####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00041
Uniform title: paramārthasāra
Main title: paramārthasāra of abhinavagupta with the commentary by yogarāja
Author : abhinavagupta
Commentator : yogarāja
Editor : Chatterji J. C.

Description: 
E-text transcribed from volume 7 of the Kashmir Series of  Texts and Studies .


Notes: 
Transcribed by the staff of Muktabodha under the supervision of Mark S. G.  Dyczkowski .  Revision 0:  28/11/2005  

Publisher : Research Department Jammu and Kashmir State
Publication year : 1916
Publication city : Shrinigar
Publication country : India
####################################################


oṃ namaścidātmaparamārthavapuṣe ||

atha

paramārthasāraḥ
 
śrīmanmahāmāheśvarācāryavaryaśrīmadabhinavaguptācāryaviracitaḥ |

śrīmadyogarājācāryakṛtavivṛtyupetaḥ |

ciddhano'pi jaganmūrtyā śyāno yaḥ sa jayatyajaḥ |
svātmapracchādanakrīḍāvidagdhaḥ parameśvaraḥ || 1 ||

yo'yaṃ vyadhāyi guruṇā
	yuktyā paramārthasārasaṃkṣepaḥ |
	vivṛtiṃ karomi laghvīm
asmin vidvajjanārthito yagaḥ1 || 2 ||

iha śivādvayaśāsane dehādipramātṛtāprādhānya-

__________________FOOṭṇOṭEṣ___________________

[1 yogaḥ yogarājābhidha ācāryaḥ |]


--------------- page  2 -----------------
 svasaṃkalpasamutthaśaṅkātaṅkālasyasaṃśayādirūpavighnaughaprasara-
pradhvaṃsapūrvikāṃ śāstraniṣpattiṃ manyamānaḥ, 
parimitapramātṛtādhaspadīkāreṇa cidānandaikaghana - 
svātmadevatāsamāveśaśālinīṃ samastaśāstrārthasaṃkṣepagarbhāṃ 
prathamataḥ tāvat parameśvarapravaṇatāṃ parāmṛśati

paraṃ parasthaṃ gahanād anādim
ekaṃ niviṣṭaṃ bahudhā guhāsu |
sarvālayaṃ sarvacarācarasthaṃ
tvāmeva śaṃbhuṃ śaraṇaṃ prapadye || 1 ||

	tvāṃ sarvapramātṛsphurattāsāraṃ svātmadevatārūpameva śaṃbhuṃ 
anuttaraśreyaḥsvabhāvaṃ sattātmakaṃ, śaraṇaṃ trātāraṃ 
tvatsamāveśasamāpattaye saṃśraye | eva - kāraḥ, śambhuṃ 
svātmadevatākārameva prapadye, na punaḥ māyāntaścāriṇaṃ kaṃcit bhinnaṃ 
devam - iti anyayogaṃ vyavacchinatti | anyacca kiṃbhūtaṃ paraṃ pūrṇaṃ 
cidānandecchā

--------------- page  3 -----------------
 - jñāna - kriyāśaktinirbharam anuttarasvarūpam, tathā parasthaṃ gahanāt 
iti, gahanāt māyābhidhānāt tattvāt parasmin pūrṇa eva 
śivādividyātattvaparyante śuddhādhvani svarūpe tiṣṭhantaṃ, na punaḥ 
tattadavasthāvaicitryeṇāpi sphurataḥ, tataḥ parasmāt pūrṇāt svarūpāt tasya 
pracyāvo bhavati | yaduktam

	jāgradādivibhede'pi tadabhinne prasarpati |
	nivartate nijānnaiva svarūpādupalabdhṛtaḥ || (spa. 1 | 3)

iti spandaśāstre | anādiṃ purāṇaṃ sarvapratītīnām anubhavitṛtayā 
pramātṛtvena ādisiddhatvāt, ekam iti asāhāyaṃ, cidaikyena sphuraṇāt bhedasya 
anupapatteḥ | tathā niviṣṭam ityādi | evaṃ jātīyakamapi svasvātantryeṇa 
bahudhā nānāprakāraiḥ bhedaiḥ guhāsu rudra2 - kṣetrajñarūpāsu hṛdguhāsu 
antarāviṣṭaṃ, caitanyarūpo'pi svayaṃ jaḍājaḍātmatāmābhāsya naṭavat 
nānāpramātṛtayā

__________________FOOṭṇOṭEṣ___________________

[2 rudrā bhuvanapatayaḥ kṣetrajñāḥ paśupramātāra iti |]

--------------- page  4 -----------------
 sthitaḥ - iti yāvat | ata eva sarvālayam iti, sarvasya rudra - 
kṣetrajñādipramātṛ - prameyarūpasya jagataḥ ālayaṃ viśrāntisthānaṃ | 
sarvamidaṃ kila pūrṇapramātari sthitaṃ sat, grāhyagrāhakayugalakāpekṣayā 
unmagnamiva bhedena prakāśamānaṃ nānārūpaiḥ vyapadiśyate, anyathā 
etasya prakāśāt bhinnasya sattaiva na syāt, kutaḥ idaṃ viśvam - iti 
sarvanāmapratyavamarśaḥ | na etāvatā bhagavataḥ samuttīrṇaṃ svarūpam - 
ityāha sarvacarācarastham iti | sarvamidaṃ yat jaḍājaḍasvabhāvaṃ viśvaṃ, 
tadrūpatayā tiṣṭhantaṃ, 

	kartāsi sarvasya yataḥ svayaṃ vai
	vibho tataḥ sarvamidaṃ tvameva |

iti nyāyena hi vyatiriktasya anyasya aprakāśamānasya kāryatvānupapatteḥ |

	bhoktaiva bhogyabhāvena sadā sarvatra saṃsthitaḥ | (sp. 3 | 2)

--------------- page  5 -----------------
 iti bhagavāneva tathā tathā cakāsti - iti | evaṃ vidhaṃ tvām anuttaraṃ 
sarvasya svātmadevatāsvarūpaṃ parāhantācamatkārasāramapi 
gṛhītanānātvam, atha ca atyantākhaṇḍitasvasvātantrya - paramādvaya - 
prakāśasvabhāvaṃ bhagavantaṃ śaṃbhuṃ prapadye 
śarīrādikṛtrimāhaṃkāraguṇīkāreṇa etādṛśaṃ tvāmeva svātmānaṃ 
parāhantācamatkārasvarūpaṃ samāviśāmi - iti yāvat | anena 
grahaṇakavākyena paramopādeyāṃ svasvabhāvasamāveśamayīṃ daśām 
upadiśatā guruṇā vakṣyamāṇaheyopādeyatayā sakalagranthārthopakṣepaḥ 
kṛtaḥ || 1 ||
	evaṃ prakaraṇatātparyam advayasvarūpaṃ stutidvāreṇa pratipādya, 
idānīṃ śāstrāvatāram abhidadhat saṃbandhābhidheyādikaṃ granthakṛt 
āryādvayena āha

--------------- page  6 -----------------

 garbhādhivāsapūrvaka -
maraṇāntakaduḥkhacakravibhrāntaḥ |
ādhāraṃ bhagavantaṃ
śiṣyaḥ papraccha paramārtham || 2 ||
ādhārakārikābhiḥ
taṃ gururabhibhāṣate sma tatsāram |
kathayatyabhinavaguptaḥ
śivaśāsanadṛṣṭiyogena || 6 || (yugalakam)

kaścit bhagavatprasādāt samutpannavairāgyaḥ saṃsārāt viratamatiḥ, 
guroḥ śāsanīyo'smi - iti matvā, sadgurum ādhāraṃ bhagantaṃ śeṣākhyaṃ 
muniṃ samyak ārādhya paramārthopadeśasvarūpaṃ pṛṣṭavān | tadā 
tadyogyatāparipākasvarūpapariśīlanakrameṇa taṃ śiṣyaṃ 
vigalitāntaḥkaraṇaṃ matvā, so'pi anantanātho niḥśeṣaśāstropadeśajñaḥ 
paramārthasāranāmnā ādhārakārikābhiḥ ityaparābhidhānagranthena

--------------- page  7 -----------------

 sāṃkhyanayoktopadeśānusāreṇa prakṛtipuruṣavivekajñānāt 
parabrahmāvāptiḥ - ityevam etaṃ śiṣyaṃ proktavān | sa eva brahmopadeśaḥ 
paramādvayasvarūpasvasvātantryadṛṣṭyā pratipāditaḥ san yuktiyukto bhavati - iti 
matvā sarvaṃ janam anugrahītuṃ paramādvayaśaivanayayuktyā, guruḥ 
abhinavena alaukikena ciccamatkārasphāreṇa gupto guhyaḥ sarahasyaḥ - iti | 
so'yaṃ puṇyanāmākṣarāvaliḥ, tatsāraṃ tasya paramārthopadeśasya yat 
sāraṃ, dadhno navanītamiva upādeyaṃ, parānugrahapravṛttaḥ san pratipādayati - 
iti | evaṃ saṃbandhābhidheyābhidhānaprayojanādaya upapāditāḥ, na iha punaḥ 
śāstragauravabhayāt pratanyante | kīdṛśaḥ sa śiṣyaḥ ! - ityāha garbhādhivāsa 
iti | garbhādhivāsaprārambhaṃ jayate, asti, vardhate, vipariṇamate, apakṣīyate, 
vinaśyati - iti tattadavasthāvaicitryeṇa

--------------- page  8 -----------------

 ṣaḍbhāvavikā3ranemiyuktaṃ yat maraṇāntakaduḥkharūpam 
āvirbhāvatirobhāvāt saṃsaraṇasvabhāvatayā cakramiva cakram tasmin 
vibhrānto viparivṛttaḥ | anena asya prāgjātismaraṇasvabhāvo bodhāvirbhāvo 
dyotitaḥ, anyathā kathaṃ kāṣṭhāprāptilakṣaṇaṃ praśnakutūhalitvaṃ syāt | 
evaṃ ca yaḥ samutpannavairāgyaḥ parameśvarānugrahaśaktividdhahṛdayaḥ 
samuditasamyagjñānaḥ upadeśapātratām avāpya, parameśvarākāraṃ 
samucitamapi guruṃ samāsādya, paramādvayajñānam abhilaṣate, sa eva ca 
gurupadeśabhājanaṃ syāt - iti | etadeva ca anyatra uktam

	śaktipātavaśāddevi nīyate sadguruṃ prati |
iti |

	dīyate paramaṃ jñānaṃ kṣīyate karmavāsanā |

iti ca | iha ca purastāt vakṣyate || 3 ||

__________________FOOṭṇOṭEṣ___________________

[3 vikāra eva nemiḥ cakradhārā iti |]

--------------- page  9 -----------------

 adhunā samutpattikrameṇa pīṭhikābandhaṃ vidhāya, viśvavaicitryacitre 
asmin jagati pārameśvaram anuttamaṃ svātantryam ekameva saṃyojana 
viyojanakartṛtvahetuḥ - iti tacchaktivikāsameva viśvam aṇḍacatuṣṭayamukhena 
āvedayan grantham avatārayati

nijaśaktivaibhavabharād
aṇḍacatuṣṭayamidaṃ vibhāgena |
śaktirmāyā prakṛtiḥ
pṛthvī ceti prabhāvitaṃ prabhuṇā || 4 ||

	cidānandaikaghanena prabhuṇā svatantreṇa bhagavatā maheśvareṇa 
aṇḍacatuṣṭayaṃ viśvācchādakatvena kośarūpatayā vastupiṇḍabhūtam idam | 
yaduktam

	----------------vastupiṇḍo'ṇḍamucyate |

iti | prabhāvitaṃ prakāśitaṃ, bhavanakartṛtayā vā prayuktam | kasmāt - ityāha 
nijaśaktivaibhavabharāt

--------------- page  10 -----------------

 iti | nijaḥ svātmīyo yo'sau asādhāraṇa icchādyaḥ śaktipracayaḥ tasya 
yat vaibhavaṃ vicitraḥ prasaraḥ, tasya yo'sau bharaḥ samudrekaḥ tasmāt - iti 
bhagavataḥ kila svaśaktivikāsasphāra eva jagannirmāṇam | yaduktaṃ 
śrīsarvamaṅlāśāstre

	śaktiśca śaktimāṃścaiva padārthadvayamucyate |
	śaktayo'sya jagatsarvaṃ śaktimāṃstu maheśvaraḥ ||

iti | kiṃ - rūpā aṇḍacatuṣṭayasaṃkhyā ? - ityāha śaktirmāyā, prakṛtiḥ, 
pṛthvī ca iti | viśvasya pramātṛprameyarūpasya parāhantācamatkārasārasyāpi 
svasvarūpāpohanātmākhyātimayī niṣedhavyāpārarūpā yā pārameśvarī 
śaktiḥ saiva ācchādakatvena bandhakatayā śaktyaṇḍam - ityucyate | 
sadāśiveśvara - śuddhavidyātattvaparyantadalaṃ sat

--------------- page  11 -----------------

 vakṣyamaṇam aṇḍatritayam antaḥ samantāt garbhīkṛtya avatiṣṭhate - iti 
kośarūpatayā eṣā śaktiḥ anena śabdena saṃjñitā | etasmin aṇḍe 
sadāśiveśvarāveva adhipatī |
	anyacca malatrayasvabhāvaṃ mohamayaṃ bhedaikapravaṇatayā 
sarvapramātṝṇāṃ bandharūpaṃ puṃstattvaparyantadalaṃ māyākhyamaṇḍam 
- ityucyate | tacca vakṣyamāṇam aṇḍadvayam antaḥ samantāt svīkṛtya sthitam | 
aṇḍādhipatiśca atra gahanābhidhāno rudraḥ |
	tathā sattvarajastamomayī prakṛtiḥ kāryakaraṇātmanā pariṇatā satī, 
paśupramātṝṇāṃ bhogyarūpā sukhaduḥkhamoharūpatayā bandhayitrī 
prakṛtyabhidhānam aṇḍam - ityucyate | tatrāpi mahāvibhūtiḥ śrībhagavān 
viṣṇurbhedapradhāno'ṇḍādhipatiḥ |
	tathā pṛthvī ca evaṃ manuṣyasthāvarāntānāṃ

--------------- page  12 -----------------

 pramātṝṇāṃ pratiprakārarūpatayā sthūlakañcukamayī bandhayitrī - iti 
kṛtvā pṛthvyaṇḍam - iti ucyate | tatrāpi caturdaśavidhe bhūtasarge pradhānatayā 
aṇḍādhipo bhagavān brahmā - iti | evaṃ parameśvaravijṛmbhitam idam 
aṇḍacatu4ṣṭayaṃ bhagavatā itthaṃ prakāśitaṃ parisphurati || 4 ||
	evaṃ etat aṇḍacatuṣṭayaṃ pratipādya atraiva 
bhogyabhoktṛtvapratipādanaparatayā viśvasvarūpanirūpaṇāya kārikāmāha

tatrāntarviśvamidaṃ
vicitratanu - karaṇa - bhuvanasaṃtānam |
bhoktā ca tatra dehī
śiva eva gṛhītapaśubhāvaḥ || 5 ||

__________________FOOṭṇOṭEṣ___________________

[4 yaduktam
	śaktyaṇḍamṛtpiṇḍamupādadāno māyāṇḍacakrabhramaṇakrameṇa |
	mūlāṇḍadaṇḍena muhurvidhatte brahmāṇḍabhāṇḍaṃ bhagavān 
kulālaḥ ||
iti | mūlaṃ prakṛtiḥ, mūlāṇḍaṃ prakṛtyaṇḍamityarthaḥ |]

--------------- page  13 -----------------

 tatra teṣu caturṣu aṇḍeṣu āgamaprasiddheṣu viśvam idam antarmadhye 
vartate | kīdṛśam ! - ityāha vicitra iti | rudra - kṣetrajñabhedabhinnā 
nānāmukhahastapādādiracanārūpāḥ tanavaḥ ākārā 
viśiṣṭasaṃsthānarūpeṇa āścaryabhūtāḥ | tathā anyonyabhedena sātiśayāni 
karaṇāni cakṣurādīni | tadyathā - rudrapramātṝṇāṃ niratiśayāni 
sarvajñatvādiguṇagaṇayuktāni, taiḥ kila sarvamidam ekasmin kṣaṇe yugapat 
jñāyate, saṃpādyate ca | kṣetrajñānāṃ punaretānyeva karaṇāni 
parameśvaraniyatiśaktiniyantritāni santi 
ghaṭādipadārthamātrajñānakaraṇasamarthānyeva, na taiḥ sarvaṃ jñāyate, 
nāpi kriyate | tatrāpi yoginām atiśayaḥ karaṇānām - yat 
niyatiśaktisamullaṅghanāt tadīyaiḥ karaṇaiḥ dūravyavahitaviprakṛṣṭamapi 
paricchidyate, parapramātṛgataṃ ca sukhaduḥkhādi

--------------- page  14 -----------------

 jñāyate | evaṃ ca tiraścāmapi niyatiśaktyā saṃkucitānāmapi 
manuṣyebhyo'pi atiśayaḥ karaṇānāṃ vidyate | tadyathā - gāvaḥ svagṛhaṃ 
vyavahitamapi paśyanti, aśvā rātrāvapi mārgam īkṣante, gṛdhrā 
yojanaśatagatamapi āmiṣam avalokayanti, pakṣiṇo mākṣikā maṣakaparyantā 
ākāśavihāriṇo dṛśyante, sarīsṛpā urasā panthānaṃ gacchanti, dṛśā ca 
śṛṇvanti śabdān uṣṭrā dūrādapi gartāt śvāsamātreṇa sarpamākarṣayanti - 
iti | evaṃ sarvatra karaṇavaicitryam ūhyam | tathā bhuvanāni āgamaprasiddhāni 
vartula tryaśracaturaśrārdhacandra - chatrākāratayā sātiśayasaṃsthānāni - iti | 
evaṃ vicitro nānātiśayādbhutasvabhāvaḥ eṣāṃ tanukaraṇabhuvanānāṃ 
saṃtānaḥ aviratabandhapravāho yasmin viśvasmin tat evaṃ - vidhaṃ viśvam | 
evaṃ - vedhe ca atra bhogyasvabhāve viśvasmin

--------------- page  15 -----------------

 bhoktrā bhāvyam - ityāha bhoktā ca tatra dehī iti | malatrayāghrāto deho 
bhogāyatanaṃ vidyate yasya aṇoḥ sa dehī sukhaduḥkhādisvabhāvaḥ śarīrī, 
sukhaduḥkhādimaye asmin bhoktā sukhaduḥkhādyanubhavitā paśupramātā - iti 
kathyate | nanu parapramātrapekṣayā aṇumātrasyāpi na bhedo vidyate, kutaḥ 
tadvyatirikto dehī nāma varākaḥ | yaduktam

	pradeśo'pi brahmaṇaḥ sārvarūpyam
	anatikrāntaśca avikalpyaśca |
iti |

	ekaikatra ca tattve'pi ṣaṭtriṃśattattvarūpatā |

iti nyāyācca eka eva svaśaktiyukto mahāprakāśavapureva parameśvaraḥ 
pramātā sarvato'bhinna eva avabhāsate | tato bhinnasya aprakāśamānasya 
dehino'stitvābhyupagame'pi prakāśamānatvānupapatteḥ

--------------- page  16 -----------------

 na sattā niścīyate | prakāśate cet, tasmin parabrahmātmani tarhi 
prakāśābhinna eva ekaḥ pramātā - iti, punarapi kiṃparatvena ayaṃ 
bhogyabhoktṛlakṣaṇaḥ san bhedaḥ ! - iti sarvaṃ samarthayamāna āha śiva eva 
gṛhītapaśubhāvaḥ iti | yo'yaṃ bhagavān samanantaraṃ pratipāditaḥ 
cidānandaikaghanaḥ svātantryasvabhāvaḥ śivaḥ sa eva svarūpagopanāsatattvaḥ 
san svecchayā naṭa iva dehapramātṛbhūmikāṃ samāpannaḥ, pālyatvāt 
paśutvāt paśusattālakṣaṇaśca sukhaduḥkhādimaye svayaṃ - nirmite asmin 
bhogye bhoktā dehī - iti kathyate, na punaḥ śivavyatiriktaṃ kiṃcit padārthajātam 
asti | eṣa eva ca bhagavān śivaḥ svātantryāt bhoktṛbhogyalakṣaṇaṃ 
pramātṛprameyayugalakaṃ krīḍanakamiva samutthāpayati, yadapekṣayā ayaṃ 
bhedapradhāno vyavahāraḥ | tasmāt etadeva

--------------- page  17 -----------------

 parameśvarasya svātantryaṃ niratiśayaṃ, yat pūrṇasvarūpatāparityāgena 
bhoktṛbhogyasvabhāvaṃ paśubhāvam āpanno'pi sarvapramātṝṇām 
anubhavitṛtayā svātmani prasphuran cidānandaikaghanaḥ śiva eva || 5 ||
	evamapi ekaścitsvabhāvaḥ pramātā, sa yadi 
māyādipramātṛprameyavaicitryeṇa nānātvāt anekaḥ - iti kathaṃ 
viruddhayaikatayā vyavahriyate, ekaścet kimiti nānārūpaḥ - iti chāyātapavat 
virodhāt viruddhadharmādhyāsaḥ samāpatati, na punaḥ anekarūpa ekaśca 
padārthaḥ syāt | yaduktam

	ayameva bhedo bhedaheturbhāvānāṃ yat viruddhadharmā -
	dhyāsaḥ kāraṇabhedo vā |

iti | laukikam atra dṛṣṭāntaṃ pradarśayan dārṣṭāntike codyaṃ samarthayate

--------------- page  18 -----------------

 nānāvidhavarṇānāṃ
rūpaṃ dhatte yathā'malaḥ sphaṭikaḥ |
suramānuṣapaśupādapa -
rūpatvaṃ tadvadīśo'pi || 6 ||

	yathā eko'pi sphaṭikamaṇiḥ tattallākṣānīlādyupādhivaicitryasahasreṇa 
tattadvaicitryaṃ svātmani dhārayan tathā vicitrito bhavati, na punaḥ tasya 
sphaṭikatāhāniḥ etāvatā samutpadyate | edeva sphaṭikamaṇermaṇitvam, yat 
tattadviśeṣeṇa ācchurite'pi tasmin, sphaṭikamaṇiḥ ayam - iti abādhitā sarvasya 
sarvadaiva pratītiḥ | kevalam atra amī lākṣādayaḥ sphuranti - iti vyavahriyate, na 
punaḥ lākṣādyupādhiḥ paṭamiva taṃ viśinaṣṭi, yena svarūpavipralopo'sya 
syāt | tasmāt etadeva amalatvaṃ maṇeḥ yat upādhirūpān ākārān bibharti, 
svasvarūpatayā ca prathate | tathaiva ayam īśvaraḥ svatantraḥ cidekaghana ekako'pi

--------------- page  19 -----------------

 svacche svātmadarpaṇe deva - manuṣya - paśu - pakṣi - sthāvarāntānāṃ 
rudra - kṣetrajñādipadārtharūpāṇāṃ viśeṣāṇāṃ svayaṃ nirmitānāṃ ca 
rūpatvaṃ varṇavaicitryaṃ sphaṭikamaṇivat svātmābhedena dhārayan, tato'pi 
samuttirṇatvāt aham - ityevam akhaṇḍacamatkāropabṛṃhitaṃ nānārūpamapi 
ekaṃ svātmānaṃ pratyavamṛśati | itthamapi asya ekatākhaṇḍanāmayo 
bhinnarūpo deśaḥ, kālo vā na kaścit vidyate, yadapekṣayā etasya 
svātmamaheśvarasya viruddhadharmādhyāsādidūṣaṇam ucyetāpi | 
sākṣātkāralakṣaṇaṃ citrajñānaṃ nānābhedasaṃbhinnamapi parairapi 
ekameva tat abhyupagatam | yathā

	nīlādiścitravijñāne jñānopadhirananyabhāk |
	aśakyadarśanastaṃ hi patatyarthe vivecayan ||

iti pramāṇavārike | kiṃ punaḥ sarvataḥ pūrṇasya jñātuḥ cidekavapuṣaḥ 
svatantrasya, yau imau deśakālau bhedakatayā'bhimatau mūrtivaicitrya - 
kriyāvaicitryābhyāṃ yasya samullāsakatayā sthitau, kathaṃ

--------------- page  20 -----------------

 tasyaiva bhagavato vyavacchedakau syātām | yadi nāma deśakālayoḥ 
kadācit saṃvido bhedena sthitirabhaviṣyat, tadā tatkṛto'pi viruddhadharmādhyāsa 
udapatsyata - iti tatra saṃbhāvanā syāt | yāvatā tayoḥ saṃvitprakāśenaiva 
svātmasattāsiddhiḥ - iti siddha eva anekasvabhāvo'pi eka eva maheśvaraḥ 
cinmūrtiḥ, bhedadharme punaḥ viruddhadharmādhyāso duruddhara eva - iti || 6 ||
	nanu eka eva saṃvitsatattvaḥ pramātā abhyupagataḥ, tanu - karaṇa - 
bhuvanatāṃ samāpannaḥ san sa eva anekatāṃ - iti cet, tarhi tanvādivināśe sa eva 
vinaṣṭaḥ syāt, tadutpattau vā eṣa eva tadā utpadyeta | evaṃ pratipramātṛ sa eva 
jāyate, asti - ityādiṣaḍbhāvavikāratayā vyavacchidyate, 
puṇyapāpasvabhāvakarmavaicitryeṇa etasyaiva bhagavataḥ svarganarakādibhogaḥ 
prāptaḥ - iti katham ucyate - svasvarūpa eva śiva ? - iti |

--------------- page  21 -----------------

 dṛṣṭāntadvārṇa etadapi samarthayate
gacchati gacchati jala iva
himakarabimbaṃ sthite sthitiṃ yāti |
tanu - karaṇa - bhuvanavarge
tathā'yamātmā maheśānaḥ || 7 ||

	yathā jalapravāhe yāti sati, himakarabimbaṃ candravapuḥ vastuvṛttena 
ākāśasthaṃ svayam acalattātmakaṃ jalapravāhāntaḥpatitamapi tat gacchati 
prayāti iva tathā tasminneva kṣaṇe anyatra jalāśaye niḥstimite sati, tadeva 
himakarabimbaṃ sthitiṃ gacchati iva - iti ubhayathā sarvapramātṛbhiḥ etat 
saṃbhāvyate, na punaḥ paramārthena tat tathaiva syāt | nāpi jalagatau deśakālau 
bhedakatayā candramasaḥ svarūpaṃ gaganasthaṃ parāmṛśataḥ, kevalaṃ 
jalameva tādṛśam, atha ca

--------------- page  22 -----------------

 tatpratibimbitasya candrabimbasya jalagatacalattācalattadiko bhedo vyavahriyate 
- iti etāvatā gaṅgājalagatasya, kardamapatitasya vā śaśinaḥ svasvarūpatāyāṃ 
na kācit kṣatiḥ | tathaiva ayamātmā caitanyasvabhāvaḥ svayaṃ nirmite 
tanukaraṇa - bhuvanasamūhe parikṣīṇe sati, samutpanne vā prakṣīṇaḥ, 
samutpannaśca - iti māyāvyāmohitānāṃ vyavahāramātram etat 
jalagatacandravat, na punaḥ svātmā jāyate, mriyate vā - iti | gītāsu evameva uktam

	na jāyate mriyate vā kadācit
	nāyaṃ bhūtvā bhavitā vā na bhūyaḥ |
	ajo nityaḥ śāśvato'yaṃ purāṇo
	na hanyate hanyamāne śarīre || (2 | 20)

iti | tasmāt ayam ātmā maheśānaḥ svatantraḥ 
sarvasvātmapratyavamarśasvabhāvaḥ, sarvapramātṝṇām anubhavitṛtayā 
prathamānaḥ, tataḥ tattadavasthāvipralope,

--------------- page  23 -----------------

 samutpattau vā svasvarūpa eva | etadeva ca durghaṭakāri maheśānatvaṃ 
saṃvittattvasya, yat tathā tathā paśupramātṛtayā svarganarakādi bhogabhoktā'pi 
sarvānubhavitṛtayā saṃvitsvarūpa eva | pratyuta 
puṇyapāpasvarganarakakṣutpipāsādiko yo'yaṃ paśubhāvo bandhakatayā 
niyataḥ, sa yadi bhagavatā svātmaprakāśena prakāśitaḥ parāmṛṣṭaśca syāt, 
tadā yathoktāṃ svātmani sattāṃ labhate, anyathā niḥsvabhāva eva eṣa - iti 
kathaṃ svātmanaḥ tasyaiva maheśasya svarūpavipralopāya ucyate | sarvathā 
nirmitameva vastu saṃhāryaṃ, samutpādyaṃ vā dehādirūpaṃ syāt, na punaḥ 
nitye bhagavati caitanye samutpattivināśau kadācit bhavetām | tasmāt eka eva 
ātmā grāhyagrāhakatayā nānārūpasvabhāvaḥ san, punarapi 
sarvānubhavitṛtayā sarvasya ekatayā prathate - iti

--------------- page  24 -----------------

 na kācit advayavādakṣatiḥ || 7 ||

	itthamapi sarveṣām ayam ātmā viśvaprapañcasvabhāva eva 
saṃvinmātraparamārthaḥ sarvāvabhāsaḥ sarvatra saṃvidanugamāt - iti 
yuktyāgamābhyāṃ pratipāditaścet, kimiti loṣṭādāvapi aviśeṣāt svātmatayā 
sa na pratīyate, abhyupagame vā jaḍājaḍavyavasthā iyaṃ bhāsamānā na 
saṃgacchate, lokavyavahāraśca jaḍājaḍarūpaḥ - iti kathametat syāt ? - iti āha

rāhuradṛśyo'pi yathā
śaśibimbasthaḥ prakāśate tadvat |
sarvagato'pyayamātmā
viṣayāśrayaṇena dhīmukure || 8 ||

	ākāśadeśe rāhuḥ sarvatra paribhramannapi na upalabhyate, sa eva punaḥ 
grahoparāgakāle candramūrtisthaḥ prathamānaḥ, ayaṃ rāhuḥ - iti parīkṣyate,

--------------- page  25 -----------------

 anyathā sthito'pi bhacakre'sthita iva | tathaiva ihāpi sarvāntaratamatvena 
sthito'pi ayam ātmā svānubhavaikasvarūpatayā pratyakṣaparidṛśyamānaḥ 
sarvasya tathā na upalakṣyate | yadā punaḥ puryaṣṭakapramātṝṇāṃ 
buddhidarpaṇe pratibhāmukure grāhyavyavasthākāle śabdādiviṣayasvīkāreṇa 
śṛṇomi ityevam ahaṃ - pratītiviṣayo bhavati, tadā grāhakasvabhāvatayā 
loṣṭādāvapi sthitaḥ san sphuṭarūpaḥ, tatraiva svātmā prakāśate sarvaiśca 
svānubhavaikarūpaḥ pratīyate; loṣṭādau atyantatamomayatvāt sthito'pi 
asthitakalpo'sau prathate, rāhur ākāśe yathā | evam ayaṃ bhagavān 
māyāśaktyā svātmakalpe'pi bhāvavarge kāṃścit puryaṣṭakasvarūpān 
vedyakhaṇḍānapi ahantāvyavasthārasābhiṣiktān

--------------- page  26 -----------------

 vedakīkaroti, kāṃścit vedyīkaroti, yadapekṣayā ayaṃ 
jaḍājaḍavyavasthāsvarūpo bhedavyavahāraḥ susthita eva upadyate | tena 
loṣṭādiḥ vedyatvāt jaḍaḥ, vedakatvāt puryaṣṭakapramātāpi ajaḍaḥ | na punaḥ 
paramārthena parameśvarāpekṣayā jaḍājaḍavyavahāraḥ - iti || 8 ||
	nanu sarvapramātṝṇāṃ buddhau cet svātmano'pi aviśeṣeṇa 
prasphuraṇaṃ, tarhi te sarve kimiti svātmavido na syuḥ, tajjñānavanto mā vā 
bhūvan, viśeṣābhāvāt | yat punaḥ saṃsārāvasthāyāmapi kecana 
svātmajñāntāt jīvanmuktāḥ sarvajñatva - sarvakartṛtvaśālinaḥ, kecana 
svātmajñānayogyā ārukṣavaśca dṛśyante, apare svātmajñānarahitāḥ santo 
dharmādharmanimitta - śubhāśubhakarma - nigaḍaprabandhabaddhāḥ saṃsāriṇa 
eva, - iti katham etat saṃgacchate ?

