####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00034
Uniform title: mahānayaprakāśa
Main title: mahanayaprakāśaḥ
Author : unknown (see catalog record notes)
Editor : śāstrī k. s.

Description: 
The e-text is from the Trivandrum Sanskrit Series No. CXXX,    also published in Sri Citrodaya-mañjari Series No. XIX, 1937.


Notes: 
The e-text was transcribed by the staff of Muktabodha under the supervision of mark S. G. Dyczkowski.     Ascribed to abhinavagupta by the T.S.S. edition editor śāstrī k. s.  but ascribed to śivānanda II by Navjivan Rastogi in his The Krama Tantrism of Kashmir pg. 257 .    Revision 0: 02/08/2006

Publisher : Trivandrum Sanskrit Series
Publication year : 1937
Publication city : Trivandrum
Publication country : India
####################################################
|| śrīḥ ||
mahānayaprakāśaḥ

(p. 1) yasyāḥ kramākramapadojjhitavṛttirūpaḥ (-padojatsitanṛ-)
sākṣād virājatitarāṃ (-* rāṃ) kramabhūmikāntaḥ |
tāṃ kāmapi pragahanānubhavaikarūpāṃ
devīṃ namāmyapaṭaṭaṅkamayapratiṣṭhām || 1/1 ||

vicakṣaṇairyadyapi samyayukto 
mahārthacakrakramasampradāyaḥ |
prakurvate hanta tathāpi yuktyā 
yathānvitaḥ svānubhavāviluptaḥ || 1/2 ||

svātmasvarūpamaniketanamaprameyaṃ 
svābhāsamacchamaviluptamatisvatantram |
viśvātmakaṃ tadativarti ca yat tadasya
mithyāvikalpajanitau kila bandhamokṣau || 1/3 ||

evaṃvidhaṃ yadaghigantumihātmatattvam 
mithyāvikalpavibhavoddalanaṃ ca samyak |
yuktiṃ mahānayamayīṃ na vihāya śakyaṃ
sarvottamottamatamo hi tato mahārthaḥ || 1/4 ||

(p. 2) tasyāsya samprati yathāsthitalokayātrā-
rūpasya sarvaviṣayapratipattiyuktyā |
unmīlyate kathanapūjanasaṃkramātmā
nityāviluptavibhavo gurusampradāyaḥ || 1/5 ||

idamanubhavasārayuktigarbhaṃ
gurumukhamudgatasaṃśayāvasānam |
jhaṭiti parapadāptaye'ntaraṃ
hṛdi parimṛśya nidhīyate mahadbhiḥ || 1/6 ||

atitīvraṃśaktipātādārūḍhe śāmbhave samāveśe |
svānandāmṛtarūpaṃ jīvanmukteḥ prakalpate viśvam || 1/7 ||

atimātramadhyamṛdutābhedenāpi pravartamānasya |
sūkṣmekṣikāprakāro vilasati tasyātiśaktipātasya || 1/8 ||

anidaṃprathamatayā yadviśvagataṃ vyāpakaṃ nijaṃ rūpam |
anupāyayogayuktyā gurumukhadṛṣṭena sampradāyena || 1/9 ||

sarvānubhavadaśāyāṃ yadaluptaḥ sarvadā bhavet pṛthak |
tasya svabhāvavilasadviśvamayasya svarūpakiraṇasya || 1/10 ||

so'yaṃ purāṇādhiṣṭhānaḥ kramaḥ kramavivarjitaḥ |
mahārthasya parā niṣṭhā galitasvaparasthiteḥ || 1/11 ||

purāṇasyādisiddhasya yadadhiṣṭhānamātmanaḥ |
gītaṃ purāṇādhiṣṭhānaṃ bhāṣayātu (-tat) taduttamam (tū-) || 1/12 ||

yukticaryādivikṣepavāsanākṣobhavarjitaḥ |
anupāyakramaḥ so'yaṃ yasya rūḍhaḥ sa (rūḍhasya) yogirāṭ || 1/13 ||

(p. 3) sarvāvaraṇanirmukto hānādānapadojjhitaḥ |
sthitaye svasvarūpasya nānyat kiñcidapekṣate || 1/14 ||

nirvikalpavikalpādisaṃvidoghasamāśrayā |
yā citistanmayasparśāt (cita-) parānandacamatkṛtiḥ (-teḥ) || 1/15 ||

sā bhūtavyoma vāmeśī gurudṛkpātasāhasāt |
pīṭhakramādau sarvatra viśuddhistasya jāyate || 1/16 ||

anapahnavanīyasya viśvasyāsya yathodayaḥ |
sthitināśau svabhāvasya svarūpe ca vilepanam || 1/17 ||

nirāvaraṇatā cāpi yathāsmin sati jāyate |
parānandacamatkāracandrikācchāntacetasaḥ || 1/18 ||

atra sarvatra viṣaye nirvikalpaḥ pravartate |
guruprasādād yajjñānaṃ * * * * kilocyate || 1/19 ||

mahātivratame * * * * svānubhavasthite |
kathanādikramātītā viśuddhistatra kāśate || 1/20 ||

mahātīvratame cāsmin pravṛtte guruśāsanāt |
dṛṣṭādṛṣṭādisaṅketakathāmātrā prakāśate || 1/21 ||

prakāśante (-te) mahātīvre vyavahāradaśāsu yāḥ (-darāsu yāḥ) |
pratyekaviṣayāvṛttyā bahirantarmukhodayāḥ || 1/22 ||

saṃviddevyo mahāvyomasaṃghāditroṭitāśśalāḥ(?) |
tāsāṃ pūjanavicchittyā svarūpaṃ samprakāśate || 1/23 ||

vikalpavāsanāśūnyaprarūḍhasvātmasaṃvidaḥ (-rūḍhassā-) |
prathate kasyacijjñānamanapekṣitasādhanam || 1/24 ||

(p. 4) udriktanirvikalpāṃśaṃ mandamandavikalpataḥ |
prathate kasyacijjñānaṃ saṅketādikathāśrayāt || 1/25 ||

pūjanādikramāpekṣaṃ  saṃsthite (svaṃ-) * * kasyacit |
vikalpasāmanantaryānnirvikalpaḥ pravartate || 1/26 ||

apravṛttasya * * * śaktipātasya yā sthitiḥ |
atimātrādibhedena tato'yamuditaḥ (-mucitaḥ) kramaḥ || 1/27 ||

paradhārāsamārūḍhamāheśvaryapradarśakaḥ |
śaktipātakramo yo'yaṃ mahātīvratamādikaḥ || 1/28 ||

nānyatra sa tathoddiṣṭa ityato gurugauravāt |
mahānayakrame pūrvaṃ mahāśabdo'rthayuktibhāk (uhāśabdo-)|| 1/29 ||

kulakaulādikāmnāyaśāktatrikamatādiṣu |
sarahasyapraprañceṣu svarūpasthitihetuṣu || 1/30 ||

siddhāntatantrabhedeṣu nānyopāyātmakeṣu ca |
sthiteṣvapi ca sollekho vyāpako hi mahānayaḥ || 1/31 ||

paurvāparyaparikṣīṇā ye mahārthārthinaḥ kila |
asti nānyā gatisteṣāṃ vikalpagrāsasāhasāt || 1/32 ||

suprabuddho'napekṣo'tra prabuddho'pekṣate punaḥ |
saṅketādikathāmātraṃ tathā cakraprapūjanam || 1/33 ||

dṛṣṭanaṣṭādi saṅketakathāmātrasya marma yat |
tat prapañcitamanyatra yadataḥ sāmprataṃ manāk || 1/34 ||

etatpūjanamakramakramamayaṃ pīṭhakramopakramaḥ 
cakrollāsavibhāgayuktighaṭanāsatsampradāyojjvalaḥ | (vakrollāsa- -
ghaṭanaṃ-)
(p. 5) mā gālluptamihedṛśaṃ (gā * * mihe) gurumukhaṃ kālakramādityataḥ 
samyak * * * * * * * navaśādasmābhirunmīlyate || 1/35 ||


iti śrīmahānayaprakāśe sarvavailakṣaṇyapratipādano nāma prathamollāsaḥ || 




atha dvitīya-ullāsaḥ |

(p. 5) paramarahasyā * * * guruvaramukhasampradāyasadbījam |
pīṭhakramasvarūpaṃ natvā santanyate prathamam || 2/1 ||

yathāsthitaṃ samāśritya bhūtabhāvātmakaṃ jagat |
pīṭhakramasya saṃsthānaṃ kathyate hṛdayaṅgamam || 2/2 ||

devīcakrasya yaḥ sphāraḥ pīṭhakramatayā sthitaḥ |
yāgādikramarūpeṇa rajjñaptirguruṇocyate || 2/3 ||

prādhānyena sthito loke vyavahāraḥ kriyātmakaḥ |
ataḥ pīṭhakramajñaptistanmukhenaiva kathyate || 2/4 ||

anenaivāśayenādau caruprāśanapūrvakaḥ |
guruṇā sampradāyasya bhājanaṃ kriyate paśuḥ || 2/5 ||

pīṭhaśmaśānakṣetreśamelayāgātmako hi yaḥ |
pīṭhakramo'tra pīṭhebhyo vyomeśvaryādayaḥ kramāt || 2/6 ||

yaḥ śūnyaprāṇadhībuddhikarmendriyacayātmakaḥ |
kāyo yaśca jaḍatvena bāhyena viṣayātmanā || 2/7 ||

vyomna ārabhya pṛthivīparyantena vyavasthitaḥ |
anantānubhavādhārasiddhayoginiṣevitaḥ || 2/8 ||

(p. 6) etatsaṅketakasthānamāśritāścinmarīcayaḥ |
dṛśyante prakaṭaṃ yasmādasau pīṭhakrastataḥ || 2/9 ||

karmendriyātmano yāgācchūnyāntaṃ yāvadāsthitaḥ |
udyogādikramaḥ kāye bahiḥ pṛthvyādyanukramāt || 2/10 ||

pūrvaṃ pūrvaṃ mahāvyāptiratra sarvatra vartate |
āśrayāśrayibhāvaścāpyavibhinnatayā sthitaḥ || 2/11 ||

niśāvaraṇarūpatvādanantatvādanākulā |
pīṭhasvarūpe (-rūpaṃ) vyomeśi viśrāntiḥ sarvasaṃvidām || 2/12 ||

antaśśūnyātmanā kāye saiva paṭhitayā sthitā |
yaḥ karmendriyaparyantaḥ saṃvitsphārastadāśrayaḥ || 2/13 ||

pātādārabhya pṛthivīparyantaṃ yajjaḍātmakam |
etasyaivāśrayatvena nabhaḥ pīṭhakalā bahiḥ || 2/14 ||

akālakalite vyomni spandamānā tu yā citi |
kāladāhaikabhūḥ saiṣā śmaśānaṃ khecarī matā || 2/15 ||

apavedye suṣupteṣu prāṇaḥ spandanaśaktimān |
kālaṃ grasati dehāntaḥ śmaśānaṃ sa tathā smṛtaḥ || 2/16 ||

vedyasya kalanārūpe (-rūpaṃ) kālastvapi samāpyate |
kālagrasanaśīlatvāt tvak śmaśānaṃ tu sā bahiḥ || 2/17 ||

etadrūpaṃ paraṃ kṣetraṃ prakāśānandabhūmigam |
pālaye * * * * bhyāṃ bhūpari kṣetrapastataḥ || 2/18 ||

buddhipramātā dehāntaḥ śūnyaprāṇamayaṃ yataḥ | 
kṣetraṃ pālayate tena kṣetreśaścaiva (-śavasyai) tanmayaḥ || 2/19 ||

(p. 7) bāhye'pi viṣaye tejastvaṅ nabhomaṇḍalātmakam |
kṣetraṃ pālayate tena tadātmatvena saiva tat || 2/20 ||

viśvābhāsamayaṃ jñānaṃ yadgataṃ parasaṃvidi |
sāmarasyātmanā saiṣā melaḥ saṃhārabhakṣiṇī || 2/21 ||

ābhāsānāṃ sa saṃhāro yā prakāśāntarāsthitiḥ |
sāmarasyātmanā saiṣā pratyāvṛttyā samantataḥ || 2/22 ||

bhakṣayantyāntarasparśādataḥ saṃhārabhakṣiṇī |
viṣayābhogasambhūtacamatkāropabṛṃhitam || 2/23 ||

buddhīndriyābhāsamayaṃ jñānaṃ yatropaśāmyati |
bījabhāvātmanā melaḥ snigdho yaḥ pratyagātmanā || 2/24 ||

a * vatā bahiryeyaṃ pratibimbagrahakṣamā |
sāmyāntararasāsvādamelāvātmānubhūyate || 2/25 ||

vāsanāvedhasaṃskārasāmarasyātmanā sthitiḥ |
āhanyamāne rabhasāt paratarpaṇahetutaḥ || 2/26 ||

pūrṇāntaramahārāvadrāvaṇādalikulākulā (-drāvaṇā * li-) |
nirāvaraṇadurllakṣyasvaviśrāntipadonmukhī(m?) || 2/27 ||

