####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00341
Uniform title: mātṛkācakraviveka
Author : svatantrānandanatha
Editor : Pandit Lalita Prasada Dabral

Description: 
Volume 50 of the    Princess of Wales Saraswati Bhavana Texts. Edited and with an introduction by Pandit Lalita Prasada Dabral.


Notes: 
Data entered by the staff of Muktabodha under the direction of Mark S. G. Dyczkowski.

Revision 0: Februrary 21, 2016

Publisher : Princess of Wales Saraswati Bhavana Texts
Publication year : 1934
Publication city : Benares
Publication country : India
####################################################



|| śrīḥ ||

mātṛkācakravivekaḥ |

svatantrānandanātha viracitaḥ

prathamaḥ khaṇḍaḥ |

jāgratsuṣuptikṛtadakṣiṇavāmabhāgāṃ
svapnasvabhāvaparikḷptajaghanyabhāgām |

iha khalu paramaśivabhaṭṭārakasya prāṇabhūtayā 
vidyāvidyobhayacamatkāramayyā svarasavāhinyā vimarśaśaktyā samunmīlitāsu 
bāhyābhyantaravividhavicitrasiddhāntavipratipattiṣu viluṭhato lokasyānugrahāya 
śivaprayuktaḥ svatantānandanāmā mahāsiddhaḥ svarasiddhatayā 
nikhilavāṅmayanidānatayā ca mahāpramāṇasya 
mātṛkāmahāmantrasyārthopadeśena nikhilasaṃśayanirāsanirākulaṃ 
paramārthasvarūpaṃ nirūpayitukāma ādau mahāmantrārtharūpiṇīṃ bhagavato 
mahādevasya mahāśaktiṃ granthasya pāramparyapravṛttirūpābhīṣṭasiddhaye 
parāmṛśati-jāgradityādi | suptinivṛttau ghaṭapaṭādīnāṃ 
cidvedanānusandhānadaśā jāgrat suṣuptirjaḍanidrā krameṇa tābhyāṃ kṛtau 
dakṣiṇavāmapārśvau yayā tām | jāgrataḥ kriyārūpatayā dakṣiṇabhāgatvaṃ 
karmapradhānaḥ khalu dakṣiṇabhāgaḥ śarīre'nubhūyate | nidrātmikāyāḥ 
suptervāmabhāgatvaṃ vāmabhāgaḥ khalu niṣkriyaḥ strībhāgaḥ | svapnetyādi |

p. 2)

turyātituryaghaṭitānanahṛtpradeśāṃ 
prāṇeśvarīṃ paraśivasya parāmṛśāmaḥ || 1 ||

anivṛttāyāṃ suptau mānasiko bhedaḥ saṃsāraḥ svapnaḥ sa eva 
svabhāvo'vasthāviśeṣaḥ tena parikḷpto jaghanyabhāgo yonibhāgo yayā tāṃ 
suṣuptijāgranmadhyadaśāyāḥ svapnasya madhyāṅgaucitye 
vikalpodayasthānatvādyonitvamuktam | evaṃ ca suṣuptiḥ saṃsārasya garbhadaśā 
svapnaḥ prasavadaśā jāgrat pravṛddhidaśeti veditavyam | evaṃ 
jīvāvasthātrayātmakaṃ trikoṇaṃ śarīracakrasthitamanusandhāya tatraiva sthitaṃ 
śivatrikoṇamanusandhatte - turyeti | turyaṃ caturdaśā | 
cetyavyāptima(ti)tī | jīvāvasthātraye citkāraṇakasya cāsya 
cinmayatvānusandhānadaśā turyam | tatrāpi yadyapi 
cidvyāptiviṣayabhūtajāgradādyavasthātrayavaśādavasthātrayasambhavaḥ tathāpi 
sarvavyāptimattvācciteraikyena vaicitryābhāvādekavidhatvamuktaṃ turyasya | 
atītaturyaṃ turyātītaṃ saṃsārakalaṅkāspṛṣṭaśuddhāntarmukhacidviśrāntiḥ 
tābhyāṃ krameṇa ghaṭitamukhahṛdayabhāgām | turyasya 
jāgradādidaśāvijṛmbhamāṇacetyakavalanānmukhatvamuktam | mukhaṃ hi 
carvaṇavyāpāravat | atituryaṃ nikhiladaśāprāṇabhūtamiti hṛdayatvenoktam | 
evaṃ ca jāgradādidaśācatuṣṭayātmakacaturasracakrasya athavā 
jāgradādyupādhivaśāt turyasyāpi traividhayabhimāne 
śivajīvatrikoṇadvayaśleṣasambhāvitaṣaṭkoṇacakrasya vā 
śarīrarūpeṇāvasthitasya madhye cakranābhipade hṛdayadeśe 
turyātītaviśrāntyātmanā prāṇakalayā sphurantīṃ caturaṅgāṃ ṣaḍaṅgāṃ vā 
paramaśivasya prāṇeśvarīṃ sattāsaṃpādanīyam | anena pañcāvasthottarā 
sārvatrikatayā akhaṇḍarūpiṇī paramaśivadaśā kācidaṅgīkṛteti 
śivādhikyamuktam | prāṇeśvarīmityanena yadyapi sā paramaśivadaśā sambhavati 
tathāpi tasyāścitsārabhūtavimarśaśaktyadhīnā satteti śaktyutkarṣaḥ parigṛhīta 
iti vijñeyam | parāmṛśāma ityanena namaskārādeḥ sarvasyā api kriyāyāḥ 
paryālocane vimarśamātratvameveti sūcitam || 1 ||

p. 3)

sparśasvarollikhitajāgarasuptyavasthā-
mantaḥsthasūcitasuṣuptyudita prabodhām |
ūṣmoktajāgaradaśoditasuptyavasthāṃ
mantrotkarasya jananīṃ manasā viśāmaḥ || 2 ||

atheyameva pañcāvasthātmakapañcāvayavamūrtiḥ sakalasiddhāntasamaṣṭirūpiṇī 
paramaśivaśaktirmātṛkāmahāmantreṇocyate ityāha - sparśetyādi | kādayo 
māvasānāḥ sparśāḥ sṛṣṭipralayaviṣayatvāt akārādivisargāntāḥ svarāḥ 
uccāraṇe saṅkocavikāsabāhulyānnādakalpā nādā evetyarthaḥ | svaro nādaḥ | 
sparśaiḥ svaraiśca krameṇa ullikhite bodhite jāgarasuptidaśe yayā tāṃ 
sparśairjāgaraṃ svaraiḥ suptiṃ ca vyañjayantīmityarthaḥ | antaḥsthetyādi | 
yaralavā antaḥsthā svarasparśayorantarmadhye tiṣṭhantīti tathoktāḥ | taiḥ sūcitaḥ 
bodhitaḥ suṣuptyuditaḥ suṣuptidaśāyāmevoditaḥ na tu jāgaravatsuptivirāme 
prabodhaḥ ghaṭapaṭādyanusandhānarūpo bodhaḥ svapnamiti yāvat yayā tām | 
antaḥsthavarṇeṣu svapnadaśāmavagamayantīmityarthaḥ | ūṣmetyādi | śaṣasahā 
ūṣmāṇaḥ | pāribhāṣiko'yaṃ śabdaḥ | athavā saṅkucitarūpatayā jaḍānāṃ 
sparśavargāṇāṃ punaḥsaṅkocatyāgarūpa ūṣmādivikṛtatāprārambhalakṣaṇaḥ 
prayatnaviśeṣaḥ yeṣu varṇeṣviti ūṣmāṇastairuktā jāgaradaśāyāmevoditā utthitā 
suṣuptyavasthā jāgarādūrdhvaṃ supteḥ prāgbhavantī yoganidrākhaya jīvāvasthā 
turyaṃ yayā tām | mantrotkarasya bālā śrīvidyā parā mahārthaśāmbhavī 
caraṇavidyādi pāralaukikasya pañcākṣaryaṣṭākṣaryādeḥ laukikasya 
mantrasamudāyasya jananīṃ kāraṇabhūtāṃ mātṛkāmityarthaḥ | manasā 
vimṛśāmaḥ sakalamṛlatayā sakalasiddhihetutvāt 
vividhasamayasamutpāditaparamārthaviṣayasaṃśayasamucchedimahāpramāṇatvāc
ca tadekāgracittā bhavāma ityarthaḥ | atroṣmavarṇokte turye 
kṣakārarūpakūṭākṣaraviṣayasya turyātītasya samullekhanaṃ ca vivakṣitamiti 
niravaśeṣaṃ prameyam || 2 ||

p. 4)

saṅkocasaṃśrayaṇavarjanabhāvabhaṅgyā 
jāgratsuṣuptidaśayorgamakau prayatnau |
dvau spṛṣṭatāvivṛtate viditau sudhībhiḥ
sparśasvarākṣaragatau pariśīlayāmaḥ || 3 ||

sparśādibhirvarṇaiḥ jāgradādayo daśā jñāpyanta ityuktam | 
jñāpyajñāpakayorabhidhālakṣaṇādiṣu kenacitsambandhena bhavitavyam | 
ko'yamatra sambandha ityāśaṅkyāha - saṅkoceti | saṅkocasya saṃśrayaṇe 
parigrahaḥ varjanaṃ tattyāgaḥ tayorbhāvaḥ svabhāvaḥ saṃsthanaviśeṣa iti yāvat | 
tasya bhaṅgyā prakāreṇa sādṛśyenetyarthaḥ | 
jāgratsuṣuptidaśayoryathākramaṃ gamakau jñāpakau dvau yathākramaṃ 
sparśasvarākṣaragatau spṛṣṭatāvivṛtate dvau prayatnau | spṛṣṭatā nāma 
kaṇṭhatālvādīnāmadharordhvabhāgasaṅghaṭṭanarūpo varṇoccāraṇaprayatnaḥ 
vivṛtatā nāma saṅghaṭṭitasya kaṇṭhādibhagadvayasya 
punarvighaṭṭanaprayatnaḥ | kaṇṭhādibhāgayoḥ saṅghaṭṭanameva spṛṣṭatā 
vighaṭṭanameva vivṛtatā | etayoḥ saṅkocagrahaṇatattyāgalakṣaṇau prayatnau 
sādṛśyājjāgrat suṣuptyorbodhakau | abhinayanād vyañjakāviti bhāvaḥ | yathā 
aṅgulimukulanādirvyañjakaḥ tadvaditi bhāvaḥ | ghaṭapaṭādigrahaṇapade jāgrati 
tvātmanaḥ saṅkocabhāvaḥ viśrāntipade suṣuptu tu pūrṇabhāva 
ityetadanubhavavedyam | ato jāgratsuṣuptyoḥ sparśasvarakadambakābhyāṃ 
saṅkocagrahaṇatattyāgarūpamavasthāsādṛśyaṃ prekṣāvadbhiraṅgīkriyata eva 
| tadeva sādṛśyaṃ vyaṅgyavyañjakasambandhakalpakamityabhiprāyaḥ | 
sudhībhirviditāviti viśeṣaṇena varṇānāmavasthānāṃ ca 
vyaṅgyavyañjakasambandhanidānabhūtau prayatnau 
prekṣāvanmātragamyāvityuktānāṃ varṇānāmeva daśāgamakatve'pi 
saṅkocatattyāgarūpamavasthāsādṛśyaṃ varṇānāṃ prayatnamūlamiti 
prayatnayoravasthāgamakatvamupacaritaṃ pariśīlayāma 
ityetatprayatnaparyālocanamevāsmābhirapyanusandhīyate nātaḥ paraḥ 
samādhirityupadiṣṭam || 3 ||

p. 5)

spṛṣṭiryavargaviṣayā vivṛtatvayuktā
spṛṣṭyanvitā vivṛtatā ca śavarganiṣṭhā |
tau svapnaturyadaśayorgamakau prayatnā-
vetau smarāmyasakalāparipūrtipūrtyoḥ || 4 ||

athāntaḥsthoṣmaṇāṃ svapnaturyagamakatve 
sambandhamupapadayatispṛṣṭirityādi | yavargaviṣayā spṛṣṭḥ spṛṣṭatā 
prayatna vivṛtatvayuktā miśraprayatna ityarthaḥ | atra spṛṣṭatāyāḥ 
prādhānyaṃ vivṛtatāyāstu tadanuvṛttyā guṇatvam | evaṃ ca 
yavargoccāraṇaprayatnasya spṛṣṭatāyā vivṛtatvasaṅkīrṇatayā asamagratve 
īṣatspṛṣṭatvamiti vivekaḥ | śavargoccaraṇaprayatnasya vivṛtatāyāḥ 
spṛṣṭatāsaṅkīrṇatayā sāmagryabhāve īṣadvivṛtatvameveti veditavyam | ata 
evaitau prayatnau asakalāparipūrtipūrtyoḥ asamagrasaṅkocapūrṇabhāvayoḥ 
svapnaturyadaśayoḥ yathākramaṃ gamakau īṣatsaṅkocarūpasya svapnasya 
īṣatspṛṣṭatā īṣatpūrṇarūpasya tūryasya īṣadvivṛtatā ca pūrvavatsādṛśyāt 
vyajyata iti bhāvaḥ | atraiva gamyate spṛṣṭaṃ karaṇaṃ 
sparśānāmīṣatspṛṣṭamantaḥ sthānāmiti vaiyākaraṇairyaduktaṃ tatsādhu 
vivṛtamūṣmaṇāṃ svarāṇāṃ cetyetattu 
uṣmasvarānubhavavirodhādupekṣaṇīyamiti | smarāmīti | svānusandhānenāsya 
upadeśyajanaśikṣā vivakṣitā || 4 ||

p. 6)

pūrṇaiva pūrtiravikalpapade suṣuptau
jāgratyapūrtirapi saṃsṛtidhāmni tadvat |
jāgratsuṣuptisamavāyapade turīye 
svapne ca tādṛśi tayorasamagrataiva || 5 ||

athānubhavavedyaṃ jāgradādīnāṃ saṅkocavikāsādyānandānvayāyopapādayati 
- pūrṇetyādi | avikalpapade nirvikalpakakṣyāyāṃ 
bāhyābhyantarendriyaviśrāntirūpatvāditi bhāvaḥ | idaṃ ca viśeṣaṇaṃ 
pūrtisamagratāyā hetutvenoktam | vikalpābhāva eva nirāghaṭapūrṇabhāvabodhaka 
ityanubhavaḥ pramāṇam | avikalpapadatvāt suṣuptau pūrtiḥ pūrṇaiva samagraiva 
saṃsṛtidhāmni ghaṭapaṭādyananusandhānarūpaviśrāntyaspṛṣṭasaṃsārapade 
gāḍhavikalpodayasthāna iti bhāvaḥ | idaṃ ca saṅkocabhāvasamagratāyā 
hetutvenoktaṃ viśeṣaṇam | gāḍhavikalpodaya eva mahāsaṅkocasamarpaka iti 
cānubhava eva pramāṇam | jāgratsuṣuptisamavāyapade miśrapade turye 
caturthadaśāyām | yadyapi turye cidviśrāntilakṣaṇasuṣuptivyāptiḥ tathāpi 
sājāgradvyāptiścetyepyanusandhīyata iti 
vikalpaspṛṣṭatayājāgrataścānuvṛttiriti miśratvameva | svapne ca tathāvidhe 
miśrarūpe yadyapi svapnasya vikalpaprādhānyāt jāgratsuṣuptisamavāya 
ubhayorekarūpaḥ tathāpi miśratvamātrasāmānyavivakṣayā svapnasya 
turyasāmyamuktam | tādṛśīti | tayoḥ pūrtyapūrtyoḥ asamagrataiva turye 
pūrtyasāmagryaṃ svapne tvapūrtyasāmagryaṃ ca krameṇa yojyam || 5 ||

p. 7)

svapnaḥ suṣuptyanugataṃ nanu jāgradeva
turyaṃ ca jāgradanuvṛttasuṣuptireva |
svapnastathā ca sati jāgrata eva bheda-
sturyā daśāpi ca tathaiva suṣuptibhedaḥ || 6 ||

uktaprakāreṇa sparśādibhirvarṇaiḥ jāgradādīnāṃ saṅkocabhāvādilakṣaṇaṃ 
sādṛśyena gamyagamakabhāvasaṃbandhanibandhanaṃ praipādya 
jñānakriyārūpatayā pratyekaṃ dvaividhyaṃ jāgratsuṣuptyoḥ | tatra svapno 
jñānajāgrat yā jāgraditi prasiddhā daśā sā kriyājāgrat tadā turyaṃ 
jñānasuṣuptiḥ yā suptiḥ yā suṣuptiriti prasiddhadaśā sā kriyāsuṣuptiḥ | tataḥ 
svapno jāgradbheda eva turyaṃ ca suṣuptibheda eveti daśācatuṣṭayasya 
vargadvayarūpatāṃ tatsvarūpajñānādyadhikaraṇāya samupadiśatisvapnaḥ 
suṣuptyanugatamityādinā | nanu svapno nāma jāgradeva yathā jāgrati 
ghaṭapaṭādayo gṛhyante tathātrāpīti | ayameva viśeṣaḥ yatsvapne 
suṣupteranuvṛttiḥ jāgrati tannivṛttiriti | atha turyaṃ ca suṣuptireva | tathā 
viśrāntyupalambhādatra cāyameva viśeṣaḥ yatturye jāgradanuvṛttiḥ suṣuptau tu 
tannivṛttiriti | evaṃ viśeṣālpatayā svapnaturīyayoḥ jāgratsuṣuptibhedatvaṃ 
veditavyamiti bhāvaḥ || 6 ||

p. 8)

jñānātmanāntarudite khalu bodhasupti-
svapnasturīyamiti nāmaviśeṣabhājau |
vāhye kriyātmakatayoditayostayoḥ syā-
dākhyā prabodha iti suptiriti prasiddhā || 7 ||

svapnaturyayorjāgratsuṣuptyapekṣāmabhisphuṭīkaroti - jñānātmaneti | 
jñānākāratvameva varṇabheda iti prakrāntaprameyatātparyam | jñānātmaneti | 
bodhaśca suptiśca bodhasuptī ityarthaḥ | prathamamantaḥ abhyantarakṣāyāṃ 
jñānātmanā jñānarūpeṇa udite (sati) yathākramaṃ svapnasturīyamiti 
nāmaviśeṣau bhavataḥ | atha vāhye vāhyendriyakakṣāyāṃ kriyātmakatayā 
kriyārūpeṇa uditayostayorjāgratsuṣuptyoḥ prabodha iti suptiriti jāgratsuṣuptiriti 
prasiddhākhyā vyavahāro bhavatītyarthaḥ | etenābhyantarendriyānusandhānaṃ 
jñānarūpaṃ bāhyendriyānusandhānaṃ kriyārūpamiti veditavyam | 
saṃsṛtiścaviśrāntiśca prathamamābhyantarendriyānusaṃhitā satī paścād 
bāhyendriya prathāyāmavataratīti vivekaḥ | sarvasyāpi bhāvasya 
śivaśaktyātmakatayā jñānakriyārūpatvamiti bhāvaḥ | evaṃ ca 
jñānajāgratkriyājāgrajjñānasuṣuptiḥ kriyāsuṣuptiḥ punarapi 
jñānajāgradādītyevaṃ daśā catuṣṭayādavataratasturyātītanābheḥ kālacakrasya 
paribhramaṇamanusandheyamiti tātparyam || 7 ||

p. 8)

jāgradbahirvilasanaṃ nanu bhedasṛṣṭeḥ
svapnontarullasanamityubhayī daśaiva |
turyābhidhānamupayātyavibhedasṛṣṭau
sṛṣṭidvayasya janiviśramabhūssuṣuptiḥ || 8 ||

idānīṃ jāgradadidaśācatuṣṭayasya 
bhedābhedarūpasaṃsāratadviśrāntisvabhāvatāṃ yathāyogamupadarśayati - 
jāgradbahirityādi | sṛṣṭiḥ pravṛttirūpasaṃsāraḥ bhedasṛṣṭeḥ 
bhedarūpapravṛttisaṃsārasya bahirvilasanaṃ 
bāhyendriyakakṣyāyāmavabhāsanaṃ jāgrat tasyā eva bhedasṛṣṭeḥ 
antarullasanaṃ ābhyantarendriyakakṣyāyāṃ sphuraṇaṃ svapnaḥ daśādvayamidaṃ 
paśoḥ saṃsārabhūmiriti veditavyam | ityubhayī daśaiva 
jāgratsvapnarūpadaśādvayamevāvibhedasṛṣṭiḥ | avibhedo vibhedasyābhāvaḥ 
saṃhāraḥ viśrāntyaunmukhyena bhedanivṛttimārgaparigrahaḥ tatsṛṣṭau 
turyābhidhānamupayāti bhedasaṃsārādayaṃ mārgaḥ 
jāgradantadaśātrayāpekṣayā caturthatvāccaturthaḥ caturthaparyāyaḥ khalu 
turyaśabdaḥ | suṣuptisvabhāvaṃ darśayati - sṛṣṭidvayeti | sṛṣṭidvayasya 
bhedābhedarūpasya janirutpattiḥ viśramo vilayaḥ tadbhūstatpadaṃ suṣuptiḥ 
suṣupterbhedābhedaviśrāntirūpatayā pratipādayiṣyamāṇayā 
jīvaśivasaṃsārodayavilayabhūmitvam | etaduktaṃ bhavati - 
suṣuptyādijāgradantena bhedarūpeṇa padatrayeṇa jīvaḥ saṃsarati | 
jāgradādisuṣuptyantenābhedarūpeṇa turyābhidhānajuṣā tenaiva padatrayeṇa śivo 
(khyānānvi)śramate taṃ viśramamārgaṃ pāśameva bhajannapi māyayā 
na vimṛśati | evaṃ 
śivo'pīcchājñānakriyāparyāyabhedarahitasuṣuptisvapnajāgrattayeva saṃsarati 
turyaparyāyajāgradādisuṣuptyantanivṛttimārgeṇa viśramate ca | yadyapi śive 
pravṛtti nivṛtti mārgayorabhedaikarūpatvāt turyavyavahāro vidyate tathāpi 
nivṛttimārga eva tasya vyavahārasya mukhyatvamiti mahopadeśaḥ | 
advaitasaṃsārasya dvaitasaṃsārasamaḥ samādhirityuttarapratipādayiṣyamāṇeṣu 
tatpadeṣu tatprakriyonnayanam || 8 ||

p. 10)

sṛṣṭā bahiḥ śivacitā prakṛtirvisarga-
stāṃ svātmanā kavalayan śiva eṣa binduḥ |
saṃsāraviśramajuṣoriti nāmadheye
saṃsāriṇau paśuśivau ca paśuḥ śivaśca || 9 ||

evaṃ daśāsvarūpamupadiśya tadadhiṣṭhātṛbhūtaṃ śivajīvasvarūpaṃ 
nirūpayiṣyan prakṛtopayuktatayā mantrasamayāsiddhāṃ binduvisargaparibhāṣāṃ 
vyautpādayati - sṛṣṭā bahirityādi | śivacitā śiva iti vyavahriyamāṇayā citā 
prakāśatattvena bahiḥ bahiriva na tu paramārthato bahiḥ | sarvavyāpivastunaḥ 
prakāśabhittilagnatāyāṃ satyāmeva sattāsiddheḥ tadbahiṣṭhatāyāṃ tadasiddheḥ | 
sṛṣṭā visṛṣṭā | visarjanamapi camatkāramātrā | prakṛtiḥ svabhāvaḥ 
vimarśa ityavagantavyam | prakāśasya vā svabhāvo vimarśaḥ | yena svabhāvena 
vinā prakāśasyārtho parāgepi sphaṭikādikasyeva jāḍyaṃ prasajyata iti 
prāptasvasaṃvicchāstrakārairuddhoṣitamantramātrasamayaṃ 
dīkṣānantaramadhikṛtasaṃvicchāstrasiddhāntā eva paramarahasyarūpasya 
mantrāthasyopadeśādhikāriṇa ityasmābhiriha mantrārthavivekaprastāve 
saṃvinmatasāramātramevodgīryata ityanabhiyogaḥ | prakāśo hi 
svasvabhāvabhūtaṃ svātmaviśrāntaṃ 
parāprakṛtisvātantryamāyāvidyādiśabdairāgamikairvahriyamāṇaṃ 
jagadbījabhūtaṃ vimarśaṃ kadācit prapañcānusandhitsāyāṃ svātmabhittāveva 
bahiriva visṛjyata iti visargaśabdavācyo vimarśo vedyākāravān vedakaṃ 
kavalayati ata eva pramātā ca bhavati | sa (na ?) ca vedakaścidrūpo'pi 
pramuṣitavaibhavaḥ prameyatāmupagato jīvo bhavati | yadā punaḥ sa śivaprakāśaḥ 
prapañcasañjihīrṣāyāṃ tāṃ vimarśarūpiṇīṃ prakṛtiṃ svātmanā kavalayati 
tadā (bhi)vididhātoravicchedārthatayā (bhi)vidyante'vicchidyata 
iti binduśabdavyavahāryo bhavati | binduravicchedakāraṇamiti bhāratīyānāṃ ca 
vyavahāraḥ | aparicchinnasvabhāvo bhavatītyabhiprāyaḥ | evaṃ vedyātmano 
vimarśasya (vi)sargatvaṃ vedā(dakā)tmanaḥ prakāśasya 
vindutvamupadiṣṭaṃ bhavati | etadevāha - saṃsāraviśramajuṣoriti | 
saṃsaraṇasvabhāvo vimarśaḥ (viśramaṇa)aruṇasvabhāvaḥ prakāśaḥ 
tayorityuktaprakāśau vimarśaprakāśayorvisargabinduśabdau nāmadheyatvena 
paribhāṣitau | atha visargasamunnitasya vicitrasya saṃsārasya sāmānyadṛṣṭyā 
viṣayamāha - saṃsāriṇā iti || 9 ||

p. 11)

dvaitātmakaṃ bhavati saṃsaraṇaṃ paśosta-
ddvaitarūpamabhavasya parasya śambhoḥ |
miśraṃ trirūpamapi saṃsaraṇaṃ yataḥ syā-
dviśrāntibhāktadiha dhāma paraṃ hi binduḥ || 10 ||

paśuśivaparaśivāsāmānyāḥ na (sāmānyena) tāvatsaṃsāriṇa eveti 
pradarśitam | idānīṃ paśvādīnāṃ vivicya saṃsāraviśeṣaviṣayatāmupadarśayati 
- dvaitātmakaṃ bhavatīti | tatra visargaparyāyasya vimarśasyāvidyārūpeṇa 
bhedacamatkāronmīlanāditi bhāvaḥ | tatsaṃsaraṇaṃ abhavasya śivasya saṃbandhi 
advaitarūpaṃ tatra vimarśātmakavidyārūpeṇābhedacamatkāraparigrahāt 
tathātvamityavagantavyam | parasya śambhoḥ saṃsaraṇamityanuvartate | miśraṃ 
dvaitādvaitarūpaṃ tatra vidyāvidyobhayarūpiṇyā vimarśaśakteryaugapadyena 
bhedābhedaikarahasyapradarśanacamatkārābhyupagama iti veditavyam | atra 
tṛtīyakakṣyāyāṃ paraśambhupadopādānena trikaviśrāntisiddhante'pi 
bahumatirupasūcitā | tasyāpi tṛtīyapadādhiṣṭhātṛsaṃsāreṣu parigaṇanaṃ 
catuṣṭayārthamataśraddhayā kṛtam | ataḥ saṃsārakalaṅkā spṛṣṭaṃ 
śuddhāntarmukhaviśramasvabhāvaṃ mahābindupadaṃ vivecayati - 
trirūpamityādi | yataḥ yatreti trirūpamapi saṃsaraṇaṃ viśrāmyati | 
tatparamanuttaraṃ dhāma vinduriti niṣkṛṣṭamiti bhāvaḥ | yadyapi 
caturthakakṣyāyāḥ sarvasaṃsāropādānabhūtapūrṇavimarśasvabhāvatayā 
mahāviśrāntipadatvaṃ tathāpi 
kakṣyātrayodañcitaprapañcakalakalānusaṃndhānagandho nopaśānta iti 
taduttīrṇaṃ pañcamameva paravyomalakṣaṇaṃ padaṃ 
pañcamāmnāyapariśodhitaṃ niṣkalamahābindutattvamiti tāttvikasiddhāntaḥ | 
atraitaduddiṣṭaṃ bhavati | yatpaśoḥ suṣuptyādyavasthātrayaṃ bhedarūpaṃ athavā 
bhedarūpāyāṃ śaivīturyadaśāyāṃ ca tadatītadaśā | 
etasminsvarasparśādibhirmantraiḥ abhidhīyata iti pratipādite daśāpañcake 
bhedābhedamiśrasaṃsārarūpāstisro daśāḥ sarvasaṃsāraikaikaviśrāntirūpā 
(rūpāṇāṃ) caturtha daśānāṃ (caturthadaśāntargatānāṃ) 
yogaḥ turye caturthadaśāyāṃ yogaḥ tadatīte mahābindudaśāyoga iti tadvivekaḥ | 
trividhasaṃsāratadekarasaviśramataduttīrṇamahāviśramadaśāsu sarvamapi 
daśājātamantarbhutamiti siddhajanaghaṇṭāpathaḥ | ato'yamupadeśo 
manīṣijanahṛdayaṅgama ityalamatiprasaṅgena || 10 ||

p. 12)

gauṇo hi binduriti vittirabhedarūpā
śaivī tanūrbhavati bhedapadaṃ tu vedyam |
jīvasya saṃvarakamasya tataḥ svarūpaṃ 
sargairbhavedvyavahṛtirmahatāmitīyam || 11 ||

uktanyāyena bindoraparicchedalakṣaṇatvācchivasya vikalpaspṛṣṭyā 
paricchedasaṃbhavena vindulakṣaṇasyāsamagratve'pi gauṇanyāyena 
binduvyavahāro'ṅgīkriyate ityāha - gauṇetyādi | vṛttiḥ saṃvittiḥ 
abhedarūpā | idaṃ viśeṣaṇaṃ 
gauṇavinduvyavahārahetubhūtaguṇagarbhitamabhedarūpatvaṃ guṇaḥ tadvattayā 
gauṇo vindurbhavatīti viśeṣaḥ | sā vittiḥ śaivī śivasaṃbandhinī tanūḥ svarūpaṃ 
bhavati miśrasaṃsārādhiṣṭhāturapyevaṃ bindutvamūhanīyam | 
vyavahārabāhulyābhisāndhinā śivasyaivoktaṃ bindutvamiti veditavyam | evaṃ 
paśorapi paricchede satyapi cidrūpatayā bindutvaṃ prāptameva | atha tasya 
caityavyāptatayā visargatvamapi saṃbhāvitamityāha - bhedapadamityādi | 
bhedapadaṃ bhedasthānaṃ vedyaṃ tu śabdo vittisvarūpācchivājjīvasya 
bhedamavagamayati | jīvasya saṃvarakaṃ tata evāsya svarūpaṃ yadyasya 
saṃvarakaṃ tattasya svarūpamiti bhāvaḥ | vedyamapi bhedasya saṃvarakaṃ 
vyāpakaṃ tatastasya svarūpaṃ bhavatītyarthaḥ | ato vedyarūpatayā jīvasya 
vedyavadvisargaśabdavyavahāraviṣayo bhavedityarthaḥ | mahatāṃ 
mantrasamayavidāmiti | iyamuktaprakārā vyavahṛtiḥ vyavahāraḥ || 11 ||

p. 13)

caityaṃ vimarśapariṇāmadaśāvimarśa-
ściddharma eṣa ca cito jananāllayācca |
nāstyeva sā cidapi yadyavimṛṣṭarūpā
dharmastato bhavati cicca vimarśaśakteḥ || 12 ||

atha paśuśivapadayoḥ vedyavedakānyonyakavalanamityuktaṃ tatra kiṃ 
nimittamityākāṅkṣāyāmāha - caityamityādi | 
śivaśaktiparyāyaprakāśavimarśapariṇāmo jagaditi rahasyāgamasiddhāntaḥ | 
yadyapi vimarśasyaiva vilāso jagadityaṅgīkṛtaṃ purātanaiḥ tathāpi vimarśasya 
prakāśamantareṇa svarūpāsiddhervimarśo jagadākāreṇa vilasannapi tatra jagati 
prakāśāṃśamardhenāvabhāsayati ardhena nijāṃśaṃ tatra vedakaḥ 
prakāśāṃśaḥ vedyaṃ vimarśāṃśaḥ | evaṃ sati vedyaparyāyaṃ caityaṃ 
vimarśapariṇāmadaśā tatparyālocane vimarśa eva | eṣa ca vimarśaḥ ciddharmaḥ 
prakāśasya dharmaḥ | kutaḥ - cito jananāt layācca yataḥ prakāśādevodeti 
tatraiva vilīyate ca tataḥ sarvasyāpi vastunaḥ sphuraṇena vinā sattābhāvāt 
sphuraṇasya tu prakāśādīnatvāt prakāśakāraṇakatvamavaśyamaṅgīkāryam | 
kiñca śabdarūpasya vimarśasya gaganādudayo gagana eva layaḥ sambhāvitaḥ 
tadeva gaganaṃ prakāśa ityalaṅkṛtādi kāruṇyupadeśye 
pratipādanalampaṭena(?) | athānyasminpakṣe prakāśo'pi vimarśasya 
dharma ityāha - nāstyeveti | sā citprakāśo'pi yadyavimṛṣṭarūpā 
iyamīdṛśīti vimarśena anirdiṣṭasvarūpā cet nāstyeva 
idamīdṛgityavimṛṣṭasyāpi vastunaḥ sattāyāṃ śaśaviṣāṇāderapi sattvaṃ 
prasajyate | tataḥ sarvamapi vastu koṭyadhirohe vimarśamapekṣata iti prakāśasyāpi 
sattve vimarśakāraṇakatvena vimarśadharmatvamavaśyamaṅgīkartavyamityāha 
- dharmastato bhavatītyādinā || 12 ||

p. 14)

ciccaityayoriti same sati dharmadharmi-
bhāve parasparapadākramaṇaṃ svabhāvaḥ |
caityāvṛtā bhavati citpaśureṣa caitya-
māvṛṇvatī cidapi yāti śivaprasiddhim || 13 ||

prakāśavimarśayoranyonyadharmadharmibhāvapravacanasya prakṛtopayogamāha 
- ciccaityayorityādi | iti uktaprakāreṇa ciccaityayoḥ dharmadharmibhāve same 
sati parasparapadākramaṇaṃ svabhāvo naisargiko vyāpāro bhavati | dharmiṇo 
dharmapadavyāptyau cityāditi bhāvaḥ | ciccaityayoranyonyākrameṇaikā vā daśā 
sambhāvyata ityatnāha - caityāvṛtetyādi | caityāvṛtā cit eṣa paśurbhavati 
eṣa iti puro nirdeśena svaśaktipramoṣapariprāptaṃ dīnabhāvaṃ nidarśayati atha 
caityamāvṛṇvatī vyāpnuvantī cit śiva iti prasiddhiṃ yāti || 13 ||

p. 15)

ciccaityayoḥ samatayā stimite svabhāve
miśraṃ tu madhyamapadaṃ paraśambhurūpam |
ciccaityamiśraṇatayā tadayaṃ trirūpo
dharmī ca tattaducitaśca tathā vimarśaḥ || 14 ||

idānīṃ ciccaityayoḥ samavyāptipadasya tṛtīyatattvasya svarūpaṃ 
vipratipattiviṣayatayā samyagupadiśati - ciccaityayorityādi | ciccaityayoḥ 
samatayā samavyāptikatvena svabhāve stimite niścale sati 
viśrāntisvabhāvāvagāhitayā niścalaṃ tanmadhyamapadaṃ miśramiti 
vyavahriyamāṇamiti paraśambhurūpaṃ bhavatīti śeṣaḥ | tu śabdaḥ 
śivajīvābhyāṃ bhedābhidhāyakaḥ madhyamapadamityanenāsya padasya 
tṛtīyatve'pi śivajīvobhayasvabhāvatayā sandhitvaucityena 
madhyamatvamapyaṅgīkṛtamityupadiṣṭaṃ 
pravṛttinivṛttirūpayorjīvaśivavyāpārayorekakālīnatvaparyālocanāyā##-
samavyāptipadatvena sambhāvyate saiva 
stimitadaśobhayamūlatayobhayapakṣavyāpinī pakṣadvayagataviśeṣasvāmyaṃ 
labhate | yathā bahuviṭapamūlapadabhūtā taruśākhā viṭapasambandhiṣu 
puṣpaphalādiṣu svatvaṃ bhajati taruśākheyaṃ puṣpitā phalitā tadvat | 
tadevaṃrūpeṇaiva miśrapadapramātuḥ śivajīvavyāpārayaugapadyānusandhānaṃ 
na tu vikalpakakṣyādhiroheṇa śivajīvavat | tathātve tṛtīyapadavyavasthitasya 
mahātattvasya śivajīvapaṅktau tatsārthakyena vyāpārāntarāṅgīkāralampaṭe 
śivajīvasvabhāvānupraveśavaibhavasyāpyabhāvāt tadubhayāpekṣayā 
dākṣiṇyamūla evotkarṣo'pi syādityalamasāmayikavivādāgraheṇa | tadatrāyaṃ 
vipratipattyā vārtā nopakartavya(?) iti prameyatātparyamuktam | 
jīvādisvarūpaṃ traividhyanigamanadvāreṇa dṛḍhīkurvannāha - ciccaityeti | 
miśrarūpatattvena ayamaparokṣabhūto dharmī dvaitānusandhānarūpo vimarśa 
evātra dharmaḥ tadvān pramāteti yāvat | trirūpaḥ 
mantravyavahārabāhulyadṛṣṭyā trairūpyamuktaṃ na tu 
caturthapañcamadaśayoranantaroktadharmasya dvaitādirūpasya vimarśasya 
traividhyāt dharmitraividhyamityabhipretyāha - tattaducitaśceti | aucityaṃ jīvasya 
dvaitavimarśaḥ śivasyādvaitavimarśaḥ paramaśivasyobhayātmakavimarśa iti || 
14 ||

p. 16)

cittiśca caityamapi tacca vimarśatattvaṃ
jñānakriye na hi tayoḥ paramārthabhedaḥ |
jñānaṃ gṛhītakaṭhinatvaguṇaṃ kriyā syā-
jjñānaṃ bhavedviralimāśrayiṇī kriyaiva || 15 ||

evamatra viṣayopayuktaṃ śivarūpaṃ śivasya jīvatrayasvarūpaṃ 
sphuṭataramupapādya tadatyantopayuktaṃ jñānakriyāsvarūpaṃ vyutpādayati - 
citiścetyādi | cideva citiḥ sā ca abhedarūpaṃ khalu jñānaṃ ghaṭo jñāta iti 
bhinneṣvapi ghaṭapaṭādiṣvekarūpatvenābhinnatayānubhūyamānatvāt | bhedarūpā 
khalu caityarūpiṇī kriyā caityānāṃ 
ghaṭapaṭādīnāmanyonyavyāvṛttasvarūpatayā bhedarūpeṇānubhūyamānatvāt | 
evaṃ ciccaityarūpayoḥ jñānakriyayoḥ pāramārthiko na bheda ityāha - na hi 
tayorityādi | ciccaityayoryo'yaṃ bhedāvabhāsaḥ sana (pāramārthikaḥ - 
api) tu māyāparyāyaviparyayajñānanibandhana ityabhiprāyaḥ | 
tattvabhedaściccaityayorityatrāha - jñānamityādi | jñānaṃ prakāśaḥ 
gṛhītakaṭhinatvaguṇaṃ vimarśākāreṇeti bhāvaḥ | ākāśasya kāṭhinyaṃ 
śabdaḥ tadā cidākāśasya kāṭhinyarūpo vimarśa iti prakāśavimarśayoḥ 
jalakarakayoriva na vāstavo bheda iti tātparyam | nanu prakāśavimarśayoḥ 
jalakarakayoriva bhedo māstu caityātmikatvena ghaṭapaṭādinānārūpāyāḥ 
kriyāyāḥ jñānarūpātprakāśādbhedo durapanhavaḥ | varṇarūpādvimarśādapi 
pṛthubudhnodarādyākāratayā ghaṭapaṭādayo bhidyanta eveti 
cedghaṭapaṭādinaḥ sarvasyāpi vastuno ghaṭapaṭādiśabdarūpavimarśātiriktaṃ na 
kiñcidapi svarūpaṃ vivekadaśāyāmavatiṣṭhata iti 
gurukaṭākṣaparikṣapitamāyāndhakāraiḥ supratipannatvāt jñānābhedaṃ 
kriyāyāḥ pratipādya kriyāyā abhedaṃ jñānasya pratipādayati - jñānaṃ 
bhavedityādi | sāpi vimarśarūpiṇī kriyā viralimāśrayiṇī kāṭhinyaparityāgena 
viśrāntilakṣaṇaṃ viralimānaṃ parigṛhṇāti | jñānaṃ bhavetprakāśaikarasyaṃ 
prāpnotītyarthaḥ | evaṃ jñānasya bahīrūpaṃ kriyā kriyāyā āntaraṃ rūpaṃ 
jñānamiti tayorekārthatvāmiti niṣkarṣaḥ || 15 ||

p. 17)

jñānasya sidhyati vinā kriyayā na rūpaṃ
tasyāstathaiva na hi tena vinopalambhaḥ |
tasmāttayoryamalataiva mataṃ hi saiddhaṃ
pūrvāparatvakalanaṃ tviha pūrvapakṣaḥ || 16 ||

