####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00307
Uniform title: carcāstava
Commentator : harabhatta sastrī

Description: 
From volume 90 of the KSTS series


Notes: 
Revision 0: Nov. 12, 2014

Data-entered by the staff of Muktabodha under the supervision of Mark S. G. Dyczkowski.

Publisher : Fine Art Press
Publication year : 1963
Publication city : Srinigar
Publication country : India
####################################################



p. 1)

pañcastavyāṃ carcāstavo dvitīyaḥ

prāyaḥ panthā bahulavidhigo dhāmni śākte'dhiśāyī 
puṃsāṃ tattatphalanivahado dhyānavīryādhirūḍheḥ |
no vā puṃdhāmani jaḍapade niṣphale no parasmin 
iṣṭāptyai tat  sphuraduruphalā carcyate kāpi vallī ||

idānīṃ dvitīyaṃ carcāstavamupacikramiṣurācāryo 
nirvighnasamāptikāmatvenāmbāyāḥ pādakamalaṃ vīraśṛṅgāraraso 
(makarando) paśliṣṭatvena parāmṛśati | 

oṃ namastripurasundaryai-

ānandasundarapurandaramuktamālyaṃ [manthare tipāṭhāntaram]
maulau haṭhena nihitaṃ mahiṣāsurasya |
pādāmbujaṃ bhavatu me vijayāya mañju
mañjīraśiñjitamanoharamambikāyāḥ || 1 ||

ambikā nāma paripūrṇāhambhāvātmasphuraṇāvalokanacaturā 
sarvātiśayatvaśālinī parāvāk śaktiḥ | taduktaṃ catuḥśatyām- 

ātmanaḥ sphuraṇaṃ paśyedyadā sā paramā kalā |
ambikārūpamāpannā parā vāksamudīritā ||

p. 2)

iti | śrīpratyabhijñāyāmapi- 

citiḥ pratyavamarśātmā parā vāksvarasoditā (1-5-13)

iti tasya ambikāyāḥ śakterviśvajananyāḥ pādāmbujaṃ pādaścaraṇameva 
mārdavasaurabhādiguṇayogādambujaṃ kamalaṃ me mama vijayāya vijayaṃ 
viśvotkṛṣṭapadalābhamavāptuṃ bhavatu bhūyādityāśaṃsāyāṃ lot | vijayāyeti 
tumarthācca bhāvavacanāt ityanena sampradānatvam | atha ca vijayaḥ 
sarvaniyantṛtvaṃ tatprāptaye ityarthaḥ | yā brāhmaṇo jitiryā vyuṣṭirityatra 
kauṣītakyupaniṣacchrutāvācāryaistathā vyākhyātatvāt | evamagre'pi 
yathārthasaṃgatyā jayapadodīraṇe'rtho bodhyaḥ | atra 
prakṛtapādaprahāropayogitvena prāyo dakṣiṇasyaiva 
dākṣiṇyaprasiddherdakṣiṇaṃ pādakamalaṃ jñeyam |

yadvā- raṇe sasaṃrambhavyāpārāsaktyā sahasā 
prahāradānāvasarāpāte'viśeṣeṇa savyetarapādayoranyataro grāhyaḥ | athavā 
mahiṣāsuramardanamekasyaiva pādasya karma iti vīrakarmāviṣkaraṇam 
ityabhiprāyeṇaikavacanopanyāsaḥ | kīdṛśaṃ mahiṣāsurasya maulau kirīṭe | 
yadvā maulinopalakṣite śirasi haṭhena sāhasena nihitaṃ kṛtaprahāraṃ yena 
so'suro raṇe jīvitāvasānamagāt | ataḥ 

śiñjānamaṇimañjīramaṇḍitaśrīpadāmbujā |

iti brahmāṇḍoktyā tatkāle pādāmbuje śiñjitārāvotpatteraucityasadbhāvāt 
mañjubhirmanojñairmañjīraśiñjitairnūpurādijhaṇatkārairmanoharaṃ 
svabhaktānāṃ hṛdayāvarjakaṃ vipakṣāṇāṃ hṛdbhaṅgakāri ca | tathā 
durjayārivighātajanyenānandena pramodena sundaro 
bhāvisveśvaryapadalābhātmakasaubhāgyasūcakena vā harṣeṇa spṛhaṇīyo yaḥ 
purandaro devendrastena vijayakālocite bhagavatīcaraṇakamalārcanaprastāve muktāni 
nikṣiptāni mālyāni divyādbhutasurabhivicitrakusumapracayobhbhitasrajo yasmin tat | 
athavā ānandaḥ śrīputraḥ sundaraḥ kāmeśvaraḥ purandara indrastripurārirvā 
tairmuktamālyamiti pūjāvasare ābadhyamānapuṣpadāmakamityarthaḥ |

p. 3)

etaduktaṃ bhavati bhagavatyāḥ śiñjānapādaprahāro yathā tadānīmindrasya 
vijayaheturabhūt tathedānīṃ manasi smaryamāṇaṃ 
tadgataratibhāvādibhirvibhāvyamānaṃ 
mañjīraśiñjitādibhiruddīpanairanubhāvyamānaṃ tadeva pādāmbujaṃ 
svāntaścarvyamāṇatāmāpadyamānaṃ mamāpi 
lokottarasāndrānandacamatkārātiśayollāsāya bhūyādityāśāste | atra 
śṛṅgāravīrayorāśrayaikyāt spaṣṭābhāsamānatvena saṃkaraḥ | 
caraṇavidyāsaṃpradāyarahasyaṃ sugopanīyatayā gurumukhāvagamyatayā ca 
noddhāṭyate | tadavagatau satyāmekavacanatvena kathanābhiprāyo jñāyeta | nāpi 
yugalatvābhidhānaprasiddhivirodhaḥ syāt || 1 || 

atha śrīdevīviṣayakāṇāṃ praṇatīnāmapi tadvidyāṃśopāsanaucityanuguṇāni 
phalāni nirdiśati- 

saundaryavibhramabhuvo bhuvanādhipatyasampattikalpataravastripure ! jayanti |
ete kavitvakumudaprakarāvabodhapūrṇendavastvayi jagajjanani ! praṇāmāḥ || 2 ||

he jagajjanani ! tripure ! trīṇi purāṇi śarīrabuddhiprāṇātmakāni yasyāstripurā 
tathāhi śrīcakraṃ puratrayarūpaṃ caturasraṣoḍaśadalāṣṭadalātmakaṃ prathamaṃ 
puraṃ caturdaśāradvidaśārātmakaṃ dvitīyaṃ aṣṭāratrikoṇabinducakrātmakaṃ 
tṛtīyaṃ puramiti rahasyaśāstreṣu nirṇītam | athantirāṇi tu prākproktāni 
yathāsthānamagre'pi vakṣyante | tvayi tvadviṣaye ete bhaktimamadbhaḥ 
prahvībhūtairasmābhirviniveditāḥ praṇāmā namaskṛtayo jayanti 
sarvotkarṣaphaladānaśālinaḥ santi | kīdṛśāḥ saundaryasya saubhāgyasya 
vibhramāṇāṃ śṛṅgārajanyamanovṛttyanavasthādīnāṃ vilāsānāṃ ca bhuva 
ākarā utpattisthānāni | yaduktam- 

cittavṛttyanavasthānaṃ śṛṅgārādvibhramo mataḥ | 

p. 4)

iti | atra bahuvacanasya samāsāntargatatvāllabdhena ādinā vilāsalīlādayo 
hāvabhāvādayo'pi grāhyāḥ | tatra madarāgaharṣajanito viparyāso vibhramaḥ | 
yathā- animittamāsanādutthāyānyatra gamanam priyārabdhakathāmākṣipya 
sakhyā sahālāpaḥ mudhaiva ruṣitakrodhau puṣpādīnāṃ yāñcyā sahasā 
tatparityāgaḥ vastrābharaṇamālyānāmakāraṇataḥ khaṇḍanaṃ manana ca | kecittu 
yoṣitāṃ yauvanajo vikāro vibhrama ityāhuḥ | tatuktam- 

upadiśati kāminīnāṃ yauvanamada eva lalitāni |

iti | sarvatrātra śṛṅgārarasa eva kāraṇam | punaḥ kīdṛśāḥ | 
bhuvanānāmādhipatyaṃ sāmrājyaṃ tasya saṃpatteḥ samṛddheḥ 
kalpataravastajjanakāḥ tathā kavitvānāṃ kavikarmaṇāṃ 
aṣṭādaśalakṣaṇalakṣitānāṃ rūpakādidṛśyaśravyabhedairbheditānāṃ 
kāvyānāṃ śṛṅgārādirasasandarbhāṇāṃ tadrūpāṇāṃ kumudānāṃ 
kuvalayakusumānāṃ prakarāḥ kadambāni teṣāmavabodhe jñānavikāse 
pūrṇendavo rākāsudhāṃśavo vāgvilāsakāriṇa iti yāvat | 
ebhistribhirviśeṣaṇairidaṃ sūcyate yatkūṭatrayātmakasya mahātripurasundaryā 
mahāmantrasyopāsanayā trividhaphalalābhastatrādikūṭopāsanāyāṃ 
sarasvatīprasādātkavitvaśaktijananaṃ dvitīyakūṭopāsanāyāṃ 
tadadhipatikāmarājaprasādātsaundaryādijananaṃ tṛtīyopāsanāyāṃ 
tatprasādātsāmrājyalābhaḥ iti jñeyam | śaktikūṭasadhanādiphalaṃ tu 
vāmakeśvare-

pravakṣyāmi mahādevi ! śaktikūṭasya sādhanam |
śaktibījasvarūpā tu sṛṣṭvā saṃharate yadā ||

sṛṣṭisaṃhāraparyantaṃ śarīre paricintayet |
tato bhavati deveśi ! vainateya evāparaḥ ||

nāgānāṃ darśanād devi ! jaḍīkaraṇakārakaḥ |
dehināmamṛtāsāradhīradhārādharopamaḥ ||

sthirakṛtrimaśaṃkādiviṣopaviṣanāśanaḥ |
duṣṭavyādhigrahānokaḍākinīrūpikāgaṇaiḥ ||

p. 5)

bhūtapretapiśācaughaistrinetra iva dṛśyate |
athavā yena vidyeyaṃ paripūrṇā vicintyate ||

janmamaṇḍalahṛtpadmamukhamaṇḍalamadhyagā |
kevalaiva maheśāni ! padmarāgasamaprabhā ||

tasyāṣṭaguṇamaiśvaryamacirātsaṃpravartate |
manasā saṃsmaratyasyā yadi nāmāpi sādhakaḥ ||

tadaiva mātṛcakrasyavidito bhavati priye |
yadaiva japate vidyāṃ mahātripurasundarīm ||

tadaiva mātṛcakrājñā sekrāmatyasya vigrahe |
sarvāsāṃ sarvasaṃsthānāṃ yoginīnāṃ bhavetpriyaḥ ||

putravatparameśāni ! dhyānādeva hi sādhakaḥ |
yadā tu parameśāni ! paripūrṇāṃ prapūjayet ||

prayacchanti tadaivāsya khecarīsiddhimuttamām |
catuḥṣaṣtiryatāḥ koṭyo yoginīnāṃ mahaujasām ||

cakrametatsamāśritya saṃsthitā vīravandite ! |
ādau sambandhini pade madhye bījāṣṭakaṃ bahiḥ ||

kalāṃ dhyātvāṅganā raṅge jāyate'naṅgavatpriyaḥ |
karaśuddhyādividyānāmekaikaṃ parameśvari ||

rudrayāmalatantre tu karma proktaṃ mayā purā |
mādanairmadano bhūtvā pāśāṃkuśadhanuḥśaraiḥ ||

kṣobhayetsvargabhūrlokapātālatalayoṣitaḥ |
tathaiva śāktairdeveśi ! tripurīkṛtavigrahaḥ ||

sādhayetsiddhagandharvadevavidyādharānapi |
tatra śāktā mahāvajraprastāre janitāḥ śarāḥ ||

mādanāstvādiparataḥ sarvādhastānniyojitāḥ |
ādyantago mahāpāśaḥ pauruṣeyaḥ prakīrtitaḥ ||

rudraśaktiḥ kuṇḍalākhyā māyā strīpāśa ucyate |
turīyamaruṇāvarge dvitīyamapi pārvati ||

p. 6)

puṃstrīkodaṇḍayugalaṃ kāmāgnivyāpako'ṅkuśaḥ || iti || 2 ||

adhunā svātmani stutikartakatābhimānaṃ nirasyan stotṛṣu svakalanāyāṃ 
vrīḍāmāviṣkaroti- 

devi ! stutivyatikare kṛtabuddhayaste vācaspatiprabhṛtayo'pi jaḍībhavanti |
tasmānnisargajaḍimā katamo'hamatra stotraṃ tava tripuratāpanapatni ! kartum || 3 ||

he tripuratāpanapatni ! tripuro nāma daityastasya tāpano dāhakaḥ śivastasya patnī 
tadaviyuktavapustatsambodhanaṃ he parabrahmamahiṣi ! devi ! 
śivādidharaṇyantajagatsargādikrīḍātatpare ! te tava stutivyatikare 
tvadguṇavarṇānārūpastavanavyāpāre kṛtabuddhayastīkṣṇakuśāgradhiṣaṇā 
vidvāṃso vācaspatiprabhṛtayo bṛhaspatyādayo'pi jaḍībhavanti ajaḍā api santo 
jaḍāḥ saṃpadyante mūkībhavanti | yato vāco nivartante aprāpya manasā saha 
(śāṃḍi0 2-3) iti śruteḥ | teṣvapi tvadrūpāyā vācastvadicchāyā 
ṛte prasarābhāvāditi yāvat tatra mandamatīnāṃ mādṛśānāṃ kimu vaktavyaṃ 
api śabdena vedā apyasamarthāḥ iti | yataste vidhimukhena 
pratipādayitumudyatāśca sthūlārundhatīnyāyena taṭasthalakṣaṇarītyaiva satrapaṃ 
nirdiśanti | yaduktaṃ śivastave śrīmadācāryabhāskararāyapādai- 

sarvajñāḥ śrutayo'pi yāḥ paraśiva tvatprāṇarūpāḥ priyāḥ śṛṅgagrāhikayā 
trapābhṛta iva tvāṃ na prajalpanti tāḥ |
anyāneva tu netineti bahuśo vācā niṣedhanti cet 
ko'nyastvāmidamitthamityanuvadettatrāpi mādṛgjanaḥ ||

iti | granthakṛtāpi pañcame stave 

śrutīnāṃ mūrdhānaḥ prakṛtikaṭhināḥ komalatare |

p. 7)

kathaṃ te vindante padakisalaye pārvati ! padam || (ślo0 24)

ityuktam tasmāddhetoḥ atra vācaspatyādikṛtabuddhitvagaṇanāyāṃ prastutāyāṃ 
tava stotraṃ laukikaguṇānuvādaḥ sa ca ṣaḍvidhaḥ | taduktam- 

namaskārastathāśīśca siddhāntoktiḥ parākramaḥ |
vibhūtiḥ prārthanā ceti ṣaḍvidhaṃ stotralakṣaṇam ||

iti | pragītamantrasādhyakaguṇiniṣṭhaguṇābhidhānaṃ vaidikaṃ stotraṃ vā 
kartumahaṃ teṣāṃ vācaspatyādīnāṃ madhye katamo na ko'pi gaṇanāyārhaḥ 
ayamasāviti nirdhāraṇīyaḥ | yato nisargajaḍimā svabhāvata eva jāḍyayukto 
mandamatiḥ vācaspatyādīnāmapyavyāpārye vastuni vyāpāracikīrṣā 
cāñcalyānmama mahatī trapetyarthaḥ | yaduktaṃ śrīlalitāstavaratne- 

kastu kṣitau paṭīyānvastu stotuṃ śivāṅkavāstavyam |
astu cirantanasukṛtaiḥ prastutakāmyāya tanmama purastāt ||

iti || 3 || 

nanvevamaśakyastotrakaraṇe kathaṃ tava cikīrṣodyama ityāśaṅkya 
bhaktirasavaivaśyaṃ svasya dyotayati- 

mātastathāpi bhavatīṃ bhavatīvratāpavicchittaye stutimahārṇavakarṇadhāraḥ 
[stavamahārṇaveti pāṭhāntaram |] |
stotuṃ bhavāni ! sa bhavaccaraṇārabindabhaktigrahaḥ kimapi māṃ mukharīkaroti || 4 
||

he mātarviśvajanani ! bhavāni ! bhavasya patni ! tathāpi nisargato jaḍimnyapi bhave 
saṃsāre tīvrāṇāṃ duḥsahānāṃ tāpānāṃ trividhādhyātmikādīnāṃ kleśānāṃ 
vicchittaye vicchedaṃ kartuṃ bhavatīṃ tvāṃ stotuṃ sa svasaṃvedyo

p. 8)

bhavaccaraṇārabindayostvatpādāmbujayorviṣaye 
bhaktiratiśayagāḍhasnehastadrūpo graha 
āveśastvatpādāmbujamakarandarasanāveśapāravaśyaṃ kimapyatarkitameva 
māṃ mukharīkaroti vācāṭayati haṭhānmāṃ stotuṃ prayojayati | kīdṛśaḥ 
stutirūpo yo mahārṇavo 
niravadhigāmbharyādibhirduravagāhyamānatvānmahāsāgarastatra karṇadhāraḥ 
pāraprāpakatvātpotavāhakaḥ yathā potavāhenābdheḥ pāre nīyate tadvanmāṃ 
mandamatimapi tvadbhaktireva stuteḥ pāraṃ nayediti bhāvaḥ | atha ca vāg 
māndyamapi tāvadeva sañjātāyāṃ tvatkaṭākṣadṛṣṭyāṃ vāk 
pravāhaprasaraṇanirodhāt | yaduktaṃ bhaṭṭanārāyaṇena- 

tvayyanicchati kaḥ śambho ! śaktaḥ kubjayituṃ tṛṇam |
tvadicchānugrahītastu vahed brāhmīṃ dhuraṃ na kaḥ || (sta0 ci0 93) || 4 ||

nanu viṣṇuviriñcyādaya eva viśvasargādikāritvāt stutyāḥ 
nāhamityāśaṅkyāha- 

sūte jaganti bhavatī bhavatī bibharti jāgarti tatkṣayakṛte bhavatī bhavāni |
mohaṃ bhinatti bhavatī bhavatī ruṇaddhi līlāyitaṃ jayati citramidaṃ bhavatyāḥ || 5 ||

he bhavāni ! bhavatī jaganti śivādikṣityantaṣaṭtriṃśattattvātmakāni sūte sṛjati | 
yato vā imāni bhūtāni jāyante yena jātāni jīvanti yatprayantyabhisaṃviśanti tad 
brahmeti (taitti0 3-1) śruteḥ | tasmādvā etasmādātmana ākāśaḥ 
saṃbhūta ākāśādvāyurvāyoragniragnerāpo'dbhyaḥ pṛthivīti 
kṣityantasargaśruteḥ (taitti0 2-1-1) | yathā 
sudīptātpāvakādvisphuliṅgāḥ sahasraśaḥ prabhavante sarūpāḥ | 
tathākṣarādvividhāḥ saumyabhāvāḥ prajāyante tatra caivāpi yāntīti śruteḥ | 
yathāgneḥ kṣudrā visphuliṅgā vyuccarantīti ca (bṛha0 2-1-20) 
| yājñavalkyasmṛtirapi-

p. 9)

niḥsaranti yathā lohapiṇḍāttaptāt sphuliṅgakāḥ |
sakāśādātmanastadvadātmānaḥ prabhavanti hi ||

iti | sṛjyaṃ tvantastādātmyenāvasthitameva anyathā 
tadviṣayaparāmarśānupapatteḥ yaduktam- 

svāminaścātmasaṃsthasya bhāvajātasya bāsanam |
astyeva na vinā tasmādicchāmarśaḥ pravartate || (ī0 pra0 1-5-10)

iti | sadevasaumyedamagra āsīt (chāṃ0 u0 6-2-1) 
ekamevādvitīyaṃ brahma iti śruteḥ | (paiṅgalo0 1-1) agre'pi 
vakṣyate- 