ādyayāgamayī (ādyagāya-) ye (yo) yaṃ gabhīrodārabhūmikā |
raudraraudreśvarī yāgastasmādiṣṭo gurūttamaiḥ || 2/28 ||

alaṃgrāsaṃkramaḥ so'yaṃ mahāsāhasajanmabhūḥ |
adhikapriyamelāvāddhaṭhamelopalakṣaṇaḥ || 2/29 ||

antaḥkāye'pi ye bhāvā hyuktāḥ karmendriyaiḥ sphuṭāḥ |
tatkṣaṇe vismṛtisteṣāmākāṅkṣāyāḥ parikṣayāt || 2/30 ||

(p. 8) sāntarīyakaviśrāntiryo'yaṃ yāgaḥ svasākṣitaḥ |
atrānuguṇyametasyā devyāḥ sañcetyate sphuṭam || 2/31 ||

dṛśyate yat tayā pṛthvī (bahiḥ pṛthivī) tattatkarmavyapāśrayā |
sa yāgo yatra bhāvānāṃ viśrāntiḥ samanantaram || 2/32 ||

itthaṃ śmaśānatārūpacijjaḍātmaprameyatā (smāśyānatā- -m)|
pīṭhakrameṇa saṃśritya devīcakraṃ vijṛmbhate || 2/33 ||

sarvayāpakarūpatvāt tathā pratyakṣavedanāt |
sarvādyantapratiṣṭhānādetat sarvottamatvataḥ || 2/34 ||

sarvaṃsahasvabhāvatvāt parānugrahahetutaḥ |
prakarṣanutimātratvāt pīṭhaṃ praṇavasaṃjñitam || 2/35 ||

mahācakrakramo yo'yaṃ kathyamāno yathāyatham |
atrāntarnetranāthasya prakaṭānubhavo'bhavat (n) || 2/36 ||

tato dhyātaṃ (dhyānaṃ) tu tatpīṭhaṃ sarvapīṭhottamaṃ bahiḥ |
yoginīsiddhasaṃsevyamuttarasyāṃ diśi sthitam || 2/37 ||

dhāmakramasyāpi vapurantareva nirūpitam |
sarvajñānāśrayatvena lokayātrāpratiṣṭhitam || 2/38 ||

yatra yatra patantyetā antarvā yadi vā bahiḥ |
saṃviddevyo vyāptisārāstaddhāma parikīrtitam || 2/39 ||

yadi kācidihānyāsti sūkṣmā saṃśayakālimā (-tā) |
prameyalocanādagre sā svayaṃ vinivartate || 2/40 ||

pratyakṣakāyaviṣayānubhavaikaniṣṭhaḥ 
pīṭhakramasya kathito gurusampradāyaḥ |
(p. 9) atraiva dattahṛdayā vilayaṃ nayanti
mithyāvikalpajanitaṃ bhavamokṣajālam || 2/41 ||


iti śrīmahānayaprakāśe pīṭhasvarūpanirūpaṇaṃ nāma dvitīyollāsaḥ || 2 ||



atha tṛtīya ullāsaḥ |

(p. 9) udayāvabhāsakālagrāsādīnāṃ (* *) [-sa] svarūpaviśrāntiḥ |
ākuñcanaprasāraṇavaśato (-kāraṇavaśato) yatrāsti tatpadaṃ natvā || 3/1 ||

āmūlaviśvavibhavapraspandanayuktisundarodāram |
prātītikasvarūpaṃ brūmo vyomeśvarīcakram || 3/2 ||

pīṭhakrame yat prakaṭaṃ raśmicakraṃ pratiṣṭhitam |
ā mūlāt tasya saṃsthānaṃ kathyate saṃvidātmanā (-vidunmanā) || 3/3 ||

śabdādipañcavargātmaviśvaṃ hi yadidaṃ sthitam |
na śakyaṃ tadapahnotuṃ svasaṃvedanasiddhitaḥ || 3/4 ||

saṃvedanād bahirbhāvenāsya siddhiḥ kathañcana |
jñānātmatāṃ vinā yasmād bāhyatāpi na sidhyati || 3/5 ||

ato bāhyātmatā loke śarīrāpekṣayā sthitā |
saṃvedanaṃ pṛthak tasya (* *) sarvajñenāpi duṣkaram || 3/6 ||

ataḥ saṃvedanāyattā sattā viśvasya sarvataḥ |
jñānādhikatvāt siddhestu na māyā nāpi vāsanā || 3/7 ||

(p. 10) digdeśakālākārādikalātaṅkavivarjitam (-kālā * rādi-) |
kalpyaviśvātmakatve'pi (katpa-) taduttīrṇatayā sthitam || 3/8 ||

nanu viśvamayī saṃvit sarvasyānubhavāt sthitā |
taduttīrṇasvarūpāyāstasyā nānubhavastadā || 3/9 ||

prathaiva cet kathaṃ viśvaṃ cinmātraṃ hi praśekṣyati (pratheṣyati) |
nirāvaraṇarūpāyāścito viśvātmatā kutaḥ || 3/10 ||

nīlaprakāro nīlātmā prakāśātiśayo na cet |
nīlaprakāro naiva syādātmasaṃvitprathābalāt (syādāddha-) || 3/11 ||

tasmānnīlaprakāśo yaḥ sa nīlātiśayātmakaḥ |
nīlābhinnaprathāsiddhā nīlatāpyanubhūyate || 3/12 ||

tasyāḥ prathaikarūpatve nīlanihnavasambhavaḥ |
prathābahiṣṭve'pyeṣaiva nyāyoktiryadataḥ pṛthak || 3/13 ||

vāsanāhetuvaicitryād (-citryā) viśvavaicitryasaṅgatiḥ (-gati) |
natu śuddhasvarūpāyāḥ prathāyā eva jṛmbhaṇāt || 3/14 ||

prakāśamānaṃ viśvaṃ tadityuktirupapadyate |
prakāśa eva viśvaṃ tu sarvānubhavavāsitam || 3/15 ||

viśvottīrṇaprakāśastu svatantro nānubhūyate |
yadataḥ svapratho'pyeṣa siddho viśvaniyantritaḥ || 3/16 ||

atrocyate yaduktaṃ tu viśvottīrṇacitiḥ katham |
sañcetyate samāviśya viśvānubhavabhūmikām || 3/17 ||

nīlānubhavakāle hi nīlarūṣaṇayojjhitā |
nirvikalpaparāhantāsvarūpā prathate prathā || 3/18 ||

(p. 11) savikalpadaśātve'pi sukhanīlādisaṃvidām |
viśeṣānubhavo nāsti vivādo'ntarbahiṣṭhayā || 3/19 ||

tathaiva nīlānubhavādabhinno'pi tadujjhitaḥ |
antarmukhaprakāśo yaḥ parāhantātmakaḥ sthitaḥ || 3/20 ||

hevākāt kevalaṃ so'nyaistattvajñairupalabhyate |
anyathā nīlasaṃvittirapi naiva prasidhyati || 3/21 ||

ābhāsaṃ na vinā yasmāt sattā saṃvida iṣyate |
ābhāso'pi kathaṃ sidhyet kila saṃvedanaṃ vinā || 3/22 ||

anyonyāpekṣayā hītthaṃ nīlasaṃvinna sidhyati |
ābhāsanirapekṣātra draṣṭavyā saṃvidaḥ sthitaḥ || 3/23 ||

paratantrasvatantratve tatrākiñcitkare yataḥ |
nīlānubhavasaṃsiddhiṃ na samarthayituṃ kṣame || 3/24 ||

siddheḥ prāk paratantratvaṃ samaṃ nīlaprakāśayoḥ |
siddhe rūpe svatantratvaṃ samaṃ nīlaprakāśayoḥ || 3/25 ||

atha nīlaṃ parāpekṣāṃ (-pekṣaṃ) prathayenna (prathayānna) prathā punaḥ |
svayamprathanaśīlatvānnīlamātmanyapekṣate || 3/26 ||

paratantramato nīlaṃ svatantrā tu prathā matā |
paratantrasvatantratve tatrākiñcitkare katham || 3/27 ||

jñātametad yathā nīlamutpannamapi hetutaḥ |
prakāśāpekṣayā (prakāśayāpe-) hyaktaṃ paratantraṃ na rūpataḥ || 3/28 ||

nīlaṃ nīlātmake rūpe svatantraṃ na prathātmake |
prakāśastu prathāmātrādatirikto na vidyate || 3/29 ||

(p. 12) tāvanmātre prakāśasya nīlāpekṣā na yujyate |
nīlātmani tu nīlasya prathāpekṣāsti (prathākepakṣāsti) sarvathā || 3/30 ||

nīlātmakaṃ hi nīlasya rūpaṃ siddhaṃ svahetutaḥ |
na prakāśātmakamapi prāyaśo'ndhādidarśanāt || 3/31 ||

prakāśarūpe tūtpanne svaparaprathanātmake |
yathānubhavasaṃsiddhau sarvāpekṣā nivartate || 3/32 ||

nīlaṃ tarhi svasiddhyarthaṃ (svasiddhā-) na prakāśamapekṣate |
prakāśastūpalambhārthaṃ nīlamātmanyapekṣate || 3/33 ||

pāratantryaṃ prakāśasya sutarāmitthamullaset |
ābhāsarahitā yasmānnaitasyotpattiriṣyate || 3/34 ||

nanu (natu) nīlaprakāśe yaḥ (yā) prakāśāṃśo vyavasthitaḥ |
tasya svarūpasattārthaṃ nīlāpekṣā kathaṃ bhavet || 3/35 ||

svarūpalābhaḥ pūrvasmāt prathāṃśāt kāraṇātmakāt |
nīlāpekṣā na tatrāsti svasphurattvena saṃvidaḥ || 3/36 ||

nīlāṃśasya prathārthatve (-tvaṃ) prathāpekṣāsti vastutaḥ |
tadetaddhi svatantratvaṃ paratantratvalakṣaṇam || 3/37 ||

itthaṃ kimetaduktaṃ syāt sopādhi nirupādhi vā |
prakāśasya nijaṃ rūpamathavāpyubhayātmakam || 3/38 ||

sopādhi cedupādheśca tasya cānyonyasaṃśrayāt |
ubhayāsiddhito rūpaṃ sidhyet sopādhikaṃ katham || 3/39 ||

athānupādhi tadrūpamupādheḥ prathanaṃ katham |
parasyāparaniṣṭhatvādevaṃ duṣyejjagatsthitiḥ || 3/40 ||

(p. 13) athobhayātmakaṃ rūpaṃ sopādhyapi tadujjhitam |
tathā sarvaṃ samīcīnamiti cet tarhicetya (-captya)tām || 3/41 ||

tatrānupādhi yadrūpaṃ tasyānubhavanaṃ katham |
svasaṃvedanarūpāyāṃ nirvikalpabhuvi sthitam || 3/42 ||

nacāpalāpaḥ kartavyaḥ pūrvadoṣaprasaṅgataḥ |
nacānupādhirūpasya nīlāṃśatvena vedanam || 3/43 ||

parāhantātmakaṃ tasmāt tadasāṅketikaṃ matam |
pratyakṣabhedaḥ kathito yaḥ svasaṃvedanātmakaḥ || 3/44 ||

tatrāśayo nacedeṣa tadbhedaḥ kinnibandhanaḥ |
nanu raktodakanyāyād (-yo) bhavato'pi smṛtiḥ katham || 3/45 ||

raktodakātmakaṃ rūpamekameva hi tāttvikam |
vikalpastu svaśilpena tadbhinatti (tadbhunarti) viśeṣataḥ || 3/46 ||

tadvannīlaprakāśātmarūpañcākhaṇḍataḥ (-mākhaṇḍyataḥ) sthitam |
vikalpaśilpatastatra kevalaṃ khaṇḍanaṃ sthitam || 3/47 ||

avibhāgātmakād bhāsāt tādṛśādeva kāraṇāt |
kāryasya tādṛśasyaiva prabandhena pravartanam || 3/48 ||

anyonyāśrayatādyāstu doṣā vaikalpikā matāḥ |
sambhaveyuḥ kathaṃ tatra nirvikalpapratiṣṭhitau || 3/49 ||

jñātaṃ kintveṣa viguṇo [dvi-] nyāyo nīlaprakāśayoḥ |
virodhāt tāvadekatvaṃ syājjaḍājaḍayoḥ katham || 3/50 ||

niraṃśasvaprakāśaśca prakāśastāttviko mataḥ |
sāṅgaścānyaprathādhīno'pyabhyāsastāttviko [-bhāsastāttviko] mataḥ || 3/51 ||

