####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00133
Uniform title: kāmadhenutantra
Editor : r m caṭṭopādhyāya

Description: 
Transcribed by the staff of Muktabodha.


Notes: 
Transcribed by the staff of Muktabodha under the supervision of Mark S. G. Dyczkowski.

Revision 0: Sept. 22, 2008

Publisher : unknown-pree 1900 Bengali Script
Publication year : 
Publication city : 
Publication country : India
####################################################



oṃ namaḥ paradevatāyai

kāmadhenutantram

prathamaḥ paṭalaḥ

śrīpārvatī uvāca

devadeva mahādeva sarvāgamaviśārada |
adhunā devadeveśa pañcāśadvarṇamuttamam || 1/1 ||
tattvarūpaṃ mahādeva kathayasva dayānidhe |
kṛpayā kathayeśāna yadyahaṃ tava vallabhā || 1/2 ||

śrīmahādeva uvāca

adhunā saṃpravakṣyāmi rahasyamatigopanam |
yena vijñātamātreṇa jīvanmukto bhavennaraḥ || 1/3 ||
ajñātvā mantratattvāni mahāvidyāṃ japettu yaḥ |
sarvaṃ tasya vṛthā devi kiṃ tasya japapūjanaiḥ || 1/4 ||
dhyānāvadhāraṇe caiva tathā yogasamādhinā |
varṇajñānaṃ yadā nāsti kiṃ tasya japapūjanaiḥ || 1/5 ||
mama kaṇṭhe sthitaṃ bījaṃ pañcāśadvarṇamadbhutam |
nānāvarṇayutaṃ śuddhaṃ tantrāṇāṃ sāramuttamam || 1/6 ||
pañcāśanmātṛkāṃ devīṃ nānāvidyāmayīṃ sadā |
nānāvidyāmayīṃ devīṃ mahāvidyāmayīṃ tathā || 1/7 ||
sarvavarṇamayīṃ devīṃ sarvadevamayīṃ parām |
sarvadevamayīṃ saumyāṃ brahmāṇḍajananīṃ parām || 1/8 ||
praṇamya bahudhā bhaktyā nigadāmi śṛṇu priye |
akārādikṣakārāntā mātṛkā bījarūpiṇī || 1/9 ||
visargaścaiva binduśca triśaktibrahmavigrahaḥ |
varṇāttu jāyate brahmā tathā viṣṇuḥ prajāyate || 1/10 ||
rudraśca jāyate devi jagatsaṃhārakārakaḥ |
mama kaṇṭhasthitā yā sā śāradā vāmalocanā || 1/11 ||
tasyā garbhasthitā devi bījāni vividhāni ca |
vidhṛtya kaṇṭhadeśe tu śivo'haṃ kamalānane || 1/12 ||
śṛṇu tattvamakārasya atigopyaṃ varānane |
śaraccandrapratīkāśaṃ pañcakoṣamayaṃ sadā || 1/13 ||
pañcadevamayaṃ varṇaṃ śaktitrayasamanvitam |
nirguṇaṃ triguṇopetaṃ svayaṃ kaivalyamūrtimān ||
bindutattvamayaṃ varṇaṃ svayaṃ prakṛtirūpiṇī || 1/14 ||

iti śrīkāmadhenutantre devadevīsaṃvāde prathamaḥ paṭalaḥ ||



dvitīyaḥ paṭalaḥ

śrīmahādeva uvāca

ākāraṃ paramāścaryaṃ śaṅkhajyotirmayaṃ priye |
brahmaviṣṇumayaṃ varṇaṃ tathā rudraṃ svayaṃ priye || 2/1 ||
pañcaprāṇamayaṃ varṇaṃ svayaṃ paramakuṇḍalī |
ikāraṃ paramānandaṃ sugandhakusumacchavim || 2/2 ||
haribrahmamayaṃ varṇaṃ sadā rudrayutaṃ priye |
sadā śaktimayaṃ devi gurubrahma svayaṃ tathā || 2/3 ||
sadāśivamayaṃ varṇaṃ paraṃbrahma samanvitam |
haribrahmātmakaṃ varṇaṃ guṇatrayasamanvitam || 2/4 ||
ikāraṃ parameśāni mūrtirvai kuṇḍalī svayam |
īkāraṃ parameśāni svayaṃ paramakuṇḍalī || 2/5 ||
brahmaviṣṇumayaṃ varṇaṃ tathā rudramayaṃ sadā |
pañcadevamayaṃ varṇaṃ pītavidyullatākṛtim || 2/6 ||
caturjñānamayaṃ varṇaṃ pañcaprāṇamayaṃ sadā |
ukāraṃ parameśāni tāra kuṇḍalīnī svayam || 2/7 ||
pītacampakasaṃkāśaṃ paṃcadevamayaṃ sadā |
pañcaprāṇamayaṃ devi caturvargapradāyakam || 2/8 ||
akāraṃ devadeveśi bījaṃ paramadurlabham |
śaṅkhakundasamākāraṃ svayaṃ paramakuṇḍalī || 2/9 ||
pañcaprāṇamayaṃ varṇaṃ pañcadevamayaṃ sadā |
pañcaprāṇayutaṃ varṇaṃ tathā trayaguṇātmakam || 2/10 ||
bindutrayayutaṃ varṇaṃ pītavidyullatā yathā |
dharmārthakāmamokṣaṃ ca sadā sukhapradāyakam || 2/11 ||
ṛkāraṃ parameśāni kuṇḍalī mūrttimān svayam |
atra brahmā ca viṣṇuśca rudraścaiva varānane || 2/12 ||
sadāśivayutaṃ varṇaṃ sadā īśvarasaṃyutam |
pañcaprāṇamayaṃ varṇaṃ caturjñānamayaṃ sadā || 2/13 ||
raktavidyullatākāraṃ ṛkāraṃ praṇamāmyaham |
ṝkāraṃ parameśāni svayaṃ paramakuṇḍalī || 2/14 ||
pītavidyullatākāraṃ pañcadevamayaṃ sadā |
caturjñānamayṃ varṇaṃ pañcaprāṇamayaṃ sadā || 2/15 ||
triśaktisahitaṃ varṇaṃ praṇamāmi sadā priye |
ḷkāraṃ cañcalāpāṅgi kuṇḍalī paradevatā || 2/16 ||
atra brahmādayaḥ sarve tiṣṭhanti satataṃ priye |
pañcadevamayaṃ varṇaṃ caturjñānamayaṃ sadā || 2/17 ||
pañcaprāṇayutaṃ varṇaṃ tathā guṇatrayātmakam |
bindutrayātmakaṃ varṇaṃ pītavidyullatā yathā || 2/18 ||
ḹkāraṃ parameśāni pūrṇacandrasamapramam |
pañcadevātmakaṃ varṇaṃ pañcaprāṇātmakaṃ sadā || 2/19 ||
guṇatrayātmakaṃ varṇaṃ tathā bindutrayātmakam |
caturvargapradaṃ devi svayaṃ paramakuṇḍalī || 2/20 ||
ekāraṃ paramaṃ divyaṃ brahmaviṣṇuśivātmakam |
bandhūkakusumaprakhyaṃ pañcadevamayaṃ sadā || 2/21 ||
pañcaprāṇātmakaṃ varṇaṃ tathā bindutrayātmakam |
caturvargapradaṃ devi svayaṃ paramakuṇḍalī || 2/22 ||

iti śrīkāmadhenutantre dvitīyaḥ paṭalaḥ ||



tṛtīyaḥ paṭalaḥ

aikāraṃ paramaṃ divyaṃ mahākuṇḍalinī svayam |
koṭicandrapratīkāśaṃ pañcaprāṇamayaṃ sadā || 3/1 ||
brahmaviṣṇumayaṃ varṇaṃ tathā rudramayaṃ priye |
sadāśivamayaṃ varṇaṃ bindutrayasamanvitam || 3/2 ||
okāraṃ cañcalāpāṅgi pañcadevamayaṃ sadā |
raktavidyullatākāraṃ triguṇātmānamīśvaram || 3/3 ||
pañcaprāṇamayaṃ varṇaṃ namāmi devamātaram |
etadvarṇaṃ maheśāni svayaṃ paramakuṇḍalī || 3/4 ||
raktavidyullatākāraṃ aukāraṃ kuṇḍalā svayam |
atra brahmādayaḥ sarve tiṣṭhanti satataṃ priye || 3/5 ||
pañcaprāṇamayaṃ varṇaṃ sadāśivamayaṃ sadā |
sadā īśvarasaṃyuktaṃ caturvargapradāyakam || 3/6 ||
aṃkāraṃ bindusaṃyuktaṃ pītavidyutsamaprabham |
pañcaprāṇātmakaṃ varṇaṃ brahmādidevatāmayam || 3/7 ||
sarvajñānamayaṃ varṇaṃ bindutrayasamanvitam |
śaktitrayamayaṃ varṇaṃ svayaṃ paramakuṇḍalī || 3/8 ||
aḥkāraṃ parameśāni visargasahitaṃ sadā |
aḥkāraṃ parameśāni raktavidyutprabhāmayam || 3/9 ||
pañcadevamayo varṇaḥ pañcaprāṇamayaḥ sadā |
sarvajñānamayo varṇa ātmāditattvasaṃyutaḥ || 3/10 ||
bindutrayamayo varṇaḥ śaktitrayamayaḥ sadā |
kiśoravayasaḥ sarvā gītavādyāditatparāḥ ||
śivasya yuvatī etā mūrttimat kuṇḍalī svayam || 3/11 ||
adhunā saṃpravakṣyāmi kāratattvamuttamam |
rahasyaṃ paramāścaryaṃ trailokyānāṃ ca saṃśṛṇu || 3/12 ||
vāmarekhā bhaved brahmā viṣṇurdakṣiṇavīthikā |
adhorekhā bhavedrudro mātrā sākṣānmaheśvarī || 3/13 ||
kuṇḍalī aṅkuśākārā madhye śūnyaḥ sadāśivaḥ |
javāyāvakasaṃkāśā bāmarekhā varānane || 3/14 ||
śaraccandrapratīkāśā dakṣarekhā ca mūrtimān |
adhorekhā varārohe mahāmārakatadyutiḥ || 3/15 ||
śaṅkhakundasamā kīrtirmātrā sākṣāt sarasvatī |
kuṇḍalī aṅkuśā yā tu koṭividyullatākṛtiḥ || 3/16 ||
koṭicandrapratikāśā madhye śūnyaḥ sadāśivaḥ |
śūnyagarbhe sthitā kālī kaivalyapadadāyinī || 3/17 ||
kakārājjāyate sarvaṃ kāmaṃ kaivalyameva ca |
arthaśca jāyate devi tathā dharmaśca nānyathā || 3/18 ||
kakāraḥ sarvavarṇānāṃ mūlaprakṛtireva ca |
kakāraḥ kāmadā kāmarūpiṇī sphuradavyayā || 3/19 ||
kāminī yā maheśāni svayaṃ prakṛtisundarī |
mātā sā sarvadevānāṃ kaivalyapadadāyinī || 3/20 ||
ūrdhvakoṇe sthitā kāmā brahmaśaktiritīritā |
vāmakoṇe sthitā jyeṣṭhā viṣṇuśaktiritīritā || 3/21 ||]
dakṣakoṇe sthito bindū raudrīsaṃhārarūpiṇī |
jñānārthā sātu cārvaṅgi kena catuṣṭayātmikā || 3/22 ||
icchāśaktirbhaved brahmā vipṇuśca jñānaśaktimān |
kriyāśaktirbhaved rudraḥ sarvaṃ prakṛtimūrttimān || 3/23 ||
ātmavidyāśivaistattvaiḥ sadāsārāpratiṣṭhitaiḥ |
āsanaṃ tripurādevyāḥ kakāraṃ pañcadevatām || 3/24 ||
īśvaro yastu deveśi trikoṇe tasya saṃsthitiḥ |
trikoṇametat kathitaṃ yonimaṇḍalamuttamam || 3/25 ||
kevalaṃ prapade yasyāḥ kāminī sā prakīrttitā |
oṃ śayanāgārasindūrasadṛśīṃ kāminīṃ parām || 3/26 ||
caturbhujāṃ trinetrāñca bāhuvallīvirājitām |
kadambakorakākārastanadvayavibhūṣitām || 3/27 ||
ratnakeyūrāṅgadaiśca bhūṣaṇairupaśobhitām |
ratnahāraiḥ puṣpahāraiḥ śobhitāṃ parameśvarīm || 3/28 ||
evaṃ hi kāminīṃ jñātvā kakāraṃ daśadhā japet |
praphullañca tato dhyātvā japasya phalabhāg bhavet |
etatte kathitaṃ devi kakāratattvamuttamam  || 3/29 ||

