#################################################### MUKTABODHA INDOLOGICAL RESEARCH INSTITUTE Use of this material (e-texts) is covered by Creative Commons license BY-NC 4.0 Catalog number: M00263 Uniform title: candrajñānāgama Manuscript : BHU C4243 Description: Notes: Data entered by the staff of Muktabodha under the supervision of Mark S.G. Dyczkowski. Revision 0: April 7, 2012 Internet publisher : Muktabodha Indological Research Institute Publication year : Publication city : Publication country : India #################################################### śrī gurave śivāye namaḥ | oṃ namaḥ paramātmane || oṃ namo gaṇādhipataye namaḥ || oṃ namo viṣṇave || p. 55a) oṃ namaḥ śivāya sa śivāya śivadāya namo namaḥ | atha candrajñānaṃ likhyate || oṃ kailāsapiṭhamadhyasthaṃ devadevaṃ maheśvaram | skandanandigaṇākīrṇaṃ viśveśvarasamanvitam || 1 || brahmādi kāraṇaiḥ sārdhamumayā sahitaṃ sthitam | mahodarasamāyuktamapsarobhiḥ samāvṛtam || 2 || mahādhyānasthitaṃ devaṃ munibhiścāpi saṃvṛtam | gandharvādi gaṇopetaṃ siddhasaṅghaiśca saṃyutam || 3 || srūyamānaṃ suravaraiḥ sādhyarudramarudghanaiḥ | nārada pramukhaiścaiva gītanṛttaviśāradaiḥ || 4 || ārādhyamānaṃ deveśaṃ varadaṃ lokakāraṇam | sarvānugrahakartāraṃ sarvapāpapraṇāśanam || 5 || p. 55b) sarvamantravaraṃ nāthaṃ sarvadeva namaskṛtam | tatrasthaṃ devadeveśamumayāsahitaṃ śivam || 6 || dṛṣṭvā tu varadaṃ devaṃ dhyānasthaṃ taṃ kapālinam | saṃśayā viṣṭacittastu candro vedavidāṃpatiḥ || 7 || aṣṭāṅgapraṇipātena praṇamya parameśvaram | rodamāno bravīdvākyamucchasaṃśca punaḥ punaḥ || || 9 || indrajālaṃ hi paśyāmi asatyaṃ satyatāṃ gatam | mohitaṃ māyayā sarvaṃ brahāṇḍaṃ sa carācaram || 9 || devamānuṣya tiryañca gandharvoragarākṣasām | sarveṣāṃ niścitā buddhiḥ praṇaṣṭā iti me matiḥ || 10 || kṣaṇikasya tu rūpasya tathā śabdasya vai prabho | tvayoktasyaiva candrasya buddhi rūpasya nityaśaḥ || 11 || p. 56a) ākāśasya kathaṃ deva praṇamanti vināśinaḥ | svayamevamasaunaṣṭaścintayāyaḥ prakalpitaḥ || 12 || śabdasya kṛtakaṃ caiva mantratvaṃ ca kathaṃ bhavet | prayuktā ca yathā vīṇā tantrīsvara samanvitā || 13 || cittena sāryate yasya ṣaḍjamadhyamadaivatā | tathā mantrā tadākārā vidyāścaiva sahasraśaḥ || 14 || aprabuddhadhiyomūḍhāḥ svacittaṃ te bahiḥ sthitāḥ | kṛtake naiva santuṣṭā bhrāmitā māyayā punaḥ || 15 || asatyamindrajālasya yadrūpaṃ tatkathaṃ prabho | uccāryamāṇā ye mantrā na te samyak tvayoditāḥ || 16 || mohitā devagandharvā mithyājñānena garvitāḥ | p. 56b) māyāsvapnopamāḥ sarve mudrādhyanādi dhāraṇāḥ || 17 || na taccitramivāsatyaṃ śāstrajālaṃ kriyāgamam | devyā vināyakasyaiva ṣaṇmukhasya trilocanam || 18 || nandibhṛṅgi mahākāla kaubīrośanasāṃ tathā | vāsukirgāruḍaścaiva brahmaṇo viṣṇurudrayoḥ || 19 || sanatkuārapramukhādṛṣīṇāṃ bhāvitātmanām | durvāsapramukhādīnāṃ munīnāṃ yastu saṃhitaḥ || 20 || mantrāśca vividhākārā devyāścāpi sahasraśaḥ | saṃprāptāvividhākārā vidyāścāpi sahasraśaḥ || 21 || kathitāśca yathāpūrvaṃ yukti yuktāḥ samāsataḥ | tatsantuṣṭa mahādeva śirassthena mayā śrutam || 22 || ???????????????????? p. 57a) bhrāmitāste mayā sarve vyāyāmena maheśvarāḥ | na jñātaṃ kasyacijjñānaṃ śārīraṃ gūḍhagocaram || 13 || aprabuddhamatitvāśca śāstrajāle bhramanti te | kṛtakaṃ naiva santuṣṭāḥ svacittamuṣitāḥ sthitāḥ || 14 || mayāśrūtāgamapathātantre tantre tvayā kṛtāḥ | sambhāvaṃ kasyacennoktaṃ mohitāḥ paramārthikāḥ || 15 || ko mantraḥ kṛtako nāma kasya karmamatistathā | dīyate kasya vā piṇḍaṃ vāyurvāyau pralīyate || 16 || āpastvapsvapralīyante viśet tejaśca tejasi | ākāśe tu tathākāśaṃ manobuddhirahaṃ tathā || 17 || yathā gatāḥ punastatra līnāḥ sve sve pade tu te | ko yaṃ māṃsa mayo deho dagdho vā prāṇibhakṣitaḥ || 18 || p. 57b) amūrto nirguṇo jīvo hyanādiścāpyakhaṇḍitaḥ | na rūpaṃ tasya no varṇo na sthānaṃ na ca dhāraṇā || 19 || kasya kālo yaśaḥ kasya bhaṭāścaiva sudāruṇāḥ | narakāśśāsanāścaiva pretapuṇyaṃ vasetakaḥ || 20 || sahasrasaṅkhyāḥ puruṣā āhave ye hatāstute | nīyante bahubhiḥkālaireko vā kiṃ bahūnnayet || 21 || pakṣiṇo vihvalī bhūtā nirgatena layaṃ gatāḥ | lakṣasaṅkhyāśca vahavastatra kālaḥkimāgataḥ || 22 || eke naiva hi kālena sahasrāṇyarbudhāni ca | nīyante bahubhiḥ kiṃ vā etatsarvaṃ vadasva me || 23 || śṛṇu candra pravakṣyāmi rahasyaṃ bhuvidurlabham | yanna kasya cidākhyātaṃ nissaṃśaya karaṃparam || 24 || p. 58a) na mantro varṇasaṃyogādya upādyaḥ kriyāparaḥ | tāneśa parameśāna mohanyuktā tu mātṛkā || 25 || paśūnāṃ sthūlamārgena svātmavijñānavartmani | saṃbhavanti yathovarṇāḥ svaravyañjanasaṃjñakāḥ || 26 || akṣarakṣarayoryattadakṣaraṃ cākṣarādhikam | tasyādhikāraṇaṃ yat tad vāgbhirvaktuṃ na śakyate || 27 || tadakṣaraṃ na jānanti mithyā garveṇa mohitāḥ | tajjñātvā bījarājaṃ tu varuṇānalamadhyagam || 28 || na jāyeta punargarbhe