(p. 14) sarvathaikye'nya * * * satyāsatyatvahānitaḥ |
ekānekasvabhāvatvāt svabhāvo na nirudhyate || 3/52 ||

svabhāvavinirodhastu bādhito'nubhavena yat |
tat svasiddhaprakāśo'nyavya (-śo'nyadvaya)vasthāhetutāmiyāt || 3/53 ||

akhaṇḍyo'pi tadeṣṭavyo'bhedo nīlaprakāśayoḥ |
tato raktodakanyāyo'saṅgato'tra kathaṃ bhavet || 3/54 ||

anyacca nīlaprathayorabhede vāstave katham |
ābhāsavigamādacchānmuktibhūtā prathā bhavet || 3/55 ||

anādikapravāhātmā * * * * * * * * |
* * * * * * * * māyābhāsapratiṣṭhiteḥ || 3/56 ||

jñātṛtvakartṛtvakartṛtāsāraṃ * * * * * |
* * * * * * * * * * * * * * * * || 3/57 ||

prathāvāsanayoścānyā sāmagrī nāsti vāstavī |
prakāśavigame'pi syād yaddhetorvāsanākṣayaḥ || 3/58 ||

tanmuktikāle yastajjñairābhāsoccheda iṣyate |
nasvaprāptāsya (?) vikalasvahetoravirāmataḥ || 3/59 ||

tatropādānaśuddyādi yatkiñcit parikalpyate |
na tat sarvajñatābījaṃ yuktitaḥ paryavasyati || 3/60 ||

tasmāt sopādhikaṃ jñānaṃ parasparasamāśrayāt |
tādātmye'pi kathaṃ nāma pratiṣṭhāmadhigacchati || 3/61 ||

prakāśasya ca cinmātrarūpaṃ yat svapratiṣṭhitam |
tadupādhiṃ prati kathaṃ mātrayāpi prasarpati || 3/62 ||

(p. 15) pratītau yacca nārūḍhaṃ tādātmye'pi na tad bhavet |
pratītibhājanaṃ yadvanmaṇiraupyādikairalam || 3/63 ||

anenaivāśayenokto yuktitattvavicakṣaṇaiḥ |
prakāśārthoparakto'pi sphaṭikādi jālomapam(?) [jaḍopamaḥ] || 3/64 ||

nanu nīlaprathākāle nīlātmātirayo'dhikaḥ |
apahnotuṃ kathaṃ śakyaḥ paratantramaya(ḥ?)prathaḥ || 3/65 ||

adhikaścet kathaṃ bhāti bhāti cedadhikaḥ katham |
bhāsate cādhikañceti parasparamasaṅgatam || 3/66 ||

prakāśa eva tarhi syānnirupādhirnirañjanaḥ |
evañca nānānubhavamayī naśyejjagatsthitiḥ || 3/67 ||

atrocyate yadadhikaṃ bhānāt tattāvatprathamayuktikaḥ(?) |
* * * * * * * * tatra tvitthaṃ samarthanā || 3/68 ||

yadā svollekhavibhavaḥ prathayā jagadudgamaḥ |
anavacchinnarūpatvaṃ tadā tasya nijaṃ prati || 3/69 ||

cidullekhamayaṃ (vi- -laṃ) viśvaṃ cidullekhe pratiṣṭhitam |
cidullekhādanadhikaṃ lokayātrāprasādhakam || 3/70 ||

ullekhaśca vimarśātmā svābhāsamayanirmitaḥ |
iyaṃ sā vastunaḥ siddhistāttvikī viduṣāṃ matā || 3/71 ||

seyaṃ sphurattā bodhasya mahāsattāsvarūpiṇī |
svollekhakartṛtāsārā pratyakṣānubhavāt sthitā || 3/72 ||

etat (* tat) svollekhavibhavamayaṃ viśvaṃ svabhāvataḥ |
svatantratvādanunbhagnamunmagnamiva bhāsayet || 3/73 ||

(p. 16) akhaṇḍaviṣayānandamayādanubhavācca (-viṣayā * da) tat |
sāmarasyena sarvatra sthitaṃcinmātrasārataḥ (sthitaści-) || 3/74 ||

digdeśakālavaicitryabhedād bhāgavatād yadi |
tadātmavartini jñāne bhedaḥ syāt tatprathā katham || 3/75 ||

prathāsāmarthyataḥ (-* ) tasmāt tadbhedo na vyavasthitaḥ |
navāṃśāṃśikayā bheda ābhāse'pyanubhūyate || 3/76 ||

tilarāśivadajñānāt saṅgatatvena vāsanāt |
ataḥ prathaikarūpatvamābhāsasya (praśethaka-) vyavasthitam || 3/77 ||

anyacca citravijñānametadevāvabhāsate (-metamevā-) |
tatprapañco vibhinno'pi tadrūpaṃ jñātumakṣamaḥ (jñe-) || 3/78 ||

na ca vyastaḥ samasto vā tatsvarūpasya bhedakaḥ |
tathātvānubhavāsiddheḥ samaṃ tatprathanaṃ katham || 3/79 ||

tadvad viśvamayī saṃvidekā cet tatprathā katham |
tanniyantraṇayā cāsyā ekatvaṃ parihīyate || 3/80 ||

viśvāveśe'pi tatsaṃvit tattadrūpaṇayojjhitā (-ṭā rūpa-) [rūṣaṇa-] |
akhaṇḍānubhavātmatvāt sāmarasyatayā sthitā || 3/81 ||

apaṭāṭaṅkatā seyaṃ gambhīrodāratā tathā |
idaṃ tad durghaṭaiśvaryamasāmānyasvabhāvakam || 3/82 ||

saṃvidā bhāsamāne ca rūpe bhrāntirna vidyate |
anyāvaṣṭambhato'nyasya prathanaṃ bhrāntiriṣyate || 3/83 ||

na svabhāsaprathā bhrāntā svasaṃvedanasiddhitaḥ |
svasaṃvedanasiddhatvaṃ na kathañcana bādhitam || 3/84 ||

(p. 17) bahiścandradvayābhāvāt tadbādhottarakālikā |
nanu dvicandrānubhave prathāmātraikajīvite || 3/85 ||

svasaṃvedanarūpasya yadi bādhā bhavet tataḥ |
tadekamayarūpatvād bhaved bhādhāpi bādhitā || 3/86 ||

tasmānnijollekhamayaṃ svasvasaṃvedanātmakam |
saṃviddevī jagaccitraṃ nirmimīte svabhittikam || 3/87 ||

vivartapariṇāmādi na kiñcit saṃvido'dhikam |
yadasatyādikalanāvaśād viśvasya sambhavaḥ || 3/88 ||

nacāpi viśvavaicitryaṃ tasya syād vāsanātmakam |
yatharddhi prātiryādi(?)gambhīrodārasaṃvidaḥ || 3/89 ||

ullikhyamānaṃ tadrūpaṃ nāmnā (nā *) nāvaicitryaśobhitam (*-) |
phenavat saṃvidudbuddhaṃ tatsāmarthyād vijṛmbhate || 3/90 ||

īdṛk svātantryamāśrity saṃvidaḥ pāramārthikam |
prameyajātamakhilaṃ sthitaṃ śakyasamarthanam || 3/91 ||

pratyakṣarūpamāśritya viṣayānubhavātmakam |
mahānayasyānuguṇaṃ cidrūpaṃ pratipāditam || 3/92 ||

bahuvaktavyatā yasmāt prameyasyāsya vartate |
ato viramyate'smābhirdiṅmātraṃ tu prakāśitam || 3/93 ||

saṃvidaḥ sāśrayāḥ kāścit kāścanāpi nirāśrayāḥ |
tatrāpi tāsāṃ vaicitryaṃ savikalpāvikalpataḥ || 3/94 ||

tatrāpi bahuvaicitryaṃ niyatāniyatātmakam |
jñānajñeyaprapañcaśca tatrāpi bahubhūmikaḥ || 3/95 ||

(p. 18) śraddhāśraddhākriyājālaphalānuguṇayogataḥ |
tatrāpi svarganarakādyanantamativibhramāḥ (-nativi-) || 3/96 ||

atāttvikā bandhamokṣavibhedā api tatra ca |
anantalokasaṃsthāna (ḥ?) prabhavāśca tathāvidhāḥ || 3/97 ||

tathāśyānaṃ (-dyanma) manobhūmimatikramyātivartate (* no-) |
āśyānasaṃvidaṃśasya (ādyā-) tadetat sphūrjitaṃ matam || 3/98 ||

avikalpanijābhogavimarśātmamayaṃ ca tat |
svacchaikarūpasvacchandacidrasāśyānatāmayam || 3/99 ||

kramākramapadāveśi pratibhārūṣaṇādike |
anantāgādhagambhīre saṃvidrūpe nimajjati || 3/100 ||

viśvātmakaṃ tadanyacca rūpametad yadīśituḥ |
astināstivyatikrāntaṃ sarvāśrayanirāśrayam || 3/101 ||

aprakāśaprakāśātmāpyasamañjasamañjasam (-sā) |
parāṃ śaktiṃ vinā tasya sthitasyāpi svabhāvataḥ || 3/102 ||

ciccamatkāraviśrāntivaiklavyādapratiṣṭhiteḥ (-teḥ) |
asatkalpatvamityasya (asaṅkalpa *-) tadapekṣitvamiṣyate || 3/103 ||

maheśasyātmaviśrāntiḥ parāhantātmikā hi yā |
tasyā - api parāvasthābhāti (-yāti) sūkṣmaprabhedataḥ || 3/104 ||

taddevīdhāma yatrāsau (yā-) kāndiśīko vibhurbhavet |
bhāvābhāvau prakāśe'ntaḥ pratiṣṭhāmadhigacchataḥ || 3/105 ||

sa cāpi sakalāpekṣāśūnyāyāṃ ciccamatkṛtau |
tāratamyādikalanāvāsanāvedhadūrage || 3/106 ||

(p. 19) paraviśrāntiparyante sāpi viśrāmyati svataḥ |
paraprakāśaviśrāntidaśāyāmapi yat sthitāḥ || 3/107 ||

vāsanāvedhasaṃskārā bhāvābhāvobhayātmakāḥ |
atastāmasanīkṛtya yā viśrāntiranuttarā || 3/108 ||

sā devī kathyate tasyā nayo'sau devatānayaḥ |
yatrāpaṭe parikṣīṇo'pi (parikṣīṇā-) ṭaṅko'sau nayastataḥ || 3/109 ||

yā kālagrāsaviśrāntistadrūpaṃ parameśituḥ |
yā tu viśrāntiviśrāntistaddevīrūpamiṣyate || 3/110 ||

itthaṃ sūkṣekṣitārūpo (sūkṣmi-) bhedo yat parameśayoḥ |
aikye'pi darśitaṃ samyak pratītipariśuddhaye || 3/111 ||

itthaṃ saṃvedanāpekṣā rūpe jñaptau ca sarvathā |
viśvasyeti kathaṃ pūrvamutpattiriti saṃśayam (-ye) || 3/112 ||

chettuṃ vyomeśvarīcakraṃ sphuṭamatra prakāśyate |
nirāvaraṇacitsindhau (-ddhau) sphurattāsārasundaram || 3/113 ||

paraprakāśaviśrāntiryatra viśrāmyati svayam |
taddevīrūpamatrāntaḥ prathamaspandanātmanā || 3/114 ||

pañcākāśamayaṃ cakraṃ viśvabījaṃ tathoditam |
sarvāpekṣāvirahitaṃ svoccalattāsvarūpakam || 3/115 ||

tatrāpi cānyat saṃvitkhamanyeṣāṃ nabhasāṃ param |
tanmayaṃ ca taduttīrṇaṃ vyāpakatvena vartate || 3/116 ||

prathamapratibhārūpā vyomeśī seyamucyate |
khecaryādisvarūpaṃ yat tadasyā - eva jṛmbhitam || 3/117 ||

(p. 20) pratyekaṃ sāmarasyena devīpañcakamañcitam |
svātantryollāsakodrekaprādhānyāt pṛthagucyate || 3/118 ||

śabdādyanubhavasthāne saṃvit spandādirūpaṇī |
pratyekaṃ sūkṣmayā vṛttyā svaucityenānubhūyate || 3/119 ||

itthaṃ pratyekaviṣaye pañcānubhavabṛṃhitam |
sāmarasyātmanā sarvaṃ devīcakraṃ prakāśate || 3/120 ||

evaṃ pañcātmakaṃ viśvaṃ siddhaṃ svānubhavena yat |
pañcākāśatayā pūrvaṃ taduktaṃ saṃvidātmanā || 3/121 ||

paraprakāśaprādhānyāccidādyaṃ śaktipañcakam |
paraviśrāntiviśrāntiprādhānyāt tvidamiṣyate || 3/122 ||

vyāpakatvaṃ ca nityatvaṃ pūrṇatvaṃ sarvaveditā (m?) |
sarvakartṛtvamityetat śaktipañcakalakṣaṇam || 3/123 ||

svarūpalābho viśvasya pūrvaṃ jñaptistataḥ param |
jñānādhikatvāt siddhestu sa tu cinmātralakṣaṇaḥ || 3/124 ||

itthaṃ viśvasya saṃsthānaṃ prathamaṃ saṃvidātmanā |
paśvātmakena sphuritaṃ paraśaktisvabhāvataḥ || 3/125 ||

svaprakāśātmakānandasphūrtibindukramātmakaḥ (-mūrti-) |
cakrapañcakaviṣphāro vyomeśyādimayaḥ sthitaḥ || 3/126 ||

akramo'pi kramātmāyamupadeśabhuvi sthitaḥ |
tat tat pratītivaicitryavibhāgapratipādanāt || 3/127 ||

tadeva saṃvido rūpaṃ pañcātmatvena saṃsphurat |
sāmarasyātmanā pūrvaṃ vyomeśīcakramucyate || 3/128 ||

