####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00075
Uniform title: śaivasiddhāntaparibhāṣā
Secondary title: śaivasiddhāntaśaivaparibhāsā
Author : śivāgrayogin

Description: 
This e-text is transcribed from the devanagari edition of the Oriental Research Institute (Sanskrit Series no. 90).


Notes: 
Transcribed by the staff of Muktabodha under the supervision of Mark S. G. Dyczkowski.

Revision 0:   November 11, 2005



Publisher : Oriental Research Institute, University of Madras
Publication year : 1950
Publication city : Madras
Publication country : India
####################################################



ābbreviations:

a				= adhyāya
ahaṃ 				= ahaṃkāra
kira				= kiraṇāgama
pa				=  paṭala
parāśaropa	 		= parāśaropapurāṇa
pa pa 				=  patipaṭala 
pā 		 		= pāda 
puṃ 				=  puṃstattva 
pau  				=  pauṣkarāgama 
pra 		 		=  pramāṇa 
bra 				= brahma
mataṅga 			= mataṅgāgama
mṛ				= mṛgendra 
vā co sū 	 		= 
vi 				= vidyā
śvetāśvatara		= śvetāśvataropaniṣad
ślo				= śloka
sarva 				= sarvajñānottara
si sā 				= siddhānta-sarāvali
sū 				= sūtra 

|| śrīḥ ||

|| śrī gurubhyo namaḥ ||

śaivaparibhāṣā

prathamaḥ paricchedaḥ

bande taṃ parameśānaṃ saccidānandalakṣaṇam |
sṛṣṭyādipañcakṛtyeśaṃ paśūnāṃ patimavyayam ||
gaṇeśaṃ ṣaṇmukhaṃ sāmbaṃ citsabheśaṃ guruṃ naman |
śivabhaktānumodāya śaivabhāṣāṃ vadāmyaham ||

1) iha khalu dharmārthakāmamokṣāravyacaturvidhapuruṣārthānāṃ 
madhye mokṣasya paramapuruṣārthatvāt tasya ca dīkṣādinā pāśāpagame 
paśau śivatvābhivyaktirūpasya patyananyatāsākṣātkāreṇaiva prāpyatvāt 
tādṛśasākṣātkārasyāpi pati-paśu-
pāśāravyapadārthatrayaparijñānasādhyatvāt tatparijñānasya ca 
pramāṇādhīnatvāt, prathamamuddeśa-lakṣaṇa parīkṣābhiḥ pramāṇaṃ 
nirūpyate ||

2) tatra nāmnā padārthānāṃ svarūpamātrakīrtanamuddeśaḥ, 
lakṣaṇamasādhāraṇo dharmaḥ, lakṣitasya lakṣaṇamupapadyate na veti vicāraḥ 
parīkṣā | tatra pramāṇānāmuddeśaḥ - pratyakṣānumānaśabdā iti trīṇi 
pramāṇāni iti | taduktaṃ - pratyakṣamānumānaṃ ca saha śabdena 
śāṅkare iti ||

3) tatra pramāṇasāmānya lakṣaṇaṃ tu 
saṃśayaviparyayasmṛtivyatiriktā pramāpara * *? - ātmacicchaktiriti taduktaṃ 
śrīmatpauṣkare -

saṃśayādivinirmuktā cicchaktirmānamucyate || iti ||
(pau pra pa ślo 4)

4) tatra saṃśayo nāma sādhāraṇadharmadarśanātkoṭidvayāvalambinī 
buddhiḥ, yathā - sthāṇurvā puruṣo vetyādi | viparyayastu atasmiṃstadbuddhiḥ, 
yathā - śuktikāyāṃ rajatamityādi | pūrvānubhavajanitasaṃskārajanyā 
buddhiḥ smṛtiḥ, yathā - kāmukasya kāminī sākṣātkārādi | 
etatttritayavyatiriktā cicchaktireva pramāṇam ||

taduktaṃ tatraiva -

dvāyalambā saṃśayo buddhiḥ samānākāradarśanāt |
viparyayo'nyathājñānamatadrūpapratiṣṭhitam ||
anubhūtārthaviṣayā matiḥ smṛtirihocyate |
ebhirvihīnā cicchaktiḥ pramāṇatvena saṃmatā || iti ||
(pau pra pa ślo 5-6)

5) iyaṃ ca cicchaktiḥ padārthaviṣayako bodha eva | tasyāśca phalaṃ 
svaviṣaye hānopādānādi | uktaṃ ca pauṣkare - 

paraṃ prameyaṃ hānādivyāpāraḥ phalamiṣyate || iti ||
(pau pra pa ślo 8)	

tatrātivyāptyādidoṣā na santīti tatraiva pratipāditam |

atrāvyāptyādidoṣāṇāṃ na kadācana saṃbhavaḥ |
pratyakṣādipramāṇeṣu vyāptyā nāvyāptidūṣaṇam ||
nātivyāptiśca meyeṣu nānābhāveṣvavartanāt |
nānyathāvyāptirapyasti pramāṇaṃ cettadīdṛśam ||
pramāṇakathanaṃ tena samīcīnamudāhṛtam || iti ||
(pau pra pa ślo 9-11)

6) tathāgatāstu pramāṇamitthaṃ lakṣayanti -

pramāṇamavisaṃvādijñānamarthakriyāsthitiḥ |
avisaṃvādanaṃ-------------------------- || iti ||

	tadasat; bhūtabhaviṣyadviṣayeṣvanumāneṣvavyāpteḥ | na 
hyasatorbhūtabhaviṣyatoḥ kācidarthakriyāsti | 
smṛtijñānasavikalpakajñānayoścātivyāpteḥ | na hi tataḥ pravṛto 
visaṃvādyate kścit | na ceṣṭāpattiḥ | teṣāṃ mate śuddhavastuviṣayakatvena 
nirvikalpasyaiva pramāṇatvāt ||

7) pabhākarāstu -

anubhūtiḥ pramāṇaṃ sā smṛteranyā smṛtiḥ punaḥ |
pūrvavijñānasaṃskāramātrajaṃ jñānamucyate ||

iti varṇayanti | tadapi naḥ tatra pūrvaṃ padārthasmaraṇapūrvakasya 
vedavākyārthajñānasya svataḥ pramāṇyaṃ prasādhyedānīṃ 
smṛtivyavacchedenānubhūteḥ pramāṇatvaṃ vadatastava pūrvāparavirodhāt | 
kiṃ ca smṛtijñānānāmātmasvātmāṃśayorabhimataṃ prāmāṇyaṃ na 
sidhyet smṛtijñānasya smṛtivyatiriktatvāsambhavenānubhūtitvābhāvāt ||

8) anadhigatatathābhūtārthaniścāyakaṃ pramāṇamiti bhāṭṭāḥ | 
yadāhuḥ -

tasmāddṛḍhaṃ yadutpannaṃ na ca saṃvādamṛcchati |
jñānāntareṇa vijñānaṃ tatpramāṇaṃ pratīyatām || iti ||
(ślo vā co sū ślo 40)

	tadapi na cārutaram; yādṛcchikasaṃvādināṃ duṣṭendriyāṇāṃ 
bāṣpādiviṣayadhūmādiliṅgavibhramāṇāṃ 
bhrāntavipralambhakavākyānāṃ ca prāmāṇyāpatteḥ, 
sakalavedāprāmāṇyaprasaṅgācca | yatra kvacana janmani vedārthasya 
sarvairadhigatatvenānadhigatapūrvatvābhāvāt | kiṃcāsminpakṣe 
dhārāvāhikadvitīyādijñānānāṃ prāmāṇyaṃ na syāt ||

9) naiyāyikāstu - sādhanāśrayayoranyatarattve sati pramāvyāptaṃ 
pramāṇamiti kathayanti | yathāhuḥ -

tatra pramāṇaṃ pramayā vyāptaṃ pramitisādhanam |
pramāśrayo vā tadvyāpto yathārthānubhavaḥ pramā || iti ||

	tadapi na ; karaṇānāṃ prameyatvena pramāṇatvābhāvāt, prāmāṇye 
vā dīpādīnāmapi tathātvaprasaṅgāt | taduktaṃ śrīpauṣkare -

nanu na syātkuto mānaṃ yattatpramitisādhanam |
tanna dīpadṛgādīnāṃ pramāṇatvaprasaṅgataḥ |
yatpramāṇaṃ na tanmeyaṃ meyābhāvaḥ punaḥ sthitaḥ ||
mātyānumīyate tatra śabdādirviṣayatvataḥ |
yanmeyaṃ na hi tanmānaṃ yato mānena mīyate ||
paśyāmīti dṛśā loke prasiddhirupakārataḥ |
na kasyāpi padārthasya yadvinā bhavati pramā ||
tadeva mānameṣṭavyaṃ cakṣurādi na tādṛśam || iti || 
(pau pra pa ślo 11-14)

10) cakṣurādīndriyāṇāṃ svasvaviṣayavyatiriktaviṣayagrāhakatvā-
yogāt sarvagrāhakaṃ kiñcitpramāṇameṣṭavyam | tacca cicchaktireva | 
taduktam -

na cakṣuḥ śabdasaṃvitau na śrotraṃ rūpavedane |
sarvatra grāhikā saṃvitsaiva mānamato matam || iti ||
(pau pra pa ślo 15)

11) nanu tarhi sarveṣāṃ padārthānāṃ 
siddhyasiddhyorbuddhyanvayavyatirekānuvidhāyitvāt, tasyāśca 
sarvaviṣayagrāhakatvāt buddhirevātra pramāṇamiti cet, na; 
tasyāścakṣarādivatprākṛtatvāviśeṣeṇa cidrūpatvābhāvāt, 
sukhaduḥkhādirūpahetunā tasyā vedyatvācca | tasmādbuddherniyamena 
pramāṇatvaṃ nāsti uktañca -

yatsiddhau ca iyaṃ siddhā yadasiddhau na kiṃcana |
buddhiḥ sarvāntimatvena kasmānmānaṃ na ceṣyate ||
prākṛtatvāviśeṣeṇa dṛgāderaviśeṣataḥ |
asaṃvidātmakatvena na hi buddheḥ pramāṇatā ||
buddhiśca vedyate kiṃca sukhaduḥkhādirūpataḥ |
pramāṇaikāntatā tena buddherapi na saṃmatā || iti ||
(pau pra pa ślo 16-18)

12) nanu pramātrādiprameyāntasāmagryāṃ satyāmeva pramotpatteḥ 
asatyāṃ ca tadanutpatteḥ pramāsāmagryeva pramāṇamiti cet, na; tathātve 
pramātṛprameyādivyavahārocchedaprasaṅgāt, pramātrādivyatirekeṇa 
sāmagryabhāvāt, yadyato vyatiriktaṃ tattato bhinnamiti vyāptivyākopācca | 
tasmāt saṃśayādivinirmuktā cicchaktireva pramāṇamiti siddham | tathā 
coktam -

nanu prameyasaṃsiddhau sāmagrī kena neṣyate | 
pramātrādighaṭānteṣu satsveva ghaṭaniścayāt ||
tanna pramātṛmeyādivyavahāravilopataḥ |
mātṛmeyapramāṇānāṃ tadantarbhāvataḥ sthiteḥ || 
teṣāṃ tu vyatirekeṇa sāmagrī na ca dṛśyate |
yadyato vyatiriktaṃ tattato bhinnaṃ svarūpataḥ ||
saṃśayādivibhinnā tu cicchaktirmānamiṣyatām || iti ||
(pau pra pa ślo 19-22)

13) nanvātmacicchaktiḥ pramāṇaṃ cettvanmate'pi caikasyaiva 
pramāṇatvapramātṛtvaprasaṅgarūpadoṣo'stīti cet, na; avidyārāgādinā 
kaluṣitā viṣayābhimukhī cicchaktiḥ pramāṇameva, na pramātā | akaluṣitā 
ātmābhimukhī cicchaktiḥ pramātaiva, na pramāṇam | taduktaṃ tatraiva -

cicchaktiśca parāpekṣo bodha eva na cāparaḥ |
na tasyābhimukhaṃ jñānaṃ mātā mānaṃ paronmukham || iti ||
(pau pra pa ślo 7)

14) tatra prathamaṃ pratyakṣalakṣaṇamucyate | sākṣātkāripramā 
pratyakṣam | tacca dvividham, nirvikalpakasavikalpakabhedāt | nirvikalpakaṃ 
nāmajātyādiyojanāhīnaṃ vastumātrāvagāhi jñānam | savikalpakaṃ tu 
nāmajātyādiyojanātmakaṃ viśiṣṭajñānam | uktaṃ ca tatraiva -

vikalpayogātsā śaktirekāpi dvividhocyate |
vastusvarūpamātrasya grahaṇaṃ nirvikalpakam ||
nāmajātyādisaṃbandhasahitaṃ savikalpakam || iti ||
(pau pra pa ślo 27-28)

15) tacca pratyakṣaṃ prakārāntareṇa trividham, indriyapratyakṣaṃ, 
mānasapratyakṣaṃ indriyāntaḥkaraṇanirapekṣacitpratyakṣaṃ ceti | taduktam -

	pratyakṣaṃ trividhaṃ proktamakṣamānasacidvaśāt || iti ||

pauṣkare ca,
 
	etaccendriyasāpekṣaṃ nirapekṣaṃ tathaiva ca |
antaḥ karaṇasāpekṣamiti trividhamiṣyate || iti ||
(pau pra pa ślo 28)

16) tatrendriyāntaḥkaraṇanirapekṣaṃ nirastabandhayā cicchaktyā 
ātmano nityasaṃbandhājjāyamānaṃ svātmāparokṣajñānam | taduktam -

tatrendriyānapekṣaṃ ca sarvathā tyaktabandhayā |
cicchaktyānantyayogācca yogaḥ svābhāviko mataḥ || iti ||
(pau pra pa ślo 29)

	antaḥkaraṇasāpekṣaṃ tu manasā bāhyendriyopanītārthānubhavaḥ | 
taduktaṃ tatraiva -

antaḥkaraṇasāpekṣaṃ bāhyendriyacayena tu |
antaḥkaraṇasāpekṣaṃ cicchakterdhyeyasaṅgatiḥ || iti ||
(pau pra pa ślo 31)

	indriyasāpekṣamapi ācchādakamalanivṛttaye indriyāpekṣayā 
cicchaktyendriyadvārārthavīkṣaṇam | tadapi tatraiva -

anyaccendriyasāpekṣaṃ syācchādananivṛttaye |
indriyāpekṣayā śaktyā taddvāreṇārthavīkṣaṇam || iti || 
(pau pra pa ślo 30)

17) nanu cicchakterindriyadvārārthasaṃbandhaḥ pratyakṣamityuktam, 
tasyāḥ svaniṣṭhāyā viṣayābhimukhyābhāvāt kiṃcitkaraṇaṃ vinā tasyā 
arthasaṃbandhaḥ kathamiti cet, satyam; malāvaraṇavaśātsvaniṣṭhāpi sā 
kalayā vyañjitā avidyayā viṣayābhimukhīkṛtā rāgeṇa rañjitā ca satī 
antaḥkaraṇabāhyendriyadvārā ātmabhogāya bāhyārthe pravartate |

18) na tu paroktarītyā indriyārthasannikarṣamātrajanyajñānaṃ 
pratyakṣam; cicchaktisaṃyogavihīnasya tasyākiṃcitkaratvāt | taduktam -

cicchakterarthasaṃyogo'dhyakṣamindriyamārgataḥ |
svayameva hi cicchaktiḥ padārthābhimukhī na tu ||
kathaṃ padārthasaṃbandhastasyāḥ karaṇamantarā |
satyaṃ malāvṛtatvena svaniṣṭhaiva pratiṣṭhitā ||
kalādikaraṇairyuktā yujyate'rthairyadā kvacit |
tadā pratyakṣamityuktamakṣamarthe pravartate ||
na cendriyārthamātrasya saṃyogo'dhyakṣamiṣyate |
citsaṃyogavihīnānāmakiṃcitkaratā yataḥ || iti ||
(pau pra pa ślo 23-26)

svāyaṃbhuve ca -

kalodvalitacaitanyo'vidyādarśitagocaraḥ |
rāgeṇa rañjitaścāpi buddhyādikaraṇairyutaḥ || iti ||

19) tatrākṣasaṃbandhaḥ ṣaḍvidhaḥ, saṃyogaḥ, saṃyuktasamavāyaḥ, 
saṃyuktasamavetasamavāyaḥ, samavāyaḥ, samavetasamavāyaḥ, 
viśeṣaṇaviśeṣyabhāvaśceti | taduktaṃ pauṣkare -

akṣamātreṇa saṃbandhaḥ ṣaḍvidhoṣdhyakṣasaṃjñitaḥ ||
ghaṭādidravyavijñānaṃ cakṣussaṃyogamātrataḥ |
saṃyuktasamavāyāttadguṇasāmānyayormatiḥ ||
saṃyuktasamavetārthasamavāyādguṇatvadhīḥ |
śabdasya grahaṇaṃ śrotrasamavetatayā sthitam ||
śabdatvaṃ samavetārthasamavāyātpratīyate |
viśeṣaṇatayābhāvasamavāyāviti sthitiḥ ||
viśeṣyatvena vābhāvasamavāyamatiḥ sthitā | iti ||
(pau pra pa ślo 32-36)

anyatrāpi -

ghaṭatannīlanīlatvaśabdaśabdatvajātayaḥ |
abhāvasamavāyau ca grāhyāḥ saṃbandhaṣaṭkataḥ || iti ||

iti pratyakṣapramāṇam ||

20) athānumānaṃ nirūpyate | vyāptiniścayena 
parokṣārthapramitiranumānam | śabdajñānavyāvattaye vyāptiniścayeneti 
padam | saṃśayottarapratyakṣe'tivyāptivāraṇāya parokṣagrahaṇam | 
atrānumitiranumānamiti bhāvavyutpattyā vyāptiviśiṣṭapakṣadharmatājñā-
najanyaparokṣārthaviṣayakabuddhivṛttyavacchinnacicchakterevānumānatvam | 
tatkaraṇasya liṅgaparāmarśasya tu meyatvena nānumānatvam | uktaṃ ca -

anumānaṃ dṛḍhavyāptyā parokṣārthāvabodhakam || iti || 
(pau pra pa ślo 37)

21) tatra vyāptirnāma sādhyasādhanayoranaupādhikaḥ sambandhaḥ | 
tathā coktam -

sādhanasya svataḥ sādhyenānvayo vyāptirucyate || iti || 
(pau pra pa ślo 41)

22) upādhiśca sādhanāvyāpakatve sati sādhyavyāpakatvam | yathā 
vahninā dhūme sādhye ārdrendhanasaṃyogādiḥ | sa hi sādhyasyadhūmasya 
vyāpakaḥ, dhūmavati sarvatra vṛtteḥ sādhanasya vahneravyāpakaḥ, 
vahnimatyayogolakādāvavṛtteḥ | ayaṃ ca niścitopādhiḥ | śaṅkitopādhistu 
mitrātanayatvena śyāmatve sādhye'dṛṣṭopādhiḥ | iyaṃ ca vyāptirdvividhā, 
anvayavyatirekabhedāt | sāmānyataḥ sādhyasādhanayoḥ 
saṃbandho'nvayavyāptiḥ, yatra dhūmastatrāgniryathā mahānasa iti | 
tayorvyatirekamukhena saṃbandho vyatirekavyāptiḥ, yathā - yatrāgnirnāsti 
tatra dhūmo'pi nāsti yathā mahāhrada iti | taduktaṃ tatraiva -

sā ca vyāptirdvidhā jñeyā vyatirekānvayātmikā ||
sāmānyamukhato jñeyā sānvayavyāptirucyate |
sādhyasādhanayorvyāptirabhāvamukhato'parā || iti ||
(pau pra pa ślo 41-42)

anyatra ca -

vyāpyavyāpakabhāvo hi bhāvayoryādṛgiṣyate |
tayorabhāvayostasmādviparītaḥ pratīyate || iti ||

23) idaṃ cānumānaṃ dvividham, svārthaṃ parārthaṃ ceti | svārthaṃ 
svapratipattihetuḥ | tacca mahānasādau vahnidhūmayoḥ 
vyāptigrahaṇānantaraṃ parvatādau 
vyāpyaliṅgadarśanādvanhyādyanumānam | yattu svayaṃ 
dhūmādagnimanumāya paraṃ bodhayitu pañcāvayavavākyaṃ prayuṅkte 
tatparārthānumānam | te cāvayavāḥ 
pratijñāhetūdāharaṇopanayanigamanabhedātpañca | tatra parvato'gnimāniti 
pratijñā, dhūmavattvāditi hetuḥ | yo yo dhūmavān so'gnimān yathā 
mahānasa ityudāharaṇam | tathā dhūmavāṃścāyamityupanayaḥ | 
tasmādvahnimāneveti nigamanam | evaṃ 
pañcarūpopapannādvākyātparo'pyagniṃ pratipadyate | 
tatparārthānumānam | tathā coktaṃ śrīmatpauṣkare -

tacceha pañcāvayavaṃ pratijñā hetureva ca ||
dṛṣṭāntopanayāvetau nigamaścātha pañcamaḥ |
iṣṭārthoktiḥ pratijñā tu hetustadvyāptimadvacaḥ ||
dṛṣṭānto dvividhodyukto hetustadvatparīkṣyate |
dṛṣṭāntapakṣayorvyāptiprastāra upanayo bhavet ||
punaḥ pratijñāniyamo nigamaḥ syātsahetukaḥ | iti ||
(pau pra pa ślo 37-40)

24) sa ca heturdvividhaḥ, dṛṣṭasādhanasāmānyatodṛṣṭasādhanabhedāt 
| tatra ādyastvakṣayogyapadārthānumāpakaḥ | yathā - kulālaṃ ghaṭakriyāṃ 
ca kutracit dṛṣṭvā anyatrāpi ghaṭadarśanāt kulālena nirmito ghaṭa iti | 
dvitīyastu pratyakṣāyogyārthānumāpakaḥ | yathā - 
parakīyajñānānumāpakaṃ paravākyam | tatra hi sādhyaṃ 
parakīyajñānaṃ na pratyakṣayogyam | kintu 
sādhyatāvacchedakajñānatvāvacchinnam | tajjātīyamātmīyajñānaṃ 
pratyakṣayogyam | ataḥ sāmānyatodṛṣṭameva | tathā prapañcakṛtyaṃ 
tatkartāraṃ caikatra adṛṣṭvā kāryatvasāmānyāt 
paśupāśajñānāgocarajagatkartranumāpakaṃ sāmānyatodṛṣṭasādhanam | 
evaṃ paśupāśamāyākarmādīnāmapyūhyam | taduktam -

dṛṣṭaṃ sāmānyatodṛṣṭamiti tatsādhanaṃ dvidhā |
tatrādyamakṣayogyasya padārthasyānumāpakam ||
anyatsato'pyadṛṣṭasya padārthasyānumāpakam | iti ||
(pau pra pa ślo 43-44)

25)  yatra sādhyaṃ vā sādhyajātīyaṃ vā na pratyakṣayogyaṃ sa 
śabdamātrajñātasādhyakaḥ paro'pi hetuḥ | yathā pūrvapuṇyānumāpaka 
idānīṃtano bhogaviśeṣaḥ | sa ca sādhyaḥ puṇyādiḥ śabdādṛte na jñāyata 
iti śabdamātrajñātaḥ | sa ca hetuḥ punastrividhaḥ, anvayavyatireki-
kevalānvayi-kevalavyatirekibhedāt |

26) tatra anvayavyatirekī hetuḥ pañcarūpopapannaḥ, tāni ca rūpāṇi 
pakṣadharmatvaṃ, sapakṣe sattvaṃ, vipakṣādvyāvṛttiḥ, abādhitaviṣayatvaṃ, 
asatpratipakṣatvaṃ ceti | tatra sandigdhasādhyadharmā pakṣaḥ | 
niścitasādhyavān sapakṣaḥ | niścitasādhyadharmābhāvavānvipakṣaḥ | tatra 
pakṣadharmatvaṃ hetoḥ pakṣe parvatādau vartanam | sapakṣe satvaṃ tu sapakṣe 
mahānasādau vartanam | vipakṣādvyāvṛttiḥ vipakṣe mahāhradādau 
hetoravartanam | abādhitaviṣayatvaṃ pakṣe parvatādau vahnyādeḥ sādhyasya 
pramāṇāntareṇa bādhavirahaḥ | asatpratipakṣatvaṃ tu 
sādhyaviparītasādhyasādhakahetvantaravirahaḥ | evaṃ pañcarūpopapanna 
evānvayavyatirekī sādhyasādhakaḥ ||

27) vipakṣaśūnyaḥ kevalānvayī | sapakṣaśūnyaḥ kevalavyatirekī | 
tāvubhau catūrūpopapannāveva svasādhyaṃ sādhayataḥ | 
krameṇaiṣāmudāharaṇam - parvato vahnimān, dhūmavatvāt, yathā 
mahānasaḥ | viśvaṃ kāryaṃ kartṛsāpekṣaṃ, kāryatvāt, 
kulālasāpekṣamṛdvat | sarvaṃ kāryaṃ sadeva, kriyamāṇatvāt, yannaivaṃ 
tannaivaṃ yathā śaśaśṛṅgamiti ||

28) tathā coktam -

anvayavyatirekīti kevalavyatireki ca |
kevalānvayirūpeṇa krameṇa parilakṣyate ||
pakṣadharmaḥ sapakṣe san vyāvṛttaśca vipakṣataḥ |
abādho'satpratīpakṣo vyatirekānvayātmakaḥ ||
sādhyadharmayutaḥ pakṣaḥ sapakṣastatsadharmayuk |
tadvidharmā vipakṣaḥ syādbādho mānāntarodbhavaḥ ||
sādhye dvayostrirūapatvaṃ tena jñānādvipakṣatā |
nirvipakṣo'nvayī heturnissapakṣastathāparaḥ ||
sāgnirdeśaḥ sadhūmatvādanyo rasavatī yathā |
kenāpyadhyāsitaṃ viśvaṃ kāryaṃ syādvastubhāvataḥ ||
yathā kulālasāpekṣā mṛdityeṣo'nvayī punaḥ |
sadevotpadyate kāryaṃ kriyamāṇatvahetutaḥ ||
asanna pūrvaṃ kriyate dharmāṃśaḥ śaśaśṛṅgavat | iti ||
(pau pra pa ślo 44-50)

	29) uktānāṃ pakṣadharmatvādirūpāṇāṃ madhye ekenāpi rūpeṇa 
hīnā ahetavaḥ katipayarūpayogāddhetuvadavabhāsamānā hetvābhāsāḥ | te 
cāsiddhaviruddhānaikāntikānadhyavasitakālātyayāpadiṣṭabhedātpañca | 
tatrāsiddhalakṣaṇam -

vyāpyasya pakṣadharmatvapratītiḥ siddhirucyate |
asiddhistadabhāvaḥ syāddhetustadvānanekadhā || iti ||

	30) sa ca svarūpāsiddho bhāgāsiddha āśrayāsiddho viśeṣaṇāsiddho 
viśeṣyāsiddha ubhayāsiddho hetvajñānāsiddho'dhikaraṇājñānāsiddho-
'nyatarāsiddho vyāpyatvāsiddha iti daśavidhaḥ | vyāpyatvāsiddho'pi 
dvividhaḥ | eko vyāptigrāhakapramāṇābhāvāt, aparastūpādhisadbhāvāt | 
ata āhatyaikādaśāsiddhāḥ | tatra svarūpāsiddho yathā - ghaṭādayaḥ 
paramāṇurūpā bhavitumarhanti, nityatvāt, pāñcarātramate ātmavaditi | atra 
ubhayavādisaṃmate anityaghaṭe nityatvahetuḥ svarūpeṇāsiddhaḥ | yathā vā - 
nityaḥ śabdaḥ, cākṣaṣatvāditi | atra cākṣaṣatvaṃ śabde pakṣe'siddham || 
bhāgāsiddho yathā - anityau jīvadehau, kāryatvāt ghaṭavaditi | atra kāryatvaṃ 
pakṣīkṛtayorjīvadehayormadhye jīve'siddham | āśrayāsiddho yathā - 
gaganāravindaṃ surabhi, aravindatvāt, sarojāravindavaditi | atra 
gaganāravindāśrayo na saṃbhavati | viśeṣaṇāsiddho yathā - śabdo 
nityaścākṣaṣatve sati guṇatvāt, rūpavaditi | atra hetau 
cākṣuṣatvaviśeṣaṇamasiddham || viśeṣyāsiddho yathā - śabdo nityaḥ, 
prameyatve sati dravyatvāt, ghaṭavaditi | atra hetau viśeṣyabhūtasya 
dravyatvasyāsiddhiḥ | ubhayāsiddho yathā - nityo ghaṭaḥ, guṇatve 
satyatīndriyatvāditi | atra hetau viśeṣaṇabhūtaṃ guṇatvaṃ 
viśeṣyabhūtamatīndriyatvamapyasiddham | hetvajñānāsiddho yathā - 
devadatto bahudhanaḥ, taddhetubhūtādṛṣṭāśrayatvāt, yajñadattavaditi | 
atrādṛṣṭāśrayatvaheturasmābhiradṛṣṭa ityajñānāddheturajñānāsiddhaḥ | 
adhikaraṇājñānāsiddho yathā - idānīmihākāśe paramāṇuḥ kadācit 
dravyārambhakaḥ, paramāṇutvāt, ghaṭārambhakaparamāṇuvaditi | 
atrāśrayasya 
ākāśādhikaraṇakaparamāṇorajñānādāśrayājñānāsiddho hetuḥ | 
anyatarāsiddho yathā - anityaḥ śabdaḥ, kṛtakatvāt, ghaṭavaditi | 
atrānyatarasminmīmāṃsakamate kṛtakatvasya 
hetorasiddhatvādayamanyatarāsiddho hetuḥ | vyāpyatvāsiddho yathā - sarvaṃ 
kṣaṇikaṃ, satvāt, jalabudbadavaditi | atra 
satvakṣaṇikatvayorvyāptigrāhakapramāṇābhāvādayamādyo 
vyāpyatvāsiddho hetuḥ | aupādhikavyāpyatvāsiddho yathā - garbhasthaḥ 
śyāmaḥ, mitrātanayatvāt, prācīnamitrātanayavaditi | atra śyāmatve sādhye 
śākādyāhārapariṇatibhedasyaivopādhervidyamānatvādaupādhikavyāpya-
tvāsiddho'yaṃ hetuḥ ||

31) atha viruddhaḥ | tallakṣaṇaṃ tu sādhyaviparyayavyāptatvam, 
sādhanaviparyayavyāptasādhyakatvaṃ vā | yathā - nityaḥ śabdaḥ 
kāryatvāt, vyomavaditi | atra kāryatvahetuḥ svasādhyaviruddhenānityatvena 
vyāptaḥ | sādhanaviparyayavyāptasādhyakastu yathā - anityaṃ manaḥ, 
cetanatvāt, ātmavaditi | atrānityatvarūpaṃ sādhyaṃ 
svasādhanaviparyayeṇācetanatvena vyāptam ||

32) anaikāntikaḥ savyabhicāro hetuḥ | sa ca dvividhaḥ | 
sādhāraṇānaikāntiko'sādhāraṇānaikāntikaśceti | tatra prathamo yathā - 
ātmā nityaḥ, prameyatvāditi | atra prameyatvahetuḥ pakṣa ātmani sapakṣe 
māyāyāṃ vipakṣe ghaṭādau ca vartate | dvitīyo yathā - bhūrnityā, 
gandhavattvāditi | atra gandhavattvahetuḥ sapakṣādātmanaḥ 
vipakṣājjalādeśca vyāvṛttaḥ pakṣamātre vartate ||

33) sādhyāniścāyako heturanadhyavasitaḥ | yathā - viśvaṃ santataṃ 
vartate, vastutvāditi | atra vastutvahetuḥ svasādhyanityavartanaṃ na 
niścinotītyanadhyavasitaḥ | balavatpramāṇāntarabādhito hetuḥ kālātītaḥ | sa 
eva bādhita viṣaya ityucyate | sa pramāṇānāṃ bhedātpañcadhā bhavati | tatra 
pratyakṣabādho yathā - agniranuṣṇaḥ, padārthatvāditi | anumānabādho 
yathā - viśvaṃ kāryaṃ nirupādānakaṃ, āgantukatvāditi | āgamabādho 
yathā - yāgādayaḥ svargasādhakā na bhavanti, kriyātvāt, vyarthakriyāvaditi | 
arthāpattibādho yathā - śatavarṣajīvī devadatto gṛhe'san bahirapi nāsti, 
pratyakṣeṇānupalabhyamānatvāditi | tathā coktaṃ śrīmatpauṣkare -

hetūnāṃ dūṣaṇānyatra pañcoktāni śivāgame |
asiddhiḥ prathamo hetoḥ pakṣavṛtteraniścaye ||
nityatvādaṇavo heturityasiddhiḥ svarūpataḥ |
viśeṣaṇaviśeṣyāderasiddhyā tattadātmikā ||
vartamāno viruddhaḥ syāddhetuḥ pakṣavipakṣayoḥ |
vyāpako'vyāpako deśānavacchinnatvahetutaḥ ||
pakṣāditritaye vartamāno'naikāntiko bhavet |
ātmā nityaḥ prameyatvādityatrodāhṛto dvijāḥ ||
sādhyāprayojakaḥ pakṣa evānadhyavasāyikaḥ |
santatyā vartate viśvaṃ vastutvādityudāhṛtaḥ ||
kālātītastu sādhyasya pakṣe mānavirodhataḥ |
nirupādānakaṃ viśvaṃ kāryamāgantukatvataḥ || iti || 
(pau pra pa ślo 51-56)

34) ye tvanadhyavasitamanaikāntike'ntarbhāvayanti te prakaraṇasamaṃ 
pañcama manyante | tallakṣaṇaṃ tu yasya sādhyābhāvasādhakaḥ samānabalo 
heturasti sa satpratipakṣaḥ prakaraṇasama iti cocyate, yathā śabdo nityaḥ, 
bādhakapramāṇarahitatvāt | sa cānityaḥ, sādhakapramāṇarahitatvāditi | 
tathā coktaṃ śrīmatpauṣkare - abādho'satpratipakṣaḥ iti | 
asatpratipakṣatvaṃ hetorguṇaṃ bruvatā satpratipakṣasya hetvābhāsatvaṃ 
śivenaiva sūcitam | pakṣābhāsaścaturvidhaḥ, kutracitpakṣābhāvāt, 
kutracitpakṣadharmatvābhāvāt, 
kutracitpakṣapakṣadharmatvayorubhayorabhāvāt, kutracidubhayoḥ sattve'pi 
vyāptyabhāvāditi |

35) atra krameṇodāharaṇāni - khapuṣpaṃ surabhi, puṣpatvāditi | atra 
pakṣa eva nāsti | anitya ātmā, aṇurūpatvāditi | atrāṇurūpatve 
pakṣadharmatā nāsti | śaśaśṛṅgaṃ sugandhi, pārthivatvāditi | atra pakṣaḥ 
pakṣadharmatā cobhāvapi na staḥ | pṛthvī nityā, cākṣuṣatvāditi | atra 
pakṣapakṣadharmatvayoḥ sattve'pi sādhyasādhanayorvyāptirnāsti |

36) ete ca pakṣābhāsā āśrayāsiddhasvarūpāsiddhavyāpyatvā-
siddheṣvantarbhavantīti neha pṛthaglakṣitāḥ | dṛṣṭāntābhāsāstu - 
arthadoṣāduktidoṣācca dvividhāḥ | tatrārthadoṣaḥ sādharmyadṛṣṭāntasya 
sādhyavaikalyaṃ sādhanavaikalyamubhayavaikalyaṃ svarūpavaikalyaṃ ceti 
caturvidhaḥ | vaidharmyadṛṣṭāntasya tu sādhyābhāvavaikalyaṃ 
sādhanābhāvavaikalyaṃ svarūpavaikalyaṃ ceti caturvidhaḥ ||

37) yathā - viśvaṃ kāryaṃ, pratyakṣatvāt, anvayena ātmavaditi, 
tatraiva adṛṣṭavaditi māyāvaditi khapu'pavaditi ca | yathā vā - vimataṃ 
kāryaṃ, apratyakṣatvāt, vyatirekeṇātmavat iti | tatraivādṛṣṭavaditi 
māyāvaditi khapuṣpavaditi ca uktidoṣo'pyanvayadṛṣṭāntasya ca 
vyatirekadṛṣṭāntasya ca vyatyayenoktiḥ, 
anvayavyatirekavyāptyorvyatyayenoktiḥ, tatraiva 
sādhyasādhanayorvyatyayenoktiḥ, sādhyasya sādhanatayoktiḥ, sādhyatayā 
sādhanasyoktiścetyanvayānumāne  pañcavidhaḥ | evaṃ vyatirekānumāne 
ceti daśavidhaḥ | yathā parvato vahnimān, dhūmādityanvayaprayoge 
anvayavyāptimuktvā yathā mahāhrada iti, tatraiva 
vyatirekavyāptipradarśanānantaraṃ yathā mahānasa iti, tatraivānvayavyāptau 
yatra yatra vahnistatra tatra dhūmo yathā mahānasa iti, tatraiva parvato 
dhūmavān vahnimattvāditi sādhyaviparyayasya sādhanaviparyayasya 
sādhanaviparyayasya ca dṛṣṭāntaḥ | evaṃ 
śabdārthadoṣavaśādanvayavyatirekavaśāccāṣṭādaśa dṛṣṭāntābhāsāḥ | 
ete dṛṣṭāntābhāsāḥ tarkaśāstre'nirūpitatvādatra kathaṃ nirūpyanta iti 
cet, yathāyathamasidhyādiṣu hetvābhāseṣvantarbhāvayituṃ śakyā iti tatra 
pṛthaṅna nirdiṣṭāḥ | atra tu śaivāgame pṛthaṅnirdiṣṭatvādbhedena kīrtitāḥ 
| taduktaṃ śrīmatpauṣkare -

anuṣṇo vahnirityādipratijñāte sahetakam |
pañcānāmanumānasyāvayavānāṃ tu pūrvayoḥ ||
vaiparītyaṃ samuddiṣṭaṃ dṛṣṭāntasyādhunocyate |
nitya ātmā vibhutvena yathākāśamitīrite ||
dṛṣṭāntaḥ sādhyavikalaḥ sādhane ca tathā bhavet | ityādi || 
(pau pra pa ślo 58-60)

38) etatprasaṅgācchalajātinigrahasthānāni nirūpyante | tatra 
cchalalakṣaṇam -

kaṃcidarthamabhipretya prayukte vacane punaḥ |
aniṣṭamarthamāropya tanniṣedhaścchalaṃ matam || iti ||

tacca trividham | vākchalaṃ sāmānyacchalamupacāracchalaṃ ceti | tatra 
vākcchalalakṣaṇam -

abhidhāvaiparītyena kalpitārthasya bādhanam || iti ||

tadyathā - āḍhyo'yaṃ, navakambalatvāditi prayoge nūtanārthatayā 
prayuktasya navaśabdasya saṃkhyāparatvamāropya niṣedhaḥ | kuto'sya nava 
kambalāḥ, eka eva kambalaḥ pratyakṣasiddha iti ||

sāmānyacchalalakṣaṇam -

sāmānyacchalametatsyāditi sāmānyayogataḥ |
tātparyavaiparītyena kalpitārthasya bādhanam || iti ||

ayamaho brāhmaṇo'nūcāna iti vākyaṃ 
brāhmaṇasyāncānatvasaṃbhāvanāmātreṇa kaścitprayuṅkte | 
brāhmaṇatvasyānūcānatvahetutvaṃ tātparyaviṣayamāropya cchalavādī 
pratyavatiṣṭhate | na brāhmaṇatvamanūcānatvahetuḥ, 
brāhmaṇabruveṣvanaikāntyāditi ||

upacāracchalasya lakṣaṇam -

upacāraprayogeṣu gauṇalākṣaṇikeṣu yaḥ |
mukhyārthāsaṃbhavādbādha upacāracchalaṃ tu tat || iti ||

yathā gaṅgāyāṃ ghoṣaḥ, siṃho māṇavaka iti prayoge kathaṃ 
gaṅgāyāṃ ghoṣavāsaḥ, kathaṃ vā siṃho māṇavaka iti pratyavasthānam ||

asya prativādyanusandhānāpekṣayā vādinā prayuktasya 
cchalavākyasya prativādinā aparijñāne sadasyairvānudghāṭane prativādino 
doṣaḥ, tarudghāṭane vā vādino doṣa iti ||

39) atha jātiḥ | sā ca sādharmyavaidharmyotkarṣāpakarṣavarṇyā-
varṇyavikalpasādhyaprāptiprasaṅgapratidṛṣṭāntānutpattisaṃśaya-
prakaraṇahetvarthāpattyaviśeṣopapattyupalabdhyanupalabdhinityānitya-
kāryasamā iti | atra dvandvānte śrūyamāṇaḥ samaśabdaḥ 
pratyekamabhisaṃbadhyate | āsāṃ sāmānyalakṣaṇam -

prayukte sthāpanāhetau dūṣaṇāśaktamuttaram |
jātimāhurathānye tu svavyāghātakamuttaram || iti ||

tatra sādharmyasamāya vaidharmyasamāyāśca jaterlakṣaṇam-

hetorvādiprayuktasya svamatasthāpanākṛte |
sādharmyavaidharmyābhyāṃ pratyavasthānaṃ tu tatsame || iti ||

tatra sādharmyasamā jātiryathā - anityaḥ śabdaḥ 
kṛtakatvādityupasaṃhāre naitadevaṃ, asti hyākāśenāpi 
sādharmyamamūrtatvam, tadvannityaḥ kiṃ na syāt, aviśeṣāditi ||

vaidharmyasamā jātiryathā - pūrvasminnevopasaṃhāre 
ghaṭavaidharmyāt śrāvaṇatvānnityaḥ kiṃ na syāditi | evamanye'pi 
jātibhedā ūhyāḥ ||

40) nigrahasthānalakṣaṇam -

akhaṇḍitāhaṃkṛtinā parāhaṃkārakhaṇḍanam |
nigrahastannimittasya nigrahasthānatocyate || iti ||

tāni ca pratijñāhāniḥ, pratijñāntaraṃ, pratijñāvirodhaḥ, 
pratijñāsannyāsaḥ, hetvantaraṃ arthāntaraṃ, nirathakaṃ, vijñātārthaṃ, 
apārthaṃ, aprāptakālaṃ, nyūnaṃ, adhikaṃ, punaruktaṃ, ananubhāṣaṇaṃ, 
ajñānaṃ, apratibhā, vikṣepaḥ, matānujñā, paryanuyojyopekṣaṇaṃ, 
niranuyojyānuyogaḥ, apasiddhāntaḥ, hetvābhāsāśca nigrahasthānānīti 
dvāviṃśatiḥ ||

pratijñāhānilakṣaṇam -

kathāyāṃ yacca pakṣādi yena nirdiṣṭamāditaḥ |
tasya tena punastyāgaḥ pratijñāhānirucyate ||

sā ca sādhyasādhanadharmiṇāṃ tadviśeṣāṇāṃ ca tyāgāt 
ṣaḍvidhā | tatra sādhyapratijñāhāniryathā - anityaḥ śabdaḥ, 
aindriyikatvādityukte sāmānyamaindriyikaṃ nityaṃ dṛṣṭamiti 
anaikāntikatvena pratyukte tarhi śabdo'pi nityaḥ syāditi | evamanyānyapi 
nigrahasthānalakṣaṇānyūhyāni ||

41) atha śabdapramāṇaṃ nirūpyate | āptavākyajanyaṃ jñānaṃ 
śabdapramāṇam | āpto nāma yathārthadarśī yathārthopadeṣṭā puruṣaḥ | 
tadvākyaṃ tu ākāṅkṣāyogyatāsannidhimatāṃ padānāṃ samūhaḥ | tena 
ghaṭaḥ karmatvamānayanaṃ kṛtiḥ ityanākāṅkaṣaṃ, agninā siñcet  
ityayogyaṃ, vyavahitoccaritaṃ ca gām------ ānaya ityādi na vākyam | 
ākāṅkṣā nāma pratipatturjijñāsā | ananvayaniścayābhāvo yogyatā | 
avyavadhānenopasthitiḥ sannidhiḥ | tenākāṅkṣāyogyatāsannidhimatpada-
kadambakaṃ vākyam | tacca dvividham, laukikaṃ tu nadyāstīre pañca phalāni 
santītyādikam | vaidikaṃ tu paramāptaśrīmatsadāśivavākyam | tacca 
dvividham | vedaḥ śaivāgamaśceti | vedavākyaṃ tu prasiddham | 
śaivāgamavākyaṃ tu muktyai prāpya satasteṣāṃ bhajedveṣaṃ 
śivālayam ityādi | ato vedaśivāgamayoḥ 
paramāptasadāśivapraṇītatvāttāveva yathārthāvabodhakau | 
tajjanyajñānameva pramāṇam ||

