#################################################### MUKTABODHA INDOLOGICAL RESEARCH INSTITUTE Use of this material (e-texts) is covered by Creative Commons license BY-NC 4.0 Catalog number: M00537 Uniform title: muṇḍamālātantram 1 Editor : rasika mohana caṭṭopādhyāya Description: This tantra is a different text from muṇḍamālātantra II, though they coincide in their contents and concerns and belong to the same period. A fairly late tantra. Notes: Data-entered by the staff of Muktabodha under the supervision of Mark S.G. Dyczkowski. Revision 0: Sept. 19, 2021 Publisher : Publication year : Publication city : Calcutta Publication country : India #################################################### kailāsaśikhare ramye gandharvagaṇasevite | haravakṣaḥsthitā devī pṛcchati sma nagātmajā || 1 || śrīdevī uvāca devadeva mahādeva sṛṣṭisthityantakāraka | nīlakaṇṭha jagannātha prabho śaṅkara bho hara || 2 || namastubhyaṃ jagannātha mama nāthāmaraprabho | śaraṇā''gata - dīnārtta - paritrāṇa - parāyaṇa || 3 || sarvādhāra nirādhāra sādhāra dharaṇīdhara | vedavidyādharādhāra gaṅgādhara namo'stu te || 4 || śrutaṃ paramatantraṃ vai sārāt sāraṃ parāt param | yat śrutvā śīghramāyāti śivalokamanāmayam || 5 || kālītantre kubjikāyāṃ tathā kālīvilāsake | ḍāmare yāmale kālīsarvasve yonitantrake || 6 || sammohane vikrame ca tantre caiva kulārṇave | mātṛkābhedatantre ca samayācāratantrake || 7 || vīratantre toḍale ca tathā bhairavatantrake | jñānatantre ca nirvāṇe śrutaṃ paramamādarāt || 8 || idānīṃ śrotumicchāmi guhyād guhyataraṃ param | sārāt sārataraṃ deva pāvanaṃ sarvadehinām | śrutvā jīvaḥ śivatvaṃ ca labhate nātra saṃśayaḥ || 9 || śrīśiva uvāca dhanyāsi patibhaktāsi prāṇatulyāsi śaṅkari | yoṣiccapalabhāvatvāt purā noktaṃ tvayi priye || 10 || idānīṃ sthiratāṃ jñātvā kathayāmi tvayi priye | asti caikaṃ muṇḍamālātantraṃ paramasādhanam || 11 || jñātvā jīvaḥ śivo bhūtvā viharet kṣitimaṇḍale | atigopyaṃ maheśāni tantrarājaṃ manoharam || 12 || muṇḍe muṇḍe ca kathitaṃ kathitaṃ muṇḍamālayā | śṛṇu guhyaṃ varārohe kiṃ pṛcchasi nagātmaje || 13 || śrīpārvatī uvāca devadeva mahādeva viśvanātha maheśvara | trayāṇāmevamācāraṃ trayāṇāṃ bhāvaśodhanam | trayāṇāṃ samayācāraṃ yena durgā prasīdati || 14 || śrīśiva uvāca yathā kālī tathā tārā tathā tripurasanudarī | bhairavī tu vanā vidyā chinnā ca bagalāmukhī || 15 || dhūmā bhīmā'nnapūrṇā ca durgā ca kamalātmikā | mātaṅgī dhanadā parṇāvatī sarvārthasiddhidā || 16 || nānādevī mahāvidyā upavidyāṃ pṛthak pṛthak | nānātantre maheśāni kathitā śivasundari || 17 || ācāraṃ vividhaṃ durge dakṣiṇaṃ dakṣiṇetaram | muṇḍamālāmahātantraṃ sarveṣāṃ jñānasādhanam || 18 || ekā durgā maheśāni eko devaḥ sadāśivaḥ | ahamekaḥ śivo devo nānyo devaḥ kathañcana || 19 || sā vai bhavānī me patnī sarvadā jñānamālabhet | tadaiva jāyate siddhirbhaktiravyabhicāriṇī || 20 || jñānaṃ vinā paraṃ tattvaṃ na jānāmi mahītale | ata eva paraṃ jñānaṃ bhāvayet sarvakovidaḥ || 21 || durlabhyaṃ śṛṇu deveśi mama sādhanakāraṇam | ataḥ parataraṃ devi durgamaṃ parasādhanam || 22 || sarvaśāntikaraṃ caiva sarvaduḥkhaharaṃ param | sarvarogakṣayakaraṃ sarvasādhanaśodhanam || 23 || brahmādīnāṃ ca durlabhyaṃ sarveṣāṃ śivadurlabham | yaḥ śākto dharaṇīmadhye sa śivo nātra saṃśayaḥ || 24 || yāsāṃ vijñānamātreṇa jīvanmuktaḥ prajāyate | bhaktyā bhaktyā japenmantraṃ sādhako dharaṇītale || 25 || jīvanmuktaḥ sadā muktaḥ sarvakarmasu kovidaḥ | yo'nyebhyo darśayed yaśca bhuktiṃ muktiṃ ca kāṅkṣati || 26 || svapnalabdhaghanenaiva dhanavān sa bhaved yadi | śuktau rajatavibhrāntiryathā jāyeta pārvati || 27 || tathānyadarśanebhyaśca bhuktiṃ muktiṃ ca kāṅkṣati | vinā durgāṃ na me jñānaṃ vinā durgāṃ na me ratiḥ || 28 || vinā durgāṃ na nirvāṇaṃ satyaṃ satyaṃ vadāmyaham | na tryakṣā bhaktiramalā preyasī paramā kriyā || 29 || śaktidvayaṃ samāśritya śakteḥ paramapūjakaḥ | ādyaṃ devi sudurjñeyaṃ madhyaṃ pañca vibhūṣitam || 30 || śeṣaṃ kulamayeneśaṃ nāsti nāsti varānane | satyaṃ vedmi hitaṃ vedmi punarvedmi varānane || 31 || vinā durgāparijñānāt ko vā tarati kovidaḥ | ko veda paramaṃ tattvaṃ ko veda nikhilaṃ padam || 32 || ko veda bhairavācāraṃ yo veda sa ca kovidaḥ | sa kulīnaḥ sa śūraśca sa pañcamavibhūṣitaḥ || 33 || yo jānāti jagaddhātri jagadīśe jayāvahe | madhyasthaḥ pārvatītattvaṃ na punardehabhāgbhavet || 34 || ādau guruṃ samabhyarcya ante paramasādhanam | kriyāśaktirato jantuḥ sarvabhāg jāyate khalu || 35 || nidānaṃ nāsti durgāyā mamaiva jagadambike | anyeṣāmasti vai svarge dharaṇītalaketane || 36 || ataḥ satyaṃ punaḥ satyaṃ punaḥ satyaṃ vadāmyaham | bhāvābhāvasamāyuktā yānti mokṣaṃ nirāmayam || 37 || yā pṛcchā te nigaditā sarvaṃ jānāmi śaṅkari | viditā paramā vidyā karālavadanā śivā || 38 || etasyāścaritaṃ yastu etasyāḥ sādhakasya ca | caritaṃ durlabhaṃ loke teṣāṃ madhye vadāmyaham || 39 || gururekaḥ śivaḥ sākṣād guruḥ sarvārthasādhakaḥ | gurureva paraṃ tattvaṃ sarvaṃ gurumayaṃ jagat || 40 || vinā guruprasādena koṭipuraścaraṇena kim | gurupūjāṃ vinā devi nahi sidhyati bhūtale || 41 || gurupūjāṃ vinā devi iṣṭapūjāṃ karoti yaḥ | mantrasya tasya tejāṃsi harate bhairavaḥ svayam || 42 || devatāgurumantrāṇāmaikyaṃ sambhāvayan dhiyā | tadā siddho bhavenmantraḥ prakaṭe hānireva ca || 43 || śrīpārvatī uvāca aikyajñānaṃ mahādeva kathamutpadyate prabho | narākṛtigururmantre devatā dhyānarūpiṇī || mantrāścākṣararūpeṇa kathamaikyaṃ bhavecchiva || 44 || śrīśiva uvāca dhanyāsi prāṇatulyāsi patibhaktāsi pārvati | ekajātisvarūpeṇa svabhāvādekajanmataḥ || 45 || eteṣāṃ bhāvayoge tu ekasādhanameva hi | gurorjātaśca mantraśca mantrā jātā tu sundari || 46 || ata eva varārohe devatāyāḥ pitāmahaḥ | pituśca bhāvanād devi tathā caiva pituḥ pituḥ || 47 || tadudbhavaṃ toṣameti viparīte viparyayaḥ | guruḥ kartā gururhartā guruḥ pātā mahītale || 48 || guroḥ santoṣamātreṇa tuṣṭāḥ syuḥ sarvadevatāḥ | gurau tuṣte śivastuṣṭo ruṣṭe ruṣṭastrilocanaḥ || 49 || gurau tuṣṭe śivā tuṣṭā ruṣṭe ruṣṭā ca sundarī | ato gururmaheśāni saṃsārārṇavalaṅghane || 50 || kartā pātā ca hartā ca gururmokṣapradāyakaḥ | jīvaḥ śivaḥ śivo devaḥ sajīvaḥ kevalaḥ śivaḥ || 51 || pāśabaddho bhavejjīvaḥ pāśamuktaḥ sadāśivaḥ | praṇamya gurupādābjaṃ dhyātvā ca gurupādukām || 52 || jñātvā paramatattvaṃ vai yo bhajet kulacaṇḍikām | sa kṛtārthaḥ sa dhanyaśca sa kṛtajñaḥ sa paṇḍitaḥ || 53 || svabhāvajño mahādevi jāyate nātra saṃśayaḥ | dhyātaḥ smṛtaḥ pūjito vā namito vāpi yatnataḥ || 54 || jñānato'jñānato vāpi pūjākālaṃ vimuktidaḥ | cinmayasyādvitīyasya niṣkalasyāśarīriṇaḥ || 55 || upāsakānāṃ kāryārthaṃ brahmaṇo rūpakalpanā | sarvadevamayīṃ devīṃ sarvadevamayīṃ parām || 56 || ajñānāṃ cintayed devīṃ paraṃbrahmasvarūpiṇīm | nityā ca niṣkalaṅkā ca nirādhārā nirāśrayā || 57 || sarvadhārā nirādhārā vijayā ca jayāvahā | saguṇā nirguṇā ceti mahāmāyā dvidhā matā || 58 || saguṇā māyayā yuktā tayā hīnā ca nirguṇā | saguṇā ca yadā devī saguṇo'yaṃ sadāśivaḥ || 59 || nirguṇā tvaṃ mahāmāye nirguṇo'haṃ na saṃśayaḥ | tvameva nirguṇo śaktirahameva ca nirguṇaḥ || 60 || yo bhajet saguṇo devi cācirāt so'pi nirguṇaḥ | guṇātītaṃ paraṃ brahma nirīhaṃ varṇavarjitam || 61 || tadeva paramā vidyā kālyādisaguṇānvitā | sādhakasya hitārthāya śāktasyānugrahāya ca || utthitā paramā vidyā saguṇā nātra saṃśayaḥ || 62 || || iti muṇḍamālātantre pārvatīśvarasaṃvāde prathamaḥ paṭalaḥ || 1 || atha dvitīyaḥ paṭalaḥ ekadā pārvatī devī karālavadanā śivā | papraccha pārvati devī hasantī kālikā parā || 1 || śrīpārvatī uvāca mahādeva maheśāna maheśvara sadāśiva | pṛcchāmyekaṃ mahābhāga kṛpayā kathaya prabho || 2 || vinā vyānaṃ kumbhakaṃ ca prāṇāyāmaṃ ca kullukām | japaṃ tapo dhāraṇaṃ ca setuṃ caiva vinā karam || 3 || vinā haṃsaṃ vinā piṇḍaṃ vinā bhāvaṃ vinā padam | kathaṃ vā jāyate siddhirvada nātha jagadguro || 4 || śrīśiva uvāca brāhmaṇaiḥ kṣatriyairvaiśyaiḥ śūdraireva ca jātibhiḥ | vāmarāśiprabhāveṇa kartavyaṃ japapūjanam || 5 || ye śāktā brāhmaṇā devi kṣatriyā brāhmaṇāḥ smṛtāḥ | vaiśyāśca brāhmaṇāścaṇḍi sarve śūdrāśca brāhmaṇāḥ || 6 || brāhmaṇāḥ śaṅkarāścaṇḍi trinetraścandraśekharaḥ | raktapuṣpairjagaddhātrīṃ pūjayeddharavallabhām || 7 || vajrapuṣpeṇa deveśi devīṃ tribhuvaneśvarīm | pūjayed bhaktibhāvena durgāṃ mokṣavidhāyinīm || 8 || harasamparkahīnāyā latāyāḥ kāmamandire | jātaṃ kusumamādāya mahādevyai nivedayet || 9 || svayambhukusumaṃ devi raktacandanasaṃjñakam | yathā triśūlapuṣpaṃ ca vajrapuṣpaṃ varānane || 10 || anukalpaṃ lohitāgraṃ candanaṃ haravallabham | kadācit kasya muktiḥ syāt kadācid bhuktireva ca || 11 || etasyāḥ sādhakasyātha bhuktirmuktiḥ kare sthitā | yogī cennahi bhogī syād bhogī cennahi yogavān || 12 || yogabhogātmakaṃ kaulaṃ tasmāt kaulaṃ samabhyaset | nahi yogī na vā bhogī na yogī yogavāniti || 13 || yogī bhogī na vā bhogī bhaved bhogī na saṃśayaḥ | śivabhaktiṃ vinā devi yo dhāvati ca mūḍhadhīḥ || 14 || na yogī syānna bhogī syāt kalpakoṭiśatairapi | rudrasya cintanād rudro viṣṇuḥ syād viṣṇucintanāt || 15 || durgāyāścintanād durgā bhavatyeva na saṃśayaḥ | yathā śivastathā durgā yā durgā śiva eva sā || 16 || tatra yaḥ kurute bhedaṃ sa eva mūḍhadhīrnaraḥ | devi viṣṇuśivādīnāmekatvaṃ paricintayet || 17 || bhedakṛnnarakaṃ yāti rauravaṃ pāpapūruṣaḥ | nahi durgāsamā pūjā nahi durgāsamaṃ phalam || 18 || nahi durgāsamaṃ jñānaṃ nahi durgāsamaṃ tapaḥ | durgāyāścaritaṃ yatra tatra kailāsamandiram || 19 || idaṃ satyamidaṃ satyamidaṃ satyaṃ varānane | svarge martye ca pātāle nāsti śāktāt paraḥpriyaḥ || 20 || saurāṇāṃ gāṇapatyānāṃ vaiṣṇavānāṃ tathaiva ca | tato'nte caiva śāktānāṃ kramaśaḥ kramaśaḥ priye || 21 || śṛṇu devi varārohe nāsti śāktāt paro janaḥ | śākto'pi śaṅkaraḥ sākṣāt paraṃbrahmasvarūpabhāk || 22 || ārādhitā yena kālī tāra tripurasundarī | ṣoḍaśī caiva mātaṅgī chinnā ca bagalāmukhī || 23 || ārādhitā maheśāni sa śivo nātra saṃśayaḥ | atigopyaṃ varārohe śāktānāṃ paramaṃ padam || 24 || yo jānāti mahīmadhye sa śivo nātra saṃśayaḥ | brahmādyarcitapādābjaṃ yo bhajet satataṃ mudā || 25 || sa yātyacirakālena muktimandirameva hi | ekā vidyā ca prakṛtirekastu puruṣaḥ śivaḥ || 26 || eko'haṃ vaiṣṇavatvaṃ ca ekameva prabhāṣate | evaṃ ca manasā durgāṃ yo bhajeddharavallabhām || 27 || pūjayed yantrapuṣpaiṣtu sādhako bhuvi maṇḍale | kākakañcuṃ vidhāyaivaṃ prāṇāyāmaṃ viśuddhidam || 28 || kumbhakaṃ mātṛkānyāsaṃ prāṇāyāmaṃ punaḥ punaḥ | prāṇāyāmatrayaṃ bhadre adhamottamamadhyamam || 29 || adhamād jāyate svedo madhyamād gātracālanam | uttamācca kṣitityāgo jāyate nātra saṃśayaḥ || 30 || prāṇo'pānaḥ samānaścodānavyānau ca vāyavaḥ | nāgaḥ kūrmo'tha kṛkaro devadatto dhanañjayaḥ || 31 || prāṇāyāmena sarveṣāṃ viśrāmo jāyate bhṛśam | javāpuṣpairdroṇapuṣpaiḥ karavīrairmanoharaiḥ || 32 || kṛṣṇāparājitāpuṣpairvajraiśca munipuṣpakaiḥ | pūjayet parayā bhaktyā caṇḍikāṃ parameśvarīm || 33 || kālīṃ karālavadanāṃ muṇḍamālāvibhūṣitām | praṇamed bhaktibhāvena pūjayeddharavallabhām || 34 || himadigvihito jantuḥ sarvālaṅkārabhūṣitaḥ | raktāmbaraparīdhāno raktāmālyānulepanaḥ || 35 || krameṇaibaṃ maheśāni so'hamityeva cintayan | evamīśāsane durgāṃ sthitvā ca sādhakottamaḥ || 36 || śmaśānaṃ śavamāruhya madhyastho narasādhakaḥ | japatvā mahāmanuṃ guhyaṃ vaset kailāsamandire || 37 || śivo'haṃ ca śiveyaṃ ca sadā vai madhyabhāvanā | ādyā mādyāṃ samāsthāya dhyāyet kuṇḍalinīṃ mudā || 38 || kadācit tāriṇīṃ vidyāṃ durgāṃ tārakatāriṇīm | pūjayet kriyayā śaktyā brahmavidyāṃ manoramām || 39 || sahasrāre mahādevaṃ nīlakaṇṭhaṃ sadāśivam | brahmādigopyaṃ deveśaṃ dhyāyet śaktisamanvitam || 40 || idaṃ ca durlabhaṃ tantraṃ mantraṃ yantraṃ mahītale | vākyaṃ paramanirvāṇaṃ dāmbhike paśusaṅkaṭe || 41 || goptavyaṃ vai varārohe svayoniriva pārvati | divā rātrau mahābhāge prajapet paramaṃ manum || 