####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00132
Uniform title: kāmākhyātantra
Editor : r m caṭṭopādhyāya

Description: 
Transcribed by the staff of Muktabodha.


Notes: 
Transcribed by the staff of Muktabodha under the supervision of Mark S. G. Dyczkowski.

Revision 0: Sept. 22, 2008

Publisher : unknown-pree 1900 Bengali Script
Publication year : 
Publication city : 
Publication country : India
####################################################



|| oṃ namaḥ paradevatāyai ||

kāmākhyātantre

prathamaḥ paṭalaḥ

śrīdevī uvāca


bhagavan sarvadharmajña  sarvavidyāpriya prabho |

sarvadānandahṛdaya sarvāgamaprakāśaka || 1 ||

śrutāni sarvatantrāṇi yāmalāni ca bhūriśaḥ |

vidyāstāḥ sakalā deva phalāni tvatprasādataḥ || 2 ||

sārāt sārataraṃ tantraṃ jānāsi kiṃ vada prabho |

atīvedaṃ rahaḥsthānaṃ tenāhaṃ śravaṇodyatā || 3 ||


śrīśiva uvāca


śṛṇu devi mudā bhadre madīye prāṇavallabhe |

yonirūpā mahāvidyā kāmākhyā varadāyinī || 4 ||

varadā''nandadā nityā mahāvibhavavarddhinī |

sarveṣāṃ jananī sāpi sarveṣāṃ tāriṇī matā || 5 ||

ramaṇī caiva sarveṣāṃ sthūlā sūkṣmā sadā śubhā |

tasyāstantraṃ pravakṣyāmi sāvadhānā'vadhāraya || 6 ||

nikhilāsu ca vidyāsu ye ye sidhyanti sādhakāḥ |

yatra kutrāpi kenāpi kāmākhyā phaladāyinī || 7 ||

kāmākhyāvimukhā lokā ninditā bhuvanatraye |

vinā kāmātmikāṃ kāpi na dātrī siddhisampadām || 8 ||

kāmākhyā ca sadā dharmaḥ kāmākhyā cārtha eva ca |

kāmākhyā kāmasampattiḥ kāmākhyā mokṣa eva ca || 9 ||

nirvāṇaṃ saiva deveśi saiva sāyujyamīritā |

sālokyaṃ saharūpaṃ ca kāmākhyā paramā gatiḥ || 10 ||

śivatā brahmatā devi viṣṇutā candratāpi ca |

devatvaṃ sarvadevānāṃ niścitaṃ kāmarūpiṇī || 11 ||

sarvāsāmapi vidyānāṃ laukikaṃ vākyameva ca |

kāmākhyāyā mahādevyāḥ svarūpaṃ sarvameva hi || 12 ||

paśya paśya priye sarvaṃ cintayitvā hṛdi svayam |

kāmākhyāṃ na vinā kiñcid vidyate bhuvanatraye || 13 ||

lakṣakoṭimahāvidyāstantrādau parikīrtitāḥ |

sārāt sāratamā devi sarveṣāṃ ṣoḍaśī matā || 14 ||

tasyāśca kāraṇaṃ devi kāmākhyā jagadambikā |

candrakāntiryathā devi jāyate līyate punaḥ || 15 ||

sthāvarāṇi carāṇīha nityā'nityāni yāni ca |

satyaṃ satyaṃ punaḥ satyaṃ vinā tāṃ naiva jāyate || 16 ||

|| iti śrīkāmākhyātantre devīśvarasaṃvāde prathamaḥ paṭalaḥ || 1 ||



atha dvitīyaḥ paṭalaḥ


śrīśiva uvāca


mantroddhāraṃ pravakṣyāmi śṛṇu devi parāt param |

yajjñātvā sādhayet siddhiṃ devānāmapi durlabhām || 1 ||

mantrasyāsya pratāpena mohayedakhilaṃ jagat |

brahmādīn mohayed devi bālakaṃ jananīṃ yathā || 2 ||

devadānavagandharvakinnarādīn sureśvari |

mohayet kṣaṇmātreṇa prajāsu nṛpatiryathā || 3 ||

mantrasya purato devi rājānaṃ sacivādayaḥ |

anye ca mānavāḥ sarve meṣādijantavo yathā || 4 ||

mohayennagaraṃ rājñaḥ sahastyaśvarathādikam |

ūrvaśyādyāstusvarveśyā rājapatnyādikāḥ kṣaṇāt || 5 ||

stambhanaṃ māraṇaṃ devi kṣobhaṇaṃ jṛmbhaṇaṃ tathā |

drāvaṇaṃ bhīṣaṇaṃ caiva vidveṣoccāṭane tathā || 6 ||

ākarṣaṇaṃ ca nārīṇāṃ viśeṣeṇa maheśvari |

vaśīkaraṇamanyāni sādhayet sādhakottamaḥ || 7 ||

agniḥ stambhati vāyuśca sūryo vārisamūhakaḥ |

kaṭākṣeṇaiva sarvāṇi sādhakasya na cānyathā || 8 ||

jagajjayati mantrajñaḥ kāmadevo yathā jayī |

tasyā'sādhyaṃ tribhuvane na kiñcit prāṇavallabhe || 9 ||

jṛmbhaṇāntaṃ tyaktapāśaṃ yātrāvāraṇarohakam |

vyaṅgavarṇayutaṃ devi nādabinduyutaṃ punaḥ || 10 ||

etat tu triguṇīkṛtya kalpavṛkṣamanuṃ japet |

ekaṃ vāpi dvayaṃ vāpi caturthaṃ vā japet sudhīḥ || 11 ||

kāmākhyāsādhanaṃ kāryaṃ sarvavidyāsu sādhakaiḥ |

anyathā siddhihāniḥ syād vighnasteṣāṃ pade pade || 12 ||

kiṃ śāktā vaiṣṇavāḥ kiṃ vā kiṃ śaivā gāṇapatyakāḥ |

mahāmāyāvratāḥ sarve tailayantre vṛṣā iva || 13 ||

asyāśca sādhanaṃ devi śāktānāmeva sundari |

nātra cakraviśuddhistu kālādiśodhanaṃ na ca || 14 ||

kṛte ca narakaṃ yāti sarvaṃ tasya vinaśyati |

kleśaśūnyaṃ paraṃ devi sādhanaṃ drutapoṣakam || 15 ||


śrīdevī uvāca


kālītārāmantradāne cakracintāṃ karoti yaḥ |

kā gatistasya deveśaḥ nistāro vidyate na vā || 16 ||


śrīśiva uvāca


vayamagniśca kālo'pi ye ye yātā maheśvari |

kiṃ brūmo devadeveśi kālikātāriṇīmanum || 17 ||

ajñānād yadi vā mohāt kālītārāmanau priye |

kṛte cakrādigaṇane śūnīviṣṭhākṛmirbhavet || 18 ||

kalpānte ca mahādevi nistāro vidyate na ca |

asyāḥ pūjāṃ pravakṣyāmi trailokyasādhanapradām || 19 ||

haṭhāddhaṭhācca deveśi yā yā siddhiśca jāyate |

prāpyate tatkṣaṇenaiva nātra kāryā vicāraṇā || 20 ||

sindūramaṇḍalaṃ kṛtvā trikoṇaṃ ca samālikhet |

nijabījāni tanmadhye yojayet sādhakottamaḥ || 21 ||

caturasraṃ likhed devi tato vajrāṣṭakaṃ priye |

aṣṭadikṣu yajet tāṃ tu nyāsajālaṃ vidhāya ca || 22 ||

akṣobhyaśca ṛṣiḥ proktaśchando'nuṣṭubudāhṛtam |

kāmākhyā devatā sarvasiddhaye viniyojitā || 23 ||

karāṅganyāsakaṃ caiva nijabījena kārayet |

ṣaḍdīrghabhājāṃ dhyāyet tu kāmākhyāmiṣṭadāyinīm || 24 ||

raktavastrāṃ varodyuktāṃ sindūratilakānvitām |

niṣkalaṅkāṃ sudhādhāmavadanāmalakojjvalām || 25 ||

svarṇādimaṇimaṇikyabhūṣaṇairbhūṣitāṃ parām |

nānāratnādinirmāṇasiṃhāsanoparisthitām || 26 ||

hāsyavaktrāṃ padmarāgamaṇikāntimanuttamām |

pīnottuṅgakucāṃ kṛṣṇāṃ śrutimūlagatekṣaṇām || 27 ||

kaṭākṣaiśca mahāsampaddāyinīṃ parameśvarīm |

sarvāṅgāninditāṃ nānāvidyābhiḥ pariveṣṭitām || 28 ||

ḍākinīyoginīvidyādharībhiḥ pariśobhitām |

kāminībhiryutāṃ nānāgandhādyaiḥ parigandhitām || 29 ||

tāmbūlādikarābhiśca nāyikābhirvirājitām |

samastasiddhavargāṇāṃ praṇatānāṃ pratīkṣaṇām || 30 ||

trinetrāṃ mohanakarīṃ puṣpacāpeṣu bibhratīm |

bhagaliṅgasamākhyānāṃ kinnarībhyo'pi śṛṇvatīm || 31 ||

vāṇī - lakṣmī - sudhā - vākya - prativākya - samutsukām |

aśeṣaguṇasampannāṃ karuṇāsāgarāṃ śivām || 32 ||

āvāhayet tato devīmevaṃ dhyātvā ca sādhakaḥ |

pūjayitvā yathoktena vidhānena harapriye || 33 ||

kuṅkumādyai raktapuṣpaiḥ sugandhikusumaistathā |

javā - yāvaka - sindūraiḥ karavīrairviśeṣataḥ || 34 ||

karavīreṣu deveśi kāmākhyā tiṣṭhati svayam |

javāyāṃ ca tathā viddhi mālatyādisamīpake || 35 ||

karavīrasya māhātmyaṃ kathituṃ naiva śakyate |

pradānāt tu javāyāśca gāṇapatyamavāpnuyāt || 36 ||

pūjayedambikāṃ devīṃ pañcatatvena sarvadā |

pañcatattvaṃ vinā pūjāmabhicārāya kalpayet || 37 ||

pañcatattvena devyāstu prasādo jāyate kṣaṇāt |

pañcamena mahādevi śivo bhavati sādhakaḥ || 38 ||

pañcatattvasamaṃ nāsti nāsti (kiñcit) kalau yuge |

pañcatattvaṃ paraṃ brahma pañcatattvaṃ parā gatiḥ || 39 ||

