####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00264
Uniform title: haṃsasāra
Manuscript : BHU C4244

Description: 



Notes: 
Data entered by the staff of Muktabodha under the supervision of Mark S.G. Dyczkowski.

Revision 0: April 7, 2012

Internet publisher : Muktabodha Indological Research Institute
Publication year : 
Publication city : 
Publication country : India
####################################################



oṃ namaḥ śivāya sa śivāya śivadāya namo namaḥ |

oṃ namaḥ paramātmane |

oṃ namo vighnahartre |

atha haṃsasāraṃ likhyate ||


śrutaṃ deva mayā pūrvamamalaṃ haṃsayāmalam |
punarhi śrotumicchāmi sārātsārataraṃ param || 1 ||

yatpurā kathitaṃ deva sūcitaṃ na prakāśitam |
vadame vastu sadbhāvaṃ prasādaṃ kuru śūla bhṛt || 2 ||

sādhu sādhu mahāprājñe sarvasatvārthabodhini |
tadarthaṃ saṃpravakṣyāmi tavasnehānmaheśvari || 3 ||

durlabhaṃ sarvadevānāṃ yoginīnāṃ tathaiva ca |
yo sau śānto hyajo devaḥ śaktyādhāro hyavigrahaḥ || 4 ||

jīvabhūtaḥ sadā tiṣṭedvāmadakṣiṇamadhyagaḥ |
p. 68b) ca caiṣa paramohaṃsaḥ sa vai devaḥ sanātanaḥ || 5 ||

sa brahmā sa ca vai rudra īśvaro viṣṇureva ca |
sadāśivaḥ paraṃdhāma tārakaṃ brahma eva ca || 6 ||

vārāṇasyāṃ tu deveśi svakaṃ mārgaṃ prakāśitam |
ajñānaṃ caiva tatkṣetraṃ jñānināmavrataḥ sthitam || 7 ||

lakṣaṇaṃ tasya vakṣyāmi yena jñāsyanti sādhakāḥ |
gurvavasthā gamaḥ so hi dṛśyate na tu lakṣyate || 8 ||

sa paraḥ sarvato hyātmā cañcalatve vyavasthitaḥ |
sa bāhyābhyantarastho hi spandate sarvadehinām || 9 ||

nityoditaśca niṣṭaśca anādirnidhaneśvaraḥ |
avyakto vyaktarūpaśca agrāhyaśca calācalaḥ || 10 ||

bhāvagrāhyassacinmātraccaitanyāsusthitaḥ sthitaḥ |
tejorūpī hi bhagavānhṛdvyomnevasthitaḥ paraḥ || 11 ||

p. 69a) bāhyavyomni sthito dhūmro dhūmrāgre prakṛtirvapuḥ |
śuddha sphaṭikasaṅkāśaṃ bhinnaṃ vyomni tu vyomavat || 12 ||

mukterlatā tadākāraṃ cittrāvalitatādṛśam |
bhramareṇa pratīkāśaṃ hakāramaśirāhatam || 13 ||

kulanāthaṃ paraṃ śāntaṃ kulasantati dṛśyate |
siddhoti nūnaṃ tat tasmiñciva puṣpāṇi paśyati || 14 ||

ekoneka vibhedena koṭibhedena dṛśyate |
nānākāra vibhāgena dṛśyate parameśvaraḥ || 15 ||

havito piṅgalo dīpto niśi veśmani dṛśyate |
sadvyomajyotirūposau nadate sa muhurmuhuḥ || 16 ||

sa bāhyābhyantaraṃ lakṣyaṃ yo dadāti dine dine |
aghaṃśamaya te devi na kvacidyoni sambhavaḥ || 17 ||

p. 69b) janmāntara sahasrāṇi śivabhakti parāyaṇaḥ |
tasya cāpaścimaṃjanma haṃso dṛśyo varānane || 18 ||

bhidyate hṛdayagranthi cchidyante sarvasaṃśayaḥ |
kṣīyante cāsya karmāṇi tasmin dṛṣṭe parāpare || 19 ||

haṃsajñānapradātā vai durlabho * vidaiśikaḥ |
pṛthivyāṃ nāsti tad dravyaṃ yad datvā cāriṇī * ? vet || 20 ||

athātaḥ saṃpravakṣyāmi kālajñānaṃ ca?ṇāmbike |
kālacihnaparijñānaṃ nādhogatiṣu yoginām || 21 ||

bhu?jaṅga kuṭilākāramagrataḥ sarvatantuṣu |
taṃ dṛṣṭvāpi ciraṃ devi punarjanma na vidyate || 22 ||

liṅgākāre ṛ?venmokṣaṃ ghanena bandhanaṃ bhavet |
rakto yadā tanurvidyātpīte cārthasya sambhavaḥ || 23 ||

p. 70a) vyālairviśeṣagamanaṃ bindunādaprasādanam |
subhikṣaṃ ca pracāre ca durbhikṣaṃ cañcu bandhane || 24 ||

madhyacchede tribhirmāsairmriyate nātrasaṃśayaḥ |
tridivairdivase yukte mriyate ca tato dhruvam || 25 ||

