####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00502
Uniform title: ājaḍapramātṛsiddhi
Author : utpaladeva
Commentator : haribhaṭṭa śāstrī
Editor : Madhusudan Kaul Shastri

Description: 
Taken from KSTS volume 34


Notes: 
Data entered by the staff of Muktabodha under the supervision of Mark S.G. Dyczkowski.

Publisher : The Research Dept. Jammu and Kashmir State
Publication year : 1921
Publication city : Srinigar
Publication country : India
####################################################



yathā sadasatām naiva viśeṣo 'sti nijātmani |
jadājaḍānām apy evaṃ nāsty asāv iti niścayaḥ || 1 ||

 vijñānasantānavādināṃ mate sarveṣāṃ bhāvānāṃ kṣaṇikatvāt 
svalakṣaṇātmake prātisvike svarūpe viśeṣābhāvaḥ saṃtānina 
ekasyānusaṃdhātur anabhyupagatatvāt | evaṃ cetanācetanānām api svātmani 
nirviśeṣatvam ||

prakhyopākhyā ca sattā yad yad asattā viparyayaḥ |
naitat svarūpaṃ spṛśati vastuno jñātṛgāmy adaḥ || 2 ||

 prakāśavimarśalakṣaṇābhyāṃ prakhyopākhyābhyāṃ tadabhāvena ca 
bhāvānāṃ sadasattayor vyavasthāpayitum iṣṭayor api vastunaḥ 
svarūpasparśābhāvaḥ, yatas tatprakhyādi jñātur dharmas tatas 
tatsvarūpavyavasthānābhāvaḥ ||

prakhyopākhyāviṣayatāpy arthasyātmā na yujyate |
parāpekṣitayā naikarūpatve sattvala''nghanāt || 3 ||

 na ca prakhyādiviṣayatve 'pi padārthasvarūpatopapadyate paraprakāśādhīnatvāt 
tasya | kiṃ cānekākāratve 'pi vastusattāyā apratiṣṭhānāt | tasmād anyonyaṃ 
vastutadabhāvayor nirviśeṣatvam |

mā bhūd viśeṣaḥ prakhyādibhāvābhāvau tataḥ punaḥ |
siddhyaty eva viśeṣo 'tra tāvatā ca prayojanam || 4 ||

 nirviśeṣatvābhyupagame 'pi sadasator vastunoḥ prakhyādi bhāvābhāvāv 
avikalāv eva tad avalambya punar viśeṣavattvasya siddheḥ, tataḥ sākalyena bhāveṣv 
arthakriyāpi siddhyed eva ||

evam apy avabhāsānuṣaktā sattocitā bhavet |
tadapekṣāṃ vinā bhāvābhāvayor aviśiṣṭatā || 5 ||

 itthaṃ ca vastusattāyāḥ prakāśalagnāyā evaucityaṃ 
prakāśamānatālakṣaṇaṃ saṃbhāvyate 'nyathā saṃvidanuṣa''ngaṃ vinā 
sadasator anyonyanirapekṣatvāt svasvarūpaniṣṭhayor viśeṣānupapatteḥ ||

kathaṃ syād aviśeṣo 'tra yāvatārthakriyāṃ hi san |
kuryān nānyas tathāpy artho nirviśeṣo nijātmani || 6 ||

 yasmāt sata eva vastuno 'rthakriyākāritvam asatas tadabhāva iti katham 
aviśiṣṭatvam arthakriyayaiva tadbhāvopapādanāt, ity ākṣepaḥ | tatrāha tathāpy 
arthakriyāyās tattatpramātradhīnatayā naisargikatvābhāvād vinā 
saṃvidāśrayatām arthasya svātmani viśeṣādhāyaktvāsiddheḥ ||

evam arthakriyābhāsopādhisaṃbhedam āgataḥ |
sann arthaḥ syāt svarūpeṇa nāsatas tu viśiṣyate || 7 ||

 uktaprakāreṇa saṃvidy apratiṣṭhānād arthakriyākāribhis 
tattadābhāsopādhibhiḥ saṃbhinnasyārthasyārthasvarūpeṇa sattāsaṃoattāv api 
punar asato 'rthād viśeṣo na siddhyet ||

tatrāpy arthakriyā siddhasattākārthe na varṇitā |
samam evānayos tena pratiṣṭhā saṃvidāśrayā || 8 ||

