#################################################### MUKTABODHA INDOLOGICAL RESEARCH INSTITUTE Use of this material (e-texts) is covered by Creative Commons license BY-NC 4.0 Catalog number: M00512 Uniform title: kriyoḍḍīśamahātantrarāja Description: Deals with magic rites and mantras used to control others and to protect oneself from others. Notes: Data-entered by the staff of Muktabodha under the supervision of Mark S.G. Dyczkowski. Revision 0: August 14 2021. Publisher : Caukhamba krishnadasa academy Publication year : 1954 Publication city : Varanasi Publication country : India #################################################### || śrī || śrīmadindrajitpraṇītaḥ kriyoḍḍīśamahātantrarājaḥ prathamaḥ paṭalaḥ ānandaśikharārūḍhaṃ pārvatyā saha śaṅkaram | papraccha girijā kāntā punarnatvā vṛṣadhvajam || 1 || śrīpārvatyuvāca bhagavan sarvadeveśa! sarvajñānamaya! prabho! | idānīṃ śrotumicchāmi kriyoḍḍīśaṃ vibho vada || 2 || śrīśvara uvāca śṛṇu devi! pravakṣyāmi uḍḍīśaṃ tantramuttamam | gopitavyaṃ prayatnena mama svaprāṇavallabhe || 3 || śāntyādiṣaṭkarmāṇi teṣāṃ lakṣaṇaṃ ca svadevatādikkālādi jñātvā karmāṇi sādhayet | śītāṃśusalilakṣoṇīvyomavāyuhavirbhujaḥ || 4 || eteṣāmbījayogena grathanādikrameṇa karma sādhayet - ṭhaṃ vaṃ laṃ haṃ yaṃ vaṃ | tattaddevatāḥ ratirvāṇī ramā jyeṣṭhā mātaṅgī kulakāminī | durgā caiva bhadrakālī karmādau tāḥ prapūjayet || 5 || vasantādyṛtukālaniyamaḥ | iti kriyoḍḍīśamahātantrarāje devīśvarasaṃvāde prathamaḥ paṭalaḥ || 1 || atha dvitīyaḥ paṭalaḥ sarvarogamuktikavacam śrīdevyuvāca devadeva! mahādeva! surāsuranamaskṛta | idānīṃ śrotumicchāmi rogamuktaḥ kathaṃ prabho! || 1 || nāsti trātā ca jagatāṃ tvāṃ vinā parameśvara | jvarādivāraṇaṃ śīghra kṛpayā parayā vada || 2 || īśvara uvāca kathayāmi tava snehāt kavacaṃ vāraṇaṃ mahat || 3 || oṃ namo bhagavati vajraśṛṃkhale hanatu bhakṣatu khādatu aho raktaṃ pibapiba naravakṣāsthiraktapaṭe bhasmāṅgibhasmaliptaśarīre vajrāyudhe vajraprākārānicite pūrvāṃ diśaṃ muñcatu dakṣiṇāṃ diśaṃ muñcatu paścimāṃ diśaṃ muñcatu uttarāṃ diśaṃ muñcatu nāgārthaṃ dhanagrahapatiṃ bandhatu nāgapīṭhaṃ bandhatu yakṣarākṣasapiśācān bandhatu pretabhūtagandharvādayo ye kecidupadravāstebhyo rakṣatu ūrdhvaṃ rakṣatu adho rakṣatu śyenikāṃ muñcatu jvala mahābale ehyehi tu moṭi-moṭi saṭāvali vajrāgni vajraprākāre aiṃ phaṭ hrīṃ hrīṃ śrīṃ phaṭ hraṃ haṃ phuṃ pheṃ phaḥ sarvagrahebhyaḥ sarvavyādhibhyaḥ sarvaduṣṭopadravebhyaḥ hrīṃ aśeṣebhyo mā rakṣatu || itīdaṃ kavacaṃ devi surāsurasudurlabham | grahajvarādibhūteṣu sarvakarmasu yojayet || 4 || na deyaṃ yasya kasyāpi kavacaṃ manmukhāccyutam | taddatte siddhihāniḥ syādyoginīnāṃ bhavetpaśuḥ || 5 || dadyācchāntāya vīrāya satkulīnāya yogine | sadācārarato yaśca nirjitāśeṣa eva hi || 6 || aikāhiko dvyāhikaśca tryāhikaścāturāhikaḥ | sarve jvarā vinaśyanti kavacaṃ dhārayedyadi || 7 || striyā vāmakare dhāryaṃ puṃsā ca dakṣiṇe kare | avaśyameva siddhiḥ syātsatyaṃ satyaṃ varānane || 8 || iti kriyoḍḍīśamahātantrarāje devīśvarasaṃvāde dvitīyaḥ paṭalaḥ || 2 || atha tṛtīyaḥ paṭalaḥ sarvarogavināśāya pārthivaśivaliṅgapūjanaprakaraṇam ataḥ paraṃ maheśāni pūjanaṃ pārthivaṃ śivam | viśeṣataḥ sarvaroge tryambakasya prapūjanam || 1 || yatkṛtvā sarvataḥ śāntirbhaveddevi na saṃśayaḥ | tataḥ prayogaṃ sarveṣāṃ vaśyādīnāṃ ca kārayet || 2 || vidhānaṃ tatra vakṣyāmi śṛṇuṣva kamalānane || 3 || śivapūjāvidhānam mṛdā liṅgaṃ vinirmāya śatatolakamānayā | tatrānīya mṛtaṃ muṇḍaṃ sthāpayitvā mamārcanam || 4 || pūrvamagniṃ ca saṃsthāpya yajñasthānaṃ caturvidham | uttare dakṣiṇe vāpi pūrve ca paścime tathā || 5 || sarvakāmeṣu hotavyamanyathā niṣphalaṃ bhavet | ghaṭaṃ saṃsthāpya mama pūjāṃ yathāśakti kuryāt | tato vahnisthāpanam | muṇḍasthāpanam | naramahiṣamārjāramuṇḍatrayam | athavā nṛmuṇḍatrayam | ekamuṇḍaṃ vā tadupari māṃ sampūjya gandhodakaiḥ snāpayitvā vitastimitadharātale pothayitvā tasyopari vedīṃ kalpayet | tatraiva bhūtanāthādīn caturdikṣu samarcayet | pūrve oṃ bhūtanāthāya namaḥ iti pādyādibhiḥ pūjayitvā baliṃ dadyāt | evaṃ dakṣiṇe śmaśānādhipāya | paścime kālabhairavāya | uttare ca īśānāya | vedīmadhye hauṃ pretabījaṃ vilikhya tatraiva bhāratīṃ pūjayet | puṣpāñjaliḥ re vīra śava deveśa muṇḍarūpa jagatpate | dayāṃ kuru mahābhāga siddhido bhava majjape || 6 || iti puṣpāñjalitrayaṃbhava madattvā āgne yyāṃ hrīṃ namaḥ nair-ṛtyāṃ hrīṃ caṇḍikāyai namaḥ | vāyavyāṃ hrīṃ bhadrakālyai namaḥ | īśāne hrīṃ dayāmayyai namaḥ | śmaśānavāsino ye ye devādevāśca bhairavāḥ | dayāṃ kurvantu te sarve siddhidāśca bhavantu me || 7 || anena praṇavādyena puṣpāñjalitrayaṃ kṣipet | tataḥ sthānaṃ tu saṃspṛśya vaśyo bhava vadediti || 8 || tataḥ snānaṃ tatra liṅgaṃ saṃsthāpya parameśvari | snānaṃ tu pañcagavyena dadhidugdhādikaṃ tathā || 9 || athavā parameśāni śarkarāmadhunā yutam | pañcāmṛtaistataḥ snānaṃ kārayetparameśvari || 10 || īśānāya prathamaṃ snānaṃ vāmadevāya dvitīyakam | tṛtīye sadyojātāya caturthe ca pinākadhṛk || 11 || pañcamaṃ devadeveśaṃ pūjayetpārthivaṃ śivam | adhunā mūlamantreṇa śarkarayā gāyatrikaṃparam | tato jīvanyāsaṃ kṛtvā nyāsādikaṃ tataḥ param || 12 || dhyānaṃ śṛṇu mahādeva! snehena kathitaṃ mayā || 13 || hastābhyāṃ kalaśadvayāmṛtarasairāplāvayantaṃ śiro dvābhyāṃ tau dadhataṃ mṛgākṣavalaye dvābhyāṃ vahantaṃ param | aṅke nyastakaradvayāmṛtaghaṭaṃ kailāsakāntaṃ śivaṃ svacchāmbhojagataṃ navendumukuṭaṃ devaṃ trinetraṃ bhaje || 14 || punardhyātvā tu sampūjya aṅganyāsaṃ tataḥ param | aṅganyāsaḥ oṃ tatsaviturvareṇyaṃ hṛdayāya namaḥ | trayambakaṃ yajāmahe sugandhiṃ puṣṭivarddhanaṃ śirase svāhā | bhargodevasya dhīmahi śikhāyai vaṣaṭ | urvārukamiva bandhanāt kavacāya hum | dhiyo yo naḥ pracodayāt netratrayāya vauṣaṭ | mṛtyormukṣīya māmṛtāt astrāya phaṭ || evaṃ karanyāsaḥ || tataḥ ṣoḍaśopacāraiḥ pūjā japāparājitā kṛṣṇabilvapatraṃ ca pippalam || 15 || karavīramapāmārgaṃ pratyekaṃ juhuyācchive | aṣṭādhikaśatenaiva pūjayet || 16 || ataḥ paraṃ maheśāni! madhu deyaṃ viśeṣataḥ | guḍārdrakarasenaiva surāstu brāhmaṇasya tu || 17 || nārikelodakaṃ caiva kāṃsye tu kṣatriyasya ca | śūdrasya tāmrapātre tu madhuyuktaṃ nivedayet || 18 || athavā sārṣapaṃ tailamājyena homayeddvijaḥ | juhuyātsarvakarmāṇi kathitāni maheśvari! || 19 || mantraḥ matraṃ śṛṇu mahādevi! kathitaṃ tava śraddhayā || 20 || oṃ tatsaviturvareṇyaṃ tryambakaṃ yajāmahe sugandhiṃ puṣṭivarddhanaṃ bhargo devasya dhīmahi urvārukamiva bandhanād dhiyo yo naḥ pracodayāt mṛtyormukṣīya māmṛtāt | sthānabhedakam śūnyāgāre nadītīre parvate vā catuṣpathe | bilvamūle śmaśāne vā nirjane ca prapūjayet || 21 || aṇimādyaṣṭaśaktiṃ ca vandhyā vā mṛtavatsā vā baddho vā rājaśatruke | sarvaśāntikaraṃ devi pūjanaṃ tryaṃbake śive | ata eva kathitaṃ me ca satyaṃ satyaṃ varānane || 22 || iti kriyoḍḍīśe mahātantrarāje devīśvarasaṃvāde tṛtīyaḥ paṭalaḥ || 3 || atha caturthaḥ paṭalaḥ sarvavyādhimocanam śṛṇu vakṣyāmi cārvaṅgi sarvavyādhivimocanam | ekādaśa pūjayedrudrāndaśāṃśaṃ guggulairghṛtaiḥ | catvāraḥ kumbhāḥ saṃsthāpyāḥ pañcapallavasaṃyutāḥ || 1 || uktamantreṇa raupyāṣṭadalapadmamadhye liṅgaṃ pūjayet | prativāsaraṃ saptaliṅgaṃ pūjayet lakṣaṃ japtvā | palāśasamidhā homam uktamantreṇa tatkramāt || 2 || atra pīṭhe yajamānamabhiṣecayet | dakṣiṇāṃ dadyādgobhūhematilāñjalīn brāhmaṇebhyaḥ kiñciddeyā ācāryāya dadyāt || iti kriyoḍḍīśe mahātantrarāje devīśvarasaṃvāde caturthaḥ paṭalaḥ || 4 || atha pañcamaḥ paṭalaḥ kriyopadeśaḥ vaśīkaraṇādikarmāṇi vāratithinakṣatramaṇḍalaviśeṣe karttavyāni | sphāṭikīmālā sarvasiddhidā | maṇisaṃkhyā - pañcaviṃśatibhirmokṣaṃ puṣṭau tu saptaviṃśatiḥ | triṃśadbhirdhanasiddhistu pañcāśanmantrasiddhaye || 1 || aṣṭottaraśataiḥ sarvasiddhiḥ | śivamantrasamāyuktamauṣadhaṃ saphalambhavet | mūlikotpāṭanacchedanavidhiḥ pūrvatantre kathitaḥ | vandhyādidoṣanivāraṇam | strīṇāṃ bādhakamocanam | raktamādryādi caturvidhabādhakadoṣanivāraṇam | tatra yantram - trikoṇamatha ṣaṭkoṇaṃ navakoṇaṃ maṇḍalākṛtiḥ | yantrāṇyetāni saṃlikhya vāhayenmantrapūrvakam || 2 || tantrapūjanāt auṣadhādi bhakṣaṇāddoṣaśāntiḥ | iti kriyoḍḍīśe mahātantrarāje devīśvarasaṃvāde pañcamaḥ paṭalaḥ || 5 || atha ṣaṣṭhaḥ paṭalaḥ mṛtavatsādiśāntikavacam mṛtavatsāmṛtagarbhāputrahīnānāṃ śāntiḥ kavacadhāraṇāt | kavacaṃ prathamam | oṃ namo narasiṃhāya namo mahāvipannāśāya divyarūpāya narasiṃhāya namaḥ | sthauṃ kṣauṃ rāmāya namaḥ | rāṃ rāmāya namaḥ | oṃ hrīṃ śrīṃ phaṇaṃ huṃ hāṃ phetkāraśabdena sarvabālakasya sarvabhayopadravanāśāya imāṃ vidyāṃ paṭhati dhārayati yadi tadā narasiṃho rakṣati sadā huṁ phaṭ svāhā | prakārāntareṇa dvitīyakavacam oṃ namo narasiṃhāya hiraṇyakaśiporvakṣaḥsthalavidāraṇāya tribhuvanavyāpakāya bhūtapretapiśācaḍākinīkulanāśāya stambhodbhavāya samastadoṣān hara hara viṣa viṣa paca paca matha matha hana hana phaṭ huṁ phaṭ ṭhaḥ ṭhaḥ ehi rudro jñāpayati