####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00020
Uniform title: īśvarapratyabhijñāvivṛtivimarśinī Volume 1
Author : abhinavagupta
Editor : śāstrī m. k.

Description: 
Text taken from Vol. 60 of the Kashmir Series of Texts and Studies, The īśvarapratyabhijñā vivṛtivimarśinī by Abhinavagupta Vol. 1


Notes: 
Data-entered by the staff of Muktabodha under the supervision of Mark Dyczkowski.    Revision 0: 19/11/2005  

Publisher : Research Department Jammu and Kashmir State
Publication year : 1938
Publication city : Bombay
Publication country : India
####################################################
oṃ

kāśmīra-saṃskṛtagranthāvaliḥ |

granthāṅkaḥ 60

īśvarapratyabhijñāvivṛtivimarśinī

śrīmanmahāmāheśvarācāryavarya-śrīmadabhinavaguptaviracitā |

śrīrājarājeśvara-mahārājādhirāja-kāśmīranarendra-śrīharisiṃhajī-
bahādurājñayā

risarca-kāryālayādhyakṣa-paṇḍita-
madhusūdanakaula-śāstriṇā 

uddiṣṭakāryālayasthetarapaṇḍitasahāyena

saṃśodhanādisaṃskaraṇottaraṃ

saṃpādya

mumbayyāṃ nirṇayasāgara mudraṇālaye mudrāpayitvā prākāśyamupanītā |

(prathamo bhāgaḥ)

saṃvat 1994 kāśmīra-śrīnagara straistābdaḥ 1938.

(asya granthasya mudrāpaṇādyadhikārāḥ proktamahārājavaryaiḥ 
svāyattīkṛtāḥ santi)


(page 1)


atha

īśvarapratyabhijñāvivṛtivimarśinī |

śrīmanmahāmāheśvarācāryavaryaśrīmadabhinavaguptapādaracitā |


.o namo maṅgalamūrtaye |

śrīśaktitritayāviyogi hṛdayaṃ bibhrattadekātmasā-
dbhāvāvirbhavadātmabhāvanibhṛtollāsādhvavispanditam 
śrīmadbhairavadhāma tadvijayatāṃ bhaktāntarātmasphurat-
stotraprābhṛtasaṃgrahonmukhatayā yadviśvarūpāyate || 1 ||
labdhvānugrahamīśvarānnijamahaḥsaṃbhārasaṃdīpino 
dehe'sminnarasiṃhaguptaghaṭite labdhāspadaḥ paścime | 
śrīmallakṣmaṇaguptadarśitapathaḥ śrīpratyabhijñāvidhau 
ṭīkārthapravimarśinīṃ racayate vṛttiṃ praśiṣyo guroḥ || 2 ||
ghaṭayati paripākaṃ śabdavṛtte pramāṇe 
vighaṭayati ca bhūyo mṛtyusantrāsacintām |
abhinavamatirevaṃ ceśvarapratyabhijñā-
vivṛtipadavimarśinyeva bhogāpavargau || 3 ||
nijānujamanorathaprathitasatpathābhyarthanā-
vaśo'bhinavaguptasatpadaniveśitasvātmakaḥ |
prakāśayati mārgamenamamunā jano'pyunmanāḥ 
prayāti śivadhāma tat pathi na yatpaśūnāṃ dṛśaḥ ||  4 ||

(page 2)

pūrṇavyākaraṇāvagāhanaśuciḥ sattarkamūlonmiṣat-
prajñākalpalatāvivekakusumairbhyarcya hṛddevatām |
pīyuṣāsavasārasundaramahāsāhityasauhityabhāg-
viśrāmyāmyahamīśvarādvayakathākāntāsakhaḥ sāṃpratam 
amṛtamanantamanuttaramaghoraṣoḍaśakaśakticakragatam |
aunmanasapadanirūḍhiprathamopoddhātakaṃ bande || 6 ||

     iha eka eva śrīmadasmatparameṣṭhiśrīsomānandapādaprasādāpasārita-
saṃkocaḥ śrīmān utpalākhyaḥ śāstrakāro vikasvarasvahṛdayakamalaparimala-
pavitritadigantaḥ sūtraṃ vṛttiṃ ṭīkāṃ ca īśvarapratyabhijñānasiddhaye 
kṛtavān | tatra sūtrakārabhūmikāvasthitaḥ kathaṃcit ityādinā maheśvaraṃ 
prati prahvaṃ svātmānaṃ parāmṛśan tadvākyapaṭhanapuraḥsarībhāvena 
vṛtteravaśyaṃbhāvitāṃ paśyan, punarvṛttikārapadāvasthitaḥ pravṛttyantareṇa 
na parameśvaraprahvatāṃ svātmani satatavāhinīmapi parāmarśa sūtrakāra eva 
ca etadbhūmikāpanno vartate iti darśayitum | yadapi vṛttau 
svasāmānādhikaraṇyena idaṃ darśitaṃ pratyabhijñāpayāmi parituṣyeyam 
ityādinā, anyathā sūtrakṛdevaṃ karotīti vaktavyaṃ syāt, taddarśane ca 
prayojanaṃ vṛttikṛtaḥ sūtrārthānavabodhe saṃbhāvanānirāsaḥ, tannirdeśe'pi 
nāyaṃ vītāśaṅkamāśayaḥ | sphuṭībhūtārthavyākhyānāya 
paryāyadānamātreṇa itthaṃ prayuktaṃ, yathā kāvyaṭīkāvyākhyāna-
prakriyāyāṃ
     viditaṃ vo yathā kāścinna me svārthāḥ pravṛttayaḥ | (ku. saṃ. 6 | 26) 
ityatra bhagavaduktau vyākhyāyamānāyāṃ mama na kecana svasmai vyāpārā 
iti ṭīkākāro vyācakhyāno'pi na bhagavata evābhinna iti pratīyate iti 
saṃbhāvyetāpi | namaskārāntarākaraṇātmikaiveyaṃ

(page 3)

sūtrakaraṇapūrvakasamanantara-tatsūtravṛttigranthakaraṇātmikā 
pravṛttirācāryasya ekatāṃ gamayati anyathā evaṃ 
bhūtaikapravṛttinirvāhāsaṃbhavāt | ṭīkākārapadamadhiśayānastu 
śāstrakāro'vaśyaṃ pravṛttyantareṇa yujyate | tatra ca mūlaślokapāṭho na 
pūrvabhāvī | (tasya hi avatāraṇakramo'vaśyavaktavyaḥ | pravṛttyantare ca 
avaśyaṃbhāvini parameśvaraṃ prati prahvatāparāmarśaḥ 
punaravaśyānusaṃdheyaḥ) | yadyapi asya pratyabhijñāteśvaraśaktivijṛmbhā-
rūpasamastasvaparātmapariniṣṭhitavedyavedakaprapañcasya unmiṣitamātramapi 
na parameśvaraprāvaṇyādatiriktam, kimaṅga īśvaraśaktipratyabhijñānarūpa-
pramāṇaparighaṭanaṃ, tathāpi rājotsavālaṃkārasvādhīnabhartṛkāmadanot-
savasaṃbhoganyāyena avaśyaṃ samagratatsārabhūtasvarūpaparāmarśanaṃ 
kartavyaṃ pravṛttyorantarālapāti bhaviṣyatpravṛttisāphalyabhāvanāya | 
ekagranthakārakṛtatvaṃ tu svayameva ākhyāsyati trayyāṃ vāci  ityādinā | tatra 
ayaṃ granthakāraṣṭīkākārapadaṃ pratipanno vakṣyamāṇaśāstrasandarbhagata-
mupāyena parapratipādanāyāmavaśyakartavyamapi pūrvapakṣatatpratikṣepa-
prabhṛti tuṣakambukapalālaprāyamavadhīrya, tat sthirarūpaṃ paramamupādeyaṃ 
parāmraṣṭuṃ namaskāraṃ karoti svecchā ityādinā 

svecchāvabhāsitāśeṣalokayātrātmane namaḥ |
śivāya śaśvadacchannasvacchasvacchandavṛttaye ||

svasmāditi ātmanaḥ sakāśāt, svasminniti ātmani eva, svayaiva ca icchayā 
avabhāsamānā anyonyāvahānena bhedātmanā nirbhāsamānāḥ saṃpāditā 
aśeṣāḥ śuddhāśuddhamiśrarūpā lokāḥ pramātṛprameyāḥ, teṣāṃ ca 
yātrāḥ prāptayaḥ parasparasaṃbandhāḥ kāryakāraṇabhāvakriyākāraka-
bhāvavaicitryādayaḥ, teṣāmātmā pāramārthikaḥ svabhāvo yaḥ, sa eva śivaḥ | 
ekamapi ca idaṃ padaṃ śaktibhedāt

(page 4)

tantrādāvṛttervā adhyātmādhidevādhiyajñādimantrārthavat bahūn arthān 
svīkaroti  | ekaniścayārohayaugapadyasiddhaye ca evaṃ prayujyate, yadvakṣyati 
śleṣayā iti | ya evaṃbhūto bhagavān tasmai namaḥ iti tadviṣayaṃ 
prahvībhāvaṃ dyotayati namaḥ śabdaḥ | nanu svarūpāvasthitamaśeṣaṃ 
vedyavedakaprapañcaṃ tataḥ svarūpāt bahirbhāvena nijayā icchayā 
bahirbhāvayannasau bahirbhūtānapi svātmani eva avabhāsayati, tathā 
avabhāsyamānānāmapi teṣāṃ sa eva ātmeti sarvamidaṃ viruddhamālakṣyate | 
tathāhi samastā iyaṃ lokayātrā bhagatyeva cidātmani svarūpe viśrāntetyetadeva 
tāvat kathaṃ pratyeyam | tadīyayaiva ca icchayā yadi bahiravabhāsyate, tadidānīṃ 
tatraiva svātmani avabhāsyate-iti kimetat | svātmani avibhedena hi yadavabhāsanaṃ, 
tadviruddhaṃ bahiravabhāsanam | nahi yat bhāsamānaṃ tatraiva bhāti, tat tadaiva 
tadvahirbhūtaṃ yuktaṃ ghaṭa iva gṛhāntarbhūtastadvahirbhūtaśca | kiṃca tathā 
bhāsamānānāmapi eṣāṃ sa eva śiva ātmeti nitarāmaprātītikam | tathā 
bhāsamānatvaṃ hi bhedāvabhāsanena vyāptam, śivātmakatvaṃ ca 
eṣāmekātmakatvena tadviruddhena vyāptam, tat nānātmānaśca ekātmānaśca 
yugapadeva amī bhāvā ityuktaṃ kaḥ pratīyāt | svātmani ca vyavasthitaṃ 
vedyavedakarāśiṃ bahiravabhāsayituṃ kimarthamasya icchā utpadyate, 
niṣkāraṇameva vā | tathecchotpādābhyupagame satatameva tathābhāvaḥ syāt, na 
kadācidveti, tatsarvamidamasamañjasaprāyamiti āśaṅkya āha śaśvat iti | yat 
tāvaduktaṃ śivātmanyeva viśvaṃ viśrāntamiti kathametaditi | tatrocyate | iha 
bhāvānāṃ sattvaṃ, asattvaṃ vā vyavatiṣṭhamānaṃ saṃvidviśrāntimantareṇa 
na upapadyate | saṃvidviśrāntā hi

(page 5)

bhāvāḥ prakāśamānā bhavanti | prakāśamānatā ca eṣāṃ saṃvidabheda eva 
| prakāśa eva saṃvidyataḥ | tatprakāśādatiricyante ca, prakāśante ceti ucyamāne 
nīlaṃ svarūpāt vyatiriktam, atha ca nīlamiti ucyate | tadamī saṃvidi tāvat 
viśrāntā bhāvāḥ saṃvidanadhikavṛttaya iti āyātam | na ca saṃvido bheda 
upapadyate | prakāśaikarūpāyāṃ hi saṃvidi saṃvidantarāt svarūpabhedakṛte 
bhedavyavahāre ekataratra aprakāśarūpatvamuktaṃ syāditi 
asaṃvidrūpatvamāpatet | vedyāśca amī tatsvarūpaikātmyabhājaḥ 
svayaṃbhidyamānatvaṃ cet saheran, tat svamahimnā saṃvidaṃ bhedayeyurapi | ta 
eva tu na svato bhedamālambituṃ samarthāḥ | atha saṃvedanakṛta eva eṣāṃ 
bhedaḥ, suspaṣṭamanyonyāśrayam | deśakālāvapi vedyarāśimadhiśayānau 
vedyatvādeva saṃvittādātmyamabhidhāvantau kathaṃkāraṃ tāṃ saṃvidaṃ 
bhintām | vedyarāśirhi samasta evaṃ prakāśādabhinnaḥ | yat prakāśate, tat 
prakāśābhinnaṃ saṃvitprakāśa iva | nahi prakāśabhinnasya aprakāśamānasya 
prakāśamānatā yuktā virodhāditi evaṃ prakāśamānatvaṃ 
prakāśabhinnatvāt vipakṣatvāt svabhāvaviruddhāmaprakāśamānatāmatra 
baddhāspadāmavadhīrya vyāvṛttaṃ prakāśābhinnatvena vyāpyata iti 
vyāptisiddhau svabhāvahetuḥ | saṃvidaśca svaprakāśatvamasahamānā amunaiva 
pratikṣiptā mantavyāḥ | tat vedyabhedavat deśakālabhedo'pi na saṃvido 
bhedakaḥ | kiṃca vedye deśakālaprabhṛtaya upādhayo na jātucit 
svarūpābhinnaṃ bhāvaṃ bhettuṃ śaktāḥ | kevalaṃ svarūpabhedo bhavanneva 
taiḥ pariniṣṭhīyate | na ca saṃvidi kathaṃcidapi svarūpabhedaḥ 
prakāśaikarūpatvāditi hi uktam | tadamī prakāśa eva tāvadviśrāntā bhāvāḥ | 
prakāśaśca vimarśaśūnyo na bhavati | tataśca vimarśa eva bhagavata icchā 
nityaiva rudrakṣetrajñapramātṛvargasukhaduḥkha-

(page 6)

nīlapītādiprameyasaṃcayaṃ ca avabhāsayatīti, tathā avabhāsamānamapica 
saṃvinmaye prakāśa eva viśrāmyati, anyathā tathātvasyaiva asatkalpatvāt, naca 
prakāśamātratāmujjhati prakāśādatiriktasya tṛṇamātrasyāpi 
aprakāśanaprasaṅgāt | tadevaṃbhūtaṃ nirbhāsamānaṃ kathamapahnūyatā-
miti virodho'pi atra na kaścit | yadi hi nīlamanujjhitanīlaprakāśabhāvameva 
anīlaprakāśatayā nirbhāyāt, ko nīlānīlayorapi virodhavaidhuryamuddhoṣayet | 
iha punarnīlādayo'nujjhitanīlādibhāvā eva prakāśamānāḥ santaḥ 
prakāśābhedamayāḥ | tadidameva bhagavataḥ svācchandyam-yat saṃvidātmaka 
eva bhavan vicitrapramātṛprameyātmanā saṃvidrūpānadhikenāpi 
saṃvidrūpādhikatayā nirbhāsamānavapuṣā prakāśate ca, tathā vimṛśati ca | 
anadhikasyāpi adhikasya iva bhāsanaṃ svacchabhāva ucyate darpaṇasya iva | sa hi 
prākāragṛhahastyaśvapuruṣaghaṭakumbhakārabhedaistadgatāvayavāvayavibhā-
vādhārādheyabhāvakāryakāraṇabhāvaprabhṛtibhiśca 
vyavahāranivahairmanāṅmātramapi svarūpānadhikairapi atiriktairiva ca yat 
nirbhāsate, tadevaṃ svaccha iti ucyate | kevalamasya tathāvimarśābhāvād-
asvācchandyaṃ jaḍatvam | parameśvarastu tathā bhāsamānamātmānaṃ 
vimṛśatyeva saṃvido vimarśaparyantatvāt | yacca uktaṃ sarvadaiva tathā 
bhāsamānaṃ syāditi | tatra sarvadeti kadāciditi ca yadi kālaḥ kaścit 
tannirmāṇanirapekṣaḥ svatantrastat tadavalambanena codyetāpi | naca evam | tathāhi 
asminkāle dyotyāderna asya śabdasya artho'nyaḥ kaścidṛte tathā bhāsamānāt 
sūryaparispanditāt | tadetaduktaṃ syāt-tatsūryādivispanditasahabhāvenaiva 
kasmāt nīlādi viśvaṃ bhāsata iti | tadidamapi kiṃ na codyate-nīlameva pītaṃ 
kiṃ na bhātīti | nanu evaṃ na nīlaṃ bhāsitaṃ syāt | yadi evam, anyathā bhāsane

(page 7)

tadeva tatsūryavispanditaṃ nāvabhātameva syāt | saptārṇavamīlananirbhāsitve hi 
pralayadinameva adyatanaṃ dinaṃ syāt, nādyatanaṃ dinaṃ tadbhāve 
tadubhayātmanāpi | naca atiriktena vapuṣā bhāti parameśvara iti na kiñcidatra 
aprātītikam | saṃvedanasyaiva hi svapnasaṃkalpaśāstranirmāṇādau 
tattadantarvyavasthitabhāvasaṃbhārabahiṣkriyāyāmapi anatireko dṛṣṭa iti pratyuta 
pratītibahiṣkṛtaparikalpanamaprātītikam | tena śaśvaditi 
kālaparicchedāsaṃbhavaḥ | acchanneti svarūpānatirekaḥ | svaccheti 
anatiriktatve'pi atiriktatābhāsasaṃbhavaḥ | svacchandeti vimarśasvātantryayogaḥ | 
vṛttipadena eṣāṃ rūpāṇāṃ bhagavati śaktimati śive tādātmyāvabhāsa 
uktaḥ | śaśvaditi kālāparicchannā, acchannā svarūpānyathābhāvaṃ 
manāgapi abhajamānā, svacchā adhikanirbhāsanamiva sahamānā, svacchandā 
pāryantikapratiṣṭhāsthānavimarśāśūnyatayā tadvimarśasthānāntaro-
payācñālakṣaṇapāratantryaviyuktā vṛttirvartanaṃ svarūpaspanditameva yasya, 
sa eva aśivarūpasāṃsārikamohāpahastanayogādānandasārabhogā-
pavargarūpaparāparaśreyaḥparamārthatayā śivaḥ parameśvaraḥ, tasmai nama iti 
śāstrakṛt vāṅmanaḥkāyānāṃ tatprahvatāmāviṣkaroti | prahvatā ca 
uktarūpā bhagavatsvarūpotkarṣadarśanena tadicchāvaśāviśīrṇaśarīra-
prāṇādikalpitapramātṛbhāvanāsaṃskārātmakaśeṣavṛttisaṃbhave 
vyutthānasamayasaṃbhāvyamānasya śarīrādigatapramātṛtābhimānodrekasya 
apāsanena māyāpramātrabhimānātirekanyagbhāvitasaṃvidātmakasvasvarūpa-
tāyā unamagnatātmakaḥ samāveśaḥ | tādṛśaṃ śivasvarūpaṃ 
pradhānapramātṛtayā adhiśaye nyakkaromi māyāpramātṛbhāvābhimānamiti 
anyanipātavat dyotaka eva ayaṃ namaḥ śabdaḥ | yattu namaḥśabdasya 
svarūpaparatvamabhidhīyate, tat na manoramam | nahi bhagavati namaḥ-

(page 8)

śabdasvarūpārpaṇena kiñcit | gītanyāyena hi namaḥśabdaḥ śrūyamāṇo 
bhagavati paritoṣamādhatta iti śapathaśraddheyo'yamarthaḥ | svāhādīnāmapi 
homādau dīptyabhivṛddhidevatārpaṇatarpaṇaprabhṛtirdyotya eva arthaḥ, na 
svarūpaniṣṭhatā cādinipātavat | svarūpaparatve tu caḥ paṭhita itivat 
sattvarūpatāyāmanavyayatvaṃ syāt liṅgasaṃkhyādiyogaprasaṅgāt | arthasya ca 
śabdena ko yoga iti tadyoge caturthī vighaṭeta | namaskaroti namasyatīti 
namaḥśabdamuccārayatīti arthaparyavasāne parameśvaramiti 
bāhyakarmasaṃbandhānupapattiḥ | vācika eva ca tadā namaskāro mānaso'pi vā 
syāditi kāyiko namaskāraḥ kathamiti traividhyaprasiddhyayogaḥ | asmatpakṣe tu 
manasā vācā kayena svātmānaṃ prahvīkurvan nyagbhāvayan 
bhagavantamutkarṣayatīti namasyaterarthaḥ iti sarvamupapannam | yadvakṣyati 
jayanamaskārādyabhidhānenāpīśvarasyotkarṣaḥ khyāpanīyaḥ 
svātmanaśca tatpravaṇatā iti | āgameṣvapi namaḥsvāhāvauṣaḍādīnāṃ 
vividhasiddhijananopayogitayā jātiśabdavācyānāṃ tattadarthadyotakatvameva 
abhidhīyate | saṃbhavantaṃ ca arthopakāramanādṛtya svarūpakṛtopakāra-
samāśraye ko grahaḥ | tadevaṃ yato viśvaṃ nirbhāsate, yatra ca viśrāntaṃ 
nirbhāsate, yadicchayā ca prakāśate, yaśca viśvasya prakāśamānasya ātmā, 
yacca viśvatrāpi nirbhāsamāne'nāvṛtameva, anādhikyenāpi ca yatra viśvaṃ 
yasya svātantryāt adhikamiva nirbhāsate, tadeva paramārthatattvaṃ pradhānatayā 
utkṛṣṭam, anyattu asmadādi tatpravaṇamiti ayamatra pradhānābhidheyaḥ 
śāstrārtho hṛdaye praveśitaḥ, yena vivartapariṇāmaprabhṛtipakṣāntar-
apratikṣepaḥ | vivarto hi asatyarūpanirbhāsātmetyuktam | nirbhāsate ca asatyaṃ 
ceti kathamiti tu na cintitam | pariṇāme tu rūpāntaraṃ tirobhavati, rūpāntaraṃ

(page 9)

ca prādurbhavatītyuktam | prakāśasya tu rūpāntarābhāvāt tattirodhāne 
syādāndhyam | aprakāśaśca prādurbhavan naiva prakāśeteti ubhayathāpi 
suptaṃ jagat syāditi na paryālocitam | pratibimbavāde ca svacchatāmātraṃ 
saṃvedanasya, na svātantryamiti tatsamarpakavastvantaraparyeṣaṇā kartavyā | 
avidyā ca anirvācyā vaicitryaṃ ca ādhatte iti vyāhatam | pārameśvarī śaktireva 
iyamiti tu hṛdayāvarjakaḥ kramaḥ | tasmādanapahnavanīyaḥ 
prakāśavimarśātmā saṃvitsvabhāvaḥ paramaśivo bhagavān svātantryādeva 
rudrādisthāvarāntapramātṛrūpatayā nīlasukhādiprameyarūpatayā ca 
anatiriktayāpi atiriktayā iva svarūpānācchādikayā saṃvidrūpanāntarīyaka-
svātantryamahimnā prakāśata iti ayaṃ svātantryavādaḥ pronmīlitaḥ ||
     evaṃ parameśvarasvarūpe samāviśya granthakāraḥ sūtravṛttyarthaṃ 
pūrvapakṣottarapakṣaiḥ samuddhāṭayiṣyan tarko'pratiṣṭhaṃ iti apratiṣṭhatā,
     adyāsmānasataḥ kariṣyati sataḥ syāsnūnatho naśvarān iti 
svaśaktipradarśanamātrasāratayā gomayapāyasīyanyāyopahāsena 
paramārthānupayogitā, 

aho dhigvyākhyātṛgrahamitarahevākabhṛtaka-
maho tarkasyāntaḥ kvacidapi na labhyaśca vibudhaiḥ |

iti tatkāritvataddveṣitvārdhavaiśasayogādaprāṃāṇikatvaṃ vahnirna yasya 
salilam iti abaddhābhidhānamātramatra mā saṃbhāvīti ślokatrayeṇa ghaṭayati 
khapuṣpaṃ satkartum ityādinā | eko'piśabdo bhinnakramaḥ tathā iti ca | deśe 
kāle pramātari ca sarvatra asattvena viditaṃ khapuṣpamapi sat saṃpādayituṃ, 
tathā puraḥ sphuradapi sarvasya vartamānatayā deśanaikaṭyena ca 
prakāśamānam, ata eva vastu yat tadapi asat saṃpādayituṃ prabhavanaśīlaḥ san

(page 10)

jagadidaṃ bhāvābhāvarūpaṃ cakitamiva svarūpe anavasthitamiva karomi iti 
sāmarthyamātmani saṃbhāvaye | vādasya pakṣapratipakṣaparigrahasya | 
ārambhakāle cikīrṣāyām | yat yathā pakṣatayā vā pratipakṣatayā vā 
kartumicchāmi, tanme tathā saṃpadyate iti eṣā yasya uktiḥ, tathā iti 
svasāmarthyaprathanābhiprāyaprakāreṇa, sa sphuṭameva ātmano nindāṃ karoti | 
yadartharahitamabhidheyaprayojanaśūnyavacanamasamāptaṃ ca 
apariniṣṭhitābhidheyaṃ niyamanidānābhidhānābhāvācca asaṃbhāvito-
paramaṃ mama prekṣāpūrvakāritāvirahāt prasarati svayameva pravartate, tatra ca 
prakupitāntaravātābhidhānadhātuprakṣobha eva nimittaṃ bhavati | yo hi tadeva 
nīlaṃ pītamiti; na nīlaṃ, pītamiti; na nīlaṃ, na pītamidamiti vā brūyāt; sa 
unmattadhaureya iti praśaṃsāṃ muktvā na stutyantarapātraṃ bhavet | tadīdṛśena 
pathā svasāmarthyapradarśanamunmādapradarśanameveti tātparyam | naca 
kevalamunmādamātram, yāvat paro'pi amunā mārgeṇa nīyamāno vitāritaḥ 
syāditi mahat pātakārjanamiti darśayitumāha jaḍānāmiti |  
upayuktapramāṇavṛttā api hi gurusevāśāstraśīlanādiprayatnaśataiḥ, athaca ya 
evamaprekṣāpūrvakāriṇaḥ, ta eva jaḍāḥ, teṣāṃ ye upayuktaśāstrārtha-
samyagvikāravirahalakṣaṇāpariṇāmaprabhavā udgārā abhidheyaprayojana-
śūnyā ananusaṃdhāne'pi haṭhapravṛttā udgārasthānīyavātaprakṣobha-
pralāpāḥ, tairdūṣitā ruciḥ svā dīptiḥ paramārthasvarūpalakṣaṇā yasyāḥ, 
yasyāṃ ca asatā rūpeṇa tasya sataḥ pāramārthikasya rūpasya saṃkīrṇatvaṃ 
vyāmiśratvaṃ yat tatsāmarthyāt sā tādṛśī; arthānāmarthayitṝṇāṃ 
pramātṛṇāmarthyamānānāṃ ca prameyāṇāmāvaliḥ parasparonmukho'pi 
yugalakamayaḥ samūhaḥ parito mlāyati unmukhatoddhurakandharatāṃ hitvā 
avanamati iva svakarta-

(page 11)

vyaudāsīnyaṃ pratipadyate | yathā mandāgnīnāmaudarikāṇāmatibhojanājara-
ṇajanitairugārairbhogotsukāpi kācit mugdhā sarvatra bhogye tāmbūlādāvapi 
asatā aśuddhena rūpeṇa saṃkīrṇatāmiva ullikhantī ata eva vināśitabhojanādya-
bhilāṣā arocakadoṣeṇa mlāniṃ pratipadyate | etaduktaṃ bhavati-mugdhamater-
lokasya laukikavaidikaprabhṛtidṛṣṭādṛṣṭaprayojanakartavyaviśeṣaviṣayasaṃtati-
pravṛttibhājastādṛśamṛṣāpāṇḍityapralāpairbhagnarasā rucirjāyate, naca 
paramārthatattve kvacana avatāryate apratiṣṭhānāt | tasmādīdṛśena svātmani 
unmādadāyinā paramapakurvatā ca kiṃ pāṇḍityena | īdṛśaṃ tu tadyuktam-
ityāha yathāvastūdgrāha iti | yat yat vastu, tasya tasya utkarṣamudrekamun-
magnatāṃ ca gṛhṇatāmamī pratipādyā ityatra arthe upayogī pūrvapakṣatad-
dūṣaṇasiddhāntasamarthanātmā tatsamarthācaraṇalakṣaṇo yaḥ 
prayojakavyāpāraḥ, tatra graho rasaḥ sa eva bhūmnā prāśastyena atiśayena 
satataṃ ca vidyate yasya tādṛk yo vastuto vidvān tathaiva vetti, natu anyathā, natu 
anyathā paśyati, anyacca brūte, vidvāṃśca prekṣāpūrvakārī, tatra sthitā tatra 
viśrāntā | sā arthāvalī | vigatā śāntā śaṅkā yasyāḥ, yasyāṃ ca | sā 
pramātṛprameyavargātmikā āśvasiti kartavyaparilopayogābhāvāt 
laukikālaukikadṛṣṭādṛṣṭaviṣaye taduttīrṇaparamārthatattvaviṣaye ca 
dhṛtimābadhnāti | yatastādṛśo vidvān sarvasya viviktatvaṃ vivekaṃ 
bhinnaviṣayatayā virodhaparihāraṃ paropakārameva svaphalaṃ paśyan dadāti | 
tathāhi yat yathā prakāśate, tat tathā prakāśasyaiva mahimeti dṛṣṭau 
sūkṣmatvatāratamyaprakāśāt kiṃ na pāramāṇavatvaṃ, sukhādijanakatvāt 
kiṃ na tādātmyaṃ, saṃvedanābhāve kiṃ na andhatamasaprāyaśūnya-
śarīratvaṃ ghaṭādeḥ śarīrapramātṛmātra-

(page 12)

viduṣo vā bālāṅganāpāmarāderaparalokitvaṃ sphurati hi, yastāvadahaṃ, 
so'haṃ dehabhasmībhāve na kaściditi parameśvarasaṃvidabhedabhājo bhāvā 
api parameśvarasvarūpāḥ pramātāro'pīti vicitraśaktiparisphuraṇameṣāṃ 
paramā maṇḍanā, natu alpāpi khaṇḍanā | kevalaṃ tāvanmātrabhāgaparigraha-
grahikā vivadante andhā iva hastiśarīre karapucchādibhāgasparśanadvārotpanna-
samucitakarivikalpāḥ tadapi vivadanameṣāṃ parameśvaraśaktivijṛmbhāmātraṃ 
na kaṃcana doṣaleśamāvahatīti | yathāca sā sukumāramatiḥ kācana tasmāt 
jaḍodgāravyāptāt deśāt kenacit tadabhiprāyavedinā asaṃmatena jaḍena saha 
viviktatvaṃ dūratvamāpādyate | avidagdhaloko hi tāṃ mlāyatīyamarocakeneti 
paraṃ paśyati, natu atra jaḍodgārajanitatvamaruceriti jānīyāt | sāpica evameveti | 
yadā tu tāmbūlāsavabhojanāderyat yat vastu, tatra tatra utkarṣasvīkāranipuṇaṃ 
taddhṛdayaṃ graheṇa gāḍhena saṃpādyate; tadā sā nijaruciprabodhādāśvasiti 
mlāniṃ tyajati | kācana ca kumārī prabhodhābhimukhamadanāṅkuropakaraṇa-
kalitahṛdayāpi tathābhūtaudarikodgāradūṣitarucirevaṃbhūtāḥ khalu puruṣā 
bhavantīti mlāniṃ nītā, kenacit vidagdhena vivikte vigatāśaṅkā 
tadekāvabaddhapremaparatantrā kṛtā, laukikabhojanādibhogarasajñā 
lokottararatirasāsvādābhijñā ca saṃpādyate | tathā paramārthapaṇḍitenāpi 
siddhimokṣalakṣaṇaparāparaśreyaḥ-prāptyānandocitā pramātṛprameyamayī 
trilokī saṃpādyate | nityayogādyabhidhānāya lāghavaprāptamapi 
tadasyāstyasminnityetāvati matvarthe vihitaṃ bahubrīhimapahāya tatpuruṣāt 
matvarthīṃyaprayogaḥ kṛtaḥ | jaḍānāmudgāraiḥ iti bahuvacane tādṛśīṃ 
pracuratāmapariniṣṭhāṃ ca abhidhattaḥ | viduṣi iti tadvaiparītyena 
ekatvavivakṣayā paramārthapaṇḍitaḥ

(page 13)

paramārthavidagdhaśca durlabha iti uktam | kasmiṃścit iti lokottare | nanu 
tādṛgasau yadi kaścideva, tadasaṃbhāvanīya eva astitveneti āśaṅkya āha te 
kḷptāḥ kila iti | etaduktaṃ bhavati-parameśvarecchaiva svarūpapracchādanaṃ 
ca svarūpaprakaṭanaṃ ca vidadhatī avaśyaṃ tādṛśaṃ prasūte 
paramārthapaṇḍitaṃ, kevalaṃ māyārāśirbhūyān vidyāvattu tanutaraṃ tejaḥ | 
tathāhi rodasīśabdavācyasya dyāvāpṛthivīdvayasya yat vibhajanamasaṃ-
kīrṇatvajñānaṃ viśeṣeṇa ca bhajanamapātakatayā sevanaṃ bhogayogyatvam, 
atra kartavye sapta kulaparvatāḥ kḷptāḥ samarthā nirmitāḥ, parvataśata-
pūrṇe'pi jīvaloke saptaiva, na adhikāḥ | naca atyantaṃ na nirmitāḥ | rātrindinasya 
ca tamaḥprakāśarūpasya satkāre candrārkau dvāveva | natu 
maṇiprabhṛterbahutaratejovargasyāpi atra śaktiḥ | naca tau na sṛṣṭau | yadi hi sūryo 
na syāt, rātrireva syāt, sāpi vā na bhavet | prakāśarūpatājñāne hi 
tadabhāvastama iti jñānam | jātyandho'pi antaḥsaṃkalpārūḍharūpādi-
prakāśaṃ jānanneva bahistadaprakāśamandhatamasaṃ vetti, 
suptamūrcchitatāyāmandhatamasasya prathamapraveśa eva prakāśasaṃskāra-
vaśādavabhāsaḥ, natu tadekavaśībhāvāvasthāyām | tadā hi na kiñcit 
nirbhātamiti ca saṃsmaraṇaṃ sarvaśūnyasaṃvedanamāvedayeta | naca 
andhatamasaṃ sarvaśūnyameveti vakṣyāmaḥ | tathāhi kāpilaiśchāyā 
sapratighavastudharma iṣṭā, ābhidharmikaiśca tamorūpabheda eva | 
nimīlitanetrasya hi bahirandhatamasamiti na pratipattiḥ, apitu unmīlitadṛśa eva | 
ālokaśūnyatāyāṃ tatra na paraṃ paśyāmīti saṃvit, natu tamaḥ paśyāmīti | 
yadi ca sūrya ekarasasphuṭasvabhāva eva syāt, tat dinameva syāt | yadā tu 
svaraśmisaṃkramaṇapūryamāṇamaṇḍalābhogaścandro'sti

(page 14)

sūryateja eva tathā vaicitryeṇa āste yena sadapi asadiva, tadā rātrirnāma bhāti | 
anayā bhaṅgyā niśākaratvaṃ candrasya, natu sūryodaye dinamiva candrodaye 
niśetyevamatra vivakṣitaṃ mantavyam | yathāca kulaparvatāḥ, yathā ca 
candrārkau, tathā īśvareṇaiva viśvādhārakatvāt dhātrā sadasatoryuktāyukta-
yorbhāvābhāvayośca vivekakaraṇe yo vidhiravicalo nyāyaḥ, tatra kaścideva, na 
sarvo vipaścijjanaḥ, samyak paśyaṃśca niścinvaṃśca sṛṣṭaḥ, natu na sṛṣṭaḥ | 
kileti saṃbhāvanāyām | apoḍhaṃ vyāvartitaṃ gāḍhamanādikālasaṃsāra-
vāsanāvaśaprarūḍhamapi timiramakhyātilakṣaṇaṃ yayā prakṛṣṭajñāna-
lakṣaṇayā prabhayā arciṣā, tayā bhāsvaraḥ svayamatamorūpaḥ, paraṃ ca 
svarūpamajjanena atimiraṃ prakāśamayaṃ kurvan | ayam iti guruprabandhaṃ 
prācyakālaṃ bhāsamānarūpaṃ svātmānaṃ vartamānaṃ śiṣyapraśiṣya-
santānaṃ ca bhāvinaṃ paśyannavicchīnnavidyāvabhāsanaḥ parameśvara iti 
darśayati | viśeṣeṇa paśyatīti vipaśyaḥ paramasarvajñaḥ, tadvadācaran 
bhāvatattvaṃ cetati yaḥ sa vipaścit | śapathadvipaśyannasugatavaditi ? cetayate 
vipaściditi hi sūtrāntaḥ svaparavimarśakṣamacittattvayutaḥ syādvipaścittu iti | 
paraṃ vimṛśatīti ṇici kvipi paraṃ vimṛśantī cidasya iti śrīvṛhaspatipādāḥ | 
evaṃ krameṇa alpālpatayā parametadavatiṣṭhate, natu sarvathaiva asambhavo'sya 
arthasyeti uktaṃ bhavati | evaṃ tattvaniṣṭhameva pāṇḍityam | tacca 
pariniṣṭhitameva sat paropakāraniṣṭhaṃ bhavatīti abhidhāya kariṣyamāṇa-
ṭīkāprayojanaṃ sūtravṛttiṭīkānāṃ ca ekagranthakāranirmitatvam, 
ekavaktaprayojanatve'pi ca granthabhedanirmāṇasāphalyaṃ darśayitumāha 
trayyāṃ vāci iti | trayo'vayavāḥ paśyantīmadhyamāvaikharīti yasyāḥ sā 
trayī parāmarśarūpā kroḍī-

(page 15)

kṛtābhinnasamastaparāmarśanīyarāśiḥ parā bhagavatī | vakti svarūpaṃ 
vimṛśatīti vāk, tasyāṃ ca etat iti paridṛśyamānaṃ vāṅmayaṃ 
pramitilakṣaṇaparāmarśarūpasaṃvedanānuviddhatayā śabdanaikaśarīraṃ 
viśvaṃ yathā krameṇa vikasitaṃ, paśyantyāṃ vikāsonmukhaṃ, 
madhyamāyāṃ vikasat, vaikharyāṃ pṛthaktayā parāmṛśyamānatvena 
labdhavikāsam | yadvacca gāyatrī adhikṛtapreraṇānirmāṇanipuṇanijahṛdaya-
gaganasadoditabodhādityaprabhāpratibhārūpā amutra iti āmuṣmikaphaladāna-
nimittam; yadivā amutra viśvaprasiddhe antaḥpraṇavanigamātmani krameṇa 
vikasitā antar iti karavai iti saṃkalpabhūmau vikāsonmukhā, karmaprārambha-
kāle omiti abhyupagamarūpatayā mantraprāthamyaprathanarūpatayā ca vikasantī | 
tataḥ karmasaṃpādanasamaye ṛgyujaḥsāmatatsamudāyalakṣaṇā trayī 
saṃpādyahautrādhvaryavaudgātravrahmatvasphuṭībhāvāvasthāyāṃ 
labdhavikāseti laukikaṃ phalabhūtaṃ vaicitryaṃ vaidikaṃ ca tatkāraṇabhūtaṃ 
dṛṣṭāntatvena uktam ; yadi vā antarāditraye, amutra ca paśyantyādike traye 
kramavikasitā gāyatrīti | athavā antaḥpraṇavaṃ praṇavasya antarmadhye yat 
nigamātmakaṃ trayamṛgādi

     sravatyanoṅkṛtaṃ pūrvaṃ purastācca viśīryate | (ma. smṛ. 2 | 74) iti 
nayena praṇavatādātmyena

sarve vedā-| (ka. va. 2 | 15)

iti nayena ca, tatra yathā gāyatrī kartavyaprārambhe pratibhārūpā krameṇa 
vikāsameti | sāhi pratibhā sāmasu gītirūpeṣu nādātmatāṃ gṛhṇatī, ṛkṣu 
karmaguṇadevatāpraśaṃsātmakārtharūpatāsūtraṇaṃ svīkurvāṇā, yajuṣṣu 
kartavyātmanā sphuṭībhavati | vedyaṃ dharmādyupāyaṃ niścayaṃ gamayatīti 
nigamo vedaḥ | tadvadīśvarapratyabhijñā sūtravṛttyoḥ

(page 16)

sphuritahṛdayā yā, sā iha vivṛtau vyaktiṃ gatā | śanaiḥ krameṇa īśvaraḥ 
pratyabhijñāyate yayā dṛkkriyātmakaśaktyabhijñānadarśanayā 
pratīpamābhimukhyena jñānopāyabhūtayā svātmani īśvaravyavahārasādha-
napramāṇapaddhatyā, sā sūtre sphuraddhṛdayā, vṛtau sphuritasārā, vivṛtau tu 
vyaktā sarvajanagocaratāṃ gatā | sphuraṇaprārambhaḥ sūtre sphuraṇanirvāhastu 
vṛttāviti paramārthata aikyamanayorekakālakṛtatvāt, vibhāgakalpanayā tu bheda 
iti darśitam | etaduktaṃ bhavati-yathā paravāktattve vibhāgahānyā viśvaṃ 
sthitaṃ, paśyantyāmāsūtritabhedaṃ, madhyamāyāmunmīlitabhedaṃ, 
vaikharyāṃ bhinnaparāmṛśyamānarūpatayā sphuṭībhūtabhedāvabhāsaṃ; 
tathaiva bhinnānāmadhikāriṇāṃ bhinnāmarthakriyāṃ vidhatte, tathā 
paravāktattvasthāne śivābhinnaśāstrakārasaṃvedanaṃ tādātmyena yat 
vartamānaṃ paramārthatattvaṃ sāratvācca hṛdayaśabdavācyaṃ, tat 
parapratipādyajanaviṣayatāpattiyogyatālakṣaṇasphuraṇātmakabhedāsūtraṇayā 
sthitaṃ sūtre, vṛttau tu tadeva unmīlitaṃ, vivṛttau tu ākṣepapratisamādhānadiśā 
sphuṭībhūtaṃ sarvajanapratipattiyogyatālakṣaṇabhedaṃ bhavatīti tasya tasya 
adhikāriṇo vividhaphaladāyitayā hi agṛhītadarśanāntarajanitabhedavāsanā-
grahāḥ sūtramātrāt vṛttisahitādabhivinītāḥ santo vṛttyanapekṣasūtrārtha-
mātrapariśīlanadiśā parāparasiddhibhājo jāyante | tīrthāntarapariśīlanotthita-
mithyādṛṣṭayastu vivṛtirūpayā ṭīkāyā apasāritatathāvidhavimohāḥ 
sūtravṛttyarthaviśrāntahṛdayāḥ krameṇa sūtrārthabhāvanāviyogaviśrāntyā 
tathaiva śāstrakārasaṃvedanarūpaparahṛdayāvibhaktatattvatayā siddhyantīti | 
yathāca pratibhātmani sarvaḥ kartavyakalāpogalitabhedaḥ krameṇa 
karmārambhaparyantatāṃ pratipanno viśvavyavahārasiddhihetuḥ, 
evamātmasaṃbodho guruhṛdayaviśrāntaḥ sūtrādiṣu krameṇa

(page 17)

sphuṭībhūtaḥ pratipādyapratipādakabhāvena niḥśaṃkena nirvivādena ca 
sphuṭatāṃ pratipadyate iti | sūtryate'rtho yena, tat sūtram | sūtrasya svābhidheye 
vartanaṃ vṛttiḥ, tatpratipādakatvāt sūtrārthodbhedano grantho'pi vṛttiḥ | 
śāstrārthasya saṃvṛtasya ācchāditasya iva śaṅkyamānaparamatapāṃsurāśi-
prāyāvaraṇāpasāraṇena apagatāvaraṇatvaṃ vivaraṇaṃ vivṛtiḥ, tatpratipādaka-
tvāt grantho'pi | sa eva ṭīkā ṭīkyate avagamyate hṛdayabhūmisaṃcaraṇacāturya-
yogyo'rthaḥ kriyate yayeti | tathā ca vakṣyati-

ṭīkāyāmathaca kramopacayavat-|
iti | yadi tu

striyāḥ khalanau vipratiṣedhena |

iti lakṣyaṃ nādriyate, tadā vṛttiśabdo vivṛtiśabdaśca karaṇe vyutpādyaḥ; 
vṛttiśabdastu adhikaraṇavyutpattyā yadi arthe, tadā granthe upacārādeva vṛttiḥ | 
evamiyatā ṭīkāpi granthakāreṇaiva kṛteyuktaṃ bhavati | nahi anyapramātṛtattvage 
paśyantīmadhyame, pramātrantaraviśrāntā ca vaikharīti saṃbhavati | nāpi 
anyasya karmopakramaḥ, anyasya kartavyanirvāhaṇamiti saṃbhavo'sti | yatrāpi 
ubhayaṃ kāvyasamasyāvārakapaṭasamāpanādau syāt, tatrāpi 
mūlasphuritatāvadekābhiprāyanirvāha eva tathā bhavati ekīkāra eva na anyatheti 
| tadanena sūtravṛttivivṛttitritayaviracanena sarva upakṛto bhavatīti pradarśya 
prayojananirūpaṇapuraḥsaraṃ tātparyābhidhānadvāreṇa 
ādivākyamavatārayati śāstrārambhe ityādinā | ucite kartavye yat 
vighnaśamanaṃ, tat yatnopārjanīyamiti śāstrārambha padam | yadāhuḥ

śreyāṃsi bahuvighnāni------------|

(page18)

iti | vighnanti vilumpanti kartavyamiti vighnāḥ ādhyātmikādayo'navadhānadoṣā-
dayastrividhā upaghātāḥ, tadadhiṣṭhātāraśca devatāviśeṣāḥ | te ca 
prakṣīṇamohasyāpi māyāsaṃskārāvinivṛttaśarīraprāṇaprabhṛtigatapramātṛ-
bhāvasya pratyagātmanaḥ prabhaveyurapi icchāvighātāya, viśeṣataḥ 
samastalokamabhyuddhartuṃ parigṛhītodyamasya | 
lokagatadharmādharmaparispandena tadadhiṣṭhātrā ca devatāvṛndena 
saṃsāraparirakṣaṇaparigṛhītakṣaṇena avaśyaṃ vighnasaṃghasaṃghaṭanā 
kriyate | yathoktaṃ

vighnāyutasahasraṃ tu parotsāhasamanvitam |
praharatyaniśaṃ jantoḥ sadvastvabhimukhasya ca ||
viśeṣato bhavāmbhodhisamuttaraṇakāriṇaḥ |

ityādi | tadasau vighnasaṃghāto yadi paraṃ tādṛśālaukikodyogayojakena 
bhagavataiva anugrahātmakacaramanijakṛtyanirvāhaṇakāriṇā vihantuṃ śakyate 
iti pratyagātmani śarīrādau tadrūpatātiraskāreṇa avanatirūpeṇa prathamasamaye 
parameśvarasvarūpotkarṣaṇaparāmarśātmā samāveśaḥ

mukhyatvaṃ kartṛtāyāstu------| (3 | 2 | 12)

ityādivakṣyamāṇalakṣaṇaḥ svīkāryaḥ | tatra hi sati viśvamapi svātmabhūtama-
bhinnasvatantrasaṃvinmātraparamārthaṃ bhavatīti kaḥ kasya kutra vighnaḥ | 
anantaraṃ tu granthakaraṇakāle yadyapi pratyagātmaprādhānyameva anusandheya-
manyathā vaikharīparyantaprāptinirvāhyaśāstraviracanānupapatteḥ, tathāpi 
tatsamāveśasaṃskāramahaujojājvalyamānanijaujaḥ samujjhāsitabhedagrahatayā 
na prabhanti vighnāḥ | naca māyādhikāriṇi brahmaviṣṇvādau ucitaḥ 
samāveśaḥ iti paramagrahaṇam | pratirlakṣaṇe, tena hetunā yataḥ prahvatā bhavati 
anyathā na same nyūne

(page 19)

vā prāmāṇikasya prahvatā ucitā, itthaṃ bhūtākhyāne vā viṣayaviṣayibhāve 
pratiḥ | prakarṣeṇeti anyatiraskāreṇa hvayati śabdayati tādrūpyaṃ parāmṛśati 
tadguṇānupraveśaspardhāvāniveti prahvaḥ | ātmani iti śarīrādau 
pratyagātmani | tathāhi śūnyabuddhiprāṇakaraṇedehe sati nirvāhyaṃ 
śāstrasaṃpādanamanyanirodhena paramārthatādhyavasāyena śabdanirmāṇena 
paropadeśena ceti | tatra avaśyāvalambanīye dalakalpe pārameśvaraṃ 
svarūpamanuprāṇakaṃ vedakatvena samāśrīyate parāmṛśan iti 
śatṛpratyayena idamāha | āsādya iti, yadyapi pūrvakāle dhātvarthe vartamānāt 
dhātorbhāve ktvāpratyayovidhīyate, tathāpi dhātusaṃbandhabalāt 
tadvākyārthānuprāṇakatvena ktvāntārthaḥ pratīyate | pūrvamāsavaṃ pivati 
tato gāyatīti hi vākye yādṛśaṃ kriyayoḥ paurvāparyamātraṃ pratīyate, na 
tādṛśameva āsavaṃ pītvā gāyatīti, apitu tadāsavapānamupakāratvena 
pradhānavākyārthānuprāṇakatvena anuyāyi iva bhāti | kevalaṃ 
pūrvotpannatāmātraṃ paurvakālye, natu utpadyaiva niranvayaḥ pravilaya iti evaṃ 
jātaṃ cet parameśadāsyāsādanaṃ, tatsvajanena na vilambaḥ kartavyo vilambe 
māyāsaṃskāratiraskāreṇa aśaṅkitopanataparameśvaratādātmyāpavarga-
saṃbhāvanayā paropakārasaṃpatterabhāvāt | anāsādita tatsvarūpasya tu 
śāstrakaraṇe pratārakatvādavaśyamāsādanasāmanantaryeṇaiva 
paropakārakaraṇamucitam, natu vilambanīyam | tena parameśaguruprasādocitaṃ 
śuddhāśuddhādhikārisadāśivarudraviṣṇuviriñcādyuttīrṇaparameśvara-
dāsyāsādanaṃ sajjanatvalābhapūrvakasya paropakāraiṣaṇānimittakasya 
sarvasaṃpadavāptiprayojanopāyasya īśvarapratyabhijñopapādanasya 
pratyaṃśaṃ nirvāhakatvena vartate iti āsādya iti ekavākyatāprayogeṇa uktamiti 
śatrā vicchedābhāvolakṣaṇatvaṃ

(page 20)

hetutvaṃ ca prahvatāparāmarśasya dyotitamiti prayojanameva prādhānyena 
pravartakam | tata āha pravṛttaye iti | tatra phalaṃ pradhānatayā vākyārtha iti 
darśane prayojanameva phalarūpaṃ vākyārthe upapādanasya 
tatphalahetubhūtapratyabhijñākarmakasya tatraiva viśrānteḥ | 
karmavākyārthamate'pi karmārthatvāt kriyāyā abhidheye 
pratyabhijñālakṣaṇe'rthe yadyapi śabdāt jhaṭiti prādhānyaṃ pratīyate, tathāpi 
tasya saṃpaddhetutayā viśeṣaṇāt saṃpadeva pradhānatvena bhāti | evaṃ 
kriyāvākyārthavāde'pi | sā hi karmārthā, phalārthaṃ ca tat | abhidheyaṃ tu 
upadiśyate | prāpye'pi phale upāyasya duṣṭatā mā śaṅkīti | tathāca 
vakṣyatyeva avatāratā ityādi | śāstrakāraḥ iti, parapratipādanopāyarūpaṃ 
mohāpasāraṇaphalaṃ svasaṃvitsiddhe svaprakāśe'pi pramātṛtattve maheśvare

smāryate sa paraṃ paro dṛṣṭasādharmyāt |

iti nyāyena vyavahārasādhanaṃ pramāṇaṃ śāstrarūpaṃ ya upadiśati | 
ayamāśayaḥ-na iha kalahapūrvaka eva prastāvapūrvaka eva vā kīnāśadāna-
diśā mahatāṃ paravyutpādanopadeśaḥ, apitu

------balāttattve niyojayet |

iti kāruṇikatvena | tatra ca śrotaiva tāvadupalālyāpi pravartanīyaḥ iti 
evaṃvitatavitataparārthānumānasvabhāve śāstre mūlabhūmau pravartakaṃ 
prayojanamabhidhātavyam | tata eva saṃśayadiṣoḍaśapadārthadṛṣṭyā 
nirūpyamāṇo nyāyaḥ paraṃ samyak vyutpādayatīti akṣapādamuninirūpitā-
meva dṛṣṭimanujjhan samyagvyutpādakaḥ śāstrakāraḥ iti ucyate | 
saugataprabhṛtayastu tatkāriṇaśca taddveṣiṇa iti | etacca mayā kathāmukhatilake 
vitatya nirūpitam, anveṣyaṃ tat eva | apūrvāṃ praṇāmabhaṅgīṃ paśyan kaścit 
vyāmuhyedityā-

(page 21)

śayena ṭīkākārastatsamarthānāṃ karoti jayanamaskārādi iti | ādipadena 
vandanapradhyānaprabhṛti gṛhyate | iha dvayaniṣṭaṃ yat rūpaṃ, tat 
anyataramukhena pratipādyamānamubhayaviśrāntau paryavasāyayitayam | ghaṭo 
bhāsate, ghaṭaḥ paśyatīti hi ghaṭaṃ nirbhāsamānaṃ nirbhāsayatīti 
arthapratipattiḥ | ubhayaniṣṭhaṃ ca prahvatvamatra asyeti | utkarṣaśca ato'syeti | tat 
jayati-jayasi-jayetiśabdaprayoge parameśvarotkarṣamukhena pravṛtte'pi 
svātmanyagbhāvanātmakaṃ prahvatvamālambanīyamaparathā utkarṣasya 
anirvāhāt | evaṃ namo-namāmi-vande-ityādiprayoge 
svātmanyagbhāvanaparāmarśamukhena pravṛtte'pi īśvarotkarṣaviśrāntirāśra-
yaṇīyā | tadidamubhayamekameva vastu dvyaṃśamapi sadiha śloke ā samantāt 
veditaṃ śabdena saṃmukhīkartavyasamastaśrotṛjanasphuṭaparāmarśayogyaṃ 
kṛtam | arthākṣiptaṃ hi sarvasya na gocaraḥ | atyantadurlabhaṃ dāsyam iti 
kathañcit ityanena uktamiti sutarāmātmaviṣaye nyagbhāvanamuktamuktam | 
mahāphalaṃ taddāsyam iti īśvarasya utkarṣaḥ dāsatvādeva svāmini īśvare 
labdhe punarīśvarapadaṃ māheśvaryaparyavasitameva | mahāphalapadena 
ṭīkākāraḥ samastasampatsamavāptihetum iti padaṃ 
pratyabhijñāviśeṣaṇamapi dāsyaviśeṣaṇamiti darśayati | vṛttau ca 
sūcito'yamartho dāsyalakṣmīḥ ityanena | dāsyaprabhavā lakṣmyaḥ samastāḥ 
saṃpadaḥ parameśvaraprasādāt labdhā yeneti | anyathā 
lakṣmīśabdopādānamasaṃgataṃ syāt bahvarthaviṣayatāprakaṭīkaraṇaṃ ca | 
vācāpi vā iti apiśabdāt kāyenāpīti mantavyam | tahāhi prahvatā ca 
utkarṣaṇaṃ ca tathā prakāśaparāmarśanarūpaṃ mānase saṃvedane 
tatsārarūpe ca vāktattve viśrāntam, natu jaḍe śarīre | tena manovāgātmakaṃ 
yadavibhaktaṃ saṃvicchakteḥ, tadeva arpayatā bhaktena

(page 22)

viśvamarpitaṃ bhagavati bhavatīti | tadāgame

------svātmānaṃ ca nivedayet |

iti kathitam | nivedayediti arpayet niścayena vidyāmayaṃ ca kuryādityarthaḥ | tatastu 
tannāntarīyakatvādeva śarīradhanadārā dīnāmapi tatra arpaṇaṃ jāyate iti 
pūjanahavanaśirovinamanāṣṭāṅgapraṇipātanādi tadanumānahetutayā 
upacārātpraṇāma iti vyavahriyate, na mukhyatayā | satyam iti kāmaṃ 
vighnaśamanamiyataiva saṃpadyate, adhikaṃ tu prayojanamādau paṭhitasya 
tatprahvatānibandhanasya ślokavākyaikadeśasyeti | adyāpi iti avicchinnatayā 
pustakaniveśadvāreṇa aśeṣahṛdayasaṃkrānteḥ | tatraiva hi āveditatvasya 
upayogaḥ, nātmanīti bhāvaḥ | vyākhyātṛpadamabhyarhitamiti pūrvam | 
pratyabhijñopapādane hi anumīyate īśvarasāṃmukhyam | 
īśvarasāṃmukhyapūrvakam iti | nanu vyākhyātari pratyekametadarthānupra-
veśāducitametat, śrotṝṇāmiti tu katham | nahi śrotāpratyabhijñāmupapādayati, 
naca dāsyamiti antaḥ pṛthak parāmarśo yukto vākyārthaparāmarśaikyāt | 
śrotāpi prathamata etadvākyaṃ paṭhanneva evamantaḥ parāmṛśati-ahamadhunā 
evaṃvidhalokottararahasyopadeśabhājanatvaprāptyanumitādeva 
parameśvaraprasādāt maheśvaradāsyaprāpaṇāpūrvikā pratyabhijñā yā 
amunā vyākhyātrā upapādyate, tatra adhyeṣaṇatatsamarthācaraṇarūpaṃ 
prayojakavyāpāraṃ karomi, yena ahamapi ācāryapadaprāptiyogyatayā 
parameśvaradāsyaṃ tān janānapi prāpayya janopakāramicchan iti | tathāca 
rahasyapraṇavādimantrabījārthamavidvānapi tadanucintanāt tatphalamāsādayati | 
evaṃ śiṣyo'pi | adhyavasāyayogābhāvāddhi buddhilakṣaṇaṃ 
pramātāramanāruḍho'pi ayamartho vāstave pramātari visrāmyati tasya 
pramāturasya

(page 23)

ca parāmarśasya vastuta ekarūpatvāt | sajātīyahaṭhānudhāvanaṃ hi 
loṣṭajalādiṣu jaḍeṣu mahābhūteṣvapi dṛṣṭam | tathāca 
jñānamasaṃkucitanirvikalpakasaṃvidrūpaṃ pauruṣaṃ 
śāstravyatiriktadīkṣādyupāyakamapi, tadaparamadhyavasāyapadaprāptaṃ tu 
saṃkucitasaṃvidrūpaṃ bauddhaṃ yadarthaṃ śāstrādi ucyate | ajñānamapi 
saṃkucitāvikalpasaṃvedanarūpaṃ puruṣaniṣṭhaṃ, 
saṃkocādhyavasāyabhūmyārūḍhaṃ tu buddhiniṣṭhamiti dvidhā manyante 
āgamikāḥ-iti śrīmanmataṅgādiśāstramatra arthe paryeṣyam | 
tadabuddhipūrvakamapi śiṣyāṇāmetatparāmarśamayasaṃvedanamayatā jāyate 
svāpamadayoḥ kartavyaparāmarśamayasaṃvedanavat | āsādya iti 
pratyabhijñāmupapādayāmi iti ca dvau ṇicau | vṛttāvapi ekākisaṃpadā iti 
vacanena parasyāpi tadeva parameśvaraprasādaikahetukataddāsyasaṃpat-
saṃcāraṇaṃ sūcitamiti āsādya iti ṇijdvayārtho vyākhyātaḥ | 
pratyabhijñāpayāmīti ca ṇijdvayṃ vṛttau, yāvadeva ca 
rahasyopadeśayogyatvāvāptyanumeyo māheśvaraprasādaḥ, tāvat ātmaparo-
pakārakaraṇasamartho'haṃ jāta eveti | vṛṣṭaśceddevaḥ, saṃpannāḥ śālayaḥ 
iti vadayamucita eva śiṣyasya parāmarśaḥ | vastutaśca ekātmakatvāt 
tatprakāśanāvicchedasyaivaca mohāpasāraṇena saṃpādyatvāt granthakārasya 
tu ayameva udyamaḥ-matparāmarśamayāḥ pratyekaṃ sarve saṃpadyantām | 
śāstrakāravadeva ca vyākhyātṝṇāmapi śiṣyān prati sa tathaiva yuktaḥ |

matsamatvaṃ gato janturmukta------|

iti hi mahāvyāptibhāvane'yameva tātparyārthaḥ | evaṃ 
sūtravṛttipāṭhaparāmarśa eva śrotṝṇāmapi parameśvarasaṃmukhībhāvaṃ 
dadātyeva | kiṃca vyākhyātrāpi paṭhyamāne sūtravṛttigranthe 
durlabheśvaradāsyā sādanādvāreṇa janasya ayamupakāramicchan 
tatpratyabhijñāmupapāda-

 (page 24)

yatītyevaṃbhūtamarthaṃ pratibimbakalpaṃ bimbasthānīyāduttamapuruṣārthāt 
pratisaṃkramaṇavaśādāyātaṃ pratipādya adhikārirūpatāsaṃvedanāt jano 
jāyamāno yaḥ kaścit, sa iha upakārya iti | evaṃrūpāt svātmani abhyuditāt sadā 
ahaṃ jana upakāryaḥ, taddurlabhesvaradāsyāsādanaupayikāmanena 
upapādyamānāmupapattyā sthāpyamānāṃ pratyabhijñāmupapādayāmi 
ahamapi upapattyā hṛdaye sthāpayāmi tāmupapattimavadhārayamāṇaḥ iti 
iyatpratipattiparyantā pratipattiḥ | atra tāvat kauśalāt saṃkramaṇe'pi 
parāmarśasāmyaṃ darśitam, anyatrāpi tu evam | yata eṣa eva 
adhikāryanadhikāriṇorviśeṣaḥ | tathāhi tvāṃ gacchetyupadiśāmīti 
śruteryathārthamavabuddhya māmayaṃ gaccheti upadiśatīti dvitīyaṃ 
pratisaṃkrameṇa sopānamāruhya tat gacchāmīti tṛtīyaṃ padamāsādya 
vākyārthajño bhavati | anadhikārī tu prathamasopāna eva viśrāmyati | evamayaṃ 
vivakṣati, enaṃ prerayatītyapi bhavatsopānāntaraṃ na vakturabhisaṃhitaṃ 
kartvavyatve tu na viśrāmyatītyalamavāntareṇa | sarvathā 
śrotṛpadamupannārthameva | ādigrahaṇāt śravaṇa iti mantavyam | 
evamapūrvāṃ praṇāmabhaṅgīṃ samarthya tadvākyapāṭhaṃ ca 
saprayojanīkṛtya kathaṃcit iti sautraṃ vivarītuṃ yā vṛttiḥ 
parameśvaraprasādādeva iti, tāṃ vyākhyātumāha yaccedam iti  | cakāraḥ 
prameyāntaraṃ vyākhyeyaṃ samuccinoti | bhaktyā iti tatsvarūpasamāveśabalāt 
hi tasmin paramārthataḥ svasvarūpe bhagavati prakāśamāne 
bhrāntāpāramārthikābhimānatucchatāvedanodayāt tatraiva satye 
pūrṇānandarūpe satatasamāveśaprābalyaṃ vidyālakṣaṇaṃ bhaktiḥ, tayā | 
anantaphalārthitvena mokṣalakṣaṇo ya āsvādaḥ paripūrṇo viśvarūpatāmayo 
dṛkkriyātmā

(page 25)

vimarśaḥ, sa eva prakṛto yatra | tena kāṇādokto jāḍyātmā na mokṣa ityāha 
mokṣasya ca ya āsvādaḥ, evaṃbhūto'sāvityaṃśena vimarśaḥ | bhaktyā hi 
tatparameśvaraviṣayavaivaśyasamāveśarūpayā yaḥ svātmaprakāśaḥ, sa eva 
anāśaṅkyamānapunarvyutthānatayā mokṣaḥ | dharmasya iti 
praṇayāparanāmna iti yāvat | māyāntaraṃ māyāmadhyaṃ cārayati bhramayati, 
māyāntare ca carati | māyātattvaṃ hi dharmādīnāmāyatanam, buddhitattvaṃ tu 
vibhavasthānamiti nirṇeṣyate | atra hetuḥ niyatiśaktyotthāpitam | aśvamedhāt 
kṛtāt yo'dhivāsaḥ saṃkucite saṃvittattve, sa tasmin saṃkocabhāge māyātmani 
niviṣṭa iti yuktam, na saṃvidbhāge saṃkocāpagame tatra tadabhāvāt | sa eva ca 
buddhāvadhyavasāyayogyatayā vikasvarasvarūpaḥ phalāyeti | tasya dharmasya 
māyābuddhigatasya niyatitattvaṃ niyāmikā pārameśvarī śaktiḥ 
śrūtyādiśāstraprasaramayī nimittam | etaduktaṃ bhavati mokṣāsvādasavidhasya 
parameśvarabhaktivaivaśyasamāveśasya māyottīrṇatvaṃ vyāpakaṃ, 
tadviruddhaṃ ca māyāntarvartitvam | tasya kāraṇaṃ dharmaḥ kathaṃ 
svakāryaviruddhavyāptaṃ prahvaṃ prati hetutāṃ gacchet | tadayaṃ prayogaḥ-na 
bhaktivaivaśyaṃ dharmaphalaṃ mokṣāsvādamayatvopalambhāditi 
dharmaphalatvavyāpakamāyāntarvartitvaviruddhamāyottīrṇatāvyāptasya 
mokṣāsvādamayatvasya upalabdhiḥ svavyāpakaviruddhavyāptasya 
dharmaphalatvasya niṣedhaṃ karoti | viśṛṅkhalaḥ svaniyatikalpitadharmādyana-
pekṣo ya īśvarasya prasādo māyāpaṭapracchannatātmakasvasvātantryopa-
kalpitakāluṣyāpasāraṇena svasvabhāvaprakaṭanātmakanairmalyamayo 
yo'hametatpramātṛrūpatayā pracchannaḥ svasvarūpeṇaiva prakāśe vimṛśāmi 
cetyevaṃrūpaḥ, tadyogyatātmanā prakāraviśeṣeṇa, na anyena laukikena 
prakāreṇa, bhavanamasya saṃbhāvyam | sarvathā nairmalyātmā prasādo 
bhagavadrūpatā,

(page 26)

tādātmyaṃ mokṣa eva | na tatra māyāsaṃskāraḥ, iha tu so'pi tadicchayaiva 
lokānugrahakṛtyanirvāhaṇakāriṇyā astīti | pātratārūpeṇa iti 
lokāprasiddhaprakāraviśeṣaṇamupāttam | māyīyo hi kāryakāraṇabhāvaḥ 
svapnagatakulālaghaṭanyāyena svātantryasāratathābhāsanarūpasaṃvinniṣṭha-
pāramārthikakartṛtvātmakakāryakāraṇabhāvabhittiviśrānto māyāmaye loke 
hṛdayaṅgamatvātprasiddhaḥ | satu yatra nopapadyate, tatra sa pāramārthikaḥ eveti 
yat vyākhyātaṃ, tattadvastu brūte anena khaṇḍanena vṛttikāraḥ iti sarvatra 
vivṛtikārasya śailī | dharmādhrmādiphale'pi vastuni asti 
dharmādyadhiṣṭhātṛbuddhimadadhiṣṭhānanāntarīyakaparameśvaraprasādo-
payoga ityāśaṅkya evakāro vṛttau, vyākhyātaśca viśṛṅkhalaśabdena | kenacit 
prakāreṇa ityasya kathaṃ pañcamyā vyākhyānamityāśaṅkya tridhā 
samarthayate | prakāratvaviśiṣṭārthābhidhāyibhyaḥ kimādibhyaḥ svārthe 
thamupratyayo vidhīyate-kaḥ prakāraḥ katham | tasya tu bāhyasaṃbandhyape-
kṣayā ucitavibhaktyarthaḥ kalpyate | iha  ca heturūpatāprastāvāt pañcamyartha 
eva ucitaḥ, natu tṛtīyārthaḥ, niyamena anupraviṣṭo'treti ekaḥ prakāraḥ | atha 
yathā bhāvavacanānāmityatra bhāvakartṛkāṇāmityayamartho vacanāśabde 
kartṛsādhane prakṛtyarthāṃśasya upāyamātrasya avivakṣaṇāt, evaṃ 
prakāravacana ityatra vacanaśabde karaṇasādhane karaṇarūpatāpanna-
prakārārthaviśiṣṭāyāḥ prakṛtesthamuḥ | tathāca tṛtīyānte naiva prasiddho 
vigrahaḥ | evamapi hetureva sūtre kāraṇatvena vivakṣita iti pratipādayituṃ vṛttau 
hetutāṃ asandigdhāmabhidhātuṃ pañcamī prayukteti dvitīyā vyākhyā | 
anayordvayorapi vyākhyayorhetuviśeṣa eva hetuprakāra uktaḥ | athāpi evaṃ syāt-
prakāra iti prakṛṣṭaḥ kāraḥ, prakṛṭā kriyā, viśiṣṭaḥ kriyābheda ucyate |

(page 27)

ataśca evaṃ yena dravyaguṇādibhedamātreṇa thamuḥ prayujyate śabdaḥ iti kiṃ 
guṇo dravyaṃ karma vā ityatra arthe kathaṃśabdaḥ iti prayogābhāvāt tadā 
hetuprakāraḥ kathaṃśabdena nocyate, apitu kriyāprakāra eva | kriyā ca iha 
āsādanakriyā, tasyāḥ prakāro hetubhedakṛta eva | parameśvaradāsyāsādanaṃ 
hi anyadeva ārtijijñāsāphalautsukyādinimittam, ayaṃ tu anya eva āsādanabheda 
iti kathaṃciditiśabdaḥ āsādyaśabdena saha milito vyākhyātavyaḥ | 
maheśvaraprasādahetukāsādanabhedo'yaṃ pūrvabhāvī vṛttau vyākhyāto 
labdhaśabdena ktāntena paurvakālikatvasya vyākhyānāt samāsena ca 
kartṛśarīrānupraveśakāriṇā kartṛdvāreṇa vākyārthānuprāṇakatvāt | 
sphuṭīkaraṇaṃ samānakartṛkatvasya dhātvarthasaṃbandhasya ca 
āsādanabhedena āsādya iti sāmānyaviśeṣabhāvena kriyākaraṇabhāva 
upalakṣyopalakṣaṇabhāvo vā | tasyaiva iti evakāreṇa anyānapekṣā uktā | yayā 
ityādinā phalanirūpaṇadvāreṇa phalābhisandhānābhāva uktaḥ | tadbhāvaṃ 
tadāsvādalābhena tadāveśavaivaśyaṃ gataṃ mānasameṣāmiti bhakteḥ 
svarūpamuktam | alabdhatadāsvādasyāpitu tatra prāptigrahaḥ śraddheti | tadāhuḥ

śraddhāphalaṃ bhaktiruktā tadvinā nāsituṃ ghaṭaḥ |

iti | atha janasyāpyupakāramicchan iti sūtrāṃśe vṛttim ahamekākisaṃpadā 
lajjamānaḥ itīmāṃ vyākhyātumupakramate sajjanena ca  iti | caḥ 
prameyāntarasamuccayaṃ kurvan pūrvavat vyākhyeyāntaropakramadyotakaḥ | 
īśvaradāsyāsādanādeva pūrṇatātmakaḥ sajjanabhāvaḥ | apūrṇa eva hi 
svātmānaṃ sarvataḥ pūrayiṣyāmīti paramapakaroti, nopakaroti vā, tato durjanaḥ 
| ata eva bhāvyam iti avāśyake ṇyat |

(page 28)

ātmambhariṇā tena avaśyaṃ na bhūyate iti ahamiti pūrṇatvāvaṣṭambha-
parāmarśaḥ | nau labdhadurlabhataddāsyo'hamekākibhattyeti vaktavyam, kiṃ 
lakṣmīsaṃpacchabdābhyām | samasteti sautrasya pratyabhijñāviśeṣaṇasya 
dāsyaviśeṣaṇatāpiśunasūcanam, na prayāsāntareṇetyāśaṅkya āha saṃpat 
iti | aiśvaryamayī maheśvarasamāveśarūpā yā prakṛṣṭā bhaktiḥ 
phalāṅgibhāvabhāgibhavānīvallabhabhaktyantaravilakṣaṇā vivakṣitā, sā 
lakṣmīśabdena saṃpatpadena ca samastetyasya dāsyaviśeṣaṇatāsūcanena 
nirdiṣṭā | saṃpatpadaṃ vyākhyeyapratyāsatteḥ pūrvamupāttam, tatprasaṅgāt tu 
caramaṃ lakṣmīśabdaḥ | nanu prakṛṣṭā bhaktiḥ phalābhisaṃndhivandhyā 
kathaṃ samastetiviśeṣaṇaṃ viruddhaṃ sahate ityāśaṅkya āha yataḥ iti | 
samastatvamanavacchinnatvaṃ saṃpadām | tacca parameśvarāveśavaśādeveti na 
atra virodhaḥ | yata evaṃbhūtā parameśvarāpattirūpā bhaktiḥ prakṛṣṭā, tata 
eva bahvarthavṛttirlakṣmīśabdaḥ iti dūreṇa saṃbandhaḥ | madhye tu atra 
saṃvādako granthaḥ, tadyojanaṃ ca gītam iti guruṇā arjunaṃ prati

caturvidhā bhajante māṃ janāḥ sukṛtinaḥ sadā |
ārto jijñāsurarthārthīṃ jñānī ca---------|| (bha. gī. 3 | 16)

iti | duḥkhanirākaraṇakāraṇatāniścayena vā sukhasaṃpattihetutāniścayena vā 
tadubhayaviṣayārthasaṃśayena vā jijñāsāśabdavācyena 
tattvajñānanāntarīyakatayā vā parameśvaraviṣayaḥ prahvībhāvo jāyate | 
tadāha māmiti-avicchedena prakāśamānaṃ paramātmānaṃ sopādhiṃ  
pūrve, carame nirupādhiṃ, bhajante sevante utkarṣayanti | tena 
bhaktāścaturvidhāḥ | teṣāṃ madhye'ntyo nityayukto nityaṃ

mayyāveśya mano ye māṃ------| (bha. gī. 12 | 2)

(page 29)

ityuktena samāveśayogena yuktaḥ, nityaṃ ca bhaktyā yuktaḥ, natu ādyatritayavat 
phalaprāptau vivartamānabhaktiḥ | tathā ekatra parameśvara eva bhaktiryasya, natu 
prādhānyena phale, sa viśiṣṭa iti prakṛṣṭatāṃ nirūpya 
parameśvarāveśarūpatayā samastasaṃpannimittabhāvaṃ saṃvādayati

----jñānī tvātmaiva me---| (bha. gī. 7 | 18)

iti | mama pratyabhijñātaparameśvarātmano jñānī ātmā svabhāvaḥ 
parameśvara ityayamartho bhaṅgyā uktaḥ, natu jñānino'hamātmeti | etadeva 
sphuṭayati jñānī hi bhaktaḥ iti | jñānitvameva nāma bhaktiriti yāvat | 
īśvarocitā īśvaratādātmyanāntarīyikāḥ | bahvarthasya vṛttiryasya; naca 
anabhidhānaṃ kababhāvādeva bahutvāvagateḥ | lakṣmīśabdāntāt hi 
nadyṛtaśca (5 | 4 | 153) iti nitye kapi siddhe uraḥprabhṛtiṣu samānatvāt 
naurlakṣmīriti ekavacanāntānāṃ pāṭhastatraiva nityaḥ kap yathā syāt, 
dvibahuvacanāntatve tu vibhāṣeti | iyatā maheśvaradāsyaṃ 
maheśvarapratyabhijñānaprāṇitaṃ bhaktatvamātmano jātamiti 
pratyabhijñāgatamapi samastetyādiviśeṣaṇaṃ kathañciditi vinivedite 
jñānitādvārāyite dāsye balādeva saṃkrāntamityukatam | īdṛśena ya 
ekakisaṃpadā lajjate, tata eva ārdrāśayaḥ sarasavimalahṛdayaḥ, ata eva 
viśvarūpaparameśvarasamāveśocitahṛdayastena | śeṣaḥ 
pratyabhijñātasvasvabhāvaṃ parameśvaratādātmyāpannaṃ janaṃ muktvā yaḥ 
kaścidanyo bhūtabhaviṣyadvartamānapramātṛprabandharūpo janaḥ, tasya nija 
ucito yaḥ prabhuḥ pratyabhijñāpayituśca nijastadviṣayaḥ 

bhūuto'nusandherudhāryo jñāninā tu mṛtoddhṛtau |

ityāgamaḥ, tasya prabhorasau saṃbandhaḥ pratyabhijñātṛpratyabhijñeyatā-
lakṣaṇo mahāphalaḥ samastasaṃpadavāptihetuḥ, tasyeti vā pratyabhijñā-

(page 30)

payiturardrāśayasya īśvarasamāveśāt sarvaśakterjanairyaḥ saṃbandhaḥ 
pratyabhijñāpayitṛpratyabhijñāpyalakṣaṇaḥ | etat tu vyākhyānadvayamapi 
ṭīkāvākyasya asthānapunaruktatāvaham | tasyāpi paramātha iti 
vṛttikhaṇḍavyākhyāne hi idamucitam vakṣyate ca īśvarapratyabhijñāpi 
janasya uttamaphalā iti | tasmādārdrāśayagatatvenaiva vyākhyeyam | tasya 
ārdrāśayasya sarvaśakterīśvarasya ca ya asāviti prabhudāsalakṣaṇaḥ 
saṃbandhaḥ, sa mahāphalo vitataphalaḥ svātmopakāra iva paropakāre'pi 
paryavasyatyeva | tena samastasya saṃpada ityapi sūtrārthe vṛttau ca ekākiśabdena 
sūcitametat | yathā ca prasiddhaḥ sujano'pekṣāvaśena paramasya īśvarasya asmi 
dāsaḥ ekākī na saṃpado bhuñje, apitu janamapi pratyabhijñāpayāmi, yena 
asyāpi lābhena tuṣyeyamiti parāmṛśati; tathā kathaṃciditi ātmāśayavaśāt 
mahata īśvarasya dāsyamityādi upapādayāmītyantaṃ vimṛśati | tathāhaṃ 
vimṛśāmi sujanasvabhāvatvāditi vyāptighaṭanāpi sūtravṛttibhyāṃ kṛteti 
vuvṛṇoti yo hi iti | yo yaḥ sujano labdheśvaragāḍhaparicayo dīyate'smai sarvamiti 
dāsaśabdavācyaḥ, sa evaṃ vimṛśati | sujanaśca granthakṛditi svabhāvahetuḥ | 
anevaṃvimarśakatve hi saujanyaviruddhaṃ daurjanyamiti svabhāvaviruddhopa-
lambhāt saujanyaṃ heturvipakṣādanevaṃvimarśakatvāt  vyāvṛttamevaṃ-
vimarśakatvena sādhyena vyāpyate iti vyāptisiddhiḥ | paricayapadena prakriyā-
virahito dāsabhāvo dṛṣṭānte vyākhyātaḥ |  prasiddhasya ata eva 
pratyabhijñāpanāyāṃ kartṛkarmaṇaḥ, natu mukhyakarmaṇaḥ | īśvaram iti 
prasiddhamapi māyāvaraṇādaprasiddhamiti bhāvaḥ | taṃ prati iti anyaṃ janam | 
nanu dṛṣṭānte īśvaraḥ kartṛkarma, prakṛte tu mukhyakarmeti 
śabdasāmyamātraṃ sādhyasya, tataśca yathā gomānayaṃ deśo

(page 31)

vyavahartavyastejoyogāditi dṛṣṭānte gomattvavyavahāreṇa vyāptau 
sādhyadharmiṇi māheyīmattvavyavahāro na sidhyati, tathā prakṛte'pi 
ityāśaṅkya āha ubhayo'rthaḥ iti | na atra vaiṣamyaṃ kiṃcit | 
pratyabhijñāpanaṃ dvikarmakamupakārakaṃ sat saṃpādyatvena sujano 
vimṛśatīti hi vyāptiḥ | tataḥ pakṣadharmatābalāt viśeṣaḥ, yena asau 
hetusādhyayoḥ kaṃcit doṣamādhatte | ata eko'yamartho dvidhā viśadyate iti 
ubhayo'rthaḥ iti uktam | janasya prayojyakarmatā prakṛte-svāminaṃ 
pratyabhijānīhīti, svāminaśca prayojyakarmatā dṛṣṭānte-ucitamimaṃ kṛtyeṣu 
svaṃ pratyabhijānātu svāmī iti paryāyeṇa prayojyakarmatā | saṃjñāpanavat 
pratyabhipūrvo jānātirna buddhyarthaḥ ityāśaṅkāta āha buddhyarthatvāt iti | 
jñātasyāpi mohavaśādajñātasya iva ābhimukhyena hṛdayaṃgamībhāvena 
jñānaṃ pratyabhijñānam | nanu vyāptiviṣayopadarśanaṃ sūtre na dṛśyate, 
tatkathaṃ vṛttāvityāśaṅkya āha tena tasya ca iti | etadarthadvayaviṣaye 
saṃbandhasāmanyavivakṣayā yā śeṣaṣaṣṭhī tayā saha yaḥ samāsaḥ, tatra 
yo'rthadvayasya śleṣa ekaśabdavācyatātmā saṃbandhaḥ; tato hetoḥ sūtre'pi 
upāttaḥ ubhayo'yamartha iti pūrveṇa saṃbandhaḥ | nanu pratyabhijñāpanaṃ yat 
vṛttāvuktaṃ yatra paryāyeṇa mukhyāmukhyakarmayogaḥ, tat sūtre nopāttam; 
tatra hi upapādanamuktaṃ pratyabhijñākarmakamityāha prayojaka iti | anena 
sūtre upāttamiti saṃbandhaḥ | nanu sūtre upapadiḥ, natu pratyabhijānātiḥ; tat 
kathamaikārthyamityāśaṅkya āha pratyabhijñopāya iti | pratyabhijñāpanaṃ 
hi prayojakavyāpāraḥ, natu pratyabhijānīṣveti praiṣādhyeṣaṇarūpo'sāviha, 
apitu tatsamarthācaraṇalakṣaṇaḥ | pratyabhijñāyāṃ ca yattatsamarthācaraṇaṃ, 
tadupapattyā tatsaṃbhavanirūpaṇaṃ, na anyat | ataḥ pratyabhijñāmupapattyā

(page 32)

nirūpayāmi, tadviṣayān upāyān pradarśayāmi, saṃbhavantīṃ tāṃ 
saṃbhāvayāmi, pratyabhijñāmupapādayāmi, pratyabhijñāpayāmīti eka eva 
arthaḥ | tathā ca vakṣyamāṇopāyena iti vṛttiḥ upapādayāmi ityasya 
vyākhyā, yata upapādayāmītyasya tadviṣayānupāyān pradarśayāmīti | 
vakṣyamāṇavyākhyāntarasūcanaṃ ca idaṃ samastasaṃpadityasya | tathāhi 
pratīpaṃ jñātasyāpi vismṛtasyeva chāditasyeva punarābhimukhyena, natu 
smaryamāṇatayā, apitu sphuṭatvena jñānaṃ pratyabhijñānaṃ sa evāyamiti 
bhātabhāsamānānusandhāne sthirasya adhunātanakālavyāpino'pi 
jñātatvameva | ayamasāvadya mayā pratyabhiñāta ityatrāpitu kutaścit 
sāmānyākāreṇa jñānamabhūdeva | evamātmani satataṃ bhātyapi 
mohādāvṛte iva punarābhimukhyena jñānam | tatra ca upāyaḥ-samastasya 
nīlasukhādeḥ saṃpat siddhiḥ, tasyāḥ samyagavāptiracalavimarśopārohaḥ | 
ato'yamarthaḥ-samastasaṃpadavāptirheturupāyo yasyāṃ pratyabhijñāyāṃ, 
tādṛśīṃ tadupāyikāmupapādaye | upapādanaṃ ca pratyabhijñāyāṃ, 
viśrāntamiti tat prayujyamānaṃ tāṃ svaviśiṣṭāṃ prayuktāṃ phalataḥ karoti-
iti na sūtrārthavṛttyarthavaiṣamyaṃ kiṃcit | śaktirdṛkkriyātmā, tadeva 
lakṣaṇarūpamabhijñānam | yat yat jñānakriyāsvatantraṃ, tadīśvaraḥ 
purāṇāgamasiddha iva | pramātṛtattvaṃ ca evam, etāvanmātralakṣaṇaṃ ca 
aiśvaryam | purāṇādisiddhe'pi īśvare'naṅgīkriyamāṇe gṛhagrāmamaṇḍale-
śvaraprasiddhau tadviṣayāpratihatajñānakaraṇe eva aiśvaryasya lakṣaṇam | te ca 
pramātṛtattve sarvaviṣaye apratihate eveti | apiśabdo bhinnakramaḥ | na kevalaṃ 
mama mahāphalā, yāvat janasyāpi | iyatā samasta ityasya ubhayaviśeṣaṇatvaṃ 
sphuṭīkṛtam | natu samastāḥ saṃpadaḥ

(page 33)

phalatvena sūtritāḥ, vṛttau tu paramārthalābhamātraṃ phalaṃ vivṛtamiti kimetat 
| atra āha yatra iti | samastasaṃpadyogena pūrṇatā lakṣyate | rājyabhogasvarga-
bhuvanabhogaprāptāvapi uttarottarāśaṃsanīyasaṃbhave kaḥ pūrṇatāvakāśaḥ 
| parame tu arthanīye yataḥ paramarthanīyāntaraṃ nāsti, tasmin parameśvarabhāve 
samāsādite kimāśaṃsanīyaṃ paraṃ syāditi tātparyam | etāvatā ca  iti 
sūtravṛttigranthena | nanu lokagataḥ puruṣārthalābhaḥ śāstrakṛtaḥ kathaṃ 
prayojanam | āha pravṛttihetutayā iti | nahi prayojanasya śṛṅgamasti-yadeva hi  
pravartakaṃ, tadeva prayojanam | yamarthamadhikṛtya (nyā. sū. 1 | 1 | 24) iti vadanti 
'iṣṭalakṣaṇatvāt' iti ca | lokaphalasiddhau śāstrakṛtaḥ kimiti cet, svagataphala-
siddhāvapi asya kim | tasyāṃ parituṣyatīti cet, ihāpi samānamityāśayena āha 
sāśtrakṛtastu iti | nanu parituṣyeyamiti vṛttyā kaḥ sūtrāṃśo vyākhyātaḥ 
ityāśayena āha anena iti |  svātmani nirākāṅkṣatā iti viśeṣaviṣayo 
niṣedhaḥ śeṣamabhyunujā nātīti icchārūpāyā ākāṅkṣāyā 
gatyantaravirahāt para eva viṣayo bhavati | naca parāpakāraviṣayā asau yuktā tasya 
apūrṇasvātmakaireṣaṇīyatvāt, asya tu īśvaradāsyena samastasaṃpatprāpti-
hetunā paripūrṇatvāt svātmani kiṃcidapi kartavyameṣaṇīyaṃ nāsti | apratihatā 
ca citsvabhāvatvādicchā | sā parārthaviṣayaiva balāt saṃpadyate | 
svasaṃpādyaniyantrito hi na paramupacikīrṣet, svasaṃpādyābhāve tu balādeva 
paropakāraviṣayā sā bhavati | yathoktaṃ mayaiva śrīṣaḍardhaślokavārtike 
tantrāloke

svaṃ kartavyaṃ kimapi kalayaṃlloka eṣa prayatnā-
nno pārārthyaṃ prati ghaṭayate kāṃcana svātmavṛttim |

(page 34)

yastu tyaktākhilabhavamalaḥ prāptasaṃpūrṇabodhaḥ
kṛtyaṃ tasya sphuṭamidamiyallokakartavyamātram || (2 | 39)

iti | tena ātmano'śeṣasaṃpannidhānamahādevadāsyalābhāt saṃpanne upakāre 
parasyāpi tamicchanniti apratihatecchāprasaratvādeva parituṣyāmīti prāptakālo 
yukto me'tra āśu paritoṣaḥ iti prāptakāle liṅga | tadetat upakāramicchan ityasya 
vyākhyānaṃ parituṣyeyam iti | prasarantyā hi icchāyā anirodhaḥ paritoṣaḥ 
paropakāre samarthaḥ, tadviṣayāmicchāṃ prasarantīṃ svārthasaṃpādana-
prābalyena vā svārthapratighātaparākaraṇatātparyeṇa vā anāśaṅkitaprasara-
nirodhāṃ  kathaṃkāraṃ nirundhyāmiti tātparyam | evaṃ sūtravṛttī vyākhyāya 
vivṛtikārastadadhunā vyavahartṛmātra syāpi ityādinā granthena nirṇayati 
yaduktavān sūtrāvatāraṇopakrame śrotṛjanapravṛttaye prayojanaṃ kathayati 
iti | tathāhi kecit manyante puruṣavacasāṃ satyāsatyatvāvalokanāt 
vākyāvagamite'pi prayojane sandeha upajāyamāno'rthaḥ prayojanaṃ 
saṃśayarūpatvāt pravartakaḥ saṃbhāvanāpratyayarūpatvāt vā; yataḥ 
śīlasamācārau śāstrakārasyāvagatau, tadetat na sahate vyavahartṛmātrasyāpi 
ityādinā | ihārthitvam iti tadupāyalābhe'pi janasya kathaṃ pravṛttirbhavediti 
arthitaiva mukhyatayā pravṛttikāraṇam, upāyavedanaṃ tu kevalaṃ 
pravartamānasya viṣayamarpayat karāvalambanamādhatte | tatra abhyaste vyavahāre 
vyavahartā suvarṇarūpyaparīkṣādau suvarṇakāravaikaṭikāderapi vacaḥ 
prāmāṇyena abhimanyate, kimaṅga śāstrakārasya | parameśvaraprasādataśca 
asya parameśvarasvarūpāveśātmani prayojane matirunmanāyate; 
upāyamavidvāṃstu kiṃ kurutāmiti kāndiśīko jhaṭiti ādivākyaṃ śṛṇvan

(page 35)

pravartata eva niḥśaṅkaḥ | tadāha dṛṣṭa iti anapahnavanīyo'yamarthaḥ | ata eva 
abhyaste viṣaye svata eva prāmāṇyamabhyupāgaman | śāstrādinirdiṣṭāt iti | 
patramātrameva hi avalokayan pravartate, natu lokaṃ pṛcchedupādhyāyaṃ vā, 
saśaṅko vā śāstraṃ śrutvā tataḥ satyatāṃ pratīyāditi | etatprayojanena 
yo'rthī jano yaḥ kaściditi adhikāriṇo'tra nānyo niyama iti | pravartatām iti arhati 
pravartitumetasya śāstrasya śravaṇe iti | vispaṣṭanamarthaḥ prayojanaṃ yasya 
prayojananibandhanasya, tasya na ānarthakyam | atraiva iti kathañcit iti śloke | 
vṛttikāro hi pratyabhijñāṃ granthakāra upapādayatīti brūyāt, natu 
upapādayāmīti | nanu vṛttikāro'nyathāpi anavabodhādinā prayojanaṃ 
brūyādityāśaṅkāto'nāśvāsasthānam | tat yadi vipratārakatayā vṛttikāraḥ 
śaṅkyate, idamapi kasmāt na āśaṅkyate-upapādayatīti vaktavye vṛttikṛt 
vitāraṇārthamupapādayāmīti uktavānityāśaṅkya āha prasiddheḥ  iti 
mūlagranthakārasamānakālabhāvino hi sākṣāddarśinaḥ krameṇa imāṃ 
prasiddhiṃ prasārayanti | nanu prasiddhirnāma na kiṃcana pramāṇam | yadi paraṃ 
kalpitaḥ svabhāvahetuḥ, naca kalpanayā paramārthavyavahārāḥ 
sidhyantītyāśaṅkya āha yadvakṣyate iti vyākhyāsyate āgamavicāre vitatya 
etadityarthaḥ | nahi mūlavṛttigranthayoretadbhaviṣyati | nāpi tatratyametat 
ṭīkāvacanam, apitu āgamagranthavākyam | tasya pāṭhamātre iha ca agre ca tulye 
vakṣyate iti katham | agre hi uktametadityapi vaktavyaṃ syāt | tasmādetadarthaḥ 
pramāṇalakṣaṇāvasare

idametādṛk------| (2 | 16)

ityatra vyākhyāsyata ityarthaḥ | tatra hi dṛḍhānunmūlanīyavimarśādhāyakaṃ

(page 36)

pramāṇam | tathāca prasiddhiḥ svayameva vimarśajīvitā āgamapramāṇarupā iti 
vakṣyate | yuktimān iti nyāyadattahastāvalambo yathā īśvarādvayādyāgamaḥ | 
itaraḥ iti nyāyānanugṛhītaḥ | iyanti tattvabhuvanānītyādita ārabhya teṣām-
etairmantrairetāvatībhirāhutibhiḥ śuddhirapunarbandhakatvalakṣaṇā bhavati, tata 
evaṃ śivayojanetyādinā āgamaḥ, sa evaṃrūpo vidyāyāmapavargarūpa-
svarūpalābhopāye, avidyāyāṃ saṃsārabhuvi bogopāye yuktimān 
dānāddharmo hiṃsātastu adharma iti | upakārāpakāracittāt hi 
nirmalasamalarūpāt tādṛk phalamiti saṃbhāvanānumānam | niryuktikaḥ

snānāt dharmo dīkṣitasyādharmo dānāt |

iti | avigānataḥ iti prāmāṇye hetuḥ, viruddhaḥ gānaṃ tadvimarśonmūlanena 
vimarśāntarasya abhāvāt prāmāṇyam, tadudaye tu apramāṇyameva | nanu sa 
āgamaḥ kuta āyātaḥ | āha aiśvarī īśvarāt āgatā sā satyā vāk ataścaivaṃ 
yena hi nirurutsitāpi na niroddhuṃ śakyā, ata eva hi avigītā 
viruddhavimarśānunmūlitavimarśā; tayā prasiddharūpayā aiśvaryā vācā | 
yatra adhikāriviśeṣe, deśe ca | yadā iti kāle | yat iti prameyam | siddhaṃ 
vimarśabhūmiprāptaṃ hṛdayakoṭare haṭhakṛtadṛḍhanirūḍhikam | tat iti 
taddeśatadadhikāritatkālakaprameyarūpam | aviśaṅkitaiḥ iti aśaṅkitatvādeva 
grāhyam na na grāhyam

anyadvacasi kaṇṭhe'nyat-------|

iti nyāyena āśrayaṇīyamityarthaḥ | tena

riktasya jantorjātasya------------|

(page 37)

iti riktā vācoyuktiḥ | prasiddhiśatapūrṇe jīvaloke kasyacit kācideva prasiddhiḥ

līneva pratibimbiteva likhitevāntarnikhāteva ca (mā. mā. 5 | 10)

iti nyāyena hṛdayabhittau utpāṭanaśatairapi hṛdayamanunmūlya 
nāpasarpatītyāśayena āha bauddhasyāpi iti | sa hi

tathā viśuddhe viṣayadvaye śāstraparigraham |
cikīrṣoḥ sa hi kālaḥ syādyadā śāstreṇa bādhanam ||
iti āha, tathā
tadvirodhena cintāyāstatsiddhābhīṣṭayogataḥ |
tṛtīyasthānasaṃkrāntau nyāpyaḥ śāstraparigrahaḥ ||

iti | tatra ca sudūramapi gatvā kathametat niśceyam-yenaiva 
pratyakṣānumānāvagamayogyametat viṣayadvayamavitathaṃ kathitam, tenaiva 
ayaṃ tadaviṣayastṛtīyasthānātmā viṣayo bhāṣita iti | nahi atra 
saṃbhāvanānumānamapi vītarāgasarvajñanyāyena saṃbhati, vitārako'pi 
ko'pi tanmadhye caityavandanāt ityādi akṣaipsīditi saṃbhāvanānapagamāt | 
atha buddhena idaṃ bhāṣitamiti svayūthyaparayūthyaprasiddhiranatiśaṅkanīyā 
ucyeta | tadasmaduktasanmārgārohaṇametat, alamatra asthānaviśaṅkayeti | evaṃ 
prādhānyena prayojanamuktaṃ pāryantikaṃ samastasaṃpaditi, tatsaṃpādakaṃ tu 
upapādayāmīti | tayośca sādhyasādhanabhāvaḥ saṃbandhaḥ | abhidheyā 
pratyabhijñā | tasyāḥ śāstrasya ca vyutpādyavyutpādakatāsaṃbandhaḥ | 
tadupāyatvāt śāstrasya abhidhānamīśvarapratyabhijñeti | guruparvakramastu

iti prakaṭito------| (4 | 15)

iti śāstrānte nirūpayiṣyate āgamārthābhidhānaprasaṅgāt, vyava-

(page 38)

hārasādhanapramāṇacintāvasare tu kiṃ tena | nahi vacanabalāt vyāptirhetoḥ 
svarūpaṃ vā | parārthānumāne ca sarvameva āgamarūpatānapekṣam | kevalaṃ 
mohavyapohanamātramatra phalaṃ dharmiṇo hetorvyāpteśca siddhāyā api 
mohācchādanakṛtāsatkalpanāpasāraṇena sāphalyāt |

kevalaṃ dṛṣṭasādharmyātsmāryate samayaṃ paraḥ |

iti nyāyena dharmyasiddhau hetvasiddhau vyāptyasiddhau vā parasya 
vacanamātrasya anupayogāt vacanapratyaye vā āgamarūpataiva syāt, na 
anumānamiti | tadiha ātmani īśvararūpatayā svayaṃ prakāśamāne 
mohāpasaraṇe vyavahārasādhakapramāṇavyāpāraḥ | ata eva

tarko'pratiṣṭhaḥ-------------|

iti na avatarati maulikasaṃvedanaparighaṭanāt ghaṭo'yaṃ tathā bhāsamānatvāt 
iti nyāyena | nahi etat nityo'yaṃ pakṣasapakṣānyataratvāt madupagamāt ityādivat 
satyānubhavabāhyaṃ svavikalpamātroparacitam | tata eva etatpṛṣṭhe āgamo'pi 
upodvalako'stviti | kathaṃcidityanenaiva guruparvakramo'pi na na sūcitaḥ | durlabho 
hi sadgurusaṃbandhaḥ ityuktaṃ śrīmanmataṅgādau

