####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00155
Uniform title: janmamaṛanavicāra
Author : vāmadeva
Editor : śāstrī m r

Description: 
Photographed from volume 19 of the Kashmir Series of Texts and Studies.


Notes: 


Publisher : Research Department Jammu and Kashmir State
Publication year : 1918
Publication city : Srinagar
Publication country : India
####################################################
 


oṃ 
tatsatsaṃvidvapuṣe amṛteśvarāya namaḥ | 

atheyaṃ 

janmamaraṇavicāragranthasya 

bhūmikā 

(granthāṅkaḥ 19) 

ayaṃ granthaḥ śaivāgamagrantheṣu 
mukhyaviṣayasvātmādvaitajñānapaddhatisārasaṃkṣepatayā 
śrībhaṭṭavāmadevākhyamahāmāheśvarācāryavareṇa viracitaḥ | 
śībhaṭṭavāmadevaśca 
śrīyogīśvarāparaparyāyayogarājācāryasya śiṣyo'bhūt | 

śrīyogarājaḥ 
śrīmadabhinavaguptācāryaśiṣya-śrīkṣemarājācāryasya śiṣyaḥ 
śrīmadabhinavaguptācāryaviracitaśaivāgamaviśeṣaparamārthasārag 
ranthaṭīkākṛta tadante svaguruṇāmabhikhyānādikaṃ nirdiṣṭavān 
| 

tasmātsākṣāttayāsya granthasya viracanakālānāmnāye'pi 
śrīmadabhinavaguptācāryāṇāṃ 
kaliyugadvācatvāriṃśaśatyāntaḥ kālamabhivyāpya loke 
sthitisattayā tacchiṣya-kṣemarājasyottarasamakālikatve'pi 
tacchiṣya-yogarāja-tacchiṣyaitadgranthakartṝṇāṃ 
viṃśativiṃśatiprāyābdottarakālagaṇanayā tathā 
anantadevarājasya kāśmīrasaurājyakāle 
vāmadevācāryasthitijanaśrutyā ca anumito 
dvācatvāriṃśaśatyāntyabhāgavartī etadgranthakṛtsaṃbhavakālaḥ 
saṃbhāvyate | 

atastadanusāryeva (kaliyugadvācatvāriṃśaśatyāntyabhāgakālaḥ) 
etadgranthaviracanakālaḥ | 

p. 2) 

asya granthasya mūlādarśapustakamekamātramevopalakṣyate, 
atiprayatnavidhānenāpi kutaścanāpyanyannāvāpi | 

tadetadekamapi tantrasāragranthabhūmikāyāṃ varṇitatadvṛttasya 
āgarāpradeśādavāptapratnataraśāradākṣarāṅkitakāśmīrikapustaka-
amudāyasya madhyata uktatantrasāragranthasamaikabandheṣu 
pustakeṣvekatamaṃ paṇḍitakṛṣṇasvāmināmnā 
kāśmīrikavidvadviśeṣeṇa 4603 samīpavartilaukikasaṃvatsare 
likhitaṃ samasti iti || 

asti cākṛtyā laghāvapyasmingranthe 
śrīsvacchandatantra-tantrālokādivistīrṇaśaivāgamagrantheṣu 
yathāyathaṃ vitatya nirṇītānāṃ 
mukhyaviṣayasvātmādvaitajñānasaṃsādhakapaddhatīnāṃ 
yathopayogaṃ bhinnatayā sthāne sthāne pratipāditānāṃ 
samagraviṣayāṇāṃ pūrṇopajñānasyaikatrasaṃgṛhya 
sugamasaṃkṣiptamārgapradarśanam | 

tadyathā - 

(1) prathamataḥ saṃvidātmanaḥ paramaśivasya 
svātantryodbhāvitanikhilajagadātmatve'pi 
sarvottīrṇatādyotiniratiśayasvātantryādiśaktimattayā 
prakāśasvarūpatāpratipādanam | 

(2) cidānandecchājñānakriyākhyānāṃ 
paramaśivasaṃbandhipañcaśaktīnāṃ svarūpānuśāsanam | 

(3) viśvaṃ sisṛkṣoḥ prakāśātmaparamaśivasya tasya svātmanaḥ 
saṃkucitarūpāvabibhāsayiṣayā aṇutvarūpāvasthānanirṇayaḥ | 

(4) uktāṇutāvasthāpattau ca deśakālādyupādhivirahitatayā 
anuttarānandaparispandātmakasya bhagavato na kāpi kṣatiḥ pratyuta 
paramamahimnaḥ puṣṭiḥ - ityetatpratipādanam | 

p. 3) 

(5) tasyaiva dharāditattvānubandhinyāḥ 
vijñānākalapralayākalasakalātmakatāyāḥ samāpattinirdeśaḥ | 

(6) aṇoḥ svasvarūpācchādakasya 
māyākalāvidyārāgakālaniyatirūpakañcukaṣaṭkasya tatkarmaṇaśca 
pratipādanam | 

(7) 
bhuvanatattvakalākhyaprameyatrayapadamantravarṇākhyapramāṇatrayasaṃkalita-
ṣaḍadhvayogino nivṛttipratiṣṭhāvidyāśāntā 
śāntyatītākhyasya pārameśaśakti (kalā) pañcakasya 
tadadhiṣṭhānādeśca nirdeśanam | 