yadyapi brahmahā bhavet | parivārāṅga vistāraṃ nāmajāti vivarjitam || 29 || ekavīraṃ smṛtaṃ mantraṃ saṅkṣiptaṃ vidhi sādhanam | śabdāvasthaṃ parityajya bodharūpeṇasaṃsthitam || 30 || p. 58b) svaramādya svaraṃ jñeyaṃ taṃ svaraṃ svaravarjitam | asvaraṃ paramaṃ mantraṃ yogināṃ mokṣadaṃ dhruvam || 31 || tuṭirṇavanimeṣāśca tathā kāṣṭhāḥ kalāstathā | śaśadhavaravidyāṃ ca muhūrtadinarātribhiḥ || 32 || pakṣamāsaṃ tvayanayoryaṃ vatsara tamaḥ smṛtaḥ | kīlanāddvijarājaivamevaṃ kālobhidhīyate || 33 || kṛtasya karmaṇaścaiva līnaḥ kālassatena vai | nīyate dehasaṃsthena karmaṇākālarūpiṇā || 34 || nākṛtirvikṛtirnāsti kālasya paramārthataḥ | sukhaduḥkha phalaṃ bhuṅkte jīvaḥ svasyaivakarmaṇaḥ || 35 || ekaḥ kṛtāntaḥ saṃhārī paśu hṛdbhavati kṣaṇāt | āyuḥ kṣīṇāśca ye bhūtāstiryañcomānuṣāḥ surāḥ || 36 || p. 59a) teṣāṃ niyamanārthāya kālonāmapravartate | na dveṣānna ca vairāgyāṅkālaḥ karmedamucyate || 37 || kālena nīyate ko sau kiṃ rūpaṃ tasya śaṅkara | kiṃ vidhau devadeveśa jīvonāmamaheśvara || 38 || kasmin sthāne vasejjīvo mriyate sa kutaḥ punaḥ | kathaṃ kālaḥ praśamati jīva sthāne trilocana || 39 || etatsarvaṃ samāsena sadbhāvena vada prabho | śṛṇu tāvat pravakṣyāmi rahasyaṃ bhuvi durlabham || 40 || jīvo hyanādiramalo niṣkalo virajaḥ katham | śaktigarbha sthito nityaṃ rūpaṃ dhyānavivarjitam || 41 || pramāṇatarkarahitastva hetuśca nirañjanaḥ | p. 59b) upamānavaśaścandra śṛṇu pātrastu kalpitaḥ || 42 || bālāgraśatabhāgastu vaidikorupagīyate | trividhaḥ sa tu vijñeyaḥ śāktogrā kārakaḥ smṛtaḥ || 43 || śāntaḥ śūnyo nirābhāsastvaprameyo nirañjanaḥ | sarvopamānarahitaḥ kalpanā kālavarjitaḥ || 44 || dvitīyaṃ yasya yadrūpaṃ śaktiḥ saivopagīyate | guṇātmikā tu vijñeyā prakṛtistattva rūpiṇī || 45 || mahābhūtāḥ smṛtāḥ pañca manobuddhirahaṅkṛtā | eṣā prakṛtirutpanā saṃsthitā sarva dehiṣu || 46 || tasyāḥ kriyā kramaṃ sarvaṃ piṇḍadānādi lakṣaṇam | etacchrutvā dhva?hāsena candro vedavidāṃbaraḥ || 47 || vihasya suciraṃ kālaṃ dvijarājobhavra?vedidam | p. 60a) pañcabhūtātmakaṃ piṇḍaṃ pañcasthāna gataṃ prabho || 48 || svasthāne ca manobuddhirahaṃkāraḥ pralīyate | ye ye bhāvā yathā yātāstathā tatra layaṃ gatāḥ || 49 || sarvajñasaṃśayasyāsya kiṃ bravihi vinirṇayam || 50 || śṛṇu sadbhāva kathanaṃ rahasya mamṛtodbhavam | mūrtairbrahmādibhiścaiva vedarājayamena ca || 51 || varuṇena tathā candra agnivittapavāyunā | ātmārthaṃ racitaṃ śāstraṃ kriyākāṇḍamanuttamam || 52 || piṇḍaṃ ca māsikaśrāddhaṃ tathā sāṃvatśarīyakam | prajārthaṃ sarvabhūtānāṃ jīvanopāya hetukam || 53 || kṛtaṃ śāstraṃ prajārthānnaṃ pradadanti parasparam | p. 60b) annena jīvalokoyaṃ vartate sarvasambhavaḥ || 54 || sadbhāvena tu jīvasya arūpasyāvyayasya ca | śrāddhadānādikaṃ karma na ca piṇḍodaka kriyā || 55 || sarvopamānahīnasya kalpanā rahitasya ca | kutaḥ piṇḍaṃ kutaḥ śrāddhaṃ kutodāhādi lakṣaṇam || 56 || brahmādyairacitaṃ śrāddhaṃ mohanārthaṃ dvijottama | sthiti kāraṇahetuṃ tvādbhūtā * * *? ta saṃskṛtam || 57 || karmanāma dvijendrendra asti sarveṣu vastuṣu | svakarmaṇā sukhaṃ bhuṅkte duḥkhaṃ bhuṅkte svakarmaṇā || 58 || yathā ca kurute karma tathaiva bhuñjate punaḥ | yena yena svabhāvena prakṛtisthāṃ tyajet tanum || 59 || tena te naiva mārgeṇa sva sva karmopabhuñjate | p. 61a) jīvaḥ saṃsarate dehānna cāsau mriyate punaḥ || 60 || janmārthe tyajate kāyaṃ kriyārthaṃ kāyameva ca | na naṣṭaścaiva notpanno baddho mukto na cāpyasau || 61 || śakterabhyantarasthāyī yathāsau jāyate punaḥ | na kṛtirguṇapāśaistu veṣṭitāssarvadehinām || 62 || tasyāḥ karma yathāsaṃsthaṃ cchāyā vadanu tiṣṭhati | yena bhāvena yo tyantaḥ prakṛtergacchate punaḥ || 63 || tena vai prakṛtaṃ karma tatra tatra pravartate | jīvo dvandva vinirmuktaḥ sarvakarmasusaṃsthitaḥ || 64 || na tena rahitaṃ kiñcidvidyate bhuvana traye | yathā vṛtau gatau vāyuḥ saṃsthitasya dvijeśvara || 65 || tathā sarveṣu bhūteṣu śaktirvai prāṇarūpiṇī | p. 61b) tatrasthaṃ yatparaṃ śūnyaṃ candrajīvaṃ tu taṃ viduḥ || 66 || vinaṣṭakālayogena dhṛtiścaiva dvijādhipa | yat tat tattvadharaṃ śūnyaṃ sa kathaṃ caiva naśyati || 67 || yathā nabhassthito vāyurghaṭā madhye virājate | sahasā ca ghaṭe bhinne na vāyurvidyate kvacit || 68 || evaṃ sarvaśarīrastho dehapātānna pacyati | darpaṇānanasaṃyoga jalārka pratibimbite || 69 || bhraṣṭe ca darpaṇe candra na naṣṭaṃ caiva mānanam | jalakṣayādyathā cārko naiva naśyati vai kvacit || 70 || evaṃ dehakṣayād dehī na naṣṭo na ca badhyate | sarvagaḥ sarvakartā ca sarvadvandva bahiṣkṛtaḥ || 71 || na tasya kālakalanā na rāgadveṣa eva ca | puṣpairgandhai tilaistailaṃ kṣīre sarpistato nalaḥ || 72 || p. 62a) indhane ca yathā saṃsthastathāsau sarvagaḥ paraḥ | śakterabhyantare jīvaḥ saṃsthito naiva lipyate || 73 || yathā veśmāntara gataṃ nabhaḥ sarvagataṃ sthitam | catuṣkena pranaṣṭe tu tannabho