42) na tu vedānāmanirdiṣṭapravartakatvādapauruṣeyatvādata eva 
nityatvānmahājanaparigṛhītatvācca prāmāṇyamupapadyate | āgamānāṃ tu 
tadviparītatvāt śratipathagalitānāṃ tantramārge niveśaḥ ityādiā 
tatrāuṣṭhāe doṣaśravaṇācca kathaṃ prāmāṇyamiti cet, satyam; 
nirdiṣṭapravakṛkāṇāmārṣāṇāṃ manvādismṛtīnāṃ pramāṇyamabhyupa-
gacchatāṃ tadupāsyeśvarapraṇītāgameṣu kathamaprāmāṇyaśaṅkā-
vakāśaḥ | atha yadyapauruṣeyanityavedamūlakatayā tāsāṃ prāmāṇyamiti 
manyase, tadanupapannam; tathā hi - vedasya svarūpato vā nityatvaṃ pravāhato 
vā? nādyaḥ; svarūpasya śabdātmakatayā uccaritapradhvastatvena pratyakṣata 
evānityatvadarśanāt, sa evāyaṃ gakāra ityādipratyabhijñānānāṃ 
samānyaviṣayatvena śabdasvarūpanityatāyāṃ pramāṇatvābhāvācca | na 
dvitīyaḥ; pravāharūpanityatāyā adhyāpakādhyetṛsampradāyāvicchedātma-
katvāt prapañcasyāpyutpattivināśavatvena vedasyāpi tadantarbhūtatvenā-
nityatvameva | tasmānnityanirmalasarvajñapakṣapātarahitayathārthagrāhakā-
vyayaparipūrṇasvatantrapaśupāśahantṛparamāptaparameśvarapraṇītatvenaiva 
vedānāmāgamānāṃ ca prāmāṇyam | vedasya 
svayaṃbhūtvanityatvaśravaṇātkathamutpattivināśavattvamiti cettattathā na 
bhavati | svayaṃbhuparamāptaparameśvarapraṇītatvena kārye 
kāraṇatvopacārāt svayaṃbhūtvasyā''pralayasthāyitvena nityatvasya ca tatra 
tatra śravaṇāt | āgamānāṃ parameśvarapraṇītatvena 
prāmāṇyābhyupagame vāmādīnāmapi prāmāṇyaprasaṅga iti cetsatyam; 
īśvareṇaiva vaidikakarmādhikāriṇāṃ vedopabṛṃhitāni, 
ṣaṇmuniśāpagrastadvijādīnāṃ 
svatantrāgamakarmānuṣṭhānadvārā janmāntare 
vaidikaśaivakarmasvadhikārasiddhyarthaṃ asurādivyāmohārthaṃ 
cānyāni vāmādīni mayaiva kathitāni; tasmānmadbhaktaiḥ 
śiṣṭairvedaviruddhāni svatantrāgamāni na sevyāni 
ityuktatvāttattadadhikāriṇaḥ pratyeva tasya tasya prāmāṇyam | na sarvānprati | 
taduktaṃ kāmike -

śaivāgamo'pi dvividhaḥ śrauto'śrautaśca sa smṛtaḥ |
śrutisāramayaḥ śrautaḥ svatantra itaro mataḥ ||
anyāni caiva śāstrāṇi lokesminmohanāya vai |
vedavādaviruddhāni mayaiva kathitāni tu ||
vāmaṃ pāśupataṃ caiva vātulaṃ caiva bhairavam |
na sevyametatkathitaṃ vedabāhyaṃ tathetarat || iti ||

43) tasmāttantrānuṣṭhānaniṣedhasyāpi 
vedaviruddhatantraviṣayatvameva | āgamādanyeṣvārṣeṣu daivateṣu ca 
jñānamokṣayoḥ saṃbhavāt taireva śāstraiḥ paryāptamiti cenna; teṣu 
prakṛtyadhogatānāṃ caturviṃśatitattvānāmeva nirūpaṇāt 
ṣaṭtriṃśattattvātītaparamamokṣānirūpaṇācca parasparaviruddhatvācca | 
tasmātsarvajñyādiviśiṣṭaparameśvaraḥ praṇītāgamaireva jñānamokṣayoḥ 
siddhiriti sarvamavadātam | taduktaṃ pauṣkare -

athavā sadbhiraprāptā śraddhayā śivagocarāḥ |
anye tu sajjanāyātāḥ prakṛtyādyavagocarāḥ ||
na cārṣaṃ pauruṣairvākyaiḥ ṝṣibhirdaivikaṃ tathā |
na devairbrahmaṇo vākyaṃ vaiṣṇavaṃ padmajanmanā ||
tathā raudraṃ na hariṇā na raudreṇa śivoktakam |
bādhyamūrdhvordhvavaiśiṣṭyādadho'dho bādhyamūrdhvataḥ ||
śivāgamāvirodhena śāstraṃ sarvaṃ vyavasthitam |
nānyaśāstravirodhena tatsaṃvāditayā tathā || 
śivaśāstraṃ vyavasthāpyaṃ tadvyavasthāpakaṃ yataḥ |
yasya yasya hi śāstrasya yāvatī vyāptiriṣyate ||
tāvatyeva bhavedviprāḥ prāmāṇyaṃ tasya tasya ca |
āptoktirāgamaḥ so'pi parokṣārthaikasādhanam ||
pratyakṣeṇānumānena yadi vārthaṃ suniścitam |
yo vakti so'yamāptaḥ syāttasmādāptataraḥ śivaḥ ||
suprasannedriyagrāmaḥ sarvajñaḥ sarvagocaraḥ |
pakṣapātavinirmukto yathārthagrāhakaḥ sadā ||
avyayaḥ paripūrṇaśca svatantraḥ paśupāśahā |
pramāṇamekaṃ tadvākyaṃ tathyaṃ śreyonidhiḥ sadā ||
sṛṣṭyanantarameveśaḥ śuddhādhvaviṣayānaṇūn |
svāṃśusaṃsparśanādeva kṛtvā dṛkkriyayotkaṭān ||
sadāśivo'pi bhagavānnādarūpatayā gatam |
ṣaṭpadārthamayaṃ jñānamanekacchanda eva ca ||
pūrvato daśasaṅkhyātaṃ śivabhedaṃ tathāparam |
raudramaṣṭādaśavidhaṃ tebhyo'vādīt kṛpānidhiḥ || iti ||
(pau pra pa ślo 74-79, 61-67)

44) atra pramāṇaśabdena karaṇavyutpatyā 
śabdārthayorabhedopacārādvā śabda ucyate | sarvatra cicchaktereva 
prāmāṇyasamarthanāt | tathā coktaṃ śrīmatpauṣkare -

śabdastu pāramparyeṇa śivajñānānumāpakaḥ || iti ||
(pau pra pa ślo 74)

45) padaṃ nāma varṇasamūhaḥ | varṇānāṃ kṣaṇabhaṅguratvāt 
arthapratyāyakatvābhāvāt arthapratyayanārthaṃ varṇeṣu sphoṭo nāma 
kaścitpadārtho nityo'ṅgīkaraṇīyaḥ | itthaṃ pramāṇānāṃ tritvaṃ 
vyavasthitam | eteṣveva triṣu pramāṇeṣūpamānādīnāṃ sarveṣāṃ 
yathāyathamantarbhāvaḥ | tathā hi - arthāpattistāvadanumāne'ntarbhavati | 
katham? 
anupapadyamānārthadarśanādupapādakārthāntarakalpanamarthāpattiḥ | 
yathā jīvato devadattasya gṛhe'bhāvamupalabhya bahirbhāvakalpanam | 
tadidamanupapatteravinābhāvarūpatayā tajjñānajanyamityanumānameva | 
anupapattirhi bahirbhāvaṃ vinā jīvato gṛhe'bhāvasyāsattvam | 
so'yamavinābhāva eva | gṛhe asan devadatto bahiḥ san, śatavarṣajīvitve sati 
gṛhaniṣṭhābhāvapratiyogitvāt | yannaivaṃ tannaivam | yathā ajīvanyajñadatta 
iti ||

46) upamānamapyanumānameva | na pṛthakpramāṇam | tathā hi - yadi 
tāvatsādṛśyajñānamupamānaṃ tadā pratyakṣameva tat, ayaṃ tatsadṛśa iti 
pratyakṣeṇa grahaṇasaṃbhavāt | yadi tvetatsadṛśaḥ sa iti jñānamupamānaṃ 
tadā sa etatsadṛśaḥ, etadgatasādṛśyapratiyogitvāt, yo yatsādṛśyapratiyogī sa 
tatsadṛśaḥ, yathā sammata ityanumānameva | atha 
tvatideśavākyaśravaṇasamanantaraṃ tadarthapratyabhijñayā tasya 
vācyatvaparicchedaḥ tadāpi piṇḍagatavācyatāparicchedo vākyāt | 
piṇḍagatajātipravṛttinimittatāparicchedo lāghavaliṅgāditi na 
mānāntaramupamānam ||

47) saṃbhavo'pyanumānānnātiricyate | sahasreṣu śataṃ saṃbhavatīti 
śatasadbhāvaniścayo ho saṃbhavaḥ | sa ca sahasrasya śatāvinābhāvagraheṇa 
janita ityanumānameva | aitigyamapi yathārtha cet śabda eveti siddham |

48) abhāvo'pi pratyakṣānnātiricyate | tathā hi - ghaṭādyabhāva 
indriyeṇa gṛhyate, tatpratītestadanvayavyatirekānuvidhānāt | na ca 
vahnyādipratītāvivādhikaraṇagrahaṇatadupakṣayādanyathāsiddhaṃ 
tadanuvidhānamiti yuktam | nimīlitākṣasya tvagupanīte ghaṭādau 
nīlādyabhāvagrahaprasaṅgāt | 
pratiyogigrāhakendriyajanyamadhikaraṇajñānaṃ heturiti cenna ; 
vāyoścakṣuṣā grahaṇābhāvena tatra rūpābhāvagrahaprasaṅgāt | 
indriyadoṣādinā abhāvapratītau doṣadarśanādapi tasyā 
indriyajanyatvamabhyupeyam | na cābhāvena saṃyogādisaṃnikarṣo nāstīti 
kathaṃ tasyaindriyikatvamiti vācyam ; aindriyikatvānurodhena 
viśeṣaṇatāsannikarṣakalpanopapatteḥ | na caindriyikatvasaṃnikarṣakalpanayoḥ 
parasparāśrayatvam | aindriyikatvakalpanāyāṃ sannikarṣakalpanāyā 
anapekṣitatvāt | sannikarṣo hyaindriyikatve'pekṣitaḥ | na tu tatkalpanāpi 
tatkalpanāyām ||

49) pariśeṣo'pyanumānameva | ayaṃ ca daśasveteṣu coro'sti, ete nava 
acorā ityukte ayaṃ cora iti niścayaḥ | coratvaṃ amukavarti, 
purovartiṣvanyatamavartitve sati amukānyaitadanyatamāvartitvāt, 
amukatvavadityanumānameva | amukatvādau pūrvaṃ vyāptigrahābhāve'pi 
sāmānyato vyāptigrahasaṃbhavāt | iti siddhaṃ pramāṇatraividhyam ||

50) eteṣāṃ prāmāṇyaṃ svat eva gṛhyate utpadyate ca | tatra svato 
grāhyatvaṃ nāma bādhānavatārakālīnayāvatsvāśrayagrāhakagrāhyatvam 
| atra ca pramāṇaṃ sāmagryeva | jñānagrāhakeṇa hi jñānaṃ 
viṣayāvacchinnaṃ gṛhyate | viṣayaśca viśeṣaṇaviśeṣyavattatsaṃbandho'pi | 
ata eva ghaṭameva ghaṭatayā jānāmītyanuvyavasāyo dṛśyate | na caivaṃ 
prāmāṇye saṃśayo na syāt; niścite tadayogāditi vācyam | niścite'pyarthe 
jñānasya doṣajanyatvasaṃśayena saṃśayopapatteḥ | anyathā 
paratastvavādino'pi prāmāṇyasaṃśayo'pi na syāt | 
arthatathātvasyānuvyavasāyenāniścayepi vyavasāyena niścayāt | 
prāmāṇyasaṃśaysya ca tatsaṃśayaparyavasannatvāt | anyathā 
suniścite'pyarthe prāmāṇyasaṃśayāpatteḥ | utpattau svatastvaṃ ca 
yāvatsvāśrayajñānajanakasāmagrījanyatvam | jñānasāmagrījanyatve sati 
tadatiriktahetvajanyatvaṃ pramāyāḥ svatastvamiti | asti cātrānumānam | 
vimatapramā jñānasāmagrījanyatve sati tadatiriktajanyā na bhavati, 
apramātvānadhikaraṇatvāt, ghaṭavaditi | na ca vimatapramā, 
jñānahetvatiriktahetvadhīnā, kāryatve sati tadviśeṣatvāt, 
apramāvadityaudayanamanumānaṃ bādhakamiti śaṅkanīyam | pramā 
doṣavyatiriktajñānahetvatiriktajanyā na bhavati, jñānatvāt, apramāvaditi 
pratisādhanagrahagrastatvāt, jñānasāmagrīmātrādeva pramotpattisaṃbhave 
tadatiriktasya guṇasya doṣābhāvasya vā kāraṇatvakalpanāyāṃ 
kalpanāgauravaprasaṅgācca ||

51) nanu doṣasyāpramāhetutvena pramāyāstadabhāvahetutvaṃ 
durnivāramiti cet, doṣābhāvasyāpramāpratibandhakatvenānyathāsiddhatvāt | 
apramā tu parata evotpadyate jñāyate ca | tasyāḥ jñānasāmagrīvyatiriktasya 
doṣasyotpattau hetuvāt | jñāptau ca jñānagrāhakasāmagryatiriktasya 
mānāntarasya grāhakatvasaṃbhavāt | lakṣaṇaṃ tu 
viśeṣyavattyaprakārakajñānatvaṃ, atadvati tatprakārakajñānatvaṃ vā | 
etādṛśaṃ ca bhrāntijñānaṃ prābhākaroktarītyā 
grahaṇasmaraṇātmakajñānadvayaṃ na bhavati; idaṃ rajatamiti 
sāmānādhikaraṇyapratibhāsavirodhāt | na ca idaṃ rajatamityatra jñānaṃ 
rajataṃ ca śuktikāyāmanirvacanīyamutpadyata iti vācyam, tadutpattau 
sāmagryā abhāvāt | na cāsadeva rajatamutpadyata iti vaktuṃ śakyam; tasya 
tucchasya utpattipratipattyorayogāt | na cātmanyeva rajataṃ bhāsata iti vācyam, 
tathātve ahaṃ rajatamiti pratyayaprasaṅgāt | tasmāditarāsāṃ khyātīnāṃ 
aprāmaṇikatvādapramā anyathākhyātireveti siddham ||

iti 
śrīmadativarṇāśramācāryaśaivaparipālakaśivāgrayogīndrajñānaśivā-
cāryaviracitāyāṃ śaivaparibhāṣāyāṃ pramāṇanirūpaṇaṃ nāma 
prathamaḥ paricchedaḥ ||


dvitīyaḥ paricchedaḥ

1) atha prameyaṃ nirūpyate | tacca trividham; patiḥ paśuḥ pāśaśceti | 
taduktam -

	patiḥ paśuḥ pāśa iti padārthāstraya īritāḥ || iti ||

	tatra paśūnāmasvātantryāt pāśānāmacetanatvāt patyuḥ 
prathamamuddeśaḥ | anantaraṃ cetanatvasādharmyāt paśūnām | tadanu 
pāśasyāvaśiṣṭasya | nanu -

	sapta svāyaṃbhuve proktāḥ ṣaṭ pauṣkaramataṅgayoḥ |
	śrīmatparākhye pañcoktāḥ padārthāḥ raurave trayaḥ ||

iti padārthasya nānāvidhasaṅkhyātvadarśanāt kathaṃ padārthāstraya eveti 
cet, satyam; teṣāṃ patipaśuvyatiriktānāṃ pāśapadārtha evāntarbhāvāt, 
asmatsantānādimunervāmadevasya rauravāgamapradhānatvācca tadanusāreṇa 
trayaḥ padārthā ityuktamityavirodhaḥ | tatra patiśabdena indra ityukte devendra 
itivat bhāmetyukte satyabhāmetivacca nāmaikadeśe nāmagrahaṇātpaśupatiriti 
hara ucyate | nanu sṛṣṭisthitisaṃhārarūpakṛtyatrayasya 
brahmaviṣṇurudrakartṛkatvena vedāgamapurāṇeṣu bahuśaḥ śrutatvādatra 
hara eka eva patiriti kathaṃ nirūpyata iti cet, prākṛtasṛṣṭyādikartṝṇāṃ 
guṇatrayādhiṣṭhitatrimūrtīnāṃ madhye rūdra eva kartetyuktaṃ cet 
śaṅkāvakāśaḥ | atra mayoktaṃ guṇatrayātītaṃ trimūrtīnāṃ 
kāraṇātmakaṃ sthūlasūkṣmaśūnyarūparahitaṃ cidānandaikarūpam | 
tacca guṇanāmakriyārahitamapi yogavṛttyā brahmaviṣṇurudrādisarvaśabda-
vācyaṃ paratattvamiti nātra śaṅkāvakāśaḥ |

	2) taduktaṃ devīkālottare -

na sthūlasūkṣmo na ca śūnyarūpo jñānaikarūpo jagadekabandhuḥ || iti ||

parākhye-

	eko hi nāmagairbhedaḥ sthitaḥ sa parameśvaraḥ |
	bṛhatvādbṛṃhaṇatvācca brahmaiva śivayogataḥ ||
	viṣṇuḥ prabhavaśīlatvātprabhavo jagatāṃ prabhuḥ |
	rujaṃ drāvayate yasmāttena rudro rujaḥ kṣayāt || iti ||

skāndapurāṇe sūtasaṃhitāyām -

vikalparahitaṃ tattvaṃ jñānamānandamavyayam |
	na ca nāmāni rūpāṇi śivasya paramātmanaḥ ||
	tathāpi māyayā tasya nāmarūpe prakalpite |
	śivo rudro mahādevaḥ śaṃkaro brahma satparam || 
	viṣṇunārāyaṇādīni nāmāni parameśvare |
	kathaṃcidyogavṛttyā tu vartante na tu mukhyayā || iti ||

	3) tasya pratattvasya svarūpalakṣaṇaṃ paśupāśapramāṇāgamyaṃ 
nirmalaniratiśayasvaprakāśajñānānandātmakaṃ vibhu nityaṃ svatantraṃ 
śivamiti | tathā coktaṃ śrīmatsvāyaṃbhuve -

	aprameyamanirdeśyamanaupamyamanāmayam |
	sūkṣmaṃ sarvagataṃ nityaṃ dhruvamavyayamīśvaram || iti ||

etacca lakṣaṇamatadvyāvṛttyaivoktamityetattatraivoktam -

	aprameyamanantatvādanirdeśyamalakṣyataḥ |
anaupamyamasādṛśyādvimalatvādanāmayam ||
	sūkṣmaṃ cānupalabhyatvādvyāpakatvācca sarvagam |
	nityaṃ kāraṇaśūnyatvādacalatvācca taddhrūvam |
	avyayaṃ paripūrṇatvāt svāmibhāvāttatheśvaram || iti ||

śrīmatparākhye ca -

	tatsvarūpaṃ bhavedasya śivasya paramātmanaḥ |
	cidrūpamātmano rūpaṃ dṛkkriyāśaktilakṣaṇam || iti ||

devīkālottare -

	ākāśamiva sarvaṃ tu sabāhyābhyantaraṃ priye |
	parānandamarūpaṃ tu paśyannānandabhāgbhavet || iti ||

śrīmadacintye -

	nādhyakṣaṃ nāpi tallaiṅgaṃ na śābdamapi śāṅkaram |
	yatsukhaṃ paramaṃ jñeyaṃ -------------------------------- | iti |
	svasaṃvedyaṃ paraṃ jyotiḥ --------------------------------- | iti ca |

4) tasya pañcavidhakṛtyakāritvaṃ taṭasthalakṣaṇam | na 
cānanteśādiṣvativyāptiḥ | teṣāmapi tadabhivyaktyā 
pañcavidhakṛtyakāritvena lakṣyatvāt | tāni pañcavidhakṛtyāni 
sṛṣṭisthitisaṃhāratirodhānānugrahāḥ | taduktaṃ śrīmanmṛgendre -

jagajjanmasthitidhvaṃsatirobhāvavimuktayaḥ |
kṛtyaṃ sakārakaphalaṃ jñeyamasyaitadeva hi || iti ||
(mṛ pra 2 ślo 3)

5) asya ca patyuḥ sadbhāve vedāgamāvanumānaṃ ca pramāṇam | 
vedāgamau prasiddhau | anumānaṃ tu - strīpuṃnapuṃsakādibhāvena 
nānāvidhaṃ tanukaraṇādikaṃ jagat sakartṛkam, kāryatvāt, ghaṭavat iti | 
yathā vā vivādādhyāsitaṃ jagat svopādānavitkartṛpūrvakam, kāryatvāt, 
ghaṭavaditi | tathā coktaṃ śrīmacchivajñānabodhe -

strīpuṃnapuṃsakāditvājjagataḥ kāryadarśanāt |
asti kartā sa hṛtvaitatsṛjatyasmān prabhurharaḥ || iti ||
(śiva sū 1)

śrīmatpauṣkare -

	vivādādhyāsitaṃ viśvaṃ viśvavitkartṛpūrvakam |
	kāryatvādāvayoḥ siddhaṃ kāryaṃ kumbhādikaṃ yathā || iti ||
(pau pati pa ślo 92)

śrīmṛgendre -

	athopalabhya dehādi vastu kāryatvadharmakam |
	kartāramasya jānīmo viśiṣṭamanumānataḥ || iti || 
(mṛ pra 3 ślo 1)

śrīmatparākhye ca -

karma cidrahitaṃ tasmādyojakaṃ tadapekṣate |
yojakaḥ sa maheśānaḥ svecchayā balavānyataḥ || iti ||

anyatrāpyuktam -

	acetanasya māyādeḥ pravartakatayā patiḥ |
	siddhaḥ sarvārthavitkartā vyāpakaḥ satatoditaḥ || iti || 

śrīmanmataṅge -

	dharmeṇa sādhyate dharmī catkāryeṇa kāraṇam |
kāraṇena kvacitkāryaṃ kvacidāmnāyadarśanāt ||

ghaṭādidharmātkartṛtvaṃ kulāle dharmiṇi sthitam || iti ||

ghaṭādigocarakriyāśaktirūpāddharmādityarthaḥ |

	6) na cokteṣvanumāneṣu pakṣatāvacchedakānanugamaḥ | 
kṣityāditvasyaiva pakṣatāvacchedakatvena vivakṣitatvāt | na cāprayojakatvam; 
etādṛśakartrabhāve kāryānupalabdhereva bādhakatvāt | na ca kāryatvaṃ 
svarūpato'siddham; sāvayavatvena kāryatvasya siddheḥ | nāpi 
śarīrajanyatvamupādhiḥ; lāghavena janyatvasyaiva sakartṛtāprayojakatvāt | 
upādhinirāsādeva tannibandhanā vyāpyatvāsiddhirapi na | na cāyaṃ 
heturviruddhaḥ; sādhyaviparītenāvyāpyatvāt | nāpyanaikāntikaḥ; 
akartṛkatayā niścite ātmādau kāryatvābhāvāt | na ca 
kāryatvavatyaṅkurādāvakartṛkatvasandehena sandhigdhānaikāntikatvamastviti 
vācyam; sādhyābhāvasandehe sandigdhānaikāntikatvābhāvāt | anyathā 
parvatādau vahnyabhāvasandehena dhūmāderapi 
sandigdhānaikāntikatvaprasaṅgāt | na ca vimatamakartṛkam, 
śarīrājanyatvādityanena satpratipakṣatvam; tasyāpyupādhinirāsoktirītyaiva 
nirāsāt ||

	7) ayaṃ ca kartā avasthābhedena trividhaḥ | śakta udyuktaḥ pravṛttaśceti 
| yadā sarvaṃ kāryamupādāne līnaṃ tadā tajjananaśaktimātrayuktatvā-
cchaktaḥ | yadā tu tadīyaśaktiḥ kāryajananābhimukhī tadodyuktaḥ | yadā tu 
sā janitakāryā tadā pravṛttaśaktiyuktatvātpravṛttaḥ | taduktaṃ śrīmṛgendre 
-

	śaktodyuktaḥ pravṛttaśca kartā trividha iṣyate |
	śakteḥ pravṛttibhedena bhedastasyopacārataḥ || iti ||

śrīmatpauṣkare ca -

	layādiko'pyayaṃ bhedaḥ śaktitastu tataḥ sthitaḥ |
	bindukṣobho yataḥ śaṃbhoḥ śaktereva pravartate ||
	jñānakriyātmikā sāpi nityā nityoditaprabhā |
	sā parābhimukhī sarvabandhaleśavivarjitā ||
	ananyānyā śivātmaiva vastuto mūrtirīśvarī |
	layāvasthāṃ yadā prāptā tadodāsīnarūpiṇī ||
	kāryābhāvādudāsīnā sāmyāvasthā tadaiva hi |
	vijñānakriyayoḥ sāmyaṃ yasmādudyuktakartṛṣu ||
	tadā hyetatkaromīti vyāpāre sāmyametayoḥ |
	adhikāre kriyodyuktā kāryeṣvadhikṛtā yataḥ || iti ||
(pau pati pa ślo 38-42)

	8) nanu śivasamavetāyāṃ śaktau kiṃ mānam ? vimataṃ karaṇajanyam, 
kāryatvādityanumānamiti cenna; jñānecchādīnāṃ karaṇatvasambhavena 
arthāntaratayā anena śaktisidhyayogāditi, maivam; jñānecchādīnāmeva 
śaktitvena tairarthāntarasyābhāvāt | tarhi teṣāṃ bhedena śaktirapi 
nānātvaṃ syāditi aikyasiddhānto vyāhanyeteti cenna; jñānecchādīnāmapi 
svato bhedābhāvāt | ekasyā eva śakteryadā 
kāryānukūlādṛṣṭādiparāmarśitvaṃ tadā jñānatvam, yadā tvevaṃ 
bhavatvityākāratā tadā icchātvam, yadā tattatkāryajanakatvaṃ tadā 
kṛtitvamiti jñānādibhedopapatteḥ | evameka evāyaṃ kartā navadhā bhidyate | 
tatra śivaśaktinādabindvākhyāścatvāro niṣkalabhedāḥ | sadāśivākhyaḥ 
sakalaniṣkala ekaḥ | maheśvararudraviṣṇubrahmākhyāścatvāraḥ 
sakalabhedāḥ | tatra dvau śaktibhedau | apare sapta śivabhedāḥ | evamekaiva 
tacchaktiḥ binduśaktimanonmanīmaheśvaryumālakṣmīvāṇībhedena saptadhā 
bhidyate |

	9) nanu bindoravasthābhedena kartuḥ śivasya bheda uktaḥ, tanna 
saṅgaccheta; acetanasya bindoḥ svataḥ pravṛttyayogāt | atha cedīśvara eva 
tatpravṛttiṃ kārayati tadā tasya vikāritvaṃ syāditi cet, ucyate - tatra kartṛtvaṃ 
dvividham, saṅkalpamātreṇa karaṇena ceti | tatra karaṇāpekṣakartṛtvaṃ 
kulālādīnām | saṅkalpo'pi dvividhaḥ, manovyāpārarūpaḥ 
sannidhirūpaśceti | tatra  manovyāpāreṇa kartṛtva brahmādīnām | śivasya tu 
sannidhimātreṇa; na tu vikṛtihetubāhyakaraṇāpekṣayā; nirmalatayā tasya 
karaṇādirūpopādhirahitatvāt | loke copādhimatāmeva vikāritvaṃ dṛṣṭam | 
tasmātkartṛtvenāvikāritvaṃ na viruddham | na ca yadi tasya dehādyupadhimata 
eva kulālādeḥ kartṛtvadarśanāditi vācyam; 
svadehapreraṇādāvupādhyabhāve'pi kartṛtvadarśanāt | 
tatrāpyupādhyantarasvīkāre'navasthāprasaṅgāt | tasmātprathamasṛṣṭau 
samastopādhivarjitaḥ pravṛttāśeṣaśaktikaḥ śiva eva kartābhyupeyaḥ | tasya 
ca pañcavidhakṛtyeṣu sūryasya kamalotpalanavanītapaṅkasambandhiṣu 
vikāsamukulībhāvadravīkaraṇaśoṣaṇarūpakāryeṣviva sannidhimātreṇa 
kartṛtvam |

	10) tathā coktaṃ śrīmatpauṣkare -

ṛṣayaḥ -

	bindvavasthāviśeṣeṇa śivabhedastvayoditaḥ |
	bindoracetanatvena pravṛttiḥ svata eva na ||
	kartā cettatpravṛttyarthaṃ vikārī syāttadā śivaḥ |
	evaṃ virodha āpanne parihāraṃ vadeśvara ||

īśvaraḥ -

	kartṛtvaṃ dvividhaṃ viprāḥ ! saṅkalpātkaraṇādapi |
	na hi saṅkalpamātreṇa kulālaiḥ kriyate ghaṭaḥ ||
	śivaḥ saṅkalpamātreṇa bindukṣobhakaraḥ sadā |
	na vyāpāraviśeṣeṇa yenāyaṃ vikṛto bhavet ||
	samastopādhiśūnyatvānnirmalatvācca he dvijāḥ |
ya evopādhimantaste vikṛtāḥ karyajanmani ||
tataśca nāvikāritvaṃ kartṛtvena virudhyate |
samastopādhiśūnyatvātkartṛtvaṃ neṣyate katham ||
kartṛtvapratibandhatvādupādhestadviyogataḥ |
bhavetpratyuta kartṛtvaṃ prācuryāya munīśvarāḥ ||
adehasyāpi kartṛtvaṃ svadehapreraṇe yathā |
sadehasyāpi kartṛtvaṃ sarvatrāpi yadīṣyate ||
taddehasyāpi kāryatvādvyāptaṃ kartrantareṇa tat |
tasya dehādayo'pyevamityavasthā na kutracit ||
tataḥ prathamasṛṣṭestu samastopādhivarjitaḥ |
kartā maheśa eveṣṭaḥ pravṛttāśeṣaśaktikaḥ ||
yathārko dinaceṣṭānāṃ sannidherupakārakaḥ |
tathā sannidhimātreṇa bidadhātyakhilaṃ śivaḥ || iti ||
(pau pa pa ślo 27-37)

11) nanu tadvapuḥ pañcabhirmantraiḥ pañcakṛtyopayogibhiḥ 
ityādinā śivasya mantraśarīratvaśravaṇātkathamaśarīratvamiti cet, satyam; 
atra śāstre mananatrāṇayogitayā śaktereva mantraśabdenābhidhānāt 
tadvapuḥ śāktam | nanu śāktatvaṃ śaktyārabdhatvaṃ śaktipariṇāmatvaṃ 
vā ? tathātve tasya nirvikāratvanityatvādipratipādakāgamādivirodhaḥ | tathā 
ca śaktereva kāryabhedabhinnāyā mūrdhādibhāvakalpanayopacāreṇa 
śarīratvābhyupagamaḥ | tasyāśca tadabhinnatvānna vāstavamasya śarīratvam 
| tathā coktaṃ śrīmṛgendre -

loke vapuṣmato dṛṣṭaṃ kṛtyaṃ so'pyasmadādivat |
malādyasambhavācchāktaṃ vapurnaitādṛśaṃ prabhoḥ ||
tadvapuḥ pañcabhirmantraiḥ pañcakṛtyopayogibhiḥ |
īśatatpuruṣāghoravāmājairmastakādikam ||
īṣṭe yena jagatsarvaṃ guṇenoparivartinā |
sa mūrdhā samadeśatvānamūrdhā nāvayavastanoḥ ||
tasya tasya tanuryā pūstasyā muṣati yena saḥ |
tattrāṇādvyañjanāccāpi sa tatpuruṣavaktrakaḥ ||
hṛdayaṃ bodhaparyāyaḥ so'syāghoraḥ śivo yataḥ |
parigrahasya ghoratvādghoroktirupacārataḥ ||
vāmastrivargo vāmatvādrahasyaśca svabhāvataḥ |
vāmaṃ dhāma paraṃ guhyaṃ yasyāsau devaguhyakaḥ ||

sadyo'ṇūnāṃ mūrtayaḥ sambhavanti yasyecchātastena sadyo'bhidhānaḥ |
sadyomūrtiryogināṃ vā vidhatte sadyomūrtiḥ kṛtyaśaighryānna mūrteḥ ||
itthaṃ śaktiḥ kurvatī dehakṛtyaṃ dehābhāvāducyate dehaśabdaiḥ |
tasyā bhedā ye'pi vāmādayaḥ syuste'pi proktāḥ kṛtyabhedena sidbhiḥ ||
(mṛ pra 3 ślo 7-14)

sa itthaṃ vigraho'nena kāraṇenāhataujasā |
karoti sarvadā kṛtyaṃ yadā yadupacaryate || iti |
(mṛ pra 4 ślo 1)

12) na cānanteśvaraśrīkaṇṭhādīnāṃ śivabhedānāṃ śarīritvena 
śivasyāpi śarīritvaṃ syāditi vācyam; tatrāpi teṣāṃ śivabhedatvasya 
tadabhivyaktatadadhiṣṭhātṛśivaśaktyāyattatvāt | ata evaiteṣāṃ 
mantreśvarāṇusadāśivānāmapi patipadārthe'ntarbhāvaḥ | 
kārakapadārthasyāpi dīkṣātmakaśivaśaktirūpatayā tatraivāntarbhāvaḥ |

13) ayameva ca jagato nimittam | 
tatsamavāyicicchaktermāyopahitatvenopādānatvamapi | na tu paramāṇavo nāpi 
prakṛtiḥ nāpi kevalamāyādvayam | tathā hi - na tāvatparamāṇavo 
jagadupādānam; pramāṇābhāvena teṣāmevāsiddheḥ | nanu anumānaṃ 
mānam | tathā hi - jālasūryamarīcisaṃsthaṃ sūkṣmaṃ rajaḥ 
svanyūnaparimāṇadravyārabdhaṃ, kāryadravyatvāt, ghaṭavaditi 
paridṛśyamānasya sūkṣmarajasaḥ kāraṇe'numite tasya 
mahadārambhakatvena kāryatve cānumite tenaiva hetunā tasyāpi 
tathāvidhadravyārabdhatvamanumīyate | tathā ca dṛśyamānasya 
sūkṣmadravyasya yat paramparayārambhakaṃ sa eva paramāṇuḥ | 
tathāṇuparimāṇatāratamyaṃ kvacidviśrāntaṃ, parimāṇānāṃ 
tāratamyatvāt, mahatparimāṇatāratamyavadityanumānenāpi 
paramāṇusiddhiriti, maivam; samānaprimāṇadugdhārabdhairdadhyādibhira-
dhikaparimāṇasarpirādyārabdhairghṛtādibhiścādyasya hetoranaikāntikatvāt | 
tatra tadavayavārabdhatve pramāṇābhāvāt | dvitīyasya ca paridṛśyamāne 
parimāṇa eva viśrāntisambhavena abhimatārthāsādhakatvāt | 
tasmātparamāṇūnāmevābhāvānna teṣāmupādānatvam | nāpi prakṛtiḥ; 
tasyā mahadādyapekṣayā upādānatvasyāsmābhirabhyupagamāt 
paramopādānatvaṃ tu nāsti; tasyā kāryatvasya samarthayiṣyamāṇatayā 
upādeyatvāt | nāpi māyā; kiṃ tu tasyā 
upādānakoṭiniveśamātrābhyupagame iṣṭāpatteḥ | tasyā 
evopādānatvamityupagamastu 
māyāviśiṣṭaśivasyopādānatvasādhakapramāṇena bādhitaḥ | tacca 
pramāṇaṃ pañcamīśrutyādikam |

14) tathā hi skānde-

śivātsatyaparānandaprakāśaikasvalakṣaṇāt |
āvirbhūtamidaṃ sarvaṃ cetanācetanātmakam ||

ityapādānapañcamī śrutā | sā ca janikartuḥ prakṛtiḥ (pā sū 1-4-
30) ityapādānasaṃjñayā upādānavācino vihitā | ataḥ saiva pañcamī tatra 
pramāṇam | tathā tatraiva -

sṛṣṭyarthamaikṣata prājño bahusyāmiti śaktimān ||

iti bahubhavanasaṅkalpaḥśrūyate | sa copādānatva eva ghaṭate | na hi 
nimittamātrasya kulālasya ghaṭaḥ syāmiti saṅkalpo'sti | evaṃ devīkālottare -

bhūtāni cāhaṃ sthirajaṅgamāni
yāvanti cānyānyahameva tāni ||

iti sāmānādhikaraṇyena nirdeśo vartate | sa ca mṛdghaṭa 
ityādāvupādānopādeyayoreva dṛṣṭaḥ, na 
tvatyantabhinnayordaṇḍaghaṭayoriti so'pi pramāṇam | taduktaṃ 
śivajñānabodhe -

anyaḥ sanvyāptito nānyaḥ --------------------- |
----------------------------------------------------- || iti ||
(śiva sū 2)

15) nanvevaṃ nirvikāratvapratipādakāni vacanāni vyāhanyeranniti cet, 
na; śivācchaktimataḥ prabhoḥ ityādivacanānusāreṇa 
māyādvayākhyaparigrahaśaktiviśiṣṭasya śivasyopādānatve'pi 
viśeṣaṇībhūtamāyāyā eva vikāritvāt | vikāritve'pi kevalasya 
nirvikāratvāvirodhāt | nanu śivo nopādānam, cetanatvāt, 
paśuvadityanumānena bādhaḥ pratirodho vā śivopādanatvabodhakāgamasyeti 
cenna; āgamasyānumānāpekṣayā prabalatvena tasyaivānumānabādhakatvāt 
| anyathā yāgādikriyā na svargasādhanam, kriyātvāt, 
vṛthāceṣṭāvadityanumānena 
yāgādisvargasādhanatābodhakasyāpyāgamasya bādhapratirodhādyāpatteḥ | 
nanu samavāyikāraṇasya nānātva eva 
tatsaṃyogātmakamasamavāyikāraṇaṃ labhyate | śivasya tūpādānatve 
asamavāyikāraṇaṃ na labhyata iti na tasyopādānatvaṃ yujyata iti cenna; 
bhāvakāryasyāsamavāyikāraṇajanyatvaniyame mānābhāvāt | pratyuta 
tadabhāvasyaivopādānatvabodhakāgamena niścayāt, 
śabdādikārye'samavāyikāraṇasyābhāvena vyabhicārācca | na ca tatrāpi 
bheryākāśasaṃyogādirasamavāyikāraṇam; tadvyatirekaprayuktasya 
kāryavyatirekasyādarśanena tasya kāraṇatve mānābhāvāt | anyathā 
tatrākāśaparimāṇasyāpyasamavāyikāraṇatvakalpanāpatteḥ; 
ekatantvārabdhe sūtre vyabhicārācca | na ca tatrāpi 
tantvavayavānāmevārambhakatvam, teṣāṃ ca saṃyogaḥ sambhavatīti yuktam; 
mūrtānāṃ samānadeśatāvirodhe tu tantusamānadeśasya sūtrasya 
niṣpatyayogāt | tantorapi sadbhāvapratītyā tantuvināśakalpanāyā 
bādhitatvāt | evaṃ ca śivo nopādānam, kartṛtvāt, kulālavadityanumānaṃ 
nirastam | āgamabādhena tasyāpyanutthānāt | nanvāgamenāpi 
sākṣādupādānatvaṃ na bodhyate, kiṃtu tadvyāpyatvam, 
kāryeṇābhinnatvam, tallayādyadhikaraṇatvaṃ ca | tathā cānayoḥ 
satpratipakṣatvameva syāditi nopādānatvaniścayo yuktaḥ | na ca 
layādyadhikaraṇatvamāgamena bodhitamiti prabalamiti yuktam; katṛtvasyāpi 
tenaiva bodhitatvāt | yadi cāgamabodhitasya kartṛtvasambandhinaḥ 
pakṣadharmatvasya bodhena tadīyā vyāptirbodhyate tadā 
layādyadhikaraṇatvasya vā kartatvasya vā sā bādhyatām, viśeṣābhāvāt | 
tasmātsatpratipakṣatvameva ||

16) ata eva nopādānatvaniścaya iti, maivam; pañcamyāḥ prakṛte 
prakṛtitvarūpopādānatvabodhakatayā sākṣādevāgamenopādanatvabodhanāt 
| nanvevaṃ śivo nimittaṃ na bhavet, upādānāsamavāyivyatiriktakāraṇasyaiva 
nimittaśabdārthatvāditi cenna; 
prakṛtibhāvenopādānatvavadanukūlacikīrṣādiyogena nimittatvasyopapatteḥ | 
nimittalakṣaṇamapi prakṛtibhāvādanyādṛśopayogavattvam | tacca 
cikīrṣādinopayogavati śive'pyakṣatamiti śiva evopādānaṃ nimittaṃ ceti 
siddham || 

17) nanvevam -

nimittamīśvarasteṣāmupādānaṃ sa bindurāṭa ||
(pau tantra pa ślo 28)

śivo nimittaṃ prakṛtiḥ parāparā 
kāryātmatāmasya samāpnute jaḍā ||

ityādivacanavirodha iti cet, na, etādṛśavacanānāṃ 
māyāvadvikāritayopādānatvaṃ nāstītyevamparatvāt | yadapi bahu syāmiti 
śaktimān, yāvanti cānyānyahameva tāni ityādivacanajātaṃ 
kevalopādānatvamātraparaṃ, tadapi anyaḥ sanvyāptito'nanya iti kārye 
vyāptisattālakṣaṇānusyūtisphūrtiparamiti na kaścidvirodhaḥ ||

18) evaṃ ca patipadārthaśivasya tadadhiṣṭhitamāyāyāśca 
kāryabhūtaprapañcasya svadharmasattāsphūrtipriyādirūpatayā 
jaḍavikārādirūpatayā cobhayorupādānatvam | śivasya tu māyāyā 
adhiṣṭhātṛtayā nimittatvamadhikamiti viśeṣaḥ | yathā dhūmalakṣaṇe kārye 
ārdrendhanavahnyorubhayorupādānatve'pi dhūmakārye 
kāṣṭhadharmakṛṣṇarūpameva; na tu vahnidharmabhāsvararūpam; tathā 
prapañcasya śivamāyobhayopādānatve'pi na cidānandarūpatvam | kiṃ tu 
jaḍamāyādharmaprakāśyatvavikāritvarūpamiti | tatra ca vahneriva śivasya 
nimittatvamiti na tadutkṛṣṭadharmavattvam | na ca vahnirapi dhūme 
nimittamātram, na tūpādānamiti vācyam; anyasyopādānasyābhāvena 
paramāṇuprakriyāyāśca parākariṣyamāṇatvena 
vahnīndhanayorevopādānatvāt | na ca kāṣṭhamevopādānaṃ vahnistu 
nimittamātramiti vaktuṃ śakyam | 
vahnidharmabhūtauṣṇyāderapyupalabhyamānatvena grāhakataulyāt | 
tasmānmāyāviśiṣṭeśvarasya nimittatvamupādānatvaṃ ca siddham |

19) tadupapādakavacanāni vātule-

liṅge sarvaṃ samutpannaṃ layastatraiva cocyate |
liṅgaṃ śaṃbhuriti jñeyaṃ pīṭhaṃ śaktirudāhṛtam ||
yoniliṅgaprakāreṇa jagatsṛṣṭyarthakāraṇam |
sadā saṃyogabhāvatvātkāmarūpamudāhṛtam ||
liṅge tu jāyate tatra jagatsthāvarajaṅgamam |
tasmālliṅgaṃ viśeṣeṇa karmarūpamudāhṛtam ||
kārmodaye tu sṛṣṭiḥ syāt karmānte saṃhṛtirbhavet |
etatkarmeśarūpaṃ tu sṛṣṭisthitilayāvaham |
dakṣiṇāṅgabhavo brahmā hariḥ pūrvāṅgasambhavaḥ |
hṛdayānnīlarudrastu śirasaśśivasaṃjñakaḥ ||
maheśasya sahasrāṃśādrudradevasamudbhavaḥ |
etanmaheśakoṭyaṃśādbrahmaviṣṇusamudbhavaḥ |
netre tu savyavāmordhve sūryasomāgnisambhavaḥ |
prāṇe vāyuḥ samutpannaḥ śrotre kīlādisambhavaḥ ||
āsye jñānaṃ samutpannaṃ gaṇeśastadgalodbhavaḥ |
ṣaṇmukho hṛdaye jāto nābhau devāḥ samudbhavāḥ || 
pañcāśatkoṭidevāśca maheśāṃśasamudbhavāḥ |
ṝṣayaśca tathā koṭyo romakūpasamudbhavāḥ || iti ||

jñānaṃ nāma vedādividyā |

20) nanvevamapi śivasyaiva jagatkartatvamiti katham ? 
tvayaivānanteśvarādīnāmapi kartṛtvābhyupagamāt |

kadācitsṛṣṭya śārvāḥ kadācitpadmajodbhavāḥ |
kadācidapi vaiṣṇavyaḥ kadācinmuninirmitāḥ ||

iti jagato'niyatakartṛtvaśravaṇāditi cenmaivam; prakṛtimāyāyāṃ 
sṛṣṭau brahmāṇamadhiṣṭhāya tasyāmeva māyāyāṃ sṛṣṭau pālane ca 
viṣṇumadhiṣṭhāya punaśca tasyāmeva sṛṣṭisthitisaṃhāreṣu 
rudramadhiṣṭhāya aśuddhamāyāyāṃ 
sṛṣṭisthitisaṃhāratirobhāveṣvīśvaramadhiṣṭhāya kāraṇatve'pi 
śuddhamāyāyāṃ sṛṣṭisthitisaṃhāratirobhāvānugraheṣu 
sākṣātsadāśivasyaiva kartṛtvam ||

21) nanvanyatra sṛṣṭyādikāryatrayasyaiva brahmāditrayasya 
kāraṇatvamuktam; na tu pañcasu kāryeṣu pañceśvarāṇāmiti cet, 
pañcakāryāṇāṃ pañceśvarakartṛtvapratipādakāni 
kāmikādyāgamavacanāni bahūni santyeva vedopabṛṃhitapurāṇavacanāni 
cocyante | kāśīkhaṇḍe -

pañcānāmapi devānāṃ brahmādīnāṃ samāśrayam |
oṅkārabodhitaṃ liṅgaṃ pañcāyatanamuttamam || iti ||

nasiṃhapurāṇe ca -

ānābherbrahmaṇo rūpamāgalādvaiṣṇavaṃ vapuḥ |
āśīrṣādrudramīśānaṃ tadagre sarvataḥśivam || iti ||

