####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00097
Uniform title: vāmakeśvarīmata
Main title: vāmakeśvarīmata with the commentary of jayaratha
Secondary title: vāmakeśvarīmatavivaraṇa
Secondary title: nityāṣoḍaśikārṇava (alternate title)
Commentator : jayaratha
Editor : śāstrī m k

Description: 
E-text transcribed from volume 66 of the Kashmir Series of Texts and Studies.


Notes: 
This e-text was transcribed by the staff of Muktabodha under the supervision of Mark S.G. Dyczkowski.          Revision 0: Oct. 16, 2007       

Publisher : Research Department, Jammu and Kashmir State
Publication year : 1945
Publication city : Srinagar
Publication country : India
####################################################



atha

śrīvāmakeśvarīmatam
śrīmadrājānakajayarathaviracitavivaraṇopetam |

prathamaḥ paṭalaḥ |

svasvāmibhāvaparijṛmbhaṇasāracakra-
cakreśvarīmayatayā navadhā svarūpam |
ābhāsayantyadhanude tripurāstu sarva-
sarvātmakatvakalanena nijākṣarāṇām || 1 ||
jayanti paramādvaitavijñānāmṛtanirbharāḥ |
pūrve śrīdīpikācāryapramukhā guravo mama || 2 ||
parakṛtakukalpanāmayatimirāndhyāpohanāya manāk |
śrīvāmakeśvarīmatamuddyotayituṃ mamodyamo'dyāyam || 3 ||
      iha khalu kañcana parānujighṛkṣāparatayā avatitārayiṣitarahasyaitacchāstragarbhīkāreṇa 
bhaktitāratamyāt paunaḥ punyena samucitanamaskāryanamaskāraṃ karoti tantrāvatārako

gaṇeśagrahanakṣatrayoginīrāśirūpiṇīm |
devīṃ mantramayīṃ naumi mātṛkāṃ pīṭharūpiṇīm || 1 ||

      iha

      - - - - - na vidyā mātṛkāparā | (sva0 11|199)
iti paśubhirajñātasvarūpāṃ bhagavatīṃ mātṛkāmanyatra
      yā sā śaktirjagaddhātuḥ kathitā samavāyinī |
(mā0 vi0 3|5)
ityādinā uktām, ihāpi

p. 2)

tripurā paramā śaktirādyā jātāditaḥ priye |
sthūlasūkṣmavibhāgena trailokyotpattimātṛkā || (4|4)
ityādināṃ vakṣyamāṇasvarūpām, gurubhirapi
citiḥ pratyavamarśātmā parā vāk svarasoditā |
svātantryametanmukhyaṃ tadaiśvaryaṃ paramātmanaḥ ||
sā sphurattā mahāsattā deśakālāviśeṣiṇī |
saiṣā sāratayā proktā hṛdayaṃ parameṣṭhinaḥ ||
(ī0 pra0 1|5|10)
ityādinā nirūpitāṃ parahaṃparāmarśasārāṃ parāṃ parameśvarīṃ vācyavācakātmano 
viśvasya jananīṃ svātantryātmikāṃ śaktim,
      - - - - - - - - - - - - ekākī na ramāmyaham |

itivacanāt

      āsthāsyadekarūpeṇa vapuṣā cenmaheśvaraḥ |
      maheśvaratvaṃ saṃvittvaṃ tadatyakṣyadghaṭādivat
      (ta0 3|100)
ityādyuktayuktyā ca bahirullilāsayiṣayā unmiṣantīṃ śrīmannaravāhanadattasūtritayā

      akacaṭatapayaśagaṇeśagrahādhīśanakṣatrarāśīśvarī-yoginīvācyagarbhā
ityādibhaṅgyā gaṇā aṣṭau vargāḥ,

arkārajīvabudhaśukraśanaiścarādyā
vargāḥ krameṇa kathitā grahaṣaṭkayuktāḥ |
indormukhasya ca sitāsitapakṣayogād
hlādopatāpajanakau kathitau yaśau tu ||

ityādyuktyā tadīśā grahāḥ

dvādaśamaṇḍalabhagaṇastatrārdhe siṃhato ravirnāthaḥ |
karkaṭataḥ pratilomācchaśī tathānye'pi taddānāt ||

p. 3)

ityukteḥ, pāramparyeṇa sākṣācca tadadhiṣṭhānaṃ nakṣatrāṇi, yoginyastattadgrahādiyogabhāktvāt 
pratipadādyāstithaya āvṛttyā tadavalambanena udīyamānā brāhmyādyā api, rāśayo 
meṣādyāśca tadrūpiṇīṃ
      kālaḥ sūryādisaṃcāraḥ - - - - - - - - - - - - - | (ī0 pra0 2|1|3)
iti mahāgurūditalakṣaṇakālarūpatayā prasphurantīmityarthaḥ | na kevalamevaṃ 
yāvaddeśarūpatayāpi prasphuratītyāha - pīṭharūpiṇīmiti | pīṭhaśabdena
      pīṭhastu mātṛkā proktā - - - - - - - - - - - - - - - - |
iti sakalajagadādhāramātravācitve'pi atra tadavinābhāvitvāt deśa ākṣipyate iti deśarūpatayāpi 
avabhāsamānāmityarthaḥ | ayamatra āśayaḥ - paraiva hi saṃvit svātantryāt prathamaṃ 
viśvamavabibhāsayiṣuḥ

mūrtivaicitryato deśakramamābhāsayatyasau |
kriyāvaicitryanirbhāsāt kālakramamapīśvaraḥ ||
      (ī0 pra0 2|1|5)

itidiśā mūrtivaicitryāvabhāsanena parasūkṣmasthūlatayā kalātatvabhuvanātmanā sphurantī 
deśādhvānamavabhāsayati, kriyāvaicitryanirbhāsanena api varṇamantrapadātmanā kālādhvānamapīti 
ṣaḍvidhādhvamayanikhilaviśvarūpatayā sphuratīti | yadāhuḥ

tatra kriyābhāsanaṃ yatso'dhvā kālākhya ucyate |
varṇamantrapadābhikhyamatrāstyadhvatrayaṃ sphuṭam ||
yastu mūrtyavabhāsāṃśaḥ sa deśādhvā nirūpyate |
kalātattvapurābhikhyamantarbhūtamiha trayam ||
trikadvaye'tra pratyekaṃ sthūlaṃ sūkṣmaṃ paraṃ vapuḥ |
yato'sti tena sarvo'yamadhvā saḍvidha ucyate || (taṃ0 6|36)

p. 4)

iti | etadadhiṣṭhātṛttvena api iyameva avabhāsate ityāha mantramayīmiti | mantraśabdena ca atra 
sapta api śivādayaḥ sakalāntāḥ pramātara upalakṣyante iti nikhilarudrakṣetrajñādimayatayā api 
ābhāsamānāmityarthaḥ | tadevaṃ pramātṛprameyādikṣobhamayatve'pi apracyutaprācyasvarūpaiva 
iyamiti uktaṃ devīmiti evamapi parapramātrekarūpasvaprakāśaparasaṃvidātmanaiva dyotamānāṃ 
naumi dehādimitapramātṛtāguṇībhāvena citpramātṛtayā samāviśāmītyarthaḥ | iha prakṛtasya 
arthasya aviśrāntatāyāmupakṣepyasya arthasya abhidhānameva tāvanna nyāyyaṃ, tatrāpi 
aśabdārthaṃ kaṣṭakalpanāvalopanītamasaṅgataprāyaṃ ca taditi kaṣṭātkaṣṭaṃ yat 
gaṇeśaśabdākhyāne gakārasya tāvat tṛtīyātmakasaṃkhyeyamātrābhidhāyitve 
tritvalakṣaṇasaṃkhyābhidhānābhāvāt na tryarārthapratyāyakatvam | tatrāpi svāmipadenaiva 
gatārthatvāt vyarthametadupādānam | eka evahi tryaralakṣaṇaścakrāvayavaḥ pratipādyo vartate | sa 
ca etāvataiva siddha iti kimetadupādānena | yadāgamaḥ
tatraikamaṣṭakaṃ madhye dvidaśānte caturdaśa |
caturdaśa daśadvandvamaṣṭāvakaṃ maheśvari ||
iti | atha svāmipadena madhyamātramucyate varṇapadena tu tryaramiti cet, na ubhayathāpi 
madhyāvyatirekeṇaiva asyarthasya svayaṃsiddheḥ | nāpi akṣapatitvena ekataradaśārāvayama astasya 
dikpatitvavat daśatvalakṣaṇasaṃkhyābhidhāyitvābhāvāt |
mana eva daśānāmapi akṣāṇāmekaḥ patiḥ | yadāgamaḥ
tat tridhā taijasāttasmānmano'kṣeśamajāyata || (mā0 vi0 2|31)

p. 5)

iti | buddhindriyagaṇapatitā manasaḥ ityapi bhavataiva uktam | gaṇapatitithirapi saṃkhyeyasya 
abhidhāyikaiva, natu saṃkhyāyā iti na asyā api caturdaśāravācakatvamiti uktaprāyam | 
gaṇayorīśārṇatayā ityanenāpi ṣoḍaśāradvayamucyate | naca atra etat vivakṣitamekasyaiva 
ṣoḍaśārasya iṣṭeḥ | gaṇeśaśabdaśca kena vyāpāreṇa enamarthamabhidhatte iti tāvat 
bahuvaktavyatvādāstāṃ, tatrāpi saṃkhyeyameva avagamayati, na saṃkhyāmiti punarapi 
prakṛtārthānupapattireveti na sākṣāt nikhilacakrāvayavapratipādanaṃ siddhyet | kiṃca gaṇeśā 
aṣṭau, grahāśca aṣṭau, nakṣatrāṇi ca saptaviṃśatiḥ | kathaṃ navacakrakalāḥ
aṇimā laghimā mahimeśitvavaśitve prakāmatā bhuktiḥ |
icchāmokṣarasāścehoktāḥ siddhayastantre ||
ityādyuktyā daśa siddhīrmudrāśca vidyāśca aṣṭāvabhidhātumutsahante iti
svāmitayā varṇatayā nandyāditayākṣadikpatitvena |
gaṇapatitithirūpatayā vidyeśatayā kramākramataḥ ||
gaṇayorīśārṇatayā lokeśatayā tathā ca navacakryām |
śaśiguṇavasudaśadaśamanuvasupativasuvāg gaṇeśapadam ||
cakrakalāsu gaṇeśāścakreṣu ca vācakā grahā navasu |
nakṣatrāṇi navasvapi siddhiṣu mudrāsu vidyāsu ||
ityādyuktamiveti lokamahattayā saṃbhāvyamānānāmevamucyamānaṃ sarveṣāṃ karṇakaṭukamiva 
pratibhāsata iti sthālīpulākanyāyena iyadeva āstām | evaṃ gaṇeśādigaṇanayā 
tricatvāriṃśatkoṇatvādivyākhyānamardhocchiṣṭaprāyameveti kimanenāpi granthavistarakāriṇā 
prakṛtānupayoginā paryālocitena | marmasthāneṣu punaḥ
p. 6) pratipadametanmātsaryālocanaṃ sarvathā kāriṣyato'nyathā pravṛttireva duṣyatīti 
alamativistareṇa || 1 ||
evaṃ
saṃsāraikanimittāya saṃsāraikavirodhine |
namaḥ saṃsārarūpāya niḥsaṃsārāya śambhave ||
      (u0 sto0 1|8)
itimahāgurūditadṛṣṭyā evaṃvidhaṣaṭvidhādhvarūpaṃ saṃsārabhāvirbhāvya, punarapi svacchayā 
tirobhāvayatīti atidurghaṭakāritvamasyāḥ pradarśayitumāha

praṇamāmi mahādevīṃ mātṛkāṃ parameśvarīm |
kālahallohalollolakalanāśamakāriṇīm || 2 ||

tasyāpyūrdhvamameyastu kālaḥ syātparamāvadhiḥ |
nityo nityodito devi akalyaśca na kalyate ||
sa cādhaḥ kalayetsarvaṃ vyāpinyādiṃ dharāvadhim |
tuṭyādibhiḥ kalābhiśca devyadhvānaṃ carācaram ||
      (sva0 11|311)
ityādinirūpitasvarūpasya kālasya yo hallohalaḥ
      sa kālaḥ sāmyasaṃjñaśca - - - - - - - - -  | (sva0 11|309)
ityuktaprakarṣāprakarṣaśūnyasāmyātmakāvibhāgasvabhā-vo'vasthāviśeṣastasya ullolāḥ
aparaḥ ṣoḍaśo yāvatkālaḥ saptadaśaḥ paraḥ |
parātparastu yaḥ kālaḥ sa priye'ṣṭādaśaḥ prabhuḥ ||
      (sva0 4|329)
ityādyuktāni tuṭilavanimeṣādyātmakāni visphūrjitāni taryāḥ 
kalanāstattadābhāsabhedāhitakramākramaprāyatayā avacchedāstāsāṃ śamakāriṇīṃ

sarvatrābhāsabhedo'pi bhavetkālakramākaraḥ |
vicchinnabhāsaḥ śūnyādermāturbhātasya no sakṛt ||
      (ī0 pra0 2|1|6)

p. 7)

ityādyuktayuktyā parimitaśūnyādipramātṛtāvilāpanena
sarvāṃ mamāyaṃ vibhava ityevaṃ parijānataḥ |
viśvātmano vikalpānāṃ prasare'pi vimuktatā ||
      (ī0 pra0 4|1|6)
ityādyanusandhānabhājamanugrāhyajanamakhaṇḍaparipūrṇa-parasaṃvidātmani akālakalite pare 
dhāmni viśrāmayantīm, ata eva mahādevīṃ mahattvena aparicchinnaparasaṃvidekaghanatayā 
dyotamānām, ata eva parameśvarīmatidurghaṭakārisvātantryaśālinīṃ mātṛkāṃ praṇamāmīti 
vākyārthaḥ || 2 ||
	na kevalamevaṃ yāvattattatsiddhidānapravaṇā api iyamityāviṣkartumāha

yadakṣaraikamātre'pi saṃsiddhe spardhate naraḥ |
ravitārkṣyendukandarpaśaṅkarānalaviṣṇubhiḥ || 3 ||

      yasyā vāgbhavādāvekasminnapi akṣaramātre vakṣyamāṇaikaikākṣarasādhanaprakriyayā 
saṃsiddhe naro'pi ravyādibhiḥ spardhate tatsamāna eva jāyate ityarthaḥ | yadvakṣyati
      tato bhavati vai devi vainateya ivāparaḥ || (4|45)
iti,
tato bhavati deveśi sarvaśṛṅgāramāninām |
rāgiṇāṃ sādhako devi vādhako madanādhikaḥ || (4|38)
iti,
duṣṭavyādhigrahānekaḍākinīrūpikāgaṇaiḥ |
bhūtapretapiśācaughaistrinetra iva dṛśyate || (4|50)
iti,
p. 8)

- - - - - - - - - - - - - - - - dṛśyate sādhakottamaḥ |
sarvayoginivṛndaistu jvalatpāvakasannibhaḥ || (3|49)
iti,
etāmeva purārādhya vidyāṃ trailokyamohinīm |
tralokyamohanaṃ rūpamakārpīdbhagavānhariḥ || (4|67)

iti ca | analakandarpayoreva evaṃvacanāt ravīndvorapi etadarthasiddhamiti pṛthak na uktam | 
bahuvacanādādyartho'pi labhyate iti vākpatyāderapi grahaṇam | yadvakṣyati
	so'pi saṃjāyate vāgmī vācaspatirivāparaḥ | (4|26)
iti | ata eva ca atra vākpatitvābhyūhanena nirvibandhanamananuguṇatvaṃ na vācyaṃ, kintu 
akṣaramātrasaṃsiddhiphalapratipādane prakrāntasya kāṇḍakūṣmāṇḍanyāyena 
cakratrayasamārādhanaphalābhidhānasya ko'vasara iti vācyaṃ yato'tra

vaiśvānaro daśakalo daśakiraṇaśatānvito dineśānaḥ |
bhuvanāhlādakṛdindurdaśajātiviṣakṣayo garuḍaḥ ||
madano'pi daśāvastho vidyāsthānānvito'pi vāgīśaḥ |
daśadiksvāmī śambhurdaśadhā śatarudradhṛtadehaḥ ||
viṣṇurdaśāvatāro vividhamahābhūtasṛṣṭikṛdvedhāḥ |
kamalajavākpatiyāmalamanuktamapyūhanīyamiha ||
daśadaśacaturdaśākṛtikalanācakratrayaṃ samārādhya |
vāmagurukāraṇatayā trayaṃ trayaṃ siddhametadiha ||
piṇḍatritayātmaivahi devī viśvasya yonitāṃ prāptā |
tasmādyonīnāmapi piṇḍagatāḥ siddhayaḥ proktāḥ ||

ityādyuktasya daśakalatvādeḥ piṇḍatrayātmadevīyonitāprāpteśca asamañjasaṃ hetutvamiti 
sarvamidasālajālaprāyamiti kimucyate mahātmanām | naca khyādeḥ saptakasyaiva upādāne 
tejobalādiguṇasaptakaṃ 
p. 9) niyāmakaṃ bhavitumarhati evaṃvidhānāṃ guṇāntarāṇāmapi saṃbhavena anaikāntikatvāt | 
tatrāpi

tejo balaṃ prasādaśca rūpaṃ jñānaṃ viśuddhatā |
parārthamudyamaśceti sapta sarvottamā guṇāḥ ||

ityatra tathā prācuryābhāvādayauktikatvāt ravyādikramasamāśrayaṇasadbhāvācca kṛtakatvamiva 
saṃbhāvyate iti āstāmetat | yacca atra anyaiḥ

kālahallolasūtreṇa ravitārkṣyādisūtrataḥ |
ekākṣarā tryakṣarā ca dve vidye sūcite mayā ||

ityādi jiṣṇūkurvat viśvāmitranyāyena navāmeva vācyavācakamayīṃ sṛṣṭiṃ vidhāya 
ravyādiśabdaiḥ krameṇa kakārahakārāvekārakakāramakārā īkārahakārakakārā lakāro repha 
īkāraścetyākṣiptā iti mukhyamantrasaṃketo'pi atra kaṭākṣita iti uktaṃ, tatra vayaṃ niṣeddhuṃ 
vidhātuṃ vā na pragalbhāmahe iti kimabhidadhmaḥ yadvā kimamuṣmai tapasvine ruṣyate yat 
vārtikakāreṇa api evameva pratipadaṃ mantroddhāraḥ kṛta iti alamanālocyālocanena || 3 ||
	na kevalaṃ sādhakaviṣayameva iyamevaṃ kurute, yāvat carācarātmakaṃ nikhilamapi 
jagadetadanuprāṇitamevetyāha

yadakṣaraśaśijyotsnāmaṇḍitaṃ bhuvanatrayam |
vande sarveśvarīṃ devīṃ mahāśrīsiddhamātṛkām || 4 ||
      
      yacchrutiḥ
      astamita āditye yājñavalkya candre'stamite kiṃ jyotiḥ puruṣaḥ, vāgjyotiriti hovāca samrāṭ 
| (vṛ0 u0 4|3|5)
iti | pūrvācāryā api

p. 10)

saiṣā saṃsāriṇāṃ saṃjñā bahirantaśca vartate |
yadutkrāntau visaṃjño'yaṃ dṛśyate kāṣṭhakuḍyavat || (vā0 pa0 1|128)
iti
idamandhaṃ tamaḥ kṛtsnaṃ jāyeta bhuvanatrayam |
yadi śabdāhvayaṃ jyotirāsaṃsāraṃ na dīpyate ||

iti ca | evamevaṃvidhāṃ tāṃ mahatyā sakṛdvibhāto'yamātmā itidṛśā vidyudādivat vicchidya 
vicchidya bhāsamānatvābhāvadekarasatayā pravṛttayā aviratena rūpeṇa avabhāsamānayā 
saṃvitsphuraṇalakṣaṇayā śriyā

pramātari purāṇe tu sarvadābhātavigrahe |
kiṃ pramāṇaṃ navābhāsaḥ sarvapramitibhāgini ||
      (ī0 2|3|16)
ityādinayena apūrvārthaviṣayapramāṇāgocaratvādādita eva svataḥ siddhāṃ 
mahātripurasundaryādiśabdavyapadeśyāṃ mātṛkāṃ parāṃ śaktiṃ

pramāṇānyapi vastūnāṃ jīvitaṃ yāni tanvate |
teṣāmapi paro jīvaḥ sa eva parameśvaraḥ || (taṃ0 1|55)

ityādyuktyā sarveṣāṃ pramātṛpramāṇaprameyādīnāmapi jīvitādhāyitvādīśvarīm, ata eva devīṃ 
tattatpramātrādirūpatayā krīḍanaśīlāṃ vande samāviśāmītyarthaḥ || 4 ||
	idaṃ tāvat bhuvanatrayamasyāḥ parasyā eva śakteḥ sakāśādudbhūtamanayaivaca 
anuprāṇitamiti sthitam, āśrayo'pi asya iyamaveti pratipādayitumāha

yadakṣaramahāsūtraprotametajjagattrayam |
brahmāṇḍādikaṭāhāntaṃ vande tāṃ siddhamātṛkām || 5 ||

etat sarvato'vabhāsamānaṃ brahmāṇḍādikaṭāhaḥ śaktyaṇḍaṃ, tadantaṃ carācarātmakaṃ
p. 11) bhavabhavābhavābhavarūpaṃ jagattrayaṃ yadakṣarāṇyeva mahat sarvānugamayogyaṃ 
sūtraṃ, tatra protamanusyūtaṃ tadbhittisaṃlagnatayaiva avatiṣṭhate tāmādisiddhāṃ mātṛkāṃ 
vande iti vākyārthaḥ || 5 ||

yā sā tu mātṛkā devi paratejaḥsamanvitā |
tayā vyāptamidaṃ sarvamābrahmabhuvanāntakam ||
iti
	evaṃ śabdasya niṣpattiḥ śabdavyāptaṃ carācaram |
iti prakārāntareṇa api etadakṣaraprotatvameva jagataḥ prapañcayitumāha

yadekādaśamādhārabījakoṇatrayodbhavam |
brahmāṇḍādikaṭāhāntaṃ jagadadyāpi dṛśyate || 6 ||

akacādiṭatonnaddhapayaśākṣaravargiṇīm |
jyeṣṭhāṅgabāhuhṛtpṛṣṭhakaṭipādanivāsinīm || 7 ||

tāmikārākṣaroddhārasārādhārāṃ parāparām |
praṇamāmi mahādevīṃ paramānandarūpiṇīm || 8 ||

      tāṃ prakrāntāṃ mātṛkāṃ bhagavatīṃ mahādevīṃ mahattvena samanantaroktanirūpitena 
cittvena dyotamānāṃ cicchaktipradhānādivarṇātmikāṃ citaśca ānando brahmaṇo rūpam iti 
śruterānandarūpatāmantareṇa cittvameva na syādityāha 
ānandarūpiṇīmānandaśaktipradhānadvitīyavarṇasvarūpām,-ityevaṃ cidānandayorlolībhāvena 
sisṛkṣātmakaparāmarśodayādicchāśaktyātmana ikārākṣarasya tṛtīyabījasya uddhāreṇa 
sārādhārāṃ sakalajagadullāsanaśālitayā utkṛṣṭādhārām, ata eva śaktidaśāśidhiyataya 
parāparāṃ tadrūpāṃ-paramatyarthaṃ praṇamāmi | evaṃ sṛṣṭyunmukhatvādeva yasyāḥ

p. 12)

anuttarānandacitī icchāśaktau niyojite |
trikoṇamiti tatprāhurvisargāmodasundaram || (taṃ0 3|94)

ityādyuktyā tadbījatrayasaṃghaṭṭādudīyamānamekādaśaṃ

trikoṇaṃ bhaga ityuktaṃ viyatsthaṃ guptamaṇḍalam |
icchājñānakriyākoṇam - - - - - - - - - - - - - - - - - - - - ||

ityukteḥ, ādhāro janmādhārastadrūpamekārātma yadbījaṃ tasya yadicchājñānakriyātmakaṃ 
koṇatrayaṃ tat udbhūtaṃ dharādiśaktiparyantaṃ nikhilamidaṃ sādhāraṇaṃ jagadadyāpi 
sarvakālaṃ, natu kadācideva, dṛśyate viśeṣānupādānāt sarvaireva tādrūpyeṇa parāmṛśyate 
ityarthaḥ | nahi asya jagataḥ sa kaścidapi aṃśo'sti yasya na etacchaktitrayānugamaḥ | nahi 
acikīrṣitamajñātamakāryaṃ vā kiṃcidapi vyavahāranirvahaṇanaipuṇyamudvodumutsahata ityatra sarva 
eva laukikāḥ sākṣiṇaḥ | evameva ca śrītantrālokādyuktayuktyā ādivarṇādereva 
uditairakacādibhiraṣṭabhirvargaistadvattāmudvahantīmityarthaḥ | jyeṣṭhāṅgaṃ śirastena 
śikhālalāṭabhūmadhyātmakamavayavatrayamākṣipyate, bāhubhyāṃ svamūlagataḥ kaṇṭhaḥ, 
hṛcchabdasya āvṛttyā hṛtpṛṣṭhaśabdena nābhiḥ, kaṭyā ca janmādhāraḥ | yat vārtikakāraḥ

bhrūmadhyabhālacūlā jyeṣṭhāṅgaṃ bāhumūlagaḥ kaṇṭhaḥ |
hṛddhṛdayaṃ tatpṛṣṭhe yasyāḥ sā proditā nābhiḥ ||
janmasthānaṃ ca kaṭirnyāsakramatastathāhakaḥ pādaḥ |

iti || 8 ||
      evamiyaṃ devairapi vikalpayituṃ na śakyeti etipādayitumāha

p. 13)
adyāpi yasyā jānanti na manāgapi devatāḥ |
keyaṃ kasmāt kva keneti svarūpārūpabhāvanām || 9 ||

vande tāmahamakṣayyakṣakārākṣararūpiṇīm |
devīṃ kulakalollolaprollasantīṃ paraulijām || 10 ||

      brahmendropendraprabhṛtayo'pi devatā manāgīṣadapi yasyāḥ 
svarūpahetuviṣayaprayojanaviṣaye kā iyaṃ kasmāt kva kenetivikalpacatuṣṭaye'pi svarūpaṃ 
sattvamarūpamasattvaṃ tatra bhāvanāṃ kathametadbhavatīti tanniṣṭhṃ svavyāpāramadyāpi na 
jānanti tanniścayaṃ kartumasamarthā ityarthaḥ | yata iyamahaṃrūpiṇī

pratyāhṛtāśeṣaviśvānuttare sā nilīyate |
tadidaṃ viśvamantaḥsthaṃ śaktau sānuttare pade ||
tattasyāmiti yatsatyaṃ vibhunā saṃpuṭīkṛtiḥ |
saṃvittau bhāti yadviśvaṃ tatrāpi khalu saṃvidā ||
tadetattritayaṃ dvandvayogātsaṃghaṭṭatāṃ gatam |
ekameva paraṃ rūpaṃ bhairavasyāhamātmakam ||
(taṃ0 3|207)
ityādyuktayuktyā ādyantyārṇagrahaṇena pratyāhṛtāśeṣavarṇatvāt pratyāhārakremeṇa 
ahaṃparāmarśamayī pramātrekarūpeti na keyamiti idantāparāmarśanīyatāṃ sahate iti 
kathamāsāṃ sattvāsattvābhyāṃ tanniścayaḥ | nanu evamapi ekonapañcāśadarṇātmanā 
niyatamasyā rūpaṃ siddhaṃ, tat tādrūpyeṇaiva niyataḥ parāmarśo'stviti cet etadapi bhavituṃ na 
arhati yadiyamakṣayyakṣakārākṣararūpiṇī kūṭātmani nije rūpe'vatiṣṭhamānatvādakṣayyaṃ yat 
kṣakārākṣaraṃ tadrūpā apītyarthaḥ | kṣakāro'pihi 
anuttaravisargasārakakārasakārapratyāhārātmatayā yugapadeva nikhilāṃ mātṛkāmāmṛśatīti 
punarapi yathoktaikaikākṣaratvādyanekarūpatvāt naiyatyena sattvāsattvābhyāṃ tanniścayaḥ kartuṃ 
na sādhyaḥ | heturapi asyā na niścetuṃ śakyo yadiyaṃ paraulijā parā pūrṇā yā iyamolirovalliḥ 
sakalamānasavyavahārottīrṇamaunmanasamavikalpakajñānaṃ tasmāt
      - - - - - - - - - - - - - - ādyā jātāditaḥ - - - - - - | (4|4)
iti vakṣyamāṇadṛśā ādisiddhāt śivāt jāteti | so'pi avikalparūpatvādavikalpanīya eveti 
uktaprāyam | viṣayo'pi evaṃ yat
      kulaṃ padamanāmākhyaṃ - - - - - - - - - - - - - 
iti kularūpāyāmavyapadeśyāyāṃ kalāyāṃ parasyāmeva saṃvidi ullolaṃ jaladhilaharīnyāyena 
prollasantī tatraiva viśrāntā tadanatirekeṇaiva ābhāsamāneti pūrvokta eva panthāḥ | evaṃ 
tattadrūpāvasthāne'pi na asyā niyataṃ kiṃcit prayojanamastīti tanniścayo'pi ko yat devī 
tattadrūpatayā krīḍanaśīletyarthaḥ | yadāgamaḥ
      
      śive tadvanna kāmo'sti śakterapi na kāmitā |
      utpannā tu svabhāvena śivasya parameśvarī ||

iti | evamevaṃvidhāṃ tāṃ mātṛkādiśabdavyapadeśyāṃ parāṃ śaktiṃ vande 
samāviśāmītyarthaḥ || 10 ||
	idānīṃ pūjāsaṅketamapi upakṣeptumāha

vargānukramayogena yasyā mātraṣṭakaṃ sthitam |
vande tāmaṣṭavargotthamahāsiddhyaṣṭakeśvarīm || 11 ||

tāṃ bhagavatīṃ mātṛkāmarthāt yata eva vargāṣṭakavat svāṃśarūpatayaiva utthitaṃ 
yadaṇimādilakṣaṇaṃ
p. 15) mahadaparicchinnaṃ siddhyaṣṭakaṃ, tasya īśvarīṃ taddānaikapravaṇāṃ vande yasyā

      vargānukramayogena devatāṣṭakasaṃyutā | (1 | 60)

itivakṣyamāṇadṛśā vargānukramamabhisaṃbaddhya tattadaṇimādisiddhijananāt mātṝṇāṃ 
vaśinyādīnāmaṣṭakaṃ sthitaṃ svānatiriktamapi atiriktamiva antaraṅgaparivārabhūtaṃ 
prathamabāhyacakrapūjyatayā avabhāsitamityarthaḥ || 11 ||
	atra tāvat sarvacakrapūjyasiddhyaṣṭakasāhacaryāt vaśinyādyaṣṭakopādānamātreṇaiva 
samagracakrapūjākramā-sūtraṇamupakrāntam, sāmprataṃ tu prādhānyāt 
mūlatrikoṇapūjāsaṅketamapi upakṣeptumāha

kāmapūrṇajakārākhyaśrīpīṭhāntarnivāsinīm |
caturājñākośabhūtāṃ naumi śrītripurāmaham || 12 ||
      sarvatrātra hyahaṃśabdo bodhamātraikavācakaḥ |
      (taṃ0 1 | 132)
itinītyā satyapi dehādau bodhaikaghanaparamātmasvarūpaḥ proktavakṣyamāṇalakṣaṇāṃ 
śrītripurāṃ mātṛkāśabdavyapadiṣṭāmasmaddarśanaprakhyopākhyāṃ śrīmahātripurasundarīṃ 
pūrvādidiṅniviṣṭeṣu caturvapi pīṭheṣu sātatyena vartamānāyā api anugrahājñāyāḥ kālavalena 
pramlāyantyāstattatsidhayoginyādipramukhena punaḥ punaravatāraṇāt kośabhūtāṃ 
gañjaprāyāmākarabhuvamityarthaḥ | taduktaṃ

jñānabhraṃśāvasāne tu saṃjñābhedādvarānane |
karāle tava santāno bhaviṣyati tavājñayā ||

iti | ata eva kāmarūpādau sakalajagadanujighṛkṣāparatayā satataṃ saṃnihitāṃ naumiti 
vākyārthaḥ | anena ca
p. 16) aṣṭamanavamacakrapūjāsaṅketoṭṭaṅkanamapi kaṭākṣitamiti uparamyate | yacca atra anyaiḥ 
pratipadaṃ kaṣṭakalpanāvalopanītamaśabdārthaṃ vyākhyātamapabhāṣitaṃ ca, tatsarvairalpaśrutairapi 
svayameva avagamyate iti upekṣitamiti paramatamapratiṣiddhamanumatameva iti na 
vidvadbhirāśaṅkanīyaṃ yat tat pratipadamanūdya dūṣyamāṇaṃ prakṛtānupayogitvāt 
granthavistaramātrādhānaphalameveti asmābhirasthāne na abhiniviṣṭaṃ, kiṃtu 
tadviruddhābhidhānenaiva tat dūṣitaṃ bhavatīti mantavyamiti alamatiprasaṅgena, prastutamava 
abhidadhmaḥ || 12 ||
	evamasya tantrasya stutipūrvakatvaṃ saṃprakāśya avataraṇikāmeva kartumupakramate 
śrīdevyuvāca iti | kimuvācetyākāṅkṣāyāmāha

     bhagavansarvamantrāśca bhavatā me prakāśitāḥ |

tathāca

catuṣṣaṣṭistu tantrāṇi mātṛṇāmuttamāni tu || 13 ||

mahāmāyā śambaraṃ ca yoginī jālaśambaram |
tattvaśambarakaṃ devaṃ bhairavāṣṭakameva ca || 14 ||

bahurūpāṣṭakaṃ jñānaṃ yāmalāṣṭakameva ca |
candrajñānaṃ vāsukiṃ ca mahāsaṃmohanaṃ tathā || 15 ||

mahocchuṣmaṃ mahādeva vāthulaṃ ca nayottaram |
hṛdbhedaṃ mātṛbhedaṃ ca guhyatantraṃ ca kāmikam || 16 ||

kālapādaṃ kālasāraṃ tathānyat kubjikāmatam |
p. 17)
nayottaraṃ ca vīṇādyaṃ trotulaṃ bhrātulottaram || 17 ||

pañcāmṛtaṃ rūpabhedaṃ bhūtoḍḍāmarameva ca |
kulasāraṃ kuloḍḍīśaṃ kulacūḍāmaṇiṃ tathā || 18 ||

sarvajñānottaraṃ deva mahāpicumataṃ tathā |
mahālakṣmīmataṃ deva siddhayogīśvarīmatam || 19 ||

kurūpikāmataṃ deva rūpikāmatameva ca |
sarvavīramataṃ deva vimalāmatameva ca || 20 ||

aruṇeśaṃ modaneśaṃ viśuddheśvarameva ca |
evametāni śāstrāṇi tathānyānyapi koṭiśaḥ || 21 ||

bhavatoktāni me deva sarvajñānamayāni ca |

vīṇādyamiti vīṇāśikhottaram ||
kintu evaṃ sarvaśāstrebhyo'pi antarbhūtā

     vidyāḥ ṣoḍaśa deveśa sūcitā na prakāśitāḥ || 22 ||

tasmāt

idānīṃ śrotumicchāmi tāsāṃ nāmāni śaṅkara |
ekaikacakrapūjāṃ ca paripūrṇāṃ samantataḥ || 23 ||

     anekadevatānāmamantramudrāgaṇaiḥ saha |

      atraiva pratyuttarayituṃ śrībhairava uvāca | kimuvācetyāha

p. 18)
śṛṇu devi mahājñānaṃ vidyāṣoḍaśakārṇa-vam || 24 ||
     na kasyacinmayākhyātaṃ sarvatantreṣu gopitam |
      duravagāhatvācca atra arṇavena nirūpaṇam ||
      tadeva āha

     tatrādau prathamā nityā mahātripurasundarī || 25 ||

tataḥ kāmeśvarī nityā nityā ca bhagamālinī |
nityaklinnāpi hi tathā bheruṇḍā vahnivāsinī || 26 ||

mahāvidyeśvarī dūtī tvaritā kulasundarī |
nityā nīlapatākā ca vijayā sarvamaṅgalā || 27 ||

jvālāmālivicitrā cetyevaṃ nityāstu ṣoḍaśa |

      prathameti pradhānetyarthaḥ | dūtī śivādūti, nityeti tadabhidhānaivetyarthaḥ ||
      tatra

