####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00509
Uniform title: gaurīkāñcalikātantra
Author : mantramahādeva

Description: 
This tantra belongs to the class of tantras, concerned with potions and spells to cure illness.


Notes: 
Data-entered by the staff of Muktabodha under the supervision of Mark S.G. Dyczkowski.

Revision 0: August 14, 2021.

Publisher : Bhuvanacandra Vasaka
Publication year : 1921
Publication city : Calcutta
Publication country : India
####################################################



p. 1)

ācāryabhāsarvajñaviracitā 

gaṇakārikā 

namaḥ sarvajñāya ||

pañcakāstvaṣṭa vijñeyā gaṇaścaikastrikātmakaḥ |
vettā navagaṇasyāsya saṃskartā gururucyate || 1 ||

lābhā malā upāyāśca deśāvasthāviśuddhayaḥ |
dīkṣākāribalānyaṣṭa pañcakāstrīṇi vṛttayaḥ || 2 ||

gurubhaktiḥ prasādaśca materdvandvajayastathā |
dharmaścaivāpramādaśca balaṃ pañcavidhaṃ smṛtam || 3 ||

ajñānahānyadharmasya hāniḥ saṅgakarasya ca |
cyutihāniḥ paśutvasya śuddhiḥ pañcavidhā smṛtā || 4 ||

vyaktāvyaktaṃ jayacchedo niṣṭhā caiveha pañcamī |
dravyaṃ kālaḥ kriyā mūrttiḥ guruścaiveha pañcamaḥ || 5 ||

gururjanaguhādeśaḥ smaśānaṃ rudra eva ca |
jñānaṃ tapo'tha nityatvaṃ sthitiḥ siddhiśca pañcamī || 6 ||

vāsaścaryā japadhyānaṃ sadārudrasmṛtistathā |
prasādaścaiva lābhānāmupāyāḥ pañca niścitāḥ || 7 ||

mithyājñānamadharmaśca saktihetuścyutistathā |
paśutvamūlaṃ pañcaite tantre heyādhikārikāḥ || 8 ||

samāptāḥ gaṇakārikāh |
p. 2

gaṇakārikāyā ratnaṭīkā 

namaḥ sarvajñāya |

anādisṛṣṭisaṃhārasthitinirvāṇakāriṇe |
nityānantyeśvaratvāya namaḥ sarvārthadarśine ||

saṃsārakūpapatitaṃ yaḥ samuddharati dvijam |
pañcārthajñānahastena tasmai sadgurave namaḥ ||

kiṃ nu bhagavan ! pañcārthoktasamastaniyogānupālanādeva duḥkhāntaḥ prāpyata iti ? 
| ucyate | na kevalaṃ tataḥ kintu samastaniyogānuṣṭhānaśaktivikalenāpi 
brāhmaṇaviśeṣāṇāṃ śiṣyatvenopagatānāṃ samyaganugrahakaraṇādapi 
duḥkhāntaḥ prāpyate | kasmāt ? | sampradāyarakṣaṇāt | sampradāyaṃ pālayatā hi 
tatsampradāyasāmarthyena duḥkhāntaṃ gamiṣyatāṃ bahūnāmapi duḥkhāntaḥ 
sampādito bhavati | tato'nantaphalapuṇyopacayaḥ | tato yogaprāptau prasādādduḥkhānta 
iti | tadevaṃ duḥkhāntanimittena śāstrasampradāyapālanārthaṃ 
brāhmaṇaviśeṣāṇāṃ samyaganugrahaḥ kartavyaḥ | asamyakkaraṇe tu sampradāyo 
viplāvita eva syāttato mahānarakapāta eveti | samyaganugrahakartṛtvaṃ punaḥ 
pañcārthaśāstroktārthaniścaye sati bhavati | sa ca śāstrārthaḥ pañcadhā navadhā vā 
jñātavyaḥ | tadapratipādane hi vidhāvapyanadhikāraḥ kutastasya yogamokṣāviti | 
tasmānmumukṣubhiḥ 

pañcakāstvaṣṭa vijñeyā gaṇaścaikastrikātmakaḥ |

pañcapañcasaṅkhyā'vacchinnāḥ samudāyāḥ pañcakā lābhādayasteṣāṃ 
nyūnādhikavyavacchedena aṣṭa iti saṅkhyāmāha | tu śabdaḥ 
saṅkṣepavistāraparijñānayoḥ tulyaphalatvamavadhārayati śiṣyajijñāsā'nurodhena 
bhāṣyārambho'pyarthavāniti | vijñeyā viśeṣeṇa jñātavyāḥ punaḥ punarabhyāsena 
dṛḍhīkartavyā yena sarvadā śāstrārthe cittasthe kṛte sati granthavismaraṇe'pi 
brahmodyadoṣo na bhavet | anuṣṭhānāśaktasyānyathā hi surāpānasamaṃ pātakaṃ 
syāditi | gaṇaśabdaḥ samuccayavācī | ca śabdaḥ samuccayena kevalamaṣṭa pañcakā 
vijñeyā gaṇaścaikastrikātmako vijñeya iti | eka 
ityanantaroktāṣṭasaṅkhyāśaṅkānirākaraṇārtham |

p. 3)

trisaṅkhyāvacchinnaḥ samudāyaḥ trikaḥ | sa eva ātmā svabhāvo yasya 
bhaikṣādivṛttigaṇasya sa tathoktaḥ vṛttyantaraniṣedhārtham | evamete nava gaṇā 
jñeyatvonoddiṣṭāḥ | yastānsamyagavadhārayati so'vaśyaṃ duḥkhāntaṃ 
yāsyatyanyeṣāṃ cānugrahakaraṇasamartho bhavatīti | kutaḥ punaretanniścīyata iti (?) | 
niścīyate yasmātsarvaireva paramayogibhiḥ 

vettā navagaṇasyāsya saṃskartā gururucyate ||

vida jñāne | tasya vediteti prāpte chandobhaṅgaparihārārthaṃ chāndasaḥ prayogo vettā 
iti kṛtaḥ | athavā vicāraṇe tasya vetteti bhavati | vettā vicārayitā | nabagaṇānāmiti 
bahuvacane prāpte chandobhaṅgaparihārārthaṃ tatparijñānasya 
bhinnaphalatvajñāpanārthaṃ vā navagaṇasya ityuktam | nandimahākālādiṣvapi 
gaṇaśabdo dṛṣṭaḥ tadāśaṃkānirākaraṇārthamasyetyuktam | asya anantaroddiṣṭasya 
lābhādikasyetyarthaḥ | suparīkṣitaṃ brāhmaṇaṃ dīkṣāviśeṣeṇa 
pañcārthajñānaviśeṣeṇa ca śiṣyaṃ saṃskurvansaṃskarttā ityucyate | sa ca 
tajjñairmukhyata eva gururucyate | gururācāryaḥ śraddhāvatāmāśramiṇāṃ 
darśanasambhāṣaṇādibhirapi pāpaghnaḥ puṇyātiśayakārī cetyarthaḥ | athavā 
anyathā kārikāsambandhaḥ pradarśyate | dvividhaḥ khalvatra brāhmaṇo'pavargagantā 
śrūyate sādhaka ācāryaśceti | tatreha darśane yaḥ sādhakaḥ sannapavargaṃ 
gantumicchati tena śāstraṃ śrutvā''cāryopadeśamātrādvā vidhyādisvarūpaṃ 
jñātvā vidhiyogānuṣṭhānamatyantābhiyogena kartavyam | yastvācāryaḥ 
sannapavargaṃ gantumicchati tena kiṃ kartavyamiti āha - 

pañcakāstvaṣṭa vijñeyā gaṇaścekastrikātmakaḥ | iti 

tu śabdaḥ samastasūtrasūtrāvayavānāmupodghātādiniścayadvāreṇa navagaṇā 
vijñeyāstānvijñāya śiṣyāṇāṃ saṃśayādyajñānaṃ nirvartayatā saṃskāraḥ 
kartavya ityevaṃbhūtaṃ viśeṣaṃ sūcayati | śeṣastvavayavārthaḥ pūrvavat | kathaṃ 
punaretat gamyate (?) | duḥkhāntanimittamācāryatvamātmana icchatā navagaṇā 
viśeṣato jñātavyā iti gamyate | yasmāt 

vettā navagaṇasyāsya saṃskartā gururucyate || 1 ||

evaṃ cānuṣṭhānābhiniveśāsamartho'pi yadi śraddhānvito bhūtveṣadapi 
samayamātraṃ pālayan jñānābhyāsaṃ na muñcati tadā'pavargagantā 
bhavatyācārya iti cocyate |

p. 4)

yastvāgamārthajñānamātreṇa tuṣṭaḥ san śraddhādivirahitaḥ śraddhādimātrayukto 
vā lābhādijñānavikalaḥ sa khalvācāryābhāsa eva nāpavargaganteti || 1 ||

gaṇasvarūpaṃ tarhi vācyam | atha ke'ṣṭa pañcakāḥ kaśca trikātmako gaṇaḥ (?) ityata 
āha - 

lābhā malā upāyāśca deśāvasthāviśuddhayaḥ |
dīkṣākāribalānyaṣṭa pañcakāstrīṇi vṛttayaḥ || 2 ||

vidhīyamānamupāyaphalaṃ lābhaḥ athavā 
jñānatapodevanityatvasthitisiddhibhedabhinnā lābhāḥ athavā'nabhivyaktapūrvā 
bhāvāḥ sādhakātmani vyajyamānā lābhāḥ | yeṣāmātmāśritānāṃ bhāvānāṃ 
kṣapaṇārthaṃ sādhakaḥ prayatate te malāḥ | athavā 
mithyājñānādharmasaṅgacyutipaśutvabhedabhinnā malāḥ | sādhakasya 
sādhakatamāḥ śuddhivṛddhihetava upāyāḥ | athavā 
vāsaścaryājapadhyānasadāsmṛtiprasādabhedabhinnā upāyāḥ | ca śabdaḥ 
pādapūraṇa lābhādīnāṃ vā parasparāsaṅkīrṇalakṣaṇasūcaka iti | 
deśāścāvasthāśca viśuddhayaśceti dvandvaḥ | yadāśrayasāmarthyena sādhakaḥ 
śuddhivṛddhī prāpnoti te deśā gurujanaguhāsmaśānarudralakṣaṇā iti vakṣyāmaḥ | 
ālābhaprāpterekamaryādayā'vasthitayaḥ sādhakasya avasthāstā vyaktādiviśeṣeṇa 
viśiṣṭā vakṣyante | mithyājñānādīnāmatyantavyapohā viśuddhayaḥ | dīkṣākārīṇi 
ca balāni ceti dvandvaḥ | dīkṣānimittāni dīkṣākārīṇi 
dravyakālakriyāmūrtigurusañjñakāni sādhakātmagatānyupāyapravṛttinimittāni | 
balāni gurubhaktimatiprasādadvandvajayadharmāpramādalakṣaṇāni | aṣṭa pañcakā 
ityupasaṃhāraḥ | tisro vṛttaya iti prāpte trīṇi vṛttaya iti chāndasaḥ prayogaḥ kṛtaḥ 
pañcamalaghūkaraṇārtham | āgamāvirodhino'nnārjanopāyā vṛttayaḥ 
bhaikṣotsṛṣṭayathālabdhasaṃjñikāḥ | tatra prathamāvasthasya tāvadbhaikṣameva 
vṛttistasyāḥ ko vidhirityucyate | jñātvā bhikṣākālaṃ śucirbhūtvā bhasmanā hastau 
prakṣālya pātraṃ gṛhītvā udakaprakṣālitaṃ mantrasaṃskṛtaṃ ca kṛtvā mahādevaṃ 
praṇamyānujñāṃ prārthayettadanu gurūniti | tato devagurubhiranujñāto 
mantrānāvartayan īśvarāsaktacitto vā dṛṣṭipūtena pathā'bhiśastapatitagṛhāṇi 
varjayitvā yatra ca bhayanimittaṃ ca kākādi kaluṣanimittaṃ 
cāmedhyavivastrayuvativiṭadurjanavacanabhikṣukākīrṇatvādyupalabhyate tadgṛhāṇyapi 
varjayannekameva grāmādīnāmanyatamaṃ paryaṭedyadyantarāle eva paryāptirna bhavati 
upaghāto vā kaściditi tataḥ 

p. 5)

svāyatanamāgatyāparādhānurūpaṃ prāyaścittaṃ kṛtvā mantrasaṃskṛtaṃ ca kṛtvā 
tadbhaikṣaṃ śivāyānugurave ca nivedya maheśvaraṃ hṛdi sandhāya 
saṃyatavāgudaṅmukhaḥ prāṅmukho vā samarasaṃ kṛtvoparyupari vā bhuñjīteti | 
pātraṃ pātraśaucaṃ ca sūtrānumataṃ smṛtiprasiddhaṃ pratipattavyam | tathā ca 
yājñavalkyaḥ - 

yatipātrāṇi mṛdveṇudārbalābumayāni ca |
salilaiḥ śuddhireteṣāṃ govālaiśca nigharṣaṇam ||

manurapyāha - 

ataijasāni pātrāṇi tasya syurnirvraṇāni ca |
teṣāmadbhiḥ smṛtaṃ śaucaṃ camasānāmivādhvare ||

sāpannaṃ ca salepaṃ ca vibhinnaṃ cāpi yadbhavet |
tatra bhuktvā ca pītvā ca yatiścāndrāyaṇaṃ caret || iti yamaḥ ||

āgamāvirodhigrahaṇādekānnasya 
vidyākhyāpanānuśāsanalokayātrādibhirnimittairarjitabhaikṣasya pratiṣedho draṣṭavya 
ityeṣā prātipadāvasthasya vidhiḥ | tṛtīyāvasthasyāpyayaṃ vidhiḥ | etāvānatra 
viśeṣaḥ | prāyaścittanivedanapañcabrahmajapānusnānādikaṃ na karoti tṛtīyāvasthaḥ 
paramayogitvāditi | dvitīyāvasthasyotsṛṣṭameva vṛttiḥ | devādyuddeśena 
parityaktamannapānaṃ kāruṇyakautūhalābhyāṃ vā yadi 
kaścidaduṣṭajātirdadyādaśucitvādidoṣarahitaṃ tadutsṛṣṭam | tacca 
māyābhedenopayoktavyam | bhaikṣanivṛtteḥ pātraniyamo nāsti | caturthāvasthasya 
yathālabdhaṃ vṛttiḥ | smaśānadeśāvasthitenaiva divase divasadvaye traye vā 
yadannapānaṃ prāpyate tadyathālabdhamucyate | pañcamāvasthasya tu 
śarīrābhāvādeva vṛttyanupapattiriti || 2 ||

granthakramasya aprādhānyamarthajñānasyaiva prādhānyaṃ manyamāno'krameṇaiva 
nirdeśaṃ karoti gurubhaktiḥ ityādinā | athavā sarvārambhāṇāṃ 
lābhārthatvāttatprādhānyajñāpanārthaṃ pūrvamādau lābhā uddiṣṭā idānīṃ 
punaḥ sarve'pi lābhā upāyasādhyāste copāyā balahīnaiḥ puruṣairanuṣṭhātuṃ na 
śakyanta ityataḥ prādhānyajñāpanārthaṃ balānāmādau nirdeśamāha |

gurubhaktiḥ prasādaśca materdvandvajayastathā |
dharmaścaivāpramādaśca balaṃ pañcavidhaṃ smṛtam || 3 ||

guruḥ ācāryaḥ pañcārthajñānopadeṣṭā | tasya bhaktiḥ śraddhā 
sarvaduḥkhābhibhūtasya mamāyameva trātetyeṣā bhāvanā kāryā | tathā coktam | 
gururdevo guruḥ svāmī ityādi |

p. 6)

na ca kāraṇapravacanayorbhaktivirodhastadanumatyaiva tayorbhaktisambhavāt | yatastu 
tayorbhaktiḥ kartavyeti nānumanyate sa gurureva na bhavati ananugrahakāritvāt | sā ca 
gurubhaktistadanabhipretaṃ pariharatotthānādikaṃ kurvatā ca satataṃ sevanīyā | 
jñātvā tadabhiprāyamaśāstroktamapi taddhitaṃ kartavyam | tathā coktam | 
granthārthaviduṣaḥ ityādi | yadeva hi gurorabhipretaṃ tadeva vihitaṃ śāstrānuktamapi 
śreyaskāri bhavati rāmasya mātṛvadhavat | gurorvākyāni ca śraddheyāni anyathā 
doṣaśravaṇāttattvajñānālābhaprasaṅgācca | bhaktibalavihīno hi grahaṇādyupeto'pi 
jñānāvalepenānyathā'pi śāstrārthaṃ pratipadyata ityato grahaṇādyupetasya 
bhaktireva balam | bhāṣyavirodho'pi nāsti | yato balamaṣṭāṅgaṃ 
brahmacaryamityasyāyamarthaḥ | aṣṭānāṃ grahaṇādīnāmaṅgamaṣṭāṅgaṃ 
bhaktirevocyate vedāṅgavadarthāntarābhidhānāt | saiva brahmacaryanimittatvāt 
brahmacaryamityucyate | yadi punaryathāśrutārthaḥ syāttadā 
vāsovidhānamityādijñāpakābhidhānavirodhaḥ syāditi | vidhāvadhikṛtasya dvitīyaṃ 
balamāha | prasādaśca mateḥ iti | matiprasādaśabdenākaluṣatvamuktam | sati hi 
tasminmatiḥ prasannā bhavati | tathā ca balamakaluṣatvam iti bhāṣyam | atrāpi tarhi 
spaṣṭābhidhānaṃ kimarthaṃ na kṛtam (?) | 
matiprasādahetoranyasyāpyāśaucavyāmohādyabhāvasya balatvajñāpanārthaṃ 
pradhānāpekṣayātvakaluṣatvamuktam | ca śabdaḥ pūrvoktabalasya vidyamānasyāpi 
caritārthatvāttadbalatvaṃ prādhānyānna cintyata iti sūcayati | taccā'kaluṣatvaṃ 
dvividhaṃ paramaparaṃ ca | tatra kaluṣatvabījasadbhāve'pyutpannakaluṣatvanirodhi 
yāvadanāgataṃ kaluṣaṃ notpadyate tāvatkālaṃ yadakaluṣatvaṃ tadaparaṃ 
yadbījakṣayādatyantanimittasadbhāve'pi kaluṣaṃ notpadyate tatparamiti | 
yogakriyāyāmadhikṛtasya tṛtīyaṃ balamāha | dvandvajayastathā iti | 
ādhyātmikādhibhautikādhidaivikāni duḥkhasādhanāni dvandvāni teṣāṃ jayaḥ 
sahiṣṇutvaṃ dvandvānabhibhāvyatvamityarthaḥ | tathāśabda. samānārthe | yathā 
prāguktabale satyapyacaritārthavidhyadhikṛtasyākaluṣatvameva balaṃ cintyate tathā 
baladvayasadbhāve'pyacaritārthaṃ dvandvasahiṣṇutvameva prādhānyena balaṃ cintyata 
iti | tadapi dvividhaṃ parāparabhedāt | yattāvadakṣapite pāpe 
yogakriyāyāmabhiniviṣṭasya sādhakasya 
mṛdumadhyamaśītātapādibhiranubhāvyatvaṃ dhyānādyabhyāsastadaparam | yat 
kṣapite niḥśeṣapāpe guhādeśaṃ gatasyātitīvrairapi 
śītādibhiranabhibhāvyatvalakṣaṇaṃ dvandvasahiṣṇutvaṃ tatparam | bhāṣyakṛtā tu 
parameva gomṛgadharmatvaṃ vyākhyātam | akaluṣatvavadabhyūhya śiṣyā aparaṃ 
gomṛgadharmitvaṃ pratipatsyanta ityabhiprāyavatā noktamiti |

p. 7)

sadāsmṛtyadhikṛtasya caturthaṃ balamāha dharmaścaiva iti | evaśabdo'vadhāraṇe | 
yadā dharma evāvasthitastadā balamityarthaḥ | īṣadadharmasadbhāve'pyavadhāraṇe 
nāsti doṣaḥ kṛṣṇabindusadbhāve śukla evāyaṃ paṭa iti yathā | ca śabdaḥ 
pūrvoktabalatrayasadbhāve'pi dharma evācaritārthatvena balamiti sūcayati | 
niṣṭhāyogayuktasya pañcamaṃ balamāha apramāda iti | viśiṣṭaṃ 
jñānamevātrāpramāda ityabhipretam | tathā ca bhāṣyam asya tu jñānamasti 
yasmādāhāpramādī iti | ca śabdaḥ śarīrendriyadharmādharmavyāvṛttau 
satyāmapramāda eva balamiti sūcayati balānāṃ nyūnādhikabhāvavyavacchedaṃ ceti | 
balaṃ pañcavidhamityupasaṃhāraḥ | smṛtamityāptoktatvaṃ darśayati | nanu ca tatra 
balacintā yujyate yatra tatsaṃpādya śatrukṣaya upapadyate | atra punarmokṣaśāstre 
vītarāgasya niṣparigrahasya śatrava eva na vidyante kutaḥ tatkṣaya ityato'tra 
balacintā'nupapanneti | naitadevam | atrāpi 
sādhakasyājñānādiśatruhānyupapattestatpratipādanārthamāha - 

