####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00089
Uniform title: stavacintāmaṇi
Secondary title: stavacintāmaṇi of bhaṭṭanārāyaṇa with commentary by kṣemarāja
Author : bhaṭṭanārayaṇa
Alternate name : nārāyaṇa
Commentator : kṣemarāja

Description: 
E-text transcribed from volume 10 of the Kashmir Series of Texts and Studies.


Notes: 
This e-text was transcribed by the staff of Muktabodha under the supervision of Mark S.G. Dyczkowski.    Revision 0: Nov. 30, 2005    

Publisher : Research Department, Jammu and Kashmir State
Publication year : 1918
Publication city : Srinagar
Publication country : India
####################################################



oṃ namaḥ svātmāmṛtavapuṣe paramaśivāya ||

atha

stavacintāmaṇiḥ |

śrībhaṭṭanārāyaṇaviracitaḥ |
śrīkṣemarājakṛtavivṛtyupetaḥ |

prakāśamāne paramārthabhānau
naśyatyavidyātimire samaste |
tadā budhā nirmaladṛṣṭayo'pi
kiṃcinna paśyanti bhavaprapañcam || 1 ||

namaḥ śivāya satataṃ pañcakṛtyavidhāyine |
cidānandaṣanasvātmaparamārthāvabhāsine || 2 ||

antaḥ spandāndolanānandasaṃpad -
bāhyaspandāmandasaṃdohinībhiḥ |
saṃviddhārādhoraṇībhiḥ samantāt
siñcan viśvaṃ svātmaśaṃbhunarmasyaḥ || 3 ||

(page  2)


nārāyaṇaḥ svahṛdayāmbunidherviveka -
bhūbhṛdvimardarabhasocchalitaṃ yadetat |
śrīśaṃkarastutirasāyanamācakarṣa
taccarvaṇādiha budhā vibudhā bhavantu || 4 ||

	iha stotrādau stotrakāraḥ sarvopaniṣatpradarśitasatsaṃpradāyodghā-
ṭanamukhaṃ svātmaparamārthaparameśvarasvarūpasamāveśaṃ vyutthāne 
vimraṣṭumāha

sugirā cittahāriṇyā
paśyantyā dṛśyamānayā |
jayatyullāsitānanda -
mahimā parameśvaraḥ || 1 ||

	prakāśānandarūpaḥ parameśvaraḥ 
paramānandātmakasvātantryaśaktisvarūpaparāvāgāliṅgitamūrtiḥ anayaiva 
śaktyā śiva - mantramaheśvara - mantreśvara - 
mantravijñānākalātmaśuddhādhvapramātṛmayīṃ bhāratīṃ vācaṃ 
paśyantīṃ, maṇḍali - śrīkaṇṭha - krodheśa - vīrabhadra - śatarudrānanta -
bhuvaneśvaraprathātmikāṃ madhyamām, etadatiriktabhuvaneśvara -

(page  3)
 vicitrapralayākala - sakalaniṣṭhāṃ 
tattannānārūpaprapañcaparābhāsāṃ pūrvapūrvavākchaktivyāptāṃ 
vaikharīṃ ca vācaṃ svabhittāvavabhāsayan, avarohakrameṇa 
viśvavaicitryamaracayati | itthaṃ ca vaikharīpradhānasakalapramātṛpade'pi 
yathoktavyāptikapara - parāpara - madhyamākhyavāktrayāviyoga eva | ata eva 
anujighṛkṣuḥ bhagavān vaikharīmadhyamāpraśamanapuraḥsaraṃ 
paśyantīdaśāmunmajjya yathoktānāśritaśivaparyantavyāptikāṃ tāṃ 
vedyatvena ābhāsya vedyavedakasvātmasattām ārohaṇakrameṇa āveśayan 
bhaktibhājaḥ, sarvotkarṣeṇa vartate, - ityayamatra vākyārthaḥ |
	padārthastu - paramaḥ, - cidātmarūpaḥ īśvaro jayati - 
svadharāntāśeṣaviśvotkarṣeṇa vartate, kīdṛk ? vaikharīmadhyamāpekṣayā 
śobhanā vyakhyātaparamārthā yā iyam 
avibhāgākramasatatāvabhāsarūpā madhyamādivāgvyāpinī paśyantī, 
tayā dṛśyamānayā - sphuṭam unmagnarūpatvena sphurantyā, ata

(page  4)
 eva buddhyupārūḍhasakramasaṃkalpavikalpakāri madhyamātmakaṃ 
cittaṃ, tadanuṣaṅgeṇa ca varṇavyañjakavaikharyāśrayaṃ prāṇamapi 
tācchīlyena harantyā - niḥśeṣaṃ praśamayantyā, dṛśyamānayā ca - 
anāśritaparyante rūpe vedakatāpraśamanena vedyātmanaiva 
avabhāsamānayā hetubhūtayā ullāsitaḥ, - pratyabhijñāpadavīṃ nītaḥ 
parāvāgātmā ānandamahimā yena, vikalpapraśamanapuraḥsaraṃ 
paśyantībhūmimunmajjya taddhārādhirūḍhānāśritapadavīmapi vedyatvena 
ābhāsya paramānandātmakaparamādvayaparamapramātṛtāmunmīlayan 
anugṛhṇāti parameśvara ityarthaḥ | ayameva ca sarvarahasyeṣu sārabhūtaḥ 
samāveśopāya āmnātaḥ | yathoktaṃ śrīmālinīvijaye

	akiñciccintakasyaiva guruṇā pratibodhataḥ |
	utpadyate ya āveśaḥ śāṃbhavo'sāvudīritaḥ ||

iti | asmatparameṣṭhinā śrīpratyabhijñākṛtāpi

	vikalpahānenaikāgryātkrameṇeśvaratāpadam |

(page  5)
 iti | śrījñānagarbhe'pi

	vihāya sakalāḥ kriyā janani mānasīḥ sarvato
	vimuktakaraṇakriyānusṛtipāratantryojjvalam |
	sthitaistvadanubhāvataḥ sapadi vedyate sā parā
	daśā nṛbhiratandritāsamasukhāmṛtasyandinī ||

iti | yathā kayācit hṛdayahāriṇyā taruṇyā priyatamānurañjakamadhuragirā 
parasparānurāgavaśataḥ sābhilāṣaṃ dṛśyamānayā, paśyantyā ca, 
udañcadromāñcādisakalasāttvikabhāvadarśanonnīyamānānandamahimā 
kaścit īśvaro jayati; tathā vyākhyātakrameṇāyamapi paramaśivātmā 
svātmā, - ityanuraṇanaśaktyā śleṣadhvaniḥ | paśyantyādīnāṃ svarūpaṃ 
tatrabhavatā bhartṛhariṇā uktam, yathā

	avibhāgā tu paśyantī sarvataḥ saṃhṛtakramā |
	svarūpajyotirevāntaḥ sukṣmā vāganapāyinī ||
	kevalaṃ buddhyupādānā kramarūpānupātinī |
	prāṇavṛttimatikramya madhyamā vāk pravartate ||
	sthāneṣu vivṛte vāyau kṛtavarṇaparigrahā |
	vaikharī vāk prayoktṝṇāṃ prāṇavṛttinibandhanā ||

(page  6)
 iti || 1 ||

	evaṃ śaktimatpradhānāṃ śāṃbhavīṃ bhuvaṃ stutvā 
śaktipradhānāṃ stotumāha

yaḥ sphītaḥ śrīdayābodha -
paramānandasaṃpadā |
vidyoddyotitamāhātmyaḥ
sa jayatyaparājitaḥ || 2 ||

	sa - bhagavān, aparājito - viśvātiśāyī jayati, - tameva utkṛṣṭatayā 
parāmṛśantaḥ samāviśāmaḥ | śrīḥ - aśeṣakāraṇavibhavaprathābhittiḥ 
parā caitanyalakṣmīḥ, dayā - viśvānugrahātmā parecchāśaktiḥ, bodhaḥ - 
jñānaśaktiḥ, paramānandaḥ - svātantryaśaktiḥ, saṃpat - 
svaprathārūpasamṛddhyātmā kriyāśaktiḥ, śrīśca dayā ca bodhaśca 
paramānandaśca saṃpacca tat śrīdayābodhaparamānandasaṃpat tena 
cidicchā - jñānānanda - kriyātma - sphāra - 

(page  7)
 rūpeṇa śaktipañcakena yaḥ sphītaḥ - paripūrṇaḥ, tata eva 
viśvānugrahapravaṇatvāt vidyayā - ahameva sarvam iti 
ahantedantāsāmānādhikaraṇyaprathātmanā śuddhavidyāśaktyā, 
uccairdyotitaṃ - parādvayamayatvena anugrāhyāṇāṃ prakaṭīkṛtaṃ 
māhātmyaṃ - jñānakriyāsphāro yena || 2 ||

	evaṃ śaktipradhānaṃ bhagavadrūpaṃ stutvā narapradhānamapi 
stotumāha

prasaradbindunādāya
śuddhāmṛtamayātmane |
namo'nantaprakāśāya
śaṃkarakṣīrasindhave || 3 ||

	śaṃ - parādvayaprathārūpaṃ śreyaḥ karoti yaḥ sa eva svacchatva - 
prakāśaghanatva - āhlādakatvasarvasaṃpadāspadatvādidharmayogāt 
kṣīrasindhuriva, tasmainamaḥ - śarīrādiprahvībhāvayuktyā tadeva tattvaṃ

(page  8)
 samāviśāmaḥ | kīdṛśāya śaṃkarakṣīrasindhave ?- 
prasaradbindunādāya - prasarantau nityameva sadāśiveśvarādinā 
vedyaparyantena parādvaitaprathānupraviṣṭena viśvātmanā rūpeṇa 
prasarantau bindunādau - sāmarasyātmike jñānakriyāśaktī yasya; tathāhi - 
prakāśātmā parameśvaraḥ 
svātantryaśaktyaparaparyāyasāmarasyāvasthitajñānakriyāśaktyātmakaḥ 
sphuranneva svabhittau svātmagopanārūpāmanāśritaśivadaśāmullāsya, 
jñānaśaktipradhānaṃ sadāśivaṃ, kriyāśaktipradhānam īśvaraṃ, 
tatkāraṇarūpāṃ ca śuddhavidyām ābhāsya, saṃkocābhāsarūpāṃ 
māyām, tadanu saṃkucitajñānakriyāśaktyātmike vidyākale pradarśya, 
tatsaṃkocaprakarṣātmabindunādaśabdavācyāṃ prāṇāpānabhūmiṃ, 
sakalakaraṇāvalīsamāśrayabhūtām uṭṭaṅkya, punarapi 
jñānakriyāsaṃkocaprakarṣayoginīmantaḥkaraṇabhūmim ullāsya, 
kramātkramaṃ tāratamyaprāptasaṃkocajñānaśaktimayāni buddhīndriyāṇi 
bodhyābhāsaparyantena rūpeṇa prathitāni ;

(page  9)
 tathaiva prakṛṣṭasaṃkocakriyāśaktimayāni karmendriyāṇi, tadvadeva 
uccāraṇīyagrāhyādi - viṣayābhāsaparyantāni prathayan, bodhyakāryādi - 
sarvaviṣayān bāhyendriyaprakāśaikātmyānayanapramukhamantaḥkaraṇa-
prakāśamāveśya, vidyākalābhūmikāsparśadvāreṇa 
sadāśiveśapadamāveśya, svasvātantryaśaktyātmanaiva prathayan, 
īdṛśāvarohārohadolākeliṃ kurvan anavaratamavasthitaḥ, 
niyatikālarāgatattvāni vidyākalābhyāmevākṣiptāni, prāṇāpānābhyāṃ 
puṃstattvamuktam vidyākalāntaḥ - praviṣṭena kiṃcidaṃśena 
pradhānamākṣiptaṃ viṣayaiḥ tanmātrabhūtāni iti | itthameṣa bhagavān 
prasaradbindunādaḥ, tata eva ca jñānakriyāmayatvāt viśvasya, 
gṛhītaviśvavaicitryo'pi parameśvaraḥ śuddhāmṛtamayātmā 
paramānandarasasāra eva; ata eva ananto - deśakālākārairaparicchinnaḥ 
prakāśo yasya, teṣāmapi prakāśātmakatvāt, anyathā

(page  10)
 tu asattvāt ; evaṃ ca itthaṃ naraparyantenāpi rūpeṇa prasaran 
paripūrṇa eva śaṃkarakṣīrasindhuḥ yaḥ sthitaḥ tasmai namaḥ | 
kṣīrasamudro'pi ullasadbinduḥ kallolanādayuktaḥ śuddhaḥ - susitaḥ, 
amṛtamayaḥ prakāśamānanāgarājaśca bhavati, iti śleṣopamā | 
stotrakārasya pitāmahaḥ parameśvarākhyaḥ, aparājitaḥ pitā, śrīdayākhyā 
mātā, śaṃkarābhidhāno jyeṣṭho bhrātā abhavat, tataḥ teṣāmapi 
parameśvarābhedabhājām iyaṃ stutiḥ, iti ākhyāyikāvidaḥ || 3 ||

	evaṃ viśvātmikāsu nara - śakti - śivabhūmiṣu 
advayaikaparamārthaṃ parameśvaramabhedena vimṛśya, īdṛśīmeva 
sarvadaśāsu svātmapratipattiṃ prathayati ā stotraparisamāpti vicitrābhiḥ 
sūktibhiḥ

dviṣmastvāṃ tvāṃ stumastubhyaṃ
mantrayāmo'mbikāpate |
ativāllabhyataḥ sādhu
viśvaṅno dhṛtavānasi || 4 ||

(page  11)
 he ambikāpate ! viśvasya pitaḥ, pitṛtvādeva asi - tvaṃ, naḥ - asmān, 
viśvak - samantāt sarvadaśāsu, sādhu - samyak, parādvayadṛśā dhṛtavān - 
anugṛhītavān ; katham ? ativāllabhyataḥ - yataḥ tvam asmākamatiśayena 
vallabhaḥ, nityameva tvadekaparā vayaṃ, tata eva tavāpi vayam ativallabhāḥ | 
yathoktaṃ gītāsu

	priyo hi jñānino'tyarthamahaṃ sa ca mama priyaḥ |

iti | yataśca itthaṃ hṛdayaikadhyamasmākam ato'tivāllabhyādeva vayaṃ 
vyavahārapade lokamadhyagatā lokasthitirakṣaṇārthaṃ yat kiṃcit 
rahasyācārādi gajanimīlanikayā dviṣmaḥ tat tvāmeva dviṣmaḥ, nahi 
asmākam atvanmayaṃ kiṃcidapi bhāti, iti dveṣyadveṣṭrādibhūmāvapi 
tvanmayā eva smaḥ, na tu asmākaṃ dveṣādidoṣakāluṣyaṃ jātucit | 
yadvakṣyati

	doṣo'pi deva ko doṣastvāmāptuṃ yaḥ samāsthitaḥ |

(page  12)
 iti | yadapi lokamadhyagatāḥ tathaiva vaidikamiṣṭāpūrtādi sthumaḥ 
tadapi na tvadatiriktam iti tvāmeva stumaḥ | yadapi yajñādau 
indrādidevāmantraṇaṃ kurmaḥ tadapi tubhyaṃ - tvadarthameva mantrayāmaḥ 
- śivamayātmadevatāyai viśvaṃ juhumaḥ | yacchrutiḥ

yajñena yajñamayajanta devā----------- |

iti | ata evātra vyatiriktasya phalasyābhāvāt na 
kartrabhiprāyakriyāphalavivakṣā iti ātmanepadaṃ na kṛtam | kiṃ ca 
lokottarabhavadbhaktiśālimadhyagatā api vayaṃ yat vaidikācārādi dviṣmaḥ, 
yacca rahasyācārādi stumaḥ, tadapi tvanmayameva manyāmahe | evaṃ ca 
lokalokottarayoḥ daśayoḥ vayaṃ yat dviṣmaḥ tat tvāmeva manyamānā 
vastutastu tvāṃ stumaḥ, tvadadvayamayadvayābhāsaparāmarśanameva hi 
bhavatstutiḥ, ataśca itthaṃ tattaddveṣastutyādyavasthāsu vastutaḥ tvāṃ 
stuvanto vayaṃ tubhyaṃ mantrayāmaḥ,

(page  13)
 tvāṃ mantradevatāṃ viśvābhedavimarśātmakamahāmantreṇa 
mantrayāmaḥ | ittham ativāllabhyāt asmān asi - tvaṃ sādhu - samyak ca 
anugṛhītavān, tvadanugrahādeva īdṛśī asmākaṃ mahāvibhūtirāvirbhūtā 
ityarthaḥ || 4 ||

	tataśca

saṃhṛtasparśayogāya
saṃpūrṇāmṛtasūtaye |
viyanmāyāsvarūpāya
vibhave śaṃbhave namaḥ || 5 ||

	śaṃ bhavati asmāt iti śaṃbhuḥ tasmai, vibhave - vyāpakāya 
cidātmane namaḥ | kīdṛśāya ? saṃhṛto - nāśitaḥ sparśaiḥ - viṣayaiḥ 
yogaḥ - antarnānāvāsanādhiṣṭhānasaṃbandho yena; tata eva ca viyat - 
vinaśyat akhyātyātmano māyāyāḥ svarūpaṃ yataḥ tasmai; ataśca 
saṃpūrṇaṃ - parādvayaprathātma yat amṛtaṃ tasya sūtaye - 
abhivyaktihetave | evaṃ ca pāśakṣa -

(page  14)
 paṇapūrṇasvarūpadānena bhagavān svātmaiva maheśvaraḥ 
anugrāhyān anugṛhṇānaḥ sthitaḥ, iti āntaravāsanābījaploṣayuktyaiva 
akhyātipraśamanapuraḥsaraṃ parasattāmāviśet bhaktibhāk, iti bhaṅgyā 
upadiṣṭaṃ bhavati | uktaṃ ca

uddharedātmanātmānam------------------------|

iti | viyat - ākāśam asparśaṃ pūrṇacandrāspadaṃ māyāvat 
tucchasvarūpaṃ vibhu ca bhavati, iti anuraṇanaśaktyā śleṣadhvaniḥ, 
evamuttaratrāpi || 5 ||

	kiṃ ca

bhinneṣvapi na bhinnaṃ ya -
cchinneṣvacchinnameva ca |
namāmaḥ sarvasāmānyaṃ
rūpaṃ tatpārameśvaram || 6 ||

	tat pārameśvaraṃ rūpaṃ namāmaḥ - etatstotraparāmarśanadvāreṇa 
anugrāhyajantucakrābhinnā vayaṃ samāviśāmaḥ | itthameva 
pūrvatrottaratra ca bahuvacanaṃ

(page  15)
 yojyam | kiṃ tat ? - ityāha bhinneṣu - vibhāgena sphuratsvapi tattattattva - 
tadadhiṣṭheyapramātṛ - tadāśrayabhuvanabhāvādiṣu vastuṣu yat na bhinnam 
- ekarūpam, tathā teṣveva cchinneṣu - pralayādyavasthāsu vinaṣṭeṣvapi 
avinaṣṭam, ataśca sarvasāmānyam - pūrṇāhantātmakamahācaitanyarūpaṃ 
sarvasāmānyapadena vaiśeṣikābhyupetaparāparasāmānyavyatireko'sya 
darśitaḥ || 6 ||

	tadittham

praṇavordhvārdhamātrāto' -
pyaṇave mahate punaḥ |
brahmāṇḍādapi nairguṇya -
guṇāya sthāṇave namaḥ || 7 ||

	sthāṇave - satatāvasthitarūpāya bhagavate namaḥ, kīdṛśāya ? 
praṇavasya yā ūrdhvārdhamātrā tadupalakṣito'tisusūkṣmaḥ samanārūpo 
mātrā - aṃśaḥ

(page  16)
 tato'pi yaḥ aṇu - anupalabhyamūrtitvāt upalabdhrekarūpaḥ ityarthaḥ 
tasmai | tathā śaktitattvāvasthitabrahmabilādhiṣṭhātṛbrahmopalakṣitaṃ yat 
aṇḍaṃ śaktyaṇḍaparyantaṃ jagat tato'pi paricchedyamūrteḥ mahate - 
tadvyāpakāya aparicchedyāya ityarthaḥ | tathā nairguṇyaṃ - 
sattvādiguṇābhāva eva guṇaḥ - citprakāśātmā dharmo yasya | itthaṃ ca 
praṇavoccāraṇakrameṇa samanāntabhūmikātikrameṇa 
unmanāparatattvaikātmakaṃ vyāptasamanāntāśeṣaviśvaṃ cide, 
kaghanameva satatāvasthāsu bhagavatsvarūpaṃ samāviśāmaḥ, iti 
piṇḍārthaḥ || 7 ||

	tataśca

brahmāṇḍagarbhiṇīṃ vyoma -
vyāpinaḥ sarvatogateḥ |
parameśvarahaṃsasya
śaktiṃ haṃsīmiva stumaḥ || 8 ||

