####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00173
Uniform title: bodhapañcadaśikā
Main title: bodhapañcadaśikā with commentary by harabhaṭṭaśāstrī
Author : abhinavagupta
Editor : zadoo jagaddhar

Description: 
Photographic facsimiles from vol 76 of the Kashmir Series of Texts and Studies.


Notes: 
Data entered version added:

Revision 0: Sept. 18, 2011

Publisher : Research Department Jammu and Kashmir State
Publication year : 1947
Publication city : Srinigar
Publication country : India
####################################################




śrībodhapañcadaśikā 

mahāmāheśvarācāryābhinavaguptapādaviracitā | 

śrīgaṇeśāya namaḥ || 

śrīśāradāmbāyai namaḥ || 

iha khalu śivādvayaśāsanāmbhodhipāradṛśvā śrīmān 
mahāmāheśvaro'bhinavaguptākhya 
ācāryavaro'titīkṣṇapratibhāprasādātiśayato'vagāhanīyeṣu 
śaivāgameṣu keṣāñcidanugrāhyāṇāṃ śiṣyāṇāṃ 
natisaukumārya paryālocyānāyāsameva 
trikaśāstrasaṃpradāyajijñāsūṃstānupadidikṣuḥ pañcadaśabhiḥ 
ślokaistatpratibodhanāya śāstrārthamupanibadhnāti | tatrādau 
nityoditasaṃvitprakāśasyāvabhāsane pramāṇavyāpārābhāva iti 
pratipādayannāha - 

anastamitabhārūpastejasāṃ tamasāmapi | ya eko'ntaryadantaśca 
tejāṃsi ca tamāṃsi ca || 1 || 

svatantraśivaprakāśo hi sarvābhāsakaḥ sadodito na svaṃ 
prakāśayituṃ prakāśāntaramapekṣate svaprakāśatvāt 
tasyā'stoditatvābhāvāt sakṛdvibhāto'yamātmā iti nahi 
draṣṭurdaṣṭrerviparilopo vidyate'vināśitvāt iti śruteḥ | (bṛ0 
ā0 4|3|23|) ya eko'dvitīyo'rkādīnāṃ tejasāṃ 
pramāṇādiprakāśānāṃ ca tathā madamūrchādyavasthārūpāṇāṃ 
tamasāṃ bāhyāprakāśānāmantaravasthitatvāt tadanuprāṇako 
bahirapi tasyaiva saṃvitprakāśasya sattvāttadantareva 
tānyarkādīnāṃ tejastamāṃsi svasattāmupayānti | 

p. 2) 

nahi bhārūpaṃ saṃvitprakāśaṃ vinā kimapi ghaṭādi bhāvajātaṃ 
prakāśamānatāmeti te ca prakāśā astaṃ yānti udayanti ca | 
prakāśaḥ punarastodayānākalitaḥ pramāṇānāmapi jīvitarūpaṃ 
mūlapramāṇaṃ tamarkādiprakāśaḥ kaścidavabhāsayituṃ na 
śaknoti tasya prakāśyatvāt svābhāsane'pyasamarthasya kathaṃ 
paraṃ bhāsayituṃ prāgalbhyaṃ pratyuta svābhāsane'pi 
saṃvitprakāśamevāpekṣate sa iti svaprakāśatvādarkādīnāṃ sa 
eva bhāsakaḥ | yaduktam - 

yanna sūryoṃ navā somo nāgnirbhāsayate'pi ca || 
nacārkasomavahṇīnāṃ tatprakāśādvinā mahaḥ || 

kimapyasti nijaṃ kintu saṃviditthaṃ prakāśate | (taṃ0 3 | 115) 

iti | tathā gītāsu - 

na tadbhāsayate sūryo na śaśāṅko na pāvakaḥ | yadgatvā na 
nivartante taddhāma paramaṃ mama || (bha0 gī0 11|56) 

abodho'pi na bodhyamāno bodhādbhidyate'nyathā 
tatsattvānupapatteriti sthityā khapuppāderapyasato 
vyāpakatvādaparicchinnaḥ saṃvitprakāśo viśvatra 
nirnirodhāvaraṇaṃ tattadvaicitryātmanā vijṛmbhate ityetena kimapi 
pramāṇādi tatra sarvajīvitabhū nopayujyate ityuktaṃ bhavati || 1 
|| 

evaṃ saṃvitprakāśaḥ prakāśyaṃ prameyaṃ prakāśayatīti 
prakāśaprakāśanīyabhāve siddhe kathaṃ śivādvayabhāva 
ityāśaṃkyāha - 

sa eva sarvabhūtānāṃ svabhāvaḥ parameśvaraḥ | bhāvajātaṃ hi 
tasyaiva śaktirīśvaratāmayī || 2 || 

sa eva parameśvaraḥ svatantraciddhanatāsaparamārthaḥ 
sarvabhūtānāṃ samagrāṇāṃ śivādisakalāntānāṃ 
pramātṛvargāṇāṃ sakalānāṃ prameyavargāṇāṃ ca ubhayeṣāṃ 
prāhyagrāhakarūpāṇāṃ sphurattātmānuttaraprakāśavapuḥ 
svabhāvo'nyathā - 

p. 3) 

yattatra nahi viśrāntaṃ tannabhaḥ kusumāyate | (taṃ0 8|3) 

iti sthityā saṃvitprakāśādbhinnasyā'satvānna kimapi prakāśeta 
| etadeva hi pārameśvaryamananyāpekṣaṃ svātantryaṃ 
yattattadaniyataviśvavaicitryeṇa svecchayaiva svātmabhittau 
samunmīlanaṃ tatrāpi niyatākāradhāritve aiśvarya vighaṭeta | 
yaduktamācāryeṇaiva - 

asthāsyadekarūpeṇa vapuṣā cenmaheśvaraḥ | maheśvaratvaṃ 
saṃvittvaṃ tadatyakṣyaddhaṭādivat || (taṃ0 3|100) 

kevalaṃ vedyavedakatvarūpasya vyavahārasya māyābhūmau 
kalpitapramātrapekṣayā tātkālikī vyavahniyamāṇatā | 
yaduktamīśvarapratyabhijñāyām - 

kevalaṃ bhinnasaṃvedyadeśakālānurodhataḥ | 
jñānasmṛtyavasāyādivyavahāro'nubhūyate || (ī0 pra0 1|5|21) 

iti | vastutastu 
sadaivābhinnaprakāśamayo'nuttarānākhyeyasaṃvitsvabhāvaḥ 
parameśvaraḥ eva svātmocchalattayā tattadviśvabhāvaparisphuraṇena 
cakāstītyarthaḥ | etadeva hetudvārā spaṣṭaṃ nirūpayannāha 
bhāvajātamiti tasyaiva parameśvarasya hi yasmādīśvaratāmayī 
śaktiraiśvaryaṃrūpaṃ svātantryameva 
vācyavācakātmaviśvapadārthamayaṃ bhāvajātaṃ bhavati yaduktaṃ 
maṅgalāyām - 

