####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00514
Uniform title: liṅgārcanatantra
Manuscript : IFP transcript T00937 pages 1-60.

Description: 
Deals with the worship of the Lingam.


Notes: 
Data-entered by the staff of Muktabodha under the supervision of Mark S.G. Dyczkowski.

Revision 0: August 14 2021.

Internet publisher : Muktabodha Indological Research Institute
Publication year : 
Publication city : 
Publication country : India
####################################################



|| śrīḥ ||

oṃ namo gaṇeśāya |

devyuvāca-

kāmarūpaṃ samāsīnaṃ śaṅkaraṃ priyaśaṅkaram |
papracchu sādaraṃ devī yogamāyā jaganmayī ||

trilocana mahādeva sarveṣāmīśvara prabho |
pūrvaṃ yā sūcitaṃ deva śivaliṅgārcanaṃ prabho ||

hṛdaye cintyate deva mama prāṇopamaṃ sadā |
idānīṃ parameśāna kṛpayā samyaguccara ||

śivaliṅgārcanantattvaṃ vicārya kathaya prabho |
sāṅgopāṅgena sahitaṃ rahasyaṃ yacca vidyate ||

devagandharvamanujā asurā rākṣakṣāśca ye |
te sarve siddhimāyānti śivaliṅgārcanātprabho ||

pūrvaṃ hi sūcitaṃ deva cānyadevairmaheśvara |
sarvaṃ hi kathayeśāna yadyahaṃ tava vallabhā ||

īśvara uvāca-

śṛṇu nagātmaje prauḍhe menakā naganandini |
etat jñānaṃ maheśāni vakṣyetehaṃ sadā priye ||

padante parameśāni * * * * kṣate tathā |
mayā dattaṃ maheśāni sthiti saṃhārakāriṇe ||

yatkṛtvā parameśāni viṣṇustu sthitikārakaḥ |
sṛṣṭikartā bhaved brahmā etajjñānaprabhāvataḥ ||

p. 2)

etajjñānaprabhāveṇa mṛtyuṃ jitvā varānane |
mṛtyuñjayo'haṃ deveśi sadāsundari yogini ||

sarvapūjāsu deveśi liṅgapūjāṃ paraṃ padam |
liṅgapūjāṃ vinā devi anyapūjāṃ karoti yaḥ ||

vikṛtā tasya sā pūjā ante narakamāpnuyāt |
tasmālliṅgaṃ maheśāni prathamaṃ paripūjayet ||

yadrājyaṃ liṅgapūjāyāṃ rahitaṃ satataṃ priye |
tadrājyaṃ patitaṃ manye citābhūmisamaṃ smṛtam ||

brahmaviccāpi deveśi yadi liṅgaṃ na pūjayet |
tatkṣaṇāt parameśāni cāṇḍālatāṃ vrajet ||

śūdraśca parameśāni sadā suravara priye |
pūjayet śivaliṅgantu catvāro brāhmaṇādayaḥ ||

śivapūjāsu cārvaṅgi yadgṛhaṃ varjitaṃ sadā |
viṣṭhāgartasamaṃ tasya tadgṛhaṃ viddhi pārvati ||

annaṃ viṣṭhā payo mūtraṃ tasya veśmani kāmini |
śivapūjāṃ vinā devi anyapūjāṃ karoti yaḥ ||

sarvaṃ viṣṭhāsamaṃ tasya pūjānaivedyameva ca |
annaṃ viṣṭhāsamaṃ tasya payomūtraṃ varānane ||

kānto vā ceśvaro vāpi * co vā parameśvari |
ādau nityaṃ prapūjyātha bilvapatre varānane ||

p. 3)

paścādanyaṃ maheśāni śivaṃ prārthya prapūjayet |
anyathā mūtravat sarvaṃ śivapūjāṃ vinā priye ||

yatkṛtaṃ gandhanaivedyaṃ dhūpaṃ dīpaṃ tathā priye |
pādyaṃ cārghyamācamanīyaṃ ghṛtaṃ madhu saśarkaram ||

dadhidugdhaṃ maheśāni nānāpuṣpaṃ manoharam |
phalaṃ sarvavidhaṃ bhadre āmraṃ drākṣāphalaṃ tathā ||

panasantu tathā sarvaṃ viṣṭhāsamaṃ bhavet priye |
tasmāt sarvāsu pūjāsu prathamaṃ liṅgapūjanam ||

sarvavedeṣu tantreṣu purāṇeṣu varānane |
gīyate parameśāni prathamaṃ liṅgapūjanam ||

śivapūjāṃ vinā devi nāsti pūjā kadācana |
svarge martye ca pātāle śivapūjā garīyasī ||

brahmāṇḍavāsināṃ devi śivapūjā sadā dhanam |
śivapūjāṃ vinā devi anyapūjāṃ karoti yaḥ ||

sa eva rasanāhīnaḥ kumbhīro jāyate priye |
śivapūjā maheśāni sarvadharmasu śasyate ||

sarvadharmasu yaddharma sarvadāneṣu yaddhanam |
taddhanaṃ samavāpnoti śivapūjākriyādibhiḥ ||

tasmātsarva prayatnena śivapūjāṃ sadā priye |
nirmāya pārthivaṃ liṅgaṃ rudraṃ saṃhārarūpiṇam ||


p. 4)

āśutoṣaṃ mahādevaṃ śāśvataṃ vṛṣabhadhvajam |
nirmāya vidhivalliṅgaṃ vidhivat pūjayet śivam ||

rahasyaṃ vidhivaddevi kṛtvā mokṣamavāpnuyāt |
arcayedvividhaiḥ puṣpairgandhaiśca sumanoharaiḥ ||

puṣpairaneka jātīyaiḥ phalairbahuvidhaistataḥ ||

|| iti liṅgārcanatantre haraparvātīsaṃvāde prathamaḥ paṭalaḥ || 1 ||



śrīdevyuvāca-

indriyarahito deva śūnyarūpaḥ śivaḥ smṛtaḥ |
śivasya kāraṇaṃ nāsti kiṃ tasya pūjanaṃ tataḥ ||

īśvara uvāca-

sādhu pṛṣṭhaṃ maheśāni śṛṇu vakṣyāmi pārvati |
preta pūjā maheśāni kadācināsti bhāmini ||

rudrasya parameśāni raudrīśaktiriti smṛtā |
jyeṣṭhā ca vaiṣṇavī śaktiryathā viṣṇoḥ prakīrtitā ||

vāmā tadbrahmaṇaḥ śaktiryathā bhavati kāmini |
rudrasya parameśāni raudrī śaktistathā smṛtā ||

rudraṃ hi parameśāni mahākuṇḍalinīyutam |
vartate satataṃ devi brahmaviṣṇuśiveṣu ca ||

sārddhatrivalayākāraiḥ śivaṃ veṣṭya sadāsthitam |
śaktiṃ vinā maheśāni pretatvaṃ tasya niścayam ||

śaktisaṃyogamātreṇa kartā hartā maheśvaraḥ |
ata eva maheśāni pūjayet śivaliṅgakam ||

p. 5)

śivaśaktyormaheśāni ekadā yadi jāyate |
tadaiva paramaṃ jñānaṃ sarvavedeṣu sammatam ||

sarvavedeṣu tantreṣu purāṇeṣu varānane |
ekadā śivaśaktyostu paramaṃ jñānamucyate ||

ata eva maheśāni śivaṃ nityaṃ prapūjayet |
pūjayet parameśāni catvāro brāhmaṇādayaḥ ||

saṃpūjya parayā bhaktyā nirvāṇaṃ yāti pūjakaḥ |
śivapūjā maheśāni yadgṛhe satataṃ priye ||

kāśīpuraṃ maheśāni tadgṛhaṃ viddhi pārvati |
śivaliṅgaṃ prapūjyātha sarvapūjāphalaṃ labhet ||

śrīdevyuvāca-

śivaliṅgaṃ mahādeva paramajñānasaṃyutam |
sākṣādbrahma mahādeva kṛpayā kathaya prabho ||

śivaliṅgārcanaṃ deva sākṣāduktaṃ na saṃśayaḥ |

īśvara uvāca-

śṛṇu devi pravakṣyāmi tava bhaktyā varānane |
pūjayet parameśāni sarva brahmāṇḍavāsinaḥ ||

mṛtyuñjayapuraṃ gatvā brahmādyāstridivaukasaḥ |
śivaśaktimaye gehe tiṣṭhanti tridaśādayaḥ ||

sarvaṃ jñānamayaṃ draṣṭvā tāvaddṛṣṭyādibhiḥ priye |
caturyugaṃ nābhasastu evaṃ hi gatavān priye ||

tadante pralayastāvān drākṣīrātriḥ pragīyate |
evameva prakāśena pralayaṃ nābhaso gataḥ ||

brahmādyā parameśāni pretatyaṃ gatavān priye |
tatastu śatavarṣānte raudrī rudramukhāt priye ||

bhāvitaḥ parameśāni agniparvata sannibhaḥ |
jalādikaṃ maheśāni tatkṣaṇāt bhasmasātkṛtaḥ ||

dṛṣṭvāścaryaṃ maheśāni kautukaṃ mama jāyate |
bhasmañca parameśāni gṛhītvā paramaṃ padam ||

vilipya dehe deveśi bhasma śrīmantrasannibham |
kṣaṇamātraṃ maheśāni dhyānastho'haṃ nagātmaje ||

bhasmarāśigate loke sadevāsuramānuṣe |
vibhāvya parameśāni hṛdaye parameśvari ||

bhāvanāt parameśāni lakṣavarṣaṃ gataṃ mama |
dhyānabhāvaṃ maheśāni yadā mama śucismite ||

tadaiva parameśāni kāminī vṛṣarūpadhṛk |
saṃmukhe darśanaṃ datvā kiñcidvākyaṃ ca māṃ prati ||

uvāca śubhayā vācā sundaraṃ kamalekṣaṇe |
mṛtyuñjaya mahābāho vākyaṃ me śṛṇu satvaram ||

yaddṛṣṭaṃ hṛdaye deva sāhaṃ śāntisvarūpiṇī |
kāminī vṛṣarūpeṇa sākṣāddharmo na saṃśayaḥ ||

ākarṇya mama pūrvoktaṃ pārthivaṃ śivamarcaya |
śaktirūpī mahādeva kāminī satataṃ sadā ||

p. 7)

nāmnā nandī mahādeva vāhanaṃ tava sundaraḥ |
dharmarājeti loke'smin gīyate māṃ maheśvara ||

ullūko'haṃ mahādeva gīyate satataṃ janāḥ |
śaktirūpī ahaṃ deva kiñcinnāstyatra saṃśayaḥ ||

śaktipuñjaṃ mahādevaṃ sarvaṃ tvayi pratiṣṭhitam |
ata eva mahādeva dharmarāṭ śaktirūpiṇī ||

vṛṣarūpaṃ samāsthāya ulmuko'haṃ maheśvaraḥ |
sarvaṃ pretamayaṃ dṛṣṭvā śaktirāvirbhūtā prabho ||

ata eva mahādeva namnā nirañjana saṃjñakaḥ |
ukāraśca umādevi ūkāraṃ kāminī prabho ||

nakāraṃ pṛthivī devī viddhitvaṃ guṇasāgara |
kakārañca mahādeva sadā te u * * te jinaṃ ||

ata eva mahādeva nāmnā ullūka yogadhṛk |
sarvayogeśvarastvaṃ hi satataṃ mṛtyunāśakaḥ ||

sarvadevāḥ sagandharvā harirvṛkṣādayastathā |
pretatvaṃ gatavān sarvaṃ devavṛkṣāntavāsinaḥ ||

pretatvarahitaṃ deva tvaṃ hi vṛkṣaḥ sanātanaḥ |
anantāḥ śaktyo deva tvayyaṃśe vidyate vibho ||

yakārasyāntimo vinduḥ tvaṃ hi deva nirañjanaḥ |
yadbījaṃ saptamaṃ deva yakārasya tapodhana ||

p. 8)

śaktipuñjaṃ mahādeva sa eva sargavān vibho |
bhṛgustu parameśāna tvaṃ gatibhiryadā prabho ||

tadaiva parameśāna sthiti sṛṣṭiṃ bhaved dhruvam |
tvaṃ devā parameśāna bhṛgubījaṃ hi gacchati ||

pralayaṃ parameśāna tatkṣaṇāt jāyate dhruvam |
mṛtyuñjayapadāttvaṃ hi sadāśaktyā prasādataḥ ||

