####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00402
Uniform title: kulacūḍāmaṇi nigama
Editor : Arthur Avalon
Editor : John Woodroffe

Description: 



Notes: 
Data entered by the staff of Muktabodha under the direction of Mark S. G. Dyczkowski.

Revision 0: April 27, 2017

Publisher : Ganesh and Co.
Publication year : 1915
Publication city : Madras
Publication country : India
####################################################



Kulacūḍāmaṇi ṇigama

Edited by
ārthur āvalon

śivābhyāṃ nama

kulacūḍāmaṇitantram

prathamaḥ paṭalaḥ

śrībhairava uvāca-

asaṃkhyā tripurādevī asaṃkhyātā [asaṃkhyā caiva] ca kālikā |
vāgīśvarī tathāsaṃkhyā tathā ca sukulākulā || 1 ||

mātāṅginī tathā pūrṇā vimalā caṇḍanāyikā |
tripuraikajaṭā durgā yā cānyā kulasundarī || 2 ||

vaiṣṇavaṃ gāṇapatyaṃ ca mahāsauramataṃ tathā |
śaivaṃ śāṃkarajātaṃ ca yatkiṃcid bhūtasaṃbhavam || 3 ||

catuḥṣaṣṭiśca [catuḥṣaṣṭiśca tantrāṇi mātṛṇāmuttamāni ca (1-13) ityataḥ 
paraṃ vāmakeśvaratantre mahāmāyāśambaraṃ ca ityupakramya 
catuḥṣaṣṭitantranāmānyuktāni | tatratyapāṭho'ntarāntara kiṃcidanyathā 
dṛśyate so'yaṃ pāṭho mahājanaparigṛhītatayā samīcīnatayā ca dhriyate 
vyākhyāyate ca |
mahāmāyāśambaraṃ ca yogino jālaśambaram | tattvaśambarakaṃ caiva 
bhairavāṣṭakameva ca || 
atra pūrvārdhe catvāri tantrāṇi - mahāmāyā (1) śambaram (2) yoginījālam (3) 
śambararūpāṇi | śambarasya dvidhollekhastu śambara-bṛhacchambaratvena 
vyākhyeyaḥ | kaścit yoginītantraṃ jālaśambaramityevaṃ vyācaṣṭe | 
tattvaśambarakamekaṃ bhairavāṣṭakamaparamityaparārdhokte dve iti ṣaṭ tantrāṇi 
|] tantrāṇi [tantrāṇām] mātṝṇāmuttamāni ca |
mahāsārasvataṃ [mahāmāyāśambaraṃ ca | asitāṅgo ruruścaṇḍaḥ krodha 
unmatta eva ca | kapālo bhīṣaṇaśceti saṃhāraścāṣṭa bhairavāḥ || 
ityuktāṣṭabhairavaviṣayakaṃ tantraṃ bhairavāṣṭakanāmnā prasiddham |

bahurūpāṣṭakaṃ caiva yāmalāṣṭakameva ca | candrajñānaṃ vāsukiṃ ca 
mahāsaṃmohanaṃ tathā ||

bahurūpāṣṭaka śivadūtīsaṃhitānāṃ saptānāṃ mātṝṇāmaṣṭau tantrāṇi 
bahurūpatantranāmnābhihitāni | yāmalāṣṭakam - brahmayāmalaṃ (1) 
viṣṇuyāmalaṃ (2) rudrayāmalaṃ (3) lakṣmīyāmalaṃ (4) umāyāmalaṃ (5) 
skandayāmalaṃ (6) gaṇeśayāmalaṃ (7) grahayāmalaṃ (8) cetyaṣṭasaṃkhyakam 
| bhāskarastu - grahayāmalasthāne jayadrathayāmalaṃ papāṭha | candrajñāna-
vāsuki-mahāsaṃmohanāni trīṇi ityasmin śloke ūnaviṃśatitantrāṇyuktāni |

mahocchuṣyaṃ mahādeva ! vātulaṃ vātulottaram | hṛdbhedaṃ tantrabhedaṃ ca 
guhyatantraṃ ca kāmikam ||
kalāvādaṃ kalāsāraṃ tathānyat kubjikāmatam | tantrottaraṃ ca vīṇākhyaṃ 
trotalaṃ trotalottaram ||
pañcāmṛtaṃ rūpabhedaṃ bhūtoḍḍāmarameva ca | kulasāraṃ kuloḍḍīśaṃ 
kulacūḍāmaṇiṃ tathā ||
sarvajñānottaraṃ deva ! mahākālīmataṃ tathā |
mahālakṣmīmataṃ caiva siddhayogeśvarīmatam ||

kurūpikāmataṃ devarūpikāmatameva ca |
sarvavīramataṃ caiva vimalāmatamuttamam ||

atra pañcaślokyā aṣṭāviṃśati tantrāṇi saṃkhyātāni yathā - mahocchuṣyam 
(1) vātulam (2) vātulottaram (3) hṛdbhedam (4) tantrabhedam (5) guhyatantram (6) 
kāmikam (7) kalāvādam (8) kalāsāram (9) kubjikāmatam (10) tantrottaram (11) 
vīṇākhyam (vīṇātantram) (12) trotalam (13) trotalottaram (14) pañcāmṛtam (15) 
rūpabhedam (16) bhūtoḍḍāmaram (17) kulasāram (18) kuloḍḍīśam (19) 
kulacūḍāmaṇiḥ (20) sarvajñānottaram (11) mahākālīmatam (22) 
mahālakṣmīmatam (23) siddhayogeśvarīmatam (24) kurūpikāmatam (25) 
devarūpikāmatam (26) sarvavīramatam (27) vimalāmatam (28) iti |

pūrvapaścimadakṣaṃ ca uttaraṃ ca niruttaram |
tantraṃ vaiśeṣikaṃ jñānaṃ vīrābali rathāparam ||
aruṇeśaṃ mohinīśaṃ viśuddheśvarameva ca ||

anena sārdhaślokena ekādaśa tantrāṇyuktāni-

yathā - pūrvāmnāyaḥ (1) paścimāmnāyaḥ (2) dakṣiṇāmnāyaḥ (3) 
uttarāmnāyaḥ (4) niruttaratantram (5) vaiśeṣikatantram (6) jñānārṇavatantram (7) 
vīrābalitantram (8) aruṇeśatantram (9) mohinīśatantram (10) 
viśuddheśvaratantram (11) iti śaktipradhānatantrāṇāṃ madhye etāni 
catuḥṣaṣṭitantrāṇi uttamāni śreṣṭhāni jñeyānītyākūtam |] caiva yogino 
jālaśambaram || 4 ||

p. 2)

tattvaśambarakaṃ nāma bhairavāṣṭakameva ca |
bahurūpāṣṭakaṃ jñānaṃ yāmalāṣṭakameva ca || 5 ||

tantrajñānaṃ vāsukiṃ ca mahāsaṃmohanaṃ tathā |
mahāsūkṣmaṃ mahādevi ! vāhanaṃ vāhanottaram [mahāsāṃkhyaṃ 
mahādevaṃ vātulaṃ vātulottaram] || 6 ||

p. 3)

hṛdbhedaṃ mātṛbhedaṃ ca guhyatattvaṃ ca kāmikam |
kalāvādaṃ kalāsāraṃ tathānyat kubjikāmatam || 7 ||

māyottaraṃ ca vīṇākhyaṃ trotalaṃ trotalottaram |
pañcāmṛtaṃ rūpabhedaṃ bhūtaḍāmarameva ca || 8 ||

kulasāraṃ kuloḍḍīśaṃ tantraṃ viśvātmakaṃ yathā |
sarvajñānātmakaṃ devi ! mahāpitṛmataṃ tathā || 9 ||

mahālakṣmīmataṃ devi ! siddhayogeśvarīmatam |
kurūpikāmataṃ devi ! rūpikāmatameva ca || 10 ||

sarvavīramataṃ devi ! vimalāmatamuttamam |
pūrvapaścimadakṣaṃ ca uttaraṃ ca niruttaram || 11 ||

tantraṃ vaiśeṣikaṃ jñānaṃ śivābalimathāparam |
aruṇeśaṃ mohaneśaṃ viśuddheśvarameva ca || 12 ||

evametāni tantrāṇi tathānyānyapi koṭiśaḥ |
śrutvā devi ! na kutrāpi jātānandāsi bhairavi || 13 ||

tatkathaṃ vada suśroṇi ! mayi tvatpādavartini || 14 ||

devyuvāca -

śṛṇu deva ! parānanda parāprakulātmaka |
manmāyāmudritāśeṣatantrajñānakulārṇava || 15 ||

ahaṃ prakṛtirūpā ceccidānandaparāyaṇā |
kva brahmā kva hariḥ śaṃbhuḥ kva devaḥ kva manorjapaḥ || 16 ||

kva sṛṣṭi kva sthitirvāpi kva vā saṃhṛtibhūmikā |
kva rāgaḥ kva sukhaṃ duḥkhaṃ kva muktiḥ kva ca sādhutā || 17 ||

āstikyaṃ kva nu nāstikyaṃ kva gurutvaṃ kva śiṣyatā |
māyayācchādya cātmānaṃ tridhā bhūtvā madonmukhī || 18 ||

parākularasonmādamodinī ca vikāriṇī |
pañcabhūtāni liṅgāni caikottaraśatāni ca || 19 ||

p. 4)

brahmādibhūrbhuvaḥsvaḥsvabhāvavyaktirajāyata |
sarve'pyāvirbhavantyatra tato bhāvādikalpanā || 20 ||

śivaśaktiprabhedena guṇotpattistu jāyate |
sarve brahmādayo yūyaṃ madaṃśā bhāvasaṃbhavāḥ || 21 ||

parasparāvibhinnāśca tantramantrasamākulāḥ |
pañcatvaṃ prāpayiṣyāmi nirvāṇapadalālitāḥ || 22 ||

punarāvirbhavantyete prakṛteḥ parataḥ pumān |
ahaṃkāraḥ pañcamātrāḥ sattvaṃ cātha rajastamaḥ || 23 ||

etanmātrātmakaṃ viśvaṃ naṣṭaṃ cāvirbhavatyapi | [etattattvātmakaṃ jñātvā 
brahmacārī bhavatyapi]
yadi māṃ viddhi sarvajña! kva cāmnāyaḥ kva yājanam || 24 ||

na viddhi māṃ cet sarvajña! kva cāmnāyaḥ kva yājanam |
nārīrūpaṃ samāsthāya sṛṣṭisāraṃ madātmakam || 25 ||

bhavantaṃ bhavayogasthaṃ guruṃ jñātuṃ vijṛmbhitā |
etāvatāpi deveśa ! mama tattvaṃ na jāyate || 26 ||

devyuvāca -

śṛṇu putra parānanda paricaryāviśārada |
yoganirmuktakānuṣṭha upāyaḥ kathyate mayā || 27 ||

sarvatantraikasāraṃ ca sarvadevanamaskṛtam |
sarvasārvajñyadaṃ guhyaṃ tattvabodhaprabodhakam || 28 ||

pāpapuṇyaikanāśārhaṃ bhogamuktipradāyakam |
sarvāścaryamayaṃ vatsa ! viduṣāmapi mohanam || 29 ||

