#################################################### MUKTABODHA INDOLOGICAL RESEARCH INSTITUTE Use of this material (e-texts) is covered by Creative Commons license BY-NC 4.0 Catalog number: M00538 Uniform title: muṇḍamālātantram 2 Editor : rasika mohana caṭṭopādhyāya Description: This tantra is a different text from muṇḍamālātantra I, though they coincide in their contents and concerns and belong to the same period. A fairly late tantra. Notes: Data-entered by the staff of Muktabodha under the supervision of Mark S.G. Dyczkowski. Revision 0: Sept. 19, 2021 Publisher : Publication year : Publication city : Calcutta Publication country : India #################################################### || oṃ namaḥ śivāya || sarvānandamayīṃ vidyāṃ sarvāmnāyairnamaskṛtām | sarvasiddhipradāṃ devīṃ namāmi parameśvarīm || 1 || śrīdevī uvāca devadeva mahādeva paramānandasundara | prasīda guhyavaktrānta kathayasva priyaṃvada || 2 || sarvatantreṣu mantreṣu guptaṃ yat pañcavaktrataḥ | tat prakāśaya guhyākhyaṃ yacca tvaṃ mama vallabha || 3 || śrīśiva uvāca kathānte kathayiṣyāmi guptṃ yaccañcalāmbike | strīsvabhāvānmahattattva na jānāsi śubhapradam || 4 || śrīdevī uvāca susthirā'haṃ bhaviṣyāmi na vaktavyaṃ kadācana | tava bhaktyā bhaviṣyāmi bhāvanā mantrasiddhidā || 5 || śrīśiva uvāca devatāgurumantrāṇāṃ ekabhāvanamucyate | mantro yo gururevāsau yo guruḥ sā ca devatā || 6 || kālī tārā mahāvidyā ṣoḍaśī bhuvaneśvarī | bhairavī chinnamastā ca vidyā dhūmāvatī tathā || 7 || bagalāmukhī siddhavidyā mātaṅgī kamalātmikā | etā daśa mahāvidyāḥ siddhavidyāḥ prakīrtitāḥ || 8 || atyantadurlabhaṃ loke ṣaḍāmnāyanamaskṛtāḥ | etāśca paramā vidyāstriṣu lokeṣu durlabhāḥ || 9 || sukhadā mokṣadā vidyā kleśasādhyā na tādṛśī | yena yena prakāreṇa siddhiryāsyati bhūtale || 10 || sarvaṃ te kathayiṣyāmi premabhāvena kevalam | naiva siddhādyapekṣā'sti nakṣatrādivicāraṇā || 11 || kālādiśodhanaṃ nāsti nāsti mitrādidūṣaṇam | siddhavidyā mahāvidyā yugasevā pariśramam || 12 || nāsti kiñcinmahādevi duḥkhasādhyaṃ kadācana | yā kālī paramā vidyā [ saiva tārā prakrīrtitā || 13 || yā tārāparamā vidyā caturdhā kathitā purā | etayorbhedabhāvena (sarve) nānāmantrā bhavanti hi || 14 || uktaṃ ca kālikākalpe tārākalpe ca te mayā | ṣoḍaśī yā mahāvidyā caturdhā kathitā purā || 15 || lakṣmībījādibhedena pañcamī sā bhavediha | ekākṣarī mahāvidyā bījahīnā bhavet purā || bhuvaneśvarī tryakṣarī tu mahāvidyā prakīrtitā || 16 || śrīdevī uvāca duṣṭā vidyā ca deveśa kathitā na prakāśitā | idānīṃ taddayābhāvāt kathayāṅandasundara || 17 || śrī-īśvara uvāca bhuvaneśī mahāvidyā devarājena vai purā | ārādhitā ca vidyeyaṃ vajreṇa nāma mohitā || 18 || ekākṣarī bījahīnā vāgbhavenojjvalā bhavet | kāmarājākhyavidyā yā vidyā sā puṣpadhanvanā || 19 || smareṇa pūjitā pūrvaṃ bhuvaneśyā pratiṣṭhitā | kumārī yā ca vidyeyaṃ tayā śaptā bahiścyutā || 20 || kevalaṃ śaktirūpeṇa śivarūpeṇa kevalam | tayā pratiṣṭhitā vidyā tārā candrasvarūpiṇī || 21 || [bhairavī tu mahāvidyā mahāsampatpradāyinī | chinnamastā surāmāṃsapriyā raktasvarūpiṇī || 22 || dhūmāvatī mahāvidyā māraṇoccāṭane ratā | bagalāvaśyastambhādinānāguṇasamanvitā || 23 || mātaṅgī ca mahāvidyā trailokyavaśakāriṇī | jīvaputraistu dhanadā pāṣāṇaiḥ sarvabhogadā || 24 || kamalā trividhā proktā