	śivo dharmeṇa haṃsastu-----------------|

(page  17)
 iti svacchandanirūpitanītyā 
viśvasṛṣṭisaṃhārātmakahānasamādānadharmā parameśvara eva haṃsaḥ, 
tasya ca tādṛśīmeva śaktim - unmanākhyāṃ haṃsīrūpāṃ stumaḥ - 
tadvimarśāveśapuraḥsaraṃ śaktimatsvarūpaṃ samāviśāmaḥ | kīdṛśīṃ 
? vyākhyātarūpaṃ brahmāṇḍaṃ garbhe - antarabhedena sthitaṃ yasyāḥ | 
kīdṛśasya parameśvarahaṃsasya ? vyomavyāpinaḥ - 
mahāmantrarājasatattvasya, vyoma ca śūnyātiśūnyapadaṃ vyāpnuvataḥ, 
tathā sarvataḥ - sarvasmāt gatiḥ - prāptiḥ yasya, sarvatra ca gatiḥ - 
prasaradrūpatā prakāśaśca yasya | haṃsasya ca vyomaprasaraṇena sarvatra 
gacchataḥ aṇḍagarbhiṇī haṃsī nityamanucarī bhavati iti upamā || 8 ||

	athātidurghaṭakārisvātantryātmakaṃ māheśvaraṃ rūpaṃ 
stotumāha

nirupādānasaṃbhāra -
mabhittāveva tanvate |
jagaccitraṃ namastasmai
kalāślādhyāya śūline || 9 ||

(page  18)
 
svātantryaśaktibhittyuṭṭaṅkitecchājñānakriyārātrayodbhāsiśūlabhṛte 
namaḥ, gacchati tattadavasthāvaicitryam iti jagat - anāśritaśivādikṣityantaṃ, 
citraṃ - nānārūpam ; atha ca tadeva citraṃ citramiva 
tattadanantarudrakṣetrajñādyābhāsamayamapi bhittimātratattvameva, tathā 
bhūtamapi ca tadatiriktamiva iti āścaryakāri, citram iti vyastaṃ samastaṃ ca, 
abhittau - niṣedhāvabhāsarūpāyāṃ mahāśūnyabhittau, tanvate - 
uṭṭaṅkitavate, a - mā - no - nāḥ pratiṣedhe iti sthityā akāraḥ pratiṣedhavācī, 
arūpā śūnyātmā bhittiḥ abhittiḥ; kathaṃ tanvate ? 
nirupādānasaṃbhāram, upādānaṃ - māyāprakṛtyādi, saṃbhāraḥ - 
karmādiḥ sahakārigrāmaḥ, tena niṣkrāntaṃ kṛtvā 
upādānasahakāryāderapi tadābhāsyatvena jaganmadhya eva anupraveśāt 
anyathā śaśaviṣāṇatulyatvāt taditthaṃ parameśvaraḥ kalayā - 
svaśaktibaidagdhyenaiva ślāghyaḥ | āścaryaṃ ca etat - 
anupādānādiprapañcam

(page  19)
 abhittikaṃ citram iti, na caitat asaṃbhāvyaṃ, saṃkalpasvapnayoriva 
nirmāṇādau saṃvida eva bhagavatyāḥ tattadābhāsollāsakatvadarśanāt || 9 ||

	evaṃ yathā bhagavata eva anargalāt svātantryāt jagadudayaḥ, tathā ata 
eva saṃsāranivṛttiḥ ucitā iti saṃbhāvayan māyātirobhāvakaṃ jñānaṃ 
labdhuṃ parameśvarameva prārthayate

māyājalodarātsamya -
guddhṛtya vimalīkṛtam |
śivajñānaṃ svato dugdhaṃ
dehyehi harahaṃsa naḥ || 10 ||

	he vyākhyātasatattva harahaṃsa ! ehi - saṃmukhī - bhava, - 
śarīrādibhūmikātiraskāreṇa unmajja, ataśca vyutthānadaśāyāmapi śiva 
eva idaṃ viśvam iti īdṛk śreyorūpaṃ jñānaṃ, naḥ - asmabhyaṃ dehi -

(page  20)
 manasi prarohaya | yacchrutiḥ

	tanme manaḥ śivasaṃkalpamastu |

iti | kīdṛśam ?, akhyātirūpāyā māyāyāḥ saṃbandhi yat 
kalākalitatvādivaśena jaḍaṃ - bheda - pratītisāram, udaraṃ - madhyaṃ, tataḥ 
samyak - mitāhaṃbhāvagālanayuktyā unmīlya, vimalīkṛtaṃ - 
vigalitākhyātisaṃskārarūpāṃ śuddhimāpāditam, ata eva svato dugdhaṃ - 
tvayaiva kalāślāghyena ākṛṣya ānītam | haṃsaḥ kṣīranīrābhyāṃ 
kṣīramāhartuṃ vidagdha iti anuraṇanārthaḥ || 10 ||

	yataśca tvamīdṛk śivajñānaṃ naḥ prayacchasi ata eva

ṣaṭpramāṇīpariccheda -
bhedayoge'pyabhedine |
paramārthaikabhāvāya
baliṃ yāmo bhavāya te || 11 ||

(page  21)
 bhavati - sarvasya satyaprakāśātmanā rūpeṇa vidyate iti bhavaḥ, tata 
eva paramārthena ekasvarūpaḥ, tasmai te baliṃ yāmaḥ - 
unmīlitaśivajñānāya tubhyameva bhairavāgnaye śarīraprāṇapuryaṣṭakādi 
juhumaḥ | kīdṛśāya ? ṣaṇṇāṃ - 
pratyakṣānumānopamānāgamārthāpattyabhāvākhyapramāṇānāṃ 
samāhāraḥ ṣaṭpramāṇī mīmāṃsakoktā, tayā kṛto yaḥ svasya svasya 
viṣayasya paricchedaḥ, sa eva bhedaḥ - pratyakṣāpratyakṣasādṛśya - 
yāgaphala - sādhyasādhanābhāvākhyaprameyavyavasthārūpaḥ, 
pramātṛpramāṇaprameyāpekṣārūpaśca, tadyoge'pi na bhidyate tacchīlaḥ 
tasmai | etaduktaṃ bhavati - yatkiṃcit pramāṇaiḥ vibhedena vyavasthāpyate tat 
vyavasthāpyamānatvādeva saṃvinniṣṭhāṃ vyavasthām āsādayat 
saṃvinmayameva, iti bhedavyavasthāpi 
abhinnamahāprakāśātmakaśivamayyeva, pramāṇaparicchedayogaśca 
bhagavata eva saṃbhāvyaḥ tato'tiriktasyābhāvāt, tathā -

(page  22)
 saṃbhāvanāyāmapi ca uktadṛśā abheditvameva || 11 ||

		itthaṃ balinivedanalabdhasamāveśo vyutthāne'pi 
tadrūpatāmāśaṃsitumāha

api paśyema gambhīrāṃ
pareṇa jyotiṣābhitaḥ |
unmṛṣṭatamasaṃ ramyā -
mantarbhava bhavadguhām || 12 ||

	he bhava ! bhavadguhāṃ tvanmāyāśaktiṃ gambhīrāṃ - durantāṃ, 
pareṇa jyotiṣā - tvadīyena paramādvayaprakāśena, abhitaḥ - antarbahiśca 
unmṛṣṭatamasaṃ - praśamitākhyātitimirām, ata eva ramyāṃ - 
pāramārthikena svātantryaśaktyātmanā rūpeṇa sphurantīm, antariti 
pūrṇāhantātmani pramātraikātmye, paśyema - samāviśema kim ? || 12 ||

	evaṃ tadāśaṃsāvaśonmiṣadbhaktyudreka āha

(page  23)
				 namastebhyo'pi ye soma -
kalākalitaśekharam |
nāthaṃ svapne'pi paśyanti
paramānandadāyinam || 13 ||

āstāṃ tāvat advayātmā katipayajanahṛdayāśvāsapradaḥ 
pārameśvaraḥ svabhāvaḥ | ākṛtimantamapi induśekharaṃ ye darśanāvasara 
eva paramānandapradaṃ svapne'pi paśyanti, tebhyo'pi 
bhavaddarśanapavitritebhyo namaḥ || 13 ||

	yataśca ete'pi asmākaṃ bhavadbhaktyudrekeṇa namaskāryāḥ, 
tataḥ

bhagavanbhava bhāvatkaṃ
bhāvaṃ bhāvayituṃ ruciḥ |
punarbhavabhayoccheda -
dakṣā kasmai na rocate || 14 ||

bhāvātkaṃ bhāvaṃ - cidānandaghanaṃ tvatsvarūpaṃ

(page  24)
 bhāvayituṃ - svatvena pratyavamraṣṭuṃ, ruciḥ - abhilāṣaḥ śraddhā, 
kasmai mahādhiye na rocate, sarvasyaiva pratibhāsate ityarthaḥ | kīdṛśī ? 
punarbhavabhayocchede - janmāntaratrāsonmūlane dakṣā - śaktā || 14 ||

	ataśca

yāvajjīvaṃ jagannātha
kartavyamidamastu naḥ |
tvatprasādāttvadekāgra -
manaskatvena yā sthitiḥ || 15 ||

	tvadanugrahādeva ekamapi kṣaṇaṃ tvadabhedabhāvanāśūnyaṃ mā 
bhūt ityarthaḥ | tvadekāgreti tvameva ekaḥ agre nityaṃ svātmarūpatayā 
vimṛśyo yasya || 15 ||

	punarapi bhaktiprakarṣāt sarvaśāstravākyaikavākyatāṃ vimṛśan 
bhagavatsvarūpaṃ stauti

(page  25)
 			śākhāsahasravistīrṇa -
vedāgamamayātmane |
namo'nantaphalotpāda -
kalpavṛkṣāya śaṃbhave || 16 ||

	tattadaṃśābhiniviṣṭamitahṛdayānusāreṇa vibhinnaśākhāśataiḥ 
vitato yaḥ - vindanti anena paraṃ tattvam iti vyutpattyā vedarūpāḥ āgamaḥ - 
parameśvarapraṇītaṃ vākyaikavākyaṃ, tathā 
ekaparavastutattvaviśrāntisāraṃ sarvameva śāstraṃ tanmaya ātmā yasya, 
parameśvara eva hi śabdarāśiśarīraḥ tatprapañcamayāśeṣaśāstrātmanā 
sphurati, ata eva anantam - aparicchinnaṃ svarūpaprathāmayaṃ yat phalaṃ, 
tadutpāde - tadabhivyaktau, kalpavṛkṣatulyāya avilambitameva phalināya, 
mitahṛdayavikalpitavibhinnaśākhānusāreṇa tu anantasya - nānārūpasya 
phalasya utpādakāya, śākhābhede'pi tu sarvaśākhāpratyeyam ekaṃ karma 
iti sthityā vākyaikavākyatāparyālocanayā

(page  26)
 paraphalaviśrāntatvameva nānāśāstrātmanā ekasyaiva 
mahāśāstrasya | yaduktaṃ sārasvate stotre

	trayī sāṃkhyaṃ yogaḥ paśupatimataṃ vaiṣṇavamiti
	prabhinne prasthāne paramidamadaḥ pathyamiti ca |
	rucīnāṃ vaicitryādṛjukuṭilanānāpathajuṣāṃ
	nṛṇāmeko gamyastvamasi payasāmarṇava iva ||

iti || 16 ||

	yata evam, ataḥ

vāṅmanaḥkāyakarmāṇi
viniyojya tvayi prabho |
tvanmayībhūya nirdvandvāḥ
kaccitsyāmāpi karhicit || 17 ||

	yatkiñcit vadantaḥ kalpayantaḥ kurvāṇā vā vayaṃ tvanmayameva 
sarvaṃ bhāvayantaḥ, ata eva tvanmayībhāvāt nirdvandvāḥ - galitabhedāḥ, 
tathā sukhaduḥkhādisarvadvandvānabhibhūtā

(page  27)
 api - nāma, kaścit kadācit bhavema || 17 ||

		phalitaiva iyamasmākamāśaṃsā, - yata evaṃvidho bhagavān, - 
ityāśayena asāmānyatatprakarṣaparāmarśātmikāṃ stutimāha

jagatāṃ sargasaṃhāra -
tattaddhitaniyuktiṣu |
ananyāpekṣasāmarthya -
śāline śūline namaḥ || 18 ||

	nirṇītaparaśaktisphāratattvāya śūline, tata eva 
sadāśivādisakalāntānāṃ sarvajagatāṃ vividhajanmapralayayoḥ 
tattadabhīṣṭaprāptyātmikāsu ca hitaniyuktiṣu bhogāpavargasaṃpādaneṣu, 
nirapekṣanijasvātantryavijṛmbhitātmane namaḥ - iti prāgvat, evamuttaratrāpi || 
18 ||

	kṛtaṃ vābhyadhikena

vyatītaguṇayogasya
mukhyadhyeyasya dhūrjaṭeḥ |
nāmāpi dhyāyatāṃ dhyānaiḥ
kimanyālambanaiḥ phalam || 19 ||

	dhūrjaṭe - mahādevasya, arthānugamaśūnyaṃ vastutaḥ 
tattvārthaniṣṭhaṃ dhūrjaṭyādināmāpi bhūyo bhūyaḥ cintitaṃ kiṃ kiṃ na 
sūte, ataḥ tadeva cintyatām | yadvakṣyati

	bhavatastvīśa nāmāpi mokṣaparyantasiddhidam |
iti | tathā

	yannāmnāpi mahātmānaḥ kīryante pulakāṅkuraiḥ |

iti evaṃ yannāmamātracintanamevābhilaṣitaṃ puṣṇāti, tadanyālambanaiḥ - 
tattadākāraviṣayaiḥ dhyānāntaraiḥ kiṃ prayojanam | uktaṃ ca 
śrīvijñānabhairave

	bhiyā sarvaṃ ravayati sarvado vyāpako'khile |
	iti bhairavaśabdasya santatoccāraṇācchivaḥ ||

(page  29)
 iti | śabdasyeti śabdamātre - bharaḥ, vastuto hi bhairavaśabdaḥ 
proktapūrṇārthavṛttiḥ ato yadi arthabhāvanāṃ vināpi yaḥ santatam 
uccārayati sa śiva eva bhavati, - paramantravat evamāderbhagavadvācakasya 
vācyaikātmyāt | kīdṛśasya dhūrjaṭeḥ ? vyatītaguṇayogasya - 
nistraiguṇyamahāprakāśātmatayā ākṛtyādyupādhiśūnyasya, ata eva 
mukhyadhyeyasya - brahmādibhiḥ sarvakāraṇaiḥ dhyeyairapi upāsyasya || 20 ||

	punarapi bhaktibharodrekollasitahṛdaya āha

namo namaḥ śivāyeti
mantrasāmarthyamāśritāḥ |
ślāghyāste śāmbhavīṃ bhūti -
mupabhoktuṃ ya udyatāḥ || 20 ||

śivāya - cidānandaikaghanaśreyorūpāya, namo

(page  30)
 namaḥ - iti avicchedenaiva punaḥ punaḥ 
śarīraprāṇapuryaṣṭakaśūnyātmakaṃ taddvāreṇa ca viśvaṃ juhumaḥ, 
ityevam, arthasatattve tanmantramāhātmyaṃ ye āsthitāḥ - anupraviṣṭāḥ, te 
śāmbhavīṃ vibhūtiṃ mahānandamayīm upabhoktuṃ - svātmābhedena 
camatkartum udyatāḥ ślāghyāḥ || 20 ||

	vayaṃ ca tādṛśā iti svātmanyeva amānāha, athavā 
nirbharabhaktibhājāmasmākam

kaḥ panthā yena na prāpyaḥ
kā ca vāṅnocyase yayā |
kiṃ dhyānaṃ yena na dhyeyaḥ
kiṃ vā kiṃ nāsi yatprabho || 22 ||

	kiṃ vā anena namo namaḥ śivāya ityādimantraparāmarśena, yato yat 
amitatvanmahāprakāśarūpaṃ na bhavati tat kiṃ, na kiñcideva | tena kaḥ 
tādṛśaḥ panthāḥ - kāyīyaḥ kriyākramo'sti,

(page  31)
 yena tvaṃ na prāpyo bhavasi | vāgapi sarvā tvadviṣayaiva | sarvaṃ 
manaḥsaṃkalpātmakaṃ dhyānamapi tvadālambanameva | ataśca aprayāsaṃ 
sarvadaiva tvanmayā jātāḥ smaḥ || 21 ||

	ata eva sarvadaśāsu

arcito'yamayaṃ dhyāta
eṣa toṣita ityayam |
rasaḥ srotaḥsahasreṇa
tvayi me bhava vardhatām || 22 ||

	śarīramanovāgvyāpāraiḥ sarvaireva māmakaiḥ yato bhagavatyeva 
viśramyate, tena ayam iti eṣa iti ca sarvadaśāsu prasphuran citparamārtho 
bhagavān yathākramam arcito dhyātaḥ paritoṣitaśca ityayaṃ rasaḥ - 
abhiniveśaḥ, tvadviṣaye mama yaḥ sthitaḥ sa śataśākhaḥ pravardhatām || 22 ||

	ataśca

(page  32)
				namo niḥśeṣadhīpatri -
mālālayamayātmane |
nāthāya sthāṇave tubhyaṃ
nāgayajñopavītine || 23 ||

	tubhyaṃ sthāṇave - avināśyamānaikarūpāya, namaḥ | kīdṛśāya ? - 
nāgo vāsukiḥ yajñopavītaṃ yasya tasmai, ittham ākṛtimattve'pi

	citraṃ yaccitradṛṣṭo'si manorathagato'pi vā |
	paramārthaphalaṃ nātha paripūrṇaṃ prayacchasi ||

iti sthityā pūrṇa eva bhagavān ityāha - niḥśeṣāṇāṃ - 
śivādikīṭāntānāṃ, niḥśeṣāśca yā dhiyaḥ saṃvidaḥ, tā eva 
cāñcalyāt patrimālāḥ pakṣipaṅktayaḥ, tāsāṃ yo layaḥ - 
pūrṇāhantātmani viśrāntiḥ, tanmaya ātmā yasya tasmai, sthāṇuśca 
jaradvṛkṣakalpaḥ pakṣivargālayayukto bhavati || 23 ||

	etannamaskṛtisamucitāṃ prārthanāmāha

(page  33)
				 ajñānatimirasyaika -
mauṣadhaṃ saṃsmṛtistava |
bhava tattatpradānena
prasādaḥ kriyatāṃ mayi || 24 ||

	ajñānaṃ - śivaikyākhyātireva, timiraṃ - 
parapratibhācakṣurāvārakatvena dvaitapradarśako doṣaḥ, tasya 
cidghanasvarūpavimarśātmā tvatsmṛtireva ekam auṣadhaṃ - praśamopāyaḥ, 
tasmāt tatpradānena - tadekāgramayatvāpādanena, prasādaḥ kriyatām - 
akhyātikāluṣyapraśamanena nairmalyam āśrīyatām || 24 ||

	punarapi bhaktibharāviṣṭa etatprasādasaṃbhāvanocitāṃ stutimāha

nama īśāya niḥśeṣa -
puruṣārthaprasādhakaḥ |
praṇantavyaḥ praṇāmo'pi
yadīya iha dhīmatām || 25 ||

(page  34)
 dhīmatāṃ - tattvavidāṃ, yadīyaḥ - prāgvyākṛtasamāveśātmā 
praṇāmo'pi, niḥśeṣasya bhogāpavargātmanaḥ puruṣārthasya 
saṃpādakatvāt tathā alaṅkārakatvāt praṇantavyaḥ - prahvatayā 
samāśrayaṇīyaḥ, bhūyobhūyaḥ tasmai īśāya - evaṃ 
vidhālaukikasvātantryāya namaḥ || 25 ||

	yuktaṃ ca etat

magnairbhīme bhavāmbhodhau
nilaye duḥkhayādasām |
bhakticintāmaṇiṃ śārvaṃ
tataḥ prāpya na kiṃ jitam || 26 ||

	duruttarakleśamaye saṃsārābdhau, duḥkhāni - 
ādhibhautikādyupatāpā eva yādāṃsi - makarādayaḥ, teṣām āspade 
magnaiḥ - niravaśeṣaṃ bruḍitaiḥ, tata eva tanmadhyādeva, śārvaṃ - 
śarvasya viśvaśaraṇavaraṇasya sambandhinaṃ bhakticintāmaṇiṃ 
tadicchayaiva

(page  35)
 labdhvā - akasmādeva prāpya, kiṃ yat kleśādi na jitaṃ - na 
abhibhūtaṃ | kiṃ yacca bhogāpavargādi na jitaṃ - na prāptaṃ, sarvam 
abhīṣṭaṃ jhagiti labdhameva ityarthaḥ | tathā ca nandimahākālādīnāṃ 
tattadabhīṣṭāvāptiḥ āgameṣu śrūyate || 26 ||

	bhaktireva ca bhagavattattvaparijñāne hetuḥ, na anyat ityāha

nirāvaraṇanirdvandva -
niścalajñānasaṃpadām |
jñeyo'si kila ke'pyete
ye tvāṃ jānanti dhūrjaṭe || 27 ||

	kila iti āgame - evaṃ kila āmnāyeṣu ucyate, āvaraṇāt - 
akhyātyātmano niṣkrāntā nirdvandvā - paramādvaitarūpā, niścalā ca 
akampā jñānasampat yeṣāṃ teṣāmeva, dhūrjaṭe ! jñeyo bhavasi - 
svaprakāśatayā sphurasi, ataḥ ke'pi ete - lokottarā

(page  36)
 eva ete mahātmānaḥ, ye tvāṃ paśyanti - svābhedena sphurantaṃ 
pratyabhijānanti || 27 ||

	tataśca

nirguṇo'pi guṇajñānāṃ
jñeya eko jayatyajaḥ |
niṣkāmo'pi prakṛtyā yaḥ
kāmanānāṃ paraṃ phalam || 28 ||

	proktajñānātmakaguṇāvabhāsinām, ekaḥ - advitīyaḥ, ajaḥ - anādiḥ, 
nirguṇo'pi - sattvādiguṇāspṛṣṭamūrtirapi, jñeyo - jñātuṃ śakyaḥ 
svābhedena sphurati | tathā paripūrṇānandanirbharatvāt kāmebhyaḥ - 
kāmanābhyo niṣkrānto'pi, prakṛtyā - vastusaundaryeṇa, sarvāsāṃ 
kāmanānāṃ, paraṃ - pūrṇaṃ phalaṃ | sarvā hi kāmanāḥ 
tattadbhogātmakaphalayoginyo'pi bhoktṛcamatkārapramukhaṃ 
pāryantikaparamānandābdhau paryavasyanti | taduktamasmatprabhupādaiḥ