śrīśaṃkarācāryaiḥ saundaryalaharyāṃ ca -

jagatsūte dhātā hariravati rudraḥ kṣapayate 
tiraskurvannetatsvamapi vapurīśastirayati |
sadāpūrvaḥ sarvaṃ tadidamanugṛhṇāti ca śivaḥ 
tavājñāmālambya kṣaṇacalitayorbhrūlatikayoḥ ||
(ślo 24)

ityuktatvāt siddhaṃ pañceśvarāṇāṃ pañcakāryakartṛtvam |

22) evaṃ ca sraṣṭaḥ parameśvarasya cicchakteḥ sūkṣmaśarīratayā 
parigrahabinduśakteḥ sthūlaśarīratayā svadehapravartakatvavat 
sṛṣṭyādipravartakatvamavagantavyam | tadevaṃ vyavadhānenāvyavadhānena 
vā śivasyaiva sarvaprapañcakāryakartṛtvam | tacca kāryaṃ 
pariṇāmārambhasamūhavivartavṛttibhedena pañcavidham | tatra vṛttireva jagat, 
na pariṇāmādiḥ | tathā hi - na tāvajjagat pariṇāmaḥ, 
pūrvāvasthāparityāgenāvasthāntaraprāptirhi pariṇāmaḥ | yathā payasaḥ 
payastvāvasthāparityāgena dadhyādirūpaprāptiḥ | na ceha 
pūrvāvasthāparityāgo'sti | nāpyārambhaḥ, yatra hi nānākaraṇaiḥ 
parasparasaṃyogenaikaṃ kāryamārambhyate tadevārambhaḥ, yathā ghaṭādiḥ 
| atra tvekasyā eva māyāyāḥ kāraṇatvānnārambhapakṣaḥ kṣodasahaḥ | na 
ca māyāśivayoḥ saṃyogenehāpyārambho'stviti yuktam; 
tayostulyavadupayogābhāvāt | māyā hi vikāritayopayujyate | 
tadadhiṣṭhātṛtayā tu śiva iti | saṃyogasya caramakāraṇatvena sarvadā 
kāryāpatteśca | ata eva na samūho'pi; anekeṣāmeva lomnāṃ 
cāmarādirūpasamūhadarśanāt | prakṛte ca tadasambhavāt | nāpivivartaḥ; 
tasya atattvato'nyathābhāvātmakatvena jagato'tyantāsattvaprasaṅgāt | 
tasmādyathā paṭasya kuṭyavasthā aheśca kuṇḍalāvasthā 
apracyutapūrvarūpasyaivāvasthāntaraprāptirūpatvādvattiḥ tathā jagadapi 
śivādhiṣṭhitaśuddhāśuddhamāyayorvṛttireva ||

23) ayaṃ ca svarūpajñaptiviṣayaḥ | nātyantamanavabhāsyaḥ | nāpi 
pramāṇabhāsyaḥ; tathātve tucchatvajaḍatvayoḥ prasaṅgāt | na ca 
manorūpapramāṇajanyajñānaviṣaye jīvātmani jaḍatvābhāvena 
vyabhicāraḥ | tasya pramāṇajanyajñānaviṣayatve tadabhāve 
prakāśāsambhavena kadācidahaṃ vā nāhaṃ veti saṃśayasya nāhamiti 
viparyayasya ca prasaṅgena svaprakāśatvasyaivopeyatvena 
pramāṇajanyajñānaviṣayatvāyogāt | na ca pramāṇāgamyatve śivasya 
prāguktamanumānāgamavedyatvaṃ vyāhanyeteti yuktam; dharmiṇaḥ 
svaprakāśatve'pi taddharmāṇāṃ katṛtvopādānatvādīnāṃ tadgamyatvena 
prāguktasyānumānādipramāṇagamyatvasyopapatteḥ | iti siddhaṃ śivasya 
svaprakāśatvam ||

iti 
śrīmadativarṇāśramācāryavaryaśaivaparipālakaśivāgrayogīndrajñāna-
śivācāryaviracitāyāṃ śaivaparibhāṣāyāṃ patipadārthanirūpaṇaṃ 
nāma dvitīyaḥ paricchedaḥ ||



tṛtīyaḥ paricchedaḥ

1) atha cidrūpatayā patyananyaḥ paśupadārtho nirūpyate | tatra 
paśurnāma dehendriyādivyatirikto nityaścidātmako'neko 
vibhuranādimalāvṛto'svatantrakartā ca | atra dehendriyādivyatirikta ityanena 
dehendriyaprāṇabuddhyātmavādānāṃ nirāsaḥ | nitya ityanena 
kṣaṇikātmavādasya cidātmaka ityanena jaḍātmavādasya aneka ityanena 
ekātmavādasyavibhurityanenāṇuparimāṇamadhyamaparimāṇātma vādayoḥ 
anādimalāvṛto'svatantra ityābhyāṃ ātmeśvaravādasya ca vyāvṛttiḥ | 
kartetyanena sāṅkhyātmavādanirāsaḥ | tathā coktam -

ata sātatyagamane vyutpannā jñasvabhāvataḥ |
parāmarśātmakāddhetorgaterjñānārthatā yataḥ ||

ātmāno vyāpino'nantāścidrūpāḥ paśavastridhā || iti ||

śrīmanmṛgendre ca -

nāvyāpako na kṣaṇiko naiko nāpi jaḍātmakaḥ |
nākartābhinnacidyogī pāśānte śivatāśruteḥ || iti || 
(mṛ pra 6 ślo 7)

śrīmatparākhye ca -

dehānyo'naśvaro vyāpī vibhinnaḥ samalo'jaḍaḥ |
svakarmaṃphalabhukkartā kiñcijjñaḥ seśvaraḥ paśuḥ || iti ||
(parākhyaṃ paśu pa ślo 15)

2) nanu kathamātmano dehavyatiriktatvam? dehasyaivātmatvāt | tathā hi - 
yadyasmin satyeva dṛśyate tattasya kāraṇaṃ dṛṣṭam | tathā ca 
caturvidhabhūtapariṇāmāddehāccaitanyaṃ svata evotpadyate 
kiṇvādyaṇuśaktyā madarūpavicitrakāryavat | 
tasmādbhūtātmakāddehādeva caitanyasambhavaḥ | 
taccaitanyamadhiṣṭhātumātmā īśvaraśca nāpekṣaṇīyaḥ, ata eva 
sthūlo'haṃ kṛśo'hamityādisāmānādhikaraṇyapratyayopapattiḥ | mama 
deho'yamityādipratyayastu rāhoḥ śira ityādivadaupacārikaḥ; 
tasmāddehātirikta ātmā nāstīti cenmaivam | na vayaṃ kāraṇaśaktibhiḥ 
kāryāṇāṃ vaicitryaṃ neti vrūmaḥ; kiṃ tu viruddhātkāraṇādviruddhaṃ 
kāryaṃ notpadyata iti | tathā ca jaḍāddehāt kathaṃ 
prakāśarūpacaitanyasambhavaḥ | kiṃ ca guṇasya nāśo 
guṇināśādvirodhiprādurbhāvādvā bhavati | iha tu mṛte deha 
ubhayābhāve'pi kathaṃ tadguṇabhūtacaitanyanāśaḥ; 
dehārambhakabhūtaikadeśaprāṇavāyunirgamāditi cenna; suptau 
tatsadbhāve'pi jñānānupalabdheḥ | na ca karaṇoparamāttadānīṃ 
caitanyānupalabdhiriti vācyam, tvanmate karaṇoparatihetukarmābhāvena 
suptāvapi caitanyodayaprasaṅgāt | tasmādyatsadbhāve dehasya ceṣṭā, 
yadabhāve tadabhāvaḥ taccaitanyaṃ dehavyatiriktaṃ ātmatveneṣṭavyam | kiṃ 
ca bālyayauvanavārdhakeṣu śarīrasya bhedena vālye kṛtasya kathaṃ vārdhake 
pratisandhānam | tasmāddehātmavādaḥ pratyakṣeṇaiva nirākṛtaḥ | ata eva 
mama deho'yamityādipratyayadarśanam | 
sthūlo'hamityādipratyayastvaupacārikaḥ | kiṃ ca 
nirdoṣendriyārthasannikarṣe'pyarthagraho na dṛśyate | tatkasya hetoḥ? 
vyāsaktatvāditi cet, hanta ! tarhi cittavyasaṅgaprayojakaḥ sūkṣma ātmā 
abhyupeyaḥ |

3) etacca pratipāditaṃ śrīmatpauṣkaraparākhyayoḥ -

caitanyadarśanāddehe nātmā caitanyako bhavet |
yadyasmin sati sandṛṣṭaṃ tadiṣṭaṃ tasya kāraṇam ||
kāraṇatvāviśiṣṭo'tra dehaścaitanyasādhakaḥ |
śarīraghaṭayoryogāt surāpūpākhyakāryayoḥ ||
kāraṇaṃ guḍapiṣṭādiraviśiṣṭo'pi dṛśyate |
apūpādasatī pūrvaṃ madaśaktistadātmani ||
tasmādbhūtātmakādeva dehāccaitanyasambhavaḥ |
taccaitanyamadhiṣṭhātuṃ kimanyenātmaneśvara ||

īśvaraḥ -

kenoktaṃ bhinnakāryāṇāṃ vaicitryaṃ neti śaktibhiḥ |
viruddhātkāraṇātkāryaṃ viruddhaṃ nopajāyate ||
viruddhamapi caitanyaṃ jaḍāddehātkathaṃ bhavet |
kiṃ ca yasya tu yo dharmastannāśāddharmanāśanam ||
virodhiguṇasadbhāvādatha syādanyathā dvijāḥ |
dehe satyapi caitanyaṃ mṛte kimiti neṣyate ||
yadbhāvayadabhāvābhyāṃ ceṣṭāceṣṭe bhajettanuḥ |
taccaitanyamiti proktaṃ vyatiriktaṃ tu dehataḥ ||
kiṃ ca bālye ca vārdhakye yauvane ca vibhedataḥ |
śarīrasyānusandhānaṃ kathaṃ bālye kṛtasya ca ||
sa tāvadanusandhatte prāgbhuktā seyamaṅganā |
iti tasmāccharīrātmavādo'dhyakṣanirākṛtaḥ ||
tasmātsthūlo'hamityādirjñeyo rāhoḥ śiro yathā |
kiṃ ca deho mametyādipratyayo'styeva puṣkalaḥ || iti ||
(pau paśu pa ślo 61-71)
bhūtānāṃ samudāye'pi dehasyādhyavasāyataḥ |
vastugrahe pravṛttasya saṃśuddhe locane'pi ca ||
na yato'rthagraho hyasya yo'bhipreto'nyacetasaḥ |
ato'pyanyaḥ pumānasti yo jātaḥ śūnyamānasaḥ ||
dṛṣṭā bālyādikāvasthā tāvaddehe caturvidhā |
pariṇāmaviśeṣeṇa yā vibhinnā pṛthak pṛthak ||
anyāṃ yāṃ yo'nusandhatte tāmavasthāṃ gatāmapi |
so'sminsmartā smṛtirjñānaṃ bhinnaṃ bhūtākṣanirgatam || iti ||
(parākhyaṃ paśu pa ślo 19-20; 22; 24)

4) nanvindriyāṇi jñānahetava ityanvayavyatirekasiddham | ato 
jñātṛtvamapi teṣāmevāstu | jñātrantarakalpanāyāṃ gauravāt | na 
cendriyāṇāṃ nānātvena guṇapradhānabhāvābhāvena ca 
yugapadviruddhavyāpārāḥ prasajyeranniti vācyam | svato 
guṇapradhānabhāvābhāve'pyekasmin dehe vidyamānānāṃ 
teṣāmekagrāmavāsināmiva kāryānurodhena guṇapradhānabhāvopapatteḥ | 
māstu vā guṇapradhānabhāva indriyāṇām | tathāpi 
yugapadviruddhavyāpārābhāva upapadyate | manorūpasahakārisāhityena 
prabalasya vyāpāropapatteḥ | na ca teṣāṃ kāraṇatvānna kartṛtvamiti vācyam 
| karaṇatvasyāsmābhiranabhyupagatatvenānyatarāsiddhatvāt | na ca 
rūpādyapalabdhikaraṇatvenaiva teṣāṃ siddhernāsiddhiriti yuktam; 
sahetukatvānumānena teṣāṃ siddhyupapatteḥ | tasmānmūko'haṃ 
badhiro'hamityādyanubhavānusāreṇendriyāṇyevātmeti, maivam | 
indriyābhāve'pi svapnādau jñānopalambhena teṣāṃ jñātṛtvāyogāt | kiṃ 
ca śrotrādīnīndriyāṇi pratiniyataviṣayāṇi, ātmā tu sarvagrāhaka 
ityanubhavasiddham | atastaiḥ śabdādisarvaviṣayagrāhaka ātmā 
anyo'bhyupagantavyaḥ | kiṃ cendriyāṇyapi preryāṇyanubhūyante | na ca 
svatantrasyātmanaḥ preryatvamasti, ato na teṣāmātmatvaṃ sambhavati | api ca 
śrotrādīni na svarūpaṃ jānanti | ātmā tu śrotrādisvarūpaṃ jānāti | ato 
viruddhadharmayogitvānna śrotrādirātmā | kiṃ ca yo'haṃ cakṣuṣā 
ghaṭamadrākṣaṃ so'hamidānīmāndhyadaśāyāṃ tameva tvacā 
spṛśāmīti pratyabhijñānamupalabhyate | tadindriyāṇāmātmabhāve na 
yujyate | anyenopalabdhe'nyasya pratyabhijñānābhāvāt | kiṃ 
cendriyāṇāmātmatve yugapadviruddhavyāpārayogaprasaṅgaḥ | na 
caikagrāmavāsināmiva kāryānurodhena teṣāṃ guṇapradhānabhāvādīti 
pūrvoktaṃ yuktam | asādhāraṇakārye teṣāmapi 
guṇapradhānabhāvābhāvāt | na ca varagoṣṭhīnyāyena 
guṇapradhānabhāvaḥ | yugapatsvasvabhogyapratyāsattirahiteṣveva 
tannyāyapravṛtteḥ | vareṣu hyekasya svabhogyasannidhāne 
tadrahitānāmitareṣāṃ guṇabhāvābhyupagamo yujyate | indriyeṣu 
yugapatsvasvaviṣayasannikṛṣṭeṣu naikasyāpi 
guṇapradhānabhāvābhyupagamaḥ sambhavati | tasmānna 
varagoṣṭhīnyāyenāpi guṇapradhānabhāvaḥ | nāpi 
manassāhityaprābalyātkṛto vyāpārayogaḥ | ekatra manassāhityamityasyaiva 
tvanmate'yuktatvāt | manmate hi svatantra ātmā svābhimatagrāhiṇīndriye 
mano niveśayatīti yuktamekasyaiva sāhityam | tvanmate tu indriyāṇyeva 
svatantrāṇi | tatparatantraṃ manaḥ | na ca pradhānānāṃ teṣāṃ vaimatye 
guṇabhūtasyaikatrāgamanaṃ yuktam | na cendriyameva manaḥ samākarṣati | 
vinigamakābhāvāt | tasmādindriyāṇāmātmatve 
yugapadviruddhavyāpāraprasaṅga eva | tasmānnendriyāṇyātmā ||

5) astu tarhi prāṇavāyurātmā; ahaṃ jīvāmītyanubhavāt | na 
caikasmindeśe prāṇāpānādibhedenātmabhedaprasaktau rucibhedena 
yugapadviruddhavyāpārayogaḥ syāditi yuktam | ekasyaiva vyāpārabhedena 
prāṇādisaṃjñābhedopapattyā prāṇāpānādibhede mānābhāvāt | na ca 
suṣuptyādāvapi prāṇādīnāṃ sattvena jñātṛtvaṃ syāditi yuktam | 
indriyavyāpāraviraheṇa tadvirahasyopapatteḥ | tasmātprāṇavāyurevātmeti, 
maivam | prāṇavāyorapi dehavanniyamyatvānubhavena tanniyāmakasya 
kasyacitparasyāvaśyābhyupagantavyatvāt | na ca dehādireva kāryaniyantā | 
ātmatvenābhyupagatasya tasya dehaniyāmakatayā tanniyamyatvāyogāt | 
vāyuviśeṣaguṇasya sati tasmin dhvaṃsāyogena svāpe'pi tasya 
jñātṛtvaprasaṅgācca | na cāntaḥkaraṇavargasyātmatvam | tasyācetanatayā 
tanniyamyatvāt ||

6) nanvastu jñānasantatirātmā | na ca jñānasya bhedābhāvena 
santatyayogaḥ | ghaṭapaṭādijñānabhedasya pratyakṣasiddhatvāt | atha 
santānivyatirekeṇa santānābhāvāt santānināmātmatvaṃ vācyam | tacca na 
sambhavati | anyānubhūte'nyasyānusandhānābhāvena 
pratyabhijñādyabhāvaprasaṅgāt | atha kathaṃ 
kṣaṇikavijñānasyātmatvamiti, maivam | santānaikyavaśena 
pratyabhijñādyapapatteḥ | yatsantānapraviṣṭasya hi jñānasyānubhavitṛtvaṃ 
tatsantānapatitasya pratyabhijñātṛtvam | na ca santānasyānyasyābhāvena 
kathamaikyamiti yuktam | vṛkṣātiriktasya vanasyābhāve'pi vanatvasya 
vyāsajyavṛttitvenaikaṃ vanamitivat santānatvasyāpi vyāsajyavṛttitayā 
santānaikyopapatteḥ | tasmātkṣaṇikavijñānamevātmeti | atra pratividhīyate | 
suṣuptau tāvajjñānasantānavicchedastavāpi sammataḥ | anyathā 
tatkālīnajanyasmaraṇādiprasaṅgāt | evaṃ ca yatpūrvedyurmayā dṛṣṭaṃ 
tadevedamiti pratyabhijñā kathaṃ syāt | pūrvajñānasantānasya suṣuptau 
vicchedena santānaikyasyāpyabhāvāt | nanu santānaikyaṃ māstu prayojakam | 
dehaikyaṃ tu bhaviṣyati | yaddehasambandhi jñānamanubhavitṛ, 
tatsambandhyeva jñānaṃ pratyabhijñātriti vyavasthopapatteriti cenna | tvanmate 
dehasyāpi kṣaṇikatvena tadekatvasyāpyabhāvāt | atha dehasantānaikyaṃ 
prayojakamiti manyase; evamapi bālasyādyapravṛtyanukalajanmāntarānubhūta-
smaraṇāderanupapatteḥ | tatra dehasantānaikyasyāpyabhāvāt | ata eva 
janmāntarakṛtakarmaphalabhoktṛtvamapi na syāt; anyena kṛte karmaṇyanyasya 
phalabhogāsambhavāt | jñānasantānaikyasya dehasantānaikyasya vā 
tadbhoktṛtāprayojakasyābhāvāt ||

7) nanvanubhavituḥ pratyabhijñātṛtvaṃ kartuśca phalabhoktṛtvaṃ kva 
dṛṣṭam ? yena sthāyitayā ātmā svīkartavyaḥ syāt | na ca sthāyitvasiddheḥ 
pūrvamaikyasya prayojakatvaṃ bhavatā jñātuṃ śakyate | ataḥ 
parasparāśrayatvamatreti cenna; devadattādanyasya 
yajñadattādestadanubhūtasmartṛtvasya tatkṛtakarmaphalabhoktṛtvasya 
cādarśanenaikyasya prayojakatvakalpanāyāṃ sthāyitvasidhdyupapatteḥ ||

8) nanu sarvasyāpi kṣaṇikatvānna sthāyitvamātmanaḥ sambhavati | 
tathā hi - ekasya kāladvayasambandho hi sthāyitvam | sa ca na sambhavati; 
ekakālasambandhasyāparakālasambandhābhāvena vyāptatvāt | nīlasya 
pītatvābhāvena vyāptigrāhakasya sahacāragrahādeḥ sattvāt | 
sthāyino'rthakriyākāritvarūpasya sattvasyāyogena sataḥ 
kṣaṇikatvāvaśyambhāvācca | tathā hi - sthāyino'rthakriyākāritvaṃ 
krameṇa yugapadvā ? nādyaḥ | tasya tāvadarthakriyājananasāmarthye 
samarthasya vilambāyogena kramāyogāt | asāmarthye tu sutarāṃ 
kramāsambhavāt | na ca samarthasyāpi kālāntare'pi na tajjanakatvamiti 
sahakārisannidhānānusāreṇa krameṇa kāryajanakatvaṃ sambhavatīti yuktam | 
sahakāriṇāmatiśayānādhāyakatve'sahakāribhyo 
viśeṣābhāvenājanakatvāt | atiśayādhānābhyupagame atiśayasya 
bījādyapekṣayā'tireke'navasthāprasaṅgāt | anatireke'ṅkurajanakasya 
bījasya tatkālotpattikatvāṅgīkāreṇa kṣaṇikatvābhyupagamaprasaṅgāt | 
nāpi dvitīyaḥ; yugapattāvatkāryotpādanasamarthasya kṣaṇāntare'pi sattve 
tadāpi tāvatkāryotpattiprasaṅgāt | kṣaṇāntare'sadbhāve 
tvasmanmatapraveśāt | tasmātsarvasyāpi kṣaṇikatvameva | na caivaṃ sa 
evāyaṃ ghaṭa iti pratyabhijñānupapattiḥ; tasyāḥ 
tatsādṛśyaviṣayakatvakalpanāt | sa evāyaṃ dīpa ityādau tathā darśanāt | 
tasmānna sthāyitvamātmana upapadyata iti cenmaivam | pratyabhijñāyā 
aikyaviṣayatvasambhavena sādṛśyaviṣayakatvakalpanasyāyuktatvāt | na 
coktayuktyā aikyaviṣayakatvāsambhavaḥ ; ekasyāpi vṛkṣasya 
kapipuruṣādinānāsambandhavannānākālasambandhopapatteḥ, sthāyino'pi 
sahakārisannidhānānurodhena kramikakāryajanakatvopapatteśca | na 
cātiśayānādhāyakatve sahakāritvānupapattiḥ; 
tathātve'pyanvayavyatirekādinā sahakāritvopapatteḥ | tasmānna 
kṣaṇakajñānarūpa ātmā |

9) taduktaṃ śrīmatpauṣkare -

ṛṣayaḥ -

yadyajjñānaṃ bhavetsarvaṃ na taccicchaktisambhavam |
tatsarvaṃ bauddhameṣṭavyaṃ vināśitvena hetunā ||

īśvaraḥ -

tanna buddherjaḍatvena jñānotpādakatā kutaḥ |
abhivyañjakasambandhātkādācitkatayā citaḥ ||
kṣaṇikatvaṃ tu nityāyā api sadyo'nubhūyate |
yāvaddīpaḥ sthitastāvat padārthānāṃ prakāśakaḥ ||
abhivyañjakahetūnāṃ santatyaiva pravṛttitaḥ ||
dhārāvāhikadhīścāpi kṣaṇikaivānubhūyate |
ata eva hi bhāvānāṃ kṣaṇikatvena saṃvidaḥ ||
kṣaṇikatvaṃ bruvāṇānāmāśāpīḍā nivāritā |

ṛṣayaḥ -

sattvena kṣaṇikābhāvo neṣyate kimitīśvara ||
arthakriyākāritā hi sattā sā kṣaṇikeṣu ca |
kramākramavibhāgābhyāṃ sthireṣu tadayogataḥ ||
vilambakāraṇāyogāttathā sthairyakṣaterapi |
alaṃ svato'samarthasya sahakāriśatairapi ||
arthakriyākaratvena kṣaṇikatvamavasthitam |

īśvaraḥ -

kṣaṇikatve padārthānāṃ kāryakāraṇatākṣatiḥ ||
kāryakāraṇarūpeṇa bhavatkāraṇatāṃ vrajet |
vartamānaghaṭatvena mṛtpiṇḍaḥ kumbhatāṃ vrajet ||
ataḥ kṣaṇadvayasthāyī kāryotpattau tu kāraṇam |
tayorarthāntaratvena tadutpattau tu kāraṇam ||
anyathā samakālo'pi bhāvaḥ kasmānna kāraṇam |
dvayorarthāntaratvena kālabhedaḥ kathaṃ tayoḥ ||
kāraṇasya kutastyo vā viśeṣaḥ sahakāritaḥ |
kuto vā ghaṭaniṣpattistantubhyo na bhaveddvijāḥ ||
kāryakāraṇabhāvo'taḥ sthireṣveva vyavasthitaḥ |
arthakriyākaratvaṃ ca sthāyināṃ kramaśaḥ sthitam ||
samarthasya sadā kāryakaratvaniyamena ca |
agnirdāhasamartho'pi sphoṭe'ṅgulimapekṣate ||
kramākramavibhāgābhyāṃ durāśā kṣaṇikatvadhīḥ |
kiṃca prāganubhūtā yā dhīḥ seyamupajāyate ||
kṣaṇikatve kutastasyāḥ pratyabhijñā hi jāyate |
kṣaṇikatvaṃ padārthānāmatha vāstu jaḍātmanām ||
kāraṇatrayamātraṃ yat sarvakāryeṣvapekṣyate |
bindvādayo'pi ye bhāvāḥ samānapariṇāminaḥ ||
jñānameva sthiraṃ nityaṃ jaḍavargasya dīpakam |
tasya kṣaṇikatā jñeyā vastūnāṃ kṣaṇikatvataḥ || iti ||
(pau puṃstva pa ślo 214-232)

10) śrīmatparākhye ca -

kṣaṇabhaṅge sthite jñāne kasya karmārjanaṃ bhavet |
na tatkarmaphalaṃ bhogyaṃ jñānanāśe niranvaye ||
yā tvayā vāsanā proktā kiṃ nāvicchinnalakṣaṇā |
bhinnarūpā yadā sā na tatkṣaṇāntargatā bhavet |
tatkṣaṇena vinaṣṭena sā vinaṣṭā bhavettataḥ |
avicchinnā sthirā caikā nānājñānasamāśrayā ||
śrutyā vicāritā yuktyā nātmano vyatiricyate |
janmāntarāṅgasaṃyoge śokaharṣādihāsyataḥ ||
jātisaṃsmaraṇe'pyevaṃ prāktanānubhavāditaḥ |
sthiratvaṃ tatsmṛtergamyaṃ smṛtirnānubhavādṛte ||
smartānubhavitā sthairyāttena jñātā sthiro vibhuḥ || iti ||
(parā pra pa ślo 30-35)

11) na caivamātmā kṣaṇikavijñānayogī | jñātṛtvasya 
nityātmadharmatvāt | na hi loke nityo'nityadharmā dṛṣṭaḥ | kiṃ ca tacca 
jñātṛtvaṃ vimvātmadharmatvādvibhu, na kvācitkam | ata evātmā 
sarvārthadṛkkriyaḥ | yadi tvasya jñātṛtvaṃ kvācitkaṃ syāt tasyātmano 
vibhutvaṃ bhajyeta | loke hi dharmiṇo yāvatī vyāptistāvatī dharmasyāpi 
vyāptirdṛśyate | yathā paṭagataṃ śauklyaṃ paṭamakhilaṃ vyāpya tiṣṭhati | 
evamātmānamapi jñātṛtvaṃ vyāpya tiṣṭhati | na ca viṣayāsannidhāne 
jñānasyānudaya iti vācyam | svarūpasyaiva viṣayatvāt | taduktaṃ 
śrīmatpauṣkare -

jñātṛtvamapi tannityaṃ dharmatvānnityavastunaḥ |
nānityadharmā dharmī syānnitya ātmā munīśvarāḥ ||
tacceha vibhudharmatvānna ca kvācitkamiṣyate |
nityatvamiva tenātmā sthitaḥ sarvārthadṛkkriyaḥ ||
jñātṛtvamapi yadyasya kvācitkaṃ vibhutā kutaḥ |
dharmiṇo yāvatī vyāptistāvaddharmasya ca sthitiḥ ||
yathā paṭasthitaṃ śauklyaṃ paṭaṃ vyāpyākhilaṃ sthitam |
sthitaṃ vyāpyaivamātmānaṃ jñātṛtvamapi sarvadā ||
na ca nirviṣayaṃ jñānaṃ parāpekṣaṃ svarūpataḥ || iti || 
(pau paśu pa ślo 100-104)

12) nanvātmano vyāpakatve siddhe taddharmasya vyāpakatā siddhyet | na 
ca tatsambhavati | dehādanyatrānupalambhenātmano vyāpakatvāyogāt | 
tatrāṇuparimāṇa evātmeti pāñcarātrā varṇayanti -

vālāgraśatabhāgasya śatadhā kalpitasya ca |
bhāgo jīvaḥ sa vijñeyaḥ sa cānantyāya kalpate || iti ||
(śvetāśvatara - adhyāya 5, mantraḥ 9)

13) kṣapaṇakāstu pradīpaprabhāvatsaṅkocavikāsavānātmā 
dehānurūpaparimāṇavāniti varṇayanti | pakṣadvayamapi na saṅgacchate | 
ātmā vibhuḥ, dehādanyatra sthitārthagrāhakatvāt, yannaivaṃ tannaivaṃ, 
yathā ghaṭaḥ | kiṃ ca ātmā vibhuḥ, sarvatropalabhyamānakāryatvāt, iti 
vyāpakatvasiddheḥ | kiṃ ca madhyamaparimāṇatva ātmano nityatvaṃ na syāt | 
yanmadhyamaparimāṇaṃ tadanityam, yathā ghaṭa ityanumānāt | 
tasmādvyomavadvyāpaka ātmā | taddharmabhūtamapi jñānaṃ vyāpakam | 
tasmātpratyakṣata eva nirasto vaiśeṣikātmavādaḥ ||

14) tathā coktaṃ śrīmatpauṣkare -

ṛṣayaḥ -

vyāpakatve hyaṇoḥ siddhe dharmavyāpakatā bhavet |
anyatrānupalabdhasya dehādvyāpakatā kutaḥ ||

īśvaraḥ -

na dehaparimāṇatvamaṇūnāmupapadyate |
tasmāddehādato'nyatra sthitārthagrāhakatvataḥ ||
kiṃ cābhivyañjako yatra yatra dehendriyādikam |
tatra sarvatra tatkāryadṛṣṭervyāpakatātmanaḥ ||
vyāpako'yamamūrtatvādyathā vyoma tatastathā |
taddharmabhūtaṃ jñānaṃ ca vyāpakaṃ viṣayonmukham ||
yannityarūpaṃ vijñānaṃ tacca nirviṣayātmakam |
pakṣo'dhyakṣanirasto'yaṃ svaparagrāhakatvataḥ ||
aṇoḥ pratyātmasiddhatvānnānumādhyakṣabādhikā |
neha grāhakatā buddheḥ sādhitatvājjaḍatvataḥ ||
kiṃ caitadgrāhakatvaṃ ca na bhedādātmanāṃ sthitam |
svarūpaṃ tu tatasteṣāṃ grāhakatvena saṃsthiteḥ ||
na hyaṃśena padārthānāṃ vicāraḥ śobhate kvacit |
agniśśaktiṃ vinā kīdṛgiti cintā na kutracit ||
svaparagrāhakastasmātsarvadātmā vyavasthitaḥ || iti ||
(pau paśu pa ślo 105-113)

anyatra -

vyañjkaṃ yatra yatra syāccharīraṃ tatra tatra tu |
bhogārthaṃ syādguṇavyaktirvyāpitvaṃ tena gamyate || iti ca ||

15) na ca sāṅkhyoktarītyā ātmanāmajñātṛtvam; 
teṣāmarthagrāhakatvasya darśanāt | na ca vācyamātmano jñaptimātratve'pi 
mahattattvāparaparyāyasya buddhitattvasya jñātṛtvamiti | tasya jaḍatvena 
jñānābhivyañjakatvāt | kiṃ ca ātmā svaparaprakāśako'nubhūyate | 
paraprakāśakatvaṃ ca jñātṛtvamātmana eva guṇaḥ | buddhyā 
aikyamāpannasyātmano jñātṛtvamiti vācyam | 
buddhyaikyasādhakasyādhyāsasyaivāsiddheḥ | kiṃcādhyāsasyāpi paratra 
pūrvadṛṣṭāvabhāsatvenātmavyatiriktasya jñātṛtvaṃ vaktavyam | tacca na 
sambhavati | buddherjaḍatvena jñātṛtvābhāvasyoktatvāt | atha 
citpratibimbatvena buddhyāderjñātṛtvaṃ, tarhi buddhirapi cetanā syāt | kiṃ ca 
cidrapasya pratibimbanameva na sambhavati | buddherhi pariṇāmino jaḍasya 
pratibimbanam | tasmāt buddhāvātmanaḥ pratibimbanaṃ vaktuṃ na yujyata 
ityadhyāsenātmanaḥ kartṛtvaṃ buddhiparikalpitam ||

16) tathā coktaṃ śrīmatpauṣkare -

jñātā cāyaṃ na tu jñaptimātro'rthagrāhako yataḥ |

ṛṣayaḥ -

jñaptyātmaivāyamuddiṣṭo jñātṛtvaṃ mahato matam ||
mahānadhyavasāyātmā tantre'pyasminmaheśvara |

īśvaraḥ -

sarve jñātāra eveha dṛśyante prāṇinaḥ sadā ||
na bauddhametajjñātṛtvaṃ yuktaṃ tasyā jaḍatvataḥ |
kiṃ tu budhyādibhirjñānaṃ vyajyate'tra sadaiva hi ||
kiṃ cānubhūyate hyātmā svaparātmaprakāśakaḥ |
paraprakāśakatvaṃ ca nityaṃ nityaguṇo yataḥ ||
jñātṛtvaṃ naitadadyāsakṛtaṃ bhavitumarhati |
anyatra dṛṣṭadharmāṇāmanyatrādhyāsa iṣyate ||
ātmetarasya jñātṛtvāsiddhernādhyāsa iṣyate |
atha citpratibimbena buddhyāderjñātṛtā bhavet ||
tarhi citpratibimbena buddhyādirapi cidbhavet |
na cetano yato buddhau cidrūpaḥ pratibimbitaḥ ||
na cāyaṃ pratibimbo'pi cidrūpasyātmano mataḥ |
jaḍe jaḍasya saṅkrāntiryujyate pariṇāminaḥ ||
buddhyādeḥ pratibimbo'pi na syādātmanyasambhavāt |
anyonyādhyāsavādo'yaṃ kudṛṣṭiparikalpitaḥ || iti ||
(pau paśu pa ślo 91-99)

17) nanvātmabhede kiṃ mānam ? pratyakṣamiti cenna; 
tasyāmūrtadravyatvena bāhyendriyāviṣayatvāt | nāpyahaṃ sukhī ahaṃ 
duḥkhītyādimānasapratyakṣeṇātmabhedasiddhiḥ | tatpratyayasya 
bhedaprayojakatvābhāvāt | na ca ātmānaḥ parasparaṃ bhinnāḥ, 
parasparaviruddhadharmāśrayatvāt, dahanatuhinavadityanumānaṃ mānamiti 
vācyam; parasparaviruddhadharmāṇāṃ tadavacchedakopādhiparikalpitatayā 
ātmaniṣṭhatvābhāvāddhetorasiddheḥ | na hyekasmin ghaṭākāśe 
rajodhūmādibhiryujyamāne maṭhākāśādayo'pi yujyante | 
tasmātparidṛśyamānasya bhedasyaupādhikatayātmabhedaḥ kathamiti cet, 
ucyate - ātmāno bhinnāḥ, parasparaviruddhajanmamaraṇādidharmavattvāt, 
yadevaṃ tadevaṃ, yathā ghaṭapaṭādi | na cātmanāṃ janmādyabhāvena 
hetorasiddhiḥ | dehādereva janmādyapagame tatra caitanyameva na dṛśyate | 
ataścaitanyayukta eva dehādirutpadyate ||

18) nanu nityasya caitanyasya kathamutpattiḥ ? yathā tava nityānāṃ 
dehendriyādīnāmutpattistathātmano'pi sambhavati | athaivaṃrūpeṇa 
dahendriyā dayo na nityāḥ, kiṃ tu kāraṇātmaneti brūṣe tadā 
mamāpyātmāno'vacchinnarūpeṇotpatyādimantaḥ, anavacchinnāstu nityā iti 
siddhamutpattilayadharmakatvamātmanām | nanu yathā utpattyādayo dharmāḥ 
kumbhakalaśodañcanādīnāṃ, na tu tadavacchinnasyākāśasya | 
evamutpattyādayo dharmā dehādīnāmeva | na tu tadavacchinnasyātmana iti 
cenna; ātmadharmasyaiva bhojanagamanādiviṣayakasyecchāderbhinnatve-
naivātmabhedasiddheḥ | na ca tasyāpyaupādhikatvam; tasyātmano rūpaṃ 
dṛkkriyānantyalakṣaṇam iti lakṣaṇābhidhānāt | na ca bhinnatayā 
meyatvenātmanāṃ mātṛtvaṃ na siddhyediti vācyam | 
meyatvamātṛtvayorvirodhābhāvāt | anyathā ātmānāṃ meyatvāyogena 
śivasya sarvajñatvaṃ bhajyeta | kiñcaikasya muktau sarveṣāṃ muktiḥ 
prasajyeta | na ceṣṭāpattiḥ | prapañcasya yugapadvināśaprasaṅgāt | tathāca 
mokṣe yatno'pi viphalaḥ syāt | tasmādbhinnā evātmānaḥ ||

19) tathā  coktaṃ śrīmatpauṣkare -

ṛṣayaḥ -

ātmāno bahavaḥ proktā bahutvaṃ kena gamyate |
nādhyakṣagamyaṃ tattāvannānumāviṣayaṃ tataḥ ||
bhedasya meyadharmatvānmātā meyaḥ kathaṃ bhavet |
na hetusādhanābhāvo'pyātmabhedopapādakaḥ ||
sopādhikātmadharmasya bhedātsopādhikāntare |
yathaikasmin ghaṭākāśe rajodhūmādibhiryute || 
na sarve samprayujyante tadvajjīvāḥ sukhādibhiḥ |
tasmādekātmabhāve'smin parihāro vidhīyatām ||

īśvaraḥ -

ātmāno bahavo janmamaraṇādivibhedataḥ |
janmanāśādayo dharmā dṛśyante bhinnavastuṣu ||
tatastu janmanāśādyā ātmano bhedakāḥ sthitāḥ |
na dehasyaiva janmādyā dehādyaiḥ saha cātmanām ||
dehāderyadi janmādyā na syāccaitanyadarśanam |
taddehe jātabālānāmapi caitanyamiṣyate ||
caitanyenāviyuktaḥ san dehādirupajāyate |
janmādibhedavanto'to dehāścidbhedasādhakāḥ ||
caitanyasyeha nityasya kathaṃ janmeti cenmatiḥ |
atyalpamidamete ca nityā dehendriyādayaḥ ||
nāsato vidyate bhāvo nābhāvo vidyate sataḥ |
tasmādekātmavādo'yaṃ kalpito mūḍhacetanaiḥ ||

ṛṣayaḥ -

athākāśaṃ yathā kumbhakalaśodañcanādiṣu |
ekameva sthitaṃ tadvaddeheṣvātmā vyavasthitaḥ ||

īśvaraḥ -

taccaikarūpamākāśaṃ naivaṃ caitanyamiṣyate |
bhoktumicchā yadaikasya gantumicchāparasya ca ||
tadevamātmacaitanyaṃ bhinnarūpamiva sthitam |
yadyabhinnaṃ tu sarveṣāṃ bhoktumicchaikadā bhavet ||

ṛṣayaḥ -

sopādhikātmadharmasya bhedāditi nanūditam |

īśvaraḥ -

aṇorabhede saṃsiddhe tathā vaktavyamagrajāḥ ||
yuktibhiḥ sādhite bhede nāsiddhisvīkṛtiḥ śubhā |
ata eva ghaṭākāśe rajodhūmādibhiryute ||
na sarve samprayujyante yathānye tanna dūṣaṇam |
bhedasya meyadharmatvāditi yaccoditaṃ purā ||
sa ca heturasiddho'tra meyāmeyārthayordhṛtaḥ |
bhedo'pyubhayaniṣṭhaḥ syānna ca māturameyatā ||
śivasya meyā hyātmāno na cetsarvajñatākṣatiḥ || iti ||
(pau paśu pa ślo 74-91)

anyatra -

sthitāyāṃ sarvato muktau bhavocchedaḥ prasajyate |
na cāsti sa bhavocchedastena te bahavo matāḥ || iti ||

20) evaṃ cātmano dehādyanyatvanityatvacidrapatvakartṛtvanānātvāni 
ca siddhāni | sarvajñatvamapi svataḥ siddham | kiñcijjñatvaṃ tu 
malarūpakāraṇāt | taduktaṃ tatraiva -

aṇoḥ pratyakṣasiddhatvānnānumādhyakṣabādhikā |
nehā grāhakatā buddheḥ sādhitatvājjaḍatvataḥ ||
kiṃ caitadgrāhakatvaṃ ca na bhedādātmanāṃ sthitam |
svarūpaṃ tu tatasteṣāṃ grāhakatvena saṃsthitiḥ ||
na cāṃśena padārthānāṃ vicāraḥ śobhate kvacit |
-----------------------------------------------------------
tadvat svato'mī sarvajjñāḥ kiñcijjñatvaṃ tu kāraṇāt |
niruddhaṃ yena sārvajñyaṃ sa malaḥ paripaṭhyate || iti ||
(pau paśu pa ślo 110-112, 114)

21) nanvayaṃ sākāro nirākāro vā ? ādye'pi dṛśyākāro vā 
dṛśyādṛśyākāro vā ? nādyaḥ | dehamadhye'nyasyādarśanāt; na dvitīyaḥ; 
dṛśyādṛśyatvayorekatra virodhāt | kāṣṭhāgnivacchākhācandravaccobhaya-
mapi kālabhedena sambhavatīti cet, na; tadvadeva kadācidadarśanaprasaṅgāt | 
nāpi tṛtīyaḥ; sūkṣmaśarīrāvyatirekaprasaṅgāt | nāpi nirākāraḥ; 
tatsaṃbandhena śarīre ceṣṭādyayogāt | na hyākāśasaṃyogena 
kutracicceṣṭā bhavati; ceṣṭāvatsaṃyogasyaiva dṛtiprabhṛtiṣu 
ceṣṭājanakatvadarśanāt | kiṃ cātmanaścidrūpatva indriyāṇāṃ 
vaiyarthyamāpatet | na hi cito jñātṛtve'citsāhityamapekṣyata iti yuktam | api 
cātmano vyāpakatve 
lalāṭādiniyatadeśavṛttitvāyogenāvasthāpañcakānupapattiprasaṅga 
ityanupapattiparāhṛtamātmasvarūpamiti; ucyate - nirākāra evāyamātmā | na 
caivaṃ śarīre ceṣṭānupapattiḥ; kriyāśaktyā tadupapatteḥ na ca tasyāḥ 
sarvadā sadbhāvena ceṣṭāpi sarvadā syāditi vācyam; tasyā 
āṇavāvṛtatvenāsatkalpatayābhivyañjakabuddhivṛttirūpasaṃrambhasāpekṣa
-tayā kāryasya kādācitkatvopapatteḥ | na caivaṃ saṃrambha eva 
ceṣṭāprayojako'stu, kiṃ kriyāśaktyeti vācyam;  saṃrambhamātrasya 
jaḍadharmatayā ceṣṭāprayojakatvānupapatteścetanaśakterāvaśyakatvāt-
saṃrambhotpādanāya kriyāśakterāvaśyakatvācca | 
jñānakriyayormūrtitvopacāreṇa mūrtimānapi bhavati | 
evamātmanaścidrūpatve'pi nendriyāpekṣānupapattiḥ | 
caitanyaśaktermalāvṛtatvena tadabhivyaktaye buddhirūpabodhotpādanāya 
tadapekṣopapatteḥ | buddhivṛtterjaḍatvena tadabhivyaktacicchaktereva 
prakāśakatvāt | evaṃ vyāpakatve'pyasya na kāpyanupapattiḥ | 
jāgradādyavasthāparikarasya lalāṭādivṛttitvena tadavacchinnasyāpi 
lalāṭādiniyatadeśakatvopapatteḥ | sūkṣmadehasya gatimattvena 
tadavacchinnasya sakalāvasthasya paralokagatyādyupapatteśca ||

22) tathā hi - ātmanastisro'vasthāḥ | kevalāvasthā, sakalāvasthā, 
śuddhāvasthā ceti | tatra yadā dvividhena dehena prāṇendriyāntaḥkaraṇaiśca 
vinākṛto'ta evābhivyañjakavidhuratayāṇavāvatasaṅkalpajñānakriyā-
śaktiḥ kimapyabudhyamāna āste tadā kevalāvasthā | yadā 
sūkṣmadehenānnamayaprāṇamayamanomayavijñānamayānandamaya-
kośaiścāvacchinnastadā sakalāvasthā | yadā karmasāmye 
tanniyataśaktinipāte ca sati 
gurukṛpāvaśācchivānandābhivyaktermalatrayanivṛttyā 
śivaikyābhivyaktistadā śuddhāvasthā | tatra sakalāvasthātaḥ 
kevalāvasthāprāptisamaye'vasthābhedaḥ pañcavidhaḥ | 
nādādipṛthivyantaṣaṭtriṃśattattvaiḥ saha yadā lalāṭasthaḥ sarvān 
viṣayānanubhavati tadā sapratibhā jāgradavasthā | saiva sakalāvasthā | 
viṣayabhojakādṛṣṭābhāvena prerakāṇi śuddhāni pañcatattvāni 
bhojayitṛkāṇi saptatattvāni pañcamahābhūtāni ca; eteṣu 
saptadaśasūparateṣu śrotrādīni pañca, vāgādīni pañca, 
manobuddhyahaṅkāracittāni catvāri, śabdādīni pañca, tāttvikāni 
vacanādīni pañca, prāṇādīni daśa cetyetaiḥ saha kṣetrajñanāmaka ātmā 
pañcatriṃśo yadā mukhe tiṣṭhannapi 
prerakabhojayitṛkāṇḍayornirvyāpāratvenāṇavātiśayājjāgrannapi viṣayān 
samyaṅna jānāti tadā apratibhā jāgrat | sūkṣmadehabhoganimittāni 
śabdādīni pañca, vacanādīni pañca, prāṇādīni daśa, 
manobuddhyahaṅkāracittāni catvāri, etaiḥ saha pañcaviṃśakaḥ 
kṣetrajñanāmaka ātmā yadā kaṇṭhe sthito vyāvahārikaviṣayānvihāya 
tātkālikapratibhāsikaviṣayānanubhavati tadā svapnāvasthā | 
sthūlasūkṣmadehabhogān tyaktvā yadā hṛdaye cittaprāṇavāyubhyāṃ saha 
tṛtīya ātmā tiṣṭhati tadā suṣuptyavasthā | yadā nābhisthāne prāṇavāyunā 
dvitīya ātmā tiṣṭhati tadā turīyāvasthā | yadā tu mūlādhāre 
tattvatāttvikādīn sarvānvihāya ātmaivaika āṇavāvṛtastiṣṭhati tadā 
turyātītāvasthā | saiva nityakevalāvasthetyādinā kevalāvasthā caturvidhā ||