ekākṣaradhiyā sthitā || kevalā tu mahāsampaddāyinī sukhamokṣadā || 25 || || iti dvitīye muṇḍamālātantre prathamaḥ paṭalaḥ || 1 || atha dvitīyaḥ paṭalaḥ śrīdevī uvāca akṣamālā tu kathitā yatnato na prakāśitā | akṣamāleti kiṃ nāma phalaṃ kiṃ vā vadasvame || 1 || śrī-īśvara uvāca akṣamālā tu deveśi kāmyabhedādanekadhā | bhavanti śṛṇu tat prauḍhe vistārāducyate mayā || 2 || anulomavilomasthakṣiptayā varṇamālayā | ādināntaḥkṣādikāntaḥkrameṇa parameśvari || 3 || kṣakāraṃ merurūpaṃ taṃ laṅghayenna kadācana | meruhīnā ca yā mālā merulaṅghyā ca yā bhavet || 4 || aśuddhā'tiprakāśā ca sā mālā niṣphalo bhavet | citrāṇī viśatantvābhā brahmanāḍīgatāntarā || 5 || tayā saṃgrathitā dhyeyā sarvakāmaphalapradā | aṣṭottaraśatajapādādau klībaṃ samācaret || 6 || ṛḷvarṇadvayaṃ yat tu taddhiklībaṃ pracakṣate | vargāṇāmaṣṭabhirvāpi kāmyabhedakrameṇa tu || 7 || akacaṭatapayaśā ityevaṃ cāṣṭavargataḥ | sphāṭikairmokṣadā proktā padmākṣairbahuputradā || 8 || śuddhasphaṭikamālā tu mahāsampatpradā priye | śmaśānadhūsturairmālā caikā dhūmāvatīvidhau || 9 || narāṅgulyasthibhirmālā grathitā parvabhedataḥ | sarvasiddhapradā mokṣadāyinī varavarṇini || 10 || nāḍyā saṃgrathanaṃ kāryaṃ raktena vāsasā api | sadā gopyaṃ prayatnena mātuśca jāravat priye || 11 || pañcadhā kathitā mālā sarvasiddhiphalapradā | mauktikairgrathitā mālā sarvaiśvaryaphalapradā || 12 || maṇiratnaprabālaiśca hemarājatasambhavā | mālā kāryā kuśagranthyā sarvayajñaphalapradā || 13 || nāḍībhirgrathitā mālā mahāsiddhipradā priye | triṃśataiśvaryaphaladā pañcaviṃśena mokṣadā || 14 || caturdaśamayī mokṣadāyinī bhogavardhhinī | pañcadaśātmikā devi māraṇoccāṭane sthitā || 15 || stambhane mohane vaśye tirodhāne'ñjane tanoḥ | pādukāsiddhisaṅghe ca śataṃ saṅkhyā prakīrtitā || 16 || aṣṭottaraśataṃ kuryādathavā sarvakāmadam | nityaṃ japaṃ kare kuryānna tu kāmyaṃ kadācana || 17 || kāmyamapi kare kuryānmālābhāve priyaṃvade | tatrāṅgulijapaṃ kurvan sāṅguṣṭhāṅgulibhirjapet || 18 || aṅguṣṭhena vinā karmakṛtaṃ tadaphalaṃ bhavet | anāmikādvayaṃ parva kaniṣṭhādikrameṇa tu || 19 || tarjanīmūlaparyantaṃ karamālā prakīrtitā | meruṃ pradakṣiṇīkurvan anāmāmūlaparvataḥ || 20 || merulaṅghanadoṣāt tu anyathā jāyate phalam | ārabhyā'nāmikāmūlāt prādakṣiṇyakrameṇa tu || 21 || madhyamāmūlaparyantaṃ japedaṣṭasu parvasu | tarjanīmūlaparyantaṃ japed daśasu parvasu || 22 || madhyamā tritayā grāhyā anāmāmūlameva ca | anāmāmadhyaparvaṃ tu meruṃ kṛtvā na laṅghayet || 23 || tarjanyagre tathā madhye yo japet tatra mānavaḥ | catvāri tasya naśyanti āyurvidyā yaśo balam || 24 || aṅgulīrna viyuñjīt kiñcit saṅkocayet talam | athātaḥ prathamaṃ vakṣye mālānāṃ tantrabodhanam || 25 || pūjāṃ vidhāya bhaktyā tu śuciḥ pūrvamupoṣitaḥ | vijane prajapenmaunī svayaṃ mālāṃ ca sādhakaḥ || 26 || kṛtanityakriyaḥ śuddhaḥ śuddhakṣaṇe ca mantravit | yathākālaṃ yathālābhamakṣāṇyānīya yatnataḥ || 27 || anyonyasamarūpāṇi nātisthūlakṛśāni ca | kīṭādibhiraduṣṭāni na jīrṇāni navāni ca || 28 || gavyaistu pañcabhistāni prakṣālya ca pṛthak pṛthak | tato dvijendrapuṇyastrīnirmitaṃ granthivarjitam || 29 || triguṇaṃ triguṇīkṛtya paṭṭasūtramathāpi vā | śuklaṃ raktaṃ tathā kṛṣṇaṃ śāntivaśyābhicārake || 30 || aśvatthapatrairnavakaiḥ padmākāreṇa sthāpitaiḥ | sūtraṃ maṇīṃśca gandhāntaiḥ kṣālitāstatra