śaktayo'sya jagatkṛtsnaṃ śaktimāṃstu maheśvaraḥ | 

itinītyā svātantryameva jagadātmanā prathate ityarthaḥ | yaduktam 
- 

bodho hi bdharūpatvādantarnānākṛtīḥ sthitāḥ | 
bahirābhāsayatyeva drāk sāmānyaviśeṣataḥ || (taṃ0 1|257) 

iti | tatheśvarapratyabhijñāyām - 

cidātmaiva hi devo'ntaḥ sthitamicchāvaśādbahiḥ | yogīva 
nirupādānamarthajātaṃ prakāśayet || ī0 pra0 (1|5|7) 

p. 4) 

iti | ataśca svaiśvayanirbharaḥ śiva evaikastathā tathā 
prasphurati ityekaiva saṃvitparamārthasatīti bhāvaḥ || 2 || 

nanvevaṃ parameśvarasya śaktayaṃ viśvamiti śaktitadvatoḥ 
parasparaṃ dharmadharmibhāvena bhedāt kathamekaśivātmabhāva 
ityāśaṃkyāha - 

śaktiśca śaktimadrūpād vyatirekaṃ na vāñchati | 
tādātmyamanayornityaṃ vahnidāhikayoriva || 3 || 

yathāgnestacchakteśca 
dāhakatvapācakatvaprakāśakatvādivilakṣaṇāyā 
anayorayutasiddhatvātsātatyena samavetayoraikātmyameva na kadācid 
dāhikādistacchaktiḥ svāśrayaṃ vahnimanāṭṭatya svarūpasattāṃ 
labhate yadyena vinā na tiṣṭheta tattasmānna vyatiricyate iti 
nyāyādabhinnasārūpyāt tādātmyamevāvajambate | yaduktam - 

mātṛkḷpte hi bhāvasya tatra tatra vapupyalam | ko bhedo vastuto 
vahnerdagdhṛpaktṛtvayoriva || (taṃ0 1|70) 

iti | evaṃ viśvabhāvavaicitryaprathāmayī svātantryaśaktiḥ 
śaktimallakṣaṇāt śivasvabhāvānna vyatirekamicchet tatsatve hi 
tasyāḥ svarūpavipralopāt svarūpavināśe 
kāryasaṃpādanaśakteranupapadyamānatvādviśvamidaṃ na prasphuret 
prasphurati ca viśvaṃ tasmācchivaprakāśābhinnā 
svātantryaśaktireva vedyavedakarūpeṇa visphurati ityamunaivāśayena 
śivasūtreṣu caitanyamātmā iti bhāvaprādhānyena nirdeśaḥ | 
nāpi kriyābhedāt kriyāvān bhidyate tāsvanavarataṃ 
pravartamānāsvapi karturekatvānapāyāt | evaṃ śaktīnāṃ 
bahusve'pi śaktimānekatvaṃ na vyabhicarati tadvahutvasyāpi 
ekasyāmeva svātantryaśaktāvantarbhāvānmukhyā saiva ekā 
śaktiśaktimadavyatirekiṇī sarvatrābhiṣicyate | yaduktam - 

tasmātsaṃvittvamevaitatsvātantryaṃ yattadapyalam | vivicyamānaṃ 
vahnīṣu paryavasyati śaktiṣu || (taṃ0 1|61) 

p. 5) 

iti | tathā - 

bahuśaktitvamapyasya tacchaktyaivā'viyuktatā | (taṃ0 1|68) 

iti | tathā - 

eka evāsya dharmo'sau sarvākṣepeṇa vartate | tena 
svātantryaśaktyaiva yukta ityāñjaso vidhiḥ || (taṃ0 1|67) 

iti | etadeva hṛdayaṃ vimarśaḥ sāra ityādiśabdaiḥ paribhāṣyate 
idameva jaḍaprakāśādvailakṣaṇyādhāyi | yaduktaṃ 
pratyabhijñāyām - 

svabhāvamavabhāsasya vimarśaṃ viduranyathā | 
prakāśo'rthoparakto'pi sphaṭikādijaḍopamaḥ || (ī0 pra0 1|5|10) 

iti | evaṃ māyādhvani durapahnavatvādbhāsamānasyāpi bhedasya 
ābhāsasāratvāt na svatantraśivādvayabhāvakhaṇḍanā iti || 3 || 

nanu parameśvarasya tattadviśvavaicitryaprathane kiṃmuddiśya 
pravṛttiḥ kiṃca nimittaṃ ityāśaṃkyāha - 

sa eva bhairavo devo jagadbharaṇalakṣaṇaḥ | svātmādarśe samagraṃ 
hi yacchaktyā pratibimbitam || 4 || 

sa eva śaktimān svatantro'nuttarabhaṭṭārakaḥ 
svasvātantryeṇodbhāsitasya viśvasya svātmabhittisaṃlagnatayā 
dhāraṇapoṣaṇasvabhāvatvād bhairavo viśvabharitasvarūpaḥ - 

mriyātsarvaṃ racayati sarvado vyāpako'khile | iti bhairavaśabdasya 
santatoccāraṇācchivaḥ || (vi0 bhai0 130) 