--------------- page  27 -----------------

 ittham antaḥ sarvaṃ kṛtvā pārameśvaraḥ śaktipāto viśṛṅkhalaḥ, - iti 
pratipādayati

ādarśe malarahite
yadvad vadanaṃ vibhāti tadvad ayam |
śiva - śaktipātavimale
dhītattve bhāti bhārūpaḥ || 9 ||

	darpaṇe mālinyarahite yathā nirviśeṣarūpādiguṇagaṇayuktaṃ mukhaṃ 
cakāsti | - na sa deśo'sti yaṃ vinivṛttamala ādarśo na svīkurute | samale darpaṇe 
tu mukham ananyātiśayamapi dhyāmalatvāt vaiparītyena prakāśate | nāpi 
malinaḥ tadīyān guṇān svīkartum alam | pratyuta tannyastamukhaḥ pumān 
mukham anyathaiva dhyāmalatvādyupetam avalokya svātmano lajjām āvahati 
vikṛtaṃ

--------------- page  28 -----------------

 madvadanam iti | - tathaiva śivasya svātmano yā asau anugrahākhyā śaktiḥ, 
tasyāḥ pātaḥ svakiraṇavisphāraḥ, tena saṃmārjite pratibhāmukure āṇava - 
māyīya - kārmamalavāsanāprakṣayāt viśadīkṭe, keṣāṃcit 
apaścimajanmanāṃ pramātṝṇāṃ bhāḥ prakāśo rūpaṃ yasya - iti sa 
bhārūpaḥ svātmā yāvatsarvajñatvādiguṇagaṇayuktaḥ tāvānapi avabhāsate, 
yena kecanaiva te svātmasvarūpaprathanāt saṃsāramadhyapatitā api muktakalpāḥ 
sātiśayāśca | keṣāṃcideva parameśvaratirodhānaśaktyā āṇava - māyīya - 
kārmamalasamācchādite buddhitattve bhārūpo'pi ātmā mālinyāt bhāto'pi 
abhātakalpaḥ, yena te sāṃsārikāḥ paśavaḥ - iti abhidhīyante; anye'pi 
ubhayaśaktiyogāt pramātāra ārurukṣavaḥ - iti | itthaṃ tīvra - manda - 
mandatarādibhedena śaktipātavaicitryaṃ

--------------- page  29 -----------------

 sarvatrāpi ūhyam | atra na māyāntaḥpātiniyatiśaktisamuttham 
aśvamedhādikaṃ japadhyānādi vā anyat yatkiṃcit karma mocanahetuḥ ātmanaḥ 
; tasya hi māyātaḥ samuttīrṇatvāt bhedapradhānaṃ vastu tatsādhanāya na 
prakalpate | yat gītam

	nāhaṃ vedairna tapasā na dānena na cejyayā | (bha. ga. 11 | 53)

iti | tasmāt ekameva atra parameśvarānugrahaḥ kāraṇam akṛtrimam 
bhavyabuddhinām | yaduktam

	īśituḥ śaktipātāṃśe khyāpayitrī svatantratām |
	dhīḥ kāraṇakalāghrātā naiva kiṃcidapekṣate ||

iti | paśupramātṝṇāṃ tu parameśvaratirodhānaśaktiḥ saṃsaraṇahetureva, yena 
ete svasvarūpāprathanāt śubhāśubhakarmaniratāḥ sukhaduḥkhādibhogabhājaḥ 
punaḥ punaḥ asmin saṃsaranti | tasmāt

--------------- page  30 -----------------

 pramātṝṇāṃ sādhāraṇe'pi svātmani, prakāśāprakāśarūpe 
anugrahatirodhānaśaktī dve eva; te mokṣabandhapravibhāgahetū | yaduktam 
(avadhūtasiddhapādaiḥ)

	badhnāti kācidapi śaktiranantaśakteḥ
	kṣetrajñamapratihatā bhavapāśajālaiḥ |
	jñānāsinā ca vinikṛtya guṇān aśeṣān
	anyā karotyabhimukhaṃ puruṣaṃ vimuktau ||

iti || 9 ||
	evam idaṃ sarvam āgamānubhavayuktiyuktaṃ pratipādya, yat prāk 
śaktyādyaṇḍacatuṣṭayaṃ pratipāditaṃ tadantarālavarti samutpattikrameṇa 
ṣaṭtriṃśattattvātmakaṃ jagat yallagnaṃ bhāti, tat prathamataḥ kāraṇakāraṇaṃ 
paramaśivasvarūpaṃ kārikādvayena āha

bhārūpaṃ paripūrṇaṃ
svātmani viśrāntito mahānandam |
icchāsaṃvitkaraṇair
nirbharitam anantaśaktiparipūrṇam ||

--------------- page  31 -----------------

 sarvavikalpavihīnaṃ
śuddhaṃ śāntaṃ layodayavihīnam |
yat paratattvaṃ tasmin
vibhāti ṣaṭtriṃśadātma jagat || 10 | 11 ||

	yat evaṃ - vidhaṃ paraṃ pūrṇaṃ śivatattvaṃ, tatra 
śivādidharāparyantaṃ vakṣyamāṇaṃ viśvaṃ viśrāntaṃ sat prakāśate, 
tadabhinnameva cakāsat yuktyā upapadyate - iti yāvat | nanu tanyate sarvaṃ tanvādi 
yatra tat tattvaṃ; tananāt vā tat āpralayaṃ, tasya bhāvaḥ - iti vā tattvam; iti 
evamapi tattvavyadeśo'yaṃ jāḍyāpādakaḥ kathaṃ cidrūpe bhagavati 
paramaśive syāt ? - ucyate | upadeśyajanāpekṣayā yāvatā śabdena pratipādyate, 
tāvatā tatra tattvavyapadeśo, na vastutaḥ | kīdṛśaṃ tat paraṃ tattvaṃ ? bhāḥ 
prakāśo rūpaṃ svabhāvo yasya, mahāprakāśavapuḥ - ityarthaḥ | tathā

--------------- page  32 -----------------

 paripūrṇaṃ nirākāṅkṣam | nirākāṅkṣamapi sphaṭikamaṇidarpaṇādi 
jaḍaṃ vastu bhavati - ityāha svātmani  viśrāntito mahānandam iti | svāsmin 
svabhāve akhaṇḍāhantācamatkārarase viśramāt mahān ānandaḥ parā 
nirvṛtiḥ yasya - iti | tat evaṃ paramāhlādakasphurattāsāratvāt 
prakāśyasphaṭikādeḥ jaḍāt vailakṣaṇyam uktaṃ bhavati | ata eva āha 
icchāsaṃvitkaraṇairnirbharitam iti | icchā - jñāna - kriyāśaktisvabhāvameva, 
na punaḥ śāntabrahmavādināmiva śaktivirahitaṃ jaḍakalpam | anyacca 
anantaśaktiparipūrṇam iti | anantāḥ niḥsaṃkhyā ghaṭapaṭādyā 
nāmarūpātmikāḥ śaktayaḥ icchā - jñāna - kriyā śaktīnāṃ pallavabhūtā 
brahmyādyāḥ śaktayaḥ śabdarāśisamutthāḥ, tābhiḥ paritaḥ samantāt 
pūrṇaṃ vyāptaṃ, tata eva ullasantyaḥ tatraiva śāmyanti - iti | evaṃ 
parāvāgrūpaṃ bhagavati svātantryam uktaṃ syāt | nanu vāgrūpaṃ cet paraṃ 
tattvaṃ, tarhi

--------------- page  33 -----------------

 kālpanikaṃ śabdasaṃbhinnatvāt, kathaṃ śuddhaprakāśavapuṣi 
kalpanāyogaḥ ? - ityāśayena āha sarvavikalpavihīnam iti | parapramātari 
yo'yaṃ parāhantācamatkāraḥ sa vāgrūpo'pi nirvikalpaḥ | vikalpo hi 
anyāpohalakṣaṇo dvayaṃ ghaṭāghaṭarūpam ākṣipan aghaṭād vyavacchinnaṃ 
ghaṭaṃ niścinoti | prakāśasya punaḥ parāhantācamatkārasārasyāpi na 
aprakāśarūpaḥ prakāśāt anyaḥ pratipakṣatayā vidyate, yadvyavacchedāt tasya 
vikalparūpatā syāt | vyavacchedyo hi artho'prakāśātmā prakāśavapuṣi 
prakāśate cet, tarhi

	tatsaṃvedanarūpeṇa tādātmyapratipattitaḥ || (spa. 3 | 28)

ityādinyāyena yo'pi arthaḥ prakāśasvabhāvatāṃ yātaḥ san, sa kathaṃ 
svātmanaḥ tasyaiva vyavacchedakaḥ syāt, yena vikalparūpatāṃ tatra samāvahet | 
atha pratipakṣatayā na prakāśate - iti, katham

--------------- page  34 -----------------

 iha aprakāśamānaḥ padārthaḥ pratipakṣarūpo'sti iti paricchettumapi 
śakyeta ? - iti yat kiṃcit etat syāt | yataḥ sarvaiḥ vyavacchedātmakaiḥ 
vikalpairvihinam aparicchinnasvabhāvaṃ paraṃ tattvam | ata eva āha śuddham iti 
vimalaṃ, vikalpamayyā aśuddhimaṣyā abhāvāt | tathā śāntam iti | 
grāhyagrāhakasamutthakṣobhābhāvāt śaktisāmarasyena svasvarūpasthaṃ, na 
punaḥ aśmaśakalakalpam | anyacca layodayavihīnan iti |

	sakṛdvibhāto'yamātmā | (śru.)

iti kṛtvā sanātana eva | ato bhūtabhaviṣyadvartamānavapuḥ kālaḥ tatra na 
kramate, yataḥ kālasya tata eva samullāsaḥ - iti samutpattivināśabahiṣkṛte 
paratattve'bhyupagate viśvasya viśvatvam

--------------- page  35 -----------------

 upapannam - iti pratipāditaṃ syāt || 11 ||
	nanu evaṃ - vidhe paratattve jagat bhāti - iti yat pratipāditaṃ, tat katham etat 
syāt, yāvatā paratattvāpekṣayā na kiṃcit bhedena bhātuṃ pragalbheta? tato 
bhinnaṃ cet jagat bhāsate, tadā advayavādakhaṇḍanā; abhinnaṃ cet, jagat 
prakāśate iti kathaṃ vācoyuktiḥ ? - iti dṛṣṭāntadvāreṇa 
tadbhedābhedarūpaṃ tattvam upadarśayan etatsamarthanāya āha

darpaṇabimbe yadvan
nagaragrāmādi citramavibhāgi |
bhāti vibhāgenaiva ca
parasparaṃ darpaṇādapi ca || 12 ||
vimalatamaparamabhairava -
bodhāt tadvad vibhāgaśūnyamapi |
anyonyaṃ ca tato'pi ca
vibhaktamābhāti jagadetat || 13 ||

--------------- page  36 -----------------

 yathā nirmale mukurāntarāle nagara - grāma - puraprākārāṭṭa - sthala - 
nada - nadī - jvalana - vṛkṣa - parvata - paśupakṣi - strīpuruṣādikaṃ sarvaṃ 
pratibimbatayā citraṃ svālakṣaṇyena nānārūpaṃ bhāsate; avibhāgi darpaṇāt 
avibhaktaṃ sat bhāti tadabhedenaiva antar ākāraṃ samarpayati; tatra abhedena 
bhāsamānamapi bhāti vibhāgenaiva ca parasparam iti anyonyasvālakṣaṇyena 
ghaṭāt paṭo bhinnaḥ, paṭāt ghaṭaḥ - iti vibhaktatayā sphurati | tadantargatā hi 
bhāvā eva pṛthaktvena parāmṛśyante, na punaḥ taṃ darpaṇaṃ tyaktvā pṛthak 
kiṃcit upalabhyate, kiṃtu darpaṇasāmarasyena sthitamapi sarvato bhinnaṃ jagat 
pratīyate | evamapi ghaṭādipratibimbena darpaṇas tarhi antarhitaḥ syāt - iti, etat na 
ityāha darpaṇādapi ca iti | na kevalaṃ svayaṃ bhāvā darpaṇāntargatā api 
bhinnāḥ prakāśante, yāvat darpaṇādapi vyatiricyante; 

--------------- page  37 -----------------

 yato darpaṇaḥ tattatpratibimbamayo'pi tebhyaḥ pratibimbebhyaḥ 
samuttīrṇasvarūpatayā cakāsti, na punaḥ tanmayaḥ saṃpadyate, yena ca na 
darpaṇaḥ iti pratītiḥ syāt | sarvasya punaḥ tattatpratibimbagrahaṇe'pi 
darpaṇo'yam iti abādhitā pratipattiḥ | nāpi ghaṭādiḥ darpaṇaṃ viśinasṭi, yena 
ayaṃ ghaṭadarpaṇaḥ, ayaṃ paṭadarpaṇaḥ iti svasvarūpatāhāniḥ atra jāyate | 
deśakṛtaḥ kālakṛto vā bhedo na tatra svabhāvavipralopāya bhavati | tasmāt 
tattatpratibimbasahiṣṇuḥ san svātmani darpaṇo darpaṇa eva, - iti na kācit 
pratibimbavādakṣatiḥ | atha ucyate bhrāntireṣā - yat utadarpaṇe hastī - iti 
parāmṛśyate, natu punaḥ darpaṇe sa kaścit vidyate, tathātvena arthakriyāvirahāt, 
bhrāntyaiva eṣa niścayaḥ - iti | etāvatā pratibimbavādena dṛṣṭāntaḥ tāvat 
siddhaḥ | bhrāntestu

--------------- page  38 -----------------

 svarūpaṃ samanantaraṃ nirūpyate | tadvat tathaiva 
darpaṇanagarādipratibimbadṛṣṭāntena vimalatamaparamabhairavabodhāt 
atiśayena vigalitakālikāt pūrṇānandodriktāt prakāśāt jagat viśvam 
vibhāgaśūnyamapi darpaṇapratibimbavat tataḥ prakāśāt avibhaktamapi, 
parasparaṃ ca vibhaktatvena grāhyagrāhakāpekṣayā nānārūpaṃ prathate; 
tato'pi ca iti bodhādapi unmagnamiva ābhāti, yato bodhaḥ tadrūpatayāpi 
prathamānaḥ tataḥ samuttīrṇaḥ prathate, yathā pratibimbebhyo darpaṇaḥ | evamapi 
viśvabhāvapratibimbasahiṣṇuḥ prakāśo viśvabhāvebhyaḥ samuttīrṇaḥ sarvasya 
anubhavitṛtayā svasvarūpeṇa prathate | bhāvagato'pi deśakālākārabhedaḥ 
kevalam atra prakāśate darpaṇavat, na punaḥ svaṃ rūpaṃ saṃbhinatti | ata eva 
ekānekasvarūpo'pi bodha eka eva, bodhābhyupagatacitrajñānavat | kiṃtu 
darpaṇaprakāśāt sacamatkārasya

--------------- page  39 -----------------

 citprakāśasya iyān viśeṣaḥ, - yat darpaṇe svacchatāmātrasanāthe 
bhinnaṃ bāhyameva nagarādi pratibimbatvena abhimataṃ bhāti, natu svanirmitam, 
ato darpaṇe ayaṃ hastī iti yo niścayaḥ, sa bhrāntaḥ syāt; prakāśaḥ punaḥ 
svacamatkārasāraḥ svecchayā svātmabhittau abhedena parāmṛśan 
svasaṃvidupādānameva viśvam ābhāsayati | viśvasya ābhāsanameva 
nirmātṛtvaṃ bhagavataḥ, - iti parāmarśa eva prakāśasya jaḍāt 
darpaṇaprakāśādeḥ vailakṣaṇyāpādakaṃ mukhyaṃ rūpam - iti | etadeva 
granthakṛtā vivṛtivimarśinyām uktam

	antarvibhāti sakalaṃ jagadātmanīha
	yadvad vicitraracanā makurāntarāle |
	bodhaḥ punarnijavimarśanasārayuktyā
	viśvaṃ parāmṛśati no makurastathā tu ||

--------------- page  40 -----------------

 iti | itthaṃ parameśvarāpekṣayā svāṅganirmite bhāvarāśau na kācit 
bhedabhrāntiḥ māyāpramātrapekṣayā tu yo'yaṃ bhedāvabhāsaḥ, eṣā 
pūrṇatvākhyātirūpā bhrāntiḥ; - pūrṇasya advayātmano rūpasya akhyānam 
aprathā, pūrṇaṃ na bhāsate, kiṃtu apūrṇaṃ dvayarūpaṃ bhāsate; bheda eva 
pratīyate - iti yāvat | tasmāt niravadyo'yaṃ pratibimbavādaḥ || 13 ||

	itthaṃ paratattvasvarūpanirūpaṇapūrvaṃ prakāśābhedena jagataḥ 
ṣaṭtriṃśattattvātmakasya sthitiṃ vidhāya, punarapi etasya samutpattikrameṇa 
pratitattvaṃ svarūpaṃ kārikābhiḥ pratipādayati

śiva - śakti - sadāśivatā -
mīśvara - vidyāmayīṃ ca tattvadaśām |
śaktīnāṃ pañcānāṃ
vibhaktabhāvena bhāsayati || 14 ||

--------------- page  41 -----------------

 yo'yaṃ paramaśivaḥ paratattvarūpaṇayā 
samanantarapratipāditasvarūpaḥ, svasvarūparūpāḥ yāḥ śaktayaḥ 
cinnirvṛtīcchā - jñāna - kriyākhyāḥ pañca anantaśaktivrātahetubhūtāḥ, 
tāsāmeva pañcānāṃ śaktīnāṃ bhinnatvena atadvyāvṛttyā imāṃ 
tattvadaśāṃ pañcasaṃkhyāvacchinnāmeva bhāsayati svālakṣaṇyena 
prakaṭayati - ityarthaḥ | dīdṛśīṃ tām ? - ityāha śivaṃ ityādi | śivaśca 
śaktiśca sadā śivaśca, teṣāṃ bhāvo yasyāḥ sā tathoktā tāṃ, tathā 
īśvaravidye prakṛtiḥ yasyāṃ sā tathā - iti | atra pratitattvaṃ svarūpaṃ 
pradarśyate | tathā - hi - sarvapramātṝṇām antaḥ pūrṇāhantācamatkāramayaṃ 
sarvatattvottīrṇaṃ mahāprakāśavapuḥ yat caitanyam, etadeva śivatattvam | atra 
tattvanirūpaṇam upadeśyajanāpekṣayā - iti | tasyaiva bhagavataḥ cidrūpasya 
ānandarūpā, viśvaṃ bhavāmi iti parāmṛśato

--------------- page  42 -----------------

 viśvabhāvasvabhāvamayī saṃvideva kiṃciducchūnatārūpā 
sarvabhāvānāṃ bījabhūmiḥ, iyaṃ śaktyavasthā | eṣaiva 
viśvagatasṛṣṭisaṃhāropacārāt kṛśapūrṇobhayarūpāpi ekaiva 
sarvarahasyanayeṣu gīyate | punarapi atraiva viśvasamutpattibījabhūmau 
mahāśūnyātiśūnyākhyāyāṃ, maheśasya ahamidam iti abhedena 
pūrṇāhantāmayo yaḥ camatkāro jñānaprādhānyāt kriyābhāgasya 
ahantāviśrānteḥ, seyaṃ sadāśivadaśā | atra mantramaheśvarāḥ pramātāraḥ 
tiṣṭhanti | tathā atraiva ahamidam iti abhedena ahantedantayoḥ 
samadhṛtatulāpuṭanyāyena yaḥ svātmacamatkāraḥ, saiṣā tasya īśvarāvasthā | 
atrāpi mantreśvarāḥ pramātāraḥ | atrāpi idantāprādhānyena 
ahantāguṇīkāreṇa yaḥ, aham aham, idam idam ityevaṃrūpaḥ camatkāraḥ 
sadyojātabālasyeva

--------------- page  43 -----------------

 śiro'ṅgulīnirdeśyaḥ, etadeva bodhasāratvāt bhagavataḥ 
śuddhavidyātattvam | atra vidyeśvaraiḥ saha saptakoṣṭyastu mantrāṇāṃ 
vācakatayā anugrahasvabhāvāt paśūn ūdhartuṃ vācyān 
mantramaheśvaramantreśvarān prati avatiṣṭhante | atra vidyātattve 
vidyeśvarapramātṝṇāṃ bodharūpatvāviśeṣe'pi yā bhedaprathā sā 
māyāśaktikṛtaiva, - iti āgameṣu gīyate

	māyopari mahāmāyā------------------|

iti | yena tatrasthā mantrā mahāmāyānupraveśāt aṇavaḥ - iti ucyante | 
māyātattvopari śuddhavidyādhaśca vijñānākalāḥ pramātāraḥ 
āṇavamalabhājanam | evam ekameva idaṃ śivasvarūpaṃ turyātītamapi 
turyarūpatayā tattvapañcakatayā gīyate | tasmāt eka eva eṣa svatantraḥ kartā 
prakāśate, yasya ahamidam iti sadāśiveśvarabhūmau yaḥ prakāśaḥ, etadeva 
śuddhavedanarūpaṃ karaṇaṃ; vakṣyamāṇo māyātattvādidharāntaḥ 
tattvasargaśca kāryam

--------------- page  44 -----------------

 - ityeva kartṛkaraṇakriyārūpa eka eva svātmamaheśvarākhyaḥ 
paramapramātā vijṛmbhate || 14 ||

	māyātattvasvarūpam āha

paramaṃ yat svātantryaṃ
durghaṭasaṃpādanaṃ maheśasya
devī māyāśaktiḥ
svātmāvaraṇaṃ śivasyaitat || 15 ||

	paramam ananyāpekṣaṃ yat parameśituḥ svātantryaṃ 
viśvanirmātṛtvaṃ, saiva iyaṃ māyākhyā śaktiḥ tasya śaktimataḥ | mīyate - 
paricchidyate dharāntaḥ pramātṛprameyaprapañco yayā sā māyā; 
viśvamohakatayā vā māyā | eṣā devasya krīḍāśīlasya saṃbandhinī - iti 
kṛtvā devī, na punaḥ brahmavādināmiva vyatiriktā kācit māyā uapadyate - iti | 
kīdṛśaṃ tat svātantryaṃ? durghaṭasaṃpādanam iti | duḥkhena ghaṭayituṃ 
śakyam -

--------------- page  45 -----------------

 iti durghaṭasya kāryasya pramātṛprameyarūpasya saṃpādanaṃ 
prāptiprāpakam | eṣaiva māyā svecchayā paśubhāvam āpannasya śivasya 
svātmāvaraṇaṃ svarūpagopanākhyam āṇavādimalatritayam || 15 ||
	vakṣyamāṇe ca prādhānike sukhādirūpe bhinne bhogye, yat bhoktṛrūpaṃ 
puṃstattvaṃ, tatsvarūpam āha

māyāparigrahavaśād
bodho malinaḥ pumān paśurbhavati |
kāla - kalā - niyativaśād
rāgāvidyāvaśena saṃbaddhaḥ || 16 ||

	māyā - svīkārapāratantryāt sarvajñatva - sarvakartṛmayo'pi bodhaḥ 
sarvajñatvādiguṇāpahastanena akhyātirūpam āṇavaṃ malam āpannaḥ, yena

--------------- page  46 -----------------

 ghaṭākāśavat pūrṇasvarūpāt cidākāśāt avacchedya parimitīkṛtaḥ san, 
tadeva puṃstattvam ucyate | ato māyāyāḥ pālyaḥ pāśyaśca - iti paśuḥ āṇava 
- māyīya - kārmamalasvabhāvānāṃ pāśānāṃ bhājanam | anyacca 
kālakalā iti vakṣyamāṇasvarūpaiḥ kālādibhiḥ otaprotatayā samyak baddho 
dṛbdhaḥ - ityevaṃ tattvaṣaṭkaveṣṭitaṃ puṃstattvam || 13 ||
	kālādīnāṃ tattvānāṃ ca etadveṣṭanakrameṇa svarūpam āha

adhunaiva kiṃcideve -
dameva sarvātmanaiva jānāmi |
māyāsahitaṃ kañcuka -
ṣaṭkamaṇorantaraṅgamidamuktam || 17 ||

	itthaṃ svatantro'pi bodhaḥ svamāyayā yathā aṇutvaṃ prāptaḥ, tathaiva 
tadīye jñānakriyāśaktī

--------------- page  47 -----------------

 saṃkucite asya paśurūpasya vidyā - kale - iti ucyete | yathā rājñā 
apahṛtasarvasvasya anukampayā jīvanārthaṃ kiṃcid dhanaṃ stokaṃ dīyate, 
tathaiva aṇutvam āpannasya bodhasya apahṛtasarvajñatvādeḥ 
kiṃcitkartṛtāparamārthaṃ jñatvam upodbalyate, - iti jñatvasyaiva prādhānyāt 
kālādīnāṃ jānātinā anvayo darśitaḥ | idaṃ kañcukaṣaṭkam uktarūpayā 
māyayā yuktam aṇoḥ āṇavamalāpahastitasarvajñatvādeḥ puṃsaḥ 
svarūpācchādakam, svarṇasya kālikeva antaraṅgaṃ nijaṃ kathitam | kiṃrūpa? 
- ityāha adhunā ityādi | adhunaiva jānāmi iti so'ṇuḥ vartamāna5tayā, idaṃ 
prāk mayā jñātaṃ, jānābhi, jñāsyāmi - iti; evamapi kṛtaṃ, karomi, 
kariṣyevā - iti jñānakriyāsvarūpeṇa bhāvānapi tathā kalayan avacchinatti ca - 
ityeṣo'sya kālaḥ | tathā kiṃcideva iti avacchinnameva karoti,

__________________FOOṭṇOṭEṣ___________________

[5 dhruvasthānīyamātmānamavachidya bhūtabhaviṣyadvartamānatayā ityarthaḥ |]

--------------- page  48 -----------------

 sarvaṃ kartuṃ na alam; ghaṭamātrakaraṇāya prabhavati, na paṭādau; - 
ityetad asya aṇoḥ kalātattvam | idameva iti niyatāt kāraṇāt niyataṃ kāryaṃ yat 
arthayate, yathā vahnereva dhūmaḥ, aśvamedhādikarmaṇā eva svargādiphalam, 
na sarvasmāt; - ityevaṃ niyamena svasaṃkalpakṛta - 
karmaprabandhasamutthapuṇyāpuṇyaiḥ ātmā niyamyate yena, tat asya niyatitattvam 
| tathā sarvātmanā iti yā iyam apūrṇammanyatā, sarvaṃ mama idam upayujyate; 
bhūyāsaṃ, mā kadācit na bhūvam; - ityetat paśoḥ rāgatattvam | buddhidharmo 
yo rāgaḥ, sa ekatra kutrāpi kāntālakṣaṇe'rthe anyat apohya, atra me rāgaḥ iti 
abhiṣvaṅgamātraṃ, na sarvākāṅkṣāmayasya rāgatattvasya samānaḥ | tathā 
jānāmi iti kiṃcideva purovarti ghaṭādikaṃ, na punar dūravyavahitaṃ vastu; - iti 
vidyātattvam | śuddhavidyāpekṣayā kārikāyām avidyā iti kathitam, na punar 
vedanābhāvāt | māyāsahitaṃ bhedaprathāyuktam

--------------- page  49 -----------------

 etat kañcukaṣaṭkaṃ paśoḥ - iti || 17 ||

	katham etasya kañcukaṣaṭkasya aṇuṃ prati antaraṅgatvam ? - ityāha

kambukamiva taṇḍulakaṇa -
viniviṣṭaṃ bhinnamapyabhidā |
bhajate tattu viśuddhiṃ
śivamārgaunmukhyayogena || 18 ||

	vāstavena vṛttena bhinnamapi kambukaṃ yathā abhidā 
taṇḍulakaṇaviniviṣṭam iti abhedena taṇḍulāntaśca ūtaṃ bhāsate, nipuṇairapi 
yatnataḥ prakṣipyamāṇaṃ taṇḍulasya antaraṅgatvāt na pṛthak avatiṣṭhate, tathā 
etat māyādikañcukam aṇoḥ taṇḍulasthānīyasya antaraṅgatvāt 
kambukasthānīyaṃ vyatiriktamapi, avyatiriktatayā pūrṇasaṃvitsvarūpam 
ācchādya sthitam - iti śeṣaḥ | evamapi durnivāraṃ kathaṃ tat vilīyate ?-

