####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00358
Uniform title: paraśambhumahimnastava
Author : durvāsa
Author : alias krodhabhaṭṭāraka

Description: 



Notes: 
Data entered by the staff of Muktabodha under the supervision of Mark S. G. Dyczkowski.

Revision 0: June 26, 2016

Publisher : N. Rajam & Co.
Publication year : 1946
Publication city : Madras
Publication country : India
####################################################



śivābhyāṃ namaḥ

paraśaṃbhumahimnastavaḥ

prathamaṃ prakaraṇam

anekaśaktisaṃghaṭṭaprakāśalaharītanuḥ |
śuddhasaṃvicchivaḥ pāyādvibhuḥ śrīparameśvaraḥ ||

śrīśaṃbho te mahimnaḥ stutipatharacitāḥ sāṅgavedāḥ saśāstrāḥ siddhāntāḥ 
sāṅgavidyāḥ sacakitamatayo naiva paśyanti pāram | sādyantāstvāmanantaṃ 
paramaśivaguruṃ te kathaṃ varṇayeyu-
stasmātprajñānusārādahamapi bhavataḥ staumi kiṃciccaritram || 1 ||

kvānandātmaprakāśastava paramahimāpārapīyūṣasindhu-
stvadbhaktyāmodamagnāḥ kva ca kavimadhupā brahmaviṣṇupramukhyāḥ |
śrīśaṃbho mohajṛmbho na janayati parāṃ svātmavattāṃ kimeta-
ccitraṃ tadvanmayāpi svamativibhavataḥ stūyase tvaṃ na doṣaḥ || 2 ||

śrīmadbhirdṛśyabhāvairahamahamidamityātmajṛmbhādhirūḍhai-
rnānārūpaiḥ padārthairanavadhivibhavairāśudedīpyamānaḥ |
sarvātītastvamekaḥ paraśivacaraṇa svaprakāśātmaśaṃbho
nānyastvattaḥ paro'stītyahamiha guruṇā tvāṃ svabhāvairavaimi || 3 ||

p. 2)

ātmaivaiṣa svakīyo niratiśayacidānandasadbrahmapūrṇo
jihmaḥ saṃsārabhāvairatiduradhigamairāttamāyāvilāsaiḥ |
sarvātmatvādanantastava śivamahasaḥ śrīguroḥ satyavākyaiḥ 
nistarkopādhibhedaiḥ paramapuruṣa te tattvamadvaitameti || 4 ||

dīkṣāṃ yaḥ śāṃbhavīyāṃ śivaguruvihitāṃ divyabījāgamoktāṃ
prāpya śrīśaṃmutādātmyavitaraṇacaṇāṃ janmamṛtyuprabhetrīm |
bhitvā bhedyaṃ paśutvaṃ paraśivacaraṇadhyānayogena pūrṇaḥ 
svāghorabrahmavidyāviditaparapadaṃ brahma sa praiti vidvān || 5 ||

brahmāṇḍaṃ piṇḍametatpitaramiva sutastatsamaṃ naikadharmaṃ
vijñāyājñānamuktaḥ śivaguruvacanairātmavijñānaśāntaḥ |
sarvātmaikaprabhoste paraśivacaraṇārādhanāsaktacitto
yaḥ ko'pyekaḥ sa yogī jayati janimṛtī bho mahāmṛtyumṛtyo || 6 ||

piṇḍe ṣāṭkośike'sminnavavivarapure pañcabhūtendriyāḍhye
puṃske straiṇe ca ṣāṇḍe śivaguruvacanairatra vijñāyase cet |
kenāpyannāsucittapramitinirupamānandakośāttarāśi-
stvaṃ ṣodhā bhinnamūrtiḥ paraśiva sa budho viśvarūpatvamīyāt || 7 ||

sarveśa śrīpureśa tribhuvanabhavanavyaktayaḥ śaktayaste-
'nantādyāḥ śrīparādyā niravadhivibhavā mātṛkāntāḥ kṣakāntāḥ |
vijñātāḥ syuḥ svarūpe yadi śivaguruṇā viśvadṛśyaprapañca-
svātmajyotirvilīnānvidadhati viduṣo yoginaḥ saiva muktiḥ || 8 ||

p. 3)

ṣoḍhā? pañcadhā ca prakaṭitavibhavā śrīparā deva śaṃbho
saiva śrīsundarīti śrutibhirabhinutā cakrarājāsanasthā |
sarvatrānekakoṭiprakaṭitagaṇanāyoginīryaśnuvānā
tvattejo'ntarnirūḍhā racayati jagatāmādimadhyāntakālān || 9 ||

yā śaktiḥ pañcavāhapravahaṇalaharīvyaktanaijātmatejaḥ 
saṃvartāgniprapītatribhuvanajaladhiḥ kālasaṃkarṣaṇī te |
dikkālātītamūrte paraśiva mahatāṃ bhaktibhājāmavidyāṃ
mṛtyuṃ vijñānadānātpraharati viduṣāṃ tanmahatvaṃ tvameva || 10 ||

sarvajño nityatṛptaḥ sadasadubhayago'nādibodhaḥ svatantro
nityā luptātmaśaktirnirupamacarito'nanta ityaṅgaṣaṭkaiḥ |
ṣaṭcchaktivyaktabhāvastvamiha yadi śiva jñāyase deśikoktyā
yena svātmanyanādau sakalavilasitaṃ te parāyāḥ sa bhedaḥ || 11 ||

gāyatrī vedadhātrī śatamakhaphaladā vedaśāstraikavedyā
cicchaktiṃ brahmavidyā paramaśiva tava śrīparāṃ vyākaroti |
śabdabrahmaikyavācyāmakhilamatamiti vyaktatattvāmavācyāṃ
saptasrotovibhūtiṃ tribhuvanamayatāṃ tattvataḥ sarvaturyām || 12 ||

saṃsārāsārabhāvapravahaṇacaturāmādiśaktiṃ parāṃ tāṃ
svātmābhinnāṃ viditvā vapuranumatibhirnāvṛtāhaṃkṛtisthaḥ |
trailokyaṃ brahmaviśvaprasaramanavadhisvaprakāśaprapūrṇaṃ 
jñātvā muktaḥ sa yogī bhavati gatabhavastvatprasādānmaheśa || 13 ||

p. 4)

viśveśa svaprakāśaprasaramiha vinā nānyadastīti tattvaṃ
mīmāṃsārūpametattava paramaguro śrīmukhāmnāyajālam |
svapratyakṣaṃ vihāya svarahitamiti cedasti cānyatra tattvaṃ
ye dhīrāstarkayeyusta iha janimṛtīrāpnuvantyaṅgabhāraiḥ || 14 ||

na brahmā viṣṇurudrau surapatiramarā nāsurā naiva pṛthvī
nāpo'gnirnaiva vāyurna ca gaganatalaṃ no diśo naiva kālaḥ |
no vedā naiva yajñā na ca raviśaśinau no viyanno vikalpaḥ 
svajyotiḥ satyamekaṃ jayati tava padaṃ saccidānandamūrte || 15 ||

