####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00160
Uniform title: mālinīvijayottaratantra
Main title: mālinīvijayatantra
Editor : śāstrī M.R.

Description: 
Photographed from volume 37 of the Kashmir Series of Texts and Studies.


Notes: 
The corrections listed in the printed edition have been made directly to the text.

Date-entered by the staff of Muktabodha under the direction of Mark S.G. Dyxzkowski.

Revision 0:  January 31, 2015    
Revision 1: October 1, 2021 Removed front material

Publisher : Research Department Jammu and Kashmir State
Publication year : 1922
Publication city : Srinagar
Publication country : India
####################################################




atha

mālinīvijayottare tantre

prathamo'dhikāraḥ |

jayanti jagadānandavipakṣakṣapaṇakṣamāḥ |
parameśamukhodbhūtajñānacandramarīcayaḥ || 1 ||

jagadarṇavamagnānāṃ tārakaṃ tārakāntakam |
sanatkumārasanakasanātanasanandanāḥ || 2 ||

nāradāgastyasaṃvartavasiṣṭhādyā maharṣayaḥ |
jijñāsavaḥ paraṃ tattvaṃ śivaśaktyunmukhīkṛtāḥ || 3 ||

samabhyarcya vidhānena te tamūcuḥ praharṣitāḥ |
bhagavanyogasaṃsiddhikāṅkṣiṇo vayamāgatāḥ || 4 ||

sā ca yogaṃ vinā yasmānna bhavettamato vada |
ṛṣibhiryogamicchadbhiḥ sa tairevamudāhṛtaḥ || 5 ||

pratyuvāca prahṛṣṭātmā namaskṛtya maheśvaram |
śṛṇudhvaṃ saṃpravakṣyāmi sarvasiddhiphalapradam || 6 ||

mālinīvijayaṃ tantraṃ parameśamukhodgatam |
bhuktimuktipradātāramumeśamamarārcitam || 7 ||

p. 2)

svasthānasthamumā devī praṇipatyedamabravīt |
siddhayogīśvarītantraṃ navakoṭipravistaram [taṃ0 śatakoṭipravistaramiti] 
|| 8 ||

yattvayā kathitaṃ pūrvaṃ bhedatrayavisarpitam |
mālinīvijaye tantre koṭitritayalakṣite || 9 ||

yogamārgastvayā proktaḥ suvistīrṇo maheśvara |
bhūyastasyopasaṃhāraḥ prokto dvādaśabhistathā [taṃ0 dvādaśabhistvata 
iti] || 10 ||

sahasraiḥ so'pi vistīrṇo gṛhyate nālpabuddhibhiḥ |
atastamupasaṃhṛtya samāsādalpadhīhitam || 11 ||

sarvasiddhikaraṃ brūhi prasādātparameśvara |
evamuktastadā [taṃ: uktastata iti] devyā prahasyovāca viśvarāṭ || 12 ||

śṛṇu devi pravakṣyāmi siddhayogīśvarīmatam |
yanna kasyacidākhyātaṃ mālinīvijayottaram || 13 ||

mayāpyetatpurā prāptamaghorātparamātmanaḥ |
upādeyaṃ ca heyaṃ ca vijñeyaṃ paramārthataḥ || 14 ||

śivaḥ śaktiḥ savidyeśā mantrā mantreśvarāṇavaḥ |
upādeyamiti proktametatṣaṭkaṃ phalārthinām || 15 ||

malaḥ karma ca māyā ca māyīyamakhilaṃ jagat |
sarvaṃ heyamiti proktaṃ vijñeyaṃ vastu niścitam || 16 ||

p. 3)

etajjñātvā parityajyaṃ sarvasiddhiphalaṃ labhet |
tatreśaḥ sarvakṛcchāntaḥ sarvajñaḥ sarvakṛtprabhuḥ || 17 ||

sakalo niṣkalo'nantaḥ śaktirapyasya tadvidhā |
sa sisṛkṣurjagatsṛṣṭerādāveva nijecchayā || 18 ||

vijñānakevalānaṣṭau bodhayāmāsa pudgalān |
aghoraḥ paramo ghoro ghorarūpastadānanaḥ || 19 ||

bhīmaśca bhīṣaṇaścaiva vamanaḥ pivanastathā |
etānaṣṭau sthitidhvaṃsarakṣānugrahakāriṇaḥ || 20 ||

mantramantreśvareśatve [pa0 śrī0 mantramaheśvareśatve iti |] 
saṃniyojya tataḥ punaḥ |
mantrāṇāmasṛjattadvatsapta koṭīḥ samaṇḍalāḥ || 21 ||

sarve'pyete mahātmāno mantrāḥ sarvaphalapradāḥ |
ātmā caturvidho jñeyastatra vijñānakevalaḥ || 22 ||

malaikayuktastatkarmayuktaḥ pralayakevalaḥ |
malamajñānamicchanti saṃsārāṅkurakāraṇam || 23 ||

dharmādharmātmakaṃ karma sukhaduḥkhādilakṣaṇam |
īśvarecchāvaśādasya [k: vaśāttasyeti] bhogecchā saṃprajāyate || 24 ||

bhogasādhanasaṃsiddhyai bhogecchorasya mantrarāṭ |
jagadutpādayāmāsa māyāmāviśya śaktibhiḥ || 25 ||

p. 4)

ca caikā vyāpinīrūpā niṣkalā [k: niṣkalasya svabhāvajeti | kh0 pu0 niṣkalasya 
śivātmana iti pāṭhaḥ | niṣkalā ityārabhya kathyate ityantaḥ pāṭhaḥ 
ghasaṃjñapustakātpūritaḥ |] jagato nidhiḥ |
anādyantāśiveśānī vyayahīnā ca kathyate || 26 ||

asūta sā kalāatattvaṃ yadyogādabhavatpumān |
jātakartṛtvasāmarthyo vidyārāgau tato'sṛjat || 27 ||

vidyā vivecayatyasya karma tatkāryakāraṇe |
rāgo'pi [k: rāgo'nurañjayatīti |] rañjayatyenaṃ svabhogeṣvaśuciṣvapi || 28 
||

niyatiryojayatyenaṃ svake karmaṇi pudgalam |
kālo'pi kalayatyenaṃ tuṭyādibhiravasthitaḥ || 29 ||

tata eva kalātattvādavyaktamasṛjattataḥ [k, kh: tattvamavyaktamiti |] |
guṇānaṣṭaguṇāṃ tebhyo dhiyaṃ dhīto'pyahaṅkṛtam [k, kh, g: 
ahaṃkṛtimiti ] || 30 ||

tattridhā taijasāttasmātmano'kṣeśamajāyata |
vaikārikāttato'kṣāṇi tanmātrāṇi tṛtīyakāt || 31 ||

śrotraṃ tvakcakṣuṣī jihvā ghrāṇaṃ buddhīndriyāṇi tu |
karmendriyāṇi vākpāṇipāyūpasthāṅghrayaḥ kramāt || 32 ||

kalādikṣitiparyantametatsaṃsāramaṇḍalam |
samudrādi [kh, g: samudrādyamiti|] jagatkṛtsnaṃ 
parivartayatīcchayā || 33 ||

p. 5)

bhedaḥ paraḥ kalādīnāṃ bhuvanatvena yaḥ sthitaḥ |
asṛjattamasāveva bhogināṃ bhogasiddhaye || 34 ||

ityanena kalādyena dharāntena samāsthitāḥ [kh: avasthātritaya iti |] |
pumāṃsaḥ sakalā jñeyāstadavasthājighāṃsubhiḥ || 35 ||

avasthātritaye'pyasmiṃstirobhāvanaśīlayā |
śivaśaktyobhayākrāntāḥ [kh: śaktyubhayeti |] prakurvanti viceṣṭitam || 
36 ||

evaṃ jagati savatra rudrāṇāṃ yogyatāvaśāt [kh: kartṛtāvaśāditi|] |
aṅguṣṭhamātrapūrvāṇāṃ śatamaṣṭādaśottaram || 37 ||

anugṛhya śivaḥ sākṣanmantreśatve niyuktavān |
te svagocaramāsādya bhuktimuktiphalārthinām || 38 ||

brahmādīnāṃ prayacchanti svabalena samaṃ phalam |
ṛṣibhyaste'pi te cānu manvantebhyo mahādhipāḥ || 39 ||

heyopādeyavijñānaṃ kathayanti śivoditam |
brahmādistambaparyante jātamātre jagatyalam || 40 ||

mantrāṇāṃ koṭyastisraḥ sārdhāḥ śivaniyojitāḥ |
anugṛhyāṇusaṃghātaṃ yātāḥ padamanāmayam || 41 ||

evamasyātmanaḥ kāle kasmiṃścidyogyatāvaśāt |
śaivī saṃbadhyate śaktiḥ śāntā muktiphalapradā || 42 ||

p. 6)

tatsaṃbandhāttataḥ kaścittatkṣaṇāṃdapavṛjyate |
ajñānena sahaikatvaṃ kasyacidvinivartate || 43 ||

rudraśaktisamāviṣṭaḥ sa yiyāsuḥ śivecchayā |
bhuktimuktiprasiddhyarthaṃ nīyate sadguruṃ prati || 44 ||

tamārādhya tatastuṣṭāddīkṣāmāsādya śāṅkarīm |
tatkṣaṇādvopabhogādvā [kh: upayogādveti |] dehapātācchivaṃ [k: 
pāte śivamiti |] vrajet || 45 ||

yogadīkṣāṃ samāsādya jñātvā yogaṃ samabhyaset |
yogasiddhimavāpnoti tadante śāśvataṃ padam || 46 ||

anena kramayogena saṃprāptaḥ paramaṃ padam |
na bhūyaḥ paśutāmeti śuddhe svātmani tiṣṭhati || 47 ||

ātmā caturvidho hyeṣa punareṣa caturvidhaḥ |
ācāryatvādibhedena śuddhātmā paripaṭhyate || 48 ||

nityāditritayaṃ kuryādguruḥ sādhaka eva ca |
nityameva dvayaṃ cānyoyāvajjīvaṃ śivājñayā || 49 ||

upādeyaṃ ca heyaṃ ca tadetat parikīrtitam |
jñātvaitajjñeyasarvasvaṃ sarvasiddhyaraho bhavet [k, kh: siddhiphalaṃ 
labhet ] || 50 ||

iti śrīmālinīvijayottare prathamo'dhikāraḥ || 1 ||




atha

dvitīyo'dhikāraḥ

athaiṣāmeva tattvānāṃ dharādīnāmanukramāt |
prapañcaḥ kathyate leśādyogināṃ yogasiddhaye || 1 ||

śaktimacchaktibhedena dharātattvaṃ vibhidyate |
svarūpasahitaṃ tacca vijñeyaṃ daśapañcadhā || 2 ||

śivādisakalātmāntāḥ śaktimantaḥ prakīrtitāḥ |
tacchaktayaśca vijñeyāstadvadeva vicakṣaṇaiḥ || 3 ||

evaṃ jalādimūlāntaṃ tattvavrātamidaṃ mahat |
pṛthagbhedairimairbhinnaṃ vijñeyaṃ tatphalepsubhiḥ || 4 ||

anenaiva vidhānena puṃstattvāttu [taṃ: puṃstattvāttatkalāntakamiti] 
kalāntikam |
trayodaśavidhaṃ jñeyaṃ rudravatpralayākalāḥ || 5 ||

tadvanmāyāpi vijñeyā navadhā jñānakevalāḥ |
mantrāḥ saptavidhāstadvatpañcadhā [taṃ: pañca mantravināyakā iti |] 
mantranāyakāḥ || 6 ||

tridhā mantreśvareśānāḥ śivaḥ sākṣānna bhidyate |
bhedaḥ prakathito leśādananto vistarādayam || 7 ||

evaṃ bhuvanamālāpi bhinnā bhedairimaiḥ sphuṭam |
vijñeyā yogasiddhyarthaṃ yogibhiryogapūjitā || 8 ||

p. 8)

eteṣāmeva tattvānāṃ bhuvanānāṃ ca śāṅkari |
ya ekamagni jānāti so'pi yogaphalaṃ labhet || 9 ||

yaḥ punaḥ sarvatattvāni vettyetāni yathārthataḥ |
sa gururmatsamaḥ prokto mantravīryaprakāśakaḥ || 10 ||

spṛṣṭāḥ saṃbhāṣitāstena [kh: saṃbhāvitā] dṛṣṭāśca prītacetasā |
narāḥ pāpaiḥ pramucyante saptajanmakṛtairapi || 11 ||

ye punardīkṣitāstena prāṇinaḥ śivacoditāḥ |
te yatheṣṭaṃ phalaṃ prāpya padaṃ gacchantyanāmayam [kh: gacchanti 
paramaṃ padamiti] || 12 ||

rudraśaktisamāveśastatra nityaṃ pratiṣṭhitaḥ |
sati tasmiṃśca cihnāni tasyaitāni vilakṣayet || 13 ||

tatraitatprathamaṃ cihnaṃ rudre bhaktiḥ suniścalā |
dvitīyaṃ mantrasiddhiḥ syātsadyaḥ pratyayakārikā || 14 ||

sarvasattvavaśitvaṃ ca tṛtīyaṃ lakṣaṇaṃ smṛtam |
prārabdhakāryaniṣpattiścihnamāhuścaturthakam || 15 ||

kavitvaṃ pañcamaṃ jñeyaṃ sālaṅkāraṃ manoharam |
sarvaśāstrārthavettṛtvamakasmāccāsya jāyate || 16 ||

rudraśaktisamāveśaḥ pañcadhā paripaṭhyate |
bhūtatattvātmamantreśaśaktibhedādvarānane || 17 ||

p. 9)

pañcadhā bhūtasaṃjñastu tathā triṃśatidhāparaḥ |
ātmākhyastrividhaḥ prokto daśadhā mantrasaṃjñakaḥ || 18 ||

dvividhaḥ śaktisaṃjño'pi jñātavyaḥ paramārthataḥ |
pañcāśadbhedabhinno'yaṃ samāveśaḥ prakīrtitaḥ || 19 ||

āṇavo'yaṃ samākhyātaḥ śākto'pyevaṃvidhaḥ smṛtaḥ |
evaṃ śāmbhavamapyaibhirbhedairbhinnaṃ vilakṣayet || 20 ||

uccārakaraṇadhyānavarṇasthānaprakalpanaiḥ [g: vikalpanairiti |] |
yo bhavetsa samāveśaḥ samyagāṇava ucyate || 21 ||

uccārarahitaṃ vastu cetasaiva vicintayan |
yaṃ samāveśamāpnoti śāktaḥ so'trābhidhīyate || 22 ||

akiṃciccintakasyaiva guruṇā pratibodhataḥ |
jāyate [vi0 bhai0 utpadyate ya āveśa] yaḥ samāveśaḥ 
śāmbhavo'sāvudāhṛtaḥ [g: udīrita] || 23 ||

sārdhametacchataṃ proktaṃ bhedānāmanupūrvaśaḥ |
saṃkṣepādvistarādasya parisaṃkhyā na vidyate || 24 ||

saṃvittiphalabhedo'tra na prakalpyo manīṣibhiḥ |
bhedo'paro'pi saṃkṣepātkathyamāno'vadhāryatām || 25 ||

jāgratsvapnādibhedena sarvāveśakramo budhaiḥ |
pañcabhistu parijñeyaḥ svavyāpārātpṛthak [kh: bhedaiścānyaiḥ 
pṛthagiti |] pṛthak || 26 ||

p. 10)

tatra svarūpaṃ śaktiśca sakalaśceti tattrayam |
iti jāgradavastheyaṃ bhede pañcadaśātmake || 27 ||

akalau dvau parijñeyau samyak svapnasuṣuptayoḥ |
mantrāditatpatīśānavargasturya iti smṛtaḥ || 28 ||

śaktiśaṃbhū parijñeyau turyātīte varānane |
trayodaśātmake bhede svarūpamakalāvubhau [g: svarūpamakalāviti] || 29 ||

mantramantreśvareśānāḥ śaktiśaṃbhū ca kirtitau |
pralayākalabhede'pi svaṃ vijñānakalāvubhau || 30 ||

mantramantreśvareśānāḥ śaktīśāvapi pūrvavat |
navadhā kīrtite bhede svaṃ mantrāḥ mantranāyakāḥ || 31 ||

tadīśāḥ śaktiśaṃbhū ca pañcāvasthāḥ prakīrtitāḥ |
pūrvavatsaptabhede'pi svaṃ mantreśeśaśaktayaḥ || 32 ||

śivaśceti parijñeyāḥ pañcaiva varavarṇini |
svaṃ śaktiḥ sanijeśānā [k: svanijeti] śaktiśaṃbhū ca pañcake || 33 ||

trike svaṃ śaktiśaktīcchāśivabhedaṃ vilakṣayet |
savyāpārādhipatvena taddhīnaprerakatvataḥ || 34 ||

icchānivṛtteḥ svasthatvādabhinnamapi [taṃ: abhinnaṃ ceti] pañcadhā |
iti pañcātmake [k: pañcātmabhedeneti] bhede vijñeyaṃ vastu kīrtitam || 
35 ||

p. 11)

bhūyo'pyāsāmavasthānāṃ saṃjñābhedaḥ prakāśyate |
piṇḍasthaḥ sarvatobhadro jāgrannāma dvayaṃ matam || 36 ||

dvisaṃjñaṃ svapnamicchanti padasthaṃ vyāptirityapi |
rūpasthaṃ tu mahāvyāptiḥ suṣuptasyāpi taddvayam || 37 ||

pracayaṃ rūpātītaṃ ca samyak turyamudāhṛtam |
mahāpracayamicchanti turyātītaṃ vicakṣaṇāḥ || 38 ||

pṛthaktattvaprabhedena bhedo'yaṃ samudāhṛtaḥ |
sarvāṇyeva hi tattvāni pañcaitāni yathā śṛṇu || 39 ||

bhūtatattvābhidhānānāṃ yogo'dhiṣṭheya iṣyate [g: ucyate] |
piṇḍasthamiti taṃ prāhuḥ padasthamaparaṃ viduḥ || 40 ||

mantrāstatpatayaḥ seśā rūpasthamiti kīrtyate |
rūpātītaṃ parā śaktiḥ savyāpārāpyanāmayā || 41 ||

niṣprapañco nirābhāsaḥ śuddhaḥ svātmanyavasthitaḥ |
sarvātītaḥ śivo jñeyo yaṃ viditvā vimucyate || 42 ||

caturvidhaṃ tu piṇḍasthamaṣuddhaṃ buddhameva ca |
prabuddhaṃ suprabuddhaṃ ca padasthaṃ ca caturvidham || 43 ||

gatāgataṃ suvikṣiptaṃ saṃgataṃ susamāhitam |
caturdhā rūpasaṃjñaṃ [taṃ: saṃsthamiti] tu jñātavyaṃ yogacintakaiḥ || 
44 ||

p. 12)

uditaṃ vipulaṃ śāntaṃ suprasannamathāparam |
manonmanamanantaṃ ca sarvārthaṃ satatoditam || 45 ||

pracaye tatra saṃjñeyamekaṃ tanmahati sthitam |
ityevaṃ pañcadhādhvānaṃ tridhedānīṃ nigadyate || 46 ||

vijñānākalaparyantamātmatattvamudāhṛtam |
īśvarāntaṃ ca vidyāhnaṃ śeṣaṃ śivapadaṃ viduḥ || 47 ||

evaṃ bhedairimairbhinnastatrādhvā parikīrtitaḥ |
yugapatsarvamārgāṇāṃ prabhedaḥ procyate'dhunā || 48 ||

pārthivaṃ prākṛtaṃ caiva māyīyaṃ śāktameva ca |
iti saṃkṣepataḥ proktametadaṇḍacatuṣṭayam || 49 ||

pṛthagdvayamasaṃkhyātamekamekaṃ pṛthak pṛthak |
ādyaṃ dhārikayā vyāptaṃ tatraikaṃ tattvamiṣyate || 50 ||

ekamekaṃ pṛthak kṣārṇaṃ padārṇamanuṣu smaret |
kālāgnibhuvanādyāvadvīrabhadrapurottamam || 51 ||

puraṣoḍaśakaṃ jñeyaṃ ṣaḍvidho'dhvā prakīrtitaḥ |
āpyāyinyā dvitīyaṃ ca tatra tattvāni lakṣayet || 52 ||

trayoviṃśatyavādīni tadvaṭṭādyakṣarāṇi ca |
padāni pañca mantrāśca ṣaṭpañcāśatpurāṇi ca || 53 ||

p. 13)

tattvāni sapta bodhinyā taccaturthā purāṇi ca |
tṛtīye sapta varṇāḥ syuḥ padamantradvayaṃ dvayam || 54 ||

utpūyinyā caturthaṃ tu tatra tattvatrayaṃ viduḥ |
varṇatrayaṃ mantramekaṃ padamekaṃ ca lakṣayet || 55 ||

aṣṭādaśa vijānīyādbhuvanāni samāsataḥ |
śivatattvaṃ paraṃ śāntaṃ kalā tatrāvakāśadā || 56 ||

svaraṣoḍaśakaṃ mantraṃ padaṃ caikaṃ vilakṣayet |
ityevaṃ ṣaḍvidho'pyadhvā samāsātparikīrtitaḥ || 57 ||

śuddhāśuddhaṃ jagatsarvaṃ brahmāṇḍaprabhavaṃ yataḥ |
tasmācchuddhamimaiḥ śuddhairbrahmāṇḍaiḥ sarvamiṣyate || 58 ||

brahmā viṣṇuśca rudraśca īśvaraśceti suvrate |
pṛthageteṣu boddhavyaṃ śāntaṃ paticatuṣṭayam || 59 ||

yo hi yasmādguṇotkṛṣṭaḥ sa tasmādūrdhva ucyate |
etatte kathitaṃ sarvaṃ kimanyatparipṛcchasi || 60 ||

iti śrīmālinīvijayottare tantre vyāptyadhikāro dvitīyaḥ || 2 ||


atha

tṛtīyo'dhikāraḥ |

evamuktā mahādevī jagadānandakāriṇā |
praṇipatya punarvākyamidamāha jagatpatim || 1 ||

evametanmahādeva nānyathā samudāhṛtam |
yathākhyātaṃ tathā jñātamāditaḥ samanukramāt || 2 ||

śivādivasturūpāṇāṃ vācakānparameśvara |
sāṃprataṃ śrotumicchāmi prasādādvaktumarhasi || 3 ||

ityuktaḥ sa maheśānyā jagadārtiharo haraḥ |
vācakānavadanmantrānpāramparyakramāgatān || 4 ||

yā sā śaktirjagaddhātuḥ kathitā samavāyinī |
icchātvaṃ tasya sā devi sisṛkṣoḥ pratipadyate || 5 ||

saikāpi satyanekatvaṃ yathā gacchati tacchṛṇu |
evametaditi jñeyaṃ nānyatheti suniścitam || 6 ||

jñāpayantī jagatyatra jñanaśaktirnigadyate |
evaṃbhūtamidaṃ [spa0 pra0 evaṃbhūtamidaṃ sarvamiti kāryonmukhī 
yadā] vastu bhavatviti yadā punaḥ || 7 ||

p. 15)

jātā tadaiva tattadvatkurvatyatra kriyocyate |
evaṃ [k: evameṣeti] saiṣā dvirūpāpi punarbhedairanekatām [k: 
bhedairanantatāmiti] || 8 ||

arthopādhivaśādyāti cintāmaṇiriveśvarī |
tatra tāvatsamāpannā [śi0 vi0 samāpannamātṛbhāvā] mātṛbhāvaṃ 
vibhidyate || 9 ||

dvidhā ca navadhā caiva pañcāśaddhā ca mālinī |
bījayonyātmakādbhedāddvidhā bījaṃ svarā matāḥ || 10 ||

kādibhiśca smṛtā yonirnavadhā vargabhedataḥ |
prativarṇavibhedena [śi0 vi0 pṛthagvarṇavibhedeneti] 
śatārdhakiraṇojjvalā || 11 ||

bījamatra śivaḥ śaktiryonirityabhidhīyate |
vācakatvena sarvāpi śaṃbhoḥ śaktiśca sasyate || 12 ||

vargāṣṭakamiha jñeyamaghorādyamanukramāt |
tadeva śaktibhedena māheśvaryādi cāṣṭakam || 13 ||

māheśī brāhmaṇī caiva kaumārī vaiṣṇavī tathā |
aindrī yāmyā ca cāmuṇḍā yogīśī ceti tā matāḥ || 14 ||

śatārdhabhedabhinnānāṃ tatsaṃkhyānāṃ varānane |
rudrāṇāṃ vācakatvena kalpitāḥ parameṣṭhinā || 15 ||

p. 16)

tadvadeva ca śaktīnāṃ tatsaṃkhyāṃnamanukramāt |
sarvaṃ ca kathayiṣyāmi tāsāṃ bhedaṃ yathā śṛṇu || 16 ||

amṛto'mṛtapūrṇaśca amṛtābho'mṛtadravaḥ |
amṛtaugho'mṛtormiśca amṛtasyandano'paraḥ || 17 ||

amṛtāṅgo'mṛtavapuramṛtodgāra eva ca |
amṛtāsyo'mṛtatanustathā cāmṛtasecanaḥ || 18 ||

tanmūrtiramṛteśaśca sarvāmṛtadharo'paraḥ |
ṣoḍaśaite samākhyātā rudrabījasamudbhavāḥ || 19 ||

jayaśca vijayaścaiva jayantaścāparājitaḥ |
sujayo jayarudraśca [k: jayabhadra] jayakīrtirjayāvahaḥ || 20 ||

jayamūrtirjayotsāho jayado jayavardhanaḥ |
balaścāti balaścaiva balabhadro balapradaḥ || 21 ||

balāvahaśca balavān baladātā baleśvaraḥ |
nandanaḥ sarvatobhadro bhadramūrtiḥ śivapradaḥ || 22 ||

sumanāḥ spṛhaṇo durgā bhadrakālo manonugaḥ |
kauśikaḥ kālaviśveśau suśivaḥ kopa eva ca || 23 ||

ete yonisamudbhūtāścatustriṃśatprakīrtitāḥ |
strīpāṭhavaśamāpannā eta evātra śaktayaḥ || 24 ||

p. 17)

bījayonisamudbhūtā rudraśaktisamāśrayāḥ |
vācakānāmanantatvātparisaṃkhyā na vidyate || 25 ||

sarvaśāstrārthagarbhiṇyā ityevaṃ vidhayānayā |
aghoraṃ bodhayāmāsa svecchayā parameśvaraḥ || 26 ||

sa tayā saṃprabuddhaḥ sanyoniṃ vikṣobhya śaktibhiḥ |
tatsamānaśrutīnvarṇāṃstatsaṃkhyānasṛjatprabhuḥ || 27 ||

te [k: taistairiti] tairāliṅgitāḥ santaḥ sarvakāmaphalapradāḥ |
bhavanti sādhakendrāṇāṃ nānyathā vīravandite || 28 ||

tairidaṃ saṃtataṃ viśvaṃ sadevāsuramānuṣam |
tebhyaḥ śāstrāṇi vedāśca saṃbhavanti punaḥ punaḥ || 29 ||

anantasyāpi bhedasya śivaśaktermahātmanaḥ |
kāryabhedānmahādevi traividhyaṃ samudāhṛtam || 30 ||

viṣayeṣveva saṃlīnānadho'dhaḥ pātayantyaṇūn |
rudrāṇūnyāḥ samāliṅgya ghorataryo'parāḥ smṛtāḥ || 31 ||

miśrakarmaphalāsaktiṃ pūrvavajjanayanti yāḥ |
muktimārganirodhinyastāḥ syurghorāḥ parāparāḥ || 32 ||

pūrvavajjantujātasya śivadhāmaphalapradāḥ |
parāḥ prakathitāstajjñairaghorāḥ śivaśaktayaḥ || 33 ||

p. 18)

etāḥ sarvāṇusaṃghātamapi niṣṭhā (dhiṣṭhāya) yathā sthitāḥ |
tathā te kathitāḥ śaṃbhoḥ śaktirekaiva śāṅkarī || 34 ||

asyā vācakabhedena bhedo'nyaḥ saṃpracakṣyate |
yatheṣṭaphalasaṃsiddhyai mantrātantrānuvartinām || 35 ||

viśeṣavidhihīneṣu nyāsakarmasu mantravit |
nyasecchāktaśarīrārthaṃ bhinnayoniṃ tu mālinīm || 36 ||

na śikhā ṝṛ ḷḹ ca śiromālā tha mastakam |
netrāṇi ca dha vai nāsā ī samudre ṇuṇū śrutī || 37 ||

vakavarga-i-ā vaktradantajihvāsu vāci ca |
vabhayāḥ kaṇṭhadakṣādiskandhayorbhujayorḍaḍhau || 38 ||

ṭho hastayorjhañau śākhā jraṭau śūlakapālake |
pahṛcchalau stanau kṣīramā sa jīvo visargayuk || 39 ||

tatparaḥ kathitaḥ prāṇaḥ ṣakṣāvudaranābhigau |
maśaṃtāḥ kaṭiguhyoruyugmagā jānunī tathā || 40 ||

e-aikārau tathā jaṅghe tatparau caraṇau daphau |
ato vidyāśca mantrāśca samuddhāryā yathā śṛṇu || 41 ||

sabindukāṃ dakṣajaṅghāṃ tato vācaṃ prakalpayet |
tathaiva jaṅghayā yuktaṃ caturthaṃ daśanaṃ tataḥ || 42 ||

dakṣajānuyutaṃ daṇḍaṃ prāṇaṃ daṇḍasthamīryutam |
pṛthag ghṛddaṇḍakaṭigā dvijadaṇḍau ca pūrvavat || 43 ||

p. 19)

usthitaṃ binduyukprāṇaṃ pūrvavaddaśanaṃ tataḥ |
daṇḍaṃ kevalamuddhṛtya vāmamudrānvitaṃ punaḥ || 44 ||

dakṣajānuyutaṃ hṛcca prāṇaṃ jīvātmanā yutam |
daśanaṃ pūrvavannyasya daṇḍaṃ kevalameva ca || 45 ||

nitambaṃ dakṣamudretaṃ dvitīyaṃ jihvayā dvijam |
sanāsaṃ dakṣaśikharaṃ nitambaṃ kevalaṃ tataḥ || 46 ||

punastathaiva śikharaṃ jaṭharaṃ kevalaṃ tataḥ |
dakṣajānuyutaṃ karṇaṃ kaṇṭhaṃ kevalameva ca || 47 ||

nitambaṃ kevalaṃ nyasya hṛdayaṃ jihvayā yutam |
vaktraṃ kevalamuddhṛtya prāṇamādyena jānunā || 48 ||