pañcatattvaṃ mahādevi pañcatattvaṃ sadāśivaḥ |

pañcatattvaṃ bhuktimuktī mahāyogaḥ prakīrtitaḥ || 40 ||

pañcatattvena deveśi mahāpātakakoṭayaḥ |

naśyanti tatkṣaṇenaiva tūlarāśimivānalaḥ || 41 ||

yatraiva pañca tattvāni tatra devī vased dhruvam |

pañcatattvavihīne tu vimukhī jagadambikā || 42 ||

madyena modate svarge māṃsena mānavādhipaḥ |

matsyena bhairavīputro mudrayā sādhutāṃ vrajet || 43 ||

pareṇa ca mahādevi sāyujyaṃ labhate naraḥ |

bhaktiyukto yajed devīṃ tadā sarvaṃ prajāyate || 44 ||

svayambhūkusumaiḥ śuklaiḥ kuṇḍagolodbhavaiḥ śubhaiḥ |

kuṅkumādyairāsavena cārghyaṃ devyai nivedayet || 45 ||

nānopahāranaivedyairannādipāyasairapi |

vastrabhūṣādibhirdevīṃ prapūjyāvaraṇaṃ yajet || 46 ||

indrādīn pūjayet tatra teṣāṃ yantrāṇi śāṅkari |

pārśvayoḥ kamalāṃ vāṇīṃ pūjayet sādhakottamaḥ || 47 ||

annadā dhanadā caiva sukhadā jayadā tathā |

rasadā mohadā devi ṛddhidā siddhidāpi ca || 48 ||

vṛddhidā śuddhidā caiva bhuktidā muktidā tathā |

mokṣadā sukhadā caiva jñānadā kāntidā tathā || 49 ||

etāḥ pūjyā mahādevyaḥ sarvadā yantramadhyataḥ |

ḍākinyādyāstahā pūjyāḥ siddhayo yatnataḥ śive || 50 ||

ṣaḍaṅgāni tato devyā yajet puṣpāñjalīn kṣipet |

yathāśakti japenmantraṃ śuddhabhāvena sādhakaḥ || 51 ||

japaṃ samarpya vādyādyaistoṣayet paradevatām |

paṭhet stotraṃ ca kavacaṃ praṇamed vidhinā'munā || 52 ||

tataśca hṛdaye devīṃ saṃyujya śeṣikāṃ prati |

nirmālyaṃ nikṣipedaiśe trikoṇaṃ parikalpayet || 53 ||

nirmālyaṃ sādhakaiḥ sārdhaṃ gṛhṇīyād bhaktibhāvataḥ |

viharet pañcatattvena yathāvidhi svaśaktitaḥ || 54 ||

śaktimūlaṃ sādhanaṃ ca śaktimūlaṃ japādikam |

śaktimūlā japāścaiva śaktimūlaṃ ca jīvanam || 55 ||

aihikaṃ śaktimūlaṃ ca paratra śaktimūlakam |

śaktimūlaṃ tapaḥ sarvaṃ caturvargastathā priye || 56 ||

śaktimūlāni sarvāṇi sthāvarāṇi carāṇi ca |

ajñātvā pāpino devi rauravaṃ yānti niścitam || 57 ||

tasmāt sarvaprayatnena sādhakaiśca śivājñayā |

śaktyucchiṣṭaṃ pīyate hi nānyathā yānti rauravam || 58 ||

śaktyai yad dīyate devi tat tu devārpitam bhavet |

saphalaṃ karma tat sarvaṃ satyaṃ satyaṃ kuleśvari || 59 ||

śaktiṃ vinā kaulacakraṃ karoti kārayedapi |

sa yāti narakaṃ ghoraṃ nistāro na hi vidyate || 60 ||

evaṃ tu pūjayed devīṃ yaṃ yaṃ coddiśya sādhakaḥ |

taṃ taṃ kāmaṃ kare kṛtvā priye jayati niścitam || 61 ||

puraścaraṇakāle tu lakṣamekaṃ japet sudhīḥ |

taddaśāṃśaṃ hunedājyaiḥ śarkarāmadhupāyasaiḥ || 62 ||

tarpayeddhudigbhāgairjalaiścandanamiśritaiḥ |

gandhādyaiḥ sādhakādhīśastatkuśairabhiṣecayet || 63 ||

abhiṣekadaśāṃśena bhojayecca dvijottamān |

miṣṭānnaiḥ sādhakān devi devībhaktāṃśca pañcamaiḥ || 64 ||

evaṃ puraskriyāṃ kṛtvā siddho bhavati sādhakaḥ |

prayogeṣu tato devi yogyo bhavati niścitam || 65 ||

etat pūjādikaṃ sarvaṃ kāmākhyāprītikārakam |

mahāprītikarī pūjā yonicakre kuleśvari || 66 ||

yonipūjāṃ mahāpujā tatsamā na hi siddhidā |

tatra devīṃ yajed dhimān saiva devī na cā'nyathā || 67 ||

āvāhanādikarmāṇi na tatra sarvathā priye |

lepayet tāṃ tu gandhādyaiḥ pūjayed vividhena ca || 68 ||

mahāprītirbhaved devyāḥ siddho bhavati tatkṣaṇāt |

yonipūjāsamā pūjā nāsti jñāne tu māmake || 69 ||

cimbanāllehanād yonau kalpavṛkṣamatikramet |

darśanāt sādhakādhīśaḥ sparśanāt sarvamohanaḥ || 70 ||

liṅgayonisamākhyānaṃ kāmākhyāprītivarddhanam |

tadeva jīvanaṃ tasyā girije bahu kiṃ vacaḥ || 71 ||

tasmāt sarvaprayatnena yonipūjāṃ samācaret |

parastrīyonimāsādya viśeṣeṇa yajet sudhīḥ || 72 ||

veśyāyoniḥ parā devi sādhanaṃ tatra kārayet |

trirātrādeva sidhyanti nātra kāryā vicāraṇā || 73 ||

ṛtuyuktaṃ latāmadhye sādhayed vidhivanmudā |

acirāt siddhimāpnoti devānāmapi durlabhām || 74 ||

sārāt sāratamaṃ yonisādhanamīritam |

vinā tat sādhanaṃ devi mahāśāpaḥ prajāyate || 75 ||

yoninindāṃ ghṛṇāṃ devi yaḥ karoti narādhamaḥ |

acirād rauravaṃ yāti devi satyaṃ śivājñayā || 76 ||

yonimadhye vased devi yoginyāścikure sthitāḥ |

tasmānna nindayed yoniṃ yadīcchedātmano hitam || 77 ||

yoninindāṃ prakurvāṇaḥ sa vaṃśena vinaśyati |

yonistutiparo devi śivaḥ syāt tatkṣaṇena ca || 78 ||

kiṃ brūmo yonimāhātmyaṃ yonipūjāphalāni ca |

cāñcalyād gaditaṃ kiñcit kṣantavyaṃ kāmarūpiṇi || 79 ||

|| iti śrīkāmākhyātantre devīśvarasaṃvāde dvitīyaḥ paṭalaḥ || 2 ||



atha tṛtīyaḥ paṭalaḥ

varamantraṃ pravakṣyāmi sādaraṃ śṛṇu pārvati |

yasya prasādamātreṇa brahmaviṣṇuśivā api || 1 ||

indrādyā devatāḥ sarvā bhavanti kāmanāyutāḥ |

gandharvāḥ kinnarā devi tathā vidyādharādayaḥ || 2 ||

yatprasādaṃ samāgatya svakīyavisayānvitā |

yoginī - ḍākinī - vidyā - bhairavī - nāyikādikāḥ || 3 ||

kāmākhyāmantramāsādya bhajanti yogyatā parām |

svarge martye ca pātāle ye ye sidhyanti sādhakāḥ || 4 ||

nijabījatrayaṃ devi krodhadvayamataḥ param |

vadhūbījatrayaṃ caiva kāmākhyā ca punarvadet || 5 ||

prasīdeti padaṃ caiva pūrvabījāni kalpayet |

ṭhadvayānte manuḥ proktaḥ sarvatantreṣu durlabhaḥ || 6 ||

[krīṃ krīṃ krīṃ huṃ huṃ strīṃ strīṃ kāmākhye prasīda | krīṃ 
krīṃ krīṃ hu/ hu/ strīṃ strīṃ svāhā ||]

praṇavādyā mahādevi trailokye cātidurlabhā |

caturvagapradā sākṣānmahāpātakanāśinī || 7 ||

smaraṇādeva mantrasya sarve vighnāḥ samākulāḥ |

naśyanti dahane dīpte pataṅgā iva pārvati || 8 ||

mantragrahaṇamātreṇa jīvonmukto bhavennaraḥ |

bhuktirmuktiḥ kare tasya sarveṣāṃ priyatāṃ vrajet || 9 ||

āvṛṇoti svayaṃ lakṣmīrvadane gīḥ sadā vaset |

putrāḥ pautrāḥ prapautrāśca bhavanti cirajīvinaḥ || 10 ||

pṛthivyāṃ sarvapīṭheṣu kāmākhyādiṣu śaṅkari |

lipiścalati tasyaiva nātra kāryā vicāraṇā || 11 ||

tasya nāma ca saṃsmṛtya praṇamanti sabhājanāḥ |

nāma śrutvā vāramekaṃ palāyante ca hiṃsakāḥ || 12 ||

yāvantyaḥ siddhayaḥ santi svarge martye rasātale |

sādhakānāṃ paricaryāṃ kurvanti nātra saṃśayaḥ || 13 ||

taṃ dṛṣṭvā sādhakendraṃ ca vādī skhalati darśanāt |

sabhāyāṃ koṭisūryābhaṃ paśyanti sarvasajjanāḥ || 14 ||

jihvākoṭisahasraistu vaktrakoṭiśatairapi |

varṇituṃ naiva śaknomi mantrametanmaheśvari || 15 ||

nyāsapūjādikaṃ sarvaṃ pūrvamuktaṃ varānane |

puraścaryāvidhau kintu ṣaṭsahasraṃ manuṃ japet || 16 ||

yathāvidhi ṣaṭśatāni homādīṃśca samācaret |

siddho bhavati mantrajñaḥ prayogeṣu tataḥ kṣamaḥ || 17 ||

dhyānaṃ śṛṇu mahādevyā dhanadhānyasutapradam |

dāridryahananaṃ devi kṣaṇenaiva na cānyathā || 18 ||

atisulalitaveśāṃ hāsyavaktrāṃ trinetrāṃ
	jitajaladasukāntiṃ paṭṭavastraprakāśām |
abhayavarakārāḍhyāṃ ratnabhūṣātibhavyāṃ
	suratarutalapīṭhe ratnasiṃhāsanasthām || 19 ||