pūrvāhṇe pūrvasaṃsthaṃ tu yathā dṛṣṭvā varānane |
añjaliṃ vāripūrṇāyāṃ bhāvayeta vicakṣaṇaḥ || 26 ||

sāmastho dakṣiṇaṃ gatvā ṣaṇmāsānmṛtyumādiśet |
somasūyavibhāgena ahorātraṃ nirīkṣayet || 27 ||

dvau māsau somasūryābhyāṃ māsaṃ somasya dakṣiṇe |
pūrve dakṣiṇamāvasyāṃ praviśedravimaṇḍale || 28 ||

somāvasyāṃ daśāhetu pañcāhaṃ sūryagottare |
ekaḥ kālasya paryāyaṃ kathitaṃ tava sundari || 29 ||

p. 70b) kālasya vañcanaṃ deva kathaṃ jānāti tattvataḥ |
etaddhi saṃśayaṃ brūhi atrakautūhalaṃ mama || 30 ||

śṛṇu devi paraṃ guhyaṃ rahasyaṃ bhuvi durlabham |
yanna kasya cidākhyātaṃ tat te vakṣyāmi suvrate || 31 ||

candramaṇḍalamadhye tu ṭhakāraṃ cintayet priye |
ṭha madhyame gatohaṃsaścintanīyaḥ prayatnataḥ || 32 ||

brahmarandhrātsravantī ca paramāmṛtarūpiṇī |
avyayā sarvagā sūkṣmā parā cāsya parākalā || 33 ||

haṃsodara gatā sā tu sravantī cintayet priye |
kālo na kalayeccātra na jarāvyādhireva ca || 34 ||

p. 71a) kālasya vañcanaṃ devi goptavyaṃ vīravandite |
guptosānnidhyamicchanti mātaraḥ sādhakeśvari || 35 ||

tasmāt sarvaprayatnena na deyaṃ yasya kasyacit |
dātavyaṃ bhakti yuktānāṃ gurubhaktiratātmanām || 36 ||

guruśśiva gatojñeyaḥ śivogurumukhodgataḥ |
yo guruḥ sa śivaḥ sākṣāt pūjanīyaḥ prayatnataḥ || 37 ||

śucirdakṣo vinītaśca śaktiścāpyasya tat plutā |
tasya jñānaṃ ca mokṣaṃ ca siddhyate paramārthataḥ || 38 ||

tasmin sthāne yadā līnaṃ cittaṃ vigatavṛttikam |
valīpalitanirmuktaḥ ṣaṇmāsena bhaviṣyati || 39 ||

na kālaṃ kalayeccātra na ca sāvyādhireva ca |
haṃsasāraṃ paraṃ brahma paraṃ vyoma paraḥ śivaḥ || 40 ||

tvacchreyorthamidaṃ khyātaṃ haṃsasārasamuccayam |
p. 71b) anāstikānāṃ nādeyaṃ śaṭhānāṃ kruracetasām ||

dāmbhikānāmabhaktānāṃ tantrācāraratātmanām |
yataste paśavaḥ kīṭā mahāmārgabahiṣkṛtāḥ || 32 ||

śaṅkāvikalpanirdagdhā mahāmohāndhyapīḍitāḥ |
anāśvastā asantuṣṭāḥ paśuśāstreṣu bhāvitāḥ || 33 ||

na te labhante paramaṃ mahorminikarākulam |
oghasarvasvamatulaṃ guruvaktre samāgatam || 34 ||

tasmāt sarvaprayatnena dātavyaṃ vīravandite |
gurubhaktāya śāntāya nityābhyāsaratāya ca || 35 ||

vīrācāraniṣaṇṇāya dravyādvaitaparāya ca |
samayā sevine nityaṃ kulakālodite śive || 36 ||

p. 72a) adāmbhikāya guptāya guptācāraratāya ca |
yataḥ svarasmirūpasthāḥ pīṭhebhyaḥ pīṭhavigrahaḥ || 37 ||

nityaṃ bhrānti vihīnānāṃ parokṣākāritāṃśritāḥ |
rakṣantitāḥ kṛpāviṣṭāḥ samayācārapālakāḥ || 38 ||

sarvabhāvaiḥ prayatnena prāṇamadhye ca mātaraḥ |
vikāsayanti paramaṃ tejo yadvāntasambhṛtam || 39 ||

te nodito nodayanti melāpādi samṛddhayaḥ |
pratyakṣarūpo vīrāṇāṃ sa bāhyābhyantaraṃ sthitāḥ || 40 ||

saṃvidyā hṛdayādīnāṃ yogināṃ kaulaśāsane |
rahasyaṃ jñeyagamanaṃ bhūmiratramagāhyagā || 41 ||

jīvanmuktirahasyaṃ ca vīreśānāṃ sukhāgamam |
kathitaṃ sārasarvasvamumayāsaharaṃ param || 42 ||

p. 72b) upeya gahvaraṃ prāyaḥ sataśotha sahasraśaḥ |
tasmāt sarvaprayatnena na deyaṃ yasya kasyacit || 43 ||

ekaśiṣyamidaṃ jñānamaprakhyāpyamahātmabhiḥ |
sarvaśāstrabahirbhūtaṃ hṛdayaṃ yoginī kule || 44 ||


###########   END OF FILE  #######