayati 
svayaṃ ca yathāśāstramananuvartamāno'nyānapi janān na 
anuṣṭhāpayati, sa tādṛśaḥ parameśvarapravartitaprakriyāvyutthāpakatvāt 
aghāyuḥ pāpāyaiva āyurjīvitaṃ yasya, sa tādṛśaḥ san moghaṃ 
niṣphalaṃ jīvati tādṛśasya hi 
tattvajñānaśūnyatvādapavargalakṣaṇottamaphalābhāvādīśvaravyavast
hāpitaniyamātikramācca 

p. 72) svargādibhogalakṣaṇāvaraphalābhāvādapi niṣphalameva jīvitam || 
16 ||
	evaṃ pravṛttilakṣaṇadharmādhikṛtasya upadeśyasya saṃsāriṇaḥ 
śāstroktakarmaparihārānupapattiṃ pratipādya, idānīṃ 
nivṛttilakṣaṇadharmānuṣṭhānapratiṣṭhitabuddherapi mumukṣostāṃ 
pratipādayitumāha

yaścātmaratireva syādātmatṛptaśca mānavaḥ |
ātmanyeva ca santuṣṭastasya kāryaṃ na vidyate || 17 ||

naiva tasya kṛtenārtho nākṛteneha kaścana |
na cāsya sarvabhūteṣu kaścidarthavyapāśrayaḥ || 18 ||

tasmādasaktaḥ satataṃ kāryaṃ karma samācara |
asakto hyācarankarma paramāpnoti pūruṣaḥ || 19 ||

	iha sarvasya kasyacit jantoraprāptaṃ sukhaṃ 
prāptumicchatastatsādhanabhūte śabdādau viṣaye ratiḥ rāgo'bhilāṣo 
jāyate, tataḥ prayatna viśeṣeṇa tasmin prāpte sati tṛptiḥ sampūrṇocchatā, 
tataḥ santoṣo'bhikāṃkṣānivṛttiriti ete ratitṛptisantoṣāḥ sadā sannihite 
niruttarānandanirbhare svātmani eva pratiṣṭhitāḥ | tasya 
tadvyatiriktaprāpaṇīyavastvantaranirapekṣaṇīyasya 
aprāptasvārthasādhanabhūtaṃ kāryaṃ karaṇīyaṃ na vidyate na 
sambhavati | yataḥ sadā kṛtakṛtyatvāt tasya naiva kaścin kṛtena 
prāgakṛtatvādupādeyatayā idānīṃ nirvartitena prayojanaṃ nāpi akṛtena 
heyatvāt parihṛtena kaścin arthaḥ prayojanam | ata eva asya evaṃvidhasya 
svātmapratiṣṭhitabuddheryoginaḥ sarvabhūteṣu samasteṣu sthāvareṣu 
jaṃgameṣu ca sattveṣu madhye na kaścidarthavyapāśrayaḥ arthasya 
prāpyasya vastuno vyapāśraya ālambanam | idamatra tātparyam 
prākpratipāditasthirabuddhitvadaśāmadhirūḍhasya yoginaḥ phalalipsayā 
mamaivedamiti asādhāraṇatayā

p. 73) kāryaṃ sādhyaṃ vastu na kiñcana vidyate, 
sarvavarṇāśramasādhāraṇaṃ ca śāstracoditaṃ kāryaṃ 
tattanniyatakaraṇīyaṃ pratipāditavijñānaniṣṭhasya vidyata eva | yata evaṃ, 
tasmāt kāraṇam mumukṣuḥ san svaṃ kāryaṃ karma 
śāstravihitatvādavaśyānuṣṭheyaṃ yuddhāditavijñānaniṣṭhasya vidyata 
eva | yata evaṃ, tasmāt kāraṇāt mumukṣuḥ san svaṃ kāryaṃ karma 
śāstravihitatvādavaśyānuṣṭheyaṃ yuddhādivyāpāram asaktaḥ 
kṣaṇikasukhalavasādhanabhūteṣu viṣayeṣu animagnacitta vṛttiḥ san 
samācara samyak yathāpratipāditātmatattvapratiṣṭhitabuddhitve manāgapi 
apramattatayā ācara anutiṣṭha | yasmāt puruṣo mumukṣuḥ saṃsārāsakto 
muktasaṃgaḥ san śāstraniyaṃtritaṃ karma ācaran kurvan paraṃ 
prakṛṣṭamapavargalakṣaṇaṃ prāpyaṃ vastu āpnoti labhate, natu 
karmatyāgāt siddhiḥ kasyacidasti sarvakarmatyāgānupapatteḥ prāgeva 
pratipāditatvāt kasyacidvā karmaṇastyāge 
sarvakarmatyāgābhimānagrahāt rāgadveṣādidoṣāvirbhāvasya 
durnivāratvāt || 19 ||

	atraiva udāharaṇamāha

karmaṇaiva hi saṃsiddhimāsthitā janakādayaḥ |

	iha loke janakādayaḥ rājarṣayaḥ 
śrutismṛtītihāsapurāṇādiprasiddhāḥ karmaṇaiva 
svavarṇāśramaniyatena kriyāviśeṣeṇa prajāpālanādinā saṃsiddhiṃ 
niruttarapuruṣārthaprāptilakṣaṇaṃ phalam āsthitāḥ svīkṛtavantaḥ | 
tathāca mokṣadharmeṣu

ekasminnapyadhiṣṭhāne saṃvādaḥ śrūyatāmayam |
chatrādiṣu ca muktasya muktāyāśca tridaṃḍakaḥ ||

iti upakrānte sulabhājanakasaṃvāde janakavākyāni

sukhī so'hamavāptārthaḥ samaloṣṭāśmakāñcanaḥ |
muktasaṃgaḥ sthito rājye viśiṣṭo'nyaistridaṃḍibhiḥ ||

mokṣe hi trividhā niṣṭhā dṛṣṭā pūrvairmahātmabhiḥ |
jñānaṃ lokottaraṃ yacca sarvatyāgaśca karmaṇām ||

p. 74) jñānaniṣṭhāṃ vadantyevaṃ mokṣaśāstravidho janāḥ |
karmaniṣṭhāṃ tathaivānye munayaḥ sūkṣmadarśinaḥ ||

vāgdaṃḍo'tha manodaṃḍaḥ kāyadaṃḍastathaiva ca |
yasyaite niyatā daṃḍāḥ sa tridaṃḍīti kīrtitaḥ ||

prahāyobhayamapyetajjñānaṃ karma ca kevalam | 
tṛtīyeyaṃ samākhyātā niṣṭhā tena mahātmanā ||

iti tṛtīyā samuccayarūpetyarthaḥ, tathā anyatra

akaiñcanye na mokṣo'sti kaiñcanye nāsti bandhanam |
kaiñcanye cetare caiva janturjñānena mucyate ||
(ma0 bhā0 śā0 pa0 325 a0)

iti ||

atha tattvavido'pi anyaṃ karmāparityāgahetumāha

lokasaṃgrahamevāpi saṃpaśyankartumarhasi || 20 ||

yadyadācarati śreṣṭhastattadevetaro janaḥ |
sa yatpramāṇaṃ kurute lokastadanuvartate || 21 ||

	lokaśabdena trivargamātropadeśaviṣayabhūto jano'tra vivakṣitaḥ, 
tasya saṃgrahaḥ śāstrārthānuṣṭhātṛlakṣaṇasvapakṣasvīkāraḥ | taṃ 
vakṣyamāṇahetunā avaśyakaraṇīyatayā saṃpaśyan samyak 
budhyamānastvaṃ kartuṃ śāstravihitāni karmāṇi ācaritum arhasi | ataḥ 
śreṣṭhaḥ kulavidyāvṛttādibhirjyāyān jano yadyat kiñcit karma ācarati 
anutiṣṭhati tattadeva nānyat itaro janaḥ svayaṃ 
kāryākāryavivekaśūnyamatirloko'nutiṣṭhati | yataḥ sa śreṣṭho jano yat 
vastu pramāṇaṃ kurute svayamanuṣṭhānādupapannatvena vyavasthāpayati 
tat lokaḥ anuvartate anusarati | tasmāt paramārthajñena api 
lokasaṃgrahārthaṃ śāstracoditaṃ karma sarvathā anuṣṭheyamiti || 21 ||

p. 75) atra ātmānameva udāharaṇaṃ kurvannāha

na me pārthāsti kartavyaṃ triṣu lokeṣu kiñcana |
nānavāptamavāptavyaṃ pravarte'thaca karmaṇi || 22 ||

	he pārtha mama svārthasādhanatayā kartavyaṃ kāryaṃ na kiñcit 
asti yasmāt triṣu lokeṣu samaste jagati anavāptaṃ 
pūrvamanāsāditamidānīm avāptavyaṃ svecchāpūraṇāya labdhavyaṃ 
na kiñcidasti | alabdhalābhārthe hi sarvaḥ kaścit svakāryamārabhate, 
mama tu yathāpratipāditatattvajñānaniṣṭhāpratiṣṭhitaprajñasya na kiñcit 
prāpyamasti | ataśca tādṛśo'pi san lokavat karmaṇi śāstravihite pravarte 
satatamudyukto bhavāmi | anena

yastvātmaratireva syāt ----------------|
------------tasya kāryaṃ na vidyate | (3/17)

iti upakramya

tasmādasaktaḥ satataṃ kāryaṃ karma samācara || (3/19)

iti yat prāguktaṃ, tadekānuṣṭhātṛpuruṣaviṣayameveti niḥsaṃśayatayā 
pratipāditavān || 22 ||
	atha tattvajño'pi san bhagavān lokavat karmaṇi pravartate ityāha

yadi hyahaṃ na varteyaṃ jātu karmaṇyatandritaḥ |
mama vartmānuvarteranmanuṣyāḥ pārtha sarvaśaḥ || 23 ||

	yadi ahaṃ varṇāśramocite karmaṇi atandritaḥ asaṃjātālasyaḥ san 
kadācidapi na varteyaṃ na tiṣṭheyam | tat sarva eva manuṣyāḥ karmaṇi 
adhikṛtāḥ mānavāḥ pramāṇabhūtacaritasya mama vartma 
mārgamācāram anuvarteran anusareyuḥ || 23 ||

p. 76) kiṃca ata ityāha

utsīdeyurime lokā na kuryāṃ karma cedaham |
saṃkarasya ca kartā syāmupahanyāmimāḥ prajāḥ || 24 ||

	yadi ahaṃ lokavat śāstracoditaṃ karma na ācareyam, tadamī lokāḥ 
samastāni bhuvanāni 
saṃsāripuruṣocitatattatsvakarmaphalopabhogādhikaraṇabhūtāni utsīdeyuḥ 
utsādaṃ vināśaṃ bhajeyuḥ | karmanibandanā hi lokānāṃ sthitiḥ | kiṃca 
tathāvidhaṃ karma akurvan saṃkarasya varṇavibhāgamiśrīmāvasya kartā 
pravartako bhaveyam | sarve hi puruṣā māṃ śāstrīyaṃ karma 
akurvāṇamanuvartamānāḥ svaṃ svaṃ tattajjātivihitaṃ karma 
yatheṣṭamanyajātivihitatvādinā virodhena api ācarantaḥ 
saṃkīrṇavarṇatāmāpnuyuḥ | ato'hameva varṇasaṃkaradoṣasya kartā 
syām | kiṃca ataḥ imāḥ prajāḥ etān karmabhūmijanmanaḥ 
śāstracoditakarmādhikṛtān sarvān saṃsāriṇaḥ puruṣān upahanyām 
upaghātena vināśena yojayeyam | etā hi prajāḥ yathāvihitaṃ karma 
anācarantyaḥ svargādiprāpterapetā nisargatastattvajñānaśūnyatvāt 
kaivalyalakṣaṇāduttamāt puruṣārthāt dūrabahiṣkṛtā 
naryakatiryagbhāvaprāptilakṣaṇaṃ vināśamāpnuyuḥ | taditthaṃ 
parameśvarecchāparikalpitajagatkrīḍāniyamavyutthāpakatvaṃ mayaiva 
ācaritaṃ bhavet || 24 ||

ataḥ 

saktāḥ karmaṇyavidvāṃso yathā kurvanti bhārata |
kuryādvidvāṃstathāsaktaścikīrṣurlokasaṃgraham || 25 ||

	yathā yena prakāreṇa avidvāṃsaḥ 
yathoktātmatattvajñānaśūnyatvāt mukhyayā vidvattayā rahitāḥ 
puruṣāḥ karmaṇi kṣaṇikasukhasādhanabhūte yajñādikriyātmake 
vyāpāre saktāḥ tadeva paratvena 
manyamānāstāvanmātraparisamāptapuruṣārthāḥ santaḥ kurvanti 
vihitāni

p. 77) karmāṇi ācaranti, tathaiva tenaiva prakāreṇa 
sāmānyajanadurlakṣyasvahṛdayasaṃvedyatattvajñānaniṣṭhatvāt 
tādṛśābhiyogarūpeṇa vidvān paramārthapaṃḍitaḥ kuryāt karmāṇi 
ācaret | kīdṛśaḥ san | asaktaḥ 
niruttarānandāmṛtāsvādasatataparitṛptatvāt lokavat 
svargādibhogaviṣayena tattatkarmaphalasaṃgena rahitaḥ | kimarthamevaṃ 
kuryāditi hetugarbhaṃ viṣeṣaṇamāha cikīrṣurlokasaṃgraham lokasya 
abuddhasya jagasya saṃgrahaṃ pūrvoktaṃ cidīrṣuḥ sampipādayiṣuḥ | 
viditavedyena hi viduṣā tattvajñānopadeśayogyatāśūnyaṃ lokaṃ 
narakapātādiduḥkhādujjihīrṣuṇā tathā karma ācaraṇīyaṃ, yathā 
lokastadanuvartamānaḥ svakarmānuṣṭhānāt svargāderapi phalāt na 
vyapaiti || 25 ||
	ayogyasya tattvajñānopadeśo vināśāya eva paryavasyediti āha

na buddhibhedaṃ janayedajñānāṃ karmasaṃginām | 
joṣayetsarvakarmāṇi vidvānyuktaḥ samācaran || 26 ||

	vidvān prabuddho yuktaḥ yathoktātmajñānasahitaḥ san samyak 
yathāśāstraṃ jātyādiniyatāni karmāṇi ācarannanutiṣṭhan ajñānāṃ 
svabhāvata eva samprati 
parameśvarecchānanugṛhītatvādanāvirbhūtavivekajñānānāmata eva 
karmasu yajñādisādhanabhūteṣu bhogaiśvaryaprasaktatvādinā hetunā 
saṃgināṃ tatraiva saktānāṃ buddheḥ prajñāyā bhedaṃ tādṛśāt 
saṃgāt pracyāvanaṃ na utpādayet | te hi ajñāḥ santo yadi tattvajñāne 
karmatyāgamātreṇa vyutpādyante, tat teṣāmajñatvādeva tattvajñāne 
pratiṣṭhāmalabhamānānāṃ svargādihetośca karmasaṃgāt 
pracyuterbuddhirbhedaṃ prāptā satī ubhayabhraṃśāyaiva paryavasyet | 
atastān tathāvidhānajñān sarvāṇi karmāṇi, yeṣu hi te gṛhītāsaṃgāḥ, 
tāni joṣayet prītyā sevayet svayaṃ tadanuṣṭhānaprakhyāpanena || 26 ||

p. 78) itthaṃ parameśvarecchāniyamitajagadvyavasthāvyutthānavicchedāya 
svasmin svasmin karmaṇi lokamaprabuddhaṃ pravartayituṃ prabuddhasya api 
lokavat vihitānāṃ karmaṇāmavaśyamanuṣṭhānamupapāditam | ataśca 
prabuddhāprabuddhayostulyameva kartṛtvaṃ, tulyāni evaca karmāṇi, 
asaktatvakṛtastu phalabhedaḥ iti sthite tulye kartṛtve tulyeṣu ca karmasu 
kriyamāṇeṣu kathaṃ phalabheda iti 
anavadhāritaprabuddhāprabuddhaviśeṣasya arjunasya 
saṃśayamāśaṃkamānaḥ saṃsāriṇo yoginaśca samāne'pi hi vyāpāre 
yathā phalabhedopapattiḥ, tathā vibhajya viśeṣaṃ pratipādayitumāha

prakṛteḥ kriyamāṇāni guṇaiḥ karmāṇi bhāgaśaḥ |
ahaṃkāravimūḍhātmā kartāhamiti manyate || 27 ||

tattvavittu mahābāho guṇakarmavibhāgayoḥ |
guṇā guṇārthe vartante iti matvā na sajjate || 28 ||

	iha yat kiñcit śārīraṃ vācikaṃ mānasaṃ vā 
śāstroktamaśāstroktaṃ vā karma yena kenacit kartrā kriyate, tatra na asau 
kevalaḥ kāraṇaṃ; kintu

adhiṣṭhānaṃ tathā kartā -------------| (18/14)

ityādinā vakṣyamāṇāḥ paṃca padārthāḥ kāraṇam | te ca sarva eva 
sattvarajastamolakṣaṇaprākṛtaguṇamayā eveti vakṣyati | ataḥ prakṛteḥ 
sambandhibhiḥ guṇaiḥ kriyamāṇāni sarvāṇi karmāṇi vyavasthitāni | 
katham | bhāgaśaḥ sāttvikamadhiṣṭhānādi kāraṇaṃ sāttvikaṃ karma 
ārabhate, rajomayaṃ rājasaṃ, tamomayaṃ tāmasamiti vibhāgena | itthaṃ 
karturapi

muktasaṃgo'nahaṃvādī--------------------| (18/26)

ityādinā traiguṇyasya vakṣyamāṇatvāt guṇānāmeva kartṛtve paryavasite 
ahaṃkāreṇa śarīrādiṣu ātmapratyayena vimūḍhātmā 
aprabuddhasvabhāvaḥ

p. 79) saṃsārī aham eva kevalaḥ kartā iti 
adhiṣṭhānādikāraṇāntaranirapekṣaṃ kartṛtvaṃ śarīrādirūpe kṛtrime 
svātmani āropayati | sa ca guṇaparatantre tādṛśi ātmani 
ahaṃkāramāropayan guṇeṣu eva sakto na kadācit saṃsārabandhahetubhyo 
vimucyate | guṇavibhāgasya karmavibhāgasya ca tattvavit paramārthavedī 
yogī punaḥ guṇāḥ sattvadayaḥ guṇārthe svaprayojane 
dehendriyaviṣayādyātmake vartante tatraiva tiṣṭhanti, na ātmanaḥ sarvadā 
svatantrasuprasannasaṃvinmātrasvabhāvasya svoparāgamarpayituṃ 
prabhavanti, iti sarvadā satyātmapratiṣṭhatayā na guṇeṣu na karmasu sajjate 
ahaṃkāramamakārau teṣu na karotītyarthaḥ | atha kīdṛśo guṇānāṃ 
vibhāgaḥ, kīdṛśaśca karmaṇāṃ, kiṃca atra tattvamiti vyākhyāyate | iha 
parameśvareṇa 
acintyasvecchāvilasitasvabhāvātmakasakalajagatprapaṃcakāraṇatvena 
avabhāsitayā pāramārthikātmatattvābhedākhyātimātraśarīrayā, ata 
eva bhinnārthaviṣayajñānakriyāniyamātmakasattvādiguṇamayyā 
prakṛtyākhyayā anādyavidyāprabandhasambaddhānāmīśvarecchayaiva 
anyonyabhedena avabhāsamānānāṃ jīvānāṃ guṇaireva 
ārabdhatanukaraṇabhuvanabhogādikalāpatvāt sarvameva guṇādhīnamiti 
prāyeṇa guṇā eva teṣāṃ kartāraḥ iti ayaṃ kṣetrajñaviṣayatvena 
guṇavibhāgaḥ | tathāvidhāśca te jīvā yāni karmāṇi ārabhante te teṣu 
viṣayasukhatṛṣṇāturatayā sajjanti tadbādhakabhūteṣu anyeṣu dveṣeṇa 
parābhavantīti etāvanmātraniyatacittavṛttitvāt vimūḍhā bhavanti, iti 
tadviṣayatvena sarvakarmāṇi rāgadveṣamohātmakatvāt 
saṃsārabandhakāraṇatayā paryavasyantīti ayaṃ teṣāṃ karmavibhāgaḥ | 
satyātmatattvapratiṣṭhitabuddhīnāṃ tu yogināmanyathā guṇānāṃ 
karmaṇāṃ ca vibhāgaḥ | tathāhi te guṇāḥ sattvādayo guṇānāmeva 
arthe prayojane

p. 80) saṃsāriviṣayatvena jagatprapañcaviracanārūpeṇa vartante, na 
asmādviṣayatvena, eṣāṃ 
sarvadānastamitasaṃvitprakāśamātravyatiriktaṃ kiñcit rūpāntaraṃ na 
bhavatīti manvānā nityaniratiśayanijānandanavasudhāsvādanaikaniratāḥ 
kathaṃ teṣu rāgādiviṣamaviṣarasamayeṣu sajjantīti yogiviṣayatvena guṇā 
na guṇatvena sphurantītyayaṃ yogiviṣayo guṇavibhāgaḥ | evaṃvidhāśca 
ete yāni karmāṇi ārabhante, tāni kriyamāṇānyeva 
yathoktajñānāgnidagdhatvāt na saṃsārakāraṇatāmāpādayitumeṣāṃ 
prabhavanti, ityayaṃ yogiviṣayaḥ karmavibhāgaḥ | tādṛśo yogī 
guṇātītaḥ ucyate | udvakṣyati

na dveṣṭi saṃpravṛttāni na nivṛttāni kāṃkṣati | 
udāsīnavadāsīno guṇātītaḥ sa ucyate || (14/25)

iti | tattvamapi etayorguṇakarmavibhāgayoretadvyākhyānenaiva 
vyākhyātam || 28 ||
	evaṃ prabuddhāprabuddhayostulyeṣu karmasu kriyamāṇeṣu 
mokṣasaṃsārabandhalakṣaṇaṃ phalabhedamupapādya, idānīṃ 
prabuddhasya 
yathāpratipāditajñānakarmasamuccayānuṣṭhānapariniścitabuddherlokavi.
sayamātmaviṣayaṃ ca vyavahāraṃ niyamayitumāha

prakṛterguṇasammūḍhāḥ sajjante guṇakarmasu |
tānakṛtsnavido mandān kṛtsnavinna vicālayet || 29 ||

	prakṛteḥ uktalakṣaṇāyāḥ sambandhibhirguṇaiḥ 
sattvādibhiranādisambandhaparicitatvāt vāsanārūpatayā 
śarīrādyārambhakatayā ca vyatiriktatvena avasthitaiḥ 
sammūḍhāstādṛśaguṇamayā eva śarīrādāvātmapratyayalakṣaṇaṃ 
saṃmohamāpannāḥ saṃsāriṇo guṇamayeṣu eva karmasu 
svargimartyabhāvatiryaktvādiphalahetuṣusajjantevivekajajñānābhāvāt 
tānyeva paratvena manyamānāsteṣu nimajjanti | ataḥ tānkṛtsnavidaḥ

p. 81) guṇaparispandaparimitīkṛtajñānatvāt sarvaṃ heyopādeyarūpaṃ 
jñeyajātamajānānān, ata eva mandān alpadhiyaḥ kṛtsnavit 
samastajñeyatattvavedī na vicālayet yatraiva guṇātmake karmaṇi phale ca 
āsaktāḥ, tato na pracyāvayet teṣāṃ buddhidvaidhaparihārāya sarvaṃ 
vihitaṃ karma anutiṣṭhediti || 29 ||
	lokasaṃgrahāpekṣayā anuṣṭhīyamānamapi karma yogino yathā 
kaivalyāya paryavasyati, tathā tasya praguktamapi jñānaniṣṭhatvena 
karmānuṣṭhānamarjunamukhena niścinvannāha

mayi sarvāṇi karmāṇi sannyasyādhyātmacetasā |
nirāśīrnirmamo bhūtvā yudhyasva vigatajvaraḥ || 30 ||

	sarvāṇi śāstravihitāni yajñadānatapaḥprabhṛtīni karmāṇi 
adhyātmacetasā yathāpratipāditasvarūpātmaniṣṭhena manasā mayi 
paramakāraṇe paramagurau saṃnyasya samyak samarpya eka eva 
parameśvaraḥ prathamameva pratipāditasvarūpaḥ sarvaprāṇibhiḥ 
kriyamāṇānāṃ sarvakarmaṇāṃ kartā svecchāmātreṇa 
svaśaktivibhavarūpāṇāṃ nirmātā | na tadvyatirekeṇa kvacidapi 
kartṛtvaṃ pāramārthikamasti, guṇaparatantratayā tu dehādau tadabhimāno 
māyāvilasitamevetyanayā bhāvanayā saṃnyāsavidhiṃ sampādya, ata eva 
āśaṃsanīyavastuvirahāt nirāśīḥ āśīrbhyaḥ prārthanābhyo 
niṣkrāntaḥ, ata eva sarvabhāveṣu parigrahābhāvāt nirmamaḥ mamedamiti 
saṃsāripuruṣocitāyāḥ pratipatteḥ niṣkrānto bhūtvā vigatajvaraḥ 
yathoktavijñānāmṛtāvahāhanāt nivṛttasandehādisamastasantāpaḥ san 
yudhyasva samarātmakamavasaropanatamavaśyakāryaṃ svakarma 
anutiṣṭheti || 30 ||
	etāvatā granthena prāyaḥ parisamāpto'yaṃ 
jñānakarmasamuccayānuṣṭhānātmaka upadeśasāro yataḥ prathame 
tāvat prastāvanā asya pratipāditā,

p. 82) dvitīye vijñānasvarūpaṃ parighaṭitam, tṛtīye tatsaṃskṛtasya 
karmaṇo'vaśyānuṣṭheyateti manyamāno bhagavānasya paramarahasya 
bhūtasya svamatasya prabhāvapratipādanārthaṃ bodhābodhayoḥ 
phalamāha

ye me matamidaṃ nityamanuvartanti mānavāḥ |
śraddhāvanto'nasūyanto mucyante sarvakilviṣaiḥ || 31 ||

ye tvetadabhyasūyanto nānuvartanti me matam |
sarvajñānavimūḍhāṃstānviddhi naṣṭānacetasaḥ || 32 ||

	itthaṃ mayā upanyastaṃ mataṃ madīyaṃ 
sarvaśāstrasarvasvabhūtamabhiprāyaṃ nityaṃ sarvakālaṃ ye mānavāḥ 
śāstrādhikṛtā manuṣyā anuvartanti samyagavagamya anutiṣṭhanti te 
sarvakilviṣaiḥ 
avidyāprabhavarāgadveṣādikleśamūlairghorasaṃsāraduḥkhadāyibhiḥ 
kukarmācaraṇajanitaiḥ kilviṣaiḥ pāpaiḥ mucyante na punarvadhyante | 
kīdṛśāḥ santaḥ | śraddhāvantaḥ 
yathāpratipāditamanmataprarūḍhanirvikalpapratipattijanitayathoktaphalasamb
hāvanātmikayā śraddhayā yuktāḥ, ata eva 
etanmataviṣayāmasūyāmatattvajñajanocitāmakurvantaḥ | ye punaḥ etat 
evaṃvidhaṃ manmatamabhyasūyanto mohatimiratiraskṛtasamyagjñānatvāt 
doṣādhiropaṇādinā vigarhanto nānuvartanti na anucaranti, tān sarveṣu 
samasteṣu heyopādeyaniścayaviṣayeṣu jñāneṣu śāstrarūpeṣu 
vimūḍhān viparyayapratyayān viśeṣeṇa mūḍhān vicittān vinaṣṭān 
viddhi bhogāpavargalakṣaṇādubhayato'pi phalāt, pracyutān sato 
durgatiprāptilakṣaṇaṃ vināśaṃ prāptān jānīhi yatasteṣāṃ 
ceto'ntaḥkaraṇasamyagdarśitvāt sadapi nāstyeva || 32 ||
	idānīmuktameva arthaṃ sudṛḍhapratipattaye vineyopakārāya 
uktibhedairnānārūpaiḥ pratipādayan karmaṇāṃ tyāgānupapattimeva 
draḍhayitumāha

p. 83) sadṛśaṃ ceṣṭate svasyāḥ prakṛterjñānavānapi | 
prakṛtiṃ yānti bhūtāni nigrahaḥ kiṃ kariṣyati || 33 ||

	iha sarvaḥ kaścit dehavānanādiprabandhapravṛttayā prakṛtyā 
sambaddhaḥ | yataḥ sarvasya śarīrendriyaviṣayādikaṃ sarvameva triguṇam, 
ato jñānavānapi āvirbhūtadehadehivivekaprajño'pi puruṣaḥ svasyāḥ 
tena tena prakāreṇa śarīrādyārambhakatayā 
pariṇatatvādātmīyatvamāpannāyāḥ prakṛteḥ īśvarecchayā 
jagatkāraṇabhāvena udbhāvitāyā guṇatrayātmikāyā avidyāyāḥ 
sadṛśam anurūpaṃ ceṣṭate vyavaharati | kimanena uktaṃ bhavati | 
dṛṣṭatattvo'pi prakṛtyārabdhaśarīrāditvāt manovākkāyairyat kiṃcit 
karma ācarati, tat triguṇameva upapadyate | tathāvidhaṃ ca tatkarma 
jñānavatā api aśakyaparihāramiti prāgapi pratipāditam | itthaṃ 
sarvabhūtāni prakṛtiṃ svasvabhāvaṃ yānti sarvathā tāmeva āśrayante, 
natu tadvyatiriktatvena śvasituṃ, spandituṃ vāpi utsahante | tato nigrahaḥ 
nedaṃ svajātivihitaṃ karma ahaṃ kariṣyāmīti niyamaḥ kiṃ kariṣyati iti 
prākpratipāditaprakāreṇa sarvakarmapratiṣedhasya aśakyatvādakiṃcitkara 
eva bhaviṣyati, yadivā nigraho'pi karmaiva, ataśca 
hānopādānanibandhanatvāt rāgadveṣānuviddhaṃ sat guṇātmakatvāt 
prākṛtameva sampadyate, ityevamapi akiñcitkaro nigrahaḥ || 33 ||

itthamaparihārye karmaṇi jñānavān mumukṣuḥ kiṃ kuryādityāha

indriyasyendriyasyārthe rāgadveṣau vyavasthitau |
tayorna vaśamāgacchettau hyasya paripanthinau || 34 ||

	yo yasya indriyasya artho viṣayaḥ śrotrādeḥ śabdādiḥ, tatra tatra 
arthe rāgadveṣau vyavasthitau | yadāhi śabdādiviṣayaṃ sukhasādhanatvena 
śrotrādinā indriyeṇa pumānupādatte, tadā tasya tasmin

p. 84) rāgo vyavatiṣṭhate; yadā tu duḥkhakāraṇatvena tameva viṣayaṃ 
heyatvena pratipadyate, tadā tasmin indriyeṇa parihriyamāṇe dveṣo'sya 
vyavatiṣṭhate iti sarvasmin viṣaye rāgadveṣau vyavasthitau | 
jñānavānāvirbhūtavivekajñānaḥ tayorvaśaṃ vidheyatāmajñavat na 
āgacchet yataḥ asya jñānavataḥ tau rāgadveṣau paripanthinau virodhinau 
śatrū | tatastāveva sarvatyāgena parihāryau, natu viṣayāḥ | nahi 
tayoraparijitayorviṣayaparājayaḥ kṛto bhavati | tau hi yathoktajñānāsinā 
yāvat na kṣatavikṣatatvamāpāditau, tāvat parivarjite'pi 
viṣaye'ntarvijṛmbhamāṇau puruṣaṃ vaśīkartuṃ prabhavata eva || 34 ||
	tadevaṃguṇopapattivaśāt sarvasmin karmaṇi prabuddhasya 
aprabuddhasya vā sarvasya kasyacidaśakyapratiṣedhe sthite 
svakarmānuṣṭhānalakṣaṇo dharmaḥ prabuddhena api ācaraṇīyaḥ ityāha

śreyānsvadharmo viguṇaḥ paradharmātsvanuṣṭhitāt |
svadharme nidhanaṃ śreyaḥ paradharmodayādapi || 35 ||

	yo yasya varṇāśramanaiyatyena śāstravihito dharmaḥ sadācāraḥ 
svatvena vyavasthitaḥ, sa kutaścit kāraṇāt mukhyena kalpena 
anuṣṭhīyamānatvāt viguṇaḥ api svairguṇairvirahito'pi san svanuṣṭhitāt 
suṣṭhu sampūrṇasaṃvidhānatayā anuṣṭhitādācaritāt paradharmāt 
vijātīyasamācārāt śreyān praśasyataraḥ 
śāstravihitātikramavihitānanuṣṭhānajapratyavāyadoṣasya abhāvāt | yata 
evaṃ svadharme'nuṣṭhīyamāne pāralaukikaśubhaphalāptiḥ, atastasmin 
svadharme sati nidhanaṃ maraṇamapi yat, tat śreyaḥ praśasyataraṃ tat syāt 
parasambandhino dharmāt svanuṣṭhitāt sataḥ ya udayo 
rājyalābhādistasmādapi tasya lokāntare viruddhaphalahetutvāt || 35 ||

p. 85) evamātmajñānaniṣṭhatayā 
śāstracoditasvakarmānuṣṭhānamapavargalakṣaṇasiddhiheturiti 
bhagavatpratipāditasakalaprakaraṇasiddhāntaṃ śrutvā 
pratipāditasvarūpasya ātmanaḥ pāratantryamevaṃvidhamanupapannaṃ 
manyamāno'rjuna uvāca

atha kena prayokto'yaṃ pāpaṃ carati pūruṣaḥ |
anicchamāno'pi balādākramyeva niyojitaḥ || 36 ||

	atha evaṃ bhagavatā pratipāditalakṣaṇaḥ ayam ātmā kena 
svāminā iva bhṛtyaḥ prayuktaḥ preritaḥ san kukarmarūpaṃ pāpaṃ 
durgatiphalaṃ kilviṣamanicchannanabhilaṣyannapi balādākramya 
haṭhādiṣṭaviṣayapravṛttiṃ nivārya niyojitaḥ vyāpārita iva ācarati 
anutiṣṭhati || 36 ||

atra uttaraṃ bhagavānuvāca

kāma eṣa krodha eṣa rajoguṇasamudbhavaḥ |
mahāśano mahāpāpmā viddhayenamiha vairiṇam || 37 ||

	yena prayukto'yamuktasvarūpānādyavidyādikleśapāśaparavaśaḥ 
puruṣaḥ *?pamācarati, sa eṣa kāmaḥ 
pariṇāmavirasakṣaṇikasukhalavasā*?nabhūtaviṣayonmukhaḥ saṃkalpaḥ, 
eṣa eva cetanācetanarūpapratipakṣa*?tihanyamānatvāt krodhaḥ 
tadupaghātapravṛttiheturdveṣaḥ sampadyate | to?'yamicchādveṣātmako 
doṣo rajoguṇasamudbhavaḥ rajoguṇāt 
viṣayasukhābhilāṣātmakarāgadveṣahetoḥ prakṛtidharmāt samudbhavati, 
ata eva mahāśanaḥ uttarottaravivardhamānagarvatvāt 
mahadaparyavasitamaśanaṃ viṣayaharaṇalakṣaṇo'bhyavahāro yasya sa 
tathā; tataśca sarvasya tasya bhogasya duḥkhaikavipākatvāt mahāpāpmā 
gurutarapākamayo durgatihetutvāt | tadevaṃvidham iha saṃsāre vairiṇaṃ

p. 86) duruttaradāruṇaduḥkhadāyitvādātatāyinaṃ viddhi jānīhi | tena 
prayukto'yaṃ puruṣaḥ pāpamācarati || 37 ||
	atha tasya vaitatyena svarūpaṃ jijñāsurarjuna uvāca

bhavatyeṣa kathaṃ kṛṣṇa kathaṃcaiva vivardhate |
kimātmakaḥ kimācārastanmamācakṣva pṛcchataḥ || 38 ||

	eṣa vairitvena pratipāditaḥ kāmādyātmako doṣaḥ kathaṃ bhavati 
kena prakāreṇa sthitilakṣaṇāṃ sattāmanubhavati, kena prakāreṇa 
vivardhate prasarati | kaśca asya ātmā svarūpaṃ, kaśca asya ācāraḥ 
kimācaratīti | tat sarvaṃ mama saṃśayaṃ pṛcchataḥ brūhi || 38 ||

atra praśnacatuṣṭaye krameṇa uttaraṃ bhagavānuvāca

eṣa sūkṣmaḥ paraḥ śatrurdehināmindriyaiḥ saha | 
sukhatantra ivāsīno mohayanpārtha tiṣṭhati || 39 ||

kāmakrodhamayo ghoraḥ stambhaharṣasamudbhavaḥ |
ahaṃkāro'bhimānātmā dustaraḥ pāpakarmabhiḥ || 40 ||

harṣamasya nivartyaiṣa śokamasya dadāti ca |
bhayaṃ cāsya karotyeṣa mohayaṃstu muhurmuhuḥ || 41 ||

	eṣa rajoguṇaprabhavaḥ kāmakrodharūpatayā prasṛto doṣaḥ 
śarīriṇāmatipratyāsannatve'pi durlakṣyatvāt paraḥ sūkṣmaḥ śaṃtruḥ | 
sa ca ahaṃkāra eva paryavasyati | yataḥ

indriyāṇi parāṇyāhuḥ-------------| (3/47)

ityādinā tasyaiva paramasūkṣmatvaṃ pratipādayiṣyati | kimātmaka iti 
praśne kimātmakatvameva asya adhunaiva abhidhatte | sa ca evaṃvidhaḥ 
śatruḥ parivārabhūtaiḥ indriyaiḥ sahitaḥ 
kāmakrodhādiniṣṇātaśastraprahāribhiḥ | taireva ayaṃ sarvaprāṇino 
viśasati | tasya durjayatvapratipādanārthaṃ 
sarvaśatruvilakṣaṇamavasthānamāha sarvaduḥkhahetutve

p. 87) sati sukhatantre sukhātmake varge ivāsīnaḥ upaviṣṭo'ta eva mohayan 
tiṣṭhati dehādyātmapratyayalakṣaṇaṃ viparyayajñānamāropayan 
sthitimanubhavatīti bhavatyeṣa katham ityasya praśnottarametat vyākhyātam, 
atha kathaṃ vivardhate ityasya vyākhyāyate kāmakrodhamayaḥ 
kāmakrodhāvuktarūpau prakṛtiryasya, sa tathāvidhaḥ | stambhasya garvasya, 
tathā harṣasya viṣādapariṇāmasya pramodasya samudbhava utpattisthānam; 
ata eva ghoraḥ dāruṇa eva kāmakrodhastambhaharṣādidoṣātmanā 
vivardhate ucchrāyaṃ bhajatīti uktaṃ bhavati | atha kimātmakaḥ iti 
praśnottaraṃ vyākhyāyate eṣa sarvadehināṃ śatrurahaṃkārasaṃjñaḥ 
abhimānātmā abhimāno jātyādyavacchedabhāji 
guṇatrayamayatvādanityatvādidoṣaikasamāśraye śarīrādāvahaṃ 
brāhmaṇo'haṃ devadatto'hamabhijanavānahaṃ vapuṣmānahaṃ 
vidagdho'hamāḍhyaḥ ityevamādi anātmanyātmapratipattinibandhanaṃ 
mithyājñānaṃ sa ātmā svabhāvo yasya, tādṛśaḥ | ata eva 
pāpakarmabhirdustaraḥ samyagjñānābhāvāt 
heyopādeyavivekaśūnyatve sati pāpamaghamayaṃ ghoraṃ 
saṃsāranirayanipātanimittabhūtaṃ karma ceṣṭitaṃ yeṣāṃ, 
tādṛśairāsuraṃ sargaṃ bhajadbhiḥ puruṣairduratikramaḥ | atha 
kimācāraḥ ityatra uttaraṃ vyākhyāyate asya kṣetrajñasya eṣaḥ 
ahaṃkārākhyaḥ śatruḥ harṣaṃ satyātmasaṃvidupalabhyamānānandaṃ 
nivartya apasārya śokaṃ śocanaṃ dadāti samarpayati | anena hi śatruṇā 
vyāmohitaḥ śarīrādi ātmatvena pratipannaṃ 
vyādhipriyaviprayogādyupadravopahanyamānamanuśocati kaṣṭaṃ 
vinaṣṭosmi, iti paridevate | ata eva asya eṣa śatruḥ bhayamapi karoti 
iṣṭaviṣayopaghātahetubhyaḥ santrāsamutpādayati | kiṃ 
kurvannevamācarati | pratikṣaṇaṃ mohayan 
yathāpratipāditaviparyayalakṣaṇaṃ vaicittyamāvahanniti | anena 
ahaṃkārākhyena

p. 88) śatruṇā indriyaparivāreṇa sukhivadvyavasthitena 
kāmakrodhastambhaharṣādidoṣātmanā vivardhamānena 
harṣāpahārādikamācaratā prayuktaḥ san kṣetrajñaḥ pāpamācarati || 41 
||
	arjunapraśnaṃ vinirṇīya tasyaiva ahaṃkārasya vitatya svarūpaṃ 
pratipādayitumāha

sa eṣa kaluṣaḥ kṣudraśchidraprekṣī dhanañjaya |
rajaḥpravṛtto mohātmā manuṣyāṇāmupadravaḥ || 42 ||

	sa eṣa yathāpratipāditasvarūpo'haṃkāraḥ samastamartyānām 
upadravaḥ sarvadoṣanidhānasaṃsārahetutvāt yataḥ kaluṣaḥ 
guṇatrayātmakatvāt nityamalinaḥ, tata evaca anityatvāt kṣudraḥ 
bhaṃgurastathā cchidraprekṣī bādhāvakāśajāgarūkaḥ | śiṣṭaṃ 
spaṣṭārtham || 42 ||

	tena asya kṣetrajñasya kiṃ kṛtamityāha

dhūmenāvriyate vahniryathādarśo malena ca |
yatholvenāvṛto garbhastathānenāyamāvṛtaḥ || 43 ||

	etena ahaṃkāreṇa ayaṃ saṃsāripuruṣāṇāmātmā tathāvṛto 
niruddhaśaktitvamāpāditaḥ | upamānena etat prakaṭayati | kathamāvṛtaḥ | 
yathā ārdrendhanatvādidoṣajanmanā kalaṃkena dhūmākhyena vahniḥ 
agniḥ āvriyate niruddhabhāsvaraśaktiḥ sampādyate, tathaiva ayamātmā 
māyāprabhaveṇa anenaiva ahaṃkārātmanā doṣeṇa 
niruddhasvasvarūpapratyavamarśātmakasvaśaktiḥ kriyate | tathā yathā 
ādarśo darpaṇo rajoniḥśvāsādisambandhajanmanā malena āvriyate 
niruddhayathāvasthitabhāvasphuraṇalakṣaṇasvaśaktiḥ kriyate | tathā yathā 
ādarśo darpaṇo rajoniḥśvāsādisambandhajanmanā malena āvriyate 
niruddhayathāvasthtiabhāvasphuraṇalakṣaṇasvaśaktiḥ kriyate, tathaiva 
ayamātmā anena āvriyate 
niruddhajagatpadārthaparamārthaprathanasāmarthyaḥ kriyate | yathā 
garbhaḥ jananīkoṣṭhavartī jīvaḥ ulvena garbhaśayyayā āvriyate

p. 89) niruddhasarvendriyaparispandanaśaktiḥ kriyate, tathaiva ayamātmā 
anena niruddhasarvakartṛtvalakṣaṇasvaśaktiḥ kriyate iti | anena 
upamānatrayeṇa ahaṃkārasya ātmānaṃ prati 
svabhāvasarvajñatvasarvakartṛtvalakṣaṇasvadharmatrayanirodhakatvaṃ 
pratipāditam || 43 ||
	yadyapi sarvaśaktinirodhako'yamātmano'haṃkārākhyo 
doṣastathāpi jñānasya prādhānyavivakṣayā idamāha

āvṛtaṃ jñānametena jñānino nityavairiṇā | 
kāmarūpeṇa kaunteya duṣpūreṇānalena ca || 44 ||

	etena yathāpratipāditena dehādyātmapratyayalakṣaṇena śatruṇā 
jñāninaḥ svātmasaṃvedanalakṣaṇamukhyajñānavataścetanasya 
tādṛśaṃ mukhyaṃ jñānamāvṛtaṃ niruddhaṃ yataḥ kāmo 
bāhyārthanibandhano'bhilāṣo rūpaṃ yasya, ata eva asau duṣpūro na 
kenacit viṣayeṇa prāptena satā pūrayituṃ śakyaḥ | yato'sya 
āhriyamāṇā viṣayā rāgaṃ vivardhayanta indriyāṇāṃ ca 
uttarottaraviśiṣṭataraviṣayarasajñatāṃ puṣṇantastebhyo 
viratimāpādayanti | ata eva analaḥ na asya alaṃbhāvo viṣayebhyo 
nivāraṇamastīti | evaṃvidhena anena svabhāvasaṃvedanalakṣaṇaṃ 
mukhyaṃ jñānamāvṛtaṃ, tasmiṃśca āvṛte sarvāḥ śaktayo'sya 
āvṛtā iti tātparyam || 44 ||

atha kimadhiṣṭhāya ayaṃ jñānamasya āvṛṇotītyāha

indriyāṇi mano buddhirasyādhiṣṭhānamucyate |
etairvimohayatyeṣa jñānamāvṛtya dehinam || 45 ||

	asya ahaṃkārasya 
pratipāditasvarūpasthitivivṛddhiviceṣṭitalakṣaṇacatuṣṭayasya indriyāṇi 
cakṣurādivāgādīni tathā manaḥ saṃkalpātmakaṃ buddhiḥ 
adhyavasāyātmikā adhiṣṭhānam | eteṣu hi kṛtasthitirayaṃ yathoktaṃ 
jñānamāvṛtya dehinaṃ kṣetrajñaṃ mohayati

p. 90) svarūpānabhijñatvakiñcijjñatvakiñcitkartṛtvakāriṇā mohena 
ajñānena yunaktiḥ || 45 ||

	tadayamevaṃvidhaḥ śatruḥ kathaṃ tiraskāryaḥ ityāha

tasmāttvamindriyāṇyādau niyamya bharatarṣabha |
pāpmānaṃ prajahīhyenaṃ jñānavijñānanāśinam || 46 ||

	yata evaṃvidho'sau, tato'sya adhiṣṭhānabhūtāni 
manobuddhisahitāni buddhīndriyakarmendriyāṇi sarvāṇyeva prathamaṃ 
niyamya yathoktasatyātmasvarūpapratiṣṭhātmapratyayatayā 
rāgadveṣādidoṣonmeṣaniṣedhena nigṛhya enaṃ pāpmānam 
ajñānamayaṃ mahākilviṣavapuṣam, ata eva jñānasya śāstrādidvāreṇa 
paramārthabodhasya tathā vijñānasya svātmasākṣātkāralakṣaṇasya 
viśiṣṭasya jñānasya nāśinaṃ tiraskāriṇaṃ paramaṃ vairiṇaṃ 
prajahīhi tiraskuru || 46 ||
	eṣa ca paramasūkṣmatvāt pareṇa udyogena apramādādinā ca 
parājayyaḥ śatruriti asya tāṃ sūkṣmatāṃ pratipādayitumāha

indriyāṇi parāṇyāhurindriyebhyaḥ paraṃ manaḥ |
manasastu parā buddhiryo buddheḥ paratastu saḥ || 47 ||

	viṣayāḥ śabdādayastāvadindriyadvāreṇa sarvasya 
kasyacidupalabhyatāmupagacchanti, atastadapekṣayā indriyāṇi parāṇi 
tebhyaḥ sūkṣmāṇi āhuḥ kathayanti tattvavidaḥ | nahi indriyāṇi 
śabdādivadupalabhyāni sākṣāt kasyacit | tebhyastathāvidhebhyaḥ 
sūkṣmebhyaḥ indribhyo manaḥ tatpravṛttinivṛttikāraṇaṃ sūkṣmataram | 
yathā indriyāṇi kathaṃcit gamyante, na tathā aticaṃcalaṃ manaḥ | 
athāvidhāt ca manaso buddhiḥ parā sūkṣmetyarthaḥ | yathāhi manaḥ 
kathaṃcit gamyate, na tathā 
nirvikalpakapratyakṣakṣaṇavartyadhyavasāyātmikā buddhiḥ | tasyāśca 
evaṃvidhāyā buddheryaḥ parataḥ paramasūkṣmatvena sthitaḥ,

p. 91) saḥ pūrvokto'haṃkārākhyaḥ śatruḥ | yathāhi buddhiḥ 
kathaṃcidabhiyuktairgamyate, na tathā ayamavidyāprathamāṃkuraḥ 
kenacidanunmiṣitaparameśvarānugrahaprabhavajñānacakṣuṣā 
lakṣyīkartumapi śakyate ||

	tasmāt

evaṃ buddheḥ paraṃ buddhā saṃstabhyātmānamātmanā | 
jahi śatruṃ mahābāho kāmarūpaṃ durāsadam || 48 ||

	evaṃ yathoktaprakāreṇa buddheḥ param enaṃ śatruṃ buddhvā 
sudurlakṣyatvāt paramadurjayaṃ matvā ata eva ātmanaiva ātmānaṃ 
saṃstabhya dhairyaṃ lambayitvā durāsadaṃ duḥkhena āsādayituṃ 
paribhavituṃ śakyamenaṃ jahi ghātaya | kīdṛśam | kāmarūpaṃ kāmo 
viṣayeṣu abhilāṣo rūpaṃ yasya, sa tathāvidhaḥ | pūrvaṃ hi 
kāmakrodhādyātmanā asya avasthitiruktā | tena yadyapi ayaṃ 
susūkṣmatvāt durjayaḥ, tathāpi asya pūrvoktena prakāreṇa 
kāmātmikāmavasthitiṃ nighnan tadvihanane samartho 
bhaviṣyasyevetyarthaḥ | evaṃ bhagavatā kṣatriyocitenaiva prakāreṇa 
arjunaḥ prastutopadeśaphalaprāptipratidvandvino'haṃkārasya nivarhaṇe 
samutsāhitaḥ | tvayā hi mahendreṇa api durjayā vahavaḥ śatravaḥ 
sahāyanirapekṣeṇa bahuśo nipātitāḥ, tadenamapi śatrumātmaikasahāyo 
nipātayitumarhasīti om || 48 ||

vijñānatattvatapanīyaguṇaprakarṣa-
prakhyāpanaikanikaṣo nijakarmayogaḥ |
asminnṛṇāṃ prakaṭitaḥ paramārthasiddhyai
so'dhyāya eṣa vivṛto vidhivattṛtīyaḥ ||

iti śrīmadrājānakarāmakaṇṭhaviracite sarvatobhadranāmni 
vākyārthānvayamātre gītāvivaraṇe tṛtīyo'dhyāyaḥ || 3 ||



atha caturtho'dhyāyaḥ |

	evamasya samastādhyātmaśāstrasarvasvabhūtārthagarbhasya 
prakaraṇasya jñānakarmasamuccayalakṣaṇamabhidheyaṃ 
paramātmasamāpattilakṣaṇaṃ ca prayojanaṃ pratipādya idānīṃ 
sambandhaviṣayayoḥ pratipādanadvāreṇa arjunasya ātmani 
puruṣatvamātrapratipattivyāmohanivṛttaye paramakāraṇatāmāviṣkurvan 
bhagavānuvāca

evaṃ vivasvate yogaṃ proktavānahamavyayam |
vivasvānmanave prāha manurikṣvākave'bravīt || 1 ||

evaṃ paramparākhyātamimaṃ rājarṣayo viduḥ |
sa kālenaiva mahatā yogo naṣṭaḥ parantapaḥ || 2 ||

sa evāyaṃ mayā te'dya yogaḥ proktaḥ purātanaḥ |
bhakto'si me sakhā ceti rahasyaṃ hyetaduttamam || 3 ||

	evam anena prakāreṇaiva yathā tubhyaṃ prokto yo yogastathaiva 
vivasvate mahāyogīśvarāya savitre yogam enam ahaṃ parameśvara eva 
kasmiṃścit kāle 
nijayogaiśvaryaparikalpitaniratiśayaprabhāvamayavigrahaḥ proktavān 
upadiṣṭavān | kīdṛśaṃ yogam | avyayaṃ paramakāraṇavat na kadācit 
vyeti kṣīyate yaḥ | sa hi jagatsargādilakṣaṇaṃ karma anutiṣṭhannapi 
parameśvaraḥ 
prākpratipāditādvayacinmātraikalakṣaṇasvabhāvavimarśaikaniṣṭhatayā 
jñānakarmasamuccayānuṣṭhānātmakasya asya yogasya 
prathamo'nuṣṭhātā, iti tadvat yogasya prādhānyena sambandhamuktvā 
krameṇa anuṣṭhānasampradāyatayā tameva sambandhaṃ vivṛṇoti 
vivasvānmanave prāha iti sa vivasvān putrāya manusaṃjñāya ādirājāya 
prāha provāca | prāheti liṭaśchāndasa āhādeśaḥ | so'pi 
manurikṣvākusaṃjñāya putrāyaiva avravīt | evaṃ

p. 93) parameśvarādeva prabhṛti paramparayā 
yogyaputrādiśiṣyarūpaprabandhapravṛttyā khyātaṃ loke prathitaṃ 
santamanye janakaprabhṛtayo rājarṣayo rājyalakṣaṇaṃ karma kurvāṇā api 
yathoktajñānaniṣṭhatvādṛṣayo munayaḥ imaṃ yathoktaṃ viduḥ 
vidāṃcakruriti asminnarthe cchāndasaḥ prayogaḥ | mahatā kālena 
yugasahasrādisaṃkhyena lokasya 
kramāpacīyamānaprajñādisarvaguṇatvāt yogyapratipattrabhāvāt naṣṭaḥ 
antardhānamāgataḥ paramakāraṇe eva vyavasthitaḥ ityarthaḥ | sa eva 
abhraṣṭasvarūpaḥ adya asmin kāle mayā parameśvareṇaiva 
jagadupakārāya yādavakulāvatīrṇena te tubhyaṃ purātano nityo yogaḥ 
proktaḥ yato mama bhakto'si śuśrūṣustvaṃ tathā sakhā suhṛt | ato 
bhaktisauhārdalakṣaṇamukhyaśiṣyaguṇasampannāya mayā 
tubhyapadiṣṭam | yata uttamaṃ sarvarahasyānāṃ prakṛṣṭametadrahasyam || 
3 ||
	evamanena asya śāstrasya sambandhaviṣayāvapi pratipāditau | 
niruttaravijñānamayadivyacakṣurdānena 
purastātpratyakṣīkariṣyamāṇapāramārthikasvarūpasya arjunasya 
svātmani yadukulodbhūtamanuṣyamātrapratipattinirākaraṇadvāreṇa 
bhagavatā pāramaiśvaryamātmanaḥ kathayituṃ ca prastutam | ata eva 
saṃjātasaṃśayo'rjuna uvāca

aparaṃ bhavato janma paraṃ janma vivasvataḥ |
kathametadvijānīyāṃ tvamādau proktavāniti || 4 ||

	bhavataḥ tava asmin kalidvāparasandhau sambhūtatvāt aparam 
apakṛṣṭaṃ janma utpattiḥ vivasvataḥ āsargāt vyavasthitasya paraṃ 
prakṛṣṭamitthaṃ kathametat budhyeya tvamaidaṃyugīnajanmā 
sucirātītakālajanmane'pi asmai sūryāya enaṃ yogaṃ proktavāniti || 4 ||

p. 94) atra bhagavānuttaramuvāca

bahūni me vyatītāni janmāni tava cārjuna |
tānyahaṃ veda sarvāṇi na tvaṃ vettha parantapa || 5 ||

	satyaṃ mama tava ca aparisaṃkhyeyāni janmāni 
tattaccharīraparigraheṇa vyatītāni atikrāntāni | tāni punastava ca 
ātmanaśca samastānyeva ahaṃ veda jānāmi tvaṃ tu mama ātmanaśca 
tāni na jānāsi || 5 ||

	ato'ham

ajo'pi sannavyayātmā bhūtānāmīśvaro'pi san |
prakṛtiṃ svāmadhiṣṭhāya saṃbhavāmyātmamāyayā || 6 ||

	ajo'vyayātmā nityatvāt janmavināśarahito'pi tathā 
sarvabhūtānāṃ sthāvarajaṃgamānāṃ sthitivināśādiṣu 
yatheṣṭakartṛtvāt īśvaraḥ prabhurapi san svāṃ prakṛtim ātmīyaṃ paraṃ 
svabhāvamadvayacinmātralakṣaṇam adhiṣṭhāya tatraiva sthitvā tasmāt 
svabhāvādapracyutaḥ svamāyayā svayā svātmādhīnayā māyayā 
dvaitāvabhāsanamātraprāṇena śaktiviśeṣeṇa hetubhūtena sambhavāmi 
janmādisattāṃ parigṛhṇāmi | ato nityatvādīśvaratvācca 
svecchāparigṛhītatvācca svaprādurbhāvān tvādṛśāṃ ca sarvadehināṃ 
bhūtān bhāvino vartamānāṃśva janmādivikārān 
satatamaviplutasarvajñatvaśaktirahameva jānāmi || 6 ||

itthaṃ svajanmaparigrahasya prayojanamāha

yadā yadā hi dharmasya glānirbhavati bhārata |
abhyutthānamadharmasya tadātmāṃśaṃ sṛjāmyaham || 7 ||

paritrāṇāya sādhūnāṃ vināśāya ca duṣkṛtām |
dharmasaṃsthāpanārthāya saṃbhavāmi yuge yuge || 8 ||

yadā yadā yatra yatra kāle dharmasya 
varṇāśramaniyamavibhaktasya

p. 95) sadācārasya glāniḥ upakṣayo bhavati tataśca tadviparītasya 
adharmasya varṇādivyavasthāvyutthānahetorduṣṭācārasya abhyutthānam 
udbhavo bhavati, tadā tatra tatra kāle ahaṃ paramakāraṇabhūtasya 
ātmanaḥ kaṃcit kaṃcidaṃśaṃ śaktileśaṃ 
svecchāparikalpitajagatkrīḍāparirakṣaṇāya sṛjāmi utpādayāmi | ato 
devāsurasargavibhedena svayamavabhāsite jagati daivasargabhājāṃ 
śāstropadeśaviṣayabhūtānāṃ sādhūnāṃ 
sattvaguṇotkarṣanirmalaprajñānāṃ paritrāṇāya 
satkriyāvighātahetubhyo vighnebhyo rakṣaṇāya tathā duṣkṛtāṃ 
śāstrīyaniyamātikramāt jagatsthitiviplāvakaduṣṭakarmakāriṇāmasatāṃ 
vināśāya pradhvaṃsāya, ata eva dharmasya 
jātideśakālādipravibhaktaviśeṣasya sadācārasya saṃsthāpanārthāya 
samyakpraropaṇāya pratiyugaṃ tena tena ākāreṇa samudbhavāmi 
utpattimattāṃ darśayāmi, natu vastuto'haṃ 
janmavināśādibhāvavikārakalaṃkasparśamanubhavāmi ||

	ata eva

janma karma ca me divyamevaṃ yo vetti tattvataḥ |
tyaktvā dehaṃ punarjanma naiti māmeti so'rjuna || 9 ||

	evam uktena prakāreṇa janma karma ca yaḥ prabuddho me tattvataḥ 
paramārthato jānāti yatra śarīritve'pi sati yathoktāt parataḥ 
svabhāvādapracyutiḥ, yatra tattatkriyāphalāsaṃsparśaśca ata eva divyam 
alokasāmānyaṃ, sa tādṛśo yathoktavijñānaniṣṇātamatiḥ dehaṃ 
tyaktvā dehe'haṃpratipattimṛtsṛjya janma naiti nityasvabhāvābhivyakte 
janmavināśavattvavyāmohaṃ jahāti, ato māmeti matsvabhāvamāpadyate 
|| 9 ||

	yata etena

vītarāgabhayakrodhā manmayā madvyapāśrayāḥ |
bahavo jñānatapasā pūtā madbhāvamāgatāḥ || 10 ||

p. 96) yathoktajñānalakṣaṇena niratiśayaśuddhihetunā vrataviśeṣeṇa 
pūtāḥ pavitrāḥ santo bahavo yogino madbhāvaṃ māmikāṃ sattām 
āgatāḥ madabhedaṃ prāptā ityarthaḥ | yato vijñānapariśīlanāt 
vītarāgabhayakrodhāḥ rāgo viṣayeṣu abhilāṣaḥ, tathā 
tadvighātahetubhyo'śakyapratīkārebhyo bhayaṃ trāsaḥ, tathā 
śakyapratīkāreṣu krodhaḥ iti | ete saṃsāradurgadurucchedanigaḍabhūtā 
doṣā vītā vigatāstruṭitā yeṣāṃ te, ata eva manmayāḥ 
madekasvabhāvāḥ madvyapāśrayāḥ ahameva vyapāśrayo nirapāyatvāt 
viśiṣṭo'pāśrayaḥ sthitiheturyeṣāṃ, te tathāvidhāḥ || 10 ||
	nanu prabandhato bhagavatā ekameva tattvaṃ 
yathāpratipāditaviśeṣaṇaviśiṣṭaṃ paramārthasattvena pratipāditaṃ, 
tadevaca idānīmahantayā vyapadiśyate | tat kathaṃ kecideva 
madbhāvamāgatā iti ucyate iti arjunasya 
samyagagṛhītapārameśvarakrīḍāvidhervikalpamāśaṃkya āha

ye yathā māṃ prapadyante tāṃstathaiva bhajāmyaham |
mama vartmānuvartante manuṣyāḥ pārtha sarvaśaḥ || 11 ||

	satyameva ahaṃ 
samastānāmanyonyabhinnanānāvidhasvarūpāṇāṃ 
phenabudbudakallolakalāpānāmudadhiriva udayāstamayanilaya eka eva | 
tādṛśena ca mayā nijamāyāśaktyā 
tattanniyatasāmarthyāvacchinnadehādipratiṣṭhitāhaṃkāratvena 
nānārūpā ye kṣetrajñā avabhāsitāḥ, teṣu madhye yathā yena 
prakāreṇa yādṛśena saṃkalpena ye kecana māṃ prapadyante māṃ 
prārthayante tatkālaṃ matsamāpannā bhavanti, tānahaṃ tathaiva 
tattatsaṃkalpocitaphaladānarūpeṇa prakāreṇa bhajāmi saṃśrayāmi | 
yataḥ sarva eva manuṣyāḥ tattadarthakriyāsampādanārthitāvasare mama 
sarvebhyaḥ sarvamanorathaprasādhanaikacintāmaṇeḥ vartma prāptihetuṃ 
nirvikalpotsāhalakṣaṇaṃ paṃthānam anuvartante anukurvanti | yathā ahaṃ

p. 97) pareṇa utsāhena eka eva sarvaṃ karomi, jānāmi ca; tathā te 
pratiniyataṃ kāryaṃ jñeyaṃ ca kurvanto jānantaśca 
matsamāpattisaṃvedanaśaktiśūnyatvādahaṃ karomyahaṃ jānāmīti 
kiñcitkartari, kiṃcijjñe ca tādṛśe svātmani kartṛtvādikaṃ manyante | 
kimanena uktaṃ bhavati | yathā arkālokena anugṛhītadṛṣṭayastiryañco 
bālādayaśca tattadarthakriyāniṣṭhāste te svaṃ svaṃ viṣayaṃ paśyanti, 
naca tatra arkālokaṃ kāraṇatvena manyante mūḍhatvāt yatastādṛśena 
vyavahāreṇa vyutpannāḥ tathaiva sarve kṣetrajñāstattadarthakriyārthino 
mayaiva tatkṣaṇaprārtitena svaprakāśānugṛhītasaṃvido 
dṛṣṭaprayojanamadṛṣṭaprayojanaṃ vā sarvaṃ kurvanti jānanti ca 
māyāvimohitatvādātmānaṃ tatra kāraṇatvena manyante, naca māṃ tatra 
kāraṇatvena manyante || 11 ||

	ata eva kiṃ vāñchantaste mama vartma anuvartante ityāha

kāṅkṣantaḥ karmaṇāṃ siddhiṃ yajanta iha devatāḥ |
kṣipraṃ hi mānuṣe loke siddhirbhavati karmajā || 12 ||

	dṛṣṭaprayojanena karmaṇāṃ tattadabhimataprāptilakṣaṇāṃ 
siddhiṃ karmaphalaṃ prārthayamānāḥ, tathā adṛṣṭaprayojanena 
yajñādinā tattallokāntarabhogyasukhaprāptilakṣaṇaphalābhilāṣiṇaḥ 
santo devatāḥ indrādirūpā yajantaḥ havirdānādinā pūjayantaḥ | kimatra 
tātparyam | ā brahmaṇaḥ kīṭaparyantaṃ yo yaḥ kaścit yena yena 
abhisandhinā yadyat kiñcana cikīrṣati jijñāsate vā, 
tattatphalasampattestatkālavaśyambhāvinī asaṃcetyamānā 
matsamāpattireva ekaṃ kāraṇaṃ yasmādasmin mānuṣe loke sarvasya 
pratyakṣabhūte karmajā tattatsaṃkalpamūlavyāpārasamutthā siddhiḥ 
phalaprāptiḥ kṣipraṃ tatkālameva matsamāpattibalādeva sampadyate 
paramārthataḥ karturjñāturvā anyasya asambhavāt || 12 ||

p. 98) nanu tvameva cedekaḥ kartā, tat kṣetrajñabhāvena kṛtaiḥ 
karmabhistvameva tatphalena sambadhyase, tataśca kṣetrajñavat 
sukhādisambandhastava api prasakta iti arjunaśaṃkāṃ parihartukāma āha

cāturvarṇyaṃ mayā sṛṣṭaṃ guṇakarmavibhāgataḥ |
tasya kartāramapi māṃ viddhyakartāramavyayam || 13 ||

	satyaṃ guṇavibhāgena ayaṃ sāttviko'yaṃ rājaso'yaṃ tāmasa 
ityevaṃrūpeṇa sargabhedamūlena tathā karmavibhāgena brāhmaṇena 
adhyetavyaṃ yaṣṭavyaṃ dātavyamityevamādirūpeṇa mayā 
yathoktasvarūpeṇa ekena kartrā cāturvarṇyaṃ sṛṣṭaṃ catvāro varṇā 
brāhmaṇādayo nirmitāḥ | tasya evaṃvidhasya cāturvarṇyasya 
svaguṇakarmavibhāgasamucitakarmānurūpatattatphalabhājaḥ kartāraṃ 
nirmātāramapi māmakartāraṃ tadvat tādṛkkarmaphalasambandhābhāvāt 
kartṛdharmarahitaṃ jānīhi | kuta iti hetugarbhaṃ viśeṣaṇamāha kīdṛśaṃ 
santamakartāraṃ viddhi | avyayaṃ nityamekasmāt svarūpāt yato'haṃ na 
vyemi na vyapagacchāmi advayacinmātrasvabhāvatāmeva na jahāmi | 
evaṃca avyayaṃ santaṃ māmakartāraṃ viddhi | kṣetrajñā hi 
manmāyodbhāvitānityadehādyahaṃkāramayāstriguṇāḥ 
saṃkalpakāriṇaḥ sukhādibhiḥ phalairyujyante, natu ahaṃ 
guṇātītasvabhāvastairjātu yujye || 13 ||

	tataśca

na māṃ karmāṇi limpanti na me kāmaḥ phaleṣvapi |
iti māṃ yo'bhijānāti karmabhirna sa badhyate || 14 ||

	karmāṇi puṇyāpuṇyalakṣaṇāḥ kriyāḥ na māṃ limpanti 
sukhaduḥkhādilakṣaṇasvaphalarūpeṇa kalaṃkena na malinayanti yato 
nityanijānandatṛptasya mama karmaṇāṃ phaleṣu 
tattaduttarottaraprakṛṣṭasvarūpeṣu api na kāmaḥ na abhilāṣo 
yathāpratipāditasvarūpaikamayatvena

p. 99) sarvamidamanupaśyataḥ | yaśca yathoktena jñānāmṛtanirjhareṇa 
nirdhautasakalavikalpakalaṃkatvāt nirmalaprajño yogī 'iti' evaṃ 
yathoktasvarūpaṃ 'māmabhijānāti' pratipadyate śa' madvat kriyamāṇaiḥ 
'karmabhirna badhyate' na rāgādikleśapāśaniyantritaḥ kriyate || 14 ||

kiṃca 

evaṃ jñātvā kṛtaṃ karma pūrvairapi mumukṣubhiḥ |
kuru karmaiva tasmāttvaṃ pūrvaiḥ pūrvataraṃ kṛtam || 15 ||

evaṃ yathāpratipādite karmatve'pi akarmatvaparyavasāyitvāt 
tattvaṃ jñātvā adhigamya pūrvairapi manvādibhiḥ mumukṣubhiḥ karma 
śāstracoditaṃ kṛtam anuṣṭhitam | tasmāt tvamapi 
yathoktajñānaniṣṭhatvena karmaiva svajātivihitaṃ yuddhādivyāpārameva 
anutiṣṭha | pūrvaiḥ atītaviprakṛṣṭakālajanmabhistaistaiḥ pūrvataram 
āditaramanuṣṭhitam || 15 ||

kintu 

kiṃ karma kimakarmeti kavayo'pyatra mohitāḥ |
tatte karma pravakṣyāmi yajjñātvā mokṣyase'śubhāt || 16 ||

kiṃ karma anuṣṭheyaṃ kiṃ ca akarma parihāryamityatra 
pravibhāgajñāne kavayo'pi draṣṭāro'pi munayo mohitāḥ te'pi 
samyagetayorna vibhāgaṃ jānate | tasmādakarmaparihāreṇa tat 
anuṣṭheyaṃ karma tubhyaṃ prakarṣeṇa idānīṃ kathayiṣyāmi, yat viditvā 
saṃsārabandhalakṣaṇāt aśubhāt akalyāṇāt mokṣyase mukto bhaviṣyasi 
|| 16 ||

yataḥ 

karmaṇo hyapi boddhavyaṃ boddhavyaṃ ca vikarmaṇaḥ |
akarmaṇaśca boddhavyaṃ gahanā karmaṇo gatiḥ || 17 ||

sāmānyena anuṣṭheyatayā upadiṣṭasya karmaṇo boddhavyaṃ 
viśeṣātmakaṃ 

p. 100) vastu vidyate, akarmaṇaśca karmaparihārasya api boddhavyaṃ vidyate 
vikarmaṇaśca viruddhasya api karmaṇastathaiva boddhavyaṃ vidyate 
yato'sya triprakāratve vyavasthitasya karmaṇo gahanā duravadhāratattvā 
gatiḥ vyāptiḥ || 17 ||

sā ca yathā avadhāryate, tathā pratipādayitumāha 

karmaṇyakarma yaḥ paśyedakarmaṇi ca karma yaḥ |
sa buddhimānmanuṣyeṣu sa coktaḥ kṛtsnakarmakṛt || 18 ||

yathoktajñānaniṣṭhatayā anuṣṭhīyamāne 
śāstracoditasvavyāpāre yaḥ tattvavit akarma karmābhāvaṃ 
saṃsārabandhalakṣaṇakarmakāryākaraṇāt putre'pi aputravat paśyati, 
tathā akarmaṇi yathāvihitakarmapratiṣedhe pūrvoktopapattyā 
rāgādidoṣānuṣaṅgasya durucchedatvāt 
bandhalakṣaṇakarmakāryakaraṇāt karmatvaṃ paśyati jñānadṛṣṭyā 
niścinoti sa manuṣyeṣu madhye praśasyayā buddhyā yuktaḥ | sa evaca 
sampūrṇapuruṣārthasampādakatvāt kṛtsnasya avikalasya karmaṇaḥ kartā 
anuṣṭhātā ucyate | bhogamātraphalaṃ hi karma kṛtsnamavikalāṃgamapi 
anuṣṭhitamapavargalakṣaṇaphalaṃ prati ahetutvāt na kṛtsnaṃ bhavati, 
atastadanuṣṭhātā na kṛtsnakarmakṛdityarthaḥ | evamanena ślokena 
karmaṇaśca akarmaṇaśca boddhavyamasti, - ityetat vyākhyātam || 18 ||
	atha karmaiva akarma bhavatītyetat pūrvamuktamapi dṛḍhapratipattaye 
smārayan vivṛṇoti 

yasya sarve samārambhāḥ kāmasaṃkalpavarjitāḥ |
jñānāgnidagdhakarmāṇaṃ tamāhuḥ paṇḍitaṃ budhāḥ || 19 ||

kāmyante iti kāmāḥ karmaphalatvena prārthyamānāste te 
bhogāsteṣu saṃkalpa icchā tena rahitāḥ sarve samastā 
dṛṣṭānuśravikaviṣayaniṣṭhāḥ samārambhāḥ karmapravṛttayo yasya taṃ 
yathoditaṃ yathoktātmatattvajñānarūpeṇa 

p. 101) analena dagdhakarmāṇaṃ dagdhāni 
saṃsārāṃkuraprasavasāmarthyaharaṇāt bhasmīkṛtāni bījāni yena taṃ 
tādṛśaṃ paṇḍitaṃ vidvāṃsam āhuḥ paramārthavidaḥ, yataḥ 
sarvātmanā kṛtakṛtyatvaparyavasāyinī vidvattā, sā ca yathoktajñānavat 
eva saṃbhavati || 19 ||
	evaṃ karmaṇyeva akarma vidvān paśyatīti vyākhyātam | tadeva 
viśinaṣṭi yataḥ 

tyaktvā karmaphalāsaṃgaṃ nityatṛpto nirāśrayaḥ |
karmaṇyabhipravṛtto'pi naiva kiñcitkaroti saḥ || 20 ||

saḥ evaṃvidho yogī 
paramānandamayaparamasvabhāvasuvyavasthitabuddhiḥ nityatṛptaḥ 
sakalabāhyaviṣayarasaparikṣīṇākāṃkṣo'ta eva nirāśrayaḥ 
svarūpavyatiriktāt bāhyādālambanāt niṣkrāntaḥ karmaphalāsaṃgaṃ 
karmaṇāṃ yajñadānatapaḥ prabhṛtīnāṃ phalaṃ 
svargādibhogalakṣaṇamāsaṃgamāsaktiṃ tadeva prakṛṣṭaṃ phalamiti tatra 
līnacittatvaṃ tyaktvā sahaje karmaṇi abhipravṛttaḥ anuṣṭhāne vyavasito'pi 
naiva kiñcit karoti tathāvidhasya yoginaḥ sarvasya karmaṇo 
bandhalakṣaṇasvakāryasampādanāsāmarthyāt || 20 ||

	yathoktasya yoginaḥ praśaṃsārthameva āha 

nirāśīryatacittātmā tyaktasarvaparigrahaḥ |
śarīraṃ kevalaṃ karma kurvannāpnoti kilviṣam || 21 ||

yadṛcchālābhasaṃtuṣṭo dvandvātīto vimatsaraḥ |
samaḥ siddhāvasiddhau ca kṛtvāpi na nibaddhyate || 22 ||

prāgeva vyākhyātametat | yadyapi karmākarmaṇoreva boddhavyaṃ 
vastu vyākhyātam, tathāpi vikarmaṇo'pi 
boddhavyamityetadvyākhyānenaiva vyākhyātam | yataḥ karmaparihārasya 
jñānaśūnyasya sato yatra bandhakatvamuktam, tatra 
varṇāśramasamayaviruddhasya karmaṇo bandhakatve 

p. 102) kā bhrāntiriti tasya api sarvātmanā parihāryatvalakṣaṇaṃ 
boddhavyaṃ vastu vyākhyātameva || 22 ||
	idānīṃ karma sarvathā kartavyamiti sāmānyena 
karmamātramanuṣṭheyatvena upadiṣṭaṃ prāk tasya 
	yajñārthātkarmaṇo'nyatra loko'yaṃ karmabandhanaḥ | (3|9) 
ityanena sūcitāṃ yajñalakṣaṇaviśiṣṭarūpatāṃ mokṣaikaphalatvaṃ ca 
yogisvarūpapratipādanadvāreṇaiva prastāvayannāha 

gatasaṃgasya muktasya jñānāvasthitacetasaḥ |
yajñāyārabhataḥ karma samagraṃ pravilīyate || 23 ||

yathokte jñāne'vasthitacetasaḥ pratilabdhapratiṣṭhaprajñasya ata eva 
nivṛttaviṣayābhyāsaṃgasya tataśca muktasya 
ātmānātmavivekasamādhisiddhilābhāt dehādyātmapratyayarūpāt 
mahato bandhanāt niṣkrāntasya sato vakṣyamāṇaprabhedāya yajñāya 
yajanāya tadarthaṃ karma śāstravihitāṃ kriyāmārabhamāṇasya kurvata 
eva samagraṃ kāyikavācikamānasikabhedena saṃgrahāt 
triprakāramavāntarabhedena tu aparisaṃkhyeyaṃ vilīyate vigalati 
brahmaprāptihetutvāt vinaśvaraphalārambhakatvalakṣaṇaṃ svarūpamasya 
naśyatītyarthaḥ || 23 ||
	kathaṃ kriyamāṇameva karma pravilīyate, - iti 
vivekasamādhisiddhināntarīyikāṃ brahmādvaitasiddhiṃ 
karmapravilayakāraṇabhūtāṃ pratipādayitumāha 

brahmārpaṇaṃ brahmahavirbrahmāgnau brahmaṇā hutam |
brahmaiva tena gantavyaṃ brahmakarmasamādhinā || 24 ||

tena gatasaṃgādiviśeṣaṇaviśiṣṭena yoginā brahmaiva gantavyam 
ataḥ samagraṃ tasya karma pravilīyate iti sambandhaḥ | tadetat vyākhyāyate | 
tena yoginā bṛhattvādidharmayogāt brahmaśabdavācyaṃ 

p. 103) paramārthatattvameva yogyatāvaśāt nirvikalpatayā 
prakāśamānaṃ gantavyaṃ sampradānatvena upasthātavyam | nahi 
tathāvidhasya yoginastattatphalābhisaṃdhinā tattat devatāntaraṃ 
sampradānatayā gantavyatvamarhati | kīdṛśena tena brahmaiva gantavyam | 
brahmakarmasamādhinā samunmiṣite vijñānātmake divye cakṣuṣi 
yathoktabrahmābhedena prathamānaṃ karma brahmakarma, tadeva 
samādhirniruttaro yogo yasya tena tādṛśena | kīdṛśaṃ brahma gantavyam | 
brahmaṇā brahmābhinnasvarūpatayā svātmānaṃ manyamānena 
yajamānena hutaṃ tarpitaṃ brahmarūpatayā pratipanne'gnau jātavedasi | 
anyacca kīdṛśaṃ brahma | brahmārpaṇaṃ brahmarūpatayaiva 
pratīyamānamarpaṇamājyapayaḥsomādiyāgadravyopakaraṇasādhanaṃ 
hastādi yatra, tat tādṛśam; tathā brahmahaviḥ brahmatvenaiva 
pratipadyamānaṃ havirhūyamānamājyādi dravyaṃ yatra, tat tathāvidham 
| idamanena pratipāditam -yadyat vastu yathā yathā prakāśate, tattat 
prakāśamānatvādeva prakāśādabhinnasvarūpamataḥ 
paramātmavyatiriktaṃ paramārthataḥ padārthajātaṃ na kiñcit 
sambhavatīti tattvavidbhiḥ svasaṃvedanasaṃvedyatvāt 
niṣprakampopapattyupalabdhipradarśanakrameṇa vyavasthāpito'pi 
ayamātmaiśvaryādvayanayo na yasya kasyacit 
pratipattigocaratāmupagacchati parameśvareṇaiva vihitaniyamatvāt | 
tadayamaiśvaro niyamaḥ svecchāvabhāsitānyonyabhinnasvarūpeṣu api 
aparisaṃkhyeyeṣu pramātṛṣu kaṃcideva svecchāvaśādasāvanugṛhṇāti | 
tasya ca anugṛhītamātrasya 
tattvāvalokavyavadhāyakasandehamahāgirīndranirdalanadambholidhārā 
bhaktirunmiṣati | tatprabhāvācca yathoktaṃ tattvajñānaṃ 
śāstrātmakamāptopadeśādinā upanamati | tasmiṃśca 
viśuddhaśraddhāsiddhasindhunirdhautanikhilavikalpakalaṃkayā paramayā 
prajñayā nirantaramanuśīlyamāne 
dehadehivivekajñānalakṣaṇamadvaitapuradvāramapāvṛtaṃ bhavati | tatra 
labdhapraveśo'smin 

p. 104) brahmārpaṇavidhāne'dhikṛto yogī bhavati, - ityata uktaṃ 

gatasaṃgasya muktasya jñānāvasthitacetasaḥ |
yajñāyārabhataḥ karma samagraṃ pravilīyate || (4|23)

tena ca brahmaiva gantavyamiti | yajñākhyasya karmaṇaḥ prādhānyāt 
dṛṣṭādṛṣṭaviṣayasakalakriyopalakṣaṇārthatvena grahaṇamiha veditavyaṃ 
yataḥ 

paśyañśṛṇvanspṛśañjighran -------------------------- | (5|8)

ityādinā sarvāsu kriyāsu etāṃ brahmādvaitabhāvanāmabhidhāsyatyeva 
|| 

idānīṃ varṇāśramavibhaktādhikāryavasthādivibhedāt yeṣu yeṣu 
yajñaprabhedeṣu eṣā bhāvanā yoginā vidhātavyā anuṣṭhātṛmukhena, 
tāṃ pratipādayaṃsteṣāṃ tāvat bāhyābhyantarasādhanaprādhānyena 
prakāradvayaṃ tasyaiva jñānayajñakāraṇabhūtaprakāradvayasahitaṃ 
ślokatrayeṇa āha 

daivamevāpare yajñaṃ yoginaḥ samupāsate |
brahmāgnāvapare yajñaṃ yajñenaivopajuhvati || 25 ||

śrotrādīnīndriyāṇyanye saṃyamāgniṣu juhvati |
śabdādīnviṣayānanya indriyāgniṣu juhvati || 26 ||

sarvāṇīndriyakarmāṇi prāṇakarmāṇi cāpare |
ātmasaṃyamayogāgrau juhvati jñānadīpite || 27 ||

	apare kecit yoginaḥ samprati anutpannayathoktatattvajñānatvāt 
kriyāmātrasamāhitā daivameva yajñaṃ samupāsate 
devānāmagnīṣomaprajāpatīndrādityādīnāṃ prādhānyena 
ijyamānatvāt devasambandhinaṃ yāgamanuṣṭhānena bhajante, na anyaṃ 
yatra ṛtvigājyapayaḥsomādi cetanācetanaṃ bāhyaṃ dravyamupakaraṇam | 
apare tebhyo'pi anye tattva vidastenaiva yajñena 
tattadupakaraṇabhāvāvasthitātmamayena yajñam ātmānameva upajuhvati 
prīṇanti | kva | brahmāgnau brahma tattvajñānaṃ, sa eva 
paraprakāśātmakatvāt sakalaśubhāśubhakarmaphaladāhahetutvāt ca 
agnistasmin | 

p. 105) etaduktaṃ bhavati-brahmārpaṇavidhānavido daivameva yajñaṃ 
jñānayajñatvamāpādayanti || atha anye kecana 
yoginaścittavṛttinirodhanalakṣaṇasamādhiniṣṭhā abahiḥsādhanasādhyaṃ 
yajñamanutiṣṭhantaḥ śrotrādīni akṣāṇi 
tattaddhyeyārthasamādhirūpeṣu saṃyameṣu eva agniṣu juhvati 
viṣayebhyaḥ pratyāhṛtya teṣu teṣu samādhiṣu ālīnānīndriyāṇi kurvanto 
yajñasampattimabhimanyante ityarthaḥ | anye punaḥ śabdādīn viṣayān 
yoginaḥ parihāreṇa śrotrādiṣu indriyeṣu juhvati niṣiddhabahiṣprasarāsu 
indriyavṛttiṣveva labdhasaṃyame cetasi śabdādīnāmagrahaṇameva 
indriyeṣu agnikalpeṣu havanaṃ manyamānāstathāvidhaṃ 
yajñamanutiṣṭhantītyarthaḥ || apare kecana evaṃvidhasya yogayajñasya 
jñānayajñatvasampattaye sarvāṇi aśeṣāṇi bāhyānāmāntarāṇāṃ ca 
indriyāṇāṃ karmāṇi prāṇasya ca sāmānyarūpasya ekasya 
prāṇāpāṇasamānodānavyānādibhedapravṛttāni samastāni karmāṇi 
ātmasaṃyamayogāgnau juhvati ātmani pratipāditalakṣaṇe parasmin 
kāraṇe yaḥ saṃyamaḥ samyak cittasya nibandhanaṃ, tadātmako yo yogaḥ 
samādhiḥ, sa eva agnistatra tāni nilīnāni kurvate | kīdṛśe | jñānadīpite 
ātmādvayalakṣaṇena jñānena bodhena dīpite dyotite | kimuktaṃ bhavati | 
teṣu teṣu nānāvidheṣu yogeṣu manaḥprāṇayorvyāpārān 
havirvadātmaniṣṭhe samādhyagnau nikṣipantastādṛśasya yogajñānasya 
jñānayajñatvamāpādayantītyarthaḥ || 27 ||

evaṃ yajñānāṃ vyāpārabhedena caturvidhatvaṃ pratipādya 
idānīmāśramabhedapratipādanadvāreṇa yajñabhedān pratipādayituṃ 
ślokadvayaṃ sārdhamāha 

dravyayajñāstapoyajñā yogayajñāstathāpare |
svādhyāyajñānayajñāśca yatayaḥ saṃśitavratāḥ || 28 ||

p. 106) apāne juhvati prāṇaṃ prāṇe'pānaṃ tathāpare |
prāṇāpānagatī ruddhā prāṇāyāmaparāyaṇāḥ || 29 ||

apare niyatāhārāḥ prāṇānprāṇeṣu juhvati |

	dravyeṇa havirādinā yajñaḥ pākayajñādiryāgavidhiryeṣāṃ, te 
dravyayajñāḥ tattaddevatāyajanapradhānakratukriyānuṣṭhāyinaḥ 
sambhavantīti śeṣaḥ | te ca gārhasthyāśramavartinaḥ prādhānyena atra 
abhipretāḥ, yato gṛhasthānāmeva dravyasādhane devayajñe mukhyatayā 
adhikāraḥ | tatra pākayajñāḥ sarvavarṇasādhāraṇā yataḥ śūdrasya api 
pākayajñaiḥ svayaṃ yajet |

iti 

vihito'sya namaskāro mantra --------------------- |

ityādinā teṣu adhikāro vihitaḥ | tathā anye tapoyajñāḥ tapasā tena tena 
varṇaviśeṣavibhaktena niyamena yajño yāgavidhiryeṣāṃ te prādhānyena 
vānaprasthāśramiṇo'tra gṛhyante teṣāmeva mukhyatayā taponiṣṭhatvāt |

	āśramā vihitāḥ sarve varjayitvā nirāśiṣam |

ityādinā śūdrasya api atra adhikārāt tapoyajñeṣu adhikāraḥ | tathā anye 
yogayajñāḥ yogena yamaniyamādyaṃganirvartyena sabījanirbījarūpeṇa 
cittavṛttinirodhaikalakṣaṇena samādhinā yajño yeṣāṃ, te yogayajñāḥ 
prādhānyena caturthāśramiṇasteṣāmeva prādhānyena yogaparatvāt | 
atrāpi śūdrasya adhikāro vihito yato bhagavatā vyāsamuninaiva 
caturvarṇasādhāraṇān dharmān nirdiśatā tanmadhye ātmajñānamuktam 
| tathāca janakaparāśarasaṃvāde 

viśeṣadharmān varṇānāṃ prabrūhi bhagavanmama |
tathā sāmānyadharmāśca sarvatra kuśalo hyasi || 

p. 107) iti praśne viśeṣadharmānuktvā bhagavān parāśaraḥ 

ānṛśaṃsyamahiṃsā cāpramādaḥ saṃvibhāgitā |
śrāddhakarmātitheyaṃ ca satyamakrodha evaca ||

sveṣu dāreṣu santoṣaḥ śaucaṃ nityānasūyatā |
ātmajñānaṃ titikṣā ca dharmaḥ sādhāraṇo nṛpa ||

atraiva anyatra 

nacāpi śūdraḥ patatīti niścayo 
nacāpi saṃskāramihārhatīti vā |
śrutipravṛttaṃ naca dharmamaśnute 
nacāsya dharmapratiṣedhanaṃ kṛtam ||

atraiva anyatra api 

sarve varṇā dharmakāryāṇi samyak 
kṛtvā rājan satyavākyāni coktvā |
tyaktvādharmaṃ dāruṇaṃ jīvaloke 
yānti svargaṃ nātra kāryo vicāraḥ || (ma0bhā0śā0pa0 302 a0)

iti | svādhyāyajñānayajñāścāpare svādhyāyo 
vedavedāṃgasmṛtītihāsapurāṇatarkadaṃḍanītivārtāderyathāsvaṃ 
svasya śāstrasya adhyayanam | tatra prādhānyena 
brahmacaryāśramiṇo'dhikṛtā yato mukhyatayā teṣāṃ 
svādhyāyaniṣṭhatvaṃ vyavasthitam | tatra ca kasmiṃścidaṃśe kathañcit 
śūdrasyāpi adhikāro yataḥ svayaṃ yajet iti pākayajñeṣu tasya api 
adhikārābhyupagamāt taditikartavyatājñānahetoḥ kasyacit 
śāstrāvayavasya kenacit prakāreṇa adhyayanamavaśyameva prasaktam | 
tathā jñānayajñā jñānena 
prabandhapratipāditātmādvaitabodhātmanā yajño yāgavidhiryeṣām | 
tatra sarvavarṇāḥ sarvāśramiṇo 

p. 108) gṛhyante | tataḥ śūdrasya api adhikāraḥ | tathāca uktamihaiva 
parabrahmasvarūpamātmānaṃ vyapadiśatā bhagavatā 

māṃ hi pārtha vyapāśritya ye'pi syuḥ pāpayonayaḥ |
striyo vaiśyāstathā śūdrāste'pi yāṃti parāṃ gatim || (9|33)

iti | naca atiśayoktimātrametat yato muninaiva mokṣadharmeṣu 
piṃgalāsulabhādyāḥ striyaḥ, tulādharādyāśca vaiśyāḥ, 
dharmavyādhādayaḥ śūdrā āvirbhūtatattvajñānāstatra tatra 
udāhṛtāḥ | tadanena jñānayajñena pūrvoktā yajñabhedā 
jñānayajñatāmāpnuvantīti uktaṃ bhavati saṃśitavratāḥ iti viśeṣaṇaṃ 
svādhyāyayajñānāmatyantaniyamaparatvāt jñānayajñānāṃ ca 
paramārthaniṣṭhatvāt mukhyayatilakṣaṇayogāt veditavyam | atha 
prāṇāyāmayajñasya sādhāraṇyāt pṛthak svarūpaṃ 
pratipādayannāha- apare kecit yoginaḥ apāne pūrakavṛttivyavasthite 
śārīre maruti prāṇaṃ recakavṛttivyavasthitavāyuṃ juhvati prāṇākhyaṃ 
vāyuṃ havirbhāvena kalpayitvā apānaṃ ca agnitvena 
yāgavidhimanutiṣṭhantītyarthaḥ | recitaḥ prāṇo yadā apānavṛttyātmanā 
parāvartamānaḥ svarūpaṃ jahāti, tadā asāvapāne huto bhavatīti kṛtvā 
apāne juhvati prāṇam iti uktam | anenaiva krameṇa prāṇe agnibhāvena 
parikalpite apānaṃ havirbhūtamanye juhvati iti | recakavṛttipūrvakatvena 
pūrakavṛttiviśrāntirūpatayā pūrakavṛttipūrvakatvena ca 
recakavṛttiviśrāntirūpaṃ prāṇāyāmakramadvayaṃ pratipādya 
kumbhakavṛttirūpaṃ kramaṃ pratipādayitumāha apare anye 
prāṇāpānayordvayorapi gatī vyāpārau ruddhvā stambhayitvā 
yāvacchakti prāṇāyāmaparāyaṇāḥ tathāvidhānāṃ ruddhānāṃ 
prāṇānāmāyāmaścirakālāvasthānāt dīrghīkaraṇaṃ parāyaṇaṃ 
niṣṭhā yeṣāṃ, te tādṛśāḥ prāṇāyāmaparāyaṇāḥ | anena 
recakapūrakavṛttyorapi prāṇānāmāyāma 

p. 109) eva ukto veditavyaḥ | te ca evaṃvidhā niyatāhārāḥ 
mātrākālāvacchinnahitapavitrāśinaḥ santaḥ prāṇān 
nānānāḍīvāhino vāyūnājyabhūtān madhyameṣu prāṇeṣu 
agnibhūteṣu juhvati tatra līnān kurvate 
madhyamaprāṇavṛttyavalambinastiṣṭhanti | ayaṃ prāṇayajñakramaḥ 
pratipāditaḥ | eṣo'pi pūrvoktajñānaniṣṭhatayā anuṣṭhīyamāno 
jñānayajñatvamāpadyate yataḥ pūrvayordvayoḥ prakārayoḥ 
prāṇodayāstamayasandhisamāhitatvena 
paramātmasamāpattihetutāmāpadyamānayorvijñānayajñatā jāyate | 
tṛtīye'pi krame madhyamaprāṇapariṇatacittatayā asau jāyate | asya ca 
prāṇāyamakramasya yogāṃgatvena vyavasthitasya api punarvacanaṃ 
kevalasyaiva yajñaviśeṣapratipādanārthaṃ veditavyam || 29 ||

evamanuṣṭhātṛbhedena yajñabhedān pratipādya 
sarveṣāmapavargaphalatvaṃ yathābhavati, tathā pratipādayitumāha

sarve'pyete yajñavido yajñakṣapitakalmaṣāḥ || 30 ||
yajñaśiṣṭāmṛtabhujo yānti brahma sanātanam |

ete yathoktavividhayajñānuṣṭhātāraḥ sarve'pi samastā eva 
nirviśeṣatayā sanātanaṃ nityamakṣayaṃ brahma paramātmatattvaṃ yānti 
gacchanti tadeva sampadyante ityarthaḥ | kīdṛśāḥ | yajñavidaḥ santo yadi 
yathāpratipāditabrahmārpaṇavidhānakrameṇa yajñaṃ yathoktaṃ 
nānārūpaṃ yāgaṃ jānanti nirvikalpatayā pratipadyante, 
tatastathābhūtena yajñavidhinā kṣapitakalmaṣāḥ 
vināśitājñānalakṣaṇamukhyamahāpātakāḥ santaḥ, tathā anuṣṭhitāt 
yajñāt śiṣṭaṃ tādṛgyāgavidhānānantaramāharaṇīyaṃ yat, tadeva 
brahmārpaṇavidhānadṛṣṭyā 
brahmamayatvādamṛtamanuttarānandāsvādasundaraṃ sudhārasaṃ 
bhuñjate parasaṃvinmayasvātmaparipoṣaya carvayanti ye, tathāvidhāḥ 
santo yathoktaṃ brahmalakṣaṇaṃ 

p. 110) padaṃ prāpnuvantītyarthaḥ | brahmārpaṇajñānavyatirekeṇa etān 
yāgaviśeṣānanutiṣṭhantastebhyastattat nānārūpaṃ parimitaṃ phalaṃ 
prāpnuvantīti arthāt pratipāditaṃ bhavati ||
	yastu kevalena kriyāmātreṇa jñānakriyāsamuccayena vā 
anayorekatamena api vidhinā yajñaṃ na kañcidanutiṣṭhati, tasya 

nāyaṃ loko'styayajñasya kuto'nyaḥ kurusattama || 31 ||

ayajñasya ubhayarūpatayā api yajñarahitasya ayaṃ lokaḥ dṛṣṭa eva 
nāstikatvāt sarvajanadveṣyasya sato nāsti | yaduktaṃ 

satyadharmacyutātpuṃsaḥ kruddhādāśīviṣādiva |
nāstiko'pi hyudvijate janaḥ kiṃ punarāstikaḥ ||

iti tasya evaṃvidhasya pāpaśīlasya kuto'nyaḥ etasmāt lokāt paraḥ 
svargāpavargātmakaphalabhogāspadamadṛṣṭasaṃjño bhavati || 31 ||

	atha eteṣāṃ sarvayajñānāṃ karmajatvapratipādanena 
jñānayajñatvāpattiṃ pratipādayitumāha 

evaṃ bahuvidhā yajñā vitatā brahmaṇo mukhe |
karmajānviddhi tānsarvānevaṃ jñātvā vimokṣyase || 32 ||

	evaṃ yathoktena prakāreṇa bhūriprakārāḥ yajñāḥ brahmaṇaḥ 
vedādeḥ śāstrasya mukhe taddvāreṇetyarthaḥ vitatāḥ 
svagativiśeṣapratipādanakrameṇa vistāritāḥ | tāṃśca sarvānkarmajān 
vāṅmanaḥkāyavyāpāranirvartyatvāt kriyāsamudbhavān viddhi na 
anyathā eṣāmātmalābhopapattiriti niścinu | ye'pi hi 
buddhimātrasādhanā yajñāsteṣu 
tādṛksūkṣmabuddhivyāpārāvyabhicāraḥ sthita eva | tataḥ 
sahasṛṣṭatvādaśakyaparihārāṇāṃ karmātmakānāṃ yajñānāṃ 
yathoktajñānaniṣṭhatayā anuṣṭhānamapavargasiddhiriti | evaṃ jñātvā 
samyak pratipadya vimokṣyase svayameva kevalībhaviṣyasi na 
nimittāntaramapekṣiṣyase 

p. 111) iti samuccayajñānasya mokṣaṃ prati saukaryapratipādanāya 
vimokṣyase iti karmakartari prayogaḥ || 32 ||

atha etasya jñānapraśaṃsārthamāha

śreyāndravyamayādyajñājjñānayajñaḥ parantapa |
sarvaṃ karmākhilaṃ pārtha jñāne parisamāpyate || 23 ||

	dravyamayādyajñāt iti 
yathoktapratipāditaprabhedayajñopalakṣaṇārthaṃ veditavyam | tena 
sarvebhyo yajñebhyo jñānayajñaḥ śreyān praśasyataraḥ | jñānamayo 
hi yajñaḥ sarvān dravyayajñādīn mokṣaphalān sampādayati, tena jñāne 
sati sarvayajñā eva bhavantīti uktaṃ bhavati | sarvayajñaniṣṭhatvena hi 
jñānasya jñānayajñatvaṃ, mokṣaphalaṃ jñānaṃ natu pṛthak yasmāt 
yathoke jñāne dravyayajñādivibhāgena sarvaṃ samastaṃ karmākhilaṃ 
svagativiśeṣāpekṣayā samagraṃ jñāne parisamāpyate pravilayaṃ 
gacchati kṛtamapi dagdhabījavat svaphalaprasavasāmarthyaṃ na bhajate || 33 ||

evaṃvidhaṃ ca

tadviddhi praṇipātena paripraśnena sevayā |
upadekṣyanti te jñānaṃ jñāninastattvadarśinaḥ || 34 ||

tat jñānaṃ tubhyaṃ jñāninaḥ 
paramātmasamāpattilakṣaṇaniruttaraphalaprāptyupāyabhūtabodhayuktā 
gurava upadekṣyanti pratipādayiṣyanti | kiṃ śāstramātrajñāḥ | neti āha 
tattvadarśinaḥ yathāpratipāditasya pramārthasya svasaṃvedanena 
draṣṭāraḥ | kena hetunā upadekṣyanti | praṇipātena 
pādapraṇāmapūrveṇa sarvātmanā prahvatvena, tathā paripraśnena 
paritaḥ samantāt sarvasaṃśayacchedārtha yaḥ praśnaḥ punḥ punaḥ 
prārthanāpūrvamanuyogaḥ, tena, tathā sevayā āsannasvasamarpaṇāt 
sarvatra 

p. 112) nirvikalpayā śuśrūṣayā | nirvyājabhaktiśraddhārādhitā gurava 
evaṃvidhaṃ mahodayamarthamupadiśantīti viddhi niścayena jānīhi || 34 ||

kīdṛśaṃ tat jñānamiti āha 

yajjñātvā na punarmohamevaṃ yāsyasi pāṃḍava |
yena bhūtānyaśeṣeṇa drakṣyasyātmanyatho mayi || 35 ||

	yajjñātvā samyak pratipadya punaḥ tatpratipatteruttarakālam evam 
avaśyānuṣṭheye vairivadhalakṣaṇe svadharme eva adharmapratipattirūpeṇa 
prakāreṇa mohaṃ viparyayalakṣaṇamajñānaṃ na prāpyasi; yena ca 
jñānena karaṇabhūtena sarvabhūtāni carācaraprāṇabhṛto mayi 
paramakāraṇe, tathā ātmani sthitāni drakṣyasi | kimuktaṃ bhavati | 
paramakāraṇābhinnāt svātmanaḥ sarvabhūtānāṃ 
vāstavamabhedamanena jñānena sākṣātkariṣyasi | atra svayaṃ 
jñānamupadiśannapi jñāninaste jñānamupadekṣyanti iti bhagavān 
yadāha, tatra sākṣāttattvānubhavalakṣaṇe viśeṣajñāne arjunasya 
abhikāṃkṣotpādanaṃ prayojanam | yataḥ krameṇa 
utpannaviśeṣajñānajijñāsātiśayaṃ 
bhagavāṃstattvamanubhāvayiṣyatyeva || 35 ||

	yuddhalakṣaṇe svadharme'nuṣṭhīyamāne kuta eva te 
pāpasambandho yato'sya jñānasya ayaṃ prabhāvaḥ 

api cedasi pāpebhyaḥ sarvebhyaḥ pāpakṛttamaḥ |
sarvaṃ jñānaplavenaiva vṛjinaṃ saṃtariṣyasi || 36 ||

	api cedasi yadyapi sarvebhyaḥ pāpebhyaḥ samastebhyaḥ pātakibhyo 
jñātigurvādivadhādiduṣkṛtakāritvāt pāpakṛttamaḥ tadapekṣayā 
atiśayena duṣṭakarmakārī tathāpi asya jñātrādivadhalakṣaṇasya 
karmaṇaḥ svadharmatve sati vṛjinaṃ tajjaṃ pāpaṃ samastaṃ sāgaramiva 
durlaṃghyaṃ yathoktajñānalakṣaṇena plavena yānapātreṇa 
laṃghayiṣyasi || 36 ||

p. 113) yataḥ

yathaidhāṃsi samiddho'gnirbhasmasātkurute'rjuna |
jñānāgniḥ sarvakarmāṇi bhasmasāt kurute tathā || 37 ||

	yathā kāṣṭhāni dīptataro'nalo bhūtimātraśeṣāṇi karoti, tathā 
tenaiva prakāreṇa sarvāṇi niḥśeṣāṇi karmāṇi punaḥ 
phaladānasāmarthyakṣapaṇāt jñānaṃ nirdahati | anena svadharmatvena 
avasthitānāṃ paramaghorāṇāmapi sarveṣāṃ karmaṇāṃ 
naiṣpalyāpādanasamarthaṃ jñānametaditi uktam, natu śāstravihitānām | 
yathoktaṃ prāk 

	śreyānsvadharmo viguṇaḥ ---------------------------- | (3|35)

ityādinā || 37 ||

	kiṃca ghorasya api karmaṇo 
mokṣalakṣaṇottamaphalaprāptiparyavasāyinā anena 

nahi jñānena sadṛśaṃ pavitramiha vidyate |
tatsvayaṃ yogasaṃsiddhaḥ kālenātmani vindati || 38 ||

yasmāt jñānena tulyaṃ pāvakamanyat vastu jagati na sambhavati tat ca asya 
pāvanatvaṃ yogasaṃsiddhaḥ jñānasaṃskṛtena yathoktena 
karmasamādhinā samyaksiddhaḥ 
prāptaparamātmasamāpattilakṣaṇaprakṛṣṭaphalaḥ san yogī kālena 
abhyāsatīvratvātīvratvānusāriṇā śīghreṇa cireṇa vā svayameva 
ātmanaiva labhate svīkaroti || 38 ||

tasya ca evaṃprabhāvasya jñānasya lābhakramamāha -

śraddhāvāṃllabhate jñānaṃ tatparaḥ saṃyatendriyaḥ |
jñānaṃ labdhvā parāṃ śāntimacireṇādhigacchati || 39 ||

śraddhā āptopadiṣṭe'rthe nirvikalpaphalasaṃbhāvanā, yadvaśāt 
prāptaphalasyaiva cetasaḥ saṃprasāda utpadyate | sā ca 
parameśvaraprasādasurapādapaprathamamaṃjaryā 

p. 114) bhaktyā sahaiva utpadyate | tadvān tayā yuktaḥ 
saṃśayātmakaghoravighnavināśāt, tatparaḥ nānyacetāḥ tathā 
saṃyatendriyaḥ prākpratipāditena krameṇa vaśīkṛtasakalākṣavargaḥ 
paramapāvanaṃ jñānam abhiyuktaḥ kutaścit parameśvarecchāpreritāt 
sākṣātkṛtaparamārthādavāpnoti | tacca prāpya nityābhyāsapariśīlanāt 
sudṛḍhapratipattyā svīkṛtya acireṇa alpīyatmaiva kālena parāṃ 
niruttarāṃ śāntiṃ sakalavikalpaviplavavināśaniścalaṃ śamaṃ 
svātmopalabdhijanitāṃ nirvṛtim adhigacchati prāpnoti || 39 ||

etadguṇavihīnastu ----------------------

ajñaścāśraddadhānaśca saṃśayātmā vinasyati |
nāyaṃ loko'sti na paro na sukhaṃ saṃśayātmanaḥ || 40 ||

ajñaḥ jñānarahito naśyati parāparaphalaprāptyabhāvāt saṃsāra 
eva nimajjati | kīdṛśaḥ sa vinaśyati | aśraddadhānaḥ yaḥ 
parameśvarānugrahādvinā na kiñcit śraddadhāti sambhāvayati yataḥ 
śraddhāvirahāt saṃśayātmā sarvatra niścayapratipattyabhāvāt 
sandehamayabuddhiḥ | ataśca tahāvidhasya sarvatra sandigdhabuddheḥ 
nāyaṃ dṛṣṭa eva loko'sti, naca paraḥ svargāpavargalakṣaṇo'dṛṣṭaḥ | 
tataśca sukhamapi tasya nāsti | saṃśayitasya hi vaidyādinā āptena ukte 
vyādhyādipratīkārahetau bheṣajādau 
sandihyamānamatervyādhyādināśābhāvādayameva loko nāsti, kutaḥ 
paraḥ, sukhaṃ vā lokadvayopabhogyamiṣṭaphalaṃ bhaviṣyati || 40 ||

yaḥ punaretadvyatiriktalakṣaṇastaṃ 

yogasaṃnyastakarmāṇaṃ jñānasaṃcchinnasaṃśayam |
ātmavantaṃ na karmāṇi nibadhnanti dhanañjaya || 41 ||

yogena yathoktena jñānasaṃskṛtakarmasamādhinā saṃnyastāni 
anityasukhātmakaphalābhisandhivirahāt tyaktāni kriyamāṇāni eva 

p. 115) tiraskṛtāni karmāṇi yena tādṛśaṃ, tathā jñānena 
sadasatpadārthaniścayapratipattirūpeṇa yathoktena bodhena saṃcchinno 
nikṛttamūlaḥ saṃśayaḥ sandeho yena taṃ tādṛśam, ata eva 
satyātmapratipattivaśāt ātmavantaṃ na karmāṇi śubhāśubhāni 
nibadhnanti sukhaduḥkhalakṣaṇaphaladānena na svatastrīkurvanti || 41 ||

yata evaṃ 

tasmādajñānasambhūtaṃ hṛtsthaṃ jñānāsinātmanaḥ |
chittvaivaṃ saṃśayaṃ yogamātiṣṭhottiṣṭha bhārata || 42 ||

tasmāt prabandhapratipāditāt kāraṇāt yogaṃ śāstravihiteṣu 
karmasu yathoktajñānasaṃskṛteṣu samādhiṃ yathoktam ātiṣṭha 
samācara atra uttiṣṭha prodyukto bhava | kiṃ kṛtvā | evaṃ 
sarvadoṣaikahetuṃ saṃśayaṃ yathoktena jñānakhaḍgena cchittvā 
mūlādeva nipāṭya | kīdṛśaṃ saṃśayam | hṛtsthaṃ hṛdayagatam 
ajñānasambhūtaṃ mohaprabhavam | anena hṛdayagatatvena 
mohaprabhavatvena ca adūravartitvamasāramūlatvaṃ ca 
succhedatvapratipādanārthamuktamiti om || 42 ||

kalyāṇaikaniketanasya jagatāṃ ghorāghavidhvaṃsino 
dharmasyāsya surāpagāmbhasa iva brahmātmakasyodbhavam |
ākhyāyātmana eva yatra bhagavān pārthāya sarvātigaṃ svaṃ 
māhātmyamasūcayatsa vivṛto'dhyāyaścaturthaḥ kramāt ||

iti śrīmadrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe caturtho'dhyāyaḥ || 4 ||



atha pañcamo'dhyāyaḥ |

atha dvitīyādhyāyaparisamāptau buddhipraśaṃsāvākyāni prāk 
ca karmayogavacanāni śrutvā teṣāṃ ca parasparaviruddhatvaṃ 
manyamānena arjunena 

jyāyasī cetkarmaṇaste matā buddhirjanārdana (3|1)

ityādinā praśno yaḥ kṛto'bhūt, sa bhagavatā yadyapi nirṇīta eva tṛtīye; 
tathāpi caturthādhyāyaparisamāptau 

yogasaṃnyastakarmāṇaṃ jñānasaṃcchinnasaṃśayam (4 | 41)

ityatra yogasaṃnyāsaśabdau śrutvā saṃnyāsaṃ tyāgaṃ manyamānaḥ 
punarutpannasaṃśayor'juna uvāca -

saṃnyāsaṃ karmaṇāṃ kṛṣṇa punaryogaṃ ca śaṃsasi |
yaḥ śreyānetayorekastaṃ me brūhi viniścitam || 1 ||

	he kṛṣṇa karmaṇāṃ tyāgaṃ praśaṃsasi stauṣi, punaśca 
teṣāmeva yogam anuṣṭhānena svīkāraṃ stauṣi | tadetayorviruddhayoḥ 
karmatyāgasvīkārayoḥ saṃnyāsayogaśabdena uktayoryaugapadyena 
anuṣṭhānaṃ tāvat na saṃbhavati | ato dvayormadhyāt ekaḥ saṃnyāso vā 
yogo vā yaḥ eva śreyān praśasyataraḥ taṃ me niḥsandehatayā brūhi || 1 ||

	atha śabdaviśeṣamātrajanitaṃ saṃśayamarjunasya parihartuṃ 
bhagavānuvāca -

saṃnyāsaḥ karmayogaśca niḥśreyasakarāvubhau |
tayostu karmasaṃnyāsātkarmayogo viśiṣyate || 2 ||

	satyaṃ dvāvapi etau karmaṇāṃ saṃnyāsayogau tyāgasvīkārau 
bhinnānuṣṭhātṛpuruṣānuṣṭhīyamānāpavargalakṣaṇābhyudayasaṃpād
akau bhavataḥ | yathaḥ 

p. 117) kevalajñānavādinaḥ sarvātmanā karmaṇāṃ tyāgena 
apavargamicchanti, samuccayavādinastu karmaṇāmatyāgena anuṣṭhāneneti 
dvayorapi phalaśrutirasti; kintu tayoḥ saṃnyāsayogayormadhyāt 
saṃnyāsāt tyāgāt tamapekṣya karmayogo vihitakarmācaraṇaṃ viśiṣyate 
uktavakṣyamāṇahetuparyālocanayā prakṛṣyate || 2 ||

yathā viśiṣyate, tathā āha -

jñeyaḥ sa nityasaṃnyāsī yo na dveṣṭi na kāṅkṣati |
nirdvandvo hi mahābāho sukhaṃ bandhādvimucyate || 3 ||

	samuccayānuṣṭhātā kurvannapi karmāṇi nityaṃ saṃnyāsī 
sadātyaktakarmā boddhavyaḥ | ko'sau | yo na kiñcit dveṣṭi na kiñcit 
kāṅkṣati | kasmāt sa nityasaṃnyāsītyāha yasmāt nirdvandvaḥ 
dveṣākāṅkṣāśabdapratipāditāt dveṣarāgalakṣaṇāt dvandvāt 
niṣkrāntaḥ karmāṇyapi kurvan sukham akleśaṃ bandhāt 
saṃsāralakṣaṇāt durgāt mucyate svayameva mokṣāmāpnoti | tadidamatra 
tātparyam - saṃsārakārākuharasthānāṃ rāgadveṣāveva durucchedau 
bandhanapāśau; tāveva yathoktātmajñānāsinā yena cchinau, tasya 
kriyamāṇānyapi karmāṇi akṛtakalpāni, - ityasau nityasaṃnyāsīti uktaḥ, 
yastu pariharannapi karmāṇi rāgadveṣau cchettuṃ na prabhavati, sa 
saṃnyastakarmā api karmadṛdeva tatkṛtasya tatphalasya bandhasya avirāmāt 
| yathāca sarvakarmaṇāṃ parityāgānupapattiḥ keṣāṃcana vā parityāge 
bandhakāraṇabhūtarāgadveṣānuparamastathā prāgeva pratipāditaṃ, 
pratipādayiṣyate ca || 3  ||
itthaṃ ca samuccite jñānakarmaṇī prāk 
saṅkhyayogaśabdābhyāṃ ye pratipādite, ta eva 
saṃnyāsayogaśabdābhyāmukte | tataḥ kiṃ te saṃśayakāraṇamityāha -

p. 118) sāṃkhyayogau pṛthagbālāḥ pravadanti na paṇḍitāḥ |
ekamapyāsthitaḥ samyagubhayorvindate phalam || 4 ||

	sāṅkhyaṃ yathāpratipāditātmatattvajñānam | 
yogastadavirahavidhānavihitabandhasāmarthyānāṃ vihitānāṃ 
karmaṇāmanuṣṭhānam | tau 
nityamanyonyāviyogapratilabhyasaṃpūrṇasvarūpatvādabhinnau | bālāḥ 
tattvajñānavyavahāravyutpattirahitatvāt bāliśāḥ pṛthak 
bhinnapuruṣānuṣṭheyatayā viviktāvasthānau pravadanti vyācakṣate natu 
paṇḍitāḥ paramārthavidaḥ | yata ekamapi sāṃkhyaṃ yogaṃ vā samyak 
yathāpratipāditena rūpeṇa āstitaḥ samāśritaḥ san ubhayoḥ dvayorapi 
sāṅkhyayogayoḥ phalaṃ kaivalyalakṣṇaṃ vindate labhate  | kimuktaṃ 
bhavati | yathā uktasāṅkhyāparasaṃjñavijñānarūpaṃ yogamantareṇa 
phalaparyavasāyi na bhavatyeva, yogo'pi sāṅkhyarahitastathaiveti || 4 ||

tadeva iha draḍhayitumāha -

yatsāṅkhyaiḥ prāpyate sthānaṃ tadyogairanugamyate |
ekaṃ sāṅkhyaṃ ca yogaṃ ca yaḥ paśyati sa paśyati || 5 ||

sāṅkhyena jñānena saṃbaddhāḥ puruṣā lakṣaṇayā sāṅkhyā 
iti uktāḥ; tadvat yogasaṃbandhāt yogāḥ | tairevaṃvidhaiḥ 
sāṅkhyairyathoktajñānavadbhiḥ yat sthānaṃ viśrāntipadaṃ prāpyate 
niruttaropeyatayā samāśriyet, tat eva yogairanugamyate paścātkālatayā 
svīkriyate | jñānapūrvatvādanuṣṭhānasya yat sāṃkhaiḥ prāpyate, 
tadyogairanugamyate ityuktaṃ; na punaḥ kaivalyalakṣaṇikaphalasaṃpādane 
tulyahetutvāt tayorbhedo'sti | tataḥ sāṅkhyaṃ yogaṃ caikameva yaḥ 
paśyati jānāti sa eva paśyati tasyaiva sajjñānātmikā darśanaśaktiḥ, natu 
yo jñānena kevalenaiva mokṣaḥ, karmayogena sarveṇa api bandha iti paśyati 
|| 5 ||

p. 119) tadāha -

saṃnyāsastu mahābāho duḥkhamāptumayogataḥ |
yogayukto munirbrahma na cireṇādhigacchati || 6 ||

	ayogataḥ yogāt yathoktanītyā karmānuṣṭhānasamādhānāt vinā 
saṃnyāsaḥ punarbandhasaṃbandhābhāvaphalaḥ karmatyāgaḥ 
prāptumāsādayituṃ duḥkhaṃ kṛcchreṇa āpyata ityarthaḥ | yasmāt 
yogayuktaḥ yoge karmasamādhau yukto yathoktajñānaikatānatayā 
nityasaṃbaddhaḥ san muniḥ bhūtvā śīghrameva brahma 
paramātmalakṣaṇaṃ paraṃ tattvam adhigacchati ātmatayā samāsādayati | 
kimuktaṃ bhavati | jñānaniṣṭatvena svakarmānuṣṭhānaṃ 
munitvakāraṇaṃ brahmaprāptilakṣaṇasya phalasya 
acchalāvisaṃvādyupāyabhūtatvāt, natu kevalaṃ jñānamātraṃ 
sarvātmanā karmatyāgānupapattestasya anupāyatvāditi || 6 ||

kasmāt yogayuktasyaiva brahma suprāpamityāha

yogayukto viśuddhātmā vijitātmā jitendriyaḥ |
sarvabhūtātmabhūtātmā kurvannapi na lipyate || 7 ||

	yato yogayuktaḥ kurvannapi karmāṇi na lipyate tato na cireṇa brahma 
adhigacchatīti saṃbandhaḥ | tadetat vyākhyāyate -yoge 
jñānakarmasamuccayānuṣṭhānasamādhau yuktastatparatayā 
nityasamāhito yogī saṃsāripuruṣāviśeṣeṇa samācarannapi svakarma 
bandhahetunā tatphalena sukhādyātmanā na lipyate na malinātmatāṃ 
nīyate | yato'sau viśuddhātmā ahaṃpratyayaikalakṣaṇo yo 
nisarganirmalacinmātrasvarūpa ātmā tasya tāvatī 
aśuddhiryadanādyavidyāvaśāt vedyaikasvarūpe 
jātyādivividhāvacchedabhāji pratiniyate dehamātre svātmapratipattiḥ, 
tadabhāvamātrameva asya viśuddhiḥ, itthaṃ viśuddha ātmā yasya, sa 
tathāvidhaḥ satyasvabhāvapratiṣṭhitāhaṃbhāvatayā 
prāptasvābhāvikaprasāda ityarthaḥ | 

p. 120) tataśca vijitātmā jitendriyaśca atra ātmendriyaśabdābhyāṃ 
jñānakriyāprapañco vivakṣitaḥ | sa ubhayātmāpi vijitaḥ svaśaktitvena 
svecchāvidheyapravṛttinivṛttitvāt vaśīkṛto yena, sa padadvayena tathoktaḥ | 
evaṃ hi yogayuktaḥ karmayogī śuddhātmā san kriyāsu pravartamāno'pi 
manyate - yā iyamakṛtrimaprakāśātmakasvabhāvaparāmarśaikarūpā 
mama avyatiriktā śaktiḥ, sa eva 
svecchānirmitajñeyakāryasvabhāvaviṣayaprakāśanāya prasarantī 
jñānakriyābhedena dviprakāratayā avabhāsate | tasyāśca jñānarūpo 
yo bhedaḥ, so'ntaḥkaraṇavargaḥ, yaḥ kriyārūpaḥ, sa bahiṣkaraṇavarga iti | 
sūryasya yathā prabhārūpā śaktiḥ karaṇacakrātmanā avabhāsate, 
tathaiva iyaṃ mama svaśaktireva antaḥkaraṇabahiṣkaraṇabhāvena 
vijṛmbhate | naca prakāśamānatvena 
saṃbaddhairābhyantarabāhyarūpairviṣayaireṣā kaluṣīkartuṃ pāryate | 
nahi dinakarakiraṇāḥ prakāśyairnīlapītādibhirbhāvabhedaiḥ svābhāsena 
uparañjayituṃ śakyante, svatantrā eva tān prakāśayanti | tathaiva ete'pi 
antaḥkaraṇabahiṣkaraṇarūpāḥ śaktibhedā mameti, evaṃ vijitātmā 
jitendriyaśca | nanu evamapi 
viśuddhātmatādivyākhyātaviśeṣaṇaviśiṣṭatvaṃ na upadyate 
karmayoginaḥ | yato viṣayeṣu pravṛttistebhyaśca nivṛttirupādeyatvaṃ 
heyatvaṃ ca vinā na saṃbhavati, tatsaṃbhave ca rāgadveṣakalaṅko 
durnivāraḥ, tasmin sati kuto viśuddhātmatvādīti | atra parihārārthaṃ 
hetugarbhaṃ viśeṣaṇamāha sarvabhūtātmabhūtātmā iti sarvāṇi 
bhūtāni aśeṣāḥ sthāvarajaṅgamā viṣayabhāvamāpannāḥ 
padārthāsteṣāmātmabhūtastatsvarūpatvaṃ prāpta ātmā svabhāvo 
yasya, sa tathāvidhaḥ | kimatra tātparyam | karmayogī kila yeṣu viṣayeṣu 
antarbahiṣkaraṇavṛttidvāreṇa pravṛttinivṛttī bhajate, teṣu tasya 
yathoktajñānaniṣṇātaprajñatvādevaṃvidhā 

p. 121) surasthira pratipattiryathā ya ime cetanācetanarūpāḥ padārthā 
viṣayabhāvamāpannāste saṃvedyamānatāvyatirekeṇa na tattatsvarūpaṃ 
pratilabhante, tataḥ svasaṃvideva tena tena rūpeṇa avabhāsate, tattvato na 
etat vastvantaraṃ kiñciditi 
parameśvaraprasādāpanītamāyātimiratvādekasmin paramārthasati 
ātmatattve nirvṛtte nivṛttadvitvāvabhāsavibhramayā samyagdṛśā 
sarvamantaḥkaraṇavahiṣkaraṇaviṣayātmakaṃ padārthajātaṃ 
paramātmasvarūpādatyantamabhinnatayā nibhālayan yogayuktaḥ sahajāsu 
śāstravihitāsu kriyāsu pravartamāno na 
śuddhātmatvādiviśeṣaṇavyabhicāraṃ bhajate || 7 ||

	tametaṃ karmayoginaḥ 
samādhimāsanaprāṇajayapratyāhārādyabhyāsaparikarmanirapekṣaṃ 
yathopasthitaviṣayasaṃsparśe'pi aviluptaparavairāgyaṃ sarvadā sarvathā 
sarvasya sulabhaparamātmapratiṣṭhālābhalakṣaṇaṃ niratiśayarūpaṃ 
phalaṃ vitatya pratipādayitumāha -

naiva kiñcitkaromīti yokto manyeta tattvavit |
paśyañśṛṇvanspṛśañjighrannaśnangacchañśvasansvapan || 8 ||

pralapanvisṛjangṛhṇannunmiṣannimiṣannapi |
indriyāṇīndriyārtheṣu vartanta iti dhārayan || 9 ||

	ato'sau yukto vyākhyātasvarūpaḥ karmayogasamāhitaḥ kurvannapi 
na lipyate | yato naiva kiñcitkaromīti manyate sarvāsu kriyāsu lokavat 
vartamāno'pi naiṣkarmyaphalameva pratipadyate iti saṃbandhaḥ | kiṃ 
kurvannevaṃ manyate | paśyan ityādinā sarvendriyavṛttīḥ prāṇavṛttīśca 
pravartayannapi | iti dhārayan evaṃvidhāmasya karmayogasya 
yathoktaphalaprātyupāyabhūtāṃ dhāraṇāmudvahan | kathaṃ dhārayan | 
darśanādikriyāsu pravṛttānyapi indriyāṇi prāṇāśca indriyārtheṣu 
sveṣu sveṣu viṣayeṣu vartante saṃbandhamātraṃ tairanubhavanti, natu teṣu 
svaviṣayasaṃbaddheṣu nityaniratiśayacitprakāśasvabhāvasya 

p. 122) mama lokavat rāgādikalaṅkasparśo'ntaḥ saṃbhavatīti | paśyan 
ityādinā nimiṣan ityantena granthena sarvendriyaprāṇavṛttayaḥ 
saṃgṛhītāḥ | tathāca buddhīndriyavṛtayaḥ 
śravaṇasparśanadarśanarasanajighraṇarūpāḥ kramamanapekṣaya paśyan 
ityādinā aśnan ityantena padapancakena pratipāditāḥ | evameva 
vacanagrahaṇagamanavisargaprajananarūpāḥ karmendriyavṛttayaḥ pralapan 
gṛhṇan gacchan visṛjan iti padacatuṣṭayena pratipāditāḥ | yato visṛjanniti 
padena visargaprajananarūpe dve vṛttī pratipādite; svapannityanena 
manovṛttiḥ pratipāditā, svāpāvasthāyāṃ hi mana eva vṛttimanubhavati, 
nendriyāṇi; unmiṣannimiṣannitipadadvayena buddhivṛttiḥ pratipāditā, 
niścayātmikā hi buddhivṛttiriti sā bhāvaviṣayatvena bhavantī 
unmeṣaśabdena uktā, abhāvaviṣayatvena bhavantī nimeṣaśabdena | 
bhāvābhāvau hi buddhivṛttireva niścinute | ahaṅkārarūpā tu vṛttiḥ 
paśyañśṛṇvanniti kartṛtayā vyapadiṣṭe puruṣe eva vartate iti | etā 
antarbahiṣkaraṇavṛttayaḥ | śvasannityanena prāṇavṛttiḥ pratipāditā | 
prāṇadhāraṇameva hi śvasanamiti | tadidamasya vākyasya tātparyam -

yaśmin sarvaṃ --------------------------------- |
------------------------------------------------------ ||

iti vyākhyātasvarūpasya parasya tattvasya ātmana eva parameśvarasya 
tādṛksvabhāvaparāmarśamātrātmikā yā śaktiravyatiriktā, saiva 
tadicchāvabhāsitajñeyakāryātmakajagatkrīḍanakaviṣayatvena prasarantī 
tanmāyājanitaviparyayadarśanānāṃ sāṃsārikapruṣāṇāṃ 
saṃgraheṇa jñānakriyārūpā api antarbahiṣkaraṇaprāṇavṛttibhedena 
caturdaśamārgaprasṛtatvena avabhāsamānā saṃsārabandhahetutvena 
paryavasyati; 

p. 123) parameśvarānugrahādeva tu 
unmiṣitaparimṛṣṭadvaitakalaṅkanirmalanijajñānacakṣuṣāṃ 
sarvavyavahāravyāpṛtānāmapi 
yathoktasvabhāvamātraparāmarśaikarūpatayā 
yathoktakarmayogināmavabhāsamānā 
paramātmasamāpattilakṣaṇamokṣaphalaprāptyarthameva kalpate iti | ato 
yukto naiva kiñcitkaromīti manyate ityādi uktam || 9 ||

idānīmetadeva prakaṭayitumāha -

brahmaṇyādhāya karmāṇi saṅgaṃ tyaktvā karoti yaḥ |
lipyate na sa pāpena padmapatramivāmbhasā || 10 ||

brahmaṇi paramātmani sarvāṇi kriyamāṇāni karmāṇi ādhāya 
tacchaktitvena viniveśya ata eva saṅgaṃ svarūpavyatiriktatvena 
avabhāsamāneṣu viṣayeṣu nimagnacittatvaṃ laukikaṃ tyaktvā yathoktayā 
jñānadṛśā parameśvarabhāvānupraviṣṭo yaḥ karoti sarvāḥ kriyāḥ 
samācarati sa laukikavat pāpena karmaphalarūpeṇa sukhādyātmanā na 
lipyate na kaluṣīkriyate ambhasā salilena nirvyavadhānatayā 
susaṃśliṣṭamapi kamaladalamiva || 10 ||

yata evamataḥ -

kāyena manasā buddhyā kevalairindriyairapi |
yoginaḥ karma kurvanti saṅgaṃ tyaktvātmasiddhaye || 11 ||

kāyagrahaṇena karmendriyāṇi, manobuddhigrahaṇena 
buddhīndriyāṇi atra gṛhyante | etaiḥ kevalaiḥ 
tadviṣayādahaṅkārādyaparigrahāt viśuddhaiḥ pṛthagbhūtairvā 
karmayathāsvaṃ vyāpāraṃ śāstracodanayā śarīrādyavyabhicāritayā 
ca dustyajaṃ yoginaḥ karmayogasamāhitāḥ kurvanti anutiṣṭhantyeva, kintu 
yathoktasya satyasya ātmanaḥ siddhaye'hantāpratītiniṣpattaye saṅgaṃ 
tyaktvā kurvanti | kimuktaṃ bhavati | saṅgatyāga eva saṃnyāsaḥ, na 
karmatyāgaḥ || 11 ||

p. 124) sa ca saṅgatyāgaḥ karmaphalatyāgāt prabandhapratipāditāt 
bhavatītyāha -

yuktaḥ karmaphalaṃ tyaktvā śāntimāpnoti naiṣṭhikīm |
ayuktaḥ kāmakāreṇa phale sakto nibadhyate || 12 ||

	yo jñānaniṣṭhatayā karmaṇi yuktaḥ sannanabhisandhānena 
karmaphalaṃ tyaktvā naiṣṭhikīṃ niṣṭhāyāṃ parasyāṃ kāṣṭhāyāṃ 
sthitāṃ śāntiṃ 
dvaitapratyayalakṣaṇakṣobharahitasatyātmasvarūpaviśramātmakaṃ 
praśamaṃ samadhigacchati, yastu nisargadustyaje karmaṇi sarvadā pravṛttaḥ 
san yukto na bhavati yathoktena krameṇa samāhito na bhavati, so'vaśyameva 
phalasaṅgitvāt badhyate saṃsāre niyamyate || 12 ||
	atha evaṃvidhayoḥ karmayogasaṃnyāsayoradhyāye'smin 
prabandhena pratipāditayorupasaṃhārāvasare svarūpānuvādapūrvaṃ 
tadanuṣṭhāturnaiṣṭhikīṃ phalasiddhiṃ sphuṭīkartumāha -

sarvakarmāṇi manasā saṃnyasyāste sukhaṃ vaśī |
navadvāre pure dehī naiva kurvanna kārayan || 13 ||

	iha manaḥśabdena buddhireva vivakṣitā | tat ca dvividhaṃ manaḥ 
laukikaṃ, yigisaṃbandhi ca | tatra 
acintyeśvaramāyāśaktivaśādudbhūtadvaitapratyayatimiramayaṃ 
laukikaṃ yena loka ekameva paramārthasattattvaṃ nānātvena manyate, 
yogisaṃbandhi tu yena bhagavadanugrahāvirbhāvita 
vidyāśaktivimalīkṛtena yoginaḥ sarvabhāvān 
yathoktaparamātmaikarūpatayā manyante | 
tadevaṃvidhamubhayātmakatvaṃ manaso muninaiva anugītāsu 
bhagavadvacasaiva arjunabodhāyaiva itivṛttaviracanakrameṇa pradarśitam | 
yadāha -

ubhe vāṅmanasī gatvā bhūtātmānamapṛcchatām |
āvayoḥ śreṣṭhamācakṣva cchindhi nau saṃśayaṃ vibho ||

p. 125) mana ityeva bhagavāṃstadā prāha sarasvatīm |
ahaṃ kāmadughā tubhyamiti taṃ prāha vāgatha ||

sa tāmāha -

sthāvaraṃ jaṅgamaṃ caiva viddhyubhe manasī mama |
sthāvaraṃ matsakāśe vai jaṅgamaṃ viṣaye tava ||

iti | evaṃvidhena susthiraparamātmasvarūpamananaikaniṣṭhatvāt sthiratayā 
sthāvaraśabdoktena parameśvarābhyāśavartinā manasā antaḥkaraṇena 
sarvakarmāṇi cittavākkāyanirvartyāḥ sarvāḥ kriyāḥ śāstracoditāḥ 
śarīrāvyabhicāriṇīśca saṃnyasya 
bandhahetunānāphalābhisandhityāgāt brahmaṇyeva nikṣipya tenaiva 
krameṇa vaśī jitātmā svīkṛtasvabhāvaḥ san karmayogī sukhamāste 
joṣamavatiṣṭhate nisarganivṛttanikhilakleśasaṃparkaniruttarānandamaye 
svātmani viśrāmyatītyarthaḥ | kīdṛśaḥ sannāste | asminneva pure dehe eva 
adhiṣṭhānasāmānyāt gṛhatvena nirūpite, ata eva kīdṛśe | navadvāre 
cakṣuḥ śrotraghrāṇacchidrāṇi ṣaṭdvārāṇi 
darśanaśravaṇajighraṇakriyāpravṛttivartmāni, tathā mukhapāyūpasthāni 
trīṇi rasanavisargakriyāpravṛttivartmānīti nava dvārāṇi yasmiṃstatra | 
advayacinmātraparamātmasvabhāvaviśrāntatvāt sarvāḥ kriyāḥ sarvāṇi 
kāryāṇi svarūpamātratvena pratipadyamāno na kurvan itaraśarīrivat 
karmābhimānamananubhavan | kecit kil pratiśarīraṃ bhinnān śarīriṇaḥ 
svābhāvikena pratiniyatena kartṛtvena yuktān manyante, tathā na kārayan 
na anyān prayojayan | apare hi kecana saṇnidhimātreṇa jaḍāyāḥ prakṛteḥ 
kriyāpravṛttau prayojakamātmānaṃ manyante, asya tu ubhayathā api 
kartṛtvaṃ pratiṣidhyate | ayaṃ hi paramātmasamāpannatvāt na karoti na 
kārayati || 13 ||

p. 126) ata eva paramātmasvarūpaṃ smārayannāha -

nakartṛtvaṃ na karmāṇi lokasya sṛjati prabhuḥ |
na karmaphalasaṃyogaṃ svabhāvastu pravartate || 14 ||

yasmādadvayacinamātraikasvabhāvapratiṣṭhatvāt prabhuḥ īśvaraḥ 
paramātmā vāstavena rūpeṇa lokasya 
tanmāyāmahimodbhāvitaparasparabhedasya jīvavargasya na kartṛtvaṃ tāsu 
tāsu kriyāsu pratiniyatāsu pratiniyataphalāsu nauṣṭhātṛtvaṃ sṛjati nāpi 
puṇyapālakṣaṇāni karmāṇi asua kasyacit sṛjati, naca 
sukhādyātmakaistatphalaiḥ saṃbandham | atastatsvarūpasamāpannaḥ 
karmayogī tādṛśa eva bhavatīti pūrvaślokena saṃgatiḥ | nanu yadyevaṃ 
yathoktasvarūpamātraniṣṭhatvādīśvaro na karoti, na kārayati; tat 
kuto'yaṃ jagdvyavahāra ityāha svabhāvastu pravartate iti 
svabhāvaśabdena prakṛtyapraparyāyā māyāśaktireva acintyasvarūpā 
ucyate, sā pravartate 
anantabhāvabhedodbhūtavicitrajagadgandharvanagarāvabhāsanāya prasarati 
| sā hi vāstavasarvabhāvābhedākhyātimātrajīvitā prākpratipāditayā 
niyatyā sarvamidamābhāsayati || 14 ||

	evamavabhāsamānamapi etat tattvajñānadṛśā 
parāmṛśyamānaṃ yathoktaparamātmasvarūpāt na vyatiricyate | tataḥ 
parameśvarasya pratiniyatakāryakartṛtvādirna vāstavo dharmaḥ | tasmāt 
māyākṛta eva bandhamokṣavibhramo'yamiti pratipādayitumāha -

nādatte kasyacitpāpaṃ na caiva sukṛtaṃ vibhuḥ |
ajñānenāvṛtaṃ jñānaṃ tena muhyanti jantavaḥ || 15 ||

jñānena tu tadajñānaṃ yeṣāṃ nāśitamātmanaḥ |
teṣāmādityavajjñānaṃ prakāśayati tatparam || 16 ||

p. 127) vibhuḥ yathāpratipāditasvarūpa īśvaro na kasyacit jantoḥ 
paramārthataḥ pāpaṃ bandhakāraṇabhūtaṃ kalmaṣam ādatte apaharati 
yena asau jantustadapaharaṇādapavargalakṣaṇam śreyaḥ prāpnoti | naca 
mokṣakāraṇaṃ sukṛtaṃ kasyacidādatte yena asau tadādānāt 
saṃsārabandhalakṣaṇamaśreyaḥ prāpnoti | kastarhi bandhaheturjantūnāṃ 
mokṣaheturvetyāha ajñānena 
paramārthikaparamātmābhedāprathanamātrasvarūpeṇa jñānābhāvena 
mithyājñānena saṃtamasena iva padārthasvarūpaṃ jñānaṃ 
yathāpratipāditatattvaprathanātmanko bodha āvṛttaṃ saṃprati tiraskṛtam | 
tena hetunā sarvaprāṇinaḥ muhyanti 
śarīrādāvātmapratipattigrahaṇalakṣaṇaviparyayajñānamayadṛṣṭayo 
bandhamanubhavanti || yeṣāṃ punaḥ tat yathāpratipāditam ajñānaṃ 
yathoktena ātmanaḥ jñeyasya tattvasya jñānena nāśitam apadhvaṃsitaṃ, 
teṣāṃ parameśvarānugrahāt 
yathoktakarmayogasaṃnyāsānuṣṭhānādhikṛtānāṃ yogināṃ tat 
jñānaṃ paraṃ prakṛṣṭamupeyaṃ paramātmasvarūpalakṣaṇaṃ vastu 
prakāśayati prathayati | katham | ādityavat yathā ādityo bhagavān 
samayābhuditaḥ san durnivāramapi sāndramandhakāraṃ prabhāmātreṇa 
paryasya dṛśyaṃ vastu sarvaṃ niḥsaṃśayatayā prakaṭīkaroti, tathaiva 
jñānamīśvarānugrahecchāvasaronmiṣitaṃ sat 
svarūpatirodhānakāraṇamajñānaṃ tiraskarotīti upamānārthaḥ || 15, 16 ||

	tadevaṃvidhaṃ yat paravastuprakāśakamajñānapradhvaṃsakaṃ ca 
jñānaṃ, tadabhyāsaphalapratipādanāya āha-

tadbuddhayastadātmānastanniṣṭhāstatparāyaṇāḥ |
gacchantyapunarāvṛttiṃ jñānanirdhautakalmaṣāḥ || 17 ||

buddhirnānābhūtabodhyavastusādhanabhūtaṃ kāraṇaṃ prādhānyāt, 
tayā 

p. 128) samastaḥ karaṇavarga upalakṣito boddhavyaḥ, ātmaśabdena ca 
boddhā puruṣa ucyate iti | tatra yathokte jñāne eva paryavasitā 
buddhiryeṣāṃ, te tadbuddhayaḥ tathā tatraiva jñāne ātmā yeṣāṃ, te 
tadātmāno yathoktajñānaniṣṭhāhaṃpratītaya iti 
sakalalokavyavahāranibandhanaṃ buddhyātmalakṣaṇaṃ 
dvayamadvaitajñānamayaṃ yeṣāṃ, te tathāvidhāḥ | tathā 
niṣṭhāśabdena paramopeyavastusīmā atra ucyate, parāyaṇaśabdena ca 
tatprāptyupāyo vivakṣitastat paro'yyate yeneti | tat jñānaṃ yathoktaṃ 
niṣṭhā yeṣāṃ, te tanniṣṭhāḥ tadeva parāyaṇaṃ yeṣāṃ, te 
tatparāyaṇāḥ iti upeyopāyalakṣaṇadvayaṃ yogivyavahāraviṣayaṃ 
yathoktajñānātmakameva yeṣāṃ, te 
evaṃvidhāstattvajñānanibandhanasakalasaṃsārāpavargaviṣayapadārthas
ārthāḥ, ata evaṃvidhena jñānena nirdhautaṃ niḥśeṣeṇa 
prakṣālitamajñānarūpaṃ kalmaṣaṃ pāpaṃ yeṣāṃ, te tathāvidhā 
yoginaḥ apunarāvṛttiṃ gacchanti abhūyaḥsaṃbhavaṃ 
mokṣamāpnuvantītyarthaḥ || 17 ||

	atha īdṛśānāṃ yogināṃ sakalalokavilakṣaṇāṃ cittavṛttiṃ 
pratipādayitumāha -

vidyāvinayasaṃpanne brāhmaṇe gavi hastini |
śuni caiva śvapāke ca paṇḍitāḥ samadarśinaḥ || 18 ||

	vidyāśāstraṃ, vinayastadarthānuṣṭhānaviṣayo 
niyamaviśeṣastābhyāṃ sapannaḥ saṃbaddho yo brāhmaṇastasmiṃstathā 
gavādiṣu tiryakṣu bhayāhāramaithunamātraparyavasitasarvavṛttiṣu tathā 
śvapāke manuṣyabhāve'pi tiryakprāye paṇḍitāḥ 
yathoktatattvajñānaprabuddhāḥ samadarśinaḥ samaṃ 
sāmānyamekamaśeṣaviśeṣaṇāsaṃspṛṣṭasvabhāvaṃ cinmātraṃ 
draṣṭuṃ pratipattuṃ śīlaṃ yeṣāṃ, te tathāvidhāḥ | kimanena uktaṃ 
bhavati | ye samujjṛmbhitadivyajñānacakṣuṣaste 
māyopahatadṛṣṭibhirnānātvena 

p. 129) paridṛśyamānaṃ samastaṃ bhāvajātaṃ brahmaikarūpatayā 
nityamālokayanti | naca evaṃ mantavyaṃ, yathā te brāhmaṇādau vihitaṃ 
samācāraṃ śvapacādiṣu prayuñjate, śvapacādiṣu vihitaṃ 
brāhmaṇādiṣviti vikarmaṇi sthitāḥ santaḥ pārameśvarīṃ 
jagadvyavasthāṃ vyutthāpayanti | te hi yathā sthitameva 
jagadbhāvavistāraṃ brahmātmakaṃ paśyanti, natu vyutthānamācarantīti 
|| 18 ||

	tāmeva samadarśitāṃ vivṛṇoti -

na prahṛṣyetpriyaṃ prāpya nodvijetprāpya cāpriyam |
sthirabuddhirasaṃmūḍho brahmavidbrahmaṇi sthitaḥ || 19 ||

	yo brahmavit āgamato yathoktabrahmatattvavedī sthirabuddhiḥ 
prabalairapi vikalpairaprakampyamatirata eva asaṃmūḍhaḥ 
heyopādeyavastunorasandigdhabuddhiḥ san tasmin śāstrādhigate brahmaṇi 
paramātmani sthitaṃ satatapariśīlanāt viśrāntaḥ, sa priyāpriyaprāptyā 
praharṣodvegau viṣamadarśitvapiśunau saṃsāripuruṣocitau na bhajate | tato 
brāhmaṇagavādiṣu paṇḍitāḥ samadarśina iti uktam || 19 ||

īdṛśe ca brahmaṇi sthitiḥ sarvathā bāhyaviṣayaparihāreṇaiva 
bhavatīti kevalajñānavādināṃ pakṣaḥ | sa pūrvoktopapattyā na 
saṃbhavati, kathaṃcit vā saṃbhavannapi sacchūla iti 
śāstravihitaviṣayatayaiva brahmaṇi sthitrnirviplaveti samuccayapakṣameva 
nirvāhayitumāha -

bāhyasparśeṣvasaktātmā vindatyātmani yaḥ sukham |
sa brahma yogayuktātmā sukhamavyayamaśnute || 20 ||