     śṛṇu devi mahānityāmādau tripurasundarīm || 28 ||

     yayā vijñātayā devi jagatkṣobhaḥ prajāyate |

      nanu bhagavatā mahātripurasundarīṃ nityāṃ śṛṇviti pratijñāte'pi kasmādākasmikaṃ 
cakrasya uddhāro vaktumupakrāntaḥ | evametat, kiṃtu paraivahi parameśvarī bhagavatī nityā 
svasvāntryamāhātmyāt tattadrūpatayā bahirullilasiṣuḥ prathamaṃ tāvadādhārādheyātmanā 
prasphurati, ādhāramantareṇa ca ādheyasya kathaṅkāraṃ bahiḥsphuraṇaṃ syāditi pramukha eva 
parameśvaraścakrasya svarūpaṃ nirūpayitumāha

     śaktyā śaktiṃ vinirbhidya bhūyo vahnipureṇa tu || 29 ||

p. 19)

     saṃpuṭīkṛtya sarvordhvaśaktiṃ vistārayedadhaḥ |

      iha khalu tryaśrameva sṛṣṭiprādhānyāt bahirmukhatvādadhomukhaṃ śaktirucyate, 
saṃhāraprādhānyādantarmukhatvādūrdhvamukhaṃ vahniriti | yadāgamaḥ

      tacchaktipañcakaṃ sṛṣṭyā layenāgnicatuṣṭayam |

iti | śrīmadasmatparamaguravo'pi

      śaktiṃ trikoṇāmekarākṛtiṃ sṛṣṭyunmukhīm |
iti,
      vahnipureṇa saṃhārapradhānordhvamukhatrikoṇena

iti,
      ūrdhvādhovadanābhyāṃ tryaśrābhyāṃ vahniśaktināmabhyām |
iti ca | anye'pi

      vahnicatuṣṭamayatra bhramamadhye śaktayaḥ sthitāḥ pañca |
      ūrddhvamukhaṃ sṛṣṭimukha - - - - - - - - - - - - - ||

iti | anyaiḥ punaḥ śaktivahnyorbhedapratipipādayiṣayā yat

      tribhiśchittvā tu paridhiṃ sakale caturaśrake |
      tryaśraṃ kṣetraṃ prakurvīta sūtraiḥ prāgādisaṃsthitaiḥ ||
      tryaśravat paścimāśāgrakoṇaṃ kṣetraṃ bhagākṛti |

iti saṃvāditaṃ, tadatra tathā na saṃgacchate yatastu tryaśrasiddhimātrapratipādanaparatvameva 
sākṣāt lakṣyate | tadapi haṭhaviheṭhanikayā yadi aśabdārthamapi ūrdhvādhomukhaṃ 
tryaśradvayaṃ vyākhyāyate, tadapi tatra siṣādhayiṣitaṃ vahniśaktivyapadeśyatvaṃ na siddhyet | 
bhagayonitryaśrādiśabdavyapadeśyatvaṃ tu anyathāpi sarvatra dṛśyate | yadāgamaḥ
      ūrdhvādhomukhamadhyasthatryaśramarmadvayāvadhi |
iti | tathā 

p. 20)

ekaikadaṇḍakaiḥ prājñaḥ ṣaṭṣaṭ sūtrāṇi pātayet |
yonayo yena jāyante samastāḥ samasandhayaḥ ||
koṣṭhakā nyūnapañcāśadbhagarūpāṇi tāni ca |

iti | guravo'pi

      tryaśrāntapañcakamuktaṃ turyāgnipañcaśaktikam |
iti,
sarvatrikoṇasyaikaikakoṇopāntaprasarpibhiḥ |
ṣaḍbhiḥ ṣaḍbhirbhavetsūtraiḥ saptasaptakayonikam ||

iti ca | tatra pūrvādhomukhatrikoṇaviṣayo'pi tryaśraśabdena vyapadeśaḥ uttaratra 
ūrdhvamukhatrikoṇaviṣayo'pi bhagayoniśabdābhyāmiti na saṅgatārthametatkiṃcit,-ityalaṃ bahunā | 
tatra yathābhimate kṣetre prathamaṃ tāvadadhomukhatryaśrakāṇāṃ śaktimullikhya adhastāt 
tādṛśyaiva anyayā śaktyā madhyatastiryakpraveśakrameṇa vinirbhedayet yena mūlatrikoṇaniṣpattiḥ 
syāt, bhūyaśca te dve api śakti parasparasaṃmukhāgrakoṇasaṃpuṭīkāre vahnipureṇa 
ūrdhvamukhena trikoṇena saṃpuṭīkṛtya mūlatrikoṇāgrakoṇāt kiñcidantarālaṃ

paścimottarapūrvādidakṣiṇānukrameṇa tu |
cakramadhye catuṣkaṃ tu krameṇa paripūjayet || (1 | 156)

itivakṣyamāṇadṛṣṭyā paristhāpya adhastanāyāḥ śakterantastiryakpraveśakrameṇa tasyā eva 
bahiradhaḥ pārśvayośca koṇatrayamantaśca ūrdhvagatyā pārśvayoḥ koṇadvayaṃ 
tanmarmasparśapuraḥsaramuparitanāyāḥ śakterutpādya uparyapi koṇotpattaye prasaraṇena saṃvalite 
kṛtvā antastryaramaṣṭāraṃ dviśaktikaikānalaṃ bhavatīti mahāgurunirupitasvarūpamaṣṭāraṃ 
kuryāditi yāvat | yaiḥ punaḥ sākṣātkṛtaviṣamatamapadayojanānapi anyānapratibuddhyaiva p.21) 
kairapi dhūrtairviṣamapadayojanāvaiśasamapahāya vākyairvākyāni ghaṭayadbhirvayaṃ hāsitā 
ityuktvāpi svayaṃ śaktyeti saṃmukhatrikoṇarūpāmeva vinirbhedya vahnipureṇa 
ūrdhvamukhatrikoṇātmanā te śakti saṃpuṭīkṛtyeti śabdaireva śabdā vyākhyātāsteṣāṃ pade 
kiyadupahasyate yat dhārṣṭyāt yattadvadatāṃ viratireva nāstītyāstāmetat | tathā sarvasya cakrasya 
ūrdhvapūrvakoṭimavalambya ullikhitā yā śaktistāṃ pārśvadvayaprasāraṇakrameṇa adhovistārayet, 
aṣṭārādhastanārādvayasaṃsparśanena prathamadaśārārambhikāṃ tṛtīyāṃ śaktiṃ 
kuryādityarthaḥ ||

     tathaiva vahnicakreṇa tāmevordhvaṃ vibhedayet || 30 ||

      tathaiva ādyaśaktivat pārśvadvayaprasāraṇakrameṇa unmukhatrikoṇātmanā vahnicakreṇa 
tāmeva samanantaraprasāritāṃ śaktiṃ viśeṣeṇa 
aṣṭāroparitanapārśvadvayavartikoṇacatuṣṭayasaṃsparśādagra-koṇasya asya utpādanapūrvamūrdhvaṃ 
bhedayet yena dvitīyo'pi vahniḥ siddhyet || 30 ||
yena

     tata ūrdhvasthitāṃ śaktimūrdhvaṃ vistārayet kramāt |

      tadanantaramūrdhvasthitāṃ prathamollikhitāmeva śaktiṃ 
tṛtīyaśaktidvitīyavahnyuparitanasaṃbhedagranthibhedanapūrvaṃ 
prāthamikavahnipurāgrakoṇasāmyalakṣaṇaṃ kramamavalambya ūrdhvaṃ vistārayet yena asya 
daśārasya pañcamasaptamārādvayaṃ syāt ||
tato'pi

punarādyaṃ vahnicakramadho vistārya sundari || 31 ||

granthibhedakrameṇaiva śaktimādyāṃ vibhedayet |

      ādyamaṣṭāracakrārambhakaṃ vahnipuraśabdābhihitaṃ vahnicakraṃ dvitīyavahnisiddhyarthaṃ 
pārśvābhyāṃ prasāritamapi
p. 22) punastaddvitīyavahnitṛtīyaśaktyadhastanasaṃbhedagranthyorbheda- nakrameṇaiva adho vistārya 
etaccakrāpekṣayā ādyāṃ vastutastu tṛtīyāṃ śaktiṃ viśeṣeṇa dvitīyaśaktyagrakoṇasāmyena 
bhedayet yojayediti daśāracakrasiddhiḥ ||
tato'pi

tathā sarvordhvavahnyantaśaktiṃ vistārayedadhaḥ || 32 ||

      sarvordhvaṃ daśāroparivartī dvitīyo yo vahnistasya ante nikaṭe yā sarvoparivartinī eva 
ādyā śaktistāmadho vistārayet pārśvadvayaprasāraṇakrameṇa 
daśārasaṃbandhyadhastanapārśvadvayīyakoṇacatuṣṭayasaṃsparśena dvitīyadaśārārambhikāṃ 
caturthī śaktiṃ janayedityarthaḥ || 32 ||
tathā

tāmādicakrādhaḥśaktyā vahninordhvaṃ vibhedayet |

      tāṃ samanantarollikhitāṃ caturthī śaktimādicakrasya anantarasiddhasya daśārasya yā 
adhastanī tṛtīyā śaktistadupalakṣitena ādyena vahninā vihitapārśvadvayaprasāraṇena ūrdhvaṃ 
viśeṣeṇa daśāroparitanakoṇacatuṣṭayasaṃsparśapūrvaṃ vahnidvayāgrakoṇasāmyena bhedayet 
tṛtīyaṃ vahniṃ janayedityarthaḥ ||
tato'pi

     punaḥ pūrvavadevādyāṃ śaktiṃ vistārya bhedayet || 33 ||

     ūrdhvavahnim - - - - - - - - - - - - - - - - - - - - - - - - - -  |

      ādyā prathamollikhitā śaktiryathā pūrvaṃ prathamadaśārasya 
pañcamasaptamārāsiddhyarthaṃ śaktivahnigranthibhedanapūrvaṃ vistāritā, tathaiva tāṃ punarapi 
vistārya ūrdhvasthitaṃ tṛtīyaṃ vahniṃ madhyatastiryakpraveśakrameṇa bhedayet spaṣṭāṃ rekhāṃ
p. 23) vidhāya uparitanamarātrayaṃ kuryādityarthaḥ || 33 ||
tathā

     - - - - - - - - - - - - - adhovahnimadhye vahnivivarjitam |
vistārya bhedayecchaktimadhastādūrdhvavahninā || 34 ||

      aṣṭārārambhakoṇaprathamollikhitena ūrdhvavahninā vahneḥ prathamadaśārārambhakasya 
dvitīyasya varjanaṃ kṛtvā tadupayogamanapekṣya adhovahneretaddvitīyadaśārārambhakatayā 
paścādullikhitasya tṛtīyasya adhastanasya granthidvayasthānātmani madhye vistārya 
arthādaurdhvavāhnameva pārśvarekhādvayaṃ vistṛtaṃ vidhāya adhastāt vyavasthitāṃ caturthīṃ 
śaktiṃ bhedayet samanantaroktavadadhastanamapi arātrayamutpādayediti dvitīyadaśārasiddhiḥ || 34 ||
tathā

ato madhyādiśaktyūrdhvaśaktiṃ vistārayedadha. |

      madhyā prathamaśaktibhedikā yā dvitīyā śaktistasyā ādāvupari sthitā yā 
prathamadaśārārambhikā tṛtīyā śaktistasyā api ūrdhvaṃ dvitīyadaśārasaṃbandhinī caturthī 
śaktistāmadho vistārayet pārśvadvayaprasāraṇakrameṇa 
dvitīyadaśārapārśvārācatuṣṭayasaṃsparśapuraḥsarāṃ pañcamīṃ śaktiṃ kuryādityarthaḥ ||
kiṃ tayā syādityāha

tathaiva saṃpuṭīkuryāt sarvaṃ cakraṃ sureśvari || 35 ||
      
      evakāro bhīnnakramaḥ | tena sarvameva cakramiti | etacca aśeṣatvena phalamuktam || 35 ||
tato'pi

p. 24)

tāṃ ca tena maheśāni vahnicakreṇa bhedayet |
granthibhedakrameṇādhaḥ sarvordhvātsarvabāhyataḥ || 36 ||

     madhyordhvaśaktiparyantam - - - - - - - - - - - - - - - - |

      tāṃ samanantarollikhitāṃ pañcamīmeva śaktiṃ sarvasya cakrasya bāhyato, natu antaḥ, 
sarvasyaiva cakrasya ūrdhvamavalambya sthitaṃ yat tṛtīyaṃ vahnicakraṃ, natu prathamaṃ, tena arthāt 
tasyaiva adhastayaiva śaktyā melanātmakau yau granthī tayoryo bhedastatkrameṇa pārśvadvayena 
prasṛtya arthāt cakrasyaiva madhyordhvaṃ ye caturthaprathame śakti 
tatparyantamuparitanatatkoṇacatuṣṭayasparśanakrameṇa bhedayet saṃyojayet yena caturtho vahniḥ sidhyet 
||
      tathā

- - - - - - - - - - - - - - - - ādiśaktyavadhipriye |
tato bāhyasthaśaktyantaḥśaktimūrdhvaṃ vikāsayet || 37 ||

      tadanantaraṃ bāhyasthā yā pañcamī śaktistasyā antargarbhe yā caturthī, 
tāmādiśaktyavadhi prathamaśaktiparyantamūrdhvaṃ vikāsayet pārśvadvayena prasṛtya tayā 
saṃyojayet yena asya cakrasya ṣaṣṭhadaśamātmakamarādvayaṃ syāt || 37 ||
      tataḥ

sarvordhvavahnyadhovahniparyantaṃ vīravandite |
tathā vistārayecchaktimādyāmapyūrdhvamīśvari || 38 ||

      sarvasya cakrasya ūrdhvaṃ yaścaturtho vahnistasyāpi adhoyastṛtīyo vahnistatparyantaṃ 
tadagrakoṭisaṃlagnatvena
p. 25) ādyāṃ prāthamikīṃ daśāradvayasaṃpattyarthaṃ punaḥ punaḥ prasāritāmapi śaktiṃ 
tathā pārśvadvayaprasāraṇapuraḥsaraṃ spaṣṭarekhākāratayā ūrdhvaṃ vistārayet yathā 
caturthavahnibhedanakrameṇa caturdaśārasya uparitanamarātrayaṃ sidhyet || 38 ||
      tato'pi

tayā vibhedayedvahnicakraṃ sarvordhvasaṃsthitam |
sarvordhvavahnyadhobhāgagranthiparyantataḥ priye || 39 ||

vistārya vāhyaśaktiṃ tu sarvādhastādvibhedayet | *

      sarvordhvavahnyadhobhāgagranthiparyantata ityetat kākākṣivat yojyam, tena sarvāpekṣayā 
ūrdhvamupari avasthitasya caturthasya vahneradhobhāgatṛtīyāgnipañcamaśaktisaṃbhedātmakau yau 
granthī, tātparyantatastayā samanantaroktayaiva trikoṇākāraprasaraṇādirūpayā bhaṅgyā sarveṣāṃ 
caturṇāmapi vahnīnāmūrdhvamādau samyagaṣṭārārambhakatayā sthitaṃ vahnipuraśabdābhihitaṃ 
vahnicakraṃ vibhedayat saṃyojayet, yena asya cakrasya tṛtīyatrayodaśārāsiddhiḥ syāt, tathā 
sarveṣāṃ vahnīnāmūrdhvamaṣṭārasaṃpattinimittamullikhitaḥ prahamaṃ samanantarakṛtayojano yo 
vahnistasya adhobhāge yau pañcamaśaktitṛtīyavahnisaṃgamanarūpau granthī, tatparyanto'rthāt 
tatpārśvarekhādvayaṃ vistārya sarvādhastāt vāhyāṃ pañcamīṃ śaktiṃ vibhedayet, yena 
caturdaśārasya
p. 26) adhastanamarātrayaṃ siddhyediti śaktipañcakāngicatuṣṭayātmanaḥ sakalasya asya cakrasya 
niṣpattiḥ ||
      etadeva vyāptipratipādanapuraḥsaramupasaṃharati

     tataḥ sṛṣṭyā mahācakraṃ prathamaṃ tu hutāśanam || 40 ||

     madhye tu dvitayaṃ sthityā saṃhāraṃ pañcamaṃ ca yat |
     evametanmahācakraṃ mahāśrītripurāmayam || 41 ||

      evamuktena krameṇa etadatyadbhutasaṃniveśavattvāt puraḥsphuradrūpatayā 
avabhāsamānaṃ tattacchāstrāntaroditacakrāntaravailakṣaṇyāt mahat pramātṛprameyātmano viśvasya 
karaṇāt ciramavasthāpanena vikāsanāt, svātmasākṣātkāreṇa kartanāt sarvatovigalanena 
cedekaśeṣatayā pūrṇatvādyaparaparyāyatṛptatāpādanena ca sṛṣṭisthitisaṃhārānākhyarūpatayā 
cakraśabdavyapadeśyam, ata eva svasvātantryavijṛmbhāmātrasāramakhilamidaṃ viśvamotaprotatayā 
vyāpnuvantī niratiśayacidānandaghanasvasvarūpaśālitayā śrīpradhānā, trīṇi 
sṛṣṭisthitisaṃhāralakṣaṇāni garbhīkṛtānantatrikāṇi purāṇi tattadvibhāgāpūrakāṇi 
svasaṃvidvisphūrjitāni makuranagaranyāyena svenaiva svabhittāvanatiriktāni api atiriktāyamānāni 
udbhāsayantī nirūpākhyaparasaṃvinmātrasatattvā mahātripurasundarīśabdavyapadeśyā yā tripurā, 
tatprakṛtikam
      
      adhārādheyarūpāya - - - - - - - - - - - |

itivat tadavibhāgasvabhāvamevetyarthaḥ | tathāhi prathamaṃ tāvat caturdaśāratayā mahat yat 
cakraṃ, tat sṛṣṭyā upalakṣitam | caturdaśavidhaivahi bahiḥ sṛṣtiḥ | yat

      saṃsārā daśa catvāraḥ - - - - - - - - - - - - - |

iti | tato madhye tu arādaśakaucityena hutāśanasvarūpaṃ
p. 27) cakradvitayaṃ sthitirūpam | sthitirhi ubhayasvabhāvaiva bhavediti bhāvaḥ | yadāhuḥ

      prabhavāpyayayorantarlolībhūtaḥ kramo'vatārākhyaḥ |

iti | mūlacakrāpekṣayā dvitīyamapi aṣṭāraṃ cakram

      ādyacakre maheśāni- - - - - - - - - - - - - - - - - - - - | (1 | 157)

itivakṣyamāṇavadarābhūyastvābhiprāyeṇa prathamatvena uddiṣṭaṃ saṃhārapradhānam | yataḥ 
śrīyogasañcārādāvapi

      - - - - - - - - - - - madhyage ye te kṛṣṇaśvete ca maṇḍale |
iti
      ṣoḍaśadvādaśārābhyāmaṣṭāreṣu ca sarvaśaḥ |

ityādinā api aṣṭārasya saṃhārapradhānatvameva uktam | ata eva pāriśeṣyāt mūlatrikoṇasya api 
nirvibhāgasvabhāvatayā anākhyarūpatvamarthasiddham | ata eva cakrapañcakasya 
sarvasaubhāgyakārakamiti sarvārthasādhakamiti sarvarakṣākaramiti sarvarogaharamiti sarvānandakaramiti 
ca sṛṣṭyādikramacatuṣṭayocitameva abhidhānamiti yathoktameva yuktam | yat punaratra anye 
pāṭhādau vipratipadyante, tat yattatprāyamiti upekṣyameva yataḥ pāṭhabhedastāvadatra sthitaḥ sa ca 
adhyetṛbhramopakalpita eva, na maulaḥ tatparigrahāparigrahau ca sādhutvāsādhutvanibandhanau, 
prakriyāgauravaparihāreṇa prakṛtārthanirvāhanaipuṇyaṃ ca nāma sādhutvamanyattu anyathā | 
yadāhuḥ

pāṭhabhedo'tra sādhurvā tadanyo vā na mūlataḥ |
kintvadhyetṛbhramāttena tatpradarśanamajñatā ||
iti,
athaikaḥ pustakābhyāse pāṭho grāhyo vicārya cet |
sādhurevatu sa grāhyaḥ sādhūnāmavigānataḥ ||

p. 28)

iti ca | tacca iha astīti kiṃ pralapyate bhavadbhirauttarādharyasvapāṭhalābhādīti, pratyuta 
bhavatāmeva ayaṃ doṣo yadasmābhiryāvatā granthena cakraniṣpattistadvyāptiścetyubhayaṃ 
vyākhyātaṃ, tāvataiva gurvyā prakriyayā bhavadbhiścakraniṣpattimātramiti | santi ca atra 
granthagauravaṃ pariharantaḥ pare sākṣiṇa iti alaṃ taccintayā api yadidameva atra 
pratisamādhānamiti | yathoktāyāśca vyāptereva tathā anucitatvaṃ na kiṃcidutpaśyāmaḥ |
yat
puṣpe gandhastile tailaṃ dehe jīvo jale'mṛtam |
yathā tathaiva śāstrāṇāṃ kulamantaḥ pratiṣṭhitam ||

itidṛṣṭyā padadvayamayaṃ kaulikaṃ jñānaṃ sarvatraiva antaranuprāṇakatayā vartate iti nāsti 
vimatiḥ, anyathā hi na kiñcidapi bhuktimuktipradaṃ syādi uktamanyatra bahuśaḥ | ata eva 
śrītantrāloke

pāśaveṣvapi śāstreṣu taddarśi maheśinā |
ghorāndhyahaimananiśāmadhyagāciradīptivat ||

ityādinā tatra kulajñānasya adharādhareṣu api anuprāṇakatvamuktam | anenaiva āśayena 
bhavadbhirapi

ūrmiriti bhoginītyapi kubjeti kuleśvarīti jagaduryām |
śrīkālakarṣaṇītyapi kuṇḍalinītyapi ca naumi tāṃ devīm ||

ityādi uktam | tatsarvatraiva sākṣātkulaśāstratayā vyapadiṣṭe'muṣmin paramopādeye śāstre 
kimevaṃvidhāyā vyāpteranānuguṇyaṃ yadvādhāmātreṇāpi na spṛṣṭam | etacca parameśvaraḥ 
svakaṇṭhenaiva caturthapaṭalārambhe vakṣyatīti alṃ rahasyārthodañcanena | pratyuta 
svakaṇṭhotktāmevaṃvidhāṃ vyāptimapahāya

p. 29)

cakraṃ baindavamambikāmayamiyaṃ vāmā trayo ye bhramā
jyeṣṭheyaṃ yadidaṃ purandarapure rekhācatuṣkaṃ bahiḥ |
yo'yaṃ śaktyanalatrikoṇanivaho raudrīyamityāmṛśan
yo'rcādhāramakṛtrimaṃ kalayate mātaḥ sa te pūjakaḥ ||

ityādivyāptipratipādanaparaṃ bahuprakāraṃ svotprekṣitaṃ yattadvadatāṃ kimapi pariniṣṭhitaṃ 
tannibandhanaṃ yadādivarṇoddhārādau yadyāsāmeva saṃniveśavattvamiti, naitat | iyaṃhi ca 
aśeṣeṇa pañcāśatsiddhiḥ | yadādivarṇoddhārādau yadyāsāmevaṃ sanniveśavattvaṃ tata iha 
vi?māyātaṃ yadevamucyate | evamapi tatra āsāmevaṃsanniveśavattvaṃ naikāntikamiti kuta ihāpi 
etatsyāt, yadambikāyāḥ

akārasya śiro raudrī vaktraṃ vāmā prakīrtitā |
ambikā bāhurityuktā jyeṣṭhā caivāyudhaṃ smṛtā ||

ityatra spaṣṭarekhākāraṃ bāhutvamuktaṃ

utthitā tu yadā tena kalā sūkṣmā tu kuṇḍalī |
catuṣkalamayo binduḥ śakterudaragaḥ prabhuḥ ||
mathyamanthakayogena ṛjutvaṃ jāyate priye |
jyeṣṭhā śaktiḥ smṛtā sā tu bindudvayasumadhyagā ||
tripathā sā samākhyātā raudrī nāmnā tu gīyate |
śaśāṅkaśakalākārā ambikā tvardhacandrikā |
ekaivetthaṃ parā śaktistridhā sā tu prajāyate ||

ityatra ca ukārātmakaśaśāṅkaśakalākāratvaṃ, vāmāyāśca atra nāmāpi na spṛṣṭam | ihāpi 
vakṣyamāṇe
kavalīkṛtaniḥśeṣabījādyaṅkuratāṃ gatā |
vāmā śikhā tato jyeṣṭhā śṛṅgāṭākāratāṃ gatā ||
raudrī tu- - - - - - - - - - - - - - - - - - - - - || (4|9)

p. 30)

ityādāvambikāyāḥ, śrīsarvavīrādau ca tatra tatra varṇāntaroddhārādāvapi navanava āsāṃ 
sannīveśaḥ prakāśita iti varṇāntaroddhāramātre'pi yatra niyatamāsāṃ rūpaṃ nāsti 
tatraivamādāvanyatra kā vārteti nāstyeva atra pariniṣṭhitaṃ kiṃcit nibandhanamiti niścayaḥ | yadvā 
vārtikakārasyaiva ayaṃ doṣo yadupajīvanenāpi bhavān pravṛtta iti alaṃ bahunā || 41 ||
      idānīmastaiva māhātmyamāha

kledanaṃ drāvaṇaṃ caiva kṣobhaṇaṃ mohanaṃ tathā |
ākarṣaṇaṃ mahādevi jambhanaṃ stambhanaṃ tathā || 42 ||

vyādhidāsviśamanaṃ sarvadurnītināśanam |
śāntipuṣṭidhanārogyamantrasiddhikaraṃ param || 43 ||

bhogadaṃ mokṣadaṃ caiva khecaratvapravartakam |
sarvarakṣākaraṃ devi sarvānandakaraṃ tathā || 44 ||

sarvakarmakaraṃ cāpi sarvakāryārthasādhakam |
sarvāveśakaraṃ devi sarvavedhakaraṃ punaḥ || 45 ||

sarvatattvakaraṃ devi sarvājñānilayaṃ tathā |
sarvarddhisaṃyutaṃ caiva sarvaśreyaskaraṃ param || 46 ||

sarvamantramayaṃ devi sarvatīrthamayaṃ punaḥ |
sarvavratamayaṃ caiva sarvāmṛtamayaṃ tathā || 47 ||

sarvaduḥkhapraśanaṃ sarvaśokanivāraṇam |
sarvonmādakaraṃ devi sarvayogīśvarīmayam || 48 ||

p. 31)

sarvapīṭhamayaṃ devi sarvajñānamayaṃ priye |
sarvadevamayaṃ devi sarvāhlādanakārakam || 49 ||

sarvadaurbhāgyaśamanaṃ sarvavighnanivāraṇam |
sarvasiddhikaraṃ cakraṃ sarvāśāparipūrakam || 50 ||

raudrābhicārakoccaṇḍaparamantraughabhakṣakam |
parasiddhyākarṣaṇaṃ ca parājñākarṣaṇaṃ tathā || 51 ||

parasainyastambhakaṃ ca paravijñānamohanam |
paravaktrastambhakaṃ ca śastrastambhanakaṃ param || 52 ||

mahācamatkārakaraṃ mahābhuktipravartakam | *
mahāvaśyakaraṃ devi mahāsaubhāgyadāyakam || 53 ||

mahājvaraharaṃ devi mahāviṣaharaṃ param |
mahāmṛtyupraśamanaṃ mahābhayavināśanam || 54 ||

mahāpurakṣobhakaraṃ mahāsukhaśubhapradam |
mahālakṣmīmayaṃ devi mahāmaṅgalyadāyakam || 55 ||

mahāprabhāvasaṃyuktaṃ mahāpātakanāśanam |

      kledanadrāvaṇayoḥ pṛthaṅnirdeśe sāmānyarūpatvaṃ nimittam | stambhanameva 
prapañcitaṃ parasainyastambhakamityādinā | sarvāveśeti pañcāśadbhedabhinnatvādinā anyatra 
uktam | sarvavedheti mantranādādirūpatayā tatra tatra bahudhā uditam | sarvatīrtheti sarvavrateti ca 
tattatphaladāyitvāt | duḥkhaṃ kṣobhaḥ
p. 32) sukhapratipakṣabhūtādharmaviśeṣaḥ, svaparānuśocanamātraṃ tu śokaḥ | mahābhuktīti 
lokadharmyapekṣam | anena ca adhiṣṭhātradhiṣṭheyayorabhedameva draḍhayituṃ 
sarvānandakaramityādipadopakṣepeṇa pūjyatayā abhimataṃ cakranavakamapi kaṭākṣitamiti jñeyam || 
55 ||
      naca asya iyāneva prabhāva ityāha

     evametasya cakrasya prabhāvo varṇituṃ mayā || 56 ||

     na śakyate mahādevi kalpakoṭiśatairapi |

      etadbahirapi kiṃ kiṃcitkāryamasti, na vetyāha

     etadvāhyagataṃ padmamaṣṭapatraṃ samālikhet || 57 ||

tadbāhyato'pi deveśi ṣoḍaśāraṃ tathaivaca |
pariveśasamāyuktaṃ caturdvāropaśobhitam || 58 ||