śaṃbho saiddhāntikā ye svamativibhavato'kharvagarvāḥ pramāṇaiḥ
mīmāṃsante bhavantaṃ bahumatajanakairāvṛtā śuddhavidyaiḥ |
anyonyaspardhinaste kathamiha bhavatastattvamīyuḥ svatejaḥ
sarvātītaṃ vikalpagraharahitamajaṃ mānatarkādyagamyam || 16 ||

dhīrāḥ kecinmahānto guruvacanaratāstyaktasaṃsārabhāvā
niḥśaṅkāghoravidyā pariṇatamatayaḥ sarvasaṃkalpamuktāḥ |
tvatkāruṇyākṣilakṣyāḥ paramaśiva bhavatsādhakāḥ puṇyapāpaiḥ
kṛtyākṛtyarvihīnāḥ parapadavibhavaṃ tvāṃ prapaśyanti viśvam || 17 ||

siddhāntaḥ śāṃbhavo'yaṃ śivaguruvacanāghoravidyākṣaroktaḥ
stotravyājena nirvāhyata iti bhavataḥ śrīvibho cāpalaṃ me |
atra nyūnātirekoktijanitamasakṛtkṣamyatāṃ dāsabuddhyā
maccittasthaḥ prameyaṃ samupadiśa paraṃ mātṛkāvarṇarāśim || 18 ||

iti śrīdūrvāsakṛtaparaśaṃbhumahimnastave upodghātaprakaraṇaṃ prathamam || 1 
||
dvitīyaṃ prakaraṇam

śrīmadraśmiprabhāvaṃ tribhuvanabhavanavyañjakaisvātmadīpaṃ
ko vā vaktuṃ niruktyā prabhavati yatadhīrāttasamyagvimarśaḥ |
yatra brahmādividvanmatirapi vigatiryāti bhītyā vināśaṃ
śrutyā sārdhaṃ sa kena pravitatamatinā varṇyate te maheśa || 1 ||

ṣaṇṇāmapyanvayānāṃ kṣitijaladahanasparśanākāśacetaḥ -
pīṭhasthānāṃ parādyāḥ paraśiva bhavataḥ śaktayo mātṛkāntāḥ |
brahmādipretasiṃhāsanagatavibhavaistāvakīyaiḥ ṣaḍaṅgaiḥ
dvātriṃśadraśmimukhyāḥ svakiraṇakaraṇavyāptaviśvairvibhānti || 2 ||

buddheḥ samyagvimarśaprakaṭitasaraṇerarthavadvokpravṛtteḥ
yatra sthāne turīye navakalitamahāvākyatattve vināśaḥ |
tatkiṃ jyotistamo vā sadasadubhayagaṃ kiṃnvamūrtaṃ nu mūrtaṃ
nirdhāraścedvināśā na hi mativacasāṃ deva tasmātparastvam || 3 ||

jñānaṃ yogaḥ prakāśo vidhirubhayamatirdehadhīḥ prāṇaśūnyā-
haṃkāraścādhikāmaḥ svaviṣayamanarthaṃ cāśrayannantarāste |
ityātmākāśamattā tava parividitā samyagetatprameyā-
dhāreṣvantarghṛtaṃ yatpayasi tilacaye tailavadbhāsi hīśa || 4 ||

p. 6)

ṣaṭtriṃśattattvapuṣpastavakaparimalastāvakīyaḥ sa tejaḥ-
kalpadruścetprabuddhaḥ śivaguruvacasā sarvataḥ svānubhūtaḥ |
advaitabrahmabuddhiṃ janayati viduṣāmeṣa evāsmadādi-
brahmāntātmaprapañce vilasati na paro'stīti cetpārijātaḥ || 5 ||

svapratyakṣe'pi tattve karatalaphalavadvetti nāsau svarūpaṃ
nānāsiddhāntajālapralapitajanitājñānamohāndhakāraiḥ |
ākrāntaḥ puṇyapāpairadhigatanidhanairātmakarmaṇyanādau
heyopādeyabuddhyā bhava iti vihitaste mahāmāyayeśa || 6 ||

eko'sau lakṣaṇaiścedakhilatanugatairindriyārthairanekaiḥ
bhinnaḥ svātmaprakṛtyā vidhijanimṛtibhiḥ saṃnibaddhaḥ kimetat |
devatvaṃ mānuṣatvaṃ vapuṣi bhujagatāṃ sarvajīvātmakatvaṃ
dhatse śailūṣavatte smarati na tu padaṃ śrīmahādevamūrte || 7 ||

iti śrīdūrvāsakṛtaparaśaṃbhumahimnastave parāśaktiskandharaśmiprakaraṇaṃ 
dvitīyam || 2 ||
p. 7)

tṛtīyaṃ prakaraṇam

sattvaṃ cittvaṃ mahattvaṃ tava paramagurorātmaśakteḥ parāyāḥ
piṇḍīkṛtya prakṛtyā prathamaratipativyājakālāntavahniḥ |
bhūtvā saṃsārasṛṣṭisthitilayanilayādyāti toyārṇavāntaṃ
tanvāno nirmamecchastvamiha vijayase viṣṇumāyāvibhūte || 1 ||

māyāyāmantarasthaḥ kusumaśararasastāvakīyaḥ svakāle 
jñānajñeyapramātṛprakaṭitamahimā svaprarohaprasāraiḥ |
utpādyādyaṃ viriñcaṃ tadanu bhuvanatāmātmanā vyaśnuvāno
bījākāraḥ svayaṃbhūriti kathayati te nāma viśvātmasṛṣṭeḥ || 2 ||

ādikṣāntārṇasṛṣṭiṃ tribhuvanabhavanābhāsabhūmiṃ śivādi-
kṣityantātmīyatattvāvalivikṛtagatiṃ vaidhasāṇḍāntabhūmim |
ātmīyānuttarecchāguṇaparavaśatāṃ prāpya saṃvyaśnuvānaḥ 
śrīśaṃbho viśvasṛṣṭirbhavasi nijamalatrayyupaproṣitātmā || 3 ||

catvāraḥ kālatattve tava yugapatayaste ca dhātuśca putrāḥ
vyākhyātā dvādaśaite sthitikṛtividitāḥ sāvatārāḥ sadārāḥ |
śrīkaṇṭhādyāśca nāthā dhṛtayugavidhayastvanniyatyutthitāntā-
ścaitanyā eva tasmātsthitiriti viditastvaṃ sahasrārkadīpte || 4 ||

p. 8)

ātmīyānādiraśmīniha bhavajanitānekasiddhāntajāla-
vyāmohādyadvikalpānṛtanijaviṣayānpuṇyapāpādibhedaiḥ |
durjñeyāndeśikoktyā pravimalavapuṣi svaprakāśaikavahnau
svātmatvena prabuddhāñjhaḍiti vijayate yastvadātmāvirodhaḥ ||

jāgratsvapnaprasuptiprakaṭitavibhavairātmamāyāguṇaiḥ sve-
rjñānecchākrodharūpairvidhihariharakairāvṛte mokṣamārge |
pānthāḥ kecitsudhīrāḥ śivaguruvacanajñānaśāstrāgnidīptā-
stvatkāruṇyaikarakṣāparivihitamiyastvāṃ prayāntyādimūrte ||

tvaṃ māyākāmadevaprayamamasi tataḥ svasya sṛṣṭau vidhātā
rakṣāyāṃ viṣṇurante prabalataramahārudramūrtiḥ svamūrtau |
satyo'nantaḥ pramātā śivagururiti ca svātmamūrtiprabhāvaiḥ
svecchāvasyāguṇāḍhyo'pyaguṇa iti vibho vastutaḥ stūyase tvan || 7 ||

icchāśaktyā yayaitatkavalitamakhilaṃ te jagajjālarūpaṃ
sṛṣṭisthityantavṛtyā sarasi jaladharāsāratulyātmagatyā |
saivānantāntaraṅgaprasarabahuvidhānekasaṃkalpabhāvai-
rāvirbhūtvā tvadaṅgaprakaṭanakṛtaye bodhasindustvameva || 8 ||

iti śrīdūrvāsakṛtaparaśaṃbhumahimnastave 
icchāśaktiskandharaśmiprakaraṇaṃ tṛtīyam || 3 ||

