####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00042
Uniform title: parātrīśikālaghuvṛtti
Commentator : abhinavagupta
Editor : śāstrī j z

Description: 
E-text transcribed from the Kashmir Series of Texts and Studies Volume 68 .


Notes: 
The e-text was transcribed by the staff of Muktabodha under the direction of Mark S. G. Dyczkowski .  Revision 0:  April 13, 2007  

Publisher : Research Departement Jammu and Kashmir State
Publication year : 1947
Publication city : Shrinigar
Publication country : India
####################################################
parātrīśikālaghuvṛttiḥ |


mahāmāheśvarācāryavarya - śrīmadabhinavaguptaracitā |

yatra tejasi tejāṃsi tamāṃsi ca tamasyalam |
tejāṃsi ca tamāṃsyetadvande jyotiranuttaram || 1 ||

sadāgamapravāheṣu bahudhā vyākṛtaṃ trikam |
śrīmadutpaladevīyaṃ tantrasāraṃ tu varṇyate || 2 ||

sadābhinavaguptaṃ yatpurāṇaṃ ca prasiddhimat |
hṛdayaṃ tatparollāsaiḥ svayaṃ sphūrjatyanuttaram || 3 ||

tatra svātmadevataiva prabuddhyamānāvasthāyāṃ svātmānaṃ 
parāmarśośenāvatarantaṃ pṛcchatiṃ | tata ucyate śrīdevyuvāca iti | kiṃ 
pṛcchati ? tadāha -

anuttaraṃ kathaṃ deva svataḥ kaulikasiddhidam |
yena vijñātamātreṇa khecarīsamatāṃ vrajet || 1 ||

he svātmarūpa deva sarvatra jñāne karaṇe ca prathamamabhimukhībhūta, 
tava tāvadanuttaraṃ rūpam uttaram utkṛṣṭamuparivarti, tacca jaḍāpekṣayā 
grāhakarūpam | tasya tu cidātmanaḥ svaprakāśasya na grāhakāntaramastīti 
anuttaratvam | 

(p. 2) tena anuttaraṃ saṃvidrūpaṃ sadā sarvatrāvabhāsitaṃ 
pūrvāparadeśakālavihīnamanapahnavanīyam, kiṃ tatrocyatām | idaṃ tu 
tatrocyate tatkila kathaṃ kena prakāreṇa kaulikasya kulasamūhasya 
dehākṣabhuvanādeḥ apūrvarūpasya svataḥ svatantrataḥ siddhiṃ 
ubhayendriyasaṃvedyatayā abhivyaktiṃ dadāti, dā dāne do'vakhaṇḍane iti ca 
dhātugatyā sṛjati saṃharati cetyarthaḥ | anuttaraṃ cidekarūpaṃ sat kathaṃ 
navanavena ata eva paryanuyojyena vedyavedanavedakādibhedena bhātītyarthaḥ | 
nanu kimetena | jñātenānena prakāreṇa jñātamātreṇa khecarī 
bodhabhūmisaṃcāriṇī satī iyaṃ saṃvicchaktiḥ 1samatām avikalpatvaṃ 
pūrṇatvamātmano vrajet gacchejjānīyāt | 2tatprakārāparijñāne tu na khecarī 
abodharūpe vedyāṃśe saṃcaraṇāt | tata eva vedyaiḥ nīlādibhirniyantriteti na 
pūrṇaśaktiḥ | kiṃca dhāraṇādikrameṇa prāṇayogādikṛtāḥ siddhayaḥ santi 
anuttaraṃ saṃvinmātrarūpamakramaṃ kathaṃ kaulikasiddhiṃ sakramāṃ dadāti 
yena jñātamātreṇa devīrūpatvaṃ vrajet || 1 ||

etad guhyaṃ mahāguhyaṃ kathaya sva mama prabho |
hṛdayasthā tu yā śaktiḥ kaulinī kulanāyikā || 2 ||

tāṃ me kathaya deveśa yena tṛptiṃ vrajāmyaham |

	etadaprakaṭamatiśayena mahat utkṛṣṭamaguhyaṃ svaprakāśaṃ yathā 
bhavati tathā kṛtvā prabho 3ācchādane svarūpasya prakaṭane ca prabhavanaśīla 
he sva svātman mama pṛcchantyāḥ saṃvidaḥ 

______________
1tatsamatāmiti pāṭhāntaram |
2tatprakāre'parijñāte tu iti pāṭhāntaram |
3nijasvarūpasyācchādakaprakaṭananocchādanaikarūpa, prakaṭanena ca 
pramātṛrūpatvātprabhavanaśīleti pāṭhāntaram |


(p. 3) kathaya vimarśapadavīṃ 1vākyaprabandhaparyantatāmānaya | nanu 
grāhakarūpaṃ sarvasya hṛdaye sphurati tatra kiṃ praśnena | 2satyaṃ, sphuritamapi 
na tattvato hṛdayaṅgamībhūtam | hṛdayaṅgamībhāvena vinā 
bhātamapyabhātameva rathyāgamane tṛṇaparṇādivat | 
hṛdayaṅgamatāvagamanasādhyā hi tṛptirjīvanmuktatā, tatsamāveśasādhyā hi 
tṛptirvibhūtirūpeti dvividhā tṛptiḥ parāmarśena vinā na bhavatīti yukta eva 
praśnaḥ | tadeva darśayati hṛdayasthā hṛdaye saṃvidrūpe sthitā yā 
svātantryalakṣaṇā śaktiryasyāḥ kulaṃ grāhyagrāhakagrahaṇacakraṃ 
nirmeyatvena prayojanaṃ tata eva kaulinī | tasya nirmitasya kulasya nāyikā sā 
adhiṣṭhātrī, tadvedanena tadavabhāsanakartrī ca tatsvarūpasaṃhartrī ca | tāṃ me 
kathaya parāmarśapadavīṃ naya | yena parāmṛśyatānayanena tṛptiṃ 
bhuktimuktirūpāṃ vrajāmyahamiti saṃvedanarūpāṃ kathayeti ṇicau | evaṃ 
prabuddhyamānarūpā saṃvit yadā praśnaṃ 
nirbhṛtāvabhāsamānaparamārthasvarūpaṃ karoti tadā 
prabuddhāvasthāpratipattau saiva pūrṇarūpā bhairavadevatātmikā 
prativacanadātrī saṃpadyate | naca 3atra aidaṃprāthamikatvaṃ kadācit apitu 
purātanameva tatparamāvartamānaṃ kālabhedakalpanayā bhātīti bhūtatvena 
vyavahriyate || 2 ||

5divyarūpatvena pratyakṣābhāvātparokṣeṇa tadetaducyate 


śrībhairava uvāca |


śṛṇu devi mahābhāge uttarasyāpyanuttaram || 3 ||

kathayāmi na sandehaḥ sadyaḥ kaulikasiddhidam |

__________________
1vākyajanyaparyantatāmiti pāṭhāntaram |
2satyaṃ sphuratīti pāṭhāntaram |
3na cātrecchāṃ prāthamikīṃ kācidityapi pāṭhaḥ |
4vedyatvena cetyapi pāṭhaḥ |


(p. 4) kauliko'yaṃ vidhirdevi mama hṛdvyomnyavasthitaḥ || 4 ||

	1mahān bhāgaḥ prabuddhatvāvasthāyāmujjigamiṣālakṣaṇā yasyāḥ sā 
tvamevaṃbhūtā śṛṇu sphuṭamavadhāraya | 2ahamuttarasyāpi grāhakasyāpi 
yadanuttaraṃ rūpam | apiśabdād grāhyagrahaṇāderapi | kaulikasiddhidaṃ 
3viśvāvabhāsanādibhogāpavargatṛptiprayojanaṃ | tatkathayāmi tacca 
hṛdayaṅgamatāṃ nayāmi | yathā sadya eva avadhāraṇamātre saṃpanne eva 
punaratra sandeho na bhavati | yasmāt ayamiti bhāsamāno yaḥ kauliko vidhiḥ sa 
mama hṛdayākāśe hṛdayatvena sadā viditaḥ san cidātmatayā tāvadāste |

sadeva saumyedamagra .... ekamevādvitīyaṃ .... tadaikṣata

ityādiśruteḥ || 4 ||

tataśca 

athādyāstithayaḥ sarvāḥ svarā bindvavasānakāḥ |
tadantaḥ kālayogena somasūryau prakīrtitau || 5 ||

pṛthivyādīni tattvāni puruṣāntāni pañcasu |
kramātkādiṣu vargeṣu makārānteṣu suvrate || 6 ||

vāyvagnisalilendrāṇāṃ dhāraṇānāṃ catuṣṭayam |
tadūrdhve śādi vikhyātaṃ purastād brahmapañcakam || 7 ||

amūlā tatkramā jñeyā kṣāntā sṛṣṭirudāhṛtā |
sarveṣāṃ caiva mantrāṇāṃ vidyānāṃ ca yaśasvini || 8 ||