--------------- page  50 -----------------

 ityāha bhajate ityādi | tuḥ viśeṣe, na anyaḥ atra upāyaḥ | śivasya 
svātmamaheśvarasya yo'sau mārgaḥ paramādvayacidānandaikaghano'smi, 
mamaiva idaṃ viśvaṃ svaśaktivijṛmbhaṇamātram iti yā 
svātmasvarūpavibhūtipratyavamarśarūpā saraṇiḥ, tadaunmukhyaṃ 
dārḍhyena tannibhālanaparatvaṃ, sa eva yogaḥ pūrṇarūpatayā aṇoḥ svātmani 
svasvarūpatvena saṃbandhaḥ, tena tat uktasvarūpaṃ kañcukaṃ viśeṣeṇa 
śuddhiṃ bhajate svayameva niḥśeṣeṇa vilayaṃ sevate | etaduktaṃ syāt - yadā 
parameśvaraśaktipātaviśuddhahṛdayaḥ paśurbhavati, tadā ahameva 
maheśvaraḥ iti svātmajñānāvirbhāvāt svayameva paśutvāpādakaṃ 
kañcukāvaraṇaṃ vilīyate, na punar atra svātmajñānaṃ vihāya māyīyaṃ 
kiṃcit niyatiśaktisamutthaṃ karma pragalbhate iti || 18 ||
	evaṃ - vidhasya aṇoḥ bhoktuśca bhogyena bhāvyam, 

--------------- page  51 -----------------

 - iti prādhānikaṃ tattvasargam āha

sukha - duḥkha - mohamātraṃ
niścaya - saṃkalpanābhimānācca |
prakṛtirathāntaḥkaraṇaṃ
buddhi - mano'haṅkṛti kramaśaḥ || 19 ||

	sattva - rajastamasāṃ yat sukhaduḥkha - mohātmakaṃ sāmānyaṃ 
rūpam, - aṅgāṅgibhāvo yatra na upalabhyate - sā mūlakāraṇaṃ prakṛtiḥ | 
prakṛteḥ anantaraṃ kāryarūpam antaḥkraṇam āha niścaya ityādi | niścayaḥ 
idam etādṛk - iti, saṃkalpanaṃ mananam, abhimāno mamatā - iti krameṇa 
buddhiḥ, mano, 'haṃkāraḥ iti, evaṃ - rūpaṃ tritayam antaḥkaraṇam 
aṅgāṅgibhāvena guṇānāṃ kāryaṃ, bhūtendriyādyapekṣayā ca kāraṇam - 
iti || 19 ||

	bāhyakaraṇam āha

--------------- page  52 -----------------

 śrotraṃ tvagakṣi rasanā
ghrāṇaṃ buddhīndriyāṇi śabdādau |
vākpāṇi - pāda - pāyū -
pasthaṃ karmendriyāṇi punaḥ || 20 ||

	vakṣyamāṇe śabdādau viṣaye, jñānapradhānāni śrotrādīni pañca-
indriyāṇi, kriyāpradhānāni ca indriyāṇi pañca vāgādīni | - vacanādāna - 
viharaṇa - visargānandātmakāḥ karmendriyāṇāṃ viṣayāḥ | - iti ubhayathā ca 
śṛṇomi, kathayāmi iti ahaṃkārānugamāt ahaṃkārakāryāṇi || 20 ||

eṣāṃ śabdādiviṣayasvarūpaṃ kathayati
eṣāṃ grāhyo viṣayaḥ
sūkṣmaḥ pravibhāgavarjito yaḥ syāt |
tanmātrapañcakaṃ tat
śabdaḥ sparśo maho raso gandhaḥ || 21 ||

--------------- page  53 -----------------

 jñeya - kāryatayā svīkāryo yaḥ eṣām indriyāṇāṃ viṣayo gocaraḥ 
syāt | sa kīdṛśaḥ ? pravibhāgavarjitaḥ viśeṣeṇa bahiṣkṛtaḥ sāmānyātmā 
sūkṣmo yo'rtho bhavet tadeva śabdādi sāmānyarūpaṃ tanmātraṃ 
śabdasāmānyaṃ, śabdatanmātram - iti | evam anyāni | viṣaya - viṣayiṇoḥ 
parasparāpekṣitvāt indriyavat idamapi tanmātrapañcakam āhaṅkārikameva - iti 
|| 21 ||
	viṣayāṇāṃ parasparasāṃkaryeṇa pṛthivyādīni kāryam - ityāha

etatsaṃsargavaśāt
sthulo viṣayastu bhūtapañcakatām |
abhyeti nabhaḥ pavana -
stejaḥ salilaṃ ca pṛthvī ca || 22 ||

	eteṣāṃ saṃsargavaśāt parasparasaṃgharṣasāmarthyāt yo viśeṣaḥ 
sthūlo viṣayaḥ sa eva bhūtarūpatāṃ yāti | 

--------------- page  54 -----------------

 tathāhi - śabdatanmātrāt śabdaviśeṣo nabho jāyate, śabdaparśābhyāṃ 
pavanaḥ, rūpasaṃyuktābhyām etābhyāṃ tejaśca, ebhyo rasayuktebhyaśca 
āpaḥ, gandhasaṃyuktebhyaśca pṛthvī, - iti pañcamahābhūtāni 
kāryakāraṇānuguṇam iti kṛtvā ekottaraguṇāni; - iti | evam eṣā prakṛtiḥ 
kāryakāraṇātmā puruṣasya parameśvarasya icchayā bhogyatayā pravṛttā, - iti 
ṣaṭtriṃśatattvātmakaṃ jagat vibhajya pratitattvaṃ  nirūpitam || 22 ||
	māyākañcukavat prakṛte kañcukatāṃ puruṣaṃ prati āha

tu ṣa iva taṇḍulakaṇikā -
māvṛṇate prakṛtipūrvakaḥ sargaḥ |
pṛthvīparyanto'yaṃ
caitanyaṃ dehabhāvena || 23 ||

	ayamapi prādhānikaḥ sargo parāparyantaḥ taṇḍulakaṇaṃ yathā tuṣo 
dhānyacarma āvṛṇute

--------------- page  55 -----------------

 samācchādyati, tathaiva māyākañcukena kambukasthānīyena samāvṛtaṃ 
caitanyaṃ punarapi tuṣasthānīyena dehabhāvena etat samāvṛṇute, 
tatpratiprākāratayā sthagayati | atra ime pramātāraḥ, kalābhiḥ 
indriyamātrābhiḥ viśeṣāntabhiḥ dehasvabhāvāḥ sakalāḥ - iti ucyante, 
viśeṣavarjitā videhāḥ pralayākalāḥ - iti ca | evaṃ śivādi sakalānta - 
pramātṛsaptakasanāthaṃ rudra - kṣetra - jñādhiṣṭhitaṃ jagat - iti || 23 ||
	kañcukatritayasya para - sūkṣma - sthūlarūpatām āha

paramāvaraṇaṃ mala iha
sūkṣmaṃ māyādi kañcukaṃ sthūlam |
bāhyaṃ vigraharūpaṃ
kośatrayaveṣṭito hyātmā || 24 ||

	caitanyasya svasvarūpāpahastanasatattvā akhyātireva āṇavo malaḥ 
āntaraḥ, svarṇasya kālikeva

--------------- page  56 -----------------

 param antaraṅgam āvaraṇaṃ chādanam, tādātmyena sthitatvāt | 
māyādi - vidyāntaṃ kañcukaṣaṭkaṃ sūkṣmam ātmana āvaraṇam, 
taṇḍulasya kambukamiva āvaraṇaṃ pṛṣṭhapātitvena āste, yena bhedamayī 
jñatva - kartṛtvādiprathā prathate; - iti eṣa māyīyo malaḥ | etadapekṣayā 
bāhyaṃ tuṣasthānīyaṃ prādhānikaṃ śarīrasattālakṣaṇam āvaraṇaṃ 
sthūlaṃ tvaṅmāṃsādirūpatvāt; eṣa tṛtīyaḥ kārmo malaḥ, yena pramātā 
śubhāśubhakarmasaṃcayabhājanaṃ bhavati | evam anena para - sūkṣma - 
sthūlarūpeṇa kośatrayeṇa veṣṭito vikasvaro'pi ghaṭākāśavat saṃkucitīkṛtaḥ 
ātmā iti aṇuḥ - iti, paśuḥ - iti ucyate || 24 ||
	etatsaṃbandhāt upahata iva bhavati - ityāha

ajñāna - timirayogād
ekamapi svaṃ svabhāvamātmānam |
grāhya - grāhakanānā -
vaicitryeṇāvabudhyeta || 25 ||

--------------- page  57 -----------------

 eṣa kośatrayasaṃbaddha ātmā, ātmākhyātyandhakārasaṃbandhāt 
ekamapi advayasvabhāvamapi svaṃ nijaṃ na anyasmāt upanatam, 
ātmasvabhāvaṃ caitanyam ātmasattālakṣaṇaṃ svarūpaṃ, pramātṛ - 
pramāṇa - prameyanānāracanāprapañcena jānāti, abhedaviparītena bhedena 
abhimanyate, - iti yāvat | yathā rekhātimiropahataḥ puruṣa ekamapi candraṃ 
paśyan, dvau candrāvimau nabhasi staḥ iti paricchindan, lokamapi darśayati dvau 
candrāvimau paśya iti | - vastuvṛttena eka eva asau candraḥ, - iti timiravaśāt tathā 
bhāsate, yena udvegalakṣaṇām ānandalakṣaṇāṃ vā arthakriyāṃ sa taimirikaḥ 
prāpnoti | - tathaiva ajñānatimiraprāptabhedaprarthaḥ sarvaṃ 
svātmano'bhinnamapi bhedena vyavaharan bhinnaṃ karmaphalam arthayate, yena 
bhūyobhūyaḥ svarga - nirayādibhogabhāk bhavati | ataśca ajñānasya timireṇa, 
rūpaṇā, viparītābhāsanāt || 25 ||

--------------- page  58 -----------------

 ātmādvayaṃ dṛṣṭāntena nidarśayati
rasa - phāṇita - śarkarikā -
guḍa - khaṇḍādyā yathekṣurasa eva |
tadvad avasthābhedāḥ
sarve paramātmanaḥ śaṃbho || 26 ||

	rasādayaḥ ikṣubhedā yathā eka eva ikṣurasaḥ paramārthataḥ sarvatra 
mādhuryānugamāt, tathaiva jāgradādi - avasthābhedā grāhya - 
grāhakaprapañcarūpāḥ sarve viśeṣāḥ paramātmanaḥ svasvabhāvasya 
śaṃbhoḥ caitanyamaheśvarasyaiva | yataḥ sa eva bhagavān sarvasya 
svātmabhūtaḥ svasvātantryāt tāṃ tāmapi bhūmikāṃ samāpannaḥ, tathā 
grāhya - grāhakādyavasthāviśiṣṭaḥ prathate, yathā ikṣurasaḥ; na punaḥ 
svātmanaḥ tasmāt bhinnaṃ kiṃcit asti, - iti sa eka eva, sarvāvasthāsu 
saṃvidanugamāt | itthaṃ sarvatra ekarūpatādarśanāt pramātā sarvadṛśvā 
bhavati | yathāha śrīśaṃbhubhaṭṭārakaḥ

--------------- page  59 -----------------

 eko bhāvaḥ sarvabhāvasvabhāvaḥ
sarve bhāvā ekabhāvasvabhāvāḥ |
eko bhāvastattvato yena dṛṣṭaḥ
sarve bhāvāstattvatastena dṛṣṭāḥ ||

iti | bhagavadgītāsvapi

	sarvabhūteṣu yenaikaṃ bhāvamakṣayamīkṣate |
	avibhaktaṃ vibhakteṣu tajjñānaṃ viddhi sāttvikam || (18 | 20)

iti || 16 ||
	tīrthāntaraparikalpitastu bhedaḥ saṃvṛtyartham abhyupagato, na 
satyabhūmau avakalpate - ityāha

vijñānāntaryāmi -
prāṇa - virāḍdeha - jāti - piṇḍāntāḥ |
vyavahāramātrametat
paramārthena tu na santyeva || 27 ||

	vijñānam iti bodhamātrameva kevalam anupādhi, nāma - rūparahitamapi 
anādivāsanāprabodhavaicitryasāmarthyāt

--------------- page  60 -----------------

 nīla - sukhādirūpaṃ bāhyarūpatayā nānā prakāśate, - iti 
vijñānavādinaḥ |

	puruṣa evedaṃ sarvam----------------------|
	neha nānāsti kiṃcana-------------------------|

iti nyāyena antaryāmi sarvasya - iti paraṃ brahmaiva anādyavidyāvaśāt bhedena 
prakāśate, - iti brahmavādinaḥ | atra ubhayatrāpi vedanasya svātantryaṃ 
jīvitabhūtaṃ viśvanirmāṇahetuḥ, - iti na cetitam |
	anye prāṇa - brahmavādinastu yathāprāṇanameva viśvam āgūrya 
vartate, nahi prāṇanād ṛte anyat kiṃcit brahmano rūpam; - iti savimarśaṃ 
śabdabrahma, - ityāhuḥ |
	apare pratipannā yathā virāḍdeham iti vairājamapi brahmaṇaḥ 
satyabhūtam, - iti | yathoktam

	yasyāgnirāsyaṃ dyaurmūrdhā khaṃ nābhiścaraṇau kṣitiḥ |
	sūryaścakṣurdiśaḥ śrotre tasmai lokātmane namaḥ ||

iyevamādi |
	jāti iti mahāsattāsāmānyalakṣaṇaṃ sarvaguṇāśrayaṃ

--------------- page  61 -----------------

 vastu paramārthasat, - iti vaiśeṣikādayo bruvate |

	anye piṇḍā iti vyaktaya eva paramārthasatyo, nahi sāmānyaṃ nāma 
kiṃcit ekam anekaguṇāśrayaṃ prakāśate, nāpi upapadyate vā; - iti 
vyaktīnāmeva vyavahāraḥ parisamāptaḥ, kiṃ sāmānyena, - iti 
nānāvṛttivikalpaiḥ sāmānyaṃ vivadamānā, vyaktayo na anuyanti, 
anyadanuyāyi na bhāsate iti evamādi bahu bruvanto, jātirna paramārthaḥ iti 
pratipannāḥ; - ityeva vijñānādiḥ piṇḍo'nte yeṣāṃ bhedānāṃ te 
tathoktāḥ, vyavahāramātram etat iti asmin svātantryavāde prakāśamānasya 
vastuno'napahnavanīyatvāt ete bhedāḥ saṃvṛtisatyatvena prakāśante, 
paramārthena tu na santyeva iti, na punaḥ satattvatayā ete bhedāḥ; 
tīrthāntaraparikalpitabhedā

--------------- page  62 -----------------

 vidyamānā eva | tasmāt eka eva paramaprakāśaparamārthaḥ svatantraḥ 
caitanyamaheśvara itthamitthaṃ cakāsti, yato'nyasya etadvyatiriktasya 
aprakāśarūpasya prakāśamānatābhāvāt | yaduktam

	tīrthakriyāvyasaninaḥ svamanīṣikābhi -
	rutprekṣya tattvamiti yadyad amī vadanti |
	tat tattvameva bhavato'sti na kiṃcidanyat
	saṃjñāsu kevalamayaṃ viduṣāṃ vivādaḥ ||

iti || 27 ||
	idānīṃ bhrānteḥ asadarthapratipādanasāmarthyena nidarśanam āha

rajjvāṃ nāsti bhujaṅga -
strāsaṃ kurute ca mṛtyuparyantam |
bhrāntermahatī śakti -
rna vivektuṃ śakyate nāma || 28 ||

--------------- page  63 -----------------

 bhrānteḥ pūrṇatvākhyātirūpāyā atādrūpyapratibhāsane mahatī 
śaktiḥ uttamaṃ sāmarthyaṃ na kenacit vivektuṃ śakyate na kenacit 
vicārāyituṃ pāryate, - iti yāvat | yathā vastuvṛttena rajjuḥ paridṛśyamānā, 
dīrghatva - kuṇḍalinīrūpatvabhramāt sarpo'yam iti adhyavasātṝṇāṃ 
rajjudravye'pi asadarthapratibhāso'yaṃ sarpādhyavasāyaḥ sadarthapratibhāsāt 
bhayaṃ maraṇāvasāyaṃ  vidadhāti | anubhavasiddhamapi etat sthāṇuṃ 
bhūtam iti matvā, svayaṃ bhīṣaṇīyaṃ vā ākāraṃ samullikhya bhrāntāḥ 
santo hṛdbhaṅganāśaṃ ke nāma na yātāḥ, - iti vibhrama eva apūrṇatvaprathane 
hetuḥ - iti || 28 ||
	etat prakṛte samarthayate

tadvad dharmādharma
svarnirayotpatti - maraṇa - sukha - duḥkham |
varṇāśramādi cātma -
nyasadapivibhramabalādbhavati || 29 ||

--------------- page  64 -----------------

 evaṃ yathā rajjuḥ paramārthasatī bhrāntyā sarpatayā vimṛṣṭāpi 
sarpagatām arthakriyāṃ karoti, tathaiva dehātmamānināṃ cetasi dharmādi 
asadapi tattvataḥ avidyamānaṃ, vibhramaṃ - vaśāt māyāvyāmohasāmarthyāt 
eva bhavati etadeva tattvam iti bhrāntyā sattāṃ labhate | dharmaḥ 
aśvamedhādiḥ, adharmo brahmahananādiḥ, svaḥ niratiśayā prītiḥ nirayo 
yātanā, utpattiḥ janma, maraṇaṃ janmābhāvaḥ, sukham āhlādaḥ, duḥkhaṃ 
rājasaḥ kṣobhaḥ, tathā varṇo brahmaṇo'smi - ityādi, āśramo brahmacārī - 
ityādi, ādi - grahaṇāt tapaḥ pūjāvratāni, - iti sarvaṃ kalpanāmātrasāraṃ 
vibhramavijambhitameva māyāśaktyā dehādyātmatayā abhimanyate | etat sarvaṃ 
bhrānteḥ prabhavati, yayā anavaratasvarga naraka - janma - maraṇa - prabandha - 
bhājaḥ paśavaḥ; na punaḥ paramārthataḥ 
svātmano'navacchinnacidānandaikaghanasya dharmādharmādikaṃ kiṃcit cidyate 
- iti || 29 ||
	evaṃ asadarthapratibhāsane bhrānteḥ sāmarthyaṃ

--------------- page  65 -----------------

 vicārya, tadutpattim āha

etat tad andhakāraṃ
yad bhāveṣu prakāśamānatayā |
ātmānatirikteṣvapi
bhavatyanātmābhimāno'yam || 30 ||

	etat tad andhakāram iti eṣā sā samanantarapratipāditā viśvamohinī 
pūrṇatvākhyāti - rūpā bhrāntiḥ, yad bhāveṣu pramātṛ - prameyarūpeṣu 
viśvavartiṣu padārtheṣu prakāśamānatayā iti

	-----------------nāprakāśaḥ prakāśate |

iti prakāśamānatānyathānupapattyā; prakāśaśarīrībhūteṣu ātmanaḥ 
caitanyamaheśvarāt apṛthagbhūteṣu satsvapi, yaḥ ayam atirekeṇa amī bhāvā 
grāhyā, bāhyā, matto bhinnāśca iti anātmābhimāno 
vāstavacidrūpatāpahastanena yat teṣu avāstavaṃ jaḍatvāpādanam | 
ayamāśayaḥ - bhāvaprakāśane anyasya aprakāśarūpasya

--------------- page  66 -----------------

 bāhyavāsanāderhetoḥ anupapadyamānatvāt svātmaprakāśa eva 
svatantraḥ, arthāt nīlasukhādinā prakāśate; ataḥ pramātṛprameyarūpatayā 
citsvarūpo'hameva prakāśe, - iti yat vāstavaṃ rūpaṃ, tat na prakāśate, 
kevalameva avāstavo bhedaḥ prathate, - iti tāttvikaprathanābhāvāt bhrānteḥ 
andhakāreṇa rūpaṇam - iti || 30 ||
	ātmani anātmābhimānapūrvo'nātmani ātmābhimāno bhavati, - iti 
pratipādayan bhrānteḥ sutarāṃ moharūpatām āha

timirādapi timiramidaṃ
gaṇḍasyopari mahānayaṃ sphoṭaḥ |
yadanātmanyapi deha -
prāṇādāvātmamānitvam || 31 ||

	ādau tāvat ekasaṃvitsatattveṣvapi bhāveṣu bhedamayaṃ jāḍyāpādanam 
akhyātitimireṇa kṛtaṃ, yat svātmano'bhinnānāṃ bhāvānāṃ tato bhedena

--------------- page  67 -----------------

 prathanam; ata eva timiramiva timiram akhyātiḥ | yathā eko'pi candraḥ 
cakṣusthena rekhātimireṇa dvidhā bhāsyate dvau candrau iti , tathaiva 
akhyātitimiram ekamapi sarvaṃ svātmasvarūpaṃ vastu bhedena anātmarūpaṃ 
prakāśitavat | evam avasthite timiram aparam āyātaṃ, mohāt moho'yam āpatito, 
gaṇḍasya upari piṭakodbhavaśca; yat akhyātyapahastitacitsvarūpeṣvapi 
viśvavartiṣu padārtheṣu jāḍyam āpāditeṣu madhyāt uddhṛte vyatirikte jaḍe 
dehaprāṇādau vedyakhaṇḍe kṛśo'haṃ, sthūlo'haṃ, kṣudhito'haṃ, sukhī 
asmi, na kiṃcit aham, - iti pramātṛtayā anātmabhūte ātmamānitvam 
atādrūpye tādrūpyapratipattiḥ, etat ativaiśasam | yadi tāvat ātmābhimānena 
vinā vaiśasam asti, tat nīlasukhādiṣvapi astu, mā vā kutrāpi bhūt; yat punaḥ 
katipaye jaḍe dehādau loṣṭaprāye

--------------- page  68 -----------------

 ātmatayā ahantārasābhiṣekaḥ, anyatra nīla - sukhādau idantayā 
anātmapratipādanam, eṣa eva pūrṇaḥ saṃsāraḥ śocanīyo, yadabhimānopanato 
dvandvā6bhighātaḥ karṣati paśūn - iti | yaduktaṃ mārkaṇḍeyapūrāṇe yoginyā 
madālasayā

	yānaṃ kṣitau yānagataśca deho
	dehe'pi cānyaḥ puruṣo niviṣṭaḥ |
	mamatvamurvyāṃ na tathā yathā sve
	dehe'timātraṃ ca vimūḍhataiṣā || (25 | 18)

iti || 31 ||
	evam akhyātivaśāt mithyāvikalpaiḥ ittham 

ātmānaṃ badhnāti - ityāha
deha - prāṇavimarśana -
dhījñāna - nabhaḥ prapañcayogena |
ātmānaṃ veṣṭayate
citraṃ jālena jālakāra iva || 32 ||

__________________FOOṭṇOṭEṣ___________________

[6 dvandvena sukhaduḥkhādirūpeṇābhivātaḥ parābhava ityarthaḥ |]

--------------- page  69 -----------------

 akhyātyapahastitacaitanyaḥ sarvaḥ pramātā svotthaiḥ vikalpanigaḍaiḥ 
vyāpakamapi ātmānaṃ veṣṭayate | katham ? - ityāha deha ityādi | 
dehaprāṇayoḥ vimarśanaṃ, dhiyo jñānaṃ niścayaḥ, nabhasāṃ 
prapañco vistāraḥ, tadyogena dehādivikalpasaṃbandhena | yathā kṛśaḥ, sthūlo, 
rūpavān paṇḍitaśca asmi, - iti bālāṅganāpāmarāḥ kārṣikāḥ itthaṃ 
svavikalpena dehameva ātmatvena pratipannāḥ kiṃcidvivecakaṃmanyāḥ |
	dehastāvat ihaiva pralīyate, kuto'sya ātmatvam?, ato yaḥ kṣudhitaḥ 
pipāsitaḥ so'ham, - iti prāṇātmamāninaśca vivecakaṃmanyatarāḥ |
	dehaprāṇau jaḍau loṣṭādivat, kuto'nayoḥ ātmabhāvaḥ?, tataḥ sukhī 
aham, duḥkhī aham, - iti yaḥ sukha - duḥkhādi cetate, sa ātmā,

--------------- page  70 -----------------

 - iti puryaṣṭakābhimānino mīmāṃsakādayo'pi vivecakatamāśca |

	etat sukhaduḥkhādyapi buddhidharmaḥ katham ātmatayā vaktuṃ śakyaḥ ?, 
tato deha - prāṇa - dhīvikalpānāṃ yatra abhāvaḥ sa ātmā, - iti 
śūnyābhimāninaḥ | evaṃ yatkiṃicit idaṃ bhāti, tat nāham, - iti aprathārūpaṃ 
śūnyameva sarvāpohanasvabhāvam ātmā, - iti nabhaḥśabdena uktaḥ | tadapi 
śūnyaṃ yadā samādhānāvasare vedyīkurvate, - etadapi śūnyaṃ vayaṃ na 
bhavāmaḥ, - tadā śūnyāntaram ātmatvena vidadhānāḥ, na iti, na iti 
brahmavādyabhyupagatatattacchūnyaparityāgena tāṃ tāṃ śūnyātmatāṃ 
parigṛhṇanti, - iti nabhaḥ prapañcaḥ kārikāyāṃ nirūpitaḥ | itthaṃ 
saṃvitsvarūpāparyavasānāt śūnyātmamānino yoginaḥ suṣuptaguhānimagnā 
jaḍāmtāno

--------------- page  71 -----------------

 bhrāntā eva ātmānaṃ saṃvitsvarūpamapi jāḍyena anubadhnanti | citram 
iti āścaryametat - yat uta vaiśasaṃ, na etata svayaṃ kartuṃ pāryate - iti | atra 
dṛṣṭāntam āha jālena ityādi | yathā jālakāraḥ kaścit kṛmirvā svanirmitena 
phenena jālam āvaraṇaṃ nirmāya, sarvato gatam ātmānaṃ veṣṭayate svaṃ 
svātmanidhanāya badhnāti, yena uttaratra tatraiva nidhanaṃ yāti ; tathā 
dehādyātmamānī tu svavikalpakalpitaiḥ ahaṃ, mama iti vikalpaiḥ 
svātmānameva badhnāti | tathā ca bauddhāḥ

	satyātmani parasaṃjñā
	svaparavibhāgāt parigrahadveṣau |
	anayoḥ saṃpratibaddhāḥ
	sarve doṣāḥ prajāyante ||

ityāhuḥ || 32 ||
	katham eṣa durnivāro mahāmoho dehādipramātṛtāsamutthaḥ pralīyate? - 
iti bhagavatsvātantryameva atra hetuḥ - ityāha

--------------- page  72 -----------------

 svajñānavibhavabhāsana -
yogenodveṣṭayennijātmānam |
iti bandhamokṣacitrāṃ
krīḍāṃ pratanoti paramaśivaḥ || 33 ||

	svasya ātmanaḥ caitanyalakṣaṇasya yat jñānaṃ svasvātantryāvagamaḥ, 
tasya vibhavo dehādyabhimānavigalanena yat citsvarūpe 
parāhantācamatkārarūpasya svasvātantryasya sphītatvaṃ, cidānandaikaghanaḥ 
svatantro'smi - iti, tasya bodhasvātantryasvarūpasya vibhavasya bhāsanaṃ 
prakāśaḥ sarvo mamāyaṃ vibhavaḥ iti bāhyatayā abhimatasya sarvasya 
svātmanyeva svīkāraḥ, tasya yogaḥ evaṃ - pariśīlanakrameṇa ātmani yat 
vimarśadārḍhyam, evam etena svajñānavibhavabhāsanayogena nijam 
ātmānaṃ na anyata upanataṃ caitanyasvabhāvam udveṣṭayate deha - prāṇa - 
puryaṣṭaka - śūnyaparāmarśanānigaḍaiḥ yo veṣṭita āsīt,

--------------- page  73 -----------------

 tameva caitanyasvarūpaḥ svatantro'smi iti vimarśanena punarapi 
bhagavāneva udveṣṭanaṃ vigataveṣṭanaṃ kurute - iti | evam akhyātibalāt āgataṃ 
svātmano dehādyāvaraṇaṃ, tat punarapi khyātibalāt vinaśyati, - iti 
svavikalpakalpita iyān doṣaḥ, - iti śrīmadgranthakṛtā tantrasāre nirūpitam

	yo niścayaḥ paśujanasya jaḍo'smi karma
	saṃpāśito'smi malino'smi parerito'smi |
	ityetadanyadṛḍhaniścayalābhayuktyā
	sadyaḥ patirbhavati viśvavapuścidātmā ||

iti | kimiti badhnāti muñcati ca bhagavān ?- ityāha iti bandha ityādi | iti prāk 
pratipāditena krameṇa bhagavān svatantraḥ paramaśivaḥ 
pūrṇacidānandaikaghanalakṣaṇaḥ svarūpagopanasatattvakrīḍāśīlatvāt 
akhyātyavabhāsanapūrvaṃ svātmānameva dehādipramātṛtāpannaṃ vidhāya, 

--------------- page  74 -----------------

 svarūpaṃ pracchādya ca bandhaṃ vidadhāti; tathaiva punaḥ svecchātaḥ 
svātmajñānaprakāśakrameṇa dehādipramātṛtābandhaṃ nivārya, sa eva taṃ 
svātmānaṃ mocayati; - iti ubhayathā bandhamokṣacitrāṃ 
saṃsārāpavargasvarūpāścaryamayīṃ krīḍāṃ khelāṃ pratanoti vistārayati 
ekākī na ramāmyaham iti | svabhāva eva eṣa devasya, yat tāṃ tāmapi 
avasthām āpannaḥ svarūparūpaḥ san sarvatra anubhavitṛtayā prathate, - ityetadeva 
svātantryam || 33 ||

	na kevalametat , yāvat aparaḥ kaścit avasthāviśeṣaḥ svasmin rūpe 
viśrānta eva avabhāsyate bhagavatā - ityāha

sṛṣṭi sthiti - saṃhārā
jāgratsvapnau suṣuptamiti tasmin |
bhānti turīye dhāmani
tathāpi tairnāvṛtaṃ bhāti ||