svāhā | oṃ kṣauṃ namo bhagavate narasiṃhāya jvālāmāline dīptadaṃṣṭrāya agninetrāya sarvarakṣoghnāya sarvabhūtavināśāya sarvajvaravināśāya daha daha paca paca rakṣa rakṣa huṁ phaṭ svāhā | gorocanayā bhūrje vilikhya svarṇathā guṭikā striyā vāmakare puruṣeṇa dakṣiṇe kare dhāryā kadāpi na doṣaḥ | iti kriyoḍḍīśe mahātantrarāje devīśvarasaṃvāde ṣaṣṭhaḥ paṭalaḥ || 6 || atha saptamaḥ paṭalaḥ śrīdevyuvāca śrutaṃ kavacacaritamapūrvaṃ devavāñchitam | idānīṃ śrotumicchāmi yantraṃ kathaya me prabho || 1 || yantram īśvara uvāca mātrāhīnaṃ rakāraṃ tu pārśve śīrṣaṃ tathā punaḥ | māyātmakaṃ tena bhavet ṣaṭkoṇaṃ yantramuttamam || 2 || māyābīja hrīṃ garbham | striyā vāmahaste dhāraṇādvandhyā putravatī bhavet | bālāyā bālakasyāpi kaṇṭhe sandhārya sukhī bhavet | bhūrje gorocanayā vilikhya svarṇasthaṃ dhārayet | ṣoḍaśīcakrasya gorocanayā bhūrje vilikhya dhāraṇāt strīṇāṃ saubhāgyavṛddhiḥ | catuṣkoṇacakraṃ saṃlikhya hrīṃ garbhabāhau dhāraṇāt nārī jīvatputrikā athavā catuṣkoṇe praṇavādi kṣaṃ punaḥ mīnacakraṃ saṃlikhya dhāraṇāt vandhyā jīvatputrikā bhavati | ataḥ param aṣṭadalakarṇikāmadhye māyā | tataḥ paraṃ dalamadhye dve dve māyābīje punaḥ punaḥ | itaḥ paraṃ navadalaṃ māyābījaṃ vilikhayā bāhau dhāraṇāt mṛtavatsā jīvadvatsā | gorocanākuṅkumena saṃlikhya raktasūtreṇa saṃveṣṭya guṭikāṃ pañcāmṛtaiḥ pañcagavyaiḥ snāpayitvā | praṇavenatu sammantrya snāpayedgandhadravyakaiḥ | prāṇān pratiṣṭhāpya devatārūpāṃ guṭikāṃ sampūjya dhārayet | śivasnānam ghṛtena madhunā vāpi snāpayedvaśyakarmaṇi | dugdhādinā tathā devi śāntau mṛtyuñjaye'pi ca || 3 || ākarṣaṇe tu madhunā bhasmanā krūrakarmaṇi | asya parimāṇam śatatolakamānena dravyametprakīrtitam || 4 || tanmānaṃ saṃvidācūrṇaṃ naivedyaṃ ca sureśvari | bilvapatraṃ tathā puṣpaṃ dadyādaṣṭottaraṃ śatam || 5 || śāntikādau droṇapuṣpaṃ barbarā cābhicārake | stambhane mohane caiva dhattūraṃ kanakāhvayam || 6 || vidveṣoccāṭane devi vijayāpyaparājitā | caturdaśyāṃ samārabhya yāvadanyā caturdaśī || 7 || ekaikaṃ kramaśo liṅgaṃ pūjayedbhaktibhāvataḥ | aṣṭādhikasahasraṃ tu japaṃ kuryāddine dine || 8 || saptāhe sapta liṅgāni pañcāhe vātha pañcakam | caṇḍogreṇa vidhānena japapūjādikaṃ smṛtam || 9 || vaṭukena tu mantreṇa mañjughoṣeṇa vā priye | traiyambakeṇa deveśi ! śāntike japapūjanam || 10 || tattatkalpavidhānena japaṃ pūjāṃ samācaret | jātidhvaṃse kulocchede jvarādau rogasaṅkaṭe || 11 || mahābhaye samutpanne sarvābhicārasambhave | yatnena pūjayeddevi liṅgamaṣṭottaraṃ śatam || 12 || atirudrayogādau rudrādhyāyena vā punaḥ | nīlakaṇṭhena vā devi stavena toṣayecchivam || 13 || namaskaromi bhūteśa rakṣa māṃ jagadīśvara | pāpebhyo narakebhyaśca trāhi māṃ bhaktavatsala || 6 || janmamṛtyujarāvyādhikāmakrodhādapi prabho | lobhamohānmahādeva rakṣa māṃ tridaśeśvara || 7 || tvaṃ gatistvaṃ matiścaiva tvaṃ bhūmistvaṃ parāyaṇaḥ | kāyena manasā vācā tvayi bhaktirdṛḍhāstu me || 8 || phalaśrutiḥ ityetadrudrakavacaṃ pāṭhanātpāpanāśanam | mahādevaprasādena bhairavena ca kīrtitam || 9 || na tasya pāpaṃ deheṣu na bhayaṃ tasya vidyate | prāpnoti sukhamārogyaṃ putramāyuḥ pravarddhanam || 10 || putrārthī labhate putrāndhanārthī dhanamāpnuyāt | vidyārthī labhate vidyāṃ mokṣārthī mokṣameva ca || 11 || vyādhito mucyate rogādbaddho mucyeta bandhanāt | brahmahatyādi pāpaṃ ca paṭhanādeva naśyati || 12 || iti kriyoḍḍīśe mahātantrarāje devīśvarasaṃvāde aṣṭamaḥ paṭalaḥ || 8 || atha navamaḥ paṭalaḥ āsanam ekaṃ siddhāsanaṃ proktaṃ dvitīyaṃ kamalāsanam | vyāghrājine sarvasiddhirjñānasiddhirmṛgājine || 1 || vastrāsanaṃ rogaharaṃ vetrajaṃ prītivarddhanam | kauśeyaṃ puṣṭidaṃ proktaṃ kambalaṃ sarvasiddhidam || 2 || śuklaṃ vā yadi vā kṛṣṇaṃ viśeṣādraktakambalam | meṣāsanaṃ tu vaśyārthamākṛṣṭau vyāghracarma ca || 3 || śāntau mṛgājinaṃ śastaṃ mokṣārthaṃ vyāghracarma ca | gocarma stambhane devi! vājiṃ cocāṭane tathā || 4 || vidveṣe śvānacarma ca māraṇe māhiṣaṃ carma karmoddiṣṭaṃ samācaret | sarvakāmārthadaṃ devi! paṭṭavastrāsanaṃ tathā || 5 || kuśāsanaṃ kambalaṃ vā sarvakarmasu pūjitam | duḥkhadāridryanāśaṃ tu kāṣṭhapāṣāṇajāsanam || 6 || homaghaṭādisthāpanam nityaṃ naimittikaṃ kāryaṃ sthaṇḍile vā samācaret | hastamātreṇa tatkuryādvālukābhiḥ suśobhanam || 7 || toyapūrṇānghaṭānpañca sthāpayetparameśvari | ekena mantrayugmena sthāpitāḥ syuḥ sapallavaiḥ || 8 || aśaktau ca mahādevi ekaikena ca vāsasā | kadācidapi caikena sarvānnācchādayecchive || 9 || anācchāditatoyāni sthāpayitvā vrajatyadhaḥ | tataḥ sthāṃ sthīṃ iti śrīmiti mantreṇa ghaṭaṃ sthirīkṛtya | klīṃ iti ghaṭaprokṣaṇam | krāmiti ghaṭābhimantraṇam | hrīṃ ityāropaṇam | hrīṃ jalena pūraṇam | tataḥ kṛtāñjaliḥ paṭhet | gaṃgādyāḥ saritaḥ sarvāḥ samudrāśca sarāṃsi ca || 10 || sarve samudrāḥ saritaḥ sarāṃsi jaladā nadāḥ | hradāḥ prasravaṇāḥ puṇyāḥ svargapātālabhūgatāḥ | sarvatīrthāni puṇyāni ghaṭe kurvantu sannidhim || 11 || tataḥ śrīmiti pallavam humiti phalam ramiti sindūram bamiti puṣpam mūlena dūrvām oṃ oṃ oṃ ityabhyukṣaṇam oṃ phaṭ svāhā iti kuśena tāḍanam | śāntyarthaṃ snāpayetkumbham | puṇyāhaṃ vācayitvā karma kuryāt digbandhanādi gaṇeśagrahadikpālādīnpratikuṇḍe pūjayet | sthaṇḍile pūjayelliṅgaṃ sarvāpattivināśanam | kumbhe cāpi pūjayet | tataḥ agnimānīya saṃskṛtya homaṃ kuryāt | mahāvipattau juhuyāt javāṃ kṛṣṇaparājitām | droṇaṃ vā karavīraṃ vā manobhīṣṭaphalaṃ labhet || 12 || karavīraiḥ śvetaraktai raktacandanamiśritaiḥ | droṇaiśca ketakīpuṣpairhomo rogaṃ vimocayet || 13 || campakaiḥ śvetapadmaiśca kokanadañca bandhukam | bilvapatraṃ kuruvakaṃ munipuṣpaṃ ca kesaram || 14 || hutvā yadi mahādevi avaśyaṃ putravānbhavet | raktotpalaṃ bilvapatraṃ kāñcanaṃ raktavarṇakam || 15 || śāntimantratrikaṃ cāpi śatasaṃkhyākrameṇa tu | juhuyāttu maheśāni sarvasiddhirbhavettadā || 16 || iti kriyoḍḍīśe mahātantrarāje devīśvarasaṃvāde navamaḥ paṭalaḥ || 9 || atha daśamaḥ paṭalaḥ śāktābhiṣekaḥ śāktābhiṣeko vandhyāmṛtavatsārogiṇīnāṃ śāntikaraḥ | dhanakīrtyāyurvṛddhiḥ saubhāgyajananaḥ sarvāśāpūrṇo mantradoṣanivāraṇo'bhicāraharo grahadoṣanāśanaḥ sarvasiddhiprado'bhiṣekaḥ || nayanarañjanam dīpaṃ kṛtvā tāmrapātre kajjalaṃ pātayedatha | gavāṃ ghṛtena cāloḍya cakṣuṣī atha rañjayet | pūrve ca yādṛśaṃ dṛṣṭaṃ tādṛśaṃ ca prapaśyati || 1 || prakārāntare raktacandanasaṃyogānmadhunā saharauduke | kiyaddṛṣṭamañjanañca timiraṃ hanti sundari || 2 || athānyaḥ punarnavāghṛtaṃ sadyaścakṣustejaḥkaraṃ bhavet || 3 || jvaraharaṇam apāmārgasya mūlaṃ ca kanyakāsūtrabandhane | svātyāṃ tathā vaiṣṇave ca jvaraṃ hanti sudāruṇam || 4 || sarvajvaranivāraṇam raktavāṭyā mūlamarkavāre kadalīsūtraiḥ śayyāyāṃ dāpayetsarvajvaraṃ tāpajvaraṃ haret | udararogapraśam nāgeśvaramūlaṃ madhunā saha pānādudararogaśāntiḥ | tṛṣṇānāśaḥ raktacandanaṃ varṣayitvā tolakaṃ jalasammiśraṃ vāmahaste gṛhītvā manumaṣṭottaraśataṃ sañjapya pibet | saptāhāttasya tṛṣṇānāśo bhavati | mantraḥ śabdabījadvayaṃ bhadre! nāśaya dvitayaṃ vadet | tṛṣṇoti padamuccārya tataḥ svāhā manurmataḥ | anena manunā devi! tṛṣṇānāśo bhaviṣyati || 5 || sarvāpacchāntikaraṃ mahāsvastyayanam atha vakṣye maheśāni mahāsvastyayanaṃ śṛṇu | sarvasiddhikaraṃ puṇyaṃ sarvapāpavināśanam || 6 || sarvopadravaśamanaṃ sarvāriṣṭavināśanam | mahāvyādhipraśamanamapasmāravināśanam || 7 || yoginībhūtavetālāḥ pretakūṣmāṇḍapannagāḥ | tatra sthāne na tiṣṭhanti ḍākinyādyā viśeṣataḥ || 8 || kṛtyāmabhyarccayeddevi! yathāvidhi puraḥsaram | ṣoḍaśāraṃ likhetpadmaṃ yoniyugmaṃ sabindukam || 9 || tanmadhye'ṣṭadalaṃ likhya yakārādīnnyasetkramāt | tanmadhye caiva ṣaṭkoṇaṃ likhenmūlamanusmaran || 10 || candrabimbaṃ likhenmadhye asādhye pārthivaṃ śivam | tasya madhye nyaset kumbhaṃ gale sragdāmabhūṣitam || 11 || tasya madhye nyaset kṛtyāṃ sarvalakṣaṇasaṃyutām | pūjayecca yathānyāsaṃ pāyasantu nivedayet || 12 || paritoṣya ghaṭe nyasya asitāṅgādibhairavān | gandhapuṣpādinābhyarcya tadbāhye kṣetrapālakān || 13 || lokapālaṃ yajeddevi! tadagre homamācaret | juhuyādājyāpāmārgeṇa rakṣatāṃ bhidamarṣaṇau || 14 || dūrvāgrakhadirāśvatthaṃ pratyekantu śatādikam | kuṇḍe va sthaṇḍile vāpi homakarma samācaret || 15 || tasya dakṣiṇapārśve tu lakṣmīṃ dhyāyedyathāvidhi | kuṇḍamadhye nyaseddevīṃ dakṣiṇe ca śriyaṃ smaret || 16 || vāmapārśve smareddevīṃ hṛllekhāṃ parameśvarīm | tasyaiva vāmapārśve tu pūjayeddaśa nāyakam || 17 || ayutaṃ mūlamantrañca japenmṛtyuvināśanam | ayutaṃ bhrūṇahatyāyāṃ japet parimāṇaṃ viduḥ || 18 || mahāvyādhipraśamanaṃ tāvajjaptvābhiṣekataḥ | evaṃ yaḥ kurute martyaḥ puṇyāṃ gatimavāpnuyāt || 19 || tasyāvaśyaṃ na vidyeta vyādhibhyo'pi bhayaṃ nahi || 20 || iti kriyoḍḍīśe mahātantrarāje devīśvarasaṃvāde daśamaḥ paṭalaḥ || 10 || athaikādaśaḥ paṭalaḥ kumāryāveśanam śrīśvara uvāca atha vakṣyāmi saṃkṣepāt kumāryāveśanaṃ śṛṇu | sugupte vijane deśe gomayenopalepite || 1 || ācāryaḥ prayato bhūtvā susnāto vijitendriyaḥ | navakumbhān samādāya śuddhakumbhena pūrayet || 2 || navaṃ śarāvamānīya kapilāghṛtapūritam | kumbhopari samāropya dīpaṃ prajvālayettataḥ || 3 || śatāṣṭamantrajāpena kumārā vā kumārikāḥ | atītānāgatañcaiva vartamānaṃ ca yadbhavet || 4 || śubhāśubhāni sarvāṇi paśyanti nātra saṃśayaḥ | samyagdhyātvā gaṇeśānaṃ gate yāme japenniśi || 5 || śubhāśubhāni karmāṇi kathayanti na saṃśayaḥ | kanyakārthī śucirbhūtvā mantrarājaṃ gaṇeśituḥ || 6 || japtvā daśasahasrāṇi bhānuruktā śvabhāvajaiḥ | puṣpairdaśāṃśahavanāt tāṃ kanyāṃ labhate dhruvam || 7 || kāmyakarmāṇi vakṣyāmi kāmyakarmāṇi sādhakānāṃ hitāya vai | śāstroktenaiva mantreṇa saṃkṣepānna tu vistarāt || 8 || divyajñānādilābhaḥ svahṛtpadme gaṇeśānaṃ kundendudhavalaprabham | śuklālaṅkārasampannaṃ bhāvayedyo nirantaram || 9 || bhāratī tasya vaktrābje śāstrajñā bahusundarī | nityaṃ prakāśate satyaṃ divyajñānapradāyinī || 10 || vaśīkaraṇam na vinaśyed gaṇeśānaṃ sindūrasadṛśaprabham | pāśāṃkuśadharaṃ dhyātvā yo japenmantravittamaḥ | anaṅgavaśasampannā tamabhyeti varāṅganā || 11 || prakārāntaram pāśāṃkuśavarābhītiṃ himakundendumallibham | digvastraṃ candravarṇābhaṃ sphuranmāṇikyamaṇḍalam | yaḥ smarettasya vaśagā hyavaśyā'pi varāṅganā || 12 || mukhastambhanam vivādeṣu gaṇeśānaṃ jvaladagnisamaprabham | prativādimukhe dhyāyanprajapenmanasā manum || 13 || tanmukhaṃ stambhayedāśu vādī dīno'pi nānyathā || 14 || sarvarogaharaṇam aṃguṣṭhamānaṃ hṛtpadme śuddhasphaṭikasannibham | cintayitvā gaṇeśānaṃ cidambarasudhārasam || 15 || abhiṣicya suraśreṣṭha satataṃ dharaṇītale | sarvarogavinirmuktaścirakālaṃ sa jīvati || 16 || viṣaharaṇam śuklavarṇaṃ gaṇeśānaṃ daśabāhūṃ madotkaṭam | śuklāmbaradharaṃ saumyaṃ cicchaśāṃkāmṛtaplutam || 17 || bhāvayeddhṛdayāmbhoje nityaṃ nirmalamānasaḥ | mantrī garuḍavat sadyastrividhaṃ harate viṣam || 18 || nānāvidhakāryāṇi dhanārthī madhunā nityaṃ vaśārthī pāyasairhunet | ghṛtena lakṣmīsamprāptyai hunet śarkarayā tathā || 19 || āyuṣe cārthasampattau dadhnā ca juhuyāttathā | annena cānnasampattyai dravyāptyai tilataṇḍulaiḥ || 20 || lavaṇairapyanāvṛṣṭyai vṛṣṭi kāmastu bilvakaiḥ | saubhāgyārthī tathā lājaiḥ kusumaiścāpi sodanaiḥ || 21 || vividhavaśīkaraṇāni vaśine juhuyāt padmai rājānaṃ vaśamānayet | aśvatthodumbaraplakṣanyagrodhasamidho hunet || 22 || viprakṣatriyaviṭśūdrāḥ sadyo vaśyā bhavanti vai || 23 || strīvaśīkaraṇam strīṇāṃ pratikṛtiṃ kṛtvā piṣṭena prativāsaram | sājyāhutitrayantasya vaśamāyānti nānyathā || 24 || prakārāntaram mantrarājaṃ japitvā tu yathāvidhi mahodaram | daśāṃśe juhuyānmantrī rājikālavaṇena ca || 25 || tadbhasma vāmahastena gṛhītvā tāḍayet striyam | samāgacchati sā nārī madanānalavihvalā || 26 || ripustambhanam tadvacca prajapedenaṃ pītapuṣpaiśca mantravit | stambhayedripusainyaṃ ca sāmātyabalavāhanam || 27 || prativādī bhavenmūko mantrasyāsya prabhāvataḥ | stambhayet pañcadravyāṇi nātra kāryā vicāraṇā || 28 || śatrūccāṭanam vibhītakasamidbhistu niyataṃ juhuyāttathā | samyaguccāṭayecchatrūn svasthānāttu viśeṣataḥ || 29 || merumaṇḍalatulyo vā sa devodvignamānasaḥ | grāmayuddhe pure vāpi imaṃ stutvā tu homayet || 30 || uccāṭayati vegena mānuṣeṣu ca kā kathā || 31 || māraṇam mānuṣāsthi samānīya samyagaṣṭāṃgulīmitam | mṛtakeśaistu saṃveṣṭya sahasrāṣṭābhimantritam || 32 || kulikodayavelāyāṃ śatrudvāre khanedbhuvi | saptāhānmaraṇaṃ tasya bhaviṣyati na saṃśayaḥ || 33 || gaṇeśayantram ataḥ paraṃ yantrarājaṃ śṛṇu devi! gaṇeśituḥ | susame bhūtale śuddhe gajādyaiḥ supariṣkṛte || 34 || kāmakrodhavinirmuktaḥ pūrvavannyāsasaṃyutaḥ | saṃpūjya devadeveśaṃ gaṇeśaṃ śaṅkarātmajam || 35 || bhūrje kṣaume tasyopari yantrarājaṃ samuddharet | kastūrīrocanāyantrakāśmīraṃ candanaṃ rasam || 36 || gośakṛdrasasaṃyuktairmātaṅgamadamiśritaiḥ | sarvaiśca susamairebhiḥ prāṇamāpūrya saṃlikhet || 37 || lekhanyā hemaśūcyā vā jātikāṣṭhena dūrvayā | ṣaṭtriṃśatkoṇamaṣṭāraṃ dvādaśāraṃ tataḥ param || 38 || kavargādīni gāyatryā varṇānyapi likhedbahiḥ | mahābhūmaṇḍalaṃ kuryādgajāṣṭakavibhūṣitam || 39 || tadbāhyaṃ vāruṇaṃ kūrmamaṇḍalañca nataṃ śubham | karṇikāyāṃ likhenmantrī dakṣau praṇavaveṣṭitau || 40 || aṅgāni cāṣṭakoṇeṣu lakṣmīmanudalaṃ likhet | dvādaśāre likhecchaktiṃ vinā napuṃsakasvaram || 41 || svarapatraṃ kalāpatre tataścāṣṭadalāmbuje | kādimantākṣarañcāpi sarvaṃ pūrvādito likhet || 42 || punaḥ pārśvakakoṇeṣu vādi sāntaṃ samālikhet | etanmantraṃ samākhyātaṃ na deyaṃ yasya kasyacit || 43 || aṇimādyaṣṭamantreṇa cāṣṭabāhuṃ prapūjayet || 44 || aṃ aṇimāyai namaḥ svāhā | laṃ lakṣmyai namaḥ | vyaṃ vyāptyai | praṃ prākāmyāyai | maṃ mahimāyai | īṃ īśitvāyai | vaṃ vaśitvāyai | kaṃ kāmāvaśāyitvāyai namaḥ svāhā || evaṃ sampūjya vidhivanmantrī munigaṇānyajet | bhojayitvā vidhānena nānāmiṣṭaphalādibhiḥ || 45 || divyagandhayutaiḥ puṣpairdivyagandhapralepanaiḥ | mūṣikaṃ pūjayāmāsa nānāmiṣṭaphalādibhiḥ || 46 || oṃ samūṣikāya gaṇādhipavāhanāya dharmarājāya svāhā | ityanenaiva mantreṇa mūṣikaṃ pūjayettataḥ || 47 || ekadantāya vidmahe vakratuṇḍāya dhīmahi tanno dantiḥ pracodayāt | iti kriyoḍḍīśe mahātantrarāje śivagaurīsaṃvāde ekādaśaḥ paṭalaḥ || 11 || atha dvādaśaḥ paṭalaḥ vaśīkaraṇam palārddhasvarṇena rajatena vā sādhyasya pratimāṃ kṛtvā sārdhahastaṃ gartaṃ kṛtvā haritālaharidrācūrṇakaṃ palārddhaṃ tatra niḥkṣipya raktāsane tatropaviśya caturdikṣu patākāṃ niveśya tilapūrṇaghaṭamadhaḥ kṛtvā saṃsthāpya prāṇapratiṣṭhāṃ kṛtvā pūrvāsyaḥ pravālamālayā daśasāhasrajapena prayogārho bhavet | mantraḥ praṇavaṃ pūrvamuccārya māyābījaṃ dvitīyakam | kātvaṃ tvallākinīyuktaṃ vāmakarṇendubhūṣitam || 1 || tato matrapadaṃ brūyāccāmuṇḍe tadanantaram | sādhyanāma tato nyasya vaśamānaya tatparam || 2 || vahnijāyāvadhirmantraṃ jayeddaśasahasrakam | athānyat-cāmuṇḍe mohaya mohaya amukaṃ vaśamānaya svāhā | prātaḥ snātvā haviṣyāśī jitendriyaḥ śucirbhūtvā prātaḥ kālamārabhya madhyandināvadhijapasamāpterdaśāṃśādikrameṇa homādīṃśca kārayet | jātīpuṣpairhomena vaśayennātra saṃśayaḥ || 3 || kāmatulyaśca nārīṇāṃ ripūṇāṃ śamanopamaḥ | yāvajjīvanaparyantaṃ smaraṇaṃ ca prajāyate || 4 || anyacca śvetāparājitāmūlaṃ peṣayedrocanāyutam | śatena mantridaṃ kṛtvā tilakaṃ kārayettataḥ || 5 || vaśayennātra sandehaḥ | rājavaśīkaraṇam raktapuṣpeṇa cāmuṇḍāpūjā dhyānam- daṃṣṭrākoṭiviśaṅkaṭā suvadanā sāndrā kṛkāre sthitā khaṭvāṅgāsinigūḍhadakṣiṇakarā vāmena pāśāṃkuśā | śyāmā piṅgalamūrddhajā bhayakarī śārdūlacarmāvṛtā cāmuṇḍā śavavāhinī japavidhau dhyeyā sadā sādhakaiḥ || 6 || japtva kiṃśukakusumairhutvā phalaprāptiḥ | ādyante mahatī pūjā pañcadinaprayogeṇa rājānaṃ vaśamānayet | prakārāntareṇa vaśīkaraṇam mṛgaśīrṣe tu saṃgrāhyaṃ suraktakaravīrakam | navāṃgulaṃ kīlakaṃ tat saptavārābhimantritam || 7 || yasya nāmnā khanedbhūmau sa vaśyo bhavati dhuvam | mantraḥ oṃ huṁ huṁ svāhā | tattatsthāne yathāsaṃkhyāmanukte tvayutaṃ japet || 8 || iti kriyoḍḍīśamahātantrarāje gaurīśvarasaṃvāde dvādaśaḥ paṭalaḥ || 12 || atha trayodaśaḥ paṭalaḥ vidveṣaṇam gṛhītvā śallakīkaṇṭaṃ nikhanedbhūvidārataḥ | kalaho jāyate nityaṃ śatrorgehe na saṃśayaḥ || 1 || mantraḥ oṃ namo nārāyaṇāya amukāmukena saha vidveṣaṃ kuru kuru svāhā | anyacca parasparaṃ riporvairaṃ mitreṇa saha niścitam | mahiṣāśvapurīṣābhyāṃ gomūtreṇa samālikhet || 2 || yayornāma tayoḥ śīghraṃ vidveṣaśca parasparam || 3 || anyacca raktena mahiṣāśvena śmaśānavastrake likhet | yayornāma tayoḥ śīghraṃ vidveṣaśca parasparam || 4 || ṣaṭkoṇacakramadhye tu ripornāmasamanvitam | mantraṃ tataḥ pravakṣyāmi mahābhairavasaṃjñakam || 5 || mahābhairavamantraḥ oṃ namo bhagavate śmaśānakālike amukaṃ vidveṣaya vidveṣaya hana hana paca paca matha matha oṃ phaṭ svāhā | anena mantrarājena homayedyatnataḥ sudhīḥ | vahnikuṇḍe śmaśānāgniṃ dīpayet khādiraindhasā || 6 || kaṭutailānvitaiḥ patrairnimbasya pariśodhitaiḥ | homayedayutaṃ dhīmānsākaṃ tilayavākṣataiḥ || 7 || bhāvayan kālikāṃ devīṃ mantraśīlakṣamaprabhām | vyomanīlāṃ mahācaṇḍāṃ surāsuravimardinīm || 8 || trilocanāṃ mahārāvāṃ sarvābharaṇabhūṣitām | kapālakartṛkāhastāṃ candrasūryoparisthitām || 9 || śarajāladharāñcañcat pretabhairavaveṣṭitām | vasantīṃ pitṛgahane sarvasiddhipradāyinīm || 10 || homayedvividhaiḥ puṣpairvalichāgopahārakaiḥ | pūjayitvā maheśānīṃ bhaktiyuktena cetasā || 11 || etadbhasma samādāya dhārayedabhimantritam | bhasmanā tena manunā vidveṣo jāyate nṛṇām || 12 || mantraḥ oṃ drīṃ vidveṣiṇi amukāmukayoḥ parasparayorvidveṣaṇaṃ kuru kuru svāhā | athoccāṭanam saurārayordine grāhyaṃ narāsthi caturaṅgulam | niśāvasāne saṃlikhya pradhānabhavane kṣipet | saptāhā'bhyantare śatrorāśu coccāṭanambhavet || 13 || druṃ amukasyoccāṭanaṃ kuru kuru svāhā | drūṃ amukaṃ hana hana svāhā | stambhanam amukasya manaḥ stambhaya stambhaya druṃ phaṭ || śāntiḥ śāntiḥ sarvābhicārasya pañcagavyena jāyate | kāmyaprayoge sarvatra niyamo'yutasaṃkhyakaḥ || 14 || māraṇam mahākṛtyāprayogaḥ ataḥ paraṃ maheśāni! māraṇaṃ śṛṇu pārvati | yena vijñātamātreṇa susādhyaṃ bhuvanatraye || 15 || rudrajāyā mahāyoginyato gaurīpadaṃ vadet | bhuvanabhayaṃkarīti padaṃ varmāstramuccarenmanum || 16 || athavā prathaṃ nyāsamathāto brahmaṇaḥ padam | yaddīrghayuktabījena cāṅgamantreṇa yojanā || 17 || hṛdayaṃ ca tato'ṅgena dharmāstreṇa śiraḥkramāt | śikhākavacanetrāstramevaṃ nyāsakramaḥ smṛtaḥ || 18 || aṅgirāśca ṛṣirdevi gāyatrīcchanda īritam | siṃhavaktrā ca bhūtānāṃ bhayaṅkari tataḥ param | mahākṛtyā devatā ca ityuktyā nyāsamācaret || 19 || dhyānam siṃhānanāṃ kṛṣṇamukhīṃ lambagātrapayodharām | daṃṣṭrākarālavadanāṃ trinetrāṃ sarvaprojjvalām || 20 || kṛṣṇakāñcīsamāyuktāṃ vidhūmāgnisamaprabhām | triśūlacakramuśalakhaṭvāṅgakarapaṅkajām || 21 || lelihānamahajjihvāṃ vidyutpuñjasubhīṣaṇām | dhyātvā kṛtyāṃ vidhānena pūjayenmantravittamaḥ || 22 || dhyātvā kṛtyāmarccayedvai raktaiḥ puṣpaiśca vaśyake | kṛṣṇairmāraṇakṛtyeṣu māṃsaraktāsavaiḥ stutām || 23 || kṛtyāñca madanāṃ kumāryaśvacchādinīṃ tathā | bhīṣaṇāṃ śrīmatīṃ caiva pratiṣṭhāñca tataḥ param || 24 || vidyāmabhyarcayedaṣṭapatreṣu hi sulocanām | pūrve tu śāṃkarīṃ nāma śuklavarṇāṃ varānvitām || 25 || dvibhujāṃ saumyavadanāṃ pāśāṃkuśadharāṃ śivām | dakṣiṇe bhīṣikāṃ nāma lambajihvāṃ sudhāmukhīm || 26 || kṛṣṇavarṇāṃ raktamukhīṃ raktamālānulepanām | caturbhujāṃ siṃhanādāṃ mahāghoṣāṃ kapālinīm || 27 || khaḍgahastāṃ śiromālāṃ sarvābharaṇabhūṣitām | paścime vāruṇīṃ nāma svarṇavarṇāṃ hasanmukhīm || 28 || surudramālikāṃ śubhradaṃṣṭrāmabhayadāṃ sadā | uttare bhīmikāṃ nāma caturhastāṃ bhayaṅkarīm || 29 || pūjayitvā japenmantraṃ nityamaṣṭottaraṃ śatam | avāpya viniyogastu kartavyo mantriṇā sadā || 30 || kālaṃ viditvā pratimāṃ madhūcchiṣṭena kārayet | dvādaśāṃgulakaṃ śatrornakhalomasamanvitam || 31 || hṛdaye nāmadheyañca phaṭkārañca samarmake | asya prāṇān pratiṣṭhāpya maricairlepayettataḥ || 32 || mṛtabrāhmaṇacāṇḍālakeśābhyāṃ pādayoḥ pṛthak | baddhvā kare karamaye toraṇe cā'pyadhomukham || 33 || tasyādho mekhalāyuktaṃ trikoṇaṃ tatra kuṇḍakam | tatra śāraṃ vidhāyāgniṃ paristīrya śaraistṛṇaiḥ || 34 || vibhītakaṃ paridhāya kalpayedyasya māraṇam | juhuyānnimbatailāktaiḥ kākolūkasya pucchakaiḥ || 35 || dārayainaṃ śoṣayainaṃ mārayetyabhidhāya ca | aṣṭottaraśatenaiva manunā vidhinā tataḥ || 36 || homānte vidhivat kṛtvā bāhye agneśca sannidhau | yo me dveṣṭi janaḥ kaściddūrastho vāntike'pi ca || 37 || piba kṛtye'mukaṃ tasya humityuktvā nivedayet | saṃrakṣyāgniṃ vidhānena navarātraṃ samācaret || 38 || hunedyāvattāvadasya bhavedeva ripormṛtiḥ | arkakṣīre ca maricaṃ piṣṭvā siddhārthameva ca || 39 || jalaiḥ saṃloḍya mantreṇa ripuṃ dhyātvā niruddhadṛk | kṛṣṇāmbarottarīyāgrapādenākramya tadripum || 40 || vajraśūlamiti dhyātvā tasyopari tu nikṣipet | navarātrāt pare śatrurmriyate nātra saṃśayaḥ || 41 || vaṭukabhairavaprayogaḥ ataḥ paraṃ maheśāni! śṛṇuṣva karmasiddhidam | vaṭukaṃ vimalāṅgākhyaṃ pūjayet ṣaṭsu karmasu || 42 || ācamya svastivācanasūktaṃ paṭhitvā abhyarcya ca śiraḥpadme śrīguruṃ karuṇāmay || 43 || saṅkalpaḥ adyetyādyamukagotrāntanāmagrahaviśiṣṭopaśamanapūrvakārogyāyurvṛddhi- kāmo gaṇeśadipūjāpūrvakavaṭukapārthivaśivapūjanamahaṃ kariṣye | śāntikādau ratiṃ ca pūjayedādau kṣetrapālaṃ tataḥ punaḥ | rudraṃ ca pūjayeddevi dhyānaṃ śṛṇu mahāmate! || 44 || praṇavādyaṃ dhyānam śūlahastaṃ mahāraudraṃ sarvavighnaniṣūdanam | pūrṇacandrasamābhāsaṃ rudraṃ vṛṣabhavāhanam | evaṃ dhyātvā mahākālīṃ pūjayedrudradaivatam || 45 || praṇavādyaṃ rudrāya namaḥ itibhaktiyogataḥ śatatolakaparimitaliṅgamānīya kāṃsyapātre liṅgaṃ saṃsthāpya | sāmānyārghyaṃ tataḥ kṛtvā bhūtaśuddhiṃ maheśvari | prāṇāyāmamaṅganyāsaṃ pīṭhanyāsaṃ samācaret || 46 || tataḥ ṛṣyādinyāsaḥ | tato dehanyāsaḥ | yathā mūrdhni oṃ bhairavāya namaḥ | evaṃ lalāṭe bhīmadarśanāya namaḥ | netrayoḥ bhūtāśrayāya namaḥ | mukhe tīkṣṇadarśanāya namaḥ | karṇayoḥ kṣetrapāya namaḥ | hṛdi kṣetrapālāya namaḥ | nābhideśe kṣetrākhyāya namaḥ | kaṭyāṃ sarvāghanāśanāya namaḥ | ūrvostrinetrāya namaḥ | jaṃghayoḥ raktapāṇikāya namaḥ | pādayoḥ devadeveśāya namaḥ | sarvāṅge vaṭukāya namaḥ || karāṅganyāsaḥ oṃ hrīṃ vāṁ aṃguṣṭhabhyāṃ namaḥ ityādi | oṃ hrāṁ vāṁ hṛdayāya namaḥ ityādi | tato mūlena vyāpakaṃ kṛtvā dhyāyet | oṃ vande bālamityādi saṃpūjya- dvāviṃśadakṣarañcaivaṃ japedrudrasahasrakam | abhiṣekaṃ tarpaṇañca yathāvidhi samācaret || 47 || eṣā śāntirmahāśāntiḥ kathivā tava śraddhayā || 48 || vaśīkaraṇam pūrvavat saṃkalpya rājasadhyānena oṃ udyadbhāskarādi dhyātvā | stambhanam ataḥ paraṃ mahādevi! pūjanaṃ krūrakarmaṇi || 49 || pūrvavat saṃkalpya vidveṣaṇoccāṭanādiṣu ca krūrakarmasu dhyānam | yathā- dhyāyennīlādrikāntamityādi dhyātvā sampūjya śivasahasrasaṃkhyākamuktaṃ śeṣe amukaṃ vaśamānaya svāhā iti mantrajapakarmāhaṃ kariṣye | yantre pūjākramaḥ punardhyātvā yantre puṣpaṃ nidhāya āvāhanādikaṃ kuryāt | yathā tatra kramaḥ- mūlādi sadyojātamantreṇāvāhanam | yathā mūlaṃ oṃ sadyojātaṃ prapadyāmi sadyojātāya vai namaḥ | bhave'bhave'nātibhave bhavasva māṃ bhavodbhavāya namaḥ | pinākadhṛgihāgaccha ihāgaccha | punarmūlamuccārya oṃ vāmadevāya namaḥ evaṃ jyeṣṭhāya rudrāya kālāya kalavikaraṇāya balāya balavikaraṇāya balapramathanāya sarvabhūtadamanāya namo namaḥ | unmanāya namaḥ iha tiṣṭha iha tiṣṭha mūlaṃ iha sannidhehi | oṃ vāmadevāya namaḥ | oṃ jyeṣṭhāya namaḥ | oṃ rudrāya namaḥ | oṃ kālāya namaḥ | oṃ kalavikaraṇāya namaḥ | oṃ balāya namaḥ | oṃ balavikaraṇāya namaḥ | oṃ balapramathanāya namaḥ | oṃ sarvabhūtadamanāya namo namaḥ | oṃ unmanāya namaḥ | iha tiṣṭha iha tiṣṭha mūlaṃ iha sannidhehi | aghoreṇa sannirodhanam punarmūlaṃ oṃ aghorebhyo'tha ghorebhyo'ghoraghoratarebhyaḥ | sarvebhyaḥ sarvaśarvebhyo namo'stu te rudrarūpebhyaḥ | iha sanniruddhasva | tatpuruṣeṇa yonimudrāpradarśanam punarmūlam | oṃ tatpuruṣāya vidmahe mahādevāya dhīmahi tanno rudraḥ pracodayāt iti yonimudrāṃ pradarśayet | īśānena vandanāmiti | punarmūlam | oṃ īśānaḥ sarvavidyānāmīśvaraḥ sarvabhūtānāṃ brahmaṇo'dhipatirbrahmāśivo me'stu sadāśiva oṃ | śivaṃ vandayāmi namaḥ | tataḥ prāṇapratiṣṭhā | āṁ drīṃ kroṃ haṃsaḥ vaṭukāya namaḥ paśupate śūlapāṇeḥ prāṇā iha prāṇāḥ jīva iha sthitaḥ | sarvendriyāṇi | cakṣuḥśrotraghrāṇaprāṇāḥ ihāgatya sukhaṃ ciraṃ tiṣṭhantu svāhā | huṁ ityavaguṇṭhya | vamiti dhenumudrayā'mṛtīkṛtya choṭikābhirdigbandhanaṃ kṛtvā ṣaḍaṅgāni sampūjya devaṃ pūjayet | mūlamuccārya etat pādyam | oṃ mahādevāya somamūrtaye baṭukatmane paśupataye śivāya namaḥ | evaṃ krameṇārghyācamanīyādikaṃ dadyāt | snāne tu viśeṣaḥ | yathā- adyetyādi amukasyā'śeṣāśubhanivṛttipūrvakagrahāriṣṭopaśamanārogyāyu- rvṛddhikāmanayā śatatolakaparimitadugdhena vaṭukātmakapaśupaterliṅgaṃ snāpayāmi | oṃ sadyojātaṃ prapadyāmi ityādinā snāpayet | tato jalena snāpayitvā mūlam | evaṃ gandhaḥ | oṃ mahādevāya somamūrtaye namaḥ | puṣpe tu adyetyādi uktavat kāmanayā baṭukātmakapaśupataye śivāyāṣṭottaśatadroṇapuṣpāṇyahaṃ sampradade | mūlamuccārya oṃ mahādevāya somamūrtaye namaḥ | iti mantreṇa ekaṃ ekaṃ kṛtvā dadyāt | evaṃ bilvapatram | madhuparkaṃ dhūpadīpe tu gandhavat | naivedyam | adyetyādi- snānīyavat kāmanayā etat sopakaraṇaśatatolakaparimitātapataṇḍulanaivedyaṃ baṭukātmakapaśupataye śivāya tubhyamahaṃ sampradade | oṃ mahādevāya somamūrtaye namaḥ | śatatolakaparimitasaṃvidācūrṇaṃ pānīyaṃ tāmbūlaṃ ca pūrvavat saṃkalpya dadyāt | vaśīkaraṇamantre mūlamuccārya oṃ bhavāya jalamūrtaye vaṭukātmane śivāya namaḥ | evaṃkrameṇa pūjayet | evamarghyācamanīyaṃ dadyāt | snāne tu adyetyādi amukasyāmukavaśīkaraṇārtha śatatolakaparimitaghṛtena madhutānā va baṭukātmakapāśupataśivaliṅgaṃ snāpayāmi mūlamuccārya | evaṃ gandhaḥ oṃ bhavāya jalamūrtaye | puṣpe tu adyetyādi amukasyāmukavaśīkaraṇārtham aṣṭottaraśatadroṇapuṣpaṃ baṭukātmane paśupatiśivāyā'haṃ sampradade | mūlamuccārya etat droṇapuṣpaṃ oṃ bhavāya jalamūrtaye namaḥ iti pratyekam | evaṃ bilvapatram | dhūpadīpe tu oṃ bhavāya jalamūrtaye namaḥ | naivedyaṃ tu adyetyādi amukasyāmukavaśīkaraṇārthaṃ śatatolakaparimitasopakaraṇanaivedyaṃ oṃ vaṭukātmakapaśupatiśivāyā'haṃ sampradade | mūlamuccārya etat sopakaraṇaśatatolakaparimitanaivedyaṃ saṃvidācūrṇañca oṃ bhavāya jalamūrtaye namaḥ | tataḥ pānārthodakam ācamanīyaṃ tāmbūlaṃ ca dadyāt | tataḥ aṣṭāvaraṇaṃ pūjayet | tato'ṣṭamūrtiṃ pūjayet | tato mūlena puṣpāñjalitrayaṃ dattvā saṃkalpya śivasahasrasaṃkhyākaṃ tanmantraṃ japet śāntikādau krūrakarmaṇyapi | tato guhyādinā japaṃ samāpya stotrādikaṃ paṭhet | tato balidānam | yathā- mūlamuccārya baṭukabhairavāya eṣa balirnamaḥ | bhairavaparivāragaṇaiḥ saha mama śatrūn sarudhiraṃ piva piva imaṃ baliṃ gṛhṇagṛhṇa svāhā | oṃ śatrupakṣasya rudhiraṃ piśitaṃ ca dine dine | bhakṣaya svagaṇaiḥ sārddhaṃ sārameyasamanvitam || 50 || tato vihitadravyaiḥ aṣṭottaraśataṃ sahasraṃ vā