āruhya mama pṛṣṭhe tu pārthivaṃ śivamarcaya |

īśvara uvāca-

ulmukasya vacaḥ śrutvā vṛṣamāruhya pārvati |
yatkṛta parameśāni satvaraṃ tacchṛṇu priye ||

yatkṛtaṃ pārthivaṃ liṅgamarcanam avadhāraya |
āruhya vṛṣabhe'ntasthe ulmuke śaktirūpiṇī ||

sākṣādvakṣamayaṃ devi āruhya yat kṛtaṃ mama |
śivaliṅgaṃ vinirmāya antasthānaṃ śucismite ||

bhūtaśuddhiṃ maheśāni prāṇāyāmaṃ tathā priye |
antarnyāsaṃ bahirnyāsaṃ mātṛkādyā śucismite ||

yāni yāni maheśāni śrīkaṇṭhādīni pārvati |
bahūni parameśāni nyāsāni kathitaṃ mayā ||

pūrvatantre maheśāni yaduktaṃ parameśvari |
kṛtvā tu sarvaṃ kṛtsnena bahudhā parameśvari ||

bhūtaśuddhau maheśāni lakṣavarṣaṃ gataṃ mama |
dṛṣṭvānandamayīṃ devīṃ hṛtpadme parameśvari ||

p. 9)

śaktipuñjaṃ maheśāni dṛṣṭvā deviñcarācaram |
suṣumnāntargatā devi tatrasthāṃ parameśvarīm ||

sūkṣmāti sūkṣmā paramāṃ yavāsindūra ākṛtiṃ |
vartante devatāstatra vṛkṣādyāśca tadā śiva ||

tāṃ dṛṣṭvā parameśāni antarātmani pārvati |
lakṣavarṣaṃ gate devi umukopari pārvati ||

sampūjya prathamaṃ dharmaṃ vāhanaṃ mama pārvati |
ulmukaṃ vṛṣabhaṃ devi nāmnā nandī prakīrtitaṃ ||

kāminī yā tu sā deva sā tu dharmādayaḥ priye |
śaktiṃ vinā maheśāni svāṃ dhartuṃ kathamutsahe ||

anantāḥ śaktayo devi sarvaṃ mayi śucismite |
śaktitvāt parameśāni māṃ hi dhartuṃ samutsahe ||

śaktiḥ svayaṃ maheśāni dharmaścāpi vṛṣaḥ svayaṃ |
prathamaṃ parameśāni dharmmaṃ saṃpūjya satvaram ||

tatastu parameśāni pārthivaṃ liṅgapūjanam |
kṛtvā krameṇa paścāddhi dṛṣṭvā tu patrakaṃ sadā ||

śrī devyuvāca-

deva deva mahādeva sṛṣṭisthityantakārakaḥ |
pūjanaṃ dharmarājasya yathārthaṃ vada śaṅkara ||

īśvara uvāca-

āsanaṃ mama cārvaṅgi svayaṃ dharmasvarūpiṇi |
āsanaṃ prathamaṃ pūjya dharmapūjāṃ yathā kṛtim ||

p. 10)

nigadāmi maheśāni sāvadhānāvadhāraya |
pūrvoktatantravatsarvaṃ snānamācamanaṃ priye ||

śaktikrameṇa deveśi kṛtvā sarvaṃ varānane |
dharmabījena deveśi yaduktaṃ parameśvari ||

kṛtvā tu bahuyatnena mātṛkānyāsapūrvakam |
pūrvokta tantravaddevi prathamaṃ parameśvari ||

kṛtvā tu bhūtaśuddhiṃ vai mātṛkānyāsamācaret |
prāṇāyāmaṃ tataḥ kṛtvā arghyasthāpanamācaret ||

pūrvoktatantravaddevi arghyaṃ paramadurllabhaṃ |
varmamantraṃ varārohe tatrastho japamācaret ||

sarvaṃ hi pūrvavatkṛtvā kāminīṃ dharmarūpiṇīṃ |
dhyātvā tu parameśāni hṛtpadme parameśvarīṃ ||

dhyānaṃ śṛṇu varārohe sākṣādānandarūpiṇaṃ |
koṭicandraprabhākāraṃ śvetasiṃhāsanasthitam ||

caturbhujaṃ mahābāhuṃ padmanetraṃ manoharaṃ |
ājānulambinī mālā hṛdi yatpariśobhitā ||

gaṅgātaraṅgakarpūraṃ śubhrāmbaravibhūṣitaṃ |
hāsyayuktaṃ kaṭākṣañca bhuvanatrayamohanam ||

ulmukaṃ bhāvayeddevaṃ sākṣāddharmaṃ tvakāraṇam |
dhyātvaivaṃ manasā devi hṛtpadme parameśvari ||

p. 11)

saṃpūjya parameśāni mānasaiḥ parameśvari |
japañca mānasaṃ kṛtvā dharmamantraṃ śucismite ||

dharmamantraṃ mahādevi śṛṇu vakṣyāmi kāmini |
yannoktaṃ sarvatantreṣu idānīṃ kathayāmi te ||

praṇavaṃ pūrvamuddhṛtya dantibījaṃ tataḥ priye |
varṇabījayutaṃ kṛtvā mudrā?yuktaṃ tataḥ kuru ||

dharmaśabdaṃ caturthyantaṃ vahnijāyā tataḥ |
eṣā saptākṣarī vidyā caturvargaphalapradā ||

lakṣaṃ japtvā maheśāni samarpya dakṣiṇe tyajet |
āruhya dharmarūpe ca vṛṣe ullūkasaṃjñake ||

saṃpūjya pārthivaṃ liṅgaṃ vidhinā yena pārvati ||

|| iti liṅgārcana tantre harapārvatīsaṃvāde dvitīyaḥ paṭalaḥ ||


īśvara uvāca-

svagātre bhasma ādāya liṅgaṃ nirmāya kāmini |
bhasmābhāve maheśāni liṅgaṃ kuryācca mṛṇmayam ||

dṛṣṭvā tu vismayāviṣṭo satataṃ naganandini |
kiṃ karomi kva pṛcchāmi iti cintākulāmyaham ||

śarīrasthaṃ maheśāni bhasma ādāya yatnataḥ |
svagātra sparśanādbhasma sākṣāttu candracandanam ||

|| oṃ viṃ dharmāya svāhā ||


p. 12)

haste gṛhītvā deveśi bhasmasthaṃ candanaprabhaṃ |
mātṛkāmantramuccārya anuloma vilomataḥ ||

gaṅgājalaiḥ ślathaṃ kṛtvā nirmāya pārthivaṃ śivam |
jaṭāsu ca sthitā gaṅgā satataṃ parameśvari ||

gaṅgā trijagatāṃ mātā sarvadā pāpahāriṇī |
ādibhūtā jaganmātā sākṣāt śaktisvarūpiṇī ||

atrehānyaṃ pravakṣyāmi gurūṃ paramadurlabham |
bhāranāśāya viṣṇuśca sthito yadā abhūtpriye ||

kṛṣṇanāmnā maheśāni kāraṇaṃ tasya saṃśṛṇu |
brahmaśāpabhavāt kṛṣṇa pippalastho yamāśritaḥ ||

tatra vyādhodurādharṣo kṛṣṇasya caraṇaśriye |
vivyādha kṛṣṇaṃ savyādhaḥ śāpaṃ saṃnamya nirmitam ||

lohanirmitavāṇena kṛṣṇasya caraṇe ruṣā |
vyadhite parameśāni kṛṣṇa * * karaḥ sadā ||

svadhāmaṃ gatavān devi vṛkṣadaṇḍahataḥ priye |
jājvalyamānaṃ tat śāpaṃ kṛṣṇasya caraṇe sadā ||

dāhayāmāsa sarvaṃ hi kṛṣṇasya caraṇaṃ tadā |
vṛkṣaśāpaṃ svacādharmaṃ caraṇe satataṃ sthitaṃ ||

dadāha parameśāni kṛṣṇasya vapuruttamaṃ |
satvaraṃ prayayau viṣṇuḥ kṛṣṇalokaṃ varānane ||

p. 13)

sarvaṃ hi pūrvaṃ vijñātaṃ kṛṣṇaśāpaṃ varānane |
vṛkṣañca kathayāmāsa praṇipatya varānane ||

viṣṇorvākyaṃ maheśāni śrutvā kṛṣṇaḥ prajāpatiḥ |
uvāca madhuraṃ vākyaṃ viṣṇave prabhaviṣṇave ||

śṛṇu vākyaṃ mahāviṣṇo auṣadhaṃ paramauṣadhaṃ |
auṣadhaṃ jāhnavītoyaṃ mama kamaṇḍalau sthitaṃ ||

pādau prakṣālya deveśa niṣpāpo bhava sundara |
trilokajananīgaṅgā ādiśaktirjaganmayī ||

haristu pādau prakṣālya kamaṇḍalujalāt priye |
ādau śivamimaṃ vandya pādaṃ paṃcānanaṃ tataḥ ||

vinyasya parameśāni tatpāpaṃ majjanāt priye |
vaikuṇṭhaṃ prayayau śīghraṃ sa hariḥ parameśvari ||

tataḥ pādāvanīyāt sā gatvā tripathagāminī |
bhūmau bhāgīrathī nāma tale bhogavatī tathā ||

svarge mandrā mahāmāyā viṣṇoryaśaḥ prakāśinī |
sā gatvā parameśāni puṇyarūpāvadhāraṇe ||

jaṭājūṭe maheśāni satataṃ mama saṃsthitā |
pṛthvyaptejo maheśāni vāyvākāśaṃ varānane ||

idaṃ tattvaṃ mahādvāraṃ saptāvaraṇasaṃyutaṃ |
prajñāveṣṭitaṃ sarvaṃ pralaye mayi pārvati ||

p. 14)

vibhūti bhūṣaṇāṃ devi pṛthivīṃ viddhi pārvati |
apastu parameśāni gatvāśnīyājjaṭātaṭe ||

yattejaḥ parameśāni tadagniṃ viddhi pārvati |
nāsikāyāṃ vahedvāyu tadvāyuṃ viddhi pārvati ||

ākāśaṃ kaṇṭhadeśantu śivasya satataṃ priye |
mahattattvamahaṅkāraṃ prakṛtiḥ śaktirūpiṇī ||

śivasya parameśāni śarīre saṃsthitā sadā |
śarīrasya maheśāni kāraṇaṃ paramaṃ padam ||

ata eva maheśāni ślathaṃ kṛtvā tu candanam |
nirmāya pārthivaṃ devi yathā pūjita vāhanam ||

tatśṛṇusva ca cārvaṅgi guhyaṃ paramadurlabham |
uttarābhimukhobhūtvā ulmukopari pārvati ||

padmāsanenopaviśya yatkṛtaṃ parameśvari |
tatsarvaṃ parameśāni nigadāmi śṛnu priye ||

hastapramāṇaṃ liṅgāṃ hi nirmāya parameśvari |
sarvāṅgasundaraṃ liṅgaṃ sarvāvayava sundaram ||

divyākṛtiṃ maheśāni sākṣāt rudraṃ sureśvari |
veṣṭitā añjalī liṅga prakṛtiḥ parameśvari ||

dvayorekatamāddevi paraṃ brahma paraṃ padam |
tatkṣaṇājjāyate devi kiñcinnāstyatra saṃśayaḥ ||

p. 15)

uktañca pārthivaṃ liṅgaṃ mṛtsnābhedena pārvati |
śuklaṃ raktaṃ tathā pītaṃ kṛṣṇañca parameśvari ||

śuklaṃ tu brāhmaṇe śastaṃ kṣatriye raktamiṣyate |
haritaṃ vaiśyajātau tu kṛṣṇaṃ śūdre prakīrtitam ||

candanañca maheśāni sarvājātiṣu śasyate |
candanaṃ hi mheśāni vibhūtibhūṣaṇo mama ||

tasmāddhi candanaṃ bhadre sarvajātiṣu śasyate |
brahmāṇḍamohanaṃ devi candanaṃ mama lepanam ||

dāhanāt parameśāni śuklarūpañca bhūṣaṇaṃ |
brahmāṇḍabījaṃ deveśi sarvaśaktimayaṃ sadā ||

śuklarūpaṃ maheśāni tadbhasma kamalānane |
brahmāṇḍabījaṃ tadbhasma mamāṅge satataṃ sthitaṃ ||

candanasya tu liṅgaṃ hi nirmāya yastu pūjayet |
brahmāṇḍaṃ pūjayettena mahāmokṣapradāyakam ||