nānārthaprasavaprājña nānārthasaṃkulākulam |
sadācāryaparijñātaṃ [jñānam] sacchiṣyaparamāspadam || 30 ||

sarvavādisadācāraṃ sarvavādivigarhitam |
na mayā viṣṇave proktaṃ na dhātre gaṇapāya na || 31 ||

p. 5)

gopanīyaṃ tu hṛdaye yatnataḥ paripālaya |
etattantraṃ vinā vatsa ! nādhikāro'sti [kāraḥ surairapi] yadyapi || 32 ||

kulācāre tathā vatsa ! jñānaśuddhiṃ vadāmyaham |
sādhakaḥ prātarutthāya kulavṛkṣaṃ praṇamya ca || 33 ||

mūlādibrahmarandhrāntaṃ kulaṃ dhyātvā guruṃ smaret |
prahlādānandanāthākhyaṃ sanakānandameva ca || 34 ||

kumārānandanāthaṃ ca vasiṣṭhānandanāthakam |
krodhānandasukhānandau jñānānandamataḥparam || 35 ||

bodhānandamathābhyarcya dhyāyet kulamathopari |
mahārasarasollāsahṛdayānandalocanāḥ || 36 ||

kulāliṅganasaṃbhinnacūrṇitāśeṣatāmasāḥ |
kulaśiṣyoparikṛpāpūrṇāntaḥkaraṇodyatāḥ || 37 ||

varābhayayutāśeṣakulatantrārthavedinaḥ |
evaṃ kulaguruṃ natvā visṛjya kulamātṛkām || 38 ||

kulasthānaṃ samāliṅgya snānārthaṃ tīrthamāśrayet |
śāktaṃ kulaguruṃ vatsa ! kathitaṃ ca sukhāvaham || 39 ||

rahasyamadbhutaṃ vatsa ! goptavyaṃ paśusaṃkaṭe |
kulanāthaṃ parityajya ye śāktāḥ kulasevinaḥ [parasevinaḥ] || 40 ||

teṣāṃ dīkṣā ca yāgaśca abhicārāya kalpate |
tasmāt sarvaprayatnena kulīnaṃ gurumāśrayet || 41 ||

kulīnaḥ sarvavidyānāmadhikārīti gīyate |
dīkṣāprabhuḥ sa evātra sarvamantrasya nāparaḥ || 42 ||

iti kulacūḍāmaṇitantre prathamaḥ paṭalaḥ ||


dvitīyaḥ paṭalaḥ

devyuvāca -

atha vakṣyāmi te vatsa ! snānaṃ kulasukhāvaham |
kṛṣṇaraktaharinnīlā vividhā mama mūrtayaḥ || 1 ||

tatra yaḥ kulagaḥ śiṣyaḥ sa tadrūpaṃ parāmṛśan |
divaṃ sarvamathorvīṃ ca pātālaṃ bhūtasaṃbhavam || 2 ||

ācāntaḥ kuladarbheṇa sadarbhakulapuṣpakam |
kulapātre sadūrvaṃ ca satilaṃ sajalaṃ tathā || 3 ||

gṛhītvā kuladevasya prītaye snānamācaret |
kṛtasaṃkalpa evādau kulacakraṃ jale nyaset || 4 ||

kulamūlaṃ samānīya kulamudrāṅkuśena ca |
kulatīrthāni tatraiva samāvāhya kulātmakam || 5 ||

tattoyaṃ ca tridhā pītvā tridhā ca prokṣaṇaṃ tanoḥ |
kulamūlāya devāya tridhārghyaṃ parikalpya ca || 6 ||

devān pitṝn ṛṣiṃścaiva tarpayet kulavāriṇā |
kulātmakān punardhyātvā kuladevāṃstu toṣayet || 7 ||

bhairavītantra evātra teṣāṃ saṃjñā ca vidyate |
bhairavāya ca devāya bhairaveṇa ca kartṛṇā || 8 ||

bhairavākhyaṃ pradātavyaṃ mantramuccārya pūrvataḥ |
dātṛdānagṛhītaṃ ca tato liṅgānurūpataḥ || 9 ||

bhairavī bhairavātmānaṃ bhāvayettadaśeṣataḥ [bhāvayedyadaśeṣataḥ] |
śrāddhe vivāhe dāne ca snāne cāṅgaprapūjane || 10 ||

p. 7)

evaṃ cintāpare deva ! prasīdāmi na saṃśayaḥ |
tatastṛptā tadāśeṣalokān prīṇāmi tattvataḥ || 11 ||

utthāya kulavastre dve paridhāya kulena ca |
tilakaṃ kularūpaṃ ca kṛtvācamya samāpya ca || 12 ||

kulapīṭhaṃ samāruhya kuladevasya [sarvaṃ] pūjanam |
dvāradeśe tato gītanṛttavādyāditoṣitaḥ || 13 ||

kulabhūtaṃ samutsārya [samuccārya] kulasthānaṃ prapūjayet |
kulāsanaṃ tataḥ kṣiptvā tadabhyarcya yathāsukham || 14 ||

kulāsanaṃ tato baddhvā gurupūjākrameṇa ca |
ātmaśuddhibhūmiśuddhidehaśuddhivibhedataḥ [ātmaśuddhiṃ pīṭhaśuddhiṃ 
dehaśuddhyādibhedataḥ] || 15 ||

kṛtvā cārghyaṃ tato vidvān kuryāt kulaviceṣṭitam |
dīkṣitābhiḥ suśīlābhiryuvatībhiḥ kulātmabhiḥ || 16 ||

devatāgurubhaktābhiḥ saṃyutaṃ [saṃcitaṃ] yāgabhūmiṣu |
nānāvidhāni puṣpāṇi gandhāni vividhāni ca || 17 ||

karpūrajātidhūpādivāsitaṃ paṭavāsitam |
tāmbūlaṃ deyadravyaṃ ca dhūpadīpādikaṃ ca yat || 18 ||

sarvālaṃkārabhūṣābhirbhūṣitaḥ kaulikastadā |
mūlavidyājaptatoyaiḥ prokṣitaṃ sthāpayettataḥ || 19 ||

sarvaṃ svadakṣiṇe sthāpyaṃ vāme cārghyaṃ niveśayet |
paścime devatāyāṃ ca kuladravyāṇi dhārayet || 20 ||

kuṇḍagolodbhavairdravyaiḥ svayaṃbhūkusumena [kusumādibhiḥ] ca |
rocanālākṣayāraktaiḥ [lākṣayā laktaiḥ] kuṅkumāruṇacandanaiḥ || 21 ||

yantraṃ kṛtvā tatra pūjāṃ kṛtvā ca japamācaret [japamārabhet] |
yathāśakti manuṃ japtvā stutvā devīṃ visarjayet || 22 ||

p. 8)

tāstāḥ pradakṣiṇīkṛtya nijā vāpyanyayoṣitaḥ |
kulāmṛtarasaṃ pūrvaṃ [pūrṇaṃ] gurave vinivedayet || 23 ||

yoṣitastvavaśeṣaṃ tu svātmanyeva niyojayet |
brahmarandhre guptasthāne yantralepaṃ tu dhārayet || 24 ||

nāstikebhyo na mūrkhebhyo na paśubhyo na vā dviṣe |
kulīnāya ca dātavyamathavā jalamadhyataḥ || 25 ||

tataḥ so'hamiti dhyātvā vaiṣṇavācāratatparaḥ |
harināmnā jātabhāvo bhaṅgyanvitaviceṣṭitaḥ || 26 ||

coravat praviśedekaḥ sadā saṅgavilambitaḥ |
yāmamātre gate rātrau kulagehaṃ tataḥ pumān || 27 ||

prasūnatūlikāmadhye sthitvā kulaparāyaṇaḥ |
kulayantraṃ sādhyanāmnā saṃkulaṃ kulacakrake || 28 ||

svanāmādyaṅkitaṃ kṛtvā kulācāraṃ samācaret |
svaśaktyā paraśaktiṃ ca samānayati sādhakaḥ || 29 ||

paraśaktyākarṣaṇaṃ ca śṛṇu vatsa ! samāhitaḥ |
nijakāntāṃ samānīya suśīlāṃ suyaśasvinīm || 30 ||

kulabhaktaṃ guruṃ prāpya dīkṣayet kuladīkṣayā |
parānandarasāghūrṇalocanāṃ kulajāṃ satīm || 31 ||

tāmbūlagrāsapūrāsyo gururakṣo'bhitaḥ sudhīḥ |
nijaputrīvadācāryastadbhālapaṭṭake likhet || 32 ||

śakticakraṃ trirāvṛttyā likhet kāmakalāṃ tataḥ |
tanmadhye deyamantreṇa darbhitaṃ nāmalāñchitam || 33 ||

tatra devīṃ samāvāhya dhyātvā devīṃ prapūjya ca |
tatastatputrikākarṇe ṛṣicchandasamanvitam || 34 ||

p. 9)

mūlamantraṃ trirāvṛtya kathayedvāmakarṇake |
adya prabhṛti putri ! tvaṃ kulapūjārcane ratā || 35 ||

a(su)kulājñāṃ samādāya lajjālasyavivarjitā |
yathopadiṣṭavidhinā [athopa] sa me vasyaṃ (śyaṃ) samānaya || 36 ||

ityanujñāṃ gurorlabdhvā praṇameddaṇḍavadbhuvi |
trāhi nātha ! kulācāra padminīkulanāyaka || 37 ||

tvatpādāmbhoruhacchāyāṃ dehi mūrdhni yaśodhana ! |
gurave dakṣiṇāṃ dattvā tāmbūlāruṇalocanā || 38 ||

svakulaṃ paramīkṛtya yathābhīṣṭaṃ samācaret |
sāṅgāvaraṇapūjādau [aṅgāvaraṇa] yadi na kṣamate kulam || 39 ||

tadā mūrdhni guruṃ dhyātvā kulāmṛtarasena ca [tu] |
tarpayitvā tato [kulaṃ dhyātvā] devaṃ japenmantraṃ nirākulam || 40 ||

iti kulacūḍāmaṇitantre dvitīyaḥ paṭalaḥ |


tṛtīyaḥ paṭalaḥ

devyuvāca 

atha tadrātrisamaye svakulaṃ tūlikopari [bhūmikopari] |
vāmabhāge samāsannaṃ raktavastravibhūṣitam || 1 ||

svarṇālaṃkārabhūṣāḍhyaṃ raktagandhavibhūṣitam |
gandhapuṣpadhūpadīpaveṣṭitaṃ sumanoharam || 2 ||

sarvaśṛṅgāraveṣāḍhyaṃ sphuraccakitalocanam |
jitāmṛtakucadvandaṃ [jitāmita] viśālakarikumbhakam || 3 ||

lalāṭayantramālikhya sādhyanāmavigarbhitam |
tatskandhe bāhumādāya bhaṅgyā dhṛtakucāvalam || 4 ||

tāmbūlapūritamukhaṃ kulaṃ tadabhisaṃhitam |
kūlākulajapaṃ kṛtvā [kuryāt] samānayati tatkṣaṇāt || 5 ||

yannāmnā likhitaṃ yantraṃ tamānayati tatkṣaṇāt |
śatayojanadūrasthāṃ nadīparvatamadhyagām || 6 ||