homayet | vaśīkaraṇe tu ghṛtāktarājikābhiraṣṭottarasahasrahomaḥ | śāntyarthaṃ dūrvādikam | krūrakarmaṇi bilvapatram | uccāṭane tu oṃ hrīṃ huṃ śivāya svāhā | iti viśeṣaḥ | dakṣiṇāṃ baṭukātmakapaśupataye śivāya tubhyamahaṃ sampradade | śvetasarṣapaṃ lavaṇamiti | iti kriyoḍḍīśe mahātantrarāje umāmāheśvarasaṃvāde trayodaśaḥ paṭalaḥ || 13 || atha caturdaśaḥ paṭalaḥ ṣaṭkarmaṇāṃ kavacaṃ śatrumardanam śrīdevyuvāca śrutaṃ vaṭukamāhātmyaṃ pūrṇavismayakārakam | idānīṃ śrotumicchāmi kavacaṃ vai ṣaṭkarmaṇām || 1 || śrīśvara uvāca śṛṇu devi! pravakṣyāmi yanmāṃ tvaṃ paripṛcchasi | śravaṇāt paṭhanādvāpi śatrunāśāya tatkṣaṇāt || 2 || śrīdevyuvāca trailokyamohanārthaṃ tu kavacaṃ me prakāśaya | trailokyaśatruṃ saṃhantu nāśitaṃ yatkṣamaṃ bhavet || 3 || evamukto mahādevaḥ kruddho bhūtvā jagatpatiḥ | devīṃ prabodhayāmāsa vākyenāmṛtavarṣiṇā || 4 || śrīmahādeva uvāca parāniṣṭe mahādevi ! kutaste jāyate matiḥ || 5 || śrīdevyuvāca jighāṃsantaṃ jighāṃsīyānna tena brahmahā bhavet | ye yathā māṃ prapadyante śrutirasti purātanī || 6 || yadi te vartate deva dayā hi kathyatāṃ mayi | śatrūṇāṃ prāṇanāśārthamuccāṭanavaśīkṛtau || 7 || teṣāṃ hi balanāśārthaṃ sarvadā prayatā narāḥ || 8 || īśvara uvāca śṛṇu devi! mahābhāge! kālāgniprāṇavallabhe | yasya dhāraṇamātreṇa śatrūṇāṃ nāśanaṃ bhavet || 9 || dhṛtvā tu pādamūlena spṛṣṭvā dāsa ivākarot | śaraṇāgatamātrantu nāśituṃ naiva śakyate || 10 || śṛṇu devi! mahābhāge sāvadhānāvadhāraya | śatrūṇāṃ prāṇanāśārthaṃ kupitaḥ kāla eva saḥ || 11 || daśavaktrā daśabhujā daśapādāñjanaprabhā | koṭisūryaprabhā kālī mama śatrūn vināśaya | nāśayitvā kṣaṇaṃ devi anyaśatrūn vināśaya || 12 || krīṃ krīṃ krīṃ ugraprabhe vikaṭadaṃṣṭre parapakṣaṃ mohaya mohaya paca paca matha matha daha daha hana hana māraya māraya ye māṃ hiṃsitumudyatā yoginīcakraistān vāraya vāraya chindhi chindhi bhindhi bhindhi karālini gṛhṇagṛhṇa oṃ krīṃ krīṃ krīṃ krīṃ sphūra sphūra pūra pūra pūna pūna cūlva cūlva dhaka dhaka dhama dhama māraya māraya sarvajagadvaśamānaya oṃ namaḥ svāhā | iti te kavacaṃ devi! bhadrakālyā pracoditam | bhūrje vilikhitañcaitat svarṇasthaṃ dhārayedyadi || 13 || śikhāyāṃ dakṣiṇe bāhau kaṇṭhe vā dhārayedyadi | trailokyaṃ mohayetkrodhāttrailokyaṃ cūrṇayetkṣaṇāt || 14 || putravāndhanavāndhīmān nānāvidyānidhirbhavet | brahmāstrādīni śastrāṇi tadgātrasparśanāttataḥ || 15 || śatravo nāśamāyānti rajatena praghāritam | māsamātreṇa śatrūṇāṃ mahavipadakāraṇam || 16 || yaṃ yaṃ śatruṃ smaranmartyaḥ kavacaṃ paṭhati dhruvam | taṃ taṃ nāśayate sadyastathyaṃ te tadvadāmyaham || 17 || dhāraṇe bhajate śatruḥ kaṇṭhaśoṣaṃ sadā bhavet | hṛtkampo jāyate tāvadyāvattasya kṛpā na cet || 18 || mohanakavacam īśvara uvāca trikālaṃ gopitaṃ devi! kalikāle prakāśitam | na vaktavyaṃ na draṣṭavyaṃ tava snehāt prakāśyate || 19 || kālī digambarī devi! jaganmohanakāriṇī | tacchṛṇuṣva mahādevi! trailokyamohanantvidam || 20 || asya mahākālabhairava ṛṣiḥ anuṣṭupchandaḥ śmaśānakālikā devatā sarvamohane viniyogaḥ | aiṃ krīṃ krūṃ kraḥ svāhā vivāde pātu māṃ sadā | klīṃ dakṣiṇakālikādevatāyai sabhāmadhye jayapradā || 21 || krīṃ krīṃ śyāmāṃginyai śatruṃ māraya māraya | hrīṃ krīṃ krīṃ klīṃ trailokyaṃ vaśamānaya || 22 || hrīṃ śrīṃ krīṃ māṃ rakṣa rakṣa vivāde rājagocare | dvāviṃśatyakṣarī brahma sarvatra rakṣa māṃ sadā || 23 || kavace varjite yatra tatra māṃ pātu kīlakā | sarvatra rakṣa māṃ devi śyāmā tūgrasvarūpiṇī || 24 || eteṣāṃ paramaṃ mohaṃ bhavadbhāgye prakāśitam | sadā yastu paṭhedvāpi trailokyaṃ vaśamānayet || 25 || idaṃ kavacamajñātvā pūjayeddhorarūpiṇīm | sarvadā sa mahāvyādhipīḍito nātra saṃśayaḥ || 26 || alpāyuḥ sa bhavedrogī kathitaṃ tava nārada | dhāraṇaṃ kavacasyāsya bhūrjapatre viśeṣataḥ || 27 || sayantraṃ kavacaṃ dhṛtvā icchāsiddhiḥ prajāyate | śuklāṣṭamyāṃ likhenmantraṃ dhārayet svarṇapatrake || 28 || kavacasyāsya māhātmyaṃ nāhaṃ vaktuṃ mahāmune | śikhāyāṃ dhārayedyogī phalārthī dakṣiṇe bhuje || 29 || idaṃ kalpadrumaṃ devi tava snehāt prakāśyate | gopanīyaṃ prayatnena paṭhanīyaṃ mahāmune || 30 || aiṃ krīṃ krūṃ kraḥ svāhā vivāde pātu māṃ sadā klīṃ dakṣiṇakālikā devatāyai sabhāmadhye jayapradā krīṃ krīṃ śyāmāṃginyai śatruṃ māraya māraya hrīṃ krīṃ klīṃ trailokyaṃ vaśamānaya hrīṃ śrīṃ krīṃ māṃ rakṣa rakṣa vivāde rājagocare dvāviṃśatyakṣarī brahma sarvatra rakṣa māṃ sadā | śrīviṣṇuruvāca ityevaṃ kavacaṃ nityaṃ mahālakṣmi! prapaṭhyatām | avaśyaṃ vaśamāyāti trailokyaṃ sacarācaram || 31 || śivena kathitaṃ pūrvaṃ nārade kalahāspade | tatpāṭhānnāradenāpi mohitaṃ sacarācaram || 32 || iti kriyoḍḍīśe mahātantrarāje devīśvarasaṃvāde caturdaśaḥ paṭalaḥ || 14 || atha pañcadaśaḥ paṭalaḥ sarvarakṣākaraṃ kavacam śrīdevyuvāca bhagavandevadeveśa sarvā'mnāyaprapūjitaḥ | sarvaṃ me kathitaṃ deva kavacaṃ na prakāśitam || 1 || prāsādākhyasya mantrasya kavacaṃ me prakāśaya | sarvarakṣākaraṃ devaṃ yadi sneho'sti samprati || 2 || śrībhagavānuvāca prāsādamantrakavacasya vāmadeva ṛṣiḥ paṃktiśchandaḥ sadāśivo devatā sādhakābhīṣṭasiddhaye viniyogaḥ prakīrtitaḥ | śiro me sarvadā pātu prāsādākhyaḥ sadāśivaḥ | ṣaḍakṣarasvarūpo me vadanaṃ ca maheśvaraḥ || 3 || pāñcākṣarātmā bhagavān bhujau me parirakṣatu | mṛtyuñjayastribījātmā āyū rakṣatu me sadā || 4 || vaṭamūlasamāsīno dakṣiṇāmūrtiravyayaḥ | sadā māṃ sarvataḥ pātu ṣaṭtriṃśadvarṇarūpadhṛk || 5 || dvāviṃśārṇātmako rudraḥ kukṣau me parirakṣatu | trivarṇātmā nīlakaṇṭhaḥ kaṇṭhaṃ rakṣatu sarvadā || 6 || cintāmaṇirbījarūpe sarvanārīśvaro haraḥ | sadā rakṣatu me guhyaṃ sarvasampatpradāyakaḥ || 7 || ekākṣarasvarūpātmā kūṭarūpī maheśvaraḥ | mārtaṇḍabhairavo nityaṃ pādau me parirakṣatu || 8 || omityākhyo mahābījasvarūpastripurāntakaḥ | sadā māṃ raṇabhūmau tu rakṣatu tridaśādhipaḥ || 9 || ūrddhvamūrddhānamīśāno mama rakṣatu sarvadā | dakṣiṇasyāṃ tatpuruṣo avyānme girināyakaḥ || 10 || aghorākhyo mahādevaḥ pūrvasyāṃ parirakṣatu | vāmadevaḥ paścimasyāṃ sadā me parirakṣatu | uttarasyāṃ sadā pātu sadyojātaḥ svarūpadhṛk || 11 || ittha rakṣākaraṃ devi! kavacaṃ devadurlabham | prātaḥkāle paṭhedyastu so'bhīṣṭaphalamāpnuyāt || 12 || pūjākāle paṭhedyastu sādhako dakṣiṇe bhuje | devā manuṣyā gandharvā vaśyāstasya na saṃśayaḥ || 13 || kavacaṃ yastu śirasi dhārayedyadi mānavaḥ | karasthāstasya deveśi aṇimādyaṣṭasiddhayaḥ || 14 || svarṇapatre tvimāṃ vidyāṃ śuklapaṭṭena veṣṭitām | rājatodarasaṃviṣṭāṃ kṛtvā ca dhārayetsudhīḥ || 15 || saṃprāpya mahatīṃ lakṣmīmantraṃ ca śivarūpadhṛk | yasmai kasmai na dātavyaṃ na prakāśyaṃ kadācana || 16 || śiṣyāya bhaktiyuktāya sādhakāya prakāśayet | anyathā siddhihāniḥ syāt satyametanmanorame || 17 || tava snehānmahādevi! kathitaṃ kavacaṃ śubham | na deyaṃ kasyacidbhadre yadīcchedātmano hitam || 18 || yo'rcayed gandhapuṣpādyaiḥ kavacaṃ manmukhoditam | tenārcitā mahādevi! sarve devā na saṃśayaḥ || 19 || iti kriyoḍḍīśe mahātantrarāje devīśvarasaṃvāde pañcadaśaḥ paṭalaḥ || 15 || atha ṣoḍaśaḥ paṭalaḥ tryambakamṛtyuñjayamantraḥ śrīdevyuvāca idānīṃ śrotumicchāmi pūrvamuktaṃ ca tryambakam | prabhede kathitaṃ deva śāntiṃ mṛtasañjīvanīm || 1 || īśvara uvāca śṛṇu devi! pravakṣyāmi yanmāṃ tvaṃ paripṛcchasi | mātṝṇāṃ tisṛṇāmamba garbhajāto yato haraḥ || 2 || atastryambaka ityuktaṃ mama nāma maheśvari | vaśiṣṭho'sya ṛṣiḥ proktaśchando'nuṣṭubudāhṛtaḥ || 3 || devatā'sya samuddiśyastrambakaḥ pārvatīpatiḥ | vibhaktairmantravarṇaiśca ṣaḍaṅgānāṃ ca kalpanām || 4 || tataśca vahnibījena samantājjaladhārayā | prācīraṃ cintanaṃ kuryāttataḥ saṅkalpamācaret || 5 || punaḥ saṃkalpya deveśi! bhūtaśaddhyādikaṃ ca yat | tataḥ paścāt karanyāsaṃ kuryācca mama sundari || 6 || tryambakaṃ aṅguṣṭhābhyāṃ namaḥ | yajāmahe tarjjanībhyāṃ svāhā | sagandhiṃ puṣṭivardhanaṃ madhyāmābhyāṃ vauṣaṭ | ūrvārukamika bandhanādanāmikābhyāṃ hum | mṛtyormukṣīya kaniṣṭhābhyāṃ vauṣaṭ | māmṛtāt karatalakarapṛṣṭhābhyāṃ phaṭ | evaṃ hṛdayādiṣu | tato dvāviṃśanmantravarṇānnyaset pūrvapaścimayāmyottareṣu vaktreṣu 4 | urogalorddhvāsye 3 | punarnābhihṛtpṛṣṭhakukṣiṣu 4 | liṃgapāyūrumūlānte 6 | jānuyugme 2 | gulphayoryugme 2 | stanayoḥ 2 | pārśvayoḥ 2 | pādayoḥ 2 | pāṇyoḥ 2 | nāsikayoḥ 2 | śīrṣe 1 | mantravarṇānnyasetkramāt punastataḥ pādādyekādaśasthāneṣu nyaset | śiro 1 bhrūyugalā 1 kṣiṣu 1 vaktre 1 gaṇḍayuge 1 bhujayoḥ 2 hṛdaye 1 jaṭhare 1 punaḥ guhyo 1 ru 1 jānu 1 pādeṣu 1 nyāsamevaṃ samācaret | tata uktadhyānena dhyātvā mānasopacāraiḥ sampūjya viśeṣārghyaṃ saṃsthāpya śaivoktapūjāvāhanādikaṃ pañcapuṣpāñjalīndattvā varuṇaṃ pūjayet | tryambakaṃ hṛdayāya namaḥ | ityādi ṣaḍaṅgāni pūjayet | tato'ṣṭapatreṣu oṃ arkāya namaḥ | evamindave vasudhāyai jalāya vahnaye vāyave vyomne yajamānāya tadbāhye pūrvāditaḥ oṃ rāmāya namaḥ oṃ rākāyai namaḥ oṃ prabhāyai namaḥ | oṃ jyotsnāyai namaḥ | oṃ pūrṇāyai namaḥ | oṃ uṣase namaḥ | oṃ pūṣāyai namaḥ | oṃ svadhāyai namaḥ | oṃ viśvāyai