####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00014
Uniform title: cidgaganacandrikā
Author : śrīvatsa
Alternate name : kālidāsa
Editor : trivikramatīrtha
Alternate name : Woodroffe, John
Alternate name : Avalon, Arthur

Description: 
cidgaganacandrikaa by śrīvatsa alias kālidāsa

E-text copied from Arthur Avalon series. Tantrik texts ; 20.

Published:  Calcutta : Sanskrit Book Depot ; London : Luzac & Co., 1937.


Notes: 
Data-entered by the staff of Muktabodha under the supervision of Mark Dyczkowski.  

Revision 0: 30/11/2005



Publisher : Sanskrit Book Depot
Publication year : 1937
Publication city : Calcutta
Publication country : India
####################################################


kṣīrodaṃ paurṇamāsīśaśadhara iva yaḥ prasphurannistaraṅgaṃ
cidvyoma sphāranādaṃ rucivisaralasadbinduvakrormimālam |
ādyaspandasvarūpaḥ prathayati sakṛdoṅkāraśuṇḍaḥ kriyādṛg 
dantyāsyo'yaṃ haṭhādyaḥ śamayatu duritaṃ śaktijanmā gaṇeśaḥ || 1 ||

sthūlaṃ sūkṣmaṃ paraṃ ca trividhamiha tagad yatprathāveśasiddhyā
yuktaṃ sattā yadīyā sphurati ca parataḥ svaprathaikasvabhāvā |
bhāmūrti yaṃ vimarśakriyamanupatitā lakṣyate lokavṛttiḥ 
sanmārgālokanāya vyapanayatu sa vastāmasīṃ vṛttimīśaḥ || 2 ||

iha kālidāsacandraprasūtirānandinī stutirvyājāt |
cidgaganacandrikābdheḥ śamayatu saṃsāradāvadavathuṃ vaḥ || 3 ||

cillocanena satataṃ śivamīkṣitumanvaye ca sadbhāvam |
labdhuṃ ca pūrṇabhāvaṃ yadi cetaḥ samupādhvamimām || 4 ||

hṛdguhāmabhilaṣannahantayā dṛkkriyāvapuradṛkkriyāpadam |
santamemi samabhāvadaṃ śivaṃ sakhyahāniramunā hi sūyate || 5 ||

yā'hamityuditavāk parā ca sā yaḥ prakāśalulitātmavigrahaḥ |
yau mithaḥ samuditāvihonmukhau tau ṣaḍadhvapitarau śraye śivau || 6 ||

śaktinetrapariṇaddhamāsthitaṃ pūrṇabhāmayapayodhimanthatām
devi tarpaṇasudhākalāśrayaṃ rudramandaramahaṃ sphuṭaṃ bhaje || 7 ||

yo'bhavad bhavati yastathetaro yo bhaviṣyati pṛthakkriyo janaḥ |
tatra yo'dharamahantayaikayā santamasmi hṛdirandhra ānataḥ || 8 ||

viśvasadmani sadātmanīśvare pūraṇāt puruṣatāmupeyuṣi |
ye manaḥ praṇidadhurmaharṣayastān patañjalimukhānupāsmahe || 9 ||

khecarīmukhamarīcijālakaṃ vyomaśaktitanu saṃśraye sadā |
śambhudakṣatanujāvabhāsayā yatra viśvamanukartumīhate || 10 ||

khaṇḍasatprasaragarbhayā yayā lakṣitaṃ sphuravipūrṇasattayā |
tattvamaiśvaramakhaṇḍamambikāṃ tvāṃ praṇaumyakhilatattvanāyikām || 11 ||

yaḥ kilāsa sa kilāsa īśvaraḥ khyātasattvalulitordhvamūrdhani |
pratyahaṃ janani yatra tiṣṭhati tvaṃ sa sattvavapuradrirasya yaḥ || 12 ||

kalpanātigamatīndriyaṃ ca yallakṣyamujjhati bahirmukhaṃ tathā |
antarālagamabhāvabhāvayostannato'smi sadahaṃ nirākṛti || 13 ||

amba yadbhavati tattdātmanā svairitāmajahadadvayodayam |
tāvakaṃ padamapākṛtakramaṃ brahma tatsaditi vā śrutaṃ bhaje || 14 ||

deśakālakalanā viśeṣato yad bhavāni bihitaṃ nigadyate |
vyaktijāti tanusaṃśritakramaṃ taddhitaṃ tava bahirvijṛmbhaṇam || 15 ||

sattvamamba ! vihitasya vastunstatprasāditadayodayaṃ vapuḥ |
syāt tamaśca yadidaṃ niṣiddhyate dve rajo sadasadanyarūpataḥ || 16 ||

yat tamo'nyadiha tat kṣitervapuḥ sattvamanyadiha tejasaḥ śive |
miśraṇotthamitaradrajastayostvatkasattvajamato guṇatrayam || 17 ||

īśvarasya tava bhartturakṣayaiśvaryarūpamasi tattvamambike |
jñānamasya śuci karma vā phalaṃ te virāgamayapūrṇatāphale || 18 ||

jyotiramba hṛdi vidyayekṣitaṃ yallagh prasṛtamarghamaṇḍape |
dhūmalakṣmaguru yacca taccyutaṃ te tu sattvatamasī vapustava || 19 ||

tvaṃ hi rudrajakaṭākṣavartinī jāyamānamavalokya caṇḍike |
sāṃkhyayogapathadeśikadvayaṃ jātasaṃmatisamādhikaṃ yathā || 20 ||

saprakāśakṛtamajjanaṃ jagat kurvatī bhavasi pūrṇimā śive |
pūrṇameva tava rūpamanyathā kurvatī kila kuhūḥ pratīyase || 21 ||

pūrṇatākṛśatayoryadantaraṃ tatra kāli vijahatkrame sthitā |
darśitakramavibhāgasaṃbhramaṃ kālamadyatanamattumīhase || 22 ||

mātṛmeyamitisādhanātmikā tvatkṛtonmiṣati yā vikalpadhīḥ |
tvatsvarūpamakalaṅkitaṃ tayā kasya devi viduṣo na muktatā || 23 ||

akramakramavimarśalakṣaṇaṃ yā kramākramamayī kramākramam |
akramaṃ śivamavekṣya madhyagaṃ tvāṃ ca satkulamidaṃ tavānanam || 24 ||

vedyavedya(da)kavibhedadakṣayā māyayā kramavadaṅgagāminī |
yā sthitāmba bahirakṣakāṅkṣiṇī tāṃ jahi tvamaṇutāṃ mayi sthitām || 25 ||

karma yad vividhavāsanātmakaṃ māyayā saha kṛtāṇubhāvayā |
vṛttibhistava vilāpyate hi tad devi ! bhānurucibhiryathā tamaḥ || 26 ||

cinmayīkṛtamato(')kṣadṛśyayā guhyayā'mba viparītacaryayā |
labhyate samarasīkṛtākhiladvaitavṛtti tava ghasmaraṃ vapuḥ || 27 ||

yāścaranti tava khe cidātmake śaktayaḥ karaṇalakṣaṇāḥ śive |
muktabāhyapadajṛmbhaṇodyamāḥ tvaṃ hi tiṣṭhasi tadūrdhvage pathi || 28 ||

saptadhā vamasi yā tvamīśvari vyomaśāntamukhacidguṇāspadam |
āśritān nayasi nāparaṃ śivaṃ dvandvayā'dvayapadātilaṅkinī || 29 ||

yā pramātari niṣeduṣī parā pratyagātmani vimarśavigrahā |
vāgiyaṃ trividhabhāvabhāsitā tvāṃ sa vakti kimutāmba vaikharī || 30 ||

nādabindulipivigrahā girastisra ūrdhvagavimarśaśīkarāḥ |
saṃhṛtisthitivisṛṣṭidhāmasu vyāhṛtāstvadadha īśavallabhe || 31 ||

dṛkkriyātmaśaśibhānumadhyagaṃ khe caratyanalavat sudhāma yat |
yattadūrdhvaśikhare paraṃ nabhastatra darśaya śivaṃ tvamambike || 32 ||

vaikharīprabhṛtivāktrayaṃ pare meyamānamiti kartṛlakṣaṇam |
udbhavasthitilayātmakaṃ vapurbhūribhedamaparaṃ smaranti te || 33 ||

viśvamūrti yadadṛṣṭavigrahaṃ tvatpraśāntipadamaiśvaraṃ vapuḥ |
tatra te ya udayaḥ kuleśi ! taṃ sṛṣṭirāśrayati pañcavāhatā || 34 ||

yā parā sphurati śaktirambike tatra hi tvayi payodhivīcivat |
śiñjikāvayavakārthapañcakaṃ vartate vividhasūkṣmavigraham || 35 ||

tvanmukhaṃ tripathanetri ! bhātmakaṃ śaktivṛndamiha turyathāgamam (yad yathāgamam ) |
dvādaśa kramapadaṃ padādibhirjṛmbhitaṃ jagati taccatustrikaiḥ || 36 ||

mānameyamitinetralakṣaṇāḥ somasūryadahanāstridhāmagāḥ |
rāśirājividhibhañjitaiḥ svarairlakṣitāstava hi vipruṣo'mbike || 37 ||