caturtham prakaraṇam

saṃvedyaṃ tattvajālaṃ paraśivadharaṇīmūlapāraṃ vicitraṃ
karmānantaprapañcaṃ nirupamamahimānādimadhyāvasānaḥ |
brahmānandāmṛtābdhiḥ samarasavidhunā jṛmbhitasvātmabhāso
hetutvena prabodhajvalana tava mahājñānaśaktiṃ vyanakti || 1 ||

gojaṃ kṣīraṃ yathaikaṃ dyutivividhaguṇasvendriyārthaprakāśo'-
pyekastadvarṇanānāruciradhikaraṇasyaikatā kāraṇena |
nīlādyābhāsabuddhyā nabhasi parivṛto dhūmabhāsairivāgniḥ
prācuryeṇa pradīptaḥ paramaśiva tataḥ satyaviśvātmakastvam || 2 ||

nityākhaṇḍaprakāśādamalataravibho tvatsakāśātkadāci-
nmāyā saṃjāyamānā triguṇamukhagaṇavyaktaśaktisvabhāvā |
siddhāntairbhinnamānapramitibhirasukhairbhedabuddhipradhānaiḥ
saṃsāritvaṃ prasārya dṛḍhayati bhavataḥ satyatāṃ vedavidyā || 3 ||

anyaḥ pakṣo'thavātra pravimalakalanānantaśaktiprakāśaḥ
satyākhyaḥ so'pi yatra pravilayamayate śūnyagarte tadātmā |
yauṣmākaḥ satyabhāvaḥ sa ca nijamahasāṃ kāmarūpātmamāyā-
mutpādyaitatprapañcaṃ ghaṭayati tadidaṃ vyaśnuṣe svātmayone || 4 ||

p. 10)

aikyācchicchaktayoścedidamahamiti ca dvaṃdvabhāvasya jīva-
brahmādidvaitabuddhyordinakaraśaśinoraṇḍavidhyaṇḍayośca |
prāṇāpānākhyavāyvoḥ sukṛtaduritayoḥ syādyadā sāmarasya-
prādurbhāvastadā tvaṃ bhavasi sadasadānandanāthaḥ paro'gra || 5 ||

seyaṃ vijñānaśaktistava śivaguruṇā darśitā nityaśuddhā
nirdvaṃdvabrahmatattvaṃ gamayati sudhiyāṃ saccidānandapūrṇam |
loke meyapramātṛpramitibhiriti cedarthitā bhinnamārgāḥ
mudrā nānāsvarūpāḥ prakaṭayati mudāhaṃkṛtisthāḥ pareśa || 6 ||

iti śrīdūrvāsakṛtaparaśaṃbhumahimnastave 
jñānaśaktiskandharaśmiprakaraṇaṃ caturtham || 4 ||
pañcamaṃ prakaraṇam

buddhijñānendriyāṇāṃ nijanijaviṣayāsvādabhogaprabodha-
kṣīrābdhiḥ prodyadicchāmṛtakaraṇarucā vāṅmukhakṣālitaiśca |
saṃkrāntaścālitārthaprasarabahupathaḥ svātmamāyorupūra-
truṭyadbrahmāṇḍabindūnvikirati tava cettvaṃ śivātaḥ kriyātmā || 1 ||

sṛṣṭisthityantalīlāvakalitasaraṇiryatprayatno yadīyaṃ
dhairyaṃ vikhyātavīryaṃ sakalamiti gatā yasya buddhiḥ samṛddhā |
yatsāmarthyaṃ prabhūtaṃ niravadhigaṇanājāṇḍarudrāṇḍabhāṇḍā-
gāraṃ yadbrahmasattā jayati tava manorūpaviśvātmakatvam || 2 ||

saṃveśaṃ dūradeśaṃ kalayati sakalaṃ karmakṛtyaṃ ca tattvaṃ
svaṃ yadbāhyendriyāṇāṃ calanamapi vinā svāntamantaḥprakāśam |
tatte vīra svatantraprakṛtinigamanaṃ nirgatopādhitarkaṃ
bāhyākhyādarśanārthaṃ vimalaśiva tatastvaṃ hṛṣīkāśrayātmā || 3 ||

yadvannyagrodhabījaṃ pṛthutaraviṭapānokahatvena rūḍhaṃ
sāmarthyaṃ darśayestvaṃ paramaśiva sadā satyavijñānabījam |
icchākṣetre subuddhindriyakulakalitaṃ sarvataḥ svakriyābhiḥ
svātmānaṃ viśvarūpaṃ prakaṭayasi yadā tvaṃ tadā gocaraḥ syāḥ || 4 ||

p. 12)

svātmāśeṣākṣavṛtteḥ pṛthagayanatayā kvāpi bhūtāni pañca
kvāpi prekṣāprapañcaḥ kva ca ninadamukhāḥ kvāpi vākyādayaśca |
etaireva pravṛtto nijaviṣayatayā sarvaviśvātmajṛmbha-
stasmāttvaṃ lokamukhyo'dvayamiti rahitaḥ svaprakāśaprameyaḥ || 5 ||

kālāvasthāśca tisro giriśa daśa diśaḥ saptadhā bhūmirāpo
nānā tejaḥ samīrā daśa viyadakhilavyāpi caikādaśākṣāḥ |
bhinnārthānantabodhaprakaṭitamahimā bījabhedāstvanantā-
stvatsaktā bījajātāḥ svaguṇamanusarantyeva te deva sattvāt || 6 ||

pañcāśadvarṇamālā bahuvidhaninadoccāraṇāttattvajāla-
vyaktivyāpārasaktā giriśa gurumukhāmnāyavidyāsvarūpā |
dhātrādyutpattipūrvaṃ śrutimukhavividhānekasiddhāntavidyā
nānābhāṣākriyābhiḥ prakaṭayati tataḥ saiva te sāṅgavedān || 7 ||

varṇebhyo dhātavaḥ syurvividhapadacayastadbhavastena vākyaṃ
tasmājjātaṃ pramāṇaṃ vividhanigamanaṃ tena siddhāntajālam |
tasmānnānātmatattvaprakaṭanamiti yattattvavidyā tvadīyā
tvaṃ cedeko'dvitīyaḥ kramarahitamahāsaṃvidātmā maheśaḥ || 8 ||

yajñasthānaṃ śmaśānaṃ sakalamiti gṛhaṃ bhāsvadoṅkārapīṭhaṃ
prādurbhūtaprayāṇasthalamiti vipulaṃ kalpavṛkṣādhirūḍhaiḥ |
saṃvītairbhairavaiścoragapatigaṇapaistatra divyārghyapātraṃ
vahnibradhnendukḷptaṃ paraśiva sakalaṃ vyaśnuṣe svātmanā tvam || 9 ||

p. 13)

citpūjā dṛkkriyātmā gurukathitamahārudramūrtiḥ samantā-
dātmīyairaṅgadevairadhigataviṣayājyāhutirnirvikalpaḥ |
niṣkāmairātmakāmairupacitayajanaścitsvatantrairatandrai-
rātmāgnau brahmavidyāpariṇatamatibhiḥ śrīvibho hūyase tvam || 10 ||

dvaitaṃ yatrānaghedhmaṃ paśuradhipiśito mṛtyurakṣāṇi jihvā-
havyaṃ cātha prabodhaḥ prakaṭahutavaho nirmalātmaiva hotā |
adharyuḥ svacchaceto gurumukhaviditā mātṛkodgātṛvargaḥ 
svācāryo deśikendraḥ paramakhamugasi tvaṃ paraḥ śaṃbhurīśaḥ || 11 ||

yāgāścānye sakāmaiḥ paśubhiriha kṛtāḥ sarvasiddhāntakṛtyāḥ
nānāyajñakriyāśca tribhuvanabhavane citrakarmaprasārāḥ |
viśvotpattipratiṣṭhāpraharaṇavidhayaḥ svakriyāśaktibījāḥ
saṃjātāḥ sarvatastvaṃ prabhavasi manasā citranirmāṇamūrte || 12 ||