namaḥ | oṃ vidyāyai namaḥ | oṃ sitāyai namaḥ | oṃ kṛtyai namaḥ | oṃ śraddhāyai namaḥ | oṃ sarāyai namaḥ | oṃ sandhyāyai namaḥ | oṃ divāyai namaḥ | oṃ niśāyai namaḥ | tadbāhye oṃ āryāyai namaḥ | oṃ ārdrāyai namaḥ | oṃ prajñāyai namaḥ | oṃ medhāyai namaḥ | oṃ kāntyai namaḥ | oṃ śāntyai namaḥ | oṃ puṣṭyai namaḥ | oṃ buddhyai namaḥ | oṃ dhṛtyai namaḥ | oṃ matyai namaḥ | tato dhūpādivisarjanāntaṃ karma samāpayet | prayogastu śanaiścare kuje vā aśvatthamūlaṃ spṛṣṭvā sahasraṃ japet | puraścaraṇavidhānena sarvaṃ kuryānmaheśvari | sākṣānmṛtyorvimucyeta kimanyāḥ kṣudrikāḥ kriyāḥ || 7 || pratyahaṃ juhuyānmantrī catuḥsthaṇḍilavidhānataḥ | dvisahasraṃ dūrvāvaṭajavābhi karavīrakaiḥ || 8 || bilvapatraṃ palāśañca tathā kṛṣṇāparājitā | vaṭavṛkṣasya samidhaṃ juhuyādayutāvadhiḥ || 9 || dhanadhānyasamṛddhiḥ syātsatyaṃ satyaṃ maheśvari! || 10 || mṛtasañjīvinī vidyā ataḥ paraṃ devi! śṛṇu mṛtasañjīvinīṃ tathā | ādau prāsādabījaṃ tadanu mṛtiharaṃ tārakaṃ vyāhṛtiṃ ca | proccārya tryambakaṃ yo japati ca satataṃ saṃpuṭaṃ cānulomam || 11 || tryambakamiti mṛtyuñjayamantrasya japātsarvasiddhirbhavati | etanmantraṃ japedāśu vyādhimukto bhaveddhruvam || 12 || hauṃ - oṃ jūṃ saḥ - oṃ - bhūrbhuvaḥ svaḥ | dhyānaṃ śṛṇu mahādevi- svacchaṃ svacchāravindaṃ sthitamubhayakare saṃsthitau pūrṇakumbhau pāṇyorhelākṣamāle nijakarakamale dvau ghaṭau nityapūrṇau | dvābhyāṃ tau ca sravantau śirasi śaśikalā cāmṛtaiḥ plāvayantī dehaṃ devo dadhāno vidiśatu viśadā kalpajālāṃ śriyaṃ naḥ || 13 || evaṃ dhyātvā tryambakāya mahārudrāya namaḥ | mahāghoraṃ yadi tadā pūjayetparameśvaram || 14 || tataḥ surasundarītyādi yoginīsādhanam | tato bhūtinīsādhanam | bhūtinīsādhanam śrīdevyuvāca yoginīsādhanaṃ jñātaṃ bhūtinīsādhanottamam | tadvadasva mahādeva! kṛpāsti yadi māṃ prati || 15 || śrīśvara uvāca ādyā vibhūṣiṇī devī parākuṇḍaladhāriṇī | hāriṇī siṃhinī caiva haṃsinī ca tato naṭī || 16 || kāmeśvarī tathā proktā ratidevī tataḥ priyā | ityaṣṭau nāyikāḥ proktāḥ sādhakānāṃ sukhāvahāḥ || 17 || ādyāvibhūṣiṇīsādhanam yathāmantraṃ maheśāni ādyā vibhūṣiṇī tathā | maṃtraḥ hūṁ phaṭ phaṭ hrīṃ bhūtinīṃ hūṃ hūṃ hūṃ | krodhāstradvayaṃ māyānte bhūtinīṃ ca trikūrcataḥ || 18 || athavā- śṛṇu deveśi oṃ hrīṃ hrīṃ phaṭ phaṭ vibhūṣiṇī hūṃ hūṃ hūṃ | tāraṃ lajjādvayāstradvayaṃ vibhūṣiṇīkrodhadvayam | dhyānam dakṣe karttarikāṃ pare'silatikāṃ hastābjake vibhratīṃ hyuttuṅgastanaśobhivakṣasi calairhārādibhiḥ śobhitā | dantāntargatamāṃsaśoṇitavasāsiktāsti yasyāstanuḥ kālaśyāmalavarṇikārmregabhujaṃgairveṣṭitā rakṣatu || 19 || sthānaṃ vṛkṣatale tatra yāminyāṃ divasatrayam | japedaṣṭasahasraṃ tu dhyāyedekāgramānasaḥ || 20 || japānte ca mahāpūjā punardhūpaṃ nivedayet | candanodakamiśreṇa dattvārghyaṃ tuṣyati dhruvam || 21 || mātā vā bhaginī bhāryā hṛṣṭā bhavati kāmitā | karāmalakatāṃ kṛtvā mātā bhūtvā jagattrayam || 22 || śatāṣṭaparivārasya dadātyañjanabhūṣaṇam | bhaginī cenmahābhāgā sahasrayojanādapi || 23 || dadāti striyamānīya divyaṃ rasaṃ rasāyanam | bhāryā cetpṛṣṭhamāropya svargaṃ prayāti nityaśaḥ || 24 || dīnārāṇāṃ sahasrantu rasaṃ caiva rasāyanam | sarvāśāṃ pūrayatyeva sadā devī vibhūṣiṇī || 25 || parākuṇḍalinīsādhanam parākuṇḍalinīdhyānaṃ śṛṇu devi! maheśvari! | karṇe kuṇḍaladhāriṇī śaśimukhī līlāvatī sasmitā śailaśroṇivilambikāñcivitatā vyāmugdhalokatrayā | muktāhāramarīcikāntivilasatprottuṅgakumbhastanī pāyātkuṇḍaladhāriṇī trijagatāmānandasandohabhūḥ || 26 || śmaśāne pūjayedetāmayutaṃ japamācaret | āyāti tatkṣaṇāddevī tataḥ kuṇḍaladhāriṇī || 27 || sādhakenāpi raktārghyaṃ deyaṃ tuṣṭā vadatyapi | kiṃ karttavyaṃ mayā vatsa mātaruktveti sādhakaḥ || 28 || pañcāśatañca dīnārāndehi trailokyadāyini | sindūrahāriṇīsādhanam ataḥ parantu cārvaṅgi! sindūrahāriṇīmanuḥ || 29 || krodhadvayendusaṃyuktaḥ sindūrahāriṇīpadam | kūrcabījatrayaṃ cāstraṃ samproktaṃ vividhaṃ tathā || 30 || dhyānam sindūrākṛtihāriṇī caladalavyālolaśākhāsvarā sotkaṇṭhīkṛtagātrayaṣṭiśubhagā śubhrāṃśucandrasmitā | antaḥ santatadantakāntimalinā trailokyaśobhākarī pāyādunnatabāhuyugmalatikā sindūrahāriṇyasau || 31 || śūnye devālaye gatvā nirjane niśi sādhakaḥ | tattvasaṃkhyādinaṃ yāvajjapastattvasahasrakaḥ || 32 || tadante mahatīṃ pūjāṃ vastrālaṅkārabhūṣaṇaiḥ | kuryātsādhakavaryastu bhāryā bhavati kāmitā || 33 || varaṃ varaya śīghraṃ tvaṃ proktā sindūrahāriṇī | rakṣati dvādaśadinaṃ devi sindūrahāriṇī || 34 || siṃhinīsādhanam ataḥ paraṃ devi! śṛṇu siṃhinyāśca mahāmanum | māyādvayaṃ krodhadvayaṃ siṃhinīti padantataḥ || 35 || punaḥ krodhaṃ tadante ca siṃhinī ca mahāmanuḥ | hrīṃ hrīṃ phaṭ phaṭ siṃhinī hūṃ hūṃ phaṭ || 36 || śailāgre nirjane vāpi siṃhinyāḥ pūjanaṃ tathā || 37 || dhyānam śailāgrakramadurgamantu aṭavīdurgāstu daityāhate keśāgrasthasamastaviṣṇucaraṇaṃ prabhraṣṭasaṃsiṃhinī | yāvanto baladaṇḍavāraṇabalāt prakṣu kvasiddhāṅganā śeṣaṃ pātu samastamantakakulavyākalpamānā kalā || 38 || śailāgra-druma-durga-danturadarī-durgānta-daityasthitā keśasrasta-samasta-viśvacaraṇā prabhraṣṭa-candrāsanī | yāvattāravidanta-dhāraṇa-vana-prakṣubdha-siddhāṅganā seyaṃ pātu samastamastakakulavyālambimālākulā || gatvaikaliṅgaṃ yāminyāṃ prajapedayutaṃ manum | tato hṛṣṭātivaradā siṃhinī ceti pūjitā || 39 || kiṃ karomi vadatyeva bhāryā bhavati kāmitā | dināvasāne yāminyāṃ siṃhinyāyāti rāti ca | vastrayugmaṃ rasamayaṃ sādhakāya dine dine || 40 || haṃsinīsādhanam ataḥ paraṃ śṛṇu cārvaṅgi haṃsinīsādhanakramam | oṃ hūṃ hūṃ hūṃ phaṭ haṃsinī | praṇavañca trikūrcāstrahaṃsinīkathito manuḥ || 41 || dhyānam śubhrā śubhrasarojatulyanayanā sāyugmabāṇānvitā śuśrūṣā kulamugdhasādhyavanitā saṃsevitā sādaram | kiñcittiryagapāṅgalolavalitavyāmugdhasmerānanā divyā kāñcanaratnahāralalitā śrīhaṃsinī pātu naḥ || 42 || vajrapāṇirgṛhaṃ gatvā pratimāṃ śobhanāṃ likhet | avadhānena sampūjya japedayutasaṃkhyakam || 43 || yāvadardhaniśā devī haṃsinyāyāti niścitam | candanārghyapradānena dṛṣṭā bhavati haṃsinī || 44 || kiṃ mayā te prakarttavyaṃ śīghraṃ tadvada sādhaka! | vastrālaṅkārabhojyāni divyārthaṃ samprayacchati || 45 || avaśeṣavyayābhāvānna dadāti prakupyati || 46 || naṭīsādhanam itaḥ paraṃ mahāmāye śṛṇu me naṭīsādhanam | oṃ hūṁ hūṁ phaṭ phaṭ naṭī hūṁ hūṁ hūṁ || 47 || tāraṃ kūrcakrodhāstradvayato naṭīti padamuddharet | kūrcatrayantu mantro'yaṃ kathito nartakīmanuḥ || 48 || dhyānam phullendīvarasundarodaramukhī prottuṅgakumbhastanī dyotantī mṛgamīnayugmanayanā sānandamandasmitā | kṣīrāmbhonidhisambhavā vilasitā bhaktārisaṃnāśinī vīṇāgītaviśālinī bhagavatī vyāhāravākcāturī || 49 || nīcapāśaṃ gamaṃ gatvā saptāhajapapūjane | naṭī susiddhā bhavati dhūpaṃ dadyānmuhurmuhaḥ || 50 || candanenārghyaṃ deyantu naivedyañca manoharam | sadā kāmabhogadātrī bhāryā bhavati nartakī || 51 || suvarṇaphalamekantu vyayaṃ tyaktvānugcchati | dine dine naṭī devī sthāyinī bhavati dhruvam || 52 || ceṭīsādhanam ataḥ paraṃ mahādevi ceṭyā ākarṣaṇaṃ śṛṇu || 53 || mantro yathā tāraṃ kūrcadvayānte ca astrayugmaṃ tataḥ param | ceṭī krodhadvayañcoktaṃ ceṭī mantrottamottamaḥ || 54 || oṃ hūṃ hūṃ phaṭ phaṭ ceṭī hūṃ hūṃ dhyānam devyeṣā'mṛtabhāṣiṇī śaśimukhī bhraṣṭottarīyādharā bibhrāṇā kalaśaṃ sarojamamalaṃ svarṇaṃ ca sīmantake | śrīkhaṇḍādivilepanāmalavapuḥ saurabhyasambhāvitā kiñciddharmasamāhitāpikaravā pāyātprabhā ceṭikā || 55 || atrāpi bhīṣaṇasthāne nāmoccāraṇamātrataḥ | dhruvaṃ ceṭī samāgatya ceṭīkarma karotyapi || 56 || athavā svagṛhadvāre tryahaṃ rātrau japaṃ caret | āgatya niyataṃ devī ceṭīkarma karoti ca || 57 || kāmeśvarīsādhanam kāmeśvarīprayogaḥ tāraṃ kūrcāstrayugmaṃ kāmeśvarī bhūtinī tataḥ | paraṃ ṅentaṃ krodhatrayaṃ kāmeśvaryā manuḥ smṛtaḥ || 58 || dhyānam oṃ tālaskandhasamāgatā madhuratā kāmantu puṣpānvitā gāyatrī madhurādharā smitamukhī vīṇāyutā gāyatī | raktāmbhojavilocanā madhumadairyuktā samantādiyaṃ pāyāt puṣpadhanurdharā madhumukhī kāmeśvarī bhūtinī || 59 || tatra sthānaṃ samāgatya kṛtvā māṃsasya bhakṣaṇam | māṃsādinā baliṃ dattvā sahasraṃ japamācaret || 60 || manumarkaṃ sahasrantu japitvā siddhimāpnuyāt | japanniśīthamāyāti raktenārghyaṃ nivedayet || 61 || kāmeśvarī bhavettuṣṭā bhāryā bhavati kāmitā | sarvāśāṃ pūrayatyeva rājyaṃ yacchati niścitam || 62 || kumārīsādhanam hūṃ hūṃ phaṭ phaṭ devyai hūṃ hūṃ hūṃ | krodhadvayāstrayugmaṃ ca devīti padamuddharet ṅe'ntaṃ krodhatrayaṃ guptaṃ kumārīmantramuttamam || 63 || dhyānam divyakārmukahemābhā kumārī divyarūpiṇī | sarvālaṅkārasaṃyuktā bhāryā bhavati sādhitā || 64 || rātrau devagṛhaṃ gatvā tatra śayyāṃ prakalpayet | sitavastraṃ candanaṃ ca jyotiḥpuṣpaṃ pradāpayet || 65 || dhūpaṃ tu guggulaṃ dattvāṣṭasahasraṃ japenmanum | japānte nityamāyāti cumbanāliṅganādibhiḥ || 66 || kāmitā jāyate bhāryā satyaṃ devī kumārikā | dadātyaṣṭau ca dīnārāndivyavastrayugaṃ tathā || 67 || kāmikaṃ bhojanaṃ divyaṃ parivārasya dāsyati | anyāśramagṛhāddravyamānīyāśu