śūladaṇḍacatuṣkaṃ ca tatrādyaṃ dvayasaṃsthimusthitam |
vāmapādaṃ ca tasyānte kapālaṃ patitaṃ nyaset || 49 ||

tataḥ paramaghorāntaṃ pādyakādye ca pūrvavat |
parāparā samākhyātā aparā ca prakathyate || 50 ||

aghorāntaṃ nyasedādau prāṇaṃ binduyutaṃ punaḥ |
vāmamudrānvitaṃ nyasya pādyaṃ kādyena [g: pādyakādye ceti] pūrvavat 
|| 51 ||

apareyaṃ samākhyātā rudraśaktiṃ parāṃ śṛṇu |
mantrāḥ saṃmukhatāṃ yānti yayoccāritamātrayā || 52 ||

p. 20)

kampate gātrayaṣṭiśca drutaṃ cotpatanaṃ bhavet |
mudrābandhaṃ ca geyaṃ ca śivāruditameva ca || 53 ||

atītānāgatārthasya kuryādvā kathanādikam |
vāmajaṅghānvito jīvaḥ pāramparyakramāgataḥ || 54 ||

pareyamanayā siddhiḥ sarvakāmaphalapradā |
nāśiṣyāya padeyeyaṃ nābhaktāya kadācana || 55 ||

rudraśca rudraśaktiśca guruśceti trayaṃ samam |
bhaktyā prapaśyate yastu tasmai deyaṃ varānane || 56 ||

śiṣyeṇāpi tadā grāhyā yadā saṃtoṣito guruḥ |
śarīradravyavijñānaśuddhikarmaguṇādibhiḥ || 57 ||

bodhitā tu yadā tena guruṇā hṛṣṭacetasā |
tadā siddhipradā jñeyā nānyathā vīravandite || 58 ||

parāparāṅgasaṃbhūtā yoginyo'ṣṭau mahābalāḥ |
pañca ṣaṭpañca catvāri dvitridvyarṇāḥ krameṇa tu || 59 ||

jñeyāḥ saptaikādaśārṇā ekārdhārṇadvayānvitā |
jīvo dīrghasvaraiḥ ṣaḍbhiḥ pṛthagjāti [k, kh: jātivibhedata] 
samanvitaḥ || 60 ||

vidyātrayasya gātrāṇi hrasvairvaktrāṇi pañcabhiḥ |
oṃkāraiḥ pañcabhirmantro vidyāṅgahṛdayaṃ bhavet || 61 ||

p. 21)

oṃ amṛte tejomālini svāhāpadāni (davi) bhūṣitam |
ekādaśākṣaraṃ proktametadbrahmaśiraḥ priye || 62 ||

vedavedini hūṁphaṭ ca praṇavādisamanvita [g: yutā śikheti] |
rudrāṇyaṣṭākṣarā jñeyā śikhā vidyāgaṇasya tu || 63 ||

vajriṇe vajradharāya svāhāntaṃ praṇavādikam |
ekādaśākṣaraṃ varma puruṣṭutamiti smṛtam || 64 ||

ślīpadaṃ [g: ślaśabdamiti] paśuśabdaṃ ca hūṃphaḍantaṃ 
bhavādikam |
etatpāśupataṃ proktamardhasaptākṣaraṃ param || 65 ||

laraṭakṣavayairdīghaiḥ sūmāyuktaiḥ sabindukaiḥ |
indrādīnkalpayeddhrasvaistadastrāṇi vicakṣaṇaḥ || 66 ||

tadvannāsāpayobhyāṃ tu kalpyau viṣṇuprajāpatī |
svarāvādyatṛtīyau tu vācakau padmacakrayoḥ || 67 ||

iti mātṛgaṇaḥ [g: mantragaṇa] proktaḥ sarvakāmaphalapradaḥ |
yogināṃ yogasiddhyarthaṃ kimanyatparipṛcchasi || 68 ||

iti śrīmālinīvijayottare tantre mantroddhārādhikārastṛtīyaḥ || 3 ||




atha

caturtho'dhikāraḥ |

athaitadupasaṃśrutya munayo muditekṣaṇāḥ |
praṇamya krauñcahantāraṃ punarūcuridaṃ vacaḥ || 1 ||

yogamārgavidhiṃ devyā pṛṣṭena parameṣṭhinā |
tatpratijñāvatāpyuktaṃ kimarthaṃ mantralakṣaṇam || 2 ||

evamuktaḥ sa taiḥ samyakkārtikeyo mahāmatiḥ |
idamāha vacasteṣāṃ saṃdehavinivṛttaye || 3 ||

yogamekatvamicchanti vastuno'nyena vastunā |
yadvastu jñeyāmityuktaṃ heyatvādiprasiddhaye || 4 ||

dvirūpamapi tajjñānaṃ vinā jñātuṃ na śakyate |
tatprasiddhyai śivenoktaṃ jñānaṃ yadupavarṇitam || 5 ||

sabījayogasaṃsiddhyai mantralakṣaṇamapyalam |
na cādhikāritā dīkṣāṃ vinā yoge'sti śāṅkare || 6 ||

kriyājñanavibhedena sā ca dvedhā nigadyate |
dvividhā sā prakartavyā tena caitadudāhṛtam || 7 ||

na ca yogādhikāritvamekamevānayā bhavet |
api mantrādhikāritvaṃ muktiśca śivadīkṣayā || 8 ||

p. 23)

śrutvā caitatpatervākyaṃ romāñcitaśarīriṇī |
idamāha punarvākyamambā munivarottamāḥ || 9 ||

abhinnamālinīkāye tattvāni bhuvanāni ca |
kalāḥ padāni mantrāśca yathāvadavadhāritāḥ || 10 ||

bhinnayonistu yā deva tvayoktā mālinī mama |
tasyā aṅge yathaitāni saṃsthitāni tathā vada || 11 ||

evamukto mahādevyā bhairavo bhūribhogadaḥ |
sphuraddhimāṃśusaṃtānaprakāśitadigantaraḥ || 12 ||

surāsuraśiromaulīmālālālitaśāsanaḥ |
uvāca madhurāṃ vācamimāmalleśitāśayām || 13 ||

yā mayā kathitā devi bhinnayonistu mālinī |
tadaṅge saṃpravakṣyāmi sarvametadyathā sthitam || 14 ||

phe dharātattvamuddiṣṭaṃ dāṃdijhānte'nupūrvaśaḥ |
trayoviṃśatyabādīni pradhānāntāni lakṣayet || 15 ||

ṭhādau ca saptake sapta puruṣādīni pūrvavat |
iṅgheṣu trayaṃ vidyādvidyātaḥ sakalāvadhi || 16 ||

śivatattve gakārādināntān ṣoḍaśa lakṣayet |
kalāḥ padāni mantrāśca bhuvanāni ca sundari || 17 ||

pūrvavadveditavyāni tatsaṃkhyārṇavibhedataḥ |
vidyātrayavibhāgena yathedānīṃ tathā śṛṇu || 18 ||

p. 24)

niṣkale padamekārṇaṃ tryarṇaikārṇamiti [k: matheti] dvayam |
sakale tu parijñeyaṃ pañcaikārṇadvayaṃ dvaye || 19 ||

caturekākṣare dve ca māyāditritaye mate |
caturakṣaramekaṃ ca kālādidvitaye matam || 20 ||

rañjake dvyarṇamuddiṣṭaṃ pradhāne tryarṇamiṣyate |
buddhau devāṣṭakavyāptyā padaṃ dvyakṣaramiṣyate || 21 ||

tataḥ pañcāṣṭakavyāptyā dvyekadvidvyakṣarāṇi tu |
vidyāpadāni catvāri sārdhavarṇaṃ tu pañcamam || 22 ||

ekaika [k, kh, g: ekadvisārdheti] sārdhavarṇāni trīṇi tattve tu 
pārthive |
parāṅge [g: purāṅge] sarvamanyacca varṇamantrakalādikam || 23 ||

sārdhenāṇḍadvayaṃ vyāptamekaikena pṛthagdvayam |
aparāyāḥ samākhyātā vyāptireṣā vilomataḥ || 24 ||

sārṇenāṇḍatrayaṃ vyāptaṃ triśūlena caturthakam |
sarvātītaṃ visargeṇa parāyā vyāptiriṣyate || 25 ||

etatsarvaṃ parijñeyaṃ yoginā hitamicchatā |
ātmano vā pareṣāṃ vā nānyathā tadavāpyate || 26 ||

dvāveva mokṣadau jñeyau jñānī yogī ca śāṅkari |
pṛthakttvāttatra * * * * boddhavyaṃ phalakāṅkṣibhiḥ || 27 ||

p. 25)

jñānaṃ tattrividhaṃ proktaṃ tatrādyaṃ śrutamiṣyate |
cintāmayamathānyacca bhāvanāmayameva ca || 28 ||

śāstrārthasya parijñānaṃ vikṣiptasya śrutaṃ matam |
idamatredamatreti idamatropayujyate || 29 ||

sarvamālocya śāstrārthamānupūrvyā vyavasthitam |
tadvaccintāmayaṃ jñānaṃ dvirūpamupadiśyate || 30 ||

mandasvabhyastabhedena tatra svabhyastamucyate |
suniṣpanne tatastasmijjāyate bhāvanāmayam || 31 ||

yato yogaṃ samāsādya yogī yogaphalaṃ labhet |
evaṃ vijñānabhedena jñānī proktaścaturvidhaḥ || 32 ||

saṃprāpto ghaṭamānaśca siddhaḥ siddhatamo'nyathā |
yogī caturvidho devi yathāvatpratipadyate || 33 ||

samāveśoktivadyogastrividhaḥ samudāhṛtaḥ |
tatra prāptopadeśastu pāramparyakrameṇa yaḥ || 34 ||

prāptayogaḥ sa vijñeyastrividho'pi manīṣibhiḥ |
cetaso ghaṭanaṃ tattvāccalitasya punaḥ punaḥ || 35 ||

yaḥ karoti tamicchanti ghaṭamānaṃ manīṣiṇaḥ |
tadeva cetasā nānyaddvitīyamavalambate || 36 ||

siddhayogastadā jñeyo yogī yogaphalārthibhiḥ |
yaḥ punaryatra tatraiva saṃsthito'pi yathā tathā || 37 ||

p. 26)

bhuñjānastatphalaṃ tena hīyate na kathaṃcana |
susiddhaḥ sa tu boddhavyaḥ sadāśivasamaḥ priye || 38 ||

uttarottaravaiśiṣṭyameteṣāṃ samudāhṛtam |
jñānināṃ yogināṃ caiva siddho yogaviduttamaḥ || 39 ||

yato'sya jñānamapyasti pūrvo yogaphalojjhitaḥ |
yataśca mokṣadaḥ proktaḥ svabhyastajñānavānbudhaiḥ || 40 ||

ityetatkathitaṃ sarvaṃ vijñeyaṃ yogipūjite |
tantrārthamupasaṃhṛtya samāsādyogināṃ hitam || 41 ||

iti śrīmālinīvijayottare tantre caturtho'dhikāraḥ || 4 ||




atha

pañcamo'dhikāraḥ |

athātaḥ saṃpravakṣyāmi bhuvanādhvānamīśvari |
ādau kālāgnibhuvanaṃ śodhitavyaṃ prayatnataḥ || 1 ||

avīciḥ kumbhīpākaśca rauravaśca tṛtīyakaḥ |
kūṣmāṇḍabhuvane śuddhe sarve śuddhā na saṃśayaḥ || 2 ||

pātālāni tataḥ sapta teṣāmādau mahātalam |
rasātalaṃ tataścānyattalātalamataḥ param || 3 ||

sutalaṃ nitalaṃ ceti vitalaṃ talameva ca |
hāṭakena viśuddhena sarveṣāṃ śuddhiriṣyate || 4 ||

tadūrdhvaṃ pṛthivī jñeyā saptadvīpārṇavānvitā |
devānāmāśrayo merustanmadhye saṃvyavasthitaḥ || 5 ||

bhuvolokastadūrdhve ca svarlokastasya copari |
maho janastapaḥ satyamityetallokasaptakam || 6 ||

caturdaśavidho yatra bhūtagrāmaḥ pravartate |
sthāvaraḥ sarpajātiśca pakṣijātistathāparā || 7 ||

mṛgasaṃjñaśca paścākhyaḥ pañcamo'nyaśca mānuṣaḥ |
paiśāco rākṣaso yākṣo gāndharvaścaindra eva ca || 8 ||

p. 28)

saumyaśca prājāpatyaśca brāhmaścātra caturdaśa |
sarvasyaivāsya saṃśuddhirbrāhme saṃśodhite sati || 9 ||

bhuvanaṃ vaiṣṇavaṃ tasmānmadīyaṃ tadanantaram |
tatra śuddhe bhavecchuddhaṃ sarvametanna saṃśayaḥ || 10 ||

kālāgnipūrvakairebhirbhuvanaiḥ pañcabhiḥ priye |
śuddhaiḥ sarvamidaṃ śuddhaṃ brahmāṇḍāntarvyavasthitam || 11 ||


tadbahiḥ śatarudrāṇāṃ bhuvanāni pṛthak pṛthak |
daśa saṃśodhayetpaścādekaṃ tannāyakāvṛtam || 12 ||

anantaḥ prathamasteṣāṃ kapālīśastathāparaḥ |
agnirudro yamaścaiva nair-ṛto bala eva ca || 13 ||

śīghro nidhīśvaraścaiva sarvavidyādhipo'paraḥ |
śaṃbhuśca vīrabhadraśca vidhūmajvalanaprabhaḥ || 14 ||

ebhirdaśaikasaṃkhyātaiḥ śuddhaiṃ śuddhaṃ śataṃ matam |
upariṣṭātpurasteṣāmaṣṭakāḥ pañca saṃsthitāḥ || 15 ||

lakulī bhārabhūtiśca diṇḍhyāṣāḍhī sapuṣkarau |
naimiṣaṃ ca prabhāsaṃ ca amareśamathāṣṭakam || 16 ||

etatpatyaṣṭakaṃ proktamato guhyātiguhyakam |
tatra bhairavakedāramahākālāḥ samadhyamāḥ || 17 ||

āmrātikeśajalpeśaśrīśailāḥ saharīndavaḥ |
bhīmeśvaramahendrādṛhāsāḥ savimaleśvarāḥ || 18 ||

p. 29)

kanakhalaṃ nākhalaṃ ca kurukṣetraṃ gayā tathā |
guhyametattṛtīyaṃ tu pavitramadhunocyate || 19 ||

sthāṇusvarṇākṣakāvādyau bhadragokarṇakau parau |
mahākālāvimukteśarudrakoṭyambarāpadāḥ || 20 ||

sthūlaḥ sthūleśvaraḥ śaṅkukarṇakālañjarāvapi |
maṇḍaleśvaramākoṭadviraṇḍachagalāṇḍakau || 21 ||

sthāṇvaṣṭakamiti proktamahaṃkārāvadhi sthitam |
devayonyaṣṭakaṃ budhau kathyamānaṃ mayā śṛṇu || 22 ||

paiśācaṃ rākṣasaṃ yākṣaṃ gāndharvaṃ caindrameva ca |
tathā saumyaṃ saprājeśaṃ brāhmamaṣṭamamiṣyate || 23 ||

yogāṣṭakaṃ pradhāne tu tatrādāvakṛtaṃ bhavet |
kṛtaṃ ca vaibhavaṃ brāhmaṃ vaiṣṇavaṃ tadanantaram || 24 ||

kaumāramaumaṃ śraikaṇṭhamiti yogāṣṭakaṃ tathā |
puruṣe vāmabhīmograbhaveśānaikavīrakāḥ || 25 ||

pracaṇḍomādhavājāśca anantaikaśivāvatha |
krodheśacaṇḍau vidyāyāṃ saṃvarto jyotireva ca || 26 ||

kalātattve parijñeyau surapañcāntakau pare |
ekavīraśikhaṇḍīśaśrīkaṇṭhāḥ kālamāśritāḥ || 27 ||

p. 30)

mahātejaḥ prabhṛtayo maṇḍaleśānasaṃjñakāḥ |
māyātattve sthitāstatra vāmadevabhavodbhavau || 28 ||

ekapiṅgekṣaṇeśānabhuvaneśapuraḥ sarāḥ |
aṅguṣṭhamātrasahitāḥ kālānalasamatviṣaḥ || 29 ||

vidyātattve'pi pañcāhurbhuvanāni manīṣiṇaḥ |
tatra hālāhalaḥ pūrvo rudraḥ krodhastathāparaḥ || 30 ||

ambikā ca aghorā ca vāmadevī ca kīrtyate |
īśvare pivanādyāḥ [k, kh: bhuvanāni syuriti] syuraghorāntā 
maheśvarāḥ || 31 ||

raudrī jyeṣṭhā ca vāmā ca tathā śaktisadāśivau |
etāni sakale pañca bhuvanāni vidurbudhāḥ || 32 ||

evaṃ tu sarvatattveṣu śatamaṣṭādaśottaram |
bhuvanānāṃ parijñeyaṃ saṃkṣepānna tu vistarāt || 33 ||

śuddhenānena śuddhyanti sarvāṇyapi na śaṃśayaḥ |
sarvamārgaviśuddhau tu kartavyāyāṃ mahāmatiḥ || 34 ||

sakalāvadhi saṃśodhya śive yogaṃ prakalpayet |
bubhukṣoḥ sakalaṃ dhyātvā yogaṃ kurvīta yogavit || 35 ||

ityeṣa kīrtito mārgo bhuvanākhyasya me mataḥ |

iti śrīmālinīvijayottare tantre bhuvanādhvādhikāraḥ pañcamaḥ || 5 ||



atha

ṣaṣṭho'dhikāraḥ |

athāsya vastujātasya yathā dehe vyavasthitiḥ |
kriyate jñānadīkṣāsu tathedānīṃ nigadyate || 1 ||

pādādhaḥ pañcabhūtānī vyāptyā dvyaṅgulayā nyaset |
dharātattvaṃ ca gulphāntamavādīni tataḥ kramāt || 2 ||

tadvattadupariṣṭāttu parvaṣaṭkāvasānakam |
puṃstattvātkalātattvāntaṃ tattvaṣaṭkaṃ vicintayet || 3 ||

tato māyāditattvāni catvāri susamāhitaḥ |
caturaṅgulayā vyāptyā sakalāntāni bhāvayet || 4 ||

śivatattvaṃ tataḥ paścāttejorūpamanākulam |
sarveṣāṃ vyāpakatvena sabāhyābhyantaraṃ smaret || 5 ||

ṣaṭtriṃśattattvabhedena nyāso'yaṃ samudāhṛtaḥ |
adhunā pañcatattvāni yathā dehe tathocyate || 6 ||

nābherūrdhvaṃ tu yāvatsyātparvaṣaṭkamanukramāt [tantrālo 
pūrvaṣaṭkamiti] |
dharātattvena gulphāntaṃ vyāptaṃ śeṣamihāmbunā || 7 ||

dvāviṃśatiśca parvāṇi tadūrdhvaṃ [tantrālo tatorddhamiti] 
tejasāvṛtam |
tasmāddvādaśa parvāṇi vāyuvyāptirudāhṛtā || 8 ||

p. 32)

ākāśāntaṃ paraṃ śāntaṃ sarveṣāṃ vyāpakaṃ smaret |
śaktyādipañcakhaṇḍādhvavidhiṣvapyevamiṣyate || 9 ||

trikhaṇḍe kaṇṭhaparyantamātmatattvamudāhṛtam |
vidyātattvamatordhvaṃ tu śivatattvaṃ tu pūrvavat || 10 ||

evaṃ tattvavidhiḥ prokto bhuvanādhvā tathocyate |
kālāgnervīrabhadrāntaṃ puraṣoḍaśakaṃ tataḥ || 11 ||

gulphāntaṃ vinyaseddhyātvā yathāvadanupūrvaśaḥ |
tasmādekāṅgulavyāptyā lakulīśāditaḥ kramāt || 12 ||

vinyasettu dviraṇḍāntaṃ tryaṅgulaṃ chagalāṇḍakam |
tataḥ pādāṅgulavyāptyā devayogāṣṭakaṃ pṛthak || 13 ||

tato'pyardhāṅgulavyāptyā puraṣaṭkamanukramāt |
catuṣkaṃ tu dvaye'nyasminnekamekatra cintayan || 14 ||

uttarādikramāddvyekabhedo vidyādike traye |
kāle pratyekamuddiṣṭamekaika tu yathākramam || 15 ||

maṇḍalādhipatīnāṃ tu vyāptirardhāṅgulā matā |
tribhāganyūnaparvākhyā tritayasya tathopari || 16 ||

dvitīyasya tu saṃpūrṇā pañcakaṃ samudāhṛtam |
aṣṭakaṃ pañcakaṃ cānyadevameva vilakṣayet || 17 ||

p. 33)

bhuvanādhvavidhāvatra pūrvavaccintayecchivam |
padāni dvividhānyatra vargavidyāvibhedatā || 18 ||

teṣāṃ tanmantravadvyāptiryathedānīṃ tathā śṛṇu |
caturaṅgulamādyaṃ tu dve cānya'ṣṭāṅgule pṛthak || 19 ||

daśāṅgulāni trī-eyasmādekaṃ [k: evaṃ pañcadaśeti] 
pañcadaśāṅgulam |
caturbhiradhikairanyannavamaṃ vyāpakaṃ mahat || 20 ||

ūnaviṃśatike bhede padānāṃ vyāptirucyate |
ekaikaṃ dvyaṅgulaṃ jñeyaṃ tataḥ pūrva padatrayam || 21 ||

saptāṅgulāni [tantrālo aṣṭāṅgulānīti] catvāri daśāṅgulamataḥ 
param |
dvyaṅgulaṃ dve pade cānye ṣaḍaṅgulamataḥ param || 22 ||

dvādaśāṅgulamanyacca dve'nye pañcāṅgule pṛthak |
padadvayaṃ catuṣparva dve pūrve dve pṛthaktataḥ || 23 ||

vyāpakaṃ padamanyacca * * * tatparikīrtitam |
aparo'yaṃ vidhiḥ proktaḥ parāparamataḥ śṛṇu || 24 ||

pūrvavatpṛthivī tattvaṃ vijñeyaṃ caturaṅgulam |
sārdhadvyaṅgulamānāni dhiṣaṇāntāni lakṣayet || 25 ||

pradhānaṃ tryaṅgulaṃ jñeyaṃ śeṣaṃ pūrvavadādiśet |
pare'pi pūrvavatpṛthvī tryaṅgulānyaparāṇi ca || 26 ||

p. 34)

catuṣparva [k: catuṣpatheti] pradhānaṃ ca śeṣaṃ pūrvavadāśrayet |
dvividho'pi [k: dvividhe'pīti] hi varṇānāṃ ṣaḍvidho bheda ucyate [k: 
iṣyata] || 27 ||

tattvamārgavidhānena jñātavyaḥ paramārthataḥ |
padamantrakalādīnāṃ pūrvasūtrānusārataḥ || 28 ||

tritayatvaṃ prakurvīta tattvavarṇoktavartmanā |
itthaṃ bhūtaśarīrasya guruṇā śivamūrtinā || 29 ||

prakartavyā vidhānena dīkṣā sarvaphalapradā |

iti śrīmālinīvijayottare tantre dehamārgādhikāraḥ ṣaṣṭhaḥ || 6 ||




atha

saptamo'dhikāraḥ |

athātaḥ saṃpravakṣyāmi mudrākhyāḥ śivaśaktayaḥ |
yābhiḥ [svaccha yābhistu rakṣita] saṃrakṣito mantrī 
mantrasiddhimavāpnuyāt || 1 ||

triśūlaṃ ca tathā padmaṃ śaktiścakraṃ savajrakam |
daṇḍadaṃṣṭre mahāpretā mahāmudrā khageśvarī || 2 ||

mahodayā karālā ca khaṭvāṅgaṃ sakapālakam |
halaṃ pāśāṅkuśaṃ ghaṇṭā mudgarastriśikho'paraḥ || 3 ||

āvāhasthāpanīrodhā dravyadā natireva ca |
amṛtā yogamudreti vijñeyā vīravandite || 4 ||

tarjanīmadhyamānāmā dakṣiṇasya prasāritāḥ |
kaniṣṭhāṅguṣṭhakākrāntāstriśūlaṃ parikīrtitam || 5 ||

padmākārau karau kṛtvā padmamudrāṃ pradarśayet |
saṃmukhau prasṛtau kṛtvā karānantaritāṅgulī || 6 ||

prasṛte madhyame lagne kaumāryāḥ śaktiriṣyate |
uttānavāmamuṣṭestu dakṣa * * * * * * || 7 ||

* * * kṣayenmuṣṭiṃ cakraṃ nārācaṃ * * * * |
uttānavāmakasyordhvaṃ nyaseddakṣamadhomukham || 8 ||

p. 36)

kaniṣṭhāṅguṣṭhakau śliṣṭau śeṣāḥ syurmaṇibandhagāḥ |
vajramudreti vikhyātā caindrī saṃtoṣakārikā || 9 ||

