####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00105
Uniform title: brahmavidyopaniṣat
Main title: yoga upaniṣads with the commentary of śrī upaniṣad brahmayogin
Secondary title: brahmavidya upaniṣat
Commentator : brahmayogin
Alternate name : śrī upaniṣad brahmayogin
Editor : śāstrī mahādeva

Description: 



Notes: 
Transcribed by the staff of Muktabodha under the supervision of Mark S. G. Dyczkowski.

Revision 0: June 14, 2007


Publisher : Adyar library and research centre
Publication year : 1920
Publication city : Madras
Publication country : India
####################################################





brahmavidyopaniṣat

saha nāvavatu- iti śāntiḥ

brahmavidyārahasyārthapraṇavabrahmasūcanam

atha brahmavidyopaniṣaducyate-

prasādādbrahmaṇastasya viṣṇoradbhutakarmaṇaḥ |
rahasyaṃ brahmavidyāyāṃ dhruvāgniḥ saṃpracakṣate || 1 ||

omityekākṣaraṃ brahma yaduktaṃ brahmavādibhiḥ |
śarīraṃ tasya vakṣyāmi sthānaṃ kālatrayaṃ tathā || 2 ||

tatra devāstrayaḥ proktā loka vedāstrayo'gnayaḥ |
tisro mātrārdhamātrā ca tryakṣarasya śivasya tu || 3 ||

vivaraṇam

svāvidyātatkāryajātaṃ yadvidyāpahnavaṃ gatam |
taddhaṃsavidyāniṣpannaṃ rāmacandrapadaṃ bhaje ||

	iha khalu kṛṣṇayajurvedapravibhakteyaṃ brahmavidyopaniṣat 
praṇavahaṃsavidyātadvedyabrahmānubhūtiṃ prakaṭayantī 
brahmamātraparyavasannā vijṛmbhate | asyāḥ svalpagranthato

p. 250) vivaraṇamārabhyate | upedghātādikamasyāḥ kaṭhavallyādisamam | 
brahmaviṣṇuprasādalabhyeyamiti vidyā stūyate | śrutireva svājñajanān 
pratyevamāha- athetyādinā | atha svājñānāṃ 
brahmavidyocitasādhanasaṃpattyanantaram iyaṃ brahmaviyopaniṣaducyate | 
tat katham ? yaḥ sarvalokasraṣṭā pālayitā ca bhavati tasya brahmaṇaḥ 
aghaṭitaghaṭanāghaṭanapaṭutaraśakteradbhutakarmaṇo viṣṇośca prasādāt 
brahmavidyāyāṃ yat rahasyaṃ, anadhikāriṇe gopanīyatvāt, 
svājñānatatkāryasvātiriktaprapañcatūlācalabhasmīkaraṇapaṭutvāt 
dhruvāgniḥ pratyak tadabhinnaparamātmeti samyak pracakṣate || 1 || kiṃ 
tatsvarūpamityākāṅkṣāyām-

sarve vedā yat padamāmananti
tapāṃsi sarvāṇi ca yadvadanti |
yadicchanto brahmacaryaṃ caranti
tatte padaṃ saṃgraheṇa bravīmyomityetat ||

ityādiśrutyanurodhena saprakāraṃ brahmālambanabhūtapraṇavasvarūpaṃ 
viśadīkaroti- omiti || 2-3 ||

praṇavamātrācatuṣṭayaprapañcanam

ṛgvedo gārhapatyaṃ ca pṛthivī brahma eva ca |
akārasya śarīraṃ tu vyākhyātaṃ brahmavādibhiḥ || 4 ||

yajurvedo'ntarikṣaṃ ca dakṣiṇāgnistathaiva ca |
viṣṇuśca bhagavān deva ukāraḥ parikīrtitaḥ || 5 ||

sāmavedastathā dyauścāhavanīyastathaiva ca |
īśvaraḥ paramo devo makāraḥ parikīrtitaḥ || 6 ||

sūryamaṇḍalamadhye'tha hyakāraḥ śaṅkhamadhyagaḥ |
ukāraścandrasaṃkāśastasya madhye vyavasthitaḥ || 7 ||

p. 251) makārastvagnisaṃkāśo vidhūmo vidyutopamaḥ |
tisro mātrāstathā jñeyāḥ somasūryāgnirūpiṇaḥ || 8 ||

śikhā tu dīpasaṃkāśā tasminnupari vartate |
ardhamātrā tathā jñeyā praṇavasyopari sthitā || 9 ||

	sūtrārthaṃ vyākaroti- ṛgveda iti | brahma eva ca, brahmā ityarthaḥ || 
4-6 || akārādeḥ sthānaṃ varṇaṃ cāha- sūryeti || 7-8 || evaṃ 
mātrātrayaṃ prapañcayitvā atha ardhamātrāṃ prapañcayati- śikhā tviti 
| yathā dīpe dīpaśikhā vartate tathā praṇavopari ardhamātrā vartata 
ityarthaḥ || 9 ||

suṣumnāyogena nāḍīśūryayoḥ bhedanam

padmasūtranibhā sūkṣmā śikhā sā dṛśyate parā |
sā nāḍī sūryasaṃkāśā sūryaṃ bhittvā tathā parā || 10 ||

dvisaptatisahasrāṇi nāḍīṃ bhittvā ca mūrdhani |
varadā sarvabhūtānāṃ sarvaṃ vyāpyeva tiṣṭhati || 11 ||

	suṣumnāsvarūpakathanaṃ praṇavānusaṃdhānavidhānaṃ 
tatsarvāvapādādhikaraṇabrahmajñānaphalaṃ cāha- padmeti | 
suṣumnāyāḥ sūryanāḍitvena taddvārotkrāntasya mūrdhni brahmarandhre 
lakṣyānusaṃdhānaṃ kurvataḥ dvisaptatisahasranāḍībhedanaṃ 
sūryamaṇḍalabhedanaṃ ca upapadyata ityarthaḥ || 10-11 ||

praṇavanādalayena mokṣaprāptiḥ

kāṃsyaghaṇṭāninādastu yathā līyati śāntaye |
oṃkārastu tathā yojyaḥ śāntaye sarvamicchatā || 12 ||

p. 252) yasmin sa līyate śabdastatparaṃ brahma gīyate |
dhiyaṃ hi līyate brahma so'mṛtatvāya kalpate || 13 ||