--------------- page  75 -----------------

 viśvāpekṣayā ye sargādayo, māyāpramātṛgatāśca ye 
jāgradādayo'vasthāviśeṣāḥ, te ubhayathā etasmin bhagavati ānandaghane 
turīye dhāmani caturthe pūrṇāhantāmaye pade bhānti tadviśrāntāḥ santaḥ 
svarūpasattāṃ kalpitapramātrapekṣayā bāhyatayā labhante | parameśvarabhittau 
yat na prakāśate tat bāhyatayāpi na prakāśate, ataḥ

	triṣu caturthaṃ tailavadāsecyam | (3 | 20 śi. sū.)

iti sarvāsu avasthāsu turīyaṃ rūpam anusyūtattvena sthitam, - iti paramārthaḥ | 
etāvatā tatra taiḥ svarūpam ācchāditaṃ syāt na vā? - ityāha tathāpi 
tairnāvṛtaṃ bhāti iti | itthamapi taiḥ svarūpasattārtham āvṛtamapi tebhyaḥ 
samuttīrṇatayā sarvānubhavitṛtayā sarvatra avabhāsata eva, na punaḥ 
tadāvaraṇena pūrṇasvarūpatāṃ tatra tirodhatte; - iti śivadhāma 
sarvāvasthāsvapi sadaiva paripūrṇam || 34 ||

--------------- page  76 -----------------

 vedāntabhāṣābhirjāgradādīnāṃ trayāṇāṃ svarūpaṃ vyavaharan, 
tadanusyūtamapi tataḥ paraṃ turīyam āvedayati

jāgradviśvaṃ bhedāt
svapnastejaḥ prakāśamāhātmyāt |
prājñaḥ suptāvasthā
jñānaghanatvāttataḥ paraṃ turyam || 35 ||

	jāgradavasthaiva viśvaṃ brahmaṇo vairājaṃ svarūpaṃ, kutaḥ? bhedāt 
śabdādiviṣayapañcakasya bāhyatayā parameśvarasṛṣṭasyaiva 
sarvapramātṝṇāṃ cakṣurādīndriyapravṛtteḥ, - iti ekasyaiva brahmaṇo 
viṣayaviṣayibhāvena sthitasya nānā indriyajñānavaicitryam | ata eva śivasūtreṣu

	jñānaṃ jāgrat | (1 | 8)

iti | eṣā brahmaṇo virāḍavasthā gīyate | yacchrutiḥ

--------------- page  77 -----------------

 	yo viśvacakṣuruta viśvato mukho
	viśvato hasta uta viśvataspāt |
	saṃbāhubhyāṃ namate saṃyajatrai -
	rdyāvāpṛthivī janayandeva ekaḥ ||

iti | tathā svapnaḥ tejo'vasthā brahmaṇaḥ | kutaḥ? - ityāha 
prakāśamāhātmyāt iti | svapne bahiṣkaraṇāni śabdādau viṣaye tāvat na 
pragalbhante, nāpi tatra bāhyaṃ śabdādikaṃ nāma kiṃcit paramārthasat vidyate, 
nāpi bāhyatayā adhyavasāyasya avidyādi kiṃcit bhinnam abhinnaṃ vā 
kāraṇāntaram upalabhyate, yuktyā vicāryamāṇaṃ vā upapadyate, atha ca svapne 
sarvaṃ prakāśate; ata idam arthabalāt āyātam - yat sa eva bhagavān svasvabhāvo 
devaḥ tattatpramātṛtāṃ samāviṣṭaḥ svapnāyamānaḥ svātmānameva 
prakāśasvātantryāt gṛha - nagarāṭṭālādi - anekapramātṛvaicitryarūpatayā 
pravibhajya pratipramātṛ svapne asādhāraṇamevaviśvaṃ prakāśayatyeva, - iti 
brahmaṇaḥ

--------------- page  78 -----------------

 svātantryaṃ svapna eva brahmavādibhiḥ abhyupagatam | yato vedānteṣu 
idamuktam

	pravibhajyātmanātmānaṃ sṛṣṭvā bhāvān pṛthagvidhān |
	sarveśvaraḥ sarvamayaḥ svapne bhoktā prakāśate ||

iti prakāśamāhātmyameva - atra hetuḥ, ataḥ svapno brahmaṇaḥ tejo'vasthā - iti | 
tathā prājñaḥ suptāvasthā iti | sarvapramātṝṇāṃ yā suptāvasthā 
suṣuptaṃ sā prajñaḥ iti brahmaṇaḥ prājñāvasthā - iti | yataḥ 
sarvapramātṝṇāṃ grāhya - grāhakaprapañcavilayāt mahāśūnyatvarūpe 
grāhyādivilaye saṃskāraśeṣe suṣupte viśvasya bījabhūtasya brahmaṇa eva 
prajñā, brahma prajñātṛtayā antaratamam avaśiṣyate, - iti yāvat | sarvasya 
pramātuḥ nīlasukhādiviśvavaicitryaprathāyāḥ saiṣā saṃskārabhūmiḥ, tataḥ 
prabuddhasya prāganubhūtavat vyavahāradarśanāt; anyathā yadi asyāṃ bhūmau 
sthiraṃ prajñātṛsvabhāvaṃ sarvakroḍīkāreṇa brahma na prākāśiṣyata, kutaḥ 
tata utthitasya

--------------- page  79 -----------------

 pramātuḥ prāganubhūtavastunaḥ tathaiva tat iti anubhūtacaratvena 
smṛtirudapatsyata; nāpi sukham aham asvāpsam, duḥkham aham asvāpsam, 
gāḍhamūḍho'ham āsam iti anubhavaḥ prādurabhaviṣyat - iti | tathā ca 
bhaṭṭadivākaravatsaḥ

	sarve'nubhūtā yadi nāntararthā -
	stvadātmasātkārasurakṣitāḥ syuḥ |
	vijñātavastvapratimoṣarūpā
	kācit smṛtirnāma na saṃbhavettat ||

iti | itthaṃ suṣuptaṃ cinmayameva brahmaṇaḥ prājñāvasthā, - iti gīyate | kutaḥ? 
jñānaghanatvāt iti | suṣuptaturyayoḥ sādhāraṇo'yaṃ hetuḥ, - iti ubhayatra 
yojyam | eṣā suṣuptabhūmiḥ jñānaghanā prakāśamūrtiḥ, kevalaṃ 
viśvapralayasaṃskāreṇa dhyāmalā/ satī śuddhacinmayī na bhavati - iti | 
yaduktaṃ spandaśāstre

	jñānajñeyasvarūpiṇyā śaktyā paramayā yutaḥ |
	padadvaye vibhurbhāti tadanyatra tu cinmayaḥ || (1 ni. 18 kā.)

__________________FOOṭṇOṭEṣ___________________

[7 dhyāmalā asphuṭā ityarthaḥ |]

--------------- page  80 -----------------

 iti | tathā tataḥ paraṃ turyam iti | tasmāt suṣuptāt param anyat 
niḥśeṣapāśavavāsanāsaṃskāraparikṣayāt śuddhapūrṇānandamayaṃ 
brahmaṇaḥ turīyaṃ rūpam anuguṇaṃ nāma | yat atra nāma anvarthaṃ na kiṃcit 
upapadyate, ato vyākhyātasya avasthātrayasya viśrāmabhūtaṃ 
sarvāntaratamatvena anusyūtam, - iti catuḥsaṃkhyāpūraṇena turyam iti 
pūraṇapratyayena saṃkhyāvyapadeśo'tra kṛtaḥ katham avasthātrayasya 
anusyūtamapi, tataḥ param etat ? - ityāha jñānaghanatvāt iti | yato 
jāgradādayo'vasthāḥ sarvā bhedapravaṇatvāt pramātṝṇām ajñānamayyaḥ, 
turīyaṃ grāhya - grāhakakṣobhapralayasaṃskāraparikṣayāt 
jñānaghanaprakāśānandamūrti; ataḥ adantaḥsthamapi tābhyo'vasthābhyaḥ 
cinmayatayā samuttīrṇatvāt param anyat - iti | evam avasthāvicitraṃ 
paramādvayasvabhāvaṃ svatantraṃ brahmaiva pūrṇaṃ vijṛmbhate || 35 ||
	evamapi śuddhasya paramātmanaḥ sarvapramātranusyūtatvena

--------------- page  81 -----------------

 sthitatvāt avaśyaṃ pramātṛgaṇagatam akhyātimālinyam āyāti, - iti yat, 
tat na, - iti dṛṣṭāntena āvedayati

jaladhara - dhūma - rajobhi -
rmalinīkriyate yathā na gaganatalam |
tadvanmāyāvikṛtibhi -
raparāmṛṣṭaḥ paraḥ puruṣaḥ || 36 ||

	yathā megha - dhūma - dhūlīpañjaiḥ ākāśasthairapi ākāśapṛṣṭham 
amalinaṃ svabhāvato na malinaṃ vidhīyate, nāpi nityatāvaitatyakhaṇḍanāṃ vā 
nīyate, kevalaṃ darpaṇapratibimbavat tattadavasthāvicitraṃ gaganaṃ gaganameva, 
sarvadā tathātvena pratyabhijñānāt | tadvat iti tathaiva māyāvikṛtibhiḥ 
akhyātisamutthairvikāraiḥ nānāpramātṛgatairjanma - 
maraṇādyanekavicitrāvasthāmayaiḥ bhagavatsthairapi bhagavān na parāmṛṣṭaḥ 
na taiḥ apahṛtasvarūpaḥ; yataḥ sa eva paraḥ puruṣaḥ iti sarvapuruṣāṇāṃ 
jīvānām ādya ullāso viśrāntisthānaṃ ca, - iti sarvānubhavitṛtayā

--------------- page  82 -----------------

 sadā sphurati, - iti paraśabdena nirdiṣṭaḥ | tasmāt na svasamutthaiḥ 
aprakāśarūpaiḥ māyāvikāraiḥ aindrajālikavat bhagavataḥ kācit khaṇḍanā - 
iti, parameṣṭhinā ajaḍapramātṛsiddhāvapi uktam

	yadyapyarthasthitiḥ prāṇapuryaṣṭakaniyantrite |
	jīve niruddhā tatrāpi paramātmani sā sthitā ||
	tadātmanaiva tasya syātkathaṃ prāṇena yantraṇā |

iti || 36 ||

	nanu ekacinmātraparamārthā api puruṣā viśiṣṭasukha - duḥkha - moha - 
janma - maraṇādinānāvasthāvaicitryabhājaśca, - iti katham etat? - iti dṛṣṭāntam 
āha

ekasmin ghaṭagagane
rajasā vyāpte bhavanti nānyāni
malināni tadvadete
jīvāḥ sukha - duḥkhabhedajuṣaḥ || 37 ||

--------------- page  83 -----------------

 yathā ekasmin kumbhākāśe dhūlipuñjasamācchādite na anyāni 
ghaṭākāśāni vimalānyapi ākāśatvāviśeṣāt malināni rajasā ācchāditāni 
bhavanti | vimalaṃ vyāpakaṃ nityamapi hi gaganaṃ yādṛśaṃ 
ghaṭasaṃkocasaṃkucitaṃ bhavet, tādṛśameva tasyaiva ghaṭasya tat bhavati, na 
punaḥ sarvāṇi ghaṭapaṭādyākāśāni kṛṣṇāgurudhūpitāni, 
mṛgamadādhivāsitāni viṭhiraghandhīni vā ekākāśasvarūpatvāt saṃkīryante, 
svagataghaṭādikṛtavicchedāt; pratyuta ekatrāpi gagane vāstave sthite ghaṭādayaḥ 
svagatabhittisaṃkocaniyantritāḥ santo nānāgaganavaicitryaṃ prathayanti | itthaṃ 
ghaṭakṛtaḥ saṃkoca eva gaganatayā tathā avaśiṣyate, tathātvena 
arthakriyākāritvāt; na punaḥ gaganasya etat kiṃcit ghaṭagataṃ mālinyādi 
svarūpatirodhānāya bhavati, nāpi parasparaṃ ghaṭādyavacchinnānāṃ 
gaganānāṃ vyāmiśraṇā - iti | tadvat iti tathaiva amī jīvāḥ

--------------- page  84 -----------------

 puruṣā ekacinmātraparamārthā api pārameśvaryā māyāśaktyā āṇava 
- māyīya - prākṛtakośatrayāveṣṭanena pūrṇaṃ vyāpi cidānandaikaghanaṃ 
svarūpam apahastya parimitīkṛtāḥ, yena ekacaitanyātmāno'pi 
svagatakośatrayavicchedadaurātmyāt parasparaṃ bhinnāśca - iti, 
ghaṭapaṭādyākāśavat | itthaṃ māyīyakośakṛto viccheda eva jīvatayā 
vyavahriyate, na punaḥ parameśvare'navacchinnacidānandaikaghane jīvāḥ, 
puruṣāḥ, ātmānaḥ, aṇavaḥ - iti darśanāntaradṛṣṭaḥ kaścit vyavahāraḥ | evam 
āṇavādikośāvacchinnā jīvā 
anādivicitrakarmamalavāsanādhivāsitanānādehā nānāśayā nānāpuṇya - 
papa - svarga - naraka - sukha - duḥkha - janma - maraṇādidvandvabhedabhājaśca 
santo na anyonyaṃ saṃkīryante, yathā nānādravyādhivāsitāni 
ghaṭādyavacchinnāni ghaṭākāśāni, - iti sūpapannam 
ekacinmātraparamārthā api svavicchedāt anyonyabhedajuṣaśca iti || 37 ||
	itthaṃ jīvamaṇḍalagatā avasthāviśeṣā ye,

--------------- page  85 -----------------

 te kevalaṃ bhagavati upacaryante, na punaḥ tattvataḥ te'tra kecit - ityāha

śānte śānta ivāyaṃ
hṛṣṭe hṛṣṭo vimohavati mūḍhaḥ |
tattvagaṇe sati bhagavān
na punaḥ paramārthataḥ sa tathā || 38 ||

	tattvagaṇe indriyavarge śānte uparate sati, tadgataḥ paramātmā śānto 
naṣṭa iva abhimanyate; evaṃ tasmin hṛṣṭe sāhlāde sati, sa tathaiva upacaryate; 
paraṃ tamomaye mūḍhe mohavān - iti, yathā sthāvarayonau, na punaḥ 
paramārthato vastuvṛttena sa parameśvaraḥ tathā tena prakāreṇa bhavati | sarvo 
hi jaḍabhāga utpādyaḥ saṃhāryo vā bhavati, na punaḥ nitye bhagavati 
bodhasvabhāve māyādikañcukagate vināśotpattī syātām, - iti bhagavan sadā 
samaḥ || 38 ||
	samutpattikrameṇa āgatā bhrāntiḥ punaḥ jñaptikrameṇa sutarāṃ 
samunmūlitā bhavati, - ityatra svātmana eva svātantryam - ityāha,

--------------- page  86 -----------------

 yadanātmanyapi tadrūpā -
vabhāsanaṃ tat purā nirākṛtya |
ātmanyanātmarūpāṃ
bhrāntiṃ vidalayati paramātmā || 39 ||

	anātmani acetanalakṣaṇe dehādau, kṛśaḥ sthūlaśca asmi ityādi yat 
tadrūpāvabhāsanam anātmani ātmatayā parāmarśanaṃ, tat tasmin purā 
ādāveva nirākṛtya ahaṃ cidānandaikaghano'navacchinnasvabhāvaḥ 
svatantraśca iti akṛtrimāhantāsphuraṇayā kṛtrimadehādipramātṛtām apahṛtya, 
ātmaiva vigalitadehabandhaḥ paramātmatāṃ yātaḥ san ātmani asmin 
sphuradrūpe viśvapadārthe prakāśavapuṣi svāṅgakalpe'pi yā bhrāntiḥ 
dehādipramātṛtābhimānajanitā bhedaprathā, tāṃ vidalayati ahameva eko 
viśvātmanā

--------------- page  87 -----------------

 sphurāmi ityevaṃ cūrṇīkaroti | idamatra tātparyam, yāvat anātmani 
dehādau ātmābhimāno na galitaḥ, tāvat svātmaprathārūpe'pi jagati 
bhedaprathāmoho na vilīyate; ataśca anātmani ātmābhimānabhramavināśāt, 
ātmani anātmābhimānabhrāntiṃ paramātmaiva svātmamaheśvaro bhagavāneva 
vināśayati, na anyasya atra sāmarthyam || 39 ||
	evaṃ bhrāntidvayāpasāraṇāt parameśvarībhūtasya yogino na kiṃcit 
kāryam avaśiṣyate - ityāha

itthaṃ vibhramayugalaka -
samūlavicchedane kṛtārthasya |
kartavyāntarakalanā
na jātu parayogino bhavati || 40 ||

	itthaṃ kārikārthapratipāditaprakāreṇa bhrāntidvayasya prarohavidāraṇe 
kṛtārthasya svasvātantryasya

--------------- page  88 -----------------

 parijñapteḥ aśeṣasaṃkocavidalanāt kṛtaḥ prāptaḥ arthaḥ 
puruṣārthalābho yena, tasya prakṛṣṭayogayuktasya na kadācit kartavyāntarasya 
tīrthāṭana - kṣetraparigraha - dīkṣā - japa - dhyāna - vyākhyā - 
śravaṇādirūpasya kāryaśeṣasya kalanā manovyāpāro'pi na vidyate,

	ayameva paro dharmo yadyogenātmadarśanam |

iti hi svātmayogasya prādhānyam; ataḥ tatprāptyā na anyatra pariśramaḥ 
pūrṇayoginaḥ | yaduktam

	yadā te mohakalilaṃ buddhirvyatitariṣyati |
	tadā gantāsi nirvedaṃ śrotavyasya śrutasya ca || (2 | 52)

iti gītāsu || 40 ||
	saṃprati pṛthivyādimāyāntasya bhedāvabhāsabhājo viśvasya 
bhedābhedamayaśāktabhūmikāveśena

--------------- page  89 -----------------

 pūrṇaprakāśānandaghanaśāṃbhavapadasamāpattyā bhedavilāyanena 
tadabhedamayatāprāptimabhidhāya, tataḥ śāṃbhavāt padāt 
saṃpūrṇasudhāmbhodhikalpāt 
mahāpravāhadeśīyaśāktaprasarollāsapramukhaṃ 
tattattaraṅgabhaṅgirūpatāmabhidadhat, svānubhavasiddhaṃ 
mahāmantravīryasāraṃ samastabhedavilāyanaparamādvayodayaṃ nara - śakti - 
śivasāmarasyātmakaṃ parasaṃviddhṛdayaṃ krameṇa unmīlayiṣyan, viśvasya 
āgamikāṇḍatrayātmatāsaṃkalanayuktyā ekīkāraṃ tāvadāha

pṛthivī prakṛtirmāyā
tritayamidaṃ vedyarūpatāpatitam |
advaitabhāvanabalād
bhavati hi sanmātrapariśeṣam || 41 ||

	pārthiva - prākṛta - māyīyāṇḍātmakaṃ yat sthūla - 
sūkṣmapararūpaṃ trividhaṃ vedyarūpatāpatitaṃ jñānagocaratāṃ prāptaṃ

--------------- page  90 -----------------

 	tattadrūpatayā jñānaṃ bahirantaḥ prakāśate |
	jñānādṛte nārthasattā jñānarūpaṃ tato jagat ||
	nahi jñānādṛte bhāvāḥ kenacidviṣayīkṛtāḥ |
	jñānaṃ tadātmatāṃ yātametasmādavasīyate ||

iti śrīkālikākramoktanyāyena yad advaitabhāvanaṃ tadbalāt - tatprakarṣāt 
sanmātrapariśeṣaṃ prakāśamānatātmakasattāmātrātmakaṃ bhavati | hiḥ 
yasmādarthe || 41 ||
	etadeva bhedasya avāstavatvapratipādanābhi prāyeṇa upapādayati

raśanākuṇḍalakaṭakaṃ
bhedatyāgena dṛśyate yathā hema |
tadvadbhedatyāge
sanmātraṃ sarvamābhāti || 42 ||

	yathā kila sauvarṇaṃ raśanādyābharaṇaṃ suvarṇārthino 
raśanāviśeṣaparihāreṇa hemamātratayaiva ābhāti, hema - rajata - kāṃsya - 
tāmra - nāgādi tāvanmātrārthino loharūpatayā, tadvat sarvam idaṃ

--------------- page  91 -----------------

 tyaktahānādānādivikalpakalaṅkasya avikalpapratibhāsamātraniṣṭhasya 
yogino

	rūpādiṣu pariṇāmāt tatsiddhiḥ |

iti bhaṭṭaśrīkallaṭoktanītyā bhedatyāge sati sanmātraṃ sattāmātrātmakam 
ābhāti || 42 ||
	tadiyataḥ sarvasya saṃkocāvabhāsaparityāgāt āgamaprasiddhyā 
nararūpasya śāktarūpopārohaṃ mantrasaṃpradāyaṃ kaṭākṣayan abhidadhāti

tadbrahma paraṃ śuddhaṃ
śāntamabhedātmakaṃ samaṃ sakalam |
amṛtaṃ satyaṃ śaktau
viśrāmyati bhāsvarūpāyām || 43 ||

	tat etat sattāmātrātmakaṃ sarvaṃ bṛhattvāt brahma | yadāhuḥ 
śrutyantavidaḥ

	sadevedaṃ somya agra āsīt |

iti pūrṇatvāt param, heyopādeyabhāvāt śuddham,

--------------- page  92 -----------------

 pṛthaktvopaśamāt śāntam, ata eva abhedātmakam, 
prakarṣāpakarṣābhāvāt samam, 

	pradeśo'pi brahmaṇaḥ sārvarūpyam -
	natikrāntaścāvikalpyaśca |

iti sthityā sakalam, ata eva amṛtam avināśi,

	satyāsatyau tu yau bhāgau pratibhāvaṃ vyavasthitau |
	satyaṃ yattatra sā jātirasatyā vyaktayaḥ sthitāḥ ||

iti |

	yadādau ca yadante ca yanmadhye tasya satyatā |

iti tatrabhavadbhartṛharinirūpitanītyā satyaṃ, tadeva sattāmātrātmakam etat 
sarvaṃ bhāsvarūpāyām icchā - jñāna - 
kriyārūpaśaktisāmarasyātmikāyāṃ parasyāṃ śaktau viśrāmyati

	saṃvinniṣṭhā viṣayavyavasthitiḥ |

iti sthityā tanmayībhavati iti |
	atha ca śāntaṃ śakārasyānte yanmūrdhanyarūpaṃ, tataḥ paraṃ yat 
amṛtam amṛtabījātmakaṃ

--------------- page  93 -----------------

 brahma sanmātrātmakaṃ sādākhyapadasparśāt śuddham, ata eva aham 
idaṃ sarvam iti sarvasamarasīkaraṇāt samaṃ sakalaṃ ca, ataśca akhyāti 
galanāt satyam | yadādiṣṭaṃ bhagavatā

	tṛtīyaṃ brahma suśroṇi-----------------|

iti śrītriṃśikāyām | tadidam amṛtībhāvāvamṛṣṭaṃ sadāśivapadopāruḍham 
etadviśvātmakaṃ brahma, prāguktāyāṃ śaktau viśrāmyati || 43 ||

	kriyājñānecchāmukhena paraśaktau yanna viśrāmyati tat na kiṃcit - 
ityāha

iṣyata iti vedyata iti
saṃpādyata iti ca bhāsvarūpeṇa |
aparāmṛṣṭaṃ yadapi tu
nabhaḥ prasūnatvamabhyeti || 44 ||

	yad vastu vastuvṛttena bahirvidyamānamapi, tadyadi 
icchājñānakriyāmukhena bhāsvareṇa 
etacchaktitrayasāmarasyātmakaparāśaktisphāramayena bodhena

--------------- page  94 -----------------

 na parāmṛṣṭaṃ tat pra8khyopākhyāvikalaṃ gaganapuṣpatulyam | anena 
ca sadvṛttyurdhvavartitriśūlātmakavṛttivīryaṃ sūcitam || 44 ||
	etacchāktapadāveśamasya anuvadan śāṃbhavapadasamāpattyā 
tanmayībhāvamāvirbhāvayati

śaktitriśūlaparigama -
yogena samastamapi parameśe |
śivanāmani paramārthe
visṛjyate devadevena || 45 ||

	taditthaṃ samastamapi etat sattāmātrarūpatvāt 
proktabrahmaparamārthaṃ, śaktitriśūlaparigamayogena nirṇītayuktyā 
parāśaktisamāpattikrameṇa, śivanāmani paramārthe 
anavacchinnacidāndaikaghane parameśvare svasmin svabhāve, visṛjyate - 
antarmukhavimarśanaprakarṣāt tatsamāveśena

__________________FOOṭṇOṭEṣ___________________

[8 prakhyā jñānam, upākhyā abhivadanam, athavā svātmano 
jñānaviṣayībhāvaprāptīcchā prakhyā, parasya 
jñānaviṣayībhāvaprāpaṇecchā upākhyā, 
svātmaparāvabhāsaviṣayabhāvajigamiṣetyarthaḥ |]

--------------- page  95 -----------------

 tanmayībhāvamāpādyate, devānāṃ brahmādi sadāśivāntānāṃ, 
sarvaprakāśānām indriyāṇāṃ ca devena prabhuṇā paramaśivenaiva, nahi atra 
anyasya kasyacit kartṛtvaṃ ghaṭate, nāpi etadvyatirikto'nyaḥ kaścit pramātāsti, 
asyaiva ca bhagavataḥ tattadbhūmikādhirohiṇaḥ tattadrudra - 
kṣetrajñādipramātṛrūpatayā sphuraṇam, - iti devadevena iti yuktaiva uktiḥ | 
taditthaṃ visargavṛttirdarśitā || 45 ||

	evaṃ iyatā bhedātmano nararūpasya jagato 
bhedābhedātmakaśāktapadādhyāroheṇa 
abhinnacidghanaśivasāmarasyāpattimupasaṃhāradṛśā pradarśya, idānīṃ 
cidekaghanaḥ śiva eva śaktirūpatayā ullāsya narātmakaviśvarūpatayā sphurati, 
na tu śivavyatiriktaṃ śaktinarayoḥ kimapi rūpaṃ, śiva eva tu itthaṃ 
nijarasāśyānatayā sphurati, - iti prasarayuktiṃ mahāmantrasphāramayīṃ 
darśayati

--------------- page  96 -----------------

 punarapi ca pañcaśakti -
prasaraṇakrameṇa bahirapi tat |
aṇḍatrayaṃ vicitraṃ
sṛṣṭaṃ bahirātmalābhena || 46 ||

	cidānandecchājñānakriyākhyaśaktipañcakasāmarasyātmā yaḥ 
paramaśivaḥ, tena cidādiśaktiprādhānyaprathanātmakaśiva - śakti - 
sadāśiveśvara - śuddhavidyākhyabhūmikonmīlanayuktyā tat aṇḍatrayaṃ 
vicitram iti tattadbhuvanādirūpaṃ sṛṣṭaṃ bahirātmalābhena iti 
bāhyābhāsātmatayā svātmanaḥ pradarśanena | punarapi ityanena etat darśayati 
- yat paramaśiva eva svatantraḥ sadā svabhittau 
viśvaprapañcollāsanavilāpanakrīḍāṃ svātmānatiriktāmapi atiriktāmiva 
ādarśayan evamitthaṃ sthito, na tu tadvyatiriktaṃ kimapi asti iti || 46 ||
	itthaṃ viśvollāsanavilāyanakrīḍāśīlo bhagavān

--------------- page  97 -----------------

 yaḥ śivaḥ iti vyapadiśyate, sa katamaḥ kutra tiṣṭhati, katamena vā 
pramāṇena prasiddhaḥ? - ityāśaṅkya sarveṣāṃ svātmaiva śivaḥ sarvatra 
ādisiddhatayā sphuran sargādīn vidadhāti, - ityasmacchabdavācakaiḥ śabdaiḥ 
pratipādayati

iti śakticakrayantraṃ
krīḍāyogena vāhayandevaḥ |
ahameva śuddharūpaḥ
śaktimahācakranāyakapadasthaḥ || 47 ||
mayyeva bhāti viśvaṃ
darpaṇa iva nirmale ghaṭādīni |
mattaḥ prasarati sarvaṃ
svapnavicitratvamiva suptāt || 48 ||
ahameva viśvarūpaḥ
karacaraṇādisvabhāva iva dehaḥ |
sarvasminnahameva
sphurāmi bhāveṣu bhāsvarūpamiva || 49 ||

--------------- page  98 -----------------

 draṣṭā śrotā ghrātā
dehendriyavarjito'pyakartāpi |
siddhāntāgamatarkāṃ -
ścitrānahameva racayāmi || 50 ||

	iti - vyākhyātena prakāreṇa, cidādiśaktipañcakākṣipto'nanto yaḥ 
śaktisamūhaḥ, tadeva yantraṃ krīḍāyogena vāhayan 
araghaṭṭaghaṭīyantranyāyena sṛṣṭyādyunmajjananimajjanahelākrameṇa 
viparivartayan, ahameva iti, devaḥ sarvaprāṇinām aham iti, anāhato nādātmā 
parāhantācamatkārasāraḥ svātmaparāmarśaḥ, sa eva sarvasya 
anapahnavanīyo'yaṃ svātmaiva devaḥ krīḍanaśīlaḥ sphurati iti | anena 
svasvarūpaniṣṭha eva śivaḥ iti pratipāditam | tathā śuddharūpaḥ iti, 
kalpanātikrāntagocaraḥ | anyacca śaktīnāṃ karaṇadevatānāṃ 
viṣayāharaṇatyāgādivyavahārasvātantryadātṛ yat mahācakranāyakapadaṃ 
tatra tiṣṭhati tatsthaḥ | yataḥ karaṇaśaktīnāṃ caitanyaviśrāntiṃ