śivādikṣityantaṃ trivalayatanoḥ sarvamudare tavāste (sa0 ja0 sta0 29) iti 
bahvasyāṃ prajāyeyeti tadātmānaṃ svayamakuruta iti śrutericchāmātreṇaiva 
kramatāratamyato viśvotpādanāt |

svecchayā svabhittau viśvamunmīlayati (pra0 hṛ0 sū0 2) iti
citiḥ svatantrā viśvasiddhiheturiti (pra0 hṛ0 sū0 1)
svecchayaiva jagatsarvaṃ nigiratyudgiratyapi 

tathā- jagaccitraṃ samālikhya svecchātūlikayātmani iti bhuvanāni 
śaivāgamaprakriyayā caturviṃśatyuttaradviśatasaṃkhyakāni prakriyāntarato 
bhūrbhuvaḥsvarlakṣaṇāni vā caturdaśa vā bhuvanādhvatmakāni sūte sṛjati 
bhavatyā brāhmīśaktirūpayānāviṣṭasya brahmaṇo 
jagatsarjanakriyāyāmaśaktatvāt śaktivihīnasya 
pāṣāṇādijaḍaprāyatvātspandābhāve tatra paramukhaprekṣitvātpāratantryaṃ 
suspaṣṭamato vastuto jagatsarjanādikaṃ bhavatyeva tattacchaktisvarūpā vidhatte 
ityarthaḥ | bhavatyeva tāni sṛṣṭāni bibharti dhārayati poṣayati ca 
arthādvaiṣṇavīśaktirbhūtvā tatkāryaṃ kurute | prāgvadviṣṇorapi 
tacchaktyāveśaṃ vinā svakāryasampādanāsāmarthyāt | atra bhavatīti 
padasyāsakṛdāmreḍanenāvadhāraṇārtho'vadhāryastena bhavatyeva nānyā 
ityarthaḥ | evamagrato'pi boddhavyam | tathā teṣāṃ sṛṣṭadhṛtapuṣṭānāṃ 
jagatāṃ 

p. 10)

kṣayakṛte yathākālaṃ yathāsvaṃ ca saṃhartuṃ bījātmanā svasminnavasthātuṃ 
na tu sarvathā vilayaṃ sampādayituṃ bhavatyeva jāgarti jāgarūkāsti na tu 
kādācitkīṃ pramādāvasthāṃ tatra samāśrayate | atrāpi pūrvavadraudrīśaktirūpā 
saṃpadya saṃhṛtyādhiṣṭhātū rudrasya kāryaṃ karotīti jñeyam | evaṃ 
bhavatyeva mohamapūrṇammanyatātmakamāṇavamala##-
tamomohaprabhṛtayo viparyayā śaktituṣṭisiddhyākhyāḥ pañcāśat pratyayā 
upalakṣyante yaduktaṃ viṣṇupurāṇe-

tamo moho mahāmohastāmisro hyandhasaṃjñitaḥ |
avidyā pañcaparvaiṣā prādurbhūtā mahātmanaḥ ||

iti | jyeṣṭākhyā śaktiḥ saṃbhūya svakiraṇacayavisphāraṇena 
paraśaktipātaviddhānaṇunmohābdhinimmagnān uddharantī 
sadāśivākhyapañcamakāraṇakāryaṃ kalpayatītyarthaḥ | tathaiva bhavatī ruṇaddhi 
paraśaktyanāghrātatvānmāyāndhāñjantūṃstirodadhāti svasvarūpāvaraṇaṃ 
karoti | atreśvarākhyakāraṇapade aiśvaryākhyaśaktyā 
pūrvavattatkāryasampādanāt | etena caturthaṃ kṛtyamabhihitaṃ jñeyam | 
taduktaṃ bhāgavate- 

śaktiḥ karoti brahmāṇḍaṃ sā vai pālayate'khilam |
icchayā saṃharatyeṣā jagadetaccarācaram ||

na viṣṇurna haro nendro na brahmā na ca pāvakaḥ |
nārko na varuṇaḥ śaktāḥ sve sve kārye kathañcana ||

tayā yuktā hi kurvanti svāni kāryāṇi te surāḥ |
kāraṇaṃ sarvakāryeṣu pratyakṣeṇāvagamyate ||

ityanena sarjanādikartṛtvaṃ pratyakṣādibhiḥ pramāṇaiḥ śaktereva 
prasiddhamityuktaṃ bhavati | anyatrāpi- 

śivo'pi śavatāṃ yāti kuṇḍalinyā vivarjitaḥ |
śaktihīno'pi yaḥ kaścidasamarthaḥ smṛto budhaiḥ ||

p. 11)

iti | itīdaṃ pañcakṛtyātmakaṃ kāryaṃ citramāścaryaṃ vicitraṃ ca 
bhavatyāstava līlāyitaṃ līlā anyaprayojananimittako vyāpāraḥ 
svapramodātiśayahetuko vā tadāvaraṇaṃ khelāyitaṃ līlayā ceṣṭitamanāyāsena 
kṛtamityarthaḥ | taduktaṃ bhāskararāyeṇa svakṛtadevīstave- 

vidhiviṣṇumukhāmarodayasthitināśeṣu śivo'pyanīśvaraḥ |
jagadamba ! tava tvayaṃ kramaḥ kṣaṇamuddālakapuṣpabhañjikā ||

uddālaketi krīḍāviśeṣasya nāmadheyam | jayati āhlādarasātirekātsātiśayena 
vartate | svecchayā svabhittau viśvamunmīlayatītyuktasthityā 
nirbharānandarasapravāhaghanocchalitametaditi bhāvaḥ | atrāyamāśayaḥ 
agnīṣomamayī parāśaktiḥ svarūpagopanātmikāyāṃ līlāyāmapi 
svapratyabhijñālakṣaṇaṃ kṛtyapañcakamanuśīlayantī tena cidānandaghanaṃ 
svātmānavamabhāsayediti | taduktam- 

namaḥ śivāya satataṃ pañcakṛtyavidhāyine |
cidānandaghanasvātmaparamārthāvabhāsine || (pra0 hṛ0 ślo0 9)

iti pratyabhijñāhṛdaye tathāpi tadvatpañcakṛtyāni karoti (sū0 10) | 
teṣāṃ lakṣaṇāni ca tatraiva ābhāsanaraktivimarśanabījāvasthāpanatastānīti 
(sū0 11) || 5 ||

evaṃ tāvat bhagavatīprasādapātrībhūtādapi anye tadāśaṃsava iti vacobhaṅgyā 
tanmahimādbhutatvaṃ dhvanayannāha- 

yasminmanāgapi navāmbujapatragauri ! gauri ! prasādamadhurāṃ 
dṛśamādadhāsi |
tasminnirantaramanaṅgaśarāvakīrṇasīmantinīnayanasaṃtatayaḥ patanti || 6 ||

he navāmbujapatragauri ! navaṃ nūtanaṃ sadyaḥ praphullaṃ yadambujaṃ kamalaṃ 
tasya 

p. 12)

yāni patrāṇi snigdhāruṇavarṇāni dalāni tadvadgauro varṇo yasyāstatsambodhanaṃ 
ata evānuguṇāmantraṇaṃ he gauri ! kātyāyani ! iti | taduktaṃ devī purāṇe- 

yogāgninā tu yā dagdhā punarjātā himālayāt |
śaṃkhakundenduvarṇā ca tasmādgaurīti sā smṛtā ||

itīyaṃ kānyakubjapīṭhādhiṣṭhātrī gaurī vā | taduktaṃ pādme- 

kānyakubje tathā gaurī iti |

athavā brahmājñayā yadā devī svātmānaṃ śuklakṛṣṇavarṇatvenābhāsitavatī 
tadā gaurītyādināmnā prasiddhābhūt | taduktaṃ vāyupurāṇe- 

tatra yā sā mahābhāgā śaṃkarasyārdhakāyinī |
kāyārdhaṃ dakṣiṇaṃ tasyāḥ śuklaṃ vāmaṃ tathā sitam ||

ātmānaṃ vibhajasveti proktā devī svayambhuvā |
tadaiva dvividhā bhūtvā gaurī kālīti sā dvijāḥ ||

iti | yasminnanugrāhye dāsajane prasādenaguṇenānugraheṇa ca madhurāṃ 
mādhuryopetāṃ manojñāṃ hṛdyāṃ cetyarthaḥ | manāk api 
dṛśamanukampārasārdraṃkaṭākṣamādadhāsi nihitavatī asi | samīpye 
vartamānavatprayogaḥ | tasmiṃstvad apāṅgadṛksampātabhājane jane'naṅgasya 
smarasya śarairaśokādikusumamayaiḥ pañcasaṃkhyairbāṇairavakīrṇā āviddhā 
yāḥ sīmantinyaḥ kāmajvarārtāḥ kāminyastāsāṃ nayanasantatayo locanapaṅktayo 
nirantaramavirataṃ yathā tathā patanti anaṅgajvaraśāntyarthaṃ tāstaṃ prati 
sarasaṃ dṛśo nibadhnanti ityarthaḥ | atra dṛkpātakārye kāraṇatvena 
tvayyekasyāṃ sthitāyāṃ satyāmanyāsāmapi khale kapotikānyāyena dṛkpātāḥ 
syuriti saṃdarbhavicchityā samuccayo'laṅkāraḥ | atrānaṅgapadena smarasya 
kenāpi pratidvandvinā'pratiyogitvamaśarīratvāt | ata eva 
tāsāmabalānāmupāyāntarābhāvāttadduḥkhaśāntaye 
sākṣādduḥkhāpanodanāmbāprasādadṛglābhābhāvāttadanugṛhītajana##-

p. 13)

spṛhaṇīya iti jñeyam | atha ca dvitīyabījopāsanāphalamapi sarvavaśīkāra iti || 6 ||

adhunā prakhyātasamrāṇnidarśanarītyā bhaktimataḥ protsāhayan 
pādārabindarajomāhātmyamāvedayati- 

pṛthvībhujo'pyudayanapravarasya tasya vidyādharapraṇaticumbitapādapīṭhaḥ |
yaścakravartipadavīpraṇayaḥ sa eṣa tvatpādapaṅkajarajaḥkaṇajaḥ prasādaḥ || 7 ||

he devi ityadhyāhṛtya prāgvatsambodhanārtho jñeyaḥ athagā 
devīdyotanādisvabhāvā div dhātoḥ krīḍāvijigīṣādyanekārthānugamāt | sa eṣa 
prasiddhatayā sarvānubhūtatvācca tvatpādapaṅkajayostava caraṇakamalayo 
rajasāṃ parāgāṇāṃ kaṇaḥ | sūkṣmoṃ'śastajjastajjanyaḥ prasādo'nugrahaḥ | sa 
kastasya prasiddhātikrāntatayā bhavatprasādapātrībhūtasyodayanapravarasya 
naravāhanadattasya vṛhatkathāyāstatkathāmūlatvāt | pṛthvībhujo'pi 
mahīmātrabhujo'pi rājño yaścakravartipadavyāḥ sārvabhaumapadasya praṇayaḥ 
prāptiḥ samapadyateti śeṣaḥ | kīdṛśaḥ vidyādhareti- 

pādukākhaḍgavetālasiddhadravyamanaḥśilāḥ |
añjanaṃ vivaraṃ caiva ceṭakaṃ yakṣiṇīṃ tathā |
yatkiñcitsiddhinicayaṃ vidyate bhuvanatraye |

iti vāmakeśvaroktanītyāsiddhividyānāṃ dhārakā vidyādharāḥ | yadvā vidyā 
śikṣākalpādayo'ṣṭādaśa tāsāṃ 
paṭhanapāṭhanādipracayagamanatadarthānuṣṭhānādinā dharā dhārakā 
vidyādharā vidvāṃsaḥ yaduktaṃ vāyavīyapurāṇe- 

aṅgāni vedāścatvāro mīmāṃsānyāyavistaraḥ |
purāṇaṃ dharmaśāstraṃ ca vidyāḥ hyetāścaturdaśa ||

p. 14)

āyurvedo dhanurvedo gāndharvaścetyanukramāt |
arthaśāstraṃ paraṃ tasmādvidyāstvaṣṭādaśa smṛtāḥ ||

iti | ye tvatra vidyādharā devaviśeṣā ityāhustannirmūlam | prakṛte 
vidyādharadevajātīrājyalābhāprasiddheḥ | teṣāṃ praṇatibhiḥ 
praṇāmaiścumbitaṃ spṛṣṭaṃ pādapīṭhaṃ pādādhaḥsthitamāsanaṃ yasya sa 
sāmrājyaṃ prāpya pādapīṭheṣu tairnirantaraṃ praṇataḥ ityarthaḥ | 
evametādṛśo'nugrahavipākastvaccaraṇarajaḥsaṃparke kimu 
tvatkṛpākaṭākṣapāte iti bhāvaḥ | ayamatrāśayaḥ udayanapravaraḥ 
sāmānyakulotpannaḥ nṛpaḥ kaścinmahādevyanugrahāccakravartitvamavāpya 
mahābhogaiśvaryasampadaṃ bheje iti | api śabda āśvaryadyotako | atrāpi 
kāmarājopāsanāyāḥ phalakathanamūhyam | kāmarājasādhanādiphalaṃ tu 
vāmakeśvare- 

tatastu śṛṇu deveśi ! kāmarājasya sādhanam |
tathā kāmakalārūpā madanāṅkuragocare ||

udyadādityabimbābhā samujjvalavapuḥ priye |
sphuraddīpaśikhākārā bindudhārāpravarṣiṇī ||

samastabhuvanābhogakavalīkṛtajīvitā |
mahāsvamahimākrāntisvasthāhaṅkṛtibhūmikā ||

krameṇa tu tato'naṅgaparyantaṃ prollasantyapi |
śarīrānaṅgaparyantamekaivamubhayātmikā ||

tato bhavati deveśi ! sarvaśṛṅgāramāninām |
rāgiṇāṃ sādhako devi ! bādhako madanādhikaḥ ||

taddṛṣṭipathagā nārī surī vāpyatha vāsurī |
vidyādharī kinnarī vā yakṣī nāgāṅganā'thavā ||

pracaṇḍatarabhūpālakanyakā siddhakanyakā |
jvalanmadanaduṣprekṣyadahanottaptamānasā ||

klinnā pracalitāpāṅgā vimūḍhā madavihvalā |
niveditātmasarvasvā vaśagā devi ! jāyate ||

p. 15)

calajjalendusadṛśī bālārkakiraṇāruṇā |
cintitā yoṣitāṃ yonau saṃbhakṣoyati tatkṣaṇāt ||

saiva sindūravarṇābhā hṛdaye cintitā satī |
saṃmohonmādanāviṣṭacittākarṣakarī smṛtā ||

niyojitāthavā mūrdhni varṣantī raktabindubhiḥ |
dhāraṇasaṃprayogena karoti vaśagaṃ jagat ||

athānyaṃ śṛṇu vakṣyāmi prayogaṃ bhuvi durlabham |
yena vijñātamātreṇa sādhako madanāyate ||

kāmasthaṃ kāmamadhyasthaṃ kāmodarapuṭīkṛtam |
kāmena kāmayetkāmaṃ kāmaṃ kāmeṣu nikṣipet ||
kāmena kāmitaṃ kṛtvā kāmasthaṃ kṣobhayeddhruvam |

iti || 7 ||

evaṃ kavīnāmapi nirargalasārasvatasūktilābhadvārā kīrtirapi cirasthāyinī 
tvatpādaprasādajaṃ phalamityāha-

tvatpādapaṅkajarajaḥpraṇipātapūtaiḥ [pūrvairiti pāṭhāntaram |] 
puṇyairanalpamatibhiḥ kṛtibhiḥ kavīndraiḥ |
kṣīrakṣapākaradukūlahimāvadātā kairapyavāpi bhuvanatritaye'pi kīrtiḥ || 8 ||

he devi ! tvatpādapaṅkajayostava caraṇakamalayo rajobhiḥ parāgapuñjaiḥ 
praṇipāteṣu praṇatiṣu mūrdhasaṃparkātpūtaiḥ pavitritadehairata eva puṇyaiḥ 
puṇyakṛdbhistvatpādārcanarūpaśubhakarmakāritvādityarthaḥ | analpā amandā 
matayo buddhayo yeṣāṃ taiḥ kṛtibhiḥ kṛtaprajñairvidvadbhirataḥ kavayaḥ 
kāvyādiracanākauśalavantasteṣāmindraiḥ prāptamahākavipadavīkaiḥ kairapi 
viralatvātkatipayaiḥ 
śrīharṣamāghabāṇabhaṭṭakālidāsādiprabhṛtibhirbhuvanatraye'pi 