hariharavidhivandhyāṃ buddhivṛddhisvarūpāṃ
	madanaśarasamāktāṃ kāminīṃ kāmadātrīm |
nikhilajanavilāsollāsarūpāṃ bhavānīṃ
	kālikaluṣanihantrīṃ yonirūpāṃ bhajāmi || 20 ||

guhyād guhyataraṃ devi dhyānaṃ dāridryanāśakam |

gopitaṃ sarvatantreṣu tava bhāvāt prakāśitam || 21 ||

svayambhūkusumenaiva tilakaṃ parikalpya ca |

tūlikāyāṃ mahādevi kulaśaktiṃ samāviśet || 22 ||

karpūritamukhaḥ svādu sādhakaścumbayenmudā |

tasyādharo yathā bhṛṅgo nīrajavyākulaḥ priye || 23 ||

dantakṣativitānāṃ ca paramaṃ tatra kārayet |

āliṅgayenmadonmattaḥ sudṛḍhaṃ kucamardanam || 24 ||

nakhāghātairnitambe ca ramayed ratipaṇḍitaḥ |

punaḥ punaścumbanaṃ ca yonau kuryāt kuleśvari || 25 ||

śukraṃ tu stambhayed vīro yonau liṅgaṃ praveśayet |

āghātaistoṣayet tāṃ tu sandhānabhedataḥ priye || 26 ||

tato liṅge sthite yonāvājñāṃ tasyāḥ pragṛhya ca |

aṣṭottaraśataṃ mantraṃ japeddhomādikāṅkṣayā || 27 ||

dinatrayaṃ mahādhīraḥ prajaped dhyānatatparaḥ |

prāpyate mānasaṃ vastu nātra kāryā vicāraṇā || 28 ||

ṛtuyuktalatāṃ devi niveśya tūlikopari |

karavīraprasūnaṃ ca tasyā liṅgopari nyaset || 29 ||

tad vīkṣya devadeveśi japeccā'ṣṭasahasrakam |

dinatrayaṃ tato devyāḥ prītiḥ syādacalā priye || 30 ||

dhanaṃ vindati tasyaiva lakṣasaṅkhyaṃ na saṃśayaḥ |

ānandaṃ varddhayennityaṃ sādhakasya mahātmanaḥ || 31 ||

aṣṭottaraśataṃ yoniṃ saṃcumbya pūjya sajjanaḥ |

punarliṅge sthite yonau japeccāṣṭasahasrakam || 32 ||

kāṅkṣā pañcaguṇaṃ vittaṃ prāpyate sarvadā sukhī |

nityaṃ tasya maheśāni nāyikāsaṅgamo bhavet || 33 ||

veśyālatāṃ samānīya kulacakraṃ vidhāya ca |

tasyā yonau yajed devīṃ hṛṣṭacittena sādhakaḥ || 34 ||

bhagaliṅgasamākhyānaṃ susvareṇa samuccaret |

yoniṃ vīkṣya japenmantraṃ saptarātramatandritaḥ || 35 ||

pratyahaṃ triśataṃ kṛtvā so'pi siddhīśvaraḥ kalau |

ājñāṃ gṛhṇāti dhanadastasya devi na saṃśayaḥ || 36 ||

sadguroḥ smaraṇaṃ kṛtvā yoneśca sādhanaṃ yadi |

tadā siddhimavāpnoti cānyathā hāsyameva hi || 37 ||

|| iti śrīkāmākhyātantre devīśvarasaṃvāde tṛtīyaḥ paṭalaḥ ||



atha caturthaḥ paṭalaḥ

śrīdevī uvāca


gurutattvaṃ mahādeva viśeṣeṇa vada prabho |

durvahā gurutā yā tu sambhavenmānuṣe katham || 1 ||

tatraiva sadguruḥ ko vā bhraṣṭaḥ ko vā vada prabho |

dūrīkuru mahādeva saṃśayaṃ me mahotkaṭam || 2 ||

iti devyā vacaḥ śrutvā provāca śaṅkaraḥ prabhuḥ |

śṛṇu sārataraṃ jñānaṃ sādhūnāṃ hitakāraṇam || 3 ||

guruḥ sadāśivaḥ prokta ādināthaḥ sa ucyate |

mahākāyayuto devaḥ saccidānandavigrahaḥ || 4 ||

sadātanaḥ paraṃ brahma śrīdharmastriguṇaḥ prabhuḥ |

tvatprasādānmahādevi śivo'hamajarāmaraḥ || 5 ||

ata eva gururnaiva manujaḥ kintu kalpanā |

dīkṣāyai sādhakānāṃ ca vṛkṣādau pūjanaṃ yathā || 6 ||

mantradātuḥ śiraḥ padme yad dhyānaṃ kurute guroḥ |

tad dhyānaṃ śiṣyaśirasi copadiṣṭaṃ na cānyathā || 7 ||

ata eva maheśāni kuto hi mānuṣo guruḥ |

mānuṣe gurutā devi kalpanā na tu tathyatā || 8 ||

akhaṇḍamaṇḍalākāraṃ vyāptaṃ yena carācaram |

tat padaṃ darśitaṃ yena tasmai śrīgurave namaḥ || 9 ||

prasidhamiti yad devi tat padaṃ darśako naraḥ |

ata eva nare devi gurutā kalpanaiva hi || 10 ||

na tu svayaṃ gururnīca mūrkhatā cobhayorapi |

ayaṃ gururiti jñānaṃ śiṣyo'yaṃ khalu me yadā || 11 ||

darśakaḥ paṭhanasyaiva svayaṃ mānuṣo guruḥ |

mokṣo na jāyate satyaṃ mānuṣe gurubhāvanāt || 12 ||

yathā bhoktari bhojyaṃ hi svarṇādipātrakeṇa ca |

dīyate tat tathā devi tasmai sarvaṃ samarpaṇam || 13 ||

yadi cintya ca tat pātraṃ bhagnaṃ vāpi maheśvari |

tadā tyajet tu tat pātramanyapātreṇa toṣayet || 14 ||

ato hi manujaṃ lubdhaṃ duṣṭaṃ śiṣyo'pi santyajet |

asammatastu lokairyastatra ruṣṭaḥ sadāśivaḥ || 15 ||

rājasvaṃ dīyate rājñe prajābhirmaṇḍalādibhiḥ |

yathā tathaiva tasmai tu śiṣyadānaṃ samarpaṇam || 16 ||

atraiva grāhakā hiṃsrā maṇḍalādyāḥ smṛtā yadi |

anyadvāreṇa dātavyaṃ tāṃstān santyajya sarvadā || 17 ||

sarveṣāṃ bhuvane satyaṃ jñānāya gurusevanam |

jñānānmokṣamavāpnoti tasmājjñānaṃ parāt param || 18 ||

ato yo jñānadāne hi na kṣamastaṃ tyajed gurum |

annākāṅkṣī nirannaṃ ca yathā santyajati priye || 19 ||

jñānatrayaṃ yadā bhāti sa guruḥ śiva eva hi |

ajñāninaṃ varjayitvā śaraṇaṃ jñānino vrajet || 20 ||

jñānād dharmo bhavennityaṃ jñānādartho hi pārvati |

jñānāt kāmamavāpnoti jñānānmokṣo hi nirmalaḥ || 21 ||

jñānaṃ hi paramaṃ vastu jñānāt sārataraṃ na hi |

jñānāya bhajate devaṃ jñānaṃ hi tapasaḥ phalam || 22 ||

madhulubdho yathā bhṛṅgaḥ puṣpāt puṣpāntaraṃ vrajet |

jñānalubdhastathā śiṣyo gurorguvantaraṃ vrajet || 23 ||

guravo bahavaḥ santi śiṣyavittāpahārakāḥ |

durlabhaḥ sadgururdevi śiṣyasantāpahārakaḥ || 24 ||

ajñānatimirāndhasya jñānāñjanaśalākayā |

cakṣurunmīlitaṃ yena tasmai śrīgurave namaḥ || 25 ||

iti matvā sādhakendro gurutāṃ kalpayet sadā |

jñāninyeva śiṣyabhaktāḥ kevalaṃ niścitaṃ śive || 26 ||

śāntodāntaḥ kulīnaśca śuddhāntaḥkaraṇaḥ sadā |

pañcatattvārcako yastu sadguruḥ sa prakīrtitaḥ || 27 ||

siddho'sāviti cet khyāto bahubhiḥ śiṣyapālakaḥ |