-------saṃbandho'tīva durghaṭaḥ |

iti | vṛttau ca gurubhaṭṭārako'pi parameśvaraśabdenaiva nirdiṣṭaḥ

ācāryasya ca mantrasya śāstrasya ca śivasya ca |
nānātvaṃ naiva kurvanti vidyeśā---------||

iti hi āgamaḥ | ṭīkākāro'pica sākṣātkṛtaparame"varākāraiḥ iti vakṣyati | 
nanu vṛttikāraḥ kathaṃ pratyabhijñāpayāmīti ahaṃbhāvaniṣṭhatvena brūyāt, 
tena hi vaktavyaṃ pratyabhijñāpayati parituṣyediti ca,

(page 39)

-ityāśaṅkya āha tatra vṛttau iti atra sūtre yā vṛttistasyām | sūtrasya 
vivarītavyasya anusāreṇa hetunā eṣa nirdeśaḥ, natu 
svātmaniṣṭhasvatābhiprāyeṇa | kasmāt sūtrasya anusaraṇamiti | āha saṃvṛto 
yathāsthitatvena ananyathākṛto yaḥ sūtrakṛto nirdiśyamāno'rthaḥ, tasya yā 
vivṛtirbhañjanaṃ; tāvāneva yato'syā vyāpāraḥ | yadi sautraṃ 
nirdeśamanyathā kuryāt, tarhi vādiprativādinoḥ siddhāntapūrva-
pakṣagatayorutthāpanaṃ bhavet; tataśca prativādikṛtasya ākṣepasya, 
punastṛtīyasthāne vādikṛtasya pratisamādhānasya karaṇaṃ syāt | tathākaraṇe 
ṭīkaiva syāt, na vṛttiḥ | pūrvaṃ ca uktaṃ śanaiḥ sūtravṛttyoḥ iti | tata 
ākṣepādyakaraṇena prayojanena pūrvapakṣādyanutthāpanaṃ, tadarthaṃ ca 
saṃvṛtasautravivaraṇam | tato hetoḥ sūtrānusaraṇam | tato hetoruttamaprayogaḥ | 
upapādayāmīti hi sūtram, tadanusārāt tu vṛttau pratyabhijñāpayāmīti | 
etacchāyāprasaṅgādavilaṅghyāt parituṣyeyamityapi prayogaḥ icchan 
ityetatsūtrāṃśabhañjanāvasare'pi | evamuttamapuruṣanirdeśasya pradhānaṃ 
prayojanamākhyāya anyadapi āha sūtrakāra eva iti | 
praṇāmākaraṇapramāṇāntarajñāpite'rthe upodbalako'pi ayaṃ nirdeśa iti 
anvācayasūcanārthaścakāraḥ | etacca pūrvamuktameva || 1 ||


|| ādivākyam ||

maulikadṛḍhapramāṇaprabhāvaprakāśamānatāyogini vastuni 
vyavahārasādhanarūpaṃ pratyabhijñānaṃ mohāpasāraṇaphalaṃ kāmaṃ 
kevalaṃ nirūpyatāmapūrvaprakāśasya siddhirūpatvāt | yatra tu avabhāsa eva na 
vṛttaḥ, tatra maulikaṃ tāvat pramāṇaṃ vācyam | tatra tu nirūpite'pi yo mohaḥ 
syāt, tadapāsanāya bhavatu vyavahārasādhanamiti mātraśabdābhiprāyaḥ | tena 
saiva ityatra evakāraḥ prāthamyaṃ dyotayati |

(page 40)

sā tāvat prathamaṃ sādhyā, tata ucyatāṃ pratyabhijñeti | vyavahārasādhana-
viṣayatāyā vyāpakamavabhāsamānatvaṃ, tadviruddhaṃ ca 
anavabhāsamānatvamatra upalabhyate iti vyāpakaviruddhopalabdhiḥ | īśvaro na 
vyavahārasādhanapramāṇamātraviṣayaḥ kathaṃcidapi anavabhāsamānatvāt | 
nahi īśvaro viśvatra kasyacit kadācit bhāsate ityāśayena āha nanu iti 
siddhasattākasya iti sattaiva na siddhā iti ca | siddhatvamatra prakāśamānatvam | 
saiva iti sattā sādhyā | apūrvaprakāśanarūpaṃ tatra jñānaṃ yato bhavati, 
tādṛk pramāṇaṃ vaktavyam | tathā ca uddyotakārādayaḥ īśvarasiddhirityevaṃ 
vyavahāramakārṣuḥ | atha cetanatayā kartṛtayā ca sāmānyarūpeṇa 
sāvayatvādidharmakatanubhuvanādikartṛsvarūpamavabhātam, evaṃ 
vyāptigrahasamaye eva sāmānyātmanā sarvaṃ pratibhātamiti | vicchinnastarhi 
anumānasya apūrvaprameyayogaḥ,-iti īśvare ko'tiśayaḥ | atha 
tatkālāparicchinnamayogavyavacchedādi apūrvamatra prameyam | prakṛte'pi tarhi 
tanvādinirmāṇocitajñānakriyāsāmarthyāyātameva prameyamiti 
īśvarasiddhireva ucitā, na īśvarapratyabhijñā | etat nirākaroti na iti | atra hetuḥ 
sarvātmarūpatayā iti | avaśyaṃ hi kiñcit sādhayatā kiñcit 
siddhamupagamyam | tato hi sādhayitṛsādhanadharmiprakāśo'napahnavanīyaḥ, 
anyathā sarvaṃ syādindrajālam, tadapi vā na syāt | kiñcit cet siddhaṃ, tat tarhi 
prakāśamānaṃ prakāśāvyatireki | prakāśa eva ca viśvātmā parameśvaraḥ iti 
sarvasya yāvadasāvātmarūpaḥ pāramārthikaḥ svabhāvaḥ, tāvat yat kiñcit 
siddhamaṅgīkriyate; tatsiddhireva tasya īśvarasya sattvasiddhiḥ sadbhāvaprakāśa 
iti kimapūrvamaprakāśitaṃ prakāśyatāmiti ucitaiva īśvarapratyabhijñā-
vācoyuktiḥ |

(page 41)

evaṃ yat āśaṅkite pūrvapakṣe saṃkṣepeṇa uktam etat na ityādi, tat vastu āha 
ślokena iti | sūtravakṣyamāṇavastupiṇḍīkaraṇamiha ṭīkāyāṃ 
ślokāvatāraṇamiti śailī ṭīkākārasya | nanu sūtre svātmani iti 
śuddhamupāttam, vṛttau tu sarveṣām iti saṃbandhipadaṃ yaduktam tat kuta 
ānīyeti āśaṅkamāna āha sva iti | ātmaśabdo'pi yadyapi

ātmā vastu svabhāvaśca------|

iti dṛṣṭyā svabhāvavācī saṃbandhiśabdaḥ, tathāpi vaiśeṣikādidṛśi svatantra 
eva ātmapadārtha iti śaṅketāpi; svaśabdopādāne tu svabhāvavacanatā asya 
gamyate | nanu svo yadi ātmīyaḥ, tadā ātmano yaḥ saṃbandhī svabhāva iti 
ātmārthaḥ prakṛtivācyaḥ svabhāva eveti svabhāvasya svabhāvaḥ iti na 
kiñciduktaṃ syāt | satyam, kintu ātmapade ucyamāne pṛthageva ātmapadārtho 
ghaṭasthānīyaḥ pratīyate | svaśabde tu svaṃ vastramityatra yathā ananyalagnatvaṃ 
pratīyate ātmīyaṃ vastramiti, evamātmīya ātmeti | kasya ātmīyaḥ iti avatarati 
anyākāṅkṣā, naca kaścidupāttaḥ iti sarvasya ātmīya ātmeti gamyate | tatra 
ātmīyārthe'pi ya ātmārthaḥ, sa pṛthak sṛṣṭa eva upadeśyopadeśopāyatayā | 
anyathā hi na saṃbandhipratītirbhavediti sarveṣāmātmanītyādiśayyāntarasamā-
śleṣe'pi saṃyogitvādisaṃbandhāntaraśaṅkā na nivarteta | ātmīyatve tu 
avyabhicaraṇīyatvamananyāpekṣatvaṃ svaviśrāntatvaṃ gamyate ityetadarthaṃ 
sṛṣṭa eva bhedena ātmā upadeśasya prakṛtisiddhyaṅgasya anyathānupapatteḥ | 
sarvasyātmetyapi hi sṛṣṭa eva bhedaḥ svabhāvavyatirekiṇaḥ sarvasya abhāvāt | 
sarvatra hi śabdajñānānupātini vastuśūnye vikalpe ayameva kramaḥ | 
vastuśūnyatvaṃ ca

(page 42)

pāramārthikarūḍhapratyayāpekṣayā ucyate, sṛjyamānatvena tu vaikalpikaṃ 
vastu eveti vakṣyāmaḥ
svātantryāmukta-------| (1 | 47)

ityādyantare | tadayaṃ svaśabdaḥ saṃbandhyākarṣaṇamātropayukto yaṃ 
saṃbandhinamākarṣati, sa niyatastāvat na bhavati anuktatvāt aprakaraṇāpannatvā-
cceti sarva eva pratīyate | anupādānāt iti śabdena prakaraṇena vā | 
sarvāntarbhāvāt iti codyam | yadyasau iti siddhāntaḥ | tatra codye 
tāvadayamāśayaḥ-aniyatatvāt saṃbandhino nikhila eva jaḍaśca ajaḍaśca 
bhāvavargaḥ pratīyate | tatra ajaḍānāṃ sa ātmā caitanyalakṣaṇa ekaḥ kadācit 
śakyo'bhidhātum, jaḍāstu amī pṛthakparicchinnasvarūpāḥ kathamekātmānaḥ 
pṛthaksvabhāvānāmekasvabhāvatvavirodhāditi | uttarasya tu ayamāśayaḥ-iha 
svātmeti sva ātmanaḥ svasāmānyalakṣaṇārthakriyākāritvāderanyāpekṣasya 
saṃbandhī ātmīyo'nanyāpekṣo'naupādhiko bhavati | tatra ye jaḍāste yāvat 
jaḍābhimatāḥ, tāvat sadasattvamapi etairdurlabhamātmani, kā tu kathā 
nīlapītasukhaduḥkhāditvasya | tathāhi yaḥ svātmani san, sa yadi asan syāt, 
kimasya duṣyet | tathaiva arthakriyāṃ kuryāditi cet, karoti ityevaṃ yadi syāt tatkiṃ 
syāt | tathaiva prakāśeteti cet, prakāśamānatā kimasya svamahimā | omiti cet; 
mama prakāśate, caitrasya prakāśate iti kathaṃ saṃgacchatām | prātipattrī sā 
prakāśateti cet, pratipatturyadyasau, tat tasya sā kiṃ bhavatu | tadvaśāt sa 
prakāśata iti tu apūrvā yuktiḥ | evaṃ hi śvetavaśāt pītaṃ śvetate ityapi syāt | 
yadi asya ātmīyaṃ, tadvaśādanyatra na bhavati nīlateva pīte; tathā ca 
prakāśarūpatā pramāturātmīyeti

(page 43)

kathaṃ sā nīle bhavet | tatra bhavanasya tādātmyaṃ vyāpakamanyathā nīle'pi 
pītatetyādi sahasraśākhamāsamañjasyaṃ dṛśyamānatādrūpyavyāpakasya 
niyamasya viruddhaṃ prasajyeta | tasya tādātmyasya viruddhamanyātmatvaṃ, 
tadeva ca anyadīyatvam; athā anyasya tatsaṃbandhīti katham | naca idaṃ nīlādeḥ 
prakāśamānatvaṃ vinā kiñcit nijajīvitamastītyanapahnavanīyaprakāśamāna-
tābalāt pramātṛprakāśatādātmyamasya aṅgīkāryamiti bodhātmāna eva 
nīlādayo'pi, natu eṣāmanyat vapuriti teṣāmapi sa eva svātmā maheśvara iti 
iṣṭameva | kaḥ prasaṅgārthaḥ | aniṣṭāpattirhi prasaṅgaḥ | tadetadāha āstāṃ 
loṣṭādiḥ iti | tasya hi sphuṭaṃ prakāśamānasya ko bodhātmatāyāṃ vivādaḥ | 
abhāvo'pi yastuccho na kiñcidityevaṃ kasyāpi saṃmataḥ, so'pi yāvadevamiti na 
cakāsti; tāvat bhāvādanyat sa ityetadeva kuto bhavediti | budhyamānaścet, 
tadasyāpi maheśvara eva svātmā | atha abudhyamāno'sāvabhāvaḥ, tarhi na 
kaścidasāviti kasya asau tadānīṃ svātmā prasajyate | evaṃ nīlāderapi 
abudhyamānasya kaḥ svātmeti budhyamānapadam | etaduktaṃ bhavati-yadā 
codyaṃ kriyate nīlatadabhāvāderapi svātmā maheśvaraḥ prasajyate iti, tadā 
budhyamānatvasya aṅgīkāra eva uttaramanyathā nirāśrayaṃ codyamiti | nanu 
evaṃ maheśvaraścet nīlasya ātmā, pītasyāpi sa eveti nīlamidaṃ, pītamidamiti 
kuto vibhāga iti | āha sarvameva iti | yasmāt cidrūpasya ātmanaḥ prakāśarū-
pasya svasvabhāvasya sarvameva vedyaṃ śarīramiva yathā śarīraṃ vedyamapi 
ahamityavaṣṭambhādanupacaritāt cidrūpānuviddhaṃ, tathaiva viśvam | nahi 
kambalādivat dehe upakaraṇatvādupacaritatā ahaṃbhāvasya loke bhāsate 
pṛthagātmamānināmapi |

(page 44)

evaṃ ca cidrūpatānuvedhāt yathā saṃvit viśvarūpā vakṣyamāṇanayena, tathā 
nīlapītādibhāvāvalī apīti anabhimata eva asmākaṃ vibhāgaḥ | etat 
vedāntavādigranthavacasā saṃvādayati pradeśo'pi iti | yathā ghaṭākāśaṃ 
paṭākāśamiti ākāśasya ghaṭādiyogena kalpitāḥ pradeśāḥ, ākāśasya 
yāvadrūpaṃ vibhutvādi tena anūnādhikāḥ; evaṃ brahmaṇo vṛhattvena 
vyāpakasya vṛṃhakatvena viśvasṛṣṭyāpyāyanavidhāyinaḥ prakāśarūpasya 
svaśaktipratyavabhāsitanīlādyupādhikṛtā ye pradeśā nīlaprakāśaḥ 
pītaprakāśaḥ ityādayaḥ; te brahmaṇi yat sārvarūpyaṃ, 
sarvaśaktyavibhāgavṛttitvaṃ, yacca prakāśamānatāmātrarūpeṇa 
pratiyogivaikalyādapohanīyābhāve vikalparūpatvāyogādapratiyogisaṃvedana-
rūpamavikalpatvam, tat pratyekamanatikrāntāḥ, tato manāgapi anadhikāśca | 
dvayamanyonyaṃ hetuhetumadbhāvaṃ dyotayati | nanu evamavibhāgarūpatā astu 
yuktyupanipatitā, yastu ayaṃ nīlaṃ pītamiti vedye, caitro'haṃ maitro'hamiti 
vedake vibhāgapratibhāsaḥ, tatkathaṃ samarthayāmahe iti | āha kevalam iti jaḍaḥ 
iti | jaḍatvena anyādhīnaprakāśatayā bhāsamāna ityarthaḥ | vakṣyamāṇā iti

     heyā trayīyaṃ prāṇādeḥ prādhānyātkartṛtāguṇe | (3 | 29) 

ityatra vakṣyate | parameśvaraprakāśa eva svamāyāśaktyā 
atidurghaṭakāritvasvātantryarūpayā svarūpamanācchāditamapi ācchāditamiva 
avabhāsayati | tatra anācchādanāṃ-śapradhānatāyāṃ 
sadāśiveśvararūpatāsamāveśadaśā, 
ācchādanabhāgāvabhāsapradhānatāyāṃ māyāvijṛmbhārūpā 
saṃsāridaśā; tato nīlamityādivedyabhedaḥ, ābhāsamānakāyabhedopalakṣita-
buddhiprāṇapuryaṣṭakādyupādhibhedārūṣitacaitanyacchāyākṛto vedakabheda 
iti bhedavijṛmbhāyāṃ māyāpramātṛtve

(page 45)

kāyo mūrdhābhiṣiktaḥ, tathā ca taducchedādeva prabhṛti mokṣavyavahārastatra 
tatra vaikaraṇyaṃ mokṣaḥ ityādau | tatpradhānyamasya sūcayati kāyo'pivā iti | 
ayam iti pūrvaṃ prakāśarūpatvāt cidrūpa eva svātantryāt vedyatāṃ nīta iti 
loṣṭādivadeva vedya eva sannanātmabhāvādapahastanenaiva ahamiti 
saṃvedanatādātmyamadhiśāyitaḥ | ātmani nimajjya iti | nīlādirnīlarūpatve 
prakāśaṃ nimajjayati, yena prakāśabalāt nīlamidamiti prakāśaḥ 
parimitībhavati; yena vedyadharmatvena prakaṭo'yamartho dṛṣṭaḥ prameya iti bhāti 
| kāye ca nimagnaḥ so'hamiti prakāśaḥ parimita upapattideśabhedena 
atītādikālakalanayā rudrakṣetrajñatadavāntaraprakārapramātṛrūpeṇa 
svarūpabhedena anyadeśakālasvarūpaviviktatvena bhāti | yadā-tadā iti nipātau 
vākyārthasvarūpaparāmarśe | yat parimitīkaraṇam, etatsaṃsārotthāpakaṃ 
mohanaṃ māyāvyāpāraḥ | tadabhiprāyeṇa iti saṃsāramohamabhipretya 
anusaṃdhatte viṣayatvena yastenoktaṃ guruṇā tatrabhavatā vāsudevena arjunaṃ 
prati | tadanusandhānena tadvivakṣayeti hetutṛtīyā vā |

ye caiva sāttvikā bhāvā rājasāstāmasāśca ye |
matta eveha tānviddhi------------------|| (7 | 12)
ityanena sarvamidaṃ vedyarūpaṃ vedakarūpaṃ ca prakāśatadabhāvatadubhaya-
saṃvalanāmayatayā vicitramahamitiśuddhasvabhāvādeva saṃvedanāt 
prasṛtamiti abhidhāya prasarasya bhedāvabhāsaprādhānyāt ahaṃprakāśasya ca 
bhinnasvarūpadeśakālottaratvāt tatra prasare rūḍho mayi na rūḍho bhavati | 
prasarasya hi madrūpatvācchādanabhāga eva prāṇāḥ | mayi tu rūḍhiṃ vinā te 
na kiṃcit syuraprakāśatvāpatteḥ, natu tairvinā svatantrāhaṃprakāśasya 
khaṇḍanā kācit | saṃsāramohābhiprāyeṇaiva

(page 46)

ca sarvabrahmaṇoḥ kiṃ vidheyaṃ, kimanuvaditavyamiti vicārayitavyam | tatra 
tadyapi pūrvasiddhaṃ brahma, tadanūdya apūrvatvena, sarvaṃ tu asya 
vedyavedakarūpaṃ vidheyaṃ, brahmaiva sarvaṃ bhavati, nānyat kiṃcana sarvaṃ, 
brahma kila sarvaśakti,-iti vidhyanuvādau; tathāpi parasya upadeśyasya brahma na 
kiṃcit siddham, yena anūdyate | sarvaṃ tu asya vedyavedakarūpaṃ siddhamiti 
tadanūdya asya brahmatādātmyamucyate | yat sarvamidaṃ dṛśyate, tasya 
antastamāṃ svarūpamanupraviśyavicāryamāṇaṃ prakāśaparāmarśa-
rūpameva avaśiṣyate | tata uktaṃ

sarvaṃ khalvidaṃ brahma | (chā. 3 | 14 | 1)

iti | tata eva sarvabhāgasya yadidaṃ śaṅkyate nānārūpaṃ, tat niṣedhati

     ---------neha nānāsti kiṃcana | (chā. 3 | 14 | 1) 

iti iha dṛśyamāne sarvaśabdasya vyapadeśye nānā yat prakāśena saha na bhavati, 
prakāśatādātmyena na vartate, tat kimapi rūpaṃ nāsti aprakāśamānasya 
śapathairapi apratyeyatvāt | śapatho'pi hi tatprakāśatākāryo bhavati | nanu yadi 
bhedāṃśaprādhānyāvabhāsaḥ saṃsāraḥ, tarhi tadbhittibhūtasya prakāśā-
bhedabhāgasya prādhānye kimiti | āha kartṛtāyāḥ iti vaiśvarūpyam iti | 
śuddhasvarūpasparśaprārambhāt sadāśiveśvararūpatayā vaiśvarūpaṃ yathā 
iha granthakāra āha, tathā anyo'pi āha, taṃ prakāramanyo'pi āheti vā, tena vā 
asmaduktena nyāyaprakāreṇa anyo'pi etadāha tadāha ityevaṃ tathā cāha iti 
vacanāntareṇa saṃvādanaṃ vacanāntarasya vā sajīvatākaramananyathā-
rthatvaṃ bhūyobhirvacanairdarśyate | mām iti ahaṃrūpamananyāpekṣaprakā-
śamananyavimarśamayaṃ svaprakāśavimarśaṃ prakāśaṃ sarvatra 
sarvopaśleṣeṇa yaḥ paśyati nīlamiti hi prakāśamāne

(page 47)

nīlaṃ prakāśate itīyadahaṃ prakāśe iti prakāśa eva prakāśito bhavati, 
prakāśaṃ ca sarvatra yaḥ paśyati, na prakāśasya deśe kāle svarūpe vā 
khaṇḍanātmā vyavacchedo'stīti, mayi iti ātmasaṃvedanaprakāśe ca 
tadavinirbhaktaṃ sarvaṃ prakāśitaṃ bhavatīti, tathā nīlādikamātmaprakāśa-
bhittau rūḍhaṃ cakāstīti yaḥ paśyati | tasya ahamiti prakāśo na praṇaśyati na 
khaṇḍanāvikārameti prakāśarūpāt na cyavate | ahaṃ ca tasya viśveśvararūpa 
eva ātmā na praṇaśyāmi na ācchādito bhavāmi | tathā so'pi evaṃ draṣṭā 
mameti śuddhaprakāśātmanaḥ parameśvarasya na praṇaśyati ācchādito na 
bhavati, tatra parameśvara eva bhātīti | anena caitrātmanā āchāditasvasvabhāvā-
vabhāsane nirbhāse ityevaṃ sa pratyagātmatayāpi aviyukta īśvarameva 
ātmānaṃ manyate | parameśvaraśca tatra pracchannatayaiva cakāsti, yena 
parameśvaro'tra prasīdatīti vyavahriyate | sarveṣu bhūteṣu paramārtharūpeṣu 
ātmā prakāśastiṣṭhati viśeṣeṣviva sāmānyaṃ, sarvāṇi bhūtāni ātmanyeva 
tiṣṭhanti dharmā iva dharmiṇi,-ityevaṃ sarvamukhena brahmamukhena vā 
samavyāptikakṛtakatvānityatvanyāyena vidhyanuvādayornāsti vaicittryam | 
vaicitrye'pi vastu bhedaḥ praveśavaicittryādadhikaḥ | tena mayi iti sarvaṃ brahma 
ityupakramaḥ, vāsudevaḥ sarvam itimadhyaḥ, sarvabhūtastham 
ityanto'yamadvayopadeśo mantavyaḥ | evaṃ sarvabhāge prakāśabhāge ca sthite 
guṇapradhānatākṛtaṃ saṃsārāsaṃsārarūpatvaṃ pratipāditam | galite tu 
samaste bhedaleśe paramaśivadaśā na iha vitānitā tāvat 
sarvātmarūpatāmukhena tatpratyabhijñānopakramāt | nanu ātmaśabda eva 

ātmā vastu svabhāvaśca---------|

iti sthityā svabhāvavācī vyākhyāyiṣyate kiṃ svagrahaṇena iti  |

(page 48)

āha svaśabdaḥ iti | śāstratastāvat kāṇādādidarśanaprasiddha eva ātmā 
labhyate; loke'pi svabhāvo nīlādīnāṃ nīlādirūpataiva ātmeti prasiddhaḥ, 
nīlamātmanā arthakriyākāriṇā sat, na pararūpeṇeti tadubhayamapi svaśabdena 
avyabhicaraṇīyaṃ pratiṣṭhāsthānatvādaparyanu-yojyaṃ sva rūpamabhidadhatā 
nirasyate | nanu kiṃ tat tathābhūtaṃ rūpam | tathāhi sarvabhāvānāṃ 
paramāṇvādi vā pradhānaṃ vā sattā vā śūnyaṃ vā vadyantarairupagataṃ 
jaḍameva svarūpam | tadviśeṣya vaktavyaṃ cidrūpe svātmanīti | āha tasya ca iti | 
jñātari kartari iti hi ukte jñānakriyāsvātantryamananyavadanāvalokijānāmi-
karomītyevaṃrūpaṃ sphuratyeva, cidrūpe iti tu ucyamāne nīlarūpe ityetattulyaṃ 
syāt | tataśca punarapi cidrūpatvaṃ jñātṛkartṛtvayoḥ saṃkrāmayitavyam | 
iyameva iti idantāvyapadeśanikāramātratvāt tāvat rakṣaṇīyaḥ svātmā, tatra 
jñātā kartetyapyukterbahirviśrāntidhāmatātmā vidheyatvena idantaiva unmīlet | 
jānāti karotītyapi śvetate nīlatītivat tāṭasthyam | jānāmītyapi kalpitā ahantā | 
naca sarvathā rakṣitumidantā śakyā anupadeśyatāprasaṅgāditi yāvadgati sā 
rakṣaṇīyā | tatra bhūtavibhaktiyoge bahiḥ prādhānyanyakkāro'ntārūpa-
viśrānterahaṃbhāvasparśarūpo bhātīti saṃbandhavicāre vakṣyate iti 
evakārārthaḥ | śreyasi iti anūdyamanāparamatopakrame'pītyarthaḥ | ata eva iti | 
yato jñāne kṛtau ca svātantryameva cittvam, tataḥ kartṛśabdena avyutpannena 
kriyāsāmānyābhidhāyikarotiprakṛtikena vā kriyāviśeṣopādhisaṃbandhakā-
luṣyānārūṣitaṃ svātantryamabhidadhatā tadbhittilagnaṃ jñānasvātantryaṃ 
śleṣeṇa ca nirmātṛttvasya tadavinābhāvitāṃ darśayituṃ yatnaparigṛhītena 
tatpūrvakaṃ nirmāṇe svātantryamuktam |

(page 49)

anyathā iti | yadi eṣa śuddhasvātantryapratipādanābhiprāyo na syāt | tat 
jñānapūrvakaṃ nirmāṇaṃ dṛṣṭam | saṃvidrūpasya kāraṇatvaṃ 
dūṣayiṣyate | naca tat nirmāṇamityevaṃ jñātari iti prāk nirdiśyeta | nanu evaṃ 
jānāmi karomīti ucitapratibhāse svatantraikarūpe saṃvedanātmani tattve 
kathamadhikaraṇabhāvaḥ | pāratantryaprāṇitaṃ hi kārakāntarāṇāṃ tattvam | 
matto viśvaṃ mayi viśvamityādāvapi hi sṛṣṭa eva asmadarthaḥ, 
pāramārthikamahantārūpaṃ tu matto mayi viśvamiti prakāśe vimṛśāmi 
cetyevaṃrūpam | tat kathaṃ saptamītyāśaṅkya āha paramatena iti | paro hi 
tadviṣayaṃ sādhakaṃ bādhakaṃ vā abhidadhat siddhim-astīti 
prakāśavyavahārarūpāṃ, niṣedhaṃ vā-nāstīti tacchūnyavastvantaraprakā-
śavyavaharaṇarūpaṃ kartumudyuktaḥ | sa evaṃ kurvāṇaḥ pramāṇasya 
tatkṛtayośca siddhiniṣedhayorviṣayatayā adhikaraṇamīśvaraṃ prameyaṃ 
paratantrameva abhimanyate | sa evaṃ manvāno'nūditaḥ, jāḍyaṃ tu asya 
vidhīyate | paramatena siddhiviṣayatvaṃ sūcitaṃ, nahi upapadyate tat 
pramātrekarūpatvāditi akṣarasaṃgatiḥ | nanu vṛttigranthe kathaṃ na saptamī 
śruteti | āha vṛtau tu iti sa eva iti | anupapadyamāna eva san viṣayabhāvo 
vivarīṣyate ṣaṣṭhyā | tāmeva siddhiṃ saṃbandhitvena antaḥpraveśya ṣaṣṭhyā 
sa eva viṣayabhāvaḥ kriyāvyavadhitirodhānataḥ svabhāvakalpatāṃ nīta iti 
nikaṭībhāvyate siddhāntaḥ | kathaṃ svabhāvabhūtatā | āha | 
pramātṛmātratāyā yadupapādanaṃ pūrvagranthena sarvārthasiddhi ityādinā 
kṛtaṃ, tena | anupapadyamānatā kathaṃ vivṛtā | āha | dūṣaṇena 
jaḍānāmevodyamaḥ ityanena | etaduktaṃ bhavati-siddherīśvaro viṣaya iti 
vadannanuyojyaḥ kimasau siddhyan prakāśasvabhāvaḥ, na vā | uttarapakṣe naiva 
siddhaḥ syāt | ādye pakṣe tatsvabhāvasya kiṃ sādhyate |

(page 50)

pūrvamatatheti cit, siddhau tarhi asya svarūpaṃ pratyuta lupyeta | nīlādayo'pi 
pṛthak na kecana prakāśāditi | tadayaṃ saptamyarthaḥ idantāmantardhāpya 
svayamapasṛto jñātṛkartṛrūpamahaṃprakāśaviśrāntameva karotīti | 
sarveṣāṃ svātmanaḥ ityādivṛttīvākyaṃ yato vyākhyeyatayā upakrāntaṃ, 
tataḥ tena ityādivākyāntare bhāvinī prasaṅgādiha vyākhyāyamāne ucito 
bhaviṣyatprayogo viparīṣyate iti | nanu vyākhyārūḍhe'pi vākye ṣaṣṭhyeva asti, 
tat bhaviṣyadvākyaṣaṣṭhyeva kathamevamuktetyāśaṅkya āha svātmana iti tu iti 
| kartari eṣā  ṣaṣṭhī | tatkartṛkaṃ hi jñānaṃ karaṇaṃ ca, natu 
saṃbandhaṣaṣṭhī | evaṃ prasaṅgāt bhāvivākyaṣaṣṭhīṃ vicārya pūrvoktaṃ 
tasya ca citsvabhāvatvam ityādi yuduktaṃ, tadupasaṃharati tadevam iti | 
yadabhimataṃ prastutaṃ pratipādyaṃ jñātṛkartṛtābhyāṃ lakṣyate śuddhaṃ 
svātantryamiti, tat vastu evamiti uktena iyameva śayyā ityupakrameṇa vivarīṣyate 
ityantena vyākhyānanyāyakrameṇa nirvyūḍhamityarthaḥ | nanu pramātṛtayā 
jñātṛtvamuktaṃ, natu kartṛtvam | tat pratyuta ekaśabdena parākṛtam | tat 
kimetadityāśaṅya āha kriyā hi iti 
tiṣṭhāsorevamicchaiva hetutā kartṛtā kriyā | (2 | 53)
ityatra apratihataṃ prakāśasvātantryameva karaṇamiti vakṣyate | nanu evaṃ 
nirmātṛtāpi śleṣanirdeśāditi kimarthaṃ vṛthā vyākhyātam | evaṃ manyate-
kumbhakārādipravṛttirūpamapi yat bhedena nirmātṛtvaṃ cakāsti, tadapi 
prakāśamānatāprāṇatayā parameśvaraśaktivijṛmbhitaṃ na asmākamatyanta-
mupekṣaṇīyamiti | ata eva ekaśabdo'tra na kartṛtāṃ nirākaroti, api tu 
niyamastadvipakṣācca kalpyate na virodhinaḥ |

(page 51)

iti nyāyena pramātṛtātmakasvātantryaviruddhāṃ prameyatātmikāṃ 
paratantratāmeva | tathāca āha ata eva iti | yataḥ svātantryaṃ cittatvam iti 
pūrveṇa saṃbandhaḥ | prameyatvābhāve ca na tatra pramāṇamupayogi 
upapattimadvā | yataḥ pramātṛtvameva kartṛtvaṃ, na anyat; ata eva prameyatā asya 
nirasiṣyate, natu kāryatā | anyathā prameyatvavat tasya kāryatvamapi, 
pramāṇavacca kāraṇamapi niṣidhyeteti tu vyākhyānaṃ na tathā hṛdayagrāhi | 
nahi kāryatvaṃ paramate'pi asti bhagavata iti nanu yasya pramātṛtaiva rūpaṃ, tat 
tāvat pramāṇasya na viṣayaḥ | yacca evaṃ, tat na vyavahārapadaṃ piśācavat | tat 
varaṃ svasaṃvedanasiddhatvamasya vaktumucitam, natu sarvathaiva 
pramāṇāviṣayateti | āha naca iti | nanu pūrvasiddhatāyāmapi pūrvamasya 
pramāṇaviṣayatvaṃ syāt yathā agneḥ pūrvasiddhodhūma ityāśaṅkya brūte 
etaduktam iti | yadā yadā upakramaḥ, tadā tadā pūrvasiddhatvamityeṣo'tra 
paramārthaḥ | tat nīle iva na atra vyatiriktaṃ pramāṇaṃ, nāpi cittacaitanyavat 
svayaṃprakāśatve'pi nūtanāpūrvaprakāśarūpatvena svasaṃvedanam | 
idantādeśakālasvarūpaniyamārūḍhaṃ prathanaṃ yasya nīlasukhādikasya, tasya 
bhāvastanniṣedhopalakṣitaḥ san pramātā prakāśate ca, prākāśiṣṭa ca, 
prakāśiṣyate ceti yāvat | ata eva purāṇaḥ pūrvasiddhaśceti na paryāyau, 
purāṇo'pi hi na pūrvasiddhaḥ piśāca iva , pūrvasiddho'pi na puraṇo dhūma 
iveti ubhayoktiḥ | kaviṃ purāṇam iti, 

purāṇaṃ tatparaṃ tejo yenābhinavatejasām |
hriyate cārpyate tejastajjyotirbhairavātmakam ||

iti itihāsarahasyādāvuktaṃ saṃvādayati samyak bhūtamabhimataṃ 
pūrṇamarthaṃ jalpayati; athavā pūrvasiddhataiva āgameṣu purāṇatā, natu

(page 52)

ākāśādivat cirantanatāmātra prakāśāveśaśūnyaṃ, tena saṃvādayati 
samaṃ tulyamarthamabhidhāpayatīti | etacca iti pūrvasiddhatvamasya 
pramāturbhavati | sarve tasmāt pramāturanye ye'rthāḥ teṣāṃ yā siddhiḥ 
prakāśamānatā, tasyā yataḥ sa pramātā nibandhanaṃ viśrāntisthānaṃ 
vimarśarūpatayā samāśrayaḥ; tena vṛttau sarvārtha ityādi pūrvasiddhatve 
hetutvena vyākhyeyamityāśayaḥ | nanu siddhiḥ saṃvedanarūpā, tasyāśca 
kimāśrayeṇa anyeneti | āha yatkiñcit iti | tathātve sphuradrūpatve | 
dārḍhyamacalatā | nīlamiti yat sphuritaṃ, tat na pītādi, naca na nīlaṃ, nāpi na 
sphuritamiti siddhirvastunaḥ | kiṃcit iti pramātāram | evaṃsvabhāvatvāt iti 
mama nīlaṃ sphurati, caitrasya nīlaṃ sphuratīti hi sphuraṇam, natu nīlaṃ 
sphuratītyetāvat | ata eva saugataiḥ santānarūpo vikalpo vā avaśyamekaḥ 
pramātā kalpyate anapahnavanīyatvādevaṃsphuritasya | ata eva iti yata evaṃ 
sphurati dārḍhyamasya | vakṣyate iti 

viśvavaicintryacitrasya samabhittitalopame || (30)

iti dvitīye'dhikāre | nanu etāvatā astu pramātā abhimato vikalpo vā, 
vikalpakalpito vā; pūrvasiddhastu kuta ityanuyoge kathayati te te ca iti | nahi 
sādhyatā nāma sādhye nirupākhye padamupanibadhnāti, apitu mamedaṃ 
sādhyamiti sādhayitari | sādhayiteti ahamātmānaṃ nirākaromīti hi 
svanirākaraṇe'pi pramātaiva prapatati, ātmarūpo nirākriyate paraṃ vikalpito vā 
kalpitadharmā vā | ākṣiptā avaśyaṃbhāvinītvena aṅgīkṛtā siddhiḥ 
prakāśamānatā yena | ahamātmānaṃ sādhayāmi nirākaromi vā nīlaṃ 
vetyatra hi yadahamiti, na tat mūrcchāsvāpakalpam, apitu prakāśa

(page 53)

eva ayam | naca idantayā asau bhāti | tathātve hi pṛthaksiddhinibandhanārthānta-
rānveṣaṇe ahamityetadeva kathaṃ bhavet | nanu ahamiti vikalpamātraṃ, tatra 
santāna eva kalpito'dhyavasīyate | saṃvedananiṣṭhaiva, natu jaḍaniṣṭhā, 
prameyāṇāṃ, natu kāryāṇāṃ, siddhirvyavasthā | tat saṃvedanamātramastu 
kiṃ pramātrā kalpitena | bhavatu vā asau | tathāpi saṃvidādhāramātrarūpo'sau 
kāṇādavat saṃvidrūpo'pivā vimarśaśūnya eva sāṃkhyavadastviti 
saṃkṣepeṇa bauddha kāṇāda-kāpila-vyāmohaṃ vihantumāha 
saṃvinniṣṭhā hi iti | prameyāṇāṃ bhāvānāṃ saṃvinniṣṭhā yā 
siddhirucyate, sā na saṃvidi | ākārārpaṇena ekasāmagrīkatayā janakatvena vā 
yo'nupraveśo viṣayatāpattiḥ, tāvanmātratattvā hi yadi syāt, tat 
padārthāstāvanmayā dṛṣṭāḥ, natu tṛṇādiviśeṣā iti bhedena pratiṣṭhā na 
bhavet | nahi padārthamātraṃ kiñcidasti pṛthak viśeṣataḥ, yadākāramarpayet 
samānasāmagrīkaṃ vā syāt janakaṃ vā bhavet viśeṣasyaiva paramārthasattvāt 
| sadapi sāmānyaṃ tādātmyavṛtti vā samavāyavṛtti vā na viśeṣaniṣkṛṣṭaṃ 
pratibhānayogyaṃ bhavati | goḥ pathyaṃ kṣīram gaurna padā spraṣṭavyā 
ityādibuddhāvapi paridṛṣṭaviśeṣollekhanapramukhatayaiva sāmānyāvabhāsaḥ | 
yadvakṣyate ṭīkākṛta ekatamamibhānataśṛṅgam ityādi | tat mārgeṇa 
dhāvato'pratiṣṭhitameva padārthatattvam | nanu kā tarhi saṃvinniṣṭhā 
siddhirabhimateti | āha | tṛṇamidamityādiryo vimarśaḥ, sa eva prakṛtaḥ 
paramārthasvabhāvo yasya prakāśasya; tatra samyak bandhanaṃ viśramaṇaṃ 
saṃvidi niścayena sthānamiti niṣṭhā ucyate | nanu evaṃ padārthamātratve'pi 
tarhi saṃvidi niṣṭhā vyākhyeyeti | āha padārthamātratvena tu ityādi | 
padārtho'yamityapi hi vimarśa-eva |

(page 54)

nanu etāvatā niścayārūḍhatā niṣṭhā, natu pramātṛsiddhiriti | āha ya eva ca  iti 
| vimarśaḥ prakṛtaḥ svabhāvabhūto yasya tādṛk yaḥ prakāśaḥ saṃbandhī, 
yatra samyak badhyante'rthāḥ, sa eva pramātā | yasmādeva 
saṃvedanamātrātiriktaḥ pramātā siddhyati, tata eva sa parokṣarūpastāvat 
nopapadyate kāṇādavaditi prameyāntaraṃ hetau samuccinoti cakāraḥ | nanu iyatā 
tṛṇagatau prakāśavimarśau stāṃ nāma, pramātuḥ punaḥ kathaṃ 
prakāśavimarśarūpateti | āha tasya ca iti | tṛṇamiti yo vimarśamayaḥ prakāśaḥ, 
sa eva yadi prameyaśarīraniṣṭhitaḥ; tat mameti pratyavabhāso na bhavedeva | 
svātmanyeva hi tadā tṛṇaṃ sphuret | naca evaṃ, tatastṛṇamidamiti 
prakāśavimarśau tṛṇāṃśāduttīrṇau saṃvidbhāgamavalambete | tayośca 
tatragayoḥ prakāśavimarśanāyoge prakāśanavimarśanāparyavasāne vā 
punarapi na kiñcidbhavet | tena tṛṇamidamityayaṃ vimarśaḥ svātantrye 
viśrāmyati yat, tadahamityucyate | yathoktam

idamityasya vicchinnavimarśasya kṛtārthatā |
yā svasvarūpe viśrāntirvimarśaḥ so'hamityayam ||
                              (a. pra. si. 15 kā.)
iti | etaduktaṃ bhavati-saṃvedanamavimarśarūpaṃ tāvat na kiñcit | 
vimarśamayatāyāṃ svātantryaṃ pramātṛtā svaprakāśatvamiti kathaṃ 
saṃvedanamātraṃ tadādhāramātraṃ nirvimarśasaṃvitpuruṣarūpaṃ vā 
siddhyediti | yo hi aparyantaprakāśavimarśātmā ahamiti vedyāvabhāsabhitti-
bhūtaḥ, tasya vedyatārūpedantābhāvāt deśakālabhedābhāve svarūpabhedā-
bhāve ca ekatvaṃ vyāpitvaṃ nityatvaṃ na yatnāntaramavalambate | 
nīlasukhādiprameyavyavahāraḥ prakāśavimarśātmakasiddhinibandhanabhūta-
pramātravinābhāvī prameyavyavahāratvāt | yaḥ kila 
prakāśavimarśātmakasiddhyadhīno

(page 55)

na bhavati, na asau prameyatāvyavahāro bījāṅkurādīnāmiva kāryakāraṇa-
bhāvaḥ | tena uktarūpapramātṛviraheṇa bhavanāt vipakṣāt prameyavyavahāras-
tadvyāpakaniyamavattvaviruddhāniyamavattvaprasaṅgāt vyāvṛttaḥ pramātṛvira-
hābhavanena vyāpyate iti vyāptisiddhau svabhāvahetuḥ | pūrvavat iti | yathā 
vimarśamayaprakāśānanugrahāt pūrvamasau na siddhaḥ, tathā tadanugrahe'pi 
na siddha eva bhavedviśeṣābhāvāt | tena hi tadānīmapi tasya bhāvasya prakaṭa-
tātmakaṃ rūpaṃ jātaṃ sarvānprati tathā prasaṅgāt; na kaṃcana prati vā | nanu 
etāvatā svasaṃvedanaṃ tatra pramāṇaṃ siddhiṃ vitaratīti | āha naca iti | 
prameyatve hi svātantryaṃ vighaṭate tadaiva tatraiva svātantryapāratantryayor-
virodhāt | evaṃ prameyaṃ paratantrarupaṃ vibhinne svatantre pramātari viśrāmyat 
prameyaṃ bhavati | naca nīlaṃ svātmani prakāśavimarśamaye viśramayan 
pramātā svātmānaṃ prakāśavimarśāntare viśramayedanavasthānāt | naca 
prakāśavimarśāntaramapi asti svarūpadeśakālabhedāsaṃbhavāt | tadayaṃ 
pramātā ananyādhīnasvābhāvika prakāśavimarśamayaḥ prameyatāṃ kathaṃ 
yāyāt | prameye ca pramāṇacintā | tadayaṃ prayogaḥ-prameyapratiṣṭhānaṃ 
yataḥ pramātā, tataḥ prameyo na bhavati | prameyatāyā vyāpakaṃ pāratantryaṃ, 
tadviruddhena ca prameyapratiṣṭhānatvaṃ svātantryeṇa vyāptaṃ 
pāratantrye'navasthānāt prameyapratiṣṭhānāyogāt | tadiyaṃ 
vyāpakaviruddhavyāptopalabdhiḥ pramātari prameyatāṃ niṣedhati | 
svaprakāśocita eva parāmarśo'hamiti ucyate | nanu dṛṣṭaḥ pramātari 
prameyatāvyavahāra upadeśādau | na asau pramātari, apitu nīlādisthānīye sṛṣṭe 
vastvantare eva | nanu ca deśakālarahitatvamavicchinnāvabhāsatvayogāt 
vicchidyāvabhāsanakṛtapunararthaprāṇatvaniṣedhaparyavasitā sakṛdvibhātarū-
patā pramātṛtvaṃ ca

(page 56)

kathaṃ sṛṣṭe saṃbhavet | kathaṃ ca ato vākyāt pramātari ātmani pratipattirbhavet 
| satyamevam, kintu svaprakāśasvabhāvo'nanyādhīnāhamitivimarśamayaśca 
pramātā | tatsvātantryādudito yo meyaḥ, sa tameva mūlatvena avalambamāno 
dṛśyavikalpyaikīkāranyāyena vikalparūpayā sṛṣṭyā tatsvaprakāśarūpaikī-
kāreṇaiva sṛjyate | tadetadāha apitu ahantāvyavadhānena iti natu na prakāśate | 
ātmaśabdāt kiñcit nāpi vyatiriktameva prakāśate, apitu ātmaiva | 
ahaṃparāmarśasopānavyavadhānena tu yathā guṇaḥ kriyā śṛṅgāra iti 
śabdaiḥ guṇādyarthaḥ guṇo'yaṃ kriyeyamiti hi vikalpayet sṛṣṭam | śuklaḥ 
paṭaḥ pacatītyetat vikalpārūḍhavastuparyavasānena sṛjyate | yo hi parāmarśo 
yatparāmarśāntaraṃ niyamena madhye sopānīkṛtya parāmarśanīyasamāroha-
ṇena kṛtakṛtyatāmeti, sa tena vyavahita ucyate | nanu samayaśaraṇīkaraṇena 
śabdo'rthaṃ brūte | sa ca samayaḥ sarvatra samānaḥ, śabdārūṣitaṃ ca 
vikalpakaṃ vijñānamiti kiṃ kasya vyavadhāyakam | bhavedevam, yadi 
samayamukhaprekṣyeva śabdārthavyavahāro bhavet | yāvatā saṃvidrūpe 
prāṇitakalpaṃ yat vimarśarūpatvaṃ śabdanātmatvam, tat tāvadasāṅketikamiti 
vitatya vakṣyate | tatsaṃketānapekṣasahajaparāmarśocitaṃ yadetat śabdanaṃ, 
tadeva saṃketakṛtānāṃ ca śabdāntarāṇāṃ ca tadupajīvināṃ ca vikalpānta-
rāṇāṃ tadvikalpavikalpanīyatayā sṛṣṭānāṃ ca ābhāsāntarāṇāṃ 
bhittikalpatvena nirbhāsamānaṃ vyavadhāyakamiti abhidhīyate | tathāhi ātmā 
para iti saṃkete svāntaḥpraveśamiva bahirnirgamamiva dṛṣṭivaktrāṅgulīkriyā-
viśeṣābhirbhāvakaṃ parāmṛśan svabhāvo bhāti | tatra ca ahaṃ haṃ amhe hage 
iti eṣaḥ eho eso iti ca sodarāḥ saṃketāḥ, ātmā para ityādayaśca

(page 57)

tadvyavahitā iti yuktam | saṃketavadanāvalokanaprāṇitamātra-śabdārthavyava-
hāravādino'pi lokadṛḍhanirūḍhavyavahārasiddhasaṃketakaireva śabdaistadvi-
kalpaiśca vyavahitā eva sāmayikaprāyāḥ saṃketā bhānti | pacati, śuklaḥ paṭa 
iti lokanirūḍhaśabdavyavahāropari pākaḥ pacanaṃ kriyā, varṇo guṇo dharma iti 
pārṣadaprāyasaṃketopajīvīni śabdāntarāṇi | tatrāpi parṣado'pi 
saṃkocāsaṃkocādinā bhedāḥ | tathāca

kṛcchreṇoruyugaṃ vyatītya---------|
iti
vaktrendau tava sati------------------|
iti
yattvannetra---------------------|

iti abhilāṣasaṃbhogavipralambhabhinne kāvyarase vibhāvānubhāva ityādi 
sāmānyalakṣaṇaṃ ratisthāyibhāvaprabhava ityādi viśeṣalakṣaṇam | tāvatā 
śṛṅgāraśabdasya arthasaṃketanamiti laukikodāharaṇāpekṣiṇi 
lakṣaṇavākyārthe lokanirūḍhe padavacanaṃ pārṣadaprāyamiti 
sodāharaṇalakṣaṇavākyaśravaṇapratyaye kāvyarase śṛṅgārādiśabdo 
niveśito'pi tādṛgvākyocitaparāmarśavyavahitāmiva pratītiṃ jijanayiṣurapi 
niyataṃ kiṃcidvākyaṃ laukikamanusmārayituṃ sāmarthyamalabhamānaḥ 
sarvāpaṇasvāyattatāprathananyāyena pradhānabrahmabhāvāpannabhāvanyāye-
na ca viśeṣollekhasādhyāsvādādyarthakriyāyogyaparāmarśasaṃpādanā-
samarthatvāt sākṣādavācaka eva | yatra tu parāmarśanīyaniṣṭhaviśiṣṭarūpa-
tāsthaganameva parāmarśaucityasya jīvitam, tatra samastabhāvanirbharātmaka-
saṃvinmayaparameśvaraparāmarśādau vākyārthe

(page 58)

padavacanaṃ varṇavacanaṃ tadaṃśāṃśavacanamiti vā nyāyena 
praṇavādibījapiṇḍatadaṃśagatameva pratyuta mukhyaṃ vācakatvam | yathāha 
guruḥ |

tasya vācakaḥ praṇavaḥ | (yo. sū. 1 | 27)

iti | tadalamavāntareṇa bahunā | sthitametat-guṇakriyājātiśabdebhyo 
vyavadhānena arthapratyaya iti | smaraṇe'pi na arthasya apūrvaḥ prakāśaḥ, apitu 
pūrvaprakāśasyaiva unmīlanamiva | pūrvaprakāśaśca asāvanubhava iti 
smṛtāvapi arthaḥ anubhavavyavadhānena bhāti, na sākṣāt | tathaiva 
idantāparāmṛśyo na sākṣāt pramāteti sākṣāt pramātari prameyarūpatā 
niṣidhyate | idantānirdeśyo na pramātāprameyatvāditi pramātṛtvavyāpakasya 
svātantryasya viruddhena pāratantryeṇa vyāptaṃ prameyatvamupalabhyamānaṃ 
pramātṛniṣedhavyava-hāraṃ karotīti vyāpakaviruddhavyāptopalabdhiḥ | tataśca 
na svasaṃvedanaṃ pramāṇaṃ prameyaśūnyatvāt, prāmāṇyavyāpakasya 
prameyavattvasya viruddhaṃ tacchūnyatvamiti vyāpakaviruddhopalabdhiḥ | nanu na 
kartṛkarmabhāvo vāstavaḥ | tataḥ kim | tataḥ saṃvidaḥ prakāśataiva prameyatā 
ghaṭavat | pramātṛtā ca saiva ghaṭasaṃvedanavaditi ko virodhaḥ | tatra āha 
evamapi iti | rūpadvitayāsiddhau śabdadvayamātrametāvatā siddhyet, na vastu 
kiñcit | nahi prakāśamanataiva prameyatvam, apitu anyādhīnasiddhikatvamiti 
svādhīnasiddhikaṃ kathaṃ prameyaṃ syāt, upacārāt tu prameyatvaṃ bhavet | 
apūrvaṃ hi prakāśamānaṃ prameyaṃ dṛṣṭamiti apūrvatātkālikaprakāśa-
mānatāsāmyāt prameyatvamāropitaṃ bhavet | prameyatvāropaṇe ca 
pramāṇatāpi āropitaiva, na mukhyā | yadyapi upacarito'pi ayaṃ prakāraḥ 
upacārabījasya dharmabhedasya nimittaprayojanarūpasya abhāvena nirākariṣyate 
nāpi prakāśātmatvāt iti, tathāpi iyat tāvat

(page 59)

paraḥ pratipadyatāmiti vivekāvataraṇāya mukhyatvaniṣedhaṃ tāvat karoti | 
tathāhi ekasāmagryadhīnatayā vā janakatvena vā ākārārpakabhāvena vā yato 
mukhyaṃ prameyatvam | atra ca kramādanena asya asminniti avaśyamanyāpekṣā | 
vijñānadarśane'pi

yadābhāsaṃ prameyaṃ tat------------|

iti sthityā vyāvṛttibhedo'pekṣaṇīyaḥ | saca nīlabodhe nīlabhāgaṃ bahīrūpa-
miva bodhāṃśamantarmukhaṃ ca svīkurvāṇayā kalpanayā ullikhyate | 
sukhabodhe'pi sātatāsaṃvedanatābhyāṃ syādapi vyāvṛttibhedaḥ, natu 
saṃvedanāṃśe kathañcidapi ayaṃ panthāḥ samarthanārha iti aupacārikaṃ 
prameyatvam | evaṃ saṃvedanasya pramāmaṅgīkṛtya prameyatā mukhyā na 
yuktetyapi upapāditam | adhunā tu pramaiva asya siddhyaparaparyāyā na yukteti 
upapādyate-sā hi iti siddhiḥ | nīlasukhāderhi vāstavī vā vyāvṛttisamullikhitā 
vā vidūratānavadhānādidaśāyāṃ tasyaiva asiddhasya anyathāsiddhiḥ 
pramārūpā rūpāntaramucyatām | sā ca na svātmani viśrāntā yuktā | 
pūrvamapi svātmanastathātve'dhunaiva siddhiriti hi na syāt | tataśca 
svātmāvyatirikte prakāśarūpe saṃvidātmatvena ajaḍatvādananyonmukhe 
svacchatayā anyākāradhāriṇi vāsanāvāsitatvena anyākāranirbhāsavati vā 
bhavantī siddhiḥ anyāpekṣaiva prameyatvavadeva | sā hi iti siddhiḥ | param iti 
svātmavyatiriktam | ābhāsaśabdo vaibhāṣikavaiśeṣikapāramarṣasautrāntikayo-
gācāravijñānanayeṣu sādhāraṇaṣṭīkākṛtā yathāyogaṃ 
tadaunmukhyatatprakāśatatpratibimbatadullekheṣu prayuktaḥ | svātmā iti 
saṃvedanam | asiddhasya iti nīlāderhi asiddhatvamapi astīti nīlādirūpādhikā 
siddhirucyatāṃ kāmam, saṃvedanasya tu tadrūpātiriktaṃ

(page 60)

na kiñcit siddhatvaṃ labhyate iti saṃvedanaṃ svasaṃvedanasiddhamiti paraṃ 
śabdasubhikṣaṃ na arthasaṃpadaṃ vyatirecayati | astu tarhi nīlavadeva 
aprakāśamāntā bodhasyeti labdhāntaraṃ vaiśeṣikaṃ prabodhayati tasyāpi iti | 
bodho yatra bodhāntare viśrāntyā siddhyati, tat cet na siddham; tarhi 
vedyaviśrāntasya dharmasya prakāśamānatvābhidhānasya abhāve tadapi 
bodhāntaraṃ yadi na prakāśate, tadā na viṣayaḥ, nendriyam, na manaḥ, na ātmā, 
na bodhaḥ prakāśate iti mahān moho hanta jagadvyavasthāyāḥ | 
bodhāntarakalpanāyāṃ ca aniṣṭhāta iyameva vārtā | nanu asti arthendriyādi cet, 
jāyate jñānamātmani; tato'pīcchā; tataḥ prayatnaḥ; tato'pi dehakriyā; tataḥ 
saṃyogaḥ; tataḥ sukhamiti iyatī jagadyātrā | kimasyāḥ truṭyati 
svātmaprakāśatvābhāve saṃvedanasya | na na bodhyate 
naiyāyikagrāmaṇimmanyaḥ | bījam, aṅkuraḥ, kāṇḍaḥ, palāśaḥ, puṣpaṃ, 
phalānīti yaḥ kāryakramaḥ, yaśca ayaṃ bhavaduktaḥ, etayorapi viśeṣe ekatra 
jāḍyamaparatra ca ajāḍyamiti kutaḥ | jñānameva ajāḍyamiti cet, bījameva 
ajāḍyamityapi kiṃ na bhavet paraniṣṭhatvābhāve prakāśamānatābhāve ca 
yasya kasyacit viśeṣasya asatsamatvāditi | nanu evaṃ kim | 
saṃvedanamapramāṇakameva astu | prameyasya prameyāntaraṃ vinā kiṃ duṣyati, 
saṃvedanasyāpi pramāṇena vinā kiṃ vyasanamāsīdati vyasanamātramatra 
pramāṇasamarthanam | prakāśamānataikātmakaṃ hi taditi tāvataiva 
sarvamiṣṭaṃ labdham | saṃvedanaṃ na pramā 
prameyatvavyavahārapadamitarānapekṣatvāt | tadvyavahārapadatvaṃ hi 
itarāpekṣayā vināpi yadi bhavet, tat bhūmyantargate'pi ghaṭe syāt | na ca evamiti 
dṛśyānupalambhāt tattathā kṛtamiti niścite kāraṇaviruddhopalabdhireṣā | nanu 
svātmanā siddhā bhāvā iti 

(page 61)

kathameṣa vyavahāraḥ syāditi parāśaṅkāṃ śamayati kevalam iti | yathā bījaṃ 
bījātmanā siddhaṃ niṣpannaṃ svātmani, tathā pramātā svasaṃvedanātmanā 
niṣpannaḥ svātmanītyapi syāt yadi anityo bhavet | nityaśca asau 
deśakālasvarūpabhedābhāvasya uktatvāt vakṣyamāṇatvācca | nanu tvatpakṣe 
nityaḥ pramātā, saugatasya tu na tatheti tasya tāvat saṃvedaneṣu 
asaṃvedanasiddhatāvyavahāro na ayuktaḥ | netyāha na ca tathā iti | tatheti tena 
utpattiprakāreṇa siddhiḥ svātmani saṃvedanātmanā niṣpattirityevaṃ yā 
svasaṃvedanasiddhiḥ, sā tasya saṃvedanasya svarūpamuktaṃ bhavet; natu 
prameyatāpremeya iti vyavahāraḥ, pramāsaṃbandhaśca tayā sidhyati | prameyatā 
hi na kāryatā, api tu jñāpyatā | sā ca nāsti | tataśca svasaṃvedanena pramāṇena 
saṃvedanaṃ bhātīti yat pareṇa uktaṃ, tadapasāritameva bhavati | yadi vā tathā 
siddhiryā sā svasaṃvedanasiddhireva nocyate yā prameyatāyāḥ prayojikā | nanu 
bauddhasya mate mā bhūt saṃvidātmani prameyatvam, tadavinābhūtaṃ ca mā 
bhūt mukhyaṃ pramāṇatvaṃ vastvantarasya tatpratiṣṭhāpadasya asaṃbhave 
pramāṇatvaprameyatvadharmadvayakalpanābījasya vyāvṛttidvayasya prakāśaika-
rūpe kalpayitumaśaktyatvāt | īśvarātmavādinastu māyāpramātṛn paramārtha-
pramātāraṃ ca bhedena aṅgīkurvataḥ saṃvedanamapi śūnye yadidaṃ bhāti 
tadvyatiriktaṃ yat tadahamiti prasaṃkhyānavatāṃ pramātṛbhāvena nirbhāsa-
māne vā prāṇe kṣudhito'hamiti ātmatayā saṃmate vā ādigrahaṇāt buddhau 
sukhyahamityādau gṛhītṛtvena nirbhāsiṣyate ityāśaṅkāṃ parāsyati | yathāhi 
śarīraṃ jaḍarūpaṃ vedyapratiṣṭhāsthānatayā na āśaṅkanīyam, tathā 
śūnyādikamapi yat vedyaṃ, tat na prameyapratiṣṭhāsthānam | yathā śarīraṃ, 
tathā ca śūnyādi | pratiṣṭhāsthānatvaṃ hi

(page 62)

jaḍebhyo vyāpakasya kacideva upalambha ityevaṃrūpasya niyamasya anupalambhāt 
prasajyamānāt hetorvyāvartate iti ajaḍatvena vyāpyate | tadviruddhaṃ ca 
vedyatvamiti vyāpakaviruddhopalabdhiḥ | tena saṃvideva sarvatra 
pratiṣṭhāsthānam | sā paraṃ śūnyādau māyāśaktyā samāropyate iti 
saṃkucitā ucyate | yadajaḍapramātṛsiddhiḥ

yadyapyarthasthitiḥ prāṇapuryaṣṭakaniyantrite |
jīve niruddhā tatrāpi paramātmani sā sthitā ||
tadātmanaiva tasya syātkathaṃ prāṇena yantraṇā | (21)

     iti, tathā

nārthavyavasthā prāṇādāvahaṃbhāvanirodhataḥ |
prakāśasyātmaviśrāntirahaṃbhāvo hi kīrtitaḥ || (22)

iti | tasyaiva iti śūnyādeḥ | tam iti prakāśam | pramāṇaviṣayatā iti 
pramāṇatā, viṣayatā ca | prakāśātmatvāt iti aupacārikatvasya 
pūrvamabhyupagatasya niṣedhahetuḥ | dharmāntarābhāve hi yadekameva 
bhūyobhiḥ svabhāvairupacaryate, tatra nimittabhede prayojanabhede ca asaṃbhavati 
śabdagaḍumātramupacāro jāyate | svātmani ahaṃ cakravartī dāsaścetyapi hi 
viruddharūpopacaraṇe'parāyattatvopakaraṇatvadharmadvayayogo nimittamadī-
natvapūrṇatvaprabhṛtyabhimānābhāvānanyonmukhatvābhāvaprabhṛti ca 
prayojanaṃ bhinnamastyeva, natu evaṃ prakāśaikarūpe saṃvedane 
dharmāntaramasti | uktanītyā ca pramātṛpramāṇaprameyatānāmupacāre 
vikīrṣite'ntato dharmaṣaṭkamupayogi | atha svātmapratiṣṭhaṃ nabhaḥ iti nyāyena 
svasaṃvedanasiddhimiti bhaṅgyā saṃvedanamanupayujyamānānupapadyamāna-
pramāṇamiti ucyate | tadiyamasmaddṛṣṭiḥ | tathā ca

(page 63)

caturvidhaṃ pratyakṣamiti svasaṃvedanasya pramāṇabhedagaṇanānupapattiḥ | 
pramāṇāviṣayatvam iti | viṣayatvābhāvopasaṃhāre pramātṛtvapramāṇatvā-
bhāvo'pi upasaṃhṛto mantavyaḥ | saugatasya tu syādapi upacārabījaṃ 
prameyatāyāṃ pūrvānadhigatatvamapūrvatvaṃ ca tatkālocitasya saṃvedanasya | 
sati ca prameyatopacārabīje prakāśātmatvāt pramāṇatvamapi upacaryate 
anyānapekṣatāṃ pratipādayitum | etadapitu na kathañcidapi asmanmate iti 
darśayati apūrvarūpatvābhāvāt iti | pramāṇāviṣayatvamiti vā pāṭhe nāpi 
pramāṇaviṣayatvamiti saṃbandhaḥ | kathaṃ tat pramāṇaviṣayatvaṃ śaṅkyate iti 
| āha prakāśātmatvāt nimittādekasyāpi tritvam iti | viṣayatvamapūrva-
tāyāṃ ghaṭeta viṣayatve ca pramāṇatvamiti | etadvitanoti anadhigata iti anadhi-
gataviṣayamiti viṣayamukhena, ajñāta iti viṣayaniṣṭhaprakāśātmakasvarūpa-
mukhena diṅgāgīyaṃ lakṣaṇadvayam | prāthamyedantābhyāṃ viṣayapuraḥ-
sarīkāreṇa svarūpaṃ, saṃśayaviparyayatvābhāvau, tatra nidānaṃ 
svataḥpramāṇateti krameṇa viśeṣaṇapañcakasya tātparyaṃ 
mīmāṃsakalakṣaṇe | nanu ātmano yadyapi nityatvādapūrvatvaṃ nāsti prameya-
tvopacāranidānaṃ, tathāpi pūrvānadhigatatvaṃ bhaviṣyatīti | āha ātmanaśca 
iti | svagrahaṇaṃ parapramātari astu pūrvānadhigatatvaṃ tāvaditikartavyamapi na 
kṛtaṃ svaparavibhāgasya iha darśane'tāttvikatvāt | saṃvedanaṃ hi ekameva 
paramārthataḥ | kalpitaśūnyaprāṇaśarīrādimāyāpramātṛviṣayatayā tu 
svaparavyavahāra iti hi purastādabidhāsyate | tata ātmana iti sāmānyoktireva 
yuktā | apūrvaprakāśo'yamiti niścayasya kāraṇabhūtaḥ pūrvaṃ nāyaṃ 
ghaṭaḥ prakāśitaḥ iti niścayaḥ | tasya vyāpakaṃ taddhaṭaprakāśarahitayā-
dṛśatādṛśaprāya-

(page 64)

vasturūpasya pūrvakālasya smaraṇam | tadabhāve pūrvamiti, na prakāśita iti ca 
bhūtakālapratītyabhāvādanupapadameva syāt | ghaṭaprakāśaśūnyakālānu-
bhavaśca tatsmaraṇasya kāraṇamiti tāvaduttaro'yaṃ prabandho na bhavet | 
tatsadbhāve'pi apūrvaprakāśo'yamanubhava iti katham | tataśca 
apūrvaprakāśo'hamanubhavitā, adhunā prakāśe, pūrvaṃ na prākāśiṣīti 
saṃvedanākṣiptena pūrvakālasmaraṇena tatkālānubhava 
ākṣipyamāṇo'nubhaviturapūrvasattāmapūrvaprakāśatāṃ ca apabādhate | 
rāmāvataraṇakāle nāhamabhūvamityapi hi tasya kālasya anubhavo vaktavyaḥ | 
āgamāt tatkālajñānamiti cet, āgamo'pi vakturanubhavituranubhavamākṣipati | 
tadanubhavitrā tāvadbhāvyamiti | nanu vālmīkistāvatā anubhavitā siddhaḥ, na 
asmādādiḥ | sthāne praśnaḥ, kintu saṃvedanātmano'haṃvimarśasya 
tāvadiyatā sadbhāvaḥ sadātanaḥ siddhaḥ | saca eka eva paramārthapramātā yadi 
paraprāṇabuddhipuryaṣṭakaśarīrādayo bhinnāḥ, tadbhedakṛtaśca 
pramātṛbhedavyavahāra iti tat śarīrādi adyatanaṃ tasmin kāle nābhūdityetadatra 
tattvam | pralayakāle sṛṣṭimukhārambhe ca na vayaṃ vabhūvimeti, anyathā 
kālaviśeṣollekho na syāt | vayaṃ na vabhūvimetyapi atra pratītau 
liṭpratyayāntarnītabhūtakālāvabhāsa unmiṣatyeva | nahi iyaṃ na pratītiḥ | 
pratītiśca na anubhavarūpā iyaṃ tathātve yogina iva idānīṃ 
pūrvakālaviṣayasphuṭatāpratyavabhāsaprasaṅgāt | tadiyaṃ smṛtireva bhavantī 
pūrvānubhavamākṣipatyeva | utprekṣāpi bhavantī smaraṇamanubhavaṃ vā 
mūlato'valambate, natu andhatamasānupraveśa iva utprekṣā saṃbhavet | kevalaṃ 
śuddhasaṃvedanamātrasya kāloparāgaśūnyatayā 
svarūpavyatirekivastvavabhāsāsaṃbhavena ca tadubhayānuprāṇitarūpā smṛtirna 
saṃbhavatīti śarīrādyuparāgata eva seti | prācyaśarīroparāgaśca

(page 65)

etaccharīroparāgavibhinna ityevamuparāgadvayasphuṭīkārāyogāt na sphuṭaṃ 
smṛtitvamatiśiśutāpadānabhūte iva yūnaḥ | anubhavitṛtvena hi yatra abhimāno 
gāḍhaḥ śarīre, tatraiva aikyasaṃskārābhraṃśādanuvartamānatvena 
abhimanyamāne sphuṭasmartṛtvābhimāna iti alaṃ bahunā | sthitametat-na 
ātmano'pūrvatayā prakāśa iti | apūrvatvam iti sattayā | 
apūrvaprakāśatvam iti adhigamena | atra ca cārtho mantavyaḥ | ata eva vibhajati-
naca ātmanaḥ pūrvamasattā, naca sato'pi anubhavaḥ iti | vastutastu sattāpi 
prakāśaviśrāntaiveti sattāpūrvyaṃ prakāśāpūrvatāyāmeva viśrāmyati,-
ityāśayena sāmānādhikaraṇyameva yuktam | pratipadyatām iti cakāro na 
prayuktaḥ | pramātṛgato'pūrvaprakāśatvavyavahāraḥ prāk pramāturasadbhāve 
na bhavati pramātṛpramāyattapūrvakālasmaraṇāpekṣatvāt | tadasadbhāve 
bhavanasya vyāpakaṃ tadāyattarūpānapekṣatvaṃ paṭasya iva mṛtpiṇḍābhāve | 
tadviruddhaṃ ca tadā yattarūpāpekṣatvamiti vyāpakaviruddhopalabdhiḥ | tarhi 
ayaṃ pramātṛsadbhāva eva pramāturapūrvaprakāśatvavyavahāraḥ ityastu | 
etadapi katham | nahi sa eva pūrvaṃ prakāśate, adhunā ca apūrvaprakāśa iti 
saṃgacchate virodhāt | tadayaṃ bhinnaviṣayatayā virodhaḥ parihartavyaḥ | 
āropitaprakāśabhāvo dehādirapūrvaprakāśaḥ sati eva purāṇaprakāśe 
paramārthapramātari vyavahartuṃ śakyaḥ | paramārthapramātā tu parameśvaro 
na kathañcidapūrvaprakāśaḥ, tadavibhinnāśca sarve pramātāraḥ,-iti vastuto na 
apūrvaprakāśatā | yadgītaṃ 

nahyevāhaṃ jātu nāsaṃ---------|
     iti uktvā,
-------------------neme narādhipāḥ |
na caiva na bhaviṣyāmaḥ------------| (2 | 12)

(page 66)

iti | anena hi ātmani paramārthapramātari kālatrayāvicchinnaprakāśatvamuktvā 
tadabhedādanyeṣāmapi uktam | māyāpramātari apūrvaprakāśatā bhavantī api 
na prakāśāṃśamāśliṣyati, apitu vedyāṃśameva idaṃbhāvabhāginamiti hi 
asya granthasya tātparyārthaḥ | sa eva iti evakāreṇa paramārthapramāturabheda-
māha | avāntaraprameyamupasaṃharati tasmāt iti | ātmanaḥ iti | bauddhanyāyena 
tu saṃvedanasya apūrvaprakāśatvāt bhavedaupacārikī prameyatā, yataḥ 
svasaṃvedanaṃ pramāṇamiti ucyate ityāśayaḥ | aupacārikamapi 
pramāṇaviṣayatvaṃ na upapadyate iti avāntaraprameyamupasaṃhṛtya, prakṛtaṃ 
prameyatvābhāvalakṣaṇaṃ mahāprameyamupasaṃharati tadevam iti | tasmāt 
yuktikalāpādevaṃbhūte sadāprakāśatvamātmanaḥ iti prameyavastuni sthite 
ityarthaḥ | nanu ātmagatanityatādivicāre'vaśyamātmā prameya evetyāśaṅkya 
āha vaikalpika iti | tatrāpi vicārayitā pūrvasiddha eva anyathā 
vicārāyogādityevamātmā vicārthamāṇo'pi svaśiraśchāyāṃ iva pramāṇa-
padākramaṇāt dūramapakrāmati | kevalaṃ 

svātantryāmuktamātmānaṃ---------| (1 | 47)

iti bhāvinayena tatra prameyabhūto'tyaktapramātṛrūpabhittitādātmyaḥ sṛjyate iti 
prameyatvaṃ tatra pramātṛtāyāṃ viśrāmyati tasyā eva tathā 
hṛdayaṃgamīkaraṇena vyavahāryatvāt | yasya prakāśitasya hṛdayaṅgamī-
karaṇāya yat viruddhamupādīyate, tatra tat viruddhaṃ na pratiṣṭhāṃ labhate 
pratyakṣadṛṣṭe iva ghaṭe'numeyatvam | tathāca pramātṛtāhṛdayaṅgamīkara-
ṇāya prameyatā vaikalpikī pratiṣṭhālābhe kāraṇam | taddīyamānāpūrva-
prakāśatvaṃ parvata iva agnyanumeyatvasya, tadviruddhaṃ ca 
pūrvaprakāśatvamiti kāraṇaviruddhopalabdhiḥ | turapiśabdānantaramevaṃ

(page 67)

vicārakālo yadyapi asti, tathāpi śuddhāt prameyatvāt viśuddhācca 
pramātṛtvādeṣa viśeṣaḥ-iti dyotayati | viśuddhaṃ hi prameyatvaṃ ghaṭasyaiva 
anumeyatvamiva agneḥ | viśuddhaṃ tu pramātṛtvaṃ ghaṭe prameye ahaṃbhāvasya 
amūḍhaṃ prati pratyakṣatvamiva ghaṭasya | idaṃ tu miśraṃ 
pramātṛprameyarūpatvam | pramātṛtāpradhānaṃ tu mūḍhaṃ prati ghaṭasya 
pratyakṣatvānumeyatvaṃ pratyakṣatvapradhānamiva | sākṣātkārācca 
asākṣātkaraṇarūpamanumānaṃ viruddhamapi taṃ vyavahārayatyeva 
tanniṣṭhatvāt | ahaṃ gaura iti ahaṃbhāvāt viruddhamapi darpaṇe ayaṃ gaura iti 
idantājñānamiva tat | tanniṣṭhatvamapi yadi vyavahārayet, na kvacidapi 
vyavahārakatvaṃ syāt ; iṣṭaṃ ca taditi tāvanmātranimittatvasya vyāpakasya 
pratyakṣavirodhabhayena avaśyāṅgīkāryasya anupalabdhiprasaṅgāt 
tanniṣṭhatvamavyavahārakatvāt vipakṣādapasṛtaṃ sādhyena vyavahārakatvena 
vyāpyate iti vyāptisiddhau svabhāvahetuḥ | evam ādisiddhe iti 
sautrapadaparyāyaṃ pūrvasiddhasya iti vyākhyāya, kroḍīkṛtasiddhikatvaṃ 
yaduktaṃ vṛttāvādisiddhatvasphuṭīkaraṇābhiprāyeṇa, tadadhunā 
sphuṭībhūtamiti vitatya vaktumupakramate evam iti | etāvati prameye sthite 
yāvattāvacchabdāvavaśyaṃbhāvadyotakau, ata eva karturanupādānam | tasya 
siddhikroḍīkāro hi avidhitsitaḥ | avaśyaṃ hi pramīyate tāvat kiñcit, iyatā ca 
sarvaṃ siddhamiti pramāṇaviṣayaṃ prameyaṃ bhūtā prāptā prameyocitā tasya 
pramāturyā siddhiḥ | taṃ prati  iti pramātāraṃ prati | prameyavastu iti 
vastugrahaṇaṃ mātraparyāyaḥ | ata eva iti yatastṛṇamātramapi tatra viśrāntaṃ 
prameyaṃ bhavati, tato hetoḥ | tena pramātrā svātmano nijasya rūpatya siddhiḥ 
prakāśaḥ prameyasiddhyaiva kroḍīkṛtā kroḍopalakṣitahṛdayarūpatāṃ gatā 
kṛtā hṛdayaṅgamīkṛterthaḥ |

(page 68)

uktā iti vṛttau | prakāśarūpatā khalu anavacchinnā pramātṛgatā prameyatvaṃ 
kathaṃ sahatām, anavacchinnāpi hi sā na prameyatāsahiṣṇuriti darśayati āstāṃ 
tāvat iti | daṇḍāpūpīyanyāyena ayatnasādhyamidamiti yāvat | nanu cakṣurādi 
pramāṇam, tacca anumānādyapekṣamiti | āha pramitisādhakatamatām iti na 
tatpramāṇamityāśayaḥ | prakṛtasya pramātuṃ prārabdhasya prameyasya 
heyopādeyātmanaḥ siddhirna syāt | ata eva iti yataḥ pramāṇe 
pramāṇāntarāpekṣiṇi jaḍe'navasthā, tataḥ | kayācit iti viṣayoparāgadattena 
deśakālasaṃkocena | nīlaprakāśo hi mitaviṣayabahirmukhatāsaṃkucitataravṛttiḥ 
paramārthaprakāśaviśrānte buddhiprāṇādisaṃkocabhājane'pi 
antarmukhamātrasaṃkocayogādubhayatomukhasaṃkocanīlaprakāśāpekṣayā 
vitate ata eva sarvaviṣayāvabhāsanayogyatājuṣi pratyagātmani mameti sattvena 
avabhāsamānatayā viśrāntimatyajan nijasphuritaśabdanātmavimarśaphalo nīle 
bahiḥ sarvasādhāraṇābhāse prameye pramāṇamiti vakṣyate

idametādṛgityevaṃ---------| (2 | 16)

ityatra | nanu anirbhāsamānameva cakṣurādi pramāṇaṃ bhaviṣyati, tat 
kathamanavasthā yadbhayāt na jaḍasya pramāṇatvamityāśaṅkya āha nahi 
kāraṇamātram iti kāraṇaviśeṣaḥ karaṇamiti mātraśabdaḥ, yena iti 
kāraṇamātraṃ karaṇamityato hetorityarthaḥ, tathā iti karaṇam, apitu 
prakṛṣṭopakārakatvaṃ karaṇatā | tacca kartrā vyāpāryamāṇataiva, na anyat | 
tataḥ kimiti | āha kartā ca iti | vakṣyamāṇanītyā iti

itthaṃ tathā ghaṭapaṭādyābhāsajagadātmanā |
tiṣṭhāsorevamicchaiva hetutā kartṛtā kriyā ||  (2 | 53)

(page 69)

iti hi vakṣyate | tato'pi prakṛte kimiti | āha saca iti cetano yāvat kriyāyāmupayogi 
saṃcetitaṃ, tāvat prayuṅkte; natu aprakāśamānamiti saṃbandhaḥ | jaḍaṃ na 
cetanaḥ prayuṅkte aprakāśamānatvāditi kāraṇaviruddhopalabdhiḥ | 
prakāśamānatā hi prayoge kāraṇaṃ tadabhāve prayogasya abhāvāt | tameva 
darśayati anyathā iti | tena atyantaparokṣāṇāṃ 
mano'kṣadikkālākāśādīnāṃ sāmagrīprāmāṇyavādadṛśi 
kartṛprayojyatvaṃ tāvat na upapannam | nanu sparśaviśeṣādinā 
netragolakamupalabhya unmeṣayati, saiva asya prayojyatā, tato nīladarśanamiti 
jaḍasya aprakāśamānatvamasiddhamityāśaṅkya tāmeva anavasthāṃ 
smārayitumāha tasyāpi iti | sparśaviśeṣo'pi sparśanena jñātavyaḥ, tadapi 
anyena jaḍeneti aniṣṭhā | nanu sa sparśaḥ sparśajñānena jñāpayiṣyate, tacca 
svasaṃvedanasiddhamiti kā anavastheti | āha paryantena iti prakāśalakṣaṇam iti 
| nīle nīlaprakāśa eva karaṇaṃ yuktaṃ sparśe iva sparśaprakāśaḥ | nanu 
paryantāvalambanaṃ prathamata eva kartavyamiti ko'yaṃ niyama iti | āha 
vāsyādi iti | tathāhi cchedane dātraṃ karaṇaṃ, tatpreraṇe hastaḥ, tatpreraṇe 
icchā, tasyāṃ svasaṃvedanaṃ paryantakaraṇam | naca iyatā cchedanameva 
icchākaraṇakaṃ daṇḍopāditsayā daṇḍamiti nītyā bhavitumarhati | satyam, 
bahirniṣṭhāyāṃ kriyāyāmevamupapadyate | chedanaṃ hi 
kāṣṭhaniṣṭhadvidhābhāvaphalaṃ, nīlavedanaṃ tu 
pramātṛviśrāntanīlavimarśaphalaṃ yathā hastapreraṇe icchā | tatra na bāhyaṃ 
karaṇaṃ dūravṛtti yujyate | nanu dūravṛttitā kutra aparādhyatītyāśaṅkya āha 
tadviniyogāt iti | indriyaviniyogāt pūrvameva ghaṭavimarśakriyā pramitirūpā 
niṣpanneti asyāmuttarakālabhāviprayojyatākamindriyaṃ kathaṃ karaṇam | nanu 
indriyaprayogānantaraṃ

(page 70)

sā udetītyāśaṅkya āha ghaṭapramiti iti | ghaṭavimarśo bhavatāditi hi gṛhītvā 
indriyaṃ vyāpārayet, anyathā niyatamindriyaṃ niyate deśe kāle ca kathaṃ 
vyāpārayediti | evaṃ ghaṭavimarśaścedabhisaṃhitaḥ, vispaṣṭo ghaṭaḥ 
prakāśitaśca ghaṭaḥ; anyathā paṭapramityabhisandhānaṃ kiṃ tat na bhavet | tena 
ghaṭavimarśastadabhisandhānabalāt cet sphuritaḥ, tadanyathānupapattyā 
pāraṃparyeṇa ghaṭo'pi sphuritaḥ | ghaṭasphuraṇameva ghaṭapramitiriti tātparyam 
| yat yadviniyogāt pūrvameva bhāti, na tat tatkāryaṃ bījamiva nāṅkurakāryam | 
indriyaviniyogācca pūrvameva ghaṭasphuraṇamiti | tatkāryatāvyāpakaṃ hi 
tatpaścādbhāvitvaṃ, tadvirūdhaṃ ca tatpūrvabhāvitvamiti 
vyāpakaviruddhopalabdhiḥ | nanu ghaṭamātrasphuraṇaṃ satyamādāvasti, natu 
tāvanmātrameva ghaṭapramā vivakṣitā, apitu sajātīyavijātīyavyāvṛttisvala-
kṣaṇasphuraṇam | tacca indriyaviniyogasya paścādeva | etadeva āha atha ghaṭa iti | 
co hetau | yata indriyasya kartrā niyojanaṃ, tataḥ kartṛprayojyatālakṣaṇaṃ 
karaṇatvamupapannamiti | etatpariharati tat iti kartṛprayojyatvam | nahi 
parokṣamaprakāśamānaṃ cetanaprayuktamiti yuktam | nanu mā bhūt 
kartṛprayojyatvaṃ karaṇalakṣaṇam | tat hi na sarvatra nirvahati śubhena karmaṇā 
śubhaṃ bhuñje, mūlaistarustiṣṭhatītyādau tadasaṃbhavāt | kriyāyāṃ 
prakṛṣṭopakārakamiti tu karaṇalakṣaṇaṃ yuktamavyāptidoṣaśūnyatvādityā-
śaṅkya āha nāpi iti | prakarṣo hi iyān saṃbhāvyate-tasmin sati sa eva bhāti, 
tasmin sati sa bhātyeva, tasminneva sati bhātīti | tatra ādyaṃ prakarṣaṃ nirākaroti 
nāpi iti | tasya indriyasya | natu mahattvānekadravyatvarūpavattvādidharma-
padārthāpekṣayā prathamaḥ prakarṣo bhaviṣyatītyāśaṅkāpūrvakamapākaroti 
padārtha

(page 71)

iti | arthinām iti viśeṣyasādhyārthakriyayā | tvayāpi hi vayamidameva pūrvaṃ 
paryanuyuktāḥ atha ghaṭābhisandhāne'pi ityādineti atra āśayaśeṣaḥ | nanu 
padārthamātramapi astitvamātrasādhyahṛdbhaṅgaparihārādyarthakriyārthinā-
mupayogi syāt | kiṃ nu khalu tāvatā | ghaṭāvabhāsane viśeṣyasādhyārtha-
kriyārthinaṃ prati indriyasya sa ādyaḥ prakarṣaḥ samarthito bhavet | sārvatrikaṃ 
ca pratyakṣe indriyasya karaṇatvaṃ samarthanīyam | tacca na samarthitameva | 
tadetadāha athāpi ityādi | tathāpi ityatraiva cchedaṃ kṛtvā 
nārthināmiṣṭasiddhiḥ iti pūrveṇa saṃbandhanīyam | tathāpītyasya tu 
uttaragranthena saha yojane prathamaṃ prakarṣaṃ samarthayituṃ yat pūraṇaṃ, 
tadapratisamādhāya dvitīyaprakarṣanirākaraṇena uttaradānaṃ na atīva saṃgatiṃ 
pūrayatīti dvitīyaṃ prakarṣaṃ nirākartumāha prabhāsvarāt iti | prathamam iti 
kālāntare tu bhavatu nāma | pravṛtte'pitu indriye padārthavimarśo nodetīti 
bhavatyeveti prakarṣo na siddhyati | prakarṣasya viśeṣātmanaḥ sāmānyātmano 
vā | apirbhinnakramaḥ | tasya indriyasya | atra iti padārthāvamarśe phale kartavye | 
avyavahitopakāritā bhavatyeveti dvitīyaprakarṣarūpatā yā uktā, sāpi iha nāstīti 
saṃbandhaḥ | tasminneva sati bhātīti tu tṛtīyaprakarṣarūpaṃ na ciṃtitam | 
prasiddho hi atra darśane'yamarthaḥ-mantramaheśvarādiyogiparyantapramātra-
pekṣayā vināpi indriyavyāpāreṇa dṛṣṭaḥ sākṣātkāraḥ iti | nanu 
prabhāsvarādapavarakapraviṣṭasya viśramya yat nīlajñānamudeti, tatra indriye 
sati bhavatyeva nīlavimarśarūpā prameti ayamasti atiśayaḥ | yattu prathamasamaye 
nāsti, tatra prāptaparipākamindriyaṃ samarthaṃ na jātam | viśiṣṭasyaiva ca 
indriyasya karaṇatvaṃ brūmaḥ, na indriyamātrasya | tena sahakārisaṃpāta

(page 72)

eva yo viśeṣastadabhāve yat karaṇatvadūṣaṇaṃ, na tadindriyasya karaṇatvaṃ 
dūṣayitumalam | kiṃca indriyasya na avyavahitopakāritetyukte kenacit vyavadhātrā 
bhāvyam | tadeva ca jaḍaṃ karaṇaṃ bhaviṣyatīti ubhayadūṣaṇamityāśaṅkya 
āha bodhāvabhāsasya ca iti | iha pramātmakaṃ phalamuddiśya karaṇasya 
atiśayo nirūpaṇīyaḥ | pramā ca vastuparicchittiḥ, vastu ca arthakriyāyogyam, 
arthakriyā arthino bhedaikarasasya pramātustādṛśenaiva pramātrantareṇa saha 
vyavajihīrṣoḥ, arthakriyāyogyatā ca bāhyatāyāṃ viśrāntā, arthakriyāyā api 
bāhyarūpataiva prārthanīyatvāditi | bāhyatā ca pramāturvyatiriktatā | naca sā 
paramārthapramātuḥ prakāśātmakādupapadyate aprakāśanaprasaṅgādapra-
kāśamānasya ca arthakriyāyāmayogyatvāt | tadidamubhayaṃ samarthanīyam-
prakāśamānatvaṃ ca bāhyatvaṃ ca | tatra ādyaṃ pāramārthikaśivasadā-
śiveśvarātmakapramātṛrūpābhedena ghaṭate | bāhyatā tu kalpitapramātṛ-
bhāvaṃ māyīyaṃ śarīraprāṇādimapekṣya saṃgacchate | evaṃ ca māyīyasya 
pramāturbāhyarūpatāvasāya eva nīlasya pramā | naca aprakāśamānasya 
avastubhūtāpi bāhyarūpatā avasāyenāpi vitarītuṃ śakyā bhittyabhāve 
dharmaparikalpanācitrāsaṃbhavāt | etacca

bhrāntitve cāvasāyasya---------| (1 | 21)

ityatra nirālambanābhimānikādhyavasāyadūṣaṇena vitaniṣyate | tasmāt nīlena 
tāvat prakāśitavyaṃ prathamam | prakāśanaṃ ca asya paramārthapramātari 
śive'hamiti, sadāśivabhūmāvidamaṃśāsphuṭatayā ahamidamiti, īśvarabhuvi 
sphuṭedamaṃśena ahamidamityetāvān jñānaśaktimātramavabhāsaḥ | iyatyāṃ 
bhūmāvidamaṃśasya pṛthaktaiva nāsti ahantāto darpaṇādiva nīlasya, tataḥ 
pṛthaktvollāse'pi

(page 73)

apṛthaktayā caitanyādiva dehasya | eṣā vidyābhūmirucyate | atrāpi ca 
mantramaheśvaramantrabhedena avāntaro bheda iti āgamādhikāre vitaniṣyate | 
tataḥ saṃkucitāt pramātuḥ śūnyarūpasya sarvamidaṃ yat, na 
tadahamityevaṃrūpasya vijñānakevalarūpatvasya udaye tadāviṣṭe prakāśe 
tādātmyaśūnyāpekṣayā tu bāhyatayā prakāśaḥ, paścāt tadbuddhirūpe 
asaṃkucite prakāśe savedyapralayakevale, tato'pi taddeharūpe sakale | itthameva 
tādātmyabāhyatvābhyāṃ prakāśaḥ | bāhyatvena ca prakāśe yo 
vimarśabhāgo'vyabhicārī, sa vikalpa iti vyavasthāpayiṣyate | prakāśasya ca 
vimarśa eva jīvitam | sa ca atra vikalparūpatāṃ bhajati yā 
prakāśamānarūpātirekadāyinīti, so'yadhyavasāya iti vyavahriyate | 
prakāśamānarūpādhikaṃ ca bāhyatvamiti bāhyatvasya na prakāśamātra-
mucyate, apitu adhyavasāyaḥ | tādātmyena tu prakāśanaṃ prakāśāṃśa eva | 
naca tasya śivāt prabhṛti sakalānte'pi pramātari kaścit bhedo'sti | tatra ca 
vimarśo na prakāśātiriktaṃ kiṃcit karotīti nirvikalpakaṃ prakāśa iti anubhava iti 
ca ucyate | evaṃ sthite bāhyatādhyavasāyarūpāyāḥ pramāyā 
indriyavyāpārasya ca antarālavartinī yā śivasadāśiveśvaravidyārūpā 
nirvikalpānubhavadaśā, saiva asyāmavyavahitā pramāyām | prabhāsvarāda-
pavarakapraveśe'pi parasyāpi nīlādhyavasāyaḥ pramā, nīlānubhavānantara-
bhāvī ca asāviti iṣṭameva | tataśca na kvacidapi indriyavyāpārasya 
avyavahitopakāriteti sthitam | yā ca asau vyavadhātrī daśā, na sā jaḍarūpā, apitu 
saṃvinmayī eveti yuktamuktam-prakāśātmaiva hi kayācidapekṣayā 
bhedamānīya pramitikaraṇīkartuṃ yujyate, na jaḍavastviti | tadetadāha 
bodhāvabhāsasya ca

(page 74)

ityādinā | cakāra uttara samuccinvan pūrvapakṣāśaṅkāṃ sūcayati | sā ca 
uktaiva | bodharūpasya vastuto'vabhāsasya avaratayā nikarṣeṇa apūrṇatayā 
bhāsamānasya nīlasya saṃkocarūpeṣadarthayogādābhāsādiśabdavācyasya 
bāhyo'yaṃ mattaḥ, saca artho vastubhūta ityevaṃ yo'dhyavasāyo nīlasya 
itthamadhyavasīyamānatā, tasyāṃ pramārūpāyāṃ pramāṇaṃ vicāryate 
laukikaiḥ | yaśca asau bāhyarūpatādhyavasāya indriyavyāpārasya anantara iti 
parasya saṃmataḥ, sa jñānaśaktyullāsamātrarūpāt nīlaprakāśarūpāt 
paramasadāśivādiniṣṭhādahamityevarūpādāgato yo mantreśvarādibhuvi 
vidyāmayaḥ | tena nirvikalpena abhedavimarśena prakāśamātrajīvitena anubhava-
śabdavācyena madhyavartinā vyavahitā ityato hetoḥ | sa eva iti 
abhedavimarśamayaḥ prakāśaḥ pramāṇaṃ yuktaṃ 
bāhyārthāvasāyarūpāyāṃ pramāyāṃ nimittabhūtaḥ | nimittatvaṃ darśayati 
yata evam iti | mama avabhāsamānamiti pramātṛlagnaḥ prakāśaḥ karaṇam, tato 
hetoḥ | nīlametat bāhyamiti adhyavasāyaḥ pramā | nīlaṃ prameyam | etacca

idametādṛgityevaṃ---------| (2 | 16)

ityatra upapādayiṣyate | yadivā indriyavyāpārāpekṣayā idamucyate-na 
indriyavyāpāreṇa nīlamidamiti vyavasthāpyate, yena tadvyavasthāpanātmikāṃ 
pramāṃ kurvatastasya prāmāṇyaṃ śaṅkyeta, kiṃtu etat nirvikalpena 
vyavasthāpayiṣyate | evamupapattyā nirūpya yaduktaṃ pramāṇamapi yāvat na 
pṛthak siddhihetuṃ pramāṇamākṣipati iti, tat nigamayati tatastasya iti 
arthāvabhāsasya iti nīlaprakāśarūpasya anubhavasya | pramitikriyākaraṇasya 
iti pramāṇasya | punaḥ pramāṇaṃ dvitīyaṃ pramāṇamanavasthāpādakaṃ