      ṣoḍaśāreti arāśabdo dalaparyāyaḥ | yaduktaṃ

      ṣoḍaśāre mahāpadme - - - - - - - - - - - |

iti | tathaiveti padmamevetyarthaḥ | pariveśeti vyomarekhā | śrīrasamahodadhau punaretat 
sukaratvābhiprāyeṇa sūtravartanāmukhena api uktam | tathāhi

athātaḥ saṃpravakṣyāmi cakramaṅkitanirṇayam |
tadarthaṃ devi kurvīta trihastaṃ maṇḍalottamam ||
tasya kuryāttribhāgena karṇikāṃ cakralāñchitām |
padmadvayaṃ tadardhena dvārakṣetraṃ ca tatsamam ||
brahmasūtraṃ purā dattvā karṇikābhramamadhyataḥ |
yāmyasaumyāyataṃ dadyāt tatrasthaṃ sūtrasaptakam ||
p. 33)
turyasūtraṃ tato luptvā madhyāṃśaḥ syāddvibhāgikaḥ |
tṛtīyapañcamau bhāgau kṛtvā tryaṃśavivarjitau ||
tena bhāgena ca punarmadhyabhāgaṃ vivardhayet |
tṛtīyasya dvitīyasya ādisūtrasya cāntayoḥ ||
prasārayedadhodhaḥsthaṃ tataḥ sūtradvayaṃ dvayam |
bhrame saptamake sūtre brahmasthāne ca saṅgatam ||
āpañcamādadhaḥsthānāṃ trayāṇāṃ cāntato nayet |
sūtradvayaṃ dvayaṃ cānyat tryaśrāṇyevaṃ bhavanti ṣaṭ ||
caturdaśāramityevaṃ daśāraṃ ca prasiddhyati |
sūtrāddvitīyakātṣaṣṭhādbrahmasūtrasya pārśvayoḥ ||
sūtradvayaṃ dvayaṃ deyamadha-ūrdhvaprasāritam |
tatkoṭisaṃgataṃ paścātsūtrayugmaṃ prasārayet ||
daśāramevaṃ kathitaṃ cakrametat tṛtīyakam |
sūtrāgrātpañcamādūrdhvamanyatsūtradvayaṃ nayet ||
ūrdhvādhomukhamadhyasthatryaśramarmadvayāvadhi |
dadyāt tṛtīyasūtraṃ ca tayoranyānyasaṅgatam ||
evaṃ caturthamaṣṭāramekāraṃ cātra pañcamam |
iti saṃsiddhyate cakraṃ karṇikāntargataṃ samam ||
tacchaktipañcakaṃ sṛṣṭyā layenāgnicatuṣṭayam |
pañcaśakticaturvahnisaṃyogāccakrasaṃbhavaḥ ||
tatraikamaṣṭakaṃ madhye dvidaśāntacaturdaśa |
p. 34)
caturdaśa daśadvandvamaṣṭāvekaṃ maheśvari ||
sṛṣṭisaṃhārayogena śaktisthānānyanukramāt |
sthitāni tripurācakre yadbodhādamaro bhavet ||
bahiḥ padmadvayaṃ kuryādaṣṭaṣoḍaśakacchadam |
caturaśraṃ tato dattvā kuryāddvāracatuṣṭayam ||
catuṣkoṇasamāyuktamevaṃ syānmaṇḍalottamam |
raktena rajasāpūryaṃ cakraṃ śukloccaresvikam ||

iti | ayamatra arthaḥ | tadardheneti tasya tribhāgasya ardhena ṣaḍaṃśenetyarthaḥ | tena 
pratipārśvaṃ dvādaśāṅgulasaṃmite kṣetre padmadvayaṃ kāryamiti | anyeṣāṃ 
punastribhāgenetyeva pāṭhaḥ | yadāhuḥ

tatra trihastayāge kara eko dvārabhūmigaḥ kalpyaḥ |
ṣoḍaśavasudalakamale hastena ca karṇikā tryaṃśaḥ ||

iti | tatsamamiti pāṭhadvayābhiprāyeṇa api yojyam | evaṃvibhaktasya ca asya trihastasya kṣetrasya 
bhramamadhyataḥ pūrvāparāyatabrahmasūtrayāmyasaumyāyatasūtrasaptakadāna-
bhāgaśabdādivacanānyathānupapattyā caturaśrasiddhipūrvaṃ prathamaṃ caturviṃśatidhā 
vibhajanaṃ kāryamiti siddhaṃ yena hāstikasya karṇikākṣetrasya aṣṭabhirbhāgairvibhaktasya sarvametat 
saṃgacchate | tataśca pratipārśvaṃ dvābhyāṃ dvābhyāṃ bhāgābhyāṃ padmadvayaṃ, 
dvāraṃ ca caturbhiścaturbhiriti syāt | evaṃca brahmasthāne binduṃ vinyasya tadanusāraṃ 
karṇikāpadmadvayārthaṃ bhramatrayavidhānaṃ, tadanu caturaśravidhiḥ parataḥ karṇikāyāṃ 
sūtraistricatvāriṃśattrikoṇaviracanamityādivyakhyānaṃ rekhākarmānabhijñatvapratipādanaphalamatīva 
hāsyāvahatāṃ gurupuṅgavasya prakāśayatītyalaṃ caryānandanāthopadeśaviṣadapratibhāvibhavaiḥ 
saha
p. 35) saṃbhāsitena, cakraniṣpattyupayogitāmātrapratipādanaparaṃ tu niyatasūtropādānam | tathāca 
pūrvāparāyatasūtramadhyāt brāhmasūtrasyaiva 
śaktivahnīnāmagrakoṇasāmyotpādanamātramupayogaḥ | 
brahmasthānalābhasūtrabhāgagaṇanādyupayogārthamupāttasya api turyasūtrasya 
cakrāvayavaviśeṣasaṃpattyai yogyatādarśanārthaṃ punarlopa uktaḥ, itareṣāṃ tu cakraniṣpattau 
sākṣādeva upayogaḥ, -iti dvitīyādīnāṃ caturṇāṃ sūtrāṇāṃ dvitīyaṣaṣṭhayośca antata 
ārabhya sūtraprasāraṇe brahmasthāne ca viśrāntau cakrasya niṣpattireva na syādityāśaṅkya 
prathamameva parameśvarastatra tatra tryaṃśalakṣaṇāṃśarūpahānipradarśanadvārā 
sthānanaiyatyameva saṃkṣiptayā uktyā śikṣayati tṛtīyetyādinā | 
tṛtīyastacchabdasaṃnidhestṛtīyasmādeva bhāgāt yaḥ pañcamaśca bhāgastau tṛtīyapañcamādīnāṃ 
sūtrāṇāmantata eva prasāraṇasya vakṣyamāṇatvādanāgatāvekṣaṇatantrayuktyā antata eva 
tryaṃśena bhāgasya tryaṅgulatvādaṅgulaparimāṇena varjitāvarthāt pūrvataḥ kṛtvā, punaśca 
paratastathaiva vidhāya, tena tryaṃśalakṣaṇenaiva mārgeṇa caturdaśāradaśārāpekṣayā 
madhyabhāgaṃ punardvitīyabrahmaṣaṣṭhasūtrātmasu triṣu sthāneṣu pārśvayorvivardhayet tatra tatra 
aṅgulaparimāṇāṃ vṛddhiṃ kuryādityarthaḥ | idamuktaṃ bhavati-iha khalu prathamasya dvitīyasya 
ṣaṣṭhasya saptamasya ca sūtrasya abhramato'ṅgulamātraṃ parivarjya madhye ca dvitīyasya 
ṣaṣṭhasya ca sūtrasya aṅgulamātramadhikīkṛtya tatra tatra tathā paricchedārthaṃ binduṃ dattvā 
sūtrāṇi adha ūrdhvaṃ ca prasārya vakṣyamāṇadṛṣṭyā tatra tatra teṣāṃ viśrāntiḥ kāryā | 
kintu prathasūtrasya brahmasthāne'pi aṅgulamātrameva adhikīkṛtyeti śarasaṃkhyaṃ ca tṛtīyaṃ 
neyamadhaśca aṅgulena ūrdhvamiti vyākhyānaṃ tu aśabdārthamiti cakraniṣpattau tāvat na 
sādhakaṃ, pratyuta cakrāṇāṃ sāṅkaryotpādanādinā
p. 36) marmāṇāṃ ca sarvatovighaṭanena bādhakamiti upekṣyam |

evaṃ śrīrasamahodadherye rahasyavararakṣarāśisaṃpūrṇāt |
katicitsudurlabhā apyucchalitāḥ ślokaśīkarāḥ siddhāḥ ||
te vāmakeśvarāgamato muktavikalpakālikākaluṣāḥ |
sañcārātkṛtavedhāḥ sarveṣāmupakariṣyanti ||
ityākalayya jitvā gurujanadṛḍhamalaghu mātsaryam |
etānsadgurulabdhānviśvāvartaḥ pravartitavān ||

ityādyabhidadhadbhirapi bhavadbhiḥ pañcapuruṣīṃ gṛhe gopayitvā parirakṣya tadastitvamātreṇa ca 
bhāṅkāraśatāni vidhāya sūtrakaṇikāmātramadyāpi na avagatamityataḥ paraṃ kiṃ nāma 
maurkhyasya hāsyasya vā sthānaṃ pratyuta dagdhaṃ mukhaṃ kṛtvā pratipadamupajīvyāpi 
nirmitticitramullikhatāṃ mahātmanāṃ mahāgurūṇāṃ, natu etāvatā akuśalaparikalpite parairapi 
anyathākartuṃ śakye dvātriṃśadbhāgavibhajanādāvanāgamike etanīvamityucyate iti alaṃ vācālaiḥ 
saha saṃlāpanena | antayoriti uktanītyā bhramato'ṅgulamātreṇa kṛtaparicchedayoḥ | evamantata 
ityatrāpi jñeyam | brahmasthāne'pi aṅgulamātreṇa adhikīkṛte adhaḥsthānāṃ trayāṇāmiti 
pañcamaṣaṣṭhasaptamātmanām | dvitīyakāditi ṣaṣṭhāditi tena uktagatyā aṅgulena aṅgulena 
adhikīkṛtāt | brahmasūtrasya pārśvayorityanena ūrdhvādharayorityanena ūrdhvādhara 
tryaśrāśrakoṇasāmyotpādanameva upodvalitam | adha ūrdhvamiti yathāsaṅkhyam | tatkoṭisaṅgatamiti 
kākākṣinyāyena yojyam, tena tasya pūrvasiddhasya daśārasya koṭāvavāntarasaṅgataṃ 
tāvadetatsūtradvayamadha ūrdhvaṃ ca prasārayet yāvat caturthabhāgārthaprāyatatkoṭisaṅgamaḥ 
syādityarthaḥ | tathā teṣāṃ samanantaradattānāṃ caturṇāmapi sūtrāṇāṃ koṭiṣu
p. 37) saṅgatamanyadapi sūtrayugmaṃ pañcāśatprasāritaṃ deyamiti pūrveṇa saṃbandhaḥ | 
ūrdhveti ūrdhvādhomukhe madhyasthe yat pūrvāparatṛtīyatrikoṇadvayajanite tryaśre 
anyonyasaṃbhedotpāditaṃ-marmadvayaṃ, tadavadhi tatparyantaṃ lakṣyīkṛtyetyarthaḥ | taditi cakraṃ, 
cakrapañcakasya sṛṣṭisaṃhārābhyāmupasaṃhāre śiṣyahitatvaṃ nimittam | bahiriti 
cakralāñchitāyāḥ karṇikāyāḥ | raktaśuklapadadvayopādānācca rajontaraniṣedhaḥ kaṭākṣito 
yadiha rajontarāṇāmanānuguṇyādetāvataiva kārtārthyam | tena

gorocanayā yuktaṃ kṛtvā cakrasthakarṇikāmadhyam |
asitaṃ tadantarālaṃ kastūrikayāthavā dugdhe ||
kṣiptvā tāṃ godhūmairañjyam - - - - - - - - - |

ityādi na vācyam, - ityalaṃ bahunā | anenaiva āśayena etadāgamārthamadṛṣṭvaiva anyairapi 
mahāgurubhirākāśacitranyāyena svapratibhayaiva sūtragatyā asya

daśanasamāṃśe deśe vasuvasuśāntaḥ samantatothāntaḥ |
dvidvidvibhāgalopātpūrvasyāṃ pārśvayugme'pi ||
pādārdhārdhonayugatryakāṃśatyāgatastataḥ parataḥ |
grahasārdhakāmaṣoḍaśaviśrāntāṃ tritryarīkuryāt ||
evaṃ paścātkiṃtu prathamatryaramabdhibhāgasaṃtyāgāt |
pārśvābhyāṃ sārdhanavaprarūḍhamantastataḥ kāryam ||
munimunibhāgatyāgātprārabdhaṃ pūrvatastataḥ paścāt |
sārdhanavāntaṃ kāryaṃ pārśvatryarasaṃgataṃ tryaśram ||
itthaṃ cakraṃ kṛtvā dattvā gaganadvayaṃ tadantaragam |
cakraṃ kāryaṃ gurubhiḥ paraśunibhāraṃ vikārāram ||
bahiratha bhāgatritaye kuryāddvārāṇi koṇayuktāni |
p. 38)
kamalāṅkitāni śobhāvantyupaśobhānvitānyapica ||
iti kathito'bhinavo'yaṃ mārgaḥ śivaśāsanānusāreṇa |
cakraṃ sukaraṃ susamaṃ yena ca sumanoharaṃ bhavati ||

ityādinā uddhāraḥ kṛtaḥ | atra tu iyānāgamārthavisaṃvādī doṣaḥ-yatkṣetrasyārdhacakramardhe 
ca padmādi ṣoḍaśadala[m], padmasthāne ca cakraṃ niviṣṭakalāṭakaṃ ca dvāramityādi | 
etadupajīvanena pravṛttairapi asmadvyākhyāgurubhiradṛṣṭatvāviśeṣe'pi 
prātibhajñānavaśonnītatadāgamārthaistadavisaṃvādinī cakrasya vartanā saṃgṛhītā | yathā

śrutibhujabhāge kṣetre madhye'ṣṭāṃśe bhramaṃ vitanvīta |
tatraca śaktitritayaṃ pārśvābhyāṃ pūrvataśca turyāṃśāt ||
bhramato'gnyaṃśādaguṇādanalāṃśavivarjitādyamāṃśācca |
janayedvasumuni saguṇāṃśābdijamevaṃ ca hutabhujaḥ parataḥ ||
kiṃtu yamāṃśādagniṃ tṛtīyamiṣubhāgagaṃ caturthamatha |
vedāṃśā vā dviguṇāṃśarasāṃśagamevameva jalaśaktiḥ ||
iṣvantaṃ śaraśaktistṛtīyaśaktyagnisambhedāt |
itthaṃ cakraṃ vedāgnibāṇaśaktyanvitaṃ sukhaṃ siddhaḥ ||
tadanu dvitaye dvitaye vasvadaṣṭidalaṃ saroruhadvitayam |
bhāgānāmavaśiṣṭe caturaśre dvāramiti yāgaḥ ||
ityalaṃ bahunā | prakṛtameva abhidadhmaḥ || 58 ||
      evamādhārasvarūpanirūpaṇānantaraṃ prāptāvasaramādheyasya api 
svarūpanīrupaṇamityāha

     saṃsthitā tu mahācakre mahātripurasundarī |

      atra adhiṣṭhātṛtayā avasthitāyāśca asyāḥ kathyamānaṃ 
pūjāvidhānamavadhārayetyāha

p. 39)
śṛṇu devi yathā sā tu pūjyate sādhakottamaiḥ || 59 ||

     vargānukramayogena devatāṣṭakasaṃyutā |

      devatāṣṭaketi antaraṅgatvādasya ||
      vargānukramameva asya darśayati

     avargaḥ prathamo devi vaśinī tatra devatā || 60 ||

tatparastu kavargo yastatra kāmeśvarī sthitā |
modinī tu cavargasthā ṭavarge vimalā tathā || 61 ||

aruṇā tu tavargasthā pavarge jayinī sthitā |
sarveśvarī yavarge tu śavarge kaulinīti ca || 62 ||

etā vargāṣṭake devi aṣṭāvevahi devatāḥ |
arcitāḥ puruṣasyāśu prakurvanti vaśaṃ jagat || 63 ||

      amantrakā hi pūjā na bhavatīti āsāṃ bījāṣṭakameva tāvaduddharati

uddharetprathamaṃ rephaṃ tadadhaḥ kuṭilāntagam |
tadapyavanibījasthaṃ ṣaṣṭhasvarasamanvitam || 64 ||

ūrdhvamardhendubindvāḍhyaṃ kārayetparameśvari |
etattadvaśinībījaṃ yoginīnāṃ mukhe sthitam || 65 ||

      kuṭilaḥ phakāraḥ, tasya antagaṃ va avanibījaṃ la, saṣṭhaḥ svaraḥ ū, ardhendvādinā 
sakalamātṛprameyopakṣepaḥ kṛtaḥ | evaṃ rblū/
	evaṃ vaśinībījamabhidhāya kāmeśvaryā api āha

dvitīyavargātprathamamaindrārūḍhaṃ maheśvari |
p. 40)

     adhastānnābhasaṃ bījamāgneyasthaṃ samuddharet || 66 ||

caturthasvarasaṃyuktaṃ bindukhaṇḍendvalaṅkṛtam |
etatkāmeśvarībījaṃ trailokyakṣobhakārakam || 67 ||

      dvitīyavargāt kavargāt prathamaṃ ka, aindraṃ la, nābhasaṃ bījaṃ ha, āgneyo ra, 
caturthasvara ī | evaṃ klhrī/ || 67 ||
      evaṃ modinyā api āha

aruṇāpañcamasyādho vāruṇaṃ viniyojayet |
tadadho'pīndrabījaṃ tu sarvordhvabhiparaṃ priye || 68 ||

etattanmodinībījaṃ sarvatattvavaśaṅkaram |

      adhiṣṭātradhiṣṭheyayorabhedopacārādaruṇāśabdena tadadhiṣṭhitastavargastasya pañcamaṃ 
na, vāruṇaṃ va, indrabījaṃ la, sarvordhvaṃ binduḥ, iparaṃ ī | evaṃ nvlī/ ||
      tataḥ

vāyavyamindrabījasthaṃ ṣaṣṭhasvarasamanvitam || 69 ||

ardhendumastakākrāntaṃ bindunā paribhūṣitam |
etatte kathitaṃ devi vimalābījamuttamam || 70 ||

sarvapāpakṣayakaraṃ sarvopadravanāśanam |

vāyavyaṃ ya, indro la, ṣaṣṭhaḥ svaraḥ ū | evaṃ ylū/ ||

jakāraṃ kālamārūḍhaṃ tadadho jvalanākṣaram || 71 ||

caturthasvarasaṃbhinnaṃ bindunādasamanvitam |
etattadaruṇābījamaruṇaṃ sarvamohanam || 72 ||

      kālaṃ ma, jvalanākṣaraṃ ra, caturthaḥ svaraḥ ī | evaṃ jmrī/ |
aruṇamiyartiṃ gacchatīti arthānugamāt jñānapradhānamityarthaḥ ||

p. 41)
śivabījaṃ tadādisthamadhastādaindravāruṇau |
vāyavyamuparodbhinnaṃ saṃyojya parameśvari || 73 ||

jayinībījamevedaṃ nādabinduvibhūṣitam |

      śivabījaṃ ha, tadādi sa, aindraṃ la, vāruṇaṃ va, vāyavyaṃ ya, upara ū, evaṃ hslvyū/ 
|| 73 ||

uddharenmodinīvargacaturthaṃ parameśvari || 74 ||

adhaḥ kālāgnivāyavyān krameṇa viniyojayet |
dīrghāyurbījasaṃyuktānyathānukramayogataḥ || 75 ||

uparīśvarabindvantānekatra surasundari |
etatsarveśvarībījaṃ sarvatraivāparājitam || 76 ||

      modinīvargaścavargaḥ, taccaturtho jha kālo ma, agnī ra, vāyavyo ya, dīrghāyurbījaṃ ū, 
evaṃ jhmryū/ || 76 ||

kaulinīpañcamaṃ devi kālabījoparisthitam |
sarvādhastādapi tathā vahnibījaṃ niyojayet || 77 ||

caturthasvarasaṃyuktaṃ bindvindusamalaṅkṛtam |
etadbījavaraṃ bhadre kaulinīrūpamāsthitam || 78 ||

      kaulinyadhiṣṭhitasya śavargasya pañcamaṃ kṣa, kālabījaṃ ma, vahnibījaṃ ra, 
caturthasvaraḥ ī, evaṃ kṣmrī/ || 78 ||
etadeva upasaṃharati

evametāni bījāni kramādaṣṭau maheśvari |
kathitāni mahādevi - - - - - - - - - - - - - - - -

      devītyatra etānīti apapāṭho maheśvarītyatra kṛte'pi chede paunaruktyānivṛtteḥ ||
      na kevalamantaraṅgaparivārabhūtadevatāṣṭakamantrā uktā yāvadanye'pi ucyante ityāha

     - - - - - - - - - - śṛṇu vidyāṅgarūpiṇīḥ || 79 ||

      saiṣa dāśarathī rāmaḥ itivadatra sandhiḥ || 79 ||
      tā eva uddiśati

karaśuddhikarīṃ vidyāṃ tathāṅganyāsasaṃsthitām |
ātmāsanagatāṃ cāpi tathā cakrāsanasthitām || 80 ||

sarvamantrāsanagatāṃ sādhyasiddhāsanasthitām |
devyāvāhanavidyāṃ ca - - - - - - - - - - - - - - - - - - - |

      na ca etadeva, yāvat

     - - - - - - - - - - - - - - - - -mūlavidyāmapi priye || 81 ||

      śṛṇviti prācyena saṃbandhaḥ || 81 ||
      etadeva krameṇa uddharati

vāgbhavaṃ prathamaṃ devi kāmarājaṃ dvitīyakam |
śāntāntaṃ kādisaṃyuktamaikārāntāntayojitam || 82 ||

eṣā vidyā maheśāni karaśuddhikarī smṛtā |

      uddharediti pūrveṇa sabandhaḥ | śasya tālavyasya antomūrdhanyaḥ ṣa, tasya antaḥ sa 
kasya ādirvisargaḥ, aikārasya anta okāraḥ, tasyāpi antaḥ aukāraḥ evaṃ sauḥ ||

p. 43)
nanu ihāpi
vāgbhavaṃ prathamaṃ devi kāmarājaṃ tataḥ punaḥ |
śāntāntaṃ kādisaṃyuktamaikārāntāntayojitam ||

ityaṣṭamapaṭaloktavadeva sāmānyena upadeśe kriyamāṇe

prathamaṃ vāgbhavaṃ tu cātra avarṇaṃ lokaviśrutam |
dvitīyaṃ haṃsadevaṃ tu tṛtīyaṃ vahniveśmakam ||

ityādidṛṣṭyā vāgbhavāderanaikye sukumārabuddhayo'nugrāhyā muhyeranniti viśeṣābhidhitsayā 
svayameva kāruṇikaḥ parameśvaro vibhajya idaṃ bījadvayamācaṣṭe

     e-omadhyagataṃ bījaṃ vāgvidhānāya kevalam || 83 ||

rudrayāmalatantre tu nirdiṣṭaṃ paramākṣaram |
mādanaṃ śakrasaṃyuktaṃ caturthasvarasaṃyutam || 84 ||

ūrdhvamardhendubindvāḍhyam - - - - - - - - - - - - - |

      ekāraukārayormadhye gataṃ ai, kevalaṃ śūnyaṃ binduḥ, tena aiṃ mādanaṃ ka, śakro 
la, caturthasvaraḥ ī, evaṃ klīṃ śaktibījaṃ vyākhyātaṃ, evaṃ aiṃklīṃsauḥ | taduktaṃ 
śrīnityākule

uddharetprathamāddevi aṣṭamaṃ surasundari |
kālamastakasaṃbhinnamardhendūparisaṃsthitam ||
ayaṃ sa vāgbhavo devi vāgīśatvapravartakaḥ |
yonivargādimaṃ bījaṃ paurandaraniyojitam ||
mohinyā śirasākrāntaṃ bindukhaṇḍendvalaṅkṛtam |
kāmarājo mahādevi kāmasiddhipradāyakaḥ ||
kṣapeśaṃ tu samuddhṛtya daśamasvarayojitam |
sṛṣṭyavasānaṃ deveśi śaktibījamudāhṛtam ||

iti | śrīrasamahodadhāvapi

o-jamadhyagataṃ varṇaṃ jhordhvena śirasā hatam |
aṃ-gamadhyagataṃ varṇaṃ va-ramadhyāsanasthitam ||
dvitīyametatkathitaṃ ā-ūmadhyaṃ sabindukam |
va-hamadhyaṃ ā-adhaḥsthaṃ aṃ-kamadhyena lāñchitam ||
prathamaṃ tryakṣarā vidyā karaśuddhikarī smṛtā |

iti | o-jamadhyagataṃ ai jhordhvaṃ aṃ, tena aiṃ | aṃ-gamadhyagataṃ vahnipurāpekṣayā ka, va-
ramadhya iti la, ā-ūmadhyaṃ ī, evaṃ klīṃ | va-hamadhyaṃ sa, ā-adhaḥsthaṃ au, aṃ-kamadhyaṃ 
aḥ, evaṃ sauḥ | tadanuguṇa evahi tatra

caturaśraṃ puraṃ kṛtvā caturviṃśāṅgulaṃ śubham |
īśātpaścimagaṃ sūtramagneḥ paścimagaṃ punaḥ ||
pūrvasūtraṃ tu saṃsthāpya śeṣāṇi trīṇi lopayet |
tridaṇḍā tu smṛtā yoniḥ trimāyā sā tridevatā ||
ekaikadaṇḍake prājñaḥ ṣaṭṣaṭsūtrāṇi pātayet |
yonayo yena jāyante samastāḥ samasandhayaḥ ||
koṣṭakānyūnapañcāśadbhagarūpāṇi tāni tu |
īśādakāramārabhya vāruṇyāṃ tu vināyakam ||
vinyasenmātṛkāṃ sarvāṃ viṣṇvādiśivapaścimām |
etaccakraṃ likhetpaṭṭe śubhe dārumaye dṛḍhe ||
trikoṇe ca tripāde ca varṇotkīlitalakṣaṇe |
ṣaṇmāsājjāyate siddhiḥ pūjājapaparāyaṇe ||
ato mantrāḥ samuddhāryā yathā devi tathā śṛṇu |

p. 45)

ityasti prastāro yasya ayaṃ saṃniveśaḥ -























      evaṃ karaśuddhikarīṃ vidyāmabhyuddhṛtya aṅganyāsasaṃsthitāṃ dvitīyāmapi uddharati

     - - - - - - - - - - - - - - - - - - ādyante tatparaṃ punaḥ |

      etasyā eva - - - - - - - - - - - - - - - - - - - - - - - - - - (1|88)

itivakṣyamāṇaivakāramahimnā etasyāḥ karaśuddhikaryā eva tryarṇāyā vidyāyā ya 
ādirvāgbhavastasya ante saṃnikarṣe punastasmāt samanantaroktāt kāmarājātparaṃ tṛtīyaṃ 
śaktibījamarthāt kāryaṃ yena
p. 46) kāmarājaśaktibījayorviparyāsena sthitiḥ syāt | yathā aiṃsauḥklīṃ | ataḥparaṃpāṭhe'pi 
ayameva arthaḥ ||
	kāruṇyāt ca atra parameśvarastatparamiti tasya kāmarājasya paramakṣaraṃ 
lakāramīkāraṃ vā kasyacidāśaṅkanīyaṃ mā bhūdityāha

     śāntāntaṃ kādisaṃyuktamaikārāntāntayojitam || 85 ||
      
      gatārtham || 85 ||
      evaṃ

eṣā vidyā mahāvidyā yoginīnāṃ mahodayā |
kulavidyā maheśāni sarvakāryārthasādhakī || 86 ||

      yaduktaṃ tatraiva

dvayoḥ kṛtvā viparyāsaṃ pūrvabījena vai vinā |
aṅganyāsavidhau vidyā dvitīyeyaṃ kṛśodari ||

iti | pūrvabījeneti vāgbhavena | dvayoriti śiṣṭayordvitīyatṛtīyayoḥ tena vāgbhavānantaraṃ śaktibījaṃ 
tataḥ kāmarāja iti || 86 ||

      aṅganyāsasaṃsthāne ca asyāḥ prayojanaṃ darśayati

     anayā vidyayā gauri rakṣāmātmani kārayet |

      ata eva kulavidyetyādi uktam ||
ātmāsanagatāṃ tṛtīyāmapi vidyāṃ lakṣayati

     etasyā eva vidyāyāḥ śivamāyāgnibindumat || 87 ||

     bījamādipade yuktvāṃ kāryātmāsanarūpiṇī |

śivo ha, māyā ī, agnī ra, evaṃ hrīṃ | etasyā ādyāyāḥ karaśuddhikaryā
p. 47) vidyāyā eva na punaretadvikṛtirūpāyā dvitīyasyāḥ kulavidyāyā ādervāgbhavasya pade 
sthāne tamapāsya etanmāyābījaṃ yojayitvā ātmāsanagatā vidyā kāryetyarthaḥ | evaṃ 
hrīṃklīṃsauḥ | taduktaṃ

ṣādha-ūrdhvagataṃ piṇḍaṃ ā-au-antavibhūṣitam |
ādyāyā vāgbhavasthāne tryarṇātmāsanarūpiṇī ||

      ṣādho ha, tadūrdhvaṃ ra, piṇḍa iti etadvarṇadvayārabdhatvāt, ākārasya antaḥ ī, 
aukārasya antaḥ aṃ, evaṃ hrīṃ ||
      cakrāsanagatāṃ caturthīmapi āha

     punarvidyādyamasyordhvamantarantaṃ śivānvitam || 88 ||

     trailokyamohanīyaṃ sā vidyā cakrāsanasthitā |

      punaḥ karaśuddhikaryā ādyāyā eva vidyāyā yadādyaṃ bījaṃ 
vāgbhavamantarantarālavarti kāmarājaṃ antamantyaṃ śaktibījaṃ ca asya trayasya api ūrdhvaṃ 
śivena hakāreṇa anvitaṃ kuryāditi śrīmadīśvaraśivācāryaḥ | evaṃ hai/ hklīṃhsauḥ |
taduktaṃ

gṛhītvā varṇamekaikamādyamādyatṛtīyayoḥ |
tadantamūrdhve ṣādhena vidyā cakrāsanasthitā ||

iti | atra ādyatṛtīyayorvidyayoḥ krameṇa ādyaṃ varṇaṃ vāgbhavaṃ antaṃ 
kāmarājaśaktibījalakṣaṇaṃ tadekaikaṃ ca varṇaṃ gṛhītvā ṣādhena hakāreṇa ūrdhvaṃ yojayet, 
varṇatrayamapi upari hakārasaṃbhinnaṃ kuryādityarthaḥ | atha ca tṛtīyavidyādyakṣaratvena 
anantarameva uddhṛtasya asya māyābījasyordhvamādau punarapi karaśuddhikaryā eva vidyāyā 
ādyaṃ vāgbhavamarthātkṛtvā anayoreva vāgbhavamāyābījayorantarmadhye'rthāt tasyā eva 
ādyāyā vidyāyā antaṃ śaktibījaṃ śivena hakāreṇa
p. 48) ānvitamarthāduparisaṃbaddhaṃ sat kuryāditi śrīśaṅkararāśiḥ | evaṃ aiṃhsauṃḥhrīṃ | 
etacca tatraiva madhye'ntamitipāṭhabhedāduktam | ayamatra arthaḥ-ādyatṛtīyayorvidyayorādyamekaikaṃ 
varṇaṃ vāgbhavaṃ māyābījaṃ ca gṛhītvā arthādanayoreva madhye'rthādetadīyameva antaṃ 
śaktibījena ṣādhena hakāreṇa ūrdhve'rthāt yojitaṃ satkuryāditi śeṣaḥ | tatra 
prākpakṣopekṣaṇam cānyairevaṃ hi śrīmadīśvaraśivamatena yathā iha cakrāsanoddhārastathaiva 
rājānakakalyāṇavarmamatena na paryavasita iti yādṛktādṛkprāyanyāyopanyāsakena tāvadāśayena 
kṛtam | na vidmaḥ evaṃhi paryavasite ko doṣaḥ syāt | vastuto hi asya darśanasya etadeva 
ācāryadvayaṃ kaśmīreṣu avatārakam | tanaśca śrīviśvāvartamukhenaiva lakṣyate yat, tadeva 
idamasmatparyantaṃ śiṣyapraśiṣyakrameṇa sarveṣāmapi prāptam | evaṃ ca tayorāptatvāviśeṣāt 
tanmatameva sarvātmanā pramāṇam | tataśca tulyapramāṇatvāt tanmatayorvikalpo nyāyyaḥ, natu 
ekatarapakṣaparityāgaḥ pratyuta śrīmadīśvara śivācāryamatasya valavattvaṃ lakṣyate yataḥ sa eva 
śrīrasamahodadhiślokānāṃ sākṣātpravartayiteti sarvatra avigītā prasiddhiḥ | yat bhavanto'pi

śrīśūramaṭhādhipaterlebhe guruvaraparamparopanatam |
cakramidamīśvaraśivātpūrvācāryo'smadīya eva purā ||

iti | evamādyadvayamanyādṛṅmadhyasamante'kṣaraṃ caturthyā yadi, tadapi 
aparyālocitārthābhidhānameveti āstāmetat ||
      sarvamantrāsanasthitāṃ pañcamīmapi āha

     punarādyāṃ mahāvidyāṃ śivacandrasamanvitām || 89 ||
p. 49)
     kṛtvā kāmapradā vidyā sarvamantrāsanasthitā |

      punarapi tattadvidyāntaroddharaṇabhittibhūtatvāt mahatīṃ vidyāmādyāṃ karaśuddhikarīmeva 
pratyarṇaṃ śivacandrābhyāṃ ha-sakārābhyāṃ samanvitāṃ kṛtvā tattadabhīṣṭārthadāyinī 
sarvamantrāsanasthitā vidyā guruṇā uddhāryeti śeṣaḥ | evaṃ hsaiṃ hsklīṃ hssauṃḥ |
taduktaṃ 