ūrddhvaprasārito muṣṭirdakṣiṇo'ṅguṣṭhagarbhagaḥ |
daṇḍamudreti vikhyātā vaivasvatakulapriyā || 10 ||

vāmato vaktragāṃ kuryādvāmamuṣṭeḥ kaniṣṭhikām |
daṃṣṭreyaṃ kīrtitā devi cāmuṇḍākulanandinī || 11 ||

vāmajānugataṃ pādaṃ hastau pṛṣṭhapralambinau |
vikṛte locane grīvā bhagnā jihvā prasāritā || 12 ||

sarvayogigaṇasyeṣṭā prītā yogīśvarī matā |
hastāvadhomukhau padbhyāṃ hṛdayāntaṃ nayedbudhaḥ || 13 ||

tiryagmukhāntamupari saṃmukhāvūrdhvagau nayet |
mahāmudreti vikhyātā dehaśodhanakarmaṇi || 14 ||

sarvakarmakarī caiṣā yogināṃ yogasiddhaye |
vaddhvā padmāsanaṃ yogī nābhāvakṣeśvaraṃ nyaset [taṃ: kṣiyediti] || 
15 ||

daṇḍākāraṃ tu taṃ bhāvaṃ nayedyāvatkakhatrayam [kh: taṃ ca taṃ 
tāvaditi] |
nigṛhya tatra tattūrṇaṃ prerayet khatrayeṇa tu || 16 ||

etāṃ baddhvā mahāvīraḥ khegatiṃ pratipadyate |
adhomukhasya dakṣasya vāmamuttānamūrdhvataḥ || 17 ||

p. 37)

anāmāmadhyame tasya vāmāṅguṣṭhena pīḍayet |
tarjanyā tatkaniṣṭhāṃ ca tarjanīṃ ca kaniṣṭhayā || 18 ||

madhyamānāmikābhyāṃ ca tadaṅguṣṭhaṃ nipīḍayet |
mudrā mahodayākhyeyaṃ mahodayakarī nṛṇām || 19 ||

anāmikākaniṣṭhābhyāṃ sṛkvaṇyau pravidārayet |
jihvāṃ ca cālayenmantrī [k: jihvāṃ ca lālayediti] hāhākāraṃ ca kārayet || 
20 ||

kruddhadṛṣṭiḥ karāleyaṃ mudrā duṣṭabhayaṅkarī |
vāmaskandhagato vāmamuṣṭirucchritatarjanī || 21 ||

khaṭvāṅgākhyā smṛtā mudrā kapālamadhunā śṛṇu |
nimnaṃ pāṇitalaṃ dakṣamīṣatsaṃkucitāṅguli [sva: 
mīṣattatkuñcitāṅgulim] || 22 ||

kapālamiti vijñeyamadhunā halamucyate |
muṣṭibaddhasya dakṣasya tarjanī vāmamuṣṭinā || 23 ||

vakratarjaninā grastā halamudreti kīrtitā |
muṣṭyā (pṛṣṭha) gayordakṣavāmayostarjanīdvayam || 24 ||

vāmāṅguṣṭhāgrasaṃlagnaṃ pāśaḥ prasṛtakuñcitaḥ |
hale muṣṭiryathā vāmo dakṣahīnastathāṅkuśaḥ || 25 ||

adhomukhasthite vāme dakṣiṇāṃ tarjanīṃ budhaḥ |
cālayenmadhyadeśasthāṃ ghaṇṭāmudrā priyā matā || 26 ||

p. 38)

karāvūrdhvamukhau kāryāvanyonyāntaritāṅgulī |
anāme madhyapṛṣṭhasthe tarjanyau mūlapavarge [sva0 mūlaparvata] || 27 
||

madhyame [sva0 madhye dva tu yuta paruṣāvapi ca] dve yute kārye kaniṣṭhe 
paruṣāvadhi |
tarjanyau madhyapārśvasthe virale parikalpite || 28 ||

mudgarastriśikho [k: striśira] hyeṣa kṣaṇādāveśakārakaḥ |
karābhyāmañjaliṃ kṛtvā anāmāmūlaparvagau || 29 ||

aṅguṣṭhau kalpayedvidvānmantrāvāhanakarmaṇi |
muṣṭī dvāvunnatāṅguṣṭhau sthāpanī parikīrtitā || 30 ||

dvāveva garbhagāṅguṣṭhau vijñeyā saṃnirodhinī |
dravyadā tu samākhyātā * * * * tra saṃmukhī || 31 ||

hṛdaye saṃmukhau hastau saṃlagnau prasṛtāṅgulī |
namaskṛtiriyaṃ mudrā mantravandanakarmaṇi || 32 ||

anyonyāntaritāḥ sardhāḥ karayoraṅgulīḥ sthitāḥ |
kaniṣṭhāṃ dakṣiṇāṃ vāme'nāmikāgre niyojayet || 33 ||

dakṣiṇe ca tathā vāmāṃ tarjanīmadhyame tathā |
aṅguṣṭhau madhyamūlasthau mudreyamamṛtaprabhā || 34 ||

p. 39)

dakṣiṇaṃ nābhimūle tu vāmasyopari saṃsthitam |
tarjanyaṅguṣṭhakau lagnau ucchritau yogakarmaṇi || 35 ||

evaṃ mudrāgaṇaṃ mantrī badhnīyāddhṛdaye budhaḥ |
sarvāsāṃ vācakaścāsāṃ oṃ hrīṃ nāma tato namaḥ || 36 ||

iti śrīmālinīvijayottare tantre mudrādhikāraḥ saptamaḥ || 7 ||




atha

aṣṭamo'dhikāraḥ |

athātaḥ saṃpravakṣyāmi yajanaṃ sarvakāmadam |
yasya darśanamātreṇa yoginīsaṃmato bhavet || 1 ||

tatrādau yāgasadanaṃ śubhakṣetre manoramam |
kārayedagnikuṇḍena vartulena samanvitam || 2 ||

pañcaviṃśatiparveṇa samantādardhanābhinā |
turyāṃśamekhalenāpi parvauṣṭhena suśobhinā || 3 ||

tataḥ snātvā jitadvandvo bhāvasnānena mantravit |
tacca ṣaḍvidhamuddiṣṭaṃ bhasmasnānādyanukramāt || 4 ||

bhasmasnānaṃ mahāstreṇa bhasma saptābhimantritam |
malasnānāya saṃhārakrameṇoddhūlayettanum || 5 ||

vidyāṅgaiḥ pañcabhiḥ paścācchiraḥ prabhṛti guṇṭhayet |
abhiṣekaṃ tu kurvīta mūlenaiva [k: jalenaiveti] ṣaḍaṅginā || 6 ||

tato'vāsāḥ suvāsā vā hastau pādau ca dhāvayet |
ācamya mārjanaṃ kuryādvidyayā bhūrivarṇayā || 7 ||

nyāsaṃ kṛtvā tu sāmānyamaghamarṣaṃ dvitīyayā |
upasthānaṃ ca mālinyā japeccaikākṣarāṃ parām || 8 ||

p. 41)

jalasnāne'pi cāstreṇa mṛdaṃ saptābhimantritām |
pūrvavattanumālabhya malasnānaṃ samācaret || 9 ||

vidhisnānādikaṃ cātra pūrvavat kiṃtu vāriṇā |
sādhāraṇavidhisnāto vidyātritayamantritam || 10 ||

toyaṃ vinikṣipenmūrdhni mantrasnānāya mantravit |
rajasā godhutenaiva [taṃ; lo: kṛteti] vāyavyaṃ snānamācaret || 11 ||

mahāstramuccaran gaccheddhyānayuk padasaptakam |
tadeva punarāgacchedanusmṛtya parāparām || 12 ||

varṣātapasamāyogāddivyo'pyevaṃvidho mataḥ |
kiṃtu tatra parāṃ mantrī sravantīmamṛtaṃ smaret || 13 ||

astreṇāṅguṣṭhamūlāttu vahnimutthāpya nirdahet |
svatanuṃ plāvayetpaścātparayaivāmṛtena tu || 14 ||

sūryādau mantramādāya gacchedastramanusmaran |
yāgaveśmāstrasaṃśuddhaṃ viśecchuciranākulaḥ || 15 ||

tatra dvārapatīn pūjya mahāstreṇābhimantritam |
puṣpaṃ vinikṣipeddhyātvā jvaladvighnapraśāntaye || 16 ||

daśasvapi tato'streṇa dikṣu saṃkalpya rakṣaṇam |
praviśedyāgasadanaṃ vahnivadvahnisaṃyutam || 17 ||

p. 42)

pūrvāsyaḥ saumyavaktro vā viśeṣanyāsamārabhet |
tatrādāvastramantreṇa kālānalasamatviṣā [k: samanvitā] || 18 ||

aṅguṣṭhāgrāttanuṃ dagdhāṃ sabāhyābhyantarāṃ smaret |
vikīryamāṇaṃ tadbhasma dhyātvā kavacavāyunā || 19 ||

śivabindusamākāramātmānamanucintayet |
tato'sya yojayecchaktiṃ so'hamityaparājitaḥ || 20 ||

vidyāmūrtiṃ tato dadhyānmantreṇānena śāṅkari |
daṇḍākrāntaṃ mahāprāṇaṃ daṇḍārūḍhaṃ sanābhikam || 21 ||

nitambaṃ tadadhastācca vāmastanamadhaḥ punaḥ |
kaṇṭhaṃ ca vāmaśikharaṃ vāmamudrāvibhūṣitam || 22 ||

bindvardhacandrakhaṃ nādaśaktibinduvibhūṣitam |
eṣa piṇḍavaro devi navātmaka iti śrutaḥ || 23 ||

sarvasiddhikaraścāyaṃ sarahasyamudāhṛtaḥ |
eṣa tryarṇojjhito'dhastāddīrghaiḥ ṣaḍbhiḥ svarairyutaḥ || 24 ||

ṣaḍaṅgāni hṛdādīni jātibhedena kalpayet |
kṣayaravalabījaiśca dīptairbinduvibhūṣitaiḥ || 25 ||

vaktrāṇi kalpayetpūrvamūrdhvavaktrāditaḥ kramāt |
pratyaṅgavidhisiddhyarthaṃ lalāṭādiṣvatho nyaset || 26 ||

p. 43)

a lalāṭe dvitīyaṃ ca vaktre saṃparikalpayet |
i-ī netradvaye dattvā u-ū karṇadvaye nyaset || 27 ||

ṛ ṛ nāsāpuṭe tadvaṃt ḷ ḹ gaṇḍadvaye tathā |
e ai adhordhvadanteṣu o-aukārau tatho'ṣṭhayoḥ || 28 ||

aṃ śikhāyāṃ visargeṇa jihvāṃ saṃparikalpayet |
dakṣiṇaskandhadordaṇḍakarāṅgulinakheṣu ca || 29 ||

kavargaṃ vinyasedvāme tadvaccādyamanukramāt |
ṭatādyau pūrvavadvargau nitamborvādiṣu nyaset || 30 ||

pādyaṃ pārśvadvaye pṛṣṭhe jaṭhare hṛdyanukramāt |
tvagraktamāṃsamūtreṣu yavargaṃ parikalpayet || 31 ||

śādyamasthivasāśukraprāṇakūpeṣu pañcakam |
mūrtyaṅgāni tato dattvā śivamāvāhayedbudhaḥ || 32 ||

prāṇopari nyasennābhiṃ tadūrdhve dakṣiṇāṅgulim |
vāmakarṇaprameyotaḥ sarvasiddhipradaḥ śivaḥ || 33 ||

sadbhāvaḥ paramo hyeṣa bhairavasya mahātmanaḥ |
aṅgānyanena kāryāṇi pūrvavatsvarabhedataḥ || 34 ||

mūrtiḥ sṛṣṭistritattvaṃ ca aṣṭau mūrtyaṅgasaṃyutāḥ |
śivaḥ sāṅgaśca ṣoḍhaiva nyāsaḥ saṃparikīrtitaḥ || 35 ||

p. 44)

asyopari tataḥ śāktaṃ kuryānnyāsaṃ yathā śṛṇu |
mūrtau parāparāṃ nyasya tadvaktrāṇi ca mālinīm || 36 ||

parāditritayaṃ paścācchikhāhṛtpādagaṃ nyaset |
kavaktrakaṇṭhahṛnnābhiguhyorūpādagaṃ kramāt || 37 ||

aghoryādyaṣṭakaṃ nyasya vidyāṅgāni tu pūrvavat |
tatastvāvāhayecchaktiṃ sarvayoginamaskṛtām || 38 ||

jīvaḥ prāṇapuṭāntasthaḥ kālānalasamadyutiḥ |
atidīptastu vāmāṅghribhūṣito mūrdhni bindunā || 39 ||

dakṣajānuyutaścāyaṃ sarvamātṛgaṇānvitaḥ [taṃ0 lo0: arcita] |
anena prīṇitāḥ sarvā dadate vāñchitaṃ phalam || 40 ||

sadbhāvaḥ paramo hyeṣa mātṝṇāṃ paripaṭhyate |
tasmādenāṃ japenmantrī ya icchetsiddhimuttamām || 41 ||

rudraśaktisamāveśo nityamatra pratiṣṭhitaḥ |
yasmādeṣā parāśaktirbhedenānena [taṃ0 lo0 anyeneti] kīrtitā || 42 ||

yāvatyaḥ siddhayastantre sarvāḥ [kh: pu0 tāḥ sarvāḥ kurute tviyamiti] 
syuranayā kṛtāḥ |
aṅgāni kalpayedasyāḥ pūrvavatsvarabhedataḥ || 43 ||

p. 45)

mūrtiḥ savaktrā śaktiśca vidyātritaya eva ca |
aghoryādyaṣṭakaṃ ceti [k: anyathāpyanneti] tathā vidyāṅgapañcakam || 
44 ||

sāṅgā caiva parā śaktirnyāsaḥ prokto'tha ṣaḍvidhaḥ |
yāmalo'yamato nyāsaḥ sarvasiddhiprasiddhaye || 45 ||

vāmo vāyaṃ vidhiḥ kāryo muktimārgāvalambibhiḥ |
varṇamantravibhedena pṛthagvā tatphalārthibhiḥ || 46 ||

yāvantaḥ kīrtitā bhedaiḥ śaṃbhuśaktyaṇuvācakāḥ |
tāvatsvapyevamevāyaṃ nyāsaḥ pañcavidho mataḥ || 47 ||

kiṃtu bāhyastu yo yatra sa tatrāṅgasamanvitaḥ |
ṣaṣṭhaḥ syāditi sarvatra ṣoḍhaivāyamudāhṛtaḥ || 48 ||

svānuṣṭhānāvirodhena bhāvābhāvavikalpanaiḥ |
yāgadravyāṇi sarvāṇi kāryāṇi vidhivadbudhaiḥ || 49 ||

tato'rghapātramādāya bhāvābhāvāvikalpitam |
tataścāstrāgnisaṃdagdhaṃ śaktyambuplāvitaṃ śuvi || 50 ||

kartavyā yasya saṃśuddhiranyasyāpyatra vastunaḥ |
tasyānenaiva mārgeṇa prakartavyā vijānatā || 51 ||

p. 46)

nā cāsaṃśodhitaṃ vastu kiṃcidapyatra [taṃ0 kiṃcidapyupakalpayediti] 
kalpayet |
tena [k: pu0 saṃśodhitaṃ ca yatsarvamiti] śuddhaṃ tu sarvaṃ 
yadaśuddhamapi tacchuci || 52 ||

tadambunā samāpūrya ṣaḍbhiraṅgaiḥ [k: ṣaḍbhirarghairiti] samarpya ca |
amṛtīkṛtya sarvāṇi tena dravyāṇi śodhayet || 53 ||

ātmānaṃ pūjayitvā tu kuryādantaḥ kṛtiṃ yathā |
tathā te kathayiṣyāmi sarvayogigaṇārcite || 54 ||

ādāvādhāraśaktiṃ tu nābhyadhaścaturaṅgulām |
dharāṃ surodaṃ potaṃ ca kandaśceti catuṣṭayam || 55 ||

ekaikāṅgulametatsyācchūlasyāmalasārakam [k: caturaṅgulametaditi] |
tato nālamanantākhyaṃ daṇḍamasya prakalpayet || 56 ||

lambikāvadhitaścātra śūlordhvaṃ granthiriṣyate |
abhittvainaṃ mahādevi pāśajālamahārṇavam || 57 ||

na sa yogamavāpnoti śivena saha mānavaḥ |
dharmaṃ jñānaṃ ca vairāgyamaiśvaryaṃ ca catuṣṭayam || 58 ||

koṇeṣu cintayenmantrī āgneyādiṣvanukramāt |
gātrakāṇāṃ catuṣkaṃ ca dikṣu pūrvādiṣu smaret || 59 ||

p. 47)

grantherūrdhvaṃ trīśūlādho bhavitavyā catuṣkikā |
vidyātattvaṃ tadevāhuśchaṃdanatrayasaṃyutam [kh: chadanadvayeti] || 
60 ||

kakhalambikayormadhye tattattvamanucintayet [k: kakhalambakayormadhye 
tattvamanuvicintayedityeyaṃvidhaḥ] |
padmākṛti [k: kṛti kakhe tattvamiti] kakhatattvamaiśvaraṃ 
cintayedbudhaḥ [cintayettata] || 61 ||

karṇikākesaropetaṃ sabījaṃ [k: bījaṃ vikasitaṃ sitamiti] vikasatsitam | 
pūrvapatrāditaḥ paścādvāmādinavakaṃ nyaset || 62 ||

vāmā jyeṣṭhā ca raudrī ca kālī ceti tathā [k: tataḥ] parā |
kalavikaraṇī caiva balavikaraṇī tathā || 63 ||

balapramathanī cānyā sarvabhūtadamanyapi |
manonmanī ca madhye'pi bhānumārgeṇa vinyaset || 64 ||

vibhvādinavakaṃ cānyadvilomātparikalpayet |
vibhurjñānī kriyā cecchvā vāgīśī jvālinī tathā || 65 ||

vāmā jyeṣṭhā ca raudrī ca sarvāḥ kālānalaprabhāḥ |
brahmaviṣṇuharāḥ pūrvaṃ ye śāktāḥ pratipāditāḥ || 66 ||

p. 48)

dalakesaramadhyasthā maṇḍalānāṃ ta īśvarāḥ |
dhvani? cārkenduvahnīnāṃ saṃjñayā paribhāvayet || 67 ||

īśvaraṃ ca mahāpretaṃ prahasantaṃ sacetanam |
kālāgnikoṭivapuṣamityevaṃ sarvamāsanam [parātri tyetatsarvamiti] || 68 ||

tasya nābhyutthitaṃ śaktiśūlaśṛṅgatrayaṃ smaret |
kakhatrayeṇa niryātaṃ dvādaśāntāvasānakam || 69 ||

cintayettasya śṛṅgeṣu śāktaṃ padmatrayaṃ tataḥ |
sarvādhiṣṭhāyakaṃ śuklamityetatparamāsanam || 70 ||

tatropari tato mūrti vidyākhyāmanucintayet |
ātmākhyāṃ ca tatastasyāṃ pūrvanyāsaṃ śivātmakam || 71 ||

tato madhye parāṃ śaktiṃ dakṣiṇottarayordvayam |
parāparāṃ svarūpeṇa raktavarṇāṃ mahābalām || 72 ||

icchārūpadharāṃ dhyātvā kiṃcidugrāṃ na bhīṣaṇām |
aparāṃ vāmaśṛṅge tu bhīṣaṇāṃ kṛṣṇapiṅgalām || 73 ||

icchārūpadharāṃ devīṃ praṇatārtivināśinīm |
parāṃ cāpyāyanīṃ devīṃ candrakoṭyayutaprabhām || 74 ||


p. 49)

ṣaḍvidhe'pi kṛte śākte mūrtyādāvapi cintayet |
vidyāṅgapañcakaṃ paścādāgneyyādiṣu vinyaset || 75 ||

agnīśarakṣovāyūnāṃ dakṣiṇe ca yathākramam |
śaktyaṅgāni śivāṅgāni tathaiva vidhinā smaret || 76 ||

kiṃtu śakrādidikṣvastramantraṃ madhye ca locanam |
aghorādyaṣṭakaṃ dhyāyedaghoryādyaṣṭakānvitam || 77 ||

sarvāsāmāvṛtatvena lokapālāṃśca bāhyataḥ |
sāstrānsvamantraiḥ saṃcintya japaṃ paścātsamārabhet || 78 ||

svarūpe tallayo bhūtvā ekaikāṃ daśadhā smaret |
jvalatpāvakasaṃkāśāṃ dhyātvā svāhāntamuccaret || 79 ||

sakṛdekaikaśo mantrī homakarmaprasiddhaye |
ityeva mānaso yāgaḥ kathitaḥ sāmudāyikaḥ || 80 ||

etattriśūlamuddiṣṭamekadaṇḍaṃ triśaktikam |
itthametadavijñāya śaktiśūlaṃ varānane || 81 ||

baddhvāpi khecarīṃ mudrāṃ notpatatyavanītalāt |
ityetacchāmbhavaṃ proktamaṣṭāntaṃ śāktamiṣyate || 82 ||

turyāntamāṇavaṃ vidyāditi śūlatrayaṃ matam |
pṛthagyāgavidhānena śakticakraṃ [kh: śaktipadmamiti] vicintayet || 83 ||

p. 50)

tenāpi khecarīṃ baddhvā tyajatyevaṃ mahītalam |
tato'bhimantrya dhānyāni mahāstreṇa trisaptadhā || 84 ||

nikṣipeddikṣu sarvāsu jvalatpāvakavatsmaret |
nirvighnaṃ tadgṛhaṃ dhyātvā saṃhṛtyeśadiśaṃ nayet || 85 ||

pañcagavyaṃ tataḥ kuryādvadanaiḥ pañcabhirbudhaḥ |
gomūtraṃ gomayaṃ caiva kṣīraṃ dadhi ghṛtaṃ tathā || 86 ||

mantrayedūrdhvaparyantaiḥ ṣaḍaṅgena kuśodakam |
mudre dravyāmṛte baddhvā tattvaṃ tasya vicintayet || 87 ||

tena saṃprokṣayedbhūmiṃ svalpenānyannidhāpayet [k: 
nānyadvidārayediti] |
vāstuyāgaṃ tataḥ kuryānmālinyuccārayogataḥ || 88 ||

puṣpairañjalimāpūrya phakārādi [k: hakārādīti] samuccaran |
dhyātvā śaktyantamadhvānaṃ nakārānte vinikṣipet || 89 ||

gandhadhūpādikaṃ datvā gaṇeśānaṃ prapūjayet |
ṣaḍutthamāsanaṃ nyasya praṇavena tatopari || 90 ||

gāmityanena vighneśaṃ gandhadhūpādibhiryajet [k: gandhapuṣpādibhiriti] 
|
asyāṅgāni[taṃ0 tasyāṅgānīti] gakāreṇa ṣaḍdīrghasvarayogataḥ || 91 ||

p. 51)

trinetramuditaṃ dhyātvā gajāsyaṃ vāmanākṛtim |
visarjya siddhikāyastu mahāstramanupūjayet || 92 ||

dattvānantaṃ tathā dharmaṃ jñānaṃ vairāgyameva ca |
aiśvaryaṃ karṇikāyāṃ ca [k, kh, g: ceti] ṣaḍutthamidamāsanam 
|| 93 ||

asyopari nyaseddhyātvā khaḍgakheṭakadhāriṇam |
vikarālaṃ mahādaṃṣṭraṃ mahograṃ bhrukuṭīmukham || 94 ||

svāṅgaṣaṭkasamopetaṃ diṅmātṛparivāritam |
svārṇairevāṅgaṣaṭkam [k, kh: sāṅgaiḥ (sārṇaiḥ) 
ityevaṃvidhaḥ] tu phaṭkāraparidīpitam || 95 ||

tadrūpameva saṃcintya tato mātraṣṭakaṃ yajet |
indrāṇīṃ pūrvapatre tu savajrāṃ yugapatsmaret || 96 ||

āgneyīṃ śaktihastāṃ ca yāmyāṃ daṇḍakarāṃ tataḥ |
nair-ṛtīṃ varuṇānīṃ ca vāyavīṃ ca vicakṣaṇaḥ || 97 ||

khaḍgapāśadhvajairyuktāṃ cintayedyugapatpriye |
kauverīṃ mudgarakarāmīśānīṃ śūlasaṃyutām || 98 ||

gandhapuṣpādibhiḥ pūjya svatantre homamācaret |
ādau ca kalaśaṃ kuryātsahasrādhikamantritam || 99 ||

sahasraṃ homayettatra tato japtvā visarjayet |
śatamaṣṭottaraṃ pūrṇaṃ paścādyajanamārabhet || 100 ||

p. 52)

tatrādau kumbhamādāya hemādimayamavraṇam |
sarvamaṃntrauṣadhīgarbhaṃ[taṃ0 sarvaratnauṣadhīgarbhamiti] 
gandhāmbuparipūritam || 101 ||

cūtapallavavaktraṃ ca sraksūtrasitaṃkaṇṭhakam [taṃ0 
kṛtakaṇṭhakamiti] |
rakṣoghratilakākrāntaṃ sitavastrayugāvṛtam || 102 ||

śatāṣṭottarasaṃjapta mūlamantraprapūjitam [k: śūlamantraprapūritamiti] 
|
vārdhānyapi tathābhūtā kiṃtu sastreṇa pūjitā || 103 ||

vikirairāsanaṃ dattvā pūrvoktaṃ tu vicakṣaṇaḥ |
indrādīnpūjayetpaścātsvadikṣu proktasvasvaraiḥ || 104 ||

avicchinnāṃ tato dhārāṃ vārdhānyā pratipādayet |
bhrāmayetkalaśaṃ paścādbrūyāllokeśvarānidam || 105 ||

bho bhoḥ śakra tvayā svasyāṃ diśi  vighnapraśāntaye [k: 
vighnopaśāntaye] |
sāvadhānena karmāntaṃ bhavitavyaṃ śivājñayā || 106 ||

nītvā tatrāsane pūrvaṃ mūrtibhūtaṃ [k: mūrtibhūtāṃ parāmiti] ghaṭaṃ 
nyaset |
tasya dakṣiṇadigbhāge vārdhānīṃ viniveśayet [taṃ0 vinivedayediti] || 107 
||

ātmamūrtyādipūjyāntaṃ kumbhe vinyasya mantravit |
gandhapuṣpādibhiḥ pūjya vārdhānyāṃ pūjayedimam [kh: pūjayedasimiti] 
|| 108 ||

p. 53)

gandhairmaṇḍalakaṃ [taṃ0 gandhamaṇḍalakamiti; kh: 
manumaṇḍalakamiti] kṛtvā brahmasthāne vicakṣaṇaḥ |
tatra saṃpūjayetṣaṭkaṃ [kh: saṃpūjayecchaṃkhamiti] trikaṃ [taṃ0 
trike veti] vāpyekameva vā || 109 ||

kuṇḍasyollekhanaṃ lekhaḥ kuṭṭanaṃ copalepanam |
catuṣpathākṣavāṭaṃ ca vajrasaṃsthāpanaṃ tathā || 110 ||

kuśāstaraṇaparidhiviṣṭarāṇāṃ ca kalpanam |
sarvamastreṇa kurvīta vidyārmohīmiti [kh: vidyāmaindrīmiti] nyaset || 111 ||

śivamomiti vinyasya saṃpūjya dvitayaṃ punaḥ |
tāmrapātre śarāve vā ānayejjātavedasam || 112 ||

śivaśukramiti dhyātvā vidyāyonau vinikṣipet |
tatastvāhutayaḥ pañca vidyāṅgaireva homayet || 113 ||

jananādi tataḥ karma sarvamevaṃ kṛte [taṃ0 mevaṃ kṛtaṃ kṛtamiti] 
kṛtam |
parāparāmanusmṛtya dadyātpūrṇāhutiṃ punaḥ || 114 ||

saṃpūjya mātaraṃ vahneḥ pitaraṃ ca visarjayet |
carvādisādhanāyāgniṃ samuddhṛtya tataḥ punaḥ || 115 ||

jvalitasyāthavā vahneścitiṃ vāmena vāyunā |
ākṛṣya hṛdi saṃkumbhya dakṣiṇena punaḥ kṣipet || 116 ||

p. 54)

pūrṇāṃ ca pūrvavaddadyācchivāgneraparo vidhiḥ |
śivarūpaṃ tamālokya tasyātmāntaḥ kṛtiḥ kramāt || 117 ||

kuryādantaḥ kṛtiṃ mantrī tato homaṃ samārabhet |
mūlaṃ śatena saṃtarpya tadaṅgāni ṣaḍaṅgataḥ || 118 ||

śeṣāṇāṃ mantrajātīnāṃ daśāṃśenaiva [k: daśāṃśaiścaiva 
tarpaṇamiti] tarpaṇam |
tataḥ pravesayecchiṣyāñśucīnsnātānupoṣitān || 119 ||

praṇamya devadeveśaṃ catuṣṭayagataṃ kramāt |
pañcagavyaṃ caruṃ dadyāddantadhāvanameva ca || 120 ||

hṛdayena caroḥ siddhiryājñikaiḥ kṣīrataṇḍulaiḥ |
saṃpātaṃ saptabhirmantraistataḥ ṣaḍbhāgabhājitam || 121 ||

śivāgniguruśiṣyāṇāṃ [k: śiṣyāṃśceti] vārdhānīkumbhayoḥ samam |
dantakāṣṭhaṃ tato dadyātkṣīravṛkṣasamudbhavam || 122 ||

tasya pātaḥ śubhaḥ prācīsaumyaiśāpyordhvadiggataḥ |
aśubho'nyatra tatrāpi homo'ṣṭaśatiko bhavet || 123 ||

bahiḥkarma tataḥ kuryāddikṣu sarvāsu daiśikaḥ |
oṃ kṣaḥ kṣaḥ sarvabhūtebhyaḥ svāheti manunāmunā || 124 ||

p. 55)

samācamya kṛtanyāsaḥ samabhyarcya ca śaṅkaram |
* * * * * * * * * * * * gṛhe 
śuciḥ || 125 ||

nyāsaṃ kṛtvā tu śiṣyāṇāmātmanaśca viśeṣataḥ |
prabhāte nityakarmādi kṛtvā svapnaṃ vicārayet || 126 ||

śubhaṃ prakāśayetteṣāmaśubhe homamācaret |
tataḥ puṣpaphalādīnāṃ suveśābharaṇāḥ striyaḥ || 127 ||

āpaduttaraṇaṃ caiva śubhadeśāvarohaṇam |
madyapānaṃ śiraśchedamāmamāṃsasya bhakṣaṇam || 128 ||

devatādarśanaṃ sākṣāttathā viṣṭhānulepanam |
evaṃ vidhaṃ śubhaṃ dṛṣṭvā siddhiṃ prāpnotyabhīpsitām || 129 ||

etadevānyathābhūtaṃ duḥsvapna [k: duḥkhasvapnamitīti] iti kīrtyate |
pakvamāṃsāśanābhyaṅgagartādipatanādikam || 130 ||

tantroktāṃ niṣkṛtiṃ kṛtvā dvijatvāpādanaṃ tataḥ |
devāgnigurudevīnāṃ pūjāṃ kṛtvā sadā budhaḥ || 131 ||

eteṣāmanivedyaiva na kiṃcidapi bhakṣayet |
devadravyaṃ gurudravyaṃ caṇḍīdravyaṃ ca varjayet || 132 ||

niṣphalaṃ naiva ceṣṭeta muhūrtamapi mantravit |
yogābhyāsarato bhūyānmantrābhyāsarato'pi vā || 133 ||

p. 56)

ityevamādisamayāñśrāvayitvā visarjayet |
devadevaṃ tataḥ snānaṃ śiṣyāṇāmātmano'pi vā || 134 ||

kārayecchivakumbhena sarvaduṣkṛtahāriṇā |
ityetatsāmayaṃ karma samāsātparikīrtitam || 135 ||

iti śrīmālinīvijayottare tantre samayādhikāro'ṣṭamaḥ || 8 ||



atha

navamo'dhikāraḥ |

athaiṣāṃ samayasthānāṃ kuryāddīkṣāṃ yadā guruḥ |
tadādhivāsanaṃ kṛtvā * * * * * * * * || 1 ||

sa ca pūrvāṃ diśaṃ samyak sūtramāsphālayettataḥ |
tanmadhyātpūrvavāruṇyāvaṅkayet samāntaram || 2 ||

pūrvāparasamāsena sūtreṇottaradakṣiṇam |
aṅkayedaparādaṅkātpūrvādapi tathaiva te || 3 ||

matsyamadhye kṣipetsūtramāyataṃ [k: dadetsūtramiti] dakṣiṇottare |
matakṣetrārdhamānena madhyāddikṣvaṅkayetsamam || 4 ||

tadvaddiksthācca koṇeṣu anulomavilomataḥ |
pātayetteṣu sūtrāṇi caturaśraprasiddhaye || 5 ||

vedāśrite[k: vedāśrite trihaste; kh: evamasya trihastasya prāk] hi haste 
prāk pūrvamardhaṃ vibhājayet |
hastārdhaṃ sarvatastyaktvā pūrvodagyāmadiggatam || 6 ||

guṇāṅgulasamairbhāgaiḥ śeṣamasya vibhājayet |
tryaṅgulaiḥ koṣṭhakairūrdhvaistiryak cāṣṭadvidhātmakaiḥ || 7 ||

p. 58)

dvau dvau bhāgau parityajya punardakṣiṇasaumyagau |
brahmaṇaḥ pārśvayorjīvāccaturthātpūrvatastathā || 8 ||

bhāgārdhabhāgamānaṃ tu khaṇḍacandradvayaṃ dvayam |
tayorantastṛtīye tu dakṣiṇottarapārśvayoḥ || 9 ||

jīve khaṇḍenduyugalaṃ kuryādantarbhramādbudhaḥ |
tayoraparamarmasthaṃ khaṇḍendudvayakoṭigam || 10 ||

bahirmukhabhramaṃ [k: mukhaṃ bhramamiti] kuryāt khaṇḍacandradvayaṃ
dvayam |
tadvadbrahmaṇi kurvīta bhāgabhāgārdhasaṃmitam [k: bhāgaṃ 
bhāgārdheti]
|| 11 ||

tato dvitīyabhāgānte brahmaṇaḥ pārśvayordvayoḥ |
dve rekhe pūrvage neye bhāgatryaṃśaśame budhaiḥ || 12 ||

ekārdhendūrdhvakoṭisthaṃ [k: ekārdhendvardheti] 
brahmasūtrāgrasaṃgatam |
sūtradvayaṃ prakurvīta madhyaśṛṅgaprasiddhaye || 13 ||

tadagrapārśvayorjīvātsūtramekāntare śritam [kh: vṛtamiti] |
ādidvitīyakhaṇḍendukoṇātkoṇāntamāśrayet || 14 ||

tayorevāparājjīvātprathamārdhendukoṇataḥ |
tadvadeva nayetsūtraṃ śṛṅgadvitayasiddhaye || 15 ||

p. 59)

kṣetrārdhe cāpare [kh: cāpare kuryāddaṇḍamasya yathā śṛṇu iti 
pāṭhāntaraṃ vartate] daṇḍo dvikaracchannapañcakaḥ |
dvikaraṃ pañca tadbhāgāḥ pañcapīṭhatirohitāḥ || 16 ||