nikṣipet || 31 || śmaśānavāriṇā cāpi pīṭhaprakṣālitena ca | śuddhodakena ratnena kastūrīkuṅkumena ca || 32 || tāvat śaktiṃ mātṛkāṃ ca sūtre caiva maṇiṣvatha | vinyasya pūjayedājyairjuhuyāccaiva yatnataḥ || 33 || homakarmaṇyaśaktaśced dviguṇaṃ japamācaret | maṇimekaikamādāya sūtre sampātayet sudhīḥ || 34 || mukhe mukhaṃ tu saṃyujya pucche pucchaṃ tu yojayet | gopucchasadṛśī kāryā'thavā sarpākṛtirbhavet || 35 || tatsajātīyamekākṣaṃ merutvenā'grato nyast | ekaikamaṇimadhye tu brahmagranthiṃ prakalpayet || 36 || japamālāṃ vidhāyetthaṃ tataḥ saṃskāramārabhet | kṣālayet pañcagavyena sadyojātena tajjalaiḥ || 37 || mantrastu - oṃ sadyojātaṃ prapadyāmi sadyojātāya vai namaḥ | bhave bhave nābhibhave bhava eva māṃ bhavodbhavaḥ || bhave bhavasya māṃ bhavodbhavaḥ || 38 || ṅentāntaḥ praṇavādyena namo'ntena kramād yajet | candanāgurugandhādyairvāmadevena gharṣayet || 39 || oṃ namo vāmādevāya namo jyeṣṭhāya namaḥ śreṣṭhāya namo rudrāya namaḥ | kālāya namaḥ kalavikaraṇāya namo balavikaraṇāya namaḥ pramathanāya namaḥ || sarvabhūtadamanāya namo nama unmattāya unmanāya namo namaḥ || 40 || dhūpayet tāmaghoreṇa lepayet puruṣeṇa vai | oṃ ghorebhyo'ghorebhyo ghoraghoratarebhyaḥ || 41 || sarvataḥ sarvasarvebhyo namaste'stu rudrebhyaḥ | oṃ tatpuruṣāya vidmahe mahādevāya dhīmahi || 42 || tanno rudraḥ pracodayāt | mantrayet pañcamenaiva pratyekaṃ tu śataṃ śatam || 43 || oṃ īśānaḥ sarvavidyānāṃmīśvaraḥ sarvabhūtānām | brahmaṇo'dhipatirbrahmaṇo'dhipatiḥ śivaḥ pañca sadāśivaḥ || 44 || praṇavādyo mahāmantraḥ sadāśiva iti kramāt | meruṃ ca pañcamenaiva tato mantreṇa mantrayet || 45 || saṃskṛtyaivaṃ budho mālāṃ tatprāṇāṃstatra sthāpayet | mūlamantreṇa deveśi sampūjya bhaktibhāvataḥ || 46 || guruṃ sampūjya taddhastāt gṛhṇīyādakṣamālikām | aśucirna spṛśedenāṃ karabhraṣṭāṃ na kārayet || 47 || aṅguṣṭhasthāmakṣamālāṃ cālayenmadhyamāgrataḥ | tarjanyāṃ na spṛśedenāṃ gurorapi na darśayet || 48 || madhyamād bhuktimuktiḥ syādanāmāduttamena tu | tarjanīmāraṇādiṣṭakaniṣṭhāmāraṇaṃ smṛtam || 49 || bhuktau muktau tathā kṛṣṭau madhyamāyāṃ jape sudhīḥ | aṅguṣṭhānāmikābhyāntu japed vaśye tu karmaṇi || 50 || tarjanyaṅguṣṭhayogena māraṇoccāṭane japet | kaniṣṭhāṅguṣṭhayogācca japenmāraṇakarmaṇi || 51 || japānte tu ca mālāṃ vai pūjayitvā tu poṣayet | japakāle tu goptavyā japamālā tu sā śubhā || 52 || guruṃ prakāśayed vidvān na tu mantraṃ kadācana | akṣamālāṃ ca vidyāṃ ca na kadācit prakāśayet || 53 || bhūtarākṣasavetālā gandharvāḥ siddhacāraṇāḥ | haranti prakaṭāt siddhiṃ tasmād guptiṃ sadā kuru || 54 || jīrṇasūtre punaḥ sūtraṃ grathayitvā śataṃ japet | pramādāt patitāddhastāt śatamaṣṭottaraṃ japet || 55 || bhramanniṣiddhasaṃsparśe kṣālayitvā ca pūjayet | japamālā mayā devi kathitā bhuvi durlabhā || sadā gopyā prayatnena yadi tvaṃ mama vallabhā || 56 || || iti dvitīye muṇḍamālātantre dvitīyaḥ paṭalaḥ || 2 || atha tṛtīyaḥ paṭalaḥ devī uvāca sthānāsane devadeva kathayānandasundara | sadācāryaṃ vinā yena sarvamantrāḥ susiddhagāḥ || 1 || śrī-īśvara uvāca nadītīre bilvamūle śmaśāne śūnyaveśmani | mahāliṅge parvate vā devāgāre catuṣpathe || 2 || śavasyopari muṇḍe vā jale vā kaṇṭhapūrite | saṃgrāmabhūmau yonau tu sthale vā vijane vane || 3 || yatra kutra sthale ramye yatra vā syānmanoramam | sthānaṃ te kathitaṃ devi