dvīpāntarasahasreṣu rakṣitāṃ nigaḍādibhiḥ |
payodharabharakṣubdhamadhyamāṃ lolalocanām || 7 ||

nitambabimbavidhvastasphurajjaghanamaṇḍalām |
sādhakākāṅkṣihṛdayāṃ vivarāntaḥprasarpiṇīm || 8 ||

kapāṭalohasaṃnaddhaprākāravivarāntare |
sādhakāntaḥsamāsīnāṃ devatāmiva cāriṇīm || 9 ||

vaśayanti mahādeva sādhakastatkṣaṇādimām |
evamākṛṣṭi siddhiścet sādhakaḥ kauliko bhavet || 10 ||

p. 11)

dīkṣitā na ca yoṣā cet kathaṃ syātkulapūjanam |
kulapūjā na cedvatsa ! kulamantrāḥ [kulapūjā parāṅmukhā] parāṅmukhāḥ || 
11 ||

anyayoṣā yadā vatsa ! svayaṃ tasyā gurubhavet |
vāmakarṇe parāṃ dadyānmantreṇaivābhiṣecayet || 12 ||

mantraṃ śṛṇu mahādeva ! yathāvatkathayāmi te |
vāntānte tripurāyai(tu) hṛdayaṃ parikīrtitam || 13 ||

imāṃ śaktiṃ padānte ca pavitraṃ padamucyate |
tato gurupadaṃ dadyāt mama śaktipadaṃ tataḥ || 14 ||

kuru svāheti mantro'yaṃ ṣaḍviṃśatyakṣarātmakaḥ |
anena manunā deva ! śaktiśuddhiṃ samācaret || 15 ||

abhiṣekādbhavecchuddhī raṇḍāyā atibhairava |
brāhmaṇī kṣatriyā vaiśyā śūdrā ca kulabhūṣaṇā || 16 ||

vaiśyā nāpitakanyā ca rajakī yoginī tathā |
viśeṣavaidagdhyayutā sarvā eva kulāṅganāḥ || 17 ||

catuṣpathe vā nadyāṃ vā bilvamūle triśūlake |
pretabhūmau bilvamūle haṭṭe vā rājaveśmani || 18 ||

sindūreṇa likhedyantraṃ vipulaṃ sādhyagarbhitam |
tatra saṃpūjya vidhivat kulaṃ kularasena ca [tu] || 19 ||

tarpayitvā tadantaḥsthaṃ [tadante ca prajapenniśi cārataḥ] pūjayenniśi bhāvataḥ 
|
tato lakṣapradānena siddhidāstā bhavanti hi || 20 ||

puraścaraṇakāle tu parayoṣāṃ prapūjya ca |
dīkṣitāṃ vastrapuṣpādyairbhojyaiḥ pāyasasaṃbhavaiḥ || 21 ||

ārambhakāle niyataṃ svayaṃ pakvānnabhojanam |
nānāvidhaṃ piṣṭakaṃ ca nānārasasamanvitam || 22 ||

p. 12)

dugdhaṃ dadhi ghṛtaṃ takraṃ navanītaṃ saśarkaram |
upalākhaṇḍacūrṇaṃ ca nānāvidharasāyanam || 23 ||

nārikelaṃ kapitthaṃ ca nāgaraṃ karamardakam [nāgaraṅgaṃ sudarśanam] |
niṣpāvaṃ bījapūraṃ ca dāḍimīphalameva [phalamuttamam] ca || 24 ||

nānāramyaphalaṃ caiva nānāgandhavilepanam |
candanaṃ mṛganābhiṃ ca śrīkhaṇḍaṃ navapallavam [surapādapam] || 25 ||

taṅkanaṃ lodhrakaṃ caiva jalajaṃ vanajaṃ tathā |
nānāśailasamudbhūtaṃ nānālaṃkārabhūṣitam [saṃmitam] || 26 ||

śūnyagehe samānīya cārghyodakaviśodhitam |
amṛtīkaraṇaṃ kṛtvā śaktīrabhimukhaṃ nayet || 27 ||

aṣṭakanyārūpabhedaṃ vilokyāmarśaceṣṭitam |
brahmāṇyādyaṣṭaśaktīnāṃ nāmabhiḥ kṛtasaṃjñakāḥ || 28 ||

āsanaṃ prathamaṃ dattvā svāgataṃ ca tataḥ punaḥ |
arghyapānīyakaṃ [arghyaṃ pādyaṃ ca pānīyaṃ] pādyaṃ madhuparkaṃ jalaṃ 
tathā [tataḥ] || 29 ||

snāpayedgandhapuṣpādyaiḥ [puṣpābhiḥ] keśasaṃskārameva ca |
dhūpayitvā tataḥ keśān kauśeyaṃ ca nivedayet || 30 ||

tataḥ sthānāntare pīṭhamāstīryaṃ pādukādvayam |
datvā tatra samānīya nānālaṃkārabhūṣaṇaiḥ || 31 ||

bhūṣayitvānulepaiśca gandhamālye nivedayet |
tāṃ tāṃ śaktiṃ samāvāhya mūrdhni tāsāṃ samānayet || 32 ||

bhojyaṃ maṇḍapamadhye tu svarṇapātre suśobhane |
carvyaṃ coṣyaṃ lehyapeyaṃ bhojyaṃ bhakṣyaṃ nivedayet || 33 ||

adīkṣitāścettāstatra tato māyāṃ nivedayet |
tāsāṃ ca savyakarṇeṣu tataḥ stotraṃ samācaret || 34 ||

p. 13)

mātardevi ! namaste'stu ! brahmarūpadhare'naghe |
kṛpayā hara vighnaṃ me mama siddhiṃ prayaccha me || 35 ||

māheśi ! varade ! devi ! paramānandarūpiṇi ! |
kṛpayā hara vighnaṃ me mama siddhiṃ prayaccha me || 36 ||

kaumāri sarvavidyeśe kumārakrīḍane vare ! |
kṛpayā * * * * * * * * * * * * * || 37 ||

viṣṇurūpadhare ! devi vinatāsutavāhani |
kṛpayā * * * * * * * * * * * * * || 38 ||

vārāhi ! varade ! devi ! daṃṣṭroddhṛtavasuṃdhare ! |
kṛpayā * * * * * * * * * * * * * || 39 ||

śakrarūpadhare devi ! śakrādisurapūjite [gaṇapūjite] ! |
kṛpayā * * * * * * * * * * * * * || 40 ||

cāmuṇḍe ! muṇḍamālāsṛkcarcite ! bhayanāśini ! |
kṛpayā * * * * * * * * * * * * * || 41 ||

mahālakṣmi ! mahāmohe kṣobhasaṃtāpahāriṇi ! |
kṛpayā * * * * * * * * * * * * * || 42 ||

mitimātṛmaye ! devi ! mitimātṛbahiṣkṛte |
eke bahuvidhe ! devi ! viśvarūpe ! namo'stu te || 43 ||

etatstotraṃ paṭhedyastu karmārambheṣu saṃyataḥ |
vidagdhāṃ vā samālokya tasya vighnaṃ na jāyate || 44 ||

kulīnasya dvāradevāḥ kathitāstava putraka ! |
dīkṣākāle nityapūjāsamaye nārcayedyadi || 45 ||

tasya pūjāphalaṃ vatsa ! nīyate yakṣarākṣasaiḥ |

|| iti karṇejapastotram ||

yadi vrīḍāparāstāstu bhojayettad gṛhādbahiḥ || 46 ||

p. 14)

sthitvā stotraṃ paṭhettāvadyāvattṛptiḥ prajāyate |
ācamya mukhavāsāditāmbūlaṃ ca nivedayet || 47 ||

tato dadyāt punarmālyaṃ gandhacandanapaṅkilam |
namaskṛtya [visṛjya pradakṣiṇīkṛtya] visṛjyaiva varaṃ prāpya sukhī bhavet || 48 ||

anyā yadi na gacchanti nijakanyā nijānujā |
agrajā vā mātulānī mātā vā tatsapatnikā || 49 ||

vayasā jātito vāpi hīnā vā paramāḥ kalāḥ |
pūjyā kulavaraiḥ sarvairnijāhaṃkāravarjitaiḥ || 50 ||

sarvābhāve'pyekatarā pūjanīyā prayatnataḥ |
saṃskṛtāsaṃskṛtā vāpi jananī vāpi niṣpatiḥ || 51 ||

pūrvābhāve parā pūjyā madaṃśā [cāsaṃkhyā] yoṣito yataḥ |
ekaścetkulaśāstrajñaḥ pūjārhastatra bhairava ! || 52 ||

sarva eva surāḥ pūjyā brahmaviṣṇuśivādayaḥ [satyabrahmasurādayaḥ] |
ekā cedyuvatistatra pūjitā cāvalokitā || 53 ||

sarvā eva parā devyaḥ pūjitāḥ kulabhairava ! |
ādāvante ca madhye ca lakṣapūrtau viśeṣataḥ || 54 ||

na pūjayati cet kāntāṃ tadā vighnaiḥ sa lipyate |
pūrvārjitaphalaṃ nāsti kā kathā parajanmani || 55 ||

tasmātsarvaprayatnena yadīcchedātmano hitam |
mamāpi krodhasaṃtāpaśamanaṃ vighnanāśanam || 56 ||

yatnataḥ pūjanīyāḥ syuḥ kulākulajanāḥ svataḥ |
prātarutthāya pūjāyāṃ snānakāle'thavā punaḥ || 57 ||

saṃskṛtāsaṃskṛtā vāpi hīnajātāpi vā suta ! |
namasyāḥ sarvajātīnāṃ kulīnānāṃ kulārcane || 58 ||

puraścaraṇakāle'pi yadi syātpīṭhadarśanam |
tadā tatra pīṭhapūjā manasāpi na hīyate || 59 ||

p. 15)

devīkūṭe mahābhāgāmuḍḍīyāne ca bhairava ! |
yoganidrāṃ kāmarūpe mahiṣāsuramardinīm || 60 ||

kātyāyanīṃ kāmabhūmau kāmākhyāṃ kāmadāyinīm |
jālaṃdhare ca pūrṇeśīṃ pūrṇaśaile ca caṇḍikām || 61 ||

kāmarūpāṃ tu ṭhehāre pūjyā dikkaravāsinī |
athavā kāmarūpasya darśanaṃ yadi bhāgyataḥ || 62 ||

tadā durgādidevīnāṃ [bhagādi] pūjā tatra vidhīyate |
kulanāthaṃ tato dhyātvā svayamavyagramānasaḥ || 63 ||