(page  37)
		phalaṃ kriyāṇāmatha vā vidhīnāṃ
		paryantatastvanmayataiva deva |
phalepsavo ye punaratra teṣāṃ
mūḍhā sthitiḥ syādanavasthayaiva ||

iti | apiśabdau virodhaṃ vyaṅktaḥ || 28 ||
ayamapi bhagavata eva asāmānyaḥ prakarṣa ityāha

śrīratnāmṛtalābhāya
kliṣṭaṃ yatra na kaiḥ suraiḥ |
tatkṣīrodadamaiśvaryaṃ
tavaiva sahajaṃ vibho || 29 ||

	yatra - kṣīrode, lakṣmyāḥ kaustubhapārijātādīnāṃ ratnānām 
amṛtasya ca lābhāya, upendrādibhiḥ kaiḥ suraiḥ na kliṣṭaṃ - sarvaireva 
kadarthanā anubhūtā | tasya tādṛśasya āścaryanidheḥ kṣīrodasya 
pradāyakamaiśvaryaṃ, he vibho ! tavaiva sahajam, anyasya tu 
ārādhanāsahasrairapi 

(page  38)
 na upārjanīyaṃ bhavati, bhavataiva upamanyumunaye kṣīrodasya 
vitaraṇāt || 29 ||

	ataśca

namo bhaktyā nṛṇāṃ muktyai
bhavate bhava te'vate |
smṛtyā nutyā ca dadate
śaṃbhave śaṃ bhave'bhave || 30 ||

	he bhava ! te - tubhyaṃ, śaṃbhave namaḥ | kīdṛśāya? bhaktyā 
upalakṣitānāṃ nṛṇāṃ muktyai bhavate - nijaprathaikātmyamuktirūpatayā 
sphurate | tathā smṛtyā upalakṣitānām avate - sarvabhayebhyo rakṣāṃ 
kurvate | tathā nutyā - stutyā hetunā upamanyumaruttaprabhṛtibhya iva bhave 
saṃsāre śaṃ bhogasaṃpadrūpaṃ śreyaḥ, abhave - abhavanimittaṃ dadate, 
mokṣaparyavasitaṃ bhogaṃ prayacchate ityarthaḥ || 30 ||

	na kevalaṃ mumukṣūṇām ārtātāṃ bubhukṣūṇāṃ

(page  39)
 ca tvayā abhīṣṭaṃ saṃpādyate yāvat jīvanmuktikāmanāmapi ityāha

sarvajñaḥ sarvakṛtsarva -
masīti jñānaśālinām |
vedyaṃ kiṃ karma vā nātha
nānantyāya tvayārpyate || 31 ||

	sarvajñaḥ sarvakartṛsvabhāvaḥ tvameva cidātmā sarvamasi, - iti 
īdṛśena jñānena ye śālante teṣāṃ yat vedyaṃ - jñeyaṃ, karma - kāryaṃ 
kriyārūpaṃ vā, kiṃ tādṛgasti ? yat tvayā ānantyāya na arpyate, sarvameva 
eṣāṃ vaiśvātmyena darśyate ityarthaḥ | evaṃ ca sarvatra 
sarvātmakamāheśvaryaprathā jīvanmuktiḥ || 31 ||

	alaṃ vā pārameśvaraprasādānām iyattayā, yataḥ


(page  40)
 			icchāyā eva yasyeyat
phalaṃ lokatrayātmakam |
tasya te nātha kāryāṇāṃ
ko vetti kiyatī gatiḥ || 32 ||

	icchāmātreṇa yo bhavābhavātibhavātmakaṃ lokatritayaṃ vidhatte, 
tasya kāryāṇāṃ - prayatnanirvartyānāṃ vastūnāṃ, kiyatī - kiṃ - 
paricchedā, gatiḥ - prasṛtiḥ, iti etat ko vetti, na kaścit | atarkyameva etat, - 
ityatiśayoktiparametat, na bhagavato yatnanirvartyatvaṃ kiñcit | paśya mṛgo 
dhāvati itivat vākyārthasya atra karmatā || 32 ||

	na kevalaṃ tvadīyaḥ kāryasphāro jñātumaśakyaḥ, yāvat tava 
aiśvaryātmakajñānamahimāpi ityāha

brahmādayo'pi tadyasya
karmasopānamālayā |
uparyupari dhāvanti
labdhuṃ dhāma namāmitam || 33 ||

(page  41)
	 brahmaviṣṇurudrādayo'pi yasya tat acintyaṃ dhāma - padaṃ labdhuṃ, 
karmasopānamālayā - tattadanudhyānādyanuṣṭhānaparamparābhiḥ, 
uparyupari - iti uttarottaraprayatnādhikyena adhikaprakarṣavāñchayā dhāvanti, 
na kāmapi viśrāntiṃ bhajante | nahi sarvasāmānye pārameśvare pade kaścit 
prakarṣāpakarṣayogaḥ - iti uttarottaraprakarṣābhilāṣukaiḥ kathaṃ tat 
prāpyate - iti jñānamāhātmyamapi māheśvaramaparicchedyameva || 33 ||

	kiṃ ca tacchaktereva imā bhaṃgyo, - yadete brahmādaya ityāha

ayaṃ brahmā mahendro'yaṃ
sūryācandramasāvimau |
iti śaktilatā yasya
puṣpitā pātvasau bhavaḥ || 34 ||

ayaṃ brahmā, - iti viṣṇurudreśasadāśivaśivān

(page  42)
 upalakṣayati, tena tattatsṛṣṭisthityādimitakāryakāriṇo ye 
brahmādayaḥ, yaśca mahendraḥ surādhipatye sthitaḥ, yau ca jagataḥ 
prakāśāpyāyanādivyāpārakāritvena sthitau sūryācandramasau, iti - 
evaṃprakāram anyadapi yatkiṃcit mahāvibhūtiyuktaṃ, tatsarvaṃ yasya 
śaktiḥ - sāmarthyarūpā latā iva, puṣpitā - saṃjātapuṣpamātratayā 
sphuritā na tu phalitā, sarvasya puṣpakalpasya parameśvarābhedaprāptireva 
lokottaracamatkāramayī phalam | yathoktaṃ śrīpūrvaśāstre 
samāveśacarcāyām

	saṃvittiphalabhedo'tra na prakalpyo manīṣibhiḥ |

iti | yasya ca evaṃ śaktilatā puṣpitā, sa pūrvavyākhyātasatattvo bhavaḥ 
pātu, - asmāt mitabrahmādyupāsāsaṃkalpasaṃparkāt rakṣatu | stutaṃ ca 
mayā

	sarvajñāḥ sarvakartāro brahmādyā bhuvaneśvarāḥ |
	yatraite budbudāyante bodhābdhiṃ taṃ śivaṃ stumaḥ ||

iti || 34 ||

(page  43)
 taditthaṃ mahāvyāpakasya

bhramo na labhyate yasya
bhrāntāntaḥkaraṇairapi |
dūragairapi yasyānto
durgamastaṃ stumo mṛḍam || 35 ||

taṃ mṛḍaṃ - paramānandamayaṃ maheśvaraṃ, sthumaḥ - samā viśāmaḥ | 
kīdṛśaṃ ? - yasya bhrāntāntaḥ karaṇaiḥ - cirakālaṃ 
paramamahattvabhāvanāyogaprakarṣeṇa anviṣyadbhirapi, bhramo - 
vaipulyābhogo na labhyate | tathā dūragairapi - ativiprakṛṣṭam adhvānaṃ 
bhāvanākrameṇa gacchadbhirapi yasya antaḥ - dairghyaparisamāptiḥ, 
kālakṛtā pūrvāparakoṭiśca na labhyate - nirākṛtitvena deśakālāyogāt, ata 
eva ākṛtimattvena bhagavadanveṣaṇaparā bhrāntāntaḥkaraṇā uktāḥ | kiṃ 
ca pralayāvasare jalamadhye svecchāvabhāsitajvālārūpākṛtimato'pi yasya 
brahmaviṣṇuprabhṛtibhiḥ tāttvikatadīyamāhātmyāparyālocanayā

(page  44)
 bhrāntacittaiḥ anviṣyadbhiḥ paricchedo na labdhaḥ, iti 
paurāṇiko'pyarthaḥ anena spṛṣṭaḥ | api ca yasya saṃbandhī bhramo'pi 
mahāmāyātmāna labhyate - na paricchidyate | sarva eva hi 
brahmaviṣṇurudrādyā māyāvimohitāḥ, tata eva bhrāntāntaḥ - 
karaṇairityuktaṃ | yatra etadīyamāyāśaktirapi na labhyate - na paricchidyate, 
tatra sa kathaṃ paricchedyaḥ syāt iti | dūragairapi - 
ṣaḍadhvadhārādhirūḍhairapi anāśritādibhiḥ, yasya antaḥ | paricchedo 
durgamo na labhyata eva || 35 ||

	yastu bhaktiśālī sa sarvāvasthāsu bhagavadabhedāvaṣṭambhamaya eva 
ityāśayena āha

namaḥ stutau smṛtau dhyāne
darśane sparśane tathā |
prāptau cānandavṛndāya
dayitāya kapardine || 36 ||

kapardine - mahādevāya, dayitāya - paramavallabhāya

(page  45)
 namaḥ, kīdṛśāya ? stutau - nāmagrahaṇe, smṛtau - tadarthabhāvane, 
dhyāne - tadekatānatātmani cintane, darśane - tadanantarabhāvini 
sākṣātkāre, sparśane - tadviśrāntau, prāptau - tadaikātmyalābhe; yadvā 
sarvasya bhagavanmayatvāt sarvadā sarvendriyavṛttiṣu 
svarūpaviśrāntyātmikāyāṃ prāptau ca ānandavṛndāya - 
parāhlādasphārarūpāya | laukiko'pi dayitaḥ stutyādiṣu prāptiparyanteṣu 
krameṇa adhikādhikaṃ sukhayati, parameśvarastu sarvatra 
anyūnādhikaparipūrṇānandamaya eva | - iti arthaśaktimūlovyatirekadhvaniḥ 
|| 36 ||

	yataśca sarvadaśāsu ānandavṛndātmakamaheśvaramayataiva sphurati, 
tataḥ

kiṃ smayeneti matvāpi
manasā parameśvara |
smayena tvanmayo'smīti
māmi nātmani kiṃ mudā || 37 ||

(page  46)
 tattatsṛṣṭyādikāribrahmādipade'pi vināśini, yaḥ smayo - garvaḥ, tena 
kiṃ na kiṃcit iti manasā matvāpi - niścityāpi, he parameśvara, - 
viśvātiśāyin, tvatsvarūpapratyabhijñāvaśonmiṣitena tvanmayo'smi iti 
smayena - mahābhimānātmanā, yā mut - harṣaḥ, tayā, kim ahamasminneva 
ātmani māmi na - api tu māmi, - paripūrṇatayā sphurāmi eva ityarthaḥ | 
yadvā sarvābhimānān jahadapi ahaṃ tvanmayo'smi iti smayena janitayā 
mudā kathamiva īdṛk kṛto, yat ātmanyeva na māmi - na varte || 37 ||

	evaṃvidhābhimānenāpi tvayyeva viśrāmyāmi ityāha

cintayitvāpi kartavya -
koṭīścittasya cāpalāt |
viśrāmyanbhava bhāvatka -
cittānande rame bhṛśam || 38 ||

(page  47)
 svābhāvikāt cittacāñcalyāt

	idamadya mayā labdhamimaṃ prāpsye manoratham |
	yakṣye dāsyāmi modiṣye--------------------------------||

ityādikā nirvirāmapravṛttāḥ kartavyaparamparāḥ cintayitvā - saṃkalpyāpi,

	ata eva yathābhīṣṭasamullekhāvabhāsanāt |
	jñānakriye sphuṭe eva siddhe sarvasya jīvataḥ ||

iti pratyabhijñānirṇītavastutattvaparāmarśadiśā, he bhava, 
bhāvatkacittānande - tvaccaitanyameva paripūrṇa ānandaḥ, tatra viśrāmyan, 
ahaṃ bhṛśaṃ rame, bāhyaparyantamapi viśvaṃ tvadānandarasaplutameva 
anubhavan sthitaḥ | yathoktaṃ pratyabhijñāyām

	sarvo mamāyaṃ vibhava ityevaṃ parijānataḥ |
	viśvātmano vikalpānāṃ prasare'pi maheśatā ||

iti | prathamaśloke vikalpātmakacittapraśamanakrameṇaiva 
paratattvapraveśopāyo ya uktaḥ, tato'yaṃ sātiśaya upāyo - vyutthānamapi 
samādhirasaplutameva

(page  48)
 karoti iti bhṛśaṃ rame - iti ukterāśayaḥ kevalaṃ tadupāyakrameṇa 
ayamupāyaḥ prarohamāsādayati - iti tathaiva iha stotrakāreṇa krameṇoktaḥ | 
cito bhāvaḥ cittā, cintā iti apapāṭhaḥ || 38 ||

	na ca itthaṃ vimṛśyamāno'pi prameyabhāvameti ityāha

	sūkṣmo'si cettrilokīyaṃ
kalāmātraṃ kathaṃ tava |
sthūlo'tha kiṃ sudarśo na
brahmādibhirapi prabho || 39 ||

	yat pūrvaṃ

	praṇavordhvārdhamātrāta--------------------------|

iti ślokena uktaṃ, tatra idaṃ tattvaṃ - yat parameśvaraḥ parapramātrekarūpo 
na kadācit prameyatāmeti, anyathā atyantāṇurūpasya kathamiyaṃ 
bhavābhavātibhavarūpā trilokī asya kalāmātraṃ - parimitāṃśarūpā 
syāt, sthūlatve tu brahmādiśivāntaiḥ na

(page  49)
 durlakṣyaḥ syāt aindriyakapratyakṣeṇaiva taṃ viṣayīkuryuḥ, na tu 
tadanveṣaṇakāndiśīkāḥ syuḥ, yataḥ sarvathaiva aparicchedyaḥ 
sarvasarvātmakacidekamūrtiḥ parameśaḥ tataḥ sarvaśāstrāṇi tatraiva 
pariniṣṭhitāni - iti tadvicāraparā vayaṃ yuktakāriṇa eva || 39 ||

	anyathā

vācya eṣāṃ tvameveti
nābhaviṣyadidaṃ yadi |
kaḥ kleśaṃ deva vāgjāle -
ṣvakariṣyatsudhīstadā || 40 ||

vāgjālāni - nigūhitatāttvikatvatsvarūpatāmiva darśayantaḥ 
śāstrakallolāḥ, vastutastu śabdarāśiśarīramayatvāt 
tāttvikatvatsvarūpaviśrāntānyeva, ato yadi etat nābhaviṣyat - na 
pratyabhijñāsyata, tat ka iva sudhīḥ - prāmāṇikaḥ, etadvicāre kleśaikaphale 
prāvartsyata || 40 ||

(page  50)
 yadyapi vastuto viśvamayastvaṃ, tathāpi etatsvarūpasākṣātkārayitrā 
upadeśena mama prasādaḥ kriyatāṃ - nairmalyamāsthīyatāṃ, yataḥ 
tvatprasādaṃ vinā na kenāpi dhyānadhāraṇādikriyākrameṇa 
tīkṣṇavicārarūpayā kayācidapi vā buddhyā tvaṃ sākṣātkāryaḥ, pratyuta 
sarvakriyābuddhipratyastamaya eva tvatsvarūpaṃ bhāti - iti 
tatpratyastamayo'yamuktapūrvaḥ prasādaḥ kriyatāmityetadāha

krameṇa karmaṇā kena
kayā vā prajñayā prabho |
dṛśyo'sītyupadeśena
prasādaḥ kriyatāṃ mama || 41 ||

	spaṣṭam || 41 ||

	evaṃ prārthanānantaramapi labdhatatsākṣātkāro vyutthāne'pi 
tatsaṃskārārūṣite tatsvarūpaṃ stotumāha

(page  51)
 			namo nirupakāryāya
trailokyaikopakāriṇe |
sarvasya spṛhaṇīyāya
niḥspṛhāya kapardine || 42 ||

	vyatiriktasya upakartuḥ upakārasya vā abhāvāt nirupakāryāya - 
anupakāryāya, ata eva spṛhaṇīyābhāvāt niḥspṛhāya, kapardine - jaṭine, 
etaccābhidhānaṃ niḥspṛhatvaucityena upāttam | evam anupakāryāya 
aspṛhāyāpi ca sarvasya abhīṣṭasaṃpādanena trailokyaikopakāriṇe, ata eva ca 
spṛhaṇīyāya - niṣkāraṇameva svasvarūpanirmalībhāvāpādanena 
asmadanugrahītre tubhyameva, śarīrādi juhumaḥ - iti anena 
lokottarotkarṣavattvaṃ bhagavata uktam || 42 ||

	itthaṃ bhaktisaṃpūrṇamātmānaṃ sāmānyoktyā ślāghamāna āha

(page  52)
 			aho kṣetrajñatā seyaṃ
kāryāya mahate satām |
yayānantaphalāṃ bhaktiṃ
vapanti tvayyamī prabho || 43 ||

	he svāmin, satām - anugṛhītānām, aho - āścaryaṃ, kṣetrajñatā - 
puruṣatā | atha ca kṣetrajñatā - sarvakleśasaṃsaraṇatrāṇahetubhūtaṃ 
tvāṃ kṣetraṃ prati jñatā - boddhṛtā sā iyam iti svātmani 
upalabdhaprabhāvā, mahate - tvadabhedāya, kāryāya - prayojanāya, yayā 
kṣetrajñatayā hetunā, amī santo bhaktiṃ - sevāṃ, 
vyatiriktaphalavāñchātyāgena tvayi kṣetre vapanti -bījavat rohayanti | 
kīdṛśīṃ bhaktim ? - anantam - aparicchinnaṃ tvatkṣetravāpādeva 
tvadaikyāvāptirūpaṃ phalaṃ yasyāṃ tām || 43 ||

	evam īdṛśyāṃ tvatsvarūpanidhānaprāpiṇyāṃ bhaktau na 
prarohayanti ye, te tvanmāyayaiva vyāmohitā 

(page  53)
 ityāha

mahatīyamaho māyā
tava māyinyayāvṛtaḥ |
tvaddhyānanidhilābhe'pi
mugdholokaḥ ślathāyate || 44 ||

	mahatī - duratikramā, māyā - akhyātiḥ, māyin, - svarūpagopanapara, 
yayā svarūpagopanasatattvayā āvṛta ācchāditatattvadṛṣṭirmugdhaḥ - 
tattvāvivekī janaḥ ślathāyate - tvadbhaktau prāptāyāmapi na tanmayībhavati 
|| 44 ||

	taditthaṃ sarvatra tvameva kartā ityāha

ārambhe bhava sarvatra
karma vā karaṇādi vā |
viśvamastu svatantrastu
kartātatraikako bhavān || 45 ||

(page  54)
 he bhava, sarvatra - śivādikīṭāntapramātṛsaṃbandhini ārambhe - 
vyāpāre, yatkiñcit kartṛkaraṇādirūpamiva ābhāti, tatsarvaṃ karma vā 
tavaiva svatantrasya kartuḥ avabhāsanātmanā kriyayā tathā ābhāsitatvena 
kāryaṃ bhavatu | yadi vā tvayaiva mitakriyāsādhakatamatvādinā 
avabhāsitatvāt karaṇādi tadastu, sarvatra punaratra 
nānākārakavaicitryātmanā sphuratyapi tvameva ekaḥ - anyānapekṣaḥ 
svatantraḥ kartā; anyastu tvadābhāsyatvādeva asvatantraḥ - iti kathaṃ kartā 
syāt | yattu brahmādīnāṃ sṛṣṭyādau kartṛtvaṃ, tat teṣā 
tvadutthāpitatattadabhimānamātratattvam | yaduktaṃ śrīvidyādhipatinā

	uttarottaramavagrahaiḥ padaṃ
	paśyato'pyadharamuttarasya yaḥ |
	sādhanasya nijabhāvanāgraho
	heturatra bhavato marīcayaḥ ||

iti || 45 ||

(page  55)
 yata evam - ataḥ,

triguṇatriparispanda -
dvandvagrastaṃ jagattrayam |
uddhartuṃ bhavato'nyasya
kasya śaktiḥ kṛpātha vā || 46 ||

	trayāṇāṃ sattvādiguṇānāṃ yaḥ prakāśapravṛttisthityātmā 
trividhaḥ parispandaḥ, tadrūpāṇi yāni dehaprāṇapuryaṣṭakagatāni 
śītoṣṇakṣuttṛṣṇāsukhaduḥkharāgadveṣajananamaraṇānidvandvāni, taiḥ 
grastam - ātmasātkṛtaṃ jagattrayaṃ - jāgarasvapnasuṣuptāviṣṭaṃ 
jantucakraṃ, taduddhartuṃ - turyaturyātītapadam avalambayituṃ, tavaiva 
ācāryasya mantramantreśvarādibhūmiṣu māhātmyavyañjikā śaktiḥ - 
sāmarthyaṃ kṛpāpi vā - anujighṛkṣātmā, nānyasya kasyāpi kadāpi | 
taduktam