iti śrīkāmadhenutantre devadevīsaṃvāde tṛtīyaḥ paṭalaḥ ||



caturthaḥ paṭalaḥ

śrīmahādeva uvāca

kakāraṃ parameśāni kuṇḍalītrayasaṃyutam |
khakāraṃ paramāścaryaṃ śaṅkhakundasamaprabham || 4/1 ||
koṇatrayayutaṃ śūnyaṃ bindutrayasamanvitam |
guṇatrayayutaṃ devi pañcadevamayaṃ sadā || 4/2 ||
triśaktisaṃyutaṃ varṇaṃ khakāraṃ praṇamāmyaham |
gakāraṃ parameśāni pañcadevātmakaṃ sadā || 4/3 ||
nirguṇaṃ triguṇopetaṃ nirīhaṃ nirmalaṃ sadā |
pañcaprāṇamayaṃ varṇaṃ sarvaśaktyātmakaṃ priye || 4/4 ||
aruṇādityasaṅkāśaṃ kuṇḍalīṃ praṇamāmyaham |
ghakāraṃ cañcalāpāṅgi catuṣkoṇātmakaṃ sadā || 4/5 ||
pañcadevamayaṃ varṇaṃ aruṇādityasannibham |
nirguṇaṃ triguṇopetaṃ sadā triguṇasaṃyutam || 4/6 ||
sarvagaṃ sarvadaṃ śāntaṃ ghakāraṃ praṇamāmyaham |
ṅakāraṃ parameśāni svayaṃ paramakuṇḍalī || 4/7 ||
sarvadavamayaṃ varṇaṃ triguṇaṃ lolalocane |
pañcaprāṇamayaṃ varṇaṃ ṅakāraṃ praṇamāmyaham || 4/8 ||
cavarṇaṃ śṛṇu suśroṇi caturvargapradāyakam |
kuṇḍalīsahitaṃ devi svayaṃ paramakuṇḍalī || 4/9 ||
satataṃ kuṇḍalīyuktaṃ pañcadevamayaṃ sadā |
pañcaprāṇamayaṃ varṇaṃ pañcaprāṇātmakaṃ sadā || 4/10 ||
triśaktisahitaṃ varṇaṃ tribindusahitaṃ priye |
chakāraṃ paramāścaryaṃ svayaṃ paramakuṇḍalī || 4/11 ||
satataṃ kuṇḍalīyuktaṃ pañcadevamayaṃ sadā |
pañcaprāṇamayaṃ varṇaṃ triśaktisahitaṃ sadā || 4/12 ||
tribindusahitaṃ varṇaṃ sadā īśvarasaṃyutam |
pītavidyullatākāraṃ chakāraṃ praṇamāmyaham || 4/13 ||
jakāraṃ parameśāni yā svayaṃ madhyakuṇḍalī |
śaraccandrapratīkāśaṃ sadā triguṇasaṃyutam || 4/14 ||
pañcadevamayaṃ varṇaṃ pañcaprāṇamayaṃ sadā |
triśaktisahitaṃ varṇaṃ tribindusahitaṃ priye || 4/15 ||
jhakāraṃ parameśāni kuṇḍalī mokṣarūpiṇī |
raktavidyullatākāraṃ sadā triguṇasaṃsthitam || 4/16 ||
pañcadevamayaṃ varṇaṃ pañcaprāṇātmakaṃ sadā |
tribindusahitaṃ varṇaṃ triśaktisahitaṃ sadā || 4/17 ||
sadā īśvarasaṃyuktaṃ ñakāraṃ śṛṇu sundari |
raktavidyullatākāraṃ svayaṃ paramakuṇḍalī || 4/18 ||
pañcadevamayaṃ varṇaṃ pañcaprāṇamayaṃ sadā |
triśaktisahitaṃ varṇaṃ tribindusahitaṃ sadā || 4/19 ||
ṭakāraṃ cañcalāpāṅgi svayaṃ paramakuṇḍalī |
koṭividyullatākāraṃ pañcadevamayaṃ sadā || 4/20 ||
pañcaprāṇayutaṃ varṇaṃ guṇatrayasamanvitam |
triśaktisahitaṃ varṇaṃ tribindusahitaṃ sadā || 4/21 ||
ṭhakāraṃ cañcalāpāṅgi kuṇḍalī mokṣarūpiṇī |
pītavidyullatākāraṃ sadā triguṇasaṃyutam || 4/22 ||
pañcaprāṇātmakaṃ varṇaṃ pañcaprāṇamayaṃ sadā |
tribindusahitaṃ varṇaṃ triśaktisahitaṃ sādā || 4/23 ||
ḍakāraṃ cañcalāpāṅgi sadā triguṇasaṃyutam |
pañcadevamayaṃ varṇaṃ pañcaprāṇamayaṃ sadā || 4/24 ||
triśaktisahitaṃ varṇaṃ tribindusahitaṃ sadā |
caturjñānamayaṃ varṇaṃ ātmāditattvasaṃyutam || 4/25 ||
pītavidyullatākāraṃ ḍakāraṃ praṇamāmyaham |
ḍhakāraṃ paramārādhyaṃ yā svayaṃ kuṇḍalī parā || 4/26 ||
pañcadevātmakaṃ varṇaṃ pañcaprāṇamayaṃ sadā |
sadā triguṇasaṃyuktaṃ ātmāditattvasaṃyutam |
raktavidyullatākāraṃ ḍhakāraṃ praṇamāmyaham || 4/27 ||
ṇakāraṃ parameśāni svayaṃ paramakuṇḍalī |
pītavidyullatākāraṃ pañcadevamayaṃ sadā || 4/28 ||
pañcaprāṇamayaṃ devi sadā triguṇasaṃyutam |
ātmāditattvasaṃyuktaṃ mahāmohapradāyakam || 4/29 ||

iti śrīkāmadhenutantre devadevīsaṃvāde caturthaḥ paṭalaḥ ||



pañcamaḥ paṭalaḥ

śrīmahādeva uvāca

takāraṃ cañcalāpāṅgi svayaṃ paramakuṇḍalī |
pañcadevātmakaṃ varṇaṃ pañcaprāṇamyaṃ tathā || 5/1 ||
triśaktisahitaṃ varṇamātmāditattvasaṃyutam |
tribindusahitaṃ varṇaṃ pītavidyutsamaprabham || 5/2 ||
thakāraṃ cañcalāpāṅgi kuṇḍalī mokṣarūpiṇī |
triśaktisahitaṃ varṇaṃ tribindusahitaṃ sadā || 5/3 ||
pañcadevamayaṃ varṇaṃ pañcaprāṇātmakaṃ sadā |
aruṇādityasaṃkāśaṃ thakāraṃ praṇamāmyaham || 5/4 ||
dakāraṃ śṛṇu cārvaṅgi caturvargapradāyakam |
pañcadevamayaṃ varṇaṃ pañcaprāṇamayaṃ sadā || 5/5 ||
triśaktisahitaṃ devi tribindusahitaṃ sadā |
ātmāditattvasaṃyuktaṃ svayaṃ paramakuṇḍalī || 5/6 ||
raktavidyullatākāraṃ dakāraṃ hṛdi bhāvaya |
dhakāraṃ parameśāni kuṇḍalī mokṣarūpiṇī || 5/7 ||
ātmāditattvasaṃyuktaṃ pañcadevamayaṃ sadā |
pañcaprāṇamayaṃ devi triśaktisahitaṃ sadā || 5/8 ||
tribindusahitaṃ varṇaṃ dhakāraṃ hṛdi bhāvaya |
pītavidyullatākāraṃ caturvargapradāyakam || 5/9 ||
nakāraṃ śṛṇu cārvaṅgi raktavidyullatākṛtim |
pañcadevamayaṃ varṇaṃ svayaṃ paramakuṇḍalī || 5/10 ||
pañcaprāṇātmakaṃ varṇaṃ hṛdi bhāvaya pārvati |
ataḥ paraṃ pravakṣyāmi pakāraṃ mokṣadāyakam || 5/11 ||
caturvargapradaṃ varṇaṃ śaraccandrasamaprabham |
pañcadevamayaṃ varṇaṃ svayaṃ paramakuṇḍalī || 5/12 ||
pañcaprāṇamayaṃ varṇaṃ triśaktisahitaṃ sadā |
truguṇai rahitaṃ varṇamātmāditattvasaṃyutam || 5/13 ||
mahāmokṣapradaṃ varṇaṃ hṛdi bhāvaya pārvati |
phakāraṃ śṛṇu cārvaṅgi raktavidyullatopamam || 5/14 ||
caturvargapradaṃ varṇaṃ pañcadevamayaṃ sadā |
pañcaprāṇamayaṃ varṇaṃ sadā triguṇasaṃyutam || 5/15 ||
ātmāditattvasaṃyuktaṃ tribindusahitaṃ sadā |
bakāraṃ śṛṇu cārvaṅgi caturvargapradāyakam || 5/16 ||
śaraccandrapratīkāśaṃ pañcadevamayaṃ sadā |
pañcaprāṇātmakaṃ varṇaṃ tribindusahitaṃ sadā || 5/17 ||
triśaktisahitaṃ varṇaṃ sadā cāmṛtanirmitam |
svayaṃ kuṇḍalinī sākṣāt satataṃ praṇamāmyaham || 5/18 ||
bhakāraṃ śṛṇu cārvaṅgi svayaṃ paramakuṇḍalī |
mahāmokṣapradaṃ varṇamaruṇādityasannibham || 5/19 ||
pañcaprāṇamayaṃ varṇaṃ pañcadevamayaṃ sadā |
triśaktisahitaṃ varṇaṃ tribindusahitaṃ priye || 5/20 ||
makāraṃ śṛṇu cārvaṅgi svayaṃ paramakuṇḍalī |
aruṇādityasaṃkāśaṃ caturvargapradāyakam || 5/21 ||
triśaktisahitaṃ varṇaṃ tribindusahitaṃ sadā |
ātmāditattvasaṃyuktaṃ hṛdisthaṃ praṇamāmyaham || 5/22 ||
yakāraṃ śṛṇu cārvaṅgi catuṣkoṇamayaṃ sadā |
palāladhūmasaṃkāśaṃ svayaṃ paramakuṇḍalī || 5/23 ||
pañcaprāṇamayaṃ varṇaṃ pañcadevamayaṃ sadā |
triśaktisahitaṃ varṇaṃ tribindusahitaṃ tathā || 5/24 ||
praṇamāmi sadā varṇaṃ mūrtimān (?)mokṣamavyayam |

iti śrīkāmadhenutantre devadvīsaṃvāde pañcamaḥ paṭalaḥ ||



ṣaṣṭhaḥ paṭalaḥ

śrīmahādeva uvāca

rakāraṃ cañcalāpāṅgi kuṇḍalīdvayasaṃyutam |
raktavidyullatākāraṃ pañcadevātmakaṃ sadā || 6/1 ||
pañcaprāṇamayaṃ varṇaṃ tribindusahitaṃ sadā |
triśaktisahitaṃ devi ātmāditattvasaṃyutam || 6/2 ||
sarvatejomayaṃ varṇaṃ satataṃ praṇamāmyaham |
lakāraṃ cañcalāpāṅgi kuṇḍalītrayasaṃyutam || 6/3 ||
pītavidyullatākāraṃ sarvaratnapradāyakam |
pañcadevamayaṃ varṇaṃ pañcaprāṇātmakaṃ sadā || 6/4 ||
triśaktisahitaṃ varṇaṃ tribindusahitaṃ hi sā |
ātmāditattvasahitaṃ hṛdi bhāvaya sarvadā || 6/5 ||
vakāraṃ cañcalāpāṅgi kuṇḍalī mokṣamavyayam |
pañcaprāṇamayaṃ varṇaṃ triśaktisahitaṃ sadā || 6/6 ||
tribindusahitaṃ varṇamātmāditattvasaṃyutam |
pañcadevamayaṃ varṇaṃ pītavidyullatopamam || 6/7 ||
caturvargamayaṃ varṇaṃ sarvasiddhipradāyakam |
triśaktisahitaṃ devi triśaktisahitaṃ sadā || 6/8 ||
śakāraṃ parameśāni svarṇavarṇaṃ śucismite |
raktavarṇaprabhākārā svayaṃ paramakuṇḍalī || 6/9 ||
caturvargapradaṃ devi śakāraṃ brahmavigraham |
pañcadevamayaṃ varṇaṃ pañcaprāṇātmakaṃ priye || 6/10 ||
rajaḥsattvatamoyuktaṃ tribindusahitaṃ sadā |
triśaktisahitaṃ varṇamātmāditattvasaṃyutam || 6/11 ||
ṣakāraṃ śṛṇu cārvaṅgi koṇaṣaṭkamayaṃ sadā |
raktacandrapratīkāśaṃ svayaṃ paramakuṇḍalī || 6/12 ||
caturvargapradaṃ varṇaṃ sudhānirmitavigraham |
pañcadevamayaṃ varṇaṃ pañcaprāṇamayaṃ sadā || 6/13 ||
rajaḥsattvatamoyuktaṃ tribindusahitaṃ param |
sarvadevamayaṃ varṇaṃ hṛdi bhāvaya pārvati || 6/14 ||
sakāraṃ śṛṇu cārvaṅgi śaktibījaṃ parātparam |
koṭividyullatākāraṃ kuṇḍalītrayasaṃyutam || 6/15 ||
pañcadevamayaṃ devi pañcaprāṇamayaṃ sadā |
rajaḥsattvatamoyuktaṃ tribindusahitaṃ sadā || 6/16 ||
triśaktisahitaṃ varṇamātmāditattvasaṃyutam |
praṇamya satataṃ devi hṛdi bhāvaya sundari || 6/17 ||
hakāraṃ śṛṇu cārvaṅgi caturvargapradāyakam |
kuṇḍalītrayasaṃyuktaṃ raktavidyullatopamam || 6/18 ||
rajaḥsattvatamoyuktaṃ pañcadevamayaṃ sadā |
pañcaprāṇātmakaṃ varṇaṃ triśaktisahitaṃ sadā || 6/19 ||
tribindusahitaṃ varṇaṃ hṛdi bhāvaya sundari |
kṣakāraṃ śṛṇu cārvaṅgi kuṇḍalītrayasaṃyutam || 6/20 ||
caturvargamayaṃ varṇaṃ pañcadevamayaṃ sadā |
pañcaprāṇātmakaṃ varṇaṃ triśaktisahitaṃ sadā || 6/21 ||
tribindusahitaṃ varṇamātmāditattvasaṃyutam |
śaraccandrapratīkāśaṃ hṛdi bhāvaya sundari || 6/22 ||
akārādikṣakārāntaṃ svayaṃ paramakuṇḍalī |
sarvaṃ carācaraṃ viśvaṃ varṇāttu jāyate dhruvam || 6/23 ||
nānāśāstraṃ purāṇañca itihāsañca sundari |
vedañca smṛtiśāstrañca anyāni yāni kāni ca || 6/24 ||
akṣarājjāyate sarvaṃ paraṃ brahma svayaṃ priye |

iti kāmadhenutantre devadevīsaṃvāde ṣaṣṭhaḥ paṭalaḥ ||



saptamaḥ paṭalaḥ

śrīmahādeva uvāca

rahasyaṃ paramāścaryaṃ sadāa mama hṛdi sthitam |
ataḥ paraṃ pravakṣyāmi mantratattvaṃ pṛthak pṛthak || 7/1 ||
mātṛkāyā varārohe sāvadhānāvadhāraya |
ataḥ paraṃ japenmantraṃ pañcāśanmātṛkāṃ pṛthak || 7/2 ||
atastvamadhikārī syānnātra kāryā vicāraṇā |
iti te kathitaṃ devi prayogaṃ mantramuttamam || 7/3 ||
etanmantraṃ vinā devi iṣṭaṃ mantraṃ japennaraḥ |
sarvaṃ tasya bhavedvyarthaṃ sarvaṃ vyarthakadarthanam || 7/4 ||
etanmantraṃ prathamato daśadhā prajapet priye |
tatastu praṇavaṃ dattvā mātṛkāṃ prajapet pṛthak || 7/5 ||
prayogaṃ paramāścaryaṃ sāvadhānāvadhāraya |

tadyathā - oṃ, a/ oṃ, oṃ āṃ oṃ, oṃ i/ oṃ, oṃ ī/ oṃ, oṃ u/ oṃ, oṃ oṃ oṃ, oṃ ṛ/ oṃ, oṃ ṛ/ oṃ, oṃ 
ḷ/ oṃ, oṃ ḹ oṃ, oṃ e/ oṃ, oṃ ai/ oṃ, oṃ o/ oṃ, oṃ au/ oṃ, oṃ aṃ oṃ, oṃ aḥ oṃ, oṃ kaṃ oṃ |

evaṃ kṣakāraparyantaṃ praṇavaiḥ puṭitaṃ sadā |
pratyekamevaṃ cārvaṅgi daśadhā daśadhā japet || 7/6 ||
pratyekaṃ japamātreṇa pratyekaṃ dhyānamācaret |
athavā sarvavarṇānāmekīkṛtya varānane || 7/7 ||
prajaped daśadhā mantraṃ svamantraṃ prajapettataḥ |
tathā ca sarvavarṇānāṃ dhyānaṃ vakṣyāmi saṃśṛṇu || 7/8 || 
koṭicandrapatīkāśāṃ puṇḍarīkoparisthitām |
bhramadbhramaralīlābhāṃ nayanatrayarājitām || 7/9 ||
nānāśāstrapravaktrīṃ ca vidyābhyāsamayīṃ sadā |
nānāvādyamayīṃ devīṃ śvetāṃśukapariṣkṛtām || 7/10 ||
śuklābharaṇadīptāṅgī śuklavastrottarīyiṇīm |
brahmāṇḍaṃ darpaṇe yasyā vāmahastasya pārvati || 7/11 ||
tadvacchukaśiśuṃ prekṣya kṣudradarpaṇamucyate |
evaṃ dhyātvā jagaddhātrīṃ mātṛkāṃ jagadambikām || 7/12 ||
prajapeddaśadhā mantramekadhā vā japettu yaḥ |
sarvasiddhimavāpnoti nātra kāryā vicāraṇā || 7/13 ||
eṣā te kathitā vidyā mātṛkā paramātmikā |
yat kṛtvā sādhako yāti durlabhaṃ mokṣamavyayam || 7/14 ||
pratyekenāthavā devi ekaikaiva varānane |
rahasyaṃ śṛṇu cārvaṅgi sugopyaṃ bhuvanatraye || 7/15 ||
iṣṭavidyāṃ sakṛt smṛtvā manasā parameśvari |
yasya mantrasya yaddhyānaṃ kṛtvā devi prayatnataḥ || 7/16 ||
tanmantraṃ daśadhā japtvā iṣṭadhyānaṃ tataḥ priye |
iṣṭamantraṃ prajaptvā vai sarvasiddhiṃ tato labhet || 7/17 ||
anena vidhinā devi mantraścaitanyamāpnuyāt |
caitanyarahitaṃ mantraṃ vidyā vā surapūjite || 7/18 ||
sarva vyarthaṃ bhaveddevi biphalaṃ sa japo bhavet |