ātmani parasmin tattve svabhāvasiddhaṃ yat sukhaṃ 
nityānandalakṣaṇo dharmastat bāhyasparśeṣu idantāvadhāryeṣu 
śabdādiṣu aviruddheṣu asaktātmā samyagjñānavaśādātmaikaniṣṭhatve 
sati animagnāntaḥ karaṇo yo yogī vindati upalabhate sa yogayuktātmā yoge 
karmasamādhau yuktātmā 

p. 130) jñānaniṣṭhatayā nityāvahitāntaḥkaraṇaḥ sukham akleśena 
avyayam vicchinnaṃ kṛtvā brahma paramakāraṇam aśnute svātmatayā 
vyāpnoti || 20 ||

	kathaṃ bāhyasparśeṣu ātmavarti sukhaṃ yogī na vindatīti 
pratipādayitumāha -

ye hi saṃsparśajā bhogā duḥkhayonaya eva te |
ādyantavantaḥ kaunteya na teṣu ramate budhaḥ || 21 ||

	hiśabdo hetau | yasmāt ye saṃsparśajāḥ 
śabdādiviṣayasaṃparkajanmāno bhogāḥ kāmāḥ te 
janmavināśayaktatvādanityāḥ santaḥ prāpteṣu satsu viyogajasya 
duḥkhasya avyabhicārādaprāpteṣu ca prārthanātmakasya duḥkhasya 
avyabhicārāt duḥkhayonaya eva duḥkhameva te janayanti | tataḥ teṣu 
bhogeṣu budhaḥ jñānavān na ramate na prītimanubhavati | kimanena uktaṃ 
bhavati | karmayogī satyaṃ saṃsāripuruṣavadindriyairviṣayān bhajate natu 
tajjanitena sukhena asau sukhito bhavati | sa hi svābhāvikamātmavarti 
sukhamanubhavatīti || 21 || 

	budhasya evaṃvidhasya eva yogitvaṃ ca sukhitvaṃ ca 
pratipādayitumāha -

śaknotīhaiva yaḥ soḍhuṃ prāk śarīravimocanāt |
kāmakrodhodbhavaṃ vegaṃ sa yogī sa sukhī mataḥ || 22 ||

	ya ihaiva asmin śarīre tiṣṭhan 
tadavyabhicāraviṣayasaṃbandhavaśāt rāgadveṣādijaṃ 
saṃrambhamātmaikaniṣṭhatayā soḍhum avadhārayituṃ 
dehatyāgādarvāgeva śaknoti prabhavati sa yogī samāhitaḥ | sa ca sukhī 
niruttarānandalakṣaṇasamādhiphalavān | yatastattvavido'nye hi 
kevalajñānavādino viṣayebhyaḥ palāyamānā yogamabhyasyanti | 
teṣāmantaraprepsuṣu teṣu ātatāyiṣu satsu ihaiva dehe durlabho 

p. 131) yogastatphalaṃ ceti yadi paraṃ te dehatyāge tadavāpsyanti | yastu 
karmayogī satsu eva viṣayeṣu aviluptātmasthitiḥ; sa jīvanneva mukta iti sa 
eva yogī, sa eva sukhīti uktam || 22 ||

ata eva tatsvarūpamāha -

antaḥsukho'ntarārāmastathāntarjyotireva yaḥ | 
sa pārtha paramaṃ yogaṃ brahmabhūto'dhigacchati || 23 ||

sukhaṃ tattatkriyāphalabhūtā nirvṛtiḥ, āramyate'sminniti 
ārāmaḥ sukhānubhavādhikaraṇaṃ, jyotistadubhayavyaktihetuḥ 
prakāśaḥ, tat tritayamapi antarātmani eva yasya sa tādṛśaḥ sarvatra 
saṃvedyamāne vastuni vigalitānātmapratyayo'ta eva brahmabhūto 
brahmaparamātmasvarūpaṃ prāptaḥ paramaṃ yogaṃ niruttaraṃ 
samādhim adhigacchati prāpnoti || 23 ||

yasmāt -

labhante brahma nirvāṇamṛṣayaḥ kṣīṇakalmaṣāḥ |
chinnadvaidhā yatātmānaḥ sarvabhūtahite ratāḥ || 24 ||

ye mahātmānaḥ chinnadvaidhāḥ 
truṭitadvaitapratyayātmakasaṃsārabandhaśṛṅkhalā yataḥ 
kṣīṇakalmaṣāḥ vinaṣṭākhilājñānamayamahāpātakā ṛṣayaḥ 
samyagdarśinaḥ, ata eva svarūpavyatiriktaṃ vastujātamapaśyantaḥ, 
sarvabhūtānāmātmana iva hite'nukūle vastuni ratāḥ abhiniviṣṭāste 
nirvāṇaṃ tāpatrayeṇa asaṃspṛṣṭatvāt praśāntaṃ brahmaparaṃ tattvaṃ 
labhante prāpnuvanti, natu ye vyatiriktatvena viṣayān manyamānāstebhyaḥ 
palāyante | te hi dvaitabandhādanirmuktā eva || 24 ||

etadeva viśinaṣṭi -

kāmakrodhavimuktānāṃ yatīnāṃ yatacetasām |
abhito brahma nirvāṇaṃ vartate viditātmanām || 25 ||

p. 132) ye rāgadveṣādidoṣarahitatvena yatacetaso nigṛhītāntaḥkaraṇāḥ, 
natu viṣayaviyuktatvena; teṣāṃ viditātmanāṃ 
vijñātaparamakāraṇasvarūpāṇāṃ mukhyalakṣaṇayuktānāṃ 
yatīnāṃ paramayogināṃ yathoktaṃ nirvāṇaṃ brahma abhitaḥ 
sāṃmukhyena vartate || 25 ||

	tato naiṣkarmyayoginaḥ sakāśāt karmayogino viśeṣaṃ 
pratipādayitumāha -

sparśān kṛtvā bahirbāhyāṃścakṣuścaivāntare bhruvoḥ |
prāṇāpānau samau kṛtvā nāsābhyantaracāriṇau || 26 ||

yatendriyamanobuddhirmunirmokṣaparāyaṇaḥ |
vigatecchābhayakrodho yaḥ sadā mukta eva saḥ || 27 ||

	yaḥ evaṃvidho muniḥ yatiḥ san mokṣaparāyaṇaḥ mokṣaṃ parameti 
tatprāptikāmaḥ, natu mukto heyopādeyavastvālambanacittatayā 
rāgadveṣādidoṣāviyogāt; yasya tu icchābhayakrodhāḥ 
pūrvavyākhyātā durvārāścittadoṣāḥ sadā nityameva 
nisarganirdoṣasvātmamātrapratiṣṭhatvāt viśeṣeṇa apunarāvṛttilakṣaṇena 
gatāḥ pradhvastāḥ, sa tādṛśaḥ karmayogī mukta eva yato'sya ātmanaḥ 
sāmānyasaṃvillakṣaṇā svabhāvaśuddhā śaktiryadā māyāvaśāt 
svarūpāvimarśinī satī nādehādyahaṃpratyayaniruddhā 
heyopādeyavastvanusāriṇī viṣayitvamanubhavati, tadā 
rāgādidoṣoparaktaṃ cittamiti saiva ucyate; yadā tu tairdoṣairvidyāvaśāt 
viyujyate, tadā nityānantanirupamanairmalyaikalakṣaṇaṃ svarūpaṃ 
pratipadyamānā saṃvinmātrarūpaiva avaśiṣyate | taduktaṃ 

cittameva hi saṃsāro rāgādikleśadūṣitam |
tadeva tairvinirmuktaṃ bhavānta iti kathyate ||

iti | tadevaṃ satsveva viṣayeṣu rāgādidoṣonmeṣaśūnyatvāt 
paramātmasamāpannaḥ karmayogī jīvanneva muktaḥ | yastu 
etadvyatiriktalakṣaṇa 

p. 133) evaṃvidho yogī, sa yadi paraṃ mokṣapravaṇa eva; natu muktaḥ | 
kīdṛśaḥ yatendriyamanobuddhiḥ yatāni nigṛhītāni indriyāṇi karaṇāni 
manaścittaṃ saṃkalpātmakaṃ buddhiradhyavasāyātmikā yena sa 
tādṛśaḥ | kiṃ kṛtvā evaṃvidhaḥ | bāhyān grāhyatvena vyatiriktān 
śabdādīn sparśān indriyaiḥ spṛśyamānatvāt sparśaśabdavācyān 
viṣayān bahiḥ kṛtvā | indriyairagrahaṇena cetaso vyatiricyetyanena 
viśeṣaṇena indriyāṇāṃ viṣayebhyaḥ pratyāhāralakṣaṇaṃ yogāṅgaṃ 
pratipāditam | tena ca pūrvabhāvīni āsanaprāṇajayadīni aṅgāni 
ākṣiptāni | anyat kiṃ kṛtvā | bhruvorantare bhrūmadhye cakṣuḥ 
darśanaśaktiṃ kṛtvetyanenāpi dhāraṇālakṣaṇaṃ yogāṅgamuktam | 
bhrūmadhyalakṣaṇe deśe tejomātrālambanatayā cittasya bandho hi anena 
uktaḥ | kiṃca nāsābhyantaracāriṇau nāsāyāḥ 
savyāpasavyanāḍīdvayātmakasya mukhāvayavasya abhyantare carituṃ 
śīlaṃ yayostau tathāvidhau prāṇāpānasaṃjñau śārīrau mārutau 
samau yaugapadyena tulyarūpatayā vahanāt samānau saṃpādyetyaena 
ekāgrabuddhisaṃpādyaṃ dhyānalakṣaṇaṃ yogāṅgamuktam | 
ekavastvālambane hi antaḥkaraṇe dhyānasaṃpattiḥ, tadbalāt viṣuvadgatiṃ 
prāṇāpānau samāśrayata iti trividhena karmaṇā 
yatendriyamanobuddhiryogī pratyāhāradhāraṇādhyānaparyantaṃ 
yogāṅgaṃ karma prāpto bhavati, natu buddheratyantatirodhānābhāvāt 
samādhimasāvadhirūḍhaḥ | sa hi asya dehavimuktiṃ vinā na sidhyati 
ādehasthiterbuddhivṛttisaṃskāraśeṣasya sattvābhyupagamāt | evaṃ 
cittavṛttinirodhalakṣaṇayogābhyāsaniṣṭhasya yoginaḥ sakāśāt sadā 
svarūpapratiṣṭhasaṃvitkarmayogī viśiṣṭaḥ pratipāditaḥ || 27 ||

sa hi -

bhoktāraṃ yajñatapasāṃ sarvalokamaheśvaram |
suhṛdaṃ sarvabhūtānāṃ jñātvā māṃ śāntimṛcchati || 28 ||

p. 134) māṃ nirvāṇaṃ brahmaśabdena uktamanuttaramupeyaṃ 
paramātmānaṃ jñātvā ātmatvena pratipadya śāntiṃ 
niḥśeṣavikalpakṣobhaviratilakṣaṇāṃ nirvṛtim ṛcchati gacchati 
matsvarūpajñānādeva mucyata ityarthaḥ | kīdṛśaṃ māṃ jñātvā | 
yajñatapasāṃ bhoktāram iha nānāyajñatapaḥ prabhṛtayaḥ kriyāḥ 
śāstreṇa anuṣṭheyatayā coditāḥ | tāsāmajñānamohitā anuṣṭhātāraḥ 
parasparabhinnamātmānaṃ tattatphalabhoktāraṃ manyante, 
paramārthavidastu kartṛbhedābhāvāt sarvakriyāphalānāmahamevaikaḥ 
kartā ca bhoktā ceti yajñatapasāṃ bhoktārm | tathā 
sarvalokamaheśvaraṃ sarvasya kasyacit jantujātasya 
krīḍāmātraprayojanatayā svecchāmātreṇaiva nānātvena avabhāsitasya 
mehśvaraṃ tāsu tāsu kriyāsu ekaviniyoktṛtvāt paramaṃ prabhuṃ, tathā 
paramārthato bhedābhāvāt sarveṣāṃ bhūtānāṃ suhṛdaṃ sarvadā 
nisarganirdoṣasvātmamātrapratiṣṭhitatvāt na kasyacit dviṣṭaṃ, nāpi 
anuraktam | evaṃvidhaṃ māṃ jñātvā madvadeva karmasu pravartamānaḥ 
karmayogī śāntiṃ muktimāpnotīti pūrvasmāt yogino viśiṣṭatvameva 
asya pratipāditamiti || 28 ||

yatraikatāṃ yamunayā gaganāpageva
saṃnyāsadhīrupagatā saha yogabuddhyā |
adhyāyamenamabhigacchata sarvatīrtha-
sāraṃ prayāgamiva pañcamamātmasiddhyai ||

iti śrīrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe pañcamo'dhyāyaḥ || 5 ||


atha ṣaṣṭho'dhyāyaḥ |

	ātmajñānavihitakarmasamuccayānuṣṭhānarūpasya 
sakalaprakaraṇasiddhāntasya prathamena adhyāyena 
prastāvanāmātramupakrāntaṃ, dvitīyena jñānakarmaṇoḥ 
svarūpamupadarśitaṃ, tṛtīyena tayoreva 
jñānakarmaṇorbhinnanuṣṭhātṛviṣayatvabhrāntirapākṛtā, caturthena 
evaṃvidhasamuccayānuṣṭhānarūpasya yogasya parasmāt kāraṇāt 
pravṛttirupadarśitā, karmaṇaśca nānārūpatvaṃ; pañcamena te eva 
jñānakarmaṇī saṃnyāsayogāviti pradarśitam | idānīṃ 
tayorjñānakarmaṇoḥ samuccayena anuṣṭhātavyatayā upadiṣṭayoḥ kiṃ 
sarvavarṇāḥ sarvāśramiṇaśca adhikriyante, uta niyatāḥ kecaneti 
saṃśayanirāsārthaṃ sarvasādhāraṇyamasya 
pratipādayitumadhyāyāntareṇa āha -

śrībhagavānuvāca

anāśritaḥ karmaphalaṃ kāryaṃ karma karoti yaḥ |
sa saṃnyāsī ca yogī ca na niragnirna cākriyaḥ || 1 ||

	karmaphalaṃ tasya tasya karmaṇo yajñādeḥ kriyamāṇasya phalaṃ 
svargādibhogātmakam anāśritaḥ anabhisandhānādanālambitaḥ san yaḥ 
pumān kāryaṃ śāstreṇa kartavyamiti varṇāśramaniyamena coditaṃ 
karma karoti anutiṣṭhati sa saṃnyāsī tyāgavān yogī ca samāhita ucyate | 
tena sarvavarṇāḥ sarvāśramiṇaśca atra 
mokṣaphalasamuccayānuṣṭhāne'dhikṛtā iti uktam | 
karmaphalānabhisandhānamātraṃ ca saṃnyāsalakṣaṇaṃ, tadvacca 
vihitakarmānuṣṭhānaṃ ca yoga iti saṃgraheṇa 
sakalaprakaraṇapratipādyo'rthaḥ siddhāntīkṛtaḥ | tataśca 
yathāpratipāditātmajñānaikatānāntaḥkaraṇatayā 
vyatiriktasukhātmakaphalanirabhikāṅkṣaḥ san 
rāgādidoṣanirmuktasvabhāvatvādadhikārakālāt 

p. 136) prabhṛti prastutaṃ karma yo'nutiṣṭhati, sa brāhmaṇo'stu kṣattriyo 
vaiśyaḥ śūdro vā brahmacārī gṛhastho vānaprastho yatirvā, sa eva 
saṃnyāsī yogī ca bhavati; na punaḥ niragniḥ eva akriyaḥ eva vā | 
niragnyakriyaśabdābhyāṃ brahmacārī yatiśca lakṣyate | yataḥ kecit 
anayoreva āśramayoraparyālocitaparamārthatvāt naiṣkarmyābhimānino 
hetutvaṃ manyamānā brahmacāriyatyoreva saṃnyāsitāṃ yogitāṃ ca 
pratijānate | yo hi brahmacaryādeva parivrājakadharmamāśritaḥ, sa 
dāraparigrahābhāvādanāhitāgniḥ san mūlādeva parihṛtayajñādikriyo 
brahmacārī ekaḥ saṃnyāsī ca yogī ca teṣāṃ mataḥ; yo vā 
āśramatrayānuṣṭhitāḥ 
svādhyāyayāgadānādhyāpanayājanapratigrahādikāḥ sakalāḥ kriyāḥ 
parityajya nirāśiṣamāśramamāśritaḥ, sa yatirdvitīyaḥ saṃnyāsī yogī 
ca teṣāṃ mato dvayorapi anayoreva bandhahetūnāṃ kriyāṇāṃ tyāge sati 
mokṣaphalabhāgitvāt || 1 ||

tadetat kevalajñānavādimatamanupapannameveti pratipādayitumāha -

yaṃ saṃnyāsamiti prāhuryogaṃ taṃ viddhi pāṇḍava |
na hyasaṃnyastasaṃkalpo yogī bhavati kaścana || 2 ||

	ete jñānamātravādinaḥ saṃnyāsasaṃjñayā naiṣkarmyarūpaṃ 
yam arthaṃ kathayanti taṃyogaṃ karmānuṣṭhānameva tvaṃ jānīhi | 
yasmāt saṃnyāsaṃ vinā yogasteṣu nāsti, kintu sa saṃnyāsaḥ 
saṃkalpasya phalābhilāṣasya eva upapadyate, natu karmaṇaḥ sarvavarṇeṣu 
sarvāśrameṣu ca karmāvirahāt | yau kila yatibrahmacāriṇau paritrājakau 
karmatyāgitvena abhimatau, tau gṛhasthavānaprasthocitaṃ karma tyajataḥ; 
svaṃ tu yatitvādisiddhikāraṇaṃ kaṃcit karmaviśeṣamanutiṣṭhata eva | 
yatheṣṭācaraṇe hi tayorvikarmasthataiva paryavasyati | tasmāt 
saṃkalpamātrasaṃnyāsitvāt saṃnyāsitvaṃ sidhyatīti yogī yaḥ sarvadā 
sarvathā svānandāmṛtanityatṛptaparamātmalakṣaṇe 

p. 137) brahmaṇi prarūḍhāhaṃpratyayatayā 
saṃnyastakarmaphalasaṃkalpaḥ, sa yogī karmaṇi samādhimān bhavati, na 
anya iti || 

	yathoktayoḥ saṃnyāsayogayorekapuruṣānuṣṭhātṛniṣṭhayoḥ sarve 
varṇāḥ sarvāśramiṇaśca adhikṛtā anena ślokena pratipāditāḥ, kintu 
anuṣṭhāturyathoktayogaviṣayā ārurukṣāvasthā ca saṃbhavatīti tatkṛtaṃ 
tasya bhedaṃ pratipādayitumāha -

ārurukṣormuneryogaṃ karma kāraṇamucyate |
yogārūḍhasya tasyaiva śamaḥ kāraṇamucyate || 3 ||

	muneḥ jhagiti prāptamātrajñānatvāt manananiṣṭhasya 
anuṣṭhāturyathoktaṃ yogamārurukṣoḥ āroḍhukāmasya tatra nirviplavāṃ 
pratiṣṭhāṃ lipsamānasya karma varṇāśramakramāgatā sā sā kriyā 
kāraṇaṃ yogārohahetuḥ | tasyaiva tathāvidhasyaiva kāraṇabhūtaṃ karma 
ajahata eva 

paśyañśṛṇvan spṛśañjighran ----------------------- | (5|8)

	ityādinā pūrvopadiṣṭanirvyavadhānanityābhyāsavaśāt 
yogārūḍhasya yoge labdhapratiṣṭhacittatve paramātmasamāpannasya 
śamaḥ saṃkalpavikalpakṣobhakṣayaḥ kāraṇaṃ prayojakaṃ nimittam | 
kimuktaṃ bhavati | āgamamātreṇa prāptopadeśasya prāthamakalpikasya 
yogino yogapratiṣṭhālābhotsukasya api tatprāptikāraṇaṃ karmaiva 
upeyatayā vartate | tasmiṃśca śraddhādarābhyāṃ samyaganuṣṭhite, 
jñāne ca prasādakāṣṭhāṃ prāpte tatkarma atyajata eva śamaḥ 
paramopeyatvāt kāraṇaṃ saṃpadyate || 3 ||

	ata eva praśāntasya yogārūḍhasya lakṣaṇamāha -

yadā hi nendriyārtheṣu na karmasvanuṣajjate |
sarvasaṃkalpasaṃnyāsī yogārūḍhastadocyate || 4 ||

	yadā hi yasyāmeva avasthāyāṃ indriyārtheṣu aviruddheṣu 
viṣayeṣu indriyaiḥ spṛśyamāneṣu api karmasu vā tatprāptihetuṣu 
yajñatapaḥ prabhṛtiṣu 

p. 138) kriyamāṇeṣu api nānuṣajjate sahajānandatṛptatvāt na āsaktiṃ 
bhajate, kevalaṃ pavana iva padārthajātaṃ spṛśannapi 
svabhāvavyomapratiṣṭha eva bhavati; tadā sarveṣāṃ saṃkalpānāṃ 
phalābhisandhīnāṃ saṃnyāsitvāt tyāgitvāt yogārūḍhaḥ yoge 
karmasamādhāvārūḍho labdhapratiṣṭhaḥ ucyate | tadevaṃvidhasya 
paramapraśāntabrahmasamāpattikāraṇasya yogārūḍhatvasya na 
ātmavyatirekeṇa bāhyaṃ kiñcit sādhanaṃ bhavitumarhati || 4 ||

ataḥ -

uddharedātmanātmānaṃ nātmānamavasādayet |
ātmaiva hyātmano bandhurātmaiva ripurātmanaḥ || 5 ||

bandhurātmātmanastasya yenātmaivātmanā jitaḥ | 
ajitātmanastu śatrutve vartetātmaiva śatruvat  || 6 ||

jitātmanaḥ praśāntasya parātmasu samā matiḥ | 
śītoṣṇasukhaduḥkheṣu tathā mānāvamānayoḥ || 7 ||

	durvāradvaitapratyayapavanaparikṣobhitabhīṣaṇavikalpakallolasahasra
saṃkulāpāragambhīrabhavasāgaranimagnam ātmānaṃ svabhāvam 
ātmanaiva yathoktajñānopadeśapratyuditotsāhena uddharet 
yathoktayogalakṣaṇaṃ tīradeśamāropayet, natu enaṃ vismṛtasvabalatayā 
upekṣitaṃ tatraiva avasādayet majjayet | yato'sya 
uddharaṇāvasādahetutayā upakārī pratikūlaśca ātmaiva na anyaḥ | 
kathamityāha tasya puruṣasya saṃbandhinaḥ ātmanaḥ ātmaiva svabhāva 
eva bandhuḥ sarvāpatpratīkārakṛt svajanaḥ | yaduktaṃ 

ātmaiva yadi nātmānamahitebhyo nivārayet |
ko'nyo hitatarastasmādya enaṃ vārayiṣyati ||

	iti | kasya ātmaiva bandhuḥ | yena puruṣeṇa sa ātmā svasvabhāvaḥ 

p. 139) ātmanaiva jñānāmṛtābhyavahārābhyāsalabdhabalena jitaḥ 
pravimarśagocarāpādānāt vaśīkṛtaḥ | yena tu asāvātmā 
pramātṛpareṇa satā upekṣitaḥ san na jito na vaśīkṛtaḥ, tasya tathāvidhasya 
ayaṃ śatrutve sarvecchāvyāghātakāritve vartate | tathā ca uktaṃ 

na tatkuryādasistīkṣṇaḥ sarpo vātha viṣolvaṇaḥ |
arirvā nityasaṃkruddho yadātmā duradhiṣṭhitaḥ ||

	iti | yathoktasya ātmajayasya phalamāha - jito yathoktena prakāreṇa 
vaśīkṛta ātmā yena tasya jitātmanaḥ ata eva praśāntasya 
svasvabhāvanirdoṣaparamātmasamāpattivaśāt nivṛttavikalpaviplavasya 
pareṣu vyatiriktatvena pratipanneṣu sarvadehiṣu tathā ātmani 
ahantāpratīyamāne tulyā sāmānyasaṃvidekasvarūpagrāhiṇī matiḥ 
bhavati, tathā śītoṣṇasukhaduḥkhādiṣu bāhyābhyantaranimittajeṣu 
dvandvopaplaveṣu, tathā pareṇa prayujyamāne māne pūjāyāṃ, tathā 
avamāne parābhave tathaiva samānā matirbhavati | na tasya 
sarvagatādekasmāt svabhāvanirvikārāt 
paramātmano'haṃpratītirvyatiricyate, nānāvidheṣu vikārakāraṇeṣu 
upasthiteṣu api tasya satye svātmani anusandhānaṃ lokavat na vicchidyate 
ityarthaḥ || 7 ||

	sa ca evaṃvidho yogārūḍha ucyate ityāha -

jñānavijñānatṛptātmā kūṭastho vijitendriyaḥ |
yukta ityucyate yogī samaloṣṭāśmakāñcanaḥ ||

	jñānaṃ śāstrataḥ svarūpāvagamamātraṃ, vijñānaṃ 
śāstrāvagatasya tattvasya, sākṣātkāraḥ, tābhyāṃ tṛpto nirākāṅkṣaḥ 
ātmā svabhāvo yasya sa tathā, ata eva kūṭasthaḥ 
prāptaparamārthasattvanityātmapratyayatvāt kūṭasthaḥ śailādivat 
niṣprakampo yato vijitendriyaḥ vaśīkṛtabāhyāntaḥkaraṇaḥ, natu 
tadvaśaḥ; evaṃ lobhādidoṣarahitatvāt 

p. 140) samau loṣṭāśmānau mṛtpiṇḍapāṣāṇau kāñcanaṃ ca hema 
yasya, sa tathāvidho yuktaḥ yogārūḍha ucyate || 8 ||

suhṛnmitrāryudāsīnamadhyasthadveṣyabandhuṣu |
sādhuṣvapi ca pāpeṣu samabuddhirviśiṣyate || 9 ||

	yasya suhṛdariprabhṛtiṣu prītidveṣahetuṣu nānāvidheṣu 
anyonyabhinnarūpeṣu jantuṣu samā 
brahmalakṣaṇanirviśeṣaikatattvadarśitvādekarūpā buddhiḥ, sa viśiṣyate 
naiṣkarmyayoginaḥ sakāśāt prakarṣaṃ labhate | sa hi yat vastu 
samādhipratipakṣatvāt pariharati, yacca tadānuguṇyāt svīkurute, 
tābhyāṃ dveṣapriyābhyāṃ dveṣarāgadoṣai prakāśyete | yastu 
sarvasāmyaṃ prāptaḥ, sa kriyāsu vartamāno'pi samabuddhitvāt 
brahmabhūta eveti viśiṣyata iti uktam | suhṛdādīnāṃ bhedo vyākhyāyate-
suhṛt yaḥ svabhāvataḥ śobhanahṛdayaḥ, mitraṃ 
maitrīkaraṇanirvṛttasauhṛdam, ariḥ śatruḥ kāraṇavaśāt dveṣṭā, 
dveṣyastu vināpi kāraṇamapriyaḥ, udāsīnaḥ na mitraṃ na śatruḥ, 
madhyastho yaḥ kenāpi prakāreṇa mitratvamamitratvaṃ ca āśrayitumarhati, 
bandhavo jñātayaḥ, sādhavaḥ śāstroditasadācāraniyatāḥ, 
pāpāstadviparītā duṣṭācārasaṃkalpāḥ | teṣu sarveṣu 
samabuddhitvamasya karmayogina eva boddhavyam - yat śatrubhāvaṃ 
pratipanneṣu śāstracoditatvāt nyāyyavadhādikarmapravṛttāvapi 
nirvikāraikātmaniṣṭhatvam, natu śatrau śāstrāvihitatvādanyāyyā 
mitrapravṛttiḥ | yadyevamabhaviṣyat, tat tatra ātmajñānamarjunasya 
upadiśya tasmādyudhyasva iti upasaṃhāre na abhyadhāsyata | tasmāt 
karmayoginastatra tadvarṇāśramakramāgatāṃ tāṃ tāṃ śāstracoditāṃ 
kriyāmanatikramata eva sarvabhāvasāmyabhāvanā atra vivakṣitā || 9 ||

	ata eva āha -

ihaiva tairjitaḥ sargo yeṣāṃ sāmye sthitaṃ manaḥ |
nirdoṣaṃ hi samaṃ brahma tasmādbrahmaṇi te sthitāḥ || 10 ||

p. 141) ihaiva asminnevaṃvidhakriyākāriṇi śarīre vartamānaiḥ taiḥ sargaḥ 
punarbhavo jitaḥ adhaḥkṛtaḥ, yeṣāṃ yathāpratipādite sāmye 
sarvabhāvābhede manaḥ cittaṃ sthitaṃ labdhapratiṣṭham | brahma ekaṃ hi 
vaiṣamyakāraṇabhūtarāgādirahitatvāt nirdoṣam atastadeva samaṃ 
sarvathā sarvadā sarvatra viśuddhasaṃvinmātraikasvarūpam | tasmāt ye 
sāmye sthitāḥ te brahmaṇi eva sthitāḥ iti uktam || 10 ||

	yathoktasāmyānatikramasamāhitasya cittavṛttinirodhalakṣaṇamapi 
yogamitarakriyāvadahorātramdhye vyavasthitābhyāsakālaṃ 
viśiṣṭetikartavyatānvitamapi karmayoginaḥ ślokaṣaṭkena 
abhyanujānannāha -

yogī yuñjīta satatamātmānaṃ rahasi sthitaḥ | 
ekākī yatacittātmā nirāśīraparigrahaḥ || 11 ||

śucau deśe pratiṣṭhāpya sthiramāsanamātmanaḥ |
nātyucchritaṃ nātinīcaṃ cailājinakuśottaram || 12 ||

tatraikāgraṃ manaḥ kṛtvā yatacittendriyakriyaḥ |
upaviśyāsane yuñjyādyogamātmaviśuddhaye || 13 ||

samaṃ kāyaśirogrīvaṃ dhārayannacalaḥ sthiraḥ | 
saṃpaśyan nāsikāgraṃ svaṃ diśaścānavalokayan || 14 ||

praśāntātmā vigatabhīrbrahmacārivrate sthitaḥ |
manaḥ saṃyamya maccitto yukta āsīta matparaḥ || 15 ||

yuñjannevaṃ sadātmānaṃ madbhakto'nanyamānasaḥ |
śāntiṃ nirvāṇaparamāṃ matsaṃsthāmadhigacchati || 16 ||

	krameṇa etat vyākhyāyate | yogī 
prabandhapratipāditapratipādayiṣyamāṇasvarūpeṇa 
prastutavyākhyānayogāntaravilakṣaṇaparikarmaṇārva 
kāladeśāvirodhinā samādhiviśeṣanirapekṣeṇa 
samastāntarbahiṣkaraṇaprāṇavṛttiṣu 

p. 142) api aniruddhaprasareṇa karmayogena yogavān śāstravihitatvāt 
ātmānam antaḥkaraṇaṃ jīvātmānaṃ vā satataṃ pratyahaṃ 
vyavasthāpitaniyatakālānatikrameṇa rahasi aikāgryabādhakarahite deśe 
sthitaḥ yata ekākī kevalaḥ yatacittātmā yataṃ vinigṛhītaṃ cittaṃ mano 
yena tādṛśa ātmā kṣetrajño yasya, sa tathāvidhaḥ san paramātmani 
samādadhīta cittavṛttinirodhalakṣaṇamapi yogamanutiṣṭhedityarthaḥ; kintu 
irāśīḥ āśiṣaḥ phalāśaṃsāto niṣkrānto mokṣalakṣaṇo'pi phale 
prārthanā dainyarahitaḥ, tathā aparigrahaḥ sarvatra 
mamatvābhimānarahitaḥ, tathā maccittatvādivakṣyamāṇadharmayukto 
yuñjīta ityanena karmayogasamādhānāpramattena ayaṃ yogo'bhyasanīya 
iti uktam | asya idānīṃ parikarma abhidhīyate | kiṃ kṛtvā yuñjyāt | 
ātmanaḥ śucau deśe yatyādyapekṣayā puṇyasaritparisaragiriguhādau, 
gṛhasthāpekṣayā sūpaliptaviviktasadanādau viśuddhe sthāne āsanaṃ 
samādhiviṣṭaraṃ pratiṣṭhāpya sthitiṃ prāpayya | kīdṛśam | sthiraṃ 
niścalaṃ tathā sukhitvārthamucchrāyanimnatvātiśayarahitaṃ, tathā 
cailaṃ vastraṃ, ajinaṃ mṛgādicarma, kuśā darbhāḥ, taduttaraṃ 
tatpradhānam | tena gṛhasthasya cailājinottaram, yatyādeḥ kuśottaram, evaṃ 
tatra sthirasukhe āsana upaviśya ekāgraṃ dhyeyatvena 
parigṛhītaikavastuniṣṭhaṃ manaḥ cittaṃ kṛtvā ata eva yatacittendriyakriyaḥ 
yatā niṣiddhabahiṣprasarāścittendriyāṇāṃ manaso'kṣāṇāṃ ca 
kriyāḥ saṃkalpavikalpaśabdādigrahaṇarūpāṇi karmāṇi yena, 
tathāvidhaḥ san; yogaṃ cittavṛttinirodhātmakaṃ yuñjyāt samādadhīta | 
kimartham | ātmaviśuddhaye ātmano'ntaḥkaraṇasya 
bāhyoparāgalakṣaṇamalakṣālanāya kṣetrajñasya vā 
dehādyahaṃpratyayarūpakalaṅkaparimārjanāya | evaṃ 
cittasamādhānamabhidhāya 

p. 143) tatsādhanabhūtaṃ kāyasaṃsthānamāha | kāyaḥ kaṇṭhādadhaḥ 
śarīraṃ śiro mūrdhā grīvā kandharā kāyaśirogrīvaṃ tat samam 
avaktramṛju dhārayan bibhrat, tathārūpo'pi acalaḥ 
niṣprakampo'ṅgamejayatvādicittavikṣepakāraṇarahitaḥ sthiraḥ tathā 
svaṃnāsikāgraṃ ghrāṇaprāntaṃ saṃpaśyan ata evaca diśaḥ kāṣṭhā 
anavalokayan aprekṣamāṇaḥ | dikṣu dṛgvikṣepaparihārārthaṃ 
nāsikāgrasaṃdarśanamuktam, natu tat lakṣyīkartavyamiti abhiprāyaḥ | 
itthaṃ vihitasamastasamādhiparikarasya 
paramātmasamāpattilakṣaṇamokṣaprātpihetuṃ viśeṣaṇaṃ 
pratipādayitumāha praśāntātmā praśāntaḥ 
sandehādivikalpakṣobharahitaṃ ātmā antaḥkaraṇaṃ yasya sa, tathā 
sarvātmatvamavagamya sarvataścarācrabhūtajātāt vigatabhīḥ 
nivṛttasādhvasaḥ; tathā brahmacārivrate sthitaḥ brahmacāriṇaḥ 
kāmasaṃkalpavarjanaṃ vrataṃ tasmin sthitaḥ, iti 
sarvārthaviṣayaprārthanārahitatvamanena viśeṣaṇena utkam | itthaṃ 
manaḥ sa.yamya sarvataścittaṃ nigṛhya mayyeva paramātmani ekasmin tattve 
cittaṃ saṃvedanaṃ yasya sa tathāvidho yuktaḥ samāhitaḥ san matparaḥ 
tathāvidhāt yogadananyaviṣayamanā āsīta tiṣṭhet | evam 
etadviśeṣaṇaviśiṣṭaḥ sadā pratyaham ātmānam antaḥkaraṇaṃ yuñjan 
samādadhānaḥ madbhaktaḥ māmeva ātmatvena samāśrito'ta eva 
ananyamānasaḥ anyasmin viṣayāntare na yasya mānasaṃ madhukta iti 
pāṭhe tu mayyeva yukto matsamāpattimeva samādhiphalatvena pratipannaḥ 
san matsaṃsthāṃ mayi vartamānāṃ śāntiṃ 
svābhāvikasarvavikārarahitatvalakṣaṇaṃ praśamam adhigacchati svīkurute 
| kīdṛśīṃ śāntim | nirvāṇaparamāṃ nirvāṇaṃ śarīrādāvanātmani 
ātmapratyayādikṣobhaviratirūpā nirvṛtiḥ paramaṃ prakṛṣṭaphalatayā 
sthitaṃ yasyāṃ sā tathoktā tām || 16 ||

p. 144) itthamasya yogasya karmasamādhilakṣaṇamahāyogāt nirvartino 
yathoktādvaitātmajñānaniṣṭhatayā anuṣṭheyatayā abhyanujñātasya 
anyadapi parikarma pratipādayitumāha -

nātyaśnatastu yogo'sti na caikāntamanaśnataḥ |
na cātisvapnaśīlasya jāgrato naiva cārjuna || 17 ||

yuktāhāravihārasya yuktaceṣṭasya karmasu |
yuktasvapnāvabodhasya yogo bhavati duḥkhahā || 18 ||

	eṣa yathokto yogaḥ evaṃvidhasya anuṣṭhātuḥ naiva asti naiva 
saṃbhavati | kīdṛśasya | atyarthamaśnataḥ sauhityaparyantaṃ 
bhuñjānasya, tathā ekāntaṃ sarvathānaśnataḥ api nāsti tathā 
atisvapnaśīlasya nityaṃ nidrāratasya, tathaiva sadā jāgrataḥ unnidrasya api | 
atyaśanāt hi kāyagauravaśūlābhiṣyandādayo doṣāścittamakarmaṇyaṃ 
saṃpādayanti, atyantānaśanācca dhātukṣayādayaḥ 
śaktihānimāvahanti, atisvapnādālasyādaya 
udyogabhaṅgamatyantanidrāpahārādajīrṇādayo 
daurmanasyādikamāpādayanti || ato yktāhāravihārasya yukto 
hitamātrakālāvacchinnatvādupapanna āhāro bhojanaṃ 
vihāraścaṅkramaṇādiryasya tādṛśasya, tathā karmasu 
dṛṣṭādṛṣṭaviṣayeṣu vyāpāreṣu yuktā 
cittaśarīrānavasāditvaparyavasāyinī ceṣṭā manaḥkāyavyāpāro yasya 
tasya tādṛśasya, tathā yuktau yathākālabhāvitvāt nyāyyau svapnabodhau 
nidrājāgarau yasya, tasya tādṛśasya yogina eṣa yogo duḥkhahā bhavati 
abhyasyamānaḥ kleśaṃ hanti sukhena saṃpadyate ityarthaḥ || 18 ||

	evamāhāravihāraniyamamuktvā siddhilakṣaṇaṃ yogamāha -

yadā viniyataṃ cittamātmanyevāvatiṣṭhate |
niḥspṛhaḥ sarvakāmebhyo yukta ityucyate tadā || 19 ||

	yadā, asya yoginaḥ samādhyabhyāsakāṣṭhāṃ prāptasya cittaṃ 
viniyataṃ 

p. 145) nigṛhītaṃ sat samprajñātasamādhibhūmikā 
vitarkavicārānandāsmitānugatā atikrāntaṃ sat sthūlasūkṣmeṣu 
dhyeyeṣu labdhasaṃyamatvāt tāni tyaktvā ekasmin dhyeye ātmanyeva 
svabhāva eva avatiṣṭhate, avasthitiṃ pratiṣṭhāṃ saṃyamaṃ labhate, tadā 
tasyāṃ daśāyāmātmaikārāmatvāt sarvebhyo vyatiriktebhyo bhogebhyaḥ 
spṛhārahito nirabhikāṅkṣaḥ sannasau yuktaḥ sampannanirbījasamādhiḥ iti 
ucyate || 19 ||

	tasya ātmadhyānaniṣṭhasya yogicittasyaiva yogaśabdavācyasya 
upamānamāha -

yathā dīpo nivātastho neṅgate sopamā smṛtā |
yogino yatacittasya yuñjato yogamātmani || 20 ||

	ātmani riruttare dhyeye yogaṃ samādhiṃ yuñjānasya yoginaḥ 
sarvataḥ pratyāhṛtatvāt yataṃ nigṛhītaṃ cittaṃ yena tādṛśasya, sā 
upamā tadupamānaṃ tattvajñaiḥ smṛtā | yathā dīpaḥ pradyotako 
nivṛttavātadeśe sthitaḥ san neṅgate na prakampate, tathaiva ātmālambane 
samādhau sthitaṃ yogicittaṃ na prakampate iti 
upameyavākyamadhyāhāryam | anena dīpopamānena 
pratyāsannaprabalavipakṣatvāt yatnasaṃrakṣaṇīyatvaṃ yogicittasya 
pratipāditam || 20 ||

	athāsya parasya yogasya lakṣaṇamāha -

yatroparamate cittaṃ niruddhaṃ yogasevayā |
yatra caivātmanātmānaṃ paśyannātmani tuṣyati || 21 ||

sukhamātyantikaṃ yatra buddhigrahyamatīndriyam |
vetti yatra na caivāyaṃ sthitaścyavati tattvataḥ || 22 ||

yaṃ labdhvā cāparaṃ lābhaṃ manyate nādhikaṃ tataḥ |
yasmin sthito na duḥkhena guruṇāpi vicālyate || 23 ||

p. 146) taṃ vidyād duḥkhasaṃyogaviyogaṃ yogasaṃjñitam |
sa niścayena yoktavyo yogo'nirviṇṇacetasā || 24 ||

taṃ yogasaṃjñitaṃ samādhyākhyamarthaṃ vidyāt jānīyāt | 
kaṃ tam | yatra yasmin niruddhaṃ nivṛttabahiṣpracāratayā niyamitaṃ yat 
cittaṃ yogasevayā yogasya samādheḥ prāpyasya anyasya sevayā 
sevanādāśrayaṇādupalabdhaparamopeyatvāt tatraiva viśrāntaṃ sat 
yogāntaraviṣayaṃ prayatnamutsṛjati, tasyaiva yogasya niruttaratvāt | ata eva 
tasyāmavasthāyāṃ yogī yatra ātmanaivātmānaṃ paśyan 
svasaṃvedanena svarūpamanubhavan ātmani svabhāve eva 
adhikaraṇabhūte tuṣyati parāṃ prītiṃ pratipadyate, taṃ yogaṃ vidyāditi 
sambandhaḥ | tadānīṃ hi nivṛttasakalabāhyoparāgaṃ 
cittamātmasamāpannaṃ sat śuddhasaṃvedanalakṣaṇataddharmatvena 
avatiṣṭhate | tathā yatra ātyantikam anantaṃ 
nirupamasvarūpānubhavacamatkāramayaṃ sukhaṃ sahaja 
ānando'bhivyajyate | kīdṛśaṃ sukham | atīndriyaṃ śrotrādīni 
bāhyendriyāṇi atītamatikrāntam, ata eva buddhigrāhyaṃ buddhyā 
tātkālikyā bodhalakṣaṇayā, ātmanaḥ svaśaktyaiva grāhyaṃ saṃvedyam 
ayaṃ yogī vetti jānāti, taṃ yogaṃ vidyāt | tathā yatra sthitaḥ yasmin 
labdhaviśrāntirayaṃ yogī tattvataḥ paramātmarūpāt paramārthāt na 
cyavate na viyujyate | tathā yaṃ yogamāsādya tato'dhikaṃ 
tasmādutkṛṣṭam aparam anyaṃ lābham iṣṭaprāptiṃ yogī na manyate na 
buddhyate | ata eva prāguktaṃ yatra sthitastattvato na cyavata iti | ata eva 
yasmin sthitaḥ saṃrūḍho nivṛttetaravyāpṛtiḥ san yogī guruṇāpi 
prabalenāpi kenacin mānasena śārīreṇa vā duḥkhena na vicālyate na tato 
vyutthāpyate, taṃ yogasaṃjñitamarthaṃ vidyāt | kīdṛśam | 
duḥkhasaṃyogaviyogaṃ duḥkhaṃ viṣayeṣu indriyapravṛttijanito 

p. 147) rājasaḥ kleśaḥ, tena saṃyogaḥ saṃsāridaśāyāṃ sambandhaḥ, 
tasmāt viyogo virahastaṃ, heyavastuprārthanājanmanā duḥkhena 
sambandhābhāva eva viyoga ityarthaḥ | sa evaṃlakṣaṇo yogaḥ paraḥ 
samādhirnaruttarānandalābhalakṣaṇamahābalahetuḥ niścayena 
niḥsandehatvena anirviṇṇacetasā anudvignamanasā yoktavyaḥ 
samādhātavyaḥ | alabdhabhūmikasya hi yoginaḥ prathamaṃ sandehaḥ, 
ārurukṣataśca abhyāsadaśāyāṃ kleśaḥ sambhāvyate iti niścayena 
anirviṇṇacetasā sa yoktavya iti uktam || 21-24 ||

	evaṃ bāhyaviṣayaparihārakrameṇa cittavṛttinirodhalakṣaṇāṃ 
samādhisiddhimabhidhāya punarapi prakṛtakarmayogakramameva 
samāśrayan tatsiddhiṃ pradarśayitumāha -

saṃkalpaprabhavān kāmāṃstyaktvā sarvānaśeṣataḥ |
manasaivendriyagrāmaṃ viniyamya samantataḥ || 25 ||

śanaiḥ śanairuparamed buddhyā dhṛtigṛhītayā |
ātmasaṃsthaṃ manaḥ kṛtvā na kiñcidapi cintayet || 26 ||

yato yato niścarati manaścañcalamasthiram |
tatastato niyamyaitadātmanyeva vaśaṃ nayet || 27 ||

praśāntamanasaṃ hyenaṃ yoginaṃ sukhamuttamam |
upaiti śāntarajasaṃ brahmabhūtamakalmaṣam || 28 ||

yuñjannevaṃ sadātmānaṃ yogī niyatamānasaḥ |
sukhena brahmasaṃyogamatyantamadhigacchati || 29 ||

	krameṇa etat vyākhyāyate | śanaiḥ śanaiḥ 
uttarottaraviśeṣārohaṇakrameṇa, natu sahasaiva uparamet bāhyeṣu 
viṣayeṣu āsaṅgāt, tathā dehādāvātmābhimānāt nivarteta | kena 
sādhanena | buddhyā samyagjñānena | kīdṛśyā | dhṛtigṛhītayā dhṛtiḥ 
paramātmani 

p. 148) ahaṃkārāvaṣṭambhalakṣaṇaṃ dhairyaṃ tayā gṛhītā svīkṛtā 
yā buddhistayā tādṛśyā | sāttvikī hi dhṛtiryāṃ buddhiṃ dhārayati, sā 
atra yoge sādhanatvamarhati, yasyā dhṛterlakṣaṇaṃ vakṣyati -

dhṛtyā yayā dhārayate manaḥ prāṇendriyakriyāḥ |

	yogenāvyabhicāriṇyā dhṛtiḥ sā pārtha sāttvikī || (18|33)

	iti | pūrvaṃ kiṃ kṛtvā uparamet | manasaiva pareṇa 
mokṣaviṣayeṇaiva cetasā prāk sthāvarasaṃjñayā uktena 
saṃkalpaprabhavān viṣayagrahaṇavyagrajaṅgamamanaḥsamutthān sarvān 
dṛṣṭānuśravikabhedena samastān tathā 
pratyekamaśeṣānavidyamānasaṃskāramātrān kāmān bhogān tyaktvā 
parihṛtya tathā tenaiva manasā, natu viṣayaviṣayeṇa indriyagrāmaṃ 
karaṇavargaṃ samantataḥ sarvebhyo vihitebhyo'pi śabdādibhyo viniyamya 
rāgādidoṣaparihārātmanā viśeṣeṇa vigṛhya, ityanena 
prastutasamuccayānuṣṭhānasādhyakarmayogaviṣayaṃ kāmatyāgasya 
indriyaniyamasya ca pūrvoktaṃ kramameva smārayati | evamanena krameṇa 
ātmasaṃsthaṃ mukhye ātmani brahmāparanāmni samyak sthitaṃ 
labdhaviśrānti manaḥ antaḥkaraṇaṃ kṛtvā sampādya tadvatiriktaṃ 
vstvantaraṃ na kiñcida dhyāyet | tadānīṃ hi sarvaṃ brahmarūpatayaiva 
prakāśate | evaṃ vidhena abhyāsakrameṇa yato yato yasmāt yasmāt 
kutaścidbandhanabhūtāt ābhyantarād bāhyācca manaḥ ceto niścarati 
nirgacchati, tatastataḥ tasmāt tasmāt niyamya pratiṣidhya ātmani 
paramakāraṇa eva vaśaṃ nayet tatraiva nibadhnīyāt | yataḥ svabhāvata etat 
cañcalaṃ capalaṃ tathā prārthite'pi viṣaye na ciramavatiṣṭhate iti asthiram 
yasmāt tasminnātmavaśaṃ nīte sati enaṃ yoginaṃ praśāntamanasaṃ 
viṣayasukhaunmukhyakṣobhaviratinirvṛtacetasaṃ santaṃ svayameva uttamaṃ 
nityaniravadyasvabhāvatvādutkṛṣṭaṃ sukhaṃ sahaja ānandaḥ upaiti 

p. 149) upagacchati | kīdṛśaṃ yoginam | śāntarajasaṃ śāntaṃ vilīnaṃ 
rajo viṣayapravṛttiheturguṇo yasya, ata eva brahmabhūtaṃ 
paramātmasamāpannaṃ yasmāt akalmaṣam 
avidyamānājñānalakṣaṇakilviṣakalaṅkam | evamanena yathoktena 
krameṇa pūrvameva prabandhapratipāditena niyatamānasaḥ 
samprayatāntaḥkaraṇo yogī sadā sarvāsu avasthāsu paśyan śṛṇvan (5|8) 
ityādinā pratipāditāsu ātmānaṃ yuñjan samādadhānaḥ sukhena 
āsanaprāṇāyāmapratyāhāradhyānadhāraṇādikleśābhāvādanāyāse
na brahmaṇā paramātmanā saṃyogaṃ abhedam atyantaṃ nityameva 
adhigacchati prāpnoti || 25-29 ||

	itthaṃ siddhaniruttarasamādheḥ karmayogino lokottaraṃ vyavahāraṃ 
pratipādayitumāha -

sarvabhūtasthamātmānaṃ sarvabhūtāni cātmani |
īkṣate yogayuktātmā sarvatra samadarśanaḥ || 30 ||

yo māṃ paśyati sarvatra sarvaṃ ca mayi paśyati |
tasyāhaṃ na praṇaśyāmi sa ca me na praṇaśyati || 31 ||

sarvabhūtasthitaṃ yo māṃ bhajatyekatvamāsthitaḥ |
sarvathā vartamāno'pi sa yogī mayi vartate || 32 ||

ātmaupamyena sarvatra samaṃ paśyati yor'juna |
sukhaṃ vā yadi vā duḥkhaṃ sa yogī paramo mataḥ || 33 ||

	yathokte'smin karmayoge yuktātmā samāhitaḥ sarvatra sarvadā 
sarvathā avahitacitto yogī ātmānam advayacinmātraikalakṣaṇatayā 
uktasvarūpaṃ sarvabhūteṣu parasparaṃ bhinnatvena avasthiteṣu carācareṣu 
prāṇiṣu sthitaṃ paśyati, yadātmanaḥ sāmānyacinmātraṃ rūpamekaṃ 
tadātmakānyeva bhūtāni prekṣate ityarthaḥ | tathoktasvarūpe svātmani 
sarvabhūtāni vigalitānyonyabhedāni paśyati, ityātmanaḥ 
sarvabhūtānāṃ 

p. 150) cābhedadarśanaṃ pratipāditameva | 
abhedadarśanapratipādanaparametat | yathā caitat sambhavati tathā 
pratipāditameva prāk, tathāpi smṛtyarthaṃ punarucyate | ātmā nāmāyaṃ 
sukhaduḥkhagrāhyagrāhakamūḍhatvaśūnyatvādisakalavikalpavirahaviśu
ddhasamvitprakāśaikalakṣaṇaḥ, tasya saṃveditṛtvaṃ nāmāvyabhicārī 
guṇaḥ | tena yadyat saṃvetti tattat saṃvedyamānameva tena tena rūpeṇa 
ātmānaṃ labhate | saṃvedyamānatā ca nirvikalpāvasthāpūrvikā bhavati 
| tena yatakiñcit yadā yadā yatra yena yena pramātrā saṃvedyate, 
tattadadvayānantacinmātrasvarūpamiti ātmanaḥ saṃvediturvedyānāṃ ca 
sarvabhūtānāṃ nāsti vāstavaḥ kaścidbhedaḥ, 
devalamacintyaparameśvarmāyodbhāvito vedyavedakavikalpaḥ 
sarvamidamanyonyaṃ vibhinnatayā avabhāsayati | sa ca 
parameśvaraprasādādunmiṣitayā vidyākhyayā divyayā dṛśā 
tattvavidbhistādṛśo vibhāvyamāno yadā vigalati, tadā 
bhinnasetusāgarasalilavat sarvamidamātmatayā aikyenāvabhāsate | 
jñānakarmasamuccayānuṣṭhānātmani cāsmin mahāyoge 
pratyuditavidyāśaktirevādhikṛtā iti | karmayogī sarvatra sthāvare jaṅgame 
ca bhūtagrāme samadarśanaḥ advaitātmatattvaikadarśī ityuktaḥ | yaśca 
ātmā so'hamevaṃ ityabhedaṃ bhagavān pratipādayitumāha- yo yogī 
sarvatra bhāvajāte māṃ yathoktātmatattvaikarūpamuktayā upapattyā 
paśyati mayi ca sarvaṃ tathaiva paśyati tasya tattvadarśinaḥ ahaṃ na 
praṇaśyāmi nādṛśyo bhavāmi, so'pi me svarūpabhūtatvāt na 
praṇaśyati nādṛśyatvamāpadyate, iti karmayogasiddhasya yoginaḥ 
svātmanaśca abhedapratipādanaparametad bhagavadvacanam | kiñca yo yogī 
sarvatra sarvasmin dehaprabhṛti sukhaṃ duḥkhaṃ vā anyaṃ vā 
kaṃcitprāṇidharmamuktayā 

p. 151) upapattyā saṃvedyamānasya saṃvidātmakatvāpattirūpatayā 
samaṃ saṃvinmātraikasvabhāvaṃ paśyati budhyate | katham | 
ātmaupamyena ātmānamupamānīkṛtya svānubhavavadityarthaḥ | sa 
sarvathā sarveṇa kenacit sādhāraṇena prakāreṇa vartamāno'pi mayi 
vartate madabhinno'hamevāsāvityarthaḥ | sa evaṃvidho yogī sarvāsu 
avasthāsu aviliptaniruttarasamādhiphalāsvādo 
durvāravighnavṛndānubandhaduḥsādhayogāṅgānuṣṭhānaniṣṭhopalabhy
asamādhiphalapūrvoktayogyapekṣayā paramo niruttarātiśayayuktaḥ 
īśvaravat sarvasāmyadaśādhirūḍhatvāt jīvanmukta ityarthaḥ || 30-33 ||

	atha samprati ananubhūtatvādasya sarvasāmyapratipattiphalasya 
samādherasambhāvyatāṃ manyamāno'rjuna āha -

yo'yaṃ yogastvayā proktaḥ sāmyena madhusūdana |
etasyāhaṃ na paśyāmi cañcalatvāt sthitiṃ parām || 34 ||

cañcalaṃ hi manaḥ kṛṣṇa pramāthi balavad dṛḍham |
tasyāhaṃ nigrahaṃ manye vāyoriva suduṣkaram || 35 ||

	he kṛṣna yo'yaṃ samanantaraṃ 
karmayogalakṣaṇo'nyayogavilakṣaṇo yogastvayā proktaḥ etasya parāṃ 
sthitiṃ prakṛṣṭāṃ pratiṣṭhāṃ na paśyāmi na tarkayāmi cañcalatvāt 
anavasthitatvāt | yasmāt tatsādhanaṃ manaścañcalaṃ prakṛticapalamataḥ 
pramāthi pramathanaśīlaṃ, yataḥ kṛcchralabdhāmapi 
bhūmikāmunmārgapravaṇatvādāśu vināśayati | na ca tadvyāvartayituṃ 
śakyaṃ yato balavat asya viṣayān pratyabhidhāvataḥ 
śailendraśikharaviśīryamāṇasalilaughavat durdharaṃ balaṃ, yato 
janmasahasrābhyasteṣu viṣayaraseṣu dṛḍhāsaktatvāt dṛḍhaṃ | tasya 
evaṃvidhasyāsya manaso nigraham utpathāt pratiṣedhanaṃ sutarāṃ 

p. 152) duṣkaraṃ dussādhaṃ sambhāvayāmi, kasyeva vāyoriva yathā 
vāyuḥ svācchandyena dikṣu prasaran nigrahītumaśakya evametanmanaḥ || 
34-35 ||

	atha etadabhyupagamapūrvamuttaraṃ bhagavānāha -

asaṃśayaṃ mahābāho mano durnigrahaṃ calam |
abhyāsena tu kaunteya vairāgyeṇa ca gṛhyate || 36 ||

	nāstyatra saṃśayaḥ, idaṃ calaṃ svabhāvacapalaṃ manaḥ 
duḥkhena nigrahītuṃ śakyate; kintu abhyāsena vairāgyeṇa ca 
upāyadvayena gṛhyate niyamyate | abhyāsaścātra karmayoge 
paśyañśṛṇvan (5|8) ityādiprāguktakrameṇa sarvendriyavṛttiṣu 
vihitaviṣayaunmukhyena pravartamānāsu sarvaprāṇavṛttiṣu ca 
śarīrāvyabhicāritvāt tathaiva pravartamānāsvapi upadeśānusāriṇā 
krameṇa yathokte svātmani niveśātmakasthitilābhaviṣayo yatnaḥ, 
vairāgyaṃ ca aniṣiddhaviṣayasparśānubhūyamāne sukhe 
sahajānandanirupamāsvādāvismaraṇādanāsaṅgaḥ, tābhyāmevaṃ 
vidhābhyāṃ 
karmayogādhikṛtapuruṣaikagocarābhyāmabhyāsavairāgyābhyāmetat 
sucañcalamapi cittaṃ niyantuṃ śakyameva || 36 ||

	ata eva -

asaṃyatātmanā yogo duṣprāpa iti me matiḥ |
vaśyātmanā tu yatatā śakyo'vāptumupāyataḥ || 37 ||

	yato vyākhyātābhyāsalakṣaṇasādhanābhāvāt asaṃyatātmanā 
aniyamitāntaḥkaraṇena puruṣeṇa eṣa yogo duṣprāpaḥ durlabhaḥ | 
vaśyātmanā vidheyāntaḥkaraṇena punaḥ puruṣeṇa yatatā yatamānena 
nityamavicchinnotsāhatayā prayatnaṃ kurvatā upāyataḥ 
yathoktajñānalakṣaṇādupāyāt svīkartuṃ śakya eva || 37 ||

	atha upāyasya jñānarūpasya śrutimātrāvagatatvād 
abhyāsavairāgyayośca 

p. 153) atyantaduḥsādhatvādātmanaśca saṃsāridharmānuparamād 
yogasya duravāpatvaṃ manyamānaḥ, śraddhāmātrasya ekasya kāraṇasya 
yogaṃ prati upāyatvaṃ syānna vā iti saṃśayāno'rjuna uvāca -

ayataḥ śraddhayopeto yogāccalitamānasaḥ |
lipsamānaḥ satāṃ mārgaṃ pramūḍho brahmaṇaḥ pathi || 38 ||

anekacitto vibhrānto mohasyaiva vaśaṃ gataḥ |
aprāpya yogasaṃsiddhiṃ kāṃ gatiṃ kṛṣṇa gacchati || 39 ||

	āptopadiṣṭādupāyāt niḥsaṃśayatayā phalasya sambhāvanā 
śraddhā iti kiloktā, tayopetaḥ śraddhāvān ata eva satāṃ 
satpuruṣāṇāmuttamaphalārthināṃ puṃsāṃ mārga panthānaṃ 
prepsurapi yadi yogāt uktalakṣaṇāt samādheḥ calitamānasaḥ 
vicyutacittavṛttiḥ, ata eva ayataḥ yatnaśūnyaḥ; tataśca brahmaṇaḥ parasya 
upeyasya tattvasya pathi prāpyupāyarūpe mārge pramūḍhaḥ prakarṣeṇa 
mūḍhaḥ samyagjñānarahitaḥ | ataścopāyāniścayāt anekacittaḥ 
vikalpākulatvāt pratikṣaṇaṃ cañcalatvād bahuvidhamanovṛttirata eva 
vibhrāntaḥ na kvacillabdhasthitiḥ, yato mohasyaiva ajñanasya vaśaṃ gataḥ 
vidheyatāṃ prāptaḥ syāt | tadeva doṣasāmagryā yogasaṃsiddhiṃ 
samādhilābhamaprāptaḥ san kāṃ gatiṃ gacchati tasyaivaṃvidhasya 
śraddhāmātraikālambanasya pariśiṣṭopāyarahitasya dehādūrdhvaṃ 
kīdṛśe yonyantare gamanamityarthaḥ || 38-39 ||

	tadeva pṛcchati -

kaccinnobhayavibhraṃśācchinnābhramiva naśyati |
apratiṣṭho mahābāho vināśaṃ vādhigacchati || 40 ||

etanme saṃśayaṃ kṛṣṇa cchettumarhasyaśeṣataḥ | 
tvadanyaḥ saṃśayasyāsya cchettā nahyupapadyate || 41 ||

p. 154) kaccit iti abhīṣṭapraśne | api nāma evaṃ śraddadhānaḥ puruṣaḥ 
svargāpavargalakṣaṇasya gatidvayasyāpi bhraṃśābhāvādekataragatiṃ 
prati āśāsambhave chinnābhramiva pavanaviśīrṇo jalado yathā vinaśyati 
tadvat punaḥ sandhānamāpadyate, uta gatidvayopāyaniścayābhāvāt 
apratiṣṭhaḥ niravalambanaḥ san ātyantikameva vināśam prāpnoti 
apunarutthānāyaiva saṃsāraśvabhre patati, ityetamevaṃvidhaṃ sandehaṃ 
mama vināśayitum arhasi yatastvattaḥ sarvasaṃsārigativedinaḥ sarvajñād 
anyo'sya yathoktasya saṃśayasya parihartā na sambhāvyate | yata uktaṃ 
bhagavatā -

	bahūni me vyatītāni (4/5) ityatra śloke sarvajantūnāṃ 
nānāgativeditvam || 40 || 41 ||

	athaivaṃvidhasaṃśayacchedāya bhagavānuvāca -

pārtha naiveha nāmutra vināśastasya vidyate |
na hi kalyāṇakṛt kaścid durgatiṃ tāta gacchati || 42 ||

	tasya evaṃvidhasya 
bhogāpavargalakṣaṇasiddhibījabhūtaśraddhāguṇasaṃskṛtacittasya 
puṃsaḥ kvacidapi viṣaye vināśaḥ sarvadurgatihetuḥ 
jñānabhraṃśalakṣaṇastirobhāvo na vidyate | kva na vidyate | ihāmutra vā, 
iheti dṛṣṭānuśravikabhogādhikaraṇe saṃsāre ityarthaḥ | amutreti 
etasmādanyatra svātmapratiṣṭhāhetau apavarge ityarthaḥ | yataḥ 
kalyāṇavān(kṛt) kuśalābhiniveśī na kaścida durgatim 
ajñānadūṣitatvād duṣṭāṃ yoniṃ prāpnoti | śraddhāvataśca 
kalyāṇakāritvamavaśyameva sthitam | śraddhā hi nāma 
parameśvaraprasādakalpadrumasya bījakaṇikā taṃ 
bhogāpavargalakṣaṇaphalasampattisamṛddhamakṛtvā na nivartate, kevalaṃ 
mṛdumadhyādi(dhi)mātratvāditāratamyāt kālaviśeṣāpekṣiṇī 
svakāryaṃ nirvartayati || 42 ||

p. 155) yata evamataḥ -

prāpya puṇyakṛtāṃ lokānuṣitvā śāśvatīḥ samāḥ |
śucīnāṃ śrīmatāṃ gehe yogabhraṣṭo'bhijāyate || 43 ||

athavā yogināmeva jāyate śrīmatāṃ kule |
etaddhi durlabhataraṃ loke janma yadīdṛśam || 44 ||

tatra taṃ buddhisaṃyogaṃ labhate paurvadaihikam |
tato bhūyo'pi yatate saṃsiddhau kurunandana || 45 ||

pūrvābhyāsena tenaiva hriyate hyavaśo'pi san |
jijñāsurapi yogasya śabdabrahmātivartate || 46 ||

prayatnād yatamānastu yogī saṃśuddhakilviṣaḥ |
anekajanmasaṃsiddhastato yāti parāṃ gatim || 47 ||

	yogabhraṣṭaḥ yogādyathoktajñānaniṣṭhatayā 
śāstravihitasvakarmānuṣṭhānalakṣaṇāt samādheḥ bhraṣṭaḥ 
parameśvarasamāpattilakṣaṇaṃ phalamaprāpyaiva vicyutaḥ san 
śraddhābīje satyapi īśvarecchāvaśādeva samprati tīvrasaṃvegābhāvād 
yatnādisahakārisāmagrīsākalyāddhikāryā(lā)ntarāpekṣiphalaḥ san 
puṇyakṛtāṃ prakṛṣṭayajñadānatapaḥprabhṛtiśubhakarmakāriṇāṃ 
sambandhino lokān tatkarmocitabhogādhikāraṇabhūtāni bhuvanāni 
prāpya āsādya tatra ca tatkarmānurūpāḥ śāśvatīḥ samāḥ 
sahasrasaṃkhyāni varṣāṇi uṣitvā nivāsamnubhūya 
tatastādṛśakarmaphalopabhogānte karmabhūmau asyāṃ śucīnāṃ 
śrīmatāṃ śuddhābhijanakarmaṇāṃ lakṣmīvatāṃ kule anvaye 
abhijāyate janma labhate | yena yogābhivāñchāleśakaluṣitacittatvāt 
asamyaganuṣṭhitāt karmayogād bhraṃśaṃ prāptastasya eṣā 
gatirnirdiṣṭā | yasya tu apavargapravaṇatveṣpi sati kutaścit pratibandhāt 
karmayogaḥ samyak na nirvṛttaḥ, sa imāṃ gatimāpnoti iti 
pakṣāntaropanāsena 

p. 156) āha - athavā yogabhraṣṭo yogināṃ 
yathoktakarmasamādhiniṣṭhānāmata eva dhīmatāṃ 
prakṛṣṭajñānayuktatvāt praśasyabuddhimatāṃ kule anvaye jāyate 
samutpadyate, īdṛśametat evaṃvidhānāṃ yogināṃ kule janma 
durlabhataraṃ karmayogabhrṣṭamantareṇa na kenacit prāptuṃ śakyam | 
tasmiṃśca janmani taṃ buddhisaṃyogaṃ tādṛśaṃ buddhyā 
jñānasaṃskṛtayā dhiyā sambandhaṃ labhate | kaṃ taṃ | paurvadaihikam 
pūrvasmin dehe bhavaṃ, yatra jñānakriyāsamuccayānuṣṭhānarūpo 
yogastenāśritaḥ san na nirvāhitaḥ | tatra kila 
tathāvidhayogasamāśrayaṇahetubhūtajñānasaṃskṛtayā buddhyā 
sambandho'syābhūdeva, sa ca parameśvarānugrahaṃ vinā na bhavati; saca 
parameśvarānugraho nādattaphalo viramati, ataḥ kutaścit vighnaleśāt 
kaṃcit kālaṃ vilambya punarabhivyajyata eva, tatastad 
buddhiyogamāhātmyād bhūyaḥ punarapi prayatnamārabhate 
saṃsiddhinimittaṃ yogaphalāvāptyarthaṃ, yasmāt tenaiva 
pūrvajanmasambaddhena mandenāpi abhyāsena yogaviṣayeṇa 
saṃskārātmanā avasthitena avaśaḥ anicchannapi hriyate ātmasāt kriyate | 
kasmāt tena abhyāsayogena hrīyate ityāha - yasmāt 
karmasamādhilakṣaṇasya yogasya jijñāsurapi svarūpaṃ jñātukāmo'pi 
śabdabrahma śāstrātmakaṃ tattvaṃ ativartate atikrāmati 
niścayābhāvād yogaviṣayā pravṛttireva na sambhavati, saṃśayitasya ca 
śāstramupakārakamato ygajijñāsuḥ śabdabrahmātivartate iti uktam | sa 
punaryogī prayatnāt udyogāt yatamānaḥ 
yogamanutiṣṭhaṃstadanuṣṭhānasaṃskāravaśācca saṃśuddhakilviṣaḥ 
prakṣālitājñānamayakilviṣakalaṅko bahubhirjanmabhiḥ parāṃ 
kāṣṭhāmadhirūḍhe tādṛśi jñāne tataḥ anantaraṃ saṃsiddhaḥ samyak 
prāptaprāpaṇīyaḥ parāṃ gatiṃ paramātmasamāpattilakṣaṇāṃ, 
prakṛṣṭāṃ bhūmiṃ prāpnoti, yataḥ paraṃ gamyāntaraṃ na vidyate || 42-
47 ||

	evaṃvidhasya karmayoginaḥ praśaṃsārthamāha -

p. 157) tapasvibhyo'dhiko yogī jñānibhyo'pi mato'dhikaḥ |
karmibhyaścādhiko yogī tasmādyogī bhavārjuna || 48 ||

	sutīvrasyāpi tapomātrasya antavatphalatvāt tapasvibhyaḥ yogī 
nityaniruttarānandamayasamādhimān adhikaḥ prakṛṣṭaḥ, jñānibhyo'pi 
kevalajñānamātraśaraṇebhyaḥ, tathā karmibhyaḥ 
yajñādikevalakarmavadbhyaḥ adhikaḥ tasmāt tvaṃ yathopadiṣṭaṃ yogaṃ 
svīkṛtya sarvotkṛṣṭo yogī bhava || 48 ||

	kecana yogino darśanabhedāt sambhavanti, teṣāmapi ayamevaṃvidho 
yogī prakṛṣṭatama iti pratipādayannadhyāyamupasaṃharati -

yogināmapi sarveṣāṃ madgatenāntarātmanā |
śraddhāvān bhajate yo māṃ sa me yuktatamo mataḥ || 49 ||

	samastānāṃ yogināṃ madhye sa yogī yuktatamaḥ atiśayena 
yuktaḥ samāhito mama mataḥ, ko'sau yaḥ śraddhāvān 
sarvasiddhibhūtayā śraddhayā yuktaḥ san madgatena antarātmanā, yathā 
pratipāditajñānagatyā māṃ paramātmānamīśvaramekaṃ tattvaṃ 
paramopeyatayā gatena prapannena antarātmanā antaḥkaraṇena bhajate 
vāṅmanaḥkāyavyāpārān matparāneva kurvan madbhakto bhavati, 
yathoktajñānavidhinā yathoktamatsvarūpāvagamapūrvaṃ māmeva ya 
upāste, sa eva samāhitatama iti || 49 ||

yātā yasyāṅgabhāvaṃ dadhati yadi paraṃ yogatāmanyayogā-
staṃ yogaṃ jñānakarmavyatikarasukarābhyāsavairāgyagamyam |
samyaṅ saṃprāptukāmaiḥ paramagururiti śraddhayā paryupāsyaḥ 
ṣaṣṭho'dhyāyo'yamāryairavahitamatibhistyaktasarvānyakāryaiḥ ||

iti śrīrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe ṣaṣṭho'dhyāyaḥ || 6 ||



atha saptamo'dhyāyaḥ |

	evaṃ yadaṅgabhāvamāpannānāṃ yogāntarāṇāṃ 
yogatvasiddhiḥ tasya jñānakarmasamuccayarūpasya niratiśayasya 
anuṣṭhātuḥ madbhaktasya karmayogino'pi sataḥ tava jñeyaśeṣo vidyata 
eva ityātmana eva jagatkāraṇatvādi prāksūcitaprāyaṃ jñeyāntaraṃ 
sphuṭatayā pratipādayituṃ bhagavānuvāca -

mayyāsaktamanāḥ pārtha yogaṃ yuñjan madāśritaḥ |
asaṃśayaṃ samagraṃ māṃ yathā jñāsyasi tacchṛṇu || 1 ||