(8) anantaraṃ ca āṇavāvasthāmāśritasya bhagavato 
vicitrajātyāyurbhogaiḥ 
jarāyujāṇḍajodbhedajasvedajādijantujātaṃ prādurbhāvayataḥ 
upabhuktānnapānapākavaśādrasarūpāvasthitaraktamāṃsamedo'sthi-
majjātmanā śukradhātau viśrāntipradarśanottaraṃ 
strīpuṃsādirūpatayodbhavanmanuṣyapaśupakṣitarudaṃśādiśarīra- 
saṃbandhyanurūpanāḍyādyaṅgapratyaṅgasaṃdhitatsaṃkhyānottarottara-
tadupacayagarbhasthitijanmatadanuvartibālyādyavasthānatadanubhūyamāna-
harṣaśokādinirṇayamanu 
punarjanmasadasatkarmodarkasadasallokāvāptisamanuśāsanapūrvakaṃ 
svātmasvarūpāvāptyupāyajñānamārgaprakāśanaṃ saṃgṛhya 
pratipāditaṃ samasti | 

tadetasya pustakasya saṃgrahaṇottaraṃ samādhānena 
vimarśanābhyāsāt tattvajñānaphalarasāsvādamadhigacchantu 
sahṛdayāḥ sadvidvāṃsaḥ saphalayantu 
caitatsaṃskaraṇottaraprakāśanaprayatnaḥ māmakīnamityāśāse | 

iti nivedakaḥ ma0 ma0 paṃ0 mukundarāma śāstrī 

oṃ namaḥ śivāyāmṛtavapuṣe | 

atha 

janmamaraṇavicāragranthaḥ | 

śrīmadbhaṭṭavāmadevācāryaviracitaḥ | 

sāndrodrekakṣubhitamabhitaḥ svāntamantarniyamya prāyo dhatte 
navanavarasollekhamānandakandam | bhūyo bhūyaḥ 
pralayavibhavoddāmaduḥkhāntarāyo yo'sāvantarjayati hṛdaye ko'pi 
saṃvidvikāsaḥ || 1 || 

iha khalu nikhilajagadātmā sarvottīrṇaśca sarvamayaśca 
vikalpāsaṃkucitasaṃvitprakāśarūpaḥ 
anavacchinnacidānandaviśrāntaḥ 
prasaradaviralavicitrapañcavāhavāhavāhinīmahodadhiḥ 
niratiśayasvātantryasīmani pragalbhamānaḥ sarvaśaktikhacita eka 
eva asti saṃvidātmā maheśvaraḥ | tasya prakāśarūpatā 
cicchaktiḥ svātantryam ānandaśaktiḥ taccamatkāraḥ icchāśaktiḥ 
āmarśātmakatā jñānaśaktiḥ sarvākārayogitvaṃ kriyāśaktiḥ 
iti | 

p. 2) 

itthaṃ sarvaśaktiyoge'pi ābhirmukhyābhiḥ śaktibhirupacaryate sa 
ca bhagavān svātantryaśaktimahimnā svātmānaṃ saṃkucitamiva 
ābhāsayan aṇuḥ iti ucyate | yathoktam - 

vyāpako hi śivaḥ svecchākḷptasaṃkocamudraṇāt | 
vicitraphalakarmaughavaśāttattaccharīrabhāk || 

iti nijasvarūpagopanakelilolam evaṃ māheśaśaktiparispandaṃ 
pravaraguravaḥ pratipedire | tathā ca āhuḥ - 

atidurghaṭakāaritvātsvācchandyānnirmalādasau | 
svātmapracchādanakrīḍāpaṇḍitaḥ parameśvaraḥ || 

anāvṛte svarūpe'pi yadātmācchādanaṃ vibhoḥ | saivāvidyā yato 
bheda etāvānviśvavṛttikaḥ || 

iti | na ca etāvatā bhagavato 
deśakālākāropādhivirahitaniratiśayānandaparispandātmakasya 
kācidapi kṣatiḥ pratyuta paramamahimnaḥ paripuṣṭirityuktam | 

asthāsyadekarūpeṇa vapuṣā cenmaheśvaraḥ | maheśvaratvaṃ 
saṃvittvaṃ tadatyakṣyadghaṭādivat || 

p. 3) 

paricchinnaprakāśatvaṃ jaḍasya kila lakṣaṇam | 
jaḍādvilakṣaṇobodho yato na parimīyate || 

tena bodhamahāsindhorullāsinyaḥ svaśaktayaḥ | āśrayantyūrmaya 
iva svātmasaṃghaṭṭacitratām || 

ityādi | tadevam asau bhagavān svamāyāśaktyākhyena 
avyabhicaritasvātantryaśaktimahimnā svātmanaiva ātmānaṃ 
saṃkucitamiva avabhāsayan vijñānākalaḥ pralayākalaḥ sakalaśca 
saṃpadyate | tatra āṇavena ekenaiva malena saṃyukto vijñānākala 
ucyate dvābhyām āṇavamāyīyābhyām apavedyaḥ pralayākalaḥ 
tribhirāṇavamāyīyakārmaiḥ saṃvedyaḥ taireva 
kalādidharaṇyantatattvamayaḥ sakalaḥ tadarthameva ayamarthasargaḥ | 
tatra sṛṣṭyunmukho bhagavān śuddhādhvani vartamānaḥ 
svaśaktibhiḥ māyāṃ vikṣobhya kalātattvaṃ 
kiṃcitkartṛtvalakṣaṇaṃ pudgalasya sṛjati tato'pi 
kiṃcidavabodhākhyaṃ vidyātattvaṃ kiṃcidabhilāṣarūpaṃ ca 
rāgatattvaṃ tadetatsarāgaṃ kartṛtattvaṃ 
bhūtabhaviṣyadvartamānatayā tridhā avacchidyate tat kālatattvaṃ 
tulyatve'pi rāge yena kartṛtvasya 

p. 4) 

avacchedaḥ kriyate tat niyatitattvaṃ tadetat kañcukaṣaṭkam 
antarmalāvṛtasya pudgalasya bahirācchādakam uktaṃ ca 
cillācakreśvaramate 

māyā kalā śuddhavidyā rāgakalau niyantraṇā | 
ṣaḍetānyāvṛtivaśātkañcukāni mitātmanaḥ || 