atha śivaśaktisvarūpayoḥ jñānakriyayostulyaprādhānyatayā 
yaugapadyasiddhisaṃpratipattimūlayāmalasiddhāntaṃ mantrahṛdayabhūtatvena 
siddhābhimataṃ pratibodhayannetanmatābhyupagamamūlabhūtaṃ 
prakāśavimarśaparyāyajñānakriyānyonyakāraṇakatvaṃ prāguktamevānuvadati 
- jñānasyetyādinā | hi yasmāt kriyayā vimarśena vinā jñānasya 
prakāśasvarūpaṃ na sidhyati tathaiva tasyāḥ kriyāyāstena jñānena 
vinopalambhanāsiddhiḥ tasmāttayorjñānakriyayoryamalatā yutapatsiddhataiva 
saiddhaṃ siddhasambadhi mantrahṛdayatvāditi bhāvaḥ | iha 
jñānakriyāsiddhivicāraviṣaye pūrvāparatvakalanaṃ tu pūrvapakṣaḥ 
vedyavedakākāreṇa prakṛtipuruṣākāreṇa dehātmākāreṇa śabdārthākāreṇaiva 
paryāyaprakārāntarākāreṇa vā kriyājñānayoḥ siddheḥ 
paurvāparyābhyupagamaḥ pūrvapakṣatvameva bhajati nirvoḍhumaśakyatvāditi 
tātparyam || 16 ||

p. 18)

ardhaṃ kriyā bhavati dakṣiṇamanyadardhaṃ
jñānaṃ samatvamanayorapi madhyamicchā |
icchaiva bījamacalāntarabāhyagatyā
jñānaṃ kriyā ca khalu mūlamihāṅkuraśca || 17 ||

idānīṃ 
jñānakriyayoranyonyāvinābhāvasvabhāvataikasvarūpasambandhaucityayoḥ 
tatsamaṣṭirūpayecchayā samastrīpumubhayasvabhāvatayā 
rahasyavidbhirabhimatasya paramaśivatattvasya svarūpabhāgatvābhiprāyeṇa 
ekasvarūpasambandhaṃ darśayati - ardhaṃ kriyetyādi | kriyā dakṣiṇamardhaṃ 
bhavati śivasyetyabhiprāyaḥ | karmakāṇḍasya dakṣiṇamārgatayāṅgīkārādiyaṃ 
vyavasthā | jñānamanyadvāmamardhaṃ jñānakāṇḍasya 
vāmamārgatvenāṅgīkārāditi bhāvaḥ | nanu śaivaṃ dakṣiṇācāraḥ śāktaṃ 
vāmācāra iti siddhajanapratipādāt kriyā 
vimarśarūpatvācchaktisvarūpamityaṅgīkartavyam jñānaṃ prakāśarūpatvāt 
śivasvarūpamiti ca tatkathaṃ kriyāyā dakṣiṇatvaṃ jñānasya vāmatvamiti cet 
satyaṃ rahasyasamayasārāvabodhakasadgurusaparyāvidhurāṇāmayaṃ vipratipattiṣu 
saṅghaṭṭo duratikramaḥ mahāgurukaṭākṣaśivatāṃ(?) tu 
nirākṛtyātra vivecayati tadupadiśyate jñānakriyārūpayoḥ 
śivaśaktyoranyonyānurāgeṇānyonyasvabhāvoparaktasvabhāva iti veditavyam | 
śivasya svabhāvo jñānaṃ jaḍākārayā kriyayoparaktaṃ sat jaḍasya śuklatayā 
śuklaṃ bhavati | śaktiḥ svabhāvaḥ kriyā ajaḍena jñānenoparaktā satī ajaḍasya 
raveḥ ṛtutayā aruṇā bhavati | tadubhayamiśraṃ 
tadrūpamubhayavarṇasaṃsargāttvidaṃ hemanibhaṃ bhavatīti 
śivādisvarūpatrayaparyāyaśāmbhavoktacaraṇatrayavadvarṇavā##-
śaktisvabhāvakriyāsvarūpānusandhānaikavyāpāratayā jñānamārge vāmācāre 
vyavasthāpita iti (?) kaulikopaniṣat | tadetatprameyaṃ 
jñānakriyayorvāmadakṣiṇārdhatvopanyāsadvāreṇa sūtrakṛtā vyutpāditaṃ 
jñānakriyāmiśrapade sve(ṣvi)cchayā bhāgavyavasthāmāha - 
samatvamanayoriti | anayorjñānakriyayoḥ samatvaṃ samavyāptikatvaṃ yattadiccheti 
icchālakṣaṇaṃ cātrānusandheyam | madhyamiti | 
dakṣiṇavāmayormadhyamityarthaḥ | icchātattvasya 
prākpratipāditaparaśivasvabhāvasya jñānakriyātmakapakṣadvayamūlarūpatayā 
tadubhayabījatvaṃ samarthayati icchaiva bījamityādi | evakāreṇa pakṣatrayasyāpi 
jñānaṃ ca karma cetyādivakṣyamāṇatrimūrtyātmakatvapratipādanena 
yadyapyanyonyamūlatvamupapattimat tathāpi mādhyamikatayā 
suṣumnāparyāyabhūtāyā icchāyā eva prekṣāvanmahāyogibhirurarīkṛtaṃ 
jñānakriyārūpatvamityupadiṣṭam | icchaivācalā prākpratipāditamaryādayā 
stimitasvabhāvā | idaṃ ca viśeṣeṇa bījatvasamarthakam | bījaṃ hi niścalaṃ tiṣṭhati 
mūlāṅkurāveva antarbahiśca prasarataḥ | āntaragatyā nivṛttirūpaprasaraṇena 
jñānaṃ mūlaṃ bījasyādhobhāgaprasṛtavān rohāvayavaḥ bāhyagatyā 
pravṛttirūpaprasaraṇena kriyā iha bīje aṅkuraḥ | cakāraḥ samuccayābhidhānena 
bījasya pūrṇaṃ lakṣaṇatvamabhidhatte || 17 ||

p. 20)

jñānaṃ kriyā tadubhayaikarasāpi cecchā
tattvatrayaṃ bhavati nityayutasvabhāvam |
jñānasya mānamiti meyamiti kriyāyā
māteti cetarapadasya hi nāmabhedāḥ || 18 ||

icchājñānakriyāṇāṃ pramātrādibhirekārthatayā 
pramātṛpramāṇaprameyaśabdavyavahāro'pi bhavatītyāha - jñānaṃ 
kriyetyādi | jñānaṃ kriyā tadubhayaikarasā tadubhayasamaṣṭirūpā icchā ca iti 
tattvatrayaṃ nityayutasvabhāvaṃ bhavati anyonyāvinābhūtaṃ bhavati | 
etadviśeṣaṇaṃ tripuṭīrūpatayā nityayutasvabhāvebhyaḥ pramatrādibhya 
icchādīnāṃ sādṛśyoktidvāreṇaikārthatāpratipādakam | icchādīnāṃ 
pramātrādiṣu kasya kenaikārthatetyākāṅkṣāyāmāha jñānasyetyādi | jñānasya 
mānamiti kriyāyā meya iti itarapadasya jñānakriyābhyāmitarasya padasya icchāyā 
ityarthaḥ | māteti ca nāmabhedātsaṃjñābhedaḥ sasaṃjñakānāmicchādīnāṃ 
pramātrādīnāṃ ca paryālocane bheda iti bhāvaḥ || 18 ||

p. 21)

jñānaṃ ca karma ca parasparamūlamicchā
mūlaṃ tayostadubhayaṃ khalu mūlamasyāḥ |
mūrtitrayaṃ matamidaṃ trayameva sṛṣṭi-
sthityantakāraṇatayā triguṇasvabhāvam || 19 ||

icchādīnāṃ mantrasamayasiddhatrikoṇabhāvopapattevyutpādanābhiprāyeṇa 
pratyekamitaradvayamūlatāmupapādayati - jñānaṃ cetyādi | jñānaṃ ca 
karma ca parasparamūlaṃ prakāśavimarśasvarūpatvāt | 
prākpratipāditamaryādayeti bhāvaḥ | icchā tayorjñānakriyayormūlaṃ 
miśratattvasyobhayamūlatvaṃ ca prākpratipāditaṃ tasyā icchāyāstadubhayaṃ 
mūlaṃ jñānakriyāmiśrarūpiṇyā icchāyāstṛtīyatattvasya 
siddhirjñānakriyāsiddhimūleti copapannamiti bhāvaḥ | 
idamicchāditrayamevoktamaryādayā anyonyamūlaṃ sanmūrtitrayaṃ 
hariharahiraṇyagarbhātmanā | mahāśaktiricchādirūpiṇyevāvabhāsata iti 
tattvavidāmabhimatamityarthaḥ | mūrtitrayasyāpi 
parasparamūlatvādicchādibhāvopapattiḥ | icchāditrayasya mūrtitrayatvopapattau 
mahattattvādikaṃ nidhatte sṛṣṭyādi | idamicchāditrayaṃ 
sṛṣṭisthityantakāraṇatayā triguṇasvabhāvaṃ - bhedarūpasya miśrasya vā 
saṃsārasyecchātattve sṛṣṭiḥ jñānatattve sthitiḥ kriyātattve saṃhāra iti 
icchāditrayasya sṛṣṭyādihetutvāt triguṇasvabhāvatā sṛṣṭyādikrameṇa 
rajaḥsattvatamaḥprakṛtitā | icchāditrayameva guṇatrayasvabhāvaṃ cetyarthaḥ || 
19 ||

p. 22)

etattrayātmakatayā sakalaṃ trirūpaṃ
suptyādikā api daśāśca tathaiva tisraḥ |
suptiḥ kriyājaḍatayā bhavati prabandho
jñānaṃ vimiśramanayoḥ padamanyadicchā || 20 ||

ata icchādirūpatayaiva saṃsāre sarvamapi vastu trairūpyeṇāvatiṣṭhata ityāha - 
etattrayātprakatayetyādi | lokatrayaṃ varṇatrayaṃ vedatrayamityādirūpeṇa 
sakalamapi vastujātaṃ paryālocyamānaṃ trairūpyeṇaivāvatiṣṭhate | 
tatrecchāditrayātmakatvameva heturityarthaḥ | idānīṃ prakṛtāstisraḥ 
(suptyā)sṛṣṭyādidaśā api icchādyātmikā evetyāha - suptyādikā 
iti | suptyādidaśā api athaivecchādyātmikā iti sūtrakārasya 
sāmānyoktatātparyabhūtamuttaratra tadvyavahāradarśanātpāramparyeṇa 
gurumukhāgatatvāccādikṛtaṃ rahasyaprameyamupadiśyate | 
suptyādīnāmicchādyātmakatvenānyonya mūlatāyāṃ tulyaprādhānyatayā 
trikoṇabhāvaprāptāvanyonyamādimadhyāntabhāvaḥ sambhāvyeta tathā ca 
satyādimadhyāntavyavasthita icchājñānakriayabhāvaḥ pratyekamapi sambhāvyate | 
tathā hi bhedasaṃsāre suṣuptiricchā bhedākāraviśrāntirūpatvāt 
bhedasaṃsāraprārambhapadatvācca prārambhapadamicchādiprahato mārgaḥ svapno 
jñānaṃ kiñcitsaṅkocapadatvāt | prārambhapadamiccheti prārabdhasya 
kiñcitsiddhipadaṃ jñānadaśeti sphuṭatarapadā jāgrat kriyāsaṅkocasya 
paryavasitatvāt prārabdhasya nirvarṇakriyeti ṛjumārgaḥ | evamicchati jānāti 
karotīti padatrayavyavasthitaḥ sarvopyudyama iti veditavyam | atha 
punarviśramaṇakriayasamudyame jāgradicchā kasyacidudyamasya niṣpattāvanyasya 
codyamasya pravṛttau madhye viśrāntiḥ sambhavatīti 
jāgradviratāvicchālakṣaṇaṃ viśrāntipadaṃ sambhavatyevamanyatrāpi vijñeyam | 
nivṛttiḥ svapno jñānaṃ kiñcidviśrāntisamunmīlanāt | suṣuptiḥ kriyā 
viśramarūpā kriyāyā anusandhānāt | tatheha suptijāgratoḥ pratyekamicchātvaṃ 
kriyātvaṃ ca svapnasya jñānatvaṃ ca nirūpitam | athānyatpadaṃ nirūpyate | 
vikalpāvikalparūpatvādajaḍaviśramarūpasvapnaḥ prakāśapadaṃ 
jaḍaviśramarūpā suṣuptirvimarśapadaṃ 
anayoranyonyabhāvaparigrahaprakriyāyāṃ svapna icchā 
jaḍībhāvakriyāprārambharūpatvāt jāgrajjñānaṃ jāgrati prakāśasya 
svavahirbhūtatayāvabhāsamāne vedyāṃśe jaḍatāparigrahāt jaḍasuṣuptiḥ 
kriyāsamabhilaṣitāyā jaḍībhāvakriyāyāḥ sākalyenānusandhānāt | athāsya 
jaḍasvarūpasya punaḥ prakāśakarasyā(tha?)'jaḍī 
bhāvakriyāsamudyama eva suṣuptiricchā ajaḍībhāvakriyāprārambharūpatvāt | 
jāgrat jñānaṃ vedakaprakāśaspṛṣṭasya (yā) ve(dya)dasya 
kiñcidajaḍībhāvasamudayād svapnaḥ kriyā kiñci jaḍājaḍarūpasya sākalyena 
ajaḍībhāvakriyānusandhānāt | evaṃ svapnasuptyoḥ pratyekamicchātvaṃ 
kriyātvaṃ ca jāgrato jñānatvaṃ ca vijñeyam | anayaiva diśā 
jaḍājaḍapramātṛpadayorjāgratsvapnayoranyonyabhāvaprakriyāyāmapi 
vakṣyamāṇamaryādayā binduvisargaśleṣarūpatvena 
jaḍājaḍaviśrāntirūpasuṣuptimadhyakakṣyāvagāhena pratyekamicchātvaṃ ca 
yojanīyam | viśrāntirūpāyā api suṣupteścidacinmayatvāt jñānatvoktiranavadyaiva 
| jīvaḥ suṣuptyavagāhena viśrāntiṃ jānanneva śivo bhavati | śivaśca 
tadavagāhena jaḍatvaṃ jānan jīvo bhavatīti suṣupteḥ 
madhyapadatvamupapannameveti niravadyakaraṃ prameyam | evaṃ suptyādipadatraye 
yasya kasyacidapyupakrameṇa vilomānulomabhāvāt 
padatrayapravāhaśivaśaktyanyonyabhāvasamādhirapi sidhyatīti 
suptyādidaśātrayāvabodhake mātṛkākhaṇḍatraye yasya 
kasyacidapyupakrameṇāvartanaṃ sāmpradāyikameveti 
tatsarvaprakriyānusandhānaṃ pariśīlanīyam | taduktaṃ mātṛkāsaṅgraharūpasya 
bālāmantrasya prastāve laghustotrakāreṇa kramagataṃ yadvāsthitaṃ vyutkramāditi 
suptyādidaśātrayapratibimbabhūtacaturdaśārādicakraskandhatrayātmanaḥ 
śrīcakrasyāpi saparyāviṣaye yasya kasyacidapi skandhasyopakrameṇa 
bījatrayoddeśena vilomānulomaskandhatrayapravāhe 
samyaganubhavasamādhisiddhireveti 
tadakhilaprakriyānusandhānamācāryavaryāṇāmiti 
mahāmantrayantraprāṇabhūtamidaṃ prameyamiti prapañcitaṃ 
svapnajāgratsuṣuptīnāmicchājñānakriyātvaṃ prasiddhamārgatayā pratipādayait 
suptiḥ kriyetyādi | kriyātve jāḍyaṃ hetutayoktaṃ kriyā khalla 
smṛtivilakṣaṇasākṣādanubhavarūpatayā bahirupasandhānaṃ 
tajjñānarūpāntarānusandhānavadajaḍaṃ na bhavatīti kriyāyā 
jaḍatvamanubhavasampratipannam || 20 ||

p. 24)

anyonyalīnavapuṣoriha caityacityoḥ
suptyadiṣu triṣu padeṣu bhavo dvirūpaḥ |
śliṣṭaḥ pravṛttivinivṛttimayo vibhāvyaḥ 
śrīcakramūlamanusaṃsthitidarśanena || 21 ||

uktamaryādayā sūcitaṃ suṣuptyādīnāṃ jaḍājaḍasvabhāvatayā 
dvairūpyeṇāvasthānaṃ sphuṭīkaroti - anyonyalīnavapuṣorityādi | 
suptyādidaśātrayaṃ khalu ciccaityaparyāyayoḥ śivajīvayoḥ 
saṃsaraṇaviśramaṇavyavahārapadaṃ svarūpameva | 
prakāśavimarśaparyāyayościccaityayoranyonyalīnatvaṃ svabhāvaḥ | prakāśe 
khalu vimarśa(vāsa)nā naiyatyenāvasthitā vimarśe ca prakāśavāsanā 
tayoranyonyabhāvopādānasvabhāvatvāt ta(thai)daiva 
jaḍatvājaḍatvavyavasthayā tayoḥ pratyekaṃ svarūpabhūte suptyādi daśātraye 
ajaḍe'jaḍaṃ jaḍe vā jaḍamapi vāsanārūpeṇa nilīnaṃ paryāyeṇa parisphuratīti 
sūtratātparyam | caityacityoriti | caityaśabdasya pūrvanipātena māyāprābalyāt 
caityaparyāyajīvadaśānāmeva prathamaparyāyasphuraṇamityabhisandhiḥ | 
caityacityorjīvaśivayoḥ krameṇa pravṛttinivṛttimayaḥ ata eva dvirūpo bhavaḥ 
saṃsāraḥ suptyādiṣu triṣu padeṣu śliṣṭonyonyanilīno vibhāvyaḥ 
jīvaśivapadānāmanyonyanilīnatālakṣaṇaśleṣanirṇaye mūlamāha śrīcakretyādi | 
cakraṃ navatrikoṇa śleṣaviśiṣṭaṃ yantraṃ mūlamanurmātṛkā tayoḥ 
saṃsthitiḥ saṃsthānaviśeṣaḥ taddarśanena paryālocanena 
śrīcakrasaṃsthitiścaturdaśārādiskandhatraye'pi pratiskandhaṃ trikoṇayoḥ śleṣaḥ 
tena śleṣeṇa pratyekaṃ trairūpyeṇāvasthitānāṃ 
śivajīvadaśānāmanyonyanilīnatādhyavasāyena paryāyeṇa sphuraṇapratipattiḥ 
mūlamanusaṃsthitiḥ khaṇḍatrayasyānulomavilomavartanaṃ tena ca 
pravṛttinivṛttirūpavyavasthayānyonyanilīnānāṃ jīvaśivadaśānāṃ 
paryāyeṇollasanapratipattiriti vivekaḥ || 21 ||

p. 25)

icchā suṣuptirabahirjanitaḥ prabodho
jñānaṃ kriyā bhavati jāgaraṇaṃ jaḍasya |
turyasthajāgarapadādisuṣuptisīmā
icchādayaḥ khalu daśāstvajaḍāḥ śivasya || 22 ||

idānīṃ vivṛtīṣatspṛṣṭispṛṣṭīṣadvivṛtivivṛtiprayatnakrameṇa 
vyavasthitamantrasaṃsthānenāvabodhyena 
suptyādijāgradantajāgradādisuṣuptyantapravṛttinivṛttimārgayorjīvaśivayoḥ 
saṅkocapūrṇabhāvābhivyaktiḥ sahṛdayasāmayikahṛdayaṅgameti 
tanmārgopāśrayeṇa tatsamayamavabodhayitukāmaḥ 
suptyādīnāmicchādibhāvamupapādayati - icchā suṣuptirityādi | 
suṣuptiricchābhedasaṃsārā ityabhiprāyaḥ abahirantarjanitaḥ prabodhaḥ svapnaḥ 
jñānaṃ jāgaraṇaṃ jāgradavasthā kriyā jaḍasya jīvasyevecchādīnāṃ 
samavāyanirdeśaḥ turyasthetyādi | uktaṃ khalu prāk 
jāgratsvapnasuṣuptīnāmabhedavis'yatve turyavyavahāra iti tadabhiprāyeṇātroktaṃ 
turyasthajāgarapadādīti | turyasthaṃ turyavyavahāralagnaṃ yadabhedarūpaṃ 
jāgarapadaṃ tadādita ārabhya suṣuptisīmāḥ turyasthena yā suṣuptiḥ tadavadhikāḥ 
abhedajāgratsvapnasuṣuptaya ityarthaḥ | ajaḍāḥ turyasthalenaivājaḍatve siddhe 
punarajaḍaviśeṣaṇamanu(dhi)ṣṭhānatayā yojanīyam | śivasyecchādayo 
daśā bhavanti | 

nanu prakāśamayaḥ śivaḥ pravṛttyabhimukho vimarśamayaḥ 
paśurnivṛttyabhimukha iti prāguktaṃ kathamatra nivṛttirūpiṇī turyadaśā 
śivasyetyuktamiti ciducyate | nivṛttyāhbimukha paśuḥ śiva ityeva vyavahriyate | 
pravṛttyabhimukhaḥ śivaśca paśurityeva vyavhāramupalabhata iti mahāguroḥ 
sūtrakārasya niravadyaḥ pravacanamārgaḥ || 22 ||

p. 26)

antarmukhī bhavati bindugatirvisarga-
syoktā gatirgurujanena bahirmukhīti |
pūrvaḥ suṣuptipadamadhyamupaiti jāgran 
madhyāttamṛcchati parastu suṣuptimadhyāt || 23 ||

atha 
jīvaśivayorbahirmukhāntarmukhatayānyonyavilakṣaṇasphuraṇamupapattimadeveti 
prākpratipāditaprakriyāmanusmārayannāha - antarmukhītyādi | 
bindugatirantarmukhī bhavati visargasya gatirbahimukhīti gurujanenoktā | 
tayorviśramaṇasaṃsaraṇasvabhāvateti prākpratipāditatvādatrāpratipādanamiti 
mantavyam | ataḥ kāraṇātpūrvopasannihitavākye pūrvanirdiṣṭo binduḥ 
sannihitavākyapūrvanirdiṣṭo jāgranmadhyātsuṣuptipadamadhyamupaiti 
tisṛṇāmapi daśānāṃ pratyekaṃ jaḍājaḍabhāgadvayasya 
pratipāditatvānmadhyadeśo bhāgadvayasya sandhirityavagamyate | 
jaḍajāgratparisamāptyanantarādbuddhaṃ turyaparyāyājaḍajāgratprārambhapadaṃ 
jāgranmadhyaṃ tataḥ pūrvāvadheḥ suṣuptipadamadhyaṃ 
abhedasuṣuptiparisamāptipadamuttarāvadhimupaiti | parastu uttaranirdiṣṭo visarga 
ityavagamyate | suṣuptimadhyāt 
ajaḍasuṣuptiparisamāptyanantarodbuddhajaḍasuṣuptiprārambhapadāt pūrvāvadheḥ 
taṃ jāgranmadhyaṃ bhedajāgratparisamāptipadamuttarāvadhimṛcchati gacchati | 
evaṃ binduvisargayorantarbahiḥ prasaraṇaprakriyā 
mantrārthavivekādityantopayoginīti sūtrakāreṇa sphuṭīkṛteti veditavyam || 23 ||

p. 27)

suptyādi jāgradavadhi tritayaṃ daśānāṃ
jantoḥ pravṛttivapuṣo'tha nivṛttimūrteḥ |
tajjāgradādyavadhibhūtasuṣupti śambho-
rārohasīmasamupakramaṇovarohaḥ || 24 ||

uktamevārthaṃ dṛḍhīkaraṇāya upapattyantaropanyāsena pratipādayati - 
suptyādītyādi | pravṛttisvarūpasya jantorjīvasya daśānāṃ tritayaṃ 
suptyādijāgradavadhi prāguktamaryādeveti bhāvaḥ | atheti pakṣāntare | 
nivṛttimūrteḥ śambhordaśānāṃ jāgradādi avadhibhūtasuṣupti 
suṣuptyavadhimityarthaḥ | atra ca prāguktaprakriyānusandhātavyā | 
jīvadaśāpravahaṇavailakṣaṇyena śivadaśānāṃ 
jāgradādipravahaṇaprakriyāyāmupapattimāha - āroheti | ārohasya 
ārohaṇarūpakriyāyāḥ yā sīmā avadhiḥ tatsamupakramaṇaṃ tatprārambhaḥ 
khalvavarohaḥ prasiddhaḥ | tasmātpravṛttirūpasajīvadaśāvadhipadaṃ (##?
bhavatītyupapadyata ityarthaḥ || 24 ||

p. 28)

tasmātpravṛttivinivṛttimayobhayārthaḥ
svapnaḥ suṣuptirapi jāgradapīti gopyam ||
bhedāni bhedamayajīvaśivāṅgakānāṃ
ṣaṇṇāṃ vimiśraṇamidaṃ prakṛttirdaśānām || 25 ||

athārohāvaroharūpayoḥ pravṛttinivṛtti(rāroha##?
pratyekaṃ bhāgadvayāṅgīkāro rahasyamārga ityupadiśati - tasmāditi | 
prākpratipāditaprameyatātparyasya hetutvamuktaṃ taducyate | jīva eva khalu 
pravṛttikarttā nivṛttimaṅgīkurvan śiva ityucyate śivo vā pravṛttipade 
jīvaśabdena vyavahṛtaḥ punarnivṛttipade śivaśabdavyavahāraṃ prāpnoti na tu 
jīvaśivayoḥ pāramārthiko bhedaḥ api tu daśābhedenaiva bheda ityekārthatā | 
etadubhayaparyāyayoḥ tayoḥ prakāśavimarśayoḥ evamekārthatānusandheyā | 
evaṃ pravṛttinivṛttikartryorekārthaṃtve yā pravṛttirūpā kriyā tasyā eva 
nivṛttyā bhāvyam | yadyanyataḥ pravṛttiranyato nivṛttiḥ tarhi jīvasyānyatra 
prāguktapravṛttirūpabandhānucchede'nyatra nivṛttirūpā muktiriti 
mukterbandhasahitatvena nirākulānandarūpaṃ tallakṣaṇaṃ na prāpnotīti 
pravṛttinivṛttyoraikapadyamevopapadyate | tatpravṛttirūpasyaiva daśātrayasya 
nivṛttirūpateti pratyekamavasthādvayamaṅgīkartavyam | tadevāvasthādvayaṃ 
bhāvadvayamiti vyapadiśyata iti prākprameyatātparyam | tasmāditi hetutayoktam | 
tasmātkāraṇāt svapnaḥ pravṛttinivṛttimayobhayārthaḥ suṣuptirapyevaṃ 
jāgradapyevamityetadrahasyam | evaṃ 
pravṛttinivṛttisaṃbhāvitabhedābhedamayatvena pratyekaṃ dvisvabhāvānāṃ ata 
eva ṣaṇṇāṃ jīvaśivāṅgakānāṃ daśānāṃ 
vimiśraṇamanyonyalīnatālakṣaṇaśleṣaḥ prakṛtisvabhāvaḥ śivasyābhyantare 
śaktiḥ śakterabhyantare śiva iti yadā śivaśaktyoranyonyāntaravasthānaṃ tadā 
bhedavibhāgena tadaṅgabhūtānāṃ jāgradādīnāṃ 
bhāgadvayasyānyonyāntaravasthānamiti || 25 ||

svapnaprajāgarasuṣuptimayāṣṭakoṇa-
paṅktyasrayugmamanukoṇavirājamāne |
yantreśvare hi śivajīvasamanvayo'yaṃ
dṛṣṭaḥ samastaparamārthavidīṣṭadeve || 26 ||

evaṃ bhedābhedabhāgayoḥ pratyekamupapāditatayā dvirūpasya jāgradekasya 
anyonyaśleṣaṃ tatreti bimbabhūte mahāyantre saṃpādayatisvapnaprajāgaretyādi | 
svapnaprajāgarasuṣuptimayaiḥ svapnādipratibimbabhūtaiḥ aṣṭakoṇaḥ 
paṅktyāśra(ya?)ko yugmamanukoṇaiḥ aṣṭakoṇasvapnapratibimbaṃ 
yakārādihakārāntairaṣṭabhirvarṇaiḥ svapnatattvāvayavānāṃ 
kalādiśaktyantānāṃ vakṣyamāṇatvāt paṅktyaśrayugmaṃ jāgratpratibimbaṃ 
kakārādisa(na)kārāntairviṃśattyā varṇaiḥ jāgrattattvāvayavānāṃ 
pṛthivyādiśrotrāntānāṃ vakṣyamāṇatvāt manukoṇaścaturdaśakoṇaḥ 
suṣuptipratibimbaṃ akārādyaukārāntaiścaturdaśabhirvarṇaiḥ 
suṣuptitattvāvayavānāṃ pṛthivīsaṃskārādibindvavartasaṃskārāntānāṃ 
vakṣyamāṇatvāt | evaṃ skandhatrayātmakaiścakrairvirājamāne 
yantreśvarīmahāyantre ayaṃ śivajīvasamanvayaḥ 
pratyekamavasthātrayātmakaśivajīvaśleṣaḥ dṛṣṭaḥ | darśanaṃ caivaṃ 
aṣṭakoṇādiṣu caturdaśakoṇānteṣu cakreṣu | yo'yaṃ trikoṇadvayaśleṣaḥ 
saṃlakṣyate sa eva śleṣo jīvaśivāṅgabhūtasvapnodya(##?
trikoṇaḥ pratibimbamiti yuktaṃ ekaikasmin jāgradādipade kathaṃ 
trikoṇabhavamūlabhūtā trairūpyopapattiriti nāśaṅkanīyam | 
avasthānāmicchādirūpatayā tasya cecchāditrayasya prākpratipāditamaryādayā 
nityayutasvabhāvatvādekasyāpi pade sarvasyā api tripuṭyā vyatiṣaṅga iti 
niravadyam | yantreśvarasya mātṛkāyā iva mahāpramāṇatāmupapāpayati - 
samasteti | samastaparamārthavidāmanena viśiṣṭopādeyatoktā | iṣṭadeve 
iṣṭadevatārūpeṇābhimate | mantradevatābhyāmatiriktaṃ na hi pramāṇam | ato 
mātṛkācakrabodhito'rtho na saṃśayairupspṛśyata iti tātparyam || 26 ||

p. 30)

suptiḥ śaśī jaḍatayā tapano'pi jāgra-
ccaityasya santapanamātracidātmakatvāt |
svapnonalogilitacaityatayā paśutve
so'pyarka eva dahanaḥ sakalaṃ śivatve || 27 ||

atha svarasparśavyāpakānāṃ 
candrasūryāgnivyavahāropapattistadarthabhūtasuṣuptyādīnāṃ 
candrādityopapattimūleti tatprameyaṃ vyutpādayati - suptiḥ śaśītyādi | 
jaḍatayā jāḍyāddhetoḥ suptiḥ śaśī candraḥ brahmāṇḍe yo'yaṃ 
jaḍasvarūpaścandraḥ sa khalu piṇḍāṇḍe suṣuptiḥ 
brahmāṇḍapiṇḍāṇḍayoranyonyakāraṇakatvenaikasvabhāvatvāt | caityasya 
vedyasya ghaṭapaṭādeḥ santapanamātracidātmakatvāt 
suṣuptigatajāḍyapramārjanādajaḍatvaspṛṣṭyupalambhanena yatsantapanaṃ 
prakāśoṣmaṇā śoṣaṇaṃ na tu tatsantāpanametaddahanatanmātracidātmakatvāt 
tatparipāṭīvyavasthitaprakāśakātmakatvāddhetorjāgradavasthā tapanaḥ sūryaḥ 
jāgrataḥ paricchinnaprakāśātmakatayā bahirgatatvenaiva caityaprakāśanaṃ 
sūryasyeva na tu vahnivat svāntargatatvena svāvadhiparyantaprakāśanamiti bhāvaḥ | 
gilitacaityatayā svāntarupakṣiptacaityatayā svapno'nalaḥ svapne khalu caityaṃ 
svamanogarbha eva nilīnaṃ bhāti | evaṃ vahnitvena saṃbhāvitasya svapnasya 
paśutvaviṣaye sūryatvamevāha paśutve so'pyarka eveti sa iti svapnaḥ paśuḥ khalu 
svapne svamanogatatvena svāntasthamapi jaganmāyayā svabahiṣṭhamevānusandhatte 
| jāgrati patito jāgradiva svapno'pi paśoḥ sūrya evetyanubhavasaṃpratipannaṃ 
śivatve suptyādīnāṃ viśeṣamāha - śivatve sakalaṃ dahana iti | sakalaṃ 
suptyāditrayaṃ dahano'gnireva sarvatra daśāyāmabhedavāsanāpāṭavena 
jagatkavalanāditi bhāvaḥ || 27 ||

p. 31)

caityātivisphuraṇasīmni khalu pratiṣṭhā
jāgratyaṇoratha turīyapadāntararthe |
śambhorvimarśavati jāḍyamalavyapete
jāgratsuṣuptidaśayoḥ samamadhyabhāge || 28 ||

atha jīvaśivayordaśātraye sarvatra vā kutracidvā 
svātmābhimānadārḍhyamityākāṅkṣāyāṃ mantratātparyamabhisandhāyāha ##-
avadhiḥ tatra jāgrati bhedaparamāvadhau aṇorjīvasya pratiṣṭhā 
svātmano'bhimānadārḍhyenāvasthānaṃ jāgratpadabodhakeṣu sparśeṣu makārasya 
jīvakalāsthānatvena vakṣyamāṇatvāt | atha śambhorvimarśavati ata eva 
jāḍyamalavyapete jāgratsuṣuptidaśayoḥ samamadhyabhāge abhedavikalpapadamatra 
jāgradvivakṣitaṃ nirvikalpapadaṃ suṣuptiḥ tayormadhyabhāge sandhirūpasya tasya 
padasya vikalpāvikalpobhayapadavyāpakatvāt | 
abhedavikalpāvikalpasandhipadabodhakasya kṣakārasya śivakalāsthānatvena 
vakṣyamāṇatvāt || 28 ||

p. 32)

mātā śaśī bhavati meyapadaṃ paśutve
vahniḥ pramāṇamiha tigmaruciḥ kriyāgryam |
mātānalaḥ śivapade himaguḥ prameyaṃ
jñānāgryabhāga iha turyaraviḥ pramāṇam || 29 ||

atha jāgranmadhyamapadakasya mārgasya prameyamāha - mātā śaśītyādi | 
paśutve śaśī suṣuptyātmakasvarakhaṇḍārdhaścandraḥ mātā pramātā bhavati | 
paśutve candrarupasya vedyasyaiva vyāptiḥ meyapadaṃ vahniḥ svapnātmakaṃ 
vyāpakakhaṇḍārdho vahniḥ prameyapadaṃ bhavati | paśutve vahnirūpasya 
vedakasya vyāpyatvāt | iha paśutve tigmaruciḥ jāgradātmakasparśakhaṇḍārdhaḥ 
sūryaḥ kriyāgryaṃ vedyāṃśapradhānaṃ pramāṇaṃ vedyavedakobhayātmake 
pramāṇe paśudaśāyāṃ vedakāṃśavyāpakatayā 
vedyāṃśaprādhānyamavalambate | atha śivatāyāṃ 
candrāderbhāvāntaragrahaṇamāha śivapade analapadakaḥ pramātā śivapade 
vedakasya vyāpakatvāt tatra himaguścandraḥ vedyaṃ prameyaṃ vyāpyatvāt iha 
śivatāyāṃ turyaraviḥ abhedajāgradrūpo ravisturyaraviḥ jñānāgryabhāgaṃ 
vedanapradhānāṃśakaṃ vyāptimattayā pradhānabhūtavedakāṃśaṃ pramāṇaṃ 
bhavati | ayaṃ suptyādisvapnāntamārge viveka iti veditavyam || 29 ||

p. 33)

caityapramāturiha yajjaḍameva mānaṃ
taccitpramāṇamanujīvati taddhi caityam |
cittattvameva niyamādanujīvadetan-
nātyaśnute svamiva cittadidaṃ vibhedi || 30 ||

atha visargarūpasya vedyapramāturbhedarūpatopapattimāha - 
caityapramāturityādi | iha jāgranmadhyamapadake mārge caityapramātuḥ 
caityarūpasya pramātuḥ jaḍameva kriyārūpatayā jaḍameva yāvanmānaṃ 
pramāṇaṃ vedyakavalanasādhanaṃ taccitipramāṇaṃ citaḥ sādhanabhūtaṃ 
jñānarūpaṃ pramāṇamanujīvati anuprāṇiti | atrāyamabhiprāyaḥ paśutve 
vedyasya kavalayataḥ pṛthivyādirūpasya vedyapramātustatkavalane vyāptau 
sādhanaṃ śabdādipañcakaṃ śabdādibhiḥ khalu svadharmabhūtaiḥ sādhanaiḥ 
pṛthivyādayo vedakaṃ badhnanti | tatra śabdādayo jaḍatvādvedakasya sādhanaṃ 
vimarśarūpatvādajaḍaṃ śrotrādikamanujīvanti | śrotrādīnāmeva 
śabdādivyāptyanusandhānena śabdādīnāṃ vyāptiprasādasiddhiriti bhāvaḥ | ato 
vedyapramāṇasya vedakapramāṇasāpekṣakāryakāritvam | tacca caityaṃ 
pramātṛcittattvameva niyamādanujīvati | cittattvābhāve 
caityavyāptyanusandhāturabhāvāccaityavyāpterasiddhireva | api ca 
caityasvarūpasyāpyasiddhiḥ prathata iti caityavyāptipade citaḥ 
śirodarśanamavaśyamiti cidvyāptipade caityoccheda iva caityavyāptipade cito 
nocchedaḥ | ataścaityaṃ svavyāptipade citsahitameveti bhedasyopapattiriti tātparyam 
| cit svamivātmānamiva etaccittattvaṃ karma nātyaśnute nātyantamutsādayati 
tattasmātkāraṇādidaṃ caityaṃ vibhedi bhedavat || 30 ||

p. 34)

jāḍyādacinna vimṛśatyapi mātṛbhāve
tāṃ citkaleva gilitātmapadāṃ mṛśanti |
mohena kalpayati mātṛdaśāmamuṣyā 
vyāptirhi mātṛpadalakṣaṇatopapannā || 31 ||

uktamevārthaṃ sphuṭīkaroti - jāḍyādityādi | acit caityaṃ mātṛbhāve'pi 
svavyāptikapade'pi jāḍyāddhetorna vimṛśati | na hi pṛthivyādau 
caityavimarśaḥ tāṃ ayati saṃpādayati | evaṃ cedvimarśavato vedakasyeva 
vedyavyāptipade'pi pramātṛtvamastviti cet netyāha | avyāptermātṛlakṣaṇatvaṃ 
vyāptimātratāvacchinnapramātṛlakṣaṇarūpavimarśavato'pi vedakasya 
tṛtīyapadamapi vyāpyatvābhimānadoṣeṇa vyāpyatvānna pramātṛtvamiti 
tātparyam || 31 ||

mānaṃ tṛtīyapadabhāgapi bāhyatastu
madhye vimiśraṇamidaṃ khalu meyamātroḥ |
miśraṃ hi madhyamapade nikhilasya dṛṣṭaṃ
dvairūpyamasya ca napuṃsakatā ca dhāmnaḥ || 32 ||

idānīṃ sparśārdhasya jāgradrūpasya pramāṇātmanaḥ sūryasya 
meyamātṛmiśrarūpatayā tadubhayasiddhyanantaraṃ siddhirāpanneti tṛtīya 
(padatve svīkṛte) svayaṃ kṛte svapadaucityaṃ kathaṃ 
madhmamarūpadvitīyapadaucityamityāśaṅkāṃ pariharati - mānamityādi | 
mānaṃ pramāṇaṃ tṛtīyapadabhāgapi bāhyatastu madhyaviśrāntipade 
nirāgraharūpeṇa siddhasvarūpayormayamātrorbāhyatayā'nyonyavyātisvabhāvatayā 
tatsvabhāvaparigrahasannāharūpapramāṇasya dvitīyakakṣyārohitvam | etaduktaṃ 
bhavati | viśrāntāvantarmukhayormeyamātroranyonyavyāptyāgrahānudayātsvā##-
tayorāgrahodayenābhimukhyaṃ bhajatormadhye pramāṇapadāvirbhāva iti 
veditavyam | atastṛtīyapadatvaṃ bahirmadhyakakṣyāroheṇa dvitīyapadatvaṃ 
pramāṇasyeti niṣkarṣaḥ | akṣarārthastu mānaṃ tṛtīyapadabhānyapi bāhyatastviti 
bāhye viśeṣakathanādidamantareti gamyate | bāhyatastu madhyam | atropapattimāha 
- idaṃ pramāṇaṃ meyamātroḥ vimiśraṇaṃ 
anyonyabhāvagrahaṇamārgatvātsannipātapadaṃ vyāmiśraṇapadasya 
madhyatvopapattimāha | nikhilasya vastuno'horātrādermiśraṃ sandhyārūpaṃ padaṃ 
madhyamapade dṛṣṭaṃ tasya dhāmnaḥ padasya dvairūpyaṃ dvisvabhāvatvaṃ 
śaktiśivātmakatayā strīpumātmakameyamātṛsaṅkaratayā napuṃsakatā ceti 
veditavyamiti śeṣaḥ || 32 ||

p. 35)

raśmīnanūdayati bimbamataḥ svareṣu
sargaḥ sitāṃśuraṇubindurinaśca kādau |
yādau śikhī mahitabinduriti trikhaṇḍyā
varṇakrameṇa viditaṃ trimahomayatvam || 33 ||