iti vijñānabhairavoktanītyā 
pūrṇāhantācamatkāranirbharabhairavasvarūpe viśramaṇādvā 
viśvenāpi dhāryamāṇaḥ poṣyamāṇaśca sadaiva viśvamayatvena 
prasphuraṇāt ityuktaṃ jagadbharaṇalakṣaṇa iti | bhairavasaṃvido 
hi vyatiricyamānasyānyasyācetyamānatvāt sarvatra pāripūrṇyaṃ 
viśvabharitasvabhāvatvāt | tasyaiva svaiśvaryaghanatāmahimnā 
yacchivādibhūmyantena tattvabhūtabhāvādyātmanā vijṛmbhaṇaṃ 
tadeva svātmagopanātmakrīḍārasikasya devatvaṃ 
vistaratasturbhairavadevaśabdayorvivaraṇaṃ śrītantrāloke 
draṣṭavyam | 

p. 6) 

etadeva vaśvasṛṣṭyādau parameśvarasya nimittaṃ na punaḥ 
prāṇināṃ karmādi tatsāpekṣatve hi svātantryaṃ (na punaḥ 
prāṇināṃ karmādi tatsāpekṣatve hi svātantryaṃ) vighaṭeta 
svātantryamevānandaghanatvaṃ tadeva ghanatā'tiśayaprāptā 
samucchalatsvabhāvatvena tattadviśvavaicitryeṇa sphurati dyotate 
sarvotkarṣatayāpyāste | yaduktam - 

tasya svatantrabhāvo hi kiṃ kiṃ yanna vicintayet | taduktaṃ 
triśiraḥśāstre sa buddha iti vetti yaḥ || 

iti | yacchaktayā parākhyayā svārtmaiva svacchatvādinā 
pratibimbasahatvād darpaṇastasmin samagraṃ 
pramātṛprameyātmabhāvajātamupādānādisāmagrīnirapekṣatvena 
pratibimbitaṃ darpaṇo hi bimbasāpekṣaḥ 
svāntastattadracanārvaicitryaṃ dhatte eṣā 
parāśaktistannirapekṣameva 
viśvavaicitryamābhāsayatītyetadajāḍyasya vilasitam | yadāha 
bhaṭṭa utpaladevaḥ - 

nirupādānasaṃbhāramabhittāveva tanvate | jagaccitraṃ namastasmai 
kalāślāghyāya śūline || (22|9) 

iti | śrīśaktisūtreṣvapi - 

svecchayā svabhittau viśvamunmīlayate | (śa0 sū0 2) 

iti | śrīmānācāryo'pi - 

antarvibhāti sakalaṃ jagadātmanīha yadvadvicitraracanā 
makurāntarāle | bodhaḥ punarnijavimarśanasārayogā - dviśvaṃ 
parāmṛśati no makurastathā tu || (taṃ0 sā0 3 ā0) 

p. 7) 

iti | aṇupratyabhijñāyāmapi - 

nātha tvayā vinā bimbaṃ svacche svātmani darśitam | 
prasenādarpaṇeneva prabhāvādbhāvamaṇḍalam || 4 || 

iti | evaṃ vaiśvarūpyollāse bhedāmarśanāt kathaṃ 
bhairavasyādvaitatvaṃ syādityāśaṃkyāha - 

tasyaivaiṣā parā devī svarūpāmarśanotsukā | pūrṇatvaṃ 
sarvabhāveṣu yasyā nālpaṃ nacādhikam || 5 || 

tasyaiva bhairavātmanaḥ saṃvitprakāśasya eṣā 
vaiśvarūpyeṇollasantī svātantryākhyā 
śaktirdyotanādikrīḍāśīlatvād devī svātmani prakāśābhedena 
viśvasyāmarśanāvabhāsābhyāṃ parā pūrṇatayā sphurantī 
tatraiva darpaṇanagarādivadbhedyabhedatayā viśvasya 
parāmarśanādatyantaṃ bhedenāpi māyāpramāturucitena vimarśanāt 
parāparādisaṃjñāmavāptāpi svarūpasyāmarśane svātantryāt 
tattadbhāvajātaṃ svātmamayameveti viśvāhaṃbhāvacamatkṛtau 
utsukā svātmānameva tathātathā parāmraṣṭumautsukyena pravṛttā 
evaṃ tridhāpyāmarśane 
vyatiriktabhāvauṃnmukhyavirahātpāripūrṇyādanapetai 
svasvātantryeṇa svameva svātmanāmṛśati | yaduktaṃ 
pratyabhijñāyām - 

svātantryāmuktamātmānaṃ svātantryādadvayātmanaḥ | 
prabhurīśādisaṅkalpairnirmāya vyavahārayet || ī0 pra0 1|5|16) 

iti sthityā dvaitollāse'pi nādvaiṃtahāniriti | ata eva yasyāḥ 
sarvabhāveṣu sākalyena viśvavartiṣu nīlasukhādiṣu padārtheṣu 
pūrṇatvamakhaṇḍaṃ pāripūrṇyaṃ tacca nālpaṃ nacādhikaṃ 
bhāvānāmudayapralayayoḥ saṃvidoḥ nyūnādhikyābhāvāt 
rudrakṣetrajñādipramātṛṣvapi cito nyūnādhikatayā 
viśeṣābhāvātpūrṇatvaṃ na hīyate | yaduktaṃ brahmadarśane - 

yaiva cidgaganābhogabhūṣaṇe vyomni bhāskare | dharāvivarakoṣasthe 
saiva citkīṭakodare || 

p. 8) 

iti | yathā pradeśākāśānāṃ mahākāśādanatiriktā vṛttirevaṃ 
nīlādiprakāśānāṃ brahmaṇo bṛhattvena bṛṃhakatayā ca 
tadanadhikavṛttitvamiti || 5 || 

ata evābhinnāni kṛtyāni karoti parameśvaro na bhedamayānītyāha - 

eṣa devo'nayā devyā nityaṃ krīḍārasotsukaḥ | vicitrān 
sṛṣṭisaṃhārān vidhatte yugapadvibhuḥ || 6 || 

eṣa pratyabhijñāpadamārūḍho 
dyotanādilakṣaṇaściddevo'nayoktalakṣaṇayā parā vākrūpayā 
viśvollāsanādikrīḍāśīlatvād devyā devasambandhinyā vā 
tatsamavāyadharmiṇyā saha nityamavirataṃ 
tattadbhūmikāviṛmbhaṇe'pi avyucchinnatvāt sadoditāyāṃ 
krīḍāyāṃ pañcakṛtyātmikāyāṃ yo raso'bhilāṣastatrotsuko 
nirapekṣaṃ prasahya tatra pravartamānaḥ | yaduktam - 