naiva naśyati || 74 || evaṃ sarvaśarīrasthaḥ śūnyarūpo hyalepakaḥ | na tasya kālo mṛtyurvā na piṇḍaḥ śrāddhalakṣaṇam || 75 || etatsadbhāvakathanaṃ mayā tedyaprakāśitam | etacchrutvādyavai candraḥ praphultakamalekṣaṇaḥ || 76 || apūrvamadbhutaṃ deva śrūtaṃ tvatto mayādyavai | prakṛtiḥ kiṃ vidhā caiva rūpaṃ tasyāstu kīdṛśam | mānaṃ tu karaṇaṃ tasya pramāṇaṃ vada bhairava || 78 || p. 62b) anacchā aśirekaurādvikubjā tantu rūpiṇī | prāṇāpānapravāhena gacchate viśate punaḥ || 79 || sarpavatkuṭilākārā bālāgraparimāṇagā | guṇāḥ sarve sthitāstasyā uparāgāmaṇeriva || 80 || maṇi rūpāparāśaktiruparāgopamā guṇā | tena tena svabhāvena tatra tatrāvatiṣṭhate || 81 || caturdaśa vidhe sarge śaktirnāma parā kalā | darpaṇe ca yathā cchāyā jalamadhye tu tārakāḥ || 82 || guṇāḥ prakṛtijāstadvaddṛśyante śakti madhyagāḥ | karmaṇā svena bhāvena taṃ tu bhuñjanti dehinaḥ || 83 || śaktigarbha sthito jīvo vaṃśe dhvanirivasthitaḥ | evaṃ śaktikanirjīvaḥ sukhadohlādakaḥ smṛtaḥ || 84 || p. 63a) āpādāścaiva mūrdhāntaṃ sarvatraiva vyavasthitaḥ | kālāgnyādi śivāntaṃ ca yadrūpaṃ kiñcid dṛśyate || 85 || tatra cābhyantare śūnyaṃ saṃsthitaṃ caiva sa prabhuḥ | aśmāntaragataścaiva asthirandhraśca saṃsthitaḥ || 86 || na tena rahitaḥ prāṇaḥ prakaroti gamāgamam | rahasyaṃ tedya vakṣyāmi ekāgraḥ śṛṇu tatparaḥ || 87 || ata ūrddhaṃ diśaḥ sarvā bhūmirāpo nalastathā | vāyuścakhaṃmanobuddhirahaṅkāraśca ye guṇāḥ || 88 || sarvaśūnyaṃ nirālambaṃ tatra sarve pratiṣṭhitāḥ | yat kiñcit sakalaṃ bhāvaṃ rūpataḥ keṣusaṃsthitam || 89 || tadasārataraṃ candrarūpaṃ svapnopamaṃ sthitam | bhrāntiṃ tyaja sa vai putra sarvaṃ śūnye pratiṣṭhitam || 90 || p. 63b) śūnyāt pravartate śaktiḥ śaktervarṇāḥ prajajñire | varṇebhyaśca tathā mantrā mantrebhyaḥ sṛṣṭiravyayā || 91 || tasmācchūnyaṃ jagaddhyāyedyannanaśyet kadācana | yugādinā tato adya nityaṃ sada sataḥ param || 92 || hṛdistho lakṣyate naiva sarvadarśī hyalepakaḥ | nāyaṃ piṇḍesti na śrāddhaṃ na kālakalanā tathā || 93 || sarvakriyā vihīnosau saṃsthito naiva lipyate | bhūtagrāmeṣu sarveṣu śaktyantarvasate prabhuḥ || 94 || sa bāhyābhyantaraṃ caiva sarvaṃ tena pratitiṣṭhitam | sthitaṃ tadeva bhāṇḍāsthaṃ sarvasya varavarṇakam || 95 || kriyābhedaguṇānāṃ ca bhedo mantreṣu vidyate | jñānabhedo na vidyeta teṣāṃ śāstrāgameṣu ca || 96 || p. 64a) adyāpi na mayājñātamindrajālasya lakṣaṇam | prakṛtirnāmadeveśa ādhāradharaṇī