atha svarādīnāṃ prasiddhaṃ candrādibhāvaṃ sopapattikaṃ pratipādayati - 
raśmīnityādi | bimbaṃ sūryādīnāṃ bimbaṃ raśmeranu kiraṇānāṃ 
paścādudayati | avayavodayānantaramavayavyudaya iti bahumatamityarthaḥ | ataḥ 
tasmātkāraṇāt svareṣu visargaḥ sitāṃśuścandraḥ adhiṣṭhitaśceti śeṣaḥ | 
akārādivindvantānāṃ pañcadaśasvarāṇāṃ visargāpekṣayā 
prathamoccāraṇameva prathamodayopalakṣakatayā candrakalātvasamarpakam | evaṃ 
cākārādibindvantapañcadaśasvarāḥ kalāḥ ṣoḍaśakalārūpo 
visargaścandrasvarūpamityupapāditam | tathaiva kādau sparśakadambake 
aṇubinduḥ paricchinnabinduḥ anyonyāntargatameyamātṛmiśrasvabhāvatayā 
sā(?)pādibhāntacaturvarṇakalādvayarūpāṅgāṅgirūpaḥ inaḥ 
sūryo vādhiṣṭhāteti śeṣaḥ | sūryasya dvisvabhāvatvādakṣaradvayātmakāḥ kalāḥ 
| ataḥ kakārādinakārāntairviṃśatyā varṇairdaśakalāḥ sampadyante | tāsāṃ ca 
pūrvavadavayavakalātvavivekaḥ | ekādaśyā dvādaśyāśca kalāyā 
yādisvarūpāyāśca tathā | yaralavādau varṇagaṇe mahitabinduḥ 
(atropetavyaḥ) anagnyopetavyaḥ śikhī analaḥ adhiṣṭhāteti śeṣārthaḥ 
pūrvavat iti varṇakrameṇa trikhaṇḍyā mātṛkākhaṇḍatrayasya trimahomayatvaṃ 
candrāditejastritayasvabhāvatvaṃ viditam | atrāyaṃ sāro bindu kṣakārādeḥ 
sāmpradāyikopadeśaḥ prākpratipādite svapnamadhyapade mārga iva atrāpi 
jāgranmadhyapade mārge 
caityacitparyāyayorvisargabindvoranyonyanilīnatālakṣaṇaśleṣaḥ 
suptyādipadatrayāvabodhake svarādikhaṇḍatraye vibhāvyaḥ | svareṣu 
tāvadekamātradvimātrarūpā binduvisargakalāḥ 
prathamadvitīyoccāraṇopalakṣitayorantarbahiḥkakṣyayoḥ sthitāḥ | tathaiva 
tatparyante samuccāraṇaprayatnopalakṣitāntarbahiḥ prasaraṇau binduvisargau tau 
tadatra jaḍaviśrāntipadasuṣuptau bahirvisargo'ntarbinduriti śakterabhyantare śiva iti 
caityaparyāyaśaktitattvādyavasthādayaḥ | athājaḍaviśrāntirūpasvapnāvabodhake 
vyāpakavarge yavargasyeṣatspṛṣṭāviṣayatvena bhedapramātṛkalātvāt 
visargakalātvaṃ śavargasya 
vivṛtatāviṣayatvenābhedapramātṛbindukalātvapravṛttinivṛttimelanātmano 
vyāpakavargasya ubhayaparyantagatau makārakṣakāro 
bhedābhedakalādhiṣṭhātārau visargabindū | atrāpi 
prathamadvitīyoccāraṇopalakṣite antarbāhyakakṣye ato bindugarbhe visarga iti 
śakterabhyantare śiva ityasya svapnātmano viśramapadasya 
śivatattvatayādhyavasāyaḥ | athānyonyagrahaṇapadajāgarāvasthābodhake 
sparśaskandhe 
kāryajñeyarūpapṛthivyādigandhādirūpadaśaviṣayakaraṇajñānasādhanarūpap
āyvādighrāṇādidaśendriyayogāddaśakalāniṣpattiḥ | tatra viṣayāṇāṃ 
jaḍatvādvisargarūpatā indriyāṇāmajaḍatvādbindurūpatā | atra grahaṇapade 
kādīnāṃ prathamoccāraṇarūpaḥ 
pūrvanipāto'bhyarhiṃtagrāhakatvamabhivyaktidvārā vedyatattvasya 
prathamavyāptimupapādayait | suptisvapnayostu viśrāntipadatvādbinduvisargayoḥ 
pūrvanipāto'bhyarhitaviśrāntitābhinnāntaratyantanilīnatāmāpādayati | iti 
niravadyaṃ prameyaṃ sparśaparyante 
pādibhāntavarṇacatuṣkasaṃbandhidvidvivarṇaniṣpannaṃ kalādvayaṃ 
vinduvisargarūpamadhiṣṭhātṛdvayaṃ pramāṇakalānāṃ meyamātṛmiśratayā 
dvidvivarṇaniṣpannatvādvarṇacatuṣkeṇādhiṣṭhātṛtadaṅgabinduvisarga##-
visargāṃśavyāptiḥ pravṛttipade | atha nivṛttipade vedakavyāptyāṃ 
khaṇḍatraye'pi vindvaṃśavyāptirityanusandheyam || 33 ||

p. 34)

khaṇḍakrameṇa śaśino dahanāṅgatoktā
tadvyutkrameṇa jaḍabhānuguṇatvamagneḥ |
khaṇḍeṣuca kramavilomajapena caitya-
cityoḥ parasparapadākramarītiruktā || 34 ||

khaṇḍatrayasya prathamaṃ svarādipāṭhastadanantaraṃ vyāpakādipāṭhaśca 
prathamaṃ vedyena vedakākramaṇaṃ paścādvedakena vedyākramaṇaṃ bodhayatīti 
uttareṇa sūtreṇāha - khaṇḍakrameṇetyādi | khaṇḍakrameṇa 
svarādikhaṇḍānāṃ krameṇānulomapāṭhena śaśinaścandrasya dahanāṅgatā 
dahanaḥ aṅgaṃ yasyeti vigrahaḥ | tadbhāvastattā | uktā | tadvyutkrameṇa teṣāṃ 
khaṇḍānāṃ vyutkrameṇa vilomapāṭhena agneḥ jaḍabhānuguṇatvaṃ 
jaḍabhānuścandraḥ guṇo'ṅgaṃ yasyeti vigrahaḥ | pūrvavat 
uktamityanuṣañjanīyam | a(tra)khaṇḍānāṃ kramavyutkramoktyā 
akārādikṣakārāntavarṇānāṃ kramavyutkramapāṭhoktirasatī sphuṭeti 
sphuṭatvāyāha - khaṇḍeṣu ceti | khaṇḍeṣu ca kramavilomajapena kramaḥ 
anulomaḥ vilomastadviparyayaḥ tathāvidhena japena caityacityorvisargabindvoḥ 
parasparamākramarītiḥ ākramaḥ ākramaṇaṃ rītiḥ prakriyā uktā | anulomajapena 
caityena cidākramaṇaṃ vilomajapena citā caityākramaṇamiti yojanā || 34 ||

p. 38)

svapnaśca jāgradapi vāsarapūrvayāmau
turyaṃ padadvayavaduttarayāmayugmam |
suptisturīyalayabhuḥ prathamaṃ kṣapārdhaṃ
svapnaprajāgaradaśālayabhūrdvitīyam || 35 ||

iti śrīmātṛkācakraviveke tātparyavivekaḥ prathamaḥ khaṇḍaḥ || 1 ||

atha svapnamadhyame mārge daśānāṃ punaḥ punarāvṛttyā kālarūpatāṃ 
vyavasthāpayati - svapnaścetyādi | ahorātrarūpaḥ khalu kālaḥ 
aṣṭayāmātmakaḥ | tatra svapnaśca jāgradapi vāsarasya prahamayāmaḥ svapnaḥ 
suṣuptirūpiṇyā rātreranantaraṃ pravartamānatvāt | vāsarasya dvitīyayāmo 
jāgratsvapnānantaraṃ pravartamānatvātgrāhakarūpeṇa pramāṇarūpabheda 
sphuraṇaparamāvadhitvācca padadvayavat | 
nivṛttijāgratsvapnarūpapadadvayayuktaṃ turīyam uttarayāmayugmaṃ vāsarasyeti 
saṃbandhaḥ | tatra turyajāgrattṛtīyayāmabhedaḥ saṃsārasya 
nivṛttiprāramabharūpatvāt turyasvapnaścaturthayāmaḥ bhedaraveḥ rūpajāgrato 
bhedasantāpasyātimātranivṛtteḥ | atha tūrīyalayabhūḥ 
uktanivṛtījāgratsvapnarūpaturīyatādaśāviśrāntibhūmiḥ suptiḥ | suptiḥ khalu 
bhedābhedarūpāṇāṃ saṃsāradaśānāṃ viśramapadaṃ kāraṇarūpatvāt | 
atasturyajāgradviśrāntapadaṃ suṣuptirūpiṇyā rātreḥ prathamayāmaḥ | 
turyasvapnaviśrāntapadaṃdvitīyayāma iti turīyalayabhūḥ suptiḥ prathamaṃ 
kṣapārdhaṃ yāmadvayaṃ svapnajāgaradaśālayabhūḥ suptiḥ dvitīyaṃ 
kṣapārdhaṃ svapnaviśramapadaṃ tṛtīyayāmo jāgradviśramapadaṃ 
rātricaturthayāma iti samyaganubhavatāṃ hṛdayaṅgamaprameyatayā 
mantrārthaprāṇabhūtatvāccaitadupadiṣṭam | atha 
prakaraṇaparisamāptivācyagranthasyopapattimannāmoddeśamupadiśannetarasya 
granthaprameyāṅgatāṃ sphuṭīkaroti - itītyādi | atra mātṛkāśabdasya 
tantreṇa dviruktiravagantavyā tena mātṛkā ca mātṛkācakraṃ ceti labhyate | 
tayorviveko'treti vigrahaḥ | mātṛkā mantro mātṛkāyāścakraṃ 
mātṛkācakraṃ mātṛkāvarṇasanniveśavaśena saṃbhūtaṃ cakraṃ 
mātṛkaiva cakrākāreṇa sanniveṣṭeti bhāvaḥ | tahā hi manvasre 
akārādyaukārāntacaturdaśasvareṣu vindukalānāṃ saptānāmekabhāge 
sanniveśaḥ visargakalānāṃ saptānāmanyabhāge cakramadhye pratikoṇaṃ 
koṇābhyantarabhāgavibhāviteṣu caturdaśa daleṣu 
dalamūlavibhāvitavṛttākāradalatatkarṇikāvṛttarūpadalasahiteṣu ṣoḍaśasu         
ṣoḍaśadalapadmarūpavindorvisargacandrasteṣveva daleṣu 
ekaikadalavyavahitadalāṣṭakasaṃbhāvitāṣṭadalapadmabimbo binduvahniriti 
binduvisargavargayoḥ 

p. 40)

sanniveśaḥ visargavyāpteḥ prādhānye visargasya bahirniveśaḥ 
bindostvantarvyāpyatvenābhimatatvādbinduvyāptau bindupade bāhyatvābhimānaḥ 
visargapade'ntarabhimāna ityabhimānasyobhayākārasaṃbhavādanavadyam | 
daśārayugme vis'yendriyarūpaviṃśativarṇānāṃ viṃśatikoṇeṣu 
yathābhimukhyaṃ sanniveśaḥ bahirdaśārabāhye 
vidikcatuṣṭayopalakṣitamarmacatuṣṭayasya 
pratipadamantarbhāgavibhāvitatrikoṇacatuṣṭaye 
prakṛtyādimano'ntatattvarūpāṇāṃ pādibhāntānāṃ sanniveśaḥ | athavā 
vedyavedakarūpe kādibhāntavarṇakadambake kādayo dvādaśavarṇā vedyarūpā 
avarohakrameṇa bhakāraprabhṛtidvādaśavarṇā vedakarūpāḥ teṣāṃ 
yathākramamanvayena dvādaśakalāniṣpattiḥ | tatra prathamataḥ kalādvayaṃ 
bimbarūpaṃ itarāḥ kalā avayavabhūtāḥ koṇeṣu sanniveśyāḥ | 
vedyavedakavyāptiprakriyā pūrvavat | aṣṭakoṇe ekato bhāge caturṣu koṇeṣu 
yādilāntavarṇacatuṣṭayasanniveśaḥ | anyato bhāge caturṣu koṇeṣu 
śādihāntavarṇacatuṣkavinyāsaḥ | yādicatuṣkamūle śādicatuṣkānte ca 
trikoṇabindurūpacakradvaye guṇatrayāvṛtaguṇottīrṇajīvaśivarūpayoḥ 
makārakṣakārayoḥ sanniveśaḥ tayoranyonyavyāpakatayābhimukhyena 
cakrādyantopalakṣake cakramadhye viniveśa ityanavadyam iti 
varṇasanniveśaprakriyā kiñcidunmīlitā mantrārthānurodhena 
matimadbhirvarṇasanniveśāccakre viśeṣavattayā kṛto'pi 
arthāviśeṣābhāvātpratipāditena savarṇānurūpeṇa anurudhyata ityanavadyam | 
dvivekarūpaḥ | idaṃ ca prakaraṇaṃ granthatātparyaprameyamityuktamiti śivam || 35 
||

vidyāmātṛvivecane purabhidaḥ prajñāpi 
saṃmuhyatītyarthāddaśārayutadvidaśāracaturviṃśatidalaviveke tannetyanena 
kalādvādaśake raverdaśāvayavakalā sadvisvarūpakale veditavye | aṣṭakoṇe 
caivamaṣṭadalaviveke vahnyavayavakalā |

p. 41)

cakraṃ (tritrikakoṇa) yatsaṃniveśovahirmanvastre prathitastadatra na hi me 
garhā pramāde girām ||

māturmantratanormiṃthaśca samaye mayyanyato durlabha |
svāṅgakrīḍanayogyatāvitaraṇādyat (?)putrako'haṃ kṛtaḥ ||

śivānandena muninā deśikādeśavartinā |
vyākhyātaṃ mātṛkācakraviveke prathamaṃ padam || 1 ||


atha dvitīyaḥ khaṇḍaḥ |

māyābalātprathamabhāsi jaḍasvabhāvaṃ
vidyodayādatha vikasvaracinmayatvam |
suptyāhvayaṃ kimapi viśramaṇaṃ vibhāti 
citrakramaṃ cidacidekarasasvabhāvam || 1 ||

atha mantrakhaṇḍānāṃ daśācatuṣṭayābhidhānaprakriyāṃ 
pratipadamārabhamāṇastatrādau jīvaśivayorviśrāntipadatvena 
sarvasaṃsārabījarūpatayā cābhyarhitāṃ suṣuptiṃ tadavacchedake svarakhaṇḍe 
vitatya vivariṣyan jaḍājaḍarūpa(ta)yāsupti(pte)rekapade 
sāmarasyena sthiticamatkāramabhiṣṭauti | māyetyādi | cidacidekarasasvarūpa 
cidacitostattvayorya eko rasaḥ gajavṛṣabhacitranyāyādanyonyā'virodhena 
ekapadānupraviṣṭobhayatattvamadhyasambhūto rasaḥ | yatra rase jaḍasyā'jaḍasya ca 
tattvasya pratyekaṃ bhāgakaraṇaṃ vinā sarvata eva svarūpānupraveśaḥ 
yadaikasmiṃśictraviśeṣe gajavṛṣabhayoḥ pratyekamanupraveśo bhāgakaraṇaṃ 
vinaiva sākalyena tadvat | so'yaṃ jaḍājaḍamadhyaikarasaḥ svabhāvaḥ svarūpaṃ 
yasya tatsuptyāhvayaṃ suptiriti vyavahriyamāṇaṃ kimapi anirvacanīyaṃ 
anubhavaikavedyamiti yāvat | viśramaṇaṃ viśrāntiḥ vibhāti 
sarvasyānubhavaviṣayaṃ sphurati | etatsuṣuptiviśramaṇaṃ viśeṣaṇa mukhena 
sphuṭaṃ vyutpādayati | citreti māyetyādi ca | citrasyā'lekhyaviśeṣasya 
gajavṛṣabhaśleṣakādeḥ krama iva kramaḥ prakāro yasya tat | ekasminneva 
suptiviśrame jaḍājaḍaparyāyayorvisargabindvoḥ pratyekaṃ sarvato'nupraveśa iti | 
citraviśeṣasādṛśyaṃ suptidaśāyā jaḍatvaṃ tāvatsarvasyānubhavasiddhatvāt 
sampratipannam | ajaḍatvaṃ tu etāvantaṃ kālaṃ sukhamahamasvāpsamiti 
suptyantasambhāvitasuṣuptisukhānuvādena gamyate | citraśabdasya 
adbhutārthatvamapyavagantavyam | ekasyāṃ suptau 
anyonyaviruddhajaḍājaḍasāmarasyamadbhutamiti | evaṃ suptiviṣayayoḥ 
jaḍājaḍapratītyormadhye jaḍapratīteḥ prāthamyamupapādayati māyeti | māyaiva 
vidyāto balīyasī bāhyakakṣyāvilasanaśīlatayā pāścātyasphūrtiḥ 
sphūrtiprāthamyalakṣaṇaṃ balīyastvaṃ na labhate | utpattau tu vidyāyā eva 
prāthamyaṃ na māyāyāḥ ato māyābalāt suptiviśramaṇaprathamabhāse 
jaḍasvabhāvaṃ atha vidyodayādavikasvaracinmayatvaṃ citsāmarasyena 
nispandasye(syai)va (cit)tattvasya 
yugapajjaḍājaḍānyonyavyā(pti)pirūpaspandaṃ camatkāraśceti | 
sāmarasyajaḍājaḍaparyāyāṇāmicchājñānakriyāṇāṃ yāmalatvameva 
siddhāntatayā mantreṇocyata ityavagantavyam | ataḥ suptyādidaśāsu sāmarasyaṃ 
spandadvayaṃ ca yāmalaṃ ca sarvato vibhāvanīyam | icchājñānakriyāparyāyasya 
sāmarasyaspandadvayātmanaḥ padatrayasya yāmalatvādeva etadanantarametaditi na 
kramo niyataḥ || ata eva tattritayabodhakānāṃ mantrakhaṇḍānāṃ na 
paurvāparyakramaḥ | tadātmano mahācakrāṅgabhūtacakratritayasya ca na 
kramaniyama iti sarvatra skandhatrayasya pratyekaṃ prādhānyābhivyaktyarthaṃ 
tattadādyāvartaprakriyā prāgupapāditā || 1 || 36 ||

p. 44)

mātā nabhaḥkṣitivimiśrapadaṃ pramāṇaṃ
vāyuḥ śikhī ca salilaṃ ca mahī ca meyam |
jñānātmapūrvapaṭhitaṃ yugalatraye'pi
paścādudīritamihābhimataṃ kriyātma || 2 ||

atha svaravarṇaprastāve sarvavarṇānāṃ sāmānyabhūtaṃ 
bhūtapañcakābhidhāyakatvaṃ vyutpādayiṣyan bhūtapañcakasya 
sakalasaṃsārakalāpabhūtapramātṛpramāṇaprameyātmatāṃ vyutpādayati | 
mātetyādi | nabhaḥ kṣityorvimiśrapadaṃ mātā | dehātmanoḥ 
pṛthivyākāśarūpayorubhayorapi pramātrabhimānaviṣayatvāt | vāyuḥ śikhī ca 
ubhayaṃ pramāṇaṃ śikhī vahniḥ salilaṃ ca mahī ca ubhayaṃ prameyaṃ 
dehātmanoranyatarasmin pramātṛtvābhimāne itarasya prameyatvamiti | 
pṛthivyākāśayorubhayorapi prameyatvaṃ sambhavatyeva | 
atrā(kāśā)tmanaḥ pramātṛtvapakṣāpekṣayā pṛthivyāḥ 
prameyatvamuktamiti mantavyam || jñānakriyayorita retarā'vinābhāvasvabhāvatvāt 
|| pramātrādipadatraye pratyekapadaṃ tayordvayorapi sthitiriti tadvibhāgamāha 
jñānātmetyādi | yugalatraye'pi nabhaḥkṣitivāyuśikhisalilamahīrūpe 
yugmatrayapūrvapade tannabhovāyusalilarūpaṃ jñānātmā | paścādudīritaṃ 
kṣitiśikhimahīrūpaṃ kriyātma | jñānampramātā ākāśaḥ kriyā pramātā 
kṣitirūpo dehaḥ jñānaṃ pramāṇaṃ vāyuḥ kriyā pramāṇaṃ vahniḥ jñānaṃ 
prameyaṃ salilaṃ kriyā prameyaṃ mahīti vibhāgaḥ | ayaṃ vibhāgaḥ uttaratra 
jñānakriyāpramātroritaretaravyāptau pramāṇādipadadvaye'pi tattadaṃśatvaṃ 
bhavediti tatropayuktatayā'tra pradarśita iti mantavyam || 2 ||

p. 45)

varṇāḥ svavāyuśikhitoyadharāḥ krameṇa
syuḥ kaṇṭhatālukaśiroradanoṣṭhajātaḥ |
sthānoccayāpacayajau mahadalpabhāvau
syād vyutkramaḥ paśupade salilānilādau || 3 ||

evaṃ pramātrādirūpatayā sakalasaṃsārakalāpasya bhūtapañcakasya 
varṇabodhyatvaṃ sambandhapravacanapūrvaṃ vyutpādayati - varṇā ityādi | 
kaṇṭhatālukaśiroradanoṣṭhajātāḥ kaṇṭhādipañcasthānasambhūtā varṇāḥ 
akārakavargahakārāḥ kaṇṭhajāḥ ikāracavargayakāraśakārāstālujāḥ 
ṛkāraṭavargarephaṣakārāḥ śirobhavāḥ ḷkāratavargalakārasakārā 
dantajātāḥ ukārapavargavakārā oṣṭhajā iti vaiyākaraṇamatānusāreṇa veditavyam 
| ubhayasandhirūpāṇāṃ sandhyakṣarāṇāmubhayarūpatā kūṭākṣarasya 
sthānakūṭajanyatvamiti vivekaḥ | kaṇṭhādyoṣṭhāntapañcasthānajātā varṇāḥ 
krameṇa khavāyuśikhitoyadharāḥ ākāśādipṛthivyantapañcabhūtabodhakāḥ | 
bodhyabodhakayorabhedopacārādvarṇānāmākāśāditvoktiḥ | 
kaṇṭhādisthānajātānāṃ varṇānāmākāśādibodhane sambandhamupapādayati 
- sthāneti | mahadalpabhāvau ākāśādīnāṃ mahāvṛttyalpavṛttitvena 
mithaḥ prasiddhānāmanyonyāpekṣayā mahānalpaśca ubhau bhāvau svabhāvau 
sthānoccayāpacayajau sthānasya kaṇṭhādeḥ uccayaḥ uccatvaṃ apacayo nīcatvaṃ 
tābhyāṃ jāyete sambhāvyete iti tajjau | ayamatrābhiprāyaḥ - varṇānāṃ 
suptyādidaśāvabodhane yathā sadṛśyaṃ sambandhaḥ 
teṣāmākāśādyavabodhane ca sādṛśyameva sambandhaḥ | sthānapañcake 
kaṇṭhasya sarvonnatasthānatayā tadbhavo varṇo mahāvṛttirbhūtapañcake 
mahāvṛttimākāśaṃ sādṛśyenāvabodhayati | evaṃ tālubhavaḥ 
śirobhavādyapekṣayā mahāvṛttirāsyādyapekṣayā mahāvṛttiṃ vāyuṃ 
sādṛśyenaiva bodhayati | evamanyadapyūhyam | śirasaḥ pañcasu sthāneṣu 
madhyatvenābhimatatvāt sarvoccatvaṃ nā'śaṅkanīyam | 
kaṇṭhajādīnāmākāśādibodhanaṃ paśupade vyutkramaṃ bhajatītyāha syādityādi 
| caityavyāptimatkhalu paśupadaṃ tatra vyāptiparigraheṇa pṛthivyā 
ākāśabhāvaḥ vyāptibhraṃśādākāśasya pṛthivībhāvaḥ | tathā 
nīlakaṇṭhajairvarṇairākāśabhāvaṃ prāptā pṛthivyucyate | 
tālubhavairvāyubhāvaṃ prāptaṃ salilamucyate | śirobhavairajaḍāṃśakasyāhāro 
jaḍāṃśakoṭirvahnirucyate | vahnirjaḍājaḍarūpaṃ tejaḥ vāyurajaḍarūpaṃ tejaḥ 
salilaṃ jaḍateja iti jāgratskandhe vakṣyamāṇatvāt | dantyauṣṭhyavarṇaiḥ 
pṛthivyudakarūpau vāyvākāśāvucyete | sarvatraiva kriyā vyāptimatī paśupade 
kriyārūpā pṛthivyeva jñānāṃśaṃ jalaṃ vyāpnotīti dantyoṣṭhyayoḥ 
pṛthivījalabodhakatvamevopapannam | lakāravakārayordantyoṣṭhyayoḥ 
pṛthivījalabījatvaṃ prasiddhamiti tato'pīdamupapannam | evaṃ ca varṇā 
vivṛtatvādiprayatnopaghaṭitasuṣuptyādisādṛśyena suṣuptyādibodhakāḥ 
kaṇṭhādisthānopaghaṭitavyāptitāratamyarūpeṇa ākāśādisādṛśyena 
ākāśādibodhakāḥ sambandhadvayānvayena suṣuptyādiviṣayākāśādibodhakā 
bhavantīti mantrasya tattvarahasyapratipādakatā paramopapattimatī || 3 ||

p. 46)

icchādvayaṃ bhavati tālubhavoṣṭhyavarṇau
mūrdhanyadantyatanumānayugaṃ kriyādi |
saṅkocabhāvatadabhāvavaśādakāraḥ
sargo'pi bindurapi san śritamātṛbhāvaḥ || 4 ||

atha sakalasaṃsārakāraṇarūpāyāṃ suptau 
kāryakāraṇayorekarūpyaniyamādvāsanārūpeṇa sarvasaṃsārasaṃvidhānena 
bhavitavyamiti | ā(a)kārādiṣu pañcasvareṣu bhedābhedarūpavāsanāṃ 
saṃsārasannāhamupadarśayati | icchetyādi | tālubhavauṣṭhyavarṇau ikārokārau 
icchādvayaṃ bhavati | jaḍājaḍapramātrorvisargabindvoriti 
sūtrāntopadiśyamānavisargabindupramātṛsambandhena labhyate | 
ikārokārayorvyāpya pada evecchātvaṃ veditavyaṃnatu vyāpakapade 
visargavyāptau | visargarūpaḥ akāra evecchā ikārastatsādhanaṃ bhavati | 
akārekārayoḥ kriyātvenekārasya bhāvaḥ | binduvyāptāvapi bindurūpaḥ akāra 
evecchā ukārastu tadekākāratāṃ labhate jñānarūpatvāt | tataḥ yadāpi visargo 
vyāpī tadā ukārasya bindvicchātvaṃ bindorūparūpatvāt | yadā bindurvyāpī tadā 
ikāro visargecchā taduparūpatvāditi vivekaḥ | mūrdhanyadantyau ṛkāraḷkārau 
tattanu tatsvarūpaṃ | kriyādimānayugaṃ karmendriyajñānendriyarūpaṃ 
pramāṇyugalamityarthaḥ | saṅkocabhāvatadabhāvavaśāt saṅkocabhāvo 
bhedarūpatā tadabhāvastvabhedarūpatā | tadvaśāt akāra eva visargo bindurapi 
saṃśritamātṛbhāvaḥ pramātṛbhāvaṃ śrayatītyarthaḥ | idamatra rahasyam | 
akāra evābhedarūpo binduḥ akāra eva bhedarūpo visargaḥ tayorbinduvisargayoḥ 
sāmarasyapadamapyakāra eva | sāmarasyapade niṣpanda evākāraḥ 
jñānakriyārūpabinduvisargecchārūpeṇa bahiḥspandacamatkāraṃ parigṛhṇāti | 
tatrādau yadā visargarūpeṇa spandate tadā 
pramātṛbhūtavisargarūpākāraspandasamakālameva 
ikārādivarṇacatuṣṭayātmakastrīpuṃrūpaḥ saṃsārakalāpaścākāragarbhādeva 
bahiḥspandate | yadā bindurūpeṇākāraspandaḥ tadā bindunā pramātrā sahaiva 
nivṛttirūpaḥ prāguktavarṇacatuṣṭayātmakaḥ saṃsārakalāpaḥ 
pūrvavadakāragarbhādeva spandate | tadevamakāra eva sāmarasyapadamakārasyaiva | 
binduvisargarūpeṇa bahiḥ spandanamakārādeva 
sakalasaṃsārakalāpabhūtabhūtapañcakotpattirakāra eva 
mātṛkodayaviśrāntisthānamityupaniṣat || 4 ||

p. 48)

mūladvaye sphurati mātṛyamastadanta-
ricchādvayaṃ bhavati mānayugaṃ tadantaḥ |
etatsamaṃ padamato viṣamaṃ dvirūpaṃ
caityocchraye sphurati jātu ciducchraye ca || 5 ||

athānantaravarṇagarbhe vāsanārūpeṇāvasthitasvaspandadvayavaśāt bahirvilasitasya 
visargabindusaṃsāradvayasannāhasaṃsthānasya padasvarūpaṃ darśayati | 
mūletyādi mūladvaye saṃsārakalāpapadasya ubhayormūlayoḥ mātṛkāyugaṃ 
visargavindurūpaṃ pramātṛyugalaṃ sphurati tadantastayorantaḥ vyāpyapradeśe 
icchādvayaṃ ikārokārarūpaṃ yathāyogaṃ bhavatīti sambandhaḥ visargasyāntaḥ 
sannidhau ikāraḥ bindorantaḥ sannidhau ukāra iti yojanā | tadantastayoricchayorantaḥ 
vyāpyapradeśe mānayugaṃ ṛkāraḷkārarūpaṃ pramāṇadvayaṃ bhavatīti 
pūrvavatsambandhaḥ | visargādakārādārabhya akārekāra##-
samaṃ visargabindvoḥ samavyāptau padaṃ ataḥ asmātpadādviṣamaṃ 
asamānarūpaṃ padaṃ dvirūpaṃ bhavati | jātu kadācit 
caityocchrayayorvisargavyāptau bindorakārasyādarśanaṃ ukārarūpeṇaiva 
tadavasthānamiti pañcāṅgatvaṃ jātu ciducchraye cidvyāptau 
visargarūpasyākārasyādarśanaṃ ikārarūpeṇaiva tadavasthānaṃ ukārasyāpi 
bindāvakāre'pyaikarūpyamiti caturaṅgatā evaṃ viṣamaṃ padamuttaratra 
pratipādanaparīkṣayā yojanīyam | pañcāṅgakasya visargapadasya 
suptyādyavasthātrayasambhāvite trairūpye pañcatrikoṇāḥ sampadyante | 
caturaṅgasya bindupadasyāpi tathātve catvārastrikoṇāḥ sampadyante | tathā ca 
pañcatrikoṇarūpasya śaktiparyāyasya visargasya catustrikoṇarūpasya 
śivaparyāyasya bindoḥ samapade anyonyaśleṣeṇa navatrikoṇaśleṣātmanaḥ 
śrīmahāyantrasya sampattiriti veditavyam || 5 ||

p. 49)

sāmyaṃ bhavetprakṛtamatra camatkriyaiva
vaiṣamyamadbhutatarā hi vimarśavṛttiḥ |
niṣpandatāṃ samapade satataṃ bhajantī 
praspandate ca cidacitkalitocchritatvāt || 6 ||

uktamaryādayā navāṅgarūpasya samapadasya pañcāṅgarūpasya visargapadasya 
caturaṅgarūpasya bindupadasya ca madhye svābhāvikavaikārikakakṣyāvibhāgaṃ 
darśayati - sāmyamityādi | atra samaviṣamarūpe padatraye sāmyaṃ samatvaṃ 
prakṛtaṃ bhavet | yadyapi yāmalanyāyena padatrayasya paurvāparyābhāvāt 
svābhāvikāgantukaparyālocanāyā niravakāśaḥ tathāpi 
niṣpandaviśrāntirūpatvena samapadasya svarūpapadadvayāpekṣayā 
nirvikāratvamanubhavapade sphuratīti tasya prakṛtatvaṃ mūlarūpatvamiti yāvat | 
vaiṣamyaṃ spandarūpaṃ viṣamatvaṃ tu camatkriyaiva camatkāramātrameva tatrāpi 
paryālocane niṣpandasvabhāvasya bhittibhūtasyānuvṛttatvāt | kathaṃ 
spandāspandayorviruddhayoḥ sāmānādhikaraṇyamityatrāha - adbhutetyādi | 
vimarśavṛttiḥ sakalasaṃsāramūlabhūtasya mahāprakṛtervimarśasya 
vṛttirvyāpāraḥ adbhutatarā hi | tadevādbhutataratvamabhidhatte 
niṣpandatāmityādi | samapade satataṃ nityaṃ niṣpandatāṃ bhajantī | 
cidacitkalitocchritatvāccidacitoḥ pramātrā(trāḥ) 
saṃyojitavyāptirūpocchritatvāt praspandate ca yaugapadyena 
niṣpandaspandadvayaprakriyā caivaṃ niṣpandasvarūpānubhavakāle spandadvayaṃ 
vyavṛttirūeṇā'nubhūtata eva | atra niṣpandaviśrāme spando na sphuratīti 
spandadvayamanusandhāya khalu tadasphuraṇamanusandheyam || ao niṣpande pade 
vyāvṛttiviṣayatayā spandayoranubhavo'pi niyata eva | evaṃ 
jaḍaspandānubhavakāle viśrāntyajaḍaspandayorvyāvṛttiviṣayatayā'nubhavaḥ 
ajaḍaspandānubhavakāle ca viśrāntijaḍaspandānubhavaścaivameveti | athavā 
sandhirekākāratayā caitramaitrādīnāmekatve caitro viśramate maitro bahirmukhaḥ 
spandate devadatto'ntarmukhaḥ spandate iti yaugapadyaṃ padatrayasya | ato 
vimarśavṛttiradbhutatareti yathoktam || 6 ||

p. 50)

caityaṃ yadollasati saṅghaṭitasvakecchaṃ
citsvaṃ svabhāvamaṇumāśrayate nijecchām |
antarbhavedatha cidullasane tu cetyaṃ
pañcāṅgakaṃ jaḍapadaṃ caturaṅgamanyat || 7 ||

caityamityādi | prabodhasaukaryāya prāgvyākhyā tasya 
visargapadapañcatvabindupadacatuṣṭvaprameyasyedaṃ sūtram | caityaṃ visargaḥ 
bahiḥ pṛthivīrūpo'ntaḥprakṛtirūpaḥ yadāsaṅghaṭitasvakecchaṃ 
(cavargekāra) cavargākāra ikārapratipādyagandhādyahaṅkārarūpiṇyā 
yayā svakīyecchayā svayaiva rūpāntareṇa saṅghaṭitaṃ sambaddhaṃ sat ullasati | 
tadā cit aṇum saṅkucitam svamsvasambandhisvabhāvaṃ svarūpaṃ nijecchāṃ 
akāra(u)(va)kārapratipā(dya)dyāparimitapramātṛrūp
ām āśrayate tadākāreṇa tiṣṭhati | cidullasane tu caityaṃ visargaḥ tanmayaḥ 
parimitapramātā ca antarbhavet | citīti śeṣaḥ | caityasvarūpāntaramicchaiva tiṣṭhati 
| ataḥ kāraṇāt jaḍapadaṃ pañcāṅgakam | anyat ajaḍapadaṃ caturaṅgam || 7 ||

p. 51)

antarbahiḥ karaṇajṛmbhaṇayoradīrgha-
dīrghasvareṣu jaḍasaṃsaraṇaṃ dvirūpam |
e ai iti dvayamihollikhati krameṇa 
svīyecchayā padayuge ghaṭanaṃ jaḍasya || 8 ||

prameyapramāṇapramātṛrūpakakṣyātrayopalakṣitānāṃ svapnādīnāṃ 
kāraṇarūpatayā kakṣyātrayavati suṣuptipade 
pañcapañcarūpahrasvadīrghasvaravargadvayavibhaktabinduvisargapadātmikāyāṃ 
prameyakakṣyāyāṃ suṣuptisuṣuptau tadviśrāntatatkāraṇa bhūtabhedā 
bhedamiśrapramātṛsaṃsāravāsanāṃ vyutpādya idānīṃ 
sandhyakṣaracatuṣkarūpe suṣuptipramāṇapade grāhakapadatvāt 
bhedādipramātṛsaṃsāravilāsaṃ darśayati - antarityādi | 
antarbahiḥkaraṇajṛmbhaṇayoḥ kramādantarbahirindriyasamunmeṣe ca sati 
jaḍasaṃsaraṇaṃ parimitapramātṛsaṃsāraḥ dvirūpaṃ 
svapnajāgradrūpeṇetyarthaḥ | tatsaṃsaraṇadvayaṃ karma e ai iti varṇadvayaṃ 
kartṛ adīrghadīrghasvareṣu pañcapañcātmanā padadvayarūpeṇa sthiteṣvityarthaḥ 
| adhikaraṇasaptamī hrasvasvarapadarūpe adhikaraṇa yekāraḥ 
svapnarūpamantaḥsaṃsāramullikhati bodhayati | dīrghasvarapadarūpe adhikaraṇa 
yaikāro jāgradrūpaṃ bahiḥ saṃsāraṃ bodhayati | e ai iti dvayaṃ rūpaṃ 
sadbodhayatītyatrāha krameṇetyādi | krameṇa padayuge antarbahīrūpe jaḍasya 
pramātuḥ antarbahiḥ 

p. 52)

padayorekamātradvimātrākārarūpasya svīyecchayā 
antarbahirekamātradvimātrekārarūpayā ghaṭanaṃ sat saṅghaṭṭanarūpaṃ sat 
ekāraḥ khalvakārekāraghaṭanarūpaḥ tatraivaikāre akārekārayoḥ 
dvitīyamātrāyogena niṣpannatvāt akārekāraghaṭanarūpa aikāraḥ | atredaṃ 
hṛdayaṃ | sparśavyāpakabodhyayoḥ jāgratsvapnayoḥ saṃsārapadayoḥ 
pratipadamādau prameyakakṣyā madhyataḥ pramāṇakakṣyā antataḥ 
pramātṛkakṣyā copalakṣyate | tatkāraṇarūpatayā suṣuptāvapi kakṣyātrayam 
tatrādau hrasvadīrgharūpādaśa svarāḥ prameyakakṣyāḥ sandhyakṣaracatuṣṭayaṃ 
pramāṇakakṣyā vinduvisargau pramātṛkakṣyā | evaṃ sati prameyakakṣyā 
jaḍaviśrāntipadaṃ pramātṛkakṣyā ajaḍaviśrāntipadaṃ pramāṇakakṣyā 
jaḍājaḍayoḥ saṃsārapadaṃ tasya saṃsārapadasya viśrāntimūlatvādviśrāntirūpe 
prameyapade saṃsthāna(saṃsāra)vāsanā icchādvayaṃ bhavatītyādi 
sūtracatuṣṭayena nirūpitā'nena sūtreṇa sandhyakṣararūpe pramāṇapade e ai iti 
varṇadvayaṃ jaḍapramāturantarbāhyasaṃsārau pratipādyate | 
pramāṇatvātsandhyakṣarāṇāṃ dvidvivarṇarūpatā | suṣupte viśrāntipadatvena 
tatrecchāmātrasyaiva saṃsārasyopapattiḥ | akārasya visargasyecchāyāmikāra##-
yoga eva visargasya citpadagrāhakatvamiti | ekārasya grāhyagrāhakobhayarūpatā | 
evamaikārādiṣvapi yojyam | svapnapramātureva bahirmukhatvena 
jāgratpramātṛtvamiti | ekārasyaiva lakārekāradvitayamātrāyogena 
sandhivaśādaikāratvamiti | nāyamaikāra ākāra īkārayogo niṣpannaḥ | tathātve 
sandhivaśādekāratvameveti | etena svapnasyā'ntaḥsīmatayā bindupadatvaṃ jāgrato 
bāhyasīmatayā visargapadatvamiti sūcitam || 8 ||

p. 53)

antarbhaiḥ karaṇavṛttivaśādadīrgha-
dīrghaṃ svareṣvajaḍasaṃsaraṇaṃ dvirūpam |
o au iti dvayamihollikhati krameṇa 
svīyecchayā dvirajaḍasya padasya yogam || 9 ||

atha jaḍapramāturantarbahiḥ saṃsārāṇāmokāraukāraviṣayau nirūpayati 
antarityādi | antarbahiḥkaraṇavṛttivaśāt pūrvavadantarbahirindriyollāsavaśāt 
dvirūpamajaḍasaṃsaraṇaṃ ajaḍapramātṛsaṃsāraṃ 
pūrvavadadīrghadīrghasvareṣu padadvayarūpeṣu adhikaraṇabhūteṣu ajaḍasya 
padasya ajaḍapramāturbindorityarthaḥ | svīyecchayā antarbāhyakakṣyayoḥ dviḥ 
dvivāraṃ yogaṃ saṅghaṭṭanaṃ karma o au iti dvayaṃ kartṛ ullikhati sūcayati | 
akārātmano bindoḥ hrasvasvareṣu svīyecchayā ukāreṇa antaḥ pada evayogaḥ | 
tasyaiva bahiḥpade dīrghasvareṣu padabhūteṣu dvitīyamātrāyuktayā ukārarūpayā 
icchayā dvitīyamātrāyuktasyaikavāraṃ yoga iti | tadyoganiṣpannasvarūpā 
aukāraukārāntaṃ yogau sūcayata iti tātparyam | okārākārayoḥ pratyekaṃ 
grāhyagrāhakobhayarūpatvāditi vivekaḥ pūrvavat || 9 ||

bhede'pi binduravibhedapadevisargo
jñānakriyāsthala tayā'ntarabāhyasīmnoḥ |
dṛṣṭāviha prakaraṇasya balātsvabhāvaṃ
naivāpnutaḥ sphuṭamabhedavibhedarūpam || 10 ||

nanu bindurabhedarūpaḥ visargo bhedarūpaḥ kathaṃ bhedapramāturantaḥpade 
svapne bindutvaṃ | abhedapramāturbahiḥpade turyajāgrati visargatvamityatrāha | 
bhede'pīti | bhede'pi bhedasaṃsāre binduḥ hrasvasvaravargādhiṣṭhātā avibheda pade 
abhedasaṃsāre visargaḥ dīrghasvaravargādhiṣṭhātā ca āntarabāhyasīmnoḥ 
bhedasvapne turyajāgrati ca jñānakriyāsthalatayā antaḥpadasya jñānasthalatayā 
bahiḥpadasya kriyāsthalatayā dṛṣṭau lakṣitau ekāraukārarūpeṇetyarthaḥ | etau 
binduvisargau prakaraṇasya balādbhedā'bhedarūpasya prakaraṇasya balāt | 
abhedavibhedarūpaṃ svabhāvaṃ bindoravibhedarūpasvabhāvaḥ visargasya 
vibhedarūpaḥ taṃ svabhāvaṃ sphuṭamabhivyaktaṃ tathā yathā naivāpnutaḥ 
sphuṭasyaiva svabhāvasya naivāpnuta iti niṣedhāt | kiñcitsvabhāve prāpnuta eveti 
gamyate | ayamarthaḥ - bhedasvapnapade niviṣṭo binduḥ 
bhedaprakaraṇabalādabhedarūpaṃ svabhāvaṃ na sphuṭamāpnoti kiñcidāpnotyeva | 
śuddhabhedapadājjāgrataḥ svapne (abhedasparśa) avibhedaḥ 
sparśavaśādviśeṣaḥ | evaṃ turyajāgrati niviṣṭo visargo'pi abhedaprakaraṇa 
balādbhedarūpaṃ svabhāvaṃ sphuṭaṃ nāpnoti kiñciprāpnotyeva | 
śuddhā'bhedarūpātturīyasvapnapadāt turyajāgrato 
bhedaspṛṣṭivaśādviśeṣo'styeveti mantavyam || 10 ||