(p. 21) guroḥ svarūpametacca sarvāvaraṇabhedakam |
parasvarūpaviśrāntisamāveśanatatparam || 3/129 ||

etasya jñaptimātreṇa dehādyāvaraṇakṣayaḥ |
pūjanena tu saṃrūḍhirataḥ pūjyatamaṃ hi tat || 3/130 ||

niśśeṣaviśvavibhavapratipattihetur-
vyomeśvarīprathamacakranirūpaṇena |
labdhāvadhānavaśataḥ (labdhvā-) kṛtino bhajanta
ādyantavarjitapadaṃ paramātmaniṣṭhāḥ || 3/131 ||


iti śrīmahānayaprakaśe vyomeśvarīcakranirūpaṇaṃ nāma tṛtīyollāsaḥ || 



atha caturtha ullāsaḥ |

(p. 21) nānānubhavavilāsaprasaraṇabījasvarūpamavibhinnam (-bījaṃ-) |
jñātvā svayuktigarbhaṃ prakāśacakrakramaṃ tanumaḥ || 4/1 ||

pañcātmakaṃ svacakraṃ yat prathitaṃ saṃvidātmanā |
jñānakriyātmakatvena pratyekaṃ tad dvidhā matam || 4/2 ||

buddhikarmendriyavrātau sthitau jñānakriyātmanā |
daśadhāpyāptisāratvāt tayorapi parisphuṭam || 4/3 ||

āśraye buddhimanasī sthite sāmānyarūpataḥ |
evaṃ dvādaśakaṃ yatra prakāśakalilātmakam || 4/4 ||

avibhinnatayotpannanirvikalpamayapratham |
prakāśacakrapūjyaṃ * * * dvādaśadhā sthitam || 4/5 ||

(p. 22) saṃvitkadambakaguhāsthitaṃ (-bakala-) siddhaniṣevitam |
prakāśamātraprādhānyādanvarthaṃ nāmataḥ sthitam || 4/6 ||

pramāṇasṛṣṭipravaṇā atra saṃvinmarīcayaḥ |
avadhānadhanairjñeyā (-naivyeyā) dvādaśātmāvaśuddhaye || 4/7 ||

saṃmūrcchitaprakāśātmā marīcīnāmayaṃ cayaḥ |
deśakālakriyārūpakalāsṛṣṭilayāvaniḥ || 4/8 ||

māsarāśyādirūpo'pi dvādaśātmānubhūyate |
kālakramo bahistattadbhāvabhāvakasaṃvṛtaḥ || 4/9 ||

pramāṇasṛṣṭisaṃrambhalampaṭāsu (-rabhaṃlapa-) marīciṣu |
bahirmukhāsvahaṅkāro nilīno'tra vyavasthitaḥ || 4/10 ||

antaḥspandapradhānatvāt khe nirāvaraṇātmani |
carantyā eva viṣphāraḥ khecaryā dvādaśātmanā || 4/11 ||

jñānakriyāsāmarasyamayaśaktisvabhāvataḥ (-ñca) |
tadākāramayatvena (ā *-) pūrvaṃ viśvasya sambhavaḥ || 4/12 ||

tataḥ pramāṇarūpeṇa dvādaśātmatayodayaḥ |
jñānakriyāsāmarasyāt (syaṃ-) kiñcidudrekalakṣaṇaḥ || 4/13 ||

atra dattāvadhānānāṃ deśakālakriyātmanaḥ |
kālakramasya sahasā grāso bhavati yoginām || 4/14 ||

svabhāvāvarakatvena (*-) ye lokasya vyavasthitāḥ |
jñāninaḥ svasvarūpasya viṣphārastaistu tanyate || 4/15 ||

ataḥ kālakramasyāsya dvādaśātmā ya udbhavaḥ |
sa evaṃ sanniviṣṭāntat(?)grāsena sahasāvaniḥ || 4/16 ||

(p. 23) iti kathitamudārayuktiyogā-
danubhavabhūmigataṃ prakāśacakram |
guruvaramukhasampradāyagamyaṃ
paramasamādhimatāmatandritaṃ syāt || 4/17 ||


iti śrīmahānayaprakāśe prakāśacakranirūpaṇaṃ nāma caturthollāsaḥ || 



atha pañcama ullāsaḥ |

(p. 23) svātmaprameyamayanirmitapūrṇabhāvā-
dicchānurūpavibhavena samullasantyaḥ |
cidraśmayo na ca camatkṛtayo hi yasmin-
nānandacakramadhunā tadidaṃ pravacmaḥ || 5/1 ||

prakāśacakraṃ yat pūrvaṃ pramāṇād vinirūpitam |
viṣayābhogavibhavā prasṛtecchāsya pūryate (prapūryate) || 5/2 ||

tanmātrābhūtarūpaṃ ca saṃvidāśyānatāmayam |
pañcātmakaṃ yadviṣayasvarūpamanubhūyate (yadviṣaya * rūpa) || 5/3 ||

tatra saṃvinmarīcīnāṃ buddhikarmendriyātmanām |
viṣayābhoganirjñātanirvikalpapratiṣṭhite || 5/4 ||

aikadhyād buddhimanasorya ekādaśadhodyamaḥ |
ṣoḍaśātmā sa sañjāto viṣayābhogapūraṇāt || 5/5 ||

ānandacakraṃ tadidaṃ ṣoḍaśātmatayā sthitam |
cinmarīcicamatkāraprameyollekhadanturam || 5/6 ||

(p. 24) svasvarūpāparityāgāt prameyīkaraṇaṃ hi yat |
svātmano durghaṭaiśvaryapratipādanalakṣaṇam || 5/7 ||

anena paripūrṇatvādicchābhogyasya sarvataḥ |
mahānandapradhānatvāccakramānandasaṃjñitam || 5/8 ||

atrāpi dattacittā ye bhavanti jñānaśālinaḥ |
viṣayā eva eteṣāṃ bhavet saṃvitsvarūpabhūḥ || 5/9 ||

atra viśvasvarūpasya sarvākāraṃ samāpanāt |
carvaṇātmāpi saṃhāro nāntarīyatayoditaḥ || 5/10 ||

sāmarasyakriyodrekānniṣpanne'ntarjagadbhare |
viṣayābhoga autsukyaṃ marīcīnāṃ nivartate || 5/11 ||

cicchaktibhūtāyāmasyāmicchātmanyudito (-yā * * mic-) bhuvi |
carantyā eva viṣphāro bhūmayyāḥ ṣoḍaśātmakaḥ || 5/12 ||

ānandacakrasya yathopapatti pradarśitaṃ svānubhavasvarūpam |
samādhilābhāya sadaiva bhūyād bhāvopabhogena mahājanasya || 5/13 ||


iti śrīmahānayaprakāśe ānandacakranirūpaṇaṃ nāma pañcamollāsaḥ ||



atha ṣaṣṭha ullāsaḥ |

(p. 24) yatrāvṛttivaśena viśvavibhavollāsopabhogātmanāṃ
raśmīnāṃ vilayo hyakṛtrimatame'haṅkārarūpe bhavet |
tattatkālakalākalāpakabalavyāpārapāraṅgamaṃ
dhyātvā samprati mūrticakramucitaṃ vyā *? nyate (yuktibhiḥ) || 6/1 ||

(p. 25) ānandacakraṃ yadidaṃ ṣoḍaśātma nirrupitam |
viśrāntiruditā (-cirā) tasya pratyāvṛttyā pramātari || 6/2 ||

ataḥ pramātṛrūpasya mūrtatātrānubhūyate |
ahaṅkārasya sakalaprayogārthadaśātmanaḥ || 6/3 ||

bahirmukhamarīcīnāṃ prādhānye sati yo bhavet |
avyaktarūpo'haṅkāraḥ sa mūrto'tra sphuṭaṃ sthitaḥ || 6/4 ||

pramāṇarūpaḥ prathamaṃ dvādaśātmā yataḥ sthitaḥ |
kālasṛṣṭimayaḥ sphāro (sphurā) marīcīnāṃ cidutkaṭaḥ || 6/5 ||

viṣayābhogarūpeṇa kāmenāsya prapūryate |
bahirmukhe vā yadataḥ kālakāmātmakaṃ jagat || 6/6 ||

niṣpanne jagato rūpe kālakāmakramātmake |
viṣayābhogaviṣphāraviṣaṇṇāsu marīciṣu || 6/7 ||

pratyāvṛttyā svasvarūpamelanābhāsatatparaḥ |
saptadaśaḥ (-śa) ṣoḍaśānāṃ marīcīnāṃ vināyakaḥ || 6/8 ||

pramātṛrūpo'haṅkāro mūrtatvena samutthitaḥ |
saptadaśātma tadidaṃ mūrticakraṃ vimṛśyatām || 6/9 ||

kāmopabhogakālātmagrāsasāhasatatparam |
tattatpratītivaicitryavāsanālayabhūmigam || 6/10 ||

pūrvaṃ bahirmukhātmā yo marīcīnāṃ cayo bhavet |
idānīṃ sa samāpanno mātṛmelāvabhājanam [-melāpa-] || 6/11 ||

kālasṛṣṭimayaṃ mānaṃ (bhānaṃ) meyaṃ kāmakriyātmakam |
etad dvayaṃ yatra līnaṃ sāmarasyena vartate || 6/12 ||

(p. 26) bījabhāvātmanā saiṣā kālagrāsapranālikā |
āvāsanena (ava-) sahasā mūrticakre'nubhūyate || 6/13 ||

kālāt kāmasya viṣphāraḥ kāmāt kālastu vardhate |
iti viśvakrame hetū kālakāmau na tāttvikau || 6/14 ||

kāmātmatāṃ vinā kālaḥ kathaṃ syāt kalanātmakaḥ |
kalanātmakatāvarjyaṃ kathaṃ kāmasya sambhavaḥ || 6/15 ||

ataḥ (* *) parasparāpekṣau kālakāmau na tāttvikau |
akālakalitād rūpādakāmācca samutthitau || 6/16 ||

tayoḥ kabalanaṃ yatra pratyāvṛttyā bhavet sphuṭam |
tad viśvagrāsarasikaṃ svarūpaṃ parameśituḥ || 6/17 ||

etat prameyānugamāt kālakāmamayaṃ (* yaṃ) dvayam |
bāhyaṃ dadāha śikhināṃ sthūlarūpadharo haraḥ || 6/18 ||

taditthaṃ yo hyahaṅkāro nirmātā kālakāmayoḥ |
pratyāvṛttyā sa evāntaḥ saṃhartā kālakāmayoḥ || 6/19 ||

ahaṅkārasya mūrtatvaprādhānyānmūrtisaṃjñitam |
cakraṃ saptadaśamayakramamelapasundaram || 6/20 ||

tattādṛśād vicitratvāt pratītīnāṃ svabhāvataḥ |
nāmasaṃsthānayorbhedaṃ prati cakraṃ pravartate || 6/21 ||

svasiddharūpaprādhānyāt tatra siddhatayā sthiteḥ (sthitiḥ) |
nirmeyayogataḥ śakteryoginītvena sambhavaḥ || 6/22 ||

paraṃ rahasyaṃ kathitaṃ kiñcit kiñcit kvacit kvacit |
sarvaṃ sabhayabhīrutvānnaikatraiva prakāśyate || 6/23 ||

(p. 27) mahānayaprakāśe'smin ye pūrvāparavedinaḥ |
hastāmalakavat teṣāṃ vastutattvaṃ prakāśate || 6/24 ||

itthaṃ viśvasya saṃsthānaṃ pramātrantaṃ nirūpitam |
gurudṛkpātapātrāṇāṃ saṃśayatrāsavicchide || 6/25 ||

yathākramaṃ mānameyamātṛrūpatayā bahiḥ |
khacakrāt prasṛtaṃ viśvaṃ paraśaktisvabhāvataḥ || 6/26 ||

stotrakārasyedameva sthitaṃ cetasi yajjagau |
saṃvit stotraiḥ samālokapramāṇārthapramātṛtaḥ (-tṛdaḥ) || 6/27 ||

pratyāvṛttyā vitanvatyāḥ saṃhārasyāpi bhakṣaṇam |
devyāḥ saṃhārabhakṣiṇyāḥ sphāra eṣa susaṅgataḥ || 6/28 ||

mūrticakravarasampradāyataḥ kālaghaṭṭanamayī samantataḥ |
saṃvidatra paramārthayogināṃ bhāsatāmasamasāhasāvaniḥ || 6/29 ||

iti śrīmahānayaprakāśe mūrticakranirūpaṇaṃ nāma ṣaṣṭhollāsaḥ ||



atha saptama ullāsaḥ


(p. 27) avikalpavikalpasaṃvidāṃ sakalaṃ vṛndamanujjhitakramam |
udayādimayaṃ (-mayā) yadantare haṭhapākena galatyanāratam || 7/1 ||

anubhūya guruprasādataḥ paraviśrāntidaśāmanuttarām |
tadidaṃ samudāyapūrvakaṃ kila vṛndakramacakramucyate || 7/2 ||

pratyakṣānubhavaṃ śritvā bhūtabhāvamayaṃ jagat |
pīṭhakramadṛśā pūrvaṃ guruṇā pratipāditam || 7/3 ||