ajñānahānyadharmasya hāniḥ saṅgakarasya ca |
cyutihāniḥ paśutvasya śuddhiḥ pañcavidhā smṛtā || 4 ||

ajñānahāniradharmasya iti prāpte 
chandobhaṅgaparihārārthamajñānahānyadharmasyetyuktam | ārṣatvānna doṣa iti | 
ajñānaṃ ca vakṣyamāṇakaṃ tasya hāniḥ sabījasyātyantocchedaḥ | adharmo'pi 
vakṣyamāṇakastasya hāniḥ savikārasyātyantocchedaḥ | adharmavatsaṅgakarasyāpi 
hānirvyākhyātā | cakāro hānipadasyānukarṣaṇārthaḥ | cyuteḥ khalu 
vakṣyamāṇikāyāḥ saha bījenātyantocchedaścyutihānirityucyate | 
paśutvasyeti ṣaṣṭhyantatvābhidhānādanantaroktahānipadena sambandhaḥ 
| ḍamarukamaṇinyāyena vā madhyoktaṃ hānipadaṃ cyutipaśutvābhyāṃ sambadhyate | 
cakāro vā saṅgakarapadāntokto'trānuvṛttaḥ | sa na kevalaṃ hānipadānukarṣakaḥ 
śuddhīnāṃ nyūnādhikabhāvaṃ vyavacchinatti | paśutvasya 
māheśvaraiśvaryasambandhādātyantiko nirodhaḥ paśutvahānirityucyate | śuddhiḥ 
pañcavidhā ityupasaṃhāraḥ | smṛtā ityāptoktatvapradarśanārtham | kiṃ punaretāḥ 
śatrunivṛttayo balāni cāvasthābhedabhinnasya saṃpadyante'thaikāvasthasyeti (?) | kutaḥ 
saṃśaya ubhayathā darśanādviṣṇucakravat | ucyate prāyeṇa 
tāvadavasthābhedabhinnasya yasmādavasthābhedamāha - 

p. 8)

vyaktāvyaktaṃ jayacchedo niṣṭhā caiveha pañcamī | iti 

prātipadāvasthā khalu vyaktāvasthetyuktā | kasmāt (?) | pāśupatye'yamiti 
vyaktinimittatvāt bhasmasnānaśayanānusnānādibhirliṅgadhārītyupadeśāditi | 
dvitīyāvasthā tu jātyādivyakterahetutvādavyaktāvasthetyuktā | kasmāt (?) | 
avyaktaliṅgitvopadeśādvidyādigopanopadeśācceti | tṛtīyāvasthā 
punarindriyajayārthatvena jayāvasthetyucyate | devanityatvārthatve'pyasyā 
indriyajayārthataiva prādhānyenoktā sūtrāṇāṃ 
sambandhakathanadvāreṇācāryabhāṣyakṛteti | chedāvasānārthā'vasthā 
chedāvasthetyuktā | sarvasya sādhakavyāpārasyātyantoparamo niṣṭhā | 
tadupalakṣitā'vasthā niṣṭhāvasthetyucyate | 
vyaktādiviśeṣaṇābhidhānādyūhādiśaktimatāṃ 
viśeṣapratipattirbhaviṣyatītyabhiprāyavatā'trāvasthāgrahaṇaṃ na kṛtamiti | ca śabdo 
nyūnādhikavyavacchedasūcakaḥ | 
retonmattamūḍhāvasthāntarasadbhāvādadhikavyavacchedānupapattiriti cenna 
gopananiyamenāvyaktāvasthāyāmevāntarbhāvāt | 
jayacchedāvasthayorapyavyaktāvasthātvaprasaṅgaḥ iti 
cennānayorgopananiyamānabhyupagamānniṣṭhāvasthāmanabhyupagamya 
siddhāvasthāṃ pañcamīmāhuḥ | kecittanmatamavadhāraṇenaiva nirācaṣṭe | niṣṭhā 
caiveha pañcamī iti | ihetyasminpañcārthadarśane niṣṭhāvasthaiva pañcamī 
sūtraprāmāṇyātpratīyate na siddhāvasthā | tatra 
kṣapaṇīyaprāpaṇīyābhāvātsādhakāvasthāśceha nirūpyante na tato'nyasyeti | 
atrāha | anadhikāriṇo'vasthāprāptirayuktā | tatra tathā dvitīyādyavasthāprāptau 
jñānākaluṣatvādayo'dhikāritvāpādakāḥ tathā prathamāvasthāprāptau ko 
heturityucyate | atrāpi kāraṇaviśeṣotpāditā dīkṣā hetuḥ | 
yatastatkāraṇapratipādanārthamidamāha - 

dravyaṃ kālaḥ kriyā mūrtirguruścaiveha pañcamah || 5 || iti 

atra vidyākalāpaśusaṃjñitaṃ trividhaṃ kāryaṃ dravyamityucyate | tatra vidyā 
tāvacchiṣyagatā dīkṣāṅgaṃ yayā śiṣyo dīkṣā'dhikṛto bhavati | yayā tvācāryaḥ 
sampūrṇāṃ dīkṣāṃ nirvartayati sā''cāryagatā vidyā | kalā darbhādyā 
dīkṣāṅgam | uktaṃ hi - 

pūrvaṃ darbhāḥ punarbhasma candanaṃ sūtrameva |
puṣpāṇi ca punardhūpaṃ mantrā eṣa kramaḥ smṛtaḥ ||

paśuḥ saṃskartavyo brāhmaṇaḥ | itthaṃ vyākhyānakaraṇādupakaraṇāderapi saṅgraha 
ityato na saṃskārakārikāvirodhaḥ | kālaḥ pūrvāhṇaḥ | kāraṇamūrttiśiṣyayoḥ 
saṃskārakarma kriyetyucyate |

p. 9)

tatkramaśca saṃskārakārikāyāṃ draṣṭavyaḥ | mūrttiśabdena yadupahārasūtre 
mahādevejyāsthānamūrdhvaliṅgādilakṣaṇaṃ vyākhyātaṃ 
tatsamīpadakṣiṇabhūpradeśaḥ kuṭyādyavyavahito'trābhipretaḥ | gururācāryaḥ sa 
dvividhaḥ parāparabhedāt | tatrāparaḥ pañcārthajñānamaryādā'nvītaḥ | tathā 
coktam - 

śāstrānuge pracāre yo'bhiniviṣṭaḥ prakṛṣṭadhīḥ kuśalaḥ |
sa bhavati mataḥ kila satāmācāryo jñānahetuśca ||

tathā - 

ācāre sthāpayan śiṣyānyasmādācarati svayam |
ācinoti ca śāstrārthānācāryastena kīrtyate ||

tasyādhiṣṭhātā bhagavānmaheśvaraḥ paro gurustathā caivaṃ varṇite nimittamapyatra 
nānuktaṃ bhavati | ca śabdo nyūnādhikavyavacchedasūcakaḥ | eva śabdo guroḥ 
prādhānyamavadhārayati | iha iti svasiddhāntanirdeśaḥ | pañcama ityupasaṃhāraḥ | 
athavā eva ihapadayoḥ pāṭhaviparyayaṃ kṛtvā'nyathā'rthaḥ pradarśyate | ihaiva 
pāśupatadarśane evaṃviśiṣṭāni dīkṣānimittāni nānyatra | tataśca niṣpādyā 
dīkṣāpyatraiva viśiṣṭā'sti nānyatretyuktaṃ bhavati | atha kiṃ kāraṇaviśeṣaireveyaṃ 
dīkṣā viśiṣyate na kiṃ tarhi phalaviśeṣairapi (?) | yasmāttadarthamidamāha - 

jñānaṃ tapo'tha nityatvaṃ sthitiḥ siddhiśca pañcamī | iti |

tatra pañcapadārthaviṣayaṃ 
samāsavistaravibhāgaviśeṣopasaṃhāranigamanatastatvajñānaṃ prathamo vidyālābho 
jñānamiti cocyate | teṣāṃ samāsādīnāṃ svarūpaṃ yadyapi śrīmatā''cāryeṇa 
bhāṣyāvasāne prakaṭitaṃ tathā'pi leśatastadbhāṣyavivaraṇārthamasmābhirapyucyate 
| tatra padārthānāmuddeśaḥ samāsaḥ | so'thaśabdādibhirduḥkhāntādīnāmabhihitaḥ 
| uddiṣṭānāṃ pramāṇataḥ prapañcābhidhānaṃ vistaraḥ | patiḥ sannādya ityevamādi 
| tatsādhanatvena pramāṇānyapi vistaraśabdenoktāni | dharmadharmiṇāṃ 
yathāsaṃbhavaṃ lakṣaṇato'nyatvābhidhānaṃ vibhāgaḥ | sarvatrāpyabhidhīyata 
ityabhidhānam | karmavyutpattirdraṣṭavyā | tatra duḥkhāntasya vibhāgastāvaducyate | 
sarvaduḥkhāpoho duḥkhāntaḥ | sa dvividho'nātmakaḥ sātmakaśceti | tatrānātmakaḥ 
sarvaduḥkhānāmatyantocchedaḥ sātmakastu maheśvaraiśvaryalakṣaṇā siddhiḥ | sā 
dvirūpā jñānaśaktiḥ kriyāśaktiśceti | tatra jñānameva śaktirjñānaśaktiḥ |

p. 10)

sā khalvekā'pi satī samastavyastaviṣayabhedātpañcadhoktā darśanaśravaṇetyādinā 
brahmāderivopacaritasarvajñatvapratiṣedhārtham | kriyāhetuḥ śaktiḥ kriyāśaktiḥ sā 
trividhā manojavitvādibhedā | tatra niratiśayaṃ śīghrakāritvaṃ manojavitvaṃ 
karmādinirapekṣasyecchayaivānantararūpakartṛtvādhiṣṭhātṛtvaṃ kāmarūpitvaṃ 
saṃbhṛtakāyendriyasyāpi niratiśayaiśvaryasaṃbandhitvaṃ vikaraṇadharmitvaṃ ceti | 
yadā ceyaṃ dvirūpā siddhiḥ prāpyate tadā daśa siddhilakṣaṇānyavaśyatvādīni 
patitvāntāni bhavanti | tatra niratiśayamaparādhīnatvamavaśyatvam | atha 
kimidamavaśyatvaṃ nāmeti (?) | vaśyatvamalanivṛttāvaśyatvākhyaḥ puruṣe'vasthito 
dharmo'bhivyajyate paṭe śuklatāvadityeke | tantrāyuktam aiśvaryābhivyakteḥ 
pratiṣiddhattvādanātmakasya ca 
dharmasyābhivyaktyanupapatteranyathā'nātmakatvavirodhaḥ syād yadā guṇairyukta 
ityādibhāṣyavirodhācca nāvasthitā'bhivyaktiḥ kintvaiśvaryasaṃbandha eva 
parādhīnatvanivartakatvādavaśyatvamucyate | athavā yadā guṇairyuktastadā sa 
evātathābhūtapūrvastathā bhavati sarpaśikyādivattasya 
bhāvastatsvarūpamavaśyatvaṃ bhedenocyate 
vyavahārārthamityevamanāveśyatvādiṣvapi vicāro draṣṭavyaḥ | satkāryavicāre 
cāyaṃ vistārito mayā teneha na pratanyate | 
sattvāntarānabhibhāvyajñānasambandhitvamanāveśyatvaṃ 
sattvāntarādhīnajīvitarahitatvamavadhyatvam smastabhayātikrāntatvamabhayatvam 
aiśvaryeṇa nityasambandhitvamakṣayatvaṃ 
kāyendriyavaikalyaphalenātyantāsambandhitvamajaratvaṃ 
prāṇādiviyogajaduḥkhāsasparśitvamamaratvaṃ sarvatrābhipretārtheṣu 
pravartamānasya maheśvareṇāpyapratibandhadharmitvamapratīghātaḥ 
sarvapaśubhyo'bhyadhikatvamaiśvaryātiśayānmahattvaṃ 
sarvapaśvādikāryasvāmitvaṃ patitvamiti | yadasvatantraṃ tatsarvakāryaṃ tasya vibhāga 
ucyate vidyā kalā paśuśceti | tatra paśuguṇo vidyā svaśāstradṛṣṭyoktā | 
vaiśeṣikadṛṣṭyā dravyavat | sā vidyā bodhābodhasvabhāvabhedāt | tatrā 
bodhasvabhāvā dharmādilakṣaṇā vidyāntarbhāvakaraṇādavidyātmakasya 
vidyāntarbhāve kalāderapyantarbhāvaḥ syāditi | bodhasvabhāvā tu 
viṣayabhedāccaturddhā pañcadhā coktā | svarūpatastu dvidhā vivekavṛttiḥ 
sāmānyavṛttiśceti | tatra vivekavṛttiḥ prāyeṇopadeśavyaṅgyā na ca tatra 
samākhyāntaramasti | vidyaiva hi viśeṣasamākhyā sāmānyavṛttistu 
pramāṇamātravyaṃgyā cittamityuktā | anayorbhedaṣṭīkāntare mayā darśita iti neha 
pradarśyate | cetanānāśritatve sati niścetanā kalā | sā'pi dvividhā kāryākhyā 
karaṇākhyā ceti | tatra kāryākhyā daśavidhā 
pṛthivyaptejovāyvākāśagandharasarūpasparśaśabdalakṣaṇā karaṇākhyā tu 
trayodaśavidhā pañca karmendriyāṇi pañca buddhīndriyāṇyantaḥkaraṇatrayaṃ ceti |

p. 11)

paśutvasaṃbandhī paśuḥ | so'pi dvividhaḥ sāñjano nirañjanaśceti | tatra sāñjanaḥ 
śarīrendriyasambandhī caturdaśavidhaḥ | uktaṃ hi-

daivamaṣṭavidhaṃ jñeyaṃ tairyagyonaṃ ca pañcadhā |
parvamekaṃ tu mānuṣyametatsaṃsāramaṇḍalam || iti 

nirañjanastu trividhaḥ saṃhṛtaḥ kaivalyagato niṣṭhāyogayuktaśceti | 
samastasṛṣṭisaṃhārānugrahakāri kāraṇaṃ tasyaikasyāpi guṇadharmabhedādvibhāga 
ukto'nyatpatitvamityādinā | niratiśayadṛkkriyāśaktiḥ patitvaṃ tenaiśvaryeṇa 
nityasaṃbandhitvaṃ sattvam anāgantukaiśvaryatvamādyatvaṃ 
samastajanmarahitatvamajātatvaṃ mahāsṛṣṭisaṃhārakartṛtvaṃ bhavodbhavatvaṃ 
paramotkṛṣṭaṃ guṇadharmanimittanāmābhidheyatvaṃ vāmatvaṃ 
duḥkhāntanimittadharmmotpādakanāmābhidheyatvaṃ vā 
svecchayaivāśeṣakāryotpattyādikāraṇasvabhāvaḥ krīḍā taddharmitvaṃ devatvaṃ 
siddhasādhakapaśubhyaḥ paratvaṃ jyeṣṭhatvaṃ sargādāvapi rutabhayasaṃyojakatvaṃ 
rudratvam karmādinirapekṣasya svecchayaivāśeṣakāryakartṛtvaṃ kāmitvaṃ 
śamasukhanirvāṇakaratvaṃ śaṅkharatvam antarasṛṣṭyāmapi saṃhārakartṛtvaṃ 
kālatvaṃ kāryakāraṇākhyānāṃ kalānāṃ sthānaśarīrādibhāvena saṃyojakatvaṃ 
kalavikaraṇatvaṃ dharmādibalānāṃ yatheṣṭaṃ vṛttilābhalopākṣepakartṛtvaṃ 
balapramathanatvaṃ sarvadevamānuṣatiraścāṃ ratirañjanādhivāsanākartṛtvaṃ 
sarvabhūtadamanatvaṃ sakalaniṣkalāvasthāyāstulyaśaktitvaṃ mano'manastvaṃ 
sukhakarānaṃtaśarīrādhiṣṭhātṛtvamaghoratvaṃ 
duḥkhakarānantaśarīrādhiṣṭhātṛtvaṃ ghorataratvaṃ sarvavidyādikāryāṇāṃ 
vyāptā'dhiṣṭhātṛtvaṃ pūraṇaṃ yathepsitānantaśarīrādikaraṇaśaktiḥ pauruṣyam | 
tadubhayaṃ bhagavataḥ puruṣatvamucyate | 
sarvapaśvādibhyo'bhyadhikotkṛṣṭavyatiriktatvaṃ mahattvaṃ devatvaṃ pūrvoktam | 
duḥkhāntanimittaṃ dhyānaikaviṣayatvamoṅkāratvam | ṛṣitvaṃ 
kriyāśaktirjñānaśaktistu vipratvam | 
anayorāśrayavyāpitvānantaviṣayatvaniratiśayatvajñāpanārthaṃ tadāśrayo 
bhagavānmahānityuktaḥ | sarvadā sarvatrāvicalitasvabhāvena vartamāno bhagavāneṣa 
ityucyate | guṇadharmadvāreṇa vācaḥ pravartante 
yasmādatastadvyatiriktastadaviśeṣitaśca bhagavānviśuddha ityucyate |

nityānāgantukaiśvaryayukte paramakāraṇe |
yatra vāco nivarttante vāgviśuddhaḥ sa kīrtitaḥ ||

kṣaṇaikamapi yastatra prāpnotyekāgratāṃ yatiḥ |
sa dagdhvā sarvakarmāṇi śivasāyujyamāpnuyāt ||

p. 12)

sarvaiśvaryapradātṛtvaṃ maheśvaratvaṃ samastakāryaviṣayaṃ prabhutvamīśatvaṃ 
sarvavidyāviṣayaṃ prabhutvamīśānatvaṃ sarvabhūtaviṣayaṃ prabhutvamīśvaratvam | 
prakramāpekṣaḥ khalvevamīśādiśabdānāmarthaḥ pradarśito'nyathā 
punarekārthatvameveti | 
brahmagrahaṇasyodāharaṇārthatvādaśeṣapativiṣayaprabhutvamadhipatitvaṃ 
bṛṃhaṇabṛhattvaṃ brahmatvaṃ paripūrṇaparitṛptatvaṃ śivatvamiti | evaṃ suniścitāḥ 
khalvime guṇadharmāḥ parameśvarasyopahārakāle gāyatā bhāvayitavyāḥ satataṃ vā 
japaṃ ca kurvatā vibhaktyupasarganipātakriyāpadānāmarthaiḥ saha 
cintanīyāstato'cireṇaiva kālena śuddhivṛddhī bhavataḥ | te ca svātmasaṃvedye iti |

dharmārthaḥ sādhakavyāpāro vidhiḥ | sa dvividhaḥ pradhānabhūto guṇabhūtaśceti | 
tatrāvyavadhānena dharmaheturyo vidhiḥ sa pradhānabhūtaścaryeti vakṣyate | yastu 
caryā'nugrāhakaḥ sa guṇabhūto'nusnānādiḥ | tatra 
bhuktocchiṣṭādinimittāyogyatāpratyayanivṛttyarthaṃ liṅgābhivyaktyarthaṃ ca 
yatsnānaṃ ca yatsnānaṃ yatkaluṣanivṛttyarthaṃ tadupasparśanam | 
etadubhayamapyajapataiveśvaraniyogamanusandhāya saṃsāradoṣaṃ bhāvayatā 
gurulaghubhāvaṃ ca paryālocya bhasmanaiva kartavyam | nirmālyadhāraṇamapi 
liṅgābhivyaktibhaktivivṛddhidvāreṇa caryā'nugrāhakam | vicārya kāraṇanirmālyaṃ 
niṣparigrahaṃ paraṃ kṛtaṃ gṛhītvā saṃyatātmanā kāraṇaṃ praṇamyānujñāṃ 
prārthayettataḥ prasannamukhaṃ bhagavantaṃ svanirmālyaṃ nirmalīkaraṇāya 
prayacchantaṃ dhyātvā mahāprasāda ityabhisandhāya bhaktyaiva śirasi dhārayet | 
tathā''yatanavāsitvamapi caryā'nugrāhakam |

vidhibījasya sā bhūmistatra vaptaṃ mahāphalam |
liṅgāddhastaśataṃ sāgraṃ śivakṣetraṃ samantataḥ ||

jantūnāṃ tatra pañcatvaṃ śivasāyujyakāraṇam |

grāme vā yadi vetyādi | upasparśanenākṣapitakaluṣakṣāpaṇārthaṃ prāṇāyāmaḥ | 
koṣṭhyasya vāyorgatinirodhaḥ prāṇāyāmaḥ | tatropaspṛśya 
kāraṇatīrthakaragurūnanupraṇamya prāṅmukha udaṅmukho vā 
padmakasvastikādīnāmanyatamaṃ yathāsukhamāsanaṃ baddhā kṛtamunnataṃ ca 
kṛtvā śanaiḥ saṃyatāntaḥkaraṇena recakādīn kuryāt | kaluṣābhāve'pi 
cittasyātinirmalatvāpādanārthamabhyāsārthaṃ nityaṃ kuryāt | uktaṃ hi - 

prāṇāyāmairdaheddoṣān dhāraṇābhiśca kilviṣam |
pratyāhāreṇa viṣayān dhyānenānīśvarān guṇān ||

prāṇāyāmena yuktasya viprasya niyatātmanaḥ |
sarve doṣāḥ praṇaśyanti sattvasthaścaiva jāyate ||