	evaṃ yogābhyāsamakurvato'pi praṇavālambanena tatphalaṃ 
prāptuṃ śakyamityāha- kāṃsyeti | 
hemamūlikāṣoḍaśavārasaṃskṛtakāṃsyaghaṇṭānādaśāntivat 
ṣoḍaśamātrākāloccāritapraṇavanādalayakṛt yogī ya evaṃ 
praṇavajapaṃ karoti || 12 || yasya- dhiyamiti vibhaktivyatyayaḥ, prathamārthe 
dvitīyā- dhīḥ antaḥkaraṇaṃ praṇavanādena sākaṃ vilīyate so'yaṃ yogī 
tallayādhikaraṇabrahmabhūyāya amṛtatvāya 
svātiriktāstitvabhramamokṣāya kalpate || 13 ||

jīvasvarūpanirūpaṇam

vāyustejastathākāśastrividho jīvasaṃjñakaḥ |
sa jīvaḥ prāṇa ityukto vālāgraśatakalpitaḥ || 14 ||

nābhisthāne sthitaṃ viśvaṃ śuddhatattvaṃ sunirmalam |
ādityamiva dīpyantaṃ raśmibhiścākhilaṃ śivam || 15 ||

	haṃsavidyāprakaṭanāya tadvidyānuṣṭhātāraṃ jīvaṃ nirūpayati- 
vāyuriti || 14 || tasya sthānaṃ nirdiśati- nābhīti | viśvaṃ 
vaiśvānarāṃśaṃ vastutaḥ svagataheyāṃśāpāye śuddhatattvam | 
śivaṃ pratyañcamātmānam antaḥkaraṇayogato jīvaṃ paśyanti || 15 ||

bandhamokṣakāraṇanirūpaṇam

sakāraṃ ca hakāraṃ ca jīvo japati sarvadā |
nābhideśādviniṣkrāntaṃ viṣayavyāptivarjitam || 16 ||

p. 253) tenedaṃ niṣkalaṃ vidyāt kṣīrāt sarpiryathā tathā |
kāraṇenātmanā yuktaḥ prāṇāyāmaiśca pañcabhiḥ || 17 ||

satuṣkalāsamāyukto bhrāmyate ca hṛdi sthitaḥ |
golakastu yadā dehe kṣīradaṇḍena vāhataḥ || 18 ||

etasmin vasate śīghramaviśrāmaṃ mahākhagaḥ |
yāvanniśvasito jīvastāvanniṣkalatāṃ gataḥ || 19 ||

nabhaḥsthaṃ niṣkalaṃ dhyātvā mucyate bhavabandhanāt |
anāhatadhvaniyutaṃ haṃsaṃ yo veda hṛdgatam || 20 ||

svaprakāśacidānandaṃ sa haṃsa iti gīyate |

	so'yaṃ jīvaḥ ucchvāsaniḥśvāsacchalena sakāraṃ ca | 
niṣkramaṇavelāyāṃ viṣayavyāptivarjitam || 16 || yena hetunā viṣayaviralaḥ 
syāt tenedaṃ niṣkalam | yathā kṣīrāt kāraṇāt sarpiḥ kāryato bhinnamapi 
kāraṇāvasthāyāṃ kṣīrameva bhavati tathā ayaṃ sarpiḥsthānīyo jīvaḥ 
kṣīrasthānīyakāraṇenātmanā yukto bhavati | 
svakāraṇabhāvāpattisādhanaṃ kimityatra- prāṇāyāmaiśca pañcabhiḥ 
prāṇāyāmapratyāhāradhāraṇādhyānasamādhibhiḥ || 17 || 
viśvataijasaprājñaturyabhedena catuṣkalāsamāyukto bhavati | evaṃ hṛdi 
sthitaḥ san bandhamokṣatatkāryakalanāsu bhrāmyate cetyarthaḥ | yāvat 
brahmanāḍīṃ na praviśati tāvat aviśrāntaṃ saṃsaratītyāha- golakastviti 
| yadā yasmin kāle sthūladehe 
vidyamānamūlādhāratrikoṇāgravilasatsuṣumnāgolakastu kṣīradaṇḍena 
kṣīravaddhavaladaṇḍavat bhogaviśiṣṭakuṇḍalinīśaktitattvena prāṇena vā 
yāvat ahata anākrānto bhavati || 18 || tadā etasmin dehe mahākhago haṃsaḥ 
prāṇādhāro jīvaḥ aviśrāmam aviśrāntaṃ

p. 254) yathā bhavati tathā yat svajñānanāśyaṃ śīghraṃ 
svājñānamavalambya vasate vasati, abhūtasaṃplavaṃ svajñānāvadhi 
saṃsaratītyarthaḥ | kadā tatsaṃsṛtinivṛttirityata āha- yāvaditi | ayaṃ jīvaḥ 
prāṇādivṛttimavaṣṭabhya yāvanniśvasito na śvasitaḥ 
prāṇanādivyāpāraviralo bhavati tāvat 
sarvakaraṇavyāpṛtyuparamaṇalakṣaṇanirvikalpakāvasthāyāṃ 
niṣkalatāṃ gato bhavati || 19 || hṛdayanabhasi tiṣṭhati upalabhyata iti 
nabhaḥsthaṃ prāṇādināmāntakalābhāvāt niṣkalamātmānaṃ 
dhyātvā bhavabandhanāt mucyate nivṛttasaṃsāraḥ kṛtakṛtyo 
bhavatītyarthaḥ | haṃsajñānī haṃsa evetyāha- anāhateti | 
anāhatadhvaniyutaṃ hṛdayavibhātanādopādhikamityarthaḥ || 20 ||

haṃsavidyayaiva parameśvaraprāptiḥ

recakaṃ pūrakaṃ muktvā kumbhakena sthitaḥ sudhīḥ || 21 ||

nābhikande samaṃ kṛtvā prāṇāpānau samāhitaḥ |
mastakasthāmṛtāsvādaṃ pītvā dhyānena sādaram || 22 ||

dīpākāraṃ mahādevaṃ jvalantaṃ nābhimadhyame |
abhiṣicyāmṛtenaiva haṃsahaṃseti yo japet || 23 ||

jarāmaraṇarogādi na tasya bhuvi vidyate |
evaṃ dine dine kuryādaṇimādivibhūtaye || 24 ||