śrīmāhadeva uvāca

aparaṃ śṛṇu cārvaṅgi vargāṣṭakamanuttamam || 7/19 ||
vargāṣṭakaṃ vinā devi koṭipuraścaraṃ yadi |
sarvaṃ tasya vṛthā devi ante ca narakaṃ brajet || 7/20 ||
akacaṭatapayaśā ityetadaṣṭavargakam |
mantrasyādau ca ante ca akāraṃ bindusaṃyutam || 7/21 ||
dattvā tameva bhaktyā ca aṣṭottaraśataṃ japet |
anena vidhinā devi ādityābhaṃ samācaret || 7/22 ||
tāvajjaped varārohe yāvallakṣaṃ samāpyate |
tato mantraṃ varārohe dhruvaṃ jīvatvamāpnuyāt || 7/23 ||
jīvatvaṃ hi vinā devi na puraścaraṇaṃ caret |
jīvatvaṃ hi vinā devi yadi kuryāt puraścaram || 7/24 ||
viphalā tasya sā sarvā pūrvapuṇyaṃ vinaśyati |
vargāṣṭakena sahitaṃ pratyahaṃ prajapet śatam || 7/25 ||
sadaiva sahasā bhadre sarvaṃ mantrañca sidhyati |
kiṃ tasya dhyānapūjāyāṃ puraścaryāñca kiṃ punaḥ || 7/26 ||
kṛtvā tu jīvaṃ mantrasya vidyāñca varavarṇinī |
vidyāyāśca tathā devi yaḥ kuryāt prāṇanirṇayam || 7/27 ||
tatkṣaṇād yānti cārvaṅgi puraścaryāṃ śataṃ śatam |
viśeṣataḥ kaliyuge jambūdvīpasya bhārate || 7/28 ||
prāṇanyāsaṃ vinā devi na japet sādhakaḥ kvacit |
vaiṣṇaveṣu ca mantreṣu śaiveṣu śaktimantrake || 7/29 ||
gaṇeśasauramantre ca prāṇanyāsaḥ praśasyate |
kiṃ tasya japapūjāsu homādiṣu ca kiṃ priye || 7/30 ||
prāṇatattvaṃ maheśāni yo jānāti sa pūjakaḥ |
prāṇatattvaṃ vinā devi dehanyāsaṃ karoti yaḥ || 7/31 ||
sa bhraṣṭaḥ sa ca pāpiṣṭho rauravaṃ narakaṃ vrajet |
ālokya tanmukhaṃ devi sūryadarśanamācaret || 7/32 ||

iti kāmadhenutantre devadevīsaṃvāde saptamaḥ paṭalaḥ



aṣṭamaḥ paṭalaḥ

śrīmahādeva uvāca

etatte kathitaṃ bhadre rahasyaṃ paramādbhutam |
yannoktaṃ sarvatantreṣu mātṛkāyāḥ pṛthak pṛthak || 8/1 ||
pañcāśadvarṇasaṃketaṃ pañcāśattattvamuttamam |
sarvadevamayaṃ tattvaṃ sarvajñānamayaṃ tathā || 8/2 ||
bindutattvamayaṃ devi ahaṃtattvamayaṃ tathā |
sarvaśaktimayaṃ tattvaṃ sarvaprāṇamayaṃ tathā || 8/3 ||
garbhatattvamayaṃ devi kevalaṃ kalikā tathā |
kusumasya yadā devi kalikāṃ gandhasaṃyutām || 8/4 ||
adṛśyaṃ sarvabhūtānāṃ tathā gandhaṃ sucismite |
puṣpasya kalikāmadhye yathā jyotiḥ pradīpyate || 8/5 ||
tathaiva kalikābīje navatattvañca vidyate |
koṭividyutpratīkāśāṃ mātṛkāṃ praṇamāmyaham || 8/6 ||
nirābādhāṃ nirguṇāñca guṇānāṃ guṇamātṛkām |
mātā sā sarvavidyānāṃ sarvāgamapratiṣṭhitā || 8/7 ||
sarvāsāṃ vedavidyānāṃ brahmāṇḍānāñca pārvati |
mātā sā gīyate devi pañcāśanmātṛkā ca sā || 8/8 ||
mantratattvañca vidyāñca sarvavarṇaviniścayam |
pañcāśadyuvatīrūpā mātṛkā śavamavyayā || 8/9 ||
mātṛkā parameśāni kālī sākṣānna saṃśayaḥ |
kuto brahmā kuto viṣṇuḥ kuto rudraśca īśvaraḥ || 8/10 ||
sadāśivaḥ kuto devi te sarve śavavat priye |
śavavat sarvadevāśca brahmāṇḍaṃ śavavat sadā || 8/11 ||
ata eva varārohe viṣṇumantraṃ yathā tathā |
śivamantraṃ yathā devi gaṇeśaṃ saurameva ca || 8/12 ||
śaktimantrañca vidyāñca pañcāśadyuvatīmayam |
purāṇañca tathā vedaṃ smṛtiśāstraṃ tathaiva ca || 8/13 ||
etattattvaṃ varārohe yuvatīrūpamadbhutam |
brahmā viṣṇuśca rudraśca īśvaraśca sadāśivaḥ || 8/14 ||
te sarve cañcalāpāṅgi mātṛkājjāyate (?) priye |
samastajananī devi mātṛkā jananī parā || 8/15 ||
kaṭākṣalakṣasaṃyuktā mahāśaktiḥ pragīyate |
mātṛkāvarṇarahitaṃ brahmāṇḍaṃ śavavat priye || 8/16 ||
gītaṃ vādyaṃ śrutirnāṭyamālāpaṃ varavarṇinī |
sarvaṃ hi yuvatīrūpaṃ dhyānamārge pratiṣṭhitam || 8/17 ||
etatte kathitaṃ devi kālikābījamuttamam |
ubhayoḥ saṃgamaṃ devi praphullaṃ bhavati priye || 8/18 ||
bahavaḥ saṅgame devi praphullaṃ mokṣamavyayam |
yanna mantreṣu vidyāsu praphullaṃ bhavati dhruvam || 8/19 ||
praphullaṃ śṛṇu cārvaṅgi japayajñaṃ samācaret |
praphullarahitaṃ devi vidyāmantraṃ yadi priye || 8/20 ||
kevalaṃ kālikābījaṃ varṇairvarṇaiḥ pṛthak pṛthak |
dhyātvā siddhimavāpnoti nānyathā surapūjite || 8/21 ||
praphullāt kalikādvāpi kṛṣṇādi jāyate dhruvam |
yuvatī yā samākhyātā sā mahākuṇḍalī parā || 8/22 ||
varṇarūpamayī devī kuṇḍalī paradevatā |
pañcāśadvarṇatattvaṃ ca vidyāmantraṃ japettu yaḥ || 8/23 ||
sarvaṃ hi viphalaṃ tasya śavavat tajjapo bhavet |
caitanyarahitaṃ devi tajjapaṃ śavameva tat || 8/24 ||
jñātvā praṇamya kurvīta japapūjādikaṃ priye |
harirhi nirguṇaḥ sākṣāt saguṇā parakuṇḍalī || 8/25 ||
tasmāttu yuvatīdehāt harerutpattireva ca |
sarvāsāṃ devadevīnāṃ bījaṃ janmasthalaṃ sadā || 8/26 ||
bījāttu jāyate brahmā śūnyarūpī sanātanaḥ |
ata eva maheśāni brahmaṇaḥ kāraṇaṃ parā || 8/27 ||
jñātvā tantramidaṃ devi japapūjāṃ karoti yaḥ |
prāṇanyāsavidhiṃ kṛtvā japapūjāṃ karoti yaḥ || 8/28 ||
sa śivaḥ paramaṃ brahma sa eva puruṣottamaḥ |
sa eva divyo vīraśca sa eva bhairavaḥ svayam || 8/29 ||
sa eva dhanyo deveśi trailokye sacarācare |
sa sūryo devi pūjyaśca sadguruśca na cānyathā || 8/30 ||
uddhartuṃ caiva saṃhartuṃ samarthaḥ so'pi nānyathā |
ajñātvā tantrametattu japayajñaṃ karoti yaḥ || 8/31 ||
sarvaṃ tasya vṛthā devi paśureva na saṃśayaḥ |
sarveṣu ca gururdevi śiṣyo'pi paśuvat sadā || 8/32 ||
śrutvā tasya mukhe vidyāṃ mantraṃ vā naganandini |
sikto bhavati cārvaṅgi kiṃ tasya japapūjanaiḥ || 8/33 ||
evaṃ vidhaṃ guruṃ tyaktvā śrutvā paśumukhāt priye |
pūrvamantraṃ parityajya gṛhṇīyād gaṇanāparam || 8/34 ||
sa bhraṣṭaḥ sa ca pāpiṣṭhaḥ kathaṃ mantramupāsmahe(?) |
mantrasya gaṇanāddevi yat pāpaṃ prāpnuyānnaraḥ || 8/35 ||
tat pāpaṃ śṛṇu cārvaṅgi narakañcottarottaram |
yat pāpaṃ prāpnuyād devi svayaṃbhūliṅgacālane || 8/36 ||
tat pāpaṃ koṭiguṇitaṃ gaṇanāddevamantrayoḥ |
tasmāttu gaṇanāṃ devi varjayenmatimānnaraḥ || 8/37 ||
tyaktvā śaivavaiṣṇaveṣu saure gāṇapate tathā |
anyat sarvāsu vidyāsu gaṇanāṃ varjayennaraḥ || 8/38 ||

iti śrī kāmadhenutantre devadevīsaṃvāde aṣṭamaḥ paṭalaḥ ||



navamaḥ paṭalaḥ
śrīmāhādeva uvāca

adhunā saṃpravakṣyāmi rahasyaṃ guhyamuttamam |
yajjñātvā sādhako yāti durlabhaṃ brahmamandiram || 9/1 ||
iḍayā pūrayed vāyuṃ suṣumnāntargataṃ tataḥ |
recayet piṅgalāmārge prāṇāyāmakramāt priye || 9/2 ||
anulomena cārvaṅgi mātṛkāṃ yuvatīṃ smaret |
pañcāśanmātṛkāvarṇaṃ sabinduṃ nādasaṃyutam || 9/3 ||
uccārya pūrakeṇaiva tata iṣṭaṃ samuccaret |
tatastu mātṛkāvarṇaṃ vilomena japet priye || 9/4 ||
suṣumnāmadhyadeśe tu citriṇī suvarānane |
anulomavilomena mātṛkāṃ yuvatīṃ smaret || 9/5 ||
iṣṭamantraṃ tato japtvā vilomaṃ kuru yatnataḥ |
anenaiva vidhānena recayet piṅgalāpathe || 9/6 ||
evaṃ dvādaśadhā kṛtvā pratyahaṃ varavarṇini |
trisandhyāṃ cañcalāpāṅgi yaḥ kuryāt kamalānane || 9/7 ||
jīvanyāsaṃ bhavettasya mantrasiddhiśca nānyathā |
ekadhā vā maheśāni kalau saṃkhyā caturguṇā || 9/8 ||
pratyahaṃ daśadhā kṛtvā śivatulyo bhavennaraḥ |

iti śrīkāmadhenutantre devadevīsaṃvāde navamaḥ paṭalaḥ ||



daśamaḥ paṭalaḥ

śrīmahādeva uvāca

lalāṭatattvaṃ cārvaṅgi akāraṃ sarvadā priye |
ākāraṃ mukhatattvantu śṛṇuṣva varavarṇini || 10/1 ||
ikāraṃ dakṣanetrañca īkāraṃ vāmanetrake |
ukāraṃ dakṣakarṇe syādūkāraṃ vāmakarṇake || 10/2 ||
ṛkāraṃ dakṣanāsā ca ṛkāraṃ vāmanāsike |
ḷkāraṃ dakṣagaṇḍaṃ syāt ḹkāraṃ vāmagaṇḍakam || 10/3 ||
ekāraṃ adharaṃ tattvaṃ aikāraṃ oṣṭha eva ca |
okāraṃ ūrdhvadantaṃ syāt aukāraścādhodantakam || 10/4 ||
aṃkāraṃ śirasastattvaṃ aḥkāraṃ mukhamaṇḍalam |
kakārādi pañcatattvaṃ dakṣabāhau praśasyate || 10/5 ||
vāmabāhau cakārādi pañcatattvañca tiṣṭhati |
dakṣapāde ṭakārādi pañcatattvaṃ varānane || 10/6 ||
takārādi pañcatattvaṃ vāmapāde paśasyate |
pakāraṃ dakṣapārśvañca phakāraṃ vāmapārśvake || 10/7 ||
bakāraṃ pṛṣṭhatattvañca bhakāraṃ nābhireva ca |
makāraṃ udaraṃ tattvaṃ yakāraṃ hṛdayaṃ tathā || 10/8 ||
rakāraṃ skandatattvañca lakāraṃ vāmameva ca |
ghaṭitattvaṃ vakārañca śakāraṃ dakṣabāhuṣu || 10/9 ||
vāmabāhau ṣakārañca sakāraṃ dakṣapādakam |
vāmapādaṃ hakārañca kṣakāraṃ śirasopari || 10/10 ||
akāraṃ bījatattvañca takāraṃ praṇavena ca |
makārañca sakārañca maṇḍitaṃ hi tathaiva ca || 10/11 ||
ahaṅkāraḥ pakāraṃ syāt phakāro manasastathā |
nakāraṃ śabdatattvañca daṃ dhaṃ rūpaṃ praśasyate || 10/12 ||
gakāraṃ pādatattvañca chakāropasthameva ca |
ukāramākāśatattvañca ūkāraṃ śrotrameva ca || 10/13 ||
tvaktattvañca jakāraḥ syād jhakāraḥ pādameva ca |
kakāraḥ pṛthvītattvaṃ khakāro jñānatattvakam || 10/14 ||
śakāraṃ hṛtpuṇḍarīkaṃ ṣakāraṃ tattvamaṇḍalam |
sakarāñca tathā candraṃ rakāraṃ vahnimaṇḍalam || 10/15 ||
parameṣṭhi tathā tattvaṃ ṣakāraḥ surapūjite |
lakāraṃ pṛthvītattvaṃ hakārañca śirastathā || 10/16 ||
yakāraṃ vāyutattvañca kakāraṃ svargameva ca |
etayoryogamāsādya kṣakāraṃ tattvavigraham || 10/17 ||