camatkārī daivaśaktyā sadguruḥ kathitaḥ priye || 28 ||

aśrutaṃ sammataṃ vākyaṃ vakti sādhu manoharam |

tantra mantraṃ samaṃ vakti ya eva sadguruśca saḥ || 29 ||

sadā yaḥ śiṣyabodhāya hitāya ca samākulaḥ |

nigrahānugrahe śaktaḥ sadgururgīyate budhaiḥ || 30 ||

paramārthe sadā dṛṣṭiḥ paramārthaṃ prakīrtitam |

gurupādāmbuje bhaktiryasyaiva sadguruḥ smṛtaḥ || 31 ||

ityādi guṇasampattiṃ dṛṣṭvā devi guruṃ vrajet |

tyaktvā kṣamaṃ guruṃ śiṣyo nātra kālavicāraṇā || 32 ||

kevalaṃ śiṣyasampattirgrāhako bahumārakaḥ |

vyaṅgitaśca samakṣe yo lokairnityo gururmataḥ || 33 ||

kāyena manasā vācā śiṣyaṃ bhaktiyutaṃ yadi |

dṛṣṭvā'numodanaṃ nāsti tasya tad vastu kāmataḥ || 34 ||

karmaṇā garhitenaiva hanti śiṣyaṃ dhanādikam |

śiṣyāhitaiṣiṇaṃ lokaṃ varjayet taṃ narādhamam || 35 ||

mahāvidyāṃ samādāya vīrācāraṃ dadāti ca |

sa yāti narakaṃ ghoraṃ śiṣyo'pi patito dhruvam || 36 ||

paśubhāvasthito yo hi kālikā tāriṇī manum |

tattvā''cāraṃ vadennaiva narakānna nivartate || 37 ||

tasmāt paśugurustyājyaḥ sādhakaiḥ sarvadā priye |

paśordīkṣā'dhamā proktā caturvargavighātinī || 38 ||

yadi daivāt paśorvidyāṃ labhate śaktimānnaraḥ |

kaulāt tu kaulikīṃ prāthya tanmanuṃ punarālabhet || 39 ||

tadā vidyā prasannā syāt phaladā jananaī samā |

anyayā vimukhī devī kutastasyaiva sadgatiḥ || 40 ||

pūrvoktadoṣayuktaśca divyo vā vīra eva vā |

tayorapi na kartavyā śiṣyeṇa gurubhāvanā || 41 ||

kintu bhāvyaṃ hitaiṣitvaṃ gurutākalpanāṃ tyajet |

divye vīravare vāpi na doṣo'tra śivājñayā || 42 ||


śrīdevī uvāca


divyato vīrato deva paśutaḥ kiṃ viśeṣakaḥ |

vada me parameśāna śrotuṃ me cittamutsukam || 43 ||


śrīśiva uvāca


śṛṇu devi jagadvandye yat pṛṣṭaṃ tattvamuttamam |

divyaḥ sarvamanohārī mitavādī sthirāsanaḥ || 44 ||

gabhīraḥ śliṣṭavaktā ca śatāvadhānakaḥ sukhī |

gurupādāmbuje bhīruḥ sarvatra bhayavarjitaḥ || 45 ||

sarvadarśī sarvavaktā sarvaduṣṭanivārakaḥ |

sarvaguṇānvito divyaḥ so'haṃ kiṃ bahuvākyataḥ || 46 ||

nirbhayo'bhayado vīro gurubhaktiparāyaṇaḥ |

vācālo balavān śuddhaḥ pañcatattve sadā ratiḥ || 47 ||

mahotsāho mahābuddhirmahāsāhasiko'pi ca |

mahāśayaḥ sadā devi sādhūnāṃ pālane rataḥ || 48 ||

tamomayaḥ sadā vīro vinayena mahotsukaḥ |

evaṃ bahuguṇairyukto vīro rudraḥ svayaṃ priye || 49 ||

paśūn śṛṇu mahādevi sarvadevabahiṣkṛtān |

adhamān pāpacittāṃśca pañcatattvavinindakān || 50 ||

kecicchāgopamā devi kecinmeṣopamā iha |

kecit kharopamā bhraṣṭāḥ kecicca śūkaropamāḥ || 51 ||

ityādyāḥ paśavo devi jñeyā duṣṭā narādhamāḥ |

eṣāṃ devyārcanaṃ siddhirgaṇanaṃ vā kuto bhavet || 52 ||

ato hi paśavaśchedyā bhedyāḥ khādyāśca vīrakaiḥ |

varjitāḥ sarvathā bhadre paramārthabahiṣkṛtāḥ || 53 ||


śrīdevī uvāca


kiñcit tu kathitaṃ nātha sandehaḥ pracalīkṛtaḥ |

kṣudro hi paśubhāvaśca gadito yat svayaṃ sadā || 54 ||

arcitaṃ paśubhāvena varaṃ sādhāraṇaṃ vada |

devatā naiva jānāti tasmāt samarpitaṃ na hi || 55 ||

bhañja bhañjāśu sandehaṃ karuṇāsāgara prabho |

sūryo yathā samāhanti cāndhakāraṃ kṣaṇādapi || 56 ||


śrīśiva uvāca


bhadramuktaṃ tvayā vijñe tattvaṃ tu śṛṇu saṃskṛtam |

ya uktaḥ paśubhāvo hi kalau kastasya pālakaḥ || 57 ||

pañcatattvaṃ na gṛhṇāti tatra nindāṃ karoti na |

śivena gaditaṃ yat tu tat satyamiti bhāvayan || 58 ||

nindāyāḥ pātakaṃ vetti pāśavaḥ sa prakīrtitaḥ |

tasyācāraṃ vadāmyāśu śṛṇu saṃśayanāśakam || 59 ||

haviṣyaṃ bhakṣayennityaṃ tāmbūlaṃ na spṛśedapi |

ṛtusnātāṃ vinā nārīṃ kāmabhāvena hi spṛśet || 60 ||

parastriyaṃ kāmabhāvād dṛṣṭvā svarṇaṃ samutsṛjet |

saṃtyajenmatsyamāṃsāni pāśavo nityameva ca || 61 ||

gandhamālyāni vastrāṇi cīrāṇi prabhajenna ca |

devālaye sadā tiṣṭhedāhārārthaṃ gṛhaṃ vrajet || 62 ||

kanyāputrādivātsalyaṃ kuryānnityaṃ samākulaḥ |

aiśvaryaṃ prārthayennaiva yadyasti tat tu na tyajet || 63 ||

sadā dānaṃ samākuryād yadi santi dhanāni ca |

kārpadrohān kṣipet sarvānahaṅkārādikāṃstataḥ || 64 ||

viśeṣeṇa mahādevi krodhaṃ saṃvarjayedapi |

kadācid dīkṣayennaiva pāśavaḥ parameśvari || 65 ||

satyaṃ satyaṃ punaḥ satyaṃ nānyathā vacanaṃ mama |

ajñānād yadi vā lobhānmantradānaṃ karoti ca || 66 ||

satyaṃ satyaṃ mahādevi devīśāpaḥ prajāyate |

ityādi bahudhā''cārāḥ kvacid brūmaḥ paśormataḥ || 67 ||

tathāpi ca na mokṣaḥ syāt siddhiścaiva kadācana |

yadi caṃkramaṇe śaktaḥ khaṅgadhāre sadā naraḥ || 68 ||

paśvācāraṃ sadā kuryāt kintu siddhirna jāyate |

jambūdvīpe kalua devi brāhmaṇo hi kadācana || 69 ||

paśurna syāt paśurna syāt paśurna syāt śivājñayā |

satye krameccaturvargaiḥ kṣīrājyamadhupiṣṭakaiḥ || 70 ||

tretāyāṃ pūjitā devī ghṛtena sarvajātibhiḥ |

madhubhiḥ sarvavarṇaiśca pūjitā dvāpare yuge || 71 ||

pūjanīyā kalau devī kevalairāsavaiḥ śavaiḥ |

nānukalpaḥ kalau durge nānukalpaḥ kalau yuge || 72 ||

nānukalpo brāhmaṇānāṃ śūdrādīnāṃ kalau yuge |

na sandeho na sandeho na sandehaḥ kalau yuge || 73 ||

satyametat satyametat satyametacchivoditam |

sadguroḥ śaraṇaṃ nītvā kulācāraṃ bhajennaraḥ || 74 ||