____________
1mahānubhavaikaprabuddheti pāṭhāntaram |
2yato'hamukrasyeti pāṭhāntaram |
3viśvāvabhāsakādibhogeti pāṭhāntaram |

(p. 5) iyaṃ yoniḥ samākhyātā sarvatantreṣu sarvadā |

iha padārthaprakāśanameva tāvat saṃvedanaṃ prasiddham, padārthaśca 
jñātṛjñeyasvabhāvaḥ, tatra jñātṛtā nāma unmeṣanimeṣalakṣaṇena 
saṃkocavikāsātmajñānakriyālakṣaṇena svabhāvena svaparispandanasārā natu 
pariniṣṭhitā | paricchinnajaḍarūpaghaṭāditulyasya ca saṃkocavikāsayogaḥ katham 
| trikoṇaṃ hṛdayaspandanādiṣu yathāyathā sphuṭībhavati tathātathā 
jñātṛtvamutkṛṣyate | 1yā bahiriva saṃvidi yathāyathā nyūnībhavati, tathātathā 
tannikṛṣyate | yāvajjaḍapāṣāṇādau svayaṃ saṃkocavikāsalakṣaṇo visargaḥ 
svātantryātmā bhagavato'nuttarasya śaktiḥ | tena 
bhairavasaṃghaṭṭaviśramaṇodayaparamārthaśivaśaktisvarūpaṃ 
rudrayāmalamucyate | saṃkocavikāsayoge eva madhye anuttaraḥ, ānandaḥ, icchā, 
īśanā, unmeṣaḥ, ūnatā, iccheśanayorasphuṭasphuṭavedyollāsaḥ ṛ ṝ ḷ ḹ 
bhavati, tayoriccheśanayoranuttarānanvābhyāṃ sandhiyamānatvāt e ai, 
unmeṣonatayostābhyāmeva tathākṛtatvāt o au iti bhavati, tadanantaraṃ 
vedyajātasya vedakātmakabindusvarūpasaṃskāraśeṣatvabhityanena rūpeṇa 
paripūrṇaṃ2 bhavati, ityevaṃ pūrṇānandacidrūpa3visargaśaktimayaṃ 
parabhairavayāmalam | tatra visargarūpatā sāmānyākārā viśeṣeṣu 
pañcadaśasviti pṛthag gaṇanārhā na bhavati | evaṃ kauliko vidhirmama tāvad 
hṛdi saṃvidrūpatādātmyenāvasthitaḥ | athānantara 4midaṃparāmarśamahimnā 
prasaranti ye akārādyā binduparyantāḥ 

____________________
1jñātṛtetyarthaḥ |
2pūrṇo bhavatityapi pāṭhaḥ |
3visargaśaktimayaparabhairaveti pāṭhāntaram |
4idamiti padaṃ nāsti ka. pustake |

(p. 6) svarāḥ, ta eva paramānandarūpasya sthitiṃ pūrayantīti tithaya uktāḥ | 
evaṃ sā bodhacandrasya prakāśānandamayasyānuttarasya vimarśaśaktiḥ 
pañcadaśabhistithibhiḥ pūryate | te caite sarve svarāḥ śabdanasvarūpāḥ 
1paramārthātmāno jagadapekṣayā svayaṃ rājantaḥ svaprakāśāḥ teṣāmantaḥ 
somasūryau saṃkocavikāsau tadātmā teṣāṃ tadantaḥ teṣāmantaḥ 
bindudvayātmā visarga iti yāvat | tataḥ sarveṣveteṣu kālena saṃkalanātmanā 
parāmarśanayogaḥ | tato hetoḥ | parāmarśo hi spandanātmaiva, natu 
pariniṣṭhitācalajaḍarūpaḥ | bahirapi ca somasūryau 
rātridivasasaṃkocavikāsarūpeṇa tithipañcadaśakasya antaḥ 2carataḥ iti | iyaṃ 
sā bhagavatī parāmarśaśaktiḥ | yaśca asāvicchāyāmīśane ca vedyollāsaḥ sa 
eva pṛthagbhavan sthūlatayā bhūtapañcakātmā sūkṣmatvena ca 
tanmātrapañcakātmeti daśa tattvāni, pṛthivī jalaṃ tejovāyurākāśaḥ gandho 
raso rūpaṃ sparśaḥ śabda iti | sa eva vedyollāsaḥ karaṇatayā 
sṛjyamānānīndriyāṇi tattatkriyāśaktipradhānāni 
upasthapāyupādapāṇivāgādīni karmendriyāṇi 3jñānaśaktipradhānāni 
buddhindriyāṇi ghrāṇarasanācakṣustvakśrotramiti | tato vedyatāyāḥ krameṇa 
saṃsāre vedanābhasasyollāse mano'haṃkāraḥ buddhiḥ pradhānaṃ purusaḥ | 
tathā pṛthivyādīni puruṣāntāni kādiṣu māntaṣviti | puruṣasya ca 
4saṃvedyarūpasyaivopari māntasya vedyarāśau gaṇanam | tena hi vinā 
pṛthivyādi vedyaṃ kathaṃ bhavet | 5tena vedyābhāsasyaiveyadrūpaṃ 
yadvedyarāśereva atyaktavedyabhāvasya bhinna -

____________
1paramārthātmano iti pāṭhāntaram |
2tithipañcadaśakasyāntaḥ carantaḥ iti pāṭhāntaram |
3jñānaśaktiprādhānyānīti pāṭhāntaram |
4 saṃvedyarūpasyaivoparimaṇasyetyapi pāṭhaḥ |
5na vedyābhāsasyaivedaṃ rūpamiti pāṭhāntaram |

(p. 7) vedyavedakaikīkaraṇam | tadvyāvṛttāni tattvāni | kalāḥ vāyurūpā kiṃcit 
kartṛtvena prerikā | aśuddhavidyā tejorūpā kiṃcijjñatvena prakāśikā ca | 
māyā salilarūpā abhiṣvaṅgarūpanimajjanātmakastambhanasvabhāvā | 
indropalakṣitā pṛthivīrūpā rāgaśaktiḥ | tā etāścatasraḥ śaktayaḥ puruṣaṃ 
dhārayanti madhye triśaṅkuvada1viśramayanti, anyathā pāṣāṇādivat 
jaḍabhumimevāpatetparameśvaravadvā saṃvidgaganamevāpatet | ubhayathāpi 
māyāpramātṛtābhāve vedyamapi na kiṃciditi, saṃkocavikāsāvapi na kaucit,  
saṃkocena vinā 2vikāsasyāpyayogāt | tadvisargarūpeṇa saṃkocavikāsātmanā 
idaṃ sarvamākṣiptaṃ | yat 3vedyasṛṣṭiḥ samuci(di)tavedakasṛṣṭiśceti | 
ākāśaśaktayā4 tu nātra māyāpramātṛtādhāne prayojanamasti | sā hi 
antarlīnā puruṣasya 5vedyaśūnyatayā vedyāvakāśasahiṣṇutayā ca 
6pramātṛtvāt tadīyā nityā vimarśaśaktiḥ | yadā tu vedyatāyāḥ krameṇa 
prachādanaṃ saṃvidrūpasya ca prathanaṃ tatra tāvat dhṛtiḥ, tadrūpasyaiva 
āpyāyanaṃ tatprakāśayogaḥ | tatraiva paramasvātantryalābhātmakaṃ 
spandanaṃ sarvatra tenaiva rūpeṇa vyāptam | ityetad bṛṃhakaṃ svarūpasya 
pūrakaṃ vyāpakaṃ pañcakaṃ śādīnāṃ 
vidyeśvarasadāśivaśaktiśivalakṣaṇaṃ 
sūkṣmapṛthivyaptejovāyvākāśarūpaṃ, 
sadyojātavāmadevāghoratatpuruṣeśānarūpaṃ 
brahmapañcakaśabdenākhyātamiti | evamasau 7parāpararūpā 8visargaśaktiḥ | 
tathābhūtañca 9pañcakarūpaṃ punarapyanuttaraviśrāntam | tadevaṃ 
10visargaśaktireva athādyā 

______________________
1viśrāmayantīti pāṭhāntaram |
2vikāsasyāpyabhāvāditi pāṭhāntaram |
3vedyasṛṣṭiśceti iti pāṭhāntaram |
4ākāśaśaktyātmeti pāṭhāntaram |
5vedyatveti pāṭhāntaram |
6pramātṛrūpatvāditi pāṭhāntaram |
7śrīparāpararūpeti pāṭhāntaram |
8vimarśaśaktiḥ iti pāṭhāntaram |
9bhūtapañcakarūpamiti pāṭhāntaram |
10tathaiva vimarśaśaktimayamityapi pāṭhaḥ |