p. 54)

binduḥ kalā api visargakalā guṇāḥ syuḥ
sargaḥ kalā api ca bindukalāṅgabhūtāḥ |
bindvagniraṣṭakala eva visargapāyī
sargastu ṣoḍaśakalādṛḍhabindurinduḥ || 11 ||

athāsmin suṣuptipade binduvisargayostatkalānāñca anyonyaśliṣṭatayā'ṅgāṅgi 
bhāvaḥ samāna iti pratipādayan binduvisargayoḥ bimbasvarūpaṃ vyutpādayati ##-
visargavyāptyabhimāne satīti veditavyam | atha sargo visargaḥ tatkalā api 
bindostatkalānāṃ cā'ṅgabhūtā bhavatīti binduvyāptyabhimāne satīti veditavyam | 
atha bindoḥ kati kalāḥ visargasya katītyatrāha - bindvagnītyādi | bindvagniḥ 
agnrirūpo binduḥ | aṣṭakala eva hrasvasvarāḥ pañca ekāraukārau dve aṃ iti 
svasvarūpamekā kaleti sambhūya bindoraṣṭau kalāḥ bindoraṅgabhūtā visargakalā 
aṣṭau santi | tathā ca kathaṃ bindoraṣṭakalatvamityatrāha - visargapāyīti 
visargaṃ candrarūpaṃ pivatīti visargapāyī | bindvagniḥ bindāvagnau kalāsahito 
visarga ekākāratāṃ bhajatīti vindoraṣṭāveva kalā ityarthaḥ | dṛḍhavinduḥ 
svavyāptāvapi anucchinnabinduḥ | taducchede visargasvarūpasyaikyasiddheḥ | 
induścandrarūpo visargastu ṣoḍaśakalo'ṅgabhūtābhirbindukalābhiḥ saha 
dīrghasvarapañcaka aikāraukāraha(aḥ)kārārūpavisargakalāḥ ṣoḍaśeti 
yojanā || 11 ||

p. 55)

bindoḥ kalā api visargakalāśca sapta 
saptaitadanvayavaśena caturdaśāram |
bindvagniraṣṭadalapadmagatastadantaḥ
sargaśca ṣoḍaśadalābjagato'sya cāntaḥ || 12 ||

idānīṃ binduvisargayostatkalānāṃ ca anyonyaśleṣaṃ mahāyantrasya suṣuptipade 
caturdaśāracakre samupadarśayati - bindorityādi | bindoḥ kalā api sapta | 
visargakalāśca sapta | ubhayatra avayavikalāṃ vineti vijñeyam | 
etatsaptakadvayasyā'nvayavaśena śleṣavaśena caturdaśāraṃ saṃpadyata iti 
śeṣaḥ | tadantaḥ tasya caturdaśakoṇasyāntaḥ | 
prāgupadiṣṭasuptivibhāvanāmaryādayā bindvāgniraṣṭadalapadmagataḥ | asya 
cā'ṣṭadalapadmarūpabimbasya bindorantarvisargaśca ṣoḍaśadalā'bjagataḥ | atrāpi 
prākpratipāditaprakriyā'nusandheyā || 12 ||

p. 56)

hrasvasvarāṣṭadalabhāganalo hi dīrgha-
mātrātmaṣoḍaśadalāmbujabhādchaśāṅkaḥ |
candrārkayostriguṇitā'ṣṭakalātmanoḥ syā-
dbindau plutāṣṭakadalātmaniyuktiragnau || 13 ||

iti mātṛkācakraviveke suṣuptiviveko dvitīyaḥ khaṇḍaḥ ||

idānīṃ prakārāntareṇa bindukalā viviktā | evaṃ visargasya ṣoḍaśadalān 
samupadarśayan binduvisargasya tatsāmarasyarūpaṃ padatrayaṃ svaravarge 
samupadarśayati - hrasvetyādi | analo binduḥ 
hrasvasvararūpā'ṣṭadalapadmabimbagataḥ syāt | śaśāṅko visargaḥ 
dīrghamātrātmaṣoḍaśadalāmbujabhāk | aṣṭasu dīrghasvareṣu yā mātrāḥ ṣoḍaśa 
tadātmakaṣoḍaśadalāmbujabimbasaṃśrita ityarthaḥ | prativarṇaṃ dvimātratayā 
ṣoḍaśamātrāsampanneṣu dīrghasvaravarṇeṣu yadyapyaṣṭau mātrā bindurūpāḥ 
bindusāhityeneva visargasaṃsthānaniyamāt tathāpi 
bindorhrasvasvararūpaviviktavis'yasaṃbhavāt ṣoḍaśamātrātmakaṃ 
dīrghasvarāṣṭakaṃ visargasya vivikto viṣaya ityabhimānaḥ | evaṃ ca 
candrārkayorvisargabindvorabhedapadādhiṣṭhāturbindorarkatvamapyanena sūcyate 
abhedakhaṇḍasyaikādhiṣṭhātṛtvāt | bhedacamatkārasampattirabhihitatvāt 
sāvaśeṣajagatsvāmīkaraṇo'rkaḥ | niravaśeṣajagatsvāmīkaraṇo'nala iti | 
tasmādabhedabindorubhayorapi vyavahāra iti bhāvaḥ | 
tayorvisargabindurūpacandrārkayostriguṇitā'ṣtakalātmanoḥ 
triguṇitāṣṭakalāścaturviṃśatikalāḥ tadātmano bindoraṣṭau kalāḥ | visargasya 
dīrghasvaramātrārūpāḥ ṣoḍaśakalāḥ | saṃbhūyobhayoścaturviṃśatikalāḥ 
tadrūpayoretayoḥ plutāṣṭakadalātmani caturviṃśatimātrābhiraṣṭau plutāḥ 
sampadyante | plutasya trimātratvāt | 

p. 57)

tasminmahābindāvagnau bhedābhedobhayapakṣavyāpitvādayaṃ 
mahābinduragnireva | na tu sūryavyavahārasyāpi padaṃ tasminnagnau 
tayoścandrārkayoryuktiryogaḥ syāt | plutasya nāsāntaranādatvāt | 
tadātmakasyā'sya sāmarasyapadasya 
pravṛttinivṛttispandabhittibhūtaniṣpandabhūtasya mahātattvasya 
śāśvatatvamityupadiṣṭam |

avibhedavibhedamiśraṇaistribhiraṅgairghaṭitaikamūrtikā |
hṛdayeṣu vibhāti śāṅkarī svaravargārthamayī mahātmanām ||
bhāgadvayasphuritabinduvisargarūpaṃ
tatsāmarasyapadalakṣakamadhyarekham |
ālocyamarthavadanuttaravarṇabimba-
marcyaṃ ca japyamapi cā'khilasiddhimūlam || 1 ||

antaḥsphuradbindupadaṃ bahiṣṭhā
ttadūrddhvatastvaṣṭavisargarūpam |
ikārabimbaṃ samupāsanīyaṃ
makārabimbaṃ ca tato vilomam || 2 ||

madhye vimiśrapadalakṣakapūrṇabindu-
mūrddha tale ca cidacitpadakhaṇḍabindum |
īkārabimbaminacandrakṛśānurūpaṃ
śrīpādukāṃ paraśivasya śirassu śeyāt || 3 ||

p. 58)

nityā ṣoḍaśikātmikā svarakalā nityatrikoṇākṛti-
rnavye dravyarasaikadabhralaharī sākṣātkṛtavyomabhiḥ |
yaḥ samyagvarivasyati sphuraṇayā tasyā'mbikānugrahe
gūḍho'pyeṣa hṛdi sphuretsvaragaṇasyārthaḥ kṛtārthatvabhūḥ || 4 ||

śivānandena muninā deśikādeśavartinā |
dvitīye mātṛkācakraviveke vyākṛtaṃ padam || 5 ||

|| iti dvitīyaḥ khaṇḍaḥ samāptaḥ ||


atha tṛtīyaḥ khaṇḍaḥ |

viśvasya kāraṇadaśeti vicāritaivaṃ
kāryakramo bhavati kāryamidaṃ vimarśāt |
viśrāntamātmani parāhvayavāci suptau
viśvaṃ vamatyatha vibodhapade vimarśaḥ || 1 ||

atha skandhāntaramārabhamāṇaḥ pūrvottaraskandhayoḥ sambandhadarśanāya 
pūrvaskandhatātparyābhidhānapūrvamuttaraskandhaprameyaṃ prastauti - 
viśvasyetyādi | iti uktaprakāreṇa viśvasya viśrāntisaṃsārarūpeṇa 
kāraṇakāryarūpasya kāraṇadaśā viśrāntirūpā avasthā nirūpitā | 
viśrāntirūpāsuṣuptiḥ kāraṇarūpaṃ viśvaṃ saṃsārarūpāḥ svapnādayaḥ 
kāryarūpaṃ viśvamiti bhāvaḥ | evaṃ kāryakramaḥ | yadā kāraṇakramaḥ tadā 
kāryasyāpi kramaḥ kāraṇakāryayorekarūpatvāditi bhāvaḥ | 
prameyādikakṣyātrayasampannatvajaḍājaḍavyāptyādiḥ kāraṇakramaḥ | evameva 
kāryakramo'pi kāryaniṣṭhaḥ prameyakakṣyādikramaḥ kāryakramaḥ | idaṃ kāryaṃ 
viśvaṃ vimarśādbhavatīti śeṣaḥ | idamīdṛgityanusandhānamūlaṃ 
vācikatvarūpaṃ kāryaṃ viśvānusandhānaṃ vimarśaḥ | ataḥ kāryarūpasya 
viśvasya vimarśamūlatvam | ayaṃ vimarśaḥ suṣuptiviśrāntau kenarūpeṇa sthita 
ityatra āha viśrāntamityādi | vimarśaḥ suptau suṣuptikāle | parāhvayavāci pareti 
vyavahriyamāṇāyāṃ vāci | ātmani svākāre parāvāgrūpe svātmanītyarthaḥ | 
viśrāntaṃ nilīnaṃ viśvam | atha suṣuptyanantaraṃ 
vibodhapade'pyu(vyu)tthānadaśāyāṃ vamati vahirudvamati anena 
viśvasya vimarśagarbha eva sthitiruddiṣṭā | tadvilāsarūpatvāt vimarśavilāsa##-
vimarśe svayamapi nilīnaḥ prabodhapade antarbāhyendriyātmanā sphuṭasvarūpasya 
vimarśasya garbhānniḥsaratīti bhāvaḥ || 1 ||

p. 60)

vāṇī parā khalu ṛkāraḷkārarūpā
saṅkocagandhasahitā gagane'pi suptau |
saṅkoca eva cidacidgaganasya vāṇī
tadvyoma saṅkucati ca prakṛtau vimarśe || 2 ||

vimarśaḥ pārāvāgrūpeṇa suṣuptiviśrāntau tiṣṭhatītyuktam | 
prameyapramāṇapramātṛrūpe akārādyukārāntaviśrāntipade parasyā vācaḥ 
kiṃ sthānaṃ kaḥ svabhāva ityatrāha - vāṇītyādi | parā vāṇī 
ṛkāraḷkārarūpā khalu anena parāvāgrūpasya vimarśasya pramāṇatvamuktam 
| vyutthānapadeṣvapi vimarśaḥ pramāṇarūpa iti veditavyam | 
pramāṇarūpāṇāmindriyāṇāṃ anusandhānarūpatvādanusandhānasya 
vimarśarūpeṇa paryavasānādindriyāṇyeva vimarśasya svarūpamiti niṣkṛṣṭo 
vivekaḥ | ṛkāraḷkārātmanaḥ pramāṇasya 
parāvāktatvavimarśarūpatāyāmupapattyantaramāsāṃ saṅkocayati | gamane'pi 
sāmānyarūpāyāmapi suptau pūrṇasvabhāvāyāmiti bhāvaḥ | 
saṅkocagandhasahitā ṛkāraḷkārayorikārokārāpekṣayā saṅkocabhāvaḥ 
pratīyate | vyañjanavarṇeṣviva sthaulyānubhavāt | nanu parāvāco vimarśasya 
saṅkocaḥ svabhāvaścet tadānīṃ khalu saṅkoca bhāvopalakṣita - 
ṛkāraḷkārātmakapramāṇatvopapattiriti parāvāco vimarśasya 
saṅkocasvabhāvatāmupapādayati - saṅkoceti | cidacidgaganasya 
cidacitsāmarasyarūpasya gaganasya viśrāntiḥ saṅkoca eva | 
vāṇīvimarśadaśāyāṃ viśrāntasvabhāvaḥ pūrṇatayā'nubhūyate | sa eva 
svabhāvo yathānusandhānabhūmikāṃ pratigṛhṇāti tathā 
grāhyagrāhakobhayābhāsātmakavimarśarūpeṇa saṅkucati | gaganasya 
śabdākāreṇa khalu saṅkocaḥ | viśrāntirūpasya gaganasya 
śabdarūpavimarśānāṃ saṅkoca ityupapannam | nanu pūrṇatayā sthitaṃ 
tadviśrāntigaganaṃ kuto hetorvimarśātmanā saṅkocabhāvaṃ prāpnotītyata āha 
- tadvyometi | tadvyoma viśrāntigaganaṃ vimarśe prakṛtau svabhāve sati 
saṅkucati | vimarśātmanā saṅkocabhāvaparigraho viśrānti tattvasya svabhāvaḥ 
na kaścidapyatra heturiti bhāvaḥ || 2 ||

p. 61)

dharme svake svarasavāhini vāksvarūpe
lagnaṃ paraṃ gaganamapyupayāti sattām |
sattvāya nityamupagūḍhāvimarśatattvaṃ
taddharmatāṃ gaganamapyupayāti citram || 3 ||

idānīṃ kāryarūpajagadbījasya vimarśasya kāraṇarūpajagadbījatvamapi 
pratipādayan mahattvatāṃ vyutpādayati | dharma ityādi - svarasavāhini svata eva 
pravahaṇaśīle na tvanyapreraṇayā tathātve tasyāpi prerakasya 
preraṇasaṅkalparūpaṃ vimarśaṃ vinā preraṇānupapatteḥ tasyāpi vimarśasya 
vimarśāntaraṃ vinā'pravahaṇamityanavasthayā vimarśasya paryantatayā 
svarasavāhitvamaṅgīkāryam | ataḥ svarasavāhini vāksvarūpe ciddharma eva ca cito 
jananalayācceti prākpratipāditamaryādayā dharme vimarśasvarūpe svake dharme 
lagnaṃ sat paraṃ gaganamapi cidacitsāmarasyarūpaṃ viśrāntitattvamapi 
sattāmupayātīti vimarśasīmānupraveśā bhāvāt | nāstyeva sā cidapīti 
prāguktakriyayā viśrāntitattvasyāpi svarūpāsiddheḥ | ataḥ sattvāya sattāsiddhaye 
nityaṃ niyataṃ upagūḍhavimarśatattvaṃ āliṅgitavimarśatattvaṃ gaganamapi 
cidacitsāmarasyarūpaṃ viśrāntigaganamapi taddharmatāṃ tasya vimarśasya 
dharmatāmupayāti | citraṃ anyonyadharmadharmitvamadbhutamityarthaḥ | 
prākpratipādito'yamarthaḥ vimarśasya sarvaprakārajaganmūlatvapravacanaprasthāne 
vimarśaprabhāvavyutpādanāyā'nusmṛta iti niravadyam || 3 ||

p. 62)

tasmātparaiva jananī samupāsanīyā
vyomnaḥ parasya gatajāḍyamiyaṃ hirūpam |
badhnāti ceyamidamaṃśasamucchrayeṇa
jantūn vimocayati connamitā'hamaṃśāt || 4 ||

ataḥ sarvamūlatayā vimarśatattvamevopāsanīyamityāha - tasmādityādi | 
tasmādviśrānterapi mūlatvāt kāraṇatvāt jananī sarvamūlatvāt sarvamātṛkā 
paraiva vimarśaśaktireva samupāsanīyā | evakāraḥ paryālocito vā'sya 
nirṇayamabhidhatte | tāmeva paryālocanāmudghāṭayati vyomna ityādi | parasya 
vyomnaḥ upāsyatvena saṃbhāvitasyeti bhāvaḥ | gatajāḍyaṃ nirvimarśatayā 
sambhāvitajāḍyaśaṅkāvyapetaṃ rūpaṃ | iyaṃ hi khalu parāvāk 
cetanarūpatayopāsyatvenā.bhimatasya paramagaganasya caitanyakalāsthānam ata 
evā'vyaktacaitanyādaṃśāt abhyarhiteti bhāvaḥ | anena vimarśasya 
prakāśaikātmyamupapāditam | vimarśasya paramopāsyatvakathanāttadātmakasya 
pramāṇatattvasya viśeṣeṇa upāsyatvamupapāditam | ayamartho 
mahāyantraprathamopāsanāyogyapramukhapadacaturasrarūpasya pramāṇacakrasya 
sanniveśādabhivyaktaḥ upāsyatvena vyutpāditasya 
vimarśasyaivopāsanāpravṛttimūlaṃ bandhamokṣaikakartṛ pratipādayati 
badhnātītyādi | iyameva vimarśarūpiṇī parā idamaṃśasamucchrayeṇa 
svasvarūpobhayabhāgayorbhedābhedarūpayoridamahamaṃśayormadhye 
idamaṃśasamucchrayeṇa jantūn badhnāti | sarvatra vastuni idamākārapratītau 
dehamātre'pyahamākārapratītau saivocchritedagtāpratītiḥ khalu bandhaḥ | 
unnamitā'hamaṃśājjantūn vimocayati ca | idaṃpratītyanyathābhāvena 
sarvatrā'hantāpratītyaulbaṇyameva ca mokṣa iti bhāvaḥ | 
anayorbandhamokṣayorvimarśarūpiṇī parāśaktireva mūlaṃ svarasavāhinī khalu 
parā yasya yasyahṛdaye idantaulbaṇyenā'hantānyagbhāvena pravahati sa sa baddho 
bhavati yasya yasya hṛdaye ahantaulbaṇyena idantānyagbhāvena pravahati sa sa 
mukto bhavatīti bhāvaḥ || 4 ||

p. 63)

tredhedamityahamiti sphuraṇātmikāyā-
stasyāḥ svarūpamubhayāṃśasamā'samatve |
taddharmasaṅgativaśena tathā trirūpo
dharmīṃ ca caityacitimelanasiddharūpaḥ || 5 ||

pūrvasūtreṇa idamahamatmakau pratyayau vimarśarūpiṇyāḥ parāyāḥ svarūpe 
ubhau bhāgāviti sūcitaṃ anena sūtreṇa tamevārthaṃ sphuṭīkaroti - tredhetyādi 
| idamityahamiti yat sphuraṇadvayaṃ tadātmikāyāḥ tasyāḥ parāyāḥ svarūpaṃ 
tredhā bhāgatrayaviśiṣṭatvaditi bhāvaḥ | ke te bhāgā ityatrāha ubhayāṃśetyādi | 
idamityahamiti sphuraṇarūpayorubhayoraṃśayoḥ samāsamatvena tridhetyanvayaḥ | 
idamahamaṃśayoḥ sāmyameko bhāgaḥ tayorasamatve idamiti 
sphuraṇolbaṇatāyāmeko bhāgaḥ ahamiti sphuraṇolbaṇatāyāmanyo bhāga iti tau 
dvau bhāgau samatvabhāvena sambhūya trayo bhāgāḥ | atrāpi 
jaḍājaḍasāmyānāmiva bhāgakaraṇaṃ vinā pratyekaṃ sarvasanniviṣṭānāṃ 
samatvādisvarūpāṇāmaṃśatvamupacāraḥ | evaṃ dharmarūpaṃ vimarśaṃ 
paryālocya prakriyāsāmyena prākpratipāditasyāpi dharmiṇastrirūpyamanusmarati 
taddharmetyādi | taddharmasaṅgativaśena uktanavīnatrirūpasya tasya 
vimarśātmano dharmasya saṃsargavaśena dharmī ca tathā trirūpaḥ 
trairūpyopalakṣitaṃ dharmiṇaṃ pradarśayati caityeti | caityacitimelanasiddharūpaḥ 
vyāptimatā caityena vyāptimatyā citā tadubhayamelanena siddhasvarūpa ityarthaḥ | 
idantolvaṇavimarśasaṅgativaśāt vyāpakacaityarūpaḥ dharmī 
ahantolvaṇavimarśasaṅgativaśāt vyāpakacidrūp dharmī idantā'hantāsāmyena 
stimitavimarśasaṅgatidaśā ciccaityasāmarasyarūpo dharmīti vivekaḥ || 5 ||

p. 64)

viśrāntidhāmani nijāśrayayorvimarśa-
ściccaityayorbhavapade svayamāśrayo'pi |
etaddvayaṃ nijasamāśrayameva kurvan 
svairakrameṇa vilasatyabahirbahiśca || 6 ||

atha sūtratrayeṇa paramaśivabhaṭṭārakasvātantryaśaktervimarśasya 
nirādhāravilasanacamatkārān pradarśayati - viśrāntītyādi | vimarśaḥ kartā 
viśrāntidhāmani viśrāmapade suṣuptāvityarthaḥ | nijāśrayayoḥ 
ciccaityayorviśrānteḥ niḥśabdatayā vimarśaściccaityayorāśrito līna 
ityupapannam | bhavapade saṃsārapade svayamāśrayo bhavapadasya 
vikalpamūlatvādvikalpasya vimarśatvāttatra pade pramātrādikaḥ sarvo'pyartho 
vimarśamūla eveti ciccaityayoḥ pramātrorapi vimarśāśritatvam | tathā 
dharmiṇorapyāśrayo vimarśa etaddvayaṃ ciccaityarūpaṃ dharmidvayaṃ 
nijasamāśrayameva svamāśrayameva kurvan abahiḥ - antaḥ sīmāyām | 
bahiśca bahiḥsīmāyāṃ ca svairakrameṇa bāhyādabhyantaraṃ vā 
abhyantarādbāhyaṃ veti evamādibhiḥ svarasapravahaṇakramairvilasati || 6 ||

p. 65)

svapne sphuratyabahirindriyamūrtiranta-
rbāhye bahiḥkaraṇamūrtiratha prabodhe |
saṅkocamāśrayati pūrvapade'tra kiñci-
datyarthamuttarapade tu tamādadhāti || 7 ||

svapnetyādi | svapne abahirindriyamūrtirmanobuddhisvarūpaḥ 
antarabhyantarakakṣyāyāṃ sphurati | jagadrūpaṃ svavilāsaṃ darśayatīti bhāvaḥ | 
svapnaśabdaḥ prakṛtisaṃsārasyāpyupalakṣakastatrāpi manobuddhirūpeṇa 
vimarśasya jagadudvamanāt | athānantaraṃ prabodhe suṣuptinivṛttyā 
śuddhajāgradrūpe prabodhe bahiḥ kāraṇamūrtiḥ 
śrotrādivāgādijñānakiyendriyasvarūpaḥ | bāhye bāhyakakṣyāyāṃ sphuratīti 
saṃbandhaḥ | atra svapnajāgradrūpapadadvaye yatpūrvapadaṃ svapnastatra 
kiñcitsaṅkocamāśrayati | suṣuptau viśrāntyaikarasyena pūrṇasya vimarśasya 
tadantarapade svapne īṣatsaṅkocastadvaśāt pramātṛprameyayorapi tathātvam 
tameva jāgratsaṅkocamāha uttarapadetviti | uttarapade svapnāntarapade jāgrati 
atyarthamatimātraṃ taṃ saṅkocamādadhāti aṅgīkaroti || 7 ||

p. 66)

saṅkocavartiparasīmani bāhyaraṅge
vyāptiṃ samarpayati nāntaradhāmni pūrṇe |
viśrāntimarpayati pūrṇatarāmito'pi
māyā camatkṛtimavāpya jaḍo vimarśaḥ || 8 ||

paśoḥ saṃsārapade vimarśasya māyācamatkāraparigraheṇa viparītapratītirūpeṇa 
vilasanaṃ darśayati -

saṅkoceti | saṅkocavartiparasīmani saṅkocabhāvaparamapade bāhyaraṅge 
jāgratpade vyāptiṃ samarpayati pūrṇatāmāropayati | ghaṭapaṭādīnāṃ prasphuṭaṃ 
sākṣātkaraṇena jāgratprakāśa eva pūrṇa ityanusandhatte | pūrṇe jāgradapekṣayā 
pūrṇe saṅkocasyeṣanmātratvāt | āntaradhāmni āntarakakṣyāyāṃ svapna 
ityarthaḥ | atra vyāptiṃ pūrṇatāṃ na samarpayati svapnaprakāśasya 
jāgratprakāśādalpatvamanusandhatte | sākṣātkṛtānāmapi ghaṭapaṭādīnāṃ 
jāgradudaye antardhānātsvapnaprakāśasya niṣprakāśasuṣuptikalpatvameveti 
pratipadyata ityarthaḥ | ito'pi svapnāt pūrṇatarāmatipūrṇāṃ viśrāntisuṣuptimito'pi 
svapnādalpamiti saṅkocapadaṃ pratipadyate kasyacidapi ghaṭapaṭāderapratipatteriti 
bhāvaḥ | evaṃ vimarśasya viparītapratibhāne nimittamāha - māyetyādi | māyā 
camatkṛtimavāpya jaḍaḥ san vimarśa eva viparītarūpo bhavatītyarthaḥ | na 
kvacinmāyā vidyānāmatattva | vimarśa evedantaulvaṇyena 
saṃbhāsamānāmāyetyucyate sa evāhaṃtaulbaṇyena bhāsamāno vidyeti 
vyapadiśyata iti veditavyam || 8 ||

p. 67)

icchādvayāntaritamānayuge yavarge
svāpne jaḍā khalu daśā samavekṣaṇīyā |
mātṛtvamatra manaso hi lakāramūrteḥ
svapno hi mānasikasaṃsaraṇaṃ prasiddham || 9 ||

idānīmicchāmātrasaṃsārasya suṣupteranantaraṃ jñānakriyāsaṃsārayoḥ 
svapnajāgratormadhyevisargaprakaraṇatvāt kriyāprādhānyena yadyapi jāgrataḥ 
prathamavivekaucityaṃ tathāsyotpattikriyāsṛṣṭyā jñānasya prathamatvāt 
jñānasaṃsārasya svapnasya prathamaṃ vivekamācaramāṇa īṣatsaṅgocarūpāṃ 
svapnadaśāmīṣatsaṅkocavati yavarge nirūpayati -

iccheti | icchādvayāntaritamānayuge svarapadaprakriyānusāreṇa 
ikārokārasaṅkocarūpayoḥ yakāravakārayoḥ jaḍājaḍecchātvam tena 
icchādvayena antaritaṃ madhyekṛtaṃ mānayugam | 
ṛkāraḷkārasaṅkocarūparephalakārātmakaṃ kriyājñānarūpaṃ 
pramāṇayugaṃ yatra tasmin yavarge jaḍā svāpne daśā jīvasaṃbandhinī 
bhedasvapnadaśā samavekṣaṇīyā khalu yavargasvapnadaśayo 
rīṣatsaṅkocarūpayoḥ sādṛśyayogāditi bhāvaḥ | atra svapne lakāramūrtermanasa 
eva pramātṛtvam | lakāraḥ khalu jñānapramāṇasthānīyaḥ | antaḥkaraṇasaṃsāre 
svapne jñānarūpe pramāṇaṃ mana eva na tu śrotrādayo na tu 
svatantrāṇīndriyāṇyeva nijanijeṣu viṣayeṣu pravartanta ityanubhavaḥ | manasaḥ kiṃ 
svarūpaṃ vetyata āha śrotrādīnāṃ bahīrūpamāntaraṃrūpaṃ ceti rūpadvayaṃ 
yathā(dā) śrotrādayo bahirnimīlitā antaḥ pravartante tathā(dā) 
śrotrādīnāmeva tathāntaraṃ rūpaṃ mana ityucyate yadā bahirunmīlitāḥ pravartante 
tadānīṃ śrotrādivyavahāra iti vijñeyam | antaḥ śrotrādīnāmantaḥ pade mana iti 
vyāvahārāt | jñānendriyasthānīyo lakāro mana eva evaṃ karmendriyasthānīyo 
repho buddhiḥ karmendriyāṇāmapyāntararūpaṃ buddhirityavagantavyam | svapne 
manasa eva pramātrāditripuṭībhāvaparigrahacamatkāreṇa saṃsaraṇaṃ na tu 
tātvikadeharūpasya pramātuḥ tathātve svapnānubhūtānāmarthānāṃ jāgrati 
sampātaprasakteḥ | ato manasa eva mahāśaktervimarśasya tripuṭīrūpeṇa svapne 
vilasanaṃ tasyaiva manaso bahirapi śrotrādirūpasya viṣayākāreṇa vilasanamiti 
jagato na kutrāpi bahirantarvā vimarśādanyataḥ paramāṇvādeḥ siddhiriti 
gurukaṭhākṣanirastamāyāndhakārāṇāṃ sampratipannam | svapna saṃsārasya 
tattvikadehapramātṛkartṛkatve jāgrati tatsampādaucityāttatsaṃpātasyādarśanāt 
svapno manovilāsa iti laukikasyāpi sampratipannamiti tadapekṣayā svapne 
nirvivādaṃ manasa eva pramātṛtvamiti tathoktaṃ 
tāmevalaukikasampratipattimudghāṭayati - svapno hīti || 9 ||

p. 68)

svasyaiva śaktiravamarśamayī svagarbhe
grastastayaiva manasā vapurādimūrtyā |
ātmāsvaraśmipaṭalasthagito'ryameva
nābhati kiñcidapi kañcukapañcakāntaḥ || 10 ||

idānīṃ cittattvasyātmanaḥ svāntaḥsthayaiva vimarśaparyāyayā manaḥ 
śaktyā(ktau) dehādyantaḥprapañcasya 
pṛthivyādibāhyaprapañcarūpiṇyā(ṇyāṃ) saṃvaraṇacamatkāraṃ 
vyutyādayati -

svasyaivetyādi | avamarśamayī vimarśarūpiṇī śaktiḥ svasyaiva | 
svasambandhinyeva | asyāḥ sthitirapi svagarbhe | dharmatvāt manasā manorūpiṇyā 
tayaiva vapurādimūrtyā dedapṛthivyādiprapañcabhūmikāparigrāhiṇyā grastaḥ 
vyāptaḥ | anena prapañcena ahaṃkavalita iti vimarśyaiva 
viparītapratīticamatkārabhāvādbhrasanacamatkriyāviṣayaḥ na tu paramārthato 
grastaḥ | vidyodayānantaraṃ svarūpaparyālocanāyāṃ svasya prapañcena 
kabalanaṃ vimarśacamatkāramātre paryavasyatīti svadharmavilāsa stena kathaṃ 
svasyāvaraṇamityetadupamāmukhena samarthayatisvaraśmīti | svaraśmipaṭalena 
sthagitaḥ channa aryamā sūrya iva kaścukapañcakasya 
manaḥśaktisamunmiṣitaparicchinnasaṅkalparūpavedyādipañcāṅgapadātmanaḥ 
| ataḥ vyāpyakakṣyāyāṃ sthita ityarthaḥ | nābhāti na prabhāti | yathā sūryaḥ 
svaraśmipaṭalenaivācchādito na dṛgviṣayabimbaḥ tathāyamapyātmā 
svaśaktivilāsena | ata eva svaraśmicakrarūpeṇa prapañcena 
cchannontarhitacidātmakamūlarūpa ityupapannamiti bhāvaḥ || 10 ||

p. 69)

ātmānvitaṃ vapurahaṅkṛti dhīmanāṃsi
trīṇyāntarāṇi karaṇāni padaṃ pramātuḥ |
etanmanovilasitaṃ yadi pañcarūpaṃ
māyāpadaṃ padamidaṃ prakṛtestu sākṣāt || 11 ||

atha visargavyāptiviṣayatayā sambhāvitapañcāṅgakasya svapnapadasya 
saṃsthānamupadarśayan vakṣyamāṇaprakṛteḥ 
saṃsārapadādanyabhedamupapādayati -

ātmetyādi | ātmānvitaṃ vapuḥ ātmanā saha parigaṇitaṃ vapuḥ | 
ahaṅkṛtidhīmanāṃsi ahaṅkārabuddhimanorūpāṇi | trīṇyāntarāṇi karaṇāni | 
sambhūya pañcāṅgakam svapnarūpaṃ pramātuḥ padaṃ padamityasminnarthe 
pramāturātmana eva svāmyamuktam | asya 
padasyātmaśaktimanovilāsarūpatvādātmavilāsarūpatvamarthātsiddhamiti jāgrati 
mānasikasaṃsārūpaṃ prakṛtipadaṃ vakṣyamāṇapavargarūpam | tatrāpyātmā 
vapuḥ paryāyaprakṛtiḥ ahaṅkārādyantaḥkaraṇatrayamiti pañcāṅgaṃ padam | 
tathā ca prakṛtipadāt svapnapadasya ko bheda - ityatrāha etadityādi | 
etatpañcarūpaṃ padaṃ manovilasitam | yadi manasa eva tāttvikadehe 
pramātṛnirvyapekṣasya yadi vilasitaṃ tadānīṃ svapnaparyāyaṃ māyāpadaṃ 
bhavati sākṣāccedahamevaṃ smarāmīti jāgratprakṛtirūpa pramātṛmūlaṃ cet 
prakṛteḥ - padaṃ bhavatīti bhāvaḥ || 11 ||

p. 70)

māyāpade svamana eva śarīratābhā-
gityādiśantyaṇuvido'tra vakāragarbhe |
tadbāhyato'pi ca lakāramanusmarantaḥ
pañcāṅgakaṃ padamidaṃ caturaṅgameva || 12 ||

nanu svapnapadaṃ visargavyāptiviṣayatayā pañcāṅgakamityuktam | tatra 
yakārādivakārāntāścatvāro varṇāḥ 
jaḍājaḍecchāpramāṇadvayājjaḍecchāsthānīyavisargapramātṛsthānaṃ varṇo 
na śrūyate vahiśca na dṛśyate | tatkathamasya padasya pañcāṅgatvamityatrāha 
-

māyetyādi | aṇivido mantravidaḥ | māyāpade svapnapade | bhedavimarśo 
māyābheda vimarśasya svapna eva prathamābhivyaktisthalamiti svapnapade 
māyāpadamiti ca vyavahāraḥ | tatra pade mana eva kālarūpaḥ śarīratābhāk 
dehapramātṛbhāvabhāk | manovyatirekeṇa svapne vyavahartā deho nāstīti 
prākpratipāditam | ato manasa eva dehatvamityādiśanti | kurvantara ? 
(atra)ravakāragarbhe vakārasyāntaḥ yakārānantarapada ityarthaḥ | 
tadbāhyato'pi ca vakārātpūrvapde ca lakāramanusmarantaḥ anuyojayantaḥ | manaḥ 
sthānīyasya viyojane mana eva dehatvaṃ prāptamiti pratīyate | atastathāyojanena 
sampradāyapravartanamevopadeśa iti bhāvaḥ | vakārātpūrvapade 
bāhyatvenābhimate manaḥsthānīyo lakāro'nusandheyaḥ | vakārātparapade 
āntaratvenābhimate dehasthānīyasya lakārasya sanniveśa iti | nanu visargavyāptipade 
visargapramātṛrūpasya dehasya kathamātmasthāniyasya vakārasya garbhe 
sanniveśa ityatrocyate - svapnapade visargasya sthitirbindugarbha eva tathāpi 
vindorvisargeṇāvyāptipratītiḥ | ata eva svapnasya cidacidvyāptipradeśe 
visargapramātṛrūpasya dehasya kathamātmasthāniyasya vakārasya garbhe 
sanniveśa ityasaṅketasthānatayā miśrādvayaṃ vakṣyati | jāgrati tu 
visargapramāturbindubahirbhāgasanniveśaḥ | ata eva tasyāśuddhatā vakṣyate | 
dehasyātmāntargatvena antaḥkaraṇatrayasyātmāntargatatvamanumeyam | 
tadbahirgatatvasanniveśastadvyāptipratipattyapekṣayopapadyata iti niravadyam |

nanvetatpadaṃ pañcāṅgakamuktam tathā ceccaturaṅgakeṇa śavargeṇa saha 
aṣṭakoṇe kathaṃ samasaṅkhyayā sanniveśamarhati | athāsya caturaṅgatve 
visargavyāptirna saṅgacchata ityatrāha - pañcāṅgakamityādi | vakārasya 
bahireva lakārasanniveśe caturaṅgameva satsāmpradāyikena vakāragarbhe 
lakāragarbhasanniveśarahasyena pañcāṅgakaṃ ceti viśeṣajñaiḥ sampratipadyate 
iti vijñeyam || 12 ||

p. 71)

pṛthvī lakāra iha dehamayī svadhāmā
kartṛjñatesya marudagnimayau yarephau |
vyāpye tayoḥ kṣitijalau(le) vikṛte lavau ca 
svātmasthitasya vapuṣaḥ karaṇāni garbhe || 13 ||

uktamaryādayā visargavyāpyābhimāne pañcāṅgasya svapnapadasyāṅgeṣu 
varṇeṣu paśupadatvātpṛthivyādīnāṃ vyutkrameṇa sanniveśaṃ darśayati -

pṛthvītyādi | iha svapnapade lakāraḥ vakārāntarvartilakāraḥ 
svadhāmā'nyasminpadayākāśasthānaṃ prāptā deharūpiṇī pṛthvī | asya 
pṛthvīrūpasya dehasya visargapramātuḥ | marudagnimayau vāyvagnirūpau yarephau 
| kartṛjñate kriayajñānakaraṇe vidyāptipade salilajaḍāgnirūpe yattattvadvayaṃ 
tadidānīṃ vyutkramapade vāyujaḍāgnisthānaṃ yakārarepharūpeṇa upalakṣitam | 
pṛthivyātmano dehapramātuḥ cidvyāptau sādhanabhūtaṃ 
kriyājñānakaraṇadvayaṃ bhavatīti bhāvaḥ | kriyātmano dehasya pramātṛtvāt 
tatsādhanamapi kriyāpradhānaṃ bhavatīti vijñeyam | vakārātpūrvo lakāraḥ 
vakāra(rātpara)śca lakārastayoryakārarepharūpavāyyagnyoḥ vyāpye 
vikṛte vikṛtimāpanne | prakṛtyā vāyvākāśarūpayostattvayoḥ 
kṣitijalabhāgau (vi)vakārakṣitijalau(le) | evaṃ svātmasthitasya 
vapuṣaḥ ātmasthānīyavakāragarbhe sthitasya dehasya visargapramātuḥ garbhe 
karaṇāni | bhavantīti śeṣaḥ | visargasya svavyāptipade citpadāvacchedaniyamāt 
ākāśādirūpasya visargapadasya saṃsthānaviśeṣeṇaiva cidana(va)cchedo 
gamyate | visargapramātṛsādhanābhyāṃ vāyvagnibhyāṃ 
pṛthivījalayorucchedo na sidhyati | vāyunā jalasyocchedaḥ agninā pṛthivyā 
ucchedaḥ sambhavati | vāyunā pṛthivyucchedo'gninā jalasyocchedo na 
sambhāvyata iti || 13 ||

p. 73)

magnaḥ pumānvapuṣi cittamahaṃkriyāyāṃ
buddhau jaḍāṃśajaṭhare'pyajaḍastadaṃśaḥ |
itthaṃ pramātari jaḍāṃśagatā'jaḍāṃśe
jñānakriyāntaravabhāti mahānajāṇḍaḥ || 14 ||

idānīmātmanaḥ svagarbhasthenaiva dehādinā vyāptiṃ nirūpayan 
manobuddhirūpasya vimarśasya dehāhaṅkārarūpāntarjagadudvamanānantaraṃ 
bāhyajagadudvamanacamatkāraṃ darśayati -

magna ityādi | pumānātmā vakārarūpaḥ | vapuṣi lakārarūpe | magno bhavatīti 
śeṣaḥ | cittaṃ pūrvalakārarūpaṃ manaḥ | ahaṃ kriyāyāṃ yakārarūpe ahaṅkāre 
magna ityanvayaḥ | buddhau jaḍāṃśajaṭhare | ajaḍastadaṃśaḥ magna ityanvayaḥ | 
buddheragnitvaṃ jaḍā'jaḍarūpatvaṃ ca pratipāditam | nanu vāyunāhaṅkāreṇa 
pṛthivīrūpasya cittasya kabalanam agnirūpayā buddhyā jalarūpasyātmanaḥ 
kabalanaṃ pūrvasūtreṇonmīlitam | idānīmātmano dehena kabalanaṃ kathamiti cet 
ucyate | jñānakriyārūpaṃ karaṇadvayaṃ pramāturaṅgameva | tatkabalanaṃ 
phalataḥ pramātṛkabalanameveti na virodhaḥ | itthamuktanimajjanapakriyayā | 
pramātari vakārarūpe pramātari | jaḍāṃśagatā'jaḍāṃśe 
visargatadaṅganimagnasvātmasvakīyāṅge sati jñānakriyāntaḥ 
manobuddhigarbhāt | manobuddhirūpavimarśagarbhādityarthaḥ | mahān ativitataḥ | 
ajāṇḍo brahmāṇḍaḥ | avabhāti nirgacchati | vimarśaḥ svagarbhādantaḥ 
prapañconmīlanānantaraṃ bāhyaprapañcamudvamatīti bhāvaḥ | svapnapade 
brahmāṇḍasya piṇḍāṇḍaṃ kāraṇamitilaukikasyāpi sampratyayaḥ | jāgrati tu 
brahmāṇḍaḥ piṇḍāṇḍasya kāraṇamiti dakṣiṇamārgalaukikapratītiḥ | 
vāmamārgasya yoginastu tatra piṇḍāṇḍa eva brahmāṇḍakāraṇamiti niścayaḥ 
siddhadarśane | yāmale tu tayoranyonyakāryakāraṇatvaṃ yaugapadyasiddheriti 
śaktyātmanoḥ piṇḍāṇḍabrahmāṇḍayoravinābhāva iti | antaḥ pade 
piṇḍāṇḍāṅgaṃ brahmāṇḍamiti bahiḥ pade brahmāṇḍāṅgaṃ piṇḍāṇḍamiti 
samavivekaḥ || 14 ||