tena a ta ma sa pa pha na da dha ga cha u ū ja jha ka kha śa ṣa sa ra ya la ha kṣa 
||

akārādikṣāntavarṇaṃ tattvañca pañcaviṃśatiḥ |
sarvatattvamatiguhyaṃ paramātmā sulocane || 10/18 ||
mātṛkāyā varārohe kramānnāmāni saṃśṛṇu |
brahmāṇī caṇḍikā raudrī gaurīndrāṇī tathaiva ca || 10/19 ||
kaumāro vaiṣṇavī durgā tathaiva nārasiṃhikā |
kālikā muṇḍamālā ca śivadūtī tathā parā || 10/20 ||
varāhī kauṣikī caiva tathā māheśvarī priye |
śaṅkarī ca jayantī ca maṃgalā kalimardinī || 10/21 ||
pālikā caiva medhā ca śivarūpā ca śāmbhavī |
bhīmā śāntā ca ugrā ca bhrāmarī rudrarūpiṇī || 10/22 ||
ambikā bahurūpā ca kṣemā kṣemaṅkarī tathā |
dhātrīrūpā svadhā svāhā tathaiva vahnirūpiṇī || 10/23 ||
aparṇā ca tathā māyā ghorarūpā priyaṃvadā |
brahmāṇḍavāṇī brāhmī ca pañcāśanmātṛkāḥ smṛtāḥ || 10/24 ||
ityetat kathitaṃ samyak kevalaṃ tava bhaktitaḥ |
etāstu mātṛkādevyo brahmāṇḍaṃ sacarācaram || 10/25 ||
vyāpya tiṣṭhanti cārvāṅgi nānāmūrttidharāvyayāḥ |
śaktimantre viṣṇumantre śaive saure ca pārvati || 10/26 ||
anyasarveṣu mantreṣu gaṇeśe varavarṇini |
mātṛkā yuvatīrūpā mantravigraharūpiṇī || 10/27 ||
brahmā viṣṇuśca rudraśca īśvaraśca sadāśivaḥ |
te sarve cañcalāpāṅgi niścalāśca nirindriyāḥ || 10/28 ||
devādīnāṃ varārohe mantraṃ nāsti kadācana |
śabdabrahma yadā yāti tantraṃ mantraṃ tadā bhavet || 10/29 ||
pañcāśadyuvatī sarvā śabdabrahmasvarūpiṇī |
brahmaṇaḥ kāraṇaṃ nāsti prakṛterasti bhāvini || 10/30 ||
prakṛteryā varārohe sā dīkṣā sarvasammatā |
dīkṣāyāṃ cañcalāpāṅgi praśastā yuvatīkalā || 10/31 ||
pañcāśanmātṛkā yā sā yuvatī parigīyate |
yuvatīrahitaṃ devi kuto vidyā kuto manuḥ |
nirguṇaṃ paramaṃ brahma pradhānā yuvatīgaṇāḥ || 10/32 ||

iti śrīkāmadhenutantre devadevīsaṃvāde daśamaḥ paṭalaḥ ||



ekādaśaḥ paṭalaḥ

śrīśiva uvāca

yathā jale sūryatattvaṃ tathā mantre pratiṣṭhitam |
devīnāṃ jyotiṣaḥ puñjo vartante prakṛteḥ kalāḥ || 11/1 ||
athāntarātmā paramaṃ jñānātmā suvarānane |
vartante yuvatīrūpāḥ ṣoḍaśa prakṛ(tiḥ?teḥ) parāḥ || 11/2 ||
prakṛtiṃ hi vinā devi jñātā brahmā sanātanaḥ |
ata eva varārohe sa eva śrīsadāśivaḥ || 11/3 ||
jāgrat svapnasuṣuptiryā turīyā varavarṇini |
tāstāḥ sarvā varārohe yuvatī paramāparā || 11/4 ||
kāryakāraṇakāle ca gaṇanīyā varānane |
śūnyāt śūnyaṃ paraṃ śūnyaṃ śūnyarūpaṃ nirañjanam || 11/5 ||
koṭisūryapratīkāśaṃ nirmalaṃ jñānamuttamam |
hṛdi bhāvaya cārvaṅgi tejaḥpuñjaṃ mahāprabham || 11/6 ||
dalitāñcanapuñjābhaṃ varṇarājaṃ varānane |
tribhaṅgalalitākāraṃ cārucūḍāvirājitam || 11/7 ||
śikhipucchayutaṃ cūḍaṃ bhramaraiḥ śobhitaṃ param |
pītāṃśukaparīdhānaṃ vanamālāvibhūṣitam || 11/8 ||
ratnakuṇḍalasaṃyuktaṃ sphuradgaṇḍamanoharam |
kadambakusumopetaṃ śravaṇaṃ janamohitam || 11/9 ||
śrīvatsakaustubhoddīptaṃ ājānubāhurājitam |
āraktanayanadvandvaṃ koṭividyutsamadyutim || 11/10 ||
āraktacaraṇadvandvaṃ nūpurārāvasaṃyutam |
āraktakaratalasvacchaṃ guñjamālāvirājitam || 11/11 ||
śabdabrahmamayaṃ viṣṇuṃ ikāraṃ śabdajalpitam |
evaṃrūpaṃ samutpannaṃ hṛdi madhye varānane || 11/12 ||
jāyate kāmabījāttu śūnyamadhye sulocane |
śūnyamadhye sthitā devi kāmabījasvarūpiṇī || 11/13 ||
lakārasaṃyutā yā sā kṛṣṇamātā pragīyate |
sarveṣu viṣṇumantreṣu kāmabījaṃ parātparam || 11/14 ||
hṛdi śūnye maheśāni viṣṇormantraṃ japet priye |
tato vai kāmabījāttu jāyate viṣṇuvigraham || 11/15 ||
ataṃ kāmamayaṃ viṣṇuṃ hṛdi bhāvaya pārvati |
kāminī yā maheśāni viṣṇumātā pragīyate || 11/16 ||
ato viṣṇumātṛvarṇaṃ varṇarājamavāpnuyāt |
kakāraḥ kāminī sākṣād lakāraḥ pṛthivīśvarī || 11/17 ||
ratistu mardinī sākṣād nādastu yonirūpiṇī |
binduḥ kuṇḍalinīrūpaṃ śivaśaktimayaṃ priye || 11/18 ||
idaṃ bījaṃ maheśāni viṣṇumātā parākṣarā |
nirakṣaro viṣṇudevo hyakṣarājjāyate dhruvam || 11/19 ||
ata eva varārohe brahmaṇaḥ kāraṇaṃ parā |
klīṃkārabījarūpā yā sā parā parigīyate || 11/20 ||
parātparatarā sā'pi vahnimaṇḍalasaṃyutā |
kāminī sā maheśāni pṛthivī tasya āsanam || 11/21 ||
kadācit pṛthivīmadhye kadācid vahnimaṇḍale |
vasate kāminī devī bindutrayasamanvitā || 11/22 ||
janmalabdhā mahāviṣṇuḥ kūrcabījaṃ japet priye |
anena prajapenmantraṃ huṃkāraṃ varavarṇini || 11/23 ||
viṣṇorvigrahaṇe tattu svayaṃ prakṛtimūrtimān |
prakṛtiḥ paramārādhyā devānāṃ naganandini || 11/24 ||
huṃkāraṃ paramāścaryaṃ bījarantaṃ śṛṇu priye |
ṣaṣṭhasvaraḥ paricayo viyadbījaṃ śaśiprabham || 11/25 ||
tasyopari varārohesadābinduṃ vibhāvaya |
kāmamanmathakandarpam akṣaradhvajasaṃjñakam || 11/26 ||
mīnaketurmaheśāni pañcabījaṃ prakīrtitam |
māyākūrcaṃ vadhūbījaṃ lakṣmībījañca pārvati || 11/27 ||
praṇavañca maheśāni svayaṃ caturdaśaṃ tathā |
sapiṇḍavattathā devi yeṣu yāsu ca vidyate || 11/28 ||
tanmantramatisiddhaṃ syāt paraḥ prakṛtirūpiṇī |
evaṃ bījaṃ sakṛd dhyātvā sarvāsāṃ bhavati priyaḥ || 11/29 ||
tanmantraṃ prajapeddevi bījadhyānaṃ punaḥ priye |
evaṃ hi daśadhā kṛtvā mantrāṇāṃ bījasādhanam || 11/30 ||
tasmād bījāt samākṛṣya devatārūpamudbhavam |
devadhyānaṃ tataḥ kṛtvā iṣṭamantraṃ tato japet || 11/31 ||
punardhyānaṃ devatāyāḥ punarjāpaṃ kuru priye |
evaṃ hi daśadhā kṛtvā devādhiṣṭhānameva ca || 11/32 ||
tataḥ saptacchadāṃ japtvā kullukāṃ daśadhā japet |
ādyante setumantrañca datvā aṣṭottaraṃ japet |
tanmantraṃ prajapeddevi evaṃ siddhimupālabhe || 11/33 ||

iti kāmadhenutantre devadevīsaṃvāde ekādaśaḥ paṭalaḥ ||



dvādaśaḥ paṭalaḥ

śrīmahādeva uvāca

aparaikaṃ pravakṣyāmi rahasyamatigopanam |
akṛtvā dhyānatattvañca aṣṭatattvaṃ tathaiva ca || 12/1 ||
akṛtvā vyarthatāṃ yāti nātra kāryā vicāraṇā |
tato jīvatvamāpnoti mantraḥ sidhyati tatkṣaṇāt || 12/2 ||
athavā parameśāni mantravarṇaṃ yathā tathā |
praṇavapuṭitaṃ kṛtvā anulomavilomataḥ || 12/3 ||
tadaiva parameśāni jīvatvaṃ prāpyate manuḥ |
ekadhā vā tridhā kṛtvā yadi kuryād varānane || 12/4 ||
tadā siddhimavāpnoti nānyathā surapūjite |
jīvatvaṃ hi vinā devi yadi mantraṃ japet sudhīḥ || 12/5 ||
tajjapaṃ cañcalāpāṅgi śavameva na saṃśayaḥ |
sadā nidrāturo mantrī jīvahīnaśca pārvati || 12/6 ||

śrīṃ klīṃ hrīṃ huṃ strīṃ śrīṃ om |

kathaṃ siddhimavāpnoti nidrāyāṃ varavarṇini |
jīvanyāsena cārvaṅgi nidrābhaṅgo bhaved dhruvam || 12/7 ||
bindutattvaṃ prajapyātha jñānatatvañca sundari |
prāṇatattvañca cārvaṅgi devatattvaṃ tathaiva ca || 12/8 ||
japatattvaṃ mantratattvaṃ dhyānatattvaṃ sulocane |
akṣare akṣare devi ajñātvā prajaped yadi || 12/9 ||
saṃyogaṃ yad bhaved yogaṃ praphullaṃ tadudāhṛtam |
kevalaṃ kalikābījaṃ tadvarṇaṃ surapūjite || 12/10 ||
āgataṃ mama vaktrād yad gataṃ tava mukhe sadā |
mataṃ śrīvāsudevasya iti te kathitaṃ priye || 12/11 ||
etanmantraṃ mahāguhyaṃ īśānamukhasaṃyutam |
etanmantraprabhāvāddhi kālakūṭaṃ pibāmyaham || 12/12 ||
etāstu mātṛkā varṇāḥ suṣumnāmadhyavartinaḥ |
ete varṇā varārohe mahāyogamayāḥ sadā || 12/13 ||
akṣaraṃ hi vinā devi na yogo jāyate mama |
yogamārge bhaktimārge muktimārge ca sundari || 12/14 ||
dhyānamārge tu pūjāyāṃ japamārge tathaiva ca |
etāstu yuvatīvarṇāḥ kāryakāraṇarūpiṇaḥ || 12/15 ||
etanmantramavijñāya na japtavyaṃ kadācana |
etanmantramavijñāya purāṇaṃ saṃhitāṃ smṛtim || 12/16 ||
paṭhannarakamāpnoti pitṛbhiḥ saha nānyathā |
sarvadharmeṣu yatkarma sarvayajñeṣu yatphalam || 12/17 ||
sarvadāneṣu tīrtheṣu yatphalaṃ prāpnuyād dvijaḥ |
tatphalaṃ samavāpnoti varṇānāṃ dhyānamātrataḥ || 12/18 ||
varṇadhyānamavijñāya varṇatattvaṃ tathaiva ca |
purāṇavācako yastu dhruvaṃ narakamāpnuyāt || 12/19 ||
koṭivaṃśān samādāya sa dvijo narakaṃ brajet |
yathā vaktā tathā śrotā dvayorapi phalaṃ samam || 12/20 ||
kathamajñānato mūrkho'jñātvā varṇavinirṇayam |
purāṇāni paṭhitvā vai niścayaṃ narakaṃ vrajet || 12/21 ||
niścayañca maheśāni dāridryaṃ ghoramāpnuyāt |
niścayaṃ rogamāpnoti jambūdvīpasya bhārate || 12/22 ||
sa syāt sanātano devo vāṇī tripurasundarī |
sarvāsāṃ yuvatīnāñca bhavānī cādhidevatā || 12/23 ||
dhyāyed devīṃ mahāmāyāṃ mātṛkāṃ jagadīśvarīm |
raktapadmāsanagatāṃ raktāṃśukapariṣkṛtām || 12/24 ||
raktacandanaliptāṅgīṃ raktavastrottarīyiṇīm |
raktabimbaphalābhāsāṃ rākācandramukhīṃ parām || 12/25 ||
bhramadbhramaralīlābhanayanatrayarājitām |
kaṭākṣaśatasaṃyuktāṃ cārucūḍāvinodinīm || 12/26 ||
raktālaṅkārasubhagāṃ tribhaṅgilalitākṛtim |
hāsyayuktāṃ praphullāsyāṃ jyotsnājālasamacchavim || 12/27 ||
mṛṇālasadṛśākārabāhuvallīvirājitām |
kañculīsaṃyutāṃ ramyāṃ kadambakorakastanīm || 12/28 ||
nakhānāṃ kiraṇodyotairbhuvanaṃ parimohayan |
evaṃ dhyātvā mahāmāyāṃ bhavānīṃ śivamohinīm || 12/29 ||
aparaikaṃ pravakṣyāmi rahasyaṃ pramādbhutam |
hṛtpadme dvādaśadale varāhopari bhāvayet || 12/30 ||
yasyadevasya yadbījaṃ praphullakalikāṃ tathā |
dhyātvādevīṃ yathāśaktyā tasmādāvirbhavet svayam || 12/31 ||
śaktirvā viṣṇudevo vā śivo vā sūrya eva vā |
bījādutpadyate devi paraṃbrahma nirañjanam || 12/32 ||
bījadhyānaṃ vinā devi kathamutpadyate hariḥ |
sadāśivo mahādevaḥ kathamutpadyate svayam || 12/33 ||
sadāśivasya jananī bījarūpā sanātanī |
iti yo vetti sa jñānī sa eva vīrasattamaḥ || 12/34 ||
gururyogyaḥ sa eva syāt sa eva paramaḥ śivaḥ |
sarveṣāñcaiva bījānāmevaṃ dhyānaṃ samācaret || 12/35 ||
śuklavidyutsamākārāṃ nayanatrayadhāriṇīm |
kaṭākṣaviśikhairyuktāṃ caturbāhusamanvitām || 12/36 ||
tribhaṅgalalitākārāṃ cārucūḍāvirājitām |
puṇḍarīkopaviṣṭāñca rākācandramukhīṃ parām || 12/37 ||
nānāgandhapraliptāṅgīṃ sugandhimālyasaṃskṛtām |
nānābharaṇadīptāṅgīṃ meghāṃśukapariṣkṛtām || 12/38 ||
vīṇāvādyavinodena ullasantīṃ jagattrayam |
ādyāṃ brahmamayīṃ devīmiṣṭabījasvarūpiṇīm || 12/39 ||
brahmādyā devatā yasyāścaraṇe patitā bhuvi |
bhaje'haṃ mātṛkādevīṃ vedamātā sanātanīm || 12/40 ||
anena vidhinā dhyātvā sarvāsāṃ bhavati priyaḥ |
bījametanmaheśāni prathamaṃ daśadhā japet || 12/41 ||
tanmantraṃ cañcalāpāṅgi ānandapaṭale sthitam |
tato dhyātvā punarjaptvā daśadhā varavarṇini || 12/42 ||
etattattvamavijñāya prajaped yadi pārvati |
sarvapāpamayaḥ so'pi bhavet śūkaravad dvijaḥ || 12/43 ||
tattvametanmahāguhyaṃ yogamārge sthitaṃ sadā |
tava bhaktyā mayākhyātamatiguhyaṃ sulocane || 12/44 ||
tantrāṇāṃ sārametattu sarvasiddhipradāyakam |
sa yogī yogavettā ca yogātmā yoganāyakaḥ ||
yogācāryo yogamāyā yogānandapradāyakaḥ || 12/45 ||