iti śrīdūrvāsakṛtaparaśaṃbhumahimnastave 
kriyāśaktiskandharaśmiprakaraṇaṃ pañcamam || 5 ||
ṣaṣṭhaṃ prakaraṇam

nityāluptātmaśaktiḥ sakalatithiphaṇāpañcadaśyā pradīpta-
struṭyādīnkālavāyūngrasadururasanaścakravalmīkavartī |
samyak caitanyagumphairavagatakiraṇo viśvajṛmbhaikabhartā
kṛṣṇādhvārkenduyonirbhujagapatitanustvaṃ tataḥ kuṇḍalīśaḥ || 1 ||

dīpāntarvahnivedhairavitatagatibhirbodhitādhāraśaktim |
tattaccakraprabhedodbhavavividhamahāśabdarūpāmananta-
brahmānandapravāhāmanubhavasi parāmādisauṣumṇamūrte || 2 ||

yasmātprāṇaḥ prarohatyuparigatiradhaḥ saṃpradhāvatyapāna-
stasmādevāvirodhāttadubhayajanikṛdvāyusaṃrodhamātrāt |
vidyāvidyādiyugmaprasarasamarasāmbhodhijṛmbhairadambhaiḥ
sārdhaṃ haṃsaḥ parasminmahasi khalu layaṃ praiti te prāṇasūtraḥ || 3 ||

sarveṣāmindriyāṇāṃ nijanijaviṣayodyotanaṃ yatprasūtaṃ
sārāḥ sarveṣu karmasvanupamaviṣayāḥ sādhvasānandakopāḥ |
yajjātāḥ sarvanāḍīpathacaladanilavyāptayaḥ sarvabhāvāḥ
nānārūpāśca sarvāyanapathikamahāspandakaḥ sa tvameva || 4 ||

p. 15)

buddhvā saddeśikoktyā suviditavibhavāṃ khecarīṃ divyamudrā-
marthānantaprapañcānvitanijakaraṇānyātmacitte nirudhya |
taccittaṃ jyotiraṅgaṃ niravadhikaraṇaṃ cintayedyaḥ sa yogī
nirvāṇaḥ kṛṣṇavartmā bhavati tava mahāspandatāmetya śaṃbho || 5 ||

prāṇākhyā kuṇḍalinyā jagadidamakhilaṃ prāṇitaṃ te yayeśa
jñātvā yāṃ yoginaste parataramabhayaṃ yānti śāntaṃ padaṃ tat |
yāmajñātvā bhavābdhau jananamaraṇakṛtkrūrakarmaprabaddhā
majjantyādyantahīnā yadi kṛpayati sā mocayenmṛtyubandhāt || 6 ||

iti śrīdūrvāsakṛtaparaśaṃbhumahimnastave 
kuṇḍalinīśaktiskandharaśmiprakaraṇaṃ ṣaṣṭham || 6 ||
saptamaṃ prakaraṇam

ajñātaṃ brahmatattvaṃ nijahṛdayadarīlīnamātmaprakāśaṃ
vyaktīkartuṃ svanityākṣaraviditamahāmātṛkātvaṃ prapannaḥ |
tvaṃ divyāmnāyavidyā suviditamahimānantaśaktiprakāśā-
stattadvarṇātmabhedairupadiśasi padaṃ śrīguro svasvarūpam || 1 ||

śrīśabdabrahmamūrte sakalaravamayānāhatadhvānabhedā-
nātmīyānakṣarasthānbahuvidhaninadairbhūrivādyaprabhedaiḥ |
bherīniḥsāṇaghaṇṭādaramurajamahāśṛṅganālorutālai-
rvaṃśairyantraiśca gātrairjaladharapaṭalaistvaṃ bravīṣi dhvanijñaḥ || 2 ||

tattvānāṃ vyaktihetuḥ sakalatithigataḥ saptapuryaṣṭakāṅga-
strīpuṃsadvaṃdvarūpo dyumaṇiśaśimahāvahnipādaḥ ṣaḍātmā |
sarvābhiprāyasaṃvitprakaṭitavibhavastvaṃ mahāmnāyavidyā-
sārasphārasvarūpaḥ puruṣa iti tataḥ so'kṣarātmādivarṇaḥ || 3 ||

ramyodāttānudāttasvaritavikṛtigaḥ proccanīcobhayastho
bhedādaṣṭādaśātmā mahitanijamahāsphūrtireko'kṣarādiḥ |
ṣaḍjādigrāmajātaśrutivitatalasadgītasaptasvarodya-
nnānārāgānprabandhānadhivasati bhavānādinityasvarātman || 4 ||

p. 17)

sarvāsyasthānavarṇaḥ prathamavigaṇitastvaṃ stutaḥ ṣoḍaśīti
svecchāśaktyā nirūḍhadraḍhimanijamahāprauḍhimāḍhaukamānaḥ |
kālavyaktastriliṅginnijagativilayānhrasvadīrghaplutādīn
vidyāvidyobhayātmā janayasi paritaḥ śrīmahāvarṇajātman || 5 ||

pakṣadvaṃdvaikakartāvanijalahutabhuṅmārutākāśamūrte
śrotrādyakṣāṇi sarvāṇyadhigatacaraṇaḥ svaprakṛtyā nibaddhaḥ |
antastho viśvarūpaḥ puruṣa iti yato jñāyase svakrameṇa 
jñātā vargākṣarāṇāṃ paramaśiva janaistvaṃ tato vargajo'si || 6 ||

sarvātītātmadhāmānalanilayapadajñāpikā mantravidyāḥ
satyābhiprāyabuddhyā śivaguruvadanāmbhoruhādbhāsamānāḥ |
nānārthā dhātavaśca prakaṭitavibhavāścitravāgbrahmavedāḥ
sarvaṃ naśyadvinā tvāṃ paraśiva sahajaṃ varṇasaṃyogarūpam || 7 ||

oṃkāraṃ svātmavāsaṃ śrutibhirabhinutaṃ vāgbhavaṃ śaktibījaṃ
mābījaṃ smārabījaṃ parataravibhavaṃ mātṛkābījayugmam |
śaivāntya cāpi gatvā ṣaḍayanavilasatkūṭaṣaṭkaṃ ca bhitvā
haṃsaḥ so'haṃ tathā tvaṃ viramasi manasāmantare mantramūrte || 8 ||

bindvendorūrdhvanādairavakalitakalāvyāptibhiḥ sādhidevai-
rnānānantādhidevaiḥ pariṇatisulabhaiḥ śrīgurūktāgamasthaiḥ |
nyāsairvidyāviśeṣaiḥ śrutimukhavividhānekasiddhāntamantraiḥ
viṣvakprotapratīko dahasi bhavamaghaṃ duṣprabhāmantravahnau || 9 ||

varṇāste mantravidyā daśavikaraṇagā dhātavo nityaśabdāḥ 
vākyānyāmnāyabhedā bahuvidhamatajāḥ sāṅgavedāśca bhāṣāḥ |
nānācchandāṃsi tālāḥ svaravikṛtiguṇāḥ sarvato vāṅmayasthāḥ?
nānārūpāḥ parāgneḥ samajaniṣata te mātṛkāśaktibījāt || 10 ||

iti śrīdūrvāsakṛtaparaśaṃbhumahimnastave 
mātṛkāśaktiskandharaśmiprakaraṇaṃ saptamam || 7 ||
aṣṭamaṃ prakaraṇam

evaṃ rātriṃdivasthāḥ paraśivaghaṭikā eva te raśmibhūtāḥ
strīpuṃsadvaṃdvarūpā raviśaśicaraṇākrāntayo raktaśuklāḥ |
ṣaṭchaktyaṃśaprabhedā daharapurayuge koṇaṣaṭkāntarasthāḥ
kālāvasthāścaturbhiḥ pravidadhati yugairviśvabhūtairnidānaiḥ || 1 ||