āsanaṃ kathyate'dhunā || 4 || stambhane gajacarmā'tha māraṇe māhiṣaṃ tathā | meṣacarma tathoccāṭe khaḍgīyaṃ vaśyakarmaṇi || 5 || vidveṣe jāmbukaṃ proktaṃ bhaved gocarma śantike | vyāghrājine sarvasiddhirjñānasiddhirmṛgājine || 6 || vastrāsanaṃ rogaharaṃ vetrajaṃ vipulaśriyam | kauśeyaṃ puṣṭikārye ca kambalaṃ duḥkhamocanam || raktaṃ vā yadi vā kṛṣṇaṃ viśeṣād raktakambalam || 7 || ninditāsanamāha - vaṃśāsane ca dāridryaṃ daurbhāgyaṃ dārujāsane | dharaṇyāṃ duḥkhasambhūtiḥ pāṣāṇe rogasambhavaḥ || 8 || tṛṣṇāsane yaśohāniretat sādhāraṇaṃ smṛtam | mṛdukambalamāstīrṇaṃ saṃgrāme patitaṃ hi tat || 9 || jantuvyāpāditaṃ vā'pi mṛtaṃ vā navamāsakam | garbhacyutatvacaṃ vāpi nārīṇāṃ yonijāṃ tvacam || 10 || sarvasiddhipradaṃ devi sarvabhogasamṛddhidam | tvacaṃ vā yonisaṃsthāyāḥ kuryād vīro ratāsanam || 11 || śmaśānakāṣṭhaghaṭitaṃ pīṭhaṃ vā yajñadārujam | nā'dīkṣito viśejjātu kṛṣṇasārāsane gṛhī || 12 || udāsīnavadāsīnasnātakabrahmacāriṇaḥ | kuśājināmbaraiḥ kāryaṃ caturasraṃ samantantaḥ || 13 || ekahastaṃ dvihastaṃ vā caturaṅgulamucchritam | viśuddha āsane kuryāt saṃskāraṃ pūjanaṃ budhaḥ || 14 || bhadrāsanaṃ rogaharaṃ yogadaṃ kaurmamāsanam | padmāsanamiti prāhuḥ sarvaiśvaryaphalapradam || 15 || ekaṃ vīrāsanaṃ devi sarvasiddhipradaṃ nṛṇām | ūrdhvapādau sthitau devi nirodhaḥ parimaṇḍitam || 16 || padmāsanena deveśi pātālagṛhasaṃsthitaḥ | sarvāsanānāṃ śreṣṭhaṃ hi devairapi suduṣkaram || 17 || rātrau ca yo'rcayed devīṃ dhanavān sutavān bhavet | pīṭhānāṃ devi sarveṣāṃ caturddhā pīṭhamuttamam || 18 || uḍḍīyānaṃ mahāpīṭhaṃ pīṭhānāṃ pīṭhamuttamam | jālandharaṃ mahāpīṭhaṃ tathā pūrṇācalaṃ matam || 19 || pañcāśatpīṭhamadhye tu kāmarūpaṃ mahāphalaṃ | kṛte jālandharaṃ jñeyaṃ tretāyāṃ pūrṇaparvatam || 20 || uḍḍīyānaṃ dvāpare ca kāmarūpaṃ kalau yuge | mahāphalapradaṃ loke tatkṣaṇāt siddhidaṃ mahat || 21 || japapūjā balistatra devi lakṣa guṇo bhavet | bahudhā kathyate devi kiṃ tasya guṇavarṇanam || yonirūpeṇa yatrāste svayaṃ koṭiguṇātmikā || 22 || || iti dvitīye muṇḍamālātantre tṛtīyaḥ paṭalaḥ || atha caturthaḥ paṭalaḥ śrīdevī uvāca kevalaṃ balidānena tuṣṭā bhavati caṇḍikā | kathitaṃ pūrvamasmabhyaṃ prakāśaṃ kuru śaṅkara || 1 || śrī-īśvara uvāca atyantaguhyaṃ deveśi vidhānaṃ balipūjanam | kathayāmi varārohe susthirā bhava sarvadā || 2 || dadhi kṣīraṃ vratānnaṃ ca pāyasaṃ śarkarānvitam | pāyasaṃ kṣaudramāṃsaṃ ca nārikelaṃ samodakam || 3 || śarkaraṃ meṣakhaṇḍaṃ ca ārdrakaṃ sahaśarkaram | rambhāphalaṃ laḍḍukaṃ ca bharjitānnaṃ ca piṣṭakam || 4 || śālamatsyaṃ ca pāṭhīnaṃ śakulaṃ cekuṭaṃ tathā | madgūraṃ ca baliṃ dadyāt māṃsaṃ māhiṣameṣakam || 5 || pakṣimāṃsaṃ mahādevi ḍimbaṃ nānāsamudbhavam | kṛṣṇachāgaṃ mahāmāṃsaṃ godhikāṃ hariṇīṃ tathā || 6 || jalaje matsyamāṃse ca gaṇḍakīmāṃsameva ca | nānāvyañjanadagdhāni vyañjanāni madhūni ca || 7 || īṣad dagdhaṃ ghṛtenāktaṃ niśāyāṃ divase'pi vā | baliṃ dadyāt viśeṣeṇa kṛṣṇapakṣe śubhe dine || 8 || chāge datte bhaved vāgmī meṣe datte kavirbhavet | mahiṣe dhanavṛddhiḥ syāt mṛge mokṣaphalaṃ bhavet || 9 || datte pakṣiṇi ṛddhiḥ syāt godhikāyāṃ mahāphalam | nare datte maharddhiḥ syāt yataḥ siddhiranuttamā || 10 || lalāṭa - hasta - hṛdaya - śiro - bhrū - madhyadeśataḥ | svahṛdo rudhire datte rudradeha ivā'paraḥ || 11 || caṇḍālabalidānena mahāsiddhiḥ prajāyate | surādānena deveśi mahāyogīśvaro bhavet || 12 || surā tu trividhā proktā sphāṭikī ḍākinī tathā | kāñcikī ca mahādevi kathitā bhuvi durlabhā || 13 || sphāṭikīdānamātreṇa dhanavṛddhiranuttamā | ḍākinīdānayogena sarvavaśyo bhaved dhruvam || 14 || kāñcikī surayā devi yo'rcayet parameśvarīm | guṭikāñjanastambhādimāraṇoccāṭanādibhiḥ || 15 || mahāsiddhīśvaro bhūtvā vaset kalpāyutaṃ divi | arghyodake maheśāni mahāsiddhiranuttamā || 16 || raktacandanabilvādijavākusumavarvaraiḥ | arghyaṃ dattvā maheśāni sarvakāmārthasādhanam || 17 || surayā cā'rghyadānena yoginīnāṃ priyo bhavet | puraḥ pātraṃ ghaṭasyā'nte tadante bhojyapatrakam || 18 || tadante vīrapātraṃ ca baleḥ pātraṃ tadantike | pādyārghācamanīyānāṃ pātrāṇi sthāpayet budhaḥ || 19 || mahāyogī bhaved devi pīṭhaprakṣālitairjalaiḥ | svayambhūkusume datte bhavet ṣaṭkarmabhājanam || 20 || suśītalajalairarghyaṃ kastūrīkuṅkumānvitaiḥ | kuṇḍagolo'tha bījairvā sarvasiddhīśvaro bhavet || 21 || sadhavāratisambhūtaṃ kuṇḍamuttamabhūtidam | vidhavāratisambhūtaṃ golamṛddhipradaṃ bhuvi || 22 || mūlamantreṇa deviśi ākṛṣya nirbhayaḥ śuciḥ | arghyaṃ dadyāt viśeṣeṇa cakravātena pūjitā || 23 || svayambhūkusumaṃ devi trividhaṃ bhuvi jāyate | āṣoḍaśādanūḍhāyā uttamā sarvasiddhidā || 24 || rajoyogavaśādanyā madhyamā sukhadāyinī | balātkāreṇa deveśi adhamā bhogavarddhinī || 25 || kumārīpūjane śakto nārīṃ svapne'pi na smaret | ākṛṣya baddhayogena golo'tha puṣpakaṃ nyaset || 26 || śuddhaṃ kuryāt prayatnena nirbhayaḥ śucimānasaḥ | tāmrapātre kapāle vā śmaśānakāṣṭhanirmite || 27 || śanibhaumadine vā'pi śarīre mṛtasambhave | suvarṇe'pyatha lohe vā cakramarcyaṃ yathāvidhi || 28 || puṣpāṇyapi tathā dadyād raktakṛṣṇasitāni ca | śvetaraktaṃ javāpuṣpaṃ karavīraṃ tathā priye || 29 || tagaraṃ mallikā jātī mālatī yūthikā tathā | dhuttūrāśokabakulāḥ śvetakṛṣṇā'parājitāḥ || 30 || bakapuṣpaṃ bilvapatraṃ campakaṃ nāgakeśaram | vahnikā jhiṇṭikā kañciraktaṃ yat parikīrtitam || 31 || arkapuṣpaṃ javāpuṣpaṃ varvaraṃ ca priyaṃvade | aṣṭamyāṃ tu viśeṣeṇa santuṣṭā tasya pārvatī || 32 || aṣṭamyāṃ ca caturdaśyāṃ nānāpuṣpaiḥ samarcayet | padmapuṣpeṇa raktena santuṣṭāḥ sarvadevatāḥ || 33 || kṛṣṇā vā yadi vā śuklā kālikā varadā bhavet | śmaśānadhuttareṇaiva tuṣṭā madhumatī parā || 34 || śmaśānajātapuṣpeṇa santuṣṭā kālikā parā | vanyapuṣpaiśca vividhaiḥ santuṣṭā pārvatī parā || 35 || āmalakyāstu patreṇa tuṣṭā puṣpeṇa pārvatī | aṣṭamyāṃ ca caturdaśyāṃ nānāpuṣpaiḥ sadā'rcayet || śmaśāne rātriśeṣe ca śanibhaumadine niśi || 36 || || iti dvitīye muṇḍamālātantre caturthaḥ paṭalaḥ || 4 || atha pañcamaḥ paṭalaḥ śrīdevī uvāca rahasyātirahasyaṃ me puraścaryāvidhiṃ prabho | vadasva yadanuṣṭhānāt sarvakāmā bhavanti hi || 1 || śrī-īśvara uvāca gṛhītvā sadgurordīkṣāṃ śubhakāle divā niśi | adhamo vaiṣṇavaḥ prokto madhyamaḥ śaivadīkṣitaḥ || 2 || parayā dīkṣito yo vai sa eva paramo guruḥ | caturdaśasahasrāṇi sevito hariharātmakaḥ || 3 || tato bhavati deveśi parāpūjārataḥ pumān | kāyena manasā vācā suvarṇarajatādibhiḥ || 4 || santoṣya parayā bhaktyā guruṃ dīkṣāṃ samāśrayet | pūrvoktasthānamāsādya japapūjāṃ samāśrayet || 5 || prātaḥkālaṃ samārabhya japenmadhyadināvadhi | prathame'hani yajjaptaṃ tajjaptavyaṃ dine dine || 6 || nyūnādhikaṃ na japtavyamāsamāptaṃ sadā japet | gate prathamayāme