23) nanu mahāpralaye tattvātāttvikādīnāṃ sarveṣāṃ 
līnatvādātmanaḥ kevalatvenāvasthānaṃ sambhavatu; idānīṃ 
tattvānāmāpralayāvasthāyināṃ vibhorātmanaśca sattve'pi kathaṃ 
tattadvyāpārābhāva iti cet, satyaṃ, agnerayasaśca sattve'pi 
saṃyojakapuruṣavyāpārābhāvādyathāyaso na dāhaktvaṃ tathā 
vidyamānānāmapi tattvānāṃ bhojakādṛṣṭābhāvaprayuktāyāḥ 
śivaśaktipreraṇāyā abhāvānna viṣayabhojakatvam | taduktaṃ -

ayasāgneryathā yogo viyogo'gneryathāyasā |
tattvānāmātmanaścaiva śaktyā karmavaśādbhavet || iti ||

24) atha nirmalajāgradādyacyate - 
akārokārakārabindunādādhiṣṭhātṛśivaśaktiyogena nirmalāntaḥkaraṇa 
ātmā hṛdaye tiṣṭhan sarvaṃ dṛśyamānaṃ prapañcaṃ śivākāratayā 
vaiṣayikasukhaṃ ca svarūpānandatayānubhavati tannirmalajāgrat | 
jāgradavasthākāraṇasyākārasyokāre vāhyaviṣayagrāhakasya 
manasaścāhaṅkāre laye sati ahaṅkārādicatuṣṭayasyokārādicatuṣṭayena 
saha kaṇṭhe sohambhāvanayāvasthānaṃ nirmalasvapnaḥ | 
svapnāvasthākāraṇasyokārasya makāre 
ahamityabhimānakāraṇasyāhaṅkārasya ca buddhau laye sati 
buddhyāditrayasya tatprerakasyamakārāditrayasya ca 
suṣuptisthānabhūtatālumūle 
dehendriyavṛttirahitavācāmagocarajñeyajñātṛjñānatripuṭīrūpeṇāvasthān
aṃ nirmalasuṣuptiḥ | suṣuptyavasthākaraṇamakārasya bindau 
nirṇāyakabuddheśca citte laye sati cittasahitātmano bindunādābhyāṃ saha 
turyāvasthāsthānabhūte bhrūmadhye bāhyāntaḥkaraṇavyāpārarāhityena 
jñaptimātreṇāvasthānaṃ nirmalaturīyam | 
turyāvasthākāraṇabindunādayoḥ kuṭilāyāṃ cittasya ca prakṛtau laye sati 
turyātītāvasthāsthānabrahmarandhra ātmano'ntarbahirvyāpitayaikasyaiva 
tiṣṭhato'khaṇḍākārasaccidānandādvayaparipūrṇaśivānanyābhivyaktiḥ, 
saiva nirmalaturyātītam | tadeva śuddhāvasthā |

25) taduktaṃ siddhāntasārāvalyām -

bāhyāntaḥkaraṇairaṇoḥ svaviṣayajñānaṃ tu jāgrattataḥ
svapno'ntaḥkaraṇasthavṛttiviṣayajñānaṃ suṣuptiḥ param |
dehe tvindriyavṛttihīnamavacogrāhyā matisturyakaṃ 
dehākṣoparatau svacinmatirathātītaṃ śivatvodayaḥ || iti ||
(si sā - yogapāde ślo 8)

siddhāntabodhe ca -

jāgratkāraṇamevārṇayogasaṃvedanaṃ hṛdi |
ubhayendriyavṛttyātha līnamākāravedanam ||
svapno'ntaḥkaraṇaireva kevalairgaladeśataḥ |
pūrvaviṣayākhyāṇuyogena saṃvedanaṃ yadā ||
līnāntakaraṇaṃ vṛtteḥ suṣuptistāludeśataḥ |
bundūdayastu turyaṃ tu bhrūmadhye vyatirekataḥ ||
kāryakāraṇayoratra vṛttyārthādeśca saṅgrahaḥ |
sarvārthadṛkkriyāvṛttihetornādasya vedanam ||
turyātītā ca randhro'tra daṇḍāntādeśca saṅgrahaḥ || iti ||

26) tadevamavasthābhedopeto malasambaddhacidrūpo vyāpakaḥ paśruriti 
siddham ; eṣa ca paśurūpādhibhedena trividhaḥ sakalaḥ pralayākālo 
vijñānākalaśceti | tatra sakalo nāma maloparuddhadṛkchaktitve sati 
tatprasārāya kalādimattve sati bhogāya karmasambaddhaḥ | pralayākalo nāma 
pralaye ujjhitakalatve sati dīkṣayā prāyaścittena bhogādvā 
aśuddhādhvaviṣayakarmaparikṣayavattve sati 
bhokṣyamāṇamiśrādhvakarmaṇā svavaśīkṛtakalāsambandhavān | 
vijñānākalo nāma vijñānādinā sarvakarmāṇi kalāśca vihāya 
dṛkkriyāvarakāṇavamalamātrayukto vijñānakevalaḥ |

27) tathā coktaṃ śrīmatpauṣkare -

paśavastrividhā jñeyāḥ sakalaḥ pralayākalaḥ |
vijñānākala ityeṣāṃ śṛṇudhvaṃ lakṣaṇaṃ kramāt ||
maloparuddhadṛkchaktistatprasṛtyai kalādimān |
bhogāya karmasambandhaḥ sakalaḥ paripaṭhyate ||
prāgvanniruddhadṛkchaktiḥ karmapākātkalojjhitaḥ |
karmaṇaiṣyatkalāyogyo yassa ca pralayākalaḥ ||
maloparuddhaśaktitvācchūnyakalpasvadṛkkriyaḥ |
tṛtīyaḥ paṭhyate tantre nāmnā vijñānakevalaḥ || iti || 
(pau paśu ślo 2-5)

28) tatra 
sakalānāmavasthānamaśuddhamāyādhobhāge'śuddhādhvani | 
pralayākalānāṃ tu aśuddhamāyāmadhyabhūtamiśrādhvani | 
vijñānakevalānāmaśuddhamāyopari śuddhavidyādhobhāge | 
etaccāvasthānaṃ vibhutve'pyupādhivaśāllakṣyate | taduktaṃ tatraiva -

māyādāvudare cānte krameṇaiṣāṃ vyavasthitiḥ |
avasthānaṃ ca bandhena lakṣyate'ṇorvibhutvataḥ || iti ||
(pau paśu pa ślo 6)

29) nanu vijñānakevalānāṃ malamātrāvṛtatvena malasya ca 
vyāpakatayā ekadeśe māyānte kathamavasthānam ? ucyate - 
aśuddhamāyāyā bhuktatvena 
tatrecchābhāvādbhokṣyamāṇaśuddhamāyāyāśca vubhukṣitatve'pi 
tatprāpakaśivecchāyā abhāvāttayormadhye'vasthānamityuktam | te ca 
śivecchayā śuddhādhvavartino bhavanti | tadvartināmapi teṣāṃ na sakalatvam 
| kiṃ tu śivecchayā adhikāramalasahitatvena kevalaṃ vijñānakalatvameva | 
vijñānarūpā kalā yeṣāmiti vijñāna kalāḥ ||

30) tathā coktaṃ śrīmatpauṣkare -

ṝṣayaḥ -

vijñānakevalāṇūnāṃ bandhastu mala eva hi |
malasya vyāpakatvena māyānte saṃsthitiḥ katham ||

īśvaraḥ -

bhadraṃ viprā mahāprājñāḥ śuddhādhvā yaḥ puroditaḥ |
bhokṣyamāṇatayā tasya bhuktatvenetarasya ca ||
arthādeva sthitā madhye proktā vijñānakevalāḥ |
vijñānakevalāḥ sākṣātta eva munipuṅgavāḥ ||
śuddhādhvavartinaḥ paścādbhaviṣyanti śivecchayā |
aṇorniyāmakatvena māyāvacchuddhavartmanaḥ ||
tadvartino na sakalāḥ kiṃ tu vijñānakevalāḥ |
adhiakāramalopetāḥ śivecchānumatāḥ sadā || iti ||
(pau paśu pa ślo 7 - 11)

31) teṣāṃ māyākarmarāhitye heturapi tatraivoktaḥ -

vijñānakevalānaṃ tu siddhyai yuktirihocyate |
kalātattvāntarodhinyā dīkṣayā jñānato'pi vā ||
yogena bhogato vātha sannyāsādvā parikṣaye |
karmaṇāṃ tu tadāyattamāyāyāśca parikṣayāt ||
mala eko'vaśiṣṭaḥ syāttasmādvijñānakevalāḥ |
bauddhādidṛṣṭimuktānāṃ kaivalyamapi neṣyate ||
yatastadbuddhitattvordhvakarmaṇāmaparikṣayaḥ |
sakalā eva te jñeyāḥ kalāyogo yataḥ sthitaḥ ||
evamevāṇavo yuktisiddhāḥ pralayakevalāḥ |
tattvānāmupasaṃhāre pralayātkarmaṇo'tha vā ||
tyaktasūkṣmabahirdehā eṣyadbhoganibandhanaiḥ |
apakvaiḥ karmabhiryuktā iṣyantāṃ pralayākalāḥ ||
sakalāstu kalāyogāt sūkṣmā sthūlā ca sā dvidhā |
pratipuṃniyataṃ tattvaṃ kalādyavanipaścimam || iti ||
(pau paśu pa ślo 12-18)

32) vijñānakevalāśca praśāntakaluṣā apraśāntakaluṣāśceti 
dvividhāḥ | teṣu kāṃścana malaparipākaṃ nirīkṣyaiva śivaḥ 
śuddhādhvanyadhikāre yojayati | kāṃścidbhogākhye tattve yojayati | tatra 
yojitāśca te'bhīpsitavividhabhogān bhuñjānāḥ patyuricchayādhikāreṣu 
pravartante | ye tvīśvaratattvaṃ prāpitā adhikāraguṇopetā 
mahāntaścakravartino yathāpūrvaguṇottarā aṣṭāvanantādyā vidyeśvarāḥ | 
kecana punarvidyākhyaṃ tattvaṃ prāptāḥ saptakoṭimahāmantrāḥ | eteṣāṃ 
madhye yasya svādhikāre vairāgyaṃ jāyate taṃ 
malaparipākānuguṇyenaiveśvaro'nugṛhya paramāṃ muktiṃ prāpayya 
sādākhyatattvagatānāṃ pade īśvaratattvagatan, īśvaratattvagatānāṃ pade 
vidyātattvagatān, tatratyānāṃ pade māyāmastakagatāṃśca yojayati |

33) taduktaṃ śrīmatpauṣkare -

icchayaivānugṛhyādau śivo vijñānakevalān |
malapākamapekṣyaiva kāṃścicchuddhādhvagocare ||
yojayatyadhikāreṣu kṛtvā dṛkkriyayotkaṭān |
tattve bhogāhvaye cānyān yojayatyīśvarāhvaye ||
anyān vidyāhvaye tattve sarvajñānbalaśālinaḥ ||
sadāśivaguṇopetā bhogākhyaṃ tattvamāśritāḥ |
mano'bhilaṣitānbhogānbhuñjānā vividhānapi ||
patikṛtyādhikāreṣu pravṛttāḥ patyuricchayā |
ye prāptāstattvamaiśānaṃ viśeṣeṇa kriyādhikāḥ ||
adhikāraguṇopetā mahāntaścakravartinaḥ |
aṣṭāvanantasūkṣmādyā yathāpūrvaṃ guṇādhikāḥ ||
atisaundaryalāvaṇyā akṣīṇamanasaḥ sadā |
vidyāvidyādvayaṃ prāptāḥ saṅkhyayā saptakoṭayaḥ ||
praśāntakaluṣāḥ sarve mahātmāno'mitaujasaḥ |
eteṣāṃ yasya vairāgyamupajātaṃ mahātmanaḥ ||
kimetenādhikāreṇa śreyasaḥ paripanthinā |
iti taṃ parameśāno malapākamapekṣya saḥ ||
svecchayaivānugṛhṇāti muktivyaktyarthayā dṛśā |
tato muktyarthamāsannaṃ kaniṣṭhaṃ tatpade vibhuḥ ||
niyunaktyanugṛhyānyaṃ tatpade niyunaktyapi || iti ||
(pau paśu pa ślo 49- 58)

34) evaṃ pralayākalā apidvividhāḥ | pakvamalā apakvamalāśceti | tatra 
śivaḥ pakvamalānanugṛhā tebhyo bhuvanapatitvaṃ dadāti | pralayakāleṣu 
apakvamalāḥ prākṛtabhogakarmavaśātpuryaṣṭakadehayutāśca sakalā 
bhavanti | taduktaṃ tatraiva -

svecchayaivānugṛhṇāti pralayāṇūnapīśvaraḥ || iti ||
(pau paśu pa ślo 19)

anyatra ca -

pralayākaleṣu yeṣāṃ pakve malakarmaṇi vrajantyanye |
puryaṣṭakadehayuktāṃ yoniṣu nikhilāsu sūkṣmakarmavaśāt ||
kāṃścidanugṛhya vitarati bhuvanapatitvaṃ maheśvarasteṣām || iti ||

35) sakalā api trividhāḥ; sāṃsiddhikavainayikaprākṛtabhedāt | tatra 
sāṃsiddhiko nāma pūrvajanmani 
kṛtaśravaṇamanananididhyāsano'niṣpannaśivasākṣātkārastadarthaṃ 
śukavāmadevajaḍabharatādivatparigṛhītadeho'vicchinnanididhyāsanavāsa-
nayā śivāvānugrahācchivasākṣātkāravān | vainayiko nāma gurau 
vinayaśīlaḥ san dīkṣāṃ labdhvā manovākkāyikaśivadharmaiḥ śuddhaḥ 
laukikaśivaśāstrayoḥ parijñānavān | tadanugrahaprakāraṃ dīkṣāparicchede 
vakṣyāmaḥ | prākṛto nāma svapnajñānavat jñātājñātabodhaḥ 
prakṛtijanyadehendriyādiṣvātmābhimānavān | taduktaṃ śrīmṛgendre -

viśiṣṭadharmasaṃskārasamuddīpitacetasām |
guṇaḥ sāṃsiddhiko bhāti dehāpāyo'pi pūrvavat ||
lokadhīguruśāstrebhyo bhāti vainayiko guṇaḥ |
sammārjito vainayiko manovāktanuceṣṭayā ||
prākṛto dehasaṃyoge vyaktaḥ svapnādibodhavān || iti ||
(pra 10, ślo 26-28)

36) asya ca sakalasya bandhamokṣaprakārāvavasthābhedaśca 
śrīmatkiraṇe pratipāditaḥ |

garuḍaḥ -

yadyevaṃ sa paśustāvat kīdṛśo baddhyate katham |
mucyate kathamākhyāhi sandehavinivṛttaye ||

bhagavānuvāca -

paśurnityo hyamūrto'jño niṣkriyo nirguṇo'prabhuḥ |
vyāpī māyodarāntastho bhogopāyavicintakaḥ ||
tasyāśuddhasya sambandhaṃ samāyāti śivātkalā |
tayodbalitasāmarthyo'vidyādarśitagocaraḥ ||
rāgeṇarañjitaścāpi pradhānena guṇātmanā |
buddhyādikaraṇānīkasambandhādbadhyate paśuḥ ||
tato niyatisaṃśleṣātsvārjite viniyamyate |
kālena kālasaṅkhyānakāryabhogavimohitaḥ ||
evaṃ tattvakalābaddhaḥ kiñcijjño deha saṃyutaḥ |
māyābhogapariṣvaktastanmayaḥ sahajāvṛtaḥ ||
tataḥ sukhādikaṃ kṛtsnaṃ bhogaṃ bhuṅkte svakarmataḥ |
same karmaṇi saṃjñāte kālāntaravaśāttataḥ ||
tīvraśaktinipātena guruṇā dīkṣito yadā |
sarvajñaḥ sa śivo yadvat kiñcijjñatvavivarjitaḥ ||
śivatvavyaktisampūrṇaḥ saṃsārī na punastadā |
evaṃ krameṇa baddhaḥ sa mucyate kramayogataḥ ||
kevalaḥ sakalaḥ śuddhastryavasthaḥ puruṣaḥ smṛtaḥ |
malinatvāccitermokṣaḥ prāpyate nirmalācchivāt ||
paśurevaṃvidhaḥ proktaḥ kimanyatparipṛcchasi || iti ||
(kira paśu pa ślo 14-24)

37) etadbhedopādhibhūtamalamāyākarmaṇāṃ lakṣaṇaṃ pāśapaṭale 
vakṣyate | nanvātmani siddhe tadbhedo yujyate | tatsadbhāve kiṃ mānam ? 
ucyate; ceṣṭamāno dehādiścetanādhiṣṭhito bhavitumarhati, jaḍatvāt, ghaṭavat; 
evaṃ ca jaḍapravartakatvenātmā siddhaḥ | yathā vā īśvarakartṛkaṃ 
tanukaraṇabhuvanādikaṃ kasyacidupabhogāya bhavitumarhati, jaḍatvāt; na 
ceśvara eva tadupabhoktā, tasyāvāptasakalakāmatvāt | nāpi bhuvanādikamapi 
tadupabhoktṛ; svasyaiva bhogyabhoktṛtvāsambhavāt | na ca vaiyarthyam ; 
prekṣāvatkāryatvāt | tasmātpāriśeṣyājjaḍeśvarayoranyena tadupabhokttrā 
bhavitavyam | sa cātmeti siddham |

38) taduktaṃ śrīmatpauṣkare -

ṛṣayaḥ -

satyātmani ca saṃsiddhe prākproktaṃ saphalaṃ bhavet |
tatsadbhāve tataḥ śambho ! pramāṇamabhidhīyatām ||

īśvaraḥ -

pravartamāno dehādiścetanādhiṣṭhitaḥ sadā |
svataḥ pravṛttiśūnyatvājjaḍatvena ghaṭādivat ||
yastu pravartakaḥ so'yamātmeti parapaṭhyate || iti ||
(pau paśu pa ślo 59-61)

39) śrīmanmṛgendre ca -

kāryaṃ kṣityādi karteśastatkartuṃrnopayujyate |
na svārthamapyacidbhāvānnānarthyaṃ kartṛgauravāt ||
pariśeṣyātparārthaṃ tat kṣetrajñaḥ sa parastayoḥ |
paro dehastadarthatvāt parārthāḥ kṣmādayo nanu ||
kāyo'pyacittvādānyārthyaṃ sutarāṃ pratipadyate |
cetanaścenna bhogyatvādvikāritvācca jātucit ||
bhogyā vikāriṇo dṛṣṭāścidvihīnāḥ paṭādayaḥ || iti ||
(mṛ pra 6 ślo. 2-5)

iti śrīmadativarṇāśramācāryavaryaśaivaparipālakaśivāgrayogīndra-
jñānaśivācāryaviracitāyāṃ śaivaparibhāṣāyāṃ 
paśupadārthanirūpaṇaṃ nāma 
tṛtīyaḥ paricchedaḥ ||



caturthaḥ paricchedaḥ

1) atha pāśapadārtho nirūpyate | tatra pāśatvaṃ nāma 
śivānandābhivyaktivirodhitvam | taccāṇavamalasyācchādakatayā, 
tirodhāyakaśaktestu taccodayitṛtvena, bindumāyākarmaṇāmapi 
bhogabhogyasampādanadvārā vaiṣayikasukhādijanakatvena ca bodhyam | ayaṃ 
ca pāśaḥ pañcavidhaḥ | āṇavaṃ tirodhāyakaśaktirbindurmāyā karma ceti | 
tatra catvāraḥ padārthā jaḍarūpāḥ | tirodhāyakaśaktistu cidrūpāpi 
pāśānugrāhakatvāt pāśa ityupacaryate | tatrāṇavatvaṃ nāma ātmano 
dṛkkriyārodhakatvam | asya cāṇavatvoktirvibhorātmano'ṇutvasampādanāt |

2) nanvasya sadbhāve kiṃ mānam ? na tāvatpratyakṣaḥ, 
tasyātīndriyatvābhyupagamāt | nāpyanumānam; tasya kvacidapyadarśanena 
sahacāragrahaviraheṇānvayino'sambhavāt | vyatirekasyoktanyāyena 
pratyakṣānumānāvagamyatayā tadabhāve vyatirekavyāpteragrahe 
vyatirekiṇo'pyanavatārāt | tasmānmalasadbhāve na kiñcinmānaṃ 
paśyāmaḥ | atrocyate - ātmā kiñcidāvṛtasārvajñyaḥ, kiñcijjñatvāt, yaḥ 
kiñcidāvṛtasārvajñyo na bhavati sa kiñcijjño'pi na bhavati, yathā śiva iti 
vyatirekyanumānena malasiddhiḥ | na cātmanāṃ sarvajñatve na 
kiṃcinmānamiti vācyam; teṣāṃ jñānaśaktiḥ sarvaviṣayā, 
jñānaśaktitvāt, īśvaraśaktivat, ityasya tatra mānatvāt | na 
cāsyāprayojakatvam; viṣayanaiyatyaprayojakasya 
tattadviṣayasambaddhakaraṇajanyatvasyābhāvena niyataviṣayatvāyogāt | 
svābhāvike vā teṣāṃ kiñcijjñatve muktau sarvajñatvaśrutivirodhācca | 
evaṃ ca jñānaśakterna 
svābhāvikasarvagocaratvamityācchādanādhīnamevābhyupeyam | 
taccācchādakajanyamityācchādaktvena malasiddhiḥ | uktaṃ ca 
śrīmatpauṣkare -

ātmā malāvṛtaḥ sarvajñatve kiñcijjñatā yataḥ |
na kiñcijjñastu yaḥ so'yaṃ malenāpi na saṃvṛtaḥ ||
yathā śivastathā nāyaṃ malenaiva samāvṛtaḥ || iti ||
(pau paśu pa ślo 124-126)

3) na cājñānenārthāntaratvam; vikalpāsahatvāt | tathāhi - 
tadajñānaṃ jñānābhāvaḥ anyathājñānaṃ vā ? nādyaḥ; 
abhāvasyākiṃcitkaratvāt | na hi ghaṭādyabhāvāḥ kiṃcitkāryaṃ kurvanti | 
kiṃ ca sa ca jñānābhāvaḥ prāgabhāvaḥ pradhvaṃsābhāvaḥ atyantāhāvo 
vā ? nādyaḥ; kālāntara eva jñānodayaprasaṅgāt | na dvitīyaḥ; kālāntare 
jñānānudayaprasaṅgāt | nāpi tṛtīyaḥ; bādhāt | nāpyanyathājñānam ; 
tasya doṣaṃ vinānudayāt | kiṃñcedamanyathājñānamāgantukaṃ 
svābhāvik'm vā ? āgantukaṃ cennityacicchakterbādhakaṃ na syāt | nāpi 
dvitīyaḥ; tasya svābhāvikatve'nyathātvāyogāt |

4) tathā coktaṃ śrīmatpauṣkare -

tadiha jñānamātraṃ cejjñānābhāvaḥ kimajñatā |
anyathāpratibhāso vā gatiranyā na vidyate ||
jñānābhāvona cājñānaṃ tasyākiñcitkaratvataḥ |
nābhāvo'pi ghaṭasyeha jalamāharati kvacit ||
jñānasya prāgabhāvaścejjñānotpattiḥ prasajyate |
nāpyetadanyathājñānaṃ tasyāpyanudayātsvataḥ ||
śuktikārajatajñānaṃ na bhavetpaṭalaṃ vinā |
kiñcaitadanyathājñānamāgantukamathetarat ||
āgantukaṃ ceccicchakterbādhaka na kadācana |
yadyanāgantukaṃ tarhi nānyathājñānameva tat ||
anityameva tajjñeyaṃ rajatajñānavaddvijāḥ |
kiñcaitadanyathājñānaṃ na samyagjñānabādhakam ||
na dṛṣṭaṃ śuktikājñānaṃ rajatajñānabādhitam | iti ||
(pau paśu pa ślo 115-121)

5) ayaṃ ca malo dravyarūpo bhavitumarhati; anekaśaktimattvāt, analavat | 
uktaṃ ca śrīmatpauṣkare -

kiñca dravyaṃ malo'nekaśaktimattvādyathānalaḥ | iti || 
(pau paśu pa ślo 115)

ata evāyamātmano na guṇaḥ; guṇatve guṇaguṇisambandhasya nityatvāt 
tasya nivṛttyabhāvaprasaṅgena muktau tannivṛttiśravaṇavirodhāt | na 
cāṇavasādhakasyānumānasya rāgeṇārthāntaratvam; tasya nirmale 
akiṃcitkaratvāt | yadi nirmale'pi syānmuktātmasvapi syāt | kiñca 
buddhidharmasya rāgasya prākṛtatvenā nityatayā 
nityāyāścicchakterbādhakatvaṃ na sambhavati |

6) uktaṃ ca pauṣkare -

rāgo'sti kāraṇaṃ sakteriti cetkiṃ malena tu |
satyaṃ rāgo'sti taddheturna sa kiñcitkaro'male ||
amale'pi sa cetsaktyai syanmuktepyaviśeṣataḥ |
na hi muktaḥ śivo vāpi bhogāsaktaḥ kadācana ||
kiñcāyaṃ pratyayātmokto rāgo bauddho yatastataḥ |
buddhiśca prakṛteḥ siddhā tasmādeṣa vinaśvaraḥ ||
cicchakternityasiddhāyā bādhakaḥ kathamiṣyate || iti ||
(pau paśu pa ślo 127-130)

7) nāpi karmaṇā arthāntaratvam; tasya cicchaktisādhyatayā 
jñānātmakabhogahetutayā ca tadāvārakatvāyogāt | āvārakatve vā tasya 
buddhidharmadharmādharmarūpatayā buddhitattvādūrdhvaṃ 
bandhakatvāyogācca | kiñca bhogaikavyāpṛtayostayorāvaraṇe kathaṃ 
vyāpāraḥ ||

8) nanvevaṃ tadeva kāryadvayasādhakamastu; kiṃ 
padārthāntarakalpanakleśeneti cet, hanta tarhyekayaiva vidyayā 
samastakāryasaṃsiddhau kāryabhedādarśanāttattvāntarakḷptirvyarthā syāt | 
tasmānna cicchakterāvārakamiti sthitam | uktaṃ ca tatraiva -

karmaṇāpi na ca jñānabādhaḥ sambhavati dvijāḥ |
sādhyatvātkarmaṇaḥ puṃsaḥ sādhakatvena saṃsthiteḥ ||
kiñca bhogaikahetustatkathaṃ bhogasya bādhakam |
yato jñānātmako bhogo na hi tena tadāvṛtiḥ ||
dharmādharmātmakaṃ karma tau ca bauddhau vyavasthitau |
vyāptyabhāvāttayorūrdhvaṃ bandhakau sarvataḥ katham ||
kiṃ ca bhogapravṛttau tau vyāpriyete kathaṃ vṛtau |
anyatrāpi pravṛttasya yadyapyatrāpi hetutā ||
anekatattvasaṃkḷptiḥ kāryabhedādvihanyate |
tasmānna karma cicchakterbādhakaṃ saṃvyavasthitam ||
kiñcābhivyañjakaṃ karma cicchakterbādhakaṃ katham | iti ||
(pau paśu pa ślo 130-135)

9) na ca māyayārthāntaratvam; tasyāḥ kāryāntarajanakatayā 
kḷptatvenāvaraṇarūpakāryāntarajanakatvāyogāt | kiñca 
kalādyṛtpādanadvārā dṛgādiśaktivyaktiṃ prati hetutayā 
tadviruddhācchādanahetutvāsambhavācca | uktaṃ ca tatra -

na ca māyā malastasmādyataḥ kāryātprakāśikā |
kāryātprakāśakaṃ yattu svātmanācchādakaṃ na tat ||
yathā prakāśakau dṛṣṭau vahnidīpāvubhāvapi |
na dīpakāraṇaṃ vahniḥ kvacidapyaprakāśakaḥ ||
na ca māyā svarūpeṇa puṃsāṃ kāryakarī sthitā |
kāryairaṇūpakāritvādyaditthaṃ tanna cātmanā ||
yathā tantuḥ svakāryeṇa paṭenaiva na cātmanā || iti ||
(pau māyā pa ślo 51- 54)

10) ata eva na dehasyāpyācchādakatvam; tasyāpi 
buddhivṛttyādyutpādanadvārā tadabhivyañjakatvāt | tasmādātmanāṃ 
dṛkkriyāvārakapratyātmasthasvakālāntāpāyiśaktisamūhavadekamanā-
divyāpyāṇavamiti siddham | yuktaṃ ca śrīmanmṛgendre -

tadekaṃ sarvabhūtānāmanādinibiḍaṃ mahat |
pratyātmasthasvakālāntāpāyi śaktisamūhavat || iti ||
(mṛ pra 7 ślo. 4)

11) etadanugrāhikā śivasya rodhakaśaktiḥ | taduktam -

tāsāṃ māheśvarī śaktiḥ sarvānugrāhikā śivā |
dharmānuvartanādeva pāśa ityupacaryate || iti || 

tathānyatra - (siddhāntasārāvalyāṃ)

nīhāro'nādireko manujasahabhavastāmragā kālikeva
svādhīkārāntanāśipratipuruṣadṛgāvārakānekaśaktiḥ |
pāśyaḥ śodhyaśca bodhyaḥ sa tu bhavati yato bhoktṛtā pāratantryaṃ
karmāderyoga etatkṛtimanukalitā rodhayitrīśaśaktiḥ || iti ||
(si sā ślo 6)

12) ayaṃ ca malo mohamadarāgaviṣādatāpaśoṣavaicitryākhyakārya-
bhedātsaptadhā | tatra moho nāmātmanāmanādiḥ sahajo madādīnāṃ 
ṣaṇṇāṃ hetuḥ jānatāmapi vanitādiṣu mohakārī malaḥ | svakīyatayā 
prāpteṣvaṅganādiṣvatiśayābhimāno madaḥ | rāgo nāma viṣayābhilāṣaḥ | 
tadalābhe viṣaṇṇatvaṃ viṣādaḥ | tataḥ pralāparūpastāpaḥ | 
putramitrakalatrādibhirdhanādibhiśca matsamo nāstītyādiviṣayacintā 
vaicitryam | tadvināśe stabdhātmakatvaṃ śoṣaḥ |

13) uktaṃ ca pauṣkare -

malo'pi saptadhā jñeyo mohaścāpi madastathā |
rāgo'nyaśca viṣādākhyastāpaḥ śoṣaśca saptamaḥ ||
vaicitryamapi sarveṣāṃ malinānāṃ prakīrtitam |
moho nāma malaḥ puṃsāṃ sahajo'nādimāniha ||
yoniḥ ṣaṇṇāṃ madādīnāṃ pradhānatvāddvijottamāḥ |
yasminsatyātmano moho jānatopyaṅganādiṣu ||
sa moha iti vikhyāto varjyāvarjyāvibhāgataḥ |
prāptāmapi striyaṃ yena stauti nāsyāḥ parāṅganā ||
divyāṅganeyameveti sa madaḥ pariṭhyate |
tadalābhe viṣaṇṇatvaṃ bāṣpalocanatā yataḥ ||
sa viṣādo malo nāma prāṇināmatiduḥkhadaḥ |
tatastāpo bhavedantaḥpralāpātmātivistaraḥ ||
sa tāpa iti vikhyāto malaḥ śoṣo bhavettataḥ |
stabdhātmā tu yadā yasmānmalo'tīva sudustaraḥ ||
eṣa bandhuriyaṃ bhāryā mṛṣṭaṃ cedaṃ dhanaṃ mahī |
kṛtārtho'hamato yadvā kastrātā māmakasya ca ||
kuṭumbasyaivamādyā tu cintā yena nṛṇāṃ bhavet |
nānāmatikaraḥ so'yaṃ malo vaicitryasaṃjñitaḥ ||
saptaite sahajāḥ proktā malā malavatāṃ nṛṇām || iti ||
(pau paśu pa ślo 137-146)

14) kaḥ punarātmamalayoḥ saṃbandhaḥ ? samavāya iti cet; malasya 
guṇatvaprasaṅgaḥ | na ceṣṭāpattiḥ; guṇasya jaḍatve guṇino'pi 
jaḍatvaprasaṅgāt | kiṃ ca samavāyasya nityatayā anirmokṣaprasaṅgācca | 
tasmāddravyameva malo'yutasiddhabhāvena guṇavadbhāti | atastayoḥ 
sambandhaḥ saṃyoga eva ||

15) nanu yutasiddhayoḥ sambandhaḥ saṃyoga iti saṃyogalakṣaṇāt 
saṃyogo'pi na saṅgacchate | satyam; tasya janyasaṃyogalakṣaṇatvāt | 
saṃyogamātrasya tūpādānopādeyabhāvarahitayordravyayoḥ sambandha iti 
lakṣaṇaṃ draṣṭavyam | tadevamāṇavaṃ tadanugrāhikā rodhakaśaktiriti 
pāśākhyaṃ siddham ||

16) atha bindurnirūpyate - śuddhasya tādṛśānāṃ ca 
tattvānāmupādānaṃ binduḥ | sā ca jaḍarūpā bhagavataḥ parigrahaśaktiḥ 
kuṇḍalinyaparaparyāyā | atraiva śivasya layādiravasthābhedo rudrāṇūnāṃ 
prabodho vimuktiśca | uktaṃ ca śrīmatpauṣkare -

layādibhedaḥ prāgukto yadupādhau śivasya tu ||
sa binduriti mantavyaḥ saiva kuṇḍalinī matā |
kiṃ ca rudrāṇavo yena badhyante yatra vā sthitāḥ ||
bimucyante yato vāyaṃ sa binduriti gamyatām | iti ||
(pau bindu pa ślo 1-3)

17) tatsadbhāve mānaṃ tu ananteśvarādiśarīrāṇi 
tadādhārabhūtatattvabhuvanādikaṃ ca sopādānaṃ, kāryatvāt, ghaṭavat iti | 
na cāśrayāsiddhiḥ | kalādikṣityantaṃ kāryaṃ śarīrakartṛkam, 
duḥkhānuṣaktakāryatvāt, sammatavadityanumānena 
samastamāyeyakāryakaraṇatvenānanteśaśarīrasya siddhiḥ | tathā - 
taccharīraṃ bhuvanavṛtti, śarīratvāt, tacca bhuvanaṃ tattvajanyaṃ, 
bhuvanatvāt sammatavaditi tattvabhuvanayorapi siddhisambhavāt | na ca 
māyayārthāntaratvam, anantaśarīrādeḥ samastamāyākāryajanakatayaiva 
siddhyā māyākāryatvāyogāt | anyathā tatrāpi 
śarīrāntarakalpanāprasaṅgāt | tathā ananteśaḥ savikalpakajñānavāneva san 
kāryaṃ karoti, prayojyakartṛtvāt, 
kulālavadityanumitasavikalpakajñānaviṣayatayā śuddhaśabdasiddhau 
taddhetutayāpi bindusiddhiḥ | na ca 
tadīyasavikalpakajñānaviṣayatvamaśuddhasyaiva śabdasyāstviti vaktuṃ 
yuktam; kalādisṛṣṭeḥ pūrvamaśuddhasya śabdasyāsambhavāt | tathā 
śuddhādhvavartināmavakāśapradātṛtayāpi tatsiddhiḥ | māyeyasyākāśasya 
tatrāvakāśapradātṛtvāyogāt |

18) uktaṃ ca śrīmatpauṣkare -

kiṃ ca māyādyupādānaṃ dehendriyakaraṃ nṛṇām |
kṣubdhaṃ kāryakaraṃ tasya karturdehendriyādikam ||
yadupādānato jātaṃ sa binduriti gamyatām |
kiṃ ca śabdānusaṃviddhā jāyante pratyayā nṛṇām ||
na hyakāraṇakāḥ śabdāḥ sambhaveyuḥ kadācana |
teṣāṃ yatkāraṇaṃ viprāḥ ! sa bindurbahuvṛttikaḥ || iti ||
(pau bindu pa ślo 12-14)

māyāpi nātropādānaṃ mohakatvātsvatejasā |
yataḥ prabuddhapuṃkāyakaraṇānāṃ na kāraṇam ||
śuddhādhvavartinaḥ sarve prabuddhāḥ śivatejasā |
dehendriyādimanto'pi nābuddhāsteṣu te punaḥ ||
kiṃ ca karmojjhitāḥ sarve pudgalāḥ śuddhavartmani |
kathaṃ karmānusāreṇa māyā pariṇatā satī ||
teṣāṃ dehendriyādīnāmupādānaṃ bhaveddvijāḥ |
tasmācchuddhādhvanaścāsya svānukāryeva kāraṇam ||
iṣyatāṃ kuṇḍalinyākhyaṃ śuddhametaddvijottamāḥ |
sā ca kuṇḍalinī śambhoḥ śaktiḥ śuddhā jaḍātmikā ||
na tādātmyātsthitā kiṃ tu vartamānā parigrahe |
śive kartari tādātmyānneyaṃ kuṇḍalinī sthitā ||
upādānatvato hetoḥ kulāle mṛttikā yathā || iti ||
(pau bindu pa ślo 6-12)

19) na cātra śivaśaktirevopādānam; cidrūpatvāt | acitaḥ khalu 
pariṇāmaḥ | nanu cito vivarta evāstu; tathā ca śivaśaktireva tattadākāreṇa 
vivartata iti cenna; tathā sati kāryajātasya mithyātvaprasaṅgāt | na 
ceṣṭāpattiḥ; sarvapramāṇasiddhasya jagatastathātvānupapatteḥ | uktaṃ ca 
tatraiva -

nātra śaktirupādānaṃ cidrūpatvādyathā śivaḥ |
pariṇāmo'citaḥ proktaścidrūpasya na yujyate ||
cito vivarta eveṣṭastathātve kāryaśūnyatā | 
sarvapramāṇasaṃsiddhaṃ cidvivartaṃ kathaṃ jagat || iti ||
(pau bindu pa ślo 4-5)

20) atra śabdavṛttiścaturdhā, sūkṣmā paśyantī madhyamā vaikharī 
ceti | tatra jñānaikāśrayā arthasāmāmānyaprakāśikā vāṇī sūkṣmā | 
mayūrāṇḍarasavadavibhaktavarṇārthaviśeṣabodhanākṣamā vāṇī 
paśyantī | buddhyupārūḍhavarṇā tatkramaviśeṣopetā 
prāṇavṛttyagocarībhūtā saiva madhyamā | prāṇavṛttyābhivyaktā 
śrotragrāhyārthaviśeṣabodhanakṣamā saiva vaikharī | tatra sūkṣmā 
paśyantyāḥ, paśyantī madhyamāyāḥ, madhyamā vaikharyāśca kāraṇaṃ 
draṣṭavyam | etāśca vṛttayo'ṇūnāṃ pratyayātmikāḥ | tatra tisrontareva 
sthitāḥ | anyā bahiḥ sthitā | ete ca śabdāḥ śuddhādhvani sūkṣmāḥ, 
miśrādhvani sthūlāḥ, aśuddhādhvani sthūlatarāḥ ||

21) taduktaṃ tatraiva -

śabdāścaturvidhāste'pi vaikharyādivibhedataḥ |
vaikharī madhyamākhyā ca paśyantī sūkṣmasaṃjñitā |
vaikharī śrotraviṣayā sthūlavarṇaparigrahā |
sthāneṣvapi dhṛte vāyau prayokturupakāriṇī ||
buddhya varṇānusandhānapūrvamarthasya vācikā |
prāṇavṛttimatikrāntā vāgeṣā madhyamāhvayā |
varṇarūpānusandhānavirahāntaḥ samujjvalā |
māyūrāṇḍaraso yadvannirviśeṣārthadhārikā |
paśyantī vāgiyaṃ jñeyā tṛtīyā śivaśāsane |
sūkṣmā cidekaśaraṇā nivṛttāśeṣaśaktikā || 
vaikharyāḥ kāraṇaṃ madhyā paśyantī madhyamāṃ prati |
paśyantyāḥ kāraṇaṃ sūkṣmā nirvikalpasvarūpiṇī ||
etāśca vṛttayo'ṇūnāṃ catasraḥ pratyayātmikāḥ |
antareva sthitāstisro bahiranyā vyavasthitā ||
āgopālāṅganābālaṃ mlecchāḥ prākṛtabhāṣiṇaḥ |
antarjalagatāḥ sattvā nityaṃ jalpanti tā giraḥ ||
ābhyo na paramo bandha ābhyo muktistu nāparā |
tannivṛttyavinābhūto dṛkkriyāvārako yataḥ ||
viviktānmanvate tebhyaḥ pudgalāḥ svānna kutracit |
duḥkhyahaṃ sukhyahaṃ ceti matiryā śabdatāḍitā ||
sūkṣmāḥ śuddhādhvani giraḥ sthūlā miśrādhvani sthitāḥ |
aśuddhādhvani tā vācaḥ sthitāḥ sthūlatarāḥ sadā || iti ||
(pau bindu pa ślo 20-30)

22) kiṃ ca nivṛttyādikalāhetutvenāpi bindusiddhiḥ | uktaṃ ca tatra -

anyāśca vṛttayo bindornivṛttyādikalātmikāḥ |
nivṛttiśca pratiṣṭhā ca vidyā śāntistathaiva ca ||
śāntyātītā ca pañcaitāḥ śuddhamārge purātmkāḥ |
miśrāśuddhādhvanoretāstattvādyādhārikāḥ sthitāḥ ||
vasturūpāḥ kalā jñeyāḥ śabdarūpāḥ paroditāḥ |
śabdavastūbhayātmāsau bindurnānyatarātmakaḥ || iti ||
(pau bindu ślo 30-32)

23) atra bindvārabdhāni śivaśaktisadāśiveśvaraśuddhavidyākhyāni 
pañca (?) tattvāni | uktaṃ ca tatraiva -

vṛttistattvātmikā cāsya caturdhā saṃvyavasthitā |
śivatattvaṃ sadeśākhyamaiśaṃ vidyāhvayaṃ tathā || iti ||
(pau bindu pa ślo 33)

24) tatra śivatattve sūkṣmābhidhānā vāgvṛttiḥ | atraiva 
śāntyatītabhuvanānāmavasthitiḥ | uktaṃ ca -

vikalpabodhāyāṇūnāṃ tattvānāṃ sthitaye kalāḥ |
pañca tattvāni lokāṃśca mantrādīnasṛjacchivaḥ ||
śāntyatītā purādhāraṃ śivatattvaṃ purābhavat || iti ||

25) asya ca śivādhiṣṭhitatvena śivatattvavyapadeśaḥ | śivatatvavikāraḥ 
śaktitatvam | atraiva paśyantyākhyāyā vāgvṛtteḥ nivṛtyādikalānāṃ 
cāvasthānam | asya ca śivaśaktyadhiṣṭhānatvena śaktitatvapadavācyatā | 
śaktitatvavikāraḥ sadāśivatatvam | idameva madhyamābhidhānāyā vāṇyā 
adhiṣṭhānam | tathā kāmikāditantrabhedakāraṇānāṃ praṇavādīnāṃ 
sāmīpyādimuktibhājāṃ ca tanubhuvanādikāraṇam | īśvaratatvavikāro 
vidyātatvam | idameva vaikharyākhyāyā vāgvṛtteradhiṣṭhānam | tathā 
karaṇabhūtānāṃ saptakoṭisaṃkhyānāṃ mantrāṇāṃ vidyārājñīnāṃ 
ca tanubhuvanādisampādakam ||

26) uktaṃ ca śrīmanmṛgendre -

bhṛguṇī brahmavetālī sthāṇumatyambikā parā |
rūpiṇī nandinī jvālā sapta saptārbudeśvarāḥ ||
vidyārājñyaḥ samākhyātā vidyāyāṃ rudrasaṃstutāḥ |
tāsāmupari dīptaśrīrdevo vidyādhipaḥ sthitaḥ ||
mantreśeśacidāviṣṭarudravyūhāṣṭakānugaḥ |
ucchuṣmāścambarāścaṇḍā mahāvīryapadadrugāḥ ||
rudrā gaṇāśca dikpālāḥ śāstrāṇi patayaḥsthitāḥ |
te cānantaprabhṛtayo gaditā eva nāmataḥ ||
svarūpataśca te viprāḥ pūrvaṃ praśnānuṣaṅgataḥ |
sadāśive pavitrāṅgaḥ sakalādiparicchadaḥ ||
devaḥ sadāśivo bindau nivṛttyādikaleśvarāḥ |
nāde dhvaniḥ patiḥ śaktau sarvaśktimatāṃ varaḥ ||
yonirviśvasya vāgīśāḥ patayaḥ parataḥ śivaḥ || iti ||
(mṛ pra 13 ślo 157-162)