ṣeṣamanyadbhaveddṛśyaṃ pṛthutvādbhāgasaṃmitam |
ṣaḍvistṛtaṃ caturdīrghaṃ tadadho'malasārakam || 17 ||

vedāṅgulaṃ ca tadadho mūlaṃ tīkṣṇāgramiṣyate |
ādikṣetrasya kurvīta dikṣu dvaracatuṣṭayam || 18 ||

hastāyāmaṃ tadardhaṃ tu vistārādapi tatsamam |
dviguṇaṃ [g: dviguṇaṃ bāhyamardhaṃ ceti] bāhyataḥ kuryāttataḥ 
padmaṃ yathā śṛṇu || 19 ||

ekaikabhāgamānāni kuryādvṛttāni vedavat |
dikṣvaṣṭau punarapyaṣṭau jīvasūtrāṇi ṣoḍaśa || 20||

dvayordvayoḥ punarmadhye tatsaṃkhyātāni pātayet |
eṣāṃ [g: eṣu tṛtīyeti] tṛtīyavṛttasthaṃ pārśvajīvasamaṃ bhramam 
[k: bhramāditi] || 21 ||

etadantaṃ prakurvīta tato jīvāgramānayet |
yatraiva kutracitsaṅgastatsaṃbandhe sthirīkṛte || 22 ||

tatra kṛtvā nayenmantrī patrāgrāṇāṃ prasiddhaye |
ekaikasmindale kuryātkesarāṇāṃ trayaṃ trayam || 23 ||

p. 60)

dviguṇāṣṭāṅgulaṃ [k: dviguṇāṣṭadalamiti] kāryaṃ 
tadvacchṛṅgakajatrayam |
tataḥ prapūjayenmantrī rajobhiḥ sitapūrakaiḥ || 24 ||

raktaiḥ kṛṣṇaistathā pītairharitaiśca viśeṣataḥ |
karṇikā pītavareṇena mūlamadhyāgradeśataḥ [k: madhyāgrabhedata] || 25 
||

sitaṃ raktaṃ tathā pītaṃ kāryaṃ kesarajālakam |
dalāni śuklavarṇāni prativāraṇayā saha || 26 ||

pītaṃ tadvaccatuṣkoṇaṃ karṇikārdhasamaṃ [g: karṇikārasamamiti] bahiḥ 
|
sitaraktapītakṛṣṇaistatpādānvahnitaḥ kramāt || 27 ||

caturbhirapi śṛṅgāṇi tribhirmaṇḍalamiṣyate |
daṇḍaḥ syānnīlaraktena pītamāmalasārakam || 28 ||

raktaṃ śūlaṃ prakūrvīta yattatpūrvaṃ prakalpitam |
paścāddvārasya pūrveṇa tyaktvāṅgulacatuṣṭayam || 29 ||

dvāraṃ vedāśri vṛttaṃ vā saṃkīrṇaṃ vā vicitritam |
ekadvitripuraṃ tulyaṃ sāmudramatha vobhayam || 30 ||

kapolakaṇṭhaśobhopaśobhādibahucitritam |
vicitrākārasaṃsthānaṃ vallīsūkṣmagṛhānvitam || 31 ||

p. 61)

evamatra suniṣpanne gandhavastreṇa mārjanam |
kṛtvā snānaṃ prakurvīta pūrvoktenaiva karmaṇā [g: varmaṇeti] || 32 ||

praviśya pūrvavanmantrī upaviśya yathā purā |
nyasya pūrvoditaṃ sarvaṃ pañcadhā bhairavātmakam || 33 ||

uttare vinyasecchṛṅge devadevaṃ navātmakam |
madhye bhairavasadbhāvaṃ dakṣiṇe ratiśekharam || 34 |

raktatvaṅmāṃsamūtraistu vāmakarṇavibhūṣitam |
binduyuktaṃ prameyotaṃ ratiśekharamādiśet || 35 ||

śāktaṃ ca pūrvavatkṛtvā tarpayetpūrvavadbudhaḥ |
punarabhyarcya deveśaṃ bhaktyā vijñāpayedidam || 36 ||

gurutvena tvayaivāhamājñātaḥ parameśvara |
anugrāhyāstvayā śiṣyāḥ śivaśaktipracoditāḥ || 37 ||

tadete [k: tadetadvividhā] tadvidhāḥ prāptāstvameṣāṃ kurvanugraham |
madīyāṃ tanumāviśya yenāhaṃ tvatsamo bhavan || 38 ||

karomyevamiti prokto harṣādutphullalocanaḥ |
tataḥ ṣaḍvidhamadhvānamanenādhiṣṭhitaṃ smaret || 39 ||

p. 62)

sṛṣṭyādipañcakarmāṇi niṣpādyānyasya [kh: niṣpādhānānīti] cintayet 
|
śaktibhirjīvamūrtiḥ syāddvidhaivāsya parāparā || 40 ||

mūrtāmūrtatvabhedena [k: mūrtyamūrtatvabhedena mamāpyeṣā] 
māmapyeṣānutiṣṭhati |
karaṇatvaṃ prayāntyasya mantrā ye hṛdayādayaḥ || 41 ||

evaṃbhūtaṃ śivaṃ dhyātvā tadgatenāntarātmanā |
bhāvyaṃ tanmayamātmānaṃ daśadhāvartayecchivam || 42 ||

triḥkṛtvā sarvamantrāṃśca garbhāvaraṇasaṃsthitān |
sitoṣṇīṣaṃ tato baddhvā saptajaptaṃ navātmanā || 43 ||

śivahastaṃ tataḥ kuryātpāśaviśleṣakārakam |
prakṣālya gandhatoyena hastaṃ hastena kenacit || 44 ||

gandhadigdho yajeddevaṃ sāṅgamāsanavarjitam |
ātmanyālambhanaṃ kuryādgrahaṇaṃ yojanaṃ tathā || 45 ||

viyogaṃ ca tahoddhāraṃ pāśacchedādikaṃ ca yat |
evaṃ patitvamāsādya prapañcavyāptitaḥ śivam || 46 ||

bhāvayetpṛthagātmānaṃ tatsamānaguṇaṃ tataḥ |
maṇḍalastho'hamevāyaṃ sākṣīvākhilakarmasu || 47 ||

p. 63)

homādhikaraṇatvena vahnāvahamavasthitaḥ |
āyāgāntamahaṃ kumbhe saṃsthito vighnaśāntaye || 48 ||

śiṣyadehe ca tatpāśaviśleṣatvaprasiddhaye |
sākṣātsvadehasaṃstho'haṃ kartānugrahakarmaṇaḥ || 49 ||

ityetat sarvamālocya śodhyādhvānaṃ [g: śodhyātmānamiti] vicintayet |
dīkṣāṃ yenādhvanā mantrī śiṣyāṇāṃ kartumicchati || 50 ||

tatraivālocayetsarvaṃ yāyātpadamanāmayam |
tatra tenāpṛthagbhūtvā punaḥ saṃcintayedidam || 51 ||

ahameva paraṃ tattvaṃ mayi sarvamidaṃ jagat |
adhiṣṭhātā ca kartā ca sarvasyāhamavasthitaḥ || 52 ||

tatsamatvaṃ gato janturmukta ityabhidhīyate |
evaṃ saṃcintya bhūyo'pi śodhyamādyaṃ samāśrayet || 53 ||

śiṣyamaṇḍalavahnīnāṃ tatraikaṃ bhāvayetsthitam |
śodhyādhvānaṃ tu śiṣyāṇāṃ nyasya dehe puroktavat || 54 ||

svena svenaiva mantreṇa svavyāptidhyānamāśrayet |
āgantu sahajaṃ śāktaṃ baddhvādau pāśapañjaram || 55 ||

p. 64)

bāhukaṇṭhaśikhāgreṣu triṣu (vṛt) triguṇatantunā |
svamantreṇa tatastattvamāvāhyeṣṭvā [k: āvāhyādhvā pratarpyeti] 
pratarpya ca || 56 ||

tatastacchodhyayonīnāṃ vyāpinīṃ yonimānayet |
māyānte'dhvani tāmeva śuddhe vidyāṃ vicakṣaṇaḥ || 57 ||

tasyāṃ saṃtarpaṇaṃ kṛtvā śiṣyamastreṇa tāḍayet |
ālabhya hṛdaye vidvāñchivahastena taṃ punaḥ || 58 ||

grahaṇaṃ tasya kurvīta raśmimātrāviyogataḥ |
nāḍīmārgeṇa gatvā tu haṃhṛnmantrapuṭīkṛtam || 59 ||

kṛtvātmasthaṃ tato yonau garbhādhānaṃ vicintayet |
tryarṇārdhākṣarayā [k: tryarṇādhīrdhākṣarāmiti kriyānvitāmiti ca] 
mantrī sarvagarbhakriyānvitam || 60 ||

bhogyabhoktṛtvasāmarthyaniṣpattyā jananaṃ budhaḥ |
dakṣaśṛṅgasthayā mantrī prakurvīta sulocane || 61 ||

pibanīpūrvikābhiśca astrādyaiḥ parayāpi ca |
samyagāhutayo dadyāddaśa pañca vicakṣaṇaḥ || 62 ||

tato'syāparayā kāryaṃ pāśavicchedanaṃ budhaiḥ |
bhuvaneśamathāmantrya tattveśvaramathāpi vā || 63 ||

p. 65)

bhogabhāgā * * * * paścāttamidamādiśet |
bhuvaneśa tvayā nāsya sādhakasya śivājñayā || 64 ||

pratibandhaḥ prakartavyo yātuḥ padamanāmayam |
utkṣepaṇaṃ tataḥ kuryāttayaivādhyuṣṭavarṇayā || 65 ||

avyāptimantrasaṃyogātpṛthaṅ mārgaviśuddhaye |
dadyādekaikaśo dhyātvā āhutīnāṃ trayaṃ trayam || 66 ||

tataḥ pūrṇāhutiṃ dadyātparayā vauṣaḍantayā |
śiśumutkṣipya cātmasthaṃ taddehasthaṃ ca kārayet || 67 ||

āhutīnāṃ trayaṃ dadyāddattvā pūrṇāhutiṃ budhaḥ |
mahāpāśupatāstreṇa vilomādiviśuddhaye || 68 ||

visarjayitvā vāgīśīṃ tattvaṃ tu tadanantaram |
vilīnaṃ bhāvayecchuddhamaśuddhe parameśvari || 69 ||

kālāntavyāptisaṃśuddhau kṛtāyāmevamādarāt |
bāhupāśaṃ [g: bahupāśamiti] tu taṃ chittvā homayedājyasaṃyutam || 
70 ||

māyātattve viśuddhe tu kaṇṭhapāśe tathā budhaḥ |
māyāntamārgasaṃśuddhau dīkṣākarmaṇi sarvataḥ || 71 ||

p. 66)

kriyāsvanuktamantrāsu yojayedaparāṃ budhaḥ |
vidyādisakalānte ca tadvadeva parānparām || 72 ||

yojayennaiśvarādūrdhvaṃ [k: yojayeccaiśvarāditi] 
pibanyādikamaṣṭakam
[k: aṣṭadheti] |
na cāpi sakalādūrdhvamaṅgaṣaṭkaṃ vicakṣaṇaḥ || 73 ||

niṣkale parayā kāryaṃ yatkiṃcidvidhicoditam |
viśuddhe sakalānte tu śikhāṃ chittvā vicakṣaṇaḥ || 74 ||

hutvā cājyaṃ tataḥ śiṣyaṃ snāpayedanupūrvataḥ |
ācamyābhyarcya deveśaṃ sruvamāpūrya sarpiṣā || 75 ||

kṛtvā śiṣyaṃ tathātmasthaṃ mūlamantramanusmaret |
śivaśaktiṃ tathātmānaṃ śiṣyaṃ sarpistathānalam || 76 ||

ekīkurvañchanairgaccheddvādaśāntamananyadhīḥ |
tatra kumbhakamāsthāya dhyāyansakalaniṣkalam || 77 ||

tiṣṭhettāvadanudvigno yāvadājyakṣayo bhavet |
evaṃ yuktaḥ pare tattve guruṇā śivamūrtinā || 78 ||

na bhūyaḥ paśutāmeti dagdhamāyānibandhanaḥ |
vidhireṣa samākhyāto dīkṣākarmaṇi bhauvane || 78 ||

p. 67)

itarādhvavidhiṃ muktvā śivayogavidhiṃ tathā |
vilomakarma saṃtyajya dviguṇastattvavartmani || 80 ||

tadvacca varṇamārge'pi caturdhā padavartmani |
aṣṭadhā mantramārge'pi kalākhye'pi ca taddvidhā || 81 ||

trikhaṇḍe viṃśatiguṇaḥ sa eva parikīrtitaḥ |
iti sarvādhvasaṃśuddhiḥ samāsātparikīrtitā || 82 ||

sādhakācāryayoḥ karma kathyamānamataḥ śṛṇu |

iti śrīmālinīvijayottare tantre kriyādīkṣādhikāro navamo'dhikāraḥ || 9 ||



atha 

daśamo'dhikāraḥ

atha lakṣaṇasaṃpannaṃ siddhisādhanatatparam |
śāstrajñaṃ saṃyataṃ dhīramalubdhamaśaṭhaṃ dṛḍham || 1 ||

aparīkṣya gurustadvatsādhakatve niyojayet |
samabhyarcya vidhānena pūrvavatparameśvaram || 2 ||

dvitīye pūrvavatkumbhaṃ hemādimayamavraṇam |
sarvatra madhyapadmasya dakṣiṇaṃ dalamāśritam || 3 ||

nāyakānāṃ pṛthaṅmantrānpūjayetkusumādibhiḥ |
taṃ saṃtarpya sahasreṇa prakuryādabhiṣecanam || 4 ||

bhadrapīṭhe śubhe sthāpya śrīparṇe dārunīrmite |
pūrvāmukhamudagvaktraṃ snātaṃ puṣpādyalaṅkṛtam || 5 ||

kṛtamantratanuḥ samyak samyak kṛtamaṅgalaḥ |
śaṅkhabheryādinirghorṣairvedamaṅgalanisvanaiḥ || 6 ||

sarvarājopacāreṇa kṛtvā tasyābhiṣecanam |
sadāśivasamaṃ dhyātvā tatastamapi bhūṣayet || 7 ||

punaḥ saṃpūjya deveśaṃ mantramasmai dadedbudhaḥ |
puṣpākṣatatilopetaḥ sajala * * śvaraṃ nyaset || 8 ||

p. 69)

so'pi mūrdhani taṃ tadvanmūrtimāśritya dakṣiṇām |
abhiṣicya tato'streṇa rudraśaktiṃ prakāśayet || 9 ||

sa tayāliṅgya tanmantraṃ sahasreṇa pratarpayet |
tadā prabhṛti tanniṣṭhastatsamānaguṇo bhavet || 10 ||

ācāryasyābhiṣeko'yaṃ sa * mantravidhiṃ vinā |
kiṃtu tasya * * * * adhivāsapadānvitam || 11 ||

evametatpadaṃ prāpyaṃ duṣprāpyamakṛtātmanām |
sādhako mantrasiddhyarthaṃ mantravratamupācaret || 12 ||

evaṃ kṛtvābhiṣekoktaṃ snātvā vidyādhipaṃ japet |
lakṣamekaṃ da(śāṃśena ta)sya tarpaṇamācaret || 13 ||

pūrvavaccābhiṣekaṃ ca kṛtvā brahmaśiro japet |
tallakṣyastanmayo bhūtvā lakṣadvayamatandritaḥ || 14 ||

lakṣadvayaṃ ca rudrāṇīṃ catuṣkaṃ tu puruṣṭutam |
lakṣāṇāṃ pañcakaṃ devi mahāpāśupataṃ japet || 15 ||

sitaraktapītakṛṣṇavicitrāmbarabhūṣaṇaḥ |
tataḥ saṃrakṣito mantrairebhirapratimo bhavet || 16 ||

abādhyaḥ sarvaduṣṭānāṃ mantratejopabṛṃhitaḥ |
evaṃ cīrṇavrato bhūtvā yaṃ sādhayitumicchati || 17 ||

p. 70)

dattvārghaṃ tasya lakṣāṇāṃ japennavakamādarāt |
uttamadravyahomācca taddaśāṃśena tarpaṇam || 18 ||

mahākṣmāpapalānyāhuruttamādīni tadvidaḥ |
madhyame dviguṇaṃ kṛtvā triguṇaṃ kanyase'pi ca || 19 ||

ājyaguggulanṛsnehā mahāmāṃsasamāḥ matāḥ |
dadhibilvapayaḥ padmāḥ kṣmāsamāḥ parikīrtitāḥ || 20 ||

dhātrīdūrvāmṛtāmīnāḥ samyagājyasamā matāḥ |
tilādyairatha kurvīta navaṣaṭtriguṇaṃ kramāt || 21 ||

pūrvamevamimaṃ [g: pūrvasevāmimāmiti] kṛtvā siddherarghaṃ 
dadedbudhaḥ |
dattvārghaṃ tu japettāvadyāvatsiddhirabhīpsitā || 22 ||

lakṣeṇaikena pṛthvīśaḥ sabhṛtyabalavāhanaḥ |
vaśamānīyate devi dvābhyāṃ rājyamavāpnuyāt || 23 ||

tribhirnidhānasaṃsiddhiścaturbhirbalasiddhayaḥ |
pañcabhirmedinī sarvā ṣaḍbhirapsarasāṃ gaṇaḥ || 24 ||

saptabhiḥ saptalokāśca daśabhistatsamo bhavet |
pañcāśadbhistato gacchedavyaktāntaṃ maheśvari || 25 ||

p. 71)

māyāntaṃ ṣaṣṭibhirlakṣairīśvarāntamaśītibhiḥ |
sakalāvaniparyantaṃ koṭijaptasya siddhyati || 26 ||

athavā vīracittaḥ syātkṛtvā sevāṃ yathoditām |
kṛṣṇabhūtadine rātrau vidhimenaṃ samācaret || 27 ||

kṛtvā pūrvoditaṃ yāgaṃ hutvā dravyamathottaram |
ūrdhvakāyo japenmantrī suniṣkampottarāmukhaḥ || 28 ||

tāvadyāvatsamāyātā [k: samākhyātā] yogeśvaryaḥ samantataḥ |
kṛtvā kalakalārāvamatighoraṃ sudāruṇam || 29 ||

bhūmau nipatya tiṣṭhanti veṣṭyāntaḥ sādhakeśvaram |
tāsāṃ kṛtvā namaskāraṃ bhittvā vāmāṅgamātmanaḥ || 30 ||

tadutthena tatastāsāṃ dattvārghaṃ tatsamo bhavet |
ācāryo'pi ca ṣaṇmāsaṃ maunī pratidinaṃ caret [g: pratidinaṃ japediti] || 31 
||

daśa pañca ca ye mantrāḥ pūrvamuktā mayā tava |
pūrvanyāsena saṃnaddhastrikālaṃ vahnikāryakṛt || 32 ||

dhyāyetpūrvoditaṃ śūlaṃ brahmacaryaṃ samāśritaḥ |
kṛtvā pūrvoditaṃ yāgaṃ triśaktiparimaṇḍalam || 33 ||

p. 72)

abhiṣiñcettadātmānamādāvante ca daiśikaḥ |
evaṃ cīrṇavrato bhūtvā mantrī mantraviduttamaḥ || 34 ||

nigrahānugrahaṃ karma kurvanna pratihanyate [k: pratipaśyatīti] |
śuddhayorvinyasenmūlamadhyāditritaye trayam || 35 ||

vāmāṅguṣṭhe tale netraṃ tarjanyāmastrameva ca |
akṣahrīmiti [kh: namo hrīmiti]  khaṇḍena śabdarāśiṃ niveśayet || 36 ||

naphahrīmityanenāpi śaktimūrtiṃ vicakṣaṇaḥ |
viparītamahāmudrāprayogān * * mūlameva ca || 37 ||

svasthāneṣu tathāṅgāni nyāsaḥ sāmānya ityayam |

iti śrīmālinīvijayottare tantre'bhiṣekādhikāro daśamaḥ || 10 ||



atha

ekādaśo'dhikāraḥ

athātaḥ saṃpravakṣyāmi dīkṣāṃ paramadurlabhām |
bhuktimuktikarīṃ samyaksadyaḥ pratyayakārikām || 1 ||

nāsyāṃ maṇḍalakuṇḍādi kiṃcidapyupayujyate |
na ca nyāsādikaṃ pūrvaṃ snānādi ca yathecchayā || 2 ||

praviśya yāgasadanaṃ sūpaliptaṃ sucarcitam |
prāṅmukhodaṅmukho vāpi supuṣpāmbarabhūṣitaḥ || 3 ||

dīptāṃ śaktimanusmṛtya pādāgrānmastakāvadhi |
mahāmudrāprayogena nirdagdhāṃ cintayettanum || 4 ||

anulomaprayogācca mālinīmamṛtaprabhām |
cintayettanuniṣpattyai taddhyānagatamānasaḥ || 5 ||

śodhyādhvānaṃ tato dehe pūrvoktamanucintayet |
tataḥ saṃśodhya vastūni śaktyaivāmṛtatāṃ nayet || 6 ||

parāsaṃpuṭamadhyasthāṃ mālinīṃ sarvakarmasu |
yojayeta vidhānajñaḥ parāṃ vā kevalāṃpriye || 7 ||

gaṇeśaṃ pūjayitvā tu purā vighnapraśāntaye |
tataḥ svagurumārabhya pūjayedgurupaddhatim || 8 ||

p. 74)

gaṇeśādhastataḥ sarvaṃ yajenmantrakadambakam |
tatpatīnāṃ tato'rdhaṃ ca tatraiva paripūjayet || 9 ||

antyādhaḥ pūjayedvidyāṃ tadvadvidyāṃ maheśvarīm |
mantravidyāgaṇasyāntaḥ kulaśaktiṃ niveśayet || 10 ||

pūrvayāmyāparodakṣu māheśyādicatuṣṭayam |
indrāṇīpūrvakaṃ tadvadaiśādidala antagam || 11 ||

tatropari nyaseddevaṃ kūṭarūpāṇunāmunā |
jīvaṃ daṇḍasamākrāntaṃ śūlasyopari saṃsthitam || 12 ||

dakṣāṅguli tato'dhastāttato vāmapayodharam |
nābhikaṇṭhau tato'dhastādvāmaskandhavibhūṣaṇau || 13 ||

śivajihvānvitaḥ paścāttadūrdhvoṣṭhena copari |
sarvayoginīcakrāṇāmadhipo'yamudāhṛtaḥ || 14 ||

asyāpyuccāraṇādeva saṃvittiḥ syātparoditā |
tato vīrāṣṭakaṃ paścācchaktyuktavidhinā [k: śaktyākteti] yajet || 15 ||

prabhūtairvividhairiṣṭvā gandhadhūpaiḥ sragādibhiḥ |
śrīkārapūrvakaṃ nāma pādāntaṃ parikalpayet || 16 ||

tataḥ śiṣyaṃ samāhūya bahudhā suparīkṣitam |
rudraśaktyā tu saṃprokṣya devāgre viniveśayet || 17 ||

p. 75)

bhūjau tasya samālokya rudraśaktyā pradīpayet |
tathaivāpyarpayetpuṣpaṃ karayorgandhadigdhayoḥ || 18 ||

nirālambau tu tau dhyātvā śaktyākṛṣṭau vicintayet |
śaktimantritanetreṇa baddhvā netre tu pūrvavat || 19 ||

tataḥ prakṣepayetpuṣpaṃ sā śaktistatkarasthitā |
yatra [k: tatra tatpataneti] tatpatate puṣpaṃ tatkulaṃ tasya lakṣayet || 20 ||

mukhamudghāṭya taṃ paścātpādayoḥ [k: mukhaṃ baddhā yutaṃ 
paścāditi] pratipātayet |
tato'sya mastake cakraṃ hastayoścārcya yogavit || 21 ||

taddhastau prerayecchaktyā yāvanmūrdhāntamāgatau |
śivahastavidhiḥ proktaḥ sadyaḥ pratyayakārakaḥ || 22 ||

carukaṃ dāpayetpaścāt kharjūrādiphalodbhavam |
śaktyālambāṃ tanuṃ kṛtvā sthāpayedagrataḥ śiśoḥ || 23 ||

puṣpakṣepaprayogena hastamākṛsya dakṣiṇam |
carukaṃ grāhayenmantrī taddhyānagatamānasaḥ || 24 ||

śivahastaprayogena samāropya mukhaṃ nayet |
anenaiva vidhānena kṣīravṛkṣasamudbhavam || 25 ||

p. 76)

dantakāṣṭhaṃ dadeddevi ṣoḍaśāṅgulamāyatam |
eteṣāṃ cālanānmantrī śaktipātaṃ parīkṣayet || 26 ||

mandatīvrādibhedena mandatīvrādikādbudhaḥ |
ityayaṃ samayī proktaḥ saṃsthitoktena vartmanā || 27 ||

cikīrṣuśca yadā dīkṣāmasyaivārpitamānasaḥ |
tadiṣṭvā pūrvavadyogī kuleśaṃ tamanukramāt [k: 
sukulīnamanukramāditi] || 28 ||

saṃpūjya pūrvavacchiṣyamṛjudehe vilokayet |
śaktiṃ saṃcintya pādāgrānmastakāntaṃ vicakṣaṇaḥ || 29 ||

śodhyādhvānaṃ tato nyasya sarvādhvavyāptibhāvatām |
śaktitattvādibhedena pūrvoktena ca vartmanā || 30 ||

upaviśya tatastasya vidhānamidamācaret |
mūlaśodhyātsamārabhya śaktiṃ dīptānalaprabhām || 31 ||

yojayecchodhyasaṃśuddhibhāvanāgatamānasaḥ |
evaṃ sarvāṇi śodhyāni nirdahantīmanāmayām || 32 ||

śive saṃcintayellīnāṃ niṣkale sakale'pi vā |
yoginā yojitā mārge svajātīyasya poṣaṇam || 33 ||

p. 77)

kurute nirdahatyanyadbhinnajātikadambakam |
anayā śodhyamānasya śiṣyasyāsya mahāmatiḥ || 34 ||

lakṣayeccihnasaṃghātamānandādikamādarāt |
ānanda udbhavaḥ kampo nidrā ghūrṇiśca pañcamī [k: dhūrṇiśca 
pañcakamiti] || 35 ||

evamāviṣṭyā śaktyā mandatīvrādibhedataḥ |
pāśastobhapaśugrāhau prakurvīta yathecchayā || 36 ||

gṛhītasya punaḥ kuryānniyogaṃ śeṣabhuktaye |
athavā kasyacinnāyamāveśaḥ [k: kaṃsyacidvāyamiti] saṃprajāyate || 37 ||

tadenaṃ yugapacchaktyā sabāhyābhyantare [g: bhyantaraṃ dahoditi] dahet |
tayā saṃdahyamāno'sau cchinnamūla iva drumaḥ || 38 ||

patate kāśyapīpṛṣṭhe ākṣepaṃ vā karotyasau |
yasya tvevamapi syānna taṃ caivopalavattyajet || 39 ||

pṛthaktattvavidhau dīkṣāṃ yogyatāvaśyavartinaḥ |
tattvābhyāsavidhānena vakṣyamāṇena kārayet || 40 ||

iti saṃdīkṣitasyāsya mumukṣoḥ śeṣavartanam |
kulakrameṣṭirādeśyā pañcāvasthāsamanvitā || 41 ||

p. 78)

buhukṣostu prakurvīta samyagyogābhiṣecanam |
tatreṣṭvā pūrvavaddehaṃ vistīrṇairvibudhairbudhaiḥ (?) || 42 ||

hemādidīpakānaṣṭau ghṛtenāruṇavartikān |
kulāṣṭakena saṃbodhya śivaṃ śaṅkhe prapūjayet || 43 ||

sarvaratnauṣadhīgarbhe gandhāmbuparipūrite |
tenābhiṣecayettaṃ tu śivahastoktavartmanā || 44 ||