prayacchati || 68 || nityaṃ sahasraṃ japtvā tu sā cāyāti kumārikā | satyaṃ satyaṃ punaḥ satyaṃ śṛṇu me prāṇavallabhe || 69 || muhurmuhurjapanmantraṃ krodhasya mantramuttamam | krodhādhipaṃ vyomavaktraṃ vajrapāṇiṃ surāntakam || 70 || etanmantramavijñāya yo japetsiddhikāṃkṣayā | tasya syānniṣphalaṃ karma ante narakamāpnuyāt | kalikalpatarorvallī bhūtinī siddhirucyate || 71 || sundarīsādhanam sādhanakramaḥ ataḥ śṛṇu paraṃ devi sundarīsiddhisādhanam | sundaryādiprabhedena pratyekaṃ pūjayecchive || 72 || prātarutthāya susnāte nityakarma samācaret | tataḥ prāsādamāruhya pūjāsthānaṃ suśobhanam || 73 || bilvamūle śmaśāne vā prāntare ca catuṣpathe | tatrasthaḥ sādhayedyogī yoginyādi ca bhūtinīm || 74 || ajināsanagaḥ śuddhastilakaṃ mūrdhni kārayet | tato vidhivadācamya sūryārghyaṃ pradadettataḥ || 75 || svastivācanikaṃ kṛtvā śāntipāṭhaṃ punaḥ punaḥ | gaṇeśaṃ baṭukañcaiva pūjayedyantrakopari || 76 || tataścodaṅmukho bhūtvā saṃkalpaṃ tatra kārayet | gaṇeśaṃ krodhabhairavaṃ ca pūjayetparameśvari || 77 || mūlamantreṇa prāṇāyāmaṃ ṣaḍaṅganyāsamācaret | pūrvavacca punardhyātvā mānasaiḥ pūjayettataḥ || 78 || kṛtvārghyaṃ sthāpanaṃ tatra paṭṭamaṣṭadalaṃ likhet | tanmadhye ca vinirmāya candanena vilepanam || 79 || lajjābījaṃ likhettatra punardhyātvā prapūjayet | niśāyāṃ pūjayedvīraṃ divase pūjayetpaśum || 80 || mūlamantraṃ mahādeva māsaṃ vyāpya japet sudhīḥ | arddharātre tataḥ pūjāṃ baliṃ kṛtvā vidhānataḥ | nirbhayaḥ sañjapenmantraṃ hṛdgataṃ ca nivedayet || 81 || yakṣasādhanam ataḥ paraṃ mahādevi! yakṣasādhanamuttamam | yakṣamantraḥ gagano grahaṇaścaiva yuktacandrārddhaśekharaḥ || 82 || ekākṣaramahāmantro sādhakairjapyate yadi | saṃkhyayāṣṭasahasrāśca sarvasiddhipradāyakaḥ || 83 || śrīdevyuvāca bhīmavaktrādiyakṣāṇāṃ mahāmantrāḥ śrutā mayā | candraśekhara taddhyānaṃ saṃkṣepeṇa vada prabho || 84 || yakṣāṇāṃ dhyānāni bhīmavaktradhyānam pratyālīḍhapadaṃ kṛṣṇaṃ kharvakarburamūrdhajam | dvibhujaṃ dakṣiṇe kartrī vāme kharparadhāriṇīm | vyāghracarmāmbaradharaṃ trinetrāṃ bhīṣaṇānanām || 85 || mahāvaktradhyānam dhyāyeddevaṃ mahāvaktramagnivarṇaṃ trinetrakam | dvibhujaṃ dakṣiṇe khaḍgaṃ kheṭakaṃ vāmahastakam || 86 || kṛṣṇakeśantu kuṭilaṃ vikṛtāsyaṃ bhayānakam | sādhakāya prayacchantamabhayaṃ varameva ca || 87 || siṃhavaktradhyānam dhyāyeddevaṃ siṃhavaktraṃ jaṭābhārasamanvitam | vikṛtāsyaṃ dvijihvaṃ ca caturnetraṃ dvikarṇakam || 88 || dvibhujaṃ ca gadāpāṇiṃ vāme cā'bhayasaṃyutam || 89 || hayānanadhyānam śveto hayānanaḥ sarvo dvibhujo'tibhayānakaḥ | dakṣe ḍamarukaṃ dhatte vāme caiva triśūlakam || 90 || mahāvīradhyānam dhyāyeddevaṃ mahāvīraṃ dvikarṇantu trinetrakam | dvibhujaṃ hāsyavadanaṃ varā'bhayavidhārakam || 91 || iti kriyoḍḍīśe mahātantrarāje gaurīśvarasaṃvādeṣoḍaśaḥ paṭalaḥ || 16 || atha saptadaśaḥ paṭalaḥ mṛtyuñjayavidhānam śrīdevyuvāca prāṇanātha kṛpāsindho brūhi śāstraviśārada | mṛtyuñjayasya pūjāyāḥ kiṃ phalaṃ kiṃ vidhānakam || 1 || śrīśiva uvāca vaktuṃ nāhaṃ kṣamo gauri tvayi snehātprakāśitam | mṛtyuñjayavidhānaṃ tu na vaktavyaṃ bahirmukhe || 2 || mukhe tu devi! vaktavyaṃ yatnataḥ prāṇavallabhe | mṛtyuñjayo mahādevaḥ sākṣānmṛtyuharaḥ paraḥ || 3 || vidhānaṃ tasya saṃkṣepādvaktavyaṃ śṛṇu sundarī | deveśi rogaśāntyarthaṃ tasya pūjāvidhiryathā || 4 || mṛtyuñjayaṃ samāpūjya liṅgaṃ tribhuvaneśvaram | rogārto mucyate rogādbaddho mucyeta bandhanāt || 5 || yastu sampūjayedbhaktyā liṅgaṃ mṛtyuñjayādhidham | yamo'pi praṇamedbhaktyā kiṃ kariṣyati pāmaraḥ || 6 || tasya pūjāvidhiṃ vakṣye śṛṇu matprāṇavallabhe | jātibhedairmṛttikāṃ tu gṛhītvā'śītitolakām || 7 || nirmāya pārthivaṃ liṅgaṃ kāntyādhāre niveśayet | paurāṇikena mantreṇa kuryācca paṭhanaṃ budhaḥ || 8 || snāpayet pañcagavyena pratyekasyāṣṭatolakam | svasvamantraiśca pratyekadravyeṇa snāpayet sudhīḥ || 9 || rogakṣayecchayā vidvānnāmagotrādipūrvakam | upaviśyāsane vipro dhṛtvā dhautaṃ ca vāsasam || 10 || rudrākṣamālāṃ kaṇṭhe vai dhṛtvā bhasmatripuṇḍrakam | upacārāḥ ṣoḍaśaṃ tu deyā bhaktyā prayatnataḥ || 11 || suvarṇasyāsanaṃ deyaṃ tathaivābharaṇāni ca | vastrayugmaṃ pradadyāttu paridheyaṃ yathā bhavet || 12 || śivayantram ṣaṭkoṇamaṇḍalaṃ kṛtvā tadante sādhyanāmakam | prāsādabījaṃ hauṃ saṃlikhya yataḥ ṣaṭkoṇeṣu praṇavasahitapañcākṣaravarṇānaṣaḍaṅgamantrāṃśca vilikhya tadbahiḥ pañcadalāni viracya taddale oṃ īśānāya namaḥ | oṃ tatpuruṣāya namaḥ | oṃ aghorāya namaḥ | oṃ sadyojātāya namaḥ | oṃ vāmadevāya namaḥ | iti pañcamantrān prāgādikrameṇa likhet | tadbahiraṣṭadalāni racayitvā taddaleṣu mātṛkāvarṇān likhet | tadbahirvṛttaṃ tryambakeṇa veṣṭayet | etadyantraṃ japahomādinā sampūjya dhārayet | āyurārogyaiśvaryādisiddhirbhavati | mṛtyuñjayayantram athavā śṛṇu deveśi yantraṃ sarvasusiddhidam || 13 || madhye sādhyākṣarāḍhyaṃ dhruvamabhivilikhenmadhyamaṃ digdaleṣu koṇeṣvantaṃ manostat kṣitibhuvanamayo dikṣu candraṃ vidikṣu | ḍhāntaṃ yantraṃ taduktaṃ sakalabhayaharaṃ kṣveḍabhūtāpamṛtyu- vyādhivyāmohaduḥkhapraśamanamuditaṃ śrīpadaṃ kīrtidāyi || 14 || madhuparkaṃ kāṃsyapātre dadyādbhojanayugmakam | bilvapatrasahasrantu hyabhagnaṃ vinivedayet || 15 || evaṃ saṃpūjya liṅgaikaṃ dvisahasraṃ manuṃ japet | samidbhistu guḍūcyāstu tatra homaṃ samācaret || 16 || dakṣiṇāṃ brāhmaṇe devi suvarṇaṃ vastrakaṃ tathā | tadardhaṃ vā tadardhaṃ vā yathāvibhavamānataḥ || 17 || aṃgahīnā na karttavyā pūjā cāphaladā yataḥ | ekaliṅgaṃ samārādhya phalaṃ syādanyake yuge || 18 || tatphalaṃ labhate devi kalau saṃkhyā caturguṇā | āmrapātre tu saṃsthāpya jalaṃ cāśītitolakam || 19 || tajjalenaiva deveśi kulaiḥ sammārjya rogiṇam | kṣipeddīpaśikhāyāṃ ca mantramuccārya mānakam || 20 || evaṃ vidhividhānena pūjayenmama liṅgakam | yādṛgyādṛg bhavedrogo nāśameti mayoditam || 21 || sāṅgena pūjayitvā tu labhate vāñchitaṃ phalam | aṅgavyatikrameṇaiva vṛthā bhavati vāsanā || 22 || rogī pramucyate sadyo bhogīvojjhitakañcukaḥ | yadi madvacane bhaktistadā mukto bhaveddhruvam || 23 || anyathā yadi deveśi sarvaṃ bhavati niṣphalam || 24 || yantrapūjāvidhānam ataḥ paraṃ devi! śṛṇu yantrapūjāvidhānakam | kṛtanityakriyo devi! svastivācanapūrvakam | saṃkalpaṃ ca tataḥ kuryādvidhivākyānusārataḥ || 25 || adyetyādi amukagotraḥ śrīpūrvakadevaśarmā yantrādhiṣṭhita | devatāyāḥ pūjārthamamukamantrasaṃskāramahaṃ kariṣye | iti saṃkalpya mahādevi! gurorarcanamācaret | pañcagavyaṃ tataḥ kṛtvā śivamantreṇa mantritam || 26 || tatra cakraṃ kṣipenmantrī praṇavena samākulam | taduddhṛtya tataścakaṃ sthāpayetsvarṇapātrake || 27 || pañcāmṛtena dugdhena kastūrīkuṅkumena ca | payodadhighṛtakṣaudraśarkarādyauranukramāt || 28 || toyadhūpāntaraiḥ kuryāt pañcāmṛtamanuttamam | aṣṭābhiḥ kalaśairdevīmaṣṭābhirvāripūritaiḥ || 29 || kaṣāyajalasampannaiḥ kārayet snānamuttamam | snānaṃ samāpya tāṃ devīṃ sthāpayet svarṇapīṭhake || 30 || gāyatrī yathā- yantrarājāya vidmahe mahāmantrāya dhīmahi tanno yantraḥ pracodayāt | spṛṣṭvā yantraṃ kuśāgreṇa gāyatryā cābhimantrayet | aṣṭottaraśataṃ devi devatābhāvasiddhaye || 31 || ātmaśuddhiṃ tataḥ kṛtvā ṣaḍaṅgairdevatāṃ yajet | tatrāvāhya mahādevi! jīvanyāsañca kārayet || 32 || prāṇapratiṣṭhā asya prāṇapratiṣṭhāmantrasya brahmaviṣṇumaheśvarā ṛṣayaḥ | ṛgyajuḥ sāmāni cchandāṃsi caitanyaṃ devatā prāṇapratiṣṭhāyāṃ viniyogaḥ | upacāraiḥ ṣoḍaśabhirmahāmudrādibhistathā | phalatāmbūlanaivedyaiḥ śivaṃ tatra samarcayet || 33 || paṭṭasūtrādikaṃ dadyādvastrālaṅkārameva ca | aguruṃ cāmaraṃ ghaṇṭāṃ yathāyogyaṃ maheśvari || 34 || sarvametatprayatnena dadyādātmahite rataḥ | tato japetsahasrantu sakalepsitasiddhaye || 35 || japasamāpanaṃ kuryādaṣṭāṅgena namaskṛtam | aṣṭottaraśataṃ hutvā sampātājyaṃ vinikṣipet || 36 || homakarmaṇyaśaktaśceddviguṇaṃ japamācaret | gurave dakṣiṇāṃ dadyāttato devīṃ visarjayet || 37 || asya prayogaḥ kṛtanityakriyaḥ svastivācanapūrvakaṃ saṅkalpaṃ kuryāt | adyetyādi amukagortraḥ śrī amukadevaśarmā amukadevatāpūjārthamamukayantrasaṃskāramahaṃ kariṣye | tataḥ pañcagavyamānīya hauṃ iti mantreṇāṣṭottaraśatamabhimantrya praṇavena yantraṃ tatra kṣipet | tata utthāpya snāpayecchītalajalacandanagandhakastūrī kuṅkumaiḥ | snāpayitvā pañcagavyamānīya hauṃ iti mantreṇāṣṭottaraśatamabhimantrya praṇavena śodhayitvā snāpayet | tatra kramaḥ | prathamaṃ kṣīreṇa snāpayitvā dhūpaṃ dadyāt | evaṃ dadhnā ghṛtena madhunā śarkarayā ca | tato'ṣṭābhiḥ kalaśaiḥ snāpayet | kuṅkumagorocanayā candanamiśritaistoyaiḥ snāpayet | sarvatra snānaṃ mūlamantreṇa tato yantramuttolya kuśāgreṇa tatspṛṣṭvā gāyatryaṣṭottaraśatābhimantritaṃ kṛtvā prāṇapratiṣṭhāṃ kuryāt | asya prāṇapratiṣṭhamantrasya brahmaviṣṇumaheśvarā ṛṣayaḥ ṛgyajuḥ sāmāni cchandāṃsi caitanyaṃ devatā prāṇapratiṣṭhāyāṃ viniyogaḥ | tadyathā- āṃ hrīṃ krauṃ yaṃ raṃ laṃ vaṃ śaṃ ṣaṃ saṃ hauṃ haṃsaḥ | amukadevatāyāḥ prāṇā iha prāṇāḥ | jīva iha sthitaḥ | sarvendriyāṇi vāṅmana ityādi