śuklaṃ hi pārthivaṃ liṅgaṃ nirmāya yastu pūjayet |
sa ca vipro maheśāni trivargakulabhāgbhavet ||

kṣatriyaśca varārohe raktaṃ nirmāya pārthivaṃ |
pūjayet satataṃ yastu trivargaṃ kulabhāgbhavet ||

haritaṃ pārthivaṃ devi nirmāya yastu pūjayet |
sa ca vaiśyo maheśāni trivargakulabhāgbhavet ||

p. 16)

kṛṣṇaṃ hi pārthivaṃ liṅgaṃ nirmāya yastu pūjayet |
sa śūdraḥ parameśāni trivargakulabhāgbhavet ||

mṛtsūkte parameśāni varṇabhedena sundari |
saṃgṛhya mātṛkāmantrairanulomavilomataḥ ||

japtvānte parameśāni daśadhā parameśvari |
iti mantraṃ japtvā vai mṛtsu prāpya varānane ||

sarvaśaktimaye devi mūrtike tridaśeśvari |
nirmāya pārthivaṃ liṅgaṃ śivapūjāṃ karomyaham ||

dvāraṃ dharmaśca kāmaśca arthañcoktaṃ tvayīśvari |
caturvargaprade devi nānāratnavibhūṣite ||

tvāṃ vinā parameśāni jñātvā proktaṃ kutaḥ sukhaṃ |
arthakāmau ca deveśi tvāṃ vinā na hi jāyate ||

oṃ hrīṃ mūrtike duṣkṛti hare hrīṃ oṃ iti mantra samuccārya gṛhṇīyāt bhṛttikāṃ 
priye |

dvādaśākṣaramantraṃ ca yadā mama hṛdi sthitaṃ |
ati gopyaṃ mahatpūṇyaṃ caturvargapradāyakam ||

ajñātvā parameśāni gṛhṇīyādyastu mṛtikām |
niṣphalā tasya sā pūjā pārthivasya śivasya ca ||

oṃ harāya iti mantreṇa gṛhṇīyādvā śucismite |
nirmāṇaṃ mātṛkāmantraiḥ oṃ maheśvarāya iti priye ||

p. 17)

uccārya mātṛkāmantraṃ śūlapāṇe tataḥ param |
supratiṣṭho bhava ityuccārya mātṛkāṃ tataḥ ||

prāṇaṃ niyojayeddevi pārthive śivaliṅgake |
prāṇapatiṣṭhāmantreṇa prāṇaṃ niyojayet tataḥ ||

bhūtaśuddhiṃ maheśāni prathamaṃ parikīrtayet |
pūrvoktamantravat kuryāt bhūtaśuddhyādikaṃ ca yat ||

tatastu mātṛkānyāsaṃ kuryātparamayatnataḥ |
prāṇāyāmaṃ tataḥ kuryāt śivaṃ dhyātvā śucismite ||

dhyātvā śivaṃ mahādevaṃ sarvadevādikāraṇam |
dhyātvā ṣoḍaśadhā devi vāmanāḍyāṃ varānane ||

vāyumāpūrya cārvaṅgi dhyānamārgeṇa kāmini |
vāyudhāraṇamācarya recakaṃ kārayet sudhīḥ ||

pūrakaṃ dhārakaṃ devi recakaṃ parameśvari |
prāṇasya satataṃ devi prāṇāyāmamidaṃ smṛtam ||

dvādaśākulamānena prāṇaṃ hi parikīrtitaṃ |
prāṇaśca parameśāni ātmajñānaṃ śucismite ||

yastu prāṇaṃ maheśāni sarvāṅgaṃ parikīrtitam |
pradīpakalikākāraṃ hṛdaye vidyate priye ||

paraṃ brahma maheśāni pradīpakalikā kṛti |
antarātmā maheśāni sarveṣāṃ hṛdi vidyate ||

p. 18)

antarātmā parabrahma śarīraṃ vyāpya tiṣṭhati |
dvayostejo varārohe śaktiḥ prakṛti rūpiṇī ||

prāṇāyāmasya kāle tu dṛṣṭvāścaryaṃ varānane |
yadyuktaṃ paramaṃ guhyaṃ tanniśāmaya yogini ||

|| iti liṅgārcanatantre harapārvati saṃvāde tṛtīyaḥ paṭalaḥ || 3 ||


īśvara uvāca-

ātmā brahmamayo bhūtvā yaduktaṃ parameśvari |
tatkṣaṇaṃ parameśāni dṛṣṭamānandamadbhutam || 1 ||

manomayaṃ maheśāni kṛtvā tatraiva pārvati |
sudhāntare maheśāni manobhūtvā varānane || 2 ||

lakṣavarṣaṃ maheśāni gatavān parameśvari |
prāṇāyāmakṣaṇe devi lakṣavarṣaṃ gataṃ mama || 3 ||

yaddṛṣṭaṃ parameśāni nirdiṣṭaṃ tat śṛṇu priye |
nātaḥ parataraṃ kiṃcid vartate mama gocare || 4 ||

paryaṅkaṃ parameśāni āścaryaṃ rūpamadbhutaṃ |
tatra phenanibhāṃ śayyāṃ nānāvastra vibhūṣitām || 5 ||

sā śayyā parameśāni mahāvastrā sadāśivaḥ |
tasyopari maheśāni suptāṃ tripurasundarīm || 6 ||

yavāyāvaka sindūrasadṛśākṛti kāminīm |
caturbhujāṃ trinetrāñca pañcabāṇadhanurdharām || 7 ||

p. 19)

varadābhayamudrāṃ ca dhāriṇīṃ parameśvarīm |
dṛṣṭvānandamayīṃ lolāṃ lakṣavarṣaṃ gataṃ mama || 8 ||

yadā ca parameśāni mama dṛggocaraṃ gatā |
tadaiva sahasā tu sūkṣmarūpamupāgatā || 9 ||

dhyānabhaṅgo maheśāni tadaiva mama sundari |
tatraiva dṛṣṭaṃ brahmāṇḍaṃ brahmādyāstri divaukasaḥ || 10 ||

śaktiṃ vinā maheśāni nāsti kiñcinmayi priye |
śaktirhi brahmaṇo rūpaṃ śakti puñjaṃ varānane || 11 ||

śaktiṃ vinā maheśāni na kiṃcinmama gocare |
evaṃ hi kramaśo devi prāṇāyāmamanuttamam || 12 ||

prāṇāyāme kṛte devi mātṛkānyāsamuttamam |
kṛtvā nyāsaṃ maheśāni mātṛkāṃ viśvamohinīṃ || 13 ||

ataḥ paraṃ varārohe śrīkaṇṭhanyāsamācaret |
śrīkaṇṭhanyāsamātreṇa śivo'haṃ kamalānane || 14 ||

śrīkaṇṭhaṃ parameśāni trailokye cāpi vanditaṃ |
pūrvokta tantravatsarvaṃ viśeṣārhyaṃ ca kāmini || 15 ||

sarvaṃ kuryānmaheśāni yatnataḥ parameśvari |
dhyāyet śivaṃ maheśāni hṛtpadme kamalekṣaṇe || 16 ||

hṛtpadme parameśāni brahmajñānaṃ manoharam |
jīvasya sthānamatroktaṃ hṛdayaṃ paramaṃ padam || 17 ||

p. 20)

hṛtpadmaṃ dvādaśadalaṃ sahasrādityavarcasam |
tanmadhye bhāvayeddevaṃ śivaṃ mṛtyuñjayaṃ priye || 18 ||

śuddhasphaṭikasaṃkāśaṃ pañcavaktraṃ mahāprabham |
ājānubāhu deveśi raktapadmacchavīkṣaṇam || 19 ||

kirīṭinaṃ kuṇḍalinaṃ keśarāṅka suśobhitam |
satataṃ hāsyayuktañca dantapaṃktivirājitaṃ || 20 ||

rudrākṣaśobhitaṃ vakṣaḥ jaṭāśobhitamastakam |
vyāghracarmaparīdhānaṃ daśabāhuvirājitaṃ || 21 ||

evaṃ dhyātvā mahādevaṃ sadā mṛtyuñjayaṃ priye |
śaktiyuktaṃ mahādevaṃ sarvajñaṃ sarvamohanam || 22 ||

sarvajña cintanaṃ kṛtvā ekāṅgaṃ cintayettataḥ |
ekāṅgañca parityajya samādhirjāyate tataḥ || 23 ||

samādhikāle deveśi yat tejastūpajāyate |
tanniśāmaya deveśi jñānaṃ paramaśobhanam || 24 ||

sarvajñañca parityajya yat tejastūpajāyate |
sa eva parameśāni śivo mṛtyuñjayaḥ priye || 25 ||

pradīpakalikākārāṃ prakṛtiṃ viddhi pārvati |
tatra tejasi deveśi adbhutātmā sadā sthitaḥ || 26 ||

adbhutātmā maheśāni kāryakāraṇavarjitam |
bhramaraṃ bhramarī baddhvā hṛtpadme parameśvari || 27 ||

yogastho'haṃ maheśāni lakṣavarṣaṃ gajo mama |
etasmin samaye devi bhramarīṃ gatavān priye || 28 ||

ājñāpuraṃ maheśāni taddṛṣṭvā bhramara priye |
tatpaścāt pradyayau śīghraṃ lolatvaṃ kamalānane || 29 ||

kāryañca kāraṇañcaiva prakṛtiṃ viddhi pārvati |
evaṃ dhyānaparo bhūtvā yat kṛtaṃ tat śṛṇu priye || 30 ||

bhramaraśca maheśāni bhramaryā saha sundari |
jñānapāśena vijñāto anyonyaṃ ca śucismite || 31 ||

ṣaṭpadmasaṃsthito bhūtvā madhupānayutaḥ sadā |
bhramarī parameśāni sākṣānmokṣa pradāyinī || 32 ||

yatra yatra maheśāni bhramarī yāti sundarī |
tatra tatra maheśāni bhramaraḥ prayayau drutam || 33 ||

bhramarīṃ tu gate devi yogabhaṅgamabhūnmayā |
yogasthe sati cārvaṅgi ṣaṭpuraṃ paramādbhutam || 34 ||

ṣaṭpurīparameśāni sadā jyotirmayī priye |
pūrīṃ jyotirmayīṃ divyāṃ paramāmṛtapūritām || 35 ||

dṛṣṭvā padmavanaṃ bhadre kadācinna nivartate |
bhramarī mama deveśi nahi yāti vanāt priye || 36 ||

śrīdevyuvāca-

tatkathaṃ parameśāna bhramarastatra jāyate |
jñānapāśaṃ maheśāna cidvyoma prayayau katham || 37 ||

p. 22)

īśvara uvāca-

bhramarī cāṅganā devi pakṣi yasyānugāminī |
ata eva maheśāni yogamaṅgamamūn mama || 38 ||

ata eva maheśāni bāhyapūjāṃ samācaret |
bhetturabhimukho bhūtvā ulmukopari pārvati || 39 ||

upaviśya maheśāni  yathā pūjitavāhanaḥ |
nigadāmi śṛṇu proktaṃ tatsarvaṃ varavarṇinī || 40 ||

antaḥpūjāṃ vidhāyaivaṃ bāhyapūjāṃ yathā kṛtam ||

|| iti liṅgārcanatantre harapārvatīsaṃvāde caturthaḥ paṭalaḥ || 4 ||


īśvara uvāca-

pūrvoktaṃ tantravat sarvaprathamaṃ parameśvari |
kṛtvā tu bahuyatnena bāhyadhyānaṃ samācaret ||

pūrvokta dhyānaṃ deveśi kṛtvā puṣpaṃ vinikṣipet |
maṇḍapaṃ raktavarṇaṃ hi caturdvārasamanvitam ||

suveśaṃ sundaraṃ ramyaṃ prastūya parameśvari |
nandipṛṣṭhe maheśāni kṛtvā tu candanopari ||

caturasraṃ caturdvāraṃ paramajñānasaṃyutaṃ |
ātmadakṣiṇavedyāṃ hi pūrvavedyāṃ śṛṇu priye ||

pūrvasyāṃ diśi yā vedī antarātmā tu gīyate |
yā vedī uttare devi paramātmā sā ca gīyate ||

yā vedī paścime devi jñānātmā sā ca gīyate |
caturasre catuṣkoṇe aṇimādyaṣṭa siddhyaḥ ||

p. 23)

vartante satataṃ devi nātra kāryā vicāraṇā |
aṇimā pūrvavedyāṃ ca mahimā vahni koṇake ||

vyāptistu yāmyavedyāṃ vai nair-ṛte prākāmya pārvati |
mahimā paścime devi īśitā vāyukoṇake ||

vaśitā ūrdhve deveśi aiśāne kāmasundarī |
tanmadhye parameśāni binduṃ nirmāya sundaram ||

tanmadhye parameśāni kāmabījaṃ varānane |
vilikhya bījaṃ deveśi sarvaśaktimayaṃ priye ||

caturasraṃ hi saṃveṣṭya kuṇḍalī dvitayaṃ priye |
saṃlikhya parameśāni kuṇḍalīṃ viśvamohinīm ||

caturasre maheśāni caturasraṃ praṇavaṃ likhet |
tatastu parameśāni aṣṭabījaṃ kramāllikhet ||

tadbījaṃ parameśāni kramād vakṣyāmi saṃśṛṇu |
bindūrdhvasaṃyutaṃ devi saṃlikhya abhayaṃ priye ||

bindūrdhvasaṃyutaṃ kṛtvā pṛthivībījaṃ tataḥ param |
śaktibījaṃ maheśāni bindurdhvasaṃyutaṃ priye ||