evaṃ ca pudgalasyāntarmalaḥ kañcukavatsthitaḥ | tuṣavatkañcukāni 
syustasmājjñānakriyojjhitaḥ || 

iti | sā ca kalā puruṣasya parimitaṃ kartṛtvaṃ prakāśya 
sukhaduḥkhamoharūpaṃ bhogyam avyaktatvaṃ sṛjati tato'pi 
aṣṭaguṇaṃ buddhitattvam utpannaṃ tato'pi 
sāttvikarājasatāmasabhedabhinnaṃ triskandham ahaṃkāratattvam tatra 
pūrvasmāt ahaṃkārāt mano jātaṃ aparasmāt indriyāṇi tṛtīyāt 
tanmātrāṇi ebhyo bhūtāni - ityevamayam ekasyaiva ādidevasya 
svātantryamahimnā saṃsāre saṃsarataḥ parimitapramātṛtām 
avalambamānasya tattvaprasaraḥ uktaṃ ca - 

bhūtāni tanmātragaṇendriyāṇi mūlaṃ pumānkañcukayuksuśuddham | 
vidyādiśaktyantamiyānsvasaṃvit- sindhostaraṅgaprasaraprapañcaḥ || 

p. 5) 

tathā - 

sāla utta puripuṇṇa u sa-alla-utta uttiṇṇa | pari āṇaha attāṇa 
u pari masiveṇa samāṇa u || 

iti | eteṣāṃ ca uktarūpāṇāṃ tattvānāṃ pramātṛbhede 
vaicitryāt prameyavaicitryaṃ bhavati iti śrīpūrvaśāstre kathitam 
tathāhi - 

śaktimacchaktibhedena dharātattvaṃ vibhidyate | svarūpasahitaṃ 
tacca vijñeyaṃ daśapañcadhā || 

anenaiva vidhānena puṃstattvāttu kalāntikam | trayodaśavidhaṃ 
jñeyaṃ rudravatpralayākalaḥ || 

tadvanmāyāpi vijñeyā navadhā jñānakevalaḥ | mantrāḥ 
saptavidhāstadvatpañcadhā mantranāyakāḥ || 

tridhā mantreśvareśānāḥ śivaḥ sākṣānna bhidyate | yaḥ punaḥ 
sarvatattvāni vettyetāni yathārthataḥ || 

sa gururmatsamaḥ prokto mantravīryaprakāśakaḥ | dṛṣṭāḥ 
saṃbhāṣitāstena spṛṣṭāśca prītacetasā || 

narāḥ pāpaiḥ pramucyante saptajanmakṛtairapi | 

iti | tadevam anekāvasāyo'yaṃ tattvakramaḥ | eteṣāṃ ca 
tattvānāṃ vargaśo yadanugāmi rūpam - 

p. 6) 

ekarūpam - ekarūpakalanāsahiṣṇutvāt sā kalā kathyate | tathā hi 

nivartante yatastattvavargāḥ sā nivṛttirnāma kalā | 

sā ca pṛthivyāmeva vyavasthitā | 

kāraṇatve pūraṇāpyāyakāritvāt pratiṣṭhā nāma kalā ucyate | 

sā ca jalādimūlāntaṃ vyāpya vyavasthitā | 

vedyavilaye saṃvidādhikyāt vidyā nāma kalā | 

sā ca pumādimāyāntam adhvānam adhyāste | 

kañcukataraṅgopaśamāt śāntā nāma kalā ucyate | 

sā ca śuddhavidyādiśaktyante sthitā iti | etadeva 
aṇḍacatuṣṭayaṃ pārthivaprākṛtamāyīyaśāktalakṣaṇam | 

sarvātītatvāt śivatattve śāntyatītā | 

iti | paraṃ tu tattvaṃ svatantratvāt kalātītam āsāmeva kalānāṃ 
tattvavadantarbhūtāni bhuvanānyapi boddhavyāni evaṃ 
sthūlasūkṣmaparatvena 

p. 7) 

bhuvanatattvakalārūpaṃ trividharūpaṃ prameyam uktam pramāṇamapi 
tathaiva padamantravarṇatayā trividhameva - iti ekasyaiva 
pūrṇapramātuḥ svātantryāt saṃsarataḥ ṣaḍvidhe adhvani 
viśrāntiruktā | bhavanti cātra 
dīkṣāparighaṭanasaṃgrahaślokāḥ - 

padamantravarṇamekaṃ puraṣoḍaśakaṃ dhareti ca nivṛttiḥ | 
tattvārṇamagninayanaṃ rasaśarapuramastramantrapadamanyā || 

munitattvārṇaṃ dvikapada- mantraṃ vasvakṣibhuvanamaparakalā | 
agnyarṇatattvamekaka- padamantraṃ saikabhuvanamiti turyā || 

ṣoḍaśa varṇāḥ padamantra- tattvamekaṃ ca śāntyatīteyam || 

iti | tadevam āṇavīṃ vṛttim ālambya bhagavān vicitraiḥ 
jātyāyurbhogaiḥ jarāyuja aṇḍaja udbhedaja svedajādijātaṃ 
prādurbhāvayati | tatra upabhuktasya annapānasya pākavaśāt 
rasarūpatayā sthitasya raktamāṃsamedo'sthimajjātmanā 
śukradhātau viśrāntirbhavati taṃtra imāḥ prajāḥ prajāyante | 

p. 8) 

tathā coktaṃ sauśrute - 

iha khalu pāñcabhautikasya caturvidhasya āhārasya ṣaḍrasopetasya 
dvividharasavīryasya aṣṭavidharasavīryasya anekaprakāropabhuktasya 
pariṇatasya yastejorūpaḥ sāraḥ sūkṣmaḥ sa rasa ityucyate tasya 
hṛdayaṃ sthānaṃ sa ca hṛdayāt caturviṃśatidhamanīranupraviśya 
ūrdhvagā daśa daśa ca adhogāminīḥ catasraḥ tiryaggāḥ sakalaṃ 
śarīram aharahastarpayati jīvayati dhārayati vardhayati 
adṛṣṭanimittena karmaṇā sa khalu āpyo raso yakṛtplīhādiṃ 
prāpya rāgamupaiti bhavanti vā atra ślokāḥ - 

rañjitāstejasā tvāpaḥ śarīrasthena dehinām | avyāpannāḥ 
prasannena raktamityeva tadviduḥ || 

rasādeva striyo raktaṃ rajaḥsaṃjñaṃ pravartate | 
tadvaśāddvādaśādūrdhvaṃ yāti pañcāśatiḥ kṣitim || 