	ṣaṣṭhādhyāyaparisamāptau madgatenāntarātmanā yo māṃ 
bhajate sa yuktatamaḥ iti yaduktaṃ, tadeva mayyāsaktamanā madāśritaśca 
ityanena paddvayena iha anūditam, tataśca matsvarūpaṃ jñātvā māṃ 
bhajaṃstvaṃ yathā yena prakāreṇa sandeharahitaṃ kṛtvā samagraṃ 
saṃpūrṇasvarūpaṃ māṃ jñāsyasi pratipatsyase, tadidānīṃ śṛṇu | 
ayaṃ hi jagatprapañcaḥ svataḥsiddhanityapradhānapariṇāmatayā kaiścit 
pratipannaḥ, anyaiḥ paramāṇupākaprabhavatvena, itaraiḥ 
kṣaṇikajñānasantānabhramajanyatayā, paraiśca anyathā ceti, kimatra 
tattvaṃ syādityasti saṃśayasyāvakāśaḥ, tanniścayārthaṃ cedaṃ 
vakṣyamāṇamavadhāraya, tadavadhāraṇādeva ca samagraṃ 
matsvarūpajñānaṃ bhaviṣyati iti || 1 ||

	tadevāha -

jñānaṃ te'haṃ savijñānamidaṃ vakṣyāmyaśeṣataḥ |
yajjñātvā na punaḥ kiñcijjñātavyamavaśiṣyate || 2 ||

	idaṃ samanantaraprastutaṃ 
jagatprapañcaparamārthapratipattiviṣayaṃ 
matsvarūpasākalyasaṃvittiviṣayaṃ ca jñānaṃ upapattyupanyāsarūpaṃ 
śāstraṃ tadubhayasākṣātkārahetunā viśiṣṭena jñānena sahitaṃ 
aśeṣataḥ 

p. 159) kathayiṣyāmi, yatpratipadya bhūyo boddhavyaṃ vastvantaraṃ na 
kiñcidavaśiṣyate, yadavagamāt viditasakalavedyaḥ kṛtakṛtyo 
bhaviṣyasītyarthaḥ || 2 ||

	etayośca jñānavijñānayoryatsaṃvedanameva phalaṃ paryavasyati, 
tacca paramarahasyatvāt na sarvasulabhaṃ yataḥ -

manuṣyāṇāṃ sahasreṣu kaścidyatati siddhaye |
yatatāmapi siddhānāṃ kaścinmāṃ vetti tattvataḥ || 3 ||

	iha niravadhau prāṇisargaprapañce manuṣyatvameva tāvat 
durlabhaṃ | te hi manuṣyāḥ 
karmabhūmilabdhajanmānaścaturvargasiddhyadhikāriṇaḥ | teṣāṃ 
manuṣyāṇāṃ sahasreṣu madhye kaścideva 
tathāvidhakarmaparipākavaśādutpannasaṃsāravirāgaḥ siddhaye 
punarjanmābhāvalakṣaṇaprāptaye yatati tattadupāyāharaṇaprayatnaparo 
bhavati | na tu tāvatsiddhiṃ prāpnoti; teṣāmapi yatamānānāṃ 
siddhānāṃ tattaddarśananiścitamokṣalakṣaṇāṃ siddhiṃ 
prāptānāmapi madhye kaścideva 
prakṛṣṭapuṇyapariṇāmavaśādavāptamadanugrahāvirbhāvitayathoktanirat
iśayaśraddhābhaktiprasāditavivekajajñānaprabhāvāt 
yathāpratipāditasvarūpaṃ māṃ vetti ātmatvena pratipadyate || 3 ||

	tajjagatsvarūpapratipādanapūrvamupadeṣṭumāha -

bhūmirāpo'nalo vāyuḥ khaṃ mano buddhireva ca |
ahaṃkāra itīyaṃ me bhinnā prakṛtiraṣṭadhā || 4 ||

apareyamitastvanyāṃ prakṛtiṃ viddhi me parām |
jīvabhūtāṃ mahābāho yayedaṃ dhāryate jagat || 5 ||

	yo'haṃ satatacinmātrasvarūpāpracyuta eva 
acintyanijamāyāśaktimāhātmyāt jaḍacetanavibhāgena dvirūpa iva 
avabhāsamāno jagatkrīḍāmimāṃ nirvartayāmi, tasya me 
sukhaduḥkhamohātmakatayā 

p. 160) sarvabhāvānugatasattvādiguṇatrayarūpā jaḍā yā prakṛtiḥ sā 
iyamaṣṭadhā aṣṭābhiḥ prakārairbhinnā vibhāgaṃ prāptā | ke te aṣṭau 
prakārāḥ | bhūmirityādayaḥ, tatra bhūmyādibhiḥ pañcabhiḥ 
apyayakramanirdiṣṭaiḥ prakāraiḥ kāraṇabhūtāni sūkṣmāṇi nirdiṣṭāni 
veditavyāni, taiśca kāryabhūtāni pṛthivyādīni pañca sthūlabhedāni 
ekaikāpāyapañcādiguṇāni saṃgṛhītāni, buddhikarmendriyavargaśca 
daśasaṃkhyaḥ, iti bhūmyādibhiḥ pañcabhiḥ tattvaviṃśatirākṣiptā | 
manaśca sarvendriyanāyakaṃ, buddhirniścayātmikā, ahaṅkāro dehādiṣu 
anātmabhūteṣu ātmapratyayaḥ, iti trividhamantaḥkaraṇamiti 
trayoviṃśatisaṃkhyaḥ kāryakāraṇavargaḥ | tadanuguṇaṃ ca 
traiguṇyātmakaṃ pradhānaṃ kāraṇamiti tattvacaturviṃśatirūpā 
jaḍatvena avabhāsamānā prakṛtiḥ | iyaṃ ca 
parāvakṣyamāṇajīvabhūtaprakṛtyapekṣayā sthūlā, yato'sau jaḍā 
vedyāparatantrāvinśvarā satī cetanād vedakāt svatantrāt nityācca 
jīvatattvāt apakṛṣṭā, ata evāha - itaḥ uktāyāḥ prakṛteḥ punaḥ anyāṃ 
vilakṣaṇāṃ parāṃ prakṛṣṭāṃ jīvabhūtāṃ māyāvaśāt 
anyonyabhinnatvena avabhāsamānakṣetrajñatvaṃ prāptāṃ viddhi jānīhi 
| kīdṛśīm | yayā kartṛbhūtayā idaṃ yathoktatattvavrātamayaṃ 
jagaddhāryate jīvalakṣaṇaparaprakṛtinibaddhā jagatpadārthasitiḥ | evaṃ 
māyāvabhāsitaparāparabhedena jaḍacetane dve prakṛtī || 4 || 5 ||

etadyonīni bhūtāni sarvāṇītyupadhāraya |
ahaṃ kṛtsnasya jagataḥ prabhavaḥ pralayastathā || 6 ||

	evaṃ yathāpratipāditasvarūpe madīye prakṛtī yoniḥ 
utpattikāraṇaṃ yeṣāṃ tādṛṃśi sarvāṇi bhūtāni ityupadhāraya 
niścayena buddhyasva | jīvabhūtā hi prakṛtiścitsvarūpatvāvyabhicārāt 
vastutaḥ 

p. 161) paramakāraṇāt paramātmano mattaḥ parameśvarādabhinnāpi 
manmāyāvaśāt bhedamiva āpannā jaḍayā prakṛtyā anāditvena 
sambaddhā satī tāmeva guṇātmikāṃ prakṛtiṃ mahadādibhāvena 
pariṇatāmātmatvena abhimanyamānā sukhādisādhanabhāvena 
cetanācetananānābhāvarūpaṃ viṣayamapekṣate, - ityanādiḥ 
prakṛtipuruṣasambandho jagataḥ kāraṇamiti ete prakṛtī sarvabhūtānāṃ 
yonirityuktam | tathā ca vakṣyati -

yāvatkiñcitsaṃbhavati sattvaṃ sthāvarajaṅgamam | 
kṣetrakṣetrajñasaṃyogāttadviddhi bharatarṣabha iti || (3|29)

	iti | evaṃ jagatkāraṇabhūtayoretayormatsambandhinyoḥ 
prakṛtyormanmāyaiva evamavabhāsane kāraṇamityāha aham iti | kṛtsnasya 
sarvasya niravadhicarācarabhūtabhedamayasya jagataḥ prabhavaḥ 
pralayaścāhaṃ matta eva etat prabhavati, mayyeva etat pralīyate ityarthaḥ | 
matsaṅkalpamātrodbhāvitayā māyayaiva ete jaḍājaḍe prakṛtī 
ābhāsyete, tannibandhanau ca 
sargasaṃhārāvityetayorjagatprabhavapralayayorahameva 
mūlakāraṇamityarthaḥ || 6 ||

	ata eva mamaiva paramakāraṇatvāt svarūpalābhe 
kāraṇāntarāpekṣā nāstītyāha (kh: ityarthamāha) -

mattaḥ parataraṃ nānyatkiñcidasti dhanañjaya |
mayi sarvamidaṃ protaṃ sūtre maṇigaṇā iva || 7 ||

	jaḍā prakṛtiraparā ityuktā, tadapekṣayā jīvabhūtā parā iti | 
etayostu kāraṇabhūto'haṃ parataraḥ iti mattaḥ anyat kiñcit vastvantaraṃ 
na saṃbhavati yat matkāraṇatvena paratamaṃ syāt, ahameva 

p. 162) kāraṇaṃ niruttaramityarthaḥ | yata idaṃ sarvaṃ bhāvajātaṃ mayi 
sarvāśrayabhūte protaṃ anusyūtam | katham | ekasmin tantau yathā 
parasparapṛthagbhūtā api maṇigaṇāḥ vyavasthitimanubhavanti, tathā 
manmāyodbhāvitānyonyabhedāścarācarā bhāvā mayyeva 
ekasminnāśraye tiṣṭhantītyarthaḥ || 7 ||

	nanu ubhe ete jaḍājaḍe mama prakṛtī, prakṛtiśca svabhāva ucyate, 
tat kathamadvayacinmātrasvarūpasya jaḍātmakatvāt vinaśvaraścetano'pi 
parasparāvacchedāt nānārūpasvabhāva upapadyeteti vāstavaṃ 
pramātradvaitaṃ pratipādayitumāha -

raso'hamapsu kaunteya prakāśaḥ śaśisūryayoḥ |
praṇavaḥ sarvavedeṣu śabdaḥ khe pauruṣaṃ nṛṣu || 8 ||

puṇyaḥ pṛthivyāṃ gandho'smi tejaścāsmi vibhāvasau |
jīvanaṃ sarvabhūteṣu tapaścāsmi tapasviṣu || 9 ||

bījaṃ māṃ sarvabhūtānāṃ viddhi pārtha sanātanam |
buddhirbuddhimatāmasmi tejastejasvināmaham || 10 ||

balaṃ balavatāṃ cāhaṃ kāmarāgavivarjitam |
dharmāviruddho bhūteṣu kāmo'smi bharatarṣabha || 11 ||

	saṃvedyamānāḥ santaḥ sarve bhāvāstaṃ tamātmānaṃ labhante 
saṃvedyamānatāvyatiriktena prakārāntareṇa kasyāṃcidavasthāyāṃ 
keṣāmapi anupalambhāt | itthaṃ vāstava eka eva saṃveditā saṃvidanneva 
bhāvān sṛjati | tato bhāvarūpā saṃveditureva śaktirvijṛmbhate, na anyat 
tadvyatiriktaṃ kiñcididam; ataḥ parāpare me prakṛtī sabhāvabhūte iti 
svataḥ siddhaṃ pramātradvaitaṃ garbhīkṛtya upakrama eva yaduktam, tat 
raso'hamityādinā ślokacatuṣṭayena upapādayati | tatra yo yasya 
prādhānyena vartate guṇaḥ, sa eva tasya ātmā, - iti apāṃ rasa 

p. 163) eva ātmā, sa ca aham | yata uktena nyāyena rasyamānatayā 
saṃvedyamānā āpo rasarūpamātmānaṃ labhante, tato rasayitureva 
rasātmikā śaktiḥ | mamaiva ca 
anubhavitṛtvalakṣaṇasvabhāvāvyabhicārāt rasayitṛtvaṃ, tataḥ apsvahaṃ 
rasaḥ ityuktam | yathā apsu rasa ātmatvena vyavasthitaḥ, evaṃ pṛthivyāṃ 
gandhaḥ śaśiravivibhāvasuṣu tejolakṣaṇabhūtabhedeṣu prakāśaḥ 
tejaḥśabdābhihito rūpaguṇa ātmatvena vyavasthitaḥ | tathā khe nabhasi 
śabdaguṇaḥ | evaṃ vāyau sparśaguṇoapi atra parisaṃkhyeyaḥ, - iti 
bhūtapañcake gandhādipradhānaguṇātmanā pūrvoktena nyāyena ahaṃ 
vyavasthita iti pūrvoktena vibhāgena 
bhūtapañcakasaṃgṛhītatattvaviṃśatirūpajaḍaprakṛtivibhāgo mama 
svabhāvaḥ, - iti upapāditam | puṇyaśabdaśca atra prādhānyāpekṣayā 
sarvaguṇeṣu viśeṣaṇatvena anuvartanīyaḥ | evaṃ bhūteṣu prāṇiṣu 
dharmāviruddhaḥ kāmaḥ saṃkalpo mano'ham | tathā nṛṣu jīveṣu 
pauruṣam ahaṅkārātmakaṃ puruṣatvamahameva | tathā buddhimatāṃ 
buddhiraham eveti | mano'haṅkārabuddhilakṣaṇamantaḥkaraṇaṃ 
puruṣāṇāṃ pradhānaṃ dharmatrayaṃ pūrvoktena nyāyena ahameveti 
tribhiretaiḥ sahitastrayoviṃśatibhedaḥ kāryakāraṇavargaḥ 
[ahaṃkārahetutāmāpadyate, natu sarvasāmyadarśino yogina ityarthaḥ | 
tathā jñānasya parāṃ niṣṭhāṃ niratiśayāṃ caturthīṃ kāṣṭhāṃ 
jñānalakṣaṇāṃ madbhaktiṃ matsvarūpa -----------] caturviṃśena (kh: 
viṃśa) pradhānena anugato jaḍaprakṛtiprapañco mamaiva svabhāvaḥ, - iti 
vyavahitaiḥ padaiḥ pratipāditam | evameva sarvabhūteṣu jīvanaṃ 
prāṇanaṃ pradhānaṃ, tadapi ahameva | tathā sarvavedeṣu (k: sarveṣu) 
praṇavaḥ oṃkāraḥ svoditāvikṛtadhvanyātmako'hameva | sa hi 
prakṛtibhūtatvāt sarvavedeṣu pradhānaṃ, tasya 

p. 164) vikārabhūtā hi sarve vedāḥ | tathā sarvakriyāsu tapomayī kriyā 
pradhānaṃ, tataḥ tapasviṣu vartamānaṃ tapaḥ ahameva | 
kāmarāgavivarjitaṃ balaṃ balavatāṃ pradhānaṃ, tadapi pūrvoktena 
nyāyena ahameva | tathā tejasvināṃ prabhāvātiśayayuktānāṃ tejaḥ 
prabhāvo mukhyastadapi ahameva | evamanena krameṇa sarvabhūtānāṃ 
bījaṃ heturahameveti jaḍacetanabhedena dviprakārā prakṛtirmamaiva 
svabhāvaḥ, - ityanena prakāreṇa viprakṛṣṭasamanvayaiḥ padaiḥ 
pratipāditam | evaṃ raso'hamityādi prādhānyavivakṣayā 
upalakṣaṇamātratvena pratipāditam || 8-11 ||

	paramārthatastu pūrvoktena nyāyena tat padārthajātaṃ kiṃcana na 
saṃbhavati, yat na ahamiti pratipādayitumāha -

ye caiva sāttvikā bhāvā rājasāstāmasāśca ye |
matta eveha tān viddhi na tvahaṃ teṣu te mayi || 12 ||

	aparyante bhāvaprapañce prakṛtipariṇāmarūpatvāt sarvasya 
bhāvasya traiguṇye vyavasthite (kh: sthite) kecit sattvapradhānā 
guṇībhūtarajastamaskāḥ, kecidevameva rajaḥpradhānāḥ, kecit 
tamaḥpradhānā iti tāratamyabhedādānantyamanapekṣya tritvena 
saṃgṛhītā iti ye kecana sāttvikā rājasāstāmasāśca bhāvāḥ 
saṃbhavanti, tān pūrvoktena nyāyena matta eva paramakāraṇāt (kh: 
prakāśarūpāt) jātān jānīhi | kiṃtu teṣu matkāryajñeyarūpatayā 
labdhātmakeṣu bhāveṣu satsu nāhaṃ bhavāmi na 
tatsattādhīnasadbhāvatā mama 
svabhāvasiddhanityopalabdhṛmātradharmakasya vidyate | te tu tathārūpāḥ 
mayi sati bhavanti uktopapattyā matsattādhīnasadbhāvāḥ sarva eva bhāvā 
ityarthaḥ || 12 ||

p. 165)	nanvevaṃ svaśaktimātropādānatayā sarvakartā parameśvara eka 
eva ayamātmā, tat kuto'yaṃ jīvānāṃ vyāmoho yadete 
kāraṇāntaralabdhātmakaṃ kiñcideva svaviṣayabhūtaṃ vastu jānanti 
kurvanti ceti | atra vakṣyamāṇaṃ svamāyāśaktivaibhavaṃ garbhīkṛtya 
uttaramāha -

tribhirguṇamayairbhāvairebhiḥ sarvamidaṃ jagat |
mohitaṃ nābhijānāti māmebhyaḥ paramavyayam || 13 ||

	sarvaṃ jagat sakalo jīvalokaḥ ebhiḥ sāttvikādibhiḥ pūrvaṃ 
pratipāditaiḥ guṇamayaiḥ sukhaduḥkhamohaparyavasāyipratipattibhiḥ 
bhāvaiḥ saṃvedyaiḥ 
padārthairyathāsthitasvabhāvapratyavamarśavyavadhāyakatayā mohitaṃ 
janitānyonyabhinnadehādyātmapratyayalakṣaṇājñānatimiraṃ ebhyaḥ 
sarvebhyo bhāvebhyo vedyaikasvarūpapatvādanityebhyaḥ paraṃ 
vyatiriktasvabhāvaṃ, ata eva avyayaṃ 
avidyamānayathāpratipāditasvarūpapracyutilakṣaṇakṣayaṃ māṃ 
paratattvaṃ nābhijānāti na pratipadyate || 13 ||

	nanu prabandhato yathāpratipāditena prakāreṇa tvameva 
parameśvaraḥ paramātmā ekaṃ tattvaṃ vijṛmbhase, tat ka ete guṇā nāma 
yanmayairbhāvairmohitaṃ jagat māṃ na jānātītyuktam | atra āha -

daivī heyṣā guṇamayī mama māyā duratyayā |
māmeva ye prapadyante māyāmatitaranti te || 14 ||

	yat bravīṣi ka ete guṇā nāma | eṣā hi guṇamayī daivī māyā 
itthaṃ devanāt krīḍanāt devasya sato mama saṃbandhinī asatī api 
satyavadābhāsayantī madīyā śaktiḥ | mama kila pāramārthikī parā 
śaktirekaiva, sā ahamiti yathoktaṃ mama svarūpaṃ parāmṛśantī 

p. 166) vidyeti ucyate, idamiti tu parāmṛśantī mama māyā iti vyavahriyate | 
idamiti tu parāmarśo vyatiriktavedyārthodbhāvanena svarūpaṃ labhate | 
tacca vedyaṃ jaḍacetanabhedena saṃgrahato dviprakārakameva, 
avāntarabhedaparikalpanayā anantamapi sukhaduḥkhamohabhedāt 
trividhapratyayarūpatayā vedyatvena paryavasyat 
sattvādiguṇatrayātmakatayā sarvaṃ saṃgṛhītam, ato viśvabhāvamayī 
guṇamayī mama māyetyuktam | ataḥ krīḍaikaprayojanasya api mama icchaiva 
guṇamayatvena vijṛmbhamāṇā na kenacit pareṇa atikramituṃ śakyeti 
duratyayā ityuktā | nanu yadyevameṣā na kenacidanyathākartuṃ pāryate, 
tat sarvathā saṃsāravibhramānuparame prasakte nirarthaka eva 
ayamapavargamārgāpyupāyopadeśa iti | atra āha māmeva ekaṃ 
yathoktasvarūpaṃ parameśvaraṃ paramātmānaṃ 
madanugrahecchābodhitāḥ santo ye prapadyante madabhedaparyavasāyinā 
yathoktena jñānena samāśrayante, te enāṃ atitānti atikrāmanti | ahameva 
ekaḥ satatavikasvaraprakāśātmā prabhākara iva tamisrayā anayā na 
kadācit saṃspraṣṭuṃ śakyaḥ, tato matsvarūpasamāpannatvāt 
galitadehādyahaṃpratyayatayā ahameva saṃpanna etāṃ 
paramārthaniḥsvabhāvabhāvabhedābhāsasaṃtamasamayīṃ 
māyāmatilaṅghayitumalam, natu tasyāstaditare 
mohanidrānimīlitanijaduṣṭayaḥ svarūpamapi saṃvedituṃ śaktāḥ || 14 || 

	nanu kasmāt tvāṃ sarvaḥ kaścinna prapadyate ityāha -

p. 167) na māṃ duṣkṛtino mūḍhāḥ prapadyante narādhamāḥ |
māyayāpahṛtajñānā āsuraṃ bhāvamāśritāḥ || 15 ||

	madicchayaiva āsuraṃ rajastamobahulaṃ bhāvaṃ sattāṃ sargam 
āśritāḥ āpannāḥ, ata eva māyayā yathoktasvarūpayā avidyayā 
apahṛtajñānāḥ ākṣiptaparamārthabodhāḥ, tataśca duṣkṛtinaḥ 
saṃsāraśvabhrapātaparyavasāyijñānaśūnyaduṣṭakriyāvantaḥ, ata eva 
mūḍhāḥ vicetaso narādhamāḥ puruṣeṣu madhye nikṛṣṭāḥ māṃ 
paramātmānaṃ na prapadyante na āśrayante || 15 ||

	ye tu madicchāvaśādeva daivasargabhājaḥ santo 
madanugrahecchāvirbhāvitavidyāśaktiprabodhitāḥ 
kaivalyaprāptiphalapuṇyakriyāyuktāḥ prabuddhāste -

caturvidhā bhajante māṃ janāḥ sukṛtinaḥ sadā |
ārto jijñāsurarthārthī jñānī ca bharatarṣabha || 16 ||

	anugrahītṛtattvasāmye'pi anugrahecchātīvratāditāratamyāt 
caturvidhāḥ prastutavibhāgena catuṣprakārāḥ janā māṃ bhajante 
madbhaktā bhavanti, ata eva te sukṛtinaḥ | teṣāṃ cāturvidhyaṃ kathayati 
ārtaḥ ityādinā | tatra ārto māṃ bhajate, yo mṛdutaramadanugrahauṣadhena 
viśīryamāṇasaṃsāramohasaṃnipātatayā cirāt 
saṃvedyatāpannaduḥkhatrayavedanākadarthyamānamānasaḥ, 
tannivṛttimicchan 
sakalalokaprasiddhatattatsaṃjñākārādisthūlopāyasamāśrayaṇena 
madbhakto bhavati | tataḥ krameṇa vardhamānasamāveśaleśavaśāt 
jijñāsuḥ yaḥ 

p. 168) samupajāyamānajagadbhāvaheyopādeyavicāraḥ san ko'haṃ, 
kimidaṃ śarīrendriyaviṣayādimayaṃ mahāmohajālaṃ, kathamato 
bandhanāt parimucyeya iti tattvaṃ 
jñātumicchurnānāśāstraśuśrūṣāśravaṇādyabhiyuktamatiḥ 
saṃśayāpanna eva matsaparyāparo bhavati | ata eva 
tattvajijñāsābhiniveśaprakarṣādāvirbhavadvivekavāsanālokavilīyamān
aviparyayapratyayatīvratimiratvāt 
prathamānayathāsthitaheyopādeyapadārthapravibhāgaḥ arthārthī bhajate 
yaḥ śāstrābhyāsavaśādutpannaniścayaḥ san idameva paramaṃ phalam 
ityupādeyatayā ātmatattvalakṣaṇamarthaṃ vastu arthayate'bhikāṅkṣayati 
| tato māṃ jñānī bhajate yaḥ sakalacikitsāvicchedaviśvastamatiḥ 
svīkṛtayathoktajñānalakṣaṇaparamopāyaḥ san 
yathoktasvarūpamavyavadhānena māmeva upāste iti || 16 ||

	eṣāṃ caturṇāṃ madhye jñāninaḥ prakarṣaṃ pratipādayitumāha 
-

teṣāṃ jñānī nityayukta ekabhaktirviśiṣyate | 
priyo hi jñānino'tyarthamahaṃ sa ca mama priyaḥ || 17 ||

	teṣām ārtādīnāṃ madhye jñānī yathoktabodhavān viśiṣyate 
yato'sau sarvataḥ sthūlāt sūkṣmācca vinivṛttopādeyapratipattiḥ 
parāmupāyakāṣṭhāmadhirūḍhaḥ, ata eva vedakaikasvabhāvaḥ ekasmin 
mayi parasmiṃstattve bhaktimān, ata eva nityayuktaḥ sarvāsu avasthāsu 
avicchinnasamādhāno yasmāt | tasya evaṃvidhasya jñānino'hamatyartham 
akhilajagatpadārthasārthaparihāreṇa priyaḥ prītikāraṇaṃ sa ca api tathaiva 
mama priyaḥ iti avyatirekapratipādanaparametat || 17 ||

p. 169)	nanu jñānina eva prakṛṣṭatve sati ārtādayaḥ kiṃ bahiṣkṛtā eveti | 
atra āha -

udārāḥ sarva evaite jñānī tvātmaiva me mataḥ |
āsthitaḥ sa hi yuktātmā māmevānuttamāṃ gatim || 18 ||

	ete ārtādayo yadyapi uttarottaraviśiṣṭatvena anyonyabhinnarūpāḥ, 
tathāpi bhaktimūrtyā kṛtodayayā parayā ekayā macchaktyā adhiṣṭhitāḥ 
santaḥ sarvaevodārāḥ udāttacetasa audāryalakṣaṇena ekena guṇena 
yuktāḥ, kintu ārtijijñāsārthārthitādaśāsu ye vartante, te 
vyatiriktārthālambinaḥ | jñānavān punarahamiti abhedena 
matsvarūpaikālambana iti ātmaiva asau mama abhipretaḥ | etadeva 
prakaṭayatiyasmāt sa jñānī mamaiva, na anyasya vyatiriktasya vastvantarasya 
anuttamāṃ niratiśayāṃ gatiṃ prāptihetumabhedajñānalakṣaṇaṃ 
panthānam āsthitaḥ samāśrito yato yuktātmā mayyeva 
samāhitāntaḥkaraṇo'yam || 18 ||

	ataḥ -

bahūnāṃ janmanāmante jñānavān māṃ prapadyate |
vāsudevaḥ sarvamiti sa mahātmā sudurlabhaḥ || 19 ||

	ārtatvādyavasthājuṣāṃ bhūyasāṃ janmanāṃ 
śarīraparigrahāṇāṃ ante parikṣaye sarvam idaṃ carācaraṃ bhāvajātaṃ 
paramārthasatatanirvikārasāmānyasaṃvidrūpo bhagavān sarvatra vasanāt 
sarvasya vā tatra vasanāt vāsudeva iti sarvādvayatvaniścayena māṃ 
paramakāraṇaṃ pratipadyate | sa caivaṃvidhaḥ sarvotkṛṣṭasvabhāvaḥ 
sudurlabhaḥ sutarāṃ durlabho duṣprāpo manuṣyakoṭiṣu api tādṛśo 
mahānubhāvo labhyate navā || 19 ||

p. 170) 

	kasmāt tathāvidhaḥ sudurlabha ityatra svecchāmātramekaṃ 
kāraṇaṃ pratipādayitumāha -

kāmaistaistairhṛtajñānāḥ prapadyante'nyadevatāḥ |
taṃ taṃ niyamamāsthāya prakṛtyā niyatāḥ svayā || 20 ||

yo yo yāṃ yāṃ tanuṃ bhaktaḥ śraddhayārcitumicchati |
tasya tasyācalāṃ śraddhāṃ tāmeva vidadhāmyaham || 21 ||

sa tayā śraddhayā yuktastasyārādhanamīhate |
labhate ca tataḥ kāmānmayaiva vihitān hitān || 22 ||

antavattu phalaṃ teṣāṃ tadbhavatyalpamedhasām |
devāndevayajo yānti madbhaktā yānti māmapi || 23 ||

	iha yathāpratipāditaprakāreṇa 
nānājīvabhūtamatprakṛtyātmakāḥ puruṣā 
madicchodbhāvitakāryakāraṇabhāvayā guṇātmikayā prakṛtyā svayā 
tattatpuruṣabhedena pratiniyatakāryakāraṇātmanā pratyekaṃ 
svatvamāpannayā niyatāḥ pravibhaktaśarīrendriyaviṣayādyātmakatayā 
parasparabhedena niyantritāḥ santaḥ sukhādyātmakaṃ prākṛtaṃ 
rūpameva ātmatvena pratipannāḥ, ata eva svatvāpannatattatprakṛtyucitaiḥ 
taistaiḥ kriyāphalatayā prāpyatvena kāmyamānaiḥ kāmaiḥ 
bhogaistattallokāntarabhogyaiḥ hṛtajñānāḥ 
muṣitaparamārthalakṣaṇaikatattvaviṣayabodhāḥ santaḥ anyadevatāḥ anyā 
ātmalakṣaṇaparamadaivatavyatiriktahariharahiraṇyagarbhādityaprabhṛtīstat-
tatsvābhimatanānāphaladāyitvaśrutaprabhāvāḥ parasparabhinnātmatayā 
avagamyamānāḥ prapadyante bhajante | katham | taṃ taṃ 
tattaddarśanaprasiddhaṃ niyamam itikartavyatāviśeṣarūpāṃ vyavasthāṃ 
āsthāya āśritya avalambya | itthaṃsthite yo yaḥ kṣtrajñaḥ 
phalābhilāṣānu(gu)ṇyena yāṃ yāṃ

p. 171) caturbhujatrinetratvādivibhaktaviśeṣāṃ tanuṃmūrtiṃ bhaktaḥ 
samāśritaḥ san śraddhayā tāvanmātraphaladāyibhinnadevatāviṣayayā 
tattatphalaprāptaye arcituṃ pūjayituṃ vāñchati, tasya tasya tāmeva 
tāvanmātraphaladāyibhinnadevatāviṣayāṃ, na anyāṃ 
parāmekatattvaviṣayāṃ acalāṃ tadviṣayatvena sthitāṃ ahaṃ dadāmi | 
matta eva sāttvikādisarvabhāvodbhavasya prākpratipāditatvāt sa tayā 
maddattayā śraddhayā yuktastasya tattadākṛterdevatāviśeṣasya 
ārādhanaṃ prasādhanaṃ īhate manovākkāyaiśceṣṭate | tataśca 
devatāviśeṣādārādhitāt sataḥ pūrvoktopapattyā mayaiva ekena 
pāramārthikena kartrā vihitān visṛṣṭān hitān anukūlān kāmān 
bhogān labhate | kintu māmekamīśvaraṃ sarvamanorathapradaṃ 
samyagjñānābhāvādajānatāmata eva alpaprajñānāṃ teṣāṃ 
parimitaṃ bhogalakṣaṇaṃ phalamantavat anityaṃ bhavati | te hi 
ajñānamohitāḥ santaḥ ātmānaṃ devatāṃ phalaṃ ca nānātvena 
pratipadyante | tataśca ye devān nānātvena pratipannān 
yajñādibhirantavadbhiḥ kriyāviśepairyajante prīṇayanti, te devān yānti 
tattaddevatādhikaraṇabhūtaṃ taṃ taṃ devalokaṃ gacchanti | ye tu māṃ 
yathoktasvarūpamekaṃ tattvaṃ yathāpratipāditena krameṇa madicchayaiva 
preryamāṇāḥ santaḥ krameṇa jñānitvadaśādhirohaparyantena bhaktāḥ 
samāśritāḥ, te mām eva paramaṃ kāraṇaṃ yānti ahamityabhedena 
samāpadyante || 23 ||

(avyaktaṃ vyaktimāpannaṃ manyante māmabuddhayaḥ |
paraṃ bhāvamajānanto mamāvyayamanuttamam || 24 ||)

p. 172) taditthamāsuraṃ daivaṃ ca sargaṃ mayaiva svecchayā āpādito loko 
māyākhyayā vidyāśaktyā ca pravṛttinivṛttyordharmayorniyujyamānaḥ 
saṃsārāpavargalakṣaṇaṃ phalaṃ prāpnotīti saṃgraheṇa 
pratipādayitumāha -

nāhaṃ prakāśaḥ sarvasya yogamāyāsamāvṛtaḥ |
mūḍho'yaṃ nābhijānāti loko māmajamavyayam || 25 ||

	vaiśvarūpye'pi advayacinmātrasvarūpāvasthānāparicyutilakṣaṇa 
aiśvarasamādhiryogaśabdena uktaḥ | tathāvidhayogamahimnā utpāditā 
yā māyā matsvarūpānyathāpratipattihetuḥ śaktiḥ, tayā samāvṛto 
vyavahitaḥ san ahaṃ sarvasya matprakṛtimohitasya āsurasvabhāvasya jantoḥ 
na prakāśaḥ ātmatayā na pratyabhijñeyaḥ | tataśca sarvo mūḍho 
loko'yamajamavyayaṃ nityatvāt janmavināśarahitaṃ māṃ nābhijānāti 
ātmatvena na pratyavamṛśati || 25 ||

	yataḥ -

vedāhaṃ samatītāni vartamānāni cārjuna |
bhaviṣyanti ca bhūtāni māṃ tu veda na kaścana || 26 ||

	śarīrāṇi anityaprakṛtipariṇāmaparyavasitāhaṃpratyayatvāt 
sarvato'vacchedavatīṃ vedyadaśāmāpannāni, ata eva 
atītavartamānabhaviṣyatpadaviśeṣyāṇi bhūtāni sarvaśarīriṇaḥ ahaṃ 
paramārtha vedakasvabhāva eka eva veda jānāmi | māṃ punarnityatvāt 
kālakalanādyavacchedavirahitamahimānaṃ na kaścit śarīrī veda jānātīti 
| anena ananyasādhāraṇavedakaikasvabhāvatvaṃ parasya kāraṇasya

p. 173) tatkāryasya ca jagatastadvyatiriktasvarūpasya vedyatvameva 
pratipāditam || 26 ||

	kasmāt tvāṃ na veda kaścidityatra āha -

	icchādveṣasamutthena dvandvamohena bhārata |
sarvabhūtāni saṃmohaṃ sarge yānti paraṃtapa || 27 ||

yata etāni sarvabhūtāni manmāyāvaśādanyonyabhinnāni 
anityaśarīrātmakatvāt janmavināśabhāñji sarge sṛṣṭau satyāṃ 
saṃmohaṃ svarūpāvimarśarūpamajñānaṃ yānti pratipadyante | kena 
hetunā | dvandvamohena dvandvāni sukhaduḥkhādyātmakāni, sa eva 
mohastattvāpratipattistena | kīdṛśena | icchādveṣasamutthena 
rāgadveṣaprabhaveṇa | idamatra tātparyam - 
manmāyodbhāvitaguṇamayaprakṛtirūpasargasaṃmohitāḥ sarvaprāṇinaḥ 
parasparabhinnānityaguṇapariṇāmātmakameva jagadidaṃ manyamānāḥ 
kvacit rajyantaḥ, kiñcit dviṣantaḥ saṃsāracakraparivartanamanubhavanti ato 
yathāpratipāditasvarūpaṃ māṃ nityanirvikāraikacitsvabhāvaṃ 
paramātmānaṃ na bhajante || 27 ||

ke punastvāṃ bhajante ityatra āha -

yeṣāṃ tvantaṃ gataṃ pāpaṃ janānāṃ puṇyakarmaṇām |
te dvandvamohanirmuktā bhajante māṃ dṛḍhavratāḥ || 28 ||

	yeṣāṃ punaḥ janānāṃ madanugrahādeva 
pratyuditavidyāśaktīnām, ata eva puṇyakarmaṇāṃ sukṛtināṃ pāpam 
ajñānalakṣaṇaṃ antaṃ gataṃ vināśaṃ prāptaṃ; te yathoktāt 
dvandvamohāt nirmuktāḥ dṛḍhavratāḥ sthiraniyamāḥ santo mām ekaṃ 
daivataṃ bhajante madabhedapratipattiparyantayā saparyayā samāśrayante || 
28 ||

p. 174) 
	itthaṃ ca -

jarāmaraṇamokṣāya māmāśritya yatanti ye |
te brahma tadviduḥ kṛtsnamadhyātmaṃ karma cākhilam || 29 ||

sādhibhūtādhidaivaṃ māṃ sādhiyajñaṃ tathā viduḥ |
prayāṇakāle'pi ca māṃ te viduryuktacetasaḥ || 30 ||

	māṃ yathoktasvarūpaṃ āśritya caturvidhayā bhaktyā 
ālambanīkṛtya ye jarāmaraṇādidvandvadoṣavimuktaye yatante 
satatamaviluptodyogā bhavanti, te yuktacetaso yathoktasatatasamāhitamanaso 
brahma svarūpādibhedena 
samanantarādhyāyavyākhyāsyamānasaptavidhavijñānadṛśā māṃ 
viduḥ māṃ jānate ityom || 30 ||

gītādhyāye sthitimupagatāḥ saptame satyarūpe 
santaḥ samyakphalitasukṛtāḥ ke'pi loke yathāsmin |
niḥsandehāḥ sakalabhuvanābhogabhāgavyavasthāṃ
hastanyastāmalakaphalavad vyaktamālokayantu ||

iti śrīrājānakarāmakaṇṭhaviracite vyākyārthānvayamātre 
sarvatobhadranāmni bhagavadgītāvivaraṇe saptamo'dhyāyaḥ || 7 ||



atha aṣṭamo'dhyāyaḥ ||

	atha saptame'dhyāye pratipāditajñānavido 
bhaktilakṣaṇavijñānaviśāradā brahmādīn prakārān viduriti yat 
bhagavatā uktaṃ, tatasteṣāṃ prakārāṇāṃ 
saṃjātasvarūpajijñāso'rjuna uvāca -

kiṃ tadbrahma kimadhyātmaṃ kiṃ karma puruṣottama |
adhibhūtaṃ ca kiṃ proktamadhidaivaṃ kimucyate || 1 ||

adhiyajñaḥ kathaṃ ko'tra dehe'smin madhusūdana |
prayāṇakāle ca kathaṃ jñeyo'si niyatātmabhiḥ || 2 ||

	praśnavākyāni etāni gatārthāni, kiṃtu kiṃ taditi tacchabdasya 
ayamabhiprāyaḥ - yat bhagavatā uktaprāyeṣu teṣu prakāreṣu kiṃ tad 
brahma kaḥ prakāro brahmasvarūpaḥ, kimadhyātmaṃ kaśca 
adhyātmasvarūpa iti vibhāgajijñāsārūpaḥ | prayāṇakāle kathaṃ 
jñeyo'si iti pūrvamanuktārthaviṣayaḥ pṛthak praśnaḥ || 1-2 ||

	yathoktapraśnavyākaraṇārthaṃ bhagavānuttaramāha -

akṣaraṃ brahma paramaṃ svabhāvo'dhyātmamucyate |
bhūtabhāvodbhavakaro visargaḥ karmasaṃjñitaḥ || 3 ||

adhibhūtaṃ kṣaro bhāvaḥ puruṣaścādhidaivatam |
adhiyajño'hamevātra dehe dehabhṛtāṃ vara || 4 ||

antakāle'pi māmeva smaran muktvā kalevaram |
yaḥ prayāti sa madbhāvaṃ yāti nāstyatra saṃśayaḥ || 5 ||

	tatra brahma kimucyate iti praśne tāvaduttaram - paramamakṣaraṃ 
brahma na kṣarati na saṃcalati na svarūpāt cyavatīti akṣaraṃ 
cidrūpamucyate |
p. 176) tat ca dviprakāraṃ saṃbhavati brahmarūpaṃ, jīvarūpaṃ ca | yat 
brahmarūpaṃ, tat paramaṃ; tasya na kadācit svarūpāt saṃcalanaṃ bhavati 
| yatastasya prabandhataḥ svarūpaṃ 
janmavināśādibhāvavikārāsaṃsṛṣṭaikacinmātralakṣaṇaṃ 
sahajanityānandaikadharmakaṃ sakalaviśvabhāvāvabhāsakatvāt 
viśvarūpamapi viśvabhāvavadavacchedyatvena kathaṃcidasaṃgatatvāt 
tebhyo vyatiriktaṃ pratipāditameva | jīvarūpaṃ tu kūṭasthatve sati 
akṣaraṃ bhavati, kintu aparaṃ parabrahmavat paratvena na avasthitaṃ, 
yatastasya māyāvaśāt 
kṣarasvabhāvaprākṛtabhāvāhaṃpratyayālambane sati 
dehādiprākṛtabhāvavat pralayodayau janmamaraṇādikaṃ vā 
tatsvarūpamanuvidadhānasya svarūpapracyutisaṃbandhe sati 
aparamakṣaratvam | yat vakṣyati 

dvāvimau puruṣau loke kṣaraścākṣara eva ca |
kṣaraḥ sarvāṇi bhūtāni kūṭastho'kṣara ucyate ||

yasmāt kṣaramatīto'hamakṣarasyāpi cottamaḥ |
ato'smi loke vede ca prathitaḥ puruṣottamaḥ || (15|18)

	iti | itthaṃ brahmāpekṣayā jīvānāṃ nityatve'pi 
pratipāditopapattyā nikṛṣṭamakṣaratvaṃ, paramaṃ tu akṣaraṃ brahma, - iti 
prathamapraśnasya uttaram | adhyātmaṃ kimucyate ityatra uttaraṃ 
svabhāvo'dhyātmam iti | svabhāvaśabdena 

bhūmirāpo'nalo -------------------------| (7|4)

ityādinā

--------------------------------- yayedaṃ dhāryate jagat | (7|5)

ityantena granthena aparā parā ca prakṛtirbhagavatā prākpratipāditā

p. 177) iha ucyate | evaṃ prakṛtyātmakaḥ svabhāvaḥ 
paramakāraṇarūpasatyātmāvabhāsitanānātmādhīnatvādadhyātmamiti 
uktaḥ | ātmā hi parameśvaro jaḍacetanavibhāgena svecchayā 
ātmānameva avabhāsayati, yaduktaṃ

kalpayatyātmanātmānamātmā devaḥ svamāyayā |
sa eva kurute bhedāniti vedāntaniścayaḥ || (māṃ0 kā0 2|12)

iti | evaṃ dviprakāraprakṛtilakṣaṇasvabhāva 
ātmādhīnatvādadhyātmamucyate, - iti dvitīyapraśnasya uttaram | atha kiṃ 
karma ityatra uttaraṃ visargaḥ karmasaṃjñitaḥ iti | visargo viśiṣṭā 
parabrahmavyatiriktā sṛṣṭiḥ karmetisaṃjñitaḥ | tasya hetugarbhaṃ 
viśeṣaṇamāha bhūtabhāvodbhavakaraḥ bhūtānāṃ 
jaḍājaḍaprakṛtyātmakānāṃ yo bhāvaḥ sattā jaḍānāṃ 
pravāhanityatārūpā, cetanānāmanyonyavibhaktatve'pi 
kūṭasthanityatārūpā; tasya bhāvasya udbhavaṃ 
tathāvabhāsanarūpāmabhivyaktiṃ yaḥ karoti, sa tathoktaḥ | īśvarecchayā 
anādinā prabandhena jaḍacetanayoḥ prakṛtyoryaḥ saṃyogastena kṛto yaḥ 
svaprapañcamayaḥ sargaḥ, sa tayoḥ karmeti ucyate, yata uktaṃ prāk 

etadyonīni bhūtāni sarvāṇītyupadhāraya | (7|6)

iti | evaṃ buddhyādipṛthivīparyantaprapañcalakṣaṇo jaḍāyāḥ prakṛteryo 
vividhaḥ sargaḥ, tathā caturdaśavidhaprāṇiprapañcalakṣaṇo yo 
jīvabhūtāyāḥ prakṛtervividhaḥ sargaḥ; sa tayoḥ saṃyogajatvāt tayoḥ 
karmatvena visarga uktaḥ, - iti tṛtīyapraśnasya uttaram | atha adhibhūtaṃ 
kimucyate ityatra uttaram - adhibhūtaṃ kṣaro bhāvaḥ iti | kṣaraḥ 
pariṇamadrūpatayā svarūpasaṃcalanaparo yo bhāvaḥ pratipuruṣaṃ 
vibhaktakāryakāraṇakalāpātmakaḥ 

p. 178) padārthaḥ, so'dhibhūtamucyate tasya bhūtādhīnatvāt | 
bhūtarūpā prakṛtiḥ kāryakāraṇātmanā vipariṇamate iti kṣaro 
bhāvo'dhibhūtamiti caturthapraśnasya uttaram | atha adhidaivaṃ kimucyate 
ityatra uttaram puruṣo'dhidaivatam iti | puruṣaḥ kṣetrajña iti 
jātāvekavacanam | ataste te puruṣāstattadvāsanānuguṇyena 
pariṇatapravibhaktatattatkāryakāraṇātmakakṣarabhāvarūpe'rthe-
'dhiṣṭhātṛtayā avatiṣṭhamānā adhidaivatatvaṃ bhajante, iti 
puruṣo'dhidaivatamiti pañcamapraśnasya uttaram | atha atra dehe kathaṃ 
kena prakāreṇa kaścādhiyajñaḥ ityatra uttaramāha adhiyajño'hamevātra 
iti | parasparavibhaktakartrabhimānāviṣṭanānākṣetrajñādhiṣṭhite'smin 
dehe yadyapi kṣetrajñā eva adhiyajñatvamarhanti tattatphalābhisandhinā 
taṃ taṃ yāgavidhimanutiṣṭhantastādṛśamavacchinnamātmānaṃ 
kartṛtvena abhimayante, tathāpi  pāramārthikasya kartṛtvasya 
ananyasādhāraṇatvādahameva mukhyaḥ kartā sarvayajñānāmiti ahameva 
adhiyajño, na anyaḥ | kathamiti prakārapraśne'pi etadeva uttaram ahameva | 
ahamityanenaiva prakāreṇa ahamadhiyajñaḥ | idamatra tātparyam yo'pi 
kṣetrajñānāṃ śarīrādyālambananimittāhaṃkāraḥ, yo'pi 
parasvarūpaniṣṭho mama, tayorahaṃkāratve nāsti kaścit bhedaḥ, kevalaṃ 
māyāvaśāt kṣetrajñānāmavacchedyālambananiṣṭhatvādavacchinna iva 
asau, mama tu svabhāvaniṣṭhatvādanavacchinnaḥ iti ahameva, na anyo 
mukhyāhaṃkāraniṣṭhatayā adhiyajño, na prakārāntareṇeti 
sarvayajñeṣu adhikṛtaḥ prabhurahameva | yadvakṣyati 

ahaṃ hi sarvayajñānāṃ bhoktā ca prabhurevaca | (9|25) 

p. 179) iti ṣaṣṭhasya praśnasya uttaram | anenaiva nyāyena 
adhibhūtamahameveti boddhavyam, bhūtabhāvena paramārthato'hameva 
sthita ityarthaḥ | tathaiva adhidaivatatvena puruṣākhyo yaḥ prakāra uktaḥ, 
tatra ahameva adhikṛta iti praśnaṣaṭkasya saṃkṣepato vyākaraṇamevaṃ 
veditavyam | yaduta brahmātmakarmasaṃjñaṃ 
paramātmakṣetrajñaprakṛtipariṇāmarūpaṃ saptame tattvatrayaṃ 
nirṇītam, tatra yathākramamadhiyajñādhidaivatādhibhūtabhāvena 
ahameva tattvato vyavasthito, na madvyatiriktaṃ kiṃcit saṃbhavatīti 
tātparyam | tathā 

te brahma tadviduḥ kṛtsnam ----------------- | (7/29)

ityādinā tattvatrayametaduktvā 

sādhibhūtādhidaivaṃ māṃ sādhiyajñaṃ ca te viduḥ | (7/30)

	iti tadvyāpakatvena ātmānaṃ bhagavān nirdiṣṭavān | atha 
prayāṇakāle dehāt dehāntarasaṃkramaṇasamaye 
niyatātmabhirnigṛhītāntaḥkaraṇaiḥ kathaṃ jñeyo'sītyatra uttaraṃ 
antakāle'pi māmeva ityādi | antakāle'pi tattatkarmakṣayāt tasya tasya 
śarīrasya prakṣayasamaye māṃ yathoktaviśeṣaṇaṃ paramātmānaṃ 
smṛtvā saṃcintya matsvarūpapratyavamarśapūrvaṃ kalevaraṃ śarīraṃ 
tyaktvā svātantryeṇa vimucya yaḥ prayāti tato dehādutkrāmati, sa 
madbhāvaṃ madīyāṃ sattāṃ yāti ahameva saṃpadyate iti | atra na 
saṃśayaḥ sandeho nāsti || 3-5 ||

tathā yuktiṃ pradarśayitumāha -

yaṃ yaṃ vāpi smaran bhāvaṃ tyajatyante kalevaram |
taṃ tamevaiti kaunteya sadā tadbhāvabhāvitaḥ || 6 ||

	yaṃ yaṃ sāttvikaṃ rājasaṃ tāmasaṃ vā bhāvaṃ padārthaṃ 
smaran sāttvikyā rājasyā tāmasyā vā buddhyā dhyāyan puruṣaḥ ante 
avasāne dehaṃ jahāti, taṃ tameva dehāntaraṃ prapadyate | atra 
hetugarbhaṃ

p. 180) viśeṣaṇamāha sadā tadbhāvabhāvitaḥ sadā nityakālaṃ tasmin 
tādṛśi sāttvikādau bhāve bhāvitaḥ saṃjātabhāvano yataḥ | kimuktaṃ 
bhavati | vartamāne dehe yadeva sāttvikādikaṃ vastu puruṣo'bhyāsena 
bhāvayati, tat tadbhāvanābhyāsaprakarṣāhitasaṃskārastameva 
ante'vaśyaṃ smarati | yameva ca smaran tasmāt dehādutkrāmati, tameva 
samanantare dehāntare labhate, yat vakṣyati 

yadā sattve pravṛddhe tu pralayaṃ yāti dehabhṛt | 
tadottamavidāṃ lokānamalānpratipadyate ||
rajasi pralayaṃ gatvā karmasaṅgiṣu jāyate |
tathā pralīnastamasi mūḍhayoniṣu jāyate || (14/15)

iti || 6 || 

yata evaṃ -

tasmāt sarveṣu kāleṣu māmanusmara yudhya ca |
mayyarpitamanobuddhirmāmevaiṣyasyasaṃśayam || 7 ||

	tasmāt uktāt kāraṇādāptopadeśaprāptikṣaṇāt prabhṛti sarveṣu 
kāleṣu kālaśabda upalakṣaṇārthastena sarvesu deśeṣu sarveṣu ākāreṣu 
sarvāsu avasthāsu yathāpratipāditasvarūpaṃ māṃ paramātmānaṃ 
parameśvaraṃ anusmara saṃcintaya 
matsvarūpadhyānānuparataniviḍāvadhāno bhava, yuddhya ca svakarma 
anutiṣṭha ca yena mayi yathoktena prakāreṇa nityaviniveśitāntaḥkaraṇo 
niḥsaṃśayaṃ māmevaiṣyasi madabhedaṃ prāpsyasi ahameva 
bhaviṣyasītyarthaḥ || 7 ||

pratipattidārḍhyārthamenameva arthaṃ vivarītumāha -

abhyāsayogayuktena cetasānanyagāminā |
paramaṃ puruṣaṃ divyaṃ yāti pārthānucintayan || 8 ||

p. 181) 

	nityānusmaraṇayatnalakṣaṇe samādhau yuktena saṃbaddhena, ata 
eva ananyagāminā yathoktatattvavyatiriktavastvantaraviratagatinā 
antaḥkaraṇena anucintayan sadā dhyāyan saṃskārabalāt paramaṃ 
sarvebhyaḥ kṣetrajñebhyaḥ utkṛṣṭamekaṃ puruṣaṃ ātmānaṃ divyaṃ 
divi paramavyomni svabhāvamaye bhavaṃ yāti pratipadyate 
tādātmyamupaiti || 8 ||

	evamabādhitopapattyupanyāsapūrvaṃ 
yathāpratipāditānuttarajñānamātrasādhanaṃ paramutkrāntikramaṃ 
pratipādya idānīṃ prāṇajayādisādhyayogasādhanamaparaṃ taṃ 
pratipādayitumāha -

kaviṃ purāṇamanuśāsitāramaṇoraṇīyāṃsamanusmaredyaḥ |
sarvasya dhātāramacintyarūpamādityavarṇaṃ tamasaḥ parastāt || 9 ||

prayāṇakāle manasācalena bhaktyā yukto yogabalena caiva |
bhrūvormadhye prāṇamāveśya samyak sa taṃ paraṃ puruṣamupaiti 
divyam || 10 ||

	sa evaṃvidho yogī taṃ divyaṃ divi paramavyomni bhavam, ata eva 
paraṃ sarvotkṛṣṭaṃ puruṣam īśvaramātmānam upaiti prāpnoti | ko'sau | 
yo bhaktyā bhagavadanugrahadivasālokaprabhātasaṃdhyayā 
sakalapuruṣārthasiddhibījabhūtayā tathā 
prastutasvarūpanirūpaṇasamādhisāmarthyena yuktaḥ san 
tasyāmavasthāyām acalena sthirasamādhānena manasā antaḥkaraṇena 
sarvasya ghātāraṃ paramakāraṇam anusmaret antakāle'nucintayet | 
kathaṃ, kīdṛśaṃ ca bhruvormadhye abhyāsasvatantrīkṛtaṃ prāṇam 
āntaraṃ mārutaṃ samyak madhyamena mārgeṇa āveśya saṃdhāya 
ādityavarṇaṃ sarvatejovyatiriktajyotīrūpam, ata eva tamasaḥ parastāt

p. 182) ajñānasya pṛthaktayā vartamānam | kīdṛśaṃ sarvasya 
ghātāramanusmaret parāvasthāyāṃ kavimityādiviśeṣaṇāviśiṣṭatvāt 
acintyaṃ pāramārthikajñātṛsvabhāvatvāt cintanakriyāyāḥ karmatvaṃ 
netumaśakyam, yataḥ purāṇaṃ kavim anādiṃ draṣṭāraṃ, tathā 
anuśāsitāraṃ sarvasya carācarasya sargasya tena tena niyamena niyantāram, 
ataḥ sarvajñaṃ sarvakartāraṃ cetyuktaṃ bhavati; tathā svarūpato'ṇuḥ 
sūkṣmaḥ kṣetrajñādiḥ, tasmādapi aṇīyāṃsam atiśayena aṇum | 
idamatra tātparyam yaḥ parāvasthāyāmadvayajñānaikaviṣayatvāt 
smaraṇavyāpārāviṣayabhūtastatsaṃyogarūpāyāmaparāvasthāyāṃ 
niyatadeśatvena niyatākāratvena ca yo yogī yathoktena krameṇa smarati, sa 
tameva puruṣamupaiti tatsamīpaṃ gacchati || 10 ||

	yogakrama eva paramapadaprāptiphalo yathā bhavati, tathā samyak 
vaktuṃ pratijānīte -

yadakṣaraṃ vedavido vadanti viśanti yadyatayo vītarāgāḥ |
yadicchanto brahmacaryaṃ caranti tatte padaṃ saṃgraheṇābhidhāsye || 11 ||

	tat padaṃ yogibhiḥ prāpyaṃ dhāma saṃgraheṇa saṃkṣepeṇa te 
tubhyam abhidhāsye kathayiṣyāmi | kiṃ tat dhāma | yad vedavidaḥ 
vedārthaviśāradāḥ akṣaraṃ nityaṃ vidvāṃso vadanti pravacanena 
pratipādayanti | yat ca yatayaḥ jñānaikaniṣṭhāḥ viśanti samāpadyante | 
yat ca icchantaḥ prāptukāmāḥ brahmacaryaṃ brahmaṇo vedasya 
adhyayanaśravaṇādinā caryamācāraṃ caranti gacchanti samāśrayante | 
kecit vidanti iti pāṭhaṃ paṭhantaḥ evametat vyācakṣate yathā 
vedavidgrahaṇena gṛhasthavānaprasthāḥ pratipāditā yataste 
śāstroktakriyānuṣṭhānaniṣṇātāḥ santastat padaṃ vidanti jānanti

p. 183) prāpyatayā adhyavasyanti, yatayastu kṛtakṛtyatvāt viśanti 
tādātmyamāpnuvanti, brahmacāriṇastu tatprāptukāmāḥ 
svādhyāyaśāstrārthabodhādiniṣṭhā vrataviśeṣaṃ bhajante iti || 11 ||

	yathāpratijñātamabhidhātumāha -

sarvadvārāṇi saṃyamya mano hṛdi nirudhya ca |
mūrdhnyādhāyātmanaḥ prāṇamāsthito yogadhāraṇām || 12 ||

omityekākṣaraṃ brahma vyāharan māmanusmaran |
yaḥ prayāti tyajan dehaṃ sa yāti paramāṃ gatim || 13 ||

	yogī paramāṃ gatiṃ pūrvoktaṃ prakṛṣṭaṃ padaṃ yāti 
pratipadyate | ko'sau | yaḥ evaṃ dehaṃ śarīraṃ tyajan vimuñcan prayāti 
utkrāmati | kīdṛśaḥ | māmanusmaran yogadhāraṇāmāsthitaḥ māṃ 
yathoktasvarūpaṃ paramakāraṇamoṃkāravācyaṃ 
brahmatattvamanudhyāyan yogasya kasyacit samādherālambanībhūte'rthe 
cittaniyamarūpāṃ dhāraṇāṃ bhūmikāmāsthita āśritaḥ | 
kathamāsthitaḥ | prathamataraṃ sarvadvārāṇi cakṣurādīni 
cittavṛttiprasaravartmāni saṃyamya yathāsvaṃ viṣayebhyaḥ pratyāhṛtya, 
manaśca upadeśādhigate hṛdi sarvasaṃvidadhikaraṇabhūte dehaikadeśe 
nirudhya pratiṣiddhendriyaviṣayapracāraṃ kṛtvā, tathā prāṇam 
antaścaraṃ mārutaṃ mūrdhni brahmarandhre 
brahmapurārgalabhūtabhrumadhyagranthibhedāt labdha (mārgaṃ santam 
ādhāya kṛtvā ), tahthā omitiprasiddhaikākṣararūpaṃ brahma 
śabdatattvaṃ vyāharan uccārayan | evaṃ prāṇasya mūrdhni preraṇaṃ, 
praṇavasya uccāraṇaṃ, praṇavavācyasya ca matsvarūpasya anusmaraṇaṃ 
ceti sarvendriyamanoniyamapūrvakaṃ yugapat

p. 184) tritayametat saṃpādayan yo dehavisargaṃ karoti, sa yogī paramaṃ 
padamāpnotīti tātparyam || 13 ||

	tasmin prayāṇakāle tātkālikāvasthāvisaṃsthulacitto yogī 
kathamatra samādhiṃ sādhayedityatra pūrvoktaṃ kāraṇamāha -

ananyacetāḥ satataṃ yo māṃ samarati nityaśaḥ | 
tasyāhaṃ sulabhaḥ pārtha nityayuktasya yoginaḥ || 14 ||

	tasya nityayuktasya avicchinnasamādheḥ yogino'haṃ nityaśaḥ 
sarvāsu avasthāsu sukhātmikāsu duḥkhātmikāsu vā sulabhaḥ suprāpaḥ | 
kasya | yaḥ satatam avyavadhānena māṃ yathoktayogābhyastarūpatayā 
ekaṃ tattvaṃ paramātmānam ananyacetāḥ anyatomadvyattiriktāt vastuno 
nivṛttāntaḥkaraṇaḥ smarati ātmatvena pratyavamṛśati |

yaṃ yaṃ bhāvaṃ smaranvāpi -------------------- | (8|6)

	ityādinā uktopapattyā 
sarvātmakamatsvarūpapratyavamarśābhyāsasudṛḍhasaṃskārasya 
yoginastasyāmavasthāyāmahamātmabhūtatvāt kathaṃ duṣprāpa iti 
tātparyam || 14 ||

	ye ca anena krameṇa māṃ prapannāste -

māmupetya punarjanma duḥkhālayamaśāśvatam |
nāpnuvanti mahātmānaḥ saṃsiddhiṃ paramāṃ gatāḥ || 15 ||

	mahātmānaḥ yathoktajñānapariśīlanabhāvāt mahān 
sarvātiśāyī parameśvara eva ātmā yeṣāṃ, te tathā, ata eva māṃ 
yathoktayā bhaktyā upetya samāśritya paramāṃ saṃsiddhim 
abhedasamāpattilakṣaṇāṃ paramāṃ phalasaṃpattimitaḥ saṃsārāt 
gatāḥ santaḥ

p. 185) punaḥ bhūyo janma dehāntaraprāptiṃ nāpnuvanti na labhante | 
kīdṛśaṃ janma | duḥkhānāmādhyātmikādīnāṃ saṃgrahāt 
triprakārāṇāṃ vistārato'nantabhedānāmālayamāspadam, tathā 
aśāśvatam avaśyamanuṣaktaśarīrendriyādisarvasvavināśam | anātmani 
ātmapratyayanibandhanā sarvaduḥkhayogitā 
janmavināśādivikārasaṃbaddhatā ca jīvānāṃ sāmānyaṃ 
paramakāraṇamekamātmānaṃ māmahantayā pratipannānāṃ punarna 
saṃbhavatīti tātparyam || 15 ||

	evaṃ ca yathoktena nayena matsamāśrayaṇamekamupāyaṃ 
varjayitvā na anyat kiṃcidapunarāvṛttikāraṇaṃ saṃbhavatītyāha -

ā brahmabhuvanāllokāḥ punarāvartino'rjuna |
māmupetya tu kaunteya punarjanma na vidyate || 16 ||

	paramaprakṛṣṭatapoyajñadānādipuṇyakarmaprāpyo brahmaṇaḥ 
prajāpaterloko brahmalokaḥ, tamavadhiṃ kṛtvā yāni kānicit 
puṇyakarmaprāpyāṇi lokāntarāṇi saṃbhavanti, teṣu ye lokāḥ 
tattatkriyānuṣṭhātṛtvāt labdhopapattayo janāḥ, te 
yathoktajñānaśūnyatvāt tāsāṃ kriyāṇāmanuṣṭhitānāmantavattve 
sati punarāvartinaḥ bhūyaḥ saṃsāravartmani prādurbhāvinaḥ | māṃ 
punaryathoktajñānanirmalabhaktimātraikopāyagamyaṃ 
parabrahmasvarūpaṃ parameśvaram upetya 
tādātmyapratipattiparyantamāśritya punarjanma saṃsārabhūmāvutpattiḥ 
na vidyate eva | māmupetya bhūyo na jāyante iti 
upāyajananakriyayorekakartṛtvamatra avagantavyam || 16 ||

	atha kathaṃ brahmalokavāsino'pi punarāvartante, na 
punarmatprapannā ityatra krameṇa kāraṇamāha -

sahasrayugaparyantamaharye brahmaṇo viduḥ |
rātriṃ yugasahasrāntāṃ te'horātravido janāḥ || 17 ||

p. 186) ye 
jāgarasvapnādyavasthāhetubhūtasūryodayāstamayopalakṣitameva 
kālaviśeṣamahorātratayā manyante, na te tattvato'horātrasvarūpajñāḥ 
ye tu brahmaṇaḥ prajāpaterdivyayā saṃkhyayā caturyugānāṃ sahasraṃ 
paryanto'vadhiryasya, tāvatpramāṇamaharvāsaraṃ viduḥ jānate, 
tāvatparimāṇāmeva ca rātriṃ te tattvajñāḥ ahorātravidaḥ ucyante | 
kimanena uktaṃ bhavati | yathā martyānāṃ nālikāṣaṣṭyavacchinnaḥ 
kālo'horātraḥ, tathā brahmalokanivāsināṃ 
caturyugasahasradvayāvacchinnaḥ kālo'horātraḥ | tataśca yathā martyāḥ 
svāhorātraparisaṃkhyayā parikalitaṃ varṣaśataṃ puruṣāyuṣamativāhya 
punardehāntaraṃ bhajante iti iha vyavasthā, tathā brahmalokanivāsino'pi 
yathoktaparimāṇāvacchinnāhorātrakalpanayā varṣaśataṃ 
puruṣāyuṣamativāhya punardehāntaraṃ bhajanti, iti karmabhūmibhājāṃ 
martyānāṃ brahmalokanivāsināṃ ca puṇyakarmaṇāmahorātrādeḥ 
puruṣāyuṣaparyantasya kālasya hrāsadairghyakṛto viśeṣ'h, natu 
saṃsāritve teṣāṃ kaścit viśeṣaḥ | tato yathā martyāḥ punarāvartante, 
tathā brahmalokāntaranivāsino'pi svakālaparimāṇena 
puruṣāyuṣamativāhya punarāvartante iti 