42 || japtvā bhavenmahājñānī gāṇapatyaṃ labhet tu saḥ | ahameva śivaṃ brahma śivo'haṃ bhairavo hyaham || 43 || bhairavo'haṃ bhairavo'haṃ ramaṇī mama bhairavī | manasā jñānamāsādya sādhakendro bhaved bhuvi || 44 || evaṃ jñānaṃ paraṃ nityaṃ nirvikāraṃ manoramam | prāpyaivaṃ sarvadā jīvo viharet kṣitimaṇḍale || 45 || pādyārghyācamanīyādyaiḥ pūjayet parameśvarīm | sadānandaḥ sa vijñeyaḥ sarvadharmārthasādhakaḥ || 46 || bhaktyā ca kriyayā caṇḍi praṇamed yastu kālikām | jīvaḥ śivatvaṃ labhate satyaṃ satyaṃ na saṃśayaḥ || 47 || kva yamaḥ kva tapo viṣṇuḥ kva kaliḥ karmahiṃsakaḥ | sarvaṃ ca mānasaṃ kleśaṃ sadā satyaṃ vibhāvayet || 48 || evaṃ vidhānamāsādya prajapet bhāvayet sudhīḥ | so'cireṇaiva kālena śivatvaṃ labhate janaḥ || 49 || sadā kriyā prakartavyā kriyayā siddhimuttamām | prāpnoti sarvadā śuddhimata evaṃ na vā tyajet || 50 || śmaśānasiddhirvairāgyaṃ śavasiddhirvarānane | durgānugrahamātreṇa bhaviṣyati na saṃśayaḥ || 51 || divyastu devavat prāyo vīraścoddhatamānasaḥ | paśubhāvastathā devi śuddhaśca dharaṇītale || 52 || śrutvā hasantī kālī sā karālakamalā kalā | digambarā divyadehā prāha devaṃ trilocanam || 53 || gopyaṃ yat kathitaṃ nātha śrutaṃ paramamādarāt | atigopyaṃ rahasyaṃ ca śrotumicchāmyahaṃ punaḥ || 54 || divyaṃ ca durlabhaṃ nātha vīro jātivihiṃsakaḥ | paśau nādhiṣṭhitā durā vīratantre purā śrutam || idānīṃ śrotumicchāmi brahmavākyaṃ sadāśivam || 55 || śrīśiva uvāca śrutaṃ bhairavatantraṃ ca yonitantraṃ kulārṇavam | kulācāraṃ tathā guptasādhanaṃ gurutantrakam || 56 || nirvāṇaṃ samayācāraṃ vīratantraṃ śrutaṃ purā | ḍāmaraṃ ḍamaraṃ ḍīnaṃ śrutaṃ kālīvilāsakam || 57 || saptakoṭimahāgranthā mama vaktrād vinirgatāḥ | yāmalaṃ devi brahmodyaṃ yāmalaṃ viṣṇuyāmalam || 58 || śivayāmalakaṃ devi yāmalaṃ mitrayāmalam | śaktiyāmalakaṃ durge kathitaṃ ca śrutaṃ tvayā || 59 || tathāpi hṛdayagranthirasti te parameśvari | purā sukathitaṃ tantraṃ purā devi tvayā śrutam || 60 || saṅketaṃ samayācāraṃ tantraṃ saṅketakaṃ tathā | kulasaṅketakaṃ nāma saṅketaṃ bahuvistaram || 61 || śmaśānasādhanaṃ bhadre śavasādhanameva ca | etat te kathitaṃ devi nānābhāvaṃ pṛthagvidham || 62 || kintvekaṃ śṛṇu cārvaṅgi kathayāmi samāsataḥ | matsyaṃ māṃsaṃ ca madyaṃ ca mudrā maithunameva ca || 63 || divyānāṃ caiva vīrāṇāṃ sādhanaṃ bhāvasādhanam | na madyaṃ prapibed vipro na mudrāṃ bhakṣayed sadā || 64 || na maithunamagamyāsu kartavyaṃ siddhināśanam | avadhūtaḥ śivaḥ sākṣādavadhūtaḥ sadāśivaḥ || 65 || avadhūtī śivā devī avadhūtāśramo mahān | avadhūtaśca dvividho gṛhasthaśca hitānugaḥ || 66 || sacelaścāpi digvāso vidhiyonivihāravān | sadāraḥ sarvadāvastho hyarddhahāso digambaraḥ || 67 || gṛhāvadhūto deveśi dvitīyastu sadāśivaḥ | na kalau sādhanaṃ madyaṃ pratyakṣaṃ varavarṇini || 68 || gṛhāvadhūtaḥ sarvatra kartavyaṃ ca digambari | ata eva varārohe miśrācāraṃ prakalpayet || 69 || evamācāramiśreṇa pūjayed yastu kālikām | santuṣṭā sā jagaddhātrī mokṣamārgavidhāyinī || 70 || svakarasthaśca bhogaśca svakarasthaśca mokṣakaḥ | devīmantraprasādena kiṃ na sidhyati bhūtale || 71 || surāṇāṃ cā'surāṇāṃ ca kinnarāṇāṃ ca pārvati | śaraṇyaṃ tāriṇīpādapadmaṃ mokṣapradāyakam || 72 || javāparājitādroṇakaravīraiḥ sitetaraiḥ | gandhairmālūrapatraiśca naivedyairvividhairapi || 73 || evaṃ vidhirvidhātavyaḥ kriyāsiddhikarātmakaḥ | tadaiva jāyate siddho jīvanmuktaḥ sadāśivaḥ || 74 || nārikelodakaṃ cārdraṃ jalaṃ sarvārthasādhanam | kāṃsye guḍe savyakare kṛtvā kāraṇakalpanam || 75 || tadā pūjā vidhātavyā madyena naganandini | brāhmaṇī kṣatriyā vaiśyā śūdrāṇī sarvamaṅgalā || 76 || śuklaṃ raktaṃ tathā pītaṃ kṛṣṇaṃ ca bhadramīritam | śuklapuṣpaṃ brāhmaṇe tu raktapuṣpaṃ ca kṣatrīye || 77 || vaiśye ca pītapuṣpaṃ ca śūdre kṛṣṇaṃ tadīritam | saṃvidāsurayormadhye saṃvidaiva garīyasī || 78 || anukalpāni cānyāni na dadyāt kevalāṃ surām | saṃvidāpānamātreṇa sa vīraḥ sa ca madyapaḥ || 79 || vāgjālaśāstre kathitaṃ niṣiddhaṃ naganandini | na grāhyaṃ tasya vākyaṃ ca grāhyaṃ tantrātmakaṃ vacaḥ || 80 || śivā kartrī śivā hartrī śivā śivavidhāyinī | śiveyaṃ ramaṇī devī śivo'haṃ śivakāminī || 81 || sadāśivaśivarādhyā śivānandavidhāyinī | vāmānandaḥ śivānando bhaved bhavasamo janaḥ || trayāṇāṃ bhāvatattvajño bhavayevaṃ varānane || 82 || || iti muṇḍamālātantre pārvatīśvarasaṃvāde dvitīyaḥ paṭalaḥ || atha tṛtīyaḥ paṭalaḥ kailāsaśikharāsīnamindukhaṇḍavibhūṣitam | pārvatī parayā bhaktyā prāha devaṃ trilocanam || śrotumicchāmyahaṃ nātha tantrān bahu pariplutān || 1 || śrīparvatī uvāca devadeva mahādeva saṃsārārṇavatāraka | namaste deva deveśa nīlakaṇṭha trilocana || 2 || namaste pārvatīnātha daśavidyāpate namaḥ | gaṅgādhara jagatsvāmin prabho śaṅkara bho hara || 3 || niḥśeṣajagadādhāra nirādhāra nirīhaka | nirbīja nirguṇābhāṣa saguṇāntakara prabho || 4 || namaste vijayādhāra vijayeśa jayātmaka | vijayānanda santoṣa vijayāprāṇavallabha || 5 || jagadīśa jagadbandya jayeśa jagadīśvara | viśvanātha prasīda tvaṃ prasanno bhava śaṅkara || 6 || śrīśiva uvāca saptakoṭimahāvidyā upavidyā tathaiva ca | śrīviṣṇoḥ koṭimantreṣu koṭimantre śivasya ca || 7 || śūdrāṇāmadhikāro'sti svāhāpraṇavavarjite | sarveṣāṃ durlabho mārgo durgāmārgo maheśvari || 8 || bhaktānāṃ khalu śāktānāṃ sulabhāt sulabhaḥ priye | nātaḥ parataro devo nātaḥ parataraṃ sukham || 9 || nātaḥ paratarā vidyā nātaḥ parataraṃ padam | śṛṇu devi varārohe parāt paraṃ priye || 10 || kevalaṃ dakṣiṇaṃ savyamāśritya yadi sādhakaḥ | bhāvayet paramāṃ vidyāmumeśo nātra saṃśayaḥ || 11 || śṛṇu caṇḍi varārohe karālāsye digambare | stauti tvāṃ satataṃ bhaktyā namaste jagadambike || 12 || śrīśiva uvāca ghoradaṃṣṭre karālāsye surāmāṃsabalipriye | caṇḍamuṇḍakṣayakare muṇḍamālāvibhūṣite || 13 || namaste'stu mahāmāye durge mahiṣavāhini | namaste jagadīśānadayite sarvamaṅgale || 14 || vakṣye paramatattvaṃ vai sārāt sāraṃ parāt param | śṛṇu devi jagaddhātri sāvadhānā'vadhāraya || 15 || yonimudrāprakaraṇaṃ pūrvaṃ ca gaditaṃ mayā | trikoṇaṃ guṇasaṃyuktaṃ yoniṃ paramakāraṇam || 16 || saṃgacchet tu śivābuddhyā śivarūpī na saṃśayaḥ | tuṣeṇa baddho vrīhiḥ syāt tuṣābhāve tu taṇḍulaḥ || 17 || karmabaddho bhavejjīvaḥ karmamuktaḥ sadāśivaḥ | jīvānāṃ paramo rogaḥ karmabhogaḥ sudāruṇaḥ || 18 || tasmāt tārāṃ jagaddhātrīṃ pūjayed bhaktibhāvataḥ | jaṭā - bhasma - vyāghracarmadhārī paramapāvanaḥ || 19 || nirantaraṃ japed yastu sādhakendro dharātale | sa dhanyaḥ sa kavirvīro divyastu paramaḥ paśuḥ || 20 || bhāvaśuddhirjñānaśuddhiḥ paraśuddhistu saṅgatā | citāśuddhiḥ pīṭhaśuddhirdhyānaśuddhistu sacchivā || 21 || jñātvā paramatattvaṃ vai jñānaṃ mokṣaikasādhanam | bhavet tu parayā buddhyā jīvaḥ śivatvamālabhet || 22 || vihāraṃ jagadambāyāḥ sahasrāre manoramam | sadāśivena saṃyogaṃ yaḥ karoti sa paṇḍitaḥ || 23 || jñānināṃ ca mataṃ vakṣye jñānināṃ ca mataṃ mudā | jñānā'jñānasamāyuktaḥ sarvadā vihared bhuvi || 24 || iḍā vāme sthitā nāḍī vidhustatrāpi tiṣṭhati | dakṣe'pi piṅgalā nāḍī sūryastatrāpi tiṣṭhati || 25 || madhye suṣumnā tanmadhye brahmanāḍī manoharā | madhyamaṃ khaṃ vidadhyād yo jano mṛtyuñjayo bhavet || 26 || citriṇīmadhyagaṃ vāyuṃ pūraṇaṃ recanaṃ yadā | karoti vāmanāsāgrairapi satyaṃ sureśvari || 27 || dakṣe tu dakṣiṇā vāmā virāmā cā'sitāsitā | nāḍī vāme kapālā ca vijihvā śūlakāriṇī || 28 || kaṅkālā niṣkalaṅkā ca savyadakṣiṇataḥ kramāt | bhitvā ca kramaśaścakraṃ yogindrairapyalabhyagam || 29 || nabhomadhyagataṃ cakraṃ sahasrābjaṃ manoramam | kālīpuraṃ tatra ramyaṃ sarvavarṇātmakaṃ priye || 30 || vidhāya caināṃ manasā buddhyā kāyena caṇḍikām | tatraiva dhyānamāsādya prakaroti japārcanam || 31 || yadi dhyānaṃ varārohe karoti satataṃ mudā | tadaiva jāyate siddhirmuktiravyabhicāriṇī || 32 || na ca dhyānaṃ na vā pūjā na stutiḥ paramārthikā | pūjayet tāṃ jagaddhātrīṃ kusumairmānasodbhavaiḥ || 34 || kāmarūpe dvijāgāre śvapacasya gṛhe'thavā | gaṅgādvāre prayāge ca yā muktiḥ pāvanī mukhe || 35 || yatra kutra mṛto jñānī tatraiva mokṣamāpnuyāt | durgāsmaraṇajaṃ puṇyaṃ durgāsmaraṇajaṃ phalam || 36 || durgāyāḥ smaraṇenaiva kiṃ na sidhyati bhūtale | śaivo vā vaiṣṇavo vāpi śākto vā girinandini || 37 || bhajed durgā smareddurgāṃ jayed durgāṃ śivapriyām | tatkṣaṇād devadeveśi mucyate bhavabandhanāt || 38 || kṣīroddhṛtaṃ yadva * * * tatra kṣiptaṃ na pūrvavat | pṛthak tvayā guṇebhyaḥ syāt tadvadātmā ihocyate || 39 || kṣīreṇa sahitaṃ toyaṃ kṣīrameva yathā bhavet | aviśeṣo bhavet tadvad jīvātmaparamātmanoḥ || 40 || yathā candrārkayorbimbo jalapūrṇaghaṭeṣu ca | ghaṭe bhagne jaleṣveva pralīnau candrasūryakau || 41 || na jāyate na mriyate ātmā tu paramaḥ śivaḥ | ātmajñānaṃ samāsādya saṃsārārṇavalaṅghane || 42 || taratyevaṃ sadā caṇḍi jīvaḥ śivatvamālabhet | pārvatīcaraṇadvandvabhajanāt kinnaro bhavet || 43 || svargo bhogaśca mokṣaśca śāktānāṃ na bhavet kimu | śāktānāṃ caiva nindā vai ye kurvanti narādhamāḥ || 44 || teṣāṃ lohitapānaṃ vai kurvanti bhairavā gaṇāḥ | bhairavāścaiva bhairavyaḥ sadā hiṃsanti pāmarān || 45 || teṣāṃ kṣatajapānaṃ vai kurvanti bahuraktapāḥ | śāktān hiṃsanti garjanti nindati bahujalpakāḥ || 46 || bhinatti teṣāṃ deveśi śirāṃsi śivavallabhā | śāktānāmuttamo nāsti svarge martye rasātale || 47 || śāktastu śaṅkaro jñeyastrinetraścandraśekharaḥ | svayaṃ gaṅgādharo bhūtvā viharet kṣitimaṇḍale || 48 || nāsti tantrasamaṃ śāstraṃ na bhaktaḥ keśavāt paraḥ | na yogī śaṅkaro jñānī na durgā devatā parā || 49 || dakṣiṇāṃśe yadvikṣīṇā uro bāhyamadhaḥ kṣipet | gatirmṛtyuḥ palāṅko'rddhaṃ khedayuktā ca muktidā || 50 || durgāyā mantranikaraṃ nānātantre tvayā śrutam | nānāmantraṃ na kutrāpi kathitaṃ na śrūtaṃ tvayā || 51 || durgā durgeti durgeti durgānāma paraṃ manum | yo bhajet satataṃ caṇḍi jīvanmuktaḥ sa mānavaḥ || 52 || mahotpāte mahāghore mahāvipadi saṅkaṭe | mahāduḥkhe mahāśoke mahābhayasamutthite || 53 || yaḥ sadā saṃsmared durgāṃ yo japet paramaṃ manum | sa jīvaloke deveśi nīlakaṇṭhatvamāpnuyāt || 54 || jīvaḥ śivaḥ śivā vāmā'bhirāmā śivanandini | evaṃ bhāvaṃ samāśritya kriyābhaktisamanvitaḥ || 55 || bhavatyevaṃ kva vā duḥkhaṃ kva bhayaṃ narakaṃ kva vā | kva kaliśca kva kālaśca sarvaṃ satyamayaṃ vapuḥ || 56 || kālyāścaiva hi tārāyāstripurāyāśca sundari | bhairavyā bhuvanāyāśca caritaṃ muktidāyakam || 57 || muktiśayyāṃ jñānamayīṃ sadā santoṣakāriṇīm | yenaiva bhāvamāsādya gacched duḥkhavināśinīm || 58 || japanaṃ pārvatīdevyāḥ pūjanaṃ pārvatīpadam | śaraṇaṃ pārvatīdevyāścaraṇaṃ bhavanāśanam || 59 || kālasya yantraṇāt kālī karālārivimardanāt | tasmāt padāṅghribhajanād devīputro bhaved dhruvam || 60 || purā nigaditaṃ caṇḍi nānācāraṃ pṛthagvidham | idānīṃ yāgavṛttāntaṃ manasaḥ śṛṇu śaṅkari || 61 || hṛtpadme bhāvayed durgāṃ devīṃ durgatināśinīm | karālāṃ ghoradaṃṣṭrāṃ ca muṇḍamālāvibhūṣitām || 62 || śavārūḍhāṃ śmaśānasthāṃ tāriṇīṃ ca digambarām | arddhahāsāṃ lalajjihvāṃ meghaśyāmāṃ varapradām || 63 || bhavānīṃ yaḥ smarennityamante sa pārvatīpatiḥ | sahasrāre sthitaṃ liṅgaṃ taptacāmīkaraprabham || 64 || kadā śuklaṃ kadā kṛṣṇaṃ pītaṃ nīlaṃ kadā kadā | kadā varṇamayaṃ liṅgaṃ svarādiparibhūṣitam || 65 || padmamadhyasthitaṃ liṅgaṃ jyotirmayamacintakam | jīvādibhūṣitaṃ liṅgaṃ karṇikopari saṃsthitam || 66 || sadāśivaṃ tato bhaktyā praṇamed bhaktisaṃyutaḥ | tadā siddhimavāpnoti nānyathā kalpakoṭibhiḥ || kiṃ bahūktyā maheśāni gurubhaktyā ca sidhyati || 67 || || iti muṇḍamālātantre pārvatīśvarasaṃvāde tṛtīyaḥ paṭalaḥ || 3 || atha caturthaḥ paṭalaḥ devī uvāca pṛcchāmyekaṃ mahābhāga yogendra bhaktavatsala | pṛcchāmi paramaṃ tattvaṃ devadeva sadāśiva || 1 || śrīśiva uvāca kathayiṣye jagaddhātri durgāyāścaritaṃ śṛṇu | ekā durgā jagaddhātrī eko hi paramaḥ śivaḥ || 2 || madaṃśāścaiva ye bhūtāste śaivā nātra saṃśayaḥ | tvadaṃśāścaiva śāktāśca satyaṃ vai girinandini || 3 || bahuvarṣasahasrānte