p. 74)

piṇḍāṇḍamūlamapi mūlamivāsya bhāti
brahmāṇḍamantaramapi bāhyamivāsya citram |
māyāvimohitadṛśā tadaṇurnirīkṣya
svāṅgāni pañca kalayatyaṇuśaktikāni || 15 ||

idānīṃ paśoḥ svasvarūpabhūtāt piṇḍāṇḍādevoditasya brahmāṇḍasya 
darśanena yo'yaṃ viparītapratītirūpavimarśavilāsa staṃ vivṛṇoti -

piṇḍāṇdeti | brahmāṇḍapiṇḍāṇḍamūlamapi svapne'pi dehābhimāninaḥ vivādaṃ 
manomūlatvātpiṇḍāṇḍamūlakamapi asya piṇḍāṇḍasya svayaṃ mūlamiva bhāti | 
asya piṇḍāṇḍasya antare'pi manoniṣṭhatvādantaḥsthamapi bāhyamiva bhāti | 
citramadbhutam | svāntaḥsthasya svavyāpakatvena pratīterdbhutatvāt | aṇuḥ 
saṅkucitapramātā | tattadevaṃvidhaṃ brahāṇḍam | māyāvimohitadṛśā 
māyācamatkāraparigraheṇa vimohitayā vikṛtiṃ gatayā dṛśā | 
dṛgvimarśena nirīkṣya | pañca piṇḍāṇḍasthānāni dehādīni | svāṅgāni | 
aṇuśaktikāni brahmāṇḍāpekṣayā atyalpasārāṇi | kalayati | manute || 15 ||

p. 75)

saṅkḷptavāyuśikhibhūjalakhāpakarṣā
bandhāḥ syurantaraṇukasya kalāpyavidyā |
rāgaśca kālaniyatī iti kañcukāste
māyātmanaḥ prathamakañcukatā suṣupteḥ || 16 ||

idānīṃ paśoḥ pañcamahābhūtātmakabrahmāṇḍāṅgadarśanena 
saṃkucitabhūtātmakasvasvarūpapiṇḍāṇḍāṅgānāmapakarṣasaṅkalpā eva 
antarbandhāḥ kalādiśabdavyavahriyamāṇāḥ ṣaṭkañcukā bhavantītyāha -

saṅkṛpteti | saṅkḷptavāyuśikhibhūjalakhāpakarṣāḥ | saṅkḷptāḥ 
saṅkalpitāḥ vāyvādyapakarṣāḥ 
yakārarephalakāravakāralakārasthānakavāyvāgnikṣitijalākāśasaṅkocāḥ | 
aṇukasya paricchinnapramātuḥ | antarbandhāḥ syuḥ | saṅkalpānāṃ 
paśorantarhṛdaye'vasthānāt prapañcavyāptilakṣaṇabandhamūlatvācca 
antarbandhatvam | svasaṅkalpavaśād baddha iti prasiddheḥ | teṣāṃ 
saṅkalparūpabandhānāṃ yakārasthānakavāyvādikrameṇa 
siddhasampradāyaprasiddhakalādiṣaṭkañcukarūpatāṃ krameṇānudiśati - 
kaletyādi | yakārasthānakavāyusaṅkoca saṅkalpaḥ kalā nāma kañcuko bhavati | 
rephasthānakāgnisaṅkoca saṅkalpaḥ avidyā nāma kañcuko bhavatīti | 
lakārasthānakapṛthvīsaṅkoca saṅkalpo rāga iti kañcuko bhavati | 
vakārasthānakajalasaṅkocaḥ saṅkalpaḥ kālo nāma kañcuko bhavati | 
lakārasthānakā'kāśasaṅkocaḥ saṅkalpo niyatirnāma kañcuko bhavati | 
aparicchinnapramātṛpade sarvakartṛtvasya vāyoḥ paśupade 
saṅkocātkalāmātrakartṛtvamiti kalā sarvajñatvasyāgnervidyārūpasya 
saṅkocādvaiparītye avidyātvam pūrṇatvaśakteḥ pṛthivyāḥ saṅkoce 
mamedamāśāsyamiti spṛhāparyāyarāgodayādrāgatvam nityatvaśakteḥ salilasya 
saṅkoce anityatākalanātkālatvam vyāpakatvaśakterākāśasya saṅkoce 
atraivāhamiti deśaniyamānniyatitvamiti kalādīnāmupapattiḥ | nanu kañcukāḥ 
ṣaḍitiprasiddhistatra māyā prathameti śrūyate tasyāḥ kathaṃ nātra viveka ityatrāha 
- māyātmana iti | yo'yaṃ pañcakañcukarūpātsvapnātpūrvabhāvinī 
tatkāraṇarūpabhūtā jaḍasuṣuptiḥ | saiva māyābhedasaṃsārasya mūlarūpatvāt 
tasyā māyātmanaḥ suṣupteḥ prathamakañcukatā kṣakārādi kakārāntavarṇāḥ 
śivādikṣityantaṣaṭtriṃśattattvarūpā iti sāmpradāyikī prasiddhiḥ | te ca varṇā 
dvirūpeṇa lakāreṇa saha pañcatriṃśakena ṣakārakṣakārayorekavarṇatvena 
sampradāye sampratipannatvāt | tataḥ svaravargasya 
māyātattvarūpasyāntaḥsthaḥvargamūle sanniveśe varṇeṣu ṣaṭtriṃśattattvasthiti 
ravisaṃvādinī | svara khaṇḍaḥ khalu vyāpakakhaṇḍasya mūlam | 
yavargarūpabhedasvapnabījatvācchavargarūpā-bhedasvapnaviśrāntipadatvācca 
| utpattyapekṣayā jñānasya prādhānyaṃ pratītyapekṣayā kriyāyāḥ 
prādhānyamitijñānakriyāsaṃsārarūpayoḥ svapnajāgratormadhye sarvakāraṇasya 
suṣupteḥ svaravargarūpasya sanniveśa iti svaravarge svapnavāsanārūpayakāro 
māyātattvasthānamiti vivekaḥ || 16 ||

p. 76)

kartṛtvaśaktiranilaḥ sakalajñatāgni-
rbhūḥ pūrṇatā'vilayatāmbu viyadvibhutvam |
pañcāpi śaktaya imā vitatāḥ svarūpaṃ
śambhorbhavantyapi ca saṅkucitāḥ paśostu || 17 ||

idānīṃ yakārādisthānānāṃ vāyvādīnāṃ bhūtānāṃ pūrṇāpūrṇatayā 
jīvaśivasvarūpakartṛtvādipañcaśaktittvaṃ vyutpādayati -

kartṛtveti | anilaḥ śivasya sarvakartṛtvaśaktiḥ | agniḥ sarvajñatāśaktiḥ | bhūḥ 
- pūrṇatāśaktiḥ | ambu - avilayatā nityatvaśaktiḥ | viyadākāśaḥ - 
vibhutvaṃ vyāpakatvaśaktiḥ | imāḥ pañcāpi śaktayaḥ niratāḥ pūrṇāḥ 
śambhoḥ svarūpaṃ bhavanti | saṅkucitāstu paśoḥ svarūpaṃ bhavanti | sarvasyāḥ 
kriyāyāḥ spandarūpatvāt spandasya vāyudharmatvādbāyoḥ kartṛtvaśaktitā | 
jñānasya bhāsanarūpatvāt bhāsanasya tejodharmatvādvahnerjñatvaśaktitā | 
sampannatāparyāyasya pūrṇatvasya 
sakalabhogyavastumūlatvātsakalabhogyavastūnāṃ pṛthivīmūlatvāt pṛthivyāḥ 
pūrṇatvaśaktitā | nityatvasyā'pyāyanāvicchedamūlatvādāpyāyanasya 
nityatvaśaktitvam | vibhutvasya vyāptimūlatvā 
dvyāpterākāśadharmatvādākāśasya vibhutvaśaktiriti vivekaḥ || 17 ||

p. 77)

syātpañcaśaktimayatā prakṛtiḥ śivasya
svāntarjagatkalanamapyatha dehinastu |
bāhye jagatkalanameva bhavedvibhedaḥ
svābhyantarasthajagato'pi vimohaśaktyā || 18 ||

śivayoḥ pañcaśaktimayatve sāmānye bhedakaṃ dharmamutpādayati -

syāditi | śivasya pañcaśaktimayatā prakṛtiḥ svabhāvaḥ syāt | aṣṭau mūrtayaḥ 
śivasyeti prasiddhiḥ | tatra candrārkayostejasi vahnāvantarbhāvādyajamānasya 
cidātmana ākāśe tejasi śivāntarbhāvāt brahmāṇḍarūpeṇa pariṇatāḥ 
pañcamahābhūtā eva śivasya svarūpamākāśaprabhūtikā ityupapannam | śivasya 
jīvādbhedakaṃ dharmamāha - svāntarjagatkalanamiti | 
mahābhūtapariṇāmarūpāṇāṃ jagatāṃ bhūrbhuvādīnāṃ 
mahābhūteṣvevāvasthānāt tadātmanaḥ śivasya svāntarjagatkalanametāvatī 
śivasya prakṛtiḥ | atha dehinastu | atha pakṣāntare | pañcabhūtātmakatvāt 
pañcaśaktimayasyaiva sataḥ svābhyantarasthajagataḥ piṇḍāṇḍarūpasya jīvasya | 
piṇḍāṇḍādeva brahmāṇḍodayāttatraiva tasya saṃsthānāt 
svābhyantarasthajagato'pītyupapannam | vimohaśaktyā viparītapratītirūpavimarśa 
śaktyā | bāhye vyāptipade | yajjagatkalanam jagatāmavasthānasaṅkalpaḥ | tadeva 
śivādviśeṣaḥ | bhedakodharmaḥ | yadā nijasvarūpaṃ piṇḍāṇḍaṃ 
brahmāṇḍasya mūlatayā brahmāṇḍādadhikaṃ manyate | tadā svasvarūpasyaiva 
brahāṇḍatve taduttīrṇatve ca prāpte sati viśvamayaviśvottīrṇasvabhāvaṃ 
śivatvameva śivasya prāpnotīti bhāvaḥ || 18 ||

p. 78)

antaḥsthitasya manaso na hi pūrtiyoga-
ścaityasya tatkabalitatvaviniścayāyāḥ |
tadvacciterapi na pūrtirato daśeyaṃ
pakṣadvaye sphuradapūrtyabhipūrtiyogā || 19 ||

idānīṃ svapnasya miśrādhvatāpratipādanāya tatra cidacidvyāpisāṅkaryaṃ 
darśayati -

antarityādi | manasaḥ | antaḥsthitasya caityasya | dehabrahmāṇḍarūpasya vedyasya | 
pūrtiyogaḥ pūrtyupapattiḥ | na hi | tatkabalitatvaviniścayāyāḥ - 
tenobhayavidhena caityena kabalitatvaṃ vyāptatvam tatra viniścayaḥ 
pratipattidārḍhyam yasyāḥ sā tathoktā | citerapi vakārasthānakasyātmano'pi tadvat 
na | yathā caityasya tathetyarthaḥ | pūrtiḥ caityasya cidantargatatve paramārthe 
cidvyāptirevāstu | anyathā pratipattidoṣeṇa paramārthasya na khalu vyāhatiriti 
nāśaṅkanīyam | nirvikalpaparamārtho mūlavastu nirvikalpavaśādeva khalu 
saṃsārādhyavasāyaḥ | na hi pāramārthikaḥ saṃsāraḥ | 
atastattatpratītirūpavimarśabhāsitā bhāvā atāttvikatvena nāpahnavanīyāḥ | 
tathātve sarvasyāpi saṃsārasyāpahnavīyatvaprasakterityalaṃ 
rahasyopadeśāntarāyakathābhiḥ ataścidacitorvyāptinirṇayānaikāntyāt | iyaṃ 
daśā | svapnaḥ | pakṣadvaye cidacidrūpe pakṣadvaye | sphuradapūrtyabhipūrtiyogā 
sphurantyorapūrtyabhipūrtyoryogaḥ saṃsṛṣṭirasyāmiti sā tathoktā || 19 ||

p. 79)

adhvā bhaveccidapakarṣavaśādaśuddhaḥ
śuddhastvasau bhavati caityapadāpakarṣāt |
ciccaityayorupacayā'pacayā'viśeṣān-
miśro hi māyikapadaṃ bhavatīdamadhvā || 20 ||

svapnasyāśuddhādhvatāpravacanaprasthāne sarvasyāpyadhvanaḥ svarūpaṃ 
vyutpādayati -

adhveti | cidapakarṣavaśāccaityasya vyāptyā cittatvasyāpakarṣe vyāpyatve prāpte 
tadvaśāt | aśuddhaḥ adhvā bhavati | yatra yato vyāpyatvādapakarṣaḥ tadeva 
padamaśuddhādhveti vyavahriyate | 
bhedajāgrajjaḍasuṣuptiścā'śuddhādhvetyarthaḥ | tatra caityavyāpteraikādhipatyena 
cito vyāpyatvāt | asāvadhva caityapadāpakarṣāt śuddho bhavati | śuddha iti 
vyavahriyate | turyapadaṃ śuddhādhvā cidvyāptiraikādhipatyena caityasya 
vyāpyatvāt | idaṃ māyikapadaṃ svapnapadam ciccaityayorupacayāpacayāviśeṣāt | 
upacayo vyāpakatvam | apacayo vyāpyatvam | tayoraviśeṣaḥ sāmānyabhāvaḥ | 
ciccaityayoḥ pratyekaṃ vyāpya vyāptisāmānyāt miśro hyadhvā bhavati | 
miśrādhveti vyavahriyate | viśvasya cinmayatvapāramārthyāt tadvyāptipratītireva 
śuddhiḥ | tadvāna śuddhaḥ | caityavyāpteścamatkāramātratayā 
citsvarūpāvarakatvena malaparyāyatāyāṃ caitavyāptipratītiraśuddhiḥ | 
tadvānaśuddha iti veditavyam | jāgradādīnāmeva daśānāṃ śivajīvayoḥ 
sañcaraṇaparyāye punaḥpunarabhyāvṛttiviṣayatayā vyavahāraḥ || 20 ||

p. 80)

ātmā vakāravapuṣāṇurukāra eva
dehātmanaiva khalu saṃsṛtirasya jantoḥ |
dehaṃ ca tāttvikamamuṣya suṣuptameva 
svapne tadatra mana eva śarīratābhāk || 21 ||

iti mātṛkācakraviveke svapnavivekastṛtīyaḥ khaṇḍaḥ ||

prakaraṇamupasaṃharan svapne manasa eva śarīratvamiti vipratipattiviṣayatvāt 
saviśeṣaṃ pratipādayati -

ātmeti | akārādirūpe suṣuptipade ātmasthānīye ya ukāraḥ so'yamukārarūpa 
evātmā svapnapade vakāravapuṣā vakārarūpeṇa | aṇuḥ saṅkucitaḥ | asya 
vakārarūpasya jantoḥ jīvasya | dehātmanaiva deharūpeṇaiva | saṃsṛtiḥ 
saṃsaraṇam khalu śivavaddehabandhaṃ vinā nirmalacidākāśarūpeṇa 
saṃsaraṇalīlācamatkārānusandhānaṃ na saṃbhavatīti bhāvaḥ | ato jīvasya 
saṃsaraṇe dehamavaśyaṃ svapne manaḥ - kalpitam tāttvikaṃ dehaṃ 
suṣuptameva nimīlitabahirindriyagrāmaṃ sacchayyātalaṃ na jahātīti bhāvaḥ | 
tasyaiva svapnasaṃsāriṇo'dhiṣṭhātṛtve svapnasambhāvitāṅgulicchedāderjāgrati 
sampātaprasakteḥ | yadyapi tāttvikasyāpi dehasya manomūlatvaṃ tathāpi 
laukikapratītyapekṣayā'tāttvikaṃ manaḥkṛtamityuktam | tattasmātkāraṇād atra 
svapne | mana eva | pāriśeṣyāditi bhāvaḥ | śarīratābhāk śarīratvaṃ bhajatīti 
sampratipannaṃ laukikasyāpītyarthaḥ || 21 ||

p. 81)

śambhordakṣiṇamakṣibhūtavitateḥ śoṣe yakāraḥ paṭu -
rnetraṃ madhyamamuṣya lokadahane jāgartirephākṣaram |
viśvāplāvakakarmaṭhaṃ paśupatervāmekṣaṇe vākṣaraṃ
trainetraṃ padamādadāti japatāmetattrayaṃ dehinām ||

suptyā magnasya jaladhau viśvasyoddhṛtya dhāraṇāt |
mantravidbhiryavargo'yaṃ dhāraṇāśaktirucyate || 1 ||

sthitirindre hi viśvasya lakāre mānase tathā |
tadindrākhyā lakārasya mantravitsāmpradāyinī || 2 ||

vakāraṃ ca lakāraṃca bhitvā budhyātitīkṣṇayā |
(valabhidvalabhitprokto navalo nāma rākṣasaḥ ) || 3 ||

bhedapratyayaghasmarairnavarasaiḥ peyairyakārātmakai-
?rlākārairupadaṃśanaiśca radanotpattikriyāyāḥ phalaiḥ |
māyāṃ ye samupāsate kṛtadhiyasteṣāṃ yavargasthitaṃ 
māyāsphūrtirahasyamantaracirādudyotate svātmani || 4 ||

śivānandena muninā deśikādeśavartinā |
tṛtīyaṃ mātṛkācakraviveke vyākṛtaṃ padam || 5 ||

iti tṛtīyaḥ khaṇḍaḥ samāptaḥ || 3 ||


atha caturthaḥ khaṇḍaḥ ||

ityantarīṣadiha saṅkucite vimarśe
saṅkocamāśrayati bāhyapade pragāḍham |
pratyekameva kalayantyatha bhāvamevaṃ
bhūtāni pañca jagato niyataḥ kalāpaḥ || 1 ||

atha skandhāntaramārabhamāṇaḥ pūrvottaraskandhayoḥ sambandhadarśanāya 
pūrvaskandhaprameyānuvādapūrvakamuttaraskandhaprameyaṃ prastauti -

itītyādi | ityuktaprakāreṇa | antarantaḥkaraṇakakṣyāyām | iha svapnadaśāyām | 
īṣatsaṅkucite vimarśe bāhyapade bāhyendriyakakṣyāyām | jāgrati | 
pragāḍhamatimātraṃ saṅkocamāśrayati | bhūtāni jagato niyataḥ kalāpaḥ | jagato 
bhūtapariṇāmarūpatvāt bhūtānāṃ niyamena jagatkalāpatvam | pratyekaṃ 
pañcabhāvaṃ kalayanti prāpnuvanti | vimarśasyātisaṅkocapade jāgrati 
bhūtānāmapyatisaṅkocaparigrahāt | pṛthivyādīnāmekaikasya 
pṛthivyādipañcarūpatvenātisaṅkocaḥ | paśupramātṛpadasya salilasya 
puruṣaprakṛtyādirūpeṇa pañcabhūtātmatayātisaṅkocaḥ | 
paśupramātṛjñānendriyapadāyāḥ pṛthivyāḥ śrotratvagādirūpeṇa 
pañcabhūtātmatayātisaṅkocaḥ | 
paśupramātṛkarmendriyapadasyāgnervākpāṇyādirūpeṇa 
pañcabhūtātmatayātisaṅkocaḥ | paśupramātṛjñeyavedyapadasya vāyoḥ 
śabdasparśādirūpeṇa pañcabhūtātmatayātisaṅkocaḥ | paśupramātuḥ 
kāryavedyarūpasyākāśasyākāśavāyvādirūpeṇa pañcabhūtātmatayāti 
saṅkocaḥ | atrāyamartho gamyate - bhūtānāṃ pratyekaṃpañcabhūtātmatayā 
vilasanaṃ svabhāvaḥ suṣuptisvapnayorapi saṅkocāviṣayatvānnonmiṣati | 
jāgratyatisaṅkocapade tu samunmiṣatīti | etena bhūtānāmapi sarveṣāṃ 
sarvabhūtaiḥ sahāvinābhāvasambandha niyama iti veditavyam || 1 ||

p. 83)

yadvarṇapañcakamapūrvakamādivargya-
mantaḥsthatāṃ bhajati saṅkucite tadīṣat |
tatkādivargatanusaṅkucitaṃ nitānta-
mūṣmātmakaṃ ca dadhate'ṅkuritābhipūrti || 2 ||

idānīṃ jāgratprastāve kādimāntasparśavarṇānāṃ saṅkocādhikyadarśanāya 
sarvavarṇakāraṇarūpasyākārādivarṇapañcakasya sphuraṇe pratipādiprakriyāṃ 
vyutpādayati -

yadvarṇetyādi | ādivargaḥ - vargāṇāmāditvādādivargaḥ svaravargaḥ | tatra 
bhavam ādivargyam | apūrvakam akāraḥ pūrvo yasya varṇapañcakasya 
tadapūrvakaṃ yadvarṇapañcakam akārekārokāra-ṛkāraḷkārarūpam | 
tadevaṃ varṇapañcakam | īṣatsaṅkucitaṃ sat | īṣatspṛṣṭatāprayatnaviṣayatayā 
īṣatsaṅkucitaṃ sat | antaḥsthatāṃ yakārādirūpatāṃ bhajati | ikārasyeṣatsaṅkoco 
yakāraḥ ṛkārasya rephaḥ (ḷ)?ikārasya lakāraḥ ukārasya 
vakāraḥ saṅkocaḥ | manasa eva lakārasthānakasya 
visargapramātṛparyāyadeharūpatvādakārasaṅkoco nāsti | 
evamakārādivarṇapañcakasyaiva rūpāntaramantaḥsthavargaḥ | tadeva 
varṇapañcakaṃ nitāntaṃ saṅkucitaṃ spṛṣṭāviṣayatayātisaṅkucitaṃ sat | 
kādivargatanu - kavargādivargapañcakasvarūpam | akārasya saṅkocaḥ 
kavargaḥ | ikārasya saṅkocaścavargaḥ | ṛkārasya saṅkocaṣṭavargaḥ | 
ḷkārasya saṅkocastavargaḥ | ukārasya saṅkocaḥ pavargaḥ | atha tadeva 
varṇapañcakam | aṅkuritābhipūrti - īṣadvivṛttiprayatnaviṣayatayā 
aṅkuritapūrṇatvaṃ sat ūṣmātmakaṃ ca | (dadhate - bhajati) 
pavargapañcakarūpeṇa saṅkucitasyākārādivarṇapañcakasyeṣatpūrṇatvarūpā 
ūṣmāṇa ityarthaḥ | cavargasyeṣatpūrṇatvaṃ śakāraḥ | ṭavargasyeṣatpūrṇatvaṃ 
ṣakāraḥ | tavargasyeṣatpūrṇatvaṃ sakāraḥ | kavargasyeṣatpūrṇatvaṃ hakāraḥ | 
evaṃ kāraṇarūpasyākārādivarṇapañcakasyaiva daśāviśeṣāstatkāryarūpāḥ 
sarve varṇā iti vivekaḥ || 2 ||

p. 84)

sthānena sādhitadharāprabhṛtisvabhāve
varṇotkare bhavati mātṛpadaṃ pavargaḥ |
ātmā manastadanu buddhirahaṅkriyā ca |
prāk cetasaḥ prakṛtirapyavarohabhaṅgyā || 3 ||

atha sparśakadambakasya sthānavaśātpṛthivyādirūpatvavivekaṃ 
prāguktaprameyatayā sūcayanniti tatpramātṛpadasya pavargasya varṇapañcake 
tatpratipādyaṃ tattvapañcakaṃ vyutpādayati -

sthāneti | sthānena kaṇṭhatālvādīnā | sādhitadharāprabhṛti svabhāve 
prāguktaprakriyayā nīcoccasthāneparyālocanayā niścita pṛthivyādisvabhāve | 
varṇotkare sparśavarṇakadambake | pavargo mātṛpadaṃ pramātṛpadaṃ bhavati 
| yadyapi kavargasyaiva vyāpakatayā pramātṛpadatvaṃ tathāpi caityasya 
pramātṛtvaṃ vaikārikaṃ citaḥ prameyatvaṃ ca tatheti citpadasya pavargasya 
pramātṛpadavyavahāraḥ pūrva(śā)śasanayeti niravadyam | 
avarohabhaṅgyā vilomakrameṇa | makāramārabhya pakāraparyantamityarthaḥ | 
ātmā manaḥ buddhiḥ ahaṅkriyā prakṛtiritipavargavarṇānāṃ vilomakrameṇa 
tattvapañcakasvarūpatā | tadbhāvakatve tatsvarūpatvamupacārataḥ | makāra ātmā 
puruṣatattvamityarthaḥ | bhakāro manastattvam | bakārobuddhitatvam 
phakāro'haṅkāratattvam | pakāraḥ prakṛtitattvamiti vijñeyam | 
pakārādivarṇapañcakasya pṛthivyādyākāśāntarā(tā)yāṃ satyāmeva 
prakṛtyādivyavahāraḥ | pṛthivyaṃśaḥ prakṛtiḥ | jalāṃśo'haṅkāraḥ | 
agnyaṃśo buddhiḥ | vāyvaṃśo manaḥ | ākāśāṃśaḥ puruṣa iti vivekaḥ | 
evamitaravargacatuṣṭayasyāpi prathamavarṇādāramya pṛthivyādyaṃśatatve 
satyeva vakṣyamāṇatattattattvarūpatā vijñeyā |

nanu puruṣatattvānantaraṃ prakṛtitattvamiti pravādaḥ tatkathamatra kramavirodha 
ityatrāha - prākcetasa iti | cetaso manasaḥ prāk prathamaṃ prakṛtiriti 
tattvodayakramaḥ | ākāśapṛthivīrūpayoḥ puruṣaprakṛtyordharmiṇoranantaraṃ 
taddharmabhūtānāṃ manobuddhyahaṅkārāṇāmudayasyopapattiḥ tathāpi teṣāṃ 
dharmāṇāṃ dharmidvayamadhya evodayāt madhyagatā parigaṇanā udayāpekṣayā 
dharmāṇāṃ dharmidvayānantarya manavasthityapekṣayā tu 
dharmidvayamadhyatvamiti bhāvaḥ | madhyatve'pi manasaḥ 
puruṣadharmatvāttatsamīpa evāvasthānam ahaṅkārasya prakṛtidharmatayā 
prakṛtisamīpa eva sthitiḥ mano'haṃkārayormadhye ubhayadharmasya buddheḥ 
sthitiriti vijñeyam | visargavyāptau prakṛtyahaṅkārabuddhimanaḥ puruṣā iti 
binduvyāptau puruṣamanobuddhyahaṅkāraprakṛtaya iti kramaḥ tadatra 
visargavyāpteḥ prāthamyāt prakṛtyādikaḥ kramo'ṅgīkartavyaḥ || 3 ||

p. 86)

śrotrādikaṃ khalu tavargamayaṃ vilomā-
dvāgādi pañcakamidaṃ ca ṭavargarūpam |
śabdādi khādyapi cavargakavargarūpa-
metāni vāyudahanāmbumahīvilāsāḥ || 4 ||

pavargavarṇapratipādyāni tattvānyuktvā tavargādivarṇapratipādyānyapi tattvāni 
vyutpādayati -

śrotrādikamityādi | śrotrādikaṃ śrotratvakcakṣurjihvāghrāṇarūpaṃ 
tattvapañcakam | vilomāttavargamayam 
vilomakramikatavargarūpanakārāditakārāntavarṇapañcakarūpamityarthaḥ | atrāpi 
nakārapratipādyaṃ śrotratattvamākāśāṃśaḥ | dhakārapratipādyā tvak 
vāyvaṃśaḥ | dakārapratipādyaṃ cakṣustejo'śaḥ | thakārapratipādyā jihvā 
jalāṃśaḥ | takārapratipādyaḥ prāṇaḥ pṛthivyaṃśa iti vijñeyam | idaṃ 
pratyakṣanirdeśyaṃ vāgādipañcakaṃ ca 
vākpādapāṇyupasthapāyurūpatattvapañcakam | vilomādi tyasyātrāpi sambandhaḥ 
| vilomakramikaṭavargarūpam | ṇakāra ākāśāṃśo vāk | ḍhakāro vāyvaṃśaḥ 
pādau | ḍakārastejoṃ'śaḥ pāṇī | ṭhakāro jalāṃśaḥ upasthaḥ | ṭakāraḥ 
pṛthvivyaṃśaḥ pāyuḥ | śabdādiśabdasparśarūparasagandharupa 
tattvapañcakamākāśādyapi ca ākāśavāyvagnijalapṛthivīrūpaṃ 
tattvapañcakaṃ ca | krameṇa cavargakavargarūpam | atrāpi 
vilomādityasyānuvṛttiḥ | ñakāra ākāśāṃśaḥ śabdaḥ | jhakāro vāyvaṃśaḥ 
sparśaḥ | jakārastejoṃ'śorūpam | chakāraḥ salilāṃśo rasaḥ | cakāraḥ 
pṛthivyaṃśo gandhaḥ | ṅakāra ākāśaḥ | ghakāro vāyuḥ | gakārastejaḥ | 
khakāraḥ salilam | kakāraḥ pṛthivīti vivekaḥ | etāni 
tavargādivargacatuṣṭayatattvāni | vāyudahanāmbumahīvilāsāḥ | 
vāyostavargādhiṣṭhātṛtvāt tavargapratipādyatattvāni vāyuvilāsā iti vijñeyam | 
agneṣṭavargādhiṣṭhātṛtvāt ṭavargapratipādyatattvāni agnivilāsāḥ | jalasya 
cavargādhiṣṭhātṛtvāccāvargapratipādyatattvāni jalasya vilāsāḥ | pṛthivyāḥ 
kavargādhiṣṭhātṛtvāt kavargapratipādyatattvāni pṛthivīvilāsā iti vivekaḥ || 4 ||

p. 87)

dehātmikā prakṛtirāntararūpamurvyāḥ
sūkṣmaṃ jalasya khalu rūpamahaṅkriyā syāt |
agnestu buddhiranilasya mano'ntarātmā
sargaḥ khalu prakṛtijaḥ kṣitisargabījam || 5 ||

idānīṃkacaṭatavargatatvātmanaḥ sthūlasya pṛthivyaṇḍasya pavargavarṇarūpaṃ 
prakṛtyantaṃ sūkṣmarūpatayā kāraṇamiti pratipādayati - dehātmiketi | 
dehātmikā deharūpiṇī | prakṛtiḥ | dehābhimāna eva prakṛtiriti vyavahriyate | sā 
prakṛtiḥ | urvyāḥ pṛthivyāḥ | kavargarūpiṇyā iti bhāvaḥ | āntaram 
antaḥkakṣyāsthitaṃ rūpaṃ svarūpaṃ sūkṣmaṃ rūpam | 
ahaṃkriyā'haṅkāraścavargarūpasya salilasyā'ntaraṃ rūpaṃ syātkhalu | 
agneṣṭavargarūpasya antarātmanā buddhiḥ | anilasya tavargarūpasya antarātmanā 
manaḥ | evaṃ prakṛtijaḥ sargaḥ saṃsāraḥ | pavargavarṇacatuṣṭayaṃ bhavati | 
rūpaprakṛti saṃsāraḥ | kṣitisargasya kavargādivargacatuṣṭayātmanaḥ pṛthivī 
saṃsārasya | bījaṃ kāraṇam | sūkṣmasya prakṛtisaṃsārasyaiva sthūlabhāvaḥ 
pṛthivī saṃsāra iti prakṛtisaṃsārasya brahmāṇḍaparyāyasya kāryatvaṃ 
svābhāvikasya prakṛtyantasya pṛthivyanta mūlatvaṃ prakṛtyantastu 
māyāvilāsa iti tātparyam | ata eva caturasrarūpasya prakṛtyantasya ravibimbatvaṃ 
daśārayugmarūpasya pṛthivyantasya raśmicakratvaṃ mahāyantraṃ vibhāvyate || 
5 ||

p. 88)

dehātmanoḥ prakṛtipūruṣayoḥ pramātā
dehotra tasya nilayo'pi tadaṅgamātmā |
ātmā yathā bhavati mātṛpadaṃ vapuścet
tallīnamastyavirahaḥ śivayoḥ svabhāvaḥ || 6 ||

idānīṃ prakṛtyaṇḍamārabhate -

dehātmanorityādi | dehātmanordehātmaparyāyayoḥ prakṛtipuruṣayormadhye | 
atravisargaprakaraṇe | dehaḥ pramātā | tasya dehasya | nilayo'pi āśrayo'pi | api 
śabdenāṅgitvasambhāvanā pratīyate | dehasya vimarśatattvapariṇāmarūpasya 
ātmanaḥ prakāśaṃ vinā na kutrāpi sthitirupapadyate dharmasya 
dharmiṇyevāśrayaṇamiti niyamāt | ātmātadaṅgam tasya dehasyāṅgaṃ 
tadantargatatvena tadaṅgatvam | visargapramātṛdehasya prakṛtiparyāyasya 
vyāptau ātmā tadantargataḥ san tadaṅgatāṃ bhajate | yathā ātmāpramātṛpadaṃ 
pramātṛsthānaṃ bhajatyārohate | tatra binduvyāptipade | tallīnam - 
tasminnātmani līnamekarasībhūtam | vapuḥ | asti sattāmavalambate | na tu 
paramocchedaṃ prāpnoti | tathātve vimarśapadasyāpunarudayaprasaṅgāt | 
vimarśasya punaḥ punarudaya(darśanena)prakāśavyāptāvapi 
vimarśasyātyantikocchedo na sambhāvyate ityavadhāraṇīyam | 
prakāśavimarśayoritaretaravyāptau ubhayorapyanucchedaṃ pratipādayati - 
aviraha iti | śivayoḥ śivā ca śivaśca śivau tayoḥ śivayoḥ | avirahaḥ 
anyonyāvinābhāvaḥ | svabhāvaḥ naisargika ityarthaḥ | prakāśaṃ vinā vimarśo'pi 
na vimarśaṃ vinā prakāśo'pi na kintu prakāśavyāptau vimarśasya 
prakāśaikarasyena sthitiḥ vimarśavyāptau prakāśasya bhinnarasatvenaiva sthitiriti 
vibhāgaḥ || 6 ||

p. 89)

jāḍyādahaṅkṛtiriti prathate vimarśo
buddhirjaḍājaḍatayā manasastvajāḍayāt |
traiguṇyametadabahiḥ karaṇatrayaṃ syāt 
sauṣuptajāgradavaśeṣadaśānidānam || 7 ||

evaṃ dharmiṇoḥ dehātmanoḥ svarūpaṃ vicārya idānīṃ 
ahaṅkārabuddhimanorūpeṇa trividhasya vimarśādabhinnasya dharmasya svarūpaṃ 
parāmṛśati -

jāḍyādityādi | vimarśajāḍyāt jaḍatvabhūmikā parigrahāt ahaṅkṛtiritiprathate | 
prasiddho bhavati | jaḍatvabhūmikāparigrahe vimarśa evāhaṅkāraśabdena 
vyavahriyate ityarthaḥ | dehe ahamiti yo'yaṃ vimarśaḥ sa eva jaḍaḥ 
vimarśo'haṃkāraḥ | jaḍabhūtadehāśritatvena taddharmatvāt | ayameva 
jaḍavimarśo'ntaḥkakṣyāyāmahaṅkāraḥ san dehadharmabahiḥkakṣyāyāṃ 
śabdādipañcakarūpaḥ san bhūtacatuṣṭayāṅkāyāḥ pṛthivyā aṅginyā 
dharmaḥ | atha vimarśa eva jaḍājaḍatvabhūmikāparigrahe buddhiriti vyavahriyate 
ityāha - buddhirjaḍājaḍatayeti | kriyāsādhanamindriyaṃ svayamapi sthaulyena 
kriyārūpatvājjaḍaṃ ca svata eva spandamānatvādajaḍaṃ ca ataḥ 
kriyāsādhanarūpeṇa jaḍājaḍo vimarśaḥ antaḥ kakṣyāyāṃ buddhirityucyate | 
bahiḥ kakṣyāyāṃ vāgādipañcakamucyate |

atha vimarśa eva ajaḍatvabhūmikāparigraheṇa mana ityucyate 
vimarśastyājaḍatvaṃ jñānasādhanarūpeṇa | jñānasādhanaṃ khalu 
manaścakṣurādikamantarbahiḥ kakṣyāvibhaktaṃ sūkṣmarūpatayā 
buddhivāgādivilakṣaṇaṃ padaṃ jaḍameva | evaṃ 
vimarśarūpamahaṃkārādyantaḥkaraṇatrayameva guṇatrayamityāha - 
traiguṇyamiti | etadbahiḥkaraṇatrayam antaḥkaraṇatrayatraiguṇyaṃ 
sattvāditriguṇasamāhāraḥ syāt | ahaṃkāro rajoguṇaḥ | utpattirūpatvāt | buddhiḥ 
satvam | sthitirūpatvāt | manasastamoguṇaḥ saṃhārarūpatvāt | cidekākāratā khalu 
saṃhāraḥ prakāśaviśrāntirūpo laukikaistama ityucyate | tadasya manaso 
laukikāpekṣayaiva tamastvam | athavā kriyāyāḥ saṃhārapakṣe 
kriyārūpo'haṅkārastamaḥ jñānarūpaṃ manorajaḥ ajaḍatvaṃ jagadutpattidaśā 
jaḍatvaṃ tatsaṃhāra iti laukikaḥ pakṣaḥ | jaḍatvaṃ jagadutpattidaśā ajaḍatvaṃ 
saṃhāradaśeti yogasiddhāntaḥ | ato yathā vivakṣitaṃ 
jaḍājaḍayorahaṅkāramanasostamorajoguṇayoryojanā kartavyā | 
athaitaddehāntaḥkaraṇatrayaṃsuptyādidaśātrayabījamityāha - sauṣupteti | 
suṣuptireva sauṣuptaṃ suṣuptijāgradbhyāmavaśeṣadaśā svapnaḥ ahaṅkāro 
jaḍatvātsuṣuptinidānam buddhirjaḍājaḍatayā jāgrannidānam manastvajaḍatayā 
svapnanidānamiti vivekaḥ || 7 ||

p. 90)

dehī guṇatrayamayaprakṛtirdaśāsu
suptyādikāsu niyamātparibaṃbhramīti |
tāsvapyahaṅkṛtipuraḥsaraṇāttripuṭyāṃ
meyonnatiṃ kalayati pramukhakriyāṃśam || 8 ||

idānīṃ dehino guṇatrayamayaprakṛtiyogena suptyādidaśātraye 
paribhramaṇamityāha |

dehīti | dehī dehābhimānī pramātā guṇatrayamayaprakṛtiḥ 
guṇatrayasaṃsṛṣṭirūpiṇī prakṛtiḥ svabhāvo dehaparyāyo yasya tayoktaḥ | etena 
guṇatrayasaṃsṛṣṭireva prakṛtiriti prakṛtilakṣaṇamuktam | 
evaṃrūpaprakṛtirjīvaḥ suptyādikāsu daśāsu suṣuptijāgratsvapneṣu 
niyamādavyabhicāreṇa paribaṃbhramīti punaḥpunarbhramati | tāsvapi daśāsu 
ahaṅkṛtipuraḥsaraṇāt dehadharmasyāhaṅkārasya prādhānyāt | tripuṭyāṃ 
pramātṛpramāṇaprameyarūpāyāṃ saṃsārakalāpasaṃpuṭikāyām | meyonnatiṃ 
prameyavyāptim | pramukhakriyāṃśam - pradhānaḥkriyāṃśo 
yasyāsminkarmaṇi tathā | kalayati vimṛśati | dehasya pramātṛtve taddharmasya 
vimarśasya jaḍatvājjaḍapakṣyasya premayasya vyāptyanusandhānaṃ 
bhavatītyarthaḥ || 8 ||

p. 91)

meyādikā satatayuktripuṭī manastāṃ
meyādi bhāsayati mūḍhamahaṅkriyātma |
mātrādi bhāsayati cātha nijasvabhāvā-
dbuddhiśca madhyamapade mana eva bodhyam || 9 ||

idānīṃ sarvasyāntaḥkaraṇasya mana eva pramāṇabhūtaṃ manasa 
evāhaṅkārādayo bhūmikāḥ manaso 
vimarśaprathamarūpatvādvimarśavaibhavaṃ manovaibhavamiti vyutpādayati |

meyādīti | meyādikā meyamānamātṛrūpā tripuṭī trayāṇāṃ meyādipuṭānāṃ 
samāhārastripuṭī | satatayuk | anyonyāvinābhāvasvabhāvā | tāṃ tripuṭīm | manaḥ 
vimarśasya mūlarūpam mūḍhaṃ jāḍyaparyāyamauḍhyabhūmikāparigraheṇa | 
ahaṅkriyātma - ahaṅkārasvarūpaṃ sat | meyādi bhāsayati | prameyādikaṃ 
yathā tathā bhāsayati | meyavyāptiṃ darśayatītyarthaḥ | manasa 
evānusandhānamahaṅkāra āropyata ityarthaḥ | atha tadeva manaḥ 
nijasvabhāvādajaḍarūpāt | ajaḍarūpaṃ nijasvabhāvaṃ parigṛhyetyarthaḥ | tāṃ 
tripuṭīmityanuvartate | mātrādi bhāsayati pramātrādikaṃ yathā tathā bhāsayati | 
citpramātṛvyāptiṃ darśayatītyarthaḥ | mana eva madhyamapade 
jaḍājaḍasamānapade | jaḍājaḍapadaparigraheṇetyarthaḥ | buddhiśca 
prameyapramātroḥ samavyāptipradarśikā buddhiśca mana eveti bodhyam || 9 ||