ā brahmabhuvanāllokāḥ punarāvartinaḥ ( 8|16) 

	iti uktam | tena idamatra tātparyam - 
yathoktajñānaśūnyapuṇyakriyāviśeṣānuṣṭhānalabhye 
kālāvacchedatucchabhogādhikaraṇe brahmalokādau vivekinā na 
sthairyāsthāvipralabdhena bhavitavyam | so'pi 
viśiṣṭajātyāyurbhogasaṃbandhāt saṃsāre eva, 
yugasahasraparimāṇamapi kāladairghyamantavattvāt martyāhorātrāt na 
vyatiricyate iti yathoktaṃ yugasahasradvayaparimāṇaṃ kālamahorātratvena 
ye manyante, te'horātravido janāḥ iti uktam || 17 ||

p. 187) idānīṃ tu tasya brāhmasya ahorātrasya 
svarūpapratipādanadvāreṇa 
martyāhorātratulyavṛttāntatāmupadeśyānāṃ vivekanairmalyāya 
upadeṣṭumāha -

avyaktād vyaktayaḥ sarvāḥ prabhavantyaharāgame |
rātryāgame pralīyante tatraivāvyaktasaṃjñake || 18 ||

bhūtagrāmaḥ sa evāyaṃ bhūtvā bhūtvā pralīyate |
rātryāgame'vaśaḥ pārtha prabhavatyaharāgame || 19 ||

	avyaktāt īśvarodbhāvitajagatkāraṇabhāvāt guṇasāmyātmanaḥ 
pradhānāparābhidhānāt padārthāt 
yugasahasraparimāṇabrahmadivasāvirbhāve sati sarvā vyaktayaḥ 
sarvabhāvānāṃ sarve viśeṣāḥ prabhavanti prādurbhavanti | yathā 
sūryodayāt pravṛtte divase sarvaprāṇināṃ sarvakriyāviśeṣāḥ 
prabhavanti, tathaiva yugasahasraparimāṇe brahmaniśāgame tatraiva 
yathokte'vyaktasaṃjñatattve pralīyante vyaktarūpatāṃ parityajya 
śaktimātratvena avatiṣṭhante yathā iha sarvaprāṇabhṛtāṃ 
sūryāstamayāt saṃjāte niśāgame sarvendriyapravṛttayo'ntareva 
pralīyante | kimatra tātparyam iha udayāstamayayoḥ sargapralayayośca 
paryāyeṇa pravahatoranityatve nāsti kaścit bhedaḥ, kevalaṃ 
kalevarādivinaśvarabhāvārhābhāvasaṃkalitanisarganiravacchedasaṃvi-
dāṃ māyāśaktimohitānāṃ hrāsadairghyakalpanākṛto 
viśeṣavibhramaḥ, na tadā yathoktajñānaniṣṇātatayā kālānavacchinne 
satye svātmani ahaṃpratipattirvivekibhirdṛḍhīkāryeti | etadeva nigamayati 
bhūtagrāmaḥ sa evāyam iti | sa eva ayaṃ caturdaśavidhena prapañcena 
pravibhakto bhūtagrāmaḥ carācaraprāṇivargo yathoktena krameṇa 
sargādau bhūtvā

p. 188) bhūtvā punaḥ punarabhivyaktimāsādya rātryāgame 
brahmarātrisaṃjñe pralayakāle pralīyate nyagbhavati, aharāgame sargādau 
prabhavati vyaktimāsādayatīti || 19 ||

	evam ā brahmabhuvanāllokāḥ punarāvartante 
ityetadarthapratipādanaprasaṅgena sargapralayasvarūpaṃ pratipādya 
idānīṃ matpratipannā yena kāraṇena na punarāvartante, tat 
pratipādayitumāha -

parastasmāttu bhāvo'nyo vyaktāvyaktaḥ sanātanaḥ |
yaḥ sa sarveṣu bhūteṣu naśyatsu na vinaśyati || 20 ||

avyakto'kṣara ityuktastamāhuḥ paramāṃ gatim |
yaṃ prāpya na nivartante taddhāma paramaṃ mama || 21 ||

	tasmāt avyaktasaṃjñāt jagatkāraṇatvena avabhāsitāt padārthāt 
pradhānākhyāt paraḥ punaranyo vilakṣaṇaḥ bhāvaḥ paramārthaḥ 
satpadārtho vidyate iti śeṣaḥ | kīdṛśaḥ | vyaktāvyaktaḥ vyaktaṃ 
kāraṇatvena pradhā(natā)nāpannamavyaktaṃ pradhānātmakaṃ vastu 
yasmāt, tathāvidhaḥ, vivakṣiteśvaralakṣaṇabhāvavaśāt kila 
avyaktavyavahāro'yaṃ pratīyate; yadivā vyaktaśca avyaktaśceti 
viśeṣaṇasamāsāśrayaṇena vyākhyeyametatpadam | sa hi bhāvo 
nityoditaprakāśātmakatayaiva sarvamidaṃ prakāśayan vyakta eva, 
māyāvaśāt tu sarvasya tathāpratipattyabhāvādavyaktaḥ | tathā 
sanātanaḥ sadā sarvakālaṃ bhavatīti sanātano nityaḥ | kīdṛśo'sau | 
samasteṣu jaḍacetanabhedena dviprakāreṣu 
avāntarabhedādaparyantaprapañceṣu bhūteṣu prāṇiṣu naśyatsu uktena 
prakāreṇa pradhāne pralayamanubhavatsu na vinaśyati 
nityoditādvaitacitprakāśātmakatvāt pralīnatvādivyapadeśaṃ na yāti, 
kuto'tyantābhāvatā | tat kasmāt na upalabhyate ityāha 
acintyasvamāyāśaktimohitān prati yathāsthitena nityena

p. 189) rūpeṇa aprathamānatvāt avyaktaḥ paramārthataḥ punaḥ akṣaraḥ 
na kṣarati svasmāt svarūpāt na saṃcalati | yaśca evaṃ vidho bhāvastaṃ 
paramāṃ gatim anuttarāṃ prāptiṃ āhuḥ tattvavidaḥ | ata eva kīdṛśaṃ 
tam | yaṃ prāpya āsādya ātmatvena pratipadya 
praśāntaprāpyāntaraspṛhā yathoktā yogino na nivartante 
saṃsārasaraṇiṃ na avataranti yatastathāvidho yo bhāvaḥ tat mama parasya 
brahmaṇaḥ paramakāraṇasya parameśvarasya dhāma nityoditaprakāśo 
niruttarasthānaṃ vā | tadevaṃvidhaṃ māṃ ye prapannāste na 
punarāvartante iti tathā vidhānāṃ yogināmapunarāvṛttikāraṇaṃ 
pratipāditam || 21 ||

	tasyaiva yathoktasya bhāvasya svarūpaṃ nigamayan 
tatprāptyupāyaṃ smārayannāha -

puruṣaḥ sa paraḥ pārtha bhaktyā labhyastvananyayā |
yaṃ prāpya na punarjanma labhante yogino'rjuna || 22 ||

yasyāntaḥ sthāni bhūtāni yatra sarvaṃ pratiṣṭhitam |

	ya eṣa yathāpratipāditasvarūpo bhāvaḥ sa paraḥ 
sarvakṣetrajñātiriktaprabhāvatvāt niratiśayaḥ puruṣaśabdavācyaḥ | 
sarvaśarīrāntaḥśāyitvāt puruṣaḥ paramātmā | kīdṛśaḥ | 
uktavakṣyamāṇaprakāreṇa yaṃ prāpya ātmatvena pratilabhya yoginaḥ 
svīkṛtanānāvidhasamādhibhedāḥ punaḥ bhūyo janma saṃsāritayā 
utpattiṃ na labhante na āpnuvanti, tathā yasya ekasya antaḥ 
sāmānyasaṃvillakṣaṇe hṛdaye sthitāni sarvāṇi carācarabhūtāni | nahi 
teṣāmevamanyonyavibhinnarūpatayā 
sphuratāmadvayaikacinmātrānupraveśamantareṇa sattāsaṃbhavaḥ, ata eva 
yatra yasmin sakalajagatpadārthasārthasāmānyādhāre

p. 190) sarvam idaṃ pratiṣṭhitaṃ kṛtavyavasthānam | sa punaritthaṃbhūto 
bhaktyā 
pratipāditottarottaraprakṛṣṭārtatvādijñāniparyantacaturavasthārūpayā 
sevayā labhyaḥ prāpyaḥ | kīdṛśyā | ananyayā tatsvarūpavyatirekeṇa 
sarvāsu avasthāsu avidyamānamanyadālambanaṃ yasyāstayā 
tathāvidhayeti ||

	atha anyamutkrāntiviṣayaṃ yogopadeśaṃ prastāvayannāha -

yatra kāle tvanāvṛttimāvṛttiṃ caiva yoginaḥ || 23 ||
prayātā yānti taṃ kālaṃ vakṣyāmi bharatarṣabha |

	yatra yasmin vakṣyamāṇe kāle prayātāḥ saṃnyastadehāḥ santo 
yogino'nāvṛttiṃ tathā āvṛttiṃ 
viśiṣṭabhogādhikaraṇayogyaśarīrādisaṃbandhaṃ yānti svātantryeṇa 
bhajante, taṃ tādṛśaṃ vakṣyamāṇakrameṇa yogināmeva sulabhaṃ 
kālam upadekṣyāmi || 23 ||

tamāha -

agnirjyotirahaḥ śuklaḥ ṣaṇmāsā uttarāyaṇam || 24 ||

tatra prayātā gacchanti brahma brahmavido janāḥ |
dhūmaḥ kṛṣṇastathā rātriḥ ṣaṇmāsā dakṣiṇāyanam || 25 ||

tatra cāndramasaṃ jyotiryogī prāpya nivartate |

	iha agnīṣomau prakāśatamasī, tadupalakṣite dinarātrī; 
śuklakṛṣṇau pakṣau; tathā ṣaṇmāsaparimāṇe uttaradakṣiṇe ayane, iti 
sthūladṛṣṭyā kālavibhāgamācakṣate tasya devapitṛmartyaviṣayatvena 
prakṛṣṭamadhyamanikṛṣṭaparimāṇatāṃ ca | itthaṃsthite agnirjyotiḥ 
sūryaprakāśastadupalakṣitam ahaḥ triṃśannālikāvacchinnaparimāṇo 
divasākhyaḥ kālāṃśaḥ | āpūryamāṇasomopalakṣitāḥ pañcadaśa 
ahorātrāḥ 

p. 191) śuklapakṣaḥ śuklaśabdena nirdiṣṭaḥ | tathā 
makarādirāśiṣaṭkasaṃcārivirocanacāropalakṣitāḥ ṣaṇmāsāḥ 
uttarāyaṇam ityete kālaviśeṣāḥ prasiddhāḥ | tatra evaṃ vidhāyāṃ 
kālaviśeṣasāmagryāṃ ye brahmavidaḥ vijñātaparamakāraṇasvarūpāḥ 
prayānti utkrāmanti śarīramutsṛjanti te brahma paraṃ tattvaṃ gacchanti 
apunarāvṛttiṃ mokṣagatiṃ prāpnuvantītyarthaḥ | tathā dhūmaḥ 
jalātmakatvāt somaḥ, tathā tadupalakṣitā rātriḥ prasiddhā | kṛṣṇaḥ 
kṣīyamāṇasomopalakṣitāḥ pañcadaśa ahorātrāḥ kṛṣṇaḥ pakṣaḥ | sa 
ca kramāpekṣayā yathāpāṭhaṃ na vyākhyātaḥ | tathā 
karkaṭādirāśiṣaṭkasaṃcārisūryopalakṣitāḥ ṣaṇmāsā dakṣiṇāyanam 
| tatra evaṃ vidhāyāṃ kālasāmagryāṃ punarjanmahetubhūtaṃ 
candramasaṃ jyotiḥ tejaḥ prāpya yogī samādhimān āvartate punaḥ 
saṃsāramārgabhavatarati | atra kecit vicakṣaṇā evaṃ vicāramārabhante 
iha tāvat brahmaṇo yathoktasya paramasya kāraṇasya dvividhaṃ vedanam 
svasaṃvedanena sākṣātkāraḥ, āptopadiṣṭasya vā 
svarūpāvagamamātram | tatra ādyena prakāreṇa ye brahmavidasteṣāṃ 
prāptaprāpaṇīyatvāduktakālasāmagrī na brahmaprāptihetutvamarhati, 
dvitīye'pi pakṣe svarūpāvagamamātreṇa ye 
brahmavidasteṣāmasākṣātkṛtatattvānāṃ 
yathoktakālaviśeṣaprāptimātramapunarāvṛttihetorbrahmaṇaḥ 
prāptikāraṇamiti na śakyate vaktum | evamubhayarūpāṇāmapi 
brahmavidāmantakāle yathoktakālaprāptyadhīnā brahmaprāptiriti na 
yuktyā saṃgacchate | yo'pi yogī svīkṛtasamādhiviśeṣastasya 
tadbalānapohena yathoktakālaviśeṣaprāptimātrādeva 
punarāvartanamayuktimat 

yaṃ yaṃ vāpi smaran bhāvaṃ tyajatyante kalevaram | (8|6)

p. 192) ityādinā pratipāditopapattyā sudṛḍhabhāvanābhāvitasya 
bhāvasya avyabhicārāt mantharaṃ bhāvitasya tatkālamasaṃsmaraṇe sati 
punarāvṛttiḥ sthitaiva, kimuktaḥ kālaḥ kariṣyati | tadevaṃ yogī 
yathoktakālaviśeṣaprāpteḥ punarāvartate ityetadapi na hṛdayāvarjakam | 
yadapyucyate yadyeṣa yathoktaḥ kālo brahmaprāptyādiheturna bhavet, tat 
kathaṃ brahmavido'pi śāntanavasya 
tanusaṃnyāsārthamuttarāyaṇapratīkṣā śrūyate | satyaṃ śrūyate, kintu 
brahmaprāptihetutvena tena asau kālo na pratīkṣitaḥ | yadi hi sa eva 
brahmaprāptihetuḥ syāt, tadā sarvairbrahmavidbhirdehotsarge sa eva 
apekṣyeta, tatkālotsṛṣṭadehāśca sarva eva anāvṛttibhāvaṃ bhajeyuḥ | na 
ca evamasti | naca evaṃvidhe kāle mriyeteti vidhirupapadyate sarvasya maraṇe 
svātantryābhāvāt | bhīṣmasya tu svatantramṛtyutvāt 
tādṛkkālapratīkṣaṇe nimittāntaramanumeyam | tat ca idam yat kila 
sthūlayā dṛśā yathoktaḥ kālaḥ kalevarasaṃnyāsāvasare samupanato 
gativiśeṣādhānaheturbhavati, ityāgamavacanapramāṇīkaraṇārthaṃ 
bhīṣmasya tādṛkkālapratīkṣodyamaḥ, tasmāt yathoktakālasya 
mukhyatayā na ahorātrādirūpatvam | tataśca brahmavidāṃ yogināṃ ca 
yathākramaṃ brahmaprāpteḥ punarāvṛtteśca kāraṇabhūtaṃ yadetat 
kālagatidvayamuktam, tatra avaśyaṃ kaścit viśeṣo boddhavyatvena vartate | 
vakṣyati hi 

naite sṛtī pārtha jānan yogī muhyati kaścana | (8|27) 

	iti | naca etayoḥ 
sṛtyorbāhyakālaviśeṣarūpayordevayānapitṛyānasaṃjñāmātrasya 
jñānaṃ brahmādiprāptiheturbhavet | ataḥ kaścit viśeṣo 
yathoktārthasaṃgatiheturatrānumeyaḥ, ityācakṣate | kālasya hi 
bāhyābhyantarabhedena rahasyaśāstreṣu dviprakāratā pratipāditā | tatra 

p. 193) prasiddhasūryenducāropalakṣito bāhyaprakāraḥ, 
prāṇāpānalakṣaṇasūryenducāropalakṣitastu ābhyantaraḥ | tatra 
mukhyasya bāhyasya pratipāditabādhakasadbhāvāt gauṇa ābhyantaraḥ 
samāśrīyate, tena agnyādaya uttarāyaṇaparyantāḥ śabdāḥ 
pāṇagatipratipāditatvena atra prayuktāḥ, yataḥ prāṇagatireva 
divasādyuttarāyaṇāntakālāvayavatvena tatra tatra rahasyaśāstreṣu 
tattadviśiṣṭaśarīrādyapekṣayā prasiddhā | itthaṃsthite yeṣāṃ 
yathoktajñānaniṣṭhatayā brahmavidāṃ satāmantakāle svarasena 
mūrdhacchidrākhyabrahmadvāravāhini prāṇacāre niyamitaṃ 
saṃvitsrotaḥ prāṇopaśāntikṣaṇe sarvato 
nistaraṅganisarganirmalasāmānyasaṃvinmahodadhau praviśya 
samarasībhāvamāpadyate, teṣāṃ brahmaprāptiravyavadhānena upapannā 
| sa hi brahmavidāṃ devayānaḥ panthāḥ | eṣā ekā tadviṣayā śāśvatikī 
gatiḥ | yastu yathoktatattvajñānavyatirekeṇa abhyāsasvīkṛtakevalayogaḥ, 
tasya yogino yathoktaprāṇagatiniyamitamapi saṃvitsrotaḥ 
prāṇopaśāntikṣaṇe brahmaveditvābhāvāt 
dehādyahaṃpratyayaparvatapratihataprasaraṃ sat parāvartate | 
parāvartamānaṃ ca 
dhūmādidakṣiṇāyanaśabdāntapratipāditāmapānavṛttimeva 
pitṛyāṇalakṣaṇāṃ gatiṃ samāśritya yogābhyāsaprakarṣānusārocitaṃ 
viśiṣṭaṃ śarīrāntaramāviśati, yatra pūrvābhyāsahniyamāṇacittatayā 
prakṛṣṭatareṇa utsāhena yatamānaḥ parāṃ siddhiṃ prāpsyatītyuktam | 
tadayamatra saṃkṣepārthaḥ ye jñānitvāt brahmavidaḥ santo'ntakāle 
yathāpratipāditena krameṇa 
prāṇaśaktyālambanacittavṛttayastatpraśāntikṣaṇe'pi 
aviluptaparatattvasmṛtayo dehamutsṛjanti, te 
nirvyavadhānabrahmaprāptivaśāt na punarāvarttante | ye tu kevalayoginaḥ 
santaḥ prāṇavṛttimeva āśritya dehamutsṛjanto jñānitvābhāvāt 
paratattvasmṛtyabhāve sati utkrāmanti,

p. 194) te dehādyanuparatāhaṃpratyayatvādapānavṛttiṃ 
saṃsāramārgamāśritya viśiṣṭadehāntaraṃ prāpnuvanti, yataḥ sarvasya 
kasyacit śarīriṇaḥ sarvasaṃsārisādhāraṇaprāṇavṛttyāśrayaṇena 
vartamānāt dehādutkrāntasya apānavṛttyāśrayaṇena 
bhaviṣyaddehasaṃkrāntirbhavati | brahmavidāṃ yogināṃ ca iha prakaraṇe 
viśeṣa eva pratipāditaḥ || 25 ||

	ata eva prāṇāpānalakṣaṇāntaraviśiṣṭamārgadvayatvena etat 
saṃgrahītumāha -

śuklakṛṣṇe gatī hyete jagataḥ śāśvate mate |
anayoryātyanāvṛttimekayāvartate'nyayā || 26 ||

	ete yathokte dve gatī prāṇāpānavṛttirūpau 
devayānapitṛyāṇasaṃjñau dvau mārgau jagataḥ sarvalokasya śāśvate 
nitye | tena na sarvaḥ kaścit janaḥ prāṇamārgāśrayaṇena 
dehādutkrāmati, kintu apānamārgāśrayaṇena dehāntare saṃkrāmati | 
brahmavido yoginaśca ayaṃ viśeṣo yat anayoḥ gatyormadhyāt ekayā 
ūrdhvavāhaprāṇarūpayā śuklayā gatā yathāpratipāditena prakāreṇa 
antakāle samāśritayā brahmavit anāvṛttiṃ yāti brahma prāpnoti | yogī tu 
tayaiva utkrāman anyayā apānarūpayā kṛṣṇayā uktena hetunā āvartate 
viśiṣṭadehāntare saṃkrāmati || 26 ||

	yataḥ -

naite sṛtī pārtha jānan yogī muhyati kaścana |
tasmāt sarveṣu kāleṣu yogayukto bhavārjuna || 27 ||

	ete yathāpratipādite sṛtī prāṇāpānarūpe gatī jānan

p. 195) yathoktayā mahattayā pratipadyamāno yogī 
prākpratipāditasvīkṛtamukhyayogo na kaścit muhyati sarva eva tadgatijñaḥ 
san brahmaprāptihetugatisamāśrayaṇena brahmaiva prāpnoti, natu 
saṃsāramitaragatiparihārāt | etayośca gatyorevaṃvidhāṃ mahattāṃ 
brahmavidāṃ jñeyatvena sthitāṃ tattvavido vadanti | manaḥ 
prasarasahacaro'yaṃ prāṇaprasaro yata udeti, yatra ca astameti; tat 
kālakalanādisakalaprapañcavirahitabrahmatattvopalabdhipadam | tataśca 
yathoktaprāṇaprasaranibaddhaḥ sakalaḥ kālādiḥ 
prapañcastadudayāstamayadaśāvimarśakṣamasaṃvidāṃ brahmavidāṃ 
pralīyate | tādṛśīṃ ca daśāmāsādya yo brahmavit paramayogī 
dehamutsṛjati, sa brahmaṇyeva pariṇato na punarāvartate | yastu kevalayogī 
tāṃ daśāṃ pratyavamaṣṭuṃ (mraṣṭuṃ) na kuśalaḥ, sa cāndramasaṃ 
jyotirapānaprasararūpamāśritya utkrāman dehāntare saṃkrāmati, yatra 
krameṇa siddhimāpsyatīti | evamanayorgatyoḥ siddhihetuvibhāgavijñānam 
| ata eva uktaṃ 

naite sṛtī pārtha jānan yogī muhyati --------------- |

	ityādi | yata evaṃ, tasmāt sarveṣu kāleṣu bāhyadṛṣṭyā 
uttarāyaṇadakṣiṇāyanādibahubhedapratipāditeṣu yogayukto bhava 
yathoktena prakāreṇa prāṇāpānagatijñānātmake yoge samādhau 
yukto'vahito bhava || 27 ||

	yato'sya yogasya ayaṃ prabhāvaḥ -

vedeṣu yajñeṣu tapaḥsu caiva 
dāneṣu yat puṇyaphalaṃ pradiṣṭam |
p. 196) atyeti tatsarvamidaṃ viditvā 
yogī paraṃ sthānamupaiti cādyam || 28 ||

	idaṃ saptapraśnātmakavyākaraṇarūpaṃ vastu viditvā jñātvā 
yogī yathoktasamādhiḥ tat sarvaṃ vedādhyayanayajñatapodānādi antavat 
puṇyakriyāphalam atyeti atikrāmati, yataḥ ādyam anuttaramata eva param 
anantānandamayatvādatyutkṛṣṭaṃ sthānaṃ dhāma upaiti prāpnoti 
paramātmani svābhāvikīṃ pratiṣṭhāṃ labhate iti | yadyapi evaṃ 
kaiścidayamartho vyākhyātaḥ yathāmuyā eva vṛttyā 
uttarāyaṇasāmagryā prayātā 
brahmavido'rcirādisaṃjñalokāntarākramaṇakrameṇa brahma gacchanti, 
yoginaśca ata eva yogiśabdena uktā dakṣiṇāyanakālasāmagryāṃ 
prayātāḥ santaḥ cāndramasaṃ jyotiḥ prāpya 
dhūmādisaṃjñalokāntarākramaṇakrameṇa saṃsāra āvartante iti | 
pūrvoktayuktyā ca etadapi vyākhyānaṃ na saṃgacchate | yathoktayuktyā 
ca ayamapi kramo'nayoreva gatyorantarbhavatīti kecit manyante | tadatra 
paramārthavedinaḥ pramāṇamiti om || 28 ||

gambhīrairvipulaiḥ svabhāvavimalaiḥ śrīmatpadārthojvalaiḥ 
sphītāṃ saptabhiramburāśibhiriva brahmādibhirvastubhiḥ |
adhyāyasya naro'ṣṭamasya vivṛtiṃ pṛthvīmimāmañjasā 
yaḥ svīkartumalaṃ sa eva viduṣāṃ sāmrājyameko'rhati || 

iti śrīrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe'ṣṭamo'dhyāyaḥ || 8 ||


atha navamo'dhyāyaḥ |

	aṣṭamādhyāyaparisamāptau saptamapraśnanirṇaye'ntakāle 
śuklakṛṣṇagatidvayajñānaṃ brahmaprāptyupāyatvena upadiṣṭam, 
atastāvanmātra eva brahmaprāptyupāyastvayā mā vedi, iti 
arjunamaṣṭamādhyāye pratipāditameva upadeśaṃ smārayan saṃgraheṇa 
bhagavānuvāca -

idaṃ tu te guhyatamaṃ pravakṣyāmyanasūyave |
jñānaṃ vijñānasahitaṃ yajjñātvā mokṣyase'śubhāt || 1 ||

	tuśabdo vyatireke | aṣṭamādhyāyoktalakṣaṇopāyavyatirekeṇa idaṃ 
svabuddhinityasaṃnihitaṃ jñānaṃ brahmaprāptyupāyabhūtaṃ 
vijñānena svasaṃvitsākṣātkāraparyantena viśiṣṭena jñānena bodhena 
saṃyuktaṃ tubhyamahaṃ prakarṣeṇa saṃkṣepataḥ 
sārapratipādanarūpeṇa atiśayena vakṣyāmi kathayiṣyāmi | kīdṛśāya | 
anasūyave śuddhātiśuddhabuddhitvāt yato'smai jñānāya anasūyasi 
yathoktasya phalasya asaṃbhāvanāvaśādajñavat na garhaṇamārabhase | 
kīdṛśaṃ jñānaṃ vakṣyāmi | guhyatamaṃ guhyaṃ guhyataraṃ ca 
pūrveṣu adhyāyeṣu jñānamuktam, idaṃ tu tadapekṣayā atiguhyaṃ, 
anāvirbhūtavivekajajñānānāṃ guhāyāṃ dūratare'dhvani sthitaṃ, 
rahasyatayā vā guhyam | ata eva tvaṃ yat viditvā 
janmajarāmaraṇacakraparivartanalakṣaṇāt aśubhāt aśreyasaḥ mokṣyase 
svayameva mokṣaṃ prāpsyasi || 1 ||

	yato vakṣyamāṇajñānopāyaniṣṭhasya antakāle 
gatidvayajñānābhyupāyavyatirekeṇāpi brahmaprāptirnirdiṣṭaiva, ata eva 
asya jñānasya praśaṃsārthamāha -

p. 198) rājavidyā rājaguhyaṃ pavitramidamuttamam |
pratyakṣāvagamaṃ dharmyaṃ susukhaṃ kartumavyayam || 2 ||

	idaṃ vakṣyamāṇaṃ jñānam uttamam ananyasāmānyaṃ pavitraṃ 
pāvanaṃ sarvakilviṣakalaṅkapaṅkasaṃkṣālanahetuḥ | santi hi pavitrāṇi 
tīrthamantratapoyajñadānādīni | tāni tu jñānarahitatvādantavanti yadi; 
parametajjñānasaṃskṛtāni anantaphalatvamaśnuvīran, ata eva uttamaṃ 
pavitramiti uktam | yato rājavidyā eṣā rājñāṃ 
janakāśvapatiprabhṛtīnāmugraṃ svakarmāpi anutiṣṭhatāmeṣā vidyā 
jñānamapavargaphalatvena śrūyate | tataśca teṣāṃ rājñāṃ guhyaṃ 
rahasyametat, yataḥ pratyakṣāvagamaṃ pratyakṣaḥ 
svasaṃvedanavedyo'vagamo bodho yasya tat tathāvidhaṃ, anyeṣāṃ hi 
pavitrāṇāṃ kālāntare dehāntare lokāntare ca phalāvagamo bhaviṣyati; 
tathā dharmyaṃ dharmāt śāstroditāt varṇāśramakramavibhaktāt 
sadācārādanapitam, ata eva kartuṃ saṃpādayituṃ, susukham 
atyantasukhakaraṃ sahajasvabhāvakarmamātrasādhanatvāt, tathāvidhaṃ 
sadapi avyayam avidyamānakṣayaṃ tatprāpyasya phalasya 
matsamāpattilakṣaṇasya nityatvāt || 2 ||

	etacca madanugrahotthitabhaktiśraddhādiguṇasaṃpadbhireva 
sulabhaṃ yataḥ -

aśraddadhānāḥ puruṣā dharmasyāsya parantapa |
aprāpya māṃ nivartante mṛtyusaṃsāravartmani || 3 ||

	asya uktasya vakṣyamāṇasya ca jñānarūpasya dharmasya 
aśraddadhānāḥ yathoktaphalāsaṃbhāvanāparāḥ puruṣā māṃ 
yathoktasvarūpaṃ paraṃ brahma aprāpya matsamāpattimanāsādyaiva 
mṛtyusaṃsārayorbhūteṣu nityaparivarttinormaraṇajanmanorvartmani 
nivartante punaḥ punarāpatanti |

p. 199) kimuktaṃ bhavati | 
madanugrahasudhāsāgarasamudgataśraddhāsuratarumañjarī 
sakalasiddhiprasavaikaheturyairupāsyate, taireva anena jñānena sulabho na 
anyairiti || 3 ||

	tadidānīṃ jñānaṃ pratipādayitumāha -

mayā tatamidaṃ sarvaṃ jagadavyaktamūrtinā |
matsthāni sarvabhūtāni na cāhaṃ teṣvavasthitaḥ || 4 ||

na ca matsthāni bhūtāni paśya me yogamaiśvaram |
bhūtabhṛnna ca bhūtastho mamātmā bhūtabhāvanaḥ || 5 ||

	mama saṃbandhinam aiśvaram īśvare sarvathā svāmini ekasmin 
bhavaṃ yogam ananyādhikaraṇaṃ samādhiṃ paśya pratipadyasva | yataḥ 
idaṃ vedyatvena sarvapramātṝṇāṃ sarvaṃ 
saṃkṣepataścarācarabhāvarūpamavāntarabhedaparikalpanayā 
niṣparyantaṃ vastu mayā upādānasahakāryādikāraṇāntaranirapekṣeṇa 
nityanirvikārasāmānyasaṃvinmātrasvabhāvāpracyutena 
ananyānukāryaniratiśayanijakrīḍāmātraikaprayojanena 
svecchaikasādhanena ekena kartrā tatam 
itthamanantāścaryāvabhāsarūpatayā vistāritaṃ jagat bhuvanam 
avyaktamūrtinā manmāyotthāpitaiḥ sarvaiḥ pramātṛbhiridantayā 
paricchettumaśakyatvādavyaktā vyapadeśyavyaktivirahitā mūrtirākṛtiḥ 
svarūpaṃ yasya, sa tathā tena tādṛśena | kimuktaṃ bhavati | 
brahmāderārabhya paramakṣudrajantuparyantasya sarvasya pramāturyat 
saṃvedyaṃ vastu yena yena prakāreṇa yadā yadā yatra yatra prakāśate, tat 
saṃvedyamānaṃ santamātmānaṃ labhate, saṃvedyamānatā ca 
saṃvedituḥ karmabhāvāpattiḥ, saṃveditā ca paramārthataḥ sadā eka eva 
bhavitumarhati yo na kathaṃcit na kadācit

p. 200) na kutracit saṃvedyatvalakṣaṇaviśeṣaṇasaṃparkaṃ sahate | tato 
matsthāni mayi ekasmin saṃveditari sthitāni sarvāṇi nikhilāni sthāvarāṇi 
jaṅgamāni ca saṃvedyāni bhūtāni | evaṃ sarvakartā sarvaśaktihetuḥ 
ahaṃ na ca teṣu bhūteṣu vyavasthitaḥ yathā 
nityasaṃveditṛtvamātrasvabhāvāvyabhicāriṇo mama vyavasthā 
saṃvedyānāṃ sarvabhūtānāṃ vyavasthitihetuḥ, na tathā 
sarvabhūtavyavasthā madvyavasthitiheturityarthaḥ | sarvāṇi hi bhūtāni 
saṃvedyatvādeva utpādavināśādidharmasaṃbandhādanityāni, mama tu 
saṃveditṛtvamekaṃ lakṣaṇamiti kathaṃ mama bhūtasthityadhīnā 
avasthitirbhavet | itthaṃ madadhīnasthitikāni api bhūtāni na matsthāni mayi 
saṃveditari madrūpatayaiva na sthitiṃ bhajante vedyatayā sphuraṇāt; 
bhūtasthitiheturahaṃ yathā saṃveditṛtayaiva nityaṃ sphurāmi, na tathā 
anyāni api bhūtāni saṃvedyatvenaiva teṣāṃ pratīteḥ | evaṃ yathoktena 
prakāreṇa mamātmā svabhāvo bhūtabhṛt bhūtāni bibharti dhārayati tena 
tena rūpeṇa avasthāpayati naca bhūtasthaḥ na bhūtasthityadhīnasthitikaḥ, 
ityuktameva | ataśca anena krameṇa bhūtabhāvanaḥ bhūtāni bhāvayati 
sṛjatītyarthaḥ || 5 ||

	atra kenacit sādṛśyāṃśena dṛṣṭāntamāha -

yathākāśasthito nityaṃ vāyuḥ sarvatrago mahān |
tathā sarvāṇi bhūtāni matsthānītyupadhāraya || 6 ||

	evamanena prakāreṇa mayi anavacchinnamahimni sthitāni 
ādheyatvamāpannāni tattaddeśagatāni sūkṣmāṇi mahānti ca bhūtāni 
upadhāraya budhyasva | katham | yathā ākāśe niravacchedavyāptau nityaṃ 
sadaiva sthitaḥ vāyuḥ | kīdṛśaḥ | sarvatragaḥ tatra tatra deśe gataḥ 
kṛtavyāptiḥ mahān ca anyāpekṣayā vyāpakaḥ | evaṃ

p. 201) matsthāni bhūtāni budhyasva | atra idaṃ tātparyam yathā vāyoḥ 
sarvatra sarvagatatvamahattvādayo dharmā 
aparyantākāśāvakāśaikanibandhanāḥ, tathā sarvabhūtānāṃ sarve 
dharmā matsvabhāvānupraveśaikanibandhanā iti || 6 ||

	tadetat nigamayitumāha -

evaṃ hi sarvabhūteṣu carāmyanabhilakṣitaḥ |
bhūtaprakṛtimāsthāya sahaiva vinaiva ca || 7 ||

	evam anena vāyvākāśasaṃbandhopamena prakāreṇa sarvabhūteṣu 
carāmi tāni vyāpnomi anabhilakṣitaḥ idantayā kenacidapi 
anavadhāritasvarūpaḥ | kiṃ kṛtvā carāmi | bhūtaprakṛtiṃ 
prākpratipāditacetanātmakabhūtalakṣaṇāṃ prakṛtiṃ svabhāvam 
āsthāya adhiṣṭhāya | kathaṃ carāmi | saha caiva vinaiva ca 
nityamanyonyasaṃbaddhatvāt saha vedyavedakalakṣaṇasvarūpābhedāt, 
vinaiva anyonyapṛthaktayā eva | anyo hi vedakasvarūpo mama 
svabhāvo'nyacca madicchodbhāvitaṃ vedyasvarūpam || 7 ||

madicchodbhāvitatvameṣāṃ pratipādayitumāha -

sarvabhūtāni kaunteya prakṛtiṃ yānti māmakīm |
kalpakṣaye punastāni kalpādau visṛjāmyaham || 8 ||

	etāni cetanācetanāni sarvabhūtāni mahākalpāvasāne madīyāṃ 
prakṛtiṃ svabhāvaṃ yānti madicchayaiva mayi pralīyante ityarthaḥ | tāni ca 
kalpādau kalpāntarārambhe'hameva visṛjāmi caturdaśavidhenaiva bhedena 
avabhāsayāmi, natu yāni eva pralīnāni tāni eva punaḥ sṛjāmīti atra 
arthaḥ | īśvarecchāyā aparyanuyojyatvāt svātantrye'pi 
caturdaśavidhameva bhūtasargaṃ pralayotpādāvasthayoḥ saṃharati sṛjati 
ca parameśvara iti tātparyam || 8 ||

p. 202) etadeva nigamayati -

prakrtiṃ svāmavaṣṭamya visṛjāmi punaḥ punaḥ |
bhūtagrāmamimaṃ kṛtsnamavaśaṃ prakṛtervaśāt || 9 ||

	svāṃ prakṛtiṃ nijaṃ svabhāvaṃ, na anyat kiñcit kāraṇāntaram 
avaṣṭabhya avalambya imaṃ sarvaṃ bhūtagrāmaṃ prāṇisamūhaṃ 
punaḥ punaḥ bhūyo bhūyo'nādiprabandhapravṛttakalpādikālakalpanayā 
sṛjāmi evamudbhāvayāmi prakṛteḥ eva vaśāt 
matsvabhāvapāratantryādeva avaśam asvatantram | kalpānte ca tathaiva 
saṃharāmīti atra anuvartanīyam || 9 ||

	kiṃca -

naca māṃ tāni karmāṇi nibadhnanti dhanañjaya |
udāsīnavadāsīnamasaktaṃ teṣu karmasu || 10 ||

	tāni sargasaṃhārādirūpāṇi karmāṇi na punarmāṃ badhnanti 
manmāyodbhāvitanānākṣetrajñavat niyamitavipākārambhakatvādinā na 
paratantrīkurvanti | yathā kṣetrajñānāṃ karmāṇi 
jātyāyurbhogalakṣaṇavipākārambhakatvena 
saṃsārabandhakāraṇatvamāpadyante, na tathā sargādikarmāṇi 
mametyarthaḥ | kīdṛśaṃ santaṃ māṃ na nibadhnanti, iti hetugarbhaṃ 
viśeṣaṇamāha teṣu karmasu asaktatvān mamatvādigrahābhāvena 
animagracittatvāt udāsīnavat taṭasthavat āsīnaṃ sthitam | yathā 
parakīyakarmasu paro naitāni mama tattatphaladāni iti 
manyamānastāṭasthyamanubhavaṃstaistaiḥ karmabhiḥ 
svaphalabhoktṛtvādinā na niyamyate, tathā sargādibhiḥ karmabhirna 
nibadhyaḥ, | yatastāni sargādīni karmāṇi 
acintyavaibhavasvamāyodbhāvitānyonyabhedān

p. 203) ksetrajñān prati, mama sarvataḥ svecchāmātreṇa 
tathāvabhāsakatvameva kartṛtvam | kṣetrajñā eva hi manmāyāmohitāḥ 
santo'nyonyabhedena avabhāsamānānāṃ bhāvānāṃ 
sargādyavasthāyogitvaṃ pratipadyante, mama punarete sarve 
bhāvāstattatsargādyavasthājuṣo'pi advayacinmātralakṣaṇāt svabhāvāt 
na bhidyante, iti | anena teṣu karmasu udāsīnavadāsīnaṃ māmetāni na 
nibadhnantīti uktam | eva ca arthaḥ prāgeva punaḥ punaḥ 

	tasya kartāramapi māṃ viddhyakartāramavyayam | (4|13)

ityādinā 

na māṃ karmāṇi limpanti na me kāmaḥ phaleṣvapi | (4|14)

ityādinā ca prtipāditaḥ || 10 ||

	yadi evaṃ vastusthityā parameśvaro na, idaṃ jagat sākṣāt 
sargādikarmaṇā niyunakti, tat kena idaṃ jagat sṛjyate ityāha -

mayādhyakṣeṇa prakṛtiḥ sūyate sacarācaram |
hetunānena kaunteya jagadviparivartate || 11 ||

	mayā parameśvareṇa nityaṃ svabhāvamātrāvasthitenaiva 
adhyakṣeṇa adhiṣṭhātrā hetubhūtena prakṛtiḥ saptame'dhyāye 
cetanācetanavibhāgena pratipāditaparāparasvarūpā svabhāvavṛttireva 
aparyantasthāvarajaṅgamabhedayuktaṃ jagat sūyate janayati | anena hetunā 
nimittena idaṃ jagad viparivartate sargasthitisaṃhāraprabandhacakre 
paribhramati || 11 ||

	evamadbhutaiśvaryaikāspadam -

avajānanti māṃ mūḍhā mānuṣīṃ tanumāsthitam |
paraṃ bhāvamajānanto mamāvyayamanuttamam || 12 ||

	mūḍhāḥ māyāmuṣitatattvajñānāḥ māṃ 
yathāpratipāditasvabhāvam

p. 204) avajānanti nityoditaniratiśayaprakāśapradyotamānasvabhāvamapi 
mohabalotsāhavicchedāt majjijñāsāyāmapi avajñāmāśrayanti | 
kīdṛśaṃ santaṃ māmavajānanti | mānuṣīṃ tanumāsthitam 
mānuṣīgrahaṇamupalakṣaṇārtham, tena manuṣyādibhedena 
anyonyabhinnānantākṛtiviśeṣarūpāṃ 
pāramārthikasvarūpatirodhānatiraskariṇīmāśritam | ata eva te mūḍhāḥ | 
kīdṛśāḥ santo māmavajānanti | evaṃvidhayā manmāyayā madīyaṃ 
paraṃ etasmāt nānācetanācetanabhāvalakṣaṇāt prapañcādanyaṃ 
vilakṣaṇam, tathā avyayam avinaśvaram, ata eva anuttamam 
uttarottaravicāryamāṇaprakarṣe sati avidyamāno'nya uttamaḥ prakṛṣṭo 
yasmāt, taṃ tathāvidhaṃ bhāvaṃ pāramārthikīṃ sattām ajānantaḥ 
santo māmevaṃ vimarśābhāvādabuddhyamānāḥ || 12 ||

yataste mūḍhāḥ santaḥ -

moghāśā moghakarmāṇo moghajñānā vicetasaḥ |
āsurīṃ rākṣasīṃ caiva prakṛtiṃ mohinīṃ śritāḥ || 13 ||

	mohinīṃ svabhāvājñānakāriṇīṃ prakṛtiṃ guṇamayaṃ 
svabhāvaṃ śritāḥ dehātmakāhaṅkāranibandhanasthitayaḥ | ata eva 
kīdṛśīṃ prakṛtim | āsurīṃ rajoleśānugatatamaḥ pradhānāṃ, tathā 
rākṣasīṃ kevalatamaḥpradhānām, uttamādhamāsurasargabhedatvena 
prāk prastāvanāyāṃ pratipāditasvarūpām | yata evaṃvidhāṃ prakṛtiṃ 
śritāstato moghāśāḥ moghāḥ phalaśūnyā āśā yeṣāṃ te 
tathāvidhāḥ | te hi āsurarākṣasaprakṛtitvāt rajastamomayatve sati 
kāmātmāno bhogaviṣayaṃ saṃkalpameva kurvanti, natu 
tatphalaprāptihetuṃ śāstroditaṃ

p. 205) karma ārabhante, tato moghāśā iti uktam | tathā moghakarmāṇaḥ 
yadapi karma ārabhante, tat śāstrīyopāyaniyamābhāvāt moghaṃ 
niṣphalaṃ yeṣāṃ, te tathāvidhāḥ | vakṣyati hi rājasatāmasayoḥ 
karmaṇorlakṣaṇam | tadyathā

yattu kāmepsunā karma sāhaṅkāreṇa vā punaḥ |
kriyate kleśabahulaṃ tadrājasamiti smṛtam ||

anubandhaṃ kṣayaṃ hiṃsāmanavekṣya ca pauruṣam |
mohādārabhyate karma yattattāmasamucyate || (18|25)

iti | tathā evaṃvidhakartṛlakṣaṇamapi 

rāgī karmaphalaprepsurlubdho hiṃsātmako'śuciḥ |
harṣaśokānvitaḥ kartā rājasaḥ parikīrtyate || (18|27)

tathā

ayuktaḥ prākṛtaḥ stabdhaḥ śaṭho naikṛtiko'lasaḥ |
viṣādī dīrghasūtraśca kartā tāmasa ucyate || (18|28)

	iti | tathā moghajñānāḥ cikīrṣitakarmaniṣpattihetutvāt 
karmārambhapūrvabhāvijñānamapi moghaṃ niṣphalaṃ yeṣāṃ, te 
tathoktāḥ | jñānapūrvakaṃ hi karmaṃ, jñānasyaiva ca 
āsurādiprakṛtyāśritajñātṛsaṃbandhino 
viparyayapratipattidoṣasaṃbandhāt karmaphalena visaṃvādāt 
niṣphalatāsthitaiva | tathāca evaṃ vidhajñānalakṣaṇamapi vakṣyati 

pṛthaktvena tu yajjñānaṃ nānābhāvān pṛthagvidhān |
vetti sarveṣu bhūteṣu tadrājasamiti smṛtam || (18|21)

tathā 

yattvakṛtsnavidekasmin kārye saktamahaitukam |
atattvārthavadalpaṃ ca tattāmasamudāhṛtam || (18|22)

p. 206) iti | moghajñānatvāt vicetasaḥ tattvārthaniṣṭhatvābhāvāt sadapi 
vigataṃ samyagjñānalakṣaṇasvakāryākaraṇādavidyamānamiva 
ceto'ntaḥkaraṇaṃ yeṣāṃ, te tathāvidhāḥ || 13 ||

	evamekāntato māyākroḍīkṛtānāmāsuraprakṛtyāśritānāṃ 
vṛttiṃ pratipādya, vidyānugṛhītānāṃ 
pravṛttinivṛttiviṣayaśāstropadeśapātrabhūtānāṃ 
daivaprakṛtyāśritānāṃ pratipipādayiṣuḥ paradaivaprakṛtyāśritānāṃ 
tāvattāṃ pratipādayitumāha -

mahātmānastu māṃ pārtha daivīṃ prakṛtimāśritāḥ |
bhajantyananyamanaso jñātvā bhūtādimavyayam || 14 ||

	prastāvanāpratipāditaparāparasvarūpamayyāḥ parasyā devyāḥ 
prakṛtiṃ daivīṃ samyak jñānavivekadyotanaśīlatvāt 
devaśabdavācyānāṃ saṃbandhinīṃ prakṛtiṃ svabhāvam āśritāstu ata 
eva mahātmānaḥ utkṛṣṭasvabhāvāḥ māṃ paramātmānaṃ bhajante 
caturvidhayā sevayā ananyamanasaḥ 
madvyatiriktavastvantarābhāvaprarūḍhapratipattitvāt mayi evaikasmin tattve 
mano yeṣāṃ, te tathāvidhāḥ jñātvā ca anuṣṭhānam iti sthiteḥ | 
kīdṛśaṃ māṃ viditvā bhajante | bhūtādiṃ bhūtānāṃ 
cetanācetanānāṃ madhye ādiṃ prathamaṃ, tathā avyayaṃ nityatvāt na 
mama kṣayo vidyate ityarthaḥ | sarvabhūtāni ādyantavanti, ahamādireva, na 
antavāniti atra tātparyam || 14 ||

kiṃca -

satataṃ kīrtayantaśca yatantaśca dṛḍhavratāḥ |
namasyantaśca māṃ bhaktyā nityayuktā upāsate || 15 ||

	te evaṃ daivaprakṛtyāśritāḥ prabuddhāḥ satatam avyavadhānena 
kīrtayantaḥ mantrajapastutyādinā udghoṣayantaḥ, tathā dhyānādinā

p. 207) yatamānāḥ, tathā namasyantaḥ grahībhavanto māṃ bhaktyā 
hetubhūtayā nityayuktāḥ santaḥ upāsate vāṅmanaḥkāyavyāpārān 
madekaviṣayān kurvāṇāḥ paricarantītyarthaḥ || 15 ||

kiṃca -

jñānayajñena cāpyanye yajanto māmupāsate |
ekatvena pṛthaktvena bahudhā viśvatomukham || 16 ||

pūrvebhyaḥ prasiddhabhaktiprakārāśrayaṇena madyajanaparebhyaḥ anye 
vilakṣaṇā jñānena viśuddhasaṃvinmātramatsvarūpacintanaikalakṣaṇena 
yajñena yāgavidhinā yajantaḥ pūjayantaśca māmupāsate sevante | 
kathaṃ māṃ jñānayajñena upāsate | ekatvena 
sakalaprapañcaparihārādabhinnaikasaṃvinmātramatsvarūpatayā, tathā 
pṛthaktvena nānātvena, ata eva bahudhā anekena jñānena 
kriyādyupacaraṇīyavicitrākṛtyādibhinnarūpatayā | vastutaḥ kīdṛśam | 
viśvatomukhaṃ sarvataḥ sarva eva upāsanīyābhedāt mukhaṃ 
pratyabhijñākāraṇaṃ yasya, taṃ tādṛśam | idamatra tātparyam 
dvividhaḥ pāramārthiko matsvarūpopāsākramaḥ | ekaḥ 
saṃvinmātraikatattvaviṣayajñānamātrasādhanaḥ, apara ekasyaiva 
tattvasya nānājagadbhāvanānāśaktisamūhatvāt taddvāreṇa tasya tasya 
upāsanamiti || 16 ||

tadeva ekasya tattvasya sarvaśaktitvaṃ pratipādayitumāha -

ahaṃ kraturahaṃ yajñaḥ svadhāhamahamauṣadham | 
mantro'hamahamevājyamahamagnirahaṃ hutam || 17 ||

	kratuyajñayoryadyapi paryāyatvena vyavahāraḥ, tathāpi 
yajñaśabdasannidhāne paśusomādisādhanaviśiṣṭa eva yajñaḥ 
kratuśabdena atra

p. 208) uktaḥ | yajñaśabena pākayajñānāṃ grahaṇaṃ, tato 
yathāpratipāditabrahmādvaitasthityā sarvo 
yāgavidhirnānādevatāsaṃpradānaḥ aham eva | tathā svadhā 
pitṛtarpaṇamantro'pi aham eva | tathā nānauṣadhivikārātmakam 
auṣadhaṃ yāgopakaraṇadravyam aham eva | tathā 
saṃpradānabhūtadevatāsaṃmukhīkārādivividhārthavācakaśabda-
viśeṣarūpaḥ mantraḥ yajñopakaraṇaviśeṣo'pi aham | tathā ājyaṃ 
ghṛtaṃ tarpaṇadravyam | tathā agniḥ āhavanīyādiryāgavidhyadhikaraṇam 
| tathā hutaṃ havanaṃ homakarma, iti yajñādirūpatayā 
brahmārpaṇavidhinyāyena aham eva sthitaḥ, iti atra tātparyam || 17 ||

kiṃca-

pitāhamasya jagato mātā dhātā pitāmahaḥ |
vedyaṃ pavitramoṅkāra ṛk sāma yajureva ca || 18 ||

gatirbhartā prabhuḥ sākṣī nivāsaḥ śaraṇaṃ suhṛt |
prabhavaḥ pralayaḥ sthānaṃ nidhānaṃ bījamavyayam || 19 ||

	asya jagataḥ samastasya carācarasya viśvasya utpattimūlakāraṇatvāt 
pitā mātā cāham | yadivā pitarau yathā 
apatyasyasamastayogakṣemodvahane nityāvahitau, tathā ahamasya jagataḥ | 
tathā dhātā dhartā sthitihetuḥ | tathā pitāmahaḥ brahmādīnāṃ jagataḥ 
sraṣṭṭatvena sthitānāṃ janakatvāt pitāmahaḥ | pavitraṃ paramaṃ 
pāvanaṃ yat vedyaṃ jñeyaṃ vastu | tathā oṃkāraḥ parabrahmavācakaḥ 
praṇavākhyo vedādiḥ śabdaviśeṣaḥ, tatprabhavāṇi ca ṛksāmayajūṃṣi | 
tathā gamyate jñāyate vā paraṃ tattvamanayeti gatiḥ upāyaḥ | tathā 
bhartā poṣṭā | tathā prabhuḥ yatheṣṭaviniyogaikasvāmī | tathā sākṣī 
śubhāśubhakarmādhyakṣaḥ | tathā nivāsaḥ 
sarvabhūtānāmekamāvasatham |

p. 209) tathā śaraṇaṃ sarvopadravapraśamāya āśrayaḥ | tathā suhṛt 
sarvabhāvena upakārī | tathā janmavināśasthitihetutvāt prabhavaḥ 
pralayaḥ sthānaṃ ca | tathā pralīnaṃ sat yatra avatiṣṭhate, tat 
pradhānātmakaṃ nidhānam | tathā yataḥ prabhavati, tat pradhānasyāpi 
avyayam akṣayaṃ bījaṃ kāraṇamiti | na tat kiñcidasti, ydahamasya jagato 
na bhavāmītyarthaḥ || 19 ||


tathāca -

tapāmyahamahaṃ varṣaṃ nigṛhṇāmyutsṛjāmi ca |
amṛtaṃ caiva mṛtyuśca sadasaccāhamarjuna || 20 ||

	sūryo bhūtvā grīṣmādau rasamādadānaḥ ahaṃ tapāmi yataḥ, 
tadā hi ahameva varṣaṃ nigṛhṇāmi niruṇadhmi, varṣākāle ca ahameva 
parjanyo bhūtvā utsṛjāmi tapanavarṣaṇakriyayā annādyutpādanena 
ahameva jagat pravartayāmītyarthaḥ | tathā amṛtam avināśi yat vastu 
mṛtyuśca vināśaheturahameva | kiṃ bahunā uktena yat kiñcit sat 
vidyamānaṃ śobhanaṃ vā, yat asat tadviparītaṃ kiñcit jagati saṃbhavati; 
tat sarvam ahaṃ macchaktireva ekā sadasadbhāvena avabhāsate iti || 20 ||

	evaṃ paradaivaprakṛtyāśritasargabhedapratipādanaprasaṅgena 
brahmasvarūpaṃ saṃgraheṇa uktvā, 
idānīmaparadaivaprakṛtyāśritānāṃ puruṣāṇāṃ pravṛttiṃ 
pratipādayitumāha -

traividyā māṃ somapāḥ pūtapāpā
yajñairiṣṭvā svargatiṃ prārthayante |
te puṇyamāsādya surendraloka-
maśnanti divyān divi devabhogān || 21 ||

p. 210) te taṃ bhuktvā svargalokaṃ viśālaṃ 
kṣīṇe puṇye martyalokaṃ viśanti |
evaṃ trayīdharmamanuprapannā 
gatāgataṃ kāmakāmā labhante || 22 ||

	jñānarahitakriyāmātropadeśaparyavasitārthā 
ṛgyajuḥsāmalakṣaṇāstisro vidyā adhīyate vidanti vā traividyāḥ 
mukhyatayā brāhmaṇādayastraivarṇikāḥ pūtapāpāḥ āniṣekāt 
śāstravihitasaṃskārasaṃpannatvāt hatakalmaṣāḥ, tathā 
nirvṛttayathoktabrahmacaryādyāśramaniyamāḥ santaḥ somapāḥ 
nityanaimittikasvakarmānuṣṭhānaniṣṭhā ityarthaḥ, tathāvidhāḥ santo 
devatāntarayajanavidhirūpaiḥ yajñaiḥ taistaiḥ 
śāstracoditairyāgaviśeṣaiḥ samyagjñānābhāvādavidanto'pi māmeva 
iṣṭvā pūjayitvā svargatiṃ devalokaprāptiṃ kāmātmānaḥ santaḥ 
prārthayante upayācante, yatastaistairyajñavidhibhistāṃstān devaviśeṣān 
yajante, iti viśvatomukhamekaṃ tattvaṃ māmeva yajante | kevalaṃ saṃprati 
vidyāśaktyānanugṛhītāḥ paraṃ madīyaṃ bhāvamavidanto 
bhogamātraṃ yajñādikriyāphalaṃ manyamānāḥ 
svargamabhikāṅkṣanti | te tathāvidhāstraividyā dehānte svakarmopanataṃ 
svargalokaṃ viśālaṃ vipulaṃ devalokaṃ gatvā tadgatān bhogān bhuktvā 
upasevya svakarmopārjite puṇye tadanurūpakālātivāhanāt kṣīṇe antaṃ 
gate martyalokaṃ karmabhūmimimāṃ 
svakarmānurūpajātiviśeṣāśrayaṇena viśanti pratipadyante | evam anena 
krameṇa trayīdharmaṃ vedoktaṃ svaṃ svamācāram anuprapannāḥ 
samāśritāḥ santaḥ kāmakāmāḥ 
svargādibhogābhikāṅkṣiṇaścāturvarṇikā api gatāgataṃ gataṃ 
svargādibhūmau gamanaṃ, āgataṃ tato bhūyaḥ 
karmabhūmāvāgamanaṃ labhante prāpnuvanti saṃsārabandhabhāginaḥ 
punaḥ punarbhavantītyarthaḥ || 21 || 22 ||

p. 211) etadantena granthena jñānamuktvā vijñānamāha -

ananyāścintayanto māṃ ye janāḥ paryupāsate |
teṣāṃ nityābhiyuktānāṃ yogakṣemaṃ vahāmyaham || 23 ||

	ye janāḥ parāṃ daivīṃ prakṛtimāśritā 
dṛṣṭānuśravikaguṇātmakebhyo 
bhogebhyo'śuddhyatiśayakṣayādidoṣavadbhyo viraktāḥ santo 
nityanirmalaniratiśayānantānandasudhāsāgaraṃ māṃ paramakāraṇaṃ 
brahmatattvaṃ paryupāsate yathāpratipāditajñānaniṣṭhatayā 
svakarmāṇi ajahataḥ samantāt sevante | kīdṛśāḥ santaḥ | ananyāḥ 
avidyamānamanyat madvyatiriktaṃ vastu yeṣāṃ te, tathāvidhā 
manmayameva sarvamidamanubhavanta ityarthaḥ | teṣāṃ tādṛśānāṃ 
nityābhiyuktānāṃ yathoktajñānaikatānatayā satatodyuktānāṃ 
sarvāsvavasthāsu yathoktamatsvarūpasmaraṇaikaparāyaṇānāmityarthaḥ 
ahaṃ parameśvaraḥ yogakṣemaṃ vahāmi yogaṃ prāganāsāditena 
matsvarūpasaṃvedanātmakena phalena saṃbandhaṃ, kṣemamāsāditasya 
punaraparilopalakṣaṇaṃ dhārayāmi | ye nityaṃ manmayāsteṣāṃ kuto 
yogakṣemakṣatirityarthaḥ | evaṃ 
yathoktopāyanirapāyaniveśitāntaḥkaraṇatayā 
matsvarūpānubhavarūpāṃ parāṃ kāṣṭhāmadhirūḍhā bhaktireva 
vijñānamiti tātparyam || 23 ||

	nanu viśvatomukhastvamevaikaṃ tattvamiti devatāntarayājino'pi 
ananyā eva, tat kathamuktam ananyā ye māmupāsate, teṣāṃ yogakṣemaṃ 
vahāmīti | atra āha -

ye'pyanyadevatā bhaktā yajante śraddhayānvitāḥ |
te'pi māmeva kaunteya yajantyavidhipūrvakam || 24 ||

	satyam ye'pi janāḥ anyadevatā bhaktāḥ parasparabhinnasvarūpān 

p. 212) tāṃstān sūryendrādipramukhān devaviśeṣān yajante, te'pi 
paramārthato madvyatiriktadvitīyavastvabhāvāt māmeva śraddhayā 
tattadbinnaphalasaṃbhāvanayā yajanti pūjayanti, kintu avidhipūrvakam | 
madyajane evaṃvidho vidhirukto vakṣyate ca | yathoktajñānaniṣṭhatayā 
sarveṣu yaṣṭavyeṣu devatāviśeṣeṣu tāsu tāsu yāgakriyāsu yaṣṭari ca 
svātmani advayacinmātralakṣaṇamatsvarūpānubhavaḥ, sa ca teṣāṃ 
jñānaśūnyakevalakriyāmātraśaraṇānāṃ vidhirna saṃbhavati, 
tasmādavidhipūrvakaṃ yajanti, ityuktam || 24 ||

etadeva prakaṭayitumāha -

ahaṃ hi sarvayajñānāṃ bhoktā ca prabhureva ca |
natu māmabhijānanti tattvenātaścyavanti te || 25 ||

	sarvayajñānāṃ nānābhedānāṃ yāgānām ahameva bhoktā 
eka eva parameśvaraḥ phalasya svīkartā | tathā prabhuḥ 
adhiṣṭhānakriyādhiṣṭhitaḥ | sarve yajñā ahameveti na punastathāvidhaṃ 
māṃ tattvena paramārthena yathoktena abhijānanti ekatvena na pratipadyante 
| ato hetoḥ te tādṛśā anuṣṭhātāraḥ cyavanti matto viyujyante nānātvena 
sarvaṃ paśyantītyarthaḥ || 25 ||

tataśca 

yānti devavratā devān pitṛn yānti pitṛvratāḥ |
bhūtāni yānti bhūtejyā yānti madyājino'pi mām || 26 ||

	devebhyo devārthaṃ vrataṃ niyamo yeṣāṃ, te 
śakrādidevārādhakāḥ devavratāḥ tatsaparyāsiddhau devān eva yānti 
tallokabhājo bhavantītyarthaḥ | evaṃ pitṛvratāḥ pitṝn yānti | tathā 
bhūtebhyo

p. 213) yakṣarakṣaḥpiśācādibhyastadarthamijyā yāgo yeṣāṃ, te 
tādṛśāstāni eva pūrvavat yānti | devapitṛyājinaḥ sāttvikāḥ, 
bhūtayājinastu rājasāstāmasāśca | yaduktaṃ

yajante sāttvikā devān yakṣarakṣāṃsi rājasāḥ |
pretān bhūtapiśācāṃśca yajante tāmasā janāḥ || (17|4)

	iti | ye tu nistraiguṇyāste madyājinaḥ māmeva 
traiguṇyātītasvarūpaṃ yaṣṭuṃ śīlaṃ yeṣāṃ te tathāvidhameva 
matsvarūpaṃ parabrahma yānti samāpadyante || 26 ||

	sa ca madyāgo devavratādiyāgavat 
tattannānādravyasaṃbhārasādhano naivetyāha -

patraṃ puṣpaṃ phalaṃ toyaṃ yo me bhaktyā prayacchati | 
tadahaṃ bhaktyupahṛtamaśnāmi prayatātmanaḥ || 27 ||

	bhaktiradvayacinmātrasvarūpabrahmatattvabhāvanayā ātmana eva, 
tasya tasya vā nānādevatāviśeṣasya upāsanam | tayā sādhanabhūtayā 
yastattvavit patrādyapi yatkiñcit mahyaṃ prayacchati, tat tasya 
prayatātmanaḥ tathāvidhādvayavijñānasamāhitāntaḥkaraṇasya 
tādṛśabhaktyupahṛtam aśnāmi upabhuñje yādṛśabhāvanāviśeṣeṇa 
upahṛtaṃ, tathaiva tat svīkaromītyarthaḥ || 27 ||

	yata evaṃ, tataḥ

yat karoṣi yadaśnāsi yajjuhoṣi dadāsi yat |
yat tapasyasi kaunteya tat kuruṣva madarpaṇam || 28 ||

	yat karoṣi tattatphalārthitayā yat karma anutiṣṭhasi, yacca aśnāsi 
tattatkarmaphalabhūtamupabhuñje, tat sarvaṃ madarpaṇaṃ kuru mayi 
brahmasvarūpe'rpaṇaṃ madātmakapratipattyā nivedanaṃ yasya, tat

p. 214) tādṛśaṃ kuru saṃpādaya | tacca kāryaṃ jñānarahitānāṃ 
nānāphalahetutvena vyavasthitaṃ vivṛṇoti yat juhoṣi teṣu teṣu yajñeṣu 
tattaddevatātarpaṇārthaṃ yadagnau havanakriyayā kṣipasi, yacca 
anatarvedyādau tadāsi pātrebhyaḥ prayacchasi yat taponiyamaviśeṣaṃ 
carasi; tat sarvaṃ madarpaṇaṃ kuru | yajñadānatapolakṣaṇāsu kriyāsu 
avaśyakartavyāsu tattatphalābhikāṅkṣākārpaṇyaparihāreṇa 
matsvarūpānubhavameva ekaṃ phalamavalambasvetyarthaḥ || 28 ||

asyā bhāvanāyāḥ phalamāha -

śubhāśubhaphalairevaṃ mokṣyase karmabandhanaiḥ |
saṃnyāsayogayuktātmā vimukto māmupaiṣyasi || 29 ||

	evam anena prakāreṇa yajñādikāḥ svāḥ kriyā anutiṣṭhannapi 
śubhāśubhaphalaiḥ śubhaiḥ sukhātmakairaśubhairduḥkhātmakaiḥ 
kriyāṇāṃ phalaiḥ mokṣyasetyakṣyase tāni te bandhanāya na 
kalpayiṣyante ityarthaḥ | kīdṛśaiḥ | karmabandhanaiḥ karmāṇi 
jñānaśunyāni bandhanaṃ niyamaheturyeṣāṃ, tathāvidhaiḥ | 
karmanibandhanāni hi phalāni jñānaśūnyaṃ badhnanti, na 
yathoktajñānasaṃpannam | atastvaṃ saṃnyāsayogena 
phalāsaṃkalpasamādhinā yuktātmā saṃbaddhasvabhāvaḥ, ata eva 
vimuktaḥ sarvabandhanebhyo viniṣkrānto mām ekaṃ paramakāraṇam 
upaiṣyasi ahameva saṃpatsyase ityarthaḥ || 29 ||

	nanu keṣāṃcit yajñādikriyābhirapi upasevamānānāṃ 
bandhanaheturbhavān, anyeṣāṃ tu patrādi upaharatāṃ mokṣaheturiti kiṃ 
tavāpi rāgadveṣānuṣaṅga iti | atra āha -

samo'haṃ sarvabhūteṣu na me dveṣyo'sti na priyaḥ | 
ye bhajanti tu māṃ bhaktyā mayi te teṣu cāpyaham || 30 ||

p. 215) sarvabhūteṣu caturdaśavidhena prapañcena prasṛteṣu 
paramārthatastattvasya ekatvāt paratattvātmakaḥ ahaṃ samaḥ 
nirviśeṣavṛttiḥ; ato vyatiriktatvābhāvāt na me kaścit dveṣyo 
dveṣadoṣahetuḥ, nāpi priyaḥ rāgadoṣahetuḥ saṃbhavati | etau 
bhedadarśināmeva anuṣaktau | tataśca ye punarmahātmāno madicchayaiva 
vidyāśaktyanugrahādekatattvadarśinaḥ santo māṃ yathoktasvarūpaṃ 
yathoktayā bhaktyā bhajanti sevant yathoktayā bhāvanayā upāsate te mayi 
tiṣṭhanti teṣu cāham abheda eva tiṣṭhāmi mattasteṣāṃ 
durbhedabhedapratyayasetuvidalanāt brahmāmṛtasāgarasamarasībhūtatvāt 
tattadbhedasya || 30 ||

	evaṃ yathoktayā bhāvanayā bhagavadbhakteḥ stutimāha -

api cet sudurācāro bhajate māmananyabhāk |
sādhureva sa mantavyaḥ samyagvyavasito hi saḥ || 31 ||

yadyapi yuṣmatpratipāditadṛṣṭyā yuddhādighorakarmānuṣṭhānāt 
sutarāṃ duṣṭaceṣṭitaḥ san ananyabhāk madekālambanaḥ māṃ bhajate 
upāste sa tādṛśaḥ sādhuḥ sadācāra eva mantavyaḥ boddhavyaḥ, yataḥ 
samyak aviparyastajñānatvāt yathāvat sa tādṛk bhakto vyavasitaḥ 
gṛhītavyavasāyaḥ | etāvadeva sadācāradurācārayorlakṣaṇam 
yo'nanyatayā madbhaktaḥ, sa sadācāraḥ; tadvyatiriktastu durācāra iti | 
etāvadatra tātparyam aparyanuyojyecchasya hi bhagavataḥ śaktiravatīrṇā 
kvacidapi anugrāhye vinaṣṭaṃ ca nirmūlamakhilaṃ durācāratvam || 31 ||

p. 216) etadeva prakaṭayitumāha -

kṣipraṃ bhavati dharmātmā śaśvacchāntiṃ nigacchati |
kaunteya pratijāne'haṃ na madbhaktaḥ praṇaśyati || 32 ||

	kṣipram anugrahalakṣaṇasamakālameva dharmātmā bhavati 
pratipāditajñānayogalakṣaṇaḥ paramo dharma ātmā svabhāvo yasya, sa 
tādṛśaḥ saṃpadyate | tathāsaṃpannamātraṃ śaśvat nityakālaṃ 
śāntiṃ 
yathāpratipāditātmānātmādijñeyavastujñānabhāvalakṣaṇakṣobhakṣa
yarūpaṃ praśamaṃ yathoktatattvasamāpattirūpaṃ nitarāṃ gacchati 
prāpnoti | niyacchatīti pāṭhe ātmani tāṃ niyacchati 
niyatāmavyabhicāriṇīṃ karoti | tataśca hetoste tubhyaṃ pratijñāṃ 
karomi yathā madbhaktaḥ yathoktena rūpeṇa madupāsako na praṇaśyati 
matsvarūpavyatirekapratipattilakṣaṇaṃ nāśaṃ na prāpnoti || 32 ||

ata eva āha -

māṃ hi pārtha vyapāśritya ye'pi syuḥ pāpayonayaḥ |
striyo vaiśyāstathā śūdrāste'pi yānti parāṃ gatim || 33 ||

kiṃ punarbrāhmaṇāḥ puṇyā bhaktā rājarṣayastathā |
anityamasukhaṃ lokamimaṃ prāpya bhajasva mām || 34 ||

	pāpā pāpakarmavipākajā yonirutpattikāraṇaṃ yeṣāṃ te 
strīśūdravaiśyādayaḥ ye'pi kecana bhaveyuḥ te māṃ vyapāśritya 
yathoktamadekaśaraṇā bhūtvā parām anuttarāṃ gatim 
apunarāvṛttipadavīmāpnuvanti | naca etadatiśayoktimātrameveti 
vyākhyātameva prāk | punaḥ kiṃ atra vācyaṃ, ye puṇyāḥ 
puṇyakarmāṇaḥ puṇyakarmavipākāt labdhotkṛṣṭayonayaḥ brāhmaṇā 
rājarṣayaśca rājatve

p. 217) sati apavargabhāgitvāt mukhyā ṛṣayo draṣṭāro bhaktāḥ santaste 
parāṃ gatiṃ yāsyanti | tadetena sarvalokasādhāraṇatvamātmajñānasya 
bhagavatā pratipāditam | yata evamutkṛṣṭaphalā madbhaktistataḥ imaṃ 
lokaṃ karmabhūmilakṣaṇaṃ bhuvanaṃ prāpya atra janma labdhvetyarthaḥ 
māṃ bhajasva | kīdṛśaṃ lokam | anityaṃ śarīrasya bhogasādhanasya 
bhogānāṃ ca antavattvādasthiram asukhaṃ ca | yadapi atra kiñcit 
sukhabhrāntyā gṛhyate, tadapi vivekabuddhyā vicāryamāṇaṃ 
duḥkhameva | yaduktaṃ 

pariṇāmatāpasaṃskāraduḥkhairguṇavṛtti-
virodhācca sarvameva duḥkhaṃ vivekinaḥ |
						(yo0 sū0 2|15)
guṇavṛttivirodhācca sarvaṃ duḥkhaṃ vivekinaḥ |

	iti | yathā jaladhimadhyapatitasya ratnātiśayalābhaḥ kathañcit 
saṃbhāvyate, tathā duḥkhaikahetukarmabhūmipatitasya madbhaktilābhaḥ 
saṃbhāvyate eva asmin loke ityarthaḥ || 34 ||

	evaṃrūpamapi imaṃ lokaṃ labdhvā māmanuttarasukhahetuṃ 
bhajasvetyāha -

manmanā bhava madbhakto madyājī māṃ namaskuru |
māmevaiṣyasi yuktvaivamātmānaṃ matparāyaṇaḥ || 35 ||

	evaṃvidhaḥ san madbhakto bhava | kīdṛśaḥ | manmanāḥ madyājī 
tathā mannamaskāraparaḥ | etena viśeṣaṇatrayeṇa 
cittakāyavacanakriyāṇāṃ bhagavatsvarūpalakṣaṇaikatattvaviśeṇātmako 
mukhyo bhaktiprakāraḥ pratipāditaḥ | māṃ namaskuru ityanena hi 
mantrajapanamaskārastutyādirūpā bhagavatpraṇatiruktā | evam anena 
prakāreṇa

p. 218) ātmānam antaḥkaraṇaṃ yuktvā samādhāya matparāyaṇaḥ 
madekālambanaḥ saṃvṛttaḥ san māmevaiṣyasi madabhedasamāpanno 
bhaviṣyasītyom || 35 ||

vyomni jyotirgaṇa iva ghanadhvāntaśāntiprasanne 
sūryendvādidviguṇavikasannirmalasvaprasādaḥ |
yatrārthaughaḥ sphurati sutarāṃ jñānavijñānapūrva-
statrādhyāye taratu navame rājahaṃsīva gīrvaḥ ||

iti śrīrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe navamo'dhyāyaḥ || 9 ||



atha daśamo'dhyāyaḥ |

	evaṃ 
navamādhyāyaprayantagranthagrathitaprasannagambhīrabhaṇitibhedābhihita-
jñānavijñānādiparamarahasyarūpārthaśravaṇādupajātaparitoṣa-
viśeṣatāmatyantaduravadhāraparamārthatvādasya arthasya 
asaṃtuṣṭahṛdayatāṃ ca arjunasya upalakṣya, 
prasādātiśayamanukampāṃ ca 
upagacchannanekadeśayathoktaparatattvasākṣātkārakāraṇabhūtanirati-
śayānugrahacikīrṣāviṣkāri vākyaṃ bhagavānuvāca -

bhūya eva mahābāho śṛṇu me paramaṃ vacaḥ |
yatte'haṃ prīyamāṇāya vakṣyāmi hitakāmyayā || 1 ||

	yadyapi prāyeṇa niravaśeṣamupadeśyaṃ vastu vitatya pratipāditaṃ, 
tathāpi tadatisūkṣmatvāt paramaprakṛṣṭaprajñānāmapi hṛdaye jhagiti 
pratiṣṭhāṃ na labhate, iti bhūyaḥ bahutarameva pūrvoktaṃ tat madīyaṃ 
paramam uttamārthapratipādakatvāt prakṛṣṭamidaṃ vacanamākarṇaya | 
bahutaravacanakathane kāraṇamāha yat vacanaṃ prīyamāṇāya paritoṣaṃ 
bhajate hitakāmyayā ātyantikānukūlyakaraṇecchayā tubhyaṃ ahaṃ 
idānīṃ kathayiṣyāmi | kimanena uktaṃ bhavati | yāvat 
prakārāntaradurharamohaviṣaviṣādahāriṇā 
pratipāditārthaparamārthāpurvapīyūṣaparamaleśasparśena 
anāhlāditaṃ hṛdayam, tāvat kutaḥ prīyamāṇatvam | atastathāvidhasya hi 
punaruktakathanādudvega evaṃ syāt | ataḥ prīyamāṇatvena 
āviṣkṛtaśiṣyaguṇaviśeṣāya taddhitacikīrṣuṇā dayāviṣṭahṛdayena 
deśikottamena vicitroktiprakāraistāvadupadeṣṭavyam, yāvadasau 
sugṛhītārthatayā nirākāṅkṣatāmāpadyate, iti bhūyovacanakathanena 
bhavatā na udvejanīyamiti bhagavato'bhipretam | athavā 

p. 220) nidrāṃ mohamayīṃ haratsu sahasaivāntaḥ prabodhaśriyaṃ 
tanvatsvarthiṣu vāñchitārthaviṣayāvandhyodyamādhāyiṣu |
teṣvekābhinavībhavatsu bhagavadvākyeṣu kaścetanaḥ 
sūryāṃśuṣviva paunaruktyajanitodvegatvamāpatsyate ||

	iha matsvarūpavijñānalakṣaṇa eva artha ukto vakṣyate ca | tacca 
matsvarūpaṃ guhyatamatvāt na alpena prayatnena pratipattavyaṃ, 
pratipādyaṃ ca, ato bahutaravacanākarṇane'vahito bhava || 1 ||

yataḥ-

na me viduḥ suragaṇāḥ prabhavaṃ na maharṣayaḥ |
ahamādirhi devānāṃ maharṣīṇāṃ ca sarvaśaḥ || 2 ||

	mama paramārthata ekasyaiva sanātanasya tattvasya prabhavam 
utpādam, prabhāvamiti vā pāṭhe māhātmyam, suragaṇāḥ 
brahmendrasūryādayo devasamūhāḥ na viduḥ na jānate | maharṣayaḥ 
bhṛgvādayo'pi tathaiva | te hi 
manmāyāśaktyudbhāvitatattatsvarūpaśaktyādibhedāstaṃ taṃ 
svādhikāramanutiṣṭhantaḥ pratikalpaṃ 
sargapralayādyanityabhāvasaṃbandhāvasthājuṣaḥ | ahaṃ tu nityatvāt 
teṣām ādiḥ prathamaḥ | evaṃ prakarṣagatyā 
kalpādidīrghakālasthāyino'pi devādayo madīyaparamasattāpekṣayā 
antavantaḥ | te ca madīyamāyāmohitāḥ santaḥ 
svādhikāranirvartanamātraparyāptasāmarthyāstattvato māṃ saṃprati na 
vidanti || 2 ||

tataḥ -

yo māmajamanādiṃ ca vetti lokamaheśvaram | 
asaṃmūḍhaḥ sa martyeṣu sarvapāpaiḥ pramucyate || 3 ||

p. 221)	yaḥ kaścit viralo mahātmā madanugrahādeva 
pratyuditasamyagjñānaśaktiḥ ajaṃ nityatvāt janmarahitamata eva anādim 
avidyamānapūrvapuruṣāntaram, tathā lokamaheśvaraṃ lokānāṃ 
brahmādīnāṃ lokyante dṛśyante vedyante itiṃ lokaśabdavācyānāṃ 
janānāṃ mahāntaṃ 
sargasthitipralayādyavasthāvidhānasvatantraśaktitvāduttamaṃ svāminam; 
teṣāmapi hi brahmādīnāṃ svaviṣayaṃ yāvanmātramaiśvaryaṃ, tatra 
kāraṇamityarthaḥ | evaṃvidhaṃ māṃ yo vetti, ātmatvena pratijānīte sa 
martyeṣu māyākroḍīkṛtatvāt maraṇadharmasaṃbaddheṣu devādiṣu 
sarvajantuṣu madhye asaṃmūḍhaḥ satyātmani mayi eva 
prarūḍhātmapratyayatvāt viparyayalakṣaṇaḥ saṃmoho'jñānaṃ tasya na 
vidyate ityarthaḥ | ata eva sarvairniravaśeṣairmanovākkāyanirvartyaiḥ 
pāpairnānāyonyantaraviśeṣahetubhiḥ kilviṣaiḥ pramucyate parivarjyate | 
dehādyanityavastuvyavasthitāhaṅkāramātraṃ hi 
sarvapāpānāmutpattikāraṇaṃ, samyagjñānavatastu tat nāstīti sa eva 
asaṃmūḍhaḥ iti uktaḥ || 3 ||

	sarvabhūtānāṃ sarvāvasthāhetutve lokamaheśvaratvaṃ yat 
vyākhyātaṃ, tadeva vivṛṇvannāha -

buddhirjñānamasaṃmohaḥ kṣamā satyaṃ damaḥ śamaḥ |
sukhaṃ duḥkhaṃ bhavo'bhāvo bhayaṃ cābhayameva ca || 4 ||

ahiṃsā samatā tuṣṭistapo dānaṃ yaśo'yaśaḥ |
bhavanti bhāvā bhūtānāṃ matta eva pṛthagvidhāḥ || 5 ||

	iha ahameva ekaṃ tattvaṃ paramārthasaditi bahuśaḥ pratipāditameva 
| ayaṃ ca devāsurabhedena dviprakāraḥ kṣetravargo manmāyayaiva 
itthamavabhāsitaḥ | evaṃ tadasya kṣetrajñavargasyāpi 
tadahaṅkārāvalambanena