divyatvaṃ labhate kiṃ vā vīratvaṃ labhate śubhe |

asādhyaṃ sādhayed divyo'pyanāyāsena yad bhuvi || 75 ||

vīrastaṃ kleśato devi prāpnotīha na cānyathā |

paśuḥ kalpaśatairvāpi sādhituṃ na ca tatkṣamaḥ || 76 ||

laṅghituṃ naiva śaknoti yathā paṅgurgiriṃ kvacit |

atiguhyamidaṃ proktaṃ rahasyaṃ tvayi sundari |

gopanīyaṃ gopanīyaṃ gopanīyaṃ sadā'naghe || 77 ||


|| iti śrīkāmākhyātantre devīśvarasaṃvāde caturthaḥ paṭalaḥ || 4 ||



atha pañcamaḥ paṭalaḥ

śrīdevī uvāca


kasyā devyāḥ sādhakānāmekāntanindanaṃ mahat |

na kṛtvā pañcatattvaiśca pūjanaṃ parameśvara || 1 ||


śrīśiva uvāca


kalau tu sarvaśāktānāṃ brāhmaṇānāṃ viśeṣataḥ |

pañcatattvavihīnānāṃ nindanaṃ parameśvari || 2 ||

tanmadhye kālikā tārā sādhakānāṃ kuleśvari |

madhyaṃ vinā sādhanaṃ ca mahāhāsyāya kalpate || 3 ||

yathā dīkṣāṃ vinā devi sādhanaṃ hāsyameva hi |

tathānayoḥ sādhakānāṃ jñeyaṃ tattvaṃ vinā sadā || 4 ||

śilāyāṃ sasyavāpaiśca na bhavedaṅkuro yathā |

anāvṛṣṭyā kṣitau devi karṣaṇaṃ ca yathā na hi || 5 ||

ṛtuṃ vinā striyāṃ devi kuto'patyaṃ prajāyate |

gamanaṃ ca vinā kvāpi grāmaprāptiryathā na ca || 6 ||

ato devyāḥ sādhaneṣu pañcatattvaṃ sadā labhet |

pañcatattvaiḥ sādhakendrāvarcayed vidhinā mudā || 7 ||

madyairmāṃsaistathā matsyairmudrābhirmaithunairapi |

strībhiḥ sārddhaṃ sadā sādhurarcayejjagadambikām || 8 ||

anyathā ca mahānindā gīyate paṇḍitaiḥ suraiḥ |

kāyena manasā vācā tasmāt tattvaparo bhavet || 9 ||

kālikātāriṇīdīkṣāṃ gṛhītvā madyalehanam |

na karoti naro yastu sa kalau patito bhavet || 10 ||

vaidikīṃ tāntrikīṃ sandhyāṃ japeddhomabahiṣkṛtaḥ |

abrāhmaṇaḥ sa evoktaḥ sa eva hastimūrkhakaḥ || 11 ||

śūnīmūtrasamaṃ tasya tarpaṇaṃ yat pitṛṣvapi |

ato na tarpayet so'pi yadīcchedātmano hitam || 12 ||

kālītārāmanuṃ prāpya vīrācaraṃ karoti na |

śūdratvaṃ taccharīre tu prāptaṃ tena na cānyathā || 13 ||

kṣatriyo'pi tathā devi vaiśyaścāṇḍālatāṃ vrajet |

śūdro hi śūkaratvaṃ ca yāti yāti na saṃśayaḥ || 14 ||

avaśyaṃ brāhmaṇo nityaṃ rājā vaiśyaśca śūdrakaḥ |

pañcatattvairbhajed devīṃ na kuryāt saṃśayaṃ kvacit || 15 ||

pañcatattvaiḥ kalau devi pūjayed yaḥ kuleśvarīm |

tasyāsādhyaṃ tribhuvane na kiñcidapi vidyate || 16 ||

sa brāhmaṇo vaiṣṇavaḥ sa śākto gāṇapato'pi ca |

sauraḥ sa paramārthī ca sa eva pūrṇadīkṣitaḥ || 17 ||

sa eva dhārmikaḥ sādhurjñānī caiva mahākṛtī |

yājñikaḥ sarvakarmārhaḥ sa hi devo na cānyathā || 18 ||

pāvanānīha tīrthāni sarveṣāmiti sammatam |

tīrthānāṃ pāvanaḥ kaulo girije bahu kiṃ vacaḥ || 19 ||

asyaiva jananī dhanyā dhanyā hi janakādayaḥ |

dhanyā jātikuṭumbāśca dhanyā ālāpino janāḥ || 20 ||

nṛtyanti pitaraḥ sarve gāthāṃ gāyanti te mudā |

api kaścit kule'smākaṃ kulajñānī bhaviṣyati || 21 ||

tadā yogyā bhaviṣyāmaḥ kulīnānāṃ sabhātale |

samāgantumiti jñātvā sūtsukāḥ pitaraḥ pare || 22 ||

kulācārasya māhātmyaṃ kiṃ brūmaḥ parameśvari |

pañcavaktreṇa deveśi sanātanyāḥ phalāni ca || 23 ||


śrīdevī uvāca


sādhanaṃ vada kauleśa sādhakānāṃ sukhāvaham |

divyaṃ ramyaṃ manohāri sarvābhīṣṭaphalapradam || 24 ||


śrīśiva uvāca


śṛṇu kāmakalākānte sādhanaṃ tu sukhāvaham |

yat kañcid gaditaṃ pūrvaṃ vistṛtaṃ tad vadāmyaham || 25 ||

atisulalitadivyaṃ sthānamālokyaṃ bhaktyā
	hṛdi ca paramadevīṃ saṃvibhāvaikacittaḥ |
madhurakusumagandhairvyāptamāhṛtya sādhu -
	stadupari khalu tiṣṭhet sādhanārthī kulajñaḥ || 26 ||

jayavati yatamānaḥ śabdapuṣpaṃ kṣipet tat
	sa khalu karakabījānyatra durge tato hi |
cirabhavabakapuṣpaṃ varjayitvā'rcayitvā
yadi japati vidhijñastatkṣaṇāt so'pyahaṃ ca || 27 ||

upavanapariyukte śuddharamyālaye yo
	vidhikṛtabaraliṅgaṃ lepayitvā sugandhaiḥ |
vividhakusumadhūpairdhūpayitvā latāṃ
	saṃprati japati subhaktyā tvatsutojāyate saḥ || 28 ||

acalaśikharamadhye śīghramālambayitvā
	kanakakusumasārdhaṃ śabdapuṣpaṃ nivedya |
kṛtabahuvidhipūjāḥ svaṃ guruṃ bhāvayitvā
	japati yadi vilāsī viṣṇureva svayaṃ saḥ || 29 ||

paricarati sa sādhuḥ siddhavargaḥ saśaṅkaḥ
	paravadhūlatānāṃ vaktrapadmopabhogī |
jayati bhuvanamadhye nirjaraścāmaro'pi
	vrajati tamanu nityaṃ sārvabhaumo nṛṇāṃ saḥ || 30 ||

abhinavaśubhanīraṃ raktapadmaprakīrṇaṃ
	vividhakamalaramyaṃ bhraṣṭamīnaprayuktam |
aparavihitavastu vyāptamīśeśvaro'pi
	vigatajanasamūhe prāpya devi prakoṇe || 31 ||

ghanajanitasuśobhe vidyudādīptiramye
	hṛdi ca paramadevīṃ cintayitvā subhaktyā |
vidhivihitavidhānaiḥ snānapūjāṃ samāpya
	pratijapati niśāyāṃ gahvare brahma kaḥ syāt || 32 ||

iha ca guruvarājñāṃ prāpya śīrṣe nidhāya
	tvayi bhajati kulajño bhāvabhedāt kuleśi |
suragururiha ko vā kopi candro dineśo
	vrajati bhuvanamadhye dikpatitvaṃ ca ko'pi || 33 ||

iti ca paramadevyāḥ sādhanaṃ yanmayoktaṃ
	yadi paṭhati subhavyo gadgado vāsanābhiḥ |
abhimataphalasiddhiḥ sarvalokairvareṇyo
	bhavati bhuvanamadhye putradārairyuto'pi || 34 ||

acaladhanasamūhastasya bhoge vaset tu
	pratidinamabhipūjā devatāyā gṛhe ca |
parijanagaṇaśaktiḥ sarvadā tatra tiṣṭhet
	sadasi vasati rājñaḥ sādaraḥ so'pi vandyaḥ || 35 ||