ācāryasyābhiṣeko'yamadhikārapadānvitaḥ |
kuryātpiṇḍādibhistadvaccatuḥṣaṣṭiṃ pradīpakān || 45 ||

abhiṣiktavidhāveva sarvayogigaṇena tu |
viditau bhavatastatra gururmokṣaprado bhavet || 46 ||

anayoḥ kathayejjñānaṃ [k: kathayorjñānamiti] trividhaṃ sarvamapyalam |
svakīyājñāṃ dadedyogī svakriyākaraṇaṃ prati || 47 ||

iti śrīmālinīvijayottare tantre dīkṣādhikāra ekādaśaḥ || 11 ||



atha

dvādaśo'dhikāraḥ |

athaitāṃ devadeasya śrutvā vācamatisphuṭām |
praharṣotphullanayanā jagadānandakāriṇī || 1 ||

saṃtoṣāmṛtasaṃtṛptā devī devagaṇārcitā |
praṇamyāndhakahantāraṃ punarāheti bhāratīm || 2 ||

pūrvameva tvayā proktaṃ yogī yogaṃ samabhyaset |
tasyābhyāsaḥ kathaṃ kāryaḥ kathyatāṃ tripurāntaka || 3 ||

evamukto jagaddhātryā bhairavo bhayanāśanaḥ |
prāha prasannagambhīrāṃ girametāmudāradhīḥ || 4 ||

yogābhyāsavidhiṃ devi kathyamānaṃ mayā śṛṇu |
sthirībhūtena yeneha yogī siddhimavāpsyati || 5 ||

guhāyāṃ bhūgṛhe vāpi niḥśabde sumanorame |
sarvābādhāvinirmukte yogī yogaṃ samabhyaset || 6 ||

jitāsano jitamanā jitaprāṇo jitendriyaḥ |
jitamidro jitakrodho jitodvego gatavyathaḥ || 7 ||

p. 80)

lakṣyabhedena vā sarvamathavā cittabhedataḥ |
dharādiśaktiparyantaṃ yogīśastu prasādhayet [kh: muktvā samādadhe] || 8 
||

vyomavigrahavindvarṇabhuvanadhvanibhedataḥ |
lakṣyabhedaḥ [k: lakṣabhedo mata] smṛtaḥ ṣoḍhā yathāvadupadiśyate || 
9 ||

bāhyābhyantarabhedena samuccayakṛtena ca |
trividhaṃ kīrtitaṃ vyoma daśadhā vinduriṣyate || 10 ||

kadambagolakākāraḥ sphurattārakasaṃnibhaḥ [k: tārakasaprabha] |
śuklādibhedabhedena eko'pi daśadhā mataḥ || 11 ||

ciñcinīcīravākādiprabhedāddaśadhā dhvaniḥ |
vigrahaḥ svāṇubhedācca dvidhā bhinnopyanekadhā || 12 ||

bhuvanānāṃ na saṃkhyāsti varṇānāṃ sā śatārdhikā |
ekasminnapi sādhye vai lakṣedatrānuṣaṅgataḥ || 13 ||

anyānyapi phalāni syurlakṣyabhedaḥ sa ucyate |
ekameva phalaṃ yatra cittabhedastvasau mataḥ || 14 ||

homadīkṣāviśuddhātmā samāveśopadeśavān [k: 
samādeśopadeśavāniti] |
yaṃ siṣādhayiṣuryogamādāveva samācaret || 15 ||

p. 81)

hastayostu parābījaṃ nyasya śaktimanusmaret |
mahāmudrāprayogena viparītavidhau budhaḥ || 16 ||

jvaladvahnipratīkāśaṃ pādāgrānmastakāntikam |
namaskāraṃ tataḥ paścādbaddhā hṛdi dhṛtānilaḥ || 17 ||

svarūpeṇa parābījamatidīptamanusmaret |
tasya mātrātrayaṃ dhyāyetkakhatrayavinirgatam || 18 ||

tatastālaśatādyogī samāveśamavāpnuyāt |
brahmaghno'pi hi saptāhātprativāsaramabhyaset || 19 ||

evamāviṣṭadehastu yathoktaṃ vidhimācaret |
yaḥ punarguruṇaivādau kṛtāveśavidhikramaḥ [k: vidhikramāt] || 20 ||

sa vāsanānubhāvena bhūmikājayamārabhet |
gaṇanāthaṃ namaskṛtya saṃsmṛtya trigurukramam || 21 ||

samyagāviṣṭadehaḥ syāditi dhyāyedananyadhīḥ |
svadehaṃ hemasaṃkāśaṃ turyāśraṃ vajralāñchitam || 22 ||

tato gurutvamāyāti saptaviṃśatibhirdinaiḥ |
divasātsaptamādūrdhvaṃ jaḍatā cāsya jāyate || 23 ||

p. 82)

ṣaḍbhirmāsairjitavyādhirdrutahemanibho bhavet |
vajradehastribhiścābdairnavanāgaparākramaḥ || 24 ||

eṣā te pārthivī śuddhā dhāraṇā parikīrtitā |
ādyā pūrvodite devi bhede pañcadaśātmake || 25 ||

savyāpāraṃ smareddehaṃ durtahemasamaprabham |
upaviṣṭaṃ ca turyāśre maṇḍale vajrabhūṣite || 26 ||

saptāhādgurutāmeti māsādvyādhivivarjitaḥ |
ṣaḍbhirmāsairdharāntaḥsthaṃ sarvaṃ jānāti tattvataḥ || 27 ||

tribhirabdairmahīṃ bhuṅkte saptāmbhonidhimekhalām |
dvitīyaḥ kathito bhedastṛtīyamadhunā śṛṇu || 28 ||

tadvadeva smareddehaṃ kiṃtu vyāpāravarjitam |
pūrvoktaṃ phalamāpnoti tadvatpātālasaṃyutam || 29 ||

caturthe hṛdgataṃ dhyāyeddvādaśāṅgulamāyatam |
pūrvavarṇasvarūpeṇa savyāapāramatandritaḥ || 30 ||

prāpya pūrvoditaṃ sarvaṃ pātālādhipatirbhavet |
tadeva sthiramāpnoti nirvyāpāre tu pañcame || 31 ||

sphuratsūryanibhaṃ pītaṃ ṣaṣṭhe kṛṣṇaṃ ghanāvṛtam |
nistaraṅgaṃ smarettadvatsaptame'pi vicakṣaṇaḥ || 32 ||

dvaye'pyatra sthirībhūte bhurbhuvaḥsvariti trayam |
vetti bhuṅkte ca lokānāṃ puroktaireva vatsaraiḥ || 33 ||

p. 83)

sakalaṃ hṛdayāntasthamātmānaṃ kanakaprabham |
svaprabhādyotitāśeṣadehāntamanucintayet || 34 ||

savyāpārādibhedena saptalokīṃ tu pūrvavat |
vetti bhuṅkte sthirībhūte bhede'sminnavame budhaḥ || 35 ||

ravibimbanibhaṃ pītaṃ pūrvavaddvitayaṃ smaret |
brahmalokamavāpnoti pūrvoktenaiva vartmanā || 36 ||

adhaḥ prakāśitaṃ pītaṃ dvirūpaṃ pūrvavanmahat |
cintayenmatsamo bhūtvā mallokamanugacchati || 37 ||

sabāhyābhyantaraṃ pītaṃ tejaḥ sarvaprakāśakam |
cintayecchatarudrāṇāmadhipatvamavāpnuyāt || 38 ||

ityevaṃ pṛthivītattvamabhyasyaṃ daśapañcadhā |
yogibhiryogasiddhyarthaṃ tatphalānāṃ bubhukṣayā || 39 ||

yogyatāvaśasaṃjātā [k: vaśagā jāteti] yasya yatraiva vāsanā |
sa tatraiva niyoktatryo dīkṣākāle vicakṣaṇaiḥ || 40 ||

yo yatra yojitastattve sa tasmānna nivartate |
tatphalaṃ sarvamāsādya śivayukto'pavṛjyate || 41 ||

ayukto'pyūrdhvasaṃśuddhisaṃprāptabhuvaneśataḥ |
śuddhācchivatvamāyāti dagdhasaṃsārabandhanaḥ || 42 ||


iti śrīmālinīvijayottare tantre prathamadhāraṇādhikāro dvādaśaḥ || 12 ||



atha

trayodaśo'dhikāraḥ |

athātaḥ saṃpravakṣyāmi dhāraṇāṃ vāruṇīmimām |
yayā saṃsiddhayogena jalāntādhipatirbhavet || 1 ||

jalāntaḥsthaṃ [jalātmakaṃ smarediti pāṭhaḥ svacchande pramāṇitaḥ |] 
smareddehaṃ sitaṃ śītaṃ suartulam |
sabāhyābhyantaraṃ yogī nānyadastīti cintayet || 2 ||

evamabhyasyatastasya saptāhātklinnatā bhavet |
pittavyādhiparityakto māsena bhavati dhruvam || 3 ||

snigdhāṅgaḥ snigdhadṛṣṭiśca nīlakuñcitamūrdhajaḥ |
bhavatyabdena yogīndrastribhirvarṣati meghavat || 4 ||

ityeṣā vāruṇī proktā prathamā śuddhadhāraṇā |
adhunā saṃpravakṣyāmi bhedairbhinnāmimāṃ punaḥ || 5 ||

pūrvavaccintayeddehaṃ savyāpāraṃ sitaṃ svakam |
jalopari sthitaṃ devi tadgatenāntarātmanā || 6 ||

saptāhānmucyate rogaiḥ sarvaiḥ pittasamudbhavaiḥ |
ṣaṇmāsājjāyate sthairyaṃ yadi tanmayatāṃ gataḥ || 7 ||

p. 85)

jalāvaraṇavijñānamabdairasya tribhirbhavet |
nirvyāpāraprabhede'pi sarvatra varuṇopamaḥ || 8 ||

sa yāti vāruṇaṃ tattvaṃ bhūmikāṃ kramaśo'bhyaset |
pūrvavatkaṇṭhamadhyasthamātmānaṃ dvādaśāṅgulam || 9 ||

saṃsmarañjalatattveśaṃ prapaśyatyacirāddhruvam |
taddṛṣṭiḥ sthiratāmeti svarūpe pañcame sthire || 10 ||

dvibhede'pi stharībhūte candrabimbe ghanāvṛte |
tatsamānatvamabhyeti tataḥ sakalarūpiṇī || 11 ||

cintyate dehamāpūrya sitavarṇena tejasā |
tadeva sthiratāmeti tatra susthiratāṃ gate || 12 ||

ghanamuktendubimbābhastataḥ samanucintyet |
tatpatitvaṃ samabhyeti dvitīyaṃ sthiratāṃ vrajet || 13 ||

ataḥ prakāśakaṃ śuklaṃ tatastejo vicintayet |
vidyeśvaratvamāpnoti jalāvaraṇasaṃbhavam || 14 ||

svadehavyāpini dhyāte tatrasthe śuklatejasi |
sarvādhipatyamāpnoti susthire tatra susthiram || 15 ||

dhyeyatattvasamānatvamavasthātritaye sthire |
dvitīye ca tadīśānasaṃvittirūpajāyate || 16 ||

dvitīye'nyatra tattūlyaḥ sthiro bhavati yogavit |
ṣaṭke sarveśatāmeti dvitīye'nyatra tu cyutiḥ || 17 ||

p. 86)

ityayaṃ sarvatattveṣu bhede pañcadaśātmake |
jñeyo vidhirvidhānajñaiḥ phalapañcakasiddhidaḥ || 18 ||

tatphalāntarametasmāduktaṃ yaccāpi vakṣyate |
anuṣaṅgaphalaṃ jñeyaṃ tatsarvamavicārataḥ || 19 ||

ityevaṃ vāruṇī proktā prabhedairdaśapañcabhiḥ |
yogināṃ yogasiddhyarthamāgneyīmadhunā śṛṇu || 20 ||

trikoṇaṃ cintayeddehaṃ raktajvālāvalīdharam |
saptabhirdivasairdevi taikṣṇyamasyopajāyate || 21 ||

vātaśleṣmabhavaiḥ sarvairmāsānmucyati sādhakaḥ |
nidrāhīnaśca bahvāśī svalpaviṇmūtrakṛdbhavet || 22 ||

icchayā nirdahatyanyatspaṣṭavastu ṛtukṣayāt |
tryabdādagnisamo bhūtvā krīḍatyagniryathecchayā || 23 ||

sarvaṃ nirdahati kruddhaṃ saśailavanakānanam |
trikoṇamaṇḍalārūḍhamātmānamanucintayet || 24 ||

savyāpārādibhedena sarvatrāpi vicakṣaṇaḥ |
saptāhādvyādhibhirhīnaḥ ṣaṇmāvadagnisādbhavet [g: agnivadbhavediti] || 
25 ||

tribhirabdaiḥ sa saṃpūrṇaṃ tejastattvaṃ prapaśyati |
yacchaktibhede yaddṛṣṭaṃ tattadbhede sthirībhavet || 26 ||

p. 87)

pūrvavattālumadhyasthamātmānaṃ jvalanaprabham |
dhyāyanprapaśyate tejastattveśānakhilānkramāt || 27 ||

dhūmākrāntāgnisaṃkāśaṃ ravibimbasamākṛtim |
dhyāyaṃstanmadhyatastejastattveśasamatāṃ vrajet || 28 ||

prabhāhatatamojālaṃ vidhūmāgnisamaprabham |
tatraiva sakalaṃ dhyāyettatpatitvamavāpnuyāt || 29 ||

divasāgniprabhākāraṃ tatra tejo vicintayet |
tanmantreśvaratāmeti [g: tanmantrasamatāmiti] tatra susthiratāṃ gate || 30 ||

maṇipradīpasaṃkāśaṃ tejastatra prakāśayet |
mantreśeśatvamabhyeti yogī tanmayatāṃ gataḥ || 31 ||

sabāhyābhyantaraṃ tejo dhyāyansarvatra tadgatam |
tasmānna cyavate sthānādāsaṃhāramakhaṇḍitaḥ || 32 ||

saṃhāre tu paraṃ śāntaṃ padamabhyeti śāṅkaram |
ityeṣā pañcadaśadhā kathitā vahnidhāraṇā || 33 ||

svadehaṃ cintayetkṛṣṇaṃ vṛttaṃ ṣaṭbindulāñchitam 
[k: vṛttaṣaṭpañcalāñchanamiti] |
calaṃ sacūcūśabdaṃ ca vāyavīṃ dhāraṇāṃ śritaḥ || 34 ||

calatvaṃ kaphajavyādhivicchedādvāyuvadbhavet |
ṣaṇmāsamabhyasedyogī [g: abhyasanyogīti] tadgatenāntarātmanā || 35 ||

p. 88)

yojanānāṃ śataṃ gatvā muhūrtādetyakhedataḥ [k: muhūrtādeva 
khedata] |
vatsaraistu tribhiḥ sākṣādvāyurūpadharo bhavet || 36 ||

cūrṇayatyadrisaṃghātaṃ [k: cūrṇayanpatrasaṃghātamiti] 
vṛkṣānunmulayatyapi |
kruddhaścānayate [k: kruddhaśca jayati śatrumiti] śakraṃ 
sabhṛtyabalavāhanam || 37 ||

nīlāñjananibhaṃ dehamātmīyamanucintayet |
pūrvoktaṃ sarvamāpnoti ṣaṇmāsānnātra saṃśayaḥ || 38 ||

tryabdātprapaśyate vāyutattvaṃ tanmayatāṃ gataḥ |
bhrūvormadhye smaredrūpamātmano'ñjanasaṃnibham || 39 ||

paśyate vāyutattveśānāśugānakhilānapi |
ghanāvṛtendranīlābho ravibimbasamākṛtim || 40 ||

dhyāyaṃstatsamatāmeti tatsaṃlīno yadā bhavet |
bhinnendranīlasaṃkāśaṃ sakalaṃ tatra cintayet || 41 ||

tanmantreśatvamāpnoti tatastasyeśatāmapi |
sarvavyāpini tadvarṇe dhyāte tejasyavāpnuyāt || 42 ||

tadāpradhṛṣyatāmeti tatrordhvādhovisarpiṇi |
ityevaṃ kathitā divyā dhāraṇā vāyusaṃbhavā || 43 ||

svadehaṃ vāyuvaddhyātvā tadabhāvamanusmaran |
divasaiḥ saptabhiryogī śūnyatāṃ pratipadyate || 44 ||

p. 89)

māsaṃmātreṇa bhogīndrairapi daṣṭo na muhyati |
sarvavyādhiparityakto valīpalitavarjitaḥ || 45 ||

ṣaṇmāsādgaganākāraḥ sūkṣmarandhrairapi vrajet |
vatsaratritayātsārdhādvyomavacca [vyoma eveti svacchandatantre 
pramāṇitaḥ] bhaviṣyati || 46 ||

icchayaiva mahākāyaḥ sūkṣmadehastathecchayā |
acchedyaścāpyabhedyaśca cchidrāṃ paśyati medinīm || 47 ||

śatapuṣparasocchiṣṭamūṣāgarbhakhavannijam |
dehaṃ cintayatastryabdādvyomajñānaṃ prajāyate || 48 ||

pūrvoktaṃ ca phalaṃ sarvaṃ saptāhādikamāpnuyāt |
lalāṭe cintayettadvaddvādaśāṅgulamāyatam || 49 ||

tattattveśānkramātsarvānprapaśyatyagrataḥ sthitān |
rāhugrastendubimbābhaṃ dhyāyaṃstatsamatāṃ vrajet || 50 ||

sakalaṃ candrabimbābhaṃ tatrasthamanucintayet |
tanmantreśatvamāpnoti jyotsnayā candratāmapi || 51 ||

tayaivādhovisarpiṇyā sabāhyābhyantaraṃ budhaḥ |
mantreśvareśatāmāpya vijñānamatulaṃ labhet || 52 ||

tayā cordhvavisarpiṇyā jyotsnayāmṛtarūpayā |
svatantratvamanuprāpya na kvacitpratihanyate || 53 ||

p. 90)

ityevaṃ pañcatattvānāṃ dhāraṇā parikīrtitā |
śuddhādhvasthā tu saṃvittirbhūtāveśo'tra pañcadhā || 54 ||

tāsveva saṃdadhaccittaṃ viṣādikṣayamātmanaḥ |
anyasyāmapi saṃvittau yasyāmeva nijecchayā || 55 ||

cetaḥ samyaksthirīkuryāttayā tatphalamaśnute |
ekāpi bhāvyamāneyamavāntaravibhedataḥ || 56 ||

antarāyatvamabhyeti tatra kuryānna saṃsthitim |
saṃsthitiṃ tatra kurvanto na prāpsyantyuttamaṃ phalam || 57 ||

dhāraṇāpañcake siddhe piśācānāṃ guṇāṣṭakam |
aindrāntāḥ pañca siddhyanti yogināṃ bhedato'pivā || 58 ||

iṣṭāḥ pañcadaśāvasthāḥ krameṇaiva samabhyasan |
tryabdādādyāṃ prasādhyānyāṃ dvābhyāmekena cāparām || 59 ||

ṣaṇmāsātpañcabhiścānyāṃ caturbhistribhireva ca |
dvābhyāmekena pakṣeṇa daśabhiḥ pañcabhirdinaiḥ || 60 ||

tribhirdvābhyāmathaikena vyastecchoḥ pūrvavatkramaḥ |
śāśvataṃ padamāpnoti bhuktvā siddhiṃ yathepsitām || 61 ||

iti śrīmālinīvijayottare tantre bhūtajayādhikārastrayodaśaḥ || 13 ||



atha

caturdaśo'dhikāraḥ |

atha gandhādipūrvāṇāṃ tanmātrāṇāmanukramāt |
dhāraṇāḥ saṃpravakṣyāmi tatphalānāṃ prasiddhaye || 1 ||

pītakaṃ gandhatanmātraṃ turyāśraṃ parvasaṃmitam [svaccha0 
pañcasaṃmitamiti] |
nāsārandhrāgragaṃ [k: randhrāntakamiti] 
dhyāyedvajralāñchanalāñchitam || 2 ||

daśamāddivasādūrdhvaṃ yogino'nanyacetasaḥ |
ko'pi [kh: kvāpi gandha iti dvidhābhūtasya naikadhā] gandhaḥ samāyāti 
dvidhābhūto'pyanekadhā || 3 ||

tato'sya ṛtumātreṇa śudho gandhaḥ sthirībhavet |
ṣaḍbhirmāsaiḥ svayaṃ gandhamaya eva bhaviṣyati || 4 ||

yo yatra rocate gandhastaṃ tatra kurute bhṛśam |
tryabdātsiddhimavāpnoti preritāṃ pāñcabhautikīm || 5 ||

tadūrdhvamātmano rūpaṃ tatra saṃcintayeddhṛdi |
gandhāvaraṇavijñānaṃ tribhirabdairavāpnuyāt || 6 ||

īṣaddīptiyutaṃ tatra tanmaṇḍalavivarjitam |
dhyāyanprapaśyate sarvāngandhāvaraṇavāsinaḥ || 7 ||

p. 92)

dharātattvoktabimbābhaṃ [k: bimbāntamiti] tatraivamanucintayan |
tatsamānatvamabhyeti pūrvavaddvitaye sthire || 8 ||

svarūpaṃ tatra saṃcintya bhāsayantamadhaḥ sthitam |
tadīśatvamavāpnoti pūrvoktenaiva vartmanā || 9 ||

dharātattvoktavatsarvamata ūrdhvamanusmaran |
tadrūpaṃ phalamāpnoti gandhāvaraṇasaṃsthitam || 10 ||

rasarūpāmato vakṣye dhāraṇāṃ yogisevitām |
yayā sarvarasāvāptiryoginaḥ saṃprajāyate || 11 ||

jalabudbudasaṃkāśaṃ jihvāyāṃ [g: rājanāḍyagrasaṃsthitamiti] 
cāgrataḥ sthitam |
cintayedrasatanmātraṃ jihvāgrādhāramātmanaḥ || 12 ||

suśītaṃ ṣaḍrasaṃ cintyaṃ [k: ṣaḍrasaṃ snigdhamiti] 
tadgatenāntarātmanā |
tato'sya māsamātreṇa rasāsvādaḥ pravartate || 13 ||

lavaṇādīnparityajya yadā madhuratāṃ gataḥ |
tadā tannigiranyogī ṣaṇmāsānmṛtyujidbhavet || 14 ||

jarāvyādhivinirmuktaḥ kṛṣṇakeśo'cyutadyutiḥ |
jīvedācandratārārkamabhyasyaṃśca kvacitkvacit || 15 ||

pūrvoktabudbudākāraṃ [g: bahudhākīramiti] svarūpamanucintayan |
nīrāvaraṇavijñānamāpnotīti kimadbhutam || 16 ||

p. 93)

tameva dyutisaṃyuktaṃ dhyāyaṃnnādhāravarjitam |
padyeta [g: paśyate vatsarairiti] vatsaraiḥ sarvāṃ rasāvaraṇamāśritām || 
17 ||

jalatattvoktabimbādi tadūrdhvamanucintayan |
pūrvoktaṃ sarvamāpnoti rasāvaraṇajaṃ sphuṭam || 18 ||

ato rūpavatīṃ vakṣye divyadṛṣṭipradāṃ śubhām |
dhāraṇāṃ sarvasiddhyarthaṃ rūpatanmātramāśritām || 19 ||

ekāntastho yadā yogī vinimīlitalocanaḥ [k: bahirmīlitalocana] |
śaratsaṃdhyābhrasaṃkāśaṃ yattu kiṃcitprapaśyati [k: yattatkiṃciditi] || 
20 ||

tatra cetaḥ samādhāya yāvadāste daśāhakam [k: daśāhnikamiti] |
tāvatprapaśyate tatra bindūnsūkṣmatamānapi [k: tamānitīti] || 21 ||

kecittatra sitā raktāḥ pītā nīlāstathā pare |
tāndṛṣṭvā tatra [k: teṣu] saṃdadhyānmano'tyantamananyadhīḥ || 22 ||

ṣaṇmāsātpaśyate teṣu rūpāṇi subahūnyapi |
tryabdāttānyeva tejobhiḥ pradīptāni sthirāṇi ca || 23 ||

tānyabhyasyaṃstato dvyabdādbimbākārāṇi paśyati |
tato'bdātpaśyate tejaḥ ṣaṇmāsātpuruṣākṛti || 24 ||

p. 94)

trimāsādvyāpakaṃ tejo māsātsarvaṃ visarpitam |
kālakramācca pūrvoktaṃ rūpāvaraṇamāśritam || 25 ||

tatsarvaṃ phalamāpnoti divyadṛṣṭiśca jāyate |
itīyaṃ kalpanāśūnyā dhāraṇā kṛtakoditā || 26 ||

daśapañcavidho bhedaḥ svayamevātra jāyate |
yato'syāṃ niścayaṃ kuryātkimanyaiḥ śāstraḍambaraiḥ || 57 ||

ata sparśavatīmanyāṃ kathayāmi tavādhunā |
dhāraṇāṃ tu yayā yogī vajradehaḥ prajāyate || 28 ||

ṣaṭkoṇamaṇḍalāntaḥ sthamātmānaṃ paribhāvayet |
rūkṣamañjanasaṃkāśaṃ pratyaṃśaṃ [k: pratyaṅgacchuritākulamiti] 
sphuritākulam || 29 ||

tato'sya daśabhirdevi divasaistvaci sarvataḥ |
bhavetpipīlikāsparśastatastamanucintayan || 30 ||

vajradehatvamāsādya pūrvoktaṃ pūrvavallabhet |
pūrvoktamaṇḍalākāraṃ pūrvarūpaṃ vicintayan || 31 ||

sparśatattvāvṛtijñānaṃ labhankena nivāryate |
hīnamaṇḍalamātmānaṃ dhyāyettatpatisiddhaye || 32 ||

yayā saṃsiddhayā sarvasparśavedī bhaviṣyati |
karṇau pidhāya yatnena nimīlitavilocanaḥ || 33 ||

p. 95)

yaṃ śṛṇoti mahāghoṣaṃ cetastatrānusandhayet |
dīpyate jāṭharo vahnistato'sya daśabhirdinaiḥ || 34 ||

dūrācchravaṇavijñānaṃ ṣaṇmāsādupajāyate |
yastasyānte dhvanirmandaḥ kiṃcitkiṃcidvibhāvyate || 35 ||

sakalātmā sa vijñeyastadabhyāsādananyadhīḥ |
śabdāvaraṇavijñānamāpnoti sthiratāṃ gatam || 36 ||

yaḥ punaḥ śrūyate śabdastadante śaṃkhanādavat |
pralayākalarūpaṃ tadabhyasyaṃ tatphalepsubhiḥ || 37 ||

sa evātitarāmanyaśabdapracchādako yadā |
vijñānākala ityuktastadāsāvaparājite || 38 ||

manohlādakaro yo'nyastadante saṃvibhāvyate |
sa mantra iti vijñeyo yogibhiryogakāṅkṣibhiḥ || 39 ||

tatastu śrūyate yo'nyaḥ śāntaghaṇṭāninādavat |
sa mantreśa iti proktaḥ [k: mantreśa iti mantra] sarvasiddhiphalapradaḥ || 40 
||

ghaṇṭānādavirāmānte yaḥ śabdaḥ saṃprajāyate |
mantreśeśapadaṃ taddhi siddhīnāṃ kāraṇaṃ mahat || 41||

anilenāhatā vīṇā yādṛṅnādaṃ vimuñcati |
tādṛśo yo dhvanistatra taṃ vidyācchāṃbhavaṃ padam || 42 ||

p. 96)

pṛthagvā kramaśo vāpi sarvānetānsamabhyaset |
prāpnoti sarvavitsiddhiḥ śabdāvaraṇamāśritāḥ || 43 ||

ityetāḥ kathitāḥ pañca tanmātrāṇāṃ tu dhāraṇāḥ |

iti śrīmālinīvijayottare tantre tanmātradhāraṇādhikāraścaturdaśaḥ || 14 ||



atha

pañcadaśo'dhikāraḥ |

atha vāgindriyādīnāṃ manontānāmanukramāt |
dhāraṇāḥ saṃpravakṣyāmi daśaikāṃ ca samāsataḥ || 1 ||

vadanāntaṃ namaḥ śabdamātmanaścintayedbudhaḥ |
gṛhītavāktvamabhyeti maunena madhusūdani || 2 ||

sarvatrāskhalitā vāṇī ṣaḍbhirmāsaiḥ pravartate |
sarvaśāstrārthavettṛtvaṃ vatsarādupajāyate || 3 ||

vāgevāsya pravarteta kāvyālaṅkārabhūṣitā |
tribhirabdaiḥ svayaṃ kartā śāstrāṇāṃ saṃprajāyate || 4 ||

tatraiva cintayeddehaṃ svakīyamanurūpataḥ |
bhūyastameva dhavalamīṣattejovabhāsitam || 5 ||

rasāntaḥ somabimbāditejontaṃ tamanusmaret |
sarvaṃ phalamavāpnoti vāgāvaraṇajaṃ kramāt || 6 ||

pāṇau ca taṃ samādāya ṣaṇmāsāddūrasaṃsthitam |
vastu gṛhṇātyasaṃdehāttryabdātpāre'pi vāridheḥ || 7 ||

tatrātmadehaṃ pūrvaṃ tu padmābhamanucintayan |
savyāpārādibhedena caturdaśakamādarāt || 8 ||

p. 98)

pūrvoktakālaniyamātpūrvoktenaiva [g: purokteti] vartmanā |
sarvaṃ phalamavāpnoti hastāvṛtisamāśritam || 9 ||

pādāvevaṃvidho dhyāyanvatsaratrayamādarāt |
muhūrtena samudrāntāmaśrānto bhramati kṣitim || 10 ||

caturdaśa samabhyarcya svadehādikamabhyasan |
prāpnoti pūrvavatsarvaṃ phalaṃ pādāvṛtisthitam || 11 ||

pāyāvapi manastattvaṃ [g: manastadvaditi] sthirīkurvannavāpsyati |
māsena tadbhavavyādhivimuktimavilambataḥ || 12 ||

puṇyaślokatvamāpnoti tribhirabdairanādarāt |
caturdaśavidhaṃ cātra pūrvavatphalamāpsyati || 13 ||

svarūpataḥ smarelliṅgaṃ māsamātrājjitendriyaḥ |
ṣaḍbhirmāsairanāyāsādicchākāmitvamāpnuyāt [k: 
icchāsiddhimavāpnuyāditi] || 14 ||

caturdaśavidhe bhede tatrābhyaste mahāmatiḥ |
liṅgāvaraṇajaṃ sarvaṃ pūrvavallabhate phalam || 15 ||

svajihvāminduvarṇābhāṃ cintayeddaśabhirdinaiḥ |
prāpnotyanubhavaṃ yogī jihvābhavamivātmanaḥ || 16 ||

p. 99)