śeṣaṃ samāpayedvatsa ! tadanusmṛtipūrvakam |
pūjākāle hīnajātā svayoṣidvā prayatnataḥ || 64 ||

pūjanīyā prayatnena dvaidhaṃ tatra vivarjayet |
yathā viṣṇuḥ paraṃ goptā yathā ca śaṃbhurīśvaraḥ || 65 ||

yathā kamalajanmāpi ye vā vyāsamukhā dvijāḥ |
indrādyā lokapālāśca sarve gandharvakiṃnarāḥ || 66 ||

yakṣarakṣaḥpiśācādyā guhyacāraṇakhecarāḥ |
tairyathā gopitaṃ guhyaṃ tvaduktaṃ śāstrasaṃbhavam || 67 ||

tathā tvayaiva goptavyaḥ kulācāraḥ sudurlabhaḥ || 68 ||

iti kulacūḍāmaṇitantre tṛtīyaḥ paṭalaḥ |


caturthaḥ paṭalaḥ

devyuvāca -

śṛṇu putra ! rahasyaṃ me samayācārasaṃbhavam |
yena hīnā na siddhyanti janmakoṭiśatairapi [kulāḥ koṭisahasraśaḥ] || 1 ||

mānavaḥ kulaśāstrāṇāṃ kulacaryānucāriṇām |
udāracittaḥ sarvatra vaiṣṇavācāratatparaḥ || 2 ||

paranindāsahiṣṇuḥ syādupakārarataḥ sadā |
[parvate vipine]devatāyatane caiva nirjane śūnyamaṇḍape || 3 ||

catuṣpathe jale madhye yadi daivādgatirbhavet |
kṣaṇaṃ dhyātvā manuṃ japtvā natvā gacchedyathāsukham || 4 ||

gṛdhraṃ vīkṣya mahākālīṃ namaskuryādalakṣitaḥ |
kṣemaṃkarīṃ tathā vīkṣya jambukīṃ yamadūtikām || 5 ||

kuraraṃ śyenakākau tu kṛṣṇamārjārameva ca |
pūrṇodari ! mahācaṇḍe ! muktakeśi ! balipriye || 6 ||

kulācāraprasannāsye ! namaste śaṃkarapriye ! |
śmaśānaṃ ca śavaṃ dṛṣṭvā pradakṣiṇamanuvrajan || 7 ||

praṇamyānena mantreṇa mantrī sukhamavāpnuyāt |
ghoradaṃṣṭre ! kaṭhorākṣi ! kiṭiśabdapraṇādini ! || 8 ||

[ghora ghoraravāsphāle] ghoraghorarave mātarnamaste citivāsini ! |
kṛṣṇapuṣpaṃ [raktavastrāṃ raktapuṣpāṃ] raktavastraṃ vilokya tripurātmikām 
|| 9 ||

praṇameddaṇḍavadbhūmāvimaṃ [praṇappa] mantramudīrayan [stotra] |
bandhūkapuṣpasaṃkāśe ! tripure ! bhayanāśini ! || 10 ||

p. 17)

bhāgyodayasamutpanne ! namaste varavarṇini ! |
kṛṣṇavarṇaṃ [kṛṣṇavastrāṃ kṛṣṇapuṣpāṃ] tathā puṣpaṃ rājānaṃ 
rājaputrakam || 11 ||

hastyaśvarathaśastrāṇi phalakaṃ [phalakān vīrapūruṣān] vīrapūruṣam |
mahiṣaṃ kuladevaṃ ca dṛṣṭvā mahiṣamardinīm || 12 ||

praṇamya jayadurgāṃ vā sa ca vighnairna lipyate |
jaya devi ! jagaddhātri ! [mahiṣaghni namo'stu te] tripure'mbe tridevate ! |
madyabhāṇḍaṃ samālokya matsyaṃ māṃsaṃ varastriyam || 14 ||

dṛṣṭvā ca bhairavīṃ devīṃ praṇamya [vimṛśan]vimṛśenmanum |
ghoravighnavināśāya kulācārasamṛddhaye || 15 ||

namāmi varade devi ! muṇḍamālāvibhūṣite ! |
raktadhārāsamākīrṇavadane ! tvāṃ namāmyaham || 16 ||

sarvavighnahare devi ! namaste haravallabhe |
eteṣāṃ darśane vatsa ! yadi [vairaṃ]naivaṃ prakurvate |
śaktimantraṃ puraskṛtya tasya siddhirna jāyate || 17 ||

eteṣāṃ māraṇoccāṭaṃ hiṃsanaṃ vāgurādibhiḥ |
kriyate yadi pāpātmā madbhaktaḥ sa kathaṃ bhavet || 18 ||

pradhānāṃśasamudbhūtā ete kulajanapriyāḥ [janāśrayāḥ] |
ḍākinyaśca tathā sarvā madaṃśāḥ śṛṇu bhairava ! || 19 ||

labdhasiddhisamāyogāt ḍākinīhiṃsanaṃ [ḍākinyā hiṃsanaṃ] yadi |
atha vā dānavānāṃ ca madbhaktānāṃ viśeṣataḥ |
vaṭukānāṃ bhairavāṇāṃ tasya siddhirna jāyate || 20 ||

grāme vā nagare vātha haṭṭe vā catvare'pi vā |
yaṃ dṛṣṭvā yuvatirnārī pūrvadoṣavivarjitā || 21 ||

bhāvaikabhinnahṛdayā vakradṛṣṭyā vilokya ca |
dṛṣṭvā madhukaraśreṇī yathā madhumadākulā || 22 ||

p. 18)

patatyavirataṃ padme yathā vāmṛtalolupā |
cakorī meghamāsādya sotsukā cātakapriyā || 23 ||

navaprasūtā dhenurvā yathā vatsānusaṅginī |
navena tṛṇajātena yathā vā hariṇāṅganā || 24 ||

kravyādāḥ palamāsādya tṛṣṇārtāstoyadarśanāt |
mṛṇāladarśanā haṃsī madhulobhātpipīlikā || 25 ||

cañcalā nijavaṃśā ced bhāvanā mūḍhamānasā [gūḍha] |
utkṣipya bhujamūlaṃ [mūlasya] ca vasanaṃ kṣipyate punaḥ || 26 ||

celāñcalaparīvartadarśitāpaghanākulā |
kaṇḍūtibhāvavyājena śithilīkṛtavāsasī || 27 ||

darśitastanaparyantabhūbhāgā [bhāgā vā] punarāvṛtā |
skhalatpadayugāpātapatitā punarutthitā || 28 ||

sakhimirvyājamāsādya karṇākarṇimanoharam |
etatpraṇayayogena rahasye kāmakalpanā || 29 ||

lekheyaṃ paśya suśroṇi śaśāṅkasya kucopari |
ityādibhāvabharitaghṛṇālajjāvivarjitā || 30 ||

kāmāsahiṣṇuhṛdayā dūre vā cāntike sthitā |
dūtīmukhena lekhairvā jijñāsāsphuritādharā || 31 ||

kastvaṃ kasyāsi putro vā kasmādāgata eva vā |
kimarthaṃ kimanuṣṭhātā kiṃ vā te'bhimataṃ vada || 32 ||

aṅguṣṭhakeśaparyantaṃ pītvāpi ca na śāmyati |
tadā tadbhāvacaturo bhāvabodhahavirbhuje || 33 ||

tasyāṃ nijamanohāri haviḥśeṣaṃ vidhāya ca |
tatra sthitvā puraḥkṣobhaṃ kuryāt kāma ivāparaḥ || 34 ||

bhaumavāre citāsthāne kulasindūramānayet |
tenaiva kulakāṣṭhena yantraṃ kṛtvā tadantare || 35 ||

p. 19)

spheṃ [sphreṃ sphreṃ] spheṃ kiṭikiṭidvandvaṃ likheccaṇḍamanuṃ tataḥ |
patre mahiṣamardinyā navavarṇaṃ likhettataḥ || 36 ||

tadbāhe jayadurgākhyāṃ śmaśānabhairavīṃ tataḥ |
likhitvā pūjayedrātrau bhadrakālīṃ samāhitaḥ || 37 ||

kāmākhyāṃ [deśa]diśamāsthāya dhyātvā kāmakalāṃ tanum |
digvāsā galitāśeṣacikuraḥ kulakaulikaḥ || 38 ||

dhyāyet kālīṃ karālāsyāṃ daṃṣṭrālīnavilocanām |
sphuracchavakaraśreṇīkṛtakāñcīṃ digambarīm || 39 ||

vīrāsanasamāsīnāṃ mahākāloparisthitām | [paveṣṭitām]
śrutimūlasamākīrṇasṛkkanīṃ caṇḍanādinīm || 40 ||

muṇḍamālāgaladraktacarcitāṃ pīvarastanīm |
madirāmoditāsphālakampitākhilamedinīm [sphāra] || 41 ||

vāme khaḍgaṃ khaṇḍamuṇḍadhāriṇīṃ dakṣiṇe kare |
varābhayayutāṃ ghoravadanāṃ lolajihvikām || 42 ||

śakuntapakṣasaṃyuktavāmakarṇavibhūṣaṇām |
śivābhirghorarāvābhiḥ [sphāra] sevitāṃ pralayoditām [praṇavoditām] || 43 ||

caṇḍahāsacaṇḍanādacaṇḍāsphālaiśca bhairavaiḥ |
gṛhītanarakaṅkālairjayaśabdaparāyaṇaiḥ || 44 ||

seitākhilasiddhaughasevibhiḥ sevitāṃ parām |
evaṃ tāṃ kālikāṃ dhyātvā pūjayet kulasiddhaye [nāyakaḥ] || 45 ||

vinā parapurāveśavivarāntaḥpraveśanam |
yat kiñcit kulasiddhistu jāyate na manāgapi || 46 ||

sarvasiddhipradā devī helayāpi ca cintitā |
ataḥ sā dakṣiṇā nāmnī triṣu lokeṣu gīyate || 47 ||

p. 20)

tato'ṣṭaśatamāmantrya siddhyarthaṃ śvetasaṃbhavam |
kālīmantreṇa sādhyādigrathitena ca bhairava || 48 ||

visṛjya devīṃ hṛdaye sthāpayitvā catuṣpathe |
varālṃakāraracito viśet parapuraṃ tataḥ || 49 ||

devīṃ dhyātvā dvāradeśe namaskṛtya kulaṃ gurum |
siddhārthaṃ vāmahaste tu gṛhītvā mantramuccaran || 50 ||

yatra ca dvāri nigaḍalauhaśaṅkukulāvṛtiḥ |
bhittvā tatra viśedrātrau niḥśaṅkaḥ kṣobhavarjitaḥ || 51 ||

śatāvṛtiṃ samullaṃghya viharet svecchayā tataḥ |
aśvāgāre rathāgāre kālikāgārasaṃnidhau || 52 ||

devatāyatane vāpi ajjanāñcitalocanaḥ |
dhyātvā svapnavatīṃ vidyāṃ [devīṃ] praviśet kāmamaṇḍapam || 53 ||

yadi ko'pi samāyāti na bhayaṃ tatra cintayet |
ke yūyamī vaktavye vayaṃ ca vīrapūruṣāḥ || 54 ||

vaktuṃ grahītuṃ smartuṃ vā na śaktāḥ purapālakāḥ |
tatra pradakṣiṇīkṛtya pitarau paramāspadam || 55 ||

pūjayedyantramālikhya nijaṃ mantraṃ japettataḥ |
devīkūṭe tathoḍḍīne kāmarūpe tatastaṭe || 56 ||

jālaṃdhare tataḥ pūrṇe yajñabhūmau tataḥ param |
eṣu vinyasya cakrāṇi pūjayitvā praṇamya ca || 57 ||

aṣṭadhā daśadhā vāpi śataṃ vāpi sahasrakam |
japtvā pīṭhaṃ samādāya bhāṇḍāgāraṃ tato viśet || 58 ||

nirmūlāṃ bhūmimāsthāya tatra siddhāsanaṃ tataḥ |
rakṣāpīṭhaṃ puraskṛtya praṇamet pīṭhasaṃmukham || 59 ||