punaḥ śaktiṃ maheśāni saṃlikhya pūrvavat sadā |
papañcamaṃ maheśāni kṛtvā bindūrdhvasaṃyutaṃ ||

vāmākṣisaṃyutaṃ binduṃ kṛtvā paramayatnataḥ |
valabījayutaṃ kṛtvā saṃlikhya parameśvari ||

p. 24)

aṣṭabījaṃ maheśāni aṣṭaiśvarya pradāyakam |
sarvaṃ veṣṭya maheśāni mahākuṇḍalinī priye ||

saṃlikhya cañcalāpāṅgi mantraṃ brahmāṇḍarūpiṇam |
dvārasya bāhyakoṇe tu aṣṭapadmaṃ śucismite ||

saṃlikhya bahuyatnena sundaraṃ sumanoharaṃ |
etanmātraṃ varārohe sadā mama hṛdi sthitam ||

etanmantraprabhāveṇa siddho'haṃ ca nagātmaje |
etanmantraṃ maheśāni surāsurasudurlabham ||
 
ataḥ paraṃ maheśāni nirmāṇaṃ śṛṇu pārvati |
hastamātrapramāṇena candanasya maheśvari ||

nirmāya vidhivalliṅgaṃ ghaṭitaṃ candanena ca |
ātmano hastamātraṃ hi nirmāya surapūjite ||

saṃsthāpyamantramadhye tu kāmabījopari priye |
sampūjya dhyānamācarya tasyopari vinikṣipet ||

bilvapatraṃ maheśāni brahmaviṣṇu śivātmakam |
guṇatrayātmakaṃ devi tripatraṃ sarvadāyakam ||

tatastu parameśāni kṛtvā saṅkalpamānasam |
yathā pūrvaṃ mahādevaṃ brahmāṇḍaṃ sthitavānasau ||

tathā bhavatu brahmāṇḍaṃ iti saṃkalpameva ca |
ta gopyaṃ mama deveśi nanāma parameśvari ||

p. 25)

na mātā parameśāni na pitā mama kāmini |
tasmin kāle maheśāni mama sarvaṃ na hi priye ||

na vāraṃ na tithiṃ devi tasminkāle śucismite |
na kāṣṭhāṃ na kalāṃ devi tasminkāle varānane ||

na divā parameśāni na rātriṃ parameśvari |
ata eva maheśāni saṃkalpaṃ mānasaṃ smṛtam ||

mānasaṃ yadi āyāti tadā sthūlena kiṃ priye |
saṃkalpaṃ mānasaṃ devi caturvarga pradāyakam ||

sthūlaṃ hi parameśāni saṅkalpaṃ vyarthamucyate |
saṅkalpena vinā devi yatkiṃcit kṛtavān sudhīḥ ||

yaduktaṃ parameśāni tatsarvaṃ mānasaṃ param |
yaduktaṃ parameśāni muninā kṣudrabuddhinā ||

tatsarvaṃ parameśāni vyarthaṃ bhavati pārvati |
iti saṅkalpamācarya jīvanyāsaṃ samācaret ||

jīvanyāsaṃ maheśāni sāvadhānāvadhāraya |
prāṇāpānasamānaśca udānavyāna eva ca ||

pañcaprāṇā ime devi hṛdaye mama vidyate |
hṛdi prāṇo maheśāni apānantu gude priye ||

nābhideśe samānantu udānaṃ kaṇṭhadeśataḥ |
vyānantu parameśāni śarīraṃ vyāpya tiṣṭhati ||

p. 26)

etān vāyūn maheśāni praṇavena samācaret |
pratipadmaṃ maheśāni tejaḥ puñjaṃ prajāyate ||

vāmanāsāpuṭe nītvā tattejaḥ praṇave priye |
vāmanāsāpuṭe devi lakṣaṃ viśrāmya pārvati ||

tadojaḥ parameśāni javākusumasannibham |
śivaliṅge vinikṣipya tadojaḥ kamalānane ||

iti kṛtvā maheśāni vāyormantraṃ śṛṇuṣva me |
pañcamantraṃ varārohe sāvadhānāvadhāraya ||

oṃ prāṇāya iti deveśi ante svāhāṃ samuccaret |
oṃ apānāya svāhā ityantaṃ surapūjite ||

oṃ samānāya iti svāhāntaṃ suravandite |
oṃ udānāya svāhā ityantaṃ mīnalocane ||

oṃ vyānāya iti svāhāntaṃ sarvadā sadā |

pañcamantraṃ  japitvā vai prāṇaṃ nyasya śivopari |
dhṛtvā śivaṃ maheśāni satataṃ jñānamudrayā ||

prāṇapratiṣṭhāṃ deveśi viśeṣaṃ śṛṇu pārvati |

oṃ hrāṁ hrīṁ yaṁ raṁ laṁ vaṁ śaṁ ṣaṁ saṁ haṁ kṣaṁ sauṁ namaḥ śivāyeti uccārya yat 
kṛtaṃ mayā asya śūlapāṇeḥ prāṇāḥ iha prāṇāḥ | pūrvamantraṃ 
samuccārya asya śūlapāṇeḥ sarvendriyāṇi punaḥ pūrvamuccārya asya 
śūlapāṇeḥ vāṅmanaḥ cakṣuḥ śrotraṃ prāṇa prāṇā ihāgatya ciraṃ 
tiṣṭhantu svāhā | iti |

tataḥ punaḥ samuccārya oṃ namaḥ śivāya ṣaḍakṣaram |
iti mantraṃ maheśāni uccārya saptavā priye ||

p. 27)


dhṛtvānte parameśāni liṅgaṃ śrīkaṇṭhanirmitaṃ |
ataḥ paraṃ maheśāni pādyaṃ dattvā varānane ||

arghyañcāmcamanīyañca dattvā tu śivāliṅgake |
pūrvoktadhyānaṃ deveśi kṛtvāhaṃ varavarṇini ||

kalakaṇṭhapriye devi bilvapatraiḥ śucismite |
dhyānañca hṛdayāyāntaṃ kṛtvā puṣpaṃ śucismite ||

liṅge nikṣipya deveśi bilvapatraṃ manoharaṃ |
tatastu parameśāni āvāhya parameśvaram ||

pūrvoktatantravatsarvaṃ kṛtvāhaṃ jagadīśvari |
tarpaṇaṃ trividhaṃ dattvā ātmābhedena sundari ||

tatastu prārthanaṃ mantraṃ paṭhitvā parameśvari |
āgaccha devadeveśa liṅge'tra susthiro bhava ||

sthito bhūtvā mahādeva pūjāṃ gṛhaṇa namo'stute |
tava prasādāddeveśa brahmāṇḍaṃ racayāmyaham ||

tatastu ṣoḍaśairdevi upacāraiḥ pṛthak pṛthak |
sampūjya devadeveśaṃ liṅgaṃ śrīkaṇṭhasambhavam ||

tatastu añjaliṃ devi dattaṃ bhaktyā śivāya vai |
sarvaṃ dadyānmaheśāni liṅge śrīkaṇṭhasambhave ||

etasmin samaye devi ulmukaṃ savyavikramaḥ |
yaduktaṃ mayi cārvaṅgi nigadāmi śṛṇu priye ||

|| iti liṅgārcanatantre harapārvatīsaṃvāde pañcamaḥ paṭalaḥ || 5 ||


īśvara uvāca-

mṛtyuñjaya mahābāho vacanaṃ prathame prabho |
na śaknomi mahādeva dhartuṃ liṅgaṃ kadācana ||

mama pṛṣṭhe mahādeva dvitīyaṃ śivameva hi |
sthitvāntarikṣe deveśi dhārayāmi kathaṃ prabho ||

kṣamasva devadeveśa kṛpāṃ kurumayi prabho |
namaste devadeveśa parameśaḥ purātanaḥ ||

namaste jagatāṃ nātha mṛtyuñjaya namo'stu te |
ulmukasya vacaḥ śrutvā kiṃ karomi iti priye ||

cintākulo'haṃ deveśi tatkṣaṇādapi pārvati |
dhyānastho'haṃ mahādevi tatkṣaṇādapi pārvati ||

vibhāvya hṛdaye devīṃ taḍinme * tanīmayīṃ |
hṛtpadmānta sthitāṃ devīṃ sundarīṃ sūkṣmarūpiṇīṃ ||

sākṣānmantramayīṃ divyāṃ ṣoḍaśīṃ mokṣadāyinīṃ |
iti rūpaṃ maheśāni dṛṣṭvāścaryaṃ varānane ||

śīvidyāṃ paramāṃ sūkṣmāṃ mayārādhyāṃ śucismite |
suṣumnāntargatāṃ vidyāṃ dharmakāmārthamokṣadām ||

paraṃ brahmamayīṃ nityāṃ śabdabrahmasvarūpiṇīṃ |
sindūrasadṛśākārāṃ yavāyāvakasannibhāṃ ||

taruṇāditya saṅkāśāṃ praṇamya parameśvarīṃ |
prajapya parameśāni śrīvidyāṃ parameśvarīṃ ||

p. 29)

japitvā mānase devi daśadhā parameśvari |
antarātmani sā devī yaduktaṃ mayi pārvati ||

śṛṇu tatsāmprataṃ guhyaṃ jñānasāraṃ vadāmi te |
mābhairmābhairmahādeva mṛtyuñjaya sadāśiva ||

māṃ vinā parameśāna nāsti kiñcittapodhana |
etadviśvaṃ mahādeva saptāvaraṇasaṃyutam ||

sarvametanmahādeva brahmāṇḍaṃ mayi vartate |
śaktiṃ vinā mahādeva na kiñcidvidyate prabho ||

śaktiṃ vinā mahādeva jagat śavamayaṃ sadā |
pralaye sati deveśa mayi sarvamupasthitam ||

kathite sati cārvaṅgi tadit śaktipurīṃ yayau |

īśvara uvāca-

yaduktaṃ parameśāni sā taḍit parameśvari |
śṛṇu guhyaṃ maheśāni jñānasāraṃ vadāmite ||

mṛtyuñjaya mahābāho bhramaśca upajāyate |
etaddhipūjanaṃ deva bhramajanyaṃ sadāśiva ||

śrīvidyā paramārādhyā sarvadā tava suvrata |
tatkathaṃ parameśāna iṣṭa vidyāṃ tyajet prabho ||

iṣṭavidyāṃ prathamato japtvā devi samarcayet |
etaddhi kevalāddeva balahīnaśca ulmukaṃ ||

idānīṃ smara devendra mṛtyuñjaya sadāśiva |
tasyā vākyaṃ tataḥ śrutvā praṇamya mokṣarūpiṇīm ||

p. 30)

tata ulmukamāśvāsya kathitaṃ yat śṛṇu priye |
bho viśva ulmukastvaṃ hi vadāmi varamuttamam ||

kalau tu bhāratevarṣe prādurbhāvo bhaviṣyati |
tava deva mahābhāga ulmukaṃ satyavikramaḥ ||

kāminī tvaṃ mahābhāga dharmastvaṃ śvetarūpadhṛk |
kalau tu tavapūjāyāṃ yo'nyacca manasāyutaṃ ||

brāhmaṇaḥ kṣatriyo vāpi vaiśyo vā śūdrajātayaḥ |
tatkṣaṇāt parameśāni teṣāṃ vyādhiḥ prajāyate ||

yogabhaṅgaṃ maheśāni tatkṣaṇāt mama jāyate |
iṣṭa vidyāṃ na japtvā vai vighnaṃ tasmātprajāyate ||

jagatśaktimayaṃ sarvaṃ yo na vetti sa nārakī |
yogabhaṅgaṃ maheśāni kṛtvā sundari yatkṛtam ||

tatsarvaṃ śṛṇu cārvaṅgi pārthivasya makhaṃ priye |
vibhāvya mukhapadmaṃ hi śivasya varavarṇini ||

sadyojātaṃ vāmadevaṃ aghorañca tataḥ param |
tatpuruṣaṃ tatheśānaṃ pañcavaktraṃ prakīrtitam ||

sadyojātañca vai śuklaṃ śuklena tejasānvitaṃ |
pītavarṇaṃ tathā saumyaṃ vāmadevaṃ manoharam ||

kṛṣṇavarṇamaghorañca samaṃ bhīma vivardhanam |
raktaṃ tatpuruṣaṃ devaṃ divyamūrtiṃ manoharam ||

p. 31)