ṣaṭtriṃśattattvamālāmavanimukhaśivāntāmupetātmavṛttiṃ
khe vāyau saptaviṃśatyuḍugaṇavikṛtīrjīvamāyā śivāṃśāt |
tejasthāḥ svāntarātmāntaratanuvikṛtīrasthimāṃsapramukhyāḥ
kṣoṇyāṃ tvaṃ jīvamāyāguṇagaṇamabhito bhāsayasyaṃśumālin || 2 ||

yāvantaste mayukhāḥ kṣitijaladahanasparśanākāśacetaḥ-
pīṭhasthāḥ ṣaṭpramāṇāḥ paramadhiptatayo bhairavā eva sarve |
teṣāṃ madhye tvamekaḥ parataramahimojjṛmbhamāṇaḥ pracaṇḍo
mārtaṇḍo raśmimadhyasthita iva parito bhāsi cidbhairavāgne || 3 ||

bhairavyo raśmidevyastava śiva karuṇāpūritākṣāḥ prasannā-
stvatsattākāśavāhoditanijagatayaścarvitātmārthakṛtyāḥ |
taddhāmanyeva śāntāḥ suramunipitṛbhiḥ puṇyapāpaśca baddhān
bhaktāṃścānekabādhāñjhaṭiti vighaṭayantyātmabodhāgnijṛmbhaiḥ || 4 ||

p. 20)

śrīnātha śrīpareśeśvara paraśiva te divyadivyā marīcī-
rbrahmādīnāṃ manovāganavagatamahācitranānārtharūḍhāḥ |
gūḍhaprauḍhaprakāśāḥ suramunivacanairapyabuddhāḥ kathaṃ vā 
stotuṃ jñātuṃ samartho bhavati kavijanaḥ ko'tra mando nṛmātraḥ || 5 ||

iti śrīdūrvāsakṛtaparaśaṃbhumahimnastave sādhāraṇyena 
ṣaḍanvayaraśmivivekaskandhaprakaraṇamaṣṭamam || 8 ||
navamaṃ prakaraṇam

gaṅgā bhūmiḥ śatāṅgaḥ śatadhṛtirapi tatsārathiḥ saptayaste
vedā brahmaikavedyāḥ pṛthutaracaraṇau puṣpavantau tadakṣaḥ |
* * *?kīlabandhaḥ kamaṭhapatiribhāstatpṛthustambhapaṅktiḥ
śeṣastadrajjubandhastadupari pitṛbhūstatra cintyo rathī tvam || 1 ||

kalpāntānantasūryadyutimati vikaṭānekadaṃṣṭraṃ ṣaḍāsyaṃ
vahnīndvarkāmbukāṣṭhādaśayutamabhitaḥ prajvalantaṃ mayūkhaiḥ |
śūlāsīṣūgraśaktyaṅkuśavaranṛśiraḥ śrīphaleṣvāsanāri-
dyotatpāśābhayāṅkairnijabhujaparidhaistvāṃ guruṃ śaṃbhumīḍe || 2 ||

nāgāsthīnduprasūtaiḥ śravaṇagatamahābhūṣaṇaiḥ kuṇḍalīndrai-
rākrośanmuṇḍamālāparivṛtavapuṣā dikṣu jā *? lyamānam |
mattebhendrorukṛttyantaraghaṭitakaṭīmaṇḍalaṃ sāṭṭahāsaṃ
taṃ bhāsvadvyobhagabhoṃdaravidhṛtakarāṅguṣṭhamātraṃ prapadye || 3 ||

nāgendraiḥ kalpavṛkṣairadhigatavihagairbhairavairdevadaityaiḥ
bhūtaiḥ pretaiḥ piśācaiḥ parivṛtamabhito yoginībhiḥ śmaśāne |
sarvaprajñaikavāsaṃ tribhuvananilayaṃ svātmanādhyātmadīptaṃ
sarvottīrṇātmatattveśvaramanalamukhaṃ tvāṃ guruṃ śaṃbhumīḍe || 4 ||

p. 22)

nānādhyānātmayogaprakaṭitaśivatāsiddharūpaprasādaḥ
svecchājñānakriyātmatriśikhavidalitatrayyudīrṇapramohaḥ |
satyajñānāsibhinnapramitijaniripuḥ svātmayogeṣu dhārā-
cchinnāvidyāsu lakṣyeḥ paramaśiva vibho tena mṛtyuṃjayastvam || 5 ||

deva brahmāṇḍasṛṣṭisthitilayasamayadhvaṃsinī te triśakti-
rmāyāśaktipracaṇḍoddhataghanakariṇī vāriṇī sā sṛṇiste |
dharmārthātmeṣṭamuktipravitaraṇacaṇaste varaste'pyamīti-
rviśvagrāsogramṛtyupratibhayadalinī tadbhavān mṛtyumṛtyuḥ || 6 ||

pāśaste viśvavaśyaḥ pitṛpatikṛtabhirhastinī siṃhavṛtti-
ścakraḥ saṃsārarātridyumaṇisamudayastāvakaste pinākaḥ |
ākrāntāśeṣamohaprakṛtivikṛtimahāmātṛkācitparātmā
prāṇāste tatkapālaṃ hatavidhimukhasatpretacidrūpamīśa || 7 ||

evaṃ te divyadivyāyudhaparamahimā gīyate vedaśāstraiḥ
prāguktaste śatāṅgo'pyapi ca pitṛgaṇaprataśīrṣāccaraṅge |
uccaṇḍaṃ tāṇḍavaṃ te tribhuvanabhayakṛdvajrapātāṭṭahāso
bhīṣāsmāttvatsakāśādapara iva paro nāsti tenogravīraḥ || 8 ||

cittākāśānilāgnyambvavanitalapatipretasiṃhāsanasthaḥ
ṣaṭcchaktivyaktamūrtiḥ ṣaḍayanapathikaḥ somasūryāgnipādaḥ |
brahmāgniḥ saptajihvākabalitaviṣayībhūtaviśvaprapañca-
sthūlo'pi dhyānadṛṣṭestvamadhikatamasāṃ jyotiṣāmapyagamyaḥ || 9 ||

p. 23)

ityuktadhyānacintyo'pyanavagatamanovākpravṛttisvabhāvaḥ 
svacchandātmīyasattā ciducitavibhavaḥ pāvakaḥ śaṃbhurūpaḥ |
sarvātītasvabhāvo'pyupaniṣaduditajñānamīmāṃsyamānaḥ 
satvaṃ yasyāntaraṅge nivasati sa śivastvanmayaḥ syānmaheśa || 10 ||

śrīmānapyādibhikṣustribhuvanajanako'pyātmabhūrāgamokti-
vyākhyāvedyo'pyavācaḥ prakṛtisuvimalo'pyātmamāyāvilāsaḥ |
tattvādeko'pyanekaḥ parayuvatirato'pyātmavitsevyamānaḥ
tasmātsvacchandalīlastvamiha vijayase mānasīṃ bhāvavṛttim || 11 ||

iti śrīdūrvāsakṛtaparaśaṃbhumahimnastave pāvakadhyānayogaprakaraṇaṃ 
navamam || 9 ||
daśamaṃ prakaraṇam

draṣṭavyastvaṃ jagadbhirbahuvidhavidhibhiḥ sarvasiddhāntavākyaiḥ
śrotavyo nirvikalpaḥ śivaguruvadanāmbhoruheṇa prabuddhaḥ |
mantavyaḥ sarvatattvāvakalitacaraṇastannidadhyāsitavyaḥ
sattāmātrāvalambītyamaranutapado nāsti devastvadanyaḥ || 1 ||

ugraṃ śāntaṃ ca vīraṃ sakalamayamahāviṣṇumagniṃ jvalantaṃ
sarvatrānantavaktraṃ naramṛgavapuṣaṃ bhīṣaṇaṃ sarvabhadram |
sarvajñaṃ mṛtyumṛtyuṃ bahuvidhanutibhirvanditaṃ sarvalokaiḥ
viśvāhaṃkārajṛmbhaṃ paramaśiva guruṃ tvāṃ bhaje mantrarājam || 2 ||