(page 75)

prati na apekṣā | atra hetuḥ svaprakāśātmanaḥ iti | atrāpi hetuḥ-bodhāt 
svaprakāśādavibhinnasya avyatiriktasya | nanu ca saṃsāriṇaḥ kathamiyaṃ 
śivasadāśiveśvaradaśā, yayā vyavadhānaṃ bhavedityāśaṅkya āha tasyāṃ 
hi iti | yā iyamadhyavasāyasya pūrvabhāvinī uktā, tasyām | aiśvaraḥ iti 
īśvarasya ayam | bhāvaḥ iti na asaṃvedanam | śivadaśā tu 
ekarasāhaṃbhāvātmā, naca atra arthonmīlanamiti na sā arthacintāyāmupa-
yuktā; tena aiśvaro bhāvaḥ iti uktam | uttarottaraṃ hi pūrvapūrveṇa aviyuktamiti 
| paśorapi māyādaśāpatitasya vidyeśvarādipūrvadaśayā na viyogo'nyathā 
aprakāśanaprasaṅgāt | yata īśvararūpatā, tena tasyāṃ kālakalāyāṃ 
tatkālavartini bodhe abhedaikarase svaprakāśe sāṃvyavahārikyāḥ saṃbhūya-
vyavahāraḥ parasparavyavahāro bhedapradhānaḥ prayojanaṃ yasyāḥ, idaṃ 
pramāṇaṃ, idaṃ prameyamiti vyavasthayā vicitrasya avasthānasya bhedarūpasya 
tasyāṃ na avakāśo'bhedarūpeṇa bhedasya virodhāt | nirvikalpadaśāyāṃ na 
anyat pramāṇamabhedaikasāratvāt | pramāṇaṃ hi prameyamākṣipat 
bhedasaṃbhavena vyāptaṃ, tadvirūddhaṃ ca abhedaikasāratvamiti vyāpaka-
viruddhopalabdhyā pramāṇāntarāpekṣā pramāṇe nivāritā bhavati | nanu 
evaṃbhūtā daśā ahamidamitirūpā, tasyāśca kathaṃ kāraṇatā, ahaṃbhāvo 
hi svatantraḥ pramātā, na pramāṇam | atha tat pramāṇaṃ, tarhi pramātṛrūpaṃ 
vaktavyamityāśaṅkya āha padārthāvabhāsarūpatvamātreṇaiva tu iti | 
tuśabdaḥ pramāṇāt pramāturviśeṣaṃ dyotayannaviśeṣāṃ śaṅkāṃ 
sūcayati | asmādīśvaradaśārūpāt bodhāvabhāsādahaṃbhāvasāmānā-
dhikaraṇyamāpannādapi ahamidamityevaṃrūpāt pramāturapi bhavedviśeṣaḥ | 
kathaṃ viśeṣaḥ | āha padārtha iti | nīlasya yo'vabhāsaḥ,

(page 76)

tadrūpatvamātreṇa | nīlaṃ hi tatra adhikamasti, tena pramāṇatā | pramātā tu 
naivaṃvidha iti vaktuṃ hetutāgarbhamasya viśeṣaṇamāha-ahaṃbhāve ya eko 
raso viśrāntiḥ, tatsvabhāvo yataḥ pramātā; ata eva pūrṇaḥ | na pramāṇatayā 
saṃkocakalā atra kācidartharāśeḥ sarvasya atra ahaṃmayatvāt | apiśabdo 
bhedānavakḷptimāha | etadarthameva mātragrahaṇam | yata evaṃ pramātā 
ahamityetāvanmātrarūpaḥ, tato'dhikā ca īśvaradaśetyato hetostasyaiva 
īśvaradaśāpannasya bodhasya pramāṇatvaṃ sthitam, yatra na anavasthā | nanu 
śivarūpatāṃ pramātṛtayā, pramāṇatayā ca sadāśivādidaśāṃ na lokaḥ 
pratipadyate | ka evamāha-na pratipadyate | nirvikalpakamidamityapi kiṃ lokaḥ 
pratipadyate | yuktyā anubhavo vyavasthāpyate iti cet, ihāpi na samānam | tadāha 
tadetat iti | saṃsāravyavahāraṃ patito māyāmayatvaṃ bhedaikarasatvamā-
hriyamāṇaḥ, ata eva abhedadaśāṃ bhavantīmapi tadupayogimāyādaśāni-
hnutāmavajānan bhogyatvāt pāśyatvā paśustasyāpi vāstavaṃ pāramārthikaṃ 
rūpamuktam, yena pramātrādi vyavasthāpyate anavasthādidūṣaṇairnābhidrū-
yate | yasmādanena vāstavena rūpeṇa vinā śūnyādeḥ pramātuḥ pramātṛtā na 
upapadyate ekāntato vedyarūpatvena jaḍatve pratyuta svasiddhau pramātrantarāpe-
kṣaṇāt, indriyādeśca karaṇarūpasaṃmatasya karaṇatā na upapadyate | 
prakāśitasya kartṛprayojyatayā karaṇatvaṃ tadbhāne karaṇāntarāpekṣayā 
anavasthānāt | apiḥ samuccaye vā, śarīrasya pramātṛtāṃ prati dūratādyotane 
vā, tadgatavāstavapramātṛtānaucityasūcane vā | anavasthāmeva sūcayati 
prakāśānanupraveśaḥ ityādinā | anena prakṛtārthasiddhireva na upapadyate iti 
yaduktaṃ, tat nirvāhitam | tena paryante pramātrantarādyanapekṣaṇe viśrānti-
sthāne

(page 77)

iyaṃ parīkṣā parito vicārarūpā heyaparivarjanāya ca upādeyasya īkṣā 
pramātṛpramāṇayoḥ saṃbhavamupapādayantī prameyasyāpi upapādayati | na 
punarhālikādayaḥ evaṃ jānanti bhedaikarase māyāpade viśrāntatvādeṣām | 
yathāsthita eva tu tadvyavahāraḥ | evam iti śivarūpe viśvapramātari 
sadāśivarūpe ca viśvapramāṇe sati upapadyate | evaṃ pramāṇatattve ca jñāte 
visaṃvādo bādhakayogo nāsti, yena apramāṇatā syāditi vitatya

idametādṛk---------------------| (2 | 16)

ityatra pramāṇalakṣaṇe | etaduktaṃ bhavati-bhedaikaraso bhedārthī tathāvidha-
pramātṛsahasramadhyagato yato'yaṃ māyīyaḥ pramātā, tato dṛḍhanirūḍhi-
sthānamapi ekāntavedyatayā atyantajaḍatāṃ śūnyaśarīraprāṇendriyavargasya 
ātmarūpajñatvādikiyanmātrāveśanena adhaspadīkurvadapi paramaśivasadā-
śivādipadamavajānīte sukhaikarasa iva jano duḥkhasthānatāmarthakāmārja-
nādeḥ | ata eva tatsaṃbhavopadeśa eva avadhānayoge'bhyupāyaḥ | yaduktaṃ

grāhyagrāhakasaṃvittiḥ sāmānyā sarvadehinām |
yogināṃ tu viśeṣo'yaṃ saṃbandhe sāvadhānatā || (vi. bhai. 106) iti, 

saṃpradāyamimaṃ bhadre śṛṇu samyagvadāmyaham |
kaivalyaṃ jāyate sadyo netrayoḥ stabdhamātrayoḥ || (vi. bhai. 113)

ityādi ca | ityalaṃ rahasyāntaraprasaktyā | bahutaraprameyamagnaṃ prakṛtaṃ 
sūtrārthamunmajjayituṃ nigamayati tadevam iti | nanu yadi na pramāṇāpekṣā, 
tarhi kimanena śāstreṇa, tataḥ kathamuktaṃ pratyabhijñāmupapādayāmi iti | 
etadāśaṅkya āha vakṣyamāṇa iti | samanantarameva hi vakṣyate

(page 78)

kintu mohavaśādasmin-------| (1 | 3)
ityādi,
     viśvavaicitryacitrasya------------| (2 | 30)
ityupakramya
     apravartitapūrvo'tra---------------| (2 | 32)

ityādi ca | nanu etāvatā svatantrarūpa ātmā siddhaḥ, natu īśvara iti | āha 
svātantryamātra iti | evaṃ svātantrye prakāśite jñānakriye api prakāśite eva | 
tadeva ca aiśvaryamiti kimanyadaprakāśitaṃ syāt | yat yāvadātma, tat tasmin 
prakāśite na aprakāśitaṃ bhavati aprakāśitatve atāvadātmakatvasya viruddhasya 
prasaṅgāt | jñānakriyaiśvaryalakṣaṇasvātantryamayaśca svātmeti 
vyāpakaviruddhopalabdhiḥ | niṣedho yathā sādhayituṃ na yogyaḥ, naca śakyaḥ, 
tathā siddhirapi | anena sūtre vidhiniṣedhau dṛṣṭāntadārṣṭāntikabhāvena 
anyonyaṃ vyākhyeyāviti darśayati | vāśabdo hi tadartha eva sūtre | ajaḍātmā 
iti vyācaṣṭe sacetasām iti pramāṇikānām | nirātmānaḥ iti niḥsvabhāvā 
ghaṭādayaḥ | jaḍaśabdena tāvadiyaduktam, idaṃ tu dhvanyate-jaḍānāṃ 
tāvadayamudyamo yukto'siddhasvātmanām | etadapi ca kathaṃ syāt | jaḍaśca 
svayamalabdhasiddhiranyasya ca vidhiniṣedhau kartumudyacchati | udyamayogāt 
cedasya ātmā siddhaḥ, kimīśvarasya asiddhaṃ yena siddhiṃ kuryāt | kiṃ vā 
tadabhāve siddhaṃ, yena tannirākaraṇaṃ kuryāt | tataśca īśvarasiddhirīśvara-
nirākaraṇamityetat sarvaṃ svavacanaprasiddhipratyakṣānumānādibādhitameveti 
kharaviṣāṇaprakhyameveti yuktamādisūtraṃ tatpratyabhijñāmupapādayāmi 
iti || 2 ||

     vakṣyamāṇaślokārthasaṃkṣepeṇa avatārayati evamapi iti

(page 79)

prāguktaṃ yatprayojanaṃ tatpratyabhijñāmiti, asmin ghaṭādike dṛṣṭe'pi 
mohavaśādanupalakṣite atyantopādeye vyavahārasādhanena 
svaśaktyāviṣkaraṇena niścayapradarśanamiti loke dṛṣṭam, tathāca ayamātmā 
īśvaro dṛṣṭo'pi tathānupalakṣitaḥ iti svabhāvahetuḥ, atyantopādeyasya 
dṛṣṭasyāpi avimṛṣṭasya kathamupādānaṃ syāditi upādānavyāpakasya 
anupalabdhiprasaṅgāt vipakṣato vyavahārasādhanāviṣayatvarūpāt vyāvṛtto 
hetuḥ prakṛtena sādhyena vyāpyate,-ityevaṃ sūtravṛttyoḥ tātparyaṃ neyam | 
praśnayogyatāṃ dyotayati kim iti, tuḥ viśeṣam | tena kintu iti asamāptavakta-
vyatāṃ dyotayannanyaprameyābhidhānāvakāśamāha | nanu svaprakāśatva-
mīśvarasya yatnena upapāditaṃ, tat kathamuktam asminnīśvare dṛṣṭe'pi iti | 
āha dṛṣṭaśabdo'yam iti | upacaritaṃ yat karma ātideśikaṃ, yagātmanepadādi 
hi tatra udāharaṇamātraṃ bhinnaḥ kusūlaḥ svayamityapi darśanāt | yadi vā 
upacaritaṃ dṛśaḥ kartṛsvabhāvakatāyāṃ gauṇyā vṛttyā āśritaṃ karma tat 
sādhanaṃ yasya sa tathā | tatra upacāre mukhyārthabādhaṃ bījamādarśayati 
asaṃbhavāt iti | nahi draṣṭrantaramasti anavasthānāditi uktamasakṛt, vakṣyate ca | 
nimittaṃ ca prakāśamānatvaṃ, prayojanaṃ ca sphuṭadṛṣṭābhimataghaṭādi-
tulyatāpratipādanena anapahnavanīyatvaprakhyāpanam | yathā dṛṣṭo'rtho 
vimarśaṃ vinā na sukhaviśramādyarthakriyāsu, tathā ātmā apīti 
dṛṣṭāntadārṣṭāntikatākhyāpanamapi prayojanam | tena sūtraṃ vṛttiśca yadyapi 
prakṛtaviṣaye, tathāpi arthadvayasādhāraṇe yojye | tata eva ṭīkāyāṃ 
dṛṣṭasyāpi ityādi ahīyata ityantaṃ mukhyatayā dṛṣṭāntaviṣayam | tadāha 
vācoyukti iti | etadeva vācoyuktervaicitryaṃ yat parimitena yatnena pratipādyavastu-
saṃgrahaḥ | svasaṃvedanasiddhasya ityapi

(page 80)

vṛttau gauṇaṃ draṣṭavyaṃ sukhādivadanapahnavanīyatāṃ nirūpayitum | 
pūrvaṃ hi svasaṃvedanasiddhatvaṃ nāpi svasaṃvedanasiddhatvamātmanaḥ 
ityādinā dūṣitam | sūtre nimittārthe saptamī | yato'yamīśvaro dṛṣṭo'pi 
anupalakṣitaḥ, tataḥ pratyabhijñā pradarśyate | sāmarthyāt tasyaiveti labhyate | sa 
eṣa sāmarthyalabhyo'rthaḥ ṣaṣṭhyā vṛttau vyākhyātaḥ; nimittasaptamyarthastu 
ahṛdayaṃgamatvāt iti hetupañcamyā vyākhyātaḥ | sūtre saptamyā dārśito 
vṛttāvapi ṣaṣṭhyā vyākhyātaḥ | māyākṛto vyāmoho māyāvyāmohaḥ | 
māyā ca parameśvarasyaiva śaktiḥ | etacca sūtre'pi uktaṃ mohavaśāt iti | 
mohayatīti mohaḥ īśvaraḥ, tasya vaśaḥ sāmarthyaṃ māyāśaktistataḥ; 
mohayatyanena śaktiviśeṣaṇeti vā moho māyāśaktistasyā vaśaḥ sāmarthyaṃ 
mohanakāryaṃ prati avirāmaḥ | yathoktaṃ
māyā vimohinī nāma---------| (vi. bhai. 95)
iti | muhirvā mohaḥ āvaraṇaṃ tasya vaśo'vicyutiriti kriyayā śaktiḥ, tayā ca 
śaktimānākṣipyate | tena paśupramātṝṇāmakhyātirūpo mohaḥ | kāraṇaṃ ca 
asya īśvaraśaktiriti svarūpataḥ kāraṇataśca nirvācyataiva | na khalu 
anirvācyākāraḥ kaścidavidyātmā moho'vastutvena asya 
iyadvaicitryaprathanasāmarthyāsaṃbhavāt, saṃbhave vā pūrṇameva vastutvam, 
na anirvācyatā | nāpi sāṅkhyadṛśi iva rajastamovṛttirmohaḥ | tasya jaḍatvena 
pravṛttinivṛttivaicitryānupapattiryataḥ | tasmāt parameśvarasvātantryameva 
māyākhyaṃ mohayatītyāśayena āha natu anyathā iti | nanu dṛṣṭaṃ ca 
anupalakṣitaṃ ceti kathamityāśaṅkya āha dṛṣṭasyāpi iti | hṛdayaṃ vimarśaḥ, 
tatprāptiparyantaṃ darśanamupalakṣitatvam | tasmin sati 
samucitavyavahāropayojanaṃ, na anyathā mārgadṛṣṭe tṛṇādāviva | tena 
hṛdayena saha

(page 81)

sātmatā ātmarūpatā sākalyāt ātmarūpatādhyavasāyo vā | sātmā iti 
sākalyādāvavyayībhāve--------nini vā | dārḍhyaṃ vyācaṣṭe 
pramātrāveśāt iti | hṛdayaviśrāntirhṛdayaṅgamatvaṃ ca nāma kimityāha 
prakāśamupārūḍhānāṃ pramātṛprakāśabalena prakāśamānānāṃ, 
natu svayam | etadarthameva uktaṃ pramātrāveśāt iti | nanu hṛdayaṃ gacchati 
prāpnotīti hṛdayaṅgamam, kathaṃ ca parāmarśo hṛdayamiti | āha 
parāmarśalakṣaṇo hi iti |
citipratyavamarśātmā parā vāksvarasoditā | (1 | 45)
iti upakramya
     saiṣā--------------| (1 | 14)
iti uktam | etat tātparyeṇa vyācaṣṭe nīlādi iti | yathā sattvaṃ laghu prakāśakam 
iti jñānaṃ kṣaṇikaṃ kāryaṃ kāraṇam ityādirekasyaiva niraṃśasya 
tattadvyāvṛttibalena dharmiṇo dharmāṇāṃ ca anyonyaṃ bhedaḥ kalpyate 
tattadaṃśavimatiśāntaye, tathā prakāśarūpe saṃvedane'vabhāsavimarśā-
dīnāṃ pratyuta iha darśane yat yathā avabhāsyate, tat tathā saditi paropadeśakāle 
sṛṣṭo'yaṃ dharmadharmibhedaḥ pāramārthika eva | yathaiva ca sṛṣṭaḥ, tathaiva 
pāramārthikaḥ-ityabhedaviśrāntataiva tathaivasṛṣṭeḥ, anyathā ghaṭapaṭavat ko 
dharmadharmibhāvaḥ syāt | etadabhipretya āha avyatirikto'pi iti 
pṛthakkṛtyāvasāyyate iti ca | avasāyyate ityanena vikalparūpo māyīyo'yaṃ 
vyāpāra ityāha | upadeśāvasthāpi māyaiva | sā kevalaṃ 
paramārthamārgāvagāvahanasaukaryeṇa śuddhavidyeti vakṣyate | idaṃ 
nīlamavabhāsate iti bodhabahirbhūtaṃ śuddhaṃ yadidamiti saṃmataṃ, 
tatsāmānādhikaraṇyena avabhāsaḥ sphurati | mamedamavabhāsate ityatra hi 
mametyaṃśe viśrāntamahaṃbhāve nigīrṇamiva nīlaṃ prakāśasaṃbandhinā 

(page 82)

avabhāsalakṣaṇena dharmeṇa spṛśyate iti na atīva dūram | bodhabahirbhūte tu 
śuddhe avabhāso yat prakāśate sāmānādhikaraṇyena yataḥ keṣāṃcidarthagatā 
prakaṭateti matam, tato bodhastamavabhāsaṃ bhṛtyamiva viruddhasaṃkramaṇaśīla-
mubhayavetanatayā vyabhicāriṇaṃ śaṅkate | ahaṃ vimṛśāmīti tu 
vimarśabhūmiriyamasūryaṃpaśyeva na bahirmukhatāṃ spṛśati, ata eva nīlasya 
tatra karmataiva vimṛśyate iti pratīteriyaṃ mayā vimṛśyate ityasyāṃ ca 
daśāyāṃ dṛśo'ntarmukhatānirbhāsāt | idaṃ nīlaṃ bhātīti tu 
mametyapisaṃvedanasparśe bahirmukhatāprādhānyameva dṛśaḥ sphurati | tata 
eva ahantā guṇabhūtā yato mameti anuvadanasthānamidaṃ ṣaṣṭhyā nirdiśyate | 
etaduktaṃ bhavati-prakāśasvātantryamiha bodhasaṃvedanādiśabdavācyam | 
svātantryaṃ ca nāma yathecchaṃ tatra icchāprasarasya avighātaḥ, tena svayaṃ 
prakāśate parātmanā prakāśate iti anavacchedanayā prakāśamānatā, tadeva 
svātantryaṃ parātmanā prakāśate iti | etadeva ucyate paraṃ prakāśayatīti | 
etadeva hi rājñaḥ sutarāṃ yuddhe svātantrya-yat yuddhyate yodhayati ceti | tat 
svayaṃ nirbhāsate nirbhāsamānaṃ ghaṭādikaṃ nirbhāsayatīti iyati 
kriyāsamudāye-----------saṃvidādayo vartante iti tāvat samastāṃśasvīkāreṇa 
vimṛśāmīti vartamānaṃ dharmirūpasāram | ābhāsate iti tu bhāgamātram | 
dharmaḥ iti prakāśasvatantravapuṣo dharmiṇo yo'vabhāso dharmaḥ, tata 
utkṛṣyate vimarśa iti saṃbandhaḥ | nanu vimarśastāvat śabdanasaṃvalitā 
pratipattiḥ | naca saṃvedane śabdanamasti avikalpanīyatvena 
saṃketaviṣayatvābhāvāt | yatra ca saṃketo yujyate'rthe, tatra yo vimarśa idamiti; 
sa nīlenaiva sāmānādhikaraṇyamavikalamavalambate | yattu uktaṃ vimṛśāmīti, 
antarmukhatvena cakāstīti; 

(page 83)

tadavabhāse'pi tulyamavabhāsayāmīti antareva viśrānteḥ | tat kathamuktaṃ-
vimarśo na kadācididantābhūmimāskandatītyāśaṅkya āha svato'pi 
viśuddhasya iti | apiśabda uttarāpekṣayā samuccaye | svasminnapi yo vimarśaḥ, 
yo'pica idaṃ nīlamiti vibhinne nīle, sa ubhayo'pi pramātṛmātre pramātari eva 
viśrāmyati, natu prameye iti saṃbandhaḥ | śuddhasya iti kartari ṣaṣṭhī | 
śuddhatvena nīlādyuparaktāt pramāṇarūpāt prakāśāt tadanuparaktatayā 
pramāturviśeṣa ukto'hamityavicchedaprakāśaviśrāntilakṣaṇaḥ | ata eva camato 
bhuñjānasya karaṇaṃ saṃrambho'hamasau nīlāderbhokteti | nanu ahamiti 
śabdanaṃ sāṃketikaṃ saṃketābhāve saṃketāsmṛtau ca kathaṃ syāt | nedaṃ 
sāṃketikamityāha prāṇabhūtaḥ iti ātmabhūto'vyatiriktaḥ | atra hetuḥ jaḍaḥ 
iti | jaḍāt hi cetanasya vimarśakṛta eva viśeṣaḥ, anyathā prakāśādaprakāśasya 
kathaṃ bhedaḥ | tadākāratvaṃ tajjanyatvaṃ tadākṛṣṭatvaṃ tatsamānasāmagrī-
katvaṃ jaḍasyāpi darpaṇadhūmāyorasāderasti | naca vācyaṃ vimarśasyāpi 
avimarśāt kathaṃ bheda iti vimarśasya pāryantikaviśrāntisthānatvena aparyanu-
yojyatvāt | nīlaṃ hi kutastathā prakāśate yatastadapi kutastathā vimṛśyate yata 
etāvati paryavasitaṃ prameyasya prameyatvaṃ pramātuśca pramātṛtvamiti na 
adhikamupayācyate | apiśabdena prameyavṛttitvaṃ saṃbhāvyamānatvenāha | 
ahantāvimarśamayaḥ iti | yaduktaṃ

     idamityasya vicchinnavimarśasya---------| (a. pra. si. 15)

ityādi | nimīlya hi nayane nīlamidamiti vimṛśati | tatra ca ayaṃ paramārthaḥ-
ahaṃ nīlaprakāśatayā prakāśe iti | tāvatā iti adhikānapekṣāmāha | viśuddhe 
nīlādyuparāgaśūnye pramātari yā citsvarūpatā vimarśamayatvaṃ, tatra 
sātmatā ātmanā sādṛśyamātmarū-

(page 84)

patāsaṃpattirātmarūpatāsākalyamātmatāviśrāntirātmarūpatādhyavasānam 
| kiṃ bahunā | ātmani vimarśasya svarūpe sarvathā nimajjanamekībhāvo'rthasya 
| tasyāṃ satyāṃ me'rthasya asau pramātā bhavati yaḥ śuddhapramātā | evaṃ 
ca sati yogyatāmātreṇa yat nīlādi prameyamabhūt, tat vastutaḥ 
pramāviṣayatāpattyā prameyaṃ bhavati | anyathā iti yadi vimarśarūpatā na 
bhavet, tat vimarśasāmānyābhāve tadviśeṣo'dhyavasāyātmako niścayo na 
bhavet vyāpakasāmānyābhāve vyāpyaviśeṣāsattāprasaṅgāt | tataśca 
viṣayaḥ san na san, nīlo na nīlaḥ, iha na iha, idānīṃ na tadānīm, mayā 
dṛṣṭo'munā dṛṣṭaḥ ityevamanyatareṇāpi rūpeṇa na kaścidasau syāditi 
dvividhasvabhāvena ādhārasvarūpātmanā deśena kālena viṣayatayā ca na 
kiṃcidasya svarūpatattvamavatiṣṭhate | na kiṃcittvamapi na avatiṣṭhate, 
anaikāntikarūpatāpi na paryavasyet | tadāha dolāyamānataiva iti | śuddhasya 
pramātṛtvasya na dolāyamānatā śaṅkyā avirataprakāśatvāt | 
arthapramātṛtvasya ca iyameva avicalatā yā prameyasya, natu anyā kāciditi punaḥ 
sā pṛthak na upasaṃhṛtā | lokasya ca bāhyārthasādhyāmarthakriyāṃ prati 
bharaḥ | tena prameyasya upasaṃhāraḥ kṛtaḥ | upakrame ca pramātaiva prapatati, 
tataḥ pramātā pramātā bhavatītyuktam | anvācayena ca tatra prameyam | 
ahamityupakramā, nīlaṃ-jānāmītimadhyā, 
nīlametadarthakriyākārītyupasaṃhārā lokasya pratītiḥ | nanu mārgagatau 
tṛṇādi avabhātaṃ ca na vṛmṛṣṭamityāśaṅkya āha rathyāgamanādau ca iti, 
etadapi iti | apiśabdena idamāha-rathyāgamanena yata eva tṛṇādi bhātamapi 
abhātaṃ tṛṇādirūpeṇa avimṛṣṭatvāt, tata eva bhātaṃ vimarśe sati bhātaṃ 
bhavati idantāṃśamātreṇeti, ato vyatireko'nvayaśca

(page 85)

atraiva pradarśayituṃ śakyāveva prakāśavimarśayoriti | evaṃ mukhyatayā 
dṛṣṭāntapṛṣṭhe sūtravṛttyarthayojanaṃ ṭīkākṛtā kṛtam, tatprasaṅgena tu 
dṛṣṭāntatayaiva māyāpramātṛpṛṣṭhe | etadeva dārṣṭāntike yojayati evamasya 
iti | tathā prameyaṃ vimṛṣṭaṃ prameyam | tasya ca etadeva vimarśanaṃ-yat 
nīlaprakāśarūpo'hami ātmani pramātṛrūpavimarśanaṃ rūpam | evamasyāpi 
pramātṛrūpasya idameva vimarśanaṃ-yat viśuddheśvarasadāśivarūpatokrama-
paramaśivātmakasvatantrasvasvabhāvavimarśanam | yathāca nīlamātreṇa 
arthinastatpramātṛtvaṃ vimṛśyamānamapi nīlavimarśaṃ prati 
upakaraṇīkriyamāṇatvena avimṛṣṭaṃ bhavati, evaṃ nīlena tatpramātṛtāmā-
treṇa ca arthinaḥ parameśvarasvatantrasvasvabhāvāmarśanaṃ bhavadapi 
arthanīyabāhyārthakriyāṃ prati satatavāhidṛḍhāgrahagrastatayā 
asaṃcetyamānatvenāpi svarasavaivaśyena haṭhādeva māyāpramāturupakaraṇī-
bhāvaṃ prāpayato'satkalpam | pūrṇa iti nīlādyasaṃkocito yo'haṃbhāvākhyo 
vimarśastatsvabhāve yaścamatkāra ānandātmā paramo bhogaḥ, tasya yā 
āpattiḥ prāptiḥ; pūrṇāhambhāvasya vā yā camatkārāpattiḥ pradhānatayā 
vimṛśyamānatāpattiḥ; tayā upalakṣito yaḥ svātmarūpa īśvarastasya 
upalakṣaṇaṃ-sarvaireva īśvarasya lakṣaṇairnityatva-vibhutva-sarvakartṛtva-
sarvajñatva-sarvaśaktitvaprabhṛtibhiranīśvarāsādhāraṇairdharmaiḥ 
svasvabhāvīkṛtaiḥ iti aparāmṛṣṭatayā ye na svātmanaḥ svabhāvā abhūvan 
prakāśavimarśasāratvāt vastuvyavasthāyāḥ, ata eva hi nareśvaravivekaḥ 
pāramārthika eva, vidyodaye tu prādurbhūtaistaiḥ svasya ātmanaḥ 
svabhāvatāmāpāditaiḥ-bhavati | kiṃ tadupalakṣaṇamucyate ityāha tat iti 
bhairaveśvaralakṣaṇairyaḥ samyagāveśaḥ ā samantāt tatkartṛkaḥ svīkāraḥ, 
tasya yo rasaḥ pravāhastasya yat ā samantāt svādanaṃ parāmarśanaṃ

(page 86)

-ahamevaṃbhūto'pratiyogirūpa iti avikalpakam-natu śarīraprāṇabuddhyādinā 
nīlādinā ca vedyena apṛthaktayā vimṛśyamānatvena nyakkaraṇaṃ-tasya lābha 
iti | etadupalakṣaṇaṃ hṛdayasya āvarjanaṃ tadunmukhīkaraṇaṃ 
satyametadrūpamiti hṛdayaṅgamatvaṃ ca ucyate | nanu kathaṃ tadevaṃbhūtama-
nāsvāditapūrvamaiśvaryamāsvādagocarībhavatītyāśaṅkya āha hṛdaya iti | 
bhavet iti saṃbhāvyameva asya bhavanamiti yāvat | asādhāraṇamanīśvare 
yadasaṃbhāvyaṃ jñatvakartṛtvādi, tadeva abhijñānamekadharmātmakasva-
rūpamukhena anantadharmacitravastusvarūpapraveśābhyupāyaḥ, abhitaḥ 
svarūpasarvasvasvīkāreṇa vastu jñāyate yeneti; tasya khyāpanena prathanayā | 
anena śaktyāviṣkaraṇena iti vivṛtam, iyam iti dṛḍhaśabdena, pratyabhijñā iti 
bhāvasādhanaṃ niścayaśabdena | nanu ta--------nyeva svaprakāśatvāt tataśca 
avicchannakhyāpanasya kā khyāpanetyāśaṅkāṃ pradarśayan śamayati 
yadyapica iti vakṣyamāṇanayena iti |

kalodvalitametacca cittattvaṃ kartṛtāmayam |
acidrūpasya śūnyāderbhitaṃ guṇatayā sthitam || (3 | 22)

iti vakṣyate | prathāṃ nīyate iti | atrāpi vakṣyamāṇanayena iti saṃbandhaḥ | 
vakṣyate hi

mukhyatvaṃ kartṛtāyāstu bodhasya ca cidātmanaḥ |
śūnyādau tadguṇe jñānaṃ tatsamāveśalakṣaṇam || 3 | 23)

iti | tacca idaṃ cidrūpasya anyatra anupakaraṇīkaraṇaṃ śarīrādau, 
kāyaprāṇādervā kāyādirūpatānimajjanena cidrūpatodrecanamiti | etadeva 
prabhāvaḥ-prakarṣeṇa yadvaśāt bhāvyate anyavilakṣaṇatayā ca kartavyaṃ 
bhāvayatīti | etacca parāparasiddhiprādhānyeneti

(page 87)

vakṣyāmaḥ | siddhasya iti svarūpato jñaptitaśca | nanu ca siddhe vastuni yat 
pramāṇaṃ, tat kila vyavahārasādhanamiti prasiddham | tataśca tadanusāreṇaiva 
vṛttau vācyaṃ pratyabhijñānamātraṃ sādhyate itītyāśaṅkya āha sarva iti | 
jaḍapadārthaviṣaye hi siddhe'pi yat pramāṇaṃ vyavahārasādhanaṃ, 
tadavaśyamasiddhasya kasyacidaṃśasya antatastathā prakhyopākhyārūpasya 
vyavahārasaṃpattimapūrvāṃ karoti | ātmani tu īśvare na kiṃcidasaṃpannaṃ 
sādhyamasti prakhyopākhyayorapi siddhatvāt, tadasiddhau prameyaleśasyāpi hi na 
kācit siddhiriti uktam | atastadvyavahāramātramapi neha sādhyate, apitu upāṃśu 
cchannaṃ sthitaṃ sat, upasamīpe iti hṛdayasaṃgamanena pradhānatayā darśyate | 
ātmani īśvararūpe ye prakhyopākhye te mā anyatra dehādau nīlādau ca 
upakaraṇīye bhavetām, apitu te eva pradhānatayā paśyateti | tena vṛttau 
sūtrānusāreṇaiva upadarśyate iti uktam | loke jaḍaviṣaye yat vyavahāramātrasya 
sādhanaṃ, tadapi iha ajaḍe kriyamāṇaṃ pradarśanena samamavikalaṃ 
pradarśanamātrāvaśeṣaṃ pradarśanena ca paśya-paśyeti 
avadhānadāpanārūpeṇa tulyam | tadatra sūtre dṛṣṭe iti karmaṇi dṛṣṭāntā-
veśena akarmakatvāt kartari eva dārṣṭāntikābhiprāyeṇa vyākhyāne 
nirvivādasiddhatā nāma dṛṣṭatvamubhayatra tulyam || 3 ||

     bhāvisūtrārthaṃ saṃkṣepeṇa nirūpayati evaṃ ca iti | ātmaiva īśvaraḥ, 
sa ca siddhaḥ iti yaduktam, tadevaṃ; tasya yā pratyabhijñā karaṇabhāvasādhana-
tvena āviṣkriyamāṇā śaktistatkṛtaśca dṛḍhaniścayaḥ, tadapi evamityetadvastu 
sopapattikaṃ kṛtvā niścayaparyantaṃ darśayitumāha | upoddhātānantaraṃ 
vakṣyamāṇasya śāstrasya sā pratyabhijñaiva jñānakriyāśaktirūpā 
artho'bhidheyo jñānakriyādhikā-

(page 88)

rābhyāmāgamasaṃvāditārthābhyāṃ tattvārthasaṃgrahanirūpitatāt-
paryābhyāṃ jñānakriyāśaktyorvistarato nirūpaṇāt | dṛḍhaniścayaśca 
samastasya śāstrasya prayojanam | jaḍabhūtānāṃ jīvadāśrayaṃ pratiṣṭhānam, 
jīvatāṃ ca jīvanaṃ jñānakriye eva yasmāt, tasmāt tatheti ātmaiva īśvaraḥ 
sadā siddhaḥ iti hi śabdo hetuhetumadbhāvaṃ dyotayati | ātmanaḥ siddhatvam, 
aiśvaryaṃ ca yaduktaṃ kartari jñātari iti, tena prakāreṇa, yasmādidaṃ 
sakalalokasaṃmataṃ jaḍānāṃ jīvanmagnā siddhiḥ, jīvanasya jñānakriye 
tattvamiti upapadyate | nanu jaḍājaḍavargasyaiva ayaṃ vṛttānto nirūpito, natu 
anyasya | satyam | anyastu na ko'pyastītyāha vṛttikṛt vastūnām iti | nanu evaṃ 
sarvabhāvānāṃ yadi dvairāśyaṃ, tadā

     kriyāsaṃbandhasāmānyadravya------| (2 | 9)
ityādau
     dvayātmā tadrajo duḥkhaṃ śleṣi sattvatamomayam | (4 | 6)

ityādau ca yastṛtīyarāśisaṃbhavo vakṣyate, sa kathamityāśaṅkya āha ṭīkā-
kāraḥ bhāvābhāvayoḥ iti, nīlaṃ bahirabahiratatpracyavaḥ, tatpracyavāvinā-
bhūtāśca pītādaya iti na nīlaṃ te, nāpi te'nīlam, kintu ābhāsaparamārthā eva 
sarve'rthā iti ābhāsasthāne pramātari sāmānādhikaraṇyena vaiyadhikaraṇyena 
vā nīlānīle tāvat viśrāmyataḥ | pramātṛviśrāntaṃ ca vastūnāṃ 
pāramārthikaṃ rūpam | tacca tatsamanvayaśabdena uktam | tasmin rūpe sati 
tathaiva yat bāhyatvena adhyavasīyate, tadapi pramātrā na tatkālasṛṣṭam; apitu 
adhyavasitamīśvarasṛṣṭavastupṛṣṭhe tathaiva arthakriyākaraṇāt vastveva | 
bhagavacchivaśaktisadāśiveśvaravidyāmāyāsṛṣṭiḥ pramātṛsṛṣṭiścetyādi hi 
satyāsatyataddvayādirūpeṇeti vakṣyāmaḥ

(page 89)

     taddvayālambanā------------| (2 | 11)

ityādau | tataśca yadā vaiyadhikaraṇyena sṛjyate sṛṣṭyā artharūpaṃ nīlasya 
anīlaṃ kāryaṃ kāraṇaṃ sahakāri virodhi vyavadhi vā ādhāra ityādi, tadā 
bahirasau saṃbandhaḥ | sāmānādhikaraṇyasṛṣṭāvapi pāratantryeṇa sṛṣṭau 
citraṃ rūpam, paṭasya rūpaṃ yadeva nīlaṃ tadeva anīlamiti; atra 
tādātmyasaṃbandhaḥ sṛṣṭa ekārthasamavāyo vā | ekānekacitravādena ca 
virodhastasya anābhāsanasārasya pramātṛkṛtatvāt, anābhāsanābhāve 
tadabhāvāt | svātantryeṇa nirmāṇe'vayavi dravyam, yo nīlaḥ paṭaḥ sa eva 
anīlaḥ iti | yadyapi paramāṇorapi citratā upagatā, ākāśāderapi ghaṭena 
saṃyogaḥ, paṭena vibhāgaḥ iti yugapadviruddhasaṃyogatadabhāvamayatā; 
tathāpi sakalapramātṛgocare vastuni vicāraḥ | yā ca paramāṇvākāśādiprati-
pattirlaukikī, sāpica yogināṃ taddvārikaiveti avayavipadaṃ dravyaviśeṣaṇam | 
pṛthageva vā dravyagrahaṇaṃ tatsaṃgrahārthaṃ prasiddhatvena, prādhānyāt tu 
pṛthagavayavipadamupāttam | upalakṣaṇaṃ vā avayavidravyapadam | atra ca 
sarvatra pramātṛviśrāntirūpaḥ samanvaya eva prāṇitam | bahirapica tathaiva 
arthakriyākaraṇāt vastutaivātretyāha vastu saṃbhavet iti | nanu evaṃ 
tṛtīyarāśerūbhayātmano'nubhayātmano vā saṃbhave vipakṣāt vyāvṛtto'pi 
heturna sādhyena vyāpyeta gatyantarakṣayāyogāt | na | te--------nīlāt vyāvṛttaṃ 
hi nīlānīlādapi vyāvṛttam, nīlamapi hi tadanubhayarūpaṃ 
pāśavavikalpasṛṣṭameva bhavati na bāhyamiti tatrāpi na śaṅkitavyam | kiṃca 
anumānasya īśvaranīyatyupajīvanena prāmāṇyaṃ vakṣyate

     yoginirmāṇatābhāve------| (2 | 43)

(page 90)


ityādyuddeśeṣu | niyatiśca prācyaprasiddhyupajīvanī na vipakṣavyāvṛttiṃ 
pradhānatvena upajīvati | tadastu atra tṛtīyo rāśiḥ | cittattve tu bhāvānāṃ 
viśrāntiḥ, natu cittattvasya anyatra, yena cidacitoḥ sāmānādhikaraṇyena anyathā 
vā nīlānīlavat tṛtīyarāśirunmīlet | nanu bhagavatparamaśivavijambhārūpāt 
śaktitattvādeva ārabhya sadāśiveśvaravidyābhūmiṣu parāparadaśāyāṃ 
sāmānādhikaraṇyena ahamidamiti ca vakṣyate

     sāmānādhikaraṇyaṃ ca sadvidhā---------| (3 | 3)

ityādau | māyāpade ca śūnyadhīprāṇadehādeścidrūpatābhiṣekeṇa 
cidacidrūpatā vakṣyate | tathā ca nareśvaravivekaḥ

     aṇavaścidacidrūpāḥ------------------|

iti | mahāpramātari ca māyāpramātṛprameyayoryugapat prakāśa iti 
nirūpayiṣyate 

'grāhyagrāhakatābhinnāvarthau bhātaḥ pramātari |' (1 | 31)

iti | tat kathamuktaṃ natu cidacitoraparacittatvānupraveśaḥ iti | atrocyate-iha tāvat 
paradhāmni na kiñcit jaḍaṃ nāma, māyāpade tu nīlādayaḥ sṛjyante | teṣāṃ ca 
iyameva sṛṣṭiḥ-yadanyonyataścidrūpā acidrūpāśca nāneti bahuśākhena 
vaiviktayena ābhāsanam | iyaṃ hi sā pūrṇatvākhyātiriti vakṣyate | atrāpitu pade 
na cittattvasya sṛṣṭiḥ kācit tathātve jaḍatāpatteḥ | ahamidamiti ca prakāśe 
yo'hamaṃśaḥ, sa paramaśiva eva pūrṇaḥ | tatra paramidamaṃśaḥ unmīlan 
ahamaṃśe eva pratiṣṭhāṃ labhate | yat vakṣyate

     atrāparatvaṃ----------------| (3 | 5)
iti upakramya
     paratāhantayācchādāt------------| (3 | 5)

(page 91)

iti | nahi cidacidrūpayostulyakakṣyatā | cidrūpasya deśakālasvarūpavaicitryaṃ hi 
na kadācit, acidrūpasya tu na tadvaicitryavirahaḥ kadācit | sāmānādhikaraṇyaṃ 
tu vaiyadhikaraṇyaniṣṭhitapṛthaktvaprakāśābhāvamātre upacaritam | natu 
ahantedantayostṛtīyamadhikaraṇaṃ kiñcit samānamasti | naca yathā nīlameva 
anīlam, anīlameva nīlamiti ekaprāṇīkaraṇe'pi tadvibhaktobhayarūpaprakāśaḥ; 
tadvat yo'haṃ, tat nīlam, yat nīlaṃ, tadahamiti prakāśe, apitu nīlametat svayaṃ 
niḥsāramahaṃprakāśaprāṇitameveti | ata eva 

     aṇavaścidacidrūpā---------|
ityatra
     ------cittvādeko maheśvaraḥ |
     te na kecidacittvāt------------||

iti uktam | māyāpramātuśca yaḥ prakāśaḥ parame prakāśe, na asau 
pṛthagbhūtasya cidrūpasya, apitu śarīraprāṇādervedyarūpasyaiva | tasya tu 
pramātṛtā paramaśivaprakāśa eva, māyākṛtāt tu abhimānamātrāt tasya 
cidrūpatākalpanaṃ na tāttvikam | tathāhi ajaḍapramātṛsiddhiḥ

     yadyapyarthasthitiḥ prāṇapuryaṣṭakaniyantrite |
     jīve niruddhā tatrāpi paramātmani sā sthitā ||
     tadātmanaiva tasya syātkathaṃ prāṇena yantraṇā | (21)

ityādi | etacca sarvaṃ cittattvasya svayaṃprakāśatvāt ityanena uktam | yat 
svayameva prakāśate na anyatra prakāśata eva ca, natu prakāśyate'nyeneti, tadeva 
tattvataścidrūpam | tasya kathamanyatra ābhāsanam, anyat tu atattvataściditi | 
māyīya iti

(page 92)

bhedavyavahāro hi ayaṃ grāhyagrāhakabhāvalakṣaṇaḥ sarvasya prasiddhaḥ, 
tadapekṣayā tadanuvādena tattvopadeśaḥ kartavyaḥ iti dvaividhyamuktam | nanu 
pañca bhūtānītyāhuḥ pañcānāṃ bhūtaśabdavācyatvam ityādau tat 
kathamuktaṃ sūtre bhūtānāṃ jīvatām iti | etadāśaṅkya āha jīvo'pica iti | 
siddhaṃ bhavatikriyākartṛrūpaṃ hi bhūtamucyate | tat paramārthato jīvata eva 
bhūtatvamucitam, tatprasādena tu aparasya | pārṣadasamayastu aniyataḥ | so'pica 
atra astyeva | bhagavadgītāsu ca yadyapi

     buddhirbuddhimatāmasmi---------| (7 | 10)

ityādau saṃbandhaṣaṣṭhī, tathāpi bāhulyena nirdhāraṇaṣaṣṭhyaḥ

     ---------pāṇḍavānāṃ dhanañjayaḥ | (10 | 37)

ityādayaḥ śrūyante | samānajātīyānāmeva ca nirdhāraṇamiti cetanāpi 
bhūtarūpaiveti vastugrahaṇamiti vṛttau | tadapekṣayaiva iti | sā uktapūrvā yā 
apekṣā lokayātrāpekṣārūpā guṇabhūtāpivā lokayātrā buddhyā 
pṛthakkṛtya parāmṛśyate iti ṣaṣṭhīsamāsaḥ | lokayātrāyāṃ lokavyavahāre hi 
grāhyagrāhakavyatiriktaṃ na vastu bhāti | saṃsāriṇām iti 
tattvapratyabhijñānena anugrāhyāṇāmityarthaḥ | sākṣātkāre'nubhavātmani 
yat pratibhāsate, tadeva vāstviti dṛḍhasaṃbhāvitapṛthaktākatvena cidrūpe yatnena 
praveśanīyamiti yāvat | nanu smaryamāṇavikalpyamānāderapi arthasya citpraveśo 
nirūpya eva, natu kevalamanubhūyamānasyaivetyāśaṅkya āha na tadatiriktam 
iti | anubhavavāsanopajīvitvāt smṛtermanorājyotprekṣādivikalpānāṃ ca na 
tadvicāra iti | asphurato hi kathaṃ bhedābhedādi nirūpyate | nanu śāstritānāṃ 
yat bhāti, tat kimidānīṃ cidrūpāt bhinnameva astvityāśaṅkya āha 
śāstrasaṃskṛtānāmapi iti |

(page 93)

sāṃkhyasya yadyapi pañcaviṃśatistattvāni sphuranti, tathāpi pañcaiva bhūtāni 
cetanā cetyetāvanmātre tāvat sākṣātkārarūpo'nubhavaḥ, na adhike | tata eva 
tatrabhavato dhātuṣaṭkanirūpaṇe eva viśvaṃ nirūpitaṃ bhavatītyāśayena 
tatsamīkṣodyamaḥ | saṃbhāvanānumānāgamajaniteṣvapi jñāneṣu tadeva 
bhāsate, kevalaṃ yojanāmātramadhikam | yathā pṛthivī eva yā 
surabhyasurabhyādivicitragandhā tatraiva viśeṣatyāgena saukṣmyeṇa ca 
gandhatanmātrarūpateti | anubhūtameva iti adhyāruhyavādena evamuktam | 
sukhaduḥkhamohānāṃ hi guṇānāṃ sāmyavyāpakatvādi samāropya 
pradhānamupakalpitam | tatra ca sarvamanubhūtameva sukhādi tāvat dṛṣṭameva, 
sāmyaṃ ca madhurakaṭukāderdṛṣṭam, vyāpakatvaṃ ca paṭe rūpasyeti | 
tasmādidaṃ tātparyam-iha dvayī gatiḥ pradhānamidamiti | kiṃcit pṛthak sphurati 
cet, rūpādimayameva | atha na idantayā sphurati, athaca sphurati;  tadahantayaiva vā 
pṛthaktayā vā gatyantarābhāvāt | atha na sphurati, tat na kiṃcit | nanu sphurati ca 
idantayā rūpadyatiriktaṃ ca tathaiva ca utprekṣitatvāt | satyaṃ, tathāpitu jānāti, 
mamāntare tat sphurati, pramātrantaḥsphurattaiva ca upadeśyā | 
pramātraikātmyamāntaryamiti hi vakṣyate | sā cet siddhā, kimanyena | ata eva āha 
sukara iti | sukaraṃ sarvajanavedyaṃ pramātari antarbhāvanamapṛthagbhāvanaṃ 
yasya tat tathā | yatastadavastunā khapuṣpādinā vāhyena tulyamiti tadanūdya yadi 
tasya pramātrapekṣayā dvayaṃ pramāturabhinnatvaṃ sādhayitumārabhyeta, 
tadanyebhyaḥ śāstrebhyaḥ pṛthaktvapradhānebhyo na asya vailakṣaṇyaṃ syāt | 
tathāhi khapuṣpaṃ pramāturna pṛthagiti ukte ghaṭādernirbhāsamānasya na 
advayarūpatvamupapāditaṃ bhavati | yasya ca khapuṣpasya upapāditaṃ, na tat 
pṛthagbuddhyā kaścana pratipadyate | kathaṃ sukarapramātrantarbhāvanam iti |

(page 94)

āha tathāhi iti | yeṣāṃ vikalpanamekaṃ prayojanaṃ, natu bāhyaṃ kiñcit; 
vikalpane eva ca ye bhāvāḥ, natu bahistatra asphuraṇāt, te vaikalpikāḥ | 
teṣāmātmarūpāṇāṃ jñānākāramayānāmavabhāsaṃ bhūyasā iti 
saugatavedāntādidṛśā pratipannāḥ

     ---------bhrāntiḥ sā vāsanāmayī |

ityuktatvāt | nanu ātmā vā jñānaṃ tadvāsanāṃ vā tadākāro vā tattvena na 
bhāti, apitu idaṃ rajatamiti idaṃrūpabāhyākāreṇa | saca eṣāmasan, asataśca 
ko'ntarbhāva ityāśaṅkya āha satkhyātāvapi iti | iha antarbhāvena na kiṃcit 
kṛtyam, kevalamātmaiva asti, natu anyaditi pṛthaktvena dvaitaparivarjanamupa-
deśyam | avastunaśca avastutvāt pṛthaktvaparivarjanaṃ svataḥsiddhameva | nanu 
yadyapi tadavastu vaikalpikaṃ, tathāpi bāhyarajatatayā tadadhyavasīyate sā ca 
astyeveti avastubhūtā kathamityāśaṅkya āha adhyavasāyāpekṣayāpica iti | 
adhyavasānaṃ na vastuspṛk, kathamasya tat vastutāṃ vitarediti tāvadāstāmiha | 
pradhānavikalpe tu idaṃ tat bāhyaṃ ghaṭādimadhyaniviṣṭaṃ pradhānamiti 
adhyavāsāyo nāsti | sahi avikalpakadarśanamūlaḥ | tacca iha nāsti, 
vikalpāntaramūlatāyāṃ tu anavastheti iyato'rthasya dyotanāya apiśabdaḥ | 
caśabdaḥ pūrvapakṣaśaṅkāṃ sūcayan prameyaṃ samuccinoti | na kiñcit iti | 
pradhānāderna tādṛśaṃ rūpaṃ kiñcit, yat kṛcchreṇa yatnanirūpaṇena 
parihriyate dvaitarūpeṇa pṛthaktvena parivarjyate | sāṃkhyaiśca amunaiva 
āśayena anumānāgamādivedyatve'pi pradhānāderasaṃvedyaparvatvaṃ 
pradarśitam | smaraṇavikalpanādau ityādeḥ na kiñcit duṣpariharaṃ syāt 
ityantasya granthasya itiśabdena

(page 95)

heturūpatāṃ dyotayan prakṛtopayogamāha | niḥsandehaprasiddhatvaṃ 
sākṣātkārajñeyatvaṃ na kiñcit prati asiddhatvaṃ ca upapādayitavyam iti 
upapādanārhaṃ yatnenetyāśayaḥ | uktaṃ bhavati iti sūtravṛttibhyāmiti śeṣaḥ 
| evaṃ dṛḍhanyāyaghaṭanā uktā tāvat-yat yatra lokasya siddhaṃ, na tat tatra 
yatnena upapādyaṃ nīlasya iva nīlatvam | tathāca pradhānamāyādāva-
pṛthaktvamiti yatnena upapādyasya vyāpakamaprasiddhatvam | prasiddhatve'pi hi 
yadi syāt, tat sarvatra bhavediti na jātu tūṣṇīko janaḥ syāditi tadvyāpakakādā-
citkatvaviruddhasārvatrikatvaprasaṅgādaprasiddhatvena yatnasādhyatā vyāpyate, 
tasya ca viruddhaṃ prasiddhatvamiti vyāpakaviruddhopalabdhiḥ | atha ye 
dṛḍhanyāyanibandhaṃ na sahante kṛpālośca na vyutpādyāḥ, tān prati 
sāvahelaṃ pakṣāntaraṃ parigṛhya sūtravṛttī vyācaṣṭe athavā iti | bhūta-
śabdena sūtre bhavatītivyutpattibhājā, vastuśabdena vṛttau vasatīti vyutpannena 
kiṃ kiṃ na saṃgṛhītamiti yāvat | pratyakṣaṃ pṛthivyādi, parokṣaṃ tadgataṃ 
deśakālāvasthābhinnaṃ vaicitryamatyantātīndriyaṃ ca asmadādyapekṣayā, 
natu mantreśvarādyapekṣayā, pradhānādi | saṃvedyalakṣaṇam iti jaḍaśabdena 
viśeṣaṇāditi bhāvaḥ | tathā nirdeśaḥ iti sūtre jaḍabhūtānām iti 
vastūnāṃ jaḍa iti vṛttau | nanu bahūnāṃ tanukaraṇabhuvanādirūpāṇāṃ 
vedyānāṃ brahmādīnāṃ sthāvarāntānāṃ vedakānāṃ ca tenaiva rūpeṇa 
īśvaraikātmakatvaṃ kiṃ na-ucyate, kimavāntare jaḍājaḍatayā vargadvaya-
siddhaye sūtre jaḍajīvadgrahaṇaṃ vṛttau ca jaḍājaḍabhedapadamityā-śaṅkya 
āha dvairāśyena ca iti | cakāraḥ prameyaṃ samuccinvānaḥ pūrvapakṣaṃ 
dyotayati | evamanyatrāpi yathāyogaṃ yojyam | ayaṃ bhāvaḥ-niḥsaṃkhyākā 
api amī bhāvāstāvat jaḍamajaḍamiti  ityatā rūpeṇa vimṛśyante ca prakāśyante

(page 96)

ca tadvimarśaprakāśaparavaśatvācca bahutvamujjhitvā dvaidhe śiṣyante | 
tadekatāpi abhinnadurlabhā | prakāśavimarśarūpāṃśca īśvara eva 
svatantrastānātmabhūtān yathāruci racayati, naiṣāṃ kimapi prātisvikaṃ 
tattvamiti | jhaṭiti ca anantānāmaikyaṃ kathamaṅgīkurute hṛdayamityapi 
vargīkaraṇam | nanu ajaḍo vargaḥ pūrvaṃ vācyaḥ prādhānyāditi | nirākaroti 
jaḍasyaiva ca iti | jaḍaṃ hi pūrvasiddhamanūdya cidrūpe'ntarabhāvanīyaṃ 
yatnena, natu cidrūpasya cidrūpāntarbhāvanaṃ yatnasādhyam | vyāmohāttu yat 
tatra anaiśvaryaṃ bahutvaṃ ca abhimanyate, tat kevalamapasāraṇīyam | tena 
yatnasādhyacidantarbhāvanaṃ pūrvaṃ jaḍamuddiṣṭam | tatra iti vṛttipadaṃ 
paṭhitvāvyācaṣṭe tayorjaḍājaḍayoḥ iti | itthaṃ ca atra avataraṇikā-viśvasya 
tāvadīśvaramayatvaṃ vaktavyam | tatra jaḍasya īśvaramayatve

     puruṣa evedaṃ sarvam |

ityādinyāyena vaktavye kimantarālanirūpitayā jīvallagnatayeti | tatra āha 
jaḍātmanaḥ iti | anirūpitasya aprakāśitasya ca jaḍasya kharaśṛṅgapratimādapi 
śocyasya kiṃ nirūpyatām | prakāśavimarśau ca na tasya nijau | mama prakāśate, 
mayā vimṛśyate iti hi vyavahāraḥ | nanu īśvarasadāśivaśaktibhuvi ahamidamiti 
prakāśavimarśatādātmyameva bhāvānāmityāśaṅkya āha tadāca iti | tatra ca 
kiṃ dvaitabhrānterapāsanena tasyā abhāvādeveti āśayaśeṣaḥ | adya tu iti 
māyāpade yatnopadeśyatādaśāyām | dvaitavādibhirapi yadaṅgīkṛtaṃ 
saṃvinniṣṭhatvaṃ viṣayavyavasthānāṃ, tat krameṇa saṃvittādātmyaṃ 
paryavasāyayati jīvatparatantrā jīvallagnā jīvadbhūtamagnā ityādinā | 
niṣṭhā hi tadāyattatvaṃ, tadapi tadviśrāntatā, sāpica tadantarlīnatvamiti jīvata 
evaṃbhūtatvaṃ

(page 97

vastutvamavaśiṣyate ityantavyākhyānapade bhūtaśabdasya āśayaḥ | 
siddhaparatantrabhāvāḥ iti | parairapi tāvadeṣāṃ saṃvitpāratantryamaṅgī-
kṛtam, yadbalācca saṃvittādātmyamāyāntītyarthaḥ | vakṣyamāṇanayena iti

     prakāśātmā prakāśyo'rtho nāprakāśaśca sidhyati | (1 | 34)

iti | ajaḍapramātṛsiddhirapi

     evamātmanyasatkalpāḥ prakāśasyaiva santyamī |
     jaḍāḥ-----------------|| (15)

iti | anena iti jaḍānāmantarāle jīvanniṣṭhatānirūpaṇena | amumeva 
jīvatsopānā-rohaṇadvāreṇa jaḍānāmīśvarabhāvopadeśamabhipretya 
tattvārthasaṃgrahā-dhikāre

     ātmaiva sarvajantūnāmeka eva maheśvaraḥ | (1)
iti jantugrahaṇam |
     ātmaiva sarvabhāveṣu------------------| (2)

iti śivadṛṣṭau saptamyarthaṃ yatnasvīkṛtaṃ vyākhyātuṃ paṭhiṣyati 
bhūtatvāviśeṣe'pi iti | na anyadeṣāṃ jaḍāt vailakṣaṇyakāri rūpamiti 
abhiprāyaḥ | jīvanasaṃbandhaḥ ityanena kriyāsaṃbandho'tra pravṛttinimittamiti 
hṛdi nidhāya samāsakṛttaddhiteṣu saṃbandhābhidhānamiti manyamānaḥ 
śatrantaṃ jīvacchabdaṃ sādhyamānāvyuparatajīvanakriyāvadabhidhāyakaṃ 
sūcayati | jīvatāmityupakramya jīvanaṃ jñānakriye ityekavacanena 
saṃvidaikyaṃ pāramārthikamāha | nanu jīvanaṃ yadi jñānakriye, tadā 
tatsaṃbandhaḥ svātantryasya heturiti kiṃ kena saṃgatamityāśaṅkya āha te eva hi 
svātantryaṃ vakṣyate iti |

     citipratyavamarśātmā parā vāksvarasoditā |
     svātantryametanmukhyaṃ tadaiśvaryaṃ paramātmanaḥ || (1 | 45)

(page 98)

ityatra hi prakāśarūpaṃ jñānaṃ, vimarśarūpā ca kriyetyetadeva svātantryamiti 
nirṇāyiṣyate | nanu bhavatāṃ jñānakriye svātantryaṃ, jīvanaṃ tu te iti kutaḥ | 
tat hi prāṇadhāraṇamātramityāśaṅkya āha jīvanaṃ hi iti | hiśabdena asya 
granthasya prāguktajñānakriyātmakajīvanasamarthanāya hetutāṃ dyotayan 
pūrvapakṣāśaṅkāṃ sūcayati | satyaṃ prasiddhaṃ prāṇadhāraṇatvena 
jīvanam, prāṇaśabdastu atra prāṇādipañcake vartate | tasya ca dhāraṇaṃ 
yathāsthānaṃ yathākriyaṃ ca avicaladrūpatākaraṇam | tacca cakṣurādīnāṃ ca 
buddhīndriyāṇāṃ vāgādīnāṃ ca karmendriyāṇāṃ 
mano'haṅkārabuddhyā-tmanā antaḥkaraṇatrayeṇa saha militānāṃ 
trayodaśānāṃ bāhyāt rūpadarśanādeḥ 
śabdoccāraṇādernīlādisaṃkalpādeśca vṛttiviśeṣāt yā anyā āntarī 
vṛttiraśaktiviśeṣāndhyādividhvaṃsitarūpadarśanādibāhya-vṛttitve'pi 
eṣāmapratihanyamānā vṛttiḥ saṃrambhodyamanaprayatnādiparyāyā, tayā hi 
paravaśīkṛto vāyurnaisargikīṃ tiryaggatimavadhūya 
prāgavāksamordhvavyāptinayanādanvarthaprāṇādipañcakātmatāṃ bhajati | 
saṃrambhodyamanaprayatnāśca jñānarūpāḥ parāmarśātmānaśceti | tatra 
jīvane jīvanavyavahāre jñānakriyayorantarlīnatā apṛthaktvena abhidhānāt vana 
iva dhavādīnām | nanu jāgratsvapnayoḥ stāṃ jñānakriye, suṣṭhusuptatāyāṃ 
tu gāḍhanidrārūpāyāṃ kathaṃ te, naca tadā na jīvatīti vyavahāra iti 
śaṅkitvā āha suṣuptāvasthāyāmapi iti | atra hetumāha-
buddhikarmendriyāṇāṃ militānāṃ satāṃ trayodaśānāṃ yasmāt kāryaṃ 
suṣuptāvasthāyāmapi prāṇādipañcakapreraṇaṃ, tasmāt jñānakriyātmakam | 
buddhīndriyakāryaṃ hi jñānaṃ, karmendriyakāryā ca kriyā | nanu evaṃ 
jānāmi karomīti suṣupte'pi bhāseta, ajñāsiṣamakārṣamiti ca smaryate, naca 
evamityāśaṅkya āha antarlīne

(page 99)

iti anudbhinnaviśeṣe ityarthaḥ | etaduktaṃ bhavati-trayodaśānāmindriyāṇāṃ 
sattārūpāyāṃ prāṇanalakṣaṇāyāṃ vṛttau jāgrati iva guṇapradhānabhāvā-
bhāvāt samānābhihārāt adhyavasyāmītyādi yāvadānandajananakriyāvān 
bhavāmītyantaṃ ye viśiṣṭā jñānakriyābhedāḥ, teṣāmanyatamo na 
udriktatayā bhātīti na viśeṣāṃśollekhanaṃ vinā sphuṭastatpratyavabhāsaḥ, 
sāmānyarūpatayā tu jñānakriye sta eva | nahi prabuddhasya pratyavamarśe 
ahamityetadrūpaṃ vicchinnaṃ punaruditamapūrvamiti bhāti | etacca vitatya uktaṃ 
tadātmaviviktapūrvakāladṛśvanā ityatra | jāgratsvapnayorapi sā tādṛśī 
sāmānyajñānakriyārūpā jīvanaśaktiranullikhitaviśeṣā āntarī 
sāmānyakaraṇavṛttirastyeva; kevalaṃ tatra guṇapradhānabhāvamahimnā bāhyā 
kasyacidindriyasya vṛttirullasati, tataḥ saiva sphuṭatvena bhāti; natu sāmānyarūpā 
śāvaleyapratītāviva gotvam | tena iha tatra ca suṣuptāvasthāyāmapi iti 
sāmānādhikaraṇyenāpi yojyam | tat jīvanaṃ jāgradādāvapi suṣuptāvasthaika-
rūpaṃ yadyapi uktāt nyāyāt, tathāpi antarlīnajñānakriyākameva | nanu 
buddhiprāṇādāvahamaṃ śarasābhiṣeko bhagavanmāyāśaktyupakalpito 
jīvanam, ahamityeva ca jñānakriye, tat naisargikyāveva te, tatra 
buddhikarmendriyakāryatvaṃ katham | satyam, kintu saṃsārijano'ṅgīkṛtabheda-
graha iti pratibodhyate | naca tasya bhagavacchaktyādi kiñcit viditamiti tena rūpeṇa 
kathaṃ pratibodhyatām, viditatve vā kimanyat pratibodhyatām | sarvatra ca aiśvare 
pāramārthike svātantrye sthite'pi tanniyatiśaktimahimnā avāntaro'pi ayaṃ 
kāryakāraṇabhāvo nirbhāsamānatvena satya iti so'pi aṅgīkriyata eva | tatra ca 
buddhikarmendriyāṇāṃ bahirvṛttiryathā ghaṭamadhyavasyāmītyādikā, tathā 
anullikhitaviśeṣā

(page 100)

antarapi jīvanarūpā astyeveti na kiñcit duḥstham | nanu evaṃ svātmavarttina eva 
jñānakriyātmano jīvanasya avabhāsanaṃ syāt | tataḥ kim | parajīvatāṃ na 
aiśvaryamuktaṃ syāt | tato'pi kim | tarhi dvaitaṃ bhāsate | bhoḥ prāmāṇikā yadi 
te pare jīvanto jīvattayā na bhānti, tadamī jaḍāḥ, teṣāṃ ca jīvallagnataiva ukteti 
kathaṃ tairdvaitam | atha bhānti,  tathāpi jīvanaṃ jñānakriye eveti kathaṃ 
dvaitam | bhāntītyeva ca pakṣo yukto jīvati viparīte ca vyavahārabhedāt | nanu 
āntarī vṛttirjīvanarūpā, sā kathaṃ parasaṃvedyetyāśaṅkya āha bahirapi iti | 
antastāvat jīvanaṃ darśitam, bahirapitu yat viśeṣavṛttirūpaṃ vacanādānādi, 
tadapi viśeṣasya sāmānyāvinābhāvāt vā sāmānyapariṇā-matvāt vā 
jīvanarūpam, na kevalaṃ svasaṃvedyam, yāvat parairapi saṃvedyate | atra arthe 
tatrabhavadbhartṛharipaṭhitamāgamaṃ likhati tadutkrāntau iti |

     arthakriyāsu vāksarvānsamīhayati dehinaḥ |
     saiṣā saṃsāriṇāṃ saṃjñā bahirantaśca vartate ||
     tadutkrāntau visaṃjño'yaṃ dṛśyate kāṣṭhakuḍyavat | (vā. pa. 1 | 128)

tasyā utkramaṇe kāṭhakuḍyatulyo'yaṃ naṣṭasaṃjña iti pratyakṣeṇaiva dṛśyate 
| tacca naṣṭamiti bhāti yat saditi pratyakṣeṇaiva bhāti | tena vāgādidvāreṇa tat 
tādātmyāpannamāntaramapi jīvanaṃ pratyakṣatvenaiva abhimanyate, natu

     buddhipūrvāṃ kriyāṃ dṛṣṭvā svadehe'nyatra tadgrahāt |
     kalpyate yadi dhīḥ----------------||

(page 101)

iti nītyā kevalānumānagocaratayaiveti | etaduktaṃ bhavati-paraśarīre'pi yāvat 
gauratvaśyāmatvakṣuttṛṣṇāsukhaduḥkhādi vedyabhūtaṃ, tāvadanyajaḍavat 
jīvati pratibimbitaṃ bhāti; jīvanaṃ tu jñānakriyārūpaṃ svātmatādātmyenaiva 
| tathābhāsanasya ca pramātṛbhedonmūlanaphalasya śuddhavidyārūpasya 
saṃsārarakṣaṇa------loko'tra

     buddhipūrvāṃ------------|
     --------------||

iti nayena anumāna eva sātiśayaṃ nibaddhādaro bhavati || 4 ||

     nanu jñānakriyātmakaśaktyabhijñānahetunā ātmani 
aiśvaryavyavahāraḥ sādhyatāṃ nāma | sa eva tu hetuḥ kathaṃ siddhaḥ 
ityāśaṅkya tatra jñānaṃ iti yat sūtraṃ, tatsaṃkṣepābhidheyaṃ ṭīkākāro 
nirūpayati evaṃca iti |

     tatra jñānaṃ svataḥ siddhaṃ kriyā kāyāśritā satī |
     parairapyupalakṣyeta tayānyajñānamūhyate || (5)

tatreti tayormadhye svātmani jñānaṃ svaprakāśaṃ, kriyāpi āntarī 
saṃvedanādavyatiriktā vimarśarūpā svaprakāśā | saiva śarīraparyantībhūtā 
tu bāhyadarśanasparśanādigamyāpi parapramātari tu kāyaparyantībhūtā 
vyāpāravyāhārarūpā darśanādipramāṇagamyā tādātmyāt tatkāryatvāt 
tatparyantatvādāntarasaṃvedananirbhāsamapi karotīti svaparapramātṛgataṃ 
jīvanaṃ jñānakriyātma siddhaṃ heturūpaṃ, tata aiśvaryavyavahāra-
sādhanamiti ślokasya tātparyārthaḥ | ūhyate  iti na anumeyatāmātraṃ 
parasaṃvedanasyetyāha ūhanaṃ tarkaṇaṃ saṃbhāvanam iti | atrāṃśe 
indriyavyāpāraṇamapi asti, tataśca sākṣātkāramupalakṣayati ūhaḥ | so'pi hi 
paramārthataḥ parasaṃvedane'sti, paratvaṃ tu māyāmohakṛtamabhimānamātra-
sāramiti hi uktamavataraṇikāyāṃ

(page 102)

svaparopakrame'pi svasaṃvedanasiddhamiti sāmānyābhidhānāt | nanu jñānaṃ 
viṣayaprakāśasamaye na ekāntena prakāśate, apitu viṣayaḥ prakāśate, na 
tatprakāśaḥ | sa tu yadā prakāśate, tadā jñānāntaragrāhyatayaiveti 
ākṣapādīyamāśaṅkya āha parapakṣe prakāśate iti | viṣayaḥ prakāśate iti 
hi yadi viṣayasya dharmaḥ, tanmameti niyamena pramātṛlagnatā na syāt | 
pramātṛkāryatvena tatheti cet, na kāraṇena kāryasya tallagnatāvabhāsaniyama-
karaṇaṃ, na dṛṣṭaṃ yataḥ | evaṃ hi sati kuvindasyaiva paṭa iti syāt, 
pramātṛlagnatābhāve ca sa viṣayaprakāśaḥ sarvān prati, na kaṃcit vā pratīti 
sarvajñaṃ suptaṃ vā jagat syāt | atha prakāśate iti nāyaṃ viṣayasya dharmaḥ | 
tarhi kasya | ātmana iti cet, viṣayaḥ prakāśate iti ātmani rūpaṃ samavetamiti 
ātmā viṣayaprakāśamaya eveti āyātam | tathātvaṃ ca tasya yadi ātmano na 
bhāsate, tadatathābhūtarūpatvāt ko'sya viśeṣaḥ | śuklaguṇayogāt hi yaḥ 
śuklaḥ paṭaḥ, sa yathā jaḍastathāprakāśamānatve svātantryavirahāt; tathā 
ātmāpi bhavet | viṣayaprakāśayoga eva vāstavena vṛttena bhavan 
jaḍatvādātmānaṃ rakṣatīti cet, astvevaṃ tāvat; tathāpitu svātmapa-
rātmaviveko na syāt | parātmāpi hi vāstavena viṣayaprakāśātmakajñānaguṇa-
samavāyabalena jñātā cetano naca prakāśate, svātmāpyevamiti, ahaṃ 
jānāmīti yadātmani svātantryamanubhūyate parātmavivekena tat 
kathamupapadyate svātmani jñānāntareṇa jñātṛtārūpaṃ gṛhyate na 
parātmani, tatkathaṃ na svātmaparātmanorvivekaḥ | tadapi jñānāntaraṃ yadi 
anyat jñānamapekṣate, tadanavasthā | tathāpi ca svātmaparātmavivekasiddhiḥ | 
tata eva uktaṃ

     vijñātāramare kena vijānīyāt |

(page 103)

iti | kiṃca viṣayasya tāvat na prakāśo dharma iti sa tāvat na prakāśate, 
viṣayaprakāśarūpamapi jñānaṃ na prakāśate, 
tadgrāhakajñānāntaramālāpi kalpitā na ābhāti, tatsamavāyakāraṇabhūto'pi 
ātmā na prakāśate, tatprakāśarūpamapi jñānaṃ na svayaṃ bhāti, 
tajjñānāntaramālāpi evamiti anavasthānāt na kiṃcit bhātīti andhaṃ jagat syāt 
| tadetadāha paraprakāśatve ca anavasthādi iti | 
ādigrahaṇādanyonyāśrayacakrakāsaṃbhavānubhavaviro-dhāḥ | 
viṣayaprakāśātmanā hi jñānena ātmānumānarūpaṃ jñānam, ahaṃ 
ghaṭaṃ jānāmi ityevaṃbhūtaśca viṣayaprakāśaḥ | ghaṭo'yamityatrāpi hi 
mayā vedyate iti antaḥ praviṣṭam |------------------tyaṃvālasyādanuccā-raṇe'pi 
iyataḥ ahamiti ca idamātmajñānaminyonyāśrayam | sukhādijñānānu-mitena 
śabdādijñanāntareṇa ātmānumāne'dhikānupraveśakṛtaṃ cakrakam | 
hetuprakāśa eva na saṃbhavatīti asaṃbhavaḥ | naca ātmani nirbhāsamāne 
vyavadhānalavo'pi saṃvedyate iti anubhavavirodhaḥ | anyatra iti, athavā 
pratyakṣasādhana evendriyadhiyaḥ kalpanāvirahaḥ iti | jitaṃ jaḍaiḥ ityādi | 
arthajñānaṃ ca nāma buddhisādhanaṃ pratyeti, na buddhimiti 
ślāghanīyaprajñaḥ iti | apratyakṣopalambhasya na arthadṛṣṭiḥ | nahi 
viṣayasattayā viṣayopalambhaḥ, kiṃ hi tarhi, tadupalambhasattayā | sā ca 
apramāṇikā | sattānibandhanān vyavahārī uparuṇaddhi, tadaprasiddhau viṣayasya 
aprasiddhiḥ-ityastaṃgataṃ viśvaṃ syāt | upalabhate saṃvedanamanyena iti cet 
ityādi, tat na tāvadayaṃ puruṣaḥ kaṃcidarthaṃ pratyeti upalambhaniṣṭhāṃ 
pratīkṣamāṇaḥ, naca sā astītyādi viniścayavārtikādipradeśeṣu | nanu na 
kārikāyāṃ jīvadgrahaṇamasti, tat kathaṃ vṛttāvuktaṃ jīvatāmiti | 
etadāśaṅkya āha jīvatvākṣipte iti |

(page 104)

jñānaṃ kriyā ca jīvatāṃ jīvanam iti pūrvasūtrārthaparyālocanādevaṃ 
labhyate | tacca vispaṣṭīkaraṇārthaṃ vṛttau vyākhyātamityarthaḥ | tat iti 
jīvatvavyavahārasya nibandhanaṃ nimittam | yato jñānakriyāsaṃbandhaḥ, ato 
jīvannayamityevaṃbhūtanirbhāsopakramo jānāti karotyayamiti vyavahāraḥ, 
so'pi jānāmi karomītyatra bhavan anyadehāṃśaṃ svadehamiva kurvannahantā-
paramārtha eva | nanu jīvanaṃ jñānakriye eva iti pūrvamuktam, tacca anena 
ākṣepanibandhanabhāvavyavahāreṇa virudhyate tasya bhedamūlatvāt | satyaṃ, 
kintu jīvatīti prāṇān dhārayatītyarthe jñānakriye antarlīne; yadi vā jīvatva-
śabdena jīvanavyavahāra eva ucyate | jīvatyayamiti hi vyavahāre kuta iti praśne 
jānāti karoti yata iti uttaramāhuḥ, tathā jānāti karotyayamiti vyavahāre kuta iti 
paryanuyoge yato jīvatīti āhuḥ | parasparāvinābhāvāttu pūrvamuktaṃ jīvanaṃ 
jñānakriye eveti | abhede'pi vā vikalpoparacitastāvadasti bhedaḥ, jīvatīti hi anyo 
vikalpaḥ, anyaśca jānāti karoti iti | tadvyāvṛttibhedopakalpitabhedatvāntar-
nibandhanatā  tādātmye'pi yuktā saugatamate iva ākārayogasya 
pramitinibandhanatā | yathoktaṃ

     tadvaśāttadvyavasthānāt------|

iti | nanu jñānaṃ kriyā ca iti sūtraṃ, tadullaṅghya vṛttau kriyā kasmāt 
pūrvaṃ vyākhyāyate ityāha kriyā ca iti | caḥ pūrvapakṣaṃ sūcayati | 
kāyaspandarūpatvaṃ prāptā satī tasya kriyāvataḥ pramātuḥ svātmani 
prasiddhā, yat pramātṛvyatiriktasya ca pramātrantarasya dārśanaspārśanasphuṭa-
pratyakṣāvaseyeti nirvivādasiddhā, ato'tra aiśvaryaprasādhakahetvabhidhāna-
prasaṅge saiva pūrvamupādeyā hetoravivādasiddhasya upādānayogyatvā-
danyathā sādhyasamatvānavasthādidūṣaṇayogāt | parapramātari

(page 105)

ca dharmiṇi yadaiśvaryaṃ sādhyaṃ, tatra svātmana iva parapramāturdharmiṇaḥ 
sarvātmagataiśvaryānumāpakapramātrapekṣayā ahamitisvaprakāśatvābhāve 
dharmyasiddhatārakṣaṇārthaṃ kriyayaiva siddhiḥ kartavyā | tadanena 
utkarṣadvayena vṛttau kriyā pūrvaṃ vyākhyātā | tarhi sūtre'pi evaṃ kasmāt 
noktamityāśaṅkya āha paravāgvṛttyādikā iti | sā hi kriyā mūlabhūmau 
saṃvedanameva avalambate vimarśarūpatvāt | vimarśasya ca 
saṃvedanāvalambitvāt śabdanarūpatāsvīkāreṇa vimarśarūpatābhidhānāya 
vākpadamupāttam | tathāhi avyatiriktaprakāśasya yā svātmani viśrāntirahamiti 
anullikhitapratiyogikalpanatadāropaṇatadapasāraṇādikā, sā parā pūrṇā 
sarvasya svarūpaparamārtharakṣaṇena pālanena sarvotkṛṣṭā ca vāgrūpā 
vṛttirvimarśakriyā | ullikhitamapi idaṃbhāgamahaṃbhāvagrastatayā praroha-
rahitamāsūtrayantī paśyantī ahamidamiti | tameva ahaṃbhāvādākarṣantī 
madhyamā ahamidaṃ jānāmi karomīti | tathaiva paraṃ prati jijñāpayiṣuḥ 
prāṇe sphuṭībhūtā vaikharī, śarīre tu spandanarūpā kriyā | iyati ca sarvatra 
vimarśarūpataiva anugatā | calāmi śiraścālayāmītyevaṃ bhūtavimarśasā-
raiva hi  śarīre tadavyayave ca kriyā | aparispandarūpāpi tiṣṭhāmītyādikā kriyā 
kartari kramikatāparāmarśaparamārthaiva | tata eva sā jaḍajalaśilādigatacalana-
sthānādikriyāto vilakṣaṇākārā | jaḍagatāpi tu kriyā jaḍasya 
svātmaniṣṭhatānupapatteryanniṣṭhā tatpramātṛsaṃvinniṣṭhaiva 
jñānaśaktirūpamūle ahamityātmani idaṃbhāvasyāpi calatītyātmano 
viśrāntatvāditi sarvā kriyā vimarśarūpeti | vṛttau ca ayamarthaḥ pūrvāvasthā-
saṃbhavasūcakacvipratyayaprayogeṇa svīkṛtaḥ ṭīkākāreṇa vyākhyātaḥ, 
sautraśca kramo vyākhyātaḥ | yata eva jñānasyaiva kriyā pucchabhūtā, 
jñānaṃ ca pramāturapṛthagbhūtaṃ, saṃvedya-

(page 106)

bhedātkalpitabhedam, tata eva svabhāvaheturayaṃ vastutaḥ, na kāryahetuḥ | 
vitatasya srotasa iva aṃśamātrarūpaṃ hi vyāpārātmakaṃ spandanam | 
svabhāvahetuśca sarvo 
mohavaśāropitāpāramārthikarūpāntaraparākaraṇamātraparyavasita iti 
vyavahārasādhaka eva abhidhīyate, natu aprasiddhaprasādhanarūpa iti vāstavaṃ 
svaprakāśatvaṃ jñānasya pramātustadaiśvaryasya ca maulikaṃ na vighaṭate iti 
atra granthakārasya āśayaḥ | nanu kriyayā yadi dharmī cikīrṣitaḥ paraḥ pramātā 
anumīyate, hetubhāgaśca jñānātmā; tadā vedyarūpatvena pramāturjñānasya 
ca idantāparāmṛśyatvena jaḍatāprasaktirityāśaṅkya āha pramātṛtā ca iti | 
pramātṛtā saṃvidrūpatā, yayā caitraḥ pramātāḥ maitraḥ pramāteti 
vyavahāraḥ | sā ca yādṛśī svātmani prakāśitā ahamityananyāpekṣaprakāśa-
jīvitocitavimarśā, tata eva idantāvimarśāsahiṣṇuḥ; tādṛśyeva anumānena 
anumātuṃ yuktā | nahi anyena vyāptiranyacca anumīyate, svaprakāśarūpeṇaiva 
ca vyāptiḥ | nanu ayaṃ caitraḥ pramātā, idamasya jñānam, ayamahaṃ pramātā, 
mamedaṃ jñānamiti idantāpratibhāso vikalpe tāvat dṛṣṭaḥ, vikalparūpaṃ 
vyāptivikalpamūlaṃ ca anumānam, tat kathaṃ na tatra anayoridantayā pratibhāsa 
ityāśaṅkya āha nahi vikalpaḥ iti, svayaṃ yatsvarūpaparikalpito yaḥ svabhāvaḥ 
pramāturahamityanavacchinnaprakāśasvātantryātmā, jñānasya ca 
vedyonmukhatvāvacchinnaprakāśasvācchandyalakṣaṇaḥ; sa yasmāt naiva vikalpe 
prakāśate, apitu śarīraprāṇādyupādhisaṃvṛta eva pramāturnīlādiprameyā-
kārapracchanna eva ca jñānasya svabhāvo bhāti, tasmāt pramātṛtā na 
vedyatāmāpadyate iti saṃgatiḥ | nanu evaṃ tarhi pramātṛtā anumīyate, jñānaṃ 
ca anumīyate iti katham | yat kila anayoḥ prātisvikaṃ

(page 107)

vapuḥ, tadanumānavikalpe na bhātyeva yacca bhāti, tat pratyuta tadāvaraṇarūpaṃ 
śarīrādi nīlādi vā | naca tatra kiñcidanumānena kṛtya pratyakṣādināpi 
siddhatvāt | naca tatra animitatvaṃ saṃvedyate | api ca sarveṣāṃ 
pramātṝṇāmaiśvaryaṃ jñānakriyāyogādanumīyate iti prakṛtamiha | tatra 
kriyāviśeṣāṇāṃ bhedāt dharmiṇo'pi ātmāno bahava iti tanniṣṭhamai-
śvaryamapi bhidyeteti kathamekeśvarasiddhiriti śaṅkāṃ parākartumāha 
tathāvidha evaca iti | na śarīrādi pramātṛrūpamanumīyate, nāpi jñānarūpaṃ 
nīlādi; apitu yādṛgeva pramāturjñānasya ca svabhāvaḥ svātmani ahamiti 
svaprakāśatayā vimṛṣṭaḥ, tathāvidha eva viṣayīkriyate'numānena 
idantāgrāhiṇāpi | nanu idantāhantayoḥ pāratantryasvātantryarūpayorvirodhāt 
kathametadityāha ahantā iti | ahamiti avyayamavyatirikte prakāśe vartate, tasya 
bhāvo'hamitivimarśasvarūpamahantā | sa eva prakāśasya svabhāvo nijaṃ 
lakṣaṇamaprakāśāt bhedakaṃ tena yadvyavadhānaṃ tenedaṃ saṃvedanamiti 
anumānasaṃvedanānantaramavaśyaṃbhāvitvena ahantāviśrāntaṃ vedanaṃ hi 
utpadyate | yato hi ayaṃ karoti jānāti ca, tataḥ saṃvedanamasya karomi 
jānāmyahamityetadrūpavimarśocitam | etacca sarvamahaṃ jānāmi, 
matprakāśaviśrāntaṃ matprakāśavimarśamātramayamiti paryante'pi anumātā 
ahaṃprakāśavimarśamayatvena bhāti,-ityevaṃ pāryantikaṃ yat pratiṣṭhitaṃ 
rūpaṃ, tat svaprakāśameva prakāśitaṃ bhavati | nanu madhye yatsaṃvedanasya 
idantayā saṃvedyatvaṃ, tasya pāryantikamahantāviśrāntitvaṃ viruddham | nahi 
madhye nīlaṃ pītatāyāṃ viśrāmyatītyucitam | etatpariharati svātmano'pi iti | 
etadeva svātantryaṃ yadatidurghaṭakāritvam | durghaṭaṃ ca tat 
niyatiśaktikṛtādeva māyādaśāyāṃ

(page 108)

virodhāt | svātantryapāratantrye ca ativiruddhe api anyonyamatirodadhatī api 
anuttarasvātantryāt parameśvaro yojayati īśvara ātmā ityādivikalpasṛṣṭau | 
tathāhi tatra idantatāṃśayogāt bhāvyatvapūjyatvopadeśyatvādyupapattiḥ; 
anācchāditāhantāṃśayogācca pāramārthikatadrūpaprāptiriti vakṣyate

     svātantryāmuktamātmānaṃ svātantryādadvayātmanaḥ |
     prabhurīśādisaṃkalpairnirmāya vyavahārayet || (1 | 47)

iti | evaṃca iti | vakṣyamāṇāduktācca 
svātantryapāratantryasaṃghaṭanopapattilakṣaṇāt nyāyāt paraśarīre jñānaṃ 
pramātṛrūpaṃ ca anumīyamānaṃ prārambhe idantāviṣayīkṛtaṃ yadyapi, 
tathāpi paryante svaprakāśameva siddhaṃ bhavati; natu sādhyamiti saṃbhāvyate; 
yata ādisiddhaṃ pramāṇāntarairasādhyaṃ; kriyayā ca saha vyāptigrahaṇakāle 
anumānakālāt pūrvasiddhaṃ, caitanyasvabhāvaṃ yadanusandhānaṃ 
nīlādijaḍapratiṣṭhātmakamahamitirūpaṃ, tadeva prādhānyena rūpaṃ yasya 
pramātustatsvabhāvaṃ tat | etacca vṛttau siddha eva natu sādhyaḥ ityanena 
darśitam | sidhyati ityapi vṛttau svaprakāśatāṃśaprādhānyāya uktam | 
anumānaṃ hi atra vidyutprabhānyāyena madhye paramidantāṃ bhāsayati mūle 
vyāptigrahaṇāvasare paryante ca anumitapratipattipratiṣṭhākāle ahamityatraiva 
viśrāntatvāt | yathāhi nīlādyapi prameyaṃ pramātaryeva viśrāmyati, tathā 
anumānaprameyamapīti | tatra asāvidantāṃśo'numātṛgatāyāmahantāyāmeva 
līnaḥ | dharmibhedo'pi idantārūpatvāt saṃvinmātra eva viśrāmyati, 
ahantābhāgastu na ahantāntarāt bhidyate saṃvedanasya deśakālābhyāṃ 
vedyarūpatayā saṃvedana eva nimagnābhyāṃ bhettumaśakyatvāt saṃvedanasya 
ca saṃvedanāntarāt svarūpabhede sati asaṃvedanatāprasaṅgāt | nīlasyāpi 
nīlāntarāt

(page 109)

nīlābhāsena na bhedo nīlābhāsasya traikālyatrailokyayorekatvāt | tatra tu 
ābhāsāntareṇa deśakālādinā bhedaḥ, nirābhāse tu saṃvedane na 
ābhāsāntaravyāmiśraṇaṃ miśrīkāryatve saṃvidantarāpekṣāyāṃ 
saṃvedyatvasaṃvedanatvāyogāt | savedyatve'pi saṃvidviśrāntatvameveti 
abhinnameva saṃvittatvaṃ paramārthataḥ siddhyati | anyasyāpi anumāturevameva | 
dhūmādapi hi anagnivyāvṛttimātraṃ sidhyat pāramārthikaparvatakāntāra-
mahānasaprabhṛtidharmibhedavaśāt bhidyatāṃ nāma, iha tu dharmiṇo'pi 
śarīrādeḥ svato na kiṃcit pāramārthikaṃ vapurasti saṃvedanamātraviśrānta-
tvāt; kevalaṃ svaśaktyaiva tatsaṃvedanaṃ vicitravedyāvabhāsamullāsayat 
dharmyādikalpanāmapi na asatyāṃ darśayati aparasṛṣṭivaditi 
madhyavartībhavannapi ayamanumānavyavahāro na abhedaṃ bādhate | sarvo hi 
ayaṃ pramāṇakṛto bhedavyavahāraḥ paramārthasaṃvedane eva viśrāmyati | 
yathāca dikkālākāśasāmānyādi naiyāyikaistalliṅgānāṃ pūrvāparacirakṣi-
praśabdābhidhānapratyayābhedāt iti------nāmaviśeṣāt ekamiti sādhitaṃ, tathā 
ātmaliṅgānāṃ jñānakriyādīnāmapi aviśeṣāt kiṃ na aikyam, vyavasthā ca 
digādiṣvapi dṛṣṭā, aupādhikatā ca ātmanyapi na na  susamartheti siddhamīśvara 
eka eveti | saugatānāmapi anumitamapoharūpamavastu pūrva-
dṛṣṭasvalakṣaṇarūpatāvyavasāyaviśrāntameva arthakriyārthināmarthanīyaṃ 
pravartakaṃ ca bhavati | teṣāṃ tu etat svalakṣaṇātmakaniraṃśavastuvādināṃ 
samarthayitumaśakyaṃ girivartino'dṛṣṭatvādanadhyavaseyatvāt 
mahānasavartinaśca tato'nyatvāt | asmākaṃ tu vahnyābhāsa eva vastu ca ekaśca 
sarvatreti na doṣaḥ | tadvat prakṛte'pi anumitamahamiti yadātma svalakṣaṇaṃ 
svatantraṃ, tadrūpādhyavasāyenaiva paraḥ pramātā anumito bhavati; 
vyavahārasādhaneṣu ca pramāṇeṣu maulikapramāṇasiddha-

(page 110)

mevarūpaṃ prapatati | tadihāpi maulikaṃ svaprakāśatvameva vijṛmbhate | parasya 
aikyopapādanādanumātṛrūpapramātṛvyatiriktāni pramātrantarāṇi 
paramārthata ekarūpāṇīti uktam | vivṛtau ca pramātṛjñānadvayopakrame'pi 
ekatarābhidhānaṃ vastuta ekarūpatāṃ pratipādayitum | jñānamiti hi 
jñātṛtaiva uktā | paratra anumeyamānā jñātṛtā pramātṛrūpatvamiti yāvat | 
athavā evaṃceti vākyena pramātṛdṛṣṭāntena jñānasyaiva etadrūpamuktamiti 
dvayasyaiva upakrāntasya abhidhānaṃ dharmimukhena dharmamukhena ca tadeva 
rūpaṃ nirūpayitum | nanu yadi ātmā īśvaraḥ, sarvaḥ sarvajño na kasmāt | sarva 
iti yadi pramātṛbhedāśayena uktiḥ, tadasat pramātṛbhedasya apāramārthikatvāt | 
kevalaṃ svātantryaśaktyaiva tadbhedāvabhāsanam, ekastu pramātā 
śivādisthāvarāntaḥ, saca sarvajña eveti | etadāha sarvapramātṝṇām iti 
vastutaḥ saṃvidabhedāt | taduktaṃ śrīparameṣṭhipādaiḥ śivadṛṣṭau

     ghaṭo madātmanā vetti vedmyahaṃ ca ghaṭātmanā |
     sadāśivātmanā vedmi sa vā vetti madātmanā ||
iti uktvā
     nānābhāvaiḥ svamātmānaṃ jānannāste svayaṃ śivaḥ | (5 | 109)

iti | tata eva ca ādisiddhatāsamarthanāvasare yaduktaṃ rāmāvataraṇakāle nāhaṃ 
babhūvetyatrāpi pramātrantarasaṃvedanātmanā vaktaiva tatkālānubhaviteti, 
tadidānīmayatnaghaṭitamiti | yattu tatra sārvajñyasamarthanārthamuktaṃ

     sarva eva hi sarvajñamanaḥsaṃkalpanāvaśāt |
     sarvabhāvagrahaṇatāyogyatvādvā kramasthiteḥ ||
     pratyakṣādyairupāyairvā nirupāyatayāpivā | (5 | 103)

(page 111)

iti, tat māyāpade'pi | iha tu paramārthavicāre śivaikātmakatvameveti 
tadupekṣitaṃ guruṇā | saṃkṣepeṇa vastvabhidhānaṃ na uktivaicitryapoṣaṇāmā-
traphalam, apitu adhikāriviśeṣaṃ tīvraśaktipātaṃ śaradabhrabhaṅgībhraśyan-
mohāvaraṇamanupayogipūrvapakṣopakṣepapratikṣepavistaramanugrahītumiti 
darśayati etāvataiva iti | īśvaratvapradarśanaṃ tadvyavahārasiddhinibandhanaṃ 
pramāṇaṃ, tato yā pratipattirīśvaratāvimarśarūpā pramātmikā, tasyā 
dārḍhyaṃ paravikalpairbādhakābhāsairunmūlayitumaśakyatvaṃ, tato 
hetorīśvarapratyabhijñākṛto'bhyudayo jīvanmuktivibhūtilābhalakṣaṇaḥ 
śrotṝṇāṃ bhavatīti granthakārasya tatpratyabhijñopapādanātmakamabhīṣṭaṃ 
saṃpannameva | nanu evaṃ samāptaṃ śāstramiti uttaragranthena kimityāśaṅya 
āha atimātra iti | ye mandaśaktipātāsteṣāṃ sātiśayaṃ prarūḍho 
māyākṛtastrividhaḥ svātmasaṃkocavedyabhedasukṛtaduṣkṛtāvabhāsalakṣaṇo 
malaḥ, tata eva pratipadamasāvunmūlanīyaḥ | anyathā hi ya eva aṃśaḥ 
śṛṅgagrāhikayā na nirmūlitaḥ, sa eva svayaṃ vā paraprabodhanayā vā 
prabudhya dūṣayedeva īśvaratāniścayamasya | yathoktaṃ śrībhaṭṭanārāya-
ṇena

     namaste bhavasaṃbhrāntabhrāntimudbhāvya bhindate | (71)

iti | tasya iti karmaṇi ca kartari śleṣeṇa ṣaṣṭhī | yaḥ svaparayorahaṃmātrapratye-
yatayā nirbhāsanayogyo'ta eva sa māyāśaktitirohitairmūkhairvimanyate 
uktarūpavirūddhena rūpeṇa abhimanyate, sa evaca īśvaro vipratipadyate tasyaiva 
sarvatra kartṛtvāt | ubhayatra māyāśaktikṛtamāvaraṇāvabhāsanaṃ hetuḥ | yat 
śivadṛṣṭiḥ

     vāditvaprativāditve kasmāccettasya tatsthiteḥ | (3 | 76)

iti | evam iti vakṣyamāṇapūrvapakṣarūpatayā | upāṃśu saṃkṣepeṇa 

(page 112)