(p. 8) ityādinā brahmapañcakam ityantenaiva vapuṣā vikasatīti | tadidaṃ 
śakticakramavicchinnaprabandhaṃ bhagavato bhairavanāthasya | 
anuttarecchonmeṣatrikoṇa1visargaśaktayaḥ eva hi 
pañcabhedavatya2ścidānandecchājñānakriyāśaktayo 
vācyabhūtapañcakaśaktimayyaḥ iti | tataśca 
sarvametadavibhāgaparāmarśarūpaṃ prathamataḥ tato 
vibhāgaparāmarśātmanā pañcāśadvimarśarūpaṃ parāmṛśyarūpeṇa tu 
3karmatāṃ prāptaṃ bahistattvajālaṃ jāyate | tasya parāmarśātmataiva jīvitam | 
sā ca mātṛkārūpā | ata eva sarveṣāṃ mantrāṇāṃ guptārthabhājāṃ 
4bījapiṇḍātmanāṃ catuṣkalanavātmādīnāṃ 
puruṣarūpavācyādhyavasitānāñca vidyānāṃ 
saṃvedyamānasphuṭārtharūpāṇāṃ namaḥśivāya ityādimālāmantrāṇāṃ 
strīrupavācyādhyavasitānāṃ ca sarveṣāmiyaṃ yoniḥ 
avibhāgaparāmarśatārūpaṃ kāraṇaṃ | sarveṣu śivarudrādirahasyatantreṣu 
yatkiṃciducyate tatsarvaṃ ita evodeti | 5yatkila parāvara6siddhidaṃ rūpaṃ 
tatsarvaṃ tattvaṣaṭtriṃśatyāṃ7 labhyate | tasyāśca parāmṛśyaṃ 
yajjaḍarūpaṃ śarīrasthānīyaṃ tasya parāmarśatā jīvitaṃ, sā ca asyāṃ 
bhagavatyāmiti ithameva sarvaṃ dadāti | ata eveha bhagavatyāḥ praṣṭurūpatvam | 
anayaiva hṛdayaṅgamatayā yaśasvini iti 8prasiddham | iyatā viśvātmarūpeṇa 
prasiddhā jāteti yaśasvinītyāmantraṇam | eṣā ca sā trividhā sṛṣṭirakāramūlā 
kṣakāraparyantā anuttararūpā 9prasūtiḥ punarapi śivātmanyeva10 
viśrāntidvāreṇa 
______________________
1vimarśaśaktaya iti pāṭhāntaram |
2paṃcabhedavata iti pāṭhāntaram |
3tūttaratāṃ prāptamiti pāṭhāntaram |
4bījātmagatānāmiti pāṭhāntaram |
5yatkiṃciditi pāṭhāntaram |
6parāsiddhirūpamiti pāṭhāntaram |
7triṃśatyetipāṭhāntaram |
8prasiddhamiti iti pāṭhāntaram |
9anuttararūpātprabhṛti iti pāṭhāntaram |
10śivātmanyevānuttaradhāmni iti pāṭhāntaram |

(p. 9) tatraivānuttaradhāmni viśramaṇaṃ yasyāḥ sā tathābhūtā udāhṛtā 
jñeyā satī | anayābhijñātayā tadanuttaraspandasvarūpaṃ suṣṭhu jñātaṃ 
bhavatīti yatkila tadanuttaramiti yāvat | evaṃ hṛdayasthā 
pūrvamavibhāgaparāmarśarūpā 1śaktiḥ vibhāgaparāmarśatāṃ 
kaulikasiddhirūpatāmanenaivānuttararūpasvātaṃtryeṇa pratipadyate iti nirṇītaṃ 
śivarudrarahasyāditantreṣu || 8 ||

	nanvavibhāgaparā2marśe pṛthagvibhāgaparāmarśamūlabhūte 
hṛdayasvarūpe 3sati na nivṛttaḥ sandehaḥ ? ityāśaṅkyādiśati 

caturdaśayutaṃ bhadre tithīśāntasamanvitam |
tṛtīyaṃ brahma suśroṇi hṛdayaṃ bhairavātmanaḥ || 9 ||

	caturdaśena svareṇa paripūrṇānuttarānandaśālinā 
saṃpūrṇakriyāśaktiśarīronmeṣonatvasaṃpadā 
kriyāśaktidvārānta4rlīnecchājñānayugalena yutaṃ satataṃ miśrībhūtaṃ 
yadidaṃ tṛtīyaṃ brahmasadāśivatattvā5tmakaṃ grāhyarāśivilakṣaṇaṃ 
sadrūpaṃ viśvaṃ tat tithīśānāṃ - pañcadaśānāṃ svarāṇāṃ 6yo'ntaḥ 
paryantasthitibhūto visargaḥ tasmin samyak aviyogena anvitaṃ viśrāntaṃ sat 
bhairavātmano bhagavataḥ śabdarāśeḥ viśvaśarīrasya hṛdayaṃ sārabhūtam | 
yathā hi sarvatattvamayaśarīrasya vibhaktatvagādisantānatantritasya7 
tadavibhāgaprakāśavimarśaviśrāntidhāma hṛdayapadamucyate, tathaiva 
bhagavato bhairavanāthasya tadidaṃ vibhaktatattvabhuvanādimayaṃ viśvarūpaṃ 
parāmarśasāraṃ pañcāśadvarṇamayaṃ śarīraṃ 

___________________
1śaktiḥ, sā vibhāgeti pāṭhāntaram |
2parāmarśasyatyepi pāṭhaḥ |
3satīti padaṃ nāsti ka. pustake |
4taduktaṃ [asmiṃścaturdaśe dhāmni sphuṭībhūtatriśaktike | triśūlatvamataḥ 
prāhaśāstā śrīpūrvaśāsane || taṃ lo. |] 
5sadāśivatattvātmakamaghoraprakāśasvarūpamasphuṭībhūtedantātmakagrāhya
rāśilakṣaṇamiti pāṭhāntaram |
6yato niścaya iti pāṭhāntaram |
7yaṃtritasyeti pāṭhāntaram |

(p. 10) tasya tadavibhāgaparāmarśasāramidaṃ hṛdayam | bho bhagavati suśroṇi! 
viśrāntaparamānandamayadhāmaśaktitrayagatānavaratasaṅkocavikāsarūpatriko.
naparispandanarūpametad hṛdayaṃ bhairavātmano bhairavasya 
ātmabhūtāyāstadavibhāgavatyāḥ śrīparādevyāḥ 1tattvaṃ bhavati | 
anuttararūpā saṃvit tāvat, bījātmano 2prathamasvarakoṭyoḥ 
svarūpaviśrāntisatattvayoḥ parispandena tatspandaprabhāvādeva madhyakoṭau 
vibhaktaparāmarśātmanā sṛṣṭirūpeṇa samastatattvama3yīti | ata eva vakṣyate 
sṛṣṭiṃ tu saṃpuṭīkṛtya iti || 9 ||

etannāyoginījāto nārudro labhate sphuṭam |
hṛdayaṃ devadevasya sadyo yogavimokṣadam || 10 ||

	etat bījaṃ yo labhate sa lābhakāla eva na paśuḥ, yato'smin labdhe etat 
hṛdayaṃ 4jāyate | etadahṛdayataiva bhairavatvam | 5tato rudrayoginīyāmalena 
6yāvat na jātaṃ śaktisvarūponmīlanaṃ tāvad etad hṛdayaṃ7 kathamasyonmīlati | 
asminnunmīlite satya'nena hṛdayena sahayogaḥ | etad hṛdayalābhaḥ 
śrībhairavayāmalasamāveśalakṣaṇo jīvata eva vimokṣada iti unmīlanamātre 
jīvanmuktatālakṣaṇā parā kaulikī siddhiranuttare saṃvinmātrarūpe yathā 
vidhīyate, tathā darśitam || 10 ||

	adhunā yena prakāreṇa aparā api siddhayo vibhūtilakṣaṇāḥ 
saṃvitparispandaparāmarśabalāt 
prāṇanāḍikālavelāmantravidyācaryādiviḍambananirapekṣāt bhavanti, taṃ 
prakāramupakra-

______________
1etattattvaṃ bhavati ka. pāṭhaḥ |
2spandena prathameti pāṭhāntaram |
3mayyaiveti pāṭhāntaram |
4jñāyate iti pāṭhāntaram |
5atheti pāṭhāntaram |
6yojanata iti pāṭhāntaram |
7hṛdayaprakāśamunmīlanaṃ mīlayatīti pāṭhāntaram |

(p. 11) mapūrvaṃ darśayati -

asyoccāre kṛte samyaṅ mantramudrāgaṇo mahān |
sadyaḥ sanmukhatāmeti svadehāveśalakṣaṇam || 11 ||

muhūrtaṃ smarate yastu cumbake nābhimudritaḥ |
sa badhnāti tadā dehaṃ mantramudrāgaṇaṃ naraḥ || 12 ||

atītānāgatānarthān pṛṣṭo'sau kathayatyapi |
praharādyadabhipretaṃ devatārūpamuccaran || 13 ||

sākṣāt paśyatyasandigdhamākṛṣṭaṃ rudraśaktibhiḥ |
praharadvayamātreṇa vyomastho jāyate smaran || 14 ||

trayeṇa mātaraḥ sarvā yogeśvaryo mahābalāḥ |
vīrā vīreśvarāḥ siddhā balavān śākinīgaṇaḥ || 15 ||