27) anye tu pañcānāmapi śivadvārakaṃ lakṣaṇaṃ vadanti | 
jñānamātrayuktena paramātmanādhiṣṭhitaṃ tatvaṃ śivatatvam | 
kriyāmātrayuktenādhiṣṭhitaṃ śaktitatvam | 
samapravṛttobhayavatādhiṣṭhitaṃ sadāśivatattvam | 
adhikakriyāvatādhiṣṭhitamīśvaratatvam | adhikajñānavatādhiṣṭhitaṃ 
vidyātatvamiti | kecittu śivāditatvapañcakamapi sākṣādū 
bindukāryamevetyāhuḥ | etacca śivatatvādikaṃ bindvādiviśiṣṭaśivasya 
vṛttirūpaṃ kāryam | na pariṇāmaḥ; sarvatra kāraṇānusyūtatayā 
pūrvāvasthāparityāgābhāvāt | nāpyārambhavādaḥ puñjavādo vātra 
saṅgacchate | ekasyaiva hi śivasya kāraṇatvena niścitatvāt | etacca vṛttirūpaṃ 
kāryaṃ kāraṇātmanaiva sat | kāryātmanāpi sattve 
tatvānāmavasthāpāyarūpapralayāyogāt | 
tatvavyapadeśastvākalpāvathāyitayā na virudhyate | ayaṃ ca śuddhādhvā na 
bandhakaḥ; karmānvayābhāvāt ||

28) nanu śuddhādhvavartināṃ kathaṃ vicitrabhogaḥ ? taddhetoḥ 
karmaṇo'bhāvāt | kathaṃ vā jñānodayaḥ ? taddhetoḥ kalāyā abhāvāt | 
kathaṃ vā viṣayābhimukhyam ? taddhetorvidyāyā abhāvāt | kathaṃ ca 
viṣayeṣvāsaktiḥ ? rāgābhāvāt | kathaṃ vā bhogeyattāparicchedaḥ ? 
kālābhāvāt | kathaṃ ca bhoktṛviśeṣaniyamaḥ ? niyaterabhāvāt | ucyate - 
santi tāvacchuddhādhvani baindavāni kalādīni tatvāni 
tanukaraṇabhuvanabhogādayaśca | tatra yadyapi bhogavaicitryakāraṇaṃ karma 
nāsti, tathāpi malaparipākavaśādvicitro bhogaḥ sambhavati | tathā hi - yasya 
prakṛṣṭo malaparipākaḥ sa sādhākhye bhogaṃ bhuṅkte | yasya tu 
prakṛṣṭataraḥ sa tvīśvaratatve vidyātatve ca | tasmānna karmātra 
bhogakāraṇam | kiṃ tvīśvarecchaiva | na ca śivasyātra vaiṣamyanairghṛṇye; 
tatra duḥkharūpabhogābhāvāt | tasmācchuddhādhvani malaparipākādhīnaḥ 
sukhātmaiva bhogaḥ |

29) uktaṃ ca śrīmatpauṣkare -

kiñca karmānvayābhāvācchuddhādhvāno na bandhakāḥ || iti ||
(pau bindu pa ślo 43)

tathā -

adhvāyaṃ bhogya uddiṣṭo bhogo rāgādibhiḥ sthitaḥ |
atra teṣāmabhāvena kathaṃ bhogo maheśvara ||

īśvaraḥ -

atrāpi kalāmukhyāni santi tattvānyadho yathā |
kintu tānyatra śuddhāni baindavāni dvijottamāḥ ||
(pau bindu pa ślo 56-57)

tathā -

śuddhānyetāni tattvāni rudrāṇūnāṃ mahātmanām |
vicitrapuramālābhiḥ khacitāni mahānti ca ||
divyaśrībhirmahāścaryairbhogairduḥkhavivarjitaiḥ |
tanubhogendriyādyaiśca varjitānyunnatāni ca || iti ||
(pau bindu pa ślo 34-35)

tathā -

śuddhādhvani mahābhogaḥ karma nāstīti coditam |
kathaṃ tadvartināṃ bhogo vicitrastadvadeśvara ||

īśvaraḥ -

na karma bhogavaicitrye kāraṇaṃ śuddhavartmani |
malasya paripāko yo vicitraḥ so'tra kāraṇam ||
yasya prakṛṣṭastatpāko bhogatattve sa bhogabhuk |
itarastvīśavidyākhyatattvayorbhogabhāgbhavet ||
kiṃ karmaṇātra viprendrā yatrecchābhoga iṣyate || iti ||
(pau bindu pa ślo 45-48)

tathā -

naiveha śambhornairghṛṇyaṃ bhavatīha kadācana ||
duḥkheṣu hi niyuñjāno nirghṛṇo nāparatra ca |
śuddhe'dhvani sukhātmaiva bhoga evaṃ sa ca smṛtaḥ || iti ||
(pau bindu pa ślo 52-53)

etacca śuddhatatvajātaṃ pralayākalasakalānāṃ prerakakāṇḍa 
ityabhidhīyate ||

30) atha māyā nirūpyate | sā ca mayati dadāti viśvamiti vā, 
mātyāyāti viśvamatreti vā anvarthā ||  taduktaṃ pauṣkare -

mayatyasmājjagadviśvaṃ māyā tena samīritā || iti ||
(pau mā pa ślo 1)

anyatra -

māti yatra jagatsuptau sṛṣṭvā vā yāti sā tataḥ |
māyā tena samākhyātā tattvamuktaṃ guruttamaiḥ || iti ||

iyamapi kalādeḥ pṛthivyantasya kāryajātasyopādānabhūtā jaḍā 
bhagavataḥ parigrahaśaktiḥ | sā caikā | bahutve pramāṇābhāvāt | nityā; 
mūlakāraṇatvāt | anityatve pralaye karmaṇāṃ nirāśrayatvaprasaṅgāt | na ca 
bindustadāśrayaḥ; tasya karmottaratvāt | nāpyātmānaḥ ; teṣāṃ 
jaḍatvaprasaṅgāt | sā ca vyāpinī; sarvatra kāryopalambhāt |

31) taduktaṃ pauṣkare -

nityaikā vyāpinī vasturūpā karmāśrayāśivā || iti ||
(pau mā pa ślo 2)

śrīmanmṛgendre ca -

tadekamaśivaṃ bījaṃ jagataścitraśaktimat |
sahakāryadhikārāntasaṃrodhi vyāpyanaśvaram ||
kartānumīyate yena jagaddharmeṇa hetunā |
tenopādānamapyasti na paṭastantubhirvinā ||
tadacetanameva syātkāryasyācittvadarśanāt |
(mṛ pra 9 ślo 2-4)

tadādhārāṇi kāryāṇi śaktirūpāṇi saṃhṛtau ||
vikṛtau vyaktirūpāṇi vyāpriyante'rthasiddhaye || iti ||
(mṛ pra 9 ślo 13)

tathā pauṣkare -

nityaiṣā'śeṣakāryāṇāṃ kāraṇatvādyadanyathā |
na tannityaṃ yathā tantustasmānmāyāpyanaśvarā ||
anityaiṣā yadīṣyeta karmaṇāṃ kutra saṃsthitiḥ |
na binduḥ karmaṇāṃ sthānaṃ binduḥ karmottaro yataḥ ||
na cātmani sthitisteṣāṃ yasmādātmā jaḍo bhavet || iti ||
(pau mā pa ślo 27-29)

32) asyāśca vicitraśaktitvaṃ vicitrakāryajanakatayā | anātmani 
dehādāvātmabhramahetutayā mohinītvaṃ ca | eṣā ca sarveṣāṃ sakalānāṃ 
sādhāraṇī, pralaye līnadehānāṃ teṣāṃ sūkṣmasthūlātmakadehādeḥ 
kāraṇam | uktaṃ ca pauṣkare -

sādhāraṇī ca sarveṣāṃ sakalānāṃ munīśvarāḥ |
pralaye līnadehasya karmiṇo'ṇoraharmukhe ||
dehādeḥ kāraṇaṃ māyā sūkṣmasthūlātmakasya tu || iti ||
(pau mā pa ślo 2-3)

iyaṃca vasturūpā vastvātmakasya jagataḥ kāraṇatvāt |

33) nanu prapañcasya vastvātmakatvamasiddham; 
pramāṇaprameyasambandhānāṃ durnirūpatvāt | tathā hi - na 
tāvatpratyakṣam; pramātrādibhedarūpasyetaraniṣedhasya ghaṭamahaṃ 
jānāmīti vidhiviṣayakapratyakṣaviṣayatvābhāvāt | ataḥ 
pramātṛbhinnaprameyasadbhāve na pratyakṣaṃ pramāṇam | vyāpterapi 
tanmūlatvenānumānamapi nātra pramāṇam | 
pratyakṣādiviruddhaviṣayasyāgamasya grāvaplavanādivākyavanna svārthe 
pramāṇyam | tasmātprapañcasadbhāve na kiñcinmānam | astu vā 
pramāṇapremayasadbhāvaḥ; kastayoḥ sambandhaḥ ? na 
tāvattādātmyalakṣaṇaḥ sambandhaḥ; tathātve svapnajñānajanakasya 
svāpnikapadārthasya satyatvaprasaṅgaḥ | tasmātprapañcamithyātve 
tanmūlabhūtamāyāpi mithyeti |

34) atrocyate - asti tāvatsatyaprameyagocaraṃ pratyakṣam | tathā hi - 
sthāṇurvā puruṣo veti saṃśaye nāyaṃ puruṣaḥ; sthāṇureveti 
koṭyantaraniṣedhapurassaraṃ jāyamānaṃ pratyakṣaṃ kathaṃ na 
tadbhedagocaram ? na cāsya savikalpatvena bhrāntatvam; bādhābhāvāt | na hi 
vakrakoṭarādimatvena sthāṇutve niścite tasya kadācidbādhaḥ sambhavati | na 
ca rajjusarpādāvevaṃ bādhābhāvaḥ | tasya sarvalokasiddhatvāt | kiṃ ca 
rajjusarpayoḥ sāmyena bhrāntistatra sambhavati | caitanyasya ghaṭādirūpatayā 
pratītau na kiñcana sādṛśyaṃ paśyāmaḥ | api ca prameyasya 
nirvikalpakaviṣayatve'pi bhedapratyakṣasiddhiḥ | anyathā agṛhītabhedasya 
puṃso devadatto brāhmaṇo'yamiti vyāvṛttaviṣayakamuttaraṃ savikalpakaṃ 
kathaṃ jāyeta | kiñca prapañcamithyātvagocaraṃ pramāṇaṃ mithyā vā na 
vā ? ādye prapañcasya satyatvaṃ siddham | dvitīye tu mithyātvahetostatra 
vyabhicāraḥ | tasmāt prapañcasya satyatvaṃ siddham | na ca jñānajñeyayoḥ 
sambandhānupapattiḥ; viṣayaviṣayibhāvasya sambandhasya vidyamānatvāt | 
tasmātsarvasya jagataḥ satyatvāttanmūlabhūtamāyāpi satyeti siddham ||

35) taduktaṃ śrīmatpauṣkare -

na hi prapañco vastvātmā pramāṇānāmabhāvataḥ |
prameyābhāvatastadvatsambandhābhāvato'pi ca ||
prapañco'yaṃ pramātrādibhedātmā nākṣagocaraḥ |
yataḥ pratyakṣamarthānāṃ vidhātṛ na niṣedhakam ||
niṣedhamantarā bhedo na samasti kadācana |
tasmātprapañcasadbhāve pratyakṣaṃ na tu sādhakam ||
vyāptestatpūrvakatvena nānumānamapi pramā |
pratyakṣādiviruddhe'rthe nāgamasya pramāṇatā ||
tasmātprameyābhāvo'pi pramāṇābhāvataḥ sthitaḥ |
astu mānaṃ prameyaṃ ca sambandho durlabhastayoḥ ||
na tāvajjñānaghaṭayoryogastādātmyalakṣaṇaḥ |
jñānasyābhyantaratvena ghaṭaścābhyantaro bhavet ||
notpādyotpādakātmā pa svapne'pyarthastu san bhavet |
evaṃ prapañcāvastutve vastu māyā kathaṃ bhavet ||
asti pramāṇaṃ sadbhāve prapañcasya purātanam |
pratyakṣaṃ tāvadarthānāṃ pramāṇaṃ bhedagocaram ||
sthāṇurvā puruṣo veti sandehe sthāṇureva saḥ |
puruṣo neti bhedātmā dṛśyate pratyayo'kṣataḥ ||
bhrānto'yaṃ savikalpatvādrajjuvanneṣyatāmiti |
sarveṣāṃ sarvadā kumbhaḥ kumbha eveṣyate'kṣataḥ ||
naivaṃ rajjuḥ kadācittu yataḥ sarpāyate nṛṇām |
mālāyate tadanyeṣāṃ naivaṃ kumbhaghaṭādayaḥ ||
kiṃ cāhirajjvossāmyena bhrāntiratropapadyate |
cito ghaṭādirūpeṇa pratītau kā samānatā ||
nirvikalpākṣabodhe'pi bhedātmā pratyayaḥ sthitaḥ |
anyathottaravijñānaṃ vyāvṛttaṃ nopajāyate ||
agṛhītārthabhedasya tannāmādiviśeṣavat |
kiṃ ca yena pramāṇena prapañcābhāva ucyate ||
tatpramāṇaṃ pramāṇaṃ vā na veti paricintyatām |
pramāṇaṃ cetprapañco'sti tattadantargataṃ yataḥ ||
yadyapramāṇaṃ sutarāṃ bhāvarūpaṃ jagadbhavet |
sambandho jñānaghaṭayorjñāpyajñāpakalakṣaṇaḥ ||
evaṃ vastvātmakaṃ viśvaṃ bhavetkathamavastujam |
tasmādvastvātmikā māyā sthitā viśvasya kāriṇī ||
(pau mā pa ślo 10-26)

36) asyāḥ sadbhāve mānaṃ tu, kalādikṣitiparyantaṃ 
tattvajātamavibhāgena kāraṇe kutracitpralīnam, ekasya kāryatve sati 
vibhaktattvāt, bīje skandhapalāśādivat; kalādikaṃ sopādānam, kāryatvāt, 
ghaṭavat; pralayakālīnaṃ karma kiṃcidāśritam, saṃskāratvāt, 
sammatavadityādyanumānāni | na ca kālenārthāntaratvam; kālasya 
vakṣyamāṇarītyā vināśitvena tadānīmāśrayatvāyogāt |

37) nanu karmaṇi siddhe tadāśrayatvena māyāsiddhiḥ, tatsadbhāve kiṃ 
mānam ? ucyate - prāṇināṃ sukhaduḥkhabhogaḥ kiṃcidāyattaḥ, 
asyābhāvikatvāt, pākajarūpavat, iṣṭāpūrtādikaṃ 
phalotpattiprākkṣaṇavartivyāpārakam, tadutpattipūrvaṃ vinaṣṭatve sati 
tajjanakatvāt, kṛṣicikitsādivaditi | na ceśvaraprasāda eva vyāpāro'stviti 
yuktam; tasyāvilambitatvena phalajanakatayā samanantarameva 
phalotpattiprasaṅgāt | uktaṃ ca pauṣkare -

aviśiṣṭe tu bhoktṛtve bhuñjate divi kecana |
kecanāvīcimukhyeṣu na syādetadahetukam ||
yattatra hetuḥ karmeti mantavyaṃ munipuṅgavāḥ |
ubhayoḥ kṛṣisāmye tu kaściddhānyāni yacchati ||
na kiṃcidaparastasya karma kāraṇakaṃ dvijāḥ || iti ||
(pau mā pa ślo 31-33)

38) na ca tatprakṛtijanyamiti vācyam; prakṛterbhogyatvena 
bhojakatvāyogāt | nanu prākṛtameva buddhidharmarūpaṃ karma, 
bhāvātmatayā bhogyam, karmātmakatayā bhojakamastviti cet, 
buddhidharmarūpasya tasya bhāvamātrātmakatvāt | teṣāṃ ca 
sāmyābhāvena kenacitprayojakena bhavitavyam | na ca svayameva svasya 
prayojakamiti vācyam; svātmani kriyāvirodhāt | tathā coktaṃ pauṣkare -

na cātra prakṛtirheturbhogyatvena virodhataḥ |
yadbhogyaṃ bhojakaṃ naikaṃ tasmātkarmānyadiṣyatām ||
prakṛteḥ pariṇāmo yo bauddho bhāvāṣṭakātmakaḥ |
sa syātkarmātmako'nyastu bhogyaḥ syāditi cenmatiḥ ||
tadapyasāraṃ bhāvānāṃ pratyayātmakatā yataḥ |
pratyayāste ca vividhā dṛśyante'ṇuṣu sarvadā ||
na samāstatra kenāpi hetunā bhāvyamagrajāḥ |
na ca svayaṃ svavaividhye hetavastvanavasthiteḥ || iti ||
(pau mā pa ślo 33-37)

39) etacca karma trividham | manovākkāyarūpakāraṇabhedāt | tatra 
manojanyamiṣṭadevatānudhyānaparastrījihīrṣādirūpam | vācikaṃ 
mantrajapaparāpavādādirūpam | kāyikaṃ devatārcanāgamyāgamanādi-
rūpam | tathā tanna kāraṇatraividhyāt trividhakarmakāryaṃ ca sukhaduḥ-
khādikamādhyātmikādibhedena trividham | tatra cittaprasādodvegādika-
mādhyātmikam | candanānulepanakhaḍgaghātādijanyamādhibhautikam | 
abhimatānabhimatavarṣātapādijanyamādhidaivikam | tathā 
laukikavaidikādhyātmikādhimārgikamāntrabhedena pañcavidhaṃ karma | tatra 
vāpīkūpādinirmāṇābhakṣyabhakṣaṇādijanitaṃ 
nivṛttikalāvyāptādhvāvadhibhogasya taddhetuśarīrādeśca janakaṃ laukikam 
| jyotiṣṭomādyanuṣṭhānajanitaṃ 
pratiṣṭhākalāvyāptādhvāvadhibhogajanakaṃ vaidikam | vairāgyādijanyaṃ 
vidyākalāvyāptādhvāvadhibhogajanakamādhyātmikam | yogajanyaṃ 
śāntikalāvyāptādhvāvadhibhogajanakamādhimārgikam | vijñānajanyaṃ 
śāntyatītakalāvyāptādhvāvadhibhogajanakaṃ māntram | 
tadetatpañcavidhamapi karma vaiṣayikasukhaduḥkhādihetutayā pāśaḥ | 
etatkarmāśrayatvena siddhāyā māyāyāḥ sākṣātparamparayā cā jātāni 
kalādīnyekatriṃśattattvāni | tatra bhogeyattāparicchedātmakasya kalanasya 
hetuḥ kālaḥ lavatruṭyādipratītiviśeṣyo māyāyāḥ prāthamiko vikāraḥ | 
kecittu kalaiva prathamo vikāra ityāhuḥ | ayaṃ ca sṛṣṭikālaḥ sthitikālaḥ 
saṃhārakālaśceti trividhaḥ ||

40) nanvasya kathaṃ kāryatvam ? ekatve sati pravāhānādikāryajana-
katvenānāditvāt | na ca viśeṣaṇāsiddhiḥ; bhede mānābhāvena 
lāghavasahakṛtena mānena kālasiddhau tadekatvasyāpi siddheḥ | ata eva jaḍatve 
satyanekatvena kāryatvamasyānumīyata ityapi na yuktam; viśeṣyāsiddheḥ | na 
ca pūrvāparādibhedaḥ kāle'nubhūyata iti vācyam; ya eva pūrvaḥ sa 
evānyadā para iti pūrvāparādibhedasyaupādhikatvāvaśyambhāvāt | 
tasmātkālo'nādireveti, maivam; kālabhedasyaupādhikatve sarvatropādhinaiva 
tattatkāryopapattyā kālasyaivāsiddhiprasaṅgāt, kālasyaikatve'dhikaraṇatvena 
tasya sarvakāryahetutayā kālaviśeṣavyatirekaprayuktasya 
kāryaviśeṣavyatirekasyānupapattiprasaṅgācca | kṣaṇalavādibhede 
upādherabhāvācca | tasmātkālasya svābhāvika eva bhedaḥ | ata eva jaḍatve 
satyanekatvādutpattivināśāvapi ||

41) nanvevaṃ kathamātmanāṃ nityatvam ? nityakālavṛttitvasyaiva 
nityaśabdārthatvāditi cet, na; kālāvacchedarāhityasyaiva 
tadarthatvenātmanāṃ nityatvasambhavāt | tauktaṃ pauṣkare -

kalādibhistribhistattvaiḥ pravṛttaṃ puruṣaṃ tataḥ |
lavatruṭyādibhiḥ kālaḥ kalayatyātmavṛttibhiḥ ||
tāśca bhauvanadehordhvā eva yasmātkriyāstadā |
atītavartamāneṣyadvṛttīnāṃ kāraṇaṃ tu yat ||
sa kāla iti mantavyo bhogyārthotpādako nṛṇām || iti ||
(pau pāśa pa ślo 47-49)

tathā -

kāla eko vibhurnitya iṣyate kaiścidīśvara |
tathā kimiti neṣṭo'tra bhagavanvaktumarhasi ||

īśvaraḥ -

kāla eko yadīṣyeta kriyāto nātiricyate |
yasmātsvataḥ kriyāyāstu nāstyatītādirūpatā ||
tasyā eva yadīṣyeta saiva kālaḥ prasajyate |
tataśca vartamānādipadārthānāṃ munīśvarāḥ ||
vartamānādirūpaistu kālairbhinnairvyavasthitiḥ |
tataśca naikaḥ kālo'yaṃ kiṃtvanantātmavṛttikaḥ || iti ||
(pau pāśa pa ślo 53-56)

tathā -

jaḍatve satyanekatvānna nityo'yaṃ yathā ghaṭaḥ |
anityasya satastasya vibhutvaṃ vinivāritam  || iti || 
(pau pāśa pa ślo 61)

ṛṣayaḥ -

anityaḥ kāla uddiṣṭastatkathaṃ nityatātmanām |
nityakālānuvartitvaṃ natyatvaṃ tadvadeśvara ||

īśvaraḥ -

kālāvacchedaśūnyatvānnityatvaṃ kālavatsthitam |
na hi kālasya nityatvaṃ kālavastvanavasthiteḥ || iti ||
(pau pāśa pa ślo 64-65)

42) na ca mahārthasaṃhāre kālasyāpyupasaṃhārāttatrāpi 
kālāntarāpekṣeti vācyam; īśvarecchayaiva tadupapatteḥ | taduktaṃ tatraiva -

ṛṣayaḥ -

māyotthatvena kālasya vināśitvaṃ vyavasthitam |
kathaṃ mahārthasaṃhāre niyamaḥ kālato bhavet ||

īśvaraḥ -

svecchayaivopasaṃhāre niyamaṃ vidadhāti saḥ |
tataḥ kriyopasaṃhāre kālāpekṣā na saṃmatā ||
pralaye'pyanugṛhṇāti sṛjatyavati hanti ca |
tirodadhāti bhagavānna kālāpekṣayā sadā || iti ||
(pau pāśa pa ślo 68, 70-71)

43) diktu na tattvāntaraṃ syāt; prerakabhogabhogyakāṇḍeṣu 
niyamenāpekṣābhāvāt | nanu kiṃ sarvātmanā diśo na santyeva ? na ; tāstu 
sūryādyupādhighaṭitāḥ sādhāraṇāḥ pratipadārthāpekṣayā 
asādhāraṇāśca dharmādharmavyavasthārthamaṅgīkriyante ||

44) niyamanasya kāraṇaṃ tattvaṃ niyatiḥ | iyaṃ ca māyāyā eva 
dvitīyo vikāraḥ | niyamanaṃ tu duṣkarmakartustatphalena yojanam, 
sukṛtaphalasyākartṛsambandhavyāvartanam, taccharīrādeḥ 
puruṣāntarasambandhibhogājananaṃ ca | idameva kāryaṃ niyatitattve 
pramāṇam | niyatitattvābhāve hi duṣkṛtaphalaṃ na kaścidapi bhuñjīta | 
parakṛtasyāpi sukṛtasya phalamaparo bhuñjīta | yajñadattaśarīramapi 
devadattasya bhogaṃ janayet |

45) nanu duṣkṛtasya phalajanakatvaniyamāttadanupabhogo hyaprasakta evā 
na hi sāmagrīsattve kāryābhāvaprasaktivāraṇāya tattvāntaramupeyate | na ca 
duṣkṛtasya phalajanakatvaniyamo'siddhaḥ; niṣedhakaśāstrasyaiva tatra 
mānatvāt | evaṃsukṛtasyāpi kartṛgataṃ phalaṃ pratyeva 
svarūpayogyatvādakartuḥ phalabhogo'prasaktaḥ | ato na tattvāntaraṃ 
tadvāraṇāyāṅgīkartavyam | na hi jalasya dāhakatvavāraṇāya tattvāntaraṃ 
svīkriyate | na ca tasya janakatvaṃ kartṛgataphalaṃ pratyevetyasiddham; 
kartṛgāmiphale vihitenātmanepadena tatsiddheḥ; kartā śāstrārthavattvāt 
(bra sū 2-3-33) ityādinyāyena tatsiddheśca | anyathā anuṣṭhānasya 
vaiphalyaprasaṅgācca | evaṃ śarīrasyāpi tattatkarmārjitatvenaiva 
tattadbhogajanakatvaniyama upapadyata iti na tadanurodhenāpi niyatitattvasiddhiḥ | 
tasmādanyathāsiddhatvānniyamasya na tādarthyena niyatiraṅgīkāryeti, 
maivam; duṣkṛtasya phalajanakatvaniyame'pi na kartuḥ phalabhoganiyamaḥ; 
anyasya phalasambandhenāpi tadupapatteḥ | evaṃ sukṛtasyāpi 
phalajanakatvamātraṃ śrutyā avadhāritam, na tu kartari 
phalasambandhaprāpakatvamapi | nanvātmanepadādinā 
phalasyakartṛsambandho'vadhārita iti cet - satyam | ata eva tatkāraṇatayā 
niyatitattvamupeyam | na ca karmaiva tatrāpi janakam; kṛṣyādeḥ sasyādikaṃ 
pratīva tasya phalasvarūpajanana eva caritārthatvāt; 
puruṣaviśeṣasaṃbandhaprāpaṇāya rājājñāderiva niyaterapyapekṣitatvāt | 
evaṃ śarīrasyāpi tattatkarmārjitatve'pi na niyatyabhāve niyama upapadyate | 
rājājñābhāve tattatkṛṣyārjitasyāpi sasyādestattadbhogajanakatvadarśanāt | 
nanu sarvamapīdaṃ niyamanaṃ śivaśaktyaiva bhavatīti niyatirvyartheti cenna; 
tasya kḷptatattatkāraṇasāhityena tattatkāryajanakatayā 
kevalāyāstajjanakatvāyogāt | tasmānniyamanāya niyatitattvamaṅgīkāryam ||

46) nanvātivāhikaśarīrānupraviṣṭe'sādhāraṇe niyatitattve 
niyamanahetutvasadbhāve'pi sādhāraṇasya bhuvanādyādhārasya na 
taddhetutvamiti kathaṃ niyatitattvam ? tatsadbhāve vā kiṃ mānamiti cenna; 
tajjātīyatvena tasyāpi niyamanajanakatvāt | tatsadbhāve tvāgama eva mānam | 
taduktaṃ śrīmatpauṣkare -

samāsenātha niyatiṃ śṛṇudhvaṃ munipuṅgavāḥ |
bhogāyābhipravṛttasya kalāvidyādivṛttibhiḥ ||
karmaṇāmārjitānāṃ tu phalāpaharaṇe sati |
tadvināśe pravṛtteyaṃ niyatiḥ śivaśāsane ||
na tadvanniyamenāpi malamāyākhyakarmaṇām |
pravṛttā kintu tadyuktapuruṣasyaiva he dvijāḥ ||
api bhogeṣvanicchantaṃ niyojayati sā balāt |
svārjiteṣveva nehānyairārjiteṣu kadācana ||
yadi sā na bhavedanye bhuñjīrannārjitaṃ paraiḥ |
rājājñāmantarā yadvadbhuñjate dasyavaḥ paraiḥ |
ārjitāni tathaiveyamasāmañjasyanāśikā |
anayā niyataṃ tacca yaccharīrendriyādikam ||
atha cecchāṅkarī śaktiryā saiva syānniyāmikā |
satyaṃ na sā svataḥ kiṃ tu niyativyavadhānataḥ ||
tatsambandhādvimucyeran saiva cenniyatiryadi |
na karma svaphalaṃ puṃsāṃ sambandhayitumarhati ||
karmatvātkṛṣivattasmānneha karma niyāmakam || iti || 
(pau pāśa pa ślo 79-87)

47) ātmano dṛkkriyārūpacaitanyābhivyañjakaṃ tattvaṃ kalā | 
abhivyaktiścācchādakamalanivṛttiḥ | sāpi nācchādakasya svarūpavināśaḥ; 
kiṃ tvācchādanaśaktivināśena tadviśiṣṭaśaktinivṛttiḥ | 
śaivālodakanyāyena kāryākṣamatvam | etatsadbhāve mānaṃ tu 
caitanyācchādakasya nivṛttiḥ asādhāraṇakiñcidāyattā, kāryatvāt, 
saṃmatavat, ityanumānam | adṛṣṭādeḥ sādhāraṇatvānna tenārthāntaratvam 
| iyaṃ ca puṃsāṃ karmānusāreṇa malasyaikadeśanivartanaṃ karoti | uktaṃ 
ca -

caitanyaṃ jñatvakartṛtvarūpaṃ tadbalamātmanaḥ |
kalayā vyajyate tattu tasyaiva hi tiraskṛtam ||
sarvātmanā kalā naitaccaitanyaṃ vyañjayatyaṇoḥ |
kiṃ tu karmānusāreṇa kalā vṛttyaikadeśataḥ || iti ||

48) nanu dṛkkriyāśaktyabhivyaktirbuddhidharmeṇa yatnena bhavatu; 
yatnasya cābhivyañjakatvaṃ tvayāpyabhyupeyam; anyathā 
mṛtpiṇḍādigocarayatnaṃ vināpi kalāmātreṇa dṛkkriyābhivyaktyā 
kulālāderghaṭādikartṛtvāpatteriti cenna; tasya 
dṛkkriyāśaktyabhivyaktyanantarabhāvitvenābhivyañjakatvānupapatteḥ | tathā 
hi - mṛtpiṇḍādigocaro yatno mṛdādigocareṇa jñānena | tadapi 
manovyāpāreṇa | so'pi tadgocareṇādhiṣṭhānena | adhiṣṭhānaṃ 
cābhivyaktadṛkkriyāśaktirūpam | na ca tadabhivyaktiryatnena sambhavati; 
yatnasyāpyabhivyaktyadhīnamanovyāpārādhīnatvāt | tasmādanyatra yatnasya 
dṛkkriyāśaktyabhivyañjakatve'pi prāthamike manovyāpārādau kalāyā eva 
dṛkkriyāśaktyabhivyañjakatvamabhyupeyam | tasmād 
dṛkkriyāśaktyabhivyaktaye kalātattvamabhyupeyam ||

49) kalodvalitacaitanyānāṃ puṃsāṃ viṣayeṣu pravartakaṃ tattvaṃ 
vidyā | buddhi saṃvedanaṃ sakaraṇam, kriyātvāt, 
saṃmatavadityanumāneneyaṃ siddhā | taduktaṃ śrīmatpauṣkare -

kalāyā kartṛbhūtasya buddhilakṣaṇakarmaṇaḥ |
ālokane yatkaraṇaṃ sā vidyā śivaśāsane ||
buddhirhi karma grāhyatvādātmano ghaṭakuḍyavat |
grāhyaṃ karaṇasāpekṣaṃ dṛṣṭaṃ rūpādikaṃ yathā |
tatastu cakṣurādyaiśca krameṇārthe viniścite |
buddhyantairniścitārthaistāṃ pumān saṃvetti vidyayā || iti ||
(pau pāśa pa ślo 9-11)

50) na ca manasā arthāntaratvam | tadvyāpārādhīnaniścayāyattatvāt | 
buddhivyāpārasya ca buddhisaṃvedanāyattatvāt | tasmādbuddhisaṃvedanasya 
manovyāpārātpūrvabhāvitayā na tatra mano janakam | manasaḥ 
saṅkalpādimātrahetutvenaiva siddhatvācca | yadyapi cicchaktyabhivyaktau 
buddhiprakāśo hetutayā'vaśyaṃ kalpanīyaḥ; tathāpi 
buddhiprakāśānukūlendriyādigocaracicchaktyabhivyaktyādau vidyaiva hetuḥ ||

51) viṣayānurañjakaṃ tattvaṃ rāgaḥ | taduktaṃ śrīmatpauṣkare -

kalāto jāyate rāgaḥ sadyaḥ puṃsāṃ pravṛttaye |
anicchannahi bhuñjāno dṛśyate kvacidapyaṇuḥ |
rāgādbhogyeṣu saktatvādbhogyaṃ bhoktumato'rhati || iti ||
(pau pāśa pa ślo 26-27)

ayaṃ ca 
prāthamikendriyādivyāpārānukūlecchāśaktyabhivyañjakatvena siddhaḥ | 
anyatra buddhidharmasyābhiṣaṅgābhivyañjakatve'pi tatra rāgatattvasyaiva 
vyañjakatvāt | tathā buddhidharmasyābhiṣaṅgahetutvenāpi 
tatsiddhirdraṣṭavyā ||

52) nanu tatra sukhādisādhanatājñānameva janakam | na ca viraktasya 
tasminsatyapi abhiṣaṅgo nopalabhyata iti yuktam; tatra tasya 
viṣayadoṣadarśanādinā tadanutpattestvayāpyabhyupeyatvāt | anyathā 
rāgatatvena tatra tasya tvanmate'pyabhiṣaṅgotpatterapratīkārāt | 
niyataviṣayābhilāṣaṃ prati rāgatatvasya hetutvā yogena 
sukhādisādhanatājñānasyaiva hetutvaucityācca | 
tasmādbuddhidharmo'bhiṣaṅgo viṣayasaundaryāyatto na rāgatatvādhīna iti, 
maivam; viṣayasaundaryādhīnasyāpi viṣayaviśeṣābhiṣaṅgasya 
māñjiṣṭhakādirāgasya triphalākaṣāyādhīnatvavadicchāśaktisāmānyā-
bhivyañjakarāgatatvādhīnatvāt ||

53) ātmanaḥ prakṛtibhoktṛtvaprayojakaṃ tatvaṃ puruṣatatvam | idaṃ ca 
kalādipañcakañcukenāvidyayā cārabdham | etacca sakalasyaivāṇorbhojakam 
| na vijñānapralayākalayoḥ | tayoḥ kalādisaṃsparśābhāvāt | na ca 
kalādikameva tatra prayojakamastu, kimantarā tatvāntareṇeti vācyam | tasya 
kāryāntarajanakatayaiva kḷptatvādihāpi tasyaiva prayojakatve 
tatvasāṅkaryaprasaṅgāt; vijñānākalasyeva sakalasyāpi bhoktṛtvāyogācca | 
nāpyavidyādiḥ puṃstvaprayojakaḥ; kalādyabhāve puṃsaḥ kartṛtvāyogāt | 
tasmātprākṛtāvidyādisahitakalādyārabdhaṃ prākṛtabhogaprayojakaṃ 
puṃstatvamabhyupeyam |

54) uktaṃ ca śrīmatpauṣkare -

pañcakañcukasaṃyuktaḥ prakṛtiṃ bhoktumudyataḥ |
avidyādisamāyuktaḥ puruṣaḥ parikīrtitaḥ ||
na vijñānākalastena nāpi pralayakevalaḥ |
puruṣākhyāṃ labhedyasmānnāvidyādivivarjitaḥ ||
tasmātsakala evāṇurlabhate puruṣāhvayam |
kalādipañcakasyaiva yadi puṃstve nimittatā ||
tadā prakṛtibhoktṛtvaṃ na syājjñānākale yathā |
tathā'vidyādimātrasya nāpi puṃstve nimittatā ||
kalādyabhāve kartṛtvābhāvādbhoktā kathaṃ bhavet |
prākṛto ystvavidyādiḥ puṃsāṃ puṃstvamalaḥ smṛtaḥ ||
tadākrāntaḥ kalādyāḍhyaḥ puruṣastena saṃmataḥ || iti ||
(pau puṃ pa ślo 1-6)

prayogaśca - aṇoḥ prakṛtibhogaḥ pratiniyatakiñcidāyattaḥ, kāryatvāt, 
saṃmatavaditi | idaṃ ca tatvaṃ pratipuruṣaniyatameva ||

55) nanu dīkṣāyāṃ puṃstatve bhuvanānyuktāni | kathaṃ teṣāṃ 
tatrāvasthānamiti ceducyate | gaṅgāyāṃ ghoṣa ityādivadbhogyatayā 
puruṣasannikṛṣṭāyāḥ prakṛtermastaka eva teṣāmavasthānasambhavāt | 
uktaṃ ca tatra -

dīkṣāyāṃ ca purā puṃsi bhuvanānyuditāni hi |
kathamatra sthitisteṣāṃ chindhi sandehajaṃ tamaḥ ||

īśvaraḥ -

yatra lakṣaṇayā vṛttyā bhuvanasthitirīritā |
tatastatprāntavartinyāṃ prakṛtāveva kalpyatām ||
gaṅgāyāṃ grāma ityukte tattaṭe kalpyate tathā || iti ||
(pau puṃ pa ślo 7-9)

etāni māyādīni puruṣāntāni sapta tattvāni śuddhāśuddharūpāṇi 
bhojayitṛkāṇḍa ityabhidhīyante ||

56) guṇādipṛthivyantamūlopādānaṃ prakṛtiḥ | iyaṃ ca 
śrīkaṇṭhaśaktikṣobhyā kalāto jāyate | nanu guṇopādānaṃ na prakṛtiḥ; 
kiṃ tu sāmyāvasthāṃ prāptā guṇā eva | te ca paramakāraṇam | kāryatve 
mānābhāvāt | tat eva mahadahaṅkārādayaḥ prakṛtivikṛtirūpā jāyanta iti 
cenna; guṇānāṃ jaḍatve satyanekatvena kāryatayā paramakāraṇatvāyogāt | 
na ca guṇānāṃ nānātve'pi teṣāṃ sāmyamekameva | tadeva ca prakṛtiriti 
yuktam; sāmyasyaikatve'pi guṇānāṃ nānātvenopādānasāpekṣatayā 
upādānāntarasya kalpanīyatvāt | guṇavaiṣamye sati sāmyasyopādānasya 
nivṛttyā kāryasyāpi nivṛttiprasaṅgācca | teṣāṃ guṇatvānna tattveṣu 
gaṇanā | uktaṃ ca -

guṇādikṣitiparyantaṃ tattvajātaṃ yato bhavet |
tadavyaktamiti proktaṃ kṣobhyaṃ śrīkaṇṭhavikramaiḥ ||

ṛṣayaḥ -

guṇā eva samāvasthāṃ prāptāḥ prakṛtirucyate |
tatkathaṃ tadupādānaṃ prakṛtiḥ pratipādyate ||

īśvaraḥ -

na guṇānāṃ samāvasthā prakṛtiḥ śivaśāsane |
acetanatvenaikatvādguṇānāṃ munipuṅgavāḥ ||
iṣṭaṃ kāraṇapūrvatvaṃ tattu prakṛtisaṃjñitam || iti || 
(pau puṃ pa ślo 18-21)

57) etāni kalādiparyantāni sapta tattvāni bhojayitṛkāṇḍa ityucyante | 
asmādeva prakṛtitattvādvaiṣamyonmukhaguṇatrayarūpaṃ 
jñānollekhamātrajanakaṃ guṇāvyaktāparaparyāyaṃ cittākhyaṃ 
tattvamutpadyate | cittaṃ mahān guṇaḥ avyaktamiti 
kāryamāyāparaparyāyaprakṛtyadhobhāgaparyāyanāmāni | ayaṃ ca guṇaḥ 
sattvarajastamobhedena trividhaḥ | tatra prakāśavṛttikaṃ sattvam | 
pravṛttyādivṛttikaṃ rajaḥ | niyamanādivṛttikaṃ tamaḥ | uktaṃ ca -

kriyā prakāśaniṣṭhātmā rajādiguṇa īritaḥ ||

tathā -

sthairyaṃ dhairyaṃ tathā dākṣyaṃ mārdavaṃ laghutāpi ca |
santoṣamārjavaṃ śaucaṃ vyavasāyaḥ kṣamā smṛtiḥ ||
sauhityaṃ paramautsukyaṃ dāntiḥ śāntirdayā parā |
sattvasya vṛttayaḥ proktāḥ rajasaścātha kathyate ||
śauryaṃ krauryaṃ mahotsāhaḥ sābhimānaḥ sakalkatā | 
dārḍhyaṃ ca nirdayatvaṃ ca bhogo ḍambho rajoguṇāḥ ||
aratirmandatā dainyaṃ paiśunyaṃ gurutā tathā |
nidrādhikyaṃ madālasyaṃ nirodho mūḍhatā ca yā |
tamaso vṛttayaḥ proktā vibhinnāḥ sarvajantuṣu |
evaṃ saṃkṣepato viprā guṇatattvamudāhṛatam || iti ||
(pau puṃ pa ślo 21; 37-41)

58) yadyapīndriyatanmātrādīnāṃ 
ahaṃkārākhyaikatattvopādānakatve'pi yathā naikatattvatā tathā 
guṇānāmapyekatattvatā na yuktā; tathāpi sambhūyaiva kāryakāritvena 
tattvaikyaṃ yuktam | na ca sarvatra kārye sarvasya guṇasya janakatayā idaṃ 
sāttvikamidaṃ rājasam ityādivyapadeśaḥ kathamiti yuktam; tattadvattīnāṃ 
prakāśādīnāṃ prācuryeṇa tasyopapatteḥ | guṇasadbhāve mānaṃ tu - 
sukhaduḥkhamohādikaṃ kiñcijjanyam; kāryatvāt, saṃmatavaditi | na ca 
viṣayaviśeṣajñānenaiva tadupapattiḥ; ekasyaiva vanitāderviṣayasya 
puruṣabhedena sukhaduḥkhādijanakatvāt | tathā hi - caitrasya padmāvatyāṃ 
prītiḥ, tāmavindato maitrasya duḥkham, tatsapatnīnāṃ ca mātsaryānmohaḥ | 
padmāvatyāṃ ca sarve bhāvā vyākhyātāḥ | na ca 
svīyatvaparakīyatvābhyāṃ viśeṣaḥ; sādhāraṇe'pi saṅgītādau 
puruṣabhedena saumanasyavaimanasyāderdarśanāt | na ca tathāpi 
guṇakriyārabdhe viṣaye kathaṃ puruṣabhedena sukhaduḥkhādikamiti yuktam; 
yasya guṇasya yadā yaṃ pratyudbhavastadā taṃ prati tatkāryaṃ 
sukhādikamutpadyata iti vyavasthopapatteḥ |

59) asmādeva cittatattvādudbhūtasattvaṃ nyagbhūtarajastamaskaṃ 
buddhitattvamupajāyate | sā buddhirdvividhā | adhyavasāyinī anadhyavasāyinī 
ceti | tatrādhyavasāyinyāṃ buddhau saṃskārasyāvasthānam | etatsadbhāve 
mānaṃ tu iṣṭāpūrtādijanitamapūrvaṃ kiñcidāśrayakam, saṃskāratvāt, 
saṃmatavat | na cātmanāṃ tadāśrayatvam; vikāritvaprasaṅgāt | tathā 
niścayaḥ kiñcidāyattaḥ, kāryatvāt, saṃmatavat | tathā dharmajñānādayo 
goṇāḥ kiñcinniṣṭhāḥ, guṇatvāt, saṃmatavat; tathā 
smṛtijanakasaṃskārāśrayatvenāpi tatsiddhiḥ |

60) uktañca -

guṇatattvāparā buddhirabhavanmunipuṅgavāḥ |
rajastamobhyāṃ nyagbhūtā vṛttiḥ sattvena cotkaṭā ||
sā buddhiruditā tantre viṣayādhyavasāyinī |
bodho'tra dvividho prokto viṣayādhyavasāyakaḥ ||
anyo'nadhyavasāyātmā vyavasāyātmakastu yaḥ |
sā buddhiritarastvātmasvabhāvo grāhakātmanaḥ ||
kiñca prapātaṭākādikriyāḥ kḷptāḥ phalārthibhiḥ |
samanantarameveha na yacchanti phalāni tu ||
āmuṣmikatvātkiṃ tūrdhvaṃ vinaṣṭā api tāḥ kriyāḥ |
phalakālānuvartitvāt saṃskāro'pūrvasaṃjñitaḥ ||
kalpyate na sa puṃsi syādvikāritvena hetunā |
kṛṣyāderapi saṃskāro na puṃsi paridṛśyate ||
kurvanti yatra saṃskāraṃ kriyā sāṣṭaguṇā matā |
evaṃ jñānādisaṃskāro'pyūhyatāṃ munipuṅgavāḥ || iti ||
(pau puṃ pa ślo 42-49)