sadā sṛṣṭivinodāya sadā sthitisukhāsine | sadā 
tribhuvanāhāratṛptāya svāmine namaḥ || (u0 sto0 22|9) 

iti | tathā - 

pratikṣaṇamaviśrāntastrailokyaṃ kalpanāśataiḥ | kalpayannapi 
ko'pyeko nirvikalpo jayatyajaḥ || (sta0 ci0 112) 

iti | tacca krīḍanaṃ vicitram tathāhi parābhūmau 
prakāśaghanatāmayānāṃ bhāvānāmavicchinnāvabhāsādinā 
sadoditameva pañcakṛtyavidhayitvaṃ paśyantyāṃ 
codbhaviṣyatāmidantāvabhāsānāmahantārasodrekatayā tatrāpi 
svāṅgakalpatvena bhedāsūtraṇāṃ 
vijṛmbhayitastadbhūmikāmāpannasya tādṛśameva kṛtyakāritvam 
madhyāyāṃ punarasphuṭatayābhāsamānānāṃ 
bhāvānāmahantāyāmevedantāpradhānyodrecaṇāt tādṛśabhe 
vāsphuṭakalpaṃ kṛtyam saṃkocakāṣṭāyāṃ tu 
māyīyapramātṛtāyāmapi sarvathā svātmavismṛtau tādṛśameva 
bhedaikasāraṃ kṛtyam tatrāpi pramātṛ prakāśamantareṇa 
nīlādīnāmapratiṣṭhatvāt tatkṛtyaṃ prakāśamayameva parijñāya 
ca yatpunaḥ svarūpalābhapratyāpattyā'ṇubhāvātsvātmano 
vimuktirityāgameṣu parigīyate iti ata evāha vicitrāniti | 

p. 9) 

naca brahmādivanniyataśaktayā saṃkucitatvānniyatameva 
tadanyataratkartu śaknuyādityabhipretyāha - sṛṣṭisaṃhārāniti 
bahuvacanaṃ kṛtyāntarāṇāmupalakṣaṇārtham | tena 
sṛṣṭisthitisaṃhārapidhānānugrahān vidhatte karoti | 
kālādikṛto'tra na kaścinniyama ityāha - yugapaditi akrameṇa 
akālakalite parameśvare tatkramābhāvāt vibhuriti 
deśādyavachedaśūnyatve hetuḥ ata evākrameṇaiva 
vicitrāsvetāsvavasthāsu vicitrāṇāṃ sṛṣṭisaṃhārāṇāṃ 
kartṛtvamavicchinnam | atha ca kalpitapramātaryapi sadaiva 
sargādivinodāsaktaḥ parameśvaraḥ svasvātantryamāhātmyena 
karaṇeśvarīcakraṃ samullāsya paryāndolanakrīḍayā nikhilaṃ 
prameyajātaṃ sṛṣṭikālyādyupārohaṇena prollāsayan paripāṭyā 
krameṇa vā kālasaṅkarṣaṇīdhāmni viśramya 
svātmaviśrāntirūpapūrṇāhaṃparāmarśacamatkāradhāmāsādayeti 
evameva bhūyobhūyaḥ krīḍārasautsukyena 
vicitrasṛṣṭayādikāritvaṃ pariśīlayatīti 
sahṛdayasaṃvedyametattanmukhādavagantavyam | gṛhītapaśubhūmikasya 
śivasya etadevābhijñānaṃ yadāha śrīkṣemarājaḥ - tathāpi 
tadvatpañcakṛtyāni karoti iti | ataḥ sarvamidaṃ svātantryasyaiva 
vilasitamiti || 6 || 

tadāha - 

atidurghaṭakāritvamasyānuttarameva yat | etadeva 
svatantratvamaiśvarya bodharūpatā || 7 || 

evamasya svātantryaśālinaḥ parameśvarasya yadevābhinnasya 
prakāśaikyenāvasthitasya grāhyagrāhakātmano 
viśvasyedantābhāvenāhantādhikyena sadāśive 
īṣasphuṭībhāveneśvare samadhṛtatulāpuṭanyāyena 
śuddhavidyāyāṃ bhedaikaprāṇeṃ'śuddhādhvani atyantabhedena 
svasmādbahiravabhāsanaṃ yadapi bhāsitasyāpi punarabhedena svātmani 
prakāśaghane nimajjanaṃ nāmāmuttaramanāśritādibhyo'pi 
atyutkṛṣṭamatidurghaṭakāritvametadeva svatantratvaṃ svācchandyaṃ 
sarvaśaktikroḍīkāṃri tatraiva śaktyantarāṇyantarbhūya 
tanmūkhaprekṣitvāt tadākṣepyāṇyeva - 

p. 10) 

ata eva svātantryameva mukhyamaiśvarya 
yenānuttarānandādyuduyakrameṇa visargaparyantena yāmalaprasareṇa 
vā mātṛkāmālinībhāvametya tattadvicitravācyavācakātmanā 
vaiśvarūpyeṇa prasphuraṇam | yaduktam - 

tasmādanuttaro devaḥ svācchandyānuttaratvataḥ | 
visargaśaktiyuktatvāt saṃpanno viśvarūpakaḥ || 

iti | asvatantrasya hi anīśvaratayā viśvamudbhāvayitumasāmarthyāt 
viśvavisarge tathā pañcavidhakṛtyakāritve ca svātantryasyaiva 
mukhyanimattatvāt | yaduktaṃ pratyabhijñāyāma - 

citiḥ pratyavamarśātmā parāvāksvarasoditā | 
svātantryametanmukhyaṃ tadaiśvaryaṃ paramātmanaḥ || 

sā sphurattā mahāsattā deśakālāviśeṣiṇī | saiṣā sāratayā 
proktā hṛdayaṃ parameṣṭhinaḥ || ī0 pra0 (1|513) 

iti | aiśvaryamapyasyāparicchinnameva paricchede hi 
brahmaviṣṇavādivanniyataiṃkatarakārye vyāpriya 
māṇatvādanīśvaratvameva eṣaiva bodharūpatā 
jaḍaprakāśārdevailakṣaṇyāpādakatvādvimarśamayaṃ 
bodharūpatvam | yaduktaṃ śrīpratyabhijñāyām - 