      ṣādhontābhyāṃ yutā pūrvā jñeyā mantrāsanasthitā |
      
iti | ṣādhontābhyāmiti taddeśāvasthitābhyāṃ hakārasakārābhyām ||

      sādhyasiddhāsanasthitāṃ ṣaṣṭhīmapi āha

     devyātmāsanavidyāyāḥ pūrvoktāyā yathākramam || 90 ||

antadeśe toyabinduśakraśaktīranukramāt |
saṃyojya parameśāni sākamardhendunā tataḥ || 91 ||

     kevalākṣarabhedena vidyā sādhyāsanasthitā |

      toyaṃ va, śakro la, śaktiścaturthasvaraḥ ī, evaṃ vlīṃ | tato yathākramaṃ 
pūrvoktāyāstṛtīyasyā ātmāsanavidyāyā ante sthitasya śaktibījasya deśe sthāne tadapāsya 
toyādīnanukramāt saṃyojya tasyaiva ekaikasya piṇḍātmano'kṣarabhedena satyabhāmābhāmetivat 
sādhyāsanasthitā vidyā uddhāryetyarthaḥ | evaṃ hrīṃ klīṃ vlīṃ | taduktaṃ

viparītasthitau rāntau jhordhva-ūpūrvalāñchitau |
dattvā tṛtīyavidyāyāḥ kāmabījāntadeśataḥ ||
sādhyasiddhāsanagatā ṣaṣṭhī vidyā prakāśitā |

iti | rānto lo vaśca | viparītasthitāviti vakāra ūrdhvamadho lakāraścetyarthaḥ |
p. 50) jhordhva aṃ, ūpūrva ī, kāmabījāntadeśato dattveti tena ādau māyā, tataḥ kāmarājastata 
idamiti ||
      saptamīṃ devyāvāhanavidyāmapi āha

     haṃsasomasamārūḍhāmādyāmagnyāsanasthitām || 92 ||

     sarvārthasādhakī vidyā devyāvāhanakarmaṇi |

      ādyāṃ karaśuddhikarīṃ tryarṇāmeva vidyāṃ pratyarṇaṃ haṃsasomasamārūḍhāṃ 
agnyāhitādivat rephasya samyakvyañjanāpekṣayaiva ūrdhvamavasthitahakārasakārāṃ 
satīmagnyāsanasthitāmadho'vasthitarephāmarthāt kṛtvā devyāvāhananimittaṃ sarvārthasādhakī 
iyaṃ vidyā arthāduddhāryetyarthaḥ | evaṃ hsraiṃ hsklrīṃ hssrauḥ | taduktaṃ

dattvā bījatrayasyordhva varṇau ṣādhaṣa-antagau |
yāntasthā ādyavidyaiva āvāhanavidhau parā ||

iti | ṣādhogo ha, ṣāntagaḥ sa, yānto ra ||
      etadupasaṃharannanyadavatārayati

     evametā mahāvidyā devi sarvārthasiddhidāḥ || 93 ||

     mahātripurasundaryāṃ mūlavidyāṃ śṛṇu priye |
      
      ādarātiśayadarśanārthaṃ tu punaḥ śṛṇvityasya upādānam ||
      tāmeva āha

     mādanaṃ tadadhaḥ śaktistadadho bindumālinī || 94 ||

aindramākāśabījasthamadhastājjvalanākṣaram |
māyābindvīśvarayutā sarvopari niyojitā || 95 ||
p. 51)
ayaṃ  sa vāgbhavo devi vāgīśatvapravartakaḥ |

      mādanaṃ ka, śaktiḥ e, bindumālinī ī, aindraṃ la, ākāśabījaṃ ha, jvalanākṣaraṃ ra, 
māyā ī, bindvīśvaretyanena adhiṣṭheyādhiṣṭhātṛkukhena samastamāntraprameyāsūtraṇaṃ 
kaṭākṣitam | evaṃ ka-e-īlahrīṃ ||
      evaṃ vāgbhavamabhidhāya kāmarājamapi uddharati

 śivabījaṃ tridhā yuṅktvā sṛṣṭisthitilayakramaiḥ || 96 ||

dvayamādyena rahitamādyādho madanākṣaram |
punaḥ sthitiśivādhastādindrabījaṃ niyojayet || 97 ||

tathā layaśivādho'pi jvalanaṃ ca maheśvari |
caturthasvarasaṃyuktaṃ bindukhaṇḍendvalaṅkṛtam || 98 ||

evametanmahābījaṃ kāmarājaṃ mahodayam |

      śivabījaṃ ha, yuṃktveti saṃyojya vinyasyetyarthaḥ | naca 
etadantarālayordvayasyeṣṭernairantaryeṇa nyastavyamityāha dvayamādyena rahitamiti sthitilyātmakaṃ 
dvayamādyena sthityātmakena rahitamasaṃśliṣṭameva kāryaṃ yena antarā vakṣyamāṇasya 
varṇadvayasya avakāśaḥ syāt | ata eva āha ādyādho madanākṣaramiti, 
sthitiśivādhastādindrabījamiti ca, madanākṣaraṃ ka, indrabījaṃ la, jvalanaṃ ra, caturthasvaraḥ ī, 
evaṃ hk-hlhrīṃ | ādyena śirorekhātmakena ākāreṇa rahitamiti tu na vācyam | evaṃ hi dvayasya 
śirorahitatvamekasya ca saśiraskatvamiti kena abhiprāyeṇa uktamiti na jānīmaḥ |
p. 52)  vastuto hi sarveṣāmeva piṇḍavarṇānāmanackatvameva nyāyyaṃ yatra kutracidekenaiva yena 
kenacidacā sāckatveṣṭeḥ, na kevalamihaiva anena evamapavyākhyānaṃ kṛtaṃ, yāvadanayaiva 
saraṇyā

      - - - - - - - - - - - - kecinnaṣṭaistu nāśitāḥ |

itibhaṅgyā śrīmadānandeśvarakalpe

      śivaṃ śaktim -  - - - - - - - - - - - - - - -  |

ityādiko'pi mantragrantho nāśita iti kimeṣāmadṛṣṭaguruṇāṃ svayambhuvāmucyate, 
yairmahāgurūditāṃ prakṛtāṃ rājapathāyamānāṃ prakriyāmapahāya kiṃcit yattatprāyamuktamiti 
āstāṃ prastutavastuvyākṣepakāri granthāntaraparyālocanamapi etat ||
      evaṃ kāmarājabījamuddhṛtya śaktibījamapi abhidhatte

     māyābījaṃ maheśāni mādanaṃ śakrasaṃyutam || 99 ||

     candrabījaṃ kevalaṃ tu viniyojyaṃ varānane |

      māyābījaṃ hrīṃ, mādanaṃ ka, śakro la, candrabījaṃ sa, kevalaṃ ha ||
      kathaṃca eṣāṃ viniyojanaṃ kāryamityāha

     tyaktvā sṛṣṭikramaṃ devi prāguccārakrameṇa tu || 100 ||

     saṃhārakramayogena śaktibījaṃ samuddharet |

      mādanaśakrabījayostu viśeṣaṇaviśeṣyabhāvenaiva saṃhārānukramo vyatyayo darśitaḥ | 
uccārastu sṛṣṭikrameṇaiva kārya ityāha prāguccārakrameṇeti | ata eva tutabdo vyatireke | evaṃ 
hsklhrīṃ ||
      tadeva upasaṃharati

     evameṣā mahāvidyā mahātripurasundarī || 101 ||
p.53)
     saṃsmṛtaiva mahādevi trailokyavaśakāriṇī |

yaduktaṃ
      aḥ-khamadhyagataṃ gṛhya ḹ-aimadhyamataḥ kuru |
      tasya madhye nyasetpaścādaḥkārordhvavyavasthitam ||
rāntaṣāntayakārāntamāyābindunirodhiyuk |
vāgbhavo'yaṃ samākhyātaḥ samyakpratyayakārakaḥ ||
trayāṇāṃ ṣādhavarṇānāmekaikasyāsane nyaset |
gādyasordhvayakārāntāvekatrādyarṇalā~chitam ||
kāmabījaṃ maheśāni sarahasyaṃ prakāśitam |
asyoccāraṇamātreṇa jagatkṣobhaḥ prajāyate ||
tṛtīyaṃ saṃpravakṣyāmi śaktibījaṃ mahādbhutam |
ṣādhaṃ lādhasamāyuktaṃ gādyaṃ phādhaṃ ṣapādhagam ||
aḥpṛṣṭhaṃ jhordhvasaṃyuktaṃ śaktibījaṃ samuddhṛtam |
anena jñātamātreṇa kuryātsarvaviṣakṣayam ||
eṣā vidyā samākhyātā sarvāścaryakarī parā |
anayā jñātayā samyaṅnāsti tadyanna sādhayet ||

iti | aḥ-khamadhyaṃ ka, ḹ-aimadhyaṃ e, aḥkārordhvaṃ ī, rāntaṃ la, ṣādho ha, yakārāntaṃ ra, 
māyā ī, evaṃ vāgbhavaḥ | ṣādhavarṇānāṃ hakārāṇāṃ gādyaṃ vahnipurasthityapekṣayā 
ka, sordhvaṃ la, yakārānto ra, ādirviśvakāraṇatvānmāyā, tadvarṇaḥ ī | yadvā ā ākāra 
ādiḥ pūrvo yasyāsāviti kāmarājaḥ | ṣādho ha, lādhaḥ sa, gādyaṃ ka, phādho la, 
ṣādhogaṃ ha, pādhogaṃ ra, aḥpṛṣṭhaṃ ī, jhordhvaṃ aṃ, evaṃ śaktibījam | na ca atra 
sphuṭe'pi saptātmatve navātmatvaṃ vācyaṃ, evaṃ
p. 54) nirodhinyādyapekṣayā daśātmatvādi api kiṃ na ucyate tasyā api 
mantraprameyatāyāmaviśeṣāt | śrīrasamahodadhāvapi

      asti hi nirodhinyā vacanaṃ bindunirodhiyuk |

iti | yattu śrīmadallaṭena api aṅganyāsavidyāyāṃ kiṃ tvādervāgbhavabījasya ante tatparamiti 
kāmarājaparaṃ śaṃkararāśermatamidamiti jñātvā api pakṣāntarohaṅkanaṃ 
tṛtīyapañcamasaptamavidyānāmuddhāre karaśuddhividyāmapahāya dvitīyatṛtīyapañcamīnāṃ 
parāmarśaṃ

kevalamiti śivabījaṃ tallakṣyaṃ śaktibījamantyaṃ ca |
vidyāyā asyā api saṃbhedastasya yastrividhaḥ ||
kevalavāgbhavapūrvaistribhiḥ svaraiḥ prathamakathitavidyāvat |
tena samastatayānyatryaracakre śrītripiṇḍena ||
tena śivendusmarahariśivadahanairvākturīyaśūlayutaiḥ |
ekaikabindutatsahaitairiyamaṣṭamī vidyā |

iti vidyāntaraparikalpanaṃ ca śrīmatsvagurvanabhimatamapi svotprekṣitaṃ kṛtvā

dvitryarṇaviparyayato'pīndvakṣarato dvitīyasyāḥ |
pañcamasaptamayorapyuddhṛtamiha śaktibījaṃ vaiḥ ||
te bījavarṇakīlanamātramapi prāyaśo'tra mantrāṇām |
avidanto garjanti ca kena mahimneti citramidam ||
iti caturanvayasantatibhedenāyaṃ samastavidyānām |
iha nigadita uddhārastacchāmanaṃ gurumukhaprāpyam ||
iti
bahuvidhasaṃtatibhedairyadyapi gurubhirmamedamādiṣṭam |
caturanvayasantatiriha tathāpi mukhyaiva yuktiyutā ||
p. 55)
ityādi ca uktam, tat sarvamevamupekṣyamuktanītyā sarvaprakāraṃ sāmañjasyābhāvāt | 
yatpunaratra akṣaraśliṣṭatāmātrameva ālambya ālajālaprāyamaskhalitāparyavasitasaṃvitkramādikaṃ 
nirnibandhanamalpaśrutatātipriyaṃ mantrādau vyāptyādi uddarśitaṃ, tatra na 
asmābhirvidvadbhyo'sūyitavyam | yatkimiti, na tat prātipadyena anūdya dūṣitamiti yat mūlata eva 
āgamārthaprakāśane'pi akartavye kathaṃ nāma suprakaṭaṃ paraṃ prāyaścittāvahaṃ 
mantrārthaprakāśanamapi kriyamāṇaṃ kṣamante mahātmānaḥ samayabhīravo mahājanāḥ | 
yato'dya yataḥ kutaścana asthānādanayena antataścauryādinā api āsāditakhaṇḍitapatrikāmātrāḥ 
sarva eva yathāsthitaṃ gurvādi parivartya, tatra ājñāmapi svapitrādi ca gurutayā parikalpya 
śāstrārthānuṣṭhānaparāṅmukhā mantravikrayamātratātparyā dhanasaṃgrahaṇaparāyaṇāḥ 
sakalaṃ lokaṃ viplāvayanto dṛśyante | śāstrārthavicchedabhīrutayā tu paramatyalpaṃ 
tātparyālocanamātraṃ kṛtamiti alaṃ khalajanaśirortikāriṇā amunāpi vacanena ||
      evaṃ māhātmyavattve'pi anayā kiṃ kāryamityāha

     etayaitasya cakrasya sādhako'rcanamārabhet || 102 ||

      sa ca kīdṛgityāha

kuṅkumāruṇadehastu vastrāruṇavibhūṣitaḥ |
tāmbūlapūritamukho dhūpāmodasugandhitaḥ * || 103 ||

karpūrakṣodadigdhāṅgo raktābharaṇamaṇḍitaḥ |
raktapuṣpāvṛto maunī raktagandhānulepanaḥ || 104 ||
p. 56)
raktāsanopaviṣṭastu lākṣāruṇagṛhasthitiḥ |
sarvaśṛṅgāraveśāḍhyastripurīkṛtavigrahaḥ || 105 ||

     manaḥsaṃkalparakto vā sādhakaḥ sthiramānasaḥ |

      vastrāruṇeti pūrvanipātavyatyayaḥ | raktagandheti haricandanālaktakādi | sādhaka iti 
siddhisādhanāya satatodyuktaḥ, ata eva uktaṃ sthiramānasa iti | raktopacārasya ca atra 
avaśyopayogitvameva dyotayitumuktaṃ manaḥsaṃkalparakto veti | evaṃ vāhyadravyābhāve'pi na 
nityādau kācit khaṇḍanetyapi anena āveditaṃ tatra yathāsaṃbhavaṃ pravṛtterbhāvāt, 
kāmyādāveva hi yathāsambhavaṃ na bhavediti bhāvaḥ | ayaṃ punaratra tātparyārtho yat 
sādhakasya yena kenacidātmani parānandacamatkāratāratamyamayatvāvirbhāvo bhavet, tadeva 
sarvātmanā dravyajātaṃ saṃbharaṇīyamiti | yadāhuḥ

yatkiñcinmānasāhlādi yacca saubhāgyavardhanam |
tenātmānamalaṅkṛtya devamabhyarcayetsadā ||
iti ||
      etaccakraṃ kutra kathaṃ kīdṛk ca kāryamityāha

     bhūpradeśe same śuddhe gomayenopalepite || 106 ||

puṣpaprakarasaṃkīrṇe dhūpāmodasugandhite |
sindūrarajasā devi kuṅkumenāthavā punaḥ || 107 ||
p. 57)
ālikhetprathamaṃ cakraṃ samarekhaṃ manoramam |
samatrikoṇaśaktyagraṃ saśrīkamatisundaram || 108 || *

      saśrīkatvameva prapañcitamatisundaramiti | tatra ca samarekhatvādiviśeṣaṇadvārako hetuḥ | 
iha tāvat sādhakasya tattadupāsyamantradevatātādātmyāvaṣṭambhabhāvanaṃ vinā na kiñcidapi 
pūjādi siddhyediti anantarameva uktaṃ tripurīkṛtavigrahaḥ iti || 108 ||
      tacca kathaṃ syādityāha

dhyātvā puratrayaṃ devi bījatrayasamanvitam |
sarvādyavidyayā devi karaśuddhiṃ tu kārayet || 109 ||

      puratrayaṃ guhyahṛdbhrūmadhyalakṣaṇaṃ natu vāṅmanaḥkāyarūpaṃ, bījatrayasamanvitaṃ 
dhyātvā tatra mūlavidyāsaṃbandhi bījatrayaṃ nyasyediti yāvat | yat vakṣyati

      nābhimaṇḍalahṛtpadmamukhamaṇḍalamadhyagā || (4 |51)
iti | asmatparamaguravo'pi

      guhye hṛdi bhruvormadhye nyasyenmūlākṣaratrayam |

iti | pāṭhakramādarthakramo balīyāniti samanantaravakṣyamāṇanyāsānantarametannyāsa iti guravaḥ 
| natu vācyamatra astra mantrasyaucityāt vighnavyudāsāya yāgaveśmani 
ūrdhvamadhyādhobhāgātmake puratraye bījatrayametat dhyāyediti || 109 ||
      evaṃ karaśuddhau kṛtāyāṃ tatkaraṇako mantrāntaranyāso nyāyya ityāha

p. 58)
tata ātmāsanaṃ dadyāccakrāsanamatheśvari |
sarvamantrāsanaṃ devi sādhyasiddhāsanaṃ tathā || 110 ||

      ātmāsanaṃ samākhyābalādeva ātmani āsanatvena vinyasya cakrāsanādīnāṃ 
guhyakandahṛdrūpasthānanaiyatye pramāṇābhāvāt sarvaśarīragatatvenaiva nyāso nyāyyastasya 
tattadāsanarūpatāyāmaucityāt | bahiḥ punareṣāmagradakṣetarapārśvaniścaye pramāṇābhāvāt 
samākhyābalopanataḥ sthānaniyamo'vaśyagrāhyo'nyathāhi apariniṣṭhitaṃ pūjanaṃ syāt | 
yaduktaṃ mayaiva

atha mantrāsanamantaścaturaśradvāramadhyamāśritya |
cakrāsanamādyoditaśaktyagragataṃ tryarasya madhye ca ||
sādhyāsanam - - - - - - - - - - - - - - - - - - - - - - - - - - - |
iti || 110 ||
      tathā

tato rakṣāṃ prakurvīta pūrvoktakulavidyayā |
ṣaḍaṅganyāsayogena namaskāraniyuktayā || 111 ||

      naca atra aṅgeṣu śāstrāntaroktavat jātyantaraprayogo'pi kārya iti uktaṃ 
namaskāraniyuktayeti | sarvaśeṣatvena punaretat vyākhyānamupekṣyameva 
kuladarśanatvānyathānupapattyā vainayikaprakriyā ucitā iha upapatteḥ || 111 ||
      tato'pi

     śikhālalāṭabhrūmadhyakaṇṭhahṛnnābhigocare |
     ādhāre'pyūhakaṃ yāvannyāsamaṣṭabhirācaret || 112 ||

      ūhakamityanena tadudrādhiṣṭhitaḥ pādo lakṣyate | aṣṭabhiriti
p. 59) vaśinyādibījairnatu cakraisteṣāṃ navasaṃkhyatvāt tattatparāmṛśyatvāyogāt | etāvataivaca 
asya siddhaḥ svātmani tripurībhāvaḥ iti |

vāgbhavaṃ dakṣiṇe netre kāmarājaṃ ca vāmataḥ |
lalāṭe śaktibījaṃ ca karṇayordakṣavāmayoḥ ||
vaktramadhye ca tānyeva bhujayorhṛdaye tataḥ |
jaṅghayornābhimadhye ca mantranyāsamiti kramāt ||
vidhāya cakravinyāsamapi cāstraṃ vidārayet |
muṇḍavyomani tatrādyaṃ vaindavaṃ cakranāyakam ||
tryaraṃ śikhāyāmaṣṭāraṃ bhāle bhrūmadhyadeśataḥ |
daśāraṃ taddvitīyaṃ ca kaṇṭhe tadanu vinyaset ||
caturdaśāraṃ hṛdaye nāmāvaṣṭadalaṃ tataḥ |
ādhāre ṣoḍaśadalaṃ dvāracakraṃ tu pādayoḥ ||
pāśāṅkuśau vāmadakṣakarayordhanuṣī bhruvoḥ |
nāsāyāṃ viśikhāṃśceti cakramapyāntarālikam ||

ityādi avāntaramanapekṣitamapi svotprekṣitaṃ na kiṃcidapekṣaṇīyamapekṣāyā eva abhāvāt | 
satyāṃ hi tasyāṃ śāstrāntarāt tāvadapekṣaṇīyaṃ yāvadapekṣāyā nivṛttiḥ syāt | tadabhāve 
punarnirnibandhanameva | śāstrāntaroktasyāpekṣaṇīyatve sarvasyaiva tatprasaṅgādanavasthitameva 
śāstrānatarānuṣṭhānaṃ syāt | yaduktaṃ

naca śāstrāntare kartuṃ yuktaṃ śāstrāntaraśrutam |
śāstrasyānyānapekṣatvātpuṃbuddhiprabhavaṃ hi tat ||
sāpekṣatve'pyapekṣaiva mānaṃ yāvadapekṣate |
tāvadevānyataḥ kāryaṃ nānyatsyādanavasthite ||

iti | tasmāt tattaddeśāntaravaragurūpapāditopadeśyatve'pi anupadeśyānprati pratipadaṃ kimucyate iti 
āstām || 112 ||

p. 60)
      evaṃ tripurīkṛtavigrahaḥ sādhakaḥ svātmapūjāpuraḥsaraṃ 
vahirmaṇḍalādāvasmatpūrvagurvādiṣṭadṛṣṭyā dvāreśadivyādyoghatrayabhinnagurvādipūjāṃ kṛtvā 
nikhilacakrasaparyāsaṃttyarthaṃ prathamaṃ tāvat prādhānyāt devyā eva āvāhanādi 
kuryādityāha

tataḥ padmanibhāṃ devīṃ bālārkakiraṇāruṇām |
japākusumasaṅkāśāṃ dāḍimīkusumopamām || 113 ||

padmarāgapratīkāśāṃ kuṅkumodakasaṃnibhām |
sphuranmukuṭamāṇikyakiṅkiṇījālamaṇḍitām || 114 ||

kālālikulasaṃkāśakuṭilālakapallavām |
pratyagrāruṇasaṃkāśavadanāmbhojamaṇḍalām || 115 ||

kiṃcidardhendukuṭilalalāṭamṛdupaṭṭikām |
pinākidhanurākārasubhruvaṃ parameśvarīm || 116 ||

ānandamuditollolalīlāndolitalocanām |
sphuranmayūkhasaṃghātavitatasvarṇakuṇḍalām || 117 ||

sugaṇḍamaṇḍalābhogajitendvamṛtamaṇḍalām |
viśvakarmādinirmāṇasūtrasuspaṣṭanāsikām || 118 ||

tāmravidrumabimbābharaktoṣṭhīmamṛtopamām |
smitamādhuryavijitamādhuryarasagocarām || 119 ||

anaupamyaguṇopetacibukoddeśaśobhitām |
kambugrīvāṃ viśālākṣīṃ mṛṇālalalitairbhujaiḥ || 120 ||
p. 61)
raktotpalasamākārasukumārakarāmbujām |
karāmbujanakhadyotavitānitanabhastalām || 121 ||

muktāhāralatopetasamunnatapayodharām |
trivalībalanāyuktamadhyadeśasuśobhitām || 122 ||

lāvaṇyasaridāvatākāranābhivibhūṣitām |
anargharatnaghaṭitakāñcīyuktanitambinīm || 123 ||

nitambabimbadviradaromarājyaparāṅkuśām |
kadalīlalitastambhasukumārorumīśvarīm || 124 ||

lāvaṇyakadalītulyajaṅghāyugalamaṇḍitām | *
namadbrahmaśiroratnanirghṛṣṭacaraṇāmbujām || 125 ||

śītāṃśuśatasaṃkāśakāntisantānahāsinīm |
lauhityajitasindūrajapādāḍimarāgiṇīm || 126 ||

raktavastraparīdhānāṃ pāśāṅkuśakarodyatām |
raktapadmaniviṣṭāṃ tu raktābharaṇamaṇḍitām || 127 ||

caturbhujāṃ trinetrāṃ tu pañcabāṇadhanurdharām |
karpūraśakalonmiśratāmbūlāpūritānanām || 128 || *

mahāmṛgamadoddāmakuṅkumāruṇavigrahām |
p. 62) sarvaśṛṅgāraveśāḍhyāṃ sarvālaṅkārabhūṣitām || 129 ||

jagadāhlādajananīṃ jagadrañjanakārikām |
jagadākarṣaṇakarīṃ jagatkāraṇarūpiṇīm || 130 ||

sarvamantramayīṃ devīṃ sarvasaubhāgyasundarīm |
sarvalakṣmīmayīṃ nityāṃ paramānandananditām || 131 ||

mahātripuramudrāṃ tu smṛtvāvāhanarūpayā |
vidyayāvāhya subhage namaskāraniyuktayā || 132 ||

pūrvoktayā sādhakendro mahātripurasundarīm |
cakramadhye tu saṃcintya - - - - - - - - - - - - - - |

      kṣaṇaṃ tatpara eva tiṣṭhediti śeṣaḥ | mādhuryeti rāmaṇīyakaṃ mādhuryarūpañca asau 
rasa iti | bhujairiti upalakṣitām | jagata āhlādakatvādeva anyatra jagadānandaśabdavācyasya parasya 
tattvasya abhivyañjikām | sarvasaubhāgyasundarīmiti sarvalakṣmīmayīmiti ca viśeṣaṇadvayena 
samastaviśeṣaṇārthaḥ saṃgṛhītaḥ | evaṃ mukhyadevyā eva dhyānavacanādanyāsāmapi īdṛgeva 
dhyānamiti arthasiddhaṃ tatsphārarūpatvādāsām | yat rasamahodadhiḥ

vācāmagocaraṃ devyāḥ sarvānandamayaṃ punaḥ |
ekavaktraṃ mahāraktaṃ raktapadmāsanasthitam ||
caturbhirāyudhairyuktaṃ pāśāṅkuśadhanuḥśaraiḥ |
devīkaraṇarūpaṃ tu śuddhe śaktigaṇaṃ smaret ||
dhyānaṃ na vidyate tāsāmato'rthādvaravarṇini |

iti | dhyānaṃ na vidyate iti ata uktāt dhyānādanyadityarthaḥ | natu eva mūlata eva p. 63) 
tannivedho vivakṣitaḥ sarvānandamayatvena vāgagocarāyā api mukhyadevyā dhyānasya saṃbhave 
tatsphārarūpāṇāmanyāsāṃ tadupapatteḥ | mahātripuramudrāmiti 
āvāhanavidyādiśabdasaṃnidhestrikhaṇḍām | yat vakṣyati

      trikhaṇḍaiṣā mahāmudrā tripurāhvānakarmaṇi || (3|4)

iti | namaskāraniyuktayeti āvāhanānaucityāt ||

     - - - - - - - - - - - - - - - - tataḥ pūjanamārabhet || 133 ||

      nanu amantrakā tāvat pūjā na syāt, uktāśca ete viniyuktāḥ tat katareṇa idānīṃ 
pūjanaṃ kriyate ityāha

śivāgnibindavo devi dinakṛdvahnibindavaḥ |
yugapatkramarūpeṇa yojanīyā maheśvari || 134 ||

māyārdhendusamāyuktaṃ bījayugmaṃ yadutthitam |
māyālakṣmīmayaṃ tena pūjyāstatrāṣṭa mātaraḥ || 135 || *

      śivoha, agnī ra, dinakṛt śa, vahnī ra, māyā ī, evaṃ hrīṃ śrīṃ ||
tāśca kāḥ kutra pūjyā ityāha

brahmaṇī paścimadvāre māheśvaryapi cottare |
p. 64) pūrve caiva tathendrāṇī kaumārī dakṣiṇe tathā || 136 ||

vaiṣṇavyapica vāyavye vārāhīmīśadiggatām |
cāmuṇḍāṃ devi cāgneye mahālakṣmīṃ tu nair-ṛte || 137 ||

prathamāntā pūjyeti saṃbandhanīyā, dvitīyāntāṃ pūjayediti |

tatra prakaṭayoginyaścakre trailokyamohane |
aṇimādyā mahādevi siddhayo'ṣṭau vyavasthitāḥ || (yo0 hṛ0 3 | 118)

ityādinā brāhmyādaya eva tatkāritvādaṇimāditvena vyapadiṣṭā iti na kaścidvirodhaḥ | āsāṃ 
cakreśvarītvena tatraiva 

      tatrādibhede tripurā - - - - - - - - - - - - - - - -  | (yo0 hṛ0 2|9)

iti śrītripurākhyāyā devyāḥ pūjitatvamuktaṃ, cakreśvaryāśca praticakraṃ pārśvadvaye

mudrā yā stripurāyāntu devi siddhyaṣṭakānvitāḥ |
tā eva sarvacakreṣu pūjākāle prapūjayet || (4 | 65)

itivakṣyamāṇadṛśā ekaikasiddhisahitāmekāmekāṃ mudra pūjayet | tadyathā iha saṃkṣobhiṇī 
mudrā aṇimā ca siddhiriti | etacca trayaṃ praticakramagra eva pūjyamiti guravaḥ || 137 ||
	evaṃ prathamaṃ trailokyamohanaṃ cakramabhidhāya dvitīyaṃ sarvāśāparipūraṇaṃ 
cakramapi āha

kāmākarṣaṇarūpā ca buddhyākarṣasvarūpiṇī |
ahaṅkārākarṣiṇī ca śabdākarṣasvarūpiṇī || 138 ||

p. 65) sparśākarṣaṇarūpā ca rūpākarṣaṇakāriṇī |
rasākarṣakarī devī gandhākarṣakarī tathā || 139 ||

cittākarṣaṇarūpā ca dhairyākarṣasvarūpiṇī |
smṛtyākarṣaṇarūpā ca nāmākarṣaṇakāriṇī || 140 ||

bījākarṣaṇarūpānyā ātmākarṣasvarūpiṇī |
amṛtasyākarṣaṇī ca śarīrākarṣaṇī parā || 141 ||
      evaṃ

ṣoḍaśāre mahādevi vāmamārgeṇa pūjayet |
māyālakṣmīkalābhistu kalāṣoḍaśakaṃ tvidam || 142 ||

      vāmamārgeṇeti sādhakasya, devyāstu dakṣiṇeneti arthasiddham | yadvakṣyati

vāmamārgakrameṇaiva paścimādeva dakṣiṇam |
gṛhītvā- - - - - - - - - - - - - - - - - - - - - - - - - - - - -  || (1 | 148)

iti | ekaḥ kalāśabdaḥ svaravācakaḥ, dvitīyastu śaktīnām |
cakreśvarī ca atra tripurīśvarīti uktā | yadāgamaḥ

tathaiva guptayoginyaḥ sarvāśāparipūraṇe |
kāmākarṣaṇarūpādyā devatāḥ parikīrtitāḥ ||
iti,
      - - - - - - - - - - - dvitīye tripurīśvarī |
iti ca || 142 ||
sarvasaṃkṣobhakārakākhyaṃ tṛtīyaṃ cakramapi āha

     anaṅgakusumāṃ pūrve dakṣiṇe'naṅgamaṅgalām |
p. 66) paścime'naṅgamathanāmuttare madanottarām || 143 ||

anaṅgalekhāmāgneye nair-ṛte'naṅgavāsinīm |
anaṅgāṅkuśāṃ vāyavya īśāne'naṅgamālinīm || 144 ||

      iha ādye cakre pūrvapaścimādikramasya anyanairapekṣyeṇa ukteḥ prājāpatya eva dikkramo 
grāhyaḥ,

      anaṅgakusumādyāśca dvāradevīvyavasthayā |

ityādi tu śrutiviruddhatvādupekṣyameva | cakreśvarī ca atra tripurasundarī | yaduktaṃ

guptaguptatarā devi sarvasaṃkṣobhakārake |
anaṅgakusumādyāśca cakre devyā vyavasthitāḥ ||
iti,
      - - - - - - - - - - - - - tṛtīye tripurasundarī |

iti ca || 144 ||

      sarvasaubhāgyakārakākhyaṃ caturthamapi āha

sarvasaṃkṣobhiṇī śaktiḥ sarvavidrāvaṇī tathā |
sarvākarṣakarī cānyā sarvāhlādakarī tathā || 145 ||

sarvasaṃmohanī śaktiḥ sarvastambhanarūpiṇī |
sarvajambhanarūpā tu sarvato vaśakāriṇī || 146 ||

sarvarañjanaśaktiśca sarvonmādasvarūpiṇī |
sarvārthasādhakī śaktiḥ sarvāśāparipūrakī || 147 ||

sarvamantramayī devī sarvadvandvakṣayaṅkarī |

p. 67)

      evaṃ

vāmāvartakrameṇaiva paścimādeva dakṣiṇam || 148 ||

gṛhītvā pūjayedetā devīstribhuvaneśvarīḥ |

      paścimāditi devyagrata ārabhyetyarthaḥ | gṛhītveti avadhitvena | cakreśvarī ca atra 
tripuravāsinī | taduktaṃ

saṃpradāyakramāyātāścakre saubhāgyakārake |
sarvasaṃkṣobhiṇīpūrvāḥ saṃsthitāḥ surasundarī ||
iti,

      - - - - - - - - - - - - - - - caturthe tripuravāsinī |

iti ca ||
sarvāthasādhakākhyaṃ pañcamamapi āha

sarvasiddhipradā śaktiḥ sarvasaṃpatpradā tathā || 149 ||

sarvapriyaṅkarī cāpi sarvamaṅgalakāriṇī |
sarvakāmapradā devī sarvaduḥkhavimocinī || 150 ||

sarvamṛtyupraśamanī sarvavighnavināśinī |
sarvāṅgasundarī devī sarvasaubhāgyakāriṇī || 151 ||

etāśca

tathaiva devadeveśi punarevādyavidyayā |
dvitīyāvaraṇe devi devīdaśakamarcayet || 152 ||

      ādyavidyayeti anantarameva uddhṛtayā māyālakṣmīlakṣaṇadvyakṣarātmikayetyarthaḥ | 
yaduktaṃ

nāsākrāntaṃ mahāprāṇaṃ daṇḍākāraṃ savindukam |
p. 68) tadvadguhyaṃ ca kurvīta vidyeyaṃ dvyakṣarā matā ||

iti | tathaiveti prathamadvitīyayorityarthaḥ | punarevetyanena tṛtīyacaturthayorapi asyā eva viniyoga iti 
uktaṃ tasyā eva upakrāntatvāt vidyāntarasya ca anuktatvāt | tryarṇavidyāpakṣe punaretat na 
kiṃcitsaṃgacchate tasyāḥ pūrvameva viniyuktatvādiha aprastāvāt | śrīsamahodadhāvapi

māyālakṣmīmaye bīja ādyacakrasya pūjane |
tatsaṃyuktaṃ dvitīyasya svaraṣoḍaśakaṃ pṛthak ||

ityādivācakāntarāvacanāt cakracatuṣṭayopalakṣaṇaparameveti na kaścit doṣaḥ | guravo'pi