(p. 28) anyahetunirāsena tasya mūlāt samudbhavaḥ |
khacakrātmatayonmagnaḥ pañcātmātha prakāśitaḥ || 7/4 ||

svaprakāśakarāntasthasphuṭajñānakriyātmakaḥ |
pramāṇātmā dvādaśadhā tato'pi pratipāditaḥ || 7/5 ||

tato'pi durghaṭaiśvaryapāripūrṇyacamatkṛteḥ |
ānandākhyaḥ ṣoḍaśadhā prameyātmā nirūpitaḥ || 7/6 ||

tato bahirmukhaiśvaryatṛpteruparame sati |
svapratiṣṭhatayā sṛṣṭisaṃhārātmā vyavasthitaḥ || 7/7 ||

pratyāvṛttyātmataścāpi yatra sarvaṃ pralīyate |
mātuḥ saptadaśasyāsya mūrtatvena samudbhavaḥ || 7/8 ||

taditthaṃ sarvajantūnāṃ vyavahāradaśākrame |
siddho'pi yo bahirbhāvaḥ sarvaḥ sarvavidātmakaḥ || 7/9 ||

meyamānapramātrātma bahiḥ siddhamapīha yat |
tat prakāśaṃ vinā sidhyenna kathañcana kasyacit || 7/10 ||

ataḥ prakāśaniṣpattyā niṣpattiryasyakasyacit |
parasyāparaniṣṭhatvānnatvaikyaṃ cijjaḍātmanoḥ || 7/11 ||

ato yad viśvavaicitryaṃ [-cityaṃ] jaḍātmaivānubhūyate |
svollekharekhāsaṃsthānaṃ tat svatantraṃ cidātmakam || 7/12 ||

parākāśāt spandanata icchāto'tha yathākramam |
indriyadvārataḥ paścād bhāvābhāsaḥ pravartate || 7/13 ||

bahiḥsiddhe'pi viṣaye pramātṝṇāṃ svabhāvataḥ |
tadatra yāvad guruṇā viśvasyodayasaṃsthitiḥ || 7/14 ||

(p. 29) saṃhṛtiḥ svasvabhāvaśca svasākṣitvena darśitaḥ |
ataḥ sarvatra cakrāṇāṃ svarūpapratipādanam || 7/15 ||

mahānubhāvādhiṣṭhānāt sāmarasyaṃ pravartate |
āraghaṭṭaghaṭīyantranyāyenaitāvataḥ sadā || 7/16 ||

jagataḥ sṛṣṭisaṃhārau (-saṃsārau) bhāvābhāvamayau sthitau |
ane(ka)kramayogenāpyākṣipte (ane * - -te) * * gocaram || 7/17 ||

vicitrasṛṣṭisaṃhāraprabandhaḥ parivartate |
śūnyādārabhya dehāntaṃ saṅkocātmā hi yo'grataḥ || 7/18 ||

sa saṃsāro vimuktistu tatsvarūpaviparyayaḥ |
tadatra yāvat saṃsārastattadrūpatayā sthitaḥ || 7/19 ||

* * * samuddharṣābhyāṃ saṅkocasya vyavasthiteḥ |
na bhāvatyāgato muktirnāpi bhāvopabhogataḥ || 7/20 ||

bhāvanālambanānnāpi (bhāvanāśāla-) śūnyamātropalambhataḥ |
anāgrahādāgrahādvā kasyacinnāpi tāttvikī || 7/21 ||

asaṅkocāpaṭātmā sā vimuktiḥ pāramārthikī |
yadapekṣāvaśāt sarvāḥ saṃsāronyā(?) vimuktayaḥ || 7/22 ||

etadātmani viśvasya svasvarūpavilāpanam |
saṅkocadalanābhyāsād vāsanālayabhūmigam || 7/23 ||

nirāvaraṇatāhetoratastatpratipattaye |
vṛndakramasya saṃsthānaṃ kathyate gurvanugrahāt || 7/24 ||

svavimarśāvadhānenāpyākālāgni śivāvadhi |
viśvasya bhāvaḥ sahasā svasvarūpe vicīyate || 7/25 ||

(p. 30) mahānayamahāyānavedāntādvayavādinaḥ |
sadṛśāḥ pratipādyante cārvākādvayavādibhiḥ || 7/26 ||

ye hastimaśakanyāyādarthādarthāstu bhedinaḥ |
tairjaḍā vipralamyante sadṛśairabhidhāyakaiḥ (-sāyataiḥ) || 7/27 ||

ato nāstikatātattvaṃ citte kṛtvā durātmabhiḥ |
mahānayopadeśena pātyete svaparāvadhaḥ || 7/28 ||

sarvotkṛṣṭasvabhāvasya śivasyāpi mahātmanaḥ |
sthitaḥ saṅkocasaṃskāraḥ kā kathānyeṣu jantuṣu || 7/29 ||

ato nityāvadhānena svasvarūpamayasthiteḥ |
sarvāgrahagrāhavaśājjīvanmuktiḥ prakāśate || 7/30 ||

taccāvadhānaṃ viṣayisvarūpapariśīlanāt |
avikalpavikalpātmasthairyarūpatayā punaḥ || 7/31 ||

vikalpaśṛṅkhalābaddho hetukāryātmako hi yaḥ |
nānāvidhāgrahagranthivāsanāvedhabṛṃhitaḥ (-jahitaḥ) || 7/32 ||

na śakyo'sāvapahnotuṃ kila pratyātmavedanāt |
ataḥ saṃhārarūpo'yaṃ * * * * vinā katham || 7/33 ||

sahasā grasituṃ śakyaḥ saṃvādaireva peśalaiḥ |
tasmāt svarūpadārḍhyena sarvāvaraṇabhedinā || 7/34 ||

parāvadhānarūpeṇa sthātavyaṃ parayoginā |
ato viśvasya saṃsthāne yanmukhena yadāgatam || 7/35 ||

tanmukhenaiva tat tasya haṭhapākena līyate |
viśvaṃ prakāśādhīnatvāt tanmayatvācca vastutaḥ || 7/36 ||

(p. 31) saṃvitsvarasavāhitvācchūnyaṃ sthāpayituṃ yathā |
tathaiva haṭhapākena pratyāvṛttikramātmanā || 7/37 ||

nirāvaraṇatāṃ netuṃ śakyaṃ saṃsthānaśīlanāt |
etasmin vidite samyaṅmuktiḥ saṃsārabhūmitaḥ (-nām) || 7/38 ||

anyathā muktirūpaṃ tu saṃsārasyāparo vidhiḥ |
yathāsthitasya viśvasya yathaivānubhave sthite || 7/39 ||

saṅkocasaṃsthānalayājjivanmuktiḥ prakāśate |
yathaiva paśyanti viśvaṃ tathaiva parivartate || 7/40 ||

saṃvitsvātantryatastyaktasarvopāyakadarthanam |
ato vimarśarūpo'yaṃ kathanātmā prakāśate || 7/41 ||

satsampradāyo guruṇā sarvāvaraṇabhedakaḥ |
mūrticakre hyahaṅkāraḥ pramātrātmā ya utthitaḥ || 7/42 ||

svātmasaṅkocasaṃhārapūrve sa haṭhapākataḥ |
bhāvasaṃskārarūpasya raśmivṛndasya sarvataḥ || 7/43 ||

tiṣṭhato bījabhāvena mātṛmelāvarūpiṇaḥ (mātra-) |
nirvikalpavikalpāṃśān bhāvābhāvadvayānugān || 7/44 ||

vinirbhidya vinirbhidya saṃharatyāntarānapi |
nirvikalpavikalpāṃśāḥ prāyaḥ saṅkalanāvaśāt || 7/45 ||

sambhavanti catuṣṣaṣṭiḥ pratītīnāṃ svabhāvataḥ |
tatrāpi jñeyasaṃskārābhijñarūpāḥ pratītayaḥ || 7/46 ||

sambhavanti catuṣṣaṣṭiḥ sopānakramayogataḥ |
anyā - apica tanniṣṭhā haṭhapākaikalampaṭāḥ || 7/47 ||

(p. 32) jñātṛbhogasvarūpiṇyastatsaṃkhyā eva vastutaḥ |
jñātṛbhogasvarūpāṇāṃ marīcīnāṃ kadambakam || 7/48 ||

pratyekaṃ haṭhapākena grasituṃ tatra vartate |
tacca sphuṭāsphuṭatvena vartate'nubhavādapi || 7/49 ||

jñeyasaṃskārarūpāṇāṃ (jñeyaṃ-) pratītīnāmanukramāt |
āsāṃ sarvapratītīnāṃ paraviśrāntilakṣaṇam || 7/50 ||

na kṣaṇaṃ cyavate rūpaṃ yasyāḥ sā pāramārthikī |
sarvottīrṇā sarvamayī sarvasarvātmakaprathā || 7/51 ||

avibhinnā vibhinneva yā kācit pārameśvarī |
vyapadeśātigā tasyāḥ svasvarūpamayasthiteḥ || 7/52 ||

pañcaṣaṣṭipratītitvamupacāreṇa gīyate |
raudreśvaryā ayaṃ sphāraḥ prādhānyena vyavasthitaḥ || 7/53 ||

saṃskārahaṭhapākātmā grāsavyāpārapāragaḥ |
saṃhārabhakṣiṇīrūpād vyomeśyantaṃ hi yat sthitam || 7/54 ||

cakrasaṃsthānametasya nijacakrakramāntare |
nirvibhajya svakaṃ rūpaṃ haṭhapākakriyātmakam (kaḥ?) || 7/55 ||

pratyāvṛttyā svasvarūpe nirāvaraṇasundare |
icchāsaṃskāravirahe kṣīṇā viśrāmyati svataḥ || 7/56 ||

paradhārāsamārūḍhasāmarasyāvasānabhūḥ |
eṣā kṛśatanurdevī sarvecchāvilayāvaniḥ || 7/57 ||

anapāyapadaprāptyai kaiścidevābhyupāsyate |
yāṃ (*) yāṃ (yā) svacakre cakreśī tāṃ tāmāviśya yuktitaḥ || 7/58 ||

(p. 33) raudreśvarī sarvacakrāṇyāmūlād grasati svayam |
ato vṛndakrame sarvamupādeyatayā sthitam || 7/59 ||

prameyajātaṃ saṅkocakalāvicchedanakṣamam |
mudrāmantranirīhādiprameyapratipādanāt || 7/60 ||

kathanātmā sampradāyo niṣṭhāmatra parāṃ gataḥ |
kathanāt saṃśayacchedaḥ pūjanaṃ paripūrṇatā || 7/61 ||

saṅkramāt sāmarasyasya parā niṣṭhā pravartate |
ato'tra sāvadhānena hṛdayena vimṛśyatām || 7/62 ||

catuṣṣaṣṭimarīcīnāṃ saṃsthānaṃ hṛdayaṅgamam |
pratyakṣānubhavāt (* * vāt) sarvaṃ svātmā bhavati yoginām || 7/63 ||

ato gurumukhāt tadyat pratyakṣeṇānubhūyate |
viṣayābhogasaṃskārarūpo yaḥ kāmasambhavaḥ || 7/64 ||

kālenāsādyate bhūyaḥ sa tad bījakramātmanā |
tadbhogenāpi kālasya tṛpteruparame sati || 7/65 ||

yathākramaṃ svasvarūpahāniḥ saṃjāyate sphuṭam |
taditthaṃ prathamaḥ kālaḥ kāmaṃ sṛṣṭvā tataḥ kramāt || 7/66 ||

pratyāvṛttyā tu tadgrāsāt svaṃ svaṃ rūpaṃ grasatyapi |
tadetad vastutaḥ sarvaṃ marīcīnāṃ vijṛmbhitam || 7/67 ||

akramāṇāṃ kramābhāsarūpamapratyakṣataḥ sthitam |
tatra kālasya yā sṛṣṭirdvādaśātmā nirūpitā || 7/68 ||

pratyāvṛttikramonmānā mūrtāhaṅkāramelanāt |
trayodaśātmatāṃ prāptā sā viśrāntipadonmukhī || 7/69 ||

(p. 34) trayodaśānāṃ rūpāṇāṃ pratyekamudayādibhiḥ |
pañcātmikā pañcaṣaṣṭistata etā marīcayaḥ || 7/70 ||

antyā kramākramotkrāntyā viśrāntiriti gīyate |
catuṣṣaṣṭimarīcīnāṃ sāmarasyāvasānabhūḥ || 7/71 ||

udayādimayollāsadvādaśātmamarīcayaḥ |
tanmayollāsaparamāhaṅkārānugamūrtayaḥ || 7/72 ||

pratibhāvaṃ pravartante haṭhagrasanalampaṭāḥ |
bhāvānubhavabhūmau hi stimitivyantarātmani || 7/73 ||

sarvendriyamarīcīnāṃ cakraṃ yugapadullaset |
yasyā yasyā yatra yatra rūpādāvadhikāritā || 7/74 ||

tasyāstasyāstatra tatra svodrekaḥ kevalaṃ sthitaḥ |
tannilīnatvamanyāsāmityeko'nubhavo nacet || 7/75 ||

kathaṃ syādrūpalāvaṇyavikāsāḍhyaparastriyām |
abhilāṣastathāhyeṣa prāyaḥ sparśendriyātmakaḥ || 7/76 ||

nacātra rūpalāvaṇyavilāsaḥ sparśanātmakaḥ |
evaṃ vacanamādhuryaṃ tathāṅgaśvāsasaurabham || 7/77 ||

adharāmṛtapānaṃ ca sarvaṃ syāt tacca niṣphalam |
taditthaṃ sarvaraśmīnāṃ sarvasarvātmatāmayam || 7/78 ||

pramātṛparitoṣātmasāmarasyavyavasthitam |
sa eṣa paramo vīraḥ parāhaṅkāralakṣaṇaḥ || 7/79 ||

yugapat sarvaraśmīnāṃ paraṃ drāvaṇalakṣaṇam |
ādyayāgaṃ samāsādya sāmarasyena vartate || 7/80 ||