śyāmalañca tatheśānaṃ sarvadevaśivātmakaṃ |
cintayetpaścimenādyaṃ dvitīyantu tathottare ||

aghoraṃ dakṣiṇe devaṃ pūrve tatpuruṣaṃ tathā |
īśānaṃ madhyato jñeyaṃ cintayed bhaktitatparaḥ ||

pañcamantraṃ maheśāni nigadāmi varānane |
mṛtyuñjayo'haṃ deveśi yajjaptvā parameśvari ||

samastānāṃ svarāṇāntu dīrghāḥ śeṣāḥ sabindukāḥ |
ṛ-ḷśūnyāḥ sārdhacandra praṇavaiḥ sahitā sadā ||

pañcavaktraṃ maheśāni pañcabhūtātmakaṃ sadā |
pṛthivīṃ vāyubījañca āpa ākāśameva ca ||

iti tattvaṃ maheśāni pañcabhūtaṃ parampadam |
sadyojātakrameṇaiva bhāvayetparameśvari ||

kramāt sanmada sanmoha nāda gauravasaṃjñakāḥ |
prasādastu bhavet puṣṭaḥ pañcamantrāḥ prakīrtitāḥ ||

āmodakārakaḥ śambhormantraḥ sanmad ucyate |
manaḥ prapūraṃ gatvā ca sanmohaḥ parikīrtitaḥ ||

ākarṣaṇaṃ maheśāni nādamantraṃ prakīrtitaṃ |
śreṣṭhaṃ hi goravaṃ mantraṃ dharmārthakāmamokṣadaṃ ||

prāsādaṃ parameśāni vibhavapradamucyate |
ekaikena tathaikaikaṃ vaktraṃ mantreṇa pūjayet ||

p. 32)

ekaṃ samuditaṃ kṛtvā pañcabhirvai prapūjayet |
etattattvaṃ maheśāni jñānasāraṃ śivasya hi ||

sarveṣāṃ sthāvarādīnāṃ jñānasāraṃ sudurlabham |
tavabhaktyā mayākhyātaṃ jñānasāraṃ sudurlabham ||

|| iti liṅgārcanatantre haraparvatī saṃvāde ṣaṣṭhaḥ paṭalaḥ || 6 ||


aparañca maheśāni jñānasāraṃ śṛṇu priye |
yasya smaraṇamātreṇa āpadaḥ pralayaṃ gatāḥ ||

dhyāyennityaṃ mahādevaṃ rajatādrisamaprabham |
hāsyayuktaṃ prasannāsāṃ śravaṇe candramaṇḍanam ||

āraktanayanaṃ devaṃ pañcavaktraṃ manoharaṃ |
jaṭājūṭasamāyuktaṃ prativaktratrilocanam ||

yogapadmasamāsīnaṃ muṇḍamālā vibhūṣaṇam |
vibhūtibhūṣaṇaṃ devaṃ vyāghracarmaparicchadam ||

caturbhujaṃ mahākāyaṃ akṣamālādharaṃ sadā |
evaṃ hi cintayeddevaṃ devadevaṃ sanātanam ||

evaṃ hi cintayitvā tu sarvadeveśvareśvaram |
aṇimādyaṣṭasiddhivatpūjāṃ kṛtvā varānane ||

svasvamantraiḥ prapūjyātha bilvapatrairvarānane |
caturthyantaṃ maheśāni kṛtvā siddhin śucismite ||

ādau praṇavamuccāryaṃ

yadbījaṃ punaruddhṛtya caturthyantaṃ śucismite |
bījaṃ hi punaruddhṛtya praṇavāntaṃ tataḥ paraḥ ||

anenaiva vidhānena aṣṭavidyā śucismite |
aṣṭavidyāṃ maheśāni saṃpūjya suravandite ||

pratikoṇe maheśāni caturdikṣu ca sundari |
sampūjya vidhivadbhaktyā japtvā stutvā śucismite ||

kṛtvā pūjāṃ mahādevi aṣṭamūrtiśivasya ca |
yathāṃ parameśāni tat śṛṇuṣva varānane ||

dvāradeśe maheśāni aṣṭamūrtiṃ prapūjya vai |
siddho'haṃ parameśāni sampūjya vidhivatsadā ||

aṣṭamūrtermaheśāni nāmāni śṛṇu sundari |
sampūjya parayā bhaktyā saṃmukhādikrameṇa hi ||

prayogaṃ śṛṇu cārvaṅgi hṛdayasyaṃ sadā mama |

oṃ śarvāya kṣitimūrtaye namaḥ |
oṃ bhavāya jalamūrtaye namaḥ |
oṃ rudrāya agnimūrtaye namaḥ |
oṃ ugrāya vāyumūrtaye namaḥ |
oṃ bhīmāya ākāśamūrtaye namaḥ |
oṃ paśupataye yajamānamūrtaye namaḥ |
oṃ mahādevāya somamūrtaye namaḥ |
oṃ īśānāya sūryamūrtaye namaḥ |

kṛtvā pūjāṃ maheśāni anena vidhinā priye |
aparaikaṃ maheśāni jñānasāra vadāmi te ||

aṣṭaviṣṇuṃ maheśāni sampūjya tadanantaram |
sampūjya parameśāni kuṇḍalyā bāhyaveṣṭani ||

aṣṭaviṣṇormaheśāni nāmāni nigadāmi te |
ugraṃ viṣṇuṃ mahāviṣṇu hyanantaṃ saṃpratāpanam ||


p. 34)

nṛsiṃhaṃ bhīṣaṇaṃ bhīmaṃ mṛtyumṛtyuṃ prakīrtitam |
etān viṣṇu maheśāni yathā saṃpūjya tat śṛṇu ||

saṃmāyādikramāddevi pūjitaṃ viṣṇumavyayam |
tanmantraṃ śṛṇu cārvaṅgi jñānasāraṃ varānane ||

oṃ ugrāya viṣṇave nama iti mahāviṣṇave namastataḥ |
oṃ anantāya viṣṇave nama iti saṃpratāpanāya viṣṇave namaḥ ||

oṃ nṛsiṃhāya viṣṇave nama iti bhīṣaṇāya viṣṇave namaḥ |
oṃ bhīmāya viṣṇave namaḥ |
oṃ mṛtyumṛtyave viṣṇave namaḥ ||

iti pūjāṃ maheśāni kṛtvāhaṃ parameśvari |
viṣṇujñānaṃ mayā prāptaṃ sarvaśakti samanvitam ||

ṣoḍaśairupacāraiśca pūjitaṃ viṣṇumavyayam |
tataḥ paraṃ varārohe mantravāhyaṃ śucismite ||

sarveṣāṃ mātṛṇāṃ mātā pūjitā suravandite |
yaduktaṃ pūrvatantreṣu mātṛkāmantramuttamam ||

etairmantrairmaheśāni mātṛkāṃ pūjitāṃ mayā |
akārādi kṣakārāntāṃ mātṛkāṃ brahmarūpiṇīm ||

sarveṣāṃ mātṛbhūtā sā aiśvarī mātṛrūpiṇī |
yāṃ vinā parameśāni vāṇī ca jaḍatāmiyāt ||

tāṃ devīṃ parameśāni kalārūpeṇa sākṣiṇīm |
pūjayitvā yathānyāyaṃ vidhivatsuravandite ||

rakṣārthamātmano devi brahmāṇḍasya ca sundari |
yā nārī parameśāni mātṛkā sā śucismite ||

p. 35)

tasmādādau ca madhye ca antye ca naganandini |
saṃpūjya mātṛkāṃ devīm anyathā vighnatā bhavet ||

pūrvoktamantravatsarvaṃ mātṛkāmantrameva hi |
pūjayitvā yathā nyāyaṃ gaṇeśaṃ tadanantaram ||

saṃpūjya parayābhaktyā gandhapuṣpādibhiḥ priye |
ataḥ paraṃ varārohe dakṣiṇe viṣṇumarcayet ||

vāme gaurīṃ mahāmāyāṃ saṃpūjya parameśvari |
dakṣiṇe oṃ viṣṇave nama iti vāme gauryai namastataḥ ||

anena vidhinā devi saṃpūjya liṅgamadbhutam |
āmtādi mantrabhedena trivāraṃ tarpayet śivam ||

ataḥ paraṃ varārohe japaṃ kuryādyathā priye |
tanniśāmaya cārvaṅgi jñānasāraṃ parātparam ||

tataśca hṛtpadmānte dhyātvā liṅgaṃ manoharaṃ |
pañcamantraṃ maheśāni prajapya varavarṇini ||

akārādikṣakārāntā vartamānā prakīrtitā |
anulomavilomena japtvā liṅgaṃ śucismite ||

suṣumnāntargatāṃ citrāṃ japamālāṃ varānane |
mālāṃ sūkṣmāṃ maheśāni nānācitravicitritām ||

suṣumnāntargatā yā tu sā nābhi mucyate |
śivaśaktimayī sā tu satataṃ kamalānane ||

p. 36)

japamālāṃ gṛhītvā tu japtvā lakṣaṃ śucismite |
sahasrāre mahāpadme dṛṣṭvā cānandamadbhutam ||

ānandaṃ brahmaṇo rūpaṃ iyaṃ prakṛti rūpiṇī |
sadāśiva mahāpreta dṛṣṭā śaktipurī priye ||

mālāṃ nityanatāṃ devi kṛtvā tatraiva līyate |
tadakṣaraṃ maheśāni lakṣaṃ japa śucismite ||

etasmin samaye devi manobrahmaṇi līyate |
sadāśivapuro devi dṛṣṭvā śaktiṃ sudhāmayīm ||

yadvā ṣaḍakṣaraṃ jāpyaṃ yaduktaṃ tat śṛṇu priye ||

|| iti liṅgārcanatantre harapārvatī saṃvāde saptamaḥ paṭalaḥ || 7 ||


īśvara uvāca-

sūkṣmāti sūkṣmāṃ paramāṃ yavā sindūrasannibhām |
caturbhūjāṃ trinetrāṃ ca pañcabāṇa dhanurdharām ||

raktavastraparīdhānāṃ kiṅkiṇī kaṭiśobhitām |
nūpurādiraṇatkāraiḥ śobhitāṃ parameśvarīm ||

śaṅkhakaṅkaṇakeyūra valayādi vibhūṣitām |
stanadvayayutāṃ devīṃ tārahāra virājitām ||

sarvadevamayīṃ devīṃ sarvadevamayīṃ śivāṃ |
brahmaviṣṇuśiroratna nidhṛṣṭacaraṇāmbujām ||

abhayaṃ varadaṃ caiva mudrādvaya vidhāriṇīm |
gaṅgāñca yamunāñcaiva śoṇañca nayanasthitām ||

sindūramasṛṇaṃ yasyāḥ prātarāruṇasannibhām |
evaṃ dṛṣṭvā maheśāni ānandaṃ mama jāyate ||

p. 37)

vismṛto'haṃ maheśāni saḍakṣarajapaṃ priye |
śrīvidyāṃ parameśāni mukṁhe tasyāḥ śucismite ||

śrīvidyāṃ parameśāni sadā mama hṛdi sthitām |
tathā ca kālikāṃ vidyāṃ tasyāḥ kaṇṭhe virājate ||

atha daśamahāvidyāyā utpattiḥ

bhuvaneśīṃ mahāvidyāṃ tasyā dakṣiṇabāhuṣu |
vāmabāhau maheśāni tasyāstu bhairavī priye ||

hṛdaye chinnamastā ca tasyāstu parameśvari |
mātaṅgī vagalādevī tasyāḥ pādadvaye tathā ||

tasyā nābhau maheśāni lakṣmīñca kamalānane |
tasyāḥ maulau maheśāni svayaṃ mahiṣamardinī ||

pañcāśanmātṛkāṃ devīṃ pañcāśat sthānasandhiṣu |
tiṣṭhanti parameśāni svasvarūpādibhiḥ priye ||

sarvāgamamayīṃ devīṃ sundarīṃ mokṣarūpiṇīṃ |
tasyā mukhe maheśāni dṛṣṭvā vidyāṃ parākṣarām ||

tāṃ vidyāṃ parameśāni dṛṣṭvā hṛdayapadmasu |
nirvacya paramaṃ jñānaṃ śrīvidyāmantramuttamam ||

japitvā parameśāni lakṣaṃ mānasasaṃbhavam |
ātmanā manaso devi kṛtvā saṃyogamuttamam ||

evaṃ japtvā maheśāni lakṣavarṣaṃ gato mama |
svāhāgamo maheśāni ajapādvyakṣarātmakam ||

svayamātmā maheśāni tasyāḥ śirasi vartate |
ataḥ paraṃ varārohe bhramarīṃ gatavān priye ||

p. 38)

bhramareṇa saha śīghraṃ bhramarī nāganandini |
mūlādhāraṃ yayau devi madhupānāya kāminī ||

baddhvā tu bhramarī devi mukhantūrdhvaṃ śucismite |
sadāśivapure ramye yatrāste mokṣarūpiṇī ||

lakṣaṃ hi mānasaṃ japtvā śrīvidyāṃ parameśvarīm |
yogaṃ mama maheśāni tatkṣaṇāt bhaṅgatāmiyāt ||

bhramaraḥ parameśāni sṛṣṭyādīnāṃ śucismite |
bhramarīṃ siddhihastāñca badhvāyāti purīṃ purīm ||