āgatya samayaṃ dattvā bhairaveṇa pracoditāḥ |
yacchanti paramāṃ siddhiṃ phalaṃ yadvā samīhitam || 16 ||

	etat saṃvittattvaṃ hṛdayatāṃ cet pratipannaṃ tadā jīvanmuktateti uktam | 
yadā tu 1tadeva prāṇabuddhibhūmiṣu siddharasavidhyamānadhātunyāyena 
samāveśakrameṇaitadhṛdayātmakaparāmarśapātratāpādanayā 
prāṇabuddhyādijaḍimanykkāriṇyā 2prasaradrūpamabhyāsadaśāṃ 
saṃpādyate, tadāsya svavimarśāveśābhyāsādeva 
nāḍīprāṇajayādiśāstrāntarīyayoganirapekṣā eva aparā api siddhayo 
vibhūtirūpāḥ kaulikasya siddhayo jāyante iti tātparyam | asya bījasyoccāre 
prāṇarūpatāyāṃ samāveśena tāvatkṛtamātra eva jñānakriyāśaktiśarīrā 
mantramudrāḥ sadya eva 


________________
1paraśarīrasyeti pāṭhāntaram |
2praharadvayamiti pāṭhāntaram |

(p. 12) saṃmukhatāmuccārayiturābhimukhyaṃ pratipadyante | katham 
svadehāveśalakṣaṇaṃ kṛtvā | tena hi prāṇena svadeho'pyāviśyate | tataśca 
saṃpūrṇajñānakriyātmaka1hṛdayarūpāntarlīnīkṛtena prāṇanāḍyadhiṣṭhito 
deho'pi 
tadhṛdayarūpatāsamāviṣṭajñānakriyātmikābhirmantramudrābhirāviśyate 
tāvattāvadupakramo vibhūtīnāṃ mantramudrāyattatvāditi | atha tathāveśo 
nirantaraṃ yadi ghaṭikādvayamabhyasyati cumbake vaktre 
samastabāhyasadrūpabhāvarāśiniṣṭhacumbanātmani nigiraṇapravṛtte 
kākacañcupuṭākāre sadvṛttirūpasomasvabhāvaparamaśītalarasāsvādakāriṇi 
sati nābhimudritaṃ nābhisthānāvadhiṃ kṛtvā 
2pūrṇakumbhakasamāveśābhyāsena, tadā mantramudrāsamūhaḥ dehe 
vāgrūpe kālarūpe ca 3pareśasyaivābhivyajyate buddhirūpe ca pratyagātmani 
prakāśate, jñānakriyāveśādyathā 4praśne kṛte jhaṭiti pratibhāsate, 
atītānāgatavartamānaṃ tatsarvamavitathameva bhavati | 5tathābhūtatejaśca 
sāmānyākāramantramudrāveśābhyāse dṛḍhībhūte tamevābhyāsaṃ 
nirantaraṃ madhye vicchedaśūnyamekarasaṃ sakṛdvibhātaṃ praharaparyanta 
tāṃ yadi nayati, yāṃ kāṃcinmantradevatāṃ mudrādevatāṃ vā hṛdaye 
saṃdhīyate, tadā 6tāmeva 
rudraśaktibhirnirantarasamāveśāvaṣṭambhanavīryarūpābhirākṛṣṭā-
mānītāṃ7 sākṣādrūpeṇa svaśarīratādātmyena pratipannāmākṛtitaḥ8 
paśyati | 9tathā prāpte'pi yadi samāveśaṃ na tyajati tadā praharadvayaṃ 
nirantaraṃ samāviṣṭo deha 

______________________
1hṛdayarūpasyāntarlīnasya kṛte iti pāṭhāntaram |
2pūrakakumbhaketi pāṭhāntaram |
3paravaśasyeveti pāṭhāntaram |
4prakaṭane kṛte ityapi pāṭhaḥ |
5tathā bhūte ceti pāṭhāntaram |
6tamevaṃ rūpaśaktibhiḥ iti pāṭhāntaram |
7āsāditāmiti pāṭhāntaram |
8ākṛtitaḥ kālataśceti pāṭhāntaram |
9tathā svīkāre prāpte ityapi pāṭhaḥ |

(p. 13) prāṇādikaṃ svakaṃ na kiṃcit paśyati 1nirāvaraṇaṃ cidrūpaghanameva 
sakalamavalokayati | tathā etasmin sarvadā yāvadatiparikṣīṇena dehena 
anyaśarīrakalpena avicchede punarapi yadā samāveśābhyāsaṃ na parityajati, 
yadā praharatrayaṃ nirantaraṃ sakṛdvibhātavibhedavandhyasvarūpe 
samāveśaśālini tiṣṭhati, tadā mātaro brāhmyādikāḥ, yogeśvaryaśca 
taccakrābhyāsasiddhāḥ vīrāśca aghorādayaḥ, vīreśvarāḥ 
navātmadevatāprabhṛtayaḥ samunmīlayanti | taccakrābhyāsa2jātavibhūtayaśca 
siddhā jāyante | ete mahatā bhairavabalena yuktāḥ | yaśca śākinīnāṃ 
śaktīnāṃ khecaryādibhedabhinnānāṃ saṃbandhī gaṇo vargaḥ bhairavabalena 
balavān | ete sarve paramāṃ siddhiṃ dharaṇyādiśivāntādhvaviṣayāṃ anenaiva 
dehena 3svatantratāṃ dadati | yataḥ ete sarve 4mātṛprabhṛtayo devatāviśeṣāḥ 
samayaṃ dattveti maryādāpūrvakaṃ bhairaveṇa bhagavatā svarūpāvibhedena 
svarūpāvabhāsanena bhairavacakrānujīvitatvena prakarṣeṇa 5coditāḥ | sarve ete 
devatācakreśvarā6stadāviṣṭaprāṇā 7bhairavabhūtā eva, atastadanugāminyo 
bhavanti | taduktaṃ āgatyeti | viśiṣṭaṃ kiñcidekatamaṃ 
uttamamadhyamādhamaphalarāśimadhyāt 
khaḍgagorocanoddiṣṭapātālādiphalaṃ hṛdaye'bhisaṃhitaṃ bhavati, tadā tadapi 
prayacchanti || 16 ||

	yathā anyeṣāṃ prāṇanāḍijayaprabhṛtīnāṃ yogānāṃ 
viśiṣṭacaryāsāmagryādibāhyāpekṣāvaśāt kālavelādisaṃkocaḥ 

___________________________
1nirāvaraṇeti pāṭhāntaram |
2vīreśvarā navātmadevatāprabhṛtayaḥ tacca krābhāseti adhikaḥ |
3svātaṃtryamiti pāṭhāntaram |
4mātrā iti pāṭhāntaram |
5bhāviteti pāṭhāntaram |
6tadāviṣṭaprāṇādiśceti pāṭhaḥ |
7bhairavabhūta eveti pāṭhāntaram |

(p. 14) yathoktaṃ 

	kulabījakamasyāntarbhogaḥ kaulaṃ kṛṣādiṣu |

iti | tathā atra na kaścidavacchada iti samādiśati -

anena siddhaḥ setsyanti sādhayanti ca mantriṇaḥ || 17 ||

ayaṃ triṣvapi kāleṣu aviśiṣṭa ityarthaḥ || 17 ||

nanu kiṃ tat sādhayanti1 anenetyāha

yatkiṃcidbhairave tantre sarvamasmāt prasiddhyati |
mantravīryasamāveśaprabhāvānna niyantraṇā* || 18 ||

	yadanyaśāstreṣu kicitsādhyamuktaṃ tatsarvamanenaiva siddhyatīti kā 
a2trāsādhyagaṇaneti yāvat | nanu kena vidhānenāyaṃ mantro grāhya 
ityāśaṅkyottaramāh - asminnaye na kadācinniyantraṇā | eta3tprāptimātrameva 
sādhyaṃ, natvatra vidyāvratādi kiṃcitsahakāribhāvenopayogi kevalaṃ 
parikṣīṇaśaṅkātaṅkatvamatra upayogi śaṅkāyāḥ sandehavipratipattisāratayā 
ekarasatadvimarśātmakasamāveśavighnabhūtatvāditi sphuṭīkriyate || 18 ||

adṛṣṭamaṇḍalo'pyevaṃ yaḥ kaścidvetti tattvataḥ |
sa siddhibhāgbhavennityaṃ sa yogī sa ca dīkṣitaḥ || 19 ||

anena jñātamātreṇa jñāyate sarvaśaktibhiḥ |
śākinīkulasāmānyo bhavedyogaṃ vināpi hi || 20 ||

avidhijño vidhānajño jāyate yajanaṃ prati |

	āsatāṃ tāvadanye vidhayaḥ4, maṇḍaladarśanopalakṣitamadhivāsanādi 
hātṛvadhiparyantaṃ mantrārpaṇavidhijātamapi na kiñci-