yathā || 97 || tataḥ śāstre tvayā pūrvaṃ jīvaṃ caiva sugūhitam | na naṣṭā na ca saṃbhrāntiradyāpi parameśvara || 98 || sadbhāvaṃ vadadeveśa yathā jānāmyahaṃ punaḥ || || yathā nabhaścyutāścandra tuṣārāssa tatopamāḥ | saro madhye ca patitā galitā ekatāṃ gatāḥ || 100 || tathā guṇāmarasthā tu śaktistaddharmadhāriṇī | nirguṇatvaṃ guṇaṃ yasya arūpaṃ caiva rūpakam || 101 || tathā vidhaṃ tu yat kiñcicchakti garbhe vyavasthitam | tena sarvamidaṃ vyāptamābrahmabhuvanāntikam || 102 || p. 64b) tataḥ kriyāḥ pravartante hetu proktamidaṃ jagat | āṇavaṃ ca tathā śāktaṃ bindunādātmakaṃ ca yat || 103 || vāyūnāṃ ca gamaṃ kiñcit prāṇāpānakṣaṇātmikam | sarvaśivamayaṃ candra śivo jīvaḥ prakīrtitaḥ || 104 || śāstrajālaṃ parityajya tarkajālamathottaram | adhyātmajñānasambodhaṃ śaktigarbhaṃ tu yo bhyaset || 105 || naiva naśyatyasau candra na kālaścāsya vidyate | ajarāmarabhūto vai bhavate nātrasaṃśayaḥ || 106 || jīvo na jāto na mṛtaḥ parāparagamaḥ sthitaḥ | karmaṇāṃ caiva mahato guṇānāṃ bhūtajastathā || 107 || prakṛtistu parāśaktiryatraiva bhrānti lakṣaṇam | idaṃ rahasyaṃ paramaṃ kathayāmi tavākhilam || 108 || avijñāte pare tattve na tyajet tu kriyā kramam | p. 65a) paśutvaṃ ca patitvaṃ ca dvau bhedau ca śarīriṇām || 109 || paśutvāt karmajālena gṛhyate hyamṛtodbhavam | yathābhrairarkaraśmibhyo darpaṇaṃ ca malena ca || 110 || sphaṭikaṃ pāṃsunā yad vat tathā jñānaṃ tamo vṛtam | ajñānāddṛśyate janturguṇapāśaistu yantritaḥ || 111 || karmopabhogaṃ bhuñjīta tiṣṭhate svānna yoniṣu | na deho mriyate bhuṅkte karmabhogeti tasya vai || 112 || patijñānaṃ prabuddhastu sarvajñaḥ parameśvaraḥ | prāpnoti jñānamabhyāsājjñānānmuktastu mocakaḥ || 113 || caṇḍālo hīnajanmā ca śvapaco vāpi phukkasaḥ | sarvagaṃ paramaṃ devaṃ hetūpādhivivarjitam || 114 || samyag jānāti yaścandra sa yogī cottamomataḥ | p. 65b) vipro vā mūḍhabuddhiśca ajñāna spṛśya eva saḥ || 115 || caṇḍālo yadi vā jñānī tasmai deyaṃ pratigraham | tasya hastā tu vai grāhya sa ca pūjyo yathā hyaham || 116 || bhrāntiṃ tyajasva vai candra hyetajjñānaṃ samabhya sa | ajñānācca kriyākāṇḍaṃ jñānāt karmakṣayo bhavet || 117 || niyamo na ca vā kālo bhrāntimetāṃ parityaja | ajñānāt karmapāśaistu prakṛtairbadhyate punaḥ || 118 || prabuddhānāṃ sadā candra sarvajñānamayaṃ jagat | sarvaṃ jagat svadehaṃ vā parānandena pūritam || 119 || sarvaśaṅkāḥ parityajya śūnyabhūmiṃ bhavet tu