āhatetaraduruttarāśrayastvatpadādudayate śivātmike |
advayādviṣayacitprathātanurdṛgvimarśa iha vācakaḥ svaraḥ || 38 ||

amba ! dhāmakaraṇaprayatnajo vaikharaḥ sphurati śabda āhataḥ |
mānasaḥ punarasāvanāhato vāsitastvadupalakṣya uttaraḥ || 39 ||

ṣaṣṭhavarjamahimadyuteḥ kalāḥ sargabindurahitāśca ye śubhe |
sarva eva śaśinaḥ kalāḥ śive yonayo vidhṛtabījatatsvarāḥ || 40 ||

bījayonividhibhedabheditā mātṛkāsukṛtamātṛlakṣaṇā |
śaktiramba bhavati kriyāmayī tvattanurjayati pārameśvarī || 41 ||

bindurakṣaramayaṃ kriyāmayaṃ yo niyantrayati buddhilakṣaṇaḥ |
nāda iṣṭatanurasya kāraṇaṃ | tvaṃ pare ! tritayadharmarūpiṇī || 42 ||

udyamaḥ prathama ūrmiruttaro nistaraṅgaśivacitpayonidheḥ |
prāgacitpadaparigrahāttava vyomanīśvari tanurmahodayaḥ || 43 ||

sphāritā janati seyameṣaṇā khecaratvasamupāśritā diśi |
akṣacakramanujagmuṣī gavi prāptagocarapadā bhava svayam || 44 ||

khecarīprabhṛti yaccatuṣṭayaṃ sāṃśamamba ! tava tad bahirvapuḥ |
yad dvayādvayavibhāgaghasmaraṃ tanniraṃśamabahirna vākpadam || 45 ||

pañcavṛttitanuramba ! nirgatā śaktirarpitakulaprabhāsanā |
tvaṃ śivādakulataḥ sameyuṣī tena tatra punareṣi viśramam || 46 ||

yuktito'mba ! tava vṛttipañcakaṃ pañcabhūtaguṇavṛtti lakṣyate |
gharmivṛttikṛtasiddhanāmakaṃ dharmavṛttikṛtaśaktināma te || 47 ||

brahmaṇaḥ prabhṛti siddhapañcakaṃ bhāratīprabhṛti śaktipañcakam |
unmanīṃ smarati yastavākṛtiṃ siddhavartmani jayatyasau janaḥ || 48 ||

tvaṃ prakāśayasi yaṃ sa sṛjyate dharmidharmatanurartha īśvare |
yaḥ prakāśa iha sa tvayā kṛtaḥ tattadākṛtirūpaiti sṛṣṭitām || 49 ||

tvaṃ hi cittanurato na cittatā svena te viṣayacittatāṃ vinā |
śiṣyase yadi vinārthamaṇḍalaṃ sargasīmani kuto'sti cittatā || 50 ||

vāsanā ca na vicitratāpadaṃ tatprasūstvamiha kevalaiva cet |
śaktilakṣaṇajagadbhṛtodarī mānasaindriyakavastusūrasi || 51 ||

sārvakālikamidaṃ jagat tvayā bhāsyate vidhṛtaśabdarūpayā |
āntaraṃ janani buddhidarpaṇe bāhyamadyatanamakṣarūpayā || 52 ||

yāvadamba ! puruṣasya śāntatā saptamī sakalabhāvavartinaḥ |
tāvadadvayavimarśabhinnatā sārvakālikavimarśabhāvitā || 53 ||

amba tajjaḍamuśanti bhedibhiryad guṇaiḥ sphuradapohyate kramāt |
cittadākṛtinirākṛtiḥ svato bhāti yā sakṛdasau tvameva sā || 54 ||

jāḍyamamba ! jagato nisargato yatparāprabhṛti bhāti bhedataḥ |
tvaṃ tu jāḍyaparipanthinī smṛtā yā vibhāsi sakṛdarthamaṇḍale || 55 ||

viśvametaditi yā'hamityasau nāmarūpaviraheṇa niścitā |
sā tvamamba ! na bibharṣi bhāsyatāṃ bhātmano yadasi dharma īśituḥ || 56 ||

bhāvadṛk smūtiviyuktamīśvare śūnyaratnamavalambya pudgalam |
nirniruktikamidaṃ jagat sthitaṃ cillayordhvagapathānna tattathā || 57 ||

śāntatāṃ bhajadanāśritaṃ padaṃ śaktimātrajagadekasadma yat |
nirmalajvalanaśaucavajjagat tatra hi tviṣi nimajjitaṃ tvayā || 58 ||

siddhaśaktimayabhātṛbhāsanavyāptibhāva upayukprakāśatām |
yo'yamarthanikarastvadantike tvatpramātrabhimukhaṃ tanoṣyasau || 59 ||

draṣṭṭatā jagati yatprakāśane yaśca niścayavidhau pramātṛtā |
grāhakatvamapi niścitagrahe vettyataḥ sa tava vṛttipoṣitaḥ || 60 ||

āsthitaḥ sadasadarthamaṇḍalaṃ ghīmano'kṣavapurasmitāmayaḥ |
yastrayodaśavidhaḥ svatantratā taddvayo'hamasau tavāṃśakaḥ || 61 ||

tattadarthamayabhogyalakṣaṇānandamūrtirayamuttamaḥ pumān |
arpaṇena jagataścidambare bhāti saṃhṛtimayaḥ śive tava || 62 ||

aṣṭadhā sphurati yā purī śive sūkṣmabhāvamupagamya laiṅgikam |
tajjapauṣṭakṛtacittavṛttayo vāsanāstvadudarasthite paśau || 63 ||

sargasaṃvṛtiśarīrayordvayorbhakṣyabhakṣakapadasthayostayoḥ |
antarevamahamāsthitaḥ śive dhīmano'kṣavapurarpitaṃ tvayā || 64 ||

rājanāt prakṛtirañjanācca māṃ rājasaṃjñamanu bodhakarmaṇoḥ |
ṣaṭ tvayā pṛthagamī pravartakāḥ putrabhāvamadhiropitāḥ śive || 65 ||

ūrdhvavāhamayabindulakṣaṇaḥ prāṇasūrya iha ciddviṣaṭkalaḥ |
tatkalādharatanurgurukrame tvaṃ prakāśatanu siddhamaṇḍalam || 66 ||

yastvadhovahananādalakṣaṇo'pānasoma iha bhogyavigrahaḥ |
tasya ṣoḍaśakalāḥ kṛtāstvayā''nandacakratanavo gurukrame || 67 ||

vāsareśarajanīśayoḥ kalāścaṇḍi yāvadudayaṃ vitanvate |
tāvadeva divasakṣapodayastvatkṛtaḥ prakaṭaguptavigrahaḥ || 68 ||

devi taddvayakalāvimiśraṇāt sāmarasyapadameti yā sthitiḥ |
bindunādasamavedyavedakā'ntargatā hi tava mūrtiratra sā || 69 ||

līḍhabhānuśaśimaṇḍalā sthitirlambhitā pralayavahninā tvayā |
prāṇadhāmni daśasaptadhā satī mūrtirāśritagurukramā śive || 70 ||

iṣṭabodhakṛtaśaktayastvayā saṃhṛtisthitivisṛṣṭisadmasu |
turyacitpadamayuḥ prasāritāḥ suptitaḥ prabhṛti dhāmasu triṣu || 71 ||

meyamātṛmitilakṣaṇaṃ kulaṃ prāntato vrajati yatra viśramam |
tatpadaṃ tava turīyamambike yanmahadbhiranupākhyamiṣyate || 72 ||

cārarāvacarubhirvibheditairmudrayā ca yadupāsanaṃ tava |
tadvaśena bhajate paramparāṃ tāvakī kramatayā sphuṭākṛtiḥ || 73 ||

maṅgale tvamasi vākcatuṣṭaye yā parā sphurati mūrtimaṇḍale |
sā prakāśa-sukha-vṛndacakragā nādabindulipimūrtirijyase || 74 ||

ādyacitprasaramūrtirambike pītatāṃ vrajati yatkṛtāspadā |
akṣayaṃ śivamupāsya tajjanaḥ śakticakrajanitaḥ pramucyate || 75 ||

amba ! śaktivapuṣā tvayonmiṣadrūpayā samarasaḥ śivo yadā |
yattadollasati vīryamūrjitaṃ pīṭha eṣa hi mahāṃstvadutthitaḥ || 76 ||

yā śive sphuraṇaśaktirakṣayā kṣmādipañcakaniviṣṭabhātanuḥ |
sā mahad bhavati vīryamagrimaṃ yanmayī tvamasi pīṭhacakrasūḥ || 77 ||

pīṭhacakranikaraikadharmiṇī tvaṃ sthitā ca satataṃ samantataḥ |
sadbhirudyamanirantarātmabhirlakṣyase'mba niravagrahodayā || 78 ||