	ācāryadehamāsthāya śivaḥ pāśānnikṛntati |

iti |

(page  56)
 -----------------------śatamaṣṭādaśottaram |
	anugṛhya śivaḥ sākṣānmantreśatve niyuktavān ||

iti || 46 ||

	evaṃ tvadaikyabhāvanābhāvābhāvāveva guṇadoṣau ityāha

doṣo'pi deva ko doṣa -
stvāmāptuṃ yaḥ samāsthitaḥ |
guṇo'pi ca guṇaḥ ko nu
tvāṃ nāptuṃ yaḥ samāsthitaḥ || 47 ||

	he deva, viśvakrīḍādipara, viṣayatṛṣṇāvānapi yaḥ 
tvadaikadhyavimarśamayaḥ sa guṇavāneva; yastu 
pāṇḍityavairāgyādiguṇayukto'pi na tvadvimarśasāraḥ sa doṣī 
śocyaprajña eva, samāsthitaḥ - samyak abhedāpattyā ā samantāt sthitaḥ - 
abhiniviṣṭaḥ || 47 ||

(page  57)
 ataśca

rāgo'pyastu jagannātha
mama tvayyeva yaḥ sthitaḥ |
lobhāyāpi namastasmai
tvallābhālambanāya me || 47 ||

	tvayyeva, na tu tvayi ca phale ca | nama ityanena bhagavadbhaktyudrekameva 
draḍhayati | rāgaḥ - spṛhā, lobhaḥ - sarvasvavat parirakṣaṇaṃ, tvallābho - 
bhavatsamāveśaḥ, ālambanaṃ - viṣayo yasya || 47 ||

	īdṛgrāgalobhātmā tvadbhāvanā viśvamuddharati - ityāha

aho mahadidaṃ karma
deva tvadbhāvanātmakam |
ābrahmakrimi yasminno
muktaye'dhikriyeta kaḥ || 48 ||

(page  58)
 vaidikajyotiṣṭomādibhāvanātmake karmaṇi svargaprade dvija eva 
adhikṛtaḥ, tvadbhāvanātmake karmaṇi tu ā prajāpateḥ krimyantaṃ 
tvadicchayaiva muktyarthaṃ viśvam adhikāri kṛtam, iti arthaśaktyā 
vyatirekadhvaninā apratihataṃ svātantryaṃ bhagavatā vyañjayatā 
adbhutaraso dhvanyate || 48 ||

	kiṃ ca

ārambhaḥ sarvakāryāṇāṃ
paryantaḥ sarvakarmaṇām |
tadantarvṛttayaścitrā -
stavaiveśa dhiyaḥ pathi || 49 ||

	he īśa - svatantra, tvatsaṃvideva sarveṣāṃ 
bhogāpavargādikāryāṇāṃ tadvyāpārāṇāṃ ca 
prārambhasamāptimadhyāni vetti || 49 ||

	yadyapi tvatsaṃvit viśvamābhāsayati, tathāpi

(page  59)
 tadābhāsitāyā bhakteḥ ko'pi mahimā asti ityāha

yāvaduttaramāsvāda -
sahasraguṇavistaraḥ |
tvadbhaktirasapīyūṣā -
nnātha nānyatra dṛśyate || 50 ||

	yadyat uttaraṃ yāvaduttaraṃ, he nātha - prārthanīyasvarūpa, 
samāveśātmā yaḥ tvadbhaktirasaḥ, sa eva paramānandamayatvāt pīyūṣaṃ, 
tato'nyatra na kvāpi yāvaduttaraṃ kramātkramam āsvādānāṃ - 
camatkārāṇām ānandasandohānāṃ, sahasraguṇo - niḥ saṃkhyo, vistaro - 
vistāro dṛśyate, tvadbhaktireva uttarottaraṃ prakṛṣṭāḥ paramānandasaṃpado 
vitarati | āsvādya ityapapāṭhaḥ | vistara iti aśabdaviṣayaḥ śabdaḥ cintyaḥ, 
prathane vāvaśabde

(page  60)
 yata evaṃ, tena

upasaṃhṛtakāmāya
kāmāyatimatanvate |
avataṃsitasomāya
somāya svāmine namaḥ || 51 ||

	saha umayā devyā - svātantryaśaktyā vartate yaḥ svāmī - cidātmā 
maheśvaraḥ, paraśaktirūpanijottamāṅgasaṃgamitasamastameyacandraḥ ata 
eva vyatiriktārthanīyārthābhāvāt upa - samīpe ātmanyeva saṃhṛtakāmaḥ - 
svānandacamatkāranityatṛptaḥ, ata eva paripūrṇatvāt sarvām āyatiṃ - 
mūrtikriyāvaicitryavistṛtiṃ tanvan - nityaṃ svātmani prathayan yaḥ, tasmai 
namaḥ, iti āntareṇa krameṇārthaḥ |

	bāhyena tu tagdhamanmathāya, āyatim āgāminaṃ śubhaṃ kālaṃ, 
kailāsādiṣu nityapravartamāna -

(page  61)
 pramodanirbharakrīḍāmayaṃ lokottaraprabhāvaṃ vistārayitre, 
umādehārdhadhāriṇe, dhṛtacandrakalābharaṇāya nama ityarthaḥ | 
manmathadāhino'pi ca 
ālambanoddīpanavibhāvasaṃpūrṇāsāmānyaśṛṅgāraniviṣṭatvam iti 
ākṛtimattve'pi atidurghaṭamaiśvaryamuktam |

	atha ca upasaṃhṛtāḥ - bhaktimataḥ paripūrṇasvarūpaprathanena 
praśamitāḥ, sarve kāmā - abhilāṣāḥ yena, tata eva ca kām āyatim atanvate - 
sarvaṃ kālaṃ mokṣalakṣmīsamāśleṣamayaṃ darśayitre, svāmine nama iti 
ayamapi asyārthaḥ || 51 ||

	evaṃ tāvat bhaktidraviṇaparirakṣāpravaṇa evāsmi, tathāpi tu yadi 
vaśinaste māyāśaktiḥ māṃ vismṛtasvarūpaṃ madhye karoti, tat

kimaśaktaḥ karomīti
sarvatrānadhyavasyataḥ |
sarvānugrāhikā śaktiḥ
śāṅkarī śaraṇaṃ mama || 52 ||

(page  62)
 krīḍāmayamaheśvaramāyāśaktyā kayācit vyutthānadaśāyāṃ 
vyāmohitatvāt aśaktaḥ kim ahaṃ karomi, na kiṃcit iti sarvatra 
śarīramanovāgvyāpāreṣu anadhyavasyataḥ - kutrāpi adhyavasāyam 
agṛhṇataḥ parameśvaraniyogataḥ kāndiśīkasya mama 
parādvayaprathātmakaśreyaskaraṇāt śaṃkarasya sambandhinī śaktiḥ 
sarvānugrahaikaprayojanā śaraṇaṃ, saiva māṃ punarudbodhayiṣyati 
ityarthaḥ || 52 ||

	na caivaṃ vaktavyaṃ śaṃkaro'nugrahaikaprayojanaḥ, anyastu kaścit 
īśvaro mohako bhaviṣyati iti, yataḥ

guṇātītasya nirdiṣṭa -
niḥ śeṣātiśayātmanaḥ |
labhyate bhava kutrāṃśe
paraḥ pratinidhistava || 53 ||

(page  63)
 he bhava - prakāśaikātmanā rūpeṇa nityāvasthita, sattvādiguṇayogāt 
māyāpramātṝṇāṃ nānātā bhavati, tvaṃ tu guṇātītaḥ 
svatantracidekamūrtiriti, tādṛśasya tava aṃśamātre'pi kaḥ pratinidhiḥ- 
tulyaḥ asti, cito bhedakasya kasyāpi abhāvāt | ataḥ kathaṃ 
paripanthakeśvarāśaṃkā, ata eva parameśvaraḥ

	---------------svatantrastu kartā tatraikako bhavān |

ityādinā nirdiṣṭaniḥśeṣātiśayātmā pratipāditasakalotkarṣasvabhāvaḥ | 
nirmṛṣṭeti pāṭhe samutpuṃsitasarvātiśayaḥ 
mahāsāmānyacidekamātrarūpa ātmā yasya iti yojyam || 53 ||

	ataśca tavaiva vaśino māyayā kvacit vyutthāne vyāmohyamānā 
tvatprakāśāya tvāmeva tāraṃ krandāmaḥ, yadāha

nirdvandve nirupādhau ca
tvayyātmani sati prabho |
vayaṃ vañcyāmahe'dyāpi
māyayāmeyayā tava || 54 ||

(page  64)
 he prabho - dāsavatsala, nirdvandve - paramādvayarūpe, tathā 
deśakālākārebhyaḥ upādhibhyo niṣkrānte tvayi mahādeve, na tu 
puryaṣṭakādirūpe ātmani sati tathātvena niścitya niṣṭhāpite'pi vayam 
adyāpi īdṛśīṃ prabodhadhārām adhirūḍhā api, tava vaśinaḥ ameyayā 
māyayā vañcyāmahe - manāṅmātraṃ dehapramātṛtāsaṃskāreṇa na 
tyajyāmahe, ataḥ svāmin, tavaivaitadviditaṃ kṛtyaṃ, tvaṃ tathā kuru - yathā 
ayaṃ māyāsaṃskāro'pi asmākaṃ tvaddāsānāṃ śāmyati | taduktaṃ 
mayāpi svastotre

	unmūlitāpi śataśo dalitāpi sahasraśaḥ |
	gonāsevāprathodeti drāgatra śaraṇaṃ śivaḥ ||

iti || 54 ||

	na caitatpraśamanaṃ durāsadam, yataḥ

aṇimādiguṇāvāptiḥ
sadaiśvaryaṃ bhavakṣayaḥ |
amī bhava bhavadbhakti -
kalpapādapapallavāḥ || 55 ||

(page  65)
 aṇimādyavāptiḥ brahmādīnāṃ, sadaiśvaryaṃ sadāśivādīnāṃ, 
bhavakṣayaḥ śuddhātmanām, ityete tvadbhaktikalpavṛkṣasya pallavāḥ, na tu 
kusumāni phalāni vā, kusumaṃ hi asya tvacchaktimayatvaṃ, phalaṃ tu 
tvanmayataiva, yataśca bhavakṣayaḥ tvadbhakteḥ pallavaḥ, tato 
bhavadbhaktibhājāmasmākaṃ tvatprasādāt māyāsaṃskāro'vaśyaṃ 
naṅkṣyati ityāśayaśeṣaḥ | uktaṃ ca vijñānabhairave

	bhaktyudrekādviraktasya yādṛśī jāyate matiḥ |
	sā śaktiḥ śāṅkarī nityaṃ bhāvayettāṃ tataḥ śivaḥ ||

iti || 55 ||
	evaṃ bhaktyudrekeṇa uttejito galitaniḥśeṣadehasaṃskārāṃ 
maheśvaratanmayatāmeva āśaṃsan āha

yā yā diktatra na kvāsi
sarvaḥ kālo bhavanmayaḥ |
iti labdho'pi karhi tvaṃ
lapsyase nātha kathyatām || 56 ||

(page  66)
 diśyate iti dik deśaḥ, yaḥ kaścit mūrtyātmā deśaḥ, kriyātmā vā 
kālaḥ, sa sarvaḥ cetya mānatvāt cidekātmaiva ityanena nyāyena labdho'pi - 
āsādito'pi viśvamayaḥ tvaṃ, karhi - kadā, lapsyase - 
galitasūkṣmatamadehasaṃskārakalāvighnaṃ tvadātmasadbhāvaṃ kadā 
āpsyāmaḥ - ityetat nātha - svāmin, dāsānām ādeśyatām | iti 
gāḍhaparicayapraṇayanirbharoktiḥ || 56 ||

	punarbhaktibhareṇa namaskartumāha

namaḥ prasannasadvṛtta -
mānasaikanivāsine |
bhūribhūtisitāṅgāya
mahāhaṃsāya śaṃbhave || 57 ||

	śaṃbhave mahāhaṃsāya namaḥ, haṃsatvaṃ prāgvat, mahattvaṃ tu 
sarvakṣetrajñarudrāpekṣayā, sarva eva hi pramātāraḥ 
svocitasargasaṃhārarūpahānasamādānadharmatvāt haṃsāḥ, śaṃbhustu 
teṣāmapi sargasaṃhārakṛt

(page  67)
 iti mahāhaṃsaḥ | ata eva śrīsvacchande

	śivo dharmeṇa haṃsastu-------------|

iti upakramya

	ātmā vai haṃsaḥ---------------------|

ityādi uktam | kīdṛśāyaśaṃbhave ? prasannaṃ - bhavadbhaktibhareṇa 
tāttvike'rthe niḥsaṃśayaṃ, yat sadvṛttānāṃ - 
tvadbhāvanātmakabhavyacaritānāṃ mānasaṃ - cetaḥ, tatra ekasmin nivasati - 
agūhitātmatvena sphurati tācchīlyena yaḥ tasmai, tathā bhūriḥ - mahatī 
viśvavaicitryātmā māyā bhūtiḥ - vibhavaḥ tayā sitaṃ - saṃbaddham 
aṅgaṃ - jñānakriyātmakaśaktirūpaṃ svarūpaṃ yasya tasmai | 
mahāhaṃsaśca prasannamānasākhyasaronivāsī bhūribhūtivat sitāṅgo 
bhavati iti anuraṇanārthaḥ || 57 ||

	ataśca

hṛtoddhatatamastāntiḥ
pluṣṭāśeṣabhavendhanā |
tvadbodhadīpikā me'stu
nātha tvadbhaktidīpikā || 58 ||

(page  68)
 he nātha, tvadbhaktireva prakāśakatvāt dīpaśikhā, tvadbodhasya - 
bhavadīyamahāprakāśasya dīpikā astu - abhivyañjikā astu, kīdṛśī asau ? 
hṛtā uddhatā tamastāntiḥ - akhyātikadarthanā yayā, tathā pluṣṭaṃ - 
dagdham aśeṣaṃ bhavendhanaṃ - saṃsāradāru yayā | dīpaśikhā 
kṛtakajjalātmakatamastāntiḥ adagdhasamastavartiḥ ghaṭādi prakāśayati, ato 
vilakṣaṇā iyaṃ tvadbodhadīpikā iti vyatirekālaṅkāraḥ || 58 ||

	rūpāntareṇa vimṛśan āha

visṛṣṭānekasadbīja -
garbhaṃ trailokyanāṭakam |
prastāvya hara saṃhartuṃ
tvattaḥko'nyaḥ kaviḥ kṣamaḥ || 59 ||

	he hara - viśvasaṃharaṇapara, bhavābhavātibhavarūpaṃ trailokyaṃ 
vāgaṅgāhāryasāttvikādivividhadharmayogāt

(page  69)
 nāṭakamitra - abhineyakāvyamiva prastāvya - prakramya, saṃhartuṃ - 
praśamayituṃ tvattaḥ anyaḥ kaḥ kaviḥ - prajāpatiḥ kṣamaḥ, na kaścit 
ityarthaḥ | kīdṛśaṃ ? visṛṣṭam - utpāditam anekaṃ satāṃ sattvena 
pradarśyamānānāṃ bhāvānāṃ bījaṃ - māyāprakṛtyādi garbhe - antaḥ 
yasya | nāṭakākhyaṃ ca kāvyaviśeṣaṃ prastāvanāyāṃ mukhasandhinā 
prastāvya - saṃkṣepeṇa upakṣipya saṃhartuṃ - nirvahaṇasandhinā 
virvāhayituṃ kaścideva dhārādhirūdhaḥ kaviḥ śakto bhavati na sarvaḥ | 
yadāhuḥ

	nāṭakaṃ khyātavṛttaṃ syāt-------------------|

iti | kīdṛk nāṭakaṃ ? visṛṣṭaṃ ni--------------saṃbandhabījādikama-------------
-------yasmin sandhau yasya-----------garbhāvamarśanirvahaṇa--------------
rājyalābhādeḥ prayojanādīni garbhasandhau nikṣipyante | yadāha sma 
bharatamuniḥ

(page  70)
 	bījaṃ binduḥ patākā ca prakarī kāryameva ca |
	arthaprakṛtayaḥ pañca garbhasandhau vyavasthitāḥ ||

iti | eṣāṃ ca svarūpaṃ pradarśyamānaṃ 
granthavaitatyamānayatprakṛtānupayogi iti na uktam || 59 ||

	yato nānyaḥ kaścidevaṃ kartuṃ kṣamaḥ, tataḥ

namaḥ sadasatāṃ kartu -
masattvaṃ sattvameva vā |
svatantrāyāsvatantrāya
vyayaiśvaryaikaśāline || 60 ||

	satāṃ - vidyamānānāṃ jagadvartinām arthānām, asattvaṃ - 
saṃhāram, asatāṃ - vā saṃhṛtatvāt prakhyopākhyāśūnyānāṃ sattvaṃ 
- punarjananaṃ, kartuṃ svatantrāya - ananyāpekṣasāmarthyāya, tathā 
asvatantrāṇāṃ sarveṣāmeva brahmādīnāṃ yāni āyavyayaiśvaryāṇi - 
utpādavināśavibhavāḥ taiḥ asvatantrāyavyayaiśvaryaiḥ svābhedena 
sphuradbhiḥ ekaḥ - advitīyaḥ śālate - ślāghate yaḥ tasmai || 60 ||

(page  71)
 bhaktyatiśayaprakāśitatāttvikasvarūpaṃ bhagavantaṃ punarapi 
stotumāha

trailokye'pyatra yo yāvā -
nānandaḥ kaścidīkṣyate |
sa binduryasya taṃ bande
devamānandasāgaram || 61 ||

	vyākhyātasvarūpe trailokye, yo yāvān iti yaḥ kaścit, ā śivāt 
sakalapramātṛparyantam ānandaḥ sphurati, sa sarva eva yasya binduḥ - 
vipruṇmātraṃ krīḍādiparamānandasāgaram aparyantānandasamudraṃ vande 
- samāviśāmi | itthaṃ ca tattatparimitānande'pi ekāgrībhāvitacittaḥ 
paramānandamāviśati yogijana iti upadeśadik darśitā | yathoktaṃ 
śrīvijñānabhairave

	jagdhipānakṛtollāsarasānandavijṛmbhaṇāt |
	bhāvayedbharitāvasthāṃ mahānandastato bhavet ||

iti | 61 ||

(page  72)
 yata īdṛśo devaḥ, tataḥ

aho brahmādayo dhanyā
ye vimuktānyasaṃkatham |
namo namaḥ śivāyeti
japantyāhlādavihvalāḥ || 62 ||

	vimuktānyasaṃkathaṃ kṛtvā, tadekāgrībhāvena āhlādena - 
japavaśonmiṣitena ānandena vihvalāḥ - vismṛtavyavahārāḥ || 62 ||

	kiṃ ca

niṣkāmāyāpi kāmānā -
manantānāṃ vidhāyine |
anāditve'pi viśvasya
bhoktre bhava namo'stu te || 63 ||

	paripūrṇānandatvādeva kāmebhyaḥ - abhilāṣebhyo niṣkrāntāyāpi 
vicitrabhogāpavargātmakānāṃ

(page  73)
 kāmyamānānām arthānāṃ saṃpādakāya, tathā anāditve'pi - 
viśvasya ādibhūtādvitīyarūpatvepi nityaṃ svabhittyullāsitasya viśvasya 
bhogyabhūtamya bhoktre - camatkartre, yasya ca kāmāḥ na santi sa kathaṃ tān 
dadāti, yaśca anādī - anadanaśīlaḥ sa kathaṃ viśvasya bhoktā syāt iti 
virodhālaṃkāraḥ || 63 ||

	kiṃ ca 

stumastribhuvanārambha -
mūlaprakṛtimīśvaram |
lipserannopakāraṃ ke
yataḥ saṃpūrṇadharmaṇaḥ || 64 ||

	tribhuvanaṃ prāgvat, tadārambhamūlaprakṛtim iti 
sarvakāraṇakāraṇam, ata eva īśvaraṃ - sarvatra apratihatasāmarthyaṃ 
stumaḥ | yataḥ saṃpūrṇaḥ sarvātiśāyī dharmaḥ - svātantryātmā 
svabhāvo yasya, tasmāt

(page  74)
 ke iva upakāraṃ svocitaiśvaryalābhaṃ na lipseran - na arthayeran, sarve 
hi brahmādyāḥ maheśvareṇaiva vitīrṇatattadvibhūtivipruṣaḥ kṛtāḥ || 64 ||

	api ca

mahatsvapyarthakṛcchreṣu
mohaughamalinīkṛtāḥ |
smṛte yasmin prasīdanti
matayastaṃ śivaṃ stumaḥ || 65 ||

	paryavasāyayitum aśakyatvāt mahatsu guruṣvapi arthakṛcchreṣu - 
jagadvicārādiprayojanasaṃkaṭeṣu viṣayeṣu, mohaughena - māyāsphāreṇa 
malinīkṛtāḥ - sthagitatāttvikaprakāśā matayaḥ - saṃvido, yasmin smṛte - 
vimṛṣṭamātre sati, prasīdanti - māyākāluṣyaṃ ujjhitvā tattvajñā - navatyo 
jāyante, taṃ śivaṃ - śreyomayaṃ stumaḥ - abhedena vimṛśāmaḥ || 65 ||

	sarvametat tvayaiva sukaram ityāha

(page  75)
 			prabho bhavata eveha
prabhuśaktirabhaṅgurā |
yadicchayā pratāyete
trailokyasya layodayau || 66 ||

	icchayaiva yaḥ trailokyalayodayakṛt tasya kiyat etat, anyastu 
tvadekāyattavṛttiḥ bhaṃguraśaktireva ityarthaḥ || 66 ||

	tava ca iyat nirargalaṃ svātantryam ityāha

kukarmāpi yamuddiśya
devaṃ syātsukṛtaṃ param |
sukṛtasyāpi saukṛtyaṃ
yato'nyatra na so'si bhoḥ || 67 ||

	devaḥ - krīḍādiparaḥ parameśvara eva ahaṃ sarvamidaṃ karomi iti 
dhiyā kriyamāṇaṃ kutsitaṃ niṣiddhamapi karma sukṛtaṃ, yattu aśvamedhādi