p. 13)

jalabindukuśāgreṇa māse māse ca yaḥ pibet |
saṃvatsaraśataṃ sāgraṃ prāṇāyāmaikatatsamam ||

prāṇāyāmaviśuddhātmā yasmāt paśyati tatparam |
tasmātkiñcitparaṃ nāsti prāṇāyāmāditi śrutiḥ ||

tadakṣapitakaluṣakṣapaṇārthaṃ japaḥ kartavyaḥ | tṛtīyacaturthayoranyatarasmin brahmaṇi 
prayatnaniruddhaṃ cittaṃ sampūrṇākṣarānubodhena tadarthānubodhena vā punaḥ 
punaḥ sañcārayediti | evaṃ ca prāyaścittāntaramutsūtratvānna kartavyamiti | nanu ca 
trikasya kaluṣanivṛttyarthamevābhidhānaṃ vyabhicārāntareṣu punaḥ kiṃ prāyaścittam 
(?) | na caitadvācyaṃ yaterapramattasya sarvadaiva saṃyatatvādasambhavī vyabhicāra iti 
kāmādivyabhicāreṇa samānatvāttrikasyāpyanārambhaprasaṅgo vā | kiṃ 
cādharmasāmarthyādviduṣo'pi vyabhicārasambhavāt | uktaṃ ca hriyate budhyamāno'pi 
ityādi | hiṃsāyāścāvaśyaṃ bhāvitvāt |

uktaṃ hi |

ahnā rātryā ca yāñjantūnnihantyajñānato yatiḥ |
teṣāṃ snātvā viśuddhyarthaṃ prāṇāyāmān ṣaḍācaret ||

pratidinamityarthaḥ | atraike sarvavyabhicāreṣu trikameva kartavyamiti manyante | vayaṃ tu 
paśyāmaḥ kaluṣanivṛttyarthameva trikaṃ kartavyam | bhāṣyasyāpi tathaiva 
śrutatvānnādṛṣṭārthamadṛṣṭaśuddheścāniścayāt trikānuparamaprasaṅgaḥ syāt 
tasmātkaluṣanivṛttau 
pūrvakṛtādharmakṣapaṇavadvyabhicārakṛtādharmakṣapaṇārthamapi 
vidhyācaraṇameva kartavyam | tathā ca sūtraṃ bhūyastapaścaret iti | manurapyāha - 

yat kiñcidenaḥ kurvanti vāṅmanomūrtibhirjanāḥ |
tatsarvaṃ nirnudantyāśu tapasaiva tapodhanāḥ ||

mahāpātakinaścaiva śeṣāścākāryakāriṇa. |
tapasaiva sutaptena mucyante kilviṣāt tataḥ ||

tathā śrīmadbhāṣyakṛtā'pi jñāpakamuktam - 

tapobhirāryā ninudanti pāpaṃ dhyānopayogāt kṣapayanti puṇyam |
te nirmalāstattvavido viśuddhā gacchanti mokṣaṃ hyubhayorabhāvāt ||

na cāyaṃ niyamaḥ puṇyakṣaya eva dhyānāt kintu pāpakṣayo'pi | yataḥ tatraiva 
jñāpakāntaramuktam - 

p. 14)

sarvaṃ dahati dhyānena puṇyapāpakriyāśrayam |
puṇyapāpaphale dagdhe svāmī tasya na vidyate || iti |

evaṃ tarhyanarthakaṃ vidhyanuṣṭhānamiti cennānena vidhinā rudrasamīpaṃ gatveti 
pravacanādvidhyanuṣṭhānavikalasya yogānuṣṭhānasāmarthyābhāvāt ||

tathā cānyātrāpyuktam - 

dharmaḥ prayatnataḥ kāryo yoginā tu viśeṣataḥ |
nāsti dharmādṛte yoga iti yogavido viduḥ iti ||

tasmādupasparśanādibhiḥ prasannaṃ cittaṃ kṛtvā sarvasyādharmasya kṣapaṇārthaṃ 
vidhiyogānuṣṭhānamevātyaṃtādibhiyogena kartavyaṃ na prāyaścittāntaramiti | tathā 
daśāhiṃsādayo yamāścaryā'nugrāhakā yadā tadā vidhyantarbhūtā yadā tu 
yogakriyā'nugrāhakāstadā yogāntarbhūtā iti | tatra vākkāyamanobhiḥ 
paraduḥkhānutpādanamahiṃsā indriyasaṃyamo brahmacaryaṃ 
dharmasādhanānaṅgavacanapratiṣedhaḥ satyaṃ varṇāśramibhiḥ saha 
dṛṣṭārthasaṅgatipratiṣedho'saṃvyavahāraḥ dharmasādhanāṅgādabhyadhikasya 
nyāyato'pyasvīkaraṇamanyāyatastu dharmasādhanāṅgasyāpyasvīkaraṇaṃ cāsteyaṃ 
parairapakṛtasyāpyamlānacittatvamakrodhaḥ vākkāyamanobhirgurau hitabhāvenaiva 
vartanaṃ guruśuśrūṣā kāyāntaḥkaraṇātmaśuddhiḥ śaucaṃ 
svavṛttyaivopārjitānnasya vidiyogānuṣṭhānāvirodhenābhyavaharaṇamāhāralāghavam 
| aṣṭau grāsā muneriti kecit tanneṣṭaṃ vidhiyogānuṣṭhānavirodhaprasaṅgāt | 
savyañjanāśanodakābhyāṃ koṣṭhasya bhāgatrayaṃ pūrayitvā caturthaṃ bhāgaṃ 
vāyoḥ saṃcaraṇārthamavaśeṣayedityanye | tadiṣṭamevāvirodhāt | atra ca 
pañcavidhabhaikṣābhidhāyakaṃ vākyaṃ carenmādhukarīm ityādyavirodhena 
vyākhyeyam | yathāvihitavidhiyogānuṣṭhāne satatamevodyamo'pramādaḥ | ayaṃ ca 
pradhānabhūto yamaḥ | tathā coktam - 

yatidharmasya sadbhāvaḥ śrūyatāṃ guṇadoṣataḥ |
apramādātparā siddhiḥ pramādānnarakaṃ dhruvam || iti |

vāso'pi jñānotpādanadvāreṇa caryānugrāhakatvādguṇavidhireveti | 
cittadvāreṇeśvarasambandhaḥ puruṣasya yogaḥ | sa dvividhaḥ kriyālakṣaṇaḥ 
kriyoparamalakṣaṇaśceti | tatra kriyālakṣaṇo japayantraṇadhāraṇadhyānasmaraṇātmaka 
iti | vakṣyāmaḥ | kriyoparamalakṣaṇo'pyatigatyādiśabdavācya iti | 
śāstrāntaroktapadārthebhyo'mīṣāmatiśayābhidhānaṃ viśeṣaḥ | tathāhi 
śāstrāntare duḥkhanivṛttireva duḥkhāntaḥ iha tu paramaiśvaryaprāptiśca |

p. 15)

tathā'nyatrābhūtvā bhāvi kāryamiha tu nityaṃ paśvādi | tathā'nyatrāsvatantraṃ 
pradhānādi kāraṇamiha tu svatantro bhagavāneva | tathānyatra kaivalyābhyudayaphalo 
yogaḥ iha tu paramaduḥkhāntaphalaḥ | tathānyatrāvarttakaḥ svargādiphalo vidhiriha 
tvanāvartako rudrasamīpādiphala iti | padārthānāṃ samāptirupasaṃhārastatra 
duḥkhāntakāryakāraṇavidhīnāmiti śabdena samāptiruktā | yogasya tu tvāśabdeneti | 
samāptānāṃ niḥśeṣīkaraṇārthaṃ prāsaṅgikasaṃśayanivṛttyarthaṃ ca 
dharmāntarābhidhānaṃ nigamanam | pratijñātārthena 
sahaikavākyatvakhyāpanārthamityanye | tadevaṃ vidhiyogayoḥ kāryāntarbhāve'pi 
atiprayojanavaśāt pṛthagabhidhānaṃ kṛtvā pañcānāmeva samāsādaya uktā ityataḥ 
pañcaiva ucyante | anye tu padārthabhedamanyathā varṇayanti | tattvaṃ guṇo bhāva iti | 
tatra yadanāśritaṃ tattatvam | tacca viṃśatibhedanam | pañca pṛthivyādīni 
trayodaśendriyāṇi paśuḥ kāraṇaṃ ceti | tattvavṛttayaḥ bhāvāśrayā guṇāstatra 
pṛthivyādiṣu yathāsambhavaṃ rūparasagandhasparśaśabdāḥ pañcaiva vartante | 
indriyatattvāni tu nirguṇāni | paśuṣu sapta guṇā vartante 
paśutvadharmādharmacittavidyāprayatnecchālakṣaṇāḥ | sukhādīnāṃ tu 
tadvikāratvāttadantarbhāva eva mṛdvikāravat | kāraṇe trayo guṇā 
kāmārthitvavipratvākhyā iti dharmibhyo'nyānanyatvenānirvacanīyāḥ | 
sattvaguṇānāṃ dharmā bhāvā ityucyante | tadvicāraśca satkāryavicāre kṛta iti neha 
kriyate | tadevaṃ kāraṇādiniścayajñānaṃ prathamo lābha iti | dvitīyaṃ lābhamāha 
tapaḥ iti | bhasmasnānādividhijanito dharmastapa ityucyate | tasyotpādo 
rakṣaṇādiliṅgādapi niścīyate | adharmataskareṇa sanmārgādapahriyamāṇaḥ 
sādhakaḥ purapālasthānīyena dharmeṇa rakṣyate | avasthānādavasthāntaragamanaṃ 
gatiḥ | vihitānuṣṭhāna eva santoṣaḥ prītiḥ | lābhasambandhaḥ prāptiḥ | yadbalena 
vidhiyogābhiniviṣṭasya cittaṃ rambhādīnāṃ gītavādyādibhirapi kṣobhayituṃ na 
śakyate tanmāhātmyaṃ dharmaśaktirityarthaḥ | atigatisāyujyasthitiśabdā 
niṣṭhāyogaparyāyāḥ | yasmin sati padārthāḥ sādhakasyādhyakṣopalabdiyogyā 
bhavanti sa prakāśaḥ dvividhaḥ parāparabhedāt | tatra yena vidhiyogasādhanāni 
samyagvivecayati dhyeyatattve brahmaṇi ca svaṃ cittaṃ samāhitaṃ cyutaṃ ca 
cyavamānaṃ ca lakṣayati so'paraḥ prakāśaḥ | yena tu sthāpanāvasare sarvatattvāni 
saguṇadharmāṇyānantyena dṛṣṭvā yojyāyojyabhāvena vivecayati sa para iti | 
viṣayiṇāmiṣṭaviṣayeṣvivānicchato'pi rudre cittavṛttipravāhaḥ samīpaṃ 
tadevātyantotkarṣāpannaṃ devanityatvamityetsarvaṃ dharmajñāpakatvenoktamiti | 
tṛtīyaṃ lābhamāha |

p. 16)

atha nityattvamiti | athetyānantarye tapo'nantaraṃ yaddeve bhāvābhyāsalakṣaṇaṃ 
nityatvaṃ tṛtīyo lābhaḥ sa ucyate | na tu nityayuktatetyarthaḥ | avyucchinnapravāho 
nityattvamatrābhipretaṃ yathā nityapravāhā gaṅgeti | caturthaṃ lābhamāha sthitiriti | 
doṣahetujālebhyaśchinnasya mūlākhyānivṛttau cittasya 
rudre'vasthānamatyantaniścalatvaṃ sthitirucyate | tatsamakālaṃ yogino'saṅgitvādīni 
nava lakṣaṇāni bhavanti | tatra lakṣyamāṇasya saṃgasyātyantavyāvṛttirasaṅgittvam | 
kevalarudratattvāvasthitacittattvaṃ yogitvam | anurudhyamānacittavṛttittvaṃ nityātmattvam 
| aprādurbhāvicittatvaṃ ajatvam | paramasamatā maitratvam | śarīrādiviyuktatvamekatvam 
| sarvāśaṅkāsthānātikrāntattvaṃ kṣemittvam | bāhyādhyātmikakriyāśūnyatvaṃ 
niḥkriyatvam | samastacintārahitatvaṃ vītaśokatvamityetāni lakṣaṇānyasya 
yogasyātyantotkṛṣṭattvapratipādanārthamuktāni | pañcamaṃ lābhamāha siddhiśca iti | 
siddhiḥ pūrvavyākhyātā | sānumānādapyavagamyate | nirupacaritā muktātmānaḥ 
paramaiśvaryopetāḥ puruṣatve sati samastaduḥkhabījarahitatvānmaheśvaravat | 
parābhipretā muktātmānaḥ paramaiśvaryavikalatvādasmadādivaditi | cakāro 
nyūnādhikavyavacchedasūcakaḥ | pañcamīti lābhānāṃ pañcatvopasaṃhārārthamiti 
|| 6 ||

athaite lābhāḥ kiṃ deśaniyamena prāptavyā yathā 
brahmacārigṛhasthavānaprasthabhikṣubhirvidyāprajātayogākhyā lābhāḥ kiṃ vā 
deśāniyamenāpi pañcaviṃśatitatvajñena kaivalyavaditi (?) | ucyate | deśaniyamena | 
yatastadarthamidamāha - 

gururjanaguhādeśaḥ smaśānaṃ rudra eva ca || iti 

ārṣatvādvā yathāśrute'pyadoṣaḥ | guruḥ 
pūrvoktastadājñayā'vatiṣṭhamānastadāśrito bhavati yathā grāmaṇyamāśrito 
grāma iti | tatrādidharmāvasthasya tāvadāyatane vāsa ityatrāyatanaśabdo gurāveva 
draṣṭavyo liṅgakartetyādijñāpakādupacārādvā mañcaśabdavat | 
yadyapyāyatanasūtre pratiṣedhaḥ śrūyate tathāpi deśaprastāve gururabhipreta 
evācāryo loka ityādi jñāpakābhyanujñānāt | ata eva gūḍhavratopadeśādāyatane 
vāsa ityatrāyatanaśabdo jane vivakṣito maryādayāyatanāditi kṛtvā baddhasya rudrasya hi 
śivāyatanavāsānupapatteḥ | yadā'pi vāsastadā'pi janādhīna evetyato 
dvitīyāvasthasya jana eva deśaḥ | janaśabdenātra dharmādharmajananādhikṛtā 
varṇāśramiṇo'bhidhīyanta iti | tṛtīyāvasthasya guhā deśaḥ | guhāgrahaṇaṃ 
sūtrārthopalakṣaṇārthamataḥ 

p. 17)

śūnyāgāraguhayoranyataraṃ vyāsaṅgādidoṣavarjitaṃ yatprāpyate tatra vastavyam | 
deśagrahaṇaṃn tatrāvasthānamātreṇa guhāyā deśatvajñāpanārthaṃn na tu 
gurujanavattadāyattatveneti | caturthāvasthasya śmaśānadeśaḥ | śmaśānaṃ ca 
prasiddhameva grāhyam | tasya ca na guhāvaddeśatvaṃ kiṃtvādehapātāt 
tatraivānirgacchatā stheyamityayaṃ viśeṣaḥ | paṃcamāvasthasya deśo rudraḥ | rudro 
bhagavānmaheśvaraḥ | prāgapi rudrāyattatvātsādhakasya rudro'styeva deśastathāpi 
prāganyavyapadeśo'pyasti sāmprataṃ punaḥ śarīrādirahitasya 
sarvadeśavikalatvādavadhāraṇaṃ karoti rudra eveti | ca śabdo 
nyūnādhikavyavacchedasūcaka iti |

atha kimetaddeśāvasthitimātreṇaivaite lābhāḥ prāpyante kalpavṛkṣadeśāvasthitivat (?) 
| ucyate | na | kiṃ tarhi deśabhedavadupāyabhedo'pyasti | yatastatpratipādanārthamāha - 

vāsaścaryā japadhyānaṃ sadārudrasmṛtistathā |
prasādaścaiva lābhānāmupāyāḥ pañca niścitāḥ || 7 || iti |

grahaṇadhāraṇohāpohavijñānavacanakriyāyathānyāyābhiniveśānāṃ vāsa iti 
saṃjñā tāntrikī śiṣṭaiḥ kṛtā | tatra sakṛduccāritavākyasya 
samyagarthapratipattisāmarthyaṃ grahaṇam | gṛhītasya cirakālavyavadhāne'pi 
smaraṇasāmarthyaṃ dhāraṇam | ekadeśaśravaṇāt 
tannyāyenāpūrvārthapratipattisāmarthyamūhaḥ | ācāryadeśīyairuktārthānāṃ 
yuktāyuktapravibhāgena pratipattityāgasāmarthyamapohaḥ | 
śrutasyārthasyānekadhāvicāraṇe parapratipādane ca sāmarthyaṃ vijñānam | 
vyāhatapunaruktādidoṣarahitaṃ vākyaṃ vacanam | nirduṣṭaśabdoccāraṇenācāryaṃ 
paritoṣayato mithyājñānamalanivṛttau vidyā'bhivyaktirbhavati | 
tathotthānapratyutthānādikā gurau paricaryā kriyetyuktā | yuktyāpi 
pūrvottarāviruddhaśāstrārthaparyālocane tadarthānuṣṭhānārthamatiyatno 
yathānyāyābhiniveśaḥ | tathā coktam - 

pūrvottarāvirodhena vākyārthaṃ hyavicālitam |
yastarkeṇānusandhatte sa dharmaṃ veda netaraḥ ||

dharmasyopāyaḥ caryā | bhasmasnānādirmūḍhāntaḥ kriyāsamūhaścaryetyucyate | sā 
ca tryaṅgā dānayāgatāpāṅgeti | pañcasu pavitreṣvāvartyamāneṣu 
daśabhirnamaskāraiḥ parameśvarāyātmasamarpaṇaṃ dānam | 
tadevātidānamanāvṛttiphalatvāt | anyattu kudānamāvṛttiphalatvāditi | 
parameśvaraniyogābhisandhinā bhasmasnānādikriyāṇāṃ yathāvihitakaraṇaṃ yāgaḥ 
|

p. 18)

sa evātiyāgo'nyastu kuyāgaḥ pūrvoktaheudvayāt | svavidhyabhiniviṣṭasyaiva 
trividhaduḥkhopanipāte sati anupāyataḥ pratīkāramakurvataḥ sahiṣṇutvaṃ tāpaḥ | sa 
evātitāpo'nyattu kutāpa iti | sā tryaṅgāpi caryā dvividhā vrataṃ dvārāṇi ceti | tatra 
snānaśayanopahārajapapradakṣiṇāni vratam dharmaniṣpatyadharmocchedārthaṃ 
prādhānyena kriyamāṇatvāt | dvārāṇi tu 
krāthanaspandanamandanaśṛṅgāraṇāpitatkaraṇā'pitadbhāṣaṇāni | 
apamānaparibhavaparivādaniṣpādanadvāreṇa 
pūrvotpannayordharmādharmayorāyavyayanimittatvāditi kramaḥ svarūpaṃ caiṣāṃ 
bhāṣya eva prapañcitam | tadanusāreṇa śiṣyahitārthaṃ mayāpi leśataḥ pradarśyate | 
prāgādityodayāt ghaṭikādvayaṃ pūrvāhṇasandhyā | sā tridevatā | prathamā brāhmī 
madhyamā vaiṣṇavī antyā raudrī | tatra pūrvasandhyayoḥ śaucaṃ kṛtvā bhasma 
saṃskartavyam | kartṛkārakādidoṣarahitaṃ śuklādiguṇayuktaṃ ca bhasmārjitaṃ 
śivadakṣiṇamūrtau mantraiḥ saṃskṛtya pradakṣiṇaṃ ca dattvā sūryarūpiṇaṃ 
bhagavantaṃ locanatrayeṇa prasannadṛṣṭyā bhasma paśyantaṃ dhyāyet | tadanu 
cācāryāya śivatattvānurañjitadṛṣṭaye jyeṣṭhabhrātre vā nivedayet | tadanvekānte 
śucau pradeśe jantusthāvarahīne pañca pavitrāṇyāvartayataiva stheyaṃ raudrasavanaṃ 
yāvattato bhagavantaṃ praṇamya tvadājñāṃ karomītyabhisaṃdhāya 
japannaivāpādatalamastakaṃ yāvat prabhūtena bhasmanā'ṅgaṃ pratyaṅgaṃ ca 
prayatnātiśayena nighṛṣya nighṛṣya snānamācaredityevaṃ 
madhyāhnāparāhṇasandhyayorapīti | etāvadatra viśiṣyate | madhyāhne prathamā 
brāhmī madhye mastakoparisthite ravau raudrī tadante vaiṣṇavī arkāstasamayottaratra 
prathamā raudrī tadanu vaiṣṇavī tadante brāhmī ceti | sarvatra raudrasavanameva 
snānakālaḥ | evaṃ snānaṃ nirvartya japannevāyatanaṃ gatvā śivaṃ bhaktyatiśayena 
praṇamya snānaṃ nivedya ca śanairgarbhagṛhaṃ praviśet | tadanu mūrtidakṣiṇe 
bhūpradeśe jānunī pātayitvā hṛdi cāñjaliṃ baddhā mūrttisthaṃ sākṣādiva śiva 
paśyan yadyanivṛttapratyāhārastadā gatamātra eva hasitaṃ kuryādityeke | vayaṃ tu 
paśyāmo'bhigamya ca yatpūrvaṃ japatītyādi bhāṣyasyārtho yadi vicāryate 
tadā'vaśyaṃ gatvā saṃyatātmanottarābhimukhena pratyāhāraviśeṣārthaṃ 
japtavyaṃ japtvā tu śivadhyānāsakta evāṭṭahāsaṃ punaḥ punaḥ kuryāt | tadanu 
gītamārabhya gāyannevottiṣṭhet | tato gītasahitameva nṛtyaṃ kuryāt | tatrādau gītaṃ 
parisamāpya paścānnṛtyaṃ samāpayet | tadanu pūrvoktavidhinopaviśya śivaṃ 
dhyāyanneva huḍukkāraṃ kṛtvā namaskāraṃ kuryāt tadanu japamiti | atra 
japanamaskārau mānasāveva nṛtyaṃ kāyikameva hasitagītahuḍukkārā vācikā eveti 
niyama iṣṭaḥ |