śaṃbho tvāṃ bhūrbhuvaḥsvarmaharuditatanuṃ tvantarikṣadyusūryā-
rajñācāryenduśukrārkibhirapi nigamabrahmabhiḥ protaśaktim |
prāṇāpānādibhedaiḥ kalayati sakalaṃ mānasaṃ dhyānayogaṃ
yeṣāṃ teṣāṃ saparyā bhavati surakṛtabrahmatā yogitā ca || 3 ||

sarvotkṛṣṭaṃ paraṃ tatsavituranupamaṃ te vareṇyaṃ śaraṇyaṃ
bhargo devasya dhīmahyabhidadhati dhiyo yo na ityaurvatejaḥ |
turyaṃ sarvāṇibhūtānyadhigatamamalaṃ sarvato dṛkkramādyaṃ
dhyāyāmi dhyeyamantaḥkaraṇasuniyatairyogibhiḥ śrīmaheśa || 4 ||

p. 25)

kālo'nanto yugātmā śiva divasaniśāpakṣamāsāstathābdāḥ
tadbhedāḥ ṣaḍṛtusthāstadanugatajagatsarvavṛttāntabhedāḥ |
nānāyajñakriyāśca tridaśaditisutā mānuṣāḥ sarvanāgāḥ
yogīndrā jīvasaṃghāstava caraṇabila yānti janmāntamadhyāt || 5 ||

bhūtaṃ bhavyaṃ bhaviṣyattribhuvanabhavane ṣaṇmahāśaktibhistvaṃ
tatsarvaṃ vyaśnuvāno vicarasi kalitaḥ sṛṣṭigatyantakāmaiḥ |
devairdaityairmanuṣyairuragapatikulaiḥ sarvajīvaprasārai-
rātmīyaiścitritāṅgaḥ śiva bhavatamasaḥ sūryabhāstvaṃ parastāt || 6 ||

śrotā sparśī nijarasarasikaḥ sarvagandhāntarajño
vaktā kartā ca gantā tribhuvana bhavato viśvasargaḥ pramodī |
kāmī mīmāṃsakaśca prathitaśuciśikhāsaptakavyāptaviśvo
boddhā svārthānanantānadhigatacaraṇaḥ sarvatastvaṃ śivo'si || 7 ||

sarvārthī sarvanāmā sakalakulapatiḥ sarvalokāṅganeśaḥ 
śṛṅgārī sarvabhogī navarasarasikaḥ prājyasāmrājyabhoktā |
trailokye vākprapañce pravacanapaṭhitaḥ somayājī ca yajñaḥ 
saṃsārī kāmacārītyanuvadati jano yaḥ sa dhanyaḥ śiva tvām || 8 ||

kṣetraṃ kṣetrapramātā śivaguruvadanāghoravidyādhidevo
mantro mantrādhidevo makhavidhiranagho yogayogyaḥ padārthaḥ |
tvaṃ darśaḥ pūrṇamāsaḥ paridhirapi makhācāryavaryaśca hoto-
dgātādhvaryuśca havyaṃ trividhahutavahastvāṃ vinā nāsti śaṃbho || 9 ||

p. 26)

kṣetrajñāḥ sarvadevāḥ suranarabhujagāḥ sarvajīvāśca tacca
kṣetraṃ brahmāṇḍarūpaṃ tribhuvanabhavanavyāpakaṃ citrarūpam |
etāvadvyāpya tatra sthitamakhilajagadbhaktabhoktāramagniṃ
jñātvā ṣaṭcchaktibhistvāṃ paramaśiva mahāmṛtyumatyeti vidvān || 10 ||

uktakṣetrādhideve paratarapuruṣe tvayyanantasvarūpe
divyāmnāyā gurūktā nijanijaniyatisphūrtayah sarvavedāḥ |
sāṅgopāṅgāśca śāstrāṇyadhigatamahimānyonyasiddhāntavidyā
bhāṣā svārthairvibhānti triṇayana bhavato viśvamūrteḥ paraḥ kaḥ || 11 ||

mūlaṃ vyomaiva vāyujvalanajaladharā madhyamaṃ yasya śākhā
devāḥ parṇāni daityāḥ kisalayanicayāḥ mānuṣāśca pratānāḥ |
nāgāḥ puṣpāṇi jīvā bahuvidhatanavo pakvasasyaprabodho
viśvanyagrodhakadroḥ paramaśiva bhavān bījabhūto vibhāti || 12 ||

māyārūpeṇa kālo jananamaraṇakṛtsarvajīvāṅgavṛtte-
rvidyārūpeṇa kālāntaka iti vinutaḥ sa tvamevāparo na |
dehāhaṃkāra evāntaka iti guruṇā yaḥ pravijñāya māyāṃ
jāgartyātmaprabodhe śiva tava kṛpayā so'tra mṛtyuṃjayaḥ syāt || 13 ||

tvaṃ nāthastvaṃ gurustvaṃ parapadajanitāmnāyavidyārthakośa-
stvaṃ śaṃbhustvaṃ pareśaḥ parataramahimā tvaṃ parā tvaṃ parāgniḥ |
tvaṃ bhānustvaṃ sudhāṃśustvamapi ca jananī tvaṃ pitā tvaṃ sumitra-
stvaṃ bhrātā bāndhavastvaṃ tvamasi dhananidhistvāṃ vinā nāsti me'nyaḥ ||

p. 27)

śabdārthādhārabhūtaṃ tribhuvanajanakaṃ sarvato diksatattvaṃ
trailokyasthāyi liṅgatrayaviditapadaṃ sarvatattvaikavedyam |
sarvānirvācyasattāgataparavibhavajyotirujjṛmbhamāṇaṃ 
vyaktīkṛtyātmavarṇaiḥ prakaṭayasi paraṃ tattvamātmīyamagre || 15 ||

tvaṃ viśvaṃ viśvaheturvirahitakaraṇe vi'svakāryaikakartā
viśvātītaśca viśveśvara iti bahudhā niścitaścāks'rajñaiḥ |
advaitātmaprabodhānalabahulaśikhācarvitātmīyahavyaḥ
śrīśaṃbho viśvasattā parataraviyati paiṣi nirvāṇapūjām || 16 ||

evaṃ yaḥ stauti bhūtiṃ tribhuvanamahatīṃ viṣvagāścaryacaryā-
mantarbāhyāgamoktipravinutavibhavāmādimadhvāntahīnām |
saumyogrākāradevāsuranarabhujagānekajīvaprabhedo-
tpattisthityantabhūmiḥ sa bhavati jagadāścaryavāneva śaṃbho || 17 ||

iti śrīdūrvāsakṛtaparaśaṃbhumahimnastave mahāvibhūtiprakaraṇaṃ daśamam 
|| 10 ||
ekādaśaṃ prakaraṇam

kā pūjā pūjakaḥ kaḥ śivagururiti kaḥ ko vidhiḥ kaśca mantraḥ
kiṃ pīṭhaṃ kiṃ prasūnaṃ kimamalasalilaṃ ke'tra sarvopacārāḥ |
nirdvaṃdvasyātmanaste dvayamiti racitaṃ sarvametatkathaṃ syā-
tsaṃtoṣārthe maheśa trikaraṇavimalajñānapūjāprasannāḥ || 1 ||

traikālyaṃ sarvataste sakalajagadidaṃ vyaśnuvānātmasatta-
visphūrteraṣṭamūrterakhilajanamanaḥproccasiṃhāsanasya |
kasmādāvāhanaṃ syādbahiriha caritaṃ kvāsanaṃ candramaule-
rmāyā saṃsārabhāvo racayati nitarāmātmabhogāya bhedam || 2 ||