īraṇena vividhena vīratāṃ yo'yamakṣaragaṇaḥ prapadyate |
antyamīśamasi taṃ tridhāmakaṃ varṇaśaktipadavī ca citkalā || 79 ||

yā'nalārkaśaśivigrahā kalānāhatāmbaravisarpiṇī śive |
pīṭhataḥ prabhṛti yāvadarcyate tāvadunmiṣati tanmayī satī || 80 ||

nirjanasthitilayaprathātmike'grāsanityaniravagrahodayaḥ |
jṛmbhitastvadanupākṣadīpito dvyaṣṭakaṃ manurume ! tavāsanam || 81 ||

nityabhātaruci viśvaghasmaraṃ durnirīkṣamapi sanniketanam |
tvaṃ śmaśānamasi vīrahṛdgataṃ kṣīṇavṛtti karavīramijyase || 82 ||

viśvasaṃharaṇalīlayotkaṭaṃ vyomni śaśvaduditaṃ nirāśraye |
kṣetrapālamanupādhikollasat tvadvimarśamabhinandatīśvare || 83 ||

khecarīprabhṛtiramba śākinīprānta eṣa tava yo gurukramaḥ |
sṛṣṭitaśca yadanākhyavikramaṃ cakrametadakhilaṃ tavodgamaḥ || 84 ||

taddvayollasitamamba ! vartate yatra nityamiha sāmarasyataḥ |
sanniketapadanityajṛmbhitollāsa eṣa tava me purassaraḥ || 85 ||

bhogyabhoktṛrucighasmaraṃ manaḥ pañcavāhamayamucyate tamaḥ |
nirniketapadameti yatra te ko'pyasau satatamadhvarotsavaḥ || 86 ||

pūrṇasattvaraja-ādihṛdgatādhiṣṭhitā tvakhilalokavāhinī |
pañcadhā vahasi śāśvatodayā siddhasindhuriva siddhasevitā || 87 ||

vyomayānamatimatpurassaraḥ pañcadhā prasara eṣa tāvakaḥ |
jṛmbhamāṇaguruvaktracitpathollāsimūrtirayamāsthito jagat || 88 ||

spandamādyamanu kurvatī śive nirniketanapathotthitā guṇaiḥ |
śūnyadhāma vasasi tvamiṣṭitaḥ prāgadhiṣṭhitaravā vijṛmbhase || 89 ||

ciccamatkaraṇarūḍhanirbharā tvaṃ purā sphurasi saiva khecarī |
rūpasaṃgrahadarśitaiṣaṇā tejasā svarasavāhinā'mbike || 90 ||

devi naikaviṣayodyamasphuṭārohiṇī bhavasi saiva bhūcarī |
sparśasaṃgrahaṇanityasammukhī svairitāmajahatī svabhāvajām || 91 ||

pratyagātmani dṛśo'vakuñcanā viśvamannamudare vitanvatī |
grasya saṃhṛtimukhena dikcarī saiva devi rasacarvaṇonmukhī || 92 ||

prāptacittamukhato'dhitasthuṣī svasvarūpamaniketamañjasā |
raudrabhāvakṛtabāhyajṛmbhaṇā gocarī tvamasi gandhahāriṇī || 93 ||

brahmavigrahakalādhirohiṇī pañcavāhavapuṣaḥ kalā tava |
sāmarasyaghaṭitodayā śive śaśvadullasati siddhamaṇḍale || 94 ||

bhānuśītakaravahnikuṇḍalībindusūtritaparāvarasthalā |
rudraśaktiriha kālakarṣiṇī tvatkapañcavidhavṛttisūcinī || 95 ||

ghoṣavāḍavaśikhāstaduttaraṃ bindunādayugalaṃ ca yatpadam |
saprasādamiha pañcabhiḥ śive tvāṃ kalābhiranukḷptamomapi || 96 ||

induśūlavṛṣaṭaṅkamātṛkākālabījadhṛtapañcabhūmikaḥ |
lopasandhivihitadhruvodayaścinmayaśca tava devi darśitaḥ || 97 ||

yajjvarādipadamamba vāyunā yā śikhā madhusapannagāspadā |
yā niśā madhuniviṣṭasṛṣṭikā paṅktirapyanukaroti te sthitim || 98 ||

yannabhaḥ sphurati yo marut tvayādhiṣṭhito vidhṛtasargarūpayā |
yā śikhā yaduta vāri yajñasūryāmba paṅktirapi taistathāvidhaḥ || 99 ||

bhūcarī vahasi daṇḍataḥ kramaṃ muṇḍato'paracatuṣṭayī ca sā |
bhogyabhoktṛkalanormisaṃkṣaye sāmarasyarasarohiṇī śive || 100 ||

yastvanāhatadhṛtordhvapāragastryaśramūlagaganasthitaḥ svaraḥ |
tatra devi viyadagnipārśvayormadhyagā vahasi pañcadhā kramaiḥ || 101 ||

pañcavargamayapiṇḍagāminī mañcapañcakatanustvamamba yā |
devi varṇa iva bhāsi niṣkramā sāmarasyakṛtapañcavṛttikā || 102 ||

śūnyamamba mahamucyase tu yā yat tvamatra gagane sadoditā |
divyamoghamata udgirantyasau sparśamujjhasi hi vāmavigrahā || 103 ||

ambarasya paramāgatā śive saiva cittamanaghā svabhāvataḥ |
spandametya paramaṃ virājate khecari praṇatakhecarastvayā || 104 ||

vyaktamakramavijṛmbhitā śive tvaṃ visṛṣṭabhuvanadvayodayā |
saiva saṃcarasi saṃśritā yadā bhūcarī bhavasi saṃjñayā tadā || 105 ||

svaṃ vapuḥ sphuraṇaśaktilakṣaṇaṃ tattadarthamayamambike kṣaṇāt |
saiva cennijapadāntavartinī saṃharasyatha tadāsi dikcarī || 106 ||

pratyagarpitamukhī bhidākṣayādaikarasyamaghiropitaṃ tridhā |
svaṃ kramaṃ grasasi saiva cedasau gocarī khalu mahāmbarāntagā || 107 ||

pañcasu sphurati devi vṛttisu tvanmayīṣu yadi kācana svataḥ |
śaśvadāśu nikhilāstadaiva tāḥ sāmarasyamadhiruhya bhāntyamūḥ || 108 ||

nirṇiketanatayā'mba khecarī sphāritā gaganakāmayā tvayā |
nādasarganihitasvavaibhavā dikcarī sphuṭamadhiṣṭhitā yayā || 109 ||

kṣobhamamba ! tava tāvadiṣṭato dvyaṣṭaraśmitanunādavigrahā |
bindubhūmimadhitasthuṣī sphuṭānandacakravibhavāsi bhūcarī || 110 ||

dikcarī tvamasi bindubhāskarā jṛmbhitā bahirihāmba nirgatā |
arthapañcakamalaṃ grasantyasau bhūcarīṃ nayasi nirvibhāgatām || 111 ||

tad dvipañcakalavahnivigrahaṃ saptatacchikhamaśeṣaghasmaram |
mūrticakramadhiruhya dikcarī tvaṃ parāṃ viśasi vācamadvayām || 112 ||

cetasaḥ kṛtamadā svajṛmbhayā tvaṃ nijaṃ viyadabhūmi jagmuṣī
gṛhṇatī paramamamba citpadaṃ maṅgalāsi vidhutāhṛtiḥ parā || 113 ||

asvarāgrimavikāsadharmiṇī viśvacakraparimelanodyamā |
bhāvanādikalanātivartinī pañcavaktramadhipīṭha ijyase || 114 ||

bindunādaśaśipīṭhabhāsvarā jvālarājabhagakālavigrahā |
asvarākhyaparamāmbarātmikā maṅgalā tvamasi vāktrayātigā || 115 ||

dvyaṣṭadhāmanilayā citiḥ śive sphārayantyaniśamātmano balam |
nirniketanapadā tanoṣyasau jñānaraśmivisaraṃ sadoditam || 116 ||

antaramba bahirapyamī karā ye tavākṣatanavo'ṅka eṣa yaḥ |
vigrahadvitayamapyataḥ paraṃ cinnabho nayasi naḥ karaṅkiṇī || 117 ||

yatprakṛtyavadhitattvamaṇḍalaṃ kṣmāmukhaṃ parimitagrahāsṣadam |
krodhanī tvamasi tajjihīrṣayā mantramūrtiriha te vijṛmbhate || 118 ||

devi kāryakaraṇāhvayaṃ vapustvaṃ triśaktivisaradguṇātmakam |
māntramugrarasasaṃkulaṃ paraṃ vīryamānayasi tajjihīrṣayā || 119 ||