(page  76)
 sukṛtamapi phalābhilāṣamuṣitamānasatayā kriyate tat kukarma iti 
bhagavadabhedabhāvanābhāvābhāvābhyāṃ yat karaṇaṃ tadeva 
sukṛtaduṣkṛtayoḥ vāstavaṃ lakṣaṇaṃ, so'si bhoḥ ityanena anuttaraṃ 
pārameśvaraṃ svarūpaṃ sollasātmābhimukhībhāvena vimṛśati || 67 ||

	yata īdṛśaḥ tvam, ataḥ

eṣa muṣṭyā gṛhīto'si
dṛṣṭa eṣa kva yāsi naḥ |
iti bhaktirasādhmātā
dhanyā dhāvanti dhūrjaṭim || 68 ||

	eṣasarvadaśāsu cinmayatvena sphuran, muṣṭyā gṛhīto'sti - 
svātmīkṛta evāsi, eṣa ca dṛṣṭo'si - sākṣātkṛto'si, sarvadaiva 
citprakāśarūpatayā sphuṭameva asi sphuran sthitaḥ, ata eva naḥ - asmākaṃ 
kva yāsi na kvāpi

(page  77)
 svarūpaṃ gūhayituṃ śaknopi, sarvaṃ hi asmākaṃ tvanmayameva 
cakāsat sthitam iti - īdṛśena satatoditatvatsamāveśātmanā bhaktirasena ye 
ādhmātāḥ - proddīpitasaṃvidaḥ te dhūrjaṭiṃ - mahādevaṃ dhāvanti - 
rābhasyena anusaranti, sarvadaśāsu prasarpantam 
ananupraviṣṭākhyātivyavadhānaṃ parāmṛśanti, ata eva dhanyāḥ 
paramadraviṇapūrṇā vidvacchlādhyāśca || 68 ||

	kiṃ ca

stumastvāmṛgyajuḥsāmnāṃ
śukrataḥ parataḥ param |
yasya vedātmikājñeya -
maho gambhīrasundarī || 69 ||

	ṛgādivedatrayasya yat paraṃ śukraṃ, tadabhedavimarśamayaṃ - 
bodhādityapratibhātmakapraṇavatejorūpaṃ, tato'pi paraṃ - 
bodhādityarūpaṃ tvāṃ stumaḥ, yasya iyaṃ vedātmikā ājñā - niyogaḥ, 
karmakāṇḍa -

(page  78)
 devatākāṇḍa - jñānakāṇḍavākyaikavākyatājñānasya kaiścideva 
prāpyatvāt gambhīrā vijñānamānandaṃ brahma iti vedānteṣu 
pratipāditadṛṣṭyā paramānandaviśrāntipradatvāt sundarī, evaṃ ca 
abhidadhato'yamāśayaḥ - yat niyogarūpājñātmā ayaṃ vedārthaḥ sa 
niyoktari - ājñātarisati upapadyate, anyathā kathamiva jaḍasya śabdasya 
saṃghaṭanārthavattvaṃ niyoktṛtvaṃ vā syāt, niyoktṛtvaṃ ca bhagavato 
gāyatryaiva uktamapi śrotriyaiḥ jāḍyāt na cetyate | yad abhidhāsyati

	gāyatryā gīyate yasya dhiyāṃ tejaḥ pracodakam |

iti || 69 ||

	evamājñārūpaniyogavicāralabdhaṃ niyoktāraṃ stutvā, 
vidhivākyārthapakṣasyāpi seśvaratvameva - iti abhidhatte

vidhirādistathānto'si
viśvasya parameśvara |
dharmagrāmaḥ pravṛtto ya -
stvatto na sa kuto bhavet || 70 ||

(page  79)
 yajet, na hiṃsyāt, ityādirūpo yo vidhiḥ kartavyetarapravibhāgaḥ, ādiḥ 
- iti tasmin vidhau vidhātā, anto - vihitārthaniṣpattyā tattatphalāvirbhāvaḥ, 
sarvo'pi tvameva svatantracidātmā, tathā vidhyādirūpatayā bhāsase 
ityarthaḥ | anyathā viśvasya yo dharmagrāmo - vicitrasvabhāvaparispandaḥ 
pravṛttaḥ sa yadi na tvattaḥ tat kuto bhavet, tvāṃ vinā naiva bhavet, 
prakāśabhittiṃ vinā kasyāpi aprakāśanāt ityarthaḥ | yadāhuḥ 
śrutyantavidaḥ

	tameva bhāntamanu bhāti sarvaṃ tasya bhāsā sarvamidaṃ vibhāti

iti | vidhinaiva ca bhāvanāpakṣo'pi kṛtottaraḥ || 70 ||

	yadi śrutyantānusāreṇa sarvaṃ bhagavanmayaṃ, tat kasmāt 
karmakāṇḍeṣu jñānameva na upadiśyate, kathaṃ ca jñānakāṇḍeṣu tadeva 
niṣidhyata ? - iti saṃśayaṃ śamayati stutidvāreṇa

(page  80)
 			namaste bhavasaṃbhrānta -
bhrāntimudbhāvya bhindate |
jñānānandaṃ ca nirdvandvaṃ
deva vṛtvā vivṛṇvate || 71 ||

	he deva - svatantraceṣṭita, bhave - saṃsāre ye saṃbhrāntāḥ 
tvanmāyāśaktivaśāt vyāmūḍhāḥ, tata eva ca bhedāsaktatvāt 
karmaniṣṭhāḥ teṣāṃ pūrvakakṣyāyāṃ tāṃ tāṃ bhedabhrāntim 
udbhāvya siddhāntakakṣyāyāṃ bhindate - dhvaṃsakāya, tathā 
jñānānandaṃ - paramādvayarūpaṃ vijñānam ānandamayaṃ vṛtvā - 
prathamaṃ rahasyatvāt ayogyān prati ācchādya, paścāt yogyān prati 
vivṛṇvate - sphuṭīkurvate tubhyaṃ namaḥ | evaṃ ca yat pūrvapakṣatayā 
karmakāṇḍasvarūpaṃ bhagavatā heyatvena darśitaṃ, tadeva mūḍhaiḥ 
upādeyatvena abhyupagamya, jñānakāṇḍasya arthavādatvam ucyate | atha 
vābhagavataiva sṛṣṭyādikṛtyacatuṣṭayarakṣāyai te tādṛśāśvāsavanto

(page  81)
 vyāmohitāḥ sthāpitāḥ | saṃbhrāntim iti apapāṭhaḥ || 71 ||

	yathā parameśvaraḥ tattadvedasaṃhitādiśāstreṣu bhrāntimudbhāvya 
bhindan, jñānānandaṃ vivṛṇoti, tathā asmākamapi māyāmudbhāvitāṃ 
bhittvā jñānānandameva prakāśayatu ityāha

yasyāḥ prāpyeta paryanta -
viśeṣaḥ kairmanorathaiḥ |
māyāmekanimeṣeṇa
muṣṇaṃstāṃ pātu naḥ śivaḥ || 72 ||

	yasyāḥ cidabhedāprathātmano māyāyāḥ paryantasya viśeṣaḥ 
parakāṣṭhācidadvayamayatāprāptilakṣaṇaḥ kaiḥ brahmādibhiḥ 
pramātṛbhiḥ kaiḥ manorathaiḥ prāpyeta, sarvasya manorathānāmapi 
aviṣayaḥ, tāṃ māyām ekanimeṣeṇa muṣṇan - svarūponmeṣamātreṇaiva 
apaharan, śivaḥ - śreyaḥpradaḥ, naḥ - asmān

(page  82)
 pātu - māyāsaṃskāragocarāt rakṣatu; yathā akhyātiḥ nāmnāpi 
nāvatiṣṭhate || 72 ||

	māyāparyantaviśeṣo yādṛk bhaktibhājāmeva darśanayogyaḥ - tat 
prakaṭayati

vairāgyasya gatiṃ gurvīṃ
jñānasya paramāṃ śriyam |
naiḥspṛhyasya parāṃ koṭiṃ
bibhratāṃ tvaṃ prabho prabhuḥ || 73 ||

	he prabho parameśvara, vairāgyasya - viṣayavaitṛṣṇyasya, gurvīṃ - 
kāṣṭhāprāptāṃ sadāśivādipadamapi tṛṇavat manyamānāṃ, gatiṃ - 
pratītiṃ, tathā jñānasya tattvāvabodhasya, paramāṃ - vaiṣṇava - lākula - 
pāśupatādyuktamitajñānahānyā viśvottīrṇa - viśvamaya - 
cidānandasundara - svatantra - satatāvabhāsvara - 
paramādvayasvātmaprathārūpāṃ śriyaṃ - parāṃ vibhūtiṃ, 

(page  83)
 tathā naiḥspṛhyasya - 
yathoktajñānalakṣmīprāptyupāyānveṣaṇavaimukhyasya ca, parāṃ - 
dhārādhirūḍhāṃ koṭiṃ  sakalamudrāmantradhyānādyapahastanarūpām | 
yadāha sma kaścit

	aparokṣe bhavattatve sarvataḥ prakaṭe sthite |
	yairupāyāḥ pratanyante nūnaṃ tvāṃ na vidanti te ||

iti | evamīdṛśīṃ niḥspṛhatvasya parāṃ koṭiṃviśrāntiṃ ye bibhrati - 
vahanti, teṣāṃ māyāpāradṛśvānāṃ, tvaṃ prabhuḥ - nirargalāḥ te tava 
dāsāḥ, ataśca īdṛśānāmasmākaṃ tvamunmeṣamātreṇaiva māyāṃ 
muṣṇāsi ityarthaḥ || 73 ||

	asāmānyaśca eṣāṃ tvaṃ prabhurityāha

brahmaṇo'pi bhavānbrahma
kasya neśastvamīśituḥ |
jagatkalyāṇakalyāṇaṃ
kiyattvamiti vettikaḥ || 74 ||

(page  84)
	jagato - viśvasya madhye, yat kalyāṇam - īśa - sadāśiva - śivāḥ, 
teṣāmapi kalyāṇaṃ - pūrṇacidānandaghanasvātmaprathanena anugrāhakaṃ 
kiyat māhātmyam iti etat ko vetti, - aparicchedyamahimā asi ityarthaḥ, yato 
brahmaṇopi mahāprakāśarūpasya vedāntopāsyasya, bhavān 
brahmasvātantryaśaktimayatvena utkṛṣṭo'si, viśvanirmāṇaśaktidānena 
bṛṃhakaśca | yaduktaṃ gītāsu

	mama yonirmahadbrahma tasmingarbhaṃ dadāmyaham |
saṃbhavaḥ sarvabhūtānāṃ tato bhavati bhārata ||

iti | tathā

	napuṃsakamidaṃ nātha paraṃ brahma phalet kiyat |
	tatpauruṣaniyoktī cenna syāttvacchaktisundarī ||

iti | tathā kasya brahmādeḥ śivāntasya īśituḥ tvaṃ na īśaḥ api tu 
sarvasyaiva svāmī || 74 ||

(page  85)
 ataśca


kimanyairbandhubhiḥ kiṃ ca
suhṛdbhiḥ svāmibhistathā |
sarvasthāne mameśa tvaṃ
ya uddhartā bhavārṇavāt || 75 ||

	he īśa - sarvatra prabhavanaśīla, sarveṣāṃ - mitrādibandhūnāṃ, 
sthāne - prasaṅge, mama tvaṃ tadupakartavyaṃ sarvaṃ karoṣi, yato 
duruttarabhavārṇavoddharaṇaṃ jagato.pi aśakyaṃ tvaṃ saṃpādayasi - ataḥ 
kimanyaiḥ bandhvādibhiḥ || 75 ||

	evaṃ gāḍhabhaktibharonmiṣitaparāmṛtacarvaṇāghūrṇita āha

jayanti mohamāyādi -
malasaṃkṣālanakṣamāḥ |
śaivayogabalākṛṣṭā
divyapīyūṣavipruṣaḥ || 76 ||

(page  86)
 mohaḥ - akhyātiḥ āṇavaṃ malam, māyā - māyīyam, ādiśabdāt 
kārmaṃ ca; eṣāṃ malānāṃ samyak kṣālane - utpuṃsane śaktāḥ 
śaivayogabalena - māheśvarasamāveśaprakarṣeṇa ākṛṣṭāḥ - māyodarāt 
haṭhādeva ānītāḥ divyapīyūṣavipruṣaḥ - paramānandakaṇā api jayanti - 
sarvotkarṣeṇa vartante || 76 ||

	evamapi vyutthānāvasareṣu sarvadā samāveśāyaiva parameśvaro me 
matīḥ udyoginīḥ kārayet iti āśaṃsan āha

gāyatryā gīyate yasya
dhiyāṃ tejaḥ pracodakam |
codayedapi kaccinnaḥ
sa dhiyaḥ satpathe prabhuḥ || 77 ||

kaccit iṣṭapraśne, yasya - maheśituḥ bodhādityasya

(page  87)
 saṃbandhi tejo - vareṇyaṃ jyotiḥ, vākśaktirūpayā gāyatryā - 
vedamātrā, dhiyāṃ sarvapramātṛmatīnāṃ, codakaṃ - 
tattatkartavyādhyavasāyagrāhakaṃ, gīyate - stūyate, sa prabhuḥ - sarvatra 
prabhavanaśīlaḥ kaccit, asmākaṃ vyutthānāvasaronmagnāḥ dhiyaḥ - 
sarvāḥ buddhivṛttīḥ, samāveśātmani satpathe, parameśvaraprāptyupāye, 
codayet - nyakkṛtānyavyāpāratayā udyamaṃ grāhayet | satpathe ityasya ca 
ayamāśayaḥ - yadevaṃ gāyatryaiva pratipāditaṃ bhagavato 
viśvadhīpracodakatvam aharahaḥ paṭhadbhiḥ avabuddhyamānairapi ca 
mūrkhaśrotriyaiḥ nāvabuddhyate iti tatkartṛkaiva eṣā teṣāmasatpathe codanā 
iti || 77 ||

	athavā kṛtaṃ samāveśaprārthanayā, svābhedamayyāṃ 
pṛthivyādimūrtāvapi mām ekāgradhiyaṃ kurvāṇayāpi vā prārthanayā, 
tvaṃ hi me prasannaḥ samāveśadaśāsu 
māyākāluṣyopaśamananirmalībhūtasya tatsarvaṃ kariṣyasi - sarvāsu 
pṛthivyādimūrtiṣu

(page  88)
 sarvamayameva svarūpam avilambitameva prakaṭayiṣyati ityetadāha

aṣṭamūrte kimekasyā -
mapi mūrtau na naḥ sthitim |
śāśvatīṃ kuruṣe yadvā
tuṣṭaḥ sarvaṃ kariṣyasi || 78 ||

	pṛthivyādiyajamānāntābhiḥ mūrtibhiḥ bhagavāneva sthita iti 
dvaitasya nāmāpi nāsti iti aṣṭamūrtipadāśayaḥ | kariṣyasi iti kṣipravacane 
ḷṭ || 78 ||

	yuktā ca iyaṃ saṃbhāvanā, yataḥ

vastutattvaṃ padārthānāṃ
prāyeṇārthakriyākaram |
bhavatastvīśa nāmāpi
mokṣaparyantasiddhidam || 79 ||

he īśa, sarveṣāṃ tattvabhuvanatadadhiṣṭhātṛrūpāṇāṃ padārthānāṃ,

(page  89)
 nijanijocitatattadarthakriyākṣamaṃ prāyeṇa lokasthityā vastutattvaṃ - 
paramārthaḥ, bhavatastu dhūrjaṭeḥ nāmāpi dhyāyatām ityatra 
nirṇītadṛṣṭyā nāmāpi mokṣaparyantāṃ mahāsiddhiṃ dadāti iti 
daṇḍairapūpā vyākhyātāḥ | prāyeṇa ityuktyā lokasthityā etaduktam, - 
paramārthadṛṣṭyā hi viśvasya bhagavanmayataiva vastutattvam iti dhvanati || 79 
||

	ko vā na lokottarastava mahimā ityāha

muhurmuhurjagaccitra -
syānyānyāṃ sthitimūhitum |
śaktiryā te tayā nātha
ko manasvī na vismitaḥ || 80 ||

	he nātha, gacchati tāṃ tāṃ sthāvarādidevayonyantāṃ 
tattadbrahmādirūpatāṃ ca iti jagat - jīvavargaḥ, tadeva citraṃ tasya 
niḥsaṃkhyasya, pratikṣaṇam

(page  90)
 anyām anyām anantaśākhāṃ sthitiṃ - saṃvitsantativaicitrīm, 
ūhituṃ - tarkayituṃ niścetuṃ, yā te - tava sarvajñasya na tu anyasya kasyacit, 
śaktiḥ - sāmarthyaṃ, tayā tvadaikātmyabhāvanāmayena praśastena manasā 
yukto manasvī, ko vā na vismitaḥ, sarva eva vismaya 
mahāmudroṭṭaṅkitaromāñcādisāttvikadharmābhivyaktāntaḥprasphurat-
paramānandamaya eva iti || 80 ||

	kiṃ ca

duṣkaraṃ sukarīkartuṃ
duḥkhaṃ sukhayituṃ tathā |
ekavīrā smṛtiryasya
taṃ smarāmaḥ samaradviṣam || 81 ||

	smaradviṣam - asāmānyollekhakāriṇaṃ, taṃ smarāmaḥ - svābhedena 
vimṛśāmaḥ, yasya saṃbandhinī smṛtirapi bhagavataḥ anyena 
kartumaśakyatvāt duṣkaraṃ - rudraśaktisamāveśaṃ sukarīkartuṃ - 
helāmātreṇa

(page  91)
 saṃpādāyituṃ, tathā duḥkhaṃ - sakaladuḥkhanidhānaṃ 
māyāvyāmohaṃ sukhayituṃ - paramānandamayīkartum, ekavīrā - 
ananyāpekṣasāmarthyamayī apratihatā || 81 ||

	yataśca evaṃ - vidhānuttarasāmarthyo bhagavān ata eva āha

jayanti gītayo yāsāṃ 
sa geyaḥ parameśvaraḥ |
yannāmnāpi mahātmānaḥ
kīryante pulakāṅkuraiḥ || 82 ||

	mahān - śaktipātavaśonmiṣatsamāveśavaśāt vikasvarīkṛta ātmā 
yeṣāṃ te, proktanītyā yadīyena nāmnāpi vyutthānāvasthāyāṃ 
śrutipathagatena pulakāṅkuraiḥ kīryante - punarapi samāveśyante, tadīyam 
anyat āstāṃ tāvat, tatparāmarśaparāḥ gītayo'pi - stutisūktayo'pi

(page  92)
 jayanti sarvotkarṣeṇa vartante || 82 ||

	na tava upamānaṃ kimapi astīti ananvayālaṃkāreṇa āha

bhavāniva bhavāneva
bhavedyadi paraṃ bhava |
svaśaktivyūhasaṃvyūḍha -
trailokyārambhasaṃhṛtiḥ || 83 ||

	bhava iti prāgvat, svāsām icchādiśaktīnāṃ vyūhena - 
vicitraguṇapradhānabhāvaprakāśanena saṃvyūḍhe - nirvāhite 
proktarūpasya trailokyasya ārambhasaṃhṛtī yena, sa tvameva yadi paraṃ - 
kevalam asādhāraṇam ityarthaḥ || 83 ||

	ataśca

mantro'si mantraṇīyo'si
mantrī tvattaḥ kuto'paraḥ |
sa mahyaṃ dehi taṃ mantraṃ
tvanmantraḥ syāṃ yathā prabho || 84 ||

(page  93)
 he prabho, yaḥ kaścit catuṣkalanavātmādiḥ mananatrāṇadharmā 
pūrṇāhaṃvimarśaparamārtho mantraḥ sa tvameva, tanmantryaśca 
mahāprakāśātmā tvameva, asya mantrasya mantryasya ca mantrayitā - 
parāmarśakaḥ tvameva, anyasya kasyacidapi cidatiriktasyābhāvāt, ataśca sa 
tvam īdṛśaḥ taṃ mantraṃ mantramantryamantrayitṛrūpaṃ mahyaṃ 
dehiprayaccha, yena tvameva proktatraividhyātmā mantroyasya tathā syāṃ - 
vigalitamantramantryamantrayitṛvibhāgaḥ tvadekamaya eva bhaveyam | uktaṃ ca 
śrīkaṇṭhasaṃhitāyām

	pṛthaṅmantraḥ pṛthaṅmantrī na siddhyati kadācana |
	jñānamūlamidaṃ sarvamajñātvā naiva siddhyati ||

iti || 84 ||

yataśca idaṃ jātam ityāha

bhārūpaḥ satyasaṃkalpa -
stvamātmā yasya so'pyaham |
saṃsārīti kimīśaiṣa
svapnaḥ so'pi kutastvayi || 85 ||