ādhāro'gniḥ supātraṃ raviramṛtakalānāyakaḥ pūrṇamadyaṃ
śaktīśastvaṃ prapūjyaḥ ṣaḍavayavayutastatra pātrapravarge |
pādyaṃ te tarpaṇaṃ ca prabhavati samude bāhyayāgārghyapātraiḥ
saṃtuṣṭaḥ syāḥ kathaṃ tvaṃ paraśiva vimalajñānadugdhābdhiśāyin || 3 ||

bhāsvaccandrāgnibimboditavimalaśivajñānanityapramoda-
jñānānandapravāhāstriguṇitasarito mukhyanāḍītrayasthāḥ |
kālindījahnukanyāntarasaridabhidhāste tanusnānakṛtye
sṛṣṭā hṛlliṅgamūrteḥ kathamitarajalaiḥ syāttava snānamatra || 4 ||

lajjārāgādimāyātimiradinakarī * * * * * * *? 
-
jyotiḥpuñjapravṛttairganabhavatamasau dikpaṭālāṃkṛtasya |
prajñāyajñaupavītairupacitavapuṣah praitamapyāṅgarāga-
syanye mithyaupaccārāstava vasanamahāsūtravandhānuleṣāḥ || 5 ||

sarvāhiṃsandriyāścadrutagatiśamanaṃ sarvabhūtānukampā-
śāntiḥ satyaṃ prabodho gurukathitatayo niścalavyānadṛṣṭiḥ |
śraddhābhaktiśca nityaṃ nijaviṣayaparityāgitā niḥspṛhatvaṃ
saṃvitpūjyeti puṣpāṇyamala śiva bhavatpūjanāya kriyante || 6 ||

brāhmyādyā mātaro'ṣṭau svaviṣayakusumairātmamātraprasūnaiḥ
yoginyaḥ śaktayaste nijanijamahimasphūrtimanmañjarībhiḥ |
tvadbhāvaṃ bhāvayadbhistava kiraṇamahābhairavairāttamaṅgā-
stvāṃ śrīcidbhairaveśaṃ paramaśivaguruṃ pūjayanti smarantyaḥ || 7 ||

sadvidyāṅgāramadhyārpitasatatamahāvāsanābhyāsadhūpaiḥ
śrīmadvaktrāravindoditasakalakulāmnāyabodhapradīpaiḥ |
sarvākṣārthānnabhedairupacitamahādivyanaivedyapānai-
rārādhyo yogibhistvaṃ kathamitarakṛtaistoṣyase śrīpareśa || 8 ||

iti śrīdūrvāsakṛtaparaśaṃbhumahimnastave 
antaryāgopācāraparāmarśaprakaraṇamekādaśam || 11 ||
dvādaśaṃ prakaraṇam

vidyā nānāvibhūṣā mṛgamadaghanasārādisaurabhyavastu-
protaśrīcandanāni pravikacakusumānyadbhutānyambarāṇi |
nānāmodāśca dhūpāḥ kramukaśakalavadvīṭikāḥ pānabhedāḥ 
nānāpātrāṇi bhūmyāḥ paraśiva bhavataḥ pūjanāya kriyante || 1 ||

saptaite maṇḍalasthāścarujalanidhayo divyanaivedyarāśī-
nnānāpakvānnabhedānvividhapiśitavacchākanānopadaṃśān |
bhakṣyaṃ bhojyaṃ ca coṣyaṃ vividhaśaśisudhāsvādavadvastulehyaṃ
hālādadhyājyadugdhānyapi vidadhati te sūpahārāya śaṃbho || 2 ||

mantrākāraiḥ pradīpairdahanaravikalānāthanakṣatramālā-
vidyunmāṇikyamuktārajatakanakadhātvādinānāprakāśaiḥ |
yuṣmannīrājanāyai viracitaracanaḥ svaprakāśādimūrti
sarvānandātmarūpaṃ paramaśivaguruṃ bhāsayatyaurvatejāḥ || 3 ||

mudrā nānārthapoṣānatipathecalitānaṣṭayogāṃśca nāṭyaṃ
tīrthākrāntiṃ praṇāmaṃ nijakaraṇagati sarvasiddhāntavācaḥ |
karmājñānapravāhānvyajanamapi mahācāmarāṇyātapatraṃ
hastyaśvādīnrathāṃste paraśivacaraṇādhyāsya dāsyaṃ vidhatte || 4 ||

p. 31)

ākāśaḥ śabdabhedaiḥ pralayajaladharāmandadambholijṛmbhai-
rbherīniḥsāṇavādyairdaranikararavairbhūrighaṇṭāninādaiḥ |
tālairnādairmṛdaṅgairmurajaḍamarukairgītasadvallakībhiḥ
sarvairvādyaprabhedadhvanibhiriha vibho nātha pūjāṃ karoti || 5 ||

śāṃbhavyo raśmidevyaḥ samarasamuditā mātṛkāvarṇarūpā
bhāsvanto bhairavāṣṭā api sarasakalāpānamattaḥ kramasthāḥ |
vedāntairāgamāntairabhidadhati paraṃ śāṃbhavaṃ vaibhavaṃ te 
sarvānirvācyasattāviyaduditapadaṃ śrīvibho viśvamūrte || 6 ||

yoginyaḥ kṣetrapālāḥ sarasamadhumadāvedaśāstrārthatattva-
vyākhyānadhyānavaktrāḥ pitṛvanadaśadigvṛkṣagā bhairavāśca |
saudhāsvādapramattāḥ prakaṭitavikaṭāṭopasiṃhāṭṭahāsāḥ
svasvavyāpārapuṣpaiḥ paramaśivaguruṃ tvāṃ vibho pūjayanti || 7 ||

bhūtāḥ pretāḥ piśācāḥ svavikṛtivibhavaiḥ prāptabībhatsaveṣā
yoginyaste śmaśānāvaraṇagatamahādevatā bhāsayanti |
devāste pūrvadevā madhurasamuditā vismayāviṣṭacittāḥ
śāntā dhyāyanti gāyantyapi paramaśiva tvāṃ mudopāsate ca || 8 ||

brahmā vedoktigānairharirapi kamalaistāṇḍavaiścaṇḍarudrā-
stauryatrayyā mahendro nijanijaviṣayairanyadikpāladevāḥ |
siddhāḥ sarve munīndrā stutinutivacanaiḥ sarvadurgāgaṇeśā
nṛttairvādyaprabhedairvidadhati sumudaṃ te mahādeva śaṃbho || 9 ||

p. 32)

saṃtaptaḥ pretasiṃhāsanavihitamahābhairavaḥ śāṃbhavāgniḥ
pañcāśadvisphuliṅgākṣaraviditaparāghoravidyogratejāḥ |
satyāntaryajñadevastribhuvanahaviṣā toṣitātmīyaraśmi-
rvāgarthavyaktabhāvātsakalamiha tanuṃ vyaśnuvāno vibhāti || 10 ||

sarvajñānaikabhūmistribhuvanakaravīrākhyaśūnyaśmaśāna-
jñānākūpārapūraśrutamukhabahuvicchāstrabodhodavāhān |
prajñāṃ gāmbhīryagarvātgrasati raviriva svaprakāśātprakāśā-
nanyānindūḍumukhyānnibiḍatararucirdhvāntapūrāṃstavāgniḥ || 11 ||