īśvaratvamavāpnoti sadābhyāsarataḥ pumān |
bahavo naikamārgeṇa prāptā nityatvamāgatāḥ || 25 ||

haṃsavidyāmṛte loke nāsti nityatvasādhanam |

	kevalakumbhake parameśvaraṃ dhyāyataḥ tadāptimāha- recakamiti || 
21-24 || haṃsavidyāmṛte muktisādhanaṃ na kiṃcidastīti vidyāṃ stauti- 
bahava iti || 25 ||

p. 255) 			haṃsavidyāgurubhaktividhiḥ

yo dadāti mahāvidyāṃ haṃsākhyāṃ pāvanīṃ parām || 26 ||

tasya dāsyaṃ sadā kuryāt prajñayā parayā saha |
śubhaṃ vāśubhamanyadvā yaduktaṃ guruṇā bhuvi || 27 ||

tatkuryādavicāreṇa śiṣyaḥ saṃtoṣasaṃyutaḥ |
haṃsavidyāmimāṃ labdhvā guruśuśrūṣayā naraḥ || 28 ||

ātmānamātmanā sākṣādbrahma buddhvā suniścalam |
dehajātyādisaṃbandhān varṇāśramasamanvitān || 29 ||

vedaśāstrāṇi cānyāni pādapāṃsumiva tyajet |
gurubhaktiṃ sadā kuryācchreyase bhūyase naraḥ || 30 ||

gurureva hariḥ sākṣānnānya ityabraṃvīcchrutiḥ || 31 ||

	haṃsavidyopadeṣṭāram īśvaraṃ matvā tadājñānuvartī yogī 
tatprasādataḥ pratyagabhinnaṃ brahmāsmīti niścitya svātiriktamakhilaṃ 
tyaktvā yāvadupādhi gurudaivataikyaṃ bhāvayedityāha- yo dadātīti || 26-
29 || yāvadupādhiparyantaṃ tāvacchuśrūṣayet gurūn iti śrutyanurodhena 
gurubhaktiṃ sadā kuryāt || 30 || guruḥ sākṣāt ādinārāyaṇa eva iti śrutiḥ 
|| 31 ||

ātmanaḥ śrutyācāryaikagamyatvam

śrutyā yaduktaṃ paramārthametat
tatsaṃśayo nātra tataḥ samastam |

p. 256) śrutyā virodhe na bhavet pramāṇaṃ
bhavedanarthāya vinā pramāṇam || 32 ||

dehasthaḥ sakalo jñeyo niṣkalo dehavarjitaḥ |
āptopadeśagamyo'sau sarvataḥ kimavasthitaḥ || 33 ||

haṃsahaṃseti yo brūyāddhaṃso brahmā hariḥ śivaḥ |
guruvaktrāttu labhyeta pratyakṣaṃ sarvatomukham || 34 ||

tileṣu ca yathā tailaṃ puṣpe gandha ivāsthitaḥ |
puruṣasya śarīre'smin sa bāhyābhyantare sthitaḥ || 35 ||

śrutyuktaṃ pramāṇam | tadatiriktamapramāṇam | 
pramāṇāpramāṇānuṣṭhānataḥ svārthānarthau syātāmityāha- śrutyeti 
|| 32 || dehayogāyogābhyāṃ sakalatvaniṣkalatvaṃ niṣkalasya 
deśikopadeśagamyatvaṃ cāha- dehastha iti | sarvavyāpako'pi niṣkalaḥ 
svācāryopadeśena gamyaḥ nānyathetyarthaḥ || 33 || ācāryaḥ ka ityata āha- 
haṃseti | uktārthametat || 34 || haṃsasya sadṛṣṭāntaṃ 
sarvavyāpakatāmāha- tileṣviti || 35 ||

sakalaniṣkaladevatāvivekaḥ

ulkāhasto yathā kaścit dravyamālokya tāṃ tyajet |
jñānena jñeyamālokya paścājjñānaṃ parityajet || 36 ||

puṣpavat sakalaṃ vidyādgandhastasya tu niṣkalaḥ |
vṛkṣastu sakalaṃ vidyācchāyā tasya tu niṣkalā || 37 ||

p. 257) niṣkalaḥ sakalo bhāvaḥ sarvatraiva vyavasthitaḥ |
upāyaḥ sakalastadvadupeyaścaiva niṣkalaḥ || 38 ||

sakale sakalo bhāvo niṣkale niṣkalastathā |
ekamātro dvimātraśca trimātraścaiva bhedataḥ || 39 ||

ardhamātrā parā jñeyā tata ūrdhvaṃ parātparam |
pañcadhā pañcadaivatyaṃ sakalaṃ paripaṭhyate || 40 ||

brahmaṇo hṛdayasthānaṃ kaṇṭhe viṣṇuḥ samāśritaḥ |
tālumadhye sthito rudro lalāṭastho maheśvaraḥ || 41 ||

nāsāgre acyutaṃ vidyāttasyānte tu paraṃ padam |
paratvāttu paraṃ nāstītyevaṃ śāstrasya nirṇayaḥ || 42 ||

dehātītaṃ tu taṃ vidyānnāsāgre dvādaśāṅgulam |
tadantaṃ taṃ vijānīyāt tatrastho vyāpayet prabhuḥ || 43 ||

	kaivalyāptāvapi tadupakārakajñānaṃ na tyājyamityatrāha- ulketi || 
36 || dṛśyādṛśyayoḥ sakalaniṣkalatvaṃ cāha- puṣpavaditi | vṛkṣaḥ 
svāvidyāpādaḥ | svajñānavraścanāt vṛkṣatvaṃ, taddhetumāyāyāḥ 
tacchādakatvāt chāyātvam ityarthaḥ || 37 || evaṃ niṣkalasakalabhāvaḥ 
sarvatra vartata ityāha- niṣkala iti | svātiriktakalāviśiṣṭasvāvidyāpade 
sakalabhāvaḥ | tadapavādādhikaraṇe niṣkale sakalasāpekṣataḥ 
sapratiyogikaniṣkale 
sāpekṣaprabhavasapratiyogikaniṣkalagatasaviśeṣāpahnavāt 
niṣpratiyogikaniṣkalātmā avaśiṣyata ityarthaḥ || 38 || 
akārādimātrācatuṣṭayāt paraṃ brahmetyāha- ekamātra iti || 39 || 
akārādimātrātrayāpekṣayā ardhamātrā | 
hṛdayādipañcasthānāsanapañcabrahmātītaṃ paraṃ brahmaiva, tasya 
sarvaparatvena tatparaṃ nāstītyāha- pañcadheti || 40-41 || acyutaṃ 
sadāśivam || 42 ||

p. 258) tasya dehātītatvaṃ vyāpakatvaṃ cāha- deheti | prāṇalayasthānaṃ 
nāsāgradvādaśāṅgulaṃ yaḥ tallayādhāraḥ taṃ dehātītaṃ 
pratyagātmānaṃ vidyāt | yaḥ pratyagbhāvaviralaḥ tadantaṃ taṃ 
paramātmānaṃ jānīyāt | so'yaṃ paramātmā prabhuḥ tatrasthaḥ 
sarvātītapade sthito'pi svavikalpitaṃ viśvaṃ viśvavirāḍotrādyātmanā 
vyāpayet || 43 ||

yogasya paramagopyatvam, uttamādhikāriṇa eva dātavyatvaṃ ca

mano'pyanyatra nikṣiptaṃ cakṣuranyatra pātitam |
tathāpi yogināṃ yogo hyavicchinnaḥ pravartate || 44 ||

etattu paramaṃ guhyametattu paramaṃ śubham |
nātaḥ parataraṃ kiṃcinnātaḥ parataraṃ śubham || 45 ||