 tayor ubhayoḥ sadasator madhye 'pi prāgasiddhe 'rthe 'rthakriyāyā avyavasthitatvāt, 
atha ca pūrvasiddhe 'rthe tatsiddher nārthakriyaiva vastvātmā; tasmād 
bhāvābhāvayor akramam eva saṃvidadhīnaiva siddhis tanniṣṭhatvād eva 
bhāvavyavasthitīnām ||

saṃvid apy aparāmarśarūpā cet tad asāv api |
abhāvena jaḍenātha tulyaiva prāgvad ātmani || 9 ||

 nirvimarśasya prakāśasyāpi sphaṭikādivad viśvāvabhāsane 'py asvatantratvāt 
svātmany asatā jaḍena ca bhāvena sādṛśyam eva syāt parasparavṛttaparijñāne 
'nelamūkaprāyatvāt, etena śāntabrahmavādanirāsaḥ kaṭākṣitaḥ ||

saivaṃ bhūtātmanā svenāpy alabdhapariniṣṭhitiḥ |
katham anyasya bhāvasya pratiṣṭhāspadatām iyāt || 10 ||

 nirvimarśā saṃvit svato ' labdhasattākā paraṃ vyavasthāpayituṃ nālaṃ 
gaganakusumam iva saurabhādijanane ||

idam ity ucitaḥ saṃvit prakāśe 'nyasya vastunaḥ |
pratiṣṭhātmakatāṃ gacched aham ity ātmanā punaḥ || 11 ||

 bhinnaṃ vastu idaṃtāvimarśena prakāśanārhaṃ sat punar ahaṃtātmanā 
vyavasthām iyāt | saṃvid eva viśvasphurattāmayī svasvātantryād eva 
vicitrārthātmanāvibhinnaprakāśamayena prasphurantī viśvajīvitaṃ, tad 
ahaṃtāviśrāntiṃ vinā svato 'siddhaṃ kathaṃ vyavahāryaṃ syāt ||

vyatireketarābhyām hi niścayo 'nyajaḍātmanoḥ |
vyavasthitiḥ pratiṣṭhā ca siddhir nirvṛttir ucyate || 12 ||

 jñātari vyavasthitatve san jaḍo 'nyathāsan, svātmānyasaṃrambhatve 
svaprakāśatvaṃ tadabhāve nāstīty anvayavyatirekābhyāṃ hi svaparatvaniścayaḥ, 
sa ca vyavasthāpratiṣṭhādiśabdair ucyate ||

evam ātmany asatkalpāḥ prakāśasyaiva santy amī |
jaḍāḥ prakāśa evāsti svātmanaḥ svaparātmabhiḥ || 13 ||

 itthaṃ jaḍabhāvānāṃ saṃvidviśrāntiṃ vināsatkalpatvāt svātmany 
asatsvabhāvānāṃ jñātuḥ prakāśasvabhāvasya saṃbandhitayaiva sattvaṃ, 
tasmāt saṃvitprakāśa eva svātmocchalattayā svamāyāśaktyullāsite 
viśvavaicitrye jaḍājaḍabhāvarāśidvayena vedyavedakātmakena 
svarūpānatiriktenātirikteneva praśpuret, -- iti svātantryavādasya pronmīlanaṃ 
sūcitavān ācāryaḥ ||

na caivānubhavo 'py asti bhinnābhinnaviniścayam |
muktvānvayasya prakāśasya vimarśarahitātmanaḥ || 14 ||

 saṃyojanaviyojanātmakaṃ svātantryaṃ vihāya sato jaḍaprakāśasya naiva 
saṃrambhātmānubhavo nirvimarśātmakatvāt | etad eva hi pratyavamarśasya 
māhātmyaṃ yad viśvaṃ svātmaikyenāntaḥsthitaṃ bahiridaṃtayodbhāsayan 
udbhāsyamānam api punaḥ pūrṇāhaṃtāviśrāntyabhedam āpādayet ||

idam ity asya vicchinnavimarśasya kṛtārthatā |
yā svasvarūpe viśrāntir vimarśaḥ so 'ham ity ayam || 15 ||