p. 19)

tatra dīrghocchāsatrayaṃ yāvaddhasitaṃ daṇḍakatrirāvartanaṃ yāvadgītanṛtye 
gambhīrahuḍukkāratrayaṃ ṣaṣṭi namaskārān pañcapavitrāṇāṃ trirāvartanaṃ 
kuryādityāha bhagavānācāryaḥ svāmī mama yenāhamajñānārṇavāduttāritaḥ 
| ṭīkākārāstu sarvamāparitoṣāt kartavyamityevaṃ pratipannāḥ | tadevaṃ 
nirvartyopahāraṃ dhyāyannīśaṃ 
hasitagītanṛtyahuḍukkāranamaskārajapyaiḥ ṣaḍaṅgopahāraṃ bhagavanmahādeva ! 
yuṣmadanujñayā nirvartitavānahamavabhṛthasnānaṃ ca kariṣyāmītyevaṃ nivedayet | 
tato niṣkramyeśaṃ praṇamya praṇāmāntaṃ pradakṣiṇatrayaṃ japanneva śanaiḥ 
kuryāt | tato'vabhṛthasnānaṃ kṛtvā bhagavaṁllakulīśādīn rāśīkarāntāṃśca 
tīrthakarānanukrameṇa yathāvadbhaktyā namaskuryāttadanu pradakṣiṇamekamiti | 
anyadā tu yāvadicchaṃ pradakṣiṇaṃ japanneva kuryāt pañcamantrajapastu kevalo'pi 
dharmaheturiti | athāyatanasandhinaṃ bhūpradeśaṃ divā 
parigṛhītasthāvarādidoṣavarjitatvena suparīkṣitaṃ sandhyāvasāne 
vastrāntādimṛdupavitreṇa vivecya bhasmanaiva śuciṃ kuryāt | tadanu tatropaviśya 
vidhyabhiniviṣṭastāvattiṣṭhedyāvadatinidrā'bhibhūtaḥ śrāntaśca bhavati | tataḥ 
punarutthāya vivecayet | tadanu mantraiḥ saṃskṛtya bhasma prabhūtaṃ prastaret | tatastatra 
paṃca mantrānāvartayanneva svapet punarutthāyānenaiva vidhinā svapedyenāśveva 
śuddhivṛddhī bhavataḥ | suptasyāpi prāṇātyaye cātigatiḥ syādanyathā vidhibhraṣṭasya 
saṃsārāpattireveti | evaṃ prathamāvasthāyāṃ vidhimanuṣṭhāya yadā khalu 
prāptajñānaḥ prakṣīṇakaluṣaḥ kṛtābhyanujñaśca bhavati tadāvasthāntaraṃ gatvā 
raṅgavadavasthiteṣu janeṣu madhye naṭavadavasthito vivecya vivecya krāthanādīni kuryāt 
| tatrāsuptasyeva suptaliṅgapradarśanaṃ krāthanaṃ vāyvyabhibhūtasyeva 
śarīrāvayavānāṃ kampanaṃ spandanam upahatapādendriyasyeva gamanaṃ mandanam | 
rūpayauvanasampannāṃ striyamavalokayan kāmukamivātmānaṃ yairliṅgaiḥ 
pradarśayati tacchṛṅgāraṇaṃ kāryākāryavivekaśūnyasyeva 
lokaninditakaraṇamapitatkaraṇaṃ 
vyāhatāpārthakādi"ṣabdoccāraṇamapitadbhāṣaṇamiti | na caiṣāṃ kramo niyamyate | 
kintvapamānādiniṣpādakatvaṃ yena paribhavaṃ 
gacchedityupadeśāddavāgnitulyatvenāpamānāderiṣṭatamatvāditi | evaṃ tarhi 
hiṃsāsteyādikaraṇaduṣṭaśabdoccāraṇaprasaṅgo'pi 
syādapamānādiniṣpādakatvāditi | nāpitatkaraṇā'pitadbhāṣaṇo 
devāśeṣakriyāvyāptāvahiṃsādyavirodhajñāpanārthatvātkrāthanādyārambhasyeti | 
devanityatve kastarhi upāya ityāha japadhyānam iti | tatra tṛtīyacaturthakasya 
mantrasyāvartanaṃ japaḥ | sa dvividhaḥ pratyāhāraphalaḥ samādhiphalaśceti | 
tatrādyaḥ pratyāhāraphalastanniṣpattau ca kriyamāṇo japaḥ samādhiphala iti | nanu 
cānyāsaktatve kriyāmāṇo japaḥ 

p. 20)

saṃvatsaraśatenāpi na pratyāhāraṃ karotyapi tu doṣameva tasya janayatīti | 
satyamevametat | kintu pratyāhāradvaividhyamiheṣṭaṃ parāparabhedāt | 
tatrāntaḥkaraṇapūrvako'paraḥ | tatsahitena japena nirmalīkṛtaṃ cittaṃ 
prayatnanirapekṣamapi brahmaṇyevālātacakravadavatiṣṭhate yadā tadā'sau paraḥ 
pratyāhāro japapūrvaka evāyamityuktaḥ | sa hyanekajanmopārjitaṃ karma 
lakṣaṇamātreṇa dagdhvā dhyeyatattve cittaṃ stambhanikṣiptāyaḥkīlakavanniścalīkaroti 
| rudratattve sadṛśaścintāpravāho dhyānam | tad dvividhaṃ japapūrvakaṃ 
dhāraṇāpūrvakaṃ ca | tatra japapūrvakaṃ prasaṅgenaiva pūrvamuktaṃ 
dhāraṇāpūrvakaṃ tūcyate | nirālambanaṃ cittamamūḍhasya dhāraṇam | 
saṃhṛtamūrcchādyavasthasyāpi cittaṃ vṛttālābhānnirālambanamastīti 
tannivṛttyarthamamūḍhasyetyuktam | yo vidyā'nugṛhītayā buddhyā svaṃ cittaṃ 
nirālambanaṃ karoti so'mūḍha ityucyate | tayā dhāraṇayā nirmalīkṛtaṃ cittaṃ 
rudratattve sthāpitaṃ sudīrghakālaṃ na cyavata ityanenaiva viśeṣeṇa 
pūrvadhyānāpekṣayedaṃ dhāraṇāsahitaṃ dhyānaṃ paramityuktaṃ 
śrīmadbhāṣyakṛtā paramayoginā | yadyapyeva dīkṣāprabhṛti cittaṃ nirmalīkartuṃ na 
śakyate tathāpi dhānuṣkacitrakarādivadabhyāsārthaṃ sarvāvasthāsu yathāśaktyā 
dhyānaṃ kartavyaṃ mṛtyukālasyāniścitatvāt | anyathā hi yuddhakāla eva 
aśvadamananyāyaḥ syāditi |

itthaṃ samyagvidhiṃ jñātvā yastu dhyāyati śaṅkaram | 
niśādāvardharātre ca niśānte cācyutavrataḥ ||

yāmaṃ yāmaṃ tadardhaṃ vā yāvacchaktyā divāpi ca |
santyajyāsaktimanyatra paśyanduḥkhamayaṃ bhavam ||

paraṃ vairāgyamāsthāya laghvāhāro jitendriyaḥ |
utsāhātiśayaṃ kurvan śuddhotkarṣaṃ vivardhayan ||

nairantaryeṇa ṣaṇmāsaṃ brahmahatyādimānapi |
ekaṃ saṃvatsaraṃ vāpi taccittastanmayo bhavet ||

sa hatvā duṣkṛtaṃ ghoraṃ rāgādīnāṃ ca pañjaram |
paśyatyevākhilaṃ tattvaṃ sarvopādhisamanvitam ||

sarvasattvādhipaṃ paśyannanantaṃ śivamavyayam |
yo na pāśupatādanyairyogīśairapi dṛśyate ||

taṃ dṛṣṭvā paramaiśvaryaṃ labdhvā syānnirbhayaḥ sadā |
ajñātvā'pi vidhānaṃ yasteṣu kāleṣu suvrataḥ ||

sadbhaktyutsāhavairāgyairnityaṃ dhyāyati śaṅkaram |
tasyāpīśaḥ prasannastāṃ siddhiṃ dadyādanuttamām ||

p. 21)

yāṃ prāpya tyaktasaṃsāraḥ svatantraḥ śivavadbhavet |
dhyāyanneva tamīśānaṃ yadi prāṇānvimuñcati ||

tasya dehāntakāle vai dadyādīśaḥ parāṃ gatim |
abbhakṣā vāyubhakṣāśca ye cātyugratapaścarāḥ ||

kṣityādīnāṃ ca dātāro yajñānuṣṭhāyinaśca ye |
saṃvatsarasahasreṇa yāṃ siddhiṃ prāpnuvanti te ||

tāṃ prāpnotyardhayāmena japadhyāne rato yatiḥ |
jñātvaivaṃ yogamāhātmyaṃ dehādeḥ sthityaniścayam ||

duḥkhārṇavaṃ ca saṃsāraṃ na kuryādanyathā matim |
śarīraṃ dhriyate yāvadyāvadbuddhirna hīyate ||

tāvaddhyānaṃ japaṃ caiva yāvacchaktyā samabhyaset |
iṣṭaṃ dravyaṃ yathā naṣṭaṃ kaściddhyāyatyaharniśam |
tadvadvāgādyasaṃsṛṣṭaṃ śivaṃ dhyāyedanālasaḥ ||

vivakṣorvāgviśuddhaḥ prāg yadvaccetasi bhāsate |
tadvattaṃ praṇidhānena divā rātrau ca cintayet ||

guṇairdharmairviśiṣṭaṃ vā bhāvayitvāśhu niścitaḥ |
paścāttaṃ kevalaṃ dhyāyedbuddhyā kṛtvā pṛthaktataḥ ||

ityetatpāśupatayogavidhānaṃ paramottamaṃ surairapi alabhyaṃ 
paramaguhyamāparameśvarādgurupāramparyopadeśaikasamadhigamyaṃ 
svalpaprajñānāmanugrahārthaṃ vyaktamevopanyastam | yastvevaṃ na 
śraddadhātyaparīkṣitebhyo vā dadāti tasya brahmahatyādibhyo'pi garīyaḥ pātakaṃ 
syādityataḥ śiṣyaparīkṣāyāṃ śraddhāyāṃ ca yatnaḥ kartavya iti | sthiterupāyamāha 
| sadārudrasmṛtistathā iti | devanityatvameva sadāsmṛtirityucyate | sthitiṃ 
pratyupāyatvapratipādanārthaṃ saṃjñāntarābhidhānamiti | tathāśabdaḥ 
samānārthaḥ | yathā devanityatvaṃ pratyadhyayanadhyānayorevopāyatvaṃ dharmaṃ ca 
prati caryāyā eva 
tadanugrāhakatvenānusnānādiyamayantraṇādirapyupāyatvamupacaryate tathā sthitiṃ 
prati smṛtireva prādhānyenopāyastadanugrāhakatvenendriyajayo'pyupāyatvenokta ityato 
nendriyajayādityanena virodhaḥ | saṅgādinivṛtterupāyāntaramindriyajaya ityeke | tanna 
pañcopāyatvavirodhāt tyāgādānasūtrabhāṣyavirodhācca | 
devanityatvendriyajayayorabheda ityanye'pi |

p. 22)

tadapi na | lakṣaṇabhedādindriyotsargagrahayoḥ prabhutvamindriyajayaḥ | deve 
bhāvābhyāsataratvaṃ devanityatvamiti | siddhestarhyupāyo vācya ityata āha | 
prasādaścaiva iti | kāraṇasya svaguṇaditsā prasāda ityucyate | ca śabdo 
nyūnādhikavyavacchedasūcakaḥ | eva śabdaḥ prasādasyā nyānapekṣavamavadhārayati 
| lābhānāmupāyā ityetadgamyamānārthasyāpyabhidhānaṃ śāstrāntaroktānāṃ 
mokṣopāyanāmanupāyatvajñāpanārtham | pañca ityupasaṃhārārtham | niścitā 
ityāptairdṛṣṭā ityarthaḥ || 7 ||

atha kimetairupāyaiḥ pañcalābhā eva prāptavyā iti na kiṃ tarhi malāśca pañca 
kṣapaṇīyāḥ (?) | ke punaste ityāha - 

mithyājñānamadharmaśca saktihetuścyutistathā |
paśutvaṃ mūlaṃ pañcaite tantre heyādhikārataḥ || 8 ||

tatra pramāṇābhāsajaṃ jñānaṃ mithyājñānamuktaṃ 
saṃśayaviparyayādilakṣaṇam | śāstrāntarebhyo'pi tarhi 
saṃśayādinivṛtteraviśeṣaprasaṅga iti cenna śāstrāntarapraṇetṝṇāmapi 
viparyayānivṛttipratipādanādācāryavaiśeṣyaprakaraṇe | tanna śāstrāntarebhyo'pi 
saṃśayādinivṛttiriti | kāmakrodhadveṣāḥ kaluṣaṃ tasyāpyajñāne'ntarbhāvaḥ | 
kasmāt (?) | avyaktāvasthāgamane pratyanīkatvāt | tadidaṃ saṃśayādi kaluṣaṃ ca saha 
bījena mithyājñānamityucyate | dvitīyaṃ malaṃ darśayati adharmaśca iti | 
pāpmabījaṃ pāpamevātrādharma ityabhipretam | tasya savikārasyaikamalatvaṃ 
vikāravikāriṇorananyatvāditi | satyapyajñānakaluṣasaṅgacyutihetoradharmatve 
pāpākhya evātrādharmo'bhipreta iti caḥ sūcayati | tṛtīyaṃ malamāha | saktihetuḥ iti | 
saktiḥ saṅgaḥ viṣayāsaktilakṣaṇasukhaṃ bhāṣye sukhābhimāna ityanenoktam | tasyaiva 
lakṣaṇārthaṃ bhāṣyam avivecanamiśraṇapreraṇalakṣaṇo vanagajavat iti | tasya 
saṅgasya hetustanmayakāraṇaṃ vidhyantaropārjito dharmaḥ saṅgakara iti ya uktaḥ saha 
vikāreṇāsau tṛtīyo mala iti | caturthaṃ mala māha | cyutistathā iti | 
rudratattvādīṣaccittaṃ cyavate viṣayaṃ na prāpnoti taccittacyavanaṃ cyutirityucyate | 
tathā śabda samānārthe | yathā mithyājñānasya svabījena saha malatvam 
adharmasaṅgakarayośca savikāreṇa tathā cyuterapi ūṣmavadavasthitādharmākhyena 
svabījena saha malatvamiti | atra bhāṣyavirodhānna 
mithyājñānakaluṣapāpmasaṅgacyutayaḥ puruṣasya bhāvāścittavidyayorvā | nāpi 
kaluṣamicchāyā 

p. 23)

bhāvaḥ kintvadharmavikārā evatite jñānecchābhyāṃ saha kṣīrodakavadabhinnā iva 
gṛhyante | tathā ca satkāryavicāre prapañcitametaditi | pañcamaṃ malamāha paśutvam 
iti | dharmādharmavyatiriktaḥ pratighātānumeyaḥ puruṣaguṇaḥ paśutvam | tasya 
caturdaśalakṣaṇopetasya malatvam | tāni ca lakṣaṇānyasarvajñatvādīnyapatitvāntāni 
sarvajñatvādiviparyayeṇaiva vyākhyātānīti | taccetthaṃbhūtaṃ paśutvaṃ 
saṃsārasyānādikāraṇaṃ pradhānabhūtamityevaṃ matvāha mūlamiti | tathāhi 
kaivalyagatānāmanyamalābhāve'pi paśutvādeva punaḥ saṃsārāpattiriti | pañca iti 
nyūnādhikavyavacchedenopasaṃhārārtham | ete ityavadhāraṇārtham | ete eva 
saṃsārabandhātmakā malā na tu śāstrāntaroktā bhoktṛbhogyasambandhādaya 
ityarthaḥ | kva punaritthaṃbhūtā malāḥ prasiddhā ityāha | tantre 
sākṣānmaheśvarapraṇītamathaśabdādi śivāntaṃ śāstraṃ tantraṃ tasminnete 
pratipāditā ityarthaḥ | dharmajñānāderapi tyajyamānatvādadharmāderiva malatvaṃ 
prāptamityāśaṅkyā heyādhikārataḥ iti | yeṣāṃ kardamādivadduḥkhahetutvaṃ 
matvā sādhakaḥ kṣapaṇārthamadhikriyate ta eva malā na tu yeṣāṃ 
puṣpādivadanicchato'pi vināśa ityato heyādhikārādajñānādaya eva malā iti | 
heyādhikārikā iti vā pāṭhastatrāpyayamarthaḥ | heyatvena kṣapaṇīyatvenādhikāro 
yogyatā'sti yeṣāṃ te heyādhikāriṇasta eva heyādhikārikāḥ | svārthe kapratyayaḥ | 
adhikāraśabdādvā ikaṇpratyaye kṛte heyapadena karmadhārayastadayamartho yato 
heyādhikārikā evātra malā vivakṣitāḥ | tasmānna dharmajñānavairāgyādayo'pi 
malā iti |

ityetatsarvamākhyātaṃ saṃkṣipyābdhisamaṃ mayā |
ācāryāṇāṃ prasādena jñānaṃ pañcārthalakṣaṇam ||

kiṃ jñātairbahubhiḥ śāstraiḥ svānuṣṭhānāpahāribhiḥ |
idamevottamaṃ jñātvā yogābhyāsaratirbhavet || 

kṛtakṛtyaṃ svamātmānaṃ śrutvaitanmanyate tu yaḥ |
tasmai deyamidaṃ jñānaṃ nānyasmin siddhimicchatā ||

yastu maryādāhīnebhyo dadyātkenā'pi hetunā |
sa guhyabhedato gacchetsaha śiṣyairadhogatim ||

namaḥ sadgurave tasmai sarvavidyāntagāmine |
sacchlokairaṣṭabhiryena pañcārthābdhiḥ pradarśitaḥ ||

ācāryabhāsarvajñaviracitāyāṃ gaṇakārikāyāṃ ratnaṭīkā parisamāptā ||
p. 24)

āPPEṇḍīX ī

viśuddhamunikṛtaṃ yamaprakaraṇam 

guruṃ paraṃ tīrthakaraṃ smṛtvā lakuladhāriṇaṃ |
hitāya viprāṇāmasminvapurādāya yaḥ sthitaḥ || 1 ||

kuśikādyaparagurūṃstathā yathā yathāprajñam |
bhāṣyakṛtoktaṃ tadvakṣye yamaprakaraṇaṃ tathā || 2 ||

ahiṃsā brahmacaryaṃ ca satyāsaṃvyavahārakau |
asteyaṃ guruśuśrūṣāṃ śaucamāhāralāghavam || 3 ||

akrodho'pramāda uktāḥ pālyanta iti śaṃbhunā |
daśaivādehapatanātpañcārthe yogināṃ yamāḥ || 4 ||

jarāyujāṇḍajodbhijjasvedaṃjabhūtasaṃghasya |
sarvasya duḥkhānutpādastāmahiṃsāṃ vidurbudhāḥ || 5 ||

trayodaśānāṃ pañcārthe jihvopasthasya saṃyamaḥ |
indriyāṇāṃ viśeṣeṇa brahmacaryamiti smṛtam || 6 ||

dharmasya sādhanānaṅgaṃ vacanaṃ yatprakīrtitam |
pratiṣedho hi tasyoktaṃ satyaṃ satyavicārakaiḥ || 7 ||

dṛṣṭārthā saṅgatiryā ca varṇairāśramibhiḥ samam |
tattyāgo'saṃvyavahāraṃ prāhurete mumukṣavaḥ || 8 ||

adattānatisṛṣṭasya tathā'nabhimatasya ca |
grahaṇamanupāyalābho'nadhikārapratigrahaḥ || 9 ||

aniveditopayogaśca steyaṃ ṣaḍvidhaṃ matam |
tasya varjanamasteyaṃ prāhurasyeyacintakāḥ || 10 ||

vākkāyamanobhirgurau hitabhāvena vartanam 
guruśuśrūṣā kāyāntaḥkaraṇātmaviśodhanam || 11 ||

śaucamupārjitānnasya svavṛttyaivāvirodhataḥ |
vidhiyogānuṣṭhānasyābhyavahāraściraṃtanāḥ || 12 ||

p. 25)