(page  94)
	 yasya - mama, bhārūpaḥ - prakāśaghanaḥ, satyasaṃkalpaḥ 
tāttvikapūrṇāhaṃvimarśamayaḥ ātmā - tattvaṃ so'pi aham 
īdṛksphārarūpaḥ, saṃsārī - saṃsārāvasthāvasthitiḥ kim ahaṃ naiva īdṛk, 
api tu tvameva ayamahaṃ sphuṭameva sphurāmi | yattu vyutthānadaśāyāṃ 
samādhirasasaṃskāraplutāyāṃ kiṃcinmātradehādiprādhānyena manāk 
saṃsāritvāmiva sphurati sa kiṃ svapnaḥ, sphuṭasya dehādipramātṛtvasya 
abhāve kiṃcideva ca ābhāsena svapnaḥ saṃbhāvyate, sa ca tvayi cidekarūpe 
na yuktaḥ, yataḥ tvameva turyaturyātītasphāramayo mama ātmā, tat kasya 
svapno bhāsatāṃ, tadbhāsanāśrayasya kasyāpi abhāvāt, tat sarvathā 
saṃsāritvasya bhrāntyāpi sphuraṇaṃ nāsti, - iti sadaiva śiva evāham || 85 ||

	yataśca tvameva ahaṃ sarvathā sphuran sthitaḥ,

(page  95)
 na tu ahaṃ nāma kaścidanyaḥ kiṃcit karomi bhuñje vā, tena itthaṃ 
mitāhaṃbhāvapraśamanena sarvakarmatatphalasaṃnyāsināṃ yat 
tvanmayameva aiśvaryaṃ tadeva ekaṃ ślāghyam iti sāmānyoktyā āha

tadabhaṅgi tadagrāmyaṃ
tadekamupapattimat |
tvayi karmaphalanyāsa -
kṛtāmaiśvaryamīśa yat || 86 ||

	abhaṅgi - anaśvaram avibhāgaṃ ca, grāmorudrakṣetrajñādisamūhaḥ 
tatra bhavaṃ grāmyam - utkarṣāpakarṣavattvāt aślāghyam tat yatra na tat 
agrāmyaṃ - sarvotkṛṣṭam, ata eva upapattimat - ananyamukhaprekṣitvāt 
satyārtham || 86 ||

	evamīdṛśavastutattvaparāmarśocchalitaḥ svātmānameva 
ślāghamāna āha

(page  96)
 		kṣamaḥ kāṃ nāpadaṃ hantuṃ
kāṃ dātuṃ saṃpadaṃ na vā |
yo'sau sa dayito'smākaṃ
devadevo vṛṣadhvajaḥ || 87 ||

	vṛṣo dharmaḥ sa devasya guṇo vai dṛkkriyātmakaḥ
	dhatte sa cidacidyasmāddharmastenocyate budhaiḥ |

iti śrīmayoktanītyā vṛṣo - dharmo jñānakriyāsāmarasyātmā dhvajo - 
lakṣaṇaṃ yasya saḥ, asmākaṃ dayito - vallabhaḥ, kīdṛk ityāha yo'sau kāṃ 
na āpadam api tu sarvāṃ hantuṃ, kāṃ vā saṃpadanam api tu sarvāṃ 
dātuṃ kṣamaḥ || 87 ||

	ataśca īdṛśasya sarvaśakteḥ tava saṃbandhinī bhaktireva 
yathābhīṣṭaheturityāha

māyāmayamalāndhasya
divyasya jñānacakṣuṣaḥ |
nirmalīkaraṇe nātha
tvadbhaktiḥ paramāñjanam || 88 ||

(page  97)
 māyā eva āmayo - vyādhiḥ, tatkṛtaṃ malam - āvaraṇaṃ, tena 
andhasya - āvṛtaprakāśasya, divyasya - lokottarasya, jñānacakṣuṣaḥ - 
pūrṇaprathānayanasya, tvadbhaktireva paramam añjanaṃ, nirmalīkaraṇe - 
svarūponmīlanaviṣaye || 88 ||

	ataśca

nirbhayaṃ yadyadānanda -
mayamekaṃ yadavyayam |
padaṃ dehyehi me deva
tūrṇaṃ tatkiṃ pratīkṣase || 89 ||

	he deva, ehi - svarūpagopanāṃ nimajjya saṃmukhībhava, tataśca yat 
ānandamayam advitīyam avināśi nirbhayaṃ - yasmin sati saṃsārabhayaṃ 
nāsi, yadviṣayaṃ ca apasaraṇāśaṃkābhayamapi na bhavati, īdṛśaṃ yat 
padaṃ - viśrāntidhāma, tat mahyaṃ tūrṇaṃ dehi - śīghraṃ māṃ 
svātmani

(page  98)
 āveśaya, kiṃ pratīkṣase - kṣaṇamātramapi mā vilambaṃ kṛthāḥ - iti 
gāḍamutkaṇṭhitasya praṇayanirbharoktiḥ || 89 ||

	punarapi bhaktibharocchalita āha

aho nisargagambhīro
ghoraḥ saṃsārasāgaraḥ |
aho tattaraṇopāyaḥ
paraḥ ko'pi maheśvaraḥ || 90 ||

	brahmādibhirapi dustaratvāt nisargagambhīraḥ, ghoro - duḥkhamayaḥ, 
ata eva sāgara iva | ko'pi iti bhaktiśālibhireva labhyaḥ cidekaparamārtho 
nirupamaḥ para upāya iti anāyāsameva jhagiti parapāraprāpakaḥ | dvau 
ahośabdau atyāścaryaṃ dhvanataḥ || 90 ||

	ākāraparigrahe'pi asāmānyātiśayavattvaṃ bhagavataḥ stotumāha

(page  99)
 			namaḥ kṛtakṛtāntānta
tubhyaṃ madanamardine |
mastakanyastagaṃgāya
yathāyuktārthakāriṇe || 91 ||

	viśvopadravakaraṇadurmadayoḥ kālakāmayoḥ nigraha eva ucitaḥ, 
devīkarasparśanoditasvanayanajānandāsrusrutimayatvāt pāvanatvena 
jagadupakāriṇyā gaṃgāyā nije śirasi dhāraṇānugraha eva ucita iti 
yathāyuktārthakāritvam || 91 ||

	yata evamākṛtimattvepi tvameva viśvātiśāyī, tato 
viśvātiśāyiphalābhilāṣukāṇāṃ tvameva śaraṇam ityāha

aiśvaryajñānavairāgya -
dharmebhyo'pyupari sthitim |
nātha prārthayamānānāṃ
tvadṛte kā parā gatiḥ || 92 ||

(page  100)
 aiśvaryam - īśitavyavastusattayā sphītatvaṃ, jñānaṃ - 
heyopādeyavastvadhyavasāyaḥ, vairāgyaṃ - viṣayavaitṛṣṇyaṃ, dharmaḥ - 
sattvaguṇotkarṣakṛtavyāpāradattaḥ saṃskāraḥ, tebhyo brahmādiṣvapi 
kṛtapadebhyaḥ, upari - śuddhacidātmani, avasthitiṃ prārthayamānānāṃ, 
tvameva gatiḥ - śaraṇaṃ, nānyaḥ anyeṣām aiśvaryādicatuṣṭayāvṛtatvāt || 
92 ||

	tavaiva ca anuttaram īdṛk aiśvaryaṃ, yasmāt

tvayyanicchati kaḥ śaṃbho
śaktaḥ kubjayituṃ tṛṇam |
tvadicchānugṛhītastu
vahedbrāhmīṃ dhuraṃ na kaḥ || 93 ||

	āstāṃ sṛṣṭyādikriyā, tṛṇamapi kubjīkartuṃ tvadicchāṃ vinā na 
ko'pi brahmaviṣṇvādiḥ śaktaḥ, tvacchaktyanugrahāttu 
brahmaviṣṇvādipadaṃ na ko vahet, kīṭo'pi yāvat voḍhuṃ śaktaḥ |

(page  101)
 taduktaṃ śrīsvacchande

	brāhmī śaktiḥ parasyaiva yatrecchā tatra pātayet |

iti | tathā

	vaiṣṇavyāstu smṛto viṣṇuḥ---------------------------|

iti || 93 ||

	ataśca

harapraṇatimāṇikya -
mukuṭotkaṭamastakāḥ |
nameyuḥ kaṃ paraṃ kaṃ vā
namayeyurna dhīdhanāḥ || 94 ||

	harasya - maheśituḥ praṇatireva māṇikyamukuṭam - 
aiśvaryavyañjakaṃ ratnamayaṃ mukuṭaṃ tena utkaṭamastakāḥ - 
unnataśiraskāḥ, ye dhīdhanāḥ - tattvāvabodhadraviṇāḥ, te kaṃ 
brahmaviṣṇurudrādikaṃ praṇamanti na kaṃcit, atyalpā ca iyam uktiḥ, kaṃ 
vā brahmādikaṃ na namayeyuḥ - sarvameva svapraṇataṃ saṃpādayeyuḥ || 94 
||

(page  102)
 yatpraṇāmasya cāyaṃ mahimā, tadāveśameva āśaṃsan āha

sarvavibhramanirmoka -
niṣkampamamṛtahradam |
bhavajjñānāmbudhermadhya -
madhyāsīyāpi dhūrjaṭe || 95 ||

	he dhūrjaṭe - mahādeva, bhavajjñānāmbudheḥ - 
tvatprakāśasamudrasya, madhyaṃ - sārabhūtam, amṛtahradam - 
ānandamayasvātantryaśaktyātmakarūpam adhyāsīya - kadā 
tanmayībhāvam iyām, kīdṛśam amṛtahradaṃ ? sarveṣāṃ vibhramāṇām - 
ajñānānāṃ nirmokena - tyāgena yat niṣkampaṃ - prarūḍhatayā labdhaṃ, 
prakāśātmanaśca bhagavato vimarśamayaṃ svātantryameva hṛdayabhūtam | 
yadāhasma śrīpratyabhijñākāraḥ

	citiḥ pratyavamarśātmā parāvāk svarasoditā |
	svātantryametanmukhyaṃ tadaiśvaryaṃ paramātmanaḥ ||

(page  103)
 iti || 95 ||

	citrasaṃkalpādigataṃ tvadākṛtimātramapi bhaktānāṃ kāṃ 
saṃpadaṃ na prasūte ityāha

citraṃ yaccitradṛṣṭo'pi
manorathagato'pi vā |
paramārthaphalaṃ nātha
paripūrṇaṃ prayacchasi || 96 ||

	na kaścidapi tāvat citrasaṃkalpādyullikhitena atāttvikena rūpeṇa 
arthakriyāṃ karoti, parameśvaraḥ punaḥ sarvasaṃnidhiḥ kena nāma na 
rūpeṇa bhaktānāṃ paramānandavikāsaṃ pūrṇaṃ sūte, evam iha 
citrasaṃkalpasthaṃ namastebhyo'pi ye soma iti śloke svapnagatam 
upasaṃhṛtakāmāya ityādinā bāhyaniṣṭhaṃ kiṃ nāsi yatprabho 
ityādipradeśeṣu viśvamayam bhinneṣvapi na bhīnnaṃ yat ityādyuktiṣu 
cidānandaghanaṃ bhagavatsvarūpam

(page  104)
 asya kāṣṭhāprāptabhakteḥ bhagavadekamayasya sarveṇaiva rūpeṇa 
paraphalapradameva || 96 ||

	tadittham

ko guṇairadhikastvattaḥ
tvattaḥ ko nirguṇo'dhikaḥ |
iti nātha numaḥ kiṃ tvāṃ
kiṃ nindāmo na manmahe || 97 ||

	tvatto guṇaiḥ - sarvajñatvādibhiḥ, ko'dhiko - na kaścit bhavāniva 
bhavāneva bhavedyadi ityādyuktyā samo'pi tava nāsti iti uktam tatkatham 
adhikaḥ syāt | tvattaśca ko'nyo nirguṇaḥ adhikaḥ - sattvādiguṇasaṃskāreṇa 
aspṛṣṭo na kaścidanya ityarthaḥ | iti anena uktidvayena kiṃ tvayi nindā 
paryavasitā, kiṃ vā stutiriti tattvaṃ na vidmaḥ, anadhikaguṇeṣu 
sattvādiguṇayukteṣvapi yā nindā sā tvanmayatvāt viśvasya kiṃ tvayyeva 
paryavasitā, āhosvit

(page  105)
 guṇādhikyanirguṇatvābhyāṃ stutiḥ tvayi viśvātmani pariniṣṭhitā 
iti mahādvayamayaṃ tvām uktidvayaṃ ca idaṃ paryālocayantaḥ 
sandehadolām āruḍhāḥ smaḥ | vastuto hi tvayi aparicchedyamūrtau na kācit 
stutiḥ nindā vā asti iti paramārthaḥ || 97 ||

	tadalaṃ tāvat etaduktidvayavimarśanena

kīrtane'pyamṛtaughasya
yatprasatteḥ phalaṃ tava |
tatpātumapi ko'nyo'laṃ
kimu dātuṃ jagatpate || 98 ||

	he jagatpate, tava amṛtaughasya - paramānandarūpasya, kīrtane - 
nāmamātroccāraṇe'pi, yat prasatteḥ tava tvadīyānnairmalyaprathātmanaḥ 
prasādāt pūrṇaṃ camatkāramayaṃ, phalaṃ tatpātum 
aviśrāntyantarmukhatvena āsvādayitumapi na kaścit brahmādirapi

(page  106)
 paryāptaḥ, kimu dātuṃ - vitarītuṃ, tvameva taddātuṃ kṣama 
ityarthaḥ || 98 ||

	tadīdṛśāt svāminaḥ parasiddhilābhavāñchayā bhaktimeva 
prārthayitumāha

niḥśeṣaprārthanīyārtha -
sārthasiddhinidhānataḥ |
tvattastvadbhaktimevāptuṃ
prārthaye nātha sarvathā || 99 ||

	samastābhilaṣitaniṣpattinidhānāt, nātha - arthanīya, tvattaḥ 
parameśvarāt, tvadbhaktimeva sarvaprakāram arthaye, na tu kimapi phalam || 99 ||

	bhakteḥ parasiddhiparyavasitṛtvaṃ bhagavannamaskāramukhena 
darśayati

namastrailokyanāthāya
tubhyaṃ bhava bhavajjuṣām |
trilokīnāthatādāna -
nirvināyakaśaktaye || 100 ||

(page  107)
 trailokyanāthāya - viśveśvarāya, tubhyaṃ namaḥ, yastvaṃ 
bhavajjuṣāṃ - tvadbhaktimatāṃ, pūrvanirṇītatrilokīnāthatādāne - 
viśveśvarasvātmaikyaprathane, nirvināyakaśaktiḥ - anargalasvātantryaḥ || 100 
||

	ataśca

niḥśeṣakleśahānasya
hetuḥ ka iti saṃśaye |
svāminso'sīti niścitya
kastvāṃ na śaraṇaṃ gataḥ || 101 ||

	he parameśvara, avidyādyaśeṣakleśapraśamakāraṇaṃ kiṃ syāt iti 
saṃśayya, so'si īdṛk tvameva iti niścitya, kaḥ tvāṃ na āśritaḥ, sarve 
vivekinaḥ tvām aśeṣakleśanāśanaṃ bhajante, iti tvadbhaktireva 
trilokīnāthatādāne iva sarvakleśapraśame'pi hetuḥ || 101 ||

(page  108)
 ata eva

bhuktvā bhogānbhavabhrāntiṃ 
hitvā lapsye paraṃ padam |
ityāśaṃseha śobheta
śaṃbhau bhaktimataḥ param || 102 ||

	śaṃbhau - cidānandaghane, bhaktibhājo durlabhasya kasyacideva, 
kevalam iyam āśaṃsā śobheta | kā asau ityāha bhavabhrāntiṃ hitvā - 
niḥśeṣām akhyātiṃ parihṛtya, yathopanatān yogaprabhāvākṛṣṭān bhogān 
bhuktvā, paraṃ padaṃ lapsye - prāpsyāmi iti paramādvayamaye māheśvare 
naye

	sthānyupanimantraṇe saṃgasmayākaraṇaṃ punaraniṣṭaprasaṃgāt (pā0 3 - 51)

ityanyaśāstranītyā na kadācidapi viditatattvasya

(page  109)
 bhogāsaṃgo bandhāya bhavati | yaduktaṃ śrīspande

	tena śabdārthacintāsu na sāvasthā na yaḥ śivaḥ
	bhoktaiva bhogyabhāvena sadā sarvatra saṃsthitaḥ ||
(3 ni0 2 kā0)

iti || 202 ||
	tena

nātha svapne'pi yatkuryāṃ
brūyāṃ vā sādhvasādhu vā |
tvadadhīnatvadarpeṇa
sarvatrātrāsmi nirvṛtaḥ || 103 ||

	he nātha, yatkiṃcit ahaṃ mohanamaye svapne'pi manaḥkāyābhyāṃ 
kuryāṃ, brūyāṃ vā vācā, tacca sādhu - śāstravihitam itaradvā astu, atra 
sarvatra asmi nirvṛtaḥ - tvadānandamaya eva, kena tvadadhīnatvadarpeṇa - 
tvameva cidātmā maheśvaro'haṃ sarvāsveva avasthāsu sarvam idaṃ karomi 
iti īdṛśena tvadāyattatvotsāhena tvadabhedāvaṣṭambhamayasya

(page  110)
 mama na kāpi kutrāpi kadācidapi kadarthanā ityarthaḥ || 103 ||

	nahi mama ajñānasparśo'pi asti ityāha

jyotiṣāmapi yajjyoti -
statra tvaddhāmni dhāvataḥ |
cittasyeśa tamaḥsparśo
manye vandhyātmajānujaḥ || 104 ||

	he īśa - svatantra, jyotiṣāṃ - sūryendvagniprabhṛtīnāmapi 
vedyarūpāṇāṃ, jyotiḥ - prakāśakaṃ, yat tasmin tvadīye dhāmni - 
citprakāśe, dhāvataḥ - avyavadhānameva prasarpataḥ, cittasya tamaḥsparśaḥ - 
ajñānasaṅgaḥ, vandhyātmajānuja iti manye, vākyārthasya atra karmatā, 
vandhyāyāḥ suta eva na bhavati kathaṃ tu tasya anujaḥ - kanīyān bhrātā 
bhavet, ityuktyā atyantāsattvaṃ mama akhyāteḥ iti darśayati, 
prakṛṣṭaprakāśabhūmau

(page  111)
 ca tamaso na nāmāpi bhavati iti ucitoktiḥ || 104 ||

	āstāṃ vā tvatprakāśānusaraṇaṃ, tvadbhaktau utsāho'pi me 
varaphalaprasūrityāha

manye nyastapadaḥ so'pi
kṣemye mokṣasya vartmani |
manorathaḥ sthito yasya
seviṣye śivamityayam || 105 ||

	śivaṃ - śreyomayaṃ, seviṣye - tanmayībhāvena āśrayiṣye, iti 
īdṛgalaukikotsāhamayo yasya me saṃkalpaḥ, so'haṃ mokṣasya - 
śivābhedaprāptyātmanaḥ apavargasya, mārge - śākte dhāmni, kṣemye - 
kṣemāya paraśreyase hite, nyastapadoniveśitanijajñānakriyāśakticaraṇaḥ - 
iti bhaktiviṣaya utsāha evāsya abhīṣṭapradaḥ saṃpadyate |

(page  112)
 yaduktamasmatprabhupādaiḥ

	uttiṣṭha śaṃkaraṃ staumi pūjayāmi maheśvaram |
	iti saṃrambhasaṃbhogaṃ dhanyā evopabhuñjate ||

ityādi || 105 ||

	śivo viśvopakaraṇanityoditaḥ svayam, ityasmākamabhīṣṭaṃ 
ghaṭitameva ityāśayenāha

sthityutpattilayairloka -
trayasyopakriyāsviha |
ekaiveśa bhavacchaktiḥ
svatantraṃ tantramīkṣate || 106 ||

	sthitiḥ - nānābhogasaṃsaṅgaḥ, uttpattiḥ - pralayena 
vyāmūḍhīkṛtānāṃ yathocitaśarīrabhuvanādijananaṃ, layo - 
bhogaparamparānuṣaṅgaśrāntānāṃ viśrāntidānārthaṃ kaṃcitkālaṃ 
saṃhāraḥ, taiḥ viśvasya upakārāya, iha - jagati, he īśa - svāmin,

(page  113)
 ekaiva - advitīyā tvacchaktiḥ, svatantram - ātmāyattaṃ, tantraṃ - 
tantraṇaṃ sādhanaṃ paśyati | uktaṃ ca mṛgendrāyām

	svāpe'pyāste bodhayanbodhayogyān
	rodhyānnu?ndhansādhayankarmikarma |
	māyāśaktīrvyaktiyogyāḥ prakurvan
	sarvaṃ paśyedyadyathāvastujātam ||

iti || 106 ||

	yathā ca svecchāmātreṇa viśvasṛṣṭisthitisaṃhārān darśayasi, tathā 
tvameva anugrāhyān anugṛhṇāsi ityāha

trilokyāmiha kastrāta -
stritāpyā nopatāpitaḥ |
tasmai namostu te yastvaṃ
tannirvāṇāmṛtahradaḥ || 107 ||

	he trātaḥ - saṃsārabhayapraśamana, iha - jagati

(page  114)
 ādhyātmikādhidaivikādhibhautikātmanā tritāpyā - tāpatrayeṇa ko 
na tāpitaḥ, sarva eva saṃtāpitaḥ | yadudghuṣyate