      - - - - - - - - - - - - itthaṃ cakreṣu ṣaṭsvapi |
      cakreśivarjaṃ yoginyo māyāśrībījayojitāḥ ||

iti | naca atra

      ādyāṃ vidyāṃ cāhurvāgeśīṃ mātṛkām - - - - - - - - |

iti mātṛkārtho'pi vyākhyeyaḥ

vāmāvartavilomakramataścakratrayaṃ tayaiva punaḥ |
manudiksaṃkhyakalāvarṇaiścārcyaṃ kṣataḥ kāntaiḥ ||

iti, tathā

      vargāṣṭakapūrvākṣaravācakatāpyaṣṭakatritaye |

ityādeviṃbhāgasya aśrutatvāt dvitīyāvaraṇaṃ prati cakrāntaścaturdaśārāpekṣayā | cakreśvarī ca 
atra tripurā śrīḥ | yaduktaṃ

kulakaulikayoginyaḥ sarvasiddhipradāyake |
sarvasiddhipradādyāstu cakre sarvārthasādhake ||
iti |

      pañcame tripurā śrīśca - - - - - - - - - - - - - - - - |

iti || 152 ||

p. 69)

      sarvarakṣākarākhyaṃ ṣaṣṭhamapi āha

sarvajñā sarvaśaktiśca sarvaiśvaryapradāyinī |
sarvajñānamayī devī sarvavyādhivināśinī || 153 ||

sarvādhārasvarūpā tu sarvapāpaharī tathā |
sarvānandamayī devī sarvarakṣāsvarūpiṇī || 154 ||

punareva maheśāni sarvepsitaphalapradā |
daśamī devatā khyātāḥ svanāmasadṛśodayāḥ || 155 ||

evametā mahādevīrdevi sarvārthasiddhidāḥ |
pūrvoktena vidhānena tṛtīyāvaraṇe'rcayet || 156 ||

      svanāmasadṛśodayā iti sarvārthasiddhidā iti ca sarvaśeṣaḥ | pūrvokteneti 
dvyakṣaravidyāprayogavāmāvartādyātmanā | cakreśvarī ca atra tripuramālinī | yaduktaṃ

nigarbhadevatāścakre sarvarakṣākare pare |
sarvajñādyā mahādevi saṃsthitā vīravandite ||
iti,

      - - - - - - - - - - - ṣaṣṭhe tripuramālinī |

iti ca || 156 ||
      sarvarogaharākhyaṃ saptamamapi āha

ādyacakre maheśāni śṛṇu pūjāṃ yathākramam |
ekaikaṃ devatānāma pūrvoktaṃ bījasaṃyutam || 157 ||

adhastāddevadeveśi vāmamārgeṇa pūjayet |
p. 70) yāvaddakṣiṇamārgaṃ tu raktapuṣpairmaheśvari || 158 ||

      adhastādārabhya paścimādārabhyetyarthaḥ | raktapuṣpairiti sarva śeṣaḥ | cakreśvarī ca 
atra tripurā siddhiḥ | yaduktaṃ

rahasyadevatāścakre sarvarogahare priye |
vaśinyādyā mahādevyaḥ saṃsthitāḥ paramārthaḥ ||
iti,

      - - - - - - - - - - - - - - saptame tripurā siddhiḥ |

iti ca || 158 ||

      sarvasiddhimayākhyamaṣṭamamapi cakramāha

paścimottarapūrvādidakṣiṇānukrameṇa tu |
cakramadhye catuṣkaṃ tu krameṇa paripūjayet || 159 ||

cakramadhye iti arthāt mūlatrikoṇāt bahiḥ, tatraiva vāhyāntarālacatuṣṭayaṃ catasṛṣu dikṣu 
astītibhāvaḥ | pūrvādīti ādiśabdena api vāmāvarta eva upodvalitaḥ || 159 ||
      kiṃ catuṣkamityāha

kāmabāṇānmaheśāni dhanustatpāśameva ca |
jambhamohavaśastambhapadaiḥ sahitamaṅkuśam || 160 ||

      aṅkuśamiti kāmapadasaṃnidhestadīyameva jñeyam | etatsājātyādatra devyastrāṇāmapi 
pūjanaṃ syāt, na kevalamiti yāvat || 160 ||

sarvamadhyatrikoṇe'pi pūjayenmūlavidyayā |
kevalākṣarabhedena samastavyastayeśvari || 161 ||

kāmeśvarīmagrakoṇe vajreśīṃ dakṣiṇe tathā |
p. 71) vāme'pi bhagamālāṃ tu madhye tripurasundarīm || 162 ||

      kevalākṣarabhedeneti kevalamekaikamakṣaraṃ bhedayitvetyarthaḥ | tena mūlavidyāyā 
vyastatve'pi koṇatraye'pi kāmeśvaryāditrayamekena ekena puṇḍena vāmāvartenaiva, natu 
tadvarjanena, pūjayet | samastatve tu piṇḍatrayeṇa api aṣṭamacakreśvarīṃ tripurāmbikāṃ madhye iti 
tātparyārthaḥ | taduktaṃ

sarvasiddhimaye cakre paramātirahasyagāḥ |
sthitāḥ kāmeśvarīpūrvāścatasraḥ pīṭhadevatāḥ ||
iti,

      - - - - - - - - - - - - - - - - - -  aṣṭame tripurāmbikā |

iti ca | kevalapadalakṣitasya antyapiṇḍātmano'kṣarasya ādividyāvat vāgbhavādisvaratrayasaṃbhedena 
aṣṭamī vidyeti tu gurvāgamānupadiṣṭatvāt na nyāyyamiti uktaprāyam | tadevamaṣṭamanavamayorapi 
cakrayoḥ śrīdevīpañcaśatike sṛṣṭisaṃhāracakrayoriva ekaikavidyeti na kaścit virodhaḥ | evaṃ ca 
asyā aṣṭamyā vidyāyā aṣṭamanavamayoścakrayoścakreśvarīvācakatvābhidhānādavaśiṣṭasya api 
vidyāsaptakasya prathamacakrādārabhya cakrasaptake yathākramaṃ 
cakreśvarīvācakatvamarthasāmarthyato labhyate iti siddham | madhye tripurasundarīmityāvṛttyā api 
sarvānandamayākhye navamacakreśvarīṃ śrīmahātripurasundarīmiti aṣṭamacakrasyaiva madhye 
pūjayedityarthaḥ | anenaiva āśayena śrīrasamahodadhāvapi

      - - - - - - - - - - - - - - - - - - - - - prāntakramasamanvitām |

iti uktam | ata eva prāntakramapūjyatayā ambāṣṭakajuṣṭaṃ cakram ityādi api nirastam | evaṃ hi 
daśamamapi cakramuktaṃ bhavediti śrutivirodhaḥ syāt | taduktaṃ

p. 72)
navame tu meheśāni mahātripurasundarī |
mūlavidyā samākhyātā trailokyavaśakāriṇī ||
evaṃ navaprakārādyā pūjāmātreṇa pāvarti |
ekākārā hyādiśaktirajarāmarakāriṇī ||
iti,
sarvānandamaye cakre mahāpūrṇeśvarīśvarī |
saṃsthitādyā sarvamayī mahātripurasundarī ||
lokātītasvabhāvā tu prāntakramasamanvitā |
paramādvaitabhāvasthā mahāpūjāparā priye ||

iti ca | ye punarnavamaṃ cakraṃ muṇḍavyomani eva pūjanīyamiti āmananti, teṣāṃ cake nava 
cakrāṇi pūjitāni tāvat na syuriti prastutavastuvyāghātaḥ | cakrāntarāṇāṃ ca muṇḍavyomani 
pūjanaṃ kena niṣiddhamiti alaṃ khaṇḍitapāramparyalābhaduḥśikṣitaiḥ saha saṃlāpena || 162 ||
      iha tāvat

āvāhite mantrāgaṇe puṣpaiḥ sarvaniveditaiḥ |
dhūpaiśca tarpaṇaṃ kāryaṃ śraddhābhaktibaloditam ||

ityādyuktyā avaśyakāryaṃ tarpaṇamityāha

evaṃ pūjāvidhānaṃ tu kṛtvādau sādhakottamaḥ |
dhūpagandhādinaivedyatarpaṇāni nivedayet || 163 ||

      tato'pi

saṃkṣobhadrāvaṇākarṣāveśonmādamahāṅkuśāḥ |
khecarībījarūpādiyonimudrāstvanukramāt || 164 ||

p. 73) viracya sādhakendrastu dhyānaṃ kuryātsamāhitaḥ |

anukramādviracyeti praticakram, tena prathamacakre saṃkṣobhaṇī yāvadaṣṭamabījamudrā 
navamatvādiśabdasvīkṛtā trikhaṇḍamudrā yonimudrā ceti | atra ca mudrādvayaṃ cetyeva pūjyamiti 
guravaḥ | iha siddhayo'pi daśaiva

aṇimā laghimā caiva mahimā prāptireva ca |
prākāmyaṃ ca tatheśitvaṃ vaśitvaṃ ca tataḥ param ||
tathā kāmāvasāyitvamaṣṭamaṃ parikīrtitam |

ityuktā aṇimādyā aṣṭau siddhayo yathākramamaṣṭasu cakreṣu, navame tu 
rasasiddhirmokṣasiddhiśceti | iha mukhyayā vṛttyā hi bhuktimukti eva hi tāvatphalam | tatra 
vyastatayā aṇimādyā siddhayo'ṣṭabhiścakraiḥ sādhyante, samastatayā tu mukhye navamena 
cakreṇa yadapekṣayā rasasiddheḥ pūjyatayā abhidhānam | saivahi sarvasiddhinidhānabhūteti 
śrīrasasvacchandādau tatra tatra sarvatra uktam | yathā

piṇḍasiddhipradaścaiva sarvakāmaphalapradaḥ |
aṇimādyuditaṃ pūrvaṃ sarvaṃ saṃsādhayedayam ||

iti | śrīrasamahodadhāvapi rasasiddhisaṃpattinimittameva asyā bhagavattyāḥ 
śrīmahākāmeśvarotsaṅgagatatvena upadeśaḥ | yaduktaṃ tatra

śrutaṃ sarvamaśeṣeṇa vidhānaṃ rasanāyike |
durbhagānāṃ ca tannātha na siddhyati kadācana ||
ataḥ saubhāgyahetvarthaṃ narāṇāṃ hitakāmyayā |
mahākāmeśvarasyoktaṃ vidhānaṃ bhairava tvayā ||
p. 74) yasyotsaṅgagatā yā sā mahātripurasundarī |
tasyāḥ saṃsūcitaṃ kiṃcinmantradhyānādikaṃ tvayā ||
pṛthagārādhyate sā tu yathā bhāgyārthibhirnaraiḥ |
tathā kathaya me deva kṛpayā prāṇināṃ prabho ||

iti | bhuktiśca asmaddarśane muktyavyabhicāriṇīti sarvaśeṣatvena atraiva prādhānyāt mokṣasiddhirapi, 
yat

      aṇimādiṣu mokṣānteṣvaṅgeṣveva phalābhidhā |

ityādi pūrvairapi uktam | yat punaratra anyaiḥ prāptiyatrakāmāvasāyitve nivārya bhuktīcchāsiddhī 
parikalpya siddhyaṣṭakameva aṣṭamacakre bījamudrādimudrātrayamityādi uktaṃ, tat 
yuktyāgamabahiṣkṛtamiti upekṣyameva | samāhita iti 
paraniṣkalamantrasvarūpanibhālanaikatānānusaṃdhāna ityarthaḥ ||
      tadeva āha

binduṃ saṃkalpya vaktraṃ tu tadadhastātkucadvayam || 165 ||

tadadhaḥ saparārddhaṃ ca cintayettadadhomukham |

      binduṃ samarasitaśivaśaktyātmakavedanamātrarūpaṃ 
parādvayamayamavibhāgasvabhāvamavyapadeśyaṃ paraṃ tattvaṃ ṣaṭtriṃśattattvātmano viśvasya 
parāmarśātmakatvāt viśrāntidhāmatayā prādhānyāt ca vaktraṃ saṃkalpya tadrūpatayā 
anusandhāya, tadevaca svasvātantryādadhastāt bahirullilasiṣāyāṃ

naumyanuttaranāthasya raśmidvayamahaṃ sadā |
śivaśaktīti vikhyātaṃ - - - - - - - - - - - - - - - - - ||

itidṛśā śivaśaktidaśādhiśāvitayā svasvarūpaparāmarśanātmakakūjanāt kucadvayaprāyaṃ 
vibhāgadaśāmāpannaṃ sat

p. 75) prāk saṃvit prāṇe pariṇatā

itinītyā tato'pi bahīrūpatāyāṃ sasya paro hakārastasya ardhamanackakalā, tadātma 
sāmānyaprāṇarūpatābhāsapuraḥsaraṃ prāṇapramātrādibhūmikāmavalambamānaṃ, tato'pi 
adhomukhamāvṛttyā

      tata eva sakāre'sminsphuṭaṃ viśvaṃ prakāśate |

itinītyā sasya prameyātmano viśvasya paramardhaṃ pāryantikaṃ kālāgnyantaṃ dharādhirūḍhaṃ 
sthūlaṃ rūpaṃ prāptaṃ sat cintayet parāmṛśediti saṃvitkrameṇa arthaḥ | varṇakrameṇa api 
vinduṃ vaktraṃ tadrūpaṃ saṃkalpya parāmṛśya tadadhastādapi kucadvayaṃ tadākārau 
sūryācandrarūpau bindū ca, tadadho'pi sasya sakārasya repharūpamagnyātmakaṃ ca 
paramardhamityevaṃ savinduṃ turyasvaraṃ, āvṛttyā tadadho'pi sasya paro hakārastasya 
ardhamanackahakalā, tadadho'pi sasya paramardharepharūpaṃ trikoṇākāraṃ 
yoginīvaktrādiśabdavyapadeśyamadhomukhamityevaṃ niṣkalamantrātma māyābījaṃ 
cintayedanusaṃdadhyādityarthaḥ | iyacca asya niṣkalatvaṃ yadīkāreṇa śaktirūpatvāviśeṣādekāro, 
hakāreṇa mādanatvasājātyāt kakāro repheṇa ca ralayorekatvasmaraṇāt lakāraḥ saparārdhatvācca 
sakāraḥ saṃgṛhīta iti mūlavidyāyā eva idaṃ sakalakalopasaṃhārātmakaṃ piṇḍitaṃ 
sūkṣmarūpamiti | dhāmakramaśca etannāntarīyakatayā uktaprāya eveti alaṃ bahunā ||
      kimālambanaṃ ca evaṃdhyānamityāha

evaṃ kāmakalārūpamakṣaraṃ yatsamutthitam || 166 ||

kāmādiviṣamokṣāṇāmālayaṃ paramaṃ dhruvam |
p. 76) tadeva tattvapravaraṃ nijadehaṃ vicintayet || 167 ||

      evamuktena prakāreṇa tritattvarūpe'pi prādhānyāt kāmakalārūpamakṣaraṃ 
pravṛttāvaviratena rūpeṇa avabhāsamānam, ata eva dhruvaṃ niṣkalaṃ, niṣkalaikarūpatvācca 
paramam, ata eva kāmādiviṣamokṣāṇāmālayaṃ yat samyaganubhavaikamātratayā utthitamuditaṃ, 
tat nijadehameva tatpratikṛtirūpatayā tattvapravaraṃ viśeṣeṇa tadekākārātmatayā 
cintayedanusaṃdadhyādityarthaḥ | śarīra evahi sarveṣāṃ sākṣādevaṃ saṃniveśaḥ 
svānubhavasākṣika eveti alaṃ vistareṇa, ādiśabdaścātra 
dvitīyapaṭalādipratipādayiṣyamāṇakṣudrasiddhyādisaṃgrahaparatayā prakārārtha iti vṛthāṭitaṃ 
vāgagocaratadarthānveṣaṇe | guṇapradhānabhāvo hi sarvaṃsahatvā - - - - - sarvatra viśiṣṭa eva 
| yat punaratra anyairanyatra vā sākṣāt gurutastadarthasatattvamanavagamya 
śrītantrālokasaṃvādanaṃ tadarthaprakāśanaṃ vā kṛtaṃ, tat sarvaṃ pitṛpitāmahakramopanataṃ 
prakṛtaṃ spaṣṭaṃ mārgamapi ajānatāmaśrutāmapūrvāmadṛṣṭacarāṃ ca gahanagahanāṃ 
tatsaraṇiṃ tajjñān prati prakāśayatāṃ teṣāmeva mahatīmupahāsyatāmāvahati |
yat ta eva āhuḥ

yaḥ paṅgurvadhiraśca nāṅganabahirdvāraṃ dadarśāthavā
no śuśrāva kadāpi daiśikamukhātkaścitkutaścitkathām |
niḥśeṣādhvavide sa potavaṇije deśāntaraprakriyā-
vicchittīrupapādayatyayamaho hāsāvatāro navaḥ ||

iti | asmābhiretat gahanatvād bahuvaktavyatvāt granthavistarādhāyitvāt prakṛtānupayogāt ca vibhajya 
na darśitamiti na asūyitavyaṃ vidvadbhiḥ | nahi etatpradarśanaṃ nāma duḥśakaṃ kiṃciditi sarva 
eva sākṣiṇaḥ | tadasmadgurūpaśatadvivekādadhigantavyam, kimatiprasaṅgena || 167 ||
p. 77)	evamāsāditaparasvarūpāveśaḥ kiṃ kuryādityāha

dhyātvā cakreṇa sahitāṃ tatastripurasundarīm |
svamudrayā sādhakendraḥ kṣamasveti visarjayet || 168 ||

      svamudrayeti saṃhārarūpayeti śivam || 168 ||

iti rājānakaśrīmajjayarathaviracite śrīvāmakeśvarīmatavivaraṇe prathamaḥ paṭalaḥ || 1 ||



atha

dvitīyaḥ paṭalaḥ |

      evaṃ pūjanena kṛtena asya kiṃ syāditi pāṭalikaṃ saṃbandhamanubandhan bhagavānāha 
*

yatrānena vidhānena sādhakena prapūjyate |
deśe vā nagare grāme jagatkṣobhaḥ prajāyate || 1 ||

      nagare grāme vetyanena deśāvakḷptivacanena idamāveditaṃ
p. 78) yadanyanirapekṣameva etatpūjanaṃ sarvāḥ siddhīḥ karotīti | tena 
dvīpāmnāyopadeśādyapekṣaṇaṃ na vācyam, tatra hi deśaprādhānyenaiva jagatkṣobhādi 
citrakṣitamiti alaṃ bahunā || 1 ||
      ko nāma jagatkṣobha ityāha

jvalatkāmāgnisantāpapratāpottaptamānasāḥ |
pipīlikāsthinyāyena dūrādāyānti yoṣitaḥ || 2 ||

      yataḥ

mantrasaṃmūḍhahṛdayāḥ sphurajjaghanamaṇḍalāḥ |
taddarśanānmahādevi jāyante sarvayoṣitaḥ || 3 ||

      nanu kimetat pūjanamātrādeva syānnavetyāha

     japte lakṣaikamātre tu kṣubhyante bhūtale'ṅganāḥ |

      nanu etāvataiva cet na asau bahirmukhībhavati, tadā asya kiṃ syādityāha

     yadi na kṣubhyatītthaṃ hi sādhakasya mano manāk || 4 ||

     saṃkṣubhyanti tataḥ sarvāḥ pātāle nāgakanyakāḥ |

      saṃkṣubhyantīti arthāt dvitīyasminnapi lakṣe japte ||
      evamapi pūrvavadeva viśiṣṭasiddhyunmukhatve

     tāsāmapi yadā nāsau kṣobhaṃ yāti manāgapi || 5 ||

     tataḥ svarganivāsinyo vidravanti surāṅganāḥ |

      tṛtīye'pi lakṣe japte iti śeṣaḥ ||
tadeva upasaṃharati

evaṃ lakṣatrayaṃ japtvā vratasthaḥ sādhakottamaḥ || 6 ||
p. 79) saṃkṣobhayati deveśi trailokyaṃ sacarācaram |

      evaṃ māntraṃ prayogamuktvā yāntramapi āha

     likhitvā vipulaṃ cakraṃ tanmadhye pratimāṃ yadi || 7 ||

nāmnā likhati saṃyuktāṃ jvalantīṃ cintayettataḥ |
śatayojanamātrasthā tvadṛṣṭāpi ca yā bhavet || 8 ||

     bhayalajjāvinirmuktā sāpyāyāti vimohitā |

      vipulamiti sādhyapratimālikhane viśeṣaṇadvārako hetuḥ ||
      atraiva pakṣāntaramāha

     tanmadhyago'thavā bhūtvā mantraṃ saṃcintayedyadā || 9 ||

sarvamātmānamaruṇaṃ sādhyamapyaruṇīkṛtam |
tataḥ saṃjāyate devi sarvasaubhāgyasundaraḥ || 10 ||

     vallabhaḥ sarvalokasya sādhakaḥ parameśvari |

      tanmadhyaga iti likhanadvāreṇaiva, ata eva pūrva vipulamiti uktam | sarvamiti ātmānaṃ 
mantraṃ sādhyaṃ ca yadā aruṇaṃ saṃcintayediti anvayaḥ ||
      tṛtīyamapi pakṣamāha

     sarvaraktopacāraistu pūjyate mudrayā yutam || 11 ||

     yasya nāmnaiva saṃyuktaṃ sa bhaveddāsavadvaśī |

      mudrayeti vakṣyamāṇadṛśā yonirūpayā | nāmnaiveti, natu pratimādinā api ||
      caturthamapi āha

adṛṣṭāyāstu saṃyojyaṃ nāma cakrasya madhyagam || 12 ||

viracya yonimudrāṃ tu tāmākarṣayati kṣaṇāt |
yakṣiṇīṃ cātha gandharvīṃ kinnarīṃ vāsureśvarīm || 13 ||

siddhakanyāṃ nāgakanyāṃ devakanyāṃ ca khecarīm |
vidyādharīmapsarasamṛṣikanyāmathorvaśīm || 14 ||

madanodbhavavikṣobhajharañjaghanalambikām |

adṛṣṭāyā iti ākarṣayatīti ca pūrvasmāt viśeṣakam |
jharaditi draveṇetyarthaḥ ||
dhyānajapamukhena api āha

mahākāmakalādhyānātkṣobhayetsarvayoṣitaḥ || 15 ||

tathā

rocanākuṅkumābhyāṃ ca samabhāgaṃ ca candanam |
aṣṭottaraśataṃ japtvā tilakaṃ kārayedbudhaḥ || 16 ||

evaṃ kimityāha

tato yamīkṣate vakti saṃspṛśeccintayecca yam |
arthena ca śarīreṇa so'vaśyaṃ yāti dāsatām || 17 ||

anyacca

tathā puṣpaṃ phalaṃ gandhaṃ pānaṃ vastraṃ maheśvari |
śatamaṣṭottaraṃ japtvā yasyāḥ saṃpreryate striyāḥ || 18 ||

sadyaḥ ākarṣayetsādhvīṃ vimūḍhahṛdayāṃ satīm |

      tāmiti śeṣaḥ, satīṃ bhavantīmityarthaḥ ||

p. 81) yataḥ

haṭhākṛṣṭiriyaṃ bhadre na kvacitpratihanyate || 19 ||

prakārāntareṇa api yantrāṇi āha

likhedrocanayaikānte pratimāmavanītale |
surūpāṃ cāruśṛṅgāraveśābharaṇamaṇḍitām || 20 ||

tataḥ

tadbhālatalahṛnābhijanmamaṇḍalayojitām |
janmanāmamahāvidyāmaṅkuśena vidarbhitām || 21 ||

sarvāṅgasandhisaṃlīnamālikhya madanākṣaram |
tadāśābhimukho bhūtvā tripurīkṛtavigrahaḥ || 22 ||

baddhvā tu kṣobhiṇīṃ mudrāṃ vidyāmaṣṭottaraṃ japet |

      janmanāmasahitāṃ mahāvidyāmiti madhyapadalopī samāsaḥ | aṅkuśena 
vidarbhitāmālikhyeti nāmavidyayorantaraṃ sakṛdaṅkuśamantranyāsaḥ kārya ityarthaḥ | 
madanākṣaraṃ ceti śeṣaḥ ||
      naca kevala eva avanītale pratimāṃ likhedityāha

     niyojya dahanāgāre candrasūryakalālaye || 23 ||

      evamavanyāṃ saṣaṇṭhāṣaṇṭhasvarapaṅktidvayavalayitamūrdhvamukhaṃ tryaśramālikhya 
tadantaḥ pratimāṃ likhediti tātparyārthaḥ || 23 ||
      evaṃ kṛte sati kiṃ syādityāha

tato vihvalitāpāṅgāmanaṅgaśarapīḍitām |
procchalanmadakallolapracalajjaghanasthalām || 24 ||

p. 82)	śakticakrocchalacchaktivalanākavalīkṛtām |
dūrīkṛtasvacāritrabhayalajjānayāṅkuśām || 25 ||

ākṛṣṭahṛdayāṃ naṣṭadhairyāmuttīrṇajīvitām |
vapraprākāraniviḍanadīyantrasurakṣitām || 26 ||

navānurāgasandhānavepamānahṛdambujām |
manodhikamahāmantravegenāpahṛtāṃśukām || 27 ||

vimūḍhāmiva vikṣubdhāmivāpluṣṭāmiva srutām |
likhitāmiva niḥsaṃjñāmiva pramathitāmiva || 28 ||

dalitāmiva saṃbhrāntāmivottrāsamitāmiva |
galitāmiva saṃbhinnāmivākulitamānasām * || 29 ||

bhramanmantrānilodbhrāntapatrākārāṃ nabhastale |
bhramantīmānayennārīṃ yojanānāṃ śatādapi || 30 ||

rakṣāyantrāṇi api āha

athavā mātṛkāṃ sarvāṃ likhitvā cakrabāhyataḥ |
dhārayedbāhumūle yastvabadhyaḥ sarvajantuṣu || 31 ||
tathā
tathaiva hi maheśāni svasaṃjñākramayogataḥ |
p. 83)	candanāgurukarpūrairajarāmaratāṃ labhet || 32 ||

      tathaiveti pūrvoktasarvārthātideśaḥ, saṃjñāyogastu adhikah | candanādi tu pūrvatra api 
yojyam || 32 ||
      tathā

etadeva vidhānena rocanāgurukuṅkumaiḥ |
likhitaṃ cakrayogena yasmiṃstasminnapi sthitam || 33 ||

sādhyanāma svanāmnā tu cakrasyāntarvidarbhitam |
karoti sakalaṃ lokamacirātpādavartinam || 34 ||

      etadeveti cakram | cakrayogeneti mātṛkākṣarāṇām | yasmiṃstasminniti bāhumūlaśikhādau 
| cakrasya antastu sādhyanāma, tataḥ svaṃ nāma tacca ante sakṛnnyastayā vidyayā vidarbhitaṃ 
kāryamiti garbhavākyam || 34 ||
      tathā

madhyaṃ gatena bījena mahākāmakalātmanā |
ekamekamavaṣṭabhya sādhyanāmākṣaraṃ priye || 35 ||

bahirapyakhilaireva veṣṭayenmātṛkākṣaraiḥ |

      ekamekaṃ sādhyanāmākṣaraṃ veṣṭayediti anvayaḥ  | madhyagatenetyanena cakrāntareva 
etat kāryamiti kaṭākṣitam, anyathā bahirapīti asaṅgataṃ syāt | avaṣṭabhyeti

abhidheyārṇakaikaṃ tu yantravarṇapuṭīkṛtam |
grathitaṃ mantribhirjñeyaṃ - - - - - - - - - - - - - - ||
ityuktyā saṃgrathyetyarthaḥ ||
tataḥ

     hemamadhyagatāṃ kṛtvā dhārayedvāmake bhuje || 36 ||

rakṣāmiti śeṣaḥ || 36 ||
na kevalamatraiva, yāvat

     śikhāyāmathavā vastre dhārayedyatra tatra vā |

evamiyaṃ rakṣā

karoti dāsabhūtaṃ hi trailokyaṃ sacarācaram || 37 ||

saṃmohayati rājānaṃ vājinaṃ duṣṭakuñjaram |
cauraṃ kesariṇaṃ sapraṃ paramantramahāgraham || 38 ||

śatruṃ vajrāśaniṃ śastraṃ ḍākinīṃ śākinīṃ tathā |
bhūtapretapiśācāṃśca dhāritā cakrarūpiṇī || 39 ||

purādikṣobhakamapi yantramāha

tena cakreṇa sandarbhya purāṇāṃ nāma sundari |
madhye catuṣpathe vāpi caturdikṣu nidhāpayet || 40 ||

teneti pūrvoktenaiva antarbahīrūpatvādinā | saṃdarbhyeti na punaḥ saṃgrathya | madhye iti arthāt 
purāṇām, evamanyatrāpi | nidhāpayediti yantram || 40 ||
evaṃ kiṃ syādityāha

mahāhallohelo devi tato lokasya jāyate |
yoṣitāṃ ca viśeṣeṇa tvadṛṣṭānāmapīśvari || 41 ||
tathā
etanmadhyagatāṃ pṛthvīṃ saśailavanakānanām |
p. 85)	catuḥsamudraparyantāṃ jvalantīṃ cāpi cintayet || 42 ||

pṛthvīmiti arthāt pūrvavat nāmalekhanapūrvameva || 42 ||
      tataḥ

     ṣaṇmāsadhyānayogena jāyate madanopamaḥ |

tataḥ kimityāha
     
     dṛṣṭyaivākarṣayellokaṃ dṛṣṭyaiva kurute vaśam || 43 ||

dṛṣṭyā kṣobhayate nārīṃ dṛṣṭyā saṃharate viṣam * |
dṛṣṭyā karoti cāveśaṃ dṛṣṭyā sarvavimohanam || 44 ||

dṛṣṭyā cāturthikādīṃśca nāśayedacirājjvarān |

asyaiva kālanaiyatyena api phalāntaramapi āha

etatprapūjitaṃ rātrau sindūreṇa vicitritam || 45 ||

karoti mahadākarṣaṃ sudūrādapi yoṣitām |

etaditi jvalanmadhyagatayathoktapṛthvīkaṃ cakram ||
      diṅnaiyatyena āha

     sarvadikṣu vidikṣvevaṃ yathā devī prapūjyate || 46 ||

     diganukramayogena tadā sarvaṃ jagadvaśe |

evamiti rātrisindūritatvādikrameṇa | diganukrameti tattatpūrvādidiganusāreṇetyarthaḥ ||
purādikṣobhaṇe yantrāntaramāha

p. 86)
bhūrjapatre samālikhya rocanāgurukuṅkumaiḥ || 47 ||

saṃdarbhayettasya madhye nagaraṃ vāthavā param |
vipulaṃ deśamathavā viṣayaṃ maṇḍalaṃ ca vā || 48 ||

svanāmadarbhitaṃ kṛtvā - - - - - - - - - - - - - - - - - - |

samālikhyeti cakraṃ, tasya cakrasya madhye nagarādināma svanāmadarbhitaṃ vidyayā 
saṃdarbhayediti tātparyārthaḥ || 48 ||
      evaṃ kṛte

- - - - - - - - - - - - - - - - - - yadi bhūmau nidhāpayet |
dhārayedathavā haste kaṇṭhe vā bhujamūlataḥ || 49 ||