āsvādayati dūrasthaṃ ṣaṇmāsādekamānasaḥ |
vatsaraistu tribhiḥ sākṣālleḍhyasau paramāmṛtam || 17 ||

yenāsau bhavati yogī jarāmaraṇavarjitaḥ |
apeyādiprasakto'pi na pāpaiḥ paribhūyate || 18 ||

pūrvavatsarvamanyacca svadehādyanucintayan |
phalamāpnotyasaṃdehādrasanāvṛtisaṃbhavam || 19 ||

kanakābhaṃ svakaṃ ghrāṇamanucintayataḥ [k: svakaṃ jñānamiti] 
śanaiḥ |
divasairdaśabhirghrāṇaśūnyatānubhavo bhavet || 20 ||

ṣaṇmāsādgandhamāghrāti dūrasthasyāpi vastunaḥ |
ghātayedgandhamāghrāya yasya duṣṭo bhaviṣyati || 21 ||

vatsaraistu tribhirdivyaṃ gandhamāsādya yogavit |
jarāmaraṇanairguṇyayukto divyatvamarhati || 22 ||

sarvamanyadyathoddiṣṭaṃ tathaiva ca vicintayet |
kramikaṃ phalamāpnoti ghrāṇāvaraṇamāsthitam || 23 ||

udayādityasaṃkāśe cintayaṃścakṣuṣī nije |
daśāhāccakṣuṣo raktasrāvānubhavamāpsyati || 24 ||

vedanā mahatī cāsya lalāṭe saṃprajāyate |
na bhetavyaṃ mahādevi na cābhyāsaṃ parityajet || 25 ||

p. 100)

saṃtyajannandhatāmeti tena yatnāatsamabhyaset |
ṣaḍbhirmāsairmahāyogī divyadṛṣṭiḥ prajāyate || 26 ||

chidrāṃ prapaśyate bhūmiṃ kaṭāhāntāmatandritaḥ |
ādhruvāntamathordhvaṃ ca karāmalakavadbudhaḥ || 27 ||

vatsaraistu tribhiryogī brahmāṇḍāntaṃ prapaśyati |
tadantaryoginījñānaṃ śarīrasthaṃ prajāyate || 28 ||

svadehādikamanyacca pūrvoktaṃ pūrvavatsmaran |
nayanāvṛtijaṃ sarvamāpnotīti kimadbhutam || 29 ||

sarvatrāñjanapatrābhāṃ nistaraṅgāṃ tvacaṃ smaran |
śastrairapi na māsena hantuṃ [g: cchettuṃ śakya] śakyo bhaviṣyati || 30 ||

ṣaṇmāsādatitīvreṇa nāgnināpyeṣa dahyate |
vatsaratritayādyogī vajropalaviṣādibhiḥ || 31 ||

pīḍyate na kadācitsyādajarāmaratāṃ gataḥ |
sparśādṛtipavijñānagītavacca caturdaśa || 32 ||

bhedāḥ saha phalairjñeyāḥ pūrvakālānusārataḥ |
kiṃtvatra cintayeddehaṃ svadehādibhirāvṛtam || 33 ||

saṃdadhānaḥ svakaṃ cetaḥ śrotrākāśe vicakṣaṇaḥ |
dūrācchravaṇavijñānaṃ ṣaṇmāsādupajāyate || 34 ||

p. 101)

tribhiḥ saṃvatsarairdevi brahmāṇḍāntarudīritam |
śṛṇoti sa [k: visphuṭaṃ sarvamiti] sphuṭaṃ sarvaṃ jarāmaraṇavarjitaḥ 
|| 35 ||

tatrākāśoktavatsarvaṃ svadehādyanucintayet |
śrotrāvaraṇajaṃ sarvaṃ phalamāpnoti pūrvavat || 36 ||

manovatīmato vakṣye dhāraṇāṃ sarvasiddhidām |
yayā saṃsiddhayā devi sarvasiddhiphalaṃ labhet || 37 ||

mana eva manuṣyāṇāṃ kāraṇaṃ bandhamokṣayoḥ |
tasmāttadabhyasenmantrī yadīcchenmokṣamvyayam [g: makṣayamiti] || 38 ||

tadardhacandrasaṃkāśamadhovaktraṃ hṛdi sthitam |
cintayanmāsamātreṇa pratibhāṃ [k: patitāṃ pratīti] pratipatsyate || 39 ||

akasmātpasyate kiṃcidakasmācchṛṇute tathā |
sarvendriyātmakaṃ jñānamakasmācca kvacitkvacit || 40 ||

svasvakendriyavijñānaṃ saṃpaśyedvatsaratrayāt |
bhavate yogayuktasya yoginaḥ suparisphuṭam || 41 ||

svadehādikamapyatra pūrvoktavadanusmaran |
cittāvaraṇavijñānaṃ prāpya somaguṇaṃ labhet || 42 ||

p. 102)

ityekādaśa gītāni samabhyasyāni te tathā |
indriyāṇi yataḥ sarvaṃ phalameva pratiṣṭhitam || 43 ||

bandhamokṣābubhāvetāvindriyāṇāṃ [taṃ0 indriyāṇīti] jagurbudhāḥ |
vigṛhītāni bandhāya vimuktāni vimuktaye || 44 ||

etāni vyāpake bhāve yadā syurmanasā saha |
vimuktānīti vidvadbhirjñātavyāni tadā priye || 45 ||

yadā tu viṣaye kvāpi pradeśāntaravartini |
saṃsthitāni tadā [k: tadetānīti] tāni baddhānīti pracakṣate || 46 ||

ityayaṃ [taṃ0 ityevamiti] dvividho bhāvaḥ śuddhāśuddhaprabhedataḥ |
indriyāṇāṃ samākhyātaḥ siddhayogīśvarīmate || 47 ||

iti śrīmālinīvijayottare'kṣadhāraṇādhikāraḥ pañcadaśaḥ || 15 ||




atha

ṣoḍaśo'dhikāraḥ |

atha garvamayīṃ divyāṃ dhāraṇāṃ dhāraṇottamām |
mahāgarvakarīṃ vakṣye yogināṃ yogavandite || 1 ||

ṣoḍaśāraṃ smareccakramātmadehamananyadhīḥ [kh: 
ātmanyahamananyadhīriti] |
eṣo'hamiti saṃcintya svakāryaparivāritam || 2 ||

apradhṛṣyo bhavedyogī vatsaratritayena tu |
mamatvamacyutaṃ tasya bhavetsarvatra kutracit || 3 ||

tādṛgrūpasya cakrasya nābhiṃ mūrtiṃ svakāṃ smaran |
cintayetsarvamevāhaṃ mayi sarvamavasthitam || 4 ||

tato'haṅkāravijñānaṃ prāpnotīti kimadbhutam |
hṛccakre samanudhyāyanmatsvarūpamatandritaḥ || 5 ||

arkalokamavāpnoti garvāvaraṇajaṃ phalam |
bimbādikaṃ kramātsarvaṃ cintayannīlalohitam || 6 ||

tadbhavaṃ sarvamāpnoti daśāvasthāpracoditam |
iti garvamayī proktā prajāpatiguṇapradā || 7 ||

p. 104)

udyadādityabimbābhaṃ [k: uditādityeti] hṛdi padmamanusmaran |
dharmādibhāvasaṃyuktamaṣṭapatraṃ sakarṇikam || 8 ||

māsena sthirabuddhiḥ syātṣaḍbhiḥ śrutidharo bhavet |
tribhirabdaiḥ svayaṃ kartā śāstrāṇāṃ saṃprajāyate || 9 ||

svāṃ tatra cintayenmūrtiṃ buddhitattvaṃ prapaśyati |
tadīśajñānamāpnoti brahmāṇamanucintayan || 10 ||

vedānudgirate sapta ? (suptaḥ) samādhistho'thavā muniḥ |
susthirāste sadābhyāsādanadhītā api sphuṭam || 11 ||

bimbādikaṃ kramātsarvaṃ pūrvoktamanucintayan  |
prāpnoti brāhmamaiśvaryaṃ buddhyāvaraṇamāśritam || 12 ||

hṛdi bimbaṃ raverdhyāyaṃstadantaḥ somamaṇḍalam |
evamabhyasatastasya ṣaṇmāsādupajāyate || 13 ||

divyacakṣurajāyāsātsiddhiḥ syādvatsaratrayāt |
svadehaṃ cintayaṃstatra guṇajñānamavāpsyati || 14 ||

liṅgākāraṃ smarandīptaṃ tadīśatvamavāpnuyāt |
bimbādi pūrvavaddhyāyandaśakaṃ daśakātmakam || 15 ||

p. 105)

phalamāpnotyasaṃdehādguṇāvaraṇasaṃsthitam |
caturviṃśatyamī [k: viṃśatisaṃproktā] proktāḥ pratyekaṃ 
daśapañcadhā || 16 ||

dhāraṇāḥ kṣmāditattvānāṃ samāsādyogināṃ hitāḥ |
trayodaśātmake bhede ṣaḍanyāḥ saṃsthitā yathā || 17 ||

yogināmanuvarṇyante tathā yogaprasiddhaye |
dehaṃ muktvā svarūpeṇa nānyat kiṃciditi smaret || 18 ||

sitapadmāsanāsīnaṃ maṇḍalatritayopari |
evamatra sthirībhūte māsamātreṇa yogavit || 19 ||

sarvavyādhivinirmukto bhavatīti kimadbhutam |
ṣaṇmāsādasya vijñānaṃ jāyate pṛthivītale || 20 ||

abdājjarādinirmuktastribhiḥ puṃstattvadṛgbhavet |
hṛdadhaḥ paṅkaje'traiva dvādaśārdhāṅgulāḥ tanum || 21 ||

hṛdante bhāvayetsvānyāṃ ṣaṇmāsānmṛtyujidbhavet |
tribhirabdaiḥ samāpnoti puṃstattveśvaratulyatām || 22 ||

bimbādau pūrvavatsarvaṃ tatra saṃcintite sati |
phalamāpnotyasaṃdehātpuruṣāvaraṇasthitam || 23 ||

etadvedāntavijñānaṃ samāsādupavarṇitam |
kapilasya purā proktametadvistaraśo mayā || 24 ||

p. 106)

śaratsaṃdhyābhrasaṃghābhaṃ svadehamanucintayan |
vītarāgatvamāpnoti ṣaḍbhirmāsairna saṃśayaḥ || 25 ||

jarāmaraṇanirmukto varṣeṇaivopajāyate |
tryabdājjñānamavāpnoti rāgāvaraṇajaṃ mahat || 26 ||

raktaṃ saṃcintayeddehaṃ saṃpūrṇābhroparisthitam |
māsaṣaṭkamanudvigno vītarāgatvasiddhaye || 27 ||

smaransaṃvatsare samyaṅmṛtyunā na prapīḍyate |
tribhirabdairjitadvandvo rāge ca samatāṃ vrajet || 28 ||

raktapadmasthitaṃ raktaṃ pañcaparvaṃ hṛdāvadhi [k: 
parvahṛdāvadhīti] |
dhyāyanphalamavāpnoti pūrvoktamakhilaṃ kramāt || 29 ||

bimbādi cātra pūrvoktamanucintayato muhuḥ |
phalaṃ bhavati niḥśeṣaṃ rañjakāvṛtisaṃbhavam || 30 ||

hṛdi padmaṃ sitaṃ dhyāyeddvyaṣṭapatraṃ sakesaram |
sarvāmṛtamayaṃ divyaṃ candrakalpitakarṇikam || 31 ||

niścalaṃ tatra saṃyamya ceto nidrāntamātmanaḥ |
tato yatpaśyate svapne tathyaṃ tattasya jāyate || 32 ||

p. 107)

evamabhyasatastasya taddhi padmoditaṃ phalam |
sarvaṃ prajāyate tasya [g: prajāyate devīti] tatkālakramayogataḥ || 33 ||

caturaṅguladehādi sarvatraivaṃ vicintayan |
pūrvavatsarvamāpnoti vidyātattvasamudbhavam || 34 ||

hṛdayādekamekaṃ tu vyatikramyārdhamaṅgulam |
pṛthak cakratrayaṃ dhyāyedraktanīlasitaṃ kramāt || 35 ||

tatratyadvyekaparvaṃ [k: tatra tithyekaparvamiti] tu puruṣaṃ tatsamadyutim |
bimbādikaṃ ca yatproktaṃ tattvatrayamidaṃ mahat || 36 ||

trayodaśātmakaṃ bhedametadantaṃ vidurbudhāḥ |
ekādaśaprabhedena tattvadvayamathocyate || 37 ||

kaṇṭhakūpāvadhau cakre pañcāre nābhisaṃsthitam |
dhyāyetsvarūpamātmīyaṃ dīptanetropalabdhavat || 38 ||

kṣityādikālatattvānte yadvastu sthitamadhvani |
sarvaṃ prasādhya yogīndro na kālenābhibhūyate || 39 ||

bimbādike'pi tatrasthe yogināmanucintite |
bhavatīti kimāścaryamanāyāsena tatphalam || 40 ||

p. 108)

kaṇṭhākāśe sthiraṃ cetaḥ kurvanyogī dine dine |
māyotthaṃ phalamāpnoti bimbādāvapi tatrage || 41 ||

kaṇṭhakūpavidhānābhaṃ rāhugrastendubimbavat |
cintayanna punaryāti māyādervaśavartitām || 42 ||

tadeva tatra svarbhānumuktavatparicintayan |
tejodehādikaṃ cāpi prāpnoti parameśatām || 43 ||

madhyandinakarākāraṃ lambakasthaṃ vicintayet |
samastamantracakrasya rūpaṃ yatsāmudāyikam || 44 ||

tataḥ kālakramādyogī mantratvamadhigacchati |
anuṣaṅgaphalaṃ cātra pūrvoktaṃ sarvamiṣyate || 45 ||

mūrti tatraiva saṃcintya mantreśatvamavāpnuyāt |
tadadho dīpakaṃ tejo dhyātvā tatpatitāṃ vrajet || 46 ||

sabāhyābhyantaraṃ tasmādadhordhvaṃ vyāpi ca smaran |
tejo mantreśvareśānapadānna cyavate naraḥ || 47 ||

baddhvā padmāsanaṃ yogī parābījamanusmaran |
bhruvormadhye nyaseccittaṃ tadbahiḥ kiṃcidagrataḥ || 48 ||

nimīlitākṣo hṛṣṭātmā śabdālokavivarjite |
paśyate puruṣaṃ tatra dvādaśāṅgulamāyatam || 49 ||

p. 109)

tatra cetaḥ sthiraṃ kuryāttato māsatrayopari |
sarvāvayavasaṃpūrṇaṃ tejorūpamacañcalam || 50 ||

prasannamindusaṃkāśaṃ paśyati divyacakṣuṣā |
taṃ dṛṣṭvā puruṣaṃ divyaṃ kālajñānaṃ pravartate || 51 ||

aṃśiraske bhavenmṛtyuḥ ṣaṇmāsābhyantareṇa tu |
vañcanaṃ tatra kurvīta yatnātkālasya yogavit || 52 ||

brahmarandhropari dhyāyeccandrabimbamakalmaṣam |
sravantamamṛtaṃ divyaṃ svadehāpūrakaṃ bahu || 53 ||

tenāpūritamātmānaṃ cetonālānusarpiṇā |
sabāhyābhyantaraṃ dhyāyandaśāhānmṛtyujidbhavet || 54 ||

mahāvyādhivināśe'pi yogamenaṃ samabhyaset |
pratyaṅgavyādhināśāya pratyaṅgāṅgamanusmaran || 55 ||

dhūmavarṇaṃ yadā paśyenmahāvyādhistadā bhavet |
kṛṣṇe kuṣṭhamavāpnoti nīle śītalikābhayam || 56 ||

hīnacakṣuṣi tadrogaṃ nāsāhīne tadātmakam |
yadyadaṅgaṃ na paśyeta tatra tadvyādhimādiśet || 57 ||

ātmano vā pareṣāṃ vā yogī yogapathe sthitaḥ |
varṣaistu pañcabhiḥ sarvaṃ vidyātattvāntamīśvari || 58 ||

p. 110)

vetti bhuṅkte ca satataṃ na ca tasmātprahīyate |
tatrasthe tejasi dhyāte sarvadehavisarpiṇi || 59 ||

pūrvoktaṃ sarvamāpnoti tatkālakramayogataḥ |
athordhvavyāpini dhyāne tatra tasmādakhaṇḍitaḥ || 60 ||

sarvaṃ mantreśvareśatvānna bhūyo'pi nivartate |
evaṃ lalāṭadeśe'pi mahādīptamanusmaran || 61 ||

prapaśyatyacirādeva varṇāṣṭakayutaṃ kramāt |
indranīlapratīkāśaṃ śikhikaṇṭhasamadyuti || 62 ||

rājāvartanibhaṃ cānyattathā vaidūryasaṃnibham |
puṣparāganibhaṃ cānyatpravālakasamadyuti || 63 ||

padmarāgapratīkāśamanyaccandrasamadyuti |
tāṃ dṛṣṭvā paramāṃ jyotsnāṃ divyajñānaṃ pravartate || 64 ||

vihārapādacārādi tataḥ sarvaṃ pravartate |
adhordhvaṃ vyāpini dhyāte na tasmāccyavate padāt || 65 ||

ityetatsarvamākhyātaṃ lakṣyabhedavyavasthitam |
adhunā cittabhedo'pi samāsādupadiśyate || 66 ||

p. 111)

piśācānantaparyantaguṇāṣṭakasamīhayā |
tattadrūpaguṇaṃ kuryātsamyagīśe sthiraṃ manaḥ || 67 ||

itīśvarapadāntasya mārgasyāsya pṛthak pṛthak |
yathopāsā tathākhyātā yogināṃ yogasiddhaye ||  68 ||

iti śrīmālinīvijayottare tantre dhara?ṇādhikāraḥ ṣoḍaśaḥ || 16 ||




atha

saptadaśo'dhikāraḥ

athaitatsarvamuddiṣṭaṃ yadi na sphuṭatāṃ vrajet |
sphuṭīkṛte sthite tatra na manastiṣṭhate sphuṭam || 1 ||

gatibhaṅgaṃ tatastasya prāṇāyāmena kārayet |
sa ca pañcavidhaḥ proktaḥ pūrakādiprabhedataḥ || 2 ||

pūrakaḥ kumbhakaścaiva recako hyapakarṣakaḥ |
utkarṣaḥ pañcamo jñeyastadabhyāsāya yogibhiḥ || 3 ||

pūrakaḥ pūraṇādvāyordvedhā ṣoḍhā ca gīyate |
svabhāvapūraṇādeko virecyānyaḥ prapūritaḥ || 4 ||

nāsāmukhordhvatālūnāṃ randhrabhedādvibhidyate |
bhinnaḥ ṣoḍhātvamabhyeti punarbhedairanantatām || 5 ||

kumbhaḥ pañcavidho jñeyastatraikaḥ puritādanu |
vidhṛto recakātpaścāddvitīyaḥ parikīrtitaḥ || 6 ||

dvayorante dvayaṃ cānyatsvabhāvasthaśca pañcamaḥ |
sthānāntaraprabhedena gacchatyeṣo'pyanantatām || 7 ||

recakaḥ pūrvavajjñeyo dvidhābhūtaḥ ṣaḍātmakaḥ |
sthānasaṃstambhito vāyustasmādutkṛṣya nīyate || 8 ||

p. 113)

yo'nyapradeśasaṃprāptyai sa utkarṣaka iṣyate |
tasmādapi punaḥ sthānaṃ yato nītastadāhṛtaḥ || 9 ||

apakarṣaka ityukto dvāvapyetāvanekadhā |
eṣāmabhyasanaṃ kuryātpadmakādyāsanasthitaḥ || 10 ||

adhamaḥ sakṛdudghāto madhyamaḥ siddhido mataḥ |
jyeṣṭhaḥ syādyastrirudghātaḥ sa ca dvādaśamātrakaḥ || 11 ||

trirjānuveṣṭanānmātrātriguṇachoṭikātrayāt |
ajitāṃ nākramenmātrāṃ vāyudoṣanivṛttaye || 12 ||

pratyaṅgadhāraṇādvāyuṃ na ca cakṣuṣi dhārayet |
nābhihṛttālukaṇṭhasthe vivṛte maruti kramāt || 13 ||

catasro dhāraṇā jñeyā śikhyamvvīśāmṛtātmikāḥ |
yadyatra cintayeddravyaṃ tattatsarvagataṃ smaret || 14 ||

bindunādātmakaṃ rūpamīśānīṃ dhāraṇāṃ śritam |
amṛtāyāḥ smaredinduṃ kālatyāgoktavartmanā || 15 ||

dhāraṇābhirihaitābhiryogī yogapathe sthitaḥ |
heyaṃ vastu parityajya yāyātpadamanuttamam [g: padamanāmayamiti] || 16 
||

trivedadbīndusaṃkhyātasamudghātāstvimā matāḥ |
etābhirapyadho'pyuktaṃ phalaṃ prāpnotyanuttamam || 17 ||

p. 114)

yogāṅgatve samāne'pi tarko yogāṅgamuttamam |
heyādyālocanā tasmāttatra yatnaḥ praśasyate || 18 ||

mārge cetaḥ sthirībhūte heye'pi viṣayecchayā |
preryaṃ tenānayettāvadyāvatpadamanāmayam || 19 ||

tadarthabhāvanāyuktaṃ manodhyānamudāhṛtam |
tadeva paramaṃ jñānaṃ bhāvanāmayamiṣyate || 20 ||

muhūrtādeva tatrasthaḥ samādhiṃ pratipadyate |
tatrāpi ca suniṣpanne phalaṃ prāpnotyabhīpsitam || 21 ||

yatkiṃciccintayedvastu nānyatvaṃ pratipadyate |
tena tanmayatāmāpya bhavetpaścādabhāvavat || 22 ||

pañcatāmiva saṃprāptastīvrairapi na cālyate |
tataḥ śabdādibhiryogī yoginīkulanandanaḥ || 23 ||

ityanena vidhānena pratyāhṛtya mano muhuḥ |
prāṇāyāmādikaṃ sarvaṃ kuryādyogaprasiddhaye || 24 ||

sarvamapyathavā bhogaṃ manyamāno virūpakam |
svaśarīraṃ parityajya śāśvataṃ padamṛcchati || 25 ||

tadā pūrvoditaṃ nyāsaṃ kālānalasamaprabham |
viparītavidhānena kuryā * * dviyugmatām || 26 ||

āgneyīṃ dhāraṇāṃ kṛtvā sarvamarmapratāpinīm |
pūrayedvāyunā dehamaṅguṣṭhānmastakāntikam || 27 ||

p. 115)

tamutkṛṣya tato'ṅguṣṭhādbrahmarandhrāntamānayet |
chedayetsarvamarmāṇi mantrenānena yogavit || 28 ||

jīvamādidvijārūḍhaṃ śiromālādisaṃyutam |
kṛtvā tadagre kurvīta dvijamādyamajīvakam [k: mādyaṃ sajīvakamiti] || 
29 ||

ityeṣā kathitā kālarātrirmarmanikṛntanī |
naināṃ samuccareddevi ya iccheddīrghajīvitam || 30 ||

śatārdhoccārayogena jāyate mūrdhni vedanā |
evaṃ pratyayamālocya mṛtyujiddhyānamāśrayet || 31 ||

nipīḍya taṃ tatastratra bindunādādicintakam |
vegādutkṛṣya tatrasthakālarātrīṃ visarjayet || 32 ||

* * * * * * * * siddhayogīśvarī mate |
tatsakāśādbhavetsiddhiḥ sarvamantroktalakṣaṇā || 33 ||

tadeva mantrarūpeṇa ma (nuṣyaiḥ) samupāsyate |
eṣa te jñeyasadbhāvaḥ kathitaḥ suravandite || 34 ||

abhaktasya guhasyāpi nākhyeyo jātucinmayā |
udaraṃ sarvamāpūrya brahmarandhrāntamāgatam || 35 ||

vāyuṃ bhramaṇayogena [k: tadā bhramaṇeti] tatastaṃ prerayettathā |
yāvatprāṇapradeśāntaṃ yogināṃ manasepsitam || 36 ||

p. 116)

vyāpyate punarā (vṛtya) tathaiva nābhimaṇḍalam |
evaṃ samabhyasettāvadyāvadvāsarasaptakam || 37 ||

tadāprabhṛti saṃyuktaḥ karṣayettridaśānapi |
anenākṛṣya vijñānaṃ sarvayoginiṣevitam || 38 ||

gṛhṇīyādyogayuktātmā kimanyaiḥ kṣudraśāsanaiḥ |
prathamaṃ mahatī ghūrṇirabhyāsāttasya jāyate || 39 ||

tataḥ prakampo deveśi jvalatīva tato'pyaṇuḥ |

iti śrīmālinīvijayottare tantre saptadaśo'dhikāraḥ || 17 ||




atha

aṣṭādaśo'dhikāraḥ |

śṛṇu devi paraṃ guhyamaprāpyamakṛtātmanām |
yanna kasyacidākhyātaṃ tadadya kathayāmi te || 1 ||

sarvamanyatparityajya cittamatra niveśayet |
mṛchailadhāturatnādibhavaṃ liṅgaṃ na pūjayet || 2 ||

yajedādhyātmikaṃ liṅgaṃ yatra līnaṃ carācaram |
bahirliṅgasya liṅgatvamanenādhiṣṭhitaṃ [g: manyenādhiṣṭhitamiti] 
yataḥ || 3 ||

ataḥ prapūjayedetatparamādvaitamāśritaḥ |
anudhyānena deveśi pareṇa paramāṇunā || 4 ||

yo'nudhyātaḥ sa evaitalliṅgaṃ paśyati nāparaḥ |
yadetatspandanaṃ nāma hṛdaye samavasthitam || 5 ||

tatra cittaṃ samādhāya kampa udbhava eva ca |
tatra praśāntimāpanne māsenaikena yogavit || 6 ||

hṛdayādutthitaṃ liṅgaṃ brahmarandhrāntamīśvari |
svapramoddyotitāśeṣadehāntamamaladyuti || 7 ||

tatraiva paśyate sarvaṃ mantrajālaṃ mahāmatiḥ |
tanmastakaṃ samāruhya māsamātramananyadhīḥ || 8 ||

p. 118)

tatastatra suniṣpanne ṣaṇmāsātsarvasiddhayaḥ |
etalliṅgamavijñāya yo liṅgī liṅgamāśrayet || 9 ||

vṛthā pariśramastasya na liṅgaphalamaśnute |
śaivametanmahāliṅgamātmaliṅge (na) siddhyati || 10 ||

siddhe'tra liṅgavalliṅgī liṅgastho liṅgavarjitaḥ |
bhavatīti kimāścaryametasmālliṅgaliṅgitaḥ || 11 ||

anena liṅgaliṅgena yadā yogī bahirvrajet |
tadā liṅgīti vijñeyaḥ purāntaṃ liṅgamiṣyate || 12 ||

etasmālliṅgavijñānādyogino liṅgitāḥ smṛtāḥ |
anenādhiṣṭhitāḥ mantrāḥ śāntaraudrādibhedataḥ || 13 ||

bhavantīti kimāścaryaṃ tadbhāvagatacetasaḥ |
raudraṃ bhāvaṃ samāśritya yadi yogaṃ samabhyaset || 14 ||

durnirīkṣyo bhavetsarvaiḥ sadevāsuramānuṣaiḥ |
gamāgamavinirmuktaḥ sarvadṛṣṭirakātaraḥ || 15 ||

muhūrtaṃ tiṣṭhate yāvattāvadeveśamāpnuyāt |
āviṣṭaḥ paśyate sarvaṃ sūryakoṭisamadyuti || 16 ||

yattadakṣaramavyaktaṃ śaivaṃ bhairavamityapi |
taṃ dṛṣṭvā vatsarārdhena yogī sarvajñatāmiyāt || 17 ||

ya evainaṃ samāsādya yastṛptimadhigacchati |
na ca kṛttrimayogeṣu sa muktaḥ sarvabandhanaiḥ || 18 ||

p. 119)

prāṇāyāmādikairliṅgairyogāḥ syuḥ kṛtrimā matāḥ |
tena te'kṛtakasyāsya kalāṃ nārhanti ṣoḍaśīm || 19 ||

etatsamabhyasanyogī divyacihnāni paśyati |
upaviṣṭa ṛjuryogī na kiñcidapi cintayet || 20 ||

muhūrtānnirdahetsarvaṃ dehasthamakṛtaṃ kṛtam |
dahyamānasya tasyeha prakampānubhavo bhavet || 21 ||

tatastatra sthirībhūte jyotirantaḥ prakāśate |
tāṃ dṛṣṭvā paramāṃ dīptiṃ divyajñānaṃ pravartate || 22 ||

svatantraśivatāmeti bhuñjāno viṣayānapi |
animīlitadivyākṣo yāvadāste muhūrtakam || 23 ||

tasmātsarvagataṃ bhāvamātmanaḥ pratipadyate |
tameva bhāvayedyatnātsarvasiddhiphalepsayā || 24 ||

tatastaṃ bhāvayedyogī kampamāno'tyanulvaṇam |
tataḥ prapaśyate tejo lalāṭāgre samantataḥ || 25 ||

dṛṣṭvā tatparamaṃ tejo [k: paratamaṃ teja] divyajñānamavāpnuyāt |
ṣaḍbhirmāsairanāyāsādvatsareṇa prasiddhyati || 26 ||