--------------- page  99 -----------------

 vinā svarūpasattā na vidyate, ataḥ śaktimantameva svarūpāsādanāya 
anavarataṃ bhajante, - ityanena sarvapramātṛhṛdayādhiṣṭhātṛtvāt bhagavato 
niyatabhuvanādhiṣṭhātṛtvaṃ parihṛtam | tathā yadidaṃ kiṃcit 
viśvatayābhimataṃ, tat sarvam ādarśapratibimbanyāyena mayyeva bhāti 
vyākhyātarūpāsmadarthaviśrāntameva avabhāsate, ahantāsārameva sphurati iti 
yāvat | tathā mattaḥ iti - pūrṇāt aham iti - rūpāt svātmanaḥ, sakalaṃ 
niḥśeṣamidaṃ viśvaṃ prasarati pramātrapekṣayā apahṛtatayā sphurati | 
katham?- ityāha svapnavicitratvamiva suptāt iti, yathā nidritāt pramātuḥ 
svapnāvasthāyāṃ bāhyapadārthābhāve'pi pura - prākāra - devagṛhādi 
nānāścaryaṃ svapnapadārthavaicitryam 
avidyādiparikalpitakāraṇāntarābhāvāt svasaṃvidupādānameva prasarati, 
tathaiva tīrthāntaraniyamitakāraṇāntarānupapatteḥ 
anavacchinnacidānandaikaghanāt aham iti - rūpādviśvam iti | tathā ahameva 
viśvarūpaḥ ityādi |

--------------- page  100 -----------------

 aham, ityeva yaḥ pūrṇaścaitanyaparāmarśaḥ, eṣa eva asmi 
nānādehādipramātṛtāsamāpanno viśvarūpaḥ, ā - gopālabālāṅganādiṣu 
antarabhedena sphuraṇāt viśvāni mamaiva rūpāṇi iti yāvat | ka iva,? 
karacaraṇādisvabhāvo deha iva, yathā sāmānyena sarveṣām eko dehaḥ 
karacaraṇādisvabhāvaḥ pratipramātṛ svālakṣaṇyena nānārūpaḥ, tathaiva 
ekaścaitanyalakṣaṇaḥ padārthaḥ sarvāvāsatvāt viśvarūpaḥ iti | tathā 
sarvasmin pramātṛpramāṇaprameyarūpe'smin ahameva sphurāmi sarvasya 
svātmānubhavitṛtvena prakāśanāt | kathaṃ? bhāveṣu bhāsvarūpamiva iti, 
yathā nānāvastuṣu bhāsvarūpam atiśayena dyotanaśīlaṃ vastu dedīpyate, 
tathaiva jaḍe'smin jagati ekaścidrūpo'ham iti | ataśca draṣṭā ityādi, - 
dehendriyavarjito'pi cinmūrtatvāt ahameva paśyāmi, śṛṇomi, jighrāmi, 
rasayāmi, spṛśāmi - iti sarvatra pūrṇāhantāviśrānteḥ kṛtakṛtyatā | 
dehendriyavargo hi paśyāmi

--------------- page  101 -----------------

 ityādi manyate, paraṃ svāpādyavasthāsu draṣṭṭatvādyabhāvāt; tasmāt 
dehendriyādivargasamullāsakaḥ tadvarjito'pi cidānandaikaghanaḥ 
sarvabhūtahṛdayāntaracārī puruṣa eva | tathā ca śrutiḥ

	apāṇipādo javano grahītā
	paśyatyacakṣuḥ sa śṛṇotyakarṇaḥ |
	sa vetti vedyaṃ na ca tasyāsti vettā
	tamāhuragryaṃ puruṣaṃ mahāntam || (śve. u. 3 | 19)

iti | tathā akartāpi siddhāntāgama ityādi, svayamavidhātāpi deva - muni - 
manuṣyādyāśayāviṣṭaḥ saṃkṣepavistāravivakṣayā antaḥpratibhāsvarūpaḥ 
ahaṃ siddhāntādīn nānāścaryān karomi, na punaḥ jaḍānāṃ 
loṣṭasthānīyānāṃ dehendriyāṇāṃ tatkaraṇaṃ śakyam, - iti 
tattadvyavadhānena ahameva sarvapramāṇanirmātā iti | anena 
parāhantāsvarūpasya svātmamaheśvarasya sattāyāṃ na pramāṇopayoga 
upapadyate yupayujyate vā - ityuktaṃ syāt | evamanapahnavanīyaḥ aham ityevam 
anubhavitṛtayā

--------------- page  102 -----------------

 sarveṣāṃ svātmaiva śivaḥ sarvatra avasthitaḥ, sarvapramāṇeṣu 
ādisiddhaḥ iti || 47 || 48 || 49 || 50 ||

	tadevaṃ vyākhyātena krameṇa sarvo mamāyaṃ vibhavaḥ iti dārḍhyena 
svātmānaṃ pratyavamṛśan parabrahmasvarūpo yogī bhavati ityāha

itthaṃ dvaitavikalpe
galite pravilaṅghya mohanīṃ māyām |
salīle salilaṃ kṣīre
kṣīramiva brahmaṇi layī syāt || 51 ||

	anena prakāreṇa sarvāhaṃbhāvapariśīlanayuktyā dvaitavikalpe gilite - 
bhedaprathāyāṃ vilīnāyāṃ, mohanīṃ māyāṃ pravilaṅghya anātmani 
ātmābhimānarūpām akhyātiṃ bhedaprathāheum ahameva viśvātmā iti 
saṃkocāparaṇena samutsṛjya, jñānī brahmaṇi bṛṃhaṇātmake pūrṇe 
cidānandaikaghane svarūpe layī syāt saṃkocavilayād brahmatādātmyaṃ

--------------- page  103 -----------------

 yāyāt | kiṃ yathā ? - ityāha salile ityādi | yathā salalilam uddhṛtaṃ 
nānāghaṭādibhiḥ jalaṃ, kṣīraṃ vā, vividhaśāvaleya - 
bāhuleyādyanekagosahasrasaṃbhinnaṃ punarapi 
ghaṭaśāvaleyādikṛtabhedasaṃkocaparikṣayāt salile salilaṃ praviṣṭam kṣīre 
kṣīraṃ vā - ityekameva tadvastu, na tatra bhedaḥ sphurati, tathaiva 
dehaprāṇapuryaṣṭakaśūnyātmakapratyavamarśabhaṅgāt brahmaiva saṃpadyate 
| yathāha bhaṭṭadivākaravatsaḥ

	jāte dehapratyayadvīpabhaṅge
	prāptaikadhye nirmale bodhasindhau |
	avyāvartya tvindriyagrāmamanta -
	rviśvātmā tvaṃ nitya eko'vabhāsi ||

iti kakṣyāstotre || 51 ||

	evaṃ brahmasattāmadhirūḍhasya yogino dvandvābhibhavo'pi brahmamaya 
eva na svarūpavipralopāya pragalbhate - ityāha

--------------- page  104 -----------------

 itthaṃ tattvasamūhe
bhāvanayā śivamayatvamabhiyāte |
kaḥ śokaḥ ko mohaḥ
sarvaṃ brahmāvalokayataḥ || 52 ||

	evaṃ nirṇītena prakāreṇa galitakañcukabandhasya yoginaḥ tattvasamūhe 
bhūtaviṣayendriyavrāte bhāvanayā sarvamidamekā svasaṃvit - iti 
dṛḍhapratipattyā śivamayatvaṃ prāpte - paramādvayarūpatāṃ yāte, 
śokamohopalakṣitā dvandvābhibhavāḥ sarvam idaṃ tattvavrātaṃ brahma 
paśyato'sya na kecanaiva te, brahmamayatvāt sarve svarūparūpā - iti na khedāya 
prabhavanti || 52 ||
	nanu paramādvayarūpasyāpi jñānino'vaśyaṃ sthite śarīre'pi 
taddhetukaśubhāśubhakarmaphalasaṃcayaḥ kimiti na syāt? - iti pariharati

--------------- page  105 -----------------

 karmaphalaṃ śubhamaśubhaṃ
mithyājñānena saṃgamādeva |
viṣamo hi saṅgadoṣa -
staskarayogo'pyataskarasyeva || 53 ||

	aśvamedha - brahmahananādirūpapuṇyāpuṇyakarmaphalapracayasaṃ-
cayo'pi mithyājñānena saṃgamādeva prādurbhavati, ahaṃ śarīrī, idam 
aśvamedhādi mama upāyatayā astu - iti yadanātmani ātmābhimānapūrvam 
ātmani anātmābhimānalakṣaṇaṃ vaiparītyena jñānaṃ, tena yo'bhiṣvaṅgaḥ, 
tasmādeva paśoḥ śubhāśubhakarmaphalasaṃcayo, yena anavaratādhivāsitaḥ 
saṃsārakleśabhājanaṃ bhavati | nanu brahmātmakasyāpi pramātuḥ kimiti 
etāvatā paśutvamāyāti? - ityatra arthāntaramupakṣipati viṣamo hi ityādi | 
yasmāt saṅgadoṣaḥ sarvathā aviṣahyaḥ, yathā asādhuyogo'tyantasādhorapi

--------------- page  106 -----------------

 svagatadoṣasamarpaṇaṃ kurute, tathaiva śuddhasyāpi pramātuḥ 
akhyātijanito mohayogaḥ paśutvamāpādya śubhāśubhakarmasaṃbandhaṃ 
dadāti || 53 ||
	janmamaraṇādyapi na brahmarūpasya yoginaḥ, api tu 
māyāpramātṝṇāmeva - ityāha

lokavyavahārakṛtāṃ
ya ihāvidyāmupāsate mūḍhāḥ |
te yānti janmamṛtyū
dharmādharmārgalābaddhāḥ || 54 ||

	ye pramātāro dehātmamānino bhūtvā phalakāmanākaluṣitā 
lokācārarūpāṃ puṇyāpuṇyamayīm avidyāṃ bhedaprathārūpāṃ māyāṃ 
jagati svarganarakādi phalaprāptyupāyatvena sevante, te mūḍhāḥ ajñāḥ 
puṇyāpuṇyanigaḍabaddhāḥ tatphalopabhogāya punaḥ punaḥ jāyante mriyante ca, 
- ityanavaratasaṃsārakleśabhājo bhavanti, na punaḥ prakṣīṇamohāvaraṇo 
vigalitadharmādharmabandho brahmasvabhāvo yogī jāyate

--------------- page  107 -----------------

 mriyate vā - iti || 54 ||

	evamavidyopārjitānyapi karmāṇi jñānāvirbhāvādeva kṣīyante, na 
anyathā - ityāha

ajñānakālanicitaṃ
dharmādharmātmakaṃ tu karmāpi |
cirasaṃcitamiva tūlaṃ
naśyati vijñānadīptivaśāt || 55 ||

	ajñānakāle kṛtrimapramātṛtābhimānāvasare puṇyāpuṇyarūpaṃ 
karma anuguṇaphalaprārthanayā yat nicitaṃ svīkṛtaṃ, tat vijñānadīptivaśāt 
viśiṣṭajñānadīptivaśāt naśyati ahameva paraṃ brahma iti 
kṛtrimapramātṛtādāhasamarthaṃ vijñānaṃ, tasya yā paunaḥpunyena 
pratyavamarśanāt prabhā, tatsāmarthyāt tat adarśanaṃ yāti | kimiva? - ityāha 
cirasaṃcitaṃ tūlamiva yathā cirasaṃcitaṃ tūlaṃ haṃsaroma 
vahnipradīptivaśāt jhaṭityeva bhasmasāt yāti, tathaiva sarvaḥ karmaphalapracayo 
vijñānavahnisāmarthyāt

--------------- page  108 -----------------

 kṣaṇamadhye pralayamupagacchati - iti | gītāsu

	yathaidhāṃsi samiddho'gnirbhasmasātkurute'rjuna |
	jñānāgniḥ sarvakarmāṇi bhasmasātkurute tathā || (4 | 37)

iti || 55 ||

	na kevalaṃ prākkṛtaṃ karma jñānaprasādāt upalīyate, yāvat 
idānīntanamapi karma jñāneddhayā dṛṣṭyā na phalopabhogāya paryavasyati - 
ityāha

jñānaprāptau kṛtamapi
na phalāya tato'sya janma katham |
gatajanmabandhayogo
bhāti śivārkaḥ svadīdhitibhiḥ || 56 ||

	ātmamaheśvarapratyavamarśaprarūḍhau kṛtamapi śubhāśubhādikaṃ 
karma kṛtrimapramātṛtābhimānābhāvāt na anuguṇaphaladānāya pragalbhate, - 
iti karmaphalābhāvāt tadupabhogayogyasya janmanaḥ

--------------- page  109 -----------------

 kena prakāreṇa sattā syāt, na bhavet yoginaḥ punarjanma - ityarthaḥ | nanu 
sa piṇḍapātāt punarna jāyate cet, tarhi kīdṛśaḥ syāt? - ityāha gatajanma ityādi 
| gato janmarūpasya bandhasya yogaḥ saṃbandho yasya sa evam - iti, 
prakṣīṇamohāvaraṇaḥ svadīdhitibhiḥ cinmarīcinicayaiḥ sa śivarūpo'rko 
bhāti sphurati, na punaḥ tīrthāntaraparikalpito'sya mokṣaḥ9 - kutracit prāptiḥ, - iti 
kevalaṃ māyādikañcukakṛtasaṃkocavināśāt svaśaktivikasvaratām āpadyate - 
iti || 56 ||
	atraiva yuktimāha

tuṣa - kambuka - kiṃśāruka -
muktaṃ bījaṃ yathāṅkuraṃ kurute |
naiva tathāṇavamāyā -
karmavimukto bhavāṅkuraṃ hyātmā || 57 ||

__________________FOOṭṇOṭEṣ___________________

[9 mīmāṃsakānāṃ svargādilokāvāptereva mokṣasyābhimananāditi bhāvaḥ |]

--------------- page  110 -----------------

 yathā kiṃśārukatuṣakambukebhyaḥ pṛthakkṛtaṃ śālibījaṃ 
bījasvabhāvakiṃśārukādisāmagryabhāvāt kṣitijalātapamadhyavartyapi naiva 
aṅkurajananalakṣaṇakārye heturbhavati, tathaiva kambukasthānīyena āṇavena 
malena, tuṣasthānīyena māyāmalena, kiṃśārukasthānīyena kārmamalena ca 
muktaḥ pṛthagbhūtaḥ ātmā caitanyaṃ malatrayarūpasāmagryabhāvāt na 
punaḥ bhavāṅkuraṃ saṃsāraprarohaṃ vidadhāti, kevalaṃ 
viśvagatanānāpadārthasārthaprādurbhāvavināśavaicitryaṃ svātmani 
parāmṛśan maheśvara eva bhavati || 57 ||
	evaṃ jñānāgnidagdhakañcukabījasya jñānino na kiṃcit 
śaṅkāsthānaṃ heyopādeyaṃ vā - iti ata āha

ātmajño na kutaścana
bibheti sarvaṃ hi tasya nijarūpam |
naiva ca śocati yasmāt
paramārthe nāśitā nāsti || 58 ||

--------------- page  111 -----------------

 yaḥ ātmajñaḥ svātmamaheśvarasvātantryavit, sa na kutaścana bibheti 
na sa kasmādapi rājñaḥ śatroḥ prāṇibhyo vā bhayamādatte | kuta etat? - ityāha 
sarvaṃ hi tasya nijarūpam iti , yataḥ tasya svātmamaheśvarādvayavedinaḥ 
sarvaṃ padārthajātamidaṃ viśvaṃ nijasya svātmano mahāprakāśaikavapuṣa 
eva rūpam ākāraḥ, sarvatra prakāśānugamāt, - iti prakāśa eva svātantryāt 
svaparātmanā prakāśate; ata eva bhayasthānaṃ loke yat kiṃcit pratibhāti tat tasya 
tathiva svāṅgakalpameva kathaṃ bhayajanakaṃ syāt; yaduta svātmano vyatiriktaḥ 
padārtho bhayaheturbhavet, kaḥ punaḥ sarvataḥ paripūrṇasya avadhibhūto bhinno 
yamādirasti, yasmāt jñānī apahastitadehātmamānitvo'pi bibhiyāt, - iti sarvatra

--------------- page  112 -----------------

 nijarūpopalabdheḥ saṃsārasthito'pi ekako vigalitasvaparavibhāgatayā 
niḥśaṅkaṃ vicaratyeva | yathoktaṃ parameṣṭhipādaiḥ

	yo'vikalpamidamarthamaṇḍalaṃ
	paśyatīśa nikhilaṃ bhavadvapuḥ |
	svātmamātraparipūrite jaga -
	tyasya nityasukhinaḥ kuto bhayam || 
(utpalastotrāvalyāṃ 13 sto. 16 ślo.

iti | granthakāro'pi

	ekako'hamiti saṃsṛtau jana -
	strāsasāhasarasena khidyate |
	ekako'hamiti ko'paro'sti me
	itthamasmi gatabhīrvyavasthitaḥ ||

iti | anyacca naiva ca śocati ityādi | nāpi ātmajñaḥ śocati yathā - 
dhanadārādikaṃ mama naṣṭaṃ, rikto'smi, vyādhinākrānto'haṃ mriye vā - 
ityādi, yato vyākhyātena krameṇa paramārthe tāttvike vastuni caitanyarūpe 
antarmukhe pramātṛmātre

--------------- page  113 -----------------

 nāśitā kṣayadharmitvaṃ na vidyate | sarvaṃ hi abhimānasāraṃ 
kāryatvena pratibhāsamānam idantāvacchinnam utpadyate kṣīyate ca, na punaḥ 
saṃvinmayasya ātmano'hantāsārasya akṛtrimasya svatantrasya, - 
krāyonmukhaprayatnānupalabdheḥ | na ca etāvatā svarūpavipralopaḥ syāt - iti 
vimṛśato yogino dehasthasyāpi tadghe?tukaḥ śokādyāvirbhāvaḥ 
svarūpācchādakatvena na bhavet iti || 58 ||
	nāpi svātmamaheśvarasvarūpapariśīlanadārḍhyāt asya jñāninaścetasi 
apūrṇatvādidoṣaḥ syāt - iti pratipādayati

atigūḍhahṛdayagañja -
prarūḍhaparamārtharatnasaṃcayataḥ |
ahameveti maheśvara -
bhāve kā durgatiḥ kasya || 59 ||

	atigūḍham atiśayena guptaṃ hṛdayameva gañjaṃ 
sarvaparamārthasvasvarūpaviśrāntisthānasvabhāvaṃ

--------------- page  114 -----------------

 bhāṇḍāgāraṃ, tatra yo'titīvratamasamāśvāsaprarūḍhaḥ 
paramārthaḥ sadgurupadiṣṭaḥ svātmajñāna satattvaḥ sa eva 
sarvavibhūtihetutvāt ratnasaṃcaya iva ratnasaṃcayaḥ tena hetunā, ahameveti 
sarvamidam asmi - iti yaḥ āvirbhūtaḥ pūrṇaḥ parāhantāviśrāntilakṣaṇo 
maheśvarabhāvaḥ śarīriṇo'pi svātmaprakāśasvātantryaṃ, tasmin sthite sati 
kā nāma varākī durgatiḥ daridrabhāvaḥ, tadupalakṣito vā kaścit kṛtrimo 
vibhūtyādyatiśayaḥ syāt | ābhāsasārā hi sarve padārthā yadaiva ābhāsante, 
tadaiva yoginaḥ svātmakalpāḥ santaḥ katham utkarṣāpakarṣādau pragalbhante - iti 
na kiṃcit daurgatyādikaṃ bhavet | kasya vā, iti ko vā asyā durgateḥ samāśrayaḥ, 
dehādyātmābhimānino hi asyā durgateḥ samāśrayā bhavantu, yataste 
vyatiriktasya eṣaṇīyasya prāptyā īśvarāḥ, 

--------------- page  115 -----------------

 tadapahārādriktāḥ - iti | yaḥ punaḥ 
akṛtrimāhantāpratyavamarśaparamārtho jñānī sarvamasmi iti avyatiriktena 
eṣaṇīyena maheśvaraḥ, sa kathaṃ vyatiriktaprāptyaprāptyabhāvāt 
daurgatyāderbhājanaṃ syāt?, ata eva gañjaśabdasya ratnasaṃcayaśabdasya 
īśvaraśabdasya ca hṛdayaprarūḍhaparamārtho mahān, - iti 
akṛtrimārthavācakāni viśeṣaṇāni upapāditāni || 59 ||
	idānīṃ mokṣasvarūpamāha

mokṣasya naiva kiṃcid
dhāmāsti na cāpi gamanamanyatra |
ajñānagranthibhidā
svaśaktyabhivyaktatā mokṣaḥ || 60 ||

	mokṣasya parāhantācamatkārasārasya kaivalyasya

--------------- page  116 -----------------

 dhāma vyatiriktaṃ sthānaṃ na vidyata eva, 
deśakālākārāvacchedābhāvāt; ata eva na cāpi anyatra kutracit vyatirikte 
gamanaṃ layo mokṣaḥ, yathā bhedavādināṃ matena utkrāntyā ca 
krādhārādibhedanāt ūrdhvaṃ dvādaśānte layaḥ - eṣaiva muktiḥ - iti | 
yaduktam

	vyāpinyāṃ śivasattāyāmutkrāntyā kiṃ prayojanam |
	avyāpinī pare tattve hyutkrāntyā kiṃ prayojanam ||

iti | evaṃ - vidhā api anye tīrthāntaraparikalpitā bahavo mokṣabhedāḥ santi, te 
pratanyamānā granthagauravabhayam ānayanti, - iti neha pratanyante - iti sarvatra 
dvaitamalasya saṃbhavāt amokṣe mokṣalipsā mokṣābhāsa eva | kiṃ punaḥ 
mokṣalakṣaṇam? - ityāha ajñāna ityādi | ajñānam akhyātijanitaḥ ātmani 
anātmābhimānapūrvo'nātmani dehādau ātmābhimānalakṣaṇo mohaḥ, sa eva 
pūrṇasvarūpasaṃkocadāyitvāt granthiriva granthiḥ svasvātantryalakṣaṇasya 
nijasya vyāpitvādeḥ

--------------- page  117 -----------------

 dehādyabhimānatayā bandhaḥ, tasya bhit bhedanaṃ 
nijapūrṇasvātmasvātantryapriśīlanadārḍhyāt dehādyabhimānalakṣaṇasya 
granthervidāraṇaṃ, tena hetunā svaśaktibhiḥ svātmasvātantryalakṣaṇaiḥ  
dharmaiḥ abhivyaktatā svātmaśaktivikasvaratā, eṣa eva niratiśayo mokṣaḥ iti | 
ayamāśayaḥ - yathā sahajanityavyāpakatvādidharmayuktam ākāśamapi 
ghaṭādibhittibandhasaṃkucitam, tata eva tadeva avyāpakatvādidharmayuktaṃ 
ghaṭākāśam - ityucyate ākāśādbhinnamiva prathate, punarapi 
ghaṭādibhittikṛtasaṃkocabhaṅgāt tadeva ghaṭādyākāśaṃ tadaiva 
vyāpakatvādidharmayuktaṃ syāt, na punaḥ tasya ghaṭādibhaṅgāt nūtanaḥ 
kaściddharmāvirbhāva āyāti - iti | tathaiva 
dehādyabhimānakṛtasaṃkocasaṃkucitaṃ caitanyaṃ baddhamiva - ityucyate, tadeva 
punaḥ svasvarūpajñānābhivyakteḥ dehādipramātṛtābandhasaṃkṣayāt 
svaśaktivivekavikasvaraṃ

--------------- page  118 -----------------

 muktamiva, - iti abhimānamātrasārau parimitapramātrapekṣayā 
bandhamaukṣau, na punaḥ paramārthe saṃvittattve evaṃ kiṃcit saṃbhavati - iti | 
tasmāt muktau nūtanaṃ na kiṃcit sādhyate, nijameva svarūpaṃ prathate | etadeva 
viṣṇudharmeṣvapi uktam

	yathodapānakaraṇātkriyate na jalāmbaram |
	sadeva nīyate vyaktimasataḥ saṃbhavaḥ kutaḥ ||
	bhinne dṛtau yathā vāyurnaivānyaḥ saha vāyunā |
	kṣīṇapuṇyāghabandhastu tathātmā brahmaṇā saha ||

iti || 60 ||

	evaṃ prakṣīṇājñānabandho jñānī parānugrahārthaṃ śarīramapi 
dhārayan muktaḥ - iti āvedayati

bhinnājñānagranthi -
rgatasaṃdehaḥ parākṛtabhrāntiḥ |
prakṣīṇapuṇyāpāpo
vigrahayoge'pyasau muktaḥ || 61 ||

	śarīrasaṃbandhe'pi svātmajñānavit śarīrādyabhimānābhāvāt

--------------- page  119 -----------------

 jīvannapi mukto vikasvaraśaktirbhavet | nanu vigrahayoga eva bandhaḥ, 
kathaṃ tatsaṃbandhe'pi asau muktaḥ syāt ? - ityāha bhinna ityādi | bhinno 
vidāritaḥ ajñānarūpo granthiḥ apūrṇatvakhyātisamuttho 
dehādyabhimānarūpo bandho yena sa evaṃ | tathā gatasaṃdehaḥ iti ata eva 
naṣṭasaṃśayaḥ | parākṛtā nyakkṛtā paramādvayajñānalābhāt bhrāntiḥ 
dvayarūpo bhramo yena sa tathā - iti | evaṃ pariśīlanena prakṣīṇāni 
puṇyāpuṇyāni vigalitasaṃskārāṇi dehātmamānitvābhāvāt 
dharmādharmāṇi yasya sa evaṃ - vidhaḥ, - iti | anena ajñānameva bandhaḥ iti 
pratipāditam | tacca vigrahayoge'pi yasya prakṣīṇaṃ sa tadaiva jīvanneva mukto, na 
punaḥ śarīrayogo bandhaḥ, tadapagamo muktiḥ - iti, kiṃ tu dehapātāt pūrṇo 
mokṣa iti || 61 ||
	jīvanmuktasya karmahetau śarīre sthite'pi śarīrayātrāmātrārthaṃ 
jñāneddhaṃ kurvāṇasya karma na

--------------- page  120 -----------------

 phalāya tasya bhavati - ityatra upapattimāha

agnyabhidagdhaṃ bījaṃ
yathā prarohāsamarthatāmeti |
jñānāgnidagdhamevaṃ
karma na janmapradaṃ bhavati || 62 ||

	vahninirbhṛṣṭaṃ śālibījaṃ kṣitisalilātapamadhyavartyapi 
sāmagrīvaikalyāt yathā aṅkurādijanane aśaktatāṃ yāti, tathaiva 
jñānāgninā dagdhaṃ paramādvayabodhadīptyā pluṣṭaṃ karma yathā 
ahameva itthaṃ viśvātmanā sphurāmi - ityevaṃ - rūpeṇa 
dehādyātmamānitvahāneḥ heyopādeyabuddhiparityāgena yat kiṃcit 
śubhāśubhaṃ karma kriyamāṇaṃ tat dagdhavīryaṃ na punaḥ jñāninaḥ 
piṇḍapātādanantaraṃ janmaphalapradaṃ bhavati dehanirmāṇahetuḥ saṃpadyate 
dagdhaṃ bījamivāṅkure | tasmāt na sarvāhaṃbhāvarūpāyāḥ

--------------- page  121 -----------------

 citiśakteḥ aphalābhisaṃdhānatayā kṛtaṃ karma bhūyo janma dātuṃ 
prabhavati iti || 62 ||
	evaṃ punarvikasvarāpi citiśaktiḥ kathaṃkāraṃ dehavatī syāt? - ityāha

parimitabuddhitvena hi
karmocitabhāvidehabhāvanayā |
saṃkucitā citiretad -
dehadhvaṃse tathā bhavati || 63 ||

	yasmāt parimitabuddhitvena akhyātijanitena 
dehādyabhimānavāsanāpūrvakakāmanākāluṣyaniścayena yat kṛtaṃ karma 
yathā aham aśvamedhena yakṣye, iha amutra ca sukhī bhūyāsam, mā 
kadācana duḥkhyahaṃ bhūyāsam, amunā karmaṇā vā aindraṃ

--------------- page  122 -----------------

 padaṃ pāpnuyām ityevaṃ - vāsanāviśiṣṭasya kartuḥ evamanuguṇaṃ 
karma, tasya manovāsanālabdhaprarūḍheḥ karmaṇaḥ ucitaḥ 
tadanuguṇaphalabhoktṛtāyogyaḥ asau bhāvī dehaḥ 
prārabdhakarmaphalabhoktṛśarīrādhikāraparikṣayāt yat uttaratra 
bhaviṣyaccharīraṃ, tasya yā bhāvanā amunā aśvamedhādikarmaṇā 
sāmrājyādi āpnuyām iti abhimatakarmaphalavāsanādhirūḍhiḥ, tayā 
karmocitabhāvidehabhāvanayā iyaṃ sarvataḥ pūrṇāpi citiśaktiḥ 
āṇavamāyīyamalamūlena kārmamalena āghrātā saṃkucitā vyāpinyapi 
ghaṭākāśavat karmānuguṇaphalabhoktṛśarīravāsanāvacchedavatī saṃpannā 
satī etaddehadhvaṃse tathā bhavati iti | etasya prārabdhasya karmaphalasya yo 
bhoktā dehaḥ tasya bhogaparikṣayāt yo dhvaṃso mṛtiḥ tasmin dehadhvaṃse sati 
sā citiḥ udbhūtakarmavāsanā tathā bhavati yena āśayena pūrvakarmaphalam 
upārjitaṃ tatkarmaphalabhoktā yo dehaḥ tadvatī saṃpadyate, yadvaśāt

--------------- page  123 -----------------

 citirapi svarganarakādibhogabhājanaṃ syāt | tasmāt śarīrībhūtvā 
parimitaphalalaulyāt yat kṛtaṃ karma tat phalabhoktṛ janma dātum avaśyaṃ 
prabhavati | yat punaḥ aśarīrībhūtvā sarvaṃ brahmāsmi iti saṃvidrūpatayā 
kṛtaṃ, tat vāsanāprarohānāsādanāt kathaṃ vyāpinyāḥ citiśakteḥ janmane 
syāt ? - iti tātparyārthaḥ || 63 ||
	evam anātmatayā samucitaṃ karma saṃsaraṇāya pramātuḥ bhavati - iti cet, 
tarhi ātmasvarūpaṃ vaktavyaṃ yena saṃsārī na syāt - iti pratipāditamapi 
śiṣyajanahṛdayaṅgamīkartuṃ punaḥ kathayati

yadi punaramalaṃ bodhaṃ
sarvasamuttīrṇaboddhṛkartṛmayam |
vitatamanastamitodita -
bhārūpaṃ satyasaṃkalpam || 64 ||