ārtavaṃ śoṇitam āgneyam - agnīṣomīyatvāt garbhasya | 

rasādraktaṃ tato māṃsaṃ māṃsānmedaśca jāyate | medaso'sthi 
tato majjā majjātaḥ śukrasaṃbhavaḥ || 

evaṃ māṃsena śukratvaṃ raso yāti yathākramam | strīṇāṃ 
tathaiva māsena bhavedārtavasaṃbhavaḥ || 

iti | tadevaṃ bhūte mātṛpitṛsaṃbandhasaṃbhūte agnīṣomātmake 
raktaretasīi kusumasamayādanantaraṃ - 

p. 9) 

jananījaṭhare retaḥ kalilībhavati tato budbudam tataḥ peśī tato 
ghanaḥ yāvadaṅgaparigrahaḥ aṅgavyaktiḥ saṃvidullāsaḥ 
sarvāṅgasaṃpattirojaḥ saṃcāraḥ sukhaduḥkhasaṃvittiriti yāvat 
prajāyate | uktaṃ śrīcillācakreśvaramate - 

somasūryarasollāsaparasparanigharṣaṇāt | jātavedasi saṃjāte 
madhyadhāmavikāsini || 

virāruṇaparīṇāmavaśādaṅkurasaṃbhavaḥ | ekarātroṣitaṃ retaḥ 
siktaṃ kalilatāṃ vrajet || 

budbudaṃ saptarātreṇa peśī māsena jāyate | dvitīye māsi ca 
ghanastṛtīye'gniparigrahaḥ || 

caturthe vyaṅgatāṅgānāṃ cetanā pañcame bhavet | ṣaṣṭhe 
sarvāṅgasaṃbhedaḥ saptame calanodgamaḥ || 

tejo'ṣṭame saṃcarati navame vedanaṃ bhavet | saṃpūrṇadeho 
daśame māsi jantuḥ prajāyate || 

jāto'sau vāyunā spṛṣṭo yoniyantraprapīḍitaḥ | na 
smaratyugrasaṃtāpamanekabhavasaṃbhavam || 

krameṇa vṛddhimāyānti tasyaite dehahetavaḥ | rasaḥ sthitiṃ 
prakurute raktaṃ saṃjīvayatyalam || 

māṃsaṃ vṛṃhayati prāyo medaḥ snehayati sphuṭam | dhārayanti 
tathāsthīni majjāntaḥ sārasaṃśrayā || 

harṣotkarṣakaraṃ śukraṃ mūtraṃ kledavivekakṛt | 
vāyvagnisaṃrodhakaraṃ purīṣaṃ parikīrtitam || 

p. 10) 

svedakledopakaraṇaṃ garbhaheturathārtavam | evaṃ śarīramāsādya 
ṣāṭkośaṃ tatparigrahāt || 

anapekṣya nijaṃ bhāvaṃ pumānbhāvānapekṣate || 

iti | ayameva ca artho niruktikṛtāpi - 

uktapārthivān aṣṭau guṇān vidyāt trīn mātṛtaḥ trīn pitṛtaḥ 

ityādyupakramya uktaḥ | atraiva idaṃ puṃstrīnapuṃsakalakṣaṇaṃ 
prakṛtitrayakāraṇam - 

somādhikyena puṃjanma sūryādhikyena yoṣitaḥ | sāmyātklībastu 
vātena bhedātsyādbahvapatyatā || 

iti | avayavabhedo'pi - 

navame daśame māsi prabalaiḥ sūtimarutaiḥ | niḥsāryate bāṇa iva 
yantracchidreṇa sajvaraḥ || 

tasya ṣoḍhā śarīaṃ tatṣaṭ tvaco dhārayanti ca | asthnāṃ 
tathā ṣaṣṭyadhikaṃ vinibaddhaṃ śatatrayam || 

sthūlaiḥ saha catuḥṣaṣṭirdaśanā viṃśatirnakhāḥ | 
pāṇipādaśalākāśca tāsāṃ sthāne catuṣṭayam || 

ṣaṣṭyaṅgulīnāṃ dve pārṣṇī gulpheṣu ca catuṣṭayam | 
catvāryaratnikāsthīni jaṃghayostāvadeva tu | dve dve 
jānukapoloruphalakāṃsasamudbhave | akṣisthalūṣake śroṇīphalake 
ca vinirdiśet || 

bhagāsthyekaṃ tathā pṛṣṭhe catvāriṃśacca pañca ca | grīvā 
pañcadaśāsthīni jatrvekaṃ ca tathā hanuḥ || 

p. 11) 

tanmūle dve lalāṭākṣigaṇḍanāsāghanāsthikā | 
parśukāstalakaiḥ sārdhamarbude ca dvisaptatiḥ || 

dvau śaṅkhakau kapālāni catvāryeva śirastathā | uraḥ 
pañcadaśāsthīni puruṣasyāsthisaṃgrahaḥ || 

iti | eteṣveva 
kapālabharaṇaturuṇḍaruṇḍarucakanalayaṣṭīlanalakabhedena 
abhidhānāni śāstrāntareṣu uktāni | sthānāntarāṇi āha - 

vasāvapāvahananaṃ nābhiklomayakṛtplihā | kṣudrāntravṛkśako 
vastiḥ purīṣāpāna eva ca || 