śuddhajñānāmṛtaṃ prāpya paramākṣaranirṇayam |
guhyādguhyatamaṃ gopyaṃ grahaṇīyaṃ prayatnataḥ || 46 ||

nāputrāya pradātavyaṃ nāśiṣyāya kadācana |
gurudevāya bhaktāya nityaṃ bhaktiparāya ca || 47 ||

pradātavyamidaṃ śāstraṃ netarebhyaḥ pradāpayet |
dātāsya narakaṃ yāti sidhyate na kadācana || 48 ||

	yogināṃ karaṇagrāmasya svasvavyāpāravyagratvena yogavicchittiḥ 
syādityāha- mano'pīti | manastu svātmano'nyatra nāde nikṣiptaṃ tathā 
cakṣurapi nāsāgre pātitaṃ saṃkalparūpādiviṣayāduparatam | 
svāntarbāhyayogavighnābhāvāt yogiyogasya avicchinnatvaṃ yujyata 
ityarthaḥ || 44 || yat yogamukhyaphalaṃ tadatiriktarahasyaṃ nāstītyāha- 
etaditi || 45 || sarvamanyat parityajya

p. 259) paramākṣarajñānameva sadā grāhyam ityāha- śuddheti || 
paramākṣaranirṇayātmakaṃ jñānaṃ prayatnāddeśikamukhena 
grahaṇīyaṃ grāhyam || 46 || yadevaṃ guhyatamaṃ tat uttamādhikāriṇe 
dātavyaṃ taditarebhyo na dātavyam | yadi dadyāt tadā dātuḥ narakapātaḥ 
syādityāha- neti || 47-48 ||

kevalaśāstrajñānavato'pi pāpapuṇyalepābhāvaḥ

gṛhastho brahmacārī vā vānaprastho'tha bhikṣukaḥ |
yatra tatra sthito jñānī paramākṣaravit sadā || 49 ||

viṣayī viṣayāsakto yāti dehāntare śubham |
jñānādevāsya śāstrasya sarvāvastho'pi mānavaḥ || 50 ||

brahmahatyāśvamedhādyaiḥ puṇyapāpairna lipyate |

	yaḥ ko'pi vā vṛttyādijñānādeva kṛtārtho bhavati tasya na 
puṇyapāpalepo'stītyāha- gṛhastha iti | ābhāsato'pi viṣayāsaktidarśanāt 
ayaṃ saviśeṣajñānī || 49 || tasya dehāvasānasamaye viṣayāsaktivairalyāt 
śubhaprāptiriṣyata ityarthaḥ | kevalaśāstrajanyajñānāt 
āgāmipuṇyapāpālepo bhavatītyarthaḥ || 50 ||

trividhā ācāryāḥ

codako bodhakaścaiva mokṣadaśca paraḥ smṛtaḥ || 51 ||

ityeṣāṃ trividho jñeya ācāryastu mahītale |
codako darśayenmārgaṃ bodhakaḥ sthānamādiśet || 52 ||

mokṣadastu paraṃ tattvaṃ yajjñātvāmṛtamaśnute |

p. 260) codakādibhedena deśikatraividhyaṃ tajjñānataḥ kṛtakṛtyatāṃ 
cāha- codaka iti || 51 || ahaṃ brahmāsmi ityanusaṃdhānaṃ kuryāditi 
svājñaṃ brahmābhimukhyena codayatīti codako vedāntaḥ, 
mārgadarśakatvāt | tat tvameva tvameva tat iti svājñaṃ bodhayatīti bodhako 
deśikaḥ, brahmaprāpakatvāt || 52 || matsvarūpameva sarvaṃ māmeva 
prāpsyasi madvyatiriktamaṇumātraṃ na vidyate iti paramopadeśena 
svātiriktabhramamokṣaṃ dadātīti mokṣadaḥ parameśvaraḥ, 
paratattvasvarūpatvāt | yajjñānāt mumukṣuḥ amṛto bhavati so'yam 
īśvara ityarthaḥ ||

praṇavahaṃsānusaṃdhānātmakaṃ pratyakṣayajanam

pratyakṣayajanaṃ dehe saṃkṣepācchṛṇu gautama || 53 ||

teneṣṭvā sa naro yāti śāśvataṃ padamavyayam |
svayameva kṛtaḥ paśyeddehe binduṃ ca niṣkalam || 54 ||

ayane dve ca viṣuve sadā paśyati mārgavit |
kṛtvā yāmaṃ purā vatsa recapūrakakumbhakān || 55 ||

pūrvaṃ cobhayamuccārya arcayettu yathākramam |
namaskāreṇa yogena mudrayārabhya cārcayet || 56 ||

sūryasya grahaṇaṃ vatsa pratyakṣayajanaṃ smṛtam |

	kiṃ tat pratyakṣayajanamityatra śṛṇvetat ityāha- pratyakṣeti || 53 || 
yadā prāṇaḥ piṅgalayā kuṇḍalinīsthānaṃ praviśati tadeva 
sūryagrahaṇaṃ, yeneṣṭvā muniḥ brahmapadam eti tat 
pratyakṣayajanamityāha- svayameveti | iḍāpiṅgalayoḥ piṅgaleḍayoḥ 
kramaṇam uttarāyaṇadakṣiṇāyane bhavataḥ tathā mūlādhāre mūrdhani 
ca

p. 261) yadā prāṇaḥ praviśati tadā dve viṣuve bhavataḥ | 
evamanayaviṣuvadvaye ca prāṇamārgavit svayameva dehe binduṃ sakalaṃ 
niṣkalaṃ ca sadā paśyet paśyati | he vatsa purā ādau 
recakapūrakakumbhakān sahitān kevalān vā aharahaḥ yāmamātraṃ 
kṛtvā || 54-55 || om iti haṃsa iti ca yanmantradvayaṃ pūrvamuktaṃ 
tadubhayaṃ cārthānusaṃdhānapūrvakamuccārya yaḥ praṇavārtho 
haṃsaḥ so'hamityanusaṃdhānaṃ namaskārayogaḥ, aikyānusaṃdhānasya 
namaskārayogatvāt namastvaikyaṃ pravadet iti śruteḥ | tena 
namaskārayogena svātiriktaṃ neti cinmudrayā śāṃbhavīkhecarīmudrayā 
vā yuktaḥ san yathākramamātmānam arcayet, sadā so'hamasmīti dhyāyet, 
so'haṃbhāvena pūjayet iti śruteḥ || 56 || idameva hi pratyakṣayajanaṃ 
vijñeyaṃ ||