     śikhāyāmathavā vastre yatra tatra sthitaṃ ca vā |
tadā
     cakrametanmahābhāge purakṣobhaṇamuttamamam || 50 ||

rakṣāntaramapi āha

arkakṣīraṃ kuṅkumaṃ ca dhattūrakarasaṃ tathā |
rocanālaktakaṃ lākṣārasaṃ mṛgamadotkaṭam || 51 ||

ekīkṛtya cakrametallikhyate yasya saṃjñayā |
tasya coragrahavyādhiripusiṃhāhivājinām || 52 ||

yakṣarākṣasabhūtaughaśākinīduṣṭacetasām |
lūtādigardabhajvālā tathā śītalikodbhavam || 53 ||

bhayaṃ na vidyate - - - - - - - - - - |
p. 87) tathā
     - - - - - - tasya paramantrābhicārakam |
     nityasaṃdhāraṇāccāpi kālamṛtyuyamādayaḥ || 54 ||

     na śaktā hiṃsituṃ samyagromaikamapi sarvadā |

prakārāntareṇa api yantraprayogamāha

     athavā madhyagāṃ devīṃ trikoṇobhayagāṃ tathā || 55 ||

adhastānnāmasaṃyuktāṃ rocanākuṅkumāṅkitām |
kuryādyastu ca saptāhāddāsavatkiṅkaro bhavet || 56 ||

trikoṇobhayagāmiti ṣaḍaśragatāṃ, tatra api madhyagatāṃ, natu avāntarakoṇagatām || 56 ||
      tathā

pītadravyeṇa vālikhya dhārayedindradiggatām |
nāmnā sarvajñabhūto'pi mūko bhavati tatkṣaṇām || 57 ||

dhārayediti ṣaḍaśramadhyagāṃ devīmarthāt yasya nāmnā adhaḥ saṃyuktāṃ, bhavatīti saḥ || 57 
||
      tathā

mahānīlarasenāpi nāma saṃyojya pūrvavat |
dakṣiṇābhimukho vahnau dagdhvā taṃ mārayetkṣaṇāt || 58 ||

nāmeti yasya, dagdhveti arthāt yantram || 58 ||
tathā

mahiṣāśvapurīṣābhyāṃ gomūtreṇa samaṅkitam |
p. 88)	kṣiptvāranālamadhyasthaṃ vidviṣṭaḥ sarvajantuṣu || 59 ||

      gomūtrāloḍitena mahiṣāśvapurīṣeṇa pūrvavat yannāmnā likhitaṃ cakramāranālamadhye 
kṣipyate, sa sarvavidviṣṭaḥ syāditi vākyārthaḥ || 59 ||
      tathā

yuktvā rocanayā nāma kākapakṣasya madhyagam |
lambamānaṃ tadākāśe uccāṭanakaraṃ param || 60 ||

yuktveti ṣaḍaśramadhyasthadevyadhastāt | nāmeti yasya madhyagamiti kṛtvā, uccāṭanakaraṃ tasya || 
60 ||
      tathā

dugdhalākṣārocanādimahānīlarasādibhiḥ |
likhitvā dhārayeddevi cāturvarṇyaṃ vaśaṃ nayet || 61 ||

dugdheti | likhitveti arthāt pūrvoktabhaṅgyaiva | cakraṃ dhārayediti bhujādau | vaśaṃ nayet 
dugdhalikhitena brāhmaṇān yāvanmahānīlarasalikhitena śūdrāniti || 61 ||
      tathā

etadeva vidhānena jalamadhye yadā kṣipet |
saubhāgyamatulaṃ tasya snānapānānna saṃśayaḥ || 62 ||

      etaditi yathoktaṃ cakram | vidhāneneti dugdhalekhanātmanā | tasyeti cāturvarṇyasya | 
snānapānāditi madhyakṣiptacakrajalasya || 62 ||
      tathā
p. 89)

etanmadhyagatāṃ devi nagarīṃ vā varāṅganām |
saptāhātkṣobhayetsatyaṃ jvalamānāṃ vicintya tām || 63 ||

      idānīṃ pūjāviśeṣānāha

mahāpātakayuktātmā yadi devi prapūjayet |
śamīdūrvāṅkurāśvatthapallavairathavārkajaiḥ || 64 ||

māsena hanti kaluṣaṃ saptajanmakṛtaṃ naraḥ |

      pūjayediti arthādetat cakram ||
      tathā

     likhitvā pītavarṇaṃ tu cakrametadyadārcayet || 65 ||

     pūrvāśābhimukho bhūtvā stambhayetsarvavādinaḥ |

      tathā

     sindūrareṇulikhitaṃ pūjayeduttarāmukhaḥ || 66 ||

     yadā tadāsya vaśago loko bhavati sarvadā |

      tathā

     cakraṃ gairikamālikhya pūjayetpaścimāmukhaḥ || 67 ||

      evaṃ kiṃ syādityāha

     sa ca sarvāṅganākarṣavaśyakṣobhakaro bhavet |

      tathā

     dakṣiṇābhimukho bhūtvā kṛṣṇavarṇaṃ yadārcayet || 68 ||

     yasya nāmnā tasya nityaṃ mantrahānistu jāyate |

p. 90)	tathā

     tadvaddigantarāleṣu pūjitaṃ parameśvari || 69 ||

stambhavidveṣaṇavyādhiśatrūccāṭanakārakam |

      tadvadityanena pītādivarṇavāmāvartādi yadiṣṭaṃ, tena īśakoṇe pītavarṇaḥ, phalaṃ 
stambho yāvadāgneye kṛṣṇo varṇaḥ, phalaṃ ca śatrūccāṭanamiti ||
      āśrayabhedādapi asya phalabheda ityāha

rocanālikhitaṃ devi dugdhamadhye vaśaṅkaram || 70 ||

kṣiptaṃ gomūtramadhye vā śatrūccāṭanakārakam |
takramadhyagataṃ cakraṃ vidveṣaṇakaraṃ param || 71 ||

jvalajjvalanamadhyasthaṃ sarvaśatruvināśanam |

deśakālādivaiśiṣṭyena api pūjāviśeṣānāha

athavā devadeveśi yadekānte catuṣpatham || 72 ||

tatsamīpe likheccakraṃ sindūreṇa mahāprabham |
sarvabāhyata ārabhya yāvanmadhyaṃ maheśvari || 73 ||

akārādikṣakārāntāṃ mātṛkāṃ tatra vinyaset |

evaṃvidhaṃ tat cakraṃ

pūjayedrātrisamaye kulācārakrameṇa yaḥ || 74 ||

tatkṣaṇāt maheśāni sādhakaḥ khecaro bhavet |

      kulācārakrameṇeti parādvayabhāvanayeti arthaḥ | nahi sādhakasya svātmani 
parasaṃvidadvaitamayamantradevataikātmyāvaṣṭambhamantareṇa kiñcidapi siddhyatīti, ata eva 
sarvamaśeṣatvena etadiha uktam | yat punaratra anyairyadyatkarma hi vāhyaṃ tattat jñānaṃ vinā 
āntaraṃ na bhavediti
p. 91) āntaralakṣāśritameva bahiḥ phalati karma kṛtamiti pratijñāyāmasthāne bahu 
āntaratāyāmabhiniviśya atra sindūralikhitacakre madhumāṃsādyaiḥ kulocitadravyaiḥ 
kulamantrasaṃtatiyutaiḥ pūjā kāryā iha devīnāmiti vyākhyātaṃ, tat pratijñātārthaviruddhatve'pi 
aprayojakaṃ yat pūjayedityanenaiva gatārtham | asmaddarśane hi etadupakaraṇakameva pūjanaṃ, 
ayamarthaśca āntaralakṣāśrayaṇe'pi vitāyamāna ityetadvismaraṇaṃ na nyāyyamiti āstām ||
      tathā

pūjayitvā mahādevi tadvadekataro girau || 75 ||

ajarāmaratāṃ samyaglabhate nātra saṃśayaḥ |

tadvaditi pūrvoktasarvātideśaḥ ||
tathā

mahābhūtadine vāpi śmaśāne yadi pūjayet || 76 ||

pūrvavanniśi deveśi sādhakaḥ sthiramānasaḥ |
pādukākhaḍgavetālasiddhakravyamanaḥśilā || 77 ||

añjanaṃ vivaraṃ caiva ceṭakaṃ yakṣiṇīṃ tathā |
yatkiṃcitsiddhinicayaṃ vidyate bhuvanatraye || 78 ||

tatsarvameva sahasā sādhayetsādhakottamaḥ |
p. 92)

      sahaseti acireṇa, tatsaṃpattau ko nāma vaicitryātiśaya iti śivam ||

iti rājānakaśrīmajjayarathaviracite śrīvāmakeśvarīmatavivaraṇe dvitīyaḥ paṭalaḥ || 2 ||


atha

tṛtīyaḥ paṭalaḥ


      viracya yonimudrāṃ tu - - - - - - - - - - - - - - - - - | (2|13)
ityādau kathaṃ tadviracanaṃ syāditi pāṭalikaṃ saṃbandhamanubadhnanti śrīdevyuvāca kimityāha

bhagavaṃstripurāmudrāḥ sūcitā na prakāśitāḥ |
kathaṃ viracanaṃ tāsāṃ kriyate vada śaṅkaraḥ || 1 ||

      devyā evamāśaṅkāṃ nirācikīrṣuḥ śrībhairava uvāca kimityākāṅkṣāyāṃ

śṛṇu devi pravakṣyāmi mudrāḥ sarvārthasiddhidāḥ |
yābhirviracitābhistu saṃmukhā tripurā bhavet || 2 ||

tatra
      saṃkṣobhadrāvaṇākarṣa - - - - - - - - - - - - - - - - - | (1 | 164)
ityatra sākṣādanuddiṣṭāmapi
      mahātripuramudrāṃ tu smṛtvāvāhanavidyayā | (1 | 132)
iti āsūtritāmāvāhanasya pūrvabhāvitvādagranirvarttyāṃ trikhaṇḍāmudrāmeva tāvat 
prathamamāha

p. 93)	parivartya karau spaṣṭāvaṅguṣṭhau kārayetsamau |
anāmāntargate kṛtvā tarjanyau kuṭilākṛtī || 3 ||

     kaniṣṭhike niyuñjīta nijasthāne maheśvari |
     trikhaṇḍaiṣā mahāmudrā tripurāhvānakarmaṇi || 4 ||

      parivartya karāviti añjalibandhasaṃniviṣṭau kṛtvetiyāvat | svastikabandhāvasthite anāme 
antargate yayoriti samāsaḥ | niyuñjīteti arthāt same | evaṃ madhyamayorapi avikṛtayoreva 
nijāvasthānamarthasiddham || 4 ||

      idānīṃ saṃkṣobhaṇādyā nava krameṇa lakṣayati

madhyamāmadhyage kṛtvā kaniṣṭhe'ṅguṣṭharodhite |
tarjanyau daṇḍavatkṛtvā madhyamoparyanāmikā || 5 ||

eṣā tu prathamā mudrā sarvasaṃkṣobhakāriṇī |

      kaniṣṭhe anāmike ca arthāt svastikākāre | aṅguṣṭheti arthāt daṇḍākārābhyām ||

etasyā eva mudrāyā madhyame sarale yadā || 6 ||

kriyete parameśāni sarvavidrāviṇī smṛtā |

      sarale iti pūrve kuṭile iti āsātām, anyathāhi kaniṣṭhāgarbhīkāraḥ kathaṃ syāt | anyastu 
prācya eva saṃniveśa iti siddham ||

madhyamātarjanībhyāṃ tu kaniṣṭhānāmike same || 7 ||

aṅkuśākārarūpābhyāṃ madhyage parameśvari |
iyamākarṣiṇī mudrā trailokyākarṣakāriṇī || 8 ||

p. 94)

      same iti prāgvat svastikākāratvena | madhyaga iti arthātkṛtvā || 8 ||

     sphuṭākārau karau kṛtvā tarjanyāvaṅkuśākṛtī |
     parivartakrameṇaiva madhyage tadadhogate || 9 ||

     krameṇa devi tenaiva kaniṣṭhānāmikādayaḥ |
     saṃyojya niviḍāḥ sarvā aṅguṣṭhāvagradeśataḥ || 10 ||

     mudreyaṃ parameśāni sarvāveśakarī smṛtā |

      kṛtveti anyatra api yojanīyam | parivartakrameṇeti svastikākāratvenetyarthaḥ | tenaiva 
krameṇeti svastikākārādhogatatvādilakṣaṇenetyarthaḥ | ādiśabdaḥ prakāre aṅguṣṭhāviti arthāt 
pūrvavadeva spaṣṭau ||

     saṃmukhau tu karau kṛtvā madhyamāmadhyage'nuje || 11 ||

     anāmike tu sarale tadbahistarjanīdvayam |
     daṇḍākārau tatrāṅguṣṭhau madhyamā nakhadeśagā || 12 ||

     mudraiṣonmādinī nāmnā kledinī sarvayoṣitām |

      kṛtvā anyatra api sarvatra saṃbandhanīyam | madhyamāmadhyage ityatra madhyaśabdo 
madhyamavalakṣya yena anayoraṣiddhakatvena aṅguṣṭhayoretannakhadeśatvaṃ saṃgataṃ syāt | anuje 
kaniṣṭhe | tarjanīdvayamiti arthātsaralameva ||

     asyāstvanāmikāyugmamadhaḥ kṛtvāṅkuśākṛti || 13 ||

     tarjanyāvapi tenaiva krameṇa viniyojayet |
     iyaṃ mahāṅkuśā vidyā sarvakāmārthasādhakī || 14 ||

p. 95)

      adha iti adhomukhaṃ, pūrvaṃ hi saralākṛtitvādūrdhvamukhamāsīt | ata eva 
aṅkuśākṛtitvamasya uktam, tenaiva krameṇeti adhomukhāṅkuśākṛtitvātmanā, evaṃ ṣaṣṇāmapi 
aṅgulīnāmaṅkuśākṛtitvaṃ syāt || 14 ||

savyaṃ dakṣiṇadeśaṃ tu dakṣiṇaṃ savyadeśataḥ |
bāhuṃ kṛtvā mahādevi hastau saṃparivartya ca || 15 ||

     kaniṣṭhānāmike devi yuktvā tena krameṇa tu |
     tarjanībhyāṃ samākrānte sarvordhvamapi madhyame || 16 ||

aṅguṣṭhau tu maheśāni kārayetsaralāvapi |
iyaṃ sā khecarī nāmnā mudrā sarvottamā priye || 17 ||

      savyamiti vāmamākṛtikriyāpekṣayā hastau saṃparivartyeti yojyam | anyathā evaṃbandhaḥ 
sukaro na syāt | hastāviti arthātpṛṣṭhato vimiśritāṅgulīkau | saṃparivartyeti 
svastikākāratayetyarthaḥ | tena krameṇeti svastikākāralakṣaṇeneti yāvat | sarvordhvamapītyatra 
yuktveti saṃbandhanīyam | saralāvapīti apiśabdena tarjanīmadhyamayorapi saralatvamākṣiptam || 17 ||

      sarvottamatvameva asyā darśayati

     racitaiva mahādevi sarvatejopahāriṇī |
     baddhayaivaitayā devi dṛśyate sādhakottamaḥ || 18 ||

     sarvayoginivṛndaistu jvalatpāvakasannibhaḥ |

kiṃ ca

     śākinīḍākinīvṛndai rākiṇīlākinīgaṇaiḥ || 19 ||

p. 96) 	kākinīhākinībhistu dhyāteyaṃ parameśvari |

ata eva

     etayā jñātayā devi yoginīnāṃ bhavetpriyaḥ || 20 ||

      ataśca śākinyādīnāṃ sarvātmanā etaddhyātṛtvāt mayā sarvāsāṃ yoginīnāṃ 
samayaparipāṭī iyaṃ dattā yadevaṃjānānasya api sādhakasya priyatvaṃ kāryamiti || 20 ||
      
tadāha

     ataḥ samayamudreyaṃ sarvāsāṃ parikīrtitā |

      śrītantrarājoktasamayamudrāsamānakaṭyatvaṃ punarasyā durupapādam | iyaṃ hi 
cāśapañcāśatsiddhiḥ ! tatra api anvayādi bahiṣkṛtatve ca ! astītyalaṃ bahunā ||
	nanu evaṃmāhātmyavattvādasyāḥ kiṃ bandhe kaścit niyamo'sti na vetyāha

     prayato'prayato vāpi śucau deśe'thavāśucau || 21 ||

utthito vopaviṣṭo vā caṅkramanniścalo'thavā |
ucchiṣṭo vā śucirbhūtvā bhuñjāno maithune rataḥ || 22 ||

      badhnīyāditi śeṣaḥ || 22 ||
      
      asyā eva prakārāntaramapi āha

     mudrāyā madhyamāṅgulyau parivartya krameṇa tu |
     pārthivaṃ sthānakaṃ yuktvā sadyaḥ khecaratāṃ vrajet || 23 ||

      krameṇa parivartyeti kaniṣṭhānāmāvadeva svastikākāratayā avasthāpyetyarthaḥ | 
pārthivaṃ sthānakamiti | yaduktaṃ

dviguṇaṃ pātitaṃ vāmaṃ pādaṃ dakṣiṇamūrdhvataḥ |

p. 97) kṛtvānyonyatalasthaṃ tu vīralakṣaṇamāsanam ||

iti | vīraśca pārthiva eva ucyate iti āśayaḥ | prāṇagamāgamanikānāmamātramapi ajānānāḥ 
pārthivaṃ sthānakaṃ mattagandhakena vyācakṣāṇāḥ sthūladṛśo'pi asthūladṛśo yavayaṃ 
kāyikasaṃniveśopadeśamātrapravaṇa eva prastāvaḥ | vīryānusandhānaṃ tu sarvāsāmeva 
samānamiti atraiva kimevamabhidhānena tacca mahātmanāṃ keṣāṃcideva cetasi sthitamiti kiṃ 
vāgāḍambaraviḍambanayā tattatsaṃniveśaviśeṣavattvena ca raudryādiśaktirūpatvamapi āsāṃ na 
nyāyyamiti prāgeva uktaprāyam | śrīrasamahodadhau punaḥ

ubhau tu saṃniruddhau tu prāṇāpānau vyavasthitau |
tatra madhye paraṃ tattvaṃ bhāvābhāvapadodbhavam ||
tatra madhye citaṃ kuryānmudraiṣā khecarī parā |
anyāstu karabandhena sarvaśāstreṣu saṃsthitāḥ ||

ityādinā tattacchāstrāntaroditamāhātmyā sarvamudrāprāṇitabhūtā anyaiva khecarī mudrā ukteti 
asthāne vūyā kliṣṭamanyairiti alaṃ bahunā || 23 ||

parivartya karau spaṣṭāvardhacandrākṛtī priye |
tarjanyaṅguṣṭhayugalaṃ yugapadbhāvayettataḥ || 24 ||

adhaḥkaniṣṭhāvaṣṭabdhe madhyame viniyojayet |
tathaiva kuṭile yojya sarvādhastādanāmike || 25 ||

bījamudreyamacirātsarvasiddhipravartakī |

kaniṣṭhāmadhyamayośca svastikābandho'rthasiddhaḥ | sarvādhastāditi sarvasya 
tarjanyādiyugmacatuṣṭayasya apītyarthaḥ | ata eva anayorantarnimagnaprāyameva avasthānam ||

madhyame kuṭile kṛtvā tarjanyuparisaṃsthite || 26 ||

anāmikāmadhyagate tathaivahi kaniṣṭhike |
sarvā ekatra saṃyojyā aṅguṣṭhaparipīḍitāḥ 27 ||

eṣā tu prathamā mudrā yonimudreti saṃsmṛtā |

      kuliṭe iti arthādīṣat | tarjanyorapi arthasiddhamīṣatkuṭilatvam, anyathāhi madhyamayoḥ 
kathametaduparivartitvaṃ syāt | anāmiketi adhomukhakuṭilayoḥ | kaniṣṭhike iti arthāt 
svastikabandhāvasthite | ekatreti niviḍatayetyarthaḥ | prathameti pradhānā ||
      kaśca āsāṃ prayogāvasara ityāha

     etā mudrā maheśāni tripurāyā mayoditāḥ || 28 ||

     pūjākāle prayoktavyā yathānukramayogataḥ |

yathānukrameti āhvānapūjanavisarjaneṣvityarthaḥ | yathā uktaṃ
mudrāṃ pradarśayetpaścāt tridhā traikālyakarmaṇi |
iti śivam ||

iti śrīmadrājānakajayarathaviracite śrīvāmakeśvarīmatavivaraṇe tṛtīyaḥ paṭalaḥ || 3 ||


atha

caturthaḥ paṭalaḥ |

parasaṃvidadvaitajñānāplāvanamantareṇa pūjājapamudrādi na kiñcit syāditi pāṭalikaṃ 
saṃbandhamāgūrayantī śrīdevyuvāca kimityāha

bhagavansarvamākhyātaṃ mudrāṇāṃ jñānamuttamam |
vadedānīṃ mahādevyā ekaikākṣarasādhanam || 1 ||

mahājñānaprabhāvaṃ ca vyāptiṃ sthānodbhavaṃ layam |
sthūlasūkṣmavibhāgena śarīre parameśvara || 2 ||

      jñānamiti viracanaṃ jñānapūrvakatvāt tasya | sthānodbhavaṃ layamiti 
sṛṣṭisthitisaṃhāralakṣaṇam, athavā kutaḥ sthānādudeti kutra ca līnā bhavatītyarthaḥ || 2 ||
      etadeva ca pratisamādhitsuḥ śrībhairava uvāca | tatra yathoddiṣṭānāṃ kramamapahāya 
prādhānyāt prathamaṃ tāvat jñānasya svarūpaṃ nirūpayitumupakramate

     śṛṇu devi mahājñānaṃ sarvajñānottaraṃ param |
     yenānuṣṭhitamātreṇa bhavābdhau na nimajjati || 3 ||

      paraṃ pūrṇamata eva mahadanuttaraṃ samarasitaśaktiśaktimadubhayaṃ yat jñānaṃ 
sarveṣāṃ śivaśaktinarātmanāṃ jñānānāmābhāsānāmavabhāsakatvāduttamaṃ, tadīdṛk 
praśnakauśalātiśayaśālitvena 

p. 100) dyotamāne śṛṇu sāvadhānamavadhāraya yatparāmarśamātrāt sarvasya viśeṣeṇa 
sakalo'yamakhyātyātmā mohaḥ śāmyet || 3 ||

      tadeva āha

     tripurā paramā śaktirādyā jātāditaḥ priye |
     sthūlasūkṣmavibhāgena trailokyotpattimātṛkā || 4 ||

     kavalīkṛtaniḥśeṣatattvagrāmasvarūpiṇī |

      ādita iti uktagatyā ādisiddhāt cidānandaikaghanāt paramaśivāt tatsamavetatvādeva 
paramā sakalaśaktinikurumbakāvibhāgasvabhāvā ata eva niyatavyapadeśāsahiṣṇutvādanākhyā 
sahajasiddhatvādeva ca ādyā ata eva upādhyantarānullāsāt kavalitasakalatattvakalanāvabhāsā 
parāhaṃcamatkāramayī vimarśātmakā ekā api tattadavabhāsasahasrollāsanasāmarthyasatattvā 
śaktiḥ svamahimnaiva bahirullilasiṣayā paradaśāyāmicchājñānakriyātmanā, sūkṣmadaśāyāṃ 
vāmājyeṣṭhāraudrīlakṣaṇena, sthūladaśāyāṃ brahmaviṣṇvīśarūpeṇa vibhāgena trayāṇāṃ 
purāṇāmuktagatyā sṛṣṭisthitisaṃhārāpūrakāṇāṃ sthānānāṃ bhāvādanugatārthatayā tripurā 
trailokyasya atibhavābhavabhavātmakasya utpattāvavabhāsane mātṛkā jananī, atha ca 
ambikāśabdavyapadeśyā jātā tathātvena sphuritetyarthaḥ ||
	nanu ekaṃ śāntaṃ paraṃ brahmaiva asti, prapañcaśca avidyājanita iti kimevaṃvidhayā 
anayā abhyupetayetyāśaṅkya āha

     tasyāṃ pariṇatāyāṃ tu na kaścitpara iṣyate || 5 ||

      turhyarthe | tasyāṃ hi śaktāveva vidyamānāyāṃ paraḥ pālanapūraṇātmatvena 

p. 101) abhimato na kaścidiṣyate, paraṃ brahma api evaṃ na sidhyedityarthaḥ | iha śuddhaḥ 
prakāśa eva tattvamiti nāsti vimatiḥ, sa ca savimarśa eva nyāyyaḥ | anyathāhi 
tattadarthāvabhāsakatve'pi aphaṭikāderjaḍādasya bhedo na syāt | yadāhuḥ

      svabhāvamavabhāsasya vimarśaṃ viduranyathā |
      prakāśo'rthoparakto'pi sphaṭikādijaḍopamaḥ || (ī0 pra0 1|5|11)

iti | sa ca na asya svarūpātiśayaḥ kaścit, apitu prakāśamānatāyāmanapekṣitaparopayogaṃ 
svaprakāśaṃ svameva rūpam | tadevaca vāhyamarthaṃ vāsanāmavidyāṃ vā upekṣya 
tattadābhāsasahasrollāsanasāmarthyaṃ nāma svātantryamiti uktaṃ yena sarvamidaṃ siddhyet | 
avidyāderhi bhede ekaṃ brahmeti hīyeta, abhede ca brāhmaiveti sarvaṃ 
vyāhanyetetyevaṃvidhasvātantryamātrarūpaṃ brahmaiva sarvamiti || 5 ||
	
      śaktimantareṇa nāsti kācit gatirityāha

     paro hi śaktirahitaḥ śaktaḥ kartuṃ na kiṃcana |

tasmādavaśyeṣṭavyā śaktirityāha

     śaktastu parameśāni śaktyā yukto yadā bhavet || 6 ||

tadeti adhyādvāryam | bhavediti paraḥ prakāśaḥ || 6 ||

kiṃca

     śaktyā vinā śive sūkṣme nāma dhāma na vidyate |

      sūkṣme iti svaprakāśatvādavedye ityarthaḥ | svaprakāśo hi paraḥ śreyorūpaḥ prakāśaḥ 
| svaprakāśatvādeva kadācidapi paraprakāśyatāmāsādayituṃ na utsahate iti asya 

p. 102) nāma savikalpakaṃ dhāma nirvikalpakaṃ ca jñānaṃ na vidyate pramātrekarūpatvāt na 
etatprameyatāṃ yāyādityarthaḥ | ajñeyatve ca asya upadeśyatvabhāvanādyayogātkṛtam ātmā 
jñātavyo mantavyo nididhyāsitavyaśca ityādiśāstrāḍambareṇeti tūṣṇīmeva āsitavyaṃ śāktaṃ 
rūpaṃ vā abhyupagantavyaṃ yadayaṃ vastutaḥ paramātrekarūpo'pi svasvātantryādeva 
tādrūpyādaparicyutameva nijaṃ rūpamupadeśyatvādisiddhaye prameyatāmāpādayati yena 
laukikālaukikaḥ sarvo'yaṃ vyavahāraḥ sidhyet | yadāhuḥ

svātantryāttu nijaṃ rūpaṃ boddhṛrūpādavicyutam |
upadeśatadāveśaparamārthatvasiddhaye ||
bodhyatāmānayandevaḥ sphuṭameva vibhāvyate | (taṃ0 12|11)

iti ||
	evaṃ jñeyatāmāpanne'pi tasmin parasmin prakāśe śaktireva sarvārthakriyākāriṇītyāha

     jñātenāpi maheśāni karma śarma na kiñcana || 7 ||

      paraṃ prakāśamapekṣya hi tadatiriktaṃ na kiñcidapi prakāśeteti sarvaṃ prakāśa eveti 
tasyāṃ daśāyāṃ kiṃ nāma sādhakasya śarmāvahaṃ karma syāditi śaktidaśānupraveśa eva 
yatanīyaṃ yena sarvajñatādinikhilasiddhyudayaḥ syāt | yadāhuḥ

ādyāyāṃ tu tuṭau sarvaṃ sarvataḥ pūrṇamekatām |
gataṃ kiṃ tatra vedyaṃ vā kāryaṃ vā vyapadeśabhāk ||
ato bhedasamullāsakalāṃ prāthamikīṃ budhāḥ |
cinvanti pratibhāṃ devīṃ sarvajñatvādisiddhaye || (taṃ0 10|210)

iti || 7 ||

p. 103) ata eva na atra dhyeyatā api yujyata ityāha

     dhyānāvaṣṭambhakāle tu na ratirna matiḥ sthitiḥ |

      dhyānaṃ hi pratiniyatadhyeyaviṣayaniṣṭhamaikātmyaṃ, tacca abhedapradhānam | bhinne hi 
vastuni jano rajyate, tatraivaca asya sthairyāt tadviṣayaṃ yathāyathaṃ prakṛṣṭaṃ jñānaṃ jāyate | 
naca atra etat bhavitumarhati paripūrṇaprakāśaikaghanatvāt dhyātṛdhyeyabhāvaghaṭanāditi 
parāhaṃparāmarśacamatkāramayī śaktireva asmaddarśane viśrāntidhāmatayā eṣṭavyā yaiva 
spandasphurattāsārormihṛdayasadbhāvasaṃkarṣiṇītripurādiśabdaistatra tatra sarvatra uddhodhyate ||
	evamiyameva sā parapramātraikātmyena vartamānā vācyavācakātmano nikhilasya viśvasya 
sṛṣṭisthitisaṃhārādyavabhāsiketyāha

praviśya paramārgāntaḥ sūkṣmākārasvarūpiṇī || 8 ||

kavalīkṛtaniḥśeṣabījādyāṅkuratāṃ gatā |
vāmā śikhā tato jyeṣṭhā śṛṅgāṭākāratāṃ gatā || 9 ||

raudrī tu parameśāni jagadgrasanarūpiṇī |

      paramārgāntaranupraveśādeva parapramātrekarūpatvāt sūkṣmākārasvarūpiṇī avedyā 
tatsamavetatvādevaca ādyā svasvarūpa eva avasthānādya svātmasātkṛtaniḥśeṣakāraṇaprapañcā 
api sā parā śaktiḥ svasvātantryamāhātmyāt bahirullilasiṣurviśvaprasaronmukhatayā aṅkuratāṃ 
gatā kuṇḍalinīrūpatāmādadhānā kavalitaṃ sakalaṃ jagat vamantī vāmā, tadanu 
uttiṣṭhāpayiṣayā 

p. 104) śikhā kālāgniparyantanikhilādhvadaṇḍarūpaspaṣṭarekhākāratāmadhitiṣṭhantī jyeṣṭhā 
punūrapi udveṣṭanakrameṇa jagatsaṃjihīrpuricchādiśaktivaya-
sāmarasyātmakaśṛṅgāṭākāratāmudbhāvayantī raudrī cetyucyate iti 
svātmabhittyullikhitasṛṣṭisthitisaṃhāraṃ 
dhāmatrayamaśeṣavarṇānuprāṇakamādivarṇamatrabhāsayantītyarthaḥ | yaduktaṃ

ūrdhve tu saṃsthitā sṛṣṭiḥ paramānandanandinī |
pīyuṣavṛṣṭiṃ varṣantī vaindavī paramā kalā ||
adhaḥ saṃhārakṛjjñeyo mahānagniḥ kṛtāntakaḥ |
ghorajvālāvalīyuktāṃ durdharṣo jyotiṣāṃ nidhiḥ ||
tayormadhye paraṃ teja ubhayānandasundaram |
avatāraḥ sa vijñeya ubhābhyāṃ vyāpakaḥ śivaḥ ||
parasparaṃ samāviṣṭau candre'gniṣṭīṭibhe śaśī |
candraḥ sṛṣṭi vijānīyādagniḥ saṃhāra ucyate ||
avatāro raviḥ prokto madhyasthaḥ parameśvari |

iti ||

	na kevalamevaṃ vācakātmakameva viśvamavabhāsayati yāvat vācyātmakamapītyāha

     evaṃ sā paramā śaktirekaiva parameśvarī || 10 ||

     tripurā trividhā devī brahmaviṣṇvīśarūpiṇī |
     jñānaśaktiḥ kriyāśaktiricchāśaktyātmikā priye || 11 ||

     trailokyaṃ saṃsṛjati - - - - - - - - - - - - - - - |

      trividheti sṛṣṭisthitisaṃhārādyātmiketyarthaḥ | etadevaca brahmaviṣṇvīśarūpiṇītyādinā 
upodbalitam, evamapi anākhyātparamasvarūpādaparicyutaiveti 

p. 105) uktaṃ parameti eketi parameśvarīti daivīti | trailokyamiti bhavābhavādirūpam | saṃsṛjatīti 
darpaṇanagaranyāyena svasvarūpādaparicyutamapi atiriktāyamānatayā ayabhāsayatīrtyathaḥ |
	
      ata evaca asyā anugatārthamiha abhidhānamityāha

     - - - - - - asmāt tripurā parikīrtitā |

      asmāditi trayāṇāṃ purāṇāṃ saṃsarjanāt, tena trīṇi purāṇi saṃsṛjatīti 
tripuretyuktetyarthaḥ natu tisṛṇāṇ śaktivyāpinīsamanānāṃ purā pūrvabhāvinīti vyākhyeyaṃ 
pūraṇaguṇasuhitārthasadavyayatavyasamānādhikaraṇena (2 | 2 | 11) iti avyayānāṃ 
ṣaṣṭhītatpuruṣaniṣedhāt | tatrāpi purāśabdasya deśakālamātrābhidhāyitva eva nipātanāt 
dravyavācitvāsaṃbhavāt tadaparāmarśa eveti alaṃ bālālāpaparyālocanena ||
      
	evamantarapi asyā layodayāvabhidhātumāha

yadollasati śṛṅgāṭapīṭhātkuṭilarūpiṇī || 12 ||

śivārkamaṇḍalaṃ bhittvā drāvayantīndumaṇḍalam |
tadudbhavāmṛtasyandamadirānandananditā || 13 ||

kulayoṣitkulaṃ tyaktvā paraṃ puruṣameti sā |
nirlakṣaṇaṃ nirguṇaṃ ca kularūpavivarjitam || 14 ||

      yadā khalu iyameva prāṇadaśādhiśāyinī kulapadamavalambamānā parā śaktiḥ 
śṛṅgāṭapīṭhāt prasarākarādiśabdavyapadeśyāt janmādhārāt kuṭilarūpiṇī anackahakalākārā 
api 

p. 106) śivapadaprāptikāritvāt śivamarkamaṇḍalaṃ prāṇaṃ bhitvā indumaṇḍalamapānamapi 
drāvayantī svarasapravṛttaṃ dakṣavāmalakṣaṇaṃ vāhadvayaṃ ghaṭṭayitvā tadghaṭṭanādeva 
udbhūtena madhyavāhasatatasulabhena amṛtasyandaprāyeṇa madirānandena nanditā satī 
udānavāhakramamātrasya daṇḍāhatabhujaganyāyena spaṣṭākāratayā ullasati ūrdhvaṃ prasarati, 
tadā kulaṃ śarīramapahāya akulapadāvasthitaṃ paraṃ pūrṇam, ata eva 
nirlakṣaṇamasādhāraṇaniyata-rūpopagrāhakadharmabahiṣkṛtatvādaniyatākāram, ata eva kulena 
śarīreṇa taddharmeṇa rūpeṇa ca vivarjitaṃ nirāvaraṇasvabhāvam, ata eva nirguṇam puruṣaṃ 
paraṃ pramātārameti tadaikātmyamāsādayatītyarthaḥ || 14 ||

	naca atraiva asyā viśrāntirityāha

tataḥ svacchandarūpā tu paribhramya jagatpunaḥ |
tena cāreṇa saṃtuṣṭā punarekākinī satī || 15 ||

ramate - - - - - - - - - - - - - - - - - - - - - - - - - - - - - |

      punarapi tataḥ parākāśarūpādakulapadāt svacchandarūpā parānapekṣaṃ svarasata eva 
sṛṣṭikrameṇa samullasantī kulalakṣaṇaṃ jagadākramya tena sṛṣṭyātmanā cāreṇa 
kulabhūmikānubhavasamudbhūtaṃ santoṣaṃ bhajamānā api punaḥ svācchandyādeva 
urdhvacārātmanā saṃhārakrameṇa kulabhuvamapahāya alakugaganamavagāhamānā ekākinī 
viśvottīrṇaṃ rūpamādadānā satī ramate tatraiva paramaśivena saha sāmarasyamāsādayet
      
	akulaṃ tu kule tyaktvā kulaṃ cākulagocare |

itidṛśā pratikṣaṇamājavañjavībhāvena sṛṣṭisaṃhārakramāvalambanena

p. 107) layodayamayatayaiva prasphurantī na kasyacidapi pratiniyatena rūpeṇa vyaktatāmetītyarthaḥ | 
athaca atra veśyāvṛttānto'pi kaṭākṣīkṛtaḥ iti upamālaṅkāradhvaniḥ | sāpi paryante 
kṣīṇaveśyāvṛttā ekākinī satī tapasvinīprāyā api pracchannaṃ ramate iti | kulayopidapi evaṃvidheti 
virodho'pi dhvanita iti āstāṃ, kimanena aprākaraṇikena ||
	evamiyaṃ kāraṇaprabhṛtibhirapi anupalabdhaniyatasvarūpā svasvātantryādeva bahirullasantī 
niyatena rūpeṇa vyaktatāmāpannā sarvopasevyatāmāsādayatītyāha