p.16)

trailokyāmapi kṣīraṃ payaḥ kṣapākaraḥ sudhāṃśurdukūlaścīnāṃśukaṃ himaṃ 
tuṣārastadvadavadātā śuklavarṇā kītiryaśo'vāpi prāptā | atra samuditānāṃ 
bahuśuklavastūnāṃ saṃbhūya śauklyaguṇātiśayapariṇāmāditi 
bahūpamānāśrayeṇa nirupamaśauklyaguṇādhikyaṃ tatkīrtau dhvanyate | arthāt te 
kavayo mahādevīprasādādhigatasārasvatasudhābdhisāraprasarannirargala##-
śṛṅgārādirasajīvitāni kāvyāni nibadhya divaṃ gatā api kīrtiśarīraiściraṃ 
sthāyibhiradyāpi bhūmau jīvantīveti | anena vāgbhavopāsanāphalakīrtanaṃ sūcyate 
iti || 8 ||

na kevalaṃ manuṣyāṇāmeva bhogaiścaryasaṃprāptyarthaṃ 
devyārādhanāpekṣamāṇatvaṃ yāvatsamṛddhānāṃ devānāmapi 
tadyogakṣemodvahanāyeti sūcayan devīprītyatiśayāpādanāya 
lokāprasiddhamupacāropakaraṇamāha-

kalpadrumaprasavakalpitacitrapūjāmuddīpitapriyatamāmadaraktagīti [gītimiti 
pāṭhāntaram] |
nityaṃ bhavāni ! bhavatīmupavīṇayanti vidyādharāḥ kanakaśailaguhāgṛheṣu || 9 
||

he bhavāni ! bhavaṃ mahādevaṃ saṃsāraṃ kāmaṃ vā ānayati jīvayati 
prakāśajīvitaprāyatvādatidurghaṭakārisvātantryātmakatvāt 
vilāsasārasaundaryākāratvādvā bhavānī tasyāḥ sambuddhiḥ kanakaśailasya 
hemādrerguhāgṛheṣu darīprāsādeṣu nityamanavarataṃ vidyādharā devajātayaḥ 
vidyāyā guṭikāñjanakhaḍgapādukādiviṣayiṇyā dharā 
dhārakāstvatprasādābhilāṣitvāt bhavatīṃ tvāmupavīṇayanti vīṇābhiḥ samīpe 
tālalayādisamucitapañcamagrāmādinā gāyanti saṅgītena prīṇayantītyarthaḥ | 
kvanadvīṇākalaravasāhitye

p. 17)

hi gīte'tyarthamalaukikānandarasāpūranimagnacittatayā śrotuḥ prītyatiśayaḥ 
saṃjāyate ityato vīṇopakaraṇasya tairāśrayaṇīyatvāttatrāpi 
nisargamadhurasvarāṇāṃ kāminīnāmasphuṭākṣarakalakākalīsamuddīpitasaṅgīte 
kimu vaktavyam ! kīdṛśīṃ bhavatīṃ kalpadrumāṇāṃ 
pārijātasantānādivṛkṣāṇāṃ prasavaiḥ sphuratsaurabhakusumaiḥ kalpitā kṛtā 
citrapūjā yasyāstāṃ vicitravarṇakusumaprakaraiḥ kriyamāṇā pūjā 
citrapūjetyucyate | athavā citraśabdena nānāvidhopacārā lakṣyante tena 
pañcopacārā ṣoḍaśopacārā vā pūjetyarthāntaram | etena pūjānantaraṃ 
saṃgītāderavakāśa ityabhihitam | kathamupavīṇayantītyāha uddīpitā aujjvalyaṃ 
nītāḥ priyatamānāṃ preyasīnāṃ vidyādharīṇāṃ madena 
divyasudhāpānajanyenānandollāsena raktā madhurakaṇṭharāgayuktā gītayaḥ 
saṃgītārthaprabandharacanāviśeṣā yatra tat iti kriyāviśeṣaṇam | rāgāstu vasanta 
gūrjara karṇāṭa gauḍādyabhidhānāḥ ṣaḍjamadhyamādisaptasvarānubandhinaḥ 
saṅgītaśāstreṣu prasiddhāḥ | vīṇetyupalakṣaṇaṃ tena mṛdaṅgavaṃśādīnyapi 
vādyāni gṛhyante | ayaṃ bhāvaḥ citrapūjāvasāne 
raktakaṇṭhībhirvidyādharībhistaruṇānandollāsopetakalamadhurasvaraṃ 
saṃgāyantībhiḥ saha tauryatrikakalākauśalyena vidyādharā 
vīṇāvaṃśaghanamṛdaṅgādivādanaistvāṃ harmyeṣu samārādhayantīti 
tanmāhātmyātteṣāmadhikabhogaiśvaryasaṃpattaya iti || 9 ||

atha bhagavatīcaraṇaprasādasya phalāni prastauti- 

lakṣmīvaśīkaraṇakarmaṇi kāminīnāmākarṣaṇavyatikareṣu ca siddhamantraḥ |
nīrandhramohatimiracchidurapradīpo devi ! tvadaṅghijanito jayati prasādaḥ || 10 ||

he devi ! lakṣmyā dhanabhūhastyaśvagavādisaṃpadaḥ padmāyā vā 
vaśīkaraṇakarmaṇi yāvajjīvavidheyatārūpavaśīkaraṇakriyāyāṃ tathā 
kāminīnāṃ dūrasthitānāmapyaṅganānāmākarṣaṇavyatikareṣu 
cākṛṣṭivyāpāreṣvapi 

p. 18)

siddhamantraḥ siddhaḥ pūrvasevārūpayā pañcāṅgapuraścaryayā 
tattanmantrārṇaguṇitalakṣasaṃkhyajapādipuraḥsaraṃ sādhito 
yathepsitakāmyakarmaprayogārhīkṛto mantro mananatrāṇātmako vidyādirūpaḥ | 
siddhamantrasyaiva prayogārhatvādavilambena phalasaṃpatteriti bhāvaḥ | tathā ca 
vāmakeśvare-

tadāśābhimukho bhūtvā tripurīkṛtavigrahaḥ |
baddhvā tu kṣobhiṇīmudrāṃ vidyāmaṣṭaśataṃ japet || ityādi |
bhramantīmānayennārīṃ yojanānāṃ śatairapi | ityantam |

nanu kimidamākarṣaṇaṃ sādhakasya svīyāyāḥ parakīyāyāḥ vā striyaḥ ādye 
nairantaryeṇa svasamīpasthāyāḥ svādhīnatvād 
duḥsādhyatvābhāvādākarṣaṇavaiyarthyācca | na ca kautukaprayojanā 
pravṛttirastu iti vācyaṃ duṣprāpāmantaḥpurasthāṃ parakīyāṃ pratyeva 
kutukapradarśanāt | dvitīye tvadharmasya vidhivihitatvābhāvādanupapatteḥ | ataḥ 
svakīyāyāḥ evānicchantyā balātkāreṇāharaṇādinā nimittena duḥsādhatāyāṃ 
vidhivākyānāṃ sāmarthyaṃ syāt | asti ca pīṭhamāhātmyeṣu itihāsaḥ- 

nārāyaṇākhyasya munerbhāryāṃ candravadanākhyāṃ śaktātmajena 
seturājenāpahṛtāṃ munirdevīmārādhyaivājahāreti | athavā parakīyākarṣaṇasya 
dharmāvirodhenaiva phalāntaraṃ kalpyam | astu vā sambhogārthamevākarṣaṇaṃ 
tathāpi bhāvanābhāvyatvenaivānvayānna vidheyatvam | taduktaṃ tantravārtike- 

phalāṅgabhāvanāyāśca pratyayo'tividhāyakaḥ |
vakṣyate jaiminiścātra tasya lipsārthalakṣaṇe ||

iti vihitatvābhāvācca na parakīyābhilāṣasyādharmatvaṃ tatkaraṇabhūte 
prakṛtaprayoge tu śyenayāga iva dharmatvam | yāni tu sarvāsāmeva yoṣāṇāṃ 
kaulikaḥ patirityādīni śyāmārahasyakārairlikhitāni tadarthaniṣkarṣarītyā tu 
dharmatvaṃ gurumukhādevāvagantavyamiti śrībhāskararāyapādāḥ | tathā 
nīrandhraṃ niviḍaṃ yanmoharūpamavivekātmakaṃ timiraṃ 
tamastasyacchiduraśchedako vidāraṇaḥ pradīpaḥ 
prakṛṣṭo'jñānahāritvātprakāśako

p. 19)

dīpaḥ yathā dīpastamo'paharati tadvadayaṃ tvadīyaḥ prasādaḥ 
saṃsārābdhinimajjanahetvajñānasaṃharaṇakṛdityarthaḥ | athavā prakarṣeṇa 
vyomni dīpyate dīpayati vā viśvapadārthāniti pradīpo'rko mohadhvāntahārītyevaṃ 
bhūtastvadaṃghrijanitastavāṅghribhyāṃ pādāmbujābhyāṃ janitaḥ 
prasādo'nugraho jayatyuttarottaraṃ sātiśayasatphalavitaraṇakuśalo vartate | 
yaduktam-

asaubhāgyaṃ dhatte paramasukhabodhāspadamayaṃ vicitraṃ tadgehaṃ bhavati 
pṛthukārtasvarabhṛtam |
niviṣṭaḥ paryaṅke sakalayati kāntārataraṇaṃ prasādaṃ kopaṃ vā janani ! bhavatī 
yatra kurute ||

ityatra prasādapakṣe'sāviticchedaḥ | kārtasvaraṃ svavarṇam palyaṅko mañcaḥ 
kāntārasya taraṇam | kopapakṣe tu asaubhāgyamityekaṃ padam | ayamiti chedaḥ 
vicitraṃ vigatacitraṃ pṛthukānāmārtasvaraḥ | palyā aṅke kāntāyā rate 
raṇamitiśleṣeṇayojyam | itthaṃ prāptatvatpādānugrahaśālināṃ bhogamokṣau 
nirargalaṃ sulabhāvityanenābhidhīyate | etādṛśaprakāraḥ 
śrīsundarīpādārabindārcanaparāṇāṃ viralānāṃ keṣāṃcideva bhavati 
dhanyānāṃ | yaduktam- 

yatrāsti bhogo na ca tatra mokṣo yatrāsti mokṣo na ca tatra bhogaḥ |
śrīsundarīpūjanatatparāṇāṃ bhuktiśca muktiśca karasthitaiva ||

ityatra śrīvidyākūṭopāsanāphalavaiśiṣṭyaṃ 
mukhyatayābhidhātumabhipretatamityūhyam || 10 ||

surastriyopi tvaccaraṇaprasādamāśaṃsamānā ityāśayenāha- 

devi tvadaṅghinakharatnabhuvo mayūkhāḥ
pratyagramauktikaruco mudamudvahanti |

p. 20)

sevānativyatikare surasundarīṇāṃ
sīmantasīmni kusumastabakāyitaṃ yaiḥ || 11 ||

he devi ! tvadaṅghrinakhāstava pādayoḥ nakhāḥ eva ratnāni bhuvo bhūmaya 
utpattisthānāni yeṣāṃ te ratnebhyo bhavantyutpadyante iti vā mayūkhāḥ 
pannakharaktakiraṇāḥ pratyagrāṇāmabhinavānāṃ mauktikānāṃ 
muktāmaṇīnāmiva rug gauravarṇā kāntiryeṣāṃ te ata eva 
pādābjadidṛkṣecchāvatāṃ bhaktānāṃ hṛdi mudamānandotkarṣamudvahanti 
samullāsayanti | yaiḥ sevāyāṃ śuśrūṣākāle nativyatikare 
pādābhivandanavyāpṛtau surasundarīṇāmamaralalanānāṃ ye sīmantāḥ 
keśavinyāsāsteṣāṃ sīmni prāntadeśe kusumastabakāyitaṃ 
puṣpamañjarīgucchāyitaṃ puṣpastabakamivācaritamityarthaḥ | keśakalāpeṣu 
kusumāni dhāryante iti hi subhagāṅganānāmācāraḥ | amarīkavarīṇāṃ 
śyāmavarṇatvāttatra nakhamayūkhānāṃ śuklatvātkusumastabakarūpeṇa 
pariṇāmaḥ iti yāvat | vikāsonmukhāḥ kalikāḥ stabakāḥ || 11 ||

atha sthānaviśeṣatastridhā pariṇataṃ śaktitejaḥ pratyakṣavyāpāreṇāvadhārayan 
svātmanastatpratyabhijñammanyatāṃ dyotayati- 

mūrdhni sphurattuhinadīdhitidīptidīptaṃ madhye lalāṭamamārāyudharaśmicitram |
hṛccakracumbi hutabhukkaṇikānurūpaṃ jyotiryadetadidamamba ! tava svarūpam || 
12 ||

he amba ! idaṃ jyotiḥ-

taddevā jyotiṣāṃ jyotirāyurhopāsate'mṛtam |

iti bṛhadāraṇyakaśruteḥ (bṛha0 4-4-16) | paraṃ śāktaṃ 
tejaḥ na tatra sūryo bhātīti (kaṭho0 5-15) na tadbhāsayate sūryaḥ 
(bha0 gī0 15-6) iti śrutismṛtiprasiddhaṃ yena sūryastapati 
tejaseddhaḥ iti | paraṃ 

p. 21)

jyotirupasaṃpadya iti (chāṃ0 u0 8-3-4) manojyotirjuṣatā 
mityādiśrutiprayogātprakāśasvabhāvasyāsya paratvamucyate | tava svaṃ 
rūpamasādhāraṇaṃ rūpam svasaṃvedyamidaṃ kimityāha- yadetanmūrdhni 
śirasi arthādājñācakrādyāvad brahmabilaṃ sphurantī vikasantī yā 
tuhinadīdhiterhimāṃśoḥ dīptiścandrikā tadvaddīptaṃ ramyaṃ 
hṛdayāhlādatāpapraśamananetrānandakāritvāt tathā madhyelalāṭaṃ 
lalāṭe'rthādanāhatapadādyāvadājñācakrasthānamamarāyudhasyendra##-
arthādādhārādāhṛdayaṃ hṛccakrasparśi hutabhujo'gneḥ kaṇikā 
atyalpāgnikaṇāstadvadanurūpaṃ tatsaṅkāśam | anukārīti pāṭhe'pi 
sadṛśamityarthaḥ | bhātīti śeṣaḥ | ayamāśayaḥ- 
mūlādhārasthasphurattārakākārajyotīrūpamevopāsakānāṃ sthānatritaye tathā 
tathā vaicitryeṇa bāsamānaṃ pariśīlanīyamiti | yaduktam-

yonau kanakapuñjābhaṃ hṛdi vidyucchaṭopamam |
ājñāyāṃ candrasaṃkāśaṃ mahastava maheśvari ||

iti | etena trayāṇāṃ bālāvidyābījānāmapi sthānavarṇadhyānāni sūcitāni | etat 
prathamastave prathamaśloke vitatya darśitam || 12 ||

idānīṃ kāmeśvaryā dhyānaviśeṣaṃ vaśīkārānuguṇaṃ prastauti- 

sindūrapāṃsupaṭalacchuritāmiva dyāṃ tvattejasā jaturasasnapitāmivorvīm |
yaḥ paśyati kṣaṇamapi tripure ! vihāya vrīḍāṃ mṛḍāni 
sudṛśastamanudravanti || 13 ||

he tripure ! tribhyaḥ purābhūtatvādityādi tripurāpadanirvacanaṃ bodhyam | atha ca 
trayāṇāṃ mātṛmānameyānāṃ puraṃ nagaraṃ tadātmikā śrīlalitāmbā 
tisṛbhyo mūrtibhyaḥ purābhūtatvāt tripureti | taduktam-

mūrtitrayasyāpi purātanatvāttadambikāyāstripureti nāma iti | 
yadāhugauṃḍapādāḥ

p. 22)

tattvatrayeṇābhidyateti ekameva brahma tattvatrayeṇābhidyatetyarthaḥ | tattvapadaṃ 
guṇamūrtibījajagatpīṭhakhaṇḍādipurātvena bahudhā vyākhyātamiti guṇādibhyaḥ 
puretyarthaḥ | kālikāpurāṇe tu- trikoṇamaṇḍalaṃ cāsyā ityādi prastutya 
sarvaṃ trayaṃ trayaṃ yasmāttasmāttattripurā matā iti | ācāryapādairapi- 
devānāṃ tritayaṃ trayī hutabhujāmi ityādi śloke svayamapi tathaivoktam | 
tvattejasā tvaccharīrotthāruṇakāntyā dyāṃ vyoma sindūrapāṃsūnāṃ 
sindūrarajasāṃ paṭalaiḥ puñjaiśchuritāṃ khacitāṃ rañjitāmiva tathorvīṃ 
pṛthivīṃ jaturasena lākṣādraveṇa snapitāmāplutāmiva yaḥ dhyānasamaye 
kṣaṇamapi paśyati dhyāyatītyarthaḥ | taṃ tvadbhāvanābhāvitamanaska 
bhaktimantaṃ dhyāyinaṃ vrīḍāṃ lajjāṃ parāpavādamaryādollaṃghanādijāṃ 
vihāya he mṛḍāni ! sudṛśo mṛgākṣyo'nudravanti anudhāvantītyarthaḥ | 
yaduktaṃ saundaryalaharyām-

tanucchāyābhiste taruṇataraṇiśrīsaraṇibhiḥ ityādi | atra tvattejasetyanena lauhityaṃ 
dhvanyate | lauhityaṃ ca vimarśastaduktaṃ kādimate- 

svātmaiva devatā proktā lalitā viśvavigrahā |
lauhityaṃ tadvimarśaḥ syādupāstiriti bhāvanā ||

iti | vāmakeśvare'pi-

svayaṃ hi tripurā devī lauhityaṃ tadvimarśanam |

iti | uktaprakāśavimarśasāmarasyātmikāyāḥ śrīmahātripurasundaryāḥ 
sthūlasūkṣmaparatvena dhyānasya trairūpyam | tatra śīrṣapāṇicaraṇādiviśiṣṭaṃ 
sthūlaṃ mantramayaṃ sūkṣmaṃ paraṃ tu vāsanāmayaṃ saṃvinmayaṃ veti | 
taduktaṃ yogavāsiṣṭe- 

sāmānyaṃ paramaṃ dve rūpe viddhi me'nagha |
pāṇyādiyuktaṃ sāmānyaṃ yattu mūḍhā upāsate ||

paraṃ rūpamanādyantaṃ yanmamaikamanāmayam |
brahmātmaparamātmādiśabdenaitadudīryate || iti |

p. 23)

sāmānyaṃ dvividhaṃ proktaṃ sthūlasūkṣmavibhedataḥ |

iti jñānārṇave'pi kāmyaprayogacarcāyāṃ- 

tadīyakāntisindūrabharitaṃ bhuvanatrayam |
cintayetparameśāni ! trailokyaṃ mohayetkṣaṇāt ||

rājāno vaśamāyānti pannagā rākṣasāḥ surāḥ |
kandarpa iva deveśi ! yoṣitāṃ mānahārakaḥ ||
manasā cintayedyoṣid dāsīva vaśagā bhavet |

iti | evaṃ kāmeśvarīdhyānena dhyāyinaḥ kāmarājakūṭopāsanāphalaṃ sūcyate | 
tadanusaraṇaparāṇāṃ kulācārabhājāṃ sudṛśāṃ maryādātikramaṇe'pi 
kuladīkṣāprabhāvānnirbandhanatayehāmutrāpi sukhaprāptirityato mṛḍānīti 
sambodhanaṃ sābhiprāyam || 13 ||

atha prakārāntareṇa saphalaṃ dhyānaṃ prapañcayati-

mātarmuhūrtamapi yaḥ smarati svarūpaṃ lākṣārasaprasaratantunibhaṃ bhavatyāḥ |
dhyāyantyananyamanasastamanaṅgataptāḥ
pradyumnasīmni subhagatvaguṇaṃ taruṇyaḥ || 14 ||

he mātaramba ! lākṣārasājjatudravātprasaro udbhavo yasya tādṛśastantuḥ 
alaktakasūtraṃ tannibhaṃ tadupamaṃ yo bhavatyāstava svarūpaṃ muhūrtamapi 
ghaṭikādvayamapi smarati dhyāyati | anaṅgataptāḥ kāmajvarapīḍitā 
ananyamanaso'nanyavṛttayastaruṇyaḥ 
kāminyastamuktalākṣārasatantunibhabhavatsvarūpadhyāyinaṃ pradyumnasya 
kandarpasya sīmni sīmāyāṃ maryādāyāṃ subhagatvaguṇaṃ 
saubhāgyaguṇavantaṃ dhyāyanti saundaryeṇa kāmanirviśeṣaṃ hṛdaye 
kāmajvaropaśamanakaraṃ cintayantītyarthaḥ | prāgvadatrāpi upāsanātatphalamapi 
jñeyam || 14 ||

p. 24)

bhaṅgyantareṇa prāguktaṃ dhyānaṃ sopāyamāha-

ādhāramārutanirodhavaśena yeṣāṃ sindūrarañjitasarojaguṇānukāri |
dīptaṃ hṛdi sphurati devi ! vapustvadīyaṃ dhyāyanti tāniha 
samīhitasiddhasādhyāḥ || 15 ||

he devi ! jagatsarjanākrīḍātatpare dyotanādisatattve vā yeṣāṃ 
hṛdyanāhatapradeśe tvadīyaṃ śaktikuṇḍalikārūpaṃ vapuḥ svarūpaṃ niṣkalaṃ 
kāmakalākhyaṃ sphurati bhāsate | kīdṛśaṃ ādhāre mūlādhāracakre mārutasya 
prāṇāpānātmakasya vāyornirodhavaśena gurūktayuktyā śaktyutthāpanapūrvaṃ 
sauṣumnena pathodgacchadvahnikuṇḍalinīsañcārapariśīlanātmakenordhvarecakena 
dīptaṃ prasphuratprakāśaṃ ata eva sindūreṇa rañjito raktaḥ sarojaguṇo 
bisatantustasyānukāri tadupamaṃ mūlādhārādyāvaddhṛdayaṃ 
raktapadmaguṇanibhaṃ vidyutkoṭidīptamityarthaḥ tāniha jagati samīhiteṣu 
bhogāpavargātmakeṣvabhīṣṭārtheṣu siddhaṃ samāsāditaṃ sādhyamupeyaṃ vastu 
yaiste samīhitasiddhasādhyā niṣkāmāḥ api dhyāyanti kimu punaḥ sakāmāḥ 
ityarthata ākṣiptaṃ bhavati | atha ca samīhitā abhīṣṭā manorathā 
bhogamokṣaparamārthaikarūpāḥ siddhāḥ saṃpannā yeṣāṃ te tādṛśāḥ 
sādhyākhyāḥ devatāviśeṣā dhyāyanti smaranti | ye sindūra iti 
prāguktadhyānānuvādarūpametat || 15 ||

pūrvoktadhyānamarkamaṇḍalagatvena saphalaṃ varṇayati- 

ye cintayantyaruṇamaṇḍalamadhyavarti rūpaṃ tavāmba ! 
navayāvakapaṅkapiṅgam |
teṣāṃ sadaiva kusumāyudhabāṇabhinnavakṣaḥsthalā mṛgadṛśo vaśagā 
bhavanti || 16 ||

he amba ! mātarye tava rūpaṃ navayāvakasya sāndralākṣārasasya 
paṅkavatpiṅgaṃ 

p. 25)

śoṇavarṇamaruṇamaṇḍalamadhyavarti arkamaṇḍalāntaḥ sthitaṃ tatra dhyeyatvāt | 
ya eṣo'ntarāditye hiraṇmayaḥ puruṣo dṛśyate (mahānā0 10-1) iti 
śruteḥ antaradhikaraṇe pratipāditatvāt | atha cārkakuṇḍalinīsthaṃ sadaiva cintayanti 
smaranti | teṣāṃ kusumāyudhabāṇabhinnaiḥ puṣpaśaraśarairbhinnaṃ viddhaṃ 
vakṣaḥsthalaṃ hṛdayaṃ yāsāṃ tā mṛgadṛśo hariṇākṣyaḥ anena 
vaiśadyarāmaṇīyakaviśālatādiguṇasāmyaṃ tāsāṃ netreṣviti gamyate vaśagā 
adhīnā bhavanti | yāvajjīvaṃ sarvasvadānādinā sevante ityarthaḥ | 
evamuktayordvayoḥ 
ślokayormadhyakūṭādhidaivatakāmeśvarībhajanaphalamūhyam || 16 ||

atha vāgīśvarīdhyānaṃ saphalaṃ nirdiśati-

rūpaṃ tava sphuritacandramarīciśubhramālokate manasi vāgadhidaivataṃ yaḥ |
niḥsīma sūktiracanāmṛtanirjharasya tasyaṃ prasādamadhurāḥ prasaranti vācaḥ || 
17 ||

he devīti prāgvat | tava rūpaṃ vāgadhidaivataṃ vākkūṭādhiṣṭhātṛmayaṃ 
vāgīśvaryātmakaṃ sphuritā viśadaprabhāvāścandramarīcayaḥ 
śītāṃśuraśmayastadvacchubhraṃ dhavalaṃ manasi hṛdi (śirasi) ya 
ālokate paśyati dhyāyatītyarthaḥ | śirasīti pāṭhāntaraṃ samucitam yataḥ 
prathamastave ye tvāṃ pāṇḍurapuṇḍarīketi 
uktavāgīśvarīdhyānasādṛśyācchiraḥsthāna eva dhyeyatvaṃ jñeyam | 
niṣkrāntaḥ sīmnaḥ sīmāyā vā niḥsīmo niravadhiḥ sūktiracanārūpaḥ 
subhāṣitasandarbhātmāmṛtanirjharaḥ 
śaityāhlādaprakarṣakāritvātpīyūṣarasapravāho yasya tasya 
samāsāditavāgīśvaryātmakabhavatprasādasya sambandhinyo vāco bhāratyaḥ 
prasādamadhurāḥ prasādākhyasāhityaguṇena madhurā mādhuryopetā 
manojñāśca prasaranti mukhānniryānti | 
pravahatsūktisudhārasamadhuravākkavirbhavatītyarthaḥ | 
vāgbhavakūṭasādhanaphalaṃ  tu vāmakeśvaratantre-

p. 26)

etasyāḥ śṛṇu deveśi ! vāgbhavasya [bījatritaya] tu sādhanam |
dhavalāmbarasaṃvīto dhavalāmbaramadhyagaḥ ||

pūjayed dhavalaiḥ puṣpairbrahmacaryarato naraḥ |
dhavalaireva naivedyairdadhikṣīraudanādibhiḥ ||

saṃkalpadhavalairvāpi yathākāmaphalapradām [yathā kāmaṃ yathā 
labhet] |
saṃpūjya parameśāni ! dhyāyedvāgīśvarīṃ parām ||

bījarūpāmullasantīṃ tato'naṅgapadāvadhi [cidānandaprabodhinīm] |
brahmagranthiṃ vinirbhidya jihvāgre dīparūpiṇīm ||

cintayennaṣṭahṛdayo grāmyo mūrkho'tipātakī |
śaṭho'pi yaḥ padaṃ [pādamekaṃ suspaṣṭaṃ] spaṣṭamakṣaraṃ 
vaktumakṣamaḥ ||

jaḍo mūko'tidurmedhā gataprajño vinaṣṭadhīḥ [pinaṣṭadhīḥ] |
so'pi saṃjāyate vāgmī vācaspatirivāparaḥ ||

satpaṇḍitaghaṭāṭopajetā'pratihataprabhaḥ |
sattarkapadavākyārthaśabdālaṅkārasāravit [ṣaṭtarka] ||

vātāhatasamudrormimālātulyairupanyaset [vātoddhūta] |
sukumāratarasphāravṛttālaṅkārapūrvakam [rītya;. pūrvakaiḥ] ||

padagumphairmahākāvyakartā deveśi jāyate |
vedavedāṅgavedāntasiddhāntajñānapāragaḥ ||

jyotiḥśāstretihāsādimīmāṃsāsmṛtivākyavit |
purāṇarasavādādigāruḍānekamantravit ||

pātālaśāstravijñānabhūtatantrārthatattvavit |
vicitracitrakarmādiśilpānekavicakṣaṇaḥ ||

mahāvyākaraṇodāraśabdasaṃskṛtasarvagīḥ |
sarvabhāṣārutajñānī [jñāna] samastalipikarmakṛt [vit] ||

nānāśāstrārthaśikṣādivettā [śilpādivedavedāṅgaviśrutaḥ | iti kā0 
pāṭhāntarāṇi] bhuvanaviśrutaḥ |

p. 27)

sarvavāṅmayavettā ca sarvajño devi ! jāyate || (4-21-33)

iti || 17 ||

nanu kimevamasakṛdvarṇanayā tavetyāśaṅkya sādhāraṇakāryoktyā 
svābhimatamapi dyotayan stauti-

śarvāṇi ! sarvajanavanditapādapadme ! padmacchadacchaviviḍambitanetralakṣmi |
niṣpāpamūrtijanamānasarājahaṃsi ! haṃsi tvamāpadamanekavidhāṃ janasya || 18 ||

śṛṇāti hinastyajñānakaluṣanikaramiti śarvāṇī tatsambodhanaṃ he śarvāṇi ! 
ajñānatamohāriṇi ! tathā sarvaiḥ 
samastairjanairjananamaraṇabhīrubhirjantubhirvanditau praṇatau pādau caraṇau padme 
iva sukumārakāntiyuktatvādyasyāstadāmantraṇaṃ sarvajanavanditapādapadme ! 
mṛtyubhayahāriṇītyāśayaḥ | padmacchadānāṃ sarojapatrāṇāṃ cchavyā 
kāntyā viḍambitopamitā netralakṣmīścakṣuḥśrīryasyāstadāmantraṇaṃ 
padmacchadacchaviviḍambitanetralakṣmi ! padmapatrāyataramyalocane 
svadṛgamṛtāsāravarṣaṇenāhvādadāyinītyarthaḥ tathā niṣpāpā 
vigalitakalmaṣā mūrtirdeho yeṣāṃ teṣāṃ janānāmanugrāhyāṇāṃ mānase 
manasyeva mānasasarovare rājahaṃsīva tadāmantraṇaṃ yathā rājahaṃso 
mānasarovare sānandaṃ viharate nivasati ca tadvatsvānugrāhyahṛdaye 
satatabhāsamānā viharantītyarthaḥ | yadvā śuklaikakarmaṇāṃ manasi virājamānā 
haṃsavarṇātmā japāmanusvarūpā haṃsamantrasvarūpā vetyarthaḥ | taduktaṃ 
śrīvidyārṇave- 

ajapārādhanaṃ devi ! kathayāmi tavānaghe |
yasya vijñānamātreṇa parabrahmaiva deśikaḥ ||

haṃsaḥ padaṃ pareśāni ! pratyahaṃ japate naraḥ |
mohabaddho na jānāti mokṣastasya na vidyate ||

śrīguroḥ kṛpayā devi jñāyate japyate yadā |

p. 28)

ucchvāsaniḥśvāsatayā tadā bandhakṣayo bhavet ||

ucchvāse caiva niḥśvāse haṃsa ityakṣaradvayam |
tasmātprāṇastu haṃsākhya ātmākāreṇa saṃsthitaḥ ||

ṣaḍbhiḥśvāsairbhavetprāṇaḥ ṣaṣṭyā tairnāḍikā matā |
ṣaṣṭināḍyā ahorātraṃ japasaṃkhyā japāmanoḥ ||

ekaviṃśatisāhasraṃ ṣaṭśatādhikamīśvari |
japate pratyahaṃ prāṇī spandānandamayīṃ parām ||

utpattirjapa ārambho mṛtirasya nivedanam |
vinā japena deveśi japo bhavati mantriṇaḥ ||

ajapeyaṃ tataḥ proktā bhavapāśanikṛntanī |
śrīguroḥ kṛpayā devi labhyate nānyathā priye ||

evaṃ japaṃ maheśāni ! pratyahaṃ vinivedayet |
gaṇeśabrahmaviṣṇubhyo harāya parameśvari ||

jīvātmane krameṇaiva tathā ca paramātmane |
ṣaṭsahasrāṇi ca punaḥ sahasraṃ ca sahasrakam |
punaḥ sahasraṃ gurave krameṇa tu nivedayet ||

japaṃ nivedayitvā tamahorātrabhavaṃ priye |
sahajaṃ parameśāni nyāsaṃ kuru vicakṣaṇe ||

ṛṣirhaṃso'vyaktapūrvaṃ gāyatraṃcchanda ucyate |
devatā paramādistu haṃso haṃ bīja ucyate ||

saḥ śaktiḥ kīlakaṃ so'haṃ praṇavastattvameva hi |
nādasthānaṃ tathā śveto varṇastu parameśvari ||

udāttaḥ svara ityevaṃ manorasya prakīrtitam |
mokṣārthe viniyogaḥ syādevaṃ jānīhi pārvati ||

tataḥ ṣaḍaṅgavinyāsaṃ kuryād dehasya śuddhaye |
sūryaṃ somaṃ tathā devi nirañjanamataḥ param ||

nirābhāsaṃ caturthyantasvāhāntān kramato nyaset |
kavacāntānpravinyasya tato'nantapadaṃ smaret ||

p. 29)

tanusūkṣmacaturvarṇānuktvā ṅentaṃ pracodayāt |
svāhāntenaiva nayanamavyaktapadapūrvataḥ ||

prabodhātmā caturthyagnijāyānto'straṃ nigadyate |
asya haṃsasya deveśi ! nigamāgamapakṣakau ||

agnīṣomāvatho vāpi pakṣau tāraḥ śiro bhavet |
bindutrayaṃ śikhā netre mukhe nādaḥ pratiṣṭhitaḥ ||