āhāralāghavamūcurguravaḥ pañcilāgame |
itarairapakṛtasyāpyakrodhaścittaśuddhatā || 13 ||

yathāvihitasya vidhiryogasya satataṃ tathā |
udyama evānuṣṭhāne so'pramādo'bhidhīyate || 14 ||

evaṃ yamānvyākhyāyaiṣāṃ darśanaṃ sūtrato'dhunā |
anūdyate tatrāhiṃsā labdhā kṛtānnasūtrataḥ || 15 ||

indriyajayopadeśāttathā strīpratiṣedhataḥ |
brahmacaryaṃ tathā satyaṃ vyākhyānādyupadeśataḥ || 16 ||

asaṃvyavahāraḥ pretonmattāvyaktādiyogataḥ |
avāsaḥ sūtrato'steyamanutsṛṣṭaniṣedhataḥ || 17 ||

kathitā guruśuśrūṣā vidvadādyabhidhānataḥ |
bhasmasnānāccharīsya tathopasparśanādibhiḥ || 18 ||

bhāvasya paribhāvādyaiḥ śaucamātmana eva ca |
bhaikṣotsṛṣṭayathālabdhaistathā cāhāralāghavam || 19 ||

śūdraniṣedhādakrodhastathā'titāpadeśataḥ |
japyāpramādanirdeśādapramādo yamaḥ smṛtaḥ || 20 ||

ṣaḍgocarasya bhṛtyena viśuddhamuninā'lpakam |
kevalārthātsamuddhṛtya yamaprakaraṇaṃ kṛtam || 21 ||

viśuddhamunikṛtamātmasamarpaṇam |

śvetaḥ sutāro damanaḥ sugotraḥ kaṅka eva ca |
lokākṣijaigīṣavyau ca tathaiva dadhivāhanaḥ || 1 ||

ṛṣabho munirugraśca citrārthāliśca gautamaḥ |
vedaśirā gokarṇaśca guhāvāsiśikhaṇḍinau || 2 ||

jaṭāmālī cāṭṭahāso dāruko lāṅgalī tathā |
śvetaḥ śūlyatha daṇḍī ca sahiṣṇuḥ somaśarmakaḥ || 3 ||

kalulīśaścāvatārā aṣṭāviṃśatisaṅkhyakāḥ |
rudrasya dvijamokṣāya varadānād bhṛgostathā || 4 ||

p. 26)

maheśvara ! mahādeva ! vāmadeva ! mano'manaḥ ! |
natvā lakulinaṃ tvetaṃ mayedaṃ kiñciducyate || 5 ||

balapramathaneśāna ! ghora ! ghoratara ! dhruvam | 
mokṣaṃ pañcārthaśāstroktamahaṃ yāmi tathā kuru || 6 ||

aghorādhipate ! īśa | vāgviśuddha ! trilocana ! |
bhaktānugrāhakastena bhaktaṃ māmanukampaya || 7 ||

mahannīśvara viprarṣe ! mayā tvanmārgagāminā |
na gamyate yathā mārgo viruddhaḥ kriyatāṃ tathā || 8 ||

ajātasannādyapate ! śiva ! kāmin ! bhavodbhava ! |
vairāgyaṃ me dhruvaṃ dehi śarīrārogyatāṃ tathā || 9 ||

rudra ! kāla ! kalākṣepa ! sarvabhūtadame rata ! |
tathānuṣṭhīyatāṃ svāminmatprasiddhyati pañcilā || 10 ||

śarva ! tatpuruṣa ! jyeṣṭha ! brahmannoṅkāra ! śaṅkara ! |
mama sarveṣu bhūteṣu samabhāvo vidhīyatām || 11 ||

paro gurustvaṃ sarveṣvaparobhūḥ punarmayi |
sarvaṃ pañcārthavijñānaṃ prasādena pravartaya || 12 ||

nātha ! tubhyaṃ viśuddhena samyagācāryarūpiṇe |
kṛtveti bahudhā lipsāṃ kṛtamātmasamarpaṇam || 13 ||

kāraṇapadārthaḥ 

śivabhavavidhisāyujyaṃ siddhiṃ cāhaṃ samāsato vakṣye |
varadaṃ praṇamya bhaktyā kuśikādivimokṣakaṃ rudram || 1 ||

patyādinimittajñairyannityamupāsyate vidhānajñaiḥ |
tadiha śivatattvamādyaṃ jñeyaṃ śāstre prasādyaṃ ca || 2 ||

avikalamamalamanantaṃ yaddhyaiśvaryamiha śāstrataḥ kathitam |
tena yataḥ pāti paśūn patiriti tasmātprakīrttito rudraḥ || 3 ||

satatamaniruddhaśaktiḥ triṣvapi kāleṣu vidyate yasmāt |
satataṃ kāraṇabhāvāt saditi śivastena nirdiṣṭaḥ || 4 ||

bhūtotpattivināśaiḥ sarvatraivādikāraṇatvena |
yasmātkāraṇamīśastasmādādyaḥ sa kīrtitaḥ śāstre || 5 ||

p. 27)

janmani kālādiyoge navalakṣaṇake sahaiśvarye |
trividhe'pyajātabhāvādajāta iti kīrtyate tena || 6 ||

bhava iti vidyātitritayaṃ tasyodbhava eva vṛttilābho yaḥ |
udbhāvayetsvaśaktyā śarvastasmādbhavodbhavo jñeyaḥ || 7 ||

śraiṣṭhyaṃ vāmatvaṃ yatsvatantrabhāvo'tha devadevatvam |
paśusādhakeśvarāṇāṃ sarvaparatvātsmṛtastathā jyeṣṭhaḥ || 6 ||

rutabhayasaṃyogakaro bhūtānāṃ yaḥ sa rudra ityuktaḥ |
icchākārī bhagavānkāmī prokto vyavasthayā śāstre || 9 ||

śamasukhanirvāṇakaraḥ śaṅkara ityapramādibhiḥ proktaḥ |
kṣayakālahetubhāvātkālajñaiḥ kāla ityuktaḥ || 10 ||

sa kalā vikaroti yato hyantarasṛṣṭau hi bhāgavinyāsaiḥ |
kalavikaraṇa iti saṃjñā tenaiva śivasya vinyastā || 11 ||

dharmādiṃ balavargaṃ mathnāti yataḥ prakarṣataḥ sarvam |
sa balapramathananāmnā tasmādrudro'tha nirdiṣṭaḥ || 12 ||

ratirañjanādhivāsanayā prāṇiṣvañjasā bhavastheṣu |
damanaṃ taddhi paśūnāṃ karotyataḥ sarvabhūtadamanaḥ saḥ || 13 ||

saṃsthādvaye'pi yasmāt kālādyāvasthiteha śaktirvai |
tasmātsvaśaktiyogāt mano'manākhyo bhavetkāmī || 14 ||

śānto hyaghorarūpo ghoro'tha bhayānako hi vijñeyaḥ |
mohayati sarvalokānghorataro devadeveśaḥ || 15 ||

śaraṇaṃ sarvapaśūnāṃ vṛtamapi sarvaṃ hyaśeṣato yasmāt |
śaraṇādvaraṇācca haraḥ śarvaḥ parikīrtito gurubhiḥ || 16 ||

parameśvarākhyatattvaṃ patitvasatvādidharmabhede'pi |
vibhutāguṇena yogādyadabhinnaṃ taditi tena śivaḥ || 17 ||

eko'tyantaviśuddhaḥ puruṣaḥ sarvasya pūrakatvena |
nityai"ṣvaryamahattvāt svātantryācceśvaro mahādevaḥ || 18 ||

duḥkhāntasya nimittaṃ yaddhyānaṃ dhyānināṃ mataṃ tasya |
ekaviṣayaḥ sa yasmādoṅgārastena nirdiṣṭaḥ || 19 ||

bhagavān kriyākhyaśaktisvarūpabhāvādṛṣiḥ smṛtaḥ kavibhiḥ |
jñānābhidhānaśaktisvabhāvato vipra ityuktaḥ || 20 ||

p. 28)

anayorāśrayapūrakaniratiśayānantaviṣayabhāvena |
jñānakriyākhyaśaktyorāśrayabhāvānmahānīśaḥ || 21 ||

sarvatra sarvakālaṃ nityatvādavicalasvabhāvena |
yasmātsa vartate'smādeṣa śivaḥ sūribhiḥ kathitaḥ || 22 ||

guṇadharmadvāreṇa hi vāco yasmādiha pravartante |
guṇadharmavyatiriktāviśeṣito vāgviśuddho'taḥ || 23 ||

aiśvaryasya vidhātā sarvasya tato maheśvaraḥ proktaḥ |
niḥśeṣakāryajātaprabhurīśa itīrito munibhiḥ || 24 ||

sarvāsāṃ vidyānāṃ prabhuriti gaditastatheśānaḥ |
yatsarvabhūtaviṣayaṃ prabhutvamasyeśvarastena || 25 ||

patyuścādhipatitvād brahmatvāccaiva sarvabhāvānām |
satatānandaguṇatvāccādhipatibrahmaśivanāmā || 26 ||

|| kāraṇapadārthaḥ samāptaḥ ||

rudranāmāni 

namo rudrāya bhavāya śarvāya ca namonamaḥ |
īśānapaśupatibhyāṃ bhīmogrābhyāṃ namonamaḥ || 1 ||

mahādevāya guptāya sudevāya harāya ca |
vāmadevāya śāntāya tathomāpataye namaḥ || 2 ||

namaśca nīlakaṇṭhāya śrīkaṇṭhāya namonamaḥ |
gopataye śaṅkarāya sadā sarvasahāya ca || 3 ||

pūjā'nte prātaḥ sāyaṃ vā kṛtāñjalipuṭaḥ sthitaḥ |
ekonaviṃśanāmāni paṭhatīmāni yo naraḥ || 4 ||

sa pāpairmucyate sarvairdevadevaiśca pūjyate |
ekasyāpyeṣāṃ paṭhanāddehapāṭhe śivaṃ vrajet || 5 ||

ityāha bhagavān rudraḥ pṛṣṭo gauryā'tibhaktitaḥ |
lokānugrahabuddhyā ca purāṇe skandanāmani || 6 ||

pañcārthavidye niḥśeṣe niravadye śivapriye |
bhaktānugrāhikā devi ! mātastubhyaṃ sadā namaḥ || 7 ||
p. 29)

āPPEṇḍīX īī 

(From ṣaḍdarśanasamuccya of ācārya haribhadra)

ī

athādau naiyāyikānāṃ yaugāparābhidhānāṃ liṅgādivyaktirucyate | te ca 
daṇḍadharāḥ prauḍhakaupīnaparidhānāḥ kambalikāprāvṛtāḥ jaṭādhāriṇo 
bhasmoddhūlanaparāḥ yajñopavītino jalādhārapātrakarāḥ nīrasāhārāḥ prāyo 
vanavāsino dormūle tumbakaṃ bibhrāṇāḥ kandamūlaphalāśinaḥ 
ātithyakarmaniratāḥ sastrīkāḥ nistrīkāsteṣūttamāḥ | te ca pañcāgnisādhanaparāḥ 
kare jaṭādau ca prāṇaliṅgadharāścāpi bhavanti | uttamāṃ saṃyamāvasthāṃ 
prāptāstu nagnā bhramanti | ete prātardantapādādiśaucaṃ vidhāya śivaṃ dhyāyanto 
bhasmanāṅgaṃ tristriḥ spṛśanti | yajamāno vandamānaḥ kṛtāñjalirvakti oṃ namaḥ 
śivāya iti | gurustathaiva śivāya namaḥ iti prativakti | te ca saṃsadyevaṃ vadanti |

śaivīṃ dīkṣāṃ dvādaśābdīṃ sevitvā yo'pi muñcati |
dāsī dāso'pi bhavati so'pi nirvāṇamṛcchati ||

teṣāmīśvaro devaḥ sarvajñaḥ sṛṣṭisaṃhārādikṛt | tasya cāṣṭādaśāvatārā amī | 
nakulīśo'tha kauśikaḥ gārgyaḥ maitryaḥ kauruṣaḥ īśānaḥ pāragārgyaḥ 
kapilāṇḍaḥ manuṣyakaḥ kuśikaḥ atriḥ piṅgalaḥ puṣpakaḥ bṛhadāryaḥ agastiḥ 
santānaḥ rāśīkaraḥ vidyāguruśca | ete teṣāṃ tīrtheśāḥ pūjanīyāḥ | eteṣāṃ 
pūjāpraṇidhānavidhistu tadāgamādveditavyaḥ | teṣāṃ sarvatīrtheṣu bharaṭā eva 
pūjakāḥ | devānāṃ namaskāro na sanmukhaiḥ kāryaḥ | teṣu ye nirvikārāste 
svamīmāṃsāgatamidaṃ padaṃ darśayanti |

na svardhunī na phaṇino na kapāladāma nendoḥ kalā na girijā na jaṭā na bhasma 
|
yatrānyadeva ca na kiñcidupāsmahe tadrūpaṃ purāṇamuniśīlitamīśvarasya || 1 
||

sa eva yogināṃ sevyo hyarvācīnastu bhogabhāk |
sa dhyāyamāno rājyādisukhalubdhairniṣevyate || 2 ||

uktaṃ ca taiḥ svayogaśāstre |

vītarāgaṃ smaranyogī vītarāgatvamaśnute |
sarāgaṃ dhyāyatastasya sarāgatvaṃ tu niścitam || 3 ||

p. 30)

yena yena hi bhāvena yujyate yantravāhakaḥ |
tena tanmayatāṃ yāti viśvarūpo maṇiryathā || 4 ||

etatsarvaṃ liṅgaveṣadevādisvarūpaṃ vaiśeṣikamate'pyavasātavyaṃ yato 
naiyāyikavaiśeṣikāṇāṃ hi mithaḥ pramāṇatattvānāṃ saṅkhyābhede 
satyapyanyonyaṃ tattvānāmantarbhāvane'lpīyāneva bhedo jāyate |

tenaiteṣāṃ prāyo matatulyatā | ubhaye'pyete tapasvino'bhidhīyante | te ca 
śaivādibhedena caturdhā bhavanti | taduktam |

ādhārabhasmakaupīnajaṭāyajñopavītinaḥ |
svasvācārādibhedena caturdhā syustapasvinaḥ || 1 ||

śaivāḥ pāśupatāścaiva mahāvratadharāstathā |
turyāḥ kālamukhā mukhyā bhedā ete tapasvinām || 2 ||

teṣāmantarbhedā bharaṭabhaktalaiṅgikatāpasādayo bhavanti | bharaṭādīnāṃ 
vratagrahaṇe brāhmaṇādivarṇaniyamo nāsti | yasya tu śive bhaktiḥ sa vratī 
bharaṭādirbhavet | paraṃ śāstreṣu naiyāyikāḥ sadā śivabhaktatvācchaivā ityucyante 
vaiśiṣikāstu pāśupatā iti | tena naiyāyikaśāsanaṃ śaivamākhyāyate 
vaiśeṣikadarśanaṃ ca pāśupatamiti | idaṃ mayā yathāśrutaṃ yathādṛṣṭaṃ 
cātrābhidadhe | tattadviśeṣastu tadgranthebhyo vijñeyaḥ ||

eṣāṃ tarkagranthā nyāyasūtra 
bhāṣyanyāyavārtikatātparyaṭīkātātparyapariśuddhinyāyālaṅkāravṛttayaḥ 
krameṇākṣapādavātsyāyanodyotakaravācaspatiśrīudayanaśrīkaṇṭhābhayatilakopādh
yāyaviracitāḥ 54000 | bhāsarvajñapraṇīte nyāyasāre'ṣṭādaśa ṭīkāḥ | tāsu 
mukhyā ṭīkā nyāyabhūṣaṇākhyā | nyāyakalikā jayantaracitā 
nyāyakusumāñjalitarkaśca |

īī

(From sarvadarśanasaṅgraha)

atha nakulīśapāśupatadarśanam |

tadetadvaiṣṇavamataṃ dāsatvādipadavedanīyaṃ paratantraduḥkāvahatvānna 
duḥkhāntādīpsitāspadamityarocayamānāḥ pāramaiśvaryaṃ kāmayamānāḥ 
parābhimatā muktā na bhavanti paratantratvāt pāramaiśvaryarahitatvādasmadādivat 
muktātmānaśca parameśvaraguṇasambandhinaḥ puruṣatve sati 
samastaduḥkhabījavidhuratvātparameśvaravadityādyanumānaṃ pramāṇaṃ 
pratipadyamānāḥ kecana māheśvarāḥ 
paramapuruṣārthasādhanapañcārthaprapañcanaparaṃ pāśupataśāstramāśrayante |

p. 31)

tatredamādisūtram athātaḥ paśupateḥ pāśupatayogavidhiṃ vyākhyāsyāmaḥ iti | 
asyārthaḥ - atrāthaśabdaḥ pūrvaprakṛtāpekṣaḥ | pūrvaprakṛtaśca guruṃ prati 
śiṣyasya praśnaḥ | gurusvarūpaṃ gaṇakārikāyāṃ nirūpitam - 

pañcakāstvaṣṭa vijñeyāḥ gaṇaścaikastrikātmakaḥ |
vettā navagaṇasyāsya saṃskartā gururucyate || iti ||

lābhā malā upāyāśca deśāvasthāviśuddhayaḥ |
dīkṣākāribalānyaṣṭau pañcakāstrīṇi vṛttayaḥ || iti |

tisro vṛttaya iti prayoktavye trīṇi vṛttaya iti cchāndasaḥ prayogaḥ 
pañcamalaghūkaraṇārtham | āgamāvirodhino'nnārjanopāyā vṛttayo 
bhaiks.yotsṛṣṭayathālabdhābhidhā iti | tatra vidhīyamānamupāyaphalaṃ lābhaḥ | 
jñānatapodevanityatvasthitiśuddhibhedātpañcavidhaḥ | tadāha haradattācāryaḥ - 

jñānaṃ tapo'tha nityatvaṃ sthitiḥ śuddhiśca pañcam iti |

ātmāśrito duṣṭabhāvo malaḥ sa mithyājñānādibhedātpañcavidhaḥ | tadapyāha |

mithyājñānamadharmaśca saktirhetuścyutistathā |
paśutvamūlaṃ pañcaite tantre heyā viviktitaḥ || iti |

sādhakasya śuddhieheturupāyo vāsacaryādibhedātpañcavidhaḥ | tadapyāha - 

vāsacaryā japo dhyānaṃ sadārudrasmṛtistathā |
pratipattiśca lābhānāmupāyāḥ pañca niścitāḥ || iti |

yenārthānusandhānapūrvakaṃ jñātapovṛddhī prāpnoti sa deśo gurujanādiḥ | 
yadāha - 

gururjano hudādeśaḥ śmaśānaṃ rudra eva ca || iti |

ālābhaprāpterekatamādau yadavasthānaṃ sā'vasthā vyaktādiviśeṣeṇa 
viśiṣṭā |

taduktam - 

vyaktāvyaktājapādānaṃ niṣṭhā caiva hi pañcamam || iti |

mithyājñānādīnāmatyantavyapoho viśuddhiḥ | sā pratiyogibhedātpañcavidhā 
|

taduktam - 

ajñānasyāpyasaṅgasya hāniḥ saṅgakarasya ca |
cyutirhāniḥ paśutvasya śuddhiḥ pañcavidhā smṛtā || iti |

dīkṣākāripañcakaṃ coktam - 

p. 32)

dravyaṃ kālaḥ kriyā mūrtirguruścaiva hi pañcamaḥ | iti |

balapañcakaṃ ca |

gurubhaktiḥ prasādaśca materdvandvajayastathā |
dharmaścaivāpramādaśca balaṃ pañcavidhaṃ smṛtam || iti |