ūrdhvamādau hanyate gamyate ṭaṅkyate ca artho yeneti upoddhāta iti śivam ||

atriguptakulotpannaśarīrādhārasaṅgataḥ |
īśvarapratyabhijñāyāmupoddhātaṃ vyapāvṛṇot ||

iti 
śrīmahāmāheśvaraśrīmadācāryābhinavaguptaviracitāyāmīśvarapratyabhijñ
āvivṛtivimarśinyāmupoddhātavimarśaḥ prathamaḥ || 1 ||


atha dvitīyo vimarśaḥ |

ānandamamṛtapūrṇaṃ sāmanase parapade paraṃ satyam |
ghaṭitānuttaradṛḍhatamanirūḍhibhājaṃ śivaṃ vande ||

ātmana eva sadbhāve ye vipratipannāḥ, ta eva kathaṃ tasya aiśvaryamupagaccheyu-
riti ta eva iha mūlavipakṣāḥ | tatra laukāyatikāḥ svapakṣasthāpanāvihīnāḥ 
parapakṣamapi kathaṃ dūṣayeyuḥ pramāṇādiprakriyāmaryādānupraveśena 
taddūṣaṇāt, tadanupraveśe tu cārvākatāhāniriti saugatā eva iha 
pūrvapakṣavādinaḥ | ye hi ātmānamupayanti anekamanīśvaraṃ ca ekaṃ vā 
channaiśvaryam, te tāvat na atyantāya iha dūraṃ sphuṭitāḥ | asādhāraṇena 
dharmeṇa dharmiṇo'ṅgīkaraṇe anaṅgīkṛtadharmābhyupagamanā hi sughaṭāḥ, 
natu sarvathānupagame iti saugatīyameva pūrvapakṣaṃ

     nanu svalakṣaṇābhāsaṃ-------|
ityādinā 
     ------------tena kartāpi kalpitaḥ ||

ityantena ślokaikādaśakena āha | tathāca vakṣyati taddarśanāpekṣayaiva 
ayamākṣepaḥ iti |

(page 113)

tatra ślokadvayena pratyakṣātmavādī dṛśyānupalabdhyā nirākriyate, 
anumeyātmavādī tu smṛtyanusandhānāderanyathāsiddhatāṃ vadatā trayeṇa, 
jñānādīnāṃ guṇatvāt guṇisiddhirityapi vadannekeneti iyatā ātmani dharmiṇi 
nirākṛte jñānakriyāsaṃbandhalakṣaṇamaiśvaryavyavahārasādhanaṃ hetuṃ 
nirākartuṃ jñānasvarūpaṃ paramate ślokadvayena anupapannamāvedyate, 
kriyāsaṃbandhastu sādhakābhāvāt bādhakayogācca na kvacidupapadyate, tat na 
ātmana aiśvaryamiti trayeṇeti saṃgatitātparyam | ātmanaḥ ityādinā dharmiṇaṃ 
hetuṃ vyavahāryatvena sādhyaṃ ca bruvatā padatrayeṇa siddhāntimataṃ 
pūrvapakṣavādī dūṣaṇāya saṃkṣepeṇa anubhāṣate | ātmaiva tu ityādinā 
pūrvapakṣī svamataṃ sārdhaślokoktaṃ saṃkṣipya darśayati | tuśabdaḥ 
svapakṣasya viśeṣaṃ dyotayannupapannatāṃ dhvanayan siddhāntimatasya 
dūṣyamāṇatvaṃ sūcayati | siddhāntī khalu anupalabdherasiddhatāṃ 
brūyādityāśaṅkya yamardhaślokaṃ brūte, tasya arthaṃ saṃkṣepeṇa āha 
ahaṃpratyayenāpi ityādinā | ādiśabdena indriyaprāṇajñānādisaṃtānasya 
saṃgrahaḥ | ityāha iti etadvastu ślokadvayena āhetyarthaḥ | katham | ākṣipan 
ākṣepeṇa lakṣitā vacanakriyā  iyamiti yāvat | anena nanuśabdasya 
ākṣepadyotakatā vyākhyātā | ākṣepeṇa ca pūrvapakṣī 
yuktividagdhaṃmanyatākrāntahṛdayo'tra vipratipanno yatnena svābhiniveśāt 
saujanyāṅgīkṛtaparopakāraprāvaṇyena siddhāntinā nivartyate iti 
sūcayannajñasasaṃśayau daṇḍāpūpikayaiva iha vyutpādyete iti darśayati

     nanu svalakṣaṇābhāsaṃ jñānamekaṃ paraṃ punaḥ |
     sābhilāpaṃ vikalpākhyaṃ bahudhā nāpi taddvayam || 1 ||

(page 114)

     nityasya kasyaciddraṣṭustasyātrānavabhāsataḥ |
     ahaṃpratītirapyeṣā śarīrādyavasāyinī || 2 ||

     svamātmā ātmīyameva vā lakṣaṇaṃ yasyeti svarūpeṇa 
tadupādhibhyāṃ ca deśakālābhyāṃ yat sarvathaiva saṃkucitaṃ

     samānabhinnādyākārairna tadgrāhyaṃ kathaṃcana |
     bhedānāṃ bahubhedānāṃ tatraikasminnayogataḥ ||
     tadūpaṃ sarvato bhinnaṃ--------------|
iti 
     -----------------------pratipādikā |
     na śrutiḥ kalpanā vāpi sāmānyenaiva vṛttitaḥ ||

iti svasāmarthyotthanirvikalpakajñānaikalakṣaṇīyamuktam, tadābhāsate 
pratibhāsate yasmin sati, tasya vā ābhāsaśchāyārūpa ākāro yasmin jñāne; 
tadekam | jātāvekavacanam | rāśyabhiprāyeṇa ca ekaśabdaḥ, tena 
svalakṣaṇapratibhāsāni nirākāravādimate, svalakṣaṇākārāṇi sākāravādi-
mate jñānānīti ako'yamavikalpakarāśiḥ | ekaśabdena vā avikalpakajñānasya 
viṣayabhedakṛtaṃ bhedaṃ muktvā vikalpavat svarūpaniṣṭho'vāntarajātyutthā-
pako bhedo nāstītyucyate | tatraiva hi viṣaye smṛtirūpo vikalpo'nyathā, 
utprekṣārūpaśca anyatheti adhyavasāyaviṣayābhede'pi svarūpagatameva 
vikalpasya vacitryam | anubhavastu nīle na kaścit prakārāntareṇa ṛte 
tatpratibhāsatvāt tadākāratvāt vā | ekaśabdo vā anyavācī, ekaṃ kiñciditi 
yāvat | madhyamapakṣastu ṭīkākṛtā sūtre yojitaḥ | paramiti anyat, 
anubhavottarakālabhāvi ca tadupajīvitvāt sarvavikalpānām | abhilapyate 
ābhimukhyena viṣayiviṣayaparavaśatātyāgena bodhasvātantrye śabdena ca 
viṣayasya

(page 115)

tādātmyāpādanena vyaktatayā pramātṛsātkāraparyantatayā ucyate 
parāmṛśyate yena, so'bhilāpaḥ āntaraśabdalakṣaṇaḥ saṃjalpaḥ | 
yadāhurbhartṛharipādāḥ

     so'yamityabhisaṃbandhādrūpamekīkṛtaṃ yadā |
     śabdasyārthena taṃ śabdamabhijalpaṃ pracakṣate || ( vā. 2 | 130)

iti | tena saha vartate iti | anena so'yamitisaṃbandhātmakasaṃketavyutpattikāla-
vyavahārakālānugāmitvaṃ viṣayasya vadatā sāmānyaviṣayatvaṃ darśitam | 
bahudhātve ca avāntarajātibhedakṛte yuktiḥ sūcitā | sa ityanusandhāne smṛtiḥ, 
so'yamityanuvedhe pratyabhijñā, sa ivāyamityanurodhe utprekṣā, sa 
evāyamityanuyoge vyavacchedaḥ,-ityādayo vikalpabhedā abhilāpabhedamūlā 
eva | smṛtyutprekṣādeśca avāntarajātibhedayoge'pi vikalpa-
lakṣaṇamahāsāmānyayoga ityapi sābhilāpaśabdena sūcitam | tṛtīyaśca eṣa 
pakṣo vivṛtikṛtā sphuṭīkṛtaḥ | apiśabdo bhinnakramaḥ | dvayamapi tat na nityasya 
kasyacit draṣṭṛśabdavācyasya parairupagatasya saṃbandhitvena yuktam | tasya 
nityasya atra jñānadvaye bhāsamāne sati atra dvaye ādhāratayā ca pareṇa 
svaprakāśatābhyupagataprakāśabhāvayogyasyāpi aprakāśanāt, tasyeti vā 
jñānadvayasya atra ātmani ādhāre anavabhāsāt svatantratayaiva tat 
jñānadvayaṃ bhāti, natu kvacit nitye āśritaṃ sadityarthaḥ | nanu ahaṃ ghaṭaṃ 
jānāmīti ghaṭavat tajjñānavat taddharmā ātmā ahamiti bhātyeveti 
anupalambho'siddhaḥ | ucyate | eṣa tāvadvikalpo na avaśyaṃ viṣayatathātvamā-
viṣkurute, bhavatu vā pramāṇaṃ, tathāpi atra kṛśādisāmānādhikaraṇyaṃ cet 
bhāti kṛśo'haṃ jānāmīti, taccharīrameva itthaṃ jñānena saha 
ekasāmagryadhīnatayā adhyavasīyamānatvena pratibhāsate | athāpi

(page 116)

śarīrātiriktaṃ, tadapi jñānasaṃtānamātramatra vane vṛkṣa iti yatheti 
apiśabdārthaḥ | ṭīkākāro vikalpamādau vyācaṣṭe | tadapekṣamavikalpasya 
pramāṇādirūpamiti parakīyamatamāgūrya ucitavikalpajananāt nīlāṃśe 
pramāṇamavikalpakaṃ tadabhāvāt pramāṇaṃ na bhavati, kṣaṇikatvāṃśe 
nīlāvyatirekiṇi gṛhīte'pi tadanucitavikalpasaṃpādanāt tu apramāṇaṃ 
sthiratvādyaṃśa iti hi paro manyate | grahaṇakavākye ca vivṛtigate yadavikalpakaṃ 
paṭhitam, tatra avaśyaṃ niṣedhyatvena pūrvaṃ vikalpo vyākhyeyaḥ | vikalpaka iti 
kartṛpratyayena vikalpajñānasyaiva svātantryeṇa kartṛtāropaṇāt vikalpakatvamiti 
vadan vikalpotthāpako'nyaḥ pramātāstīti saṃbhāvanāṃ parasya parāsyati | 
sakalaṃ kālaṃ tadavinābhāvāt kālopalakṣitaṃ ca deśadharmāntaraṃ ca yat 
gacchati, tato na vyāvartate, tādṛśaṃ yadapoharūpaṃ jñānākāramātramanan-
tarbahīrūpaṃ vā āropitanīlarūpamabhimananamātropapāditaśarīraṃ vā tata 
eva niḥsvarūpeṇa avaṣṭambhāyoge kramākramāyoge deśasaṃkocābhāvāt 
vyāpakatvena kālasaṃkocābhāvāt nityatvena vyāvṛttyayogakṛtācca 
dharmasaṃkocavailyāt vyaktyanuyāyitvena adhyavasīyamānaṃ sāmānyam, 
tadeva svalakṣaṇaparāmarśavandhyatvāt tanmātram | tat pratibhāsate grāhyatvena 
yasmin, tat vikalpakamiti viṣayo'sya nirdiṣṭaḥ | yataśca asya evaṃvidho viṣayaḥ, 
tato'yaṃ vikalpaḥ śabdasaṃbandhinaṃ vyavahāraṃ śabdābhijalpyamānatāṃ 
sahate | sā hi na jñānasya vikalpātmano'pi svātmani svalakṣaṇasvabhāve 
svasaṃvedanagrāhye śabdyamānatvāyogāt, yadāha

     sukhādīnāṃ------svasaṃvedanamavikalpakam |
     aśakyasamayo hyātmā sukhādīnāmananyabhāk |

(page 117)

iti, apitu viṣayasyaiva; tasyāpi na svalakṣaṇasya deśakāla dharmasaṃkucite tatra 
saṃketasya kartumaśakyatvāt vyavahārakālaparyantamasaṃbhavena 
anupayogāccā | tat nīlacchāyāyā anīlavyāvṛtterapoharūpāyā eva 
vikalpanasahiṣṇutvena saṃketakaraṇayogyāyā vyavahārakālānugāminyāśca 
sā yuktā | tātkālikam iti tasminneva kāle bhavaṃ na kālāntaramanuvartate | 
ataḥ saṃketavyutpatteryaḥ kālo dṛṣṭvā vikalpanaṃ 
śabdasaṃketanamityevaṃrūpastaṃ na spṛśati | tameva yo na spṛśati, sa 
vyavahārakālaṃ spṛśatīti kā saṃbhāvanā | 
tadevamanupapadyamānasaṃketaṃ vacasā uktaṃ gamyamānatvena 
anupayujyamānasaṃketamupari sphuṭamiti deśaniyataṃ vyāvṛttiniyataṃ ceti 
deśāntaradharmāntarānugamanāyogyatvādapi anupayujyamānasaṃketaṃ yadi 
īdṛk svalakṣaṇaṃ tadābhāsaṃ tadākāratvena tadekasāmagryadhīnatayā 
tajjanyatvena tannirbhāsyatvena vā tadābhāsyate sākṣātkriyate yena tat tathā | 
svalakṣaṇaviṣayamityeva spaṣṭaṃ kasmāt noktamityāśaṅkya āha vikalpe'pi iti | 
tenāpi svalakṣaṇamadhyavasīyate pravṛttiprāptyādivyavahārāt | 
anubhavarūpastu asau svalakṣaṇena bhavati yo hi bhavanneva tat 
svalakṣaṇamanukaroti anukurvanneva ca bhavati |

     ------arthasya sāmarthyena samudbhavāt |
iti nyāyena nirākāratāyāṃ
     tatrānubhavamātreṇa jñānasya sadṛśātmanaḥ |
     bhāvyaṃ tenātmanā yena pratikarma vibhajyate ||

iti nītyā sākāratāyāmasau bodho'nubhavatīti ucyate | tathāca viniścaye yo 
jñānapratibhāsamātmano'nvayavyatirekāvanukārayatīti anubhavasya 
anukartṛtvamuktam | naca evaṃ vikalpaḥ | ata eva

(page 118)

iti anubhavarūpatvena yadarthasāmarthyodbhavatvamākṣiptam, tata eva sphuṭo 
deśakālākāraniyato'tra artho bhāti | nanu evaṃ jñānamityukte 
nīlapītādijñānabhedo na kaściditi bodharūpa ātmaiva ayamukto bhavati 
sūtravṛttyorityāśaṅkāṃ śamayati tasya ca iti | bahudhā iti vyācaṣṭe, 
vikalpasya tu iti, natu viṣayabhedena iti tasya nirviṣayatvādadhyavaseya-
viṣayābhede'pi smaraṇotprekṣādīnāṃ svarūpeṇaiva vaicitryādityāśayaḥ | 
tathāca iti pātañjalaṃ mataṃ saṃvādakatvena upanyasyati | vikalpāt iti 
vikalpaviśeṣāditi bhāvaḥ | bhede'pi abhedasya abhede'pi bhedasya yā vikalpanā, 
sā tatra vikalpa ityuktā | smṛtistu pūrvānubhūtāvabhāsarūpā buddhivṛttiḥ | 
tathāhi sūtre

     śabdajñānānupātī vastuśūnyo vikalpaḥ | (yo. sū. 1 | 9)
     anubhūtaviṣayāsaṃpramoṣaḥ smṛtiḥ | (yo. sū. 1 | 11)

iti | nanu evaṃ bhavatā tarhi vikalpanaiva smṛteḥ kathamuktetyāśaṅkya āha 
vācaka iti | vācakena sāmānyātmanā āntareṇa śabdanena, natu 
svalakṣaṇarūpeṇa saṃketayitumaśakyena, saṃsargaḥ śavalīkaraṇena 
ekajñānāveśastatra yogyo'rtho'nugāmitvena avasturūpo'pi arthatvena 
adhyavasīyamānastasya atr pratibhāsa ityetadeva lakṣaṇaṃ vikalpasya, 
śabdajñānānupātīti tu vikalpaviśeṣasya kalpanāparaparyāyasya lakṣaṇamiti 
abhiprāyaśeṣaḥ | prāgeva iti lakṣyanirdeśāt pūrvamityarthaḥ | nanu yadi eṣa 
vikalpānubhavayorbhedaḥ, tarhi dvayasyāpi jñānatvamekaṃ rūpaṃ kuta iti | āha 
ubhayamapi evam iti anena prakāreṇa bodharūpamiti | etat vastu agre siddhāntinā 
madīyapakṣamanubhāṣamāṇena vakṣyate

     dṛk svabhāsaiva---------------------| (1 | 18)

(page 119)

ityatra | tat tasmādubhayamapi jñānamiti padayojanā | etaduktaṃ bhavati-
avāntarabhede'pi anayoḥ svasyaiva prakāśaḥ svasya prakāśa eva sva eva asya 
prakāśo na paraḥ, svaśca asya prakāśa eveti yat bodhalakṣaṇaṃ siddhāntino'pi 
abhimataṃ, tadastyeveti dvayorapi jñānatvaṃ yuktam | tadeva tarhi ātmā 
bhaviṣyatīti | āha tat ca iti | ubhayaṃ nirvikalpakaṃ svaviṣayamātramiti, 
viṣayaśca ananuyāyīti pratikṣaṇaṃ vibhinnalakṣaṇa iti | tadapi asthiram, tathā 
vikalpakamapi adhyavaseyaṃ viṣayabhedāt | tathā sa ityayamityādyabhilāpabhedāt 
nīlapītādiviṣayaṃ bhinnam, ekasthiranīlādhyavasāyyapi pratikṣaṇaṃ bhedāt 
bhinnamiti ubhayathāpi parasaṃmataṃ nityādidharmayogitvamātmalakṣaṇaṃ 
nāsti | dvitīyasya ca iti | ubhayasyāpi bhinnabhinnasvabhāvatvaṃ tāvadekaṃ 
rūpaṃ tatastu dvitīyo bhavet yadi abhinnasvabhāvo bodho bhavedityāśayena 
tṛtīyasyeti vaktavye dvitīyasyeti uktam | bodhātiriktasya iti vṛttiṃ vyākhyātuṃ 
jñānaikajātīyatayā vā vikalpāvikalpasaṃcaya eko rāśirityabhipretya 
dvitīyasyeti | jñātuḥ iti jñānātiriktasya svānubhava ityanena 
dṛśyatvasaṃbhāvanamāha | tasya iti ātmano'nupalabdheḥ, tasyeti vā ubhayasya 
anyasaṃbandhitayā anupalabdhiriti vṛttiyojanā | jñeyarūpaḥ iti , natu 
pramāṇāviṣayatopanatajñātṛrūpo'rthaḥ kaściditi atra tātparyaṃ 
jñeyaśabdasya, natu jaḍaikarūpavācī jñeyaśabdo'tra jñānasaṃtānasya 
jaḍatvābhāvāt | ata eva uktaṃ vṛttau kaścit iti | tadeva atra ṭīkāyāṃ 
viparyayapradarśanadvāreṇa vyākhyātam | sūtre hi ahaṃpratītirapi iti 
vidhidvāreṇa asya anupalabdhiḥ sūcitā | sā svakaṇṭhena vṛttau vyākhyātā, 
taddvāreṇa tu yaḥ sūtrārtho vidhyātmā sūcitaḥ, sa ṭīkāyāṃ

(page 120)

svakaṇṭhena vyākhyāta iti | evaṃ iti tatra tatra sūtravṛttiṭikāsu avadhātavyam | 
nanu bhavatā yadi vyatirikto na avadhāryate, tāvatā prādeśiki anupalabdhirna 
abhāvaṃ sārvatrikaṃ gamayet | tasmādayamātmopalambhanivṛttimeva 
pramāṇayan paraṃ pratikṣipati, sā ca viprakṛṣṭeṣu api asti, naca te na 
santyevetyāśaṅkya yat lokaiḥ iti vṛttāvuktaṃ, tat sarvapramātṛbhiḥ ityanena 
vyākhyāya tatra hetumāha sajātīyaiḥ iti | tatrāpi hetuḥ sarvavyavahāra iti | 
anyathā hi nīlamapi hi kasyacidanīlatayā bhātītyapi hi bhavet | tataśca 
tādātmyābhāvavyavahāro'pi na sidhyediti ucchinnaiva 
bhāvābhāvavyavasthetyāśayaḥ | taduktaṃ pratyakṣanivṛttireva 
anupalabdhirabhāvasādhanī sakalakāraṇakasya asya arthasattāyā 
bhāvāsaṃbhavārthaṃ, tatra arvāgdarśanasya ātmapratyakṣani-vṛtīṃ  
pramāṇayatastadgrahaṇayogyapratiṣedho yuktaḥ iti | natu ātmeti 
sūtrasūcito'rthaḥ spaṣṭīkṛto yathoktalakṣaṇaḥ iti deśakālākārasaṃkocāsa-
hiṣṇurādisiddhatvādanupayuktapramāṇavyāpāraḥ svatantrajñātṛkartṛtāpara-
mārtha ityarthaḥ | nanu ahaṃpratyayaśabde sābhilāpagrahaṇaṃ viśeṣaṇaṃ 
vṛttau kimarthamiti | āha sābhilāpa iti | nīlānubhavo'yamityatra nirvikalpake'pi 
nīlaśabdo viṣayasvarūpamavadhārayituṃ yathā upāttaḥ, tathā tatrāpi 
ahaṃśabda iti kaścit saṃbhāvayeta, sa sūtre avasāyinī itipadena pratyāyitaḥ | 
tasyaiva artho vṛttau sābhilāpapadena vyākhyātaḥ | siddhāntinirūpyamāṇasya ca 
ātmaprasādhakasya pramāṇasya daurbalyanivedanena pūrvapakṣiṇā svapakṣe 
balavattvamāviṣkṛtam | avasyati tacchīleti pratyayabhāgena tācchīlyaṃ 
nimittānapekṣitvaparyavasitamabhidadhatā anubhavānusāryadhyavasāyarū-
patvābhāvanirūpaṇāt ya eva ahaṃ hyaḥ,

(page 121)

sa eva ahaṃ prātaḥ, naca jñānādayaḥ ityevamādeḥ pratyayasya 
sthiraguṇirūpatāniścayanaṃ, na kalpanāmātrameveti uktam | vṛttāvapi 
sahaśabdena ahaṃpratīterabhilāpāvyabhicāro darśita iti vyākhyeyam | ata eva 
āha kalpanātvena iti | nirvikalpakānusaraṇavirahasyātantryāyogena 
ahaṃpratītervastuvyavasthāpanāyāmahetutvaṃ sūcitam | leśenāpi iti na 
kiñcidasādhāraṇena dharmeṇa nityatvādyanyatameneti yāvat | samayaśabdena 
upapattiviraha uktaḥ | yadyapi śāstrasamayapratiṣṭhānāmapi na 
laukikātirikto'vabhāsa ityuktaṃ pūrvaṃ śāstrasaṃskṛtānāmapi ityādinā, 
tathāpi śāstravāsanājanitagāḍhavikalpabalāt ya evaṃ brūyāt sthiro 
mamātmā anubhave bhātyeveti, sa laukikapramātrantarasādhāraṇapratibhāsā-
bhyupagamanāyaiva pratyāyya iti ṭīkākārasya āśayaḥ | tadayaṃ prayogaḥ-nā 
stīha ātmā nityatādilakṣaṇayogī upalabdhilakṣaṇaprāptasya anupalabdheriti || 1, 2 
||

     ghaṭādiviṣayāḥ sarvenubhavā utpannāpavargiṇastāvat | anubhavaṃ ca 
anurudhyamānā smṛtirdṛṣṭā, anyathā yatraiva kutracit sā syāt | naca 
anubhavodbhavamātrātsā bhavati caitrasya dṛṣṭe bhaitrasya tadabhāvāt | 
tadayamanubhavo bahirmukhena vapuṣā dhvasto'pi antarmukhena adhvasta eva 
upagantavya iti parasya siddhāntino matam | athaśabdadyotitasaṃbhāvanārū-
pāśaṃkopalakṣitaṃ kārikayā pūrvapakṣavādī āheti saṃgatiḥ | tadanubhava 
iti tasya dhvastasyānubhavasya yo viṣayastam |

     athānubhavavidhvaṃse smṛtistadanurodhinī |
     kathaṃ bhavenna nityaḥ syādātmā yadyanubhāvakaḥ || 3 ||

(page 122)

anubhavasya vidhvaṃse anubhavasvīkārādvārā parigṛhītaniyataviṣayā smṛtiḥ 
kena prakāreṇa bhavet yadi tadanubhavāntarmukharūpo'nubhavitā sthira ātmā na 
syāt | asti ca iyaṃ smṛtiḥ, tat tenāpi bhāvitavyamiti yadi paro brūyāditi 
kārikārthaḥ | smṛtikāle iti yaḥ saṃbhāvyate kālaḥ, udbubhūṣitāyāṃ 
smṛtāvityarthaḥ | na anubhave pūrvabhāvini paścādabhāvamātraṃ 
tadanurodhitvamiti darśayati vṛttikṛt | pūrvo yo'rthaviṣayo'nubhavastasya 
yo'vaṣṭambhastadrūpāparityāgaḥ, sa dharmo yasyāḥ | tadāpi iti smṛtikāle 
smṛtirūpatāyāmityarthaḥ | yadi kaścidācakṣīta-arthānubhava eva atītaviṣayo 
viśiṣṭaḥ smṛtirucyate, tat kimasyā anubhavavirodhitvena viṣayasya svamukhenaiva 
svīkārāditi | taṃ prati smṛteranubhavarūpatvaṃ tāvat nirākaroti 
anubhavavidhvaṃse iti ca sūtroktiṃ ghaṭayati artha iti | arthasya saṃnidhānaṃ ca 
iha sattāyāṃ janakatayā asattāyāmapi viṣayatayā upayogaḥ | saṃnihitaḥ iti 
sanneva sāṃkhyadarśane iva cchanno'pi viṣayatāṃ svātantryeṇa prāpta iti 
yāvat | sākṣātkāraḥ iti avikalpaka ityarthaḥ | vikalpastāvat na viṣayaṃ sākṣāt 
svīkaroti, adhyāruhyavādena tu ucyate iti | etadāha apivā iti | 
anubhūyamānatayā iti anubhavāyamāno vā svayamanubhavarūpo vā 
vikalpo'yamiti bhavet, natu anubhūtatvena pūrvānubhavollekhanena sa ityevaṃ 
bhavet | etadeva ca smṛteḥ prātisvikaṃ rūpam | tataśca yadi smṛtivyāpte 
kālakṣaṇe'nubhavaḥ, tarhi na smṛtistadvyāpakaḥ sa iti pratyayaviruddho'ya-
mitipratyayopalabdheḥ | vorodhaśca svamukhaparamukha-viṣayasvīkārayorvirodhāt 
tadrūpatvācca idaṃbhāvatadbhāvapratītyoḥ | tasmādayaṃ prayogaḥ-smṛtikāle 
na pratīyamāno'sti

(page 123)

arthaḥ sa-itipratyayaviṣayatvāt | astitvaṃ hi arthasya pratīyamānasya 
ayamitipratyayaviṣayatvena vyāptaṃ, tadvirudhasya iyamupalabdhiriti | nanu 
naṣṭavastuviṣayāṃ smṛtiṃ muktvā anyatra idaṃ 
pratyakṣādipramāṇāntaraviruddhamanumānam | maivam | smaryamāṇo hi sarvaḥ 
pūrvānubhūta eva | saca naṣṭa eva kṣaṇikatvāditi kṣaṇāntarasadbhāvaḥ kutra 
upayogī | bhavatu sthiro'rtho ghaṭādiḥ sāṃkhya iva vānaṣṭo'pi 
sannupasthānakṣaṇabhaṅgopanyāsajanakatvena tu viṣayatāṃ nāsau svatantrāṃ 
pratilabdhumalamiti darśayati satyapivā iti nipātābhyām | naitat tattvam, apitu 
abhyupagamyavādo'yamityāha anubhavābhāvāt iti smṛteranubhavarūpatvā-
bhāvādityarthaḥ | anubhavaviṣayatvena iti smṛtijñāne svātantryeṇa viṣayatayeti 
yāvat | atītasya arthasya kālāntarabhāvini svātantryeṇa viṣayatve trayī gatiḥ | 
sthira eva bodho viṣayopanipātakṛtaṃ tadākāratvaṃ tatpratibhāsatvaṃ vā 
viṣayāpagame'pi viṣayāntarāpāte'pi ca na tyajati | evaṃ 
bhūtavartamānaviṣayasākṣātkārastāvat, vartamānānāṃ ca bhāvānāṃ 
yāvatī arthakriyāntaraparaṃparākṣepiṇī arthakriyāviśeṣe yogyatā, sāpi 
atyantanairmalyāt sākṣātkṛtā bhavatīti anāgataviṣayamapītyevaṃ pūrvaṃ 
sarvajñasaṃvedanamiti ekā gatiḥ | astiro'pi nīlaviṣayo'nubhavo nīle dhvaste 
samanantarapratyayatvena nailasākṣātkāratāmatyajantameva bodhaṃ 
pītasaṃnidhānāt tu svārthakriyāsaṃtatiyogyatākrāntapītaviṣayamapi ārabhate, 
-ityevaṃ bodhāntareṣvapīti aparā | tadetadubhayamuktaṃ ṭīkāyāṃ 
prabandhapravṛttastadāpi pūrvānubhava eva iti | sthire saṃtānavṛttau ca 
prabandhaśabdaḥ | evaṃ sadā sarvajñe dve gatī | yastu jijñāsitasarvajñaḥ, sa 
yadeva yadaiva didṛkṣate, tadeva tadaiva apūrvatvena ānumānikā-

(page 124)

tītavṛttipratyayavat pratibhānanairmalyāt jānātīti tṛtīyā | tadāha tatkālodito 
vā ityādi | etāsu tisṛṣvapi gatiṣu svātantryeṇa viṣayasvīkāre'nubhavāt 
vailakṣaṇyakāri yat smṛteḥ svarūpamucyate-pūrvānubhavamukhena 
viṣayalābhādanubhūtasya viṣayasya yo'saṃpramoṣo'napahāro'nubhūtatayaiva 
prakāśa iti, tadeva vighaṭeta | evaṃ svātantryeṇa viṣayasvīkāro na yuktaḥ 
smṛteriti upasaṃhāreṇa anuvadannāha tat iti | arthasya tirodhānaṃ svātantryeṇa 
aviṣayatā | tato'sau smṛtiranubhavaviśeṣarūpā tāvat na bhavati | anubhavaṃ ca 
upajīvituṃ sā yatate | sa ca prācyo naṣṭaḥ kathamupajīvyaḥ iti kaścidaṃśo'sya 
nūnamanaṣṭaḥ | natu viṣayavyāpṛto bahirmukhatāṃśa eva na naṣṭa iti yuktaṃ 
smṛtitvābhāvaprasaṅgāditi anubhavasya yo'nubhavaḥ svasaṃvedanātmā 
antarmukhaḥ, sa na naṣṭa iti āyātam | sarveṇa hi prakāreṇa tadananvaye yadi 
smṛtirudiyāt caitradṛṣṭe'pi maitrasya udiyāt niyamanidānābhāvāt, tadvadvā 
svadṛṣṭe'pi na udiyāt sarveṇa prakāreṇa upajīvanīyasya dhvastatvāt | ucyate 
niyamaḥ | tadanuyāyinā kenacidapradhvastena rūpeṇa bhāvyameva | nanu 
anubhavasya anubhavarūpo bodhaḥ kiṃ naiyāyikabodhavat 
jñānāntarasvabhāvaḥ | netyāha svasaṃvidrūpo'ntarmukhaḥ iti | 
arthapratibhāsavattvameva arthasya vyāpṛtatā bahirmukhatvam | bahiriti 
svarūpavyatirikte'rthe mukhaṃ pradhānaṃ prakāśatālakṣaṇaṃ rūpaṃ yasya, 
tat tathā | buddhernīlasaṃvitteḥ saiva grāhikā, tata ātmani jñānarūpe'ntarmu-
khā | antariti avyatirikte rūpe mukhaṃ prakāśatvaṃ yasyāḥ | cakārau 
yaugapadyaṃ dharmadvayasya āhatuḥ | nanu astu tāvadantarmukhāṃśo'nuyāyī, 
siddhāntinastu kiṃ siddhyati iti | āha antarmukhaśca iti | vakṣyamāṇanītyā iti 
cetyadharmadeśakālānāveśe vyāpitvanityatvasiddheriti || 3 ||

(page 125)

evaṃ siddhāntimataṃ saṃbhāvyaṃ darśitam, adhunā etannirākaraṇaprakāraṃ 
svameva ayaṃ vakṣyati,-ityāśayena siddhāntinaṃ pūrvapakṣavādī pṛcchati 
satyapyātmani ityādinā kena ityanena

     satyapyātmani dṛṅgāśāttaddvārā dṛṣṭavastuṣu |
     samṛtiḥ kena-----------------------------

     praśnasya ca ayamāśayaḥ-iha anubhavasya nīlaṃ prakāśatā ceti 
dharmadvayaṃ vyāvṛttyupakalpitaṃ vā vāstavaṃ veti tāvadāstām | 
kimasthāne'nena vikalpitena, idaṃ tu vikalpyam-smṛtau saviṣayatālābhāya 
nīlaprakāśatāṃśa upajīvitavyaḥ, na antarmukhasvaprakāśatāṃśastasya 
viṣayaviśeṣasamarpaṇāyogyatve pramātṛbhedābhedayornīlānīlayośca 
smṛtyaviśeṣaprasaṅgāt | saca upajīvanīyo'śo'rthasya abhāvādvā 
asaṃnikarṣādvā indriyavyāpārābhāvādvā ādipadāt vakṣyamāṇāt 
sarvajñatopayogyadṛṣṭinairmalyasamādhānādyabhāvādvā naṣṭa eva artha 
ābhāsate yāvatā sāmagryeṇa uktena tasya abhāve tāvat nīlānubhavarūpā 
darśanarūpatā naṣṭā | saiva ca kevalā avicchinnabodhamātropayogamanapekṣa-
māṇā avalambanaṃ dvāramupāyo'nubhūtavastuviṣayatālābhe yasyāḥ 
smṛteḥ, sā satyapi ātmani nirviṣayaśuddhāntarmukhasaṃvedane'pi abhyupagate 
kena prakāreṇeti na kaścidasau prakāro'sti, yena sā syāt, tato naiva bhavediti 
sūtrāvataraṇikayorarthaḥ | antarmukhaḥ sidhyatu bodhaḥ, kiṃ smṛtyeti 
paśyannātmavādī tūṣṇīmāsītetyāśayena tamāgūrayati tataśca iti | 
vyavahāro laukikastāvadavaśyasamarthanīyaḥ | saca smṛtyā vinā katham | 
ātmavyavahāro'pi ca tvayā smṛtidvāreṇa kartumārabdhaḥ

     ------smṛtistadanurodhinī |
     kathaṃ bhavenna nityaḥ syādātmā yadi------|| (3)
iti ||

(page 126)

atha siddhāntino vacanaṃ hṛdayasthaṃ saṃbhāvanayā upanyasyati

     ---------atha yatraivānubhavastatpadaiva sā || 4 ||

     etat vṛttikṛt vyācaṣṭe asato'pi iti | yadiśabdena athaśabdasya 
saṃbhāvanāṃ dyotyatvena āha | kathaṃ sā naṣṭasya viṣayeṇa viṣayavatī iti || 
4 ||

     atra hetumāha-
          yato hi pūrvānubhavasaṃskārātsmṛtisaṃbhavaḥ |

yataḥ pūrvānubhavasaṃskārāt smṛteḥ saṃbhavastasmāt tadviṣayeṇa tatpadaiva 
sā | hi yasmādevaṃ, tasmāt kena dṛṅnāśe smṛtiriti paryanuyogāsaṃbhava 
ityāśayaśeṣaṃ hi śabdena darśayati ||

     paro labdhāvakāśa āha-
          yadyevamantargaḍunā ko'rthaḥ syātthāyinātmanā || 5 ||

evaṃ yadi ucyate, tarhi antargaḍunā kalpanāśalyadāyinā kvacidapi 
anupayoginā ko'rtha ātmanā sthireṇa, na kaściditi yāvat | 
tamanubhavamābhāsayati iti | nanu nīlavat kiṃ viṣayatayā | netyāha, kiṃtu 
pūrvānubhavānukaraṇena tatsadṛśatvena saṃsakārajatvena pratilabdhena hetunā | 
tatsadṛśī hi sā | saca nīlaṃ viṣayatvena avagāḍhavāniti sāpi tathā bhātīti | 
tenaiva ca iti saṃskāreṇa | ṭīkākāraḥ atha yatraiva ityādeḥ yadyevam 
ityantasya sūtrasya tātparyaṃ pūrvārtha ityādinā viṣayavattābhiṣṭau 
ityantena ākhyāya ko'rthaḥ ityāderāha ātmopagamo vyarthaḥ itiśabdena 
antargaḍuśabdasya vyarthaḥ ityanena ko'rthaḥ ityasya | arthāvabhāsakṛtā 
vāsanā saṃskārarūpā yasya ātmano'ntarmukhabodharūpasya, sa yadā 
tādṛśadarśanakṛtavāsanāprabodha-dvāreṇa prabodhito bhavati; tadā

(page 127)

tasminnupādāne'ntaraṅge kāraṇe svasaṃvedanāntarmukhabodhalakṣaṇe ātmani 
kāryarūpā smṛtirjāyate, anubhavasadṛśatvena ca bhātīti saviṣayatvamiyadeva 
yasyāḥ | anubhavāt paṭvabhyāsādarapratyayarūpādātmani vāsanātmā 
saṃskāraḥ, tasya sadṛśādṛṣṭādeḥ prabodhastataḥ smṛtiriti iyat siddhāntino 
matamuktvā dūṣayitumāha evaṃ ca iti | etaduktaṃ bhavati-bahirmukhatāṃ-
śādeva jñānīyāt saviṣayatā smṛtyā pratilabdhavyā | naca sā naṣṭāt yujyate, 
nacāpi anaṣṭādantarmukhatāṃśāt | naca bahirmukhatāṃśasyāpi anāśe 
smṛtitvamupapannam, anubhava eva sa syāditi hi uktam | tadayaṃ bahirmukhatāṃśo 
naṣṭo'pi anaṣṭa iva tiṣṭhatīti upagamyam | naṣṭaśca kathamanaṣṭo bhavati yadi 
tadanukaraṇaṃ tatsadṛśaṃ jñānāntaraṃ janayituṃ yogyatā na bhavet | sa eva 
tasya naṣṭasyāpi anāśaḥ | jīvati droṇācāryo yasya aśvatthāmā putra iti hi 
vyavahāraḥ | smṛtirūpaṃ tadīyamanukaraṇamavaśiṣyate iti īdṛksadṛśatvaṃ 
mukhyaṃ saṃskārarūpatvam, upacārāttu tajjananayogyatāpi saṃskāro yā 
tāvadaprabuddhā, tajjananavyāpṛtatvaṃ tu prabuddhaḥ saṃskāraḥ; yadi vā 
prabubhutsamāno'sau, prabuddhastu saṃskāraḥ smaraṇameva tasyaiva 
anubhavānukaraṇarūpatvāditi | evaṃ bhūte bahirmukhatvasya anukaraṇamātreṇa 
avaśiṣyamāṇatārūpe saṃskāralakṣaṇe'rthe ātmavādināpi avaśyopagantavye 
śuddhasya bodhamātrasya antarmukhasya tadbahirmukhatārū-
patārūpatādātmyavṛttitvena nyāyāyātavicchedasya avicchedaḥ kasya 
anupapattyā kalpyate iti | nanu tadabhāve kutra saṃskāraḥ | āha jñānakṣaṇe iti | 
nīlānubhavāt nīlaprakāśarūpāt samanantarapratyayāt pītācca 
viṣayādudbhavan jñānakṣaṇo nīlaprakāśarūpo'pi bhavati tāvat tatsadṛśatvāt 
pītaviṣayodrekāt tu na tathā bhāti avidyādṛṣṭādi-

(page 128)

māhātmyādvā | nahi svaprakāśe'pi saṃvedane yadasti tena bhātavyaṃ 
kṣaṇikatvādyaṃśasya anirbhāsanāt, avidyādinivṛttau tu nairmalyāducyate

     saṃskārasākṣātkaraṇāt pūrvajātijñānam | (yo. sū. 3 | 18)

iti | tataḥ pītapratyayāt haritapratyayo nīlapītaharitaprakāśanaśaktimānapi 
haritaprakāśa eva | uktayuktestāvadeṣā paripāṭī-yāvat nīlasya tajjātīyatvatat-
sādṛśyatadvirodhādinā kiṃcitsaṃbaddhaṃ dṛśyaṃ bhavati, 
tatastādṛśatopalakṣitaḥ saṃbaddhadarśanarūpāt tādṛśadarśanāt 
samanantarapratyayāt viṣayaṃ kaṃcidapi anapekṣamāṇāt tatpūrvavṛttinīla-
pratyayānukārī pratyaya utpadyate | sa prabuddhaḥ saṃskāra ucyate smaraṇamiti | 
taduktam anubhavaḥ paṭīyān smṛtibījamādhatte, tādṛśadarśanādasya 
prabodhaḥ iti | prabodhaśca asau smṛtireva | anukaraṇamātrāvaśeṣatā hi 
saṃskāraḥ iti uktamācāryapādaiḥ | tena yadāśaṅkante-tādṛśadarśanāt na 
kutrāpi asya saṃskārasya prabodhaḥ, na tāvat pūrvavijñānagatasya, tat 
vinaṣṭam; na uttaravijñānagatasya nīlatādṛśajñānānantaraṃ 
pītajñāne'ntarālāsaṃcetite nīlasaṃskāraprabodhābhāvāditi, samarthayante ca 
nīlatādṛśadarśanena nīlavikalpo'buddhasaṃskārajanitaḥ smṛtiṃ karotīti; 
tadasadeva anyonyāśrayādyāpatteḥ | nīlavikalpo'pi abhilāpasmaraṇāt, tadapi 
saṃketasmṛteḥ, sāpi nīlārthasmaraṇāditi bahirmukho mukhe voplavaḥ | dvitīyaṃ 
tādṛśadarśanaṃ yatra prabuddhasaṃskāratā tato nīlārthasmaraṇamityapi 
kalpane smaraṇasya vikalparūpatvena abhilāpasaṃketasmaraṇapūrvabhāvitā 
upagamyā, tatrāpyevamiti anavastheti āstāṃ tāvadiha | agre hi aṇuśaḥ etat 
vicārayiṣyate | sthire tāvadetadanukaraṇarūpā smṛtiḥ, sā ca vikalpa-

(page 129)

paryantaṃ pūrvadarśanamanukarotīti viṣayaprakāśarūpā sābhilāpā ca na 
anyadiyamupayācate iti paramagurupādānāṃ matam | nanu kutra asthire 
saṃtānavāhini tadanukaraṇatā dṛṣṭā | tilānāṃ hi sthirāṇāṃ mālatīkusuma-
saurabhānukāritvaṃ dṛṣṭamiti | āha bhūrjapatramapi iti | pelavāvayavatvāt 
saṃbhāvyamānāvayavasphuṭanaṃ kriyāvibhāgasaṃyogavināśakrameṇa 
naśyati, anyadutpadyate bhūrjadalamiti apiśabdasya abhiprāyaḥ | saṃvartitaṃ 
cirakālaṃ tato'pi prasāritaṃ punaḥ pūrvasaṃniveśameti | naca tat kūṭasthaṃ 
sat nityam, apitu saṃtānanityam | kūṭe rāśirūpe tiṣṭhati, na kiṃcidasya calati; 
kūṭe kvacana anullaṅghanīye tiṣṭhati, na kenacidanyathā kartuṃ śakyam; kūṭe 
viśvato dāhe vināśakāraṇopanipāte'pi tiṣṭhati, kūṭe vyāje'pi apahnavātmani 
kriyamāṇe tiṣṭhati na anyathābhavatīti acalarūpatayā bhavat 
kūṭasthanityamucyate | etaduktaṃ bhavati-tileṣu tāvat na kaścit 
saṃskārārtho'bhyupagataḥ sthirapadārthavādibhiḥ | sūkṣmamakarandagandho hi 
tatra saṃyuktasamavāyādupalabhyate, nirgandhe'pi jale iveti | naca atra bhāvanā 
kalpyā | sā hi ātmanyeva, vegasthitasthāpakau tu sakriyaviṣayau kathaṃ syātāmiti 
na tileṣu saṃskāraḥ kaścit | tatsthāyini saṃskāro bhavati tilādāviti asadeva | 
vegaśca nadyāmasthirāyāṃ śarādau ca pavanajavakriyāsaṃbhavasaṃbhāvya-
mānāvayavavibhāganāntarīyake nāśe dravyāntararūpe dṛśyate eva, 
sthitasthāpako'pi bhūrjapatre | tadvat jñānasaṃtāne'pi bhāvānātmako 
bhaviṣyati | anukaraṇameva hi vastutaḥ saṃskāraḥ | śarasyāpi 
prayatnakṛtasakriyatvānukaraṇam | ata eva sthitaṃ pūrvaṃ rūpaṃ sthāpayatīti 
sthitasthāpakataiva saṃskārasya paramārthaḥ | 
deśāntaragatatadrūpasthāpanaviśeṣāt tu 17

(page 130)

vegaḥ pṛthagucyate | bhāvanā tu na sakriyatvānukārarūpā, sthitasthāpakastu 
saṃniveśānukāra iti vastuto'nukaraṇameva saṃskārārthaḥ | naca tatra 
nityatvasya leśenāpi upayogaḥ | yat yāvataiva siddhaṃ, na tat tadadhikaṃ kalpayati 
aṅkura iva bījādinā; tathāca smṛtiḥ saṃskāreṇeti | adhikakalpanasya hi 
kāraṇaṃ tāvataiva asiddhatvamanyathā adhikakalpanā na viramet | viratiśca asyā 
vyāpikā dṛṣṭaiva, tadviruddhaṃ ca iha upalabhyate iti || 5 ||

     nanu saṃskāro dharmarūpo guṇaḥ, na svatantraḥ iti dharmiṇā asya 
bhavitavyam | jñānasaṃtāna eva asya dharmī,-iti cet, na tāvat saṃtānaḥ 
kaścidanyo jñānebhyaḥ | tat yadi jñāneṣveva saṃskāra ityucyate, tadayuktam | 
nahi anyatra anubhavarūpatā, anyatra saṃskāraḥ, anyatra smṛtiriti yuktaṃ 
prasiddhe caitramaitrādipramātṛbhede evaṃvidhavṛttāntānava-lokanāt | tasmāt 
anubhavasaṃskārayorabhedaḥ samarthanīyaḥ | saca svarūpeṇa na upalabhyate ato 
vilakṣaṇatvāditi āśrayābhedādekārthasamavāyalakṣaṇādeva sa siddhyati | 
anubhavasaṃskārayośca āśrayadvāreṇa abhede siddhe sukhādīnāmapi 
pratisandhiḥ siddhyatyeva sarvasya pratisandherya eva ahaṃ sukhānubhavena sukhī 
samabhavam, sa eva icchāmi, duḥkhī dveṣmi, icchādveṣayuk ca ādātuṃ hātuṃ 
vā prayate ityādeḥ smaraṇasāratvāt | anenaiva āśayena 
saṃkṣepavyākhyārūpāyāmavatāriṇyāṃ saṃskārasya dharmatvaṃ 
vyākhyātaṃ na sukhādīnāṃ pṛthak | tasmāt saṃskārasya āśraya ekaḥ, 
ekatvādeva ca sthiro yaḥ; sa eva ātmeti pūrvapakṣavādino matamāśaṅkya 
kārikāṃ saṃkṣepeṇa vyācaṣṭe pūrvakārikārthameva upajīvan tadevam iti | 
yato nitya ātmā ato yathā asāvanuditasaṃskāro'pi na smṛtau vyāpariṣṭa; tathā 
uditasaṃskāro'pi na vyāpriyeta

(page 131)

tatsvarūpasya aṃśenāpi availakṣaṇyāt | vailakṣaṇyaṃ hi saṃskāra eva, tatkṛte 
vā vyatirekarāhitye tasya pūrvarūpāpāyādanityatvam | vyatirikte tu tasya na tat 
kiṃcitsyāt | tataḥ saṃskārasya kimāśrayeṇa smṛtau janyāyāmanupayukteneti 
mātrapadam | ubhayamapīha kalpanārūpaṃ kevalaṃ pūrvasiddhatvādekaṃ 
sūtre upamānatvena uktamityāśayena āha draṣṭāyaṃ smartā ca iti |

     tato bhinneṣu dharmeṣu tatsvarūpāviśeṣataḥ |
     saṃskārātsmṛtisiddhau syātsmartā draṣṭeva kalpitaḥ || 6 ||

     tata ātmano vyatirikteṣu dharmeṣu saṃskārādiṣu satsvapi vyatirikte ca 
samavāye satyapi tasya ātmanaḥ svasmin rūpe'nuditasaṃskārādidharmāt 
pūrvarūpāt na viśeṣaḥ | viśeṣe hi anityatvam | tasmāt saṃskārādeva 
pūrvoktanyāyena smṛtiḥ siddhāḥ | saṃskārabhāvābhāvābhyāṃ 
pramātrabhedabheda vyavahāraḥ, tāvapi upādāne 
upādeyabhāvatadabhāvakṛtau, | yat tu ahaṃ smarteti bhāsate, tatra tāvadasau 
ahaṃpratītireva; na ātmā kṣaṇikatvādasthiratvāt | tatpratyeyaṃ tu vastu 
svalakṣaṇaṃ yadi anubhavagocarīkṛtaṃ bhāti, tadasthirameva | atha vikalpyaṃ, tat 
śarīraṃ saṃtāno veti tathāpi vedyavedanātirikto na kaścit vedakaḥ 
smartṛdraṣṭṛrūpo bhāti | tato bhinneṣu iti pūrvapakṣasūcakatvena 
siddhāntopayogitvena ca sūtram | tatra ādyena rūpeṇa tāvat vṛttikṛt vyācaṣṭe 
sukhaduḥkha ityādi | sukhādayo hi dharmāḥ pratisandhīyamānā dṛṣṭāḥ, 
teṣāṃ ca bhinnānāṃ kathaṃ pratisandhiriti āśraya eko vācyaḥ | tata eva 
ṭīkākāro vyācaṣṭe parasparasamanvayo na syāt iti | atha siddhāntopayogitvena 
vyākaroti bhinnairdharmairasaṃbhinnasya iti alabdhatadāveśasyeti yāvat | etat 
ṭīkāyāṃ tairetaiḥ iti bahuvacanena vyākhyātam |

(page 132)

bhinnānāmekatādātmye kathaṃ bahutvam, anekatādātmye vā tasya abhinnasya 
kathamekatvamiti āśayaḥ | tatkṛto yaḥ sukhādīnāmupakāraviśeṣaḥ 
saṃskārajanmā pratisandhilakṣaṇaḥ, tatra asya ātmano'nupayogāt na asau tatra 
upayujyate iti yāvat | guṇakṛtādvā upayuṅkte svīkaroti | evaṃ  
sukhādipratisandhau tāvat na asya ko'pi upayogaḥ | na kevalaṃ 
sukhādibhiraveśeṣitatvāt saṃskāreṇa ca asau pratisaṃdhātā yāvat 
saṃskārasya yat mūlamanubhavātmakaṃ tenāpi asya na kaścit viśeṣaḥ kṛta iti 
kathamasau smṛtiṃ janayedityāha nirviśeṣasya ca iti | anena smṛtāvavyāpṛteḥ 
iti vṛttigranthaṃ ṣaṣṭhyantamātmano viśeṣaṇatvena hetutāsamuccayagarbhaṃ 
vyācaṣṭe | asaṃbhīnnatvena anupajātaviśeṣatvāt pratisandhāvātmano'nu-
payogaḥ smṛtāvavyāpṛtatvāt ca |

     -------śarīrādyavasāyinī | (2 | 2)

ityatratya eva iha artha ityāśayena tat draṣṭṭavat ityādivṛttiḥ ṭīkāyāṃ na 
vyākhyātā | tadayaṃ saṃkṣepaḥ-yat kalpitamapi yatsiddhaye na saṃbhavati, na 
tat tatsiddhaye prakalpyate khapuṣpamiva aṅkurasiddhaye; tathā ca nityaḥ 
kaścidātmā smaraṇapratisandhisiddhaye | iha hi kalpanāyā niyamavattvaṃ 
vyāpakam, anyathā sā na viramet | yadi ca tadaprabhaviṣṇu tatsiddhaye kalpyate, tat 
vyāpakamasyā hīyeteti tatsiddhaye prakalpanaṃ tatprabhaviṣṇuviṣayatvena 
vyāptaṃ; tacca vyāpakamiha na upalabhyate iti vyāpakānupalabdhiḥ | tadāha

     varṣātapābhyāṃ kiṃ vyomnaścarmaṇyasti tayoḥ phalam |
     carmopamaścetso'nityaḥ khatulyaścedasatsamaḥ ||
iti,

(page 133)

     yasminsati bhavatyeva yattato'nyasya kalpane |
     taddhetutvena sarvatra hetūnāmanavasthitiḥ ||
ityādi || 6 ||

     evaṃ dharmī eva tāvadātmā nāstīti kutra hetūpanyāsairaiśvaryaṃ 
prasādhyeteti uktvā jñānakriyāyogāditi yo heturuktaḥ, tat nirākartuṃ 
jñānameva parasya na upapannaṃ jaḍatvena ajaḍatvena veti parasya 
prasaṅgāpādanaṃ kartuṃ kārikādvayaṃ prasaṅgaviparyayeṇa svamatalābho 
yataḥ | tathāhi yayā yuktyā ātmā nityaḥ, tayā jñānamapi nityaṃ kasmāt | 
nityatve tasya taditi katham | tato dharmihetusvarūpayoranyonyarūpavirodhena 
āśrayāśrayibhāvavirodhena ca siddhiriti | tatra prathamamajaḍarūpatve jñānaṃ 
siddhāntino na upapadyate iti yat sūtreṇa ucyate, tat saṃkṣepeṇa avatārayati 
ātmanaḥ iti | sūtre anityam iti prādhānyādupāttaṃ dharmāntarāṇyapi 
vailakṣaṇyakārīṇi upalakṣayatītyāśayena dvitvavikalpeneti sāmānyena āha | 
ātmāpi citsvabhāvo jñānamapi, tato dvitvena anyatvena 
nityatvānityatvalakṣaṇena dharmadharmibhāvena ca yā kalpanā kṛtā, sā 
anupapannā, pramāṇamūlatvābhāvāt na vastusādhanītyetadvastu āha

     jñānaṃ ca citsvarūpaṃ cettadanityaṃ kimātmavat |
     athāpi jaḍametasya kathamarthaprakāśatā || 7 ||

     cakāraḥ siddhāntinaṃ prati anupapattyantaraṃ samuccinoti | jñānasya yadi 
cidrūpatā ātmana iva svābhāvikī, tarhi tat kimanityam | naiva anityamātmavadeva 
| citsvabhāvatvasya svaprakāśatvalakṣaṇasya hi viruddhaṃ vedyarūpatvaṃ 
paraprakāśyatārūpaṃ svātantryapāratantryayorvirodhāt, vedyatvena ca vyāpto 
deśakālayoga iti vyāpakaviruddhasya svaprakāśatvasya upalabdhyā jñāne

(page 134)

viruddhavyāptasya deśakālayogasya niṣedhaḥ | deśakālayoga eva ca anityatvam | 
niyataṃ hi yat bhavati, natu na bhavati kathaṃcit; tat nityam | yacca kvacit bhavati, 
kadācicca bhavati; tadanyatra anyadā ca na bhavatyapīti na niyataṃbhavam | 
sakaladeśakālayoge'pi vastutastadayoga eva | yadi hi tena deśena, tena vā kālena na 
asya svarūpamāviśyate, tat tatreti tadeti vā kutaḥ | āvṛta iti cet, tena ya ā 
samantāt vṛtaḥ, tasya kathamanyena dhāraṇam | vṛtto hi avaṣṭabdhaḥ, sa 
kathamanyāvaṣṭambhaṃ saheta; tata eva ka eko'vayavī bahuṣu avayaveṣvityādi 
sarvamanupapannam | evaṃ yadi citsvarūpaṃ jñānaṃ, tat nityavibhurūpaṃ 
tadapīti ātmāntaraṃ aditi jñānahetuḥ svarūpāsiddhaḥ | atha jaḍaṃ tat, tarhi 
arthaṃ prati tasya prakāśarūpatā kathamiti sūtrārthaḥ | nanu ciditi 
jñānamucyate, naca vaiśeṣikādīnāṃ tadātmanaḥ svaṃ rūpam, dharmo hi 
tadasya, tat kathamuktam-ātmanaścitsvarūpatve yathā nityatvaṃ, tathā 
jñānasyāpi syādityāśaṅkya āha paraprakāśatvābhāvāt iti | jñānamiha 
nīlādiprakāśa ucyate | sa ātmano manaḥsaṃyogādikṛtaḥ kādācitko dharmaḥ | 
sa svakāraṇābhāve yadā na bhavati, tadā ātmā nīlādiprakāśasphurito na 
bhavatīti suṣuptamūrcchāpralayāpavargādau svātmanā prakāśasvabhāvo'pi 
jaḍa ucyate | rūpaṃ tu asya svaprakāśameva, na ākāśakāladigādijaḍarūpa-
vyāpakavargatulyamapavargasya phalato'puruṣārthatāprasaṅgāt śūnyavādivat | 
tata eva bhāsarvajñācāryaprabhṛtayo naiyāyikā evameva abhyupajagmuḥ nitya-
jñānānandavattvaṃ nyāyabhūṣaṇe ātmanaḥ samarthitam | tataśca ātmā 
yathā prakāśasvabhāvaḥ kimanityaḥ, na anityaḥ, apitu nityaḥ, tadvat 
nīlajñānamapi nīlaprakāśasvabhāvaṃ kimanityam, na anityam

(page 135)

nityameveti upapanno dṛṣṭāntaḥ | athavā iti bhavatu vaiśeṣikāṇāmacit-
svabhāva ātmā, kimasthānanibandhena | ātmavādino hi mayā paryanuyojyāḥ, 
ato'nye svaprakāśātmavādina iha prasaṅgāpādanena nirākariṣyanta iti | 
dṛṣṭānta iti vaidharmyagrahaṇamatra na prayuktaṃ dṛṣṭāntasya sarvasya 
sādharmyaprāṇatvāt | ātmavat citsvarūpaṃ cediti vaidharmyeṇa yojane'pi 
viṣedhyena hi nityatvadharmeṇa tulyatā ucyate anityaḥ śabdaḥ 
ākāśādivadityanena | tathāca vṛttau guṇībhūte niṣedhye nāsya prayoga 
upapannaḥ | nahi bhavati anityaḥ śabdaḥ kṛtakatvādākāśavaditi, apitu 
nityamakṛtakamākāśamiveti; yadi vā yadanityaṃ na bhavati, tatkṛtakamapi na 
bhavati ākāśavaditi; yadi vā akṛtakatvādākāśavat nityaḥ śabdaḥ iti | tata eva 
ayaṃ vyatirekabhāge bhavan dṛṣṭāntaḥ sādharmyeṇaiva bhavati | 
ivārthatulyārthayoḥ sādṛśyameva hi sarvatra paramārthaḥ | tato na vaidharmye 
tatprayogaḥ, kevalaṃ sādharmyasya vyatirekaniṣṭhatāmabhidhātuṃ viśeṣya 
vyapadiśyate vaidharmyadṛṣṭānto'yamiti | tasmādiha evaṃ sūtre yojanā | 
kiṃśabdena kākkā niṣedho'bhidhīyate, ātmavat kimanityam, ātmavat na 
anityamiti yāvat; athavā kimityanena anupapattiprabhāvaparyanuyojyadharmatvama-
bhidhīyate | tena yathā ātmā kimanityaḥ, tathā jñānamapi kimanityam; 
ubhayorapi anityatādharmo'nupapadyamānatvena paryanuyogamātramiti | yadivā 
asamasta eva akāro nañarthaḥ prasajyapratiṣedhe'pivā | akartari ityatra 
kārakaśabdopādānaliṅgasamarthito'samarthasamāsaḥ | tataśca niṣedhyena 
tulyatā-ātmavat nityaṃ kasmāt na bhavatīti, citsvarūpatvena tu spaṣṭā | evaṃ 
tatra tatra yojanāyāmavadhātavyam | tathā ca vṛttiḥ ātmana iva 
nityatādiprasaṅgaḥ iti | jaiminīyāḥ

 (page 136)

puruṣaṃ saṃvidrūpameva sukhādyavasthābhinnaṃ manyante, sāṃkhyāstu 
svasaṃvedanamātrarūpamapariṇāminam | tatra cidrūpāṃśe 
acidrūpadharmāntarānupraveśaśūnyatvāt deśakālātmanāpi dharmeṇa na 
anupraveṣṭuṃ yuktamiti | tata āha teṣāṃ hi iti | kāpilānāṃ tāvat nitya eva asau 
| jaiminīyānāmapi cidrūpāṃśena nityaḥ, avasthāṃśena tu anityo'stviti | evaṃ 
saṃkṣepeṇa ślokārdhaṃ vyākhyāya vitatya vikalpapūrvakatāgarbhaṃ 
vyācaṣṭe cidacittvābhyām iti | abhyupagate'pi ātmani yat jñānamaṅgīkṛtaṃ, 
tat svaprakāśaṃ na veti pakṣasya dvaitam, dvitaiva dvaitam | tatra iti dvayoḥ 
pakṣayormadhye | sāṃkhyadarśane yathā ciduparāgeṇa puruṣapratibimbena 
prakāśatā, tathā na iha, apitu taṃ vinā svata eveti | eṣa yadi prathamaḥ pakṣaḥ, 
tarhi vyāpitvaṃ deśena anavacchedaḥ, nityatvaṃ kālena, ādigrahaṇādekatvaṃ 
svarūpeṇetyādirya ātmanaḥ puruṣasya dharmaḥ; sa jñānasyāpi prasajyate co 
hetau | yasmāt deśaviśeṣāyogena vyāpitvaṃ, kālaviśeṣāyogena ca nityatvam, 
deśakālopalakṣitasvarūpaviśeṣāyogena ca abhinnatvamiti ādigrahaṇāt | 
viśeṣaśabdo vā pṛthageva svarūpaviśeṣavācī | nanu saṃvidrūpasya deśakālau 
tāvat vedyau bhāsanīyau, tāveva saṃkocakau bhaviṣyataḥ, tatsaṃkocācca 
svarūpasaṃkoco'pi bhavedityāśaṅya āha naca bodharūpeṇa iti | etena jñātari 
iva jñānaguṇe'pi na saṃkoca upapadyate nyāyasya tulyatvāditi darśayatā 
cetyadharmetyādivṛttiṃ guṇiguṇaviṣayatayā vyācakṣāṇena | etaduktaṃ bhavati-
bodhe tāvat nirbhāsanaṃ yadi cidrūpe darpaṇe iva viśrāntaṃ prakāśate, tat 
cidrūpasya kaḥ saṃkocaḥ | athāpi vedyatābahirbhūtaṃ tadanāliṅgadeva 
sākṣimātrarūpaṃ saṃvedanaṃ bodhyasya bodha ityucyate, tathāpi kaḥ 
saṃkocaḥ |

(page 137)

parasparasvarūpamelane hi yāvanyonyamanyathābhāvaṃ na sahete-yathā śuklo 
guṇaḥ paṭasya na kṛṣṇāditāṃ, paṭo'pi na śuklasya anyāśrayatāṃ; tau 
saṃkocakau parasparataḥ | ādyo rūpabhedo'parodeśabhedaḥ | tatrāpi siddhatve 
guṇabhedaḥ śukla iti, sādhyatve karmabhedaścalatīti | siddhatve 
vyatiriktatvāvyatiriktatvetantuṣu paṭa iti, sādhyatve vyatiriktatvāvyatiriktatve 
gacchatīti, asaṃkocyatve asaṃkocakatvaṃ sāmānyam | tacca idaṃ vastu vā 
vyāvṛttikalpitaṃ vā samavāyena tādātmyena veti kimiha avāntareṇa | tatrāpi 
avyatiriktatayā bhāsamānaṃ yuduktaṃ siddhasādhyarūpaṃ, tadeva 
atyantavyatiriktamāveśena bhāsamānam | bāhyau deśakālau gṛhe caitraḥ, udite 
juhotīti | tasmādāveśakṛtaḥ saṃkocaḥ | ā samantāt praveśo hi āveśaḥ | 
āveśo'pi tulyakakṣyatvena | yasya hi yena samānakakṣyāsthānaṃ, tat tena 
āviśyate | bhinnakakṣyo hi anāveśāt na saṃkocyate saṃkocakavyāpakaniyama-
viruddhāniyamaprasaṅgāt | naca pātālagahanena dyauḥ saṃkocyate | 
saṃvedanācca bhinnā kakṣyā deśakālayorbodhyayoḥ | kakṣyā hi 
prakāśasthānam | deśakālau bahiḥ prakāśete ayaṃ ghaṭasya deśo vā kālo veti 
idantayā prakāśe bahirbhāvavimarśātmatayā vyatiriktaprakāśapāratantrya-
rūpayā nirbhāsamānatvāt | prakāśastu svāvyatirekeṇa ahamiti svātantryeṇa 
bhātīti | yat yena bhinnakakṣyaṃ, na tat tasya saṃkocaka pātālamiva divaḥ | tathā 
bodhena deśakālādīti saṃkocakatvavyāpakābhinnakakṣyatvaviruddhopalabdhiḥ | 
bodhādahantāprakāśamānāt bhinnā kakṣyā deśakālayoridantayā 
prakāśamānatvāt | bodhāt yadi abhinnā tayoḥ kakṣyā syāt, 
idantāprakāśamānatvaviruddhamahantāprakāśamānaṃ syāditi vyāptisiddhau 
svabhāvahetuḥ | tadetadāha na ca iti | bodhasya yadabahiḥ

(page 138)

iti bodharūpādavyatiriktaṃ sukhapradhānaṃ rūpaṃ svasaṃvedanalakṣaṇaṃ 
tatra deśakālayorna prakāśo vyatirekeṇa bodhāt bahistayoḥ prakāśanāt 
bahirmukhena bodhena | nanu evaṃ deśakālau kasya saṃkocakau bhavatām | āha 
iha ghaṭa iti | co hetau | yasmāt iheti vaiyadhikaraṇyena deśasaṃkocaḥ | sa iti 
pūrvānubhūte smaryamāṇe bhāvaśarīrānupraveśena vyāmiśrībhūtadeśa-
kālāveśaḥ | tadeti vaiyadhikaraṇyena kālaviśeṣayogaḥ iti | evamatra sarvatra | tatra 
idantātmikayā idantayā vyatiriktavimṛśyamānatayā niścīyamānau deśakālau 
ghaṭa ityevaṃ vyatiriktaniścayasyaiva tulyakakṣyasya bhedāya svarūpasaṃkoca-
nāya paryāptau | tasmāt na svasaṃvedane tayoḥ prakāśaḥ | tena bodhasya na tau 
tulyakakṣyāviti saṃgatiḥ | svabhāva eva svābhāvyam | yadi vā svabhāvasyāpi 
bahirmukhatāyāṃ bahīrūpaviṣayagatadeśakālasaṃkocāpattirviṣayopādhikṛteti 
kasyāpi śaṅkā syāt, yathā vakṣyate

     kevalaṃ bhinnasaṃvedyadeśakālānurodhataḥ |
     jñānasmṛtyavasāyādi sakramaṃ pratibhāsate || (1 | 52)

iti, tāmāpahartuṃ svabhāvasya bhāva iti anyarūpāsahiṣṇutābhidhānāya 
bhāvapratyayaḥ | nanu kimupacaritaṃ bodharupatvamasti yena 
tacchaṅkāśamanāya cicchabdena anupacaritabodhe puṃsi

     citiśaktirapariṇāminī | (yo. da.-1 | 2 bhā.)

ityādisthāneṣu prasiddhena jñānena vyavahāraḥ kṛta ityāśaṅkya āha 
sāṃkhyānāṃ hi iti | pradhānasya yaḥ prathamo vikāro mahāniti, tasya 
kāraṇaskandhādanyo yo buddhiśabdavācyaḥ karaṇaskandhaḥ, sa 
pradhānavikāratvāt jaḍo'pi cidātmakapuruṣapratibimbayogāt cetanavat 
bhāsamāna upacaritabodhasvabhāvo'styeva pāramarṣadarśane

(page 139)

yata eva, tasmādupacāraśaṅkāśamanaṃ kartavyameva | nanu upacaritabodharū-
pameva tarhi jñānaṃ bhaviṣyati, yatra nityatā syāt, sa dharmaprasaṅgadoṣo na 
bhavatītyāśaṅkya āha tādṛśī ca iti samanantarasūtra eva | nanu 
cittattvarūpasya ātmano'pi deśādiyogo bhātyeva, tat kathaṃ taddṛṣṭāntena 
tadayogaprasaṅgāt jñānaguṇasya nityatādiprasañjanam | tathāhi yathā iha 
ghaṭaḥ, idānīṃ ghaṭa iti pratītiḥ; tathā iha jānāmi, idānīṃ jānāmi; tatra 
ajñānamatra jñātāsmīti asti pratipattiḥ | satyam, sā tu śarīrādiniṣṭhā 
śarīrādāvekasāmagryadhīnatādinā jñānasaṃbandhādhyavasāyena 
tadupādhivaśena jñātari pratibhāti | tena cittattvasya yat tattvamanupacaritaṃ 
svasaṃvedanaprakāśarūpamantarmukham, tatra na diśā deśarūpayā kālena vā 
avacchedaḥ saṃbhavati pūrvoktayuktyā tattve tattvataḥ | yuktyantaramapi āha 
bodhaikātmanaḥ iti | dikkālau hi avyatiriktaviśeṣābhidhānena kiṃcitkarāveva 
viśeṣaṇaṃ bhavataḥ, na akiṃcitkarāvatiprasaṅgāt | tathāhi deśavaśāt 
lohavastrādīnāṃ viśeṣaḥ kālavaśācca bhujagaviṣādīnāṃ dṛṣṭa eva | 
cidrūpe tu prakāśa eva ekaṃ rūpaṃ, tato'dhikaṃ tu aprakāśatvarūpatvena 
cidrūpe kathaṃ miśrībhavet | tat hi vedyatvameva spṛśat tato bahirbhāvameva 
avalambate | nanu nīle'pi viśeṣo nīlatvādhikatvena anīlarūpaḥ kathaṃ 
samāviśet | ucyate | siddhāntidarśane tāvadananta ābhāsavargo niyatiśaktyā 
miśrībhūtaḥ san padārthe'rthakriyākārī, tasya rucitena aṃśena vyapadeśo 
bhavati | saugatamate'pi niraṃśasvabhāvo'pi tatastato vyāvṛttaḥ padārthātmā 
kāraṇasāmagrījanyaṃ rūpabhedaṃ vyāvṛttibhedairadhyavasīyamānaṃ sahate 
eva | jñānaṃ tu svaprakāśaṃ viṣayasya ca prakāśarūpam | tadasya vyāvṛtti-

(page 140)

svīkāriṇāpi vikalpena yaḥ kaścit taddeśatvatatkālatvādirūpo viśeṣo'dhyava-
sīyate, so'prakāśarūpedaṃbhāganiveśitvāt bodhabahirbhāvameva pratipadyate | 
nanu yathā dhūsaranīlam, bhāsvaranīlam, atra nīlam, adhunā nīlam,-
ityevaṃsvarūpadeśakālaviśiṣṭāni bhinnāni nīlāni, tathā bodhā api 
bhaviṣyanti; naca anyastebhyo'sti boddheti kathamātmana iveti vṛttāvuktam | na 
tulyametat yato nīlaṃ nāma uktarūpaṃ viśeṣaparihāreṇa na kiñciduktacaramiti 
tathābhūtānyeva tāni nīlāni nāmeti yuktam | tata āha 
bodhyatvānekavaicitryasahatvāt iti | bodhaḥ punaḥ suptasamādhānādiṣu 
vedyebhyo nīlasukhādibhyo deśakālebhyaśca tadanurañjakebhyo nirmukta eva 
prakāśamātraparamārtho'ntarmukhātmanā bhāti, tadeva asya pāramārthikaṃ 
rūpamiti adhikaṃ tato bahirbhūtameva | yat yasya nijaṃ rūpaṃ, tat tenaiva satataṃ 
bhāti tarurivaśākhādimadviśeṣātmanā | na ca deśakālādiviśeṣaiḥ sadā 
bodho bhātīti | sadā tathānābhāse'pi yadi nijaṃ rūpamiti syāt, kadācit 
paṭasāhityena ghaṭo bhāta iti paṭo'pi asya rūpaṃ syāditi aniyama upaplaveta | 
niyamaśca vyāpako dṛṣṭa iti vyāpakaviruddhopalabdhiprasaṅgāt 
vipakṣamujjhitvā vartamānanijarūpatve satatatayā bhāsamānatvena vyāpyate iti 
vyāpakānupalabdhiḥ | yo yadviśeṣarūpaḥ, sa tadanyatamanirmukto na bhavati 
taruriva dhavādinirmuktaḥ | naca bhavati viśeṣanirmukto bodhaḥ 
samādhānasuṣuptamūrcchādāviti na nīlabodhādiviśeṣarūpa ityapi 
vyāpakānupalabdhireva | bhavati ca viśeṣanirmukto bodha iti tu prayoge 
vyāpakaviruddhopalabdhiḥ | prayogabhedakṛta eva hi āsāṃ bhedaḥ | vastutastu 
ekameveti siddhaṃ nāsti bodhaviśeṣasparśa iti | tadetaduktaṃ bodhaikātmanaḥ

(page 141)

iti viśeṣānuparaktaśuddhabodhamātratvena bhātasyetyarthaḥ | tathā ca 
nareśvaravivekaḥ

     nahi yathā gotvaṃ śāvaleyādiviśeṣarūpameva, tathā 
nīlapītādiviśeṣamayameva tat |

iti | upapattyantaramapi atra samuccinoti ābhāsasāratvena ca iti | ābhāsanamā 
īṣat saṃkocena bhāsanaṃ prakāśanā sāraṃ tattvaṃ paramārtho deśakramasya 
kālakramasya ca | etaduktaṃ bhavati-kramarūpeṇa deśakālau bhedakau bhavataḥ | 
deśabhedo hi gantari sphuṭo bhavati gateḥ | ekadeśasaṃbandhastu ekadeśa iti 
tadvāsanayā tiṣṭhatyapi deśabhedaḥ kramollekhaparamārtha eva | kālabhedastu 
kramātmaiva bhāti | kramapratyayasāro hi asau | tathāhi paro'yamasmāt yūno 
vṛddhaḥ, aparo'yamasmāt vṛddhāt yuvā,-iti janmanaḥ kramavattā tadvaśācca 
astitvaprabhṛterbhāvavikārasya nirbhāsate | yaugapadye'pi krama eva paramārthaḥ 
| anyāpekṣayā hi yaḥ kramastasya tulyatābhāsena yugapadimau jātāviti pratyayo 
bhaviṣyatkramayogyatāvaśena yaugapadye kālapratyayo na paramārthataḥ 
kālabhedo'sau tayorityanye | cirakṣiprapratyayāvapi kramasya bhūyaso'lpasya ca 
anusandhibalāt bhavata iti kramaparamārthau dikkālau | ihāsti, iha na, tadānīṃ 
nāsīt, idānīmastītyevaṃrūpaśca kramaḥ | astitvanāstitvayośca vyavahāre 
bhātyayaṃ, na bhātyeva ayamiti nimittam | tadbhāsanamabhāsanena 
sāntaravyantaraṃ sat kramasya utthāpakaṃ vicitrasya | ābhāsanaikaparamārthe tu 
cidrūpe īṣadarthasya anābhāsanabhāgasya abhāvāt nirābhāse ābhāsanāt 
niṣkrānte prakāśaikarūpe kathaṃ kramayogaḥ | ata eva kāṇādairapi kāraṇe 
kālākhyeti (vai. da. 2 | 2 | 9) iti  vadadbhiḥ kāryeṣveva kālabheda iti darśitaṃ 
bhavati | paramāṇūnāṃ tu

(page 142)

kālena saṃyogamātraṃ vastubalāt, na kālabhedaḥ | kālena asaṃyoge'pi ca 
ākāśāderghaṭādyapekṣayā yaḥ kālabhedaḥ kaviṃ purāṇam iti 
vyavahārakāle, sa ghaṭādikāryaniṣṭha eva vastuta iti nirābhāse akāryarūpe 
tāvadātmani na deśakālabhedaḥ | tato na cidrūpe deśakālakramaścideka-
rūpatvāditi kāraṇaviruddhopalabdhiḥ | deśakālakramasya kāraṇaṃ 
prakāśanāprakāśanarūpatvaṃ, tadviruddhaṃ prakāśaikarūpatvamiti | 
evāmātmano nityatvaṃ vibhutvaṃ ca upapāditaṃ kāladeśāyogāt | 
deśakālabhedo'pi bhāvāpekṣayā cidrūpasya, na bhāvābhāse 
cidanavabhāsābhāvāt | tadanavabhāso hi ghaṭapaṭayoriva deśakālabhedasya 
vyāpaka iha na upalabhyate | cidrūpasya ca svarūpeṇa bhede tadapekṣayāpi nāsau 
ghaṭasya iva svāpekṣayā | tata eva bhede'nyonyāśrayamiti svarūpābhedamapi 
uktopapattyupajīvanena āha ata eva iti | yata eva deśakālābheda ukto 
deśakālādheyaviśeṣāsparśāt nirābhāsatvāditi hetoḥ, tata eva ātmanāṃ 
bahutvaṃ caitramaitrādiṣu svarūpeṇa bhedaḥ kathaṃ svābhāvikaḥ | svabhāve hi 
bhinne svābhāvikaḥ syāt | cideva tu yatra rūpaṃ, tatra ko'nyaḥ 
svabhāvāṃśo'sti, yo bhidyeta | tena deśataḥ kālataḥ svarūpataśca 
ātmanastāvat na kaścidbhedaḥ | atra ca sarvatra cidrūpatvaṃ kāraṇam | tacca 
avikalaṃ jñānaguṇe'pīti tenāpi nityena vyāpakena ekena ca bhavituṃ yuktamiti | 
tatra nityatvavyāpitve pareṇa ātmano'ṅgīkṛte, ekatvamapi sarvatra 
śrutyantavidbhiḥ; yenāpi nopagataṃ sāṃkhyādinā, so'pi upapattyā 
upagamayitavyaḥ | etacca sarvaṃ jñāne'pi prasajyate iti prasaṅge eva 
āpādayitavye granthakāreṇa dṛḍhopapattiḥ pūrvapakṣavādimukhenaiva 
nirūpitā pṛthagbhūto jñānātmā guṇo hi na siddhānte aṅgīkariṣyate 
tatkimasya prasaṅgaḥ

(page 143)

kariṣyatītyabhiprāyeṇa | tadīyo hi prasaṅgo'yaṃ sāṃkhyādīn dūṣayatu nāma, 
asmatsiddhānte tu na kiṃcit duṣyatīti | pūrvapakṣavādī ca iyati dūre 
prasaṅgaviparyayalābhāśayā adhirūḍhaḥ | tathāhi ayaṃ prasaṅgaviparyayaḥ-
naca cidrūpamapi jñānaṃ nityavyāpakādvaitarūpamupagataṃ bhavatā, 
tadātmāpi cidrūpaḥ kathamevaṃ bhavet | tathā cidrūpatvena aviśiṣṭatve 
deśakālabhedavat svabhāvabhedo'pi kathamātmanāṃ yena bahutvaṃ syāt | atha 
cidrūpatve'pi bahutvamabhyupagamyate nānāvyavasthāta iti

     jananamaraṇakaraṇānāṃ pratiniyamāt | (sā. kā. 18)

iti, tarhi deśakālabhedo'pi bhavediti | evaṃ prathamaślokārdhaṃ vyākhyātaṃ, 
dvitīyaṃ vyācaṣṭe athaitat iti | eteṣāṃ nityatvavyāpitvādvaitānāṃ yaḥ 
prasaṅgo balādeva āpatitaḥ, sa eva doṣaḥ svapakṣopamardanāt tato bhīruṇā 
ātmavādinā jaḍaikarūpaṃ yadi jñānamaṅgīkriyate; tadā nīlaṃ yathā na 
pītasya prakāśanarūpaṃ bhavati, tathā jñānamapi na syāt | nanu jaḍo'pi 
prakāśo bhavati ādityāgnyādirityāśaṅkya āha prakāśaśca bodhaḥ iti | nanu 
ālokaprāya eva nirmalasattvaprabhārūpo bodho bhaviṣyatītyāśaṅkya āha 
tathātve iti ālokāditve dīpasūryaratnaprabhādimadhyapraveśa ityarthaḥ | 
punarapi iti | satyapi āloke pramātari avidyamāne na artho bhāti, satyapitu 
pramātari pradīpakalpe tajjñānena bhāsetaiva arthaḥ | pradīpaśataprajvālane'pi 
na bhāta eva yo'rthaḥ, sa jñāne tādṛśyeva kasmāt bhāsate | yo yathājātī-
yasaṃnidhāne yathā na bhavati, sa tathā bhavan tadvilakṣaṇajātīyasaṃnidhima-
vadyotayati yathā śītalajalahimavāyusaṃnidhāvapi ghaṭo'raktatvena anubhūto 
rakto bhavannuṣṇavahnisaṃnidhim | jaḍajātīyasaṃnidhau ca bhāvo dṛśyamā-
natvādhyavasīyamānatvavyavahāryatārūpaṃ viśeṣamapratilabdhaṃ

(page 144)

kadācana pratilabhamāno'jaḍajātīyasaṃnidhimavadyotayati | 
viparyayenirnimittatvaprasaṅgāt bādhakāt vyāptisiddhau svabhāvahetuḥ | saṃvidi 
anubhavaniścayarūpāyāṃ niṣṭhā anyānapekṣiṇī viśrāntiryāsāṃ tā 
viṣayāṇā nīlādīnāṃ vyavasthitayo vividhena asaṃkīrṇena ātmanā 
avasthānāni, tā vyavasthitīḥ kathamacetano'rtho nīlādiprāyaḥ prayuñjita 
vyavasthāpayet vyavasthitīriti----pradhānaṃ vyavasthitīḥ saṃpādayedityarthaḥ | 
sāmānyaviśeṣabhāvena vā nirdeśo hataśāyikāḥ śāyayati  madyamada iti 
yathā | yadivā vicitrāṇi yāni avasthānāni nīlaṃ pītamiti, tāni vyavasthāpayati 
niyamayati-nīlamevedam, idameva nīlamiti | tadacetanasya aprakāśarūpasya 
kathaṃ saṃbhāvyate eva | tadeva hi prakāśanasya rūpam | uttarakārikāyām iti

     ------jāḍye nārthaprakāśatā |

iti sāṃkhyaṃ cidacidrūpabuddhivādinamapi prati yat vakṣyate, tatra

     dvayamatyantaviruddhamekasya na pāramārthikaṃ rūpam |

iti nayena yadi jaḍamasyā vāstavaṃ vapuḥ, tat kathamarthasya prakāśanarūpā 
asāviti vyavasthā | abhāvadoṣo ya iha ukto vādyantarāṇi 
abhyupagamitajaḍajñānarūpāṇi pratyāyayitum, sa tatrāpi yojanīyaḥ | etat 
pūrvapakṣavādī sarvaṃ pūrvoktaṃ nigamayati tat iti yadetaduktaṃ tasmāt 
hetukalāpāt | ubhayathāpi iti cidrūpatvena acidrūpatvena ca vyatiriktasya ātmano 
vyatirikto dharmo jñānākhyo na yujyate | cidrūpatve nityavyāpakasvabhāvasya na 
tādṛśena kaścit saṃyogo'pi pareṇa abhyupagataḥ, kimaṅga 
dharmadharmibhāvaḥ | cidrūpasyaiva ca viṣayavyavasthāsthānatve kimanyena 
cidrūpeṇa acidrūpeṇa vā dharmeṇa parikalpiteneti jñānakriyāyogāt ityatra 
hetau

(page 145)

jñānayogādityayamaṃśo jñānasya svarūpeṇa asaṃbhavāt tatsaṃbandhasya ca 
atyantāsiddherapi svarūpaviparītasādhanatvāt viruddhastaddvāreṇa ca 
dharmisvarūpabādhanādāśrayāsiddha iti || 7 ||

     cidrūpamacidrūpaṃ vā jñānaṃ mā bhūduktadoṣāt, cidacidrūpaṃ tu 
bhaviṣyatītyāśaṅkyamānamātmavādipakṣaṃ pūrvapakṣavādī dūṣaṇāya 
sūtreṇa āha

     athārthasya yathā rūpaṃ dhatte buddhistathātmanaḥ |
     caitanyamajaḍā saivaṃ jāḍye nārthaprakāśatā || 8 ||

asya arthaṃ saṃkṣepeṇa ṭīkākāro vyācaṣṭe sāṃkhyo'yamapi iti | samyak 
khyātiḥ prakṛtipuruṣayorvivekena, saṃkhyānaṃ ca parigaṇanaṃ 
tattvabhedānāṃ saṃkhyā; tadadhikṛtya kṛto granthaḥ sāṃkhyaḥ | tatra 
buddhitattvasya vṛttirjñānamuktam | vartanaṃ vṛttiḥ pariṇāmaviśeṣaḥ | 
pūrvarūpaṃ hi tirodadhat kaścit pariṇāmaḥ kāṣṭhabhasmavat, sa 
kāryapariṇāma ucyate; yastu atirodadhat, sa dharmapariṇāmo yaḥ siddhākāratayā 
bhāti suvarṇasyeva kuṇḍalatā; yastu atirodadhat sādhyākāratvena gacchati 
budhyate iti yathā, sa vṛttipariṇāmaḥ | tathāhi vartanaṃ tasyeva tatheti vṛttirūcyate 
| pūrvavadeva iti cidbhāgadvāreṇa nityatādidūṣaṇam, jaḍabhāgadiśā 
viṣayavyavasthānāyogaḥ iti | atha iti parasaṃbhāvanāṃ dyotayati | buddhiḥ 
kartrī arthasya nīlādeḥ saṃbandhi rūpaṃ pratibimbātmakaṃ yena prakāreṇa 
svacchatātmanā sattvātiśayakṛtena dhatte dhārayati, tenaiva svacchatāprakāreṇa 
ātmanaḥ puruṣasya saṃbandhi caitanyaṃ pratibimbātmanā dhatte antarbahiśca 
sarvataḥ svacchatvāditi sāṃkhyoktiḥ saṃbhāvyate | trāpi dūṣaṇamāha eva 
caitanyapratibimbena saṃvidrūpā jātā prakāśapratibimbena iva jalaṃ 
prakāśarūpam | evaṃ buddhivṛttiścidrūpajñānātmikā | tataśca pūrvokto 
nityatvavyāpitvādidoṣaḥ,

(page 146) 

sāṃkhyadarśanocitadoṣāntarayogaścetyāśayaśeṣaḥ sūtrāntarakaraṇe | atha 
tatpratibimbe'pi na tadrūpāpattiragnipratibimbe'pi darpaṇasya dāhakatvādṛṣṭeḥ | 
tarhi sā buddhirarthacitpratibimbadvayagrahaṇe'pi jaḍaiva, tat sa eva doṣaḥ-
viṣayavyavasthā tataḥ kathamiti sūtrārthaḥ | sūtre arthasya ityādinā caitanyam 
ityantena yaduktam, tat jñānasya svarūpamiti | prakaraṇena ca arthabalena labdhaṃ 
vṛttau spaṣṭayati jñānaṃ buddhiḥ iti | nanu vaiśeṣikādayo'pi 
buddhirupalabdhirjñānam iti anarthāntaraṃ manyante, tat ko'sya vādasya 
pūrvavādāt viśeṣaḥ, saṃvitsvabhāve eva ātmani upagate kimanyena jñānena 
abhyupagatena, buddhidharme vā jñāne kimanyena ātmanā kṛtyamityāśaṅkya 
āha sāṃkhyasya iti | vaiśeṣikādidṛśi tat jñānamātmano dharmaḥ, iha tu na 
tatheti bhedaḥ iti ekā śaṅkā nirastā; śuddhasvabhāvasaṃvit na arthaprakāśa iti 
dvitīyā; jaḍapradhānavikārabuddhisvabhāvatvāt jaḍaṃ jñānaṃ na 
svataḥprakāśarūpamiti tṛtīyeti tātparyārthaḥ | ahaṃkāravaśādātmatvena 
upacaryamāṇāyā buddhernirāsārthaṃ tattvapadam | mātragrahaṇena tasya 
dharmāntarayogaṃ nirākaroti-tathāhi dharmā udyanto'payantaśca dharmiṇo'pi 
kathaṃcit tādātmyāt pariṇāmānityatāmāyānti | tatastadabhāve paramārthato 
nitya ātmā svasaṃvedanaśaktilakṣaṇaḥ | nanu saugate'pi saṃvedanalakṣaṇa 
ātmetyāśaṅkya āha------tato'pi asya darśanasya bhedamāha antarmukham iti | 
svaprakāśamātrarūpameva ātmatattvaṃ sāṃkhyānām, saugatānāṃ tu 
svaprakāśatvena antarmukhaṃ, bāhyanīlādiprakāśatvena ca bahirmukham | naca 
ekasya antarbahirmukhatā upapannā svaparayoraikyāpattiprasaṅgāt | naca sā 
yujyate bāhyasya arthasya grāhakāt

(page 147)

vicchedena avabhāsāditi grāhako'ntarmukha eva | ata eva 
bāhyatvagrāhyatvāyogāt na tena tulyakakṣyatayā paraṃ kiṃcana cakāsti | 
tulyakakṣyatāpratibhāsakṛtaśca guṇabhāvapradhānabhāvābhyāṃ 
dharmadharmibhāvaviśeṣaṇaviśeṣyabhāvopadhānopadheyabhāvādivyavahāraḥ 
| tathāca paṭo'yaṃ śukla iti paṭābhāsaśuklābhāsayorbahirbhūmau 
tulyedantāgrāhyabhāvena sthitayoḥ paṭābhāsoparaktaḥ śuklābhāso viparyayo 
vā bhavatīti yujyate | tena atra guṇabhūto viśeṣaṇamanyopadheyarūpatvādanyat 
svarūpavyatiriktamupadheyaṃ svātmanā anurañjanīyaṃ rūpaṃ 
viśiṣṭalakṣaṇaṃ yeneti, pradhānabhūtastu viśeṣyo'nyena upadheyaṃ 
viśeṣaṇena uparañjanīyaṃ rūpamasyeti | evaṃ ca viśeṣaṇaviśeṣyabhāva-
mukhena yo vyavahāraḥ, sa ātmani na upapadyate iti na asau kasyacit dharmaḥ, nāpi 
tasya kaścit dharma iti jñānaṃ nāma yadyapi buddhirūpaṃ; tathāpi na ātmano 
dharma iti naiyāyikādito bhedaḥ | nanu evaṃ sa eva puruṣo'stu, kimanyena 
jñāneneti śaṅkitvā āha jñānaṃ punar iti | sa hi śuddhaḥ prakāśastenaiva 
vapuṣā yadi arthānāṃ prakāśaḥ syāt, tat tasya rūpasya tṛṇamātreṇāpi 
anūnādhikarūpatvāt sadā sarvasya avabhāsanaṃ kasyacit vā kadācidapi 
anavabhāsanaṃ bhavediti sarvajñamajñaṃ vā jagadbhavet | tasmāt 
ghaṭasaṃvedanamiti ghaṭābhāsodaye, paṭasaṃvedanamiti tadābhāsaprakṣaye 
paṭābhāsodaye ca bhavati | naca ghaṭapaṭābhāsasaṃbhedaṃ cinmātrarūpaṃ 
puruṣaḥ sahate | naca saṃvedanaṃ viṣayasya svarūpaṃ jaḍājaḍayo 
rūpayorvirodhāt pūrvavat sārvajñyājñatāprasaṅgācca | tadidaṃ viṣayaḥ 
prakāśate iti yat prakāśanaṃ, na tat puruṣaḥ, nāpi tat nīlādīti puruṣasya 
prakāśarūpasya cchāyeyamiti āyātam | naca saṃvedanaṃ sākṣādeva viṣaye 
cchāyāmarpayati andhādyabhāvaprasaṅgāt, nāpi indriyeṣu jhaṭityeva 

(page 148)

sarvatra niścayaprasaṅgena ālocanāsaṃbhavāpatterya eva paśyāmi,  sa eva 
śṛṇomītyādyanusandhānābhāvaprasaṅgāt bāhyendriyāvyāpārasvapnasaṃ-
kalpasmaraṇādyanudayaprasaṅgācca | tat kvacana vastvantare asya puruṣasya 
cchāyā saṃkrāmati | naca asminnagṛhītaviṣayapratibimbe punarapi viṣayasya 
aprakāśatvāpatteriti yadeva tat vastvantaraṃ caitanyaviṣayātmakobhayacchāyā-
grahaṇasamarthaṃ tata eva sattvapradhānaṃ buddhiśabdavācyamanusandhāna-
kāritvādekaṃ, tasya jānāmītyevaṃbhūtā jighṛkṣāprayatnopakramā 
viṣayālocanaśarīrā niścinomītyavasānā pūrvāparībhūtā tāvadviṣayādhya-
vasāyaphalaikyena ekā taddharmiparāmarśamatirodadhatī kriyātmā viśiṣṭā 
pariṇāmaparaṃparā jñānākhyā-vṛttirvartanaṃ tathāvasthānamucyate | 
kāṣṭhasya hi bhasma na vṛttiḥ kāṣṭhaparāmarśasya tirodhānāt | nāpi eka eva 
kṣaṇo vṛttiḥ, tatra hi ayamitthaṃ vartate iti ko vibhāgaḥ | tadaneka eva kṣaṇo 
dharmiparāmarśamatirodadhat phalabalena kalpitavicitramaryādaḥ kriyātmā 
pariṇāmo vṛttiścaitro gacchatītivat | sā ca vṛttirviṣayasya adhyavasāye paryavasi-
tarūpā puruṣacchāyābalena prakāśarūpatāmupagatā jñānamucyate iti 
piṇḍārthaḥ | tadetadāha jñānaṃ punar ityādinā | punaḥ śabdaḥ puruṣāt 
viśeṣadyotakaḥ | satatam iti pravahadrūpeṇa anavacchinnam | nidrādāvapi hi 
pratyayarūpatvamicchanti guravaḥ patañjaliprabhṛtayaḥ prabodhe pratyavamarśāt 
sukhamasvāpsamityādeḥ pratyayaviśeṣa eva nidretyādi nirūpayantaḥ | 
pūrvadeśakālādiyogena smaryamāṇatayā vartamānadeśakālādiyogena 
anubhūyamānatayā taddvayayogena pratyabhijñāyamānatayā 
vartamānabhaviṣyadyogena saṃbhāvyamānatayā bhūtasya vartamānasya vā 
bhaviṣyadyogena yadivā kevalabhaviṣyadyogena utprekṣyamāṇatayā tatrāpi 
sphuṭāsphuṭāditayā ābhāsāntarasācivyena pramātrantarādi-