śaivāḥ śaktiparāyaṇāḥ | śāktāśca śāṅkarā devi yasya kasya kulodbhavāḥ || 4 || cāṇḍālā brāhmaṇāḥ śūdrāḥ kṣatriyā vaiśyasambhavāḥ | ete śāktā jagaddhātri na mānuṣyāḥ kadācana || 5 || paśyanti mānuṣān loke kevalaṃ carmacakṣuṣā | śraddhayā'śraddhayā vāpi yaḥ kaścinmānavaḥ smaret || 6 || durgāṃ durgaśatottīrya sa yāti paramāṃ gatim | yathendraśca kuberaśca varuṇaḥ sādhako yathā || 7 || tathā ca sādhako loke durgābhaktiparāyaṇaḥ | abhaktyāpi ca bhaktyā vā yaḥ smared rudragehinīm || 8 || sukhaṃ bhuktveha loke tu sa yāsyati śivālayam | ihaiva svargaṃ narakaṃ mokṣaṃ vā girinandini || 9 || iha loke tu vāsaḥ syāt sarvaśaktimayaṃ jagat | durgāyāḥ śatanāmāni śṛṇu tvaṃ bhavagehini || 10 || durgā bhavānī deveśī viśvanāthapriyā śivā | ghoradaṃṣṭrā karālāsyā muṇḍamālāvibhūṣitā || 11 || rudrāṇī tāriṇī tārā māheśī bhavavallabhā | nārāyaṇī jagaddhātrī mahādevapriyā jayā || 12 || vijayā ca jayārādhyā śarvāṇī haravallabhā | asitā cāṇimā devī laghimā garimā tathā || 13 || maheśaśaktirviśveśī gaurī parvatanandinī | nityā ca niṣkalaṅkā ca nirīhā nityanūtanā || 14 || raktā raktamukhī vāṇī vasuyuktā vasupradā | rāmapriyā rāmaratā raghunāthavarapradā || 15 || bāhyeśvarī bāhyaratā kṛṣṇā kṛṣṇavarapradā | yaśodā rādhikā caṇḍī draupadī rukmiṇī tathā || 16 || guhapriyā guharatā guhavaṃśavilālinī | gaṇeśajananī mātā viśvarūpā ca jāhnavī || 17 || gaṅgā kālī ca kāśī ca bhairavī bhuvaneśvarī | nirmalā ca sugandhā ca devakī devapūjitā || 18 || dakṣajā dakṣiṇā dakṣā dakṣayajñavināśinī | suśīlā sundarī saumyā mātaṅgī kamalātmikā || 19 || niśumbhanāśinī śumbhanāśinī caṇḍanāśinī | dhūmralocanasaṃhartrīṃ mahiṣāsuramardinī || 20 || umā gaurī karālā ca kāminī viśvamohanī | jagadīśapriyā janmanāśinī bhavanāśinī || 21 || ghoravaktrā lalajjihvā aṭṭahāsā digambarā | bhāratī svargatā devi bhogadā mokṣadāyinī || 22 || ityevaṃ śatanāmāni kathitāni varānane | nāmasmaraṇamātreṇa jīvanmukto na saṃśayaḥ || 23 || yaḥ paṭhet prātarutthāya smṛtvā durgāpadadvayam | mucyate janmabandhebhyo nātra kāryā vicāraṇā || 24 || siddhikāle divābhāge niśāyāṃ vā niśāmukhe | paṭhitvā śatanāmāni mantrasiddhiṃ labhed dhruvam || 25 || ajñātvā stavarājaṃ tu daśavidyāṃ labhed yadi | tathā naiva ca siddhiḥ syāt satyaṃ satyaṃ maheśvari || 26 || kāmarūpe kāmabhāge kāminīkāmamandire | kāminīvallabho bhūtvā viharet kṣitimaṇḍale || 27 || vāmabhāge tu ramaṇīṃ saṃsthāpya varavarṇini | tāmbūlapūritamukhaḥ sarvadā tāriṇīṃ bhajet || 28 || mahāniśābhāgamadhye vāme tu vāmalocanām | kṛtvā japati tanmantraṃ siddhidaṃ sarvadehinām || 29 || vilokya mukhapadmaṃ ca vāmāyā ramaṇīmukhaḥ | prakarotyaṭṭahāsaṃ ca tato durgā prasīdati || 30 || paraṃ brahma paraṃ dhāma paramānandakārakam | nityānandaṃ nirvikāraṃ nirīhaṃ tāriṇīpadam || 31 || dhyātvā mokṣamavāpnoti satyaṃ paramasundari | yathā durgā tathā vāmā yathā vāmā tathā śivā || 32 || śivabhaktimayo bhūtvā viharet sarvadā śuciḥ | vinā kālīpadadvandvaṃ kaḥ śākto dharaṇītale || 33 || śaktihīnaḥ śavaḥ sākṣāt śaktiyuktaḥ sadāśivaḥ | śaktiyukto bhaved viṣṇurathavā viṣṇureva hi || 34 || rājamārgaṃ śaktimārgaṃ jānīhi jagadambike | anyapūjā na kartavyā na stutirna ca bhāvanā || 35 || na ca dhyānaṃ yogasiddhirnānyamantraṃ vicakṣaṇaiḥ | kevalaṃ kālikāpādapadmaṃ bhavavighaṭṭanam || 36 || nānyo devo na vā tīrthaṃ na dhyānaṃ na ca jalpanā | na tīrthabhramaṇaṃ caṇḍi na vātra yogadhāraṇā || 37 || stutirdurgā matirdurgā sthitirdurgā sadāśivaḥ | kṣudhā nidrā dayābhrāntiḥ kṣāntirdurgā yato gatiḥ || 38 || śaktiḥ śivaḥ śivaḥ śaktiḥ śaktirbrahmā janārdanaḥ | śaktiḥ sūryaśca candraśca kubero varuṇaśca yaḥ || 39 || śaktirūpaṃ jagat sarvaṃ yo na vetti sa pātakī | evaṃ śaktimayaṃ viśvaṃ yo veda dharaṇītale || 40 || sa veda dharaṇīmadhye kālikāṃ jagadambikām | sa eva sarvaśāstreṣu kovidaḥ sarvavallabhaḥ || 41 || śmaśānasiddhiṃ labhate nātra kāryā vicāraṇā | śūnyāgāraṃ śmaśānaṃ vā tulyaṃ paramakovidaiḥ || 42 || yo vā gacchati tatraiva sa viśveśo bhaved dhruvam | niśābhāge caturdaśyāmamāyāṃ haravallabhe || 43 || japedayutasaṃkhyaṃ ca sa siddhaḥ sarvakarmasu | sa yogīndraḥ sa bhāvajñaḥ sa ghīraḥ sarvakarmasu || 44 || nityānadaḥ sa vijñeyaḥ sarvakāryaviśāradaḥ | prabhāte'śvatthamūle tu gatvā paramakobidaḥ || 45 || pūjayet parayā bhaktyā sāmiṣairlohitairapi | bolvairbilvadalairvāpi bilvapuṣpaṃ varānane || 46 || japellakṣaṃ caturdaśyāmārabhya naganandini | pañcamena yajed devīṃ bilvamūle divāniśam || 47 || tadā vāksiddhimāpnoti kṣudro vācaspatirbhavet | āsanaṃ dvādaśavidhaṃ saṅketāsanamuttamam || 48 || bhadrapīṭhāsanaṃ padmāsanaṃ siddhāsanaṃ tathā | siddhasiddhāsanaṃ devyāsanaṃ ca kukkuṭāsanam || 49 || vīrāsanaṃ paraṃ bhadre cāsanaṃ varadāsanam | siṃhāsanaṃ paraṃ devi śmaśānāsanamuttamam || 50 || śavāsanaṃ varārohe devānāmapi durlabham | yatrāśrayet paraṃ brahmāsanaṃ paramabhūṣitam || 51 || vāmabhāge striyaṃ sthāpya dhūmāmodasugandhibhiḥ | tāmbūlacarvaṇādyaiśca pūjayed bhavagehinīm || 52 || bhavānīṃ tāriṇīṃ vidyāṃ brahmavidyāṃ manoharām | stutvā mokṣamavāpnoti tatkṣaṇādeva śāṅkari || 53 || viśvamātarjayādhāre viśveśvari namo'stu te | karālavadane ghore candraśekharavallabhe || 54 || māṃ tāraya mahābhāge dehi siddhimanuttamām | kāmakalpalatārūpe kāmeśvari kalāmate || 55 || kāmarūpe ca vijaye nistāre yaśavāhinī | gṛhītvā śavacāṇḍālaṃ dhṛtvā bhālaṃ mukhaṃ śiraḥ || 56 || nāsāṃ karṇau ca hṛtpadmaṃ nābhiṃ liṅgaṃ gudaṃ tathā | bāhū pṛṣṭhaṃ ca jaṭharaṃ dhṛtvā dhṛtvā muhurmuhuḥ || 57 || ādau māyāṃ punarmāyāṃ punarmāyāṃ niyojayet | vadhūbījaṃ tathā lajjā sarvāṅge nikṣipenmanum || 58 || aṣṭottaramanuṃ japtvā kṛtvā ca vandanaṃ śivam | punarvihārabījena nīladravyeṇa cakṣuṣā || 59 || tatkṣaṇād devadeveśi jāyate nātra saṃśayaḥ | śūnyāgāre maheśāni bhaved dhanadadiṅmukhaḥ || 60 || śaṅkhamālā gṛhītavyā sphāṭikī vā'tha rājatī | cāmīkaramayī mālā pravālaghaṭitā'thavā || 61 || mūrdhni deśe kullukāṃ ca japtvā śatamanuttamam | tadā mantraṃ japenmantrī maheśo nātra saṃśayaḥ || 62 || sa śaktaḥ śivabhaktaśca bhairavaśca sadāśivaḥ | kulīnaśca kulajñaśca yo japet tāriṇīmanum || 63 || hṛtpadmagāṃ jagaddhātrīṃ mūrdhniṃ saṃsthāṃ sureśvarīm | bhujaṅginīṃ jāgariṇīṃ bhujagādivibhūṣitām || 64 || nāradādyaiḥ sādhakendraiḥ sevitāṃ siddhasevitām | aśvatthe bilvamūle vā svajāyāmandire'thavā || 65 || devīṃ vā kāminīṃ vāpi dhyāyet paramadevatām | ādyāṃ jyotirmayīṃ vidyāmabhayāṃ varadāṃ śivām || 66 || praṇameta stutibhiścaṇḍīṃ sarvadoṣanikṛntanīm | śmaśānasthaḥ śivastho'pi paṭhet kavacamuttamam || 67 || tadā śmaśāne deveśi śave vā varavarṇini | siddhirbhaviṣyati tadā parapakṣā na bhairavāḥ || 68 || unmattaḥ krodhanaścaiva bhairavo baṭukātmakaḥ | saṃhāro bhīṣaṇaścaiva tathā ca kālabhairavaḥ || 69 || mahākālabhairavaśca ete vai vasusaṅkhyakāḥ | dṛṣṭvā śmaśānaṃ deveśi śavasādhanameva ca || 70 || nṛtyanti bhairavāḥ sarve garjanti raktalocanāḥ | adya matsadṛśo vāpi adyaiva vātulo'pi vā || 71 || śavaśmaśānayormadhye na jānāmi kathañcana | mā bhaiṣīrbhairavāḥ sarve vadiṣyanti ca bandhanāt || 72 || siṃhavyāghravarāhādyāḥ ke vā garjanti sarvataḥ | mā bhaiṣīścaiva mā bhaiṣīrmā bhaiṣīścaiva sādhaka || 73 || yo vā vadiṣyati puraḥ sa gurustattvakovidaḥ | vinā tantraparijñānād vinā guruniṣevaṇāt || 74 || prāṇāyāmād vinā dhyānād vinā mantravicālanāt | vinā jñānād vinā nyāsād vinā śavavibandhanāt || 75 || vinā bhāvād vinā lābhād vinā satsaṅgasevanāt | vinā jāpād vinā tāpād vināpi kāmamandirāt || 76 || nahi sidhyati deveśi pratyakṣaṃ haravallabhā | yadi bhāgyavaśād devi pratyakṣaṃ haravallabhā || tadaiva jāyate siddhirmahāvidyā prasīdati || 77 || || iti muṇḍamālātantre pārvatīśvarasaṃvāde caturthaḥ paṭalaḥ || 4 || atha pañcamaḥ paṭalaḥ ekadā pārvatī devī kailāsanilayāśrayā | aṭṭahāsaṃ prakurvantī prāha gadgadayā girā || 1 || śrīpārvatī uvāca devadeva mahādeva viśvanātha sadāśiva | pṛcchāmi jagadīśāna mama mandiragharṣaṇam || 2 || kiṃvidhaṃ vāpi bho nātha kasmin kāle maheśvara | śivaśaktimayaṃ brahma nityānandamayaṃ vapuḥ || 3 || navakanyāpūjanaṃ ca śrutaṃ viśveśvara prabho | kumārīpūjanaṃ deva śrutaṃ tava prasādataḥ || 4 || śrīśiva uvāca śṛṅgāraṃ dvādaśavidhaṃ viparītaṃ caturvidham | caturvidhaṃ ca śaivānāṃ naveṣu ca kareṣu ca || 5 || yo na jānāti viśveśi sa paśurnātra saṃśayaḥ | paśoragre na prakāśyaṃ na prakāśyaṃ kathañcana || 6 || paśustu dāruṇaḥ śatruḥ sarvabhāvavilopakṛta | kalpakoṭiśatenāpi vatsareṇāpi śāṅkari || 7 || nahi sidhyati viśveśi satyaṃ satyaṃ vadāmyaham | śṛṅgārarasalāvaṇyaṃ yo na jānāti paṇḍitaḥ || 8 || sa mūrkhaḥ sarvaśāstreṣu śaktibhraṣṭo na saṃśayaḥ | śṛṅgārarasalāvaṇye śāktānando yathā bhavet || 9 || na śaive vaiṣṇave vāpi saure vā gāṇapatyake | tathānando maheśāni jāyate na kathañcana || 10 || śivo jātiḥ śivo gātraṃ śivo dharmaḥ śivo ratiḥ | śivaḥ kartā śivaḥ pātā śivo hartā śivātmakaḥ || 11 || śivo buddhiḥ śivaḥ śāntiḥ śivo gatiḥ śivo matiḥ | śivaḥ kriyā śivaḥ śaktiḥ śivo muktiḥ śivātmikā || 12 || śivo'haṃ nātra sandeho jīvo'haṃ śiva eva hi | ityevaṃ yasya manasi vartate girinandini || 13 || tadaiva jāyate siddhirmuktiravyabhicāriṇī | śaktimārge vārārohe'vadhūtaḥ śaṅkaraḥ svayam || 14 || avadhūtī yasya vāmā'vadhūtastu svayaṃ bhavet | yatra kutra nivāsaśca kailāso nātra saṃśayaḥ || 15 || mandiraṃ tasya kailāsaṃ stambhaṃ maṇimayaṃ smṛtam | vṛkṣāśca parvatāścaiva kṣudrāḥ sarvapriye śive || 16 || kṣudrāśca bāndhavā rudrāḥ supradhānāḥ sadāśivāḥ | bhairavāḥ kiṅkarāḥ sarve bhairavyaśceṭikādikāḥ || 17 || evaṃ kailāsabhavanaṃ sarvānandakaraṃ param | manoharaṃ sukhamayaṃ sarvaśāntimayaṃ tathā || 18 || sarvapriyaṃ guṇamayaṃ sarvasaukhyādisambhavam | evaṃ sarvamayaṃ saukhyaṃ yo vai drakṣyati he priye || 19 || sarvaśaktiyuto bhūtvā viharet kṣitimaṇḍale | kṛṣṇāṣṭamyāṃ navamyāṃ vā prajapedayutaṃ niśi || 20 || tadā siddhimavāpnoti mantrakālapuraḥsaraḥ | evaṃ kriyā prakartavyā guptā guptatarā smṛtā || 21 || guptā guptarā pūjā prakarāt siddhināśinī | antaḥśāktā bahiḥśaivāḥ sabhāyāṃ vaiṣṇavā matāḥ || 22 || nānārūpadharāḥ kaulā vicaranti mahītale | evaṃ vidhānasambhūtaṃ śrutaṃ tantraṃ ca mohanam || 23 || kulajñānaṃ kulīnasya yoginīhṛdayaṃ śrutam | sammohanaṃ vīratantraṃ śrutaṃ śrītantramuttamam || 24 || kulārṇavastathā kālītantraṃ kālīvilāsakam | śrīkālīkalpalatikā śrutā paramamādarāt || 25 || matabhede ca guptā sā pūjā prakaṭanāśinī | antaḥśāktā bahiḥśāktāḥ kriyāśāktā varānane || 26 || bhaktiśāktāḥ kāmaśāktā dhyānaśāktā maheśvari | ratiśāktāḥ śaktiśāktāḥ sarvakarmasu nānyathā || 27 || antaḥśaivā bahiḥśivāḥ sabhāyāṃ vā gṛhe'thavā | vaiṣṇavāstādṛśā eva sarvakāleṣu śaṅkari || 28 || ityevaṃ paramo bhāvo gaditaḥ sarvayoniṣu | evaṃ bhāvaṃ samāśritya śāktāḥ paramapūjakāḥ || 29 || nityānandamayāḥ sarve trinetrāścandraśekharāḥ | sadā śaktivihāraṃ ca sadānandapariplutāḥ || 30 || sadānandaḥ sa vijñeyaḥ sarvakarmasu kauśalaḥ | kuladharmaṃ samāśritya ye vasanti mahītale || 31 || te śivāste śivā jīvā bhavanti kuladharmataḥ | kulīnaḥ śaṅkaro deva kulīnastu hariḥ svayam || 32 || kulīno vāsavo devaḥ kulīnastu pitāmahaḥ | kulīnā munayaḥ sarve kulīnāḥ pitaraḥ smṛtāḥ || 33 || kinnarāśca kulīnāśca narāśca paśujīvinaḥ | asurāśca kulīnāśca kulajā na kulīnakāḥ || 34 || ato na bhaktirno muktirasurāṇāṃ kadācana | rākṣasāśca kulīnāśca gandharvāpsarayakṣajāḥ || 35 || devībhaktiṃ samāsthāya kṛtārthaśca mahītale | vinā durgāparijñānād viphalaṃ pūjanaṃ japaḥ || 36 || tapaḥ kriyā viśuddhiḥ syādetat sarvamanarthakam | mūrkho vā paṇḍito vāpi brāhmaṇo vā varānane || 37 || kṣatriyo vaiśyajaḥ śūdraścāṇḍālo varavarṇini | sarve tulyāśca śāktāśca hyetat sarvārthasādhakam || 38 || śṛṇu devi varārohe mama vākyaṃ suniścitam | śṛṅgārarasalāvaṇyaṃ kovidaḥ sarvakarmasu || 39 || śṛṅgārājjāyate sṛṣṭiḥ śṛṅgārājjāyate ratiḥ | śṛṅgārācchaṅkarastuṣṭaḥ śṛṅgārādapi pārvati || 40 || santuṣṭā tvaṃ ca santuṣṭo hyahameva varānane | śṛṅgāraśabdaṃ lalitaṃ karkaśaṃ vā sureśvari || 41 || śṛṅgāraśabdamātreṇa janā yāsyanti sadgatim | striyo devyaḥ striyaḥ prāṇāḥ striya eva hi bhūṣaṇam || 42 || strīdveṣo naiva kartavyastāsu nindāṃ prahārakam | varjayed devadeveśi ghṛṇālajjāvivarjitaḥ || 43 || strīrūpaṃ tāriṇīrūpaṃ yo vetti dharaṇītale | sa strīpatiśca vijñeyaḥ sa eva pārvatīpatiḥ || 44 || kuje śanaiścare vāre gurau vā bhārgave tathā | tṛtīyāṃ vā dvitīyāṃ vā pūjayed bhaktibhāvataḥ || 45 || prathamo bhaktisampanno jano vāpi janārdanaḥ | ādyāṃ jyotirmayīṃ devīṃ caturthī vāpi śāṅkari || 46 || pūjayet pañcamīṃ vidyāṃ pañcamena vibhūṣitām | pañcānanapriyāṃ durgāṃ pūjayed bhaktibhāvataḥ || 47 || eṣā kriyā varārohe sāttvikī rājasī tathā | tāmasī caiva deveśi śrutā pūjā maheśvari || 48 || yā yā pūjā nigaditā sā sā pūjā tvayā śrutā | idānīṃ kuṇḍapuṣpeṇa golapuṣpeṇa śāṅkarī || 49 || cakrapuṣpeṇa śūlena vajrapuṣpeṇa pārvati | kālapuṣpeṇa deveśi pūjayeddharavallabhām || 50 || tadā siddhimavāpnoti satyaṃ satyaṃ na saṃśayaḥ | kulamārge rato jīvaḥ śiva eva na saṃśayaḥ || 51 || kuladharmārthago janturviharet kulamārgake | kulapuṣpaṃ samāśritya kulīnāśramamāśrayet || 52 || kalau matsyaṃ kalau māṃsaṃ madyaṃ mudrāṃ ca maithunam | yathā divyastathā vīro nāsti bhinnaḥ śucismiteḥ || 53 || bhakṣaṇāt pañcamasyāpi na doṣo jāyate nṛṇām | aśaktānāmakartavyaṃ sarvayonivivardhanam || 54 || madyapānamakartavyamakartavyaṃ kalau yuge | śāktānāṃ caiva śāktānāṃ kartavyaṃ sarvasiddhidam || 55 || mahāpīṭhāśrayaṃ vāpi mahāpīṭhasya darśanam | mahāpīṭhe yajed devīṃ bhaktyā paramayā yutaḥ || 56 || pūjayed raktapuṣpaiśca raktagandhānulepanaiḥ | bilvapatraistathā puṣpairmaṇipuṣpaiśca campakaiḥ || 57 || raktāmbujai raktamālyai raktābharaṇabūṣaṇaiḥ | mahiṣaiśca yajed devīṃ bheṣajaiḥ kṣatajairapi || 58 || chāgajailohitairdevīṃ gātrajairbrāhmaṇairapi | evaṃ vidhividhānena pūjanaṃ tava sundari || 59 || kartavyaṃ dvijalokeṣu gṛhyaṃ tava maheśvari | evaṃ tava vidhātavyā pūjā tribhuvaneśvari || 60 || tadā sidhīśvaro bhūtvā gāṇapatyaṃ labhet tu saḥ | na prakāśyaṃ paśoragre mama divyaṃ sureśvari || 61 || paśordarśanamātreṇa naśyanti vīraśuddhayaḥ | mahāsiddhikarī pūjā mānasī muktidāyinī || 62 || antaryāgātmikā sarvajīvatvaparināśinī | bāhyapūjā rājasī ca sarvasaubhāgyadāyinī || 63 || bhuktimuktipradā caiva sarvāpatparināśinī | sarvadoṣakṣayakarī sarvaśatruvināśinī || 64 || sarvarogakṣayakarī sarvabandhavimocanī | na vīrāṇāṃ paśūnāṃ ca bāhyapūjā'dhamādhamā || 65 || kevalānāṃ ca divyānāṃ ca bāhyapūjā'dhamā iti | toḍale yāmale devi śrutā pūjā ca vistarāt || 66 || tathāpi pūjā saṃkṣepād mayoktā girinandini | stutipāṭhād dṛḍhajñānāt pūjanācchivasundari || 67 || suprasannā mahāvidyā japāt siddhirbhaviṣyati | japād bhaktirjapād bhuktirjapānmuktirjapāt kriyā || 68 || japāt tantraṃ japānmantraṃ japād yantraṃ sureśvari | japāt kāntirjapāt śāntirjapāt śraddhā japād dayā || 69 || japāt tuṣṭirjapāt puṣṭirjapād gatirjapānmatiḥ | japād buddhirjapāllakṣmīrjapājjātirjapāt sthitiḥ || japācchāntirjapācchāntirjapācchāntirna saṃśayaḥ || 70 || || iti muṇḍamālātantre pārvatīśvarasaṃvāde pañcamaḥ paṭalaḥ || 5 || atha ṣaṣṭhaḥ paṭalaḥ devī uvāca purā śrutaṃ mahādeva śavasādhanameva ca | śmaśānasādhanaṃ nātha śrutaṃ paramamādarāt || 1 || na stotraṃ kavacaṃ nātha śrutaṃ na śavasādhane | kavacena mahādeva stotreṇaiva ca śaṅkara || kathaṃ siddhirbhaved deva kavacaṃ brūhi sāmpratam || 2 || śrīśiva uvāca śṛṇu devi varārohe durge paramasundari | siddhyarthe viniyogaśca kavacasya niyantraṇāt || 3 || siddhiṃ siddheśvarī pātu mastakaṃ pātu kālikā | kapālaṃ kāminī bhālaṃ pātu netraṃ nageśvarī || 4 || karṇau viśveśvarī pātu hṛdayaṃ jagadambike | kālī sadā pātu mukhaṃ jihvāṃ nīlasarasvatī || 5 || karau karālavadanā pātu nityaṃ sureśvarī | dantaṃ guhyaṃ nakhaṃ nābhiṃ pātu nityaṃ himātmajā || 6 || nārāyaṇī kapolaṃ ca gaṇḍā gaṇḍaṃ sadaiva tu | keśaṃ me bhadrakālī ca durgā pātu sureśvarī || 7 || pumān rakṣatu me caṇḍī dhanaṃ pātu dhaneśvarī | stanau viśvevarī pātu sarvāṅgaṃ jagadīśvarī || 8 || ugratārā sadā pātu mahānīlasarasvatī | pātu jihvāṃ mahāmāyā pṛṣṭhaṃ me jagadambikā || 9 || harapriyā pātu nityaṃ śmaśāne jagadīśvarī | śave pātu ca śarvāṇī sadā rakṣatu caṇḍikā || 10 || kātyāyanī kulaṃ pātu sadā ca śavavāhinī | ghoradaṃṣṭrā karālāsyā pārvatī pātu sarvadā || 11 || kamalā pātu rājyaṃ me mantraṃ mantreśvarī tathā | ityevaṃ kavacaṃ devi devānāmapi durlabham || 12 || yaḥ paṭhet satataṃ devi siddhimāpnoti niścitam | siddhikāle samutpanne kavacaṃ prapaṭhed yadi || 13 || ajñātvā kavacaṃ devi yaśca siddhimupakramaḥ | yaśca siddhimavāpnoti na muktirna ca sadgatiḥ || 14 || ata eva mahāmāye kavacaṃ siddhikārakam | devānāṃ ca narāṇāṃ ca kinnarāṇāṃ ca durlabham || 15 || paṭhitvā kavacaṃ caṇḍi śīghraṃ siddhimavāpnuyāt | mahotpāte mahāduḥkhe mahāvipadi saṅkaṭe || 16 || prapaṭhet kavacaṃ devi paṭhitvā mokṣamāpnuyāt | śūnyāgāre śmaśāne vā kāmarūpe mahāghaṭe || 17 || svavāmāmandire kāle'pyathavā kāmamandire | mantraṃ mantrī japed buddhyā bhaktyā paramayā yutaḥ || 18 || mūle dale phale vāpi nale kāle'nile male | jale paṭhet prāṇabuddhyā manasā sādhakottamaḥ || 19 || nāḍīśuddhiṃ tataḥ kṛtvā bhāva śuddhiṃ maheśvari | vihareddharimadhye ca sarvaśāstrārthakovidaḥ || 20 || citāmāruhya siddheśo nīlakaṇṭhatvamāpnuyāt | vāme calati kā nāḍī dakṣiṇe khalu jāhnavī || 21 || madhye kulācalā nāḍī durlabhā dharaṇītale | citriṇī padminī śaṅkhā vijṛmbhā śoṇadā tathā || 22 || kaṅkālā kūṭajā nāḍī kapolā golajā khalā | nijadehe vasantyetā brahmanāḍīṃ samāśritāḥ || 23 || sarvāsāṃ dharaṇīmadhye gaurī sūkṣmā ca tāriṇī | ghaṇṭākarṇā lolajihvā vikaṭā candravallabhā || 24 || mahānīlā vīrabhadrā sulajjā nakhadā śubhā | balākā kākinī rākā kālaghaṇṭā śivā sitā || 25 || dardurā ca durārādhyā viśokavadanā'naghā | jambhinī pukkasā śoṇā yaśodā makhadā khadā || 26 || khagā kharavatī nāḍī kolā helā halāhalā | iḍā ca piṅgalā caiva suṣumnā prāgarūpiṇī || 27 || gāndhārī koṭarākṣī ca kulajā kulapaṇḍitā | savye kanakhalā nāḍī dakṣiṇe kāmapālikā || 28 || vihāraṃ nīlakaṇṭhasya devānāmapi durlabham | kroḍe viśvambharā kāmā karālā meghavāhinī || 29 || ghanabhā ghanadā caṇḍī suśīlā varapaṇḍitā | viśvāraṇyā viśvavasanī bahupādā kaṭākṣajā || 30 || nandinī śoṇadā gaṅgā kāśī kamalavāsinī | evaṃ yadi mahāmāye bhāvayet surapūjitām || 31 || tadaiva jāyate siddhiḥ satyaṃ satyaṃ na saṃśayaḥ | bahupādakaṭā ghorā nirjitā ghanabhedinī || 32 || nāḍīvihārasamparkājjīvanmukto na saṃśayaḥ | śṛṇu deveśi ghorābhe karālabhe digambare || 33 || cintāmaṇiprasādena kiṃ na sidhyati bhūtale | mūle caturdale padme svādhiṣṭhāne ca ṣaḍdale || 34 || maṇipūre'nāhate ca ājñācakre maheśvari | evaṃ cakre parinyastairdaśadvādaśaṣoḍaśaiḥ || 35 || dalaistu maṅkuraṃ varṇaṃ nyastaṃ gāvaśataṃ matam | yatra kālīpuraṃ devi brahmādyairapi sevitam || 36 || nīlakaṇṭhaṃ trilokeśaṃ sahasrābjanivāsinam | koṭīśaṃ kulakoṭīśaṃ sādhakendraiḥ suśobhitam || 37 || dhyāyet paramanirviṇṇo devaḥ paramapāvanaḥ | jīvaḥ śivastu vijñeyo viśveśaḥ sarvadā ratiḥ || 38 || brahmatattvaṃ varārohe devānāmapi durlabham | svarādiniṣṭhitaṃ liṅgaṃ svaravyañjanabhūṣitam || 39 || varṇamālāparinyastaṃ liṅgaṃ bhuvanaśobhitam | mahābījaṃ mahotsāhairnāditaṃ paramātmakam || 40 || nīlakaṇṭhaṃ mahādevaṃ sadā śaktisamanvitam | dhyāyet tu pūjayed devaṃ manasā vacasā iti || 41 || tadaiva sādhako loke cāntaryāgaparāyaṇaḥ | antaryāgaṃ mahāmāye sādhakānāmagamyakam || 42 || brahmāṇḍaṃ vai śarīraṃ tu sarveṣāṃ prāṇadhāriṇām | brahmāṇḍe ye guṇāḥ santi te tiṣṭhanti kalevare || 43 || śarīraṃ tattvaghaṭitaṃ nānārasapariplutam | candrabindusamāyuktaṃ nādabinduvibhūṣitam || 44 || śarīraṃ śaṅkarasyāpi durlabhaṃ muktidāyakam | yāvanmuktirmahāmāye tāvadeva hi sādhakaḥ || 45 || tāvat kriyā ca bhuktiśca muktiravyabhicāriṇī | mahāghore samākleśe śarīraṃ brahmaṇaḥ padam || 46 || pāvitaṃ ca prasūnaṃ ca dehajaṃ sarvamaṅgajam | gṛhītvā kālikāṃ devīṃ muṇḍamālāvibhūṣitām || 47 || pūjayet parayā bhaktyā śiva eva na saṃśayaḥ | brahmāṇḍaghaṭitāṃ mūrtimaṅgadaiśca vibhūṣitām || 48 || caturbhūjāṃ lolajihvāṃ nānāśaktisamanvitām | pūjayet paramānando nijaśaktisamanvitaḥ || 49 || vāme svavāmāṃ deveśi nānālaṅkārabhūṣitām | kulacakrasya deveśi prajapet tu samaḥ śivaḥ || 50 || niśi cakre karālāsyāṃ muktakeśo digambaraḥ | sahasraṃ vā'yutaṃ vāpi japenmadanamandire || 51 || śvetaṃ vā lohitaṃ vāpi kusumaṃ pañcamānvitam | evaṃ vidhividhānena mahākālyai nivedayet || 52 || divā pūjā vidhātavyā niśi pūjā maheśvari | sandhyā pūjā prakartavyā tadā siddhimavāpnuyāt || 53 || na divā na niśābhāge na sandhyāyāṃ kadācana | pūjayenna jagaddhātrīṃ helāyāṃ paripūjayet || 54 || divā na pūjayed devīṃ rātrau naiva ca naiva ca | sarvadā pūjayed devīṃ divā ratrau vivarjayet || 55 || yathā iḍā piṅgalā ca suṣumnā brahmabhedinī | nāḍībhramaṇasamparkānmuktiṃ prāpnoti sādhakaḥ || 56 || vinā nāḍīparijñānaṃ vinā nāḍīniṣevaṇam | vinā viśvakaraṃ devi nahi sidhyati bhūtale || 57 || savye bilvaṃ kare dakṣe mālāṃ saṃgṛhya sādhakaḥ | prajapet pārvatīmantraṃ sarvakāryāya bhūtale || 58 || ghoradaṃṣṭrāṃ karālāsyāmaṭṭahāsāṃ digambarām | praṇamya bhaktyā deveśīṃ japeccintāmaṇiṃ manum || 59 || cintāmaṇiprasādena kiṃ na sidhyati bhūtale | cintāmaṇiṃ kalpalatāṃ gṛhītvā paramāṃ śivām || 60 || japtvā mahāmanuṃ caṇḍi devadeveśvaro bhavet | jīvaḥ śivatvaṃ labhate jñānasya varavarṇini || 61 || gurupādābjakaṃ devi rahasyaṃ paramādbhutam | vicitraṃ cārupādābjaṃ pārvatyāḥ śaṅkarasya ca || 62 || bhajedaikyaṃ vidhānena jīvanmuktaḥ sa eva hi | piṇḍe yuktāḥ pade yuktā rūpe yuktā varānane || guṇātītāśca ye bhaktāste muktā nātra saṃśayaḥ || 63 || śrīpārvatī uvāca na piṇḍaṃ na padaṃ rūpaṃ na jānāmi surottama | kathyatāṃ me dayāsindho niścitaṃ matamuttamam || 64 || śrīśiva uvāca guhyād guhyataraṃ devi sāramekaṃ vadāmyaham | piṇḍaṃ kuṇḍalinī śaktiḥ pado haṃsaḥ prakīrtitaḥ || 65 || rūpaṃ cāpi varārohe dhyānameva na saṃśayaḥ | mahākuṇḍalinīṃ devīṃ yo bhajet tu bhujaṅginīm || 66 || sa kṛtārthaḥ sa dhanyaśca sa devo vīrasattamaḥ | sa guṇī sādhakojñānī sa mānī sa ca paṇḍitaḥ || 67 || sa kṛto sarvabrahmāṇḍe devatvaṃ labhate dhruvam | ye divyāḥ sādhakendrāśca ye vīrāḥ sādhakottamāḥ || 68 || paśavaḥ paśvo jñeyāḥ sarvaśāstrārthakovidāḥ | bhāvaśuddhiṃ samāsthāya sarvakāryārthakovidaḥ || 69 || sādhako muktimāpnoti satyaṃ satyaṃ varānane | śṛṇu devi jagaddhātri sarvamaṅgalamaṅgalam || 70 || tantraṃ śṛṇuyād deveśi brahmanirvāṇamāpnuyāt | niśābhāge japenmantraṃ vāmāyukto maheśvari || 71 || ayutaṃ bhaktibhāvena jīvanmuktaḥ sa eva hi | sahasramayutaṃ vāpi kujavāre niśāmukhe || 72 || japeccintāmaṇiṃ mantraṃ kṣmātale nātra saṃśayaḥ | cintāmaṇiprasādena kiṃ na sidhyati bhūtale || 73 || yathāvidhi vidhānaṃ ca kṛtvā ca manmathālayam | vrajet tu bhaktibhāvena sa gacchet paramāṃ gatim || 74 || nabhogataṃ mahāpadmaṃ sarvadevasupūjitam | tanmadhyasthaṃ mahādevaṃ nīlakaṇṭhaṃ sadāśivam || 75 || yathā śaktiyutaṃ devi sarvānandamanoharam | śuklaṃ raktaṃ nīlavarṇaṃ pītādivarṇaśobhitam || 76 || manasā cintitaṃ devi devaṃ paramakāraṇam | dhyānaṃ ca manasā devi manasā paripūjitam || 77 || manasā pūjayelliṅgaṃ manasā tarpaṇādikam | manasā kālikāṃ tārāṃ manasā tu bhujaṅginīm || 78 || manasā brahmanāḍīṃ vai vidadhyāt sarvakāmadām | ityevaṃ dhyānayogena manasā jagadambikām || 79 || pūjayet parayā buddhyā sa viśveśo bhaved dhruvam | suṣumnāmadhyagāṃ kālīṃ karālavadanāṃ śivām || 80 || praṇamet pārvatīṃ devīṃ mahānīlasarasvatīm | ugratārākramaṃ vakṣye devānāmapi durlabham || 81 || trikoṇavalayāmbhoje mahānīlasarasvatīm | mayā budhasvarūpeṇa bhāvayet tāmaharniśam || 82 || hṛtpadme bhāvayet caṇḍīṃ hṛtpadme bhāvayecchivam | hṛtpadme