ātmāta eva caitanyaṃ citkriyā citikartṛtā | tātparyeṇoditastena 
jaḍātsa hi vilakṣaṇaḥ || ī0 pra0 (1|5|12) 

iti | anyathā svātantryavikalasya bodhasya 
vijñānākalavadabodharūpatvānmalākrāntatvaṃ durvāraṃ syāditi 
|| 7 || 

nanu kiṃ nāma bodharūpatvaṃ yadabodhādvilakṣaṇamityāśaṃkya 
tallakṣaṇaṃ nirūpayannāha - 

paricchinnaprakāsatvaṃ jaḍasya kila lakṣaṇam | jaḍādvilakṣaṇo 
bodho yato na parimīyate || 8 || 

jaḍaprakāśasya svaprakāśasvabhāvatvābhāvāt 
svātmānamapyavabhāsayituṃ sāmarthyaṃ nāsti kā kathā parasya 
prakāśane tatrānelamūkatvādvodhasvabhāvādhirohaṇānupapattiḥ | 

p. 11) 

jaḍo hi kila deśakālākāraviśeṣito bodhena paricchidyate 
pratiyogivyavacchedena aghaṭādvyavacchinno ghaṭa 
ivātadvyapohanapūrvatadadhyavasāyajīvitatāmāśrayatīti 
ityetajjaḍasya lakṣaṇam tacca pramātrāśrayaṃ mamedaṃ bhātīti 
jīvantaṃ pramātāramāśrityaiva ghaṭādayaḥ parisphuranti naiva 
teṣāṃ nijaṃ kimapi prakāśamānatvam kalpitasyāpi 
pramāturjaḍaikaśaraṇatvāt tatpakṣapātitvam tasmāt 
saṃvinmayapramātaryeva parimīyamānasya jaḍaprakāśasya 
pratiṣṭhānam tadvailakṣaṇyena hi bodho 
deśādiviśeṣānākalitatvena paricchedapadavīmanārūḍho naiva 
parimīyate | deśādeḥ paricchedakasyāpi prakāśasvabhāvād 
vyatiriktāvyatiriktavikalpopahatatvāt | nāpi bodhavyatiriktasya 
pramātrantarasyāsatvāt tena kriyamāṇasya 
atadvyapohanasyābhāvenāhamātmikābodhaviśrāntirvikalpāspadamiyād 
iti prakāśaviśrāntirasākeṅtirkītyādi atra jaḍādvelakṣaṇyaṃ 
bodhyam | yaduktam - 

prakāśasyātmaviśrāntirahambhāvo hi kīrtitaḥ | uktā saiva ca 
viśrāntiḥ sarvāpekṣānirodhataḥ || 

svātantryamatha kartṛtvaṃ mukhyamīśvaratāpi ca (aja0 pra0 si0 23) 

iti | etadeva bodhasya svaprakāśatvaṃ yat svayaṃ bhāsamānaḥ 
paramapi bhāsayan svasvātantryātmyamapācamatkaroti paramapi 
svāhantāsaṃrambhātprakāśayatīti || 8 || 

svātantryāvabhāsitāḥ sṛṣṭayādayo'pi na bhinnaviṣayā ityāha 
- 

evamasya svatantrasya nijaśaktyupabhedinaḥ | svātmagāḥ 
sṛṣṭisaṃhārāḥ svarūpatvena saṃsthitāḥ || 9 || 

evamayaṃ parameśvaraḥ svatantro nijayā svābhinnayā 
svasamavetatvāt śaktyā svātatryeṇa viśvasisṛkṣātmakena 
bhedamupagacchati anāśritaśivādārabhya 
sakalāntapramātṛvargaparyantaṃ pāñcadaśyādibhedena 
tadanurūpaprameyabhedenāpi jaḍājaḍātmāvabhedamāpadyate | 

p. 12) 

arthācchaktireva tattadbhāvamaṇḍalarūpeṇollasantī 
vividhavācyavācakatāṃ bhajate śaktimānpunaḥ sarvasya 
svātantryasāratvādeka evācyutaprācyasvarūpaḥ kevalaṃ 
parasparalolībhāvaṃ prāptānāṃ śaktīnāṃ 
bhāsanoparañjanādibhirāpātato bhedopabheditvamiva yāti na 
punastasya saḍrakocāvabhāsamamātraṃ vinānyatpriṇāmavivartādi 
saṃbhavitumarhati | pariṇāmavivartādestu 
rūpāntaratadanyathābhāvatve bodhasvabhāvaṃ prati 
tadviruddhāprakāśatvaṃ prasajyate | tatprasaktāvapi 
viśvasyāndhatamasaprakhyatvāt vyavahāravipralopaḥ syāditi | 
tatreyati bhedaparigrahe parameśvarasya 
pūrṇāhantāścamatkārasāraviśvamayatvādviśvagatāḥ 
sṛṣṭisaṃhārāḥ svātmagāḥ svābhinnāḥ 
pañcavidhakṛtyānāmupalakṣaṇametat śivapade prakāśaikyena 
sthitatvātsvarūpatve na svāṅgakalpatāya | saṃsthitāḥ | 
arvākpade'pi śrīkaṇṭhāghorabhaṭṭārakādibhiḥ kriyamāṇasya 
sargādeḥ saṃvitprakāśādabahiravasthitatvāt tanmayatvameveti 
tatrāpi na manāgapi vibhedakalanāyā viṣayībhavantīti yaduktam - 