prāṇān pratiṣṭhāpya tatra prakṛtidevatāmāvāhya ṣoḍaśopacāraiḥ pañcopacārairvā pūjayet | tatra paṭṭasūtrādikaṃ dattvā aṣṭottaraśataṃ sahasraṃ vā japitvā śaktaścedbaliṃ dadyāt | tato'ṣṭottaraśataṃ homaṃ kuryāt | homābhāve dviguṇo japaḥ kāryaḥ | tato dakṣiṇāṃ dattvā chidrāvadhāraṇaṃ kuryāt | iti kriyoḍḍīśe mahātantrarāje devīśvarasaṃvāde saptadaśaḥ paṭalaḥ || 17 || athāṣṭādaśaḥ paṭalaḥ tatrādau ṣaṭkoṇamaṇḍalaṃ kṛtvā tadante sādhyanāmayuktaṃ prāsādabījaṃ vilikhya ṣaṭkoṇeṣu praṇavasahitapañcākṣaravarṇān vilikhya vivareṣu ṣaḍaṅgamantrāt tadbahiḥ pañcadalāni viracya taddaleṣu oṃ vāmadevāya namaḥ oṃ īśānāya namaḥ oṃ tatpuruṣāya namaḥ oṃ aghorāya namaḥ oṃ sadyojātāya namaḥ iti pañca mantrān prāgādikrameṇa likhet | tadbahiraṣṭadalāni racayitvā taddaleṣu mātṛkāvarṇān likhet | tadbahirvṛttaṃ tryambakena veṣṭayet | tadyantre japahomādiḥ kāryaḥ | mṛtyuñjayamantram madhye sādhyākṣarāḍhyaṃ dhruvamabhivilikhenmadhyamaṃ digdaleṣu koṇeṣvantaṃ manastakṣitibhuvanamatho dikṣu candraṃ vidikṣu | ḍhāntaṃ yantraṃ taduktaṃ sakalabhayaharaṃ kṣveḍabhūtāpamṛtyuḥ vyādhivyāmohaduḥkhapraśamanamuditaṃ śrīpradaṃ kīrtidāyi || rogaśāntyarthaṃ tryambakamṛtasañjīvinīvidhānam svacchaṃ svacchāravindasthitamubhayakare saṃsthitau pūrṇakumbhau dvābhyāmeṇākṣamāle nijakarakamale dvau ghaṭau nityapūrṇau | dvābhyāṃ dvau ca sravantau śirasi śaśikalāṃ cāmṛtaiḥ plāvayantaṃ dehaṃ devo dadhānaṃ vidiśatu viśadāṃ kalpajālaiḥ śriyaṃ vaḥ || ādau prāsādabījaṃ tadanu mṛtiharaṃ tārakaṃ vyāhṛtiñca proccārya tryambakaṃ yo japati ca satataṃ saṃpuṭaṃ cānulomam | gāyatryāḥ pūrvapādaṃ tadanu ca śivadaṃ tryambakasyādimaṃ tat proccāryaṃ dhyānapūrvaṃ japati hi manano'tveti mṛtyuṃ dhruvaṃ saḥ || prāsādabījaṃ hauṃ mṛtiharaṃ tryakṣaraṃ mṛtyuñjayamantraṃ oṃ jūṃ saḥ | tārakam | oṃ vyāhṛta bhūrbhuvaḥ svaḥ | tena hauṃ jūṁ saḥ | oṃ bhūrbhuvaḥ svaḥ tatastryambakamantraḥ pūrvamantreṇānulomakrameṇa sampuṭitaḥ asya japāt sarvasiddhirbhavati | punaḥ gāyatryā prathamapādaṃ tryambakasya prathamapādamityādi ca dhyānaṃ pūrvamuktam | iti śrīkriyoḍḍīśe mahātantrarāje devīśvarasaṃvāde'ṣṭādaśaḥ paṭalaḥ || 18 || athaikonaviṃśaḥ paṭalaḥ śrīdevyuvāca bagavan! devadeveśa! devatābhiḥ prapūjitaḥ | sarvaṃ me kathitaṃ deva kavacaṃ na prakāśitam || 1 || mṛtyurakṣākaraṃ deva sarvāśubhavināśanam | kathayasvādya me nātha yadi sneho'sti māṃ prati || 2 || śrīśvara uvāca asya mṛtyuñjayamantrasya vāmadeva ṛṣirgāyatrīcchandaḥ mṛtyuñjayo devatāsādhakābhīṣṭasiddhyarthe jape viniyoga | śiro me sarvadā pātu mṛtyuñjayasadāśivaḥ | satryakṣarasvarūpo me vadanaṃ ca maheśvaraḥ || 3 || pañcākṣarātmā bhagavān bhujau me parirakṣatu | mṛtyuñjayastribījātmā hyāyū rakṣatu me sadā || 4 || bilvavṛkṣasamāsīno dakṣiṇāmūrtiravyayaḥ | sadā me sarvataḥ pātu ṣaṭtriṃśadvarṇarūpadhṛk || 5 || dvāviṃśatyakṣaro rudraḥ kukṣau me parirakṣatu | trivarṇātmā nīlakaṇṭhaḥ kaṇṭhaṃ rakṣatu sarvadā || 6 || cintāmaṇirbījapūre hyarddhanarīśvaro haraḥ | sadā rakṣatu me guhyaṃ sarvasampatpradāyakaḥ || 7 || satryakṣarasvarūpātmā kūṭarūpī maheśvaraḥ | mārtaṇḍabhairavo nityaṃ pādau me parirakṣatu || 8 || oṃ jūṃ saḥ mahābījasvarūpastripurāntakaḥ | ūrddhvamūrddhani ceśāno mama rakṣatu sarvadā || 9 || dakṣiṇasyāṃ mahādevo rakṣenme girināyakaḥ | aghorākhyo mahādevaḥ pūrvasyāṃ parirakṣatu || 10 || vāmadevaḥ paścimasyāṃ sadā me parirakṣatu | uttarasyāṃ sadā pātu sadyojātasvarūpadhṛk || 11 || itthaṃ rakṣākāraṃ devi kavacaṃ devadurlabham | prātarmadhyāhnakāle tu yaḥ paṭhecchivasannidhau || 12 || so'bhīṣṭaphalamāpnoti kavacasya prasādataḥ | kavacaṃ dhārayedyastu sādhako dakṣiṇe bhuje || 13 || sarvasiddhikaraṃ puṇyaṃ sarvāriṣṭavināśanam | yoginībhūtavetālāḥ pretakūṣmāṇḍapannagāḥ || 14 || na tasya hiṃsāṃ kurvanti putravatyā layanti te | paṭhitvā'bhyarcayeddevi yathāvidhipuraḥsaram || 15 || lakṣañca mūlamantrasya puraścaraṇamucyate | taddhāraṇe mahādevi! mṛtyurogavināśanam || 16 || evaṃ yaḥ kurute martyaḥ puṇyāṃ gatimavāpnuyāt | iti jñātaṃ mahādevi! tasya vaktre sthitaṃ sadā || 17 || kavacasya prasādena mṛtyumukto bhavennaraḥ | anyathā siddhihāniḥ syātsatyametanmanorame || 18 || tava snehānmahādevi kathitaṃ kavacaṃ śubham | na deyaṃ kasyacidbhadre yadīcchedātmano hitam || 19 || iti śrīkriyoḍḍīśe mahātantrarāje devīśvarasaṃvāde ekonaviṃśatitamaḥ paṭalaḥ || 19 || atha viṃśatitamaḥ paṭalaḥ yantraprakaraṇam vandhyāyantram ataḥ paraṃ devi! śṛṇu yantradhāraṇamuttamam | yantradhāraṇamātreṇa sarvābhīṣṭaphalaṃ labhet || 1 || janmavandhyā ca yā nārī śubhaputravatī bhavet | tadā gorocanādyena likhedyantramanuttamam || 2 || vṛttadvayaṃ samālikhya padmaṣṭadalaṃ likhet | pratipadme likhenmāyābījaṃ bhūpurakaṃ tataḥ || 3 || bhūrjapatre likhedyantraṃ dhārayettu maheśvari | kukṣau dhṛtvā mahāyantraṃ śubhaputravatī bhavet || 4 || prayogāntaramanyatra prāṇasaṅkaṭato nahi | dakṣiṇāṃ gurave dattvā gṛhṇīyādyantramuttamam || 5 || vṛttaṃ caturdalaṃ padmaṃ bhūpureṇa samanvitam | vṛttamadhye likheddevi sādhakākhyāṃ viśeṣataḥ || 6 || putravatīpadaṃ paścāt bhavatviti padaṃ tataḥ | praṇavaiḥ puṭitā lajjā tridhā patreṣu saṃlikhet || 7 || pūrvavatpūjayeddevi dhārayeddakṣiṇe bhuje | satyaṃ satyaṃ hi deveśi vandhyā putravatī bhavet || 8 || durbhagā cedbhavennārī subhagā māsato bhavet || 9 || rakṣāyantram ataḥ paraṃ pravakṣyāmi mahārakṣākaraṃ param | dhāraṇāddānavapatirmahārakṣākaro bhavet || 10 || pañcadalaṃ likheddevi glauṃ bījenaiva lāñchitam | gaṃ pañcakaṃ sarvamadhye likhitvā dhārayedyadi || 11 || na tasya putrabhītiḥ syāttatra rakṣākaro haraḥ | gorocanākuṅkumābhyāṃ bhūrje saṃlikhya dhārayet || 12 || tatra pūjāṃ mahādevi gaṇapatistu samācaret | pūjitaṃ dhāritañcaiva sarvopadravanāśanam || 13 || vṛttamaṣṭadalaṃ padmaṃ punaḥ padmeṣu saṃlikhet | gorocanābhiḥ saṃlikhya dhārayetparameśvari || 14 || uktarūpeṇa liṅgasya pūjāṃ kṛtvā maheśvari | dhārayedyo bhavettasya hyapamṛtyuvināśanam | 15 || putrajananayantram binduvṛttaṃ samālikhya likhedaṣṭadalaṃ tataḥ | pratipatreṣu yaṃbījaṃ likhedatha pṛthakpṛthak || 16 || pūrvavatpūjayeddevi dhāraṇānmṛtyunāśanam | kākavandhyājanasyāpi bahuputrakaraṃ param || 17 || ṣaṭkoṇaṃ vilikhed vṛttaṃ tataścāṣṭadalaṃ likhet | ṣaṭkoṇeṣu ca ṣaṭ dīrghān vilikhetparameśvari || 18 || aiṃ hrīṃ oṃ aiṃ hrīṃ phaṭ svāhā likhedaṣṭadale tataḥ | sarvamadhye likheddevi tataḥ śṛṇu maheśvari || 19 || praṇavastu tato māyā sādhakākhyaṃ tu ṅe'ntakam | suputrañca samālikhya utpādaya padantataḥ || 20 || vidhāya caivaṃ vidhivaddhārayedyantramuttamam | dhāraṇātsarvasampattirbhaveddevi na saṃśayaḥ || 21 || pūjanaṃ pūrvamuktam | devīṃ kālīmantreṇa pūjayet | vaśīkaraṇam vaśīkaraṇayantrantu śṛṇu matprāṇavallabhe ! yasya dhāraṇamātreṇa vaśīkuryāt punaḥ priye || 22 || caturvṛttaṃ samālikhya likhedaṣṭadalaṃ tataḥ | oṃ śatrumukhaṃ bandhayeti pratipadmadalaṃ likhet || 23 || yasya nāmābhisaṃlikhya bāhau sandhārayecchive | pūrvavatpūjayeddevīṃ japellakṣaṃ vidhānataḥ || 24 || cāmuṇḍoktavidhānena pūjayeddevi sādhakaḥ | hutvā caiva vidhānena sa vaśī bhavati dhruvam || 25 || bandhamuktiyantram prathamantu likhedvṛttaṃ tadbahistu svarāṃllikhet | bahirbubhūdvayaṃ likhya caturdikṣu ca hrīṃ likhet || 26 || vṛttayugmāṣṭapatrañca likhedgorocanādinā | grīvāyāṃ kaṇṭhadeśe vā śikhāyāṃ vāpi dhāraṇāt || 27 || bandhamuktirbhavettasya navame divase tathā | pūrvoktavidhinā lakṣaṃ durgāmantraṃ japedbudhaḥ || 28 || ḍākinyādibhayavināśanayantraṃ jīvavatsāyantrañca vṛttayugmaṃ likhettatra mahābījacatuṣṭayam | catuṣkoṇadvayaṃ bāhye likhitvā dhārayedyadi || 29 || nāśayetkṣaṇamātreṇa ḍākinyādibhavaṃ bhayam | mṛtavatsā yadi bhavennārī duḥkhaparāyaṇā | dhārayet paramaṃ yantraṃ jīvavatsā tato bhavet || 30 || dīrgharekhādvayaṃ dattvā tadgātre'ṣṭadalaṃ likhet | oṃ hrīṃ devadatta hrīṃ rekhāmadhye likhecchive || 31 || rekhāgātradale oṃ hūṁ rekhādyantadale ca oṃ | gorocanākuṃkumena tathaivālaktakena vā || 32 || yasya nāma tu saṃlikhya sthāpayetparameśvari | pañcāmṛteṣu deveśi jīvavatsā bhaveddhi sā || 33 || tatsutasyākālamṛtyurnānyathā jāyate priye | uktarūpe tathā pūjāṃ lakṣamantraṃ japecchive || 34 || iti kriyoḍḍīśe mahātantrarāje devīśvarasaṃvāde viṃśatitamaḥ paṭalaḥ || 20 || athaikaviṃśatitamaḥ paṭalaḥ vijayānupānam dugdhayogena vijayā mahātejaskarī smṛtā | kṣubdodhabalakāritvāccakṣurdoṣāpahāriṇī || 1 || jalayogena sā hanti hyajīrṇādigadānkṣaṇāt | ghṛtena medhājananī vāgdevī vaśakāriṇī || 2 || kaphadoṣānaśeṣāṃstu madhunā saha nāśayet | saindhavena yutā sā hi jaṭharāgniṃ vivarddhayet || 3 || sitayā lavaṇenāpi guḍena saha sevitā | amlapittaṃ tathā śūlaṃ vināśayati tatkṣaṇāt || 4 || phalapuṣṭipradā proktā madhurasvarakāriṇī | kaivalyajñānadā cetthaṃ sarvasiddhipradāyinī || 5 || iti kriyoḍḍīśe mahātantrarāje śivagaurīsaṃvāde ekaviṃśatitamaḥ paṭalaḥ || 29 || || samāpto'yaṃ granthaḥ || ########### END OF FILE #######