śeṣamaśeṣamākara evāvagantavyam |

atrāthaśabdena duḥkhāntasya pratipādanam | 
ādhyātmikādiduḥkhavyapohapraśnārthatvāttasya paśuśabdena kāryasya 
paratantravacanatvāttasya patiśabdena kāraṇasyeśvaraḥ patirīśiteti 
jagatkāraṇībhūteśvaravacanatvāttasya | yogavidhī tu prasiddhau | tatra duḥkhānto 
dvividhaḥ - anātmakaḥ sātmakaśceti | tatrānātmakaḥ 
sarvaduḥkhānāmatyantocchedarūpaḥ | sātmakastu dṛkkriyāśaktilakṣaṇamaiśvaryam | 
yatra dṛkśaktirekāpi viṣayabhedātpañcavidhopacaryate darśanaṃ śravaṇaṃ mananaṃ 
vijñānaṃ sarvajñatvaṃ ceti | tatra 
sūkṣmavyavahitaviprakṛṣṭāśeṣacākṣuṣasparśādiviṣayaṃ jñānaṃ darśanam | 
aśeṣaśabdaviṣayaṃ siddhijñānaṃ śravaṇam | samastacintāviṣayaṃ siddhijñānaṃ 
mananam | niravaśeṣaśāstraviṣayaṃ granthato'rthaśca siddhijñānaṃ vijñānam | 
uktānuktāśeṣārtheṣu samāsavistaravibhāgaviśeṣataśca 
tattvavyāptasadoditasiddhijñānaṃ sarvajñatvam | ityeṣā dhīśaktiḥ | 
kriyāśaktirekā'pi trividhopacaryate manojavitvaṃ kāmarūpitvaṃ vikramaṇadharmitvaṃ 
ceti | tatra niratiśayaśīghrakāritvaṃ manojavitvam | karmādinirapekṣasya 
svecchayaivānantasalakṣaṇavilakṣaṇasarūpakaraṇādhiṣṭhātṛtvaṃ kāmarūpitvam | 
upasaṃhṛtakaraṇasyāpi niratiśayaiśvaryasambandhitvaṃ vikramaṇadharmitvamityeṣā 
kriyāśaktiḥ | yadasvatantraṃ sarvaṃ kāryaṃ tattrividhaṃ vidyā kalā paśuśceti | tatra 
paśuguṇo vidyā | sā'pi dvividhā - bodhābodhasvabhāvabhedāt | bodhasvabhāvā 
vivekāvivekapravṛttibhedā dvividhā | tatra yā vivekapravṛttiḥ pramāṇamātravyaṅgyā 
(sā) cittamityucyate | cittena hi sarvaḥ prāṇī bāhyārthātmakaprakāśānugṛhītaṃ 
sāmānyena vivecitamavivecitaṃ cārthaṃ cetayata iti | pāśvarthadharmādharmikā 
punarabodhātmikā vidyā svaśāstraṃ yenocyate | cetanaparatantratve satyacetanākalā | 
sā'pi dvividhā - kāryākhyā kāraṇākhyā ceti | tatra kāryākhyā daśavidhā - 
pṛthivyādīni pañca tattvāni rūpādayaḥ pañca guṇāśceti | kāraṇākhyā 
trayodaśavidhā - jñānendriyapañcakaṃ karmendriyapañcakam 
adhyavasāyābhimānasaṅkalpābhidhavṛttibhedādbudhyahaṅkāramanolakṣaṇamantaḥ-
karaṇatrayaṃ ceti | paśutvasambandhī paśuḥ | so'pi dvividhaḥ - sāñjano nirañjanaśceti 
| tatra sāñjanaḥ śarīrendriyasambandhī nirañjanastu tadrahitaḥ |

p. 33)

tatprapañcastu pañcārthabhāṣyadīpikādau draṣṭavyaḥ | 
samastasṛṣṭisaṃhārānugrahakāri kāraṇaṃ tasyaikasyāpi guṇakarmabhedāpekṣayā 
vibhāga uktaḥ patiḥ sannādya ityādinā | tatra patitvaṃ niratiśayadṛkkriyāśaktimattvaṃ 
tenaiśvaryeṇa nityasambandhitvaṃ sattvaṃ ādyatvamanāgantukaiśvaryasambandhitvam | 
ityādarśakārādibhi stīrthakarairnirūpitam |

cittadvāreṇā''tmeśvarasaṃbandho yogaḥ | sa ca dvividhaḥ kriyālakṣaṇaḥ 
kriyoparamalakṣaṇaśceti | tatra japyadhyānādirūpaḥ kriyālakṣaṇaḥ | 
kriyoparamalakṣaṇastu saṃvidgatyādisaṃjñitaḥ | dharmārthasādhakavyāpāro vidhiḥ | 
sa ca dvividhaḥ pradhānabhūto guṇabhūtaśca | tatra pradhānabhūtaḥ 
sākṣāddharmahetuścaryā | sā dvividhā vrataṃ dvārāṇi ceti | tatra 
bhasmasnānaśayyopahārajapapradakṣiṇāni vratam | taduktaṃ bhagavatā nakulīśena - 
bhasmanā triṣavaṇaṃ snāyīta bhasmani śayīta iti | atropahāro niyamaḥ | sa 
ca ṣaḍaṅgaḥ | taduktaṃ sūtrakāreṇa - 
hasitagītanṛtyahuḍukkāranamaskārajapyaṣaḍaṅgopahāreṇa upatiṣṭheta iti | tatra hasitaṃ 
nāma kaṇṭhoṣṭhapuṭavisphūrjanapuraḥsaramahahetyaṭṭahāsaḥ | gītaṃ 
gāndharvaśāstrasamayānusāreṇa maheśvarasambandhiguṇadharmādinimittānāṃ 
cintanam | nāṭyamapi nāṭyaśāstrānusāreṇa hastapādādīnāṃ 
saṅkṣepaṇādikamaṅgapratyaṅgopāṅgasahitaṃ bhāvābhāvasametaṃ ca prayoktavyam 
| huḍukkāro nāma jihvātālusaṃyogānniṣpadyamānaḥ puṇyo vṛṣanādasadṛśo 
nādaḥ | huḍugiti śabdānukāro vaṣaḍitivat | yatra laukikā bhavanti tatraitatsarvaṃ 
gūḍhaṃ prayoktavyam | śiṣṭaṃ prasiddham | dvārāṇi tu 
krāthanaspandanamandanaśṛṅgāraṇāvitatkaraṇāvitadbhāṣaṇāni | tatrāsuptasyaiva 
suptaliṅgavaddarśanaṃ krāthanam | vāyvabhibhūtasyeva śarīrāvayavānāṃ 
spandanaṃ kampanam | upahatapādendriyasyeva gamanaṃ mandanam | 
rūpayauvanasaṃpannāṃ kāminīmavalokyā''tmānaṃ kāmukamiva yairvilāsaiḥ 
pradarśayati tatcchṛṅgāraṇam | kāryākāryavivekavikalasyeva 
lokaninditakarmakaraṇamavitatkaraṇam | 
vyāhatāpārthakādiśabdoccāraṇamavitadbhāṣaṇam | guṇabhūtastu (vidhiḥ) 
caryānugrāhako'nusnānādirbhaikṣocchiṣṭādinirmitāyogyatāpratyayanivṛttyarthaḥ | 
tadapyuktaṃ sūtrakāreṇa - anusnānanirmālyaliṅgadhārī iti | tatra samāso nāma 
dharmimātrābhidhānaṃ tacca prathamasūtra eva kṛtam | pañcānāṃ padārthānāṃ 
pramāṇataḥ prapañcābhidhānaṃ vistaraḥ | sa khalu rāśīkarabhāṣye draṣṭavyaḥ | 
eteṣāṃ yathāsaṃbhavaṃ lakṣaṇato'saṅkareṇābhidhānaṃ vibhāgaḥ | sa tu 
vihitaśāstrāntarebhyo'mīṣāṃ guṇātiśayena kathanaṃ viśeṣaḥ | tathāhi - 

p. 34)

anyatra duḥkhanivṛttireva duḥkhāntaḥ iha tu pāramaiśvaryaprāptiśca | anyatrābhūtvā 
bhāvi kāryamiha tu nityaṃ paśvādi | anyatra sāpekṣaṃ kāraṇamiha tu nirapekṣo 
bhagavāneva | anyatra kaivalyādiphalako yogaḥ iha tu pāramaiśvaryaduḥkhāntaphalakaḥ | 
anyatra punarāvṛttiḥ svargādi iha punarapunarāvṛttirūpaḥ sāmīpyādiphalakaḥ | 

nanu mahadetadindrajālaṃ yannirapekṣaṃ parameśvarakāraṇamiti | tathātve 
karmavaiphalyaṃ sarvakāryāṇāṃ samasamayasamutpādaśceti doṣadvayaṃ 
prāduḥṣyāt | maivaṃ manyethāḥ | vyadhikaraṇatvāt yadi nirapekṣasya bhagavataḥ 
kāraṇatvaṃ syāttarhi karmaṇo vaiphalye kimāyātam (?) | prayojanābhāva iti cetkasya 
prayojanā bhāvaḥ (?) | karmavaiphalye kāraṇaṃ kiṃ karmiṇaḥ kiṃ vā bhagavataḥ (?) | 
nā''dyaḥ | īśvarecchānugṛhītasya karmaṇaḥ saphalatvopapatteḥ | tadananugṛhītasya 
yayātiprabhṛtikarmavatkadācinniṣphalatvasaṃbhavācca | na caitāvatā karmasvapravṛttiḥ 
karṣakādivadupapatteḥ | īśvarecchāyattatvācca paśūnāṃ pravṛtteḥ | nāpi dvitīyaḥ | 
parameśvarasya paryāptakāmatvena karmasādhyaprayojanāpekṣāyā abhāvāt | 
yaduktaṃ samasamayasamutpāda iti tadapyayuktamacintyaśaktikasya 
parameśvarasyecchānuvidhāyinyā avyāhatakriyā"ṣaktyā kāryakāritvābhyupagamāt | 
taduktaṃ saṃpradāyavidbhiḥ - 

karmādinirapekṣastu svecchācārī yato hyayam |
tataḥ kāraṇataḥ śāstre sarvakāraṇakāraṇam || iti |

nanu darśanāntare'pīśvarajñānānmokṣo labhyata eveti kuto'sya viśeṣa iti cenmaivaṃ 
vādīḥ | vikalpānupapatteḥ | kimīśvaraviṣayajñānamātraṃ nirvāṇakāraṇaṃ kiṃ vā 
sākṣātkāraḥ athavā yathāvattattvaviniścayaḥ (?) | nā''dyaḥ śāstramantareṇāpi 
prākṛtajanavaddevānāmadhipo mahādeva iti jñānotpattimātreṇa mokṣasiddhau 
śāstrābhyāsavaiphalyaprasaṅgāt | nāpi dvitīyaḥ anekamalapracayopacittānāṃ 
piśitalocanānāṃ paśūnāṃn parameśvarasākṣātkārānupapatteḥ | 
tṛtīye'smanmatāpātaḥ pāśupataśāstramantareṇa yathāvattattvaviniścayānupapatteḥ | 
taduktamācāryaiḥ - 

jñānamātre yathāśāstraṃ sākṣāddṛṣṭistu durlabhā |
pañcārthādanyato nāsti yathāvattattvaniścayaḥ || iti ||

tasmātpuruṣārthakāmaiḥ puruṣadhaureyaiḥ pañcārthapratipādanaparaṃ 
pāśupataśāstramāśrayaṇīyam |

iti sarvadarśanasaṅgrahe nakulīśapāśupatadarśanam |
p. 35)

īīī

(From ṣaḍdarśanasamuccaya of rājaśekharasūri)

śaivamatam |

atha yaugamataṃ brūmaḥ śaivamityaparābhidham |
te daṇḍadhāriṇaḥ prauḍhakaupīnaparidhāyinaḥ ||

kambalikāprāvaraṇā jaṭāpaṭalaśālinaḥ |
bhasmoddhūlanakarttāro nīrasāhārasevinaḥ ||

dormūle tumbakabhṛtaḥ prāyeṇa vanavāsinaḥ |
ātithyakarmaniratāḥ kandamūlaphalāśanāḥ ||

sastrīkā atha nistrīkā nistrīkāsteṣu cottamāḥ |
pañcāgnisādhanaparāḥ prāṇaliṅgadharāḥ kare ||

vidhāya dantapavanaṃ prakṣālyāṃhvikarānanam |
spṛśanti bhasmanā'ṅgaṃ tristriḥ śivadhyānatatparāḥ ||

yajamāno vandamāno vakti teṣāṃ kṛtāñjaliḥ |
oṃ namaḥ śivāyetyevaṃ śivāya nama ityasau ||

teṣāṃ ca śaṅkaro devaḥ sṛṣṭisaṃhārakārakaḥ |
tasyāvatārāḥ sārā ye te'ṣṭādaśa tadarcitāḥ ||

teṣāṃ nāmānyatha brūmo nakulīśo'tha kauśikaḥ |
gārgyo maitryaḥ kauruṣaśca īśānaḥ ṣaṣṭha ucyate ||

saptamaḥ pāragārgyastu kapilāṇḍamanuṣyakau |
aparakuśiko'triśca piṅgalākṣo'tha puṣpakaḥ ||

bṛhadācāryo'gastiśca santānaḥ ṣoḍaśaḥ smṛtaḥ |
rāśīkaraḥ saptadaśo vidyāgururthāparaḥ ||

ete'ṣṭādaśa tīrtheśāstaiḥ sevyante pade pade |
pūjanaṃ praṇidhānaṃ ca teṣāṃ jñeyaṃ tadāgamāt ||

akṣapādo gurusteṣāṃ tena te hyākṣapādakāḥ |
uttamāṃ saṃyamāvasthāṃ prāptā nagnā bhramanti te ||

pramāṇāni ca catvāri pratyakṣaṃ laiṅgikaṃ tathā |
upamānaṃ ca śābdaṃ ca tatphalāni pṛthak prathak ||

tattvāni ṣoḍaśāmutra pramāṇādīni tadyathā |
pramāṇaṃ ca prameyaṃ ca saṃśayaśca prayojanam ||

dṛṣṭānto'pyatha siddhānto'vayavastarkanirṇayau |
vādo jalpo vitaṇḍā ca hetvābhāsāśchalāni ca ||

p. 36)

hātayo nigrahasthānānyeṣāṃ vyayastu dustaraḥ |
ātyantikastu duḥkhānāṃ viyogo mokṣa ucyate ||

jayantācāryaracito nyāyatarko'tidustaraḥ |
anyastūdayanācāryo granthaprāsādasūtrabhṛt ||

bhāsarvajño nyāyasāratarkasūtravidhāyakaḥ |
nyāyasārābhidhe tarke ṭīkā aṣṭādaśa sphuṭāḥ ||

nyāyabhūṣaṇanāmnī tu ṭīkā tāsu prasiddhibhāk |
ayameṣāṃ viśeṣastu yatprajalpanti parṣadi ||

śaivīṃ dīkṣāṃ dvādaśābdīṃ sevitvā yo'pi muñcati |
dāsī dāso'pi bhavati so'pi nirvāṇamṛcchati ||

eteṣu nirvikārā ye mīmāṃsāṃ darśayanti te |
tatra padyamidaṃ cāsti mokṣamārgaprarūpakam ||

na svardhunī na phaṇino na kapāladāma nendoḥ kalā na girijā na jaṭā na bhasma 
|
yatrāsti nānyadapi kiñcidupāsmahe tadrūpaṃ purāṇamuniśīlitamīśvarasya ||

sa eva yogināṃ sevyo yo'rvācīnastu bhogabhāk |
sa dhyāyamāno rājyādisukhalubdhairniṣevyate ||

uktaṃ ca taiḥ svayogaśāstre - 

vītarāgaṃ smaranyogī vītarāgatvamaśnute |
sarāgaṃ dhyāyataḥ puṃsaḥ sarāgatvaṃ tu niścitam ||

yena yena hi bhāvena yujyate yantravāhakaḥ |
tena tanmayatāṃ yāti viśvarūpo maṇiryathā ||

śrutānusārataḥ proktaṃ naiyāyikamataṃ mayā |
eteṣāmeva śāstrebhyastāṃstānbhāvānvidurbudhāḥ ||

eteṣāṃ yajamānastu sutārāhṛdayeśvaraḥ |
satyavādī hariścandro rāmalakṣmaṇapūrvajaḥ ||

bharaṭānāṃ vratādāne varṇavyaktirna kācana |
yasya punaḥ śive bhaktirvratī sa bharaṭo bhavet || 

amīṣāṃ sarvatīrtheṣu bharaṭā eva pūjakāḥ |
śeṣā namaskārakarāḥ so'pi kāryo na sanmukhaḥ ||
p. 37)

āPPEṇḍīX īV 

kāravaṇamāhātmyam |

śrīgaṇeśāya namaḥ | śrīlakuṭapāṇaye namaḥ |

amaragaṇaniṣevyaḥ sarvasiddhipradātā kaliyugamavatīrṇaḥ kāyarūpī maheśaḥ 
| sakalabhuvanakartā sarvapāpaprahartā diśatu lakuṭapāṇirvo vibhūtiṃ 
prasannaḥ || 1 ||

kailāsaśikharārūḍhaṃ bhagavantaṃ trilocanam |
mahādevaṃ mahākālaṃ mahābhairavarūpiṇam ||

ekākinaṃ prabhuṃ dṛṣṭvā papraccha pārvatī tadā |

śrīdevyuvāca - 

paṭṭabandhasya māhātmyaṃ vistarātkathaya prabho ! |

īśvara uvāca - 

kalidvāparayormadhye avatāraṃ mama śṛṇu |
yasya smaraṇamātreṇa mucyate sarvapātakaiḥ ||

atrināmā tu devarṣiḥ pūrvaṃ khyāto mahātapāḥ |
tadanvaye prasūto'sau viśvarūpo mahādvijaḥ ||

sudarśanastu deveśi ! tasya patnī sudarśanā |
sarvalakṣaṇasaṃpannā rūpalāvaṇyasaṃyutā ||

harṣagadgadasaṃbhāṣā mattamātaṅgagāminī |
sampūrṇendumukhī subhrūḥ kuraṅgacakitekṣaṇā |
pativratadharā sādhvī patyurādeśakāriṇī ||

yathā rūpaṃ tathā śīlaṃ sādhvīnāṃ dhuri kīrtitā |
brahmarātryavasāne tu prathame ca caturyuge ||

avatīrṇo hyahaṃ martye ulkāgrāme vilomataḥ |
vīrabhadro gaṇo nāma tasya varānane ! ||

tasya caikāgrato bhakteravatīrṇo svayaṃ tataḥ |
upapannastato garbhe māsi bhādrapade tadā ||

devakāryasya kāryārthaṃ martyaloke varānane ! |
evaṃ caivāśvino māsastathā vai kārtiko gataḥ ||

p. 38)

atha mārgaśiromāsastathā pauṣaḥ prakīrtitaḥ |
māghamāso gato devi ! tathā vai phālgunaḥ smṛtaḥ ||

samprāpte caitramāse tu śuklapakṣe caturdaśī |
ardharātre vyatīte tu prasūtā sā kulāṅganā |
sūtikāsthā mahādevi ! mahāsatyavatī satī ||

apaśyadātmano bālaṃ jātamātraṃ varānane ! ||

piṅgākṣaṃ piṅgakeśaṃ ca taptakāñcanasannibham |
sudṛḍhaṃ bāhuyugalaṃ ūrū ca sudṛḍhau tathā ||

parasparaṃ vadantyevaṃ paśya bālaṃ guṇānvitam |
viśvarūpo mahāprājñastāsāṃ vākyena sundari ! ||

āmantrayattato viprān vedavedāṅgapāragān |
akrūrānsatyasambhāṣān sarvabhūtahite ratān ||

etadguṇasamāyuktān kṛtsnānāmantrya bhaktitaḥ |
śucirbhūtvā mahādevi ! jātakarma cakāra saḥ ||

yājñavalkyavasiṣṭhābhyāṃ tathā pārāśareṇa ca |
vedoktenaiva kāryeṇa vidhiṃ kuryātprayatnataḥ ||

tarpayāmāsa tānviprān dānaiśca vividhaiḥ śubhaiḥ |
hiraṇyaṃ rajataṃ vastraṃ gāvo dhānyaṃ ca medinī ||

evaṃvidhopacāraiśca pūjitā vividhā dvijāḥ |
dadhyakṣatakuśairdūrvākaiśca varānane ||

yajetprajāpatiṃ vidhyā vedānāṃ smaraṇaṃ tathā |
āśīrvādaṃ dadurviprā jīvatputro bhava dvija ! ||

tataḥ putramukhaṃ dṛṣṭvā vedaghoṣeṇa pārvati ! |
evaṃ caitro'tha vaiśākhastathā jyeṣṭho varānane ! ||

āṣāḍhaḥ śrāvaṇānte ca grahaṇaṃ bhāskarasya ca |
tataḥ śrutvā brāhmaṇebhya idaṃ vacanamabravīt ||

sukhāsīnau mahādevi ! dampatī śayanaṃ gatau |
parasparaṃ vadantyevamālāpairmadhurasvaraiḥ ||

śrūyate ca purāṇebhya idaṃ proktaṃ varānane ! |
tasmin tīrthe kurukṣetre sarvakāmārthasādhane ||

p. 39)

yo dadāti viśālākṣi ! yathā śaktyā tu kāñcanam |
kanyāśca rajataṃ vastraṃ gāvo dhānyaṃ ca medinīm ||

akṣayyaṃ tu bhavettasya rāhugraste divākare |
viṣṇunā varadānena tatrākṣayyaṃ prakīrttitam ||

tena santaḥ praśaṃsanti kurukṣetraṃ tataḥ param |
yadā tatraiva gantavyaṃ grahaṇe bhāskarasya tu ||

uddhareccāgnihotraṃ ca yāvannodayate raviḥ |
astaṃ gate divānāthe homaṃ dadyādyathāvidhi ||

vaiśvadevaṃ ca madhyāhne pañcayajñaṃ ca kārayet |
āgate svāgataṃ kuryāt āsanaṃ ca pradāpayet ||

bhaktipūrvopadiṣṭena yathāśaktyā tu bhojanam |
strībālavṛddheṣvaśanaṃ vāsaṃ vā'tiprayatnataḥ ||

svāgataṃ na dadātyevaṃ gṛhasthaḥ patito bhavet |
pratiśrayastu sarvebhyo dātavyo gṛhamedhinā ||

yatiśca brahmacārī ca pakvānnasvāmināvubhau |
teṣāṃ bhakṣā pradātavyā yatīnāṃ tu susaṃskṛtā ||

sukṛtaṃ yatkṛtaṃ kiñcit ājanma maraṇāntakam |
anyathā hanti tatsarvaṃ gṛhasthairnārcito yadi ||

pūjite pūjitāḥ sarve manuṣyāḥ pitṛdevatāḥ |
tasmāt sarvaprayatnena so'tithisargasaṅkramaḥ (?) ||

kāle prāptastvakāle vā pathiko'tibubhukṣitaḥ |
pūjito vividhān bhogān saṃdadyānnātra saṃśayaḥ ||