61) te cāṣṭaguṇāḥ 
dharmajñānavairāgyaiśvaryādharmājñānāvairāgyānaiśvaryāṇi | tatra 
dharmajñānavairāgyaiśvaryāṇi sāttvikyo vṛttayaḥ | avairāgyaṃ tu rājasam | 
adharmājñānānaiśvaryāṇi tāmasāni | atra dharmo dvividhaḥ yamo, 
niyamaśceti | tatra yamaḥ pañcavidhaḥ, 

ahiṃsā satyamasteyaṃ brahmacaryamakalkatā || iti ||

niyamo'pi pañcavidhaḥ, 

akrodho guruśuśrūṣā śaucaṃ saṃtoṣa ārjavam | iti ||

62) tatrāhiṃsā nāma pareṣu druhyatsvapi teṣu duḥkhānutpādanam | 
śāstrīyahiṃsāpyāhiṃsā | satyaṃ tu āpadbhītigatenāpyasatyānullekhaḥ | 
gurudevatābrāhmaṇārthe'satyollekhaśca satyam | asteyaṃ nāma anītyā 
paravittasya svīkārābhāvaḥ | śrutadṛṣṭaviśiṣṭavastunastṛṇīkāro'pi | 
brahmacaryaṃ nāma prārthayantyāmapi striyāṃ mātṛvadbuddhiḥ, 
vikārābhāvo'pi | apakāre'pi kāluṣyābhāvo'kalkatā | ete ca yamāḥ pañca 
| akrodho nāma tāḍane'pi kopābhāvaḥ | guruśuśrūṣā nāma 
gurvādīnāmājñānupālanam, nityādikarmasu śraddhā ca | śaucaṃ nāma 
mṛdambhobhiḥ śarīraśodhanam, bhāvaśuddhiśca | saṃtoṣo nāma 
lābhālābhayoḥ samatvam | ārjavaṃ nāma kauṭilyābhāvaḥ | ete pañca 
niyamāḥ | jñānaṃ tu daśavidham | tanmuktiprakaraṇe vakṣyate | vairāgyamapi 
vyādhyādisakalaviṣayānubhavatṛptyādhyātmikādiduḥkha - 
dravyārjanādiduḥkha - snigdhaviyoga - strīdoṣadarśanadehaduṣpūratāprati-
grahādiśāstrajñānahetukaṃ prāktanapuṇyaparipākamātrahetukaṃ ceti 
daśavidham | aiśvaryamapyaṇimādibhedenāṣṭavidham | 
tallakṣaṇamapyudāhariṣyamāṇavacaneṣu sphuṭam | adharmo'pi hiṃsā - 
caurya -mithyākathanāgamyāgamanāpakāra - pratyapakāra - mātsarya - 
nityakarmādilopāśaucāsaṃtoṣa - kauṭilyabhedena daśavidhaḥ | ajñāna-mapi 
tamo- moha- mahāmoha-tāmisrāndhatāmisrabhedena pañcavidham | tatra tamo 
nāmānātmanyātmabhāvaḥ | tacca cārvākādidarśanabhedena daśavidham | 
moho nāma aṇimādyaṣṭaiśvaryasiddhau tatparatvapratipattiḥ | mahāmohastu 
divyādivyabhedena daśadhā bhinneṣu śabdādiṣu paratvādhyavasāyaḥ | 
tāmisro nāma divyādivyabhedena daśavidhānāṃ śabdādīnāṃ 
aṇimādyaṣṭakasya ca nāśāttāpaḥ | andhatāmisro nāma 
śabdādiṣvaṇimādiṣu ca pareṇa bhujyamāneṣu tadasahanam | 
avairāgyamapyatuṣṭivaicitryācchatavidham | anaiśvaryamapyaṣṭavidham | 
idañcāśaktivaśādbhavati, aśaktiśca ṣaṭsaptatyadhikaśatasaṅkhyākā | 
evaṃ ca dharmo daśavidhaḥ | jñānamaśītiḥ | śatasaṅkhyo virāgaḥ | 
catuṣṣaṣṭividhamaiśvaryam | adharmo daśavidhaḥ | ajñānaṃ catuṣṣaṭiḥ | 
avairāgyaṃ śatam | anaiśvaryaṃ caturaśītyadhikaṃ śatam | āhatya 
buddhervṛttayo dvādaśādhikaṣaṭchatasaṅkhyākāḥ |

63) uktaṃ ca śrīmatpauṣkare -

dharmo jñānaṃ ca vairāgyamaiśvaryaṃ buddhivṛttayaḥ |
trayo'tra dharmamukhyāstu sāttvikāḥ parikīrtitāḥ ||
rāgastu rājasaḥ śiṣṭāstāmasāḥ parikīrtitāḥ |
ete dharmādayaścāṣṭau bhāvayanti yatastataḥ ||
liṅgābhāvāḥ samuddiṣṭāḥ paṭhyante te krameṇa tu |
dharmaśca dvividhastatra yamaśca niyamastviti ||
cittasya saṃyamastatra sa yamaḥ paripaṭhyate |
aśāstrīyakriyātyāgācchāstrīyeṣvapi karmasu ||
niyamaḥ paṭhyate śāstrairyo'yamindriyasaṃyamaḥ |
yamaḥ pañcavidho'hiṃsā satyamasteyameva ca ||
brahmacaryamakalkatvaṃ yama evaṃ tu pañcadhā |
akrodho guruśuśrūṣā śaucaṃ saṃtoṣa eva ca ||
ārjavaṃ ceti niyamaḥ pañcadhā parikīrtitaḥ |
pareṣu duḥkhānutpādo'hiṃsā drohaśatairapi ||
sā na hiṃseti vijñeyā yā hiṃsā śāstracoditā |
āpado bhītito vāpi na tathyaṃ satyamucyate ||
asatyamapi tatsatyaṃ gurudevaprayojanam |
adattāsvīkṛtistyāgo vittasyānyāyajasya ca ||
śrutasya paridṛṣṭasya tṛṇīkāro'pyacoratā |
karmaṇā manasā vācā śravaṇāddarśanādapi ||
mātṛvanmanyate nityaṃ prārthayantyāmapi striyām |
tadeva brahmacaryaṃ syāccheṣā vrataviḍambakāḥ |
svacchatā samatā prītirapakāraśatairapi ||
kāluṣyaṃ notsahedvairaṃ seyamuktā hyakalkatā |
ete pañca yamāḥ proktā yatīnāṃ suśivātmanām ||
nityaṃ pradhvastakāluṣyo na kopastāḍanādapi |
devānāṃ śivabhaktānāṃ pitrorapi gurorapi ||
ājñānupālanānnityaṃ kāmyanaimittyakarmaṇām |
dānopavāsatīrthānāṃ śrūtādhyayanayorapi ||
śraddhayā karaṇaṃ puṃsāṃ śuśrūṣā parikīrtitā |
gātraprakṣālanaṃ śaucaṃ mṛdambhobhyāmudāhṛtam ||
santoṣa uditastantre lābhe'lābhe samā matiḥ |
jānannapi ca viprendrā jaḍavanmūkavattathā ||
nivṛttaḥ parapīḍāyāḥ śraddhadhānaśca bhāvataḥ |
ārjavaṃ tasya tatproktaṃ niyamastviti pañcadhā ||
jñānaṃ buddhyātmakaṃ yattad guṇāvyaktāntagocaram |
tasmātkaivalyasaṃsiddhiriti tatsiddhirucyate ||
aśītisaṃkhyayā sā ca saṃkṣepātparikīrtitā |
(pau puṃ pa ślo 49-67)

64) atha vairāgyabhedo'pi saṃkṣepeṇādhunocyate ||
vyādhyādipīḍitasyāsya svadehe'pi virāgatā |
santuṣṭaḥ sarvakāryeṣu niḥspṛhatvājjugupsati ||
ādhyātmikādiduḥkhebhyo vairāgyaṃ niyataṃ bhavet |
ārjane rakṣaṇe coraharaṇe draviṇasya yat ||
duḥkhaṃ tanmanyamānasya vairāgyaṃ sahasā bhavet |
snigdhādviyujyamānaḥ san rudan duḥkhena pīḍitaḥ ||
duḥkhasya kāraṇaṃ sneha iti matvā virajyati |
kāmukastu striyāṃ dṛṣṭvā kiñcidvairāgyakāraṇam ||
sadyo vairāgyamāyāti śreyasaḥ prāptikāraṇam |
satyanne dhriyate dehaḥ pānīyādau ca nānyathā ||
ekahasyāpyapāne ca glāniṃ badhnāti tatkṣaṇāt |
duṣpūro'yamato hetorvairāgyamupajāyate || 
kvacitpratigrahādibhyo vairāgyamupagacchati |
akasmājjāyate kaścidviraktaḥ puṇyavaibhavāt ||
ityevaṃ tuṣṭayaḥ proktā daśadhā śivaśāsane |
atraivāntargatāḥ sarvāstuṣṭayo'nyā dvijottamāḥ ||
etāśca bhūtādyavyaktatattvānāṃ prāpakatvataḥ |
saṃbhūya śatasaṃkhyāstu tuṣṭayaḥ śivaśāsane ||
athaiśvaryaṃvibhedo'pi lakṣyate leśato'dhunā |
buddhyātmanorvibhāgena sthitamaiśvaryamaṣṭadhā ||
dharmiṇo jñānaniṣṭhasya virāgecchośca dhīmataḥ |
sattvamutpādayedbauddhamaṇoraiśvaryamicchayā ||
aṇimā paramaṇvāderapi sūkṣmatarā sthitiḥ |
laghimā śīghravegitvaṃ paṅkādāvapyamajjanam ||
mahimā vyāpyavasthānaṃ bṛhaddehendriyādibhiḥ |
tṛtīyaṃ kāryataḥ siddhamaiśvaryamaṇimādikam ||
prāptyādayo guṇāḥ pañca yoginaḥ karaṇātmajāḥ |
manasābhīṣṭasaṃsiddhiḥ prāptirnāma guṇālayaḥ ||
nirmāya strīsahasrāṇi krīḍāprākāmyamāśu yā |
ājñāvidhānaṃ brahmādau tatpūjā ceśitā matā ||
vaśīkṛtirvaśitvaṃ syājjagannirmāṇameva ca |
bhuñjānasyāsya dharmādyairabādhe garimā mataḥ || iti ||
(pau puṃ pa ślo 87-103)

65) etaccaiśvaryaṃ pārthivaṃ piśācānāmaṣṭaguṇam | rākṣasānāṃ 
pārthivāpyaṃ ṣoḍaśaguṇam | yakṣāṇāṃ pārthivāpyataijasaṃ 
caturviṃśatiguṇam | gandharvāṇāṃ pārthivāpyataijasavāyavyaṃ 
dvātriṃśadguṇam | indrasya pārthivāpyataijasavāyavyākāśīyaṃ 
catvāriṃśadguṇam | somasya 
pārthivāpyataijasavāyavyākāśīyamānasamaṣṭācatvāriṃśadguṇam | 
prajāpatestu pārthivāpyataijasavāyavyākāśīyamānasāhaṃkārikaṃ 
ṣaṭpañcāśadguṇam | brahmaṇastu 
pārthivāpyataijasavāyavyākāśīyamānasāhaṃkārikabauddhaṃ 
catuṣṣaṣṭiguṇam | uktaṃ ca śivadharmottare -

tatrāṣṭaguṇamaiśvaryaṃ pārthivaṃ piśitāśinām |
tatsāyujyagatānāṃ ca narāṇāṃ tatsamaṃ smṛtam ||
rakṣasāṃ ṣoḍaśaguṇaṃ pārthivāpyaṃ ca taddvidhā |
etanniravaśeṣeṇa yakṣeṣvanyacca taijasam ||
gandharvāṇāṃ ca vāyavyaṃ yākṣaṃ ca sakalaṃ smṛtam |
pāñcabhautikamindrasya catvāriṃśadguṇaṃ mahat ||
somasya mānasaṃ divyaṃ yaccādhaḥ pāñcabhautikam |
saumyātprajāpatisthānamahaṃkāraguṇānvitam ||
catuṣṣaṣṭiguṇaṃ brāhmaṃ bauddhamaiśvaryamuttamam || iti ||

66) tathā śrīmatpauṣkare -

piśācānāṃ yathoddiṣṭamaṇimādiguṇāṣṭakam |
rakṣasāṃ dviguṇaṃ jñeyaṃ yakṣāṇāṃ triguṇaṃ bhavet ||
caturguṇaṃ tu gāndharvamaindraṃ pañcaguṇaṃ bhavet |
somānāṃ ṣaḍguṇaṃ saptaguṇaṃ syāttu prajāpateḥ ||
catuṣṣaṣṭiguṇaṃ bauddhamaiśvaryaṃ brahmaṇaḥ smṛtam |
tataḥ samāsādaiśvaryaṃ catuṣṣaṣṭiguṇaṃ matam  ||
tatastvaiśvaryabhogena viṣayeṣvapi saṃsthitāḥ |
caranti kṣīṇakarmāṇaḥ śucīnāṃ śrīmatāṃ gṛhe ||
tato dharmeṇa yujyante bhoganidrāmadākulāḥ |
hiṃsāyāmapi caurye vā mithyākathana eva vā ||
gurvaṅganādhigamane'pyapakārapratīkṛtau |
krodhe nityādilope vāśauce vātoṣa eva vā ||
anārjave ca satataṃ pravartante'ndhadṛṣṭayaḥ |
adharmavṛttayastvetā daśasaṅkhyāstu pūrvavat ||
athādharme pravṛttaṃ tamaṇumajñānasantatau |
niyunakti maheśāno yathā mūḍho na paśyati ||
tamo moho mahāmohastāmisrañcāndhapūrvakam |
tāmisramiti pañcaiva matā ajñānavṛttayaḥ ||
anātmanyātmabhāvo yaḥ sa tamaḥ parikīrtitam |
bhūtādyavyaktaparyantaṃ tattvadarśanabhedataḥ ||
daśadhā tama uddiṣṭaṃ mohastvaṣṭavidho mataḥ |
aṇimādiṣu labdheṣu paratvapratipattitaḥ ||
divyādivyavibhedena śabdādiṣu daśasvapi |
paratādhyavasāyo yo mahāmohaḥ prakīrtitaḥ ||
śabdādīnāṃ daśānāṃ ca divyādivyavibhedataḥ |
aṇimādyaṣṭakasyāpi vaikalyātsādhane'tha vā ||
prāptānāṃ nāśatastāpo yastāmisraṃ prakīrtitam |
śabdādāvaṇimādau ca bhujyamāne pareṇa tu ||
tatsukhāharaṇe yattattāmisraṃ cāndhapūrvakam |
tataścājñānabhedo'yaṃ catuṣṣaṣṭividho mataḥ ||
avairāgyaṃ ca śatadhā tuṣṭīnāṃ vyatyayātmataḥ |
na jugupsādayaḥ sarvapadārtheṣu tadā nṛṇām ||
aṣṭabhedamanaiśvaryamaiśvaryavyatyayātmakam |
taccāśaktyā bhavetsā ca ṣaṭsaptatyadhikaṃ śatam ||
ajñānātuṣṭirūpatvāccatuṣṣaṣṭyuttaraṃ śatam |
budhdyaśaktiśca tuṣṭiḥ syātkāraṇasyārkasaṃkhyayā ||
aśaktirevaṃ saṃkṣepāt ṣaṭsaptatyadhikaṃ śatam |
iti dharmādayo bhāvā buddhisthā vāsanātmanā ||
krameṇa pratyayātmānaḥ proktāstadvṛttibhedataḥ |
pratyāyayanti kṣetrajñaṃ tena te pratyayāḥ smṛtāḥ ||
dharmo daśavidho jñānamaśītiśatasaṃkhyayā |
virāgo'ṣṭāṣṭadhaiśvaryamadharmo daśadhā mataḥ ||
ajñānaṃ ca catuṣṣaṣṭiravairāgyaṃ śataṃ bhavet |
aṣṭasaṃkhyamanaiśvaryaṃ ṣaṭtriṃśacca catuśśatam ||
ṣaṭsaptatyadhikāśaktiḥ saṃkhyayā śatadhā matā |
saṃmbhūya vṛttayo buddheḥ ṣaṭśataṃ dvādaśādhikam ||
evaṃ saṃkṣepataḥ proktā buddhirbhāvāṣṭakātmikā |
aṣṭāre'sminmahācakre paryaṭanti punaḥ punaḥ ||
pudgalāstena teṣāṃ tu nāntaṃ paśyanti pudgalāḥ || iti ||
(pau puṃ pa ślo 104-128)

67) nanu dharmādayo bhāvāḥ parasparaviruddhāḥ 
kathamekasmātkāraṇājjātāḥ ? ucyate - dharmādayaḥ parasparaviruddhā na 
bhavanti, pratyayātmakatvāt | ata eva jñānābhāvo nājñānam; 
kintvanyathājñānameva | tataścādharmādīnāmapi jñānatvena 
sāmānyaviśeṣabhāvādvirodhābhāvaḥ | uktaṃ ca pauṣkare -

aṣṭau dharmādayo bhāvā viruddhāstu parasparam |
guṇāḥ sattvādayaścaivamekakāraṇakāḥ katham ||

īśvaraḥ -

na viruddhāstu dharmādyā yataste pratyayātmakāḥ |
jñānābhāvo'tra nājñānamanyathājñānameva tat ||
tasmājjñānaviśeṣāste sarve dharmādayaḥ sthitāḥ |
na viśeṣāstu sāmānyādviruddhā hi kadācana || iti ||
(pau mā pa ślo 44 - 46)

68) asmādeva buddhitattvādindriyādyārambhakaṃ tattvamahaṃkāraḥ 
svopadhānena ātmanyahaṃbuddhihetuścotpadyate | 
etadvyāpārātprāṇādīnāṃ saṃcāraḥ | etatsadbhāve mānaṃ tu 
ahamākārādhyavasāyaḥ kiṃcitkāraṇakaḥ, kāryatvāt, 
saṃmatavadityanumānameva | na ca buddhyaiva tudupapattiḥ; buddheḥ 
kāryasyādhyavasāyasya pratyarthaṃ bhinnarūpatvaṃ 
viṣayagrāhakarūpatvaṃ ca, ahamākārādhyavasāyasya tvekarūpatvaṃ 
viṣayigrāhakarūpatvaṃ ceti, buddhikāryādadhyavasāyādasya vilakṣaṇatvāt | 
buddherahamadhyāsahetutve viṣayagrahe sarvatrāhamuparāgaprasaṅgācca | na 
ca viṣayagrahe ātmabhānasāmagryanupraveśānanupraveśābhyāṃ 
taduparāgānuparāgayorupapattiḥ; ātmanaḥ saṃyogasya 
sarvatrānupraveśenānanupraveśābhāvāt | asmanmate tu 
ahaṃkāravyāpārāvyāpārābhyāmuparāgānuparāgāvupapannāviti na 
kāpyanupapattiḥ | tadevamahamākārādhyavasāyahetutvenāhaṃkārasiddhiḥ ||

69) taduktaṃ śrīmatpauṣkare -

ata ūrdhvamahaṃkāratattvaṃ saṃkṣipya varṇyate |
pratyātmaniyataṃ tacca prasiddhamahamātmakam ||
manaḥ pūrvamadhastattvaṃ yata evopajāyate |

ṛṣayaḥ -

pratyayo'dho'hamātmātra vyavasāyātmako yataḥ ||
buddhireva tato bhūyātkimanena vadeśvara |

īśvaraḥ -

viṣayādhyavasāyo yaḥ pratyarthaṃ bhedataḥ sthitaḥ |
ayamityātmakaḥ sarvo buddhiśabdena gaṇyate ||
ahamātmaikarūpastu sarvataḥ saṃvyavasthitaḥ |
grāhakavyavasāyātmā buddhireṣā kathaṃ bhavet ||
viṣayābhimukhī buddhirahaṃ viṣayasaṅgrahaḥ |
aikyaṃ kathaṃ tayorviprāḥ kathyate'tyantabhinnayoḥ ||

ṛṣayaḥ -

ahaṃkṛdekameṣṭavyaṃ sarveṣāṃ ahamātmanaḥ |
pratyayasyodayāttatkiṃ pratyātmaniyataṃ bhavet ||

īśvaraḥ -

idamityeva sarvatra dhīstāvadupajāyate |
naitāvatā tadekatvaṃ vācyaṃ pratyakṣabādhataḥ ||
kiṃ ca sarveṣu kumbheṣu kumbha ityeva jāyate |
sarveṣāṃ pratyayo vāpi kumbhaikyaṃ na pradṛśyate ||
pratyātmaniyato'haṃkṛdgacchāmīti ca vartate |
ekasyānyasya paśyāmītyevaṃ buddhyudayastathā ||
anyathaikaprakārāhaṃmatiḥ syādubhayorapi |
ahaṃkāraḥ pṛthaksārvajanīna iti buddhyatām ||
yadyabhinnamahaṃkṛtsyāddevadatte'pyahaṃmatiḥ |
anyasya copajāyeta nātmaikatvaṃ tataḥ sthitam || iti ||
(pau puṃ pa ślo 129-140)

70) ayaṃ cāhaṃkāraḥ prathamaṃ tāvajjīvanasaṃrambhagarvabhedena 
trividhaḥ | tatra jīvano nāma pañcaprāṇavāyudhārakaḥ | saṃrambho nāma 
prayatnaḥ | garvo nāmāhamiti grāhakādhyavasāyaḥ | uktaṃ ca tattvaprakāśe 
- syāttrividho'haṃkāro jīvanasaṃrambhagarvabhedena iti | mṛgendre -

saṃrambhādyasya ceṣṭante śarīrāḥ pañca vāyavaḥ | iti ||

anyatra ca -

saṃrambho'haṃkṛto vṛttiḥ ------------------------ | iti ca ||

71) ayaṃ punaḥ sāttvikādibhedenāpi trividhaḥ | tatra taijasaḥ 
sāttvikasaṃjñaḥ, rājaso vaikārikābhidhaḥ, tāmaso bhūtādināmā | tatra 
taijasāhaṃkārātmanaḥ cakṣurādīni pañca jñānendriyāṇi cotpadyante | 
vaikṛtādahaṃkārādvāgādīni pañca karmendriyāṇyutpadyante | 
bhūtāderahaṃkārācchabdādīni pañca tanmātrāṇyutpadyante | tatra 
saṅkalpavikalpakāraṇaṃ tattvaṃ manaḥ | cakṣurādinālocite ayaṃ 
brāhmaṇaḥ ityādiniścayaḥ saṅkalpaḥ | samyagviśeṣaṇaviśeṣyabhāvena 
arthakalpanārūpatvāt | tādṛśe'rthe ayaṃ brāhmaṇo vā kṣatriyo vā 
ityādisaṃśayo vikalpaḥ | vividhakalpanārūpatvāt | tatsadbhāve mānaṃ tu 
saṅkalpavikalpapratyayaḥ sakāraṇakaḥ, kāryatvāditi | ayaṃ ca nāhaṃkāriko 
nāpi bauddhaḥ; buddhyahaṃkārayorniścayāhaṃpratyayayorhetutvena 
kḷptatvāt | na cāyamaindriyikaḥ; cakṣurādidṛṣṭasyārthasya mānasaiva 
buddhyupārohaṇāt | anyathā ghaṭe dṛṣṭe paṭasyāpi niścayaḥ syāt | na ca 
bubhutsaiva tanniyāmiketi vācyam | bubhutsāyā icchārūpatvena 
manojanyatvāt | tasmātsaṅkalpavikalpakāraṇatvena manaḥ siddham ||

72) idaṃ ca mano mahat | nanu krameṇārthaprakāśanādaṇveva | 
mahattve sarvadā sarvapadārthaprakāśanaprasaṅga iti cenmaivam | manaso 
mahattve'pi karmavaśātsāmagryapekṣaṇāttamasābhibhavādapi jñānasya 
kramikatvopapatteḥ | kiṃ ca manaso'ṇutve aṇoreva padārthasyāvabhāsanaṃ 
syāt | yasya kāraṇasya yāvatī vyāptistāvatyevārthabhāsanasya 
pradīpasūryādau dṛṣṭatvāt | na ca mahatālpasya grahaṇamayuktamiti vācyam | 
virodhābhāvāt | tasmānmano mahaditi sthitam | tacca pratyātmaniyatam |

73) uktaṃ ca śrīmatpauṣkare -

sa ca trividha uddiṣṭaḥ prathamastatra taijasaḥ |
vaikāriko dvitīyaḥ syāttathā bhūtādikaḥ paraḥ ||
sattvenotkṛṣṭabhāgo yaḥ sa taijasa ihocyate |
vaikṛto rajasotkṛṣṭo bhūtādistamasādhikaḥ ||
taijasādapyahaṅkārānmano buddhīndriyāṇi ca |
pañca karmendriyāṇi syurahaṅkārāttu vaikṛtāt ||
ahaṅkārāttu bhūtāderjātā tanmātrasaṃhatiḥ |
yaḥ saṅkalpavikalpātmā pratyayo'ntargato nṛṇām ||
sa nāhaṅkāriko nāpi bauddho vyāpārabhedataḥ |
sa tu mānasa eveṣṭastantre'sminmuktisāgare ||
cakṣuṣālokite hyarthe tamarthaṃ buddhigocaram |
vidadhātīha yadviprāstanmanaḥ paripaṭhyate ||
anyathālocite kumbhe paṭe'pi syādviniścayaḥ |
kiṃ ca sāsnādimatpiṇḍe gośabdamanubhūya yat ||
bhūyastatsadṛśe dṛṣṭe gośabdoccārahetukam |
tanmanaḥ kathyate tantre vikalpapratyayātmakam ||
kecinmano'ṇumicchanti krameṇārthavirājanāt |
mahaccetsarvadā sarvapadārthāvagatirbhavet ||
tadasat karmavaśataḥ kramājjñānodayo nṛṇām |
sāmagryapekṣātaścāpi tamasābhibhavādapi ||
mano'ṇu cedaṇudravyagrāhakaṃ sarvadā bhavet |
yāvatī grāhakavyāptistāvadgrāhyaṃ ca gṛhyate ||
dīpena grahaṇaṃ yadvattathā ādityaraśmibhiḥ |
alpārthagrāhakatvena mano'lpamiti cenmatiḥ || 
tadasanmahato'pyalpagrahaṇaṃ paridṛśyate |
mahadeva manastattvaṃ pratyātmaniyataṃ ca tat || iti || 
(pau puṃ pa ślo 140-153)

74) etāni ca cittabuddhyahaṃkāramanāṃsi bāhyārthālocane 
asāmarthyādantaḥkaraṇāni | tathā ca na 
śrotrādivadvartamānamātragrāhakāṇi  | api tu bhūtabhaviṣyatorapi 
grāhakāṇi | sāttvikarājasāhaṃkārānyataraprabhavaṃ tattvamindriyam | tacca 
dvividham | buddhīndriyaṃ karmendriyaṃ ceti | tatra 
sāttvikāhaṃkāraprabhavaṃ jñānendriyam | prakāśakatvāt | 
rājasāhaṃkāraprabhavaṃ karmendriyam | kriyājanakatvāt | tatra 
jñānendriyaṃ śrotrādibhedena pañcavidham | tatra śabdagrāhakamindriyaṃ 
śrotram | sparśagrāhakaṃ tvak | rūpagrāhakaṃ cakṣuḥ | gandhagrāhakaṃ 
ghrāṇam  |  rasagrāhakaṃ rasanam | uktaṃ ca śrīmatpauṣkare -

buddhīndriyāṇi kathyante śrotraṃ tvakcakṣureva ca |
jihvā ghrāṇaṃ ca pañceti suprasiddhāni tāni ca ||
pratyakṣaviṣayatvena teṣāṃ siddherna yuktayaḥ |
kathyante tānyahaṅkārādupajātāni sāttvikāt || iti ||
(pau puṃ pa ślo 158, 159)

75) nanu śrotrādyadhiṣṭhānatvābhimatāni karṇaśaṣkulyādīnyeva 
śabdādigrāhakāṇi santu | kṛtaṃ śrotrādibhirindriyaiḥ | na ca 
prāpyakāritvānurodhenādhiṣṭhānātiriktamindriyaṃ svīkartavyamiti yuktam | 
tvagādyadhiṣṭhānasyaiva prāpyakāritvopapatteḥ | cakṣuḥśrotrayoḥ 
prāpyakāritvāsiddheśca | na caivaṃ 
kuḍyādivyavahitasyāpyupalambhaprasaṅgaḥ | kuḍyādyabhāvasyāpi tatra 
hetutvena kuḍyādisatve tadanupalambhopapatteḥ | sphaṭikādyantaritasyāpi 
darśanācca | prāpyakāritve śākhācandrayoryugapadupalambhāyogācca | 
tasmādadhiṣṭhānātiriktamindriyaṃ nopetavyamiti maivam | cakṣuṣaḥ 
prāpyakāritvābhāve kuḍyādivyavahitasyāpyupalambhaprasaṅgāt | na ca 
kuḍyaṃ pratibandhakam | tasya sākṣātpratibandhakatve kuḍyādbahiḥ 
sthitasyeva kuḍyapuruṣayormadhyagatasyāpi anupalambhaprasaṅgena 
sannikarṣavighaṭanadvāraiva pratibandhakatvasyāṅgīkāryatvāt | na ca 
grāhyagrāhakamadhyagatatvena tatpratibandhakam; madhyāvasthānasyāpi 
sannikarṣavighaṭanāyaivāpekṣitatvāt | anyathā abhimukhasthitasyeva 
paścādbhāgasthitasyāpi grahaṇaprasaṅgācca | grahītṛgrāhyayormadhye 
anyasyābhāvāt | sphaṭikāntaritānupalambhaprasaṅgastu tavāpi samānaḥ | 
tvanmate'pi madhyavartipadārthasya pratibandhakasya sadbhāvāt | asvacchasya 
tasya pratibandhakatve manmate'pi sannikarṣe tasyaiva pratibandhakatvaṃ 
suvacam | tasmātsannikṛṣṭameva cakṣurgrāhakam | na ca nayanagolakasya 
ghaṭādibhiḥ sannikarṣaḥ sambhavatīti tadadhiṣṭhānakaṃ 
saṅkocavikāsadharmakamanyadeva cakṣuraṅgīkāryam | na ca 
cakṣūraśmīnāṃ ghaṭādisannikarṣe antarā puruṣādivyavadhāne'pi 
tadgrahaḥ syāt | sanikarṣavighaṭanahetorāśrayavināśasyānyatarakarmaṇo vā 
abhāvāditi vācyam | gavākṣapidhāne tadantargatānāṃ sūryaraśmīnāṃ 
vināśavadapasaraṇavadvā ihāpi vināśāpasaraṇānyatarasambhavena 
saṃyogavighaṭanasyaivopapatteḥ ||

 76) nanu śrotrasya kathaṃ viṣayasambandhaḥ ? na ca cakṣurvṛtteriva 
śrotravṛtterbahirnirgamena sambandhopapattiḥ | dūradeśasthasya tārasyeva 
mandrasyapi grahaṇaprasaṅgāditi cenna | vīcītaraṅganyāyena santatyā 
karṇadeśotpannasya śabdasya grahaṇopapatteḥ | na ca karṇadeśotpannasyeva 
dūradeśotpannasya śrotrasaṃyukta ākāśe samavāyena grahaḥ syāditi 
vācyam | karṇāvacchinnākāśasamavāyasyaiva grāhakatvāt | nanvevaṃ 
vīcītaraṅganyāyenotpattyabhyupagame karṇasyaiva 
sannikarṣasambhavādatiriktendriye mānaṃ nāstīti cet, badhirasya satyapi karṇe 
śabdānupalabdhyā tadadhiṣṭhānakasyānyasyābhyupeyatvāt | 
tasmātkarṇaśaṣkulyavacchinnanabhodeśādhiṣṭhānakaṃ śretrendriyaṃ 
siddham | tacca vīcitaraṅganyāyena santatyā 
karṇadeśotpannaśabdagrāhakamiti | yatta evaṃ sati atidūrotpanno'pi śabdaḥ 
santatyā śrotrākāśadeśe'pi śabdamutpādayediti tadasat; tathātve 
mandratāraśabdabhedena samīpadūragrahavyavasthāpi na syāt | 
tasmānnimittatāratamyādekasyaiva bāṇasya yathā dūrasamīpapātitvaṃ 
tathā ekaḥ śabda eva nimittatāratamyāddarasamīpasthapuruṣakarṇapradeśaṃ 
prāpnoti | evaṃ kuṣṭhādinā tvagādyupaghāte sparśādyapratītyā 
tadadhiṣṭhānamindriyamaṅgīkāryam | kuṣṭhādeḥ svato doṣatve 
mānābhāvāt |

77) nanvekamevendriyamadhiṣṭhānabhedena bhinnaviṣayagrāhakamastu; 
kṛtamindriyabhedena; andhabadhiratvādivyavasthāpi tattacchaktivināśena 
bhaviṣyatīti cenna | dharmigrāhakeṇoktena pramāṇena 
bhinnatayaivendriyāṇāṃ siddheḥ | abhede pramāṇasiddhe 
kathañcicchaktibhedena vyavasthopapādanīyā | na ca tatra pramāṇamasti | 
tadevamindriyāṇi bhinnāni |

78) taduktaṃ śrīmatpauṣkare -

nanu golakameveṣṭaṃ cakṣaḥ kaiścitsahetukam |
sāntaragrahaṇācchākhācandrayoryugapatsthiteḥ ||
sthūlārthagrahaṇāccaiva tathā kimiti neṣyate |

īśvaraḥ -

golakādīndriyatvena sāntaragrahaṇaṃ matam ||
vyāptamevaṃ hi gṛhyeta grāhako dīpavanmataḥ ||
golakasya tadavyāptyā cākṣuṣyaṃ dūravāritam |
pṛthvarthagrahaṇaṃ yattadvyāpakatvena yujyate ||
no cedgolakamātrasya bhāvasya grahaṇaṃ bhavet |
ekakāle tu śākhendvorgrahaṇaṃ vyāpakatvataḥ ||
vastusthityā tu śākhendvorgrahaṇaṃ naikakālajam |
āśutvenābhimānaṃ tatsahasradalabhedavat ||

ṛṣayaḥ -

nanu golakameveṣṭamādhāratvena cakṣuṣaḥ |
yatraivādhārasadbhāvastatrādheyo vyavasthitaḥ ||
vyāpakatvena yā sattā sā tvakiñcitkarī matā |
vyāpako'pi yathā jīvo vyomadeśe na bodhakaḥ ||
kathaṃ punardaviṣṭhārthaṃ prāpya gṛhṇāti locanam |

īśvaraḥ -

tadasattaijasatvena golakasya bahiṣkṛteḥ |
dīpavattatkṛtāsthānaṃ cakṣurgṛhṇāti nodbhutam ||
dīpenopakṛtaṃ cakṣustamasā vārthasañcayam |
tato gandhādinoktena prasaṅgo dūravāritaḥ ||
cakṣurādhārabhūtasya golakasya pravṛttitaḥ |
nanu nāyanatejobhirnissṛtairmilitairapi ||
artho gṛhyeta tannāśuvināśānmīlanottaram |
ghaṭāntasthasya dīpasya prabhā iva pidhānataḥ ||
dṛśo golakamātratve hyaprāptagrahaṇaṃ bhavet |
yadyaprāptaṃ ca gṛhṇīyāttattu syādvyavadhānataḥ ||
tasmādvyāpakameṣṭavyaṃ cakṣurdūrārthadarśane |
evaṃ sati tvagādeśca gatvārthagrahaṇaṃ bhavet ||
iti cettanna vāyvādibhūtādhiṣṭhānagocaram |
gatvārthagrahaṇaṃ naiṣāṃ kiṃ tu prāptārthamāpakāḥ ||

ṛṣayaḥ -

netravacchravaṇaṃ gatvā na gṛhṇāti yadi dhvanim |
digdeśopahitaḥ śabdaḥ kathamatropagṛhyate ||

īśvaraḥ -

tadasadvegataḥ śabdaḥ santatyā śrotramāgataḥ |
bāṇādipātavatsadyo digdeśānanumāpayet ||
tadā prāganubhūtyaiva bheryādyanumitiśca yā |
gṛhṇāti prāptamevārthamindriyāṇītyataḥ sthitiḥ ||
naikamindriyameṣṭavyaṃ cakṣūrūpādyavedanāt | iti ||
(pau puṃ pa ślo 173-191)

79) nanvetāni kathamāhaṅkārikāṇi ? pratiniyataguṇagrāhakatvena 
bhautikatvasyaivocitatvāt | yathā hi - śrotrādīni śabdādyāśrayaprakṛtikāni, 
tadabhivyañjakatvāt, yadyasyābhivyañjakaṃ tattadāśrayaprakṛtikam, yathā 
kuṅkumagandhābhivyañjakaṃ ghṛtamiti, maivam; nīlābhivyañjakena 
tadāśrayapṛthivīprakṛtikatvarahitena cakṣuṣānaikāntikatvāt | nanveṣāṃ 
prakṛtibhedābhāve kathaṃ viṣayapratiniyama iti cet, na prakṛtibhedaprayukto 
viṣayaniyamaḥ | kiṃ tarhi ? niyativiśeṣaprayuktaḥ | kiṃ ca viṣayapratiniyamaḥ 
kīdṛgrūpaḥ ? kiṃ yatprakṛtikaṃ yadindriyaṃ tattasyaiva guṇaṃ gṛhṇāti 
nānyasyeti ? kiṃ vā yadindriyaṃ yatprakṛtikaṃ tattadguṇameva gṛhṇāti na tu 
tadguṇānyaditi | nādyaḥ ; cakṣuṣā pṛthivīguṇasya nīlāderagrahaprasaṅgāt | 
na dvitīyaḥ; karmasāmānyāderagrahaprasaṅgāt | nanvindriyāṇi tattadā-
śrayaprakṛtikāni, śabdādiṣu pañcasu madhye tattanmātrābhivyañja-
katvāditi cet, na | śabdamātravyañjakatvādityatra dṛṣṭāntābhāvāt | evaṃ 
rasamātravyañjakatvādityatrāpi jalasya navaśarāvādigandhavyañjakatvād-
daṣṭānte sādhanavaikalyam | sarvatra vāprayojakatvamāhaṅkārikatva-
bodhakāgamabādhitattvaṃ ca | tasmānna bhautikānīndriyāṇi, kiṃ 
tvāhaṅkārikāṇīti siddham ||

80) taduktaṃ śrīmatpauṣkare -

ṛṣayaḥ -

yadabhivyañjakaṃ yasya sajātīyaṃ hi tasya tat |
yathābhibhūtagandhasya nimbatvakcandanasya ca ||
śabdābhivyañcakaṃ śrotramākāśātmakameva tat |
tvagādeścaivamunneyamāhaṃkārikatā katham ||

īśvaraḥ -

bhautikatvena mūrtatvamindriyāṇāṃ ghaṭādivat |
grāhyatvaṃ cendriyairanyairavasthānaṃ na kutracit ||
kiṃ ca mūrtoparodhena mūrtānāṃ grahaṇaṃ na hi |
sphaṭikāntargataṃ vastu na gṛhṇīyāttu locanam ||
pānīyāntargataṃ vāpi tasmāccakṣurna taijasam |

ṛṣayaḥ -

yadyevaṃ sati kuḍyāntarnihitasyāpi vastunaḥ ||
grahaṇaṃ syādamūrtatvenāhaṃkārodbhavatvataḥ |

īśvaraḥ -

tadasattāmasatvena kuḍyādergatirodhataḥ ||
vyaṅgyavyañjakayoryattu sajātīyatvamīritam |
tadapyacāru yatkarmajātyordṛgviṣayatvataḥ ||
rūpaikaviṣayaṃ nātastaijasatvaṃ ca hīyate |
tathātve taddaviṣṭārthagrahaṇaṃ nopapadyate ||
nāprāptagrahaṇaṃ dṛṣṭaṃ yatkiṃcidvyavadhānataḥ |
prāptamevendriyaṃ sarvaṃ gṛhṇāti tvagyathendriyam ||
kiṃ ca mūkādyanutpattirdehāṅgatve prasajyate |
ghrāṇādyavayavopeto mūkādiḥ paridṛśyate ||
tato vyāpakameveṣṭaṃ cakṣurdūrārthadarśane |
śrotrādīni kramoktāni tadgrāhyāḥ pañca ca kramāt ||
bhūtapañcakasambandhaśabdānāṃ grāhikā śrutiḥ |
tato'vaśiṣṭabhūteṣu sparśastvaggrāhya iṣyate ||
evamanyeṣvapi jñeyaṃ tadgrāhyāḥ pañca ca kramāt |
śrotratvaglocanādīnāṃ krameṇotpattirīritā || iti ||
(pau puṃ pa ślo 160-172)

81) karmendriyāṇi tu vākpādapāṇipāyūpasthāni | teṣāṃ 
vyāpārāstu vacanādānaviharaṇotsargānandāḥ | te ca 
satyapīndriyādhiṣṭhānatvābhimate kvacinnotpadyante | 
tasmādadhiṣṭhānātiriktendriyasiddhiḥ | taduktaṃ pauṣkare -

karmendriyāṇi vākpādapāṇiguhyagudāni ca |
vacanādānagamanānandotsarjanahetavaḥ || iti ||

82) tāmasāhaṅkāraprabhavaṃ tattvaṃ tanmātram | tacca pañcavidham | 
śabdatanmātraṃ sparśatanmātraṃ rūpatanmātraṃ rasatanmātraṃ 
gandhatanmātraṃ ceti | tatra 
dhvanitvavarṇatvatāratvamandratvādiviśeṣahīnaṃ śabdasāmānyaṃ 
śabdatanmātram | śītoṣṇatvādivibhāgarahitaṃ sparśasāmānyaṃ 
sparśatanmātram | śuklatvādiviśeṣaśūnyaṃ rūpasāmānyaṃ 
rūpatanmātram | madhuratvādivibhāgavidhuraṃ rasasāmānyaṃ 
rasatanmātram | surabhitvādiviśeṣānākrāntaṃ gandhasāmānyaṃ 
gandhatanmātram ||

83) nanu tanmātrasadbhāve kiṃ mānam ? na tāvat ākāśādīni 
bhūtāni upādānārabdhāni, kāryatvāt, ityanumānaṃ mānam; 
tāmasāhaṅkāreṇa paramāṇubhirvārthāntaratvāt; nāpi tārādayo viśeṣāḥ 
sāmānyapūrvakāḥ, viśeṣatvādityanumānam; khaṇḍamuṇḍādiṣu 
viśeṣeṣu gosāmānyapūrvakatvābhāvena viruddhatvāt | tasmāt 
tanmātrasadbhāve mānaṃ nāstīti, maivam; 
tāmasāhaṅkārasyākāśādikāraṇatve 
ākāśādiṣūttarottaraguṇādhikyasyādṛṣṭamātrahetukatvaṃ syāt | ato 
dṛṣṭahetukatvāt śabdatanmātrādihetukatvamabhyupeyam | evaṃ hyākāśasya 
śabdatanmātrārabdhatayā śabdaguṇakatvam | vāyoḥ 
śabdasparśatanmātrārabdhatayā guṇadvayakatvam | tejasaḥ 
śabdasparśarūpatanmātārabdhatayā guṇatrayakatvam | jalasya 
śabdasparśarūparasārabdhatayā guṇacatuṣṭayādhikaraṇatvam | pṛthivyāḥ 
śabdasparśarūparasagandhatanmātrārabdhatayā 
guṇapañcakādhikaraṇatvaṃ yujyate | na ca 
tattadguṇādhikaraṇaparamāṇūpādānatayā 
tattadguṇādhikaraṇatvameteṣāmiti yuktam; sūkṣmasya guṇasyaiva 
kāraṇatvasambhave guṇādhikaraṇasya sūkṣmasya kāraṇatvakalpanāyāṃ 
gauravāt | tasmāttanmātrāṇyeva bhūtānāmupādānatvenābhyupetavyāni |

84) taduktaṃ śrīmatpauṣkare -

tanmātrāṇyapi varṇyante kramātprāptāni samprati |
bāhyendriyaparicchedyaguṇatvādbhūtasaṃhatiḥ ||
pratyakṣatve'smadādīnāṃ sthitā kāraṇapūrvikā |
yattatra kāraṇam viprāḥ sā tu tanmātrasaṃhatiḥ ||
viśeṣattvācca śabdādeste ca sāmānyapūrvakāḥ |
yattatrāpi ca sāmānyaṃ tanmātramiti bhāvayet ||
ekadvitricatuḥpañcaguṇāstanmātrasaṃhatiḥ |
ata eva hi bhūtānāmabhiyogo guṇaiḥ kramāt ||
sthaulyasaukṣmyakṛto bhedo bhūtatanmātrayoriva || iti ||
(pau puṃ pa ślo 241-245)

85) tanmātrarabhyaṃ tattvaṃ bhūtam | 
indriyagrāhya(jātīya)guṇādhikaraṇaṃ vā | taccākāśādibhedena 
pañcavidham | tatrāvakāśapradānavyāpārakaṃ tattvamākāśaḥ | 
sparśatanmātrānupādeyatve sati śabdatanmātropādeyaṃ vā | asya ca śabda 
eva guṇaḥ | guṇatvaṃ cāsyotkarṣāpakarṣayogitvenānumeyam | nanu śabdasya 
bheryādiguṇatvopapatteḥ kathamākāśasiddhiriti cenna; śrotrasannikarṣāya 
śarapātanyāyena śabdaṃ pratyupādānatvenākāśasiddhyupapatteḥ 
bheryādirnopādānam; kintu nimittameva | nanvasya kathaṃ śabda eva guṇaḥ ? 
nīlaṃ nabha ityanubhavena rūpasyāpi sattvāt | nisparśatvādinā 
nīrūpatvānumānasya pratyakṣabādhitatvāditi cenna; yasminneva pradeśe 
dūrānnīlopalambhastatraiva samīpopasarpaṇena tadabhāvopalabdheḥ 
tajjñānasya dūratvādidoṣajanyatayā bhramatvaniścayāt | na cāsya 
sakalamūrtadravyābhāvatvenopapattestattvāntaratvakalpanaṃ nirarthakamiti 
vācyam; śabdaguṇasya nirāśrayatvaprasaṅgāt | abhāvasya 
samastabhūtāvakāśapradānagamanāgamanādyādhāratvarūpabhāva-
dharmānupapatteśca |

86) taduktaṃ śrīmatpauṣkare -

mahābhūtāni jāyante kramāttanmātrapañcakāt |
ākāśaṃ pavanastejastoyaṃ bhūriti saṃjñayā ||
gamāgamādivyāpāro yasminsati nṛṇāṃ bhavet |
taddhetubhūtamākāśamiṣyatāṃ munipuṅgavāḥ ||
no cettadavakāśākhyaṃ vihareyuḥ kva jantavaḥ | 
na hi bhūmyantarā dṛṣṭau prāṇināṃ tu gamāgamau ||
tasmādākāśameṣṭavyamavakāśasya kāraṇam |
kiṃ ca tīvrādayaḥ śabdā guṇyapekṣā guṇatvataḥ ||
guṇī cākāśamityuktaṃ tacca nṝṇāmatīndriyam |