__________________
1sādhayatyaneneti pāṭhāntaram |
2sādhyānāmiti pāṭhāntaram |
3etatprāptireva sādhyeti pāṭhāntaram |
*mantravīryasamāveśe na kadācinniyantraṇā iti pāṭhāntaram |
4anyo vidhiḥ iti pāṭhāntaram |

(p. 15) datropayogī | evamiti uktaṃ vakṣyamāṇaṃ ca yastattvatā niḥśaṅkatayā 
vetti, sa bhuktimuktirūpasiddhibhāgī | sa eva paramārthato yogena 
samāveśalakṣaṇena yuktaḥ | sa eva satyataḥ 
śivatādānabhedapāśakṣapaṇalakṣaṇāṃ dīkṣāṃ prāptaḥ | 
etajjñānamātrādeva sarvaśaktyupalakṣito'sau saṃpūrṇasvarūpo 1jñāyate 
2siddho bhavatītyarthaḥ | 3etatsamāveśābhyāsādyogaṃ vināpi* śākinīkulena 
devatācakreṇa sāmānyastulyo bhavati anena jñātamātreṇa sarvasya vastunaḥ 
pūraṇāt | yajane yat vidhānamitikartavyatā, tāmavidvānapi vidvāneva bhavati 
pūrṇatatphalalābhāt | 4yastu laukikavaidikaśaivavāmadakṣiṇakulādiprasiddhān* 
5vidhīnvidhitvena na jānāti, sa eva 6atra yajane vidhijño jāyate anuttaravidhiṃ yato 
jānāti | anuttarasaṃvinmātrarūpe sarvamanyat bahiraṅgaṃ bhavati || 20 ||

	nanu caturdaśayutaṃ ityanena yat bījamuktaṃ, tat kathaṃ 
viśvāvibhāgisaṃpūrṇaśaktikasvātmarūpaparadevatāparāmarśa7mayaṃ 
bhavatīti nirūpayati -

kālāgnimāditaḥ kṛtvā māyāntaṃ brahmadehagam || 21 ||

_____________________
1jāyate ityapi pāṭhaḥ | 
2prasiddhi iti pāṭhāntaram |
3yataḥ samāveśābhyāsalakṣaṇaṃ yogaṃ iti pāṭhāntaram |
4yaśceti pāṭhāntaram |
5vidhitvena niyaṃtraṇātveneti pāṭhāntaram |
6sa evātra yajane iti pāṭhāntaram |
7rūpamityapi pāṭhaḥ |
*vināpi-ityanantaramayaṃ pāṭho'dhiko dṛśyate :- śākinīkulaṃ 
śakticakreśvaramekaṃ yāsyanti niścinvati | bhagavatyo devatāstāsāṃ 
mānanīyaḥ taccakreśvaratāyogyatvalābhāt [yogabalādbhavati] iti |
*prasiddhānityanantamayamadhikaḥ pāṭhaḥ - 
śaṅkāsaṅkocakāryakāraṇābhāvavṛttividhīn - iti |

(p. 16) śivo viśvādyanantāntaḥ paraṃ śaktitrayaṃ matam |
tadantarvarti yatkiṃcicchuddhamārge vyavasthitam || 22 ||

aṇurviśuddhamacirādaiśvaraṃ jñānamaśnute |
taccodakaḥ śivo jñeyaḥ sarvajñaḥ parameśvaraḥ || 23 ||

sarvago nirmalaḥ svacchastṛptaḥ svāyatanaḥ śuciḥ |
yathā nyagrodhabījasthaḥ śaktirūpo mahādrumaḥ || 24 ||

tathā hṛdayabījasthaṃ jagadetaccarācaram |

	*yathā ghaṭaśarāvaprabhṛtiprapañcavarjane mṛṇmātrameva satyaṃ, 
mṛdrūpatātmakaprapañcavarjanenāpi gandha ityeva satyaṃ 
gandharūpatāviśeṣāparāmarśe ahamityeva satyaṃ, tathābhūtabhedabhaṅge'pi 
sukhaduḥkhamoharūpatā sāram, sukhādivaicitryakartane 
vedyavedakamātrarūpatā, 1paryante vedyavedakarūpabhedavigalane sadityeva 
avaśiṣyate, tatrāpi varṇatrayaparāmarśaviśīrṇatākaraṇe 
ādyavarṇa2mātraviśrāntiḥ, tathā jalatattvāderapi māyātattvaparyantasya 
vedyarūpasyāśuddhādhvamadhyapātinaḥ sarvasyaivāntyaviśrāntikāle 
sarvamekaghanamamṛtamātmabhūtam, 3saiva brahmatāpattiḥ brahmavādināṃ 
viśrāntiḥ tannirmathanapravṛttyā 4tu bhairavo'pi, viśvasṛṣṭikārī | gītaṃ ca 

mama yonirmahadbrahma tasmingarbhaṃ dadhāmyaham |
saṃbhavaḥ sarvabhūtānāṃ tato bhavati bhārata || (bha0gī0 14|3)

iti | tasyāpi 5yadā 6sanmātraviśrāntidhāmnaḥ svarūpabhedavi -

_____________________
1pāryantikīti pāṭhāntaram |
2varṇamanuttaramātretyapi pāṭhaḥ |
3saiveti padaṃ nāsti ka. pāṭhaḥ |
4atreti pāṭhāntaram |
5yatheti pāṭhāntaram |
6saṃvinmātretyapi pāṭhaḥ |
*gandharūpatāviśeṣaḥ parāmarśataḥ ghaṭa ityeva satyaṃ tathābhūtaṃ 
jagadetaccarācaramityadhiko pāṭho dṛśyate |

(p. 17) galanena rūpaṃ parāmṛśyate, tadā 
prakāśavimarśanaśaktirūpe'nupraviṣṭasya tasyāvabhāsanamiti 
tacchaktisvarūpāttadabhinnaṃ paramārthata iti śaktisvarūpamevāvaśiṣyate iti | 
tacca icchā vā kriyā vā jñānaṃ vā yataḥ sarvaṃ vastu icchāmi karomi 
jānāmi vā ityevaṃbhūtavimarśaśaktiviśrāntyā vinā na jātucidavabhāti | 
icchāmītyatra ca śaktitrayānuvedhanamevaṃ jānāmi 
karomītyatrāviyuktatvādāstām | tena śaktitrayātmakasvarūpaviśrāntaṃ 
tadavabhāsamānaṃ bhavati | tasyāpi śaktitrayasya ekameva 1svatantraṃ svarūpaṃ 
svātaṃtryādeva | atha adha ūrddhvagranthirūpaṃ bindudvayamayaṃ 
saṃvidātmakaṃ parabhairavadevatātmakaṃ tāttvikaṃ vapuḥ | 
tadetadvedyavedanavedakaviśrāntitrayamayaṃ 2varṇatrayasvarūpaṃ tattrayam | 
tatra yāṃ viśrāntiṃ pradhānīkaroti tadantamevoccāraṇaṃ 3tridhā saṃpadyate | 
4tat trayopabhoge bhuktimuktiriti krameṇa siddhayaḥ 5yatra tadekaghana6 eva ekaḥ 
parāmarśo 7viśrāntisthānamakramaṃ sarvaṃ sadrūpamicchādidvāreṇa 
8parabhairave visṛjyate kṣipyate, 8parabhairave cābhedena 9tadicchādidvāreṇa 
vedyatayā bahirvisṛjyate iti naisargikasadrūpaṃ vedyaṃ 
bhairavātmakavedakasvarūpamityubhayaspa10rśanācchaktirūpateti cāturdaśī 
vedakavedanarūpāvaroheṇa vedyābhinnasāmānyarūpatā brāhmī viśrāṃtiḥ, - 
ityevaṃbhūtaviśrāṃtitrayamaya11śāntoditatadubhayalakṣaṇatrayaikarasatākāri 
paraṃ visargatattvaṃ saṃvidbhairavanātha eveti tātparyārthaḥ | yojanā tu - 
kālāgniṃ 

______________________
1svatantraṃ rūpamiti pāṭhāntaram |
2caraṇatrayeti pāṭhāntaram |
3iti tridheti pāṭhāntaram |
4tatra bhoga ubhayabhuktiriti pāṭhāntaram |
5yasya tu |
6tadekaghaṭa iti pāṭhāntaram |
7viśrāṃtisthānakramamityapi pāṭhaḥ |
8parabhairavecchābhedenetyapi pāṭhaḥ |
9tadiccheti pāṭhāntaram |
10vimarśanāditi pāṭhaḥ |
11śāntādi iti pāṭhāntaram |