p. 92)

tasmātpakāravapuṣaḥ prakṛteḥ pramātu-
rātmā makāravapurantara eva līnaḥ |
tanmadhyatāsthitirahaṅkṛtidhīhṛdāṃ syā-
detatyamātṛpadamindriyalagnaviśvam || 10 ||

uktaprameyaṃ kāraṇīkṛtya pavargeprakṛtyāditattvasanniveśaṃ 
dṛḍhīkṛtyopadarśayati -

tasmāditi | tasmātpūrvoktaprameyarūpātkāraṇāt | pakāravapuṣaḥ 
pakārapratipādyāyāḥ prakṛteḥ | pakāravapuṣaḥ pakārasvarūpāyā ityupacāraḥ | 
pramātuḥ dehaparyāyaprakṛtirūpasya pramātuḥ | antara eva vyāpyapada eva | 
makāravapurmakārasvarūpaḥ | ātrāpyupacāraḥ | ātmā puruṣaḥ | līnaḥ vyāpta 
ityarthaḥ | tanmadhyataḥ tayoḥ prakṛtipuruṣayormadhyabhāge | 
ahaṅkṛtidhīhṛdām - ahaṅkārabuddhimanasām | sthitiḥ sanniveśaḥ syāt | 
yadyapi makārasyātmano vyāpakavarge pramātṛpade sanniveśaḥ tathāpi 
pavargavyāpakavargayormadhye sanniveśādubhayapakṣaprakriyāsambandho 
veditavyaḥ | sparśakadambakasya pramāṇapadatvānmakārasya 
pramātustatprakāśānusāreṇa parigaṇanā | tathāpi 
pramāṇapadakriyāsambandhamātraṃ tāṭasthyādaṅgīkartavyameva | ataḥ 
prakṛtivyāptiḥ puruṣaparyantaṃ pravahatīti niravadyam | caturaśracakrasanniveśe 
tu manobuddhyorevātmapuruṣarūpayorahaṅkāraprakṛtibhyāṃ vyāptistābhyāṃ 
ca tadubhayavyāptiriti vivekaḥ | athaitasminneva prakṛtyante manobuddhyoḥ 
svapnapada iva brahmāṇḍonmīlanacamatkāraṃ darśayati - etadityādi | 
etatpramātṛpadaṃ prakṛtyantarūpam | indriyalagnaviśvaṃ 
manobuddhirūpajñānakriyendriyasambaddhaṃ viśvam | bhavatīti śeṣaḥ || 10 ||

p. 93)

etacca mātṛpadamindriyasaṃśritaṃ ca 
tatsaṃśrayaśca mana eva tadindriyaṃ syāt |
tadgrāmaṇīndriyakulasya vimarśaśakti-
ściccetyamiśramakhilaṃ khalu tadvilāsaḥ || 11 ||

atha yadetadantarbāhyajagadvilasitaṃ tatsarvaṃ manomūlameveti pratipādayati -

etacceti etaccamātṛpadaṃ prakṛtanta rūpaṃ pramātṛpadam - 
indriyasaṃśritaṃ ca manobuddirūpendriyavilāsaḥtvāttatsaṃśritaṃ 
tayormanobuddhyoḥ saṃśritaṃ tatsaṃśrayaśca tayormanobuddhyoḥ saṃśrayaḥ 
āśrayaśca | etaddvayaṃ nijasamāśrayameva kurvannityuktatvāt | 
taddvirūpamindriyamapi paryālocanāyāṃ mana eva syāt | manasa eva daśāviśeṣo 
buddhirityuktatvāt | indriyakulasya antarbāhyakaraṇajālasya | grāmaṇi pravartakam | 
tat manaḥ | vimarśaśaktiḥ - 
vicitraviśvodvamanānucarvaṇakriyāpa(sphura)ṇonmeṣanimeṣasambhramā 
vimarśaśaktiḥ | mana eva | ciccaityamiśraṃ 
pramātṛprameyapramāṇarūpamakhilam | tadvilāsaḥ tasya manasovilāsaḥ khalu | 
teneyamindriyajālaśrīrjāgratipravilasata iti prasiddhiḥ || 11 ||

p. 94)

svapne ca jāgaraṇamātṛpade ca vedya-
micchātmano manasa eva vibhāti kukṣau |
pūrvatra mātṛ mana eva śarīratābhāk
pratyakṣamuttarapade tu śarīrameva || 12 ||

evaṃ svapnaprakṛtisaṃsārayorviśvamicchātmano manasa eva garbhe vilasatīti 
prabodhayati -

svapne ceti | svapne ca jāgaraṇamātṛpade jāgradavasthāyāṃ 
yanmātṛpadamavaikārikam | pavargapratipādyaprakṛtisaṃsārarūpamityarthaḥ 
tasmiṃśca vedyam antarbahiḥprapañcarūpam | icchātmana icchāsvarūpasya 
manasaḥ kukṣāveva garbha eva vibhāti vilasati | 
svapnaprakṛtisaṃsārāvicchāsaṃsārāvityarthaḥ | jñāne 
jñānendriyakarmendriyasaṃsārau jñānakriyāsaṃsārāviti bhāvaḥ | nanu 
svapnasya jñānasvarūpasya manaḥ saṃsāratvaṃ jāgrataḥ kriyāsaṃsāratvaṃ 
viśrāntirūpāyāḥ suṣuptericchā saṃsāratvamiti prāgupadiṣṭam | idānīṃ 
kathamanyarūpopadeśa iti na mantavyam | viśrāntereva bahirmukhatāyām 
icchāsaṃsāraḥ svapna eva jñānasaṃsāraḥ jāgradeva kriyāsaṃsāraḥ 
jaḍaviśrāntirajaḍaviśrāntiśceti suṣupte svapnayorjaḍājaḍaviśrāntyabhimāne 
jāgrata eva jñānakriyendriyavyāpāravyavasthāyā jñānakriyāsaṃsāratvam | 
athavā prakṛtisaṃsārasya jñānasaṃsāratvam pārthivasaṃsārasya 
kriyāsaṃsāratvam jaḍājaḍarūpasuṣuptireva jaḍājaḍecchāsaṃsāratvābhimāne 
svapnojñānasaṃsāraḥ jāgratkriyāsaṃsāra iti vivekaḥ | tadatra 
svapnaviśrānterajaḍecchāsaṃsāratvābhimāne svapnavanmānasikasaṃsāratvāt 
prakṛtisaṃsārasyāpi icchāsaṃsāratvamuktamiti niravadyam | svapna 
prakṛtisaṃsārayoricchāsaṃsāratvena aikarūpye prākpratipāditameva 
bhedakamudghāṭayati - pūrvatreti | pūrvatra svapne | śarīratābhāk mana eva | 
mātṛ pramātṛ | uttarapade prakṛtisaṃsāre tu 
pratyakṣamānasikatvenābhimataṃ śarīrameva pramātṛ anayoḥ 
saṃsārayorayamevetyarthaḥ || 12 ||

p. 95)

cetaścamatkṛtipadaṃ vamati svalīnaṃ
viśvaṃ bahiḥ śrutimukhendriyavargabhāvāt |
tatrāpi dhīndriyagaṇaḥ pavano'pi pṛthvī
jñeyairjalairapi marudbhirudīrito'ntaḥ || 13 ||

atha pārthivasaṃsāraprakriyāmupakramate -

cet ityādi | camatkṛtipadaṃ camatkārāṇāṃ sthānam | cetaḥ vimarśasya 
mūlarūpam manaḥ kartṛ | svalīnaṃ svāntargatam | prakṛtisaṃsāre 
svapnasaṃsāra iva laukikairapi viśvasya 
manovilāsamātratvābhyupagamānmanoniṣṭhatvamiti manolīnatvam manaḥ 
svasvarūpa eva vilasadityarthaḥ | viśvaṃ bahirvamati | viśvasya bhairvamanaṃ ca 
manaścamatkāraviśeṣaḥ | manasaḥ kiṃ rūpeṇa bahirvamanamityatrāha - 
śrutimukhendriyavargabhāvāt | 
śrotrādivāgādijñānakriyendriyavargasvarūpāṅgīkārāt | 
śrotrādibhūmikāparigraheṇetyarthaḥ | śrotrādibhya eva jñeyarūpasya viśvasya 
nirgamaḥ vāgādibhya eva kāryarūpasya | niyamena 
viśvasyendriyaprakāśāntarbhāsanādindriyakāraṇatvam tathā 
cendriyarūpāntara(tvaṃ)tvādviśvasyendriyaprakāśādeva paryavasyati | 
indriyaprakāśonmeṣa etatsphuraṇam 
tadanunmeṣetvasphuraṇamityanvayavyatirekābhyāṃ 
viśvasyendriyaprakāśakāraṇaṃ na tu 
māyāvimohitakāṇādasampratipannaparamāṇvādaya ityalamatiprasaṅgena |

evaṃ paramārthādindriyaprakāśodvāntasyaviśvasya paśuviṣaye 
viparītapratītiprakriyāmāha - tatrāpīti | tatra bahiḥkakṣyāyām | api 
śabdo'ntaḥkakṣyāsamuccayābhidhāyakaḥ | yathāntaḥkakṣyāyāṃ 
prakṛtisaṃsare paśorviparītapratītiḥ tathā bahiḥkakṣyāyāṃ 
pārthivāṇḍasaṃsāre'pītyarthaḥ | indriyagaṇo jñānendriyavargaḥ | 
pava(mā)no'pi paramārtharūpe cidvyāpte saṃsāre vāyusthānako'pi 
pṛthvīsthānaṃ saṅkocabhāvātprāptaḥ | jñeyairjñeyarūpaiḥ vedyairjalairapi 
cidvyāptau jalasthānakairapi | atra viparītamarudbhiḥ | vyāptyā vāyusthānaṃ 
prāptaiḥ | antarudīritaḥ svabhyantare kṣiptaḥ | vyāptaḥ ityarthaḥ | tavargarūpāṇāṃ 
jñānendriyāṇāṃ cavargarūpaiḥ śabdādibhirvyāptirityarthaḥ || 13 ||

p. 96)

karmendriyāṇi kaṭhinatvaparāntabhāñji
vahnyākṛtīni khapadasthadharāśritāni |
pṛthvīmayaprakṛtikhagrahaṇonmukhāni 
bodhyāni bhūtavitateriha vaiparītye || 14 ||

idānīṃ karmendriyāṇāṃ kāryarūpavedyānāṃ ca vaiparītyamāha - 

karmetyādi | karmendriyāṇi yavargapratipādyavāgādīni | kaṭhinatvaparāntabhāñji 
kaṭhinatvasya parāntaḥ paramāvadhistaṃ bhajantīti tathoktāni | kriyāyāḥ 
saṅkocanirbahaṇapadatvātkarmendriyāṇāṃ kāryarūpavedyānāṃ 
cātisaṅkocabhāvādatikāṭhinyam | vahnyākṛtīni 
jaḍāṃśapradhānavahnimayāni | cidvyāptau tu 
karmendriyāṇāmajaḍāṃśapradhānavahnimayatvam | vahnerjaḍājaḍamayatvaṃ 
prāgvyākhyātam | khapadasthadharāśritāni 
vyāptilakṣaṇamākāśapadamākrāntavatīṃ pṛthivīmāśritāni | vāgādīnāṃ 
paśupade'pi yadyapi dehaparyāyaprakṛtyāśritatvaṃ tathāpi 
kāryavedyapradhānabhūtapṛthivīvyāptyanusandhānāt pṛthivyāśritatvaṃ 
pṛthivītyādicidvyāptipade pūrṇarūpatayā ca upacaritarūpiṇyāḥ mahāpṛthivyā 
eva pārśve pṛthivīmayyāḥ prakṛteḥ grahaṇe vyāptau unmukhāni 
bhūtavitateriha vaiparītye bodhyāni |

atrāyabhiprāyaḥ paśorjñānendriyāṇi jñeyeṣu śabdādiṣu kiñcideva jñātuṃ 
kṣamante na tu sarvam | atastāni taiḥ jñeyaiḥ vyāptāni | śabdādaya eva 
kāryāvasthāyāṃ vacanādibhāvena sthūlatāṃ prāpyākāśādayo bhavanti | 
karmendriyāṇi ca vacanādimātramākāśādikaṃ kartuṃ kṣamante na tu 
mahābhūtarūpamākāśādi kartum atastāni ca mahābhūtaiḥ kāryairvyāptāni |

evaṃ dvividhamindrivargaṃ dvividhena vedyavargeṇa vyāptaṃ sat ātmadeharūpasya 
pramātṛdvayasya jñeyakāryavargābhyāṃ vyāptiṃ samarpayati cidvyāptau tu 
ātmā svasādhanairjñānendriyaiḥ jñeyavedyaṃ vyāpnuvan svātmīkaroti 
aśeṣajñeyasya svātmīkaraṇātsarvajño bhavati | dehaśca svasādhanaiḥ 
karmendriyaiḥ kāryavedyaṃ vyāpnuvan tatsvātmīkaroti viśeṣakāryasya 
svātmīkaraṇāt sarvakartā bhavatīti jñānakriyendriyāṇāṃ 
prakṛtivikṛtibhāvaprakriyā veditavyā || 14 ||

p. 97)

mānātmakasyataraṇerdvayato hi siddhiḥ 
māyābalātprathamatātra ca meyakoṭyāḥ |
grāhyagrahītṛpadavarṇasamanvayena
yojyāḥ kalā bahirathāntarapi kramajñaiḥ || 15 ||

atha prameyapramātṛmiśrarūpastha pramāṇasūryasya kalāsaṃsthānaprakriyāṃ 
vyutpādayati -

mānetyādi | mānātmakasya pramāṇarūpasya taraṇeḥ sūryasya dvayataḥ 
prameyapramātṛbhyāṃ siddhiḥsvarūpalābho hi | atra ca māyābalāt 
prameyakoṭyā eva prathamapadatā pramātṛkoṭyā dvitīyapadatā | 
visargavyāptireva prathametyarthaḥ | atra pramāṇasūryasya 
dvidvivarṇapratipādyānāṃ kalānāṃ yojane 
grāhyagrahītṛtvapadavarṇasamanvayena - grāhyasthānakānāṃ 
varṇānāmanantaraṃ grāhitvasthānakavarṇānāṃ yathāyogaṃ samanvayena | bahiḥ 
kavargāditavargāntarūpe pṛthivyante | antarapi pakārādibhakārāntarūpe 
prakṛtyante | kramajñaiḥ grāhyagrāhakavarṇakramavidbhiḥ | kalā yojyāḥ | 
kavargaṭavargavarṇānāṃ yathākramaṃ yogaḥ cavargatavargāṇānāṃ ca tathā | 
pakārabakārayoryogaḥ phakārabhakārayośca tathā | evaṃ ca daśārayugmaṃ 
raveḥ raśmicakraṃ caturasram vimbacakram | yattu 
kakārādiḍakārāntairanulomapaṭhitadvādaśavarṇaiḥ 
bhakārādiḍakārāntavilomapaṭhitadvādaśavarṇānāṃ yogena dvādaśānāṃ 
sūryakalānāṃ prakalpanāpāramaparyaṃ tatprameyaprāmātrātmanaḥ sūryasya 
svarūpabhūteṣu caturviṃśatisparśākṣareṣu ardhaṃ prameyakoṭi rardhaṃ 
pramātṛkoṭirubhayapakṣasamanvayādvādaśakalānirvṛttiriti vidyamānamapi 
cakrasaṃsthānasaṃvādaṃ na labhata iti 
mātṛkācakramarmavidbhirmahānubhāvairupekṣitamityalaṃ 
mahāmārgavisaṃvādakathayā || 15 ||

p. 98)

mātā daśendriyamayodaśakaṃ ca meyaṃ
tanmelanād daśakalātmadaśārayugmam |
antaḥ kalādvayamiha prakṛtau nilīna
straiguṇyamātari pumāṁścaturasravimbe || 16 ||

bahirantarapi grāhyagrahītṛpadavarṇasamanvayena kalā yojyā iti pūrvasūtreṇa 
sūcitam | kalāyojanaprakāraṃ cakre saṃsthāne saṃvādayan 
mātāntaravyākṣepābhiprāyeṇa sphuṭamupadiśati -

mātetyādi | mātṛmeyātmako hi raviḥ mātā ca bahistavarga 
ṭavargapratipādyadaśendriyamayaḥ | meyaṃ ca tathā 
cavargakavargapratipādyaśabdādyākāśādikadaśakamayam tanmelanāt 
yathākramaṃ pṛthivyādikaryavedyapratipādakakavargākṣarapañcakena 
vāgādikarmendriyapratipādakaṭavargākṣarapañcakasya melanāt | tathā 
gandhādipratipādakacavargākṣarapañcakena 
ghrāṇādipratipādakatavargāks'rapañcakasya melanāt | pañcapañcakalātmakaṃ 
sambhūya daśakalātmakaṃ daśārayugmaṃ bhavati | antaḥ pavargarūpe 
pramātṛpade kalādvayaṃ kāryavedyabījabhūtaprakṛtipratipādakena pakāreṇa 
karmendriyabījabhūtabuddhipratipādakasya bavarṇasya melanādekākalā 
jñeyavedyabījabhūtāhaṃkārapratipādakena phakāreṇa 
jñānendriyabījabhūtamanaḥpratipādakasya bhakārasya melanādanyākaleti 
kalādvayamiha caturakṣaraniṣpannakalādvayātmake caturasrabimbe traiguṇyamātari 
triguṇasavitryāṃ prakṛtau pumānmakārarūpa ātmā nilīnaḥ | 
ahaṅkārasahitāyāṃ prakṛtau buddhimanasoryannilayanaṃ tatpuruṣasya nilayane 
paryavasyatīti bhāvaḥ | sparśavarṇacakrasya 
pramāṇacakratvānmanobuddhirūpeṇaiva puruṣasyātra cakre saṃsthānaṃ na tu 
makārarūpeṇa | tathāpi manobuddhyoḥ puruṣasyaiva rūpāntaratvātpuruṣasyāpi 
makārasya pramāṇapramātṛcakrayormadhyavartitvādubhayacakrasambandha iti 
pumānnilīna ityuktam || 16 ||

p. 100)

mānātmanaiva cidacitsthitiratracakre
bhedātmake na bhavatīha visargabindoḥ |
masyānuṣaktirapi mukhyasamanvayasya
bindvekabhogapadamātṛpurocitasya || 17 ||

pūrvasūtre sūcitaṃ makārapratipādyapuruṣatattvasyaiva 
pramāṇapramātrorubhayacakrasambandhaṃ sphuṭīkaroti |

mānetyādi | atra bhedātmakam cakre | pramāṇacakrasya 
grāhyagrahītṛbhedāvinābhāvabhūmitvāt daśārayugmarūpatvam na tu 
caturdaśārā'ṣṭāvadekaikacakratvam ato bhedātmake prasphuṭabhedasvarūpam | atra 
pramāṇacakre cidacitoḥ pramātṛprameyayoḥ sthitiḥ | mānātmanaiva 
indriyarūpeṇaiva | indriyāṇāṃ pramāṇaparyāyāṇāṃ 
grāhyagrāhakobhayasiddharūpatvāt grāhyagrāhakarūpeṇaiva 
prameyamātṛsthitirityarthaḥ | ataḥ kāraṇādityaucityādadhyāhartavyam | iha 
pramāṇacakre | visargabindoḥ bindorapi sato bhedamayatvāt visargasyetyarthaḥ | 
masya makārapratipādyasya puruṣasya | anuṣaktiranuṣaṅgo na bhavati | 
caturviśatyakṣarātmakadvādaśakalārūpe pramāṇacakre puruṣasthānakasya 
makārasya pañcaviṃśatitamasya na saṃniveśa ityarthaḥ | tarhi tasya 
makārapuruṣasyātra cakre kiṃ sambandhābhāva evetyatrāha - api 
mukhyasamanvayasyeti | prādhānyena sambandhavato'pi pramāṇacakre 
prakṛtivyāptiviṣayatvena sambandhavato'pi tatra cakre nānuṣaktirbhavatītyanvayaḥ | 
kuta ityāha - bindvekabhogapadamātṛpurocitasya - 
bindorekabhogasthānam - aṣṭārarūpaṃ pramātṛpuram taducitasya | dvau hi 
saṅgraheṇa pramātārau | abhedānusandhātā bhedānusandhātā ca 
tatramakārapratipādyo bhedānusandhātā ataḥ prasiddhapramātā 
makārapratipādyapramātṛpurasanniveśamevārhati na tu pramāṇapurasanniveśam 
tatra tadrūpāntarayormanobuddhyoreva sanniveśaḥ | sambandhastu pramāṇacakre'pi 
makārapratipādyasyāstveveti niṣkarḥ || 17 ||

p. 101)

svapne smṛtaṃ tadanu jāgrati satyakalpaṃ
bandhaṃ prapadya vapuṣa svavimarśaśaktyā |
kṣityā ca tatparavaśo hṛtamātṛbhāvo
madhyandinadyumaṇireṣamakārabinduḥ || 18 ||

visargavyāptiprakaraṇamupasaṃharannāditaścinnigaraṇarūpaṃ prakaraṇameyaṃ 
kroḍīkṛtya darśayati -

svapna ityādi | svapne smṛtaṃ manasā saṅkalpitam | tadanujāgrati satyakalpaṃ 
dṛḍhānubhavārūḍhatayā paramārthavadeva bhāsanaṃ na tu paramārthatā 
antaḥkakṣyāparāmarśanirvikalpacidātmanaḥ śivasya nityanirāvaraṇatvena 
bhāsamānatvāt bahiravabhāsamānasya pravṛttirūpavimarśaspandaviplavasya 
camatkārapramātṛtvāt | antaḥ svavimarśaśaktyāvimarśaśaktereva svarūpeṇa 
vapuṣā prakṛtiparyāyeṇa vahistu kṣityā ca evaṃ kakṣyādvaye'pi bandhaṃ 
prapadya tatparavaśaḥ tayordehamahāpṛthivyoḥ paravaśaḥ paratantraḥ | 
hṛtamātṛbhāvaḥ tābhyāmevāpahṛtapramātṛbhāvaḥ prameyatāṃ prāpita 
iti bhāvaḥ | makārabinduḥ makārapratipādyobinduḥ cittattvaṃ puruṣa ityarthaḥ | 
madhyandinadyumaṇiḥ madhyāhnakālasūryo jāta iti śeṣaḥ | yathā 
madhyandinasūryaḥ svaraśmipaṭalena sthagito nāvabhāsate | tathāyamapi cidātmā 
svasyā eva vimarśaśaktervijṛmbhaṇarūpeṇa antarbahiḥ prapañcena ca 
bhāryā(āvṛta)mūlasvarūpo jāta ityarthaḥ || 18 ||

p. 102)

yatpādivargavamukhārṇacatuṣṭayasya
saṅkocavarjanamidaṃ khalutantranītyā |
turyasthitaṃ hamukhaśāntacatuṣṭayātma-
yojyaṃ krameṇa bahirantarabhedasṛṣṭayoḥ || 19 ||

iti śrīmātṛkācakraviveka jāgradvivekaścaturthaḥ khaṇḍa || 4 ||

idānīṃ prakaraṇānte cidvyāptirupamuttaraprakaraṇaprameyamavatārayan 
jāgraccakre vakṣyamāṇe svapnacakre ca visargapramātuḥ pratisiṃhāsanaṃ 
turyajāgratsvapnarūpaṃ padadvayaṃ tatra nyāyena ekaikamātṛkayā samunmīlitaṃ 
vyutpādayati -

yatpādītyādi | pādivargavamukhārṇacatuṣṭayasya vilomena 
pavargādivargacatuṣṭayaṃ pavargatavargaṭavarga ca vargarūpaṃ vargacatuṣṭayaṃ 
vakāralakārarephayakārarūpaṃ varṇacatuṣṭayaṃ tasyobhayasya | tantrarītyā ekayā 
kriyayā | prayojanadvayasiddhirūpayā tantranītyā tantranyāyena | idaṃ 
saṅkocavarjanam khalu spṛṣṭateṣatspṛṣṭatāprayatnakṛtasaṅkocatyāgaḥ 
khalu | yatturyasthitaṃ hamukhaśāntacatuṣṭayātmavarṇakadambakaṃ pavargasya 
vakārasya ca saṅkocatyāgarūpo hakāraḥ | tavargasya lakārasya ca 
saṅkocatyāgarūpaḥ sakāraḥ | ṭavargasya ca rephasya ca saṅkocatyāgarūpaḥ 
ṣakāraḥ | cavargasya yakārasya saṅkocatyāgarūpaḥ śakāraḥ | kavargasya 
dehapratipādakalakārasya ca visargapramātṛrūpatvāt tasya ca cidvyāptipade 
citsvarūpa evāntardhānātpadadvaye'pi hakāra eva vilayanam ato na 
tatsaṅkocatyāgarūpo varṇo'nveṣaṇīyaḥ |

evaṃ sparśasaṅkocatyāgarūpamataṃ tatsaṅkocatyāgarūpaṃ 
hakārādiśakārāntavarṇacatuṣṭayaṃ padadvayarūpaṃ sat krameṇa | 
bahirantarabhedasṛṣṭyoḥ | bahirabhedasṛṣṭyāṃ antarabhedasṛṣṭyāṃ ca 
bhedajāgratpratiyoginyabhedajāgratpade bhedasvapnapratiyoginyabhedasvapnapade 
cetyarthaḥ | daśārayugmārdhapade aṣṭārārdhapade ceti veditavyam | yojyaṃ 
yojanīyam || 19 ||

sarvohi bhedapada eva bhavaḥ purastā-
tpaścādabhedamavagacchati jātabodhaḥ |
śaktiḥ śivasya mahati prakṛtistadātmā
bhedogravandanamato'rhati bhedatattvam || 1 ||

saṃsthāpitāṃ purata eva śivena māyāṃ
paścātkaroti yajane dvayatatparo yaḥ |
siddhaṃ na yāti śivasāmayi ? kiṃ samūḍha-
stasmādyakhe(je)tamukhataścaturasrabimbam || 2 ||

īkārayoṣa(ga)javisargakalāstavinduḥ 
pratyāhṛtaṃ khalu visargapadaṃ kalābhyām |
sadyo jagatsapadi saṃbhṛtabhedasiddhiḥ
klīṃkāramūrtiraniśaṃ manurabhyudīryaḥ || 3 ||

yekārekāragarbhaṃ kalayugalatamaṃ māyayā vyāptamauliṃ 
mantraṃ matto'nutiṣṭhedaruṇamaṇikṛtāmakṣamālāṃ vahanyaḥ |
bhuñjāno'sau bhujiṣyāprakṛtikamaṇimādyākhyayā saṃprasiddhaṃ
siddhīnāṃ siddhalabhyaṃ daśakamabhavatāṃ prāpya divyairihaiva || 4 ||

śivānandena muninā deśikādeśavartinā |
caturthaṃ mātṛkācakraviveke vyākṛtaṃ padam || 5 ||

iti caturthaḥ khaṇḍaḥ samāptaḥ ||


atha pañcamaḥ khaṇḍaḥ |

akṣeṣu vedyavilayaḥ khalu śuddhavidyā
dehe tadakṣavilayo bhavatīśvaratvam |
īśo hi viśvamayadehakṛtābhimāno
jāgracchivasya paśujāgaracakralagnam || 1 ||

atha nivṛttirūpaṃ turyaskandhamārabhamāṇo 
nivṛttijāgradupakramatvānnivṛttijāgradadhiṣṭhātāraṃ śivasya 
sarvakartṛtvabhūmikābhūtamīśvarākhyaṃ pramātāraṃ 
tadbāhyadaśāviśeṣeṇa śuddhavidyāpramātrā saha lakṣayati -

akṣeṣvityādi | akṣeṣvindriyeṣu śrī(pāṇyādiṣu)vāgādiṣu ghrāṇādiṣu | 
ca | vedyavilayaḥ vedyānāṃ pṛthivyādibhūtānāṃ ca vilayastadekīkaraṇam 
śuddhavidyā khalu śuddhavidyāśrayaḥ pramātā śuddhavidyetyupacāraḥ | 
pāśave indriyaprakāśādbahistatsārthakyenāvabhāsamānānāṃ vedyānām | 
indriyaprakāśakagarbha 
evāvabhāsananaiyatyavimarśanendriyaprakāśavimarśarūpatādhyavasāyādindriyai
kātmyānubhavarūpā śuddhavidyā pāśavyāmohakartari gurvanugrahamūlena 
samunmiṣatīti saiṣā śuddhavidyā vedyeṣu paśudaśāyāmidampratyayaikaviṣayeṣu 
pāśavavyāvṛttau 
svātmendriyaprakāśatādātmyādhyavasāyādahaṃpratyayaviṣayatāma##-
tadabhidhānatāmupacāreṇa bhajatīti tadvivekaḥ ||

evaṃ pramāṇapade prameyanimajjanalakṣaṇaṃ śuddhavidyāpramātṛpadaṃ 
vyutpādya tadūrdhvatanīmīśvaradaśāṃ vyutpādayati - deha ityādi | dehe 
pramātari | tadakṣavilayaḥ teṣāṃ 
śuddhavidyādaśābhyastaprameyasvātmīkaraṇānāmakṣāṇāṃ vilayo 
nimajjanamekarasīkaraṇamīśvaratvaṃ bhavati | śuddhavidyādaśāyāṃ 
pramāṇapadanimajjitānāṃ prameyānāṃ pramāṇapadena saha dehātmarūpe 
pramātṛpade yaddehāṃśe vinimajjanaṃ tadīśvaratvamityarthaḥ | atra 
prathamaprameyātmano viśvasya 
kiñcididaṃpratyāyādhivāsitāhantāpratyayaviṣayaviṣayatvam dehapade nimajjitasya 
viśvasya dehasyeva dṛḍhāhampratyayaviṣayatvādīśvarasya dehādviśvasminnapi 
ceṣṭakatvam | ata eva sarvakartṛtvamīśvarasyetyavagantavyam | śuddhavidyāpade 
tvidaṃpratyayāhaṃpratyayayoridaṃpratyayasyaivaulvaṇyāt 
viśvaceṣṭakatvānudayaḥ | īśvarasyānayādīśā viśvaśarīrasya 
śivajāgratpadatvātpaśujāgratpade saṃśleṣa iti pratipādayati - īśohīti | īśo hi 
viśvamaye dehe kṛtābhimānaḥ śivasya jāgrat paricchinnadehe 
kṛtābhimānasya paśorjāgaracakre daśāradvayātmake lagnaṃ śliṣṭaṃ 
paśujāgratpade śivajāgrataḥ śleṣaucityāditi bhāvaḥ | jaḍājaḍapadayoḥ 
suptyādidaśātrayepyanyonya śleṣasvabhāvatā prāk prītapāditā || 1 ||

p. 105)

yadbāhyabāhyapadamajjanamantaranta-
staccitpade jaḍapade viparītametat |
akṣātmavedyamiha śaḥ sa hi śuddhavidyā
dehāvibhinnakaraṇendriyamīśvaraḥ ṣaḥ || 2 ||

atha nivṛttirūpasya śuddhavidyāpramātuḥ 
prameyeṣvabhyasyamānāhambhāvasya bhedo na praśānta 
ityabhedajāgratpadādhiṣṭhātṛtvaṃ nābhyupagataṃ cidvyāptipadasya 
bahirbahirarthānāmantarantartheṣu nimajjanarūpaṃ svabhāvaṃ vyutpādayan 
śavarge śuddhavidyādyabhedapramātṝṇāṃ viṣayavibhāgaṃ darśayati -

yadbāhyetyādi | antarantaḥpade bāhyavāhyapadamajjanaṃ yat bāhyabāhyapadasya 
yanmajjanam prameyāṇāṃ pramāṇapade majjanaṃ pramāṇāṃ pramātṛpade 
majjanamityarthaḥ | taccitpade cidvyāptipade | bhavatīti śeṣaḥ | jaḍapade 
caityavyāptipade | etadviparītam | antarantaḥpadasya bahirbahiḥpade majjanaṃ 
viparītam | pramātṛpadasya pramāṇapade majjanam pramāṇapadasya prameyapade 
majjanamityarthaḥ | iha śuddhavidyeśvarasadāśivaśaktyāhvayasya 
pramātṛcatuṣṭayasya | sādhāraṇapade śavarge | akṣātma indriyaprakāśaikātma | 
indriyaprakāśe labdhaikātmyamityarthaḥ | vedyaṃ prameyajātam | śaḥ śavarṇa iti 
veditavyam | pramāṇalabdhaikātmyaprameyasthānīyaḥ śavarṇa ityarthaḥ | yadyapi 
cavargayakārasaṅkocatyāgātmanaḥ śakārasya śabdādimātravedyasthānīyatvaṃ 
yuktaṃ tathāpi sarvaprameyopalakṣaṇatvena citpade'haṅkāre 
kavargalakārayormajjanādbahiravabhāsamānaścavargayakārayoga 
rūpabhedaśakāro'pi sarvaprameyopalakṣaṇa iti veditavyam | sa hi śakāraḥ 
śuddhavidyāpramātā | pramātṛpramāṇaprameyarūpeṇa padatrayeṇa 
niṣpādyasvarūpasya pramātuḥ kathaṃ prameyamātrapratipādake śakāre 
svarūpapattirityatrocyate | varṇacatuṣṭayātmakaḥ sarvo'pi śavargaḥ 
śuddhavidyādipramātṛcatuṣṭayasya sādhāṇaraṇapade pratyekaṃ 
svarūpaṃ(svarūpaṃ) bhavati | tathāpi śuddhavidyādīnāṃ caturṇāṃ 
(pramā)pramātṝṇāṃ śakārādayaścatvāro varṇā ekaikasyaikaika eva 
svarūpasiddhihetubhūtasya viśeṣasya pratipādaka 
ityupacārāttattadekaikavarṇarūpatā teṣām | tathā hi 
śuddhavidyāpramāturindriyaikātmyavedyatvaṃ svarūpasiddhihetuviśeṣaḥ | 
atastasyendriyaikātmyavedyapratipādakaśakārarūpatvam | īśvarasya 
pramāturdehāvibhinnakāryavedyaikātmyakarmendriyatvaṃ 
svarūpasiddhiheturviśeṣaḥ | atastasya 
tādṛkkarmendriyapratipādakaṣakārarūpatvam | etadevāha 
dehāvibhinnakaraṇendriyamīśvaraḥ ṣa ti || 2 ||

p. 107)

jñānendriyaṃ sa hi sadāśiva ātmanaikye
svātmā khaviśramamayo ha itīha śaktiḥ |
etatturīyapadamaṅgacatuṣṭayāḍhyaṃ
bāhyāntarālapadayoḥ śritarūpasāmyam || 3 ||

atha sadāśivaśaktipramātṛsvarūpaṃ varṇadvayamāha |

jñānendriyamityādi | sadāśivasya 
pramāturātmāvibhinnasvātmīkṛtajñeyavedyajñānendriyatvaṃ 
svarūpasiddhiheturviśeṣaḥ | atastasya 
tādṛgjñānendriyapratipādakasakārarūpatvaṃ | etadāha - ātmanaikye 
ātmanā tādātmye sati tādṛśaṃ jñānendriyam | sa hi sakāro hi 
tādṛgjñānendriyapratipādakaḥ | sakāro hi sadāśiva ityarthaḥ | 
khaviśramamayaḥ aparicchinnacidacitsāmarasya rūpākāśaviśrāntimayaḥ | 
svātmā dehātmobhayalakṣaṇaṃ svarūpam | ha iti | hakāra iti varṇaḥ | iha śavarge | 
śaktiḥ śaktināma pramātā | 
aparicchinnaviśrāntimayadehātmasāmarasyalakṣaṇasvarūpatvaṃ śakteḥ 
svarūpasiddhiheturviśeṣaḥ | atastasyāstādṛksvarūpapratipādakahakārarūpatvam | 
evaṃ śuddhavidyādīnāṃ sādhāraṇapade śavarge 
tattasvarūpasiddhihetuviśeṣapratipādaka varṇāśrayaṇena viṣayavibhāgaṃ 
vyutpādyāsya śavargarūpasya padasya bāhye 
sparśasaṅkocatyāgarūpasyāntarantaḥstha saṅkocatyāgarūpasya ubhayatra 
rūpasāmyam prāgupadiṣṭameva sphuṭapratyayāyodghāṭayati - etadityādi | 
aṅgacatuṣṭayāḍhyam mahābhūtacatuṣṭayagarbhiṇyā mahāpṛthivyāḥ 
prakṛtyāśca citpade hakāre nimajjanādubhayatrāṅgacatuṣṭayāḍhyam | 
etatturīyapadam | abhedajāgratsvapnarūpaṃ turyapadam | bāhyāntarālapadayoḥ 
sparśāntaḥsthapratipādyajāgratsvapnapadayoḥ | śritarūpasāmyam | cavargasya 
yakārasyāpi saṅkocatyāge śakāra eva ṭavargasya rephasya saṅkocatyāge ṣakāra 
eva | evamavaśiṣṭamunneyam || 3 ||

p. 108)

etpadaṃ padamakhaṇḍitameva śuddha-
vidyādikasya khalu tattvacatuṣṭayasya |
vedyādyudañcitacitisphuraṇakrameṇa
tattaddaśāvataraṇaṃ vibudhairvibhāvyam || 4 ||