p. 222) prasaranto buddhyādayaḥ pṛthagvidhāḥ nānārūpāḥ bhāvāḥ 
matta eva ekasmāt kāraṇāt bhavanti utpadyante | ete hi vividhā 
bhāvabhedāḥ prabuddhaistattvajñānadṛśā parāmṛṣyamāṇāḥ 
parasmāt matsvarūpāt manāgapi na vyatiricyante | tato māyāmātrameva 
etat yat bhedena avabhāsamānatā bhāvānām | sā ca macchaktireveti matta 
eva te bhāvā bhavantītyuktam | ke te bhāvāḥ | buddhiḥ 
mukhyamantaḥkaraṇaṃ yayā buddhyate nirvikalpatayā niścīyate 
boddhavyaṃ vastu, jñānaṃ tu manaḥsaṃjño'ntaḥkaraṇaviśeṣo yena 
boddhavyaṃ vikalpyate | etau sarvapramātṛsādhāraṇau 
buddhijñānasaṃjñau bhāvau | asaṃmohaḥ paramārthaniṣṭhaṃ jñānam 
| tato'nyaviṣayaṃ sarvameva jñānaṃ viparyayādidoṣasaṃbandhāt 
saṃmohātmakam | sa ca asaṃmohalakṣaṇo bhāvo mumukṣūṇāmeva 
bhavati | kṣamā vācā manasā karmaṇā vā nirvikāratvaṃ sarvātmanā 
śaktimattve'pi parāparādhasahiṣṇutvam | eṣo'pi yatyādyavasthāyāṃ 
mumukṣūṇāmapavargopāyabhūto dharmaḥ | avasthāntare hi 
jñānaniṣṭhatayā svakarmāparityāgasya mokṣasādhanatvādakṣamāpi 
śāstracoditā satī mokṣasādhanaṃ bhavatyeva | satyam 
ātyantikabhūtahitaparyavasāyi yathādṛṣṭārthakathanam | etat 
svargāpavargaphalārthināṃ sādhāraṇam | damaḥ utpathapravṛttānāṃ 
sarvendriyāśvānāṃ vairāgyabhāvanādikaṣābhighātāt tataḥ 
pratiṣedhanam śamaḥ siddhyasiddhyornirvikārāntaḥkaraṇatā | etau 
yogiviṣayau | sukhaṃ tattadiṣṭavastuprāpterabhikāṅkṣānivṛttau 
saṃtuṣṭacittatā | duḥkhaṃ tadviparītatā | bhavābhāvau janmamaraṇe | 
bhayaṃ duḥkhahetorduṣkarapratīkārāt trāsaḥ | abhayaṃ tadabhāvo 
viśvastacittatā | ete sukhādayaḥ sarvaprāṇisādhāraṇā bhāvāḥ | 
ahiṃsā sarvabhūtābhidrohāt

p. 223) drohāt sarvātmanā viratiḥ | sā ca yatyādyavasthāyāmeva 
mokṣasādhanaṃ, hiṃsāyā akṣamāvadavasthāntare mokṣasādhanatvāt | 
yataḥ śāstracoditaṃ yajñe vadhādi, saṃgrāme ripuvyāpādanaṃ 
duṣṭanigrahaśca hiṃsātmatve'pi tathāvidhasvakarmaniṣṭhānāṃ satāṃ 
mokṣasādhanam | samatā 

suhṛnmitrāryudāsīna ---------------------------------- | (6|9) 

	ityādinā prākpratipāditasvarūpaikatattvadarśitā 
mumukṣūṇāmeva dharmaḥ | tuṣṭiḥ sarvabhūtaviṣayā praticittatā 
mumukṣuviṣayaiva sukhasyaiva sarvasādhāraṇyena pratipāditatvāt | tapaḥ 
vākcittakāyanirvatyo niyamaviśeṣaḥ | dānam iṣṭāpūrtavibhāgena 
svadravyasya paradravyatvāpādanam, jñānādīnāṃ tu svatvanivṛttiṃ 
vinā paratra saṃkramaṇaṃ dānam | etat svargāpavargaphalārthinoḥ 
sādhāraṇam | yaśaḥ śāstracoditānāṃ śubhānāṃ karmaṇāṃ 
sāttvikyā buddhyā samācaraṇāt sarvajanaviṣayā praśaṃsā | ayaśaḥ 
tadviparītācaraṇādapraśaṃseti || 4-5 ||

	evaṃvidhānāṃ dharmāṇāmāśrayabhūtā dharmiṇa ā 
prajāpatibhyo matta eva bhavantītyāha -

maharṣayaḥ sapta pūrve catvāro manavastathā |
madbhāvā mānasā jātā yeṣāṃ loka imāḥ prajāḥ || 6 ||

	pūrve 
kalpārambhabhāvisvāyambuvamanvantararūpapūrvakālabhāvitvāt 
prathame sapta maharṣayaḥ marīcyādayo ye purāṇaprajāpatayaḥ proktāḥ | 
kecit tu buddhimanasī mahābhūtapañcakaṃ ceti sapta maharṣīn kathayanti, 
prajāsargahetutvāt te'pi prajāpataya iti vāhuḥ |

p. 224) catvāro manavaḥ brahmasāvarṇo rudrasāvarṇo dakṣasāvarṇo --- iti 
dakṣasya duhiturutpannāḥ prajāsarge prativarṇaṃ cāturvarṇyasya prathame 
puruṣā yeṣāṃ brāhmaṇādivarṇasargahetutvāt manutvaṃ prajāpatitvaṃ 
ca | ete madbhāvāḥ mattaḥ paramakāraṇādeva bhāva utpattiryeṣāṃ, te 
tathāvidhāḥ | kīdṛśāḥ santo madbhāvāḥ | mānasā jātāḥ saṃkalpajā 
ityarthaḥ | yeṣāṃ prajāpatīnāṃ satāṃ saṃbandhinyaḥ loke bhuvaneṣu 
imāḥ prajāḥ ye prajāsargakartāraḥ kalpārambhe prajāpatayaḥ śrūyante, 
te madicchāmātrodbhāvitasraṣṭṭabhāvā ityarthaḥ || 6 ||

	evaṃvidhasvaiśvaryajñānaphalamāha -

etāṃ vibhūtiṃ yogaṃ ca mama yo vetti tattvataḥ |
so'vikampena yogena yujyate nātra saṃśayaḥ || 7 ||

	etāṃ yathoktāṃ vibhūtiṃ jagatkartṛtvādirūpamaiśvaryaṃ, tathā 
yogaṃ nānābhāvaprapañcāvabhāsanarūpakartṛtvādisaṃbandhe'pi 
advayacinmātrasvabhāvāpracyutilakṣaṇamatyadbhutamananyasādhā-
raṇaṃ samādhiṃ mama yaḥ tattvataḥ paramārthato vetti jānāti, saḥ 
madīyenaiva avikampena sarvadānirūpaplavena yogena samādhinā yujyate 
saṃbadhyate | na atra arthe kaścit saṃdehaḥ saṃbhavati yato 
madanugrahāvirbhūtasamyagjñānatayā mamaiva ekasya tattvasya 
jagallakṣaṇaṃ vibhavaṃ samyag yo vibhāvayati, sa 
matsvarūpasamāviṣṭatvāt madīyena samādhinā saṃbadhyate, iti ko'tra 
saṃśayasya avakāśaḥ || 7 ||

yata evaṃvidhaḥ -

ayaṃ sarvasya prabhava itaḥ sarvaṃ pravartate |
iti matvā bhajante māṃ budhā bhāvasamanvitāḥ || 8 ||

budhā māṃ bhajante madīcchayaiva daivaprakṛtyāśrayasargaṃbhāvatvāt 

p. 225) madanugrahapātrabhūtatayā samāvirbhūtabodhāḥ santo 
mukhyavipaścito māṃ yathoktarūpamupāsate, natu anye 
āsurasargabhāvāḥ, tato matsamādhinā yujyante | te ca kiṃ kṛtvā 
samupāsate | iti matvā evaṃ matsvarūpaṃ niścitya | katham | ayaṃ 
parameśvaraḥ paramātmā sarvasya bhāvajātasya prabhavaḥ 
utpattikāraṇaṃ yasmāt bahuśaḥ 
pratipāditopapattivaśādetadvyatiriktakāraṇāntarābhāvāt itaḥ 
etasmādeva hetoḥ sarvam idaṃ pravartate prasaratīti | idamatra tātparyam 
dvividhaṃ jñānaṃ 
nirvikalpaparamārthapratipādakaśāstropadeśadṛḍhapratipattijanakamekam, 
tadvaśāt ca krameṇa tattvasākṣātkāraprabhavamaparam | tadvanto budhā 
api dvividhāḥ | tato yathoktamadvibhūtiyogajñā matsamādhinā yujyante iti 
nātra saṃśayaḥ ityuktam || 8 ||

ye tu māṃ bhajante, teṣāmevaṃvidhaṃ ceṣṭitamityāha -

maccittā madgataprāṇā bodhayantaḥ parasparam |
kathayantaśca māṃ nityaṃ tuṣyanti ca ramanti ca || 9 ||

	maccittāḥ mayi cittamantaḥkaraṇaṃ yeṣāṃ te tathāvidhā 
madekaniṣṭhajñānakriyāprasarā santo'nyonyaṃ bodhayantaḥ 
svānubhavasaṃvādena jñāpayantaḥ, tathā kathayantaḥ 
yathābodhamāgamavacanaiḥ kīrtayantaḥ tuṣyanti saṃvādāt svayaṃ 
prīyante parasparaṃ ramanti ratimanubhavanti || 9 ||

evaṃvidhānāṃ ca-

teṣāṃ satatayuktānāṃ bhajatāṃ prītipūrvakam |
dadāmi buddhiyogaṃ taṃ yena māmupayānti te || 10 ||

teṣāmevānukampārthamahamajñānajaṃ tamaḥ |
nāśayāmyātmabhāvastho jñānadīpena bhāsvatā || 11 ||

p. 226) teṣāṃ budhānāṃ budhatvādeva prītipūrvakaṃ 
tattvajñānajanitaparitoṣapuraḥsaraṃ sevamānānām, ata eva 
nityodyatānāṃ buddhiyogaṃ prajñāsaṃbandhaṃ vitarāmi yena 
hetubhūtena budhāḥ māmupayānti madīyaṃ yogaṃ samāpadyante iti 
bhaktānāṃ svayogaprāptāvasaṃśayasya kāraṇaṃ pratipāditam | yataḥ 
teṣāmeva devasargabhājām anukampārthaṃ saṃsārakleśaviśleṣaṇena 
kṛpāṃ kartum aham ajñānajaṃ mohasamudbhūtaṃ tamaḥ 
tattvāpratipattimayaṃ timiraṃ nāśayāmi pradhvaṃsayāmi | kena | 
bhāsvatā parasaṃvidātmakadīptiyuktena jñānadīpena 
yathoktabodhapradyotakena | kīdṛśaḥ san | ātmabhāvasthaḥ ātmanaḥ 
saṃvediturbhāva ātmatvaṃ tena sthito yadyapi sarvagata eka eva 
ahamātmā, tathāpi svecchayā yānevānugṛhṇāmi teṣāmeva 
ahamātmatvena sthitaḥ | anyeṣāṃ tu dehādāvātmapratipattirityarthaḥ | 
evaṃ parameśvaro'haṃ yāneva anugṛhṇāmi, ta eva yathoktena prakāreṇa 
māṃ bhajante | madvibhūtiyogayostattvavidaḥ santo madīyameva yogaṃ 
samāpadyante madabhedalakṣaṇaṃ mokṣamāsādayantītyarthaḥ | 
yadāhurbrahmavidaḥ 

nāyamātmā pravacanena labhyo na medhayā no bahunā śrutena |
yamevaiṣa vṛṇute tena labhyastasyaiṣa ātmā vivṛṇīte tanuṃ svām ||
(ma0 u0 3|2|3|| ka0 u0 2|23)

iti || 10-11 ||

atha bhagavadvacanāt viśeṣitaśraddhādiguṇatayā bhagavanmukhādeva 
adhigataṃ bhagavatsvarūpamanuvadan 
tadvibhūtiviśeṣajijñāsārthamarjuna uvāca -

paraṃ brahma paraṃ dhāma pavitraṃ paramaṃ bhavān |
puruṣaṃ śāśvataṃ divyamādidevamajaṃ vibhum || 12 ||

p. 227) āhustvāmṛṣayaḥ sarve devarṣirnāradastathā |
asito devalo vyāsaḥ svayaṃ caiva bravīṣi mām || 13 ||

	paraṃ niruttaraṃ paramātmalakṣaṇaṃ niratiśayabṛhattvādiyogi 
tattvaṃ bhavān bhagavāneva paramārthato 
brahmavyatiriktavastvantarābhāvāt | māyāvabhāsitasya 
prakṛtyādervedyasyāpi sthūlasya brahmaśabdena vyavahārāt paratvena 
brahma viśeṣitam | tathā vakṣyati, uktaṃ ca 

tāsāṃ brahma mahadyoniḥ ------------------------ | (14|4)

	iti, atra prakṛterbrahmaśabdena vyavahāraḥ; tathā 

------------------------------- śabdabrahmātivartate || (6|46)

	iti, atra śāstrādiśabdarūpasyāpi sargasya | tathā paraṃ 
sāmānyasaṃvidātmakaṃ niratiśayaṃ dhāma jyotirbhavān | 
bhedaviṣayakṣetrasaṃbandhisaṃvidapekṣayā dhāmno'pi paratvena 
viśeṣaṇam | tathā paramam anuttamaṃ pavitraṃ pāvanaṃ bhavān 
mohalakṣaṇaṃmahāpātakavināśahetutvāt | uktārthāvagamasya 
āgamaṃ bhagavadvacanaṃ ca kāraṇaṃ pratipādayitumāha yasmāt sarve 
ṛṣayaḥ parāvaradraṣṭāro munayaḥ śāśvataṃ nityaṃ puruṣaṃ 
paramātmānaṃ tvāmāhuḥ kathayanti | kīdṛśam | divyaṃ 
paramavyomastham | tathā ādi sarveṣāṃ pūrvam | devaṃ 
paraprakāśātmatayā dyotanaśīlam, ata eva ajaṃ janmarahitam | vibhuṃ 
vyāpakam | na kevalaṃ sarvarṣayo, yāvat nāradāsitadevalābhidhānā 
maharṣayastvāmevaṃ vidhamāhuḥ | svayaṃ ca māṃ sākṣāt bravīṣi || 
12-13 ||

sarvametadṛtaṃ manye yanme vadasi keśava | 
nahi te bhagavan vyaktiṃ vidurdevā maharṣayaḥ || 14 ||

p. 228) svayamevātmanātmānaṃ vettha tvaṃ puruṣottama |
bhūtabhāvana bhūteśa devadeva jagatpate || 15 ||

	etatsarvaṃ yathāpratipāditasvavibhūtiyogādirūpaṃ vastu yat 
sākṣāt vadasi, tadahaṃ ṛtaṃ satyaṃ manye | yat devāḥ api tava vyaktiṃ 
pāramārthikīṃ mūrtiṃ na viduḥ maharṣayo'pi tathaiva na viduḥ | tato 
maharṣibhyaḥ śrute mama pratyayo nāsīt, idānīṃ tu bhagavadvacanādatra 
arthe niḥsaṃśayā pratītiḥ | kutastvāṃ devā ṛṣayaśca na vidurityatra 
hetumāha svayamevetyādi | jagatpate viśveśvara tathā bhūtabhāvana 
bhūtānāṃ carācarāṇāṃ sattvānāṃ bhāvana 
vedyatvāpādanamātreṇa utpādaka, tathā teṣāmeva 
yatheṣṭaviniyogaikasvatantratayā īśa svāmin svayameva ātmanā 
ātmānaṃ svarūpaṃ tvaṃ vettha vedakaikasvabhāvatvāt kathaṃ 
vedyapadavīmanyasya devāderavatarasi | sarvaṃ hi tava ekasya sarvajñasya 
vedyaṃ, natu tvaṃ kasyacit vedyaḥ || 14-15 ||

tato hetoḥ -

vaktumarhasyaśeṣeṇa vibhūtīrātmanaḥ śubhāḥ |
yābhirvibhūtibhirlokānimāṃstvaṃ vyāpya tiṣṭhati || 16 ||

	ātmano vibhūtīḥ svaiśvaryavijṛmbhāḥ aśeṣeṇa sākalyena 
vaktumarhasi kathayituṃ prasīdetyarthaḥ | kīdṛśīrvibhūtīḥ | śubhāḥ 
sarvasya sadasadvibhāgena vyavasthitasya māyāvabhāsitasya 
jagatpadārthajātasya śubhāśubhatve sati yatra yatra sarge yā yā 
śubharūpā vibhūtistāṃ tāmādiśetyarthaḥ | kāstā vibhūtayaḥ | 
yābhirimān lokān sapta bhuvanāni tvaṃ vyāpya ākramya vartase | atra

p. 229) divyā ātmavibhūtaya iti prathamāntapāṭhaṃ kecit paṭhanti | te ca 
yattacchabdādhyāhāreṇa cchāndasaprayogeṇa vā samarthayante || 16 ||

vibhūtiśravaṇe prayojanamāha -

kathaṃ vidyāṃ mahāyogiṃstvāmahaṃ paricintayan |
keṣu keṣu ca bhāveṣu cintyo'si bhagavan mayā || 17 ||

vistareṇātmano yogaṃ vibhūtiṃ ca janārdana |
bhūyaḥ kathaya tṛptirhi śṛṇvato nāsti me'mṛtam || 18 ||

	he bhagavan sarvajñatvādiguṇaikāśraya tathā mahāyogin 
ananyasādhāraṇasamādhyekaniṣṭha tvām evaṃrūpaṃ kathaṃ kena 
prakāreṇa ahaṃ paricintayan anusmaran vidyāṃ vijānīyām | keṣu keṣu ca 
bhāveṣu padārtheṣu mayā cintyo'si dhyātavyo'si | ataḥ 
prāguktamaiśvaryaṃ samādhiṃ vibhūtiṃ ca itthaṃ 
jagadābhāsalakṣaṇāṃ svairśvaryavijṛmbhāṃ vistareṇa vaitatyena 
mahyaṃ bhūyaḥ bahutaraṃ kathaya ādiśa | yasmādetat 
svarūpapratipādanalakṣaṇam amṛtaṃ sudhārasaṃ śṛṇvato me 
śravaṇābhyāṃ pivataḥ tṛptiḥ santoṣo nāsti || 17 || 18 ||

evamabhyarthito bhagavānuvāca -

hanta te kathamiṣyāmi vibhūtīrātmanaḥ śubhāḥ |
prādhānyataḥ kuruśreṣṭha nāstyanto vistarasya me || 19 ||

	hanta abhyupagame, bāḍhaṃ yathāśuśrūṣitāḥ śubhāḥ 
svavibhūtīstubhyaṃ vakṣyāmi | kintu prādhānyena cetanācetaneṣu 
padārtheṣu aparyantavargabhedavibhediteṣu yatra yatra varge yā yā kācit 
pradhānatvādatiśāyinī

p. 230) vibhūtistāṃ tāṃ vakṣyāmi | yato madvibhūtīnāṃ vistarasya 
vitatatvasya antaḥ niṣṭhā na vidyate || 19 ||

	tatra idānīṃ nānāvibhūtikathanaprastāvanasya ante'pi 
abhidhāyiṣyamāṇāṃ paramārthasvarūpalakṣaṇāṃ parāṃ vibhūtiṃ 
tāvat prathamameva pratipādayitumāha -

ahamātmā guḍākeśa sarvabhūtāśayasthitaḥ |
ahamādiśca madhyaṃ ca bhūtānāmanta eva ca || 20 ||

	sarveṣāṃ cetanānāmāśaye hṛdi sthitaḥ kṛtapratiṣṭhaḥ ātmā 
aham sakalakṣetrajñahṛdayābhivyaktasāmānyasaṃvidrūpa eka eva 
paramārthata ātmā | saiva parā vibhūtiḥ, yatastannibandhana eva ayaṃ 
svamāyāśaktiprakāśitaviśvabhāvātmakanānāvibhūtiprapañcaḥ | 
tadrūpatayā cintito'hamanantavibhūtivistaraikakāraṇatayā jñāto 
bhavāmi yataḥ sarvabhūtānām ādiḥ prāgavasthā sargarūpā antaśca 
nāśāvasthā madhyaṃ sthityavasthā ahameva ekaḥ | yato manmāyāvaśāt 
sargasthitivināśāvasthāyogitvena parasparamavabhāsamāneṣu 
sarvabhūteṣu nityanirviśeṣaikacinmātrasvabhāvo'hameva sthitaḥ | yaistu 
tādṛśyā mahāvyāptyā ahaṃ cintayitumaśakyaḥ, 
taistadadhigamābhyāsāya yatra yatra varge yat yadutkṛṣṭaṃ tat tat 
madvibhūtyaṃśatayā cintayadbhirniruttarā sarvavyāpinī 
sāmānyasaṃvidātmikā parā madīyā vibhūtiradhigantuṃ śakyate yāṃ 
nānāvibhūtipratipādanaprakaraṇasya ante'pi 
sāmānyarūpajaḍāṃśavyatirekiṇīṃ 

viṣṭamyāhamidaṃ kṛtsnamekāṃśena sthito jagat | (10|42)

	iti vakṣyati | tadevaṃvidhe caturdaśavidhe bhūtasargaprapañce, 
aṣṭavidhāyāṃ devayonyāmādityādiṣu devādisargeṣu, ṣaḍvidhāyāṃ 
manuṣyādiyonau manuṣyādisargeṣu yat yadutkṛṣṭaṃ, tat tat 
madīyaparamaprakāśaleśatayā

p. 231) bhāvayatā niruttaraprakarṣāsāmānyasaṃvitprakāśamayī parā 
madvibhūtiradhigantavyeti adhyāyasya tātparyam || 20 ||

	tānidānīmuccāvacān svavibhūtyaṃśānahantayā 
pratipādayitumāha -

ādityānāmahaṃ viṣṇurjyotiṣāṃ raviraṃśumān |
marīcirmarutāmasmi nakṣatrāṇāmahaṃ śaśī || 21 ||

	ādityapatyatvāt sarvadevānāmādityatve prāpte rūḍhyā 
dvādaśasaṃkhyāvacchinnapurāṇapaṭhitadhātṛmitrāryamādisaṃjñā-
nāṃ devaviśeṣasarge ādityasaṃjñā prasiddhā, teṣāṃ madhye 
tadgaṇāntaḥpaṭhito viṣṇusaṃjña ādityaḥ aham | tasya 
jagatsthitipālanalakṣaṇaprabhavātiśayayogāt madvibhūtyaṃśatvam | 
tathā jyotiṣāṃ divi dyotamānānāṃ sarvatejasāṃ madhye raviḥ 
sūryo'ham | kīdṛśaḥ | aṃśumān 
sakalabhuvanaprakāśanādyaṃśuyuktatve sati prakṛṣṭairaṃśubhiryuktaḥ, 
ata eva tasya madvibhūtyaṃśatvam | tathā mārutāṃ 
devaviśeṣāṇāmekonapañcāśato manye marīciḥ nāma marudaham | tasya 
tanmadhye prajāsargakartṛtvalakṣaṇaprabhāvayogāt 
madvibhūtyaṃśatvam | tathā nakṣatrāṇām aṣṭāviṃśatisaṃkhyānāṃ 
madhye śaśī candramā aham | śaśino nakṣatranāthatvāt tanmadhye 
gaṇanaṃ, tasya ca āpyāyanahetutvādisāmarthyayogāt 
madvibhūtyaṃśatvam || 21 ||

tayaiva dṛṣṭyā anyānapi āha -

vedānāṃ sāmavedo'haṃ devānāmasmi vāsavaḥ |
indriyāṇāṃ manaścāsmi bhūtānāmasmi cetanā || 22 ||

	vedānāṃ trayāṇāṃ caturṇāṃ vā prasiddhānāṃ madhye 
sāmavedoham | tasya bhagavataiva pradhānyamāviṣkṛtam, yena praṇaṣṭeṣu 
vedeṣu

p. 232) vājivadanapuruṣodgīthamuccārya sa eva pūrvaṃ 
pratyāhṛto'tastasya madvibhūtyaṃśatvam | devānāṃ 
trayastriṃśadgaṇabhedena purāṇapaṭhitānāṃ vāsavaḥ indro'ham, tasya 
tadīśvaratvāt madvibhūtyaṃśatvam | indriyāṇām ekādaśānāṃ 
manaḥ ahaṃ, tasya pravṛttinivṛttihetutvāt prādhānye sati 
madvibhūtyaṃśatvam | dvividhāni bhūtāni carāṇi sthāvarāṇi ca | 
teṣāmubhayeṣāmapi cetanā pradhānam, yataścetanopalakṣitatvena 
carāṇāṃ sthitiḥ prasiddhaiva | cetanānibandhanā ca sthāvarāṇāmapi 
vyavasthā tadanugṛhītānāṃ teṣāṃ saṃkalpyatvāt | ataḥ 
sarvabhūtaprādhānyavyavasthitā cetanā abhinnāpi kṣetrajñaśaktiraham | 
tasyā mukhyatayā madvibhūtyaṃśatvam | kecit tu cetanāṃ 
buddhimācakṣate | tasyāśca kāryakāraṇabhedena prasṛtānāṃ 
jaḍānāmeva bhūtānāṃ madhye prādhānyamāhuḥ | sā hi tāni sarvāṇi 
puruṣasannidhisamudbhūtacetanabhāvāt cetayate iti || 22 ||

kiṃca -

rudrāṇāṃ śaṅkaraścāsmi vitteśo yakṣarakṣasām |
vasūnāṃ pāvakaścāsmi meruḥ śikhariṇāmaham || 23 ||

	rudrāṇām aṅgārakādisaṃjñābhiḥ purāṇaproktobhiḥ 
prasiddhānāmekādaśasaṃkhyānāṃ madhye śaṅkaraḥ aham, tanmadhye 
tasyaiva aiśvaryātiśayāt madvibhūtyaṃśatvam | tathā yakṣāṇāṃ 
guhyakānāṃ, tathā rakṣasāṃ piśitāśināṃ sāhacaryāt 
piśācānāmapi devayoniṣu dṛṣṭānāṃ madhye vitteśaḥ 
dhaneśvaro'ham, tasya tadvargādhikṛtatvāt madvibhūtyaṃśatvam | tathā 
vasūnāṃ dharādisaṃjñābhiḥ prasiddhānāmaṣṭānāṃ madhye

p. 233) pāvakākhyo vasuraham, tasya 
nānāvidhayāgavidhyadhikaraṇabhūtatvādinā prādhānye sati 
madvibhūtyaṃśatvam | tathā śikhariṇāṃ parvatānāṃ madhye meruḥ 
kanakācalaḥ aham tasya devālayatvasūryodayahetutvādinā prādhānyamiti 
madvibhūtyaṃśatvam, iti uttaratra sarvatra veditavyam || 23 ||

kiṃca -

purodhasāṃ ca mukhyaṃ māṃ viddhi pārtha bṛhaspatim |
senānyāmapyahaṃ skandaḥ sarasāmasmi sāgaraḥ || 24 ||

	purodhasāṃ rājaguruṇāṃ madhye mukhyaṃ pradhānaṃ 
bṛhaspatiṃ devarājaguruṃ māṃ viddhi tasya teṣu prakṛṣṭatvāt | 
senānyāṃ camūnāyakānāṃ madhye camūnāyakaḥ skandaḥ kumāraḥ 
aham tasya tanmadhye vīryātiśayayogāt prādhānyam | sarasāṃ 
jalāśayānāṃ madhye sāgaraḥ samudro'ham, tanmadhye 
nānāratnaprabhavahetutvādinā sāgarasya prādhānyam || 24 ||

kiṃca -

maharṣīṇāṃ bhṛgurahaṃ girāmasmyekamakṣaram |
yajñānāṃ japayajño'smi sthāvarāṇāṃ himālayaḥ || 25 ||

	ṛṣīṇāṃ maharṣitvādinā prajāpatitvādinā ca mahatāṃ 
prakṛṣṭānāṃ munīnāṃ marīcyaṅgiraḥprabhṛtīnāṃ madhye 
bhṛgurahaṃ tasya tadapekṣayā jñānādiprakarṣaśravaṇāt prādhānyam | 
tathā gīrnirvartyatvāt gīḥśabdavācyānāṃ madhye praṇavākhyam 
ekamakṣaram aham, tasya hi padabhūtasya 
viśvarūpatātiriktaparameśvarasvarūpavācakatvāt prādhānyam | 
yajñānāṃ dravyanirvartyānāṃ yāgaviśeṣāṇāṃ prāguktānāṃ 
madhye japaḥ

p. 234) praṇavādipavitrāvartanaṃ, sa eva yajño yāgavidhiraham | yathā 
mantrajapena devā ārādhyante, na tathā dravyayajñādineti tasya 
prādhānyam | yataḥ phalānabhisaṃdhānena japayajñaniṣṭhasya yat 
phalaṃ prāpyaṃ, tadapekṣayā tattallokāntaraprāptirapi nirayagatitvena 
mokṣadharmeṣu pratipāditā | tathāca tatra uktaṃ 

caturṇāṃ lokapālānāṃ śakrasyāpi bṛhaspateḥ |
marutāṃ viśvadevānāṃ sādhyānāmaśvinorapi ||

rudrādityavasūnāṃ ca tathānyeṣāṃ divaukasām |
ete vai nirayāstāta sthānasya paramātmanaḥ ||
(ma0 bhā0 śā0 pa0 196|6)

iti, mukhyajāpakaprāpyasyetyarthaḥ | tathā sthāvarāṇāṃ 
jaṅgamatvavyatiriktalakṣaṇānāṃ madhye himālayaḥ aham | tasya 
samastasthāvarabhūtamadhye nānāratnauṣadhīprabhavatvādinā 
prādhānyamuktam | girīṇāṃ madhye merorviśiṣṭatvamuktam, 
sthāvarāṇāṃ tu himālayasyeti na paunaruktyam || 25 ||

kiṃca -

aśvatthaḥ sarvavṛkṣāṇāṃ devarṣīṇāṃ ca nāradaḥ |
gandharvāṇāṃ citrarathaḥ siddhānāṃ kapilo muniḥ || 26 ||

uccaiḥśravasamaśvānāṃ viddhi māmamṛtodbhavam |
airāvataṃ gajendrāṇāṃ narāṇāṃ ca narādhipam || 27 ||

āyudhānāmahaṃ vajraṃ dhenūnāmasmi kāmadhuk |
prajanaścāsmi kandarpaḥ sarpāṇāmasmi vāsukiḥ || 28 ||

p. 235) anantaścāsmi nāgānāṃ varuṇo yādasāmaham |
pitṝṇāmaryamā cāsmi yamaḥ saṃyamatāmaham || 29 ||

prahlādaścāsmi daityānāṃ kālaḥ kalayatāmaham |
mṛgāṇāṃ ca mṛgendro'haṃ vainateyaśca pakṣiṇām || 30 ||

pavanaḥ pavatāmasmi rāmaḥ śastrabhṛtāmaham |
jhaṣāṇāṃ makaraścāsmi srotasāmasmi jāhnavī || 31 ||

sargāṇāmādirantaśca madhyaṃ caivāhamarjuna |
adhyātmavidyā vidyānāṃ vādaḥ pravadatāmaham || 32 ||

akṣarāṇāmakāro'smi dvandvaḥ sāmāsikasya ca |
ahamevākṣayaḥ kālo dhātāhaṃ viśvatomukhaḥ || 33 ||

mṛtyuḥ sarvaharaścāhamudbhavaśca bhaviṣyatām |
kīrtiḥ śrīrvāk ca nārīṇāṃ smṛtirmedhā dhṛtiḥ kṣamā || 34 ||

bṛhatsāma tathā sāmnāṃ gāyatrī cchandasāmaham |
māsānāṃ mārgaśīrṣo'hamṛtūnāṃ kusumākaraḥ || 35 ||

dyūtaṃ chalayatāmasmi tejastejasvināmaham |
jayo'smi vyavasāyo'smi sattvaṃ sattvavatāmaham || 36 ||

vṛṣṇīnāṃ vāsudevo'smi pāṇḍavānāṃ dhanañjayaḥ |
munīnāmapyahaṃ vyāsaḥ kavīnāmuśanā kaviḥ || 37 ||

daṇḍo damayatāmasmi nītirasmi jigīṣatām |
maunaṃ caivāsmi guhyānāṃ jñānaṃ jñānavatāmaham || 38 ||

	ślokatrayodaśakaniṣṭhānāṃ vṛkṣādīnāṃ padārthavargāṇām, 
aśvatthādīnāṃ tattadviśeṣāṇāṃ yajñiyatvādinā tena tena viśeṣeṇa 
prādhānyaṃ prasiddhamiti prātipādyena sarvaṃ na vyākhyātam, kintu 
kvacit

p. 336) kiñcit padaṃ vyākhyāyate | tatra prajanaḥ prajananakriyākartā, 
tasya jātāvekavacanam, tena prajanayitṝṇāṃ madhye prajananakriyāyāṃ 
mukhyahetutvāt kandarpaḥ kāmo'ham | sati hi tasminnanyeṣāṃ 
prajanakatvaprasiddhiḥ | yādaḥśabdena abdevatā āhuḥ, tāsāṃ madhye 
varuṇaḥ pradhānam | tathā yamaḥ vaivasvato devatāviśeṣo yatastato 
yoneryatra tatra yonyantare sarvakṣetrajñān niyacchati | tasya saṃyamatāṃ 
niyamakriyāsamarthānāṃ sarveṣāṃ madhye prādhānyam | 
saṃyamatāmiti cchāndaso yacchādeśābhāvaḥ | kecit nipuṇāḥ 
saṃyacchatāmiti paṭhanti kālaḥ kalayatām ityatra | iha tāvat sarvātmanā 
niravacchinnamahimno nityasya ekasya īśvarākhyasya tattvasya 
paramārthasattvāt kālo nāma tadvyatiriktaḥ padārtho na kaścit 
bhavitumarhati, kintu tanmāyāvabhāsitajaḍājaḍabhāvātmake jagati 
ajaḍaḥ kṣetrajñalakṣaṇo yo bhāvastasya 
parasparabhinnārthapramātṛtāyāṃ satyāmanityavastuviṣayatvena 
kalanāmātranimittakaḥ kālaḥ samunmiṣati | anityā hi bhāvā 
utpattisthitinirodhadharmāṇo bhūtavartamānabhaviṣyaddaśāyogitvāt 
kalanīyatāṃ tena tena rūpeṇa avacchedyatāṃ pratipadyante, teṣāṃ ca 
māyīyā eva pramātāraḥ kalayitāraḥ | tataḥ kalanakriyaiva kālaḥ | tataḥ 
kalanīyavyavahāramukhyasādhanabhūtakalanakriyāyāmeva asya kālasya 
kalayitṝṇāṃ madhye mukhyatvamiti kriyātvena parikalpitasya kālasya iha 
pratipāditaṃ svarūpam | dravyatvena api tasya kaivalyakalpanā 
vyavasthāpyate | tāmagre vakṣyati | akṣarāṇāṃ padāvayavabhūtānāṃ 
mātṛkāvarṇānāṃ sarvaprāṇabhūtatvādakārasya prādhānyam | sa hi 
jīva iva śarīrāṇāṃ teṣāṃ varṇānāṃ vyāpakatvena eko vyavasthitaḥ | 
tasya hi anāsāditadīrghakakārādirūpavikāratve sati yat

p. 237) rūpaṃ, tat nādātmakaṃ paraṃ śabdatattvamiti tattvavido vadanti | 
tathā sāmāsikasya tatpuruṣabahuvrīhyādeḥ samāsasamūhasya madhye 
sakalapadārthaprādhānyādinā yugapadadhikaraṇavacanatvādinā ca 
dvandvasya prādhānyam | tathā akṣayaḥ kālaḥ iti yadā dravyatvena kālaḥ 
kalpyate, tadā sargādīnāṃ nityapravṛttānāṃ nityatvavat tasyāpi nityatve 
sati kṣaṇikādikalpasthāyiparyantabhāvabhedapṛṣṭhapātināmanityānāṃ 
svāvayavānāṃ nimeṣādikalpāntānāṃ madhye'kṣayatvamanantatvamiti 
svāvayavāpekṣayaiva etasya prādhānyam | avayavanirdeśastu atra arthāt 
kalpanīyaḥ | kalpanā tu kālasya kriyātvena, dravyatvena ca, ubhayathāpi 
pratipattisahiṣṇutvāt saṃbhavatyeva | saṃbhavāpekṣayaiva ca bhagavatā 
punaḥ kālanirdeśaḥ kṛtaḥ | yadivā yo'ham akṣayaḥ paramārtho 
nityatvādavinaśvaraḥ, sa eva kālaḥ ahameva | svamātmānaṃ kālatvena 
avabhāsayāmīti pūrvoktasya kālasya 
madicchāmātrakalpitasvarūpapratipādanārthaṃ punarvacanamiti; yadivā 
darśanabhedena kvacit kriyātvaṃ, kvacit dravyatvaṃ kālasya paśyatā 
bhagavatā dvirnirdeśaḥ kṛtaḥ | tathā yaḥ satataṃ 
jīvitendriyaśarīraviṣayādikaṃ yugapadeva harati, tasya 
mṛtyostatkālabhāvino maraṇahetorvastuno'nyeṣāṃ hantṝṇāṃ madhye 
prādhānyam | tathā cchalayatāṃ vañcayatāṃ madhye dyūtasya 
cchalayitṛtve'pi dharmādanapetatvāt prādhānyam | tathā 
dharmadyūtadhanaṃ śrāddhādikriyāsu śasyate | 
paravañcanābhisandhimūlatvāt chalayitṛtvaṃ sthitam | sattvavatāṃ 
guṇānāṃ sattvarajastamolakṣaṇānāṃ sattvaguṇasya prakāśātmakatvāt 
prādhānyam | tathā yena rājāno durvinītān damayanti, sa daṇḍaḥ 
śāstraniyamito nigrahaviśeṣo mukhyasādhanamiti sa eva damayitā, tena 
damayatāṃ madhye daṇḍasya

p. 238) prādhānyam | tathā jigīṣatāṃ pratidvandvino jetumicchatāṃ nītiḥ 
karmārambhopāyādikāryasiddhiparyantāṅgapañcakamayo naya eva 
mukhyaṃ sādhanamiti nītereva jigīṣatāṃ madhye prādhānyam | tathā 
guhyānāṃ rahasyopāyānāṃ madhye maunaṃ vāṅniyamarūḍhaṃ 
munitvamaham, nānārthaviṣayasya saṃkalpasya api anunmeṣo yatra | sa hi 
paramaḥ samādhiḥ, tasmiṃśca sati saṃkalpamūlāyā vāco 
niyamarūpasya maunasya siddhiriti | tadeva paramaṃ guhyamityuktam | tathā 
jñānavadgrahaṇena nānārthaviṣayāṇi bhinnāni jñānāni gṛhyante | 
teṣāṃ madhye paramārthaikalakṣaṇaikatattvaviṣayasya abhinnasya 
jñānasya prādhānyam | tato nānājñānānāṃ madhye ekasya jñānasya 
yathoktasya prādhānyamanena pratipāditam || 26-38 ||

vibhūtipratipādanamupasaṃharannāha -

yaccāpi sarvabhūtānāṃ bījaṃ tadahamarjuna |
na tadasti vinā yat syānmayā bhūtaṃ carācaram || 39 ||

	kiṃ bahunā vibhūtivistarakathanena | saṃgrahādiyaṃ parā mama 
vibhūtiḥ, yataḥ sarvabhūtānāṃ prākpratipāditaparāparaprakṛtibhedena 
prasṛtānāṃ yadvījam utpattikāraṇaṃ, so'ham | na hi bāhyaṃ kāraṇaṃ 
jagatāṃ kiñcit saṃbhavati manmāyāśaktimātramekaṃ varjayitvetyarthaḥ 
| yataḥ tat iha vastu cetanamacetanaṃ vā nāsti na sattāṃ bhajate, yat mayā 
vinā utpadyate | ataḥ sakalakāraṇābhāsavyatirekeṇa 
pāramārthikamahameva kāraṇaṃ sarvabhūtānāmiti || 39 ||

	mayā ca paramakāraṇena satā 
svamāyāmahimodbhāvitanānābhāvabhedāśritā yā vibhūtayo mama 
saṃbhavanti, tāsāṃ -

p. 239) nānto'sti mama divyānāṃ vibhūtīnāṃ parantapa |
eṣa tūddeśataḥ prokto vibhūtervistaro mayā || 40 ||

	mama saṃbandhinīnāṃ divo 
maddhṛdayākāśādudbhūtānāmaparyantasarvapadārthavyavasthitānāṃ 
vibhūtīnāṃ nijaśaktivijṛmbhamāṇānām antaḥ avadhirna vidyate | eṣa tu 
iha prakaraṇe uddeśataḥ kasyacit dharmasya kīrtanāt vibhūteḥ 
svavibhavasya vistaraḥ prasaraḥ kathitaḥ || 40 ||

	saṃgrahatastu idaṃ svavibhūtivijñānāya bravīmi -

yadyadvibhūtimat sattvaṃ śrīmadūrjitameva vā |
tattadevāvagacchestvaṃ mama tejoṃśasaṃbhavam || 41 ||

	iha sarvalokeṣu yat yat sattvaṃ yatkiñcid vastujātaṃ 
cetanamacetanaṃ vā vibhūtimat vibhūtiyuktam, ata eva śrīmat 
śobhātiśayasaṃpannam ūrjitaṃ tattadarthakriyāsāmarthyayuktaṃ tat tat 
sarvaṃ mama saṃbandhinastejasaḥ parasya prakāśasya ya aṃśo 
leśamātraṃ tatsaṃbhavaṃ tatsamudbhūtaṃ tvamavagaccheḥ 
avajānīyāḥ || 41 ||

prakārāntarāpekṣaṇena vibhūtiniṣṭhāṃ pratipādayitumāha -

athavā bahunoktena kiṃ jñānena tavārjuna |
viṣṭamyāhamidaṃ kṛtsnamekāṃśena sthito jagat || 42 ||

	atha etena tatra tatra varge tat tat vastu madvibhūtimattvena 
sthitamavagaccheti pūrvoktena bahunā prabhūtagranthapratipāditena 
jñānena tathāpratipannena satā kiṃ te prayojanaṃ, na kiñcit kṛtyaṃ 
yataḥ idam anavadhi vicitrabhāvamayaṃ kṛtsnaṃ samastaṃ

p. 240) jagat saptalokīmitaṃ viśvamekena sarvadā sarvatra 
vicitrasāmānyasaṃvidātmanā vedyāṃśavyatirekiṇā aṃśena bhāgena 
avaṣṭabhya ākramya vyāpya ahaṃ sthitaḥ | tadidamanena uktaṃ bhavati tatra 
tatra darśane tattatprakārabhedena pratipāditasya asyajagato dvāvaṃśau 
saṃkṣepataḥ svarūpam | eko vedakaikasvabhāvaḥ sarvadā sarvātmanā 
nirvikāracinmātrasvarūpaḥ, aparo nānārūpatve'pi vedyaikasvabhāvaḥ | 
tatra vedyāṃśaparihāreṇa 
tadābhāsaikakāraṇabhūtavedakāṃśaviśrāntasaṃvidā abhiyuktena 
bhavitavyam, yena madvibhūtiḥ paramā adhigamyate ityom || 42 ||

vibhūtīrā viṣṇoriha sakalasargātiśayagāḥ 
parabrahmaiśvaryāvadhi samadhigantuṃ vyavasitaiḥ |
iyaṃ sākṣādbhaktirbhavati tu viśuddhaiva tribudhai-
rnidhātavyā nityaṃ manasi daśamādhyāyavivṛtiḥ ||

iti śrīrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe daśamo'dhyāyaḥ || 10 ||


atha ekādaśo'dhyāyaḥ ||

	atha adhyāyadaśakena bhagavadupadiṣṭajñānavijñānapūrvaṃ 
samastābhidheyavastuśravaṇamātrādeva bhagavataḥ 
parameśvaratvāvagamāt tasya paramakāraṇatve tadukte vacasi 
yathoktaphalāvisaṃvādakatayā prakṛṣṭopāyatve 
nivṛttasandehamātmānamāvedayan 
śrutimātrapratipannatatsākṣāddarśanecchāpracodito'rjuna uvāca -

madanugrahāya paramaṃ guhyamadhyātmasaṃjñitam |
yat tvayoktaṃ vacastena moho'yaṃ vigato mama || 1 ||

	madanugrahāya māmanugrahītuṃ nijayā paraśaktyā 
prabodhayituṃ tvayā parameśvareṇa svayaṃpratipāditasvabhāvena 
yadvacaḥ vacanamadhyāyadaśakātmakaṃ vākyam adhyātmasaṃjñitam 
ātmaviṣayajñānamayam, ata eva paramaṃ guhyaṃ prakṛṣṭaṃ rahasyaṃ 
uktaṃ upadiṣṭam, tena hetubhūtena ayaṃ sarvajanakroḍīkāreṇa sthito 
mohaḥ iti pratipāditaparamārthapratipattyanyathāpratītilakṣaṇamajñānaṃ 
mama nivṛtto vyapagataḥ iti || 1 ||

tatra hetumāha -

bhavāpyayau hi bhūtānāṃ śrutau vistarato mayā |
tvattaḥ kamalapatrākṣa māhātmyamapi cāvyayam || 2 ||

	yasmāt tvattaḥ paramakāraṇādekasmāt samastānāṃ 
sthāvarajaṅgamānāṃ bhūtānāṃ bhavāpyayau utpattilayau vistarataḥ 
vaitatyena mayā śrutau śrutimātreṇa pratipāditau, natu avadhāritau | apica 
avyayaṃ nityaṃ māhātmyaṃ niratiśayaiśvaryalakṣaṇaṃ mahattvaṃ 
śrutam |

ahaṃ kṛtsnasya jagataḥ prabhavaḥ pralayastathā |
mattaḥ parataraṃ nānyat kiñcidasti -------------- || (7|7)

p. 242) ityāderavisaṃvādino bhagavadvacanādeva bhagavāneva 
sakalabhūtabhāvābhāvaikakāraṇaṃ tathābhāve'pi 
viśuddhacinmātrasvabhāvāpracyuteradbhūtasya aiśvaryasya ekāspadamiti 
ca mayā pratipannamityarthaḥ iti || 2 ||

	śrutimātreṇa etat mayā pratipannaṃ, natu sākṣādanubhūtamiti 
tadarthamāha -

evametad yathāttha tvamātmānaṃ parameśvaram |
draṣṭumicchāmi te rūpamaiśvaraṃ puruṣottama || 3 ||

	yathā yena prakāreṇa pūrvoktena tvayā ātmānaṃ svarūpaṃ 
parameśvaraṃ brahmādīnāmapi īśvarāṇāmīśitṛtvāt pravaraṃ 
prabhum ātthakathayasi | etat vastu evam anena prakāreṇa sthitam, na atra me 
bhrāntirityarthaḥ | tata eva te rūpaṃ divyaṃ vapuḥ aiśvaraṃ īśvarasya 
tava saṃbandhi draṣṭuṃ sākṣāt nirūpayitum icchāmi abhikāṅkṣāmi | 
anena hi adhunā dṛṣyamānena puruṣākṛtinā rūpeṇa tat paraṃ rūpaṃ 
vāṅmātreṇa mama kevalaṃ kathitaṃ yatra idamekasmin sarvameva sthitam, 
tadidānīṃ bhagavadvacanapratyayāt mayā satyatastathā vidyamānatayā 
pratipannam | ataḥ puruṣottama paramapuruṣatvatprasādāt pratyakṣataḥ 
prekṣitumabhikāṅkṣāmīti || 3 ||

kintu -

manyase yadi tacchakyaṃ mayā draṣṭumiti prabho |
yogīśvara tato me tvaṃ darśayātmānamavyayam || 4 ||

	he prabho parameśvara tat tathāvidhaṃ tāttvikaṃ rūpaṃ 
paramayogibhirapi prārthyamānadarśanaṃ mayā manuṣyamātreṇa 
draṣṭuṃ sākṣāt prekṣituṃ śakyaṃ sahyamiti yadi manyase jānāsi, yadi 
mama iyatīṃ yogyatāṃ saṃbhāvayasi, tatastvaṃ yogīśvara  
sahajasiddhaniratiśayayogatvāt

p. 243) prayatnasādhyayogānāṃ sarveṣāṃ yogyantarāṇāṃ prabho me 
mahyaṃ avyayam anādinidhanaṃ ātmānaṃ svarūpaṃ darśaya 
pratyakṣīkuru iti || 4 ||

itthamabhyarthitaḥ prasādābhimukho bhagavānuvāca -

paśya me pārtha rūpāṇi śataśo'tha sahasraśaḥ |
nānāvidhāni divyāni nānāvarṇākṛtīni ca || 5 ||

paśyādityān vasūn rudrānaśvinau marutastathā |
bahūnyadṛṣṭapūrvāṇi paśyāścaryāṇi pāṇḍava || 6 ||

ihaikasthaṃ jagat kṛtsnaṃ paśyādya sacarācaram |
mama dehe guḍākeśa yaccānyad draṣṭumicchasi || 7 ||

	he pārtha mama ekasyaiva paramārthasataḥ paramātmanaḥ 
svaiśvaryātiśayāt svaśaktitvena saṃbaddhāni asaṃkhyātāni rūpāṇi 
ākṛtiviśeṣātmakāni paśya avalokaya | kīdṛśāni | nānāvidhāni 
vicitrāṇi, ata eva nānāvarṇākṛtīni vividhāvabhāsasaṃsthānāni, tathā 
divyāni amānuṣīyāṇi, iti sāmānyena upakramya viśiṣṭāni 
uddeṣṭumāha ādityān dvādaśasaṃkhyān devaviśeṣān | tathā vasūn 
aṣṭasaṃkhyān rudrān ca ekādaśasaṃkhyān aśvinau dasrau marutaśca 
ekānnapañcāśataṃ devaviśeṣān paśya iti prādhānyāt devatārūpāṇi 
uddeśamātreṇa uktvā, saṃkṣepata āha etāni tāvat tvayā 
suralokanivāsinā satā dṛṣṭāni, yānyapi bahūni aparimeyāṇi 
adṛṣṭapūrvāṇi na kadācidālokitāni āścaryāṇi adbhutāni, tānyapi 
sarvāṇi paśya kiṃ bahunā iha mama saṃbandhini dehe ekasminneva rūpe 
ekatra sthitaṃ kṛtsnaṃ akhilaṃ carācararūpatvāt saṃkṣepeṇa 
dviprakāraṃ, yadanyat kiñcit

p. 244) yathābhilaṣitaṃ draṣṭumabhivāñchasi, tadapi ekasthameva paśya 
ityekasyaiva paramārthasataḥ paramakāraṇasya 
svamāyāśaktyavabhāsitānantānyonyabhinnabhāvātmakatvamidamatyad-
bhutaṃ paśyeti atra tātparyamiti || 7 ||

ata eva atyadbhutatvādasya arthasya -

na tu māṃ śakyase draṣṭumanenaiva svacakṣuṣā |
divyaṃ dadāni te cakṣuḥ paśya me yogamaiśvaram || 8 ||

	anenaiva martyabhāvāt parimitadarśinaiva cakṣuṣā 
golakādhiṣṭhānayā dṛkśaktyā punaḥ māṃ 
pradarśayiṣyamāṇāścaryarūpaṃ draṣṭuṃ ālokayituṃ na śakyase na 
kṣamo bhaviṣyasi | tato divyaṃ sarvadarśitvaśaktiyogāt 
paramātmarūpaparamākāśabhavaṃ prakṛṣṭajñānātmakaṃ cakṣuḥ 
netraṃ te dadāni pāramaiśvaryā svaśaktyā niṣprayatnasyaiva 
āvirbhāvayeyam | tena mama aiśvaraṃ īśvarasya saṃbandhi 
pradarśayiṣyamāṇaṃ rūpaṃ paśya sākṣāt nirūpayeti || 8 ||

	atha bhagavatā parameṇa samādhinā niratiśayanijarūpa[darśana] 
yogyatādānāya arjuno yathā anugṛhītaḥ, tathaiva pūrva 
bhagavadvyāsamuniprasādādāsāditadivyacakṣurdhṛtarāṣṭrāya 
pratipādayituṃ 

saṃjaya uvāca -

evamuktvā tato rājan mahāyogīśvaro hariḥ |
darśayāmāsa pārthāya paramaṃ rūpamaiśvaram || 9 ||

anekavaktranayanamanekādbhutadarśanam |
anekadivyābharaṇaṃ divyānekodyatāyudham || 10 ||

divyamālāmbaradharaṃ divyagandhānulepanam |
sarvāścaryamayaṃ devamanantaṃ viśvatomukham || 11 ||

p. 245)	gatārthametat ślokatrayam | kintu ekameva aiśvaraṃ 
bhagavatsambandhi viśuddhasaṃvinmātraṃ paramārthato yadrūpaṃ, 
tadeva sakalajīvalokavicitrākṛtibhedena tanmāyāśaktyaiva avabhāsate | tato 
viśvameva bhagavadrūpamityetāvanmātratātparyāṇi rūpaviśeṣāṇi 
avagantavyāni, yena rūpasāmānādhikaraṇyena anantaṃ viśvatomukhaṃ 
devam iti granthaḥ saṃbandhametīti || 11 ||

	ata eva ekasya paramārthādvaitacitprakāśātmano vaiśvarūpyeṇa 
avabhāsamānasya svarūpaṃ pratipādayitumāha -

divi sūryasahasrasya bhaved yugapadutthitā |
yadi bhāḥ sadṛśī sā syād bhāsastasya mahātmanaḥ || 12 ||

	yadi antarikṣe samuditasya bhāskarasahasrasya samakālameva 
samutthitā prasṛtā bhāḥ dīptiḥ kadācit bhavet sā tasya ekasya 
paraprakāśasvabhāvasya mahātmanaḥ paramapuruṣasya bhāsaḥ sadṛśī 
syāt tulyā bhavediti kākvā vyākhyeyam, yena na sadṛśī syādityevaṃ 
paryavasyet | nahi 
ananyaprakāśasakalavastuprakāśakaniratiśayaprakāśātmanastasya 
koṭiśo'pi yugapaduditānāṃ dinakarāṇāṃ 
dīptistatprakāśaleśasādṛśyamapi āsādayitumarhatīti || 12 ||

evamanuttaraprakāśātmani -

tatraikasthaṃ jagat kṛtsnaṃ pravibhaktamanekadhā |
apaśyad devadevasya śarīre pāṇḍavastadā || 13 ||

	tadā 
tādṛgbhagavadvaiśvarūpyadarśanakāraṇabhūtadivyajñānātmaka-
cakṣurdānalakṣaṇaparānugraharūpe kāle tatra tādṛśi paraprakāśātmani 
devadevasya sarveśvarasya śarīrarūpe ekasthaṃ ekatraiva āśraye sthitam | 
athaca naikadhā pravibhaktaṃ viśvabhāvarūpairviprakīrṇaṃ kṛtsnaṃ 
akhilaṃ

p. 246) jagat arjunaḥ apaśyat sākṣāt kṛtvān, iti saṃjayodivyena cakṣuṣā 
pārameśvaramanugrahamarjunasya dṛṣṭvā etaduktavāniti || 13 ||

	atha dṛṣṭaparameśvaravaiśvarūpyo'rjunaḥ kiṃ cakāretyāha -

tataḥ sa vismayāviṣṭo hṛṣṭaromā dhanañjayaḥ |
praṇamya śirasā devaṃ kṛtāñjalirabhāṣata || 14 ||

	tataḥ tādṛgatyadbhutabhagavadrūpasākṣātkārakṣaṇādanantaraṃ 
punarmānuṣabhāvāvirbhāve'pi anubhūtaparatattvasmaraṇajanitena 
vismayena āviṣṭaḥ ākrāntacittavṛttiḥ, ata eva hṛṣṭaromā 
saṃjātapulakaḥ dhanañjayaḥ devakīputraṃ purovartinaṃ 
sākṣātkṛtaniratiśayaprabhāvatvāt saṃjātatadviṣayabahumānātiśayo 
mūrdhnā praṇāmaṃ kṛtvā kṛtāñjaliḥ san idaṃ vakṣyamāṇaṃ 
abhāṣata uvāceti || 14 ||

kimityāha -

paśyāmi devāṃstava deva dehe 
sarvāṃstathā bhūtaviśeṣasaṃghān |
brahmāṇamīśaṃ kamalāsanastha-
mṛṣīṃśca sarvānuragāṃśca dīptān || 15 ||

	he deva parameśvara tava dehe 
sakalajagadbhāvaikāśrayabhūte'smin vapuṣi devān divaukasaḥ, tathā 
anyānapi carācarāṇāṃ bhūtaviśeṣāṇāṃ praṇyantarāṇāṃ 
saṅghān sahasrāṇi paśyāmi iti devādiprādhānyenaiva hi jhagiti 
samastaviśvadarśanaṃ bhagavadvapuṣi pūrvaṃ pratipādya, krameṇa 
tadviśeṣadarśanaṃ pratipādayitumāha brahmāṇaṃ prajāpatiṃ īśaṃ 
prabhuṃ kamalāsanasthaṃ puṇḍarīkaviṣṭarasaṃniviṣṭaṃ paśyāmi, 
ityanena brahmalokāntamūrdhvabhuvanadarśanamuktavān | ṛṣīṃśca 
sarvān paśyāmi ityanena prādhānyāpekṣayā 
ṛṣijanopalakṣitamadhyamalokadarśanamuktavān | uragāṃśca dīptān 
paśyāmi ityaena 
anantavāsukipramukhabhujagendropalakṣitapātāladarśanamuktavān |

p. 247) evaṃ tvadvapuṣi līnaṃ bhuvanatrayaṃ paśyāmi, iti svānubhavaṃ 
pratipāditavāniti || 15 ||

	evaṃ devādivividhabhūtādhiṣṭhitabhuvanatrayadarśane'pi 
tvāmeva ekaṃ sarvāśrayaṃ paśyāmītyāha -

anekabāhūdaravaktranetraṃ
paśyāmi tvāṃ sarvato'nantarūpam |
nāntaṃ na madhyaṃ na punastavādiṃ
paśyāmi viśveśvara viśvarūpa || 16 ||

	spaṣṭārthaḥ ślokaḥ | kintu bhuvanatrayagatānāṃ bhūtānāṃ ye 
nānāvidhā bhujajaṭharavadanalocanādayo'vayavāḥ, te tavaiva 
sarvato'navacchinnamāhātmyasya ekasya avayavatvena paśyāmīti atra 
tātparyamiti || 16 ||

	idameva ca te puraḥsthitaṃ rūpaṃ tvadanugrahāt 
parameśvaratejomayaṃ paśyāmītyāha -

kirīṭinaṃ gadinaṃ cakriṇaṃ ca 
tejorāśiṃ sarvato dīptimantam |
paśyāmi tvāṃ durnirīkṣaṃ samantād
dīptānalārkadyutimaprameyam || 17 ||

avataraṇikayaiva vyākhyātatātparyametat || 17 ||

	ata eva parameśvarapratipādakāni viśeṣaṇāni tasya rūpasya 
pratipādayitumāha -

tvamakṣaraṃ paramaṃ veditavyaṃ 
tvamasya viśvasya paraṃ nidhānam |
p. 248) tvamavyayaḥ sāttvatadharmagoptā
sanātanastvaṃ puruṣo mato me || 18 ||

	akṣaraṃ svarūpapracyutilakṣaṇakṣobharahitaṃ yat paramaṃ 
niruttaraṃ vedyaṃ jñeyaṃ tattvaṃ, tat bhavān | tathā asya 
anantaprapañcasya jagataḥ paraṃ prakṛṣṭaṃ nidhānaṃ tvayi etat sarvaṃ 
jagat niviśate | nanu asti jagato nidhānaṃ pradhānaṃ, yatra tat pralaye 
nidhīyate | satyamasti tat pradhānam | tadapi paramakāraṇe bhagavati nilīyate, 
tata eva ca prabhavatīti pradhānasya api nidhānatvāt tvaṃ paramaṃ 
nidhānaṃ jagata iti uktam | tathā kālāvacchedāviṣayatvāt avyayaḥ 
akṣayaḥ sāttvatadharmagoptā tvam | saditi brahmanāma yadvakṣyati 

oṃ tatsaditi nirdeśo brahmaṇastrividhaḥ smṛtaḥ | (17|23)

iti | tat vidyate yasya sa sattvān parameśvaraḥ paramaṃ brahma, sa devatā 
yeṣāṃ te sāttvatā brahmavidaḥ, teṣāṃ dharmo 
yathāpratipāditajñānakriyāsamuccayānuṣṭhānarūpaḥ sadācāraḥ, 
tasya goptā kālāpacayavaśāt tirobhavataḥ punaḥ punaḥ praṇayanāt 
tadvādhakavighnavighaṭanāt ca tvameva rakṣiteti || 18 ||

ata eva -

anādimahyāntamanantavīrya-
manantabāhuṃ śaśisūryanetram |
paśyāmi tvāṃ dīptahutāśavaktraṃ 
svatejasā viśvamidaṃ tapantam || 19 ||

	anantatvādādyantamadhyarahitam, avacchedyasya hi vastunaḥ 
ādyādivibhāgavattvam | itthaṃ jagatprapañcaviracanasāmarthyaṃ 
vīryamanantaṃ

p. 249) na kadācit nivṛttaṃ yasya, tam | tathā sarvakṣetrajñānāṃ 
tattatkriyāsādhanabhūtā ye'nantā bahavaste paramārthikasyaiva kartuḥ 
parameśvarasya saṃbandhina iti anantabāhutvam | tathā kṣetrajñaśarīre 
cakṣurbhyā niyataviṣayaprakāśanaṃ kriyate iti śaśisūryanetratvam | 
tathā kriyāvidbhirvividhairyajñakriyāviśeṣairvaiśvānaro viśvamūrtiḥ 
parameśvara eva ekastarpyate iti tasyaiva dīpto hutāśo'gnirvaktramiti uktam | 
tathā svena tejasā saṃvidrūpeṇa jyotiṣā sarvamidaṃ tapati 
dyotayatītyevaṃvidhaṃ viśvātmānaṃ tvāṃ paśyāmīti saṃbandha iti || 
19 ||

	atha sarvaśakteḥ parameśvarasya 
kurusainyasaṃhāraprasṛtakālākhyaśaktiyuktatvāt ghoratvaviśiṣṭaṃ 
rūpaṃ varṇayitumāha -

dyāvāpṛthivyoridamantaraṃ hi
vyāptaṃ tvayaikena diśaśca sarvāḥ |
dṛṣṭvādbhutaṃ rūpamugraṃ tavedṛg 
lokatrayaṃ pravyathitaṃ mahātman || 20 ||

	yasmāt mahatā rūpeṇa gaganabhūmyantarālaṃ sarvāśca 
kakubhaḥ tvayaikena vyāptāḥ pūritāḥ, tadidamīdṛgvidhaṃ tava ghoraṃ 
rūpaṃ dṛṣṭvā lokatrayaṃ trailokyanivāsitaddarśanāyogyadevādirūpaṃ 
pravyathitaṃ prakarṣeṇa bhītam | evaṃ mahātman iti 
rūpamahattāpekṣamāmantraṇamiti || 20 ||

	teṣāṃ devādīnāṃ tathāvidharūpadarśanabhayotpannāśceṣṭāḥ 
pratipādayitumāha -

amī hi tvā surasaṃghā viśanti 
kecidbhītāḥ prāñjalayo gṛṇanti |
p. 250) svastīti coktvaiva maharṣisaṃghāḥ 
stuvanti tvāṃ stutibhiḥ puṣkalābhiḥ || 21 ||

	amī yasmāt tvāṃ duṣṭakṣayāya āviṣkṛtadāruṇākāraṃ 
śakrādidevasamūhāḥ viśanti tvayi eva līyante | kecicca bhītāḥ 
santrastāḥ santaḥ prāñjalayaḥ viracitakarapuṭāḥ gṛṇanti stutīḥ paṭhanti | 
ataśca maharṣisaṃghāḥ munipravarasārthā jagatkṣemāya 
svastiśabdamuccārya puṣkalābhiḥ mukhyārthatvāt saṃbaddhābhiḥ 
stutibhiḥ tattaccaritodīraṇaiḥ tvāṃ stuvanti praśaṃsantīti || 21 ||

kiṃca -

rudrādityā vasavo ye ca sādhyā 
viśve'śvinau marutaścoṣmapāśca |
gandharvayakṣāsurasiddhasaṃghā 
vīkṣante tvāṃ vismitāścaiva sarve || 22 ||

rudrādayo devaviśeṣā vyākhyātāḥ | ūṣmapākhyāḥ pitaraḥ | 
gandharvādayaḥ prasiddhāḥ | ete sarve devayonitvāt 
jñānaviśeṣasaṃbhave sati tvāṃ vīkṣante paśyanti ghoratvādapūrvasya 
rūpasya vismayāviṣṭāḥ iti || 22 ||

	yādṛśaṃ rūpaṃ dṛṣṭvā te evaṃvidhāḥ saṃvṛttāḥ, tat 
varṇayitumāha -

rūpaṃ mahatte bahuvaktranetraṃ 
mahābāho bahubāhūrupādam |
bahūdaraṃ bahudaṃṣṭrākarālaṃ 
dṛṣṭvā lokāḥ pravyathitāstathāham || 23 ||

spaṣṭārthaḥ ślokaḥ || 23 ||

p. 251) tadrūpadarśanena viśeṣataḥ svāmavasthāṃ darśayitumāha-

nabhaḥspṛśaṃ dīptamanekavarṇaṃ
vyāttānanaṃ dīptaviśālanetram |
dṛṣṭvā hi tvā pravyathitāntarātmā
dhṛtiṃ na vindāmi śamaṃ ca viṣṇo || 24 ||

	ayamapi śloko'vagatārtha eva | kintu 
divyacakṣurdānalakṣaṇabhagavadanugrahakṣaṇe dṛṣṭvā divyena jñānena 
anubhūya, adhunā martyadharmāveśe sati tat tvadrūpaṃ smaran 
bhītacittaḥ san dhairyaṃ nirākulacittattvaṃ na prāpnomi, ityato 
darśanakāle eva na bhayādīnāṃ saṃbhavo veditavyaḥ | anyatra api 
vartamānākhyātaprayoge pūrvadṛṣṭasmaraṇaṃ kāraṇatvena 
boddhavyamiti || 24 ||

kiṃ ca -

daṃṣṭrākarālāni ca te mukhāni
dṛṣṭvaiva kālānalasaṃnibhāni |
diśo na jāne na labhe ca śarma 
prasīda deveśa jagannivāsa || 25 ||

	sphuṭārthametadvākyam | kintu bhagavato 
daṃṣṭrākarālabahumukhatvaṃ 
saṃhārapravṛttabahuvikṛtakṛtāntapuruṣāveśāditi || 25 ||

	ata eva kṛtāntapuruṣākrāntānāṃ kurvādīnāṃ ceṣṭitaṃ 
varṇayitumāha -

amī sarve dhṛtarāṣṭrasya putrāḥ 
sarvaiḥ sahaivāvanipālasaṃghaiḥ |
bhīṣmo droṇaḥ sūtaputrastathāsau 
sahāsmadīyairapi yodhamukhyaiḥ || 26 ||

p. 252) vaktrāṇi te tvaramāṇā viśanti 
daṃṣṭrākarālāni bhayānakāni |
kecid vilagnā daśanāntareṣu
saṃdṛśyante cūrṇitairuttamāṅgaiḥ || 27 ||

nānārūpaiḥ puruṣairbādhyamānā
viśanti te vaktramacintyarūpam |
yaudhiṣṭhirā dhārtarāṣṭrāśca yodhāḥ 
śastraiḥ kṛttā vividhaiḥ sarva eva || 28 ||

tvattejasā nihatā nūnamete
tathāhīme tvaccharīre praviṣṭāḥ |
yathā nadīnāṃ bahavo'mbuvegāḥ 
samudramevābhimukhā dravanti || 29 ||

tathā tavāmī naralokavīrā
viśanti vaktrāṇyabhito jvalanti |
yathā pradīptaṃ jvalanaṃ pataṅgā
viśanti nāśāya samṛddhavegāḥ || 30 ||

tathaiva nāśāya viśanti lokā-
stavāpi vaktrāṇi samiddhavegāḥ |

	etat ślokapañcakaṃ nigadavyākhyātaprāyam | kintu tava vakrāṇi 
viśantīti bahuvacanena daṃṣṭrākarālāni ityādiviśeṣaṇaviśiṣṭāni 
vaktrāṇi upakramya acintyarūpaṃ vaktraṃ tava viśanti iti yaduktaṃ, tat 
kālapuruṣasaṃbandhinyo ghorākṛtiviśeṣarūpā nānāvidhāḥ śaktaya 
ekasyāṃ tvadīyāyāṃ parasyāṃ sāmānyaśaktau pariṇamanti, iti 
bhagavataḥ sarvaśaktyāśrayatvapratipādanaparaṃ boddhavyam, yata 
ekavaktraśabdena pratipāditāyāḥ 
sāmānyaśakteravyapadeśyatvādacintyarūpatvena viśeṣaṇamuktam, 
tathāhīme tvaccharīre iti anena tadeva sphuṭīkṛtam | atra ślokapañcake 
sārdhe nānārūpaiḥ ityādi tvat śarīre praviṣṭāḥ ityantaṃ 
ślokasārdhakaṃ ślokasāmyārthaṃ kecit na paṭhanti | kaścit tu tvattejasā 
nihatāḥ ityādi ślokārdhamanenaiva abhiprāyeṇa na paṭhati | iha tu 
bahupustakadarśanāt bhārate ca tatra sārdhaślokapraṇayanāt vyāsamuneḥ 
ślokapañcakaṃ sārdhameva paṭhitamiti || 30 ||

	atha tathāvidhāṃ ghorarūpāṃ bhagavataḥ śaktiṃ dṛṣṭvā 
tattattvajijñāsārthamidamāha -

lelihyase grasamānaḥ samantā-
llokān samagrān vadanairjvaladbhiḥ || 31 ||

tejobhirāpūrya jagat samagraṃ
bhāsastavogrāḥ pratapanti viṣṇo |
ākhyāhi me ko bhavānugrarūpo 
namo'stu te devavara prasīda |
vijñātumicchāmi bhavantamādyaṃ
na hi prajānāmi tava pravṛttim || 32 ||

	imān samagrān samastān lokān samantāt sarvataḥ 
jvaladbhirvadanaiḥ sānalairmukhaiḥ grasamānaḥ kavalayan lelihyase 
abhīkṣṇaṃ lekṣi āsvādayasi | ata eva tavogrā bhāsaḥ ghoradīptayaḥ 
samastaṃ viśvaṃ tejobhiḥ vyāpya pratapanti dedīpyante |

p. 254) yata evaṃ paramapraśāntacinmātrasvabhāvasya tava ghoraṃ 
rūpaṃ paśyāmi, tato devavara sakalasurottama tubhyaṃ namaḥ prasādaṃ 
ca kuru | ko bhavānugrarūpaḥ saṃpravṛtta iti mahyamācakṣva | yasmāt 
tava evaṃvidhaghorarūpagrahaṇe pravṛttiṃ prasaraṃ na jānāmi tattvato na 
avagacchāmi, ata ādyaṃ paramakāraṇaṃ bhavantaṃ vijñātuṃ viśeṣeṇa 
boddhum icchāmi iti || 32 ||
	kena hetunā kaḥ san tvamevaṃ ghorarūpāṃ śaktimāviṣkaroṣīti 
vijñapto bhagavānuvāca -

kālo'smi lokakṣayakṛt pravṛddhāṃ-
llokān samāhartumiha pravṛttaḥ |
ṛte'pi tvāṃ na bhaviṣyanti sarve 
ye'vasthitāḥ pratyanīkeṣu yodhāḥ || 33 ||

	kālo'smi nirupaplavasvarūpāpracyutasyaiva 
vijṛmbhamāṇaśāntograghorarūpasamagraśakteḥ kālākhyā ghorā mama 
iyaṃ śaktirityarthaḥ | śakteśca śaktimadabhedādahameva kāla iti uktam | 
kīdṛśaḥ kālaḥ | sakalalokasaṃhāraikavyāpāraḥ | adhunā tu iha 
pṛthivyāṃ pravṛddhān madodriktān pṛthivībhārabhūtān lokān imān 
samāhartuṃ kṣayaṃ netuṃ pravṛttaḥ prasṛtaḥ | tataḥ ṛte'pi tvāṃ vināpi 
paripūrṇapāpātmakatvāt sarva ete na bhaviṣyanti tvayi ayotsyamāne'pi 
vinaṅkṣyantyeva | ke te | yodhāḥ saṃprahāriṇaḥ pratyanīkeṣu 
pratipakṣasainyeṣu ye'vasthitāḥ || 33 ||