(p. 18) pṛthvītattvaṃ saprathamabhuvanamāditaḥ 1kṛtvā māyātattvaparyantaṃ 
2tṛtīyabrahmaṇi 3viśrāntam | viśvetyādikrameṇa yat bhairavadevatācakraṃ 
parabhairavīyaṃ śaktitrayarūpaṃ śakticakraṃ, tadanantasya visargasyāntarvidyate 
| 4tasya ca yaścodakaḥ - prāṇena vinā sargacodanānupapatteścaturdaśaḥ 
prāṇarūpaḥ, sa eva śuddhādhvani vidyātattvādike 5śivatattvānte vyāpakaḥ | 
yato'tra sa parameśvaro vedyabhūtadehādisaṅkocavigamāt 
sanmātrapramātṛsvabhāvatvāt bhinnasya bhinnābhinnasya ca sarvasya jñātā 
kartā ca | parameśvaro vidyeśvaravargātprabhṛti māyāsaṅkaṭāntaḥ 
6pātitābhāvātsarvagaḥ, pāśairāgantukairviyogānnirmalaḥ, 
sahajāṇavamala7vaikalyāsaṃbhavāt svacchaḥ, krameṇa 
vedyarāśeridamityevaṃbhūtasyāhamityevācchādanena 
vyatiriktavedyākāṅchāviyogāt tṛptaḥ, svāyatanaḥ svātmanyeva yatamānaḥ 
prabuddhānandaḥ tata eva bhedalakṣaṇāśuddhitirodhānāt śuciḥ | evaṃ 
bodhaka8svarūpamayatvāt yo'ṇu9staccodakaviśrāṃtisamāveśābhyāsaniṣṭhaḥ, 
so'cirādeva 
tadantarvartiśuddhavidyādiśivāntatattvāntargata10śuddhādhvāvasthitamīśva-
rasya saṃbandhi jñānaṃ tadākṣiptaṃ ca kartṛtvaṃ viśuddhaṃ 
parāpararūpamaśnute prāpnoti | 11etacca viśrāntitrayābhyāse 
12tattatphalalābhopalākṣitaturīyaparaviśrāntau sarvamabhedaikarasenāste | yathāhi 
13nyagrodhadhānāyāṃ mahāvṛkṣastadātmakasvarūpaśaktyabhinna eva bhavati, 
tathā hṛdayātmani bīje caraṃ śuddhaṃ, acaramaśuddhaṃ, carañca pramātṛ, 
acaraṃ 

____________________
1chitvetyapi pāṭhaḥ |
2tṛtīyaṃ brahmaṇorūpe iti pāṭhāntaram |
3viśrāntaṃ paraṃ prāṇamityapi pāṭhaḥ |
4tasyāgre'yamadhiko pāṭhaḥ - ataḥ (antaḥ) paro yadapekṣayeti |
5śivānte iti pāṭhāntaram |
6patitvābhāvāditi pāṭhāntaram |
7vaikalpasaṃbhāvanādanyaḥ iti ca |
8codakasyevaṃbhūtarūpamayatvādityapi pāṭhaḥ |
9etaccodakaviśrāṃtiḥ samāveśo'bhyāseti pāṭhāntaram |
10śuddhāśuddheti ca ka. pāṭhaḥ |
11etadviśrāṃtibhāse iti pāṭhāntaram |
12tattatphalalābhopalakṣaṇaṃ caturthyantaparamiti ca pāṭhaḥ |
13nyagrodhanāmā iti pāṭhāntaram |

(p. 19) prameyamiti sarvaṃ hṛdgataśakti1kalāyā avibhāgenaiva 1mātīti || 24 ||

	tadatra sadyo yogavimokṣadam iti yat pūrvaṃ 
sūcitaṃparabhairavasamāveśaphalaṃ, tadupasaṃhāradvāreṇa prakaṭayati

evaṃ yo vetti2 tattvena tasya nirvāṇagāminī || 25 ||

dīkṣā bhavatyasandigdhā tilājyāhutivarjitā |

	evamiti - uktaprakāreṇa hṛdayaṃ 4tattvena niścayena niḥśaṅka tayā yo 
vetti tasya 5dīkṣā tattvena 6paramārthena 7nirvāṇaṃ phalatvena gamyate yayā sā 
asaṃdigdhā svapratyayenaiva etad hṛdayasvarūpalābha8yuktā bhavati | 
bhairavadevatābhirhṛdayāntargatābhiḥ 
svarūpanimīlanātmakaprapañcaspandaparivarjanena 
svarūponmīlanātmakaparispandapravaṇābhirdattametad hṛdayalakṣaṇaṃ paraṃ 
jñānaṃ 9kṣapitaśca saṃkocātmakamūlapāśa iti jānātyeva | tena 
10dānakṣapaṇalakṣaṇāṃ 11dīkṣāṃ 12svaprakāśaṃ nayet | na atra 
tilādīnāmupayogaḥ | etāvatā 
jīvanmuktyātmakaparamasiddhipariniṣṭhitadhiyaṃ13 prati 14anyalābhādikaṃ na 
kiṃcidupayujyate ityuktam || 25 ||

	adhunā tu samāveśābhyāsopayogī pūjāvidhirvaktavyo yato vakṣyate 
kṛtapūjāvidhiḥ samyak (33 ślo0)

_______________________
1kalāyāḥ iti ca pāṭhaḥ |
2bhavatī pāṭhāntaram |
3vedeti pāṭhāntaram |
4tattvo - iti pāṭhāntaram |
5dīkṣeti padamanyatra nāsti |
6paramārthena bhavatīti pāṭhāntaram |
7nirvāṇaphalatvena gacchati yasya sā asaṃdigdheti pāṭhāntaram |
8lābho bhavatītyapi pāṭhaḥ |
9kṣapitasaṃkocātmamūlapāśa ityapi pāṭhaḥ |
10dānakṣapaṇalakṣaṇā iti ca pāṭhaḥ |
11dīkṣeti ca pāṭhaḥ |
12svaprakāśaṃ (svapratīti) iti pāṭhāntarāṇi |
13hṛdayamityapi pāṭhaḥ |
14hṛdayalābheti pāṭhāntaram |

(p. 20) iti | tadatra dehaprāṇabhuvi buddhipade ca samāveśābhyāsa iti | tatra 
hṛdayamātmasātkartuṃ nyāsaṃ darśayati 

	mūrdhni vaktre ca hṛdaye guhye mūrtau tathaiva ca || 26 ||

	nyāsaṃ kṛtvā śikhāṃ baddhvā saptaviṃśatimantritām |
	ekaikena diśāṃ bandhaṃ daśānāmapi kārayet || 27 ||

	tālatrayaṃ purā dattvā saśabdaṃ vighnaśāntaye |
	śikhāsaṃkhyābhijaptena toyenābhyukṣayettataḥ || 28 ||

	puṣpādikaṃ kramātsarvaṃ liṅgaṃ vā sthaṇḍilañca vā |

	purā pūrvaṃ tālatrayaṃ 1hṛdbījakalātrayaviśrāntitrayarūpaṃ 
vaikharīśabdaparyantaṃ svātmano dadyāt | tatsvīkārakaṃ svātmānaṃ 
vighnānāṃ caturaṇḍagatabhedābhimānasaṅkalpānāṃ śāntaye 2bahirantaśca 
pādapāṇihastamukhaśabdakrameṇa 
pātālabhūmyantarikṣagatabhedavighnaśamanāya kuryāt | evaṃ kṛtvā 
mūrdhādisthānatādātmyāpattibhāji hṛdayasthāne eva daṇḍabhaṅgibhāji 
hṛdayabījena pañcakṛtva uccāritena 
janmacārapravāhalayavicchittilakṣaṇacidānandecchājñānakriyālakṣaṇaspanda-
pañcakabhāṅ nyāsaṃ śarīre kuryāt | śikhāyāśca 
taddehagatamūrdhādipañcaśaktikabrahmapañcakāvibhāgabhūmibhājaḥ 
prāṇabuddhirūpāyāḥ pañcakasya pratyekaṃ 
pañcakabhedātprathamacaramakoṭidvayabhedasparśācca saptaviṃśatikṛtva 
uccāritena hṛdayabījena hṛdayarūpatāviśramaṇarūpaṃ niyantraṇātmakaṃ 
bandhaṃ kuryāt | tataśca 3sthānabījarūpahṛdayamayīkartuṃ daśa diśaḥ 
sakṛtsakṛ4duccāryamāṇena hṛdayabījena badhnīyāt 
hṛdayarūpānuttaraparāmarśaśeṣā eva kuryāt | etyevaṃ kṛtvā puṣpādike 

_______________________
1hṛdayabījeti pāṭhāntaram |
2bahiḥ svapāṇihasteti pāṭhāntaram |
3sthānarūpīti pāṭhāntaram |
4uccāriteneti pāṭhāntaram |