āyuḥ prajāśca vittaṃ ca dadāti pūjito'tithiḥ |
kupito harate sarvaṃ puṇyaṃ bṛhaspaterapi ||

etatsarvaṃ viśeṣeṇa yathoddiṣṭaṃ tu pālayet |
pativratā tu yā nārī pativākyānuyāyinī ||

sā vandyā triṣu lokeṣu iti śāstrasya niścayaḥ |
mātāpitrośca yā bhaktyā saṃyutā vratacāriṇī ||

praviśya hṛdayaṃ nityaṃ devairapi hi pūjyate |
evaṃ vākyāvasāne tu bālaṃ yatnena rakṣaya ||

p. 40)

kumāraiḥ saha vartantaṃ ramamāṇaṃ mudā pathi |
tvayā bālo viśālākṣi ! rakṣitavyaḥ prayatnataḥ ||

utsaṅge sā tataḥ kṛtvā bālaṃ paśyati sā priyā |
cakṣurbhyāmaśrapūrṇābhyāṃ mukhamālokayattadā ||

svajanā bāṃdhavā ye ca śyālāḥ saṃbandhinastadā |
vidyārthinastu ye viprā ye cānye āśritā janāḥ ||

kṛtāñjaliḥ puro bhūtvā bālaṃ yatnena rakṣata |
evaṃ samarpayanbālaṃ kurukṣetraṃ pratasthivān ||

iti śrīvāyupurāṇe śivaprasūtisargaḥ ||

ataḥparaṃ pravakṣyāmi kumāracaritaṃ param |
yanna kasyacidākhyātaṃ tatsarvaṃ kathayāmi te ||

pativratā tu sā nārī putrayuktā dhanānvitā |
bhartṛvākyānuvartantī yathoddiṣṭena karmaṇā ||

uṣaḥkāle tu samprāpte śucirbhūtvā tu sā priyā |
saṃmārjya homaśālāyāṃ gomayenānulepayat ||

samidhaḥ śruvaṃ śrucaṃ caiva akṣatāṃśca tathā ghṛtam |
tathā darbhānmahādevi ! kṛtvā ca dharaṇītale ||

abhyukṣaṇaṃ tataḥ kṛtvā gatā bāhye śubhānanā |
homaṃ dadati te sarve bālāḥ sambandhinastathā ||

dine dine tu sā devi ! yathoddiṣṭaṃ cakāra ha |
tathā cāśvayuje māsi samprāpte ca śubhānane ! ||

tato'nyasmindine devi ! pūrvāhṇe śubhakarmaṇā |
āsādya tu sruvaṃ darbhān saghṛtaṃ tāmrabhājanam ||

abhyukṣaṇaṃ tataḥ kṛtvā gatā bāhye tu sundari ! |
brāhmaṇaṃ ca tato gṛhya gṛhaṃ prāptā tapasvinī ||

gatāgnihotraśālāyāṃ susamiddhaṃ hutāśanam |
agnihotrasya tatkāryaṃ homadravyasya nikṛtim ||

paśyamānā viśālākṣī vismayāviṣṭacetasā |
jaharṣa ca tataḥ kṛtvā citte buddhiḥ prayojitā ||

p. 41)

brāhmaṇastadanujñāto homaṃ dattaṃ ca cintayan |
gataḥ svamandiramāścaryaṃ paśyantī sā dine dine ||

cintayantī paraṃ guhyaṃ rahasyaṃ kautukaṃ param |
bālarūpādhikaṃ jñātvā sā cintāvaśamāgatā ||

tyaktanidrā tu sā devi ! iti cintya muhurmuhuḥ |
īdṛśaṃ kathamāścaryaṃ kasya nākhyāpayāmyaham ||

homaṃ dadati pitaro mama kāruṇyabuddhayaḥ |
kiṃ devā ṛṣayaḥ siddhāḥ viśvedevāstrayo'gnayaḥ ||

homaṃ datvā kathaṃ yānti kṣaṇamātreṇa sarvadā |
āścaryaṃ paramaṃ guhyaṃ paśyāmi tu dine dine ||

evaṃ sā cintayitvā tu tato nidrāvaśamāgatā |
prabhāte putrakaṃ devi ! aṅke kṛtvā tapasvinī ||

panthānamīkṣate nārī udvignamanasā priye |
sā pṛcchati pathi kṣīṇān rukṣakeśāṃśca dhūsarān ||

saputraiḥ sakalatraiśca bhrātṛbhiḥ svajanaistathā |
dagdhā viyogaduḥkhena kṛṣṇadehā'bhavattadā ||

kāṃkṣamāṇā divārātrau snehāttu darśanaṃ pateḥ |
cintayantī tadā devi ! nityamudvignacetasā ||

kurukṣetragatāndevi ! pathi kṣīṇān samāgatān |
saṅghātavartino dṛṣṭvā duḥkhitā sā pativratā ||

aśrupūrṇā sunetrā ca citrāṅgī madhurasvarā |
gṛhe prāptā tu sā devi ! kāṅkṣantī bharturāgamam ||

aparāhṇe mahābhāge ! āgato munisattamaḥ |
snātvā cāsau kurukṣetre puṇyatīrthe śubhānane ! ||

āsanaṃ ca tadā devi ! tayā vistīrṇamādarāt |
pādaśaucaṃ mahādevi ! kṛtaṃ viprasya yatnataḥ ||

dadhyakṣataṃ tathā dūrvā sitatoyaṃ suśobhanam |
nikṣipya ca śubhe pātre tato'vardhāpayatpatim ||

bāndhavāḥ svajanāḥ sarve saṃgina āśritā janāḥ |
kurukṣetrāgataṃ jñātvā āgatāḥ svāgatapriyāḥ ||

p 42)

taiḥ sambhāṣya yathānyāyaṃ hṛṣṭacitto'bhavaddvijaḥ |
iṣṭabhojyaṃ tataḥ kṛtvā homaṃ datvā varānane ! ||

pathi śrānto mahādevi ! brāhmaṇaḥ śayanaṃ gataḥ |
gṛhakāryaṃ tataḥ kṛtvā saṃsupte sakale jane ||

śayyānte copaviṣṭā ca priyā vacanamabravīt |
kuśalenāgato tīrthe puṇyakṣetre mahāmune ! ||

dattvā dānaṃ supātre ca kṣemeṇāgato gṛham |

brāhmaṇa uvāca - 

śṛṇu bhadre ! pravakṣyāmi gato tīrthe yathā priye ! |
avighnena ca samprāptastava snehena sundari ! ||

durlabhaṃ priyamākhyeyaṃ durlabhaṃ jīvitaṃ dhanam |
durlabhā tvādṛśī bhāryā durlabho guṇavānsutaḥ ||

durlabhā jananī loke pitā caiva viśeṣataḥ |
durlabhaṃ sādhusanmānaṃ durlabhaṃ tīrthasevanam ||

smarāmi te divārātrau caritaṃ śobhanaṃ priye ! |
na smarāmi viśālākṣi ! kadācittava vipriyam ||

bhāryā nāma nṛṇāṃ bhadre ! sarvakāmārthasādhinī ||

yaśaḥśriyaḥ kāmayuktā putradā kulavardhinī |
bhāryāhīno viśālākṣi ! kuto bhadrāṇi paśyati (?) ||

kuśalaṃ tava bālasya kuśalaṃ tava sundari ! |
kuśalaṃ dhanadhānye ca kuśalaṃ svajane jane ||

agnihotraṃ ca sātithyaṃ pādaśaucaṃ pratiśrayaḥ |
aśeṣaṃ sarvamityetattvayā yatnena pālitam ||

sudarśanā uvāca - 

sātithyamagnihotraṃ ca pādaśaucaṃ pratiśrayaḥ |
yathā sarvamanujñātaṃ tattathā sudṛḍhaṃ kṛtam ||

viśvarūpa uvāca - 

sādhu sādhu mahābhāge priye sarvāṅgasundari |
pativrate viśālākṣi ratiputrapravardhini ! ||

vividhāni ca duḥkhāni anyajanmakṛtāni ca |
tvaddarśanena naśyanti raviṃ dṛṣṭvā yathā himam ||

p. 43)

sudarśanā uvāca - 

abhayaṃ dehi me kānta ! rahasyaṃ kathayāmi te |
akathyaṃ sarvalokānāṃ yanna vṛttaṃ kathañcana ||

viśvarūpa uvāca - 

akathyaṃ paramaṃ guhyaṃ yattvayā kautukaṃ param |
dṛṣṭaṃ kathaya me'śeṣaṃ mayi snehena sundari ! ||

śrīsudarśanā uvāca - 

yattvayā samanujñātamagnihotrasya pālanam |
tattathā kriyamāṇasya ahanyahani suvratam ||

apare ca dine homadravyaṃ śruvaṃ śrucaṃ tathā |
abhyukṣaṇaṃ tataḥ kṛtvā saghṛtaṃ tāmrabhājanam ||

aśeṣaṃ sthāpayitvā tu darbhān samidha eva ca |
bāhye gatvātivegena punarāgamanaṃ kṛtam ||

hutadravyaṃ ca paśyāmi vidhiyuktaṃ dine dine |
etanme kautukaṃ kānta ! rahasyaṃ kathitaṃ tava ||

viśvarūpa uvāca - 

pracchannaṃ tu nirīkṣāmi sandhyāyāṃ virate ravau |
yena me saṃśayo bhadre ! na kadācit pravartate ||

īśvara uvāca - 

ardharātre vyatīte tu dampatī śayanaṃ gatau |
tataḥ prabhātasamaye homaṃ datvā yathāvidhi ||

madhyāhne vaiśvadevaṃ tu kṛtamātithyabhojanam |
aparāhṇe tu samprāpte kṛtvā sammārjanaṃ priye ! ||

abhyukṣaṇaṃ tataḥ kṛtvā homadravyaṃ susaṃskṛtam |
sandhyākāle tu samprāpte'gniruddhṛtya saṃskṛtaḥ ||

pādaśaucaṃ tataḥ kṛtvā śrotrabhālobhanaṃ tataḥ |
agnau paryukṣaṇaṃ kṛtvā darbhānāstīrya yatnataḥ ||

sruvaṃ srucaṃ cābhiṣicya gavāṃ kṣīreṇa pārvati ! |
prāṅmukhastu mahādevi ! oṅkāramuccarettataḥ ||

homaṃ dattvā sruvāgreṇa paścāt kuṇḍaṃ samālabhet |
susamiddhāhutīrdattvā yāvannodayate raviḥ ||

p. 44)

samīpe ca gṛhaṃ gatvā upasṛtya ca sundari ! |
ekāgraḥ prayato bhūtvā muhustiryaṅ nirīkṣayan ||

paryaṅkādutthito bālo premaṃ dattvā yathā vrajan |
punastatraiva gacchantau dampatī tadanantaram ||

iti śrīśivapurāṇe lakulīśamāhātmye santoṣakaraṇaṃ nāmādhyāyaḥ ||

īśvara uvāca - 

tataḥ prabhātasamaye tathā dṛṣṭvā tu pārvati ! |
āhatustau viśālākṣaṃ putra ! śrānto'si ko bhavān (?) ||

iti vākyāvasāne tu mūrcchitaḥ patito bhuvi |
mūrcchitaṃ ca sutaṃ dṛṣṭvā vismitā ca sudarśanā ||

diśo nirīkṣaṇaṃ kṛtvā patitā dharaṇītale |
saptamāsastu deveśi ! sutaḥ pañcatvamāgataḥ ||

aṅke kṛtvā ca taṃ bālaṃ gatā sā jalasannidhau |
devakhāte tato devi ! kṣipto'sau vipule jale ||

nīto'sau kacchapairdevi ! yatra devo jaleśvaraḥ |
jalamadhye mahāliṅgaṃ tiṣṭhate ca varānane ! ||

pretāñjaliṃ tato datvā hā putra ! tvaṃ kuto gataḥ (?) |
śṛṇu devi ! pravakṣyāmi kathāṃ paurāṇikīṃ śubhām ||

yā na kasyacidākhyātā rahasyā muktidāyikā |
stambhayitvā ca taṃ dehaṃ kṛtaṃ saṃkramaṇaṃ yathā ||

rodamānaḥ sa viprendro mūrcchito dharaṇīṃ gataḥ |
devahrade hyahaṃ devi ! avagāhya tato jalam |
krīḍamānaṃ mahādevi ! kumāraṃ paśyate tadā ||

brāhmaṇāśca tataḥ sarve āścaryamidamabruvan |
karasantāḍanaṃ kṛtvā ehyehi mama putraka ! ||

ṛṣaya ūcuḥ - 

bālasya caritaṃ dṛṣṭvā ṛṣayo vismayānvitāḥ |
brūhi tvaṃ ko bhavān (?) kasya (?) satyadharmaparāyaṇaḥ ||

p. 45)

bāla uvāca - 

kṣitijalapavanebhyastejasaścaiva deśād upacitanaraveśaḥ sambhavo dravyarāśiḥ 
|
śravaṇanayanajihvāghrāṇasaṃsparśavettā kṣititalaparivartī ko'pyahaṃ 
prāṇadharmaḥ ||

ṛṣayaḥ ūcuḥ - 

namo bālakarūpāya avyaktāya namonamaḥ |
vyomapramāṇakāyāya kāmeśāya namonamaḥ ||

vyomapramāṇavidyāya vidheśāya namonamaḥ |
vyomapramāṇakālāya kāleśāya namonamaḥ ||

vyomapramāṇadharmāya dharmeśāya namonamaḥ |
vyomapramāṇaviśvāya viśveśāya namonamaḥ ||

ekavajradvivajrāya bahuvajrāya te namaḥ |
ekakaṇṭhadvikaṇṭhāya bahukaṇṭhāya te namaḥ ||

ekahastadvihastāya bahuhastāya te namaḥ |
ekanetradvinetrāya bahunetrāya te namaḥ ||

namaste'stu mahādeva ! namaste'stu maheśvara ! |
namaste'stu mahārudra ! namaste bālarūpiṇe ! ||

namaste'stu mahāsiddha ! devakhātasamudbhava ! |
namaste'stu mahārudra ! namaste'stu sadā hare ! ||

avyaktāya namastubhyaṃ śāśvatāya ca te namaḥ |
evaṃ stavena deveśaṃ stauti yo lakuḍeśvaram ||

sa muktaḥ sarvapāpebhyo śivaloke mahīyate |
bhogārthī labhate bhogān yogārthī yogamāpnuyāt ||

yaṃ yaṃ cintayate kāmaṃ taṃ taṃ prāpnoti satvaram |
śivasya padamāpnoti nityaṃ paṭhati yo naraḥ ||

iti śrīśivapurāṇe lakulīśamāhātmye tṛtīyo'dhyāyaḥ ||

ṛṣayaḥ ūcuḥ - 

yaṃ cārucāmīkararāśigauraṃ saṃskāravidyāvratamantradhautāḥ |
samāviśanti pratigṛhyakāyaṃ lokapravīrāya namo'stu tasmai ||

p. 46)

īśvara uvāca - 

śṛṇuṣvaikamanā bhūtvā kumāracaritaṃ param |
tatastutvā parityajya sa bālo viśvarūpiṇaḥ ||

prākāśayatsvarūpaṃ ca divyaṃ trailokyamohanam |
trinetraṃ ca sudīptaṃ ca muktakeśaṃ ca suvrate ! ||

dhṛtayajñopavītaṃ ca mekhalābhasmasaṃyutam |
prahṛṣṭamanasassarve nityaṃ protphullalocanam ||

ṛgyajuḥsāmasambandhaiḥrdivyābhistutisaṃyutaiḥ |
stotrairmanoramaiḥ stutvā dhāvamānaṃ punaḥ punaḥ ||

harṣagadgadayā vācā saṃbhāvya taṃ ca bālakam |
kṛtāñjalipuṭāḥ sarve stutiṃ samupacakramuḥ ||

saṃsārabhayasaṃtrastā jarāmṛtyubhayārditāḥ |
trātā tvaṃ parameśo no nānyastrātā vidhīyate ||

ālāpairmadhurairvākyaiḥ harṣeṇa ca varānane ! |
sādhu sādhu mahāvipra ! tava bālasya ye guṇāḥ ||

stutvā te gālavādīnāṃ ṛṣīṇāṃ tatvadarśinām |

viśvarūpa uvāca - 

dhanyo'haṃ sarva lokeṣu yasya tvatsadṛśo sutaḥ |
havyasarvaprasādena yāsyāmo paramāṃ gatim ||

īśvara uvāca - 

tasya vākyāvasāne tu tato'haṃ rūpasaṃyutaḥ |
tatkṣaṇācca parityajya bālo mārgeṇa prasthitaḥ ||

tataste pṛṣṭhataḥ sthitvā yathā suvipulena sā |
dhāvamānā mahādevi ! bālamāyātimohitā ||

sa bālaḥ kṣaṇamātreṇa adṛśyo jāyate bhuvi |
ūrvā nāmnā tu yā devī nadī nāmnā sarasvatī ||

bhṛgukṣetropakārāya triṣu lokeṣu viśrutā |
nadītīre gato bālaḥ krīḍamānastu tiṣṭhati ||

tataḥ paścimamārgeṇa śrīmatkāyāvarohaṇam |
viśvarūpo mahādevi ! dhāvamānaśca pṛṣṭhataḥ ||

p. 47)

tasya mārge vartamāno bāndhavaiḥ svajanaiḥ saha |
hā putra ! tvaṃ kathaṃ yāsi (?) māṃ tyaktvā vikalendriyam ||

mahādānaṃ prayacchanti bāndhavā vikalendriyāḥ |
sarve viprā mahādevi ! krandamānāḥ suduḥkhitāḥ ||

rātrau paribhramantaste araṇye nirjale vane |
āliṅganti tato vṛkṣān bāhubhyāṃ śokakarṣitāḥ ||

kecinmārgaṃ nirīkṣanti guhāsthānāni kecana |
itaścetaśca deveśi ! dhāvamānā dvijottamāḥ ||

vane guhālatāmadhye vīkṣante te punaḥ punaḥ |
krandamānaiśca taiḥ sarvairuṣaḥkālastato'bhavat ||

evaṃ prabhātasamaye bhānunā darśanena ca |
āśvāsitāśca te sarve pratapantaḥ punaḥ punaḥ ||

māṃ duḥkhabhājanaṃ tyaktvā abhāgyaṃ kṣīṇamaṇḍanam |
kva yāsi (?) vatsa vatseti vadantaḥ pṛṣṭhagāminaḥ ||

teṣāṃ sukaruṇāṃ vācaṃ śrutvāhaṃ karuṇāparaḥ |
samprāpto vāyuvegena paraṃ cakrapuraṃ prati ||

brāhmaṇastu mahādevi ! manasā cintayan sthitaḥ |
tato'pyagnau mahādevi ! dṛṣṭo devo maheśvaraḥ ||

tataste prasthitāḥ sarve vepamānāḥ suduḥkhitāḥ |
mātā dṛṣṭvā bālamātraṃ mahāhlādinyuvāca ha ||

putra ! putreti jalpantī susvaraṃ karuṇaṃ yathā |

viśvarūpa uvāca - 

bhāgyahīnasya me vatsa ! durlabhaṃ darśanaṃ tava |
nivedaya tvamātmānaṃ mūrcchito dharaṇīṃ gataḥ ||

īśvara uvāca - 

udvignamanaso viprāḥ vepamānā muhurmuhuḥ |
mātā sudarśanā devi ! praskhalantī pade pade ||

rudantī karuṇaṃ caiva snehād vai putravatsalā |
krandamānā mahādevi ! duḥkhitā sutadarśanāt ||

hā putra ! putra ! putreti krośantī kurarī yathā |
pāṇibhyāṃ prapadaṃ gatvā ehyehi mama putraka ! ||

p. 48)

hṛdayaṃ śokadāvāgnidagdhaṃ ca kuladīpaka ! |

kumāra uvāca - 

mā mā spṛśanti munayo mama mātā pitā tathā |
asti kāryaṃ paraṃ kiñcit śruṇvantu munisattamāḥ ! ||

tyaja śokaṃ viśālākṣi ! na me mātā kadācana |
śruṇvantu ṛṣayaḥ sarve itihāsaṃ purātanam ||

ahaṃ sarvajagadvyāpī svayaṃ sākṣānmaheśvaraḥ |
ṛṣīṇāṃ varadānāya ulkāgrāme maharṣayaḥ ! ||

prakāśāya dvijātīnāṃ dharmasaṃsthāpanāya ca |
avatīrṇaḥ svayaṃ devi ! taṃ veda māṃ purātanam ||

ṛṣayaḥ ūcuḥ - 

tvaṃ devaḥ sarvadevānāṃ kartā hartā jagatpatiḥ |
bhuktimuktipradātā tvaṃ bhogamokṣamabhīpsitam ||

kiṃ puṇyaṃ ke guṇāstasya yena devi ! praśaṃsati |
ulkāgrāmasya māhātmyamaśeṣaṃ kathaya prabho ! ||