haṃsayogalabdhajñānāt sāyujyaprāptiḥ

jñānāt sāyujyamevoktaṃ toye toyaṃ yathā tathā || 57 ||

ete guṇāḥ pravartante yogamārgakṛtaśramaiḥ |
yasmādyogaṃ samādāya sarvaduḥkhabahiṣkṛtaḥ || 58 ||

yogadhyānaṃ sadā kṛtvā jñānaṃ tanmayatāṃ vrajet |
jñānāt svarūpaṃ paramaṃ haṃsamantraṃ samuccaret || 59 ||

brahmajñānāt jale jalayogavat sāyujyaṃ pratyakparaikyamuktaṃ 
yogibhiḥ || 57 || evaṃ jīvanmuktaguṇāḥ pravartante | yasmāt evaṃ 
yogābhyāsataḥ sarvaduḥkhabahiṣkṛto bhavati tasmāt yogadhyānaṃ sadā 
kṛtvā tatprabhavavijñānamavāpya jñānasamakālaṃ 
brahmamātratāmityādityarthaḥ || 58 || yadyat antarbāhyavilasitaṃ tattat 
haṃsa eva, haṃsātiriktaṃ na kiṃcidastīti jñānī paramahaṃsaḥ 
paramātmā bhavatītyāha- jñānāditi | haṃsaḥ so'hamiti yaḥ sadā 
haṃsamantramuccaret so'yaṃ

p. 262) so'hamiti jñānāt haṃsasya yat paramaṃ svarūpaṃ yat 
niṣpratiyogikasvamātram avaśiṣyate tadeva bhavatītyarthaḥ || 59 ||

haṃsopalabdhisthānam

prāṇināṃ dehamadhye tu sthito haṃsaḥ sadācyutaḥ |
haṃsa eva paraṃ satyaṃ haṃsa eva tu satyakam || 60 ||

haṃsa eva paraṃ vākyaṃ haṃsa eva tu vaidikam |
haṃsa eva paro rudro haṃsa eva parātparam || 61 ||

sarvadevasya madhyastho haṃsa eva maheśvaraḥ |
pṛthivyādiśivāntaṃ tu akārādyāśca varṇakāḥ || 62 ||

kūṭāntā haṃsa eva syānmātṛketi vyavasthitāḥ |

	sa kutropalabhyata ityata āha- prāṇināmiti | nityānusaṃdhānāt 
svamātrācyuto haṃsaḥ hṛdyevopalabhyate ityarthaḥ | haṃsasya 
sārvātmyamāha- haṃsa eveti | akṣākṣādhipāntaryāmitvāt || 60-61 || 
abhidheyamabhidhānaṃ ca haṃsa evetyāha- pṛthivyādīti || 62 || 
kūṭaśabdena kṣakāra ucyate ||

haṃsamātrānusmaraṇapūrvakasamādhyabhyāsaḥ

mātṛkārahitaṃ mantramādiśyante na kutracit || 63 ||

haṃsajyotiranūpamyaṃ devamadhye vyavasthitam |
dakṣiṇāmukhamāśritya jñānamudrāṃ prakalpayet || 64 ||

p. 263) sadā samādhiṃ kurvīta haṃsamantramanusmaran |
nirmalasphaṭikākāraṃ divyarūpamanūpamam || 65 ||

madhyadeśe paraṃ haṃsaṃ jñānamudrātmarūpakam |

	mātṛkāmantrayoraikyaṃ haṃsajyotiravagamya 
jñānamudrāmābadhya svātmamantraṃ smaran sadā samādhiṃ 
kurvītetyāha- mātṛketi | anūpamyam anūpamaṃ nirūpamaṃ 
sarvadevamadhye dakṣiṇābhimukhaṃ devamāśritya || 63-64 || devaṃ 
kīdṛśamityatra nirmaleti || 65 ||

haṃsasyāsananirūpaṇam

prāṇāpānasamānāścodānavyānau ca vāyavaḥ || 66 ||

pañcakarmendriyairyuktāḥ kriyāśaktibalodyatāḥ |
nāgaḥ kūrmaśca kṛkaro devadatto dhanaṃjayaḥ || 67 ||

pañcajñānendriyairyuktā jñānaśaktibalodyatāḥ |
pāvakaḥ śaktimadhye tu nābhicakre raviḥ sthitaḥ || 68 ||

baddhamudrā kṛtā yena nāsāgre tu svalocane |

	haṃsaḥ kva āsanamarhatītyatra nābhicakre nāsāgre netrayośca 
vyavasthita ityāha- prāṇeti || 66-67 || śaktidvayamadhye 
mūlādhārasthapāvakarūpeṇa haṃsa eva sthitaḥ | yena nāsāgre svalocane 
ca baddhakhecarīmudrā kṛtā so'yaṃ haṃso ravirbhūtvā nābhicakre 
nāsāgre locanayośca sthita ityarthaḥ || 68 ||

haṃsayogābhyāsakramaḥ

akāre bahnirityāhurukāre hṛdi saṃsthitaḥ || 69 ||

p. 264) makāre ca bhruvormadhye prāṇaśaktyā prabodhayet |
brahmagranthirakāre ca viṣṇugranthirhṛdi sthitaḥ || 70 ||

rudragranthirbhruvormadhye bhidyate'kṣaravāyunā |
akāre saṃsthito brahmā ukāre viṣṇurāsthitaḥ || 71 ||

makāre saṃsthito rudrastato'syāntaḥ parātparaḥ |
kaṇṭhaṃ saṃkucya nāḍyādau stambhite yena śaktitaḥ || 72 ||

rasanā pīḍyamāneyaṃ ṣoṣaśīvordhvagāminī |
trikūṭaṃ trividhaṃ caiva golākhaṃ nikharaṃ tathā || 73 ||

triśaṃkhaṃ vajramoṃkāramūrdhvanālaṃ bhrūvormukham |
kuṇḍalīṃ cālayan prāṇān bhedayan śaśimaṇḍalam || 74 ||