* * prakāśa evāsti svātmanaḥ svāpasatmabhiḥ | 

iti || 9 || 

nanvitthaṃ sarvataḥ svasvātantryasya vilasitatve kathamaṇūnāṃ 
bandho bhavatītyāśaṃkya yugmemāha - 

teṣu vaicitryamatyantamūrdhvādhastiryageva yat | bhuvanāni 
tadaṃśāśca sukhaduḥkhamatiśca yā || 10 || 

yadetasyāparijñānaṃ tatsvātantryaṃ hi varṇitam | sa eva khalu 
saṃsāro mūḍhānāṃ yo vibhīṣakaḥ || 11 || 

teṣu sargādiṣu pañcavidhakṛtyeṣu 
aparādiśaktyullāsāddarpaṇanagarādivadbhedābhedaparāmarśato 
bhedaikamayatvaparāmarśanāccātyantaṃ yadvaicitryaṃ yadvā 
kramākramābhyāṃ viśvatra yatsargādivaicitryaṃ kramohi 
niyatyadhīnaḥ parameśvarasya 
svatantratvānniyatiśaktimukhaprekṣitvābhāvānna kāpi paripāṭī 
apekṣyate | ata eva sa svecchayaiva krameṇākrameṇa vā 
karotītyarthaḥ | yaccaiṃva 
ūrdhvādhastiryakatattatsanniveśaviśiṣṭāni sargādigocarāṇi 
bhuvanāni 
kālāgnyāderanāśritāntamaṣṭādaśādhikaśatasaṃkhyāni 
saṃkṣepeṇāgameṣvāmnātāni | 

p. 13) 

yaduktaṃ śrīpūrvaśāstre - 

evaṃ tu sarvatattveṣu śatamaṣṭādaśottaram | bhuvanānāṃ 
parijñeyaṃ saṃk.epānnatu vistarāt || 

iti vistareṇa tu bhuvanānāmānantyameva yacca tadaṃśā 
bhuvanānāmaneke purādivibhāgāḥ tathā 
tattadbhuvanādyadhiṣṭāt-ṝṇāmupāsanābhiḥ 
tattatsālokyādyavāpterniyatakālaṃ 
tadīyaiśvaryopabhogaparisamāptau tadūrdhvabhuvaneśapadaprāptiḥ 
tatrāpi tadaiśvaryādisukhānubhavaḥ 
āgamoktaśumācaraṇādyasevanāccādhīdho nirayapāte 
anaiśvaryādyākrānterdurgatikleśānubhavaḥ itthaṃ ca yā teṣu 
sukhaduḥkhamatiryena śubhāśubhakarmasevanāt karmānurūpaṃ tatra 
tatra saṃsaraṇam | saṃvitprakāśa eva 
svasvātantryamāhātmyātiśayānmūrtivaicitryeṇa 
deśādhvānamunmīlayati sa eva bhuvanatattvakalātmavācyaṃ tatra 
mukhyaṃ vācyaṃ bhuvanāni tattvakalayostadantarbhāvāt | 
bhuvanādīnyapi parameśvarānna vyatiriktāni 
tathātve'prakāśyamānatvāttatsattvānupattiḥ tasmātsaṃvideva 
tathā tathā bahiḥ prasphuratīti | yaduktam - 

mūrtivaicitryato deśakramamābhāsayatyasau | 

iti | tathā - 

āśyānaṃ cidrarasasyaughaṃ sākāratvamupāgatam | jagadrūpatayā 
vande pratyakṣaṃ bhairavaṃ vapuḥ || 

iti | tathā - 

adhvā samasta evāyaṃ cinmātre saṃpratiṣṭhitaḥ | yattatra nahi 
viśrāntaṃ tannabhaḥkusumāyate || (taṃ 8|3) 

iti ca || 11 || 

p. 14) 

yadetasya 
bhuvanatadaṃśādestattvādyadhvāntarāṇāmupalakṣaṇībhūtasyāpar 
ijñānaṃ svātantryameva bhuvanādyātmanā prasarati 
etadityetasyāpratyabhijñānaṃ 
tadviparītaduḥkhādyākulitabandhaparidṛṣṭiḥ taddhi 
svātantryamatidurghaṭakāritvasaṃpādanasāmarthyaṃ varṇitam 
yaduktam - 

anāvṛte svarūpe'pi yadātmācchādanaṃ vibhoḥ | saiva māyā yato 
bheda etāvānviśvavṛttikaḥ || (taṃ 4|11) 

tathā ca paramārthasāre - 

paramaṃ yatsvātantryaṃ durghaṭasaṃpādanaṃ maheśasya | devī 
māyāśaktiḥ svātmāvaraṇaṃ śivasyaitat || 

iti | sa eva khalu jaḍānāṃ māyāmohitānāṃ saṃsāro yo 
vibhīṣako rajjubhujaṅgabhramavanmaraṇāditrāsajananaḥ | ayaṃ 
bhāvaḥ yathā bhrāntyā vikalpakalpite'rthaśūnye vastuni 
raudrādyākṛtisaṃbhāvanayā bhīṣaṇīyamākāraviśeṣaṃ 
samullikhyānarthakāriṇīṃ tadarthakriyāṃ dhatte evameva 
svasvātantryāparijñānādaṇutāmāpannaḥ svātmā 
varṇāśramajātyādyabhimānena nibadhyate prabuddhā hi svātmamayaṃ 
viśvamantarbahīrūpatayā pratyabhijānānāḥ saṃsārānmucyante 
naca tadaparijñāne kimapi svātmagopanāsatattvakrīḍāṃ vinā 
kāraṇamutpaśyāmaḥ tathā tathā nigūhitaparamārthatvena 
yanmaheśvarasya prasaradrūpatvaṃ tadapi tasya svātantryameva | iyaṃ 
hi vimarśalatā viśvasisṛkṣayā prasarantī krameṇa 
vācyavācakātmaṣaḍadhvātmanā pallavitājñānāṃ 
bandhayitrītyarthaḥ | yadāha spande - 

seyaṃ kriyātmikā śaktiḥ śivasya paśuvartinī | bandhayitrī 
svamārgasthā jñātā siddhyupapādikā || 

iti || 11 || 

nanu svātantryapratyabhijñānaṃ saṃsārācca viratiḥ 
kathamaṇorbhavatītyāśaṃkya yugalakenāha - 

p. 15) 

tatprasādarasādeva gurvāgamata eva vā | śāstrādvā parameśasya 
yasmātkasmādupāgatam || 12 || 

yattattvasya parijñānaṃ sa mokṣaḥ parameśataḥ | tatpūrṇatvaṃ 
prabuddhānāṃ jīvanmuktiśca sā smṛtā || 13 || 