āmāśayo'tha hṛdayaṃ sthūlāntraṃ gudameva ca | uttarau ca gudau 
koṣṭhau vistāro'yamudāhṛtaḥ || 

kanīnike sākṣikūṭe śaṣkulī karṇaputrike | gaṇḍau śaṅkhau 
bhruvau kaṣṭaveṣṭāvoṣṭhau kukundare || 

vaṅkṣaṇau vṛṣaṇau vṛkkau śleṣmasaṃghātikau stanau | 
upajihvāsphijau jihvājaṃghe corū ca piṇḍike || 

tālūdaravastiśīrṣe cibuke galaśuṇḍike | akṣipakṣmacatuṣkaṃ 
ca paddhastahṛdayāni tu || 

avaṭuścaivamādīni sthānānyatra śarīrake | navacchidrāṇi 
tānyeva prāṇasyāyatanāni ca || 

dhamanīnāṃ śate dve tu pañcapeśīśatāni ca | 

iti | 

p. 12) 

strīṇāṃ ca stanayorgartādaṣṭātriṃśadadhikāḥ sapeśyo 
dhamanyo bhavanti 

iti sauśrutaḥ | 

ekānnatriṃśallakṣāṇi nava snāyuśatāni ca | ṣaṭpañcaśāni tu 
jñeyā sirā dhamanisantatiḥ || 

saptottaraṃ marmaśataṃ dve tu saṃdhiśate tathā | lomnāṃ 
koṭyastu pañcāśaccatasraḥ koṭya eva ca || 

rasasya nava vijñeyā jalasyāñjalayo daśa | sapta vai tu purīṣasya 
raktasyāṣṭau prakīrtitāḥ || 

śleṣmā ṣaṭvañca pittaṃ ca catvāro mūtrameva ca | vasātrayaṃ 
ca dvau medo majjaikārdhaṃ ca mastake || 

śleṣmaujasastāvadeva retasastāvadeva ca | ityetadasthiraṃ varṣma 
yasya mokṣāya kṛtyasau || 

iti svasthasya saumyadhātorevam | anyathā tu - 

vailakṣaṇyāccharīrāṇāmasvasthatvāttathaiva ca | 
doṣadhātumalānāṃ ca parimāṇaṃ na vidyate || 

ityuktam | tadetat vibhāgena bībhatsadarśanaṃ 
vairāgyamunibhiragāyi tathā cāhuḥ - 

asthisthūṇaṃ snāyuyutaṃ māṃsaśoṇitalepanam | carmāvanaddhaṃ 
durgandhi pūrṇaṃ mūtrapurīṣayoḥ || 

jarāśokasamāviṣṭaṃ rogāyatanamāturam | rajasvalamanityaṃ ca 
bhūtāvāsamimaṃ tyajet || 

p. 13) 

muniḥ pārāśaryo'pi āha - 

sarvāśucinidhānasya kṛtaghnasya vināśinaḥ | śarīrakasyāpi 
kṛte mūḍhāḥ pāpāni kurvate || 

āhārairnīyamānāya kramādduḥkhena ramyatām | ko hi nāma 
śarīrāya dharmāpetaṃ samācaret || 

iti | evaṃ śarīramuktvā śarīrisvarūpamucyate - 

dvāsaptatisahasrāṇi hṛdayādabhiniḥsṛtāḥ | hitā nāmāhitā 
nāḍyastāsāṃ madhye śaśiprabham || 

maṇḍalaṃ tasya madhyastha ātmā dīpa ivācalaḥ | sa jñeyastaṃ 
viditveha punarājāyate na tu || 

idamatra tātparyam - taṃ tathābhūtamātmānaṃ viditvā naro na 
janmakleśamanubhavati kiṃbhūtaṃ yaddhṛdayoktaṃ 
dvāsaptatisaṃkhyāvacchinnaṃ nāḍīcakraṃ tadantar yat 
śaśimaṇḍalaṃ tadantaḥsthaṃ tāśca 
nāḍyo'śitapītarasasaṃcaraṇādhikāratvāt puṇyopacayena hitāḥ 
tadabhāvena ahitāḥ tāsāṃ saṃcāraka eka eva vyavahārabhedāt 
pañcabhedo vāyuḥ tāsāṃ ca dve pradhāne - dakṣiṇottarasaṃbaddhe 
agnīṣomātmake taddvāreṇa prāṇasya ūrdhvagamanam 

p. 14) 

ahaḥ adho'pānasya rātriḥ etena 
ardhamāsamāsartuvatsarādikālavibhāgo'pi vyākhyātaḥ 
samaprāṇacāro viṣuvat tayormadhye tṛtīyā daṇḍākārā 
brahmanāḍī sthitā tatra niruddhaprāṇo yogī dīpākāram 
ātmānaṃ paśyati iti ata evoktaṃ - 

samyagdarśanasaṃpannaḥ karmabhirna sa badhyate | darśanena 
vihīnastu saṃsāraṃ pratipadyate || 

iti | saṃsārapravṛttau ca tasya kalāto viṣayavibhedo munibhiruktaḥ 
tathāhi 

paradravyāṇyabhidhyāyaṃstathāniṣṭāni cintayan | 
vitathābhiniveśī ca jāyate'ntyāsu yoniṣu || 

puruṣo'nṛtavādī ca piśunaḥ puruṣastathā | anibaddhapralāpī ca 
mṛgapakṣiṣu jāyate || 

adattādānanirataḥ paradāropasevakaḥ | hiṃsakaścāvidhānena 
sthāvarepūpajāyate || 

ityādi ayaṃ tu uktayātanasya niyogaḥ advayarūpasya ātmanaḥ 
kutastyo'yaṃ bhedaḥ? iti cet - māyāmahāmohavikalpakalpita ityāha 
- 