śavarṇaśuddhavidyādīnāṃ pratyekasvara eva sādhāraṇaṃ padamityuktam | 
tadevāha -

etadityādi | etacchavargarūpaṃ padam akhaṇḍitameva avibhaktameva | 
śuddhavidyādikasya tattvacatuṣṭayasya padam | pramāṇaprameyāṅgasya 
pramāturekavarṇamātreṇa duṣpratipādatvāt | evamapi 
śuddhavidyādīnāmekaikavarṇavyavahāropacāre prākpratipāditopapattimāsūtrayati 
- vedyāditi | vedyādyudañcitacitisphuraṇaṃ caityavyāptyavasāne yadā 
tadunmeṣaprārambhaḥ tadāyaṃ prārambho vedyādika eva bhavatītyanubhavaḥ 
pramāṇam | tathā hi - pāśavāvasāne sādhako 
gurvanugrahasamunmiṣitavivekadṛṣṭirvedyameva svātmendriyaprakāśe 
nimajjayati | prameyasyaivaṃ 
pramāṇanimajjanābhyāsādārūḍhaśuddhavidyāsvabhāvastadanantaraṃ 
svātmīkṛtaprameyaṃ pramāṇaṃ pramātṛpade nimajjayitumudyuñjānaḥ 
śarīrarūpe tāvatpramātṛbhāge svātmīkrtakāryaprameyaṃ 
karmendriyavargarūpaṃ pramāṇaṃ nimajjayati | ato viśvaśarīraḥ san 
viśvaceṣṭakatayāvirbhūtasarvakartṛtvaśaktirārūḍheśvaratākakṣyastataḥ paraṃ 
svātmīkṛtajñeyaprameyaṃ jñānendriyapramāṇamātmarūpe pramātari 
nimajjayati | ato viśvātmakaḥ 
sannāvirbhūtasarvajñatvaśaktirārūḍhasadāśivakakṣyo jñānasya prāgbhāvena 
kriyāṃ kriyāprāgbhāvena jñānaṃ cānusandadhānastataḥ paraṃ 
jñānakriyāsāmarasyabhūmimaparicchinnaviśrāntimayīmicchātmikāṃ 
śaktikriyāmārohatīti prakriyayā vedyādyudañcicitisphuraṇakrameṇa 
tattadaṃśavarṇa uktamaryādayā | śuddhavidyāditattaddaśāvataraṇam | 
vibudhairvidvadbhirvibhāvyam | uktamaryādayā vedyādikaṃ citpravahaṇe yaṃ yaṃ 
bhāgamadhikṛtya śuddhavidyādīnāṃ svarūpalābhaḥ 
tattadbhāvarūpatattadāvaraṇasya tattatpramātṛpadatvamāpaicārikamitibhāvaḥ || 4 
||

p. 109)

sā(sa)dāśivaḥ sa khalu vindumayastavarga-
statreśvarāṅgamayamāntaradhāmayogyaḥ |
jñānakriye na suśivasya sadāśiveśā-
vantarbahiśca niyatāṅgipadau krameṇa || 5 ||

idānīṃ bāhye jñānendriyapratipādakatavargasaṅkocatyāgarūpasya sakārasya 
sadāśivakalāyāḥ sato'pi bahistasya prādhānyānaucityādīśvarāṅgatvam 
antaḥpade rephāks'ratyāgarūpasya ṣakārasyeśvarakalāyāḥ sadāśivāṅgatvamiti 
vyutpādayati -

sadāśiva ityādi | bindumayastyaktasaṅkoca ityarthaḥ | tavargaḥ | sa khalu sakāraḥ 
khalu | asau sakāraḥ sadāśivasvabhāvaḥ | antaradhāmayogyaḥ | 
svapnalakṣaṇajñānakakṣyāsamucito'yaṃ sakārarūpaḥ sadāśivasvabhāvaḥ | tatra 
bāhyapade | kriyāpradhāne | īśvarāṅgam | īśvarasyāṅgameva | 
kriyāpadejñānāṃśasya nyagbhāvaḥ | atropapattimāha - sadāśiveśau 
śivasya jñānakriye |

nanu śivasya jñānaśaktilī(vi)lāsarūpaḥ sadāśivaḥ 
kriyāśaktivilāsarūpa īśvaraḥ astu prakṛte kā nāmopapattirityatrāha - etau 
sadāśiveśau | krameṇāntarbahiśca niyatāṅgipadau sadāśivasyāntaḥ 
kakṣyāniyatamaṅgipadaṃ tasya jñānasvabhāvāt | jñānasya cāntaḥpade 
prādhānyāt bahiḥkakṣyā tvaṅgapadam īśvarasya bahiḥkakṣyāṅgipadaṃ tasya 
kriyāsvabhāvāt | kriyāyāśca bāhyapade prādhānyāt | tasyāntaḥkakṣyā 
tvaṅgapadam | ato rephasaṅkocatyāgarūpasya 
ṣakārasyeśvarakalāyāstatrāṅgatvameveti vivekaḥ || 5 ||

p. 110)

icchāpapañcakavabindumayī haśakti-
rjñānakriyāsamapadaṃ khalu sobhayātmā |
bindau samunmiṣati sargapade krameṇa 
saṃsṛṣṭirāparisamāptitayorvibhāvyā || 6 ||

sadāśivakalāyā antaḥprādhānyamīśvarakalāyā bahiḥprādhānyamityuktam | 
idānīṃ śaktyāḥ kalāyā icchātmikāyāḥ sāmyena tadubhayamūlatayā 
bahirantarapi prādhānyamiti pratipādayati -

icchetyādi | pa pañcaka va bindumayī | varṇapañcakātmanaḥ pavargasya vakārasya 
ca yo bindutvam | guṇapradhāno'yaṃ nirdeśaḥ | saṅkocatyāga ityarthaḥ | tanmayī 
tatsvarūpā | haśaktiḥ hakārapratipādyā śaktidaśā | icchā icchāsvabhāvā | sā 
icchāśaktiḥ | jñānakriyā samapadaṃ jñānakriyayoḥ sādhāraṇyena mūlapadam | 
icchāṃ (vinā) vijñānamapi na pravartate kriyāpi na pravartate iti 
jñānakriyayoḥ icchaivāntaraṃ kūṭasthaṃ rūpam | ata eva sā ubhayātmā 
ubhayasya jñānasya kriyāyāśca ātmā mūlasvarūpam | atastasyā jñānapade'ntaḥ 
kriyāpade bahiśca prādhānyameva nāṅgatvamiti bhāvaḥ ||

idānīṃ visargapade vidyādikrameṇa bindunmeṣe pravṛtte satyasau bindūnmeṣaḥ 
kramapravṛttiśālī yāvatsarvamapi padaṃ vyāpnoti 
tāvadvisargagandhasyānuvṛttatvādvinduvisargayoḥ saṃsṛṣṭireva na 
bindorekādhipatyamiti vyutpādayati - bindau ityādi | sargapade krameṇa bindau 
samunmiṣati sati | āparisamāpti sarvatrapade binduvyāptiniṣpattiparyantam | 
tayorbinduvisargayoḥ | saṃsṛṣṭiḥ | tripuṭīrūpe pade kvacit bindūnmeṣaḥ 
kvacidvisargasphuratteti saṃsṛṣṭiḥ | vibhāvyā ūhanīyā | ayamarthaḥ 
śuddhavidyāpramātari vedyānāmindriyaprakāśe nimajjanena vedyāṃśa eva 
cidunmeṣaḥ indriyāṇāṃ pramātṛpade 
nimajjanābhyāsapāṭavābhāvādindriyādikeṣūttarottarapadeṣu 
bhedasyāpraśamādvisargasya sphuratteti binduvisargasaṃsṛṣṭiḥ 
īśvaradaśāyāṃ śuddhavidyottarapadatvātprameyeṣu cidunmeṣaḥ siddha eva | 
viśeṣastu svātmīkṛtasvaviṣayāṇāṃ karmendriyāṇāṃ dehātmakapramātṛpade 
nimajjanam svātmīkṛtasvaviṣayāṇāṃ jñānendriyāṇāmātmarūpe 
pramātṛpadabhāge nimajjanaṃ tatprādhānyena apāṭavamevāpradhānam 
atastadādyuttarapade bhedasphuratteti visargasaṃsṛṣṭiḥ 
sadāśivadaśāyāmīśvaradaśāparyantacidabhedonmeṣaḥ siddha eva | viśeṣastu 
svātmīkṛtajñeyānāṃ jñānakaraṇānām viśvamayasya ca 
svātmapramātṛpade nimajjanam tasyā api daśāyā 
nirākulacidviśramarūpecchāśaktitattvaikātmyaṃ sāvaśes'miti tadaṃśe 
bhedagandhādvisargasparśaḥ śaktidaśāyāṃ tu 
viśramarūpatvādaparicchinnāyāmevābhedasāmrājyamiti tātparyam | taṃ 
(tat) bindūnmeṣapade visargānuvṛttitāratamyavivekaḥ 
śuddhavidyāditattvānāṃ prasphuṭajñānakāraṇamiti tasya tatkartavyatvena codanā 
|| 6 ||

p. 112)

purvatra naivahi paro niyataḥ paratra
pūrvo bhavenniyata eva śaṣādivṛnde |
ekatra saṃvidudaye'pyaparatra bhāsa-
stasyā itīdamathavā sama meva binduḥ || 7 ||

śuddhavidyādiṣu bahirbahidaśāyāmantarantardaśā nāntarbhavanti(ti) | 
antarantardaśāyāṃ tu bahirbahirdaśāntarbhavatīti vyutpādayati -

pūrvatretyādi | śaṣādivṛnde śaṣādipratipādye śuddhavidyādivṛnde | pūrvatra 
śuddhavidyādau pūrvadaśāyām | paraḥ paradaśā | naiva hi niyataḥ | na niyatā | 
śuddhavidyāyāmīśvaradaśā na niyatā | īśvaradaśāyāṃ ca sadāśivadaśā 
sadāśivadaśāyāṃ śaktidaśā ca tathetyarthaḥ | paratra tu īśvarādidaśāyāṃ tu | 
pūrvaḥ | śuddhavidyādidaśā niyata eva bhavet | niyamena bhavedeva | 
īśvaradaśāyāṃ śuddhavidyādaśā'ntarbhūtāstyeva sadāśivadaśāyāṃ 
ceśvaradaśā śaktidaśāyāṃ ca sadāśivadaśeti yojanā |

idānīṃ vedyopakrameṇa saṃvidudaye kramaṃ vinā vedyādipratipādakaṃ sarvamapi 
śaṣādivṛndaṃ saṃvinmayūkhānāṃ nirāghāṭa(nirvādha)prasaraṇena 
yugapadeva saṅkocati tyajatīti pakṣāntaramupakṣipati - ekatreti | ekatra 
vedyabhāge | saṃvidudaye sati | aparatrāpi pramāṇādipade sarvatrāpi | tasyāḥ 
saṃvido bhāsa iti | bhāsaḥ pravahantīti (śeṣaḥ) | idaṃ śaṣādivṛndaṃ 
śaṣādyakṣaracatuṣṭayam athavā pakṣāntareṇa | samameva yugapadeva | binduḥ 
binduśabdena tyaktasaṅkocatvaṃ lakṣyate | tyaktasaṅkoco bhavatīti śeṣaḥ | 
ayamarthaḥ | vedyapadopakrameṇa bindūnmeṣe śuddhavidyādidaśānāṃ 
kālavilambāpekṣaḥ kramo na niyataḥ | kvacitpramātari bhāgyādhike śaktipātasya 
tīvratayā śuddhavidyādidaśānāṃ nirvilambena kṣaṇādāvirbhāvo yugapadeva 
sambhavati kvacittu kramāpekṣayā śanaiḥ sambhavatīti 
pakṣadvayamatrānusandheyam || 7 ||

p. 113)

jāgracchivasya paśujāgarayuktadaiśa-
mantardaśāramiha koṇagataṃ bahutvam |
bhedodayollasita metadabhedakoṭyāṃ
prāpnoti saṅgrahāmiti pratipadrahasyam || 8 ||

idānīṃ śakārādyakṣaracatuṣṭayādhiṣṭhāturīśvarasya bahvakṣarasanniveśavati 
daśārayugmarūpe paśujāgaracakre kathaṃ sanniveśaucityamityāśaṅkya 
tadupapādayati |

jāgradityādi | śivasya | jāgrat jāgradavasthā | paśujāgarayuk paśujāgarāvasthayā 
yuk yoginī | yataḥ śliṣṭamityarthaḥ | (tat) tasmātkāraṇādantardaśāraṃ 
daśendriyasanniveśapadaṃ vyāpya daśāram | aiśaṃ īśvarādhiṣṭhātṛkam | 
iheśvarādhiṣṭhātṛke daśāracakrapade | bhedodayollasitaṃ bhedavijṛmbhaṇena 
samudañcitam | yatkoṇagataṃ bahutvaṃ koṇabāhulyam | etadabhedakoṭyām 
abhedapakṣāvirbhāve | saṅgraham | abhedapadocitaṃ bāhulyatyāgaṃ prāpnotīti 
pratipadrahasyaṃ jñānarahasyam | ayamarthaḥ visargavyāptau 
sakalabhedasamujjṛmbhasthale caturviṃśatyakṣarātmake sparśakadambake 
pañcavargasaṃvibhaktaṃ yatpañcāṅgakaṃ padaṃ caturasre daśārayugmasya 
caturṣu koṇapañcakeṣu vyavasthitam | paśujāgare śivajāgare tu bhedasaṅkṣaye 
sati caturaśrapadaṃ pādivarṇacatuṣṭayaṃ hakāratvena pariṇamate | 
bahirdaśārakoṇapañcakagataḥ kavargaśca hakāre'ntarbhavati | 
avaśiṣṭakoṇapañcakagataścavargaḥ śakāratvena pariṇamati | antardaśāre 
koṇapañcakagataṣṭavargaḥ ṣakāratvena pariṇamati | 
avaśiṣṭakoṇapañcakagatastavargaḥ sakāratvena pariṇamati | makāro 
hakārarūpeṇa pariṇāmini pavarge ca sambandhamupalabhate | 
pramātṛkakṣyāyāṃ ca vakṣyamāṇatrikoṇabime sambandhamupalabhata iti | 
visargapade vindvāvirbhāvaprakriyā caturaśradaśārayugmarūpaṃ cakratrayaṃ 
koṇacatuṣṭayākāreṇa pariṇamati | visargapade bindupade ca varṇānāṃ koṇānāṃ 
caikarūpyeṇa bhavitavyamiti ye manyante te bhedābhedadaśayorapyaviśeṣaṃ 
pratipadyanta ityalam || 8 ||

p. 114)

yaḥ pārthive cidudayaḥ sa hi śuddhavidyā
yaḥ prākṛte sa punarīśvaratā kilā'ṇḍe |
yo māyike sa tu sadāśivateti śāde 
strairupyadhīriharahasyatamaṃ gurūṇām || 9 ||

idānīṃ pakṣāntarāśrayaṇena indriyadehātmani majjitaprapañcānāṃ 
śuddhavidyeśvarasadāśivānāṃ 
pṛthvī(bhū)prakṛtimāyāntāścinmayīkṛtā viṣayā ityupakalpayati 
- 

yaḥ pārthivetyādi | bahirindriyaviṣayarūpe pārthivāṇḍe yaścidudayaḥ | cidvyāptiḥ 
| sa hi sa khalu | bindūdayaḥ śuddhavidyā | 
śuddhavidyāyāmindriyaprakāśairekākārīkṛtaprameyatvalakṣaṇāt | 
pārthivāṇḍe pramātṛsthānīyaḥ pavargaḥ sambandhavāneva tripuṭyāṃ nityaṃ 
tatsambandhaniyamāt | atastyaktasaṅkoce pārthivāṇḍe caturvarṇarūpasya 
sarvasyaśavargasya sambhavaḥ | evaṃ cāsminpakṣe 
śuddhavidyāpramāturbhedapraśamopakramapadatvātpaśujāgracca trikoṇabāhulye 
satyeva sanniveśopapattiriti ca visargasparśāḥ śavargākāreṇa pariṇamadavasthā 
śuddhavidyā pramātari bhedaśirodarśanamupalabhanta iti mukhyayā vṛttyā 
tvīśvarasyaiva śivajāgratpaśujāgraccakrasaṃśleṣaḥ 
śuddhavidyā(yā)stvapariṇatavivekānāmaṅgīkārāya 
pākṣikastatsaṃśleṣa ityalam | yaḥ prākṛte'ṇḍe cidudayaḥ śavargākāreṇa 
saṅkocatyāgaḥ | sa punarīśvaratā kila | atropapatteḥ pratibhāsamātragamyatvāt | 
kileti sāmpradāyikamaitihyam | atra pavargasya śavargākāreṇa saṅkocatyāga 
evamabhyūhyaḥ - makārasyoṣṭhyavarṇasya saṅkocatyāgaḥ kaṇṭyavarṇo 
hakāra iti sugamam | pakārasya prakṛtivarṇasya hakāre citpade'ntarbhāvaḥ | 
phakārādivarṇatrayasya śakārādivarṇatrayatve yuktirucyate | 
phakārabakārabhakārā jalāgnivāyavaḥ śakāraṣakārasakārāśca tathā | ataḥ 
phakārādisaṅkocatyāgarūpatvaṃ śakārādīnām samānatattvapratipādakatvāt 
śakārādīnāṃ jalādipratipādakatvam | prāguktabhūtavaiparītyābhāvavimarśe 
sphuṭaṃ phakārādīnāṃ rūpamucyate | alpaprāṇo vargaprathamavarṇaḥ 
alpavṛttiścetarabhūtāpekṣayā pṛthivī atastatpratipādakaḥ | mahāprāṇo 
vargadvitīyavarṇaḥ pṛthivyapekṣayā mahāvṛtti ca jalam atastatpratipādakaḥ | 
nādavānvargatṛtīyavarṇaḥ mahāprāṇānnādo'dhikavṛttiḥ 
jalādadhikavartivṛttiścāgniḥ ataḥ sa tatpratipādakaḥ | nādavānghoṣavāṁśca 
vargacaturthavarṇaḥ kevalanāda(bhavaḥ nāda)vato 
ghoṣavānadhikavṛttiḥ agneradhikavṛttiśca vāyuḥ atastatpratipādakaḥ | 
uktasakaladharmasaṃsṛṣṭirūpapavargapañcamam | ataḥ 
pṛthivyādibhyaścaturbhyo'dhikavṛttirākāśaḥ | ataḥ pañcamavarṇaḥ 
ākāśapratipādaka iti | ataḥ phakārādipratipādyatattvapratipādakatayā 
saṅkocatyāgarūpatvācca śakārādayaḥ phakārādi pariṇatirūpā iti labhyate | 
īśvarasya viśvamayaprakṛtyabhimānalakṣaṇatvāttyaktasaṅkocaṃ 
prakṛtyaṇḍamīśvarapadatvamarhatītyabhiprāyaḥ | yomāyike'ṇḍe cidudayaḥ sa tu 
sadāśivatā | māyikāṇḍasya svapnasyātmaprakāśapadatvātsadāśivasya 
viśvātmatvalakṣaṇāttyaktasaṅkoco māyāṇḍaḥ sadāśivapadamiti | śādeḥ 
śakārādivarṇacatuṣṭayasya | trairūpyadhīḥ pṛthivyaṇḍe prakṛtyaṇḍe 
māyāṇḍe ca siddhasya trairūpyasya aikarūpye satyeva sthānakṛtatraividhyasya yā 
dhī vivekaḥ | sā dhīriha śuddhavidyādidaśāvivekaprastāve gurūṇāṃ 
rahasyatamamati rahasyam || 9 ||

p. 116)

bindūdaye viśati sarga imaṃ tathaiva
sargodaye tamatha so'pi pade tadantaḥ |
kaḥsyāddhakārahṛdilaśca vakāragarbhe
bāhye tu cit prakṛtisargamukhe vibhaktā || 10 ||

idānīṃ śavarge kavargasya dehapratipādakalakārasya 
śaṅkā(saṅkoca)tyāgarūpavarṇādarśanāt taddarśanopapattimāha |

bindūdaya ityādi | bindūdaye binduvyāptau | imaṃ bindum | 
pūrvametadvyāpakasargo viśati | bindāvekībhavatītyarthaḥ | pūrvaṃ 
bindugarbhādeva bahirviśvasraṣṭā visargaḥ punastameva viśatītyarthaḥ | tathaiva | 
sargodaye visargavyāptau | taṃ visargam | athānantaram | so'pi bindurapi | 
viśatītyarthaḥ | tattasmātkāraṇādantaḥpade binduvyāptisthale | kaḥ | 
jalādibhūtacatuṣṭayapratipādakenaphādivarṇacatuṣṭayenāttagarbhaḥ 
pṛthivīpratipādakaḥ kakāro hakārahṛdi syāt | tatrāntargatobhavatītyarthaḥ | 
svapnasyāpyāntarapadatvāt | tatrāpi visargapramāturlakārasya garbhe sthitimāha ##-
antaḥsthasaṅkocatyāgarūpe śavarge ca hakāragarbhe lakārāntardhānaṃ 
bhavatītyarthaḥ | visargasya bindusamāveśe tadekarasatvameva | 
bindorvisargasamāveśe viśeṣamāha - bāhyetviti | bāhye visargavyāptisthale | 
tu | cidbinduḥ | prakṛtisargamukhe prakṛtirūpasya visargasya mukhe | saṃmukhe 
tiṣṭhannapi | vibhaktā | prakṛtau nāntarbhavati | api tu vibhaktarūpeṇa dṛśyate | 
makāro hi pakārarūpiṇyāḥ prakṛteśca tatsamīpasthitisūcitasyābahirmokṣaṇasya 
kartaiva tayā nā'ntardhīyate na tatraikarasyāt svarūpahāniṃ labhate | 
pṛthivīrūpasya visargabindunā bahirvisṛṣṭasya na bindvekarasīkaraṇaṃ 
pavargarūpe bindordarśanāt | ato visargavyāptau na bindusvarūpato lopa iti bhāvaḥ || 
10 ||

p. 117)

antaḥ padaṃ bhavati taccaturaṅgamaikyā-
cciccaityayoḥ karaṇasīmnyapi bhāvitaikyam |
pañcāṅgakaṃ bhavati bāhyapadaṃ prakṛtyāṃ
cidvahnigarbhakuharādatha nirgatāyām || 11 ||

atha visargasya bindunilayanāntaḥpadasya caturaṅgatvaṃ visargabindoranilayanena 
bāhyapadasya pañcāṅgatvamiti prāguktamapi prameyaṃ prasphuṭapratipattaye 
punarudbhāsayati -

antarityādi | tattasmātkāraṇāt bindau visarganilayanarūpāddhetoḥ | antaḥ padaṃ 
caturaṅgaṃ bhavati | kuta ityāha ciccaityayoraikyāt 
citaścaityaikarasīkaraṇasāmarthyasambhavāt | kimvidhamantaḥ padam | 
karaṇasīmnyapi bhavitaikyaṃ visargapramātuḥ sarvavyāpi padasyopalakṣaṇena 
cinmajjanena bahirbhāsamāne karaṇatrayapade'pi vibhāvitacidaikyam | visargapadasya 
kavargasya hakāramajjanena upalakṣaṇe na karaṇatrayasthānīya 
cavargaṭavargatavargasaṅkocatyāgarūpāṇāṃ śaṣasānāṃ hakāre 
nimajjanameveti vibhāvyamityarthaḥ | teṣāṃ yadbahiḥ sphuraṇena 
si(śu)ddhavidyādisvarūpavivecanaṃ tat hakāranimajjane satyeveti 
veditavyam | tataścābhedarūpaṃ citpadamekāṅgameva śaṣasānāṃ 
hakāranimajjanenādarśane śuddhavidyāsvarūpaṃ na vijñāyate iti tadvijñānāya 
hakārāntargatānāmeva teṣāṃ bahiravabhāsanamiti veditavyam | atha visargaspande 
cidvahnigarbhakuharātprakṛtyāṃ vinirgatāyām | karaṇatrayeṇa 
sahetyadhyāhāryam | bāhyapadaṃ pañcāṅgakaṃ bhavati | caityasya citpadaṃ 
vināsvarūpāsiddhestatrāluptena citpadena sahetyarthaḥ || 11 ||

p. 118)

jñānakriyonmukhahakāramayādvayecchā-
viśrāntirantaravahirmukhaviśramātmā |
kūṭākṣarātmatanureṣa śivaḥ suṣupti-
viśrāntireva savikalpakalālpagandhā || 12 ||

idānīṃ śaktirūpasya hakārasya svarūpaṃ vivicyacyutpādayannetaduttarapadasya 
lakārakṣakārarūpakūṭākṣarapratipādyasya śivatattvasya svarūpamavabodhayati 
-

jñānetyādi | jñānakriyonmukhahakāramayādvayecchāviśrāntiḥ 
sadāśiveśvarātmakayorjñānakriyayorviṣaye unmukhā | 
tadadhiṣṭhātṛtvādityarthaḥ | hakāramayā'dvayecchā hakārasvarūpābhedecchā | 
hakārapratipādyatve hakārasvarūpatvādabhedecchāyāmācaritam | 
saivecchāviśrāntirūpatvādviśrāntiḥ | ayamarthaḥ - 
yeyamaparicchinnajñānakriyātmakasadāśiveśvara 
svarūpajñānakriyākaraṇādhiṣṭhātrī jñānakriyayoḥ kūṭastha tvalakṣaṇena 
tadadhiṣṭhātṛtvenecchāvyapadeśaviṣayā 
jñānakriyākūṭasthatvasyaivecchālakṣaṇatvādicchāsvarūpiṇī 
śaktitattvamityāgamikairudghoṣyamāṇā dvaitaspṛṣṭirahitākārapratipādyā 
mahāviśrāntiḥ | saivāntaḥ pade abahirmukhaviśramātmā prapañcānabhimukhā 
viśrāntirūpā | savikalpakalālpagandhā | suṣuptiviśrāntireva 
svarūpānubhavamātravikalpayuktā | suṣuptireva | kūṭākṣarātmatanuḥ 
lakārakṣakārobhayaikyarūpakūṭākṣarātmakanijasvarūpaḥ | tatpratipādya ityarthaḥ 
| eṣa aparokṣānubhavagocaraḥ | śivaḥ śivatattvam | bhavatīti śeṣaḥ | jāgratyeva 
sambhavantī somādisādhanatābhāgyavaśāt svataḥ pravṛttā vā 
kācitsuṣuptiviśrāntirantarmukhī cecchivatattvaṃ bhavati saiva 
bahirmukhīcecchaktitatvaṃ bhavatīti vivekaḥ || 12 ||

p. 119)

nāstyasti vettyuditasaṃśayajāgratīha
suptau * * śive (bhavati)(ja gra)jagadabhedarūpam |
jñānakriyātmakatayā pratirūpabhinna-
mevaṃ caturvidhamadhiśritabījamātram || 13 ||

athāntarmukhajāgratsuṣuptiviśrāntirūpasya śivasya jaḍasuṣuptiviśrāntirūpāyāḥ 
svarapratipādyāyāḥ śakteriva jagatkāraṇatvena tattvajagadbījasthityaucityamiti 
tadavasthānaṃ kūṭākṣararūpeṇa vibhāvyamānaṃ vyutpādayati -

nāstītyādi | nāstyastivetyuditasaṃśayajāgrati nāstyastivetyudbhūtasaṃśayaḥ 
jāgratyatra hīha suptau asti vā nāsti veti saṃśayagocareṇa nirdeśitāyāṃ 
suṣuptāvityarthaḥ | śive tādṛksuṣuptisvarūpe śive | abhedarūpamapi athetyevaṃ 
bhinnam evaṃ sambhūya caturvidhaṃ jagat adhiśritabījamātraṃ 
bījamātreṇādhiśritaṃ bhavatīti śeṣaḥ | ayamarthaḥ | svapnarūpe'ntaḥpade 
bhedajñānarūpam jāgradarūpe bahiḥpade bhedakriyārūpam tathaiva 
svapnarūpe'ntaḥpade abhedajñānarūpam jāgradrūpe bahiḥpade bhedakriyārūpamiti 
saṅgraheṇa jagaccaturvidham | tadeva śivatattve kūṭākṣararūpeṇa bījamātraṃ 
tiṣṭhatīti vyutpāditam || 13 ||

p. 120)

jñānaṃ dvayādvayamayaṃ lasakārarūpaṃ
tādṛk ca karma kaṣakāramayaṃ vidustat |
śliṣṭaṃ puraḥ sphuritasadvayakoṭi la kṣa-
rūpaṃ parasparagataṃ ca samaṃ ca kūṭam || 14 ||

idānīṃ lakārasakārakakāraṣakārarūpavarṇacatuṣṭaye kādisparśakūṭākṣarasya 
caturvidhajagadbījasaṃsṛṣṭirūpatvaṃ vyutpādayati - 

jñānamityādi | dvayādvayamayaṃ bhedābhedātmakaṃ jñānaṃ lasakārarūpam | 
bhedajñānapadāntaḥ sthavarge prakṛtipratipādako yo lakārastasyaiva 
tatpadādhiṣṭhātṛtvāttatpadasya jñānapadatvāt jñānapramātṛtvaṃ 
manaḥpratipādakasya lakārasya tadvyāpyatvābhimānadoṣānna jñātṛtopapattiḥ 
tanmūlarūpasya vakārasya ca tathā jñeyasthānīyasya yakārasya ca jñātṛtvaṃ 
nāśaṅkanīyam | jñeyavargasya gandhādeḥ sarvatra pṛthivyādyaṅgatvāt 
prakṛtyākārapṛthivīrūpasya lakārasyāntaḥpade kriyāpramātṛśaṅkā na 
samucitā | ato lakārasya jñātṛtvaṃ niścitam | śavargapade abhedajñānatvaṃ 
sadāśivātmanaḥ sakārasya nirvivādam | tādṛgdvayādvayamayaṃ karma | ca | 
kaṣakārarūpaṃ kakāraṣakārarūpam | bhedaprakriyāpade sparśasthale ṭavargasya 
kavargavyāpyatvābhimānadoṣānnakartṛtvam | api tu kavargādhiṣṭhātuḥ 
kakārasya abhedakriyāpade śavarge (ṭa)varge īśvarātmanaṣṣakārasya 
kartṛtvaṃ sphuṭam | tadetaccatuṣkamidaṃ śliṣṭaṃ | bhedajñānena 
lakāreṇābhedajñānaṃ sakāraḥ | bhedakriyayā kakāreṇābhedakriyā ṣakāraḥ | 
bhedābhedayoranyonyaśliṣṭatāsvabhāvāt | śleṣe ca puraḥ 
sphuritasadvayakoṭipramāyābalāditi bhāvaḥ | śliṣṭayorakṣaradvikayoḥ 
sadvayakoṭipuraḥsphuraṇe kīdṛgrūpamityata āha - la kṣarūpamiti | 
lakārasakārayoḥ śleṣabhedarūpasya lakārasya puraḥsphuraṇe la iti varṇaḥ syāt | 
jñāne jñānamekarasībhavatīti | sakārasya lakāre 
sāmarasyātsakārayogasambhāvitocchrūna bhāvo lakāro la iti śrūyate | 
kakāraṣakārayoḥ śleṣe kakārasya dvaitarūpasya puraḥsphuraṇe kriyāyāṃ kriyā 
na sāmarasyaṃ labhata iti kṣakāraḥ syāt | etatkūṭaṃ parasparagataṃ kramāt 
paraspareṇa vyāptam | prathamaṃ lakāreṇa sakāro vyāpyate | etatsaṃsthānaṃ 
bhedasaṃsārabījam | anantaraṃ sakāreṇa lakāraḥ | ā ? 
etatsaṃ(sthā)namabhedasaṃsārabījam | kriyāpade ca prathamaṃ 
kakāreṇaṣakāro vyāpyate anantaraṃ ṣakāreṇa kakāraḥ | 
(etat)saṃsthānakṛtaṃ bhedābhedabījatvaṃ pūrvavat | samaṃ ca 
madhyamapade samavyāptikatvānniṣpandam sadbhidābhedobhayavimiśreṇa bījam | 
bhedasaṃsārabījabhūtena saṃsthānena dṛśyamānasya kūṭasyaivaṃ 
saṃsthānaprakriyā gurumukhātpāramparyāgatapratibhāvadbhiranusandheyā | 
śivatattvapuñjakasya kūṭasyaikākṣaratvameva vyaṅgyasya śivatattvasyaikatvāt | 
sāsnādimattvavyaṅgyāyā jāteriva (śiva) 
sthūlarūpakūṭākṣaravyaṅgyasya śivatattvasya na viśrāntisvarūpatābhaṅga iti 
veditavyam || 14 ||

p. 122)

jñānātmajāgarasuṣuptyavadhī makāra-
kūṭātmakau paśuśivau guṇakoṇabindvoḥ |
śliṣṭauvaśādicaturasrayugānvayottha-
nāgāśraraśmyudaragau nanu sargabindū || 15 ||

idānīṃ makārādikṣakārāntadaśākṣararūpasya 
pramātṛpadasyāṣṭāratrikoṇabinducakreṣu sanniveśaṃ vyutpādayati -

jñānātmetyādi | jñānātmajāgarasuṣuptyavadhījñānātmanorjāgarasya 
suṣupteśca avadhī | sthānabhūtau | avadhisthāne tiṣṭhantāvityarthaḥ | 
jñānajāgaro'ntaḥsthapratipādyaḥ svapnaḥ tasyāvadhau yakāraprānte svapnasya 
pravṛttiḥ prathamapadasya jāgradābhimukhyena 
pravartamānatvādvakāramārabhya yakāre parisamāptiḥ 
tadanantarapadatvānmakārasya svapnāvadhisthānatvam jñānasuṣuptiḥ 
śakāravarga(rṇa)pratipādyanirvibhedajāgratsvapnarūpaṃ padadvayaṃ 
tasyāvadhau hakārottarabhāge kṣakāraḥ nivṛttirūpā yā jñānasuṣuptiḥ 
suṣuptyabhimukhaṃ pravartamānatvācchakāramārabhya hakāre parisamāptiḥ 
tadanantarapadatvāt kṣakārasya jñānasuptyavadhisthānatvam |

evaṃ jñānajāgarajñānasuṣuptyavadhīmakārakūṭātmakau 
makārakūṭākṣarasvarūpau | paśuśivau | guṇakoṇabindvoḥ trikoṇabinducakrayoḥ 
śliṣṭau | trikoṇagarbhe binduḥ bindugarbhe trikoṇa iti 
jīvaśivayoranyonyavyāptisvabhāvatvācchleṣaḥ | bhedastraiguṇyarūpa iti 
triguṇāvacchinnasya bhedapramāturjīvasya trikoṇarūpatā abhedastvekarūpa 
ityabhedapramātuḥ śivasya nirguṇatvopalakṣaṇaniṣkoṇabindusvarūpatā |

nanu bhedapramātṛtvaṃ prakṛteḥ pṛthivyā eveti yujyate tatra bhedapade 
jīvasya prameyatvamiti prākpratipāditam | tatkathamatra bhedapramātṛtvaṃ 
jīvasyocyate abhedapratisiṃhāsanārohaścāpyatraivocyata iti cet ucyate | 
pramātṛtvasya anusandhātṛtvalakṣaṇatvāccitpada eva mukhyavṛttyopapattiḥ 
caityapadenuvyāptimadhikṛtya gauṇavṛtyopacāra iti caityapramātṛtvaṃ 
jīvasyaiva phalasamaye abhedapadīye vyavahāre tu caityasyaiveti vivekaḥ | 
atastrikoṇabindvoḥ | śliṣṭau jīvaśivau | 
vaśādicaturasrayugānvayotthanāgāśraraśmyudaragau vakārādayaḥ 
śakārādayaśca varṇā vaśādayaḥ vaśādibhiryaccaturaśrayugam | 
vādibhiryāntaiścaturbhirvarṇairekaṃ caturaśram 
śādibhirhāntaiścaturbhirvarṇairanyaccaturaśram | tayoścaturaśrayoranvayaḥ 
śleṣaḥ tenotthamudbhūtaṃ yannāgāśramaṣṭakoṇaṃ tadeva raśmayaḥ 
raśmicakram | kṣakārātmanaḥ śivasya śādivarṇaniṣpanna caturasraṃ 
raśmicakram makārātmano jīvasya vādivarṇaniṣpannaṃ caturaśraṃ raśmicakram 
tayoścakrayoryathākramamantaragau adhiṣṭhātṛtvena madhyasthitau | sargabindū | 
nanu | visargabindusvarūpau nanu | trikoṇātmano jīvasya visargarūpatā | 
binducakrātmanaḥ śivasya bindurūpateti vivekaḥ || 15 ||

p. 124)

jñānakriyātmakasuṣuptivibodhamadhya-
saṃsthau kṣamāvubhayapakṣagabindusargau |
savyāpakau tadubhayasya tadaṅgibhṛtau 
jāgratsuṣuptisamavāyapade'nuṣaktau || 16 ||

idānīṃ kṣakāramakārātmanoḥ śivajīvayorjñānakriyāsuṣuptyormadhyapade 
jñānakriyājāgarayormadhyapade ca yathākramaṃ sanniveśaucityaṃ vyutpādayati 
-

jñānakriyetyādi | jñānakriyātmakasuṣuptivibodhamadhyasaṃsthau | jñānātmikā 
suṣuptirabhedajāgratsvapnarūpā śavargapratipādyā kriyātmikā bhedasuṣuptiḥ 
svareṣu bindubhāgapratipādyā | tayoḥ suṣuptyormadhye kṣakārātmanaḥ śivasya 
saṃsthānaṃ jñānatmako vibodho jāgaro'ntaḥsthapratipādyo bhedasvapnaḥ 
kriyātmako vibodhaḥsparśapratipādyo jāgaraḥ tayormadhyabhāge makārātmanaḥ 
jīvasya sanniveśaḥ | jñānavibhedobhedasuṣupterapyupalakṣaṇam | 
abhedajāgratsvapnarūpāyāḥ pūrvakoṭerabhedasuṣupterudarakoṭimadhye yadā 
śivasya sanniveśastadābhedasus.uptijñānavibodhātmikāyāḥ pūrvakoṭeḥ 
kriyāvibodharūpāyā uttarakoṭimadhye jīvasya sanniveśa iti veditavyam ||

evaṃ nirūpitasanniveśasthānau kṣakāramakārātmakau śivajīvau | 
ubhayapakṣagabinduvisargau 
jñānakriyāsuṣuptilakṣaṇobhayapakṣagastadvyāpakastadubhayādhiṣṭhātā | 
vaindavaḥ kṣakāraḥ | 
bhedasuṣuptisahitajñānajāgarakevalakriyājāgaralakṣaṇobhayapakṣavyāpakastadad
hiṣṭhātā visargo makāraḥ | evaṃ 
suṣuptirūpobhayapakṣabaindavasuṣuptisahitajāgararūpobhayapakṣavyāpakau | ata 
eva tadaṅgibhūtau | nivṛttirūpāyā dvividhāyāḥ suṣupteḥ pravṛttirūpasya 
bhedasuṣuptisahitasya dvividhasya jāgarasyādhiṣṭhātṛtvasūcakena 
madhyasanniveśena nivṛttipravṛttirūpayoḥ abhedapadayoraṅgibhūtau 
jāgratsvapnasuṣuptī samavāyapade jāgratsuṣuptyoryaḥ samavāyo miśraṇaṃ tatpade 
antaḥsthoṣmavargayoḥ khalu jāgratsuṣuptyoḥ samastayorna tu vyastayoḥ samavāyaḥ 
| antaḥsthapade ca jāgratsuṣuptyoḥ samavāya-īṣatspṛṣṭatāviṣayatvāt 
ūṣmapade ca jāgratsuṣuptyoḥ samavāyaḥ tacchleṣāttasyeṣadvivṛtatāviṣayatvāt | 
ato vyāpakavargā(rṇā) daśākṣararupāḥ svarasparśadaśayorvyāpakāḥ | 
ata eva tasya vyāpakavargasaṃjñā | tatra madhyapade pakṣadvayavyāpakayoḥ 
śivajīvayoḥ madhyapadocitayoḥ sanniveśaḥ sopapattika iti vivekaḥ || 16 ||

p. 125)

saṅkocapūrtiparasīmapadobhayārthā
śrīcakramadhyanilayā tripureśvarī sā |
tredhā visargapadamekavidhaṃ padaṃ ca
bindosturīyamiti bāhucatuṣṭayāḍhyā || 17 ||

idānīṃ daśārayugmacaturdaśāravyāpakasya aṣṭārātmano madhya cakrasya 
adhiṣṭhātṛtvena jīvaśivātmakamakārakṣakārasāmarasyameva 
sarvacakrādhiṣṭhātṛbhūtāyā madhyacakranilayāyāstripureśvaryāḥ svarūpamiti 
vyutpādayati -

saṅkocetyādi | saṅkocapūrtiparasīmapadobhayārthā saṅkocasya 
saṅkocabhāvasya pūrteḥ pūrṇabhāvasya ca yatparasīma padaṃ 
paramāvadhisthānam jāgradātmakadaśārayugmarūpaṃ suṣuptyātmakaṃ 
caturdaśārarūpaṃ ca tadubhayobhayārdhā(rthā) | śrīcakramadhyanilayā 
prameyapramāṇapramātṛlakṣaṇapuratrayātmanaḥ śrīcakrasya madhyaṃ 
svapnātmakamaṣṭārarūpaṃ pramātṛpuram tadeva nilayaḥ sanniveśasthānaṃ 
yasyā sā | tripureśvarī | anena 
makārakṣakārayoraṣṭārādhiṣṭhātṛtvādubhayasāmarasyameva tripureśvarī 
svarūpamiti pratibodhitaḥ |

atha tripureśvaryāḥ suṣuptisvapnajāgaraturyalakṣaṇasakalacakrārthasvarūpiṇyā 
daśācatuṣṭayamevāṅgacatuṣṭayamiti tadvibhāgamāha - tredhetyādi | tridhā 
trividhaṃ visargapadaṃ bhedapadam bhedastu suṣuptibheda svapnabheda jāgararūpam 
bindorekavidhaṃ padaṃ turyarūpam | atra ca yadyapi 
abhedajāgratsvapnasuṣuptirūpeṇatraividhyaṃ sambhavati | tathāpi tasya trividhyasya 
bhedapratiyogitvopādhivaśāt sphurattā na tu pāramārthyeneti 
turyasyābhedapadasyaikavidhyameveti | bāhucatuṣṭayāḍhyā 
ityuktadaśācatuṣṭayopalakṣaṇena bāhucatuṣṭayena āḍhyāyāḥ sampannāyāḥ 
tripureśvaryāḥ sāmpradāyiko yo'yaṃ bāhucatuṣṭayasaṅketaḥ so'yaṃ 
daśācatuṣṭayāṅgatvopalakṣaṇaṃ na tu pāramārthika iti 
sadgurukaṭākṣakṣayitasarvasaṃśayasya bhāgyavato jīvanasya ekavedyaṃ 
mahārahasyamiti sāmpradāyikapravādaḥ || 17 ||

p. 126)

sauṣuptajāgradabahiḥ padajāgareṣu
toyakṣamānilamayeṣva ka lātmaśaktyā |
āttecavargayamayasvaguṇekṣucāpa-
puṣpeṣupāśanigṛhītacitā tribāhuḥ || 18 ||

athaivameva bāhucatuṣṭayasaṅketamāyudhacatuṣṭayasaṅketena saha prasphuṭaṃ 
vyutpādayati -

sauṣuptetyādi | sauṣuptaṃ suṣuptiḥ | jāgrajjāgaraḥ | abahiḥ padajāgaraḥ svapnaḥ | 
suṣuptijāgratsvapneṣu | toyakṣamā'nilamayeṣu jalapṛthvīvāyurūpeṣu | 
suṣuptirjaḍatvāt jalarūpā jāgrat - saṅkocarūpatvena 
kaṭhinatvātpṛthivīrūpam svapno vāyuparyāyamanovilāsatvādvāyurūpaḥ | 
krameṇaitāsu daśāsu | a ka lātmaśaktyā akārakakāralakārarūpayā śaktyā | 
caityātmikayā pṛthvīrūpayeti bhāvaḥ | pṛthivyā evātyantakaṭhinasvarūpāyāḥ 
paramacaityatvāt | kiṃvidhayā śaktyā | 
āttecavargayamayasvaguṇekṣucāpapuṣpeṣupāśanigṛhītacitā 
suṣuptijāgratsvapneṣu krameṇa āttaiḥ parigṛhītaiḥ ikāracavargayakāramayaiḥ 
svaguṇaiḥ svakīyadharmaiḥ bhūtapañcakādhiṣṭhātṛbhūtāyāḥ pṛthivyāḥ 
śabdādipañcakaṃ khalu dharmarūpam niyamena tadāśritatvāt etaireva 
śabdādibhiḥ suptyādidaśātraye prāptaulvaṇyatāratamyamayaiḥ | ata eva 
suṣuptāvikṣucāpamiti saṅketitaiḥ | jalamayatvena madhuratvācca 
jīvasvarūpāvarjakatvācca | jāgrati pravṛddhabhede prasphuṭapañcarūpaiḥ 
vaśīkaraṇamātravyāpāravattayā kusumabāṇā iti saṅketitaiḥ | svapne 
kiñciducchunadaśāyāṃ 
vāyurūpatvādvātyāvadbhrāmaṇavyāpāreṇabhedābhedabhrāntijananena pāśa iti 
saṅketitaiḥ | evaṃ ikāracavargayakāramayaiḥ pratipādyāḥ śabdādaya eva 
ikṣucāpapuṣpabāṇapāśatvena saṅketitāḥ tairevaṃbhūtaiḥ sādhanairnigṛhītā 
baddhā āvṛtā cit jīvasvarūpiṇīcitiryayā tayā pṛthivyā śaktyā | tribāhuḥ 
bāhutrayavatī | evaṃ caityātmikayā śaktyaiva suptyādidaśātrayādhiṣṭhātrī 
tripureśvaryā bāhutrayam | tadāśritaṃśabdādipañcakameva 
tattaddaśāvyavasthitasvarūpaviśeṣaṃ sat ikṣucāpādyāyudhatrayamiti 
mahopadeśaḥ || 18 ||

p. 127)

turye'gnidhāmni hacitā sasṛṇipraṇunna-
caityātipaśvibhajaḍatvarujaikabāhuḥ |
evaṃ caturbhujavibhāvyacaturthadaśāṅgā
kṣmātmāṅginī jayati madhyapade'tituryā || 19 ||