sādhayan vajrakumbhāni nava dvārāṇi bandhayet |
sumanaḥpavanārūḍhaḥ sarāgo nirguṇastathā || 75 ||

brahmasthāne tu nādaḥ syācchaṃkinyamṛtavarṣiṇī |
ṣaṭcakramaṇḍaloddhāraṃ jñānadīpaṃ prakāśayet || 76 ||

sarvabhūtasthitaṃ devaṃ sarveśaṃ nityamarcayet |
ātmarūpaṃ tamālokya jñānarūpaṃ nirāmayam || 77 ||

dṛśyaṃ taṃ divyarūpeṇa sarvavyāpī nirañjanaḥ |
haṃsa haṃsa vadedvākyaṃ prāṇināṃ dehamāśritaḥ |
sa prāṇāpānayorgranthirajapetyabhidhīyate || 78 ||

p. 265) sahasramekaṃ dvyayutaṃ ṣaṭ śataṃ caiva sarvadā |
uccaran patito haṃsaḥ so'hamityabhidhīyate || 79 ||

pūrvabhāge hyadholiṅgaṃ śikhinyāṃ caiva paścimam |
jyotirliṅgaṃ bhruvormadhye nityaṃ dhyāyet sadā yatiḥ || 80 ||

	virāḍādirūpeṇākārādimātrātraye yo vaset taṃ prāṇaśaktyā 
bodhayedityāha- akāra iti | akāre mūlādhāre ca vahniḥ vaiśvānaro vartata 
ityāhuḥ | śiṣṭaṃ spaṣṭam || 69 || 
yathoktasthānaviśiṣṭākārādimātrātraye yat vidyate granthitrayaṃ 
taddhaṃsajñānavāyunā bhidyate | tata akārādau brahmādayaḥ 
prakāśante | taddehakalanāpāye nirviśeṣaparamātmā svamātraṃ 
prakāśata ityāha- brahmeti || 70-71 || 
taddarśanagranthitrayabhedanopāyatayā yogamupadiśati- kaṇṭhamiti | 
jālaṃdharabandhena kaṇṭhaṃ saṃkucya siddhāsanārūḍhena yena yoginā 
nāḍyādau suṣumnāmūle kuṇḍalinīśaktitaḥ kuṇḍalinīśaktyā saha 
dṛṣṭiprāṇādau stambhite sati || 72 || atha ūrdhvamunnamata ityoṃkāraḥ iti 
śrutyanurodhenākārādiparāntaṣoḍaśāvayavā yasya saḥ 
ṣoḍaśīpraṇava iva urdhvagāminī ghaṇṭikākuharagāminī iyaṃ jihvā 
pīḍyamānā bhavati tanutāmetya brahmabilaṃ praviśati | tadā tisro nāḍyo 
yatraikyaṃ bhajanti taṃ trikūṭaṃ bhrūmadhyaṃ 
mūlādhāraviśuddhyādibhedena tat trividhaṃ virājate | tatra gośabdena 
pṛthivyādibhūtapañcakatatkāryamucyate, tannityādipralaye yadātmanā 
līyate seyaṃ golā avyaktaśaktiḥ, tadātmakaṃ kha golākham 
avyākṛtākāśaṃ yasmāt nirgataṃ 
vyākṛtāvyākṛtākāśādipṛthivyantaṃ tannikharaṃ cidākāśaṃ 
yogiramaṇasthānaṃ brahma ca vidyata ityarthaḥ | yadvā- gośabdena 
jihvocyate | tathā ca haṭhatantre āmnāyate- gomāṃsaṃ bhakṣayet 
ityaṃśavivaraṇe gośabdeneritā jihvā ityuktatvāt | śiṣṭaṃ samānam || 73 || 
punaḥ trikūṭaviśeṣaṇametat- 
icchānicchāparecchāprabhavasvāntarupalabhyamānaṃ triśaṃ 
sukhaduḥkhatrayaṃ khādatīti triśaṃkham, ayogibhiḥ

p. 266) kadāpi durbhedyatvāt vajram, oṃkāram 
akārādimātrātrayāvasānasthānatvāt, ūrdhvanālaṃ bhruvormukhaṃ 
bhrūmadhyam | yadi tatra yogī jyotirliṅgaṃ draṣṭumicchati tadā 
śakticālanādyupāyato jñānadīpaṃ paśyatītyāha- kuṇḍalīmiti || 74 || 
sūryojjyāyīśītalyādīni vajrakumbhakāni, teṣāṃ 
granthitrayabhedanapaṭutvāt | tato nādaḥ āvirbhavatītyāha- sumana iti | 
sumanaḥ manojñatvāt pavanārūḍhaḥ prāṇopādhikatvāt sarāgo 
naisargikatvāt tathā nirguṇaḥ tama-ādiguṇatrayāspṛṣṭatvāt || 75 || 
daharaṃ puṇḍarīkaṃ veśma iti śrutisiddhabrahmasthāne nādāvirbhāvaḥ 
syāt | śaṃ sudhāṃ kiratīti śaṃkinī cāndrī kalā amṛtavarṣiṇī bhavati | 
tato yogī pratyagrūpeṇa prakāśayedityāha- ṣaḍiti | 
mūlādhārādiṣaṭcakramaṇḍalam adhomukham ūrdhvaṃ dharatīti 
ṣaṭcakramaṇḍaloddhāraṃ jñānājñānavṛttiṃ dīpayatīti jñānadīpaṃ 
pratyaktattvaṃ, tadrūpeṇa vidvān prakāśayedityarthaḥ || 76 || pratyañcaṃ 
sarvāntaratvena bhāvayedityāha- sarveti | tataḥ pratyagabhinnaparaṃ 
brahmāsmīti dhyāyedityāha- ātmeti || 77 || jñānibhiḥ divyarūpeṇa 
dṛśyaṃ taṃ paramātmānaṃ pratyagabhedena yo jānāti so'yaṃ muniḥ 
sarvavyāpī nirañjano bhūtvā | haṃsahaṃseti vīpsayā haṃsaḥ so'ham iti 
vākyaṃ vadediti dyotyate | yo'yaṃ haṃsānusaṃdhānavyāpāraḥ saḥ || 78 
|| ajapājapasaṃkhyeyattāmāha- sahasramiti || 79 || evaṃ haṃsayoginā 
yatinā pratyahaṃ yat kartavyaṃ tadāha- pūrveti | suṣumnāyāḥ 
pūrvabhāge mūlādhāracakre hyadholiṅga varājatattvaṃ dhyāyet | tasya 
madhye mahānagnirviśvārcirviśvatomukhaḥ iti śrutyanurodhena 
anāhatasthaśikhinyāṃ pāvakajvālāyāṃ paścimaṃ sautraṃ 
pratyagātmaliṅgaṃ vā ahamasmīti dhyāyet | bhruvorājñācakramadhye tu 
brahmamātrabhāvāpattau yatata iti yatiḥ muniḥ jyotiraiśvaraṃ nityaṃ 
niṣpratiyogikabrahmamātraliṅgaṃ vā sadā dhyāyet 
ahamasmītyanusaṃdhānaṃ kuryādityarthaḥ || 80 ||