 idam iti vicchinnatayā vimṛśyasyāsya jaḍasya yā saṃvitsvarūpaviśrāntilakṣaṇā 
kṛtārthatā so 'yam aham eva tattadbhāvavaicitryātmanā prakāśe iti 
caitanyaprakāśatādātmyād ahaṃpratyavamarṣātmā jīvitasthānīyaḥ, 
yadāśrayāj jaḍam api vastu vimraṣṭṛsvabhāvapramātraikyād 
ahaṃbhāvaviśrānter ajaḍatvam āyāti | ajaḍāś ca vastutaḥ 
parapramātrekasvabhāvāḥ, -- ity advaito 'jaḍapramātṛbhāva eva sarvataḥ 
pāripūrṇyena vijṛmbhate iti tātparyam ||

dvidhā sa eṣa evātmā mito 'parimitas tathā |
prāṇādinā niruddho 'ṇuḥ paramātmā tv akhaṇḍitaḥ || 16 ||

 sa eva saṃvidātmā parameśvaraḥ svecchayā viśvakrīḍollilāsayiṣāyāṃ 
prāṇādyātmatām avabhāsya tatpramātṛtvena saṃkucitībhūya jīvatām eti, 
prāṇādyaniruddhas tu viśvanirbharitātmatayā pūrṇaḥ svatantraś cidātmaiveti 
parimitāparimitatvena dvividhatvam ||

ubhayo 'py eṣa paryantabhūmiḥ sarvārthasaṃvidām |
eka evānusandhānād ato 'nyo nopapadyate || 17 ||

 dvividhasyāpy asya prakāśātmanaḥ samastabhāvābhāvātmikānām 
arthasaṃvidāṃ viśrāntyāspadatvam | sa ca paurvāparyānusaṃdhātṛtayā 
saṃvinmātrasphurattaikarūpa eva yasmād ato bhedānupapattiḥ ||

na cāpy avyatirekātmavimarśātmany ahaṃvidi |
bhāti paryantavartinyāṃ bhāsanād adhikaṃ jaḍam || 18 ||

 na ca viśvābhinnapratyavamarśasvarūpe 'haṃprakāśe 
sarvajñānaviśrāntibhūmau tatprakāśādhikyena jaḍasya sattā, tasya 
saṃvitprakāśād bhedābhedavikalpair upahatatvāt, ata eka evājaḍapramātā 
svasvātantryeṇa svābhinnaṃ bhāvajātaṃ svātmany evodbhāsayan vilāpayāṃś 
cāpracyutasvātmasthitiḥ prasphuratītyarthaḥ ||

na siddho 'prathanād eva jñānādisamavāyy api |
tat prāṇādi prameyaṃ syān na pramātānyato bhramāt || 19 ||

 jñānādiguṇaiḥ samaveto 'pi parimitapramātā vimarśavaidhuryād eva na 
siddhyati nirvimarśatve jāḍyaprasa''ngāt, tasmād vyavacchinnāṃ bhrāntim 
āśritya prāṇapuryaṣṭakamātur vedyatvaṃ syān na paramārthapramātṛbhāvaḥ 
saṃbhāvyate ||

yady apy arthasthitiḥ prāṇapuryaṣṭakaniyantrite |
jīve niruddhā tatrāpi paramātmani sā sthitā || 20 ||

 māyāvyavahārātmani lokayātrāyāṃ yady api prāṇādi saṃkocavati jīve 
sarveṣāṃ bāhyābhyantarāṇāṃ viṣayāṇāṃ vyavasthitir niyantritā tathāpi 
saṃkucitātmani tatra mitapramātari saṃkocāpahastanena parapramātrekātmatayā 
śivātmany eva sā tiṣṭhati prāṇādeś citprakāśād avyatirekitvāt, śivasyaiva 
svecchayā samullāsitāyāḥ paśubhūmikāyā grahaṇenāṇubhāvābhyupagamāt 
||

tadātmanaiva tasya syāt kathaṃ prāṇena yantraṇā |
sādhitā pratyabhijñāyām akhyāter jīvatā param || 21 ||

 tasmād vastutaḥ śivasvabhāvābhinnena prāṇādipramātrā saṃkucitaśuktikena 
katham anavacchinnaprakāśānandamayapūrṇāhaṃtāsphurattātmanaḥ 
śivasyāvabhāsananirodhaḥ syāt tathātve tasya svayaṃ sthātum aśakyatvāt 
kevalam aparicchinnasvaśaktivikāsasyāprathanam eva bandhakatvaparyāyaṃ 
jīvatvaṃ, tasya ceśvarapratyabhijñāyāṃ śāstre savistaraṃ nirṇītatvād iti tata 
eva vivecyam ||