iti śrīkāmadhenutantre devadevīsaṃvāde dvādaśaḥ paṭalaḥ ||



trayodaśaḥ paṭalaḥ

śrīmahādeva uvāca

adhunā saṃpravakṣyāmi ānandapaṭalaṃ priye |
śṛṇu tattvaṃ pravakṣyāmi sundaraṃ sumanoharam || 13/1 ||
hṛtpadme dvādaśadale vidyutkoṭisamanvite |
bhāvayenmantrabījāni yasya yā iṣṭadevatā || 13/2 ||
bhāvayet prathamaṃ bījaṃ varāṭopari pārvati |
anyāni sarvabījāni patramadhye pṛthak pṛthak || 13/3 ||
evaṃ hi daśadhā japtvā kramād bījaṃ japet priye |
daśadhā daśadhā devi prajaped bījamuttamam || 13/4 ||
tatastu bījamadhye tu dhyāyediṣṭaṃ sulocane |
tasmād bījād varārohe devatā jāyate dhruvam || 13/5 ||
tasya devasya cārvaṅgi nirīkṣya dehasundaram |
caraṇāt keśaparyantaṃ nānāveśamayaṃ priye || 13/6 ||
nirīkṣya manasā bhaktyā punardhyānaṃ samācaret |
tatastu prajaped bījaṃ varṇānandasvarūpiṇam || 13/7 ||
prajapet prathamaṃ bījaṃ bījadhyānaṃ tataḥ param |
etattu prathamaṃ bījaṃ sādhanaṃ durlabhaṃ priye || 13/8 ||
sarveṣāṃ bījavarṇānāṃ yadi jānāti sādhakaḥ |
dhyānaṃ paramakalyāṇaṃ varṇe varṇe pṛthak pṛthak || 13/9 ||
ajñātvā cañcalāpāṅgi mātṛkādhyānamācaret |
tadevaṃ sahasā devi sarvāsāṃ jāyate dhruvam || 13/10 ||
yasya mantrasya yadvarṇaṃ tasya dhyānaṃ pṛthak pṛthak |
bījāttu jāyate viṣṇuravatāravaraḥ priye || 13/11 ||
bījāttu jāyate rāmo bījāt kṛṣṇaḥ prajāyate |
sthāvaraṃ jaṅgamaṃ devi sarvaṃ bījāt prajāyate || 13/12 ||
ājñācakre viśuddhau ca mūlādhāre tataḥ priye |
svādhiṣṭhāne tato devi maṇipūre ca pārvati || 13/13 ||
anena vidhinā devi kuryāt sādhakasattamaḥ |
pratyahaṃ kurute yastu sa siddhaḥ śiva eva saḥ || 13/14 ||
pratyahaṃ cañcalāpāṅgi ṣaṭcakraṃ bhrāmayettu yaḥ |
sādhanācca maheśāni tasmāt kusumavat priye || 13/15 ||
nityañca hṛdaye kuryādavaśyaṃ vada kiṃ priye |
bījasya cañcalāpāṅgi dhyānaṃ mantraṃ pṛthak pṛthak || 13/16 ||
sākṣāt śrīḥ prakṛtirdevī bījarūpā sanātanī |
sanātanasya jananī sarvavarṇamayī priye || 13/17 ||
japasya prathame kāle bījasya tattvamuccaret |
tatastu prajapenmantraṃ sasetu varavarṇini || 13/18 ||
bījatattvamavijñāya prajaped yadi koṭidhā |
sarvaṃ tasya vṛthā devi araṇye rodanaṃ yathā || 13/19 ||
tattvatrayaṃ pravakṣyāmi mantrāṇāṃ śṛṇu sundari |
vibhāvya nābhipadmeṣu vāyubījaṃ sabindukam || 13/20 ||
mantrasya prathamaṃ vāyubījaṃ madhye vicintya vai |
dhyātvā bījaṃ maheśāni prajaped bījamuttamam || 13/21 ||
daśadhā prajaped bījaṃ daśadhā dhyānameva ca |
daśatattvayutaṃ mantraṃ tadaiva sahasā bhavet || 13/22 ||
saṃśoṣya bījaṃ cārvaṅgi vahnibīje vicintya vai |
hṛtpadme vahnimadhye tu dhyātvā bījaṃ hutāśanam || 13/23 ||
daśadhā prajapenmantraṃ daśadhā dhyānameva ca |
viṃśatattvayutaṃ mantraṃ tadaiva sahasā bhavet || 13/24 ||
mātṛsvarāttato devi galitāmṛtadhārayā |
āplāvya bījaṃ cārvaṅgi sarvāvayavasaṃyutam || 13/25 ||
tadaiva sahasā kṛtvā lalāṭe varuṇālaye |
varuṇasya tu madhye tu tadbījaṃ bhāvayet priye || 13/26 ||
daśadhā ca japitvā vai bījañca daśadhā smaret |
tadāmṛtamayaṃ bījaṃ sahasā bhavati priye || 13/27 ||
viṣṇumantreṣu deveśi candrabījeṣu bhāvayet |
anyat sarveṣu mantreṣu bhāvayed varuṇālaye || 13/28 ||
triṃśattattvayutaṃ mantraṃ tadaiva bhavati priye |
tattvātītaṃ svadhātītaṃ vācā vidyāṃ japet priye || 13/29 ||
anena vidhihīnañca tajjapaṃ viphalaṃ sadā |
tattvahīnaṃ japedyastu viphalaṃ satataṃ priye || 13/30 ||
śoṣaṇaṃ dahanaṃ devi amṛtaṃ jñānasaṃjñakam |
etat tattvamayaṃ bhadre śīghraṃ siddhipradāyakam || 13/31 ||
yo japettattvarahitaṃ tasya hāniḥ pade pade |
tasmāttattvaṃ śubhārādhya tasmānmantraṃ japet sudhīḥ || 13/32 ||
anena vidhinā devi sarvatattvamayaṃ manum |
kṛṣṇamantreṣu rāmeṣu avatāravareṣu ca || 13/33 ||
saure gaṇapatau devi śaktimantre svayaṃ priye |
śivamantreṣu cārvaṅgi anyatantre tathaiva ca || 13/34 ||
triṃśattattvayutaṃ kṛtvā mantraṃ bījaṃ sulocane |
evameva vidhānena bīje jīvatvamāpnuyāt || 13/35 ||
tasmād bījād varārohe rāmakṛṣṇādayaśca ye |
utpadyante varārohe nānyathā varavarṇini || 13/36 ||
etanmantraṃ sakṛt kṛtvā prajapedaniśaṃ manum |
prajapedaniśaṃ vidyāṃ śaucāśaucaṃ na cācaret || 13/37 ||
mantre akṣarabuddhiḥ syād gurau tu mānavaḥ priye |
devatāyāṃ varārohe pratimābuddhirjāyate || 13/38 ||
kiṃ tasya japapūjāyāṃ sarvaṃ vyarthaṃ kadarthanam |
iti te kathitaṃ devi bījatattvaṃ sugopanam || 13/39 ||
kasyacinnaiva vaktavyaṃ yadi kalyāṇamicchasi |
etajjñānamavijñāya sa kathaṃ gurutāṃ vrajet || 13/40 ||

iti śrīkāmadhenutantre devadevīsaṃvāde trayodaśaḥ paṭalaḥ ||



caturdaśaḥ paṭalaḥ

śrīmahādeva uvāca

devadeva mahādeva saṃsārārṇavatāraka |
kṛpayā kathayeśāna vakāratattvamuttamam || 14/1 ||

śrīmahādeva uvāca

pūrvoktaṃ cañcalāpāṅgi gāyatrītattvamuttamam |
gāyatrī yā varārohe caturvakārasaṃyutā || 14/2 ||
kāntaṃ śeṣavakārañca varuṇaṃ hṛdi bhāvaya |
yavargaṃ vāyubījañca hṛdi bhāvaya pārvati || 14/3 ||
yavargaṃ yattu deveśi vāyubījaṃ taducyate |
yakārasya caturtho yo vāyubījaṃ prakīrtitam || 14/4 ||
yavargañca vāyubījaṃ mayaitanniścitaṃ priye |
sarvavidyāsu mantreṣu varuṇaṃ bhāvaya priye || 14/5 ||
vahnijāyāyutānāñca pavargaṃ hṛdi bhāvaya |
gāyatrī saṃsthitā devi pāpoccāṭanakarmaṇi || 14/6 ||
pūrvoktadhyānamārgeṇa bhāvanā parikīrttitā |
dhyānabhedena cārvaṅgi vakāraṃ bhāvaya priye || 14/7 ||
adhunā saṃpravakṣyāmi kakāradhyānamuttamam |
viśeṣaṃ śṛṇu vakṣyāmi kakārasyātidurlabham || 14/8 ||
yannoktamānandapaṭale adhunā kathayāmi te |
tad dhyātvā sādhako yāti durlabhaṃ mokṣamavyayam || 14/9 ||
yena dhyānaprakāśena mantraṃ tantrañca sidhyati |
evaṃ taddhyānamātreṇa śivatulyo bhavennaraḥ || 14/10 ||
kakāradhyānamātreṇa sarvavarṇaṃ hi sidhyati |
kakārabhāvanāccaiva sarvāsāṃ bhāvanā bhavet || 14/11 ||
tasmāt sarvaprayatnena kakāraṃ hṛdi bhāvaya |
om prātarādityasaṃkāśāṃ siṃhapṛṣṭhoparisthitām || 14/12 ||
raktapadmopaviṣṭāñca raktavastraparīvṛtām |
caturbhūjāṃ trinetrāñca pañcabāṇadhanurdharām || 14/13 ||
varadābhayadātrīñca pīnatuṅgapayodharām |
mṛṇālasadṛśākāracaturbāhuparīvṛtām || 14/14 ||
śaṅkhakaṅkaṇakeyūrairaṅgadaiḥ pariśobhitām |
sugandhimallikāhāraiḥ kabarīmadhyaśobhitām || 14/15 ||
tribhaṅgalalitākārāṃ cārucūḍāvirājitām |
śikhipucchayutāṃ cūḍāṃ nānāratnasamanvitām || 14/16 ||
īṣadhāsyaprasannāsyāṃ muktārañjitanāsikām |
māṇikyakiraṇodyotadantapaṅktivirājitām || 14/17 ||
pūrṇacandrasamābhāsanakhapaṅktimanuttamām |
svarṇasūtrayutahāraratnacāruvinirmitām || 14/18 ||
kaṭākṣaviśikhoddīptabhrūlatāpariśobhitām |
tīrthatrayayutāṃ ramyāṃ nayanatrayarājitām || 14/19 ||
rāmarambhāsamākāra - ūrudvayavirājitām |
bṛhallatāsusaṃyuktaratnakiñjalkaśobhitām || 14/20 ||
aṣṭavargaiḥ sevitāñca aṣṭavargaiḥ prapūjitām |
sindūratilakodīptāmañjanāṅkitalocanām || 14/21 ||
lalāṭapaṭṭikāśubhrāmarddhacandraparīvṛtām |
brahmādidevatāvṛndaiḥ śirasi dhāryate ca yā || 14/22 ||
kimākhyāṃ kāminīṃ sākṣāt kakāravararūpiṇīm |
evaṃ dhyātvā varārohe prajaped yadi sādhakaḥ || 14/23 ||
tadaiva sahasā siddhirjāyate tasya sundari |
varṇajñānaṃ vinā devi na japet pāśavaḥ kvacit || 14/24 ||
kiṃ tasya dhyānapūjāyāṃ puraścaryāśataṃ śatam |
kiṃ tasya japahomena candrasūryasya parvaṇi || 14/25 ||
varṇajñānaṃ vinā devi vaiṣṇavaḥ śaiva eva vā |
ekadā noccareddevi ajñātvā vrṇadīpanīm || 14/26 ||
sarvāsāṃ mantravidyānāṃ dīpanī yā prakīrtitā |
sarveṣāṃ śāstramadhye tu praśastā varṇadīpanī || 14/27 ||
śaktimantre tathā saure gaṇeśamarcyate sadā |
jñātvā tantraṃ prakurvīta dīkṣāṃ pūjāṃ śucismite || 14/28 ||