śrīśaṃbho viśvamūrte paramaśiva guro nātha viśveśvarātma-
nneṣāśeṣārthavadvākprasavaviracitā sragdharāvṛttapūjā |
tvayyeva jñānavahnau hutavaharasane saṃhatā muktaye me
bhūyādāgaḥ kṣamasva pravacanapaṭhitaḥ śrīvibho me prasīda || 12 ||

iti śrīdūrvāsakṛtaparaśaṃbhumahimnastave viśeṣopacāraparāmarśe 
śāntiprakaraṇaṃ dvādaśam || 12 ||
trayodaśaṃ prakaraṇam

iti tava kṛpādogdhrī pūjā subhaktisrutāmṛtā
jananamaraṇaprādurbhāvaprabhedapaṭīyasī |
janayati mudaṃ brahmānandapravāhataraṅgiṇīṃ
dahati vipadaḥ puṇyaṃ pāpaṃ durantabhavāṭavīm || 1 ||

paraśiva mama janma dhanyameta-
ttava mahimastutimocito yato'ham |
kulamidamakhilaṃ dvidhā vibhinnaṃ
paramapadaṃ gatameva te prasādāt || 2 ||

hato māyāmṛtyurguruvacanakhaḍgena manasaḥ
prabhinnaṃ mālinyaṃ vyapahatamahaṃkāratimiram |
hatā me kāmādyāḥ prabalaripavaḥ svātmaviṣayāḥ
maheśa tvatsevāviditasuvivekāgnimahasā || 3 ||

jātirlajjā nijakulamadaḥ sarvasaṃśītirādhi-
rdehāhantāsukṛtaduritadvaṃdvapāśo'bhimānaḥ |
sarva hyete mama vinihatāstvanmahāvākyasūrya-
jyotiḥpuñjaiḥ kimaparamahaṃ deva bhadraṃ samīhe || 4 ||

p. 34)

madvidyābhyasanamabhūdihaiva sārthaṃ sāṃnidhyāttava ca taduktigocarasya |
adya tvaṃ tribhuvanavāṅmanasyalabhyo nirbādhaḥ sakalapathaikagamyamūrte || 5 ||

śrutismṛtimithaḥpathe pracalito'hamekāntataḥ
prabhoḥ śivaguroḥ tava trijagadunnatājñāṃ gataḥ |
bhajāmi parapāvakaṃ trijagadātmahavyāśinaṃ
bhavantamadhidaivataṃ bhavavane jvalantaṃ svataḥ || 6 ||

brahmatvaṃ suranāyakatvamakhilaṃ kṣoṇīpatitvaṃ lasa-
dbrāhmaṇyaṃ surayakṣanāgapitṛtā gandharvatā siddhatā |
etatsarvamanityameva gaṇitaṃ nāhaṃ samīhe sukhaṃ
kiṃ tu tvatpadapadmaniścalataradhyānaṃ samīhe vibho || 7 ||

saṃprāptā kṛtakṛtyatā saphalatā vācāṃ tava stotratā
mṛtyorapramitaiśca mṛtyurabhavadvaśyaṃ gata tvatpadam |
saṃsārānavadhipracaṇḍajaladhistīrṇaḥ pramoho hataḥ
puṇyaṃ pāpamagādvināśamiha me prāptaḥ prabodho vibho || 8 ||

iti paraśivaśaṃbho'nantakānte mahimna-
stavaviracitametatstotramātmoktiśaktyā |
prabhavatu sumude te tvaṃ mama svāntavartī
bhava bhavagataduḥkhaṃ chindhi cāgaḥ kṣamasva || 9 ||

yāvāṃste jīvalokaḥ paraśivacaurāśītilakṣaikasaṃkhya-
stattatkarmaprabhedopagatajanimṛtī ghorasaṃsāracakre |
sṛṣṭisthityantavṛttiṃ bhajati niravadhitvatpadadhyānahīno
dṛṣṭvainaṃ bhītabhītaṃ śaraṇamupagataṃ trāhi māṃ deva mṛtyoḥ || 10 ||

durvāsāḥ satyavāsāḥ kanakagirirahaṃ kaṃdare me hṛdākhye 
ślokāścaite mṛgendrāḥ padanakhadaśanāḥ śāṃbhavāstraikavīryāḥ |
māyādhvāntebhayūthapradalanapaṭavo brahmavidyāṭavīsthāḥ
vaktṝñśrotṝnpramātṝnnijahṛdayaguhābrahmasattaṃ nayanti || 11 ||

bhūṣyaṃ vaiduṣyamudyaddinakarakiraṇākāramākāratejaḥ
prajñānaṃ bhūrimānaṃ nijakarakalitaṃ durgamaṃ yogamargam |
āyuṣyaṃ brahmapoṣyaṃ haragiriviśadāṃ kīrtimabhyetya bhūmau
dehānte brahmapāraṃ paraśivacaraṇākāramabhyetya vidvān || 12 ||

ye śrīśāṃbhavaśāsane kṛtadhiyaḥ śrīśāsane karmaṭhāḥ
śrautasmārtavidhiṣvamandamatayaḥ satyavratā brāhmaṇāḥ |
vidvāṃsaḥ sakalāgameṣu ca kalāvidyāsu te śāṃbhava-
brahmaprāptimavāpnuvanti paṭhanācchaṃbhormahimnastuteḥ || 13 ||

stotraṃ caitatpaṭhedyaḥ śivaguruvadanāghoravidyāttadīkṣaḥ
satyajñānaprakāśātprabalabhavaripuṃ puṇyapāpādyavidyām |
bhitvā mukto vikalpastrijagati mahitaṃ saukhyamātmaprabodhaṃ
tejaḥ kīrtiṃ ca lakṣmīmabhilaṣitapadaṃ vyaśnute stotravīraḥ || 14 ||

mahimnastotrasya tribhuvanaguroryo japarataḥ
parāśaktestattvaṃ paraśivapadaṃ vetti sa budhaḥ |

p. 36)

agādhaṃ gāmbhīryaṃ stutigatamanantapramitijaṃ
samastāḥ siddhirapyanubhavati gacchetparapadam || 15 ||

śrīkrodhabhaṭṭārakadivyanāmnā durvāsasā sūktamahāmahimnaḥ |
stotraṃ paṭhedyo bhuvanādhipatyaṃ nityaṃ gurutvaṃ śivatāmupaiti || 16 ||

maheśānnāparo devo mahimno nāparā stutiḥ |
aghorānnāparo mantro nāsti tattvaṃ guroḥ param || 17 ||

sadasadanugrahanigrahagṛhītamunivigraho bhagavān |
sarvāsāmupaniṣadāṃ durvāsā jayati deśikaḥ prathamaḥ || 18 ||

śrīgurukaruṇālakṣyo yaḥ ko'pyātmavidanugṛhītiparaḥ |
paraśaṃbhustutibodho jagadādhāro bhavetsadā dhīram || 19 ||

paraśaṃbhostava padyaṃ raviprakaraṇaṃ paṭhaṃstrikāle'pi |
raviriva jagatprakāśamticāturyājjagadgururbhavati || 20 ||

tasmātsmṛtimatibuddhiprajñāvānātmavinmahādevaḥ |
paraśaṃbhostavahṛdayaṃ satpātreṣu prakāśayetsadayam || 21 ||

iti śrīdūrvāsakṛtaparaśaṃbhumahimnastave upasaṃhāraprakaraṇaṃ trayodaśam 
|| 13 ||

iti śrīkrodhabhaṭṭārakāparanāmnā mahāmahimnā durvāsasā munīśvareṇa 
viracitaparaśaṃbhumahimnastavaḥ saṃpūrṇaḥ ||





###########   END OF FILE  #######