	yata evamete saṃplavantyeva avaśyaṃbhāvinā vināśena 
āghrātāḥ 

tasmāt tvamuttiṣṭha yaśo labhasva 
jitvā śatrūn bhuṅkṣva rājyaṃ samṛddham |
p. 255) mayaivaite nihatāḥ pūrvameva 
nimittamātraṃ bhava savyasācin || 34 ||

kālātmikayā macchaktyā prāgeva prastanetān nighnan tvaṃ 
kāraṇamātraṃ saṃpadyasva, iti vyaktārtha eva eṣa ślokaḥ || 34 ||

	droṇādayaśca apratimaparākramatvāt durjayā iti ca mā maṃsthā 
ityāha -

droṇaṃ ca bhīṣmaṃ ca jayadrathaṃ ca
karṇaṃ tathānyānapi lokavīrān |
mayā hatāṃstvaṃ jahi mā vyathiṣṭhā
yudhyasva jetāsi raṇe sapatnān || 35 ||

	droṇādayo'pi sakalalokaikavīrāḥ kālasya durjayatvāt mayā 
vyāpāditā iti tān sujayān matvā mā bhaiṣīriti tātparyam || 35 ||

	evaṃ bhagavadukterarjunāvasthāṃ dhṛtarāṣṭrāya saṃjaya uvāca 
-

etacchrutvā vacanaṃ keśavasya
kṛtāñjalirvepamānaḥ kirīṭī |
namaskṛtvā bhūya evāha kṛṣṇaṃ 
sagadgadaṃ bhītabhītaḥ praṇamya || 36 ||

spaṣṭārthaḥ ślokaḥ || 36 ||

kṛṣṇaṃ kimarjunaḥ prāhetyāha -

sthāne hṛṣikeśa tava prakīrtyā
jagat prahṛṣyatyanurajyate ca |
rakṣāṃsi bhītāni diśo dravanti 
sarve namasyanti ca siddhasaṃghāḥ || 37 ||

p. 256) itthaṃ sarvaśakteḥ sarveśvarasya tava prakīrtyā praśaṃsayā 
sarvaṃ jagat praharṣaṃ bhajate, ata eva ca tvayi anuraktaṃ bhavati | tathā 
tadvyāpakāni rakṣāṃsi yātudhānā bhayāt yatastataḥ palāyante 
siddhasaṃghāḥ devaviśeṣasamūhāḥ samastāḥ praṇamanti ca | tat sarvaṃ 
sthāne yuktam || 37 ||

	tvadanugrahādeva sākṣātkṛtaṃ paraṃ bhagavatsvarūpaṃ 
parāmṛśan punarapi āha -

kasmācca te na nameran mahātman 
garīyase brahmaṇo'pyādikartre |
ananta deveśa jagannivāsa
tvamakṣaraṃ sadasataḥ paraṃ yat || 38 ||

	athavā kasmāt kutaśca hetorete siddhādayastubhyaṃ na nameyuḥ 
mahātman paramapuruṣa | kīdṛśāya te tubhyam | brahmaṇo'pi 
prajāpaterapi garīyase paramagurave yata ādikartre ādyāya sraṣṭre tasyāpi 
janmahetave | ananta aparicchinnamāhātmya deveśa sakalasuranātha 
jagannivāsa samastabhuvanaikanidhāna yatastvaṃ sataḥ 
indriyagocarādidantāvadhāraṇīyāt vastuno yat paraṃ vyatiriktam, tathā 
asataśca abhāvarūpādapi yat paramakṣaram avikāraṃ niruttaraṃ 
paramārthasatattvam, ato vedakaikasvabhāvamananyavedyaṃ 
paramakāraṇaṃ tvāṃ kathaṃ te siddhā viditavedyāḥ santo na 
namasyeyuriti tātparyamiti || 38 ||

atha yathānubhūtabhagavaddharmānudīrayati -

tvamādidevaḥ puruṣaḥ purāṇa-
stvamasya viśvasya paraṃ nidhānam |
p. 257) vettāsi vedyaṃ ca paraṃ ca dhāma
tvayā tataṃ viśvamanantarūpam || 39 ||

bahuśo'pi vyākhyātārthā ete bhagavadviṣayāḥ śabdāḥ || 39 ||

kiṃca -

vāyuryamo'gnirvaruṇaḥ śaśāṅkaḥ 
prajāpatistvaṃ prapitāmahaśca |
anādimānapratimaprabhāvaḥ
sarveśvaraḥ sarvamahāvibhūtiḥ || 40 ||

	sarvebhya aiśvaryaguṇayuktebhyo mahatī prakṛṣṭā vibhūtiḥ 
śaktivijṛmbhā yasya tathāvidho hi etādṛśo bhagavān sarveśvaraḥ ata eva 
apratimaprabhāvaḥ ananyasāmānyamāhātmyaḥ, tathā anādimān 
ādirvidyate yasya sa ādimān, na ādimānanādimān sarvaprathama 
ityarthaḥ | evaṃvidhaḥ tvam eva vāyvādayo daivataviśeṣāḥ | yathā ca 
vāyvādīnāmīśvarasvarūpādabhinnatvaṃ, tathā sarvamādau 
vyākhyātameveti || 40 ||

parameśvarasya sarvākāratvaṃ parāmṛśannāha -

namo namaste'stu sahasrakṛtvaḥ
punaśca bhūyo'pi namo namaste |
namaḥ purastādatha pṛṣṭhataste
namo'stu te sarvata eva sarva || 41 ||

sarvaṃ spaṣṭārthametat || 41 ||

kiṃca -

nahi tvadanyaḥ kaścidapīha deva
lokatraye dṛśyate'cintyakarmā |
p. 258) anantavīryāmitavikramastvaṃ
sarvaṃ samāpnoṣi tato'si sarvaḥ || 42 ||

	atra api na kiṃcidavyākhyātamasti | sarvaṃ svaśaktyā samyak 
vyāpnoṣi yataḥ, tataḥ sarvātmakastvameva | vīryam utsāhaśaktiḥ | 
parākramaḥ kriyāśaktiḥ || 42 ||

	atha vijñātabhagavatparasvabhāvatvāt pūrvaṃ 
puruṣatvapratipattyā bhagavati vihitamatikramaṃ 
manyamānastatkṣāntyarthaṃ ślokacatuṣṭayamāha -

sakheti matvā prasabhaṃ yaduktaṃ
he kṛṣṇa he yādava he sakhe ca |
ajānatā mahimānaṃ tavemaṃ 
mayā pramādāt praṇayena vāpi || 43 ||

yaccāvahāsārthamasatkṛto'si
vihāraśayyāsanabhojaneṣu |
eko'thavāpyacyuta satsamakṣaṃ 
tat kṣāmaye tvāmahamaprameyam || 44 ||

pitāsi lokasya carācarasya
tvamasya pūjyaśca gururgarīyān |
na tvatsamo'styabhyadhikaḥ kuto'nyo 
lokatraye'pyapratimaprabhāvaḥ || 45 ||

tasmātpraṇamya praṇidhāya kāyaṃ 
prasādaye tvāmahamīśamīḍyam |
piteva putrasya sakheva sakhyuḥ
priyaḥ priyasyārhasi deva soḍhum || 46 ||

p. 259) subodhametat | kintu sakhā tvaṃ mama iti, matvā yat 
yādavādiśabdena āmantrito'si, yo'pi anyo vyatikramaḥ kṛtaḥ, 
tatsarvamajānato bhagavanmāhātmyaṃ tadānīmajñātavato me 
kṣantavyamiti saṃbandhaḥ | satsamakṣaṃ iti sabhāyāṃ vā satāṃ 
sannidhau | lokatraye'pi tava samo nāsti, kuto'nyo'dhiko bhaviṣyatīti || 46 ||
	atha vijñātamahimānamāvedayituṃ ślokatrayamāha -

divyāni karmāṇi tavādbhutāni
pūrvāṇi pūrve'pyṝṣayaḥ smaranti |
nānyo'sti kartā jagatastvameko
dhātā vidhātā ca vibhurbhavaśca || 47 ||

tavādbhutaṃ kiṃ nu bhavedasahyaṃ
kiṃ vā śakyaṃ parataḥ kīrtayiṣye |
kartāsya sarvasya yataḥ svayaṃ vai 
vibho tataḥ sarvamidaṃ tvameva || 48 ||

atyadbhutaṃ karma na duṣkaraṃ te
karmopamānaṃ nahi vidyate te |
na te guṇānāṃ parimāṇamasti 
na tejaso nāpi balasya narddheḥ || 49 ||

pūrve purātanā api sarvajñāḥ ṛṣayastava karmāṇi smaranti ata eva 
teṣāmṛṣīṇāmapi tāni pūrvāṇi iti | jagatsargapralayādīnāṃ 
bhagavatkarmaṇāmanādiprabandhapravṛttatvapratipādanaparametat pūrvaṃ 
vyākhyātaprāyam | anyat subodham | kintu dhātā dhārayitā vidhātā 
sraṣṭā, tava sraṣṭavyaḥ saṃsāraḥ | kimadbhutam āścaryarūpaṃ

p. 260) karma svecchāmātropakaraṇasya ekasya kartustava asahyaṃ, ata eva 
sahakāryādinirapekṣatvāt parataḥ svātmavyatiriktāt kutaścit śakyaṃ 
sādhyaṃ kiṃvā te kathayiṣyāmi | itthaṃ ca ananyāpekṣatayā yatastvaṃ 
sarvasya vastujātasya nirmātā, tato hetvantarābhāvāt tvamevedaṃ sarvaṃ 
tvacchaktireva itthaṃ cakāstītyarthaḥ | tataśca pratyāścaryarūpamapi 
karma na te duṣkaraṃ ityādi spaṣṭamiti || 49 ||

	atha 
anugrahakṣaṇānubhūtabhagavatsvarūpāvyatirekasamādherniṣkrāntas-
tathāvidhamatyugraṃ bhagavatsvarūpaṃ 
manuṣyadharmapratyāpatteściraṃ draṣṭumaśaktaḥ prāktanameva 
didṛkṣamāṇa idamāha -

adṛṣṭapūrvaṃ hṛṣito'smi dṛṣṭvā
bhayena ca pravyathitaṃ mano me |
tadeva me darśaya devarūpaṃ
prasīda deveśa jagannivāsa || 50 ||

kirīṭinaṃ gadinaṃ cakrahasta-
micchāmi tvāṃ draṣṭumahaṃ tathaiva |
tenaiva rūpeṇa caturbhujena
sahasrabāho bhava viśvamūrte || 51 ||

spaṣṭārthametat || 51 ||

atha evaṃvidhamukto bhagavānuvāca -

mayā prasannena tavārjunedaṃ
rūpaṃ paraṃ darśitamātmayogāt |
tejomayaṃ viśvamanantamādyaṃ
yanme tvadanyena na dṛṣṭapūrvam || 52 ||

subodhametat | kiṃ tu ātmayogāt darśitam ityetadevaṃ

p. 261) boddhavyam yadā anugrahapareṇa mayā tvamātmani parasmin 
svabhāve yogaṃ samādhiṃ prāpitaḥ, tadā etadrūpaṃ tava 
pratyakṣīkṛtaṃ, vyatiriktatvena asya pārameśvarasya svarūpasya 
draṣṭumaśakyatvāt || 52 ||

ata eva āha -

na vedayajñādhigamairna dānai-
rnaca kriyābhirna tapobhirugraiḥ |
evaṃrūpaṃ śakyamahaṃ nṛloke 
draṣṭuṃ tvadanyena kurupravīra || 53 ||

mā te vyathā mā ca vimūḍhatā bhūd-
dṛṣṭvā rūpaṃ ghoramugraṃ mamedam |
vyapetabhīḥ prītamanāḥ punastvaṃ
tadeva me rūpamidaṃ prapaśya || 54 ||

	vedānāṃ yajñānāṃ bahutvādadhigamabahutvam, 
adhigamaśabdena ca adhyayanaśravaṇādayo guṇāḥ pratipāditāḥ | 
dānakriyātapaḥśabdaistadanuṣṭhānaṃ, kriyāśabdaśca 
anuṣṭhīyamānabrahmacaryādikarmaviśeṣavācakaḥ | yataśca 
evaṃvidhasadācāravyavasthitairapi 
parajñānaśūnyatvādaśakyadarśanametat paramaṃ mama rūpaṃ 
madanugrahādeva unmīlitadivyacakṣuṣā tvayā dṛṣṭam | tato 
bhayamohādīnāṃ ko'vasaraḥ, pratyuta 
matsvarūpanityānusandhānāvahitātmanā tvayā tadeva smartavyamiti 
abhiprāyaḥ | ghoraṃ kālapuruṣādyākṛtiyogāt | ugraṃ 
saṃhārādikarmaṇā | śiṣṭaṃ spaṣṭam || 54 ||

	atha etat dhṛtarāṣṭrāya saṃjaya uvāca -

ityarjunaṃ vāsudevastathoktvā
svakaṃ rūpaṃ darśayāmāsa bhūyaḥ |
p. 262) āśvāsayāmāsa ca bhītamenaṃ
bhūtvā punaḥ saumyavapurmahātmā || 55 ||

	spaṣṭārthametat | kintu mahātmā viśvarūpaḥ san saumyavapuḥ 
punaḥ prāktanapuruṣavigrahāt sudarśanākṛtirbhūtvā bhagavān 
enamarjunaṃ tathāvidhādbhutadarśanasaṃtrastacittaṃ vakṣyamāṇena 
pratyāśvāsayaditi tātparyam || 55 ||

evaṃ pratyāgataprakṛtirarjuna uvāca -

dṛṣṭvedaṃ mānuṣaṃ rūpaṃ tava saumyaṃ janārdana |
idānīmasmi saṃvṛttaḥ sacetāḥ prakṛtiṃ gataḥ || 56 ||

spaṣṭametat || 56 ||

arjunāśvāsanāya bhagavānuvāca -

sudurdarśamidaṃ rūpaṃ dṛṣṭvānasi yanmama |
devā apyasya rūpasya nityaṃ darśanakāṅkṣiṇaḥ || 57 ||

nāhaṃ vaidairna tapasā na dānena na cejyayā |
śakya evaṃvidho draṣṭuṃ dṛṣṭvānasi māṃ yathā || 58 ||

nigadavyākhyātaprāyametat | yataḥ 
sargāditattatsvādhikāravyagracittatvādaparāmṛṣṭasvabhāvā brahmādayo 
devā apyasya rūpasya sadā sākṣātkāramabhikāṅkṣanti, natu labhante 
tataḥ sutarāṃ sarveṇa kenacit duṣkaradarśanametat yat tvayā 
matprasādāvirbhūtaparajñānacakṣuṣā dṛṣṭam | ato yathā māṃ tvaṃ 
tattvataḥ sākṣātkṛtavān, tathā dānādikriyāsaktaiḥ draṣṭum 
aśakyo'hamiti || 57-58 ||

kena tarhi upāyena śakyo'smītyāha -

bhaktyā tvananyayā śakyo hyahamevaṃvidho'rjuna |
jñātuṃ draṣṭuṃ ca tattvena praveṣṭuṃ ca parantapa || 59 ||

p. 263) bhaktyā madicchayaiva paradaivasargābhijātajanasulabhayā 
paricaryayā, tatprabhāvādeva āvirbhūtasamyagjñānatvāt 
avidyamānamadvyatiriktabhajanīyaviṣayatve sati ananyayā | jñātuṃ 
avisaṃvādinā avagamena boddhuṃ, tathā samyagjñānalakṣaṇena 
upāyena draṣṭuṃ gocarīkartuṃ, tathā 
tādṛśopāyapariśīlanābhyāsātiśayāt praveṣṭuṃ ātmatayā 
avagāḍhum evaṃvidhaḥ yathā tvayā anubhūtaḥ śakyo'ham na 
anyairupāyaiḥ | tvaṃ ca parasya asya rūpasya sākṣāddarśanāt 
praveśaparyantāṃ parāṃ bhūmiṃ samadhirūḍhastena 
sudustaradvaitamohasāgarāduttīrṇaḥ samāśvasihi | kutastava 
idānīmadṛṣṭaparamārthajanocitairbhayādibhirdoṣaiḥ saṃbandhaḥ 
ityarthaḥ || 59 ||

etameva arthaṃ sidhāntīkurvannadhyāyamupasaṃharati -

matkarmakṛnmatparamo madbhaktaḥ saṅgavarjitaḥ |
nirvairaḥ sarvabhūteṣu yaḥ sa māmeti pāṇḍava || 60 ||

	ya evaṃguṇaviśiṣṭo'nyo'pi kaścidabhiyuktaḥ sa māmeti 
madabhedalakṣaṇāṃ siddhimadhigacchati | kīdṛśaḥ | matkarmakṛt 
śāstracoditāni tāni tāni varṇāśramakramāgatāni karmāṇi karoti, kiṃtu 
madarthaṃ yathopapattyā matprāptaye, natu phalāntarasiddhaye | ata eva 
matparamaḥ ahameva upādeyatayā prakṛṣṭo yasya | tataśca 
madvyatiriktasamastaheyopādeyavastuviraktacittatvāt madbhaktaḥ mamaiva 
bhaktaḥ, sarvāsu avasthāsu mayi eva samarpitāntaḥ karaṇaḥ | tathā sa hi 
sarva bhūteṣu carācareṣu bhāveṣu saṅgavarjitaḥ niḥsaṅgaḥ rāgarahito 
nirvairaḥ dveṣavarjitaḥ | yo hi atattvatayā rāgadveṣaviṣayatvena 
sarvasaṃsāribhiḥ parigṛhīteṣu vastuṣu niratiśayānandanirbharaṃ 
matsvarūpameva satatamanubhavati, sa māmeva eti 

p. 264) ------------------------------- siddho mukta ihocyate |

iti tātparyamityom || 60 ||

muñcatyeṣa svabhāvaṃ na vata bahuvidhairekamekāntaśuddhaṃ 
preṅkadbhirbhāvabhedairiti vihitaparāmarśamuktabhramāṇām |
svātmanyevaiśvaraṃ vo maṇimukura iva vyajyatāṃ vaiśvarūpyaṃ 
svādhyāyasyāsya nītaṃ sphuṭamabhimukhatāṃ vyākhyayaikādaśasya ||

iti śrīrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe ekādaśo'dhyāyaḥ || 11 |


atha dvādaśo'dhyāyaḥ

	evaṃ paramāptabhagavadvacanalakṣaṇāt 
samastapramāṇaprāmāṇyahetoḥ pramāṇottamāt 
samyagavagate'dhyāyaikādaśake, 
pratipāditapratyadhyāyasamuccayānuṣṭhāmaparyavasitatātparye 
jñānavijñānādau prakaraṇābhidheyavastuvyupapannatamatvena 
utpannaniṣkampapratipattiḥ, ata eva 
tathāpātrībhūtaprajñatvadarśanaprasannāt bhagavata eva 
parajñānarūpaṃ divyacakṣurunmeṣakāraṇaṃ 
paramamanugrahamavāptavān, svaṃ yatnaṃ vinaiva 
pārameśvaraparānugrahaprabhāvamātrādeva kṣaṇamātraṃ 
sākṣātkṛtasya parasya tattvasya idānīṃ svātantryeṇa anusmaraṇe 
sugamaḥ kaḥ panthā mayā āstheyaḥ, athavā 
madvacanāsāditaparānugraheṇa abhiyoginā janena kena mārgeṇa tat 
tattvamupāsāditavyamiti svaparārthaghanaprataropāyaṃ jijñāsurarjuna 
uvāca -

evaṃ satatayuktā ye bhaktāstvāṃ paryupāsate | 
ye cāpyakṣaramavyaktaṃ teṣāṃ ke yogavittamāḥ || 1 ||

	yathā viśvātītasvarūpa eva viśvātmakatayā sākṣātkṛto'si, 
evamanena prakāreṇa ye satatayuktāḥ satataṃ sarvadā jāgarādiṣu 
sarvāsu avasthāsu yuktāḥ samāhitāḥ santo bhaktāḥ praṇayinaḥ tvāṃ 
paryupāsate sevante, ye ca kecana akṣaraṃ 
cinmātraikasvarūpāsaṃcalanaśīlam, ata eva avyaktaṃ vyaktādasmāt 
sarvendriyagocarāt nānābhāvalakṣaṇāt vastuno'nyaṃ 
sarvārthaniṣedhasamādhiniṣṇātadhiṣaṇāḥ tvāṃ paryupāsate teṣāṃ 
ubhayeṣāṃ yogināṃ madhye

p. 266) ke yogavittamāḥ atiśayena tvatsvarūpopalabdhiphalasamādhijñā iti 
|| 1 ||

	evaṃ vijñapta ekatarapakṣaprādhānyapratipādanārthaṃ 
bhagavānuvāca -

mayyāveśya mano ye māṃ nityayuktā upāsate |
śraddhayā parayopetāste me yuktatamā matāḥ || 2 ||

	te evaṃvidhā yogino yuktatamāḥ niratiśayasamādhibhājo mama 
matāḥ abhipretāḥ | tānahaṃ paramayogino manye, na anyānityarthaḥ | ke te 
| ye mayi sakalavastuprakāśakānanyaprakāśyacitprakāśaikasvabhāve 
manaḥ antaḥkaraṇaṃ āveśya tatsamāpannaṃ kṛtvā parayā 
samastasaṃśayādivikalpavicchedādatyutkṛṣṭayā śraddhayā 
yathoktaphalasaṃbhāvanayā upetāḥ samanvitāḥ santo nityayuktāḥ 
nityaṃ sthūlasūkṣmasarvabhāvānubhavamayīṣu tāsu tāsu avasthāsu 
yathoktasamādhyavasthitāḥ samupāsate svarūpapratyavamarśalakṣaṇayā 
niruttarayā bhaktyā sevante || 2 ||

	tadevaṃ karmayogināmeva yogavitsu atiśayo'nena pratipāditaḥ | ata 
eva yogyantaropāyānāmāyāsābhyupagamapūrvaṃ 
duṣkaratvādipratipādanena avaratvameva pratipādayitumāha -

ye tvakṣaramanirdeśyamavyaktaṃ paryupāsate |
sarvatragamacintyaṃ ca kūṭasthamacalaṃ dhruvam || 3 ||

saṃniyamyendriyagrāmaṃ sarvatra samabuddhayaḥ | 
te prāpnuvanti māmeva sarvabhūtahite ratāḥ || 4 ||

	ye tu ye punaryoginaḥ indriyagrāmaṃ bāhyānāmābhyantarāṇāṃ 
ca indriyāṇāṃ samūhaṃ saṃniyamya samyak apramattatayā niyamya, 
sarvebhyo viṣayebhyaḥ pratiṣidhya, māmupāsate | kīdṛśam | 
akṣaramavyaktaṃ ca prāgvyākhyātasvarūpam | ata eva anirdeśyam 
idantāvaseyasamastasaṃvedyabhāvavilakṣaṇatvāt nirdeṣṭumaśakyaṃ 
vākpathātītam |

p. 267) tathā sarvatragaṃ sarvaṃ vyāpya avatiṣṭhamānamapi acintyaṃ 
buddhigocarātītam | tathā paramārthanityatvāt kūṭasthaṃ 
nirupaplavāvinaśvaraikasvabhāvaniṣṭham | ata eva acalaṃ dhruvaṃ nahi 
ayaṃ parvatādikūṭasthapadārthavat calanalakṣaṇena upaplavena, 
atyantābhāvalakṣaṇena vā nāśena kadācit saṃyujyate | kīdṛśāḥ 
santaḥ evaṃ vidhaṃ māmupāsate | sarvatra samabuddhayaḥ sarvasmin 
vastuni matsvarūpaikadarśitvāt samā nirviśeṣā buddhiryeṣāṃ te 
tathoktāḥ | samabuddhitvādeva sarvabhūtānāmeva hite ratāḥ sarvasya 
ātmatvena pratipatterna kvacit dveṣadoṣakāluṣyamanubhavantaḥ | anena 
viśeṣaṇadvayena vinā asya samādheraniṣpattiḥ pratipāditā | nahi 
sarvasāmyadaśānadhirūḍho yogī niṣpanna iti ucyate | evaṃvidhā yogino 
ye māmupāsate, te satyaṃ māmeva prāpnuvanti yathoktayā itikartavyatayā 
niṣpannasamādhīnāṃ matsvarūpasamāpattireva samādhiphalaṃ teṣāṃ, 
na anyat || 4 ||

kintu -

kleśo'dhikatarasteṣāmavyaktāsaktacetasām |
avyaktā hi gatirduḥkhaṃ dehabhṛddbhiravāpyate || 5 ||

	teṣāṃ sarvabhāvaniṣedhasamādhiniṣṭhānāṃ yogināṃ 
sarvabhāvaniṣṭhatvena madupāsanaparebhyo yuktatamatvena 
prākpratipāditebhyo yogibhyaḥ adhikataraḥ sātiśayaḥ kleśaḥ | 
kīdṛśānāṃ satām | avyaktāsaktacetasāṃ avyakte 
vāṅmanasagocarātikrāntasvabhāve mayi āsaktamālambanīyatvena 
tatraiva niṣaṇṇaṃ ceto'ntaḥ karaṇaṃ yeṣāṃ, tathāvidhānām | 
kathamavyaktāsaktacittatvamadhikatarakleśakāraṇamiti

p. 268) upapādayitumāha yasmāt dehabhṛdbhiḥ dehaṃ 
niyatajātyabhimānāvacchinnaṃ śarīraṃ ahamitipratipattyā 
dhārayadbhistaistādṛśairyogibhiḥ avyaktā sarvātmanā nirābhāsā gatiḥ 
samādhiprāptiḥ duḥkham atikleśena avāpyate adhigamyate | 
ayamabhiprāyaḥ śarīre'hantayā pratipādyamāne 
sarvabhāvavyatiriktamatsvarūpasamāpattiranupapannaiva, tadabhiniveśaśca 
sumahān kleśa eveti || 5 ||

	atha asti kācit yuktiryayā deha eva madbhāvena pratipattuṃ śakyaḥ 
sarvātmanā sarvakriyoparamasya asaṃbhāvitvena prākpratipāditatvāt | 
tasmāt śāstracoditāsu kriyāsveva vartamānaḥ 
pāramārthikamatsvarūpamasau yathā sukhamavāpnoti, na tathā 
duṣkarasakalakriyāniṣedhābhiniviṣṭaḥ | na ca tādṛso yoginaḥ sarvatra 
samabuddhitvamupapadyate sarvārtheṣu niṣedhyatayā dveṣādivyakteḥ | 
yastu suprabuddhatvāt sarvadā sarvathā matsvarūpaikaviśrāntasaṃvit, 
tasya nivṛttaheyopādeyavikalpasya sarvatra samabuddhitvamupapannam | 
saiṣā mukhyā bhagavatsvarūpopāsā caturthī bhaktyavasthā | yā tu 
nityakriyāntaḥpātinī nānādarśanaprasiddhetikarttavyatāviśiṣṭā, sāpi 
anayaiva dṛṣṭyā upapanneti pratipādayitumāha -

ye tu sarvāṇi karmāṇi mayi saṃnyasya matparāḥ |
ananyenaiva yogena māṃ dhyāyanta upāsate || 6 ||

teṣāmahaṃ samuddhartā mṛtyusaṃsārasāgarāt |
bhavāmi nacirātpārtha mayyāveśitacetasām || 7 ||

	ye tu ye punaravyaktopāsakebhyo yogibhyo vyatiriktā yoginaḥ 
sarvakarmāṇi śārīrīrmānasīrvācikīḥ śāstrīyā laukikīśca sakalāḥ 
kriyāḥ mayi sakalakartṛtvena pratipāditasvarūpe

p. 269) saṃnyasya kāryatayā samarpya, 
dehādyahaṅkārātmakakṣetrajñakartṛtvavinivṛttābhimānāḥ matparāḥ 
ahameva paraḥ kartṛtvādinā prakṛṣṭo yeṣāṃ, te tathāvidhāḥ ananyena 
avidyamānamadvyatiriktatattvāntareṇa yogena 
vihitakarmānuṣṭhānarūpeṇa samādhinā māṃ yathoktasvarūpaṃ 
dhyāyantaḥ anusmarantaḥ upāsate mukhyayā gauṇyā vā bhaktyā sevante 
teṣāṃ tathāvidhānāṃ karmayogināṃ nacirāt avyaktopāsakāpekṣayā 
alpīyasā kālena ahaṃ mṛtyusaṃsārasāgarāt punaḥ 
punarnāśotpādaprabandhapayodheḥ samuddhartā samyaguttārako bhavāmi 
| kidṛśānām | mayi paramakāraṇe parameśvare āveśitacetasāṃ 
madabhedabhāvanayā samarpitāntaḥkaraṇānāmiti || 6-7 ||

	atha kathamidamatyāścaryamupapadyate yat lokavat sarvāsu kriyāsu 
kriyamāṇāsu api 
advaitaparabrahmasvarūpāpracyutirūpaparamasamādhiniṣpattiriti | atra 
prākpratipāditāmapi bhaktiṃ sūkṣmatvāt durgrahāmupadeśya 
pratipattisthairyāya punarāha -

mayyeva mana ādhatsva mayi buddhiṃ niveśaya |
nivatsyasi tvaṃ mayyeva yogamuttamamāsthitaḥ || 8 ||

	iha sarvakṣetrajñānāṃ manobuddhinibandhanāḥ 
sarvārthasaṃvidaḥ | tathāhi mano'vasthā dviprakārā, 
svatantravikalpātmikā pūrvānubhūtasmaraṇarūpavikalpātmikā ca | sā 
ca dvividhā, jāgarasvapnabhedāt | evaṃ sarvatraiva | buddhivṛttistu 
niścayātmakatvāt nirvikalpetyevaṃ sthite mayyeva ekasmin paramārthasati 
nityoditanirmalacitprakāśasvarūpe paramātmani yathoktasvarūpaṃ mana 
ādhatsva saṃniveśaya | yat yat manasā vikalpayasi tat tat madātmakatvena 
jānīhi | tathā buddhiṃ yathoktasvarūpāṃ mayi eva yathoktasvarūpe 
niveśaya

p. 270) samarpaya yadyat buddhyā niścinuṣe, tat madātmakatvena jānīhi | 
ayamatra tātparyārthaḥ yo yo'rtho vikalpyamāno niścīyamāno vā tena 
tena rūpeṇa saṃvedyate, sa saṃvedyamānatvādeva 
saṃvitprakāśādabhinnaḥ | saṃvidātmakaśca prakāśo mamaiva 
pāramārthikasya ekasya saṃvedituravyabhicārī dharma iti vāstavena 
rūpeṇa sarve bhāvāḥ sarvāsu avasthāsu madātmakā eva, kevalaṃ 
māyāvyāmohito lokastānidantayā vyavacchinatti | tvaṃ tu 
samyagjñānopadeśena prathamaṃ prasāritabuddhistato yogyatātiśayāt 
sākṣāt matsvarūpamanubhāvitaḥ san sarvāsu avasthāsu sarvabhāvān 
paramārthato matprakāśakatvena eva parimṛśasi, ityevaṃvidhamimam 
uttamaṃ yogāntarāpekṣayā prakṛṣṭaṃ yogaṃ samādhim āsthitaḥ 
samāśritaḥ san, mayyeva paramātmani nivatsyasi sthitiṃ lapsyase 
madabhedamāpsyasītyarthaḥ | asya hi karmayogasya 
yathoktajñānasaṃskṛtavihitakarmānuṣṭhānamātrasādhanatvāt sarvathā 
sarvadā sarvatra susaṃpūrṇarūpatvena anubhūyamānatvāt 
dīrghakālanairantaryādāsevyamānakramasūkṣmabahuvidhānuṣṭhānaniṣ
ṇātayā aṃśāṃśikayā kadācit 
kathañcidanubhavanīyasvarūpādabhyāsayogāduttamatvamiti || 8 ||

	evaṃ mukhyaṃ bhagavatsvarūpopāsākramaṃ pratipādya, sarvasya 
kasyacit tatra pātratāmarjunavadasaṃbhāvayannarjunopadeśenaiva 
upāyāntarābhyanujñāmāha -

athāveśayituṃ cittaṃ na śaknoṣi mayi sthiram |
abhyāsayogena tato māmicchāptuṃ dhanañjaya || 9 ||

abhyāse'pyasamarthaḥ san matkarmaparamo bhava |
madarthamapi karmāṇi kurvan siddhimavāpsyasi || 10 ||

p. 271) athaitadapyaśakto'si kartuṃ madyogamāsthitaḥ |
sarvakarmaphalatyāgaṃ tataḥ kuru yatātmavān || 11 ||

	atheti prakāropanyāsārtham | yadi yathāpratipāditena prakāreṇa 
yathoktasvarūpe mayicittaṃ manobuddhivṛttyātmakamantaḥkaraṇaṃ 
sthiraṃ sarvāsu avasthāsu avicalāvadhānatayā dṛḍham āveśayituṃ 
samarpayituṃ matsvarūpābhedena bhāvayituṃ na śaknoṣi na prabhavasi 
tato'bhyāsayogena karmayogāṃśatayā 
ṣaṣṭhādhyāyasaṃsūcitasaṃvidhāanena 
tattadyogaśāstrapraṇītetikarttavyatāviśiṣṭena vā 
cittavṛttinirodhaprayatnātmakābhyāsapradhānena samādhinā māṃ 
yathoktasvarūpam āptum abhedena pratipattuṃ iccha abhivāñchasva 
matsvarūpaprāptyabhisandhyaparityāgena abhyāsayogamapi 
karmayogayogyatāhetubhūtamanutiṣṭhetyarthaḥ | evaṃ vidhe'pi abhyāse 
abhyāsayoge asamarthaḥ aśaktaḥ san matkarmaparamaḥ madarthaṃ 
karmāṇi, matkarmāṇi tānyeva paramāṇi abhīṣṭasādhanatayā 
prakṛṣṭāni yasya sa tathāvidhaḥ bhava karmayogāṅgatayā abhyupagatasya 
īśvarapraṇidhānākhyasya kriyāyogasya anuṣṭhānamācara ityarthaḥ | 
tato'pi hi matsvarūpāvāptilakṣaṇasamādhiphalasiddhirbhavati | ata eva āha 
madarthamapi karmāṇi kurvan siddhimavāpsyasi iti | athaitadapi yathoktaṃ 
kartuṃ niṣpādayituṃ aśakto'si asamarthastvaṃ bhavasi, tadā madyogaṃ 
madviṣayaṃ samādhim āsthitaḥ phalatvena samāśritaḥ san 
sarvakarmaphalatyāgaṃ sarveṣāṃ pūrvoktānāṃ 
karmaṇāmanuṣṭhīyamānānāṃ yat phalaṃ 
tattallokāntaropabhogyanānābhogātmakasiddhirūpaṃ tasya 
tyāgamanabhisandhinā saṃnyāsaṃ yatātmavān sarvasmāt viṣayāt 
nigṛhītāntaḥkaraṇena yuktaḥ san kuru niṣpādaya mayi manaḥ samādhāya 
śāstravihitāni sarvāṇi karmāṇi yathoktajñānaprasādhanopāyatayā 
phalāntarābhisandhānaṃ vinā anutiṣṭhetyarthaḥ || 9-11 ||

p. 272) evamupadiṣṭānāṃ bhagavadupāsābhedānāṃ krameṇa pūrvasya 
pūrvasya anuṣṭhānāsāmarthye sati uttarasya uttarasya anuṣṭhānaṃ 
yadupadiṣṭaṃ, tat na avaratvāpekṣayā; kintu adhikāriviṣayasya tyāgasya 
sukarataratvameva boddhavyamiti pratipādayitumāha -

śreyo hi jñānamabhyāsājjñānāddhyānaṃ viśiṣyate |
dhyānāt karmaphalatyāgastyāgācchāntiranantarā || 12 ||

	hiśabdo hetau | yasmādevaṃ vidho vyākhyātakrama iha 
vivakṣitaḥ, tasmāt matprāptaye sarvakarmaphalatyāgaṃ 
yogyatātiśayavaśāt sukarataraṃ tvaṃ kuru, iti 
pūrvāparayorvākyayoḥ saṃbandhaḥ | kīdṛśaḥ kramaḥ | iha 
jñānaṃ yathoktayā upapattyā sarvabhāvānāṃ 
parabrahmarūpatāvagamaḥ, tat abhyāsāt abhyāsayogāt pūrvoktāt 
śreyaḥ sukaratvāt praśasyataram | abhyāsayogo hi 
sarvaviṣayapratiṣedhakrameṇa cittavṛttīnāṃ nirodhe yatnaḥ | sa ca 
yathoktajñānalabdhapratiṣṭhabuddhyadhikāriviṣayaḥ | tataḥ 
pratiṣṭhitabuddhyadhikāriviṣayaṃ jñānaṃ tadapekṣayā 
sukaratvāt śreyaḥ uktam | ata eva 
abhyāsayogināmavyaktāsaktacetasāmadhikataraḥ kleśa iti 
prāguktam | evaṃ vidhācca jñānāt dhyānaṃ 
jñānaniścitopeyavastucintanaṃ viśiṣyate sukaratvādatiricyate | 
tasya hi jñānāpekṣayā 
tattvasākṣātkārapravṛtterviśiṣṭo'dhikārī, tadviṣayatvena eva 
tasya sukaratvam | evaṃvidhācca dhyānāt karmaphalatyāgaḥ 
viśiṣyate, yato ghaṭamānāvastho'sau tādṛgdhyānalakṣaṇe hi 
karmaṇi vyatirekabuddhiḥ sphuratyeva | tadadhikāryapekṣayā tyāgaḥ 
siddhyavasthādhikāriviṣayastādṛśasya eva sukara iti dhyānāt 
karmaphalatyāgo viśiṣyate iti uktam | yasmāt neha evaṃ vidhastyāgo 
vivakṣitaḥ, yasya nāhaṃ kartā na me karmaphalena saṃbandhaḥ

p. 273) iti pralāpamātreṇa niṣpattiḥ, kintu 
vyatikrāntābhyāsādipūrvāvasthāsiddhayogiviṣayaṃ 
sarvabhāvānāṃ parabrahmasvarūpe nityamanubhavāt vyatiriktasya 
phalasya adarśanameva tyāga ucyate | ata eva āha 
tyāgācchāntiranantarā iti | śāntiḥ 
saṃkalpavikalpakṣobhaprakṣayādadvayacinmātrasvarūpe 
paramātmani eva bhagavati ahamityabhedena nirupaplavā saṃvido 
viśrāntiḥ | tasyāstyāgasya ca na asti antaraṃ vyavadhānaṃ; ya eva 
tyāgaḥ, saiva śāntirīśvarasamāpattilakṣaṇā siddhiriti tyāgāt 
śāntiranantarā, iti uktam | anantaramiti pāṭhe kriyāviśeṣaṇatvena 
eṣa eva artho boddhavya iti || 12 ||

	atha īdṛśasya tyāginaḥ parasāmyasamāpannasaṃvidātmabhūtasya 
bhaktasya lakṣaṇamāha -

adveṣṭā sarvabhūtānāṃ maitraḥ karuṇa eva ca |
nirmamo nirahaṅkāraḥ samaduḥkhasukhaḥ kṣamī || 13 ||

santuṣṭaḥ satataṃ yogī yatātmā dṛḍhaniścayaḥ |
mayyarpitamanobuddhiryo madbhaktaḥ sa me priyaḥ || 14 ||

parabrahmātmakamatsvarūpasamāpattisūcakaivaṃvidhaguṇaviśiṣṭo yaḥ 
sa madbhaktaḥ sa eva ca me priyaḥ ātmabhūtatvāt dayitaḥ | kīdṛśaḥ | 
sarvasāmyasamāpannatvāt carācareṣu akhileṣu bhūteṣu adveṣṭā 
dveṣalakṣaṇadoṣarahitaḥ svātmatayā sarvaṃ bhāvajātaṃ paśyatastasya 
heyābhāvāt dveṣābhāva ityarthaḥ | anena bhāvaniṣedhātmake samādhau 
dveṣadoṣānubandhacchedaḥ prāgukto'nūditaḥ | ata eva maitraḥ sarvatra 
sauhārdavān | tathā karuṇaḥ dayāvān yato nirmamaḥ mama 
idametadarthakriyākāritayā svamiti parigrahabuddherniṣkrāntaḥ | tathā 
dehādyanityavastuniṣṭhādahaṅkārapratyayāt niṣkrāntaḥ nirahaṅkāraḥ 

p. 274) tathā same vedyatvamātreṇa 
pratibhāsamānatvādanantarāviṣkṛtadveṣarāgātmakavikāratvāt tulye 
sukhaduḥkhe yasya | tathā kṣamī krodhādivikārahetuṣu titikṣāvān | tathā 
svikṛtajñānaparāmṛtatvāt nityatuṣṭaḥ sadātinirabhikāṅkṣaḥ | tathā 
yatātmā yataḥ svātmani eva avasthāpita ātmā yena, sa tathā | sarve hi 
aprabuddhā anātmani dhanādau niyamitātmapratyayāḥ tathā 
dṛḍhaniścayaḥ kenacit vikalpena prakampayitumaśakyatvāt dṛḍhaḥ 
susthiro'dhyavasāyo yasya, sa tādṛśaḥ | tathā pūrvavyākhyātakrameṇa 
mayyarpitamanobuddhiḥ mayi paramātmani arpite niveśite manobuddhī yena 
saḥ | evaṃ vidhaguṇaviśiṣṭho madbhakta ucyate, evaṃvidhasāmagrī 
madārādhanopakaraṇasaṃpaditi atra tātparyamiti || 14 ||

	idānīmuttareṣu ślokeṣu prakṛṣṭabhaktaviśeṣaṇatvena upāttāni 
padāni bahuśo vyākhyātaprāyārthatvāt paṭhyanta eva -

yasmānnodvijate loke lokānnodvijate ca yaḥ |
harṣāmarṣabhayakrodhairmukto yaḥ sa ca me priyaḥ || 15 ||

anapekṣaḥ śucirdakṣa udāsīno gatavyathaḥ |
sarvārambhaparityāgī yo madbhaktaḥ sa me priyaḥ || 16 ||

yo na hṛṣyati na dveṣṭi na śocati na kāṅkṣati |
śubhāśubhaphalatyāgī bhaktimān yaḥ sa me priyaḥ || 17 ||

samaḥ śatrau ca mitre ca tathā mānāvamānayoḥ |
śītoṣṇasukhaduḥkheṣu samaḥ saṅgavivarjitaḥ || 18 ||

tulyanindāstutirmaunī saṃtuṣṭo yena kenacit |
aniketaḥ sthitamatirbhaktimān me priyo naraḥ || 19 ||

	gatārthāni etāni viśeṣaṇāni | kintu kṛtakṛtyatāvyaktihetubhiḥ

p. 275) paramayogisaṃbaddhairevaṃvidhairguṇairyukto yaḥ, sa madbhakto 
bhavati, ityetāvadatra tātparyaṃ prāgeva uktam || 15-19 ||

atha adhyāyamupasaṃharannāha -

ye tu dharmāmṛtamidaṃ yathoktaṃ paryupāsate |
śraddadhānā matparamā bhaktāste'tīva me priyāḥ || 20 ||

ye bhaktāḥ matsaparyāparā matparāyaṇā idaṃ yathāpratipāditaṃ 
dharmāmṛtaṃ 
matsvarūpopāsanātmakasadācāramayamamṛtamavināśikatvakāraṇaṃ 
vastu upāsate nityānuśīlanena upasevante, te atīva sutarāṃ mama priyāḥ 
vallabhā na te matto vyatiriktā ityarthaḥ | kīdṛśāḥ santa upāsate | 
śraddadhānāḥ samastasiddhibījabhūtāṃ śraddhāṃ bhajantaḥ, ata eva ca 
matparamāḥ ahameva yathoktasvarūpaḥ parameśvaraḥ paramātmā 
sarvopāyairupeyatayā paramaḥ prakṛṣṭo yeṣāṃ te, tathā 
śraddhāmūlamatsamāpattiphalāṃ parāṃ siddhimupāgatā ityom || 20 ||

sarvārthaprārthanehārahitamapi satāṃ mānasaṃ lobhayantī
lakṣmyā yatra svayaiṣā vikasati bhagavadbhaktikalpadrumaśrīḥ |
tāṃ nityaṃ nandanorvīviharaṇavirasāḥ kautukāt kāmapīmā-
mekāṃ viśrāntibhūmiṃ śrayata kṛtadhiyo dvādaśādhyāyavṛttim ||

iti śrīrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe dvādaśo'dhyāyaḥ || 12 ||


atha trayodaśo'dhyāyaḥ

	adhyāyadvādaśakena 
prakrāntaprayojanaviṣayamaśeṣamabhidheyatattvamabhihitaṃ, prāyaśo na 
kaścit vaktavyaśeṣo vidyate | kevalamukta eva artho'vaśiṣṭena 
adhyāyapañcakena nirmalīkaraṇāya idānīṃ prapañcyate | tathāca 
prastāvanāpradarśitakriyākrameṇa 
pāramārthikayathoktaikasvarūpavyavasthito'pi parameśvaro 
nirupamanijakrīḍāmātraprayojanatayā ekameva svasvabhāvaṃ 
vedyavedakavibhāgaparikalpanayā śākhādvayena prasṛtamavabhāsya 
yāmimāṃ māyāmayīṃ mahāvāgurāmaprathayat, sā 
viṣayaviṣayivibhāgena śarīraśarīribhāvena ca avabhāsamānā samastaṃ 
saṃsāricakraṃ paryavarudhya avasthitā | tasyāḥ svecchayā 
anugrāhyatvena parigṛhītaṃ janaṃ prati udgrathanopāyabhūte sakale 
prakaraṇe tatra tatra pratipāditasvarūpaṃ jñānalakṣaṇamarthaṃ 
parameśvara eva upadiṣṭavān | tatra viṣayaviṣayivibhāgena 
avasthitāyāstasyā udveṣṭanāya saptame jñānalakṣaṇo'rthaḥ 
prapañcitaḥ | tathā hi tatra parasyaiva tattvasya jaḍacetanavibhāgena 
sthūlasūkṣmaprakṛtiprapañcavivekapurassaratayā tasya arthasya

ahaṃ kṛtsnasya jagataḥ prabhavaḥ pralayastathā | (7|6)

ityādinā pratipāditayā brahmatattvalakṣaṇayā paratarayā prakṛtyā 
parāparayoḥ prakṛtyorabhedaparamārthatāpratipādanena nirṇayaḥ kṛtaḥ | 
idānīṃ śarīraśarīribhāvena vyavasthitāyāstasyā 
udveṣṭanopāyabhūtatvena jñānasya nirṇayārthaṃ 
samanantaramadhyāyamārabhate | tatra tāvat tayoḥ śarīraśarīriṇorvitatya 
vyākhyāsyamānapratipādakasaṃjñānirdeśena sāmānyalakṣaṇaṃ 
pratipādayan saṃkṣepato vivakṣitasya jñānasya svarūpamapi

p. 277) śrībhagavānuvāca -

idaṃ śarīraṃ kaunteya kṣetramityabhidhīyate |
etadyo veda taṃ prāhuḥ kṣetrajñamiti tadvidaḥ || 1 ||

	idaṃ sarvapramātṛprasiddhatayā vyavasthitaṃ śarīraṃ dehaḥ 
kṣetrasādharmyāt kṣetramiti ucyate kṣetrasaṃjñayā kathyate | yathā 
kusūlādigatānāṃ dhānyādibījānāṃ 
mūlastambaśākhāśilādiviśeṣaprasavābhivyaktyadhikaraṇaḥ 
pṛthivyuddeśaḥ kṣetramityucyate, tathā karmāśayasaṃbhṛtānāṃ 
karmaṇāṃ 
jātyāyurbhogalakṣaṇavipākaviśeṣābhivyaktyadhikaraṇabhūtaṃ 
śarīramapi idaṃ kṣetramiti ucyate | tena tatkarmavipākāspadatvena 
yadanubhūyate, tat śarīramiti veditavyam | etat ca evaṃ vidhaṃ kṣetraṃ yo 
veda jānāti, taṃ tadvidaḥ kṣetrajñasvarūpajñāḥ kṣetrajñamiti 
vidurjānate | kimanena uktaṃ bhavati | asmin śarīre dviprakārā pratipattireva 
sthitā sarvadehināmahantayā idantayā ca | tathāca ahaṃ brāhmaṇo 
yajñadattaḥ ityādinā dehamahantayā vyavasyanti, kadācit mamedaṃ 
śarīraṃ itīdantayā vyavasyanti; ato vyavasāyitā pramātā tāvat 
kaścidatra vidyata eva | yaśca aṃśaḥ pramātṛtayā pratīyate, sa kṣetrajño 
jīvaścetanaḥ iti pratipattavyaḥ | evamasmin śarīre yadyat vedyatayā 
vedakasaṃbandhamātrāt pratīyate, tat kṣetrāṃśatayā veditavyam | yo'sau 
vedakatayā pratīyate, sa kṣetrajña ātmā iti veditavyaḥ | etāvatyeva 
nityāvahitatvaṃ śarīraśarīriṇorvivekajñānakāraṇam | tacca 
vedyavedakasaṃbandhamātranibandhanasakalaparāparavyavahārāṇāmapi 
sarvadehināṃ māyānimīlitatattvadṛśāṃ svapne'pi na unmiṣati, 
yāvadīśvarānugrahaśaktyaiva sā tattvadṛk

p. 278) teṣāṃ na unmīlitā | tena anugṛhīta eva viṣayo'sya jñānasya, iti 
tātparyam | yata uktam tadvidaḥ kecanaiva yoginastaṃ viduriti || 1 ||

	nanu paramārthata eka eva pramātā pratipāditaḥ | pratikṣetraṃ ca 
pṛthakpṛthak vedakapratītirabādhitā vyavasthitā, iti 
svasiddhāntavirodhabhrāntiṃ parihartumāha -

kṣetrajñaṃ cāpi māṃ viddhi sarvakṣetreṣu bhārata |
kṣetrakṣetrajñayorjñānaṃ yattajjñānaṃ mataṃ mama || 2 ||

	iha vedakatvamātramekamavyabhicāri asādhāraṇamātmano 
lakṣaṇamuktam | ataḥ parasparabhinnānāṃ kṣaṇikanānāvasthājuṣāṃ 
vedyānāṃ śarīrāṇāmeva bhinnarūpatvaṃ vyavasthitam | na tu 
vedakatvamātratayaiva tadadhiṣṭhāyakatvena vyavasthitasya 
pāramārthikasya ekasya vedakasya ātmano nānātvamasti 
sarvadehagatatve'pi vedakaikalakṣaṇāvyabhicārāt | yā tu pratiśarīraṃ 
jātyavacchedena pṛthakpratipattiḥ, tadacintyeśvaramāyāśaktivilasitameva | 
atastadvyudāsārthameva ca ayamupadeśaḥ prabuddhānprati arjunamukhena 
ucyate | sarvakṣetreṣu caturdaśavidhabhūtasargabhedena avasthiteṣu 
aparisaṃkhyeyeṣu śarīreṣu ekameva māṃ kṣetrajñaṃ paramātmānaṃ 
viddhi jānīhi | yathā ekakṣetragatanānāvayavavedakatvenaiva 
kṣetrajñapratītirmāyādaśāyāmavasthitā, tathā 
samastaśarīravedakatvena ekaḥ pāramārthiko'hameva kṣetrajñaḥ | tataśca 
evaṃvidhayoḥ kṣetrakṣetrajñayoryajjñānaṃ samyakpratipattistadeva 
mama mataṃ jñānatvena abhipretam | natu sāṃkhyādipratipāditayoḥ 
śarīraśarīriṇorvivekajñānamātraṃ tāttvikaṃ jñānamiti tātparyam || 2 
||

	idānīṃ nānādarśanabhedena vyavasthāpitanānārūpasya api 
kṣetrasya

p. 279) vedyatvamātrasāmānyalakṣaṇābhedāt kāṃcideva 
darśanaprakriyāmāśritya tatsvarūpe pratipādayitavye 
vedādyāgamaprasiddhasāṃkhyaprakriyāsamāśrayaṇena 
pratipādayiṣyamāṇakṣetrasya svarūpamupakṣeptumāha -

tat kṣetraṃ yacca yādṛkka yadvikāri yataśca yat |
sa ca yo yatsvabhāvaśca tatsamāsena me śṛṇu || 3 ||

ṛṣibhirbahudhā gītaṃ chandobhirvividhaiḥ pṛthak |
brahmasūtrapadaiścaiva hetumadbhirviniścitam || 4 ||

	tat kṣetrajñajñeyatayā upakrāntaṃ kṣetraṃ yat 
yadabhidhānamityarthaḥ, tathā yādṛk yādṛśena prakārabhedena sthitaṃ 
tat saṃkṣepeṇa avadhāraya | tasmiṃśca kṣetre yat vastu vikāri 
viśiṣṭakāryakāraṇatvāt vikāravat vikārasaṃyuktaṃ, tadapi śṛṇu | 
tathā yataśca vikāriṇo yat vikārabhūtaṃ vastu upapadyate, tadapi śṛṇu | 
tathā sa ca kṣetrajña evameva yo yatparyāyo yatsvabhāvaḥ yādṛśaśca, 
tatsarvaṃ saṃgraheṇa ucyamānamavadhāraya | asya vastunaḥ 
smṛtiśrutiprasiddhatvapratipādanārthamāha ṛṣibhiḥ smṛtikartṛbhiḥ 
bahudhā bahuprakāraṃ tatra tatra smṛtiśāstreṣu gītam | tathā 
chandobhirvividhaiḥ vedaśākhābhedena nānārūpairata eva pṛthak 
pṛthakprakaraṇabhedena gītam | brahmasūtrapadaiḥ brahmasūtraśabdena 
rahasyabhāgo vedasya vedāntasaṃjña ucyate, tasya yāni padāni 
avāntaravākyāni; taiḥ hetumadbhiḥ upapattisaṃyuktaiḥ viniścitaṃ 
viśeṣeṇa kṛtaniścayamiti || 3-4 ||

	evaṃ vedavedāntasmṛtiprasiddhatvamanena vakṣyamāṇasya 
kṣetrādipratipādakasya arthasya proktam | tatra yat kṣetraṃ yaśca kṣetrajña 
iti yaduktaṃ, tatra kṣetraṃ śarīraṃ; yaśca tadvedakaḥ, sa kṣetrajña iti 
prāgeva uktaṃ svarūpamanayormanyamāno yādṛgityādinā śiṣṭaṃ 
vaktumāha -

p. 280) mahābhūtānyahaṅkāro buddhiravyaktameva ca | 
indriyāṇi daśaikaṃ ca pañca cendriyagocarāḥ || 5 ||

icchā dveṣaḥ sukhaṃ duḥkhaṃ saṃghātaścetanā dhṛtiḥ |
etat kṣetraṃ samāsena savikāramudāhṛtam || 6 ||

etat mahābhūtādivastusamudāyātmakaṃ kṣetraṃ vikārasaṃyuktaṃ 
vikāragrahaṇāt prakṛtibhūtasaṃyuktamapi saṃkṣepeṇa kathitam | tatra 
mahābhūtaśabdena vyāpakatvādimahattve sati tanmātrāṇyeva uktāni 
veditavyāni | yataḥ ślokārdhena kāraṇabhūtaṃ padārthacatuṣṭayaṃ 
saṅgṛhītam | tatra ahaṅkāraḥ asmītipratyayo'smitāśabdena kvaciduktaḥ | 
buddhiḥ niścayātmakaṃ jñānaṃ mahattattvamiti prasiddham | tathā 
avyaktaṃ guṇatrayātmikā prakṛtiḥ | etāni catvāri kāraṇabhūtāni 
sthulādikrameṇa nirdiṣṭāni | tāni ca pṛthivyādīnāṃ bhūtānāṃ 
tanmātrāṇi kāraṇam | ahaṅkārastaijasavaikārikabhūtādibhedena 
trividhaḥ | tatra taijasatvena manasaḥ kāraṇam, vaikārikatvena indriyāṇām, 
bhūtātmatvena tanmātrāṇām, iti ahaṅkārasya trividhaguṇātmakasya 
kāraṇatvam | kecittu ahaṅkāratanmātralakṣaṇasya ṣaṭkasya mattattvaṃ 
kāraṇamāhuḥ, kecidahaṅkārasyaiveti buddheḥ kāraṇatvam | buddheśca 
guṇatrayarūpā prakṛtiravyaktaśabdena uktā kāraṇamiti 
kāraṇabhūtavastucatuṣṭayapratipādanena yadvikāri iti prakrānto'rtho 
nirṇītaḥ | atra hi avyaktaṃ svādhikārāpekṣayā mūlakāraṇam | 
ahaṅkāraśca buddhikāryaḥ san indriyādikāraṇam | tanmātrāṇi 
ahaṅkārakāryāṇi buddhikāryāṇi vā pṛthivyādikāraṇamiti 
caturṇāmapi kāraṇatvāt vikāritvam | atha kāryavargaṃ 
pratipādayitumāha indriyāṇi pañca buddhīndriyāṇi śrotrādīni 
prasiddhāni, pañca vāgādīni

p. 281) karmendriyāṇyapi tattvam, manaśca ekādaśaṃ 
saṃkalpavikalpātmakam | pañca indriyagocarāḥ iti indriyagocaraśabdena 
yadyapi śabdādayo bhūtaguṇā ucyante, tathāpi mahābhūtānāṃ 
svaguṇopalabdhidvāreṇa svarūpopalabdherindriyagocaraśabdena 
sthūlānyeva bhūtāni uktāni yataḥ ṣoḍaśako'sau vikāravargaḥ, eṣa ca 
kārya eva, na kāraṇamiti | evaṃ sāṃkhyadarśanaprasiddhā 
tattvacaturviṃśatireṣā śarīrabhāvena vyavasthitā kṣetrajñajñeyatvāt 
kṣetramiti uktā | idānīṃ tu darśanāntareṣu 
tattatprakriyāviśeṣasamāśrayaṇena yo yaḥ padārthasaṃgrahaḥ kṛto 
bhavati, tasya sarvasya prameyatvānatikramādasmatpakṣe kṣetratvameveti 
pratipādayitumāha icchetyādi | kaiścidicchādveṣasukhaduḥkhādaya 
ātmadharmatvena abhyupagatāste vedyatvātkṣetrameva | tathā 
śarīrendriyādisamudāyaḥ saṃghātaḥ | cetanā cetyate'nayeti kṛtvā 
jñānaṃ buddhivṛttiḥ | dhṛtiḥ 
prāṇādidhāraṇānibandhanamahaṃpratyayaḥ | etatsarvaṃ 
vedyatvānatikramāt kṣetramevetyasya ślokārdhasya tātparyam | atra tu 
pramātrekasvabhāvasya ātmanaḥ kathaṃ prameyatvaṃ, kathaṃ vā 
sarvavyavahārānupapattisiddhānusaṃdhātṛlakṣaṇasvarūpasya tasya 
asambhavaḥ, kathaṃ vā deśakālādyanavacchinnamahimno 
yāvajjīvabhāvitvaṃ, ityādinānāpravādapratikṣepāya bahavo vipaścitaḥ 
kṛtapariśramāḥ | sā ca tattvasya sādhyamānāvasthā 
sandigdhabuddhitvadaśānuttīirṇapuruṣaviṣayatayā | asyāṃ 
siddhāntakathāyāmīśvarānugrahāvirbhūtaviśuddhaśraddhādiguṇāpi"
sunitasaṃśayādidoṣābhāvanirmalaprajñopadeśyapuruṣaviśeṣaviṣayā-
yāmupanyastāyāṃ matikāluṣyādṛte na kiñcit prayojanam | nahi 
susiddhaṃ surasamāhāraviśeṣamāsvādayantaṃ puruṣaṃ prati 
tatsādhanāvasthāpratipādanena prastutāhāravairasyajananamātrātiriktaḥ 
kaścidupakāraḥ saṃbhavatīti 
akāṇḍapāṇḍityaprakaṭanatāṇḍavāḍambaraviḍambitātmanāṃ

p. 282) mārgo na mantavyaḥ | tadevaṃ yathopakrāntaṃ kṣetralakṣaṇaṃ 
tāvat nirṇītam || 5-6 ||

	idānīṃ sa ca yo yatsvabhāvaśca iti upakrāntakṣetrajñalakṣaṇaṃ 
nirṇetavyatayā avaśiṣyate | sa ca 

kṣetrajñaṃ cāpi māṃ viddhi ------------------ | (13|2)

iti mukhya eva ekaḥ kṣetrajño vivakṣitaḥ, tasya

jñeyaṃ yattatpravakṣyāmi ---------------------- | (13|12)

ityādinā vitatya lakṣaṇaṃ vakṣyati | saṃprati tu tādṛśasya kṣetrajñasya 
uktasya ca kṣetrasya yat jñānaṃ samyak saṃvedanaṃ mukhyajñānatayā 
prāk pratipāditaṃ yādṛgguṇadvāreṇa abhivyajyate, 
so'bhivyaktiheturguṇagaṇa eva jñānamiti pratipādayitumāha -

amānitvamadambhitvamahiṃsā kṣāntirārjavam |
ācāryopāsanaṃ śaucaṃ sthairyamātmavinigrahaḥ || 7 ||

indriyārtheṣu vairāgyamanahaṅkāra eva ca |
janmamṛtyujarāvyādhiduḥkhadoṣānudarśanam || 8 ||

asaktiranabhiṣvaṅgaḥ putradāragṛhādiṣu |
nityaṃ ca samacittatvamiṣṭāniṣṭopapattiṣu || 9 ||

mayi cānanyayogena bhaktiravyabhicāriṇī |
vivaktadeśasevitvamaratirjanasaṃsadi || 10 ||

adhyātmajñānanityatvaṃ tattvajñānārthadarśanam |
etajjñānamiti proktamajñānaṃ yadato'nyathā || 11 ||

	saṃgharṣādidoṣaprasaktasya 
prasiddhapuruṣāntarānuṣṭhīyamānasadācārānukaraṇe saṃkalpo māna 
iti ucyate | sa ca anuṣṭhitasya api

p. 283) sadācāramātrasya 
saṃsāraśvabhrapātaphalatāmāvahannāsurasargabhāgjanaviṣayo mahān 
doṣaḥ | tathāca uktaṃ

mānāgnihotramuta mānamaunaṃ 
mānenādhītamuta mānayajñaḥ |
catvāryetānyabhayaṅkarāṇi
bhayaṃ prayacchantyayathākṛtāni || (mahābhā0)

iti | catvāri agnihotrādīni vastūni āśramadharmarūpāṇi 
śāstracoditatvādanuṣṭhīyamānāni abhayaṃ tāvat kurvanti, 
mānādidoṣadūṣitacittatvena kṛtāni pratyuta mahadbhayamanuṣṭhātuḥ 
phalantītyapi hi asya ślokasya arthaḥ | evaṃvidho māno vidyate yasya, sa 
mānī; tasya bhāvo mānitvaṃ, tadabhāvaḥ amānitvaṃ 
śuddhasaṃkalpatvaṃ nāma guṇo jñānābhivyaktihetutvāt 
jñānamityuktam | evameva adambhitvam | dambho hi 
mānādidoṣadūṣitasaṃkalpatve sati dṛṣṭamātraphalatayā 
sadācārānuṣṭhānaṃ, vyājena dharmācaraṇamityarthaḥ | sa vidyate yasya 
asau dambhī mithyācāraḥ, tasya bhāvo dambhitvaṃ; tadabhāvaḥ 
adambhitvaṃ samyak kriyānuṣṭhānamityarthaḥ, tadapi pūrvavat 
jñānameva | tathā ahiṃsā | hiṃsā nāma śāstrīyaniyamanairapekṣyeṇa 
dveṣalaulyādiprasaktasya prāṇināṃ jighāṃsā, tadabhāvo'hiṃsā 
nisargataḥ sarvabhūteṣu karuṇārdracittatvādanabhidrohaḥ, tadapi jñānam 
| tathā kṣāntiḥ parairabhidruhyamāṇasya satyapi pratīkārasāmarthye 
svabhāvataḥ praśāntacittatvāt vāṅmanaḥ karmabhiravikāritvaṃ, sāpi hi 
jñānam | nanu ahiṃsākṣāntyoryadi jñānatvaṃ, tat kathaṃ 
tattvajñānopadeśaviṣayatvena parigṛhītasya arjunasya 
yajñasaṃgrāmādikryānuṣṭhāne niyujyamānasya tadgatā hiṃsā 
akṣāntiśca anuṣṭheyatvena upadiṣṭā | ucyate

p. 284) yathoktajñānaniṣṭhasya avaśyānuṣṭheyasvakarmabhāvena 
avasthitā hiṃsā akṣāntiśca hiṃsaiva na bhavati, naca akṣāntirityuktameva 
prāk | ārjavam ṛjutvaṃ yathāhṛdayaṃ vāṅmanaḥpravṛttiheturakuṭilatā | 
yadeva prasaṃsanti -

sarvaṃ jihmaṃ mṛtyupadamārjavaṃ brahmaṇaḥ padam |

iti | tadapi jñānam | evaṃ pañcaite dharmāḥ 
parameśvarānugrahasūcakadaivasargabhājo, na anyasya 
prakṣīyamāṇasadasatkarmasantānasya 
saṃsārasvarūpapratyavekṣāyogyaprajñasya sahasaiva jāyante | te ca 
taddhṛdayakṛtapratiṣṭhasya jñānatarormūlasantatisthānīyāḥ | tadyuktasya 
puruṣasya anugrahaśaktyā kalyāṇamitrasaṃstavādinā preryamāṇasya 
ācāryopāsanaṃ sadgurvārādhanaṃ nāma dharmo ya utpadyate, sa 
jñānam | jñātaroḥ kila asau skandhasthānīyo dharmaḥ, ṣaḍāntarīyakāḥ 
śākhāpratānakalpā amī dharmāḥ prādurbhavanti | tadyathā 
sāstrādhigamapurassaraḥ saṃskāraviśeṣaḥ, tathā heyopādeyavastuviṣayo 
vivekaḥ, vijñātatatsvarūpasya 
heyāpavarjanapūrvamupādeyānuṣṭhānaunmukhyam | 
ācāryopāsanādevaṃvidhadharmodaye sati pallavapuṣpasthānīyāḥ 
śaucādayo janmādidoṣadarśanaparyantā dharmaviśeṣāḥ samunmiṣanti | 
tatra viśiṣṭakriyānuṣṭhāne prāptādhikārasya kalyāṇahetuṣu tāsu tāsu 
kriyāsu āsaktacittasya tadguṇaiḥ sambadhyamānasya prathamaḥ śauco 
nāma guṇaḥ sarvakriyāṇāṃ tatpūrvakatvāt | tacca dviprakāraṃ 
bāhyamābhyantaraṃ ca | tatra bāhyam 
adhikārideśakālādyavasthāpekṣayā niyatetikartavyatayā mṛjjalādinā 
duṣṭadravyagandhalepādyapāsanaparyantā mṛjā | ābhyantaraṃ 
bāhyanivṛttau satyāṃ śuddho'smīti nirviplavā pratipattiḥ, yāṃ 
bhāvaśuddhimityāhuḥ | etacca śaucaṃ kāyavāṅmanonirvartyānāṃ 
tapaḥ

p. 285) svādhyāyadhyānādīnāṃ guṇāntarāṇāmupalakṣaṇaṃ 
veditavyam | atha sthiryaṃ saṃśayādidoṣanivṛttyā anuṣṭheyeṣu artheṣu 
acañcalatā | tasmiṃśca sati ātmavinigrahaḥ ātmano'ntaḥkaraṇasya 
niṣiddhāt viṣayāt vinigraho niyamanam | tataśca indriyārtheṣu viṣayeṣu 
dṛṣṭānuśravikeṣu kṣayātiśayādidoṣadarśanāt vairāgyaṃ 
rāgadveṣarahitatvaṃ, tat prakarṣamāsādayat sattvāntareṣu guṇeṣvapi 
paryavasyati | tasmiṃśca tādṛśe guṇe sati anahaṅkāraḥ 
īdṛśo'smītidurabhimānābhāvaḥ, yadivā 
śarīrādāvahamasmītipratyayanivṛttiḥ | tataśca janmādidoṣaprabhavasya 
duḥkhasyaiva mahādoṣasya anudarśanaṃ pṛṣṭhato nirūpaṇam | tadyathā 
garbhavāsādiniratiśayakleśānubhavādikaṃ janmano duḥkhaṃ, 
prāptaśarīragrahasya avaśyaṃbhāvi maraṇaduḥkham | tathā sati śarīre 
vārdhakyarogādiduḥkhamiti śarīritvaṃ nāma ādimadhyāntāvasthāsu 
duḥkhamayameva, iti vivekaharmyādhirūḍhaḥ svaparaviṣayatvena vivektuṃ 
kṣamaḥ | yathoktaṃ 

prajñāprāsādamāruhya aśocyaḥ śocato janān |
bhūmiṣṭhāniva śailasthaḥ sarvān prājño'nupaśyati ||

iti | tathāvidhasya ca svargādiphaleṣu kriyāviśeṣeṣu asaktiḥ asaṅga 
audāsīnyam | tathā dṛṣṭasukhahetuṣu sutakalatrabhavanādiṣu 
anabhiṣvaṅgaḥ sarvasvagrahaparityāgaḥ | etāṃ ca daśāṃ prāptasya 
iṣṭāniṣṭopapattiṣu priyāpriyapadārthaprāptiṣu satīṣu samacittatvaṃ 
harṣaśokādivikārarahitāntaḥkaraṇatvam | evameva tasyāṃ 
jñānatarornānāvidhapallavapuṣpasthānīyāyāṃ guṇasāmagryāṃ 
nirvṛttāyāṃ phalasthānīyā mayi bhaktiḥ upāsā | kīdṛśī | 
avyabhicāriṇī nirapāyā | kena hetunā | ananyayogena anyena 
yathāpratipāditamatsvarūpavyatiriktena

p. 286) vastunā yogaḥ saṃbandho'nyayogaḥ, tadabhāvo'nanyayogastena | 
kimuktaṃ bhavati | sarvabhāvānāṃ matsvarūpāvyatiriktatvadarśanaṃ 
jñānataro phalabhūtā mukhyā madbhaktiḥ | sā hi caturthī 
jñānitvarūpā bhaktyavasthā | yathoktaṃ prāk 