śivatulyabalo bhūtvā yatreṣṭaṃ tatra gacchati |
cetaḥ sarvagataṃ kṛtvā muhūrtādeva yogavit || 27 ||

p. 120)

śaktyāveśamavāpnoti prakampānubhavātmakam |
tatastatra sthirībhūte māsamātreṇa yogavit || 28 ||

śāktaṃ prapaśyate tejaḥ sabāhyābhyantare sthiram |
tatra samyak suniṣpanne sarvendriyajamādarāt || 29 ||

tatra sphuṭamavāpnoti vijñānamanivāritam |
sarvagaṃ cātra vijñeyaṃ yadakṣārthena [g: yadakṣārthairna saṃgatamiti] 
saṃgatam || 30 ||

ekamevedamākhyātaṃ tattvaṃ paryāyabhedataḥ |
karmendriyāṇi buddhyantaṃ parityajya samastakam || 31 ||

bhāvayetparamāṃ śaktiṃ sarvatraiva vicakṣaṇaḥ |
niścalaṃ tu manaḥ kṛtvā yāvattanmayatāṃ gataḥ || 32 ||

tāvatsarvagataṃ bhāvaṃ kṣaṇamātrātprapadyate |
nirdahya pāśajālāni yatheṣṭaṃ phalamāpnuyāt || 33 ||

tasmātsamabhyasedenaṃ kṛtvā niścayamātmanaḥ |
yatrādhāravinirmukto jīvo layamavāpsyati || 34 ||

tatsthānaṃ sarvamantrāṇāmutpattikṣetramiṣyate [k: utpattisthānamiti] |
dvividhaṃ tatparijñeyaṃ bāhyābhyantarabhedataḥ || 35 ||

prayātavyādhikā mātrā sā jñeyā sarvasiddhidā |
athavā gacchatastasya svapnavṛttyā vicakṣaṇaḥ || 36 ||

p. 121)

nirodhaṃ madhyame sthāne kurvīta kṣaṇamātrakam |
paśyate tatra cicchaktiṃ tuṭimātrāmakhaṇḍitām || 37 ||

tadeva paramaṃ tattvaṃ tasmājjātamidaṃ jagat |
sa eva mantradehastu siddhayogīśvarīmate || 38 ||

tenaivāliṅgitā mantrāḥ sarvasiddhiphalapradāḥ |
īṣadvyāvṛttavarṇastu heyopādeyavarjitaḥ || 39 ||

yāṃ saṃvittimavāpnoti śivatattvaṃ taducyate |
tatra cittaṃ sthirīkurvansarvajñatvamavāpnuyāt || 40 ||

tatraiva divyacihnāni paśyate ca na saṃśayaḥ |
yatraiva kutracidgātre vikāra upajāyate || 41 ||

saṃkalpapūrvako devi tattattvaṃ tattvamuttamam |
tadabhyasenmahāyogī sarvajñatvajigīṣayā || 42 ||

prāpnoti paramaṃ sthānaṃ bhuktvā siddhiṃ yathepsitām |
gandhapuṣpādibhiryogī nityamātmānamādarāt || 43 ||

brahmarandhrapradeśe tu pūjayedbhāvato'pi vā |
dravaddravyasamāyogātsnapanaṃ [k: dravyādravyeti] tasya jāyate || 44 ||

gandhapuṣpādigandhasya grahaṇaṃ yajanaṃ matam |
ṣaḍrasāsvādanaṃ tasya naivedyāya prakalpate || 45 ||

p. 112)

yamevoccārayedvarṇaṃ sa japaḥ parikīrtitaḥ |
tatra cetaḥ samādhāya dahyamānasya vastunaḥ || 46 ||

jvālāntastiṣṭhate yāvattāvaddhomaḥ [g: tāvaddhūma] kṛto bhavet |
yadeva paśyate rūpaṃ tadeva dhyānamiṣyate || 47 ||

prasaṅgādidamuddiṣṭamadvaitayajanaṃ mahat |
udayārkasamābhāsamūrddhvadvāre [k: samābhyāseti] manaḥ sthiram || 48 
||

hṛdi vā tattathā kuryāddvādaśānte'tha vāpnuyāt |
tato māsārdhamātreṇa tadrūpamupalabhyate || 49 ||

upalabdhaṃ tadabhyasya sarvajñatvāya kalpate |
vastreṇa mukhamācchādya yogī lakṣye niyojayet || 50 ||

nābhikandādadhastāttu yāvattattvaṃ śikhāvadhi |
sūkṣmatārakasaṃkāśaṃ raśmijvālākarālitam || 51 ||

prāṇaśaktyavasāne tu paśyate rūpamātmanaḥ |
tadevābhyasato devi vikāsamupagacchati || 52 ||

tanmukhaṃ sarvamantrāṇāṃ sarvatantreṣu paṭhyate |
tato'sya māsamātreṇa kācitsaṃvittiriṣyate || 53 ||

yataḥ sarvaṃ vijānāti hṛdaye saṃvyavasthitam |
tāṃ jñātvā kasyacidyogī na samyakpratipādayet || 54 ||

p. 123)

adhyāyātkathanaṃ kuryānnākāle mṛtyumāpnuyāt |
mṛto'pi śvabhrasaṃghāte krameṇa paripacyate || 55 ||

evaṃ jñātvā mahādevi svahitaṃ samupārjayet |
śiṣyo'pyanyāyato gṛhṇannarakaṃ pratipadyate || 56 ||

na ca tatkālamāpnoti vacastvavitathaṃ mama |
nyāyena jñānamāsādya paścānna pratipadyate || 57 ||

tadā tasya prakurvīta vijñānāpahṛtiṃ budhaḥ |
dhyātvā tamagrataḥ sthāpya svarūpeṇaiva yogavit || 58 ||

ṣaḍvidhaṃ vinyasenmārgaṃ tasya dehe puroktavat |
tatastaṃ dīpamālokya tadaṅguṣṭhāgrataḥ kramāt || 59 ||

nayettejaḥ samāhṛtya dvādaśāntamananyadhīḥ |
tatastaṃ tatra saṃcintya śivenaikatvamāgatam || 60 ||

tatra dhyāyettamorūpaṃ tirobhāvanaśīlanam |
patantīṃ tena mārgeṇa hyaṅguṣṭhāgrāntamāgatām || 61 ||

sabāhyābhyantaraṃ dhyāyenniviḍāñjana saprabhām |
anena vidhinā tasya mūḍhabuddhardurātmanaḥ || 62 ||

vijñānamantravidyādyā na kurvantyupakāritām |
cittābhisaṃdhimātreṇa hyadṛṣṭasyāpi jāyate || 63 ||

kathaṃcidupalabdhasya nityamevāpakāriṇaḥ |
athavā sūryabimbābhaṃ dhyātvā vicchedyamagrataḥ || 64 ||

p. 124)

svarbhānurūpayā śaktyā grastaṃ tamanucintayet |
aparādhasahasraistu kopena mahatānvitaḥ || 65 ||

vidhimenaṃ prakurvīta krīḍārthaṃ na tu jātucit |
anena vidhinā bhraṣṭo vijñānādapareṇa ca || 66 ||

na śakyo yojituṃ bhūyo yāvattenaiva noddhṛtaḥ |
karuṇākṛṣṭacittastu tasya kṛtvā viśodhanam || 67 ||

prāṇāyāmādibhistīthaiḥ prāyaścittairvidhiśrutaiḥ |
tatastasya prakurvīta dīkṣāṃ pūrvoktavartmanā || 68 ||

tataḥ sarvamavāpnoti phalaṃ tasmādananyadhīḥ |
evaṃ jñātvā prayatnena garumāsādayetsudhīḥ || 69 ||

yataḥ saṃtoṣa utpannaḥ śivajñānāmṛtātmakaḥ |
na tasyānveṣayedvṛttaṃ śubhaṃ vā yadi vāśubham || 70 ||

sa eva tadvijānāti yuktaṃ vāyuktameva vā |
akāryeṣu yadā saktaḥ prāṇadravyāpahāriṣu || 71 ||

tadā nivāraṇīyo'sau praṇatena vipaścitā |
tenātivāryamāṇo'pi yadyasau na nivartate || 72 ||

tadānyatra kvacidgatvā śivamevānucintayet |
eṣa yogavidhiḥ proktaḥ samāsādyogināṃ hitaḥ || 73 ||

nātra śuddhirnacāśuddhirna bhakṣyādivicāraṇam |
na dvaitaṃ nāpi cādvaitaṃ liṅgapūjādikaṃ na ca || 74 ||

p. 125)

na cāpi tatparityāgo niṣparigrahatāpi vā |
saparigrahatā vāpi jaṭābhasmādisaṃgrahaḥ || 75 ||

tattyāgo na vratādīnāṃ caraṇācaraṇaṃ ca yat |
kṣetrādisaṃpraveśaśca samayādiprapālanam || 76 ||

parasvarūpaliṅgādi [k: paraliṅgasvarūpādīti] nāmagotrādikaṃ ca yat |
nāsminvidhīyate kiṃcinna cāpi pratiṣidhyate || 77 ||

vihitaṃ sarvamevātra [k: sarvamevedamiti] pratiṣiddhamathāpi vā |
kiṃtvetadatra deveśi niyamena vidhīyate || 78 ||

tattve cetaḥ sthirīkāryaṃ suprayatnena yoginā |
tacca yasya yathaiva syātsa tathaiva samācaret || 79 ||

tattve niścalacittastu bhuñjāno viṣayānapi |
na saṃspṛśyeta doṣaiḥ sa padmapatramivāmbhasā || 80 ||

viṣāpahārimantrādisaṃnaddho [kh: taṃ0 ca mantrādisaṃyukta] 
bhakṣayannapi |
viṣaṃ na muhyate tena tadvadyogī mahāmatiḥ || 81 ||

ityetatkathitaṃ devi kimanyatparipṛcchasiṃ |

iti śrīmālinīvijayottare tantre paramavidyādhikāro nāmāṣṭādaśo'dhikāraḥ || 18 ||




atha

ekonaviṃśo'dhikāraḥ |

athainaṃ paramaṃ yogavidhimākarṇya śāṅkarī |
punarāha prasannāsyā praṇipatya jagadgurum || 1 ||

sādhyatvena śrutā deva bhinnayonistu mālinī |
vidyātrayaṃ savidyāṅgaṃ vidhivaccāvadhāritam || 2 ||

adhunā śrotumicchāmi hyabhinnā sādhyate katham |
hitāya sādhakendrāṇāṃ prasādādvaktumarhasi || 3 ||

evamukto maheśānyā jagatāṃ patirādarāt |
vikasadvadanāmbhojaḥ pratyuvāca vaco'mṛtam || 4 ||

ārirādhayiṣuḥ śaṃbhuṃ kuloktavidhinā budhaḥ |
kulacakraṃ yajedādau budho dīkṣoktavartmanā || 5 ||

tato japetparāṃ śaktiṃ lakṣamekamakhaṇḍitam |
parābījapuṭāntaḥsthāṃ na drutāṃ na vilambitām || 6 ||

tadvatkhaṇḍāṣṭakaṃ cāsyā lakṣaṃ lakṣamakhaṇḍitam |
japetkuleśvarasyāpi lakṣaṣaṭkamananyadhīḥ || 7 ||

homayitvā daśāṃśena dravyaṃ pūrvoditaṃ budhaḥ |
nityānusmṛtiśīlasya vāksiddhiḥ saṃprajāyate || 8 ||

p. 127)

svakūle japayuktasya aśaktasyāpi sādhane |
bhavanti kanyasā [g: kanyakā devīti] devi saṃsāre bhogasaṃpadaḥ || 9 ||

śaktastu sādhayetsiddhiṃ madhyamāmuttamāmapi |
kṛtasevāvidhiḥ pṛthvīṃ bhramedudbhrāntapattrivat [g: patravaditi] || 10 
||

nagare pañcarātraṃ tu trirātraṃ pattane tu vai |
grāme'pi caikarātraṃ tu sthitvainaṃ vidhimācaret || 11 ||

yannāmādyakṣaraṃ yatra varge tattasya [k: vargatattvasyeti] vastunaḥ |
kulamuktaṃ vidhānajñairnagarāderna saṃśayaḥ || 12 ||

yā yatra devatā varge vācyatve saṃvyavasthitā [k: saṃvyavasthitiriti] |
saiva tasya patitvena dhyeyā pūjyā ca sādhakaiḥ || 13 ||

tasya kiṃcitsamāsādya nagarādikamādarāt |
svadigvargasthito [g: svadiśi saṃsthita] bhūtvā cakraṃ yojya nijodaye 
[niyojayet] || 14 ||

avā * * * samekaika udite * * * * |
devatā māheśvara * * * * * * * * * || 15 ||

krameṇaiva yathā rātrau * * * * tathā divā |
svadiśi svodaye vargaṃ tamevānusmaredbudhaḥ || 16 ||

p. 128)

tiṣṭhedanyodayaṃ yāvattataḥ svāṃ diśamāśrayet |
svakulaṃ cintayanyāyāttaddeśakulameva [k: yāvattaddeśeti] vā || 17 ||

yāvadanyāṃ diśaṃ mantrī tatastadanucintayet |
evaṃ yāvatsvakaṃ sthānaṃ kulacakroktavartmanā || 18 ||

bhramitvā punarāyāti pūrvakālakrameṇa ca |
tāvadāgatya deveśi taddeśakulanāyikā || 19 ||

dadedbhakṣyādikaṃ kiṃciddāpayedvātha kenacit |
anena vidhinā yukto guptācāro dṛḍhavrataḥ | 20 ||

yoginīmelakaṃ prāpya ṣaṇmāsenaiva siddhyati |
duṣkaro'yaṃ vidhirdevi sattvahīnairnarādhamaiḥ || 21 ||

sarvasiddhikaro mukhyaḥ kulaśāstreṣu sarvataḥ |
athaikasminnapi grāme pattane nagare'pi vā || 22 ||

taddigbhāgaṃ samāśritya tadevaṃ japate kulam |
tribhirabdairanāyāsātsādhayeduttamaṃ phalam || 23 ||

lokayātrāparityakto grāsamātraparigrahaḥ |
athavā nābhicakre tu dhyānacakraṃ kulātmakam || 24 ||

cetasā bhramaṇaṃ kuryātsarvakālakrameṇa tu |
tato'sya vatsarārdhena dehāntaṃ yoginīkulam || 25 ||

p. 129)

āvirbhavatyasaṃdehātsvavijñānaprakāśakam |
tenāvirbhūtamātreṇa yogī yogikule kulī || 26 ||

bhavedapi patirdevi yogināṃ parameśvari |
athavā cintayeddevi yakārādikamaṣṭakam || 27 ||

svarūpeṇa prabhākārakarālākulavigraham |
tasya madhye kuleśānaṃ svabodhakamanusmaran || 28 ||

sarvameva ca tatpaścāccakraṃ dīpaśikhākṛti |
saṃbhūtaṃ cintayedyogī yoginīpadakāṅkṣayā || 29 ||

etasminvyaktimāpanne piṇḍasthaṃ buddha ucyate |
tato'syākasmikī devi mahāmudropajāyate || 30 ||

śṛṅgāravīrakāruṇyaśokakopādayastathā |
prabuddhametaduddiṣṭaṃ piṇḍasthamamarārcite || 31 ||

divasairabhiyuktasya tato'sya bahubhirdinaiḥ |
dharāditattvabhāvānāṃ saṃvittirupajāyate || 32 ||

suprabuddhaṃ tadicchanti piṇḍasthaṃ jñānamuttamam |
cakraṃ ca triguṇāṣṭāramathavā tatra cintayet || 33 ||

kādihāntākṣarākrāntaṃ pūrvarūpaṃ savindukam |
tatrāpi pūrvavatsarvaṃ kurvannetatphalaṃ labhet || 34 ||

ādivarṇānvitaṃ vātha ṣoḍaśāramanusmaran |
madhyakrameṇa vā yogī pañcamaṃ cumbakādibhiḥ || 35 ||

p. 130)

dvāsaptatisahasrāṇi nāḍīnāṃ nābhicakrake |
yataḥ piṇḍatvamāyānti tenāsau piṇḍa ucyate || 36 ||

tatra sthitaṃ tu yajjñeyaṃ piṇḍasthaṃ tadudāhṛtam |
a * * mala * * tkeśa * * * * * * kam || 
37 ||

vijvaratvamavāpnoti vatsareṇa yadṛcchayā |
cakrapañcakametaddhi pūrvavaddhṛdaye sthitam || 38 ||

padasthamiti śaṃsanti caturbhedaṃ vicakṣaṇāḥ |
yatrārthāvagatirdevi tatsthānaṃ padamucyate || 39 ||

catuṣkamatra vijñeyaṃ bhedaṃ pañcadaśātmakam |
sarvatobhadrasaṃsiddhau sarvatobhadratāṃ vrajet || 40 ||

jarāmaraṇanairguṇyanirmukto yogacintakaḥ |
vyāptāvapi prasiddhāyāṃ māyādhastattvagocaraḥ || 41 ||

vetti tatpatitulyatvaṃ tadīśatvaṃ ca gacchati |
padasthe kiṃtu candrābhaṃ pradīpābhaṃ na cintayet || 42 ||

etadevāmṛtaughena dehamāpūrayatsvakam |
cintitaṃ mṛtyunāśāya bhavatīti kimadbhutam || 43 ||

upalakṣaṇametatte candrabimbādyudīritam |
yena yenaiva rūpeṇa cintyate parameśvarī || 44 ||

piṇḍasthādiprabhedeṣu tenaiveṣṭaphalapradā |
rūpamaiśvaramicchanti śivasyāsivahāriṇaḥ || 45 ||

p. 131)

yadbhrūmadhyasthitaṃ yasmārttena tatra vyavasthitam |
pañcakaṃ sūryasaṃkāśaṃ rūpasthamabhidhīyate || 46 ||

tatrāpi pūrvavatsiddhirīśvarāntapadodbhavā |
rūpātītaṃ tu deveśi prāgevoktamanekadhā || 47 ||

etyeṣā kulacakrasya samāsādvyāptiruttamā |
kathitā sarvasiddhyarthaṃ siddhayogīśvarīmate || 48 ||

sarvadātha vibhedena pṛthagvarṇavibhedataḥ |
vidyādisarvasaṃsiddhyai yogināṃ yogamicchatām || 49 ||

bhūyo'pi saṃpradāyena varṇabhedaśca kīrtyate |
strīrūpāṃ hṛdi saṃcintya sitavastrādibhūṣitām [k: bhūṣaṇāmiti] || 50 ||

nābhicakropaviṣṭāṃ tu candrakoṭisamaprabhām |
bījaṃ yatsarvaśāstrāṇāṃ tattadā syādanāratam || 51 ||

svakīyenaiva vaktreṇa nirgacchatpravicintayet |
tārahāralatākāraṃ visphuratkiraṇākulam || 52 ||

varṇaistārakasaṃkāśairārabdhamamitadyuti |
māsārdhācchāstrasaṃghātamudgiratyanivāritam || 53 ||

svapne māsātsamādhisthaḥ ṣaḍbhirmāsairyathecchayā |
ucchinnānyapi śāstrāṇi granthataścārthato'pi vā || 54 ||

p. 132)

jānāti vatsarādyogī yadi tanmayatāṃ [k: cinmayatāmiti] gataḥ |
anuṣaṅgaphalaṃ caitatsamāsādupavarṇitam || 55 ||

vidyeśvarasamānatvasiddhiranyāśca siddhayaḥ |
prativarṇavibhedena yathedānīṃ tathocyate || 56 ||

dhyātavyā yogibhirnityaṃ tattatphalabubhukṣubhiḥ |
vinyāsakramayogana trividhenāpi vartmanā || 57 ||

yo yatrāṅge sthito varṇaḥ kulaśaktisamudbhavaḥ |
taṃ tatraiva samādhāya svarūpeṇaiva yogavit || 58 ||

sphuratprabhāstatimiraṃ kuvannatra manaḥ sthiram |
pūrvakālakramādeva tattvābhyāsoktavartmanā || 59 ||

tadvarṇavyāptijaṃ sarvaṃ prāpnoti phalamuttamam |
athavā yojayetkaścidenāṃ vaśyādikarmasu || 60 ||

tadā prasādhayatyāśu sādhakasya samīhitam |
uditādityavarṇābhāṃ samastākṣarapaddhatim || 61 ||

icchayaināṃ suvarṇābhāṃ sravantīṃ madirāṃ muhuḥ |
saptāhaṃ cintayedyasya sarvāṅgeṣu yathākramam || 62 ||

sa vaśyo dāsavadbhūtvā nānyaṃ svāminamicchati |
trisaptādrūpasaṃpannāṃ padavibhrāntalocanām || 63 ||

p. 133)

urvaśīmapyanāyāsādānayetkimu mānuṣīm |
anenaiva vidhānena vāyuvahnipurāntagām || 64 ||

piṇḍākṛṣṭīkarī jñeyā yojanānāṃ [ ] śatairapi |
śaratpūrṇaniśānāthavarṇābhaiṣānusaṃdhitā || 65 ||

vidadhātyatulāṃ śāntimātmano'tha parasya vā |
drutahemapratīkāśā svasthāne saṃprayojitā || 66 ||

mahatīṃ puṣṭimādhatte daśāhenaiva śāṅkari |
jambūphalarasābhāsāṃ vajrakīlakasaṃnibhām || 67 ||

kīlane cintayedyogī mohane śukapicchavat |
vajranīlapratīkāśāṃ pratisthānanikṛntanīm || 68 ||

kālānalasamasparśāṃ ripunāśāya cintayet |
mālāyaṣṭarabhītānāṃ [g: mālayiṣṭarabhīṣṭānāmiti] 
kulamadrisamopamam (?) || 69 ||

cintayeddhūmasaṃkāśāmatyantamanalākulām |
śāntikarmoktavatkopapraśāntāvapyanusmaran || 70 ||

tāpane tu tathā kiṃtu svarūpaṃ sūryavadbudhaḥ |
vidveśe tu kapotābhāṃ bhañjane cāṣasaṃnibhām || 71 ||

utsāde nīlaharitapītaraktāsitāṃ smaret |
pratyaṅgavyādhisaṃbhūtāvekameva tadudbhavam || 72 ||

p. 134)

varṇaṃ vicintayedyogī māraṇoktena vartmanā |
tadvattu śāntikarmoktavartmanā tatprasāntaye || 73 ||

cintayetkṛtake vyādhisaṃghāte sahaje'pi vā |
athavaitāṃ japankaścidvāksiddhimabhivāñchati || 74 ||

tadānena vidhānena prakuryādakṣamālikām |
maṇimauktikaśaṅkhādipadmākṣādivinirmitām || 75 ||

hemādidhātujāṃ vātha śatārdhapramitāṃ [k: śatārdhākṣamitāmiti] 
budhaḥ |
yathā svabāhumātrā syādvalayākṛtitāṃ gatā || 76 ||

tāṃ gṛhītvā samālabhya gandhadhūpādhivāsitām |
pūjayitvā kuleśānaṃ tatra śaktiṃ niveśayet || 77 ||

pratyekamuccaredbījaṃ parābījapuṭāntagam [k: bījapuṭaṃ gartamiti] |
prasphuratkṣāntamekasminnādyakṣe viniyojayet || 78 ||

ādyarṇaṃ vyāpakaṃ bhūyaḥ sarvādhiṣṭhāyakaṃ smaret |
dvividhe'pi hi varṇānāṃ bhede vidhirayaṃ mataḥ || 79 ||

dvitīyaṃ vyāpakaṃ varṇaṃ dvitīyaṃ pūrvavannyaset |
tṛtīyādiṣu varṇeṣu phānteṣvapyevamiṣyate || 80 ||

tataḥ śaktimanusmṛtya sūtrābhāmekamānasaḥ |
akṣamadhyagatāṃ kuryādakṣasūtraprasiddhaye || 81 ||

p. 135)

cakravadbhrāmayedenāṃ yadevātra prabhāṣate |
tatsarvaṃ mantrasaṃsiddhyai japatvena prakalpate || 82 ||

homaḥ syāddīkṣite tadvaddahyamāne'tra vastuni |
viparītaprayogena saṃkruddho bhrāmayedyadi || 83 ||

nadā mārayate śatruṃ sabhṛtyabalavāhanam |
abhimantrya yadevātra cetasā karma sādhakaḥ || 84 ||

rātrau saumyādibhede'tra bhrāmayedakṣasūtrakam |
tadeva siddhyate devi kṛtasevāvidheḥ [g: sevāvidhiriti] priye || 85 ||

sevā cātrākṣasūtrasya ṣaṇmāsaṃ parivartanam |
vidhāvatra niyuktasya yogino vatsaratrayāt || 86 ||

vāksiddhirjāyate devi sarvalokasudurlabhā |
vāksiddhernāparā siddhiruttamā bhuvi jātucit || 87 ||

vāco varṇātmikā yasmādvarṇarūpā ca mālinī |
athavā cintayedenāmulkākārāṃ vicakṣaṇaḥ || 88 ||

nirgacchantīṃ svakāddehādvisphurantīṃ tato'pyataḥ |
sphuliṅgaiḥ koṭisaṃkhyātaiḥ saṃtataiḥ kiraṇākulaiḥ || 89 ||

grāmaṃ vā pattanaṃ vāpi nagaraṃ deśameva vā |
maṇḍalaṃ pṛthivī vāpi brahmāṇḍaṃ vā samastakam || 90 ||

vistīrṇaṃ vā janānīkamekaikamuttamottamam |
sa bāhyābhyantaraṃ vyāpya punaḥ pratinivṛttya ca || 91 ||

p. 136)

praviśantīṃ svakaṃ dehaṃ pūrvākārāmanusmaret |
evaṃ dine dine kuryāttadgatenāntarātmanā || 92 ||

tato'sya māsamātreṇa janāstatra nivāsinaḥ |
āgacchanti yathā tīrthaṃ śaktitejopabṛṃhitāḥ || 93 ||

rūpiṇyo vividhākārā lalanādyāstathā parāḥ |
bhūcaryaḥ kṣobhamāyānti ṣaṇmāsānnātra saṃśayaḥ || 94 ||

yonijā dvā majā (?) kṣetrajātāḥ pīṭhasamudbhavāḥ |
nāyikāśca mahādevi kramātkṣubhyanti vatsarāt || 95 ||

antarikṣagatā divyā brahmalokagatāśca yāḥ |
brahmāṇḍāntargatāḥ sarvāḥ kṣobhaṃ yānti samātrayāt || 96 ||

svaṃ svaṃ dadati vijñānaṃ sādhakena samīhitam |
yadi tā na prayacchanti sādhakena samīhitam || 97 ||

naśyate divyavijñānaṃ truṭyate kulasaṃtatiḥ |
dattvā tu sādhakendreṇa prārthitaṃ phalamādarāt || 98 ||

anupālitagurvājñāḥ siddhiṃ prāpsyantyanuttamām |
tābhyo vijñānamāsādya yogī yogikule kulī || 99 ||

bhuktvā yathepsitānbhogānyātyante paramaṃ padam |
ityayaṃ kathito leśātkauliko vidhiruttamaḥ || 100 ||

yogināṃ sarvasiddhyarthaṃ kulamārgānusāriṇām || 101 ||

iti śrīmālinīvijayottare tantre kulacakrādhikāra ekonaviṃśaḥ || 19 ||




atha

viṃśo'dhikāraḥ |

atha piṇḍādibhedena śāktaṃ vijñānamucyate |
yogināṃ yogasidhyarthaṃ saṃkṣepānna tu vistarāt || 1 ||

piṇḍaṃ śarīramityuktaṃ tadvachaktiśivātmanoḥ |
brahmānando balaṃ tejo vīryamojaśca kīrtyate || 2 ||

ajñānena niruddhaṃ tadanādyeva sadātmanaḥ |
tadāvibhūtaye sarvamaniruddhaṃ pravartate || 3 ||

tenāvirbhāvyamānaṃ tatpūrvāvasthāṃ parityajat |
yāḥ saṃvittīravāpnoti tā adhastātprakīrtitāḥ || 4 ||

tadeva padamicchanti sarvārthāvagatiryataḥ |
tasmātsaṃjāyate nityaṃ nityameva śivātmanoḥ || 5 ||

tadeva rūpamityuktamātmanaśca vinaśvaram |
rūpātītaṃ tadevāhuryatokṣāviṣayaṃ param || 6 ||

bhāvanāṃ tasya kurvīta namaskṛtya guruṃ budhaḥ |
tāvadālocayedvastu yāvatpadamanāmayam || 7 ||

naivaṃ na caivaṃ nāpyevaṃ nāpi caivamapi sphuṭam |
cetasā yogayuktena yāvattadidamapyalam || 8 ||

p. 138)

kṛtvā tanmayamātmānaṃ sarvākṣārthavivarjitam |
muhūrtaṃ tiṣṭhate yāvattāvatkampaḥ prajāyate || 9 ||

bhramaṇodbhavanidrāśca kiṃcidānanda ityapi |
tatra yatnena saṃdadhyāccetaḥ paraphalecchayā || 10 ||

tadetadātmano rūpaṃ śivena prakaṭīkṛtam |
yatra tu yaccaṃ [g: yatra tatra tviti] vijñeyaṃ śivātmakamapi sthitam || 11 ||

tadrūpodbalakatvena sthitamityavadhārayet |
tatsamabhyasato nityaṃ sthūlapiṇḍādyupāśrayāt || 12 ||

caturbhedatvamāyāti bhaktyābhinnamapi svataḥ |
sthūlapiṇḍe dvidhā proktaṃ bāhyābhyantarabhedataḥ || 13 ||

bhautikaṃ bāhyamicchanti dvitīyaṃ cātivāhikam |
tatrādyopāśrayādyogī sasaṃvittirapi sphuṭān || 14 ||

bāhyārthānsaṃpragṛhṇāti kiṃcidādhyātmikānapi |
dvitīyopāśrayāttattvabhāvārthānsaṃprapadyate || 15 ||