bhāvamāsādya pūjayed varavarṇini || 83 || yāvannānātvabhāvaṃ ca tāvadevaṃ pṛthagvidham | tavāt kriyāḥ pṛthagbhāvāstāvannānāvidhā matāḥ || 84 || tāvad bhinnāśca devāśca brahmaviṣṇumaheśvarāḥ | gaṇeśaṃ ca dineśaṃ ca vahniṃ varuṇameva ca || 85 || kuberaṃ cāpi dikpālametat sarvaṃ pṛthak pṛthak | tāvannānāvidhāśceṣṭāḥ strīpuṃnapuṃsakātmakam || 86 || tāvad bilvadalaṃ bhinnaṃ deveśi tulasīdalāt | tāvajjavā droṇakṛṣṇā karavīrāṇi bhūtale || 87 || vibhinnāni ca deveśi satyaṃ vai tulasīdalāt | tāvad divyaśarīraśca tāvat tu paśubhāvakaḥ || 88 || tāvat tantre bhedabuddhistāvadeva pṛthak kriyā | harau hare bhedabuddhirjāyate jagadambike || 89 || karālavadanā kālī śrīmadekajaṭā śivā | ṣoḍaśī bhairavī bhinnā bhinnā ca bhuvaneśvarī || 90 || chinnā bhinnā'nnapūrṇā ca bhinnā ca bagalāmukhī | mātaṅgī kamalā bhinnā bhinnā vāṇī ca rādhikā || 91 || bhinnā ceṣṭā kriyā bhinnā bhinno vācārasaṃgrahaḥ | yāvannaikyaṃ pādapadme bhavānyā naiva jāyate || 92 || advaite tāriṇīpādapadme paramapāvane | jñānapāre samutpanne hṛtpadmanilayaṃ tathā || 93 || aikyaṃ bhavati cārvaṅgi sarvaṃ brahmamayātmakam | ----------------------------------------jīveṣu śāṅkari || 94 || na ca pāpaṃ na vā puṇyaṃ na yamo narakaṃ na ca | na sukhaṃ nāpi duḥkhaṃ ca na rogebhyo bhayaṃ tathā || 95 || na bhayaṃ nāpi śokaṃ ca sarvaṃ brahmamayātmakam | brāhmaṇī kṣatrīyā vaiśyā vaiśyajā śūdrajā'ntyajā || 96 || tathaiva tāriṇī vidyā yathā vidyā tathā tathā | evaṃ jñānaṃ maheśāni yathā vai jāyate priye || 97 || tathaiva vidyā deveśi vidyā'vidyāvirodhinī | jāyate nātra sandeho brahmānandamayo bhavet || 98 || advaitaṃ ca guṇātītaṃ nirguṇaṃ prakṛteḥ param | paramānandasaṃyukto muktiṃ yāsyati niścitam || 99 || iti satyaṃ punaḥ satyaṃ satyaṃ caṇḍi varānane | tattvajñānāt paraṃ nāsti nāsti devaḥ sadāśivāt || 100 || nāsti bhāvastu madhyasthād nāsti durgāsamaṃ padam | so'haṃ so'haṃ punaḥ so'haṃ so'hamityeva jāyate || 101 || tadeva cirakālena so'haṃ jñānaṃ prajāyate | nānātvabuddhiṃ kṛtvā vai sāttvikīṃ paramātmikām || 102 || gṛhītvā ca varārohe jāyate paramārthavit | jñānāt parataraṃ nāsti nāsti nāsti varānane || 103 || labdhvā hi tattvaṃ paramaṃ mucyate dehabandhanāt | kulavāre kulīnastu kuladharmaṃ kulavrataḥ || 104 || āśrayet paramānandaḥ paramānandameva ca | na kulīne parā buddhirna kulīnaparā gatiḥ || 105 || na kulīne parā bhaktirna kulīne parā kriyā | evaṃ vadati yo yastu sa muktiṃ na ca yāti vai || 106 || ihaiva svargo deveśi iha kailāsamandiram | ihaiva bhuktirbhaktiśca muktiravyabhicāriṇī || 107 || bhogaḥ svargaśca mokṣaśca karasthaścaiva śāṅkari | śāktānāṃ tripureśāni satyaṃ caṇḍi na saṃśayaḥ || 108 || śrīpārvatī uvāca nīlakaṇṭha mahādeva maheśvara jagadguro | pṛcchāmi paramaṃ tattvaṃ brūhi nātha jagatprabho || 109 || kathaṃ vā jāyate muktirbhuktirbhaktirmaheśvare | jīvaḥ śivatvaṃ labhate kena rūpeṇa śaṅkara || 110 || śrīśiva uvāca viśveśvari jagaddhātri mahāmāye maheśvari | guhyād guhyataraṃ vākyaṃ śṛṇuṣva naganandini || 111 || śāntaṃ dāntaṃ kulīnaṃ ca sarvaśāstrārthakovidam | evaṃ guhyaṃ maheśāni āśrayed bhaktibhāvataḥ || 112 || tataḥ prathamato labdhvā guruṃ paramakāraṇam | gṛhṇīyāt paramaṃ mantraṃ devyāśca varavarṇini || 113 || setuṃ ca kullukāṃ jñātvā mantrasaṅketakaṃ tathā | samayācārasaṅketaṃ jñānabhāvaṃ samabhyaset || 114 || pūjayet parayā bhaktyā pārvatīṃ paṭalakramāt | yathā guruvidhānena pūjayet paradevatām || 115 || caturbhūjāṃ daśabhujāṃ sahasrabhujasaṃyutām | lolajihvāṃ karālāsyāṃ muṇḍamālāvibhūṣitām || 116 || praṇamet prajaped dhyāyed devīṃ dravyaiḥ prapūjayet | javāparājitādroṇakaravīrairmanoharaiḥ || 117 || pūjayed raktakusumaiḥ sugandhaiścāruśobhanaiḥ | nānāpuṣpaiśca deveśi pūjayed bhaktibhāvataḥ || 118 || pādyārghyācamanīyādyairnānādravyairmanoharaiḥ | gandhaiḥ puṣpaiśca dhūpaiśca dīpairambarabhūṣaṇaiḥ || 119 || naivedyairvividhairdravyaistāmbūlaiścarvaṇotkaṭaiḥ | punarācamanīyaiśca pūjayejjagadambikām || 120 || evaṃ pūjā vidhātavyā yathāśaktyā varānane | pūjayitvā tu praṇamet pārvatīṃ tantrajaiḥ stavaiḥ || 121 || stotrasya kavacasyāpi paṭhanājjagadambikā | bhuktimuktipradā caṇḍī bhaktidā sarvamaṅgalā || 122 || bāhyapūjā prakartavyā guruvākyānusārataḥ | antaryāgātmikā pūjā bāhyapūjā maheśvari || 123 || sarvapūjā vidhātavyā yāvajjñānaṃ na jāyate | evaṃ viprapraṇāmena japena tapasā'pi vā || 124 || māheśī sā prasannā'bhūt stavena kavacena ca | tato devi maheśāni siddhividyā yadā bhavet || 125 || tadaiva pūjayā siddhiḥ kriyayā buddhiyuktayā | evaṃ devyanugrahato jñānamutpadyate khalu || 126 || tadā kālātyaye caṇḍi kriyābhaktiśca niṣphalā | kevalā preyasī muktirmahādevasya bhāvinī || 127 || śrīpārvatī uvāca śrutaṃ paramatantraṃ vai sārāt sāraṃ parāt param | yat śrutvā mokṣamāpnoti karmapāśanikṛntanāt || 128 || śrīśiva uvāca śṛṇu devi varārohe mamaiva niścitaṃ tava | durgā hi paramaṃ mantraṃ durgā hi paramo japaḥ || 129 || durgā hi paramaṃ tīrthaṃ durgā hi paramā kriyā | durgā hi paramā bhuktirdurgā muktirmahītale || 130 || buddhirnidrā kṣudhā chāyā śaktistṛṣṇā tathā kṣamā | kriyā sarvavariṣṭhā ca vaidikī tāntrikī ca yā || 131 || evaṃ sarvaṃ hi durgā hi durgābhinnaṃ na tajjapaḥ | bhajed durgāpadadvandvaṃ smared durgāmaharniśam || 132 || prajaped devi durgeti mantraṃ paramakāraṇam | ya evaṃ bhaktimāsthāya prakaroti kriyāṃ śive || 133 || sarvasiddhiyuto bhūtvā viharet kṣitimaṇḍale | nānātantre pṛthak ceṣṭā mayoktā girinandini || 134 || aikyaṃ jñānaṃ yadā devi tadā siddhimavāpnuyāt | sthāvare jaṅgame caiva yadā tulyamanā bhavet || 135 || kiṃ na sidhyati viśveśi paratreha ca pārvati | evaṃ bhuktiśca muktiśca bhaktiśca jagadambike || 136 || tava jñānaṃ tadaivānte tato nirvāṇamāpnuyāt || evaṃ vai kathitaṃ caṇḍi kiṃ bhūyaḥ śrotumicchasi || 137 || śrīpārvatī uvāca śrutaṃ paramatattvaṃ vai śrutaṃ paramamādarāt | śrutaṃ kālyāśca caritaṃ tārāyāśca śrutaṃ mayā || 138 || idānīṃ śrotumicchāmi mantrasiddhiḥ kathaṃ bhavet | vidyāsiddhiḥ kathaṃ deva tad vadasva dayānidhe || 139 || śrīśiva uvāca idānīṃ śṛṇu deveśi mantrasiddhestu kāraṇam | mantrārthaṃ mantracaitanyaṃ yāmale kathitaṃ mayā || 140 || ḍāmare ca śrutaṃ caṇḍi kuloḍḍīśe kulārṇave | saṃkṣepeṇa vadiṣyāmi mantrasiddhestu kāraṇam || 141 || kiṃ bahūktyā maheśāni gurubhaktyā ca sidhyati | kulavāre maheśāni sahasramayutaṃ japet || 142 || śanaiścare caturdaśyāmamāyāṃ kujavāsare | sthitvā kuśāsane jñānī mantrasiddhiparāyaṇaḥ || 143 || ayutaṃ bhaktibhāvena sahasraṃ vā varānane | antaryāgaṃ tataḥ kṛtvā sarvasiddhīśvaro bhavet || 144 || aśvatthe vaṭamūle vā nimbabilvamūle'thavā | pūjayet parayā buddhyā mantrasiddhiṃ jano labhet || 145 || viśveśvari mahāmāye sarvavighnavināśini | evaṃ māsatrayaṃ kuryādantaryāgena śudhyati || 146 || tadā siddhimavāpnoti satyaṃ satyaṃ na saṃśayaḥ | suṣumnāntaḥ sthitāṃ devīṃ padmakiñjalkavāsinīm || 147 || dhyāyennāḍīviśuddhena mantrasiddhiranuttamā | athavā śṛṇu cārvaṅgi kriyāhīnaṃ mataṃ mama || 148 || kevalaṃ dhyānamāsthāya mantrasiddhirbhaved dhruvam | kālikāṃ hṛdayāmbhoje dhyāyet paramadevatām || 149 || yogasiddhiṃ samāsthāya mantrasiddhirbhavennṛṇām | purā pṛcchāmi gaditā durlabhā yā mahītale || 150 || sā pṛcchā te nigaditā kiṃ na sidhyati bhūtale | śaktiyāmalake siddheśvaratantre kulācale || 151 || vidyāsiddhirnigaditā durlabhā dharaṇītale | kālī tārā mahāvidyā ṣoḍaśī bhuvaneśvarī || 152 || bhairavī chinnamastā ca vidyā dhūmāvatī tathā | bagalā siddhividyā ca mātaṅgī kamalātmikā || 153 || etā daśa mahāvidyāḥ siddhividyāḥ prakīrtitāḥ | eṣā vidyā prakathitā sarvatantreṣu gopitā || 154 || sarvasiddhipradā nityā nityānandamayī śivā | vidyāsiddhirmaheśāni bhaviṣyati yadā bhavet || 155 || aindravaṃ candravadane candratattvaṃ varānane | kuberatvaṃ śivatvaṃ vā viṣṇutvaṃ viśvagehinī || 156 || tatkṣaṇād devadevaśi jāyate nātra saṃśayaḥ | vidyāsiddheḥ prakaraṇaṃ pūrvoktaṃ tripureśvari || 157 || idānīṃ kathayāmyatra vidyāsiddhimanuttamām | śmaśāne'śvatthamūle vā śave vā śūnyamandire || 158 || prajapet kālikāṃ tārāṃ mahāvidyā prasīdati | japena tapasā stotrairantaryāgairmanoharaiḥ || 159 || pūjanaiḥ kavacairdevi mahāvidyā prasīdati | anenaiva vidhānena pūjanaṃ yaḥ karotyaho || 160 || suprasannā jagaddhātrī mahāmāyā prasidhyati | mantrasiddhermahāvidyā siddheḥ kāraṇamagrataḥ || kathitaṃ te jagaddhātri kiṃ bhūyaḥ śrotumicchasi || 161 || śrīpārvatī uvāca śrutaṃ siddheḥ kāraṇaṃ tu sarvasiddhikaraṃ param | yajjñātvā mokṣamāpnoti jīvaḥ paramakovidaḥ || 162 || nānātantraṃ śrutaṃ devadeva viśveśvara prabho | idānīṃ śrotumicchāmi nīlakaṇṭha sadāśiva || 163 || māhātmyaṃ kālikāyāśca tārāyāśca sureśvara | śrotumicchāmyahaṃ nātha yatastvaṃ kālikāpatiḥ || tārāpatistvaṃ deveśa vada śīghraṃ sadāśiva || 164 || śrīśiva uvāca dhanyāsi patibhaktāsi cārvaṅgi śṛṇu madvacaḥ | kālikāyāśca tārāyā māhātmyaṃ siddhidāyakam || 165 || yathā kālī tathā tārā ekadaiva hi bhinnatā | dakṣāṃśā caiva vāmāṃśā yathānukramasārataḥ || 166 || nahi kālisamā pūjā nahi kālīsamaṃ phalam | nahi kālīsamaṃ jñānaṃ nahi kālīsamaṃ tapaḥ || 167 || tasyaiva dhanyā jananī dhanyastasya pitāmahaḥ | dhanyaṃ kulaṃ yaśaścaṇḍi yena kālī samarcitā || 168 || kālī tārāsamā vidyācāre stutivicāraṇe | yantre mantre phalaṃ tulyaṃ na viśeṣaḥ kathañcana || 169 || ityevaṃ bhedabuddhyā tu kathitaṃ caritaṃ priye | abhedabuddhyā deveśi sarvāstulyā na saṃśayaḥ || 170 || śrīmadekajaṭā devī ugratārā sarasvatī | vyālānāṃ damane kṛṣṇarakṣaṇe yamunājale || 171 || papāta tāriṇī vidyā nīlavarṇā sarasvatī | devaiścaiva hi devendrairyogīndraiḥ sādhakottamaiḥ || 172 || sādhakairmunibhiḥ sarvairgandharvaiḥ kinnaraiḥ khagaiḥ | vidyādharairnartakaiśca nānā-ṛṣigaṇairapi || 173 || ārādhitā mahākālī mahānīlasarasvatī | vadanti sādhakāḥ sarve kālīṃ kālavināśinīm || 174 || nīlāṃ sarasvatīṃ vidyāmugratārāṃ manoharām | kālikāyāśca tārāyā māhātmyaṃ devadurlabham || 175 || kaḥ śaknoti mahīmadhye tasya māhātmyakovidaḥ | daśavidyā'ṣṭādaśadhā vidyārūpāṃ sureśvarīm || 176 || bhajate yaḥ sādhakendro bhavatyevaṃ sureśvari | ityevaṃ śṛṇu deveśi māhātmyaṃ bhuvi durlabham || 177 || yāsāṃ vijñānamātreṇa jīvanmuktaḥ prajāyate | yathā śivastathā jīvo jīvastu śiva eva hi || 178 || jāyate paramaṃ jñānaṃ bhāvajñānād varānane | aparaṃ śṛṇu cārvaṅgi sāvadhānā'vadhāraya || 179 || stotraṃ ca kavacaṃ devyāḥ kālikāyā maheśvari | tārāyā na śrutaṃ caṇḍi sarvamohanakāraṇam || 180 || ṣaṭkarmasiddhidaṃ mantraṃ stotraṃ kavacamuttamam | na prakāśyaṃ ca kutrāpi sarvasampatpradaṃ priye | idānīṃ kathayāmyatra jīvamohanakāraṇam || 181 || śrīpārvatī uvāca vada nātha jagatsvāmin prabho śrīkaṇṭha śaṅkara | mohanaṃ kavacaṃ nātha stotraṃ kavacameva hi || 182 || sarvavighnahvaraṃ devi sarvaśāntikaraṃ tathā | devānāmapi durjñeyaṃ vada nātha jagadguro || 183 || śrīśaṅkara uvāca namaste jagadīśānadayite haravallabhe | viśveśvari jagaddhātri trailokyamohanaṃ kuru || 184 || mantroddhāraṃ pravakṣyāmi sāvadhānā sureśvari | lāntaṃ vāntaṃ māntayuktaṃ svara ------------tmakaṃ priye || 185 || kāntaṃ śaktiyutaṃ devi jalayaṃ cāpi vā'nvitam | ṛṇagrajaṃ ṣāgrajaṃ kukayugāgrajameva hi || 186 || śaktiyuktaṃ mantrayajñaśeṣaṃ samudīrayet | ityevaṃ mantrarājaṃ ca yo japejjagadambike || 187 || trailokyamohano bhūtvā sarvasampallabhet tu saḥ | dhāraṇaṃ yugalaṃ phāntaṃ tāntaṃ bindudvitīyakam || 188 || vākvādinyamukaṃ me vaśamānaya vai phakī | mantraṃ cāyutamevaṃ ca sahasraṃ vā'yutaṃ niśi || 189 || tadaiva devīṃ devaṃ vā naraṃ vā vaśamānayet | iyaṃ vaśakarī vidyā sarvatantreṣu gopitā || 190 || pūjayed bhaktibhāvena praṇamed rājamohinīm | smṛtvā tu manasā devīṃ japenmantraṃ kuje dine || 191 || śanaiścaradine devi rātrau stotraṃ paṭhed yadi | acireṇaiva kālena sa bhaved rājavallabhaḥ || 192 || ghoradaṃṣṭre karālāsye matsyamāṃsabalipriye | namaste