	ā brahmaṇaśca kīṭāntaṃ na kaścittattvataḥ sukhī |
	karoti tāstā vikṛtīḥ sarva eva jijīviṣuḥ ||

iti | ataḥ te - tubhyameva tasmai - asāmānyāya kasmaicit namaḥ, yastvaṃ tasya 
- viśvopatāpasya nirvāṇe - praśamane amṛtahradaḥ - 
paramādvaitānandasamudraḥ || 107 ||

	tvadbhakteḥ niḥsīmā mahimā iti tatprārthanā asmākam ucitaiva 
ityāśayenāha

kṛtrimāpi bhavadbhakti -
rakṛtrimaphalodayā |
niśchadmā cedbhavedeṣā
kiṃphaleti tvayocyatām || 108 ||

	kṛtrimā - bāhyapūjādhyānajapādinirvartyāpi

(page  115)
 yā tvayi mahādeve bhaktiḥ, sāpi 
akṛtrimatvatprāptyātmakaphalodayamayī yatra, tatra yadi asu niśchadmā - 
nirvyājā bāhyasādhanānapekṣā mahānurāgocchalitā syāt, tat kiṃphalā ? 
kena phalena yuktā iti tvayā ucyatāṃ, jīvanmuktyātmatvatsamāveśamayyāḥ 
tvadbhakteḥ atiriktaṃ phalaṃ na kimapi kalayituṃ śakyamityarthaḥ || 108 ||

	ata eva bhaktiśālinām

taccakṣurīkṣyase yena
sā gatirgamyase yayā |
phalaṃ tadaja jātaṃ ya -
ttvatkathākalpapādapāt || 109 ||

	he aja, tat cakṣuḥ - tadeva prakāśakaṃ jñānaṃ, yena tvam īkṣyase - 
sākṣātkriyase, anyat tu jñānam ajñānameva, prakāśakatvadharmayogāt 
cakṣuratra jñānam ucyate; sā gatiḥ -

(page  116)
 sā samyak pravṛttiḥ, yayā - pūjājapadhyānātmanā 
śarīravākcittanirvartyayā tvaṃ gamyase, anyā tu saṃsārāvaṭapātinī iti 
agatireva; evaṃ jñānapūrvakriyānuṣṭhānalabhyaṃ tadeva samyak phalaṃ, 
yat tvatkathāyāḥ - tvatsvarūpacarcāyāḥ sarvasaṃpatpradatvāt 
kalpapādapakalpāyāḥ sakāśāt jātaṃ paramānandavikāsātmakam, anyattu 
sarvaṃ phalaṃ heyatvāt aphalameva || 109 ||

	ataśca

śreyasā śreya evaita -
dupari tvayi yā sthitiḥ |
tadantarāyahṛtaye
tvamīśa śaraṇaṃ mama || 110 ||

	sarveṣām - īśvara - sadāśiva - śivaprāptirūpāṇāṃ śreyasām 
upari - utkṛṣṭatvena etadeva śreyaḥ - kalyāṇam, yā iyaṃ tvayi - 
cidānandaghane sthitiḥ -

(page  117)
 viśrāntiḥ, tataśca tasmin śreyasi ye'ntarāyāḥ - 
madhyamadhyotthitāḥ tvadakhyātisparśāḥ teṣāṃ hṛtaye - dhvaṃsāya, he 
īśa svāmina mama tvameva śaraṇaṃ, tathā kuru yathā vyutthānāvasare na 
kadācidapi mām akhyātiḥ spṛśati ityarthaḥ || 110 ||

	taditthaṃ bhagavatsvarūpacintanocchalitasamāveśarasena 
ghūrṇamānaḥ savismayamāha

aho svādutamaḥ śarva -
sevāśaṃsāsudhārasaḥ |
kutra kālakalāmātre
na yo navanavāyate || 111 ||

	śarvasevāyā - mahādevabhakteḥ yā iyam āśaṃsā - seveyaṃ śivam 
iti prārthanā saiva sudhā - amṛtaṃ tasya rasaḥ - camatkaraṇam, aho - citraṃ 
svādutamaḥ - paraṃ spṛhaṇīyatayā kṣaṇamapi 

(page  118)
 tyaktum aśakyaḥ, yaḥ kutra - kasmiṃścitkālasya kalāmātre'pi - 
aṃśamātre'pi, na navanavāyate - api tu pratikṣaṇaṃ navanavacamatkāramaya 
eva, na tu itararasavat anavaratāsvādanena vairasyam āvahati || 111 ||

	yatsevāśaṃsāyā iyān mahimā, saḥ

muhurmuhuraviśrānta -
strailokyaṃ kalpanāśataiḥ |
kalpayannapi ko'pyeko
nirvikalpo jayatyajaḥ || 112 ||

	pratikṣaṇaṃ tattatpramātṛprameyābhāsasaṃyojanaviyojanakrameṇa 
aviśrāntaḥ - avirata eva

	tadevaṃ vyavahāre'pi prabhurdehādimāviśan |
	bhāntamevāntararthaughamicchayā bhāsayedbahiḥ ||

iti pratyabhijñākārikānirūpitārthasthityā 
rudrakṣetrajñādisarvapramātṛbhūmikāniṣṭhaṃ bhavābhavātibhavarūpaṃ

(page  119)
 trailokyaṃ kalpanāśataiḥ - bhaṅgīsahasraiḥ, kalpayan - sadā 
pañcavidhakṛtyavaicitryeṇa ābhāsayannapi yo 
nirmalasvatantraprakāśacidekaparamārtha eva asau ajo jayati - sarvotkṛṣṭo 
vartate, kalpanāśatayuktaśca kathaṃ nirvikalpa iti vismayaḥ | ko'pi eka iti 
asāmānyaḥ || 112 ||

	stutyucitāṃ prārthanāmāha

malatailāktasaṃsāra -
vāsanāvartidāhinā |
jñānadīpena deva tvāṃ
kadā nu syāmupasthitaḥ || 113 ||

	he deva, tvāṃ kadā - kasmin kāle, upasthitaḥ - 
tvadabhedaviśrāntyātmakatvadarcāpara eva bhaveyaṃ, kena jñānaṃ - 
tattvāvabodha eva dīpaḥ tena, na tu bāhyakusumādinā | taduktaṃ 
śrīvijñānabhairave

(page  120)
          pūjā nāma na puṣpādyairyā matiḥ kriyate dṛḍhā |
		nirvikalpe mahāvyomni sā pūjā hyādarāllayaḥ ||

iti | kīdṛśena jñānadīpena, malam - akhyātiḥ tadeva vāsanāvartīnāṃ 
snigdhatādhāyakatvāt tailamiva tena aktāḥ siktāḥ yā vāsanāḥ - vicitrāḥ 
dharmādharmādisaṃskārāḥ ta eva vartamānatvāt svayaṃ veṣṭanābhiḥ 
utthāpyamānatvāt vartayaḥ tāḥ dahati avaśyaṃ yaḥ tena || 113 ||

	etatprārthanāpūraṇaṃ ca tava bhagavan helāmātrameva ityāha

nimeṣamapi yadyekaṃ
kṣīṇadoṣe kariṣyasi |
padaṃ citte tadā śaṃbho
kiṃ na saṃpādayiṣyasi || 114 ||

	he śaṃbho, tvadicchayaiva kṣīṇadoṣe - nivṛttakuprācīnasaṃskāre

(page  121)
 citte, mādṛśām anugrāhyāṇāṃ yadi kṣaṇamekamapi padam - 
anugrahītṛtvena adhiṣṭhānaṃ kariṣyasi, tadā kiṃ na saṃpādayiṣyasi - 
sarvāḥ prārthanāḥ tatkṣaṇaṃ pūrayasyeva | taduktaṃ 
śrīmṛtyujidbhaṭṭārake

	nimeṣonmeṣamātraṃ tu tattvaṃ yadyupalabhyate |
	tataḥ prabhṛti mukto'sau na punarjanma cāpnuyāt ||

iti || 114 ||

	ataśca

dhanyo'smi kṛtakṛtyo'smi
mahānasmīti bhāvanā |
bhavetsālambanā tasya
yastvadālambanaḥ prabho || 115 ||

	dhanena - tvadabhedajñānarūpeṇa samṛddhaḥ dhanyaḥ ahameva, tathā 
kṛtaṃ - saṃpāditaṃ kṛtyaṃ - parapuruṣārthaprāptilakṣaṇaṃ yena tādṛk 
ahameva, tathā

(page  122)
 mahān - sarvātiśāyī ahameva, na tu bhedeśvarāvasthitaḥ iti eṣā 
bhāvanā - pratipattiḥ, tasya - kasyāpi, sālambanā - sadarthā bhavati | yaḥ 
tvadālambanaḥ - tvaṃ maheśvara eva ālambanaṃ śaraṇaṃ yasya || 115 ||

	parameśvarādapi tadbhakterutkarṣaṃ darśayati

śubhāśubhasya sarvasya
svayaṃ kartā bhavānapi |
bhavadbhaktistu jananī
śubhasyaiveśa kevalam || 116 ||

	he īśa - svatantra, na kevalaṃ tvatprayukto brahmādiḥ svocitasya 
śubhāśubhasya kartā, yāvat svayaṃ bhavānapi sarvasya śubhāśubhasya - 
vidyāmāyātmano jagataḥ, kartā - janayitā, bhavadbhaktistu 
tvadabhedaprathātmanaḥ śubhasyaiva paraṃ jananaī iti bhavadbhaktiyukte 
svātmani bahumānaḥ || 116 ||

(page  123)
 idānīṃ nirapekṣo bhavacchaktipāta eva 
cidānandaghanasvātmasamāveśamayabhaktibhājo janān saṃpādayati, na tu 
karmasāmyamalaparipākādihetuko'sau, nāpi bhavacchaktyadhiṣṭhānāt 
malasya krameṇa paripāka ityetat ślokadvayena āha

prasanne manasi svāmi -
nkiṃ tvaṃ niviśase kimu |
tvatpraveśātprasīdetta -
diti dolāyate janaḥ || 117 ||

niścayaḥ punareṣo'tra
tvadadhiṣṭhānameva hi
prasādo manasaḥ svāmin
sā siddhistatparaṃ padam || 118 ||
			(yugalam)

	he svāmin, manasi - saṃvedane, prasanne - paripakvamale

(page  124)
 saṃjātakarmasāmye vā sati, kiṃ tvaṃ niviśase - 
svaśaktyadhiṣṭhānaṃ karoṣi, uta tvatpraveśāt - śaktyadhiṣṭhānāt tat 
prasādaṃ gacchet - malaparipākādikam āsādayet iti jano dolāyate - 
saṃdegdhi | atra punarayaṃ niścayaḥ, yat tvadadhiṣṭhānaṃ - 
svarūpagopanānimajjanena tvatsvatantraśaktyunmīlanameva kevalaṃ manasaḥ 
- saṃvedanasya prasādo, na tu malaparipākakarmasāmyādi kiṃcit; tathā hi 
yadi malaparipākaḥ śaktipātasya hetuḥ karmasāmyaṃ vā, tadapi tarhi 
kiṃhetukaṃ ? samadhiṣṭhātrī bhagavacchaktiḥ iti, taddhetukamiti cet alaṃtena, 
bhagavacchaktireva svatantrānugrāhikā bhaviṣyati, ahetukamiti cet sarvasya 
yugapat kiṃ na bhaviṣyati, kasmiṃścitkāle bhavati, iti cet sarveṣāṃ 
bandhakoṭeḥ anāditvāt kālaniyamaḥ kiṃ na kṛtaḥ, kiṃ kurmaḥ, tat kadācit 
kasyacit kathañcit bhavati, iti cet malasya svaśaktyā nirodhakatvena

(page  125)
 na avasthitasya jaḍasya vijātīyakāraṇānupraveśaṃ vinā 
paripākalakṣaṇavilakṣaṇakāryajananānupapattiḥ | kaścideva kālo'tra 
sahakārikāraṇam iti cet, ko'sau iti praśne nottaraṃ labhyate | pariṇamanmalaḥ 
paripākātmakaṃ viśeṣameti, iti cet atrāpi dugdhadadhipariṇāma iva 
uṣṇasparśasya virodhinaḥ kāraṇasya ananupraveśe 
vilakṣaṇapariṇāmānupapattiḥ | yathā svatantraśaktipātavādipakṣe 
karmabhogavaicitryaṃ muktiśca kālaniyamena, bhagavadekakartṛke ca jagati 
māyākālādīnāṃ krameṇa kāryakāraṇabhāvaḥ, tathaiva etadbhaviṣyati iti 
cet cāśapañcāśanyāya āyātaḥ, yataḥ tatpakṣe bhagavāneva svātantryāt 
gṛhītasaṃkocābhāso yathā tattattattvātmanā bhāti, tathā 
tadgataniyatapaurvāparyātmakakāryakāraṇabhāvābhāsātmanāpi 
niyatakarmatatphalavaicitryātmanāpi kramābhāsamayena, na tu atra 
kālakarmādeḥ kasyāpi nijaṃ tattvam asti iti 

(page  126)
 yathā asau itthaṃ bhogavaicitryam ābhāsayati, tathā svasvātantryāt 
anugrahavaicitryamapi ti, tathā svasvātantryāt anugrahavaicitryamapi iti nātra 
nigrahānugrahabhāk kaścit anyo'sti iti niravadya evāyaṃ pakṣaḥ | 
malaparipākādipakṣastu uktadūṣaṇaiḥ sāvadya eva - iti kathamiva 
saṃbhāvanāsāmyamātreṇābhyupagantuṃ śakyam, kramike ca viruddhe dve 
samabale karmaṇī kathaṃ yugapat phaladāne'pi samabalatvāt viruddhatvācca 
tayoḥ pratibandhāt phaladānāśaktatve jātu śaktipātaḥ syāt | kathaṃ vā 
tasmin avasare karmāntaraṃ phalaṃ na dadāti, tasya bhinnakālārjitasya bhinna 
eva paripākakāla iti cet tayorapi bhinnakālārjitayoḥ katham ekakālaḥ 
paripākaḥ | īśvarecchāta iti cet saiva bhagavatī svatantrānugrāhikā astu; alam 
anena ālajālaprāyeṇa malaparipākādinā | vitatya ca etat mayaiva 
śrīsvacchandavivṛtau pañcamapaṭalānte dīkṣāsamarthanāvasare vicāritam |

(page  127)
 yathā ca āgameṣu malasvarūpaṃ, yathā ca etannivṛttiḥ bhavati tadapi 
tatraiva nirvāhitam iti alam iha abhyadhikena, tadetat garbhīkṛtya stotrakāreṇa 
uktam | niścayaḥ punareṣo'tra yat tvacchaktyadhiṣṭhānameva, manasaḥ - 
saṃvedanasya prasādaḥ na tu malaparipākādyapi, tvadadhiṣṭhānameva ca 
siddhiḥ tadeva paraṃ padamiti | idamatra tattvaṃ, yaccitiśaktireva bhagavatī 
svasvātantryāt gṛhītasaṃkocā cittabhūmiṃ saṃsāryātmarūpāṃ 
bahuśākhāmābhāsya, punaḥ svecchayaiva kvacit saṃkocaṃ praśamayya, 
pūrṇatayā sphurati ityeva tatparaṃ padam | yaduktaṃ kenacinmahāyogīndreṇa

	caitanyapūritamidaṃ nikhilaṃ hi viśvaṃ
	cittaṃ cidātmani yadāstamupaiti śaśvat |
	evaṃ citerapṛthageva susaṃsthitatvā -
	dukto nirastakaraṇaḥ paramaḥ samādhiḥ ||

iti || 118 ||

	evaṃ bhagavatsvarūpaṃ nānāvidhābhiḥ sūktibhaṅgībhiḥ

(page  128)
 stutvā, sarvadaśāsu avicalaiva bhagavanmayatā astu iti āśaṃsan āha

vacaścetaśca kāryaṃ ca
śarīraṃ mama yatprabho |
tvatprasādena tadbhūyā -
dbhavadbhāvaikabhūṣaṇam || 119 ||

	tvatstutau yadi vaco mama tvadbhāvanāmayaṃ saṃpannaṃ, tathā 
sadaiva astu, tacca cittasahacāri, cittaṃ ca śarīrāśrayam iti taddvāreṇa tadapi 
teṣāṃ vapuścetaḥśarīrāṇāṃ yatkiṃcit 
arthābhidhānacintanaparispandanādi kāryaṃ tat sarvaṃ mama prabho - 
cidānandaghana svāmin, tvatprasādena - tvadīyena 
svarūpagopanāpraśamanānairmalyagamanena nityameva, bhavadbhāvaḥ - 
tvanmayatvameva ekaṃ bhūṣaṇaṃ yasya tādṛśaṃ syāt || 119 ||

	bhaktimatāṃ śaraṇādipravṛttyarthaṃ 
prasiddhaprabhāvasvanāmodīraṇapūrvaṃ

(page  129)
 stotrasya utkarṣaṃ darśayati upasaṃhārabhaṅgyā

stavacintāmaṇiṃ bhūri -
manorathaphalapradam |
bhaktilakṣmyālayaṃ śaṃbho -
rbhaṭṭanārāyaṇo vyadhāt || 120 ||

	mahāmāheśvaratvena prasiddhaprabhāvaḥ nārāyaṇākhyo bhaṭṭaḥ, 
śaṃbhoḥ - cidānandaghanasvātmapratyābhijñānātmakānugrahakāriṇo 
bhagavato mahādevasya, stavaṃ - stotrameva cintāmaṇiṃ vihitavān, kīdṛśaṃ 
bhūrīṇāṃ manorathānāṃ yat phalaṃ - bhagavatsamāveśalakṣaṇaṃ 
mahāphalaṃ tat pradadāti yaḥ taṃ, yato bhaktireva 
maheśvaraikātmyamayatvāt lakṣmīḥ - parā saṃpat tasyāḥ ālayaṃ - nityaṃ 
nivāsabhūmim | etatstotraśravaṇapaṭhanādinā parā samāveśalakṣmīḥ 
āliṅgati nityameva bhaktibhāja iti śivam || 120 ||

(page  130)
 guṇādityājjāto guṇagaṇagariṣṭhaḥ śivaguṇaiḥ
kṛtāmodo bālyātprabhṛti gatasaṃgo jagati yaḥ |
sa śūrādityo māṃ bahu bahulabhaktyārthayata yat
stutau tenākārṣaṃ vivṛtimiha nārāyaṇakṛtau || 1 ||
śrīrāmeṇa kṛtātra sadvivṛtirityeṣā kimartheti mā
santaścetasi kṛdhvamasti vivṛtau ko'pi prakarṣo'tra yat |
tenārthipraṇayāddinaistricaturairyāṃ kṣemarājo vyadhāt
kṣetre śrīvijayeśvarasya vimale saiṣā śivārādhanī || 2 ||
śaṃbhoḥ prakāśavapuṣaḥ śaktirekā jayatyasau |
yā sphurantyeva tanute parāmṛtamayaṃ jagat || 3 ||


iti śrīmahāmāheśvarācāryavaryaśrībhaṭṭanārāyaṇaviracitaḥ 
stavacintāmaṇiḥ samāptaḥ |

vivṛtiścātra 
tatrabhavatstutisūktikārapraśiṣyamahāmāheśvarācāryavaryaśrīmada-
bhinavaguptapādapadmamadhuparājasya rājānakakṣemarājasya

(page  131)
 		sadvidyānāṃ saṃśraye granthavidvad -
vyūhe hrāsaṃ kālavṛttyopayāte |
tattatsaddharmoddidhīrṣaikatāna-
satprekṣaujaḥśālinā karmavṛttyai || 1 ||
śrīmatkaśmīrādhirājena mukhyai -
rdharmodyuktairmantribhiḥ svairvivecya |
pratyaṣṭhāpi jñānavijñānagarbha -
granthoddhṛtyai mukhyakāryālayo yaḥ || 2 ||
tatrājīvaṃ nirviśadbhirmukunda -
rāmādhyakṣatvāśritaiḥ sadbhireṣaḥ |
pūrtyā śuddhyā vyākhyayā saṃskṛtaḥ stāt
pūrṇo granthaḥ śreyase sajjanānām || 3 || tilakam ||

śrīśivārpaṇaṃ samāveśanirvāṇāvahaṃ ca śrotṛṃ - pāṭhakajanānāṃ 
bhūyāt ||

ayaṃ granthaḥ

paṃḍita viśvanātha eṃḍa sansa
phoṭogrāpharsa proprā - iṭarsa ityādi
ityetaiḥ svakīye

kaśmīra pratāpa sṭīma presa śrīnagara
ityākhyākhyāte
mudraṇāyantre sammudritaḥ




stavacintāmaṇau

dvitīyapariśiṣṭam |

mūlaślokānāṃ saṃkṣepeṇa viṣayārthasaṃgrahaḥ |

1	vikalpamayavaikharīmadhyamāpraśamanapūrvakaṃ 
paśyantīdaśāmunmajjayatastadvyāptikāmanāśritadaśāmapi 
vedyatvenābhāsayataḥ 
paramānandātmakaparādvayapramātṛtāmunmīlayataḥ 
svātmaparamārthaparameśvarasya svarūpasamāveśavimarśanam |

2	pūrvoktasvarūpasyaiva parameśvarasya śaktiprādhānyena stavanam |

3	sadāśiveśvarādinā vedyaparyantena parādvaitaprathānupraviṣṭena 
viśvātmanā rūpeṇa prasarajjñānakriyāśakteḥ prakāśātmano 
narapradhānabhagavatsvarūpasya prahībhāvena vimarśanam |

4	tattaddveṣyastutyādyavasthāsvapi bhagavadanugrahāt 
tadabhedaprathātmikāyā vibhūterāsādanakathanam |