(page 149)

sāhityena cetyādinā vaicitryasahasrasaṃbhedanavicitrā ye ābhāsāḥ, ata eva 
guṇavācinā tacchabdena prakārayogāt dvirūktena karmadhārayeṇa vā 
tattacchabdena vyapadiṣṭā ghaṭapaṭādīnāṃ bāhyānāṃ saṃbandhina 
ābhāsabhedāḥ pratibimbaviśeṣāḥ, teṣāmudayalayau vyaktivilayau nityaṃ 
vidyete yasmin, ata eva anyaḥ iti buddhitattvāt vyatirikto bāhya iti cittattvādanyo yo 
viṣayo nīlādiḥ tatra yā antarmukhatā tadanvayavyatirekānuvidhānam, tato 
hetoryadāyattaṃ jñānaṃ, tacca na cito, nāpi arthasya, kiṃ tarhi buddhitattvasya 
paśyāmi, jānāmi, niścinomītyevaṃbhūtaḥ pūrvāparībhūtāvayavo yo 
vyāpāraḥ kriyā tatsvabhāvatvena hetunā vṛttirvartanamityanayā bhāṣayā 
sāṃkhye darśitaṃ

     vṛttayaḥ pañcatayyaḥ | pramāṇaviparyaya | (yo. sū. 1 | 6)
iti, 
     svālakṣaṇyaṃ vṛttistrayasya | (29 kā.)

ityādiṣu sthāneṣu | nanu tadanusāreṇa iha tenāpi vṛttigranthena bhāvyamiti 
buddhirjñānam iti kathaṃ sāmānādhikaraṇyena nirdeśaḥ | atra āha kevalam 
iti | buddhervṛttirbodhanaṃ saṃvedanaṃ darśanamiti hi pratyāsattyā 
samākṛṣṭāyāḥ śabdāntarasaṃnidhānācca durbalāyā api avayavaprasiddheḥ 
śabdāntarlīnaiva kriyā bhāseta; tataśca ajaḍasaṃvedanātmakaṃ tat 
jñānamityāśaṅketa | sāmānādhikaraṇye tu buddhiśabdasya

     avayavaprasiddheḥ samudāyaprasiddhirbalīyasī |

iti abādhitena nyāyena tyaktāvayavasya sāmānyaprasiddhau jaḍarūpārthābhi-
dhāyinaḥ samānādhikaraṇaṃ jñānaṃ jaḍarūpamuktaṃ bhavatīti | 
vṛttivṛttimatośca kiṃ kāṇādavat samavāya ityapi śaṅkā sāmānādhi-

(page 150)

karaṇyena avyatirekaparyavasāyinā nirākṛtā bhavati | sāmānādhikaraṇyaṃ ca 
samudāyaprasiddhimupodbalayat bodhatāśaṅkāṃ parākaroti yathā, 
tadvadavyatirekamapi pratipādayedityāha ata eva ca iti | abhedo yaḥ pratipāditaḥ, 
tato'vaśyamato bodhatāśaṅkā śāmyatīti evakāraḥ, samudāyaprasiddhyā 
ceticakāraḥ | vṛttitadvatorabhedaṃ pratipādayatā sāmānādhikaraṇyena 
bodhatāśaṅkā nirasteti tu vyākhyānamuttānadṛśāṃ matam | nanu 
pūrvāparībhūtānāṃ kṣaṇānāṃ phalamekamavalokya vṛttyekatvamaryādā 
kalpyate grāmaprāptiphalena gamanamaryādādṛṣṭeḥ, iha tu jñānarūpāyāḥ 
kriyāyāḥ kiṃ phalam | āha tasyāśca iti | caḥ pūrvapakṣāśaṅkāṃ sūcayati | 
tasyā yaḥ sattvākhyo bhārgo'śaḥ, so'dhigamakriyāyāḥ phalatvaṃ prāptaḥ 
phalabhūtaḥ | nanu sattvaṃ bhāga iti tadā yuktaṃ, yadi bhāgāntarayogo'syāḥ 
syāt | astītyāha triguṇāyāḥ iti | nanu sattvarajastamāṃsi trīṇi yadi asyā 
rūpam, tat sattvabhāga eva kasmāt phalamityāśaṅkāsūcako'pi śabdaḥ | atra 
uttaramāha-parasya ghaṭāderasau yataḥ prakāśasvabhāvaḥ |

     sattvaṃ laghu prakāśakam | (13 kā.)

iti hi āhuḥ | nanu nīlāderapi traiguṇyātmatvāt tadīyo'pi sattvāṃśastathā 
kasmāt na bhavati | ucyate śuddhatvāt iti | rajastamobhyāmanabhibhūtatvena 
svacchatvāt | ata eva

     prakhyārūpaṃ hi cittasattvam |

iti uktam | nanu paraprakāśātmā cet sattvabhāgaḥ, yugapadeva viśvaṃ kasmāt na 
cakāsyāt, sattvasyaiva ca upayoge nirūpite guṇadvayamanyat kimarthaṃ syāt,-
ityāśaṅkādvayamapiśabdenaiva dyotitaṃ pariharati rajastamobhāgābhyām iti 
| sattvaṃ prakāśarūpaṃ nirmalanabhaḥprakhyaṃ sarvato jaladapaṭalena iva 
varaṇātmanā tamasā

(page 151)

samāvṛtamāste | tatra ca mārutasthānīyaṃ pravṛttisvabhāvaṃ rajaḥ 
kriyātmakatayā krameṇa tamojaladamapasārayati nyagbhāvayati | ataśca sa 
viśeṣeṇa paraprakāśātmapi bhavannasau sattvabhāgaḥ krameṇa 
nīlāderbāhyasya sukhādeśca āntarasya prakāśarūpo jāyate iti yuktam | 
yuktaśca traiguṇyopayogaḥ | nanu prakāśarūpo'pi asau sattvabhāgo 
bāhyālokasthānīyo jaḍa eva, tadeṣa kathaṃkāraṃ nirākāṅkṣībhavet yena 
pāryantikaphalatvamasya uktam | kiñca nīlaprakāśarūpaḥ sukhaprakāśātmā 
vā yaḥ sattvabhāgaḥ sa nīlasukhapratibimboparaktaḥ, jñānātmikā ca vṛttiḥ 
kriyā, sa eva kathaṃ phalaṃ syāt | ucyate-ātmanaḥ saṃvidrūpasya tasmin 
svacche yataḥ samyak nidhānaṃ pratibimbena viśrāntistataḥ saṃvedyamānatāṃ 
pratipadyate | nanu kena anyena tasya saṃvedyatā | na bahirbuddhitattvāntaramasti, 
naca puruṣāpekṣayā saṃvedyamānatā upapannā tathātve nīlāderapi tathaiva sā 
astvityalaṃ buddhitattvakalpanāyāsena | āha-prakāśamānataiva saṃvedyatā na 
aparā kācit, apitu saṃvicchāyayā anugrahāt prakāśabruḍitaḥ svanirbhāsa iva sa 
sattvabhāgo na prakāśāntaramapekṣate iti eṣaiva saṃvedyatā | etaduktaṃ bhavati 
-sarvataḥ svacchātmani buddhisattve viṣayapratibimbabhāgo jñānakriyā, 
saṃvicchāyābhāgastu phalam | yaduktaṃ

     phalamaviśiṣṭaḥ pauruṣeyaścittavṛttibodhaḥ |

iti | nanu ātmacchāyāvaśāt viṣaye eva prakāśamānatā astu, kimantarālakalpi-
tena buddhitattvena | loke ca viṣaya eva prakaṭa iti vyavahāraḥ | tathāca jaiminīyā 
arthadṛṣṭatāmeva phalaṃ manyante | atra āha-yadi viṣaye eva prakaṭatā 
utpadyeta, tadā sa viṣayastādṛśo jātaḥ, sa kathaṃ kasyacidatādṛśaḥ syāt | nahi 
kāraṇopa-

(page 152)

nataṃ rūpaṃ kāraṇameva prati tathā bhavati | evaṃ hi kumbhakārameva prati 
kumbhaḥ kumbho bhavedanyān prati akumbhaḥ | nanu yathā dvitvaṃ kasyacit 
pramāturapekṣayā buddhyā jātaṃ naca sarvān pramātṝn pratibhāti, apitu 
tameva; tathā prakaṭatā yadātmagatabhāvanātmakakriyāsaṃnidhānāt jātā 
tameva prati bhaviṣyatīti āśaṅkya āha prakāśasaṃjñaka iti | dvitvaṃ hi 
jātaṃ na prakāśasvabhāvam, apitu tatsāmānyajñānapuraḥsaram | 
dvitvaguṇajñānāt dve dravye iti jñānena bhavitavyam, tataśca tatra 
dvitvotpattāviva tatsāmānyajñānotpattāvapi apekṣābuddhernimittatvam | naca 
sā pramātrantare saṃbhavati ekārthasamavāyāt yato jñānayoḥ 
kāryakāraṇabhāvaḥ | iha tu prakaṭatā cet jātā, na atra anyadapekṣyamasti tatrāpi 
jñeyāyāṃ prakaṭatāntarānavasthāprasaṅgāt | tasmāt viṣayaḥ prakaṭa iti 
buddhitattvapratibimbitasya viṣayasya saṃvitpratibimbamelanameva idamucyate, natu 
bāhyasya prakaṭatā kācit dharmaḥ | nanu mā bhūt viṣayaniṣṭhā prakaṭatā 
ātmaniṣṭhaiva bhaviṣyati mama prakaṭo ghaṭa iti ātmani upasaṃhāradarśanāt, tat 
kiṃ buddhitattvena | ucyate-ātmā saṃvinmātrasvabhāvaḥ sākṣāt draṣṭā 
kevalaṃ, tasya viṣayaprakaṭatā nāma yat saṃvido'dhikaṃ tajjanakatvaṃ kathaṃ 
svarūpaṃ syāt | kathaṃ tarhi asau viṣayabodheṣu draṣṭā sākṣī ceti | āha-
buddhāveva satyām | nanu mā bhūt tatra cidātmani puṃsi adhikaṃ kiñcana 
vikārādhāyi prakaṭatātmakaṃ phalaṃ, sa eva tu bhaviṣyati | āha-nirvikāra eva 
asau yadi nīlaprakāśaḥ, tarhi nīlasyaiva viśvasya asau tathā syāt | prakāśa eva hi 
nīlaprakāśaḥ pītaprakāśa iti āyātam | ata eva iti | yasmāt na viṣaye 
prakaṭatālakṣaṇo bhogo viśrāntaḥ, nāpi ātmani, asti ca

(page 153)

viṣayātmanorbhogayogavyavahāraḥ, tata ityarthaḥ | buddhirūpaṃ yat sattvaṃ tasya 
yato nairmalyaṃ rajo'pasāraṇasahiṣṇutā tadīyatamobhāgasya, natu nīlādāviva 
anapasāraṇīyatvaṃ tato hetorubhayīmapi ātmano viṣayasya ca saṃbandhinīṃ 
rūpacchāyāṃ saṃvedananīlamayatāmanukaroti tadākāradhāritayā bhāsate 
nīlaraktapaṭamadhyagatasitavastravat tato hetostatpratibimba ātmaviṣayapratibimbe 
yato yujyate, tato viṣayabodhasvabhāvo bhogaḥ sidhyati | sa hi grāhyasya grāhakasya 
ca yo melanātmā saṃbandhastadrūpatayaiva lakṣitaḥ, na anyadasya rūpamiti 
āśayaḥ | nanu buddhau yadi dvayapratibimbayogaḥ, ātmano viṣayasya ca kathaṃ 
bhoktṛbhogyarūpavyavahāra ityāśaṅkya āha sā ca iti | sā 
bhogasiddhirbhoktṛbhogyabhāve | ātmā bhoktā viṣayo bhogya iti vyavahāre 
heturhi yasmāt, tasmāt tayorātmaviṣayayorbhoktṛbhogyatāyogyayorbuddhitattve 
saṃbandho yāvadgati paraspararūpamelanātmā vāsagṛha iva yūnoḥ yaḥ, sa eva 
bhoktṛbhogyabhāvaḥ | nanu sattvaṃ tāvat prakāśātmakaṃ, tatra cet 
viṣayapratibimbaṃ patitaṃ; jāto viṣayaprakāśatāvyavahāraḥ; kimanyena 
ātmapratibimbakalpanenetyāśaṅkāṃ vārayati viṣayoparāgavat iti | sa hi 
sattvaprakāśo bāhyālokakalpo jaḍa iti uktam | bodhāveśena iti bodhasaṃsargeṇa 
| nanu yathā taṇḍulānāmayameva pāke karmabhāvo yo viklittilakṣaṇo viśeṣaḥ, 
tathaiva viṣayasyāpi buddhyamānatāyāṃ kenacit viśeṣeṇa bhāvyam, saiva 
prakaṭatā bhaviṣyati | bhavedevam, yadi nirvartyavikārye eva karmaṇī syātām, asti 
tu anyadapi prāpyaṃ karma yatra tatkartṛkarmasaṃsargādhiko na kaścit viśeṣo 
grāmaṃ gacchatīti yathā | tadāha nahi iti | bodhasaṃsargātmā ca 
bodhāveśo'yameva

(page 154)

ucyate-yo boddhrā puruṣeṇa buddhau viṣayasya saṃsargaḥ | ata eva iti | 
sāṃkhyasya yadetadityādi ārabhya pūrvoktamupayogi prameyaṃ 
buddhitattvasadbhāve hetutvena upajīvati | yata ātmā nirvikāraḥ, naca tādṛgasau 
viṣayaprakāśaḥ, viṣayasya ca na prakaṭatā naisargikī upapannā, naca 
ātmasaṃnidhānataḥ, nāpi indriyasaṃnidhānamātrāt, tato buddhisaṃjñakaṃ 
svatantrameva tattvaṃ vasturūpam, natu ātmano dharmo vaiśeṣikavat, nāpi 
viṣayasya jaiminīyavat, na indriyāṇāṃ bārhaspatyavat,-iti iyatī sāṃkhyasya 
mukhyā prameyagatiḥ | vṛttau cchāyāśabdena sūtre rūpaśabdaṃ tatparyāyaṃ 
vyākhyat | ataḥ iti ubhayacchāyādhāraṇāt | asau buddhiḥ | arthasya 
prakāśastatphalaparyanto'dhigama ityarthaḥ | nanu evaṃ buddhitattvaṃ nirmalaṃ 
sadā sthitaṃ, tat tadubhayapratibimbadhāri sadaiveti tāvatā tāvat 
paramārthabandho no kasyacit | nahi śiśiramārutaśilībhūtaśītalataramahāhi-
mānīśakalakapratibimbitaścaitraḥ śītavyathāmanubhavet, nāpi tat 
tuṣāraśakalakamupacarito'pi bandhaḥ syāt yadi upacaritā anyo bhavet 
pratibimbitaṃ caitraṃ paśyanniva maitraḥ | naca buddhipuruṣāvubhau yastathā 
upacarati, tādṛk tṛtīyo'sti | astīti āha ahaṃkāratattvam iti | karotiḥ 
kriyāsāmānye | ahaṃ karomīti jānāmi bhuñje vetyarthaḥ | tathāhi ātmā 
budhyate iti apekṣāviṣaye bhuṅkte iti tu sukhaduḥkhasādhanaviṣaye yo vyavahā-
raḥ pratītiḥ pratyavamarśaśca, tadrūpā vṛttirvartanaṃ vyāpāro'sya | nanu 
aboddhari abhoktari ca nirāgasi kathamahaṃkāra evaṃ vyavaharet | āha-
upakārakatvaṃ bodhoḥ bhoge ca buddhigate yata ātmanastenaivamadhyāropya 
vyavaharati | nanu upakārakatvaṃ tatra asya katham | ucyate | tatsaṃnidhau yato bodho 
jñānabhogobhayātmatāvibhakto

(page 155)

buddhau sidhyati | nanu pariṇāmadharmatālakṣaṇā kriyā mā bhūdātmano 
vāstavī, bhoktṛtāpitu kiṃ na pāramārthikī | omityāha natu ātmanaḥ iti | 
cinmātrataiva, na viṣayopabhoktṛtā | naca tadatiriktamasya rūpamucitamiti hi uktaṃ 
vistarataḥ | nanu ahaṃkāreṇa evamātmā bhoktṛtvena abhoktaiva san 
vyavahriyatām | vyavahriyamāṇasya tu kathamasau bhogo bhavet | upacāre hi na 
upacāryasya svātmani viśeṣaḥ kaścit, apitu upacaritureva tathābhūta-
buddhiśabdaviśeṣapratilambhātmā vyavahāraḥ, anyathā anantapramātṛbhedena 
yugapadupacaryamāṇāgnijalādiviruddhabhāvabheditavapurmāṇavako'pi 
anantaviruddharūpatāmekatrāpi kṣaṇe pratipadyet | tadetat pariharati 
ahaṃkāravyavahāryātmanā iti | kena etaduktaṃ-cidrūpatādhikaḥ kaścit 
puruṣasya bhoga iti | buddhibodhaṃ hi yadātmani aviśiṣṭatayā ahaṃkāro 
vyavaharati, sa eva ayaṃ bhogaḥ | citpratibimbayogini viṣayapratibimbavati ca 
buddhitattve ahamidaṃ jānāmi iti cetanācetanapratibimbadvayamelanāvyavahā-
rakāriṇā ahaṃkāratattvena yo'bhimāno janitaḥ, sa eva buddhitattvāt 
tadvṛttyadhyavasāyagocarīkṛtastadbuddhipratibimbacittattvena saha 
ekāśrayatālakṣaṇaṃ saṃyogaṃ bhajamānaścittattvasya citpratibimbādanadhya-
vasitabhedatvena bhoga iti ucyate | kāṇādādidarśane'pi hi jñānātmako guṇa 
ātmano'nyaḥ | kathaṃ tasya bhogaḥ | samavāyāditi cet, saṃbandhamātraṃ tarhi 
bhogarūpatāyāṃ kāraṇamiti uktaṃ bhavati | ihāpi ca darśitaḥ 
saṃbandhaścittatvādanadhyavasitabhedasya citpratibimbasya viṣayapratibimbena 
saha ahaṃkāramelitasya tayaiva buddhyā adhyavasitasya 
ekabuddhyāśrayatvalakṣaṇasaṃyoga iti saṃsargamātraprabhāvito'yaṃ 
bhogavyavahāraḥ sarvatra |

(page 156)

saṃsargaśca prāptilakṣaṇaḥ saṃyogo'stu samavāyo vā abhimānena 
vādāntareṇa | yadi vā tathābhūtasya saṃyogasya pūrvapūrvapralayamahā-
pralayeṣu api prāthamyaṃ na avadhāryate iti anādiḥ saṃyogo bhavan samavāyāt 
na viśiṣyate | buddhitattvasya ca sarvo'yaṃ dharmaḥ | dharmadharmiṇośca yaḥ 
saṃbandhaḥ, sa saṃyoga iti vā tādātmyamiti vā samavāya iti vā ucyatām | 
vastuni labdhe hi saṃjñāsu kriyāsu ca ko'bhiniveśastattvacintākāraṇam | 
yasminneva ca buddhipradeśe cittattvapratibimbayogāt cidaviśiṣṭatā, tatraiva 
nīlapratimbayoga iti ādhārādheyabhāvāpṛthaksiddhibhyāṃ samavāyatāpi 
ucyatām | ko virodhaḥ | sarvathā tāvat sarvadarśaneṣu saṃsargakṛta eva ayaṃ 
bhogavyavahāraḥ | yadāha

     ----paropādhau sarvā dhīrvyāvahārikī |
     ayathārthā-----------------||

iti | tadetat sarvamanavakḷptidyotakena vāśabdena āha saṃyogātsamavāyādvā 
iti | ahaṃ karomi jānāmītyevaṃbhūtena rūpeṇa ahaṃkāratattvasya yā vṛttiḥ, 
tayā vyavaharaṇam | bhogavyaharaṇe jñānābhidhānalakṣaṇe yogya ātmā 
svarūpaṃ yasya buddhibodhasya buddhisaṃkrāntasya viṣayapratibimbacitprati-
bimbamelanasya, tasya cidrūpeṇa puruṣeṇa saha yo bhedādhyavasāyābhāvaḥ 
prakāśatā, yena balena ca tāvanmātre mūrcchākalpe viśramitumayogya iti 
abhedādhyavasāye paryavasyan puruṣasya bhoga iti ucyate; sa saṃyogādastu 
samavāyāt veti kimaneneti | etat śeṣamunivacanena saṃvādayati | tathā ca iti |

     sattvapuruṣayoratyantāsaṃkīrṇayoḥ pratyayāviśeṣo bhogaḥ, 
parārthasvārthasaṃyamātpuruṣajñānam | (yo. sū. 3 | 35)

(page 157)

iti sūtram | asya arthaḥ-sattvaṃ yat buddhiśabdavācyam, yaḥ puruṣastayorjaḍa-
cidrūpatayā nīlamutpalamitivadanyonyamabhinnakakṣyādhiśayanena 
anyonyoparāgalakṣaṇaṃ saṃkaramasahamānayorapi yaḥ pratyaye 
bauddhe'dhyavasāye aviśeṣo bhedānadhyavasāyena abhedādhyavasāya-
viśrāntena vyavahriyamāṇamaikyaṃ, sa eva bhogaḥ | sa eva buddhivartyapi bhavan 
bhoktari puruṣe cidrūpatvāducita iti parārtha ucyate | nanu asti evaṃvidha eṣa 
saṃsargabalaprabhāvito bhogaḥ, kiṃtu eṣa saṃsargo'nādiḥ kathaṃ vicchidyeta, 
yena mokṣāvakāśo bhavedityāśaṅkya āha yadā tu iti | pradhānaṃ 
tāvadupādānakāraṇaṃ mahadādikāryātmanā pariṇamate | tatra ca asya 
jaḍatvaṃ, sukhādyātmanā ca yat bhogyatvaṃ bhogayogyatā, tat 
sahakārikāraṇam | naca guṇānāmanyonyaṃ bhogayogyatvamucitaṃ jaḍatvāt 
bhoktṛbhogyatvayorekatra viruddhatvāditi anyadeva cidrūpatvaṃ prati 
bhogayogyatvamucitam | tacca cidrūpaṃ bhogavaicitryopalambhādanekam | yadāha

     janmamaraṇakaraṇānāṃ pratiniyamāt | (18 kā.)

iti | naca asya bhogasya enameva bhoktāraṃ prati bhogyateti niyamanidānamasti, tat 
sarvān prati tat bhogyam, bhoktṛtā ca eṣāṃ svapratibimbārpaṇena 
buddhiprabhṛtisamastaprapañcāvabhāsanam |---------saprapañce buddhitattve 
saṃkīrṇo'pi saṃyogamahimnā cittattvena paramārthato na saṃkīrṇaḥ | tat 
saṃkīrṇatā yāvat citpratibimbabalāt nirbhāsate, tāvat saṃsāraḥ | yadā 
punarasaṃkīrṇatā, tadā vivekajñānametat jñānam | na 
saṃkīrṇāsaṃkīrṇarūpavyatiriktaṃ dṛśyamasti | tacca yasya samuccīyeta | 
caśabdaśca apiśabdārthe | tathāpi iti abhyupagamyavādo'yaṃ na sopapattika 
ityarthaḥ | ata eva vā iti | sūtre parāśaṅkādyotakaṃ yat kṛtaṃ, tena asya 
vādasya abhyu-

(page 158)

pagamyāpi etaducyate, natu pratibimbavādo'yamupapadyate iti anādaro'pi dyotya 
ibhiprāyeṇa ṭīkākṛdasya buddhipratibimbavādasya anupapattiṃ bahuśākhāṃ 
darśayan tathāpi iti vṛttigranthārthasya ākūtaṃ sphuṭayati naca iti | svacchamapi 
hi adhikasvacchamapekṣya asvacchaṃ na adhikasvacchasya pratibimbaṃ svīkaroti 
sitadugūlamiva sphaṭikamaṇeḥ | tathāca buddhitattvaṃ puruṣāpekṣayā | tathāhi 
āloko'pi buddhiprakāśamapekṣya asvacchaḥ, tathā so'pi puruṣaprakāśama-
pekṣya | puruṣaprakāśo hi sarvataḥ svacchastasya ananyāpekṣaṇādeva 
saṃvidrūpatvaṃ yataḥ | yathā yathā hi sphuṭā vedyatā, tathā tathā 
svacchatvābhāvaḥ | evamadhikasvacchena pratibimbaṃ svīkriyate asvacchasyeti 
pratibimbasvīkaraṇe yat kāraṇaṃ, tadviruddhamiha asvacchatvamiti 
kāraṇaviruddhopalabdhiḥ | evaṃca vadataḥ ṭīkākārasya ayamāśayaḥ-saugata 
eva sāṃkhyamataṃ dūṣayan matpakṣasya avakāśaṃ dāsyati | sarvataḥsvacche 
cidrūpe viśvaṃ pratibimbitumarhatīti | saugatasyāpi ca saṃvidi saṃvedyaṃ 
pratibimbamarpayati, natu saṃvedye saṃvititi svapakṣasiddhirāśaye viparivartate eva 
| atha paro manyeta-na svacchatvaṃ nāma pāribhāṣikaṃ kiṃcana, yadeva ca 
anyapratibimbagrahaṇasamarthaṃ tadeva svacchaṃ; buddhitattvaṃ ca 
puṃspratibimbaṃ grahītuṃ samarthameva, tadapi kiṃ na svacchamiti | tatra āha | 
samānadharmāṇyeva iti | iha pratibimbagrahaṇe niyamo dṛṣṭaḥ | tathāhi darpaṇe 
sparśagurutvādi na pratibimbati, apitu rūpasaṃsthānamātram | nirmalaṃ ca asya 
vijātīyarūpaiḥ sajātīyābhāvaiśca akaluṣitaṃ niviḍasaṃhananaṃ 
rūpamupalabdhaṃ yadā bhavati, tadā pratibimbayogaḥ, vāṣparajorūpāntaraistu 
vijātīyairaniviḍasthapuṭatvādinā sajātīyābhāvaiḥ kaluṣite tasmin rūpe na 
bhavati,-iti anvayavyatirekābhyāṃ manyāmahe |

(page 159)

pratibimbārpakāpekṣayā yasya svacchatākhyo dharmastatpratibimbātmakaguṇavi-
śeṣaniṣṭhaḥ, sa eva pratibimbaṃ gṛhṇāti | evaṃ svacchatvaṃ guṇe samāne 
viśeṣarūpatāyāṃ paryavasāyitamiti apṛthageva upasaṃhariṣyati evaṃ 
samānaguṇe eva iti | tathāhi pārthive bhūmikuṭṭime, vajraratnādimaye darpaṇe, 
āpye nistaraṅgajalāśaye, taijase cakṣurgolakāntarvartidṛṣṭimaṇḍale rūpākhyo 
guṇaḥ | tatsaṃniveśaśca saṃsthānātmā guṇo'sti svacchaprāyāṇāmapi 
rūpavattvāditi teṣu rūpasaṃsthānapratibimbameva upārohati, na anyat 
gurutvasparśādi | yathoktaṃ mayaiva

     pracchannakāminī kāntapratibimbitasundaram |
     mukuraṃ kucakumbhābhyāṃ spṛśantyapi na hṛṣyati || (taṃ. ā. 3 | 6)

iti | vyomāvakāśe ca paricchinnadīrghavartulākāre yadādityatejo na atitībraṃ na 
atimandaṃ vā candratejo vā, tatra śarīrasaṃsthānapratibimbaṃ dṛśyate 
cchāyāpuruṣopadeśapariśīlanena | lohadarpaṇādi tu taijasamiti mantavyam, tadapi 
vā pārthivamevetyābhidharmikāḥ | ākāśe ca śabdaguṇe vaktṛśabdasya 
pratibimbitaṃ pratuśrutkārūpam | nirmalena rasāntaragrāhiṇā rasena bhūyasā 
samākrāntaṃ ca rasanendriyaṃ, tasya adhiṣṭhānaṃ dantodakaṃ 
nirmalarasayuktamiti tatra kaṭutiktāmlādayo rasāḥ pareṇa āsvādyamānāḥ 
pippalīnimbadāḍimādiṣu vartamānāstadāsvādānumānapūrvakatvena 
pratibimbamarpayanti | smaryamāṇagrahaṇamanubhūtatve'pi tadānīmasākṣāt-
kriyamāṇatāmātramupalakṣayati | tena smaryamāṇā anumeyamānāḥ 
samutprekṣyamāṇā vā rasasparśādayaḥ pratibimbaṃ gṛhṇantīti | tathā ca 
śarīrasya kecidānandasthānarūpā ādhārāḥ kandahṛdayatālutalādayaḥ | teṣu 
mithunopabhogasamucitasparśastathaiva ananubhūyamāno'pi anumeyamāna-
smaryamāṇotprekṣyamāṇādirūpaḥ

(page 160)

pratisaṃkrāmati yena dhātusyandasukhādyapi syāt | kecit tu duḥkhādhārā 
mattagandhajaṭharakūrmanāḍīkaṇṭhaprabhṛtayaḥ | teṣu parānubhūyamānāḥ 
smaraṇotprekṣādisaṃnidhāpitā vā kuntāghātaśūlādisparśā 
mūrcchāduḥkhādikāriṇaḥ | parānubhavaśca pratibimbitasya tasya 
sparśādergrahaṇaṃ prati kevalaṃ sahakāritāṃ karoti 
avadhānamudbodhayamānaḥ | tena idaṃ na vācyam-anāsvādyamāno'pi kenāpi 
dāḍimaraso dantodake kiṃ na pratibimbatīti yataḥ pratibimbatyeva asau, 
anavadhānāttu na lakṣyetāpi | tathāhi-avahitaḥ sukumāro'ṅganājanaḥ pareṇa 
spṛśyamānamapi tīkṣṇakaṇṭakāgraṃ paśyan vepathumāviśatyeva | 
karmādhipatyācca keṣāṃcit kecidādhārā akaluṣā iti tatpratibimbayogo vicitro 
dṛśyate | gandhakṣetre'pi tīvravirecanādidravyagandhaḥ pratibimbamarpayatyeva 
yena tadgandhapūrṇameva sarvamabhimanyate | nanu svacchena dravyeṇa pratihatā 
nayanaraśmayaḥ parāvṛttya svameva mukhaṃ gṛhṇanti, darpaṇe mukhamiti tu 
bhrāntiriyam; natu satyatvabhrāntatvavyatirekeṇa anyo rāśiḥ 
pratibimbanāmadheyo'sti tṛtīyaḥ | maivam | evaṃ hi sati mama etanmukhaṃ 
sparśavadityapi bhāseta; paramukhasvahastādau ca bimbapratibimbadvayaṃ 
dṛśyate | anyonyasaṃmukhādarśabhūyastve ca bahutaramukhagrahaṇaṃ kutaḥ | 
bhrāntiriyamiti cet, saiva astu kiṃ satyamukhagrahaṇābhyupagamena 
asaṃvedyamānena | nahi śuktikārajatanirbhāse satyarajatanirbhāso'paro'bhyu-
pagataḥ; bhrāntāvapi ca kiṃ darpaṇa eva mukhatve bhāti, uta svamukhaṃ 
puramukhatvena | pūrvasmin kalpe darpaṇe na kaścit bhāseta 
śuktirajjvekacandrādiriva rajatasarpadvicandrāditvena bhāsamānaḥ | atra ca 
darpaṇasya na pṛṣṭhe, na abhyantare, na paścādbhāge mukhamastīti 
pratipattirdarpaṇasya avikalpasya nirbhāsāt | yadi tu svamukhaṃ paramukhatvena 
bhāseta, 

(page 161)

tadā śuktiṃ yathā rajatadhiyā gṛhṇāti; tadvat svamukhaṃ darpaṇe saṃnihite 
paramukhadhiyā gṛhṇīyāditi tatra ayamudāsīnabhāvamavalambamāno 
bhūṣaṇavinyāsaprasādhanādi na ādriyeta | pratiphalitānāṃ ca 
svadehasaṃmukhībhūtānāṃ raśmīnāṃ cākṣuṣāṇāṃ grahaṇatve 
saśarīreṇa ātmanā yadi adhiṣṭhānaṃ, tadahamityeva pratipattiḥ syāt, natu 
anyo'yamiti | avyutpannasya hi bālāderayamityeva ekarasā pratipattiḥ | vyutpannastu 
idameva śarīramatra pratisaṃkrāntamiti manyatāṃ nāma | nanu asya bimbāt na 
bhedena pratipattiḥ, pratibimbena aśarīreṇa ātmanā adhiṣṭhitāste raśmayaḥ 
paratvena gṛhṇanti,-iti cet, na dehasya bhogāyatanatvaṃ syāt tamantareṇāpi 
bahirbuddhilakṣaṇabhogodayāt darpaṇābhāve'pica tathā prasaṅgāt svaśarīre ca 
audāsīnyāpatteryogivat ca śarīrānapekṣayā saṃvedanaprasaṅgāt | 
jalatejobhiśca cākṣuṣāṇāṃ raśmīnāṃ pratighātena pratiphalanaṃ, na 
niviḍaiḥ śilātalairiti svacchandābhidhānam | smaraṇotprekṣaṇādiṣu ca 
arthākāraṃ paśyati pramātā | naca tatra netraraśmīnāṃ ko'pi vyāpārārthe 
saṃbhavo niyamo vā | naca asāvabāhya eva pāramārthika ākāro bāhyatvena 
abhimānādanyadāpi bāhyāpahnavaprasaṅgācca | athāsti saṃbhavaḥ-
yadākāro'pi asau na mukhyo naca bhātaḥ, tat darśanapratibimbenāpi 
kimaparāddham | yat tatrāpi svamukhagrahaṇameva sūtre muninā kvacidapi 
anirūpitamapi durgrahādākṣapādaiḥ samarthyate pratiśrutkādau śrotrāderna 
pratiphalanamiti, tatra avaśyaṃ pratibimbatā samarthayitavyā | nanu tatra 
mukhyaśabdādirūpataiva bhaviṣyati, darpaṇamukhādau tu pratighātena 
pratibimbāpahnava iti pareṣāṃ naiyāyikādīnāmāśayaḥ | tameva prakaṭayati 
kecit tu iti | pratisaṃkramaṇena śrut śravaṇamasyā iti pratiśrutkā | sā śabdajā | 
raso'pi danto-

(page 162)

dakasaṃbandhī nimbādirasasmaraṇena nimittena vikṛtaḥ saṃpannaḥ 
kaṭutiktāmlādisvabhāva eva, sparśakṣetragata eva asau sparśaviśeṣaḥ, 
gandhakṣetraniṣṭhaśca gandhaviśeṣa iti | tena yathā anye śabdādayo 
mukhyavastusvabhāvāḥ, natu tatpratibimbātmānaḥ; tadvat pratiśrutkādayo 
vastutve teṣāṃ bādhakasya kasyacidapi abhāvāt | rasāveśaśabdena dantodake sa 
raso niviṣṭa iti iha mantavyam, yadivā parābhiprāyeṇa rasāveśabdaḥ iti 
pratibimbavācitvena prayuktaḥ | paro'yaṃ rasāveśaṃ rasapratibimbaṃ manyate, sa 
vastubhūta eva yuktaḥ | naca bādhitatadvijñānagrāhyaṃ pratibimbamiti yuktaṃ 
sarvasya tathātvāpatteḥ | nanu darpaṇe'pi rūpasaṃniveśamātrasvabhāve 
parvatādivastvantarameva astu | kiṃ tatrāpi pratibimbāṅgīkaraṇārdhajaratīyena | 
āha darpaṇādau punar iti | na tāvat darpaṇākrānte tāvati eva ākāśadeśe 
hastiparvatayorutpattiryuktā tasya ākāśadeśasya ekena mūrtena darpaṇena 
ākrāntasya mūrtāntareṇa ākramitumaśakyatvāt mūrtānāṃ 
samānadeśatvavirodhāt, samastanagarapratibimbayukte ca darpaṇe dṛśyamāne 
tāvatāṃ mūrtānāṃ kathamekākāśadeśateti śataśākhaṃ 
parasparadeśānupraveśavikalpanāprasaṅgaḥ | naca darpaṇasya pṛṣṭhe 
tadutpattirdarpaṇadeśasya parimitatvāt darpaṇādarśanaprasaṅgācca | naca 
pṛṣṭhato'sau dṛśyate, dṛśyate tu abhyantare | naca tasya darpaṇe abhagne 
antaḥpraveśo yuktaḥ | naca asya bhaṅgo manāgapi avalokyate | darpaṇāpekṣayā 
dūrataradeśavartī iva sa parvatādirupalabhyate, nacāpi abāhye aṇumātradeśe'pi 
avalokyate | taduktaṃ

     viruddhaparimāṇeṣu vajrādarśatalādiṣu |
     parvatādisarūpāṇāṃ bhāvānāṃ nāsti saṃbhavaḥ ||

iti | saptamyā ādheyamākṣiptam | tadayamarthaḥ-darpaṇādau saṃkrāntasya

(page 163)

yat vastubhūtatvaṃ śaṅkyate, tatra ayaṃ bādha iti | tāvān iti darpaṇaparicchinno 
nabhodeśo vā darpaṇo vā tatpṛṣṭhatadantaratatpaścādbhāgādirvā | kiṃca 
yāvatkālakalāmātraṃ tadvastu mukhyamasti tāvadeva ca yo 
viśiṣṭadeśasaṃbandho'sya dṛśyate, so'pi na upapadyate | nahi svakāraṇāt vinā 
tasya bhāvasya utpattiryuktā | naca prasiddhavastubhūtahastiparvatādigatakāraṇa-
jātīyamiha kāraṇamupalabhyate | tāvatā ca prasiddhahastyārambhakāvayavapari-
māṇānāṃ tadavayavānāṃ yaḥ saṃbandhaḥ saṃyoganairantaryādiḥ, sa 
yasmāt nopapadyate na saṃbhavati | tajjātīyadeśakālakāraṇābhāve ca 
kāryamapi tajjātīyaṃ kathaṃ syāt | utpannasya ca avayavavibhāgādyabhāvahetu-
manārūḍhavata eva kathaṃ bhūtagrastasya iva ekapade niranvayī vināśaḥ | 
kṣaṇikavāde tasya niranvayanāśitāyāmapi vibhāgasasaṃtatyantaradarśanapra-
saṅgaḥ | darpaṇāt pṛthagbhūtaṃ ca utpannaṃ bhūtalādi vā anyatrāpi saṃcaret 
| tataśca yāvadasau dṛśyate, tāvadasya tenaiva deśena darpaṇāvacchinnena yaḥ 
saṃbandhaḥ, sa katham | rūpasaṃniveśau ca kāmaṃ gurutvagandhavattvādivi-
hīnau stām, sparśarahitau tu na dṛṣṭau | naca iha parvatasya pratibimbitasya 
kāṭhinyasparśaḥ | ādipadena jalāgnyādipratibimbasya śītoṣṇādiḥ | 
vastubhūtena anyaprasiddhatadvastujātīyena bhavituṃ yuktamanyathā śaśasyāpi 
viṣāṇamarūpasparśādikaṃ vastubhūtamasti,-iti ucyamāne idameva vastu, 
nedamiti yat niyamavattvaṃ vyāpakaṃ vastutvasya upalabhyate, yena vinā 
vastutvamapi vacanamātrasāraṃ syāt; tat hīyeteti vyāpakānupalabdhiprasaṅga-
balena vastutvamanyavastutajjātīyatvābhāvāt vipakṣāt vyāvṛtaṃ sādhyena 
anyatadvastujātīyatvena vyāpyate iti tadanupalambhe vastutvābhāvasiddhir-
vyāpakānupalabdheriti |

(page 164) 

tat sthitametat-pratiśrutkādiśabdajaśabdādirūpameva, na tatra pratibimbatā 
kācit; darpaṇādau tu sā astu kevalaṃ svamukhameva gṛhyamāṇaṃ bhrāntyā 
abhimanyate darpaṇena gṛhītamiti kenāpi kṛto vibhāgaḥ | enaṃ vibhāgaṃ 
dūṣayati tat iti | yaduktaṃ pratiśrutkādi vastveva, darpaṇahastyādi tu avastutvāt 
pratibimbamastu tāvaditi | etat vibhāgena ayuktaṃ nyāyasya sāmyāt | tadeva āha 
ihāpi iti | apiśabdena nyāyasāmyamāha | iha pratiśrutkārasāve-śādivarge yā 
tāvat pratiśrūtkā uktā, sā yadi anyaśabdajaśabdavat vastveva syāt, sāpi 
hastyādivadeva tacchabdajātīyaiva bhavet | śabdajaṃ ca śabdāntaraṃ 
bherībhāṅkārādi caramaṃ mandatamaprāyaṃ yatra deśe samākarṇyate, tatra na 
taiḥ pramātṛbhirādyo'sau tīvratamaḥ śabda ākarṇyate, nāpi 
tadādyaśabdākarṇanavadbhiḥ so'ntyo mandaḥ | evaṃ pratiśrutkāpi 
arvāgvyavasthitaiśca yat na śrūyate, tat pratyuta viparyasyeta yadi vastubhūtā 
śabdajaśabdarūpā syāt | asmākaṃ bimbatvena pratibimbadātṛtvena abhimato'ta 
eva mukhyaḥ śabdākāraḥ | parapakṣe tu ādyo'sau janakarūpaḥ śabdaḥ | sa 
yairna śrutastadguhāgataiḥ prāṇibhiḥ, taiḥ śrūyate sā pratiśrutketi saṃbandhaḥ 
| apiśabdo viparyayaṃ sūcayati | yaistu arvāgdeśavartibhiḥ sa ādyaḥ śabdaḥ 
śrutaḥ, tairna śrūyetetyarthaḥ | evam aśrutabimbābhimata ityādinā 
vastubhūtaśabdāntaravijātīyatvaṃ tātparyeṇa uktam | natu pratibimbatāsādhane 
ayaṃ heturyadaśrutamukhyaśabdena na śrūyate iti | nahi pratibimbasya ayaṃ 
niyamo yadadṛṣṭabimbena na avalokyate | yathoktaṃ mayaiva śrītantrāloke

     mukhyagrahaṃ tvapi vinā pratibimbagraho bhavet |
     paścādgataṃ priyaṃ paśyeṭṭaṅkitaṃ mukure puraḥ || (3 | 29)

(page 165)

iti | tasmāt vastubhūtaśabdajaśabdajātīyatvānupalabdhā pratiśrutkāpi na vastu | 
prasiddhahastyādipratibimbasālakṣaṇyaṃ ca śrītantrāloke darśitaṃ

     nacāsau śabdajaḥ śabda āgacchattvena saṃśravāt |
     piṭharādyupadhānāṃśavicitracchidrasaṃgatau ||
     citratvāccāsya śabdasya pratibimbaṃ mukhādivat |
     idamanyasya vedyasya rūpamityavabhāsate ||
     yathādarśe tathā kenāpyuktamākarṇaye tviti |
     niyamādbimbasāṃmukhyaṃ pratibimbasya yattataḥ ||
     tanmadhyagāstu śṛṇvanti pramātāro na dūragāḥ |
     ataḥ kūpādripiṭharākāśe tatpratibimbitam ||
     vaktrākāśaṃ saśabdaṃ sadbhāti tatparavaktṛvat |
     yathā cādarśapāścātya bhāgastho vetti no mukham ||
     tathā tathāvidhākāśapaścātstho vetti na dhvanim |
     śabdo nacānabhivyaktaḥ pratibimbati taddhruvam ||
     abhivyaktiśrutī tasya samakālaṃ dvitīyake |
     kṣaṇe tu pratibimbatvaṃ śrutiśca samakālake ||
     tulyakālaṃ hi no hastatacchāyārūpaniścayaḥ | (3 | 34)

ityādinā | evaṃ pratiśrutkāyāḥ pratibimbatāṃ sādhayituṃ vastubhūtaśabda-
javailakṣaṇyena avastutvamupapādya, rasapratibimbasyāpi tadupapādayati 
kaṭutiktādi iti | pippalīnimbadāḍimādi tāvat tasya kaṭukaprabhṛte rasasya 
samavāyikāraṇam, tatsaṃyogasamavāyabalācca dantodake sa mukhyo dṛṣṭaḥ, iha 
tu pareṇa dāḍime carvyamāṇe'nyasya tadudbhavaḥ kathaṃ syāt | atha 
adhipatipratyayarūpeṇa paricarvyamāṇenāpi dāḍimarasena dantodakasaṃ-
yuktātmasaṃyuktasama-

(page 166)

vāyajñāteyena paradantodake'pi tadrasatvābhimāno mukhyaḥ, tarhi sarvasya 
rasasya vastubhūtasya sahacarasparśāvyabhicāro dṛṣṭa iti pūrvoktatajjātīyatā-
vaśyaṃbhāvāpatterdantodakasavidhavartinā sparśanena dāḍimasparśe'pi 
śītādirgṛhyeta | naca evam | nanu

     ---------vicitrā vastuśaktayaḥ |

iti adhipatirūpeṇa tena rasena saṃyuktasamavāyābhimānopakalpito 
rasamātrasyaiva dantodake samutpādaḥ, yadi vā tatra dantodake pāramārthika eva 
utpādaḥ; tatkaṭukādirasamātrayuktasya dravyāntarasya tatraiva adantodake 
rasāntarasya yathā hi guṇaviniyogena madhura eva apsuḥ rasaḥ iti niyamo yukta iti | 
evaṃ tarhi vaktrāsavaparicarvaṇapravṛtto'pi kāntādantodake tatra sa tamanubhavet 
| tatra saṃkrāntasya dantodakāntaravyāmiśrībhāvāt sa rasastirodhīyate iti cet, 
tanaiva tarhi pramātrā tādṛśādapasṛte'pi dāḍimāsvādanapravṛtte puṃsi 
svakadantodakasya sthiratvena sadṛśāparāparakāritvena vā 
kūpalavaṇodakatulyavṛttāntatvāt sa rasaḥ kālāntare'pi anubhūyeta | kālāntare 
nānubhūyate'sau saṃskāradārḍhyābhāvāt rasa iti cet tatkāla eva tarhi 
bhujyamānamekarasamapi guḍaudanādi tata eva nātirucikaramapi 
pratilabdhakaṭukāmlādivicitrarasāntaradantodakasaṃmiśrībhūtaṃ 
śikhariṇīmiśritamiva svāduṅkāraṃ pareṇa bhujyeta | itiḥ prakāre | nakevalaṃ 
darpaṇādau hastyādirūpatve bādhaḥ, yāvadatra pratiśrutkārasāveśānāmapi 
evaṃprakāro'yamasāviti yastvayā nāstīti samabhāvi, sa vādo'styeveti kathaṃ 
vastubhūtatā syāt, yena tatra pratibimbatvamapahnutya darpaṇahastyādāvapi paraḥ 
pratighātamātreṇa apahnuvīta pratibimbavyavahāramityāśayaḥ | nanu evaṃ 
vastuvailakṣaṇyādavastutve śuktirajatavat bhrāntatā bhaviṣyati, tathāpi kā 
pratibimbatetyāśaṅkya

(page 167)

āha ata eva ca iti | na anena bādha upajīvyate | evaṃ hi bhrāntitvābhāve sādhye 
bādhasaṃbhavo viruddho hetuḥ syāt | tasmāt pūrvokte granthe yat vailakṣaṇyaṃ 
gamyamānatvena sthitaṃ, tadupajīvyate | tataśca ayamarthaḥ-yathā 
prasiddhavastusājātyābhāvāt na vastutvam, tathā grasiddhabhrāntisājātyā-
bhāvāt na bhrāntitvam | tadeva darśayati tasyāṃ hi ityādinā ata eva ityanena vā 
| nirācikīrṣitasya bhrāntitvasya pareṇa śaṅyamānatāyāṃ pūrvokto bādho 
hetutvena upajīvyate | sahetukasya bhrāntitvasya neti nirākaraṇaṃ kriyate | 
nirākaraṇe ca hetuḥ tasyāṃ hi ityādinā ucyate | cakāra āśaṅkāṃ dyotayati | 
ata eva bādhayogāt hetoreṣā darpaṇahastyādirasāveśādirūpā 
bhrāntirbhaviṣyati, na pratibimbamityapi yat pareṇa śaṅyate, tadapi na | hi yasmāt 
bhrāntāvāropyamāṇameva pratibhāsate; natu vastutattvasya nāmāpi sphurati | 
saṃsthānaṃ hi rūpadharmamātram | rūpatirodhau tadapi na kiṃcit | 
vastudharmatve'pi vā saṃsthānasya samastadharmapūrṇaṃ vastu ityabhyupagame 
manāgapi vaiparītye vastvantarameva nirbhātaṃ bhavet, natu tat | iha tu 
odanādiraso'saṃmiśro vikāraleśenāpi yukto bhāti, kiṃtu sa eva bhāti, 
bhātyeva saḥ | yadi ca dantodakaṃ tatkaṭukādirasayuktaṃ bhrāntyā bhāseta, 
tatsaṃmiśratvādodanaraso'pi vicitra eva nirbhāseta | pītaśaṅkhe pratibhāte hi na 
śuklaśaṅkhavān vāsudevakaraḥ pratibhāti | tasmāt yathā na darpaṇasya pṛṣṭhe 
vā antarvā paścādvā bāhye vā anyatra vā hastī kaścidasti, bhāti ca 
tadīyasvacchatāmahimnā; tathā rasādirapi na dantodakāderiti pratibimbataiva asyā 
yuktā | tatsaṃbhave ca na pratighātinetraraśmipratigṛhītasvamukhādigraha-
ṇamasaṃvedyamānaṃ

(page 168)

yuktaṃ kalpayitumiti upasaṃharati tasmāt śabdo nabhasi, sparśaḥ kvacidādhāra-
cakre, rūpaṃ darpaṇādau, raso dantodake, gandhastatkṣetre cittopāruḍhamiti 
yathāyogyaṃ smaraṇānubhavotprekṣādyabhivyaktaṃ pratibimbarūpatayā bhāti | 
bhāsanasārataiva hi pratibimbateti hi kathamavyāpṛtatadviṣayacetaskasya 
pratibimbasattāvyavahāraḥ | etaduktaṃ bhavati yadi kaścit brūyāt-nanu yathā 
nirmalo darpaṇaścet, tadavaśyaṃ saṃnihitamatra pratibimbatāmeti, tathaiva 
dantodakādiṣu rasādipratibimbāni syuḥ, naca tathā nityamavabhāsante iti; sa 
vācyaḥ-iha avabhāsanasārameva pratibimbatattvam | yathoktaṃ śrītantrāloke

     na deśo no rūpaṃ naca samayayogo na parimā 
     nacānyonyāsaṅgo naca tadapahānirna ghanatā |
     nacāvastutvaṃ syānnaca kimapi sāraṃ nijamiti 
     dhruvaṃ mohaḥ śāmyediti niradiśaddarpaṇavidhiḥ || (3 | 23)

iti | avabhāsanaṃ ca tattadviṣayagrāhakendriyānugrāhakāntaḥkaraṇādhiṣṭhā-
nāyattam | tathāhi darpaṇe saṃnihite'ntaḥkaraṇavyāpāraprayuktanetravyāpāra-
vyapohane ko mukhapratibimbavyavahāraḥ | ko hi veda andhatamase mukhaṃ 
saṃkrāntaṃ ratne | evaṃ dantodake rasakṣetre rasanendriyādhiṣṭhānabhūte 
pratibimbito rasastatsavidhavartirasanendriyapreraṇamantaḥkaraṇakṛtamantareṇa 
kathaṃ bhāseta | naca anya pramātrindriyagocarīkāryaṃ 
tatpratibimbārpaṇasthānaṃ darpaṇavat, cakṣurgolavat vā, yena asya 
svayamagraheṇa pramātrantarendriyavyāpārāt nirbhāsanaṃ bhavet | kiṃtu 
antardehavṛttitvāt dantodakāde rasādikṣetrasya na parapramātṛgocaratā śaṅkyā 
| naca antaḥkaraṇapreritasvendriyavyāpāramantareṇa tannirbhāsanaṃ yuktam | 
nirbhāsanasārameva

(page 169)

pratibimbamiti na kaścit codyāvakāśaḥ | asaṃmukhīnānām iti 
avyāpṛtacakṣuṣāmiti | lakṣaṇayā ayamarthaḥ-saṃmukhamasmin dṛśyate iti 
saṃmukhīna ādarśaḥ; saca paunaruktyāsaṃgatibādhita iti, tena nairmalyaṃ 
svaviṣayagrahaṇakṣamatvaṃ lakṣayatā vyāpṛtendriyatvamuktaṃ bhavati | anye tu 
darśana iti kartṛsādhanamapi, natu adhikaraṇasādhanameveti manyante | evaṃ 
svapakṣamupasaṃhṛtya parapakṣāyogamapi upasaṃharati mukhya iti | yadi sa 
mukhyaḥ śabdaḥ syāt, uccārayitṛdeśagṛhadeśāntarālavyatiriktadeśavṛttibhir-
gahvarodaragataiḥ pramātṛbhiḥ sa śabdaḥ śrūyeta; taddeśairapi 
ghaṇṭānunādasya iva śravaṇe tīvramandādiviśeṣasya upalambho bhavet | naca 
etadasti | raso'pi paricumbanāvasthāyāmanyena gṛhyeta gandho'pi 
taddeśavartitvādanyaiḥ pramātṛbhiḥ | sparśo'pi parakīyahastasparśādigamyo 
bhavet,-iti prasiddhatajjātīyavastvantaraviṣaye yāvatāṃ pramātṛbhāvaḥ, 
tāvatāmatrāpi syāt,-ityevaṃtātparyeṇa sarve śabdarasagandhasparśāśca 
yathāyogaṃ vātapittādiprakopapraśamasvakāryakāriṇo bhaveyuḥ | śabdo'pi 
tadgṛhāvartī jāto'truṭitaprāthamyocitatīvratamabhāvastīvratarādimandatamān-
taśabdapañcakārambhakaḥ syāditi guhāyāḥ parataramapi śrūyeta | tasmādasti 
pratibimbalakṣaṇastṛtīyarāśiḥ | tasya ca samānaguṇe svacche ca nirbhāsanaṃ 
dṛṣṭamiti svacchatva samānaguṇatvalakṣaṇaṃ kāraṇaṃ pratibimbasvīkaraṇe 
vastūnāmiti siddham | tadviruddhaṃ ca buddherātmāpekṣayā asamānaguṇatvam, 
asvacchatvaṃ ca kāraṇaviruddhamupalabhyamānamātmapratibimbagrāhitvasya 
svaviruddhakāryasya niṣedhaṃ karoti | etadupasaṃharati evaṃ samānaguṇa eva iti 
| svacchatvaṃ guṇaniṣṭhameveti pūrvasamānadharmaṇyeva ca ityatra uktamiti 
pṛthagiha na uktam | atidūra-

(page 170)

vailakṣaṇyaṃ dhiyastraiguṇyātmakatvena bhogyatvādātmanaśca nairguṇyena 
bhoktṛtvāditi kā samānaguṇatve saṃbhāvanāpīti bhāvaḥ | nanu sautrāntikāḥ 
saṃvidi nīlādipratibimbamupayanti, naca sā taiḥ samānaguṇā | 
tadvāsanāyogādanādipravṛttāt samānaguṇatvaṃ buddhāvapi 
bhaviṣyatītyāśaṅkya āha pratibimbe'pivā iti | evaṃ vadannapi idaṃ tāvat 
sāṃkhyaḥ praṣṭavyaḥ-viṣayasya vyavasthāpanaṃ 
darśanaparāmarśanātmakaṃ yaducyate, tat mukhyāmajaḍarūpāṃ kiṃ 
bhoktrīṃ citiśaktimapekṣate, tāṃ vinā na bhavatīti | omiti cet, puruṣa eva tarhi 
darśanaparāmarśanasvabhāvo'bhyu-pagantavyaḥ, 
kimanupapadyamānāsaṃvedyamānabuddhipratibimbitacitiśaktivāde-na | atha 
buddhigatena citpratibimbena tat nirvahati, tat tarhi jaḍameva na cidrūpamiti 
buddhireva tādṛśā turyeṇa guṇena yuktā kalpyatām, yā viṣayaṃ 
vyavasthāpayiṣyatītyalaṃ puruṣakalpanayā | yadāha devalācāryaḥ

     puṃsi kartṛtvamāropya buddhāvapi cidātmatām |

iti | atha mukhyacaitanyameva pratibimbībhūtaṃ tathā karotīti ucyate; 
tadayuktamanyatra pratibimbe tadadṛṣṭeḥ | nahi darpaṇapratibimbito vahnistameva 
darpaṇamapi tāvat tāpayet, kimaṅga indhanaṃ dagdhuṃ prabhavet | uktaṃ ca 

     tajjātīyena prasiddhānyatajjātīyarūpeṇaiva bhavituṃ yuktam |

itīti buddhipuruṣadvayakalpanamakiṃcitkarameva | tadāha pratibimbe'pivā ityādi 
| apiśabdena abhyupagamaṃ darśayati, vāśabdena samānaguṇatvameva pratibimbe 
kāraṇamiti | etat na ādriyāmahe apīti anādaram | tatra iti buddhau | tasyāḥ iti 
puṃspratibimbavatyā api buddheḥ | etacca yadyapi pūrvamuktam evaṃca 
buddherjaḍatve ityādinā, tathāpi dūṣaṇāntarāvakāśāya uktam |

(page 171)

tata eva bahuśākhamapasiddhāntāntaramapi samuccayena āha buddheśca iti | 
svakāraṇe pradhāne citpratibimbasya cidrūpasya vā na prātisvikasya saṃbhavaḥ | 
tatrāpi ca ātmakṛtatve ayameva doṣaḥ, buddhiparikalpanāvaiyarthyaṃ ca adhikam | 
kāraṇena ca saṃbhavadrūpaṃ na kārye samādhīyate iti tadātma kāryaṃ 
prāptamiti ātmā kāraṇaṃ bhavediti

     ---------na prakṛtirna vikṛtiḥ puruṣaḥ | (sāṃ. kā. 3)

iti tyaktaṃ bhavet | tatra iti ātmani | tataśca ātmana eva prathamo vikāro buddhiriti 
pradhānakalpanaṃ vyarthaṃ syāt | nanu yathā ghaṭe mṛtpiṇḍa eva 
upādānakāraṇaṃ, daṇḍacakradeśakālakumbhakārādi kevalaṃ 
tadupādānakāraṇasaṃpāditaṃ, tata eva śeṣaśabdavācyaṃ viśeṣamātraṃ 
vidadhat sahakāri; tadvadātmā śeṣānugrahakāritvamātrāt sahakārī syāt, na 
upādānam | upādāne ca kāryamasti, na sahakāriṣu anantakāryodayaprasaṅgāditi 
paramatamāśaṅkya āha satkāryavādinā iti | yadi tāvadupādānāsaṃbhavini 
viśeṣāṃśe'pi na vyāpriyante sahakāriṇaḥ, tadalametaiḥ; atha taṃ janayanti, 
tadasantameva cet, upādānasyāpi pāpāt kutaḥ śāpo'yam-yadantaḥ 
kāryabhāgo'sya adhyasyate

     asadakaraṇāt (sāṃ. kā. 9)

ityādernyāyasya tulyatvāt | tasmāt sāmagrīrūpakāraṇāntarvartī kāryasvabhā-
vo'bhyupagantavyaḥ satkāryavādinā dharmasaṃcayarūpaḥ, natu 
ekakopādānakāraṇāntarvartī sahakāriṇāmanupayogaprasaṅgāt | nanu kānicit 
sahakārīṇi upādānarūpamāviśantyeva kāraṇatāṃ pratipadyante | 
jalabhūmyoḥ pariṇāmiko hi rasa ūṣmaṇā vegavatā kālaprabhāvitena 
bījāntarvartitāmeva upayāti tāvatā vicitrasya aṅkurasya

(page 172)

svarūpalābhāt, anyāni tu dharmādharmapuruṣārthaprabhṛtīni abhivyaktimātre 
vyāpriyante | teṣu kā kāryaśeṣāntargamanacintā | yadyevaṃ, abhivyaktirna 
kāryaśeṣa iti tatra vyāpriyamāṇānāmeṣāṃ dīpacakṣurādīnāmiva 
kathaṃkāraṃ kāraṇatāparigaṇanaṃ bhavet | kāryaśeṣaḥ seti cet, tarhi asatī 
saiva | enāṃ tāni yathā utthāpayanti, tathā upādānamapi 
mukhyakāryamutthāpayet,-ityalaṃ kvacitsatkāryavādavyavasanena | tadāha 
abhyupeyā iti | iṇo'rhārthe yat | tataḥ iti kāryaśeṣakṛtādādhidādhikyādāt-
mani cinmātratā kathaṃ syāt | nanu tāvadrūpatvamātmano bhaviṣyati, kiṃ hi 
duṣyati tāvatā, kiṃ vā puṣyati cinmātratayetyata āha kaivalyāvasthāyāṃ ca 
iti | abhyupetacinmātratātyāga eva tāvadapasiddhāntaḥ, sa tu apasiddhāntāntarapi 
ānayatīti caśabdaḥ | tathāhi-kaivalyadaśāyāṃ na citpratibimbaṃ 
buddhāvudetīti tadā puruṣo'kāraṇasvabhāvaḥ, tataḥ 
pratibimbātmakakāryaśeṣaviyuktaḥ pūrvaṃ tadyukta iti yogavibhāgau 
bhāvābhāvatvena viruddhau | tataśca viruddhadharmayogādaikyaṃ kūṭasthaṃ na 
syāt puṃsaḥ | pradhānasyāpi hi akauṭasthye idameva nimittaṃ, na anyat | nanu 
kaivalyāvasthāyāmapi asya yogyatvamanivṛttam, tadeva ca 
kāryaśeṣāntargamanaṃ pradhānasya iva mahāpralaye ityāśaṅkya madhye 
prameyāntaraṃ hetvantareṇa upakṣipati nahi iti | anantaram iti kadācidapīti 
āśayaḥ | ghaṭe'pi paṭayogyatā bhavet, puruṣe'pivā mahadādijananayogyatā,-
iti kāraṇatvaṃ yogyatārūpaṃ niyamavattvena vyāpakena 
kāryapūrvabhāvitāvirahāt vipakṣādapasāritaṃ kāryapūrvabhāvitvena 
vyāpyate, tacca iha na upalabhyate,-iti vyāpakānupa-labdhiḥ | na kaivalye pumān 
pratibimbakāraṇaṃ kāryāpūrvabhāvitvāt | kāryapūrvabhāvitvasya ca 
vyāpakaṃ kāryapaścādbhāvaḥ |

(page 173)

tadviruddhastadabhāvaḥ kāryapūrvabhāvitvaṃ niṣedhati | na kaivalye 
kāryapūrvabhāvī puruṣaḥ kadācidapi kāryapaścādbhāvābhāvāditi 
vyāpakaviruddhopalabdhiḥ, kadācidapi kāryapaścādbhāvasaṃbhāvanāyāṃ tu 
kaivalyaṃ nāstītyeva uktaṃ syāditi āśayaśeṣaḥ | yadivā 
cinmātratāhānirityatra ayamāśayaśeṣaḥ-yat tat cinmātrāt bhoktṛrūpāt 
prakāśādadhikaṃ, tat kathaṃ bhoktuḥ svarūpaṃ bhavet | viruddhadharmāpatterhi 
puṃso'nativyāmiśraṃ rūpam,-iti uktaṃ pariṇāmitvaṃ vyapohitum | atha 
cidacidrūpaṃ ca ekaṃ cetyapi bhavati, tadā puṃsprabhṛtivivekasamarthanaṃ 
vyarthamiti | evaṃ kāryaśeṣāntarbhāvena puṃsidūṣaṇamuktvā 
abhyupagamyavādena duṣaṇāntaramāha kaivalyāvasthāyāṃ ca iti | mā 
bhūdvā tatra kāryaśeṣāntarbhāvaḥ, tathāpi kāraṇākāraṇatārūpaviruddha-
dharmāpatteḥ pariṇāmitvamaparihāryamiti | nanu cidrūpatātirekeṇa ātmano na 
kāraṇatākhyaṃ rūpāntaramasti

     ------naprakṛtirna vikṛtiḥ puruṣaḥ | (sāṃ. kā. 3)

itivacasā saptavidhakartṛtvaniṣedhābhidhānāt

     puruṣārtha eva hetuḥ-------| (sāṃ. kā. 31)

ityanena tu pradhānasya viśvatra upādānakāraṇasya sukhādyātmakatvena yat 
bhogyatākhyaṃ dṛśyatvaṃ nāma rūpaṃ, tadeva nimittakāraṇatvena uktam | tattu 
svātmāpekṣaṃ na upapadyate bhogyasya bhoktṛrūpavirodhāditi cidrūpamajaḍaṃ 
bhoktāraṃ puruṣaṃ prati iti saṃpadyamānaṃ viśeṣābhāvāt sarvapuruṣān 
pratīti vyavasthāpyate, natu puruṣaḥ kadācidapi kiṃcit karoti,-iti parakīyaṃ 
matamanubhāṣya dūṣayati buddhisadbhāve'pi iti na tatsaṃnidhāne iti 
nimittatvaṃ saptamyarthaṃ neti pratiṣedhati | etaduktaṃ bhavati-
bandhamokṣavyavasthāsiddhaye yaduktaṃ

(page 174)

kṛtārthaṃ taṃ prati naṣṭamapyanaṣṭaṃ sādhāraṇatvāt

iti, tatra  taṃ puruṣaṃ pratīti karmapravacanīyavibhaktivyaṅgyo yaḥ saṃbandhaḥ, 
sa cet na vāstavaḥ, tarhi na kiṃciduktaṃ syāt | vāstavatve saṃnidhānasya 
nimittakāraṇatāyāmucyamānāyāṃ kathamakāraṇasvabhāvatā puṃsaḥ 
sidhyet kāraṇasvabhāvatve sadātane mokṣāyogaḥ, kadācidakāraṇasvabhāvatve 
vidharmadharmayogāt kūṭasthatāhāniriti | evaṃ nacātyantaśuddham ityādinā 
na tatsaṃnidhāne tadudbhavaḥ syāt ityantena ṭīkāgranthena 
sūtroktamanādarāspadatvaṃ vṛttau tathāpītyarthena tathāca ityanena 
abhyupagamyavādābhidhāyinā kṛtavṛttikaṃ parapakṣānupapattyā 
bahuśākhayā pradarśitayā sphuṭīkṛtābhiprāyatvena vivṛtam | adhunā 
tasyāścitsvarūpatāsyāt itivṛttiparijihīrṣito'pi viruddhadharmādhyāso 
balādeti,-ityevaṃ bhaṅyantareṇa vyācaṣṭe ātmā iti | evaṃ ca atra vikalpyam-
ayaṃ citsvabhāva ātmā, iyaṃ ca cicchāyādhāriṇī dhīriti 
kimidamanubhavabalāt vyavasthāpyate, kasyacidarthasya anyathānupapattyā vā | tat 
prathamaṃ kalpaṃ dūṣayati ātmapratibimbayogāt iti | yathānubhavam iti 
anubhavānusāreṇa anubhavayogyam | anubhave ca ekameva sukhādyātmakaṃ 
svaprakāśatayā caitanyarūpaṃ tattvaṃ vastubhūtamavatiṣṭhate 
anubhavarūpābādhitapramāṇabalena sthairyamavalambate | co'pyarthe | 
ātmānaṃ caitanyapratibimbārpakaṃ, tatkṛtaṃ buddhau pratibimbamapi aṅgīkṛtya 
| etaduktaṃ bhavati-ātmacchāyākṛte'pi caitanye cidrūpe svayaṃ ca 
sukhādyātmakatvena sātākāramekaṃ buddhisaṃjñakaṃ tattvamaṅgīkṛtaṃ 
viruddhadharmābhyupagamabhīrubhirapi pāramarṣaiḥ | tataśca pratibhāsabalāt 
tadeva grāhakarūpaṃ bhaviṣyati | iha ahaṃ jānāmiti hi sarvasya abādhitā

(page 175)

pratipattiḥ | tatra idamaṃśo bāhye'pi ābhāti sarvapramātṛsādhāraṇarūpaḥ 
krayavikriyādau, antastatpratibimbito'pi asādhāraṇo manorājyasaṃkalpādau 
vikalpe ca | tatra yuktaṃ tadviṣayārpitaṃ dṛśyapratibimbaṃ buddhāviti, ahamiti tu 
yadidaṃ buddhau svarūpaṃ prakāśate ca adhyavasīyate ca, tadeva 
sukhādyanuvedhena bhāti | yadāha idameva ca naḥ sukhaṃ yat sātaṃ 
saṃvedanam iti | ahamiti tu rūpamanyatra na kutracidanubhūtaṃ yena tadarpitaṃ 
buddhitattve syāt | nacāpi puruṣasya tadrūpamiṣyate'haṅkāravṛttitvena asya 
iṣṭatvāt | ahamiti idamiti ca muktvā tattvāntarasya na kasyacidanubhavaḥ | kiṃca 
ātmānaṃ buddhitattvaṃ na paśyati yena jānīyāt-etadīyā iyaṃ me 
caitanyacchāyeti | naca anyo'nayostṛtīyo draṣṭā asti yastathā adhyavasya 
vyavaharedupacaredvā | naca sukhādirūpasya caitanyena virodhaḥ sukhādeḥ 
svaprakāśasvabhāvatvena nirbhāsanāt svaprakāśatvasyaiva ca caitanyarūpatvāt | 
kevalaṃ sukhādirūpaśūnyamapi viṣayagrahaṇamātrarūpaṃ 
saṃvedanamupalabhyate,-iti amuyā bhaṅgyā cittarūpaviśeṣakatvamabhidhātu-
mabhidharmādau sukhādayaścetyā iti vyavahriyante saṃvedanamātraṃ tu 
cittamiti, tatra anubhavabalena puruṣakṛtā cicchāyeti vyavatiṣṭhate | nanu 
buddhipuruṣayoḥ parasparasaṃsargādiyaṃ bhrāntiḥ sukhameva ca svaprakāśamiti 
| uktamanyatra

     saṃsargādavibhāgaścedayogolakavahnivat |
     bhedābhedavyavastheyamutsannā sarvavastuṣu ||

iti | kasya ca iyaṃ bhrāntiḥ | na buddheḥ puruṣamapaśyantyāḥ | naca tṛtīyaḥ 
saṃsṛṣṭataddvitayagrāhī kaścidastītyuktam ekameva iti, natu 
buddhipuruṣadvayarūpam, nāpi saṃsargakṛtabhrāntaikarūpamidamitya-

(page 176)

nubhavagocarāpattyā | naca jñeyaṃ saṃvidrūpasvaprakāśamidamityasya arthasya 
vā saṃvidrūpaṃ tata eva ca viṣayabhedāt sukhaduḥkhādinā anekena ākāreṇa 
caittarūpeṇa anadhikenāpi adhikena iva viśeṣeṇa vartamānatvācca 
pratikṣaṇabhinnaṃ saṃtānavṛttyā pravahat paśyāmaḥ | sarveṣāṃ 
pramātṝṇāṃ tadatirikte nāstyanubhava iti ekapadena brahmavivartavādo'pi na 
anyaḥ siddha iti dhvanati | evaṃ prathamastāvat kalpo na yuktaḥ, dvitīyo'pi na 
upapanna ityāha tāvanmātra eva iti | mātragrahaṇena svaprakāśatvaviṣayagrā-
hitvasātādirūpatvādi yāvadasya vyāvṛttibhedopakalpitaṃ rūpaṃ bhāti, tena na 
asya bhedaḥ kaściditi darśayati | evakāreṇa adhikaṃ niṣedhati | arthabhogasya 
idamahaṃ jānāmīti anapahnavanīyasya paripūrṇena rūpeṇa samyaktayā 
abhrāntatayā āptiḥ saṃpattiryataḥ, tasmādarthabhogarūpāyāḥ saṃvitteḥ 
saṃbandhī saṃsargasamavāyādinā vartamānaḥ kaścidātmā astīti kasya 
arthasya anyathānupapattyā kalpyeta | evamiyatā vṛttigatam anupapatteḥ itipadaṃ 
vyākhyātam | evam iti sūtradvayoktābhiryuktibhiḥ yaḥ prasaṅga uktaḥ, 
tadviparyayeṇa anityarūpasya anyānāśritasya jñānasya siddherityarthaḥ | evaṃ 
jñānakriyāyogāt ityatra hetau jñānabhāgaṃ vicārya tadanulagnatvenaiva 
kriyā vivecyā hetubhaṅgāyeti śikṣayituṃ sadapi itivṛttāvapiśabda 
uttarakārikāvakāśadānārthaḥ | apiśabdo hi kāmakārarūpaṃ sattve 
tāvadanvava-sargaṃ dyotayannanyasya tu sattvamapi na adhigantuṃ śakyamiti 
prakaṭayati | tahā ca ṭīkākāra evameva vivarīṣyati kriyā tu ityādinā apiśabda 
ityantena | ata eva uttarakārikārtho vṛttikṛtā saṃkṣepeṇa ihaiva vyākhyātaḥ | 
yathā iti yena nyāyaprakāreṇa ārya evamāha, sa iyatā

(page 177)

granthena nirṇīta iti yāvat | tatra iti pratyakṣe iti anapahnavanīyaprakāśe 
viṣayopalambhe arthabhogātmani nimittatayā sthite | samāptaḥ samyagāptaḥ 
siddhaḥ svātmani tathāprakāśānurūpavikalpanalakṣaṇaḥ, paratra tathāprakā-
śasaṃkramaṇakāripratipādanalakṣaṇaḥ prakhyopākhyāśabdavācyastat-
pūrvakaśca pravṛttiprāptyarthakriyālakṣaṇo vyavahāraḥ 
pramātṛprameyāṇāṃ bahuśākhaparasparaprāptirūpa ityato hetoścaitanyaṃ 
citiśaktimātraṃ puruṣalakṣaṇaṃ dharmāntarapratikṣepaprāṇena 
bhāvapratyayāntena abhidhānayogyaṃ yaducyate tadapārthakaṃ niṣprayojanaṃ, 
na anena vinā kiñcit prayojanaṃ siddhyati yadanyathānupapattyā tat 
kalpyetetyarthaḥ | tadayaṃ prayogaḥ-arthasaṃvedanamadhye na ātmā 
vikalpanīyo'nubhavānyathānupapattyanyatarānu-palabdheriti kāraṇānupalabdhiḥ 
| adhiko hi mahānase piṭharādibhyo'gniḥ, parvate ca taruśilādibhyo'nubhavena 
dhūmānyathānupapattyā vā kalpyate iti tatkāraṇikā kalpanā ākāraṇakatvasya 
anyakāraṇakatvasya vā kalpanā uparidṛśyamānaniyamāyogāditi | nanu 
evamanubhavānusāreṇa vyavasthāyāṃ nīlaṃ sukhaṃ, pītaṃ 
duḥkhamityetāvanmātraṃ prakāśamānamaṅgī-kartavyam; ahamiti tu 
vikalpamātraṃ, natu atra adhikaṃ cakāsti | nīlaṃ hi prakāśate, na nīlaprakāśaḥ 
kaścit, tajjñāne'pi kaḥ pakṣapātaḥ, yena karuṇāyamāna iva sadapi iti 
tadabhyupagamaṃ paraḥ kuryādityāśaṅkya āha jñānasya asattāyām iti | 
bhavataiva hi uktaṃ nīlaṃ prakāśate iti | tadatra prakāśate iti yo bhāgaḥ, sa 
nīlaśarīraparamārtha eva cet yathā nīlaṃ sarvapramātṝn prati bhavati na bhavati 
vā, tathā so'pi syāt | tadetadāha nahi ityādinā | rūpavatsyāt iti | bhavanaṃ, na 
bhavanaṃ vā samānaṃ mantavyam |

(page 178)

tat iti nipātastasmādityarthe vartamānaḥ syāditiprasaṅgasūcitasya 
svaviparyayarūpasya paridṛśyamānatvena avaśyāṅgīkāryasya hetutāmāha | 
yato jñātatvaṃ na sarvapramātṝn prati, nāpi na sarvapramātṝn prati apitu 
kaṃcideva pramātāraṃ prati, tato hetorjñānameva, natu viṣayasvarūpaṃ, 
jñātatetyarthaḥ | nanu evaṃ bhavatu jñānam, pratyakṣaṃ tu kutaḥ | 
viṣayagataprakaṭatātmakaphalānumeyamanāśritasvaprakāśasaṃvidātmaka-
phalānumeyaṃ vā tadityāhuḥ | ajñāte'rthe na kaścit buddhimupalabhate, jñāte 
tu anumānādavagacchatīti | tathā

     nānyathā hyarthasadbhāvo dṛṣṭaḥ sannupapadyate |
     jñānaṃ cennetyataḥ paścātpramāṇamupakalpyate ||

iti | tena na svarūpamātraṃ nīlasya jñātatā, yena sarvapramātṝn pratīti codyeta; 
apitu tatprakaṭatā tatsaṃvittirvā jñātatā, tajjanakaṃ tu bhāvanārūpaṃ 
kriyātmakaṃ jñānaṃ tadanumeyaṃ, natu jñānameva jñātatetyāśaṅkya āha 
ata eva iti | anenaiva adhikaraṇasiddhāntatāmāha

     yatsiddhāvanyaprakaraṇasiddhiḥ saḥ | (nyā. sū. 1 | 1 | 30)

iti | atra hi heturyacchabdena nirdiṣṭaḥ, sa ityatra tu upacārāt taddhetukastaddhetu-
sādhyo'rtha ukta iti pratijñārthatvāvirodhaḥ, heturapi vā 
pramāṇamūlābhyupagamarūpatvāt siddhāntatāṃ na jahāti, yadivā 
yatsādhyasiddhāvityatra sādhyatayaiva heturākṛṣṭa iti viśiṣṭahetuka eva 
sādhyastatheti labhyam | ata eva hetoḥ sarvapramātṝnnityuktāt jñānameva 
jñātatā, natu prakaṭatā saṃvittirvā jñātateti yat vastu tato hetostajjñānaṃ 
pratyakṣaṃ svasaṃvedanasiddhamabhyupagantavyam | yadā iti yadityasya arthe 
tadā iti tata ityasya arthe iti yat vastu viśiṣṭahetusiddhaṃ, tato hetoḥ 
pratyakṣatvamiti;

(page 179)

yasmādarthe tu vyākhyāyamāne yasmādevamiti yat vastu tasya na hetutvamuktaṃ 
bhavet, apitu evamiti vimṛṣṭe yo'nyaḥ kaścit hetuḥ, tasya prakṛte sādhye 
hetutvamuktaṃ syāt | dhūmavān yatastasmādagnimāniti hi āñjasī eva eṣāṃ 
pratītiryena hetunā dhūmavānayaṃ saṃpāditaḥ, athavā jñātaḥ so'gnimattve 
heturiti | naca etat vivakṣitam, apitu dhūmavattvasyaiva hetutvamagnimattve'bhidhi-
tsitam | tacca añjasā na ato vākyāt pratīyate | tena vivakṣite'rthe evaṃ spaṣṭā 
vācoyuktirdhūmavān yat, tasmāt agnimāniti | anuvadanakāle hi svarūpamātra-
masya parāmraṣṭavyam, natu hetubhāvaḥ | sa hi paścāt 
tacchabdaparāmṛśyatāyāṃ vidheyaḥ | tena evaṃvidheṣu sthāneṣu itthaṃ 
gamanikā vidheyā-dhūmavānityatra itiśabdārthagarbhīkāreṇa 
śabdasvarūpaṃ vā jñānaṃ vā avatiṣṭhate, dhūmavāniti yasmāt bhavati 
śabdajñānātmā vyavahāro dhūmavattvalakṣaṇādarthāt, tato hetoragnimāniti | 
yadivā yato hetorbodharūpāt dhūmavānayaṃ siddhaḥ, sa 
dhūmavattvāvabodho'gnimattve heturiti anuvādabhāge pañcamī hetuviṣayaṃ 
bodhamākṣipantī hetorajñātasya na hetutvamiti jñāpayati | etadeva na yuktam | 
tathāhi anūdyamānatākāle na hetuvācakāt śabdāt pañcamī prayujyate yasmāt 
dhūmavattvāditi, apitu yato dhūmavattvamiti prathamaiva; tadevaṃ yasmāditi 
bodhaḥ uktaḥ | etena abhiprāyeṇa cirantanairhetoranuvādayoge'pi pañcamī 
prayuktā

     yato hi pūrvānubhavasaṃskārāt------| (2 | 5)

ityādau, adyatanaistu prasiddhimātramupajīvadbhirabhinnanārikelanigaraṇavat 
vastutattvamalabhamānairvyavahriyate | yadeti vā yasyāṃ kālakalāyāmaya-
martho'sti, tasyāmayamapyastītyuktau hetuhetumattāvagatiḥ

(page 180)

sāmarthyāt labhyate | anūdyamānasya pūrvasiddhatvena yadeti hetutvaṃ yujyate, 
tadeti vidhīyamānasya apūrvatvena sādhyatvāt hetumattvamiti alaṃ bahunā | 
jñānameva jñātatetyayamartho viśiṣṭena hetunā yataḥ siddhaḥ sarvapramātṝn 
pratītyanena, tato hetoḥ pratyakṣatvaṃ jñānasya siddhyati | yadi tu anyato 
hetorjñānameva jñātateti asādhayiṣyāma, tatpakṣe tu asya hetutā na bhavet,-iti 
viśiṣṭahetukasya sato hetorhetutvam, na punaḥ

     upādāyāpi ye heyā------------| (vā. pa. 2 | 37)

iti nayena | pūrvahetusiddhe'rthe hetūcikīrṣite sa pūrvahetustyajyata eva | yathā 
dhūmavattvādayamagnimān, yasmācca dhūmavattvādagnimān, tasmāt 
śiro'rtisaṃtāpajanakaḥ-ityatra pūrvaheturayamupajīvyate; tathā atrāpīti 
etadabhidhātumuktam ata eva yadā jñānameva jñātatā tadā iti | ayamatra 
tātparyārthaḥ-iha prakaṭatā nāma yadi arthasya kriyate, tadā sā kiṃ 
rūpavadarthadharmo bhavantī svātmani jñānamapekṣate, na vā | pūrvasmin 
kalpe'navasthā-tasyāmapi hi jñānakṛtaṃ prakaṭatāntaraṃ vaktavyam, tatrāpi 
anyaditi prakaṭatāṃ jānan na aprakṣīṇeṣu jñāneṣu aviramatsu na arthaḥ prakaṭo 
yugasahasrairapi bhavet | atha sā prakaṭatā arthasya cet jātā, prakaṭo'sāvartho 
jātaḥ; kimanyat prārthyate | tatrāpi arthasya yadastu, tadastu; mama prakaṭo 
maitrasya prakaṭa iti tu yo niyatapramātṛsaṃbandhastatsaṃmukhapra-
vartanaprabhṛtivyavahāramātraparaṃparārūpārthakriyānivahaniyamanibandha-
nabhūtaḥ, sa kathaṃkāraṃ prakaṭatāyāḥ | janyajanakatāyā iti cet, 
kumbhakārakriyayā kumbhaḥ samudbhavan tasyaiva tathā syāt | ko hi viśeṣaḥ, yat 
kumbho na tajjanakasvaprakaṭatā tu tasya | tataśca kumbhatāyāṃ 
pratibimbārthakriyā tatkṛtā eva syāt prakaṭatāyāmiva | yat

(page 181)

bhāvagataṃ rūpaṃ, tat sarvasādhāraṇyena arthakriyāyai paṭagatamiva 
śuklatvam, tathā ca prakaṭateti | bhāvaniṣṭhaṃ hi rūpaṃ yadi tathā na bhavet, 
bāhyatā asya vyāpikā hīyeteti vipakṣādasādhāraṇyena arthakriyākāritvāt 
vyāpakānupalabdhiprasaṅgena vyāvartito hetuḥ sādhyena vyāpyate iti 
svabhāvaḥ | nanu dvitvaṃ yasya apekṣābuddhyā janitaṃ, na 
tadanyasādhāraṇyena arthakriyākāri,-iti anekāntaḥ | asiddhereko'nekāntaḥ | 
nahi saugatasya vikalparūpādṛte dvitvaṃ kiṃcit bhāvagataṃ rūpamasti | yasyāpi 
tat tathā, tasyāpi na asādhāraṇyena arthakriyā tato dvyaṇukagatasya aṇutvasya 
sarvasādhāraṇasyaiva dvitvādutpatteḥ prācuryeṇa ca na dvitvamarthakriyākāri, 
apitu tajjñānam | naca tat bāhyaṃ bhāvaniṣṭhaṃ rūpam | atha tajjñānamapi 
sarvasya kasmāt na syāditi ucyate, tadatrāpi tena na na ucyate | iha yathā 
dvitvamapekṣābuddhyā jāyate; tathā tatsāmānyajñānam, tato 
dvitvaguṇajñānam, tato dve dravye iti dravyajñānamiti | anyasya tat nāsti tasyā 
eva abhāvāt | apekṣābuddhirdvitvajātajñānajanmani kasmāt kāraṇamiti cet, 
rūpajñānajanmani kimālokaḥ kāraṇamiti paryanuyojyam | yathādarśanaṃ hi 
kāryakāraṇavyavastheti āstām | atha ucyate kumbho jñātaḥ san sādhāraṇyena 
arthakriyākārī, natu prakaṭatāyāṃ jñānamasti; tarhi na kasyacit sā 
arthakriyāyai bhavet | atha dvitvavadeva tatra na sarvasya jñānaṃ bhaviṣyati, tarhi 
prakaṭatāyāṃ prakaṭateti anavastheti uktam | pramātṛrūpātmānāśritasaṃvi-
drūpaphalānumeyajñānavādino'pi samānametat mama saṃviditi 
vyavahārāsiddheḥ | atha prākaṭyasaṃvidantaramantareṇāpi tathā, tat 
sarvapramātṝn prati syāt viśeṣābhāvāt | tayoḥ saṃvittiprakaṭatayorjñānameva 
pramātṛviśrāntaṃ prakaṭateti cet, bhāvena

(page 182)

kimaparāddhamityāśayena jñānameva iti evakāraḥ | smaraṇe 
atītānāgatānumānādau ca artha eva asan yathā iṅgitanimiṣitādīn 
dharmānātmani na sahate, tathā prakaṭatāmapi anupākhyaḥ kathaṃ saheta,-iti na 
asāvarthasya kasyacit dharma ityapi evakārārthaḥ | tat siddhaṃ jñānameva 
prakaṭatā jñātatāyā eva hetūcikīrṣitāyā anumitsitajñānarūpatvāditi | 
tadupādhiḥ iti jñātatopādhirhi jñāta ucyate | anyathā sadaiva sarvān prati ca 
kiṃ na jñātaḥ syāt | yaduktaṃ viniścaye jitaṃ jaḍaiḥ ityupahasya jñānaṃ 
ca nāma buddhisādhanaṃ pratyeti, naca buddhim iti ślāghanīyapraja iti, 
nanu vyaktibuddhireṣā iti ca | nanu yadidamiyatā svaprakāśarūpaṃ jñānaṃ 
siddhaṃ, sa eva ātmā bhaviṣyatītyāśaṅkya āha tasya ca iti | jñeyopādhiḥ iti 
jñeyakṛto deśabhedo vibhutvāśaṅkāśamananidānabhūtaḥ-iha ghaṭa iti; 
kālabhedaḥ-adhunā ghaṭa iti nityatvavyāmohavyapohanaheturbhātyeva | yadapi 
sukhādijñānaṃ, tadapi ekasāmagryadhīnatānityasaṃbaddhadehāvacchedakṛto 
deśakālabhedo bhātyeva; suptādau tadaiva tadeva | nāpi 
auttarakālikajāgradvikalpa-vyavahāryo deśakālabhedaḥ smaryata eva 
stimitatāyāmapi vyutthānacitta-prabhavasmṛtivikalpavyavahārya iti jñānāni eva 
ca deśakālasvabhāvabhinnāni vyāpakāni nityāni ekātmakāni saṃtatyā 
pravahanti vahanti lokayātrām | tadāha na anyasya iti saṃbandhi iti 
tādātmyasamavāyādinetyarthaḥ | anyasya iti vṛttiṃ vivṛṇoti pāṭhapūrvakam 
ātmākhyasya iti vastunaḥ iti saṃtānasya saṃbandhitvena ucyatāṃ nāma mama 
jñānamiti vyavahārasya darśanāditi ākūtam | vṛttiṃ tu vyākhyānabhaṅgo'pi 
mā bhūt, mā

(page 183)

ca bhūt punaruktamityabhiprāyeṇa ṭīkākāraḥ saṃkṣipya vivṛṇoti 
vakṣyamāṇanayena iti || 8 ||

     kriyāpyarthasya kāyādestattaddeśādijātatā |
     nānyā'dṛṣṭerna sāpyekā kramikaikasya cocitā || 9 ||

saṃkṣepeṇa kārikārthamāha kriyā iti | adṛṣṭeḥ ityasya pramāṇena 
anupalabdherityayamartha iti darśayati pratyakṣa iti avasāyaparyantaḥ 
pramāṇavyāpāra iti dṛṣṭiravasāyaparyavasāyinī sūtre vyākhyeyā, yena 
anumānamapi sagrahīṣyate ityavaseyaśabdaḥ svarūpeṇa anyasaṃbandhitayā ceti 
pramāṇānavaseyatve yuktiṃbādhitve ca ubhayatrāpi saṃbandhanīyam | yuktyā 
pramāṇavyāpāreṇa bādhitatvaṃ svarūpata uktam na sāpyekā kramikā iti, 
anyasaṃbandhitayā tu uktam ekasya kramikā kathaṃ bhavet iti | ātmana 
aiśvaryaṃ jñānakriyāyogādityevaṃrūpaparodīryamāṇahetudūṣaṇaprakaṭa-
nalabdhaṃ yat punaḥ sūtradvaye prasaṅgāpādanābhidhāyini prasaṅgaviparyaye 
viśrāntyā tasmāt jñānaṃ na yuktamiti jñānasya ayuktatvaṃ, tat kriyāyāmiha 
sūtre vṛttau ca apiśabdena samuccīyate,-ityāśayena vivṛṇoti na kevalam iti | 
anena ca kriyāpi na yuktā iti vṛttirvyākhyātā | pūrvasūtravṛttau sadapi iti 
apiśabdasya artho vyākhyātaḥ, etatsūtragatasya tu ayamarthaḥ ityāha atrāpi 
ityapiśabdena ṭīkākāraḥ | evaṃ ca vadan sūtravṛttyorekagranthatāṃ sphuṭayati | 
tatra iti na yukteti vaktavye satītyarthaḥ; yadivā tatreti ātmani kriyā | sā tāvat 
laukikī calanarūpā karmapadārthatvena padārthavidbhirupagatā na bhavati ātmano 
mūrtihīnasya mūrtyanuvidhāyinī sā nopagatā yataḥ | tairhi ātmano 
jñānacikīrṣāyatnayoge eva kartṛtvaṃ prasādhitaṃ, jñānādayaśca

(page 184)

guṇāśca tatsamavāyaśca na kriyeti tādṛśī kriyā vaktavyā, yā ātmanaḥ 
saṃbhāvyate | tadāha iti  lakṣaṇam | kārakasya phalasiddhihetubhūtakriyāni-
mittasya svakriyāpekṣayā vākartuḥ saṃbandhī tatsamavāyī tadātmā vā 
vyāpāro rūpaṃ svaṃ lakṣaṇaṃ yasyāḥ, sā kriyā yasyāḥ saṃbandhino 
bhāgāḥ pūrvāparībhūtāḥ kramavṛttayaḥ iti yāvat | yadāha tatrabhavān

     yāvatsiddhamasiddhaṃ vā sādhyatvenābhidhīyate |
     āśritakramarūpatvāttatkriyeti pratīyate ||
     guṇabhūtairavayavaiḥ samūhaḥ kramajanmanām |
     buddhyā prakalpitābhedaḥ kriyeti vyapadiśyate ||
     śvetaṃ śvetata ityetacchvetatvena prakāśite |
     āśritakramarūpatvādabhidhānaṃ pravartate ||
     kāryakārakabhāvena dhvanatītyāśritakramaḥ |
     dhvaniḥ kramanivṛttau tu dhvanirityeva kathyate ||

iti | evaṃbhūtā ca kriyā ātmano'styeva icchati jānāti yatate iti 
pūrvāparībhūtatattaddharmapratīteraṅgīkṛtā ca īśvarātmavādibhiḥ | 
yathāhuḥ śrīgranthakāragurupādāḥ

     tadecchā tāvatī jñānaṃ tāvat tāvatkriyā hi sā | (1 | 3)
iti,
     evaṃ na jātucittasya viyogastritayātmanā |
     śaktyā------------------|| (1 | 6)
iti,
     ghaṭādigrahakāle tu ghaṭaṃ jānāti sā kriyā | (1 | 24)

ityādi ca | etat lakṣaṇaṃ pariśodhayituṃ dvyarthaṃ vyācaṣṭe svātmanā iti | 
jānātītyasyāṃ kriyāyāṃ ye bhāgā abhisaṃdhānadīpālokā-

(page 185)

diḍhaukanamano'vadhānanetronmīlanādyāḥ, te svarūpeṇa kevalaṃ santaḥ, natu 
pūrve, nāpi apare pūrvāpekṣatvādaparatvasya tadapekṣaṇācca pūrvatvasya, te 
apūrvāpare santaḥ pūrvāparībhūtā avayavāḥ parasparāpekṣaṇena yasyāṃ 
sā tathā | nanu kimanena apekṣājanmanā rūpeṇa lakṣaṇena nirūpitena 
svarūpamātreṇaiva te kriyeti ucyatāmityāśaṅkya āha apekṣamāṇānāmeva 
ca iti, anyathā hi āśritakramatvaṃ yat kriyāyāḥ prāṇitaṃ, tadeva na syāt | yat 
tatrabhavān

     yathāca bhāgāḥ pacaterudakāsecanādayaḥ |
     udakāsecanādīnāṃ jñeyā bhāgāstathāpare ||
     yaścāpakarṣaparyantamanuprāptaḥ pratīyate |
     tatraikasminkriyāśabdaḥ kevale na prayujyate ||

iti | cakāraḥ prakṛtaprameyopayogitvena prameyāntaraṃ samuccinvannāśaṅkāṃ 
sūcayatīti tatpraśāntaye phalato hetutāṃ tasya prameyasya avadyotayati,-ityanayā 
bhaṅgyā uddhoṣyate co hetvarthaḥ iti | yathā caitrāya bhojanaṃ deyam, 
paramaśca ayamaudarika iti vṛhatkaṃ bhojanaṃ deyaṃ kasmādityevaṃ prameyaṃ 
cakāra ākṣipatītyādau, evamanyatrāpi avadheyam | nanu avayūyante 
ekāvayavyātmani miśrīkriyante yutatā vāpṛthaktā yeṣāṃ ca avayūyate, te 
yasya avayavāḥ saṃbandhinaḥ, so'vayavī | naca asāvātmano dharmo yukta 
ityāśaṅkya āha kramikatvāt iti | asaṃbhāvanādṛḍhīkaraṇatātparyeṇa ayaṃ 
hetuḥ, natu akramikatvādeva avayavina ārambho bhavati rūparasagandhādyaiḥ 
samānakālairapi tasya anārambhāt kramikāśca atra kālabhinnā deśabhinnāstu 
ārambhakāḥ khalu tantavo'vayavyārambhaṇadṛṣṭaśaktayo'pi na ārabhante, 
kiṃ punaradṛṣṭasāmarthyāḥ kriyākṣaṇā iti tātparyam | bhāgaḥ iti