ākāśamekaṃ hi yathā ghaṭādiṣu pṛthagbhavet | 
tathātmaiko'pyanekaśca jalādhāreṣvivāṃśumān || 

p. 15) 

iti | na ca apakvakaṣāyasya kadācidapi uktarūpam ātmajñānaṃ 
bhavati tathā ca - 

malino hi yathādarśo rūpālokasya na kṣamaḥ | tathā 
hyapakvakaraṇa ātmajñanasya na kṣamaḥ || 

ityādyuktam | ityalaṃ bhūyasā uktena | evam asau bhagavān 
svātantryaśaktimahimnā paśudaśām avalambamāno 
bhogopadānapravaṇaḥ saṃpūrṇadehaprāṇabalaḥ san uktena 
ṣaḍadhvajālakrameṇa prabuddhaḥ śarīraparigraham āsādayati 
krameṇa bhukteṣu karmasu ṣaḍirbhāvavikārairjarārogādibhiḥ 
kāyayantre vighaṭamāne dehastambho vepathurnāḍīcakrasaṃkocaḥ 
kvacidviparyayeṇa tadvikāso marmabhaṅgaḥ śoṣa ityādi 
pūrvasaṃsthāpanopamardakaṃ sarvam upapadyate yāvat vinaśyati 
vināśaśca kṣaṇiko'sya yadyapi tathāpi sthūlayā vṛttyā 
daśabhirdaśabhirabhivyaktaḥ proktaḥ | tathāhi - 

bālyaṃ vṛddhirbalaṃ prajñā tvakcakṣuḥ śrotramindriyam | 
āsanaṃ śayanaṃ puṃsāṃ daśabhirdaśabhirvrajet || 

ityuktaṃ | tataśca tasmin śarīrayantre vighaṭite sā saṃvit 
prāṇanātmatām avalambya āṃtivāhikena - 

p. 16) 

dehena dehāntaraṃ nīyate tataśca ātivāhikaṃ śarīrakaṃ 
bhūtabhaviṣyaddehāntarāle yugyasthānīyaṃ saṃbhavati 
yadārūḍho'sau pudgalaḥ śarīrāntarāsaṅgam anubhavati uktaṃ ca 
kośabhāṣye - 

mṛtyūpapattibhavayorantarā bhavatīha yaḥ | 
gamyadeśānuṣaktatvādupapanno'ntarābhavaḥ || 

vrīhisaṃtānasādharmyādavacchinnasamudbhavaḥ | 
pratibimbamasiddhitvādasāmyācca nidarśanāt || 

sa punarmaraṇātpūrvamupapattikṣaṇātparam | 
svajātiśuddhakarmākṣadṛśyakarmavivekavān || 

iti | śrutiśca - 

dve te cakre sūrye brahmāṇa ṛtuthā viduḥ | athaikaṃ cakraṃ 
yadguhā tadaddhātaya idviduḥ || 

iti ayamarthaḥ - he sūrye bhagavati ātmaśakte brahmāṇaḥ 
brahmavādinaḥ ṛtuthā kāle kāle te tava saṃbandhinī dve cakre 
viduḥ cakramiva cakraṃ parivartasādharmyāt śarīramucyate 
tayordvitvaṃ vartamānabhāvibhedāt atastayorantare kathitayā yuktyā 
yadekamātivāhikākhyaṃ tat guhā guptam anupalakṣyam ityarthaḥ ata 
eva tadaddhātayaḥ it viduḥ yogina eva jānanti iti tātparyam | 

p. 17) 

tathā ca jāgradavasthāyāṃ dṛḍhakaraṇasya pramāturindriyāṇi 
śrotrādīni śabdādayaśca viṣayā bhavanti tathā prameyasamaye 
pracalitam antaḥkaraṇamindriyaṃ yiyāsutā ca viṣayaḥ tāmeva 
yiyāsutām adhikṛtya pravaramuniḥ pārāśaryaḥ samādhitavān 

yaṃ yaṃ vāpi smaranbhāvaṃ tyajatyante kalevaram | taṃ tamevaiti 
kaunteya sadā tadbhāvabhāvitaḥ || 

iti | ayamatra saṃkṣepārthaḥ - saṃbhavabhogaḥ janmabhogaḥ 
sthitibhogaśca iti tisraḥ śarīrasya prāgavasthābhavanti hi 
tathāhi - jaṭhare cetanāyāṃ saṃjātāyāṃ garbhabhogaḥ 
prasavasamaye janmabhogaḥ prasūtasya bālyādivayaḥ parāvṛttyā 
vicitraḥ sthitibhogaḥ | mṛtibhogaḥ yiyāsutā ca dve caramāvasthe 
tatra mṛtibhogaḥ vicitrā śarīrapīḍā yiyāsutā 
ātivāhikaśarīrasaṃbaddhā tāmeva ca yiyāsutāmuddiśya - 

yaṃ yaṃ vāpi smaranbhāvam * * * * * * * * | 

ityādi pravṛttaṃ ata eva bhūtabhaviṣyadarthahitārthavādinaḥ - 

p. 18) 

smaranniti śabdapratyayasya yathārthaḥ prayogaḥ syāt etadeva ca 
vitatya śrītantrāloke pratipāditam 

mṛtibhogaḥ samasto'yaṃ marmacchinmūḍhatākṣagaḥ | 
tatrendriyāṇāṃ saṃmohaḥ śvāsāyāsaparītatā || 

yastvasau kṣaṇa evaikaścaramaḥ prāṇanātmakaḥ | sā 
dehatyāgakālāṃśakalā prāṇaviyoginī || 