āgatāsi mahābhāge ! siddhayone ! madiṣṭade ! |
kulapūjāṃ kariṣyāmi upacāraṃ prayaccha me || 60 ||

p. 21)

putrājñāṃ mastake kṛtvā tataḥ sāgāramīkṣate |
kulapuṣpaṃ [phalaṃ puṣpaṃ] tathā gandhaṃ naivedyaṃ punarāharet || 61 ||

taddhastāvacitaṃ sarvaṃ tenaivopaskṛtaṃ tataḥ |
samādāya tathā pūjāṃ kṛtvā paktvā nijecchayā || 62 ||

śālitaṇḍulamādāya matsyamāṃsāni caiva hi |
ghṛtaṃ madhu tathā cānyad yadvā yatraiva labhyate || 63 ||

sthāpayitvā tataḥ pātre paramīkṛtya sādhakaḥ |
nijeṣṭadevatāṃ dhyātvā nivedya śāstramārgataḥ || 64 ||

phalaṃ chitvā dvidhā bhitvā tasyārdhaṃ kulaśaktaye |
nivedayet svayaṃ cārdhaṃ bhakṣayitvā puraḥsthitaḥ || 65 ||

yadi no vidyate yoṣā tatastoye visarjayet || 66 ||

tataḥ pīṭhaṃ samādāya bhūmimārjanapūrvakam |
pituḥ samīpe saṃsthāpya tattvacintāparo bhavet || 67 ||

iti kulacūḍāmaṇitantre caturthaḥ paṭalaḥ ||


pañcamaḥ paṭalaḥ

śrīdevyuvāca -

nidrāvaśagate deva ! niśācāreṇa sādhakaḥ |
kāmarūpaṃ praviśyāśu kāmākhyāyonimaṇḍapam || 1 ||

pariṣkṛtya [puraskṛtya] kulairdravyairlikhitvā cakramuttamam |
sādhyasādhakanāmnā ca darbhitaṃ vipulīkṛtam || 2 ||

kāmasthaṃ kāmamadhyasthaṃ kāmena ca puṭīkṛtam |
kāmena kāmayet kāmaṃ kāmaṃ kāmena [kāmī] yojayet || 3 ||

tato dhyātvā manuṃ japtvā pīṭhādi cāvalokya ca |
mātṛpīṭhe pitṛmukhaṃ sthāpayitvā vidhānataḥ || 4 ||

gṛhītvā vastrakhaṇḍaṃ vā tāmbūladvayameva vā |
kākiṇīṃ vā tadardhaṃ vā tadyogyaṃ harate haṭhāt || 5 ||

pradakṣiṇakrameṇaiva krameṇa niḥsarettataḥ |
paurāṅganānāṃ dravyaṃ vā parirakṣitureva vā || 6 ||

gṛhītvā yadi niryāti bhraṣṭo bhavati sādhakaḥ |
teṣāṃ prahāraścāturyaṃ vyabhicārakulakṣatiḥ || 7 ||

kriyate yadi duṣṭena tadā naśyati niścitam |
vyabhicārāt [abhicārapurakṣobhe bandhaścaivābhijāyate] purakṣobho 
baddhaścaivābhibhūyate || 8 ||

svapnaprabodhamantreṇa bodhayet puravāsinīm |
anyacaureṇa vā teṣāṃ kulīnena ca śaṃkara ! || 9 ||

praviśya vighnaḥ kriyate sādhakasya na saṃśayaḥ |
bhūtāḥ pretāḥ piśācā vā rākṣasā vā sarīsṛpāḥ || 10 ||

p. 23)

kiṃnarī vā tathā nāgakanyā pātālakanyakāḥ |
vidyādharī bhairavaśca vaṭuko gaṇapastathā || 11 ||

praviśya vighnaṃ kurvanti suptā dṛṣṭvā purāṅganāḥ |
apatyahāniṃ vikṣobhaṃ vyādhimuñcāṭanaṃ tathā || 12 ||

dravyahāniṃ vyākulatvaṃ kurvanti vighnahetukāḥ |
etat purapaterevaṃ tat kāraṇādyadi śaṃkara ! || 13 ||

tṛṇahāniryadā jātā tadā naśyanti sādhakāḥ |
tasmāt sarvaprayatnena prabodhaṃ kārayed guruḥ || 14 ||

rakṣā kāryā prayatnena kīlakānnikhanettataḥ |
vajraṃ śaktiṃ tathā daṇḍaṃ khaḍgaṃ pāśaṃ tathāṅkuśam || 15 ||

tatra taddikpatīnāṃ ca pūjā kāryā prayatnataḥ |
piṣṭakaṃ kadalaṃ deva ! modakaṃ pāyasaṃ tathā || 16 ||

bhaktaṃ lājaṃ daṃśanaṃ ca nārikelaphalaṃ tataḥ |
viṣṇave paramānnaṃ ca gaṇeśāya ca pīṭhakam || 17 ||

modakaṃ nārikelaṃ ca kadalīphalameva [lasaṃjñakam] ca |
kṣetreśāya kṛṣṇacchāgaṃ datvā vīramanuṃ tataḥ || 18 ||

japtā loṣṭaṃ samādāya kṣipeddaśasu dikṣu ca |
yathā yajñe'bhiṣikte'śve yathā śakrādibhiḥ suraiḥ || 19 ||

vighnamācaryate tadvat kulopari maheśvara ! |
śayanāgāra aiśāne kulaśaṅkhaṃ nidhāpayet || 20 ||

ūrdhve vitastivistāramadho vistārameva ca |
kṛtvā tatra yantrarājaṃ pūjayenniśi sādhakaḥ || 21 ||

rātrau paryaṭanaṃ caiva rātrau ca kulapūjanam |
na karoti kathaṃ deva ! sādhakaḥ kauliko bhavet || 22 ||

p. 24)

gṛhasthāśramamāsādya pratidvāraṃ samāhitaḥ |
rātrau sthitvā kulācārakathāṃ [kulācāre] tribhuvaneśvarīm || 23 ||

natvā [likhitvā pūjayedyantraṃ] ca prajapenmantraṃ pūrvaśaktiryadā bhavet |
prātaḥ snātvā guruṃ natvā pitṝn devān ṛṣīṃstathā || 24 ||

tarpayitvā yathāśakti pūjayedbhaktibhāvitaḥ |
tato [tataḥ purapateḥ] yuvatisevāyā yatkiṃcidvyapadeśataḥ || 25 ||

yathā paurāṅganālāpamiśraṇavyapadeśataḥ |
dravyādinā tatra vāpi yathā bhavati bhairava ! || 26 ||

dāsadāsīpratīpālacāriṇāṃ priyakāryapi |
asyopari kṛpā tasyāḥ kīdṛśī vyapadeśataḥ || 27 ||

jñātavyaḥ purabhāvastu yatnataḥ kulasādhakaiḥ |
kenāpi vyapadeśena kulacūḍāmaṇiṃ svataḥ || 28 ||

gṛhītvā svarṇapātre vā tāmre vā kulasaṃjñake |
likhitvā nijayantraṃ vā kulayantramathāpi vā || 29 ||

śrīyantraṃ [śrīyantraṃ vāpi gandharvadurāpaṃ dravyamāśritam] vātha 
gandharvayantraṃ vā dravyamiśritam |
madhye tat kulanāmnā ca darbhitaṃ nijanāmabhiḥ || 30 ||

pārśve kāmakalābījaṃ nijamantreṇa veṣṭitam |
pūjayet sādhakaśreṣṭhaḥ kulāmnāyaparāyaṇaḥ || 31 ||

kulapūjādiliṅgaistu rahito [bāhyataḥ]viṣṇutatparaḥ |
gacchan svadan naman vāpi skhalan viṣṇuparāyaṇaḥ || 32 ||

jaya viṣṇo hare ! brahman nāmādya padavistaraiḥ |
smartavyo'haṃ kulābhijñairaraṇye vā jalāśaye || 33 ||

tataḥ pūrvoktarūpeṇa kulakṣobhaṃ samācaret |
tato rātrau śūnyagehe udyāne vā surālaye || 34 ||

p. 25)

ānīya kulajāṃ devīṃ mūlamantreṇa dīkṣayet |
tataḥ pūrvoktarūpeṇa kulakṣobhaṃ samācaret [samārabhet] || 35 ||

evaṃ kṛtena siddhiścet mūlamantraṃ samabhyaset |
pīṭhānāṃ paramaṃ pīṭhaṃ kāmarūpaṃ mahāphalam || 36 ||

tatra yat kriyate pūjā sakṛdvāpi maheśvara ! |
vihāya sarvapīṭhāni tatra [tasyā dehe] putra vasāmyaham || 37 ||

tasmācchataguṇaṃ proktaṃ kāmākhyaṃ yonimaṇḍalam |
teṣāṃ phalaṃ mahādeva ! bahu kiṃ kathyate'dhunā || 38 ||

yatra koṭigaṇaiḥ sārdhamādyā mahiṣamardinī |
yat pīṭhaṃ brahmaṇo vaktraṃ guptaṃ sarvasukhāvaham || 39 ||

yato devāśca devyaśca ṛṣayaścaiva [munayaścaiva] bhāvajāḥ |
sarve'pyāvirbhavantyatra tena guptaṃ mahākulaiḥ [sadā kulam] || 40 ||

dvividhaṃ caiva tatpīṭhaṃ guhyaṃ vyaktaṃ maheśvara |
vyaktād guhyaṃ mahāpuṇyaṃ durāpaṃ sādhakottamaiḥ || 41 ||

guptaṃ sarvatra deveśa ! labhyate kulasundaraiḥ || 42 ||

bhairava uvāca -

ākarṣaṇavidhānaṃ me svatantraṃ samudīraya |
putro'smi yadi deveśi ! sṛṣṭisaṃhārakāriṇi ! || 43 ||

devyuvāca -

śṛṇu putra ! mahāvidyāmākarṣaṇakarīṃ parām |
yadārādhanamātreṇa devānākarṣayennaraḥ [yeddhruvam] || 44 ||

brahmā sarasvatīyukto devatāmukhasaṃyutaḥ |
vīraśaktisamākīrṇaḥ [bījaśaktisamākīrṇaṃ kālīmantramudāhṛtam] 
kālīmantra udāhṛtaḥ || 45 ||

ekaṃ vā dviguṇaṃ vāpi triguṇaṃ vāpi bhairava ! |
japtvā karṣayati svairaṃ sthāvaraṃ jaṅgamādikam || 46 ||

p. 26)

eṣā vidyā mahākālī guhyād guhyatarā smṛtā |
suptā nidrāmitā mattā bhrāmitāvanatā [vidrāvaṇaratā parā] tathā || 47 ||

samastadoṣajālena grathitā kulasundarī |
niśācāraṃ divācāraṃ saṃdhyācāraṃ ca pallavam || 48 ||

darbhitaṃ bījasaṃyogaṃ bhāvayedyogameva ca |
jñātvā prabodhayeddhīro gururatraikakāraṇam || 49 ||

niyamaḥ puruṣe jñeyo na yoṣitsu kathaṃcana |
yadvā tadvā yena kena sarvadā sarvato'pi ca || 50 ||