granthayo'pi ṣaḍume yayā dhṛtā sā nirāvaraṇacinnabhaḥpadā |
spandamūrtidhṛtabhedaḍambarā bhairavi tvamasi viśvabhedinī || 120 ||

aṣṭapuryuditabījavāsanāsaṃhṛtipravaṇaraśmipuñjayā |
līḍhamātramukhabheditā tvayā bhūyase janani lelihānayā || 121 ||

tvaṃ parāprabhṛtivaikharāntimollekhavistaravilāpanonmukhī |
devyanāvaraṇaśambhusadmagā khecarī bhavasi cidvikāsinī || 122 ||

vahnisūryaśaśidhāmaghasmarī kuṇḍalī taḍidivotpatantyasau |
śāmbhavaṃ janani bindumadhvanā madhyamena ca gatāsi khecarī || 123 ||

mudritasvakṛtatattvamaṇḍalā jṛmbhase svajaṭhare sadoditā |
vṛndacakragatapañcabhedagā tvaṃ śive diśasi yogajāṃ śriyam || 124 ||

jñānamamba tava bheditaiḥ svaraistaistu yoga iha ṣaṇḍavarjitaiḥ |
vyañjanairudayate mahāntikairmantraśaktiyugalaṃ kahādibhiḥ || 125 ||

binducakraśaśikuṇḍalī śikhā mūrtirambaragatā caturvidhā |
śaktiratra kṛtaśambhubhedanā ṣaṣṭirambaragatāścatuṣparāḥ || 126 ||

ādihāntanijadehanirgatāḥ ṣaṣṭiratra caturuttarā rucaḥ |
khecarījaṭharaniṣṭhitāstvayā maṅgale paramabhedataḥ kṛtāḥ || 127 ||

jñānadīdhitiṣu raudradīdhitermantradīdhitiṣu vāmayoditam |
yogadīdhitiṣu jṛmbhate'mbikā jyeṣṭhayaivamatha śaktidīdhiteḥ || 128 ||

devyabheditakalācatuṣṭayā śambhudīdhitiṣu dīpyate svaraḥ |
tatsthitistvamapi varṇabhedinī maṅgale vahasi yatpradhānatām || 129 ||

sarvadaiva sakṛdāsthitodayāḥ sarvataḥ kṣapitakalpanābhidāḥ |
itthamekavapuṣā tvayā nijāḥ sphāritā mahati lakṣmacittviṣaḥ || 130 ||

udyamaprathanacarvaṇātmakaṃ jāgarādipadamamba yatkriyā |
yatturīyamapi tadvilāpanaṃ bhātanustvamakhile'tra jṛmbhase || 131 ||

yo vikalparahito'kṣamaṇḍalārūḍha ullasati māturambike |
prāgvimarśa iha tanmukhī prathā jñānamarthavidhṛtā tanustava || 132 ||

īdṛgetaditi tatprathāsthiteryo vimarśa udito'ntarakṣataḥ |
mantra eṣa tava vṛndacakrago yanmukhī bhavati tāvakī kriyā || 133 ||

bhogyabhoktṛparighaṭṭanollasannirmalapramadanirbharodayā
lolitākhilahṛṣīkavṛttikā yuktiramba ! tava viśvamelinī || 134 ||

jñaptimātramapanītavāsanaṃ nirvikalpamadhiruhya cittviṣā |
sāmarasyakṛtaśāśvatodayā tvaṃ hi śaktiradhitiṣṭhasīśvare || 135 ||

śūnyamamba gaganaṃ hi yā mahat spandabījamaniketamīyuṣī |
līyase jhaṭiti cittayā tvayā śambhuraśmivapuṣā'tra bhūyate || 136 ||

jñānamamba śamapūrṇacitpayorāśilambilaharī tvamucyase |
tadvimarśatadupāśritakramadhvaṃsamūrtiśatamūrdhvamaṇḍalā || 137 ||

styāyamānaśivacidrasātmakaṃ bhāvavṛndamadhiruhya bhāmayī |
khānilāgnijalabhūmibhāsinī śambhutaḥ prabhṛti jṛmbhase śive || 138 ||

sphāratāvakavimarśapāvakabhrāmyamāṇadhanasārabhātmikāḥ |
pañcadivyakulabījavigrahāḥ tvattviṣo'mba ! śivacinnabhaḥpradāḥ || 139 ||

pañcacakratanureṣa jṛmbhate nirvikalpaśivabodhasatphalaḥ |
pañcasu kramamahīruhaḥ śive tvanmarīciṣu nirastavaibhavam || 140 ||

bījamamba ! tava pañcadhoditasphāritapraguṇadevatākramaḥ |
siddhido'yamaparītajṛmbhaṇo yaḥ prakāśa iha so'ntacakragaḥ || 141 ||

śambhudhāmni patitāmbareśvarī śaktidhāmani tato'nu khecarī |
bhūcarī tvamanu yogadhāmnyato dikcarī tadanu mantradhāmani || 142 ||

pañcamaṃ jhaṭiti pātukakramādīyuṣī sphurasi raudravaibhavāt |
jñānadhāmni nikhileśi gocarī na kramastava nirāśraye pade || 143 ||

jñānataḥ prabhṛti pañcamaṃ śive yat tvamatra paracinnabhastanuḥ |
pañcavāhamayaśaktigarbhiṇī bhāsase prathanaketaghasmarī || 144 ||

tvaṃ nirantaracidambarātmikā velayā'mba tulitā dayāmbugheḥ |
tvayyamūrjhaṭiti saṃvidāpagāḥ pūrṇatāṃ dadhati nirniketanāḥ || 145 ||

pañcadhā prabhṛtavaibhavaṃ śive cakrametadiha gocarīkṛtam |
viśvabhakṣanirupākhyacinmayāt tvatpadād galati naiva jātucit || 146 ||

dhāma yad bhavati mudrayā samaṃ yā ca saṃvidaniketanāśraye |
yā'ṇubhāvakalitā kalā ca tat sarvamamba tava bṛndacakragam || 147 ||

asvarollasanabījamagrimo kṣīṇato'vapurapākṛtakramaḥ |
nāda eṣa tava viśvadaiśikaḥ ko'pi saṃvidi vimarśa īśvaraḥ || 148 ||

granthipañcakavibhedinī citiḥ pañcatāralipivṛttisūcitā |
yeyamamba paradhāmni te tanuryonipañcakamayī nirākṛtiḥ || 149 ||

sparśavarṇamayapañcavargajairvistarairjanani mudritā tvayā |
vyaktibhedaracanā samantato vyaktidhāmasahitā jaganmayī || 150 ||

āditaḥ kramamayībhiramba yaḥ pañcabhirbhavati yonibhiḥ svataḥ |
akramaḥ kramamayastvadāśrayāt sakramaḥ sphurati sṛṣṭilakṣaṇaḥ || 151 ||

kevalaṃ jagati yonirakramā yogamūrtiriha te satāṃ matā |
yoniratra mahatī taduttarā sā yadetadavabhāsanaṃ tava || 152 ||

śaṅkhayonirata uttarā dhṛtā vṛttiramba tava yattu cavarṇam |
kālavigrahavilāsanaṃ punaḥ padmayonirapi te vikasvarā || 153 ||

nistaraṅgajaladhikramā sthitā kāli dhāmni tava bhedaghasmare |
divyayoniriha svasvarūpiṇī niḥsvabhāva udayaḥ parastava || 154 ||

svasvarūpamayaviśvamūrtidṛksiddhagāḍhaṣarirabdhavigrahāḥ |
sparśamūrtimadhiruhya pañca te yonayo vidhṛtasṛṣṭimaṇḍalāḥ || 155 ||

jāgarāmukhacatuḥpadā'dvayonmeṣasaṃsphuritamātṛlakṣaṇā |
nirdvayādvayagatirmahākhage drāk tavāmba patisiddhamaṇḍalī || 156 ||

kuṇḍahṛtsvaracatuṣṭaye sthito vyaktitaḥ prabhṛti yo jagatkramaḥ |
tasya gopaka udagravaibhavo yo'vatāra iha sāmba te prathā || 157 ||

spandamūrtimavinaśvaraṃ khagaṃ sparśaśūnya iha haṃsamāsthitaḥ |
īśvarastripathabhakṣyadhāmago yastamamba bhajate khagendratā || 158 ||

prātibhaḥ prathama udyamo'mba yaścitraviśvaracanādaro'dvayaḥ |
kūrmavṛttimanukṛtya kūrmatāṃ yātyasau tava niveśitaḥ pathi || 159 ||

meṣa eṣa udayaḥ paro mama chandatokṣatanutāṃ vahatyume |
nityaturyamahimā grasannibhaṃ meṣa eti tava dhāmni saṃsthitim || 160 ||

chandato mama nirāśraye pade muktabāhyapadasiddhikalpanāḥ |
saṃvido vasata yūyamityamūḥ śāstyasau tava nirargalaḥ śive || 161 ||