śivaśaktipadadvandvaṃ kālāgnipārśvayugmakam |
ayaṃ paramahaṃsastu sarvavyāpī prakāśavān ||

sūryakoṭipratīkāśaḥ svaprakāśena bhāsate |
saṃhārarūpī haṃso'yaṃ vivekaṃ darśayatyapi ||

ajapā nāma gāyatrī triṣu lokeṣu durlabhā |

iti | tvaṃ janasya vandanādikāriṇo'nekavidhāmāpadaṃ 
jananādibhayātaṅkadāridryarūpāṃ haṃsyapākaroṣi ato mamāpi tāṃ dūrīkuru iti 
prārthanā dhvanyate || 18 ||

nanu paramaśiva evāśeṣābhīṣṭasampādanacaturatvāt prārthya ityāśaṃkya 
tasyāpi tvayaiva śaktyā tathātvaprasiddhirityāśayenāha-

icchānurūpamanurūpaguṇaprakarṣaṃ saṃkarṣiṇi ! tvamabhisṛtya 
[abhimṛṣya iti pāṭhāntaram] yadā bibharṣi |
jāyeta sa tribhuvanaikagurustadānīṃ devaḥ śivo'pi bhuvanatrayasūtradhāraḥ || 19 ||

he saṃkarṣiṇi ! parabhairavasya svāyattatayāvabhāsayitri ! kālasaṃkarṣiṇi ! 
parāśakte ! icchānurūpameṣaṇīyajñeyakāryaviṣayecchānuguṇaṃ 
anurūpastattadvastvanuguṇo guṇānāṃ visarjanīyasattvādīnāṃ prakraṣo'tiśayastaṃ 

p. 30)

tvamabhimṛṣya tadābhimukhyena svātmānaṃ samullāsya visphārya yadā bibharṣi 
dhatse | athavā icchānuguṇaṃrūpamarthācchivasyecchānurūpaṃ 
tattadvarṇakaparigrahaṇamayānāśritaśivādisakalāntapramātṛbhāvāva##-
tattatsadāśivādyavasthaucityāvabhāsamānānāṃ guṇānāṃ 
sarvajñatvādiguṇagaṇānāṃ prakarṣastāratamyātiśayo yatra tat 
abhisṛtyābhyupagamyetyarthaḥ | yaduktam-

bhairavīrūpī kālaḥ sṛjati jagatsthāvarādikīṭāntam |
icchāvaśena yasyāḥ sā tvaṃ bhuvanāmbike ! jayasi ||

tadānīṃ sa prasiddhaḥ kāmeśvarātmā śivastribhuvaneṣu bhavābhavādiṣveko 
mukhyo gururviśvakāryanirvāhaka upadeṣṭā ca devo 
vividharasabharitādbhutaviśvanāṭakollāsananirvāhaṇādikrīḍāśālī 
bhuvanatrayasya sūtradhāra iva sampādako jāyeta tvayaiva jagatsarjanādikāryaṃ 
vidhatte tvāṃ vinā tasyākiñcitkaratvāt | yathā kaścitsūtradhāraḥ 
śṛṅgārādirasamādhuryabharitaṃ sadbījādigarbhaṃ nāṭakaṃ 
tattadabhineyābhivyañjanīyasākṣātkāryarasārpaṇanaipuṇyaśālinyā naṭyā 
prastāvya prekṣakāṇāṃ rasāsvādanena nāṭyācāryatvaṃ loke 
sūtradhārasaṃjñāṃ ca prāpnoti | tadvadviśvakrīḍācikīrṣuḥ śivo'pi bhavatyaiva 
suślāghyakalopetayā trailokyanāṭyaṃ prastauti ityarthaḥ | atha ca trikanaye 
śāktīyayāgavidhau sṛṣṭikālyādyudayakramataḥ pāryantikī mahākālī 
mahābhairavacaṇḍograghorakālīti yā parā pārameśvaryuktā saiva 
kālasaṃkarṣiṇītyucyate | taduktaṃ śrīkramastotre- 

kramatrayatvāṣṭramarīcicakrasañcāracāturyaturīyasattām |
vande mahābhairavaghoracaṇḍakālīṃ kalākāśaśaśāṅkakāntim ||

iti | anyatra ca- 

śrīmatsadāśivapade'pi mahograkālī bhīmotkaṭabhrukuṭireṣyati bhaṅgabhūmiḥ |

p. 31)

ityākalayya paramāṃ sthitimetya kālasaṃkarṣiṇīṃ bhagavatīṃ haṭhato'dhitiṣṭhet ||

iti yadvā- prāṇādipañcakātmanaḥ kālasyāntarbahīrūpatayā 
samullasanātsaṃkarṣiṇīti | tathā cācāryābhinavaguptapādāḥ-

nāsāgre trividhaṃ kālaṃ kālasaṃkarṣiṇī sadā |
mukhasthā śvāsaniśvāsakalane hṛdi karṣati ||

pūrakaiḥ kumbhakairdhatte grasate recakena tu |
kālaṃ saṃgrasate sarvaṃ recakenotthitā kṣaṇāt ||

icchāśaktiḥ parā nāmnā śaktitritayabodhane |
yājyā karṣati yatsarvaṃ kālādhāraprabhañjanam ||

iti idaṃ vyācaṣṭe śrījayarathaḥ- iha khalu mukhasthā kālasaṃkarṣiṇī 
bhagavatī sadā pārśvavāhadvayātmaśvāsaniśvāsasaṃkalanena hṛdi 
madhyadhāmni nāsāyāśca śakteragre trividhaṃ prāṇāpānodānalakṣaṇaṃ 
kālaṃ karṣati tena tena rūpeṇa saṃcārayati | yato recakena saṃharati pūrakena 
praveśaṃ dadāti kumbhakena dhārayati ūrdhvarecakena 
tattatkāraṇapadollaṅghanakrameṇotthitā satī sarva kālaṃ kṣaṇādeva 
samyaganavacchinnameva svarūpatāpādanakrameṇa saṃharatīti | secchāyāḥ 
prathamā truṭiḥ ityuktyā pareyamicchāśaktiḥ | icchādyātmanaḥ 
śaktitritayasyotpattibhūḥ prakrāntena kālasaṃkarṣiṇīlakṣaṇena nāmnā yājyā 
yadiyaṃ sarvaṃ prāṇādipañcakātmakaṃ kālādhāraṃ prabhañjanaṃ 
karṣayatyantarbahīrūpatayā samullāsayatītyarthaḥ | yaduktaṃ yāmale-

ayaṃ pathadvaye kālaḥ sthūlaścarati yoginām |
savyāpasavye madhye ca śaktitrayavibhūṣitaḥ ||
sā graset trividhaṃ kālaṃ kālasaṃkarṣiṇī tathā | iti |
kālasaṃkarṣiṇī nāmnā kālaṃ mukhabile sthitam |
śvāsaniścāsakalane tasya saṃkarṣaṇaṃ hṛdi ||
pūrakeṇa samantāttu kumbhakena ca dhārayet |

p. 32)

recakenotthitā devī kālaṃ saṃgrasate kṣaṇāt || iti |
icchāśaktiḥ parā nāmnā śaktitritayabodhane |
yājyā karṣayate sarvaṃ kālādhāraprabhañjanam ||

iti | yadvottarāmnāyeśvarī anākhyātvena prasiddhā kālasaṃkarṣiṇī devī 
caturāmnāyeṣu śrīvidyārcāyāmarcyata iti | ato'syāḥ 
svayamakālakalitatvānnityatādivikalpairapyanirvācyatvaṃ syāt | 
yadāhurutpaladevācāryāḥ- 

na sadā na tadā na caikadetyapi sā yatra na kāladhīrbhavet |
tadidaṃ bhavadīyadarśanaṃ na ca nityaṃ na ca kathyate'nyathā || (u0 sto0 12##-

iti jñaḥ kālakālo guṇī sarvavidyaḥ iti śruteḥ (śvetā0 6-2) || 19 ||

idānīṃ devyā vaibhavapradarśanāśayena 
śaktisvarūpatvamevānyatrāpyatidiśati- 

yo'yaṃ cakāsti gaganārṇavaratnaminduryo'yaṃ surāsuraguruḥ puruṣaḥ purāṇaḥ |
yadvāmamardhamidamandhakasūdanasya devi ! tvameva taditi pratipādayanti || 20 ||

he devi ! yo'yaṃ gaganamevārṇavo ratnākarastatra sthitastadudbhavo venduḥ 
sudhāṃśuścakāsti dīpyate sa tvamevāsi tvatsmitakāntyaṃśamātratvāt | 
ācāryairapyuktam- 

amba ! tvadakṣṇoraṇuraṃśumālī tavaivamandasmitabindurinduḥ |

iti atra gāmbhīryāpāratvādisādṛśyādgagane'rṇavatvāropaḥ 
hlādakāmalatvādinā indau ratnatvāropaḥ | yaścāyaṃ surāsurāṇāṃ 
devadānavānāṃ gururmānyaḥ purāṇaḥ puruṣaḥ sraṣṭā brahmā yadvā 
purāṇapuruṣo viṣṇuḥ so'pi tvamevāsi |

p. 33)

tasyāpi tvadrūpatvāt tathā ca harivaṃśe nāradaḥ-

prakṛtyāḥ prathamo bhāga umādevī yaśasvinī |
vyaktaḥ sarvamayo viṣṇuḥ strīsaṃjño lokabhāvanaḥ ||

iti | yaccāndhakasūdanasyāndhakākhyāsurāreḥ śivasyārdhanārīśvaratvādidaṃ 
vāmamardhaṃ savyabhāgastat sarvaṃ tvamevāsi iti pratipādayanti samāmananti 
budhāḥ iti śeṣaḥ | ayamuttānārthaḥ | vastutastu 
somasūryāgnimayatvatpurasthacakratraye yadraśminicayavabhavaṃ sa bhavatyā eva 
mahimāvadhāryaḥ ityatirahasyārtho jñeyaḥ || 20 ||

atha vākprasarotpādanaṃ vāgīśvaryā dhyānamāmreḍayati- 

dhyātāsi haimavati ! yena himāṃśuraśmimālāmaladyutirakalmaṣamānasena |
tasyāvilambamanavadyamanantakalpamalpairdinaiḥ sṛjasi sundari ! vāgvilāsam || 21 
||

himavato'patyaṃ stroti tadāmantraṇaṃ he haimavati ! himācalatanaye yadvā 
haimavatyume ! yaduktaṃ kenopaniṣadbhāṣye umā haimavatīmiti | yadvā hemno 
vikārāṇi haimāni bhūṣaṇāni tāni santyasyā iti | akalmaṣaṃ vimalaṃ mānasaṃ 
mano yasya tenākalmaṣamānasena yena bhaktimatā himāṃśoḥ śītāṃśoḥ 
raśmimālā kiraṇāvalistadvadamalā dhavalā dyutiśchaviryasyā 
śītalāmṛtasecinī śubhravarṇetyarthaḥ | ata eva himavatprabhavatvena haimavatīti 
saṃbodhanaṃ sābhiprāyam | etādṛśī tvaṃ dhyātāsi vibhāvyase | he sundari ! 
spṛhaṇīyasaubhāgye ! tasyālpairdinairacireṇaivāvilambamaskhalitamanavadyaṃ 
śrutikaṭutvādidoṣarahitaṃ prasādādiguṇagaṇopetamanantakalpamamita##-
athavānto'vasānastadabhāvādanantaḥ īṣadasamāptau kalpappratyayaḥ 
tenāpūrṇo'nanto'nantakalpam vācāṃ girāṃ vilāsaṃ

p. 34)

vicitrarasanirbharakavitāprasaraṃ sṛjasi samutpādayasi | idamapi vāgīśvaryā 
dhyānābhiprāyato bodhyamiti || 21 ||

adhunā nānāsampradāyārthānugataistattannāmabhiḥ devīṃ pratipādayan āha-

tvāṃ vyāpinīti samanā iti kuṇḍalīti tvāṃ kāminīti kamaleti kalāvatīti |
tvāṃ mālinīti lalitetyaparājiteti devi ! stuvanti vijayeti jayetyumeti || 22 ||

śivasyecchākhyā paramā sūkṣmā śaktirmana utkramya 
gatonmanākhyānavacchinnasvaprakāśasphurattayā śivatvarūpābhinnā saiva yadā 
prakāśātmamahāsattārūpamātmānaṃ samastāsūtraṇāsahiṣṇuṃ kṣobhayate 
śūnyātiśūnyādidharāntasamagrajagadāsūtraṇātmanā sphurati tadā 
parapramātṛpadāvarūḍhā āsūtritāśeṣamantavyamananarūpatvātsamanākhyā 
śaktirityucyate | asāveva samanākhyā śaktiḥ prathamollekhakalpatayā sphurantī 
yadābhāsyaṃ viśvaṃ kroḍīkaroti | kroḍīkāraḥ svātmaikatayābhāsanam | tadā 
śūnyātiśūnyātmā vyāpinītyucyate | saiva yadā prasaronmukhī 
svābhedātmatānimajjanena śūnyābhāsatayābhāsyedantayā prathayati | tadā 
kuṇḍalinyākhyā mahāśaktirityucyate 
garbhīkṛtāśeṣaviśvasṛṣṭisaṃhāraprapañcaprathama##-
samastaviśvasyānunmiṣatatvenāntargarbhīkārādūrdhvakuṇḍalinītyabhidhīyate | 
natvatra mūlakuṇḍalinīyamadhaḥ stheti bhramitavyam | 
vyāpinyādisāhacaryānmahāśaktipadaṃ prasaronmukhaṃ turīyaṃ 
māntronmeṣīyaṃ jñeyam | atra samanānantaraṃ vyāpinītyādikramaḥ stutikṛtā tu 
vṛttabhaṅgānurodhanotkramato nibaddham | yaduktam- 

śivo hyanādimān dhāma śāśvataḥ prathamo'calaḥ |
icchayā tu yadā devi ! prasaratyavilambataḥ ||

sā śaktiḥ paramā sūkṣmā unmanā śivarūpiṇī |

p. 35)

astitvamātramātmānaṃ kṣobhyaṃ kṣobhayate yadā ||

samanā sā vinirdiṣṭā śaktiḥ sarvādhvavartinī |
kroḍīkaroti yā viśvaṃ saṃhṛtya sṛjate punaḥ ||

kuṇḍalyākhyā mahāśaktiḥ ||

iti | evaṃ triśaktirūpiṇīṃ tvāṃ stuvanti pratipādayanti budhā iti śeṣaḥ | evaṃ 
prathame pāde trikamate sampradāyārthaḥ | kāmyate'bhilaṣyate kamanīyatayā 
svātmatvena yogibhiriti kāmaḥ kameśvaraḥ paramaśivaḥ so'styasyāḥ svābhedena 
bhartṛbhūtatvena veti kāminī tadabhinnā kāmeśvarī ādyasundarī | yadvā kāmaḥ 
sadāśivādipṛthivīparyantajagatsarjanādikrīḍecchā tadvatī 
jagatsarjanādiśīletyarthaḥ | taduktaṃ rudrāyāmale- 

tayaitatsṛjyate viśvamityādi |

yadvā kāmayate iti kāminī so'kāmayata bahvasyāṃ prajāyeya iti 
śruterviśvasisṛkṣonmukhī | api ca kāmayate iti kāminī kamudhātoḥ 
kāntyarthatvāt kāntiricchā ruciśca tena kāmeśvaraviṣayautsukyavatī | tathā 
mātṛmānameyarūpeṇa vāmeśvaryādicakrātmanā vā virocamānā cetyarthaḥ | 
athavā kāminī bhairavī uttarasiṃhāsanadevatā taddhyānaṃ yathā- 

kāminī bhairavī ceyaṃ bhayavidhvaṃsinīti vā |

ityārabhya- 

dhyānamasyā vadāmi te 
ātāmrārkayutābhāsāṃ ratnabhūṣaṇabhūṣitām |
pāśāṅkuśābhayavarāndhārayantīṃ śivāsanām ||
muṇḍamālāvalīramyāṃ cintayedbhairavīṃ parām |

iti | api ca kāminī kāmeśvarīyoginīrūpā | taduktaṃ vidyārṇave- 

atha kāmeśvarīṃ vakṣye sarvakāmaphalapradām |

ityādi- 

kāmeśvarīṃ śaśāṅkasthāṃ khelatkhañjanalocanām |
sadā lolagatiṃ kāntāṃ kusumāstraśilīmukhām ||

p. 36)

ityantam | tathā kamale padme'syāḥsta iti kamalā arśādyac padmadvayadhāriṇī 
lakṣmīstadrūpā | yadvā kāmyate sarvairiti kamalā vṛṣāditvātkalac | kaṃ 
bhāskaraṃ malate rucyā puṣṇātīti kamalā | kaṃ vāyuṃ vegena dhriyate iti vā 
tayorbhāsanajavanaśaktirūpetyarthaḥ | yena sūryastapate tejaseddhaḥ iti bhīṣāsmāt 
[bhīṣāsmādvātaḥ pavate | ityapi pāṭhaḥ |] pavate vātaḥ iti ca śruteḥ | 
kaṃ brahmāṇaṃ dhārayatīti brāhmī śaktisvarūpeti ca |

ko brahmaṇi samīrātmayamadakṣeṣu bhāskare |
mayūre'gnau ca puṃsi syātsukhaśīrṣajaleṣu kam ||

iti medinīkoṣāt | atha ca kaṃ dakṣaprajāpatimalati svajanmanā bhūṣayatīti kamalā | 
tad dhyānaṃ śrīvidyārṇavīyadvāviṃśe śvāse- 

māṇikyābhā haragirinibhaiḥkuñjarendraiścaturbhirnāsāgrodyanmaṇimaya##-
ambhojasthā varasarasijadvandvakābhītihastā lakṣmīḥ pāyādamaranikaraiḥ 
sevitāṅdhyrambujā sā ||

iti | tathā kalāḥ kāmeśvaryādivicitrāntāḥ 
pratipadādipañcadaśatattattithyadhiṣṭhātṛdevatāḥ madhyatrikoṇapārśvasthā 
akārādivarṇavācyāḥ śaktayastā vidyante āvaraṇatayā yasyāḥ  sā kalāvatī 
ṣoḍaśī kaletyarthaḥ | taduktaṃ subhagodaye- 

darśādyāḥ pūrṇimāntādyāḥ kalā pañcadaśaiva tu |
ṣoḍaśī tu kalā jñeyā saccidānandarūpiṇī ||

iti tantrarāje tu-

ādyāyā lalitāyāḥsyuranyāḥ pañcadaśāṅgagāḥ |
lalitāṅgatvarūpeṇa sarvasāmānyavigrahā ||

ātmaivāsya ṣoḍaśī kaleti bṛhadāraṇyakokteḥ (bṛha0 1-5##-

p. 37)

yonivargaḥ kalāśarīramiti (1-3) śivasūtroktyā karmaparatvena 
kalāśabdasya vyākhyātatvāttadvatīṃ | saṃkucitakriyāśaktibhāsanātkārmamalena 
paśūn bandhayitrīti vā | yadvā kalā viśvaśaktayaḥ santyasyā iti kalāvatī | tathā 
śrīmaṅgalāyām - 

śaktayo'sya jatatkṛtsnaṃ śaktimāṃśca maheśvaraḥ | (17)

iti | śrīśivasūtreṣu -

svaśaktipracayo'sya viśvam iti | (3-30)

kalāḥ śiraḥpāṇyādyavayavarūpāstadvatī parākalā | tad dhyānaṃ yathā - 

agrabinduparikalpitānanāmanyabinduracitastanadvayīm |
nādabinduraśanāguṇāspadāṃ naumi te paraśive ! parāṃ kalām ||

iti rahasyavidyā | kalā candrakalā vā bhaktasaṃjīvanāya asyā astīti kalāvatī | yadvā 
kalā brāhmayādiśaktyaṃśabhūtā akṣobhyādicatuḥṣaṣṭikalāstadyutā vā kalā 
aṣṭātriṃśatsaṃkhyāstā vahnerdaśa candrasya ṣoḍaśa sūryasya dvādaśa kalāḥ 
pūjāpaddhatau prasiddhāstadvatī tadātmikā | anyāṃśca kalā utpattijāgarādayaḥ 
yathā- 

utpattirjāgaro bodho vyāvṛttirmanasaḥ sadā |
kalācatuṣṭayaṃ jāgradavasthāyāṃ vyavasthitam ||
jāgratsarvaguṇaiḥ proktā kevalaṃ śaktirūpiṇī |

iti tathā- 

maraṇaṃ vismṛtirmūrcchā nidrā ca tamasāvṛtāḥ |
suṣuptestu kalā jñeyāstāḥ kalāḥ śrīśivātmikā ||

tathā- abhilāṣo bhramaścintā viṣayeṣu punaḥ smṛtiḥ |
kalācatuṣṭayaṃ devi ! svapnāvasthābhidhīyate ||
śivarūpāḥ śaktirūpāstāḥ kalāstripurātmikāḥ |

tathā- vairāgyaṃ ca mumukṣutvaṃ samādhirvimalaṃ manaḥ |
sadasadvastunirdhārasturyāvasthā imāḥ kalāḥ ||

p. 38)

tathā dūtīyāgaprakaraṇe ṣoḍaśakalā āntarīdūtaryādaya uktāḥ | evaṃ 
bindvardhacandrarodhinyādīnāṃ svacchandasaṃgrahādāvuktāstatsamastakalāyuktā 
tatsvarūpetyarthaḥ yadvā kalāḥ pañcasu kṛtyeṣu sṛṣṭau daśa sthitau 
dvāviṃśatiḥ saṃhṛtāvekādaśa turye trayodaśa eva 
pañcāśatsaṃkhyāstadatīte sarvottīrṇāyāṃ bhāsāyāṃ 
vibhāgābhāvānniṣkalatvaṃ tadvatī vā asyārthasyātirahasyāttadavabodhāya 
gurūpāsanaiva śaraṇaṃ rahasyabhaṅgabhiyā nonmīlyate | taduktam-

sṛṣṭau daśakalāḥ sthitau dvāviṃśatirbhavanti śaktayaḥ |
ekādaśa saṃhāre trayodaśa tāstu turīyaparvaṇi ||

bhāsāyāṃ na vikalpaḥ sphurati sphuradekaniṣkalaśriyām |
yadi pratibimbagatyā sphurati paraṃ ṣoḍaśādhikā devī ||

iti | yadvā īśānasya pañca tatpuruṣasya catasraḥ aghorasyāṣṭau vāmadevasya 
trayodaśa sadyojātasyāṣṭau iti saṃkalayyāṣṭātriṃśatsaṃkhyāḥ kalā yadvā 
ādikṣāntavarṇakalāḥ santyasyā iti kalāvatī anuttaramahāmantrarūpetyarthaḥ | atha 
ca tatkalāmayī mātṛketyarthaḥ | pūrṇaprakāśātmanaḥ śabdarāśerbhagavato 
yeyaṃ parā 
pārameśvarīśaktirbahiraunmukhyābhāvādāntaratvātpramātraikātmyaśālinī 
pratiyogino viśvābhāsasyābhāvamavabhāsayantī 
tadanvanackollāsavṛttisamāśrayaṇakrameṇaviśvābhāsāvabibhāsayiṣayā 
malate dhatte darpaṇavadviśvaṃ parāparādibhāvenāvabhāsatīti mālinī 
parāśaktiḥ | atha ca mālyate dhāryate 
rudrairnādiphāntākṣarādhiṣṭhātṛvargairātmatayābhyupagamyate malate 
bhogamokṣasvarūpaṃ dhatte iti vā | atha ca mālinī tripuramālinī ṣaṣṭhacakreśvarī 
tadrūpā nāmaikadeśagrahaṇanyāyāt | yadvā- mālā puṣpamālā sañjātā 
tattadvaśyākarṣaṇādiphalanimittamasyā iti mālinī puṣpiṇīti | mā śabdavācyaṃ 
saṃhāraṃ rāti lāti vā iti ralayoraikyasmaraṇātsaṃhārasyālinī vimraṣṭrītyarthaḥ | 
yadāhuḥ śrīmadācāryapādāḥ-

mālyate mālitā rudrairdhārikā siddhimokṣayoḥ |
phaleṣu puṣpitā pūjyā saṃhāradhvaniṣaṭpadī ||

p. 39)

saṃhāradānādānādiśaktiyuktā yato ralau |
ekatvena smarantīti śambhunātho nirūcivān ||

iti śivaśaktyātmakatāyāmapyasyāṃ śāktasvabhāvasyodriktatā ata 
evāśeṣasiddhisaṃpādane sāmarthyaṃ pūrṇaṃ taduktam-

athānyatsaṃpravakṣyāmi mālinyāḥ karma cottamam |
vaśyavidveṣaṇoccāṭastobhastambhanamāraṇam ||

dhyānamātrādbhaveddevīti |

yadvā- kṣubdhāyā visargaśaktermālinīti āgamikaṃ vyapadeśāntaram | yadā 
kṣobhyakṣobhakātmanāṃ yonibījānāṃ kṣubhikriyāyāṃ 
kartṛkarmarūpasambandhe parasparasaṃghaṭṭātmāveśo jāyate tadā 
viśvasvarūpadhāraṇānmālinītyucyate | taduktam- 

kṣobhyakṣobhakatāveśānmālinīṃ tāṃ pracakṣate |
bījayonisamāpattivisargodayasundarā ||
mālinī hi parāśaktirnirṇītā viśvarūpiṇī |

iti tathā- 

prāyaścitteṣu sarveṣu japenmālāmakhaṇḍitām |
bhinnāṃ vāpyathavābhinnāṃ vyatikramabalābalāt ||
sakṛjjapātsamārabhya yāvallakṣatrayaṃ priye | iti |
kāṃ kāṃ siddhiṃ na vitaretkiṃ vā nyūnaṃ na pūrayet |

iti ca yadvā- mālāvatvānmālinī brīhyāditvādiṇi 
ekapañcāśanmātṛkābhimāninyā devatāyā mālinīti saṃjñā tadrūpā vā | 
yadvā devyāḥ sakhī mālinī nāmnī tadrūpā vā | taduktaṃ vāmane 
pārvatīvivāhaprakaraṇe saptapadīsaṃkramaṇaṃ prakṛtya- 

tato harāṅghrirmālinyā gṛhīto dāyakāraṇāt |
kiṃ yācase dadāmyeṣa muñcasveti haro'bravīt ||
mālinī śaṅkaraṃ prāha matsakhyai dehi śaṅkara |

p. 40)

saubhāgyaṃ nijagotrīyaṃ tato mokṣamavāpsyasi ||

athovāca mahādevo dattaṃ mālini ! muñca mām |

ityādi vṛttaviśeṣarūpā mandākinīrūpā vā mālinī |

mālinī vṛttabhede syānmālākārastriyāmapi |
campānagaryāṃ gauryāṃ ca mandākinyāṃ ca mālinī || iti 

viśvaḥ | mālinī saptabhiḥ sā syāditi vacanāt saptavarṣā kanyāpi mālinī tadrūpeti | 
mālinyā dhyānaṃ yathā- 

raktavastradharāṃ devīṃ pañcavakttradharāṃ śivām |
nivṛtyādikalāyuktāṃ prativakttraṃ trilocanām ||

pāśāṅkuśadharāṃ devīṃ sudhāsiktakapālinīm |
icchāditrayasaṃyuktāṃ śūlaṃ dakṣakare dharām ||
raktapaṅkajamadhyasthāṃ mālinīṃ bhāvayecchivām ||

iti śṛṅgārādratyāderbhāvānmanovikārācca jāto vilāsaviśeṣo lalitaṃ 
bhrūnetrādikriyāsacivakaracaraṇāṅgavinyāso vā priyaṃ kāmeśvaraṃ 
pratibhāvāviṣkṛtaṃ vā tadastyasyā iti lalitā 
lalitamatyantasaundaryamanupamasaundaryaṃ vā vidyate'syā iti vā lalitaṃ triṣu 
sundaramiti kośaḥ | taduktaṃ-

laliteti nāma yuktaṃ tava kila divyā navā vṛttayaḥ |
dhanuraikṣavamastrāṇyapi kusumāni tathākhilaṃ lalitam ||

iti | lalitā saubhāgyasundarī | arśādyac | lalitaṃ śṛṅgārahāvajanyaḥ 
kriyāviśeṣastadvatī tena śṛṅgārarasapradhāneyaṃ mūrtiriti | athavā 
lokānatītya vilasanāllalitā | yadvamarīcivṛndānyatikramyoparitane 
bindusthānamadhye lalate nitarāṃ śobhate vā | taduktaṃ pādme-

lokānatītya lalate lalitā tena socyate |

iti | yadvā lalitākhyā bhairavī | taddhyānaṃ yathā- śrīvidyārṇavīye 

p. 41)

saptame śvāse- dakṣiṇasiṃhāsanadevatāṃ prakṛtya- 

udyatsūryasahasrābhāṃ māṇikyamukuṭojjvalām |
ratnakuṇḍalamuktālipadakāṅgadabhūṣaṇām ||

ratnamañjīrasubhagāṃ raktavastrānulepanām |
pāśāṅkuśau pustakaṃ ca dadhatīmakṣamālikām ||

bālyalīlāparāṃ devīṃ kumārīrūpadhāriṇīm |
sarvāṅgasundarīṃ dhyāyetsarvasaṃpattihetave || (pṛ0 155-1-2##-

iti na parājitā aparājitā daityayuddhādau sadaiva jayaśālinī | aparājitā 
jayadurgārūpā vā | yadvāparājitāḥ īśabrahmaviṣṇavaḥ paryaṅkapādarūpatayā 
santyasyāḥ aparājitā vidyāsvarūpā ca |

aparājita īśājeṣṭyantarenājite triṣu |
girikarṇī jayā durgā śataparṇīṣu yoṣiti ||

iti medinī | devīpurāṇe tu- 

vijitya padmanāmānaṃ daityarājaṃ mahābalam |
triṣu lokeṣu vikhyātā vijayā cāparājitā ||

iti tathā viśiṣṭo brahmaviṣṇupurandarādibhirapi duḥsādho jayo yasyāḥ sā vijayā 
caturvidhasaṃvidānandarūpā vā | vijayaṃ caiva kāśmīre iti 
devīpurāṇoktaśivatīrthaparigaṇanāyāṃ vijayākhyaśivasvarūpā vā | athavā 
vijayākhyaprāsādaviśeṣo viśvakarmaśāstraprasiddhastadrūpā vā vijayākhyo 
muhūrto vā tādṛśakālarūpiṇītyarthaḥ | taduktaṃ muhūrtaśāstre- 

āśvinasya site pakṣe daśamyāṃ tārakodaye |
sa kālo vijayo jñeyaḥ sarvakāryārthasiddhidaḥ ||

ekādaśo muhūrto yo vijayaḥ parikīrtitaḥ |
tasmin yātrā prakartavyā sarvairvijayakāṅkṣibhiḥ ||

iti | jayasvarūpatvājjayā varāhaśaile sthitā jayākhyā devī jayate

p. 42)

iti jayā jayantī labdhotkarṣā ityarthaḥ | jayākhyatithisvarūpā vā | śivāsakhīrūpā 
vā agnyutpādaśaktyupetāraṇīsvarūpā vā |

jayā jayantī tithibhitpathyomā tatsakhīṣu ca |
agnimanthe nā jayante vijaye ca yudhiṣṭhare ||

iti medinī | atha ca aparājitādyāstisro devyo vāmasrotasi tumburunāthasya 
parivāradevītvenāmnātāḥ | taduktaṃ śrīnetratantre- 

caturbhujā trinetrā ca ṭaṃkakandaladhāriṇī |
daṇḍākṣasūtrahastā ca pretopari virājat ||

jayā devī tu vijayā raktavarṇā caturbhujā |
caturvaktrā trinetrā ca śarakārmukadhāriṇī ||

khaḍgacarmadharādevī ulūkoparisaṃsthitā |

tathā-

bhinnendranīlasadṛśī caturvakttravibhūṣitā ||

caturbhujā trinetrā ca pāśāṅkuśadharā tathā |
ratnapātragadāhastā divyāsanasusaṃsthitā ||

sauvarṇāmbarasaṃvītā svarṇabhūṣaṇabhūṣitā | (11 adhi0 12-18)
aparājiteti ||

ormaheśasya mā lakṣmīrumā uṃ paramaśivaṃ māti paricchinnati 
svātantryājjñeyīkarotīti umā śaivī mukhamihocyate iti | vijñānabhaṭṭārake- 

yathālokena dīpasya kiraṇairbhāskarasya ca |
jñāyate digvibhāgādi tadvacchaktyā śivaḥ priye || (vi0 bhai0 21)

iti | śrīmānutpaladevācāryaḥ- 

ātmānamata evāyaṃ jñeyīkuryātpṛthaksthiti |
jñeyaṃ na tu tadaunmukhyātkhaṇḍyetāsya svatantratā ||

iti atasīkusumopamatvādabhedopacārādbomā | 
haridrāvarṇavattvātstambhanakarmocitadhyānādau

p. 43)

vā kīrtikāntisvarūpavatvādvā | saptaśatyāṃ tu-

yā devī sarvabhūteṣu kīrtirūpeṇa saṃsthitā |
kāntirūpeṇeti vā |

umā'tasyāṃ haimavatyāṃ haridrā kīrtikāntiṣu |

iti | u ityāmantraṇe meti niṣedhe | bālye tapase pravṛttā mātrā menayā saṃbodhya 
niṣiddhatvāditi vomā | taduktaṃ kālikāpurāṇe- 

yato nirastā tapase vanaṃ gantuṃ tu menayā |
u meti tena someti nāma prāpa tadā satī ||

brahmāṇḍe'pi-

aparṇā tu nirāhārā tāṃ mātā pratyabhāṣata |
u mā iti niṣedhantī umetyeva tadā bhavat ||

sā tathoktānayā mātrā devī duścaracāriṇī |
tenaiva nāmnā lokeṣu vikhyātā surapūjitā ||

pādme puṣkarakhaṇḍe- 

tato'ntarikṣād divyā vāgabravīdbhuvanatraye |
u meti tu tvayā mene yaduktaṃ tanayāṃ prati ||

umeti nāma tenāsyā bhuvaneṣu bhaviṣyati |

u- uttamā ca sā mā- cittavṛttiśceti vā | taduktaṃ sūtasaṃhitāyām- 

parānubhūtiṃ bhavapāśanāśinīṃ sadāśivasyāpyatiśobhanāḍhyām |
umābhidhāmuttamacittavṛttiṃ namāmi nānāvidhalokavaibhavām ||

iti | yadvā- umāmiti jñānapradatvenāmnātā umānāmnī brahmavidyā- sa 
tasminnevākāśe striyamājagāma bahuśobhamānāmumāṃ haimavatīṃ

p. 44)

tāṁ hovāca kimetadyakṣyāmiti [kimetadyakṣam iti pāṭhāntaram] brahmeti 
hovācetyādi kenopaniṣacchruteḥ | (keno0 3-12) skānde-

īdṛśī paramā vidyā śāṅkarī bhavanāśinī |
prasādādeva jantūnāṃ śaktereva hi jāyate ||

sūtasaṃhitāyāṃ tu- 

vidyārūpā yā śivā vedavedyā satyānandānantasaṃvitsvarūpā |
tasyā vācaḥ sarvalokaikamāturbhaktyaiva syādambikāyāḥ prasādāt ||

iti | athavā viṣṇuśivabrahmavācakaiḥ 
praṇavamātrātmakairakṣarairghaṭitatvāttanmūrtitrayātmiketi praṇavārtho'tra 
yojanīyaḥ | ata evāsya padasya devīpraṇava iti saṃjñeti rahasyavidaḥ | taduktaṃ 
laiṅge- 

akārokāramakārā madīye praṇave sthitāḥ |
ukāraṃ ca makāraṃ ca akāraṃ ca krameritam ||

tvadīyaṃ praṇavaṃ viddhi trimātraṃ plutamuttamam |

iti | yadvā śivasūtreṣu icchāśaktirumā kumārī (1-13) iti sūtre 
yogināmicchā yā umeti saṃjñoktā tadrūpā vā | taduktaṃ- 

parabhairavatāmuktāṃ grasamānasya śāśvatīm |
tasyaiva yogino yecchā śaktistāṃ nigadantyumām ||

iti yadvā- umā devīvināyake iti pādmādvināyakapīṭhādhiṣṭhātrī umā 
sindhuvane nāmnā ityukte ṛṣikanyā kanyārūpā vā umā ṣaḍvārṣikī mateti 
kanyāprakaraṇe dhaumyavacanāt | ityādināmabhistvāṃ stuvante | atretiśabdāḥ 
śabdaparatve'pyarthaparatāmācakṣate || 22 ||

p. 45)

nanu kathamubhau bhogamokṣau tatkāmānāṃ siddhyata ityāśaṅkya tatra 
hetubhāvena ṣoḍhopāstiṃ sūcayan stauti- 

uddāmakāmaparamārthasarojaṣaṇḍacaṇḍadyutidyutimupāsita 
[mapāsitaṣaḍvikāram iti pāṭhāntaram] ṣaṭprakārām |
mohadvipendrakadanodyatabodhasiṃhalīlāguhāṃ bhagavatīṃ tripurāṃ namāmi || 23 
||

dāmno maryādāyā utkrāntā uddāmāno niravadhayaḥ kāmyante iti kāmā 
laukikālaukikabhogajātāni paramopādeyatvenārthyamānatvādarthā 
atiśayenārthanīyāścāṇimādisiddhayastānyeva sarojaṣaṇḍāni kamalavṛndāni 
tatra caṇḍadyutestīkṣṇakiraṇasyārkasyeva dyutidīptivikāsayitrī yathārkadīptyā 
sarojāni vikāsaṃ yānti tadvadbhagavatīprasādena samastaṃ kāmyamavāpyate 
ityarthaḥ | kīdṛśīṃ upāsitāḥ sādhakajanaiḥ paricāritāḥ ṣaṭprakārāḥ 
śaivavaiṣṇavādayaḥ ṣaḍupāsanāmārgāstatprāptisādhanatvādyasyāstām | 
taduktaṃ kulārṇave- 