īkṣate ca svadehāntaḥ pīṭhakṣetrādikaṃ sphuṭam |
svarūpālocanādasya yatkiṃcidupajāyate || 16 ||

tatra cetaḥ sthirīkurvaṃstadeva sakalaṃ labhet |
tena tatra na kurvīta caitaduttamavāñchayā || 17 ||

p. 139)

piṇḍadvayavinirmuktā kiṃcittadvāsanānvitā |
vijñānakevalāntasthā padamityabhidhīyate || 18 ||

yataṃ etāmanupāpto vijñānakramayogataḥ |
rūpodayātivijñānapadatvaṃ pratipadyate || 19 ||

etaccaturvidhaṃ jñeyaṃ caturdhārthapratiśrayāt |
sa ca tattvādisaṃvittipūrvastatpatitāvadhiḥ || 20 ||

padabhāvavinirmuktā kiṃcittadanuvarjitā |
avasthā svasvarūpasya prakāśakaraṇī yataḥ || 21 ||

tena sārūpyamityuktā rūpasthaṃ yattadānvitam |
uditādiprabhedena tadapyuktaṃ caturvidham || 22 ||

jñānodayā ca deveśi mamatvāttatphalapradam |
amunā kramayogena antarā yeṣu saṃdadhat || 23 ||

cetaḥ śuddhamavāpnoti rūpātītaṃ paraṃ padam |
caturvidhaṃ tadapyuktaṃ saṃvittiphalabhedataḥ || 24 ||

trividhaṃ tatsamabhyasya sarvasiddhiphalecchayā |
caturthāttu tanuṃ tyaktvā tatkṣaṇādapavṛjyate || 25 ||

iti piṇḍādibhedena śivajñānamudāhṛtam |
yogābhyāsavidhānena mantravidyāgaṇaṃ śṛṇu || 26 ||

p. 140)

pūrvoktavidhisaṃnaddhaḥ pradeśe pūrvacodite |
nābhyādipañcadeśānāṃ parārṇaṃ kvāpi cintayat || 27 ||

svarūpeṇa prabhābhātprakāśitatanūdaram |
dīptibhistasya tīvrābhirābrahmabhuvanaṃ tataḥ || 28 ||

evaṃ saṃsmaratastasya divasaiḥ saptabhiḥ priye |
rudraśaktisamāveśaḥ sumahānsaṃprajāyate || 29 ||

āviṣṭo bahuvākyāni saṃskṛtādīni jalpati |
mahāhāsyaṃ tathā geyaṃ śivāruditameva ca || 30 ||

karotyāviṣṭacittastu na tu jānāti kiṃcana |
māsenaivaṃ yadā mukto yatra yatrāvalokayet || 31 ||

tatra tatra diśaḥ sarvā īkṣate kiraṇākulāḥ |
yāṃ yāmeva diśaṃ ṣaḍbhirmāsairyuktastu vīkṣate || 32 ||

nānākarāṇi rūpāṇi tasyāṃ tasyāṃ prapaśyati |
na teṣu saṃdadhecceto na cābhyāsaṃ parityajet || 33 ||

kurvannetadvidhaṃ yogī bhīrurunmattako bhavet |
vīraḥ śaktiṃ punaryāti pramādāttadgato'pi san || 34 ||

vatsarādyogasaṃsiddhiṃ prāpnoti manasepsitām |
parāparāmathaitasyā aparāṃ vā yathecchayā || 35 ||

p. 141)

sadbhāvaṃ mātṛsaṃghasya hṛdayaṃ bhairavasya vā |
navātmānamapi dhyāyedratiśekharameva vā || 36 ||

aghoryādyaṣṭakaṃ vāpi māheśyādikameva vā |
amṛtādiprabhedena rudrānvā śaktayo'pi vā || 37 ||

sarve tulyabalāḥ proktā rudraśaktisamudbhavāḥ |
athavāmṛtapūrṇānāṃ prabhedaḥ procyate paraḥ || 38 ||

prāṇasthaṃ parayākrāntaṃ pratyekamapi dīpitam |
vidyāṃ prakalpayenmantraṃ prāṇākrāntaṃ parāsanam || 39 ||

dvādaśārasya cakrasya ṣoḍaśārasya vā smaret |
aṣṭārasyātha vā devi tasya tredhā śatasya vā || 40 ||

ṣaḍarasyātha vā mantrī yathā sarvaṃ tathā śṛṇu |
saṃkṣepādidamākhyātaṃ sārdhaṃ cakraśatadvayam || 41 ||

etattriguṇatāṃ yāti strīpuṃyāmalabhedataḥ |
śāntyādikarmabhedena pratyekaṃ dvādaśātmatām || 42||

dakṣaścaṇḍo haraḥ śauṇḍī [k: hariścaṇḍīti] pramatho bhīmamanmathau 
|
śakuniḥ sumatirnando gopālo'tha pitāmahaḥ || 43 ||

nandā bhadrā jayā kālī karālī vikṛtānanā |
kroṣṭakī bhīmamudrā ca vāyuvegā hayānanā || 44 ||

p. 142)

gambhīrā ghoṣaṇī caiva dvādaśaitāḥ prakīrtitāḥ |
āgneyyādicatuṣkoṇā brahmāṇyādyā api priye || 45 ||

siddhir-ṛddhistathā lakṣmīrdīptirmālā śikhā śivā |
sumukhī vāmanī nandā harikeśī hayānanā || 46 ||

viśveśī ca sumākhyā [g: sāmākhyā ceti] ca etā vā dvādaśa kramāt |
etāsāṃ vācakā jñeyāḥ svarāḥ ṣaṇṭhavivarjitāḥ || 47 ||

ṣoḍaśāre'mṛtādyāśca strīṣupāṭhaprabhedataḥ |
śrīkaṇṭho'nantasūkṣmau ca trimūrtiḥ śarvarīśvaraḥ || 48 ||

argheṣo bhārabhūtiśca sthitiḥ sthāṇurharastathā |
jhiṇṭhīśo bhautikaścaiva sadyojātastathāparaḥ || 49 ||

anugraheśvaraḥ krūro mahāseno'tha ṣoḍaśa |
siddhir-ṛddhirdyutirlakṣmīrmedhā kāntiḥ svadhā dhṛtiḥ || 50 ||

dīptiḥ puṣṭirmatiḥ kīrtiḥ saṃsthitiḥ sugatiḥ smṛtiḥ |
suprabhā ṣoḍaśī ceti śrīkaṇṭhādikaśaktayaḥ || 51 ||

ṣoḍaśāre svarā jñeyā vācakatvena sarvataḥ |
aghorādyāstathāṣṭāre aghoryādyāśca devatāḥ || 52 ||

māheśyādyāstathā devi caturviṃśatyataḥ śṛṇu |
nandādikāḥ kramātsarvā brahmāṇyādyāstathaiva ca || 53 ||

p. 143)

saṃvarto lakulīśaśca bhṛguḥ śveto bakastathā |
khaḍgī pinākī bhujago [k: bhujagī navamā dālirityevaṃvidhaḥ] navamo 
balireva ca || 54 ||

mahākālo dviraṇḍaśca [k: duraṇḍaśceti] cchagalāṇḍaḥ śikhī tathā |
lohito meṣamīnau ca tridaṇḍyāṣāḍhināmakau [k: tridaṇḍāṣāḍheti] || 55 ||

umākānto'rdhanārīśo dāruko lāṅgulī tathā |
tathā someśaśarmāṇau caturviṃśatyamī matāḥ || 56 ||

kādibhāntāḥ parijñeyā aṣṭāre yādyamaṣṭakam |
makāro bindurūpasthaḥ sarveṣāmupari sthitaḥ || 57 ||

juṃkāro'tha tathā svāhā ṣaḍare ṣaṭkrameṇa tu |
baliśca balinandaśca daśagrīvo haro hayaḥ || 58 ||

mādhavaśca mahādevi ṣaṣṭhaḥ saṃparikīrtitaḥ |
viśvā viśveśvarī caiva hārādrī vīranāyikā || 59 ||

ambā gurvīti yoginyo bījaistaireva ṣaṭ smṛtāḥ |
anyonyavalitāḥ sarve svāmyāvaraṇabhedataḥ || 60 ||

akārādikṣakārāntāḥ sarvasiddhiphalapradāḥ |
dhyānārādhanayuktānāṃ yogināṃ mantriṇāmapi || 61 ||

athavā sarvacakrāṇāṃ madhye vidyāṃ yathepsitām |
mantraṃ vā pūrvamuddiṣṭaṃ japandhyāyanprasidhyati || 62 ||

iti saṃkṣepataḥ proktaḥ sarvakāmaphalapradam |

iti śrīmālinīvijayottare tantre sarvamantranirṇayo nāma
viṃśatitamo'dhikāraḥ || 20 ||



atha

ekaviṃśatitamo'dhikāraḥ

athātaḥ paramaṃ guhyaṃ śivajñānāmṛtottamam |
vyādhimṛtyuvināśāya yogināmupavarṇyate || 1 ||

ṣoḍaśāre khage cakre candrakalpitakarṇike |
svarūpeṇa parāṃ tatra sravantīmamṛtaṃ smaret || 2 ||

pūrvanyāsena saṃnaddhaḥ kṣaṇamekaṃ vicakṣaṇaḥ |
tatastu rasanāṃ [g: rasatāṃ nītveti] nītvā lambake viniyojayat || 3 ||

sravantamamṛtaṃ divyaṃ candrabimbasitaṃ [k: bimbātsmitaṃ smarediti] 
smaret |
mukhamāpūryate tasya kiṃcillavaṇavāriṇā || 4 ||

lohagandhena taccātra na pivetkiṃtu nikṣipet |
evaṃ samabhyasettāvadyāvattatsvādu jāyate || 5 ||

jarāvyādhivinirmukto jāyate tatpivaṃstataḥ |
paḍbhirmāsairanāyāsādvatsarānmṛtyujidbhavet || 6 ||

tatra svāduni saṃjāte tadāprabhṛti tatragam |
yadeva cintayeddravyaṃ tenāsyāpūryate mukham || 7 ||

p. 145)

rudhiraṃ madirāṃ vātha vasāṃ vā kṣīrameva vā |
ghṛtatailādikaṃ vātha dravaddravyamananyadhīḥ || 8 ||

athānyaṃ saṃpravakṣyāmi saṃkrāntividhimuttamam |
mṛte jīvaccharīre tu praviśedyogavidyayā || 9 ||

nivātastho jitaprāṇo jitāsanavidhikramaḥ |
kurvīta vāyunāveśamarkatūle śanaiḥ śanaiḥ || 10 ||

svādākṛṣṭividhiṃ [k: svādākṛṣyeti] yāvadguḍe nimbe ca kārayet |
śrīkhaṇḍaguḍakarpūraistataḥ kṛtvākṛtiṃ śubhām || 11 ||

praguṇāmaguṇa * * * * nyaṅgeṣu saṃdadhat |
nyāsaṃ kṛtvāpi tatrāpi vedhaṃ kuryācchanaiḥ śanaiḥ || 12 ||

nirodhaṃ tatra kurvīta ghaṭṭanaṃ tadanantaram |
ghaṭṭanaṃ nāma vijñeyamaṅgapratyaṅgacālanam || 13 ||

evamabhyasatastasya yogayuktasya yoginaḥ |
calate pratimā sā tu dhāvate cāpi saṃmukhī || 14 ||

punastāṃ prerayettāvadyāvatsvasthānamāgatām |
patitāṃ cālayedbhūya uttānāṃ pārśvataḥ sthitām || 15 ||

evaṃ sarvātmanastāvadyāvatsvavaśatāṃ gatā |
tataḥ prabhṛtyasau yogī praviśedyatra rocate || 16 ||

p. 146)

mṛte jīvaccharīre vā saṃkrāntyākrāntibhedataḥ |
prakṣipya jalavacchaktijālaṃ sarvāṅgasaṃdhiṣu || 17 ||

pratyaṅgamaṅgatastasya śaktiṃ tenākramedbudhaḥ |
svakīyaṃ rakṣayeddehahamākrāntāvanyathā tyajet || 18 ||

bahūnyapi śarīrāṇi dṛḍhalakṣyo yadā bhavet |
tadā gṛhṇātyasaṃdehaṃ yugapatsaṃtyajannapi || 19 ||

athāparaṃ pravakṣyāmi sadyaḥ pratyayakārakam |
samādhānāmṛtaṃ divyaṃ yogināṃ mṛtyunāśanam || 20 ||

candrākṛṣṭikaraṃ nāma māsādvā yogabhogadam |
śuklapakṣe dvitīyāyāṃ meṣasthe tigmarociṣi || 21 ||

snātaḥ śucirnirāhāraḥ[k: nirākāra] kṛtapūjāvidhirbudhaḥ |
nyaseccandre kalājālaṃ parayā samadhiṣṭhitam || 22 ||

sarvabādhāparityakte pradeśe saṃsthito budhaḥ |
ekacittaḥ praśāntātmā śivasadbhāvabhāvitaḥ || 23 ||

tāvadālokayeccandraṃ yāvadastamupāgataḥ |
tato bhuñjīta dugdhena candradhyānasamanvitaḥ || 24 ||

evaṃ dine dine kuryādyāvatpañcadaśī bhavet |
śeṣāṃ rātriṃ svapeddhyāyaṃścandrabimbagatāṃ parām || 25 ||

p. 147)

paurṇamāsyāṃ tathā yogī ardharātra upasthitaḥ |
jane niḥśabdatāṃ yāte prasupte sarvajantubhiḥ || 26 ||

candrakoṭikaraprakhyāṃ tārahāravibhūṣaṇām |
sitāmbaraparīdhānāṃ sitacandanacarcitām || 27 ||

mauktikābharaṇopetāṃ surūpāṃ navayauvanām |
āpyāyanakarīṃ devīṃ samantādamṛtasravām || 28 ||

rājīvāsanasaṃsthāṃ ca yoganidrāmavasthitām |
candrabimbe parāṃ devīmīkṣate nātra saṃśayaḥ || 29 ||

tatastāṃ cetasā vyāpya tāvadākarṣayetsudhīḥ |
yāvanmukhāgramāyātā tatra kuryātsthiraṃ manaḥ || 30 ||

tataḥ prasārya vadanaṃ dhyānāsaktena cetasā |
nigirettāṃ samākṛṣya bhūyo hṛdi vicintayet || 31 ||

tayā praviṣṭayā dehaṃ yogī duḥkhavivarjitaḥ |
śaktitulyabalo bhūtvā jīvedācandratārakam || 32 ||

eko'pyanekadhātmānaṃ saṃvibhajya nijecchayā |
trailokyaṃ yaugapadyena bhunakti vaśatāṃ [k: vaśameti ceti] gatam || 33 ||

āsādya vipulānbhogānpralaye samupasthite |
paramabhyeti nirvāṇaṃ duṣpāpamakṛtāmanām || 34 ||

p.148)

athavā tanna śaknoti gagane paricintitum |
pratibimbe tathā dhyāyedudakādiṣu pūrvavat || 35 ||

tatpītvā manasā śeṣāṃ svapedrātrimanusmaran |
pūroktaṃ samavāpnoti ṣaḍbhirmāsairakhaṇḍitam || 36 ||

iti śrīmālinīvijayottare tantre candrākṛṣṭyadhikāra ekaviṃśatitamaḥ || 21 ||




atha

dvāviṃśatitamo'dhikāraḥ |

athānyatparamaṃ guhyaṃ kathayāmi tava priye |
yanna kasyacidākhyātaṃ yogāmṛtamanuttamam || 1 ||

sūryākṛṣṭikaraṃ nāma yogināṃ yogasiddhidam |
samyaṅmāsacatuṣkeṇa dināṣṭābhyadhikena tu || 2 ||

praharasyāṣṭamo bhāgo nāḍīketyabhidhīyate |
tatpādakramavṛddhyā tu prativāsaramabhyaset || 3 ||

udayāstamayaṃ yāvadyatra sūryaḥ pradṛśyate |
pradeśe tatra vijane sarvabādhāvivarjite || 4 ||

ahorātroṣito yogī makarasthe divākare |
śūcirbhūtvā kṛtanyāsaḥ kṛtaśītapratikriyaḥ || 5 ||

bhānubimbe nyaseccakramaṣṭaṣaṭdvādaśārakam |
śivaśaktigaṇopetaṃ bhairavāṣṭakasaṃyutam || 6 ||

varṣādi-ṛtusaṃyuktaṃ māsair-ṛkṣādibhiryutam |
aṣṭāraṃ cintayedbimbe śeṣaṃ raśmiṣu cintayet || 7 ||

tatra cittaṃ samādhāya proktakālaṃ vivakṣaṇaḥ |
animīlitanetrastu bhānubimbaṃ nirīkṣayet || 8 ||

p. 150)

tataḥ kāle vyatikrānte sunimīlitalocanaḥ |
praviśedandhakārāntarbhuvanaṃ nirupadravam || 9 ||

tatronmīlitanetrastu bimbākāraṃ prapaśyati |
saṃdhāya tatra caitanyaṃ tiṣṭhedyāvanna paśyati || 10 ||

naṣṭe'pi cetasā śeṣaṃ tiṣṭhetkālamanusmaran |
evaṃ pāsena deveśi sthiraṃ tadupajāyate || 11 ||

māsadvayena sarvatra prekṣate nātra saṃśayaḥ |
tribhiḥ samīkṣate sarvaṃ ravibimbasamākulam || 12 ||

proktakālāvasānena vṛṣasthe tigmarociṣi |
prekṣate sūryabimbāntaḥ sacakraṃ parameśvaram || 13 ||

upalabdhaṃ samākṛṣya mukhāgne sthiratāṃ nayet |
āpīya pūrvavatpaścādvṛttiṃ niścalatāṃ nayet || 14 ||

tatra tena sahātmānamekīkṛtya muhūrtakam |
yāvattiṣṭhati deveśi tāvatsaṃtyajati kṣitim || 15 ||

paśyato janavṛndasya yāti sūryeṇa caikataḥ |
anena vidhinā devi siddhayogīśvareśvaraḥ || 16 ||

śivādyavaniparyantaṃ na kvacitpratihanyate |
bhuktvā tu vipulānbhogānniṣkale līyate pare || 17 ||

tadetat khecarīcakraṃ yatra khecaratāṃ vrajet |
siddhayogīśvarītantre sarahasyamudāhṛtam || 18 ||

p. 151)

athavā cakrarūpeṇa sabāhyābhyantaraṃ svakam |
dehaṃ cintayataḥ pūrvaṃ phalaṃ syānniścitātmanaḥ || 19 ||

uccaranphādināntā vā dhvanijyotirmarudyutām |
viśrāmya mastake cittaṃ kṣaṇamekaṃ vicakṣaṇaḥ || 20 ||

trīśūlena prayogena sadyastyajati medinīm |
evaṃ samabhyasanmāsāccakravadbhramati kṣitau || 21 ||

muhūrtaṃ spṛśate bhūmiṃ muhūrtācca nabhastalam |
śivārāvādi kurute valanāsphoṭanāni ca || 22 ||

mudrābandhādikaṃ vātha bhāṣā vā vaktyanekadhā |
ṣaṇmāsānmedinī tyaktvā samādhistho dṛḍhendriyaḥ || 23 ||

tiṣṭhate hastamātreṇa gagane yogacintakaḥ |
paśyate yoginīvṛndamanekākāralakṣaṇam || 24 ||

saṃvatsareṇa yuktātmā tatsamānaḥ prajāyate |
paśyatāmeva lokānāṃ tejobhirbhāsayandiśaḥ || 25 ||

yātyutkṛṣya mahīpṛṣṭhāt khecarīṇāṃ patirbhavet |
mudrā khageśvarī nāma kathitā yoginīmate || 26 ||

jāgaritvātha vā yogī tryahorātramatandritaḥ |
caturthe'hni niśārambhe pūjayitvā maheśvaram || 27 ||

tato'ndhakāre bahule kṛtarakṣāvidhirbudhaḥ |
bhruvormadhye samādhāya kṣaṇaṃ cetaḥ prapaśyati || 28 ||

p. 152)

tejo rūpapratīkāśaṃ paryaṅkāsanamāsthitaḥ |
prayogaṃ tveva satataṃ yogayuktaḥ samabhyasetu || 29 ||

paśyate māsamātreṇa gṛhāntarvastu yat sthitam |
dvābhyāṃ bahiḥ sthitaṃ sarvaṃ tribhiḥ pattanasaṃsthitam || 30 ||

caturbhirvipayāntaḥsthaṃ pañcabhirmaṇḍalāvadhi |
ṣaḍbhirmāsairmahāyogī cchidrāṃ paśyati medinīm || 31 ||

sarvajñatvamavāpnoti vatsarānnātra saṃśayaḥ |
yoginīsiddhasaṃghasya sadbhāvavyāptisaṃsthitam || 32 ||

paśyate yogayuktātmā tatsamānaśca jāyate |
anenaiva vidhānena svastikāsanasaṃsthitaḥ || 33 ||

binduṃ nānāvidhaṃ tyaktvā śuddharūpamanusmaret |
tenāpi sarvaṃ pūrvoktaṃ vyāpnoti phalamuttamam || 34 ||

iti śrīmālinīvijayottare tantre sūryākṛṣṭyadhikāro dvāviṃśatitamaḥ || 22 ||



atha

trayoviṃśatitamo'dhikāraḥ |

athātaḥ paramaṃ guhyaṃ kathayāmi tavādhunā |
sadyopalabdhijanakaṃ [k: sadyaḥ phalānujanakamiti] yogināṃ 
yogasiddhaye || 1 ||

pūrvanyāsena saṃnaddhaścittaṃ śrotre niveśayet |
nivāte svalpavāte vā bāhyaśabdavivarjite || 2 ||

tatastatra śṛṇotyeṣa yogī dhvanimanāvṛtam [g: dhvanimanāhatamiti] |
suviśuddhasya kāṃsyasya hatasyeha muhurmuhuḥ || 3 ||

yamākarṇya mahādevi puṇyapāpaiḥ pramucyate |
tatra saṃdhāya caitanyaṃ ṣaṇmāsādyogavittamaḥ || 4 ||

rutaṃ pakṣigaṇasyāpi prasphuṭaṃ vettyayatnataḥ |
dūrācchravaṇavijñānaṃ vatsareṇāsya jāyate || 5 ||

sarvakāmaphalāvāptirvatsaratritayena ca |
siddhyatīti kimāścaryamanāyāsena siddhyati || 6 ||

athavā grahaṇe māsi kṛtvā sūryaṃ tu pṛṣṭhataḥ |
pūrvanyāsena saṃnaddhaḥ kiṃcidbhittimadāśritaḥ || 7 ||

p. 154)

lakṣayedātmanaśchāyāṃ mastakordhvamanāhatām |
dhūmavartiviniṣkrāntāṃ tadgatenāntarātmanā || 8 ||

yāti tanmayatā tatra yogayukto yathā yathā |
tathā tathāsya mahatī sā vittirupajāyate || 9 ||

tatastatra mahātejaḥ sphuratkiraṇasaṃnibham |
paśyate yatra dṛṣṭe'pi sarvapāpakṣayo bhavet || 10 ||

tadasyābhyasato māsātsarvatra pravisarpati |
jvālāmālākulākārā diśaḥ sarvāḥ prapaśyati || 11 ||

ṣaṇmāsamabhyasanyogī sarvajñatvamavāpnuyāt |
abdaṃ divyatanurbhūtvā [g: abdāddivyatanuriti] śivavanmodate ciram || 12 
||

atha jātyaḥ pravakṣyante sapūrvāsanaśāśvatāḥ |
hīṃ kṣlāṃ [g: kṣāmiti] kṣvīṃ vaṃ tathā kṣaṃ ca pañcakasya 
yathākramam || 13 ||

haṃ yaṃ raṃ laṃ tathā vaṃ ca pañcakasyāparasya ca |
ṛṃ ṝṁ ḷṃ ḹṃ tathā oṃ auṃ haḥ aṃ ākarṇikāvadhau || 14 ||

kesareṣu bhakārāntā haṃ hāṃ hiṃ hīṃ ca huṃ tathā |
hūṃ heṃ haiṃ ca daleṣvevaṃ svasaṃjñābhiśca śaktayaḥ || 15 ||

maṇḍalatritaye śeṣaṃ sūkṣmaṃ pretasya kalpayet |
jrakāraṃ śūlaśṛṅgāṇāmityetatparikīrtitam || 15 ||

p. 155)

anuktāsanayogeṣu sarvatraivaṃ prakalpayet |
namaḥ svāhā tathā vauṣaṭ huṃ vaṣaṭ phaṭ ca jātayaḥ || 16 ||

prāyaścitteṣu sarveṣu japenmālāmakhaṇḍitām |
bhinnāṃ vāpyathavābhinnāmatikramabalābalām || 17 ||

sakṛjjapātsamārabhya yāvallakṣatrayaṃ priye |
prāṇavṛttinirodhena tataḥ parataraṃ kvacit || 18 ||

sadā bhramaṇaśīlānāṃ pīṭhakṣetrādikaṃ bahiḥ |
prayogaṃ saṃpravakṣyāmi sukhasiddhiphalapradam || 19 ||

nāsākrāntaṃ mahāprāṇaṃ daṇḍarūpaṃ sabindukam |
tadvadguhyaṃ ca kurvīta vidyeyaṃ dvyakṣarāṃ matā || 20 ||

asyāḥ pūrvoktavidhinā kṛtasevaḥ prasannadhīḥ |
pīṭhādikaṃ bhrametsiddhyai nānyathā vīravandite || 21 ||

tatpradeśaṃ samāsādya mantrairātmānamādarāt |
vidyayā veṣṭayetsthānaṃ raktasūtrasamānayā || 22 ||

bahudhānanyacittastu sabāhyābhyantaraṃ budhaḥ |
tatastatra kvacitkṣetre yoginyā bhīmavikramāḥ || 23 ||

samāgatya prayacchanti saṃpradāyaṃ svakaṃ svakam |
yenāsau labdhamātreṇa saṃpradāyena subrate || 24 ||

tatsamānabalo bhūtvā bhuṅkte bhogānyathepsitān |
athavā kṛtasevastu lakṣamekaṃ japetsudhīḥ || 25 ||

p. 156)

tarpayitvā daśāṃśena kṣudrakarmasu yojayet |
tatroccāritamātreyaṃ viṣakṣayakarīṃ bhavet || 26 ||

cakravadbhramamāṇaiṣā yonau raktāṃ vicintayet |
gamāgamakramādvāpi vinda * * * vāritā || 27 ||

tatrasthaścāśu saṃghātavighātākuñcanena tu |
kṣaṇādananyacittastu kṣobhayedurvaśīmapi || 28 ||

kṛtasevāvidhirvātha lakṣatrayajapena tu |
mahatīṃ śriyamādhatte padmaśrīphalatarpitā || 29 ||

ṣaḍutthāsanasaṃsthānā sādhitāpyuktavartmanā |
sarvasiddhikarī devī mantriṇāmupajāyate || 30 ||

śūlapadmavidhiṃ muktvā navātmādyaṃ ca saptakam |
ṣaḍutthamāsanaṃ dadyātsarvacakravidhau budhaḥ || 31 ||

mudrā ca mahatī yojyā hṛdbījenopacārakam |
athānyatsaṃpravakṣyāmi svapnajñānamanuttamam || 32 ||

hṛccakre tanmayo bhūtvā rātrau rātrāvananyadhīḥ |
māsādūrdhvaṃ mahādevi svapne yatkiṃcidīkṣate || 33 ||

tattathyaṃ jāyate tasya dhyānayuktasya yoginaḥ |
tatraiva yadi kālasya niyamena rato bhavet || 34 ||

tadā prathamayāme tu vatsareṇa śubhāśubham |
ṣaṭtrimāsena kramaśo dvitīyādiṣvanukramāt || 35 ||

p. 157)

aruṇodayavelāyāṃ daśāhena phalaṃ labhet |
saṃkalpapūrvake'pyevaṃ pareṣāmātmano'pi vā || 36 ||

kvacitkārye samutpanne suptajñānamupākramet |
ityetatkathitaṃ devi siddhayogīśvarīmatam || 37 ||

nātaḥ parataraṃ jñānaṃ śivādyavanigocare |
ya evaṃ tattvato veda sa śivo nātra saṃśayaḥ || 38 ||

tasya pādarajaḥ mūrdhni ghṛtaṃ pāpapraśāntaye |
etacchrutvā mahādevī paraṃ saṃtoṣamāgatā || 39 ||

evaṃ kṣamāpayāmāsa praṇipatya punaḥ punaḥ |
iti vaḥ sarvamākhyātaṃ mālinīvijayottaram || 40 ||

mamaitatkathitaṃ devyā yogāmṛtamanuttamam |
bhavadbhirapi nākhyeyamaśiṣyāṇāmidaṃ mahat || 41 ||

na cāpi paraśiṣyāṇāmaparīkṣya prayatnataḥ |
sarvathaitatsamākhyātaṃ yogābhyāsaratātmanām || 42 ||

prayatānāṃ vinītānāṃ śivaikārpitacetasām |
kārtikeyātsamāsādya jñānāmṛtamidaṃ mahat || 43 ||

munayo yogamabhyasya parāṃ siddhimupāgatāḥ |

iti śrīmālinīvijayottare tantre trayoviṃśatitamo'dhikāraḥ || 23 ||


samāptaṃ cedaṃ mālinīvijayottaraṃ nāma mahātantram ||

śrīmatpratāpabhūbharturājñayā prītaye satām |
madhusūdanakaulena saṃpādyedaṃ prakāśitam ||

śrīsāmbaśivārpaṇamastu |



###########   END OF FILE  #######