nistaraṅgaparamādvayaprathāmbhonidhau pratinivartitakramaḥ |
viśvamannamudaraṃ nayatyume mīna utkaṭavimarśavaktragaḥ || 162 ||

nirniketamahimā nirākṛtistāvako'yamavabhāsanakramaḥ |
svasthaśaktivisaratsamāhito yatra śaktinivaho'mba jṛmbhate || 163 ||

kṣānta ādikalitākṣacakrago dhīnirāsakṛtatadvicāraṇaḥ |
khaṇḍacakra udito'mba te kramo rudrasaṃkhya iha saṃhṛtikramaḥ || 164 ||

niścitagrahanideśavarjito yuktyayuktyatigato'kramaḥ paraḥ |
satpathoditakhadhāmagaḥ śive khaṇḍacakravisarastavotkaṭaḥ || 165 ||

vyaktimattaditarakramaprathāguptikṛt kṣatabahirjagatkramaḥ |
nirgatādhamamahārthajṛmbhitaḥ saṃbhṛtau janani te'nvayakramaḥ || 166 ||

grāhyatadgrahavidhātṛsaṃbhramo nādayugma iha viśramonmukhaḥ |
rudrasaṃkhya imamattumīhate tāvake tava marīcirambike || 167 ||

yo daśendriyaniviṣṭa uddhṛto'tyarthamātmajaḍabhedaviplutaḥ |
tat kṣayāya vata kālakarṣiṇī tvatsamullasati tāvakī ruciḥ || 168 ||

akṣacakranivaho'rkasaṃkhyayā svaṃ svamarthamiha yo grasatyume |
ciccamatkaraṇanirbharaḥ sa te pratyagullasati tatpadaṃ gataḥ || 169 ||

tatpadaṃ jhaṭiti nītasantatiḥ prekṣya devi tava turyadhāmagaḥ |
nistaraṅgaparamāmbarātmagāḥ sāmarasyamupayanti dīptayaḥ || 170 ||

ādisargasamakhaṇḍavarjitasvasvarātmarucicakragāmini |
vyaktatatparatayā sthitaṃ bahistāvakārtharucicakramambike || 171 ||

nirvikalpaparamāmbarāśrayāḥ ujjhitetarapadāstviṣastava |
sphāritā hi yadi pūrṇatāmadhuḥ saṃbhramaṃ jagati bāhyamīśvare || 172 ||

cañcalā taṭidivākramaṃ parā spandavṛttilaharī tavāmba yā |
sodayāt prabhṛti kalpanāṃ vinā vṛttibhistisṛbhirujjhitā sakṛt || 173 ||

amba tatra kalanā pṛthakkriyā sṛṣṭitaḥ svapathage krame ca yā |
tadvirūpamamalaṃ tanukramodyogamukhyacaturūrmisañcitam || 174 ||

ekamamba tava bhātyanāvṛto dvādaśakramacidūrmiḍambaraḥ |
sṛṣṭikālyudayameti yanmukhe yaḥ sphuṭo niravadhirnirāśrayaḥ || 175 ||

tasya devi harasaṃbhṛtervaśād durnirīkṣyatanurucchritāśrayaḥ |
svasvabhāvavihitakramākrame dvaidha eṣa tava cittviṣāṃ cayaḥ || 176 ||

yo manonmanamanonmanītaraḥ svasvarūpacaturātmabhāvataḥ |
dvādaśaikyatanurakramakramo bhairavastvamasi devi te sthitiḥ || 177 ||

brahmaviṣṇuharamūrtitāṃ yato'bhyeti tattava turīyamāspadam |
vyoma yat kramamayī tvadīraṇā dhūyate layakhacakragā śive || 178 ||

bindugarbhanihitaṃ tridhāmagaṃ tadviśiṣṭamupari prasarpati |
bhedanānidhanamoṃ yadambike tattvameva paratattvadarśanam || 179 ||

sattvajāśrutakalāvadhi tvayā kālavahnibhuvanā marīcayaḥ |
bhakṣaṇāya jagataḥ prasāritā yallayānnṛbhiraṇutvamujjhyate || 180 ||

varṇamantrapadajṛmbhayā sama yāḥ kalāstadanu tattvamaṇḍalam |
yāni tatra bhuvanāni caṇḍike tatra kṛtsnamapi gṛhyate sthitau || 181 ||

tvaṃ nirāvaṇayuktimāsthitaistāvakādvayavimarśasādhitā |
antarāhitaṣaḍadhvamaṇḍapairyogibhirjanani śaśvadīḍyase || 182 ||

mūlataḥ prabhṛti pāvakāśrayaṃ dvādaśāntanidhanaṃ śive jagat |
vāhatatprathanayorniṣeduṣī majjayasva tava dhāmni citpade || 183 ||

ye nirāvaraṇayuktiśālinastān prati sphurati tatparaṃ nabhaḥ |
yatra meyamitimātṛghasmare vāsanāpi na jagadvibhedagā || 184 ||

vṛttisaṃharaṇameva mātari vyajyate na khalu saṃstutikṣayaḥ |
taddvayaṃ ca tava dhāmni saṃbhṛtaṃ caṇḍi keyamiti caṇḍimā tvayi || 185 ||

bhūtayantranilayāstavāmbike śaktayo'kṣarakavṛndamāsthitāḥ |
tvatpadaṃ hi viṣayāmṛtāsavaiḥ svasvavṛttikusumairyajantyamūḥ || 186 ||

gocarīprabhṛti śūnyapaścimaṃ bhūtaṣaṭkamavamajya dhāmni te |
svaprabhe pramadanirbharāḥ paraṃ śaktayo dadhati darpamīśvare || 187 ||

dvādaśāmba ! kiraṇātmano ravermātṛvahnividite tvadambare |
viśvametya sahasā marīcayo'śnanti cinmukurabimbitaṃ jagat || 188 ||

bāhyamīśvari vinā sudarpaṇo bimbametadanukāriṇī tanuḥ |
vyāptatāmupeyuṣī tvadambare yuktimarhati na bimbabāhyatām || 189 ||

asti bāhyamiti tatpratheta cet tādṛśaprathanagarbhitaṃ hi tat |
na pravedayati niṣpramāṇakam mānamamba khalu sādhayet prathām || 190 ||

īdṛgetaditi caiva mā phalaṃ tattatheti hi vimarśa āntaraḥ |
nirvibādha upadhānaśabdavat karma sā tvayi puṭatrayī sthitā || 191 ||

māyayāntaramapi sthitaṃ jagad vartamānamavabhāti bāhyavat |
bhūtabhāviyugalaṃ yathāpuraṃ vidyayāmba tava vṛttirūpayā || 192 ||

tvaṃ guhā nikhilabhāvagūhanī bhāmayena vapuṣā'vatiṣṭhase |
yacca yastava patirguhāśayaḥ prāṇicakramakhilaṃ ca yasya pūḥ || 193 ||

bhāsitaṃ janani māyayā bahirbimbametadanukāri mānasam |
māturetadubhayaṃ ca bimbitaṃ tāvake vapuṣi yad dvayaṃ sthitam || 194 ||

vārivahnimukurādiṣu sphuṭā svacchavastuṣu kumāri bimbatā |
mantritā saha paricchadena yat tena bimbamanavekṣitaṃ tava || 195 ||

yatsmṛtau sphurati vastu bimbitaṃ svapnasaṃprathanakalpayośca yat |
bimbavarjamiha tannidarśanāt tvannimagnamuditaṃ jagat tvayā || 196 ||

svapnadṛṣṭamasadityasadvaco divya eṣa yadiha pramāṇitaḥ |
kalpanāpi na mṛṣā phalaṃ śive yat sthitaṃ garuḍabhāvanādijam || 197 ||

khyātiramba ! yadi yāti pūrṇatāmīdṛgetaditi kalpanāmayī |
tattatheti hi vimarśa uttaro nāntareti parimardayogyatām || 198 ||

asti tadyadi dhṛtaṃ jalasthale devi ! tadvadanalārkasomayoḥ |
mārute nabhasi vā tadākṛtistatkṛtiṃ ca kurute hi pūruṣaḥ || 199 ||

kalpanā yadi mṛṣeti bhāṣitā dhāraṇā phalati kena hetunā |
devi ! saṃkalanabodhajīvitā devatā kimiti kairna hīyase || 200 ||

tanna jagmurudadhau svayauktito viṣṇurātmajamadarśayaccitaḥ |
tātamamba tanayasya śaṅkaro dagdha eṣa hi bahiḥkramastava || 201 ||

rūpameṣyati hayānanaṃ harirgopasaṃjñamagamad bahiḥ puraḥ |
tad dvayaṃ ca bhajatāṃ bahiḥ phalaṃ bhāvi cenna sadatītamamba yat || 202 ||

akṣare'mba parame viyadṛco yatra yatra sakalā ca devatā |
tanna vedayati cedṛcāṃ phalaṃ tadvidāṃ taditi hi sphuṭā śrutiḥ || 203 ||