(page 186)

sūkṣmāṃśaḥ, tatra avayavaśabda upacārāt pṛthaktvāyogādvā | nanu 
deśakramayogināmapi gajāśvādidhavakhadirādivastūnāṃ 
senāvanādyekapratītibalasiddhaḥ sumudāyo dṛṣṭaḥ, tadvat kramikāṇāmapi 
kriyākṣaṇānāṃ syāt | tataśca evaṃ lakṣayitavyam-pūrvāparībhūtāvaya-
vasamudāyaḥ kriyetyāśaṅkya āha ekakālatvābhāvāt iti | nanu evaṃ lakṣaṇe 
bahubrīherāśrayaṇamayuktamavayavinaḥ saṃcayasya vā anyapadārthasya 
alābhāt | tata iyat vaktavyam-pūrvāparībhūtā avayavā eva kriyā ityāśaṅkya 
āha nāpi iti | anena hi uktena bhāgā eva pratīyante, tathāca bheda eva udbhūtaḥ 
syāt | bhede ca svātmaviśrāntireva paramārthaḥ | tadviruddhā ca parāpekṣā 
paraniṣṭhatvasya tayā unmīlanāt, ato bhedodbhave pūrvāparībhāvānupapattiriti 
abhedasparśo'pi āśrayaṇīyaḥ | nanu bhinnasya kathamabhedasparśo bhinnena 
kṣaṇāntareṇa syādityāha ataḥ iti | yato bhinnasya svātmaparyavasitasya apekṣā 
paraniṣṭātmā na yuktā, tayā ca vinā na pūrvāparībhāvalakṣaṇāḥ kramaḥ, 
tanmayī ceyaṃ kriyā loke nirbhāsate; ato hetorbuddhyā vikalparūpayā tatra 
ekatvamabhedalakṣaṇaṃ kṣaṇānāmadhyavaseyam | yathoktaṃ

     buddhyā prakalpitābhedaḥ---------|

iti | nanu svatantrā buddhiścedevaṃ kuryāt, kaḥ pratiniyamaḥ iti āśaṅkya uktam 
ekakāraka iti | na svātantryeṇa ayamekatādhyavasāyaḥ, apitu ekakartṛlakṣaṇa-
kārakasvarūpāvinirbhāgabalādekaphalātmakakarmakārakasvarūpasamāśra-
yācca | kārakaśabdaḥ kartari karmaṇi ca vivakṣitaḥ | nanu pūrvāparībhūtabhā-
garūpāśca senādayo deśabhedāt samudāyarūpācca parasparasaṃbandhāt, 
tadvat kriyākṣaṇā api bhaviṣyanti, tat kimatra buddhyavasāyenetyāśaṅkya āha

(page 187)

senādīnāṃ tu iti | turvyatireke | yugapatsattvāt iti ekakālatvāditi yāvat | nanu na 
yugapatsattvamātreṇa samūhapratipattiḥ piśācasamūha iti pratyayābhāvādi-
tyāha darśanācca iti pramāṇena yaugapadyasya paricchedādityarthaḥ | 
āgamāderavagatau hi piśāceṣvapi dṛṣṭā samūhapratītiḥ | nanu 
ko'sāvaikyadṛṣṭerviṣaya ityāha tathāhi iti | kecit māṃsāsthimedomajjādyava-
yavāntarajātibhede'pi pārthivataikyāt yathā śarīrasya avayavitā tathā 
gṛhāderapi,-iti manyante | ye'pi evaṃ na manyante, te'pi saṃyuktasaṃyogaṃ vā 
pṛthagbhūtadharmapadārthasadbhāvadṛśā samudāyalakṣaṇaṃ vā ekaṃ 
gajādīnāṃ dharmaṃ pratijānate,-iti eko'piśabdaḥ, na kevalamavayavī, 
vastutastatsamudāyo'pīti dvitīyaḥ | saṃbandho'pi iti sāmānyarūpā hi 
saṃbandharūpatā sarvatra saṃyuktasaṃyogasamavāyādau, sāmānyābhāve ca 
viśeṣavṛkṣābhāva iva śiṃśapāyāṃ kā saṃbhāvanāpīti | dviṣṭhatvāt iti 
dviṣṭhe'pīti yāvat | dvayoreva tāvat kṣaṇayorekakālatvaṃ na ghaṭate; kā kathā 
bahūnām | naca ekakṣaṇe kriyātvam | yathoktaṃ

     yaścāpakarṣaparyantamanuprāptaḥ pratīyate |
     tatraikasmin kriyāśabdaḥ kevale na prayujyate ||

iti | tena pūrvāparabhāgā eva satattvaṃ pāramārthikarūpasākalyaṃ bāhyaṃ 
yasyā iti vaktumeva bahubrīhyarthasamāśrayaṇanītyā lakṣaṇaṃ 
bhāṣyakārīyamāha vṛttikāraḥ | ekakārakasvarūpāśrayāt 
buddhyavasitamanyonyāpekṣatvamuktam | tadastu, ekatvaṃ tu kutaḥ, yena 
vṛttāvuktaṃ na kā iti | atra āha tathāpica iti | pūrvāparabhāgamātraparamār-
thatāprakāreṇa upalakṣitāyā api asyāḥ kriyāyā ekatvamekā iyaṃ kriyā iti 
buddhyā | tathā iti ekatvena

(page 188)

adhyavasāyāt | naca nirmūlo'yamekatādhyavasāya ityāha ekakāraka iti | nanu 
ekakārakanirvartyā na kācana kriyā antataḥ kartṛkaraṇādhārāṇāmavaśyaṃ-
bhāvāditi āśaṅkya āha anekakāraka iti | kartṛkarmaṇoreva svātantryeṇa 
phalatvena ca prādhānyāt kartṛsthakarmasthatāvyavahāraḥ | vaiyākaraṇanikāye 
yatra viśeṣaḥ kriyātaḥ, kriyāyā vā yataḥ; tatstheti kriyā vyapadiśyate | 
sarvasyāśca kartṛgataviśeṣatve'pi kasyāścit karmāśrayaviśeṣatvādasā-
dhāraṇena karmasthatvena vyapadeśaḥ, śabdavṛttimahimnā vā tatsthatāniścaya 
ityevaṃ kartari ekatra yataḥ kriyā karmaṇi vā, tatra ekā | caitrāya rocate modaka 
ityatrāpi caitrasya modakaḥ prīṇayitā abhilāṣayitā caitraḥ 
prīṇyamāno'bhilāṣavān karmeti vastutaḥ karmasthataiva, kevalaṃ 
śabdaśaktisvabhāvāt rucirantaḥ svaviṣayamabhilāṣamasya utthāpayati,-
ityetamarthamācakṣāṇo viṣayaviṣayibhāvaṃ saṃbandhamabhidhayā udbhūtaṃ 
puraskṛtya tatkartṛkamabhilāṣaṃ pradhānatvena darśayati, ātmīyaṃ ca 
kartāramapradhānamiva karoti tato nijaṃ prayojakavyāpāraṃ guṇīkaroti,-iti 
saṃbandhe saviṣayeyaṃ saṃpradānasaṃjñā jāyate, saṃbandhasaṃbandhyapi 
caitro'bhilāṣe kartā,-iti kartṛsthatāpi | taducyate-anyakartṛko'bhilāṣo ruciḥ | 
nanu evaṃ pacanapaṭhanayostathā cchididṛśyorekakartṛkakarmagatatve 
syādaikyaṃ bhārodyamanasya vanacchedanasya na aikyamanekakartṛkarmagatatvā-
dityāśaṅkya āha ekaphaloddeśena ca iti | naca pākapāṭhakayorekaphalatvaṃ 
cchididṛśyorvā abhisaṃhitaṃ, tatra tadabhisaṃdhāne tu syādaikyaṃ 
viśvavartino'pi kriyālakṣaṇasamūhasya | yathocyate jagadidaṃ viparivartate iti | 
evaṃ kartṛkarmaikyamapi samūhābhiprāyeṇa bhārodyamanavanacchedanādau 
suvacameva | nanu pradhānamarthakriyā-

(page 189)

yāmarthyamānaṃ viśeṣaṇasaṃbaddhaṃ pratīyate | pradhānaṃ ca dravyam | 
ayaṃ gaurekaḥ śuklaścalatīti hi pratipattiḥ | tatra śuklatvacalatvayoryathā na 
anyonyaṃ saṃbandhaḥ, yathā calatvaikatvayorapi,-iti kriyāyāḥ 
kathamekatvasaṃkhyā | yattu dvau pākāvityādi ucyate, tatra vikalpamahimnā 
pāko'sau dravyībhāvita eva, na kriyātmā | yathāha kṛdabhihito bhāvo dravyavat | 
iti tathā bhāvamākhyātenācaṣṭe | iti | ākhyāte tu dvitvabahutvasaṃkhyā 
kartṛkarmagataiva nirbhāsate, natu paraviśrāntiniyatakriyāviśeṣaṇabhāveneti 
kathamuktam ekā iti vṛttikāreṇetyāśaṅkānuvādapūrvakamāha 
saṃkhyāyāśca iti | ekaśabdena na atra saṃkhyā ucyate, apitu bhedābhāva-
mātramabhinnalakṣaṇamiti | nanu evaṃbhūtā cet kriyā, tat calati caitra iti 
caitramatiricya sā kasmāt na māyādityāha ayutā iti | samavāyādvā 
tādātmyādvā na iyaṃ dravyāt bhedena pratīyate iti yāvat | ayutasiddhatvena 
tādātmyanirbhāsanidānamupalakṣitam | yat kila yutasiddhyā dvayorekasya vā 
pṛthaggamanayogyatvamityevaṃrūpayā yuktaṃ, tadatādātmyena bhāti 
ghaṭapaṭavat ghaṭākāśavacceti | nanu śuklo gacchatītyatra śuklaguṇo'pi gacchan 
nirbhāsate taddeśe punastasya anupalambhāt | tathaiva caitraḥ pacati, maitraḥ 
pacatīti kriye api dve bhāta eva | tat kathamuktaṃ dravyadharma evaṃ saṃkhyā,-
ityāśaṅkya āha ata eva iti kārakasvarūpāvaṣṭambhena pratīyamānatvāt | 
ekārthasamavāyakṛto'yamadhyāropaḥ | tata eva nimittadārḍhyāt na 
pramāturanusandhimapekṣate gaurvāhīka itivat, kiṃtu svarasata eva bhavati 
śuktirajatavat | tena etadabhiprāyeṇa vṛttāvekaśabdaḥ saṃkhyāvacano'pi astu,-
iti bhāvaḥ | nanu tathābhūtalakṣaṇabhedayogi-

(page 190)

kārakadravyaṃ kathamekam | āha aikyapratyabhijñānāt iti | sa eva ayaṃ caitra 
iti hi abādhitaṃ sarvasya jñānam | tarhi bhavatu evaṃ dravyamekam, kiṃtu kriyā 
tatra asti, sā ca pūrvāparībhūtarūpā kramavatī pākapāṭhādibhinneti kutaḥ | 
āha tasya ca iti | co'pyarthe bhinnakramaḥ, svasthāna eva vā uktāśaṅkāsū-
canāya | kārakadravyasya pratyabhijñāpanādaikye'pi tathābhūtaṃ 
pratyabhijñānasiddhaikyaṃ kārakasaṃnidhau ca utpadyamānaṃ 
tanmātrasattve'pi pūrvamabhūtaṃ tattaditi odanagranthasāṃmukhyaprabhṛti 
viśiṣṭaṃ phalaṃ krameṇa ārdratoṣṇatāvighaṭanavikledarūpeṇa ākarṇanāva-
dhāraṇeṣatsāṃmukhyasoḍhatvādirūpeṇa ca upalabhyate yataḥ, tasmāt tatra 
ekasmin kārake'nulagnaḥ kaścidartho yo dravyāśritaḥ kramikaḥ 
svarūpabhinnaśca, so'numīyate iti saṃbhāvyo'yamarthaḥ | yadi hi kriyā na syāt, 
dravyameva syāt; tasya phalajanakatve pūrvamapi phalaṃ syāt, anyathātve 
paścādapi na syāt | yadi ca tato'nyadeva kiñcit janakaṃ, tarhi tat na apekṣyate | 
tasmāt tadeva janakam | dharmāntarayogī tu dharmo'pi yadi kramavān na bhavet, 
tadadbhutaphullamiva phalamakramameva upalabhyate | yadi ca pākapāṭhayorna 
bhedaḥ syāt; phalasya na bhedo ghaṭeta | tasmāt kārakātiriktaṃ kārakāśritaṃ 
kramikaṃ bhinnalakṣaṇaṃ vastu asti,-iti anumīyate, tadeva kriyā | apiśabdena 
arthāpattirapi atra kaiściduktā,-iti darśayan mīmāṃsakopagatāṃ 
bhāvanākhyāmapi kriyāṃ vṛttikṛdadīdṛśat,-iti sūcayati | kārakasya 
bhāvakasya puruṣasya bhāvanīyasvargādiniṣṭho yajyādidhātvarthakaraṇakoyaḥ 
pratyayena ākhyātena vācyo vyāpāro jananātmā ekapratyayavācyena 
kartṛkarmānyatareṇa kārakeṇa saṃbandhādupacaritatatsaṃkhyāvyavahāro 
bhāvanātmā karotyarthaḥ, saiva sarvatra kriyā | tena artha

(page 191)

prakaṭatātmakaphalānyathānupapattyā tanniṣṭho ya ātmano vyāpāraḥ sa 
jñānakriyā,-ityapi mīmāṃsakasaṃmatajñānadarśanamapi 
kāṇādasāṃkhyajñānadṛśi nirākṛtāyāṃ bhaṅgyā ṭīkākāro 
bauddhamatena nirācikīrṣati | tathāca saṃbandhabādhakasūtraṃ vakṣyati | ato'pi 
kartṛtānupapatterjñānakriyākartṛrūpā jñātṛtā sutarāṃ nopapanneti | etacca 
tatraiva vyākhyāsyāmaḥ | etatparamatamābhāṣya dūṣayati evam iti | ekā 
kathaṃ kramikā iti sūtraṃ sphuṭayituṃ vṛttau kramikatvaṃ vyācaṣṭe | 
anekakālaspṛktvaṃ hi kramikatā | ekaśca tatkālo'tatkālaśceti kathaṃ bhavet, 
tadatadau vā kālāvekaṃ kathaṃ syāditi svarūpatastāvadaikyaṃ kriyāyāṃ 
bādhitam | vṛttau kālabhedenaiva deśabhedābhāve'pi sarvatra kramikatāyāṃ 
vyāpakena svarūpabhedamabhidadhatā deśabhedaḥ svarūpabhedaśca svīkṛta eva, 
ṭīkāyāṃ tu spaṣṭīkaraṇārthaṃ saṃbhavannabhyuccayahetutvena darśitaḥ 
tāvat iti | yatra sādhakaṃ pramāṇaṃ pareṇa saṃbhāvitadraḍhima uktam, tatra 
tannirākriyāyai prathamaṃ prayatyate; iha tu na tathā | tathā pramāṇapariniścite 
svarūpe na svarūpavimatiryuktā, nīle iva; iha tu tadvādināmeva bahuśākhā asau 
| yat tatrabhavān

     jātimanye kriyāmāhuranekavyaktivartinīm |
     asādhyā vyaktirūpeṇa sā sādhyaivopalabhyate ||
     ante yā vā kriyābhāge jātiḥ saiva kriyā smṛtā |
     svavyāpāraviśiṣṭānāṃ sattā vā kartṛkarmaṇām ||
     kriyāvyāpārabhedeṣu sattā vā samavāyinī |
     ante vātmani yā sattā sā kriyā kaiścidiṣyate ||
     buddhiṃ tajjātimanye tu buddhisattāmathāpare |
     pratyastarūpāṃ bhāveṣu kriyeti pratijānate ||

(page 192)

iti | vimatiśca atra

     kriyā nāmeyamatyantāparidṛṣṭā------|

iti tadvādinaiva paramaguruṇā abhidhānāt | tatrabhavānapi

     kramātsadasatāṃ teṣāmātmano na samūhinām |
     sadvastuviṣayairyānti saṃbandhaṃ cakṣurādibhiḥ ||

iti | kiṃca sādhakamapi pramāṇaṃ bādhakena vidhurayitavyam |

     dravyasya pratyabhijñāta aikye siddhe phalaṃ kutaḥ |

iti kriyānumānam | sāca keśanakhādau sarvatraiva bhinne bhavantī na vastu 
apekṣate vastunastathābhūtasya ayogāditi bādhakādhīnameva pratyabhijñānā-
prāmāṇyamiti tadeva paradūṣaṇe prapatatīti prāk bādhakamuktam | viruddhena 
anyonyamabhavanamākṣipatā dharmeṇayo'dhyāso'dhiṣṭhānaṃ, tat bhedena 
vyāptamiti abhedavyavahāraṃ niṣedhati | tatra vyāptiṃ darśayati na kvacit iti | 
bhedābhedavyavahāro hi kvacideva bhavan na animittako na anyanimittakaḥ | tat yadi 
viruddhadharmādhiṣṭhāne'pi na bhedavyavahāraḥ, tadanimittakatvānyanimittaka-
tve vyāpakaviruddhe prasajyeyātām | yato bhāgā nāma anekaṃ vastu ekatve 
bhāgā iti bahutvāyogāt | pūrvāparībhāvo'pi teṣāmapekṣātaḥ, sāca na 
teṣāṃ dharmaḥ, apitu pratipattṝṇāṃ vikalpamātram | naca vikalpā 
vastuviṣayāḥ, nāpi tadanusāreṇa viparivartate vastu taditi | tasmādekā kriyā,-iti 
vikalpamātraṃ viṣayaśūnyam | nanu bhāgātirikte kvacana iyaṃ dhīrastu,-
ityāha bhāgātiriktasya iti | kriyākhyo'vayavī saṃyogaḥ samudāyaḥ 
saṃbandha eka iti bhavataiva na abhyupagataṃ kramikatvasya kālabhedamayasya 
kriyālakṣaṇatvena uktatvāt | iyatā svarūpagatabādhakābhidhāyinaṃ na saikā 
kramikā yuktā iti sūtrāṃśaṃ vyākhyāya

(page 193)

nāpi kramikā ca ekasya ca ucitā iti āśrayaikyabādhakanirūpaṇaṃ 
sūtrāṃśaṃ vyācaṣṭe vṛttikṛt nāpi kālakramavyāpī ca iti | 
cakārāvanyonyavirodhadyotakau | sūtre eka eva virodhadyotakaścakāra 
ubhayaniṣṭhaṃ virodhamāha | evamāśrayagato'pi ekaścakāraḥ, apiśabdastu 
virodhasamuccaye | āśrayasya saṃbandhinā ekena ātmanā svabhāvena pūrve 
pare ca bhāgā na yujyante,-ityayamarthaḥ | kasmāt na yujyante ityāśaṅkya āha 
tathāhi iti | pūrvabhāgaparabhāgayoḥ svarūpataḥ kālataśca bheda iti 
pūrvabhāgasaṃbandhaḥ parabhāgasaṃbandhaśca svarūpato bhinnau kālataśceti 
āśrayasyāpi ubhayathā ubhayarūpaṃ svarūpabhedamubhayathāpica 
kālabhedamākṣipantau kathametvaṃ tasya saheyātām | tatra sa eka āśrayaḥ 
ityanena svarūpabhedakṛtaḥ kālabheda uktaḥ | pūrvabhāgaparabhāgau hi 
svarūpeṇa bhinnau kathamekasya āśrayasya samānakālau bhavetām | nahi tadeva 
tacca, atacca tadeva bhavatīti yujyate | tat kālabhedamāśrayasya ānayataḥ | naca 
ekasvabhāvasya ityanena pūrvaparabhāgagatasvarūpabhedakṛtaḥ svarūpabheda 
āśrayasya darśitaḥ | atha kālabhedakṛtaṃ dvayaṃ darśayitumupakramate 
kālabhedenāpi iti | na kevalaṃ svarūpabhedeneti apiḥ pūrvabhāgasaṃ-
baddhatvaṃ parabhāgasaṃbaddhatvaṃ ca kālabhedena viruddhamiti darśayati | 
nahi anyasminnapi kṣaṇe iti | evaṃ tarhi tayorna kālabhedaḥ syāt, yadi 
parasparakālāvagāhitvaṃ syāt | naca etadastīti | evaṃ pūrvaparabhāgayoḥ 
kālabhedamuktvā tadgatena kālabhedena āśrayasya svarūpabhedaṃ tāvadāha 
nahi anyasminnapi kṣaṇe iti | parabhāgakṣaṇe kāle 
pūrvabhāgakṣaṇābhāvarūpe pūrvabhāgasaṃbaddhatvalakṣaṇaḥ svabhāvo 
nāstīti sa prācyaḥ

(page 194)

svabhāvo naṣṭa ityarthaḥ | atha pūrvaparabhāgayoḥ kālabhedena āśrayasyāpi 
bheda iti darśayati nāsti iti | pūrvabhāgasaṃbaddhatvaṃ 
parabhāgasaṃbaddhatvaṃ ca kālabhedena viruddhamāśrayasya ekasmin kāle 
kathaṃ syātāmiti āśrayasya kālabhedaṃ vitarataḥ | tatra na pūrvakālaṃ 
pūrvabhāgasaṃbaddhatvamāśrayasya uttarasmin kāle saṃbhavati | tat hi 
pūrvakāle eva yuktam, uttaraśca kālaḥ pūrvakālābhāvarūpa iti 
kālabhinnābhyāṃ tābhyāṃ dharmābhyāmāśrayasya kālabhedaḥ syāditi 
caturdhā ayaṃ viruddhadharmādhyāsaḥ | atra ca deśabhedo'pi mantavyaḥ | sa tu 
asārvatrikatvāt na darśitaḥ ātmā jānātītyādau tadasaṃbhavo yataḥ | 
kālabhedastu sārvatrikaḥ | sa ca svabhāvabhedaparyavasāyī | nanu sattvāśrayasya 
bhinnāḥ svabhāvā iti āśaṅkya āha naca svabhāvavyatiriktaḥ iti | tarhi 
kimastvityāha tadā iti | yata evaṃ tata ityarthaḥ | evakāraḥ svabhāvo naśyatu, 
svabhāvī tu sthitaḥ-iti śaṅkāmapāsyan svabhāvī eva naṣṭa iti dyotayati | evaṃ 
śāstrābhyāsajanitavikalpopahatamatibhirapi adhunā bādhakopajīvanabalāt yata 
etat labdhaṃ, tataḥ paścāt vyācaṣṭe arthasya kāyādestattaddeśādijātatā | 
iti sūtrārthaṃ kevalaṃ gamana ityādinā vṛttigranthena | sūtre tu 
pūrvopādānaṃ śāstrānupahatasaralamatijanatābhi-prāyeṇa sphuṭatvādasya 
arthasya | nanu ekaiko bhāga eva pāko'stu,-ityāha naca iti | nanu bhāgasyaiva 
pākatve bahuṣu bhāgeṣu pacatipratyaya ekatvena kathaṃ bhavedityevaṃ 
bhāgamātrakriyāpekṣaḥ kathaṃ nirbīja eva śaṅkita ityāha pākasāmānyam 
iti | tāvatsu bhāgeṣu ekā pākatvajātirekabuddherālambanamiti sabīja eva ayaṃ 
pakṣaḥ | tarhi kathaṃ naca iti uktam | āha nirbhāgasya iva iti | sabhāgatve hi 
prācya eva doṣa

(page 195)

iti bhāvaḥ | pūrvāparībhūtatā iti kālakramavattetyarthaḥ | yacca ucyate

     āhitottaraśaktitvātpratyekaṃ vā samūhinaḥ |
     anekarūpā lakṣyante kramavanta ivākramāḥ ||

iti, tatra ivaśabdenaiva kramikatvasya avāstavatvamāveditam | naca uttarakṣaṇeṣu 
pūrvakṣaṇaiḥ śaktyādhānaṃ kiñcit, viśiṣṭastu uttarakṣaṇa iti na 
adhikamuktaṃ syāt | vyabhicārāt iti kutracidapi asaṃbhavādityarthaḥ, natu 
avyāpakatvāditi mantavyam | nanu mā bhūt kramikatā asyā lakṣaṇam, 
dharmamātramadhikaṃ yat, saiva kriyā bhaviṣyati | āha nāpi iti | prathamo'pi iti | 
anye tāvat kṣaṇā deśāntarasaṃyogavibhāgaviśiṣṭāḥ parairapi upagatāḥ | 
prathamakāle tāvat pūrvadeśasaṃyogavināśakena vibhāgena yata udbhūyate, 
tena kriyāpadārthena bhavitavyam | tatrāpica na asau kaścit pratyakṣeṇa 
upalabhyate pṛthagbhūto dravyāt | nanu kriyā iyamātmani vicārayituṃ 
prakrāntā, tadatra kāyaghaṭādeḥ kaḥ saṃbandhaḥ, yena sūtre kāyādeḥ iti 
uktam | satyam, dṛṣṭāntābhiprāyeṇa tu sūtram | yathā kāyādeḥ kriyā tatra tatra 
deśe apūrvasya apūrvasya janmamātraṃ gamanakriyāyāmekadeśāvasthitasya 
āsanasthānādikriyāyāṃ tatra tatra kāle sūtre ādiśabdena saṃgṛhīte tathā 
antarātmani jñānarūpe icchati-jānāti-yatate-smaratīti 
kālabhinnajñānasvarūpāpūrvajanmamātram, natu anyā kriyeti | etadāha 
yathāca iti | ucyate iti tādṛkpadārthasvarūpavyavahārāya kṛtena sāṃketikena 
śabdena | yathāha

     bhāvabhedapratītyarthaṃ saṃyojyante'bhidhāyakāḥ ||

iti | nanu ayaṃ śabdo niyoktāraṃ samāśrita iti gamanaṃ

(page 196)

prasiddhātvāt sarvotkṣepaṇādyanugamācca tāvadupādīyatām, pariṇāmena tu 
ekīyadarśanasiddhena ko'rthaḥ,-ityāśaṅkya brūte pariṇāma iti | sarvaṃ 
dhātvartharūpaṃ bhāvanātmakaṃ ca deśabhedāsaṃbhinnakālakramāviṣṭaṃ 
pariṇāmena saṃgṛhyate | yato gamane yadyapi asti kālabhedastathāpi 
deśabhedasya tatra sthūladṛṣṭigamyasya asādhāraṇasya saṃbhavaḥ iti na atra 
kālabheda udāhṛto bhavediti kevalagrahaṇam | ata eva iti yataḥ 
kevalakālakramodāharaṇatātparyaṃ pariṇāmasya, tato gamanaṃ 
deśabhedayuktaṃ pṛthak kṛtam | pariṇāmaviśeṣā deśabhedavanto 
vṛddhyapakṣayādayo gṛhītāḥ kevalam, kālakramavantastu sthānāsanabhavana-
jñānasmaraṇecchāprabhṛtayaḥ pariṇāmeneti dvayorapi viśeṣavācitvāt na 
idamāśaṅkanīyam-sāmānyaviśeṣavācināṃ kathaṃ dvandvaḥ | nahi bhavati 
dhavavṛkṣāvitīti | vṛttāvādigrahaṇena sphuṭasvarūpabhedamāmraṃ paripacyate 
dugdhaṃ pariṇamate ityādikaṃ haritapītādinā madhurāmladravakāṭhinyā-dinā 
bhinnena svarūpeṇa vakṣyamāṇena sato'pi kālabhedasya anādarakāriṇīṃ 
kriyāṃ saṃgṛhṇīte | tena gacchatīti deśabhedaḥ, tiṣṭhati dinamiti kālabhedaḥ, 
nīlati, śvetate, rājate dīpyate iti svarūpabhedaścaitrasya pratīyate iti 
deśakālasvarūpānyataiva kriyā,-iti upasaṃharati tattat iti | vastugrahaṇena 
upalabdhilakṣaṇaprāptatāmāha | anupalambhāt pratyakṣāpravṛttiruktā, athavā 
pūrvajanmaprabandhādeva phalaṃ grāmaprāptyādikaṃ saṃpadyate

     yasminneva hi saṃtāne------------|

iti nītyā svargādisiddhiḥ, saṃyogo'pi taddeśasamānasāmagrīko 
devadattakṣaṇastato'pi calāmītyabhisandhānajñānakṣaṇaikasāmagrīko 
dehakṣaṇastato'nyadeśaka iti kasya anurodhena dhātvartharūpā vā

(page 197)

bhāvanātmā vā karmapadārthātmā vā kriyā abhyupagamyate iti anumānamapi 
nāsti, arthāpattirapi vā | tatra sūtrārthasya prādhānyāt vṛttau nirmagnasya 
ṭikāyāṃ sphuṭaparāmṛṣṭasya sautreṇaiva krameṇa buddhiniveśo yathā 
syādityabhiprāyeṇa tattaddeśādijātatā nānyā iti sūtrārthāṃśaṃ 
pūrvaṃ nigamayati apramāṇā kriyā iti, pariśiṣṭaṃ paścāt 
pramāṇabādhitā ca iti || 9 ||

     tatra tatra sthite tattadbhavatītyeva dṛśyate |
     nānyannānyo'sti saṃbandhaḥ kāryakāraṇabhāvataḥ || 10 ||

     evaṃ jñānaṃ kriyāṃ ca parīkṣya tadyogādaiśvaryam ityatra hetau 
yogaśabdavācyaṃ saṃbandhāṃśaṃ parīkṣituṃ saṃbandhe tāvat sādhakaṃ 
pramāṇaṃ nāstīti tatra tatra iti kārikayā kathayati, prasaṅgācca kriyāyāmapi 
vaktavyaṃ śeṣaṃ parīkṣate | tathāhi-yadi kaścit brūyāt 
tattaddeśakālasvarūpabhinnaṃ vastu saṃtānavṛttyā pravahat kriyeti yaduktam, 
tadāsanagamanādāvastu, yatra akarmakatvaṃ prāpyakarmatā vā, yatra ca 
nirvartyaṃ ghaṭādi karma; tatra kriyākārakabhāvasya abhāve kumbhakṛt mṛdo 
daṇḍādibhirghaṭaṃ karoti,-iti bodhaḥ, tathaiva atra kriyāparyantavyavahāra-
siddhaḥ kathaṃ syāt, tadbhāvaśca kriyayā vinā kathamiti, so'pi anena sūtreṇa 
pratyāyyate tat tasyāpi anantarasūtreṇa asya arthasya sphuṭīkaraṇadiśā | ata eva 
prāsaṅgikatvamuktatvaṃ ca darśayituṃ vivṛtikāro dṛṣṭāntatvaṃ kriyāyāḥ 
saṃkṣepāvatareṇa pradarśayati yathāca iti | sūtre ca nānyat iti sāmānyoktirapi 
kriyāyāmapi paryavasāyyate | dṛṣṭāntatvena ca sā saṃbandhe yojyate na 
pratyakṣa ityādinā | sautramevakāraṃ vyācaṣṭe dṛśyate iti 
pramāṇāvasāyamātram | etāvān hetuḥ |

(page 198)

yata etāvat dṛśyate, tato nānyaditi na kriyā, na tatsaṃbandhaḥ kaścidastīti 
saṃpādyadṛṣṭāntasādhyanirdeśaḥ | tathāca vṛttau pṛthageva vyācaṣṭe 
kriyāvacca na kriyākārakasaṃbandhaḥ kaścit iti | tenaiva anyaśabdayorna 
punaruktirmantavyā | nānyadityatra pūrvasya hetutvaṃ vṛttāvuktaṃ bhinnasya 
vyatiriktasya asya saṃbandhasya kriyāyā iva anupalambhādityanena | nanu tatra 
tatra iti saptamyā ākṣipto yaḥ prātipadikārthātiriktaḥ saṃbandhaḥ, sa tarhi 
kimityāśaṅya yat sūtraṃ nānyo'sti ityādi, asya saṃkṣepeṇa nirūpaṇaṃ 
kāryakāraṇa iti | saṃniveśagrahaṇena anyarūpasaṃhārapūrvakaniyatarūpa-
praveśahetuṃ tadīyajñānecchāyatnaviśeṣopayogamapi āha | 
abhūtapūrvāṇāṃ padārthānāmutpāda eva kramaḥ, so'nubhūyate | 
antarālavartinī iti kārakāṇāmanyonyaṃ phalena saha yojanā vā yojikā vā | 
deśakāla iti iha adhunā asmākamanubhava ityevamādibhaṅgīmanā-
lambyetyarthaḥ | nanu sūtre dṛśyate iti vartamānakāla uktaḥ, tena ca 
deśānubhavitṛviśeṣāvākṣipyeyātāmityāśaṅkya āha kārikāyāṃ ca iti | 
saṃkṣepeṇa vṛttaśravyatābalena ca pratipādye jhaṭiti yayā buddhiḥ kriyate, sā 
kārikā | etaduktaṃ bhavati-deśādyasaṃkocena vīpsā vyāptumicchetyevaṃ-
rūpā pāramārthikī pūrvaṃ hṛdaye praviṣṭā bhavantī dṛśyate iti 
vartamānapratyayasya pratyuta pravāhanityatāyogāt mahānadīpravahaṇavat 
nityapravṛttarūpavartamānārthaviśrāntatāṃ karoti | citrāyājīti tu bhūtārtho 
janiteti bhaviṣyadarthasya svena rūpeṇa upakartumaśakta iti tadānuguṇyaṃ 
pratipadyatāṃ nāma, natu asāviha nyāyo dhātusaṃbandhasūtrārambhe'pīti | 
nanu tatra tatra iti sautraṃ padaṃ ṭīkāyāṃ mṛtpiṇḍādau sati ghaṭa ityeṣa 
sārvatriko'rthaḥ, 

(page 199)

ityevaṃ vyākhyātam | kathaṃca etadanantaradeśakālavyāptyā 
sidhyedityāśaṅkya āha bhāvasvabhāva iti | bhāva eva hi niraṃśo 
vyāvṛttyupakalpitairyāvadbhirdharmairekadā vyavasthāpitaḥ, tāvadbhiḥ sarvatra 
sarvadā ca aviyuktaḥ | viyoge sa eva asau na bhavet, tataśca ghaṭapūrvataiva 
stūpakatā, stūpakānantarataiva ca ghaṭatā,-ityapi kāryakāraṇasvabhāvatā 
stūpakaghaṭagrāhiṇaḥ pramāṇādeva siddheḥ | tathāvidha iti | 
kāṭhinyādibuddhimadādirūpatvaṃ svabhāvaviśeṣo mṛdaḥ kulālasya ca | 
ādigrahaṇādāyatatātānave daṇḍasyetyādi | nanu kiṃ tatra kāraṇaṃ, kiṃvā 
kāryaṃ; niyatapūrvaṃ kāraṇaṃ, niyataparaṃ kāryamiti cet; tadeva kimityāha 
yadāpica iti | yadeti hetau | ca uktāśaṅkādyotakaḥ | apirbhinnakramaḥ | 
agnyabhāve yo na bhūto dhūmastasya abhūtasyāpi tasminnarthāntarasvabhāve 
agnau sati yataḥ sadbhāvastato'sau prayojakasattākaḥ pūrva iti vyavahriyate, 
prayojyasattākastu paraḥ iti svarūpameva tayoḥ pūrvatvaṃ paratvaṃ ca, natu 
anyena prakāreṇa parasparāpekṣāpāratantryarūpaśleṣādinā kāryakāraṇayoḥ 
paratvapūrvatvalakṣaṇaḥ kaścit kālo'sti | taduktaṃ

     paśyannekamadṛṣṭasya darśane tadadarśane |
     apaśyankāryamanveti vināpyākhyātṛbhirjanaḥ ||
     darśanādarśane muktvā kāryabuddherna saṃbhavāt |
     kāryādiśrutirapyatra lāghavārthaṃ niveśitā ||

iti | evaṃ sakṛtpravṛttapratyakṣānupalambhaprasiddhaṃ svarūpadvayameva 
kāryakāraṇabhāvaḥ sārvatrikaḥ,-iti siddham | evakāraṃ sautraṃ vyācakṣāṇo 
dṛśyate ityantasya hetutāṃ nānyat ityādeśca sādhyatāṃ vyācaṣṭe 
kāryakāraṇa iti | atra arthāntare

(page 200)

iti etadupalambhāvasare | anena pratyayāntararasākalyalakṣaṇāmupalabdhila-
kṣaṇaprāptatāmāha | nanu tatra iti saptamyāḥ ko'rthaḥ | sāhi kārakavibhaktiḥ | 
tarhi rājña iti saṃbandhavibhakterapi ko'rthaḥ | ucyate-saṃbandhasya 
upakārakaraṇaprabhāvitvādupakārasya ca vyatireke 
saṃbandhopakārānavasthāyogādavyatireke nyāye kāryakāraṇabhāva eva 
ṣaṣṭhyarthaḥ | hantaḥ tarhi kārakavibhaktīnāmapi sa eva arthaḥ | tadāha sarva eva 
iti | nanu sa eva saṃbandho bhaviṣyatyeka ityāśaṅkya āha naikakālikam iti | 
agnisattāyāṃ na dhūma iti kimagnāveva kāryakāraṇabhāvo viśrāmyatu | naca 
evaṃ tasya kāryarūpatvābhāvāt svātmani | evaṃ dhūmakāle pūrvabhāvī 
vahnikṣaṇo nivṛtta iti kiṃ dhūma eva astvasau, naca yuktamadastasya 
kāraṇatvāyogāt svarūpe | tat kutra kāle sa eko'stu | tasmāt kāryakāraṇayoḥ sve 
sve kāle yat rūpaṃ, tadeva vikalpena vyavahriyamāṇamekaḥ saṃbandha iti ucyate, 
na vastutaḥ | yathoktam

     ityamiśrāḥ svayaṃ bhāvāstānyojayati kalpanā |
     tāmeva cānurundhānaiḥ kriyākārakavācinaḥ ||
     bhāvabhedapratītyarthaḥ saṃyojyante'bhidhāyakāḥ |

iti | nanu pratyayāntarasākalye'pi piśācavadadṛśyo'sau saṃbandha ityāha 
athāpi iti | anupalambhāt iti pratyakṣābhāvāditi yāvat | kāmaṃ 
dṛśyānupalambho'yaṃ na bhavatīti asattāniścayo mā bhūt, sattāniścayastu 
nāstīti prastutamasmābhiḥ | sādhakapramāṇābhāvanirūpaṇāvasaro hi ayamiti 
tāvadgrahaṇam | kāryādi iti ādigrahaṇena svabhāvahetuḥ | nanu etāvatā 
anyasya saṃbandhāderastitvaṃ na siddham,-ityastu, naca astitvasiddherabhāvaḥ |

(page 201)

iyatā tu pramāṇavyāvṛttyā prameyavyāvṛtterayogo nāvaśyaṃ kāraṇāni 
itinyāyāt tatsaṃbandho nāstīti kutaḥ siddhyet | sūtre ca nāsti anyaḥ 
saṃbandhaḥ iti, vṛttāvapi na kaścitsaṃbandhaḥ iti, vivṛtāvapi na aparaḥ 
padārtho'sti iti sattāniṣedha eva uktaḥ | tadetat kathamityāśaṅkya āha 
bādhakapramāṇa iti | ayaṃ bhāvaḥ-dviṣṭhasya ityādi 
pāratantrādyayogācca ityantaṃ bhāvi nānyo'sti saṃbandhaḥ ityanena 
sūtreṇa āvṛttyā abhisaṃbadhyate | tata eva ṭīkā bhaviṣyati saṃbandhaḥ 
pūrvasūtrāt iti | tena saṃbandhe'stitvavyavahārābhāvo 
nāstitvavyavahāraśceti dvayaṃ nānyo'sti ityanena uktamastīti na siddhyati 
nāstīti siddhyatīti ca adhyāhārabhaṅgyā | tacca etatsūtrāṃśena 
anantarasutrāṃśena ca militvā siddhyati | ata eva bhāvisūtre pañcamya 
etatsūtrārthopayuktā eva | tadubhayamelanāvaśāt tu saṃbandho nāstīti yat 
siddhaṃ, tasya anyatra hetutābhidhānāya tena iti parāmarśaḥ kariṣyate iti || 10 ||

     dviṣṭhasyānekarūpatvātsiddhasyānyānapekṣaṇāt |
     pāratantryādyayogācca tena kartāpi kalpitaḥ || 11 ||

     tathāhi sūtrāvataraṇamitthameva karoti tadevam iti | kriyāyāstāvadevamiti 
kriyāpyarthasya iti tatra tatra sthite iti sūtradvayoktāt sādhakābhāvāt, 
bādhakayogācca yo'bhāvaḥ nānyo'sti, nānyadasti ityevaṃ sūtradvaye 
nirdiṣṭaḥ, saṃbandhasyāpi yo'bhāvo'stitvaniścayābhāvanāstitva-
niścayarūpaḥ evamiti tatra tatra ityuktena sādhakābhāvena dviṣṭhatvādiyukti-

(page 202)

bhiśca bādhakena militvā upapāditaḥ, tadidamabhāvacatuṣṭayaṃ militaṃ 
kartāpi kalpitaḥ ityatra hetutāṃ sūtre tena iti nītam | sā hetutā tu ṭīkāyām 
abhāvāt iti pañcamyā saṃkṣepāduktā | pañcamī caśabdaṃ ca 
pūrvasūtreṇa saṃgamayati | saṃbandhaḥ iti nānyo'sti saṃbandho 
dviṣṭhasyānekatvāt siddhasyānyānapekṣaṇāt pāratantryādiyogācca iti 
saṃgatiḥ | saṃbandhaḥ ityetāvanmātraṃ tu svakaṇṭhena vivṛtau nirdiṣṭam | 
dviṣṭhasya iti sāmānyoktāvapi prakaraṇāt saṃbandhasyetyayamapi artho 
labhyatāmiti | nanu dṛśyānupalapalabdhyaiva nāstitvaniścayakāriṇyā so'rtho 
bādhyate | vastuta iyameva hi asya bādhā yat niścitanāstitvāvedanaṃ, natu 
drughaṇena iva śarāvasya viśarārūkaraṇam | sāca atra pradarśitaiva dṛśyasya 
pramāṇena anupalambhāditi | satyam, anupalabdhyā tu niyatadeśakālāvacchedena 
nāstitvapratipattiḥ-iha adhunā ghaṭo nāstīti | yadāha

     -nāsattāniścayo viprakarṣiṇām |

iti, yathā

     iṣṭaṃ viruddhakārye'pi deśakālādyapekṣaṇam |
     anyathā vyabhicāri syādbhasmevāśītasādhane ||

iti | tasmāt sārvatrikīṃ saṃbandhāderasattāmāvedayituṃ parābhyupagatatadī-
yarūpāsaṃbhavasaṃpādako virodhaḥ prameyaniṣṭho vaktavyaḥ, yat tvayaiva asya 
rūpamuktaṃ, tat tvaduktenaiva rūpāntareṇa virudhyate iti tata eva 
tadrūpadvayavirodhasiddhyaiva bādhakābhidhāyī kṛtārtho jāyate iti 
dūṣaṇahetau na dharmyasiddhyādicodyaprasaṅgaḥ-iti vitatya nirṇītaṃ 
prasaṅgagranthādāvityāstāṃ tāvat | tatra sāmānyalakṣaṇadvāraṃ 
bādhakamupanyasyati | yat kila dvayoḥ svarūpasamāptyā yugapat tiṣṭhati, tadekaṃ 
na bhavati veśmadvayavarti ghaṭadvayamiva |

(page 203)

ekatvaṃ hi abhinnarūpatvaṃ, tadviruddhena ca bhinnarūpatvena vyāptaṃ 
dvayoryugapatsvarūpasarvasvena avasthānam | abhinnarūpo hi yadyevaṃ syāt 
ghaṭādiḥ sarvaḥ, eko'pi evaṃ syāditi dviṣṭhatvasya kvacideva bhāva 
ityevaṃrūpo yaḥ khalu niyamo vyāpakaḥ, sahīyeta | tadviruddhavyāptopalabdhyā 
ekatvasya niṣedhaḥ | evaṃ sāmānyena dviṣṭhaikasaṃbandhamātre 
bādhakamabhidhāya tadviśeṣe'pi abhidhitsurāha siddhasya iti | iha rājña ityukte 
pratītirna nirākāṅkṣā rājetivat, apitu anyadākāṅkṣati rājā | tat sā 
ākāṅkṣā kvacit saṃbandhasya vapurbhavantī sārvatrikatvena vyavasthāpyate iti 
apekṣaiva saṃbandha iti vyavahriyate | tāṃ dūṣayati upakārakaviṣayaiva iti 
bhavatīti | asya ayamarthaḥ-na tāvat jaḍeṣu apekṣā yuktā | yadāha

     apekṣā pāratantryaṃ ca na saṃbandho jaḍātmanoḥ |
     asaṃbhavāt-----------------|| (saṃṣi. 1)

iti | yatrāpi sā bhavati, tatrāpi uktadviṣṭhasaṃbandhalakṣaṇā ekapadārtharūpā 
na upapannetyāha svarūpātiśayalakṣaṇa iti avyatirikto yata upakārastaṃ kurvan 
kāraṇameva syāt | apekṣitaṃ ca kāryamitthamuktaṃ syāt | naca etadyaktamityāha 
sataśca iti | yadāha

     apekṣā yadi saṃbandhaḥ so'sankathamapekṣate |

iti | niḥsvabhāvasya svabhāva iti virodhamāha | nanu satastarhi kāraṇasya 
kārye'pekṣā bhavatu, avidyamāne kā apekṣā, labdhaṃ ca anena rūpaṃ, tat 
kimarthamasya apekṣā | yadāha

     saṃśca sarvanirāśaṃso bhāvaḥ kathamapekṣate |

iti | kāraṇatvapratilambhāya kārye asya astu apekṣeti

(page 204)

cet, nanu kāraṇatvamasya na svarūpādhikaṃ kiñcit, svarūpaṃ ca etena labdham | 
satyaṃ labdham, tadvyavahārastu na labdhaḥ | idamapi satyam, kintu vyavahāro 
jñānābhidhānātmā tasya kāraṇasya na kaścit, apitu vyavaharturasau | evaṃca 
vyavaharturapekṣeti āyātam | sā ca vikalparūpā bhavatyeveti aṅgīkṛtamadaḥ

     ------------tānmiśrayati kalpanā |

iti | tadetaduktaṃ tadabhāvāt ityādinā | satostarhi apekṣā bhaviṣyati rājñaḥ 
puruṣa itivat | etat nirasyati naca iti | dvayoḥ iti saṃbandhasāmānye ṣaṣṭhī | 
ṣaṣṭhyarthamekagataṃ saptamyarthaṃ ca aparagataṃ svīkaroti | ayaṃ hi atra arthaḥ 
-rājñaḥ sataḥ sati eva puṃsi apekṣeti, natu anyonyāpekṣā atra vivakṣitā | sā hi 
pāratantrye vakṣyate | anyonyāpekṣāśabdo'pi vṛttāvevamarthaparyavasāyī 
mantavyaḥ | evaṃ ca prayogo lāghavena pāratantrye'pi tathāpratipattyarthaḥ | tena 
tatrāpi rājapuruṣayoḥ kāryakāraṇabhāvaviśrāntataiva kartavyā, anyathā 
vāstavaṣaṣṭhyarthāyoga iti ākūtaśeṣaḥ | nanu patnīyajamānayorivayāge, 
rāgiyugalasya iva āliṅgane parasparāpekṣārūpaṃ pāratantryaṃ saṃbandho 
bhaviṣyati dhavaśca khadiraśca cchidyatāmityādāvityāśaṅkya āha 
parasparonmukhatā iti anyonyamaunmukhyam iti | śabdamātramekam, natu 
ekasya yā unmukhatā, sā anyasyeti kathaṃ saṃbandhaḥ syāt | siddhe kā 
paratantrateti tu dūṣaṇamuktaṃ punaḥ punarasya arthasya spaṣṭatvāt | tat bhavatu 
unmukhatā kācit, tayā na saṃbandhasiddhirityevamatra abhyupagamasiddhānte 
tātparyam | tena pāratantryarūpaḥ saṃbandha ityatra itthaṃ yojanā-
pāratantryaṃ bhavadapi saṃbandho na siddhyatīti | siddhayośca kiṃ 
pāratantryamityapi  spṛṣṭaṃ vṛttau ṭīkāyāṃ ca | rājā

(page 205)

rājeti ekatra tadrūpaṃ dṛṣṭvā sarvatra tadeva rūpaṃ saṃbandhasya 
tattadanyatamarūpavādinā kalpyate ityevaṃ rājñaḥ puruṣa ityapekṣāyāmapi 
pāratantryameva darśitam | rājā ca puruṣaścetyudāharaṇāntarābhiprāyeṇa vā 
yadapi ucyate paraspararūpā prāptireva aṅgulyoriva saṃbandha iti, tatrāpi āha 
rūpaśleṣātmāpi iti | yadi dve rūpe kathaṃ śleṣaḥ, atha śleṣaḥ aikyarūpāt, 
kathaṃ saṃbandhatā | taduktaṃ

     ------dvitve sati kathaṃ bhavet |

iti | nanu rūpaśleṣaḥ sūtre tāvadādiśabdena uktaḥ, vṛttau tu kiṃ na vivṛta 
ityāśaṅya āha evamādi na vivṛtam iti | bahudhānyadūṣita iti 
granthaparivartane ko bhara iti yāvat | dūṣite'bhinavena dūṣaṇasaṃrambheṇa 
iti ca vadan granthakṛt pūrvapakṣo'pi ayaṃ bhāge siddhāntena saṃmataḥ 
vādyantaroktasya saṃbandhāderanabhyupagamāditi darśayati | tathā ca 
siddhāntopagame satyam iti vakṣyati | ādipadena tantrāntaroktamapi sūcayati | 
yadāha tatrabhavān

     nābhidhānaṃ svadharmeṇa saṃbandhasyāsti vācakam |
     atyantaparatantratvādrūpaṃ nāsyopadiśyate ||
     upakārātsa yatrāsti dharmastatrānugamyate |
     śaktīnāmapi sā śaktirguṇānāmapyasau guṇaḥ ||
     taddharmaṇostu tācchabdyaṃ saṃyogasamavāyayoḥ |

ityādi | etacca saṃbandhastotramātram, natu nyāyābhidhānamiti na dūṣitaṃ 
granthakṛtā | kāryakāraṇabhāvaśca na atra saṃgataḥ | tathāhi ātmā tāvat na 
kāryaḥ | jñānamapi viṣayendriyamanaskārāderbhavat nā ātmānaṃ 
kāraṇīkuryāt

(page 206)

     yasminsati bhavatyeva yattato'nyasya kalpane |
     taddhetutvena sarvatra hetūnāmanavasthitiḥ ||

iti nyāyāt | kriyā ca nāma na kāciditi na kaścit saṃbandha iheti | tatsamāśraya 
iti | prakṛtyā kriyā, pratyayena ca kartā saṃbaddhau vaktavyau | naca asti asau 
saṃbandhaḥ kaściditi bhāvaḥ | anubhavavikalpanasmaraṇādijñānamālaiva asti, 
natu jñātā,-ityasya arthasya prāk prasādhitatvāt | adhunā dṛṣṭāntatāṃ prāha 
yathā iti | nanu kartṛtvamapi iti kathaṃ vṛttiḥ | jñātṛtve hi jñānamasti, tadanyat 
tatsaṃbandhaśca na vidyate, parakartṛtve tu na kriyā, na tadanyaḥ, na tatsaṃbandha 
iti kathaṃ sāmyam | kalpitaḥ iti iyati aṃśe dṛṣṭānta iti kiṃ sarvasāmyena | 
tadapica na atiduryojamityāha ato'pi iti sutarām iti jñānamapi tāvat 
dhātvartharūpaṃ vaiyākaraṇamate kriyā mīmāṃsakānāṃ ca, 
bhāvanāvādināṃ keṣāṃcit tu pratyayavācyeti viśeṣaḥ | tatra 
samastakriyādūṣaṇena jñānakriyāpi parasaṃmatā dūṣitaiva bhavati | tadasti 
sarvasāmyam | pratyuta jñāne satyapi jñātṛtā na upapanneti dṛḍho'yaṃ vāda 
iti prakarṣapratyayaḥ | tata eva jñātṛtāyā dṛṣṭāntatā yuktā | 
prasaṅgadūṣaṇena ca siddhāntino jñānānupapattau kā jñātṛtetyapi prakarṣaḥ 
| idānīṃ 

     nanu svalakṣaṇābhāsaṃ------| (1 | 2 | 1)

ityādeḥ

     ------------tena kartāpi kalpitaḥ |

ityantasya sūtrasaṃdhātasya vṛttikṛt pūrvapakṣe upayogi phalamāha iti 
kathamātmā sarveśvaraḥ iti | itiśabdena dharmyasiddhiṃ

(page 207)

sūcitāṃ vivṛṇoti jñānasyaiva bodhātmanaḥ ityādinā | hetvasiddhiṃ 
sūcitāṃ darśayati kriyākāraka iti tāvanmātralakṣaṇamupakalpitamiti 
siddhāntinā uktasya aiśvaryavyavahārasiddhau svabhāvahetorabhāvamāha,-iti 
bauddhena jñānasaṃtatimātrameva ātmeti prasādhitamiti śivam || 11 ||

iti śrīmahāmāheśvaraśrīmadācāryābhinavaguptaviracitāyāmīśvara 
pratyabhijñāvivṛtivimarśinyāṃ pūrvapakṣavimarśo dvitīyaḥ || 2 ||





atha tṛtīyo vimarśaḥ |

          icchāśaktisunirbharamamṛtābhamanantabhuvanajananapaṭum |
     vande svaśaktilaharībahalitabhairavaparānandam ||

     atha asmin pūrvapakṣe'dhikāradvayena siddhānto nirūpyate |
tatra

     satyaṃ kintu------------|

ityādinā

     ---------smṛtyapohanaśaktimān |

ityantena ślokasaptakena paradarśanānupapattiṃ vimṛśatā tat nirākriyate | 
yaduktaṃ

     nanu svalakṣaṇābhāsaṃ------------| ( 1 | 2 | 1)

ityādinā pīṭhabandhamuparacayya

     saṃskārāt smṛtisiddhau syātsmartā draṣṭeva kalpitaḥ | ( 1 | 2 | 6)

iti, tat jñānavicāro'yamadhikāraḥ | kriyāsaṃbandhavicārastu dvitīye'dhikāre 
bhaviṣyati | tatra ślokābhyāṃ jñānaṃ svasaṃvidrūpamiti smṛtāvanubhavasya 
na prakāśastatsaṃskārotthāyāmapi,-iti uktam | ślokābhyāṃ 
smṛterbhrāntitvaṃ śaṅkāpūrvakaṃ nirasya tṛtīyena

(page 208)

prasaṅgāt sarvādhyavasāyānāṃ tat nirastam, satyapi saṃskāre paradṛśi 
smṛtirayukteti vyavahāralopa iti ekena uktvā svapakṣe tadupapattiḥ ślokena ukteti 
tātparyam | tatra pūrvapakṣe sarvātmanā śamayitavye neti prayujyate, 
īṣadaṅgīkārye ucyate iti, īṣannirākārye satyaṃ kintu iti | eṣā 
prekṣāpūrvakaprayogaśālināṃ śailī | ihaca satyam ityanena bahu tāvat 
pūrvapakṣavādyuktaṃ siddhānte'ṅgīkāryam | sāṃkhyakāṇādādidarśane 
jñānaṃ na upapadyate,-iti hi yaduktaṃ śākyena, tat saṃmatameva | tatraiva tu 
viśeṣāntaraṃ darśayituṃ kintu ityanena śabdena adhikaṃ pṛcchāmo 
virataśikṣāvyāpāro mā tāvadadyāpi bhūriti dyotayatā tadvyāmohāpasāraṇe 
yatno'yamiti uktam | tathāhi
     jñānaṃ ca citsvarūpaṃ cet------| (1 | 2 | 7)
iti yaḥ prasaṅga uktastvayā, ayameva naḥ siddhāntaḥ | tatra satyam iti etat 
vyarthameva ityantena vivṛtam, kevalam ityanena kintu iti | anena ca 
uttaragranthākṣepaḥ kṛtaḥ | tathāhi na kāryakaraḥ iti | iyatā etatsūtrārthasya 
upakṣepaḥ, ātmanā maheśvareṇa iti ślokasaptakārthasya, jñānamukhena iti 
sakalasya jñānādhikārasya prathamam ityanena kriyādhikārasya, 
tadvastuniṣṭhatvācca pariśiṣṭasya | tat kintvityayaṃ śabdo vijigīṣuvat ākrānto 
na anyadākrāmet iti nyāyena svāvākyaṃ prakaraṇamadhikārāntaraṃ, 
samastaṃ śāstramupakṣipan pradhānabījakalpa ityāha jñānasya 
ātmatattvasya bhedaṃ vadati iti | na iyatā paraḥ kṛtakṛtyaḥ, apitu saṃskāramapi 
āheti apiśabdaḥ | jñānātmatattve saṃskāreṇa vinā yathā na kāryakare, tathā 
saṃskāro'pi asmin naye yena vineti dvitīyo'piśabdaḥ | adhunā iti 
prāptakālatayā

(page 209)

pūrvapakṣānantaramiti prastauti ślokasaptakābhidheyametamarthaṃ vaktuṃ 
prārabhate | anena prakaraṇopakṣepaḥ prathamam | jñānamukhena iti 
jñānādhikāraprakrame samastaśāstrārthopakṣepo jñānamukhena 
jñātṛtvasamarthanārthamiti vaktavye kartṛtvagrahaṇaṃ śuddhasvātantryarūpa-
meva aiśvaryamiti darśanārthaṃ yathoktamādisiddhasūtre | tathāhi 
jñānaviṣayaṃ yat yathāruci saṃyojanaviyojanalakṣaṇaṃ svātantryaṃ 
prakāśavimarśadvayasāratayā, tatra prakāśabhāgamātraṃ pradhānīkṛtya 
jñānādhikāre vicāraḥ, vimarśaprādhānyena tu kriyādhikāre iti 
mukhagrahaṇam | mukhaṃ dvāramupāya ityanena nahi ekāṃśadvāreṇa dharmiṇi 
pūrṇa eva praveśa iti uktam | tena kartṛtvaṃ śuddhasvātantryarūpaṃ pūrṇamiha 
samarthanīyam | tatra jñānakriyāvicāra upāyamātramiti | iha anubhavena 
sukhahetutāṃ niścitya smaraṇādupādatte iti vyavahāraḥ | tatra 
anubhavasaṃskārāt kāmaṃ smṛtau viṣayaprakāśaḥ samarthitaḥ | naca tāvatā 
kiñcidanubhavasya aprakāśe tadityevaṃrūpābhāvāt, anubhavaprakāśaśca na 
ghaṭate saṃskārajatāyāmapi,-iti prakaraṇatātparyārthaḥ | tadāha sūtraṃ

     satyaṃ kintu smṛtijñānaṃ pūrvānubhavasaṃskṛteḥ |
     jātamapyātmaniṣṭhaṃ tannādyānubhavavedakam || 1 ||

     smṛtijñānam iti | smṛtirūpaṃ jñānaṃ pūrvānubhavasaṃskārāt 
yadyapi jātaṃ , tathāpi ātmani svarūpe niṣṭhā viśrāntiryasya tādṛśam, natu 
ādyasya anubhavasya jñāpakaṃ, tat bhavati | nahi tat tena saha ātmānaṃ 
miśrayati | tadāha anyonyabhinnāveva iti | evakāraḥ kathañcidapi asmannaye iva 
antarmukhatāpi bhavanmate nāsti abheda ityāha | tatra jñānasya viṣayeṇa

(page 210)

vyapadeśyatvāt tanmukhenaiva bhedaṃ samarthayate sphuṭa iti | sphuṭo jñāne 
svākārārpaṇena grāhyaḥ svalakṣaṇātmā jñānasamakālāvabhāso 
viṣayo'vabhāsate'smin, smṛtau tu asphuṭo na smṛtijñānajanakaḥ, nāpi 
tatsamakālāvabhāsaḥ | yasmin jñāne yādṛgartho bhāsate, tat jñānaṃ 
tāvadeva svakāle eva tathābhūtasya svātmaviṣayamātrasya sphuṭasya asphuṭasya 
vā upadarśanaṃ na jñānāntarāvabhāsino viṣayasya saṃsparśe'pi kṣamam | 
āstāṃ tu tatprakāśanam | nanu smṛtyā anubhavakālabhāvino'rthasya 
prakāśanam | satyam, kintu svakāle eva svaviṣayasyaiva sataḥ svaviṣayatayaiva ca 
prakāśanaṃ, natu paraviṣayasya paraviṣayatayā vā | ghaṭo'yamāsīdasti 
bhaviṣyatīti trikālaviṣayāvabhāsinā vikalpena svakāle eva svaviṣayasyaiva 
prakāśaḥ, parakālatayā adhyavasāye'pi prakāśane'pi vā na parakālasya 
adhyavasāyaḥ, vastunaḥ sataḥ prakāśo vā | rajatadvicandratayā 
adhyavasāyaprakāśe'pi hi na rajatadvicandrayoradhyavasāyādiḥ | tadetadāha 
tattaditi tena tena bhūtabhaviṣyadādinā kālabhedena saṃbhinnamanuviddhaṃ 
yadyapi arthavastu avagāhate adhyavasāyamukhena svīkaroti, tathāpi tāvadeva 
svakāla eva svaviṣayameva ca svīkaroti | yathā svapnadṛṣṭaḥ kāntājanaḥ svakāla 
eva sviviṣaya eva ca gṛhītaḥ, natu kāntājñānakālastadviṣayo vā tathātve 
kāntājanasya tathāpratīti prasaṅgāt; tathā atrāpi tattatkālabheda iti ṭīkayā 
pūrvānubhavasaṃskāraprabodhajanmāpi iti vṛttirvyākhyātā | 
saṃkāravaśāddhi pūrvānubhavakālāliṅgito'sau bhāti smṛtau 
viṣayaḥ, na jñānāntare iti tu granthena vyākhyātam ātmamātraniṣṭhatvāt 
iti vṛttivākyam | mātrapadena jñānāntaraviṣayanirāsaḥ, natu 
ātmaviṣayaniṣṭhamiti 

(page 211)

sūtre vaktavyam, vṛttau ca svaviṣayasaṃvedikaiva iti | nanu kiṃ viṣayavedane'pi 
svaniṣṭhatā ghaṭate vijñānasya | ka evamāha | kintu viṣayamukhena iyaṃ 
cedaprastutā smaraṇābhilāṣeṇa viṣayopādānādivyavahāraccheda iti | 
tadāśayenaiva ṭīkākāro viṣayapuraḥ sarīkāreṇaiva utthitaḥ 
sphuṭaviṣayayādṛgarthārthavastusvātmaviṣayavācoyuktibhiḥ | tat kathamuktam 
ātmaniṣṭhasvarūpasaṃvedikaiva ityāśaṅkya āha ātmānātma iti | 
ātmamātraprakāśanaṃ tāvat na nāsti jñānaṃ samādhānādau, iha tu 
viṣayaniṣṭhaṃ vicāryate iti apiśabdaḥ | tasyaiva iti  anātmaprakāśanaṃ 
jñānam ityasyāṃ bhaṇitāvanātmanaḥ prakāśanamiti yaducyate, tatra 
prakāśanamityanena aṃśena anātmā ghaṭādirna āliṃgyamāna ucyate 
viṣayadharmatvābhāvāt prakāśasya, apitu jñānameva anātmaprakāśatayā vā 
anātmākāradhāritayā vā prakāśate iti prakāśanaṃ svaniṣṭhameva jñānasya 
| ata eva suśikṣitanaiyāyikammanyairantarmukhabahirmukhatve jñānasya 
viruddharūpatvāt bhedāpādake śākyadarśanāntaḥpraveśena ukte sthūladṛśaḥ 
pratyāyayitumityāstāṃ tāvat | nanu vijñānavāde mā bhūt svarūpādhikaṃ 
nīlaprakāśanam, bāhyārthavāde tu nīlaṃ prakāśate iti 
kathamadhyavasāyamapahnavīmahi,-ityāśaṅkya āha bāhyavāde'pi iti | apiḥ 
pūrvapakṣasūcakaḥ | prakāśo na viṣayamāśliṣyati prakāśarūpatvāt, 
viṣayasya aprakāśarūpatvāt vedyatvamiti | tadāveśe prakāśo'pi aprakāśa eva 
syāt yathā mithyākacakūrcakajñāne | prakāśaścet kacakūrcakamāviśet, tarhi 
asanneva syāt | naca kacaprakāśo'sanniti yujyate tasya sattvādeveti cirādyavagatau 
taccikitsādivyavahāranirvāhāt | evaṃca viṣayaśleṣiṇo rūpasya

(page 212)

vyāpakaṃ taddharmāviṣṭatvam | naca tat kacakūrcakaprakāśe'sti 
asatyatādharmānāveśāditi bāhyavādini upagamite tasya bāhyasya dharmo 
vedyatvam | tadviruddhamavedyatvam | tena vyāptaṃ prakāśarūpatvaṃ 
vedyatve'navasthānāderbahuśākhasya uktatvāditi vyāpakaviruddhavyāpto-
palabdhiḥ | nanu śākyamatamīdṛśaṃ yadi syāt, tat svasaṃvedanameva ekaṃ 
pratyakṣaṃ samadarśayiṣyata, na aindriyikamityāśaṅkya āha kevalam iti | 
kāraṇabhedāt svarūpabhedācca avāntarabhedakṛta eṣa vibhāgaḥ indriyādeḥ 
kāraṇāt paraprakāśatāsvarūpeṇa ca prakāśanāt | tenaiva asādhāraṇena 
vyapadeśa aindriyika iti, arthaprakāśa iti ca yathā manasayogipratyakṣānumāna-
jñānānāmasādhāraṇena vyapadeśaḥ | yatra tu asādhāraṇaṃ nimittāntaraṃ 
na upalabhyate, tatra autsargikaṃ svasaṃvedanatvaṃ vyavahriyate iti | tadapi arthāt 
gobalīvardanyāyena viśeṣaniṣṭhameva jāyate | tataścaturvidhapratyakṣa-
vādino'pi svarūpasaṃvedakatvaṃ sthitameva | nanu mā bhūt 
parajñānaviṣayasya jñānāntareṇa avabhāsanam, sa eva tu anubhavaḥ 
smṛtijñānena prakāśyatāmatītarūpo'pi dhārāsāra iva nadīpūreṇeti | āha 
smṛtijñāne ca iti | arthavat iti vaidharmyeṇa dṛṣṭāntaḥ | artho hi yathā bhedena 
bhāti, na tathā anubhavaḥ |

     naca yuktaṃ smṛterbhede smaryamāṇasya bhāsanam | (1 | 4 | 3)

iti bhāvidṛṣṭyā sādharmyadṛṣṭānto vā | smṛtau nirdagdhapitrādirartho yo 
viṣayaḥ, tasya na smṛtijñānāt bāhyasya kasyacit saṃbhāvanā bhedeneti 
antarmukharūpābhedena smṛtyanubhavayoḥ prakāśaḥ siddhānta eva bhaviṣyati | 
evaṃca iti anubhavaviṣayasya anubhavasya vā smṛtijñānena aprakāśane'pi 
saṃskāreṇa tāvat saviṣayatāmātraṃ dīyatāṃ smṛtijñānasya; 
anubhavaviṣayatayā tu yo'dhyavasāyo

(page 213)

viṣayasya, sa na syāditi | tat yadi tṛtīyāpi gatirna aṅgīkriyate anubhavena saha 
smṛterekameva rūpamantarmukhamityevaṃrūpā, tadā hi etat nirvahati-
smṛtiprakāśa eva hi anubhavaprakāśo'ntaḥ kālabhedasya viṣayopādhikasya 
saṃvidi avāstavatvāditi smṛtāvapi anubhavaviṣayatayaiva ābhāti so'rthaḥ | 
tisṛbhirgatibhiḥ śaṅkyā tadviṣayatā | dve ca sarvathā anupapanne iti 
tṛtīyagatimukhena itthaṃ siddhavaduktam | tataśca iti tadviṣayatvena 
avabhāsābhāvāt smaraṇādabhilāṣeṇa yā pravṛttirupādānādikā, sā na syāt 
| pūrvānubhavasya yo viṣayaḥ, tena saha yadi smṛtiviṣaya ekatāṃ nīyeta, tadā 
asāvupapadyeta | tathāhi kapitthamavalokya sukhasādhanamidamiti smṛtvā 
upādatte | sukhaṃ ca pūrvānubhavaikalagnamasyāṃ smṛtau na kiṃcidasti | 
yadāha

     idameva ca naḥ sukhaṃ yatsātaṃ saṃvedanam |

iti | saṃskārādeva tu sukharūpatāyāṃ sukhānubhavajñānamiva idaṃ syāt; 
natu smaraṇamiti | anena natu vyavasthāpikā ghaṭate iti vṛttirvyākhyatā || 1 ||

     nanu mā bhūt paraviṣayasya svīkāraḥ, yastu 
saṃskāramahimopanato'dhyātmasiddhaśca mama anubhavo'bhavaditi 
smṛtāvanubhavasya avabhāsaḥ, sa kiṃ na aṅgīkriyate ityāśaṅkya 
tannirākaraṇahetutayā sūtraṃ

     dṛk svābhāsaiva nānyena vedyā rūpadṛśeva dṛk |
     rase saṃskārajatvaṃ tu tattulyatvaṃ na tadgatiḥ || 2 ||

     dṛk jñānam | sā svasyaiva ābhāsaḥ svasya ābhāsanaṃ nāma tasyaiveti | 
naca asyā aprakāśamānaṃ rūpamastīti | prakāśaśca asyāḥ

(page 214)

paraprasādopanato'pi bhavet, sadāprakāśamānatve'pi ca 
nīlādyākāracchāyākalpaṃ dvitīyamapi aprakāśamānaṃ rūpaṃ syāditi 
avadhāraṇadvayamanyat | tena sva eva asyā ābhāsa eva, svasyā ābhāsa eveti 
vetyevaṃ vaiyadhikaraṇyasāmānādhikaraṇyābhyāṃ yadīyaḥ svabhāvaḥ 
prakāśena sarvasya niyamyate, sā jaḍāt bhidyate | tadatra niyamopalakṣitena anena 
lakṣaṇena anyavedyatvaṃ nirākṛtam | rase rasaviṣayā dṛk yathā na anyena 
rūpādijñānena vedyā, tadvat sarvā dṛk na anyena jñānena vedyā | 
anubhavaśca dṛgrūpaḥ iti na smṛtijñānena vedyaḥ | saṃskāreṇa tarhi kiṃ kṛtam 
| āha viṣayasya janakasya abhāvāt nirviṣayatāyāṃ prāptāyāṃ 
saviṣayatārūpaṃ tattulyatvaṃ tena  kṛtam, upacārāttu kāryakāraṇayorabhedena 
nirdeśaḥ | upacāre prayojakaṃ kāryāntarābhāvena tadekapravaṇatādhigamaḥ, 
natu tadavagamarūpatvaṃ pūrvānubhavābhāsakatvaṃ, saṃskārajanyaṃ 
tattulyatvamapi vastucintayā ucyate | tasya tu gatiravagamo na upapadyate | 
smṛtyanubhavayorhi kastṛtīyaḥ sādṛśyamadhyavasyet | tau ca ananyonyadṛśvānau 
na sādṛśyamadhigacchata iti sūtrārthaḥ | na tadgatiḥ ityatra dvāvarthau 
tacchabdena anubhavasya sādṛśyasya ca parāmarśāt | tatra prathamārtho 
dvitīyasmin hetutvena mantavyaḥ | upacāra iha vṛttau sphuṭīkṛtaḥ 
saṃskārajatvena iti | etat saṃkṣepeṇa avatārayati ādya iti | yata ādyānubhave 
vekadatvādanubhavasya yat mukhaṃ viṣayaprakāśanaṃ tena smṛterapi 
viṣayaprakāśanarūpatvaṃ syāt; naca tadastīti sūtrasya gamyamānasādhyā-
bhiprāyanirdeśaḥ | yasmāt ityanena gamyamānasādhyopayogitvaṃ darśitam | 
saṃkārajatve'pi iti abhedopacārāt tulyatvamapi saṃkṣepeṇa uktam | 
jñānāntaravedyaṃ na bhavati iti | amunā tadgatiḥ ityasya saṃkṣepeṇa dvidhā

(page 215)

vyākhyānam-na anubhavasya avagamaḥ smṛtiḥ, na tattulyatvasya avabhāsaḥ 
smṛtyā anubhavena tṛtīyena vā | sarvatra sādhāraṇaṃ hetuvacanaṃ jñānaṃ 
jñānāntaravedyaṃ neti | svasaṃvedanaikarūpatvāt ityanena 
dṛgityāderardhasya saṃkṣipya arthanirdeśaḥ | ekagrahaṇena evakārārtha-
vyākhyānam-ekamekādi ananyasahitamekaṃ ca, tadeva; natu kadācidanyat, ekasya 
ca tasyaiva ajaḍasya rūpaṃ na jaḍasya | svasaṃvedanamekaṃ rūpaṃ yasya iti 
ṭīkākāro'sya sūtrasya śaṅkitaparamatanirasanahetutāṃ hiśabdena dyotayati | 
dṛgeva svābhāsā, dṛk svābhāsaivetyevamayogānyayogopalakṣitasvābhāsaniya-
mavattvaṃ dṛśo lakṣaṇam | tatra dṛgeva svābhāsā na anyadvastu iti 
yadanyadākṣiptaṃ jaḍaṃ, tallakṣaṇapuraḥsaramajaḍāyā dṛśo lakṣaṇamāha 
ayaṃ hi iti | aprakāśātmā jaḍa ityukte nīlaṃ prakāśate yadā, tadā na jaḍaṃ 
syāditi svayaṃgrahaṇam | prakāśamānasyāpi hi tasya yat prakāśanaṃ, na tat 
svātmani nīlarūpe saṃbandhitayā viśrāntam; apitu paratra pramātṛrūpe | tena 
ayaṃ vigrahaḥ-avidyamānaḥ prakāśaḥ prakāśanaṃ yasmin viśrāntatayā, 
tādṛgātmā svabhāvo yasyeti | etadāha svātmano na prakāśaḥ iti | asyaiva 
sphuṭīkaraṇaṃ bhaviṣyati-svātmano na prakāśate, apitu parasya prakāśate 
iti | saptamyarthe ṣaṣṭhī | yacca nīlaṃ prakāśate ityatra pakāśanaṃ nāma, na tat 
nīlasya svabhāvaḥ; apitu parabhūtameva tat nīlāt | caitramaitrādeḥ pramāturhi 
svabhāvabhūtaṃ tat | prakāśanaṃ na ātmā, apitu parabhūtaṃ yasyeti vigrahaḥ | 
tadāha svātmanā na asya prakāśaḥ iti | etadeva vyaktayiṣyati para eva asya 
prakāśaḥ iti | evaṃ nīlaṃ yathā svātmani nīlaṃ, na tathā prakāśarūpaṃ, 
prakāśanaṃ ca yathā pramātūrūpaṃ na tathā nīlasyeti yasya aprakāśo

(page 216)

rūpaṃ, prakāśaśca na rūpaṃ; tat jaḍamiti tātparyam | etadviparyayeṇa ajaḍaṃ 
jñānaṃ yasya aprakāśo na rūpaṃ, tat darśayati ajaḍastu iti svātmanaḥ 
prakāśaḥ svātmā asya prakāśaḥ iti prakāśanamātmani viśrāntaṃ 
yasyeti, prakāśanamātmā svabhāvaḥ, natu paro vyatirikto yasyeti ca 
vigrahadvayena prakāśātmā iti vyākhyātam | tadeva krameṇa sphuṭīkaroti 
svātmana eva ityādinā | evamaprakāśātmā prakāśātmeti ca 
jaḍājaḍayorlakṣaṇaṃ pratyekaṃ dvidhā svarūpayojanamukhena 
pararūpavyāvartanamukhena ca ṭīkākṛtā vyākhyātaṃ krameṇa sphuṭayatā | 
anenaiva ṭīkāgranthena svābhāsaiva iti niyamaścaturdhā vyākhyātaḥ | tathāhi 
svarūpasyaiva sā prakāśa iti vyākhyātaṃ svātmanaḥ prakāśaḥ iti, 
aprakāśamānamasyā na rūpamiti vyākhyātaṃ svātmā asya prakāśa iti 
kadācidapi na asyāḥ prakāśaḥ paraprasādopanata iti vivṛtaṃ svātmana eva 
prakāśate na parasya iti, nīlādyākārāntaramasyā na rūpamiti vivṛtaṃ 
paro'sya na prakāśaḥ iti | paro hi yo nīlādiḥ, so'sya kathaṃ 
prakāśātmakarūpaḥ syādityarthaḥ | etadvaiparītyena jaḍe'pi caturdhā 
lakṣaṇaṃ yojyam | sarvā hi jñaptiḥ iti sarvaśabdena dṛgiti jātāvekavacanaṃ 
vyākhyātam, natu adṛgrūpam; dṛgityavadhāraṇaṃ ca | svābhāsā hi yā kācana 
vastumātrā, sā sarvā dṛgrūpā bhavatīti | vākyāntaragataṃ hi 
avadhāraṇamekatra aṃśe'pi avadhārite yadyapi kṛtakṛtyaṃ bhavati yat tatra tatra 
ucyate bhinnakrama iti, tathāpi sarvāṅgaparipūrṇaṃ pūrṇaṃ tat bhavatīti 
sarvāṃśagatatve bādhakaṃ cet nāsti tathaiva vyākhyeyam | naca 
ekavākyatāyāḥ khaṇḍanā kācit, pratyuta niyataikaghanākārasya vākyārthasya 
pratipattirekatayaiva sphuṭā bhavati, 

(page 217)

tata eva brahmādiṣuhanterbhūte kvip ityādau 
caturvidhāvadhāraṇāśrayaṇamanu-padakārādayaḥ pratipedire | 
vyākhyānārthaṃ tu avāntaravākyotthāpanaṃ na vākyabhedamānayati 
ekasminnapi niyame vidhāvapivā tasya avaśyaṃbhāvāt | brahmādaya 
evaṃbhūtāstāvat mantavyā upapadatvenetyādivākyabhedamanta-reṇa 
vyākhyānāyogādityalaṃ bahunā | nanu evaṃ niyame dṛgvyatiriktasya jaḍatvamiti 
uktaṃ bhavati | tataśca jñānebhyo'tirikto yaḥ pramātā, sa jaḍo bhavediti 
ajaḍapramātṛvādī jñānasvābhāsatāvādena kathaṃ jayedityāśaṅkāṃ 
nirasyati ata eva iti | yadidaṃ jaḍājaḍayorlakṣaṇamuktam, tata eva hetorna jaḍaḥ 
prakāśate svayam, nāpi ayamarthaḥ prakāśakārī | vyatirekeṇa uktvā anvayena 
āha prakāśasyaiva hi iti | yasmādayamanvayo'sti, tasmāt vyatireko'pi ayaṃ 
pāramārthika iti hiśabdaḥ | nanu prakāśasya prakāśate iti prakāśadvayaṃ syāt, 
naca evaṃ | asmadartha eva hi prakāśate, iti iyaṃ ca asau saṃvidvā draṣṭṭatā vā 
jñānaṃ vā na matā | āha prakāśa eva hi iti | hiśabdena hetutāṃ dyotayatā 
nirākaraṇīyavastu śaṅkyamānaṃ sūcitam | pramāyāṃ svatantraḥ pramātā, 
pramā ca prakāśanam | tat yasya na anyataḥ, anyasya ca yatprasādāt tat; sa eva 
tasyāṃ svatantra iti tātparyam | prakāśāt iti nīlaṃ prakāśate iti yaḥ 
prakāśabhāgaḥ, tasmādbhinnaḥ svātmāṃśaḥ prakāśasvabhāvo'nyathā veti 
vikalpadvayam | ydi prathamaḥ pakṣaḥ, tarhi arthāṃśagataḥ prakāśo'nyaḥ 
kimaṅgīkriyate | nahi prakāśadvayaṃ bhāti, nacāpi prakāśasya 
deśakālasvarūpato bheda iti vitatya uditaṃ prāk | prakaṭatā ca na arthadharma 
ityapi uktam | saṃvittu vivecayiṣyate | tatprathamapakṣe prakāśa eva prakāśakaḥ 
pramāteti siddham | dvitīyastu pakṣo doṣopahata

(page 218)

iti upekṣya evetyāha prakāśātmatve iti | tataśca prakāśasyaiva nīlaṃ 
prakāśate ityatra ayaṃ paramārthaḥ-mahāprakāśātmakaṃ yat bhagavato 
rūpam, tatraiva svaśaktyā śūnyaprāṇādyantaḥsaṃkucito bahirviṣayeṣu na 
atyantaṃ saṃkucito yaḥ pramātā prakāśate, sa eva bahiḥ saṃkocamāpadya 
nīlaprakāśatvena bhātīti | paramārthata iyaṃ śrīmato mahādevasya 
śaktivijṛmbhā mahādarpaṇāntaravabhāsipragṛhītapratibimbakabahutarasūkṣma-
darpaṇāntaravaditi prakāśa eva ajaḍaḥ pramāteti yuktam | nanu jaḍa eva 
aprakāśamānaḥ pramātā astu | āha tadaprakāśa iti kasya iti mama iti | 
prakāśamānasyaiva hi bhittikalpasya vicitrakalpatayā nīlaṃ prakāśate ityādaya 
ullekhāḥ | tatrāpica iti apekṣaṇīye pramātrantare | tathātve iti jaḍatvena 
pramātrantarāpekṣāyāmanavasthā | nanu bhavatu asau bījāṅkuravat | bhavet, 
yadi mūlaṃ na nihanyāt, nihanti tu | tadāha arthasya pratipattiravabhāso na bhavet 
pūrvarūpavilakṣaṇasya prakāśamānasya kasyacidabhāvāt | nanu ca iyatā 
prakāśamātraṃ pratyarthaniyataṃ sidhyet, na pramāteti | āha anugata iti | sa 
prakāśo yadyapi bahirmukhatayā vedyabhedena taduparāgāyātena ca 
deśakālabhedena saṃkucitaḥ, tathāpi antarmukhapramātṛlakṣaṇamapi 
asaṃkucitamabhinnaṃ rūpaṃ tatra saṃkucite'nugatam | tena vinā na 
kaścidarthānāṃ kāryakāraṇabhāvabādhyabādhakabhāvādisamanvayo 
lokayātrāsvabhāvaḥ paramārthopadeśaparyantaḥ syāditi vitatya bhaviṣyati

     deśakālakramajuṣā---------| (1 | 7 | 3)

ityādau

     samalo vimalo vāpi vyavahāro'nubhūyate | (1 | 7 | 14)

ityante prakaraṇe | nanu anugataṃ pramātṛrūpaṃ jñānalakṣaṇānāṃ 
pramāṇāṃ

(page 219)

samavāyikāraṇamātmā bhaviṣyatīti kiṃ tatprakāśanāprakāśanacintayā,-
ityāśaṅkya āha tataḥ iti | yato'ntarmukhaprakāśasvabhāvo'nusandhānapratya-
vabhāsaparāmarśasvabhāva eva samanvayaḥ, tato na pramākāraṇatvamātreṇa 
viṣayendriyādivailakṣaṇyena jaḍasya ātmanaḥ pramātṛtā yuktā | nanu 
kāṇādadṛśā jaḍatvamanupapannamastu pramātuḥ, prakāśamānatve tu 
pramāturghaṭāderiva kārakasāmagrījanyatadviṣayasaṃvidutpādalakṣaṇaṃ 
katham | nahi ghaṭaṃ vedmītivadahamaṃśaḥ karmatvena bhāti, tata eva 
ayamajaḍo'parokṣaśceti | etat prābhākaraṃ mataṃ svadarśanena samīkaroti 
anyathā tu upapadyate iti vacanam | nīlaṃ hi yathā idamiti parasya prakāśate, na 
evamayamātmeti | tatkathaṃ jaḍaḥ syādidantayā prakāśanābhāvāt | naca ayaṃ 
prakāśaḥ | nīlasukhādi hi prakāśate iti syāt tadviṣayā saṃvidutpadyate | nanu 
ātmā prakāśate ātmasaṃvittyanudayāt, tato'yaṃ na nīlavat pratyakṣo 
nīlapratyakṣatāyām | naca sarvathā niḥsvabhāva eveti aparokṣa ātmā iti 
tadityaparokṣatābhidhānameva yuktamasmaduktayā svaprakāśātmatayā, natu 
anyathā | tathā hi sato dvayī gatiḥ-prakāśate cet, pratyakṣaḥ; na cet, parokṣaḥ | 
tatra aprakāśanapakṣe parokṣatā syāt, prakāśanapakṣe pratyakṣateti 
aparokṣatābhidhānena prakārāntaramupatiṣṭheta asattvaṃ nāma | naca 
tadyuktamityāha nahi iti | puruṣabhedaniyataḥ iti mama prakāśate caitrasya 
prakāśate iti | evaṃ prakārāntareṇa apārokṣyamasattāyāmeva viśrāmyediti 
upapādya svadarśanena tat nirvahati aparokṣyaṃ punaḥ iti | prasiddhaṃ 
yadaindriyakamānasapratyakṣasaṃvedyaṃ, tadidamiti pramāturbhedena bhātīti 
akṣapratigamādastu pratyakṣam, naivaṃ pramātā | tat na pratyakṣo naca na bhātīti 
na parokṣaḥ | anyathā iti evamabhyupagate'sya bhaṅgībhaṇitasya

(page 220)

 viṣayavibhāge parokṣataiva yadi tasya astitvamiti ākūtaśeṣaḥ | pareṇa hi 
evamucyate-ahaṃ ghaṭaṃ vedmi, ahaṃ paṭaṃ vedmītyādivyavahāreṣu 
ghaṭādiviṣayāḥ saṃvida utpadyamānāśca vilīyamānāśca bhānti | 
tathābhūtasaṃvidudayaprasādāt ghaṭādīnāṃ pratyakṣatā | tāśca saṃvido na 
viṣayadharmaḥ, na ātmadharmaḥ svātantryeṇa nirbhāsanāt | tadetadastu tāvat, 
yattu ahamiti bhāti, na tatra saṃvidudayo'pekṣyastadapekṣaṇe tadbhānasya 
vicchinnatayā prasaṅgāt, karmatvena ca | naca evam | yadāhuḥ

     sakṛt vibhāta ātmā |

iti | tadatra ātmanaḥ prakāśarūpataiva upagatā bhavati kevalaṃ; saṃvidāmapi 
prakāśarūpatve svarūpadeśakālādibhedābhāve tataḥ prakāśarūpāt 
pāramārthikāt kathaṃ bhedo bhavediti māyākṛtanīlādi 
bhedoparāgasaṃkocaprasādopanato naiva aṅgīkartavyo'smannayānupraveśeneti 
prābhākarāṇāmapi moho'pasāritaḥ prasaṅgāt | tadetadāha ata eva iti | 
yadetadapārokṣyaṃ svātantryaprakāśanasāramaṅgīkṛtam, tata eva 
hetoridamayatnasiddhamaṅgīkartavyam | yat kila vakṣyate-astitvaṃ 
prakāśamānatvameva, tacca prakāśasvarūpe svaniṣṭhameva ananyāpekṣatvāt | 
māyākalpitabhedatvena māyādaśāyāṃ yo nīlādirjaḍaḥ, sa pramātṛniṣṭha 
eva prakāśate iti pramātureva asāvasti, natu svātmanaḥ kimapi asau; svātmaiva hi 
asya na kaściditi | tathāca ajaḍapramātṛsiddhiḥ

     evamātmanyasatkalpāḥ prakāśasyaiva santyamī |
     jaḍāḥ prakāśa evāsti svātmanaḥ svaparātmabhiḥ || (13)

iti | natu saṃvidvādī prābhākaraḥ kāmamamunā nayena svadarśane 
nipātyatām, kāṇādastu katham | sa hi evamāha-ātmani samavāyikāreṇa 
manaḥsaṃyogādasamavāyikāraṇāt kāryaikārthasamavāyena

(page 221)

pratyāsannāt dṛṣṭasāmarthyācca akṣālokādernimittakāraṇācca 
jñānamutpadyate cet, arthaḥ prakāśate iti | tadarthaprakāśādhīnaśca 
icchāprayatnadehakriyāhānādānādirvyavahāraḥ saṃpannaḥ iti kiṃ 
prakāśamānatvena ātmanaḥ kalpitena | yadāpi ātmā prakāśate iti vyavahāraḥ, 
tadāpi anumānena manasaiva ātmaviṣayajñānameva ātmanaḥ prakāśanamiti 
kā hāniḥ | atra ucyate-kiṃ jñānotpattirarthasya prakāśatāṃ karoti, uta saiva 
saḥ | tatra prathamaṃ pakṣamākṣipati naca iti | prakaṭatā hi 
evamarthadharmo'ṅgīkṛtaḥ syāt kāryatābhyupagame | sā ca dūṣitā bahuśa iti 
svabhāvatāpakṣa eva dvitīyo yuktaḥ | tadāha apitu jñānameva iti 
prakāśamānatā iti saṃbandhaḥ | tadapi iti ātmākṣārthādistāvat na 
prakāśadharmāḥ, jñānamapica yadi na prakāśadharmaḥ; tarhi prāgvat iti 
tadanudaye yathā na kiṃcit prakāśate, tathā tadudaye'pi mā kiṃcit 
prākāśiṣṭa, kiṃ naścchinnam | kiṃ netyāha artho'pi iti | arthasya hi 
jñānameva pratyakṣateti atatprakāśe kathaṃ pratyakṣatvena asau vyavahāraḥ 
śuklāprakāśe śuklatvena iva | tadvyavahāryatāyāṃ hi kāraṇaṃ tadrūpeṇa 
prakāśanam, anyathā niyamena tathā vyavahāraḥ kuta iti kāraṇānupalabdhiḥ | 
atha pratyakṣatāpi jñānāntareṇa prakāśate iti ucyate, tadanavastheti 
prāgvacchabdasya arthaḥ | evaṃ prakāśasya tāvat paraprakāśyatā na upapannā | 
tāvadgrahaṇena idamāha-prakāśasya idaṃ svābhāsatvaṃ sthitam, tasmin sati 
paraprakāśyatvaṃ nivṛttam | tannivṛttāvanubhavaḥ smṛtijñānena na prakāśyate 
iti | yadyapi iyat prakṛtaṃ prameyaṃ, pramātā tu na adyāpi siddhaḥ, tathāpi 
tattvacintā iyaṃ vādarūpā vartate iti prakāśasya tāttvikarūpacintanaṃ 
ṭīkāyāṃ na asamañjasamiti

(page 222)

tata eva na asya codyasya āśaṅkā kila | bauddhena smṛtisamarthanāya 
anubhavajñānaṃ smṛtijñānena bhāṣyatāmityukte kārikayā 
ucitamuttaramuktam, vṛttyā api adanusāreṇa nirūpitam | tat na kiṃcit 
sūtravṛttyorayuktam | vivṛtau tu sarvā hi jñaptiḥ iti vyākhyātuṃ 
jaḍājaḍayorlakṣaṇabhedo ya uktaḥ, sa yuktaḥ | jñānaṃ jñānāntaravedyaṃ 
na bhavati iti hi prakṛtametat | tadanantaraṃ tu tatprakṛtaprameyasamarthanagrantha 
eva kartavyaḥ ekapramātṛniṣṭhatvenāpica ityādiḥ | anena hi 
saṃtānāntarajñānasya kadācit jñānāntareṇa anumānādinā 
prakāśyatvamastu, natu svasaṃtatau tat kathamapi upapannamiti āvedyate | madhye 
tu yo'yaṃ granthaḥ ata eva na yasya prakāśaḥ svātmabhūtaḥ ityādiḥ 
parāśayaḥ prakāśa eva bhavati, natu tadanumānam ityantaḥ; sa kathaṃ 
saṃgacchate | nahi anena kārikāvṛttyarthaḥ kaścit samarthyate, kevalaṃ 
pramāturjaḍājaḍatvacintā kriyate | smṛtibalāt pramātṛprasādhanāyaiva ca ayaṃ 
yatnaḥ | tathāhi jñānānāṃ na anyonyaviṣayasparśanena 
anyonyaprakāśyaprakāśakabhāvastadadhīnaśca sarvasmṛtyādivyavahāra iti 
pramātā avaśyāṅgīkārya iti prakaraṇānte nirvāhayiṣyate

     na cedantaḥ kṛtānantaviśvarūpaḥ---------| (1 | 3 | 7)

iti | tasmāt kimetaditi yataḥ prakāśasya vṛtāntastilaśastattvacintāyāṃ 
vicārayitavyaḥ | svaprakāśasvarūpaparyālocanaprasaṅgāt yadāyātam, tat 
cedupekṣeta vivṛtikāraḥ, na suspaṣṭamanena jñaptisvarūpaṃ vivṛtaṃ syāt | 
tataśca tadvivarīṣuṇā tatsvarūpaṃ ca nirūpitaṃ prakṛtaśca jñānasya 
svaprakāśatāvādaḥ samarthitaḥ | ayaṃ hi abhiprāyaḥ-prakāśastāvadeko'stu 
vā, paramārthato'neko vā, pramātṛrūpo vā |

(page 223)

sarvathā tāvat paraprakāśyatvamasya anucitamiti | vastutaśca asya aikyameva 
ucitaṃ bhedahetoḥ svarūpadeśakālāderayogādityāśayenāpi dṛk iti 
ekavacanaṃ sūtre | anādaramatra tu khyāpayituṃ sarvā iti vṛttau | 
tatsaṃvādanārthameva sūtrāntaravacasā bahuvacanāntena saṃvādanamiti na 
kiṃcidatra avadyam | madhyagranthāvatāraṇe ca asmābhiruktaṃ yadi bodhaḥ 
svaprakāśaṃ jñānamudgrāhayan smṛtiṃ samarthayitumakṣama iti pramātā 
kaścidaṅgīkriyate, sa tarhi jñānavyatiriktatvādeva svaprakāśaḥ prāpnotīti 
apasiddhāntaḥ siddhāntinaḥ prasajyate | ayameva hi evaṃvidhasya viṣayo yatra 
paropadeśāya vāde kriyamāṇe tattvanirūpaṇāya bahutaraṃ vastu samarthyam, 
tatra kiṃcit samarthayamānasya samarthanīyāntaraghaṭanamiti | ata eva na ayaṃ 
hetvābhāsasya viṣayaḥ | sahi ekasādhyaviṣayo bhavati | 
tadapasiddhāntaśaṅkānirākaraṇamakāri ṭīkākāreṇa | nahi pramātā nāma 
jñānavyatiriktaṃ kiṃcit, apitu jñānānāṃ bahirmukhasaṃkocabhājāṃ 
yadantarmukhamadeśakālabhedaprāṇitaṃ, tadeva sa iti | kiṃca svaprakāśatvaṃ 
nāma bodhasya lakṣaṇamiha uktaṃ, tatra lakṣyavyatirikte'pi viṣaye yat 
lakṣaṇamāste, tadativyāptidoṣadūṣitamiti alakṣaṇaṃ syāt | lakṣaṇahetuśca 
ayam | tadidaṃ pramātari api asti bhavanmate iti siddhāntinaḥ kathamidaṃ 
bodhasya lakṣaṇam | naca parasiddhatāmātreṇa vastusiddhirityapi bauddhasya bhavet 
vacanāvakāśaḥ, tamapi upaśamayituṃ madhyagranthaḥ,-ityalaṃ bahunā, 
prakṛtaṃ tu brūmaḥ | nanu prakāśatve pramāturjaḍatāyāmanavasthā,-iti 
aprakāśasvabhāvo'sāvuktaḥ, tadetat kathaṃ parapramāturvyāpāravyāhārādi-
nā anumeyatvāt | bauddhasya api jñānameva saṃtatyā vikalpakatayā vā 
pramātṛrūpam | tadapi vyāpārādinā parasantānagatamanumeyamiti kaṃcit 
bruvāṇaṃ pratikṣipati

(page 224)

yadapi iti | nanu jñānamapi siddhāntimate pramāturavyatiriktam | tat 
tasminnanumeyatayā prakāśyatvena aṅgīkṛte pramāturapi syādeva 
prakāśyatvamiti | āha kalpita iti | iha yathā bauddhamate svaprakāśasyāpi 
jñānasya pratyakṣavedyasyāpivā ghaṭāderarthasya kāryatvādirdharmo 
vyatirikto'pi vyāvṛttibuddhyā kalpito'numīyamāno'pi na 
svasaṃvidadhyakṣasiddhatāmapahastayati, tathā pramāturmāyāśaktyā yat 
nirākāravāde viṣayaunmukhyaṃ nāma spaṣṭaṃ sākāravāde viṣayākāratva-
manatiriktamapi atiriktamiva rūpaṃ, tasya prakāśyatve'pi na pramātuḥ 
svaprakāśatā khaṇḍyate paramārthasya kalpanayā anapabādhanāt | 
mūlaprasiddhameva hi rūpaṃ tatra anumānena kālpanikena upabṛṃhyate 
svaprakāśatayā vinā yathoktayuktibhiranirvāhāt | evaṃ jñānameva anumeyaṃ, 
natu paramārthaprakāśaḥ | taddharmānumeyatoparāgāt tu pramātuḥ parasya 
anumānamiti prasiddhiḥ | nanu grāhako'pi paro'numeyatayā prasiddhaḥ, kimatra 
bādhakaṃ yena paroparāgakṛto'yamatra anumeyatāvyavahāraḥ syāt | astu evam, 
tathāpitu parasaṃtatipatitaśarīraprāṇabuddhiśūnyarūpasamāviṣṭatvaṃ 
prakāśasya anumīyate svaprakāśasyāpi tatra vyāpāravyāhārādinā | tataśca 
ayaṃ paramārthaḥ-svaprakāśaṃ saṃvedanaṃ sakaladikkālagatamapi adhunā 
dharmiṇyetaccharīrādau viṣayonmukhaṃ viṣayākārametaccharīrāditādātmya-
samāviṣṭamiva sādhyametaccharīrādivyāpāravyāhārayogāt svaśarīrādivat | 
naca etāvatā svaprakāśatāhāniḥ svasaṃvedanasya | tathā

     sāmānyamekaṃ pratyakṣam-|

iti darśane kānyakubje gaurastīti pramāṇāntareṇa prasiddho 
gotvasaṃbandho'numīyamāno'pi na gotvasya pratyakṣatāmapahanti |