yoṣitāṃ dhyānayogena siddhayaḥ syurna saṃśayaḥ |
yathāyaskāntamātreṇa gūḍhaviddhaśiloccayaḥ || 51 ||

svayameva bahiryāti yathā vā sauratejasā |
sūryakāntaḥ spuṭaruciryathā ca raviraśmibhiḥ || 52 ||

candrakāntaṃ drāvayati yathā varṣāsu vāridaḥ |
jalasekābhitṛptā [kṣudhārtaḥ kṣīrapānena narastṛpto'bhijāyate |
puṣpadarśanamātreṇa gandharvaḥ prīyate yathā |
gurusevanamātreṇa mantrasiddhiryathā bhavet |
mahāpadmavanadhyānādyathā siddheśvaro bhavet |
tripurādhyātamātreṇa bhuktirmuktiryathā bhavet |] bhū rasapūrṇā pracakṣate || 
53 ||

puṣpadarśanamātreṇa bhuktimuktiryathā bhavet |
mahādurgāprasādena yathā siddhiśvaro bhavet || 54 ||

kulapuṣpaprasādena yathā prītistu jāyate |
gaṅgāsmaraṇamātreṇa niṣpāpo jāyate yathā |
yathākarṣaṇamātreṇa śiva eva prajāyate || 55 ||

yoṣiccintanamātreṇa yatheyaṃ varadāyinī |
tasmāt sarvaprayatnena dīkṣayennijakaulikīm || 56 ||

p. 27)

bhairavo'sya ṛṣiḥ prokta uṣṇik chandastu devatā |
kālikā dakṣiṇā devī caturvargaphalapradā || 57 ||

pūrvaṃ bījaṃ parāśaktirbījena mūrtikalpanā |
ṣaḍdīrghabhājā bījena kuryādaṅgādikalpanām || 58 ||

caturdaśa vibhāgena mātṛkārṇaiḥ pṛthak pṛthak |
hṛdaye hastayoḥ pādayugale vinyasettataḥ || 59 ||

pañcāśanmūlamantreṇa vyāpakaṃ vinyasettataḥ |
pañcadhā dhyānamekatra pūrvoktaṃ ca samācaret || 60 ||

daśapañcārapadmeṣu [daśadhā yogapadmeṣu] pīṭhapūjāṃ samācaret |
tatrāvāhya yajeddevīṃ dakṣiṇāṃ kulabhūṣaṇām || 61 ||

mahākālaṃ yajet paścāt pīṭhaśaktiṃ tato yajet |
kālīṃ kapālinīṃ kullāṃ prathame ca trikoṇake || 62 ||

kurukullāṃ virodhīṃ ca vipracittāṃ tathaiva ca |
ugramukhīmugraprabhāṃ pradīptāṃ ca tathaiva ca || 63 ||

nīlāṃ ghanāṃ balākāṃ ca sitāṃ dhātrīṃ ca mudrikām |
brahmāṇyādyāstathā bāhye yajet pūrvadale kramāt || 64 ||

evaṃ kṛtvā japenmantraṃ haviṣyāśī divā śuciḥ |
lakṣaṃ rātrau tathā lakṣaṃ mahāśaucaparāyaṇaḥ || 65 ||

anyāsāṃ yoṣitāṃ cātra na pūjā nāpi cintanam |
rātrau japaikamātreṇa siddhidā dakṣiṇā bhavet || 66 ||

aṅganyāsaṃ samācarya dhyātvā devīṃ japed budhaḥ |
araṇyāmathavā rātrau mahākālī mahodayā || 67 ||

anenaiva vidhānena pūjitā viśvarūpiṇī |
ākarṣayeddevakanyāṃ pātāle nāgakanyakām || 68 ||

p. 28)

araṇyā ca mahākālī dvitīyā ceyamīritā |
pūjā dhyānaṃ prayogaṃ ca japaṃ caiva viśeṣataḥ || 69 ||

samānaṃ sarvametasyāstasyā devyāḥ prakīrtitam |
japādikaṃ vāri sarvaṃ pūrvoktaṃ cātra kīrtitam || 70 ||

araṇyā ca mahākālī pūjāyāṃ nirmalā bhavet |
īśāne śaṅkhamāsādya tatra yantraṃ vilikhya ca || 71 ||

aṣṭamīrātrimārabhya caturdaśyāṃ samāpayet |
aṣṭottaraśataṃ martyo mantrayitvā susaṃyataḥ || 72 ||

nagnastāmbūlapūrṇāsyo muktakeśo jitendriyaḥ |
madirāghūrṇanayanaḥ parayoṣitsamāgame || 73 ||

pūjayed gandhapuṣpena digvāsāḥ kulabhūṣaṇaḥ |
yannāmnā darbhitaṃ yantraṃ pūjayedvīravallabhaḥ || 74 ||

sā samāyāti kāmārtā yatra deśe sa pūjakaḥ |
madyaṃ māṃsaṃ tathā vatsa ! yat kiṃcit kulasādhanam || 75 ||

tasyai dattvā tataḥ śeṣaṃ gurave vinivedya ca |
tadanujñāṃ mūrdhni kṛtvā śeṣaṃ cātmani yojayet || 76 ||

madyaṃ māṃsaṃ vinā vatsa ! kulapūjāṃ samācaret |
janmāntarasahasrasya sukṛtaṃ tasya naśyati || 77 ||

yatrāvaśyaṃ vinirdiṣṭaṃ madirādānapūjanam |
brāhmaṇastāmrapātreṣu madhu madyaṃ prakalpayet || 78 ||

athavā kulamadyena pūjayet kulapūjitam |
yogibhiḥ pīyate madyaṃ tanmadyaṃ yogipuṃgavaiḥ || 79 ||

na madyaṃ pānayogyaṃ syādyanmadyaṃ guḍapiṣṭakam || 80 ||

iti kulacuḍāmaṇitantre pañcamaḥ paṭalaḥ |


ṣaṣṭhaḥ paṭalaḥ

devyuvāca

atha vakṣyāmi te vatsa ! vidhānaṃ yatra yad bhavet |
ānīya devīṃ tad gātre vyāpakaṃ vinyasettataḥ || 1 ||

prathamaṃ sādhakaśreṣṭho devīkūṭasya mastake |
vilikhya yantraṃ pūrvoktaṃ pūjayet kulavartmanā || 2 ||

pīṭhādi devīṃ praṇamet pūjayed gandhapuṣpakaiḥ |
mahābhāgāṃ tato mūladevīmāvaraṇaiḥ saha || 3 ||

lakṣaikaṃ tatra japtvā tu uḍḍīyānaṃ tato viśet |
tatpīṭhe yoganidrākhyāṃ pūjayitvā tato yajet || 4 ||

nijeṣṭadevatāṃ tatra japellakṣaṃ samāhitaḥ |
kāmarūpaṃ tato gatvā tataḥ kātyāyanīṃ yajet || 5 ||

japtvā lakṣaṃ tato rātrau kāmākhyāṃ prathamaṃ yajet |
tato jālaṃdhare gatvā pūrṇeśīṃ prathamaṃ yajet || 6 ||

tatrāpi lakṣamānena japtvā mantraṃ samāhitaḥ |
tataḥ pūrṇagirau gatvā yajeccaṇḍīṃ tato japet || 7 ||

kāmarūpāntare gatvā [vatsa] kāmākhyāṃ prathamaṃ yajet |
tataḥ prānte mahādevīṃ yajeddikkaravāsinīm || 8 ||

evaṃ pīṭheśvarīṃ japtvā pūjayediṣṭadevatām [pūjayitveṣṭa] |
saptapīṭhe saptalakṣaṃ japtvā rātrau samāhitaḥ || 9 ||

saṃkhyāpūrtau [saṃkhyā pūrṇe punaḥ] tataḥ pṛcchet kā tvaṃ devi ! kulottame |
evaṃ kṛte vismṛtā cet svanāmni gotrajanmani || 10 ||

p. 30)

taveṣṭadevataivāhaṃ vṛṇuṣva varamuttamam |
tataḥ praṇamya deveśīṃ vṛṇuyādvaramātmanaḥ || 11 ||

yadyevaṃ naiva sā devī punaḥ pūrvoktamācaret |
akṣobhitakulācāraparicaryāparāyaṇaḥ || 12 ||

athavā sarvapīṭheṣu yajenmahiṣamardinīm |
tataḥ prasannā bhavati svairaṃ kulavarapriyā || 13 ||

tato japtvā mūlamantraṃ sarvasiddhīśvaro bhavet |
rājavṛkṣaṃ samālokya tanmūle sveṣṭadevatām || 14 ||

pūjayitvā mahārātrau tridinaṃ prajapenmanum |
lakṣapīṭhaphalaṃ deva ! labhate sādhakottamaḥ || 15 ||

vetālaṃ pādukāsiddhiṃ khaḍgasiddhiṃ ca bhairava ! |
añjanaṃ tilakaṃ guptiṃ mahiṣāsuramardinīm || 16 ||

sādhayet sādhako'bhīṣṭaṃ mūlavidyāṃ maheśvara ! || 17 ||

bhairava uvāca -

vetālādimahāsiddhiḥ kathaṃ bhavati caṇḍike ! |
tanme [tattvaṃ] kathaya deveśi ! yadi sneho'sti māṃ prati || 18 ||

devyuvāca -

[bilva] nimbavṛkṣodbhavaṃ kāṣṭhaṃ śmaśāne sādhakottamaḥ |
bhaumavāre madhyarātrau śavāsanayugāṅkite || 19 ||

khanitvā cāṣṭalakṣaṃ vai japenmahiṣamardinīm |
tatsahasraṃ hunedvatsa ! tatraiva pitṛkānane || 20 ||

kāṣṭhamuddhṛtya tatraiva daṇḍapādukacihnitam |
gatvā durgāṣṭamīrātrau śmaśāne nikṣipettataḥ || 21 ||

tasyopari śavaṃ kṛtvā pūjayitvā yathāvidhi |
śavāsanagato vīro japedaṣṭasahasrakam || 22 ||

p. 31)

tato mātṛbaliṃ dattvā kāṣṭhamantrayettataḥ |
sphe'm [sphreṃ sphreṃ] spheṃ daṇḍa mahābhāga yoginīhṛdayapriya ! || 23 ||

mama hastasthito nātha ! mamājñāṃ paripālaya |
evamāmantrya vetālaṃ yatra yatra prayujyate || 24 ||

taṃ taṃ cūrṇīvidhāyātha punarāyāti kaulikaḥ |
gaccha gaccha mahābhāge ! pāduke ! varavarṇini || 25 ||

matpādasparśamātreṇa gaccha tvaṃ śatayojanam |
aṣṭalohaṃ [khaḍgabāhuṃ] samāsādya pañcāśadaṅgulākṛtim || 26 ||

khaḍgaṃ kṛtvā tatra yantraṃ likhitvā [hutvā] prajapenmanum |
tat sahasraṃ tato japtvā mahāśavakalevare || 27 ||

khanitvā bījavṛkṣāgre baddhvā rakṣāṃ [śuṣkaṃ tu bhāvayet] tu kārayet |
kulāṣṭamyāmardharātre citāmadhye samāhitaḥ || 28 ||

prītipūrvaṃ samāmantrya hunet pitṛvane tataḥ |
madhuratrayasaṃyuktaṃ bilvapatreṇa saṃyutam || 29 ||

pādādimūrdhaparyantaṃ homānte balimāharet |
balyante paramā māyā devī mahiṣamardinī || 30 ||