baddhvā tu bhramaraṃ devi brahmarūpaṃ nirañjanam |
sarveṣāṃ parameśāni sṛṣṭyādīnāṃ śucismite ||

bhramaraḥ kāraṇaṃ devi mokṣādīnāṃ na saṃśayaḥ |
bhramarī tu maheśāni bhramarasya ca kāraṇam ||

kāryañca kāraṇaṃ devi bhramarī kamalānane |
bhramarānugaḥ sadātmā ca bhramaryā anugatau ca tau ||

sarveṣāṃ kāraṇaṃ devi bhramarī siddhidhāriṇī |
yā siddhīḥ siddhisūtrāṇāṃ sarvamāvṛtya tiṣṭhati ||

bhramaraḥ parameśāni sākṣādbrahmayaḥ sadā |
bhramarī unmanī devi sākṣānmokṣasvarūpiṇī ||

sthitvā padmavate devi madhupānaṃ karoti hi |
dṛṣṭvā mokṣapradāṃ nityāṃ sākṣānmokṣasvarūpiṇīm ||

tadaiva sahasā jātaṃ jñānasāraṃ mama priye |

īśvara uvāca-

aparaikaṃ śṛṇujñānaṃ paramaṃ padmamuttamam |
triguṇairdhāritāṃ devi dṛṣṭāścaryaṃ mama priye ||

triguṇaṃ parameśāni rudraviṣṇupitāmahāḥ |
sarve te parameśāni strīrūpā parameśvari ||

yā vāmā parameśāni brahmā sākṣāccaturmukhaḥ |
rajoguṇānvitā vāmā sindūrākṛti rūpiṇī ||

yā viṣṇu parameśāni sadā sattvaguṇātmakaḥ |
śuklākārā maheśāni sadā pālanakāriṇī ||

caturbhujā maheśāni śaṅkhacakragadādharā |
sanakādyaiḥ stutā dṛṣṭā āścaryamaparaṃ śṛṇu ||

yā raudrī parameśāni sā kṛṣṇā parameśvari |
jitvā māṃ parameśāni lelihānā jagattrayam ||

ata eva maheśāni nirdhūya mama mānasi |
brahmā viṣṇuśca rudraśca strīrūpā sarvadāsthitāḥ ||

caturvedaṃ śiredhṛtvā vāmā tiṣṭhati sannidhau |
anyaccaturdaśaṃ śāstraṃ dhṛtvā viṣṇuḥ śucismite ||

sūryaśāstramitīhāsa dhṛtvā rudraḥ śucismite |
asyāmante maheśāni pādelagnā sthitiḥ priye ||

vāmā brahmāmaheśāni jyeṣṭhā viṣṇuritīritā |
rudrastu raudrī vijñeyā triguṇaṃ parameśvari ||

p. 40)

koṭilakṣaṃ āgamaṃ hi sundaryā hastasaṃsthitam |
japanavidyāṃ mayārādhyāṃ śrīvidyāṃ brahmavigrahām ||

sadāśivapure dṛṣṭvā āścaryaṃ mama jāyate |
paraṃ rūpaṃ samāsthāya sadāśivapure sadā ||

sā devī sundarī devi jaganmohanarūpiṇī |
sarveṣāṃ sthāvarādīnābhādibhūtā sanātanī ||

ataḥ paraṃ varārohe lakṣaṃ japtvā śucismite |
ādau tantraṃ maheśāni paṭhitvā devadurllabham ||

nigadāmi śṛṇu prauḍhe tantraṃ guhyaṃ parātparam |

asya śrī pañcākṣaramantrasya brahmaviṣṇurudrā ṛṣayaḥ ṛgyajuḥ 
sāmātharvacchandāṃsi śrīmṛtyuñjayā sarve devatā caturvargasiddhyarthaṃ 
jape viniyoga |

bāhya jāpaṃ maheśāni kṛtvā lakṣaṃ prayatnataḥ |
arpaṇīyaṃ tato dṛṣṭvā bilvapatraṃ prayatnataḥ ||

namaskṛtya pārthivaṃ liṅgaṃ parabrahmamayaṃ priye |
tatastu liṅgaṃ kavacaṃ paṭhitvā kamalānane ||

atha mukhavādya praśaṃsā

mukhavādyaṃ sanityaṃ hi kṛtvā tu parameśvari |
mātṛkāmantra sahitaṃ mukhavādyaṃ sudurlabham ||

akārādikṣakārāntaṃ anulomavilomataḥ |
uccārya parameśāni mukhavādyaṃ prayatnataḥ ||

sabinduṃ varṇamuccārya pañcāśanmātṛkāṃ priye |
anuloma vilomena śabdena ca varānane ||

p. 41)

anenaiva vidhānena mukhavādyaṃ karoti yaḥ |
sa siddhaḥ sa śivaḥ so'pi saguṇo nātra saṃśayaḥ ||

mṛtyuñjayo'haṃ deveśi mukhavādyaprasādataḥ |
yasmin kāle maheśāni asuro balavadbhavet ||

tasminkāle maheśāni mukhavādyaṃ karomyaham |
tat śrutvā parameśāni asurā vāhyayāśritāḥ ||

palāyante maheśāni tat śrutvā parameśvari |
ye navā bhuvi tiṣṭhanti mukhavādyaṃ vinā priye ||

sa sarva yātanābhogī ante kumbhīratāṃ vrajet ||

|| iti liṅgārcanatantre harapārvatī saṃvāde aṣṭamaḥ paṭalaḥ || 8 ||


śrīdevyuvāca-

bhagavan devadeveśa śūlapāṇe pinākadhṛk |
yogendrenda mahābāho mṛtyuñjaya namo'stute ||

ṣoḍaśairupacāraistu kuto labdhaṃ tapodhana |
pralaye sati deveśa naṣṭe sthāvarajaṅgame ||

prāṇāyāmasya kāle ca bhūtaśuddhau tathā prabho |
yadā tatra mahādeva manobuddhyādi līyate ||

kṣaṇamātreṇa deveśa lakṣavarṣaṃ gato mama |
candrārkau gagane naṣṭe kuto rātriḥ kuto divā ||

kāraṇaṃ parameśāna kuto saṅkhyā taponidhe |

īśvara uvāca-

sādhupṛṣṭhaṃ tvayā bhadre vākyaṃ pīyuṣasambhavaṃ |
tava vākyaṃ maheśāni sadā pīyuṣasambhavam ||

p. 42)

pīyūṣasambhavaṃ vākyaṃ hāsyayuktaṃ tava priye |
brahmānandamayaṃ vākyaṃ mama yogasamaṃ priye ||

yogena parameśāni bhāvayāmi divāniśaṃ |
śarīraṃ tava deveśi bahubhāvyena bhāmini ||

yogakāle maheśāni paśyāmi bahubhāgyataḥ |
bāhyajñānaṃ maheśāni paśyāmi sakalaṃ tava ||

antarjñānaṃ bahirjñānaṃ tava māyā varānane |
tava māyā durādharṣā tava hastasthitā yadā ||

bhramarī yā tu deveśi siddhasūtravidhāriṇī |
sthāvaraṃ jaṅgamaṃ devi tvayi sarvaṃ pratiṣṭhitam ||

mṛtyuñjayo'haṃ deveśi tavāṅgasparśanāt priye |
śṛṇu pārvati vakṣyāmi yattvayā gaditaṃ priye ||

pralaye parameśāni naṣṭe sthāvara jaṅgame |
sarvaṃ mayi maheśāni sthāvarā jaṅgamāśca ye ||

tāni sarvāṇi deveśi tiṣṭhanti satataṃ priye |
mama tejasi cārvaṅgi sarvaṃ tiṣṭhati kāmini ||

tejastu parameśāni sadā prakṛtirūpiṇi |
nirguṇo'haṃ maheśāni satataṃ parameśvariṃ ||

saguṇā sarvadātvaṃ hi saguṇāstvaṃ śucismite |
viśeṣaṃ śṛṇu vakṣyāmi rahasyamati gopanam ||

ye ye bhaktyā maheśāni brahmādyāstridivaukasaḥ |
ye ye martyā maheśāni kṣālādyāḥ parameśvari ||

p. 43)

mātṛkā prabhṛtāścānye narāḥ gandharvayonayaḥ |
brahmāṇḍavāsināṃ devi bhaktānāṃ kamalānane ||

gandhapuṣpādibhirdevi dattvā pūjitavān mayi |
sarvaṃ tadakṣayaṃ bhūtvā tiṣṭhate parameśvari ||

jaṭājūṭeṣu deveśi satataṃ mama kāmini |
ṣoḍaśairupacāraiśca kṛtvā pūjāmayi sthitā ||

mama madhyamukhaṃ devi īśānaṃ brahma sammitaṃ |
tatra dattaṃ maheśāni sarvaṃ brahmamayaṃ bhavet ||

ṣoḍaśairupacāraiśca yadattaṃ bhaktibhāvataḥ |
sarvaṃ hi akṣayo bhūtvā jaṭājūṭe sthito mama ||

yat kiñcit parameśāni jalaṃdattvā śucismite |
tajjalaṃ devadeveśi jaṭājūṭe sthitaṃ mama ||

sā gaṅgā parameśāni brahmāṇḍavyāpinī parā |
śveta mūrtidharā devi śvetapadmāsanasthitā ||

śvetāmbaraparīdhānā śvetamālyopaśobhitā |
yuktāmāṇikya jaṭitā kuṇḍalaṃ satataṃ dhṛtā ||

caturbhujā mahāmāyā abhayaṃ varadaṃ dhṛtā |
sudhākuṇḍañca deveśi dhṛtā sā parameśvari ||

dhṛtā rudrākṣamālāñca satataṃ japakāminī |
dhṛtā tu japamālā vai japakāraṇamuttamam ||

tanmantraṃ śṛṇu cārvaṅgi kālikāyāḥ sudurlabhaṃ |
aṣṭākṣarīṃ maheśāni śṛṇu vakṣyāmi kāmini ||

p. 44)

kāmabījaṃ samuddhṛtya dakṣiṇe kālike tataḥ |
punaḥ kāmaṃ samuddhṛtya aṣṭākṣaramidaṃ priye ||

evaṃ bhūtvā tu sā gaṅgā sadā jaṭātaṭe sthitā |
sthāvaraṃ jaṅgamaṃ caiva jaṭājūṭe sthito mama ||

brahmāṇḍa vyāpinī yasyāḥ sā gaṅgā iti gīyate |
sā gaṅgā parameśāni īśvarī adyanāśinī ||

jalarūpeṇa sā devī sadā mama śiraḥ sthitā |
etaddravyaiḥ ṣoḍaśaiśca upacāraiḥ pṛthak pṛthak ||

sampūjya pārthivaṃ liṅgaṃ bāhyayogaṃ mama priye |
bāhyayogaṃ vinā devi antaryogaṃ na siddhyati ||

antaryogaṃ vinā devi bāhyayogaṃ na siddhyati |
ata eva maheśāni liṅgapūjā kṛtā mayā ||

bāhyapūjāṃ vinā devi na hi sṛṣṭiḥ prajāyate |
sṛṣṭiṃ vinā maheśāni sarvaṃ hi guptatāmiyāt ||

iti tattvaṃ maheśāni gaṅgā janmasamudbhavam |
yogakāle maheśāni katilakṣaṃ gato mama ||

sarvaṃ tejasi taddṛṣṭaṃ prakṛtau sarvasaṃsthitaṃ |
iti jñānaṃ na jānāmi yadi kāminī tacchṛṇu ||

tadā yogena deveśi kiṃ karomi varānane |
etatsarvaṃ maheśāni yogamārgasthitaṃ sadā ||

yogamārgaṃ varārohe pañcāśattattvaṃ saṃyutam |
tattvaṃ hi paramaṃ jñānaṃ prakṛtīrūpamavyayam ||

p. 45)

prakṛtirbrahmaṇo rūpaṃ trailokyamohini priye |
lomeyādi varṣa paryantaṃ sarvaṃ tiṣṭhati pārvati ||

iti dṛṣṭvā maheśāni lakṣasaṃkhyaṃ karomyaham |
gaṅgā hi kāraṇa jalaṃ jaṭājūṭe sthitaṃ sadā ||

gaṅgāyāḥ parameśāni utpatti sthānamuttamaṃ |
jaṭājūṭaṃ maheśāni sadā mama śucismite ||

pralaye parameśāni naṣṭe sthāvarajaṅgame |
tasmin kāle maheśāni kāraṇaṃ drutamāgataṃ ||

samīpaṃ mama deveśi sā gaṅgā satvaraṃ vacaḥ |
uvāca sūkṣmayā vācā tasmin pūrveṇa pārvati ||

bho deva tapasāṃ śreṣṭha paramātman namostute |
gaurīnātha mahādeva prasanno bhava me prabho ||

candrārkau gagane deva adṛśye sati śūlabhṛta |
sthāvare jaṅgame deva adṛśye parameśvara ||

kiṃ karomi kvagacchāmi satyaṃ vada dayānidhe |
sthānaṃ devi mahābāho mṛtyuñjaya namostu te ||