viśvamayatadutīrṇasvasvarūpaṃ pratyabhijñātuṃ kimapi tapaḥ 
pūjākramādi na pragalbhate tasya 
māyīyatvenāndhatamasaprakhyatvādamāyīyaṃ saṃvitprakāśaṃ 
prakāśayitumasāmarthyāt | svātmopalabdhau 
tapovairāgyādyapekṣāyāmapi tatsaṃpatteḥ 
kāraṇāntaramanveṣṭavyaṃ tatrāpi 
kāraṇāntaramityanavasthāpātastathā ca svātantryaṃ hīnaṃ bhavet 
tasmātparameśvaraḥ svecchayeva viśvakrīḍāmudvibhāsayiṣuḥ 
svaśaktyā tirodhānākhyayā svātmānaṃ tirodhāya punarapi 
tayaivānugrahākhyayā pratyabhijñāya svamudveṣṭayate 
taccodvaṣṭanaṃ paraśaktipātavaśātpratibhāprasādanapūrvaṃ 
svātmaśivatāpratyabhijñānaṃ śaktipātavaicitryādbahudhā 
bhavāti ityāśayena śaktipātakāryāṇi nirūpayannāha taditi 
kaścittīvraraśaktipāta pavitritahṛdayaḥ 
siddhayoginīdarśanacarubhojanādinānupāyapathena svātmānaṃ 
pratyabhijānātīti | yaduktaṃ tantrāloke - 

siddhānāṃ yoginīnāṃ ca darśanaṃ carubhojanam | kathanaṃ 
saṃkramaḥ śāstre sādhanaṃ gurusevanam || 

ityādyo nirupāyasya saṃkṣopo'yaṃ varānane | iti 

ata evoktam - tatprasādarasādeva iti evaśabdaḥ kāraṇāntaraṃ 
nirayati | prasādo hi saṃvinnairmalyena sakṛdeva 
bhairavīyaparapratibhonmajjanaṃ tatra paunaḥ 
punyenopāpapariśīlanābhāvāt | yadukta tantrāloke - 

upāyairna śivo bhāti bhānti te tatprasādataḥ | sa evāhaṃ 
svaprakāśo bhāse viśvasvarūpakaḥ || 

p. 16) 

ityākarṇya gurorvākyaṃ sakṛtkecana niścitāḥ | vinā 
bhūyo'nusandhānaṃ bhānti saṃvinmayāḥ sthitāḥ || 

iti | tathā kaścittīvrasaktipātānugṛhīto gurumukhādāgamārthaṃ 
vijñāya akiñciccintakatvādiśāṃbhavopāyakrameṇa 
paratattvābhijñatāmetītyata uktam - gurvāgamata eva vā iti | 
guruṇopadiṣṭaṃ pratibodhakramamāśritya viśvavaicitryasya 
citpratibimbatvena parāmarśanādityarthaḥ | yaduktam - 

itthaṃ viśvamidaṃ nāthe bhairavīye cidambare | pratibimbamalaṃ 
svacche na svalvanyaprasādataḥ || (taṃ0 3|65) 

iti | tathā kaścitsatarkādisahakṛtena pārameśaśāstreṇa 
śāktaparipāṭyā pratyabhijñāṃ prāpnoti | taduktam - 

yasya svato'yaṃ sattarkaḥ sarvatraivādhikāravān | abhiṣiktaḥ 
svasaṃvittidevībhirdīkṣitaśca saḥ || (taṃ0 4|42) 

iti | ataḥ śāstrādvā parameśasya ityuktam | adharadarśanāni 
parihṛtya pārameśaṃ trikādiśāsanamavalambya ityarthaḥ | yaduktam 
- 

sa samastaṃ hi śāstrārthaṃ sattakādeva manyate | śuddhavidyā hi 
tannāsti satyaṃ yadyanna bhāsayet || (4|44) 

iti | tathā mandaśaktipātavān kaściduccārakaraṇadhyānādinā 
āṇavopāyakrameṇa 
ūrdhvordhvasopānādhirūḍhe'nuttarapadaviśrantiṃ yātītyata āha 
- yasmātkasmādupāgatamiti yaṃ kaṃcit sthūlaṃ 
dhyānakaraṇādyupāyamāśritya upāgataṃ prāptamityarthaḥ 
yenaiṣāṃ nirvyutthānaṃ sadoditasamāveśo jāyate | itthaṃ 
yadanuttarasaṃvittattvasya parijñānaṃ 
viśvaparipūrṇāhaṃbhāvacamatkārollāsena 
svasvātantryābhivyaktiḥ sa eva mokṣaḥ natu 
devādyavacchinna-sthānāntaraprāptiḥ | yadāhācāryaḥ - 

p. 17) 

mokṣasya naiva kiñciddhāmāsti nacāpi gamanamanyatra | 
ajñānagranthibhidā svaśaktyabhivyaktatā mokṣaḥ || (pa0sā0 60) 

iti | saiṃva parameśatā tattadviśvātmanā prasphuradrūpatvaṃ 
pārameśvaryamabhinnaprakāśamayaṃ natu bhedamayāṇimāsiddhayaḥ | 
tadeva pūrṇāhantāvimarśamayabodhaśālināṃ prabuddhānāṃ 
pūrṇatvaṃ viśvabharitasvabhāvattvaṃ saiva dehaprāṇādi 
dhārayatāṃ jīvatāṃ pramātṛṇāṃ muktiḥ jīvacchivāvasthā 
śāstreṣu smṛteti || 12-13 || 

evaṃ bandhamokṣakalpanāpi kalpitaivetyāha - 

etau bandhavimokṣau ca parameśasvarūpataḥ | na bhidyete na bhedo hi 
tattvataḥ parameśvare || 14 || 