śrīmahādeva uvāca

rahasyaṃ tatra vakṣyāmi atyantagopanaṃ śṛṇu |
yatkṛtvā sādhako yāti paramaṃ padamuttamam || 14/29 ||
lalāṭe tilakaṃ kṛtvā candanena sugandhinā |
karpūrāgurukastūrīrocanākuṅkumaiḥ priye || 14/30 ||
tilakaṃ dhārayed yatnādekīkṛtya manoharam |
trikoṇaṃ sundaraṃ svacchaṃ tilakaṃ janamohanam || 14/31 ||
ekīkṛtya pṛthag vāpi nānāvastuṣu kārayet |
rājyārthī raktavarṇena mokṣārthī śvetacandanaiḥ || 14/32 ||
vaśye rocanayā devi tilakaṃ kārayet sudhīḥ |
mohane cañcalāpāṅgi agurukuṅkumādinā || 14/33 ||
kṛṣṇagandhaṃ varārohe śatrormāraṇakarmaṇi |
lalāṭe bāhumūle ca tathā skandhadvayeṣu ca || 14/34 ||
hṛtpadmapārśvayugale pṛṣṭhe nābhau ca sundari |
ūrudvaye gaṇḍayugme adhaḥ pādadvayeṣu ca || 14/35 ||
vilikhed yatnato devi kakāravarṇamuttamam |
candravinduyutaṃ kṛtvā vilikhed varavarṇini || 14/36 ||
tadaiva sahasā devi vidyā mantrañca sidhyati |
mohayedakhilān lokān vaśayediṣṭadevatām || 14/37 ||
iṣṭadevaṃ vaśaṃ kṛtvā ekadā prajaped yadi |
tatkṣaṇāccañcalāpāṅgi devatvamupajāyate || 14/38 ||
devatvaṃ hi vinā devi kutaḥ pūjā kuto japaḥ |
anyathā pretavat pūjā vaiṣṇave ca viśeṣataḥ || 14/39 ||
lalāṭe tilakaṃ kṛtvā rocanāsu śucismite |
tanmadhye vilikhed varṇaṃ kakāraṃ sumanoharam || 14/40 ||
sāmānyametat kathitaṃ tilakaṃ janamohanam |
etattu tilakañcaiva vaśayedapi keśavam || 14/41 ||
japāsanaṃ daśamyāntu tadārabhya ca pratyaham |
etadvarṇamavijñāya viṣaye samupāsmahe |
sa bhraṣṭaḥ sa ca pāpiṣṭho rauravaṃ narakaṃ vrajet || 14/42 ||

iti śrīkāmadhenutantre devadevīsaṃvāde caturdaśaḥ paṭalaḥ ||



pañcadaśaḥ paṭalaḥ

śrīdevī uvāca

devadeva mahādeva nīlakaṇṭha trilocana |
hṛttatvaṃ kathayeśāna yadyahaṃ tava vallabhā || 15/1 ||

śrīmahādeva uvāca

śṛṇu devi pravakṣyāmi jñānaṃ paramadurlabham |
yena vijñānamātreṇa viṣṇuḥ syād vaiṣṇavaḥ priye || 15/2 ||
hṛtpadme dvādaśadale svavidyāṃ bhāvayet sudhīḥ |
kakāraṃ bhāvayedādau varāṭopari pārvati || 15/3 ||
patre patre tato devi svavidyāṃ prajapet sudhīḥ |
mantrāṇāṃ prathamaṃ bījaṃ dhyātvādau prajapet sudhīḥ || 15/4 ||
tasmānmantrāttato devi jāyate devavigraham |
devatāñca tato dhyātvā tantroktadhyānavartmanā || 15/5 ||
dhyānañca trividhaṃ devi samānaphaladāyakam |
kṛtvā dhyānatrayaṃ devi hṛtpadme parameśvari || 15/6 ||
sahasradalapadmāntarmadhyasthāne gurormukhāt |
svavidyāṃ bhāvayeddevi koṭividyutsamākṛtim || 15/7 ||
bhāvayedaniśaṃ bhaktyā siddho bhavati tatkṣaṇāt |
jāyante devi bījāttu rāmakṛṣṇādayaśca ye || 15/8 ||
te sarve cañcalāpāṅgi bījāttu prabhavanti vai |
jñātvā sanātanaṃ tattvaṃ ānandapaṭale sthitam || 15/9 ||
pūjā kāryā ca cārvaṅgi sarvasiddhimayo bhavet |
idaṃ sanātanaṃ tattvamajñātvā narakaṃ vrajet || 15/10 ||
śūdraḥ śūdramukhācchrutvā vidyāṃ vā mantramuttamam |
rauravaṃ narakaṃ yaṃ yaṃ taṃ tamāpnoti niścitam || 15/11 ||
na śūdrāya matiṃ dadyād na ca śūdraṃ kadācana |
ubhayornarakaṃ devi koṭikulasamāyutam || 15/12 ||
anācāro dvijo yastu śūdrāṇāṃ gurureva saḥ |
yadi śūdro bhaveddevi satyavādī jitendriyaḥ || 15/13 ||
sa dharme nirato bhūtvā śrutvā dvijagurormukhāt |
sarvasiddhimavāpnoti śīghraṃ devamavāpnuyāt || 15/14 ||
yaddeśe vidyate śūdraḥ pātakī mantravikrayī |
taddeśaṃ patitaṃ manye tasya rājā ca pātakī || 15/15 ||
sa kathaṃ cañcalāpāṅgi jihvāyāṃ prajapenmanum |
tasya jihvā varārohe mūtraśoṇitaviḍyathā || 15/16 ||
tanmukhaṃ mūtraviṭkūpamannaṃ viṣṭhāsamaṃ sadā |
tajjalaṃ śoṇitaṃ sākṣāccāṇḍālasamajātiṣu || 15/17 ||
pṛthivyāṃ yāni tīrthāni sarvadevamayāni vai |
ālokya tanmukhaṃtīrthaṃ tatsthānaṃ tyajya(?)gacchati || 15/18 ||
tīrtha koṭiḥ palāyante dṛṣṭvā tanmukhamaṇḍalam |
gaṅgājalaṃ parityajya drutaṃ svasthānamavāpnuyāt || 15/19 ||
mahāpātakino ye ca brahmahatyādisaṃyutāḥ |
trailokyapāvanī gaṅgā tān punāti na saṃśayaḥ || 15/20 ||
mantravikrayiṇaḥ śūdrāḥ sadā narakagāminaḥ |
kalau tu bhārate varṣe bhaviṣyanti na saṃśayaḥ || 15/21 ||
mantravikrayiṇaḥ śūdrā jāyante vyāghrayoniṣu |
tatsaṃsargaśca yo vipraścarmakāraḥ sa eva hi || 15/22 ||
cāṇḍālasadṛśaḥ so'pi sa eva varṇasaṅkaraḥ |
svadharmanirataḥ sūdro vidyāmantraṃ śṛṇoti yaḥ || 15/23 ||
sa dhanyaḥ pṛthivīmadhye sa eva vaiṣṇavottamaḥ |
sa śāktaḥ śivabhaktaśca gāṇeśaḥ saura eva ca ||
etatte kathitaṃ devi varṇajñānavinirṇayam || 15/24 ||

iti śrīkāmadhenutantre devadevīsaṃvāde jñānānande 
pañcadaśaḥ paṭalaḥ ||



ṣoḍaśaḥ paṭalaḥ

śrīmahādeva uvāca

aparaikaṃ pravakṣyāmi rahasyaṃ paramādbhutam |
yatkṛtvā cañcalāpāṅgi rāvaṇādyā niśācarāḥ || 16/1 ||
avāpyamativṛddhiñca trailokyādhipatiḥ prabhuḥ |
sāṃketaṃ paramaṃ guhyamakṣarāṇāṃ pṛthak pṛthak || 16/2 ||
etattattvaṃ vijānāti harirbrahmā purandaraḥ |
pañcāśadvarṇasaṅketaṃ sāvadhānāvadhāraya || 16/3 ||
akṛtvā sādhako yāti rauravaṃ narakaṃ vrajet |
rauravaṃ narakaṃ yāti punarāvṛttidurlabham || 16/4 ||
viśeṣaṃ viṣṇumantreṣu kuryād vaiṣṇavasattamaḥ |
akṛtvā vaiṣṇavo yāti narakaṃ koṭikoṭiśaḥ || 16/5 ||
māsi māsi varārohe śanibhaumadine priye |
prātaḥ snānaṃ samāsādya kṛtvā sandhyāṃ samāpya ca || 16/6 ||
sūryāyārghyaṃ tato dadyāt pādaprakṣālanāya ca |
yāgamaṇḍapamāsādya bhūtaśuddhiṃ vidhāya ca || 16/7 ||
kuryānnyāsaṃ mātṛkāyāḥ prāṇāyāmaṃ tataḥ param |
nyāsānanyāṃstataḥ kuryāttantramārgeṇa pārvati || 16/8 ||
śuklāmbaradharaḥ sragvī gandhaliptakalevaraḥ |
raktāsanaṃ samāsādya kuśāsanamathāpi vā || 16/9 ||
pralipya tāmrapātreṣu sindūraṃ raktacandanam |
vilikhya mātṛkāvarṇaṃ hyasmin pātre pṛthak pṛthak || 16/10 ||
akārādikṣakārāntaṃ sabinduṃ candrasaṃyutam |
mahāpadmāntarasthānādānīya brahmavaktrakam || 16/11 ||
vāmanāsāpathenaiva śvāsaṃ puṣpāñjalau kṣipet |
tatpuṣpaṃ cañcalāpāṅgi kuryāt puṣpasya sañcayam || 16/12 ||
dhyātvā tu pūjayeddavīṃ krameṇaiva pṛthak pṛthak |
gandhairnānāvidhairdevīṃ puṣpairnānāvidhaistathā || 16/13 ||
dhūpairnānāvidhairdevi dīpairnānāvidhaistathā |
naivedyaṃ vividhaṃ devi caturvidhamayaṃ tathā || 16/14 ||
dattvā nānāphalādīṃśca pūjayet parameśvarīm |
nānāpuṣpamayairhāraiḥ śukrādigandhasaṃyutam || 16/15 ||
mahāpadmavanāntasthamaṣṭottaraśataṃ japet |
prajaped mātṛkāvarṇaṃ varṇe varṇe pṛthak pṛthak || 16/16 ||
pratipadme japenmantraṃ yasmin padme tu yat sthitam |
tasmin padme vanāntasthaḥ svavidyāṃ prajapecchatam || 16/17 ||
suprasannā mātṛkā syāt tadaiva sahasā priye |
akṛtvā mātṛkāpūjāṃ māsi māsi varānane || 16/18 ||
iṣṭavidyāṃ japedyastu tasya hāniṃ śṛṇu priye |
citrānāḍīgatā bhūtvā mātṛkā jagadīśvarī || 16/19 ||
sarveṣāṃ vaiṣṇavānāñca śāktānāṃ varavarṇini |
śaivānāñca maheśāni anyeṣāñcaiva sundari || 16/20 ||
haranti vaiṣṇavāadīnāṃ nānyathā vacanaṃ mama |
praśastā mātṛkāpūjā dīkṣā yā matta eva hi || 16/21 ||
puraścaryā hi cārvaṅgi pūjanīyā pṛthak pṛthak |
mātā sā sarvavidyānāṃ mantrāṇāñca pṛthak pṛthak || 16/22 ||
yasmādutpadyate vidyā mantrañca suravandite |
tasmāttu yatnato devi tāsāṃ pūjā vidhīyate || 16/23 ||
nānyathā niṣphalā pūjā saṃvatsarakṛtā ca yā |
anena vidhinā devi pūjayed yadi mātṛkām || 16/24 ||
prasannā mātṛkā devi putratvenānukalpate |
rahito mātṛkāpūjāṃ japapūjanatatparaḥ || 16/25 ||
tasya sarvaṃ mahāmāyā mātṛkā jagadīśvarī |
haranti mantratejāṃsi āyurvidyāyaśobalam || 16/26 ||
aparaikaṃ pravakṣyāmi rahasyaṃ paramādbhutam |
anulomavilomena kathitaṃ śṛṇu pārvati || 16/27 ||
anulomavilomañca tathaiva hi maheśvari |
sarveṣāṃ japayajñānāṃ sahasā phalabhāg bhavet || 16/28 ||
sahasā siddhimāpnoti sahasā dharmamāpnuyāt |
sahasā arthamāpnoti sahasā mokṣamāpnuyāt || 16/29 ||
paurṇamāsyāmamāvasyāṃ māsi māsi prayatnataḥ |
yaḥ karoti prasannātmā sa eva śrīsadāśivaḥ || 16/30 ||
jñātvā saṃdīpanīṃ vidyāṃ ānandapaṭale sthitām |
ajñātvā dīpanīṃ vidyāṃ caturvargaphalapradām |
rahasyametadanyacca sarvañca viphalaṃ vrajet || 16/31 ||

iti śrīkāmadhenutantre devadevīsaṃvāde 
ṣoḍaśaḥ paṭalaḥ ||



saptadaśaḥ paṭalaḥ

śrīmahādeva uvāca

etattattvamavijñāya na bhāvo jāyate priye |
na devo vidyate kāṣṭhe na pāṣāṇe ca pārvati || 17/1 ||
bhāveṣu vidyate devi bhāvo mokṣasvarūpadhṛk |
divyabhāvo vīrabhāvaḥ sadaiva sahasā bhavet || 17/2 ||
anyathā cañcalāpāṅgi paśubhāvamayaḥ sadā |
svabhāvena vinā devi kathaṃ siddhirbhavet priye || 17/3 ||
tasmāt prayatnato devi vīrabhāvamayo bhavet |
anenaiva vidhānena mātṛkāṃ pūjayettu yaḥ || 17/4 ||
sa eva divyabhāvaḥ syād vīrabhāvaḥ sa eva hi |
sa dhanī guṇī loke mātṛkāṃ yastu pūjayet || 17/5 ||