īśvara uvāca-

tasyāstu kāraṇaṃ vākyaṃ śrutvā yat pravruvaṃ śṛṇu |
āgaccha mṛgaśāvākṣi kāraṇe parameśvari ||

jaṭājūṭe maheśāni sthitābhava namostu te |
prakṛtistvaṃ mahābhāge sarvapāpapraṇāśini ||

trāhi māṃ cañcalāpāṅgi śvetamūrtidhare śubhe |
jaṭājūṭaṃ maheśāni gaṅgāsthānamanuttamam ||

p. 46)

tatra gaṅgā sadāvyāptā prakṛtiḥ parameśvarī |
yā yā ca mama deveśi sākṣāt prakṛtirūpiṇī ||

jalaiḥ piṅgalavarṇābhā sahasrādityasannibhā |
tejomayīṃ jaṭāṃ divyāṃ sākṣānmokṣaṃ varānane ||

jaṭāyāṃ krāṇe devi sarvapāpapahāriṇi |
tasyā nāma mahāgaṅgā vedoktā parameśvari ||

mahāgaṅgā tu sā devi jaṭājūṭataṭe sthitā |
ānanda pralayībhūtā ānandalaharī sadā ||

yā sā gaṅgā mahādevi svayaṃ śakti svarūpiṇī |
bilvapatrayutā sā tu jaṭājūṭe sthitā sadā ||

mṛtyuṃ jitvāmathā devi tiṣṭhāmi tava hetunā |
yathā gaṅgā priyā devi ajarāmaratā mama ||

ajarāmaratāṃ devi mahāgaṅgāprabhāvataḥ |
sā yā tu mahatīgaṅgā aṣṭaiśvarya pradāyinī ||

tasmāttu kāraṇajale nirmale pāpahāriṇi |
jaṭāyāṃ tiṣṭha cārvaṅgi mahādeva priye sadā ||

ataḥ paraṃ tu sā gaṅgā sthirībhūtā jaṭātaṭe |
dṛṣṭvā jatātaṭe ramyāṃ nānāpuṣpa samanvitām ||

nānāgandha samāyuktāṃ nānāratnapariṣkṛtāṃ |
yadyad dṛṣṭaṃ jaṭājūṭe mama sundari kāmini ||

dṛṣṭā tu kāraṇī gaṅgā tatkṣaṇāt ca svayaṃ gatā |
jaṭājūṭeṣu yaddṛṣṭaṃ varṇituṃ naiva śakyate ||

p. 47)

jaṭājūṭeṣu yā gaṅgā ādigaṅgeti viśrutā |
śveta gaṅgeti deveśi jīvabhūtā sanātanī ||

īśvara uvāca-

gaṅgādvayaṃ maheśāni sadā mama śiraḥ sthitam |
yat kiñcid dṛśyate sthūlaṃ sūkṣmaṃ vā parameśvari ||

jaṭājūṭe'si deveśi sarvaṃ mama śucismite |
jaṭā tu parameśāni śuklarūpā manoharā ||

karpūrasadṛśākārā śubhramegha samaprabhā |
jaṭā mama maheśāni aṣṭadhā varavarṇini ||

aṣṭasvaṅge varārohe sadā jaṭātaṭe sthitā |
sampūjya pārthivaṃ liṅgaṃ gandhapuṣpādibhiḥ priye ||

yāvacca upacārāṇi tatsarvaṃ prakṛtiḥ priye |
tataḥ paścānmahādevi sukhadaṃ puṣpacandanaṃ ||

naivedyaṃ vividhaṃ devi sugandhaṃ gandhavarjitam |
bilvapatraṃ ca kalhāraṃ tagaraṃ mallikāṃ tathā ||

mālatīṃ yūthikāṃ devi karavīraṃ manoharam |
padmañca ketakīṃ kundaṃ tathā āmalakīṃ priye ||

kumudaṃ kokanadaṃ caiva caturvarṇañca sundaram |
dūrvāñca tulasīṃ caiva dattvā saṃpūjya pārthivam ||

anyāni yāni puṣpāṇi dhustūrādīni pārvati |
dhustūrasadṛśaṃ puṣpaṃ mama jñānena dṛśyate ||

dhustūraṃ parameśāni sākṣānmokṣasvarūpakam |
gokoṭidāne deveśi yatphalaṃ parameśvari ||

p. 48)

dhustūrasya pradānena samatāṃ yāni pārvati |
yāni yāni ca puṣpāṇi brahmāṇḍa bharitāni ca ||

tāni sarvāṇi saṃnyasya deveśi pārthivopari |
yāni yāni ca dhūpāni dīpāni vividhāni ca ||

anyāni upacārāṇi yathokta vidhinā priye ||

|| iti śrīliṅgārcana tantre harapārvatī saṃvāde navamaḥ paṭalaḥ || 9 ||


īśvara uvāca-

yathoktavidhinā devi śivaṃ sampūjya pārthivam |
kṛtārtho'haṃ maheśāni sarvaṃ tvayi śucismite ||

pūjākāle maheśāni bahukālaṃ gato mama |
tathā tu vijayāpatraṃ saṃnyasya pārthivopari ||

dattvā tu vijayā patraṃ aśvamedhaphalaṃ bhavet |
mukhavādyaṃ hi samyak kṛtvā lakṣaṃ gato mama ||

tāṇḍavaṃ mama deveśi mukhavādyaṃ varānane |
dṛṣṭvā tu parameśāni liṅgaṃ bhittvā tadā priye ||

āvirāsīttato bhadre svayaṃ prakṛtiḥ kāmini |
āvirbhūtā mahāmāyā jagatāṃ rakṣaṇāya ca ||

dṛṣṭvā devīṃ maheśāni sākṣānmokṣasvarūpiṇī |
pārśvabhūtā mahāmāyā daśavādyasamanvitā ||

siddhasthā parameśāni pūjanāttava suvrate |
tasyā vākya tataḥ śrutvā nipatyacaraṇopari ||

p. 49)

pādyārghyādīni deveśi yaddattaṃ bhaktibhāvataḥ |
yaddattaṃ parameśāni jalagaṅgāśiraḥ sthitam ||

sā gaṅgā parameśāni tasyāḥ padme vyavasthitā |
trailokya jananī bhūtvā trailokyasyāpi saṃsthitā ||

yaddattaṃ parameśāni tasyai devyai śucismite |
tacchṛṇuṣva maheśāni nigadāmi tavānaghe ||

īśvara uvāca-

paramānandavibhave namo'stu parameśvari |
sākṣāttu dharmade satye kāmade'rthade sadā ||

namaste jagatāṃ mātaḥ pāpahantri namo'stute |
naṣṭe tu parameśāni brahmāṇḍe maṇi pūjite ||

kiṃ karomi cchagacchāmi cintā vyākulamānasaḥ |
sampūjya pārthivaṃ liṅgaṃ bahuyānena sundari ||

adyaiva saphalā pūjā śrīpādadarśanāttava |
kṛtārtho'haṃ maheśāni tava śrīpādadarśanāt ||

yaddattaṃ tu maheśāni upacāraṃ manoharaṃ |
tatsarvaṃ parameśāni paśyāmi tava pādayoḥ ||

varaṃ dehi mahāmāye sṛṣṭisaṃhārakāriṇi |
viśvaṃ pūrvaṃ sthitaṃ devi sthāvaraṃ jaṅgamaṃ ca yat ||

te naiva vidhinā devi brahmāṇḍapatanaṃ kuru |
ataḥ paraṃ mahāmāyā śrutvā mama śivaṃ priye ||

candanairmilitaṃ liṅgaṃ ādāya vāmake'ṅgule |
pūtanīṃ paramāṃ ramyāṃ nirmāya sā jaganmayaṃ ||

p. 50)

vāmā jyeṣṭhā tathā raudrī pūtanīyamidaṃ smṛtam |
vāmā brahmā maheśāni jyeṣṭhā viṣṇustu gīyate ||

tato raudrīṃ vinirmāya prāṇamantreṇa pārvati |
prāṇapratiṣṭhāṃ deveśi tatra kṛtvā śucismite ||

prāṇapratiṣṭhākāle tu yaddṛṣṭaṃ yogavardhini |
brahmāviṣṇuśca rudraśca rajaḥ sattva tamoguṇaḥ ||

pūtanyāṃ parameśāni te devāstatkṣaṇāt priye |
āvirbhūtā maheśāni satyaṃ satyaṃ śucismite ||

mūrtitrayaṃ vinirmāya tatraivāntaradhīyate |
antardhānaṃ gate sā tu cinmayo'haṃ varānane ||

tasmin kāle maheśāni yogastho'haṃ varānane |
yogamārge maheśāni sthitvā ca lakṣavatsaram ||

yonikuṇḍe maheśāni sundaryāḥ parameśvari |
bahuyatnena tāṃ devīṃ dṛṣṭvā mahiṣamardinīm ||

yo yonirardhamātrā sā tāraṃ brahmādibhiḥ sadā |
mukhaṃ tasyā vijānaṃti bindvarkaṃ kamalānane ||

dṛṣṭamātreṇa deveśi bhramaro bhramarīsaha |
prayayau parameśāni antasthānaṃ śucismite ||

tasyā ḍimbhe maheśāni tvaṃ mayā sahitā priye |
sarvaṃ dṛṣṭaṃ maheśāni yathā pūrvaṃ śucismite ||

p. 51)

śrīdevyuvāca-

yonikuṇḍe maheśāna yaddṛṣṭaṃ parameśvara |
tanme kathaya deveśa jñānasāraṃ tapodhana ||

īśvara uvāca-

dṛṣṭaṃ mayā maheśāni triguṇaṃ siṃhavāhini |
tasyāḥ pādāmbuje devi dṛṣṭaṃ triguṇavigrahaṃ ||

rajaḥ sattvaṃ maheśāni tathā tamoguṇaṃ priye |
rajo brahmā maheśāni viṣṇuśca sattvarūpadhṛk ||

rudrastamātmakaṃ devi dṛṣṭaṃ tasyāḥ padadvaye |
pade lagnā maheśāni tiṣṭhanti satataṃ priye ||

vāgbhavaṃ kāmabījaṃ ca śrībījaṃ ca śucismite |
vāgbhavaṃ rajoguṇaṃ devi śrībījaṃ sattvamadbhutam ||

kāmabījaṃ maheśāni tamorūpañca mūrtimān |
bījatrayaṃ varārohe strīrūpī nātra saṃśayaḥ ||

vāmā tu vāgbhavaṃ bījaṃ jyeṣṭhā śrībījamucyate |
kāmaṃ raudrī maheśāni dṛṣṭvā tasyāḥ padadvaye ||

bāhyajñāne maheśāni mama kāmini sundari |
yogamārge ca yaddṛṣṭaṃ bāhyajñāne ca yat priye ||

|| iti śrīliṅgārcanatantre harapārvatīsaṃvāde daśamaḥ paṭalaḥ || 10 ||

īśvara uvāca-

nigadāmi varārohe bāhyajñānaṃ śṛṇu priye |
yatpṛṣṭaṃ parameśāni viṣṇuṃ rudraṃ pitāmaham ||

yā brahmā sṛṣṭikartā sā viṣṇuḥ pālanatatparaḥ |
rudrastu parameśāni sadā saṃhārakārakaḥ ||

p. 52)

udgrāhya viśvaṃ brahmāṇḍaṃ vāmāśaktyāḥ prasādataḥ |
brahmaṇe kimadhiṣṭhānaṃ yaḥ sumeruśca pārvati ||

ante brahmā maheśāni sadārajoguṇātmikā |
viṣṇuḥ praviśya brahmāṇḍaṃ pālayatyati sundari ||

vaṣṇavīṃ śaktimāsthāya viṣṇustu pālakaḥ sadā |
rudraḥ saṃhārako devi raudrīśaktyāḥ prasādataḥ ||

ataḥ paraṃ maheśāni jñānasāraṃ vadāmi te |
viṣṇoḥ sattvaguṇe devi yaddṛṣṭaṃ parameśvari ||

nigadāmi śṛṇu prājñe khañjanākṣi namostu te |
khañjanaṃ tava netraṃ hi yathābhavati pārvati ||

tava tatparameśāni nigadāmi śṛṇu priye |
avatārā maheśāni vyāsena gīyante sadā ||

vyāsastu parameśāni mama deho varānane |
sa ca vyāso maheśāni mama mūrtimupāsaya ||

matsyaḥ kūrmo varāhaśca nṛsiṃho vāmanastathā |
rāmaḥ kṛṣṇaśca devaśca jāmadagnyastathā pare ||

buddhaśca kalkirūpaśca anye ca bahavaḥ priye |
viṣṇau sattvamaye devi mayā dṛṣṭāḥ śucismite ||

viṣṇuveśā maheśāni matsyādyāḥ parameśvari |
etatsarvaṃ mayā dṛṣṭaṃ viṣṇoḥ sattvaniketane ||

brahmā rudrastathā viṣṇuḥ sadā dṛṣṭo maheśvari |
tadā tu parameśāni abhiṣekaṃ mayā kṛtam ||

abhiṣikte maheśāni devān triguṇadhāriṇaḥ |
tatastu parameśāni devatvaṃ parameśvari ||

tato brahmā maheśāni tajjalaṃ parameśvari |
kamaṇḍaluṃ pūrayitvā brahmalokaṃ yayau drutam ||

iti tattvaṃ maheśāni sadā mama hṛdi sthitam |
tato brahmādayaḥ sarve māṃ namaskṛtya pārvati ||

svasthānaṃ parameśāni yā tuṃ baddhādarāḥ sadā |
ahantu parameśāni devānāśvāsya satvaram ||

kailāsaṃ parvataśreṣṭhaṃ nirvāṇasadṛśaṃ priye |
kailāsaṃ parameśāni sthānaṃ mama sudurlabham ||

alakā pūśca deveśi sarvaśaktimayi priye |
vimānaṃ puṣpakaṃ devi sarvagaṃ parameśvari ||

mama koṣaṃ maheśāni sarvaratnavibhūṣitam |
koṣādhyakṣo maheśāni kuberaḥ kamalekṣaṇe ||

vāsārthaṃ parameśāni yogadhāraṇasakṣamam |
ulmukaṃ pṛṣṭhamāruhya dharmasya vṛṣarūpiṇaḥ ||

nāmnā nandī maheśāni sīyante sakalā janāḥ |
sā nandī parameśāni kāminī sā varānane ||

kailāsamāśritaṃ devi kṛtaṃ yatnena sundari |
etasmin samaye devi śarīragrahaṇaṃ kṛtam ||