āyāti balipūrṇāsyā varahastā madonmukhī |
gṛhṇa vatseti śabde vai khaḍgamuttolya dhārayet || 31 ||

ghoradaṃṣṭre ! mahākāli ! karavālasvarūpiṇi |
kāṁ īṁ ūṁ kuru kalyāṇi vipakṣacchedavistaram || 32 ||

evamāmantrya khaḍgaṃ tu yamuddiśya kṣipennaraḥ |
chittvā chittvā punaśchittvā gacchatyākṛṣyate punaḥ || 33 ||

athavā kṛṣṇamārjāramekaghātena chedayet |
kuje catuṣpathe rātrau nikhanenmantritaṃ tataḥ || 34 ||

p. 32)

tatra mocāṃ samāropya yāvat patraṃ prajāyate |
tāvad bhuktvā haviṣyānnaṃ pratirātraṃ japedabhīḥ || 35 ||

aṣṭottarasahasraṃ tu ekākī dīpavarjitaḥ |
utpannaṃ patramālokya chittvā niśchidramānayet || 36 ||

tatra bhuktvā haviṣyannaṃ taddine taṭinītaṭe |
tamānīya suhṛtsaṅgaḥ kṣālayenmantramuccaran || 37 ||

tacchroto'bhimukhaṃ vatsa ! yadasthi pratigacchati |
tadānīya yajettatra kālikāṃ ghoraniḥsvanām || 38 ||

abhimantrya sahasraṃ tu kālīmantraṃ samāhitaḥ |
siddhājjano bhavenmantrī nātra kāryā vicāraṇā || 39 ||

candanāgurukastūrī miśritaṃ cāsthigharṣaṇam |
kṛtvā saṃpūjya [tilakamādāya] vidhivat sarvaṃ jayati sādhakaḥ || 40 ||

kulamīnaṃ [kulamūlaṃ kuladravyaṃ kulamadyaṃ maheśvara] kulānnaṃ ca 
kulamadyaṃ kuleśvara ! |
kulasthāne samānīya dattvā devyai prayatnataḥ || 41 ||

aṣṭottarasahasraṃ tu japtvā bhūmitale sthitaḥ |
bhūmau phūtkāramātreṇa vivaraṃ tatra jāyate || 42 ||

śatayojanadūre vā yatra sādhyasthitirbhavet |
tatraiva gamanaṃ tasya bhūtalāntaḥprasarpiṇaḥ || 43 ||

evaṃ vivaramadhye vā gavākṣe kuhare'pi ca |
kāyasaṃkocamāsādya gacchatyavikalo naraḥ || 44 ||

durgāmantraṃ vinā vatsa ! kālīmantraṃ tathaiva ca |
siddhayaḥ kulanātheśa ! jāyante na kathaṃcana || 45 ||

iti kulacūḍāmaṇitantre ṣaṣṭhaḥ paṭalaḥ ||


saptamaḥ paṭalaḥ

bhairava uvāca -

mātarmahiṣamardinyāḥ saṃketaṃ kathayasva me |
kulācārasya saṃsiddhyai bhuktimuktiprasiddhaye || 1 ||

devyuvāca -

sṛṣṭisthitivināśānāmādibhūtā maheśvarī |
gopyā sarvaprayatnena śṛṇu tāṃ kathayāmi te || 2 ||

trailokyabījabhūtānte saṃbodhanapadaṃ tataḥ |
sṛṣṭisaṃhārakau varṇau vidyā mahiṣamardinī || 3 ||

atiguhyatarā nityā sṛṣṭisthitividhāyinī |
sarvadevasarvasiddhibījabhūtā sanātanī || 4 ||

atyantagurubhaktāya śuddhāya yadi kathyate |
tadāṣṭavarṇaṃ vaktavyaṃ na bījaṃ nāpi sādhanam || 5 ||

sādhāraṇī prāṇavidyā hṛllekhā siddhigocarā |
etat pūrvasthitā devī gurusiddhivināśinī || 6 ||

viśeṣataḥ kaliyuge mahāsiddhaughadāyinī |
gurūṇāṃ kulanāthānāṃ mahāśāpapradāyinī || 7 ||

jayā durgābhayā proktā paramā siṃhavāhinī |
trailokyabījabhūtānte sā parā mardinīkulam || 8 ||

varaṃ vahnipriyā deyā [yuktā] na deyā namasāhitā |
dattā ca paramā vidyā ṅeyutā hṛdayānvitā || 9 ||

sarvatra kulaśāstrajña ! mahāśāpapradāyinī |
tasmāt sarvaprayatnena goptavyeyaṃ navākṣarī || 10 ||

p. 34)

aṣṭalakṣaṃ japenmantraṃ taddaśāṃśaṃ hunettataḥ |
nārado'sya ṛṣiḥ proktaśchando gāyatramīritam || 11 ||

devatā mahiṣaghnīyaṃ pūrvaṃ bījaṃ parāparā |
dhyāyet kālīṃ mahādaityayuddharāgamadonmukhīm || 12 ||

dakṣiṇe cakrakhaḍgau ca bāṇaṃ śūlaṃ tathaiva ca |
vāme khaḍgaṃ tathā carma dhanustarjanameva ca || 13 ||

bibhratīṃ kālatīvrorumahiṣāṅganiṣeduṣīm |
pītāmbaradharāṃ devīṃ pīnonnatakucadvayām || 14 ||

jaṭāmukuṭaśobhāḍhyāṃ pitṛbhūmisukhāvahām |
oṃ mahiṣahiṃsake hūṃ phaṭ hṛdayāya namo hṛdi |
oṃ mahiṣa(daitya)śatro hūṃ phaṭ śirasyudīritam || 15 ||

oṃ mahiṣaṃ heṣaya heṣaya hūṃ (phaṭ) śikhāmantraḥ samīritaḥ || 16 ||

oṃ mahiṣaṃ hana hana devī hūṃ phaṭ kavaca ityapi |
mahiṣamardinī hūṃ phaṭ astrāṇi śṛṇu bhairava || 17 ||

aṣṭapatre yajeddevīrdurgādyā dīrghapūrvikāḥ |
āyudhāni palāśāgre yādibhiḥ kramaśo yajet || 18 ||

brahmāṇyādyāstataḥ [brāhmyādyāśceti iti tantrasāre] paścāllokapālāṃstato 
bahiḥ |
siddhamantrī tadastrāṇi prayogaṃ ca samācaret || 19 ||

prayoge homaniyamaḥ sahasraṃ vasusaṃmitam |
eṣā vidyā mahāvidyā na deyā yasya kasyacit || 20 ||

yadi bhāgyavaśāllabdhā kuladevī kulottamaiḥ |
dīkṣitā kulajātistu siddhidā saiva nānyathā || 21 ||

mahiṣamardinīstotram

bhairava uvāca -

maccitte cara caṇḍi ! cūrṇitadurācārapracaṇḍāsure !
svairaṃ dāraya bhūri durdharadaradrohormimarmāpadaḥ |

p. 35)

tenāyaṃ nirupadruto nirupamaśrīpādapadmāṭavī-
prāptānantarasārṇave mama manohaṃsaściraṃ nandatu || 22 ||

hitvā caṇḍi ! hiraṇyadāraṇapaṭuproddāmahastāṅguli-
sphāyat kamrasumerusodarasaṭāṭopaṃ nṛsiṃhaṃ surāḥ |
mātastvatpaśupāśapeṣaṇapaṭuśrīpādasaṃsevinaṃ
sevante karivairiṇaṃ kimaribhirbhītirbhavetsevinaḥ || 23 ||

caṇḍi ! tvadviṣayāntarākṣarapadaṃ śrotrāntaraṃ cedgataṃ
tattattvaṃ puruṣaprakṛtyanugataṃ brahmādibhirgīyate |
tasmāddevi ! samastadaivatasudhāsāraikadhāmasphura-
cchrīmatpādapayojacumbanaparaṃ māmadya saṃbhāvaya || 24 ||

mannindā yadi vāstu te kulapathācārādvaraṃ [dvayaṃ] māstu vā
kīrtiḥ keśavakauśikārcanacarī naivāstu matsaṃnidhiḥ |
mātarbrahmaharismarārihutabhugdaityārisevāspada-
śrīmatpādapayojacintanavidhau cittaṃ sadaivāstu naḥ || 25 ||

nirdiṣṭo'smi yadi tvadīyapadayukpūrvāparībhāvane 
nirdiṣṭasya tadā mamāpi viralaṃ kiṃvāstu siddhāspadam |
tasmāddevi ! kṛpābharāñcitataraṃ śrīpādapadmadvayaṃ
maccitte'kṣatasaṃpadi prasaratu kṣemaṃkari ! kṣamyatām || 26 ||

ātmānaṃ [svātmānaṃ] parirabhya bhūtapatirapyunmādamāsāditaḥ
sphāraṃ jīvanarakṣaṇe sa ca kṛtī naivābhaviṣyatprabhuḥ |
daivādvicyutacandracandanarasaprāgalbhyagarbhasrava-
nmādhvīpūrṇabhavatpadaikakamalāmodena nāsvāditaḥ || 27 ||

hā hā mātaranādimohajaladhivyāhāraviddhākhila-
brahmānandarasābhiṣekavirasasvāntodare mādṛśi |
yuṣmākaṃ suravṛndanirbharamanastāpābhibhūtikṣamaḥ
śrīmadbhaktirasātidurdinaparīvāhaḥ sadā sarpatu || 28 ||

p. 36)

yatpādasphuradaṃśujālajaṭharāccaṇḍāṃśukoṭisphura-
tsvāntadhvāntavisāri nirmalacidānandatrayaṃ daivatam |
sargaṃ saṃsṛjati sthitiṃ vitanute sṛṣṭiṃ punarlumpati 
prodbhinnāñjananīlanīradamahaścitte sadaivāstu naḥ 
[tatpādasphuradaṃśujālajaṭharāccaṇḍāṃśukoṭiskhalad-
dhvāntasvāntavisāri nirmalacidānandatrayaṃ daivatam |
sargaṃ saṃsṛjate sthitiṃ vitanute sṛṣṭiṃ punarlampate 
prodbhinnāñjananīlanīradamahaccitte sadaivāstu naḥ || iti tantrasārādṛtaḥ 
pāṭhaḥ] || 29 ||

yā śaśvanmahiṣacchalasphuṭamiladgarjadvidhāvatskhala-
dvaktāntaḥprasarattamastamaśiro daityaṃ samālambate |
sā durgā bhayadurgadurgatiharā lakṣāntaratrāsinī
dṛpyaddaivatavairdāraṇapaṭurjīyājjayāhlādinī || 30 ||

nṛtyatkheṭakacāmarāñcalabalaccakrādyakharvāvara-
sphāyatsainyaśilīmukhocchaladanalpājihmatāmrāmbudhau |
jhañjhāvātavisarpinartitaśiraḥsāṭopaduṣṭāsura-
truṭyatkhaṇḍavikhaṇḍitākhilaśakuntakṣutpipāsojjvale || 31 ||

cañcatkamravirāmakālakalatīvrāsphālasaṃpādako-
nmādyanmāhiṣatiryagānataśiraḥ śṛṅgāntarāle sthale |
vasvarṇairvasupatramadhyakalitairbadhvā śrutīrmātṛbhiḥ
sevye cāru raṇāṅgaṇe raṇamudā ghūrṇāyamānāmbare [curṇāyamānāṃ 
smaret iti tantrasāre] || 32 ||