p. 267)		haṃsayoginā anusaṃdheyamātmasvarūpam

acyuto'hamacintyo'hamatarkyo'hamajo'smyaham |
avraṇo'hamakāyoha manaṅgo'smyabhayo'smyaham || 81 ||

aśabdo'hamarūpo'hamasparśo'smyahamadvayaḥ |
araso'hamagandho'hamanādiramṛto'smyaham || 82 ||

akṣayo'hamaliṅgo'hamajaro'smyakalo'smyaham |
aprāṇo'hamamūko'hamacintyo'smyakṛto'smyaham || 83 ||

antaryāmyahamagrāhyo'nirdeśyo'hamalakṣaṇaḥ |
agotro'hamagātro'hamacakṣuṣko'smyavāgaham || 84 ||

adreśyo'hamavarṇo'hamakhaṇḍo'smyahamadbhutaḥ |
aśruto'hamadṛṣṭo'hamanveṣṭavyo'maro'smyaham || 85 ||

avāyurapyanākāśo'tejaso'vyabhicāryaham |
amato'hamajāto'hamatisūkṣmo'vikāryaham || 86 ||

arajasko'tamasko'hamasattvo'smyaguṇo'smyaham |
amāyo'nubhavātmāhamananyo'viṣayo'smyaham || 87 ||

advaito'hamapūrṇo'hamabādhyo'hamanantaraḥ |
aśrotro'hamadīrgho'hamavyakto'hamanāmayaḥ || 88 ||

advayānandavijñānaghano'smyahamavikriyaḥ |
aniccho'hamalepo'hamakartāsmyahamadvayaḥ || 89 ||

p. 268) avidyākāryahīno'hamavāṅmanasagocaraḥ |
analpo'hamaśoko'hamavikalpo'smyavijvalan || 90 ||

ādimadhyāntahīno'hamākāśasadṛśo'smyaham |
ātmacaitanyarūpo'hamahamānandacidghanaḥ || 91 ||

ānandāmṛtarūpo'hamātmasaṃstho'hamantaraḥ |
ātmakāmo'hamākāśāt paramātmeśvaro'smyaham || 92 || 

īśāno'smyahamīḍyo'hamahamuttamapūruṣaḥ |
utkṛṣṭo'hamupadraṣṭāhamuttarataro'smyaham || 93 ||

kevalo'haṃ kaviḥ karmādhyakṣo'haṃ karaṇādhipaḥ |
guhāśayo'haṃ goptāhaṃ cakṣuṣaścakṣurasmyaham || 94 ||

cidānando'smyahaṃ cetāścidghanaścinmayo'smyaham |
jyotirmayo'smyahaṃ jyāyān jyotiṣāṃ jyotirasmyaham || 95 ||

tamasaḥ sākṣyahaṃ turyaturyo'haṃ tamasaḥ paraḥ |
divyo devo'smi durdaśo dṛṣṭādhyāyo dhruvo'smyaham || 96 ||

nityo'haṃ niravadyo'haṃ niṣkriyo'smi nirañjanaḥ |
nirmalo nirvikalpo'haṃ nirākhyāto'smi niścalaḥ || 97 ||

nirvikāro nityapūto nirguṇo niḥspṛho'smyaham |
nirindriyo nityantāhaṃ nirapekṣo'smi niṣkalaḥ || 98 ||

puruṣaḥ paramātmāhaṃ purāṇaḥ paramo'smyaham |
parāvaro'smyahaṃ prājñaḥ prapañcopaśamo'smyaham || 99 ||

p. 269) parāmṛto'smyahaṃ pūrṇaḥ prabhurasmi purātanaḥ |
pūrṇānandaikabodho'haṃ pratyagekaraso'smyaham || 100 ||

prajñāto'haṃ praśānto'haṃ prakāśaḥ parameśvaraḥ |
ekadhā cintyamāno'haṃ dvaitādvaitavilakṣaṇaḥ || 101 ||

buddho'haṃ bhūtapālo'haṃ bhārūpo bhagavānaham |
mahādevo mahānasmi mahājñeyo maheśvaraḥ || 102 ||

vimukto'haṃ vibhurahaṃ vareṇyo vyāpako'smyaham |
vaiśvānaro vāsudevo viśvataścakṣurasmyaham || 103 ||

viśvādhiko'haṃ viśado viṣṇurviśvakṛdasmyaham |
śuddho'smi śukraḥ śānto'smi śāśvato'smi śivo'smyaham || 104 ||

sarvabhūtāntarātmāhamahamasmi sanātanaḥ |
ahaṃ sakṛdvibhāto'smi sve mahimni sadā sthitaḥ || 105 ||

sarvāntaraḥ svayaṃjyotiḥ sarvādhipatirasmyaham |
sarvabhūtādhivāso'haṃ sarvavyāpī svarāḍaham || 106 ||

samastasākṣī sarvātmā sarvabhūtaguhāśayaḥ |
sarvendriyaguṇābhāsaḥ sarvendriyavivarjitaḥ || 107 ||

sthānatrayavyatīto'haṃ sarvānugrāhako'smyaham |
saccidānandapūrṇātmā sarvapremāspado'smyaham || 108 ||

saccidānandamātro'haṃ svaprakāśo'smi ciddhanaḥ |
sattvasvarūpasanmātrasiddhasarvātmako'smyaham || 109 ||

p. 270) sarvādhiṣṭhānasanmātraḥ sarvabandhaharo'smyaham |
sarvagrāso'smyahaṃ sarvadraṣṭā sarvānubhūraham || 110 ||