--------------- page  124 -----------------

 dikkālakalanavikalaṃ
dhruvamavyayamīśvaraṃ suparipūrṇam |
bahutaraśaktivrāta -
pralayodayaviracanaikakartāram || 65 ||
sṛṣṭyādividhisuvedhasa -
mātmānaṃ śivamayaṃ vibuddhyeta |
kathamiva saṃsārī syād
vitatasya kutaḥ kva vā saraṇam || 66 ||

	yadi punaḥ paraśaktipātaviddhahṛdayaḥ pramātā 
dehādipramātṛtābhimānam adhaspadīkṛtya svātmānaṃ śivamayaṃ 
vibuddhyeta cidānandaikaghanaṃ vijānīyāt, sa 
parijñātasvātmamaheśvarabhāvaḥ kathamiva kena prakāreṇa saṃsārī 
saṃsaraṇaśīlo bhavet ?, na syāt - iti yāvat, yataḥ cidacidrūpapuryaṣṭakātmā

--------------- page  125 -----------------

 kārmamalasaṃbandhena saṃsarati; yaḥ punaḥ cidekamūrtiḥ śivamayaḥ 
prakṣīṇāṇavādimalakañcukaḥ sa kathaṃ saṃsārī? - iti tātparyam | nanu 
cidekamūrtiḥ syāt saṃsārī ca bhavet - iti kiṃ duṣyeta,? - ityevamāśaṅkyāha 
vitata ityādi | vitatasya anavacchinnadeśakālākārasya pramātuḥ 
dehādyabhimānapūrvasvakṛtavāsanāparikṣayāt pūrṇasya tasya kutaḥ 
saraṇam sarvavyāpitvāt, tadati riktaṃ kimasti yadvastu apekṣya tato 
viśliṣṭo'nyatra bhinne saṃsaraṇaṃ gamanaṃ kuryāt? ; yato 
dehādipramātṛtābhimānāvacchinnasya kila 
apādānādhikaraṇādikārakasaṃbhavaḥ; yaḥ punaḥ cidekaghano 
brahmabhūto'navacchinnadeśakālaḥ pramātā tasya saṃsaraṇe vācoyuktirapi na 
bhavediti | kīdṛśaṃ śivarūpam ātmānaṃ vibuddhyeta? - ityāha amalaṃ

--------------- page  126 -----------------

 bodham ityādi | apagata āṇavādimalapracayo yasya tam, ata eva vaimalyāt 
bodhaṃ śuddhacaitanyam | tathā sarvasamuttīrṇaṃ niratiśayaṃ jñānakriyā 
svātantryaṃ prakṛtaṃ yasya - iti tam, vitataṃ deśādikṛtavicchedābhāvāt 
vyāpinam | tathā avidyamāne astodite pralayodayau yasyāḥ bhāso bodhadīpteḥ 
saiva rūpaṃ deho yasya tam | anyacca satyāḥ paramārthāḥ saṃkalpāḥ 
svecchāvihārā yasya, yadyat icchati tattathaiva bhavati - iti tamevaṃvidham | tathā 
dikkālākārakalanābhiḥ carcābhiḥ virahitaṃ vyāpitvanityatvadharmayogāt, ata 
eva dhruvaṃ kūṭastham, avyayam avināśinam | tathā īśvaraṃ svatantram | 
anyacca tathā suparipūrṇaṃ suṣṭhu nirākāṅkṣaṃ | tadanu bahutarāṇi 
prabhūtāni śabdarāśisamutthāni brāhmyādiśaktyadhiṣṭhitāni 
ghaṭapaṭādiśaktivrātāni teṣāṃ layotpattividhau svatantram | anyacca 
sṛṣṭyādividhisuvedhasam supravīṇaṃ vedhasaṃ vidhātāram - 
ityevamādiviśeṣaṇaiḥ

--------------- page  127 -----------------

 sarvataḥ paripūrṇaṃ svātmamaheśvaraṃ jānāno yatkiṃcidapi 
kurvāṇo, dagdhakarmabījo na punaḥ saṃsārabhāk, jīvannaiva vimukto bhavet - iti 
yāvat || 64 || 65 || 66 ||
	evaṃ svātmapratyavamarśopapattyā jñāninā 
vigalitakarmaphalābhilāṣeṇa kṛtamapi karma na phalāya - iti āvedayan 
svānubhavasiddhaṃ lokadṛṣṭāntamāha

iti yuktibhirapi siddhaṃ
yatkarma jñānino na saphalaṃ tat |
na mamedamapi tu tasye -
ti dārḍhyato nahi phalaṃ loke || 67 ||

	ahameva cidghanaḥ svatantraḥ sarvapramātrantaratamatvena sarvakarmakārī, 
nāhaṃ vā kartā, pārameśvarī

--------------- page  128 -----------------

 svātantryaśaktiḥ itthaṃ karoti - iti mama śuddhacaitanyarūpasya etāvatā 
kim āyātam? - iti yuktibhiḥ prākpratipāditasvarūpābhiḥ 
upapattibhirvyākhyātasvātmasvarūpavidaḥ pramātuḥ ubhayathā 
dehādyahaṃbhāvābhāvāt heyopādeyaśūnyatvena yat siddhaṃ karma 
niṣpannamapi kṛtaṃ na saphalaṃ na tat phalena yujyate, tasya ātmajñāninaḥ 
pratipāditavat ubhayathā kṛtrimatvābhāvāt kṛtamapi karma kutra phalena yogaṃ 
kuryāt?, dehādipramātṛtābhimānasvabhāvāśrayābhāvāt na kutracit, - iti 
yāvat | kṛtasya karmaṇo yā pramātuḥ phalābhimānarūḍhiḥ eṣa eva āśrayaḥ, 
jñāninastu abhimānābhāvāt svasmin rūpa eva prakṣīṇaṃ karma na phalena 
saṃbadhyate - iti | nanu abhimānādeva karma phalena yujyate - iti kutra yathā? - 
ityāha na mamedamapi ityādi | dṛṣṭam ca etat, na apūrvaṃ, yathā na mama 
idaṃ yajñādikaṃ karma api

--------------- page  129 -----------------

 tu tasya kasyāpi arthavato yajamānasya iti anayā buddhyā kṛtamapi 
yajñādikaṃ karma loke mūlyārthitayā phalābhimānābhāvāt na, yataḥ tat 
karma pāralaukikena phalena yuktaṃ kalpate | tathāhi - yajanti yājakāḥ, yajate 
yajamānaḥ iti nyāyena yajatām ṛtvijāṃ yajñakarma svayaṃ kṛtavatāmapi 
idam aśvamedhādikaṃ yajñakarma na asmākaṃ kiṃcit, api tu dīkṣitasya 
puṇyavataḥ, vayaṃ kila iha yajñakarmāṇi niyamita mūlyamātrārthinaḥ 
atra na kecanaiva, yajamānaḥ punaḥ amunā karmaṇā 
svargādiphalabhāgapi iti teṣāṃ karmaphalābhimānābhāvāt na svayaṃ 
kṛtamapi karma tadīyena svargādinā phalena yujyate; yajamānastu tatra yajñakarma 
svayam akurvāṇa ṛtviṅnirvartyakarmamukhaprekṣyapi mama idam 
aśvamedhādikaṃ yajñakarma, madīyena dhanena amī ṛtvijaḥ karmaṇi 
pravṛttāḥ iti mamaiva svargādiphalaṃ

--------------- page  130 -----------------

 dehapātāt avaśyaṃbhāvi, - iti akurvāṇasyāpi yathā 
samīhitakarmaphalābhimānadārḍhyāt tat tasya karma phalena yujyate | ata eva 
kartrabhiprāye kriyāphale iti dīkṣitāt kartuḥ yajate yajamānaḥ iti 
ātmanepadam, kartranabhiprāye tu parasmaipadaṃ yajanti yājakāḥ iti | iyān 
mahimā durlaṅghyo vikalpasvātantryasya - yat svayaṃ kṛtamapi karma 
phalābhimānābhāvāt tatphalena na yujyate, anyaiḥ kṛtamapi karma mama idam iti 
abhimānadārḍhyāt phalayuktaṃ syāt; tasmāt ṛtvigvyāpāravat kriyamāṇaṃ 
yoginā karma phalābhimānābhāvāt na tat saphalaṃ bhavet - iti || 67 ||

	evaṃ sarvakarmasu heyopādeyakalpanākalaṅkaparityaktabuddhiḥ jñānī 
dīptaḥ syāt - ityāha

(131)
 itthaṃ sakalavikalpān
pratibuddho bhāvanāsamīraṇataḥ |
ātmajyotiṣi dīpte
juhvajjyotirmayo bhavati || 68 ||

	itthaṃ vyākhyātena prakāreṇa yā bhāvanā ahameva 
caitanyamaheśvaraḥ sarvātmanā sarvadā evaṃ sphurāmi iti yā ātmani 
vimarśarūḍhiḥ, saiva śanaiḥ prasarantī samīraṇo vāyuriva, tena jñānī 
pratibuddho bhasmacchanno vāyunā pratibodhito vahniryathā sakalavikalpān 
paśurasmi karmabandhabaddho deharūpī, mama idaṃ putradārādi, amunā 
karmaṇā svargo nirayo vā bhaviṣyati ityādisarvāḥ kalpanāḥ ahameva idaṃ 
sarvam iti parāmarśaśeṣībhūtāḥ ātmajyotiṣi caitanyakṛśānau dīpte 
parāhantācamatkārasāre juhvat avikalpakasaṃvidrūpānupraveśena samarpayan 
sa jyotirmayo

--------------- page  132 -----------------

 bhavati dāhyavikalpendhanaparikṣayāt dāhakākāraḥ cidagnireva 
saṃpadyate, parapramātrekavapuḥ asau avaśiṣyate - iti yāvat || 68 ||
	evaṃ vyākhyātena prakāreṇa yaḥ prakṛṣṭajñānayogābhyāsarataḥ sa 
śeṣavartanayā kathaṃ kālam ativāhayati - ityāha

aśnan yadvā tadvā
saṃvīto yena kenacicchāntaḥ |
yatra kvacana nivāsī
vimucyate sarvabhūtātmā || 69 ||

	yat kiṃcit puraḥ patitam adanayogyaṃ padārtham aśnan camatkurvan, na 
punaḥ niyamena, idaṃ pavitram, idam apavitram, idaṃ kadannam, idaṃ 
miṣṭānnam iti heyopādeyakalpanāvirahāt

--------------- page  133 -----------------

 ayatnena āpatitaṃ yadapi tadapi samāharan | tathā saṃvīto yena ityādi 
kanthayā carmaṇā valkalena vā tūlapaṭādinā, divyātmavastraiḥ vā 
samācchāditaḥ, - iti ubhayathā utkarṣāpakarṣābhāvāt, 
śarīrācchādanārthakriyārthī bhūtvā nāpi kiṃcit dveṣṭi, nāpi stauti - iti | 
katham etat? yataḥ sa śāntaḥ sukhaduḥkhādivikalpanātikrāntaḥ - iti | tathā 
yatra kvacana nivāsī iti | yatra kvacana yādṛśe tādṛśe sthāne 
svapariśrayamātrārthī; na punaḥ tasya kṣetrāyatanatīrthādi pavitratvāt 
svīkāryaṃ bhavati, nāpi śmaśānaśvapacasadanādi apavitratvāt parihāryaṃ 
syāt, ayatnena yat yat sthānam āpatitam tat tat adhivasati, 
pavitrāpavitrakalpanākalaṅkavirahāt | vimucyate iti, evamapi śeṣavartanayā 
parānugrahārthapravṛttaḥ kālam ativāhayan vimucyate paramaśivībhavati | uktam 
ca

--------------- page  134 -----------------

 yena kenacidācchanno yena kenacidāśitaḥ |
	yatra kvacana śāyī yastaṃ devā brāhmaṇaṃ viduḥ ||

iti | mokṣadharmeṣvapi

	aniyataphalabhakṣyabhojyapeyaṃ
	vidhipariṇāmavibhaktadeśakālam |
	hṛdayasukhamasevitaṃ kadaryai -
	rvratamidamājagaraṃ śuciścarāmi ||

iti | katham evamapi kurvan jñānī svayaṃ mucyeta? - ityāha sarvabhūtātmā iti | 
yataḥ sajñānī sarvabhūtātmā, sarveṣāṃ bhūtānām ātmā sarvāṇi ca 
bhūtāni tasya ātmā - iti kṛtvā na kiṃcit bandhakatayā bhavati, sarvaṃ 
vimuktaye'sya saṃpadyate - iti || 69 ||
	nāpi evaṃ - rūpasya nirabhimānasya yatkiṃcitkurvato'pi 
puṇyapāpasaṃbhavaḥ - ityāha

--------------- page  135 -----------------

 hayamedhaśatasahasrā -
ṇyapi kurute brahmaghātalakṣāṇi |
paramārthavinna puṇyai -
rna ca pāpaiḥ spṛśyate vimalaḥ || 70 ||

	ya evaṃ paramārthavit svātmamaheśvarasvabhāvasatattvajñaḥ, saḥ 
aśvamedha - rājasūyāptoryāmādiyajñān niḥsaṃkhyān 
phalakāmanābhimānavirahāt kartavyatāmātramidam ityevaṃ kṛtvā 
krīḍārthaṃ yadi kadācit vihitāni karmāṇi vidadhāti; athavā brahmahanana - 
surāpānastainyādīni pramādopanatāni mahāpātakāni avihitānyapi 
aśarīratayā ca - iti ubhayathā ahaṃ mama ityabhimānābhāvāt 
parameśvarecchaiva itthaṃ vijṛmbhate, mama kim āyātam iti buddhyā na 
puṇyaiḥ śubhaphalaiḥ nāpi pāpaiḥ aśubhaiḥ sa jñānī spṛśyate

--------------- page  136 -----------------

 malinīkriyate - iti | kathametat ? - ityāha vimalaḥ iti | yataḥ tasya vigatāḥ 
prakṣīṇā āṇava - māyīya - kārmamalāḥ saṃsaraṇahetavaḥ - iti | evaṃ 
malinasya hi pramātuḥ vicchinnadehādipramātṛtayā ātmātmīyābhimānabhāvo 
yena mama idaṃ karma śubham, idam aśubham iti abhimānadaurātmyāt 
puṇyapāpasaṃcayayogaḥ syāt; yasya karmaphalasaṃcayo 
mamatvaheturmalapracayo vigataḥ syāt tasya abhimānābhāvāt kathaṃ 
puṇyapāpasparśaḥ | yathā śrībhagavadgītāsu

	yasya nāhaṃkṛto bhāvo buddhiryasya na lipyate |
	hatvāpi sa imāṃllokānna hanti na nibadhyate ||

iti || 70 ||

	evaṃ - vidhasya jñānino niyatacaryāṃ parāmṛśannāha

madaharṣakopamanmatha -
viṣādabhayalobhamohaparivarjī |
niḥstotravaṣaṭkāro
jaḍa iva vicaredavādamatiḥ || 71 ||

--------------- page  137 -----------------

 mado dehapramātṛtābhimānaḥ, harṣaḥ alabdhasya lābhāt pramodaḥ, 
kopaḥ krodhaḥ, manmathaḥ saṃbhogābhilāṣaḥ, viṣādaḥ iṣṭaviyogāt 
mūḍhatvam, bhayaṃ śatroḥ siṃhavyāghrādervā daraḥ, lobhaḥ kārpaṇyaṃ, 
moho bhūteṣu ātmātmīyabhāvaḥ - iti etān dehasaṃskārapratyavamarśān 
madhye madhye samāyātānapi sarvaṃ brahmāsmi iti parivarjayati 
avikalpakasaṃvidrūpānupraveśena svātmapratyavamarśaśeṣībhūtān 
saṃpādayati | tathā nirgataḥ stotravaṣaṭkārebhyaḥ yaḥ sa, evaṃ stutyasya 
vyatiriktasya abhāvāt na tasya stotrādyupayogo, nāpi vaṣaḍādimantrasaṃśrayo, 
bhinnasya devatāviśeṣasya virahāt; kevalaṃ sa jaḍa iva vicaret avādamatiḥ iti | 
pūrṇatvāt ākāṅkṣāvirahāt ca unmatta iva itikartavyatārūpe śāstrīye karmaṇi 
pramāṇopapanne vā prameyasatattve pramātṛbhiḥ saha idam upapannam, idaṃ 
na iti vicārabahiṣkṛtabuddhiḥ, 

--------------- page  138 -----------------

 nāpi svātmani upadeśam apekṣate, parān upadeṣṭuṃ vā prameyam 
upanyasyati , iti dāntaprāyo bhūtvā sarvaṃ brahma avalokayan krīḍārthaṃ 
viharedeva iti jaḍatvena nirūpitaḥ || 71 ||
	evamapi parivarjyamānenāpi madādivargeṇa vayamiva jñānī sati śarīre, 
kimiva na spṛśyate - ityatra kāraṇamāha

madaharṣaprabhṛtirayaṃ
vargaḥ prabhavati vibhedasaṃmohāt |
advaitātmavibodha -
stena kathaṃ spṛśyatāṃ nāma || 72 ||

	samanantarakārikāvyākhyāto madādivargo'yaṃ vibhedasaṃmohāt iti 
ātmātmīyarūpo yo vibhedasaṃmohaḥ apūrṇatvakhyātiḥ, tataḥ prabhavati 
paśupramātṛbhyo dvaitabhrāntyā heyopādeyatayā samutpadyate | yaḥ punaḥ 
sarvaṃ brahmāsmi iti paramādvayātmabodhaḥ

--------------- page  139 -----------------

 prakṛṣṭajñānī ākāśakalpaḥ sa tena madādivargeṇa kathaṃ nāma 
spṛśyatāṃ kena prakāreṇa ābilīkriyatāṃ; bhinnaṃ vastu bhinnasya hi 
kadācita svarūpam arpayatām, brahmabhūtatvena gṛhīto madādivargo 
brahmabhūtasya jñāninaḥ samānajāteḥ kathaṃ virodhāya syāt ? - iti || 72 ||
	bāhyastavanahavanavargo'pi dvaitasamāśraya eva na tasya paritoṣāya alam 
- ityāha

stutyaṃ vā hotavyaṃ
nāsti vyatiriktamasya kiṃcana ca |
stotrādinā sa tuṣyen
muktastannirnamaskṛtivaṣaṭkaḥ || 73 ||

	stutyaṃ kiṃciddevatārūpaṃ, hotavyaṃ vā kiṃcit 
jñānino'dvayabodharūpasya na vyatiriktaṃ

--------------- page  140 -----------------

 bhinnarūpaṃ vidyate, yat stūyate hūyate vā - iti | nāpi kartavyam 
ityevaṃ - rūpatayā ca stotrādinā sa ātmajñaḥ paritoṣaṃ yāti, 
abhedabodhasaṃbhogena hi nityānandamayatvāt kṛtrimam ānandaṃ na ādriyate; 
tasmāt nirgato namaskṛtivaṣaṭkebhyo yaḥ sa eva mukto vedānteṣu evaṃ - stutaḥ iti 
|| 73 ||
	naca  tasya bhinnena devagṛheṇa upayogaḥ, svaśarīrameva 
ātmadevatādhiṣṭhānaṃ saṃvidāśrayo vā na anyaḥ kaścit, - iti no bhinnaṃ 
devagṛham asya - ityāha

ṣaṭtriṃśattattvabhṛtaṃ
vigraharacanāgavākṣaparipūrṇam |
nijamanyadatha śarīraṃ
ghaṭādi vā tasya devagṛham || 74 ||

--------------- page  141 -----------------

 tasya jñānino nijaḥ parakīyo vā deha eva devatāveśma, 
svātmadevatāyāḥ bhogyādhāratvāt | bāhyastu mervādiprāsādaḥ tadā 
devagṛhībhavati yadā guruṇā śarīravyāptyā ṣaṭtriṃśattattvakalanarūpayā 
parikalpitaḥ syāt, tadgato bāhyo'pi devaḥ svātmavyāptyā cidghanatvena 
parigṛhītaḥ ceta tadā so'pi tatra devo bhavet, anyathā ubhayametat jaḍaṃ 
śilāśakalakalpameva kathaṃ bhaktān uddharet, mṛtān sāmīpyādi vā nayet ? - 
iti evaṃ mukhyayā vṛttyā śarīraṃ saṃvidāśrayatvāt devagṛham, tadgataḥ 
sarveṣāmapi svātmā devaḥ, - iti deha eva saṃprabuddhasya devagṛham | kīdṛśaṃ 
tat ? - ityāha ṣaṭtriṃśattattva iti | bāhyaṃ ṣaṭtriṃśattattvavyāptyā 
parikalpyate, paraṃ dehadevagṛhaṃ punaḥ sākṣāt ṣaṭtriṃśatā tattvaiḥ bhṛtaṃ 
poṣitam | bāhyadevagṛhe gavākṣaracanā bhavati, idaṃ tu 
vigraharacanāgavākṣaparipūrṇam iti, vigrahe śarīre racanā 
indriyadvāraparipāṭiḥ, saiva

--------------- page  142 -----------------

 tamorikalpanā tayā paripūrṇam akṣuṇṇam, - iti 
bāhyadevagṛhasadṛśam | na kevalaṃ śarīraṃ saṃvida āśrayaḥ - iti kṛtvā 
devagṛhaṃ, yāvat yatkiṃcidvā saṃvidadhiṣṭhitaṃ tatsarvaṃ tasya devagṛham - 
ityāha ghaṭādi vā iti | ghaṭādyupalakṣitaṃ viṣayapañcakam idaṃ 
bhogyarūpaṃ cakṣurādidvāreṇa saṃvidādhiṣṭhitam

	bhoktaiva bhogyabhāvena sadā sarvatra saṃsthitaḥ || (3 | 2)

iti spandaśāstropadeśadṛśā saṃvinmayameva, jñānino bhūtaśarīravat 
ghaṭādi viśvaṃ bhāvaśarīram - iti kṛtvā tadapi abhinnaṃ svaśarīravat 
devagṛhaṃ devasya krīḍāvataḥ svatantrasya svātmamaheśvarasya gṛhaṃ 
bhogyādhiṣṭhānam - iti || 74 ||
	bāhyadevagṛhe kila bhaktaḥ puṣpādyāharaṇapūrvaṃ devapūjāparo 
dṛṣṭaḥ, dehadevagṛhe punaḥ jñānī kiṃ kurvan adhitiṣṭhati? - ityāha

--------------- page  143 -----------------

 tatra ca paramātmamahā -
bhairavaśivadevatāṃ svaśaktiyutām |
ātmāmarśanavimala -
dravyaiḥ paripūjayannāste || 75 ||

	tasmin svadehadevagṛhe prakṛṣṭayogī, paramaḥ sarvātiśāyī yaḥ 
caitanyalakṣaṇaḥ ātmā sa eva 
niḥśeṣaśabdādiviṣayopabhogavilāyanapragalbhatvāt bhairavaḥ bharaṇa - 
ravaṇa - vamanasvabhāvaḥ, sa eva śivadevatā prakṛṣṭaśreyorūpo devaḥ, tāṃ 
paripūjayan āste anavarataṃ vakṣyamāṇena krameṇa tāṃ tarpayan parisphuret | 
nanu bāhyadevatā parivārayutā bhavati, etāṃ kiṃ parivārayutāṃ samarcayet ? - 
ityāha svaśaktiyutām iti | svāḥ caitanyaraśmirūpāḥ 
cinnirvṛtīcchājñānakriyāśaktīnāṃ vibhavātmikāḥ 
cakṣurādikaraṇaśaktayaḥ,

--------------- page  144 -----------------

 tābhiḥ yutāṃ samantāt āvṛtām | kaiḥ paripūjayan āste ? - ityāha 
ātmāmarśana ityādi | svātmaiva idaṃ sarvam iti yat āmarśanaṃ 
sarvapadārthānāṃ saṃvidrūpatayā pūrṇāhantāviśrānti lakṣaṇo yaḥ 
parāmarśaḥ, tena dvaitakāluṣyakalaṅkaparikṣayāt vimalāni yāni 
śabdādiviṣayapañcakarūpāṇi pūjārthaṃ dravyāṇi jāḍyāpagamena 
viśuddhāni taiḥ, ātmāmarśanavimaladravyaiḥ - iti | ayamāśayaḥ - jñānī 
heyopādeyabhedakalaṅkaparityāgena ayatnopanataṃ śabdādiviṣayapañcakaṃ 
śrotrādikaraṇadevībhiḥ samāhṛtya antaścamatkurvan svātmanā abhedam 
āpādayati, - ityevam anavarataṃ prativiṣayasvīkārakāle yo'ntarabhedena 
camatkāraḥ pūrṇāhantāsphuraṇam etadeva svātmadevatāpūjanam; ata eva 
śabdādayo viṣayāḥ pūjopakaraṇam - iti avadhānavatā viṣayagrahaṇakāle

--------------- page  145 -----------------

 pratikṣaṇaṃ svātmadevatāpūjakena bhāvyam, - iti rahasyavidaḥ | edadeva 
stutidvāreṇa rājānakarāmo dṛbdhavān yathā

	nityoddāmasamudyamāhṛtajagadbhāvopahārārpaṇe -
	vyāgrābhistava taijasīprabhṛtibhiryacchaktibhistarpyate |
	tanmāṃsāsravasāsthikūṭakalile kāye śmaśānālaye
	rūpaṃ daśarya bhairavaṃ bhavaniśāsaṃcāravīrasya me ||

iti || 75 ||

	pūjānte tāvat agnihavanena bhāvyam, - iti jñāninaḥ kathaṃ tat ? - ityāha

bahirantaraparikalpana -
bhedamahābījanicayamarpayataḥ |
tasyātidīptasaṃvi -
jjvalane yatnādvinā bhavati homaḥ || 76 ||

	tasya evaṃ - vidhasya svātmadevatāpūjakasya atidīpte 
parāhantācamatkārabhāsvare caitanyāgnau

--------------- page  146 -----------------

 yatnāt vinā tilājyendhanādisvīkārakadarthanāyā ṛte homo 
vahnitarpaṇaṃ saṃpadyate | kiṃ kurvataḥ ? - ityāha bahirantara ityādi | bahiḥ 
nīlādau prameye yat svaparapramātṛkalpanam, antargrāhye sukhādau ca yat 
saṃkalpanam , - ityevaṃ - rūpoyo bhedaḥ bāhyābāhyayoḥ pramātṛprameyayoḥ 
niścayasaṃkalpanābhimānavṛttisvabhāvaṃ nānātvam etadeva mahābījaṃ 
pramātṛprameyayoḥ tataḥ samutpatteḥ, tasya kalpanārūpasya bhedabījabhūtasya 
nicayo bhedasya ānantyāt rāśiḥ, tam arpayataḥ paramādvayadṛṣṭyā 
avikalpakasaṃvidrūpānupraveśena svātmavahnau juhvataḥ - iti | ayamāśayaḥ - 
parabrahmātmakasya yogino dehādipramātṛtābhimānābhāvāt yaḥ 
svarasasiddhaḥ svaparapramātṛprameyakalanaparikṣayaḥ sa eva akṛtrimo homaḥ | 
yathāha bhaṭṭaśrīvīravāmanakaḥ

	yatrendhanaṃ dvaitavanaṃ mṛtyureva mahāpaśuḥ |
	alaukikena yajñena tena nityaṃ yajāmahe ||

--------------- page  147 -----------------

 iti || 76 ||

	evaṃ - rūpasya yājakasya dhyānam āha

dhyānamanastamitaṃ puna -
reṣa hi bhagavān vicitrarūpāṇi |
sṛjati tadeva dhyānaṃ
saṃkalpālikhitasatyarūpatvam || 77 ||

	niyatākāracintitasya ākārasya anyatra manovṛtteḥ gamanāt kṣayo'sti, 
idaṃ punaranastamitaṃ dhyānam, yasmāt eṣa bhagavān api anantaḥ 
svātmarūpo maheśvaraḥ kriyāśaktisvabhāvavikalpasvātantryeṇa yāni 
vicitrāṇi rūpāṇi sṛjati anavarataṃ nānāpadārthān vikalparūpān ākārān 
buddhidarpaṇe samullikhati, tadeva astodayavarjitam etasya dhyānaṃ cintanaṃ, na 
ato'nyat kiṃcit | itaratra tu devatāviśeṣe

--------------- page  148 -----------------

 nānāvaktrāṅgaparikalpanayā naiyatyaṃ syāt | sarvo manovyāpāraḥ 
parāśaktisphārapallavabhūtaḥ, - iti jānānasya anavacchinnam idaṃ sarvaṃ 
parameśvarībhūtam | tathā saṃkalpena manasā ālikhitaṃ saṃvidbhittau 
citrīkṛtaṃ satyarūpatvaṃ paramārthatā yasya dhyānasya tat | evaṃ yataḥ 
sarvam idaṃ prakāśamānaṃ vikalpollikhitaṃ manovyāpārarūpamapi 
prakāśānatiriktaṃ satyaṃ, sarvatra saṃvidanugamāt - iti | taduktaṃ 
śrīmatsvacchandaśāstre

	yatra yatra mano yāti tatra tatraiva dhārayet |
	calitvā kutra gantāsi sarvaṃ śivamayaṃ yataḥ ||

iti | tathā śaivopaniṣadi

	yatra yatra mano yāti bāhye vābhyantare priye |
	tatra tatra śivāvasthā vyāpakatvāt kva yāsyati ||

iti | tasmāt svarasoditam etat yogino

--------------- page  149 -----------------

 dhyānaṃ - iti || 77 ||
	japaśca asya kīdṛśaḥ syāt ? - ityāha

bhuvanāvalīṃ samastāṃ
tattvakramakalpanāmathākṣagaṇam |
antarbodhe pariva -
rtayati yatso'sya japa uditaḥ || 78 ||

	vakṣyamāṇena krameṇa yo viśvasya pratikṣaṇam abhedena 
parāhantāpratyavamarśaḥ so'yam asya japa uditaḥ akṛtrimatvena kathitaḥ | 
ko'sau ? - ityāha bhuvanāvalīṃ samastāṃ 
ṣaṭtriṃśattattvasamūhāntarvartinīṃ catvāriṃśaduttaraśatadvayasaṃkhyātāṃ 
prākārapaṅktiṃ niḥśeṣām, tathā tattvakramakalpanām iti tattvakramasya 
ātmavidyāśivākhyasya parikalpanāṃ paricchedam, athākṣagaṇam