evaṃ bandhakaṃ bāhutrayaṃ tadāyudhatrayasahitaṃ vyutpādya mocakaṃ caturthaṃ 
bāhuṃ tadāyudhena saha vyutpādayati |

turya ityādi | agnidhāmni agnisvarūpe | cidvyāptisthānatvāditi bhāvaḥ | turye 
caturdaśāyām pāriśeṣyātturyamiti | tamā(dā)kāśasvarūpamiti 
veditavyam | hacitā | hakārapratipādyayā citā | sasṛṇītyādisakārarūpeṇa 
sṛṇinā aṅkuśena praṇunnaḥ - caityamevātipaśurmahāpaśuḥ ata eva 
mahāpaśutvādibho gajaḥ tasya jaḍatvam cidvyatirekeṇa sphuraṇaṃ tadeva ruk 
rogaḥ yayā tayeti hacidviśeṣaṇametat | (yathā)mahāpaśurgajaḥ 
khalvaṅkuśena bodhyate caityamapi tathā sakārarūpeṇa sadāśivavimarśena 
bodhyate | cidekarūpatāṃ prāpyata iti sakārasyāṅkuśasaṅketopapattiḥ | 
abhedavimarśaḥ sakāro hakārātmikāyāḥ saṃvicchaktyā aṅgatvāddharma iti 
tadāyudhatvaṃ tasya evaṃ sakārāṅkuśabhṛtā hasākāraśaktyā | ekabāhuḥ 
ekabāhumatī | evaṃ caturbhujaṃ vibhāvya | caturdaśāṅgā | 
caturbhujairvibhāvyāni catasro daśā evā'ṅgāni yasyāḥ sākṣmātmāṅginī | 
kṣakāramakārasaṃsṛṣṭirūpā aṅginī | kṣakāramakārābhyāmeva 
daśācatuṣṭayamadhiṣṭhitamiti | tadubhayasaṃsṛṣṭiraṅgitvaṃ tripureśvaryāḥ 
prāṇasvarūpateti samyagupapattiḥ | nirvikalpapadasya turīyasya 
mādhyamikatvenādhiṣṭhātṛtayā kṣakāro bījabhūtaḥ | vikalpapadasya 
suṣuptyādidaśātrayātmano mādhyāmikatvena makāro bījabhūtaḥ | 
tadubhayasaṃsṛṣṭireva sarvamūlatvātturyātītasvabhāva iti samupadiśati - 
madhyapade'tituryeti | etasyaiva padasya sarvotkṛṣṭatā jayatīti śabdenonmīlitā || 19 
||

p. 129)

suptiprabhṛtyuditacaityavijṛmbhitasya
jāgratpadaprabhṛticidvinimajjanaṃ yat |
turyaṃ padaṃc a khalu tatra suṣuptibhāgo
yaścinmayaḥ śivavapustadatīva turyam || 20 ||

nanu pañcabhūtāni pañcāmnāyā devasya pañcamukhānīti 
daśābhirapipañcabhirbhavitavyam | suṣuptyādibhiḥ 
pañcabhirdaśābhiraṅgairupalakṣitastatsarvamayāditadanyo bhavitumarhati | 
tatkathaṃ turyātītasyāṅgitvamuktamutyatrāha -

suptiprabhṛtīti | suptidaśāmārabhya | uditasya caityavijṛmbhitasya | 
jāgratpadaprabhṛti jāgratpadamārabhya yaccidvinimajjanaṃ cinmayatāvabhāsaḥ | 
tatkhalu turyaṃ padam | suṣuptisvapnajāgratkrameṇonmīlitasya bhedāvabhāsasya 
jāgratsvapnasuṣuptikrameṇa yo'yamabhedāvabhāsaḥ 
tatkhalvabhedāvabhāsasthānaṃ turyadaśā | tasyāṃ daśāyāṃ 
yaścinmayasuṣuptibhāgaḥ jāgratsvapnayościnmayāvabhāsanāntaraṃ 
sambhāvyamānaścinmayībhūtasuṣuptirūpo viśramaḥ | asau khalvatītaturyaṃ 
turyātītasvabhāvam | śivavapuḥ śivasya śirorūpaṃ vapuḥ | cinmayau 
jāgratsvapnau śivasya jaghanyaṃ vapuḥ cinmayīsuṣuptistasya śiraḥpadamiti 
veditavyamiti bhāvaḥ | etaduktaṃ bhavati | yeṣāṃ catasra eva daśā iti matam 
cinmayasuṣupteratītaturyamatyuttīrṇaturīyamiti vyapadeśāṅgīkāreṇa turya 
evāntarbhāvaḥ | teṣāṃ turyātītaṃ nāma nānyāpṛthagdaśā 
cinmayasuṣuptesturyātītatvasambhāvanāviṣayasya (turya evāntarbhāvāt##?
sarvadaśādhiṣṭhātā | etanmatānusāreṇa kṣakāramakārasamavāyasya 
sarvadaśādhiṣṭhātṛbhūtasya turyātītasvabhāvatvamaṅgitvābhiprāyeṇoktam 
daśāmātraparatvenaneti pūrvasūtrābhiprāyaḥ |

nanvevaṃ cāṅgiparatvenābhimatasya turyātītasvabhāvasya 
sarvadaśāṅgasamavāya eva yuktaḥ sa (na) 
tvekadeśaniyatakṣakāramakārasaṃsṛṣṭisanniveśaucityamiti na mantavyam | 
yathā śarīreṇa sarvaśarīrasamavāyavato'pi śarīraikadeśe hṛdayakamale 
sanniveśāṅgīkārastathā sarvadaśāsamavāyavata eva turyātīte(ta) 
svabhāvasya kṣakāramakārasaṃsṛṣṭirūpamadhyacakrasanniveśo yujyata eveti 
niravadyam | yeṣāṃ punarmate turyātītaṃ cinmayasuṣuptiparam pañcamī daśaiva 
teṣāṃ mate kṣakāramakārasaṃsṛṣṭirūpaṃ padaṃ sarvadaśāsamavetaṃ 
mahātattvameva tripureśvarīprāṇaparyāyamiti (na)vyatyayayogaḥ || 20 ||

p. 130)

turyaṃ dvikhaṇḍa mabhavasya jaghanyabhāgo
mūrdhā'tituryamanayoranubhūḥ kṣamadhyam |
jāgracchirāḥsvapanasuptijaghanyabhāgo
maprāṇakaḥ paśurasau viparatibodhaḥ || 21 ||

atītaturyaṃ śivavapuriti pūrvasūtre sāmānyoktaṃ viśeṣeṇa vyutpādayati -

turyamityādi | dvikhaṇḍaṃ khaṇḍadvayopalakṣitam | abhedajāgratsvapnarūpamiti 
bhāvaḥ | turyam | abhavasya śivasya | jaghanyabhāgaḥ | atituryam | 
abhedasuṣuptirūpaṃ turyaṃ turyadaśābhāgaḥ | mūrdhā śiraḥ | abhavasyeti 
sambadhyate | śivasya nirvikalpapradhānatvādvikalpāprādhānyācceti bhāvaḥ | 
anayorapradhānapradhānāṅgayoḥ | kṣamadhyaṃ kṣakārarūpaṃ madhyam | 
anubhūḥ prāṇasthānam | jaghanyaśirorūpayoraṅgayormadhyasthāne kaṇṭhe khalu 
prāṇastitiriti bhāvaḥ | ubhayādhiṣṭhāturubhayamadhyasthitirupapanneti tātparyam | 
śivaprasaṅgena jīvasyāpyaṅgavivekamāha - jāgracchiro yasya jāgracchirāḥ 
| svapanasuptijaghanyabhāgaḥ svapnaṃ svapnaḥ | svapanasuṣuptirjaghanyabhāgo 
yasya asau | viparītabodhaḥ śivādviparītajñānaḥ | paśuḥ | 
vikalpaprādhānyānnirvikalpāprādhānyācca paśoḥ śivādvaiparītyam | 
evaṃvidhaḥ | paśuḥ maprāṇakaḥ | ubhayāṅgamadhyavartīyo makāraḥ sa eva 
paśoḥprāṇasthānamiti pūrvavadvivekaḥ || 21 ||

p. 131)

mātmā paśuḥ prakṛtireva tayā nigīrṇo
hātmāpi citprakṛtireva nivṛttirūpā |
itthaṃ dvidhā prakṛtiviśramabhūḥ kṣakāraḥ
śambhuḥ paraḥ parata eva bhavetprakṛtyāḥ || 22 ||

bhedasaṃsārapravartinyā prakṛtyā yathā makārarūpaḥ paśurbadadhaḥ 
abhedasaṃsārapravartinyā prakṛtyā tathā kṣakārarūpasyāpi śivasya bandhaḥ 
sambhāvyate | tatkathaṃ niyatabandhaṃ 
makārakṣakārasāmarasyamupāsyatvenāṅgīkṛtamityatrāha -

mātmeti | mātmā makārasvarūpaḥ | paśurjīvaḥ prakṛtireva | tatrahetumāha | tayā 
nigīrṇa iti | prakṛtyā grastatvāt | prakṛtyuttīrṇa stadutīrṇa iti bhāvaḥ | hātmāpi 
cit | hakārarupiṇī cit | nivṛttirūpā prakṛtireva | 
tadanuṣaṅganaiyatyādityabhiprāyaḥ | kṣakārastu itthaṃ dvidhā 
prakṛtiviśramabhūḥ | itthamuktamaryādayā | dvidhā | dvirūpiṇyāḥ 
pravṛttinivṛttirūpiṇyāḥ | prakṛterviśramabhūḥ - viśramasthānam | 
śuddhāntarmukhatvena saṃsāradvayakalāspṛṣṭatvāt prakṛtyanāvṛtaḥ kintu 
prakṛteḥ svayamāvarakamityabhiprāyaḥ | ata eva | kṣakāraḥ | paraḥ śambhuḥ | 
prakṛtyāḥ parata eva | na tu tadantaḥ patitaḥ | ato nityamuktaḥ kṣakāraḥ | asyaiva 
yadbahīrūpaṃ hakāraḥ yaccā(syā)tyanta(rba)bahīrūpaṃ 
makāraḥ tayoreva prakṛtipāratantryeṇa prakṛtitvaṃ na tu kṣakārasya 
atastasyopāsyatvaṃ yujyata eveti tātparyam || 22 ||

p. 132)

yadvā śivaḥ kṣa iha ma pratiyogibhāvāt
sauṣuptameva paraśambhupadaṃ cidātmā |
yaccakramadhyapadatā tadadhīśatā ca
śambhoḥ(stadasya) sadeśyaguṇagandhitayārcyabhāvāt || 23 ||

kṣakārasya makārapratiyogitayā vikalpagandho durnivāraḥ ataḥ śuddhanirvikalpaṃ 
citsuṣuptipadameva parama tattvam | tadevopāsyamiti ye manyante tadākṣepāyāha 
-

yadveti | mapratiyogibhāvāt makārasya jīvapratipādakasya pratiyogibhāvāt 
anyonyavyāpyavyāpakabhāvasaṃsargāt | kṣakāraḥ | śivaḥ | na tu paramaśivaḥ | 
vikalpagandhanaiyatyāditi bhāvaḥ | cidātmā cinmayaṃ sauṣuptapadaṃ suṣuptireva | 
paraśambhupadaṃ paramaśivatattvam | yadvā | yadveti pakṣāntare | asmin pakṣe 
citsuṣuptāvapi vikalpātyantocchedo duṣpratipādaḥ | sādhite vikalpātyantocchede 
paryantato jaḍatvaṃ prasajyeta | jaḍasya ca nopāsyatvam | ato vikalpapade vā 
gandhapade vā tattvamupāsyamiti kṣakārasya cakramadhyasthityā vibhāvyena 
cakrādhiṣṭhātṛtvenopāsyatvaṃ sphuṭībhūtamiti samādhatte - 
yaccakramadhyapadatetyādi | kṣakārasya śambhoścakramadhyapadatā 
sāmpradāyikī cakrasya madhyapratiṣṭhā tatpratibodhitā tadadhīśatā cakrādhīśatā 
ca tadetadasya śambhorguṇagandhitayā hetunā siddhirete (siddhyati) 
arcyabhāvāt arcanīyatvāt | upapādyata iti śeṣaḥ | guṇagandhādhānenā'rcanīyo na 
tu nirguṇa iti pratipattireva kṣakārasya śambhoścakramadhyasthitiḥ sāmpradāyikīti 
samarthayatīti vivekaḥ || 23 ||

p. 133)

candrāgnibhukchaśibhugagnirathaḥ samasvaṃ
bhānuḥ pade pada idaṃ tritayaṃ svarādau |
khaṇḍatrayātmakamakhaṇḍapadaṃ ca tadvat
tadviśramaḥ pratidaśaṃ samasaṅkhyataiṣām || 24 ||

atha punaḥ punarāvartamānābhirdaśābhireva tithibhiḥ kālo vyavasthāpyate | 
tithayaśca śuklapakṣe pañcadaśa kṛṣṇapakṣe ca tāvatyaḥ sambhūya 
triṃśatsaṃkhyakāḥ punaḥ punarāvartante | yogidṛṣṭau daśānāmeva 
tithirūpatāyāṃ tithisamānasaṅkhyatā daśānāṃ sāmpradāyikopadeśagamyeti 
tadeva prameyamupadiśati -

candro'gnibhugityādi | sūtradvayena daśāyāṃ daśāyāṃ tathā tathārūpaḥ 
saṃsāraḥ pañcabhūtātmanaiva kalāpena sampadyate | tānyapi bhūtāni 
daśāsvabhāvānyeva | tathā hi | jalatattvātmakaścandraḥ suṣuptirūpaḥ | 
vāyutattvātmakaḥ sūryo jāgradrūpaḥ | tejastattvātmako vahniḥ svapnasvarūpaḥ | 
pṛthvītattvātmikā prakṛtirguṇatrayaparyāyatejastrayabījabhūtā turyam | 
ākāśatattvātmakaḥ pumān sakalaprapañcabījarūpiṇyāḥ prakṛteḥ 
viśrāntisthānam turyātītam | yadyapi suptyādau kalānāṃ bāhulyaṃ vidyate | 
tathāpi tāḥ kalāḥ pañcasvevatattveṣvantarbhavanti | iti pratidaśaṃ 
pañcaivāṅgadaśāḥ | suṣuptisuṣuptirjalam suṣuptijāgradvāyuḥ suṣuptisvapno 
vahniḥ suṣuptituryaṃ pṛthivī suṣuptituryātītamākāśaḥ | ityevaṃ 
jāgradādāvapyaṅgadaśāpañcakavibhāgo'vagantavyaḥ | evaṃ pravṛttirūpāsu 
suṣuptijāgratsvapneṣu pratidaśaṃ pañcāṅgadaśāgaṇanāyāṃ 
pravṛttirūpasaṃsāraḥ pañcadaśāṅgavānbhavati | tānyevāṅgāni 
śuklapakṣa(sya)yoḥ pañcadaśatithaya iti vivekaḥ | atha nivṛttisaṃsāre 
pravṛttisaṃsārāṅgānāṃ sarveṣāṃ nivṛttirūpateti tatra 
kṛṣṇapakṣa(sya)yostithayaḥ pañcadaśa bhavanti | pravṛttisaṃsāre 
vedyamayasya candrasyābhivṛddhiriti tatsaṃsāra(ka)sya śuklapakṣatā | 
nivṛttisaṃsāre vedyasya candrasya kṣaya iti kṛṣṇapakṣatā tasyeti vivekaḥ | 
sūtrayorakṣarārthastu agnibhugagnivyāpakaścandraḥ | śaśibhuk 
candravyāpako'gniḥ | evaṃ candrāgnyoḥsvabhāvo'gniḥ | na tu sarvāsu 
daśāsvagninā candrakabalanaṃ candreṇāgnikabalanaṃ vivakṣitam tathātve 
pravṛttisuṣuptyādau agninā candrakabalane śuklapakṣatva(vyā)hāniriti | 
atha | samatā | anayoścandrāgnyoḥ samatā | bhānuḥ | svarādau svaravargādau pade 
pada idaṃ tritayam | saṃsārakalāpatvena niyatābhyupeyamiti śeṣaḥ | 
tadvaccandrādivat | khaṇḍatrayātmakaṃ candrāgnibhānurūpakhaṇḍatrayātmakam | 
candrādyākāreṇa vilasanam | akhaṇḍapadaṃ pravṛttiparyāyapṛthivīrūpam | 
candrādayaḥ khalu guṇatrayamayāḥ pravṛttiparyāyapṛthivīvilāsarūpā iti 
vivekaḥ | akhaṇḍapadaṃ guṇatrayasamaṣṭirūpatvātprakṛterakhaṇḍapadatvam | 
etacca padaṃ pade candrādipadavacca saṃsthānamiti etadvacchabdārthaḥ | 
tadviśramaśca tasya prakṛtirūpapadasya viśramaḥ viśrāntisthānam | 
ākāśarūpam | svātmatattvamityarthaḥ | etadapi padaṃ pratidaśaṃ niyatamiti 
aṅgadaśāpañcakanaiyatyadaśānāmuktam | eṣāmaṅgānāṃ daśāsu 
niyatānāṃ tithibhiḥ samasaṅkhyatā veditavyeti śeṣaḥ || 24 ||

p. 135)

bhedāvibhedasamatātanubhiḥ suṣupti-
svapnaprajāgarapadaistriguṇīkṛtābhiḥ |
pṛthvādisvāntatithibhirnanu śuklapakṣaḥ
kṛṣṇastujāgarapadādikatannivṛtyā || 25 ||

bhedetyādi | bhedavibhedasamatātanubhiḥ | krameṇa 
bhedābhedatadubhayasāmyasvarūpaiḥ suṣuptisvapnajāgarapadaiḥ | 
triguṇīkṛtābhiḥ | pṛthivyādikhāntatithibhiḥ 
pṛthivyādyākāśāntāṅgadaśārūpābhiḥ | pañcabhistithibhiḥ | trigaṇanāyāṃ 
pañcadaśabhiḥ | śuklapakṣo nanu | bhavatīti | śeṣaḥ | 
jāgarapadādikatannivṛttyā | atha turyadaśāyāṃ 
jāgradādiprathamamantyāttunivṛttirāsāṃ tithīnāṃ nivṛttyā 
nivṛttirūpāṅgīkāreṇa | kṛṣṇaḥ pakṣaḥ | tu śabdo bhede | evaṃ 
siddhasāmpradāyikakālavivekayoge dṛptadṛṣṭeḥ puruṣasya kālapañcakatvaṃ 
sidhyatīti etatprameyopadeśaḥ || 25 ||

dehātmikā prakṛtireva parā vimarśaḥ
saiva pravṛttivinivṛttyubhayādibhūtā |
vāgarthamiśravapurindvanalāryamatra
yyekaika yuktripuṭikā navamūrtirekā || 26 ||

idānīṃ mahāprakṛtirūpaparātmikāyā 
vimarśaśakterdaśāviśeṣarūpāṇāmaṅgānāṃ navasaṅkhyākatvena tasyāḥ 
pratibimbarūpaṃ śrīcakramapi navacakrasamayarūpamiti vyutpādayannāha -

dehātmiketyādi | dehātmikā deharūpiṇī anena tripureśvaryāḥ śarīratrayameva 
mukhyaṃ rūpamiti vyutpāditam | prakṛtireva parāvāgrūpiṇī 
svarasaprahaṇalakṣaṇā | evam prakṛtiriti parāvāgiti 
vyava(sthāpitā)(sthitā)dhiṣṭhā | vimarśaḥ | vimarśa śaktiḥ 
saiva(śiva)pravṛttinivṛttyubhayādibhūtā | pravṛttisaṃsārasya 
nivṛttisaṃsārasya miśrasaṃsārasya ca kāraṇabhūtaḥ sarvo'pi saṃsāraḥ 
prakṛte mūlaḥ prakṛtireva vilāsarūpatvādityarthaḥ | vāgarthamiśravapuḥ na tu 
kevalaṃ parāvāgrūpatvācchabdarūpā api tvartharūpā ca miśrarūpā ca 
sarvavyāpivastunaḥ śabdamūlatvācchabde'ntarbhāvāt evaṃ rūpatā tripureśvarī | 
indvanalāryamāditrayyekaikayuktripuṭikā 
tripuṭikāprameyapramāṇapramātṛsamudāyalakṣaṇā indvanalāryamṇāṃ trayyā 
ekaikayuk ekaikaṃ pratyekaṃ yujyate ityekaikayuk | evaṃ pratyekaṃ 
pravṛttirūpeṇa candreṇa nivṛttirūpeṇānalena ubhayasāmyarūpeṇāryamṇā 
sūryeṇa yuktā yā tripuṭī prameyādipuratrayī tatsvarūpā satī tattvata ekarūpāpi 
viśrāntidaśāyāmadvitīyāpi navamūrtiḥ navasaṅkhyākasvarūpabhedā | 
ayamarthaḥ | jaḍatvātprameyarūpaṃ caturdaśārātmakaṃ suṣuptipuraṃ 
visargaprādhānyādvinduprādhānyādubhayaprādhānyācca tridhā bhidyate | 
pramāṇarūpaṃ daśāradvayātmakaṃ jāgratpuramapi tathā pramātṛrūpam 
aṣṭārātmakaṃ svapnapuramapi tatheti navacakravivekaḥ | etaccakraṃ 
tattaddaśārūpeṇa navadhāvilāsaṃ syātsā tripureśvaryā bimbaṃ bhavatīti 
hṛdgatābhiprāyaḥ || 26 ||

p. 136)

caitanyatā ca jaḍatā ca vimarśacityo-
stulyā yadindvanalayorubhayaṃ tadicchā |
syātkarma cāvagalitaṃ tu mitho jaḍatvāt 
jñānaṃ tayoḥ samapadaṃ ca tathā dvirūpam || 27 ||

evaṃ śivasya saguṇasvarūpaṃ prakṛtimevotkṛṣya upāsyatvasambhāvanayā 
navacakreśvarīṃ vyutpādya tasyāścetyatve prasiddhe 
sambhāvitamupāsyatvavyāhṛtiśaṅkākaraṇḍatvaṃ (kāraṇatva) 
pravādamapavadannāha -

caitanyatetyādi | (bhī)citirajaḍeti sampratyayaḥ vimarśasya 
citsāmyaṃ(?) pratipādayan jaḍatvamapavadati | vimarśacityoḥ 
vimarśaprakāśayoḥ caitanyatā ca jaḍatā ca tulyā | ubhayorapi pratyekaṃ 
caitanyatvaṃ jaḍatvaṃ ca bhavatīti camatkāraḥ | ayaṃ 
camatkāro'nyonyavyāptinibandhanaḥ | vyāpakameva caitanyaṃ vyāpyameva jaḍamiti 
dvayorapi vyāpakatve vyāpyatve ca sati cidacidbhāvacamatkāro nirviśeṣeṇa 
kartavya iti bhāvaḥ | ubhāvetau prakāśāvimarśau icchājñānakriyāvantāviti 
vimarśasyājaḍatvapratipādane hetumāha - yadyasmātkāraṇāt 
indvanalayorubhayaṃ dvayam | tadicchā | tayoḥprakāśavimarśayoricchā | 
prakāśasyakadācidvyāpakatve anala icchā bhavati | kadācidvyāpyatve induḥ | 
vimarśasyāpi tathā | vimarśasyendureveccheti nāśaṅkanīyam | tasya vimarśasya 
vyāpakadaśāyāṃ tadicchāyā indoragnivaibhavaprāptiragnitvameva 
prakāśecchāyā agnerapi tadvyāpyedantāyāmindujāḍyaprāpterindutvameva |

evaṃ prakāśavimarśayorvyavahārapade 
svarūpasyā'nalendudvayasyā'nyonyameṣitavyecchārūpeṇa pratyaikayaṃ 
(pratyekaṃ) jaḍājaḍatvamuktvā mithaḥ kartṛkāryarūpaṃ 
jaḍā'jaḍatvamāha - syādityādi | mithaḥ avagilitaṃ vyāptaṃ kartrā khalu karma 
vyāpyate | ataḥ parasparamavagilitaṃ grasitaṃ karma ca bhavati bhūtātkartā ca 
bhavatītyarthaḥ | tayoḥ samapadam | anyonyavipayatvāttulyarūpaṃ jñānaṃ ca | 
tathā pūrvavadadvirūpam | anyonyaṃ jñātā ca bhavati jñānaṃ ca bhavatītyarthaḥ | 
evamindvanalayorvimarśaprakāśayoreṣitavyecchābhāve kāryakartṛtvabhāve 
jñātṛjñeyabhāve mitho nirviśeṣe sati prakāśatattvaṃ jaḍamitidurāgrahe 
vivekahīnatāmāpādayatītyarthaḥ || 27 ||

p. 138)

pakṣadvaye'pi parivṛttivaśāttrayāṇā-
micchādikatritayatāpratidhāma dhāmnām |
ṣaṭsvatravṛttiṣu ca kāraṇakāryatāsyā-
dbindukṣayormabhavayoḥ paphavarga(rṇa)yośca || 28 ||

atha khaṇḍatrayātmano mātṛkāmahāmantrasya pratibandhamubhayapakṣārthe na 
sadāvartanaṃ bhavet | 
khaṇḍānāmanyonyamādimadhyāntatvanirviśeṣe'nyonyakāryakāraṇabhāvacamatk
āraścakrākāratā ca bhavatīti rahasyametadvyutpādayati -

pakṣadvaya ityādi | trayāṇām dhāmnām | padānām | mantrakhaṇḍānāmityarthaḥ | 
pakṣadvaye'pi | dakṣiṇato vāmataścetyarthaḥ | parivṛttivaśāt āvartavaśāt | 
pratidhāma pratipadam icchādikatritayatā icchātvaṃ jñānatvaṃ kriyātvaṃ ca 
bhavati | yasyakasyacidvā khaṇḍasyā'ditvāṅgīkāre icchātvaṃ 
madhyatvāṅgīkāre jñānatvamantyatvāṅgīkāre kriyātvamiti vivekaḥ | atra 
khaṇḍatraye | uktamaryādayā ṣaṭsu vṛttiṣu | sarvāsu | 
bindukṣayoḥ(binduḥ)svaravargastasya bindoḥ kṣakārasya ca | tathā 
mabhabayoḥ | vyāpakavargasanniveśavato makārasya sparśavargasya || 
tayorbhakārabakārayoryugalasya sparśavargasya tayoreva(m) 
pakāraphakārayoryugalasya | svaravargasthitasya visargasya cānyonyaṃ 
kāryakāraṇabhāvo bhavati | ayamarthaḥ | 
pratikhaṇḍaṃhṛdayapradeśātprāṇapadādāvartodayaḥ saṃbhāvyaḥ 
pratikhaṇḍaṃ ca hṛdayapradeśe binduvisargau svaravargodare antaḥ iti 
vinduvisargau svaravargodare caturasracakrasaṃniviṣṭāḥ 
prakṛtyahaṅkārabuddhimanaḥpratipādakāḥ pakāraphakārabakārabhakārāḥ | 
tatra visargasthānīyau pakāraphakārau bindusthānīyau bakārabhakārau 
vyāpakavargodare makārakṣakārau (visargabindusthānīyau) visargaḥ 
bindusthāne | evaṃ sati (yadā) sarveṣu bindumupakramya pratilomāvartena 
vyāpakavargāvagāhe kṣakāraparyantamāvartaḥ tadānīṃ binduḥ kāraṇaṃ 
kṣakāraḥ kāryam kṣakāramārabhya anulomāvartena binduparyavasāne kṣakāraḥ 
kāraṇaṃ binduḥ kāryam | atha svarodaragataṃ visargamārabhya 
sparśodaragatapaphavarṇarūpavisargāntamanulomenāvarte visargaḥ kāraṇaṃ 
papharūpavisargaḥ kāryam papharūpavisargamupakramya 
svaravisargāntapratilomenāvarte paphavisargaḥ kāraṇaṃ svarasthavisargaḥ kāryam | 
atha sparśodaragataṃ babhavarṇarūpaṃ bindumupakramyānulomena 
vyāpakavargodarasthamakārarūpabinduparyantamāvarte babharūpabinduḥ kāraṇaṃ 
makārabinduḥ kāryam | makārabindumārabhya pratilomena 
babharūpabinduparyantamāvarte makārabinduḥ kāraṇaṃ babharūpabinduḥ 
kāryamiti tadvivekaḥ | atra bindukṣakārayorbindutvaṃ 
śuddhavisargapaphavarṇayugalasya visargatvaṃ śuddhaṃ 
babhavarṇayugmamakārayoḥ sāṅkaryeṇa bindutvaṃ visargatvaṃ ceti 
sāmpradāyikopadeśaḥ | prameyapramāṇapramātṛkhaṇḍeṣu yasya kasyacidvā 
mūlatvābhyupagamasiddhāntaḥ siddhairanubhavānurodhenāpikṛtaḥ | 
anubhavaścaivaṃ hi ghaṭādisphuraṇe cakṣurādipramāṇasphuraṇaṃ 
cakṣuṣmatpramātṛsphuraṇaṃ cā'vibhāvya krama manubhūyate | tatra kaścit 
ghaṭasphuraṇaṃ pradhānatayā manyate kaścidindriyasphuraṇaṃ pradhānam 
(kaścit) pramātṛsphuraṇamiti tatpuruṣa pratibhāvyavasthāpite 
siddhāntatraye vipratiṣedhaviṣaye sati siddhasiddhāntaḥ 
prakāśavimarśacamatkārabhūteṣu ghaṭādi sphuraṇe(ṣu) 
siddhāntatrayasamaṣṭireva saṃtiṣṭhatīti || 28 ||

p. 140)

candrāgniviśramaṇayoḥ svarayādidhāmnoḥ
rviśvasya bījadaśayoḥ prathame pade cit |
citye nimajjati paratra citau tu caitya-
metatsamastamubhayollasite tu bhānau || 29 ||

nanu pūrvoktatrikhaṇḍasvarūpasya caturdaśāravinyāsavataḥ suṣuptyātmanaḥ 
śāktasya svarakhaṇḍasya prādhānyena yajadbhiḥ śāktaiḥ siddhantīkṛtam | 
cinnimagnacaityasvarūpasyā(sā)ṣṭāravinyāsavataḥ svapnātmanaḥ 
śaivasya vyāpakakhaṇḍasya prādhānyena yajanaṃ śaiveḥ siddhāntitam | 
caturasra(sra)garbhitadaśāravinayasavato jāgradātmanaḥ 
sparśakhaṇḍasya paśudaśāśaṅkayā prādhānyena yajana mavivekijanasya 
upekṣāviṣaye vā syāditi tasyaiva khaṇḍasya 
pradhānayajanaucityaṃsāmpradāyikamiti sūtracatuṣṭayena vyutpādayati -

candrāgnītyādi | candrāgniviśramaṇayoḥ | svarayādidhāmnoḥ | 
svaravargavyāpakavargātmanoḥ padayoḥ candrasya visargasya viśramaṇaṃ 
viśrāntisthānatvam svaravargapade agnerbindoḥ viśramaṇaṃ vyāpakavargapade 
svaravarge cinnigaraṇena caityaikacchatrato (tā)vyāpakavarge 
caityanigaraṇena cidekaści(ccha)trateti bhāvaḥ | viśvasya bījadaśayoḥ | 
caityaviśramacidviśramayoḥ | pratyekaṃ viśvabījatvaṃ viśvasya 
vimarśamayatvena prakāśamayatvena cānubhavāt | prathame pade svarapade | cit | 
citye caityaṃ citā nimajjati | caityasya darśanaṃ nāstītyarthaḥ | ubhayollasite | 
ciccaityayorullasite | ullāsarūpe | bhānau | tu | sparśakhaṇḍe tu evaṃ (etat) 
ciccaityayugalam | samastam anyonyanigīrṇasvarūpam cicaityarūpamubhyamapi 
tattvaṃ saṃbhūya darśanapade bhavati | śivaśaktyo rubhayorapi 
darśanasthānatvādbhānurūpaṃ jāgraccakrameva prādhānyena yajanīyamiti 
vivekaḥ || 29 ||

p. 141)

indau ca havyabhujicodarasīmni yatsyā-
ccakradvayaṃ cidacidabhyavamardarūpam |
bimbadvayīyugalametadaśīta(ti)bhāno-
rbimbasthale hi caturaśra(sra)tayā samastam || 30 ||

caturdaśāracakre garbhitacitsvarūpaṃ yaccaityam aṣṭāragarbhitacaityasvarūpā yā 
cit evametaccakradvayādhiṣṭhātṛbhūtaṃ 
devatāyugalaṃdaśāradvayādhiṣṭhātṛbhūte 
caturaśra(sra)cakresaṃmilitam | ata evāsya cakrasya 
caturaśra(sra)bhāva iti vyutpādayati -

indau cetyādi | indau | ca | caturdaśāracakre | havyabhuji | ca | aṣṭāracakre | 
praticakram | udarasīmni | bimbastharaśmicakramadhye bimbacakrasyaucityāt | yac 
cakradvayaṃ syātpraticakraṃ ma(ndi)ndare cakradvayaṃ bhavatītyarthaḥ | 
ccaturdaśārodare aṣṭadalaṣoḍaśadalarūpaṃ ciccaityarūpaṃ cakradvayam | 
aṣṭārodare trikoṇabindurūpaṃ caityacidātmakaṃ cakradvayam | kīdṛśaṃ 
cakradvayam cidacidabhyavamardarūpam | cidacitościccaityayorabhyavamardaḥ 
anyonyakramaṇaṃ tadrūpaṃ tadavastham | caturdaśāre ṣoḍaśadalātmanā 
caityacakreṇa aṣṭadalātmakaciccakrakramaṇam | ata evā'ṣṭadalasya 
ṣoḍaśadalaraśmirūpeṇa tadbahiravasthānam | aṣṭāre bindvātmanā ciccakreṇa 
trikoṇātmanā ? caityacakrakramaṇam | ata eva trikoṇasya binduraśmirūpeṇa 
bahiravasthānam | evaṃ vyavasthitametadbimbadvayīyumalam | 
aṣṭadalaṣoḍaśadalātmakaṃ trikoṇabindvātmakaṃ ca yugalaṃ saṃbhūya 
caturūpam | aśīta(ti) bhānoḥ sūryabimbasthale daśāradvayodare 
caturaśra(sra)tayā caturaśra(sra) rūpeṇa | samastaṃ 
saṃbhūyasthitam | aṣṭadalaṣoḍaśadalatrikoṇabindurūpaṃ cakracatuṣṭayaṃ 
caturaśracatuṣkoṇarūpeṇa sthitam | ataścaturaśraṃ prādhānyena yaṣṭavyamiti 
niṣkarṣaḥ || 30 ||

p. 142)

tasmāccatuṣpadamidaṃ caturasravimbaṃ
ciccaityanirjarasaridyamunāprayāgaḥ |
arcyaṃ bhavetprathamato'thatadaṅgabhūta-
ciccaityacakrayajanaṃ tvitipūrvatastat || 31 ||

caturaśracakrasya uktopapattyā prathamato yaṣṭavyatāṃ nigamayati -

tasmādityādi | tattasmātpūrvasūtrapratipāditopapattirūpātkāraṇāt | catuṣpadam | 
aṅgāṅgirūpeṇa sthitasya devatācatuṣṭayasya samavāyasthalam | idaṃ 
caturasrabimbam | ciccaityanirjarasaridyamunayoḥ | bhāgīrathīyamunayoḥ | citaḥ 
svacchatvāttathāvarṇabhūtabhāgīrathīsāmyam caityasya saṃsārarūpatayā 
kalaṅkitatvānnailyena yamunāsāmyam | prayāgo nāma yamunābhāgīrathyoḥ 
saṅgamarūpaḥ puṇyatamastīrthaviśeṣaḥ | 
devatācaturaśra(sra)vimbamiti(mapi) tathā puṇyatamaḥ | tatra 
nimajjane sadyo (devatā) bhāvaśceti tathā nirūpitam | (iti | 
prathamataḥ) prameyataḥ | arcyamarcanīyaṃ bhavet |

atha caturaśra(sra)yajanānantaraṃ 
tadaṅgabhūtayościccaityacakrayoraṣṭāracaturdaśārarūpayoryajanamiti | 
taccaturaśracakram | pūrvataḥ pramukhe kṛtamiti śeṣaḥ | puratrayātmake 
śrīcakre caturaśra(sra)meva prathamato 
yaṣṭavyamityetadupadeśāyapramukhe devyāḥ pade(dam) 
sarvacakravyāpakasthale kṛtam caturaśra(sra)sya naisargikasthitiṣu 
(aṣṭāra)caturdaśārarūpayoryajanamiti taccaturaśracakraṃ pūrvataḥ 
caturdaśārāṣṭāramadhyadeśa eva prathamayaṣṭavyatāvyutpādanāya 
tayoścakrayorvyāpakatvenābhimate bāhyasthale sanniveśaḥ kālpanika iti bhāvaḥ | 
caturaśra(sra)cakraṃ daśāradvayasyāpyupalakṣaṇam | tasya 
raśmicakramantareṇa bimbacakrāvasthānasyānupapannatvāt || 31 ||

p. 143)

antaḥsthameva caturasramuṣarbudhendvo-
rarkātmakaṃ cidacidudbhavametadaṅgam |
evaṃ ca satyapi jaḍājaḍasārametat
prāgeva pūjyamiti pūrṇapade kṛtaṃ tat || 32 ||

iti paramarahasyaṃ mātṛkārthasvarūpaṃ
sphuṭataramupadiṣṭaṃ cakrarājābhinītam |
lagati yadayamarthaḥ śaktividdhe'ntaraṅge
na tu tunaraparatra pratyavāyo('sti) na tanme || 33 || 

[atrāyaṃśloko mūlaślokānupūrvīsamānaprāyaḥ ādarśa pustake 
ṭīkāyāmadhikamupalabhyate |

iti paramarahasyaṃ mātṛkārthasvarūpaṃ
sphuṭataramupadiṣṭaṃ cakrarājābhinītam |
lagati yadayamarthaḥ śaktividdhe'ntaraṅge
na tu punaraparatra pratyavāyo'sti tasmai || 1 || ]


iti mātṛkācakraviveke turyavivekaḥ pañcamaḥ khaṇḍaḥ || 5 ||

mātṛkācakravivekamūlaṃ sampūrṇam ||

caturaśro(sro)palakṣitasya jāgraccakrasya bahiḥsanniveśaḥ 
śiṣyavyutpādanāyaiva vyutpannāpekṣayā tviyaṃ kalpanā(nā)nusaraṇīyā 
api tu madhyasthitasyaiva caturaśra(sra)sya prādhānyadṛṣṭyā 
prathamayaṣṭavyatā siddheti cakrasyānyathāsanniveśakalpanāpratyavāyaṃ 
pariharati -

antaḥsthamityādi | uṣarbudhendvoḥ | aṣṭāracaturdaśāropalakṣitayoḥ | arkātmakaṃ 
caturaśraṃ(sram) daśāradvayodaraniyatasanniveśamantaḥ sthameva | 
evakāreṇa naiyatyamuktam | na tu bahirdeśe tasya sanniveśaḥ śaṅkanīya##-
bhānurūpaṃ khalu bhānuścāgnicandrayoraṅgam | tadubhayādhīnasiddhikatvāt | 
evaṃ caturaśra(sra)sya aṅgatve satyapi | jaḍājaḍasāraṃ 
candrāgnitattvayoḥ sārabhūtametaccaturaśracakrarūpamaṅgasāratvātprāgeva 
pūjyamiti vyupādanāyaiva | taccaturaśra(sra)cakram | pūrṇapade 
vyāptisthale | vāhyadeśe kṛtam | ādisiddhena śiveneti śeṣaḥ | madhyacakrasya 
caturaśropalakṣitasya | mūlāṅkurāpekṣayā madhyasthitasya bījasyaiva 
yairupāsakaiḥ prādhānyamavagataṃ te madhyasthitamapi 
caturaśraṃ(sram) bījavatprādhānyadṛṣṭyā prathamato yajante | ye 
tatrāvyutpannāḥ tadapekṣayeyaṃ caturaśrasya bahiḥ sanniveśarūpakalpanā 
cakrasthitasyaivārthasya vyākhyānarūpatā | tadapratyavāyaviṣaya iti tātparyam | 
aṣṭālaṣoḍaśadalayoścaturdaśāramadhya eva sanniveśaḥ | 
tayoścatura(sra)śrasyodarabhāge yaḥ 
sanniveśaścaturaśra(sra)sya 
daśāradvayasyāpyupalakṣakasyasamanantaraṃ caturdaśārāṣṭārayoryajanaṃ 
kartavyamiti caturdaśāropalakṣakatvena 
ṣoḍaśadalamaṣṭāropalakṣakatvenāṣṭadalaṃ ca śiṣyavyutpādanāyaiva bahiḥ 
sanniveśitamiti veditavyam | ayamarthaḥ | suṣuptijāgratsvapnātmakaṃ 
cakratrayamapi pratyekaṃ pradhānyena yaṣṭavyam | tatra suṣupticakrasya 
caturdaśārasya vyāptisthale bahirdeśe sthityā prādhānyamavagamyate | 
sāmpradāyikena vilomena svapnacakravyāpārasyāpi prādhānyamavagamyate | 
tadubhayamadhyapatitasya jāgraccakrasya bījasanniveśanyāyena yaiḥ 
pradhānyamavagamyate tadapekṣayā 
caturaśra(sra)ṣoḍaśadalāṣṭadalānāṃ 
jāgratsuṣuptisvapnacakropalakṣakāṇāṃ bahiḥ sanniveśakalpanānusaraṇīyā | ye tu 
punaratrāvyutpannāḥ tadapekṣayā jāgraccakrasya pradhānyaṃ 
bahiścaturasrādicakrasya (rekhā) trayasaṃnniveśenavyutpāditam | 
tadīyākalpanā (śiṣya)vyutpādanamātraparā sanniveśakalpanā vivekena 
vyutpattimatā ca sādhakajanena caturdaśāraparyanta eva śrīcakre 
suṣuptyādicakratrayasya pratyekaṃ (prādhānyamava)gantavyamiti ? 
śivam || 32 || 33 || (1)

|| iti mātṛkācakravyākhyānaṃ sampūrṇam ||





###########   END OF FILE  #######