(page 225)

tadeva hi tat gotvaṃ pratyakṣasiddhaṃ tatra astīti siddhaṃ tena anumānena 
upavṛṃhyate | yacca yena anumānena upavṛṃhyate, tat tasya na bādhakaṃ bhavati 
vyavahārasādhanamiva pratyakṣasya | tathāca parapramātṛtānumānena 
svaprakāśatvameva upodbalyate svaprakāśatvasya abhāve pramātṛtāyā eva 
anupapatteḥ | tathāca dehe kriyādarśanādevamadhyavasīyate | atra uttiṣṭhāmīti 
svaprakāśamabhisandhānamasti sāvegaṃ grāsatātparyadarśanāt bhuñje iti, 
supte prāṇādipreraṇāt prerayāmīti sarvatra ca asmadarthaviśrāntaprakāśapra-
tīteriti | bādhakasya hi kāraṇaṃ tadrūponmūlakatvam, anyathā sarvaṃ sarvasya 
bādhakaṃ bhavet | tadvirūddhaṃ ca tadupavṛṃhakatvamiti 
kāraṇaviruddhopalabdhiḥ | paraśarīrasya pramātṛtā paramanumeyā | tattu 
pratyakṣamapi bhavati, paraprāṇādi tu svarūpeṇa anumeyameva sarvadeti 
śarīragrahaṇaṃ na kṛtam | yathā ca svasaṃtāne'pi na svaprakāśatāhāniḥ, 
tathā parasaṃtāne'pi | śarīrādipramātṛtābhimānadārḍhyāt tu paro'yaṃ 
pramāteti vyavahāraḥ | paramārthapramātā tu svaprakāśa eva | so'pica asya 
anumātṛtayā vartamānasya pramātuḥ svaprakāśatvena avaśyaṃ bhāti anyathā 
pramātṛtāyā eva ayogāt | uktaṃ hi

     yadyapyarthasthiti-------| (a. pra. si. 20)

iti | pramātṛtvena tu abhimānāspadaṃ na bhavati dehādipramātṛtābhimāna-
dārḍhyamityāśayena anupraviṣṭagrahaṇam | anuprāṇakatayā 
praviṣṭamanupraviṣṭamiti | kva anupraviṣṭamiti nirūpayituṃ svaśabdena 
pratyagātmaśarīraprāṇādiruktaḥ | svasya dehādeḥ pramātṛtvena yat 
saṃvedanaṃ, tadanuprāṇakatvena praviṣṭo'vaśyaṃ nirbhāsanayogya iti yāvat | 
evaṃ paramārthapramāturekatvāt svasaṃvedanaprakāśasya anumeyatā kvacidapi 
na upapanā, tat kathaṃ prakāśyatvaṃ syāditi uktam | adhunā tu

(page 226)

idamāha-bhavantu vā bahavaḥ pramātāraḥ, tathāpi svapramātari tāvat 
prakāśyatvaṃ nāsti; parapramātṛṣu tu tadanumānabalādānīyeta | naca 
anumānena kvacidapi svalakṣaṇaṃ spṛśyate | sāmānyaviṣayatvaṃ hi tasya 
anyathā saṃbandhagrahaṇādyayogāt | tataśca pramātari paratra yadi nāma 
apoharūpamapramātṛvyāvṛttyātmaparigṛhītamavastujñānākāramātraṃ vā 
vyatiriktamātmatvalakṣaṇaṃ sāmānyaṃ vā, tāvatā tadastu prakāśyam | 
vastvantarasya tu pramātuḥ kaḥ prakāśyatākalaṅkārpaṇāvakāśa iti | 
anumānamapica iti caśabdaḥ prameyāntarasamuccaye | apiśabdena pratyakṣasya 
atra aprakāśyatāpādane nāsti saṃbhāvanetyāha | evakāreṇa ghaṭādāvapi 
anumānadiśā na prakāśyatvaṃ nirvahatīti brūte | 
adhyakṣajñānāvabhāsinaḥ iti sākṣātkārānupraveśayogyaṃ svalakṣaṇa-
manayā bhaṅgyā uktamiti ghaṭāderapi na anumeyatvam, kimaṅga 
pramātṛsvalakṣaṇasyeti | nanu avastugrāhakatve'pi anumānasya 
vastvadhyavasāyitayā prāmāṇyam | yadāha

     prāmāṇyaṃ vastuviṣayaṃ dvayoḥ---------|

iti | tadanumānāgamavikalpairvastubhūte ātmani adhyavasāya iti 
tathādhyavaseyatvāt prakāśyatvamāgacchedeveti āśaṅkāṃ vyapohati ātmā 
iti | ātmeti vikalpena pramāteti vikalpena ceti saṃbandhaḥ | ādigrahaṇena 
āgamādigrahaṇam | dvitīyaścakāraḥ pūrvapakṣaśaṅkādyotakaḥ | vakṣyate iti 
ṭīkākṛtā | yadyapi uktamādisiddhasūtre, svataḥsiddhasūtre ca; tathāpica

     svātantryāmukta------------| (1 | 5 | 16)

iti bhāvisūtrāśayena vakṣyate iti uktam | nanu yadi sākṣādātmā na prakāśate 
parakīyaḥ, kathaṃ paracittajñānaṃ sphuṭābhaṃ

(page 227)

bhavet parātmano'pratyakṣatvādanumānena sphuṭābhasvarūpāvedanācceti | 
āha sarvathā iti | yogipratyakṣaṃ hi idaṃ, na punaranumānam | tathāhi

     tasmādbhūtamabhūtaṃ vā---------|

iti

     pratyayasya paracittajñānaṃ saṃyamāt | (yo. sū. 3 | 20)

iti nyāyena dhāraṇādhyānasamādhibalāt paracittena saha abhedaṃ yadā 
bhāvayati, tadā vastvanusāreṇa sā bhāvanā, tathā vastuta aikyāt 
māyākṛtatvāt bhedābhimānasya sphuṭābhaṃ paracittaṃ prakāśate, natu 
anumīyate tadā paracittamiti | nanu anumānena mā bhūt sākṣātprakāśa 
ātmanaḥ, pratyakṣeṇa tu svalakṣaṇameva prakāśyate, tacca parātmani bhavatyeva 
yogipratyakṣaṃ paracittajñānādeḥ prasiddhatvāditi syāt 
paraprakāśyatvamātmana iti śaṅkāṃ vyapohitumāśayapadam | etaduktaṃ 
bhavati-tatra yogipratyakṣeṇa rāgādayaścaittāḥ prakāśyante | tatsaṃvedanena 
saha yogina aikyāpatteḥ saṃvedanaṃ svaprakāśameva bhāti, natu prakāśyatvena 
| evakāraḥ samāsānantaraṃ prayukto natu mātṛprakāśo'tra 
abhedabhāvanāsādhyastasya sadāprakāśatvāditi vadan parāśayasyaiva iti 
pūrvapadārthe svārthaṃ niveśayati rājapuruṣa eva ayamiti yathā, tathā 
svasthānagato'pi evamāha sākṣātkāra eva ayaṃ parāśayasya, natu 
anumānamadhyavasāyamātrarūpamiti sphuṭābhasya na sarvathā anumeyatvaṃ 
kathañciditi | evaṃ parapramāturapi prakāśyatvaṃ nāstīti samarthitam | 
bauddhasya tu parapramātṛsiddhiḥ saṃtānāntarasiddhividhvaṃsanaṃ 
vāsanāprabodhasūtre kurvatā ṭīkākāreṇa vitatya vicārayiṣyate iti viratamiha | 
evaṃ prasaṅgāt siddhāntinā svadarśane pramātṛvṛttānto vicārito

(page 228)

madhyagranthena amunā ata eva na yasya ityādinā natu tadanumānam ityantena | 
adhunā dṛk svābhāsaiva iti prakṛtameva prameyaṃ nirvāhayati bhaṅgyantareṇa | 
tathāhi kaścit brūyāt-jñānaṃ svaprakāśaṃ svasaṃtāne, parasaṃtāne tu 
pramātrantarāpekṣayā jñānāntaraprakāśyamapi bhaviṣyati viṣayabhedena 
viruddhadharmādhyāsasya akiñcitkaratvāt, saiva hi pramadā dayitasya sukhaṃ 
sapatnyāśca duḥkhaṃ janayati; naca virodhaḥ kaściditi | taṃ prati ucyate 
ekapramātṛniṣṭhatvenāpica iti | ayamanvabhūt, ahamanvabhūvamiti 
smṛtidvayaṃ vilakṣaṇaṃ bhāsate | tatra svānubhavaniṣṭhāyāṃ 
smṛtāvanubhavasya yadātmarūpatvamātmaviśrāntatvena 
ananyāpekṣāmayamasmadarthavimarśanīyam, tat cet na bhāti; paraniṣṭhānubha-
vanirbhāsanāt ko'sya viśeṣaḥ syāt | atha 
ayamasmadarthasdanubhavavedanarūpasmaraṇapariniṣṭhitaḥ san vedye'pi anubhave 
saṃkrāmatīti ucyeta, tarhi parānubhavasmaraṇavedanayoge'pi anvabhūvamityeva 
pratītiḥ syāt | atha yo'nubhavastadāpi asmadarthaviśrāntiyogya eva bhāti, 
tatsmṛtyā saṃvedyate iti kā bhāṣā | asmadartho hi prakāśasya 
ātmaviśrāntirananyāpekṣā, smṛtyā vedyatvaṃ ca anyāpekṣeti virodhaḥ | 
yadyapi parasaṃtānavartino'pi jñānasya paraprakāśyatvamanucitaṃ, 
svaprakāśatvameva hi jñānasya anaupādhikaṃ lakṣaṇam, naca tat 
viṣayābhedādanyathā bhavati, nahi nīlapṛthivyādi anyāpekṣayāpi jalādi 
saṃpadyate, aupādhikasyaiva rūpasya tajjanakatvāderviparivṛttidarśanāt, anyathā 
sarvaṃ viparivarteteti bhāvasya svarūpaniyama eva na syāditi anyathābhavanasya 
yadaupādhikatvaṃ vyāpakaṃ, 
tadviviruddhānaupādhikatvopalambhādanyathābhavanaṃ svaprakāśatvasya 
jñānīyasya niṣidhyate | tena jñānasya viruddhameva

 (page 229)

paraprakāśyatvam | anenaiva āśayena hi vakṣyati na 
jñānasvarūpamanyasaṃvedyaṃ svaprakāśaikarūpatvāt iti | ekagrahaṇena 
hi anaupādhikatvena tallakṣaṇatayā tādātmyamuktaṃ; tathāpi atra tāvat 
viṣayabhedaprathanaṃ dhūliprakṣepaṇaprāyaṃ virodhaparihārāya 
jātyuttaramapi syāt, iha tu tadapi nāstīti atyantapadam | atyantaviruddhatvameva 
hetunā ghaṭayati nahi iti | tadvedyaḥ iti smṛtivedyaḥ | tadāpi hi iti smṛtitvena yaḥ 
saṃmataḥ kālaḥ, tatra | tatsthaḥ iti svasaṃtatistha 
ātmaviśrāntirūpo'hamitiviśrāntiyogyo na bhātaḥ syāt | bhāsatāṃ tarhi tathā 
| āha svaprakāśe ca iti svaprakāśatvaparaprakāśatvayorvirodha iti hi uktam | 
anayā ṭīkayā sūtraṃ vṛttiśca bhaṅgyantareṇa vyākhyātam | svābhāsaiva yā 
dṛk svasaṃtānarūpā, tayā ātmaviśrāntiyogyamahaṃvimarśanīyaṃ yat 
jñānaṃ; tatra anyavedyatā na upapannā | svasaṃvedanaikarūpā 
svasaṃtānarūpatayā ātmatābhimānasthānaṃ yā kācit hi jñaptiḥ, sā 
anyasaṃvidvedyā na bhavatīti | nanu yathā nīlādi kāraṇatvāt saṃvido viṣaya iti 
ucyate, tathā anubhavo'pi smṛtijñānasya kāraṇamiti viṣayo'stu,-ityāśayena 
āśaṅkate athāpi anyavedyatā iti | ayaṃ bhāvaḥ-smṛtijñānasya 
tāvadanubhavajñānaṃ pāraṃparyeṇa kāraṇamiti yadi viṣaya ucyate, 
rūpajñānasyāpi rasādijñānaṃ samanantaratvena paraṃparayā vā avaśyaṃ 
kāraṇamiti rūpajñānenāpi aśeṣāṇi rasagandhādijñānāni viṣayīkriyeran | 
ekajñātṛsamavetapadena bauddhamate kāraṇatvena viśiṣṭaṃ kāṇādamate tu 
ekārthasamavāyena viśiṣṭaṃ jñānatvamaviśiṣṭamiti sūcitam | tena 
ekasamavāyijñānatvaviśeṣāditi mantavyam, natu jñānatvāviśeṣamātrāt | 
evaṃ hi nirmalameva abhidhīyamāne

(page 230)

sati vāsukijñānādyapi asmadādijñānasya viṣayo bhavediti sarvaḥ sarvajñaḥ 
syādityādirbhūyān viplavaḥ, yo'gre vakṣyate | nacāpi 
rūparasādijñānāmanyonyavedakatvaṃ yugapat krameṇa veṣyate, prasajyate tu,-
iti sahaiva prathamataḥ prasañjanīyaḥ syāt, natu indriyaniyamābhāvamātram | 
tena sūtre'pi evaṃ yojanā-rasaviṣayā dṛk svābhāsaiva yathā rūpadṛśā na 
vedyā, tathā anyā apīti | agre tu rūpadṛgeva rasadṛgiti aviśeṣeṇa yojayiṣyati | 
nanu rasajñānaṃ yadi prakāśate, tat kiṃ niyamena jñānopādhinā 
prakāśitavyam | nahi kumbhena prakāśamānena tadupādherviśiṣṭabuddhimat-
kṛtatvāderavaśyaṃ prakāśaḥ, tat kathamuktaṃ sūtrādhikaṃ vṛttau 
anyonyavedane anyonyaviṣayavedanamapi syāt iti yasya vyākhyānāya ṭīkeyam 
-raso'pi tadupādhiḥ prakāśetetyāśaṅkya āha jñānaprakāśa eva hi iti | na 
idamupādhimātmānaṃ kumbhavat, apitu tatprakāśarūpaṃ; tataśca rasasya 
prakāśo rūpaprakāśe prakāśate iti rasasyāpi prakāśanamaṅgīkṛtameva 
bhavati | tathāṅgīrācca svahetoścakṣurjñānaṃ rasādiviṣayaṃ 
rasādiprakāśanayogāt jātamiti indriyaniyamo hīyeta | sahi trividhaḥ prasiddhaḥ | 
indriyabalāt jñānasya kāryasya niyamaḥ-cakṣurjanitaṃ hi jñānaṃ rūpasya 
eva prakāśa iti | indriyasya ca niyamo yogyatātmā-yena nayanaṃ 
rūpajñānameva janayati, na anyaditi | indriyāṇāṃ ca niyama iyattā 
ṣaḍindriyāṇītyādi, tatra prathamaṃ prakāradvayaṃ vyākhyātuṃ tataśca 
ityādinā tāvatpadena tṛtīyaḥ sūcitaḥ | taṃ ca vyācaṣṭe tadabhāvācca 
ityādinā | indriyāṇāṃ svabhāve niyamābhāvāt tajjñānānāṃ ca 
viṣayaniyamābhāvāt cakṣurjñānasya sarvaviṣayābhāsanasāmarthyādane-
kendriyakalpanā vyarthā | atra hetuḥ-ekendriyasya tathābhūtaṃ sāmarthyam 
iti |

(page 231)

atrāpi hetuḥ-kāryasvabhāvasya ityādi | atrāpi hetuḥ-anyathā ityādi | na 
cakṣuṣā tāvat rūpajñānaṃ janyate | tena yadi nāma rasajñānaṃ prakāśyate, 
tāvatā śuddhe rase jñānaṃ prati anupādhibhūte pracikāśayiṣite 
rasanendriyopayogo bhaviṣyatīti anekendriyakalpanā na vyarthā | atra āha evaṃca 
iti | co hetau | evaṃ hi ucyamānenaiva hetunā kevalasyāpi rasasya cakṣureva 
prakāśakaṃ prāptam, kevalaṃ saṃbhavadadṛśyamānamupādhibhūtamapi na 
prakāśeta piśāca iva; dikkālasamavāyādayastu sarvadaiva upādhibhūtā 
bhavanti buddhādīnāṃ rūpādaya iveti | tatpratyakṣatāpakṣe'pi na teṣāṃ 
kevalānāṃ pratyakṣatāprasaṅgaḥ | tena upādhibhūtasya prakāśanaṃ 
saṃbhavat kevalaprakāśābhāvāt vyāvṛttaṃ kevalaprakāśena vyāpyate iti 
upādhibhūtaprakāśanasvabhāvena kevalaprakāśanasvabhāvaḥ sādhyate iti 
svabhāvahetuḥ | nanu upādhibhūtasya rasasya na cakṣurjñānaṃ prakāśaḥ, apitu 
tatra nirbhāsamānaṃ rasajñānamiti upādhibhūtaprakāśanamasiddho 
heturityāśaṅkya āha cakṣurjanitā iti | na tasya rasajñānaṃ prakāśastasya 
svarūpeṇa asattvāt | tat hi tadā bhavet yadi rasanendriyajanitaṃ vartamānaṃ tat 
syāt | kevalaṃ smṛtāviva atītānubhavo rasajñānamasadeva rūpajñānena 
prakāśyate iti rūpajñānameva tadānīṃ sabhramajñānasya 
upādhimatastadupādheśca rasasya prakāśanamiti na asiddho hetuḥ | 
indriyaniyamābhāve ca andhādyabhāvaprasaṅgaḥ, ekadā ca avalokitaviṣayasya 
tadviṣayatadanubhavanāśe'pi tatphuṭībhāvaprasaṅgaḥ iti na kiṃcit kasyacit 
naṣṭaṃ syāditi | evaṃ kramabhājāṃ jñānānāmanyonyavedakatve doṣa uktaḥ | 
idānīṃ vartamānānāṃ yaugapadyena jñānānāmanyonyavedakatve doṣamāha 
sākāravāde ca

(page 232)

iti | naṭamallanartakīprekṣādau nartakīṃ vayaṃ paśyāma ityasyāṃ pratipattau 
yāvanta ekaikavyatiriktāḥ sāmājikāḥ, tāvanti darśanāni pratyekaṃ vedyāni | 
tāni satyapi bāhye ākāravanti, tacchāyāyogena asatyeva bāhye tenaiva bāhyena 
ākāreṇeti ekaikasya anantanartakyavabhāso bhavet | ekanartakyavabhāsaśca 
saṃvedyate | tasmin viṣaye yat jñānamekaikasya saṃbandhi, tasya vedakāni yāni 
jñānāntarāṇi, tacca vedakaṃ yeṣāṃ jñānāntarāṇāṃ; 
teṣāmākāravatāmanyonyavedakarūpāṇāmanekatvādekanartakyābhāse'pi 
ābhāsānāmanekatvaṃ syāditi saṃgatiḥ | nanu satyaṃ tatra 
pratyekamanekāvabhāsaḥ, kiṃtu yādṛk deśakālasvarūpata ekasya ābhāsaḥ, 
tādṛgeva aparasyeti sarvathā tādṛgrūpyapraveśamayāt samānābhihārarūpāt 
sādṛśyādanekatvaṃ na ābhāti | jalajvālāprabhāsaṃmīlane'pi hi 
upacayo'dhikaḥ syāt | iha tu sarvathā tādrūpyāt kathamanekatvaṃ bhāsatāmiti 
parāśaṅkāṃ nivārayati yatra iti | ekasya sāmājikasya yadā cakṣuṣi 
kamalādoṣastatastasya mṛgamadānukārikeralalāsikāvadanabimbamapi 
kīrakāminīvadanamiva kanakagauramābhāsate, tadā tadābhāsasya pratyekaṃ 
vedyatvādanyābhāsānāṃ ca kāmalināpi vedyatvāt sarvasya 
śyāmalapītalarūpo milito'vabhāsaḥ syāt | nanu kva evaṃ vyāmiśrāvabhāso 
dṛṣṭaḥ iti | āha yathā iti | ekatra cakṣuṣi rekhātimiraduṣṭe, cakṣurantare ca vimale 
cañcalācañcalaghaṭasaṃvittirbhavati | evamekasaṃtatau krameṇa 
naṭādiprekṣāyāṃ ca yaugapadyena jñānaṃ jñānāntaravedyaṃ 
doṣamāpādayediti uktam | adhunā tu idamāha nacāpi ityādinā prasajyante tu 
ityantena-iha na dikparīkṣāyāṃ tāvadabādhitamasti jñānametairdṛśyamānaṃ 
paśyāmīti | pratyekaṃ ca tatra ekasaṃtatipatitatā | nacāpi yugadbhāvināṃ 
kāryakāraṇabhāvaḥ |

(page 233)

tathāpi ca dṛṣṭa eva vedyavedakabhāva iti sarvapramātṛgatānāṃ 
jñānānāmaniyamena vedyavedakatve mahān viplava iti | nanu saṃskārajatvamatra 
niyāmakaṃ bhaviṣyati, tat sarvo'yamukto doṣaḥ pratisamāhita ityāśayena āha 
athāpi iti | svabhāvaniyamāt iti saṃskārajatvābhāvakṛtāt | 
svabhāvavaicitryāt iti saṃskārajatvakṛtāditi vyatirekānvayadvāreṇa 
apaunaruktyam | yadi vā pūrveṇa kāryasya jñānasya svabhāvabheda uktaḥ, 
dvitīyena tu tatkāraṇasya saṃskārasyeti | paro yathā ekaprahāreṇa doṣān 
parijihīrṣati, tathā siddhāntavādī paraprakāśaṃ jñānamityasya pakṣasya 
mūlata eva utthāpanaṃ na bhavatīti darśayati uktaṃ hi tāvat iti dṛk 
svābhāsaiva ityatra | vastūnāṃ nijaṃ lakṣaṇamanaupādhikaṃ viparivartate iti 
āśayaḥ | saṃskārajatvena tarhi kiṃ kṛtamiti cet, āha tatrāpi iti 
svaprakāśaikarūpatvena anyathābhavati api bhinnātmano'nubhavādanyarūpa-
syāpi smaraṇasya sādṛśyaṃ viṣayacchāyākṛtaṃ syāt nāma | 
anantasaṃskārajatve'pi pūrvakaṃ jñānamābhāsyate tena | evaṃ hi sati dvayaṃ 
saṃbhāvyate-anubhavagatasya grāhyāṃśasya prakāśo grāhakāṃśasya vā 
prākkalpaṃ nirākaroti grāhyasya sphuṭābhāsasya anubhavasaṃcetane, natu 
smṛtāviti | anena yogijñāne grāhakātmani yathā parasaṃvedanaṃ pṛthageva 
grāhyapakṣanikṣiptaṃ prakāśate, na evaṃ smṛtijñāne svānubhavaḥ | ghaṭa eva 
hi atra asphuṭatayā grāhyabhūmikādhiśāyīti | anena dvitīyaṃ  
prakāramapākaroti | saṃskāreṇa tarhi kimapakṛtam | āha sādṛśyamātram iti | 
mātragrahaṇamatiriktaprakāśyatvanirāsāya | yat kila naṣṭaṃ, na tat saṃskāraje 
vastvantare āveśaṃ saṃbandhameti pūrvasaṃniveśa iva saṃniveśāntare | 
naṣṭaśca anubhava iti svasaṃskāraje'pi 

(page 234)

smaraṇe viṣayatayā na saṃbandhameti | saṃbandhagamananibandhanaṃ hi 
saṃnidhānam | asaṃnihitasaṃbandho rāmo'smākaṃ rājā,-iti 
rājanvadviśvamadyeti aniyamaḥ | tadviruddhatvaṃ ca naṣṭatvamiti 
kāraṇaviruddhopalabdhiḥ | nanu anubhavena smaraṇamekaviṣayaṃ kathaṃ syāditi 
ayaṃ yatno vartate | tatra anubhave smṛtyā anābhāsyamāne'pi sādṛśyaṃ tāvat 
saṃskārajatvāt siddham | tacca viṣayadvāreṇeti ekaviṣayatvamapi 
sādṛśyādupacariṣyate iti siddho vyavahāraḥ

     smaraṇādabhilāṣeṇa---------|

itītyāśaṅkya āha vastusthityaiva iti | yat vastu sthitaṃ prarūḍhaṃ bhavati, 
tadavaśyaṃ saṃskāramādhatte | prarohajo hi saṃskāralakṣaṇo viśeṣaḥ, 
keṣāṃcittu praroha eva paṭīyastvaṃ saṃskāro viśeṣaḥ | yatprajñālaṃkāraḥ

     praroho'syāḥ saṃvidaḥ paṭīyastvaṃ eva saṃskāro vācyaḥ |

iti | yatra ca saṃskāra ādhīyate, tatra sādṛśyamiti ubhayaṃ 
bhūrjasaṃniveśaśaragamanādau dṛṣṭam | iha ca pūrvajñānaṃ sthitamabhūt | 
tadavaśyaṃ saṃskārasādṛśyābhyāṃ bhāvyamiti kalpyate, natu sādṛśyaṃ 
jñātuṃ śakyam | dvayavedī hi kvāpi akrameṇaiva saṃniveśadvayaṃ 
gogavayayoriva, kvacit krameṇa bhūrja iva parāpararūpaṃ paśyan 
tṛtīyastatsādṛśyamaveyāt, natu iha tṛtīyo'sti | sthiramātmānamabhyupayatāpi 
vaiśeṣikeṇa duḥsamarthamekaviṣayatvam | smṛtyanubhavayorhi na grāhakaṃ 
tṛtīyaṃ jñānamasti yat tayoḥ sādṛśyamavagatya ekaviṣayatāmadhyavasyedupa-
caret vā | na anubhavasmaraṇayoḥ sādṛśyaṃ vedyaṃ tṛtīyānupalabdheriti 
kāraṇānupalabdhiḥ | nanu sādṛśyādeva niśceyamidametatsaṃskārajamiti | tatra 
yadi sādṛśyaṃ na vedyaṃ, tarhi saṃskārajatvamapi kathaṃkāraṃ niśceyam | 
nahi sarvaṃ vastu saṃskāraṃ

(page 235)

karoti bhūtalādapasārite laghuni tṛṇaprāye tadasaṃbhavāt | satyamidamevam, 
kintu abhyupagamyavādamātrametaditi siddhāntī pratyuta avajñāmatra darśayati | 
yadi nāma itinipātasahitena syāt ityanena tadavagatiḥ iti sādṛśyasya avagatiḥ 
ityanena tadgatiḥ iti sūtrāṃśasya vyākhyāntaraṃ kṛtam | upacāraśca na 
vastuvyavasthākārī ekasya jñānasya goviṣayatve'nyasya vāhīkaviṣayatve 
sādṛśyādekaviṣayatāyāmupacaritāyāmapi vāstavaikaviṣayasaṃvedanādhīna-
vyavahārānirvāhāt | tataśca upacārastāvadakiṃcitkaro'tra, tādṛgapica na 
upapadyate iti parapakṣasya sarvathā daurbalyamiti apiśabdaḥ sūtrārthaṃ prakṛte 
prameye yojayati upasaṃhāradvāreṇa tadevam iti | saṃskārajatve'pi iti 
kathaṃcidabhyupagate'pīti apiśabdaḥ || 2 ||

     athātadviṣayatve'pi smṛtestadavasāyataḥ |
     dṛṣṭālambanatā bhrāntyā tadetadasamañjasam || 3 ||

     nanu yadi smṛtyanubhavayorekaviṣayatvaṃ pāramārthikaṃ bhavet, tat 
tatsamarthanāyāṃ prayasyeta api; natu tathā | tathāhi-yastāvadatītaḥ pitā 
smaraṇe bhāti, sa tadā naṣṭaḥ kathaṃ smaraṇe bhāyāt | yathā sa nirdagdhaḥ 
pitā na hasati, na kaṇḍūyati, tathā bhātyapi neti niścayaḥ | naca asya 
vartamānātītakāladvayayogaḥ piturvirodhāt | abhyupagame ca sarvato vyāvṛttaṃ 
rajataṃ kathamanyatrāpi anekaṃ syāt | bhramaśca saḥ | naca asāvasphuṭaḥ 
smārtaḥ pitrābhāso deśakālasvarūpāniyatastadviparītena ānubhavikena 
ābhāsena ekatāmupagantumutsaheta | tena anirbhāsamāne eva tasmin 
viṣaye'bhimānamātrarūpāt tadadhyavasāyāt tadavabhāsiketi 
smṛtirdṛṣṭaviṣayā ucyate bhramavaśāditi kārikāpādatrayārthaḥ 
saṃkṣepavyākhyayā

(page 236)

avatārito bhramaḥ ityantena | tathāhi bhaṭṭaśaṅkaranandanaḥ smṛtidiśaiva 
arthadharmatāṃ prakāśamānatāyā nyaṣedhīt

     artho na bhāsate bhrāntismṛtyorayogāt buddhikālatvam, naca ekatā 
deśādibhedāt tattve vā nijadeśādivedanam |

iti | tadetadasamañjasam iti saṃkṣepeṇa vyācaṣṭe ityapi ityādinā | 
smṛtirasadeva asatkhyātipakṣe ālambate, vāsanopakalpitaṃ vā 
jñānākāramātmākhyātipakṣe ābhāsayati prakāśayati; natu 
prācyamanubhavaṃ tadviṣayaṃ vā ubhayasyāpi smṛtikāle nāstitvāt, tat 
kevalamabhimānasāratvena adhyavasyati tadanubhavakālāvalambanena 
adhyavasāyasya svarūpaṃ darśayati so'nubhūtaḥ iti | sa iti 
anubhavakālasparśaḥ | anubhūta iti anubhavasya arthasya ca adhyavasāyaḥ | 
asato'pi ātmano nirbhāsamānasya tena anubhūtena adhyavasīyamānena 
abhedānadhyavasāyamayādabhedādhyavasāyāt bhramādanubhūtālambanatvaṃ 
smṛterna vivekinaḥ pratiyanti | aso'san ātmākāro vā viṣayo yasyāḥ, sa ca 
anubhavo'rthaśca na viṣayo yasyā iti sūtrārthaḥ | bhrāntyā iti 
bhramarupatvenetyarthaḥ | asamañjasam iti vṛttau vyākhyātaṃ 
netisamastavākyārthaniṣedhena | cakāreṇa āśaṅkādyotakena atha iti 
vyākhyātam | anantara ityādinā ṭīkākāro'nantarasūtre etasminnarthe hetutvena 
vākyavṛttopanatena yojye iti darśayati | nanu ghaṭe jalamitivat na iyaṃ śuktau 
rajatamiti matiḥ, tat kathamuktaṃ śuktau iti vṛttāvityāśaṅya āha śuktideśa iti 
| taṃ deśamavaṣṭamya ālambanīkṛtya tadabhimukhatayā yataḥ pravartate, 
tatastadādhāratvamuktam | bādhakodayasamaṃ pramātrantarasaṃvedanaṃ ca 
apekṣya viparīta iti nāstyeva iti ākāra iti vacanaiḥ vita-

(page 237)

thāsadātmākhyātayastistro'pi sūcitāḥ | iha atra avajñāṃ darśayituṃ 
bhrāntistāvadiyaṃ smṛtiranyabhrāntyavailakṣaṇyāditi sādhyam | 
viparītakhyātimeva bhrāntimagre saugatadṛśi samarthayiṣyate

     bhrāntitve cāvasāyasya---------| (1 | 3 | 5)

iti sūtre | vaiparītyaṃ ca pravṛttiprāptiviṣayamapekṣya prepsitādhyavasitamartha-
kriyā kāritvaṃ saṃbhavadvastubhāvaṃ ca apekṣyeti śukteranyadeśācca 
rajatāt iti uktam | rajatavikalpa ityanena dṛṣṭāntaṃ vṛttau pūrayan atrāpi iti 
dārṣṭāntikaṃ smaraṇavikalpaṃ samīkaroti | tataḥ iti vitathādikhyātirūpatvāt || 
3 ||

     smṛtitaiva kathaṃ tāvadbhrānteścārthasthitiḥ katham |
     pūrvānubhavasaṃskārāpekṣā ca kimitīṣyate || 4 ||

     etat pūrvoktaṃ nirākaroti kathaṃ sarvatomukhaṃ samastoktavastudūṣaṇa-
dvāreṇa | tathāhi anyatra kiṃcit nirākriyate-yathā śrotragrāhyo varṇātmā 
nityaḥ śabdaḥ samayāpekṣī vācaka ityatra nityatvameva nirākriyate, na anyat; 
tadaṃśadūṣaṇena tu vākyārtho'yaṃ dūṣito bhavet | iha tu smṛtiḥ saṃskārajā 
bhrāntyā pūrvānubhūtārthavyavasthāpiketi pratipadārthaṃ taddvāreṇa ca 
vākyārtha iti sarvametat nirākriyate | yaḥ svarūpaviśeṣa iha vicāracitre bhittitvena 
avalambyate, sa eva na upapadyate iti tāvacchabdārthaḥ | pūrvasūtrārthaṃ 
ṭikākāro dūṣaṇāpādanāyāmanuvadati yadyasadeva iti tataḥ smṛtitvaṃ nāma 
mukhyaṃ rūpaṃ na yuktamiti saṃbandhaḥ | tacchabdena pūrvaślokoktaḥ iha 
anūdito'rthaḥ parāmṛṣṭaḥ | anubhūtasya anubhavaprakāśitasya viṣayasya 
asaṃpramoṣaḥ kaṃcitkālaṃ madhye muṣitasyeva na pūrṇaḥ pramoṣo'pahāraḥ 
punaḥprakāśanena lābhāditi smṛtermukhyaṃ rūpam, yena 
jñānāntarebhyo'syā viśeṣaḥ | tadeva pūrvasūtrārthena unmūlyate |

(page 238)

anubhavo na prakāśate iti tadviṣayo'pi naiva prakāśate, apitu samyak prakarṣeṇa 
muṣita eva asau jāta iti hi pūrvasūtrārthaḥ | anubhavānābhāsanāt ityanena 
pūrvānubhavāprakāśāt iti vṛttirvyākhyātā tadviṣaya ityādinā 
tadviṣayasaṃpramoṣe iti anubhūtaviṣaya ityādinā adhyavasāyamātrāt iti 
viśeṣavyapadeśa ityādinā smṛtitvaṃ na yuktam iti, mukhyapadena sautraṃ 
tāvatpadam | anyathā iti vastuviṣayatvena | nanu anumānaṃ 
bhrāntirvyavasthāpayati ca vastu, tadvat smṛtirapi sukhasādhanatvādi 
vyavasthāpayiṣyatītyāśaṅya āha anumānasya iti | bhavatu tāvat 
bhavanmate'numānaṃ bhrāntiḥ | yathoktaṃ bhavadbhiḥ

     atasmiṃstadgrahāt------------|

iti, kintu punarapi uktaṃ bhavadbhireva

     ---------bhrāntirapi saṃbandhataḥ pramā |

iti,

     yo hi bhāvo yathābhūtaḥ sa tādṛgliṅgacetasaḥ |
     hetustajjā tathābhūte tasmādvastuni liṅgadhīḥ ||
     liṅgaliṅgidhiyorevaṃ pāraṃparyeṇa vastuni |
     pratibandhāttadābhāsaśūnyayorapyavañcanam ||

iti | evaṃ yat pāraṃparyaṃ, tadiha smaraṇe yadi 
bhavedatītavṛṣṭyanumānavadapūrvaniścayarūpameva idaṃ pūrvānubhavaviṣa-
yamanubhūtavastuviṣayaṃ vā |

     pūrvābhyastasmṛtyanubandhāt jātasya harṣabhayaśokasaṃpratipatteḥ |
     pretyāhārābhyāsakṛtāt stanyābhilāṣāt |
     vītarāgajanmādarśanāt | (nyā. sū. 3 | 1 | 19, 22, 25)

(page 239)

ityādihetorbālakalpitasmṛtivilakṣaṇena pūrvajanmānubhavatadviṣayānumānena 
sadṛśaṃ sa ghaṭa iti jñānaṃ syāditi pūrvaprakāśanātmakaniścaya-
pratyujjīvanaparamārthasya smṛtitvasya hāniḥ | tasmādanumāne astu 
pāraṃparyam, iha tu asiddham | tadiha anumānabhrānteḥ smaraṇabhramasya 
viśeṣaḥ,-iti kathamarthaṃ vyavasthāpayedasau | dṛṣṭaṃ 
smṛterarthavyavasthāpakatvaṃ sarvatra vyavahāre svagṛhagamanārdhakṛta-
samāpanādau | evamiha bhrānterapi arthapratibandhena bhaviṣyati vyavasthā | satu 
smṛtau nāstīti kathamarthaṃ vyavasthāpayediti uktaṃ na kācana bhrāntirartha-
vyavasthāpikā | tat kathaṃ smṛtirapi tathā bhavediti tu anantarasūtre vakṣyate iti na 
punaruktatā | nanu vikalparūpā smṛtiḥ, vikalpaśca sarvo bhrānta iti tayāpi tathā 
avaśyaṃ bhāvyamityāha nacāpi iti | bahuvacanena idamāha-na autsargikaṃ 
sarvasya vikalpasya bhrāntatvaṃ yena smṛterapi kunṛpapravartitamaṇḍaladaṇḍa-
nyāyena āyātaṃ tat syāt | yāvatā vakṣyate etat dvicandre'pi tadavasāyo na 
bhrānto'pitu bāhyatāvasāya eva iti anantarasūtre | yato yadeva viparītārtha-
vedanaṃ, tadeva bhrāntam | naca tathā smṛtiḥ |  nahi tayā pūrvaprakāśa-
rūpatvamātmani anumānajñānavadaṅgīkriyate yena svapratibhāse anarthe 
arthādhyavasāyena pravṛtteriti upanataṃ bhrāntitvaṃ bhavet | smṛterhi 
pūrvānubhava eva pratyujjīvita eva prāṇabhūtaḥ | na asyāmapūrvaṃ kiṃcit 
prakāśate yena vaiparītyamāśaṅkyate | etadarthameva vṛttau pūrvānubhūta-
grahaṇamanumānavikalpanādāviva apūrvaprakāśatānirākaraṇatātparyeṇa 
prayuktamiti darśayati tadāha itivacasā | iyatā prathamaṃ vyākhyāya dvitīyaṃ 
kārikārdhaṃ vyācaṣṭe pūrvānubhavasya iti | anyathā tu iti avastuviṣayatve | 
asyā iti smṛteḥ saṃskārāt janma yat

(page 240)

kalpitaṃ, tena kiṃ prayojanam | tatsaṃskārāt hi tatsādṛśyaṃ pūrvasaṃniveśena 
iva aparasya saṃniveśasya, tadāveśo vā tatsaṃsargāvibhāgapratipattikārī 
caṇpakāmodena iva tailasya | naca smaraṇasya pūrvānubhavena sādṛśyaṃ, 
pratyuta viparītāviparītaviṣayatayā atyantavailakṣaṇyam | sādṛśyameva ca yatra 
na asti, tatra āveśaḥ śaṅkanīyo'pi na bhavati | sahi tādātmyamivetyevaṃrūpa-
prāṇaḥ | nanu etadeva saṃskārajatvam-yadanubhavajñānāt pāraṃparyeṇa 
tadutpadyate | tarhi pītajñānamapi samanantarapratyayādupādānakāraṇāt 
vyavahitāt vā upādānopādānāt nīlajñānādutpadyate | tat tadapi 
saṃskārajaṃ kiṃ na ucyate | pūrvānubhavena asparśo'sādṛśyamanāveśaśca 
saptamyā hetutvena nirdiṣṭo vṛttau bhinnayogakṣematve sādhya iti vivṛṇoti tataḥ 
iti | yogo'labdhalābhaḥ, iha tu tadupalakṣitaṃ prakāśalakṣaṇaṃ svarūpam, 
kṣemaṃ labdhaparirakṣaṇaṃ, tadupalakṣitastu iha viṣayāṃśaḥ | tadubhayam-
anubhavāt bhinnaṃ smṛteḥ prakāśasya apūrvatvāt viṣayasya ca avastutvāditi | 
nanu vṛttau yaduktaṃ bhrānteḥ saṃskārajatvam iti, tat katham | nahi bhrāntiḥ 
saṃskārajeti kasyacidupagamaḥ | naca bhrāntimātraṃ sarvaṃ smṛtiriti puro 
rajatajñānādau smṛtitvānupagamāt | tato bhrānteḥ saṃskārajatvaṃ na 
vaktavyam, viśeṣya vā vaktavyaṃ smṛtirūpāyāḥ | bhrānteḥ saṃskārajatve 
ko grahaḥ iti codyadvayaṃ nirasyati tata eva iti | bhranteḥ saṃskārajatvaṃ 
yaduktaṃ, yacca bhrānteriti kevalamuktam, tat smṛtitvenāpi abhimatasya jñānasya 
bhrāntitāmātram, natu kaścana viśeṣaleśaḥ | yataḥ sāraṃ nyāyopanataṃ 
rūpaṃ, tato hetorbhrāntitāmātrasāratvam | kuta ityāha anya iti | nīlaśabdo 
nīlajñāne, mātraśabdo nirviṣayatvaṃ tasya āha | tadayamarthaḥ-

(page 241)

anyat jñānaṃ samanantarapratyayarūpamupādānaṃ yasya nīlajñānasya 
viṣayarahitasya bhrāntātmanaḥ, tatsāratvāt tattulyatvāt nīlasmaraṇasya | 
tattulyatvaṃ kuta ityāha tata eva iti anubhavāsparśāyātādanubhavabhinnayoga-
kṣematvādityarthaḥ | bhrānteḥ saṃskārajatvam iti anye paṭhanti | tatra evaṃ 
yojanā-iha vṛttau saṃskārajatve ko grahaḥ iti vacanena saṃskārajatvaṃ 
grahasya abhiniveśasya mithyājñānasya viṣaya iti bhrāntirūpamuktam | tat katham 
| nahi saṃskārajatvaṃ smṛteḥ | bhrāntirbhānteriti viśeṣya vaktavyam; kathaṃ 
kevalamuktamiti codyadvayasya uttaram | tata evaca iti | bhānteḥ saṃskārajatvaṃ 
yaduktaṃ, bhrānteḥ iti ca kevalamiti aviśeṣya yaduktam, tat na ayuktaṃ 
vyākhyātāt hetoriti | etaduktaṃ bhavati-paramate smṛtirnāma vicāritā | naca 
asyā bhramāntarebhyo viśeṣaḥ kaścana sthāpayituṃ śakyate yena viśeṣyeta 
yatsiddhaye saṃskārajatvamaṅgīkriyamāṇamupayogabalena pramāṇasiddhatvād-
abhrāntirūpaṃ bhavediti yukta eva ayamuktikrama iti | tena smṛtireva na yadi 
bhrāntā, naca saṃskārajā, naca arthavyavasthāpiketi smṛtiḥ saṃskārajā 
bhrāntyā arthavyavasthāpiketi sarvatomukhametat nirākṛtaṃ bhavati || 4 ||

     bhrāntitve cāvasāyasya na jaḍādviṣayasthitiḥ |
     tato'jāḍye nijollekhaniṣṭhānārthasthitistataḥ || 5 ||

     nanu pūrvānubhavaḥ, tadviṣayaśca tayā adhyavasīyate iti iyatā 
sādṛśyam, natu sarvātmanā | sādṛśyasiddhaye ca saṃskārajatvam | 
pratyakṣavikalpena tu pratyakṣaviṣayo yadyapi adhyavasīyate, tathāpi sa 
pratyakṣānubhavo na adhyavasīyate iti na asya smṛtitulyatvena 
saṃskārajatvamucyate |

(page 242)

evaṃsthite ca tadadhyavasāya eva smṛtestadvyavasthāpakatvam | bhrānti-
svabhāvo'pica ayamadhyavasāyo yathāvastu pravṛtta iti na asya smṛtyadhya-
vasāyasya kiṃcit duṣyati |  sarvatra ca adhyavasāyādeva arthavyavasthā | sa ca 
bhrānta eveti bhrāntareva sāmānyamadhyavasīyate abhimanyate niścīyate 
vikalpyate iti śabdamālāprayoge'pi bhavantaṃ pṛcchāmaḥ-kimanena vastu 
prakāśyate vā na vā | yadi tāvat prakāśyate, bhrāntatvamanupapannam | 
prakāśanāṃśe prakāśyamānāṃśena bhrāntitvaṃ hi nirākariṣyate vitatya | 
atha avasāyasya bhrāntitvaṃ samarthayituṃ prakāśanarūpatvaṃ tyajyate, 
avasāyarūpatā anyaiva kāciducyate; tarhi tasmin vyavasthāpanīye 
pūrvānubhūte'rthe sa smṛtyadhyavasāyo jaḍaḥ, tadaprakāśanāt nīlajñānam-
iva nīlamiva vā pīte iti kathasau tasya vyavasthitaye syāt | saṃvinniṣṭhā hi asau | 
nanu prakāśarūpatvamasti smṛtyadhyavasāyasya svasaṃvedane svākāre ca, tat 
kathamasya jaḍatvam | tarhi tataḥ prakāśanāt svātmaniṣṭhāt svākāraniṣṭhācca 
yadajāḍyaṃ, tasmin satyapi tato'dhyavasāyādarthasya bāhyasya sthitirvyavasthā 
na ghaṭate tasya tasmāt svātmanaḥ svākārācca anyatvāditi sūtrārthaḥ | 
nijollekha iti svātmollekha iti sūtravṛttyordvandvasamāsaḥ | nirvikalpakasya 
bhrāntatvaṃ na kvacit saṃbhavatīti sūtre yadanuvādamukhena aspaṣṭamuktaṃ, 
yacca paramatamadhyavasāyasyaiva sarvatra vyavasthāpakatvam, saca bhramarūpa 
eva | tat ko'yaṃ paryanuyogo bhrānterarthavyavasthitiḥ kathamiti | tadubhayamapi 
etat vṛttau vidhimukhena sphuṭayati adhyavasāya eva iti | bhrāntyā bhramarūpeṇa 
upalakṣito yo viṣayavyavasthāpaka uktaḥ, so'dhyavasāya eva, natu svasaṃvit | 
nāpi svasya prakāśamānasya rūpasya saṃvit nirvikalpakarūpā |

(page 243)

tadiyamadhyavasāye eva kṛtapadā bhrāntirūpatā | sa eva ca arthasya 
vyavasthāpako bhramarūpeṇa dṛśyavikalpyaikīkārābhimāneneti | atra āha 
siddhāntī sa ca iti | caśabdastarhiśabdārthe paramatānupapattimāha | sa tarhi 
adhyavasāyo jaḍo vyavatiṣṭhāpayaiṣite bāhye'rthe tasya aprakāśarūpatvāt | 
yadi tu tatra prakāśarūpaḥ syāt, yogina iva tatra pūrvasminnarthe 
vikalpanīyābhimate sphuṭatayā pūrvaprakāśaḥ syāditi na smṛtitā, nāpi 
adhyavasāyatā  bhavedanubhavaikarūpatvāt | atha na bāhye'sau prakāśo yena 
anubhavarūpatvaṃ, nāpi sarvathaiva aprakāśo yena jaḍaḥ; kintu svātmani 
svollekhe ca svākāre prakāśarūpa eva asau | tarhi punarapi arthe bāhye jaḍa eveti 
na bāhyārthavyavasthāyā hetuḥ syāt | sā hi saṃvinniṣṭhā bhavati, natu kadācit 
jaḍaniṣṭheti | bhramarūpeṇa ca yadabāhyabāhyayorekīkaraṇaṃ, na tena 
bāhyasya kiṃcit spṛṣṭaṃ, tatsparśe bhrāntatvāyogāt | nahi rajatajñānena 
satyarajatasya śuktervā vyavasthā kāciditi tātparyeṇa vṛttyarthaḥ | evaṃ sūtre 
vṛttau ca adhyavasāyamātrasya rūpaṃ dūṣitam, taddvāreṇa tu smṛtyadhya-
vasāyasyeti | atītagrahaṇaṃ ca vṛttau vikalpopalakṣaṇamutprekṣāvikalpasyāpi 
pūrvānubhavopajīvanapraveśena vastuto'tītatvādeveti ṭīkāpi adhyavasāya-
mātraniṣṭhaiva | yattu tatra smṛtijñānaṃ hi iti, tadadhyavasāyodāharaṇa-
nyāyena prakṛtasamarthanābhiprāyeṇa ceti, mantavyam | saugatamate'pi 
ṭīkākāro bhrāntitattvaṃ darśayan nirvikalpake tāvat na bhrāntitā, nāpi sarvatra 
vikalpe iti ghaṭayati saṃvidābhāsamāna iti | svasaṃvidi tanniṣṭhe ca ākāre na 
kācana saṃvidavikalpikā, vikalpikā vā bhrāntirupapadyate | yasyā eva hi

 (page 244)

saṃvido bādhakapramāṇena viparītaniṣṭhatvamāvedyate, saiva 
anavasthitirūpatvāt bhrāntirbhavitumarhati | nanu vastuvṛttena yat viparītaṃ 
vedanaṃ, tat bhrāntiḥ, kiṃ bādhakena yasyā vaiparītyaniṣṭhatvamāvedyate 
ityanena viśeṣeṇa | āha anyathā iti yadi ayaṃ viśeṣo na āśrīyate ityarthaḥ | 
sukhasaṃvedanam iti nīlālambanameva jñānaṃ tadviparītasukhasaṃvedana-
rūpam | saugatadṛśi ityanena viśeṣeṇa paṭaviparītaghaṭasaṃvedanādi avadhīrya 
sukhasaṃvedanamapi bhrāntaṃ syāditi uktam | nanu vaiparītyaṃ 
taddeśāvaṣṭambhakṛtaṃ vāstavaṃ gṛhyate | naca anīladeśarūpāvaṣṭambhena 
sukhādīnāṃ vedanam, apitu saṃvidrūpāvaṣṭambhena | tata eva hi caittā ete 
sukhādaya ucyante | ekacandradeśāvaṣṭambhastu dvicandrasyeti 
vastutastadviparīto'sau nirvikalpakenāpi gṛhīta iti dvicandre nirvikalpakaṃ kasmāt 
na bhrāntam | tathāpihi tannivṛttaye eva pratyakṣalakṣaṇe'dhikaṃ bhrāntapadaṃ 
prākṣepi  | kāmaṃ rajatabhrame pūrvaṃ śuktiranyadeśāvaṣṭambhena 
prakāśate iti aviparītaiva nirvikalpake bhātīti tatsaṃvedanamavikalpakam-
abhrāntam | rajatādhyavasāyastu rajate śuktideśāvaṣṭambhena bhavan vastuto 
viparīto bhavatīti bhramatvaṃ tatra adhyavasāyasyaiva, natu niyamo'yamupapadyate 
adhyavasāyasyaiva bhramarūpateti | etadāśaṅkamāna āha athāpi iti | 
rūpagrahaṇaṃ tādātmyena ayamavaṣṭambhaḥ, natu ādhāratayā vyatirekeṇeti 
darśayati | tat iti tathāpītyarthaḥ | dvicandrasya pratīyamānasya 
kathamekamṛgāṅkatādātmyaṃ syāt | dvicandra eva tasya svarūpam | tadeva 
pravṛttiprāptyābhimukhyena diśyate iti deśaḥ, na anyaḥ | apivā ityanena 
ādhārasya vyatiriktasya deśatā tāvat na upapannā niḥsaṃbandhatvāt 
sarvadharmāṇām | tadayaṃ prauḍhavāditayā abhyupagamyavāda iti dyotayati | 
āloke

(page 245)

ghaṭo bhātīti ghaṭapratibhāsasya asti anyadeśāvaṣṭambhaḥ | nanu na asya 
bādhakena anyadeśatā āvedyate | sa hi tadrūpasahiṣṇureva ālokaḥ 
ādhārādheyabhāvasya nirbhāsamānasya abādhitatvāt | nanu ekacandra-
deśāvaṣṭambhasahiṣṇurdvicandra ādhārasya tu apratibhātatvāt | tarhi 
adhikaraṇadeśasya anyasya avaṣṭambhāt bhrāntateti tyaktaṃ, tādātmyena ca 
avabhāsanaṃ nāsti,-iti kathaṃ bhrāntitvam , natu asanneva dvicandro bhāti | 
maivam | bhāsamānataiva hi sattā | tadasacca khyāti ceti vyāhatam | anyarūpatayā 
tu ghaṭādau satyābhimate'pi asattvamiti tadvedanamapi bhrāntiḥ syāt | tadetadāha 
naca asatkhyātiḥ ityādinā | nanu na bhāsamānatvaṃ sattvam, apitu 
arthakriyākāritvaṃ; tacca dvicandre nāsti,-iti paramatamāśaṅkya etadasiddhamiti 
darśayati arthakriyākāritvamapi iti | asataḥ iti asattvena tathābhimatasyetyarthaḥ 
| bālasya taimirikasya āhlādaḥ, vivivekina udvegaḥ | nanu yo'nyaireko dṛśyate, 
so'nena dvitvāliṅgitaḥ | naca asāveko dvitvāliṅgitatvena arthakriyākārī | ka 
evamāha | tathaiva hi asāvarthakriyāṃ karoti | yathāpratibhāsaṃ hi sā | tena 
pratibhāsanaṃ cedasti, tat tadanusāriṇyā arthakriyayā api bhāvyam | sāpica 
pratibhāsādeva satī anyathā anavasthānāditi pratibhāsa eva sattā,-iti hṛdi 
gṛhītvā upasaṃharati svātmani iti | pratibhāsamāne rūpe yadi asat syāt, 
pratibhāsamānataiva kathaṃ syāt | etadeva draḍhayati tathāhi iti na tasya iti | 
pratyuta asya tat samyagjñānam | tathāca bhiṣagasmai timiraṃ cikitsiṣurāha bhoḥ 
kiṃ satyameva dvicandraṃ paśyasīti | so'pi tathaiva prativakti-satyaṃ paśyāmīti 
| atra dṛṣṭāntamāha nahi iti |

(page 246)

indrajālaṃ mantratantrauṣadhādi vidyate yasya | asatyatvena iti abāhyatayetyarthaḥ 
| na iti | so'pi cet bhrānto bhavet, bāhyābhimukhaḥ pravarteta | naca evam | ata eva 
vyapadiśati-nāhaṃ bhrāmyāmi, lokaṃ tu bhramayāmīti | nanu evaṃ sarvatra 
astamitaiva bhrāntikathā | netyāha tataśca iti yata evaṃ, tata idaṃ 
prameyāntaraṃ labdhamityarthaḥ | kiṃ tat | āha asata iti anantarbahīrūpasya 
dvicandrasya prakāśamānasyaiva sattvena iti bahīrūpeṇa jñānākārasya vā 
arthatvena anātmatvena  yā pratītiḥ, sa bhrama iti | yadivā castorarthe | tatastu 
dvicandrapratibhāsānantaraṃ pratītiriti adhyavasāyarūpā | atra pakṣe tataśca 
ityasya anyavyākhyāyāṃ naca ityādinā tasyāḥ pratīterbalādeva adhyavasāya-
rūpatvamāpatatīti nirūpyate | tathāca nyāyaprasaktarūpāntara-samuccayārthaś-
cakāraḥ | dvitīyavyākhyāyāṃ pratītiradhyavasāyarūpā bhrāntetyatra hetu-
granthaḥ naca ityādi | co hyarthe | yat prathamānaṃ prakāśamānaṃ, tat vastu | tat 
niyatākāraṃ yathaiva prakāśate; tathaiva tat, anyathābhūtaṃ tat na bhavati | 
tatastasya yā pratītiravikalpā prakāśarūpā, sā sarvathaiva anyathātvaṃ 
viparītavedanarūpatvaṃ na sahate ityato hetoḥ pratītyantaraṃ nirvikalpakapratīti-
vyatiriktam | tadapi na sarvam, apitu viparītaṃ yena adhyavasīyate | naca asya 
svagrāhye vaiparītyam | ataḥ prathamāne nirvikalpakaviṣaye rūpe tat vaiparītyaṃ 
yena adhyavasīyate, tadeva adhyavasāyarūpaṃ sarvatra bhramajñāne bhrāntamiti 
yuktam | nanu nirvikalpakāntarameva tathā astu | netyāha tacca iti | avikalpakatvam-
etadeva-yat prathamātrarūpatvam | saṃyojanaviyojanādivyāpārastu vikalpanam | 
tadāha vikalpātmanastu iti bhrāntitvaṃ yuktamiti saṃbandhaḥ | tasya hi 
prathamānarūpapātitvamasti |

(page 247)

tadāha dṛśya iti | kiṃ sarvatra bhrāntatvam | netyāha viparīta iti | śuktau 
dṛśyāyāṃ taddṛśyaviparītena rajatena adhyavasāya aikyaṃ yadā karoti, tadā 
bhrāntatvam | nīle tu dṛśye nīlenaiva vikalpyena aikye kā bhrāntatā | anye tu 
vyācakṣate dṛśye spaṣṭe vikalpyena aspaṣṭena yadaikyam, tadadhyavasyan sarvo 
vikalpo bhrāntaḥ, vastumūlatvena tu prāpakatvāt na bhrāntitayā vyavahriyate 
nīlasyaiva prāpyatvādarthakriyākāritvena abhimānāt spaṣṭāspaṣṭatādya-
vāntarānādaraṇāt | yastu dṛśyena aikyaṃ  na adhyavasyati, sa vikalpyarūpa-
svaviṣayamātraniṣṭhaḥ sarvathaiva abhrānta iti | etadupasaṃharati ataḥ iti | 
dvicandrābhāso nirvikalpo yaḥ, tatra na bhrāntatā yathāprakāśamābhāsasya 
sattvāt | ata eva nīle asatyapi nīlaprakāśanaṃ yuktam | nahi tasya prakāśanam-
ātmīyaṃ vapuryena asati tasmin tadiṅgitavat tatprakāśanamapi na syāt; yāvatā 
prakāśamānamasya saṃvedanaṃ, tacca astīti asatyapi nīle tatprakāśanaṃ 
syāditi bāhyārthaśūnyatā yuktimatī | asati nīlaprakāśane kiṃ tadasti yadbalāt 
nīlaprakāśanaṃ prakāśeteti asati nīlaprakāśane na kiṃcidapi prakāśeta, yad-
anyasya prakāśarūpaṃ na dharmaḥ, tat tadasaṃbhave na prakāśate dīpāder-
abhāva iva prabhātmakaḥ prakāśaḥ | tathāca nīlaprakāśasya prakāśanaṃ na 
anyadharma iti tadasaṃbhave prakāśanaṃ yat sarvatra, tat na dṛṣṭamiti niyama-
vattvahetunā asya anyadharmatvaṃ vyāpakaṃ sthāpitamiti vyāpakānupalabdhiḥ | 
tat vijñānaśūnyatā nītibāhyaiveti bhadraśaṃkaranandanaḥ | tena dvicandra-
nirvikalpakaṃ, tathāvidhavikalpyamātraniṣṭhaśca tadadhyavasāyo na bhrāntiḥ | 
nahi atra ubhayatrāpi bādhakaṃ prabhavati | nahi nivṛtte'pi timire evaṃ pratipattiḥ-
na me dvicandraḥ pratibhāta iti |

(page 248)

tatpratibhānādeva hi timiracikitsitādiḥ | yastu dvicandro'yaṃ bāhyaḥ 
sarvasādhāraṇa iti adhyavasāyaḥ, sa eva bhrānto bādhakena tathāvedanāt | 
nivṛtte tāvat timire evaṃ pratipattiḥ-yo mayā dvicandro bāhyatvena sarva-
sādhāraṇyena adhyavasitaḥ, sa tathā na pratibhātaḥ; pratibhātastu abāhya eva 
asādhāraṇastimirādikāraṇāntarotthāpitastadasādhāraṇapṛṣṭha eva tu 
abhyamaṃsi-bāhyo'yaṃ sarvasādhāraṇa iti | naca asau tatheti | yad bādhakena 
netinā unmūlyate saṃvedanena, tat bhrāntatayā vyavahāryaṃ 
svasaṃvedanāṃśa iva | tathāca dvicandrapratibhāsadvicandrādhyavasāyāviti 
kāraṇānupalabdhiḥ | bhrāntatāvyavahārasya niyamavataḥ kāraṇavattvād-
anyakāraṇāsaṃbhavācca neti unmūlyamānataiva kāraṇaṃ, tadiha na 
upalabhyate iti | yadāha bhaṭṭaḥ

     asatyasyābahirbhāvo bādhaḥ sattvamato dvidhā |

iti | tathā vikalpyasyāpi anarthatā na bhavati bhrāntatvābhāvāt | yato bādhakena 
tatra na kiṃcit kriyate, dṛśyavikalpyābhedādhyavasāya eva tu unmūlyate iti 
prakramya āha

     ābhāsabhede tvarthaḥ kastatrābhedo bhramo vapuḥ |

iti | nanu evaṃ dvicandranirvikalpakapratyayabhrāntatābhidhāne timirāśu-
bhramaṇetyādāvāryasya ko'bhiprāya ityāha bāhyatāvasāyo'pica iti | 
timireṇa ayamasādhāraṇa ābhāsa utthāpyate-yato na vetti, tato 
bāhyatādhyavasāyaḥ | etaduktaṃ bhavati-ābhāsa uttiṣṭhan prācuryeṇa 
bāhyārthakṛta eva bhavatīti dṛḍhābhyāsavāsanāmahimnā prathamata eva 
prabhṛti sa ābhāsaḥ saṃvidi adhyavasāye ca nirbhāsamānaḥ samākṛṣṭa-
bāhyatāka eva nirbhāsate mandamaterindrajālatimirādāviti prathamata eva 
prabhṛti bhrāntatvamuktam |

 (page 249)

yastu timirādikāraṇatvamavaiti gacchan kakṣādyābhāsasya, sa bāhyatāṃ na 
adhyavasyati | tathāca nāvārūḍhaṃ paśya paśya taṭataravaḥ pratilomaṃ 
tūrṇaṃ tūrṇaṃ dhāvantīti savismayamācakṣāṇaṃ śiśukaṃ pratyāha 
naivaṃ vṛkṣā bhavanti, dṛśyate kevalamitthamiti | anena pratibhāsadharma eva 
ayamiti uktaṃ bhavati | evaṃ nirvikalpakena etat bādhiṣyamāṇabāhyatāsvīkārāt 
sahyamātmani bhrāntatvam, śuktirajatabhrame tu prathamanirvikalpakena rajata-
svīkārābhāvāt na sahyamiti anyābhiprāyaḥ iti | tāvat iti | iha tāvadupayogi 
darśitam, anyattu darśayiṣyate | bhavatām iti svadarśane bhrāntitattvaṃ yat, tadiha 
na tāvat darśitamiti yāvat | yat nareśvaravivekaḥ

     pareṣāmapi keśādau bhrāntā saṃvidbahirmukhā |

iti | evaṃ lokaprasiddhe bhramarūpe yastṛtīyo'dhyavasāyāṃśaḥ, tannidarśanena 
sarvatra adhyavasāye bhrāntirūpaṃ pradarśya bhrāntirūpeṇa adhyavasāyena 
vyavatiṣṭhāpayiṣitasya bāhyasya vyavasthā na ghaṭate tatra aṃśe tasya 
jaḍarūpatvāt | yatra aṃśe ca ajaḍatvamabāhye, tatra vyavasthāsaṃpādanānaut-
sukyāditi darśayati smṛtijñānaṃ hi iti | hi iti yasmādevaṃbhūto'tra vibhāga 
itīti, tasmāt viṣayavyasthāpakatvamadhyavasāyasya na yujyate yathā prakṛtasya 
smṛtijñānasyeti | smṛtirupalakṣaṇamatra | etadeva ghaṭayati sa iti | yoṃ'śo na 
bhrānto nirvikalpakasvasaṃvedanalakṣaṇaḥ, sa na arthasya vyavasthāpakastena 
anyasyaiva svarūpasya svābhāsasya ca prakāśanāt | yataḥ soṃ'śaḥ 
pratibhāsamānaḥ svarūpasvābhāsasvabhāvaḥ, tasmāt smṛtijñānādabhinno na 
vyatiriktaḥ, na bāhyasvabhāvo

 (page 250)

     jñānādavyatiriktaṃ ca---------|
iti nyāyāt | yastu vikalpanavyāpārātmā adhyavasāyaḥ, sa yadyapi 
svāṃśādavatīrṇa iva lakṣyate ityato'rthe vyavasthāpakatayā 
saṃbhāvayitumārabdhaḥ, tathāpi na nirvahati asya saṃbhāvanā | tadāha 
yāvatā iti pūrvaprakrāntasaṃbhāvanānirvāhābhāvadyotakamavyayam | nanu 
bhrāntaṃ ca bhaviṣyati, vyavasthāpakaṃ ca bhaviṣyati | duṣyati kiṃ hi tata iti 
bhrāntatvena saha samuccīyamānaṃ vyavasthāpakatvamāśaṅkitaṃ niṣedhati 
bhrāntasyāpi iti | atra hetuḥ jaḍatvāt iti | nanu viṣayasya vyavasthāpaka iti 
ko'rthaviṣayasya vyavasthāṃ karoti | tatra yathā kāṣṭhasya ploṣaṃ 
karotyagnirityukte jāḍyamagnerna pratibandhakam, tathaiva avasāyo vyavasthāṃ 
viṣayasya karotīti kimasya jāḍyājāḍyacintayetyāśaṅkya āha 
vyavasthāpanaṃ hi iti | ātmani saṃvedanaṃ prakhyāpramukhaṃ 
pāryantikopākhyā-lakṣaṇādhyavasāyarūpam, paratra ca pramātrantare 
tathābhūtasya svātmani yādṛgarthākāro'dhyavasāyaḥ, tatsadṛśasya 
arthākārasya adhyavasāyasya pūrvaṃ vā tena arthākāraprakāreṇa abhūtasya 
jananārthaṃ vācakasya saṃketitasya śabdasya udīraṇamupākhyāprasādakaṃ 
yadvaśāt taddhānopādānādiyoga iti,-ityetat vyavasthāśabdavācyam, natu 
arthasya asau kāṣṭhasya iva kaścit vikāraḥ | hi iti yata evaṃ, tataḥ 
prakhyopākhyāvattvaṃ vastuviṣayaṃ jaḍasya svātmaniṣṭhasya vastu aspṛśataḥ 
kathaṃ syāt | co'nvācaye | ata eva upasaṃhariṣyati 
vastusaṃvedanarūpatvalābhaḥ iti | tūṣṇīkenāpi hi viṣayaṃ 
saṃvedayamānena vyavasthāpito'rthaḥ, kiṃtu vyāhāravyāpārādinā sā 
vyavasthāpanā niśceyetyupākhyānaṃ prakhyāyāḥ karāvalambanamādadhat 
tatsācivyena vyapadiṣṭamiha | nanu viṣayadhamra eva vyavasthā astu 
bhāṭṭanyāyena |

(page 251)

atra āha pratipramātṛ iti | viṣayadharmo hi pratipramātṛ na bhidyate | nahi ekasya 
śuklaḥ paṭaḥ, anyasya pītaḥ, anyasya na śuklo na pīta iti bhavati | iha punarekasya 
spaṣṭaṃ pratibhāto'parasya apratibhāta eveti dṛṣṭam | viṣayadharmatāyāṃ tu 
idaṃ na ghaṭate | yaḥ pratipramātṛ bhidyate dharmaḥ, sa viṣayadharmo na bhavati 
sukhādiriva; tathā ca vyavastheti viṣayadharmatvasya vyāpakaṃ vyavasthānaṃ, 
tadviruddhena avyavasthitatvena vyāptaṃ pratipramātṛbhinnatvamiti vyāpaka-
viruddhavyāptopalabdhiḥ | pramātuḥ iti pramātṛdharma eva ayam | yasya ca ayaṃ 
viṣayaprakhyopākhyālakṣaṇo dharmaḥ, sa eva ajaḍa ucyate | apiśabdo vṛttau 
parābhyupagamasya ayuktatādyotakaḥ | yadyapi tvayā cidrūpo'ṅgīkṛtaḥ, 
tathāpi na nirdoṣatvamiti | sa eva iti tatraiva tena prakhyopākhye kartavye | saca 
bāhya eva iti bāhyaḥ prakhyātaśca upākhyātaśca tatra bhavan pūrṇa eva 
prakāśitaḥ syāditi pratyakṣādasya smṛtyadhyavasāyasya na bhedo bhavet; ata eva 
saṃvidātmanā iti uktam | saṃvitsvabhāvasya hi yo vyāpāraḥ, sa ko'nyaḥ 
saṃvedanātirikto bhavitumarhati | tadadhyavasāyādiśabdairapi abhidhīyamāno-
'sau prakāśa eva pūrṇaḥ | tataśca yat yatra pūrṇaprakāśarūpaṃ na bhavati, tat 
tatra bhramātmakamapi na bhavati, sukha iva svasaṃvedanam | tathāca smṛtya-
vasāye atīrthe'rthe yat kila yatra na pūrṇaṃ prakāśanaṃ, tat bhrāntaṃ rajata iva 
tatsaṃvedanaṃ kiṃciditi vyāpakānupalabdhiḥ | abhrāntatve prasakte'pi na kaścit 
doṣaḥ, pratyakṣatulyatāyāṃ tu saṃvedanavirodha ityāśayena vṛttau saiva 
doṣatvena uktā | ṭīkāyāṃ ca tata eva ubhayamuktam | anarthaḥ svātmā 
svollekhaśca yaḥ, sa eva adhyavasāyasya pratibhāsyo'rthaḥ, bāhyastu naiva 
pratibhāsyaḥ | tarhi bāhyo jaḍo'yam |

(page 252)

nahi jāḍyasya śṛṅgamasti | yadeva yatra apratibhāsarūpaṃ, tadeva tatra 
jaḍamucyate nīlamiva anyatreti bhāvaḥ | arthāṃśe iti vyavatiṣṭhāpayiṣite 
bāhye ityarthaḥ | svātmā saṃvidrūpaḥ, ullekhaśca utprekṣaṇena svavyāpāreṇa 
utkīryeva svātmani arthādutkṛṣyeva likhyamānaścitrakalpaśchāyāmātrarūpo 
nīla iti | ubhayamapi etadabāhyaṃ prakāśanayogena spṛśatā adhyavasāyena 
tatraiva prakhyopākhyāvatā vyavasthājanakena bhūyatām, natu bāhya iti 
mātraśabdārthaḥ | iyatā saugatamate arthasya vyavasthaiva na kathaṃcidupapadyate 
nirvikalpakena tasyāḥ pūrvāparaparāmarśaprāṇitāyā asaṃpatter-
avasāyātmanaśca vikalpasya bāhye'rthe jaḍatvāt tadvyavasthākāritā-
nupapatteriti darśitam | prakhyānaṃ hi kevalaṃ nirvikalpakarūpamupākhyā-
rūpaśūnyam | na tat vyavasthānamarthasya | nāpi upākhyā kevalā 
prakāśaśūnyeti | yaśca pratyakṣāyate vikalpa iti, tatra kimasāvācarati yat 
pratyakṣeṇa upamīyeteti uktameva | ataśca bāhyārthasiddhirapi kathamiti sūcitam | 
ata eva svadarśane sidhāntī prakāśavimarśayoranyonyamaviyogaṃ darśayiṣyati 
yena arthavyavasthā sulabheva bāhyatvenāpi | sā hi prakhyopākhyāmayī | te eva 
ca prakāśavimarśāvarthasyeti tadātmako bodhaḥ kathamarthavyavasthārūpo na 
bhavediti na kiṃcit duḥsamarthamatra | avasāyo darśanībhūto'vasāyībhūtaṃ 
darśanamityapi puruṣabuddhyaviśeṣābhidhānasamānamatāttvikameva | 
paśyāmītyapi na darśanasya niḥśamaśamasya vapurucitaṃ yena iyatā 
darśanībhūtamavasāyarūpaṃ bhavet | paśyāmīti hi parāmarśo-
'yamavasāyasyaiva vapuriti parasya asamañjasamiti āstām || 5 ||

     evamanyonyabhinnānāmaparasparavedinām |
     jñānānāmanusandhānajanmā naśyeñjanasthitiḥ || 6 ||

(page 253)

tadevaṃ ityādinā sūtraṃ saṃkṣepeṇa avatārayati | jñānaṃ iti 
tadīyamanyajñānasaṃbandhinaṃ viṣayaṃ na āskandati na svīkurute | kathaṃ 
tatsvīkaraṇaṃ saṃbhāvyate | āha nija iti svarūpe svaviṣayamātre ca niṣṭhā 
viśrāntiryasya tādṛśaṃ yadaparaṃ svīkartavyo viṣayo yadīyastajjñāna-
dvāreṇa | nanu tadviṣayasvīkāre kathaṃ tajjñānaṃ dvāratāmeti | ucyate 
tadapara iti tat svīkartavyaviṣayaṃ yadaparaṃ jñānaṃ, tat yataḥ saṃvedyaṃ 
bhavati | nanu jñānaṃ yadi saṃvedyam, tarhi viṣayastadīyaḥ kathaṃ 
svīkriyetetyevamāśaṅkya idameva uktaṃ tadapara iti tasya aparasya jñānasya 
yataḥ saṃvedyo viṣayaḥ | svaviṣayaprakāśanasvabhāvaṃ hi tajjñānaṃ 
vedyīkurvatā jñānena avaśyaṃ tadviṣayo'pi svīkṛto bhavediti yāvat | nanu yadi 
ayaṃ paraviṣayasvīkāre jñānasya jñānāntaravedyatvamupāyaḥ, tadā-
śrīyatām | tarhi tadāśrīyeta, yadi ghaṭeta; natu ghaṭate ityāha krameṇa 
yadbhavanaṃ, tena bhinnāni kila jñānāni | nanu tataḥ kim | āha svābhāse 
svarūpe svākāracchāyārūpe ca viṣaye prakāśanarūpāṇi, natu parasvarūpe 
paraviṣaye vyatirikte vā viṣaye | tathā vṛttiḥ svātmamātra iti | atra heturanantaro-
papādito nyāyaḥ | tena hi nyāyena kiṃ kṛtamiti | āha svarūpamātra iti | iyatā 
prathamaṃ kārikārdhaṃ vyākhyātam, dvitīyaṃ vyācaṣṭe tataśca iti | tataḥ 
parajñānaviṣayasvīkārābhāvācca arthināmarthakriyālābhaḥ pravṛttipūrvako 
na syādarthitāyā eva anudayāt | sā hi pravṛttiviṣayasya prārthanīyasya artha-
viśeṣasya niścaye sati bhavati | prārthanīyaśca itthamartho bhavati yadi sa pūrvaṃ 
sukhasādhanatvena dṛṣṭa iti niścayaḥ | evaṃ ca viṣayasaṃmelanātmā niścayaḥ 
prārthanākāraṇaṃ, tat nāstīti kāraṇānupalabdhyā prārthanāyā abhāve 
tayaiva uttarottara

(page 254)

kāryāṇāmabhāvaḥ iti prārthanādhyavasāyapravṛttiprāptihānādānasaṃvya-
vahārādirlokayātrā utsīdet | kramopajātasya saṃvitprabandhasya vicitraṃ kṛtvā 
saṃyojanaviyojanādinā bahuprakāreṇa vaicitryeṇa yat kasmiṃścit viṣaye 
melanaṃ-yastvayā adya viṣayo dṛśyate, sa pūrvamapi mayā itthamavalokitaḥ 
ityevaṃrūpaṃ; tena kila tatsamarthācaraṇaṃ pravṛttiviṣayasya arthaviśeṣasya 
niścaye kriyeta | tadeva tu na ghaṭate | anena anusaṃdhānajanmā iti vyākhyātam 
| ālayavijñānamekamapi kalpitaṃ kṣaṇikatvādaviṣayamelanāya prabhavati | 
smṛtijñānaṃ ca vicārayitumārabdhamiti akhilapadam | prathamajñānamapi 
ahamidaṃ jānāmīti ahantāparyavasitam, ahamiti ca pūrvāparasvātmarūpa-
parāmarśaviśrāntaṃ prathate iti tadviśrāntatvābhāve tadapi na kiṃcit bhavet | 
sukhaduḥkhādāvapi eṣaiva vartanīti | sa ca ayamanusandhyekarasatayā pramātā 
vyavaharan tadabhāve mūrcchitaprāyībhavediti anusandhiravaśyasamarthanīyaḥ | 
nanu mā bhūvan svābhāsamātraprakāśanarūpāṇi vijñānāni, santu 
bāhyārthaprakāśanarūpāṇi | bāhyaśca saṃtānavṛttyā vā sthairyeṇa vā 
tajjātīyatvena vā pūrveṇa jñānena yo dṛṣṭaḥ, sa eva uttareṇa jñānena 
dṛśyate iti siddhaṃ viṣayamelanam | sidhyet, yadi dṛṣṭatā tasya arthasya dharmaḥ 
syāt | yāvatā pūrvajñānarūpameva sā | naca anyonyaṃ jñānayoḥ svarūpa-
tādātmyam | jñānabhedasya apāramārthikatve hi evaṃ syāditi | etat darśayati 
vyatirikta ityādi | viṣayamelanaṃ hi dṛṣṭatāyā viṣayadharmatvena vā 
jñānayoḥ svarūpaikatvena vā parasparavedakatvena vā syāt, na anyatheti 
ekānto'yam | nanu tṛtīyo'stu ayaṃ pakṣaḥ | netyāha tadapi iti tathābhūtamapi 
vyatiriktārthaprakāśanarūpamapi tat jñānam | svātantryeṇa iti pūrvajñāna-
yogakṣemāsparśenaiva |

(page 255)

nanu yadi tajjñānaṃ pūrvajñānapuraḥsarīkāreṇa taṃ viṣayaṃ svīkuryāt, kā 
khaṇḍanā; pratyuta asmin vastuni pratītiḥ sākṣiṇī jñāto'yamartha iti | etad-
āśaṅkya mahatā prabandhena jñānasya jñānāntaravedyatāmākṣa-
pādābhyupagatāṃ parākartumupakramate jñānānām ityādinā | atra 
saṃkṣepeṇa yuktiḥ jaḍatāpatteḥ iti | uktam iti

     dṛk svābhāsaiva-----------| (1 | 3 | 2)

ityatra | atra paro vitatya svābhiprāyaṃ prakaṭayan jñānāntaravedyatāṃ na 
upagate svaprakāśatve'pi samarthayate svasaṃvidrūpatvāt ityādinā nātra 
kaścidbādhaḥ ityantena | bhavanti ityantena siddhāntimataṃ pūrvapakṣa-
vādinā anūditam, anena ca aparasaṃvedyāni iti vṛttau nañaḥ saṃvedanena 
saṃbandho vyākhyātaḥ | paraśabdena saṃbandhe sādhyāviśiṣṭo heturbhavet | 
evamanūdya kutaḥ ityanena svamatamāha | idaṃ ca asya ākūtam-yathā dīpe 
prajvalite dīpāntaramagacchat prakāśate na kaścidvirodhaḥ, tathā jñāne'pi 
jñānāntaram | etāvatā hi na tasya grāhakasya jñānasya kiṃcit duṣyati, tat hi 
jaḍaṃ vā gṛhṇīyādajaḍaṃ vā | grāhakatve kā hāniḥ | tadāha yathā jaḍa 
ityādi | grāhyasyāpi kā khaṇḍanā | jaḍatvāpattiriti cet, naivam | jñānaṃ hi 
prakāśamānamapi tathā svayaṃ prakāśate yathā parasya prakāśanarūpameva 
bhavati,-iti 
ātmaprakāśananāntarīyakaparaprakāśanayogādāmtānātmaprakāśanarūpa-
masya anapetameva | tadeva ca ajaḍatvam | prakāśyatā ca nāma na tasya svarūpī-
bhavati ghaṭavadeva | tena sāpi asya na jaḍatāmānayati | etadāha prakāśyatvā-
prakāśyatvayoḥ iti | aprakāśyatvaṃ na prakāśito'yamiti vyavahāraḥ, sa na 
viṣayasya

(page 256)

svarūpaṃ prakāśito'yamitivyavahāravat; pramātrā ca asya jñānasya grahaṇe 
paraprakāśyatvameva upapannamiti darśayati na svaprakāśena iti | yena hi 
prakāśarūpeṇa viṣayasya asau prakāśastenaiva cet pramātuḥ saṃvedyatāmeti, 
ghaṭasyāpi saṃvedyatāmante; jñānāntarānudaye hi ko viṣeṣa ātmadravyasya 
ghaṭadravyasya vā | tasmādasya saṃvedyatā nāma jñānasya ghaṭavadeva 
jñānāntaram, ghaṭāt vilakṣaṇatvanidānaṃ tu iyameva asya prakāśatā yā 
viṣayaṃ svaṃ prati prakāśarūpatā | nahi viṣayasya prakāśarūpatā nijaṃ 
vapuḥ | tadetadāha tatprakāśa eva hi iti | svapakṣaṃ paro nigamayati tadevam iti | 
jñānasya prakāśyatā jñānāntarameva, svarūpaṃ tu prakāśamānasya 
paraprakāśanarūpatvamiti darśitaṃ prakāśātmatvāt paraprakāśanasvabhāva-
tvācceti jñānarūpaṃ jaḍarūpaṃ veti grāhakasya jñānasya na kācit 
khaṇḍaneti darśitam | jñānāntareṇāpi evam ityādinā grāhyasya jñānasya 
na kiṃcit hīyate iti uktam | yat yatra na lakṣaṇaṃ svamapabādhate, tat tatra 
viruddhaṃ darpaṇasvacchatāyāmiva svacchadarpaṇāntarasaṃkrāntiḥ | tathāca 
jñāne jñānāntareṇa grāhyatā na jñānasya svaṃ lakṣaṇaṃ prakāśa-
mānasya sataḥ paraprakāśanarūpatvaṃ bādhate iti vyāpakānupalabdhiḥ | 
virodho hi kvacideva bhavati, na sarvatra | yadi ca lakṣaṇānapabādhako'pi viruddhaḥ 
syāt, sarvaṃ sarvasya viruddhaṃ bhavediti nīlasya kāryatvakāraṇatvādyapi 
rūpaṃ na bhavet viruddhatvāt | evaṃ niyamavattvasya vyāpakasya anupalambha-
prasaṅgāt virodhavyavahāro lakṣaṇānapabādhakarūpāt pratipakṣataḥ pracyuto 
lakṣaṇāpabādhakatvena vyāpyate | tacca iha na upalabhyate iti | etat pariharati atra 
ucyate ityādinā | anena ca lakṣaṇānapabādhakatvasya asiddhiṃ nirūpayan 
virodhameva samarthayate |

(page 257)

jñānaṃ hi ghaṭasya prakāśanarūpam | tatra prakāśamānatvaṃ na 
ghaṭaniṣṭhaṃ kiṃcidrūpam, apitu jñānasvarūpameva tat | yadi ca tat 
prakāśamānatvam jñānagatamapi jñānāntarasvarūpameva, tarhi prakāśyasya 
jñānasya niḥsvarūpatvameva syāt | grāhakasyāpi jñānasya yā 
prakāśamānatā, sāpi grāhakajñānāntaramevetyanena paryāyeṇa sarvameva 
jñānaṃ niḥsvarūpaṃ bhavedityabhiprāyeṇa upakramate yathā ityādi | 
prakāśyamāne'pi iti vacanamātreṇa abhyupagame satyapītyarthaḥ | 
ahamitipratyeyaḥ iti arhe kṛtyaḥ | prakāśamānatāyāmananyāpekṣatvaṃ 
bodhalakṣaṇam | tacca grāhyatāyāmanyāpekṣatārūpāyāṃ bādhitameva syāt | 
evagrahaṇena ananyāpekṣāmāha | ahamityevaprakāśārhaḥ sa eva hīti 
saṃbandhaḥ | madhyagranthastu ahamityasyaiva ityādiratra hetutvena uktaḥ | nanu 
ahamiti na jñānametat, apitu jñāturayaṃ parāmarśaḥ; jñānaṃ ca iha 
mīmāṃsyate ityāśaṅkya āha yadā tu iti | tuśabdadvayaṃ vāstave satyapi 
abhede arthāvacchedānavacchedakṛtaṃ jñānatvaṃ jñātṛtvaṃ ceti viśeṣa-
dvayaṃ dyotayati | etaduktaṃ bhavati-na khalu ātmā nāma kiṃcit dravyāntaraṃ 
yasya jñānena ghaṭavadeva jñānaṃ prakāśyate | tathātve hi na kiṃcit 
prakāśeta | tathā hi ghaṭasya prakāśamānatvaṃ na svarūpam, apitu jñānam | 
tasyāpi prakāśamānatvaṃ yat, tat na svarūpam, apitu jñānāntaramiti 
aprakāśādvaitaṃ bhavediti suptaṃ jagat syāt | tasmāt saṃvideva pramātṛrūpā 
antaḥ śarīraprāṇaśūnyādikāvacchedaparigṛhītasaṃkocā api bahirmukhān-
avacchedāt bahiralabdhasaṃkocā māyāpramātṛrūpā bahirapitu labdhasaṃkoca-
tāyāṃ jñānarūpā | tatrāpi bahirasaṃkucitaṃ rūpamanuyāyi bhāsate eva 
anyathā anusaṃdhānāyogāditi jñānamātmadharma ucyate iti |

(page 258)

saugatairapi iyādinā sarvasya itthameva ayamavabhāsa ityāha | sthiramasthira-
viṣayacchāyoparaktarūpānuviddhaṃ prakāśalakṣaṇaṃ sarvasya tāvad-
adhyātmasiddhamanapahnavanīyam | tattu samarthayitumaśaknuvadbhiḥ 
kuśakāśamavalambyate | tathāhi bauddhairasthirameva asya pāramārthikaṃ 
rūpamaṅgīkriyate, sthairyaṃ tu saṃtānaniṣṭhatayā vikalpakalpitaṃ jñāna-
mātravādibhiḥ, sāṃkhyairasthiraṃ rūpaṃ viṣayacchāyoparāgakṛtaṃ, 
prakāśarūpatvaṃ ca puruṣacchāyopanataṃ buddhitattvavādibhiḥ | mukhyayā iti 
na vāstavamatra mukhyatvam, apitu pratibhāsānusāreṇeti mantavyam ata eva āha 
prakāśamānāyām iti | vāstavaṃ hi pramātṛtvaṃ puruṣasyaiva | yadivā 
puruṣasya citimātrarūpatvāt pramātṛtvādivyavahāra upacaritaḥ pramāṇa-
viparyayādivṛttisārūpyakṛtaḥ | buddhivṛttyaviśiṣṭā hi vyāvṛttiḥ ityupagamāt 
tu puruṣacchāyoparakte buddhitattve eva mukhyaḥ pramātṛbhāvaḥ | ubhaya-
rūpaḥ iti idaṃ jñānam, ayaṃ pramāteti ca | yeṣāmapi iti naiyāyikadīnāṃ 
jñānalakṣaṇo yaḥ prakāśaḥ, jñānodaya eva hi eṣāṃ mate viṣayaprakāśaḥ, 
tato'tirikta ātmaśabdavācyo nityavyāpidravyaviśeṣaḥ pramāteti | tatrāpi sa 
viṣayaprakāśastāvat tasmādātmadravyādavyatirekeṇa nirbhāsamāno'ṅgī-
kṛtaḥ | kevalaṃ tathānirbhāsane samavāyasya nimittatvamuktam | yathā tu 
raktaśuklaḥ paṭa iti rāgaśauklyānuviddha eva citrapaṭo bhāti, tathaiva jñātā 
ahamātmetipratyaye'pi ghaṭajñānātmanā prakāśena paṭajñānajñānātma-
nā ca prakāśena otaprotasvabhāva eva asāvātmā syāditi vicitraprakāśarūpā-
nuviddha eva ātmā,-iti yuktamavocāma | sa eva jñānaṃ pramātā ceti | nanu 
samavāyaḥ saṃbandhaḥ, sa ca bhedenaiva bhavati saṃyogavadityāśaṅkya satyam, 
kiṃtu ayutasiddhatvāt jñānasya na jātu bhedena avabhāso yukta iti darśayati |

(page 259)

anyathā iti vyāpitvanityatvābhyāṃ tadviparītābhyo vyaktibhyo'tyantabhinna-
yogakṣemā api jātirvyaktitādātmyenaiva avatiṣṭhate nirbhāsate cetyevaṃ bhūto 
yaḥ samavāyasya mahimā, sa kathaṃ guṇaguṇinoratyantamabhinnayogakṣemayor-
bhedena avasthānanirbhāsāvaṅgīkuryādityāśayena jātimatra dṛṣṭāntīkaroti 
nahi ityādinā | dṛṣṭāntasya hetusvarūpaparipoṣakatvena prakṛtaprasādhanāṅga-
tetyāśayena hetutādyotako hiśabdaḥ | yadi jātiḥ svatantrā āsīta bhāseta vā, 
tadā tat dravyameva syāt prakāśeta ca | bhīnneṣu abhinnapratyayajanakatvaṃ hi 
jāterjīvitam | nanu yadi sarvajñaḥ ṣaṭ padārthān viviktānālocayati, tadā jātiṃ 
pṛthaktvenāpi avalokayet, mahāpralaye ca vyaktyabhāve'pi avaśyaṃ jātīḥ 
paśyet nityatvena ca tadāpi tāsāṃ bhāvādityāśaṅkya āha sarvajñasyāpi iti | 
nahi ayathāsvarūpaṃ sarvajñaḥ padārthān paśyati | evaṃ hi sa bhrānta eva 
bhavet | sarvajñatvācca pralaye'pi asāvatītānāgatāḥ sākṣāt vyaktiḥ paśyan 
taduparañjakatvajīvitāmeva jātimavaiti | tadetat arhati ityanena uktam | dṛṣṭāntaṃ 
vyākhyāya dārṣṭāntike yojayati tadvat iti | ahaṃprakāśapratibhāsyo hi 
pramātā ātmā | tadabhedenaiva jñānamucitaprakāśaṃ ghaṭābhedena iva 
śuklastadguṇatvāt | tato hi bhedena prakāśamānaṃ yadi tadguṇaḥ syāt, 
viśvamapi tadguṇaḥ syāditi tadguṇatvamaniyamaprasaṅgena vipakṣāt vyāvṛttaṃ 
sādhyena tadabhedaprakāśena vyāpyate iti svabhāvahetuḥ | evaṃca jñānaṃ 
jñātā ahamityeva ucitābhāsam | idamiti tu avabhāse jñāturbahirbhūtamatad-
guṇarūpaṃ svatantramanyaguṇarūpaṃ vā bhāsamānaṃ jñānameva bhātaṃ 
bhavet | evamahaṃprakāśayogyasya pramāturantarniṣṭhatayaiva jñānasya 
prakāśanaṃ sarvadarśaneṣu uditam |

(page 260)

jñānam iti jñānasya jñānāntaravedyatā na yuktā | nanu mā bhūdidamiti 
jñānasya prakāśaḥ, bhavatu ca ahamiti; kiṃtu yathā sukhī aham, icchāmi 
dveṣmi prayate'hamityādau sukhecchāderātmasamavetatvena ātmasamavetenaiva 
vyatiriktena jñānena prakāśanaṃ, tadvat jñātā ahamiti jñānasyāpi 
jñānāntareṇaiva ekārthasamavāyinā bhaviṣyatītyāśaṅkya dṛṣṭānta eva 
ayamayukta iti hṛdaye gṛhītvā ahaṃprakāśasyaiva rūpaṃ nirūpayati svayam iti | 
ahaṃprakāśamayatvametaducyate-prakāśyatāyāṃ svātantryamananyamukha-
prekṣitvam, anyathā prakāśāntarāvyuparame'navasthānāt na kiṃcit prakāśe-
teti asakṛt nirṇītaṃ

     prakāśasyātmaviśrāntirahaṃbhāvo hi---------| (a. pra. si. 22 kā.)

iti | yasya hi naiyāyikasya sadā parokṣa eva ātmā, tasya tatparokṣavṛttirdharmaḥ 
prakāśeteti | etadetāvat katham | pṛthakprakāśamānaśca kathamayutasiddho 
bhavet | nabhaso'pi anirbhāse śabdasya nirbhāsa iti cet, etadapi katham | tarupavana-
saṃyogāpratyakṣatvaṃ ca kathaṃ syāt | atha ahamitijñāne prakāśate eva ātmā 
| tatrāpi ahamityapi jñānaṃ na svakāśam | tadapi jñānāntaragrāhyam | tattu 
jñānāntaraṃ kena ākāreṇa udetīti cintyam | yadi tāvadidamiti, tadā ātmabahir-
bhāvo'sya syāt | atha ahamiti, tarhi ātmajñānamidaṃ bhavet, na ātmajñāna-
jñānam; anavasthānācca na kiṃcit prakāśeta | jñānasya udayo viṣayasya 
prakāśa ityuktirhi jñānaviṣayayostādātmyaṃ vā ānayet; ghaṭasya udakā-
haraṇaṃ yat, tadeva paṭasaṃbandhi prāvaraṇamityetattulyatayā vā vakturunmatta-
tām | tasmādananyāpekṣaprakāśatvaṃ jñānasya svarūpaṃ tadanyāpekṣa-
prakāśatvena viruddham, tadeva ca jñānāntaragrāhyatvamiti na jñānaṃ 
jñānāntaravedyam |

(page 261)

tadviṣaya iti jñānānāṃ ye viṣayāsteṣāṃ yā vyavasthitayaḥ, tāsāṃ niṣṭhā 
anavasthābhāvena parisamāptiriti yāvat | tadeva iti yadasya jñānasya svarūpaṃ 
viṣayonmukhāhaṃprakāśamānarūpatvam | kimanyat iti anyat hi tadīyaṃ guṇa-
tvādi tāvat na bhāti arthaprakāśamātrasyaiva nirbhāsāt | bhāsamānamapica tad-
rūpādi guṇāntarasādhāraṇajñānarūpatayā naiva nirbhātaṃ syāditi 
jñānaṃ na ābhātaṃ bhavet | etadupasaṃharati tat iti yadetaduktaṃ, tasmāt hetoḥ 
| idamiti prakāśasvātantryarūpādahaṃbhāvāt pṛthakkṛtaṃ sat jñānaṃ yadā 
prakāśate, tadā ahaṃ jñātā viṣayaprakāśamayaḥ ityevaṃbhūtāṃ 
pāryantikīṃ pratipattimadhiśayya prakāśitaṃ bhavati | yathā ayaṃ śuklo guṇaḥ 
paṭāt padārthāntarabhūtastatra paraṃ samavāyena vartate itivikalpe ayaṃ paṭaḥ 
śuklaḥ iti vikalpāntaravyavadhinā guṇasvarūpamāmṛṣṭaṃ bhavati, na sākṣāt; 
tathā mama jñānamidamiti idānīmiti anyasya prakāśabalāt yasya prathate iti 
vyavahriyamāṇatā idantārūpā, tat jaḍam; svaprakāśatābalāt yasya ahantā-
rūpā, tadajaḍamiti | itthaṃca yadi parādhīnaprakāśaṃ prakāśyaṃ ceti jaḍa-
lakṣaṇam, tadastu; anyena tu prakāreṇa prakāśabhinnatvena idantā, tadabhinna-
tvena ahanteti jaḍājaḍatvamiti tyaktvā yat prakāśyaṃ, tat jaḍamityukte kiṃ tasya 
prakāśyatvam | jñānasya udaya ityukte tasya na kiṃcit svarūpamuktaṃ bhavet | 
evaṃca jaḍalakṣaṇena ayuktamiti ajaḍaṃ nīlādi syāt | uktam iti bhavataiva | 
pūrvapakṣe evamasaṃbhavāt na lakṣaṇamativyāptiśca atreti hṛdaye gṛhītvā 
bhaṅgyantareṇa jaḍājaḍalakṣaṇasya avirodhāpādanena jaḍājaḍayor-
avyavasthāṃ darśayati ataśca iti | na kevalaṃ svarūpāsvarūpāsparśanāt, 
yāvadabhyupagate'pi svarūpasparśitve |