(p. 35) cakreśvaraḥ sa evāyamādyayāgādanantaram |
catuṣṣaṣṭimayenāntaḥ śakticakreṇa saṅgataḥ || 7/81 ||

nirvikalpavikalpātmasaṃskārān paśurūpiṇaḥ |
gagalanakṣamā tato'pi pariviśrāmavilīnā(?) || 7/82 ||

haṭhenāhanti rabhasāt svacakraparitṛptaye |
madhye ca paramāmodacamatkārarasātmikā (para * -) || 7/83 ||

madirā jṛmbhate kāpi vibhasa * kalakriyaḥ |
kāndiśīkatvamāyāti paraśaktāvasāvapi (-tsāvapi) || 7/84 ||

vīrasiṃhāsanastheyaṃ devī (-vīṃ) paramamaṅgalā (-lām) |
calanānmoharūpasya kramaṇāt parasaṃvidaḥ || 7/85 ||

guruḥ sakalacakrāṇāṃ kramākramapadojjhitaḥ |
uddyotātikramaścāpi (udyogātika *ścāpi) dvaividhyena vyavasthitaḥ || 7/86 ||

parākāśaspandanecchādṛkkriyātmā bahirmukhaḥ |
ekastadvyukramātmānyaḥ parākāśapratiṣṭhitaḥ || 7/87 ||

bahirmukhatve'pīcchātaścarvaṇaṃ tattrayātmanaḥ |
kāmasaṃsargatastasya pratyāvṛttyā (+tma)samantataḥ || 7/88 ||

jñānakriyātaḥ kālasya grāso viśrāntirapyatha (-*) |
viṣayābhoganirjñātanirvikalpe'pi yat sphuṭam || 7/89 ||

kālagrasanaviśrāntī sarveṣāṃ bhavataḥ kṣaṇam |
antarmukhatve tūddyotād bhāvāmarśakriyātmakāt || 7/90 ||

ārabhya citi viśrāntiparyantaṃ pañcakaṃ sthitam |
evaṃ bahirmukhābhāvāvasare hyudayādikam || 7/91 ||

(p. 36) vyomeśvarīkramād yāvad raudreśīpañcakaṃ sthitam |
tad (*) bahirviśvamāśrityā * * * tha kriyātmanaḥ || 7/92 ||

vimarśāt paramākāśaparyantamapi tat sthitam |
* * * * samāśritya pūrvaṃ pīṭhakramātmanā || 7/93 ||

yāgādibhedarūpeṇa tajjñaptirguruṇā kṛtā |
tato viśvasya saṃsthānamāmūlāt pratipāditam || 7/94 ||

mānameyapramātrātmamūrticakrāntamityataḥ |
idānīṃ yena rūpeṇa sarvākāraṃ vilīyate || 7/95 ||

yathāsthitakrameṇaiva tad bṛndaṃ pratipādyate |
sāmarasye pravṛtte'pi jñānamelāpalakṣaṇe (-melāva-) || 7/96 ||

vāsanāvedhasaṃskārāḥ kālagrāse'pi yat sthitāḥ |
ataḥ kriyāṃ vinā teṣāṃ hi (na) nirharaṇaṃ bhavet || 7/97 ||

cidvimarśasvarūpeṇa svātmayāgamayātmanā |
alaṃ grāsapravṛttena kriyāveśena tattvataḥ || 7/98 ||

bhūya - unmajjanaṃ na syādeṣāmiti viśeṣataḥ |
raudreśvarīmayaḥ sphāraḥ parānugrahabhūmikaḥ || 7/99 ||

mithyābhimānarūpo (-vimāna-) yaḥ saṃsāro'tra vilīyate |
nissaṃskāraprakāmātmā parāśaktiḥ pravartate || 7/100 ||

asyā eva tato devyā api prādhānyamiṣyate |
nirāvaraṇatā (-ṇaṃ *) yasmādataḥ sañjāyate sphuṭam || 7/101 ||

pūrvaṃ yā jñeyasaṃskārabhittirūpāḥ pratītayaḥ |
sopānakramarūpeṇa catuṣṣaṣṭirnirūpitāḥ || 7/102 ||

(p. 37) svacakre paśurūpāṇāṃ tāsāṃ dhāmatrayātmanām |
cidvimarśasvarūpeṇa haṭhapākena gālanam || 7/103 ||

kriyate carucaryādiprakramānubhavāt sthiram (-raḥ) |
tatra raudreśvarīrūpaṃ prathamaṃ ṣoḍaśātmanaḥ || 7/104 ||

meyasaṃskāracakrasya viṣayābhogarūpiṇaḥ |
nirāvaraṇatāṃ netuṃ pravṛttaṃ cidvimarśataḥ (-kaḥ) || 7/105 ||

kāmasvarūpamāmūlādatra grastaṃ samantataḥ |
ahaṅkāreṇa siddhatvaṃ śritvā tattanmarīcinām || 7/106 ||

saṃhārabhakṣiṇīrūpaṃ jñānaṃ siddhamayātmatām |
āviśya meyasaṃskāracakraṃ tatra pralīyate || 7/107 ||

tataḥ kālasvabhāvasya dvādaśātmamayasthiteḥ |
mānasaṃskāracakrasya pratyāvṛttikramātmanaḥ || 7/108 ||

avikalpavikalpābhyāṃ caturviṃśatirūpataḥ |
mananatrāṇadharmābhyāṃ mantrasiddhamayātmatām (-nām) || 7/109 ||

āviśya tatsvarūpasya vikalpopakramo layaḥ |
bhūcarīrūpamāviśya kriyate'nubhavātmanā || 7/110 ||

tato vikalparūpasya nirvikalpapratiṣṭhiteḥ |
melāpasiddhatāṃ (melāva-) śritvā kālagrāso hi tanyate || 7/111 ||

dvādaśātmakramonmagnamelāpānantaraṃ (-melāvā-) tataḥ |
tanmātrarūpasaṃskārāstathāntaḥkaraṇatrayam || 7/112 ||

aṣṭāviha viśiṣyante śāktā avyaktamūrtayaḥ |
tadvinirharaṇādyuktaṃ śāktamaṣṭātmakaṃ haṭhāt || 7/113 ||

(p. 38) khecarīrūpamāviśya sūkṣmakālāṃśabhedakam (-kaḥ) |
sūkṣmekṣitāprakāreṇa paraṃ tanmātrarūpiṇaḥ || 7/114 ||

ekasya kāmasaṃskāravedhasyāpyasti (-nti) saṃbhavaḥ |
tathaiva cāntaḥkaraṇatrayasaṃskārabhūmigaḥ || 7/115 ||

anuvedho'sti yasyāpyudyugāpyatra saṃlayaḥ (?) |
cakrarūpaṃ śāmbhavaṃ * tañcakraṃ kramataḥ sthitam || 7/116 ||

śreyasaḥ pararūpasya śaṃsvabhāvatayā yataḥ |
bhavanaṃ śāmbhavaṃ tena cakrametat prakīrtitam || 7/117 ||

vyomeśvarī svasvarūpe pratyāvṛttikramātmanā |
raudreśīrūpamāviśya kālagrāsādanantaram || 7/118 ||

svakṛtyaṃ sakalaṃ kṛtvā samyag viśrāmyati svataḥ |
tadatra sarvasaṃskāracakramakramarūpiṇā || 7/119 ||

jñātṛbhogasvarūpeṇa catuṣṣaṣṭimayātmanā |
sphuṭāsphuṭatvabhinnena meyābhyāsād yathāyatham || 7/120 ||

meyamānapramātṛtvaṃ vicitrakramarūpataḥ |
catuṣṣaṣṭimayaṃ meyaṃ sarvākāraṃ (-*) rasiṣyate (-syate) || 7/121 ||

mudrāmantrātmako'traiva sampradāyo'nuvartate |
prasaṅgādiha tasyāpi svarūpaṃ pratipādyate || 7/122 ||

svarūpajñāpanārūpaṃ mudrāsaṃsthānamiṣyate |
svavimarśātmanā trāṇamiṣyate mantralakṣaṇam || 7/123 ||

nānānubhavarūpāsu vyavahāradaśāsvapi |
etad dvayaṃ vyāptisāraṃ sphuṭaṃ pratyakṣataḥ sthitam || 7/124 ||

(p. 39) adyāpyabhinnarūpatvāt parokṣamiva vartate |
yatparijñānavaśato bhavo bhavati muktibhūḥ || 7/125 ||

mudrāmantrau bindunādau nirīhātmā tadāśrayaḥ |
avibhāgena vartante sarvānubhavabhūmiṣu || 7/126 ||

karaṅkiṇī krodhinī ca bhairavī lelihānikā |
khecarī ceti mudrāyāḥ pañcātmakatayā sthitiḥ || 7/127 ||

yo jñānamantramelāpaśāktaśāmbhavabhedataḥ (-melāva-) |
kramastasya yathāsaṃkhyametābhiḥ sarvathānvayaḥ || 7/128 ||

mudrāmantranirīhāṇāṃ dhāmavarṇacidātmanām |
anyonyāvyabhicāreṇa sāmarasyādabhinnatā || 7/129 ||

krame sarvajñaparyantaṃ pratyakṣā kāpi yā sthitā |
yatparijñānavaśataḥ kāyavaṅmanasāśrayam || 7/130 ||

saṅkocasaṃskāralayāt sarvākāraṃ viśudhyate |
āṇavādisamāveśatrayavyāpakarūpatā || 7/131 ||

yatrāpi bhinnānubhavāt svarūpasthitaye bhavet |
yādikarmādikalma(?)trayamakramato layam || 7/132 ||

yatprasādena yatsphārāt tryuṭyate kālaghaṭṭanam |
icchānirharaṇāt sṛṣṭamākālāgni śivāvadhi || 7/133 ||

meyamadyāpyanunmagnaprathākathanarūpataḥ |
keṣāñcideva saṅkrāntā mukhānmukhamanukramāt || 7/134 ||

mahārthakathanaṃ yasyā vinā yādṛśatādṛśam |
yāṃ vināpi nayasyāsya vailakṣaṇyaṃ na jāyate || 7/135 ||

(p. 40) saiṣā rahasyarūpatvānmukhāmnāyaikagocarā |
lipau pātayituṃ śaktyā na samyagvadate manāk (*) || 7/136 ||

kaṭākṣīkriyate (* ṭā-) buddhau tajjñānaṃ sūkṣmadarśinām |
pratyakṣānubhavādasyā bhedagrāso hi yatnataḥ || 7/137 ||

avarṇākārasaṃsthānāṃ pramātṝṇāṃ svabhāvataḥ |
apaṭāṭaṅkasaṅketāt kāyasaṃsthānataḥ sthitā (-tam) || 7/138 ||

kāyasaṃsthānarūpā ca mudrā sārvatrikī matā |
karaṅkānubhavātmatvāt prathamaṃ sākaraṃkiṇī (-rakiṃkiṇī)|| 7/139 ||

tataḥ karaṅkarūpasya svātmanyādhāratāvaśāt |
saṃrabhāt krodhinīrūpamasāvāśritya vartate || 7/140 ||

tato'pi tatsvarūpasya sāntarviparivartinaḥ |
yathāyathaṃ sambharaṇād bhairavīti prakīrtitā || 7/141 ||

tato'pi vāsanārūpapuryaṣṭakavilāpanāt |
mahāvilayarūpatvāllelihāneti kathyate || 7/142 ||

tataścāpi svasvarūpe (* sva-) pratiṣṭhāmabhyupeyuṣi |
nirāvaraṇarūpatvāt khecarīrūpamāsthitā || 7/143 ||

iyaṃ sā paramā mudrā hyāpātālācchivāvadhi |
tarpayitvā jagatkṛtsnaṃ nijasaṃsthānataḥ sthitā || 7/144 ||

evaṃvidhaṃ hi yat sthānaṃ jaṅgamasthāvarātmakam |
vācakātmasvarūpāntaradhyastaṃ mantrarūpataḥ || 7/145 ||

āpādyate parāmarśāt svarūpatrāṇayogataḥ |
avarṇamayavāk kalpa * * kāratayā sthitaḥ || 7/146 ||

(p. 41) avarṇātmā mahāmantro viśvāvaraṇatatparaḥ |
nijasvarūpaṭaṅkāntapañcamudrātmakaṃ jagat || 7/147 ||