tasyāṃ yadeva smarati prāksaṃskāraprabodhataḥ | tadeva 
rūpamabhyeti sukhaduḥkhavimohitam || 

iti | atra ca viṣayanaiyatyena vibhāgo vyāsamuninaiva kṛtaḥ | 

yadā sattve vivṛddhe tu pralayaṃ yāti dehabhṛt | 

ityādinā granthena | tā etāḥ śarīrāvasthāḥ 

pañcāre cakre parivartamāne tasminnātasthurbhuvanāni viśvā | 

ityādiśrutāvuktāḥ | anyatrāpi - 

saṃbhavo janma sattā ca mṛtiścātha yiyāsutā | etāḥ pañca 
śarīrasya pariṇāmavipattayaḥ || 

ityuktam | etadevamuktarūpeṇa asau ātivāhikena dehena dehāntaraṃ 
nīyate so'pi dehaḥ suptotthitāt prabodham avāpya prāṇiti - 

p. 19) 

uktena cakreṇa so'pi vinaśyati yāvat araghaṭṭaghaṭīyantravat 
parivartamāno'ṇuḥ nānākāyanikāyaiḥ saṃsarati saṃsāre | 
tathā ca śrutiḥ - 

sasyamiva martyaḥ pacyate sasyamiva jāyate punaḥ | 

iti | 

vāsāṃsi jīrṇāni yathā vihāya | 

ityādinā vyāsamunināpi etaduktam | 

atha kadācitparameśvarānugrahaśaktipātapavitritaḥ kenāpi 
dīkṣādinā upāyena saṃvidānandaviśrāntam advayaṃ nijaṃ rūpaṃ 
parāmṛśati tataḥ svarūpamālambate yathoktaṃ śrīmālinīvijaye - 

evamasyātmanaḥ kāle kasmiṃścidyogyatāvaśāt | 

ityupakramya - 

tatkṣaṇādvopabhogādvā dehapāte śivaṃ vrajet | 

ityevamantena granthena | yadvā kvāpi parameśvarāyatane śarīram 
ativāhya pūrve vidhau krameṇa parameśvarībhavati taduktaṃ 
śrīsāttvatāyām - 

prāsādadvāradeśācca yatra śaṅkhadhvaniścaran | prayāti sarvato 
dikṣu tatkṣetraṃ vaiṣṇavaṃ matam || 

munipraṇītāddviguṇaṃ tadeva parikīrtitam | 
siddhāvatāritāddevāttadeva triguṇaṃ smṛtam || 

p. 20) 

caturguṇaṃ svayaṃ vyaktāddehānte bhāvitātmanām | phalaṃ 
sāyujyatāpūrvaṃ vijñeyaṃ tu kramāttataḥ || 

duṣṭendriyavaśāccittaṃ nṛṇāṃ yatkalmaṣeritam | tadantakāle 
saṃśuddhiṃ yāti nārāyaṇālaye || 

iti | śrīmadamṛteśaśikhāyāmapi - 

ye tu tattvāvatīrṇānāṃ śaṅkarājñānuvartinām | 
svayaṃbhūmunidevarṣimanujādibhuvāṃ gṛhe || 

mṛtāste tatpuraṃ prāpya pureśairdīkṣitāḥ kramāt | 
martye'vatīrya vā nāvā prayānti paramaṃ padam || 

tatra svayaṃbhuvo dvedhā ke'pyanugrahatatparāḥ | ke'pi 
svakāryeṇāyātāḥ pūrve nirvāṇadāyinaḥ || 

iti | tatrāpi na sarvasya mokṣa ityuktam - 

paśumātrasya sālokyaṃ sāmīpyaṃ dīkṣitasya tu | tatparasya tu 
sāyujyamityājñā pārameśvarī || 

yastūrdhvaśāstragastatra tyaktāsthaḥ saṃśayena saḥ | 
vrajedāyatanaṃ naiva sa phalaṃ kiṃcidaśnute || 

dīkṣāyatanavijñānadveṣiṇo ye tu cetasā | ācaranti ca tatte vai 
sarve nirayagāminaḥ || 

ye ca svabhyastavijñānamayāḥ śivamayā hi te | jīvanmuktā na 
teṣāṃ syānmṛtau kāpi vicāraṇā || 

iti | ata eva uktaṃ śrīniśāṭane 

godohamiṣupātaṃ vā nayanonmīlanaṃ ca vā | samyagyuktaḥ pare 
tattve na bhūyo janmabhāgbhavet || 

p. 21) 

yasmātpūrvaṃ pare nyasto yenātmā brahmaṇi svayam | smaraṇaṃ tu 
kathaṃ tasya prāṇānte samupasthite || 

iti | śrīrāmabhaṭṭārake'pi 

tāvatkṣetraṃ tathā tīrthaṃ yāvadbrahmaṇi no viśet | tadviditvā 
śvapāko'pi matsamo nātra saṃśayaḥ || 

iti | bhagavatā bhegipatināpi 

tīrthe śvapacagṛhe vā naṣṭasmṛtirapi parityajandeham | 
jñānasamakālamuktaḥ kaivalyaṃ yāti hataśokaḥ || 

iti | śrīmatpauṣkarāyāmapi uktam 

kṣityantānāṃ ca tattvānāṃ devatvena vyavasthitaḥ | mantrajño 
bhagavadbhaktaḥ śraddadhānaḥ sadāstikaḥ || 

yatra yatrāśrame caiva nivasetsaṃyatendriyaḥ | svadehasthaṃ 
smarennityaṃ svamantraṃ nyastavigrahaḥ || 

dehasaṃnyāsakāle tu viśrānto yatra kutracit | prayāti padamādyaṃ 
vai samutkrāntaḥ svavigraham \| 