śrīmahādeva uvāca

aparaikaṃ pravakṣyāmi sāmānyaṃ varavarṇini |
pūrvoktadhyānamācarya prajapenmātṛkāmanum || 17/6 ||
kakāradhyānamātreṇa sarvasiddhiḥ prajāyate |
japtvā kakāraṃ cārvaṅgi sarvāsāṃ bhavati priyaḥ || 17/7 ||
sarvāsāṃ mātṛkāṃ japtvā kakāraṃ kevalañca vā |
kakāraṃ sarvavarṇānāṃ mūlaprakṛtirūpiṇīm || 17/8 ||
tasmāt prayatnato devi kakāraṃ pūjayet priye |
pratyahaṃ pūjayeddevīṃ prathamaṃ pūjayet sudhīḥ || 17/9 ||
sarvāsāṃ phalamāpnoti tadā bhāvamayo bhavet |
kakārapūjanād bhadre sarvāsāṃ pūjanaṃ bhavet || 17/10 ||
pratyahaṃ kurute yastu pratimāsi varāanane |
divyavīraḥ sa eva syāt sarvapūjāphalaṃ labhet || 17/11 ||
akṛtvā cañcalāpāṅgi manasāpi ca saṃsmaret |
sarvapūjāmayaḥ so'pi sarvabhāvamayaḥ sadā || 17/12 ||
bhāvatattvamavijñāya viṣṇumantraṃ kathaṃ japet |
śaktimantraṃ maheśāni sa kathaṃ pāmaro japet || 17/13 ||
śivamantrañca saurañca gāṇeśaṃ sa kathaṃ japet |
bhāvatattvaṃ vinā devi prajapedyadi koṭidhā || 17/14 ||
sarvaṃ tasya vṛthā devi narakañca pade pade |
sa kathaṃ cañcalāpāṅgi divyavīragururbhavet || 17/15 ||
paśuvat sarvadā devi sa eva paśuguruḥ priye |
bhāvatattvena rahitaḥ sa kathaṃ pañcamaṃ yajet || 17/16 ||
vaiṣṇavastu varārohe makāraṃ pañcamaṃ yajet |
devatāyā varārohe śarīraṃ jāyate dhruvam || 17/17 ||
evaṃ mantraṃ pravakṣyāmi ānandapaṭale sthitam |
kālīṃ chinnādividyāñca triṃśadvarṇamayīṃ sadā || 17/18 ||
tadā siddhimayaṃ so'pi anyathā viphalaṃ sadā |
iṣṭadhyānaṃ tataḥ kṛtvā hṛdi madhye nirīkṣaṇam || 17/19 ||
prathamaṃ kāminīṃ dhyātvā praphullāṃ tadanantaram |
praphullādhyānamātreṇa jāyate devavigraham || 17/20 ||
paphullā jāyate devi yasya yā iṣṭadevatā |
tadiṣṭaṃ bhāvayed devi mantroktadhyānavartmanā || 17/21 ||
devatāyāḥ śarīrañca bījādutpadyate dhruvam |
mantrasya prathamādbījājjāyate naganandini || 17/22 ||
pañcāśanmātṛkā yā sā sarvā yuvatirūpiṇī |
tasmāttu yuvatīdehājjāyate kṛṣṇavigraham || 17/23 ||
rāmaḥ padmapalāśākṣaḥ praphullo jāyate dhruvam |
bījādutpadyate devi paraṃ brahma sanātanam || 17/24 ||
bījasaṃyogamātreṇa śabdabrahma sanātanam |
aparaikaṃ pravakṣyāmi rahasyaṃ paramādbhutam || 17/25 ||
pañcāśadvarṇasaṃketaṃ pañcāśattattvamadbhutam |
varṇatattvaṃ vinā devi prajapedyadi koṭidhā || 17/26 ||
sarvaṃ tasya vṛthā devi hānistasya pade pade |
hṛtpadme dvādaśadale varāṭopari kāminīm || 17/27 ||
dhyātvā prayatnato devi tadgarbhe varṇabhāvanam |
akārādikṣakārāntaṃ trikoṇamadhyamaṇḍale || 17/28 ||
anulomavilome na kāminyā garbhapañjare |
ekaikaṃ bhāvayed devi prativarge pṛthak pṛthak || 17/29 ||
sarvāṃsāṃ devadevīnāṃ kakāraṃ surapūjite |
dhyātvā prayatnato devi anulomavilomataḥ || 17/30 ||
pañcāśattattvasaṅketaṃ pañcāśadvarṇameva hi |
yaḥ karoti naro jñātvā śīghraṃ vidyā prasīdati || 17/31 ||
kimasādhyaṃ varārohe yasmai vidyā prasīdati |
ṣaṭcakre parameśāni rahasyaṃ sthānamuttamam || 17/32 ||
sahasrāre guroḥ pāde padmaṃ dhyātvā prayatnataḥ |
pañcāśadvarṇasaṅketaṃ yaḥ kuryānmānavaḥ priye || 17/33 ||
keśavaṃ vaśayeddevi rahasyenādhunā dhruvam |
mohayeccañcalāpāṅgi rudraṃ kālānalaprabham || 17/34 ||
sarvañcarācaraṃ viśvaṃ sahasā mohamānayet |
etatte kathitaṃ devi varṇamohanamuttamam || 17/35 ||
ajñātvā mohanaṃ tattvaṃ prajaped yadi pārvati |
tasmai lokā gandharvāśca vairabhāvaṃ brajanti vai || 17/36 ||
pratyakṣaramayaṃ devi kathitaṃ varṇamohanam |
ajñātvā mohanaṃ tattvaṃ yaḥ kuryādanyamohanam || 17/37 ||
sarvaṃ tasya vṛthā devi nānyathā tu kadācana |
etattatvaprabhāvāddhi acirāt siddhimāpnuyāt || 17/38 ||
garbhamadhye japenmantraṃ anulomavilomataḥ |
japitvā varṇamekañca svasthānamānayecca tam || 17/39 ||
punarvarṇaṃ samākṛṣya kāminīgarbhamadhyataḥ |
prajapedakṣaraṃ devi candrabindusamanvitam || 17/40 ||
pañcāśadakṣarañcaiva bhāvayecca pṛthak pṛthak |
anena vidhinā devi yo japenmantramuttamam || 17/41 ||
tasya śīghraṃ bhavet siddhiranyathā viphalā bhavet |
sambhāvaṃ likhitaṃ devi yathā bhavati akṣaram || 17/42 ||
tattadeva varārohe japapūjā nirarthakam |
viśeṣamantraṃ vakṣyāmi ānandapaṭale sthitam || 17/43 ||
mantraṃ śrīmohanaṃ nāma pañcāśadvarṇasaṃjñakam |
jñātvā yaḥ kurute devi tasya siddhiradūrataḥ || 17/44 ||
anyathā viphalaṃ sarvaṃ rahasyaṃ saphalaṃ nahi |

iti śrīkāmadhenutantre devadevīsaṃvāde saptadaśaḥ paṭalaḥ ||



aṣṭādaśaḥ paṭalaḥ
śrīmahādeva uvāca

athānyat saṃpravakṣyāmi rahasyaṃ paramādbhutam |
ajñātvā vaiṣṇavo yāti rauravaṃ varavarṇini || 18/1 ||
evaṃ tattvayutaṃ devi yo japet parameśvarīm |
navatattvamayīṃ vidyāṃ yadā japati pārvati || 18/2 ||
tadaiva sahasā siddhirjāyate surasundari |
navatattvayutaṃ mantraṃ jñātvā yaḥ prajapet sakṛt || 18/3 ||
tadaiva sahasā devi viṣṇutulyo bhaved dhruvam |
prathamaṃ kāminīṃ dhyātvā hṛtpadme kamalekṣaṇe || 18/4 ||
uccaret prathamaṃ bījaṃ kāminīṃ tadanantaram |
punarbījaṃ dvitīyañca uccared yatnataḥ sudhīḥ || 18/5 ||
kāminīñca tato dhyātvā tṛtīyaṃ bījamuccaret |
anena vidhinā devi kāminīdhyānasaṃpuṭam || 18/6 ||
punardhyānaṃ kakārasya anulomena pārvati |
anulomaṃ yathā devi vilomañca tathā kuru || 18/7 ||
evaṃ krameṇa deveśi yadyadakṣarakaṃ priye |
kṛtvā yatnād varārohe sarvasiddhīśvaro bhavet || 18/8 ||
sarveṣāṃ mantravarṇānāṃ dhyātvā dhyātvā pṛthak pṛthak |
ādyante kāminīṃ dhyātvā śivaśaktimayo bhavet || 18/9 ||
athavā cañcalāpāṅgi hṛtpadme kamalānane |
ādau madhye tathā cānte bījaṃ dattvā japet priye || 18/10 ||
tadaiva sahasā devi jāyate devavigraham |
sadā nidrāturo mantraḥ kalikāle ca bhārate || 18/11 ||
rahasyanena cārvaṅgi nidrābhaṅgo tadā bhavet |
japedādau varārohe trivāramanulomataḥ || 18/12 ||
vilomena trivārañca dhyātvā japtvā hṛdambuje |
athānyat saṃpravakṣyāmi nidrābhaṅgasya lakṣaṇam || 18/13 ||
prathamaṃ kāminīṃ dhyātvā ante ca tadanantaram |
daśadhā prajapenmantraṃ nidrābhaṅgāya pārvati || 18/14 ||
tatastu prajaped devi praphullaṃ viśvamohanam |
rahasyanena cārvaṅgi jāyate viṣṇuvigraham || 18/15 ||
śaṅkhacakradharaṃ devaṃ śuddhatattvātmakaṃ priye |
pītāmbaradharaṃ śāntaṃ prasannaṃ mukhapaṅkajam || 18/16 ||
ājānulambitakaraṃ vanamālāvirājitam |
tribhaṅgalalitākāraṃ cārucūḍāvibhūṣitam || 18/17 ||
śrīvatsakaustubhoddīptaṃ jāyate viṣṇuvigraham |
avatāraṃ svayaṃ kṛṣṇaṃ lalitāñjanacikkaṇam || 18/18 ||
gopīmaṇḍalamadhyasthaṃ nānāsukhamayaṃ harim |
athavā jāyate devi tasmādbījācchucismite || 18/19 ||
kāminīdhyānamātreṇa devatā jāyate dhruvam |
rahasyametaccārvaṅgi kartavyaṃ hṛdi madhyataḥ || 18/20 ||
rahasyānāñca sarveṣāṃ sārametanna saṃśayaḥ |
athānyat saṃpravakṣyāmi rahasyaṃ paramādbhutam || 18/21 ||
dhyātvā tu kāminīnārīṃ prathamaṃ hṛdi madhyataḥ |
tadgarbhe bhāvayenmantraṃ manasā naganandini || 18/22 ||
tadgarbhe bhāvayed devaṃ dhyānamārgeṇa sundari |
punaśca kāminīṃ dhyātvā tasmādāvirbhaved hariḥ || 18/23 ||
harirityupalakṣaṇaṃ devi sarveṣāmeva nirmitam |
nidrāyuktaṃ maheśāni vidyāmantraṃ bhavet sadā || 18/24 ||
tasmāttu nidrārahitaṃ prajaped yadi ekadā |
japāt koṭiguṇaṃ bhadre sahasā labhate dhruvam || 18/25 ||
vāmabāhoryadā vāhastadā nidrāturo manuḥ |
calate ca yadā bāhordakṣiṇe varavarṇini || 18/26 ||
tadaiva cañcalāpāṅgi tyaktanidraḥ sadā manuḥ |
ata eva varārohe tyaktanidraṃ japet sudhīḥ || 18/27 ||

śrīdevī uvāca

pūjākāle mahādeva yadi nidrāturo bhavet |
tatkathaṃ sidhyate mantraḥ kiṃ kartavyaṃ tadā prabho || 18/28 ||
prajapet kena vidhinā na japedvā vada prabho |

śrīmahādeva uvāca

rahasyamantraṃ vakṣyāmi ānandapaṭale sthitam || 18/29 ||
dvādaśārṇamayaṃ mantraṃ nidrābhaṅgasya dīpanam |
rahasyamantraṃ cārvaṅgi ajñātvā viphalaṃ bhavet || 18/30 ||

iti śrīkāmadhenutantre devadevīsaṃvāde aṣṭādaśaḥ paṭalaḥ ||



ūnaviṃśaḥ paṭalaḥ

śrīmahādeva uvāca

sandeho naiva kartavyaḥ pūjākāle śucismite |
sahasā kāminīṃ dhyātvā turīyakūṭamuccaret || 19/1 ||
tadaiva sahasā devi tyaktanidro bhavenmanuḥ |
prajaped daśadhā devi hṛdaye manasāpi vā || 19/2 ||
pūjākāle maheśāni saṃtyajed yadi dakṣiṇam |
prāyaścittaṃ bhavettasya mantrasya varavarṇini || 19/3 ||
prāyaścittamidaṃ devi kṛtvā mantraṃ japed yadi |
kiṃ tasya dakṣiṇo bāhustasya nidrātureṇa kim || 19/4 ||
rahasyamantraṃ cārvaṅgi pūjākāle vinirṇayam |
rahasyametaccārvaṅgi sarvanidrāsu maṅglam || 19/5 ||
vāmabāhoryadā vāyuryadā ca dakṣiṇāvahaḥ |
rahasyametaccārvaṅgi kṛtvā tu prajapenmanum || 19/6 ||
tadaiva tyaktanidrā sā vidyā mantrañca nānyathā |
yoganidrāmayī vidyā yoganidrāmayo manuḥ || 19/7 ||
viśeṣamantraṃ vakṣyāmi ānandapaṭale sthitam |
aṣṭākṣarīṃ mahāvidyāṃ dīpanīṃ mokṣarūpiṇīm || 19/8 ||
sarvasiddhimayo bhūtvā rahasyaphalamāpnuyāt |
prajaped yadi nidrāyāṃ kiṃ tasya japapūjane || 19/9 ||
rahasyanena cārvaṅgi nidrāṃ tyaktvā sanātanī |
suṣumṇāmadhyamārgeṣu saṃsthitā brahmarūpiṇī || 19/10 ||
rahasyametaccārvaṅgi ajñātvā yojapenmanum |
tasya pāpamahaṃ vakṣye sāvadhānāvadhāraya || 19/11 ||
śūdreṇa likhitaṃ devi paṭalaṃ yattu paṭhyate |
yaṃ yaṃ narakamāpnoti taṃ taṃ prāpnoti mānavaḥ || 19/12 ||
dvātriṃśatkoṭimadhyeṣu narakeṣu krameṇa hi |
koṭivaṃśān samādāya pacyante manujādhamāḥ || 19/13 ||
vipro vā kṣatriyo vāpi vaiśyo vā naganandini |
pacyante narake ghore śūdrasya likhanāt priye || 19/14 ||
tasmāttu śūdralikhitaṃ paṭalaṃ na japet sudhīḥ |
tasmādāvaśyakaṃ devi kāminīdhyānamuccaret || 19/15 ||
tataḥ siddho bhaved devi vidyā mantraṃ na cānyathā |
kāminīdhyānamātreṇa sarvasiddhimayo bhavet || 19/16 ||
ekenaiva kṛtārthaṃ syād bahubhiḥ kimupāsate |
tava bhaktyā mayākhyātaṃ yadgopyaṃ bhuvanatraye || 19/17 ||
kāmadhenumidaṃ jñatvā yadi pūjāṃ samācaret |
saphalā sā bhavet pūjā japañca saphalaṃ sadā || 19/18 ||
anyathā pretavad dīkṣā pūjā ca pretavat sadā |
prathamaṃ kāminīṃ dhyātvā japapūjāṃ samācaret || 19/19 ||
kāmadhenoḥ phalaṃ labdhvā sadāśivamayo bhavet |
viṣṇurūpī sa eva syānmahāmāyā sa eva hi || 19/20 ||
śivamantre viṣṇumantre śaktimantre śucismite |
kāmadhenumidaṃ mantraṃ praśastaṃ surapūjite || 19/21 ||
etatte kathitaṃ devi sārātsāraṃ parātparam |
yat kṛtvā sādhako yāti durlabhaṃ mokṣmandiram || 19/22 ||
viśeṣamantraṃ vakṣyāmi vidyāṃ śrīkāmarūpiṇīm |
ajñātvā kāminīdhyānaṃ sahasā vyarthatāmiyāt || 19/23 ||
taddhyānaṃ cañcalāpāṅgi ānandapaṭale sthitam |
tasmādavaśyaṃ japtavyaṃ satataṃ kāmadīpanīm || 19/24 ||

iti śrīkāmadhenutantre devadevīsaṃvāde ūnaviṃśaḥ paṭalaḥ ||




viṃśatitamaḥ paṭalaḥ
śrīdevī uvāca

mantrasamarpaṇaṃ tattvaṃ kathyatāṃ devapūjita |
kasmai samarpayenmantraṃ vada deva purātana || 20/1 ||
arpayenmantratejāṃsi deveśa yadi śūladhṛk |
nistejā sādhako deva tadaiva sahasā bhavet || 20/2 ||
kiṃ japyena ca pūjāyāṃ puraścaryeṇa kiṃ punaḥ |
tanme vada mahābhāga kṛpayā parameśvara || 20/3 ||