ākṛṣya ghaṭṭayatyuñcairanāhatahatojjhitaḥ |
bhedaprapañcopaśamaḥ parāmarśāntakoṭigaḥ (-śaḥ) || 7/148 ||

etad dvayaṃ saṃvidantaḥ sāmarasyatayā sthitam |
nirīharūpe viśrāntiḥ paraviśrāntilakṣaṇe || 7/149 ||

vācyavācakasaṃsthānaṃ vastutaḥ saṃvideva hi |
nirāvaraṇatā yasmāt sthitā tatrāpi vastutaḥ || 7/150 ||

parasparāpekṣatayā kālakāmau na tāttvikau |
nacāpi na sthitau yasmāt pratītipathi vartate || 7/151 ||

nirāvaraṇatvañci tadevacito yathā (?) |
svasaṃvedanasaṃsiddhaṃ tadvadevānayorna kim || 7/152 ||

āmukhād bhāsamānaṃ tu yadrūpamanayoḥ sthitam |
keśoṇḍukābhāsasamaṃ tannirāvaraṇaṃ punaḥ || 7/153 ||

aparāmarśadoṣeṇa kevalaṃ hyanayoḥ sthitiḥ |
parāmarśaḥ punardevī parānugrahabhūmikā || 7/154 ||

parāmarśe pravṛtte tu śālanaṃ yadi vā sthitiḥ |
anayoḥ samatāmeti yoginaḥ prati vastutaḥ || 7/155 ||

etadrūpaparijñānadvayaghaṭṭanasambhavā |
nirīhātmā saṃvideva prathate'nupayoginaḥ || 7/156 ||

(p. 42) mudrāmantranirīhāṇāṃ dhāmavarṇacidātmanām |
aikadhyamanayā bhaṅgyā pratibhāvaṃ vyavasthitam || 7/157 ||

mudrā svarūpakathanaṃ mantrarūpaṃ ca pūjanam |
saṃkrāmaśca (-ñca) nirīhātmā trayamekatayāpyadaḥ || 7/158 ||

pañcaśūnyātmakākāśapiṇḍarūpatayā vibhuḥ |
saṃvitsaṃsthānamāśrityā (-āśritya) varṇātmājo (-* jo) virājate || 7/159 ||

ṣoḍaśasvararūpatvamasyāntaḥ prakaṭaṃ sthitam |
apaṭāṭaṅkasaṅketāt kevalaṃ na vibhāvyate || 7/160 ||

etatprabhāvād vyutthāne samādhiryogināṃ bhavet |
anukāryānukaraṇasamānapratipattitaḥ || 7/161 ||

ekasvabhāvā (-vaḥ) sarvāsu lipiṣveva vibhusthitiḥ |
anye varṇā vibhidyante yathā nāyaṃ punastathā || 7/162 ||

ekasvarūpaṃ mudrāyāḥ karaṅkātmatayā sthitam |
ākṣiteḥ śivaparyantaṃ mahāsāmānyalakṣaṇam || 7/163 ||

tathaiva varṇarājasya mahāmantrasvarūpiṇaḥ (-ṇim) |
sarvavācakasāmānyadhvanirūpatayā sthitam || 7/164 || 7/

tathā khacakrarūpāyāḥ saṃvido'nugamaḥ sthitaḥ |
nirīhātmatayāpyetaddvayaviśrāntilakṣaṇaḥ || 7/165 ||

tadidaṃ dhāraṇādhyānasamādhīnāṃ svabhāvataḥ |
vyutthāne'pi sthitaṃ sākṣāt trayamekatra saṃyamaḥ || 7/166 ||

etat parijñānavaśād vikṣepo nāsti vastutaḥ |
etadrūpāparijñānāt kā na vikṣepabhūmayaḥ || 7/167 ||

(p. 43) tadetat paramaṃ guhyaṃ yoginīnāṃ mukhe sthitam |
mukhāgamamlānabhayādudghāṭya pratipāditam || 7/168 ||

etatprakaṭanājjāto yo'parādho mahān mama |
marīcimaṇḍalaṃ tanme kṣamyatāṃ gurvanugrahāt || 7/169 ||

pañcapiṇḍasvarūpasya (paṇḍa-) sūkṣmaprāṇakramātmanaḥ |
asyaiva varṇarājasya lipisaṃsthānamanyathā || 7/170 ||

āśritya paramā saṃvinmuṇḍadaṇḍatayā (-nmaṇḍa-) sthitā |
hṛtsaṃviduttharūpāyā varṇāraṇimayātmanaḥ || 7/171 ||

dhvanantyāḥ paramaṃ nādaṃ mahāsāmānyavācakam |
adhaḥ kuṇḍalinīsrotomahāvartaphaṇāhateḥ || 7/172 ||

svasphāradhvanirūpasya (-rādhvāna-) niṣpattyā racitāsthiteḥ |
pratyāvṛttyā tu yaddhāmameyasaṃharaṇātmanaḥ || 7/173 ||

amākalāntaṃ paśyantyāstato'pi parame pade |
binduśūnyātmani sthānānnirāvaraṇatā tataḥ || 7/174 ||

muṇḍanaṃ jñānarūpeṇa daṇḍanaṃ ca kriyātmanā |
muṇḍadaṇḍakramau tena matau jñānakriyātmakau || 7/175 ||

śiraḥpradeśe muṇḍātmā jñānendriyamayāśrayaḥ |
karmendriyasphāramayo (-dho) daṇḍātmā tu tato'paraḥ || 7/176 ||

ādyo vyomeśvarīspandarūpo viśvodayonmukhaḥ (viśva-) |
anyo raudreśvarīsphāramayo viśvavilāpakaḥ || 7/177 ||

kasyāpi piṇḍanāthasya dehasaṃsthānarūpiṇī |
vyāptisārā sthitā mudrā pañcaprāṇakriyātmikā || 7/178 ||

(p. 44) sūkṣmaprāṇakramollāsapiṇḍanāthānusandhitaḥ |
mahāprabhāvājjāyante yogināmakramodayāḥ || 7/179 ||

pratyakṣānubhavāt so'yamuttamaḥ piṇḍavarṇarāṭ |
yogināṃ mukhyaviśrāntiścidānandāya (muddya-) kalpate || 7/180 ||

parasthūlakramau prāyo vyāptisārau vyavasthitau |
sūkṣmakramaprabhāvānāmākāro yogināṃ mataḥ || 7/181 ||

ato'tra piṇḍanāthasyāpyupayogo vyavasthitaḥ |
dhāmavarṇacidaikāgryamasyāpyanubhavasthitam || 7/182 ||

āliṅgyakāyaṃ (-* kāṃ) grasituṃ yadā kālaḥ pravartate |
tadā bhogavināśāya tadā kālopi (-vi) kalpyate || 7/183 ||

vācyavācakavicchedamayaprāṇakramātmanā |
akramoccārarūpeṇa citprakāśaḥ prakāśate || 7/184 ||

akramoccārarūpasya kramātmāyaṃ vyavasthitaḥ |
adūraviprakarṣeṇa sāmānyātmatayā punaḥ || 7/185 ||

itthaṃ svānubhavaṃ tyaktvā ye saṅkhyāmātrapūraṇāt |
yathākathañciccakrāṇāṃ granthyādhārakalādibhiḥ || 7/186 ||

varṇakramāntyairanyaiśca prakārairasamañjasaiḥ |
svarūpaṃ bodhayantyuccaiḥ te'pi (ke-)  na (*) jñānaśālinaḥ || 7/187 ||

nātaḥ kramādayo'pyatra ye tajjñaiḥ pratipāditāḥ |
āṇavatvāt (ana-) prapañcasya nāsmābhiste prapañcitāḥ || 7/188 ||

āmūlād vilasati śākinīkrame'smin
śaktā * dvigalitasaṃśayodayo yaḥ |
(p. 45) bhavyānāmanubhavaniṣṭhasampradāyaḥ 
svānandāmṛtarasatṛptaye sa bhūyāt || 7/189 ||


iti śrīmahānayaprākaśe bṛndacakranirūpaṇaṃ nāma saptamollāsaḥ || 



athāṣṭama ullāsaḥ |

svātmajñānapravaṇaṃ mahāprabhāvapravartanopāyam |
sṛṣṭisthitisaṃhārasvarūpaniṣṭhakramaṃ tanumaḥ || 8/1 ||

pratyabhijñāgamyarūpaprathanātmagurūdayaḥ |
bṛndakramāntaiḥ sphuritaḥ sarvasaṃśayabhedakaḥ || 8/2 ||

ato bṛndakramasyānte pūjyate gurusantatiḥ |
ātmarūpaparijñāne parānugrahakāriṇī || 8/3 ||

ata ātmaparijñāne sampanne nirvikalpakaḥ |
vikalpavāsanāviddhaḥ pūjanātmā pravartate || 8/4 ||

pūjā nāma na puṣpādyairyā matiḥ kriyate dṛḍhā |
nirvikalpe mahāvyomni sā pūjā hyādarālayā || 8/5 ||

iti pūjāsvarūpasya tattvataḥ pratipādanāt |
svasaṅkocakalālope nirvikalpaṃ hi pūjanam || 8/6 ||

pañcākāśasvarūpasya khacakrasyānurūpataḥ |
yonyādipañcarūpeṇa pūjanātmā yataḥ sthitaḥ || 8/7 ||

tatra yonirmahāsattāviśrāntiḥ sarvasaṃvidām |
mahāyonisvarūpasya pikāyātmatayoditā (?) || 8/8 ||

(p. 46) prameyabhūmikāvartaśaṅkhayonitayoditā |
pratyāvṛttikramād bhūyaḥ svarūpapadarūpiṇī || 8/9 ||

padmayonitayā khyātā tato'pi parame pade |
nijaviśrāntimāpanno divyayonitayoditā || 8/10 ||

iti saṃkṣepatastattvaṃ pañcavāhakramasya yat |
tannirvikalpatārūpasṛṣṭyātmā pūjanodayaḥ || 8/11 ||

yuganāthaprasādena sarvadāsya sthitiryataḥ |
atastadātmakatvena sthityātmā pūjanakramaḥ || 8/12 ||

tatra vyomeśvarīrūpaṃ khagendrātmatayā sthitam |
pañcākāśasvabhāvasya nirāvaraṇatāmayam (niśā-) || 8/13 ||

mānameyamayasvāṅgasaṅkocaprasarakṣamam |
khecarībhūcarīrūpaṃ kūrmanāthatayoditam || 8/14 ||

pratyāvṛttyā prameyasya mahāsaṃhārarūpakṛt |
saṃhārabhakṣiṇīrūpaṃ meṣanāthatayoditam || 8/15 ||

bhāvātmamayarūpatvātmacchanda iti vastutaḥ |
raudraraudreśvarīrūpaṃ śrīmacchandatayoditam || 8/16 ||

taditthaṃ yuganāthānāṃ vyāptisāratayā sthitam |
adṛṣṭavigrahāviṣṭaṃ vyomeśvaryādipañcakam || 8/17 ||

avikalpakavijñānasthairyeṇa tadanantaram |
devatārūpamāsādya svasvātantryavijṛmbhaṇāt || 8/18 ||

manasaḥ khaṇḍanodyuktā ekādaśa marīcikāḥ |
buddhyādyā eṣa saṃhāraḥ pradhānaḥ pūjanakramaḥ || 8/19 ||

(p. 47) sargāvatārasaṃhāracakrāṇāmitthamiṣyate |
pūjanātmasvarūpāṇāṃ kramo'yaṃ nirvikalpakaḥ || 8/20 ||

atrādhirūḍhavṛttīnāṃ vyutthānāvasare'pi yat |
kālagrāso bhavennityaṃ nānānubhavabhūmiṣu || 8/21 ||

ataḥ pūjanarūpo'yamātmajñānatayā sthitaḥ |
upadeśataroḥ puṣpaṃ cidāmodamanoharam || 8/22 ||

tato'pi sarvavṛttināṃ kālagrāsapurassaram (kali-) |
nirāvaraṇaviśrāntiḥ saṅkramātmā pravartate || 8/23 ||

kathanādeva yeṣāṃ tadviśrāntirjāyate parā (parām) |
sṛṣṭisthitisaṃhāracakrāpekṣāṃ na kurvate || 8/24 ||

vṛndakramānantaraṃ tairanākhyaṃ cakramiṣyate |
sṛṣṭyādicakratritayaṃ tanmate naiva pūjyate || 8/25 ||

asmanmate'pi tadapi paripūrṇārthamiṣyate |
etat samārūḍhivaśāt prabhāvo hi pravartate || 8/26 ||

etadvimarśasambhūtavīrāvalyāditarpaṇāt |
āsīdvāmanavīryasya yadviṣṇustambhanādikam || 8/27 ||

pūjanāt khecaratvaṃ hi siddhasūtreṣu gadyate |
ātmajñānāt pravartante yathecchamaṇimādayaḥ || 8/28 ||

kathane (kathaṃ na) pūjane caiva saṅkrāme'pi svabhāvataḥ |
pratyekamasti traividhyamudrekād bheda iṣyate || 8/29 ||