ūrdhvādhaḥkramasavyavāmakarayoścakraṃ daraṃ kartṛkāṃ
kheṭaṃ bāṇadhanustriśūlabhayahṛnmudrāṃ dadhānāṃ śivām |
śyāmāṃ nīlaghanoccakuntalacayapronnaddhajūṭāṃ skhala-
dvīrāsphālalasatkarālavadanāṃ ghorāṭṭahāsodbhaṭām || 33 ||

evaṃ ye tava devi ! mūrtimanaghāṃ dhyāyanti durgādibhiḥ 
śakrādyairapi pūjitāṃ parapurakṣobhādikaṃ kurvate |

p. 37)

rājyaṃ śatrujayaḥ sadarthadhiṣaṇā kāvyāmṛtādarśana-
stambhoccāṭanamāraṇādikṛtināṃ teṣāṃ svayaṃ jāyate || 34 ||

stotraṃ te caraṇāravindayugaladhyānāvadhānānmayā
mantroddhārakulopacāraracitaṃ [caritamiti tantrasāre] gūḍhopadiṣṭaṃ yadi |
ye śṛṇvanti paṭhanti devi ! tarasā śrīmokṣakāmādaya-
steṣāṃ hastagatā bhavanti jagatāṃ mātarnamaste jaya || 35 ||

devyuvāca -

stotraśravaṇasaṃtuṣṭā prītāsmi tava bhairava |
paśya mūrtiṃ na ca dhyānayogyāṃ mama sukhāvaham || 36 ||

eṣā mūrtiḥ pradhānaṃ me kālīmūrtistathaiva ca |
tripurā bhairavīmūrtirādyā sā parikīrtitā || 37 ||

kulavāre kulāṣṭamyāṃ caturdaśyāṃ viśeṣataḥ |
yoginīpūjanaṃ tatra pradhānaṃ kulapūjanam || 38 ||

yathā viṣṇutithau viṣṇuḥ pūjito vāñchitapradaḥ |
tathā kulatithau durgā pūjitā varadāyinī || 39 ||

bilvamūle prāntare vā śmaśāne vāpi sādhakaḥ |
māṃsapradhānaṃ naivedyaṃ saṃdhyākāle vidhīyate || 40 ||

kālī kālīti vaktavye tatromā śivarūpiṇī |
paśurūpā samāyāti parivāragaṇaiḥ saha || 41 ||

bhuktvā rauti yadaiśānyāṃ mukhamuttolya susvaram |
tadaiva maṅgalaṃ tasya nānyathā kulabhūṣaṇa ! || 42 ||

avaśyamannadānena niyataṃ toṣayecchivām |
nityaśrāddhaṃ tathā saṃdhyāvandanaṃ pitṛtarpaṇam || 43 ||

tatheyaṃ kuladevīnāṃ [kulasevyānāṃ] nityatā kulapūjane |
paśurūpāṃ śivāṃ devīṃ yo nārcayati nirjane || 44 ||

p. 38)

śivārāveṇa tasyāśu sarvaṃ naśyati niścitam |
japapūjāvidhānāni yatkiṃcitsukṛtāni ca || 45 ||

gṛhītvā śāpamāpādya [māsādya] śivā roditi nirjane |
ekayā bhujyate yatra śivayā deva bhairava ! || 46 ||

tatraiva sarvaśaktīnāṃ prītiḥ paramadurlabhā |
paśuśaktirnaraśaktiḥ pakṣiśaktistathaiva [pakṣiśaktiśca bhairava] ca || 47 ||

pūjitā viguṇaṃ karma saguṇaṃ kārayettataḥ [sādhayettataḥ] |
tena sarvaprayatnena kartavyaṃ pūjanaṃ mahat || 48 ||

rājādibhayamāpanno deśāntarabhayādikam |
śubhāśubhāni karmāṇi vicintya balimāharet || 49 ||

gṛhṇa devi ! mahābhāge ! śive ! kālāgnirūpiṇī ! |
śubhāśubhaphalaṃ vyaktaṃ brūhi gṛhṇa baliṃ tava || 50 ||

evamuccārya dātavyo baliṃ kulajanapriyaḥ |
yadā na gṛhyate vatsa ! tadā naiva śubhaṃ bhavet || 51 ||

śubhaṃ yadi bhavettatra bhujyate tadaśeṣataḥ |
evaṃ matvā mahādeva ! śāntisvastyayanaṃ caret || 52 ||

kulācāraṃ dakṣiṇākhyaṃ kathitaṃ tava suvrata ! |
na kasmaicitpravaktavyaṃ yadīcchecchāśvataṃ sukham || 53 ||

nirjane caiva vaktavyaṃ na caiva janasaṃnidhau |
na pituḥ saṃnidhāne vā na mātuḥ saṃnidhau tathā || 54 ||

kiṃ vā pakṣipataṅgādidarśane naiva kārayet |
pātālamaṇḍape vāpi maṇḍape vā suyantrite || 55 ||

niśchidramaṇḍape vāpi kartavyaṃ na ca saṃnidhau |
kulapuṣpaṃ kuladravyaṃ kulapūjāṃ kule japam || 56 ||

p. 39)

guruṃ kulapatiṃ cāpi kulamālāṃ [kulamānaṃ] kulākulam |
kulacakraṃ kuladhyānaṃ sarvathā na prakāśayet || 57 ||

prakāśāt siddhihāniḥ syātprakāśādbandhanādikam |
prakāśānmantranāśaḥ syātprakāśādeva hiṃsanam || 58 ||

prakāśānmṛtyulābhaḥ syānna prakāśyaṃ kathaṃcana |
pūjākāle tu deveśa ! yadi ko'pyatra gacchati || 59 ||

darśayedvaiṣṇavīṃ mudrāṃ viṣṇunyāsaṃ tathā [tathā caret] stavam |
prakāśādyadi guptiḥ syāttatprakāśānna dūṣaṇam || 60 ||

gopanādyadi vyaktiḥ syānna guptiḥ sābhidhīyate |
kadācidaṅgahānistu na ca vyaktiḥ kadācana || 61 ||

varaṃ pūjā na kartavyā na ca vyaktiḥ kadācana |
etattantraṃ gṛhe yasya kulākṣarasamanvitam || 62 ||

kuleśvaralipirvāpi tatraivāhaṃ sadā sthitā |
teṣāṃ gṛheṣu pāpāni duṣkṛtāni bhayādikam || 63 ||

pustakasthitimātreṇa naśyantyatra na saṃśayaḥ |
likhitvā kulahastena kuladravyeṇa bhairava || 64 ||

kulavāre paṭhedvāpi kulahaste ca dhārayet |
sarvathā tasya gehaṃ [dehaṃ] vai na saṃtyakṣyāmi bhairava ! || 65 ||

atyantarogayukto vā śubhahīno'pi vā punaḥ |
etattantrasamāyogāttyājyo na hi kathaṃcana || 66 ||

kulaṃ kaṃcitsamālokya labhyate kulapūjanam |
etadgranthasamāyogāt kapālīkaraṇaṃ yadi || 67 ||

kriyate sādhakendreṇa tadā kiṃ vā na labhyate |
saṃpūjya kuladevaṃ ca gṛhṇīyāccaiva nānyathā || 68 ||

p. 40)

na snehānna ca lobhena na bhītyā kāraṇānna ca |
rājyahānirvaraṃ vāpi sutahānistu vā punaḥ || 69 ||

vittasya hānirvā deva na prakāśyaṃ kadācana |
manmāyāmohitaṃ cāpi anyadevarato'pi ca || 70 ||

prakāśāt kṣobhamāpnoti satyaṃ satyaṃ vadāmyaham |
yathā yoṣiccharīreṇa vicarāmi punaḥ punaḥ || 71 ||

tathemaṃ granthamāsādya tiṣṭhāmi paramā kalā |
mahācīnakramaṃ vāpi mahānīlaṃ sadāśivam || 72 ||

saṃketaṃ vāpi yonmattaṃ yat kiṃcidvīrasādhanam |
kulācāraṃ vinā vatsa naiva siddhipravartakam || 73 ||

kulavāre kularkṣe ca kulalagne kulakṣaṇe |
yoginīnāṃ sadā pūjā manasāpi na hīyate || 74 ||

kulīnāṃ nāvamanyeta nāvajñāṃ kārayedbudhaḥ |
abhibhūtisamākīrṇaṃ vyādhiyuktaṃ ca bhairava ! || 75 ||

etadgranthena nirmucyā [nirgacchetpitṛkopaṃ vidhārayet] piñchakopari dhārayet |
saptāhaṃ kramayogena mukto bhavati durgrahāt || 76 ||

etatte kathitaṃ vatsa ! devīhṛdayamuttamam |
na kasmaicitprayoktavyaṃ pravaktavyaṃ kathaṃcana || 77 ||

idānīṃ bhava sarvajñaḥ sarvatantraviśāradaḥ |
tvameva vaktā śāstrāṇāṃ na paro'pi maheśvara ! || 78 ||

gurustvaṃ sarvatantrāṇāṃ nāhaṃ nāpi hariḥ prabhuḥ |
kāraṇāvasthayāpannā yadyahaṃ kularūpiṇī || 79 ||

na kāryaṃ nāpi yat kiṃcit brahmo'haṃ sphuritaprabham |
kāryabhāvasamāpannā yadāhaṃ viśvarūpiṇī || 80 ||

p. 41)

tadā tvameva tantrāṇāṃ vaktā nāhaṃ maheśvara |
ahaṃ viśāmi tvaddehe śaktyā yukto bhava prabhuḥ || 81 ||

māṃ vinā jananī kāpi naiva kāryavibhāvinī |
ataḥ kārye samutpanne putratvaṃ tvayi vartate || 82 ||

tvāṃ vinā janakaḥ ko'pi naiva kāryavibhāvakaḥ |
atastvameva janako nāstyanyo'pi kathaṃcana || 83 ||

kadācitpitṛrūpo'si kadācidgururūpadhṛt |
kadācitputratāpannaḥ kadācicchiṣya eva hi || 84 ||

śivaśaktisamāyogājjāyate sṛṣṭikalpanā |
śivaśaktisamāyogāt kulādermuktikalpanā || 85 ||

śavaśaktimayaṃ sarvaṃ yatkiṃcijjagatīgatam |
tasmāttvameva sarvatra sarvatrāhaṃ maheśvara ! || 86 ||

sarvaṃ tvameva deveśa ! sarvaṃ cāhaṃ sanātana ! |
gurustvaṃ yadi śiṣyo'haṃ tadā māstu vivecanā || 87 ||

tasmād bhava gururnātha śiṣyāhaṃ parameśvara ! || 88 ||

iti kulacūḍāmaṇitantre saptamaḥ paṭalaḥ ||

samāptaścāyaṃ granthaḥ ||






###########   END OF FILE  #######