(p. 21) pūjopakaraṇe'pi arghyapātraviśrāntaparamānandarasasya 
saptaviṃśatikṛtoccāritena hṛdayabījena hṛdayatādātmyaṃ kṛtvā 
tadrasābhyukṣaṇadvāreṇa hṛdayatādātmyaṃ kuryāt | anantaraṃ pūjādhārasya 
liṅgasthaṇḍilādeḥ | evaṃ sāmānyena bhedaṃ vilāpya 
1dehaprāṇādhiṣṭhitamapāsya tadupāsyayāgagṛhe'pyapohya pūjopakaraṇeṣu 
parākṛtya pūjādhāre'pi nirākuryāditi tātparyam || 28 || 

	evaṃ kṛte sati paścāttatra 2pūjādhāre bāhyābhyantarādi 
bahubhedaśatānyatama3rūpe yathāruci yathāsaṃbhavaparigṛhīte4 
liṅgasthaṇḍilamaṇḍalādike pūjyaparikalpanāpūrvakaṃ 5pūjāsvarūpamāha 

caturdaśābhijaptena puṣpeṇāsanakalpanā || 29 ||

tatra sṛṣṭiṃ yajed vīraḥ punarevāsanaṃ tataḥ |
sṛṣṭiṃ tu saṃpuṭīkṛtya paścādyajanamārabhet || 30 ||

sarvatattvasusaṃpūrṇā sarvāvayavaśobhitām |
yajed devīṃ mahābhāgāṃ saptaviṃśatimantritām || 31 ||

tataḥ sugandhipuṣpaiśca yathāśaktyā samarcayet |
pūjayet parayā bhaktyā svātmānaṃ ca nivedayet || 32 ||

	caturdaśeti - jāgradādituryāvasthāntadaśācatuṣṭayavyāptiśāli 
yadetadaukārāntaṃ bījasya vapuḥ, tāvatyāṃ vyāptāvāsanaṃ kalpanīyam | 
tathābhūtaukāraviśrāntā6 ādikṣāntā sṛṣṭirvisargaśaktisvīkṛtā uparivartinī 
bhāvanīyā | sarvābhedaghanatu -

_________________
1dehaprāṇādiṣviti pāṭhāntaram |
2pūjādhāreṣvapīti ka. pāṭhaḥ |
3rūpeṇeti pāṭhāntaram |
4parigṛhīteti pāṭhāntaram |
5pūjāsvarūpāvagamāditi pāṭhāntaram |
6viśrāntā ityanantaraṃ sarvairvā - iti padamasti |

(p. 22) ryātītavṛttiviśrāntyāṃ tasyāṃ yat viśramaṇaṃ visargaḥ, sa eva yāgaḥ 
| tasyāmapi ca turyātītavṛttau visargakalāyāṃ svīkṛtasakalasṛṣṭikāryāyāṃ 
tadeva jāgradādidaśācatuṣkakroḍīkārakamaukārāntaṃ rūpaṃ prakṣipya yajet 
1yanmadhyavartivisarga ubhayakoṭi2gatasadvṛttisparśī, visargā3tmarūpāmata eva 
sarvatattvamayīṃ sarvaiśca avayavāyamānairbhāvarāśibhiryuktāṃ 
maheśānasya parabhairavasya abhedena vartamānāṃ 
śrīparādevatāmanuttarasvarūpāṃ svīkaroti | etaduktaṃ bhavati | hṛdayasya 
mūlabhāge 4sadvṛttirūpe vedyāṃśe 
jāgratsvapnasuṣuptātmakātisphuṭasphuṭāsphuṭāsphuṭabhedatrayaśālini 
sarvadā sanmātraprathamakalāvapuṣi viśramyāvṛttau anuttararūpāyāṃ 
śaktiśivatattvāntaṃ krameṇa turīyapadaparyantaṃ viśrāntena 
kramābhinnasamastatattvasvīkaraṇādāsanavyāptiḥ pradarśitā bhavati | tato 
visargātmikā ṣoḍaśī bhairavātmikā kalā yāvat sarvottīrṇā spṛśyate, tāvat 
tasyāṃ sarvamabhedena āste iti samastābhedarūpā saptadaśī yāsau kalā, saiva 
anuttararūpā yājyā | tasyāṃ 5tathā pravartitā viśrāntiḥ | sa eva paramārthato 
yāgaḥ | tadrūpatāsiddhyarthameva tu sugandhibhirayatnata eva 
hṛdayānupraveśaśālibhiḥ puṣpair6hṛdayāntaḥsvarūpasamarpaṇādeva 
hṛdayasya poṣakairbāhyābhyantaraiḥ sarvairdravyairyathāśaktitayā, 
asvīkṛtaśaktisvarūpasya saṅkucitavṛtteryāgaṃ pratyayogyatvāt śaktyā 
svarūpavikāsarūpayā tadupayoginyāpi bāhyayā ānandinyā 
snānavilepanadhūpatāmbū-

_________________________
1yeneti pāṭhāntaram |
2gatasvarasadvṛtti-iti pāṭhāntaram |
3sarvātītarūpāmityapi pāṭhaḥ |
4sadvyāptirūpavedyāṃśe iti pāṭhāntaram |
5tathā ityanantaramayaṃ pāṭho'dhiko dṛśyate - tathā pūraṇā (pūrṇā) at eva 
saptaviṃśatikṛtvaḥ (kṛtva) pravartiteti | 
6hṛdayānteti pāṭhāntaram |

(p. 23) lāsavādisaṃbhārasubhagayā bāhyadravyaśaktyā samyagarcayet | katham, 
parayā bhaktyā parimitasya dehaprāṇapuryaṣṭakāderapradhānatākareṇana 
tadrūpatānimajjanātmakaprahvībhāvasaṃpādanapuraḥsareṇa 
taduktarūpayājyadevatātmakaparasaṃvidrūpapradhānatvāpādanalakṣaṇena 
bhajanena 1śraddhātiśayena samāveśadāyinetyarthaḥ | parā cāsau bhaktiḥ | 
puṣpāderyāgopakaraṇasya svātmahṛdayahaṭhānupraveśasundaro yo bhāgo 
ramaṇīyaḥ parimalaḥ tena pūryamāṇamātmānaṃ 
sarvābheda2rūpavṛttiniścayātmanā niyamena 3vedayet | saptaviṃśatikṛtvaḥ4 
uccāraṇāvasare tat tat 
puṣpādibāhyābhyantarabhāvarāśi5saṃpūryamāṇābhinnasvarūpaṃ 
śrīparādevatāmayamātmānaṃ yathā vetti, tathā punaḥpunarātmasvarūpaṃ 
parāmṛśediti yāvat | eṣā 6tāvatsphuraṇarūpā pūjā | tataśca 
jaṭharīkṛtasamastabhogyasvabhāvatattvaprasarasya bhokturbhagavato bhairavasya 
uddīpanātmanā homena 
tadantaḥkṛtasaṃskāraśeṣabhogyasvabhāvavilāpanadahana sāmarthyāt 
parāmarśaḥ kartavyo yena jīrṇanyāyena saṃskārasya bījarūpatayā 
7suṣuptyavasthāvat 
punarutthānalakṣaṇasaṃskārātmakamūlabhedaprasavamahāvyādhiśaṅkā 
śāmyatīti || 32 ||

	anenābhiprāyeṇa yajanamupasaṃharan homaṃ sūcayati |

evaṃ yajanamākhyātamagnikārye'pyayaṃ vidhiḥ |

	tatrāpi tilādīnāṃ śikhāsaṃkhyābhijaptena toyena abhyukṣaṇaṃ 
sruksruvādīnāṃ vahnau caturdaśābhijaptena puṣpeṇāsanakalpanā 
ityādisaṃpuṭīkaraṇaparyantaṃ yājyadevatāsamarpaṇam | tatasti-

____________________
1sadya atiśayeneti pāṭhāntaram |
2rūpāṃ vṛttimiti pāṭhāntaram |
3niyamayet iti pāṭhāntaram |
4kṛtvoccāraṇāvasare iti pāṭhāntaram |
5saṃpūryamāṇaṃ nijasvarūpamiti pāṭhāntaram |
6tāvatpūraṇarūpeti pāṭhāntaram |
7suṣuptyavasthādṛṣṭāntena (suṣuptāvṛttānteneti) pāṭhāntaram |

(p. 24) lājyādihavanaṃ saṃpūrṇarūpatayā ātmānaṃ ca nivedayet iti 
vyākhyātena krameṇa pūrṇāhutyārpaṇamiti agnikāryavidhiḥ | evaṃ 
yāgahomomaya1melanātmakaṃ pūrṇaṃ hi pūjāyāḥ svarūpam ||

	iyatā ca svātmarūpā śrībhagavatī parā devī samyak pūjitā bhavati | 
yato'2ntarmalasya 3vigalanaṃ 4 yāvanna jātaṃ tāvat sphuṭasaṃvidātmakatvaṃ 
pūritaṃ na bhavati, tato pūjaiveyamityābhyantarasaṃkalpanivṛttyā 
bāhyadravyasaṃharaṇenaitadāha 

	kṛtapūjāvidhiḥ samyak smaran bījaṃ prasiddhyati || 33 ||

	ādyantarahitaṃ bījaṃ vikasattithimadhyagam |
	hṛtpadmāntargataṃ dhyāyet somāṃśuṃ nityamabhyaset || 34 ||

	samyagiti uktaprakāreṇa kṛtapūjāvidhiḥ, samyagiti ca 
uktavakṣyamāṇopadeśadiśā bījaṃ smaran parāmṛśan samyak prasiddhyati 
parabhairavadevatāvadanenaiva dehena samastavibhūtibhājanaṃ bhavati | asya 
hṛdayaparāmarśasyābhinavābhinavarūpatayā bhāsamānasya 
pūrvapūrvatarādeḥ samyaganavabhāsamānatvāt 
kālabhedayogāpahastanādavabhāsanīyasya vastunaḥ sarvathā 5ābhyantarasyaiva 
sataḥ prakāśanāt smaraṇarūpasādṛśyāt smaraṇatvena vyapadeśāt 
śatṛpratyayena ca bhūtābhinnaṃ vartamānaṃ darśayitvā idaṃ sūcitaṃ bhavati 
| tathā ayaṃ parāmarśaḥ svīkartavyaḥ, yathā vicchedaśūnyaḥ 
sakṛdvibhātasvabhāvo'kālakalitaḥ saṃpadyate | samyaksmaranniti (yat) uktaṃ tat 
samyaktvaṃ yadyapi pūrvaṃ darśitaṃ 