īśvara uvāca - 

śṛṇvantu ṛṣayaḥ sarve mama bhaktiparāyaṇaḥ |
agnihotraratā nityaṃ vedādhyayanatatparāḥ ||

ulkāgrāmaṃ śivakṣetraṃ sapta manvantarāṇi ca |
kāmikaṃ taṃ vijānīyurnātra kāryā vicāraṇā ||

snānaṃ kurvanti ye gatvā puṇye bhāgīrathījale |
ulkāgrāme tu tatpuṇyaṃ sthāvarālokanena tu ||

tasmin tīrthe madīye tu sukṛtaṃ yena yatkṛtam |
tasya varṣasahasraṃ tu pratijanma tadakṣayam ||

parityajati yaḥ prāṇānulkāgrāme mahāmatiḥ |
divyaṃ varṣasahasraṃ tu sa rudrasya pade bhavet ||

anaśanena yaḥ kaścit prāṇatyāgaṃ karoti cet |
anivartikā gatistasya rudraloke mahīyate ||

brāhmaṇān bhojayettatra tāpasānvā yatīṃstathā |
sarvaṃ koṭiguṇaṃ tasya iti svāyaṃbhuvo'bravīt ||

p. 49)

devakhāte ca yaḥ snātvā piṇḍān dadyādyathāvidhi |
ahorātroṣito bhūtvā pitṝṇāṃ dattamakṣayam ||

caitramāse tathāṣṭamyāṃ ahorātroṣito naraḥ |
devahradataṭe ramye brāhmaṇān bhojayettataḥ ||

suvarṇaṃ rajataṃ vastraṃ gāvo dhānyaṃ ca medinī |
piṇḍaṃ dadyādyathānyāyaṃ mantraiśca vaidikaiḥ śubhaiḥ ||

kedāraśca prayāgaśca kurukṣetraṃ gayā tathā |
devahradasya sānnidhyaṃ kalāṃ nārhanti ṣoḍaśīm ||

avatīṇo hyahaṃ yatra kiṃ tatra guṇakīrtanā |
avatīrṇāḥ surāḥ sarve sacandrāḥ sadivākarāḥ ||

anye ca ṛṣayaḥ sarve saśailavanakānanāḥ |
gaṃgā sarasvatī tāpī yamunā caiva narmadā ||

mandākinī ca sarayūḥ tathā ca vedakā nadī |
devahradasa sānnidhye nātra kāryā vicāraṇā ||

labhante paramaṃ jñānaṃ ye cānye śivayoginaḥ |
etaddhi bālacaritaṃ tīrthaṃ cāpi suśobhanam ||

kāmadaṃ sarvajaṃtūnāṃ nātra kāryā vicāraṇā |
tathāpi na tyajenmātā na bhrātā na ca sodarāḥ ||

aśrupūrṇaiśca nayanaiḥ dhāvamānāśca pṛṣṭhataḥ ||

śrīviśvarūpa uvāca - 

prasādastu tvayā kāryaḥ mama mūḍhasya sarvataḥ |
tvaddarśanena pūto'haṃ ihaloke paratra ca ||

ālokaya tvaṃ māṃ vatsa ! patitaṃ śokasāgare |
vivarṇavadanā mātā praskhalantī pade pade ||

trāyasva jananīṃ vatsa ! varṣayogena duḥkhitām |
na mātṛsadṛśaṃ tīrthaṃ trailokye sacarācare ||

īśvara uvāca - 

vāryamāṇau samīpasthau mayā mātā pitā tathā |
mohitau viṣṇumāyābhirnājānītāṃ maheśvaram ||

tatrasthānātsamāyātaḥ śrīmatkāyāvarohaṇam |
aṣṭavarṣakalārūpī īśāno bhṛgumaṇḍale ||

p. 50)

bhṛgoranugrahārthāya avatīrṇaḥ kṛte yuge |
brahmarātryavasāne tu ādikalpe maheśvari ! ||

īśānaścottareśāne bhālākṣo devatāgaṇaiḥ |
pṛṣṭhabhāge punardṛṣṭvā jananījanakādayaḥ ||

tato mayā dhṛtaḥ koṇaḥ bhṛkuṭīkuṭilānanam |
tato me bhṛkuṭīṃ dṛṣṭvā sa ṛṣirdīnamānasaḥ ||

vicetanaḥ punarjātaḥ punarāśvāsito mayā |
atraiva sthīyatāṃ brahman ! āvayoḥ saṃgakāraṇam ||

mayā tu daṇḍakāṣṭhena nadīnāmā tu jāhnavī |
ānītā jāhnavī puṇyā puṇyatoyāvagāhitā ||

sarvatīrthamayī puṇyā devakhāteṣu durlabhā |
dīrghā rekhā kṛtā yasmāt teneyaṃ dīrghikā smṛtā ||

durlabhā sarvalokeṣu amāyātrā viśeṣataḥ |
dvāparasya yugasyādau meghanando maheśvaraḥ ||

yatra siddho mahāmegho yatra siddho maheśvari ! |
āśrayaṃ dehi me deva ! dināni katicitpurā ||

yāsyāmi svagṛhasthānaṃ nātra kāryā vicāraṇā |
tato madvacanaṃ śṛtvā vṛddhadevo'bravīdidam ||

mamaitatsaṃkaṭasthānaṃ kathaṃ tarhyāvayorbhavet |
sa uvāca punardeva ! ātithyaṃ kriyatāṃ mama ||

ātithye ye guṇāḥ proktāste sarve tvayi saṃsthitāḥ |
āśrayasya prasādena mahatpuṇyaphalaṃ labhet ||

gṛhasthasya paro dharmo hyāśrayaḥ pādaśaucanam |
āsanaṃ cārghyadānaṃ ca tasmātkartavyamuttamam ||

iti prabodhito devi ! na dadyādāśrayaṃ mama |

vṛddhadeva uvāca - 

brahmatīrtheṣu tiṣṭhasva brahmeśvarasya sannidhau |
bhṛgukṣetraṃ pavitrakṛtaṃ bhaktānāṃ mokṣakāmyayā ||

p. 51)

śrīmahādeva uvāca - 

vṛddhasya vacanaṃ śṛtvā lakulīśo varānane ! |
brahmeśvaraṃ samāsādhya tasminneva layaṃ gataḥ ||

sthitaḥ sa bhagavān tatra kāyarūpī maheśvaraḥ |
yena kāyāvatāro'sau tenedaṃ kāyarohaṇam ||

asidaṇḍadharo vāme dakṣiṇe bījapūrakam |
brahmaliṅge mahādevi ! ahamapi layaṃ gataḥ ||

kāyāvarohaṇe puṇye tīrthe tīrthavarottame ! |
bhṛgukṣetrapavitrārthamavatīrṇo yuge yuge ||

ādikalpāvasāne tu brahmakalpe purātane |
brahmaṇo manasaḥ putro atrināmā ca viśrutaḥ ||

atristu janayāmāsa ātreyaṃ nāma nāmataḥ |
ātreyādagniśarmopi agniśarmasutaḥ śuciḥ ||

somaśarmeti vikhyāto dhamaśīlo jitendriyaḥ |
somaśarmasuto jāto viśvarūpo dvijottamaḥ ||

viśvarūpādahaṃ jāto bālarūpadharo haraḥ |
yena vyāptaṃ jagatsarvaṃ trailokyaṃ sacarācaram ||

jagatprāṇasvarūpo'haṃ jantūnāṃ jīvalakṣaṇam |
yogināṃ paramaṃ brahma brahmaṇā parikīrtitam ||

tanmāṃ viddhi mahādevi ! viśvarūpaṃ jagadgurum |
carācareṣu vikhyātaṃ dehināṃ dehamāśritam ||

samāno nāma yo vāyurbhūtānāṃ viṣayātmavān |
tarotpannaśca tatraiva mayā saṃkramaṇaṃ kṛtam ||

lambakastu samānasyāvyāpakastu vyavasthitaḥ |
ātmarūpasamānasya prāṇināṃ paramaḥ śivaḥ ||

avatīrṇastato martye kāyarūpadharo haraḥ |
kāyāvatāre lokeśo lokānāṃ hitakāmyayā ||

īśvara uvāca - 

īśānaḥ prathame jāto dvitīye tu mahābalaḥ |
tṛtīye tu yuge jāto vṛddhadevo maheśvaraḥ ||

p. 52)

prāpte kuliyuge ghore dharmasaṃsthāpanāya ca |
sarvapāpaharaṃ puṇyaṃ śrīmatkāyāvaroharaṇam ||

koṭiliṅgasya saṃsthānaṃ śivakṣetreṇa nirmitam |
sarvaṃ tīrthamidaṃ devi ! vikhyātaṃ bhṛgumaṇḍale ||

śrīmatkāravaṇe tīrthe mūrtimān śaṅkaraḥ svayam |
cāturyugamidaṃ tīrthaṃ śivaśaktyā samanvitam ||

bhṛgukṣetrapavitrārthaṃ nirmitaṃ śambhunā svayam |
kṛte icchāpurī nāma tretāyāṃ ca mayāpurī ||

dvāpare meghavatī nāma kalau kāyāvarohaṇam |
śrīmāteti kṛte proktā tretāyāṃ bhūlambā matā ||

ādau cānte mahādevi ! mūrtimanto maheśvarau |
liṅgamūrttī dvayormadhye svayaṃ sākṣādyugeśvaraḥ ||

īśānaṃ kṛttikānāthaṃ sānandaṃ lakulīśvaram |
pa"ṣyanti ye narā nityaṃ te narā gatakalmaṣāḥ ||

īśānaṃ pravaraṃ tīrthaṃ īśāno yatra tiṣṭhati |
pravaraḥ sarvadevānāṃ sarvapāpopaśāntidaḥ ||

īśānaḥ sarvatantreṣu sarvatantreṣu nāyakaḥ |
īśānaḥ sarvadevaśca tasmādīśāno vai prabhuḥ ||

tamīśānaṃ samāsādhya vidhinā śraddhayā saha |
śivoktena ca mantreṇa pūjayitvā jagadgurum ||

pradakṣiṇaṃ tataḥ kṛtvā pūjayitvā maheśvaram |
prāpnoti paramaṃ sthānaṃ bhuktimuktiphalapradam ||

mahābalaṃ tatastīrthaṃ yatra taptaṃ tapaḥ purā |
ṛṣibhirdevamukhyaiśca paraṃ mokṣamabhīpsubhiḥ ||

purā tretāyuge devi ! tīrthe tīrthavarottame |
sālaṃkāya(?)pautreṇa nandinā bhāvitātmanā ||

ārādhya tapasā tena divyaṃ varṣasahasrakam |
dhyānayuktaḥ sadā tiṣṭhan japannindriyanigrahaḥ ||

ekacittaśca śāntātmā mama vākyaparāyaṇaḥ |
toṣito'haṃ tadā devi ! varamasmai pradattavān ||

p. 53)

trinetraḥ śūlapāṇiśca mama rūpasvarūpadhṛk |
saptarṣibhiśca bhānunā paramārthaviśāradaiḥ ||

prāptā taiḥ paramā siddhirakṣayā lokadurlabhā |
anyaiśca bahubhiḥ siddhaistapasā puṣkalena ca ||

apare tu yuge prāpte vṛddhadevo mahodayaḥ |
yatra siddho mahāmedhāḥ svayaṃ devo maheśvaraḥ ||

asya darśanamātreṇa mucyate sarvapātakaiḥ |
kṣetrādhipaṃ tu taṃ viddhi svayaṃ tatra vyavasthitaḥ ||

ghore kaliyuge prāpte devadevo jagadguruḥ |
lakulīśa iti khyātaḥ triṣu lokeṣu viśrutaḥ ||

tatrasthajīvalokānāṃ muktyarthaṃ naiva saṃśayaḥ |
jñānamūrtiḥ svayaṃ sākṣād devadevo bhavodbhavaḥ ||

ātmasthaṃ cintaya jñānaṃ vītarāgaṃ ca kevalam |
tattīrthaṃ lākulaṃ jñeyaṃ śivakṣetramudāhṛtam ||

sevyate daivataiḥ sarvai ṛṣibhiśca tapodhanaiḥ |
tapasā sādhitastaistu surairbrahmādibhiḥ priye ! ||

īpsitaṃ prāptavān kāryamasmin tīrthe varānane ! |
tatra snātvā ca datvā ca pitṝṇāṃ tu tilodakam ||

mucyate mānavaḥ pāpāt saptajanmasamudbhavāt |
sandeho naiva kartavya iti śambhuḥ svayamabravīt ||

prayāge vā bhavenmokṣo mahākāle ca vā priye ! |
amarakaṇṭake tadvat tathā kāyāvarohaṇe ||

mahāmāghīṃ puraskṛtya sasnau tatra dinatrayam |
anaghaḥ snānamātreṇa sa bhūtveha dvijottamaḥ ||

asminyoge tvaśakto'pi snāyādatra dinatrayam |
patitvā brāhmaṇastatra brahmahā cātmahā bhavet ||

mucyate sarvapāpebhyo nātra kāryā vicāraṇā |
āśvinasya site pakṣe caturdaśyāmupoṣitaḥ ||

devebhyaśca pitṛbhyaśca kṛtvā śrāddhādikāḥ kriyāḥ |
aśvinyāśca somayoge ye kurvanti narottamāḥ ||

p. 54)

paṭṭabandhaṃ lākulīśaṃ svayaṃ devaiśca yatkṛtam |
na teṣāṃ jāyate janma saṃsāre duḥkhasaṃkaṭe ||

tatra mārī na varteta na dāridryaṃ na rogiṇaḥ |
śrūyatāmatra deveśi ! puṇye'smin bhṛgumaṇḍale ||

śrīmatkārohaṇe tīrthe prathamaṃ tu kalau yuge |
dīrghakāyaṃ tu deveśi ! yajñaṃ yajñavarottame ||

kṛtvā tu brāhmaṇān pūjya dinānyaṣṭādaśaiva tu |
tatra kārohaṇe dvāre viśve devā maharṣayaḥ ||

bhojayeyurbrāhmaṇān śaktyā yajamānaḥ pitāmaham |
yo veda viśvamadrūpaṃ svayaṃ viṣṇumaheśvaram ||

brāhmaṇaḥ śraddhayā yukto brahmeśvaro hyajāyata |
ajaikapādā gandharvā kinnarāśca tathaiva ca ||

sarve devāśca pitaraḥ sacandrārkadivākarāḥ |
marīciraṃgirā atriḥ pulastyaḥ pulahastathā ||

pracetāśca vasiṣṭhaśca bhṛgurnārada eva ca |
devalo gālavaścaiva vāmadevo mahāṛṣiḥ ||

vālakhilyaśca kuśaśca tṛṇabindustathaiva ca |
uddālako jayacchṛṃgo māṇḍavyo vyāsanandanaḥ ||

gautamo'tha bharadvājo vātso vātsyāyanastathā |
anye ca bahavo devi ! ṛṣayaśca tapodhanāḥ ||

dṛṣṭvā devaṃ virūpākṣaṃ ānandaṃ paramaṃ yayuḥ |
yāni kāni ca puṇyāni tīrthāni saritastathā ||

brahmādyāḥ sarvatīrtheṣu snātvā caiva mudānvitāḥ |
snāpayeyuḥ śivaṃ tatra puṇyaistīrthodakaiḥ priye ! ||

prathamaṃ snāpayedbrahmā tataścaiva janārdanaḥ |
tatastvindro'pi deveśaḥ caturtho bhānureva ca ||

caturbhiḥ kalaśairdivyaiḥ snāpya devaṃ jagadgurum |
vilepya candanairdivyaiḥ karpūrāgarudhūpakaiḥ ||

puṣpairmanoharairdivyaiḥ śvetamālābhirarcitaḥ ||

paṭṭasūtramayairvastraiḥ sūtrajairvā maheśvaram |
paridhāpya mahādevaṃ yathāśaktyā ca pūjayet ||

p. 55)

yāvattadvastratantūnāṃ saṃkhyānaṃ śivapūjane |
tāvadyugasahasrāṇi śivaloke mahīyate ||

te pūjya vidhinā devaṃ surā brahmādayaḥ priye ! |
hiraṇmayaṃ tataḥ paṭṭaṃ cakrurdevasya mūrdhani ||

paṭṭabandhaṃ tu ye kuryurevaṃ devasya mūrdhani | 
na teṣāṃ punarāvṛttiḥ saṃsāre jāyate priye ! ||

śrīdevyuvāca - 

kiṃ puṇyaṃ ke guṇāstasya kimarthaṃ kīrtitaṃ vibho ! |
paṭṭabandhasya māhātmyaṃ śrotumicchāmi śaṅkara ! ||

śrīśaṅkara uvāca - 

sāgarasya taṭe ramye prabhāso nāma sundari ! |
sarvaṃ tīrthaṃ prabhāsādi nātra kāryā vicāraṇā ||

tatra someśvaro devo somena sthāpitaḥ purā |
tasya dvādaśamātrābhiḥ samānaṃ paṭṭabandhanam ||

sakalaiścaiva yogaiśca prabhāse yatprakīrtitam |
tatphalaṃ samavāpnoti paṭṭabandhaṃ karoti yaḥ ||

kārtike kṛttikāyoge kārtikyāṃ ṣaṇmukhasya ca |
darśanātsaptayātrāyāṃ tatphalaṃ nātra saṃśayaḥ ||

ayane'maracaṇḍīśe yātrāyāṃ pañcabhiḥ phalam |
tatphalaṃ kṛtamātreṇa (naraḥ prāpnoti) pārvati ! ||

vaiśākhyāṃ mahākāle adya ekādaśīphalam |
darśanenāpi cāśvinyāmityāhuśca purāvidaḥ ||

yatphalaṃ ca kurukṣetre rāhuṇā grasite ravau |
ājanmagāmināṃ nṝṇāṃ tatphalaṃ paṭṭabandhane ||

somavāre tvamāvāsyāṃ bhasmagātrasya darśanāt |
yātrāṇāṃ daśake yacca tatphalaṃ paṭṭabandhanāt ||

vārāṇasyāṃ mahādevi ! kālakṣepaṃ karoti yaḥ |
tatphalaṃ samavāpnoti sakṛdvai paṭṭabandhanāt ||

gaṅgāyāṃ sādhayet puṇyaṃn caturyugena yannaraḥ |
tatpuṇyaṃ jāyate tasya paṭṭabandhaṃ karoti yaḥ ||

p. 56)

gaṅgāyāṃ sariti puṃsāmājanma sevanātphalam |
nā**(?)nnaimiṣādīnāṃ tatphalaṃ paṭṭabandhanāt ||

sarasvatyāṃ kurukṣetre kanakhale * * * * (?) |
yatpuṇyaṃ hemadānena tatphalaṃ paṭṭabandhanāt ||

kedāre saptayātrāyāṃ yatphalaṃ labhate naraḥ |
tatphalaṃ samavāpnoti sakṛdvai paṭṭabandhanāt ||

kāpilaṃ gosahasraṃ tu yo dadāti dine dine |
tatphalaṃ samavāpnoti paṭṭabandhaṃ karoti yaḥ ||

kṛṣṇājinasahasrāṇi tiladhenuśatāni ca |
datvā tatphalamāpnoti paṭṭabandhe kṛte sati ||

mataṅgajasahasraṃ tu aśvānāmayutaṃ tathā |
tatphalaṃ samavāpnoti paṭṭabandhe kṛte sati ||

sasāgarāṃ dharāṃ datvā pumānyatphalamaśnute |
tatphalaṃ samavāpnoti paṭṭabandhe kṛte sati ||

kanyākoṭipradānena yatphalaṃ kavibhiḥ kṛtam |
vidhinā paṭṭabandhe tu tatphalaṃ labhate naraḥ ||

vāpīkūpasahasrāṇi devatāyatanāni ca |
kṛtvā yatphalamāpnoti tatphalaṃ paṭṭabandhanāt ||

mātāpitrorgurūṇāṃ ca bhakti * * * (?) to nṛṇām |
tatphalaṃ samavāpnoti sakṛdvai paṭṭabandhanāt ||

gavāmarthe dvijārthe ca svāmyarthe yastyajettanum |
tatphalaṃ samavāpnoti paṭṭabandhena pārvati ! ||

āpannārtiharāṇāṃ ca tīrthasevājitātmanām |
satyavratānāṃ yatpuṇyaṃ tatphalaṃ paṭṭabandhanāt ||

vanāśrameṣu vasatāṃ tāpasānāṃ ca yatphalam |
tatphalaṃ jāyate tasya paṭṭabandhaṃ karoti yaḥ ||

yastu varṣaśataṃ pūrṇamahorātramupāsate |
ekena paṭṭabandhena tatphalaṃ labhate naraḥ ||

gāṅgeyaṃ nārmadaṃ cāndraṃ puṇyaṃ sārasvataṃ jalam |
karoti pārvati ! nityaṃ tatphalaṃ paṭṭabandhanāt ||

the text of which is here printed, is very corrupt and full of mistakes - ñ.ṣ.K.]

iti śrīśivapurāṇe pārvatīmaheśvarasaṃvāde tīrtha***(?)ṇikāyāṃ 
śūlapāṇijanmapaṭṭabandhādimāhātmyaṃ samāptam |

samāptaṃ kāravaṇamāhātmyam |





###########   END OF FILE  #######