(page 262)

itaśca avirodhāt jaḍājaḍalakṣaṇayoḥ prasaktāt jaḍamapi ajaḍaṃ syāt | avirodha-
meva apiśabdadvayena dyotayati | adya iti asmaduktāyāṃ vyavasthāyām | artha-
svarūpam iti idantayā artha eva pravṛttiprāptiniyojanādinā bhāsamānatayā 
vyavahriyate, ahaṃtayā tu svaprakāśarūpaṃ jñātṛjñānarūpam | prakāśācca 
yau bhedābhedau, tāvanyonyavirudhau svavyāptayorjaḍājaḍayorvirodhaṃ 
vidadhānāvanyonyasaṃsparśākṣamatvena pravibhaktaṃ rūpaṃ tayorvyavasthā-
payataḥ | tadāha suvyavasthitaḥ iti suṣṭhu vyavasthito niyata ityarthaḥ | iyatā na 
kiṃcit jñānaṃ jñānāntaravedyaṃ bhavatīti upapāditam | adhunā yadi kaścid-
ācakṣīta-mā bhūdanyatra jñānānāmanyonyavedyavedakatā, smṛtau tu sā 
anubhavaviṣiṣṭārthanirbhāsanāyāṃ kathamavajñāyate-iti, taṃ prati pratyuta 
jñānasya vedyatve jñānaviṣayaṃ jñānaviśiṣṭārthaviṣayaṃ vā 
anubhavāntarameva bhavet, na smṛtiriti hṛdaye gṛhītvā smaraṇajñānena asya 
anubhavajñānaṃ vedyaṃ na bhavati,-iti prakṛtaṃ ghaṭayati pūrvānubhūtasya 
ca iti | cakāro yuktisamuccaye | na kevalaṃ pūrvoktayuktibhirjñānasya 
jñānāntaravedyatvaṃ nāstītyetāvataiva smaraṇajñānena pūrvānubhavasya 
viṣayīkāro niṣidhyate, yāvat yuktyantareṇa api | tathāhi ghaṭaṃ smarāmīti 
jñāne ghaṭasyaiva viṣayatayā pratibhāsaḥ, na pūrvānubhavasya | sa kevalaṃ 
smaraṇajñānenaiva saha milito bhāti | anyathā tasya pṛthagavabhāse smaraṇaṃ 
ghaṭena saviṣayaṃ na bhavet yogina iva paracittajñānaṃ paracittaviṣayena | 
yadāha

     naca sālambanaṃ tasyāviṣayībhūtatvāt |

iti | nanu ghaṭamanubhūtamanubhavāmīti smaraṇasya vapuḥ, tatra 
anubhūtatvamarthasya viśeṣaṇaṃ na smaraṇena aikyamāpadyate | ucyate |

(page 263)

eṣā khalu smaryamāṇadṛśyamānānusandhirūpā pratyabhijñā, natu śuddhaṃ 
smaraṇam | tatra tu anubhūtamiti yadullikhyate bhūtatvamanubhavasya, idameva 
smaraṇasya prātisvikaṃ vapuḥ | tatrāpi bhūtatā viṣayopādhisaṃkocakalpitā 
anubhavadaśāyogena svayaṃvartamānatve'pi | anubhūtaṃ smarāmītyapi 
pratipattāvanubhūtamityasyaiva spaṣṭīkaraṇaṃ smarāmīti, natu atikrāntānu-
bhūtatāsmaraṇāt sadā vartamāno hi bodhaḥ prācyena jñānena udriktāvasthena 
upalakṣitaḥ smaraṇamiti ucyate | tadāha anubhavaikyāpannam iti | kevalaṃ 
saugatena etat kathaṃcit sāmarthyate anubhavena svasaṃtatau vāsanātmaka-
śaktyādhāradvāreṇa, naiyāyikena api ātmani saṃskārādhānadvāreṇa, natu 
smaraṇena | anubhavo jñāyate iti tayordarśanam | evaṃ hi pūrvajñānajñāna-
rūpamanubhavāntarameva bhavet, natu smaraṇam | cirātītasya ca jñānasya 
niḥsvabhāvasya kathamarthaprakāśarūpatā | naśyadavasthaṃ ca jñānaṃ 
jñānena jñāyatāṃ nāma ekārthasamavāyāt, ayogī tu ciranaṣṭamadhunā 
vettīti kā saṃbhāvanā | na jānāti, apitu smaratīti cet, tarhi jñānajñānaṃ 
jānātīti āyātaṃ syāt | tatrāpica ayameva doṣaḥ,-iti yuktamuktam | natu 
antarālavarti iti | smaraṇasya viṣayasya ca antarāle madhye bhavannanubhavo 
viṣayaṃ prakāśayan smaraṇena prakāśamānaḥ samaraṇasya taṃ viṣayam-
arpayatīti na yuktamitthamananubhavāt | etadeva ca yuktam-yat smaraṇavigrahapatita 
eva viṣayaprakāśātmā anubhavaḥ | tathāhi smṛtiranubhavaṃ prakāśayati taṃ 
yo viṣayaṃ prakāśayatīti upagame viṣayasya yā prakāśanā, sā viṣayaniṣṭhā 
tāvat na bhavati prakaṭatāvādasya dūṣitatvāt; apitu iyameva tasya prakāśanā 
yā tadviṣayo'nubhavaḥ | saca yadi na svayaṃ prakāśate, na kiṃcit prakāśeta |

(page 264)

atha ucyate tasya prakāśanā smaraṇena tathāhi anubhavasya prakāśyasya na 
dharmo viṣayasyaiva, kintu smaraṇameva tasya anubhavasya prakāśanā abhavaditi 
viṣayakakṣyāpatito'sāvanubhavo jaḍākāraḥ prakāśabhinnaḥ kathaṃ 
mārgasya prakāśo bhavediti ghaṭaṃ smarāmīti andhapadaṃ paryavasyet | 
tadetadāha sā iti viṣayaprakāśarūpatā na syāt pūrvānubhavasya idantayā 
prakāśamānatvena jaḍasya | anyatra smaraṇajñāne tanmukhastadadhīnaprakāśo 
hi asāvanubhavaḥ | evamidantā nāma prakāśyatvaṃ prakāśāt bhinnatvaṃ 
jaḍasvarūpamiti sthāpite svapakṣaprakopaṃ śaṅkamāna āha evaṃca iti | anena 
jaḍājaḍalakṣaṇavibhāgena ahamidamitiprakāśa īśvarātmā | tatra jaḍājaḍayoḥ 
kathamekatvamiti | tatra ucyate-iha idamityapi bhāsamāne prakāśaparamārthataiva 
rūpamanyathā aprakāśayoge idantāyā api andhatamasatvāt | kevalaṃ māyā-
śaktyā prakāśābhinne'pi prakāśabhinnatvābhimāna iti yathocitamātṛmeya-
sṛṣṭiprabhāvita iti jaḍatā ucyate | īśvaradaśā ca prakāśabhinnatvābhimāna-
viṣayā ye paśupramātṝṇām, te'rthāḥ paramārthataḥ prakāśātmāna iti 
parāmarśarūpā | tat paśupramātrapekṣayā te jaḍāḥ santu nāma, paśu-
pramātṛrūpasyāpitu prakāśabhāgasya vastuta aiśvaraprakāśāvyatireka iti 
tadanusāreṇa idamityasya rūpasya vidyunnyāyena unmiṣato'pi prarohābhāvād-
ahaṃbhāve eva viśrāntiriti sāmānādhikaraṇyamahantedantayorucyate | evaṃca 
anūdyamānā iyamidantā prathamaṃ yadyapi bhāti, tathāpi anubhavādasya 
svaviśrāntyayogyatvena vidhīyamānāhantānudhāvanenaiva kṛtitvamiti ahaṃ-
mātrataiva | tadāca iti īśvaradaśāyām | nādhikyam iti idantā nāma tatra na 
adhikā prakāśasya ahantātmanaḥ | svātantryamahimaiva hi vastuta idantā |

(page 265)

tadatra parasya svaprasiddhenaiva dṛṣṭāntena mohamapohati yathāhi iti | eṣa 
bhaṅgyā dṛṣṭānta eka eva sādharmyavaidharmyābhyāṃ granthakāreṇa uktaḥ | 
yathā rūpaṃ saṃniveśasya udaye bhraṃśe ca rūpameva tathātadityupagamāt, 
evaṃ bodho viśvasya udayapralayayorbodha eva; na asya atiśaya ādhikyamiti 
sādharmyadṛṣṭāntaḥ | rūpe tu kṣaṇikatvāt tathā tatheti kaścit yo'tiśayo-
'ṅgīkṛtaḥ, sa bodhe na upapadyate | bodhasya ekarūpatvāt viśeṣaleśo na yujyate 
iti hi uktam | yat nareśvaravivekaḥ

     nīlādikoparāgeṇa na prathaiva viśiṣyate |
     aviśiṣṭaprathārūpopagamātsarvavādinām ||

iti | etacca vitatya vakṣyate ityāha tadāstām iti | asya prameyasya audāsīnyaṃ 
prāptakālamiti yāvat | yathā rūpasya na saṃniveśo'rthāntaram, evaṃ bodha-
rūpe'pi naiva kaścidatiśayaḥ saṃbhavatīti sādharmye yojanā | turevakārārthe 
atra, vaidharmye tu viśeṣadyotakaḥ | yathā rūpasya viśiṣṭatā syāt, evaṃ 
bodharūpe'pi viśiṣṭatātmā atiśayaḥ śaṅkyate; satu naiva astīti vaidharmye 
yojanā | hīti yasmādevaṃ, tadīśvaradaśāyāṃ bodharūpatāyā na ādhikyaṃ 
kiṃciditi saṃbandhaḥ | prakṛtalakṣaṇavibhāgasya hetumupasaṃharati siddhaṃ 
tāvat iti | parasaṃvedyatā bodhasya iti parasaṃvedyatā bodhasya niṣedhyā 
svasaṃvidrupatvena hetunā | tat hi niṣedhyasya vyāpikā yā idantā, tadviruddhayā 
ahantayā vyāptam | ahantaiva hi saṃvido lakṣaṇam | tena vyāpakaviruddhavyāpte-
na svasaṃdrūpatvena parasaṃvedyatvaṃ niṣidhyate | atra hi svasaṃvidrūpatvaṃ 
jñānasya pareṇa aṅgīkṛtaṃ, kevalaṃ tathābhāve'pi parasaṃvedyatvamicchati | 
sahi-svātmanā saṃvidrūpatā paraprakāśā parasaṃvedyatvaṃ tu tadviṣaya-
jñānāntarodayaḥ,

(page 266)

 tadanayoḥ ko virodhaḥ-ityāha sma ko hi virodhaḥ ityādinā | tasya idānīṃ 
virodhapratipādanena mohaḥ śamitaḥ | parasaṃvedyatāyā hi lakṣaṇaṃ prakāśa-
bhinnatvaṃ jaḍatvamidantā, saṃvidrūpāyāstu svasaṃdrūpatāyāḥ prakāśa-
tādātmyamajaḍatvamahantā,-iti lakṣaṇadvāreṇa tayorvirodha eveti parasaṃvedya-
tā svasaṃvidrūpatvena niṣidhyate | sā hi hetoḥ svasaṃvidrūpatvasya yat 
vyāpakamahamiti rūpaṃ, tasya yat viruddhamidamiti prakāśabhinnatvaṃ; tena 
vyāptā tallakṣaṇiketi | yaśca vidhau svabhāvahetuḥ, sa eva tadviparyaye niṣedhye 
viruddhopalabdhirūpo'nupalabdhiheturbhavatīti darśayati yathā iti | anityatve 
kṣaṇikatve sādhye kramikārthakriyākāritvalakṣaṇaṃ yat sattvaṃ tat svabhāva-
hetuḥ, nityatve tu niṣedhye vyāpakaviruddhavyāptopalabdhiḥ | nityasya lakṣaṇaṃ 
vyāpako dharma ekasvabhāvatvaṃ nāma, tadvirūddhaṃ ca bhinnasvabhāvatvaṃ; 
tadeva vyāpakaṃ lakṣaṇaṃ kramikārthakriyākāritvasya | krameṇa arthakriyāṃ 
karotīti hi bhāṣitasya ayaṃ paramārthaḥ-nānāsvabhāvo'yamiti na avṛkṣo'yaṃ 
śiṃśipātvādityatrāpi avṛkṣatvasya vyāpakaṃ yat lakṣaṇamaśākhādi-
mattvaṃ, tadvirūddhena śākhādimattvena śiṃśipātvaṃ vyāptamiti vyāpaka-
viruddhavyāptopalabdhireva | atha lakṣaṇātmā yo vyāpako dharmaḥ, sa na pṛthag-
vyāvṛttyā samākṛṣyate pṛthagākarṣaṇasya parapratyāyanaphalasya prasiddhe 
viṣaye niṣprayojanatvāt; tadā avṛkṣatvaviruddhena vṛkṣatvena śiṃśipātvaṃ 
vyāptamiti viruddhavyāptopalabdhirbhavati | yadā tu śiṃśiṃpāyāmapi 
vṛkṣatvaṃ na pṛthak kriyate prasiddhatvāt, kevalaṃ bhrāntyā āropitaṃ 
yadavṛkṣatvaṃ, tadapasāryate; tadā svabhāvaviruddhopalabdhireva bhavati | 
prakṛte'pi parasaṃvedyatvamidanteti ekaṃ tattvaṃ cet, tadviruddhavyāptopalabdhiḥ 
| ahantā svasaṃvidrūpatvamityapi cedekaṃ tattvaṃ, tat svabhāvaviruddho-
palabdhireva |

(page 267)

iha tu parasaṃvedyatāsvasaṃvedyate parasya lakṣaṇato na tattvataḥ siddhe | tata eva 
hi sa tayoravirodhamabhimanute ityāśayena lakṣaṇāt sa vyāpako dharmastayoḥ 
pṛthakkṛtya pradarśita iti vyāpakaviruddhavyāptopalabdhirvivṛtikṛtā darśitā | na 
anagnirdhūmādityapi viruddhakāryopalabdhireva bhavatīti | evaṃ tatra tatra 
avadhātavyamiti alamavāntareṇa | evamajaḍe parasaṃvedyatāmapākṛtya para-
saṃvedye'pi svasaṃvidrūpatā nāstīti darśayati ghaṭasyāpi iti | yadyapi 
ghaṭasya svasaṃvidrūpatvaṃ na kenacidupagatam, tathāpi virodhasphuṭīkaraṇāya 
idamuktam | yathārthadharmaprakaṭatāvādinastat balāt prasajyate, naca yuktaṃ 
virodhādityetadanena darśayati | anayaiva iti saiva iyamanupalabdhijātirityarthaḥ | 
svasaṃvidrūpatvasya niṣedhyasya vyāpakamahamiti | tadviruddhamidamiti, tena 
vyāptaṃ parasaṃvedyatvamiti | etadupasaṃharati tadevam iti | aśeṣamapi viśvaṃ 
yadi krameṇa yadivā yugapadapi saṃvedyate, tathāpi vartamānamekaṃ jñānaṃ 
svaviṣayamātrameva gṛhṇāti; natu kasyacit viṣayasya jñānāntarasvīkṛtatāṃ 
vetti | jñānaṃ hi na jñānāntareṇa jñāyate jaḍatāpatteḥ | jñānāntara-
svīkṛtatve ca ajñātā iyaṃ mayā pūrvaṃ duḥkharūpā, arthakriyāsādhano 
niścito'yaṃ sukhasādhana iti saṃvedanābhāvāt bhūtagrasta iva na tasmin dṛṣṭe 
titikṣopāditsātmikāmicchārūpāmarthitāṃ bhajet | tadabhāve tyajāmi-gṛhṇā-
mītiprayatnopakramaḥ kāyaspandamadhyastattyāgādānarūpaprāptyanto 
vyavahāro na syādicchādveṣayoḥ smṛtipūrvakatvāt tadabhāve'nutpattestat-
pūrvakaparyatnābhāve prayatnajaśarīrakarmāsaṃbhave tatkṛtārthasaṃyoga-
vibhāgādyasaṃpatteriti sadyojātanālikīradvīpavāsibhiriva pramātṛbhiḥ sthīyeta 
| teṣāmapivā asti anusandhānādi kiṃciditi tebhyo'pi śocyāḥ pramātāro na 
pramātāraḥ syuḥ |

(page 268)

iyatā sūtraṃ vyākhyātam | jñānānāṃ yadekamanusandhānaviṣaye melanaṃ, 
tato janma yasyāḥ sā janasthitistyāgopādānādivyavahāro naśyediti | vṛttirapi-
jñānānāṃ yat parasparaṃ viṣayeṣu saṃghaṭṭanaṃ, tat yathā vikalpajñānam-
anubhavasya viṣaye-idaṃ dṛṣṭaṃ vikalpayāmīti, so'pi vikalpajñānasya-yadeva 
anumānena vikalpitaṃ, tadeva paśyāmītyādau, ubhayasyāpi smṛtiḥ, tasyā api 
pratyabhijñānamityādibahuprakāram, tadeva prakṛtaṃ mūlakāraṇaṃ yasya 
lokavyavahārasya sa tasmin saṃghaṭṭanātmani mūlanidāne niraste kena 
prakāreṇa bhavet | saṃskārādinā kevalena tasya na saṃpattiriti hi bhaṇitameva | 
vṛttauca iti jñānānām ityeva ṣaṣṭhī vṛttau prayuktā teṣām iti | 
parāmarśena sūtre anusandhānasya nityasāpekṣatvāt samāsaḥ, anyathā caitrasya 
citrā gāvo'syetivat na syāt | anusandhānaṃ tu nityasāpekṣaṃ sakarmakatvād-
asyāḥ kriyāyāḥ | vṛttau viṣayasaṃghaṭṭanāyāḥ prādhānyāt teṣām itya-
pekṣaṇe'pi samāsasya yadyapi na virodhaḥ, tathāpi viṣayārthasya apradhānasya 
teṣāmityapekṣaṇe samāsābhāvaḥ prāpnoti, sa viṣayasya nityasāpekṣatvaṃ 
viṣayāpekṣaṇāditi parihṛtaḥ | samāsena ca atra taddhitavṛttirapi upalakṣyate | nahi 
bhavati dhānyānāmapūpamayī yātreti | iha tu viṣayasaṃghaṭṭanā 
viṣayadvāreṇa nityasāpekṣeti bhavatyeva dhanasya arjanasamaye ityādivat | nanu 
vyavahāro'yaṃ mūḍhānāṃ viplavamātramavicāritaramaṇīyam | kā tatra 
tattvaparīkṣā | asadetat viplavena vyavahāraniyamānupapatteḥ | kiñcideva hi ayaṃ 
jahāti, kiñcideva ca upādatte | tat niyatanidānābhāve kutastyo niyamaḥ | astuvā 
mūḍhavyavahāro viplavaḥ, yastu amūḍhānāṃ vyavahāraḥ, sa kathaṃ 
samarthyeteti darśayati vṛttikṛt paramārtha ityādi |

(page 269)

etat vyācaṣṭe viditavedyairapi iti | tattvam iti natu lokavyavahāraḥ | ayameva 
kramaḥ iti anubhūtānusandhānādiḥ | kuta iti cet, āha te'pi hi iti | na kevalaṃ 
mūḍhā evaṃ, yāvat te'pi,-iti apiśabdaḥ | viditapūrvam iti anubhavaṃ 
darśayati | evamayam iti smaraṇānusandhānapūrvakaṃ vikalpanam | śiṣye-
bhyo'pi iti avatāraṇīyebhya iti yāvat | yadivā na kevalaṃ śāstrakaraṇātmani 
upadeśe'yaṃ kramaḥ, yāvat saṃnihitāntevāsisaṃkramaṇopadeśāvasare'pīti 
apiśabdaḥ | etaduktaṃ bhavati-asarvajñastāvat tattvamāgamānumānayogi-
pratyakṣādinā svātmani prasiddhaṃ śāstre nibandhan parasmai vā nirūpayan 
smṛtvā smṛtvā vikalpya nirūpayediti tāvat sthitam | yo'pi sarvajño viśvaṃ 
sākṣāt paśyati, so'pi śiṣyamupasaṃkrāntabodhaṃ cikīrṣurūpadidikṣuḥ 
śāstraṃ vā cikīrṣuḥ śabdopārohayogyatāṃ śiṣyajanabhāvanā yogyatāṃ ca 
sākṣātkriyamāṇasya svalakṣaṇasya paśyan tasmāt sākṣātkārātmakāt 
sārvajñyāt svātantryarasena karuṇārasena vā vyutthāya ayamiti sākṣātkṛtam-
api arthamevamiti vikalpanena anusandhāya upadiśet | vikalpanaṃ ca pūrvadṛṣṭa-
tāsamullekhena śabdādyanusmaraṇaprāṇatayā ca bhavatīti | so'pi tadānīṃ 
pūrvāparajñānamelanāṃ vinā kathamupadiśet | yathoktaṃ bhavadbhireva
     
tathatāvyutthito buddhastathatāmupadekṣyati |

iti | āgameṣu api

     puṃsāmanugrahārthāya paro'pyaparatāṃ gataḥ |

iti | tathā

     yathā prakṣyanti te śiṣyāstathā sthāsyati śaṅkaraḥ |

ityādi ca | 

(page 270)

teṣāmapi iti prabudhānām | lokayātrā iti paroddhāraṇādikā | svātma iti 
svaviṣayaprakāśatāyāmātmamātraprakāśatāyāṃ ca 
viśrāntairvartamānairevetyarthaḥ | sarve eva iti prabuddhāśca aprabuddhāśca | 
niḥstimitāḥ iti bhūtagrastaprāyāḥ | nahi sarvajño'pi bhūtagrasta iva āste 
tasyāpi vikalpayitumaśaktāvasvātantryāpatterjaḍatāprasaṅgāt | ata eva parama-
śivasya api bhagavataḥ śaktyupakramaṃ layabhogādhikāraiḥ sadāśiveśvara-
vidyeśvarādikrameṇa māyāpramātṛparyantatayā prakāśanameva vikalpanavyā-
pārarūpamiti niḥstimitatvaṃ jāḍyameva | niḥstimitatvavipakṣa eva hi vimarśaḥ 
sphurattāspandādivyapadeśyo bhagavataḥ śaktiviśeṣo yannyūnatātāratamya-
kṛtaṃ sthāvarāntaṃ jaḍatvam, yadutkarṣatāratamyakṛtaṃ ca bhagavatparama-
śivāntaṃ prabuddhatvamiti vakṣyāmaḥ

     sā sphurattā------------| (1 | 5 | 14)

ityādau | nanu ayamupadeśo'pi viplavatvāt pāramārthikaṃ viṣayaṃ naiva 
spṛśatīti śaṅkitvā āha paramārthopadeśasyāpi iti | laukikasya vyavahārasya 
astu tāvat viplavatā; asyāpitu viplavatve yaḥ paramārtha upadiṣṭo bhāvitaśca, 
tasya paramārthaḥ pūrvaprakāśitaparamārtharūpatvābhāve paramārtho-
'spṛṣṭa eva kathaṃ prāpyeta | mithyāparamārthopadeśapūrvikā hi bhāvanā 
mithyāparamārtha eva kṛtā tameva sphuṭīkuryāt

     ------------yadyadevātibhāvyate |

iti nyāyāt; atha satyaparamārthameva sphuṭīkaroti prācyānubhavaviṣayīkṛtaṃ, 
tato na viplavatā | evaṃca saṃvedanānāṃ viṣayamelanamāyātamiti ākū-
tāntaram | nanu kimatra viṣayamelanena | yathāhi bījādādyātiśayādikrameṇa 
antyātiśayaṃ prāptādaṅkuro mṛdaśca ghaṭa ityādirvicitraḥ kāryakāraṇa-
bhāvo loke prasidhaḥ;

(page 271)

naca tatra viṣayamelanaṃ kiṃcidupayujyate samarthyate vā; tathaiva pūrvam-
anubhavaḥ, tato vikalpaḥ, tata upadeśanam, tato bhāvanābhiyogaḥ, tato 
bhāvanāniṣpattiḥ, tataḥ parisphuṭā bhavati jñānodaye iyameva paramārtha-
prāptiriti | kimatra viṣayamelanasamarthanāprayāsenetyāśaṅkya brūte nacedam 
iti | kāryakāraṇabhāvo'yaṃ bhavati, natu bījāṅkurādijaḍatulyavṛttānta iti 
mātrapadam | ayaṃ bhāvaḥ-iha kāryakāraṇabhāvamātreṇa 
anubhavavikalpādīnāṃ jaḍatulyavṛttāntatve svarūpamātraniṣṭhatvena paratra 
akiñcitkaratvāt viṣayasya sākṣātkaraṇaṃ vikalpanaṃ smaraṇamityādayo 
viṣayaniṣṭhāprakāśanavimarśanaparamārthā vyāpārātmāno vyavahārāḥ 
kathaṃ bhaveyuḥ, adhyātmasiddhāśca amī na apahnotuṃ śakyāḥ | ete ca 
ekaviṣayatayā vinā kathaṃ prakalpyeran | dṛṣṭaṃ vikalpayāmi smarāmīti hi 
teṣāṃ prāṇitam | tasyāśca asamarthanīyatāyāṃ vikalpāḥ pratyakṣāyante, 
anubhavaḥ smṛtibījamādhatte svapratibhāse'narthe'rthādhyavasāyenetyādi 
kimarthamuddhoṣyate | taddhi ekaviṣayatāyāḥ saṃpattaye jālamutthāpyate | sā tu 
tāvatā na sidhyatītyetāvadasmābhirucyate iti | etadāha pratītireṣā iti anubhava-
vikalpanopadidikṣopadeśabhāvanādirūpaṃ yadupadeśanaṃ, tat kila pratīti-
viṣayaniṣṭhaṃ saṃvedanam; natu bījādijaḍavat svaniṣṭhaṃ kiṃcidrūpam | tataḥ 
kimiti | āha pratītiśca iti | bhūtaṃ yat paramārthajñānamupadeṣṭurajñato-
padeśe vitārakatvādupadeṣṭṭatāyogāt bhaviṣyacca yat paramārthajñānaṃ 
sphuṭaṃ phalarūpaṃ bhāvayitustayorjñānayoryo viṣayaḥ, sa eva yadi smaraṇa-
vikalpanopadidikṣopadeśavikalpanabhāvanāparamparāṇāṃ na bhavet; tarhi anyat 
jñātamanyat vikalpitamanyadupadiṣṭamanyat bhāvitamanyat prāptamiti bhavet | 
naca etat samañjasaṃ

(page 272)

     ------------------------------------yadyadevātibhāvyate |
     bhāvanāpariniṣpattau tatsphuṭaṃ kalpadhīphalam ||

iti yattadbhyāmekaviṣayatvasya darśitatvāt | pramāṇādapi hi pravṛttiprāptyā-
dikamekaviṣayatayaiva saṃtānāśayena nirvāhyate, anyathā pramāṇāpramāṇa-
vibhāgāyogaḥ | tadetat sarvaṃ nigamayati tasmāt iti | ayamiti prabuddhāpra-
buddhaniṣṭho vyavahāro'nyonyaṃ viṣayāṇāṃ prāpaṇaṃ, jñānāntaragatasya 
hi viṣayasya jñānāntare smṛtyādau pramātrantaraviṣayasya ca pramātrantare 
niyogopadeśādau prāpaṇaṃ svātmani paramātmani ca vyavahāra ucyate | vyaveti 
vyatihāre, haratiḥ prāpaṇe | sa vyavahāra ekaviṣayatvena vyāptaḥ | tadviruddhā 
anekaviṣayatā | anekātmatve ca jñānānāṃ sā vyāpikā prasajyate | prakāra-
trayeṇa hi tadupapadyate | prakāradvayaṃ ca dūṣitam | nahi dṛṣṭatā viṣaya-
dharmaḥ | yadāha bhaṭṭaḥ

     vyāpṛttiḥ pratyayasyārthe tatra kiṃcidakurvataḥ |

iti | pratipadyate iti | pratipattireva kathaṃcidbhāva uktaḥ syāt, natu arthasya 
rūpātiśayo nirvartyate | tathātve anyendriyādivyāpāramanyasya na pratītaye-
'pekṣeta, yathā kṛto na punaranyasya karaṇamityādi ca | tat viṣayadharmatā na 
yuktā | vedyatā ca saṃvidāṃ nirastā | yadi ca ayamavaśiṣyamāṇo'pi prakāro 
na syāt jñānānāmekātmakatālakṣaṇaḥ, tadayaṃ vyavahāro vyāpakaviruddha-
vyāptopalabdhyā na bhavedeva | naśyet iti sūtrasya vṛttiḥ katham iti vivṛtā na 
syādeva iti saṃbhāvanāliṅā | kathamitica praśnena anapahnavanīyatāṃ 
vyavahārasya bruvāṇaḥ pāriśeṣyāta siddhaiva jñānānāmekā antarmukha-
saṃvittattvasvarūpatetyāha | ata eva samanantaralagnatayaiva na cet iti sūtrārtho-
'tra sphurati || 6 ||

(page 273)

     na cedantaḥkṛtānantaviśvarūpo maheśvaraḥ |
     syādekaścidvapurjñānasmṛtyapohanaśaktimān || 7 ||

tasya ca vyavahārabalādanapahnavanīyāt sidhyati ekātmateti tātparyaṃ 
niṣedhamukhenāpi pravṛttau | etadartha eva hi yadyarthaścecchabdaḥ | sahi 
svamatasya dārḍhyamāha parapakṣe'napahnavanīyasyāpi avaśyamāpatati 
saṃbhava iti dyotayan | tadetattātparyamavatāraṇikāyāmāha yujyeta iti 
hetuhetumatorliṅā | vyavahārasaṃbhavasya jñānānāmekātmatā heturiti | 
etādṛśaḥ iti prabuddhāprabuddhaniṣṭha ekaviṣayatāmaya ityarthaḥ | cinmātra-
sāratvena iti cidvapuḥ ityasya vyākhyā viśvātmanaḥ iti antaḥ kṛta ityādeḥ 
parameśvarasya iti maheśvaraḥ ityasya | ātmā iti svabhāvaḥ | etāḥ iti sarva-
janaprasiddhāḥ | vicitrāḥ iti tattatsvātantryabalāt vicitronmeṣanimeṣabhājaḥ | 
śaktayaḥ iti tadāśritāḥ, natu svatantrāḥ, nāpi tatsvarūpātiriktā dharmadharmi-
bhāvena paraṃ vartamānā ityāha śaktiyogalakṣaṇaṃ ca iti | etadeva asya 
māheśvaryam | anena jñāna ityādi vyākhyātam | evaṃ tātparyaṃ vyākhyāya 
na cet iti sautraṃ spṛśati anyathā tu iti | prakāśarūpaṃ tāvat saṃvittattvaṃ 
sakalapramābhittibhūtaṃ svayaṃ siddhaṃ, na sādhyamiti tadbhittipṛṣṭhe anyat 
nirūpyamityāśayena vṛttikṛt tadanuvādena viśvarūpatvaṃ sautraṃ vyācaṣṭe iti 
ṭīkākāro vivṛṇoti prakāśarūpam iti | hi iti yasmādevaṃ, tasmāt vṛttikāra 
idaṃ vidhyanuvādarūpamāha | tatra ca upapattimāha iti dūreṇa saṃgatiḥ | 
etāvatā ādisiddhasūtrārthaḥ smāritaḥ | nīlasukhādeḥ iti bāhyasya āntarasya 
ca sarvasyeti yāvat | jaḍābhimatasya iti paramārthataścidrūpasya api cicchakter-
eva māyātmikāyā abhimānamātreṇa gṛhītajaḍabhāvasyetyarthaḥ |

(page 274)

svayam iti jaḍasya hi lakṣaṇamuktaṃ-na asya ātmīyaḥ prakāśaḥ iti | tarhi 
paro'sya prakāśo bhaviṣyati | netyāha atadrūpatve ca iti | yasya yat na rūpaṃ, sa 
tena na samānādhikaraṇatayā paramārthato vyapadiśyate nīlena iva sindūram | 
tathāca aprakāśātmā bhāva iti prakāśena tathā na vyapadiśyeta, tattad-
vyapadeśasya niyamavattvāt tādrūpyaṃ kāraṇamiti kāraṇānupalabdhiḥ | 
vyapadiśyate ca ekādhikaraṇatayā prakāśena parābhimato jaḍaḥ prakāśate iti, 
tasmāt tadrūpa eveti svabhāvaheturvyāptiḥ kāraṇānupalabdhyā adhunaiva 
prasādhitā yataḥ | nanu ca vyatiriktena śvetaguṇena dharmī tathā vyapadiśyate,-
ityanena anaikāntiko hetuḥ | maivaṃ vipakṣato bādhakena ākṛṣṭasya hetoḥ 
sādhyena vyāptisiddhau vyabhicārasya niravakāśatvāt | nahi vyatiriktena śveta-
guṇena śvetamānatā yuktā | yat nareśvaravivekaḥ

     svayaṃ prāsādo na śveto nāpyaśveta-------|

iti aprāmāṇikoktiḥ | nahi vastudharmayoranyonyaparihāreṇa avasthitayoranyatareṇa 
ayuktaṃ vastu saṃbhavediti | upapādayiṣyate iti

     prakāśātmā prakāśyo'rtha-------| (1 | 5 | 3)

ityādisthāneṣu | nanu ca iha jñānānāmeka ātmā,-iti samarthayituṃ 
prakrāntaṃ, tat kiṃ jaḍānāmapi tadekātmatābhidhānenetyāśaṅkya āha 
bhinnāvabhāsinām iti | caḥ uktāśaṅkāsūcakaḥ | apiśabdo daṇḍāpūpīya-
nyāyena prakrāntaprameyasiddhidyotakaḥ | yatra bhinnā api abhimananātmaka-
svātantryavimarśabalāt pratibhānta idantayā parigṛhyamāṇatvāt paramārthato-
'hamitiprakāśamātrasvarūpāḥ,

(page 275)

tatra jñānānāmahamaṃśātirekeṇa nirbhāsamānānāṃ kathaṃ tādrūpyaṃ 
na bhaviṣyati | teṣāṃ hi ahamaṃśādādhikyamavyāpakatvamanityatvaṃ ca 
viṣayasvarūpadeśakālānuvartitvena saṃkucitatayā yat bhāti, tat hi viṣayaun-
mukhyopādhikṛtam | viṣayasyāpitu prakāśātmakatve sā ādhikyasaṃbhāvanāpi 
nirmūlitā bhavati | tadetadāha tathāpi iti tenāpi ahamaṃśāvyatirekaprakāreṇa 
vartamānānāmityarthaḥ | viṣayasya yo māyāśaktikṛtādabhimānamātrāt 
bhedaḥ, tena avakalpito'vajñayā aprarohayogena kalpitaḥ svāchandyena uparacito 
yo bhedaḥ, tadvatāmeṣāṃ jñānānāṃ māyādaśāyāmapi asyāṃ 
pāramārthikaṃ prakāśātmakāhantātādrūpyamakhaṇḍitameva | māyā hi 
bhagavataḥ śaktiḥ | sā na asya svarūpamāvṛṇute śaktyā śaktimatāmanā-
varaṇāt | evaṃ prakṛtaprameyasiddhiprasaṅgena uktamapi etadadadhikaraṇa-
siddhāntadiśā sādhyāntaramapi vyavahārānyathānupapattyā sidhyatīti | 
evakāreṇa prakāśamānatayā vinā tāvat vyavahārā na upapadyante, sāca 
cittattvasyaiva, na anyasyeti dyotayatā svatantracidadvaitamapi sidhyediti 
samastaśāstrārthasiddhiriyataiva ayatnaghaṭiteti vṛttikṛdāha | ityatā antaḥkṛtā-
nantaviśvarūpaścidvapurjñānādiśaktimān iti sūtrāṃśaḥ kṛtopakṣepaḥ 
| antaḥ kṛtaṃ bahīrūpamapi sat pramātṛrūpasvātmaikarūpatvāt manāgapi 
acyutaṃ svācchandyaśaktyā kṛtaṃ saṃpāditam, antaritica pramātrekātma-
katayā sthitaṃ sat kṛtaṃ bahīrūpatābhāsanena nirmitamanantaṃ catuḥṣaṭ-
ṣoḍaśacaturviṃśatiṣaṭtriṃśadādiparigaṇitarūpādabhyadhikamapi

     tasya tenātha-------------|

iti nyāyena saṃbhāvyamānaṃ viśvaṃ rūpaṃ viśati asmin sarvamiti vedya-
samūho yena |

(page 276)

na cet iti tu sautraṃ vṛttikṛtā pūrvameva vyākhyātaṃ katham iti | anena ca anya-
sūtrārthasparśena vṛttikṛtā naśyet na cet iti sūtrāṃśayorekavākyatvena 
nirvāho hetumalliṅā uktaḥ iti sphuṭīkṛtam | nanu pūrvamuktamanusandhāna-
janmā janasthitiḥ, tadiha vaktavyaṃ na cedanusandhānaṃ syāditi, tat kathamuktaṃ 
cidvapurityāśaṅkya vṛttikṛdāha aśeṣapadārthajñānānāmanyonyānu-
sandhānaṃ cittattvam iti | sāmānādhikaraṇyena anugāmitvena sandhānaṃ 
vicchinnasaṃmatānāmapi jñānānāmekībhavanaṃ nāma cideva antarmukhā, na 
anyat kiṃciditi | tadatra dadhātiḥ karmakartṛviṣayaḥ | svayaṃ sandhānaṃ paṭṭa-
tūlaśakalānāmitivat | atha miśrīkaraṇaṃ sandhānaṃ, tathāpi tasya miśrīkartu-
ścittattvādananyatvamiti yuktamea abhedena upacaraṇaṃ kriyākartroḥ 
paramārthata aikyāt | anena etaduktaṃ bhavati-anusandhānāt janasthitiriti satyam, 
tattu anusandhānamekaviṣayatālakṣaṇaṃ prakārāntareṇa uktanītyā na 
saṃbhavatīti pariśeṣata ekacidrūpatāmātrāyattaṃ saṃpadyate iti | anyathā 
ityādinā upakrameṇa kevalapradeśa ityādi abhidadhata niyatagrahaṇātmikāṃ 
sarvavyavahāramūlabhūtāṃ janasthitimanupapadyamānāmāvedayamāno na cet 
ityanena saha naśyet janasthitiḥ ityasya ekavākyatāṃ darśayati | tatra āsatāṃ 
tāvat pravṛttiprāptyupadeśādayo'nantarasūtravṛttiṭīkāpradarśitā vyavahārā 
yeṣu sphuṭameva anusandhiḥ saṃvedyate | niyataikapadārthajñānaṃ yat 
svaviśrāntatayā anusandhyanadhīnaṃ saṃbhāvyate, tadapi ekāntarmukha-
saṃvedanarūpatvābhāve bahirmukhānāṃ saṃvedanānāṃ na bhavaiditi 
tatparicchedaḥ | anyavyavacchedairgrahaṇavyavahāro'pi svaparaviṣayo ya ucyate, 
so'pi na nirvahedityāśayena saugatīyamabhāvasiddhiprakārameva vicārayati |

(page 277)

tatra jñānaṃ svaprakāśaikarūpamiti upapāditamasakṛt | yadāha tatrabhavān

     yathā jyotiḥ prakāśena nānyenābhiprakāśyate |
     jñānarūpaṃ tathā jñāne nānyatrābhiprakāśyate ||

iti | tataśca jñānāntareṇa ekajñānasaṃsargayogyaṃ na bhavati yenaivamucyeta 
yadi dve jñāne bhavetāṃ, tadvijñānajñānaṃ tṛtīyaṃ bhavet; idaṃ tu eka-
jñānajñānaṃ, tasmāt na dve jñāne sta iti | tadatra ghaṭo vaidharmyadṛṣṭāntaḥ 
| tameva vyācaṣṭe saṃvedayamānam iti svasaṃvedanatayā | etacca kevala-
pradeśajñānam iti  kartṛpadasya viśeṣaṇam | nanu yadi evaṃ ghaṭābhāvo 
niścitaḥ siddhaḥ, tat kimadhikamasmākaṃ sādhyaṃ ghaṭajñānābhāvaniścaye-
neti | āha syāt yāvatā iti bhavedetat, natu bhavati yata evaṃ vartata ityarthaḥ | tena 
vinā sa eva na niścitaḥ siddha iti tātparyam | kāmam iti tvadabhiprāyeṇa astu 
tāvat sāṃpratamiyaditi bhāvaḥ | anyathā iti yadi nāstīti na sidhyatīti ucyate, 
tadavaśyamāpatati ghaṭastatra astīti | tatsadbhāve ca kevalapradeśe na viṣayayor-
jñānam, apitu tadekasāmagrīkagrahaṇam | ghaṭamapi iti saghaṭapradeśa-
jñānaṃ tat bhavet, natu etadviparītāghaṭapradeśajñānam | dvitīyaṃ tu iti 
vyatiriktam | kena iti nahi aghaṭapradeśajñānena jñānāntarasya bhāvo jñāyate, 
yena tadabhāvo'pi jñāyeta | nanu svātmānaṃ niścinvatā jñānena kevala-
pradeśālambanena tāvat svayaṃprakāśena bhūyate | saghaṭapradeśajñānaṃ tu 
yadi tatkāle anyat syāt, tenāpi prakāśamānena bhūyeta | naca evam | tataśca tat 
nāstīti niścīyatāmiti parāśaṅkāṃ dūṣayati naca iti | iti ca vaktuṃ na yujyate 
iti saṃbandhaḥ | hi iti yasmādetadeva kena prakāreṇa jñātaṃsaghaṭapradeśa-
jñānena svaprakāśena ca bhūyate iti |

(page 278)

nanu aghaṭapradeśajñānaṃ prakāśate ityatra idameva tattvaṃ saghaṭapradeśa-
jñānaṃ na prakāśate iti | naitadityāha aghaṭa iti | paryudāsavṛttyā hi atra 
vastvantaraprakāśo bhāti, natu prasajyapratiṣedhātmā saghaṭapradeśajñāna-
prakāśābhāvaḥ | nanu bhāvābhāvayoranyonyaparihārāt paryudāse'pi 
tadviparītavastuno niṣedhaḥ kṛta eva bhavati | satyaṃ tādātmyena śaṅkya-
mānasya, natu vyatiriktasya etatsamayasaṃbhāvyamānasya | anīlaprakāśena hi 
svaprakāśena svātmani nīlaprakāśarūpatāyāḥ kāmamabhāva āveditaḥ, natu 
pṛthagbhūtāyāḥ | nanu kevalaṃ pradeśajñānaṃ yathā prakāśate, tathā 
pṛthagbhūtam | aghaṭapradeśajñānābhāvo'pi prakāśeta, yadi ābhāvo 
jñānaṃ syāt sa tuccharūpaḥ kathaṃ prakāśo bhavet | ekatara iti bhāvena 
saghaṭapradeśajñānasya vyatiriktasya abhāvena vā avyabhicāro'vinābhāvo 
nāsti kevalapradeśapratyayasya ubhayathāpi upapatteḥ | nanu saghaṭapradeśa-
jñānasya kāraṇaṃ ghaṭasadbhāvaḥ, ghaṭasadbhāvasya ca vyāpakaṃ tulya-
sāmagrīkapratyayagrāhyavastvantarasaṃvedanasaṃvedyatvam | sato'pi hi ghaṭasya 
tat yadi na bhavet, na kadācit saghaṭapradeśajñānaṃ syāt | naca tadvyāpakam-
upalabhyate | tasya hi viruddhaṃ pratyuta kevalapradeśajñānaṃ syāt | naca tat 
vyāpakamupalabhyate iti vyāpakaviruddhopalabdhyā ghaṭābhāve niścite 
kāraṇānupalabdhyā saghaṭapradeśajñānasya abhāvo niścīyate | ekaiva vā 
kāraṇavyāpakaviruddhasya upalabdhiḥ svaviruddhavyāptakāryasya niṣedhāya 
prabhaviṣyati | kiṃca kevalapradeśo ghaṭo vā anantarūpaparamāṇumayaḥ 
saṃnihitānantāvayavo vā | tatra yāvanti dravyāṇi, tāvanti cet pṛthak jñānāni; 
tarhi teṣāṃ pṛthak pṛthak svaprakāśatvena ekasamūharūpaprakāśābhāvāt 
pradeśajñānameva na bhavet,

 (page 279)

bhāti ca tatpradeśajñānamiti dṛśyānupalabdhiprasaṅgabhayena rūpātmanāṃ 
vastūnāṃ saṃnihitānāmanekajñānagrāhyatvalakṣaṇāt vipakṣāt vyāvṛttā-
vekajñānasya grāhyatvena vyāptiriti rūpātmako ghaṭaḥ saṃnihitaścet, tat 
rūpātmakapradeśagrāhikevalapradeśajñānagrāhya eva bhavediti kevalapradeśa-
jñānameva saghaṭapradeśajñānaṃ syāt | naca tat tathā, apitu tadviparītamiti 
vyāpakavirūddhavyāptopalabdhyā ghaṭasya niṣedhaḥ | cākṣuṣaṃ pradeśa-
jñānaṃ svāvadhau na pṛthak ghaṭajñāne cākṣuṣe pṛthak bhavati cākṣuṣatvāt 
| pṛthaktvasya vyāpaka ekatvāniyamaḥ | tasya viruddha ekatvaniyamaḥ | tena ukta-
yuktyā vyāptaṃ cākṣuṣatvamiti vyāpakaviruddhavyāptopalabdhiḥ | tarhi evam-
ucyamāne ghaṭajñānābhāvo'numānagamya eva syāt, na kadācit pratyakṣaḥ | 
anumānagamyatve ca anavasthānādasiddhiḥ | tathāhi dṛśyānupalabdhirvastvantar-
arūpā  bāhyā jñānāntararūpā ca ābhyantarī pratyakṣasiddhaiva pratyakṣa-
vikalpenaiva vyavahāryā, kevalaṃ nāstītyabhāvātmanā vyavahriyamāṇā 
pramāṇāntaramapekṣate yena ucyate-yāvān kaścit pratiṣedhaḥ, sa sarvo'nu-
palabdheriti | ānumānikatve tu sāpi svabhāvānupalabdhirvyāpakāderanyasya 
anupalabdhyā viruddhasya upalabdhyā ca sādhyate, tadā sāpi anupalabdhir-
anyānupalabdhyā anyaviruddhopalabdhyā vā,-iti aniṣṭhā | virodho'pi hi 
tadgrahaṇe niyamena tasya grahaṇābhāvāt niścīyate lākṣaṇikaḥ | grahaṇā-
bhāvaśca anupalabdhyeti anavasthā | sahānavasthānavirodho'pi aparyāpta-
kāraṇasya bhavato'nyabhāve'bhāvāt virodhagatidṛśā niśceyaḥ | abhāvaśca 
anupalabdhyeti aniṣṭhaiva | tathā ācāryadharmakīrtiḥ

     ekopalambhānubhavādidaṃ nopalabhe iti |
     buddherupalabhe veti kalpikāyāḥ samudbhavaḥ ||

(page 280)

     viśiṣṭarūpānubhavādanyānanyanirākriyā |
     tadviśiṣṭopalambho'tastasyāpyanupalambhanam ||
     tasmādanupalambho'yaṃ pratyakṣeṇaiva siddhyati |
     anyathārthasya nāstitvaṃ gamyate'nupalambhataḥ ||
     upalambhasya nāstitvamanyenetyanavasthitiḥ |

iti | sarvaṃ ca anusandhānaṃ smaraṇānusandhānaprāṇaṃ viṣayamelanena vinā 
na saṃbhavatyeva | atha evamucyate tat tasmāducyamānāt hetoḥ evam iti, svakalpa-
nayā lokapratītyananugṛhītayā ya iyāniti anavasthāpādako nyāyastasya anu-
saraṇāditi vākyasaṃgatiḥ | yadi tu asmaddṛśā jñānānāṃ svasaṃvedanam-
antarmukhamekameveti aṅgīkriyate, tadā svaviśiṣṭajñānābhāvādabhāva-
vyavahāra iti arthavat na saṃvedanasya saṃvedanāntarasattāviśeṣābhyāṃ tat-
siddhirityādi ca yat bhavadbhiruktaṃ, tadupapadyate, na anyathā | tathāhi samakāla-
bhāvinyau yadi saghaṭāghaṭapradeśasaṃvittī bhavetām, tadanayorekaṃ svasaṃ-
vedanaṃ tadrūpatvenaiva nirabhāsiṣyata | tacca taddvirūpaviviktaṃ nirbhāsa-
mānaṃ dvirūpasvasaṃvedananiṣedhaṃ vidadhat samakālobhayajñānaniṣedhaṃ 
svaprakāśatvenaiva karotīti na kaścit bādhaḥ | tasmāt niyatapadārthadarśanamapi 
ekasvasaṃvedanānabhyupagame na upapadyate | apica ghaṭajñānaṃ nāsti kevala-
pradeśasaṃvedanāvasare iti tāvat jhaṭiti nyāyamanusarato'pi bhāti | nyāyānu-
saraṇe ca anavastheti uktam | abhyupagamya api ucyate-mā bhūdatra anavasthā, iha 
tu kiṃ kartavyaṃ yatra etadapi na vaktuṃ ghaṭate iti darśayati yadivā iti | santate-
'ndhakāre sarvasya asti pratipattiḥ-ahaṃ rūpaṃ na paśyāmīti, sā ca katham | 
etadapi iti aprātītikaṃ niṣphalaṃ ca sadapīti apiśabdārthaḥ | kuto na śakyate iti 
āha bhinnendriya iti |

(page 281)

abhinnendriyajanyajñānagrāhyāṇā hi ghaṭapaṭādīnāmiva saṃnihitānāmeṣa 
niyamaḥ-yadekajñānagrāhyateti | naca rūpasparśau, rūparasau vā sāmān-
endriyagrāhyau, yena tadviṣayamekameva jñānaṃ rūpasparśābhāsaṃ saṃ-
bhāvyeta, rūparasābhāsaṃ vā | atha ucyate-yadi saha rūpajñānasparśajñāne 
samabhaviṣyatām, vikalpo'nantaraste dve api sahaiva adhyavasyet, smṛtiśca smaret; 
naca tatheti kāryānupalabdhyā rūpajñānābhāvasiddhiriti | tatra idameva tāvat 
vācyaṃ nāvaśyaṃ kāraṇāni iti vnyāyāt kāryānupalabdhiḥ kathaṃ kāraṇa-
abhāvaṃ gamayet | anyāvasthāṃ prāptaṃ nāstīti cet mā bhūt tathābhūtaṃ, 
tattu nāstīti kutaḥ | sparśajñānakāle ca ayaṃ rūpajñānābhāvaṃ manvānaḥ 
svātmani tadabhāvanibandhanān pradīpāṅgopasaṃharaṇādīn kurvāṇo 
dṛśyate, natu kāryābhāvaṃ pratīkṣate | vikalpo'pi rūpajñānaṃ pūrvabhāvi 
kathaṃ nirākuryāt, sahi sparśaṃ vā sparśajñānaṃ vā vikalpayan kāmaṃ na 
rūpavikalpo na vā rūpajñānavikalpaḥ | sa dvikalpanīyo yo'dhunā sparśa-
pratyayastadīye pūrvasmin kāle rūpajñānaṃ na abhūditi tu kathaṃ prakāśayet 
| nahi tatkālabhāvini rūpajñāne sati sparśajñānavikalpasya anyapramātṛgatasya 
iva kācit hāniryena sa svayaṃ bhavan tasya prācyasvakālabhāvino rūpajñāna-
sya abhāvamavyabhicāreṇa bhavantaṃ sādhayet | evaṃ smaraṇe'pi vācyam | 
etadāha nāpi ityādi | ityapi neti saṃbandhaḥ | tatra hetutvaṃ granthāntarasya āha 
yataḥ iti | vikalpaḥ smṛtirvā iti yathāsaṃbhavamubhayamuktvā tasyaiva nyāy-
yatvāt naikaṭyāt smṛtimukhenaiva pūrvapakṣāśaṅkāṃ tatpratisamādhānaṃ 
ca karoti granthalāghavamarthayamānaḥ | nanu smṛtivikalpajñānayorjñānaṃ 
viṣayaścakṣurjñānasya iva pradeśaḥ | tatra yathā pradeśajñānena ekajñāna-
saṃsargayogyasaṃnihitaghaṭanirākaraṇaṃ kriyate,

(page 282)

tathā smṛtivikalpajñānābhyāṃ sparśajñānaṃ śuddhaṃ viṣayīkurvad-
bhyāṃ tadvikalpanasmaraṇayogyadvitīyatatsahabhāvirūpapratyayapratikṣepaḥ 
kariṣyate | tadasti eva sparśajñānābhāsamātrasya smṛtivikalpapratyayatvasya 
prācyadvitīyarūpajñānābhāvāvyabhicāraḥ, tat kathamavyabhicārābhāva 
ukta ityāśaṅkya āha smārtaṃ hi iti | yasmādevaṃ, tasmāt nāstyeva avya-
bhicāraḥ iti saṃbandhaḥ | saṃskārajatvāt hi smṛtijñānaṃ pūrvamanubhavam-
anukaroti, natu viṣayatvena ābhāsayati jñānānāṃ parasaṃvedyatvasya vistarato 
nirākṛtatvāt | yena iti svātantryasākṣātkāritvena | yadi hi svātantryeṇa svena 
prakāśabalena viṣayatayā pūrvaṃ sparśajñānaṃ smṛtirābhāsayet, tadā 
pūrvasminniti pūrvakālaviśiṣṭatvena nirbhātādābhāsamānāt sparśajñāna-
lakṣaṇādākārāt viparītaṃ rūpajñānaṃ sparśajñānalakṣaṇe svaviṣaye 
tādātmyena asahamānā pūrvakālabhāvino dvitīyasya rūpajñānasya eka-
jñānasaṃsargitayā viṣayasya saṃbhāvyamānatatsmaraṇajñānaviṣayatākasya 
abhāvasiddhaye prabhavet yathā śuddhapradeśasaṃvittirghaṭasya, natu evamasti | 
smṛtirhi pūrvamanubhavamanukaroti paraṃ smartavyasaṃbandhinam | smāryasya ca 
sparśajñānasya yo'nubhavaḥ, sa tathā anukāryaḥ | evaṃca yathā tatsparśa-
jñānamantaḥ svasaṃvedanena ātmani anubhavarūpaṃ svakāle na rūpajñāna-
sya nāmāpi vetti kathañcit bhavato'pi, tathā tadanukārarūpā sparśajñāna-
smṛtirapi rūpajñānasmṛtitayāpi yadi bhavet, tathāpi sparśajñānarūpa-
jñānayoḥ sahabhāvaṃ pūrvaparigṛhītaṃ na smaredeva | yadi tathā smartuṃ 
śaknuyāt, tadasahabhāvāsmaraṇe pūrvamapi tayorna sahabhāvaḥ iti niraceṣyata 
nāma,-iti tātparyam | yato na svātantryeṇa sākṣātkāri, tata iti saṃbandhaḥ 
vikalpajñānam iti sāmānyoktiḥ smṛtimapi saṃgṛhṇīte | tadabhiprāyeṇaiva 
āha anubhūtam iti parāmṛśati iti |

(page 283)

anye tu-vikalpo'pi paramārthato'nubhavasaṃskārajatvāt smṛtireva, kevalam-
aciravṛttatvādanubhavasya sarvātmanā taduparaktatvādidantānirbhāsinīti 
anubhavāyamānatayā smṛtitvena na bhāti,-iti pṛthak vikalpa ucyate-ityāhuḥ | 
taṃ vikalpaṃ darśayati anubhavāmi iti | evaṃ jñānadvayamapi yadi vikalpe 
pratibhāsate, tathāpi na tasya sahabhāvaḥ pratīyate tasya tattvasaṃvedanadvayena 
pūrvamagṛhītatvāt vikalpasya ca pūrvāparigṛhīte vastuni svātantryeṇa grahaṇā-
sāmarthyāt | tataśca ekāki jñānaṃ gṛhṇatā vikalpena tat kāmaṃ vyavahriya-
tām, tadavyatiriktaśca dvitīyajñānābhāvaḥ; natu vyatiriktadvitīyajñānasya 
prācye kāle yadabhavanaṃ, tat vyavahartumasya sāmarthyamasti pūrvasvasaṃ-
vedanavyatiriktajñānāpekṣayoḥ sahabhāvapṛthagbhāvayoraparigrahāt | tat-
kāraṇakatvācca vikalpasya tathā vyavahāraḥ iti kāraṇānupalabdhiḥ | yena iti 
dvayagrahaṇakāle atadaikakālikatvagrahaṇena hetunā nirākuryāt pūrvasmin kāle 
rūpapratyayam | rūpajñānaviviktasvābhāsopārūḍhasparśajñānaparāmarśi 
vikalpajñānamiti saṃbandhaḥ | natu evaṃ ghaṭate ityāha yāvatā iti na svayam 
iti svasaṃvedanamātraniṣṭhatvāt dvayoḥ | tatsaṃskārajanmanā iti 
svātantryeṇa yogijñānavat pūrvajñānadvayagatasahāsahabhāvagrahaṇaṃ 
sāmarthyāt tatsaṃvedanadvayamukhaprekṣitvāditi yāvat | etadapica abhyupagamya 
uktamityāha nacāpi iti | uktaṃ hi 

     bhrāntitve cāvasāyasya na jaḍādviṣayasthitiḥ | (1 | 3 | 5)

iti | yadātu ekaṃ cittattvamantarmukhaṃ svasaṃvedanaṃ, na pṛthak 
svasaṃvedanāni; tadā jñānadvayaṃ cet saha bhavet, ekasvasaṃvedana-
viśrāntaṃ tat bhāseta | naca tathā andhakārakāle iti svātmani rūpajñānaṃ 
nāstīti niścinvan tatsajātīyasya api pramātṛvargasya

(page 284)

tathaiva tadabhāvaniścayāt niḥśaṅko'tyuṣṇajanitasaṃtāpaparihāraprayojanān 
svāṅgāvacchādanānāvaraṇādīn vyavahārān karoti,-iti siddhamiṣṭam | yo'pi 
āh-manaḥsadbhāva ekajñānotpattiniyāmaka iti, tasyāpi jñānānāmayauga-
padyaniyame siddhe manaḥ siddhiḥ sa eva tu kuta iti cintyam | jñānāntareṇa ca te 
sahakālabhāvitvāt dve jñāne avaśyagrāhye iti | kutaḥ | sahakālabhāvino'pi 
saṃskārāderjñānāntareṇa agrahaṇāt | eka"ca ātmā tajjñānasamavāyi-
kāraṇatayā bhavannapi kathamidaṃ jānīyāt-jñānadvayaṃ mama na utpannam-
iti | nanu tadutpattāvarthadvayaṃ prakāśeta | āḥ ko'yaṃ mohapralāpaḥ | artha-
dvayaṃ prakāśate iti hi jñānadvayameva tadevaca paryanuyuktam | prakāśasya 
arthadharmatāyāmapi kathaṃ jñāyate rūparasadvayaniṣṭhaḥ prakāśo na jāta iti 
| jñāne ca utpanne aprakāśe svaparavibhāgāsaṃvedanaṃ syāt | tathāhi kastvaṃ 
yasya ghaṭajñānam | parasyāpi ghaṭajñānam, samavāyo'pi samānaḥ | ātmā 
na prakāśate, jñānāntareṇa prakāśate ityapi sarvaṃ samānameva | tasmād-
ananyāpekṣaprakāśamahamiti saṃvittattvamekamantarmukhamaṅgīkāryam | 
tasmin sati samastaviplavāvakāśābhāvaḥ | tathāhi jñānadvayaṃ yadi bhavet, 
ekamasya svasaṃvedanaṃ bhavet | naca ekaṃ tathā asti sparśajñānasvasaṃ-
vedanamātratvena asya nirbhāsāditi uktameva | yaśca ananyāpekṣatayā 
svaprakāśatvena prakāśe, so'haṃ; yastu naivaṃ, sa para iti sarvaṃ svastham | 
tadetadāha tadevam ityādinā | aindriyikāṇāmapi iti | yeṣu satsu sarvo loka idaṃ 
gṛhītam, idaṃ na gṛhītamiti samāśvasto niḥśaṅkaṃ vyavaharati, teṣāmapi yatra 
eṣā gatiḥ, tatra ka āśvāso jñānāntareṣviti yāvat | arthānāmapi iti | jñāna-
niyamakṛto hi arthasattāniyamastadaniyame kathaṃ syāt | pradeśakaivalya-
vyavahāro'pi

(page 285)

ānumānikatvādanavasthopahata iti ekendriyagrāhyeṣu artheṣu na sadasadbhāva-
niyamaniścaya iti avocām | ekaśabdho'pi iti | na kevalamanena cidvapuḥ iti 
vivṛtaṃ sautraṃ yāvadekaśabdo'pīti apiśabdaḥ | nanu ca bahūnāṃ jñānā-
nāmanusandhānaṃ vikalpāntareṇa grahaṇaṃ, naca vikalpāntarameva cittattva-
mityāśaṅkya āha smṛtyādau ca iti | uktaṃ hi na jñānaṃ jñānāntaravedyaṃ 
bhavati iti | tataśca yadekamantarmukhameṣāṃ rūpaṃ, tadeva svecchāvaśāt 
yāvat jighṛkṣati tāvat pratyavabhāsate iti na yaugapadyena sarvānusandhi-
prasaṅgaḥ | naśyet iti sūtre yaḥ prasaṅgaḥ uktaḥ, sa pūrvatra vṛttau 
vyākhyātaḥ katham iti | tenaivaca  na cet ityetatsūtragatamapi vyākhyātamiti 
tadavadhīryaiva naca atraiva viśramitavyaṃ janasthiteḥ prakāśamānāyā naśyatu 
iti śāpamātreṇa anapahnavanīyatvāditi balādeva yaḥ prasaṅgaviparyayaḥ, so'tra 
vṛttau vyākhyātaḥ | ṭīkākāreṇa tu naśyet ityapi vyākhyātameva jñāna-
niyamānupapattiṃ darśayateti uktamādāveca | nanu yadi asāvekaḥ 
sarvairbhāvamamaṇḍalairbharaścidvapuḥ, tarhi tāni sadaiva unmagnāni sadaiva 
vā nimagnāni nirbhāseran; kādācitkaṃ tu vaicitryameṣāṃ kathamityāśaṅkya 
prakāśasvācchandyameva cittattvamityāśayena yaduktaṃ sūtre jñāna ityādi, 
vṛttau ca varṇitam asyaiva ityādinā; tat vivṛṇoti tasya caivam iti | uktābhiryukti-
bhirekasya 

     prakāśātmā prakāśyo'rtha-------| (1 | 5 | 3)

iti

     svāminaśca------------|

ityādivakṣyamāṇābhiḥ samastabhāvapūrṇasya jñānaṃ nāma śaktiḥ | tataḥ 
kimiti |

(page 286)

āha tasya tasya bhāvasya vicitraṃ sphuṭāsphuṭādirūpaṃ kṛtvā yā iyaṃ 
cidavyatirekādavabhāsasvatantrasya api satastadvicchedarūpajaḍatāpuraskāreṇa 
pāratantryaprāṇā idamiti avabhāsamānā paśupramātṛvartinī, tatra yat tat 
samarthācaraṇaṃ svātantryātmakaṃ tadeva prakṛtaṃ rūpaṃ yasya, tat jñānaṃ 
nāma śaktiriti saṃbandhaḥ | etaduktaṃ bhavati-

     icchāyā eva yasya---------------|

iti nyāyena aparigaṇitasarvabhāvanirbharo bhagavān svātantryāt 
bhāvarāśimadhyāt kaṃcit bhāvaṃ prakāśasvarūpāt pṛthak karoti, 
pṛthakkṛtaṃ ca prakāśayati, naca pṛthakkṛtasya prakāśanā upapanneti na 
mahāprakāśāt pṛthak karoti, apitu tathāvidhamaparamārthaprakāśarūpamāro-
pitaprakāśaṃ māyāpramātāraṃ nirmimīte | tathā saṃkocena avabhāsanameva 
ca bhagavataḥ svātmani tannirmāṇamucyate | evaṃca māyāpramātā śarīrād-
yavacchinnasaṃkucitaprakāśasvabhāvo bhavan svāpekṣayā pṛthagbhūtaṃ 
bhāvamavabhāsayati | tat navanavatadīyacchāyoparaktamasya bahirmukhaṃ 
rūpaṃ navanavaṃ jñānamucyate | tatra ca yadaiśvaraṃ svātantryam, sā 
jñānaśaktiriti avabhāsana iti kāritadvayam | tathāpi navābhāsānāṃ 
pratikṣaṇamudayalayagrastānāṃ kathaṃ vyavahāropayoga iti 
ābhātapūrvavastuni bahirmukhaṃ yat saṃvedanamāsīt, tasya yadantarmukhaṃ 
rūpaṃ, tat kālāntarāvasthāyi sat svātmagatāṃ tāmeva viśiṣṭaviṣayāṃ 
bahirmukhatāṃ parāmṛśati, māyāpramātari tadetat smaratītyucyate | tatra yat 
tathāvidhapramātrādinirmāṇasāmarthyaṃ, tat bhagavataḥ smṛtiśaktiḥ | yat 
vakṣyati pūrvāvabhāsitavastuna iti | anena ca prācyajñānopayogo vakṣyate 
pūrvāvabhāsitatvena iti | prācyo bahirmukhatāvimarśādikaḥ, na idānīntanaḥ, 
tatra navaḥ prakāśaḥ iti prakhyāpanaśabde'pi dvau ṇicau |

 (page 287)

nanu kasmādiyaṃ jñānādikā bhagavataḥ śaktirucyate ityāśaṅkya āha 
phalabheda iti | anantārthakriyākāriṇi padārthe'khaṇḍamaṇḍale upadeśyo-
padeśavyavahārādirna sidhyatīti tatsiddhaye tayā tayā vicitrayā arthakriyayā 
ekaikamavacchidya sa padārtha eka eva bahudhā vyavahriyate agnirdāhakaḥ 
pācakaḥ prakāśakaḥ iti | tatra bahutvaparāmarśapradhānatāyāṃ śakti-
vyavahāraḥ, tadekaparāmarśapradhānatve tadvadvyavahāraḥ | sacāpi na 
apāramārthikaḥ parameśvareṇaiva tathā sṛṣṭatvāt | yaduktamāgame

     na vahnerdāhikā śaktirvyatiriktā vibhāvyate |
     kevalaṃ jñānasattāyāḥ prārambho'yaṃ praveśane || (vi. bhai. 19)

iti, tathā

     ---------śaivī mukhamihocyate | (vi. bhai. 20)

ityādi | tadāstāṃ tāvadetat | nanu mahadgrahaṇaṃ sūtre kimarthaṃ, tacchakti-
yogādeva labdhaṃ hi asya svātantryamityāṅkya āha sā ca iti | paśupramātur-
yadyapi tathābhūtaṃ jñānaṃ, tataśca so'pi tayā śaktyā na na īśvaraḥ, 
tathāpi na tasya tatra svecchā prabhavati apratihatasaṃkalpatvābhāvāt | tena 
yasyaiva tatra apratighāta icchāyāḥ, sa maheśvara eva tathā yuktaḥ | ādiṣṭaṃ hi 
āgame bhagavatā

     prabhuśaktirathātmā ca prāṇaśceti trayaṃ saha |

ityādi | ato vastutastattadātmanā bhagavāneva jānāti smarati apohatīti yuktam | 
yaduktaṃ

     yadyapyarthasthitiḥ-------| (a. pra. si. 20)

ityādi, tadāśayena iha sa jñānādimāniti yuktam | māyāpramātṝṇāṃ tu tataḥ 
parameśvarādapṛthaktānavabhāsa eva māyāpramātṛtetyāśayena bhagavatā 
gītāsu mattaḥ iti

(page 288)

matsāmarthyādetat, natu mama iti pradarśitam | etadapica iha sūtre śaktipadena 
spṛṣṭameva na mama jñānādi, apitu yadvalāt tat bhavati, tat mama svātantryamiti 
darśayatā | tena ubhayathāpi jñānaśaktipadaṃ tatra tatra vigrahītavyam-jñāna-
meva śaktiḥ, tatra ca asya śaktiriti | tata eva icchāśaktiḥ pṛthagih na upāttā 
āgame kathitā api amaheśvaraśaktipadābhyāmeva apratighātaṃ jñānādī-
nāmabhidadhadbhyāṃ tasyāḥ svīkārāt | agniḥ śaktiḥ, saṃdahatīti ca 
abādhitapratyayābhāsādābhāsasāraparamārthavādinā śaktiśca kriyā ceti 
ubhayamapi upagamyam | tattu pratyarthakiryaṃ bhinnamapi sat vitatavitatasya 
anekārthakriyākāriṇo bhāvasya svarūpaṃ bhedena anupalakṣaṇādarthakriyā-
bhedabalonniyamānatvādanumānārthāpattigamyamastu, ko virodhaḥ | śaktih 
śaktā karotīti tu śakteḥ śaktimadātmanā sṛṣṭiriti śakteḥ śaktyantarayoge-
'navasthetyapi na kiṃcit, bhāvasvabhāvānadhikatvācca yathādarśanaṃ nityā 
bhavatu anityā veti kā kṣatiḥ | ata eva kāryodaye sahakāribhiḥ kimiti tu codyam-
ekasahakāriyoge sahakāryantareṣu tulyamabādhitābhāsāt kathaṅkāraṃ saha-
kāriṇo nihnūyantāmiti śaktiṣvapi samaḥ prakāraḥ | tadiyaṃ śaktirbhāva-
svarūpameva upaniya āsīnā śaktirucyate, natu pṛthagavabhāseti svarūpasaha-
kārilakṣaṇaiva ubhayī padārthasthitiḥ śaktirityapi na kāṃcidasmanmate kṣatim-
āvahati | tathāca agameṣu sarvamidamabhyanujñātameva | yathoktaṃ

     yā sā śaktirjagaddhātuḥ kathitā samavāyinī |
     icchātvaṃ devi sā tasya sisṛkṣoḥ pratipadyate || (mā. vi. 3 | 5)

iti

(page 289)

     yogo'sya śaktayaḥ svākyā------| (ma. ta. 4 | 5)

iti

     śaktayo'sya jagatsarvaṃ śaktimāṃstu maheśvaraḥ |

iti

     śaktirvidyādikā śambhoḥ syātparigrahavartinī |

iti ca | phalati iti phalaparyantā saṃpadyate, na punaḥ pratihanyate yasya | anyāni 
yāni kāraṇāni sahakāryupādānādīni, teṣāṃ yat sāmarthyaṃ tāni eva vā 
sāmarthyaṃ; tatsācivyena tatsahitatayā yeṣāṃ śaktiḥ phalati brahmaviṣṇu-
śakrādīnāṃ krimipramātṛparyantānāṃ bhagavanniyataśaktimukhaprekṣitvā-
parikṣayāt, te svaśaktiyogena īśvarā api bhavanto na maheśvarā iti yāvat | tathā 
iti viśvarūpatayā cidrūpatve'pi jñānādyapapādakatayā samastajanasthiti-
saṃpādakatvena ca | nanu maheśvarasya bhagavato bhavatu tāthārūpyam, tāvatā 
tu ātmanā kimaṅgīkṛtena ekena | maheśvaratya ca viśvarūpatvaṃ jñāna-
śaktyādiyogitvaṃ ca saṃvidrūpādhikaṃ jaḍatvādaprakāśamānaṃ 
prakāśātmanaḥ saṃvedanasya kathaṃ rūpaṃ syādityāśaṅkādvayaṃ 
vārayati cittattvasya iti | cittattvameva maheśvararūpam, naca ātmā cittattvād-
anyaḥ kiściditi prathamacodyaṃ parihṛtam | cittattvaṃ ca prakāśasvātantryameva 
ucyate, na anyat kiñcit | tadevaca viśvātmatayā prakāśanaṃ navābhāsana-
manavābhāsaparāmarśatvena adhunā parāmarśanaṃ vedyavedakānāṃ 
saṃkṣepataścaturdhā anyonyato bhedena avamarśe, prastārataḥ punaḥ 
parārdhakoṭidheti ca apohanābhāsanamiti aparā api śaṅkā śamitā mantavyā | 
agre iti

     ata eva yathābhīṣṛ------------| (1 | 6 | 11)

(page 290)

ityādau pūrvāvabhāsitatvena iti pramātṛbhedena pūrvābhāse pūrvābhāsa-
pṛṣṭhe ca pratyabhijñādāviva apūrvāvabhāsaṃ nirākaroti | avabhāse ca 
tadavyabhicārī pūrvavimarśo'pi sthita eva | tṛtīyāprayogaśca tathā parāmarśa-
māha | yathāhuḥ kṣaṇiko'pi gṛhītaḥ iti | vārtamānikastu vimarśaḥ sannapi na 
vastunastātkālikatāṃ tātkālikaprakāśatāṃ vā vitarati pūrvaprakāśa-
vimarśānapahāramātre paraṃ viśrāmyati | evaṃ jñānasmṛtī vyākhyāya, 
apohanaṃ vyācaṣṭe deśa ityādinā | upapāditaṃ saṃpāditaṃ māyīya-
pramātṛniṣṭhaṃ vikalparūpaṃ vijñānaṃ yayā bhagavataḥ svātantryaśaktyā, 
sā apohanaśabdavācyā | kathamupapāditam | āha avabhāsabhedena nirvikalpaka-
pratibhātena vastunā yā vāsanā saṃskārarūpā kṛtā, tanmātreṇa punarvastu-
prakāśādinirapekṣeṇa prabodhitena svakārye vikalpalakṣaṇe kartavye labdha-
vṛttinā | kathaṃ tasya prabodhanam | āha deśābhāsena kālābhāsena ca yaḥ 
pūrvamavacchinna ābhāsamelanamayaḥ svalakṣaṇātmā pratyavābhāsiṣṭa, 
tasya yo'sau deśakālābhyāmavacchedastadapāsanena | ata eva tasya ābhāsasya 
deśāvacchedāpāsane vibhutvam, kālāvacchedāpāsane nityatvamiti | saca

     bhāso vikalpaviṣayaḥ sāmānyamiti gīyate |

iti

     tasmāt yo yena dharmeṇa viśeṣaḥ saṃpratīyate ||
     na sa śakyastato'nyena tena bhinnā vyavasthitiḥ ||

iti nītyā ca pratyābhāsaṃ vikalpasya udayātmano deśakālābhāsayorapi vikalpo 
bhavan deśakālānavacchedāt sāmānyātmanoreva bhavati | ayamityapi sāva-
cchedo vikalpaḥ | sa sarvapurovartivartamānavastusādhāraṇarūpaparāmarśā-
tmaiva | yathoktamācāryapādaireva-

(page 291)

     niyate'pyayamityeṣa parāmarśaḥ puraḥsthite |
     sarvabhāvagatedantāsāmānyenaiva jāyate ||

iti | kiṃ bahunā | vākyārthaprāyo'pi yo viśeṣo bhedasaṃsadi vikalpe'pi sphurati 
-ayamadhunā gaurmayā dṛśyate,-iti svīkṛtapratyekapadārthāvadhāraṇaḥ, so-
'pi avaśyaṃ deśakālapramātrantaragatatathābhūtavākyārthasādhāraṇameva 
rūpaṃ viṣayīkurvannupajāyate | tasmāt sarvo vikalpo deśakālādyābhāsāva-
cchedaśūnyasāmānyapratibhāsī | nanu deśādyavacchinne'nubhūte tatkṛtayā 
vāsanayā kathaṃ tadavacchinnaviṣayayā prabudhyate | āha vicitrā aparyanuyojyā 
bhagavato mahāprakāśarūpasya śivanāthasya yā icchā, tata eva viśvamanyonya-
bhedapradhānamudbhāvayantī tadbhedabhāsanabhittibhūtān māyāpramātṝnā-
virbhāvayati evaṃbhūtena anena sāmānyāvabhāsena vikalpena | nanu vikalpa-
janikā yā bhagavataḥ śaktiḥ, sā jñānaśaktireva kasmāt na ucyate, taddṛṣṭe 
viśeṣarūpametadapohanaśaktiriti kimuktamityāśaṅkya āha śaṅkita iti | 
śaṅkitāḥ śaṅkāvaśādāropitā ye pratipakṣāḥ abhimatanīlaśarīrānu-
praveśināṃ vicitrārthakriyāsaṃpādanādyupakalpitabhedānāṃ dharmāṇām-
atadarthakriyākāritvādayo dharmāḥ, teṣāṃ yaḥ pratikṣepo'bhimukhī-
bhūtānāṃ satāmiva puro galehastikayā iva dūrīkaraṇātmakamapasāraṇaṃ 
tadeva paraṃ pradhānakartavyamasādhāraṇavyāpārarūpaṃ yeṣāṃ, teṣāṃ 
bhāvastattvaṃ; tasmāt hetoḥ sā śaktirvikalpajanikā apohanapradhānatadrūpa-
jananādapohanaśaktiriti saṃbandhaḥ | etaduktaṃ bhavati-yadyapi vikalpo 
vividharūpā pratītiriti āmukhe pratibhāsate, tathāpi tadasya nirvikalpakamanukaroti 
āviśati upajīvati vetyato hetorāyātaṃ svayaṃ viṣayeṇa svalakṣaṇena

(page 292)

ābhāsamelanātmanā sāmānyena vā aikyābhāsamātreṇa sākamalabdha-
jñāteyatvāt viṣayābhāve'pi saṃbhavāt | tadayaṃ vividhatayā vyā-
priyamāṇaḥ siddhe sati ārambho dvirbaddhe subaddhatvaṃ dārḍhyam, tacca

     śaṅkitānyavyavaccheda------------|

iti nyāyādanyavyavacchedātmeti apohanavyāpāra eva ucyate | ihaca

     kriyā saṃbandhasāmānya------------| (2 | 2 | 1)

iti bhāvinītyā saṃbhavadapi sāmānyaṃ sākṣātkāreṇa vā anubhavātmanā 
svīkṛtamiti tatsvīkāro'pi na vikalpavyāpāraḥ | nanu svalakṣaṇe'vabhāte kuto-
'tadrūpamāśaṅkyate yadapohyate;

     niścayāropamanasorbādhyabādhakabhāvataḥ |

iti

     no cedbhrāntinimittena saṃyojyeta guṇāntaram |
     śuktau vā rajatākāraḥ---------------------||

iti ca dṛṣṭyā samāropādāśaṅkā,-iti cet, samāropasya vikalpitaviṣayatvāt 
vikalpāntarasya api samāropapūrvakatvāt vikalpasamāropaparamparānava-
sthānāt yugakoṭibhirapi na nīlaniścayaḥ, anyonyāśrayādi ca bahuśākham | yadi 
bhaṭṭena uktamapohasiddhau

     prasaṅgapratyayanivartanameva nīle anīlametat na bhavati |

iti,

     vyavacchedapratyanena kartavyam----------|

iti,

     nāropasthityapekṣaṃ tat--------------------|

ityādi; tatrāpi viśiṣṭe arthe pratibhāte ko'nyathāprasaṅgasya avasara iti 
vaktavyam | avidyākṛtaḥ prasaṅgaḥ samāropo vā | so'nādiḥ | samāropa-
prasaṅgādijananaśaktirūpā vāsaneti cet,

(page 293)

saiva anavasthā vikalpya prasañjanāt samāropācca tayorapica vikalparūpatvāt | 
nīle ca anīlaṃ vikalpya samāropyate, anīle ca vikalpyamāne nīlaṃ samāropyate iti 
anyonyāśrayādidūṣaṇamapi bahuśākhaṃ naiminīyairdarśitaṃ | yadapi anantar-
bahīrūpamāropitaṃ vikalpena gṛhyate iti ucyate, tatrāpi niḥsvabhāvatve nīlapīta-
vikalpayorabhedaprasaṅgaḥ | nīlamiva vikalpena gṛhyate, natu nīlameveti cet; kiṃ 
tena gṛhyate yat nīlamiveti upameyeta utprekṣyeta | nīle prakāśanamiva adhya-
vasāyāt, natu prakāśanamevetyatra api kiṃ tasya rūpaṃ yadevaṃ vyapadiśyeta | 
tato na grāhyāṃśena, na adhyavaseyāṃśena vikalpyasya vikalpāntarāt bheda 
ucitaḥ | tucchasya hi ko bhedaḥ | vastudvayameva hi satyavastuni kathaṃ syāt | yat 
bhaṭṭaḥ

     --------------nacābhāvo viśiṣyate |

iti | āropitena bāhyena adhyavaseyena vapuṣā bheda iti cet, āropo'pi vikalparūpa 
eveti saiva aniṣṭhā | abhimānamātrata eva nīlaṃ viṣaya ityapi ucyamāne 
abhimāne tasya arthasya prakāśanamaprakāśanaṃ veti na tṛtīyā gatirlabhyate | 
yattu citraprahārapātapaṇḍitaṃmanyādivaduktam, tatra sādṛśyapratipatti-
mātramabhimānaśabdavācyam | yādṛśo hi patataḥ praharaṇasya ākāraḥ, 
tādṛgeva citralikhitaprahartṛpuruṣakarasaṃniveśasamāveśinaścitrapraharaṇasya | 
paṇḍitaśca yādṛśamākāraṃ mohasahāyāt pāṇḍityāduddharakandharaṃ ca 
paramārthapāṇḍityāt vā samastajanahitopadeśakaraṇādipravaṇamudvahati, 
tathaiva apaṇḍito'pīti | apica paṇḍito'yamiti yatra  lokataḥ śṛṇoti, tatra 
kaṃcidākāraviśeṣaṃ paśyan tathābhūtalābhasatkārādikamātmani icchan 
yatnatastathākāraṃ karotīti pāṇḍityābhimāna ucyate | evaṃ vikalpena na kiṃcit 
nīlasya śrutaṃ dṛṣṭaṃ

(page 294)

vā yat tathābhimānaṃ kuryāt | āropābhimānādīnāṃ lajjādivat cittadharma-
tāyāmapi na arthasparśanaśaktiriti na abhimānopakalpito'pi viṣayaḥ | dūṣitaṃ 
ca adhyavasāyasya svapratibhāsamātraniṣṭhatvaṃ

     bhrāntitve cāvasāyasya---------------| (1 | 3 | 5)

ityatra | tasmāt svalakṣaṇe avabhāte kutastadviparītaṃ rūpamāśaṅkyate yena 
tadapohanaṃ phalavat syāditi śiṣyasya āśaṅkāṃ nivartayati padārthāntara iti 
| iha vastvantareṇa kṣīrajalavadāmiśraṇādvāvastvantarasvabhāvatvādvā 
bhāvasya atadrūpatāpi saṃbhāvyate | ubhayamapica etat na saṃbhavatīti 
viśeṣaṇadvayena uktam | pādārthāntarāsaṃpṛkte anyānāmiśre niyataprakṛtā-
vekasvabhāve ca bhāve tenaiva svabhāvena vicitrārthakriyākāriṇī avabhāte'pi 
māyāśaktyā avāṅmukhībhūtatvena bhāte'pi bhātatvādeva hetostatra ekām-
abhīṣṭāmarthakriyāṃ yo'rthayate, sa tadarthakriyākaraṇavihīnān tān 
tānatibahūn pratipakṣānāśaṅkate yathā ghaṭe udakāharaṇamanoharaṇa-
gaganābhogāvaraṇādyarthakriyāśatakāriṇi udakāharaṇena arthī atatkāriṇo 
ghaṭānāśaṅkate alohitānanunnatāṃśca manoharaṇādinā | kuta iti cet, āha 
anyonyātmatayā | sahi eko'pi bhāvo vastuto'nyaiḥ saha tadātmaiva yadyapi 
māyāśaktyā pṛthakkṛtaḥ, tathāpi bhātatvādeva anyonyātmatāmunmīlayati | 
kathamityāha īśvara iti | īśvaraḥ sarvamidamahamitisaṃvedanarūpaḥ, tadaṅga-
bhāvaṃ tadavinirbhaktatām | yatastatparyantatvāsaṃprāptau  bhānameva hi na 
syāditi uktam | yadyapica paramaśivāntatādātmyapratipattiparyantaṃ bhānaṃ, 
tathāpi tatra bhāvasvarūpasya sarvathā anunmīlanāt na anyonyātmatā kācit | 
yatra tu tadunmīlitaṃ tadeva darśitam īśvara iti | naca sā māyāsparśe 
prarūḍhā tatra

(page 295)

īśvarāṅgatā yena anyonyātmataiva syāditi ivaśabdena uktam | tadevaṃ 
śaṅkyamānasya tasya tasya pratipakṣasya nirākaraṇaṃ vinā sa ekaikayā 
arthakriyayā arthī pratipattā tena bhāvena vyavahartuṃ hānādānakraya-
vikrayādimantamātmānaṃ kartuṃ na śaknoti, naca paraṃ vyavahārayitum | evaṃ 
dvitīyo'pi | tataśca parasparaniṣṭhaḥ kathaṃ vyavahāraḥ | evaṃ śarīrapraṇādau 
māyāpramātṛrūpe'pi arthe pramātrantarāṇi prameyāṇi ca pratipakṣarūpāṇi 
nirākartavyāni | iyatā ca ekasminnapi bhāve anekārthakriyākāritvena tattadartha-
kriyāvipakṣāṇāṃ bahutvāt tadāśaṅkāpohena bahuvikalpasamarthanakṛtaṃ-
ghaṭa unnato lohita iti-ahaṃ kṛśo gauro mandāgniriti bahvīṣvapi vyaktiṣu 
vikalpaikyamanenaiva uktamiti vyākhyāyate | vyaktibhedena vividhārthakriyākārī 
api yo'rthau gomaṇḍalalakṣaṇaḥ padārthāntareṇa mahiṣyādivargeṇa amiśraḥ, 
tatra yo viśiṣṭāmekāmekapratyayavimarśaviṣayāṃ vāhadohaprāyāmartha-
kriyāṃ pratiniyatasvabhāvatayā tāvatīṣveva vyaktiṣu saṃbhavantīmarthayate | 
tasya arthasya śaṅkyamānā ye atatkāriṇaḥ pratipakṣāḥ, śaṅkāyāṃ ca 
kāraṇaṃ pūrvavadekaḥ | evaṃca mahiṣyādivargātmakasya ekasya pratipakṣasya 
apohanāt bahuṣu api vyaktiṣu eko vikalpo gaurgauriti | taduktāmācāryapādaireva

     yāvatyo'rthakriyāstāvatsaṃkhyo'tatkāriṇāṃ gaṇaḥ |
     tāvantastatsamāropāstanniṣedhāśca tatsamāḥ ||

iti | tathā

     ekapratyavamarśo yastatkāriṣu bahuṣvapi |
     so'pyatatkārivicchedasāmye syātsanibandhanaḥ ||

iti | nanu īśvarāṅgabhūtatāyāṃ yadanyotmatvena pūrṇatvaṃ, tat pratyuta 
pāramārthikaṃ rūpaṃ svabhāva iti yuktam | atra āha māyīyānām iti |

 (page 296)

idaṃ hi pramātṛprameyāṇāṃ māyāpadaṃ mīmāṃsyate | tatra pāramārthika-
svarūpatāyāṃ māyīyataiva nyakkṛtā bhavet | pramātṝṇāṃ pramātṛbhyaḥ 
prameyebhyaśca, prameyāṇāmapica ubhayebhyo yadanantaśākhaṃ niḥ-
saṃkhyaṃ bhedanaṃ pṛthakkaraṇam, etadeva yasmāt māyīyatve prakṛtaṃ 
mukhyaṃ rūpam | ayaṃ tātparyārthaḥ-iha prakāśamātrasvabhāvatvena 
pramātṛprameyāṇāṃ viśveṣāmeva tāvat tādātmyādekarūpāveśa eva 
vāstavaḥ | saca māyāpade'pi anivṛtta eva aprakāśanaprasaṅgāt | kevalam-
anyo'nyaṃ netiparāmarśarūpasvātantryaśaktibalādavimṛśyamāna eva ādau 
prabhāvavatā stambhitabhujaṅgamaviṣavahnivat pūrṇe svarūpe udāste iva | yasya 
yat rūpaṃ vāstavaṃ, tat tadvidā prabhāvāt pratistambhitamapi na na śaṅkyate 
viṣayasya iva mārakatvam | tathāca viśvasya viśvātmatvam | anāśaṅkāyāṃ hi 
kāraṇaṃ tadrūpāsaṃbhavitvam, tadrūpasya saṃbhave'pivā tadavedanam | nahi 
khasya kṣutpraśamanatvaṃ śaṅkyate bālena vā stambhitaśakterviṣabhujagāder-
mārakatvamiti kāraṇaviruddhopalabdhiḥ | sarvasya ca pramātustathābhūtam-
īśvarātmatvaṃ prakāśate eveti viśvātmatvaṃ na aprakāśitam | yathoktamādi-
siddhasūtre anena hi vinā śūnyaprāṇādeḥ ityādi | māyāpade'pica tat-
prakāśasaṃskārasya īśvarasya anativṛtterāśaṅkā pramātṛmāhātmyādeva 
uttiṣṭhati, yat vakṣyate

     tadatatpratibhābhājā mātraivātadvyapohanāt |
     tanniścayanamukto hi vikalpo ghaṭa ityayam || ( 1 | 6 | 3)

ityādi, yena pṛthagvikalpanasamāropaṇādikṛtānavasthādidoṣāprasaṅgaḥ iti | 
yattu āryeṇa uktam

     ekapratyavamarśākhye jñāna ekatra hi sthitaḥ |
     prapattā tadataddhetūnbhāvānvibhajate svayam ||

(page 297)

iti, tatra sphuritamapi vastu duḥsamarthamiti agre bhaviṣyati | nanu apohanaṃ 
jñānasyaiva vikalparūpasya vikalpaviśeṣātmanaśca smṛtervapuriti kimasya 
pṛthaggaṇanayā | māyīyapramātṛgatāśca amī anādayaḥ kathamamāyīya-
pramātrantararūpe'rjunagurau bhaveyuranyadharmāṇāmanyatra vṛttyadarśanāt | 
tadidamāśaṅkādvayamapākaroti tat iti | yasmāt viśve ye vyavahārā bheda-
prāṇitāḥ, te'nayā apohanaśaktyā prayuktāḥ; tasmādantargatā api eṣā 
prādhānyāt pṛthagupāttā | naca asau gururmāyāpramātā | yata ā samantāt 
viṣṭo vyāptyā svīkṛto maheśvarabhāvo māheśvaryaṃ yena, tathābhūto'sau |

     ācāryamūrtimāsthāya śivaḥ pāśānnikṛntati |

iti parameśvarasyaiva gurusaṃvodhamabhedena adhitiṣṭhataḥ paramārthato 
gurutvamāgame uktaṃ yataḥ | tathāhi

     divyaṃ dadāmi te cakṣuḥ paśya me yogamaiśvaram | (11 | 8)

iti, 

     ihaikasthaṃ jagatkṛtsnaṃ paśyādya sacarācaram |
     mama dehe-------------------|| (11 | 7)

iti śarīrasthāne viśvameva mama paramātmanaḥ iti arjunasya bodhaṃ vyatārīt | 
kevalamadhikaṃ prakṛtopayogi bhaviṣyatkālaikībhāvena

     amī sarve dhṛtarāṣṭrasya putrāḥ----| (11 | 26)

ityādikaṃ prādīdṛśat yathākālāvasthitameva anyathā indrajālamātraṃ syāt 
tadānīṃ teṣāṃ bahiryathāsvasthamavasthitatvāt | upayoga evaca pradarśitaḥ

     ---------------yaccānyaddraṣṭumicchasi | (11 | 7)

iti | ahamitica sarvatra atra pāramārthikameva prakāśavimarsarūpamuktam, 

(page 298)

natu māyīyaṃ caturbhujādi sthāvarāṇāṃ himālayo'hamityādeḥ 
pratyakṣādervirodhāditi | yat mayā stutaṃ

sarvatra bhāvapaṭalena vijṛmbhamāṇa-
vicchedaśūnyaparamārthacamatkṛtiryā |
tāṃ pūrṇavṛttyahamitiprathanasvabhāvāṃ 
svātmasthitiṃ svarasataḥ praṇamāmi devīm ||

iti | nanu evamapi bhagavato māyīyatānupapatteḥ kathaṃ vikalpayoga ityāśaṅya 
āha vikalpavyāpāra iti | nahi bhagavato'pūrvābhāsanasmaraṇavikalpanādayo 
dharmāḥ | te tu māyāpramātṝṇāṃ tatsvātantryādudbhavanti,-iti bhagavatas-
tatra tatra svātantryaṃ jñānādiśaktaya ucyante | tadarthameva śaktigrahaṇam | 
vikalpanaṃ paśupramātṛgataṃ vyāpāraḥ kartavyaṃ yasyā bhagavacchakteḥ | 
bhagavāneva hi netivimarśaṃ svīkaroti eva īśvaradaśāyām | netivimarśānun-
mīlane hi cidrūpatātiriktasarvāṃśavimarśātmana idaṃbhāvasya sarvathaiva 
abhāvādidamahamitisāmānādhikaraṇyātmā bodha īśvara iti kathaṃ bhavet | 
tasmāt tatrāpi sā apohanaśaktirastyeva | taduktaṃ

     ------------daśā rudrādhidaivatā |
     niṣedharūpāstyaiśāne pade'haṃ sarvamityapi ||

iti | īśvarataiva ca viśvarūpatā gītāsu darśitā | ihāpi etadarthameva 
antaḥkṛtānantaviśvarūpaḥ iti uktam | viśvarūpāvibhāgādeva ca 
māyāpramātāro'pi tatra abhedenaiva paramārthato bhāntīti vikalpādayo'pi 
bhagavati na atyantāya dūrāpetāḥ | tata eva asya jñatvakartṛtvaprakāśādau yat 
sarvaśabdārthena viśeṣaṇaṃ, tat na saṃkocitaṃ syāt anyathā vikalpanādeḥ 
svātmavartinaḥ saṃbhave yaḥ ko'pi āsvādaḥ, tatra ayamajña eveti svaviṣayaṃ 
sārvajñyādi sarvasādhāraṇameva asya upagataṃ bhavet tadekaniyamāt,

(page 299)

saṃkocāt tu na asya māyīyateti | tena mattaḥ iti svātmano hetutā ādhāratā ca 
paṃcamyā svīkṛtā | hetau lyablope ca sā yataḥ | nanu pūrvaṃ kartari jñātari 
ca iti jñānakriye eva bhagavati śaktī nirūpite, adhunā tu smṛtyapohanaśaktī 
adhike iti kimetadityāśaṅkya āha----ceti | jñānāni smaraṇaṃ sākṣātkaraṇaṃ 
vikalpanaṃ ca apohanaśabdavācyam | tatra śaktiḥ, tānyeva ca śaktiriti || 7 ||

iti śrīmahāmāheśvaraśrīmadācāryābhinavaguptaviracitāyā-
mīśvarapratyabhijñāvivṛtivimarśinyāṃ jñānādhikāre 
paradarśanānupapattivimarśastṛtīyaḥ || 3 ||

###########   END OF FILE  #######