śaivavaiṣṇavadaurgārkagāṇapatyendusambhavaiḥ |
mantrairviśuddhacittasya kulajñānaṃ prakāśate ||
indusaṃbhavaṃ jainadarśanam |

atrāyaṃ bhāvaḥ- prāgjanmani kṛtaṣaḍvidhopāsāmupāsakānāmeveha 
janmani śrīsundaryā upāstilābhe sati kulajñānādbhogāpavargarūpayāmalasiddhiḥ 
syādityetadāśayena ślokaprathamottarārdhayorarthopanyāsaḥ kṛta ityūhyam | 
yadvopāsitāḥ ṣaṭprakārā ḍaralakaśahādayo bhedā yasyāstāṃ 
ṣaṭsvādhārasarojeṣu tatkarṇikāsthaṃ dhātvadhidevatārūpeṇa kṛtārādhanām | 
yadvā ṣaḍbhiḥ prakāraiḥ ṣoḍhā gaṇeśagrahādiśaktibhirupāsitāṃ 
tadrūpiṇīmityarthaḥ |

p. 46)

atha ca mahāṣoḍhoktaprapañcādiśaktirūpiṇīṃ | yadvāṣaṭśāmbhavānvayarītyā 
pareśvarapareśvaryādiṣoḍhāsvarūpeṇopāsitāṃ rājadantāditvātpūrvabhāvaḥ | 
moho'vivekarūpamāyā sāṣuptaṃ sa eva prabalonmattatayā dvipendro gajendrastasya 
kadanaṃ nidhanaṃ tatrodyataḥ svīkṛtanijahṛdayodyamo bodho 
bhairavīyacitprakāśarūpaḥ siṃhaḥ kesarī tasya līlāguhāṃ vilāsasthānaṃ 
saṃkucitātmatāpāsanena pūrṇāhantāviśrāntisatatvaparaprakāśasya 
prādurbhāvayitrīmityarthaḥ | evaṃvidhāṃ bhagavatīṃ tripurāṃ tisṛbhyaḥ 
śaktibhyastadadhiṣṭhitatrikāraṇebhya avasthāditritayācca pūrvabhavatvāt 
tripurāśabdavācyāṃ mahātripurasundarīṃ 
paripūrṇāhantātmikāmakhaṇḍasvasaṃvinmayīṃ 
trailokyamohanacakrādhiṣṭhātrīṃ tripurākhyāṃ vā namāmi | yaduktaṃ svasaṃvit 
tripurā devīti vitatya prāknirṇītamidam | natyarthastvabhedopāsanātmā boddhavya iti 
|| 23 ||

nanu keyaṃ tripurā nāma yā prahvībhāvenāśrayaṇīyā ityāśaṅkamāno 
mukhyaśaktiparivāryamāṇāṃ tāmantaḥpuragatāṃ paradevatāṃ nirdiśati- 

gaṇeśavaṭukastutā ratisahāyakāmānvitā smarārivaraviṣṭarā 
kusumabāṇabāṇairyutā |
anaṅgakusumādibhiḥ parivṛtā ca siddhaistribhiḥ kadambavanamadhyagā 
tripurasundarī pātu naḥ || 24 ||

gaṇeśo mahāgaṇapatiryo'suranirmitavighnayantritānāṃ devānāṃ mocanāya 
bhagavatyā kāmeśvarasya sākūtamukhāvalokanamātreṇa 
tadvighnānnirbhettumudapādi | uktaṃ ca brahmāṇḍe- 

tataḥ sā lalitā devī kāmeśvaramukhaṃ prati |
dattāpāṅgā samahasannātivyaktaradāvali ||

tasyā mandasmitarucaḥ kuñjarākṛtimānmukhe |
kaṭakroḍagaladdānaḥ kaścid devo vyajambhata ||

p. 47)

iti | atha ca śrīcakradvāraśākhayoḥ sthitau saśaktikau gaṇeśo vaṭukaśca 
kṣetreśaḥ | taduktaṃ saṃketapaddhatyāṃ- 

dvaitādvaitamahāmohaśarvarīkṣapaṇakṣamaḥ |
bhāsvāniva jayatyeko gaṇeśaḥ dūtarīyutaḥ ||

pratibhāyāḥ parollāso niśākara ivāparaḥ |
dūtiyuktaḥ sa jayati vaṭukastāṇḍavānvitaḥ ||

ityatra ratisahāyetyuktyā gaṇeśavaṭukayorapi saśaktikatvamupalakṣyam | tathā 
vaṭuko devīputraḥ kuleśaḥ iti prasiddhastābhyāṃ stutā nutā | gaṇā gaṇadevatāḥ 
ṣoḍhānyāsoktāścādityādyāḥ | yaduktamagnipurāṇe- 

ādityaviśvabasavastuṣitābhāsvarānilāḥ |
mahārājikasādhyāśca rudrāśca gaṇadevatāḥ ||

iti | yathā- 

mahāṣoḍhoditāśeṣadevatāgaṇasevitam |

iti | gaṇānāṃ pramathānāṃ nandibhṛṅgiriṭyādīnāmīśo nāyakaḥ skando 
vaṭurvāmanarūpī viṣṇurathavā vaṭavo bālakhilyādayaḥ ko brahmā vāyurdakṣo 
bhāskaro'gniśca taiḥ svasvavidyābhirupāsitā athavā gaṇā 
nandibhṛṅgiriṭyādayaḥ īśaḥ śivastathā ratiḥ kāmapatnī 
tatsahāyastatsacivastatsahāyo vasanto vā kāmaḥ smarastenānvitā paricaritā 
svasvavidyābhirvarivasitetyarthaḥ | atra ratikāmāmyāṃ 
pañcāśattattanmātṛkāśaktaya upalakṣyante | tathā smarāriḥ kāmaripuḥ 
sadāśiva eva varaḥ śreṣṭho brahmādicatuṣpādadhṛto viṣṭaro paryaṅkaḥ 
mañcāsanaṃ yasyāḥ sā 
sadāśivamahāpretaparyaṅkātmasiṃhāsanādhirūḍhetyarthaḥ | viṣṭaratvoktyā tu 
ānandaśayanādhāratvadhvananadvārā kāmāṅkayantraṇaviśeṣo dhvanyate 
ityāhurācāryāḥ | ata eva tripurasundarītyuktamiti rahasyam | ayamātmā brahma 
so'yamātmā catuṣpāditi śruteḥ | taduktaṃ bhairavayāmale- 

brahmā viṣṇuśca rudraśca īśvaraśca sadāśivaḥ |

p. 48)

ete pañca mahāpretāḥ pādamūle vyavasthitāḥ ||

śivātmake mahāmañce maheśānopavarhaṇe |
atiramyatale tatra kaśipuśca sadāśivaḥ ||

bhṛtakāśca catuṣpādā maheśaśca patadgrahaḥ |
tatrāste parameśānī mahātripurasundarī ||

iti | ācāryapādairapi- gatāste mañcatva mityādāvuktam | na cātra brahmādaya 
ime māyāntavartinasteṣāṃ śāktadaśādhiśāyitvānupapatteḥ | 
tasmātteṣāmamāyeyaṃ rūpāntaraṃ bhagavatyāḥ pīṭhapādabhāvocitam | 
īśvarasadāśivayostu sadātanamāyottīrṇameva rūpamityabhyūhyam | 
yadāhurācāryābhinavaguptapādāḥ-

māyottīrṇaṃ hi tadrūpaṃ brahmādīnāṃ puroditam |
āsanaṃ tvetadeva syānna tu māyāñjanāñcitam ||

rudrordhve ceśvaraṃ daivaṃ tadūrdhve ca sadāśivam |
nyasetsa ca mahāpreta iti śāstreṣu bhaṇyate ||

samastatattvavyāptṛtvānmahāpretaḥ prabodhataḥ |
prakarṣagamanāccaiṣa līno yannādharaṃ vrajet || (taṃ 15-308-10)

vrajediti parameva śivamupāśrayatītyarthaḥ | idamāsanaṃ 
vāmadakṣiṇobhayatantramārgasādhāraṇam | tathā kusumabāṇaiḥ 
pauṣpairbāṇairmohanavaśīkaraṇādyātmakaiḥ pañcabhiryutā upalakṣaṇametattena 
sāyudhacatuṣpāṇiśobhitāmiti | etadāyudhānāṃ tu vāsanātmakaṃ rūpaṃ yathā 
pūrvacatuḥśatī śāstre- pāśāṅkuśau tadīyau tu rāgadveṣātmakau smṛtau 
| iti | tantrarāje'pi- 

manobhavedikṣudhanuḥ pāśo rāga udāhṛtaḥ |
dveṣaḥ syāda śaḥ pañca tanmātrāḥ puṣpasāyakāḥ ||

iti | uttaracatuḥśatyāṃ tu- 

icchāśaktimayaṃ pāśamaṅkuśaṃ jñānarūpiṇam |
kriyāśaktimaye bāṇadhanuṣī dadhadujjvalam ||

p. 49)

iti | vāmakeśvare tu-

śabdasparśādayo bāṇā manastasyābhavaddhanuḥ |

iti kādimate-

bāṇāstu [bāṇāḥ syustrividhāḥ iti pāṭhāntaram ārthara avalāna 
sampādite] trividhāḥ proktāḥ sthūlasūkṣmaparatvataḥ |
sthūlāḥ puṣpamayāḥ sūkṣmā mantrātmānaḥ samīritāḥ ||

parāśca vāsanāyāṃ tu proktāḥ sthūlāñchṛṇu priye |
kamalaṃ kairavaṃ raktakalhārendīvare tathā |
sahakārakamityuktaṃ puṣpapañcakamīśvari || (pa0 5 48-50)

teṣāṃ nāmāni tu- 

harṣaṇaṃ rocanākhyaṃ ca mohanaṃ śoṣaṇaṃ tathā |
māraṇaṃ cetyamī bāṇā munīnāmapi mohadāḥ ||

iti jñānārṇave tu- 

kṣobhaṇaṃ drāvaṇaṃ devi ! tathākarṣaṇasaṃjñakam |
vaśonmādau krameṇaiva nāmāni parameśvari ||

iti | tantrarāje tu- 

madanonmādanau paścāttathā mohanadīpanau |
śoṣaṇaśceti kathitā bāṇāḥ pañca puroditāḥ || (7 pa0 13)

iti | tathānaṅgakusumādibhiranaṅgakusumā anaṅgamekhalā anaṅgamadanāa 
anaṅgamadanāturā anaṅgarekhā anaṅgaveginī anaṅgāṅkuśā 
anaṅgamālinītyākhyābhiḥ sarvasaṃkṣobhakārake cakre 
guptataraśaktibhirvasudalādhiṣṭhātrībhiḥ parivṛtā maṇḍalitā saṃnihitatvāt | 
tribhiḥ siddhaiśca mitreśādibhiryugagurubhiśca antastrikoṇe sarvasiddhipradākhye 
dhāmni pūjanīyairāvṛtā saṃnihitataratvāt | kadambavanamadhyagā śrīpuragarbhe 
kadambavane nīpādivṛkṣopaśobhini nandanodyāne madhyasthā divyamaṇḍape 
bhadrāsanāsīnā

p. 50)

śrītripurasundarī proktacakranāyikā triṣu jāgarādipureṣu 
avabhāsyamānāśeṣaviśvavaiśvātmyasāmarasyena sphuraṇāt sundarī 
cidānandaghanā lalitākhyā urdhvasiṃhāsanavidyāsu prathamasundarīsaṃjñakā vā 
trīṇi purāṇi brahmaviṣṇuśivaśarīrāṇi yasya sa tripuraḥ paramaśivastasya sundarī 
ramaṇī | yaduktaṃ kālikāpurāṇe- 

pradhānecchāvaśācchambhoḥ śarīramabhavat tridhā |
tatrordhvabhāgaḥ saṃjātaḥ paṃcavaktraścaturbhujaḥ ||

padmakesaragaurāṅgaḥ kāyo brāhmo maheśvare |
tanmadhyabhāgo nīlāṅga ekavaktraścaturbhujaḥ ||

śaṃkhacakragadāpadmapāṇiḥ kāyaḥ sa vaiṣṇavaḥ |
abhavattadadhobhāge pañcavaktraścaturbhujaḥ ||

sphaṭikābhramayaḥ śuklaḥ sa kāyaścāndraśekharaḥ |
evaṃ tribhiḥ purairyogāt tripuraḥ paramaḥ śivaḥ ||

iti | yadvā triṣu pureṣu mātṛmānameyapadeṣu sundarī satatāvabhāsitasvarūpā 
svaprakāśatvāt | taduktamabhinavaguptapādaiḥ- 

tena saṃvit trikātmaiva mātṛmānaprameyatām |
gṛhṇatī svaprakāśatvasvabhāvādeva bhāsate ||

sā cāntaḥ sthitamantrātmaśabdanāmarśasundarā |
anapekṣānyavirahātpramāṇaṃ svata eva hi ||

iti | no'smān pātu pāyādavyādityāśaṃsāyāṃ loṭ || 24 ||

evaṃ vāgvisphāraphalakāmināṃ sthānādyullekhanapūrvaṃ nirdiṣṭadevatopāstiṃ 
saphalāṃ kāvyaliṃgena samarthayati- 

tvāmaindavīmiva kalāmanubhāladeśamudbhāsitāmbaratalāmavalokayantaḥ |
sadyo bhavāni ! sudhiyaḥ kavayo bhavanti tvaṃ bhāvanāhitadhiyāṃ 
kulakāmadhenuḥ || 25 ||

p. 51)

he bhavāni ! bhavasya parabrahmaṇaḥ patnī satatasamavetāśaktistadāmantraṇaṃ | 
mṛḍānīti pāṭhe prāgvatsukhayitrītyarthaḥ | tvāṃ kalāṃ 
tathātathāviśvollekhaśālinīṃ śaktimudbhāsitamambaratalaṃ yayā 
tāmuttejitacidākāśasvarūpāmanubhāladeśaṃ lalāṭasamīpe 
aindavīmindoścandrasya sambandhinīṃ kalāṃ lekhāmivāhlādinīṃ sāpi 
svajyotsnayākāśatalamudbhāsayati avalokayanto dhyāyantaḥ sudhiyaḥ 
prajñāvantaḥ sadyo bhāvanāparipākasamanantarameva kavayaḥ 
sadguṇālaṅkārasarasamādhuryopetasatsandarbhasūktiracanāpratibhāśālino 
bhavanti | etadeva draḍhayati- yatastvaṃ bhāvanayā 
proktarūpadhyānapariśīlanajanyasaṃskāreṇa | yadvā- bhāvanā sakala 
sakalaniṣkala niṣkalarūpatvena tridhā | yaduktaṃ yoginīhṛdaye- 

ājñāntaṃ sakalaṃ proktaṃ tataḥ sakalaniṣkalam |
unmanyante pare sthāne niṣkalaṃ ca tridhā sthitam |

atrānubhāladeśamityukterājñāntasakalākhyabhāvanayāhitadhiyāmadhivāsita##-
kāmyamānānāmarthānāṃ dhenuriva dogdhrī prapūraṇītyarthaḥ | 
pūrvavaddhyānamadhigamyam | kāmadhenuśca surabhināmnī yatprasādādvasiṣṭho 
munirviśvāmitrasya rājñaḥ sasenāparicchadasyātithyaṃ rājocitaṃ cakre iti 
mahābhāratīyakathodāharaṇatvenātrānusandheyā iti || hi ityadhyāhāryam || 25 ||

nanvaśuddhacetasāmupāsanādhikārāyogyatve'bhīṣṭaphalasiddhiḥ kathaṃ 
syādityāśaṃkya tadadhikārāpādanāyaiva malasaṃskārādyucchedapūrvaṃ 
tacchuddhiṃ prārthayate- 

uttaptahemarucire ! tripure ! punīhi cetaścirantanamaghaughavanaṃ lunīhi |
kārāgṛhe nigaḍabandhanapīḍitasya [yantritasyeti pāṭhāntaram] 
tvatsaṃsmṛtau jhaṭiti me nigaḍāstruṭantu || 26 ||

p. 52)

uttaptaṃ drutaṃ śodhitaṃ yaddhema kanakaṃ tadvadrucire ! sundari ! he tripure ! 
etannirvacanaṃ bahudhā prāk proktamagre'pi nirvakṣyate | tripurāpadavyutpattistu 
vārāhīye- 

brahmaviṣṇumaheśādyaistridaśairarcitā purā |
tripureti tadā nāma kathitaṃ daivataistava ||

iti | yadvā tripure iti saptamyantaṃ trayāṇāṃ purāṇāṃ 
sthūlasūkṣmakāraṇātmanāṃ dehānāṃ saṃhārastripuraṃ tasmin 
drutasvarṇavaddīpyamānā turīyā kāpi saṃvicchaktistatsambodhanaṃ he 
uttaptahemarucire ! me mama ceto mānasaṃ punīhi pavitrīkuru tvadupāsanocitaṃ 
sampādayetyarthaḥ | tathā tatsthaṃ cirasya bhavatvāt cirantanaṃ 
purāṇamanekavāsanāpratānavalitamaghaughavanaṃ pāpaughakānanaṃ lunīhi 
lūnīkuru anudbhaviṣyadaṅkurakṣamaṃ sampādayetyarthaḥ | bhagavatyā 
nāmasmṛtikīrtanena hi pāpaśāntirjāyate tathā ca kūrmapurāṇe- 