ātmajñānasamudyatairiti nijairbhāvānubhāsātmakaiḥ 
saṃvinmajjanasāratāmupagataiḥ sṛṣṭyādibhiḥ pūjanaiḥ |
(p. 48) sampūrṇāmalasundarāmṛtamayasphārāsavānanditāḥ
kālagrāsacarūpahārarasikā nandantu yogivrajāḥ || 8/30 ||


iti mahānayaprakāśe sṛṣṭyādicakranirūpaṇaṃ nāma aṣṭamollāsaḥ ||




atha navama ullāsaḥ |

yatsargasthitisaṃhṛtikramamayaiścakrairupārūpitaṃ
na (*) svasmāccyavate manāgapi padādviśrāntilābhātmikāt |
āviśyātha tadakramakramakalottirṇaprathaṃ sāmprataṃ
tat saṅkrāmamanākhyacakramucitairyuktikramairdṛśyate || 9/1 ||

itthaṃ gurvātmadevānāṃ kathanādikamātmanā |
lolībhāvasthitaṃ nityaṃ sarvānubhavabhūmiṣu || 9/2 ||

abhede'pi (-do'pi) kilodrekādeteṣāṃ bheda iṣyate |
tamāśrityānurūpeṇa prameyaṃ pratipādyate || 9/3 ||

prāyo hi maithune madye māṃse ca paridṛśyate |
āsaktiḥ sarvajantūnāṃ viśeṣāt kasyacit kvacit || 9/4 ||

yadi tattyāgasaṃrambhaḥ pūrvaṃ teṣāṃ vidhīyate |
upadeśo na sa manāgapi citte prarohati || 9/5 ||

janmāntaraśatābyastā viṣayeṣu matirnṛṇām |
jaradgauriva sasyebhyaḥ sā hi duḥkhena vāryate || 9/6 ||

iti saṃvādatasteṣāṃ parityāgo hi duṣkaraḥ |
abhyasūyanti te yasmādupadeśakarāya ca || 9/7 ||

(p. 49) yathāsthitopabhogātmapūrvaṃ yattūpadiśyate |
tatrādhirūḍhirlokasya śraddhāpūrvaṃ prajāyate || 9/8 ||

prathaikarūpābhāvācca nirhviyante(??) tataḥ katham |
prathāyā bhāvaparyantaṃ rūpaṃ tad bhidyate katham || 9/9 ||

bhedaśced kalpyate tarhi kalpaneyaṃ na satyabhūḥ |
sphuraṇādeva vai teṣāṃ gālanaṃ nāpi tāttvikam || 9/10 ||

tacca kalpairasaṅkhyeyairbahuduṣkaracaryayā |
nacāsti sphuraṇābhāvo (sphura *-) hyanyasyānupalambhataḥ || 9/11 ||

abhāvamātraṃ nāstyeva syāccet tad bhāti sarvadā |
tasmāt tattvamatattvaṃ vā na bhāvena vinā bhavet || 9/12 ||

svasāmrājyavaśād bhānaṃ satattvātattvayoḥ samam |
hānopādānakalanātantre tvitthaṃ samarthanā || 9/13 ||

yathāsthitasya tasyātaḥ svarūpamupapadyate |
etatparijñānamayī jīvanmuktirnigadyate || 9/14 ||

ekaṃ svarūparūpaṃ hi meyamānapramātṛtaḥ |
sargāvatārasaṃhāramayirākramya vartate || 9/15 ||

svasvarūpānuguṇyena pratyekaṃ kalanāvaśāt |
sṛṣṭisthityādibhirbhedaiścaturdhā api tāḥ sthitāḥ || 9/16 ||

kālagrāsāntamudayāccaturdhā vihito hi yaḥ |
tasya viśrāntirekaiva tato devyastrayodaśa (devyātra-) || 9/17 ||

anākhyacakraprādhānyāt (anyā-) pūjanīyatayā sthitāḥ |
tāsāmantyā svaviśrāntirmahāvilayabhūḥ parā || 9/18 ||

(p. 50) sargāvatārasaṃhārāḥ kramātmāno vyavasthitāḥ |
anākhyamakramamapi kramātmaiva tadāśrayāt || 9/19 ||

akramātmaparāmarśāt kramārūṣaṇarūpiṇaḥ |
kālasya sahasā grāsasaṅkramāditthamiṣyate (grā *-) || 9/20 ||

yasmin yasmin hi viṣaye saṃkrāmanti marīcayaḥ |
tatra tatra hyanāyāsādanākhyasphuraṇaṃ sthitam || 9/21 ||

udyogenāvabhāsaścet kathaṃ saktasya sambhave |
acarvito'vabhāsaḥ syāt tadamṛṣṭatayā katham || 9/22 ||

tat sargasthitisaṃhārarūpe yo yaḥ kramaḥ sthitaḥ |
tatra tatrākramatvena anākhyaṃ prathamaṃ sthitam || 9/23 ||

atrāntare'pi viśrāntiḥ kramākramapadojjhitā |
kālopādheranākramya nāntarīyatayā sthitā || 9/24 ||

no ced bhāvāntare saṃvit prasaret kathamanyathā |
tadrūpamātrāvaṣṭambhāt paricchinnātmarūpataḥ || 9/25 ||

nīle tāvat sthitaṃ bhānaṃ bhānaṃ ca kila (tila) carvaṇe |
akrameṇa sthitaṃ no cennīlasaṃvinna sidhyati || 9/26 ||

ādau nīlaṃ tato bhānaṃ tataśca yadi carvaṇam |
anyonyaparihāreṇa nīlasaṃvinna tad bhavet || 9/27 ||

kālakramātmā kathitaḥ kramaścānyonyavarjanāt |
naivaṃ kācit pratītiḥ syādvividhāṃśābhabhedataḥ || 9/28 ||

tanniraṃśavidāṃ (-daṃ) bhogamayānākhyānubhāvataḥ |
sarvānubhavasaṃsiddhau lokayātrā pratiṣṭhitā || 9/29 ||

(p. 51) āmukhād bhāsamānaśca kramo yo'yaṃ vyavasthitaḥ |
yathānubhavametasya bhede'nākhyaṃ sphuṭaṃ sthitam || 9/30 ||

tatra meyasvarūpasya caturdhā bhedasambhavaḥ |
ādāvakalitollāsastatsambhogastataḥ param || 9/31 ||

tato'pi carvaṇaṃ tatra virāmastadanantaram |
evaṃ mānasvarūpe'pi caturdhā bhedasambhavaḥ || 9/32 ||

svaucityena parijñeyo mātṛrūpe tathaiva ca |
atra sarvatra viśrāntirekaiva nirupādhikā || 9/33 ||

āsāṃ dvādaśadevīnāṃ parāmarśabalāt sphuṭam |
vikalpavāsanāśūnyaṃ nirvikalpaṃ pravartate || 9/34 ||

ye tu yoṣidvyasaninastanmukhenaiva te kramāt |
kālagrāsapade samyak praviśanti nirāśraye || 9/35 ||

kecid darśanamātreṇa tathāṅgasparśanāt pare |
dvīndriyotpattitaścānye viśrāmyanti nirāśraye || 9/36 ||

itthaṃ yoṣidvyasanināṃ tisro'nubhavabhūmikāḥ |
dṛśyante kālavilaye viśrāntirnirupādhikā || 9/37 ||

sṛṣṭyasṛṣṭyādibhedena (sṛṣṭi-) catasro'nākhyadevatāḥ |
prameyabhūmimāśritya kālagrāsaparāḥ sthitāḥ || 9/38 ||

kṣepārthasya kalerdhātoranvarthānugamāt sphuṭam |
kālīśabdaścatasṛṇāṃ devīnāṃ vācakaḥ sthitaḥ || 9/39 ||

kṣepo bahirmukhecchātmayoṣitsambhogajanmani |
pravṛttestā (-tā) stamyādivaśāt kālagrāsaḥ (-mayaḥ) sthitaḥ || 9/40 ||

(p. 52) evaṃ madyavyasanino ye kecijjantavaḥ sthitāḥ |
teṣāṃ tadāśrayeṇaiva kālagrāso'bhidhīyate || 9/41 ||

tasyāpi darśanasparśapānayogavataḥ (-tā) sphuṭam |
udrekāt karṣato dṛṣṭaḥ kālagrāsasya sambhavaḥ || 9/42 ||

praviṣṭe'ntaḥ śīdhurase (-saṃ) bhedanirharaṇātmake |
sthairyameti camatkāro vinā viṣayasaṅgatim || 9/43 ||

pratibimbamahābhogamadhyabhūmivikāsataḥ |
pramāṇabhūmimāśritya catasraḥ kālikāḥ sthitāḥ || 9/44 ||

śabdasaṅkhyānavṛtteśca kalerdhātoḥ kilārthataḥ |
sthitisṛṣṭyādibhedena caturdhā kālikodayaḥ || 9/45 ||

evaṃ māṃsavyasanināmantarāsvādabhūminām |
pramātṛrūpamāviśya catasraḥ kālikāḥ sthitāḥ || 9/46 ||

gatārthasya kalerdhātorarthasyānugamādimāḥ |
darśanasparśasambhogavirāmodrekatā matāḥ || 9/47 ||

saṃhārasṛṣṭyādimayaścaturdhāyaṃ kramaḥ sthitaḥ |
strīmadyamāṃsabhogeṣu camatkārānuvṛttitaḥ || 9/48 ||

kālagrāso vyasanināṃ kañcitkālaṃ sphuṭaṃ sthitaḥ (-tam) |
etat parikarastvanyo bhāvavargo vyavasthitaḥ || 9/49 ||

yuktyānayaiva tatrāpi kālagrasamayī sthitiḥ |
anenaivāśayenaiva parabrahmopalabdhaye || 9/50 ||

lalanāmadhumāṃsāni pūjyāgrāṇi viśeṣataḥ |
taditthaṃ sarvabhāvānāṃ sarvānubhavabhūmiṣu || 9/51 ||

(p. 53) mahārthadṛṣṭyā sugamaḥ kālagrāso'pyayatnataḥ |
samyagvastuvicāreṇa (samyaga-) bhāvānāmāsvabhāvataḥ (-nāma-) || 9/52 ||

labdhabodhodayānandaṃ (-bodho *-) vande saṃsthānamātmanaḥ |
iti siddhamukhāmnāyayuktyā naivāsti vastutaḥ || 9/53 ||

vastusvabhāvo yatrāyaṃ kālaḥ syāt kalanātmakaḥ |
svaviṣphāramayaṃ sarvamidaṃ saṃsthānamātmanaḥ || 9/54 ||

iti bodhodayānandāt kaḥ kālo grasyate hi yaḥ |
tadgrāsasaṃrambhaparā yāśca dvādaśa kālikāḥ || 9/55 ||

itthaṃ vicāryamāṇānāṃ na kiñciditi niścayāt |
ekaiva cidacidbhogabhoganirbhogalakṣaṇā || 9/56 ||

viśrāntiḥ paramā devī kālopādhivivarjitā |
savikalpāvikalpānāṃ sarvāsā saṃvidālayaḥ || 9/57 ||

kramākramapadottīrṇā (kramāt-) tadābhogātmikāpi yā |
acalā spandarahitā sarvaspandopabhoginī || 9/58 ||

pratyakṣabhūtā sarvasyāpyadyāpi vividhairmukhaiḥ |
tathā pūjanasaṅkrāmairupāyairupalakṣitā || 9/59 ||

āsāṃ dvādaśadevīnāṃ svarūpavilayāvaniḥ |
trayodaśīti yā devī kathyate hyupacārataḥ || 9/60 ||

upādeyatayā saiva paropāsyatayā sthitā |
trayodaśīnāṃ devīnāṃ svaucityārthānusārataḥ |
abhidhānāni (-nni) vartante hṛdayaṅgamayuktitaḥ || 9/61 ||

etāsāmabhidhānena yā mantrākṣaramālikāḥ |
kālikākramadṛṣṭatvādupacāreṇa tāḥ sthitāḥ || 9/62 ||

(p. 54) melāpadarśane (melāva-) hyatra pratyakṣajñānagocare |
kathaṃ mantrasya sadbhāvaḥ sa pratyakṣo'pi vā katham || 9/63 ||

avarṇarājapratyakṣaḥ kāyānubhavabhūmikaḥ |
pañcapiṇḍātmako'pi syāt sūkṣmapratyakṣadarśinaḥ || 9/64 ||

nānyāni mantravarṇāni pratyakṣānīva sarvathā |
upacāreṇa tadvṛttikālikā kramagocarā || 9/65 ||

tattadvikalpasambhūtavāsanāvedhasaṃkṣayāt |
sarvākāṅkṣāvirahitā viśrāntirjāyate parā || 9/66 ||

itthamutthānaviṣaye bhāvānubhavabhūmiṣu |
pratyakṣaḥ sarvajantūnāṃ sthito'sau (sthito *) pūjanakramaḥ || 9/67 ||

anyairāvarakatvena ye bhāvāḥ parivarjitāḥ |
taireva jñānināmitthaṃ jājvalīti parā citiḥ || 9/68 ||

etadarthānusāreṇa stotrabhaṭṭārake mayā |
sphuṭaṃ ye vivṛtāḥ ślokāstat * * * * * * * * || 9/69 � ||


|| śubhaṃ bhūyāt ||

###########   END OF FILE  #######