śaktitvātparameśāni śānto'haṃ varavarṇini |

p. 54)

śrīdevyuvāca-

bho deva karuṇānātha sadātvaṃ bhaktavatsalaḥ |
dīnatrāṇaparo deva nīlakaṇṭha tapodhana ||

aparaikaṃ mahādeva sandehaṃ jñānayogahṛt |
brahmāṇḍaṃ nāśamāyāti jāyate tatkathaṃ punaḥ ||

jīve gate maheśāna punaryāti kathaṃ prabho |
naṣṭe sati mahādeva sthūlaṃ bhasmamavāpnuyāt ||

sūkṣmaṃ hi parameśāna nirvāṇaṃ padamāpnuyāt |
sthūlaṃ sūkṣmaṃ mahādeva śarīradvayamucyate ||

sthūlenaṣṭe maheśāni kṛmiviḍbhasmasādbhavet |
sūkṣmaṃ hi paramaṃ jñānaṃ nirvāṇaṃ padamāpnuyāt ||

nirvāṇaṃ brahmaṇo rūpaṃ prakṛtirmokṣarūpiṇī |
sthūlaṃ hi parameśāna sāmānyaṃ prakṛtervapuḥ ||

tatkathaṃ parameśāna punaḥ sṛṣṭiṃ vrajatyasau |

īśvara uvāca-

sandehaṃ tyaja cārvaṅgi jñānasāraṃ vadāmi te |
brahmāṇḍe parameśāni gate naṣṭe śucismite ||

sthāvaraṃ jaṅgamaṃ caiva sarvameva carācaram |
punarāyānmaheśāni yathāpūrvaṃ yathāmati ||

sarvaṃ dṛṣṭaṃ mayā devi sarvaśaktisvarūpiṇi |
sthūlaṃ vā prameśāni sūkṣmaṃ sarvañca adbhūtam ||

mayā dṛṣṭaṃ brahmamārge yogendratvaṃ mayi priye |
brahmādyāstṛṇaparyantaṃ sarvaśaktipure mayā ||

p. 55)

yathā dṛṣṭaṃ śaktipure tatsarvaṃ parameśvari |
aparaṃ jñānasāraṃ hi sārātsāraṃ parātparam ||

nigadāmi śṛṇu prauḍhe sāvadhānāvadhāraya |
brahmamārge śaktipure paramānandarūpiṇi ||

mayādṛṣṭaṃ maheśāni āścaryaṃ paramādbhutam |
āyānti yānti bahuśo gaṇanā tasya kā priye ||

lomakūpāt maheśāni āmokṣāt prakaroti hi |
tatsarvaṃ parameśāni brahmāṇḍopamayaṃ priye ||

etattathyaṃ varārohe na hi mithyā śucismite |
janmavanmaraṇañcaiva gamanāgamanaṃ priye ||

sarvaṃ dṛṣṭaṃ mayā devi sadā śaktipure priye |
tasmāttu parameśāni maraṇaṃ jananaṃ tathā ||

etad dvayaṃ maheśāni gamanāgamanaṃ smṛtam |
gamanaṃ dvividhaṃ bhadre jananaṃ maraṇaṃ priye ||

tasmāttu jananaṃ devi maraṇaṃ vā varānane |
kasya syāccañjalāpāṅgi mithyāvadasi kāmini ||

sarvaṃ śaktimayaṃ devi brahmāṇḍaṃ sacarācaram |
yathāpūrvaṃ śarīraṃ hi punarāyāt varānane ||

yannaṣṭaṃ parameśāni śarīraṃ sthūlarūpakam |
yadākāraṃ maheśāni dṛṣṭaṃ śaktipure mayā ||

sandehaṃ tyaja cārvaṅgi ātmano maraṇe priye |
ātmā hi brahmaṇo rūpaṃ prakṛtiḥ parameśvarī ||

p. 56)

śuddhajambūnadākāraṃ ātmānaṃ viddhi sundari |
tatkathaṃ parameśāni maraṇaṃ tasya sundari ||

śrīdevyuvāca-

namaste puṇḍarīkākṣa yogendra parameśvara |
atiguhyaṃ rahasyaṃ hi kṛpayā vada śaṅkara ||

yadyasti parameśāna koṭiśo hyacarāśaya |
kasmin piṇḍe mahādeva sthitistu tava yogamṛt ||

īśvara uvāca-

prati piṇḍe maheśāni sthito'haṃ sarvadā mama |
pratipiṇḍaṃ maheśāni etadviśvopamaṃ sadā ||

piṇḍe piṇḍe maheśāni tiṣṭhāmi satataṃ sadā |
tvāṃ vinā parameśāni na hi tiṣṭhāmi kutracit ||

tava yogabalāddevi śarīraṃ bahudhā mama |
mahati pralaye devi sarvadevamavāpnuyāt ||

mahati pralayaṃ devi ekadaiva bhavetpriye ||

|| iti śrīliṅgārcanatantre harapārvatī saṃvāde ekādaśaḥ paṭalaḥ || 11 ||


śrīdevyuvāca-

devadeva mahādeva yattvayā pūrvasūcitam |
rahasyaṃ śivaliṅgasya kṛpayā vada śaṅkara ||

īśvara uvāca-

rahasyaṃ parameśāni sāmānyaṃ tava sammatam |
pūrvokta vidhinā devi sampūjya pārthivaṃ śivam ||

sampūjya ātmano gehe yathā śaktyā vinirmitam |
ṣoḍaśairupacāraiśca sampūjya pārthivaṃ sivam ||

p. 57)

evaṃ vatsaraparyantaṃ sadbhaktyā pūjayecchivaṃ |
rahasyaṃ vāha yatpaścāt māsi māsi śucismite ||

sampūjya divase liṅgaṃ yāvatsaṅkhyaṃ varānane |
tadrātrau parameśāni talliṅgaṃ parameśvari ||

ādāya niśitalliṅgaṃ gatvā bilvataruṃ priye |
amāvasyāṃ caturdaśyāṃ paurṇamāsyāṃ viśeṣataḥ ||

kuṇḍe ca śanivāre ca somavāre viśeṣataḥ |
pūjitavyaṃ prayatnena nagno bhūtvā varānane ||

bilvapatraiḥ prapūjyātha sahasraiḥ parameśvari |
bilvapatraṃ maheśāni kīṭādidoṣa varjitam ||

komalaṃ madhuraṃ patraṃ patratrayayutaṃ priye |
bilvapatraṃ vinā devi na hi pūjāṃ samācaret ||

etaddhi vacanaṃ devi sṛṣṭivatparameśvari |
saṃhāraṃ parameśāni ekadaiva varānane ||

na kasmaicitpravaktavyaṃ paśave parameśvari |
brahmāṇḍaṃ prakṛte rūpaṃ sarvaśaktimayaṃ yataḥ ||

ata eva maheśāni strīmayaṃ sakalaṃ jagat |
pralaye parameśāni mātṛkāṃ brahmarūpiṇīm ||

etaddhi vacanaṃ devi rahasyaṃ prati pārvati |
pūjayetsarvathā devi yathānuṣṭhāna pūrvakam ||

ataḥ paraṃ maheśāni mantramuccārya yatnataḥ |
bilvapatraṃ pradadayāttu ekaikena pṛthak pṛthak ||

p. 58)

saṃśodhya vidhivaddevi bilvapatraṃ varānane |
evaṃ vatsaraparyantaṃ yaḥ karoti prasannadhīḥ ||

manasā kāryamuddiśya evaṃ yastu prapūjayet |
śīghraṃ kāmamavāpnoti gaṇeśadṛśo bhavet ||

ataḥ paraṃ maheśāni gartaṃ kṛtvā tu tatsthale |
nikṣipya liṅgaṃ tatraiva mantraṃ japtvā tu tatra vai ||

namaskṛtya maheśāni kṣamasveti visarjanam |
* * * havanaṃ kṛtvā rahasyaṃ parameśvari ||

yaḥ karoti prasannātmā sa eva śrīsadāśivaḥ |
anena ca krameṇaiva lakṣaṃ yastu prapūjayet ||

sarvapūjā kṛtā devi ca tenātra saṃśayaḥ |
anyathā triphalā pūjā ante narakamāpnuyāt ||

aṣṭottaraśataṃ devi sahasraṃ vā śucismite |
ayutaṃ vā maheśāni lakṣavadvaravarṇini ||

pūjayedyastu deveśaṃ pārthivaṃ varavarṇini |
sa eva parameśāni sākṣāt śrīparameśvaraḥ ||

śrīyuktaḥ parameśāni sākṣāt śrīparameśvaraḥ |
śrīśakti yukto deveśi sākṣāt śrīparameśvaraḥ ||

kāryaṃ ca kāraṇaṃ devi tatra śrīparameśvarī |
parameśvaro yastu devi na kāryaṃ kāraṇaṃ na ca ||

kāryavatkāraṇaṃ devi prakṛtimokṣirūpiṇī ||

p. 59)

īśvara uvāca-

nigadāmi śṛṇu prauḍhe śrīśivasya ca pūjanam |
naralokaṃ maheśāni nirmāya pārthivaṃ śivam ||

aṅguṣṭhamātraṃ nirmāya śarkarārahitaṃ priye |
pūrvavadvidhinā devi sampūjya pārthivaṃ śivam ||

bilvapatraiḥ samamyarcya kalhāraiḥ parameśvari |
yadyaddattaṃ maheśāni śivāya paramātmane ||

tatsarvaṃ parameśāni tatkṣaṇāttanmayo bhavet |
pratyahaṃ parameśāni yāvajjīvaṃ varānane ||

pūjayet parayābhaktyā liṅgaṃ brahmamayaṃ priye |
ekaṃ vā pūjayelliṅgaṃ yugalaṃ na tu pūjayet ||

ekīkṛtya maheśāni daśapañcaśatāni vai |
pratyekevāthavā devi upacāraiḥ prapūjayet ||

yatkiñcidupacāraṃ hi tasya kiñcit śucismite |
gṛhītvā parameśāni liṅgopari nivedayet ||

tannirmālyaṃ maheśāni agrāhyaṃ parameśvari |
tannirmālya mahādevi kālakūṭayutaṃ sadā ||

|| iti liṅgārcanatantre harapārvatī saṃvāde dvādaśaḥ paṭalaḥ || 12 ||


śrīdevyuvāca-

durlabhaṃ tava nirmālyaṃ brahmādīnāṃ kṛpānidhe |
tatkathaṃ parameśāna nirmālyaṃ tava dūṣitam ||

kṛpayā kathayeśāna yadyahaṃ tava vallabhā |
yadino kathyate deva vimuñcāmi tadā tanūm ||

kṛpayā parameśāna hṛdayācchalyamuddhara |
tava vākyaṃ mahādeva brahmatulyaṃ sudāruṇam ||

hṛdayānmama deveśa śalyamuddhara sāmpratam |
agrāhyaṃ tava nirmālyaṃ kathaṃ vadasi yogabhṛt ||




###########   END OF FILE  #######