--------------- page  150 -----------------

 iti antarbahiṣkaraṇarūpam indriyasamūhaṃ ca - iti antardhe 
madhyamaprāṇaśaktyakṣasūtrabhūtāyāṃ svasaṃvittau 
nādabindupravāhakrameṇa yat parivartayati araghaṭṭaghaṭīyantravat 
pratiprāṇavikṣepasṛṣṭisthitisaṃhārakrameṇa sarvametat svasaṃvittau 
paribhramayati, pratikṣaṇaṃ nādātmanā parāmṛśati - iti yāvat | sa eva 
pūrṇāhantāviśrāntilakṣaṇo'kṛtrimaḥ asya japaḥ | ayamāśayaḥ - japaḥ kila 
vācyarūpāyā devatāyā vācakasya mantrasya uccāraḥ, sa ca akṣamālayā 
prāṇaśaktivyāptikayā akṣaparivartanakrameṇa saṃkhyeyaḥ | 
paramādvayayoginastu svā prāṇaśaktistantubhūtā madhyamaprāṇe 
pravāhakrameṇa nadantī svarasoditā sarvākṣakroḍīkāreṇa sahajaiva akṣamālā 
ucyate; yataḥ sarvam idaṃ vācyaṃ ṣaṭtriṃśattattvātmakaṃ

--------------- page  151 -----------------

 viśvaṃ prāṇaśaktāveva pratiṣṭhitaṃ sat, pratiprāṇavikṣepam 
udayavyayakrameṇa parāsvabhāvā bhagavatī prāṇasvarūpam āśritya 
vimṛśantī pratiprāṇaspandam avadhānavato yogino japam akṛtrimaṃ sādhayati | 
atra japasaṃkhyā

	ekaviṃśatsahasrāṇi ṣaṭśatāni divāniśam |
	japo devyāḥ samuddiṣṭaḥ sulabho durlabho jaḍaiḥ ||

iti śaivopaniṣadi | śivasūtreṣu

	kathā japaḥ (3 u. 27 sū.)

iti | evam eṣa vandyacaraṇānām avadhānavatāmeva gocaraḥ - iti || 78 ||
	idaṃ vratam asya - ityāha

sarvaṃ samayā dṛṣṭyā
yatpaśyati yacca saṃvidaṃ manute |
viśvaśmaśānaniratāṃ
vigrahakhaṭvāṅgakalpanākalitām || 79 ||

--------------- page  152 -----------------

 viśvarasāsavapūrṇaṃ
nijakaragaṃ vedyakhaṇḍakakapālam |
rasayati ca yattadetad
vratamasya sudurlabhaṃ ca sulabhaṃ ca || 80 ||

	evaṃ yat vakṣyamāṇam etadeva asya jñānino vratam 
svātmadevatāsamārādhanāya niyamaḥ kīdṛśam ? tadāha sudurlabhaṃ ca 
sulabhaṃ ca iti | suṣṭhu kṛtvā duḥkhena akhyātiparikṣayāt 
anyopāyaparihārarūpeṇa parameśvarānugraheṇa labhyate, - ityataḥ sudurlabhaḥ; 
tathā sukhena bāhyāsthibhasmādyābharaṇāhāraniyamādisvīkārakadarthanāṃ 
ca vinā labhyate, - ityataḥ sulabhaṃ ca | kiṃ tat vratam ? - ityāha sarvam ityādi | 
yat sarvam idaṃ prātītikaṃ bhedāvabhāsarūpaṃ 
yuktyāgamānubhavapariśīlanena abhedadṛśā sarvamidaṃ ekaḥ sphurāmi

--------------- page  153 -----------------

 iti samīkṣate | yathā śrībhagavadgītāsu

	sarvabhūtasthamātmānaṃ sarvabhūtāni cātmani |
	īkṣate yogayuktātmā sarvatra samadarśanaḥ || (6 | 29)

ityādi | evam abhedabuddhidārḍhyameva vratam | anyacca yat 
viśvaśmaśānaniratāṃ saṃvidaṃ manute tadapi vratam | yathā viśvaṃ 
grāhyagrāhakasvabhāvaṃ 
ghaṭadehādijaḍalakṣaṇapadārthaśavaśatasamākrāntam - iti kṛtvā tadeva 
śmaśānaṃ pitṛvanam, - yataḥ saṃvidekā bhagavatī ajaḍā, ato'nyat 
tadullāsitaṃ sarvamidaṃ śavasthānīyaṃ jaḍam; ato viśvasya śmaśānena 
sādṛśyam | - tasmin viśvaśmaśāne niḥśeṣeṇa ratāṃ saṃvidaṃ 
samutpattinidhanatayā mahābhīṣaṇe madhyavartinīṃ manute avabudhyate | vratī 
kila śmaśāne vasati, ayaṃ punaḥ

--------------- page  154 -----------------

 alaukiko vratī sarvatra ahameva ekacittattvaparamārthaḥ iti matvā, 
jaḍaiḥ paśupramātṛbhiḥ ghaṭādibhiḥ prameyaiśca paretasthānīyaiḥ saha 
unmattavat kriḍāṃ kurvāṇaḥ saṃsārabhuvam imāṃ 
sarvapramātṛprameyanidhanatayā bhīṣaṇāṃ śmaśānasvabhāvām adhyāste | 
anyacca yat vigrahakhaṭvāṅgakalpanākalitāṃ saṃvidaṃ manute iti | 
vigrahaḥ śarīraṃ sa eva khaṭvāṅgakalpanā kaṅkālavidhiḥ, yoginaḥ kila 
svaśarīrapramātṛtābhimānadurgrahasaṃkṣayāt śarīrātītaṃ svātmānaṃ 
manyamānasya saṃskāraśeṣībhūto vigrahaḥ śavaprāyameva, - iti 
avadhārayataḥ svaśarīrameva kaṅkālamudrākalpanā, tayā kalitāṃ 
bhogyādhāratvena mudritām | vīravratino hi śmaśānasthasya 
khaṭvāṅgamudrayā bhavyam, ato'sya svasaṃvidvapuṣaḥ svaśarīramapi 
vedyatayā bhinnam avadhārayataḥ saiva khaṭvāṅgamudrā, - iti etadapi asya vratam 
| tathā vedyakhaṇḍakakapālaṃ rasayati

--------------- page  155 -----------------

 carvayati; yacca śabdādiviṣayapañcakalakṣaṇaṃ sarvabhogyarūpam 
idaṃ vedyaṃ jñeyatvakāryatvābhyāṃ paricchinnam, - iti khaṇḍakaṃ 
karparaprāyaṃ, tadeva kapālaṃ  śiro'sthiśakalaṃ yat rasayati 
sārāharaṇakrameṇa pūrṇāhantāviśrāntyā camatkurute - iti etadapi vratam | 
vratinā kila kapālasthaṃ vīrapānaṃ rasyate - ityāha viśvarasa iti | viśvasmin 
vedyaśabdādiviṣayapañcakarūpe kapālakhaṇḍe yo'sau sārabhāgaḥ 
carvaṇāmṛtamayo'ṃśaḥ sa eva paramānandadāyitvāt  rasāsavaḥ uttamaṃ 
pānaṃ, tena pūrṇaṃ nirbharam | etat uktaṃ syāt - viśvasya yaḥ 
śalkasthānīyaḥ kaṭhino'ṃśaḥ pātrakalpaḥ sa eva kapālaṃ, tadgataḥ 
sārabhāgaḥ camatkārakṣama āhlādadāyitvāt pānam - iti | kapālaṃ tu vratinaḥ 
karagataṃ bhavati - iti āha nijakaragam iti | nijāḥ svātmīyāḥ ye karāḥ 
cakṣurādikaraṇadevīsvabhāvāḥ cinmarīcayaḥ, teṣu bhogyatayā tat

--------------- page  156 -----------------

 vedyakhaṇḍakaṃ viṣayatvaṃ gacchati, - iti nijakaragam, yathā pāṇisthena 
kapālena pānaṃ pīyate, tathaiva vedyakhaṇḍakakapālena viśvarasāsavaḥ 
cakṣurādisaṃvitkaraiḥ yoginā samāhṛtya āsvādyate | ayamāśayaḥ - yogī 
sarvadaiva yathopanataṃ viṣayapañcakaṃ karaṇadevībhiḥ āhṛtya yuktyā 
svacaitanyabhairavaviśrāntim avyucchinnāṃ bhajamānaḥ caramakṣaṇaparyantaṃ 
yathopadiṣṭam advayadṛśā nirvāhayati - iti etadeva asya 
pariśīlitasadgurucaraṇapaṅkajasya vratam, ato'nyat śarīraśoṣaṇamātram - iti || 
80 ||
	prāk pratipāditaṃ saṃkalayan asya upadeśasya utkṛṣṭatvam āha

iti janmanāśahīnaṃ
paramārthamaheśvarākhyamupalabhya |
upalabdhṛtāprakāśāt
kṛtakṛtyastiṣṭhati yatheṣṭam || 81 ||

--------------- page  157 -----------------

 iti samanantaroktena prakāreṇa yat pratipāditaṃ rahasyaṃ 
paramārthamaheśvarākhyaṃ tāttvikaṃ maheśvaram upalabhya svātmani 
dṛḍhapratipattyā samyak anubhūya | kīdṛk ? āha janmanāśahīnam iti, yena 
adhigatena utpattimaraṇe na syātām - iti yāvat | kṛtakṛtyastiṣṭhati yatheṣṭam iti, 
yogī etat prāpya kartavyatāntarasya abhāvāt niṣpannaparapuruṣārtho yatheṣṭaṃ 
svecchātikramaṃ vinā svātantryeṇa cakrabhramavat dhṛtaśarīraḥ tiṣṭhati kālam 
ativāhayan āste | katham ? āha upalabdhṛtāprakāśāt iti | 
etadrahasyapariśīlanena sarvāsu daśāsu anubhavitṛtayā prakāśaḥ 
parisphuraṇaṃ tasmāt - iti, śarīrastho'pi pūrṇānandamayaḥ - iti yāvat || 81 ||
	itthaṃ svātmānaṃ yaḥ kaścit jīvatāṃ madhyāt jānānaḥ sa sarvaḥ 
tadrūpaḥ syāt, - iti adhikāriniyamābhāvam āha

--------------- page  158 -----------------

 vyāpinamabhihitamitthaṃ
sarvātmānaṃ vidhūtanānātvam |
nirupamaparamānandaṃ
yo vetti sa tanmayo bhavati || 82 ||

	ittham iti uktena prakāreṇa vyāpinam anavacchinnacidānandaikaghanaṃ 
śivam abhihitaṃ yuktyāgamānubhavapariśīlanakrameṇa āveditaṃ yo vetti yaḥ 
kaścideva prāṇiprāyo jānāti, sa sarvaḥ tyaktasaṃkocaḥ tanmayaḥ śiva eva 
syāt - iti | atra svātmajñāne na adhikāriniyamaḥ; yato ye kecana 
janmamaraṇādidoṣāghrātāḥ tiryañco'pi vā te sarve 
svātmamaheśvarapratyabhijñānāt tanmayā bhavanti, - iti yacchabdasya 
parāmarśaḥ | kīdṛśaṃ ca? sarvātmānam iti | sarveṣāṃ 
pramātṛprameyāṇām ātmā sarvāṇi vā pramātṛprameyāṇi yasya ātmā, taṃ 
sarvottīrṇaṃ

--------------- page  159 -----------------

 sarvamayam - iti yāvat | ata eva vidhūtaṃ nyakkṛtaṃ sarvadā sarvatra 
cidrūpatayā sphuraṇāt nānātvaṃ bhedānantyaṃ yena tam, evam 
ākāṅkṣāvirahāt nirupamo viśeṣaṇarahitaḥ prakṛṣṭa ānando yasya tam evaṃ 
- vidham, - iti svātmānaṃ jānānaḥ sarvaḥ śivarūpī syāt - iti || 82 ||
	evam adhigatasvātmamaheśvaraḥ svaśarīrādhikāraparikṣaye kutra 
śarīraṃ parityajet, kiṃ vā yāti ? - ityādisaṃśayaṃ pariharati

tīrthe śvapacagṛhe vā
 naṣṭasmṛtirapi parityajandeham |
jñānasamakālamuktaḥ
kaivalyaṃ yāti hataśokaḥ || 83 ||

	evaṃ pariśīlitasvasvarūpo jñānī sarvamidaṃ 
svātmaprakāśasvātantryam iti paramādvayadṛśā gāḍhaṃ 
samāśvastahṛdayaḥ, tīrthe prayāgapuṣkarakurukṣetrādau

--------------- page  160 -----------------

 mahāpuṇye sthāne, atha vā śvapacasadane antyajanagṛhopalakṣite 
atipāpīyasi śarīraṃ muñcan, - iti ubhayathā 
svīkāraparityāgakadarthanāvirahito'pi ātmajñānādeva kaivalyaṃ yāti 
kalevaraparikṣayāt pradhānādikāryakāraṇavargebhyo'nyāṃ 
cidāndaikaghanāṃ turyātītarūpāṃ kevalatāṃ yāti - iti yāvat | yataḥ asya 
sarvamidaṃ viśvaṃ svātmanā pūrṇaṃ samadṛśā parameśvarādhiṣṭhitaṃ 
paśyato na kṣetrākṣetrapravibhāgaḥ, ata eva hataḥ parākṛto 
vikalpaśaṅkāsamutthaḥ śoko yena sa evam | yathā uktam

	himavati gaṅgādvāre
	vārāṇasyāṃ kurau prayāge vā |
	veśmani caṇḍālādeḥ
	śivatattvavidāṃ samaṃ maraṇam ||

iti śrīnirvāṇayogottare | nāpi asya dehapātāvasare smṛtyupayogaḥ - ityāha 
naṣṭasmṛtirapi

--------------- page  161 -----------------

 iti | āstāṃ saṃsmṛtiḥ - iti apiśabdārthaḥ | yadi vā sa jñānī 
śarīratyāgakāle tadutthavātapittaśleṣmābhibhavāt naṣṭasmṛtiḥ 
kāṣṭhapāṣāṇatulyatvāt vigatasvātmasaṃbodhaḥ kalevaram avaśobhūtvā 
tyajati, tathāpi prāgadhigatasvātmajñānaḥ kaivalyam avaśyaṃ yāti; tato na 
svātmajñānādhigame pramayasamaye smaraṇāsmareṇe viśeṣo'sti | nanu 
tīrthātīrthapravibhāgo'sya svātmajñānavidomā bhūt, yat punaḥ antakāle sa 
naṣṭasmṛtirapi - iti yadeva svātmajñānam upāyatayā gṛhītaṃ, tasya 
dehapātāvasare tu vismaraṇaṃ cet, tarhi kathaṃ sa muktaḥ syāt ? | yaduktam, 

	antakāle'pi māmeva smaranmuktvā kalevaram |
	yaḥ prayāti sa sadbhāvaṃ yāti nāstyatra saṃśayaḥ || (8 | 5)

iti śrīgītāsu | evamapi atra smaraṇasyaiva upayogaḥ;

--------------- page  162 -----------------

 yadapi parameśvarasmaraṇābhāve'pi antakāle tadbhāvāpattiḥ syāt, 
tarhi sarvaḥ paśujanaḥ pramayasamaye mūḍho'pi viśeṣābhāvāt 
parameśvarasamāpattiṃ yāyāt; vākyāni ca evamādīni apramāṇāni syuḥ; na 
caivam - ityatra uttaramāha jñānasamakālamuktaḥ iti | satyaṃ na asya 
smaraṇena upayogaḥ, kiṃtu sadguruṇā yadaiva tasya karṇamūle 
svātmamaheśvarajñānopadeśaḥ kṛtaḥ tasminneva kāle ahameva sarvamidam iti 
adhirūḍhasvātmajñānaparamārtho vigalitamāyādikañcukabhāvo na anyat 
kiṃcit apekṣate, kevalaṃ saṃskāraśeṣatayā cakrabhramavat śarīraṃ 
vahamānaḥ, - iti na punaḥ tasya uttarakāle smaraṇāsmaraṇakadarthanā; yasmāt 
ajñānajanitāṇavamāyīyakañcukasaṃbandhe sati dehakañcukaṃ prabhavati, 
svātmajñānopadeśena ajñānajanitakañcukakṣayāt kathaṃ dehakañcukaṃ 
vinaṣṭaprāyaṃ paryante jñānino yantraṇāṃ kartum

--------------- page  163 -----------------

 alam ?, - iti svātmajñānakathanāvasara eva sa jīvanneva muktaḥ syāt | 
yathā ukta kularatnamālikāyāṃ sāhasrikāyām

	yadā guruvaraḥ samyakkathayettadasaṃśayam |
	muktastatraiva kāle'sau yantravatkevalaṃ vaset ||

iti | śrīmanniśāṭane'pi

	godohamiṣupātaṃ vā nayanonmīlanātmakam |
	sakṛdyuktaḥ pare tattve sa mukto mocayetparān ||
	yasmātpūrvaṃ pare nyasto yenātmā brahmaṇi kṣaṇam |
	smaraṇaṃ tu kathaṃ tasya prāṇānte samupasthite ||

iti | atha vā ātmavidaḥ paryantakṣaṇaḥ svānubhavaikasākṣī kena anubhūyate, 
yadvaśāt tasya smaraṇam asmaraṇaṃ vā parikalpyate, yāvatā tatra 
arvāgdṛśāṃ nāsti gocaraḥ - iti sarvajñāstatra praṣṭavyāḥ; na punaḥ 
śarīraceṣṭāmātrāt maraṇāvasare adhigataparamārthasyāpi dehatyāgakṣaṇaḥ 
śubhāśubhatvena anumātuṃ śakyaḥ | tasmāt avaśyameva sadā 
tadbhāvabhāvitaṃ svātmajñānavidaṃ svātmastha eva parameśvaro

--------------- page  164 -----------------

 maraṇāvasare svaṃ svarūpaṃ kāṣṭhapāṣāṇatulyamapi smārayati | 
yaduktam

	svasthaceṣṭāśra ye martyāḥ smaranti mama nārada |
	kāṣṭhapāṣāṇatulyāṃstānantakāle smarāmyaham ||

tathā

	sthire cetasi susvasthe śarīre sati yo naraḥ |
	dhātusāmye sthite samartā viśvarūpaṃ ca māmakam ||
	tatastu mriyamāṇaṃ taṃ kāṣṭhapāṣāṇasaṃnibham |
	ahaṃ smarāmi madbhaktaṃ nayāmi paramāṃ gatim ||

iti bhagavatā lakṣmīsaṃhitāyām uktam | evamatra sadātadbhāvabhāvitatvameva 
hetuḥ, anyathā pūrvānubhavasaṃskāradārḍhyaṃ vinā katham ante smṛtirapi 
syāt, - iti na kenacidapi jānino maraṇāvasare samupayogaḥ - iti || 83 ||

	yadi punaḥ tīrthādyāśrayaṇam uktaprakāreṇa na kutracidapi 
aṅgabhāvaṃ yāti, tarhi kimiti vidvadbhiḥ tat samāśrīyate ? - iti viṣayavibhāgam 
āha

--------------- page  165 -----------------

 puṇyāya tīrthasevā
nirayāya śvapacasadananidhanagatiḥ |
puṇyāpuṇyakalaṅka -
sparśābhāve tu kiṃ tena || 86 ||

	yeṣāṃ viduṣāmapi dehādipramātṛtāgrahaḥ sāmprataṃ na vigalitaḥ 
svātmajñānacarcāyāṃ ca na tathā samāśvāsaḥ, teṣām 
iṣṭāpūrtādidharmasaṃgrahaṃ kurvatām adharmasaṃgrahaṃ vā, 
prayāgāditīrthasevā maraṇāvasare kṣetraparigrahaḥ puṇyāya 
uttamalokaprāptaye niścitaṃ syādeva | tathaiva śvapacasadananidhanagatiḥ iti | 
śvapākādigṛhopalakṣite pāpīyasi sthāne nidhanagatiḥ pramayaprāptiḥ 
nirayāya avīcyādinarakapātāya eteṣāṃ kimiti na bhavet ?, 
dehapramātṛtāgrahasya vidyamānatvāt | maraṇasthānānuguṇaṃ bhogamapi 
bhuktvā śubhāśubheṣu deheṣu jāyante punaḥ mriyante ca, - iti 
anavaratajanmamaraṇaprabandhā

--------------- page  166 -----------------

 dehādyātmamānina evaṃ - prāyāḥ syuḥ | yasya punaḥ 
svātmajñānapratyavamarśadārḍhyāt dehādipramātṛtābhimāno niḥśeṣeṇa 
vigalitaḥ, tasya cinnabhaḥsvabhāvasya 
dharmādharmasvabhāvavāsanāsparśaprakṣaye vṛtte sati kiṃ tena ? | evaṃ sa 
yataḥ śubhāśubhakarmabhājāṃ tīrthādiparigrahaḥ, tataḥ tena tīrthasevādinā 
vimalasya jñānino nāsti upayogaḥ | yaduktaṃ mānave dharmaśāstre

	yamo vaivasvato rājā yastavaiṣa hṛdi sthitaḥ |
	tena cedavivādastvaṃ mā gaṅgāṃ mā gayāṃ gamaḥ ||

iti | atra dehātmamānitaiva hṛdayavartinī yamaḥ, sā yaiḥ 
pūrṇasvātmamaheśvarasvabhāvam upalabhya saṃbhakṣitā, teṣāṃ katham eṣa 
tīrthādisevāprayāsaḥ ? - iti siddhāntaḥ || 84 ||
	nanu prāk pratipāditaṃ - yathā 
jñānadagdhāṇavamāyīyakārmamalasvarūpa ātmā piṇḍapātāt 
svasvarūpastha eva na punarbhavaprarohaṃ vidhatte dagdhabījamivāṅkuram - iti | 
svatmajñānāvirbhāvasamakālaṃ

--------------- page  167 -----------------

 dehakañcukabhaṅgaḥ cet, tarhi uttaratra mā vidhattaṃ; yat punaḥ 
vidyamāne dehādikañcukabandhe kathaṃkāraṃ sa tadgatadharmācchurito na 
syāt, tadācchuritaḥ san mṛtaḥ kathaṃ na saṃsārī ? - iti codyam apavadati

tuṣakambukasupṛthakkṛta -
taṇḍulakaṇatuṣadalāntarakṣetaḥ |
taṇḍulakaṇasya kurute
na punastadrūpatādātmyam || 85 ||
tadvat kañcukapaṭalī -
pṛthakkṛtā saṃvidatra saṃskārāt |
tiṣṭhantyapi muktātmā
tatsparśavivarjitā bhavati || 86 ||

	tuṣakambukābhyāṃ suṣṭhu pṛthakkṛto viśliṣṭo yaḥ taṇḍulakaṇaḥ 
tasya yaḥ tuṣadalāntarakṣepaḥ

--------------- page  168 -----------------

 prāgiva punaḥ tatraiva vinyāsaḥ, sa yathā tuṣadalāntaraprakṣepaḥ 
taṇḍulakaṇasya tadrūpatayā aṅkura jananakṣamatvena sthito'pi tādātmyaṃ 
gāḍhāvaṣṭambhaṃ na kurute ayaḥśalākāvat bhinnāveva tuṣataṇḍulau 
tiṣṭhato, na punarekakāryajananavyagrau bhavataḥ, tadvat tathaiva jñānina iyaṃ 
saṃvit cetanā kañcukapaṭalyāḥ āṇavamalādikañcukasamūhāt pṛthakkṛtā 
ahameva svātmamaheśvarasvabhāvo viśvātmanā sarvadā sarvatra 
sphurāmi iti svātmajñānapariśīlanadārḍhyāt samuddhṛtā, atra iti asyāṃ 
kañcukapaṭalyāṃ kaṃcitkālaṃ śeṣavartanayā dehabhāvena tiṣṭhantyapi 
sthitā satī vimuktātmā pradhvastabandhā tatsparśavivarjitā bhavati, tasyāḥ 
dehādikañcukapaṭalyāḥ sparśaḥ puṇyāpuṇyarūpakārmamalopajanito ya 
uparāgaḥ

--------------- page  169 -----------------

 saṃsārāṅkurajananakṣamaḥ, tena vivarjitā parihṛtā saṃpadyate, yathā 
tuṣadalāntare kṣiptaḥ taṇḍulo'ṅkuraprarohasparśarahito bhavati - iti | idam uktaṃ 
syāt - ajñānakāraṇakaḥ tāvat saṃsāraḥ, tatra 
samuditasvatmajñānadalitakañcukasya yoginaḥ saṃvit na punaḥ saṃsārahetuḥ, 
ajñānajanitasāmagrīvaikalyāt; nāpi tasya śeṣavartanayā saṃskāravaśena 
tiṣṭhan ayaṃ dehakañcukabandho jñānāgnidagdhājñānamūlaḥ 
svagatadharmāvirbhāvena saṃsāraprarohaṃ dātum alam, - iti jñānī jīvanneva 
turīyarūpo dehābhāvāt turyātītarūpaḥ, - iti ubhayathā punaḥ na kācit 
saṃsāraśaṅkā - iti || 86 ||
	nanu śeṣavartanayā yāvat śarīrāvasthitaṃ 
yogisaṃvedanamadhigatasvasvarūpamapi dehopādhikṛtamālinyasyāpi 
tāvadaṃśena vidyamānatvāt aśuddhameva, - iti dṛṣṭāntena pariharati

--------------- page  170 -----------------

 kuśalatamaśilpikalpita -
vimalībhāvaḥ samudgakopādheḥ |
malino'pi maṇirupādhe -
rvicchede svacchaparamārthaḥ || 87 ||
evaṃ sadguruśāsana -
vimalasthiti vedanaṃ tanūpādheḥ |
muktamapyupādhyantara -
śūnyamivābhāti śivarūpam || 88 ||

	yathā maṇiḥ atipravīṇavaikaṭikasamuddyotitanairmalyaḥ san 
samudgakaviśliṣṭatvāt malino'pi dhūsaraprāyo bhavati, sa eva punaḥ 
samudgakopādhivicchede āvaraṇaviśeṣābhāve svacchaparamārthaḥ yathāvat 
nirmalasvarūpaḥ saṃpadyate | evam

--------------- page  171 -----------------

 anenaiva prakāreṇa idaṃ vedanaṃ sadguruśāsanavimalasthiti, 
paripūrṇasvātmajñānavit yodaiśikapravaraḥ, tasya yat śāsanaṃ 
svātmajñānarahasyamukhāmnyāyaḥ tasya pariśīlanena vigatā kālikārūpasya 
āṇavamalasya māyīyakārmamalabhittibhūtasya sthitiryasya, tat evaṃ - vidhaṃ 
maulikamalaprakṣayāt nabhorūpamapi vedanaṃ tanūpādheḥ tanuḥ śarīraṃ 
tallakṣaṇā upādhiḥ viśeṣaṇaṃ, tato muktaṃ pṛthakkṛtaṃ 
viśeṣaṇāntarābhāvāt tat śivarūpam ābhātyeva dehabhaṅgāt 
paramaśivatvena bhāsate - iti yāvat | yathā samudgakopādhivirahāt maṇiḥ 
svasvarūpo bhāti, tathaiva svasvarūpāvabodhāt vimalamapi 
aśuddhābhimataśarīropādhikṣayāt viśuddhameva saṃvedanaṃ bhāsate | nanu 
maṇiryathā samudgakopādheḥ vimukto'pi punaḥ anyatamopādhiparigrahāt 
samalaḥ saṃpadyate, tathaiva tanūpādhermuktamapi saṃvedanaṃ maṇivat 
upādhyantaraṃ cet gṛhṇāti, tarhi punarapi

--------------- page  172 -----------------

 sopādhitvāt aśuddhameva, - iti pariharati upādhyantaraśūnyamapi iti | 
na dṛṣṭāntadārṣṭāntikayoḥ sarvathā sāmyaṃ, yataḥ piṇḍapātāt tasya 
mahāprakāśavapuṣaḥ paramādvayarūpasya sarvamidam upādhyabhimataṃ 
svāṅgakalpaṃ bhāsate, ato vyatiriktasya upādhyantarasya abhāvāt na punaḥ 
tadupādhyantareṇa viśiṣyate, - iti na maṇinā upādhigrahaṇasya sāmyam | 
ajñānamūlaṃ kila śarīropādhigrahaṇaṃ, tat cet svātmajñānakuṭhāreṇa 
dalitaṃ kathaṃkāraṃ punaḥ upādhisaṃśrayo bhavet ? | yaduktam

	ajñānenāvṛtaṃ jñānaṃ tena muhyanti jantavaḥ ||
	jñānena tu tadajñānaṃ yeṣāṃ nāśitamātmanaḥ |
	teṣāmādityavajjñānaṃ prakāśayati tatparam || (3 | 16)

iti śrīgītāsu | tasmāt svasvarūpajñānāt yoginaḥ svasaṃvedanaṃ sadaiva 
śuddhameva - iti || 88 ||

--------------- page  173 -----------------

 sarvaupādhyutpattau 
yathāvatpariśīlitavyāpāramanaḥsaṃskāraprarūḍhireva nimittaṃ, na punaḥ 
nūtanatvena kimapi āyāti - iti āvedayati

śāstrādiprāmāṇyād
avicalitaśraddhayāpi tanmayatām |
prāptaḥ sa eva pūrvaṃ
svargaṃ narakaṃ manuṣyatvam || 89 ||

	āgamaprāmāṇyāt, gurupadeśapāramparyakathanāt, yuktipariśīlanāt 
prāgvāsanāprarūḍhayā śraddhayā vā svātmajñāne, iṣṭāpūrte pāśave 
karmaṇi vā kṛtābhyāsaḥ pramātā tadaiva tatsaṃskārapraroheṇa tanmayatāṃ 
tattadabhyastavastusvarūpatāṃ prāptaḥ san uttaratra dehapātāt 
vāsanānuguṇyena svargaṃ niratiśayāṃ prītiṃ, narakaṃ avīcyādi duḥkhaṃ, 
manuṣyatvaṃ sukhaduḥkhobhayarūpaṃ manuṣyabhāvaṃ prāpnoti; na punaḥ 
anabhyastavāsanasyāpi puruṣasya