śamāyālaṃ jalaṃ vahnestamaso bhāskarodayaḥ |
śāntyai kaleraghaughasya devīnāmānukīrtanam ||

iti brahmāṇḍe'pi- 

kṛtasyākhilapāpasya jñānato'jñānato'pi vā |
prāyaścittaṃ paraṃ proktaṃ parāśakteḥ padasmṛtiḥ ||

iti | tathā kārāgṛhe saṃsārarūpabandhanālaye nigaḍāḥ śṛṃkhalāḥ 
śubhāśubhakārmamalalakṣaṇāstairyadbandhanaṃ 
tattatsaṃkucitatarapramātṛbhūmikāgrahaṇaṃ tena pīḍitasya tattatkleśānubhavena 
duḥkhitasya mama tvatsaṃsmṛtau tava dhyāne hetau jhaṭiti maṅkṣu truṭantu 
vicchidyeran iti āśaṃsāyāṃ loṭ | atra śubhamapi 
karmāśubhakarmavadbandhanasādhanaṃ taduktamabhiyuktaiḥ- 

pātakapracayavanmama tāvatpuṇyapuñjamapi nātha ! lunīhi |
kāñcanī bhavatu lohamayī vā śṛṅkhalā yadi padorna viśeṣaḥ ||

iti | atra hetau saptamī | tisṛbhiḥ kriyābhirmalatrayāpākaraṇaṃ prārthyate iti 
jñeyaṃ |  

p. 53)

kārāgṛhādapi tvameva mocayitrītyarthaḥ | yathā bāṇāsurapure'niruddhasya 
devīkṛtaṃ mocanam | taduktaṃ harivaṃśe- 

ebhirnāmabhiranyaiśca kīrtitā hyasi śāṅkari |
tvatprasādādavighnena kṣipraṃ mucyeya bandhanāt ||

avekṣasva viśālākṣi ! pādau te śaraṇaṃ vraje |
sarveṣāmeva bandhānāṃ mokṣaṇaṃ kartumarhasi ||

ityārabhya- 

evaṃ stutā tadā devī durgā durgaparākramā |
baddhaṃ bāṇapure vīramaniruddhaṃ vyamocayat ||

ityantam | evamekāvalīnāmikā rājakanyakāpi kālaketudānavena baddhā tatsakhyā 
yaśovatyā svopāsitabhagavatīmantrabalānmociteti kathā devībhāgavate 
ṣaṣṭhaskandhe smaryate iti || 26 ||

evaṃ prāptacetaḥśuddhīnāmapi kāmārthitayā kīdṛgdhyeyamityāśayena 
rājasadhyānaṃ saphalaṃ varṇayati-

rudrāṇi ! vidrumamayīṃ pratimāmiva tvāṃ ye cintayantyaruṇakāntimananyarūpām 
|
tānetya pakṣmaladṛśaḥ prasabhaṃ bhajante 
kaṇṭhāvasaktamṛdubāhulatāstaruṇyaḥ || 27 ||

rudrasya janmādirujāṃ drāvayituḥ śivasya sambandhinī śaktistatsaṃbuddhiḥ he 
rudrāṇi ! ityetadāmantraṇapadamaruṇavarṇānuguṇatayā 
vivecyamatastādṛśopamānābhidhānam | vidrumamayīṃ lodhrakāṣṭhaprakṛtiṃ 
tannirmitāmityarthaḥ pratimāṃ praticchāyāmiva tvāṃ bhavatīmaruṇakāntiṃ 
raktavarṇāṃ sūryakāntiṃ vojjvalāmudayāstamayarāhityāt | nahi 
draṣṭurdraṣṭerviparilopaḥ iti śruteḥ (bṛha0 4-3-32) | 
taduktam- 

p. 54)

anastamitabhārūpastejasāṃ tamasāmapi |
ya eko'ntaryadantaśca tejāṃsi ca tamāṃsi ca ||

iti | śuddhaṃ śāntaṃ layodayavihīnamiti ca | 
tathānanyarūpāmavidyāmānamanyatsadṛśaṃ rūpaṃ yasyāstāmanupamāṃ | 
yadvānanyarūpāmabhinnarūpāmetenābhedopāsanā sūcyate | ye cintayanti smaranti 
tāṃstvadupāsakānetyopetya pakṣmāṇyakṣiromāṇi vidyante yayoste pakṣmale 
matvarthīyo lac dṛśau cakṣuṣī yāsāṃ tāḥ pakṣmaladṛśaḥ sulocanāstaruṇya 
ārūḍhayauvanāḥ śyāmā ityarthaḥ prasabhaṃ haṭhādbhajante sevante 
āśliṣyantītyarthaḥ | kīdṛśyaḥ kaṇṭhe sādhakagrīvāyāmavasaktā lagnā 
mṛdvyaḥ komalā bāhulatā bhujavallaryo yāsāṃ tāḥ | atrāpi 
kāmeśvarīdhyānābhiprāyametaditi || 27 ||

tadeva bhaṅgyantareṇa prapañcayati- 

tvadrūpamullasitadāḍimapuṣparaktamudbhāvayenmadanadaivatamakṣaraṃ yaḥ |
taṃ rūpahīnamapi manmathanirviśeṣamālokayantyurunitambataṭāstaruṇyaḥ || 28 ||

ullasitamutphullaṃ yaddāḍimapuṣpaṃ dāḍimī (karaka) latāyāḥ kusuma 
tadvadraktaṃ masṛṇāruṇavarṇaṃ madanadaivataṃ 
kāmarājabījādhidaivatamakṣaraṃ varṇamavinaśvaraṃ ca tvadrūpaṃ 
tadvapurniṣkalaṃ kāmakalātmakaṃ ya udbhāvayedutkarṣatayā hṛdi 
svātmābhedena pariśīlayet | taṃ rūpahīnaṃ rūpākhyaguṇarahita virūpamapi 
manmathanirviśeṣaṃ kāmānniṣkrāntaviśeṣaṃ kamanīyatvātkāmopamam | 
urunitambataṭā bṛhannitambaprāgbhārāstaruṇya ārūḍhayauvanāḥ kāminya 
ālokayanti paśyantyabhyupagachanti madanabhrameṇa bhrāmyantītyarthaḥ | 
dhyānaṃ prāgvad bodhyam || 28 ||

nanu kiṃ lakṣaṇopāsanā kāryetyāśaṃkya tatprakāramupakṣipan svasya 
tadāsaktiṃ nairantaryeṇāśāste- 

p. 55)

tvadrūpaikanirūpaṇapraṇayitābandho dṛśostvadguṇagrāmākarṇanarāgitā 
śravaṇayostvatsaṃsmṛtiścetasi |
tvatpādārcanacāturī karayuge tvatkīrtanaṃ vāci me kutrāpi tvadupāsanavyasanitā 
me devi ! mā śāmyatu || 29 ||

he devi ! me dṛśornetrayostvadrūpasya bhavatyā vapurlāvaṇyaguṇasya yadekaṃ 
mukhyaṃ nirūpaṇaṃ tatsaundaryāmṛtarasalaharīcamatkāraviṣayatayā 
parāmarśastatra praṇayitābandhaḥ premagranthirbhūyāt vedyāntaraparihāreṇa 
bhavatyā rūpasaundaryaikaviṣayāsakte dṛśau madīye bhavetāmityāśaṃsā | 
śravaṇayoḥ karṇayostvadguṇagrāmāṇāṃ tava śauryādiguṇeṣu gīyamāneṣu 
viṣaye ye grāmāḥ kaṇṭhotthāḥ ṣaḍjādisvaraviśeṣāsteṣāmākarṇane śravaṇe 
rāgitānuraktiḥ matkarṇau tava guṇagrāmaśravaṇānuraktau bhavetāmityarthaḥ | 
ṣaḍjādilakṣaṇaṃ yathā-

nāsāṃ kaṇṭhamurastālujihvāṃ dantāṃśca saṃspṛśan |
ṣaḍabhyaḥ saṃjāyate yasmāttasmātṣaḍja iti smṛtaḥ ||

tadvadevotthito vāyururaḥ kaṇṭhasamāhataḥ |
nābhiṃ prāpto mahānādo madhyasthastena madhyamaḥ ||

vāyuḥ samudgato nābheruro hṛtkaṇṭhamūrdhasu |
vicaranpañcamasthānaprāptyā pañcama ucyate ||

iti | nāradaḥ-

ṣaḍjaṃ rauti mayūrastu gāvo nardanti cārṣabham |
ajāvikau ca gāndhāraṃ krauñco nardati madhyamam ||

puṣpasādhāraṇe kāle kokilo rauti pañcamam |
aśvastu dhaivataṃ rauti niṣādaṃ rauti kuñjaraḥ ||

iti | yadvā- guṇasamūhānāṃ bhaṇḍāsuravadhādiśauryādīnāṃ 
mahiṣāsurayuddhavadhacaritānāṃ jagatsṛṣṭipālanādīnāṃ pañcakṛtyānāṃ 
cākarṇane śravaṇe 

p. 56)

rāgitānanyamanaskatayāsaktiriti | upalakṣaṇametat tena dhīndriyāntarāṇāmapi 
yathāsvaṃ vyāpāro jñeyaḥ | tathā 
tattaddṛṣṭaśrutarūpaguṇānubhavajanyasaṃskārodbodhitā cetasi tava 
saṃsmṛtiriti | bāhyendriyajanyavyāpāroparatau satyāṃ madīyaṃ 
manastvatsmaraṇaikapravaṇaṃ bhavatvityarthaḥ buddhivyāpārasyāpi 
etadupalakṣaṇam | tathā karayuge karayostvatpādārcanāyāṃ 
gandhapuṣpādyupacārārpaṇalakṣaṇāyāṃ tava caraṇābjayugalārhaṇāyāṃ cāturī 
dākṣyaṃ kṛtahastatā tathā vāci vāṇyāṃ tvatkīrtanaṃ 
tvadīyānāmuktaguṇānāṃ samyagvarṇanaṃ bhūyāditi sarvaśeṣaḥ | 
pādendriyavyāpārasyāpi pradakṣiṇāderidamupalakṣaṇam | taduktaṃ- 

madhukaiṭabhanāśaṃ ca mahiṣāsuraghātanam |
kīrtayiṣyanti ye tadvadvadhaṃ sumbhanisumbhayoḥ ||

ityādi |

kutrāpi kasmiṃścadapi deśe kāle'vasthāsu vā tvadupāsane 
uktadarśanākarṇanasmaraṇakīrtanādirūpe vyasanitā vyāsaktirme mama mā 
śāmyatu śāntā mābhūdityarthaḥ | evamīdṛśārcāvyāpāre karaṇavargasya 
sarvathā nirantarayā devīsvarūpapariśīlanaparatvena malahānipūrvaṃ 
pūrṇānandavyāptyā viśuddhatāsādanamabhipretamiti | taduktam-

parānandamahāvyāptiraśeṣamalavicyutiḥ |
śive gantṛtvamādānamupādeyaśivastutiḥ ||

śivāmodabharāsvādadarśanasparśanānyalam |
tadākarṇanamityevamindriyāṇāṃ viśuddhatā ||

iti | tato'pi paradevatābhāvābhivyaktireva paraṃ prayojanam | atrāyaṃ māśabdo na 
tu māṅ tena luṅliṅoraprasaṅgaḥ | āśaṃsāyāṃ loṭ || 29 ||

asya stotrasya kevalaṃ kīrtane śravaṇe'pi vā 
prāguktavidyopāsanāphalabhāgitvamastītyāha- 

p. 57)

yasstotrametadanuvāsaramīśvarāyāḥ śreyaskaraṃ paṭhati vā yadi vā śṛṇoti |
tasyepsitaṃ phalati rājabhirīḍyate'sau jāyeta sa priyatamo madirekṣaṇānām || 30 ||

yo bhaktimānīśanaśīlāyāḥ pūrṇaiśvaryasaṃpannatvādīśvarāyāḥ 
ajādyadantatvāt ṭāp | na tu puṃyoge ḍīṣ | mahātripurasundaryā 
anuvāsaramanvahaṃ śreyo bhogamokṣarūpaṃ taddhetutācchīlyānulomyaiḥ karotīti 
karamaihikāmuṣmikaṣemakāri etatstotraṃ stavaṃ yadi paṭhati kīrtayati śṛṇoti vā 
pāṭhasya phalavipākaṃ yāvadāvṛttyā pariśīlanaṃ śravaṇasyāpi 
tatsamantarapāṭhābhyāsatatphalaparyantaparyavasānatvamanuvāsaraśabdena 
bodhyate | anyathā sakṛtpaṭhanādyabhidhānaṃ syāt | tasyepsitamabhīṣṭaṃ phalati 
niṣpadyate | hyasau rājabhirīḍyate bhūpaiḥ stūyate | madiro 
mattakhañjanastadvadrucire īkṣaṇe netre yāsāṃ madirekṣaṇānāṃ 
khelatkhañjanākṣīṇāṃ vāmalocanānāṃ sa priyatamaḥ preyāñjāyeta 
saṃbhāvanāyāṃ liṅ | atra tisṛbhiḥ kriyābhistryakṣarīvidyopāsanāyāḥ 
tridhāphalamabhidhīyate || 30 ||

idānīṃ maṅgalaprayojanatvena stotrānte'pi paradevatāyāṃ svaprahvībhāvaṃ 
parāmṛśan stavamupasaṃharati-

brahmendrarudraharicandrasahasraraśmiskandadvipānanahutāśanavanditāyai |
vāgīśvari ! tribhuvaneśvari ! viśvamātarantarbahiśca kṛtasaṃsthitaye namaste || 
31 ||

iti śrīdharmācāryakṛtau pañcastavyāṃ carcāstavo dvitīyaḥ || 2 ||

p. 58)

he vāgīśvari ! tribhuvaneśvari ! viśvamātariti saṃbodhanapadatrayaṃ 
kūṭatrayādhiṣṭhātṛdevatārthānurūpyeṇa 
tattadanuguṇaphalavitaraṇābhimukhīkaraṇābhiprāyato bodhyam | 
aṣṭasarasvatīṣvekā vāgīśvarī nāmadheyā tadrūpā ca vāgeva viśvā bhuvanāni 
jajñe iti śruteḥ viśvayoniḥ | vāmakeśvare- 

vāgīśvari jñānaśaktirvāgbhave [vāgbhavā] mokṣadāyinī |

ityuktervāgbījādhiṣṭhātrītyarthaḥ | tathā-

kāmarāje [kāmarājā] kriyāśaktiḥ kāmeśī kāmarūpiṇī |

iti kāmabījādhiṣṭhātrī kāmeśvarītyarthaḥ | tathā-

śaktibīje [śaktibījā] parāśaktiricchaiva śivarūpiṇī [viṣarūpiṇī 
pāṭhāntarāṇi kā0] |
evaṃ devī tryakṣarī tu mahātripurasundarī || (4-17-18)

iti śaktibījādhiṣṭhātrī parāśaktirityarthaḥ |

brahmevedamamṛtaṃ purastād brahmapaścādbrahma dakṣiṇataścottareṇa | 
adhaścordhvaṃ ca prasṛtaṃ brahmaivedaṃ viśvamidaṃ variṣṭam iti śruteḥ 
(muṃḍa 2-2-11) antarbahiśca parāparaprakṛtibhāvena kṛtā 
saṃsthitiravasthānaṃ yayā tasyai te tubhyaṃ namo'smākaṃ tvayi 
kāyavāṅmanasāṃ tadekapravaṇatālakṣaṇaḥ prahvībhāvo bhūyādityāśāsyate | 
yadvā- antariti sarveṣāmantarjīvarūpeṇa anena jīvenaivātmanānupraviśyeti 
śruteḥ | tathā bahistejo'bannādirūpeṇa yadvāntaḥ sūkṣmeṇa bahiḥsthūlena 
rūpeṇeti | yadāhāgamaḥ-

aṇoraṇuttarā devī mahato'pi mahīyasī |

śrutiśca- aṇoraṇīyānmahato mahīyān iti | (kaṭho0 2-20)

atha cāntarbahiśceti kāryakāraṇabhāvena tadabhedavyapadeśena vā sarvaṃ 
khalvidaṃ brahma tajjalāniti śānta upāsīta iti śruteḥ (chāṃdo0 3-14##-

p. 59)

yathāsaumyaikena mṛtpiṇḍena sarvaṃ mṛṇmayaṃ vijñātaṃ-
syādvācārambhaṇaṃ vikāro nāmadheyaṃ mṛttiketyeva satyam |

iti śrutyā (chāṃdo0 6-1-4) hetuhetumadbhāvenobhayathaikameva 
vastu cakāstīti tadatiriktaṃ kimapi vastu nāstīti |

yasmātparaṃ nāparamasti kiṃcit iti śruteḥ (śvetā0 3-9) |

idaṃ brahmedaṃ kṣetramime lokā ime devā imāni 

bhūtānīdaṃ sarvaṃ yadayamātmā ityādi śruteśca (bṛha0 2-4##-

tubhyaṃ kīdṛśyai brahmā vidhirindraḥ śakraḥ athavā indrā brahmavidaḥ | 
idamityaparokṣeṇa ye sākṣiṇaḥ svātmabhūtaṃ brahmāhamasmīti sākṣātkurvanti te 
indrāḥ | idamadarśadidamadarśamiti tasmādindro nāmeti śruteḥ api cendra ātmā |

sa etameva puruṣaṃ brahma tatamapaśyadidamadarśamiti tasmādindro
nāmedandro ha vai nāma tamidandraṃ santamindramityācakṣate |

iti śruteḥ (aita0 2-3-13) | rudraḥ śivaḥ hariśabdena 
viṣṇunāgarājadharmarājavāyavo gṛhyante tathā ca viśvaḥ- 

harirvātārkacandrendrayamopendramarīciṣu |
siṃhāśvakapibhekāhiśukalokāntareṣu ca ||
harirvācyavadākhyāto haritkapilavarṇayoḥ |

iti viṣṇunārādhyatvaṃ yathā pādme-

indranīlamayīṃ devīṃ viṣṇurarcayate sadā |
viṣṇutvaṃ prāptavāṃstena ityādi ||

candraḥ somaḥ sahasraraśmiḥ sūryaḥ sūryārādhyatvaṃ yathā padmapurāṇe-

devyāḥ ratnamayīṃ mūrtiṃ bhaktyā nityaṃ divākaraḥ |
pūjayitvāptavāndivyaṃ sūryatvaṃ śubhamuttamam ||

p. 60)

iti skandaḥ kumāro dvipānano gaṇeśo 
hutāśano'gniretairbrahmādibhiragniparyantairdvādaśabhiḥ śrīvidyopāsakaiḥ 
pṛthak pṛthak svasvādhikārapadavīprāptyai 
svasvavidyābhirvanditāyāyupāsitāyai | etena 
brahmādīnāmapyaiśvaryalābhastvadadhīna eva kimvanyeṣāmiti bhāvaḥ ||

iti śrīmahāmāheśvarapaṇḍitaharabhaṭṭaśāstriviracitāyāṃ
pañcastavīṭīkāyāṃ

dvitīyaḥstavaḥ ||

vallī kāpi puratrayeṣu vilasatyekākinī visphurannānāvarṇadaśā palāśakhacitā 
śākhāpratānāgraṇīḥ |
yasmin naikaphalorubhāravinatasvaṅgā turīyā stave tasmin prāthamiketare 
vivaraṇaṃ pūrṇaṃ parānugrahāt ||



###########   END OF FILE  #######