śrīmahādeva uvāca

sādhu pṛṣṭaṃ tvayā bhadre adhunā kathayāmi te |
japitvā cañcalāpāṅgi dhyāyet paramakāminīm || 20/4 ||
mantravarṇaṃ varārohe kāminīgajagahvare |
candrabinduyutaṃ kṛtvā ekaikaṃ daśadhā japet || 20/5 ||
anulome yathā devi vilomena tathā kuru |
ataḥ paraṃ varārohe jñātvā tu kāminīṃ parām || 20/6 ||
viyadbrahma maheśāni kāminīṃ daśadhā japet |
kāminīgarbhamadhye tu viyadvahniyutaṃ priye || 20/7 ||
prajaped daśadhā bhaktyā bījatattvaṃ tadā bhavet |
tatastu kāminītattvaṃ lalāṭe paricintya vai || 20/8 ||
evañca mātṛkāsthāne kāminīṃ bhāvayet priye |
pañcāśanmātṛkāsthāne prajapenmātṛkāmanum || 20/9 || 
bījasya jyotiḥpuñjeṣu kāminīṃ satvaraṃ kuru |
daśadhā prajaped devi kāminībījamuttamam || 20/10 ||
kāminīgarbhamadhye tu jyotistattve japaṃ kuru |
jyotistattvaṃ varārohe svayaṃ jīvaḥ sanātanaḥ || 20/11 ||
kāminījīvatattvaṃ ca kṛtvā vai sādhakaḥ sudhīḥ |
sahasrāre mahāpadme saṃsthāpya kāminīṃ parām || 20/12 ||
guhyātiguhyagoptrī tvamiti mantreṇa mantravit |
devasya dakṣiṇe haste bāhyapūjādi cārpayet || 20/13 ||
devyā vāme varārohe samarpya phalabhāg bhavet |
japasya sarvatejāṃsi devahaste yadi priye || 20/14 ||
samarpya parameśāni teja(sya? svī) sādhako bhavet |
kiṃ tasya pūjane bhadre kiṃ jāpena varānane || 20/15 ||
yatkiñcid dīyate devi sarvaṃ brahmaṇi līyate |
vidyāmantraṃ japed devi tatteja upajāyate || 20/16 ||
jīvatattvaṃ vinā devi devahaste kadācana |
nārpayeccañcalāpāṅgi devyā haste viśeṣataḥ || 20/17 ||
tasmāt prayatnato devi jīvatattvaṃ kuru dhruvam |
jīvatattvaṃ vinā devi yadi devaṃ samarpayet || 20/18 ||
japañca viphalaṃ devi pūjā ca viphalā bhavet |
gandhapuṣpādikaṃ yadyat sarvaṃ deve samarpayet || 20/19 ||
japatattvaṃ varārohe sarvatejomayaṃ sadā |
yadi tejo varārohe devyai devāya arpayet || 20/20 ||
yastejaḥ satataṃ jīvaḥ kathaṃ siddhiḥ prajāyate |
yastejastvarpayed devi punarāgamanaṃ priye || 20/21 ||
durlabhaṃ cañcalāpāṅgi tattejaḥ sādhakasya ca |
vṛthā bhayaṃ varārohe kurute narapāmaraḥ || 20/22 ||
samarpaṇamavijñāya prajaped yadi koṭi vā |
devatātejamadhye tu tattejopaviśet priye || 20/23 ||
bhāvayed bahuyatnena yathā sarvasvasaṃpuṭam |
etatte kathitaṃ devi jīvatattvaṃ sudurlabham || 20/24 ||
yat kṛtvā sādhako yāti durlabhaṃ brahmavigraham |
śrutvā tantramidaṃ devi rahasyaphalamāpnuyāt |
tantrametad varārohe śṛṇuyāt sādhakaḥ priye || 20/25 ||

iti kāmadhenutantre devadevīsaṃvāde viṃśatitamaḥ paṭalaḥ ||



ekaviṃśatitamaḥ paṭalaḥ

śrīmahādeva uvāca

candrasūryoparāge ca prajaped yadi kāminīm |
tadaiva sahasā siddhirjāyate nātra saṃśayaḥ || 21/1 ||
prathamaṃ kāminīṃ japtvā svavidyāḥ prajaped yadi |
tatastu kāminīṃ japtvā sarvasiddhīśvaro bhavet || 21/2 ||
ajñātvā kāminītattvaṃ na japed grahaṇe priye |
na japed grahaṇe bhadre ajñānād yadi mūḍhadhīḥ || 21/3 ||
sarvaṃ tasya vṛthā devi pūrvadharmo vinaśyati |
candraparva sūryaparva na vicāryaṃ kadācana || 21/4 ||
sūryaparva varārohe na paśyed yadi pāmaraḥ |
astu tāvat paro dharmaḥ pūrvadharmo vinaśyati || 21/5 ||
na paśyed yadi ajñānāt sarvāriṣṭamavāpnuyāt |
sarvāriṣṭamayaḥ so'pi sarvapāpamayaḥ sadā || 21/6 ||
tasmādavaśyaṃ kartavyaṃ candraparvanirīkṣaṇam |
sūryaparva tathā devi nirīkṣyamokṣamāpnuyāt || 21/7 ||
ajñātvā yadi mūḍhātmā rāśyādigaṇanaṃ priye |
vicārya cañcalāpāṅgi na paśyed grahaṇaṃ yadi || 21/8 ||
pūrvapūrvārjitaṃ puṇyaṃ tatkṣaṇādeva naśyati |
candrasūryoparāgañca tasmād yatnānnirīkṣayet || 21/9 ||
kiṃ tasya kāminīṃ bhadre ramyāṇi ca punaśca kim |
grāsādimuktiparyantaṃ japtvā siddhīśvaro bhavet || 21/10 ||
na japed yadi cārvaṅgi rauravaṃ narakaṃ vrajet |
tatkāle cañcalāpāṅgi paraṃbrahmasvarūpiṇī || 21/11 ||
tasmin kāle varārohe kṣatrādijātibhedataḥ |
ācaṇḍālaprabhṛtayo dvijatulyā bhavanti hi || 21/12 ||
dvijāstu cañcalāpāṅgi sākṣād brahma na saṃśayaḥ |
tatra kā gaṇanā devi cāṇḍālānāṃ varānane || 21/13 ||
tasmād yatnena kartavyaṃ candraparvanirīkṣaṇam |
candrakoṭiguṇaṃ devi sūryo daśaguṇaṃ bhavet || 21/14 ||
tatra yad yat kṛtaṃ karma japahomādikaṃ priye |
akṣayaṃ tad bhaved devi vacanaṃ mama niścitam || 21/15 ||
rāśyādigaṇanaṃ tyaktvā yavanairdṛśyate yadi |
yavanasya tathā siddhirjāyate pṛthivītale || 21/16 ||
dīkṣito'dīkṣito vāpi dṛṣṭvā snānaṃ samācaret |
tadevamakṣayaṃ snānaṃ gaṅgāsnānaṃ bhavet priye || 21/17 ||
viṣṭhākūpasthitaṃ toyaṃ gaṅgodakasamaṃ smṛtam |
praśastaṃ grahaṇe kāle nānyathā vacanaṃ mama || 21/18 ||
ṣaṣṭhamāsādhiko bālo yadi syād varavarṇini |
grahaṇe candrasūryasya tasya snānaṃ praśasyate || 21/19 ||
akṛtvā snānadānañca sahasā narakaṃ brajet |
sa bhraṣṭaḥ sa ca pāpiṣṭhaḥ sahasā sūkaraḥ priye || 21/20 ||
tasyānnamudakaṃ devi mūtraṃ śoṇitavat priye |
jāyate nātra sandeho mama vākyaṃ varānane || 21/21 ||
brāhmaṇo'brāhmaṇo vāpi candraparvaṇi pārvati |
cāṇḍālaprabhṛtiḥ sarvo brahmagotre pravartate || 21/22 ||
brahmeti nāma sarveṣāṃ rāśyādigaṇanaṃ kutaḥ |
tasmāttu cañcalāpāṅgi saṃkalpaṃ naiva kārayet || 21/23 ||
māsapakṣatithīnāṃ ca nimittāni ca pārvati |
na vicāryaṃ varārohe grahaṇe candrasūryayoḥ || 21/24 ||
grāsādimokṣakāle tu kuto māsaḥ kutastithiḥ |
sa kālaḥ paramaṃ brahma sarveṣāmakṣigocaram || 21/25 ||
tat kathaṃ pāmaro loko rāśyādigaṇanaṃ priye |
uparāgaṃ parityajya yaścānyaṃ paricintayet || 21/26 ||
sa bhavedraurave magno brahmaṇaścānumānataḥ |
rauravāt punarāgatya pāpayonau pravarttate || 21/27 ||
niṣkṛtirnāsti cārvaṅgi tasyāpi ca kadācana |
tasmāt sarvaṃ parityajya candraparvanirīkṣaṇam || 21/28 ||
candraparve yathā devi sūryaparve tathā priye |
tatra śrāddhādikaṃ tyaktvā vidyāṃ mantraṃ japet priye || 21/29 ||
anyathā narakaṃ yāti pitṝn sapta nayatyadhaḥ |
aparaikaṃ pravakṣyāmi rahasyaṃ śṛṇu sundari || 21/30 ||
akārādikṣakārāntaṃ pratipadme nirīkṣayet |
tatastu prajapet śūnyaṃ candrabindukasaṃyutam || 21/31 ||
tatastu hṛdayākāśe śūnye jyotirmayeṣu ca |
anulomavilomena mātṛkāṃ prajapet sudhīḥ || 21/32 ||
tatastu sādhakaśreṣṭho varāṭopari mātṛkām |
padmabījaṃ yathā devi varṇabījaṃ prabhāvayet || 21/33 ||
candrabījaṃ puṭaṃ kṛtvā japed varṇaṃ prasannadhīḥ |
anulomavilomena japtvā'mṛtamayo bhavet || 21/34 ||
kevalaṃ kāminīṃ dhyātvā praphullavadanāntaram |
bījādutpadyate devo devī vā kamalekṣaṇe |
tatastu devatāṃ dhyātvā nirīkṣya devavigraham || 21/35 ||

iti śrīkāmadhenutantre mahādevamahādevīsaṃvāde
ekaviṃśatitamaḥ paṭalaḥ ||



trayoviṃśatitamaḥ paṭalaḥ

(granthapātaḥ)

....ṣyāṃ ca varārohe gaṅgāyāṃ snānamityaham || 22/10 ||
kariṣye iti saṅkalpya śiraḥsnānaṃ samācaret |
arko dharmapayo devi amādyarthaśca mūrtimān || 22/11 ||
śravaṇañca maheśāni sākṣātkāmaśca mūrtimān |
vyatīpāte maheśāni svayaṃ muktiḥ pragīyate || 22/12 ||
mādyastu cañcalāpāṅgi svayameveśvaraḥ priye |
etattu kathitaṃ devi pañcayogaṃ parātparam || 22/13 ||
kāyikaṃ vācikaṃ caiva mānasaṃ pāpamutkaṭam |
tatsarvaṃ nāśamāyāti gaṅgādarśanamātrataḥ || 22/14 ||
koṭijanmārjitaṃ pāpaṃ jalasparśādvinaśyati |
tatastu mauśalaṃ snānaṃ koṭisūryagrahaiḥ samam || 22/15 ||
phalamāpnoti cārvaṅgi nātra kāryā vicāraṇā |
ācamya cañcalāpāṅgi vāsaṃ kuryād viśāladhīḥ || 22/16 ||

iti kāmadhenutantre trayoviṃśatitamaḥ paṭalaḥ |



caturviṃśatitamaḥ paṭalaḥ

śrīmahādeva uvāca

mālārahasyaṃ yogendra kathayasva kṛpānidhe |
yadi pucchaṃ japenmantraṃ harettejāṃsi tanmukham || 23/1 ||
mukhād yadi japenmantraṃ pucchaṃ ca cañcalaṃ bhavet |
cañcale sati cārvaṅgi tajjapaṃ niṣphalaṃ bhavet || 23/2 ||

śrī-īśvara uvāca

pañcāśadakṣaraṃ devi grathitaṃ citranāḍiṣu |
sthāpyākṣarāṇi pūrve vai sumeruṃ pucchaṃ tarpiṇam || 23/3 ||
sumeruṃ ca paricāryya akarādikamājjapet |
mālārahasyaṃ cārvaṅgi sugopyaṃ bhuvanatraye || 23/4 ||
jātibhedaṃ jīvabhedaṃ sugopyaṃ ca yathā priye |
jīvamantraṃ pravakṣyāmi sāvadhānāvadhāraya || 23/5 ||
jīvamantraṃ jātimantraṃ samānamiti nirṇayaḥ |
yathā dhyānaṃ maheśāni samānaṃ yāti jīvane || 23/6 ||
taddhyānaṃ śṛṇu cārvaṅgi sāvadhānāvadhāraya |
dvibhujāṃ svarṇagaurāṅgīṃ pītapaṭṭaparicchadām || 23/7 ||
nānābharaṇadīptāṅgīṃ kiśorīṃ navayauvanām |
kṛṣṇagandhapraliptāṅgīṃ sūryāsanakṛtāśrayām || 23/8 ||
tanudīrghāṅgulīṃ bhāsvannakhacandravirājitām |
kadambakorakākārastanadvayavirājitām || 23/9 ||
karpūrasakalonmiśratāmbūlapūritānanām |
kaṭākṣalakṣasaṃyuktabhūlatāpariśobhitām || 23/10 ||
sindūratilakoddīptāṃ kuṭilālakamaṇḍitām |
sarvatraivaṃ maheśāni jīvaṃ tiṣṭhati sarvadā || 23/11 ||
dvijādīnāṃ ca sarveṣāmānandapaṭale sthitām |
etatte kathitaṃ sarvaṃ kāmadhenormataṃ priye || 23/12 ||

iti śrīkāmadhenutantre devīśvarasaṃvāde caturviṃśatitamaḥ paṭalaḥ ||

samāptamidaṃ kāmadhenutantram

###########   END OF FILE  #######