vahnibhānuśaśividyudātapaṃ jyotiriṅgaṇanabhaścarādayaḥ |
yāḥ sphuranti hṛdaye'pi sāravāḥ taistadambaragatairhi bhūyate || 204 ||

deśakālamavabhāsi yādṛśaṃ yattayā'nubhaviturvibhedinaḥ |
tattayā sakalamīkṣyate smṛtau matkṛtasmṛtimavekṣate kṣaṇam || 205 ||

yadyanaṅkṣyadanubhūtirīśvare sā smṛtistaditinā pratiṣyate |
saṃstavo hyanubhavasmṛtau sthitastatkṣaye'nubhava eva na smṛtiḥ || 206 ||

saṃsmṛtiḥ sadṛśavastubodhikā dṛṣṭa eva viṣayaḥ smṛtetaraḥ |
dṛk śive viṣayabhānavigrahā tatprathā smṛtiriyaṃ yadāhṛtā || 207 ||

draṣṭṛdṛśyadṛśilakṣaṇaṃ jagat prāksmṛtestvayi tadamba saṃhṛtam |
unmiṣatyapi punastadudgame tallaye nimiṣati tvadicchayā || 208 ||

sā pramāturiha jīvitaṃ smṛtiryatnatāṃ prakaṭayatyamuṣya yā |
yā ca dṛg janani nihnutena te apyubhe saha punarvirūpatām || 209 ||

dṛg vidhatta iha viśvamambike tatpunaḥ sthirayati smṛtistava |
tanmithopanihitā niṣīdasi tvaṃ tu yogatamasītyanāśritā || 210 ||

sṛṣṭipālananirodhalakṣaṇā rūpatāṃ vahasi bindulakṣaṇā |
tadvilakṣaṇapadā tvamambike cinmayī punararūpamucyase || 211 ||

bhogyabhoktṛmayagā vimarśagā devi māṃ cidudare dṛḍhāṃ daśām |
ārpayadanalasomamiśraṇastvadvimarśa iha bhānujṛmbhaṇaḥ || 212 ||

dṛṣṭirūpamidamamba bhāvitaṃ sthemarūpakaraṇāṃśubhirjagat |
syādanākhyamaniketayuktitastatpunarlayamanena cātmanā || 213 ||

akṣamūlapaśubhedavigrahā nyāyasaṃbhṛtihṛtārdharūpiṇī |
tvatpade glapitakalpane layād bhāti binduriti kiṃ nu mudrayā || 214 ||

yā daśāsu nikhilāsu sarvathā sarvataḥ sphurati citparā sakṛt |
guptabhāṣitajagadvijṛmbhaṇā mantratāṃ bhajasi tattvamamba sā || 215 ||

akṣimātravisaracchikhaṃ śive vahnimugramudare vitanvatī |
grastakālatanubhānumatkalā svodaye diśasi śaktijṛmbhaṇam || 216 ||

tatra te sadasadarthaśūnyatā nirvṛtirjayati yatra viśramaḥ |
mātṛtatkaraṇagocarojjhitā kālyakālamanu tallayo'stu me || 217 ||

kṣepamamba vitanoti saṃkhyayā tadgrahaśca sahasā paratraye |
akramaḥ sa khalu kāla īśvare pratyamuṣya bhavatī ca kālyasau || 218 ||

khe bahirghanavṛte rucistamohāriṇī vahasi hāsyarūpatām |
tvaṃ ca cinnabhasi māyayā vṛte taddhi kālyasi paraistvamīkṣitā || 219 ||

dvādaśaśātmaravikālaghasmarī kālakāliśivabhūmikā varā |
yādṛśī bhavasi caṇḍi ! tādṛśīṃ tvāṃ viduḥ kalitakalpanāparām || 220 ||

yatkulaṃ trividhamamba tadbhavo yaḥ prakāśa upalakṣyate mahān |
tatra yo nikhilakalpito'rṇavastvaṃ yadūrmirasi kṛtyalālasā || 221 ||

unmiṣannimiṣadapyuta dvayaṃ viśvametadudare dhṛtaṃ yayā |
sā tvamamba laharī śivāmbudheḥ kṣepasaṃprakaṭanagrahonmukhī || 222 ||

yaḥ paro nirupasargataḥ paraḥ syānmahānapi ca kevalaḥ śive |
uttaraṃ ca viṣayotsavastadānanda ullasati cidghanāsi yat || 223 ||

viśvasaṃhṛtipade layojjhite līyase yadi niraṃśataḥ śive |
sṛṣṭikālyasi yayā bahiḥpade kṣiptamamba jagadāśu gṛhyate || 224 ||

labdhasāmyapavanadvayāhṛtaṃ vātacakramadhitasthuṣī śive |
nirgamāgamamapojjhitāntare tvaṃ sthitaṃ grasasi hi sthitāmbike || 225 ||

yā śikhāntarahutāśanirgatā dhāmacakramavabhindatī kramāt |
ūrdhvasomarasapānadīpitā sā'pi devi kalaye bahiḥ sthitaḥ || 226 ||

barhiṇo'ṇḍarasavad yadantare śabdataḥ prabhṛti citritāsanam |
arthapañcakamasau tvamunmanī sandhipūrvapadakalpaghasmarī || 227 ||

ātmabhāvamakhilasya jagmuṣī tvaṃ śive niravadhiḥ sadoditā |
bhāvasaṃhṛtinimeṣavigrahā saṃhṛtaṃ kalayasi hyanāvṛtiḥ || 228 ||

svairakhelananiveśitāḥ śive ātmanā'kṣarucayastrayodaśa |
arthapañcakamayāśca vedakāstvaṃ vinītaghanasāramūrcchitā || 229 ||

bhakṣayantyakhilamakṣajaiḥ śive śaktiraśmibhirimāśca mātṛbhiḥ |
tāśca saṃsmṛtimahālaye pare rajyatī harasi viśvavigraham || 230 ||

kālapālakamukhaṃ śivāntakaṃ viśvamabdhipatitodabinduvat |
pūrṇatāṃ vahati yatra dīpticid ghasmarī tvamiha sādhyakālyasi || 231 ||

etadamba sadidaṃ tu neti naḥ śaṅkayā hṛdi vikalpalakṣaṇaḥ |
yo yamaḥ sa khalu kālyate tvayā bhūtasaṃyamanakelikovidaḥ || 232 ||

amba kāryakaraṇe niyacchataḥ pūrṇacitpadamahotsavadviṣaḥ |
jambitasya hṛdaye svaśaṅkayā tvaṃ yamasya vapuṣā'si bhīṣaṇā || 233 ||

vittadāramukhabhogyagāminī yā mametyabhimatirmadoddhatā |
yā'pyahaṅkṛtiranātmani sthitā mṛtyurūpamubhyaṃ tavāsanam || 234 ||

viśvamamba kuruṣe śavāsanaṃ mṛtyusecanamakhaṇḍitodayā |
cidvikalpamayamantarudyamaṃ kālamohitajagattrayam prati || 235 ||

śāśvataprasarayā cidarciṣā dīpitākhilahṛṣīkamārgayā |
arthapañcakamidaṃ tvayā jagad bhadramamba gamitaṃ tavāntaram || 236 ||

vāsanā sthitimayī bhavāspadā tvaṃ niyojya kṛtaviśvasaṃhṛtā |
tvadbhruvā kuṭilayā śive kṣaṇāt saṃhṛtaḥ khalu bhavaḥ savāsanaḥ || 237 ||

kurvatī janani sṛṣṭicitratāṃ yā kalā bhramati vedyamaṇḍale |
brūhi sā tava kalonmukhī yadā tvaṃ kriyotkuṭilayāttyamū tadā || 238 ||

unmiṣannimiṣadarkavimbayā'nantayāmba paramārthamadhyataḥ |
agnimūrtiriha sṛjyate tvayā bhakṣyate'pi ca sakṛtprabhātayā || 239 ||

bharganāmna iha bhāraveḥ śikhā śaktiramba viṣayendhanonmukhī |
śāntidhāmajuṣi yāti nirvṛtiṃ tvayyasau khalu śivaikapāvake || 240 ||

yo'mṛtāṇḍanibhamarthapañcakaṃ prāṇinaḥ sphurati bhāmayo raviḥ |
saṃhṛtārdhamanu antarāhitaṃ tadvahiḥ sṛjati cārthapañcakam || 241 ||

saṃhatordhvanikarasmṛtāvadhirvyaktamaṇḍatanuramba bhāsvaram |
kālalakṣaṇakalāpradīptaye tvaṃ hi viśvarasabhakṣamāsthitā || 242 ||

bhūtacakramadhukośasambhṛtaṃ tattadarthamadhu pātumutsukaḥ |
yanmarīciviṣayaḥ sabhāskarastvadrucau śalabhavat pralīyate || 243 ||

prāṇa eṣa yamakāla ucyate madhyavāhatanuragnimamba yaḥ |
rudrametadupanīya khaṃ paraṃ tatra sargavimukhaṃ karoṣyamum || 244 ||