(page  140)
 5	vāsanāploṣayuktyaivākhyātipraśamanapūrvakaṃ 
pāśakṣapaṇapūrṇasvarūpaprathanena svātmarūpamaheśvarasya 
anugrāhyānugrahasamāveśārthanam |

6	vaiśeṣikābhyupagataparāparasāmānyavyatiriktasarvasāmānya-
pūrṇāhantātmakamahācaitanyarūpapārameśvarasvarūpavimarśanaṃ 
namaskaraṇamukhena |

7	anupalabhyamūrtitvādatisusūkṣmatve'pi 
śaktyaṇḍaparyantasamastajagadvyāpakasya 
citprakāśadharmabhagavatsvarūpasyābhivandanam |

8	viśvasṛṣṭisaṃhārātmakahānasamādānadharmatvena 
upacaritahaṃsasvarūpasya parameśvarasyaivāntarabhedena 
dhṛtabrahmāṇḍagarbhonmanārūpahaṃsīśaktiparāmarśanam |

9	upādānādikāraṇāsattve śūnyabhuvyeva 
jagaccitraracanātmātidurghaṭakarmaṇo'vyāhatasvātantryaparameśvaraviṣa-
yasvātmasamāveśanam |

10	māyāsaṃparkarahitatvena svacchaśivajñānasya parameśvarāat 
prārthanam  |

11	meyapade pramāṇagamyatve'pi vastuto'bhedarūpatayā 
pramāṇavyāpārātītāya parameśvarāya 
śarīraprāṇapuryaṣṭakādisamarpaṇarūpabalinivedanam |

(page  141)

12	 gāmbhīryādiguṇatayā durbodhāyāḥ 
śuddhaprakāśapraśamitākhyātitimirāyāḥ 
pārameśvaramāyāśakterdarśanākāṃkṣaṇam |

13	bhaktyudrekavaśāt svapne'pi 
sākāraparameśvarapraṇāmatatparebhyaḥ praṇamanam |

14	pārameśvaraṃ svarūpaṃ pratyavamraṣṭuṃ 
janmamaraṇonmūlanaśaktāyā 
rucerbuddhimatāmatyabhilaṣaṇīyatātideśanam |

15	parameśvaraprasādāt yāvajjīvitāvasthaṃ tadekāgramanaskatayā 
sthiteḥ prārthanam |

16	anantaśākhāvistīrṇavedāgamamayatvena 
tattatphalotpādakakalpavṛkṣarūpaśaṃbhorabhivandanam |

17	vāṅmanaḥkāyanirvartyasamastakarmaṇo bhagavati samarpaṇāt 
tattādātmyena tadvannirdvandvatāyā āśaṃsanam |

18	jagadviṣayakasṛṣṭisaṃhārādiniyogeṣu 
nijasvātantryaśālitāpraśaṃsitaśaṃbhave praṇamanoktiḥ |

19	nistraiguṇyamahāprakāśātmabhagavannāmamātracintanenābhīṣṭā-
vāpteranyālambanānāṃ dhyānānāṃ niṣprayojanatākathanam |

20	bhagavadvācakamahāmantrasattānupraviṣṭānāṃ 
śāṃbhavavibhūticamatkaraṇodyuktatākathanam |

21	sarvasyaiva kāyavāṅmanoviṣayasya bhagavanmayatvāt 
bhaktimatāmaprayāsameva bhagavatsvarūpalābhakathanam |

(page  142)
 22	bhagavadviṣayakasya 
śarīramanovāṅnirvartyārcanadhyānādirāmasyottarottaravardhanāśaṃ-
sanam |

23	ākṛtimattve'pi tāttvikasvarūpāparityāgāt sarvasaṃvidāṃ 
sthirapūrṇāhantātmani viśrāntipradasya bhagavato'bhivandanam |

24	ajñānarūpatimirapraśamopāyabhūtasvasmṛtipradānottaraṃ 
prahaviṣayanairmalyāśrayaṇaprārthanam |

25	bhogāpavargasaṃsādhakabhagavatpraṇāmasyāpi praṇamyatayā 
samāśrayaṇīyatvakathanapūrvakaṃ bhagavadabhivandanam |

26	duruttarabhavāmbhodhimagnānāṃ taduttaraṇopāyabhūtāyāḥ 
sarvābhīṣṭapradabhakterbhagavata evāsādanottaraṃ 
bhogamokṣātmasaṃpūrṇeṣṭāvāpteranuśāsanam |

27	keṣāṃcideva lokottarāṇāṃ bhagavattattvajñānāda 
khyātyapagamottaraṃ niścalaparamādvaitajñānalābhānuśaṃsanam

28	nirguṇasya niṣkāmasyāpi bhagavato 
jñānātmakatadguṇāvabhāsināṃ bhaktānāṃ jñeyatayā 
tattadbhogamokṣātmapāryantikaphalatayā sarvotkṛṣṭatvena parāmarśanam |

29	śrīratnāmṛtādinidānabhūtakṣīrodadānena 
bhagavato'sāmānyaiśvaryaprakarṣakathanam |

30	nutismṛtyātmānuttaropāyabhaktimātreṇa bhogāpavargaphaladātre 
parameśvarāya praṇamanam |

(page  143)
 31	sarvajñaḥ sarvakṛtsarvamayaśca parameśvara eva 
itīdṛśajñānaśālināṃ sarvaṃ jñeyaṃ kāryaṃ ca bhagavatā 
vaiśvātmyenānubhāvyate ityanuśāsanam |

32	viśvasya yadīyecchāmātreṇa niṣpattistasya bhagavataḥ kāryajñānaṃ 
brahmādīnāmapi durūhamiti nirdeśanam |

33	tattatprayatnaśatānuṣṭhānenāpi 
brahmādikāraṇānāmapyalabhyadhāmnaḥ parameśvarasya praṇamanam |

34	brahmādayo'pi yacchaktivikāsabhaṅgibhūtāḥ 
tasmātparameśvarātpālanārthanam |

35	parameśvarasya mahāvyāpakatayā durjñeyatva-
duṣprāpyatvakathanamukhena stavanam |

36	bhaktiśālināṃ stutismṛtyādyavasthāsu 
tadabhedāvaṣṭambhamayatādhigamāt tatkālataḥ 
paramānandasphāraphalodbhāvakāya parameśvarāya namaskaraṇam |

37	sṛṣṭyādikāriparimitabrahmādipadaviṣayakasmayaparityāgāt 
bhaktānāṃ bhagavatsvarūpapratyabhijñāvaśonmiṣitasarvāhaṃbhāva-
rūpamahāsmayagrahaṇena paripūrṇatayā sphuraṇānuśāsanam |

38	bhaktiśālināṃ bhagavaccaitanyānandaviśrāntyā 
vikalpātmakavyutthānadaśāyā api samādhirasapariplutatākathanam |

(page  144)
 39	atisūkṣmarūpatve sarvasyāstrilokyāstatkalāmātratvena 
darśanāt, sthūlarūpatve brahmādibhirapi durlakṣyatvāt, sarvathaiva 
aparicchedyamūrterbhagavatastāttvikarūpaviṣayātarkyatāyā bhaṅgyā 
pratipādanam |

40	sarvaśāstrāṇāṃ śabdarāśiśarīratāttvikaparameśvarasvarūpaprati-
pādanatātparyasattayā prekṣāvatāṃ pravṛttiviṣayatvānukīrtanam |

41	tāttvikānāyāsayādṛśakramakarmabuddhyādinā 
parameśvarajñānaviṣayopadeśātmaprasādābhyarthanam |

42	svayamanupakāryatve viśvopakārakatayā niḥspṛhatve 
sarvaspṛhaṇīyatayā lokottarotkarṣaśālibhagavato'bhivandanam |

43	aparicchinnapārameśvarasvarūpaprāptiphalakabhaktyadhiṣṭhāna-
bhūtāyāḥ kṣetrajñatāyāḥ sāmānyoktyā ślāghanam |

44	bhagavatsvarūpanidhiprāpikāyāṃ bhaktau vimukhānāṃ 
duratikramabhagavanmāyayaiva vyāmohitatāpratipādanam |

45	sarvatra parameśvarasyaiva mukhyaṃ kartṛtvamanyeṣāṃ tu 
tadutthāpitatattadabhimānamātrasatattvamiti pratipādanaṃ stutimukhena |

46	guṇatrayakāryabhūtasukhaduḥkhādidvandvamagnajagaduddharaṇāya 
ṛte parameśvaramanyasya śaktiḥ kṛpā vā nāstīti pratipādanam |

(page  145)
 47	bhagavadaikyabhāvanābhāvābhāvayoreva guṇināṃ 
guṇavattayā duṣṭānāṃ doṣavattayā nidarśanam |

47 (2)	sarvathānyaviṣaye tyāgaprārthanottaraṃ bhagavadviṣayayoreva 
rāgalobhayorapyabhyarthanam |

48	svargaphalakāgniṣṭomādyadhikāriniyamanavaiśiṣṭyena muktiphalake 
nirāyāsabhagavadbhāvanātmake karmaṇi sarvasya 
jantumātrasyādhikārānuśāsanam |

49	bhogāpavargaphalakasagrastakarmaṇāmādimadhyāvasāneṣu 
bhagavatsaṃvillagnatvādeśanam |

50	atisevanādvairasyāvahetarāsvādanīyaviṣayavaiśiṣṭyena 
bhagavadbhaktisudhāyā 
evottarottarasevanānnavanavacamatkārapradatvādutkṛṣṭamahimādeśanam |

51	kāmasaṃharaṇādiviśvātiśāyikāryavaicitryakāritayā 
ākṛtimattve'pi atidurghaṭaiśvaryaśāliparameśvaraviṣayapraṇamanam |

52	māyāvyāmohenāsvātantryāpattyā kiṃcitkartumaśaktajantuvargasya 
tatkṣaṇācchaktyāpādipārameṣānugrahaśaktereva śaraṇākhyānam |

53	svatantracidekamūrteḥ parameśvarasya sarvatra 
niṣpratidvandvitākathanam |

(page  146)
 54	bhagavadātmakatvānnirastasamastopādhīnāṃ jīvānāṃ 
mohāpāditayā māyāyāḥ prabhāvātiśayadyotanam |

55	aṇimādisiddhyavāptyacalaiśvaryādhigamabhavaviratiphalānāṃ 
bhagavadbhaktikalpapādapasyaiva prabhavatvādeśanam |

56	sarvadeśakālavyāpakatayā labdhe'pi bhagavatsvarūpe 
sūkṣmatamadehādisaṃskāragalanāya tadātmasādbhāvasya 
punārāśaṃsanam |

57	sanmānasanivāsi- bhūtisitāṅgamahāhaṃsarūpāya śaṃbhave 
punarapi bhaktibhareṇa namaskaraṇam |

58	aśeṣatamo'paharaṇabhavakadarthanendhanadāhabhagavatsvarūpa-
bhūtamahāprakāśananidānabhagavadbhaktidīpikāyā abhyarthanam |

59	bhagavata eva viśvasarjanādināṭakaprastāvanottaraṃ 
tatsaṃharaṇātmanirvahaṇakṛtyakṣamakavitānuśāsanam |

60	sadasatorasattvasattvasaṃpādanasvatantrasya 
jagadutpattivināśanaiśvaryaśālino bhagavato'bhivandanam |

61	ānandasāgarātmabhagavato 
viśvavartiyāvanmātrānandasyaikavindurūpakathanottaram namaskaraṇam |

62	bhagavadvācakamahāmantravimarśanaikatānatayā brahmādīnāṃ 
dhanyatvānuśāsanam |

(page  147)
 63	svayaṃ nirīhasyāpi bhakteṣṭasaṃpādakatayā, advayātmatve'pi 
bhogyabhūtaviśvacamatkartre bhagavate'bhivandanam |

64	sarvakāraṇakāraṇādbhagavata eva brahmādikīṭāntānāṃ 
sarveṣṭasiddhyāptyāvedanam |

65	niścetumaśakyajagadvicārādiprayojanasaṃkaṭeṣu 
māyāsphāramalinīkṛtāyā buddheḥ tatsmaraṇamātreṇa 
prasādādhigamāttattvajñānasāmarthyānuśāsanam |

66	icchāmātreṇaiva viśvodayapralayakṛtsāmarthyasya bhagavata 
evābhaṅguraprabhuśaktyāvedanam |

67	bhagavadabhedabhāvanāsattāsattayostaduddeśena vihitasya 
niṣiddhasyāpi sukṛtatā, tadanuddeśena vihitasya sukarmaṇaśca duṣkṛtatā- 
ityevamanuśāsanam |

68	satatoditabhagavatsamāveśātmabhaktirasāsvādarūpadraviṇayutānāṃ 
bhagavatsvātmīkaraṇasākṣātkaraṇādivikalpaiḥ 
parāmarśanāddhanyatvanirdeśanam |

69	paramānandaviśrāntipradavedātmājñāniyoktuḥ, tathā 
tadṛgādivedatrayaparāmarśanīyatejorūpādapyuttīrṇasya parameśvarasya 
stavanam |

70	parameśvarasyaiva viśvavartivedoditavidhiniṣedhātmavicitrasvabhāva-
parispandapravartakatvapratipādanam |


(page no. 148, 149 is ṃissing)



(page  150)
 85	svātmanaḥ prakāśaikātmasatyasaṃkalpabhagavatsvarūpābhi-
nnatāmanubhūya saṃsāritvasya svapnakalpatayāpyasaṃbhavattākathanam |

86	yattadbhedabuddhyapagamottaraṃ bhagavati 
nikhilakarmatatphalasaṃnyāsinā-matiślādhyaiśvaryabhāgitvānuśāsanam |

87
	sarvāpadapaharaṇasarvasaṃpaddānasamarthabhagavadvāllabhyādhigam
e bhaktānāṃ svātmaślāghanam |

88	māyāvyādhyandhīkṛtajñānacakṣuṣaḥ 
pūrṇaprathānayanātmārogyā-pādibhagavadbhakteḥ paramāñjanatayā 
nirūpaṇam |

89	gāḍhotkaṇṭhāvaśātkṣaṇamātrāsahanavirāvaṇottaraṃ 
nirbhayānandād-vyāvyayabhagavatpadādhigamābhyarthanam |

90	brahmādibhirapi dustarasya gabhīraduḥkhamayabhavasāgarasya 
tātparyeṇa bhagavadupāsattestaraṇopāyatayāśaṃsanam |

91	jagadvighātadurmadakālakāmayornigrahaṇena, patitapāvanatayā 
jagadupakartryā gaṅgāyāḥ śirodhṛtyā ca, ākāradhāritve bhagavata eva 
yathocitakāritāśaṃsanam |

92
	brahmādivartyaiśvaryādipadacatuṣkotkṛṣṭaśuddhacidātmasthityarthina
aṃ bhagavata eva taddātṛtayā parāyaṇānuśāsanam |

(page  151)
 93	bhagavadanicchayā brahmādīnāmapi 
tṛṇakubjīkaraṇāsāmarthyasya, tathā 
tadicchānugṛhītakīṭāderapibrāhmapadodvahanasāmarthyasya nirdeśanam }

94	maheśvarapraṇāmāsaktyātmāmūlyaratnabharitamukuṭonnataśira-
skatayā tattvāvabodhākṣayadrāviṇānāṃ deveṣvapi 
svapraṇatasaṃpādanasāmarthyasaṃbhūtyanuśāsanam |

95	sarvamohatyāgottaraṃ 
prakāśātmakabhagavadvimarśānandasvātantryaśaktyāsādanāmṛtāśaṃsa
nam |

96	citradṛṣṭamanorathollikhitasyātāttvitve'pi bhagavadākṛtimātrasya 
bhaktajanasarveṣṭasaṃpatpradātṛtvakathanam |

97	parameśvarādanyasya guṇādhikyādarśanāt tathā 
nairguṇyādarśanācca pakṣadvayavyājastutinindayoḥ 
paryavasānāniścayanākhyānam |

98	bhagavatkīrtanajanyāmṛtāsvādane'pi anyasya 
devāderasāmarthyasūcanottaraṃ bhagavata eva 
tadamṛtadānasāmarthyasūcanam |

99	itarakāmānabhīpsayā sarveṣṭāsiddhinidherbhagavataḥ 
parasiddhilābhātmatadekāntabhaktyāśaṃsanam |

100	svabhaktebhyaḥ 
svātmaikaprathanātmatrailokyasvāmyadāne'nargalasvātantryaudāryabhagavat
o'bhivandanam |

(page  152)
 101	sarvaduḥkhāpaharaṇahetuḥ kaḥ ! iti saṃdihya parameśvara eva 
tādṛgiti niścinutāṃ taccharaṇatākathanam |

102	bhagavadbhaktimatāmeva 
yogaprabhāvākṛṣṭasāṃsārikabhogopabhogottaramakhyātyātmabhavabhrānt
iṃ hitvā parapadāvāptyāśaṃsanaucityānuśaṃsanam |

103	bhagavadadvayātmatayā tadāyattānāṃ mohamayīṣu 
svapnādyavasthāsvapi kṛtasya yattatpuṇyāpuṇyātmakarmaṇaḥ 
parānandaphalajanakatāvedanam |

104	paraprakāśātmabhagavaddhāmaniṣṭhacittasya 
tamaḥsaparkātyantābhāvakathanam |

105	paramaśivasevotsāhāya kṛtamanorathamātrasyāpi mokṣapade 
padanyāsānuśāsanam |

106	nānābhogāsañjanātmasthityā, 
yathocitaśarīrabhavanajananātmotpattyā 
bhogaparamparānuṣaṅgaśrāntānāṃ viśrāntidānāyetkālaṃ 
saṃhārātmalayena ca jagadukaraṇe pārameśādvayaśākteḥ 
paramasvātantryāvedanam |

107	ādhyātmikādhidaivikādhibhutikātmatritāpatāpitasamastaprāṇināṃ 
tāpaśamanāmṛhūdatānirūpaṇottaraṃ bhagavato'bhivandanam |

(page  153)
 108
	savyājapūjādhyānajapādinirvartyabhagavadbhaktermokṣa-
phalajanakatvānuvādottaraṃ nirvyājabhagavadanurāgocchalitatatsamāveśopa-
lakṣitabhakteranirvacanīyaphalatvenāparimeyaphalatvasūcanam |

109	cakṣuṣo bhagavalliṅgādiprekṣaṇe, gateśca 
bhagavatpūjādisthānagamane, 
bhagavatkathātmasarveṣṭapradakalpāpādapajanyaphalasya ca 
śabdārthadvārā saphalyamāvedya, jñānasya 
bhagavatsvarūpajñāpakatayā, yogādigateśca bhagavatpadaprāpakatayā 
sarvasaṃpatpradakalpapādaparūpabhagavatsvarūpacarcāyāḥ 
samudbhavatparānandavikāsātmakaphalasya ca ślāghyasāphalyāvedanam |

110	nikhilaiśvaryāptyātmaśreyasāmutkṛṣṭaśreyobhūtacidānandaghana-
viśrāntyai madhyata udbhavadbhagavadakhyātyātmāntarāyadhvaṃsāya 
bhagavaccharaṇatābhyarthanam |

111	uttarottarāsvādane navanavacamatkārajanakatayā kṣaṇamapi 
tyaktumaśakyasya bhagavadbhaktyamṛtarasasyāśaṃsanam |

112	tattatpramātṛprameyābhāsasaṃyojanaviyojanakrameṇa 
rudrakṣetrāditrailokyaṃ kalpanāśatairanavarataṃ kalpayato'pi bhagavato 
nirvikalpāvasthayā sthityāvedanam |

(page  154)
 113	trimalātmatailamalinasaṃsāravāsanāvartidāhitattvāva-
bodhātmadīpāvalambanottaraṃ parameśasaṃnidhau 
svopasthitikṣaṇāśaṃsanam |

114	bhagavadanugraheṇaiva prakṣīṇapūrvatanakutsitasaṃskāre citte 
kṣaṇamātramapi parameśvarādhiṣṭhānasya 
svābhīṣṭasaṃpādakatvānuśāsanam |

115	bhagavadāśritajanasyānuttaradhanyatvakṛtakṛtyatvamahattvādi-
garvāṇāṃ vāstavaśobhitvāvedanam |

116	parameśvarasya miśraśubhāśubhaphalajanakatvaṃ, tadbhaktestu 
śuddhotkṛṣṭaśubhaphalajanakatvamanūdya bhaktimatāṃ 
bahumānamānyatāvedanam |

117 - 18	kiṃ malāpagamena prasannaṃ mano bhagavatādhiṣṭhīyate, uta 
bhagavadadhiṣṭhānenamalāpagamāt prasannatāmāsādayet ! iti 
śaṅkanapūrvakaṃ bhagavadadhiṣṭhittyaiva malahānyā prasannamanasaḥ 
sarvāsiddhyāptiparapadāsādanānuśāsanam |

119	vāṅmanaḥ karmamāyānāṃ bhagavadanugrahāsādanottaraṃ 
bhagavadbhaktibhūṣaṇabhūṣitatvābhyarthanam |

120	granthakṛtaḥ prasiddhaprabhāvasvanāmodīraṇottaraṃ svakṛtagranthasya 
bhagavatsamāveśātmānuttaraiśvaryaphalaprasavatayā

(page  155)
 cintāmaṇyabhikhyāpanenātyantopādeyatānirdeśanam |


iti stvacintāmaṇau granthaprakāśaka0 paṃ0 mukundarāma śāstriṇā 
viracitaḥ pratiślokaṃ pratipāditārthasaṃkṣepaḥ samāptaḥ ||

dvitīyapariśiṣṭabhāgaśca samāptaḥ ||

###########   END OF FILE  #######