iti śrīkāmākhyātantre pārvatīśvarasaṃvāde 
pañcamaḥ paṭalaḥ || 5 ||



atha ṣṣṭhaḥ paṭalaḥ


śrīdevī uvāca


śrutaṃ rahasyaṃ deveśa kāmākhyāyā maheśvara |

mahāśatruvināśāya sādhanaṃ kiṃ vada prabho || 1 ||


śrīśiva uvāca


atiguhyataraṃ devi tava snehād vitanyate |

mahādhīraḥ sādhakendraḥ prayogaṃ tu samācaret || 2 ||

pūjayitvā mahādevīṃ pañcatattvena sādhayet |

mahānandamayo bhūtvā sādhayet sādhanaṃ mahat || 3 ||

svamūtraṃ tu samādāya kūrcabījena śodhayet |

tarpayed bhairavīṃ ghorāṃ sakalaṃ vā pibet svayam || 4 ||

daśa dikṣu mahāpīṭhe prakṣipedānane'pi ca |

nagno bhūtvā ramet tatra śatrunāśo bhaved dhruvam || 5 ||

śukraśoṇitamūtreṣu vīro yadi ghṛṇī bhavet |

bhairavī kupitā tasya satyaṃ satyaṃ vadāmyaham || 6 ||

dṛṣṭvā śrutvā maheśāni nindāṃ karoti yo naraḥ |

sahasā narakaṃ yāti yāvaccandradivākarau || 7 ||

vīrācāraṃ maheśāni na nindenmanasāpi ca |

vīro yastu mahādevi svecchācārī sadā śuciḥ || 8 ||

mṛtpātraṃ tu samādāya sādhyanāma likhecchive |

vāyunā pūritaṃ kṛtvā svamūtraṃ tatra nikṣipet || 9 ||

māyābījaṃ maheśāni aṣṭottaraśataṃ japet |

bhairavyai darśayed devi māraṇoccāṭanaṃ bhavet || 10 ||

svamūtraṃ ca samādāya vāmahastena śaṅkari |

śodhitvā bhairavīgātre niḥkṣipet sādhakottamaḥ || 11 ||

unmādo jāyate śatrormriyate vā maheśvari |

mohitaḥ kṣobhito vāpi vaśyo vāpi bhaved dhruvam || 12 ||

mūtrasādhanamātreṇa sahasrākṣasamaṃ ripum |

nāśayet sādhako vīro nātra kāryā vicāraṇā || 13 ||


śrīdevī uvāca


śukraśoṇitamūtrāṇi śuddhānīha kathaṃ prabho |


śrīśiva uvāca


śṛṇu devi rahasyaṃ ca mahājñānaṃ vadāmyaham |

śukro'haṃ śoṇitastvaṃ hi dvayorevākhilaṃ jagat || 14 ||

śuddhaṃ sarvaśarīraṃ tu śukraśoṇitajaṃ tataḥ |

evaṃ bhūtaśarīre tu yad yad vastu prajāyate || 15 ||

aśuddhaṃ tu kathaṃ devi pāmaro nindati dhruvam |

brahmajñānamidaṃ devi mayā te gaditaṃ kila || 16 ||

ataḥ śuddhaṃ jagat sarvaṃ svakāyasthe tu kā kathā |

brahmajñānaṃ vinā devi na ca mokṣaḥ prajāyate || 17 ||

brahmajñānī śivaḥ sākṣād viṣṇurbrahmā ca pārvati |

śarīro dīkṣitaḥ śuddho brāhmaṇo vedapāragaḥ |

kroḍe tasya vasantīha sarvatīrthāni niścitam || 18 ||

|| iti śrīkāmākhyātantre pārvatīsaṃvāde 
ṣaṣṭhaḥ paṭalaḥ || 6 ||



atha saptamaḥ paṭalaḥ

śrīdevī uvāca


mahādeva jagadbandho karuṇāsāgara prabho |

pūrṇābhiṣekaṃ kaulānāṃ vada me sukhamokṣadam || 1 ||


śrīśiva uvāca


śṛṇu devi mahāprāṇavallabhe paramādbhutam |

pūrṇābhiṣekaṃ sarvāśāpūrakaṃ śivatāpradam || 2 ||

āgatya sadguruḥ siddho mantratantraviśāradaḥ |

kaulaḥ sarvajanakhyātaścābhiṣekavidhiṃ caret || 3 ||

atiguptālaye śuddhe ramye kaulikasammate |

veśyāṅganāḥ samānīya tattvāni ca sayatnataḥ || 4 ||

viśiṣṭakaulikān bhaktyā tatraiva sanniveśayet |

arcayedabhiṣekārthaṃ guruṃ vastrādibhūṣaṇaiḥ || 5 ||

praṇamed vidhivad bhaktyā toṣayet stutivākyataḥ |

prārthayecchuddhabhāvena kuladharmaṃ vadeti ca || 6 ||

kṛtārthaṃ kuru māṃ nātha śrīguro karuṇānidhe |

abhiṣiñca sādhakañca sevārthaṃ śaraṇaṃ gatam || 7 ||

tato'bhiṣicya ? tattvāni śodhayecchuktimān mudā |

sthāpayitvā puraḥ kumbhaṃ mantramudrādibhiḥ priye || 8 ||

vitānairdhūpadīpānāṃ kṛtvā cāmoditaṃ sthalam |

nānāpuṣpaistathā gandhaiḥ sarvopakaraṇairyajet || 9 ||

samāpya mahatīṃ pūjāṃ tattvāni sannivedya ca |

ādau strībhyaḥ samarpyaiva prasādālpaṃ bhajet tataḥ || 10 ||

śubhacakraṃ vinirmāya āgamoktavidhānataḥ |

abhiṣektā sādhakāṃśca pāyayet tu svayaṃ pibet || 11 ||

bhuñjīran matsyamāṃsādyaiścarvyacoṣyādibhiśca te |

rameran paramānandairveśyāyāṃ ca yathāsukham || 12 ||

vadeyuḥ karmakartuśca siddhirbhavatu niścalā |

abhiṣecanakarmāśu nirvighnaṃ ceti niścitam || 13 ||

cakrālayānniḥsarenna jana eko'pi śaṅkari |

prātaḥkṛtyādikarmāṇi kuryāt tatraiva sādhakaḥ || 14 ||

dināni trīṇi saṃvyāpya bhaktyā tāṃstu samarcayet |

śiṣyaścādau divārātramabhiṣikto bhavet tataḥ || 15 ||

anuṣthānavidhiṃ vakṣye sādaraṃ śṛṇu pārvati |

na prakāṇḍaṃ na hi kṣudraṃ pramāṇaṃ ghaṭamāharet || 16 ||

tāmreṇa nirmitaṃ vāpi svarṇena nirmitaṃ ca vā |

pravālaṃ hīrakaṃ muktāṃ svarṇaraupye tathaiva ca || 17 ||

nānālaṅkāravastrāṇi nānādravyāṇi bhūriśaḥ |

kastūrīkuṅkumādīni nānāgandhāni cāharet || 18 ||

nānāpuṣpāṇi mālyāni pañcatattvāni yatnataḥ |

vihitān dhūpadīpāṃśca ghṛtena parameśvari || 19 ||

tataḥ śiṣyaṃ samānīya guruḥ śuddhālaye priye |

veśyābhiḥ sādhakaiḥ sārdhaṃ pūjanaṃ ca samācaret || 20 ||

paṭaloktavidhānena bhaktitaḥ paripūjayet |

pūjāṃ samāpya devyāstu stavaistu praṇamenmudā || 21 ||

tato hi śivaśaktibhyo gandhamālyāni dāpayet |

āsanaṃ vastrabhūṣāṃ ca pratyekena kuleśvari || 22 ||

tataḥ śaṅkhādivādyaiśca maṅgalācaraṇaiḥ paraiḥ |

ghaṭasthāpanakaṃ kuryāt kramaṃ tatra śṛṇu priye || 23 ||

kāmabījena saṃprokṣya vāgbhavenaiva śodhayet |

śaktyākalaśamāropya māyayā pūrayejjalaiḥ || 24 ||

pravālādīn pañcaratnān vinyaset tatra yatnataḥ |

āvāhayecca tīrthāni mantreṇānena deśikaḥ || 25 ||

oṃ gaṅgādyāḥ saritaḥ sarvāḥ samudrāśca sarāṃsi ca |

sarve samudrāḥ saritaḥ sarāṃsi jaladā nadāḥ || 26 ||

hṛdāḥ prasravaṇāḥ puṇyāḥ svargapātālabhūgatāḥ |

sarvatīrthāni puṇyāni ghaṭe kurvantu sannidhim || 27 ||

ramābījena japtena pallavaṃ pratipādayet |

kūrcena phaladānaṃ syād gandhavastrahṛdātmanā || 28 ||

lalanayaiva sindūraṃ puṣpaṃ dadyāt tu kāmataḥ |

mūlena dūrvāṃ praṇavaiḥ kuryādabhyukṣaṇaṃ tataḥ || 29 ||

huṃ phaṭ svāheti mantreṇa kuryād darbhaiśca tāḍanam |

vicintya mūlapīṭhaṃ tu tatra saṃyojya pūjayet || 30 ||

svatantroktavidhānena prārthayedamunā budhaiḥ |

tadghaṭe hastamāropya śiṣyaṃ paśyan guruśca saḥ || 31 ||

uttiṣṭha brahmakalaśa devatābhīṣṭadāyaka |

sarvatīrthāmbusaṃpūrṇa pūrayāsya manoratham || 32 ||

abhiṣiñcet guruḥ śiṣyaṃ tato mantraiśca pārvati |

maṅgalairnikhilairdravyaiḥ sādhakaiḥ śaktibhiḥ saha || 33 ||

pallavairāmrakādyaiśca natimacchiṣyameva ca |

ānandaiḥ parameśāni bhaktānāṃ hitakāriṇī || 34 ||

asyābhiṣekamantrasya dakṣiṇāmūrtiḥ ṛṣiḥ, anuṣṭuṣ
chandaḥ, śaktirdevatā, amukasya sarvasaṅkalpasiddhaye viniyogaḥ |