------------ jñānī tvātmaiva me mataḥ | (7|18)

iti | tasyāṃ ca satyāṃ viviktadeśasevitvaṃ viviktadeśasya 
tādṛśaniruttarabhaktirasāmṛtāsvādavighnakāricetanācetanavasturahitasya 
giriguhāpuṇyasaritpulinaguptagṛhadeśasya sevitvaṃ bhajanaśīlatā | 
tadviparītāyāṃ janasaṃsadi cittavyutthānahutulokasabhāyāṃ aratiḥ 
udvegastatpariharaṇamityarthaḥ | tathā adhyātmajñānanityatvam 
adhyātmamātmani yat jñānaṃ paramātmasvabhāvasaṃvedanaṃ, tat 
nityamavyabhicāri yasya, sa tathā tasya bhāvastattvam | tasmiṃśca sati 
tattvajñānārthadarśanaṃ tattvasya paramātmasvarūpalakṣaṇasya parasya 
bhāvasya jñānaṃ bodhaḥ svasaṃvedanānubhavaḥ | pūrveṇa padena 
jñānasya siddhiṃ kalpayatā uttareṇa siddhatvameva pratipāditaṃ, sa eva 
arthaḥ prayojanaṃ phalaṃ yasyeti tasya darśanaṃ sākṣātkāro niruttarā 
siddhirityarthaḥ | ete viviktadeśasevitvādayastattvajñānārthadarśanāntā 
dharmāḥ phalabhūtāyā bhakte rasasthānīyāḥ, ityetāvatī guṇasāmagrī 
jñānamiti proktaṃ spaṣṭo'rthaḥ | ata uktāt guṇasamūhāt anyathā 
anyena viparītena prakāreṇa mānitvadambhitvādinā yatsthitaṃ, tatsarvaṃ 
ajñānaṃ jñānaviparītaṃ veditavyam | etacca purastāt 
devāsurasargakathanaprasaṅgena punarapi jñānājñānalakṣaṇaṃ 
vakṣyati || 7-11 ||
evaṃvidhena ca jñānena -

jñeyaṃ yattatpravakṣyāmi yajjñātvāmṛtamaśnute |

p. 287) jñeyaṃ jñātavyaṃ yat yathoktena jñānena phalatayā avasthitaṃ 
paramātmalakṣaṇaṃ vastu tat idānīṃ pravakṣyāmi tatsvarūpaṃ 
prakarṣeṇa kathayiṣyāmi | yajjñātvā yadbuddhvā amṛtam 
avināśisvarūpaṃ aśnute vyāpnoti | nanu ananyasaṃvedyasya 
sarvasaṃvedakasvabhāvasya kathamidantāvaseyavastvantaravat jñeyatvena 
vyapadeśaḥ kṛtaḥ | satyaṃ, na tasya vastunaḥ paramārthato jñeyatā 
saṃbhavati | kintu ārurukṣāvasthāyāṃ 
jñātṛjñānajñeyavibhāgātmakatvādupacāreṇa jñeyaśabdastatra 
pravartate, natu vāstavena rūpeṇa tasya jñeyatā vivakṣitā | yataḥ 
so'yamahamiti svātmatvena pratyavamarśa eva tasya jñānaṃ, 
tadvadahamidaṃ vedmi iti, vyatirekeṇa tasya ekasya 
anubhavitṛtvamātralakṣaṇasya tattvasya avagamaḥ saṃbhavati ||

tathāvidhānyeva tadviśeṣaṇānyāha -

anādimat paraṃ brahma na sannāsat taducyate || 12 ||

sarvataḥ pāṇipādaṃ tat sarvato'kṣiśiromukham |
sarvataḥ śrutimalloke sarvamāvṛtya tiṣṭhati || 13 ||

sarvendriyaguṇābhāsaṃ sarvendriyavivarjitam |
asaktaṃ sarvabhṛccaiva nirguṇaṃ guṇabhoktṛ ca || 14 ||

bahirantaśca bhūtānāmacaraṃ carameva ca |
sūkṣmatvāttadavijñeyaṃ dūrasthaṃ cāntike ca yat || 15 ||

avibhaktaṃ vibhakteṣu vibhaktamiva saṃsthitam |
bhūtabhartṛ ca tajjñeyaṃ grasiṣṇu prabhaviṣṇu ca || 16 ||

jyotiṣāmapi tajjyotistamasaḥ paramucyate |
jñānajñeyaṃ jñānagamyaṃ hṛdi sarvasya viṣṭhitam || 17 ||

	kiṃ tajjñeyamiti sasaṃjñaṃ nirdiśati paraṃ brahmeti | 
paramārthataḥ

p. 288) sarvasya vastuno brahmarūpatve sthite yat jñeyatayā saṃprati 
ābhāsate, tadaparaṃ; yattu jñātṛmātrasvarūpaṃ tatparaṃ brahma 
ityuktam | kīdṛśaṃ tat | anādimat | idaṃ vedyaṃ vastu 
sarvakṣetrajñasādhāraṇaṃ pṛthivyādirūpaṃ viṣayatayā vyavasthitaṃ, 
tathā pratikṣetrajñaṃ śarīratayā vyavasthitam, ubhayarūpatayā 
prākpratipāditaṃ, kāraṇāpekṣatayā sarvamādimat, 
āgamāpāyadharmakatvādādikoṭyavacchinnaṃ, tataśca 
antakoṭyavacchinnamapi | tadviparītaṃ tu kāraṇāntaranirapekṣasadbhāvaṃ 
anādimat paraṃ brahma ityuktam | anyacca kīdṛśam | na sat | iha hi 
yadindriyairbāhyābhyantarairidamiti gṛhyate, tat māyīyaiḥ pramātṛbhiḥ 
saditi pratipadyate | brahma tu pramātrekasvabhāvatvāt 
sarvendriyagocarabhūtaṃ tathā sat na bhavati | naca evam asat taducyate | yata 
evamapi sattvena pratipannasya sarvasya vastumastathāvabhāsakatvāt tadeva 
sadbhāvakāraṇaṃ kathamasaditi vaktuṃ śakyam | ata eva tasya 
paramārthasadekapramātṛrūpasya viśvarūpatvaṃ pratipādayitumāha 
sarvataḥ pāṇipādaṃ tat ityādinā | sarveṣāṃ kṣetrajñānāṃ yāni 
pādādīni karmendriyāṇi, yāni ca cakṣuḥśrotrādīni buddhīndriyāṇi 
tattatkriyājñānasādhanatvena vyavasthitāni; tāni 
asādhāraṇakartṛjñātṛśakterekasyaiva tasya viśvātmanaḥ śaktibheda iti 
tātparyam | yata āha sarvamāvṛtya tiṣṭhati iti | ekameva tattvaṃ sarvamidaṃ 
jagat kartṛtayā jñātṛtayā ca vyāpya vartata iti | ata eva āha 
sarvendriyaguṇābhāsaṃ iti | yāni nānākṣetrajñasaṃbaddhatvena 
avabhāsamānāni sarvāṇi bāhyābhyantarāṇi indriyāṇi teṣāṃ 
śabdādiviṣayāvabhāsakatvādayo ye guṇā dharmāḥ, tānavabhāsayati 
prakāśayati yat; tat tathoktam, svayaṃ tu sarvendriyavivarjitam nahi tasya

p. 289) māyāvabhāsitāvacchinnasvarūpakṣetrajñavat 
niyatendriyādhīnaṃ jñānamityarthaḥ | tathā asaktaṃ 
viśuddhacinmātraikasvabhāvavyavasthitatvāt vedyarūpeṇa prākṛtena 
prapañcena amiśrībhūtam | atha ca sarvabhṛt sarvaṃ bibharti dhārayati yat | 
tatra hi tattve vedyavyatiriktasvabhāve'pi sarvamidamavasthitaṃ tadvinā 
kasyacidapi svarūpalābhābhāvāt | ata eva nirguṇṃ guṇebhyaḥ 
sattvādibhyaḥ prakāśapravṛttiniyamātmakebhyaḥ 
sukhaduḥkhamohavṛttibhyo niṣkrāntaṃ tebhyo'tyantavyatiriktasvarūpam | 
nahi brahma anityasukhādyātmakaṃ bhavati, kevalamākāśamiva 
sūryātaparajastimirādibhistaistairguṇairatyantāsaṃspṛṣṭasvarūpamapi 
tattvavicāraśūnyaiḥ pramātṛbhistadvattayā gṛhyate | vastutastu 
guṇabhoktṛtvāt guṇānanubhavitṛtayā bhuṅkte, natu 
taistatsvarūpamāvriyate | ata eva 
anavacchinnanijamāhātmyaviśvarūpatvādākāśamiva ghaṭādīnāṃ 
sarvabhūtānāṃ carācarāṇāṃ bahiḥ jñeyabhāvena antaḥ 
jñātṛbhāvena ca avabhāsamānamapi paramārthataḥ 
sāmānyasaṃvitsvabhāvamevaikaṃ tattattvaṃ vyavasthitaṃ, 
dehādipratyayavyavadhānamātrakṛto bāhyābhyantaravyapadeśaḥ | ata eva 
āha nityaniścalasvabhāvamātrapratiṣṭhitatvāt acaraṃ 
gatidharmavivarjitaṃ sarvavastuvedakatayā nityaprasṛtaśaktitvāt caraṃ 
gamanaśīlamiva | tathā idantāvaseyasarvavastuvilakṣaṇasvarūpatvāt 
paramasūkṣmaṃ tat tasmācca saukṣmyāt kāraṇāt avijñeyam 
idamityanavadhāryasvarūpam | ata eva sarvapramātṝṇāṃ 
jñeyatvābhāvāt dūrastham ativiprakṛṣṭam | atha ca tadvinā kasyacidapi 
jñānasya karmaṇo vā api anupapatteḥ sarveṣāṃ antike abhyāśe sthitam | 
tathā vibhakteṣu devamanuṣyatiryagāditvāt parasparabhinneṣu vastuṣu 
sāmānyasaṃvidātmakatvena avibhaktam abhinnaikasvarūpam | athaca 
vibhaktavacca

p. 290) saṃsthitam bhedena avabhāsamānatvāt | tathā tat tattvaṃ 
bhūtabhartṛsarvabhūtānāṃ tasya tasya rūpasya avasthityekahetutvāt 
dhārakam | tathā grasiṣṇu saṃhāraśaktiyuktatvāt grasanaśīlam | tathā 
prabhaviṣṇu utpādanahetutvāt sthitipralayasargakāraṇamityarthaḥ | tathā 
jyotiṣāṃ sūryādīnāṃ prakāśakānāṃ prakāśahetutvāt jyotiḥ 
prakāśakam | tāni hi jagadbhāvaprakāśakānyapi 
saṃvitprakāśaprakāśyāni | ata eva tamasaḥ paramucyate | yadyat 
paraprakāśyaṃ, tattat svayamaprakāśātmakatvāt tamorūpam | tasmāt tat 
tattvaṃ paraṃ sarvaprakāśakarūpatvāt prakṛṣṭaṃ vyatiriktaṃ vā | tathā 
jñānajñeyaṃ jñānena yathāpratipāditasvarūpeṇa upāyena 
jñeyamātmatayā pratyabhijñeyamityarthaḥ | yato jñānagamyaṃ 
jñānaṃ vinā tathā viṣayīkartumaśakyam | paramārthatastu sarvasya 
kasyacit pramātuḥ hṛdi hṛdaye saṃvettṛtayā viśeṣeṇa sthitaṃ 
siddhyavasthāyāṃ tathā svasaṃvedanasaṃvedyatvāt || 12-17 ||

upasaṃharati -

iti kṣetraṃ tathā jñānaṃ jñeyaṃ coktaṃ samāsataḥ |
madbhakta etadvijñāya madbhāvāyopapadyate || 18 ||

iti etāvatā granthena kṣetraṃ

mahābhūtāni ----------------------- | (13|2)

ityādinā prākṛtabhāvamayaṃ śarīraṃ, tathā 
amānitvāditattvajñānārthadarśanāntadharmarūpaṃ jñānaṃ tathā 

kṣetrajñaṃ cāpi māṃ viddhi sarvakṣetreṣu ------- | (13|5)

ityādinā mukhyakṣetrajñarūpaṃ jñeyaṃ tattattvamiti pradhānaṃ 
padārthatrayametaduktam | yato madbhakto madanugrahādeva 
matsaparyāparaḥ etat

p. 291) tritayaṃ jñātvā madbhāvāya matsvarūpasamāpattaye upapadyate 
upapannaḥ samartho bhavati || 18 ||

	atha yadetadatra jñānamupadiṣṭaṃ, tena 
prakṛtikṣetrajñaparamātmalakṣaṇaṃ padārthatrayaṃ nirṇītam, iti 
saṃgraheṇa krameṇa pradarśayitumāha -

prakṛtiṃ puruṣaṃ caiva viddhyanādī ubhāvapi |
vikārāṃśca guṇāṃścaiva viddhi prakṛtisaṃbhavān || 19 ||

	yaiṣā prakṛtiḥ saptame'dhyāye viṣayabhāvena, saṃprati 
śarīrabhāvena vibhajya pratipāditasvarūpā, tathaiva yaḥ puruṣaḥ 
viṣayitvena śarīritvena pratipāditaḥ, etāveva anyonyasaṃbaddhatvena 
anādī viddhi jānīhi | nahi etayorekatāsaṃbandhasya pūrvakoṭirupalabhyate, 
jñānāttu yathoktasvarūpādantakoṭirastyeva, anayorevamanāditvaṃ 
saṃbandhasya, iti atra tātparyaṃ; natu samaśīrṣikayā nityatvapratipādanam 
| yataḥ prakṛtervedyatvādudayavyayadharmayogitve sati pravāhanityatvaṃ, 
puruṣasya tu paramārthataḥ saṃvidrūpatvāt kūṭasthanityatvam | ata eva 
āha vikārān mahadādīn guṇāṃśca sattvādīn vedyaikasvabhāvān 
prakṛtisaṃbhavān pradhānakāraṇān jānīhi || 19 ||
	evaṃ sāmānyena prakṛtipuruṣayoḥ svarūpaṃ pratipādya, idānīṃ 
yathā prakṛtiḥ pratipuruṣaṃ nānāśarīrabhāvena saṃbaddhā, puruṣaśca 
prati śarīraṃ nānākṣetrajñabhāvena yathā saṃbaddhastathā 
pratipādayitumāha -

kāryakāraṇakartṛtve hetuḥ prakṛtirucyate |
puruṣaḥ sukhaduḥkhānāṃ bhoktṛtve heturucyate || 20 ||

	kāryaṃ mahābhūtādyātmakaṃ, kāraṇāni bāhyābhyantarāṇi 
indriyāṇi, iti śarīrādyātmakaḥ samūhaḥ kāryakāraṇaśabdena ucyate | 
tasya kartṛtve tāvanmātraniviṣṭāhaṃpratyayarūpe prakṛtiḥ avyaktaṃ 
hetuḥ kāraṇam | sā hi śarīrātmanā vyavasthitā sati 
tanniviṣṭāhaṃpratyayanimittam |

p. 292) tathā sukhādīnāṃ vedyatvāt bhogyānāmātmano yo 
bhoktṛtvābhimānaḥ, tatra vedakasvabhāvatvāt puruṣa eva kāraṇam | sati 
puruṣapratyaye sukhaduḥkhātmano bhogyasya viṣayatvaṃ, puruṣasya ca 
viṣayitvavyapadeśaḥ || 20 ||

kutaḥ -

puruṣaḥ prakṛtistho hi bhuṅkte prakṛtijān guṇān |
kāraṇaṃ guṇasaṃṅgo'sya sadasadyonijanmasu || 21 ||

	yasmāt prakṛtau nānākāryakāraṇātmakaśarīrabhāvena pariṇate 
pradhāne sthito māyāvaśāt tāvanmātrāhaṅkārāvaṣṭambhena 
vartamānaḥ puruṣaḥ prakṛtijān prakṛteḥ samudbhūtān guṇān sattvādīn 
sukhādyātmanā pariṇatān bhuṅkte vedakatvena viṣayīkaroti | yato 
mahābhūtaguṇāḥ śabdādayaḥ sukhādyātmanā vedyatvamāpannāḥ 
puruṣasya viṣayitvavyapadeśahetavaḥ | evaṃ śarīraśarīribhāvena 
viṣayaviṣayibhāvena ca prakṛtipuruṣayoravivekajaḥ saṃbandhaḥ | tataśca 
asya puruṣasya guṇeṣu śarīrātmanā viṣayātmanā ca 
saṅgo'haṅkāramamakārātmako dṛḍhaḥ saṃbandhaḥ, tat satīṣu 
sattvaguṇapradhānāsu, asatīṣu ca rajastamaḥpradhānāsu yoniṣu 
utpattikāraṇamūrtiṣu yāni janmāni puruṣādirūpatayā saṃbhavāḥ, teṣu 
guṇasaṅgaḥ eva kāraṇaṃ hetuḥ prakṛtipuruṣavivekābhāvamātranimittā 
saṃsāritā puruṣasyetyarthaḥ || 21 ||

	yataḥ parasya tattvasya dehe'smin nānāpuruṣasaṃbandhini dvidhā 
sthitirityāha -

upadraṣṭānumantā ca bhartā bhoktā maheśvaraḥ |
paramātmeti cāpyukto dehe'sminpuruṣaḥ paraḥ || 22 ||

p. 293) maheśvaraḥ sarvapuruṣaiśvaryāpekṣayā mahānatyutkṛṣṭa 
īśvaraḥ prabhuḥ parabrahmaśabdāparaparyāyaḥ 
svamāyodbhāvitapuruṣavyapekṣayā dehe'sminnupadraṣṭā bhartā 
anumantā bhoktā ca iti vyavasthitaḥ | yataḥ 
prakṛtyādimahadahaṅkārātmanā dṛśyatvena upasthāpitamarthaṃ 
puruṣaḥ paśyati, ityasau upadraṣṭā ityucyate | tathā dṛśyameva śarīrādi 
ahantayā parāmṛśan bhartā kāryakāraṇasya ahantayā dhārakaḥ sa eva 
vyapadiśyate | tathā prakṛtyā mataṃ jñātaṃ vedyatvena pratipannaṃ 
sukhādiviṣayabhūtaṃ vastu pṛṣṭhataḥ puruṣo manyata iti anumantā sa 
ucyate | tataśca tasyaiva bhoktṛtvavyapadeśaḥ | itthaṃ sāṃkhyaprakriyayā 
puruṣasya śarīritvaviṣayitvāropo ya ucyate, tatra vivekābhāvaḥ kāraṇaṃ; 
sa ca māyānibandhanaḥ | yadā tu vidyodayāt vivekajajñānāvirbhāvaḥ, 
tadā asāveva puruṣaḥ paramātmā ityabhidhīyate prabandhato 
yathāpratipāditādvayacidekasvabhāvabrahmasvarūpatayā ucyate || 22 ||

evaṃ prakṛtipuruṣeśvaravivekalakṣaṇasya jñānasya phalamāha -

ya evaṃ vetti puruṣaṃ prakṛtiṃ ca guṇaiḥ saha |
sarvathā vartamāno'pi na sa bhūyo'bhijāyate || 23 ||

	yo yogī evaṃ uktena prakāreṇa puruṣaṃ nānākṣetrajñarūpatayā 
avasthitaṃ guṇaiḥ sukhādyātmakaviṣayabhāvena avasthitaiḥ saha vetti, sa 
tattvatrayaparamārthaveditvāt sarvathā sarveṇāpi prakāreṇa 
tattadvarṇadharmātmakena tattadāśramadharmātmakena ca vartamānaḥ 
tadanuṣṭhātṛtayā tiṣṭhannapi bhūyaḥ punaḥ na abhijāyate na saṃsārī 
bhavati yathoktena jñānāgninā saṃsāraprasavahetūnāṃ 
bījasthānīyānāṃ karmaṇāṃ dāhāditi | yathoktaṃ

p. 294)	bījānyagnyupadagdhāni na rohanti ythā punaḥ |
	jñānadagdhaistathā kleśairnātmā saṃpadyate punaḥ ||

iti spaṣṭo'rthaḥ || 23 ||

	atra ca ātmano darśane yathoktaṃ jñānameva yadyapi mukhyatayā 
upāyaḥ, tathāpyupāyāntarairgauṇairapi asau kathañcit gamyata ityāha -

dhyānenātmani paśyanti kecidātmānamātmanā |
anye sāṃkhyena yogena karmayogena cāpare || 24 ||

anye tvevamajānantaḥ śrutvānyebhya upāsate |
te'pi cātitarantyeva mṛtyuṃ śrutiparāyaṇāḥ || 25 ||

	kecit sahajasiddhatattvajñānā niruttaraparameśvarānugrahabhājo 
dhyānena ātmānaṃ paśyanti yathoktabrahmasvarūpatānusmaraṇena 
sākṣātkurvanti | ata eva kena kva paśyantītyabhedapratipādanārthamāha 
ātmanātmānamātmani paśyanti iti | kimuktaṃ bhavati | yatra adhikaraṇe 
hṛdayādau dhyānaṃ kurvanti, yena ca antaḥkaraṇena kurvanti, yacca tena 
dhyānena upalabhante, tat sarvaṃ parabrahmarūpatayaiva pratyavamṛśantīti 
tātparyam | tathāca parā kāṣṭhā ātmajñānasya | saṃpratyetāvatīṃ 
yogyatāmaprāptāḥ anye sāṃkhyena prakṛtipuruṣavivekarūpeṇa 
jñānena ātmānaṃ paśyanti | anye yogena pātañjalādipraṇītavidhinā 
samādhinā, anye tu karmayogena yathoktajñānaniṣṭhatayā 
svakarmānuṣṭhānarūpeṇa samādhinā ātmānaṃ paśyanti, iti 
ātmajñānasya parāparabhedena prakāradvayamupanyastam | tatra 
dhyānenetyādinā śuddhajñānamātrasvarūpatayā ya uktaḥ, sā ca 
karmayogināmārūḍhāvasthā | yathoktaṃ

yogārūḍhasya tasyaiva śamaḥ kāraṇamucyate | (6|3)

p. 295) iti | karmayogeneti samuccayātmakatve'pi karmapradhānā 
karmayogināmārurukṣvavasthā 

ārurukṣormuneryogaṃ ------------------ | 6|3)

ityādinā prākpratipāditā, iti dviprakāraḥ para upāyaḥ, sāṃkhyena 
yogena ca, iti aparaḥ sthūlabhedapratipatteranumānāt | anye 
punardviprakāre'pi upāye saṃprati yogyatābhāvāt evaṃ yathoktena 
prakāreṇa ātmānam ajānantaḥ tāvanmātraśuddhādiguṇayogāt 
anyebhyo dṛṣṭānumitaṃ tata āptebhyaḥ śrutvā avadhārya 
āgamamātraśaraṇāstam upāsate bhajante | te'pi tathāvidhāḥ 
śraddhālakṣaṇasya siddhibījasya kṣetrībhūtāḥ santo mṛtyumatitarantyeva 
avināśinamātmānaṃ krameṇa pratipadyante satyārthābhiniveśitvāt | 
yatḥ satyamasatyaṃ ca dvayamapi saṃbhavati | vidyānugṛhītāḥ 
satyamabhiniviśante, māyāmohitāstu asatyaṃ; te ca tādṛśameva phalaṃ 
prāpnuvanti | tathāca uktam 

amṛtaṃ caiva mṛtyuśca dvayaṃ dehe pratiṣṭhitam |
mṛtyumāpadyate mohāt satyatve'mṛtamāhitam ||

iti || 24-25 ||

uktameva arthaṃ sphuṭataraṃ pratipādayitumā adhyāyaparisamāpterāha-

yāvat saṃbhavati kiñcit sattvaṃ sthāvarajaṅgamam |
kṣetrakṣetrajñasaṃyogāt tadviddhi bharatarṣabha || 26 ||

	yāvat yatparimāṇamaparisaṃkhyeyaṃ kiñcit sattvaṃ 
kenacidbhedena yuktaṃ prāṇijātaṃ saṃbhavati vidyate tat sarvaṃ kṣetrasya 
śarīrabhāvena pariṇatāyāḥ prakṛtestathā kṣetrajñasya 
nānāśarīritvābhimānena vyavasthitasya ātmanaḥ 
saṃyogādanādiprabandhapravṛttādanyonyasaṃbandhāt hetoḥ viddhi 
vijānīhi | kimuktaṃ bhavati |

p. 296) asya aparyavasānasya nānācarācarabhāvarūpasya prapañcasya 
avivecitasvarūpatayā prakṛtipuruṣayoḥ śarīraśarīribhāvena ekatayā 
saṃbandho nimittam | ataḥ śarīraśarīriṇorviveka ādyaḥ prakāro yathā 
pratipāditasya jñānasya tena śarīrabhāvapariṇataprakṛtiviviktasvarūpe 
suvijñāte ātmani vedakatvamātraikalakṣaṇāvyabhicārāt 
sarvakṣetrajñapratipattibhramanivṛtteriti || 26 ||

	yogī paramātmanaḥ svābhāvikaikyadarśanāt samyagdarśī 
bhavatītyāha -

samaṃ sarveṣu bhūteṣu tiṣṭhantaṃ parameśvaram |
ninaśyatsvavinaśyantaṃ yaḥ paśyati sa paśyati || 27 ||

	sarveṣu jaṅgameṣu sthāvareṣu ca dviprakāreṣu api 
avāntarabhedādanantaviśeṣeṣu api bhūteṣu samaṃ 
janmādivikārarahitatvāt nirviśeṣaṃ tiṣṭhantaṃ paramārthanityatvāt 
sadā vartamānaṃ parameśvaraṃ svatantraṃ paramātmānaṃ yo yogī 
paśyati ātmatvena pratyavamarśāt sākṣātkurute, sa paśyati tasya eva 
satyārthadarśitvāt pāramārthikaṃ draṣṭṭvaṃ 
tadvyatiriktātmanānātvadarśinaḥ sarve mithyārthadarśina ityarthaḥ | 
kīdṛśeṣu bhūteṣu kīdṛśaṃ paśyati | vinaśyatsu 
vināśāntajanmādivikārabhāgiṣu avinaśyantaṃ 
vedakatvamātrādekasmāt svabhāvādapracyavamānam | sa hi tathāvidho 
yogī samunmiṣitena yathopavarṇitena jñānamayena cakṣuṣā 
prādurbhāvatirobhāvadharmakasakalavedyāṃśaviviktasvarūpaṃ 
vedakaikalakṣaṇaṃ paramātmānaṃ sarvāvasthāsu ekatattvamātmatvena 
sākṣātkurvan samyagdarśana ucyate, anye tu viparītadarśanā ityarthaḥ | sa 
evaca ātmavāniti || 27 ||

tatra hetutvamāha -

samaṃ paśyan hi sarvatra samavasthitamīśvaram |
na hinastyātmanātmānaṃ tato yāti parāṃ gatim || 28 ||

p. 297) yasmāt yathoktena prakāreṇa sarvatra prākṛtabhāvamayavedyavarge 
samaṃ sāmānyasaṃvidrūpatayā tulyaṃ kṛtvā samavasthitaṃ 
svabhāvata eva samyak kṛtapratiṣṭham īśvaraṃ prabhuṃ paramātmānaṃ 
paśyan pratyabhijānan kaścideva ātmanā svayameva ātmānaṃ 
satyasvabhāvaṃ  na hinasti apratyabhijñānena santameva abhāvaṃ na 
prāpayati | kimuktaṃ bhavati | ya evaṃpratipāditena jñānacakṣuṣā 
kṣetrakṣetrajñaviviktaṃ paramātmānaṃ na paśyati, sa ātmaghātayukto 
mukhyayā vṛttyā | yathoktaṃ 

yo'nyathā santamātmānamanyathā pratipadyate |
kiṃ tena na kṛtaṃ pāpaṃ caureṇātmāpahāriṇā ||

iti || 28 ||

kaśca evaṃvidhaṃ paramātmasvarūpaṃ paśyatītyāha -

prakṛtyaiva hi karmāṇi kriyamāṇāni sarvaśaḥ |
yaḥ paśyati tathātmānamakartāraṃ sa paśyati || 29 ||

prakṛtiścetanācetanavibhāgena parāpararūpā 
prākpratipāditadviprakārā parameśvarecchāvaśādeva 
kṣetrakṣetrajñabhāvena anādinā saṃbandhena saṃbaddhā satī 
sarvamidaṃ jagaccitraṃ viracayati | tathāca saptame'dhyāye 
dviprakārāyāḥ prakṛteḥ svarūpaṃ pratipādya uktam 

etadyonīni bhūtāni sarvāṇītyupadhāraya | (7|6)

iti | asminnapi adhyāye 

yāvat saṃbhavati kiñcit ------------ | (13|26)

ityādinā ślokena eṣa eva artho'bhihitaḥ | tadevaṃrūpayā prakṛtyaiva 
kevalayā kriyamāṇāni nirvartyamānāni nānāśarīrasaṃbaddhatvena 
avabhāsamānāni kṛtsnāni karmāṇi vividhāḥ kriyāḥ yaḥ

p. 298) ātmatattvadarśī paśyati samyak nirūpayati, sa tādṛśo yogī tathā 
tena prakāreṇa ātmānaṃ brahmasvarūpaṃ satyasvabhāvaṃ sarvadā 
viśuddhacinmātrasvarūpe svātmani eva supratiṣṭhitaṃ santaṃ akartāraṃ 
paramārthataḥ sarvakriyāsu avyāpṛtatvāt 
svarūpavyatiriktakāryanirvṛttiprayatnarahitaṃ paśyati | kimuktaṃ bhavati | 
yathā kṣetrajñasya prakṛtyabhedābhimānena kartṛtvaṃ, na tathā 
paramātmanaḥ | tasya hi svarūpapratyavamarśamātre mukhyā kartṛtā, 
kṣetrajñasya kartṛtodbhāvanena gauṇī, iti yo'yaṃ kartṛkāryavyapadeśaḥ, 
sa sarvo bhedanibandhanaḥ, bhedaśca māyāmātravilasito na 
vastusattāmavalambate | tata ekasya tattvasya vyatiriktakāryanibandhanaṃ 
kartṛtvaṃ na vāstavamiti tātparyam || 29 ||

	itthaṃca sthite prakṛtipuruṣavivekajñānādanantaraṃ 
vāstavabrahmalakṣaṇaikatattvaviṣaye paraṃ jñānamāvirbhavatīti 
pratipādayitumāha -

yadā bhūtaprṭhagbhāvamekasthamanupaśyati |
tata eva ca vistāraṃ brahma saṃpadyate tadā || 30 ||

	tadā tasmin kāle yogī brahma saṃpadyate yathoktaparamātmani 
paramārthasatye ekasmiṃstattve samāpattimāpnoti | kadā | yadā yasmin 
kāle vivekajñānanairmalyāt samyak 
prakāśamānasarvagataikakṣetrajñasvarūpo yogī bhūtapṛthagbhāvaṃ 
bhūtānāṃ carācarāṇāmanantabhedānāṃ 
pṛthagbhāvamanyonyavyatiriktatvam ekasthamanupaśyati ekasmin 
paramātmani abhinnasaṃvitprakāśamātre sthitaṃ tadātmakatvena eva 
vartamānaṃ sākṣātkaroti | kimanena uktaṃ bhavati | 
prakāśapadavījūṣāṃ sarvabhāvānāṃ 
prakāśamānatāmātrādhīnātmalābhānāṃ vāstavīṃ 
paraprakāśaikarūpatāṃ yadā anubhavati yogī, yathāca sarvamekasthaṃ 
paśyati,

p. 299) tathaiva yadā tata eva ekasmāt tattvāt vistāraṃ nānābhāvamayaṃ 
vibhūtivaitatyaṃ paśyati, tadā brahma saṃpadyate | anena api kimuktaṃ 
bhavati | vivekajajñānaniṣṇātanirmalamatiryogī yathā ekasmiṃstattve 
līnaṃ sarvaṃ bhedajātaṃ tadabhinnaṃ paśyati, tathaiva tadeva ekaṃ 
tattvaṃ viśvabhāvabhedātmanā prasṛtaṃ tasya sarvātmanā 
bhāvanānātvapratipattibhramo vigalatītyarthaḥ | tathā ca ayameva arthaḥ 
kenāpi vipaścitā anūditaḥ 

yadyat pṛthaktvasaṃdigdhaṃ tatpṛthaktvānna bhidyate | 

iti || 30 ||

	tadevaṃvidhasya paramātmano bahuśo'pi uktaṃ lakṣaṇaṃ 
prasaṅgāt punarāha -

anāditvānnirguṇatvātparamātmāyamavyayaḥ |
śarīrastho'pi kaunteya na karoti na lipyate || 31 ||

	ayaṃ bhagavān paramātmā paraṃ tattvaṃ svabhāvata eva sarvatra 
sarvadā ca avyāhatasadbhāvaḥ, tataśca sarvasmin śarīre sthitirabādhitā 
eva | tathāpica tatrastho'pi pratipāditaikasvarūpamātre susthitatvāt na karoti 
na bhinnakāryanibandhanaṃ kartṛtvamanubhavati, tataśca kā kathā 
karmaphalānubhavasyeti na lipyate | yasmāt anāditvāt sarvakāraṇatvāt, ata 
eva nirguṇatvāt guṇebhya udayavyayadharmakebhyo niṣkrāntatvāt 
tadviviktasvabhāvatvāt avyayaḥ guṇavat vyayena vināśena rahitaḥ | yadyapi 
anāditvamavyayatvaṃ ca kṣetrajñasya api uktaṃ, tathāpi tasya guṇamayyā 
prakṛtyā saṃbaddhasya tatsvarūpānuvidhāyitvāt 
tattadudayavyayadharmakatvamupacaryate ā vidyodayāt | paramātmanastu 
upacāro'pi nāsti | ataḥ kṣetrajñavat na tasya kartṛtvaṃ, na 
karmaphalasaṃyoga iti || 31 ||

p. 300)	yathāca etasya sarvaśarīrasthatve'pi 
karmaphalasaṃyogalakṣaṇakalaṅkasaṃparkābhāvastathā upamānena 
darśayitumāha -

yathā sarvagataṃ saukṣmyādākāśaṃ nopalipyate |
sarvatrāvasthito dehe tathātmā nopalipyate || 32 ||

	yathā saukṣmyāt aṇīyastvāt sarvagataṃ samastavastuvyāpakaṃ 
deśakālādyanavacchinnamāhātmyam ākāśam 
avacchinnairvyāpyairbhāvaiḥ na upalipyate svadharmeṇa na saṃyojyate, 
tathā eva sarvatra sarvasmin suranaratiryagādyanantabhede'pi dehe śarīre 
vyāpakatayā avasthitaḥ nityasaṃnihito'pi ayaṃ paramātmā taddharmaiḥ 
sukhaduḥkhādibhirutpādavināśādibhirvā 
karmaphalasaṃbandhitvābhimānajanmabhiḥ nopalipyate na saṃspṛśyate | 
tathā ca uktaṃ brahmavidā kenacit 

yathaikasminghaṭākāśe rajodhūmādibhirvṛte |
saṃyujyante na sarvāṇi tathā jīvāḥ sukhādibhiḥ ||

iti || 32 ||

	evaṃ sarvātmanā karmaphalasaṃparkābhāve'pi 
ananyasādhāraṇaprakāśakatvadharmayogāt sa eva ekaḥ 
kṣetrakṣetrajñavyavahāraprakāśaka ityupamānāntareṇa darśayitumāha 
-

yathā prakāśayatyekaḥ kṛtsnaṃ lokamimaṃ raviḥ |
kṣetraṃ kṣetrī tathā kṛtsnaṃ prakāśayati bhārata || 33 ||

	yathā yena prakāreṇa ayaṃ sakalalokapratyakṣaparidṛśyasvabhāvo 
bhagavān bhāskāraḥ kṛtsnam akhilaṃ lokaṃ nānābhāvamayaṃ viśvam 
eka eva asahāyaḥ prakāśayati svasvarūpaṃ lambhayati, tena eva prakāreṇa 
ayaṃ kṣerī sarvakṣetrajñavyāpaka ekaḥ paramātmā

p. 301) kṣetraṃ prakāśayati iti | kimuktaṃ bhavati | 
prakāśyavastunānātvāt prakāśasya paramātmadharmasya yadi paraṃ 
nānātvopacāraḥ paramārthatastu eka eva 
sakalaprakāśyavastuprakāśakaḥ | prakāśakatvamātre ca 
upamānopameyabhāvo ravikṣetriṇoḥ | yathā hi ravirbhāvānāṃ 
prakāśako, na tathā ca kṣetrī | tathāhi kutaścit kāraṇāt labdhātmanāṃ 
ghaṭagavādīnāmarthānāmabhivyañjakatvamātreṇa raviḥ prakāśako na 
janakatvena, kṣetrī tu prakāśyatvāpādanena eva tān janayati, ato 
janakatvaṃ tasya, iti prāk pratipāditameva || 33 ||

taditthaṃrūpamadhyāyena 
kṣetrakṣetrajñaparamātmalakṣaṇatattvatrayanirṇayamupasaṃharannāha -

kṣetrakṣetrajñayorevamantaraṃ jñānacakṣuṣā |
bhūtaprakṛtimokṣaṃ ca ye viduryānti te param || 34 ||

	ye yoginaḥ evaṃ uktena prakāreṇa kṣetrasya śarīrabhāvena 
pariṇatāyā aparāyāḥ prakṛteḥ, tathā kṣetrajñasya 
nānākṣetrāhaṅkārāvaṣṭambhena avasthitāyā jīvarūpāyāḥ 
parāyāḥ prakṛteḥ antaraṃ viśeṣaṃ parasparaviviktaṃ svarūpaṃ viduḥ 
jānate | kena | amānitvādinā tattvadarśanaparyantena jñānena eva 
cakṣuṣā | na kevalaṃ tayorantaraṃ jānate, yāvat bhūtaprakṛtimokṣaṃ ca 
ye jānate | bhūtātmikā yā iyaṃ prakṛtiḥ sthūlā nirdiṣṭā, tato mokṣaṃ 
punastatra praveśābhāvādātyantikaṃ bandhatyāgaṃ ya vidanti | 
kimuktaṃ bhavati | kṣetrakṣetrajñayoḥ 
parasparaviviktasvarūpāvagamamātramāgamopapattipariśīlanadvāreṇa 
kadācit saṃbhavati, natu tāvatā prakṛtermokṣaḥ prabhavati, sa hi 
tadviviktātmasvarūpanityāvahitatvena eva bhavati | tataḥ pṛthaguktaṃ 
bhūtaprakṛtimokṣaṃ ca iti | te evaṃvidhāḥ paraṃ

p. 302) niruttaraṃ tattvaṃ saptame parataraprakṛtitvena pratipāditaṃ 
paramātmānaṃ yānti pratipadyante tadabhedalakṣaṇāṃ parāṃ 
siddhimadhigacchanti, ityom || 34 ||

bhavibhirakhilairnityaṃ tāpatrayīpariśoṣitāt
paramavirasāt kṣetrādbhogo yataḥ kila bhujyate |
cidamṛtaghanāt tadvo'dhyāyāt trayodaśataḥ srutai-
rvacanapṛṣataiḥ siktaṃ sūtāṃ vimuktiphalasriyam || 

iti śrīmadrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe trayodaśo'dhyāyaḥ || 13 ||





atha caturdaśo'dhyāyaḥ

trayodaśādhyāyaparisamāptau 

bhūtaprakṛtimokṣaṃ ca ye viduḥ ----------------- | (13|34)

iti yaduktaṃ, tatra bhūtādivikārabhāvamāpannā prakṛtiḥ kila 
bhūtaprakṛtiśabdena uktā, tataśca tasyāḥ kāraṇabhūtaṃ 
prakṛtyātmakaṃ tattvamasti, ityabhyupagataṃ bhavati | tadabhyupagame ca 
parabrahmādvaitasiddhāntatā śāstrasya asya viruddhyate | iha hi 
nityaikacitprakāśātmakasvabhāvaparāmarśaprabhavaparānandalakṣaṇaṃ 
sat tādṛksvabhāvasuvyavasthitamātmatattvaṃ 
parabrahmaśabdābhidheyamekameva paramārthasattvena 
āgamopapattyupalabdhyavisaṃvādi siddhaṃ prabandhataḥ pratipāditaṃ, 
yasya 

anādimatparaṃ brahma -----------------------------| (13|12)

ityādinā lakṣaṇaṃ kṛtam | tataśca prakṛtirnāma dvitīyaṃ tattvamastitvena 
kathaṃ siddhyati, kiṃ vā tasya svarūpaṃ, kīdṛśo vā 
parabrahmasvarūpeṇa tattvena tasya saṃbandhaḥ iti yena jñāyate | tathā 
bhūtaprakṛtirdvividhā uktā śarīrātmanā viṣayātmanā ca pariṇāmāt, 
tataḥ kathamātmano mokṣaḥ, kimatyantaparihāreṇa anyathā vā | tatra 
ādyaparihārastāvadiha na abhyupagataḥ | tathāca uktam 

anāditvānnirguṇatvātparamātmāyamavyayaḥ | 
śarīrastho'pi kaunteya na karoti na lipyate || (13|31)

tathā

ihaiva tairjitaḥ sargo yeṣāṃ sāmye sthitaṃ manaḥ | (5|14)

ityādi | anena śarīrabhāvapariṇatāyāḥ prakṛteratyantaparihāreṇa mokṣo 
na abhyupagataḥ | tathā viṣayabhāvena pariṇatāyā api na

p. 304) atyantaparihāro'bhimataḥ | taduktaṃ

rāgadveṣaviyuktaistu viṣayānindriyaiścaran |
ātmavaśyairvidheyātmā prasādamadhigacchati || (2|64)

tathā

saktāḥ karmaṇyavidvāṃso yathā kurvanti bhārata |
kuryādvidvāṃstathāsaktaścikīrṣurlokasaṃgraham || (3|25)

ityādi ca | evaṃ kathaṃ viṣayarūpāyāḥ prakṛtermokṣa iti yena jñāyate, 
tadubhayārthaviṣayajñānaṃ sūkṣmatvāt prakṛṣṭaṃ tatra tatra 
prāguktamapi punarvaktuṃ pratijānaṃstatpraśaṃsāpūrvaṃ 
bhagavānuvāca -

paraṃ bhūyaḥ pravakṣyāmi jñānānāṃ jñānamuttamam |
yajjñātvā munayaḥ sarve parāṃ siddhimito gatāḥ || 1 ||

	uktena rūpeṇa paraṃ prakṛṣṭaṃ bhūyaḥ punarbahutaraṃ vā 
jñānānāṃ kṣetrajñādiviṣayāṇāṃ madhye uttamaṃ pradhānaṃ 
jñānaṃ prakarṣeṇa kathayiṣyāmi | vakṣyamāṇena jñānena 
pūrvoktānāṃ jñānānāṃ samyakpratipattirbhaviṣyatīti teṣāṃ madhye 
tasya uttamatvam | ata eva āha yat viditvā pūrve munayaḥ saṃyaminaḥ sarve 
eva parāṃ siddhiṃ parasamāpattilakṣaṇāṃ prakṛṣṭāṃ phalaniṣpattiṃ 
itaḥ saṃsārāt prāptāḥ || 1 ||

yato'sya jñānasya ayaṃ prabhāvaḥ -

idaṃ jñānamupāśritya mama sādharmyamāgatāḥ |
sarge'pi nopajāyante pralaye na vyathanti ca || 2 ||

	idaṃ vakṣyamāṇaṃ jñānam upāśritya sugṛhītaṃ kṛtvā anye'pi 
yogino mama sādharmyaṃ madbhāvābhedaṃ prāptāḥ santaḥ 
etajjñānaśūnyakṣetrajñāntaravat sargapralayayorapi na 
utpādavināśavyapadeśabhājo bhavanti pāramārthikanityatvābhivyakteriti 
|| 2 ||

p.305) atha etajjñānaṃ vaktumāha -

mama yonirmahadbrahma tasmin garbhaṃ dadhāmyaham |
saṃbhavaḥ sarvabhūtānāṃ tato bhavati bhārata || 3 ||

	yadetat bhūtaprakṛtikāraṇabhāvena vyavasthitaṃ tattvaṃ 
parabrahmaṇo bhinnatvena āśaṅkitaṃ, tat tasmāt paramārthato na 
bhinnaṃ, brahmaiva tat; kintumahat tadapekṣayā sthūlaṃ yato vedyatayā 
parāmṛśyamānam | mama parabrahmasvarūpasya 
jagadbhāvakrīḍanakotpādanādhikaraṇatvāt yoniḥ tat | tasmin 
paramārthato hi yonibhūte mahati brahmaṇi ahaṃ garbhaṃ dadhāmi 
saṃvillakṣaṇasvavīryasaṃkrāntiṃ karomītyarthaḥ | kimanena uktaṃ 
bhavati | yathoktalakṣaṇaparabrahmasvarūpaṃ parāmṛśan 
prakṛtilakṣaṇaṃ tattvamavabhāsayāmi | tasya idantāyāmapi 
citprakāśānupraveśaṃ vinā prakāśamānatvābhāvāt 
brahmasvarūpatvaṃ, vyavacchinnavedyasvarūpatvāttu sthūlatvamiti 
sakalajagadbhāvabhedaikahetubhūtedantātmakaṃ mahadbrahma mama 
jagatsisṛkṣārasikasya yonisthānīyam | ata eva āha sarvabhūtānāṃ 
carācarāṇāṃ samastānāṃ prāṇabhṛtāṃ tataḥ tasmādidantayā 
parāmṛśyamānāt svabhāvādeva saṃbhavaḥ utpattiḥ | 
tadetadatyadbhutarūpatvaṃ pārameśvaryā māyāśakteḥ 
suprabuddhāvaseyaparamārthamanena pratipāditaṃ yat manāgapi 
svarūpapracyutyabhāve sati itthaṃ nānājagadbhāvaprapañcarūpatayā 
avabhāsamānatvam | etacca evaṃvidhamāścaryarūpatvaṃ garbhīkṛtya 
svarūpaṃ prāk pratipāditaṃ 

daivī hyeṣā guṇamayī mama māyā duratyayā |
māmeva ye prapadyante māyāmatitaranti te || (7|14)

iti || 3 ||

p. 306)	atha laukikārtharūpaṇagarbhīkāreṇa yonyādiśabdaprayogo'tra 
yaḥ kṛtaḥ, tameva sphuṭīkartumāha -

sarvayoniṣu kaunteya mūrtayaḥ saṃbhavanti yāḥ |
tāsāṃ brahma mahadyonirahaṃ bījapradaḥ pitā || 4 ||

	sarvayoniṣu samasteṣu bhāvābhivyaktyadhikaraṇabhūteṣu kṣetreṣu 
stryādyāśriteṣu yā mūrtayo 
jarāyujatvādicaturutpattiprakāraiścaturvidhasaṃsthānabhedena ākṛtayo 
bhūtānāṃ saṃbhavanti utpadyante, tāsāṃ sarvāsāṃ 
yathāpratipāditasvarūpaṃ mahadbrahma idantāsāmānyalakṣaṇaṃ 
prakṛtyātmakaṃ yoniḥ mukhyamabhivyaktyadhikaraṇaṃ, tasyāṃ ca yonau 
saṃvillakṣaṇasya bījasya svavīryasya pradānāt ahaṃ pitā | yathā 
kaścidbrāhmaṇādiḥ puruṣo bhāryātvena parigṛhīte vanitākṣetre 
santānotpādanāya vīryamavasṛjan garbhamādhatte, naca 
rūpāntaramāsādayati, evamahaṃ svarūpādapracyuta eva yathokte mahati 
brahmaṇi jagadbhāvahetuṃ saṃvillakṣaṇaṃ bījamavasṛjāmi, iti | 
svarūpāpracyutimātre pitṛtvena ātmano'dhikaraṇamātratvena yonitvena 
sthūlasya brahmaṇo rūpaṇaṃ nānābhāvahetutve bījatvena cidaṃśasya 
nirūpaṇamiti | yathāhi adhikaraṇabhūtāṃ yonimantareṇa 
santānābhivyaktyabhāvaḥ puruṣavīryasya, 
evamidantāparāmarśamātrasvarūpasthūlabrahmātmakaprakṛtimantareṇa 
sisṛkṣoḥ parameśvarasya 
jagadbhāvakrīḍanakodbhavābhāvaścillakṣaṇasya vīryasyetyarthaḥ || 4 ||

	evamidamiti parāmṛśyamānaṃ svarūpameva prakṛtiḥ, na 
vastvantaraṃ kiñcit; tasyā aparasya brahmaṇaḥ 
prakāśyaprakāśakabhāvalakṣaṇaḥ saṃbandhaḥ, sa ca prakāśādvaitaṃ 
vinā na ghaṭate prakāśyasya prakāśarūpatāmantareṇa tathā 
svarūpalābhābhāvāditi prakṛtiviṣayaṃ tāvat

p. 307) jñānamuktam | idānīmevaṃ ca labdhajanmanastasyāḥ 
śarīrādibhāvena vyavasthitabhūtādivikārarūpāyāḥ kathaṃ nirmokṣa 
iti abhedārthaviṣayaṃ jñānaṃ nirṇīyate | tatra yā eṣā 
pratipāditasvarūpā prakṛtiḥ, sā śarīraviṣayabhāvena ābhāsamānaiḥ 
svavikāraiḥ prakṛtyādibhiśca dehinaṃ badhnāti yena tatparihārādeva tato 
nirmokṣaḥ syāt | kintu yaiḥ prakāraiste saṃvedyatāmāpadyante, te 
prakārā dehinamahaṅkāramamakārābhyāṃ nibadhnanti, tatastebhyo 
nirmokṣo bhūtaprakṛtinirmokṣo bhavatīti krameṇa pratipādayitumāha -

sattvaṃ rajastama iti guṇāḥ prakṛtisaṃbhavāḥ |
nibadhnanti mahābāho dehe dehinamavyayam || 5 ||

paramārthato nityatvāt avyayaṃ vināśarahitamataśca janmarahitamapi 
dehinam ātmānaṃ yathoktaprakṛtisamutthā guṇāḥ sattvādyabhidhānā 
vakṣyamāṇasvarūpā vakṣyamāṇena prakāreṇa nibadhnanti 
vināśotpādakadehāhaṅkārāropaṇataddharmānuvidhāyitvādasvatantrī-
kurvanti || 5 ||

kathamiti teṣāṃ bandhakatvena vibhāgamāha -

tatra sattvaṃ nirmalatvāt prakāśakamanāmayam |
sukhasaṅgena badhnāti jñānasaṅgena cānagha || 6 ||

	tatra teṣāṃ madhye sattvaṃ nāmaguṇo jñānasaṅgena badhnāti 
niyataviṣayaṃ niyatakaraṇādhīnaṃ yat jñānaṃ, tatra yaḥ saṅgaḥ 
idamahaṃ jānāmi ityabhimānena āsaktistallīnatvaṃ tena paratantrīkaroti | 
tathā sukhasaṅgena badhnāti sukhaṃ tattadabhīṣṭaviṣayaprāptyā 
viṣayāntarākāṅkṣānivṛttiparyavasāyinī nirvṛtiḥ, tatra saṅgaḥ 
sukhito'haṃ sukhaṃ mamāstīti vā ahaṅkāramamakārāvaṣṭambhena 
tallīnatvaṃ; tena paratantrīkaroti | kutaḥ | yataḥ evaṃsvabhāvaṃ sattvaṃ tat 
nirmalatvāt

p. 308) āvarakatamolakṣaṇamalaviviktasvarūpatvāt prakāśakaṃ 
viṣayaprathākāraṇamato jñānasaṅgena badhnāti anāmayaṃ 
rajoviviktatvāt pravṛttiduḥkhātmakena āmayena rahitamataḥ sukhasaṅgena 
badhnāti sūkṣmatvāt | jñānasaṅgaḥ pūrvaṃ vyākhyātaḥ || 6 ||

tathā -

rajo rāgātmakaṃ viddhi tṛṣṇāsaṅgasamudbhavam |
tannibadhnāti kaunteya karmasaṅgena dehinam || 7 ||

rajaḥ saṃjñaṃ guṇaṃ rāgātmakaṃ sukhābhilāṣarūpaṃ jānīhi | ata 
eva tṛṣṇāsaṅgasamudbhavam anādiprabandhapravṛttatvāt tṛṣṇā 
viṣayarasapipāsā, tatra saṅgastadekalīnatvaṃ tataḥ samudbhavo janma 
yasya, tat tādṛśaṃ jānīhi | tat evaṃsvabhāvaṃ rajaḥ karmasaṅgena 
kṣetrajñaṃ nibadhnāti karmarāgaprayuktasya 
iṣṭaviṣayāharaṇāniṣṭaviṣayaparihāreṇa pravṛttistatra saṅgastatparatvaṃ, 
tena niyatakāryakartṛtābhimānarūpeṇa paravaśīkaroti || 7 ||

tathā -

tamastvajñānajaṃ viddhiṃ mohanaṃ sarvadehinām |
pramādālasyanidrābhistannibadhnāti bhārata || 8 ||

	tamolakṣaṇaṃ punarguṇam ajñānajaṃ 
prakāśasvabhāvasattvaguṇapraviviktatvāt jñānābhāvaprabhavaṃ, 
tataśca sarvaśarīriṇāṃ mohanaṃ jñeyaviṣayāpratipattijananaṃ jānīhi | 
tat tathāvidhaṃ tamaḥ pramādena upāyopeyavivekanirapekṣatvena, tathā 
ālasyena pravṛttyātmakarajoviviktarūpatvāt kāryeṣu anudyogena, tathā 
nidrayā mohanarūpeṇa sarvendriyaśaktivirāmeṇa dehinaṃ nibadhnāti 
niyacchati, iti guṇatrayasya svarūpaṃ bandhaprakāraśca pratipāditaḥ || 8 ||

p. 909) idānīṃ yasmin svakārye sati yasya guṇasya utkarṣo bhavati, tathā 
tatsvarūpaṃ pratipādayitumāha -

sattvaṃ sukhe sañjayati rajaḥ karmaṇi bhārata |
jñānamāvṛtya tu tamaḥ pramāde sañjayatyuta || 9 ||

sukhalakṣaṇe sattvaguṇakārye sati sattvaṃ sañjayati samyagatiśayaṃ 
labhate | evaṃ rajoguṇakārye karmaṇi rajaḥ sañjayati | tathā pramāde 
pūrvoktalakṣaṇe sati tamaḥ sañjayati | kiṃ kṛtvā | jñānaṃ 
viṣayāvagamam āvṛtya tiraskṛtya || 9 ||

atha eṣāmanyonyābhibhavavṛttitvaṃ pratipādayitumāha -

rajastamaścābhibhūya sattvaṃ bhārata vardhate |
rajaḥ sattvaṃ tamaścaiva tamaḥ sattvaṃ rajastathā || 10 ||

	rajastamasī abhibhūya nyakkṛtya sattvaguṇo vardhate | kimuktaṃ 
bhavati | yadā sattvaṃ vivṛddhaṃ balavat bhavati, na tadā taditaro guṇaḥ 
svakāryamārabhate | evaṃ tamaḥsattve abhibhūya rajoguṇo vardhate | tathā 
rajaḥsattve abhibhūya tamoguṇo vardhate || 10 ||

atha eṣāṃ guṇānāṃ vivṛddhatvavyañjanāni liṅgānyāha -

sarvadvāreṣu dehe'sminprakāśamupajāyate |
jñānaṃ yadā tadā vidyādvivṛddhaṃ sattvamityuta || 11 ||

lobhaḥ pravṛttirārambhaḥ karmaṇāmaśamaśca tṛṭ |
rajasyetāni jāyante vivṛddhe bharatarṣabha || 12 ||

aprakāśo'pravṛttiśca pramādo moha eva ca |
tamasyetāni jāyante vivṛddhe kurunandana || 13 ||

	asmin śarīre yadā yasmin kṣaṇe sarvadvāreṣu śrotrādiṣu 
prakāśaṃ sphuṭamasandigdhaṃ kṛtvā jñānaṃ 
śabdādiviṣayasaṃvedanamutpadyate; tadā 
sattvaguṇamabhibhūtarajastamaskatvāt vivṛddham upacitam,

p. 310) iti jānīyāt | tathā rajasi pravṛddhe 
abhibhūtasattvatamaskatvādupacite sati etāni liṅgāni utpadyante | tadyathā 
lobhaḥ iṣṭaviṣaye prāpte'pi naiva nivṛttiḥ, tadāharaṇārthaṃ pravṛttiḥ 
unmukhībhāvaḥ | tataśca anantaraṃ ārambhaḥ kriyā tadāharaṇavyāpāra 
ityarthaḥ | tathā prāpte'pi kasmiṃścidviṣaye viṣayāntaraviṣayāṇāṃ 
kriyāṇām aśamaḥ śāntyabhāvaḥ | tathā tṛṭ tṛṣṇābhilāṣo rāga 
ityarthaḥ | tathā tamasi vivṛddhe sattvarajo'bhibhavāt labdhabale sati etāni 
liṅgāni jāyante | tadyathā aprakāśaḥ sattvaguṇābhibhavāt 
prakāśābhāvo viṣayāsaṃvedanam | tathā rajoguṇābhibhavāt apravṛttiḥ 
kriyābhāvaḥ | tataśca svayaṃ vivṛddhatvāt 
pramādamohāvuktalakṣaṇāviti || 11-13 ||
	atha eṣāṃ vṛddhau satyāṃ prāṇaprayāṇe sati 
viśiṣṭalokāntaraprāptinirdeśena bandhahetutvameva pratipādayitumāh -

yadā sattve vivṛddhe tu pralayaṃ yāti dehabhṛt |
tadottamavidāṃ lokānamalān pratipadyate || 14 ||

rajasi pralayaṃ gatvā karmasaṅgiṣu jāyate |
tathā pralīnastamasi mūḍhayoniṣu jāyate || 15 ||

	yadā yasmin kāle sattvaguṇe vivṛddhe balavati sati dehabhṛt śarīrī 
pralayaṃ yāti vināśavyapadeśaṃ labhate, tadā uttamavidāṃ 
prakṛṣṭajñānānāṃ devādīnāṃ saṃbandhino lokān bhuvanāni 
sattvaguṇamayatvāt amalān viśuddhān prāpnoti tatra jātavyapadeśaṃ 
labhate | tathā rajasi pravṛddhe sati pralīnaḥ san karmasaṅgiṣu 
rajoguṇapradhānatvāt tattatkriyāviśeṣapareṣu martyeṣu jāyate | tathaiva 
tamasi pravṛddhe pralīnaḥ san mūḍhayoniṣu tiryaksthāvarādiṣu 
tamaḥpradhāneṣu jāyate iti || 14, 15 ||

p. 311) prayāṇasamaye sattvādiguṇavṛddhau phalanirdeśārthamāha -

karmaṇaḥ sukṛtasyāhuḥ sāttvikaṃ nirmalaṃ phalam |
rajasastu phalaṃ duḥkhamajñānaṃ tamasaḥ phalam || 16 ||

sukṛtasya sattvavivṛddhau satyāṃ yathāśāstraṃ samyaganuṣṭhitasya 
karmaṇaḥ yajñādeḥ kriyāviśeṣasya sāttvikaṃ sattvaguṇādāgataṃ 
nirmalaṃ viśuddhaṃ viśiṣṭajñānasukhasvarūpaṃ phalaṃ bhavatīti 
śeṣaḥ | rajasastu rajovivṛddhau satyāṃ duḥkhaṃ phalaṃ 
saṃśayādiduṣṭacittattvāt, śraddhādiguṇaviśuddhyabhāve yat karma 
kriyate tat pravṛttilakṣaṇaṃ duḥkhameva phalatītyarthaḥ | evameva tamaso 
vivṛddhau satyāṃ kṛtasya karmaṇo mohādiduṣṭacittatvāt 
śāstravidhivaiparītyena prayuktasya karmaṇaḥ ajñānaṃ moha eva phalam 
|| 16 ||

saṃgraheṇa etadeva āha -

sattvāt saṃjāyate jñānaṃ rajaso lobha eva ca |
pramādamohau jāyete tamaso'jñānameva ca || 17 ||

	spaṭārthaḥ ślokaḥ | etasya sattvādīnāṃ guṇānāṃ 
pṛthaksvarūpasamudāyācāraphalādibhedaprapañcapratipādanasya 
sarvāsvavasthāsu teṣāṃ vedyaikasvarūpatāpratipādanatātparyaṃ 
veditavyamiti || 17 ||

asya ca prayojanamāha -

ūrdhvaṃ gacchanti sattvasthā madhye tiṣṭhanti rājasāḥ |
jaghanyaguṇavṛttisthā adho gacchanti tāmasāḥ || 18 ||

nānyaṃ guṇebhyaḥ kartāraṃ yadā draṣṭānupaśyati |
guṇebhyaśca paraṃ vetti madbhāvaṃ so'dhigacchati || 19 ||

spaṭārthau ślokau || 18, 19 ||

p. 312) guṇānetānatītya trīn dehī dehasamudbhavān |
janmamṛtyujarāduḥkhairvimukto'mṛtamaśnute || 20 ||

	śarīraviṣayādibhāvena pariṇatāḥ sarve prakṛtivikārarūpā 
bhāvā dehasamudbhavāḥ, sati hi dehe śarīraviṣayātmakatvena 
samudbhavantīti tadātmanaiva upalabhyatāmabhiprapadyante | tat etān 
pratipāditasvarūpān trīn sattvādīn guṇānvedakaikasvabhāvāt svātmano 
vyatirecanena atītya nistīrya dehī kṣetrajñastadvyatirecanādeva śarīrādito 
nivṛttāhaṅkāramamakārābhimānatvāt śuddhacinmātrasvabhāva eva 
pratiṣṭhitatāttvikāhaṅkāro guṇamayaśarīrādibhāvapratibaddhaiḥ 
janmamṛtyujarāduḥkhaiḥ utpādavināśapariṇāmakleśaiḥ vimukto 
vivarjitaḥ san amṛtaṃ paraṃ brahma paramātmānaṃ aśnute prāpnoti 
tadabhedaṃ gacchatītyarthaḥ | kimanena uktaṃ bhavati | guṇebhyaḥ 
pratipāditasvarūpebhya ātmanaḥ svābhāvikaviviktatvabhāvanā 
bhūtaprakṛtermokṣo, natu śarīraviṣayādirūpāyāstasyāḥ 
parihāramātraṃ mokṣa iti || 20 ||

atha guṇātītasvarūpaṃ viśeṣato jijñāsurarjuna uvāca -

kairliṅgaistrīn guṇānetānatīto bhavati prabho |
kimācāraḥ kathaṃ caitāṃstrīn guṇānatīvartate || 21 ||

	kairliṅgaiḥ abhivyañjakairlakṣaṇaiḥ etān uktarūpān guṇānatīto 
bhavati tebhyo vimuktaḥ saṃpadyate | yaśca guṇātītaḥ, sa kimācāraḥ kiṃ 
tasya ceṣṭhitamityarthaḥ | kena ca prakāreṇa etānativartate vyatikrāmati 
guṇātītatvaprāptihetuḥ ko vidhiriti || 21 ||

praśnatrayanirṇayārthamuttaraṃ bhagavānuvāca -

prakāśaṃ ca prav.vrttiṃ ca mohameva ca pāṇḍava |
na dveṣṭi saṃpravṛttāni na nivṛttāni kāṅkṣati || 22 ||

p. 313) udāsīnavadāsīno guṇairyo na vicālyate |
guṇā vartanta ityevaṃ yo jñastiṣṭhati neṅgate || 23 ||

samaduḥkhasukhasvapnaḥ samaloṣṭāśmakāñcanaḥ |
tulyapriyāpriyo dhīrastulyanindātmasaṃstutiḥ || 24 ||

mānāvamānayostulyastulyo mitrāripakṣayoḥ |
sarvārambhaphalatyāgī guṇātītaḥ sa ucyate || 25 ||

	sa evaṃvidhaḥ ślokacatuṣṭayapratipādyaviśeṣaṇaviśiṣṭo 
guṇātītaḥ ucyate iti saṃbandhaḥ | ko'sau | ya etāni vastūni saṃpravṛttāni 
samyagabhivyaktāni santi na dveṣṭi samādhiviparyayatvāt teṣu aprītiṃ na 
bhajate ityarthaḥ | tathā nivṛttāni alabdhavṛttaya eva ete bhavatu, iti na 
prārthayate ityarthaḥ | kāni tānītyāha prakāśaṃ sattvaguṇasya 
vivṛddhyabhivyañjakaṃ jñānādirūpaṃ liṅgaṃ, tathā pravṛttiṃ 
rajoguṇasya tathāvidhaṃ kriyātmakaṃ liṅgaṃ, tathā mohaṃ 
tamoguṇasya tādṛśameva ajñānātmakaṃ liṅgamiti | eteṣu 
sattvādiguṇavṛddhicihnabhūteṣu vastuṣu pravṛttihetuṣu nivṛttihetuṣu vā 
nityanirvikārasvarūpapratiṣṭhatvāt yo rāgadveṣābhyāṃ manāgapi na 
āvriyate, sa guṇātīta ucyate iti | etanmukhyaṃ guṇātītasattāliṅgam | 
etacca guṇātītalakṣaṇamuktaṃ vakṣyamāṇaṃ ca dvitīye 
sthiraprajñatvalakṣaṇakathanaprasaṅgena pratipāditamihāpi anuvartanīyam 
| nanu pravṛttimohau pravṛtau santau 
rajastamovivṛddhiliṅgabhūtāvaprakāśatvāt dveṣyau bhavatāṃ nāma 
yoginaḥ, prakāśastu sattvavivṛddhiliṅgabhūtaḥpravṛttaḥ san kasya dveṣyo 
bhavet yena uktaṃ prakāśaṃ ca pravṛttiṃ yo na dveṣṭi sa guṇātītaḥ iti | 
atra ucyate iha abhyāsayogino rajastamoliṅgavat sattvaliṅgamapi 
prakāśātmakaṃ pravṛttaṃ niṣedhyatvāt

p. 314) dveṣyaṃ bhavati | tathā ca pātañjale citiśaktisvarūpamuktvā

	sattvaguṇātmikā ceyamato'viparītā vivekakhyātirityatastasyāṃ 
viraktaṃ cittaṃ tāmapi khyātiṃ niruṇaddhi |

iti uktam | karmayoginastu guṇātītadaśādhirūḍhasya viśeṣo'yamuktaḥ 
yatprakāśamapi pravṛttaṃ na dveṣṭi, naca tasya nivṛttimabhikāṅkṣati | 
tathāhi sati dveṣarāgānuṣaṅgāt guṇātītatā na ghaṭate | tena 
viśuddhasvabhāvāpracyutasaṃvidaḥ prakāśādīni pravṛttāni nivṛttāni 
vā heyatayā upādeyatayā vā yasya dveṣarāgau na udbhāvayataḥ, sa 
guṇātīta ucyate; tadetat guṇātītaliṅgamityarthaḥ | tasya liṅgāntaramāha 
udāsīnavadāsīnaḥ ityādi | yo guṇaiḥ pravṛttairnivṛttairvā na vicālyate 
svarūpāt na pracyāvyate, sa guṇātīta iti svarūpaḥ | kuto na vicālyate iti 
hetugarbhaṃ viśeṣaṇamāha udāsīnavadāsīna iti yaḥ parasya sukhaṃ 
duḥkhaṃ vā pravartamānaṃ tena amiśrībhūtacittatvāt svastho 
nirvikārastaṭastha eva paśyati, sa udāsīna iti ucyate | tena tulyaḥ sa eva 
prakāśādipravṛttinivṛttyoḥ parakīyayoriva nirvikāra eva āsīnaḥ 
svarūpaviśrāntaḥ | ata eva guṇā vartante pravṛttimanubhavantīti | etāvati 
yo jño boddhā san tiṣṭhati svasthitiṃ bhajate, ata eva neṅgate na svarūpāt 
calati, sa guṇātīta ucyate tadasya liṅgamityarthaḥ | etena 
kairliṅgairguṇātīto bhavatītyatra uttaramuktam | kimācāra ityatra 
uttaramāha samaduḥkhasukha ityādi | duḥkhasukhasvapnā iti 
rajaḥsattvatamovṛttaya uktāḥ | samā aviśeṣeṇa nirūpyamāṇatvāt 
tulyāste yasya sa tathoktaḥ | na sukhe prīyate, na duḥkhaṃ dveṣṭi, na svapne 
muhyatītyevaṃvidhastasya samācāraḥ | tulyo mitrāripakṣayoḥ

p. 315) ityetadantamanayaiva diśā kimācāra ityasya uttarametat | kathaṃ ca 
etān guṇānativartate ityatra uttaramāha sarva ityādi 
sarveṣāmārambhāṇāṃ 
yajñatapodānādikriyāviṣayāṇāmudyamānāṃ 
niratiśayanijānandanirbharanirbhayasvātmopāsāpravaṇatvāt phalasya 
svargādibhogaprāptilakṣaṇasya tyāgī nirabhisandhānatvāt varjayitā 
jñānaniṣṭhatvena phalābhisandhiśūnyatayā 
śāstroktasvakarmānuṣṭhānalakṣaṇo 
vidhirguṇātītatvaprāptiheturityarthaḥ || 22-24 ||

guṇātītatvaprāptihetuṃ paraṃ vidhimāha -

māṃ ca yo'vyabhicāreṇa bhaktiyogena sevate |
sa guṇānsamatītyaitān brahmabhūyāya kalpate || 26 ||

	yaḥ ca yathoktasvarūpaṃ māmavyabhicāreṇa 
madvyatiriktaviṣayāntarālambanavyabhicārarahitena bhaktiyogena 
prākpratipāditacatuṣprakāreṇa bhaktirūpeṇa samādhinā sevate 
ārtatvādijñānitvaparyantāvasthāsamucitavidhipūrvamupāste, sa parāṃ 
kāṣṭhāṃ prāptaḥ san etān yathoktān guṇān samatītya atikramya 
brahmabhūyāya brahmabhāvāya kalpate yathoktasvarūpaṃ brahmaiva 
saṃpadyate iti idānīmeva upāyāntaradustarāt 
dvaitamohamahāsāgarāduttirṇo bhavatītyarthaḥ | yato yathoktena krameṇa 
pratyabhijñātādvayacinmātrasvarūpaparabrahmarūpe mayi paramātmani 
suviśrāntasaṃvido yogino natu guṇarūpaṃ kiñcit vyatiriktaṃ 
padārthāntaramavaśiṣyate | yasmāt yathāpratipāditaṃ tāttvikaṃ 
matsvarūpameva acintyamanmāyāmahimnaiva idantayā 
parāmṛśyamānaṃ yathā prakṛtyākhyabhāvasvarūpatāmāpatsyate, 
tathaiva tāttvikā maddharmā amī aparāmṛśyamānāḥ 
sattvādiguṇavyapadeśabhājo bhavanti | tathāca prakāśo nāma maddharmo 
vyatiriktaprakāśyānapekṣanityoditacidātmakajyotirūpaḥ,

p. 316) sa vyatiriktaparimitaprakāśyaniṣṭhatayā tatsvarūpānuvidhāyitvāt 
parimitatvamiva āpannaḥ sattvaguṇavyapadeśaṃ labhate | evaṃ 
svarūpānubhavamātralakṣaṇakriyātmāpi maddharmaḥ, sa 
vyatiriktaparimitaprakāśyaniṣṭhatayā rajoguṇavyapadeśaṃ labhate | tathā 
deśakālādyanavacchinnamahimni svābhāvikīnityā yā sthitiḥ, saiva 
bhinnāśrayaniṣṭhatayā niyamātmakatamoguṇavyapadeśaṃ labhate | evaṃ 
parāmarśavaicitryāt bhāvanāmātravyāpāro māyāśaktiḥ 
prakṛtiguṇādibhāvavikalpātmakamatyadbhutamidaṃ 
trailokyālekhyamullikhantī sarvadehino mohayati | saiva yadā bhaktirūpeṇa 
vijṛmbhamāṇayā vidyāśaktyā tiraskṛtā bhavati, tadā pāramārthikaṃ 
brahmaiva ekaṃ tattvamavaśiṣyate | tata uktaṃ yo bhaktiyogena māṃ sevate, 
sa brahmabhūyāya kalpate iti || 26 ||

atra hetumāha -

brahmaṇo hi pratiṣṭhāhamamṛtasyāvyayasya ca |
śāśvatasya ca dharmasya sukhasyaikāntikasya ca || 27 ||

	yasmāt brahmaṇo yathoktasya ca parasya tattvasya ahaṃ 
pratiṣṭhāmayi tadavyabhicāritayā tattvasvarūpānuvidhāyi pratiṣṭhitam | 
yataḥ kṣetrajñakṣetrādibhāvena avasthitaṃ brahmaiva yadyapi uktaṃ, 
tathāpi tadavacchinnavastuniṣṭhatayā tatsvarūpānuvidhāyi sarvatra 
pratiṣṭhitam | kīdṛśasya brahmaṇo'haṃ pratiṣṭhā | amṛtasyāvyayasya ca 
na vyayo'pakṣayalakṣaṇao vikāraḥ, tena rahitasya; ata eva amṛtasya 
nityasadbhāvasya | na kevalaṃ brahmaṇo'haṃ pratiṣṭhā, yāvat 
taddharmasya śāśvatikasya citprakāśātmano'pi ahaṃ pratiṣṭhā, 
anapekṣitavyatiriktakāraṇaḥ sahaja ānanda aikāntikaṃ sukhaṃ, tasyāpi 
ahaṃ pratiṣṭhā | kimuktaṃ

p. 317) bhavati | prakāśānandākṣaratvarūpaṃ yat paraṃ brahma, so'haṃ 
bhaktilakṣaṇenaiva ekena upāyena prāpya ityom || 27 ||

yaistucchaistrapusīsatāmramalinaiḥ sattvādibhī rūpakai
rdaurgatyaṃ bhajate jano vyavaharansaṃsāradīrghāpaṇe |
siddhi cāsya rase caturdaśamahādhyāyābhidheyātmake 
nītāste paramārthatāṃ dadatu vo lakṣmīṃ kṣaṇādakṣayām ||

iti śrīmadrājānakarāmakaṇṭhaviracite vākyārthānvayamātre 
sarvatobhadranāmni bhagavadgītāvivaraṇe caturdaśo'dhyāyaḥ || 14 ||




###########   END OF FILE  #######