tvatkramopahatabhānumaṇḍalaḥ krodha eṣa layavahniruddhataḥ |
viśvabhakṣaṇarasā marīcayo yasya bhīmavibhavāstvayā hṛtāḥ || 245 ||

grāhyamatra purato haranti te yat pṛthag grahaṇamapyasuṃ tataḥ |
grāhakāṃśca varade marīcayaḥ tāstvadarpitajagadvijṛmbhaṇāḥ || 246 ||

yaḥ śmaśāna iha bhūtaghasmare rajyate'mba karavīranāmani |
grāhakaṃ grasasi taṃ śrutaṃ mahākālamapyasuhutāśadurgrahā || 247 ||

dikcarī daśasu dikṣu yā bahistattadindriyamayīṣu jṛmbhate |
antaramba karaṇatraye ca yā khecarī galasi te ca tvatpriye || 248 ||

tvaṣṭuramba ! śivabodhabhāsvataḥ sṛṣṭitaḥ prabhṛti yā marīcayaḥ |
dvādaśakramapadatrayordhvagāstāsu saṃcarasi vā trayodaśī || 249 ||

sakramākramavimiśrabhāvatastvatkramastritayacāruvīkṣaṇaḥ |
turyaraśmiguṇavikramaikabhūstvaṃ kramatriguṇabhīmakālyasi || 250 ||

yatra kāli daśa te karāḥ sthitā dve ca yāntyudayamapyamūryataḥ |
tannabhaḥ śrayasi sarvataḥ paraṃ tvaṃ prakāśaśivacandrikā satī || 251 ||

śāntamamba yadabhinnamambaraṃ yat prakāśaghanamapyapohyete |
yad dvayobhayapadātirocanād yatra muktanikaro nilīyase || 252 ||

tvaṃ padatritayagarbhitodayaṃ nirvyapohamupaguhya śaṅkaram |
aikarasyalasadakṣayaprathaṃ nādamudvamasi sarvataḥ śive || 253 ||

ye vidanti tava rūpamīdṛśaṃ ye ca nityakṛtatallayodyamāḥ |
eṣa tān prati bhavan sudhāmayo ye'nyathā viṣamayaśca tān prati || 254 ||

yaḥ pramajjayati mūḍhacetasaṃ tārayatyapi sa eṣa dhīmataḥ |
yena tadbhavasudhāmbudhiḥ śive yajjuṣāṃ vahati nistaraṅgatām || 255 ||

arthapañcakasudhāprapūrite yadbhavāmṛtanidhau sukhaplave |
padyatāṃ vahasi saṃvidindirā dhāmavastu tadume vapustava || 256 ||

tatra padmarucivedyamaṇḍale svāduni prakaṭameyivān layam |
māyayā'mba puruṣo nimīlitaḥ tvaddhiyonmiṣati vidyayāvṛtaḥ || 257 ||

tattadarthadalaśobhitaṃ jahannidramullasitamamba vārijam |
tvadvimarśamakarandanirbharaṃ pīṭhatāṃ vrajati yatra cinmayam || 258 ||

tvaṃ malatrayavilāpinī śive pūrṇapīṭhamahamātmakaṃ śritā |
śuddhabhānutanuradvayaprathānandasārarasavāhinī satām || 259 ||

satsudhābdhirasabhṛt kalāntarī garbhaṣoḍaśakalābjaviṣṭaram |
pretamujjhitagamāgamaṃ śive smerabhūḥ sarasijaṃ tvamāśritā || 260 ||

niṣkalaṅkamanavekṣitakṣayaṃ yāminīdivasatūlajṛmbhaṇam |
svaprakāśavinimagnacijjaḍaṃ candravarṣma yadi caṇḍike samam || 261 ||

ye tu kuṇḍalaśikhākulasthitāḥ ye bhavantyakulabinduśālinaḥ |
te vidanti nu tavāmba vaibhavaṃ pūrṇabhānamayaviśvaghasmaram || 262 ||

jyotiṣāmba ! śikhayāpahanyate puṃsi caitasikamuddhataṃ tamaḥ |
yatpathaprathanalakṣmapuṅkhitaṃ tattvameva śivaśaktirapyasi || 263 ||

nihnutoditaśatārkadīdhitiśchannacandraśatalakṣmacandrikam |
tvaṃ bibharṣi vapuramba bhātmakaṃ tatpraveśya kuru māmanāmayam || 264 ||

tvaṃ kulākhyaśaśibhānupāvake bhrājamānakaraṇātmanāyike |
saṃsmṛtāsi municittamaṇḍape adya me kuru tavāṅghrisaṃśrayam || 265 ||

pañcavāhagata śaktilakṣaṇaistvanmukhairakhilamarthamaṇḍalam |
gṛhṇatī mayi niveśya caṇḍike yā karoṣi sahajaṃ tavādhvaram || 266 ||

tvatpadasmṛtividhūtakalmaṣaṃ sarvataḥ sphuritapūrṇabhāghanam |
siddhacakramiha modate śive pūrṇimāpyahaha me na tāpahā || 267 ||

bhūtabhāvibhavadarthagarbhitaṃ kālaghasmaramupāsyate vapuḥ |
kālakarṣiṇi vahanti yoginaḥ kṛṣṇataḥ prabhṛti viśvarūpatām || 268 ||

sparśarūparasagandharūpajaṃ śabdacidvalasabhā vibhindatī |
vṛtti ca kramakṛtāḥ ṣaḍadhvano deśakālamayamūrticakragā || 269 ||

yatprakāśatamarañjakaṃ padaṃ tasya bhāva iha yaḥ sato'mbike |
induvahniravilakṣaṇaṃ kulaṃ tvaṃ turīyapadagā'pyalakṣyasau || 270 ||

amba nandati samantataḥ śive lokanena ya udagravaibhavaḥ |
prajñayā vahasi sārvabhaumayā yā ca netramayamarcitā tava || 271 ||

prāptadivyanayanairvilakṣaṇairvīkṣya kāli ! mahimā'nuvarṇyate |
kevalaṃ tadanuvarṇane'pyume tvanmude tadapi dāsajalpitam || 272 ||

na tvamamba puruṣaśca nāṅganā citsvarūpiṇi na ṣaṇḍhatāpi te |
nāpi bharturapi te trirūpatā tvāṃ vinā tadapi na sphuret trayam || 273 ||

īśvaro janani cintitapradaḥ ko'pyanādinighano mahāmanāḥ |
tvatprathā tvamasi viśvaghasmarī tvāṃ tataḥ ka iha bhettumarhati || 274 ||

raktaśuklatanuhaṃsabhedinī tvaṃ patiśca tava tatkṛtākṛtiḥ |
bhānuśāṅkaravibhedatastava strī ca kāpyasi pumāniva svayam || 275 ||

rūpamamba tava bhāsvaraṃ puro varṇapañcakavibheditaṃ punaḥ |
tvadvimiśraṇamapi hyasusthitaṃ citrasaṃjñitamataścaturvidham || 276 ||

bhāsanāvaraṇaśaktyadhiṣṭhito jyotirañjanamatho dvidhā tava |
vigrahābharaṇabinduśarvarīsaṃjña udbhavabhavaḥ sphuṭodayaḥ || 277 ||

añjanena rucimiśraṇe same raktamullasati tāvakaṃ vaṣuḥ |
śyāmanīlatanutā'ñjane'ghike pītaśuklatanutā ca te rucau || 278 ||

saumyatā tava sisṛkṣayā tanoḥ sā tathāpyatha rirakṣiṣā yadā |
ghoratā punariyaṃ jihīrṣayā saṃsmṛte'mba tava dhāmni śāntatā || 279 ||

bhāsvare vapuṣi sarvage tava spaṣṭamaṇḍanivaho nimajjati |
kālavahnyadhikṛtau śive yathā tatsamullasati dīptipañjare || 280 ||

tāvakaṃ trividharūpavarjitaṃ garbhitatrividharūpamambike |
cinmayaṃ paramarūpalakṣaṇaṃ rūpamantaravabhāti tadbabahiḥ || 281 ||

strīti nāma tava kāpi kalpanā strītirūpamapi tādṛśī ca dhīḥ |
vastutastvamasi viśvavigrahā tatparā ca citireva śāṅkarī || 282 ||

tvaṃ caturthapadavartinī śive yaddvitīyamapi tatpadaṃ sthitā |
yo'pi pañcamapadāśritaḥ śive yastṛtīyamapi tatpadaṃ sthitaḥ || 283 ||

yatpadaṃ prathametaduttare tatpare tadapi turyagāminī |
tvaṃ turīyatanurāhṛtatrikā pañcamaṃ viśasi pūritatrikam || 284 ||

ambareśvari nirākṛtestava vyajyate nikhilamākṛtitvataḥ |
sarvadā sphurasi yeyamadvayānandacitprasarapīṭhavartinī || 285 ||