ṛṣayaḥ -

nanu pratyakṣamākāśamutpatatkhagadarśanāt ||
anakṣaṃ cenna dṛśyeta pakṣiṇo divi yadgatiḥ |

īśvaraḥ -

evaṃ cenmūrtamākāśaṃ sparśādiguṇayogataḥ ||
ityādi vadataḥ pṛthvīsādharmyeṇātiśobhate |
anyasya kāryeṇānyasya svarūpapariniścaye ||
ālokena hi saṃyoga ākāśe dṛśyate tayoḥ |
nīlaṃ vyometi tanmithyā dūratvādinibandhanāt ||
vyomānakṣaṃ daviṣṭatvādyathā tanmātrasaṃhatiḥ |

ṛṣayaḥ -

vyomāhvayakṛtaḥ kaścidbhāvo nāstyavakāśataḥ ||
avakāśaśca pṛthvyāderabhāvātmaka eva saḥ |
ityāhurapare tatra samādhānaṃ vidhīyatām ||

īśvaraḥ -

abhāvo bhāvadharmastu tathā bhāvo'pi tadgataḥ |
yadyabhāvo na taddhrmo ghaṭābhāvaḥ paṭasya ca ||
abhāvo'yaṃ padārthasya dharmaścecchaśaśṛṅgavat |
sarvadānupalambhaḥ syāditi caitadacodanam ||
abhāvo'nupalabdhirhi sā ca kāryasamāśritā |
taddhetoḥ kāryabhūtā sā tāmasodrekataḥ sthitā ||
abhāvaḥ śaktyavasthāto bhāvakāryātmanā sthitiḥ |
bhāvābhāvau na caikatra bhāvānāṃ tena saṃmatau ||
mūrtābhāvo'pyabhāvatvānmūrteṣveva vyavasthitaḥ |
tatkathaṃ tadabhāvo'yamavakāśo bhavediha ||
yo yasya dharmastasyeha yuktā taddhrmiṇi sthitiḥ |
avakāśaḥ punaḥ so'yaṃ vyāpī sarvatra dṛśyate || iti ||
(pau puṃ pa ślo 279-294)

87) rūpatanmātrānārabdhatve sati sparśatanmātrārabhyo vāyuḥ | asya 
ca śabdasparśau guṇau | nanu śabdo na vāyuguṇaḥ, śrotragrāhyatvāt, yo 
vāyuguṇaḥ sa na śrotreṇa gṛhyate, yathā sparśaḥ; vāyurvā na 
śabdaguṇakaḥ, ākāśetarattvāt, yaḥ śabdaguṇakaḥ sa ākāśa 
ityanumānābhyāṃ śabdasya vāyuguṇakatvābhāvaniścayāt kathaṃ 
śabdasya vāyuguṇatvamiti cenna; śakaśakādidhvanervāyugatatvenopaḥ 
lambhenānumānayoḥ pratyakṣabādhitatvāt | evaṃ dhamadhama, chalachala, 
khaḍakhaḍādidhvanīnāmagnyādigatatvānubhavāttejaḥprabhṛtīnāmapi 
śabdaguṇakatvam | ayaṃ ca tvagindriyajapratyakṣaviṣayaḥ; vāyuṃ 
spṛśāmītyanubhavādudbhūtasparśavattvācca | na ca nīrūpasya kathaṃ 
pratyakṣaviṣayatvamiti yuktam; rūpasya cākṣuṣatāyāmeva prayojakatvāt |

88) rasatanmātrānārabhyatve sati rūpatanmātrārabhyaṃ tejaḥ | asya ca 
śabdasparśarūpāṇi guṇāḥ | tasya ca yadyapi prakāśasvabhāvatayā 
jñānendriyavatsāttvikāhaṃkārārabdhatvamevocitam; tathāpi 
ghaṭādyapekṣayā prakāśakatve'pi indriyāpekṣayā prakāśyatvāt 
paramparayā tāmasāhaṃkārārabdhatvamuktamiti draṣṭavyam |

89) gandhatanmātrānupādeyatve sati rasatanmātropādeyaṃ jalam | asya 
raso'pi guṇaḥ | asya ca śabdaḥ chalachalaḥ, sparśaḥ śīto, rūpaṃ śuklaṃ 
raso madhuraḥ | kūpādiṣu rasabhedapratīterāśrayabhedakṛtatvāt ||

90) gandhatanmātrārabhyā pṛthivī | asyāśca gandho'pi guṇaḥ | atra 
rūpaṃ śvetanīlapītaharitaraktakapiśabhedabhinnam | raso'pi 
madhurāmlalavaṇatiktakaṭukaṣāyabhedabhinnaḥ | sparśo'nuṣṇāśītaḥ | 
gandhaḥ surabhirasurabhiśca | sa ca pākajāpākajabhedena dviprakāraḥ | 
asyāśca śabdaḥ khaḍakhaḍaḥ | ete ca prakṛtyādayaḥ pṛthivyantā 
apyaśuddhabhogyakāṇḍa ityabhidhīyante | indriyādīnāṃ svato 
bhogyatvābhāve'pyālocanādidvārā buddhau viṣayārpakatvena 
viṣayāvacchinnabuddhirūpabhogyasampādakatvena bhogyatvamiti 
bhogyakāṇḍāntarbhāva upapannaḥ |

91) taduktaṃ śrīmatpauṣkare -

vāyvādīnāṃ samutpattiḥ krameṇaivābhidhīyate |
vāyuragnistathā toyaṃ pṛthvītyetaccatuṣṭayam ||
anilaḥ sparśatanmātrādabhavadvyūhanātmakaḥ |
utkṣepaṇādivyāpārahetutvenopakārakaḥ ||
daśadhā vartamāno'ntaḥśarīre sarvajantuṣu |
prāṇāpānasamānādivyānodānādisaṃjñayā ||
analo rūpatanmātrājjāyate paktilakṣaṇaḥ |
sa ca tridhā sthito loke gārhapatyādisaṃjñayā ||
ato'nya eva śaivāgnistato bindūdarāntare |
yadyadaśnāti loko'yaṃ tadanenaiva pacyate ||
ato'yamanalo'tyantaṃ prāṇināmupakārakaḥ |
abhavadrasatanmātrāttoyaṃ saṅgrahaṇakriyam ||
toyenaiva pratiṣṭhāsya sthitā lokasya vastunaḥ |
svato dhūlyātmakatvena pṛthvī cānena vai dṛḍhā ||
pṛthivī gandhatanmātrādabhavaddhāraṇakriyā |
nākāśājjāyate vāyurna vāyoragnisambhavaḥ ||
nāgnerāpastataḥ pṛthvī dharmātiśayadarśanāt |
kāraṇādguṇasaṃkrāntiryuktā kāryeṣu na svataḥ ||
vyomnaḥ pañcaguṇatvaṃ syāttathā sṛṣṭikramo yadi |
tanmātrapañcakājjātaṃ tato vyomādipañcakam || iti ||
(pau puṃ pa ślo 349-358)

92) tathā śrīmanmataṅge -

abhavacchabdatanmātraṃ sūkṣmaṃ naivopalabhyate |
tanmātraśabdaḥ śeṣārthavinivṛtyarthamucyate ||
ato'nyatsparśatanmātraṃ kiñcicchabdasamanvitam |
rūpatanmātramapyevaṃ śabdasparśasamanvitam ||
tato'nyadrasatanmātraṃ prāguktatritayānvitam |
gandhatanmātramapyevaṃ catuṣṭayasamanvitam || iti ||
(mataṅga ahaṃ pa ślo 101-104)

śrīmanmṛgendre ca -

vyomaprabhañjanāgnyambubhūmayo bhūtapañcakam |
śabdādyekottaraguṇamavakāśādivṛttimat ||
dhūnanajvalanaplāvakharatvāvedino guṇāḥ |
śabdā vāyvādiṣu vyomni savarṇapratiśabdagāḥ ||
vyūho'vakāśadānaṃ ca paktistadgrahadhāraṇāḥ |
vāyuvyomahutāśāmbudharaṇīnāṃ ca vṛttayaḥ || iti ||
(mṛ pra 11 ślo 17-19)

anyatra -

khaviśeṣaguṇaḥ śabda āśrayādanyataḥ sthiteḥ |
heturvaiśeṣikokto'yaṃ hetvābhāso'vagamyate ||
kālātyayopadiṣṭaśca pratyakṣāgamabādhataḥ |
pṛthivyāṃ khaḍakhaḍaḥ śabdo jale chalachalo'nale ||
dhakadhakaḥ śakaśako vāyau vyomni pratidhvaniḥ || iti ||

93) śrīmanmṛgendre ca -

iti pañcasu śabdo'yaṃ sparśo bhūtacatuṣṭaye |
aśītoṣṇau mahīvāyvoḥ śītoṣṇau vāritejasoḥ ||
bhāsvadagnau jale śuklaṃ kṣitau śuklādyanekadhā |
rūpaṃ triṣu rasombhassu madhuraḥ ṣaḍvidhaḥ kṣitau ||
gandhaḥ kṣitāvasurabhiḥ surabhiśca mato budhaiḥ |
vyūho'vakāśadānaṃ ca paktisaṅgrahadhāraṇāḥ ||
vāyuvyomahutāśāmbudharaṇīnāṃ ca vṛttayaḥ |
dehe'sthimāṃsakeśatvaṅnakhadanteṣu cāvaniḥ ||
mūtraraktakaphasvedaśuklādau vāri saṃsthitam |
hṛdi paktau dṛśoḥ pitte tejastaddharmadarśanāt ||
prāṇādivṛttibhedena nabhasvānukta eva te || iti ||
(mṛ pra 12 ślo 26-30)

94) etaiśca kalādyekatriṃśattattvairārabdhāni śarīrāṇi puṃsāṃ 
bhogasādhanāni | lokāntaragatyāgatihetubhūtaṃ tu puryaṣṭakākhyaṃ 
sūkṣmaśarīram | tacca tanmātrapañcakamanobuddhyahaṃkārātmakam | 
taduktaṃ triśatīkālottare -

śabdaḥ sparśaśca rūpaṃ ca raso gandhaśca pañcamaḥ |
mano buddhirahaṅkāraḥ puryaṣṭakamudāhṛtam || iti ||

etatsadbhāve'numānamapi - ātmanaḥ paralokagatyādikaṃ, 
kiñcitkaraṇasādhyam, kriyātvāt, sthūlaśarīrakriyāvat | na 
caitadvyāpakasyātmanaḥ svataḥ sambhavatīti aupādhikaṃ 
vācyamityupādhitvena tatsiddhiḥ ||

tadevaṃ tirodhānaśaktimalabindumāyākarmarūpāḥ pañca pāśā iti 
siddham ||

iti śrīmadativarṇāśramācāryavaryaśaivaparipālakaśivāgrayogīndra-
jñānaśivācāryaviracitāyāṃ śaivaparibhāṣāyāṃ 
pāśapadārtho nāma caturthaḥ paricchedaḥ ||



pañcamaḥ paricchedaḥ

1) eteṣāṃ ca pāśānāmasaṃsparśe śivaikyena śivānandābhivyakti-
lakṣaṇāṃ muktiṃ krameṇāyamātmā prāpnoti | tathā hi - brāhmaṇaḥ 
kṣatriyo vaiśyaḥ sacchūdraḥ savarṇādyanulomajātiśca yadā karmasāmya-
malaparipākābhyāṃ yujyate tadā tasmin pārameśvarī śaktiḥ patati | tadā 
tasya śreyovedane śraddhā jāyate | viṣayebhyaśca doṣadarśanādyadhīnaṃ 
vairāgyaṃ bhavati | evaṃ sañjātavairāgyaḥ śreyovedanāya gurukulamupasar-
pati | tasmācca gurorbhaktyādyanumitasvādhikārāt samayadīkṣāṃ labdhvā 
samayidharmān śivārāmaparipālanaśivālayasaṃmārjanaśivapūjopayukta-
puṣpādyāharaṇaśivabhaktapūjābhasmoddhūlanatripuṇḍrarudrākṣādi-
dhāraṇādīnanutiṣṭhati ||

2) evamanutiṣṭhato'sya pūrva mandataratayā sthitaḥ śaktipāto mando 
bhavati | tadā asya śivapūjāgamādhyayanādau śraddhā jāyate | anantaraṃ 
tādṛśaśraddhāparipākābhijñādgurorāgamādhyayanaśivapūjādyadhi-
kārabhūtāṃ viśeṣadīkṣāṃ labhate | tadanantaraṃ 
gurūpadiṣṭāgamādhyayanādau śraddhā jāyate | śivapūjādīn 
putrakadharmānanutiṣṭhati | evamāgamoktaputrakadharmān vaidikāṃśca 
nityādīnācarato'sya pūrvaṃ mandatayā sthitaḥ śaktipātastu tīvro bhavati | 
tadā cātipakvamalatayā prathamamāpātapratipanneṣu āgamārtheṣu 
pūrvāparāvirodhena tattvajijñāsā jāyate | anantaraṃ 
tadabhijñādgurostattvajñānapratibandhakartṛsakalasañcitakarmanibarhaṇīṃ 
nirvāṇadīkṣāṃ prapadyate | anantaraṃ  svātmanaḥ kiñcijjñatvādi 
karmamalādikṛtaṃ, śivaikyena sarvajñatvādikameva svābhāvikamiti 
gurūpadeśena pratipadyate | anantaraṃ ca tamevārthaṃ yuktibhiḥ pratiṣṭhāpya 
nirantaraṃ dhyāyate | evaṃ nirantarābhyāse tatparipākasahakṛtayā 
gurukṛpayā svarūpajñānamabhivyajyate | tasminneva kṣaṇe malena ca 
vinirmukto bhavati | evaṃ malavimuktopi prārabdhena 
karmaṇādehabandhamanubhavannāste | evaṃ niṣpannatattvajñānatayā 
tadutpādakakarmaṇo'napekṣitatve'pi kadācit tadanutiṣṭhati | kadācit 
tatparityajati | kadācinnibiḍamapi karmānutiṣṭhati | na  ca  tairlipyate | evaṃ 
prārabdhakarmaphalaṃ sukhaṃ duḥkhaṃ vānubhavati | tathāpi tatra na sajjate | 
na vā viṣīdati | evaṃ  sthitaḥ prārabdhabhogānte malakarmaṇorabhāvena 
māyāyā api dehādidvārā bandhakatvāsambhavenaikībhūtaḥ san 
alaukikamadbhūtaṃ vācāmagocaraṃ akhaṇḍākārasaccidātmakaṃ 
śivānandaṃ labhate | iyameva mokṣāvāptiḥ | etatsarvaṃ krameṇopapādyate |

3) tathā hi - dīkṣāyāṃ catvāro varṇāḥ 
ṣaḍanulomāścādhikāriṇaḥ | anulomāśca savarṇādayaḥ | tatra 
kṣatriyāyāṃ brāhmaṇājjātaḥ savarṇaḥ | vaiśyāyāṃ tasmādeva jāto 
niṣādaḥ | tasmādeva śudrāyāṃ jātaḥ pāraśavaḥ | vaiśyāyāṃ 
kṣatriyājjāto mahiṣyaḥ | tasmādeva śudrāyāṃ jāto dauṣyantaḥ | 
śūdrāyāṃ vaiśyājjāta ugraḥ | etebhyo daśabhyo'tiriktā dīkṣāyāṃ 
nādhikāriṇaḥ | teṣāmāgamapurāṇādiśravaṇasya -

anye ca brāhmaṇā viṣṇo rājānaśca tathaiva ca |
vaiśyāśca tāratamyena jñānābhyāse'dhikāriṇaḥ ||
asti śūdrasya śuśrūṣoḥ purāṇenaiva vedanam |
anyeṣāmapi sarveṣāṃ jñānābhyāso vidhīyate ||
bhāṣāntareṇa kālena teṣāṃ so'pyupakārakaḥ |

ityādinā bhāṣāntaraśravaṇavidhānamukhena niṣiddhatvāt | yadyapi cātra 
anya śabda anulomānāmapyupasthāpakaḥ, tathāpi 
jāmadagnyavidurādīnāmanulomānāṃ 
vedādhyayanabhāgavataśravaṇādestatra tatroktatayā tadanyaviṣayaḥ | evaṃ ca 
varṇānulomātiriktānāmāgamādhyayanaṃ pratyanadhikāre 
tadaṅgabhūtadīkṣāyāmapyanadhikāra eva | pradhānādhikāriṇa 
evāṅge'dhikārāt | yadyapi śūdrasyāpi -

dīkṣā kāryā hi sarveṣāṃ tacchaktividhiyoginām |
trayāṇāmapi varṇānāṃ na tu śūdrāntyajātiṣu ||

iti dīkṣāyāmadhikāro niṣiddhaḥ, tathāpi -

amadyapāstu ye śūdrāḥ śaucācārakriyādarāḥ |
śivabhaktāśca ye teṣāṃ dīkṣā kāryānyathā na hi ||

iti niṣedho'sacchūdraviṣayatayā vyavasthāpita iti 
sacchūdrasyaivādhikāraḥ |

4) tathā malaparipākaḥ karmasāmyaṃ cādhikāriviśeṣaṇam |

paripāko malasyaiva kiṃ tvanugrahakāraṇam |

ityādivacanāt |

tasya śiṣyasya viprendrāḥ karmasāmye sati dvijāḥ |
śāmbhavī śaktiratyantaṃ tasmin patati cidghanā ||

ityādi vacanācca | tatra karmasāmyaṃ samabalayoḥ viruddhaphalayoḥ 
puṇyarūpayorapuṇyarūpayoḥ puṇyāpuṇyarūpayorvā 
yugapatphalaunmukhyam | idaṃ ca tirodhānaśaktinivartanadvārā 
anugrahaśaktinipāte heturityadhikāriviśeṣaṇam | atulyabalatve 
aviruddhaphalatve ca tatphalabhogasyāvaśyakatvena 
tirodhānaśakternivartayitumaśakyatvānna tatra karmasāmyamiti 
tadvyāvartanāya tulyabalatvaṃ viruddhaphalatvaṃ ca viśeṣaṇamupāttam | 
malasya paripāko hi viśleṣaunmukhyāvasthāviśeṣaḥ | malaparipākādiyukte 
adhikāriṇi śakteḥ pāto'pi paripākādeḥ pūrvaṃ saṃvatāyāḥ 
paripākādau sati suvyaktāyāstasyā anugrahaunmukhyameva | asya ca 
śaktipātasya saṃsāravidveṣamumukṣāśivabhaktyādīni cihnāni | 
etaiścihnairadhikāriṇaṃ jñātvaiva guruṇā dīkṣā kartavyā | guruśca 
cāturvarṇika eva | tatra brāhmaṇo brāhmaṇādīnāṃ caturṇāmanulomānāṃ 
ca ṣaṇṇāṃ guruḥ | kṣatriyaḥ kṣatriyādīnāṃ navānām | vaiśyo 
vaiśyādīnāmaṣṭānām | śūdraḥ śūdrasyaiva | āśramakrame'pi sannyāsī 
sanyāsiprabhṛtīnāṃ caturṇām | vānaprastho vānaprasthādīnāṃ 
trayāṇām | gṛhastho gṛhasthabrahmacāriṇoḥ | brahmacārī tu yadi 
naiṣṭhikastadā sannyāsivyatiriktānāṃ trayāṇām | | uktarūpasya 
gurorasambhave kṣatriyo brāhmaṇasya guruḥ | vaiśyo'pi kṣatriyasya | śūdrastu 
śūdrasyaiva | na kadācit svottamavarṇasya guruḥ | evamāśramakrame'pi 
vānaprasthaḥ sannyāsino'pi guruḥ | gṛhastho vānaprasthasannyāsinorapi | 
brahmacārī gṛhasthavānaprasthasannyāsināmapi | cāturvarṇikopi 
vṛttavayoyoniguṇākārādisampanno doṣahīna eva guruḥ | guruśca na 
paśutvayogī | kiṃ tu 
nigamāgamādiśravaṇamanananididhyāsanaparipākādhīnasākṣātkāreṇa 
sampannaśiva bhāvaḥ |

ācāryamūrtimāsthāya caturdhā śaktipātataḥ |
bhagavānanugṛhṇāti sa eva sakalānapi ||
ācāryaḥ śiva evāhuḥ -------------------------- |

ityādivacanāt | kumbhādiṣviva gurau sannidhānena 
śivasyānugrahakartṛtvamiti aupacārikārthaparigrahasya 
mukhyārthabādhābhāve'yuktatvāt | evaṃ 
vidhādguroruktarūpeṇādhikāriṇā prathamaṃ samayadīkṣā labdhavyā ||

5) dīkṣāsāmānyalakṣaṇaṃ tu āgamikanityādyadhikārāgama-
śravaṇādyadhikārānyataranirvartanasamarthaśivavyāpāratvam | tatra 
samayadīkṣā viśeṣadīkṣā ca śivālayaparicaryāśivapūjādinityādya-
dhikārasampādikā | nirvāṇadīkṣā tu āgamaśravaṇamananādyadhikāra-
sampādikā | cāturvarṇikatvādiniyatavyāpārānulomaniyatavyāpāra-
vyāvṛttaye śivavyāpāragrahaṇam | iyaṃ ca dīkṣā cākṣuṣyādibhedena 
saptavidhā | tatra pāśabandhavimokṣābhiprāyeṇa vīkṣaṇaṃ cākṣuṣī 
dīkṣā | tenaivābhiprāyeṇa dakṣiṇahastena sparśanaṃ sparśadīkṣā | 
taduddeśenaiva saṃhitāmantroccāraṇaṃ vācikī dīkṣā | asya pāśavimokṣo 
bhavatviti manasābhidhyānaṃ mānasadīkṣā | tadabhiprāyeṇa 
śāstrapradānaṃ śāstradīkṣā | taduddeśenaiva śive saṃyojanaṃ 
yogadīkṣā | kuṇḍamaṇḍapādiyuktā hautrī | sāpi dvividhā, jñānavatī 
kriyāvatī ceti | yatra kuṇḍamaṇḍapādiṣu kriyamāṇaṃ karma krameṇa 
manasaiva nirvartyate sā jñānavatī | iyaṃ ca jñānavatī dīkṣā 
śaivasannyāsapaddhatau spaṣṭamuktā tatra draṣṭavyā | yatra tu 
kāyavyāpāreṇa sā kriyāvatī | kriyāvatyapi dvividhā | nirbījā sabījā ceti | 
tatra strībālavṛddhavyādhigrastādīnāmasamarthānāṃ 
samayācārasaṃśodhanena samayācārahīnā nirbījā | iyamapi dvividhā | 
sadyonirvāṇadā asadyonirvāṇadā ceti | yatra prārabdhakarmaṇo'pi 
viśodhanaṃ sā sadyonirvāṇadā | yadyapi prārabdhasya bhogenaiva tatra tatra 
vināśaḥ pratipāditaḥ, tathāpi sa tīvravegaprārabdhaviṣayaḥ | prārabdhaṃ hi 
tībravegamandasuptabhedena caturvidham | tatra tīvravegayoḥ bhogaṃ vinā na 
vināśaḥ | mandasya dīkṣāyāṃ saṃyojanasañjananapūrvaka bhogabhojanena 
vināśaḥ | suptasya tu bhogabhojanaṃ vinaiva nāśaḥ | evaṃ ca yatra 
śiṣyagataṃ tīvrataraṃ śaktinipātaṃ tādṛśaṃ ca malaparipākaṃ mandaṃ 
suptaṃ ca prārabdhaṃ jñātvātyantasamarthena guruṇā bhogabhojanena 
tadvinā vā vināśaḥ kriyate, sā sadyonirvāṇadā | yatra 
prārabdhasaṃśodhanaṃ nāsti sā asadyonirvāṇadā | 
samayācārasamarthānāṃ kriyamāṇā sabījā | iyamapi śivadharmiṇī 
lokadharmiṇī ceti dvividhā | dharmādharmayorubhayorapi yatra saṃśodhanaṃ 
sā śivadharmiṇī | adharmamātrasya yatra saṃśodhanaṃ sā lokadharmiṇī | 
kriyāvatī prakārāntareṇa trividhā | samayadīkṣā viśeṣadīkṣā 
nirvāṇadīkṣā ceti | yatra rudrapade yojanaṃ kriyate sā samayadīkṣā | 
yatreśvarapade yojanaṃ sā viśeṣadīkṣā | anayorubhayorapi nāsti 
śikhācchedaḥ | yatra śivapade yojanaṃ sā nirvāṇadīkṣā | yatra 
nirvāṇadīkṣāpūrvakaṃ sannyāsaḥ tatra tvasti śikhācchedaḥ | 
nirvāṇadīkṣāyāmadhvaśuddhiḥ kāryeti adhvā nirūpyate |

6) adhvā ca mantrapadavarṇabhuvanatattvakalābhedena ṣaḍvidhaḥ | tatra 
uttarottaraḥ pūrvapūrvavyāpakaḥ | mantrā ekādaśa | padānyekāśītiḥ | 
varṇāḥ pañcāśat | bhuvanāni caturviṃśatyadhikadviśatasaṃkhyāni | 
tattvāni ṣaṭtriṃśat | kalāḥ  pañca | tatra nivṛttikalāyāṃ pṛthivyākhyaṃ 
tattvamekam | kālāgnyādīni aṣṭottaraśataṃ bhuvanāni | tatra 
brahmāṇḍakaraṇḍamadhye ṣaṭ | prācyādyāsu daśasu dikṣu daśa daśa | 
ūrdhvaṃ dve | tadevamaṣṭottaraśataṃ bhuvanāni | sadyojātahṛdayākhyau 
mantrau | aṣṭāviṃśatiḥ padāni | varṇa ekaḥ | padavarṇānāṃ 
svarūpamanyatra pradarśitam | varṇaḥ pītaḥ | maṇḍalaṃ caturaśram | 
gandhādayo viṣayāḥ | brahmā kāraṇam | pratiṣṭhākalāyāṃ tattvāni 
trayoviṃśatiḥ | tāni ca jalādīni prakṛtyantāni | ṣaṭpañcāśadbhuvanāni | 
tāni cāmareśādīni śrīkaṇṭhāntāni | tāni jalatejo'nilākāśeṣu 
tanmātrendriyamanogarbhe'haṅkāre buddhyavyaktayoścāṣṭāvaṣṭau | 
śirovāmadevau mantrau | ekaviṃśatiḥ padāni | varṇāstrayoviṃśatiḥ | varṇaḥ 
śuklaḥ | maṇḍalamardhacandrākāram | viṣayā rasādayaḥ | kāraṇaṃ viṣṇuḥ 
| vidyākalāyāṃ tattvāni sapta | tāni ca puruṣādimāyāntāni | bhuvanāni 
saptaviṃśatiḥ | tāni ca vāmādīnyaṅgaṣṭhamātrāntāni | tatra puruṣe ṣaṭ | 
rāganiyatimāyāsu  pañca pañca | itareṣu dve dve | śikhāghorau mantrau | 
viṃśatiḥ padāni | varṇāḥ sapta | varṇaḥ śoṇaḥ | maṇḍalaṃ trikoṇam | 
viṣayā rūpādayaḥ | kāraṇaṃ rudraḥ | śāntikalāyāṃ tattvāni trīṇi | tāni 
(śuddha) vidyādīni sadāśivāntāni | bhuvanānyaṣṭādaśa | tāni vāmādīni 
sadāśivāntāni | tatra vidyāyāṃ nava | īśvare aṣṭau | sadāśiva ekam | 
tatpuruṣakavacau mantrau | padānyekādaśa | varṇāstrayaḥ | maṇḍalaṃ 
ṣaṭkoṇam | viṣayāḥ sparśādayaḥ | kāraṇamīśvaraḥ | śāntyatītakalāyāṃ 
śaktiśivākhye tattve | bhuvanāni pañcadaśa | tāni nivṛttyādīni 
anāśritāntāni | tatra śaktitattve catvāri | śivatattve ekādaśa | śivāstreśānā 
mantrāstrayaḥ | padamekam | varṇāḥ ṣoḍaśa | (śuklavarṇaḥ) sphaṭikābhaḥ | 
maṇḍalaṃ vṛttam | viṣayaḥ śabdaḥ | kāraṇaṃ sadāśivaḥ | tadevaṃ 
pañcādhvagarbhitāsu kalāsu saṃyojanādikrameṇa śuddhiḥ kāryā ||

7) tadevaṃ sthite samayadīkṣāṃ labdhvā guruṇā śikṣitān 
samayidharmānanutiṣṭhet | samayidharmāśca 
śivālayaśivabhaktaparicaryādayaḥ tripuṇḍrarudrākṣadhāraṇādayaśca | asya 
ca samayidharmasya dāsamārga iti vyavahāraḥ | etacca 
tripuṇḍrarudrākṣadhāraṇādikaṃ na kevalaṃ samayimātrasyānuṣṭheyam | 
kiṃ tu sarveṣāmapi nityakarmavannityatayānuṣṭheyam | ananuṣṭhāne 
pātakādiśravaṇenānuṣṭhānaśraddhāpraśaṃsayā nityatvoktyādibhiśca 
tasya nityatayā vidhānāt | tathā hi - skānde akaraṇe pātakaṃ śrūyate -

tripuṇḍroddhūlanādau ca tanmānaśravaṇe'pi ca |
vāñchā na jāyate yeṣāṃ te mahāpāpasaṃyutāḥ || iti ||

vāsiṣṭhalaiṅge -

yeṣāṃ bhasmani vidveṣo vartate hṛdaye sadā |
saṃkīrṇā tu bhavedbrahmaṃsteṣāṃ vaṃśaparamparā | 
(a 5 ślo 26-27)

yeṣāṃ krodho bhavennityaṃ lalāṭe bhasmadarśanāt |
teṣāmutpattisāṃkaryamanumeyaṃ vipaścitā | (a 5 ślo 22)

ye bhasmadhāriṇaṃ dṛṣṭvā vācā nindanti mānavāḥ |
teṣāṃ śūdreṇa sambhūtiranumeyā vipaścitā | (a 5 ślo 23)

ye bhasmadhāriṇaṃ dṛṣṭvā narāḥ kurvanti tāḍanam ||
teṣām caṇḍālato janma brahmannūhyaṃ vipaścitā | (a 5 ślo 24)

yeṣāṃ śraddhā mune nāsti śrautabhasmani sarvadā ||
garbhādhānādisaṃskārasteṣāṃ nāstīti niścayaḥ || (a 5 ślo 25-26)

ityādinā ananuṣṭhātṝṇāṃ janmasāṅkaryaṃ 
dvijasaṃskārābhāvaśca śrūyate |

8) tathā parāśaropapurāṇe -

tvadbhaktā brāhmaṇāḥ sākṣāttripuṇḍre bhasmakuṇṭhane |
bhaveyurvimukhā nityaṃ vedasiddhe vimuktide || (a 3 ślo 35)

iti tatparityāgasya śāpaphalatvaṃ śrūyate || tathā tatraiva -

vedotkarṣe śivotkarṣe vidyotkarṣe tathaiva ca |
tripuṇḍroddhūlanotkarṣe śraddhā puṇyavato bhavet ||
anekajanmasiddhānāṃ śrautasmārtānuvartinām |
vedoktenaiva mārgeṇa tripuṇḍre jāyate matiḥ ||
(a.	6 ślo. 21, a. 4 ślo. 27-28)

iti tripuṇḍrādiśraddhā mahāpuṇyaphalatvena stūyate | tathā tatraiva -

brāhmaṇo vidhinotpannaṃ tripuṇḍraṃ bhasmanaiva tu |
lalāṭe dhārayennityaṃ tiryagbhasmāvakuṇṭhanam ||
(a.	5 ślo. 25- 26)

iti nityaśabdayogena vidhānaṃ dṛśyte 

ādibrāhmaṇabhūtena tripuṇḍraṃ bhasmanā dhṛtam |
yato'ta eva viprastu tripuṇḍraṃ dhāreyatsadā ||
bhasmanā vedasiddhena tripuṇḍraṃ dhārayetsadā |
(parāśaropa a 5 ślo 27-28)

ityādinā sadāśabdayogena vidhānaṃ dṛśyate | kiṃ ca tatraiva -

bhasmanā vedasiddhena tripuṇḍraṃ dehakuṇṭhanam |
rudraliṅgārcanaṃ cāpi mohato vāpi na tyajet || iti || 
(parāśaropa a 10 ślo 40)

skānde ca -

tripuṇḍraṃ dhārayedbhaktyā manasāpi na laṅghayet |

iti tyāgo niṣidhyate |

9) tathā rudrākṣadhāraṇamapi akaraṇe doṣakīrtanādibhirnityam | tathā 
hi skānde -

arudrākṣadharo bhūtvā yatkiñcitkarma vaidikam |
kurvan viprastu mohena narake patati dhruvam ||

ityakaraṇe doṣaḥ kīrtyate | bṛhannāradīye -

bahūnāṃ janmanāmante mahādevaprasādataḥ |
rudrākṣadhāraṇe śraddhā svabhāvādeva jāyate ||

iti śraddhāyāḥ puṇyaphalatvoktiḥ | skānde -

kaṇṭhe mūrdhnyuṃpavīte vā karṇe kārayuge'thavā |
rudrākṣaṃ dhārayennityaṃ bhaktyā paramayā yutaḥ ||

iti nityaśabdaḥ | vāyavīye -

nābhaktyā dhārayedakṣān sadā bhaktyaiva dhārayet |

iti sadāśabdayogena vidhānaṃ draṣṭavyam | ayaṃ ca samayidharmaḥ 
tajjanmani viśeṣanirvāṇadīkṣādyalābhe sālokyaphalaṃ datvā 
janmadvayavyavadhānenaikajanmavyavadhānena vā muktiṃ janayati | 
śivadharmottare -

atha ye satataṃ bhaktyā bhajanti śivayoginaḥ |
te vindanti mahābhogānante yogaṃ ca śāṅkaram ||
bhogayogārthibhistasmātsampūjyāḥ śivayoginaḥ |
pratiśrayānnapānena śayyāvastrāsanādibhiḥ ||
iti yaḥ kurute bhaktiṃ satataṃ śivayoginām |
sa dvitīye tṛtīye vā dehe yogamavāpnuyāt ||

ityādivacanaistathā pratipādanāt | ete ca samayidharmā yadyapi sarveṣāmapi 
putrakānāṃ sādhakānāñca sādhāraṇāḥ, tathāpi 
teṣāmasādhāraṇadharmāntarasattvādete samayidharmā ityucyante | itthaṃ 
samayidharmānuṣṭhānādviśeṣadīkṣādhikāralābhe viśeṣadīkṣāṃ kṛtvā 
śivapūjāgamādhyayanādiputrakadharmānanutiṣṭhet |

itthaṃ samayadīkṣāyāṃ viśiṣṭāyāṃ viśeṣataḥ |
vahnihomāgamajñāne yogyaḥ sañjāyate śiśuḥ ||

iti pratipāditasya samayayuktaviśeṣadīkṣārūpasya tadadhikārasya sadbhāvāt 
| tatra śivārcanaṃ mānasaṃ praśastam | tatrāśaktastu 
pañcavidhaśuddhikaraṇapūrvakaṃ 
abhiṣekālaṅkaraṇanivedanastotrapāṭhanamaskārādikaṃ 
bahiryāgaśabdābhidheyaṃ kuryāt | tathā varṇāśramadharmānapyanutiṣṭhet 
| teṣāṃ tattvajñānasādhanatvāt ||

10) nanvastu teṣāṃ sākṣādeva muktisādhanatvam | 
gautamadharmaskāndādiṣu tathā pratipādanāt | tatra gautamadharme - yasyaite 
catvāriṃśatsaṃskārā aṣṭāvātmaguṇāḥ sa brahmaṇaḥsāyujyaṃ 
salokatāmāpnoti iti karmaṇāṃ sākṣānmokṣahetutvaṃ pratipāditam | tathā 
skānde'pi -

varṇāśramasamācārādeva muktirna cānyathā | iti ||

anyatrāpi -

karmaṇaiva hi saṃsiddhimāsthitā janakādayaḥ |
(bhagavadgītā a 3 ślo. 20)

iti śrūyate | na ca teṣāṃ phalāntare upayuktatvānmokṣaphale na sambandha iti 
yuktam | tathā sati karmaṇāṃ jñānaphale'pisambandhābhāvaprasaṅgāt | 
yadyutpattivākyāvagatasvarūpāṇāṃ karmaṇāmadhikāravākyadvayena 
parasparānapekṣayā phaladvayasambandhaḥ saṃyogapṛthaktvanyāyena 
bodhayituṃ śakyata ityucyate, tarhi prakṛte'pi mokṣaphalasambandho'pi tathā 
vaktuṃ śakyata iti samānam ||

11) nanu kamanuṣṭhānasya puṇyajananadvārā bhogahetutvaṃ 
nopapadyata iti cet, na; bhogakāmanayānuṣṭhitānāṃ teṣāṃ bhogahetutve'pi 
mokṣakāmanayānuṣṭhitānāṃ mokṣajanakatvāvirodhāt | anyathā tavāpi 
jñānotpādāya tadanuṣṭhāne tairbhogajananaprasaṅgāt | na 
cānekajanmārjitānāṃ sañcitakarmaṇāṃ jñānaṃ vinā nivartakābhāvāt 
kevalakarmabhirna mokṣaḥ sambhavatīti yuktam | 
yogādisampāditāṇimādyaiśvaryāyattena kāyavyūhaparigraheṇa 
bhogadvāraiva teṣāmapohyatvāt | varṇāśramasamācārādeva - ityādinā 
karmaṇo'pītaravyavacchedena kāraṇatvasya 
pratipādanādvacanadvayāvirodhāya parasparanairapekṣyeṇa vikalpena 
sādhanatvasya kalpayitumucitatvāt | tasmātsākṣātkarmaṇāṃ 
mokṣajanakatvam | na tu jñānadvārā iti, maivam | jñānatilake -

na dānairna tapoyajñairna homairna yamairvrataiḥ |
na snānatīrthasampātairlabhyate paramaṃ padam ||
anekaiḥ pāpasaṅghātairanekaiḥ puṇyasañcayaiḥ |
badhnanti sarvadātmānaṃ kośāgārakrimiryathā ||

ityādinā karmaṇāṃ mokṣahetutvābhāvasya pratyuta bandhahetutvasya ca 
pratipādanāt | kiñca malanivṛttiṃ vinā na mokṣaḥ sambhavati | 
śivānandānubhavācchādakasyānuvatteḥ | na cājñānarūpasya malasya 
jñānena vinā vinivṛttiryujyate |

jñānena ca tadajñānaṃ nivarteta na karmabhiḥ |
jñānaṃ labdhvācirādeva śivasāyujyamāpnuyāt ||

iti śivadharmottare malasya jñānamātranivartyatāpratipādanāt | 
jñānābhāve sañcitakarmaṇāṃ prakṣayānupapatteśca | bhogena prakṣaye, 
punaḥ punaḥ karmārjanasyānivāraṇāt | karmānuṣṭhāne 
ānuṣaṅgikasyādharmasyānivṛtteśca | tasmānna kevalakarmaṇā mokṣaḥ ||

12) nanvastu tarhi jñānakarmaṇoḥ samaprādhānyena samuccitatayā 
mokṣahetutvam | ata eva na vikalpaprayuktadoṣaṣṭakamapi | evañca na dānaiḥ 
ityādiniṣedho'pi jñānaṃ vinā kṛtakarmaviṣayakatayopapadyate | 
samaprādhānyena samuccaye tu -

jñānaṃ pradhānaṃ na tu karmahīnaṃ 
karma pradhānaṃ na tu buddhihīnam |
tasmāttayoreva bhavet prasiddhiḥ
na hyekapakṣo vihagaḥ prayāti ||

yathānnaṃ madhusaṃyuktaṃ madhu cānnena saṃyutam |
evaṃ tapaśca vidyā ca saṃyuktaṃ bheṣajaṃ mahat ||

ityādikaṃ vacanaṃ mānam | tasmājjñānakarmaṇī samapradhānyena 
mokṣasādhanamiti | maivam |

na karma karaṇīyaṃ hi bahistasya mahātmanaḥ |
jñānāmṛtena tṛptasya bhaktyā ca vivaśātmanaḥ |

iti śivadharmottare, 

na liṅgaṃ nāśramācāraḥ paramātmani saṃsthitau |
(vidyāpāde ślo 7)

iti sarvajñānottare, 

na dhyānaṃ na tapaḥ pūjā na homo naiva sādhanam |
agnikāryādikāryaṃ ca naiva tasya maheśvari ||
niyamo'pi na tasyāsti kṣetrapīṭhādisevanam |
nārcanaṃ pitṛkāryaṃ ca tīrthayātrāvratāni ca ||

iti devīkālottare ca sañjātajñānasya karmaniṣedhena karmaṇāṃ 
jñanārthatvāvagamāt | karmaṇāṃ hi jñānavatsākṣānmokṣahetutve 
jāte'pi jñāne tāni kartavyāni syuḥ | jñānadvārā tu sādhanatve dvārasya 
niṣpannatayā tadarthāni karmāṇi na kartavyānīti tanniṣedha upapadyate | 
karmaṇāṃ dṛṣṭajñānadvārakatvasambhave'dṛṣṭadvārakatvakalpanasyā-
yuktatvācca | jñānaṃ pradhānaṃ ityādivacanamapyuktaniṣedhaparyāloca-
nayā, jñānaṃ pradhānaṃ, sākṣātkāraṇam | tatta karmaṇā svajanakena 
vihīnaṃ cet svasyaivāniṣpattyā kāryājanakam | tathā, karma pradhānaṃ, 
jñānotpādakatayā avaśyāpekṣaṇīyam | ata eva dvārabhūtayā buddhyā 
vinākṛtaṃ na janakam | ata ubhayoḥ sattva eva muktirbhavatīti 
dvāradvāribhāvasamuccayaparatayā yojanīyam |

13) karmaṇāṃ jñānajanakatve -

vedānuvacanenāpi yajñenādhyayanena ca |
dānena tapasā devāstathaivānaśanena ca ||
vettumicchati yo vidvān sa munirnetaro janaḥ |

iti skāndavacanaṃ mānam | na ca vedānuvacanādestṛtīyāntasya, pradhānyena 
icchatītyanenānvayādicchāsādhanatvameva; na jñānasādhanatvamiti yuktam | 
aśvena gantumicchatītyatra śabdato'pradhāne'pi gamane'rthataḥ 
prādhānyādaśvasyeva vedānuvacanādeḥ sarvāpekṣā ca 
yajñādiśruteraśvavat (bra sū 3-4-26) iti nyāyena vedane sambandhāt | 
śabdataḥ prādhānyāśrayaṇe'pi tādṛśecchādvārā vedanasambandhādvā 
laukikavyutpattyāśrayaṇe'pi karmaṇāṃ vedanasādhanatvalābhāt | vastutastu 
mīmāṃsāśāstrīyavyutpattyāśrayaṇe tu icchatīti pañcamalakārasya 
vedānuvacanādisambandhe vividiṣuṃ prati vedānuvacanādi vihitamiti 
karmaṇāṃ vedanasādhanatvamasmādvākyātpratīyata eva | athavā yasyaite 
catvāriṃśatsaṃskārāḥ iti vākyaṃ karmaṇāṃ jñānasādhanatve 
mānam | saṃskārā hi prokṣaṇādijanitasaṃskāravatsvataḥ 
phalakaraṇatvābhāvādupakāryaṃ phalakaraṇamapekṣante | prakṛte 
śivasāyujyarūpaphalakaraṇaṃ jñānameva | jñānādeva tu 
kaivalyamityāha paramā śrutiḥ ityādinā tasya phalakaraṇatvenopasthitatvāt 
| upasthitaparityāgena anupasthitakalpane gauravāt | 
tasmāccatvāriṃśatsaṃskāropakṛtena jñānena śivasāyujyaṃ 
bhavatītyevamarthakatayā saṃskāravākyaṃ bhavati karmaṇāṃ 
jñānasādhanatve mānam | tathā yāgādīnyapi karmaṇi 
jñānotpattinimittaṃ tu kriyā caryā prakīrtitā  iti 
vacanājjñānajanakānyeva | evaṃ kāśīmaraṇādikamapi jñānadvāraiva 
mokṣasādhanam | malasya jñānamātranivartyatvena tena vinā 
mukterasambhavāt | ata eva skānde -

śrīmadvārāṇasī puṇyā purī nityaṃ mama priyā |
yasyāmutkramamāṇasya prāṇairjantoḥ kṛpābalāt ||
tārakaṃ brahmavijñānaṃ dadāmi śreyase hare |

iti tasya jñānasādhanatvaṃ pratipāditam |

14) na ca tatra kathaṃ sañcitakarmaṇāṃ nivṛttiriti yuktam | jñānena 
śivakṛtayā dīkṣayā vā teṣāṃ nivṛttyupapatteḥ | tasmāt karmāṇi 
jñānadvāraiva muktisādhanāni | tena vaidikānyāgamikāni ca karmāṇi 
jñānārthinā kartavyāni | na kevalaṃ vedāgamayorvihitānyeva 
karmāṇijñānajanakāni; api tu yāni tatra avihitāni pratiṣiddhāni pātakāni 
tānyapi śivārādhanatvena kṛtāni jñānajanakāni | skānde -

yāni loke niṣiddhāni karmāṇyavihitāni ca |
tāni śaṃbhoḥ parā pūjetyetajjñānaṃ mahāmakham ||
yāni karmāṇi sarvāṇi niṣiddhāni śrutau smṛtau |
tāni cārādhanaṃ śaṃbhoriti jñānaṃ mahāmakham ||
īśvarārthadhiyā pāpānyapi karmāṇi suvratāḥ |
bhavanti pūtānyatyantaṃ satyameva na saṃśayaḥ |
ārdraṃ kāṣṭhaṃ mahānagniḥ śuṣkaṃ kṛtvā dahedyathā |
tatheśvaradhiyā pāpaṃ viśuddhaṃ jñānadaṃ bhavet ||
vaidikaṃ tāntrikaṃ hitvā mārgaṃ svaprajñayā dvijāḥ |
so'pi yajña iti prokto mayā vedārthavittamāḥ ||
śraddhayā sahitaṃ sarvaṃ śreyase bhūyase bhavet ||

ityādinā tathā pratipādanāt | ayaṃ ca prapannadharmaḥ |

15) aprapannasya varṇāśradharmā evānuṣṭheyāḥ | evaṃ 
putrakadharmānanutiṣṭhato yadā daivavaśena nirvāṇadīkṣāyā 
asambhavastadā sāmīpyaphalamanubhūyānte janmāntare muktirbhavati | yadā 
tu tīvratīvrataraśaktinipātayoranyataralābhena nirvāṇadīkṣāṃ labhate tadā 
tayā sañcitakarmaṇāṃ nivṛttyā tattvajñānapratibandhakadūritavigamena 
tattvajñānārthaṃ śravaṇādikaṃ kuryāt |