saḥ | na kālo na yamaḥ kaścidetā bāla vibhīṣakāḥ || 120 || sarvopamā na hīnasya kalpanā rahitasya ca | p. 66a) kutaḥ kālaḥ kuto mṛtyurnarake śāsanāḥ katham || 121 || sarvaṃ śūnyamayaṃ dhyāyeccharīrā vayavaṃ ca yat | kāyaṃ śūnyamayaṃ kṛtvā na kiñcidapi carcayet || 122 || vikalpa yoniṃ majjanti jantavaḥ prakṛtestute | guṇapāśairnibadhyante mūḍhāḥ pāparatāḥ punaḥ || 123 || yatra yatra hi yonyantarjāyante te svakarmaṇā | tatra tatrājñā bhāvatvaṃ paśūnāṃ syāt sadodūpa || 124 || karmāṇi kasya vai deva hyetan me vada tattvataḥ | yadi jīvo hi muktaśca nīrūpaḥ khasvarūpakaḥ || 125 || nīrūpasya kathaṃ karma śūnyabhūtasya vai prabho | etadicchāmyahaṃ śrotuṃ tvat pramādāt kapāla bhṛt || 126 || p. 66b) śūnyasya dviguṇasyaiva karma tasya karoti kim | prakṛtirguṇasaṃpūrṇā mriyate jāyate tathā || 127 || kṛta karma tathātmīyaṃ yathāsau bhuñjate punaḥ | na jīvo bhuñjate karma na cāsau prakṛtirguṇaiḥ || 128 || badhyate na ca vā mukto nāsthāyī sthāna varjitaḥ | sarvajñaḥ sarvagodhyakṣaḥ kharūpī khamanaḥ khagaḥ || 129 || iti me yogino dṛṣṭābrahmaviṣṇvendra bhārgavāḥ | te pi pra?mohamāpannā jīvaṃ jñānavidhau sadā || 130 || satyaṃ ca kathayiṣyāmi dvijarājādyame śṛṇu | pravṛtyarthaṃ tu bhūtānāṃ prakṛtārthamasaṃsthitaḥ || 131 || tathābaddhaṃ jagatsarvaṃ mūtremaṇigaṇā iva | p. 67a) ādhāradharaṇī śaktiraśirāhaṃ sa rūpiṇī || 132 || tanmadhye saṃsthito jīvaḥ kharūpī vyāpakaḥ prabhuḥ | yathā veśmāntara gataṃ nabhaḥ sarvagataṃ sthitam || 133 || veśmapātena naṣṭosau jīvaścādhāra pātane | tad vat sarvagataṃ brahma sarvatraiva susaṃsthitam || 134 || tārakendra tyajabhrāntiṃ kimanyat kathayāmite || 35 || atyantagahanaṃ deva rahasyaṃ bhuvidurlabham | tvat prasādānmayājñātaṃ jīvalakṣaṇamuttamam || 36 || adyame saphalaṃ janma adya me saphalaṃ tapaḥ | adya jātosmyahaṃ deva jñānenānena bhairava || 37 || mahatāstotrarājena devadevo maheśvaraḥ | toṣito vai mahādevaścandreṇa ca yathā kṛtaḥ || 38 || p. 67b) parituṣṭena devena varaṃ dattvā yathāvidhi | jñānabhogī ca madvākyāt pūrvoktamyā mṛtodbhava || 39 || mahābhāgi bhaviṣyaiṣā metanmedattavāndharam | evamuktvā yadā devo virarāma maheśvaraḥ || 40 || candraśca prāptavānjñānaṃ candrajñānamataḥ smṛtam | bhaktāyedaṃ pradātavyaṃ śraddhādānāya dhīmate || 41 || yonindayati mohena idaṃ śāstramagauravam | sa mūḍhaḥ sarvadā tiṣṭedātmajñānenasaṃyutaḥ || 42 || ########### END OF FILE #######