na śrutirna ca giro na cāgamāḥ khaṇḍavastu viniveśitāśayāḥ |
tvāṃ nayanti parameśi te makhā yāgayogavidhayaśca nedṛśīm || 286 ||

nityatādiguṇalakṣite pade jñānayogamukhakalpanāpi te |
amba na tvadanubhūtidāyinī tvallayaikagurusaṃśrayaṃ vinā || 287 ||

vyomabhāvaviniviṣṭacetasaḥ prātibhaṃ jagadavekṣya ninditāḥ |
te tvamāviśasi yānanārataṃ tvannayena guruṇāmba ! vīkṣitān || 288 ||

nityatā tvayi vibhutvapūrṇate dṛkkṛye svarasagocare ca ye |
tāni tāni viyatīva śobhane rāgavedasakalāśca bhāntyatha || 289 ||

vyomavṛttighaṭitaikya ullasatyadvayo janani ! devatāgaṇaḥ |
tāvakodyamapade'pi sarvago drāgvilāpanapadaṃ vināpi te || 290 ||

itthamamba tava vṛttipañcakasyodayo'dbhutavibhāgasaṃbhramaḥ |
sarvadā sphurati sarvataḥ paraṃ khaṇḍitetaranijasvarūpabhāk || 291 ||

khaṇḍitetarasamastagarbhago yastripañcavisarāśrayo'kramaḥ |
devatākrama udetyanārataṃ tasya hi tvamasi devajanmabhūḥ || 292 ||

divyavāhavibhavodarasthito raśmimaṇḍalasamudgamāspadam |
avyayastava navārṇavigrahe saṃhṛtikrama udetyakalpitaḥ || 293 ||

lakṣyaśūnyasahajāśramodayārambhapūrṇanijakoṭyabhedinī |
raśmicakratanuraśmitojjhitā tvaṃ ca gauri ! varapuṇyavāsanā || 294 ||

adhvabhirdhvanivimiśraṇakramamabjabījamaniketanaṃ varam |
kalpanaikyabahubhedamadvayaṃ mantrapīṭhamasi kālyanargalam || 295 ||

spandamamba paripūrṇamapyabhūḥ spandamu~jjhitapadaṃ nirāvṛti |
vyomarūpamakhilakramāspadam pīṭhamāvadhikavidyayāmbayā || 296 ||

aṣṭayonidalapatrapūruṣaṃ tvantavṛttidalaśaktipeṭikā |
tvaṃ patiśca tava liṅgavigraho rudrasiddhamunivṛndavandite ! || 297 ||

sṛṣṭitaḥ prabhṛti yaccatuṣṭayaṃ yatprakāśanibhamūrtivṛndajam |
yacca khaṇḍapadamamba ! pīṭhagaṃ dehi cakranavakaṃ nutaṃ tava || 298 ||

tvaṃ navārṇamanucakravigrahā svodarārpitasamastadevatā |
devi saptadaśavarṇabheditā tvaṃ prakāśaśivacandragāminī || 299 ||

yaḥ śivātprabhṛtisomapaścimastvatkramaikarasiko gurukramaḥ |
ānanāgramiha cakrabhānuto yattu edadubhayaṃ tvayā yayā || 300 ||

tattadarthapuruṣo dhṛtakramaḥ pratibhasphuritadivyavigrahaḥ |
akramastava varaṃ padaṃ śive yo'hamadvayavimarśalakṣaṇaḥ || 301 ||

lakṣaṇaṃ tadanu sūkṣmamiṣyate jyotirātmakamavarṇamāsthitā |
sthūlametadanuvarṇya lakṣyate bhāvyate śamayituṃ mano mayā || 302 ||

tatra śāntavati pauruṣe male vyomavadgatamavedayā tvayā |
siddhakāryakaraṇaṃ niraṅkuśaṃ cinmarīcivisareṇa maṅgale || 303 ||

somaputramapanīya madgatastvatkramo'dya kimapi stuto mayā |
grastabhīṣaṇabhavo'yamambike tvatpadāmbujavimarśatejasā || 304 ||

muktameva na mayā mayocitaḥ prerito'smi tava tartinī tayā |
siddhanāthakṛtatvatkramastuteḥ kālidāsaracitāṃ ca pañcikām || 305 ||

yadviniścayapadaṃ ca te stavaṃ yo'mba veda kuru tanmukhaṃ jagat |
kālidāsapadavīṃ tavāśritaḥ tvatprasādakṛtavāgvijṛmbhaṇaḥ || 306 ||

tvadguṇān yadahamastu vai jagat tena mohamatiradya mucyatām |
pūrṇapīṭhamavagamya maṅgale tvatprasādanakṛte mayā kṛtaḥ || 307 ||

eṣa cidgaganacandrikāstavaḥ kinnu vāñchitamasūta māṃ prati |
yaḥ paṭhejjapati devi ! te stutiṃ yo'rthamatra vivṛṇoti vetti yaḥ || 308 ||

yo'nugātyabhinayatyabhīpsitāṃ tacca tasya kuru siddhimiśvari |
kālavarṣiṇi śataistribhiḥ stutiṃ tāvakīmiha navottaraiḥ kṛtām || 309 ||

traiṣṭubhairaharahaḥ parāmṛśan kālacakramatiyan prasīdati |
kartumicchati śivaṃ śive nṛṇāṃ jñāyate tad vicārya yā tvayā || 310 ||

kṣepadhīstavana (?) gauri tatkṛtā viśvarāśi (?jñi) kuru sarvamīpsitam |
kevalaṃ mama punastadīpsitaṃ sarvatastava madīkṣaṇaṃ śive ||
yena khelanasarohaṇārṇavaḥ śaśvadāviśati yena māṃ śivaḥ || 311 ||

pūrṇapīṭhakṛtaṃ siddhestadbhāvastavamādarāt |
vā narārthaṃ mahāguhya śrīvatso vidadhe sa tu || 312 ||

iti śrīkālīdāsamahākaviviracitā cidgaganacandrikā sampūrṇā ||

kramaprakāśikāsaṃvalitā

praśastipadyāni


tantre sūrya ivaiva bodhakiraṇairajñānanāśe'graṇīr-
lokālokakalākadambavibhavairdedīpyamāno maṇiḥ
śaśvacchāntisudhāsamudralaharī dolāyate yad-hṛdi
gopīnāthabudhaṃ namāmi vibudhaṃ sārasvataṃ tanmahaḥ || 1 ||

mīmāṃsā sahasā sudheva dhavalā yebhyaḥ pradatte nidhiṃ
vedāntāmaratattvabodhavibhavo brahmeva bodhākaraḥ |
tarkāgādhapayodhilolalaharī līlāyate yaddhṛdi
śuklopāhvavibhūtibhavyabadarīnāthān sadā tān numaḥ || 2 ||

vedāṅgāni vibhānti yatra vimale vidyāgurau mārgade
manye śrīraghunāthaśarmavibudhe sāṅgāni ratnāmbudhau |
stutyā kīrtilatā sudheva bhuvane yasyāmarā bhāsate
pūjyaṃ taṃ satataṃ smarāmi sukhadaṃ vidyākaraṃśaṅkaram || 3 ||

yoge tantrabhare vibhāgakamale bābhāti vijño varaḥ
prakhyāto vrajavallabho'tra dhavale vidyānikete'dhunā |
yasyāsīmadayaiva heturaparo nābhāti me mānase
ṭīkākarmasahāyikā navanavā taṃ bhāvaye prerakam || 4 ||

mānī śrīśivapūjano mama pitā mātā ramā mohadā
yatpārśve prabalaṃ manobalakulaṃ samprāpya kṛtvā'dhunā |
ṭīkāṃ cidgagane navāṃ navabalāmarthaprakāśe parāṃ
vaiduṣyāñcitacidbharāṃ matimatāṃ yāce dayāṃ bodhadām || 5 ||

śrīrukmiṇīkamrakaraṃ sahāyaṃ
samprāpya nirvighnamihāsmi loke |
prakhyātasīvāna iti pradeśe
vāso madīyaḥ sarayāṃ-subhūmau || 6 ||

tatrāgame śrīraghunāthamiśro
bhūriśramo yasya vibhāgatantre |
arthaprakāśāṃ vimalāṃ ca ṭīkāṃ
kamrāṃ sa tene'rthaprakāśikākhyām || 7 ||

kā pañcamī yā'rthaprakāśikāyāḥ
sāphalyasiddhāvupakārikaiva |
nāgānanā saṃśayanāśakārī
mohāpahantrī kṛtibhārahārī || 8 ||

sadā lokāloko dalayati dalaṃ gāḍhatamasāṃ
bhṛśaṃ jvālālīlo darayati daraṃ vepathumatām |
maruddhīrā dhārā dahati vipulāmuṣmalaharīṃ
tavaivaikā dṛṣṭiḥ sakalamiha mātaḥ śamayati ||

|| śubhaṃ kulakramaṃ kuryāt ||
*

###########   END OF FILE  #######