####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00121
Uniform title: yogaviṣaya
Secondary title: kaulajñānanirṇaya and some minor texts of the school of matsyendrānātha
Author : matsyendrānātha
Alternate name : matsyendra
Alternate name : macchagnapāda
Editor : Bagchi, P. C.

Description: 
The source of this e-text is Calcutta Sanskrit Series 3 - kaulajñānanirṇaya and some minor texts of the school of matsyendrānātha -  where it is bundled along with kaulajñānanirṇaya kulānandatantra, and jñānakārikā .  

The printed volume also contains introductory material and summaries in english.


Notes: 
Data-entered by Mike McGee

Revision 0:  Sept. 17, 2008

Publisher : Metropolitan Printing and Pub. House
Publication year : 1934
Publication city : Calcutta
Publication country : India
####################################################



guruśca guruputraśca ye cānye gurubāndhavāḥ.

anyoṣaṃca kramājjyeṣṭhāsteṣāṃ pādau namāmyaham || 1 ||

yadṛśī bhāvanātitaṃ taṃ guruṃ praṇamāmyaham.

bhrāntaśca bhramate loko nirbhrāntaḥ kṛtaniścayaḥ || 2 ||

tasya sidhyanti puruṣā ādināthe vyavasthitāḥ.

kulajātisamāyuktaḥ sucaritraguṇānvitaḥ || 3 ||

gurubhaktiyuto dhīmān sa śiṣya iti kathyate.

ākulenādināthena kejāpūpīnavāsinā || 4 ||

kṛpayaiva paraṃ tattvaṃ mīnanātho'pi bodhataḥ.

mīnanātho'pi sacchiṣyaṃ pratyuvāca samāhitaḥ || 5 ||

tvaṃ gurustvañca śiṣyaśca śiṣyasya ca gurorapi.

nānayorapi bhadre.ātra samasiddhiḥ prajāyate || 6 ||

umāṣaṅkaraputro'haṃ mīnanātho munīśvaraḥ.

kathayāmi paraṃ tattvaṃ kulākulavibodhakam || 7 ||

ādhāraḥ svādhiṣṭhānañca maṇipūrasanāhatam.

viśuddhirājñā kaulāni ṣaṭ cakrāṇi śubhāni ca || 8 ||

ādhāraśca gude tasthau svādhiṣṭhānañca liṅgake.

maṇipūraṃ nābhigataṃ hṛdaye cāpyanāhatam || 9 ||

viśuddhiḥ kaṇṭhadeśe ca ājñācakraṃ bhruvormukham.

cakrabhedamiti jñātvā cakrātītaṃ nirañjanam || 10 ||

iḍā vahati vāme ca piṅgalā vahati dakśiṇe.

idāpiṅgalayormadhye suṣumnā sukharūpiṇī || 11 ||

ādhāre liṅganābhau hṛdayasarasije tālumūle lalāṭe.

dve patra ṣoḍaśāre dvidaśadaśadale dvādaśārdhe catuṣke

nāsānte bālamadhye ḍaphakaṭhasahite kaṇṭhadeśe svarāṇām

haṃ kśaṃ tattvārthayuktaṃ sakaladalagataṃ varṇarūpaṃ namāmi || 12 ||

prāṇo'pānaḥ samānaśca udāno vyāna eva ca.

pañcakarmendrayayuktaḥ kriyāśaktisamudyatāḥ || 13 ||

nāgaḥ kūrmaśca kṛkaro devadatto dhanañjayaḥ.

pañcajñānendriyairyuktāḥ buddhiśaktisamanvitāḥ || 14 ||

pāvakaśśaktimadhyastho nābhicakre raviḥ sthitaḥ.

bandhamudrā kṛtāssarve nāsāgre tu sulocanam || 15 ||

akāro vahnideśe ca ukāro hṛdi saṃsthitaḥ.

makāraścaḥ bhruvormadhye vacanācca nibodhayet || 16 ||

brahmagranthiradhaṣkāre viṣnugranthirhṛdi sthitaḥ.

rudragranthirbhruvormadhye vimucyante trayastathā || 17 ||

akāro brahma ityāhuḥ ukāro viṣṇurucyate.

makāre ca śivaṃ sākśācchanteśśāntataraṃ param || 18 ||

kaṇṭhasaṃkocanaṃ kṛtvā dve nāḍyau stambhayedḥ dṛḍham.

rasanāpiḍyamānāntu ṣoḍaśaścordhvagāmini || 19 ||

trikūṭaṃ trihaṭhācaiva golhāṭaṃ śikharaṃ tathā.

triśikhaṃ vajramoṅkāra mūrdhvanākhaṃ bhruvormukham || 20 ||

ākuñcayedraviñcaiva paścānnāḍī pravartate.

bhede trihaṭhasaṃghaṭṭamubhayośśaśidarśanam || 21 ||

praṇavā gudanālā ca nalinī sarpiṇī tathā.

baṅkanāli kśayā śaurī kuṇdalī kundalāḥ smṛtāḥ || 22 ||

kuṇdalīṃ cālayet prāṇo bhedite śaśimaṇḍale.

sidhyanti vajragumbhāni nava dvārāṇi bandhayet || 23 ||

sumanaḥ pāvanārūḍhaḥ sa gāḍhaṃ nirguṇastathā.

brahmasthānaninādena śaṃkhinyāmṛtavarṣiṇī || 24 ||

ṣaṭcakramaṇḍaloddhāraṃ jñānadīpaṃ prakāśayet.

sarveṣāṃ snāpanaṃ dehe kriyate devatārcanam || 25 ||

candrāmṛtena cidrupamīśvaraṃ snāpya bhaktitaḥ.

manaḥpuṣpaṃ tathā deyamarcatetparamaṃ śivam || 26 ||

ātmarūpaṃ tamālokya jñānarūpaṃ nirāmayam.

dṛśyate deharūpeṇa sarvavyāpī nirañjanaḥ || 27 ||

haṃsa haṃsa pade vākyaṃ prāṇināṃ dehamāśritaḥ.

samprāṇāpānayorgranthirūpe ||  tyabhidhīyate || 28 ||

sahasramekañca yutaṃ ṣaṭchataṃ caiva sarvadā.

uccārapadato haṃsaḥ so'hamityabhidhīyate || 29 ||

pūrvabhāge matho liṅgaṃ śaṃkhinyāṃ caiva paścimam.

jyotirliṅgaṃ bhruvormadhye raktaśuklātmakaṃ śivam || 30 ||

pūrvapaścimadigbhāge vajradṇḍe vyavasthite.

dvau ṣaṣṭibhoginī sthānaṃ paśālliṅgaṃ prakāśayet || 31 ||

śītāśītaṃ paraṃ sthānaṃ medomajjābhipūritam.

sravati brahmaṇaḥ sthānāt siñcate bhuvanatrayam || 32 ||

sarvavyādhikriyākarma vātapittasamanvitam.

daśāṣṭadoṣarahitaṃ mīnanāthena kathyate || 33 ||

 || iti matsyendranāthaviracitaṃ bhaktisaṃ sampūrṇam  ||



###########   END OF FILE  #######