śuddhaśaivamidaṃ tantraṃ na deyaṃ na prakāśayet |
dīkṣitasya ca dhīrasya śivabhaktiparasya ca ||
śrāvaṇīyaṃ na cānyatra kathanaṃ hi praśasyate |

iti śravaṇādhikāratvena pratipāditāyā dīkṣāyā niṣpādāt | 
yadyapyadhītāgamasya padapadārthavyutpattimātreṇārthajñānaṃ bhavati, 
tathāpi tātparyāparijñāne āpātataḥ pūrvāparavirodhapratisandhānena 
sandehādikaluṣitameva syādityakaluṣitapratipattaye tātparyaparijñānarūpaṃ 
śravaṇamādaraṇīyam | etacca -

yāvatkālaṃ śivajñānaṃ dṛḍhībhavati tasya tu |
tāvatkālaṃ ca kartavyaṃ śravaṇādi viśeṣataḥ ||

ityādinā vihitam |

16) yadyapi tātparyajñānaṃ vākyārthajñānajanakatayā lokata eva 
prāptamiti na vidhātavyam, tathāpi nigamāgamādivicāreṇaivāyamartho 
niścetavyo na bhāṣāprabandhādivicāreṇetītaravyavacchedāya vidhīyate | 
tathā cāvaghātādividhivadayaṃ niyamavidhiḥ | na ca tatra 
niyamadṛṣṭasādhyaṃ paramāpūrvamastīti niyamavidhitvaṃ yuktam; iha tu 
tatsādhyaṃ nāstīti na tadyujyata iti vācyam | sākṣātkārasya 
tatsādhyatvopapatteḥ | ata eva bhagavatā bādarāyaṇena sarvāpekṣā ca 
yajñādiśruteraśvavat (bra sū 3-4-26) iti sarvādṛṣṭasādhyatvaṃ 
jñānasyābhihitam | evaṃ śravaṇena jāyamānaṃ jñānaṃ ca svasya 
śivenābhedāvagāhi | na tu niyantṛniyāmyabhāvādinā bhedāvagāhi |

ahamātmā śivo hyanyaḥ paramātmeti yaḥ smṛtaḥ |
evaṃ yo bhāvayenmohānna śivatvamavāpnuyāt ||
śivo'nyastvahamevānyaḥ pṛthagbhāvaṃ vivarjayet |
(sarva vi pā ślo 39-40)

iti bhedajñānaniṣedhapūrvakaṃ -

yaḥ śivaḥ so'hameveti advaitaṃ bhāvayetsadā ||
(sarva vi pā ślo 40)

ityanena sarvajñānottaravacanenābhedajñānasyaiva muktisādhanatayā 
bodhanāt | idaṃ cācāryamūrtisthādguroḥ nirvāṇadīkṣāpurassaraṃ 
śravaṇaṃ sakalānām | vijñānākalapralayākalayo'stu niradhikaraṇasya 
śivasyānugrahamātreṇa dīkṣā tattvajñānaṃ ca bhavatīti veditavyam | evaṃ 
śravaṇe nirvṛtte yuktibhistadarthasyānucintanarūpaṃ 
mananamayogyatānirāsena śravaṇapratiṣṭhārthaṃ kartavyam | anantaraṃ ca 
śrutasyārthasyānudhyānarūpaṃ nididhyāsanaṃ viparītabhāvanānivṛttaye 
cittaikāgryāya ca karaṇīyam | anādijanmānuvṛttā viparītavāsanā hi na 
sakṛcchravaṇamātreṇa nivartate; kiṃ tu dhyānāhitayaiva vāsanayā | na 
viparītavāsanāyāṃ satyāṃ sākṣātkāraḥ sambhavati | tathā cittaikāgryaṃ 
vinā na sūkṣmavastusākṣātkāraḥ | keśādisākṣātkāre tathā darśanāt | 
ato viparītavāsanānivṛttaye cittaikāgryāya ca nididhyāsanaṃ kartavyam | 
śravaṇādikaṃ ca yadā sākṣātkārāya na paryāptaṃ tadā arcirādidvārā 
phalabhogānanubhūya pralayasamaye śivānugrahe sati tatra tadaiva muktiḥ | 
tadā śivānugrahābhāve guruṇā janmāntare muktiḥ | yadā tu paryāptaṃ 
tadā gurukṛpāparipākena sūryakiraṇasannidhāneneva 
svātmajñānamabhivyajyate | ayameva sākṣātkārodayaḥ phalasādhanamapi ||

17) nanvācchādake male sati kathamabhivyaktiḥ | na ca 
malanivṛttyanantaramabhivyaktirastviti vaktuṃ yuktam | abhivyaktisādhyatvena 
malanivṛttestvayā svīkārāt | tasmādabhivyaktimalanivṛttyoḥ 
parasparāśrayaparihārāya malasya dīkṣānivartyatvamevābhyupagantavyam | 
yuktañcaitat | malasya dravyatvena kācādidoṣasya cikitsāvyāpāreṇeva 
śivavyāpāreṇaiva nivartanīyatvāt | na cājñānatvena malasya 
jñānamātranivartyatvaṃ yuktam | ajñānaśabdasya bhrāntivācakatve vā 
malasya bhrāntitvābhāvena pakṣadharmatvābhāvāt | evaṃ 
jñānābhāvavācakatve'pyapakṣadharmatvameva | 
bhrāntihetudravyavācakatve tādṛśakriyānivartyatvasyaiva darśanena virodhāt | 
āṇavavācakatve tasyaiva pakṣatayā sahacāragrahasthalābhāvāt | tasmāt 
sākṣātkāraḥ phalameva; na sādhanam | na caivaṃ phalasyāvidheyatayā 
sākṣātkārasya vidheyatvamanupapannaṃ syāditi vācyam | iṣṭāpatteḥ | 
śrūyamāṇo vidhistu yathā sākṣātkāro niṣpadyate tathā 
yatitavyamityevamarthakatayā yojanīyaḥ | tasmāt dīkṣaiva sādhanam | ata eva -

dīkṣaiva mocayatyūrdhvaṃ paraṃ dhāma nayatyapi |

ityādikaṃ vacanamapi  saṅgacchate | tasmānna sākṣātkāraḥ 
phalasādhanamiti |

18) maivam -

jñānena hi tadajñānaṃ nivartyeta na karmabhiḥ |

ityādinā ajñānasya jñānanivartyatāvidhānapūrvakaṃ 
karmanivartyatāniṣedhāt | aprakāśarūpasya malasya prakāśenaiva 
nivartanīyatvācca | aprakāśarūpasya tamasaḥ ālokādinā prakāśena 
nivṛttiranubhūyata iti na sahacāragrahasthalasyābhāvaḥ | na ca dravyatvena 
karmanivartyatvaṃ jñānānivartyatvaṃ vā anumātuṃ śakyate | 
ajñānānyatvasyopādhitve pakṣetaratvasyāpyupādhitvāpatteriti vācyam | 
āgamabādhitatvāt | na cābhivyaktimalanivṛttyoḥ parasparāśrayatvam | 
tamonivṛttiprakāśayoriva tadabhāvopapatteḥ | tatrāpi hi sati tamasi na 
prakāśodaya iti tamonivṛttiḥ prakāśodaye apekṣitā | prakāśodayaśca tamo 
nivṛttāviti prasaktaḥ parasparāśrayaḥ | sa ca - satyeva tamasi uditena prakāśena 
nivartate tamaḥ; tamaḥprakāśayorapi kṣaṇamātramastyeva sahāvasthānamiti 
vā, ekakālīnenāpi prakāśena tamonivṛttirjāyate; janakatvaṃ na 
pūrvabhāvitvam; kiṃ tu śaktatvamiti vā parihāryaḥ | tadvadevātrāpi 
parihāraḥ sambhavatīti na kāpyanupapattiḥ | dīkṣaiva mocayati ityapi vacanaṃ 
dīkṣāyā āvaśyakatvamātraparam | na tu jñānavyavaccedaparamiti na 
tadvirodho'pi | tasmātsākṣātkāreṇaiva malanivṛttiḥ | abhivyaktaṃ 
svarūpajñānameva sākṣātkāraḥ | na tu buddhivṛttyādirūpaḥ | tasya cetane 
apravṛtteḥ | kāraṇābhāvācca | na ca śabda eva kāraṇam | tasya 
parokṣajñānajanakatvasva bhāvatvenāparokṣajñānajanane 
sāmarthyābhāvāt na cāparokṣatvādau karaṇasvabhāvo na prayojakaḥ | api tu 
viṣayasvabhāva iti vācyam | purovartini ghaṭe  ayaṃ ghaṭaḥ 
ityādivākyenāparokṣajñānajananaprasaṅgāt | na ceṣṭāpattiḥ | 
nimilitākṣaṃ prati tasya parokṣajñānajanakatayaiva sarvasammatatvāt | 
yasyāpi tatrendriyasannikarṣo'sti tamanimīlitākṣaṃ prati 
prayojakatve'nyasyāpi tadutpattyāpatteḥ | daśamastvamasītyatrāpi śabdāt 
parokṣajñānānantaraṃ aindriyikamevāparokṣajñānaṃ jāyate | na 
caindriyike jñāne śabdāpekṣā kimartheti yuktam | 
daśatvasaṃkhyāpūrakatayā 
svagataikatvasyāpekṣābuddhāvabhānāddaśamastvamasītivākyena 
svagatamapi ekatvaṃ saṃkhyāpūrakamiti jñāpite yuktastatsākṣātkāraḥ | ata 
eva svātmagataikatvasya tatsaṃkhyāpūrakatvābhijñaṃ prati na 
tadvākyamupayujyate | tasmācchabdasya na sākṣātkārajanakatvam |

19) evamabhivyaktasvarūpajñānatayā sākṣātkārānmukto jīvanmukta 
ityucyate | asya ca karaṇīyaṃ karma kimapi nāsti | tathāpi jñānotpatteḥ 
prāṅnirantarakarmānuṣṭhānavāsanābalāt prārabdhanāśāya 
lokasaṃrakṣaṇāya ca karmānuṣṭhāne pravartate | na ca karmabhirjanitena 
puṇyena sambadhyate | na ca karmaṇaḥ puṇyajananasamarthasya kathaṃ 
tadajanakatvamiti vācyam | agnistambhābhijñaṃ prati agneradāhakatvavadatra 
tattvajñāninaṃ prati karmaṇo'pyajanakatvasyopapatteḥ | evaṃ 
prārabdhabhogārtha niṣiddhānuṣṭhāne'pi adharmasyānutpattirupapannā | 
karmaṇastajjanakatābodhako nigamāgamādirapi pramāṇam; tasya 
tattvajñānarūpapratibandhakābhāvasahakṛtaṃ karma 
tajjanakamityevamparatvāt | vihitasya niṣiddhasya ca suhṛddarhṛdoḥ 
dharmādharma janakatvasya sadbhāvācca | 
karmakartṛgatapuṇyāpuṇyajanakatvapratipādakavacanasya sāmānyaviṣayasya 
viśeṣaviṣayeṇa tattvajñāninā kṛtaṃ karma tasya suhṛdi durhṛdi vā 
puṇyādikaṃ janayatītyetadarthapratipādakena vedavacanena saṅkocopapatteḥ ||

20) nanvasya tattvajñānotpattyanantarameva sarvāṇi karmāṇi naśyanti |

yathā vahnirmahādīptaḥ kāṣṭhamātraṃ ca nirdahet |
tathā śubhāśubhaṃ karma jñānāgnirdahati kṣaṇāt ||

---------- ------------------- ----------------- --------------- ----------
jñānāgniḥ sarvakarmāṇi bhasmasātkurute tathā ||
(bhagavadgītā a 4 ślo 37)

ityādivacanāt | evaṃ ca karmaṇo'bhāvādbhogo'pi na sambhavatīti na 
tadarthasya dehasyāvasthānaṃ yujyate | astu vā prārabdhakarmaṇo'vasthānam 
| tathāpi nivṛttamalasyānāvṛtajñānatayā kathaṃ 
vaiṣayikasukhaduḥkhādibhogaḥ | tasya rāgādisādhyatvāt | nirmalasya ca 
rāgādyabhāvāt | tasmāttattvajñānino dehāvasthānamayuktamiti 
jīvanmuktiranupapanneti | maivam |

prārabdhaṃ bhogato naśyeccheṣaṃ jñānena dahyate |

ityādivacanānusāreṇa yathā vahniḥ ityādeḥ prārabdhetaraviṣayakatvaṃ 
kalpanīyamityato'styeva prārabdhakarmaṇo'vasthānam | tena tadadhīnasya 
bhogasyotpādanāya dehasyāvasthānamapekṣitameva | na ca nirmalasya kathaṃ 
rāgādyadhīno bhoga ityapi yuktam | rāgādyabhāve'pi 
prārabdhavināśābhisandhinā bhogopapatteḥ | athavā rāgādivāsanayā 
bhogaḥ | ata eva prārabdhakarmaṇo'pi vināśe tayā vāsanayaiva bhoga 
upapadyate ||

21) kecittu -

nābhuktaṃ kṣīyate karma kalpakoṭiśatairapi |
(vāsiṣṭalaiṅge a 10 ślo. 33)

ityādivacanāt sarvamapi karma bhoganāśyam | jñānāgniḥ ityādikamapi 
uktavacanāvirodhāya kāyavyūhaparigrahapūrvakabhogotpādanadvāraka-
vināśaparameveti vadanti | tanna yuktam | sarvasyāpi bhoganāśyatve 
prārabdhāprārabdhayorviśeṣābhāvena -

prārabdhaṃ bhogato naśyeccheṣaṃ jñānena dahyate |

ityādivacanavyākopaprasaṅgāt | nābhuktaṃ ityādivacanamapi anenaiva 
vacanena prārabdhaviṣayatayā niveditamiti na tadvirodho'pi | 
jīvanmuktalakṣaṇaṃ tu māyikadehādiyuktatve sati nirmalatvam | nirmalatvañca 
na maladhvaṃsavattvam | malasyaikatvenaikamuktau sarvamuktiprasaṅgāt | kiṃ 
tu malasaṃyogadhvaṃsavattvam | saṃyogastu pratipuruṣaṃ bhidyata iti ekasya 
vināśe'pyanyasyāvināśānnoktadoṣaḥ | anye tu - tattadāvaraṇaśaktīnāṃ 
vibhedenoktadoṣaṃ pariharanti |

22) asya ca jīvanmuktasya hāsakrandanavalganādīni cihnāni | 
yadyapyetānyunmattādisādhāraṇāni, tathāpi unmādādihetukebhyastebhyo 
vilakṣaṇāni tattvajñānakāruṇyādijanitānyetāni cihnāni | yathā hi - tatra 
śivaśāstroktamārge vidyamāne paśuśāstroktamārgamācarantyajñānato 
janāḥ | aho! pratyakṣe'pi viṣaye itthaṃ moho jātaḥ - iti jñānaṃ 
hāsajanakam | lpasya vaiṣayikasukhasyābhilāṣeṇa 
mahadduḥkhamanubhavatyayaṃ janaḥ, kathametannirākaraṇīyamiti kāruṇyaṃ 
krandajanakam | svātmanaḥ saṃsārasamudrāduttīrṇatājñānaṃ valganahetuḥ 
| taduktaṃ tattvasāre -

dhṛtidhairyasamāyuktaḥ sadānandasamāvṛtaḥ |
hasate nṛtyate caiva krandate valgate'pi ca ||

kārtikeya uvāca -

hasanādi tvayā proktaṃ yogīndrāṇāṃ ca ceṣṭitam |
tasyārthaṃ naiva jānāmi kimarthaṃ kurvate prabho ||

īśvara uvāca -

suvyaktaṃ dūṣayitvā tu vimārgeṇa jano rataḥ |
taṃ dṛṣṭvā hasate yogī aho! vyāmohitaṃ jagat ||

jñātvā bhavasyāsadbhāvaṃ krīḍante bhavamadhyataḥ |
krīḍānto'pi na lipyante tena nṛtyanti yoginaḥ ||

rasalubdho yathā matsyo lohaśaktiṃ na paśyati |
sukhalubdhastathā loko yamalokaṃ na paśyati ||

tattvahīno mahadduḥkhaṃ sahate'tīva dāruṇam |
tenāsau krandate yogī dṛṣṭvā duḥkhaṃ janasya ca ||
 apārasya samudrasya pāraṃ hi taritaṃ mayā |
iti matvā ca garvitvā valgante tena yoginaḥ || iti ||

itthamevāgamāntaroktāni cihnāntarāṇi jñeyāni | etaiśca cihnaiḥ 
jīvanmuktaṃ viniścitya tasmin parāṃ prītiṃ kuryāt | na kadācidapi dveṣam | 
yato dveṣe kṛte tadīyaniṣiddhakarmabhiḥ svasmin pāpaṃ jāyeta | īdṛśe ca 
jīvanmukte svarūpasākṣātkāreṇa nivṛttāvaraṇatayā śivānandaḥ 
prakāśate | tathāpi vaiṣayikasukhaduḥkhādikamapi vikṣepavaśājjāyeta | ataḥ 
paramamuktireva paramaḥ puruṣārthaḥ ||

23) tasyāśca paramamukteḥ svarūpaṃ vādinaḥ 
svasvamatyanusāreṇānyathānyathā vadanti | tathāhi - cārvākāstāvat - 
dehasyaiva duḥkhanidānatvāt tadvināśe duḥkhānutpatteḥ 
sakaladuḥkhanidānabhūtadeharūpātmanāśa eva mokṣa ityāhuḥ | tanna | 
apuruṣārthatvāt | yadyapi mokṣadūśāyāṃ duḥkhamūlasya vināśaḥ 
sarvavādisammataḥ, tathāpi sa svayaṃ na puruṣārtho bhavitumarhati | na hi 
sarpakaṇṭakādinivṛttireva puruṣārthaḥ | duḥkhābhāva eva puruṣārtha iti cet 
sa kiṃ duḥkhadhvaṃsaḥ ? uta duḥkhaprāgabhāvaḥ ? nādyaḥ | tadānīṃ 
duḥkhasyānutpattau taddhvaṃsābhāvāt | utpattau ca tajjñānādeva nāśa iti 
puruṣapravṛttivaiphalyāt | na dvitīyaḥ | duḥkhaprāgabhāvasyānādeḥ 
sādhyatvābhāvena puruṣārthatvāyogāt | astu tarhi duḥkhanidānanāśa eva 
puruṣārtha iti cet; na | pūrvoktadoṣāt | deharūpasyātmano bhoktuḥ 
muktidaśāyāmabhāvenābhujyamānatvenāpuruṣārthatvācca | nāvedyaḥ 
puruṣārthaḥ iti nyāyāt | puruṣārtho hi tatprepsunā bhujyamānaḥ sanneva 
puruṣārthaḥ | na ca svātmanāśaḥ svena bhujyate | dehasya duḥkhanidānatvavat 
sukhanidānatvasyāpi sadbhāvena tannāśasyoddeśyatvāyogācca | 
śarīrātmavādaśca pūrvameva nirastaḥ | etena jñānasantativicchedo mokṣa iti 
mādhyamikapakṣo'pi nirastaḥ | jñānanāśasyānuddeśyatvācca | 
jñānakṣaṇikatvavādaśca pūrvameva nirastaḥ | viṣayoparāgābhāvena 
nirupaplavā jñānasantatirmokṣa iti yogācāramatamapyayuktam | jñānahetoḥ 
śarīrāderabhāvāt | na ca viṣayāvacchinnajñāna eva śarīrasya hetutā | 
lāghavena jñānamātra eva tasya hetutvāt ||

24) sāṅkhyāstu - prakṛtipuruṣavivekakhyātau 
prakṛtikāryamahadādyanupadhānenāvasthānarūpaṃ kaivalyaṃ 
mokṣamācakṣate | tathā hi - puruṣasya bhoganimittaṃ prakṛtirmahadādisṛṣṭau 
pravartate | nirlepasya ca puruṣasya svato 
bhogāsambhavādbhoktṛbhūtabuddhyavivekādeva bhogo vācyaḥ | buddhyā ca 
puruṣasya vivekodaye'vivekakṛtabhogāsambhavena  prakṛtau 
mahadādikāryāniṣpattestadupadhānaviraheṇaivāvasthānarūpaṃ kaivalyaṃ 
sambhavatīti | tadayuktam | caitanyaprakāśaviraheṇa pāṣāṇatākalpe'smin 
kaivalye sadāśivāditattadbhuvanabhogaparityāgena lipsāyā anudayāt | 
sāṃsārikaduḥkhāsaṃspṛṣṭaṃ niratiśayaṃ sukhaṃ yadi muktau syāttadā 
tatrecchā syāt | sakalabhogavirodhikaivalyamātre tu na kasyāpīcchā 
udetumarhati | tasmānna kaivalyaṃ puruṣārthaḥ ||

25) etenātyantiko duḥkhocchedo mokṣa iti naiyāyikamatamapyapāstam | 
tanmate muktidaśāyāmātmano viśeṣaguṇaśūnyatvena 
duḥkhābhāvasyājñāyamānatvena apuruṣārthatvāt | nanu duḥkhābhāvasya 
svarūpeṇa puruṣārthatvam, na tu jñāyamānatayā | na hi duḥkhābhāvaṃ 
jānīyām datyuddiśya pravṛttiḥ | api tu dukhaṃ me mā bhūt duḥkhaṃ me 
idānīṃ jāyamānaṃ naśyatu ityevam | sukhādāvapi svarūpeṇaiva 
puruṣārthatvam | jñānaṃ tu nāntarīyakameveti cet, na, ajñāyamānasya 
duḥkhabhāvasya mūrcchādisādhāraṇyenāpuruṣārthatvāt | taduktam -

duḥkhābhāvo'pi nāvedyaḥ puruṣārthatayeṣyate |
nahi mūrcchādyavasthārthaṃ pravṛtto dṛśyate sudhīḥ || iti ||

etenātyantiko duḥkhasādhanadhvaṃso mokṣa iti naiyāyikaikadeśimataṃ 
cāpāstam ||

26) bhāṭṭāstu - nityasukhābhivyaktirmuktirityāhuḥ | tadapi na 
abhivyaktirjanyā ajanyā vā ? ādye'pi abhivyaktirāvaraṇanivṛttirvā ? 
jñānaṃ vā ? āvaraṇanivṛttiriti cet tasyāsmanmatattvena tavāpasiddhāntāt | 
jñānamiti cet yatkṛtaṃ tadanityam  iti nyāyena tasya vināśitvena 
mukteranityatvaprasaṅgāt | abhivyakterajanyatve puruṣāsādhyatvena 
puruṣārthatvāyogāt ||

27) ārhatāstu - ātmanaḥ satatordhvagamanameva mokṣaḥ | 
tasyordhvagamanaṃ ca bandhavigamena bhavati | 
saṃsāradaśāyāmadhogamanaṃ ca svato laghorapi 
karmabandhanenālaghubhūtasya tasya lohapañjarāntaḥsthitasyālābukasya jale 
kṣiptasyeva yuktam | ūrdhvagamanamapi karmabandhavigamena 
lohapañjaravicchedenālābukasyeva yuktamevetyāhuḥ | tadapyayuktam | 
ātmano'ṇumadhyamaparimāṇayornirastatvena vyāpakasya gamanāsambhavāt 
| ūrdhvagamanasya sukhaduḥkhābhāvetaratvenāpuruṣārthatvācca |

28) rudraviṣṇivandrādipadaprāptirmuktirityapi na yuktam, tasya 
vināśitvāt | tanmuktitvapratipādakapurāṇādivacanānāmapi 
gauṇamuktiparatvāt || 

29) kecittu sattvamuktireva muktirityāhuḥ | tathā hi puruṣasya 
prakṛtibhoktṛtvamanādi | sāditve tataḥ pūrvaṃ puruṣasyāpi sattve 
mānābhāvena tasyāpi sāditvaprasaṅgāt | na cānādernivṛttiḥ kalpayituṃ 
yuktā | puruṣasyāpi nivṛttyāpatteḥ | tato muktidaśāyāmapyasyaiva 
bhoktṛtvam | iyāṃstu bhedaḥ | yat saṃsāradaśāyāṃ karmavaśena 
duḥkhamohāntaritasukharūpā prakṛtirbhogyā; muktau 
karmaṇāmabhāvānniratiśayānandātmakasattvarūpā prakṛtirbhogyeti | 
etadapi bhogajanyatvājanyatvavikalpena bhāṭṭamatanirāsenaiva nirastam ||

30) śivasāmyamapi na mokṣaḥ | tacca sāmyaṃ 
utpattisaṅkrāntisamāveśābhivyaktibhiścaturdhā sambhavati | tatra 
mahāvratinaḥ utpattyā sāmyamupagacchanti | tathā hi - muktau 
tāvacchivasāmyamasti | tacca sarvajñatvādirūpam | tacca tadaivotpadyate | 
anyathā pūrvamapi tatprasaṅgāt | tasmācchivaguṇasadṛśaguṇotpattyaiva 
śivasāmyamiti ||

31) pāśupatāḥ saṅkrāntyā sāmyamupagacchanti | tathā hi - 
kastūrikādyāmodaḥ paṭādāviveśvarasthaṃ sārvajñyādikaṃ muktapuruṣe 
saṅkrāmati | tasmācchivaguṇasaṅkrāntyā sāmyamiti ||

32) kāpālikāḥ samāveśena sāmyamupagacchanti tathā hi - yathā 
grahāḥ puruṣeṣvāviśanti tatheśvaraguṇā mukteṣvāviśanti | 
tasmācchivaguṇasamāveśena sāmyamiti ||

33) dauvaikadeśinaḥ abhivyaktyā sāmyamupagacchanti | tathā hi - 
śivasyeva jīvānāmapi sārvajñyādikaṃ pūrvamevāsti | kintu 
saṃsāradaśāyāṃ malaruddhaṃ na prakāśate | muktau tu 
malavigamenābhivyajyate | tasmāt svīyaguṇābhivyaktyā śivasāmyamiti ||

34) tatra utpattisāmyapakṣastāvadayuktaḥ | muktau 
jñānotpādakaśarīrādyabhāvānna tāvatsārvajñyasyotpattiḥ sambhavati | 
tasyotpattimattve'nityatvaprasaṅgāt svargādibhyo mukteraviśeṣaprasaṅgācca ||

35) saṅkrāntisāmyapakṣo'pyayuktaḥ | tathā hi - kiṃ 
svāśrayaparityāgena āśrayāntaraprāptiḥ saṅkramaḥ? uta tadaparityāgena ? 
nādyaḥ | īśvarajñānasya mukte saṅkrāntyabhyupagame īśvarasya 
jñānābhāvaprasaṅgāt | nāpi dvitīyaḥ | jñānasya niraṃśatvenāṃśena 
saṅkramasyāyogāt | tathā vijñānasadbhāve mānābhāvācca | 
śivajñānaṃ nānyatra saṅkramate, guṇatvādityanumānena 
saṅkrāntyabhāvasādhanācca | na cāprayojakatvam | guṇaparityāgena 
guṇasyānyatra gamane guṇitādātmyabhaṅgaprasaṅgena 
guṇatvasyaivāyuktatvāt | taduktam -

tyaktvā svaguṇinaṃ yānti na ca guṇyantaraṃ guṇāḥ | 
gacchatāṃ ca vyavastheyaṃ padārthānāṃ virudhyate || iti ||

nanu-

nindanāddvijasādhūnāṃ pāpānāmatha sevanāt |
pāpaṃ saṅkramate puṃsāṃ svapuṇyamapayāti ca ||
kṣamāvati tvanākrośāt puṇyavadbhiḥ saha sthiteḥ | 
puṇyaṃ saṅkramate puṃsāṃ pāpaṃ yāti tato'nyataḥ ||

iti smṛtyādau puṇyapāpādeḥ saṅkramaṇaṃ pratipādyate | tathā 
ācāryaniṣṭhajñānasya śiṣye saṅkramaṇaṃ śrūyate svāyambhuvādau 
ācāryābhiṣeke -

adya saṃkramito yo'yamadhikāro mayā tvayi |
sa kartavyastvayā tāvadyāvatsaṅkramito'nyataḥ || iti ||

evañca pūrvoktaguṇatvahetorvyabhicāra iti cenna | smṛtyādau puṇyapāpayoḥ 
saṅkrāntipratipādakavacanasya tajjātīyotpattiparatvāt | 
jñānasaṅkrāntipratipādakavacanasyāpi guruniyogena guruvadvyākhyānādau 
svātantryapratipādanaparatvāt | tathā ca tatra na mukhyā saṅkrāntiḥ | na ca 
kastūrikāmodādeḥ paṭe saṅkrāntidarśanādvyabhicāraḥ | tatrāpi 
kastūrikāvayavānāmeva saṅkrānteḥ | tatra ca guṇatvābhāvena 
hetorabhāvāt | na ca vahnigatasyauṣṇyasya jale saṅkrāntiḥ dṛśyate; anyathā 
jalasambandhe karādau dāho na syāditi vyabhicāra iti vācyam | tatrāpi 
jalasthasyānudbhūtarūpavahnereva dāhakatvāt | tathā ca na guṇasya 
svāśrayādanyatra saṅkrama iti siddham | tasmātsaṅkrāntisāmyapakṣaḥ 
ayukta eva ||

	36) nāpyāveśasāmyam | tathā sati 
bhūtāviṣṭasyevāsvātantryāpattyā puruṣārthatvāyogāt ||

37) abhivyaktisāmyapakṣo'pyayuktaḥ | 
jñānakriyābhivyaktyātmanastasya sukhaduḥkhābhāvetaratvena svataḥ 
puruṣārthatvāyogāt | na ca tatkālīno duḥkhābhāvaḥ puruṣārthaḥ | tasya 
tvayā mokṣatvenānaṅgīkārāt | jñānakriyābhivyaktereva 
sāmyapadābhidheyāyāstathātvenābhyupagamāt | 
vividhatattadbhuvanabhogahānena tulyāyavyayatayā tasya 
puruṣārthatvāyogācca | śivādbhinnasya śivasamasya muktasya 
pāratantryanivṛttau śivasya sarveśvaratvavighātāpatteśca | muktānāṃ 
pāratantryanivṛttau jagatkāraṇaśaktimattvena svayamapi 
jagannirmāṇaprasaṅgācca | kiṃ ca muktasya śivasya ca bhedakābhāvādbhedo 
na yuktaḥ | śivasāmyasya muktitve ekadeśena sāmyaṃ vā sarvātmanā 
sāmyaṃ vā muktiḥ ? ādye baddhānāmapi yatkiñcitsāmyasattvena 
baddhamuktāviśeṣaprasaṅgaḥ | dvitīye'pi muktasya sāvayavatvābhāve 
niravayavasya sārvajñyādiguṇavataḥ svatantrasya ca muktasya tādṛśasya 
śivasya ca bhedakābhāvena muktaḥ śiva eva syāt | na śivasamaḥ | muktasya 
sāvayavatvāṅgīkāre sāvayavatvaṃ baindavādiśarīrayogitvameva vācyam | 
anyādṛśasya tasyāsambhavāt | tathā ca muktasya baddhasya 
cāviśeṣaprasaṅgaḥ | kiṃ ca sarvathā sāmyasyābheda eva paryavasānam | 
tasmānna śivasāmyaṃ muktiḥ ||

38) kiṃ ca śivaikībhāvena śivānandānubhava eva mokṣaḥ | tathaiva 
svasmin paramaśivābhedajñānasya mokṣahetutvena 
śrīmatsarvajñānottarādyāgameṣu bodhitatvāt | tathā hi sarvajñānottare 
vacanāni -

yo'sau sarvagato devaḥ sarvātmā sarvatomukhaḥ |
sarvatattvamayo'cintyaḥ sarvasyopari saṃsthitaḥ ||
sarvatattvavyatītaśca vāṅmanonāmavarjitaḥ |
so'hamevamupāsīta nirvikalpena cetasā ||
yadevaṃ niṣphalaṃ jñānaṃ śāśvataṃ dhruvamavyayam |
nirvikalpamanirdeśyaṃ hetudṛṣṭāntavarjitam ||

aliṅgamakṣaraṃ śāntaṃ viṣayātītagocaram |
avibhāvyamasandehaṃ tadahaṃ nātra saṃśayaḥ ||

ahameva paro devaḥ sarvamantramayaḥ śivaḥ |
sarvamantravyatītaśca sṛṣṭisaṃhāravarjitaḥ ||

mayā vyāptamidaṃ sarvaṃ dṛśyādṛśyaṃ carācaram |
ahameva jagannātho mattaḥ sarvaṃ pravartate ||

anekākārasambhinnaṃ viśvaṃ bhuvanasañcayam |
śivādyavaniparyantaṃ tatsarvaṃ mayi saṃsthitam ||

yacca kiñcijjagatyasmin dṛśyate śrūyate'pi vā |
bahirantarvibhāgena tatsarvaṃ vyāpitaṃ mayā ||

ahamātmā śivo hyanyaḥ paramātmeti yaḥsmṛtaḥ |
evaṃ yo bhāvayenmohānna śivatvamavāpnuyāt ||

śivo'nyastvahamapyanyaḥ pṛthagbhāvaṃ vivarjayet |
yaḥ śivaḥ so'hameveti advaitaṃ bhāvayetsadā ||

advaitabhāvanāyuktaḥ sarvatrātmani saṃsthitaḥ |
sarvagaṃ sarvadehasthaṃ paśyate nātra saṃśayaḥ ||
evamekātmabhāvena saṃsthitasya tu yoginaḥ |
sarvajñatvaṃ prakalpyeta vikalparahitasya ca ||

yo'sau sarveṣu śāstreṣu paṭhyate hyaja īśvaraḥ ||

akāyo nirguṇo hyātmā so'hamasmi na saṃśayaḥ |
avijñātaḥ paśuḥ so'sau sṛṣṭidharmaṃ samāśritaḥ ||

vijñātaḥ śāśvataḥ śuddhaḥ sa śivo'tra na saṃśayaḥ |
tasmādātmā sadā vedyaḥ suvicārya vicakṣaṇaiḥ || iti ||

eteṣāṃ vacanānāṃ gauṇārthatāmavalambya mahatā prayāsena 
dvaitaparatayā racitānyekadeśināṃ vyākhyānāntarāṇi na samañjasānīti 
sarvajñānottaravyākhyāne'smābhiḥ pratipāditam ||

39) nanu sarvajñena nityamuktena śivena kiñcijjñasya baddhasya 
paśoraikyaṃ kathaṃ sambhavati ? viruddhadharmāṇāṃ bhinneṣveva 
sambhavāt | anyathā paśuśivayorabhede paśudharmasya bandhasya śive, 
śivadharmasya nityamuktatvasya ca paśau prasaṅgaḥ | na caikasminneva 
badarīphale kālabhedena śyāmaraktarūpayorivaikatraiva 
sarvajñatvakiñcijjñatvādiviruddhadharmayoḥ sambhava iti vācyam | tathā sati 
śivasyaiva paśutvadaśāyāṃ baddhatvāpattyā tasya 
nityamuktatvābhyupagamavirodhaprasaṅgāt | ata eva śivasya 
baddhamuktāvasthāprasaṅgena ghaṭe naṣṭe ghaṭākāśasya 
mahākāśaikyamiva māyādibandhāpagame jīvasya śivaikyamiti pakṣo'pi 
nirastaḥ | nadīnāṃ samudre vilayena aikyamiva māyādibandhavigame 
paśūnāṃ śive vilayenaikyamityapi na yuktam | laye ekībhāvasya ekībhāve 
layasya cāsambhavāt | līnasya muktirūpapuruṣārthānubhavāyogācca | na ca 
paśūnāṃ layoktiratra na svarūpalayaḥ, kintu paśutvāvasthāvilayaḥ; 
nadīnāmapi samudraikye nadībhāvalaya eva, na svarūpalaya iti vācyam | tathā 
sati yāni jalāni pūrvaṃ nadībhāvenāvasthitāni tānyeva prāktanaṃ 
nadībhāvaṃ vihāya samudreṇaikībhūtānītyanena kiṃ vivakṣitam ? kiṃ 
prāktanajalāni prāktanasamudreṇa militvā kañcidavayavinamārabhanta iti 
vivakṣitam ? uta ekajātīyatayā saṃśleṣaḥ ? atha  
pūrvatanabhedalayenābhedotpattiḥ? ādye pakṣe tadvadeva jīvacaitanyasya 
śivena saha melanena kasyacidavayavina ārambhakatvaṃ syāt; na ca 
tathābhyupagamyate | dvitīyapakṣe śivajīvayoḥ saṃśleṣasiddhāvapi 
abhedāsiddhiḥ | tṛtīyapakṣe bhedasya nityatvena nāśāyogaḥ | abhedasya ca 
janyatve vināśāvaśyambhāvena mukteranityatvaprasaṅgaḥ | kiṃ ca 
bhedadhvaṃsenābhedotpattipakṣe muktidaśāyāmekasyaiva vidyamānatvaṃ 
vācyam | tathā sati muktau vidyamānaḥ śivo vā? jīvo vā ? ādye śivasyaiva 
sattvena muktiphalabhoktrabhāvaprasaṅgaḥ | dvitīye jīvasyaiva sattvena 
śivābhāvena bhogyaśivānandābhāvaprasaṅgaḥ | tasmājjīvasya na 
śivasvarūpaikyaṃ sambhavati | kiṃ tu tāmrasya rasaguḍikādivedhena 
kālimavigamena svarṇatāprāptau svarṇaikyoktiriva, 
viśvāmitramunestapobalena kṣatriyatvavigamena brāhmaṇyaprāptau 
brāhmaṇaikyoktiriva ca, jīvasya jñānabalena paśutvavigamena 
svagataśivadharmabhūtaśivatvābhivyaktau 
śivaikyoktirityevābhyupagantavyamiti cet; ucyate ||

40) guṇaguṇinoriva prakāśatadāśrayayoriva ca īṣadbheda evaikyam | ata 
eva baddhamuktādivyavasthopapattiḥ | yathā hi - guṇaguṇinorabhedasattve'pi 
guṇasya rūpasyaiva dharmatvaṃ cakṣurmātragrāhyatvaṃ ca, guṇino 
ghaṭādereva dharmitvaṃ tvagindriyeṇāpi grāhyatvaṃ ceti vyavasthopapadyate | 
tayorbhedasyāpi sattvāt | tathaiva śivajīvayoraikyasattve'pi jīvasyaiva 
kiñcijjñatvaṃ bandhādiyogaśca, śivasyaiva sarvajñavaṃ 
nityamuktatvādiyogaśceti vyavasthopapadyate | 
śivajīvayorbhedasyāpyaṅgīkārāt | taccaikyaṃ na muktidaśāyāmutpadyate | 
tathātve vināśitvaprasaṅgāt | tathā ca saṃsāradaśāyāmapyaikyamastyeva | 
kiṃ tu āvaraṇavaśāttadā anabhivyaktaṃ āvaraṇāpagame 
muktāvabhivyajyate | yathā hyaraṇiprabhṛtiṣu kāṣṭheṣu tādātmyenā vasthita 
eva kāṣṭhākāratirohito vahniḥ paścānmathanakriyādagdhāvārakaguru-
kaṭhinadravapārthivāpyāvayavarūpakāṣṭhākāratvenābhivyajyate tadvat ||

41) na ca tathā sati vastrasthāpyāvaraṇabhūtatantvākārāpagame sati 
abhivyakterevotpattirūpatvena atrāpyāvaraṇāpagame abhivyakterutpattirūpatva-
meveti mukteranityatvaprasaṅgadoṣatādavasthyamiti vācyam | yatra kāraṇa-
rūpāśrayagatāvasthāviśeṣeṇāvṛtaṃ tadavasthāpanayanenābhivyajyate 
tatrotpattiḥ; yatra tu āśrayagatadravyāntareṇāvṛtaṃ tannivṛttyābhivyajyate 
tatrābhivyaktirityutpattyabhivyaktyorbhedābhyupagamāt | vastrasyāśrayabhūta-
tantvavasthārūpāvaraṇāpagame abhivyakterutpattirūpatve'pi prakṛte 
āśrayabhūtātmani vidyamānamalarūpadravyāntareṇāvatatvāt śivaikyasya 
tadāvaraṇanivṛttau tṛṇaśaivālādyapagame kūpe pūrvameva vidyamāna-
jalasyevābhivyakterutpattirūpatvābhāvānnānityatvadoṣaprasaṅgaḥ | etena 
śivaikyasya pūrvameva sattve tādarthyena puruṣapravṛttivaiyarthyamityetada-
pāstam | tadācchādakamalanivṛttau kṛtisādhyatvaparyavasānāt | tathā ca 
ghaṭākāśamahākāśadṛṣṭāntena nadīsamudradṛṣṭāntena ca 
vedāgameṣvaikyoktirukteṣadbhedagarbhābhedarūpatādātmyamātrasā-
dharmyaviṣayā | na tvātyantikābhedāṃśapūrvasiddhabhedahānyaṃśāvapi 
dṛṣṭāntadārṣṭāntikayostatra vivakṣitau | na hi dṛṣṭāntadārṣṭāntikayostatra 
sarvātmanā sāmyaṃ vivakṣaṇīyam | tayorabhedāpattyā 
dṛṣṭāntadārṣṭāntikabhāvasyaivocchedāpatteḥ | tathā ca na pūrvoktadoṣaḥ 
||

42) nanu tathāpi śivaikyamātramapi na mokṣaḥ | tasya 
sukhaduḥkhābhāvetaratvena svataḥ puruṣārthatvābhāvāt | na 
cānandānubhavena puruṣārthatvam | ānandasadbhāve mānābhāvāt | 
ānandabhogasadbhāve bhogasyādhyāsarūpatvena saṃsāritvāpatteḥ | 
kvacidānandādiśravaṇasya pūrṇatvādiparatvāditi cet; na |

nistattve niṣkalībhūte vindatyātmani yatsukham |
nirvikalpamacintyaṃ ca hetudṛṣṭāntavarjitam ||

tatsukhaṃ paramaṃ proktamātyantikamanaupamam |
nirasya viṣayāsaṅgaṃ manovṛttiṃ vivarjayet ||

yadā yātyunmanībhāvaṃ tadā tatparamaṃ sukham |

iti sarvajñānottaragatavacanena sukhasya pratipādanāt | atra 
duḥkhanivṛttyātmakaṃ sukhamiti keṣāñcidvyākhyānaṃ 
sukhaśabdamukhyārthaparityāge hetvabhāvādanupapannam ||

43)  na ca sukhasya janyatvaniyamāt sukhānupapattiḥ | evaṃ sati 
jñānasyāpyabhāvaprasaṅgāt | pramāṇabalānnityajñānābhyupagame 
nityasukhasyāpyavirodhāt | ata eva sukhabhoktṛtve saṃsāritvaṃ 
syādityapāstam | anityasukhabhoktṛtva eva saṃsāritvopagamāt | anyathā 
jñānādimattvena saṃsāritvāpatteḥ | tasmānna nityaśivānandabhogena 
saṃsāritvaprasaṅgaḥ ||

44) na caivaṃ śivaikyāpannajīvasyāpi sukhasvarūpatvena 
mokṣasvarūpasukhānubhava evāstu, kiṃ śivānandānubhavābhyupagameneti 
vācyam | yathā rasavadapi rasanendriyaṃ svetaradravyagatameva rasaṃ gṛhṇāti 
| na tu svagatam | yathā vā prakāśavadapi cakṣurindriyaṃ na svaprakāśena 
sūryādiprakāśaṃ gṛhṇāti | tathā sati sūryādiprakāśaṃ vinaiva 
ghaṭādirūpagrahaṇāpatteḥ | kiṃ tu sūryādiprakāśenaiva cakṣurgṛhṇāti | 
tathā ca sūryādiprakāśānubhave cakṣuḥprakāśa upayujyate | tadvadeva 
śivānandānubhava eva jīvanmuktasya jñānānandasvarūpamupayujyate | na tu 
svātmagatasukhānubhava iti sampradāyaḥ ||

45) etena mantrauṣadhādivīryeṇa viṣaśaktipratibandhavajjñānāvāra-
kājñānasyāpi jñānena śaktipratibandhamātraṃ kriyate | na tu jñānena 
nivṛttiḥ kriyata iti matamapāstam | tathā sati śivaikyālābhāt | lābhe ca 
śive'pyajñānaprasaṅgāt | śivāgameṣu 
ajñānanityatvavacanānāmanāditvena bahukālāvasthāyitvaparatvāt ||

46) tasmātpūrvoktaprakāreṇa tattvasākṣātkārodaye malāsaṃsparśe 
āgāmikarmāsparśe ca sati sañcitakarmaṇāṃ ca dīkṣayā nivṛttau 
prārabdhasya ca bhogena kṣaye malakarmobhayābhāvena 
māyādvayasyāgāmiśarīrādyutpādanaśaktivilopena prārabdhakarmabhogena 
vartamānaśarīrādināśe śivānandānubhavavirodhipāśāpagamena 
śivenaikyaṃ prāpyālaukikaniratiśayaśivānandānubhavātmakaparama-
muktiṃ prāpnotīti siddham ||

iti śrīmadativarṇāśramācāryavaryaśaivaparipālakaśivāgrayogīndra- 
jñānaśivācāryaviracitāyāṃ śaivaparibhāṣāyāṃ 
muktinirūpaṇaṃ nāma pañcamaḥ paricchedaḥ ||


###########   END OF FILE  #######