- - - - - - - - - -  seyamavyaktā tripurā vyaktimāgatā |
tattvatrayavinirdiṣṭā varṇaśaktitrayātmikā || 16 ||

      seyaṃ parāśaktirevamavyaktā api tattvavarṇaśaktitrayātmanā vyaktimāgatā satī 
asmaddarśanopāsyā śrītripuretyucyate iti vākyārthaḥ || 16 ||
      
      etadeva vibhajya darśayati

vāgīśvarī jñānaśaktirvāgbhavā mokṣarūpiṇī |
kāmarājā kāmakalā kāmarūpā kriyātmikā || 17 ||

śaktibījā parā śaktiricchaiva viṣarūpiṇī |

      mokṣakāmaviṣāṇāṃ tattvānāṃ trayaṃ vāgbhavakāmarājaśaktibījānāṃ varṇānāṃ 
jñānakriyecchānāṃ śaktīnāṃ ca vāgbhavādibījānuguṇyenaivaca atra jñānaśaktyādīnāṃ 
viśeṣaṇatrayamupāttaṃ vāgīśvarīti kāmakaleti parā śaktiriti ca ||
	evamāyātikrameṇa iyaṃ parijñātā paraṃ puruṣārthaṃ sādhayatītyāha

p. 108) evaṃ devī tryakṣarā tu mahātripurasundarī || 18 ||

     pāramparyeṇa vijñātā bhavabandhavimocinī |

na kevalamevaṃ yāvat tāstāḥ siddhīrapi āviṣkarotītyāha

saṃsmṛtā pāpaharaṇī japtā mṛtyuvināśinī || 19 ||

pūjitā duḥkhadāridryavyādhidaurbhāgyaghātakī |
hutā vighnaughaśamanī dhyātā sarvārthasādhakī || 20 ||

      anena ca asyā mahāprabhāvatvamuktam || 20 ||
      
      evamekapraghaṭṭenaiva praśnapañcakaṃ samādhāya avaśiṣṭaṃ ṣaṣṭhamapi 
pratisamādhātumupakramate

     etasyāḥ śṛṇu deveśi bījatritayasādhanam |

      tadeva āha

dhavalāmbarasaṃvīto dhavalāmbaramadhyagaḥ || 21 ||

pūjayeddhavalaiḥ puṣpairbrahmacaryarato naraḥ |
dhavalaireva naivedyairdadhikṣīraudanādibhiḥ || 22 ||

      etadbhāve

     saṃkalpadhavalairvāpi  - - - - - - - - - - - - - - - - - - - - |

      tatrāpi pakṣāntaramāha

      - - - - - - - - - - - - - - - - - - yathākāmaṃ yathā labhet |

      yathecchaṃ yathālābhaṃ vetyarthaḥ ||
      
      evaṃ

     saṃpūjya parameśāni dhyāyedvāgīśvarīṃ parām || 23 ||

p. 109)	bījarūpāmullasantīṃ cidānandaprabodhinīm |
     brahmagranthiṃ vinirbhidya jihvāgre dīparūpiṇīm || 24 ||

      evaṃ pūjānantaraṃ sādhakaḥ
      
meḍhrasyādhaḥ kulo jñeyo madhye tu viṣasaṃjñakaḥ |
mūle tu śāktaḥ kathito bodhanādapravartakaḥ ||
agnisaṃjñastataśca - - - - - - - - - - - - - - - - - - - - - - - - |

ityatra meḍhraśabdoktānaṅgapadoddhāraṃ kāmarājaparyāyaṃ janmādhāramūlādapi 
agnisaṃjñasya adho'rthāt kulasya ūrdhvaṃ nirdeśe

      vahnerviṣasya madhye tu brahmagranthirudāhṛtaḥ |
      sarvārthaśāstravettā ca kavirbhavati tadbhataḥ ||

ityuktyā vahniviṣādhāradvayamadhyavartinaṃ janmādhāramūlāvasthitaṃ brahmagranthiṃ 
śāktamādhāraviśeṣaṃ viśeṣeṇa sāvaṣṭambhaṃ niḥśeṣeṇa natu kiṃcittvena bhittvā ullasantīṃ 
parāṃ madhyaśaktiṃ tattvādeva cidānandaprabodhinīṃ bodhanādapravartikāṃ bījarūpāṃ 
vāgīśvarīṃ

	vāgīśvarī jñānaśaktirvāgbhave bījarūpiṇī |

ityuktyā jñānaśaktisphārasāroccaradvāgbhavāvibhinnasvarūpāṃ jihvāgre dīparūpiṇīṃ tadvat 
jvalantīṃ dhyāyet tadekatānatayā anusandadhyādityarthaḥ | ito'naṅgapadāvadhi iti tu apapāṭhaḥ | 
brahmagranthivibhedanenaivahi etadartho'dhigataḥ, ata eva hṛdbhuvi bodhagranthiṃ nādātmacitā 
vibhedya ūrdhva ityādyapi na sādhūktam ||
	evamasya kiṃ syādityāha

     cintayennaṣṭahṛdayo grāmyo mūrkho'tipātakī |
p. 110) śaṭho'pi yaḥ pādamekaṃ suspaṣṭaṃ vaktumakṣamaḥ || 25 ||

     jaḍo mūko'pi durmedhā gataprajño'pi naṣṭadhīḥ |
     so'pi saṃjāyate vāgmī vācaspatirivāparaḥ || 26 ||

      evaṃvidho'pi yaścintayet, so'pi vāgmī jāyate iti anvayaḥ | mūka iti hṛtavāgindriyaḥ | 
durmedhāḥ pāpabuddhiḥ | gataprajño mūlādeva asañjātapratibhaḥ | naṣṭadhīḥ saṃjātatve'pi 
kuhakaprayogādinā vināśitaprajñaḥ || 26 ||
      aparavācaspatitvameva ācaṣṭe

satpaṇḍitaghaṭāṭopajetā'pratihataprabhaḥ |
ṣaṭtarkapadavākyārthaśabdālaṅkārasāravit || 27 ||

vātorddhūtasamudrormimālātulyairupanyaset |

      tulyairiti arthāt vākprapañcaiḥ ||
      
      tathā

     sukumāratarasphārarītyalaṅkārapūrvakaiḥ || 28 ||

     padagumphairmahākāvyakartā deveśi jāyate |

      kiṃca

     vedavedāntasiddhāntavedāṅgajñānapāragaḥ || 29 ||

jyotiḥśāstretihāsādimīmāṃsāsmṛtivākyavit |
purāṇarasavādādigāruḍānekamantravit || 30 ||

pātālaśāstravijñānabhūtatantrārthatattvavit |
vicitracitrakarmādiśilpānekavicakṣaṇaḥ || 31 ||

p. 111) mahāvyākaraṇodāraśabdasaṃskṛtasarvagīḥ |
     sarvabhāpārutajñānasamastalipikarmavit || 32 ||

nānāśastrārthaśilpādivedavedāṅgaviśrutaḥ |
sarvavāṅmayavettā ca sarvajño devi jāyate * || 33 ||

sarvajño jāyate ityatra vedapāragatvādi sarvaṃ hetuḥ ||

evaṃ vāgbhavamupasaṃhṛtya kāmarājamavatārayati

yadā kāmakalārūpā madanāṅkurāgocare |
taruṇāruṇabimbārkakiraṇābhā maheśvari || 34 ||

sphuraddīpaśikhākārā bindudhārāpravarṣiṇī |
samastabhuvanābhogakavalīkṛtajīvitā || 35 ||

mahāsvamahimākrāntidhvastāhaṅkṛtibhūmikā |
krameṇa ca tato'naṅgaparyantātprollasantyapi || 36 ||

śarīrānaṅgaparyantamekaikamubhayātmikā |
tato bhavati deveśi sarvaśṛṅgāramāninām || 37 ||

rāgiṇāṃ sādhako devi bādhako madanādhikaḥ |

      iha khalu yena kenacit yadā madhyaśaktireva vijādhārāt prathamaspandatayā ullasantī 
kāmakalārūpā
      
	sa śirorahitaḥ kāmaḥ kāminīhṛdayālayaḥ |

ityuktasvarūpānackahakalātmikā navoditāruṇavat vimbaphalavat 

p. 112) daptidīpaśikhāvacca sphuradaruṇākārā anavaratamārtavadhārāsāraṃ varṣantī yatra kutracit 
dūradeśādau svamahimākrāntyaiva vivaśīkṛtanikhilasādhyajīvitāhaṅkārā yasyāḥ kasyāścana 
sādhyāyā yoṣito madane tadudayahetubhūtāyāṃ yonau yastadantarvatīṃ kuṭilākāraḥ

tatraiva saṃsthitaṃ dhyāyedvindurūpaṃ manobhavam |
pratyagrāruṇasaṃkāśaṃ kiraṇānekasaṃkulam ||
tasyopari śikhā sūkṣmā kāmaśaktirmahaujasī ||

ityādyuktyā binduśikhātmā ghaṇṭikāprāyo'ṅkuraḥ, tasya agragocare 
kecitkālamanāgatāvekṣaṇatantrayuktyā

	cintitā yoṣitāṃ yonau - - - - - - - - - - - - - - - | (4|42)

iti uttaravākyamapekṣya cintitā kramātkramaṃ sādhyasādhakayorekaikaṃ parasparasya prāṇaśaktyoḥ 
samarasitatvena melanādubhayātmikā tato'pi anaṅgasya madanasya paryantādaṅkurāgrāt 
sādhyaśarīra eva anaṅgasya akulagaganasya paryantaṃ dvādaśāntaṃ yāvat prakarṣeṇa

	japaḥ prāṇasamaḥ kāryaḥ - - - - - - - - - - - - - - - -  |

iti nītyā kāmarājoccārāvibhinnasvarūpatayā ullasantī paunaḥpunyena cintitā, tata evaṃcintanāt 
hetoranyeṣāṃ rāgiṇāmabhiṣvaṅgamātramudvahatāmata eva śṛṅgāramānitāṃ natu 
sākṣācchṛṅgāriṇāṃ vayamapi evaṃvidhā eva kiṃ na bhavāmaḥ ityādidaurmanasyajananāt 
bādhakaḥ sa sādhako madanādhiko bhavatīti samudāyārthaḥ ||

yataḥ

     taddṛṣṭipathagā nārī surī vā yadivāsurī || 38 ||

p. 112) vidyādharī kinnarī vā yakṣanāgāṅganāthavā |
     pracaṇḍatarabhūpālakanyakāḥ siddhakanyakāḥ || 39 ||

jvalanmaṇḍaladuṣprekṣyamadanottaptamānasāḥ |
klinnāḥ pracalitāṅgyastu vimūḍhā madavihvalāḥ || 40 ||

niveditātmasarvasvā jāyante vaśagāḥ priye |

      atraiva pakṣāntaramāha

calajjalendusadṛśī bālārkakiraṇāruṇā || 41 ||

cintitā yoṣitāṃ yonau saṃkṣobhayati tatkṣaṇāt |

      cintiteti arthāt kāmakalārūpā madhyaśaktiḥ | calajjalendusādṛśye'pi 
vālārkakiraṇāruṇatvaṃ viśeṣaḥ, tasya hi śaityaṃ svābhāviko guṇaḥ ||
      
tathā

saiva sindūravarṇābhā hṛdaye cintitā satī || 42 ||

saṃmohonmādanāveśacittākarṣakarī smṛtā |

      saiveti yathoktarūpā madhyaśaktiḥ, hṛdaye iti arthāt yoṣitām ||

     niyojitāthavā mūrdhni varṣantī raktabindavaḥ || 43 ||

     dhāraṇāsaṃprayogeṇa karoti vivaśaṃ jagat |

      raktabindūniti vācye raktabindava iti aiśaḥ pāṭhaḥ | dhāraṇāsaṃprayogeṇeti

p. 114)	sa śirorahitaḥ kāmaḥ kāminīhṛdayālayaḥ |
      netrārūḍhena tenāthā śaktidṛṣṭiṃ samāharet ||

ityādyuktayuktyā cakṣurādīndriyapraṇālikayā parapurapraveśādyātmanetyarthaḥ ||
	atraiva rahasyatvāt gūḍhārthatayā prayogāntaramapi vaktuṃ pratijānīte

     athānyaṃ saṃpravakṣyāmi prayogaṃ bhuvi durlabham || 44 ||

     yena vijñātamātreṇa sādhako madanāyate |

      durlabhamiti evamadhigantumaśakyamityarthaḥ |
      tadeva āha

kāmasthaṃ kāmamadhyasthaṃ kāmodarapuṭīkṛtam || 45 ||

kāmena sādhayetkāmaṃ kāmaṃ kāmeṣu nikṣipet |
kāmena kāmitaṃ kṛtvā kāmasthaḥ kṣobhayejjagat || 46 ||

      iha khalu kāmena prāthamikaśāktaparispandasamullāsaprabubhutsayā kāmasthaḥ kāme 
tadudayasthāne janmādhāre tiṣṭhaṃstatraiva vigalitavedyāntaratayā baddhānusandhānaḥ sādhakaḥ 
kāmamadhyasthaṃ kāmasya yonermadhye
      
      - - - - - - - - - - - - - - - madanāṅkuragocare | (2 | 34)
      
iti aṅkuraśabdena ukte kākacañcupuṭākāre sparśaliṅge sthitamabhivyajyamānaṃ kāmaṃ ca

	sa śirorahitaḥ kāmaḥ - - - - - - - - - - - - - |

ityādyukteranackahakalātmakaṃ madhyaprāṇaśaktirūpaṃ kāmena kāmarājabījena 

p. 115) kāmitaṃ taduccārāvibhinnasvarūpatayā kāntaṃ, kāmodarapuṭīkṛtaṃ kasya śirasaḥ

	kalā saptadaśī yā sā amṛtākārarūpiṇī |

ityuktasvarūpāyā amāyāśca udare ghaṇṭikāsthāne tālugranthedurbhedyatvāt puṭīkṛtaṃ 
saṃpuṭīkṛtaṃ tatraiva kṣaṇasya niruddhaṃ santaṃ, kāmasthaṃ ke śirasi amanaṃ tatra tiṣṭhantaṃ 
dvādaśāntagamanaśīlaṃ tatra prāptaṃ, kāmaṃ niścitaṃ sādhayet siddhyunmukhaṃ saṃpādayet 
| tataḥ kāmeṣu praveśanirgamanalakṣaṇasaṃcārāpāyatayā tacchabdavyapadeśyeṣu

	netrārūḍhena tenātha śaktidṛṣṭiṃ samāharet |

ityādinītyā sādhyasya netrādiṣu nikṣipet svanetrābhyāṃ nirgataṃ sādhyanetrayoranupraviṣṭaṃ 
sādhyanetrābhyāṃ ca nirgataṃ svanetrayoranupraviṣṭaṃ dhyāyedityevaṃ paunaḥpunyena 
dolāyantrakrameṇa gamāgamau na kevalaṃ niyatameva kaṃcana sādhyaṃ yāvat jagat jāyamānaṃ 
jantucakramakramādeva kṣobhayet svātmani viśrāntitiraskārapuraḥsarīkāreṇa svonmukhatayā 
vaivaśyaṃ nayedityarthaḥ | etacca anyaiḥ śabdaireva śabdānvyācaṣṭe itibhaṅgyā kaṣṭakalpanayā 
paryavasitārthaṃ bahuśo vyākhyātam | tadatra anyatra ca sacetasa eva antarajñā iti ta eva 
pramāṇam | tathā ca pūrvācāryā api āhuḥ

āśrīdīpakanāthato hyagaṇitairadyāpi vṛttiḥ kṛtā
yasyānyaiśca kariṣyate guruvaraiḥ svasvāśayaucityataḥ |
devi tvaccaraṇābjareṇuśaraṇaḥ kāmasthāmityādika-
ślokasyārghayutasya tasya sukṛtī ko'pyarthavittattvataḥ ||

iti | yantrabhaṅgyā vyākhyāne'pi na kaścit doṣaḥ | yat yaṃ kaṃcana sādhyaṃ kāme

p. 116)	kṣa-la-u-aḥpūrvagatāstatsaṃyogena jāyate |
      ayaṃ kāmaḥ samākhyātaḥ - - - - - - - - - - - ||
      
ityukte hrīṃkāre āsana rūpe

	ādikāmasya deveśi sādhyāṇuṃ śirasi nyaset |

ityuktyā tacchirasi nāmākṣaranyāsamātreṇa avatiṣṭhamānaṃ

	aṃ-ya-āsvapurāddevi tṛtīyasthānavāsinaḥ |
	teṣāṃ saṃyogarūpeṇa manmatho jāyate'naghe ||

iti manmathaśabdavyapadiṣṭasya dvitīyasya kāmasya klīṃkārasya madhye sthitaṃ 
kakāralakārayorantarlikhitam

	aṃpūrvabhūtasaṃkhyākamṛparaṃ ca tathaivahi |
	ābhyāṃ saṃyogato devi kandarpastu prajāyate ||

iti kandarpaśabdavācyena tṛtīyena kāmena ekāradvayātmanā udare garbhe ṣaṭkoṇākāratayā 
avasthānena puṭīkṛtaṃ saṃpuṭitaṃ ca kṛtvā kāmeṣu yathoktakandarpākhyakāmanirvartiteṣu ṣaṭsu 
koṇeṣu

	kṣahapūrvārṇayugalaṃ rasotthaṃ makaradhvajaḥ |

iti makaradhvajapratipāditaṃ caturthaṃ kāmaṃ blaṃkāraṃ likhedityarthaḥ | etat kāmacatuṣṭayamapi

	ha-tha-la-u-pūrvakasthaṃ jāyate ca manobhavaḥ |

iti manobhavākhyena pañcamena kāmena strīṃkāreṇa sādhayet udarāntaḥprakṣiptaṃ 
sādhayedityarthaḥ | evametat pariniṣpannaṃ yantraṃ kāmena prāthamikenaiva hrīṃkāreṇa

	atha cakrasya cādhāraṃ punaḥ kāmaṃ pradāpayet |

iti śruterādhārabhūtena śirasi dhāraṇāt rājāyamānatayā kāmitaṃ kāntaṃ kṛtvā kāmaṃ 
niścitameva śikhādau dhāryamāṇeṣu eṣu kāmeṣu bhaktiprahvatayā avatiṣṭhamāno'thavā 
kāmaśaktyudayasthāne 

p. 117) meḍhramūladeśavartini śākte ādhāre sthitaḥ sāvadhānaḥ sādhako na kevalaṃ tameva 
niyataṃ kṣobhayet yāvat jagadapi, -iti kāmapañcakārabdhametat yantraṃ syāt | atra ca 
ayamuddhāraḥ-kṣasya pūrvago ha, lasya ra, ukārasya ī, aḥkārasya aṃ evaṃ hrīṃ | aṃkārasya 
svapurāt tṛtīyasthānavāsī ka, yasya la, ākārasya ī evaṃ klīṃ | uktaṃ hi

	uparaṃ yatparaṃ bījaṃ rudrasaṃkhyānasaṃsthitaṃ |
	pañcānāmapi kāmānāṃ śirobhūtaṃ tu kārayet ||

iti | ukārāt rudrasaṃkhyānasaṃsthitamekādaśaṃ bījaṃ aṃ | aṃkārasya pūrvaṃ 
bhūtasaṃkhyākaṃ pañcamaṃ e, ṛkārasya ca paraṃ tathaiva bhūtasaṃkhyākaṃ e, ābhyāmiti 
ekārābhyām | ata eva uktaṃ

	kandarpamandiraṃ kuryāddvidhābhūtaṃ tu pārvati |

iti | kṣasya pūrvaṃ rasotthaṃ ṣaṣṭhaṃ varṇaṃ va, hasya la, evaṃ blaṃ | hasya pūrvakasthaṃ 
sa, thasya ta, lasya ra, ukārasya i evaṃ strīṃ | evaṃ pañca kāmāḥ | uktaṃ ca atra

	māyākhyaṃ kāmarājasthaṃ kulabījena veṣṭitam |
	puṭīkṛtaṃ tu tenaiva ṣaṭkoṇākāradhāriṇā ||
	tatkoṇasthena kāmena vedhayettāpaneṣuṇā |
	kṣipettat stryarṇakāmāntaḥ kuryādādyena kāmitam ||
	evaṃ pañcaprakārārṇakāmamantraṃ tu sāṅkuśam |
	dhyāyedvā dhārayedvāpi śaktisthaḥ kṣobhayejjagat ||

iti | atra ca ityānviśeṣaḥ - yat caturthe kāme svarāntaraṃ bahiraṅkuśabījaṃ ceti 
yadabhiprāyeṇaiva śrīkalyāṇavarmaṇā koṇaṣaṭkamadhye blūṃkāraṃ, tadbahiḥ kroṃkārāṣṭakaṃ 
digaṣṭake nyasedyeti 

p. 118) vyākhyātam | tadevaṃ vṛddhaprapitāmahasaṃbhṛtaṃ tatra tatra tattadarthāvabodhanakṣamaṃ 
saṃvādādi sarvaṃ parikarajātaṃ gotrajebhyo valavacchalatayā yathākathaṃcidantataścauryādinā 
apahṛtya gṛhītvā api atra niravadyaṃ śabdārthayojanamātramapi kartumajānatā bhavatā 
kataratkauśalamavalambya kevalamatraiva paṭale'nyatra vā paropapāditeṣu vivarītrantarātiśāyiṣvapi 
vyākhyāviśeṣeṣu prakāśitasaṃpradāyasatattvāḥ pratibhātirekaśālibhirvayamutsāhanīyāḥ ityādi 
uktaṃ dhanyāya mahyaṃ namaḥ ityādi ca vakṣyate iti jānīmaḥ | yadvā svacchandābhidhāyināṃ 
yattadabhidhāne kiṃ nāma avadhinibandhanam | yadāhuḥ

	chidrānusṛtiśīlānāṃ jaḍimodgāraduḥspṛśām |
	nadīnāmavadhiḥ sindhurnīcavācāṃ na kaścana ||

iti || 46 ||

	evaṃ kāmarājamupasaṃhṛtya śaktibījasādhanamapi abhidhātumāha

śaktibījasvarūpāṃ tu sṛṣṭyā saṃhṛtisīmayā |
sṛṣṭisaṃhāraparyantaṃ śarīre paricintayet || 47 ||

	iha khalu sādhakaḥ svaśarīra eva samuccaracchaktibījāvibhinnasvarūpāṃ madhyaśaktiṃ 
saṃhṛtisīmnā tadavadhikayā dvādaśāntādārabhya sṛṣṭyā sṛṣṭikrameṇa hṛdantaṃ prasarantīṃ 
punarapi pratyāvṛttya sṛṣṭestadudayasthānātmano hṛdayāt saṃhārasya dvādaśāntasyaiva 
paryantamarthādullasantīṃ paritaḥ samantāt paunaḥpunyena evaṃ gamāgamābhyāṃ 
cintayedanusaṃdadhyādityarthaḥ || 47 ||

p. 119) evaṃ paricintanena asya kiṃ sthādityāha

yato bhavati deveśi vainateya ivāparaḥ |
nāgānāṃ darśanādeva jaḍīkaraṇakārakaḥ || 48 ||

dāhināmamṛtāsāradhīradhārādharopamaḥ |
sthirakṛtrimaśaṅkākhyaviṣopaviṣanāśakaḥ || 49 ||

tathā

duṣṭavyādhigrahānekaḍākinīrūpikāgaṇaḥ |
bhūtapretapiśācaughaistrinetra iva dṛśyate || 50 ||

	atra bījatrayasādhanagranthe yadanyairvyākhyātaṃ, tat vacasi āropyamaṇamapi paraṃ 
trapākaraṃ nirupayogi granthavistarādhāyi cetyasmabhyaṃ sacetobhirnāsūyitavyaṃ yatkimiti na 
tadanūdya dūṣitamiti | tatrāpi piṇḍatrayasya

	itthaṃ bhedenedaṃ bījatrayasādhanaṃ yaduditamiha |
	piṇḍoddhāraḥ svarasapravṛtta ukto'tra devena ||

ityuktyabhiprāyānavadhāraṇāt bhrāntaiḥ kena tāvat śābdena vyāpāreṇa uddhāraḥ kṛta iti na 
vidmaḥ | yadvā yeṣāṃ sākṣānmantroddhāramajānatām

	atra hi svasvarūpādiślokayugmena devayoḥ |
	manurukto vyāptigarbho gurureva hi no'bravīta ||
	svasvarūpaṃ svamārgasthaṃ svasaṃvedyaṃ svatejasam |
	svānandaṃ svasvaśaktisthamiti ṣaḍbhirviśeṣaṇaiḥ ||
	ūkārādikṣakārāntaṃ śākto bhāgaḥ kaṭākṣitaḥ |
	kṣakārādyāvadūkāraṃ śākto bhāgo'thavānayoḥ ||
	svapravāhāṃ svamārgasthāṃ svabhāvāṃ svakulodbhavām |

p. 120)	svānandāṃ svapadārūḍhāmiti ṣaḍbhiśca sūcitaḥ ||
	rephato nādaparyantaḥ śākto bhāgo'nayoryataḥ |
	nādato rephaparyantaṃ śaivo bhāgo'tha sūcitaḥ ||

ityādinā sṛṣṭisaṃhāragatyā nirnibandhanaṃ taduddhāraṃ vadatāṃ

	jihvācchedabhayaṃ nāsti na tālupatanādbhayam |
	nirviśaṅkena vaktavyaṃ nirlajjaḥ ko na paṇḍitaḥ ||

iti bhaṅgyā nirviśaṅkameva cetasteṣāṃ svayambhuvāṃ kimucyate'smābhiryaduktamabhiyuktaisteṣāṃ 
bhavatāmevamādāvatyannātīndriyārthadarśanāya kena yogīśvareṇa divyaṃ cakṣurarpitamiti na 
jānīmaḥ iti || 50 ||
	idānīmekaikabījasādhanaprasaṅgāpatitaṃ prāguktavailakṣaṇyena samastāyā api vidyāyāḥ 
sādhanamabhidhatte

athavā yena vidyeyaṃ paripūrṇā vicintyate |
nābhimaṇḍalahṛtpadmamukhamaṇḍalamadhyagā || 51 ||

kevalaiva maheśāni padmarāgasamaprabhā |
tasyāṣṭaguṇamaiśvaryamacirātsaṃpravartate || 52 ||

	evaṃ nāmasmaraṇajapadhyānamātradapi asyā viśiṣṭaphaladāyitvamastītyāha

manasā saṃsmaratyasyā yadā nāmāpi sādhakaḥ |
tadaiva mātṛcakrasya vidito bhavati priye || 53 ||

yadaiva japate vidyāṃ mahātripurasundarīm |
tadaiva mātṛcakrājñā saṃkrāmatyasya vigrahe || 54 ||

sarvāsāṃ sarvasaṃsthānāṃ yoginīnāṃ bhavetpriyaḥ |
putravatparameśāni dhyānādeva hi sādhakaḥ || 55 ||

p. 121)	evaṃ kevalāyā vidyāyā māhātmyamabhidhāya samuditāyā api āha

yadā tu parameśāni paripūrṇāṃ prapūjayet |
prayacchanti tadaivāsya khecaryaḥ siddhimuttamām || 56 ||

      nanu cedasyāḥ sacakrāyāḥ pūjanaṃ kriyate, tat khecaryaḥ kasmāt siddhimuttamāṃ 
dadatītyāha

catuṣṣaṣṭiryataḥ koṭyo yoginīnāṃ mahaujasām |
cakrametatsamāśritya saṃsthitā vīravandite || 57 ||

      atraiva vaiśiṣṭyamabhidadhatphalaviśeṣamapi āha

ādeḥ saṃbandhini pade madhye bījāṣṭakaṃ bahiḥ |
kalā dhyātvāṅganānaṅge jāyate'naṅgavatpriye || 58 ||

      ādervāgbhavasya saṃbandhini pade sthāne, madhye tatsthe kāmarāje'rthātkṛte 
vāgbhavakāmarājayorvyatyaye satyevaṃvidhā vidyā, tadvahirvaśinyādivācakaṃ bījāṣṭakaṃ, kalāḥ 
kāmākarṣiṇyādivācakaṃ svaraṣoḍaśakaṃ cetyetāvanmātraṃ cakraṃ kasyāścana sādhyāyā 
aṅganāyā anaṅge madanādiśabdoktāyāṃ yonau dhyātvā anaṅga iva 
sakalajagadviśīkaraṇasamarthaḥ sādhako jāyate ityarthaḥ || 58 ||
	nanu mūlavidyāvat vidyāntarāṇāmapi kimiti na kiñcitsādhanakarma uktamityāha

karaśuddhyādividyānāmekaikaṃ parameśvari |
rudrayāmalatantre tu karma proktaṃ mayā purā || 58 ||

      tarhi aṣṭamacakrāntarniviṣṭānāṃ sādhakānāṃ kā vārtetyāha

p. 122)	mādanairmadano bhūtvā pāśāṅkuśadhanuḥśaraiḥ |
     kṣobhayetsvargabhūlokapātālatalayoṣitaḥ || 59 ||

	evaṃ mādanānāṃ yoṣidvaśīkāritvamuktvā, śāktānāmapi puṃvaśīkāritvamatidiśati

tathaiva śāktairdeveśi tripurīkṛtavigrahaḥ |
sādhayeddevagandharvasiddhavidyādharānapi || 60 ||

	madano bhūtvā ityetatsamaskandhatayā uktaṃ tripurīkṛtavigraha iti | tathaiveti anena eṣāṃ 
madanāyudhoktapūjāprakāro'tidiṣṭa iti kasya śabdasya ayamartha āyudhasājātyādeva tatsiddhamiti 
kimaneneti āstām || 60 ||
	nanu eṣāṃ svarūpameva kiṃ yenāpi tattadvaśīkārasiddhiḥ syādityāha

     tatra śāktā mahāvajraprastārajanitāḥ śarāḥ |

	mahāvajraprastāro'tra śrīnityākāloktaḥ, natu catuḥśṛṅgo merustasya kvacidapi 
anabhidhānāt | naca atra

	evametasya cakrasya prabhāvo varṇituṃ mayā |
	na śakyate - - - - - - - - - - - - - - - - - - - - - - - - - - | (1 | 56)

iti, tathā

	saṃsthitātra mahācakre - - - - - - - - - - - - - - - - | (1 | 59)

      ityādāviva mahacchabdopādānānupādānābhyāṃ kaścit viśeṣaḥ | uktaṃ ca atra

	jhañamadhyagataṃ bījamūḍhamadhyoparisthitam |
	paścimasthena saṃbhinnamūḍhamadhyena bheditam ||
	prathamaṃ sādhakaṃ devi śoṣaṇaṃ raktasannibham |

p. 123)	tadeva tattvaṃ subhage mādyabinduvibhūṣitam ||
      pṛṣaṭkaṃ mohanaṃ nāma trailokye mohakṛtparam |
      dhasamadhyagataṃ tattvaṃ ṣahamadhyena bheditam ||
      yāntabindusamāyuktaṃ bāṇaṃ sandīpanaṃ param |
      chajamadhyagataṃ bījaṃ śāntabinduvibhūṣitam ||
      ṣahamadhyoparisthaṃ tu caturthaṃ kathitaṃ śaram |
      tāpano nāma bāṇo'yaṃ tāpayet tridaśānapi ||
      nāntaṃ hādyena saṃbhinnaṃ susvacchaṃ pañcamaṃ priye |
      unmādano nāma śarastrailokyonmādakārakaḥ ||
      
iti | ayamatra arthaḥ-jhañamadhyagataṃ da, ūḍhamadhyagataṃ ra, paścimasthaṃ ā, ūḍhamadhyaṃ 
aṃ, evaṃ drāṃ | tadeva drāmityeva tattvaṃ bījaṃ, kiṃtu iyān viśeṣaḥ-mādyaṃ īṃ, evaṃ 
drīṃ | dhasamadhyagataṃ ka, ṣahamadhyaṃ la, yāntaṃ i, evaṃ kliṃ | chajamadhyagataṃ va, 
śāntaṃ u, ṣahamadhyaṃ la, evaṃ bluṃ | nāntaṃ sa, hādyaṃ aḥ, evaṃ saḥ | 
śrīrasamahodadhirapi