tu tṛtīyapraharāvadhi || 7 || niśāyāṃ ca prajaptavyaṃ rātriśeṣe japenna ca | haviṣyaṃ bhakṣayennityamekavāraṃ susaṃyataḥ || 8 || laghvāhāraṃ prakurvīta yuvatīpūjane rataḥ | svastrīmanyastrīyaṃ vāpi pūjayet sarvaparvasu || 9 || nādhame saṅgatiḥ kāryā sarvaprāṇihite rataḥ | yasya yāvān pajaḥ proktaḥ taddaśāṃśamanukramāt || 10 || tattaddravyairjapasyā'nte homaṃ kuryād dine dine | homasya ca daśāṃśena tarpaṇaṃ proktameva ca || 11 || tarpaṇasya daśāṃśena śiromārjanamiṣyate | taddaśāṃśena viprendrān kurvīta kulakanyakāḥ || 12 || sambhojayet prītiyuktairdravyairnānāvidhairapi | homādyaśakto deveśi kuryācca dviguṇaṃ japam || 13 || yadi pūjādyaśaktaḥ syāt dravyālābhena sundari | kevalaṃ japamātreṇa puraścaryā vidhīyate || 14 || divyo vā yadi vā vīro bhuvi syāt sādhakottamaḥ | svecchācāraparo bhūtvā ekānte sarvadā japet || 15 || matsyamāṃsapradānena śāktaḥ kuryāt puraskriyām | ekārātrau śmaśāne vā śave vā prauḍhabālayoḥ || 16 || mayoktaṃ bhairavīkalpe vidhānaṃ varavarṇini | hastamātranikhāte vā kuṇḍe vā vijane vane || 17 || vīrāṇāṃ sādhanaṃ devi kathitaṃ bhuvi duṣkaram | kumārīpūjanādeva puraścaryāvidhiḥ smṛtaḥ || 18 || nānājātibhavāḥ kanyā rūpalāvaṇyasaṃyutāḥ | atyantaprauḍhā bālā vā kokilā varadāyinī || 19 || nānādravyaiḥ priyakaraiḥ bhakṣyabhojyādibhiḥ śubhaiḥ | pūjayet parabhāvena nānārūpamanoharāḥ || 20 || bhaginī kanyakā vā'pi dauhitrī vā kuṭumbinī | mātṛvarjaṃ sadā pūjyā nānājātisamudbhavā || 21 || athavā'nyaprakāreṇa puraścaraṇamiṣyate | kṛṣṇāṃ caturdaśīṃ prāpya navamyāṃ tu mahotsave || 22 || sūryodayaṃ samārabhya yāvat sūryodayaṃ bhavet | tāvajjapte maheśāni puraścaryā vidhīyate || 23 || kṛṣṇāṣṭamīṃ samārabhya yāvat kṛṣṇāṣṭamī bhavet | sahasrasaṃkhye japte tu puraścaraṇamiṣyate || 24 || aṣṭamīṃ navamīṃ rātrau pūjāṃ kuryāt viśeṣataḥ | daśamyāṃ pāraṇaṃ kuryāt matsyamāṃsādibhiḥ priye || 25 || ṣaṭsahasraṃ japennityaṃ bhaktibhāvaparāyaṇaḥ | caturdaśīṃ samārabhya yāvadanyā caturdaśī || 26 || tāvajjapet maheśāni puraścaraṇamiṣyate | kevalaṃ japamātreṇa mantrāḥ siddhā bhavanti hi || 27 || vinā homādidānena viśeṣāt pīṭhapūjane | yonipīṭhaṃ mahāpīṭhaṃ kāmapīṭhaṃ tathā'param || 28 || tayorekataraṃ pūjyaṃ rudradeha ivāparaḥ | tīrthe tithiviśeṣe ca grahaṇe candrasūryayoḥ || guroranugrahe caiva dīkṣākālaḥ śubhaḥ smṛtaḥ || 29 || || iti dvitīye muṇḍamālātantre pañcamaḥ paṭalaḥ || 5 || atha ṣaṣṭhaḥ paṭalaḥ atha devi pravakṣyāmi guptāṃ tribhuvaneśvarīm | yāmārādhya purā sarve bhūtibhājo'bhavan surāḥ || 1 || brahmā rudraḥ sahasrākṣo ramāśivamanobhavāḥ | śaktirmāyā maheśāni vidyā vasvakṣarā matā || 2 || ṛṣirbrahmā virāṭ chando devatā lokapāvanī | mahāmāyeti vikhyātā bījaṃ lakṣmīḥ prakīrtitam || 3 || māyā śaktiḥ kīlakaṃ ca śaivadehamudāhṛtam | ṣaḍaṅgāni tataḥ kuryāt māyādīrgheṇa saṃyutā || 4 || dhyānaṃ devi pravakṣyāmi sarvaiśvaryaphalapradam | vidyut puñjanibhāṃ devīṃ raktapadmāsane sthitām || 5 || trinetrāṃ digbhavāvāsāṃ pāṇiviṃśatiśobhitām | pīta - rakta - śveta - kṛṣṇa - dhūmra - pāṭala - mauktikam || 6 || nīla - pīta - vicitrāṇi varṇāni kathitāni vai | khaṅga - śūla - gadā - cakra - śaṅkha - cāpa - śarāṇi ca || 7 || lasatparighaśastrāḍhyamūṣalaṃ dānanirbhayam | kartṛmudrāṃ tathā yogamudrāṃ ca dadhatīṃ karaiḥ || 8 || śaktiśūladharāṃ devī sarvasiddhiphalapradām | pūjāyantraṃ pravakṣyāmi ṣaṭkoṇaṃ śaktisaṃyutam || 9 || ṣaḍaṣṭaṣoḍaśadalaṃ padmaṃ dvārasamanvitam | trikoṇe pūjayed devīṃ māyāṃ vāṇīṃ haripriyām || 10 || ratiḥ prītiḥ kṣamā pūjyā puṣṭistutimanoharāḥ | yoganidrā mahānidrā mahāmāyā mahāsurī || 11 || mahāmudrā mahāsvapnā ṣaḍdale pūjayet kramāt | kṣemaṅkarī yogamudrā śarīrākarṣiṇī tathā || 12 || lajjā śāntirlakṣaṇā ca capalā śāntivigrahā | aṣṭadale maheśāni vāmāvartena pūjayet || 13 || vidyā ca paramā vidyā mahāvidyā mahābalā | saumyā paramasaumyā ca mahāsaumyā mahāparā || 14 || kālarātrirmahārātrirgāyatrī ca mahāmbike | prakṛtirvikṛtirmeghā viśvarūpāḥ kramādimāḥ || 15 || mahātattvā pramattā ca unmadā mandagāminī | mahāprahlādā bagalā pūjayed vidhinā tathā || 16 || japamuṇḍāṃ mahogrāṃ ca bhīmād bhīmakapālikām | aṭṭāṭṭahāsinīṃ nityāṃ harṣeṇā'vihvalāṃ tathā || 17 || vikaṭā bahurūpā ca mahārūpā mahāpradā | ghorarāvā mahānityā mahāmañjulabhāsinī || 18 || sarvadā sundarī pūjyā aparatra kramāt priye | indrādayastataḥ pūjyāḥ pūrvādidigvidikṣu ca || 19 || caturdvāre tataḥ pūjyā bhagaklinnā bhagākṣarā | bhagadevī bhagākṣī ca vidhinā vāmavartmanā || 20 || evaṃ saṃpūjya tāṃ devīṃ caturlakṣaṃ manuṃ japet | homādividhinā kuryāt daśāṃśāt kramataḥ priye || 21 || anayā vidyayā devi mahāsiddhīśvaro bhavet | dhanavān putravān vāgmī sudhī bhogī mahābalaḥ || 22 || rājyalakṣmīmavāpnoti devīputraḥ sadaiva hi | bhuvaneśī bhagavatī vahnijāyānvito manuḥ || 23 || saptākṣaro maheśāni sarvasiddhiphalapradaḥ | svarṇapadmanibhāṃ devīṃ sarvālaṅkārabhūṣitām || 24 || kṣaumavāsāṃ trinayanāṃ śailasiṃhasamāśritām | athavā siṃhaśailau ca indrādirathadevatāḥ || 25 || evaṃ dhyātvā japet pūrvaṃ samastaṃ hi samāhitaḥ | sarvakālaṃ tu tajjapyaṃ mantraṃ sarvasamṛddhidam || 26 || śivavāmena saṃyuktaṃ śrotrena dvitayaṃ priye | brahmāmukhena saṃyukto dvirāvṛttamanukramāt || 27 || nayanena samāyuktaḥ śakrānvitatayā gataḥ | hṛdāyukto manurayaṃ sarvavidyāphalapradaḥ || 28 || bījaṃ śaktiḥ kīlakaṃ ca ādyantamadhyayogataḥ | ṣaḍdīrghabījādeva ṣaḍaṅgāni prakalpayet || 29 || kālīṃ karālavadanāṃ naramālāvibhūṣitām | caturhastāṃ trinayanāṃ śaśamāṃsakarāmbujām || 30 || kapālacitrakhaṭvāṅgadhāriṇīṃ bhīmanādinīm | karicarmaparīdhānāṃ śuṣkamāṃsātibhairavām || 31 || trailokyagrasamānāsyāṃ jihvādvitayabhīṣaṇām | nimagna - vartulā''rakta - nayana - traya - dhāriṇīm || 32 || evaṃ dhyāvā yajed devīṃ kulapīṭhe manohare | trikoṇaṃ caturasraṃ tu ṣaṭkoṇaṃ navakoṇakam || 33 || vṛttaṃ dalāṣṭamathavā caturasraṃ likhet budhaḥ | trikoṇe pūjayed devīṃ pracaṇḍāṃ caṇḍanāyikām || 34 || caṇḍakālīṃ ca caṇḍālīṃ pracaṇḍāṃ kālanāyikām | khaṭvāṃ mattāṃ kramād devi pūjayed vidhinā pathā || 35 || jayatuṇḍāṃ mahogrīṃ ca bhīmāṃ bhīmakapālikām | aṭṭāṭṭahāsinīṃ nityāṃ pragalbhāṃ ghorarūpiṇīm || 36 || śuṣkabhīmāṃ japed devi vasukoṇe parātmike | atikālīṃ mahākālīṃ mahānityāṃ mahābhayām || 37 || vicitrāṃ citrarūpāṃ ca bhīmanādaninādinīm | mahāghorāṃ yajed devi dalān dikṣu vidikṣu ca || 38 || indrādayastataḥ pūjyā lakṣamantraṃ sadā japet | iyaṃ sā ṣoḍaśī proktā triśaktirabhidhīyate || 39 || tāraṃ kāntaṃ yuvatisthaṃ vāruṇaṃ bhautikaṃ tathā | secanīye dvayaṃ kūrcaṃ phaṭ svāhā ca tathā pare || 40 || vedādyābjavai (?) rocanīye sarvapadaṃ tathā | buddhibhāvaṃ tathāṅīya rudravat parikīrtitam || 41 || vandanīyaḥ śivaḥ ṣaṣṭhaḥ svaramartyasamanvitām | nādabinduyutāṃ dvandvaṃ phaṭ svāhā tadanantaram || 42 || saptaviṃśa[akṣarayutā] mahāvidyā prakīrtitā | oṃ lajjāṃ trapāṃ medhāṃ huṃ phaḍityugratārikā || 43 || oṃ māyā śrīṃ huṃ astrāntamityekajaṭāmantraḥ | rakāraṃ prathamaṃ rephacaturdaśasvarānvitam || 44 || puṭitāntena kartavyaṃ parāparaphalapradam | astrahīnamidaṃ nīlasarasvatyā vinirdiśet || 45 || kāmākhyāyāstu hrāṃ hrīṃ hrūṃ tripuraṃ samudāhṛtam | nārasiṃhastataḥ śvantaṃ śuddhaṃ kuryāttameva ca || 46 || īṃ īṅkāriṇīmākhyātā tribījaṃ mantramuttamam | turyamaṣṭottaramathavā ? punaruttaram || 47 || iti bhagavati vaiṣṇavīti padaṃ tataḥ | subhage vahnijāyāntaṃ mantramevaṃ prakīrtayet || 48 || indrabījaṃ samuccārya ṣaṣṭhasvarasamanvitam | vārāhī śakrabījaṃ ca pañcasvaravibhūṣitam || 49 || oṃ tuṣyatu bhairavīpadaṃ caraṇāya namoktikam | vārāhyā iti vikhyātā durlabhā śatrumāraṇe || 50 || brahmā vahnisamārūḍhaḥ caturthasvarasaṃyutaḥ | nādabindusamāyuktastriśūlīkṛtavigrahaḥ || 51 || kṛcchraṃ śivāyugmaṃ nāmākṣarasamāyutam | vāgbījavahnivanitā dakṣiṇāyā dviviṃśatiḥ || 52 || hrīṃ svaratraipurā kevalāyā ihetyapi | hanti piśācinī caiva tribhāṣāṃ tadāditaḥ || 53 || ucchiṣṭhagaṇanāthasya mantro'yaṃ sarvadākṛtaḥ | etāsāmapi devīnāṃ jaṣahome ca tarpaṇe || 54 || svecchāviracitaṃ ratne tattvabodhanirodhane | devatāgurumantrāṇāmaikyamāvaśyakāriṇaḥ || 55 || śraddhayā jāyate siddhiriha loke'paratra ca | nityamadhyātmayoge ca sthirāt siddhimavāpnuyāt || 56 || sarvān kāmānavāpnoti divyān bhogān rasātalān | śṛṇu devi pravakṣyāmi mhāvidyāṃ mahākalām || 57 || nādabindusamāyuktamādyabījamudāhṛtam | vāntanetreṇa saṃyuktaṃ pāntena sahitaṃ priye || 58 || nādabindusamāyuktaṃ dvitīyaṃ bījamuttamam | sarvaiśvaryaprade vahnijāyānto manuruttamaḥ || 59 || ṛṣiḥ sadāśivo'syāstu gāyatrīcchanda ucyate | devatā śumbhamathanī sarvadevanamaskṛtā || 60 || ādyabījena deveśi ṣaḍ dīrgheṇa ṣaḍaṅgakam | ādyantabījayogena bījaśaktiśarīrakām || 61 || dhyāyed devīṃ trinayanāṃ phullendīvaralocanām | pakvabimbasamānāṅgīṃ cārucandranibhānanām || 62 || aṣṭādaśabhujāṃ nityāṃ siṃhapṛṣṭhasamāśritām | koṭikoṭigaṇairarcyā pāśāṅkuśadhanuḥśarān || 63 || śaṅkhacakragadāpadmaghaṇṭāmudgarapaṭṭiśān | carmakhaḍgaṃ mahāyaṣṭiṃ kapālakarkaśān śarān || 64 || athavā pāṇiśataśaḥ prahārairatisaṃyutām | trikoṇāntaraṣaṭkoṇe dalāṣṭapariśobhite || 65 || padme trikoṇamadhye tu siddhardhikakalā latā | ṣaṭkoṇe pūjayed devīṃ kālīṃ caṇḍāṃ pracaṇḍikām || 66 || icchāpūrtimahābhīmāṃ śivānīṃ vāmavartmanā | athā'ṣṭadalamadhye tu brāhyādimātaraḥ kramāt || 67 || brāhmī māheśvarī skāndī vaiṣṇavī śāṃkarī tathā | nārasiṃhī tathā caindrī śivadūtī prabhedataḥ || 68 || yathāvarṇayathāśastradhāriṇyo yoginīgaṇāḥ | indrādayastataḥ pūjyā dvāre nandimahābalau || 69 || parājayo jayaścaiva puṣpāñjalitrayairyajet | pañcalakṣaṃ japenmantraṃ taddhomādi daśāṃśataḥ || 70 || anayā sadṛśī vidyā trilokeṣu sudurlabhā | kevalaṃ tvatprayatnena kathitā kulasundari || 71 || kramāt vidyā maheśāni samastāyāṃ hi pūjayet | na kiñcit durlabhaṃ tasya triṣu lokeṣu vidyate || 72 || iha loke sukhaṃ sarvaṃ devīgaṇamathā'nyataḥ | goptavyaṃ tat prayatnena yasmai kasmai na vinyaset || 73 || || iti dvitīye muṇḍamālātantre ṣaṣṭhaḥ paṭalaḥ || 6 || samāptaścāyaṃ granthaḥ ########### END OF FILE #######