______________________
1melanātmakādipūrṇaṃ hi iti pāṭhāntaram |
2antarlīnasyeti ka. pāṭhaḥ |
3vigalitamiti ka. pāṭhāntaram | 
4yāvatsvātmarūpaṃ neti pāṭhāntaram |
5sarvadābhyantare rahasya iveti pāṭhāntaram |
6vibhedaśūnya iti pāṭhāntaram |

(p. 25) kālāgnimāditaḥ kṛtvā ............................................. | (21 ślo)

ityanena vistṛtagranthena tathāpi sphuṭena rūpeṇa nirṇītaṃ nirūpayati 
ādyantarahitamiti | bījaṃ vācakarūpaṃ hṛdayaṃ tasya vācyaṃ somāṃśaṃ 
saśaktikasya bhagavato bhairavanāthasya yāmalaṃ saṃghaṭṭaprabhāpuñjastaṃ 
vācyavācakābhedakrameṇa abhyasediti upadeśaḥ | somāṃśamiti pāṭhe tu 
paripūrṇajñānacandrātmakaṃ prakāśānandaparamārthaṃ | 1tata eva 
jvalanagalanavṛttisārasaṃkocavikāsaśaktipradarśitaviśvonmeṣanimeṣaśata-
saṃpādanāpratihatasāmarthyamūlena uttarottareṇa sakāra aukāra - 
aḥkāralakṣaṇena bhāgatrayeṇa āviṣṭamanuttaraṃ trikoṇātmakaṃ 
mahāhṛdayam | tasya ca trayo bhāgā aṃśāḥ | somaśca aṃśaśceti samāhāre 
dvandvaḥ | tadetat catuṣkamābhimukhyena svasaṃvidrūpahṛdayaviśrāntaṃ sat 
buddhiprāṇadehabhūmiparyantasvīkārātmanā samāveśaparyantaṃ kṣipet 
tadrūpaparāmarśapradhānaṃ vigalitajaḍabhāvaṃ tadavaṣṭambhaikasāraṃ 
buddhiprāṇadehendriyādikaṃ samastaṃ kulaṃ tatraiva 
tadrūpaprakāśanavikāsavaśāt prakāśakulatāmāyāntaṃ kuryāditi 
visargacatuṣkasamāeśo'nena darśitaḥ | tatra mukhyameva tāvat 
pūrṇahṛdayasvarūpamāha ādyantābhyāmutpattivināśābhyo rahitaṃ yat 
2viśvasya bījaṃ, tata eva bījatvāt viśvātmanā vikasat anavarataṃ vikāsaṃ 
gacchat viśvasya kālarūpāṇāṃ tithīnāṃ madhyagaṃ sāmānyarūpatayā 
avibhāgaparāmarśarūpaṃ svasminhṛdaye saṃvillakṣaṇe 
saṃkocavikāsalīlāyogātkamalarūpe'ntargataṃ tāṃ saṃvidaṃ praviśya 
saṅkocahaṭhāpasaraṇakāritayā vikāsayat dhyāyet nityam | ataśca 
pūrṇabhairavatāsiddhiḥ | utthānāpekṣayā pāṭhāpekṣayā ca | ādyantau 
svaravyañjanarūpau | tadrahitaṃ yat bījaṃ 

______________________
1tadeveti pāṭhāntaram |
2vihṛhyeti pāṭhāntaram |

(p. 26) visargātmakaṃ yataśca anyā pañcadaśa tithayo vikasanti, tacca 
sarvatithīnāṃ1 madhyagatam | tat hṛdayapadme pūrvavat dhyāyet | 
*etadbījāpekṣayā ādyantābhyāṃ vyañjanavisargābhyāṃ rahitaṃ 
triśūlavṛttimātrarūpaṃ, vikasat tithiṣu prāṇāpānakalāsu madhyagataṃ 
tatprāṇarūpasamāveśakāri taddvāreṇa dehaṃ samāviśat bījarūpeṇa hṛdi 
dhyāyet | avarge sthitā varṇāḥ | ādayaḥ svarāḥ, anta iti yaḥ tadantaḥ kālayogena 
ityatra visarga uktaḥ, tena svaravisargābhyāṃ rahitamanackasadvṛttirūpaṃ bījaṃ 
tathaiva 2vikāsinīṣu prāṇāpānakalāsu madhyagataṃ dehe hṛdi dhyāyet || 34 ||

3atra phalamāha -

	yānyān kāmayate kāmāṃstāntāñchīghramavāpnuyāt |
	ajñaḥ pratyakṣatāmeti4 sarvajñatvaṃ na saṃśayaḥ || 35 ||

	evaṃ mantraphalāvāptirityetadrūdrayāmalam |
	etadbhyasyataḥ siddhiḥ sarvajñatvamavāpnuyāt || 36 ||

	etāśca siddhaya uktā eva, eṣu kālāgnimāditaḥ 0 iti atra śīghramiti 
muhūrtaṃ smarate yastu iti asmāt pratyakṣatāmeti sarvajñatvaṃ iti ca 
praharatrayamātreṇa siddhiruktā | praharacatuṣkavibhedena samāveśe tu 
sarvasminneva prakāśamaye dinarūpatāṃ gate śarvari saṅkoce kṣīṇe anenaiva 
dehena bhairavavat sarvajño bhavati | etadupasaṃharati - evamiti evaṃ sarveṣāṃ 

______________________
1bījānāmiti pāṭhāntaram | 
2vikasatsu iti pāṭhāntaram |
3tatra ka. pāṭhaḥ |
4yātīti pāṭhāntaram |
5muhūrtādīnāmiti pāṭhāntaram |
6agneḥ pratyakṣatāmiti pāṭhāntaram |
*ayaṃ pāṭho'dhiko dṛśyate - iha 
viśeṣabhogyasvabhāvavilāpanadahanaparāmarśaḥ kartavyaḥ 
visargāṃśasamāveśaḥ |

(p. 27) mantraphalānāṃ 2parāparasiddhirūpāṇāṃ yasmādita eva 
anuttarabījādavāptiḥ, ato hetoretadeva 
sapādakoṭirudrayāmalaphalasaṃpādakatvāt rudrayāmalaṃ śivaśaktyoratra 
nityasaṃghaṭṭāt | ata eva etadbhyasyataḥ saṃkṣepataḥ phalaṃ 
sarvajñatvasarvakartṛtvalakṣaṇabhairavarūpatālābha ityāha 

	etadabhyasyataḥ ........................................

iti | abhyāsena vināpi tu jīvanmuktatā paramā kaulikīsiddhiriti śivam || 36 ||

************

	yadālūnaviśīrṇaṃ sadgopitaṃ tantrabhāṣayā |
	atrābhinavaguptena bhāsitaṃ tadanuttaram || 1 ||

	etadvivekaniṣṭhāstu mā bhūta bhramabhājanam4 |
	sacchiṣyāḥ prāpnutādyaiva5 bhairavībhāvasaṃpadam || 2 ||

	saṃpūrṇānuttarānandayogakṣemādi6 jānatām |
	trilokīkavalīkārasamāveśaviśāradāḥ || 3 ||

	yasyāṃ sadātmanā pūrṇamicchājñānakriyātmanā |
	visṛjyate yataścaimāṃ vande'nuttarasaṃvidam || 4 ||

___________________
1mantrakalānāmiti pāṭhāntaram |
2parāparāṇāṃ kaulikīsiddhi ityapi pāṭhaḥ |
3bhāṣitamityapi pāṭhaḥ |
4bhājanāḥ iti pāṭhāntaram |
5prāpnuyādeva ityapi pāṭhaḥ |
6bhijāyatāmiti pāṭhāntaram |

(p. 28) abhinavarūpāśakti-
		stadgupto yo maheśvaro devaḥ |
	tadubhayayāmalarūpa-
		mabhinavaguptaṃ śivaṃ vande || 5 ||

***********

samāptā iyamanuttaratattvavimarśinī
parātrīśikālaghuvṛtti -
trinayanacaraṇasaroruhācintanalabdhaprasiddhināma-
bhinavaguptapādānāṃ kṛtiriti śivam ||

***********


###########   END OF FILE  #######