nārthavyavasthā prāṇādāv ahaṃbhāvanirodhataḥ |
prakāśasyātmaviśrāntir ahaṃbhāvo hi kīrtitaḥ || 22 ||
uktā saiva ca viśrāntiḥ sarvāpekṣānirodhataḥ |
svātantryam atha kartṛtvaṃ mukhyam īśvaratāpi ca || 23 ||

 prāṇādau parimitapramātrāspade jaḍe svātmamātrasphurattātmanaḥ 
parāmarśasya nirodhān naiva vastuvyavasthā tasyāḥ saṃvinniṣṭhatvāt, yato yā 
saṃvidaḥ svātmamātraviśrāntiḥ sa eva pūrṇāhaṃtāvimarśasvabhāvo 
'haṃbhāvo 'rthavyavasthāpako gīyate | saiva viśvabhāvānāṃ 
paryantapratiṣṭhābhūmikatvād viśrāntiḥ, viśvaprasaraṇe 
svavyatiriktasāmagrīnirapekṣatvāt svātantryaṃ, tad eva kartṛtvaṃ mukhyam 
aiśvaryam apy āgameṣūdghoṣyate ||

māyābhidās tacchakter eva cānyāprasiddhitaḥ |
tadakhyātimayaṃ hy etaj jagannirmātṛteśitā || 24 ||

 māyā nāma śaktiḥ śivasya śaktimato 'vyatirekiṇī svarūpagopanātmikā 
krīḍā, tannimittād eva yasmād akhyātimayam etad viśvaṃ bhāsate 
vyatiriktakāraṇasya bhedābhedavikalpopahatatvenāprasiddhatvāt, tasmād 
viśvābhāsānāṃ nirmātṛtvam īśvaratvam ||

ekaiva cānusaṃdhānāt sā proktā sarvasaṃvidām |
svasaṃvedanaparyāyamātṛtattvam anādi tat || 25 ||

 saiśvarī parāśaktiḥ samastānāṃ vicchinnanīlāsisaṃvidāṃ 
saṃyojanaviyojanādau kārye pūrāparādikoṭāv aikyānusaṃdhānam āśritya 
tadādhārabhūtān avacchedinī ekaiva, tad eva svasaṃvedanaparyāyaṃ mātur 
anādi tattvam ucyate ||

bhāvavyavasthā yan niṣṭhā tasyāhaṃbhāvabhāginaḥ |
vyāpitvam anusaṃdhānaṃ taj jaḍasya na yujyate || 26 ||

 yatra sarvārthānāṃ vyavasthitiḥ pratiṣṭhitā tasya saṃvidātmanaḥ 
pūrṇāhaṃtāparāmarśasārasyājaḍapramātuḥ svātantryāvinābhāvavattvāt 
sarvatrānusaṃdhānātmakaṃ vyāpitvam asti, tac cāsvatantrasya jaḍasya na ghaṭate 
vimarśasāratvābhāvāt ||

tato bhede tu bhāsasya ghaṭate bhāsamānatā |
tenoktam pratyabhijñāyāṃ tadadvayamayaṃ jagat || 27 ||

 ajaḍatvam āśritya punar etāvati bhedollāsātmake viśvasmin nīlasukhāder 
bhāsasyāparikṣīṇāntaḥsthiter eva jñānaśaktyā bahirbhāsinaḥ 
prakāśamānatāyā ghaṭanāt; atha cābhedam avalambya jaḍasya punaḥ 
prakāśanopapatter anyathā tv aprakāśanāt | tena hetunā 
śrīmadīśvarapratyabhijñāyāṃ saṃvidadvayaprakṛti viśvam uktaṃ bhavatīti 
śivam ||

[pramātṛsiddhāv ācāryotpaladevakṛtau manāk |
candrābdhyaṣṭenduśākābde śāstrī vṛttiṃ haro vyadhāt || [śāka era 1841]]

ity ajaḍapramātṛsiddhau 
śrīmānmahāmāheśvarācāryotpaladevapādaviracitāyāṃ vṛttiḥ samāptā ||]






###########   END OF FILE  #######