viśvajanani namaste viśvabhāvini || 193 || namaste jagadīśānadayite bhaktavatsale | namaste paramānandadāyini rājamohini || 194 || namaste'stu sādānande namaste śaṅkarapriye | namaste maṅgale tubhyaṃ sarvamaṅgalamaṅgale || 195 || viśvamātarjagaddhātri namaste tripureśvari | namaste brahmanamite namaste varade śive || 196 || meghaśyāme jagaddhātri karāle vikaṭe śubhe | harabhārye harārādhye namaste harapūjite || 197 || harīndra - brahma - candrādi - pañcānanasupūjite | namaste'stu mahāraudre mahāghore mahotsave || 198 || mahānande mahākāli mahākālaprapūjite | viśveśvari namaste'stu namaste bhuvaneśvari || 199 || kāmarūpe ca kāmākṣe kāmapuṣpavibhūṣite | sarvakāmaprade devi kāmamandiravandite || 200 || sarvakāmasvarūpe ca kāmadevaprapūjite | kāmeśvari kalānāthavadane kāmavallabhe || 201 || kriyāmārgarate kāme niṣṭhākāme kalātmike | namaste caṇḍike caṇḍe caṇḍamuṇḍavināśini || 202 || rājeśvari rame rāmapūjite rājavallabhe | rāmapriye ramarate balarāmaprapūjite || 203 || nabhaścchinnakarāle ca karāle caṇḍi pārvati | namaste saguṇe devi nirguṇe nirguṇātmike || 204 || jagaddhātri jaye devi vijaye haravallabhe | namaste śaṅkarānandadāyike śaṅkarapriye || 205 || namaḥ kṛṣṇe pītavarṇe śuklaraktasvarūpiṇi | mahānīle nīlavarge mahānīlasarasvati || 206 || vāgīśvari namaste'stu padme padmanivāsini | iti te kathitaṃ devi stotraṃ vai janamohanam || 207 || paṭhanāt stavarājasya kiṃ na sidhyati bhūtale | mande candrātmaje jīve niśābhāge niśāmukhe || 208 || prapaṭhet stavarājaṃ tu sarvasiddhīśvaro bhavet | brāhmaṇaḥ kṣatriyo vaiśyaḥ śūdro vā varavarṇini || 209 || stotraprapaṭhanād devi jagadvaśanayo bhavet | vaśīkaraṇametat tu stavarājaṃ manoharam || 210 || yaṃ yaṃ mantreṇa deveśi paramākarṣayatyaho | sa eva vaśatāṃ yāti devarājasamo yadi || ityevaṃ kathitaṃ stotramadhunā kavacaṃ śṛṇu || 211 || śrīśiva uvāca śṛṇu devi pravakṣyāmi aprakāśyaṃ mahītale | śrutvā paṭhitvā kavacaṃ śavasiddhimavāpnuyāt || 212 || pārvatī mastakaṃ pātu kapālaṃ jagadambikā | kapālaṃ cāpi gaṇḍaṃ ca durgā pātu maheśvarī || 213 || viśveśvarī sadā pātu vakṣomūlaṃ śivapriyā | nābhideśaṃ jagaddhātrī jagadānandavallabhā || 214 || hṛdayaṃ caṇḍikā pātu bāhū paramadevatā | keśāṃśca pañcamī vidyā sabhāyāṃ pātu bhairavī || 215 || nityānandā yaśaḥ pātu liṅgaṃ liṅgeśvarī mudā | bhavānī pātu me putraṃ patnīṃ me pātu dakṣajā || 216 || kāmākhyā dehasakalaṃ pātu nityaṃ nabhogatam | mahākuṇḍalinī nityaṃ pātu me jaṭharaṃ śivā || 217 || vahnijāyā sadā yajñe pātu karma svadhā punaḥ | araṇye vijane pātu durgā devī raṇe vane || 218 || jale pātu jaganmātā devī tribhuvaneśvarī | ityevaṃ kavacaṃ devi durjñeyaṃ rājamohane || 219 || kavacasyāpi paṭhanād rājarājeśvaro bhavet | yatra kutra dine stotraṃ kavacaṃ varavarṇini || 220 || paṭhitvā sarvasaubhāgyaṃ labhate nātra saṃśayaḥ | evaṃ nirantaraṃ stotraṃ kavacaṃ rājamohanam || 221 || japenmantraṃ kṣititale vaśyaṃ yāti mahīpatiḥ | pūjāyāḥ parayā bhaktyā kriyayā ca vinā śive || 222 || kevalaṃ japamātreṇa sidhyatyevaṃ na saṃśayaḥ | yā pṛcchā te nitaditā kathitā varavarṇini || idānīṃ devadeveśi kiṃ bhūyaḥ śrotumicchasi || 223 || || iti muṇḍamālātantre ṣaṣṭhaḥ paṭalaḥ || atha saptamaḥ paṭalaḥ śrīdevī uvāca | kathyatāṃ me dayāsindho jagadīśa jagadguro | jagatkartā jagatpātā jagaddhātā tvameva hi || 1 || triṣu lokeṣu viśveśa tvatto bhinnaḥ kadācana | nāsti kartā mahādeva kimetat kathayāmi te || 2 || goloke na ca kailāse na brahmamandire prabho | na vaikuṇṭhe na vā saure nakṣatre na śaśipure || 3 || vaktā kartā ca pātā ca hartā ca tripureśvara | pṛcchāmi paramaṃ tattvaṃ yoginīyogasādhanam || yoginīhṛdayāmbhoje yoginīhṛdaye tathā || 4 || śrīśiva uvāca seyaṃ gopyā ca deveśi brahmeti yāṃ viduḥ śive | paraṃ brahma paraṃ dhāma saccidānandamavyayam || 5 || yogīndrāṇāṃ jñānagamyamagamyaṃ manasā api | anyeṣāṃ ca varārohe jagaddhātri śṛṇu priye || 6 || sarveṣāṃ ca mayā jñānaṃ jñātaṃ tvayākhyamavyayam | nārīṇāṃ hṛdayāmbhojaṃ na ca veda kathañcana || 7 || śrīpārvatī uvāca satyaṃ ca kathitaṃ nātha satyameva vadāmyaham | abalānāṃ ca hṛdayaṃ mantrasādhyaṃ ca kathyatām || 8 || puruṣā naiva nānanti svabhāvāt tu vyatikramam | devadeva mahādeva saṃsārārṇavatārakam || 9 || jānāmi hṛdayaṃ puṃsāṃ kāṭhinyaṃ lolamānasam | ata eva mahādeva śīghraṃ vada sadāśiva || 10 || kena rūpeṇa sā durgā suprasannā mahītale | stavena kavacenā'pi jñānena jagadīśvarī | prasannā ca mahāvidyā bhavet paramakāraṇe || 11 || śrīśaṅkara uvāca śṛṇu devi mahādevi viśveśvari jaganmayi | yena rūpeṇa sā kālī tārā tripurasundarī || 12 || bhairavī caiva kamalā durgā ca bhuvaneśvarī | yā yā vidyā maheśāni kathitā bhuvaneśvarī || 13 || sā vidyā ca prasannā'bhūt kevalaṃ jñānamātrataḥ | vinā jñānānna vai dhyānaṃ na kriyā na ca sadgatiḥ || 14 || na ca bhuktirna vā muktirna bhuktirbuddhireva hi | śmaśānasiddhiśca na vā na ca siddhiḥ śavātmikā || 15 || na vijñānaṃ maheśāni na vā siddhiḥ prajāyate | jñāne yadā samutpatne sarvāḥ sidhyanti siddhayaḥ || 16 || jñāne jñāne maheśāni vikalṃ pūjanaṃ japaḥ | tapo bhaktiḥ kriyā stotraṃ kavacaṃ viphalaṃ priye || 17 || ata eva paraṃ tattvaṃ jñānaṃ paramasādhanam | yo jānāti jagaddhātri sa śivo nātra saṃśayaḥ || 18 || kaulikaṃ kaulikaṃ devi na tyajet tu kathañcan | parityāge varārohe sarvaṃ bhavati niṣphalam || 19 || evaṃ śaktividhānena śāktaḥ sarvavicāraṇāt | jīvanmuktaḥ sarvaloke jāyate nātra saṃśayaḥ || 20 || mantrārthaṃ mantracaitanyaṃ yonimudrāṃ na vetti yaḥ | na vetti kiñcid deveśi satyaṃ ca varavarṇini || 21 || saṅketaṃ gurusaṅketaṃ jīvasaṅketakaṃ tathā | divyānāṃ caiva vīrāṇāṃ paśūnāṃ varavarṇini || 22 || bhāvasaṅketakaṃ devi brahmasaṅketakaṃ tathā | samayācārasaṅketaṃ vīrasādhanamuttamam || 23 || śmaśānasādhanaṃ bhadre śavasādhanameva hi | evaṃ nānāvidhānaṃ ca mayoktaṃ yāmale priye || 24 || tadā siddhimavāpnoti yastantre khalu kovidaḥ | kathitaṃ ḍāmare nā'tha muktiryāmalake priye || 25 || nānātantre maheśāni kathitaṃ varavarṇini | durgāsevanamātreṇa vidhivākyānusārataḥ || 26 || muktiṃ yāti naraḥ satyaṃ labdhvā tattvaṃ manoharam | vinā tattvaparijñānāt na sukhaṃ na parāṃ gatim || 27 || labhate mānavaḥ satyaṃ deveśi jagadambike | kālī karālavadanā muṇḍamālāvibhūṣitā || 28 || kāmākhyā kāminī kāmyā karālāsyā digambarā | aṭṭahāsā ghoranādā meghaśyāmā bhayānakā || 29 || sarvabījasvarūpā sā mahābījasvarūpiṇī | sārddhapañcākṣarī vidyā vaśiṣṭhādiprapūjitā || 30 || siddhendraiścāpi yogīndrairmunīndrairapi sevitā | devendraiścāpi vīraindraiḥ sādhakendraiḥ prapūjitā || 31 || evaṃbhūtā mahāmāyā sarvatattvavibhāvinī | saṅketaṃ kālikāyāśca tārāyāśca śrutaṃ mayā || 32 || kālītantre bhairave ca śrutaṃ tantre ca yāmele | śrutaṃ na bhairavītantre bhairavyāścaritaṃ priye || 33 || bhuvanāyāśca vidyāyāścaritaṃ naiva sundari | idānīṃ cāpi saṃkṣepād vadiṣyāmi varānane || 34 || padmā triśaktirdhanadā vāṇī pūrṇā maheśvari | durgā bhagavatī devī bhuvanāyāḥ pratiṣṭhitāḥ || 35 || ekā devī jagaddhātrī nānārūpavidhāriṇī | tāṃ bhajet sādhakendraśca sarvajñādiprapūjitām || 36 || mahāmāyāṃ jagaddhātrīṃ sarvālaṅkārabhūṣitām | vāṇī māyā punarmāyā mahāmantrasvarūpiṇī || 37 || tataśca kevalā māyā sādhakairapi sevitā | pāśāditryakṣarī vidyā yamabhītivimardinī || 38 || sarvasampatpradā muktidāyinī muktivallabhā | mahāyogamayī vidyā sarvajñānamayī tataḥ || 39 || pūjitā sādhakaiḥ sarvaiḥ sarvālaṅkārabhūṣitā | evaṃ te kathitā devi devadevaiḥ prapūjitā || 40 || bhuvaneśī mahāvidyā devānāmapi durlabhā | yadi bhāgyavaśād devi caturthīṃ labhate naraḥ | caturvargamayo bhūtvā paraṃ brahmā'dhigacchati || 41 || śrīdevī uvāca dīnabandho dayāsindho prabho śaṅkara bho hara | śrotumicchāmi deveśa jñānadaḥ śaṅkaro yataḥ || 42 || devadeva mahādeva namastubhyaṃ sadāśiva | namastubhyaṃ namastubhyaṃ namastubhyaṃ maheśvara || 43 || viśveśvara jagadbandho nīlakaṇṭha namo'stu te | jñāneśa jñānadānandadāyaka jñānavarddhaka || 44 || jñānādhīśa jñānapate namaḥ kocavadhūpate | namaste paramānanda namaste bhaktavatsala || 45 || namaste pārvatīnātha gaṅgādhara namo'stu te | viśveśvara jagadbandho jagadīśa sadāśiva || 46 || namo'stu te mahādeva trilokeśa maheśvara | namaste yogatantrajña namaḥ kālīpate namaḥ || 47 || namastārāpate tubhyaṃ namaste bhairavīpate | vāṇīpate jagannātha namaste caṇḍikāpate || 48 || tava rūpatarorbījaphalarūpaṃ phalaprada | namaste sarvabījajña bījādhāra namo'stu te || 49 || umāpate namastubhyaṃ namastubhyaṃ trilocana | pañcānana namastubhyaṃ namaste śaśiśekhara || 50 || śambho maheśvara vibho virūpākṣa caturbhuja | namaste parvatā ---------caṇḍīpate namaḥ || 51 || trilokeśa dayāsindho karuṇāmaya śaṅkara | bhaktavatsala deveśa nīlakaṇṭha sadāśiva || 52 || namaḥ kāśīpate tubhyaṃ namaste candraśekhara | namaścaṇḍīpate tubhyaṃ śrīpate pārvatīpate || 53 || namaste jagadādhāra caturānana vatsala | namaḥ kriyāpate tubhyaṃ namaste muktida prabho || 54 || ahamevā'balā bālā kathaṃ jānāmi śaṅkara | nirguṇā saguṇaṃ jñātuṃ na samarthā kathañcana || 55 || śrīśiva uvāca nirguṇā prakṛtiḥ satyā ahameva ca nirguṇaḥ | sadaiva saguṇā tvaṃ hi saguṇo'haṃ sadāśivaḥ || 56 || satyaṃ ca nirguṇā devī satyaṃ satyaṃ hi nirguṇaḥ | upāsakānāṃ siddhyarthaṃ saguṇā saguṇo mataḥ || 57 || nānātantramataṃ devī nānāyatnāt prakāśitam | brahmasvarūpaṃ vijñātuṃ kaḥ samartho mahītale || 58 || nānāmārge vidhāvanti paśavo hatabuddhayaḥ | śrīdurgācaraṇāmbhojaṃ hitvā yānti rasātalam || 59 || satyaṃ vacmi dṛḍhaṃ vacmi hitaṃ pathyaṃ punaḥ punaḥ | na muktiśca na muktiśca vinā durgāniṣevaṇāt || 60 || devi durgā paraṃ brahma śrutaṃ kālī śrutaṃ tvayā | tārāśrutau śrutaṃ devi śrutaṃ brahmavareṇa ca || 61 || brahmā viṣṇuśca rudraśca vāmanaśca divaukasaḥ | tatpādasevanād devi vayaṃ vai sādhakottamāḥ || 62 || na deveśo gaṇapatirno brahmā no haro hariḥ | harirharirahaṃ devi sarve pādābjabhāvukāḥ || 63 || tvatprasādānmaheśāni brahmā sṛṣṭiṃ karotyasau | tvatprasādāt hariḥ pātā haro hartā mahītale || 64 || vāsavaścā'marādhīśo-----------------rūpāḥ smṛtāḥ | te sarve nirjarā devi tvatprasādānmahītale || 65 || tvatpādapadmasamparkād devadevo'pi śaṅkaraḥ | atastvaṃ jagadīśānadayite bhaktavatsale || 66 || dṛṣṭiṃ kuru mahāmāye namastasyai namo namaḥ | tvaṃ ca kālī tvaṃ ca tārā ṣoḍaśī tvaṃ varānane || 67 || tvaṃ devi bhuvanā bālā chinnā dhūmā maheśvari | tvaṃ devi bagalā bhīmā kamalā tvaṃ maheśvari || 68 || mātaṅgī tvannapūrṇā tvaṃ dhanadā tvaṃ śivapriye | durgā tvaṃ viśvajananī daśā'ṣṭādaśarūpiṇī || 69 || saptakoṭimahāvidyā upavidyāsvarūpiṇī | kumārī ramaṇīrūpā surūpā naganandinī || 70 || śivapūjyā śivārādhyā brahmapūjyā sureśvarī | śivo bhinnaḥ śivā bhinnā na jīve vāmalocanā | iti jānāmi viśveśi satyaṃ satyaṃ na saṃśayaḥ || 71 || śrīpārvatī uvāca satyaṃ me kathitaṃ nātha satyarūpo'si śaṅkara | ahaṃ ca triṣu lokeṣu pārvatīśvara śaṅkara || viśeṣaṃ devadeveśa sarvajña kathayasva me || 72 || śrīśiva uvāca viśeṣaṃ na ca jānāmi kathayasva varānane | sarvajñā'si maheśāni yataḥ sarvajñavallabhā || 73 || śrīpārvatī uvāca goloke caiva rādhā'haṃ vaikuṇṭhe kamalātmikā | brahmaloke ca sāvitrī bhāratī vāksvarūpiṇī || 74 || kailāse pārvatī devī mithilāyāṃ ca jānakī | dvārakāyāṃ rukmiṇī ca draupadī ca gajāhvaye || 75 || gāyatrī vedajananī sandhyā'haṃ ca dvijanmanām | yogamadhye'pyuṣā'haṃ ca puṣpe kṛṣṇā'parājitā || 76 || patre mālūrapatrā'haṃ pīṭhe yonisvarūpiṇī | hariharātmikā vidyā brahmaviṣṇuśivārcitā || 77 || viśeṣānugraheṇaiva vijñeyā śaṅkara prabho | yatra kutra sthale nātha śāktastiṣṭhati gacchati || 78 || tatraivā'haṃ mahādeva niścitaṃ matamuttamam | śaktimārgaṃ parityajya yo'nyamārgaṃ vidhāvati || 79 || karasthaṃ sa maṇiṃ tyaktvā bhūtibhāvaṃ vidhāvati | ityevaṃ ca mahādeva mayoktaṃ jagadīśvara || ataḥ parataraṃ nāsti nāsti nāsti sadāśiva || 80 || || iti muṇḍamālātante saptamaḥ paṭalaḥ || 7 || atha aṣṭamaḥ paṭalaḥ śrīdevī uvāca namaste pārvatīnātha viśvanātha dayāmaya | jñānāt parataraṃ nāsti śrutaṃ viśveśvara prabho || 1 || dīnanātha dayāsindho viśveśvara jagatpate | idānīṃ śrotumicchāmi gopyaṃ paramakāraṇam | rahasyaṃ kālikāyāśca tārāyāśca surottama || 2 || śrīśiva uvāca rahasyaṃ kiṃ vadiṣyāmi pañcavaktrairmaheśvari | jihvākoṭisahasraistu vaktrakoṭiśatairapi || 3 || tathāpi tasya māhātmyaṃ na śaknomi kathañcana | tasyā rahasyaṃ gopyaṃ ca kiṃ na jānāmi śāṅkari || 4 || svasyaivaṃ caritaṃ vaktuṃ svayameva kṣamo bhavet | anyathā naiva deveśi na jānāti kathañcana || 5 || kālikāyāḥ śataṃ nāma nānātantre tvayā śrutam | rahasyaṃ gopanīyaṃ ca tantre'smin jagadambike || 6 || karālavadanā kālī kāminī kamalā kalā | kriyāvatī koṭarākṣī kāmākhyā kāmasundarī || 7 || kāpālā ca karālā ca kāśī kātyāyanī kuhūḥ | kaṅkālā kāladamanā karuṇā kamalārcitā || 8 || kādambarī kalaharā kautukī kāraṇapriyā | kṛṣṇā kṛṣṇapriyā kṛṣṇapūjitā kṛṣṇavallabhā || 9 || kṛṣṇāparājitā kṛṣṇapriyā ca kṛṣṇarūpiṇī | kālikā kālarātriśca kulajā kulapaṇḍitā || 10 || kuladharmapriyā kāmā kāmyakarmavibhūṣitā | kulapriyā kularatā kulīnaparipūjitā || 11 || kulajñā kamalā pūjyā kailāsagaṇabhūṣitā | kaṭajā keśinī kāmā kāmadā kāmapaṇḍitā || 12 || karālāsyā ca kandarpā kāminīrūpaśobhitā | kolambakā kolaratā kelinī keśabhūṣitā ||13 || keśavasya priyā kāśā kāśmīrā keśavārcitā | kāmeśvarī kāmarūpā kāmadānavibhūṣitā || 14 || kālahantrī kūrmamāṃsapriyā kūrmādipūjitā | kelinī karakā kārā karakarmaniṣeviṇī || 15 || kaṭakeśavamadhyasthā kaṭakīṭakarārcitā | kaṭapriyā kaṭaratā kaṭakarmaniṣeviṇī || 16 || kumārīpūjanaratā kumārīgaṇasevitā | kulajā ca priyā kaulapriyā kulaniṣeviṇī || 17 || kulīnā kuladharmajñā kulabhītivimardinī | kāmadharmapriyā kāmyā nityakarmasvarūpiṇī || 18 || kāmarūpā kāmaharā kāmamandirapūjitā | kāmāgārasvarūpā ca kālākhyā kālabhūṣitā || 19 || kriyābhaktiratā kālyā kāñcanī kāmādāyinī | kolapuṣpāmbarā kolā nikolā kolahantakā || 20 || koṣikī ketakī kumbhī kuntalādivibhūṣitā | ityevaṃ śṛṇu cārvaṅgi rahasyaṃ sarvamaṅgalam || 21 || yaḥ paṭhet parayā bhaktyā sa śivo nātra saṃśayaḥ | śatanāmaprasādena kiṃ na sidhyati bhūtale || 22 || brahmā viṣṇuśca rudraśca vāsavādyā divaukasaḥ | rahasyapaṭhanād devi sarve ca vigatajvarāḥ || 23 || triṣu lokeṣu viśveśi satyaṃ gopyamataḥ param | nāsti nāsti mahāmāye tantramadhye kathañcana || 24 || kriyayā ca vinā devi vinā bhaktyā maheśvari | prasannāsyā karālāsyā stavapāṭhād digambari || 25 || satyaṃ vacmi maheśāni ataḥ parataraṃ nahi | na gokule na vaikuṇṭhe na ca kailāsamandire || 26 || ataḥ paratarā vidyā stotraṃ kavacameva ca | trilokeṣu jagaddhātri nāsti nāsti kadācana || 27 || rātrāvapi divābhāge niśābhāge sureśvari | prajaṣed bhaktibhāvena rahasyaṃ stavamuttamam || 28 || śatanāmaprasādena mantrasiddhiḥ prajāyate | kujavāre caturdaśyāṃ niśābhāge japet tu yaḥ || 29 || sa kṛtī sarvaśāstrajñaḥ sa kulīnaḥ sadā śuciḥ | sa kulajñaḥ sa kālajñaḥ sa dharmajño mahītale || 30 || rahasyapaṭhanāt koṭipuraścaraṇajaṃ phalam | prāpnoti devadeveśi satyaṃ paramasundari || 31 || stavapāṭhād varārohe kiṃ na sidhyati bhūtale | aṇimādyaṣṭasiddhiḥ syād bhavatyeva na saṃśayaḥ || 32 || rātrau bilvatale'śvatthamūle'parājitātale | prapaṭhet kālikāstotraṃ yathāśakti maheśvari || 33 || śatavāraprapaṭhanānmantrasiddhirbhaved dhruvam | upāyo nāsti deveśi mahāmantrasya sādhane || 24 || ataḥ parataraṃ devi nāsi brahmāṇḍamaṇḍale | nānātantraṃ śrutaṃ devi mama vaktrāt sureśvari || 35 || muṇḍamālāmahātantraṃ mahāmantrasya sādhanam | bhaktyā bhagavatīṃ durgāṃ duḥkhadāridryanāśinīm || 36 || saṃsmaret prajaped dhyāyet sa mukto nātra saṃśayaḥ | jīvanmuktaḥ sa vijñeyastantrabhaktiparāyaṇaḥ || 37 || yaḥ sādhako mahājñānī yaśca durgāsadānugaḥ | na ca bhaktirna vā muktirna muktirnaganandini || 38 || vinā durgāṃ jagaddhātri niṣphalaṃ jīvanaṃ bhavet | śaktimārgarato bhūyo yo'nyamārge pradhāvati || 39 || na ca śāktāstasya vaktuṃ pāraṃ paśyanti sundari | vinā durgāṃ jagaddhātri vāgjāle śāstramohitāḥ || 40 || anyadevaṃ bhajantyete cānye śāstre vighūrṇitāḥ | vinā tantrād vinā mantrād vinā yantrānmaheśvari || 41 || na ca bhaktiśca muktiśca jāyate varavarṇini | tantravaktāguruḥ sākṣād yathā ca jñānadaḥ śivaḥ || 42 || yathā gururmaheśāni tathā ca paramo guruḥ | yathā parāparaguruḥ parameṣṭhiryathā guruḥ || 43 || tathā caiva hi tantrajñastantravaktā guruḥ svayam | tantraṃ ca tantravaktāraṃ nindanti tāntrikīṃ kriyām || 44 || ye janā bhairavāsteṣāṃ māṃsāsthicarvaṇodyatāḥ | ata eva hi tantrajñaṃ na nindanti kadācana || na hasanti na hiṃsanti na vadanti kadācana || 45 || śrīpārvatī uvāca śṛṇu deva jagadvandya madvākyaṃ dṛḍhaniścitam | tava prasādād deveśa śrutaṃ kālīrahasyakam || idānīṃ śrotumicchāmi tārāyā vada sāmpratam || 46 || śrīśiva uvāca dhanyāsi devadeveśi durge durgārtināśini | yaṃ śrutvā mokṣamāpnoti paṭhitvā naganandini || 47 || tāriṇī taralā tanvī tārā taraṇavallarī | tīrarūpā taṭaśyāmā tanukṣīṇapayodharā || 48 || tuvīrā taralā tīvrā nayanā nīlavāhinī | ugratārā jayā caṇḍī śrīmadekajaṭā śivā || 49 || taruṇā śāmbhavī cchinnā bhāgā ca bhadratāriṇī | ugratārā jayā caṇḍī śrīmadekajaṭā śivā || 49 || taruṇā śāmbhavī cchinnā bhāgā ca bhadratāriṇī | ugrā ugraprabhā nīlā kṛṣṇā nīlasarasvatī || 50 || dvitīyā śobhinī nityā navīnā nityanūtanā | caṇḍikā vijayā''rādhyā devī gaganavāhinī || 51 || aṭṭahāsyā karālāsyā caturāsyādipūjitā | saguṇā saguṇārādhyā harīndradevapūjitā || 52 || raktapriyā ca raktākṣī rudhirā sarvabhūṣitā | bālapriyā bālaratā durgā balavatī balā || 53 || balapriyā balaratā balarāmaprapūjitā | arddhakeśeśvarī keśā keśaveśavibhūṣitā || 54 || padmamālā ca padmākhyā kāmākhyā girinandini | dakṣiṇā caiva dakṣā ca dakṣajā dakṣiṇe ratā || 55 || vajrapuṣpapriyā raktapriyā kusumabhūṣitā | māheśvarī mahādevapriyā pañcavibhuṣitā || 56 || iḍā ca piṅgalā caiva suṣumnā prāṇarūpiṇī | gāndhārī pañcamī pañcānanādiparipūjitā || 57 || ityetat kathitaṃ devi rahasyaṃ paramātmakam | śrutvā mokṣamavāpnoti tārādevyāḥ prasādaḥ || 58 || ya idaṃ prapaṭhet stotraṃ tārāyāstu rahasyakam | sarvasiddhīśvaro bhūtvā viharet kṣitimaṇḍale || 59 || tasyaiva mantraḥ siddhaḥ syāmantrasiddhiranuttamā | bhavatyevaṃ mahāmāye satyaṃ satyaṃ na saṃśayaḥ || 60 || mande maṅgalavāre ca yaḥ paṭhenniśi saṃyataḥ | tasyaiva mantrasiddhiḥ syād gāṇapatyaṃ labhet tu saḥ || 61 || śraddhayā'śraddhayā vāpi paṭhet tārārahasyakam | so'cireṇaiva kālena jīvanmuktaḥ śivo bhavet || 62 || sahasrāvartanād devi puraścaryāphalaṃ labhet | evaṃ satatayuktāste dhyāyantastāmupāsate || 63 || te kṛtārthā maheśāni mṛtyusaṃsārabandhanāt | rahasyaṃ tāriṇīdevyāḥ kālikāyāḥ śrutaṃ tvayā || 64 || sāraṃ paramagopyaṃ ca śivadhyeyaṃ śivapradam | idānīṃ ca varārohe bhūyaḥ kiṃ śrotumicchasi || 65 || iti muṇḍamālātantre kālītārārahasyeṣṭamaḥ paṭalaḥ || 8 || atha navamaḥ paṭalaḥ rahasyaṃ pārvatīnāthavaktrāt śrutvā ca pārvatī | mahādevaṃ maheśānamīśamāha maheśvarī || 1 || śrīpārvatī uvāca trilokeśa jagannātha devadeva sadāśiva | tvatprasādānmahādeva śrutaṃ tantraṃ pṛthagvidham || 2 || idānīṃ vartate śraddhā''gamaśāstre mamaiva hi | yadi prasanno bhagavān brūhyupāyaṃ mahodayam || 3 || nānātantre mahādeva śrutaṃ nānāvidhaṃ matam | kṛtārthāsmi kṛtārthāsmi kṛtakārthāsmi śaṅkara || 4 || prasanne śaṅkare nātha kiṃ bhayaṃ jagatītale | vinā śivaprasādena na sidhyati kadācana || idānīṃ śrotumicchāmi bhuvanāyā rahasyakam || 5 || śrīśaṅkara uvāca śṛṇu devi pravakṣyāmi guhyād guhyataraṃ param | ṣaṭhitvā parameśāni mantrasiddhimavāpnuyāt || 6 || ādyā śrībhuvanā bhavyā bhavabandhavimocinī | nārāyaṇī jagaddhātrī śivā viśveśvarī parā || 7 || gāndhārī paramā vidyā jaganmohanakāriṇī | sureśvarī jaganmātā viśvamohanakāriṇī || 8 || bhuvaneśī mahāmāyā deveśī haravallabhā | karālā vikaṭākārā mahābījasvarūpiṇī || 9 || tripureśī trilokeśī durgā tribhuvaneśvarī | nityā ca nirmalā devī sarvamaṅgalakāriṇī || 10 || sadāśivapriyā gaurī sarvamaṅgalaśobhanī | śivadā sarvasaubhāgyadāyinī maṅgalātmikā || 11 || ghoradaṃṣṭrā karālāsyā madhumāṃsabalipriyā | sarvaduḥkhaharā caṇḍī sarvamaṅgalakāriṇī || 12 || pārvatī tāriṇī devī bhīmā bhayavināśinī | trailokyajananī tārā tāriṇī taruṇākṣamā || 13 || bhuktimuktipradā bhaktisadāśaṅkaravallabhā | umā gaurī priyā sādhvī priyā ca vāruṇapriyā || 14 || bhairavī bhairavānandadāyinī bhairavātmikā | brahmapūjyā ca brahmāṇī rudrāṇī rudrapūjitā || 15 || rudreśvarī rudrarūpā tripuṭā tripurā matā | bhavānī ca bhavānandadāyinī bhavagehinī || 16 || surapūjyeśvarī caṇḍī pracaṇḍā ghoranādinī | ghanaśyāmā ghanavatī mahāghananinādinī || 17 || ghorajihvā lalajjihvā vaideśī naganandinī | trailokyamohinī viśvamohinī viśvarūpiṇī || 18 || ṣoḍaśī tripurā brahmadāyinī brahmadā'naghā | ityetat paramaṃ brahmastotraṃ paramakāraṇam || 19 || yaḥ paṭhet parayā bhaktyā jīvanmuktaḥ sa eva hi | brahmādyā devatāḥ sarvā munayastantrakovidāḥ || 20 || paṭhitvā parayā bhaktyā brahmasiddhimavāpnuyuḥ | mantrasaṅketamajñātvā vidyāsaṅketakaṃ tathā || 21 || vīrasaṅketakaṃ devi saṅketaṃ bahuvistaram | -----------------yonimudrātmakaṃ priye || 22 || saṅketaṃ samayācāraṃ kulasaṅketakaṃ tathā | brahmasaṅketakaṃ caṇḍi kālasaṅketakaṃ tathā || 23 || yantrasaṅketakaṃ siddhisaṅketakaṃ bahuvistaram | kulārṇave śrutaṃ nātha śrutaṃ me mohane prabho || 24 || śrīśaṅkra uvāca vidyānāmuttamā vidyā mahāvidyā prakīrtitā | yāsāṃ smaraṇamātreṇa mantrasiddhiḥ prajāyate || 25 || mantrasaṅketamajñātvā yo yajed viśvamohinīm | śatavarṣajapenāpi tasya siddhirna jāyate || 26 || vidyādyā ca dvitīyā ṣoḍaśī bhuvaneśvarī | bhairavījñānamātreṇa siddhividyā bhavanti hi || 27 || iḍāpiṅgalayormadhye durgamā viśvamohinī | tasyāḥ prabhedasaṃskāraṃ yo jānāti sa paṇḍitaḥ || 28 || sa dhanyaḥ sa kṛtī loke sa vīraḥ sarvaśaḥ śuciḥ | sa bhairavaśca vijñeyaḥ sadā sukhavivarddhakaḥ || 29 || evaṃ karālavadanāṃ muṇḍamālāvibhūṣitām | yo jānāti jagaddhātrīṃ jīvanmuktaḥ sa eva hi || 30 || viśeṣaṃ ca pravakṣyāmi kulabhaktyā ca sidhyati | kulabhaktiṃ vinā devi na bhaktirna ca sadgatiḥ || 31 || satye tu sundarī ādyā tretāyāṃ bhuvaneśvarī | dvāpare tāriṇī vidyā kalau kālī prakīrtitā || 32 || nāmabhedaṃ pravakṣyāmi kalpabhedaṃ varānane | na bhedaḥ kālikāyāśca tārāyā jagadambike || 33 || ṣoḍaśyā bhuvanāyāśca bhairavyāstripureśvari | chinnāyāścaiva dhūmāyā bhīmāyāḥ parameśvari || 34 || tataśca bagalāmukhyā mātaṅgyāśca sureśvari | naca bhedo maheśāni vidyāyā varavarṇini || 35 || śrīpārvatī uvāca viśvanātha mahādeva maheśvara jagadguro | pṛcchāmyekaṃ mahābhāga yogendra vṛṣabhadhvaja || 36 || kṛṣṇāyāḥ karavīrasya droṇasya tu sadāśiva | bilvapatrasya māhātmyam japāyā vada śaṅkara || 37 || śrīśiva uvāca dhanyā'si patibhaktā'si prāṇatulyā'si śāṅkari | atigopyaṃ jagaddhātri devānāmatidurlabham || 38 || kṛṣṇā'parājitā sākṣāt bhadrakālī na saṃśayaḥ | karavīraṃ ca bhuvanā droṇaṃ tripurasundarī || 39 || japā sākṣād bhagavatī sarvavidyāsvarūpiṇī | ye sādhakā jaganmātararcayanti śivapriyām || 40 || etaiśca kusumaiścaṇḍīṃ te śivā nātra saṃśayaḥ | kiṃ japaiḥ kiṃ tapobhirvā kiṃ dānaiḥ kiṃ trimadhvakaiḥ || 41 || yenā'rcitā jagaddhātrī droṇakṛṣṇā japādibhiḥ | rājasūyāśca medhādyairvājapeyā'gnihomakaiḥ || 42 || phalaṃ yajjāyate caṇḍi tat sarvaṃ kusumārcanāt | japāṃ droṇaṃ tathā kṛṣṇaṃ mandaraṃ karavīrajam || 43 || sākṣād brahmasvarūpaṃ ca mahādevyai nivedayet | śvetacandanasaṃyuktaṃ raktacandanalepitam || 44 || yo dadyād bhaktibhāvena sa viśveśo na saṃśayaḥ | mahāghore mahotpāte mahāvipadi saṅkaṭe || 45 || mahāduḥkhe mahāroge mahāśoke mahābhaye | pūjayet kālikāṃ tārāṃ bhuvanāṃ ṣoḍaśīṃ śivām || 46 || bālāṃ chinnāṃ ca bagalāṃ dhūmāṃ bhīmāṃ karālinīm | kamalāmannapūrṇāṃ ca