evaṃ yo veda tattvena sa vai puruṣa ucyate ||

ityupaniṣat ||

	yathā yathā yatibhiḥ anusaṃdheyaṃ tadevāha- acyuto'hamityādinā 
| acyuto'ham, acyutasvabhāvāt, acintyaḥ cittavṛttyabhāvāt, atarkyaḥ 
anirvācyatvāt, ajaḥ janmādyabhāvāt | avraṇa ityādiviśeṣaṇatrayaṃ 
śarīratrayapratiṣedhārtham | abhayaḥ, bhayahetudvaitābhāvāt || 81 || kiṃ 
ca- aśabdo'hamityādi | pañcatanmātravairalyāt 
śabdādipratiṣedhasiddho'smi | advayaḥ, dvaitābhāvāt | anādiramṛtaḥ, 
saṃbhūtipralayābhāvāt || 82 || kiṃ ca- akṣayo'hamityādi | akṣayo'haṃ, 
kṣayiṣṇusthūlaśarīrābhāvāt | aliṅgaḥ, acihnatvāt | ajaraḥ, 
jarādiṣaḍūrmyabhāvāt | aprāṇo'hamamūko'haṃ 
saprāṇavāgindriyābhāvāt | akṛtaḥ, kṛtihetvabhāvāt || 83 || kiṃ ca- 
antaryāmyahamityādi | antaryāmī, sarvāntaratvāt | agrāhyaḥ karaṇaiḥ | 
anirdeśyaḥ anidaṃsvarūpatvāt alakṣaṇaḥ, lakṣaṇātrayābhāvāt | 
agotraḥ, kulagotravivarjitatvāt | acakṣuṣkaḥ, jñānākṣābhāvāt | avāk, 
karmākṣābhāvāt || 84 || kiṃ ca- adreśyo'hamityādi | dṛśyābhāvāt 
adreśyaḥ | avarṇaḥ varṇāśramābhāvāt | akhaṇḍaḥ pūrṇatvāt | 
adbhutaḥ- svasya niṣpratiyogikasvamātratve'pi svājñādidṛṣṭyanurodhena 
jāgrajjāgradādyavikalpānujñaikarasāntavat bhānāt adbhutatvaṃ yujyate | 
vedāntavākyeṣu mumukṣubhiḥ anveṣṭavyaḥ | amaraḥ 
pāramārthikanityatvāt || 85 || kiṃ ca- avāyurityādi | 
vāyvākāśatejograhaṇaṃ jalapṛthivyupalakṣaṇam | atejasa iti ṣaṣṭhī 
prathamārthā | avyabhicārī sadekarūpatvāt | antaḥkaraṇavṛttibhiḥ amataḥ 
ajātaḥ

p. 271) ajatvāt | atisūkṣmaḥ keśakoṭyaṃśaikabhāgasūkṣmāvyaktādapi 
sūkṣmatvāt | avikārī vikārakalanāvairalyāt || 86 || kiṃ ca- arajaska ityādi | 
guṇatrayaguṇasāmyābhāvato nirguṇatvāt | amāyaḥ nirmāyatvāt | 
anubhavātmā vijñānagamyatvāt | ananyaḥ brahmābhinnatvāt | aviṣayaḥ 
nirviṣayatvāt || 87 || advaitaḥ niṣpratiyogikatvāt | apūrṇaḥ jīvātmanā 
paricchinnadṛṣṭitvāt | yadvā- akāravācyaviṣṇvātmanā sarvatra 
pūrṇatvāt | abāhyo'hamanantaraḥ svabāhyāntaḥkalanāvairalyāt | 
akaraṇatvāt parimāṇābhāvāt adṛśyatvāt asnāviratvācca 
aśrotrādiviśeṣaṇacatuṣṭayamupapadyate || 88 || kiṃ ca- advayeti | 
pūrṇānandabodhasvarūpatvāt anicchaḥ || 89 || analpaḥ aparicchinnatvāt | 
aśoko'haṃ nirahaṃkṛtitvāt | avikalpaḥ nirvikalpatvāt | avijvalan 
niragnitvāt || 90 || ādimadhyāntaśūnyaḥ utpattisthitipralayābhāvāt | 
ākāśasadṛśaḥ cidākāśatvāt || 91 || ātmasaṃsthaḥ sve mahimni 
sthitatvāt | antaraḥ sarvāntaratvāt || 92 || uttamapūruṣaḥ 
kṣarākṣarākalanāviralapuruṣottamatvāt, uttamaḥ puruṣastvanyaḥ 
paramātmetyudāhṛtaḥ iti smṛteḥ | sarvasmāt utkṛṣṭaḥ | upadraṣṭā 
sarvasākṣisvarūpatvāt | uttarataraḥ sarvottaratvāt || 93 || kevalaḥ 
aśeṣaviśeṣābhāvāt | kaviḥ krāntadarśitvāt | karmādhyakṣaḥ 
karmiṇāṃ karmaphaladātṛtvāt | karaṇādhipaḥ digvātādirūpatvāt | 
guhāśayaḥ sarvapratyaksvarūpatvāt | goptā viṣṇutvāt | cakṣuṣaścakṣuḥ 
cakṣurādīndriyapravṛttinimittatvāt || 94 || acetanacetayitṛtvāt cetāḥ | 
jyāyān pṛthivyādeḥ | jyotiṣāṃ jyotiḥ sūryādiprakāśakatvāt || 95 || 
dhruvaḥ śāśvatatvāt || 96 || nirañjanaḥ asaṅgatvāt || 97-100 || ekadhā 
cintyamāno'haṃ sarvāpahnavasiddhaṃ brahma, niṣpratiyogikaikarūpeṇa 
cintanīyatvāt | sāpekṣadvaitādvaitavilakṣaṇaḥ 
niṣpratiyogikaparamādvaitarūpatvāt || 101-103 || śivaḥ 
svātiriktāśivagrāsatvāt || 104 || sakṛdvibhātaḥ nirāvṛtaprakāśaḥ || 105 || 
svarāṭ svamātratayā rājamānatvāt || 106 || sarvendriyaguṇābhāsaḥ 
sarvendriyavivarjitaḥ, svājñasvajñadṛṣṭibhyāmityarthaḥ || 107 || 
jāgradādisthānatrayavyatīto'ham || 108-110 || 

p. 272) vidyāphalamāha- evamiti | 
acyuto'hamityādisarvānubhūrityantasvānubhūtivākyāni 
svānubhūtimahāvākyaratnāvalīprabhālocane prāyaśo vyākhyātāni 
ityupaniṣacchabdaḥ brahmavidyopaniṣatsamāptyarthaḥ ||

śrīvāsudevendraśiṣyopaniṣadbrahmayoginā |
brahmavidyopaniṣado vyākhyeyaṃ likhitā laghu |
prakṛtopaniṣadvyākhyā saptatyadhiśatadvayam ||

iti śrīmadīśādyaṣṭottaraśatopaniṣacchāstravivaraṇe 
catvāriṃśatsaṃkhyāpūrakaṃ brahmavidyopaniṣadvivaraṇaṃ 
saṃpūraṇam


###########   END OF FILE  #######