oṃ rājarājeśvarīśaktirbhairavī kālabhairavī 

śmaśānabhairavī devī tripurānandabhairavī || 35 ||

trikuṭā tripurā devī tathā tripurasundarī |

tripureśī mahādevī tathā triṣuramālikā || 36 ||

tripurānandinī devī tathaiva tripurātanī |

etāstvāmabhiṣiñcantu mantrapūtena vāriṇā || 37 ||

chinnamastā mahādevī tathaivaikajaṭeśvarī |

tārā ca jayadurgā ca śūlinī bhuvaneśvarī || 38 ||

tvaritākhyā mahādevī tathaiva ca trikhaṇḍikā |

nityā ca nityarūpā ca vajraprastāriṇī tathā || 39 ||

etāstvāmabhiṣiñcantu mantrapūtena vāriṇā |

aśvārūḍhā maheśāni tathā mahiṣamardinī || 40 ||

durgā ca navadurgā ca śrīdurgā bhagamālinī |

tathā bhagandarī devī bhagaklinnā tathā parā || 41 ||

sarvacakreśvarī devī tathā nīlasarasvatī |

sarvasiddhikarī devī siddhagandharvasevitā || 42 ||

ugratārā mahādevī tathā ca bhadrakālikā |

etāstvāmabhiṣiñcantu mantrapūtena vāriṇā || 43 ||

kṣemaṅkarī mahāmāyā cāniruddhasarasvatī |

mātaṅginī cānnapūrṇā rājarājeśvarī tathā || 44 ||

etāstvāmabhiṣiñcantu mantrapūtena vāriṇā |

ugracaṇḍā pracaṇḍā ca caṇḍogrā caṇḍanāyikā || 45 ||

caṇḍā caṇḍavatī caiva caṇḍarūpā'ticaṇḍikā |

etāstvāmamiṣiñcantu mantrapūtena vāriṇā || 46 ||

ugradaṃṣṭrā mahādaṃṣtrā śubhadaṃṣṭrā kapālinī |

bhīmanetrā viśālākṣī maṅgalā vijayā jayā || 47 ||

etāstvāmabhiṣiñcantu mantrapūtena vāriṇā |

maṅgalā nandinī bhadrā lakṣmīḥ kīrtiryaśasvinī || 48 ||

puṣṭirmedhā śivā sādhvī yaśā śobhā jayā dhṛtiḥ |

śrīnandā ca sunandā ca nandinī nandapūjitā || 49 ||

etāstvāmabhiṣiñcantu mantapūtena vāriṇā |

vijayā maṅgalā bhadrā dhṛtiḥ śāntiḥ śivā kṣamā || 50 ||

siddhistuṣṭirumā puṣṭiḥ śrī ṛddhiśca ratistathā |

dīptā kāntiryaśolakṣmīrīśvarī buddhireva ca || 51 ||

cakrī jayāvatī brāhmī jayantī cā'parājitā |

ajitā mānavī śvetā ditiścā'ditireva ca || 52 ||

māyā caiva mahāmāyā mohinī kṣobhiṇī tathā |

kamalā vimalā gaurī śaraṇyambudhisundarī || 53 ||

durgā kriyā'rundhatī ca ghaṇṭākarṇā kapālinī |

raudrī kālī ca māyūrī trinetrā cā'parājitā || 54 ||

surūpā bahurūpā ca tathaiva vigrahātmikā |

carcikā cāparā jñeyā tathaiva surapūjitā || 55 ||

vaivasvatī ca kaumārī tathā māheśvarī parā |

vaiṣṇavī ca mahālakṣmīḥ kārtikī kauṣikī tathā || 56 ||

śivadūtī ca cāmuṇḍā muṇḍamālā vibhūṣitā |

etāstvāmabhiṣiñcantu mantrapūtena vāriṇā || 57 ||

indro'gniśca yamaścaiva ni-ṛtirvaruṇastathā |

pavano dhanadeśānau brahmā'nanto digīśvarāḥ || 58 ||

etāstvāmabhiṣiñcantu mantrapūtena vāriṇā |

saṃvatsaraścāyanau ca māsāḥ pakṣau dināni ca || 59 ||

tithayaścā'bhiṣiñcantu mantrapūtena vāriṇā |

raviḥ somaḥ kujaḥ saumyo guruḥ śukraḥ śanaiścaraḥ |

rāhuḥ ketuśca satatamabhiṣiñcantu te grahāḥ || 60 ||

nakṣatraṃ karaṇaṃ yogo'mṛtaṃ siddhistataḥ param |

dagdhaṃ pāpaṃ tathā bhadrā yogā vārāḥ kṣaṇāstathā || 61 ||

vāravelā kālavelā daṇḍarāśyādayastathā |

abhiṣiñcantu satataṃ mantrapūtena vāriṇā || 62 ||

asitāṅgo ruruścaṇḍaḥ krodha unmattasaṃjñakaḥ |

kapālī bhīṣaṇākhyaśca saṃhāro'ṣṭau ca bhairavāḥ || 63 ||

abhiṣiñcantu satataṃ mantrapūtena vāriṇā |

ḍākinīputrakāścaiva rākiṇīputrakāstathā || 64 ||

lākinīputrakāścānye kākinīputrakāḥ pare |

śākinīputrakā bhūyo hākinīputrakāstathā || 65 ||

tataśca dakṣiṇīputrā devīputrāstataḥ param |

mātṝṇāṃ ca tathā putrā ūrdhvamukhyāḥ sutāśca vai || 66 ||

adhomukhyā sutāścaiva unmukhyāśca sutāḥ pare |

abhiṣiñcantu te sarve mantrapūtena vāriṇā || 67 ||

brahmā viṣṇuśca rudraśca īśvaraśca sadāśivaḥ |

ete tvāmabhiṣiñcantu mantrapūtena vāriṇā || 68 ||

puruṣaḥ prakṛtiścaiva vikārāścaiva ṣoḍaśa |

ātmā'ntarātmā paramajñānātmānaḥ prakīrtitāḥ || 69 ||

ātmanaśca guṇāścaiva sthūlāḥ sūkṣmāśca ye'pare |

ete tvāmabhiṣiñcantu mantrapūtena vāriṇā || 70 ||

vedādibījaṃ huṃbījaṃ strībījaṃ mīnaketanam |

śaktibījaṃ ramābījaṃ māyābījaṃ sudhākaram || 71 ||

cintāmaṇirmahābījaṃ nārasiṃhaṃ ca śāṅkaram |

mārtaṇḍabhairavaṃ daurgaṃ bījaṃ śrīpuruṣottamam || 72 ||

gāṇapatyaṃ ca vārāhaṃ kālībījaṃ bhayāpaham |

etāni cābhiṣiñcantu mantrapūtena vāriṇā || 73 ||

gaṅgā godāvarī revā yamunā ca sarvasvatī |

ātreyī bhāratī caiva sarayūrgaṇḍakī tathā || 74 ||

karatoyā candrabhāgā śvetagaṅgā ca kauśikī |

bhogavatī ca pātāle svarge mandākinī tathā || 75 ||

etāstvāmabhiṣiñcantu mantrapūtena vāriṇā |

bhairavo bhīmarūpaśca śoṇo gharghara eva ca || 76 ||

sindhuścaiva hṛdaścaiva tathā pātālasambhavāḥ |

ete tvāmabhiṣiñcantu mantrapūtena vāriṇā || 77 ||

yāni kāni ca tīrthāni puṇyānyāyatanāni ca |

tāni tvāmabhiṣiñcantu mantrapūtena vāriṇā || 78 ||

matiśca vallabhā vahnervaṣaṭkūrcamataḥ param |

vauṣaṭkāraṃ tu phaṭkāramabhiṣiñcantu sarvadā || 79 ||

jambudvīpādayo dvīpāḥ sāgarā lavaṇādayaḥ |

anantādyāstathā nāgāḥ sarpā ye takṣakādayaḥ || 80 ||

ete tvāmabhiṣiñcantu mantrapūtena vāriṇā |

naśyantu pretakūṣmāṇḍā rākṣasā dānavāśca ye || 81 ||

piśācā guhyakā bhūtā abhiṣekeṇa tāḍitāḥ |

alakṣmīḥ kālakarṇī ca pāpāni ca mahānti ca || 82 ||

naśyantu cābhiṣekeṇa tārābījena tāḍitāḥ |

rogāḥ śokāśca dāridryaṃdaurbalyaṃ cittavikriyā || 83 ||

naśyantu cābhiṣekeṇa vāgbījenaiva tāḍitāḥ |

tejohrāso balahrāso buddhihrāsastathaiva ca || 84 ||

naśyantu cābhiṣekeṇa śaktibījena tāḍitāḥ |

viṣā'pamṛtyurogāśca ḍākinyādibhayaṃ tathā || 85 ||

ghorābhicārāḥ krūrāśca grahā nāgāstathā pare |

naśyantu cābhiṣekeṇa kālībījena tāṭitāḥ || 86 ||

naśyantu vipadaḥ sarvāḥ sampadaḥ santu susthirāḥ |

abhiṣekeṇa śāktena pūrṇāḥ santu manorathāḥ || 87 ||

tato guruḥ prāptamantraṃ dīkṣayet punareva hi |

tadā siddhirbhavet satyaṃ nānyathā vacanaṃ mama || 88 ||

tato devīṃ guruṃ caiva praṇamed bahudhā mudā |

dakṣiṇāṃ gurave dadyāt svarṇakāñcanamānataḥ || 89 ||

nānāvastrairalaṅkārairgandhamālyādibhistathā |

toṣayet stutivākyaiśca praṇamet punareva hi || 90 ||

kāyena manasā vācā guruḥ kuryāt tathāśiṣaḥ |

vātsalyairvividhaiḥ śiṣyaṃ grāhayet tattvamuttamam || 91 ||

guruśca bhairavaiḥ sārdhaṃ śaktibhirviharenmudā |

bhairavāḥ śaktayaścāpi kuryurāśīḥ suyatnataḥ || 92 ||

tathā tridivasaṃ vyāpya bhojayed bhairavān budhaḥ |

aṣṭame divase śiṣyaṃ punaḥ kuryāt tu secanam || 93 ||

tāmrapātrodakairdevi vidyāṃ rājñāṃ japan sudhīḥ |

kundukāṃśca tathā saptasampattihetave priye || 94 ||

śaktibhyo bhairavebhyo'pi tato vastrādibhūṣaṇam |

dadyāt prayatnataḥ sādhurviddhi devi samāpanam || 95 ||


śrīdevī uvāca


śrutaṃ rahasyaṃ deveśa cābhiṣecanakarmaṇi |

guruḥ kaulādhikārī syādatra tanme vada prabho || 96 ||


śrīśiva uvāca


mahājñānī kaulikendraḥ śuddho guruparāyaṇaḥ |

nigrahānugrahe śaktaḥ śiṣyapālanatatparaḥ || 97 ||

putradārādibhiryuktaḥ sajjanastu prapūjitaḥ |

śraddhāvānāgame nityaṃ so'dhikartā na cānyathā || 98 ||

andhaṃ khañjaṃ tathā rugṇaṃ svalpajñānayutaṃ punaḥ |

sāmānyakaulaṃ varade varjayenmatimān sadā || 99 ||

udāsīnaṃ viśeṣeṇa varjayet siddhikāmukaḥ |

udāsīnamukhād dīkṣā vandhyā nārī yathā priye || 100 ||

ajñānād yadi vā mohādudāsīnaṃ tu pāmaraḥ |

abhiṣikto bhaved devi vighnastasya pade pade || 101 ||

kiṃ tasya japapūjābhiḥ kiṃ dhyānaiḥ kiṃ ca bhaktitaḥ |

sarvaṃ hi viphalaṃ tasya narakaṃ yāti cāntime || 102 ||

kalpakoṭiśataṃ devi bhuṅkte sa narakaṃ sadā |

tato hi bahujanmabhyo devīmantramavāpnuyāt || 103 ||

tato hi vihitaṃ śuddhaṃ gṛhasthaṃ gurumālabhet |

abhiṣecanakarmāṇi punaḥ kuryāt prayatnataḥ || 104 ||

saphalaṃ hi sadā karma sarvaṃ tasya bhaved dhruvam |

vidyāpi jananī tulyā pātitaṃ satataṃ priye || 105 ||