	ñadhamadhyaṃ dvidhoddhṛtya paṣamadhyena lāñchitam |
	au-aḥpṛṣṭhasamopetaṃ kapūrveṇa śiroyutam ||
	gādyaṃ lāntaṃ ca sordhvasthau a-i-antasamanvitau |
	kādyayuktau ṣa-antaṃ ca khādyāṅkaṃ devatāśarāḥ ||

iti | ñadhamadhyaṃ da, paṣamadhyaṃ ra, au-pṛṣṭhaḥ ā, aḥpṛṣṭhaḥ ī, -kapūrthaḥ aṃ, evaṃ 
drāṃ, drīṃ | gādyaḥ ka, lānto va, sordhvaṃ la, akārasya antaḥ i, ikārasya antaḥ u, kādyaḥ 
aṃ, evaṃ kliṃ bluṃ | ṣāntaḥ la, khādyaḥ aḥ, evaṃ saḥ | ata eva eṣāṃ 
merumadhyoddhārokto viśeṣo na grāhyastasya tantrāntarīyatvāt | evaṃhi vajraprastārajanitāyā 
mūlavidyāyā api
	
      vajraprastārabhedena yā vidyā dvādaśākṣarā |
      
p. 124)	tribījarahitā sā syādādimadhyānta evahi ||

iti upakramya

	eṣāsau paramā vidyā nikhilā siddhidāyikā |
	utpannā merumadhyāttu vidyā pañcadaśākṣarā ||

ityādyukto viśeṣaḥ prasaktaḥ syāt | astu cenna uddhṛtya adhikāribhedena uktatvāt, anyathāhi 
āptatvaṃ khaṇḍyeta parameśvarasya, tadaprāmāṇye kiṃ nibandhanaṃ syāt | evaṃca

      pañca bāṇāstu ye proktāsteṣu bhūtākṣarāṇi ca |
      ekaikamādimuddhṛtya saṃpūrṇāśca bhavanti te  ||
      ekādaśādyamuddhṛtya bhāntāntaṃ tasya cāgrataḥ |
      rudrādiyuktaṃ saṃgṛhya jhiṇṭhīśvarasamanvitam ||
      navake ṛtukoṣṭhasya hakāraṃ yasya ūrdhvataḥ |
      caturthaṃ tadvijānīyātsādhurudrālayaṃ param ||
      navake rāmamadhye tu vilamadhye vyavasthitam |
      āsanaṃ devavarṇānāṃ kakārādisthitānbhavet ? ||
      tṛtīyena vinā devi trimūrti trīṇi ? bheditāḥ |
      sarve binduyutāḥ kāryāścaturakṣara (e) vahi ||
      pañcamamādidātavyaṃ dha-ante bindusaṃyutam |
      bindumastakasaṃyogātpañcaite siddhidāyakaḥ ||
      etāni pañca bījāni pañcavāṇeṣu dīpakāḥ |
      anena rahitā devi niṣphalāstu bhavanti te ||
      āsanaṃ pañca vāṇāstu mūlavidyādidūtayaḥ |
      pūrvoktaṃ yanmayā devi rurubhede ca madhyataḥ ||
      bījaḥ prastārabhedena uddhṛto'yaṃ mayā purā |
      anenaiva vidhānena saphalāstu bhavanti te ||
      nirbījā naiva siddhyanti saṃpradāyavivarjitāḥ |
      
p. 125)	sabījāstu samākhyātā nirbījā naiva pūjane ||

itisaṃvādena vṛthā āyastam | ayaṃ ca atra uddhāraḥ-ekādaśādyaṃ ka, bhāntāntaṃ ma, 
rudrādi da, jhiṇṭhīśa e, tena de | ṛtukoṣṭhaṃ ṣaṣṭhaṃ, tatsthaṃ va, evaṃ kamadeva | vilamadhye 
vyavasthitaṃ la, etena kla mla bla dale | trimūrti | atha

	sabījaistairniyoktavyāḥ saṃpradāyasamanvitāḥ |

iti śrīrasamahodadhisaṃvādabalādevamucyate iti cet, astu ev'm, kiṃtu bhavadgṛhādeva cchadmanā 
nirgate'smingranthe na etadevaṃ dṛṣṭaṃ yuṣmadīyaireva kaiścit vuppārāhulīyatvena prakhyāpite 
mantrasaṃkete ca na spṛṣṭamiti sandihāmahe kimetat vastusadavastusadveti | tatra vastusattve na 
asmākameṣa doṣo yatkaśmīreṣu śrīmānviśvāvarta eva asya darśanasya sākṣātpravartayiteti 
uktapūrvaṃ, tat

	 - - - - - - - - - - - - - - - - - śiṣyadhuṅnārakī bhavet |

itiślokapādārthaṃ vismṛtya etadbījapañcakaparihāreṇa kimiti upadiṣṭaṃ, gururevahi yadi anyathā 
mantropadeśaṃ karoti, tatkastacchiṣyāṇāmaparādhaḥ | śrīrasamahodadhiślokānāṃ yadi anyathā 
pracāraḥ kṛtastadyāvadāstāṃ, tena hi vastvapalāpamātraṃ siddhaṃ, na vastuni kācitkṣatiḥ | 
gurutaḥ sākṣātprāptānāṃ mantrāṇāṃ punaranyathopadeśe mahānpramādaḥ | evaṃ bhiṣajo'pi 
viṣaṃ prayuñjate cetsuvacā tarhi nirāturā dharitrī | itibhaṅgyā bhavatāmevaṃ duśceṣṭitamiti alaṃ 
pūrvagurutvena avasthitānāṃ prācyānāmapi doṣāviṣkaraṇena, vastusaṃsparśanaparatayā 
pravṛttestu na asmākamubhayalokadūṣakaḥ kaścit doṣaḥ | yadāhuḥ

p. 126)	dīkṣitānāṃ na nindādi kuryādvidveṣapūrvakam |
	upadeśāya no doṣaḥ sa hyavidveṣapūrvakaḥ ||

iti | avastusattve tu asmatpakṣa eva jyāyāniti alaṃ durvinītadamanena ||
	evaṃ śāktānabhidhāya mādanānapi āha

	mādanāstvādiparataḥ sarvādhaḥsthā niyojitāḥ || 61 ||

	sarvādhaḥsthāḥ sarvasya adhvano'dhaḥsthitānāṃ caturṇāṃ vāyvādīnāṃ bhūtānāṃ 
vācakā antaḥsthā arthāt teṣāmeva āderākāśasya tadvācakasya hakārasya parataḥ paścāt 
niyojitāḥ punarmādanāḥ śarā bhavantīti vākyārthaḥ, tena hayaralaveti kramaḥ || 61 ||
	tathā

	ādyantago mahāpāśaḥ pauruṣeyaḥ prakīrtitaḥ |
	rudraśaktiḥ kuṇḍalākhyā māyā strīpāśa ucyate || 62 ||

	turīyamaruṇāvargāddvitīyamapi pārvati |
	strīpuṃskodaṇḍayugalaṃ kāmāgnivyāpako'ṅkuśaḥ || 63 ||

	āderavarṇasya antagaḥ ā | kuṇḍalābhyāmikārābhyāmā samantāt khyātā 
taddvayasaṃghaṭṭādudīyamānā caturthasvarātmikā yā rudraśaktiḥ, sā iha māyā, natu 
catuṣkalāḥ strīpāśa ucyate iti anvayaḥ | evaṃ ca
	
      īkāra ivārdhayato ? māyāpi catuṣkalā strīṇām |
      
ityuktastryakṣarapakṣaḥ pratikṣipto bhavati, natu 
vṛddhaprapitāmahasaṃbhṛtānantavijayasadbodhopādānamātreṇa yadevamapi 
padatrayopādānāmarthakyaṃ 

p. 127) samāhitaṃ syāt | aruṇāvargāditi tavargāt turīyaṃ dha, dvitīyaṃ tha, kāmaḥ ka, agnī ra, 
vyāpakaḥ o, evaṃ kroṃ | kāmāṅkuśastu prathamapaṭala eva uktaḥ 
mantraprakaraṇasāmarthyātpunareṣāṃ sabindutvamavasātavyam | uktaṃ ca

      ūpūrvavarṇayugalaṃ kādyena śirasānvitam |
      pāśadvayaṃ samākhyātaṃ śāktaṃ mādanameva ca ||
      jambhādipadasaṃyuktamekamaṅkuśamuddharet |
      dvitīyaṃ kādyayonyantamaṃkārāntalayāntagam ||
      ṇāntaṃ pādyaṃ sakādyaṃ ca cāpayugmamudāhṛtam |
      ṣādhaṃ rāthaṃ layāntaṃ ca vādhaṃ lāntasamanvitam ||
      au-aḥ-madhyagabījena sarve'pi śirasāhatāḥ |
      kāmadevasya kathitaṃ śarapañcakamuttamam ||
      
iti | ūpūrvavarṇayugalaṃ ī ā, kādya aṃ, evaṃ īṃ āṃ | kādya aṃ, yonerekārasya antaḥ o, 
aṃkārāntaḥ ka, layayorantago ra, evaṃ kroṃ | ṇānto yonyantarāvasthityapekṣayā tha, pādyo dha, 
kādya aṃ, evaṃ thaṃ dhaṃ | ṣādho ha, rādho ya, layayorantaḥ ra, vādho la, lānto va, au-aḥ-
madhyagataṃ bījaṃ aṃ, evaṃ haṃ yaṃ raṃ laṃ vaṃ || 63 ||
	nanu mudrāṇāmeva pūrvamuktaṃ na pūjanaṃ, tatkimetā kutra citpūjyā na vā ityāha

	mudrā yāstripurāyāstu devi siddhyaṣṭakānvitāḥ |
	tā eva sarvacakreṣu pūjākāle prapūjayet || 64 ||
	
	siddhyaṣṭaketyanena mudrādaśakasāhacaryāt rasamokṣalakṣaṇadvayamapi upalakṣyate iti 
prāgeva uktaprāyam || 64 ||

p. 128)	asyāśca evamuktamāhātmyavattvādeva ananyasāmānyatvamastītyāha

	ataḥ pradhānavidyeyaṃ tripurā parameśvarī |
	naitasyāḥ sadṛśī kācidvidyā deveśi vidyate || 65 ||

yataḥ

	etāmeva purārādhya vidyāṃ tripurabhairavīm |
	trailokyamohanaṃ rūpamakāṣīdbhagavānhariḥ || 66 ||

tathā

	kāmadevo'pi deveśi mahātripurasundarīm |
	samārādhyābhavalloke sarvasaubhāgyasundaraḥ || 67 ||

tathā

	mayāpi yadvratasthena kriyate'dyāpi sundari |
	japyaṃ trisandhyametasyāstadetatpadasiddhaye || 68 ||

	etatprasaṅgāpatitaṃ cakrasya api vyastasamastatayā pūjanena phalabhedamāha

	madhyaprapūjanāddevi jāyate vākpatirnaraḥ |
	tathaivāparakandarpo vāhyamadhyāntare'rcanāt || 69 ||

	sarveṇa sarvadā sarvadevīyuktena pārvati |
	sādhayetkhecarīsiddhimaṇimādiguṇānvitām || 70 ||

	madhyasya mūlatrikoṇasya prakṛṣṭamaṣṭamacakraniviṣṭena devīcatuṣṭayenaiva, tadapekṣayā 
bāhyasya aṣṭārasya madhyamadhyavartino navamacakrasya api pūjanāt vākpatitvaṃ ca kāmatvaṃ 
ca siddhyediti dvidhā vyastasya cakrasya pūjanam | samastasya ca 
pūjanādaṇimādisiddhyaṣṭakānvitā 

p. 129) khecaratvasiddhiḥ syāt | nirnibandhanamaṣṭakatrayamāśrayatāṃ punaḥ kastāvadabhiprāya iti 
kaḥ kalayituṃ samartha iti śivam || 70 ||

iti rājānakaśrīmañjayarathaviracite śrīvāmakeśvarīmatavivaraṇe caturthaḥ paṭalaḥ || 4 ||



atha

pañcamaḥ paṭalaḥ

	iha vyastasamastāyā vidyāyāḥ kathaṃ japahomābhyāṃ vinā siddhiḥ syāditi pāṭalikaṃ 
saṃbandhamākṣipantī śrīdevyuvāca kimityāha

	sarvameva tvayā proktaṃ tripurājñānamuttamam |
	kāmatattvaṃ viṣajñānaṃ mokṣatattvaṃ trayaṃ tathā || 1 ||

	idānīṃ japahomābhyāṃ vidhānaṃ vada śaṅkara |
	yenānuṣṭhitamātreṇa mandabhāgyo'pi siddhyati || 2 ||

	trayamiti samastatvenetyarthaḥ || 2 ||

	atraiva pratyuttarayituṃ śrībhairava uvāca tadeva āha

p. 130)	śṛṇu devi pravakṣyāmi tripurāmantrasādhanam |
	japahomavidhānaṃ tu samīhitaphalapradam || 3 ||

	tatra japavidhānameva tāvadāha

	cakramabhyarcya vidhivatsakalaṃ parameśvari |
	madhyaṃ vā kevalaṃ devi vāhyamadhyagataṃ tu vā || 4 ||

	tadagre saṃsthito mantrī sahasraṃ yadi vā japet |
	vratasthaḥ parameśāni tato'nantaphalaṃ labhet || 5 ||

	kevalaṃ madhyamiti mūlatrikoṇarūpamevetyarthaḥ | tatra hi aṣṭamanavamacakrābhyāṃ 
mukhya eva pūjanakramaḥ, pradhāne hi kṛto yatnaḥ phalavānbhavatīti kimanyena amukhyena 
pūjaneneti abhiprāyaḥ | vāhyamadhyagatamiti bāhyena 
vaśinyādidevatāṣṭakātmakāntaraṅgaparivārādhikaraṇabhūtena saptāsanacakreṇa yuktaṃ 
madhyagataṃ tryaramityarthaḥ, evaṃ sāṣṭāraṃ tryarameva abhyarcayediti āśayaḥ |  tadagra iti 
tasya tribhirvikalpaiḥ pūjitasya cakrasya purastādityarthaḥ | yadīti hetau | vāgrahaṇena nyūnāyā api 
saṃkhyāyāḥ svīkāraḥ, tena śatādi sahasraṃ vā yato japet tato'nantaphalaṃ labhediti anvayaḥ | 
japasya ca atra sākṣādeva aṅgitvaṃ sthitamiti vṛthā anyairāraṭitamiti alaṃ 
jhaṃmanyakuvikalpavikalpanena || 5 ||
      atraiva pakṣāntaramāha

	dhyātvā vā hṛdgataṃ cakraṃ tatrasthāṃ parameśvarīm |
	pūrvoktadhyānayogena saṃcintya japamārabhet || 6 ||

	cakramiti triprakāramapi || 6 ||

	japasya ca atra anekarūpeṇa ārambha ityāha

p. 131)	nigadenopāṃśunā vā mānasenāpi suvrate |

	nigadena śabdenetyarthaḥ | yaduktaṃ

	ātmā na śṛṇute yaṃ tu mānaso'sau prakīrtitaḥ |
	ātmanā śrūyate yastu tamupāṃśuṃ vijānate ||
	pare śṛṇvanti yaṃ devi saśabdaḥ sa udāhṛtaḥ |

	tacca kathaṃ kiyat kiṃphalamityāha

	pūrvoktanyāsasaṃnaddho mudrāsaṃnaddhavigrahaḥ || 7 ||

	muktāhāramayīṃ sphītavaiḍūryamaṇisaṃbhavām |
	putrajīvakapadmākṣarudrākṣasphaṭikodbhavām || 8 ||

	prabālapadmarāgādiraktacandananirmitām |
	kuṅkumāgurukarpūramṛganābhivibhūṣitām || 9 ||

	akṣamālāṃ samāhṛtya tripurīkṛtavigrahaḥ |
	lakṣamātraṃ japeddevi mahāpāpaiḥ pramucyate || 10 ||

	pūrvoktanyāsasaṃnaddhatvādeva tripurīkṛtavigraha iti uktam | ādiśabdena 
saṃkhādergrahaṇaṃ, tena navaiveti na vācyam | naca nyāyyaḥ pāṭhamātrabhedāt

	vāktattvasiddhiprādhānye mauktikāḥ sphāṭikādijāḥ |
	vaiḍūryapadmarāgādinānāratnasamudbhavāḥ ||
	raktacandanajā vāpi kāmatattvaprasādhane |
	putrajīvakapadmākṣarudrākṣādivinirmitaḥ ||
	nirañjanamahāsiddhimukhyatve - - - - - - - - - - - |

iti ukto vibhāgaḥ, tathā

p. 132)	muktāphalādikatrikamekatryaṣṭāradevatāsvādau |
	ante'ṣṭāsthāṣṭāragadevīṣvapi putrajīvādyam ||
	sphaṭikapravālapaṅkajarāgādyaṃ madhyacakradevīṣu |
	kartavyamakṣasūtraṃ sādhāraṃ śoṇacandanajam ||

ityukto vā vibhāgo'pi na nyāyyaḥ pāṭhamātrabhedāt śrautatvābhāvāt || 10 ||

	idānīṃ saṃkhyāyāḥ phalasya ca yathāyathamādhikyaṃ darśayati

	lakṣadvayena pāpāni saptajanmakṛtānyapi |
	nāśayet tripurā devī sādhakasya na saṃśayaḥ || 11 ||

	japtvā lakṣatrayaṃ mantrī prayato mantravigrahaḥ |
	pātakaṃ nāśayedāśu saptajanmasahasrajam || 12 ||

	japtvā vidyāṃ caturlakṣaṃ mahāvāgīśvaro bhavet |
	pañcalakṣāccādaridraḥ sākṣādvaiśravaṇāyate || 13 ||

	japtvā ṣaḍlakṣametasyā mahāvidyādhareśvaraḥ |
	japtvaiva sapta lakṣāṇi khecarīmelakaṃ vrajet || 14 ||

	aṣṭalakṣapramāṇaṃ tu japtvā vidyāṃ maheśvari |
	aṇimādyaṣṭasiddhīśo jāyate devapūjitaḥ || 15 ||

	navalakṣapramāṇaṃ tu japtvā tripurasundarīm |
	vidhivajjāyate mantrī rudramūrtirivāparaḥ || 16 ||

	rudramūrtitvameva asya vyañjayati

	kartā hartā svayaṃ gauri loke'pratihataprabhaḥ |

p. 133)	nityapramudito vīraḥ svacchandagatirīśvaraḥ || 17 ||

	bhavatīti śeṣaḥ || 17 ||

	nanu nigadādīnāṃ trayāṇāṃ japaprakārāṇāṃ kimanyonyaṃ kaścidasti viśeṣo na 
vetyāha

	nigadena yadājaptaṃ lakṣaṃ copāṃśunā kṛtam |
	mānasena maheśāni koṭijāpaphalaṃ labhet || 18 ||

	iha nigadena yadīṣat sakṛt dvistrirvā sādhakena japtaṃ tat kṛtaṃ tāvanmātrameva phalaṃ 
labhedityarthaḥ, yadupāṃśunā api ājaptaṃ lakṣaṃ kṛtaṃ nigadāpekṣayā lakṣaguṇaṃ phalaṃ sa 
labhet, evaṃ mānasena api ājapte koṭiguṇamiti uttarottarameṣāmasti utkarṣaḥ iti tātparyārthaḥ || 
18 ||

	deśabhedena api japasya viśeṣamāha

	yatra vā kutraciddeśe liṅgaṃ vai paścimāmukham |
	svayaṃbhu vāṇaliṅgaṃ vā itaradvāpi suvrate || 19 ||

	tatra sthitvā japellakṣaṃ tripurīkṛtavigrahaḥ |

	itaraditi siddhādipratiṣṭhitamanekaprakāraṃ

	paścimābhimukhaṃ liṅgaṃ yonisthaṃ parikīrtitam |
	hṛdgranthibindusaṃsthānaṃ svayaṃbhu vāṇavācakam ||
	itaraccāntarālasthaṃ - - - - - - - - - - - - - - - - - - - - - - - - - - -  |

ityādyanekaprakāramanekeṣu āgameṣu astīti sāvadhānairyogibhiḥ svayameva yāvadanubhavaṃ 
yathāruci tata eva abhyūhyam | vyākhyātaṃ ca bahuśo'nyairyathākathaṃciditi romanthaprāye 
punaretadvyāvarṇane durāgrahe na asmākamabhiniveśa iti

p. 134) āstām ||

	evaṃ kiṃ syādityāha

	tato bhavati deveśi tralokyakṣobhako naraḥ || 20 ||

	evametadupasaṃharan homavidhānamāha
	
     evaṃ japaṃ yathāśakti kṛtvādau sādhakottamaḥ |
	homaṃ kuryāddaśāṃśena - - - - - - - - - - - - - - - - - ||

	kena kathamityāha

	- - - - - - - - - - - - - kusumairbrahmavṛkṣajaiḥ || 21 ||
	
     kusumbhakusumairvāpi trimadhvaktairyathāvidhi |

	brahmavṛkṣo yājñikaḥ palāśādiḥ | trimadhviti śarkarā ghṛtaṃ paya 
ityādyanekaprakāram, svayaṃbhukusumairitipāṭhe vanyairiti arthaḥ | yathāvidhīti tatra 
vakṣyamāṇakuṇḍāṣṭakamadhyādekaṃ kuṇḍaṃ paradṛṣṭyā avalokya astreṇa saṃprokṣya ullikhya 
saṃsecya saṃkuṭya upalipya catuṣpathamakṣavāṭaṃ ca prakalpya vajrīkṛtya tejaḥpuñjamayaiḥ 
kuśairantarbahirācchādya nairvighnyārthaṃ mekhalāsu vāmādiśaktitrayaṃ nyasya abhyarcayet, 
tataścatuṣpathāntastrikoṇamabhidhyāya māyābījena ambikāmāhūya āsanopari nyasya saṃpūjya 
agnimānīya saṃprokṣya amṛtīkṛtya saṃpūjya śukravat dhyātvā savyāpasavyakrameṇa trirābhramya 
tadyonau prakṣipya tadyonimastreṇa saṃprokṣya darbhairācchādya agniṃ prajvālya jvālāmudrāṃ 
pradarśya garbhādhānapuṃsavanasīmantonnayanajātakarmanāmakaraṇāni aṅgavidyayā ekaikāhutvā 
kṛtvā svavāmataḥ śivaśaktitayā darbhopari adhomukhau sthāpitau 
sruksruvāvājyādihomyadravyajātaṃ ca arghapātravipruṭprokṣaṇenaiva saṃskṛtya saṃskārapūraṇāya 

p. 135) pūrṇāṃ dattvā agnermātaraṃ visṛjya kāmāgnau mantracakraṃ saṃpūjya samagrameva 
kuṇḍaṃ vahnivaktratayā vibhāvya homaṃ kuryāditi samānāsamānatantroktaṃ 
vidhimanatikramyetyarthaḥ ||

	evaṃ kiṃ syādityāha

	tato bhavati vidyeyaṃ mahāvighnaughaghātakī || 22 ||

	sarvakāmapradā devi bhuktimuktiphalapradā |

	kutraca etat kuryādityāha

	yonikuṇḍe bhagāṅke vā vartule vārdhacandrake || 23 ||
	navatrikoṇacakre vā caturaśre'ṣṭapatrake |

	bhagāṅka iti tryaśre | navatrikoṇacakra iti samādvāre dvandvaḥ | aṣṭapatraka iti aṣṭadale 
padme ||
	nanu ekenaiva kuṇḍena homasampattiriti kimaṣṭānāṃ nirdeśenetyāha

	yonikuṇḍe bhavedvāgmī bhagāṅke kṛṣṭiruttamā || 24 ||

	vartule tu bhavellakṣmīrardhacandre trayaṃ labhet |
	navatrikoṇakuṇḍe tu khecaratvaṃ prapadyate || 25 ||

	caturaśre bhavecchāntirlakṣmīḥ puṣṭirarogatā |
	padmāṅke sarvasaṃpattiracirādeva jāyate || 26 ||

	cakre'ṣṭakoṇe subhage samīhitaphalaṃ labhet |

	evaṃ homyadravyabhedādapi phalabhedo bhavedityāha

	mallikāmālatījātīpuṣpairājyapariplutaiḥ || 27 ||

p. 136)	hutairbhavati vāgīśo mūko'pi parameśvari |
	karavīrajapāpuṣpāṇyājyayuktāni pārvati || 28 ||

	hutvākarṣayate mantrī khabhūpātālayoṣitaḥ |
	candrakastūrikāmiśraṃ kṛtvā kuṅkumamīśvari || 29 ||

	hutvā kandarpasaubhāgyātsa saubhāgyādhiko bhavet |
	caṇpakaṃ pāṭalādīni hutvā vai śriyamāpnuyāt || 30 ||

	śrīkhaṇḍamaguruṃ vāpi karpūraṃ purasaṃyutam |
	hutvā purapurandhrīṇāṃ devi vikṣobhako bhavet || 31 ||

	hutvā palaṃ trimadhvaktaṃ kṛtvā smṛtvā maheśvarīm |
	khecaro jāyate devi gatvā naktaṃ catuṣpathe || 32 ||

	tadā dadhimadhukṣīramiśrāṃllājānmaheśvari |
	hutvā na vādhyate rogaiḥ kālamṛtyubhayādibhiḥ || 33 ||

	catuṣpathe naktaṃ gatvā trimadhvaktaṃ kṛtvā maheśvarīṃ smṛtvā palaṃ hutvā khecaro 
jāyate iti anvayaḥ || iha

	bhāvārthaḥ saṃpradāyārtho nigarbhārthaśca kaulikaḥ |
	tathā sarvarahasyārtho mahātattvārtha eva ca ||
	evametanmaheśāni ṣaḍvidhaṃ pārameśvaram |
	vyākhyānaṃ sarvatantrāṇāṃ pāramparyeṇa labhyate || (yo0 hṛ0 2|15)

ityādyuktaṃ vyākhyātaṃ pratipadaṃ ṣoḍhā kriyamāṇaṃ granthavistarādhānamātraphalamidānīṃ 

p. 137) tātparyamātragatyā ucyate | tathā hi bhāvārthastāvat yatra yādṛk 
vivakṣitamakṣarārthamātram, sa eva ca vāhyatve'pi ātmajñānādipratipādanaparatayā 
mahābodharūpaḥ śivavākyāvisaṃvāditāmādadhāno gurvādyanavagītaḥ saṃpradāyārtha iti 
ucyate yathā ātmā jñātavyo mantavyaḥ iti sakṛdvibhāto'yamātmā iti ca | idaṃ ca dvividhamapi 
vyākhyānaṃ varṇādyātmāṇavopāyarūpaṃ, kathaṃ nāma ca atra sakṛdvibhātatvādeva 
sātatyena avabhāsamānaśivaikarūpasya ātmano jñātrekarūpatvāt jñātavyo'yamityādijñeyocita 
idantāparāmarśo bhavitumarhatīti sa eva

	svātantryāmuktamātmānaṃ svātantryādadvayātmanaḥ |
	prabhurīśādisaṃkalpairnirmāya vyavahārayet || (ī0 pra0 1 | 1 | 47)

ityādirītyā pramātrekarūpatāmaparityajannapi svātmani prameyatāmavabhāsayati yena evaṃ 
parāmṛśyatāmudvodumutsahate iti bhāvyatāmavalambamānaḥ śivo'yamiti gurvādibhedavibhinnasya 
śuddhātmano gocaratāmiyāditi āntaratayā nigarbhaśabdavyapadiṣṭo'yaṃ tṛtīyaṃ prakāraḥ | evam

	ātmaiva sarvabhāveṣu sphurannirvṛtacidvapuḥ |
	aniruddhechāprasaraḥ prasaraddṛkkriyaḥ śivaḥ || ( pra0 4 | 1 | 1)

iti , tathā

      svātmaiva sarvajantūnāmeka eva maheśvaraḥ |
	viśvarūpo'hamidamityakhaṇḍāmarśavṛṃhitaḥ || (4 | 1 | 1)

ityādiśrīmatpūrvagurvādiṣṭadṛṣṭyā evaṃvidha ātmā sarvāsu parimitātmasaṃvedanarūpāsu api 
daśāsu parāhaṃparāmarśamayaparaprakāśātmakasaṃvittimātrarūpatayā parāmṛśyāmānaḥ 
prayatnaṃ 

p. 138) vinā api  śiva eva paraṃ sahajamaiśvaryamāsādayediti ayaṃ

	kulamātmasvarūpaṃ tu - - - - - - - - - - - - - - - |

iti ātmarūpe kule bhāvāt kaulikaśabdavyapadeśyaścaturthaḥ iti | etadapi prakāradvayaṃ 
vikalpasaṃskriyārūpatayā śākto pāyātmakam | evamapi atraiva yathāyathaṃ 
paraprakarṣadhārādhirohāt

	tataḥ sphuṭatamodāratādrūpyaparivṛṃhitā |
	saṃvidabhyeti vimalāmavikalpasvarūpatām || (taṃ0 4|6)

ityādidṛśā sadya eva ātmasākṣātkāralakṣaṇamavikalpātmakaṃ pratyayaṃ yāyāditi 
ajñajanāsaṃvedyatvāt rahasyaśabdābhihitaḥ śāmbhavopāyātmā pañcamaḥ | evamiyato'pi 
bhāvanābalāt parāṃ kāṣṭhāmadhitiṣṭhataḥ sati api piṇḍe 
sadasadādisakalakalanākalaṅkonmuktasaṃvinmātramayīṃ siddhimāsādayetaḥ puraḥsphuradrūpamapi 
bhāvamaṇḍalaṃ

	teṣāmidaṃ samābhāti sarvato bhāvamaṇḍalam |
	puraḥsthameva saṃvittibhairavāgnivilāpitam || (taṃ0  2|35)

ityādyuktasvarūpaparamātmamayatāmāsthitaṃ sarvata eva ananyāpekṣamavabhāsate iti 
vyākhyātāyāḥ sthiteruparivartitvādanyātiśāyitayā ca mahāparamatattvārthaśabdaparāmṛṣṭaḥ 
ṣaṣṭha iti | yadāgamaḥ

      akṣarārtho hi bhāvārthaḥ kevalaḥ parameśvari | (yā0 hṛ0 2|16)
      saṃpradāyo mahābodharūpo gurumukhasthitaḥ ||
      nigarbho'pi mahādevi śivagurvātmagocaraḥ |
      kaulikaḥ svātmasaṃvittirātmasaṃvittipūrvakaḥ ||
      rahasyārtho mahāguptaḥ sadyapratyayakārakaḥ |
      mahāparamatattvārthaḥ paramātmavadāsthitaḥ ||

p. 139)	śivagurvātmasaṃvādarūpeṇārthāvabhāsakaḥ |
      nirastasarvasaṃkalpavikalpasthitipūrvakaḥ ||
      vidyāpīṭhanibaddheṣu saṃsthitaḥ piṇḍasiddhidaḥ |
      
iti | eṣāṃ ca prāyaśaḥ sarvatra evamasambhave'pi

      eka evahi bhāvārtho vāhyaśāstreṣu labhyate |
      śabdālaṅkārasāroktisaṃskāraracanātmakaḥ ||
      bhāvārthaḥ saṃpradāyaśca dvikaśāstreṣu vidyate |
      śivavāhyārthasaṃvāde mahāgurumukhasthitaḥ ||
      bhāvārthaḥ saṃpradāyārtho nigarbhārthakramānvitaḥ |
      vyākhyānaṃ trividhaṃ devi trikaśāstreṣu labhyate ||
      bhāvārthaḥ saṃpradāyārtho nigarbhārthaśca kaulikaḥ |
      tathā sarvarahasyārthastantrāṇāṃ pañcarūpiṇām ||
      bhāvārthaḥ saṃpradāyo'rtho nigarbhārthaśca kaulikaḥ |
      tathā sarvarahasyārtho mahātattvārtha evaca ||
      mahājñānārṇave dṛṣṭaṃ ṣaṭkaṃ tantre'tra pārvati |
      
ityādinā prādhānyābhiprāyeṇa tatra tatra naiyatyena avasthānamuktamiti 
alamanunmīlitamārgonmīlanacāpalena | tadevametat yathāsambhavaṃ tatra tatra svayameva abhyūhyam 
| yat punaranyaistaptasalavaṇakalājanyāyena tatra bhāvārthasaṃpradāyārthanigarbhārthāḥ 
sāntānikebhyaḥ pradarśyante, teṣu ca bhāvārthe prācyā asmatsamānakālīnāśca bahavo 
vistarataḥ kṛtaśramā iti ayaṃ samucitaprakriyāntaramātradiśā leśena prakāśyate 
ityuddeśānanuguṇaṃ pratijñāya kaulikārtharahasyārthatattvārthāstu 
sāmarasyamayasvātmasaṃvittinibandhanatayā sadyaḥpratyayakārakatayā vikalpavilayādhāyitvena ca 
bhagavatā pratipāditā ityaṃśena śabdaireva śabdān vyākhyāya ca mahāprabhubhiḥ 
keṣāṃcidapaścimajanmanāṃ 

p. 140) mukhaparamparayaiva rahasi prakāśanīyā iti kastatra lipiniveśamahāpratyavāye pravartate iti 
kvacidantarāntarā nirnibandhanametannāmamātraṃ ca abhihitaṃ, tat 
sarvamanavabodhapracchādanaparaṃ gurudhurandharasya bhāṅkāramātrameveti uparamyata iti śivam || 
33 ||

iti śrīrājānakaśrīmajjayarathaviracite śrīvāmakeśvarīmatavivaraṇe pañcamaḥ paṭalaḥ || 5 ||




uccityoccityaṃ niyataṃ kutaścana kutaścana |
yathāgurumukhaṃ kaiścidetadvyākṛtamalpakam || 1 ||

sarvataḥkaṣṭaduḥśliṣṭamliṣṭaśabdārthavartmanā |
kena tāvannimittena kairapyetadvivecitam || 2 ||

pitṛpitāmahakalpitakalpanā-

rasamahodadhimātrakadāśayā |
vivṛtamapyaparairna yathārthatāṃ
śrutabahiṣkṛtabuddhitayā gatam || 3 ||

ataḥ

	śrīmadaguruvarādevamavadhārya yathārthaḥ |

p. 141)	mayā jayarathenaivaṃ kiṃcidetatprapañcitam ||
	tatkṣaṇasyāvaghātavyamatra sadbhiravajñayā |
	avicāryaiva vaktavyo na doṣo na guṇaḥ punaḥ || 4 ||

iti rājānakaśrīmajjagarathaviracitaṃ śrīvāmakeśvarīmatavivaraṇaṃ saṃpūrṇam ||


###########   END OF FILE  #######