--------------- page  174 -----------------

 dehapātādeva yat kiṃcit āpatati | yataḥ sarvaḥ pramātā yena āśayena 
yat abhyasyati tadaiva sa tadrūpo bhavati, kiṃtu maraṇasamaye sphuṭatayā yat 
abhilaṣitaṃ vastu tat pramātuḥ abhivyaktiṃ yāti, - iti na abhyastavastunaḥ kadācit 
viparyayaḥ syāt; nāpi anabhyastavastusvarūpaṃ kiṃcit apūrvatvena āpatet, - iti 
sarvatra pūrvābhyāsa eva kāraṇam - iti bhāvaḥ || 89 ||
	evaṃ sadā tadbhāvabhāvitatvaṃ svātmavido dehatyāgāvasare 
pūrṇaprathāhetuḥ, na punaḥ lokaparidṛśyaḥ puṇyāpuṇyarūpo maraṇāvasaraḥ 
kaścit svargaṃnirayādikāraṇaṃ parikalpanīyam - ityāha

antyaḥ kṣaṇastu tasmin
puṇyāṃ pāpāṃ ca vā sthitiṃ puṣyan |
mūḍhānāṃ sahakārī -
bhāvaṃgacchati gatau tu na sa hetuḥ || 90 ||

--------------- page  175 -----------------

 ye'pi tadātmatvena viduḥ
paśupakṣisarīsṛpādayaḥ svagatim |
te'pi purātanasaṃbodha -
saṃskṛtāstāṃ gatiṃ yānti || 91 ||

	evaṃ - pratipādite jñānini antyaḥ kṣaṇaḥ caramo dehavināśasahabhāvī 
kālo dhātudoṣavaśena duṣṭavyādhyanubhavāt vā samīpasthitaiḥ pramātṛbhiḥ 
anumitāṃ puṇyāṃ pāpamayīṃ vā sthitiṃ puṣyan sevamānaḥ san 
mūḍhānāṃ dehātmamānināṃ pramātṝṇāmeva sahakārībhāvaṃ 
kāraṇatvaṃ gacchati | gacchatu varākaḥ, na etāvatā nirbhagnadehātmamānitve 
sadā svātmamaheśvaranibhālanacature tasmin yogini saḥ antyaḥ kṣaṇo gatau 
dehāt dehāntaraprāptau hetuḥ kāraṇaṃ bhavet | kutaḥ etadāgatam ? - iti 
nidarśayan āha ye'pi

--------------- page  176 -----------------

 iti | ye'pi kenāpi āśayavaśena śāpādinā vā pāpayonayaḥ paśurūpa-
tāmapi prāptāḥ svagatim ātmasthitiṃ maraṇāvasare ātmatvena jānīyuḥ, te 
mūḍhāḥ santo'pi prāgabhyastasvātmajñānavāsanāprabodhānugṛhītāḥ 
svātmasthitiṃ ca labhante | gajendra mokṣaṇādau yathā hastinā 
paśusvabhāvenāpi satā prākpariśīlitaparameśvarabhaktisaṃskāraprabhuddhena 
viṣṇuṃ bhagavantaṃ stutvā samyak kañcukaṃ bihāya svasvarūpam upalabdham, 
kaḥ tatra smaraṇe hetuḥ abhūt | ayaṃ bhāvaḥ - śarīrādyutthadhātudoṣavaśāt 
kāṣṭhapāṣāṇaceṣṭo jñānī puṇyaṃ pāpam ā9labiḍālādikaṃ vā yat kiṃcit 
pralapan dehaṃ tyajati, na etāvatā svasthaceṣṭatayā yat abhyastaṃ jñānādikaṃ 
tasya vipralopaḥ syāt; śarīrādigatā dharmāḥ śarīrādāveva nipatanti, na punaḥ 
sadā

__________________FOOṭṇOṭEṣ___________________

[9 ālo vānara iti |]

--------------- page  177 -----------------

 bhāvitaṃ vastu sthagayituṃ prabhavanti, - iti āmaraṇakṣaṇaṃ sarvatra 
prarūḍhireva paramārthaḥ | yathā gītāsu uktam

	yaṃ yaṃ vāpi smaranbhāvaṃ tyajatyante kalevaram |
	taṃ tamevaiti kaunteya sadā tadbha vibhāvitaḥ || (8 | 6)

tathā

	teṣāṃ satatayuktānāṃ bhajatāṃ prītipūrvakam |
	dadāmi buddhiyogaṃ taṃ yena māmupayānti te || (10 | 10)

iti bhāvitāntaḥkaraṇataiva paryantagatidānahetuḥ || 91 ||
	evaṃ darśitadṛṣṭyā yataḥ sadā tadbhāvabhāvitatvam apahastya 
nūtanatvena śarīravināśe na apūrvaṃ kiṃcit samāpatet jñāninaḥ, yato deha 
eva vināśī, kevalaṃ sa eva vinaśyati, na punaḥ vāsanāprarohaḥ - iti darśayan 
āha

--------------- page  178 -----------------

 svargamayo nirayamaya -
stadayaṃ dehāntarālagaḥ puruṣaḥ |
tadbhaṅge svaucityād
dehāntarayogamabhyeti || 92 ||
evaṃ jñānāvasare
svātmā sakṛdasya yādṛgavabhātaḥ |
tādṛśa eva tadāsau
na dehapāte'nyathā bhavati || 93 ||

	tat tasmāt śarīraghaṭādiniviṣṭaḥ puruṣaḥ sarvasya kārmamalādhivāsita 
ātmā svargādyabhiprāyapūrvakṛtakarmaphalavāsanāvāsitāntaḥkaraṇaḥ 
svargamayaḥ prarūḍhasvargaphalavāsanāviśiṣṭatvāt svargaphalabhoktā - iti 
yāvat | evaṃ duṣkṛtapūrvakarmavāsanāprarūḍho narakaphalabhoktā, kevalaṃ 
deha ubhayakarmaphalabhogāyatanaṃ tadbhaṅge svaucityāt iti, tasmin dehakṣaye 
svasya ātmano yathāhi -

--------------- page  179 -----------------

 tavāsanānuguṇyāt anyena bhogāyatanena śarīrāntareṇa samanantaraṃ 
saṃbandham upayāti, uttarakālaṃ yena 
viśiṣṭakarmavāsanādattaphalabhogabhāgī bhavati | tathaiva jñānāvasare 
upadeśyasya gurūpadiṣṭasvātmaprakāśanakāle svātmā caitanyaṃ sakṛt 
ekavāraṃ yādṛk yādṛśaḥ avabhātaḥ upadeśakramānusāreṇa 
paripūrṇasvātantryalakṣaṇā mitāṃ vā parāmarśadaśāṃ gataḥ, tādṛśa eva 
sadā asau yenaiva svarūpeṇa jñāninā svātmā sarvakālaṃ parāmṛṣṭaḥ 
tādrūpyeṇa vāsanāprarohāt tasya prathate, na punaḥ dehapāte prakāśito'pi 
svātmā jñāninaḥ anyathā samācchādito bhavati | nahi bhātam abhātaṃ syāt, 
aparathā na kaścit kiṃcit abhyaset, - iti sarvavyavahāravipralopo bhavet

	dharmeṇa gamanamūrdhvaṃ gamanamadhastādbhavatyadharmeṇa |
	jñānena cāpavargo viparyayādiṣyate bandhaḥ ||

ityādi sarvaṃ ca truṭyet; tasmāt maraṇakāle śarīraṃ

--------------- page  180 -----------------

 yathā astu tathā astu, kevalaṃ vāsanāprarohaḥ svātmagataḥ sarvasya 
bandhe mokṣe ca hetuḥ - iti || 93 ||
	yadi punaḥ dhātuvaiṣamyāt śarīre maraṇavyathopalabdhiḥ syāt, na 
etāvatā abhyāsaprarohe kācit kṣitiḥ, - iti āveditāmeva sthitim upalabdhuṃ 
parighaṭayate

karaṇagaṇasaṃpramoṣaḥ
smṛtināśaḥ śvāsakalilatā cchedaḥ |
marmasu rujāviśeṣāḥ
śarīrasaṃskārajo bhogaḥ || 94 ||
sa kathaṃ vigrahayoge
sati na bhavettena mohayoge'pi |
maraṇāvasare jñānī
na cyavate svātmaparamārthāt || 95 ||

	karaṇagaṇasya bāhyāntargatasya trayodaśātmakasya

--------------- page  181 -----------------

 samyak pramoṣaḥ svarūpavipralopaḥ, yathā cakṣurādīni indriyāṇi 
rūpādiviṣayālocanāyāṃ na pragalbhante, vāgādikarmendriyāṇyapi evaṃ 
vacanādānādau na pravartante, nāpi buddhiḥ yathārtham artham adhyavasyati, 
manaso'navasthitiḥ, ahaṅkāro'pi madhye madhye saṃskāratayā āste | tathā 
smṛtināśaḥ anubhūtaviṣayasya saṃpramoṣaḥ, bandhubhirarthyamāno'pi 
mumūrṣuḥ puro'vasthitaṃ vastu śataśo'nubhūtamapi na pratyabhijānāti; ata eta 
sadā tadbhāvabhāvitatvaṃ vinā brahmavidyādikathanam, antakāle dānam anyat 
kiṃcit vā tasyām avasthāyāṃ nabhaścitramiva na citte prarohati, kiṃtu tat 
itikartavyatāmātraṃ kāryam, - iti niyogaḥ | tathā śvāsaḥ kaṇṭhyo vāyuḥ, tasya 
kalilatā kaṇṭhadeśe gadgadikā hikkā vā | anyacca marmasu chedaḥ 
asthisaṃdhiṣu troṭaḥ | tathā 

--------------- page  182 -----------------

 rujāviśeṣāḥ jvarātīsāraprabhṛtayaḥ - iti | evaṃ yaḥ śarīrasya 
bhūtakañcukasya vātapittaśleṣmadhātuvaiṣamyāt śarīrasaṃskārajo bhogaḥ 
dehajo duḥkhānubhavaḥ, sa kathaṃ kena prakāreṇa vigrahayoge sati jñānino'pi 
na bhavet syādeva | tena hetunā jñānī sadā adhaspadīkṛtadehādyabhimānaḥ 
samāviṣṭasvātmamaheśvarabhāvaśca, 
maraṇakṣaṇajanitaśārīrājñānasaṃbandhe'pi svātmaparamārthāt 
prarūḍhacaitanyapratyavamarśasatattvāt na cyavate na anyathābhāvaṃ yāti | 
yato'sau jñānī nyakkṛtadehasaṃbandho na tajjena bhogena tanmayīkartuṃ 
pāryate, kevalaṃ lokavat cet śarīrapātasamanantaraṃ kṣaṇaṃ na upalabhate, - iti 
etāvatā tasya svasthahṛdayasya svasaṃkalpitābhiprāyeṇa svasthaceṣṭatayā 
abhyastabhagavadbhakteḥ na kiṃcit apūrvaṃ

--------------- page  183 -----------------

 samāpatati ; tasmāt jñānī svātmaprathāsamanantarameva muktaḥ, na 
śarīrasaṃskāro'sya bandhadāyī, - iti śataśaḥ prāk pratipāditam | yastu sadā 
dehātmamānī puṇyapāpamayaḥ, sa kathaṃ 
dehasaṃskārodbhūtasukhaduḥkhādibhogajanitaṃ tanmayatvaṃ na āyāti | 
yaduktam

	yadā sattve pravṛddhe tu pralayaṃ yāti dehabhṛt |
	tadottamavidāṃ lokānamalānpratipadyate || (14 | 14)

ityādi | sattvādayo guṇāḥ prakṛtidharmāḥ tanmayasyaiva niyantraṇāṃ vidadhate, 
yena punastato viviktatayā pariśīlitā na taṃ prati ete kecana, - iti jñānino'nya eva 
panthāḥ | ye punaḥ adṛṣṭagurucaraṇāḥ paśupramātāraḥ te svagatān dharmān 
anyatra āpādayanti | yathā yadi ayaṃ jñānī syāt, kimiti 
vyādhyādyupahataśarīro bhuṅkte paridadhāti ca? yadi vā maraṇasamaye jāḍyam 
āyātaḥ, smṛtam anena na kiñcit, - ityevaṃ

--------------- page  184 -----------------

 bahuprakāram avidyopahatatvāt vivadamānāśca kena paryanuyujyantām | 
yadi ayaṃ jñānī syāt dehadharmasaṃskārayuktaśca bhavet, kim etāvatā ca 
tasya duṣyet ? | jñāninaḥ svātmaprakāśaḥ tattadavasthāvicitro'pi 
svātmaprakāśa eva, na punaḥ tasya svātmānubhavitṛtayā vipralopaḥ syāt, yena 
jñānaṃ naśyeta | pūrṇaṣāḍguṇyamahimāpi bhagavān vāsudevaḥ 
kṛṣṇāvatāre vyādhaśarāghātajanitavyatho bhūtaśarīraṃ tyaktavān, - ityevaṃ 
kṛtvā, kiṃ tasya jagatprabhoḥ svasvarūpavipralopo'bhūt ,? - iti  ā kīṭāt 
sadāśivāntasyāpi dehasaṃskāra etādṛśa eva; kuṃtu ekaḥ 
svātmapratyavamarśamātrasanāthadehaḥ, aparastu dehādyātmamānitāsatattvaḥ, 
- iti iyān viśeṣaḥ | tasmāt śarīradharmāḥ jñānyajñāninoḥ sadṛśā eva, na 
etāvatā phalasāmyam, - iti etadeva gītāsu uktam

--------------- page  185 -----------------

 sadṛśaṃ ceṣṭate svasyāḥ prakṛterjñānavānapi |
	prakṛtiṃ yānti bhūtāni nigrahaḥ kiṃ kariṣyati || (3 | 33)

iti || 95 ||
	idānīm akrameṇa krameṇa ca jñānayogapariśīlena 
vicitraparaśaktipātameva kāraṇaṃ praipādayan phalabhedam āha

paramārthamārgamenaṃ
jhaṭiti yadā gurumukhāt samabhyeti |
atitīvraśaktipātāt
tadaiva nirvighnameva śivaḥ || 96 ||

	yasminneva kāle janaḥ paścimajanmā gurumukhāt pravaradaiśikavaktrāt 
enaṃ śataśaḥ pratipāditaṃ paramārthamārgaṃ pūrṇasvātantryalakṣaṇaṃ 
svātmasaṃbodhamukhāmnāyarahasyasaraṇiṃ yaḥ kaścit abhyeti samabhiyāti, sa 
tadaiva tasminneva avasare gurupadeśasamanantarameva anantarāyaṃ kṛtvā śiva

--------------- page  186 -----------------

 eva syāt | śrīkule yathoktam

	helayā krīḍayā vāpi ādarādvātha tattvavit |
	yasya saṃpātayed dṛṣṭiṃ sa muktastatkṣaṇātpriye ||

iti | nanu katham evaṃ - vidhaṃ mukhāmnāyarahasyameva upanayet - ityāha 
atitīvraśaktipātāt iti | atiśayena tīvraḥ karkaśoyo'sau anugrahākhyāyāḥ 
pārameśvaryāḥ śakteḥ pātaḥ paśuhṛtkamalāvataraṇaṃ, yena paśurapi 
gurvāmyāyavedanāt śivībhavati, jīvanneva muktaḥ - iti yāvat | yathā 
tāmradravyaṃ siddharasapātāt suvarṇībhavati | ayamarthaḥ - parameśvarānu-
grahopāya eva svātmajñānalābhaḥ, - iti na atra niyatiśaktisamutthaṃ 
japadhyānayajñādikam upāyatayā kramate | anugrahaśaktividdhahṛdayasya tu 
haṭhādeva akramaṃ devatāmukhāmnyāyarahasyaṃ hṛdayam āvarjayati, yena 
jhaṭityeva parameśvarībhāvaṃ yāti, - iti aparyanuyojyo vicitraḥ pārameśvaraḥ 
śaktipātaḥ - iti || 96 ||

--------------- page  187 -----------------

 yasya punaḥ madhyamandamandatarādibhedena pravṛttaḥ śaktipātaḥ, tasya 
gurupadeśam āmaraṇakṣaṇaṃ yāvat yogakrameṇa vimṛśataḥ piṇḍapātāt 
śivatvaṃ syāt - iti pratipādayati

sarvottirṇaṃ rūpaṃ
sopānapadakrameṇa saṃśrayataḥ |
paratattvarūḍhilābhe
paryante śivamayībhāvaḥ || 97 ||

	evaṃ kila śaktipātamandatvāt pūrṇajñānopadeśānāsādanena 
sarvottīrṇaṃ rūpaṃ sarvatattvaparyantavartisvabhāvaṃ saṃśrayataḥ 
sākṣātkurvataḥ, katham ? - ityāha, sopānapadakrameṇa iti | kandanābhi - 
hṛtkaṇṭha - lampikā - bindu - nādaśaktirūpāṇi sopānāni ūrdhvam 
ākramaṇāya tīrthānyeva teṣāṃ padam āsādanaṃ, tatra hānādānarūpaḥ 
kramaḥ śanaiḥ śanaiḥ kande tato nābhau tato hṛdi, - ityevam ākramaṇaṃ tena - 
iti | evaṃ yāvatparamārthaprarohopalabdhau

--------------- page  188 -----------------

 paramārthaprarohopalabdhau piṇḍapātā vasare yoginaḥ tasya krameṇa 
śivatāsvabhāvā sthitirbhavati, - iti eṣā kramayuktiḥ kathitā || 97 ||
	evamapi kramayogam abhyasyato yoginaḥ samāśvastasyāpi sataḥ 
tathārūḍhirna syāt, abhīṣṭaprāptā antarāyo jāyate; yadi param 
anāsāditatattvasya maraṇaṃ syāt, tadā kiṃ bhavet - ityāśaṅkāṃ pariharati

tasya tu paramārthamayīṃ
dhārāmagatasya madhyaviśrānteḥ |
tatpadalābhotsuka -
cetaso'pi maraṇaṃ kadācitsyāt || 98 ||
yogabhraṣṭaḥ śāstre
kathito'sau citrabhogabhuvanapatiḥ |
viśrāntisthānavaśad
bhūtvā janmāntare śivībhavati || 99 ||

--------------- page  189 -----------------

 evaṃ ullaṅghanakrameṇa yogam abhyasyataḥ kenāpi antarāyeṇa 
madhyaviśrānteḥ kutracit cakrādhāre'pi anubhavopalabdheḥ tatraiva paritoṣaṃ 
gatasya, ata eva paramārthamayīṃ dhārām agatasya paratattvarūpāṃ 
pratijñātāṃ daśāṃ sarvādhvottīrṇāṃ aprāptavato, yadi vā 
tatpadalābhotsukacetaso'pi pratijñātaparamārthasattāsādanasābhilāṣasyāpi 
kadācit madhye vipattiḥ saṃbhāvyate, tadā etasya alabdhalābhasyāpi 
piṇḍapātāt kā gatiḥ ? - ityāha yogabhraṣṭaḥ ityādi | sa yogāt samādheḥ 
ubhayathā bhraṣṭaḥ calitaḥ śāstre āgamagranthe kathitaḥ uktaḥ | kīdṛk bhavet 
? - ityāha citra ityādi | piṇḍapātādeva citrabhogāni 
nānāścaryastryannapānamālyavastrānulepanagītavādyādipradhānāni yāni 
bhuvanāni svaviśrāntyanuguṇāni tattveśvarasthānāni, teṣu patiḥ īśvaro 
bhavati maraṇasamanantarameva divyairbhogaiḥ yujyate - iti yāvat | 
tadbhogādhikāraparikṣaye

--------------- page  190 -----------------

 punarapi sa yogabhraṣṭaḥ kathaṃ syāt ? - ityāha viśrānti ityādi | 
viśrāntisthānasya kandādeḥ pradeśasya vaśāt 
tadabhyāsasaṃskāraprabodhasāmarthyāt sa janmāntare dvitīye janmani 
bhūtvā saṃsāre adhikāriśarīraṃ yogābhyāsayogyaṃ prāpya, 
pūrvābhyastaṃ yogam prayāsena svīkṛtya, helayā paramārthamayīṃ 
prāgjanmapratijñātāṃ daśām adhiruhya, piṇḍapātāt śiva eva bhavati || 99 ||
	atha abhyasyato'pi yogaṃ yogino manaścāñcalyāt viśrāntim ekadeśe'pi 
manāgapi alabhamānasya, yogaṃ prati śraddhāvataśca piṇḍapātāt kā gaiḥ 
syāt ? - ityāha

paramārthamārgamenaṃ
hyabhyasyāprāpya yogamapi nāma |
suralokabhogabhāgī
muditamanā modate suciram || 100 ||

--------------- page  191 -----------------

 viṣayeṣu sārvabhaumaḥ
sarvajanaiḥ pūjyate yathā rājā |
bhuvaneṣu sarvadaivai -
ryogabhraṣṭastathā pūjyaḥ || 101 ||

	enam iti śataśaḥ pratipāditaṃ svātmajñānasatattvaṃ patthānam 
abhyasya śraddhābhaktibhyāṃ sevitvāpi cittadoṣānavasthānena 
yathāvadyogalakṣaṇāṃ viśrāntiṃ janmamadhye'pi anadhigataḥ san mṛtaścet, 
tadā sa yogabhraṣṭo 
jñānayogaviṣayaprarūḍhaśraddhābhaktiprasādasāmarthyena 
devalokabhogabhāgī sāhlādacittaḥ suciraṃ kālaṃ harṣaṃ prayāti, sarairapi 
bhuvaneṣu nijanijasthāneṣu pūjyo bhavati | ka iva ? - ityāha sārva ityādi | yathā 
sārvabhaumo rājā saptadvīpeśvaro rājā cakravartī viṣayeṣu 
nānāmaṇḍaleṣu sarvajanaiḥ pūjyate samabhyarcyate, tathaiva ayaṃ 
prakṣīṇapuṇyāpuṇyaviṣayaḥ

--------------- page  192 -----------------

 samutpannavairāgyaḥ paścima10janmā vandyo'smākaṃ, yasya svātmani 
jijñāsārthaṃ prāk janmani udyamo'bhūt - iti surairapi stūyate - iti yāvat || 100 || 
101 ||
	tasya lokāntarabhogādhikāranivṛtteḥ anantaraṃ kiṃ syāt ? - ityāha

mahatā kālena puna -
rmānuṣyaṃ prāpya yogamabhyasya |
prāpnoti divyamamṛtaṃ
yasmādāvartate na punaḥ || 102 ||

	devalokeṣu yathānirdiṣṭeṣu bhogān bhuktvā, atidīrghena kālena sa 
yogabhraṣṭaḥ saṃsāre'smin manuṣyabhāvam āgatya, 
yogābhyāsasādhanayogyaṃ śarīram āsādhya prāgjanmani manaścāñcalyāt 
yoyogo duṣprāpo'bhūt, tameva yogaṃ 
prāgjātabhaktiśraddhāprarūḍhayogavāsanāsaṃskāraprabodham

__________________FOOṭṇOṭEṣ___________________

[10 paścimajanmeti asminneva janmani mokṣādhi gamā dantimajanmabandha 
ityarthaḥ]

--------------- page  193 -----------------

 anāyāsena prāpya samabhyasya ca dehānte divyam amṛtaṃ 
paratattvasvarūpam upalabhate, parasvarūpatādārḍhyaṃ gacchati - iti yāvat | ata 
eva tasmāt punarāvartanaṃ tasya na syāt - iti | evaṃ mahati kalyāṇe 
svātmajñānaviṣaye manāgapi pratyavamarśaḥ saṃsārasaraṇāya na bhavati | 
yaduktaṃ śrīgītāsu

	nehābhikramanāśo'sti pratyavāyo na vidyate |
	svalpamapyasya dharmasya trāyate mahato bhayāt || (2 | 4)
iti | tathā

	ayatiḥ śraddhayopeto yogāccalitamānasaḥ |
	aprāpya yogasaṃsiddhim--------------------|| (6 | 37)


--------------- page  194 -----------------

 ityādipraśnādārabhya

	anekajanmasaṃsiddhastato yāti parāṃ gatim || (7 | 45)

iti uttaraparyanto grantho muninā pratipādito'pi smartavyaḥ - iti || 102 ||
	evam anena jñānayogakrameṇa jantoḥ manāgapi spṛṣṭasya sata iyān 
vibhūtyatiśayo yaḥ pravaktuṃ na pāryate, tasmāt sarvātmanā 
vivekārdrahṛdayaiḥ jananamaraṇanivṛttau sāvadhānairbhāvyam - iti nirūpayati

tasmāt sanmārge'smin
nirato yaḥ kaścideti sa śivatvam |
iti matvā paramārthe
yathātathāpi prayatanīyam || 103 ||

	yata evaṃ svātmapratyavamarśābhyāsaḥ pratipāditakramavaśāt 
uttamaphalalābhaḥ, tasmāt etasmin

--------------- page  195 -----------------

 suśobhane mārge prakṛṣṭamuktiprāpake pathi yaḥ kaścit nirataḥ iti 
adhikāriniyamābhāvaḥ pradarśitaḥ | yaḥ kaścit jano 
jananamaraṇavyādhyādikleśaśataparipīḍito nirato vivekabuddhyā niḥśeṣeṇa 
rataḥ - tatraiva śraddadhāno bhūtvā nimagnaḥ, sa jantuḥ acirāt laghunaiva kālena 
śivatvam eti sakalasāṃsārikakleśān avadhūya paraśreyorūpadaśām ekenaiva 
janmanā prāpnoti | yathā śivadharmottare śāstre

	ihaikabhaviko mokṣa eṣa tāvatparīkṣyatām |
	anekabhavikā muktirbhavatāṃ kena vāryate ||

iti | iti matvā evaṃ vimṛśya tasmin paramārthe yathā tathā yena tenāpi 
prakāreṇa prayatanīyaṃ prakarṣeṇa samudyamaḥ kāryaḥ | pradhāne yatnaḥ 
phalavān iti kṛtvā atra arthe manāgapi avalepo na vidheyaḥ, yena yogābhyāsena 
svātmaprarūḍhiścet

--------------- page  196 -----------------

 samutpannā siddhaṃ naḥ samīhitam, na cet divyalokāntaraprāptiḥ | tato'pi 
pratyāvṛttasya prāksamabhyastayogavāsanāprabodhavalena punarapi 
yogasaṃbandhaḥ, - iti śreyomārgapariśīlanāt na viruddhaṃ kiṃcit kartuḥ 
samāpatati, - iti paramapuruṣārthasādhanāyāṃ manāgapi avalepo kāryaḥ - iti 
śivam || 103 ||
	evaṃ śāstrakāraḥ śeṣabhaṭṭārakoktaṃ paramārthasāropadeśaṃ 
śivādvayaśāsanakrameṇa yuktyanubhavāgamasanāthaṃ pratipādya, svātmanaḥ 
paritoṣamātrārthitayā svābhidhānapradarśanapūrvakam ayameva upadeśaḥ 
parapuruṣārthasādanopāyaḥ iti nirūpayan granthārthopasaṃhāram āha

idamabhinavaguptodita -
saṃkṣepaṃ dhyāyataḥ paraṃ brahma
acirādeva śivatvaṃ
nijahṛdayāveśamabhyeti || 104 ||

--------------- page  197 -----------------

 idaṃ prathamānaṃ vitatya pratipāditaṃ yat paraṃ prakṛṣṭaṃ brahma 
bṛṃhakatvāt paripūrṇānandamayaṃ svātmasvarūpaṃ dhyāyataḥ anāyāsena 
svātmani pratyavamṛśato janasya acirāt śīghrameva, natu punaḥ bahūnāṃ 
janmanāmante - iti | tat evaṃ - vidhasya brahmabhūtasya śivatvam abhyeti 
niḥśreyasaprāptiḥ saṃbhavati | kathaṃ ? nijahṛdayāveśaṃ kṛtvā, nijaṃ 
hṛdayaṃ parāmarśasthānam āviśya | kīdṛśaṃ tat brahma ? kīrtanīyanāmnā 
abhinavaguptena uditaḥ prakāśitaḥ saṃkṣepaḥ tātparyaṃ yatra tat evaṃ - 
vidham | atra ca nāmavyājena idamapi uktaṃ syāt, yathā - abhinavo yo'nyaiḥ 
adṛṣṭaḥ parabrahmarahasyātiśayo guptaśca avacchanna iva abhūt, sa evaṃvidha 
uditaḥ prakāśitaḥ saṃkṣepo yatra tadevaṃ - vidhaṃ brahma - iti | evam 
āvedayatā durlabhatā upadeśasya pratipāditā

--------------- page  198 -----------------

 syāt || 104 ||
	granthaparimāṇaṃ nirūpayan asmin prakaraṇe kartṛtvam āha

āryāśatena tadidaṃ
saṃkṣiptaṃ śāstrasāramatigūḍham |
abhinavaguptena mayā
śivacaraṇasmaraṇadīptena || 105 ||

	idaṃ śāstrasāraṃ bahūnāṃ granthānāṃ yat prakṛṣṭaṃ satattvaṃ 
tat mayā saṃkṣiptaṃ granthasahasrairapi upapādayitum aśakyam tadeva laghunā 
vṛttaśataparimāṇena svīkṛtya uktam, - ityanena pratibhākauśalam uktaṃ bhavet | 
kīdṛśena mayā ? śivacaraṇasmaraṇadīptena iti | śivasya paraśreyaḥ - 
svabhāvasya svātmamasthasya cidānandaikamūrteḥ yāni caraṇāni cidraśmayaḥ 
teṣāṃ smaraṇaṃ śabdādiviṣayagrahaṇakāle nibhālanaṃ pratikṣaṇaṃ

--------------- page  199 -----------------

 svānubhavāpramoṣaḥ, tena dīptaḥ parāhantācamatkārabhāsvaraḥ, ata 
eva kīrtanīyābhidhānena | anyathā kathaṃ dehādyātmamānino'jñātasvātma 
maheśvarasatattvasya iyati mahārthopadeśe asya kartṛtādhikāritvam upapadyate ?, 
yato yo yatsvabhāvaḥ sa tatsvabhāvaṃ vivektuṃ pragalbhate, - iti upadeṣṭuḥ 
samāviṣṭamaheśvarasvabhāvo'nena vākyena uktaḥ syāt - iti śivam || 105 ||

iti śrīmahāmāheśvarācāryābhinavaguptaviracitaḥ 
paramārthasāraḥ ||

śrīmataḥ kṣemarājasya sadgurvāmnāyaśālinaḥ |
sākṣātkṛtamaheśasya tasyāntevāsinā mayā || 1 ||
śrīvitastāpurīdhāmnā viraktena tapasvinā |
vivṛtiryoganāmneyaṃ pūrṇādvayamayī kṛtā || 2 ||

saṃpūrṇeyaṃ paramārthasārasaṃgrahavivṛtiḥ 
kṛtistatrabhavatparamamāheśvaraśrīrājānakayogarājasya ||


###########   END OF FILE  #######