yathā paśuṃ parityajya kaulikaṃ gurumālabhet |

udāsīnaṃ parityajya tathā'bhiṣecanaṃ śatam || 106 ||

abhiṣiktaḥ śivaḥ sākṣādabhiṣikto hi dīkṣitaḥ |

sa eva brāhmaṇo dhanyo devīdevaparāyaṇaḥ || 107 ||

tasyaiva saphalaṃ janma dharaṇyāṃ śṛṇu pārvati |

tasyaiva saphalaṃ karma tasyaiva saphalaṃ dhanam || 108 ||

tasyaiva saphalo dharmaḥ kāmaśca saphalo manuḥ |

dīkṣā hi saphalā devi kriyā ca saphalā tanuḥ || 109 ||

sarvaṃ hi saphalaṃ tasya girije bahu kiṃ vacaḥ |

yatra deśe vaset sādhuḥ so'pi vārāṇasīsamaḥ || 110 ||

tasya kroḍe vasantīha sarvatīrthāni niścitam |

satyaṃ satyaṃ mahāmāye punaḥ satyaṃ mayoditam || 111 ||

uktāni yāni yānīha secanāni ca pārvati |

sarvatantreṣu tānyasya kalāṃ nārhanti ṣoḍaśīm || 112 ||

yogyaṃ guruṃ tathā śiṣyaṃ vinaitat paṭalaṃ na hi |

jāyate devadeveśi satyaṃ satyaṃ mayoditam || 113 ||

idaṃ tu secanaṃ devi triṣu lokeṣu durlabham |

gaṇeśaḥ pātramatraiva kārttikeyo'pi pārvati || 114 ||

mama tulyo brahmatulyo viṣṇutulyo'tra bhājanam |

pañcavaktraiśca śakto na varṇituṃ parameśvari || 115 ||

iti te kathitaṃ guptaṃ secanaṃ paramaṃ mahat |

gopanīyaṃ gopanīyaṃ gopanīyaṃ prayatnataḥ || 116 ||

yathā ratirgopanīyā tathābhiṣecanaṃ param |

nikhāte dhanamāgatya gopayet tu yathā naraḥ ||

tathaiva tu mahāmāye gopanīyaṃ mamājñayā || 117 ||

|| iti śrīkāmākhyātantre pārvatīśvarasaṃvāde saptamaḥ paṭalaḥ || 7 ||



atha aṣṭamaḥ paṭalaḥ


śrīdevī uvāca


muktitattvaṃ mahādeva vada me karuṇānidhe |

yasmin ṣaḍdarśanānīha copahāsyagatāni ca || 1 ||


śrīśiva uvāca


śṛṇu devi śubhe vijñe yat pṛṣṭaṃ tattvamuttamam |

etanmarma ca deveśi ahaṃ vedmi tathā hariḥ || 2 ||

modakena yathā lokaḥ pratārayati bālakān |

laguḍena yathā devi badhnāti durjanaṃ nṛpaḥ || 3 ||

tathānaṅgīkṛto loke darśanairbarbaro mayā |

durjane yadi muktiḥ syācchaṅkīyati śubhānane || 4 ||

ṣaḍdarśanamahākūpe patitāḥ paśavaḥ priye |

paramārthaṃ na jānanti darvīpākarasaṃ yathā || 5 ||

na sāraḥ kadalīvṛkṣe nairaṇḍe tu śubhānane |

darśaneṣu tathā muktirnāsti devi mayoditam || 6 ||

yathā marīcikāyāstu nirvartante punarmṛgāḥ |

darśanebhyo nivartante tathā mumukṣavaḥ punaḥ || 7 ||

śrīgurośca prasādena muktimādau sadā labhet |

vicaret sarvaśāstreṣu kautukāya tataḥ sudhīḥ || 8 ||

muktitattvaṃ pravakṣyāmi sādaraṃ śṛṇu pārvati |

śarīradhāraṇaṃ yasya kurvantīha punaḥ punaḥ || 9 ||

ādāvanugraho devyāḥ śrīgurostadanantaram |

tadānanāt tato dīrghā bhaktistasyāḥ prajāyate || 10 ||

tato hi sādhanaṃ śuddhaṃ tasmājjñānaṃ sunirmalam |

jñānānmokṣo bhavet satyamiti śāstrasya nirṇayaḥ || 11 ||

muktiścaturvidhā proktā sālokyaṃ tu śubhānane |

sārūpyaṃ sahayojyaṃ ca nirvāṇaṃ hi parāt param || 12 ||

sālokyaṃ vasatirloke sārūpyaṃ tu svarūpatā |

sāyujyaṃ kalayā yuktaṃ nirvāṇaṃ tu manolayaḥ || 13 ||


śrīdevī uvāca


samyag layo janasyaiva nirvāṇaṃ yat tu kathyate |

tat kiṃ vada mahādeva saṃśayaṃ layasāt kuru || 14 ||


śrīśiva uvāca


vyaktirlayātmikā muktirasurāṇāṃ dayānidhe |

durjanatvāllopayitvā krīḍayāmi surānaham || 15 ||

manolayātmikā muktiriti jānīhi śaṅkari |

prāptā mayā viṣṇunā ca brahmaṇā nāradādibhiḥ || 16 ||

sālokī kevalaṃ yat tu yāti sāropyayuk dvayam |

tridhā sāyojyavāneti nirvāṇī sarvameva hi || 17 ||

nīlotpaladalaśyāmā muktirdvidalavartinī |

muktasyaiva sadā sphītā sphuratyavirataṃ priye || 18 ||

sanātanī jagadvandyā saccidānandarūpiṇī |

parā ca jananī saiva sarvābhīṣṭapradāyinī || 19 ||

iṣṭe niścalasambandhaḥ sa ca nirvāṇamīrtitam |

muktijñānaṃ kulajñānaṃ nānyajñānaṃ kuleśvari || 20 ||

sādhūnāṃ deva deveśi sarveṣāṃ viddhi niścitam |

svarge martye ca pātāle ye ye muktā bhavanti hi || 21 ||

babhūvuśca bhaviṣyanti sarveṣāṃ muktirīdṛśī |

tathā ca sādhanaṃ jñeyaṃ pañcatattvaiśca muktidam || 22 ||

anugrahastu devyā yaḥ kulamārgapradarśakaḥ |

dīkṣā kulātmikā devi śrīgurormukhapaṅkajāt || 23 ||

kuladravyeṣu yā bhaktiḥ sā mokṣadāyinī matā |

jñātvā caivaṃ prayatnena kulajñānaṃ bhajed budhaḥ || 24 ||

yadi bhāgyavaśād devi mantrametat tu labhyate |

mukteśca kāraṇaṃ tasyāḥ svayaṃ jñātaṃ na cānyathā || 25 ||

aśrutaṃ muktitattvaṃ hi kathitaṃ te maheśvari |

ātmayoniryathā devi tathā gopyaṃ mamājñayā || 26 ||

|| iti śrīkāmākhyātantre pārvatīśvarasaṃvāde aṣṭamaḥ paṭalaḥ ||



atha navamaḥ paṭalaḥ

śrīdevī uvāca


kāmākhyā yā mahādeva kathitā sarvarūpiṇī |

sā kā vada jagannātha kapaṭaṃ mā kuru prabho || 1 ||

kuryāstu kapaṭaṃ nātha yadi me śapathastvayi |

ratau kā kāminī yoniṃ samyak sandarśayet patim ||

śrutvaitad girijāvākyaṃ prahasyovāca śaṅkaraḥ || 2 ||


śrīśiva uvāca


śṛṇu devi mama prāṇavallabhe kathayāmi te |

yā devī kālikā mātā sarvavidyāsvarūpiṇī || 3 ||

kāmākhyā saiva vikhyātā satyaṃ satyaṃ na cānyathā |

saiva brahmeti jānīhi saṃjñārthaṃ darśanāni ca || 4 ||

vicaranti cotsukāni yathā candre cakorakāḥ |

asyā hi jāyate sarvaṃ jagadetaccarācaram || 5 ||

līyante punarasyāṃ ca sandehaṃ mā kuru priye |

sthūlā sūkṣmā parā devī saccidānandarūpiṇī || 6 ||

ameyavikramaśyāmā karuṇāsāgarā matā |

muktimayī jagaddhātrī sadānandamayī tathā || 7 ||

viśvambharī kriyāśaktistārā caiva sanatanī |

yathā karmasamāptau ca dakṣiṇā phalasiddhidā || 8 ||

tathā muktirasau devi sarveṣāṃ phaladāyinī |

ato hi dakṣiṇākālī kathyate varavarṇini || 9 ||

kṛṣṇavarṇā sadā kālī āgamasyeti nirṇayaḥ |

uktāni sarvatantrāṇi tantreṇānena niścitam || 10 ||

kṛtvā saṅkalpasiddhau tat kāmeṣu pāṭhayed budhaḥ |

paṭhitvā śrāvayed vāpi śṛṇoti pūjayed yadi || 11 ||

taṃ taṃ kāmamavāpnoti śrīmatkālīprasādataḥ |

yathāsparśamaṇirdevi tathaitat tantramuttamam || 12 ||

yathā kalpatarurdātā tathā jñeyaṃ manīṣibhiḥ |

yathā sarvāṇi ratnāni sāgare santi niścitam || 13 ||

tathā'tra siddhayaḥ sarvā bhuktirmuktirvarānane |

sarvadevāśayo meruryathā siddhaṃ tathā punaḥ || 14 ||

sarvavidyāyutaṃ tantraṃ śapathena vadāmyaham |

yasya gehe sthitaṃ devi tantrametad bhayāpaham || 15 ||

rogaśokapātakānāṃ leśo nāsti kadācana |

tatra dasyubhayaṃ nāsti graharājabhayaṃ na ca || 16 ||

na cotpātabhayaṃ tatra na ca mārībhayaṃ tathā |

na parājayameṣāṃ hi bhayaṃ devi mayoditam || 17 ||

bhūta - preta - piśācānāṃ dānavānāṃ ca rakṣasām |

na bhayaṃ kvāpi sarveṣāṃ vyāghrādīnāṃ tathaiva ca || 18 ||

kūṣmāṇḍānāṃ bhayaṃ naiva vahnyādīnāṃ bhayaṃ na ca |

vināyakānāṃ sarveṣāṃ gandharvāṇāṃ tathā na ca || 19 ||

svarge martye ca pātāle ye ye santi bhayānakāḥ |

hiṃsrā vighnakarāścaiva na teṣāṃ bhayamīśvari || 20 ||

yamadūtāḥ palāyante vimukhā bhayavihvalāḥ |

satyaṃ satyaṃ mahādevi śapathena vadāmyaham || 21 ||

sampattiratulā tatra tiṣṭhet tu sāptapauruṣam |

vāṇī tathaiva devvyāstu prasādācala īritaḥ || 22 ||

etat te kathitaṃ devi na prakāśyaṃ kadācana |

gopanīyaṃ gopanīyaṃ gopanīyaṃ sadā priye || 23 ||

paśoragre viśeṣeṇa gopanīyaṃ prayatnataḥ |

bhraṣṭānāṃ sādhakānāṃ ca sānnidhye na vadedapi || 24 ||

na dadyāt kāṇakhañjebhyo vigītebhyastathaiva ca |

udāsīnajanasyaiva sānnidhye na vadedapi || 25 ||

dāmbhikāya na dātavyamabhaktāya viśeṣataḥ |

mūrkhāya bhāvahīnāya daridrāya mamājñayā || 26 ||

dadyāt śāntāya śuddhāya kaulikāya maheśvari |

kālībhaktāya śaivāya vaiṣṇavāya śivājñayā || 27 ||

advaitabhāvayuktāya mahākālaprajāpine |

surā - strī - vandakāyā'pi śivābalipradāya ca || 28 ||

||iti śrīkāmākhyātantre pārvatīśvarasaṃvāde navamaḥ paṭalaḥ samāptaḥ || 9 ||

samāptaścāyaṃ granthaḥ |





###########   END OF FILE  #######