durgāṃ duḥkhavināśinīm || 47 || sarvavidyājapādroṇakaravīrairmanoharaiḥ | mālūrapatraiḥ kṛṣṇābhiḥ kṛṣṇaṃ sampūjya bhūtale || 48 || sādhakendro maheśāni sa bhavennātra saṃśayaḥ | lakṣāṇāṃ mahiṣairmeṣairajairdānaiḥ kharaiḥ śubhaiḥ || 49 || pūjitā sā jagaddhātrī yadyeṣā kusumārcitā | māhātmyaṃ cāpi kṛṣṇāyāḥ kṛṣṇā jānāti bhūtale || 50 || tadarddhaṃ cā'pyahaṃ devi tadarddhaṃ śrīpatiḥ sadā | tadarddhamabjajanmā vai tadarddhaṃ vedasādhakaḥ || 51 || asya puṣpasya māhātmyaṃ saṅkṣepād vacmi śāṅkari | pṛthivyāmatale svarge vaikuṇṭhe kālikāpure || 52 || japādikaravīraiśca dānaiḥ kiṃ kiṃ phalaṃ labhet | na jānāmi jagaddhātri ko veda pārvatīṃ vinā || 53 || karavīraiḥ śvetaraktai raktacandanamiśritaiḥ | pūjayet kṣmātale yastu sa viśveśo bhaved dhruvam || 54 || kṛṣṇāparājitāpuṣpairyastu devīṃ prapūjayet | so'śvamedhasahasrāṇāṃ phalaṃ prāpya śivo yajet || 55 || bilvapatrasya māhātmyaṃ devānāmapi durlabham | yo dadyād bilvapatraṃ ca śivāyai śaṅkarāya ca || 56 || sadāśivasamo bhūtvā sa gacched brahmamandiram | mahāvipattau deveśi japāṃ kṛṣṇāparājitām || 57 || droṇaṃ vā karavīraṃ vā sa gacchet kālikāpuram | kiṃ ca pādyaiḥ kiṃ ca vādyairnaivedyaiḥ kiṃ ca pūjanaiḥ || 58 || madhudānairmadhuparkaiḥ kumbhakaiḥ kiṃ ca recakaiḥ | pūrakaiḥ kiṃ ca vā dhyānaiḥ prāṇāyāmaiśca kiṃ ca vā || 59 || kiṃ japaiḥ kiṃ tapobhirvā matsyairmāṃsaiśca pañcamaiḥ | kimanyamantraiḥ kiṃ tantraiḥ kiṃ yantraiḥ kiṃ ca sādhanaiḥ || 60 || kiṃ ca vai vāsavaiḥ kiṃ vā śmaśānairmantrasādhanaiḥ | kimadhvarairmantrapūtaimantrārthairmantrajīvanaiḥ || 61 || kiṃ yonimudrayā kiṃ vā tīrthaiḥ kiṃ brahmasādhanaiḥ | kiṃ mātṛkānyāsavargaiḥ kiṃ kacchaiḥ kiṃ ghaṭaiḥ paṭaiḥ || 62 || kiṃ kākacañcubhiḥ ṣoḍhānyāsaiḥ kiṃ karmasādhanaiḥ | yenārcitā bhagavatī karavīrairjapādibhiḥ || 63 || kṛṣṇāparājitāpuṣpaiḥ karavīrairmanoharaiḥ | droṇaistu ketakīpuṣpairjapāmālūrapatrakaiḥ || 64 || pūjitā yairbhagavatī teṣāṃ kiṃ karmasādhanaiḥ | ityevaṃ ca śrutaṃ devi rahasyaṃ paramaṃ śivam || 65 || śrutvā yaṃ mokṣamāpnoti sādhako nātra saṃśayaḥ | tantrarājaṃ māheśāni sārāt sārataraṃ priye || 66 || śrutvā jñātvā mokṣamāśu labhate nātra saṃśayaḥ | mahābhaye bandhane ca vipattau bahusaṅkaṭe || 67 || pūjayitvā jagaddhātrīṃ mucyate bhavabandhanāt | śraddhayā'śraddhayā vāpi yaḥ kaścit tāriṇīṃ yajet || 68 || sa dhanyaḥ sa kavirdhīraḥ sarvaśāstrārthakovidaḥ | sa ca mānī sa ca jñānī pūjayed yastu kālikām || ityevaṃ ca śrutaṃ devi bhūyaḥ kiṃ śrotumicchasti || 69 || || iti śrīmuṇḍamālātantre navamaḥ paṭalaḥ || 9 || atha daśamaḥ paṭalaḥ śrīdevī uvāca devadeva mahādeva nīlakaṇṭha sadāśiva | namaste parameśāna viśvanātha namo'stu te || 1 || namaste parameśāna sadāśiva maheśvara | namaste paramānanda jñānamokṣapradāyaka || 2 || namaste pārvatīnātha namaste bhaktavatsala | prasīda māṃ jagadbandho gopyaṃ vada sadāśiva || 3 || śrīśiva uvāca śṛṇu devi jagaddhātri sārāt sārataraṃ param | śrutvā mokṣamavāpnoti sādhakendro mahītale || 4 || śṛṇuyād yo muṇḍamālātantraṃ paramakāraṇam | jñānadaṃ mokṣadaṃ bhaktimuktisaukhyapradaṃ śive || 5 || ityevaṃ paramaṃ devīṃ devānāmapi durlabham | yo veda dharaṇīmadhye sa eva paramārthavit || 6 || śaktimārgaṃ vinā jantorna bhaktirna ca sadgatiḥ | śaktimūlaṃ jagat sarvaṃ śaktimūlaṃ paraṃ tapaḥ || 7 || śaktimūlaṃ paraṃ karma janma śarma mahītale | vinā śaktiprasādena na muktirjāyate priye || 8 || śrutaṃ devi varārohe sarvaṃ gopyaṃ mahītale | anyad gopyaṃ kiṃ vadasi tat sarvaṃ vada suvrate || 9 || śrīpārvatī uvāca śṛṇu deva mahādeva kathayasva jagadguro | kathamutpadyate jñānaṃ kathayasva kṛpānidhe || 10 || śrīśiva uvāca ahobhāgyamahobhāgyamahobhāgyaṃ sureśvari | kṛtārtho'haṃ kṛtārtho'haṃ kṛtarājyo maheśvari || 11 || jñānakāṇḍaṃ maheśāni sārāt sārataraṃ śivam | jñānaṃ ca dvividhaṃ jñeyaṃ durjñeyaṃ manasāmapi || 12 || jñānaṃ paramatattvākhyaṃ jñānaṃ jñeyārthasādhanam | anya vibhrāntiviṣayaṃ jñānaṃ sādhāraṇaṃ matam || 13 || evaṃ ca trividhaṃ śeṣaṃ madhyamaṃ tattvavarjitam | tattvajñānaṃ varārohe yogīndrāṇāṃ ca durlabham || 14 || vinā tattvaparijñānād viphalaṃ pūjanaṃ tapaḥ | eko devaśca eko'hamātmabhinnaśarīrataḥ || 15 || ghaṭāt paṭāt māheśāni kālacakrānmahīruhāt | evaṃ jñānaṃ tattvamayaṃ tadā mukto'cireṇa tu || 16 || nānākāraṇamevāsya pūjanaṃ dhyānameva ca | sevanaṃ caiva tīrthānāṃ śaraṇaṃ tāriṇīpadam || 17 || smaraṇaṃ saharājasya bhramaṇaṃ vai kulāvalam | satsaṅgasevanaṃ viṣṇoḥ śaṅkarasyāpi pūjanam || 18 || kālikāpādayugalaṃ bhajanaṃ jñānakāraṇam | yāvanmanāstvameva syāt tāvad bhinnā mahītale || 19 || tāvajjātiśca gotraṃ ca tāvannāma pṛthagvidham | tāvalliṅgaṃ pṛthak sarvaṃ varṇānāṃ pṛthageva hi || 20 || tāvanmitrau vipakṣau ca tāvat kalatrabāndhavau | tāvat pṛthagvidhā tantrayantramantrārcanādibhiḥ || 21 || tāvat puṇyaṃ tāvadeva pāpapuṇyavivarddhakam | tāvat tvaṃ cāpyayamiyaṃ ca jāyate priye || 22 || yāvanna jāyate caṇḍi vidyā'vidyāvirodhinī | avidyānāśinī vidyā vidyā'vidyāvimardinī || 23 || yā tāriṇī mahāvidyā vidyā'vidyāvirūpiṇī | ata eva varārohe vidyāmutpādya bhūtale || 24 || nirvāṇamokṣamāpnoti satyaṃ paramasundari | śrīdurācaraṇāmbhoje bhaktiścāvyabhicāriṇī || 25 || tadaiva jāyate brahmajñānaṃ brahmādidurlabham | brahmā viṣṇuśca rudraśca vāsavādyā divaukasaḥ || 26 || bhairavāścaiva gandharvā vidyābhyāsasamutsukāḥ | brahmavidyāsamā vidyā brahmavidyāsamā kriyā || 27 || brahmavidyāsamaṃ jñānaṃ nāsti nāsti kadācana | tattvajñānaṃ śrutaṃ devi kiṃ bhūyaḥ śrotumicchasi || 28 || śrīpārvatī uvāca namastubhyaṃ mahādeva viśvanātha jagadguro | śrutaṃ jñānaṃ mahādeva nānātantraṃ tavāṅanāt || 29 || idānīṃ caṇḍikāyāstu guhyastotraṃ vada prabho | kavacaṃ brūhi me nātha mantracaitanyakāraṇam || 30 || mantrasiddhikaraṃ guhyād guhyaṃ mokṣavidhāyakam | śrutvā mokṣamavāpnoti jñātvā vidyāṃ maheśvari || 31 || śrīśiva uvāca durlabhaṃ tāriṇīmārgaṃ durlabhaṃ tāriṇīpadam | mantrārthaṃ mantracaitanyaṃ durlabhaṃ śavasādhanam || 32 || śmaśānasādhanaṃ yonisādhanaṃ brahmasādhanam | kriyāsādhanakaṃ bhaktisādhanaṃ muktisādhanam || 33 || stavaprasādād deveśi sarvāḥ sidhyanti siddhayaḥ | namaste caṇḍike caṇḍia caṇḍamuṇḍavināśini || 34 || namaste kālike kālamahābhayavināśini | śive rakṣa jagaddhātri prasīda haravallabhe || 35 || praṇamāmi jagaddhātrīṃ jagatpālanakāriṇīm | jagatkṣobhakarīṃ vidyāṃ jagatsṛṣṭividhāyinīm || 36 || karālāṃ vikaṭāṃ ghorāṃ muṇḍamālāvibhūṣitām | harārcitāṃ harārādhyāṃ namāmi haravallabhām || 37 || gaurīṃ gurupriyāṃ gauravarṇālaṅkārabhūṣitām | haripriyāṃ mahāmāyāṃ namāmi brahmapūjitām || 38 || siddhāṃ siddheśvarīṃ siddhavidyādharagaṇairyutām | mantrasiddhipradāṃ yonisiddhidāṃ liṅgaśobhitām || 39 || praṇamāmi mahāmāyāṃ durgāṃ durgatināśinīm | umāmugramayīmugrāṃ tārāmugragaṇairyutām || 40 || nīlāṃ nīlaghanaśyāmāṃ namāmi nīlasundarīm | śyāmāṅgī śyāmaghaṭitāṃ śyāmavarṇavibhūṣitām || 41 || praṇamāmi jagaddhātrīṃ gaurīṃ sarvārthasādhinīm | viśveśvarīṃ viśvaghorāṃ vikaṭāṃ ghoranādinīm || 42 || ādyāmādyagurorādyāmādyanāthaprapūjitām | śrīdurgāṃ dhanadāmannapūrṇāṃ padmāṃ sureśvarīm || 43 || praṇamāmi jagaddhātrīṃ candraśekharavallabhām | tripurāṃ sundarīṃ bālāmālāgaṇavibhūṣitām || 44 || śivadūtīṃ śivārādhyāṃ śivadhyeyāṃ sanātanīm | sundarīṃ tāriṇīṃ sarvaśivāgaṇavidhūṣitām || 45 || nārāyaṇīṃ viṣṇupūjyāṃ brahmaviṣṇuharapriyām | sarvasiddhipradāṃ nityāmanityāṃ guṇavarjitām || 46 || saguṇāṃ nirguṇāṃ dhyeyāmarcitāṃ sarvasiddhidām | vidyāsiddhipradāṃ vidyāṃ mahāvidyāṃ maheśvarīm || 47 || maheśabhaktāṃ maheśīṃ mahājalaprapūjitām | praṇamāmi jagaddhātrīṃ śumbhāsuravimardinīm || 48 || raktapriyāṃ raktavarṇāṃ raktabījavimardinīm | bhairavīṃ bhuvanāṃ devīṃ lolajihvāṃ sureśvarīm || 49 || caturbhujāṃ daśabhujāmaṣṭādaśabhujāṃ śubhām | tripureśīṃ viśvanāthapriyāṃ viśveśvarīṃ śivām || 50 || aṭṭahāsāmaṭṭahāsapriyāṃ dhūmravināśinīm | kamalāṃ chinnabhālāṃ ca mātaṅgī surasundarīm || 51 || ṣoḍaśīṃ tripurāṃ bhīmāṃ dhūmāṃ ca bagalāmukhīm | sarvasiddhipradāṃ sarvavidyāmantraviśodhinīm || 52 || praṇamāmi jagattārāṃ sārāṃ ca mantrasiddhaye | ityevaṃ ca varārohe stotraṃ siddhikaraṃ param || 53 || paṭhitvā mokṣamāpnoti satyaṃ vai girinandini | kujavāre caturdaśyāmamāyāṃ jīvavāsare || 54 || śukre niśāgate stotraṃ paṭhitvā mokṣamāpnuyāt | tripakṣe mantrasiddhiḥ syāt stotrapāṭhāddhi śāṅkari || 55 || caturdaśyāṃ niśābhāge śanibhaumadine tathā | niśāmukhe paṭhet stotraṃ mantrasiddhimavāpnuyāt || 56 || kevalaṃ stotrapāṭhāddhi mantrasiddhimanuttamām | jāgartti satataṃ caṇḍi stavapāṭhād bhujaṅginī || 57 || ityevaṃ ca śrutaṃ stotraṃ kavacaṃ śṛṇu pārvati | sadāśiva ṛṣirdevi uṣṇik chanda udāhṛtam || 58 || viniyogaśca deveśi tataśca mantrasiddhaye | mastakaṃ pārvatī pātu pātu pañcānanapriyā || 59 || keśaṃ mukhaṃ pātu caṇḍī bhāratī rudhirapriyā | kaṇṭhaṃ pātu stanaṃ pātu kapālaṃ gaṇḍameva hi || 60 || kālī karālavadanā vicitrā svaraghaṭṭinī | rakṣamūlaṃ nābhimūlaṃ durgā tripurasundarī || 61 || dakṣahastaṃ pātu tārā sarvāṇī sarvameva ca | viśveśvarī pṛṣṭhadeśaṃ netraṃ pātu maheśvarī || 62 || hṛtpadmaṃ kālikā pātu ugratārā nabhogatam | nārāyaṇī guhyadeśaṃ meḍhraṃ meḍhreśvarī tathā || 63 || pādayugmaṃ jayā pātu sundarī cāṅgulīṣu ca | ṣaṭpadmavāsinī pātu sarvapadmaṃ nirantaram || 64 || iḍā ca piṅgalā pātu suṣumnā pātu sarvadā | dhanaṃ dhaneśvarī pātu annapūrṇā sadā'vatu || 65 || bāhyaṃ bāhyeśvarī pātu nityaṃ māṃ caṇḍikā'vatu | jīvaṃ māṃ pārvatī pātu mātaṅgī pātu sarvadā || 66 || chinnā dhūmā ca bhīmā ca bhaye pātu jale vane | kaumārī caiva vārāhī nārasiṃhī yaśo mama || 67 || pātu nityaṃ bhadrakālī śmaśānālayavāsinī | udare sarvadā pātu sarvāṇī sarvamaṅgalā || 68 || jaganmātā jayaṃ pātu nityaṃ kailāsavāsinī | śivapriyāsutaṃ pātu sutāṃ parvatanandinī || 69 || trailokyaṃ pātu bagalā bhuvanaṃ bhuvaneśvarī | sarvāṅgaṃ sarvanilayā pātu nityaṃ ca pārvatī || 70 || cāmuṇḍā pātu me romakūpaṃ sarvārthasādhinī | brahmāṇḍaṃ me mahāvidyā pātu nityaṃ manoharā || 71 || liṅgaṃ liṅgeśvarī pātu mahāpīṭhaṃ maheśvarī | gaurī me sandhideśaṃ ca pātu vai tripureśvarī || 72 || sureśvarī sadā pātu śmaśāne ca śave'vatu | kumbhake recake caiva pūrake kāmamandire || 73 || kāmākhyā kāmanilayaṃ pātu durgā sureśvarī | ḍākinī kākinī pātu satyaṃ me śākinī tathā || 74 || hākinī rākiṇī pātu rākiṇī pātu sarvadā | jvālāmukhī sadā pātu mukhaṃ madhye sadā'vatu || 75 || tāriṇī vibhave pātu bhavānī ca bhabe'vatu | trailokyamohinī pātu sarvāṅgaṃ vijane'vatu || 76 || rājakule mahāghāte saṅgrāme śatrusaṅkaṭe | pracaṇḍā sādhakaṃ māṃ ca pātu bhairavamohinī || 77 || śrīrājamohinī pātu rājadvāre vipattiṣu | sampatpradā bhairavī ca pātu bālā balaṃ mama || 78 || nityaṃ māṃ śambhuvanitā pātu māṃ tripurāntakā | ityevaṃ kathitaṃ devi rahasyaṃ sārvakālikam || 79 || bhuktidaṃ muktidaṃ saukhyaṃ sarvasampatpradāyakam | yaḥ paṭhet prātarutthāya sādhakendro bhaved bhuvi || 80 || kujavāre caturdaśyāmamāyāṃ mandavāsare | gurau guruṃ samabhyarcya yaḥ paṭhet sādhakottamaḥ || 81 || sa yāti bhavanaṃ devyāḥ satyaṃ satyaṃ na saṃśayaḥ | evaṃ yadi varārohe paṭhed bhaktiparāyaṇaḥ || 82 || mantrasiddhirbhavet tasya vā'cirānnātra saṃśayaḥ | satyaṃ lakṣapuraścaryāphalaṃ prāpya śivāṃ yajet || 83 || rājamārgaṃ śivāmārgaṃ prāpya jīvaḥ śivo bhavet | paṭhitvā kavacaṃ stotraṃ muktimāpnoti niścitam || 84 || paṭhitvā kavacaṃ stotraṃ daśavidyāṃ yajed yatiḥ | vidyāsiddhirmantrasiddhirbhavatyeva na saṃśayaḥ || 85 || tadaiva tāmbūle siddhirjāyate nātra saṃśayaḥ | śavasiddhiścitāsiddhirdurlabhā dharaṇītale || 86 || ayatnasubhagā siddhistāmbūlānnātra saṃśayaḥ | niśāmukhe niśāyāṃ ca mahākāle niśāntare || paṭhed bhaktyā maheśāni gāṇapatyaṃ labhet tu saḥ || 87 || || iti muṇḍamālātantre mantrasiddhistotrakavacaṃ nāma daśamaḥ paṭalaḥ || 10 || || iti prathamaṃ muṇḍamālātantraṃ samāptam || ########### END OF FILE #######