iti | anyatrāpi 

śarīramevāyatanaṃ nānyadāyatanaṃ vrajet | tīrthamekaṃ 
śrayenmantramanyatīrthāni varjayet || 

p. 22) 

iti | tathā - 

svasthaceṣṭāśca ye martyāḥ smaranti mama nārada | 
kāṣṭhapāṣāṇatulyāṃstānantakāle smarāmyaham || 

ityuktaṃ | na ca saṃsthitasya uttamatayā adhikāriṇo 
lokayātrāprasiddhāsruvimocanādiparidevitaṃ kāryam yathoktaṃ 
śrīpūrvaśāsane 

niṣiddhaṃ sarvaśāstrāṇāṃ rodanaṃ kāyaśāsanam | 
viśeṣādbhairave tantre śambaraṃ paśukalpitam || 

ayuktamimamācāraṃ tyajedvai naurdhvadaihikam | 

iti | śrīmatarahasyatilake'pi uttamanayādhikāriṇāṃ 
saṃvṛtanijasadācārāṇāṃ lokaprasiddhirakṣāyai 
tadācārāparityāgo'pi āmnātaḥ tathāhi 

lokācārasya vicchedo na kartavyaḥ kadācana | guhyaṃ guhyataraṃ 
kāryaṃ bāhyaṃ bāhyāntaraṃ tathā || 

iti | anayośca pakṣayorekatarapakṣāvalambane pravaragurava eva 
pramāṇam | pitruddeśena ca yāgajapahomopavāsādi gurumārādhya 
avaśyaṃ vidhātavyam ityuktam śrīmahākule - 

p. 23) 

āsūtrite bhāgalupte yatheṣṭarajasānvite | api mantramanāhūya 
maṇḍale vidhicodite || 

saṃnidhānaṃ prakurvanti mantrāṇāṃ saptakoṭayaḥ | kiṃ punaḥ 
kaulikāmnāyastatrāhūya prapūjitaḥ || 

samuddiśya pitṝnbhadre tadānantyāya kalpate || 

iti | śrīpracaṇḍabhairave'pi uktam - 

tanuvittāśca ye martyā gurumantraparāyaṇāḥ | viśeṣeṇa 
mahāyāgapūjanaṃ prati na kṣamāḥ || 

siddhaliṅgaṃ tadā teṣāṃ pitrarthaṃ pūjayedbudhaḥ | ucitaṃ 
pūjanaṃ tatra devānāmapi durlabham || 

kulānyuddharate tatra daśa pūrvāparāṇyapi | 

iti | śrībhāgeśamate'pi - 

viṣasarpāgnyapasmārakṣudhātyaśanabandhanaiḥ | 
caṇḍālodakanirghātarājaśāsanataskaraiḥ || 

nidāghaśītaśakaṭalūtoṣitamahāvrajaiḥ | 
brāhmaṇamlecchapāṣaṇḍinirmūloḍḍāmarakramaiḥ || 

ye hatāḥ pāpakarmāṇo mitradroharatāśca ye | 
svāmidrohakṛtāścānye ye tathātmopaghātakāḥ || 

gurviṇyo duścaritrāśca prasavena hatāśca yāḥ | 
teṣāmuddharaṇopāyo nānyo'sti varavarṇini || 

vinā yāgaṃ vinā homaṃ vinā mūrtiparigraham | vinā 
mahājālavidhiprayogāhṛtapudgalam || 

mṛtoddharaṇasaṃjñāṃ ca dīkṣāṃ sarvādhvavartinīm | 

p. 24) 

iti | tadayaṃ tāvat ūrdhvaśāsanavartināṃ kramaḥ | itareṣāṃ tu 
svaśāstrasamayopanyastānuṣṭhānameva śreyaḥ tadalamanena | evaṃ 
samanantarodīritayā nītyā janmamaraṇaprabandhasaṃbandham 
avadhārya akṛtrimasvarūpaparāmarśanena jīvanmuktimāsādya 
kṛtakṛtyatāmālambante santaḥ | yathoktam - 

viditamatisatattvāḥ saṃvidambhonidhānā- 
dacalahṛdayavīryākarṣaniṣpīḍanottham | amṛtamiti nigīrṇe 
kālakūṭe'pi devā yadi pibata tadānīṃ niścitaṃ vaḥ śivatvam 
|| 

iti | 

śrīmadyogeśvarācāryaprasādāsāditasthitiḥ | 
vāmadevaścakāredaṃ janmamṛtyuvicāraṇam || 

abhinavamadamantharā purandhrī madhusamaye madhurāśca gītibandhāḥ 
| bata bata hṛdayaṃ haranti vāco lalitapadāśca 
rahasyavastugarbhāḥ || 

samāpto'yaṃ janmamaraṇavicārākhyo granthaḥ || 

p. 25) 

kṛtistatrabhavanmahāmāheśvarācāryavaryaśrīmadbhaṭṭavāmadevasy 
a || 

sadvidyānāṃ saṃśraye granthavidvad- vyūhe hrāsaṃ 
kālavṛttyopayāte | tattatsaddharmoddidhīrṣaikatāna- 
satprekṣaujaḥśālinā karmavṛttyai || 2 || 

śrīmatkaśmīrādhirājena mukhyai - rdharmodyuktairmantribhiḥ 
svairvivecya | pratyaṣṭhāpi jñānavijñānagarbha- granthoddhṛtyai 
mukhyakāryālayo yaḥ || 2 || 

tatrājīvaṃ nirviśadbhirmukunda- rāmādhyakṣatvāśritaiḥ 
sadbhireṣaḥ | pūrtyā śuddhyā vyākhyayā saṃskṛtaḥ stāt- 
pūrṇo granthaḥ śreyase sajjanānām || 3 || 

tilakam || 

śrīsvātmacidamṛtavapuḥśaṃkarārpaṇaṃ bhūyāt || 

###########   END OF FILE  #######