etauṃ samanantaroktalakṣaṇau bandhamokṣau ca 
parameśvarecchāmātrakalpitatvāt parameśasvarūpataḥ 
saṃvitsvātantryānna bhidyete bhinnatayā sthitiṃ na yātaḥ 
tadvyatiriktatve'saṃvedyamānatvānna prasphuretāmityarthaḥ | yataḥ 
sveccharyaiva svātmapracchādanakrīḍārasikatvānmaheśvaro 
viśvanāṭyakrīḍāpradarśanābhiprāyeṇa antarātmaraṅge 
tattadbhūmikāgrahaṇaṃ vidadhat vibhāvānubhāvādibhirvyañjitaiḥ 
sāttvikabhāvādisahacaritaistattatsthāyibhāvaiḥ 
samunmīṣitāmalaukiktarasacamatkṛtimāsvādayatītyetadvāstavārthā 
bhijñāna-virahādaparābhiḥ śaktibhiḥ pramuṣitaparamārthānāṃ 
bandhābhimāno jāyate anugrahabhājanānāṃ tu 
ciddhanasaṃvitsvātantryamevāntarbahirviśvollāsena 
prasphuratītyabhijñātavatāṃ aghorātmanā śakticakreṇa 
svābhinnaṃ prakāśaghanātmaviśvaṃ pradarśayatā 
labdhaparamārthanidhīrnāṃ mokṣābhimāna ityubhayamidaṃ bhagavān 
svācchandyeṃna vijṛmbhayati | atastacchaktimayatvāt tasmānna 
bhinnametaditi tātparyaṃ hetuvacanena draḍhayati na bheda iti hi 
yasmāttattvataḥ paramārthata ātmani parameśvare bhedo nāsti 
sarvasya prakāśasāraparamārthatvenāṇumātramapi bhedakalanāyā 
asaṃbhavāt tasmātpūrṇāhaṃbhāvacamatkārodrekāt pūrṇe 
pūrṇaṃ vijṛmbhamāṇaṃ nāpūrṇaṃ kimapi bandhamokṣādikalaneti 
sarvamanavadyam | 

p. 18) 

yaduktam - 

saṃsāro'sti na tattvatastanubhṛtāṃ bandhasya vārtaiva kā bandho 
yasya na jātu tasya vitathā muktasya muktikriyā | mithyāmohakṛdeśa 
rajjubhujagacchāyāpiśocabhramo mā kiñcittyaja mā gṛhāṇa vihara 
svastho yathāvatsthitaḥ || 

iti || 14 || 

evaṃ paramārthābhijñānāṃ jīvadavasthāyāmeva 
samāśvāsadāyinīṃ pārameśvaryarasanirbharāṃ 
tatsamāpattimāsādayitumabhyupāyamāha - 

itthamicchākalājñānaśaktiśūlāmbujāśritaḥ | bhairavaḥ 
sarvabhāvānāṃ svabhāvaḥ pariśīlyate || 15 || 

itthamuktaparāmarśanena sarvabhāvānāmantarbahirvartināṃ 
nīlasukhādīnāṃ svabhāvaḥ prakāśatmā bhairavo 
viśvabharitasvabhāvattvāt pūrṇaḥ svatantraśivaprakāśaḥ 
parīśīlyate parāmṛśyate | svātmanyeva cidākāśe 
viśvamasmyavabhāsayan sraṣṭā viśvātmaka iti prathayā 
bhairavātmatetyuttyā bhairavīyā saṃvideva hi 
bahirantastattadbhāvādyātmanā cakāsti 
yatkiñcitkaraṇeśvarībhirābhāsyatetsarvaṃ svātmaiva svātmānaṃ 
svātantryātparāmṛśati na vyatiriktamiti yāvat yadukta 
mīśvarapratyabhijñāyām - 

svātmaiva svātmanā pūrṇā bhāvā bhāntyamitasya tu | 

iti | kīdṛśa ityāha - iccheti kaleti kriyāśaktiḥ 
icchājñānakriyāśaktaya evārātrayasāmyācchūlaṃ tatra 
yanmatsyodarīmatādiprasiddhyā saṅkocavikāsadharmaśāli 
padmamaunmanasaṃ padaṃ tadāśritastaduttīrṇatayā bhāsamāna 
ityarthaḥ - 

p. 19) 

atha ca viśvasya saṃvitprakāśādanatiriktatayā sthitiṃ 
pradarśayituṃ śrīparābījasyāpyudayaḥ proktaḥ tatra svabhāva 
ityanenāmṛtabījasyoddhāraḥ kṛtaḥ 
tasyānacakatvāduccāraṇamaśakyamityataḥ asmiṃścaturdaśe dhāmni 
sphuṭībhūtatriśaktike | ityuktyā icchākaletyanena 
śūlabījoddhāraḥ | bharaṇavamanasvabhāvattvādabhairava ityanena 
bahirantārūpatayā dvidhā visargasyoddhāraḥ | 
sarvabhāvānāmityanenāsya vyāptiruktā | yaduktaṃ mālinīvijaye - 

sārṇenāṇḍatrayaṃ vyāptaṃ triśūlena caturthakam | sarvātītaṃ 
visargeṇa parāyā vyāptiriṣyate || 

iti | 

tathāhi sadidaṃ brahmamūlaṃ māyāṇḍasaṃjñitam | 
icchājñānakriyārohaṃ vinā naiva saducyate || 

tacchaktitritayārohād bhairavīye cidambare | visṛjyate hi 
tattasmādbahirvātha visṛjyate || 

iti ca | evaṃ vyāptike parābīje 
nirantarāmyāsakaraṇātpārameśvarasamāveśādaiśvaryasiddhiriti 
viśvasiddhikāraṇaitadbījaparāmarśanātkaraṇasya kaṭākṣeṇa 
pradarśanaṃ sūcitavānācāryaḥ || 15 || 

idānīmācāryaḥ svanāmakīrtanācchāstrārthaṃ 
pratyabhimukhīkaraṇādupasaṃharati - 

sukumāramatīn śiṣyānprabodhayitumañjasā | ime'bhinavaguptena 
ślokāḥ pañcadaśoditāḥ ||| 16 || 

iti bodhapañcadaśikā samāptā || 

sukumāramatayo mandaśaktipāatavantaḥ ajasa sukhena spaṣṭamanyat || 
16 || 

yāṃ bodhapañcadaśikāṃ matimāndyabhājāṃ sambodhanāya 
nivabandha guruḥ suramyām | māheśvaro'bhinavagupta itīḍyanāmā 
tatra vyadhādvyavaraṇaṃ harabhaṭṭaśāstrī || 

bhūnandanandavede'bde (4990) laukike phālgunevadī | ekādaśyāṃ 
tithau śāstrī haro vivaraṇaṃ vyadhāt || 

iti śrīmahāmāheśvarācāryavaryaṃ - 
śrīmadabhinavaguptaviracitāyāṃ bodhapañcadaśikāyāṃ paṃ0 
harabhaṭṭaśāstrikṛtaṃ vivaraṇaṃ samāptam || 

śrīśivārpaṇamastu || 

###########   END OF FILE  #######