####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00112
Uniform title: pāśupatabrahmopaniṣat
Main title: yoga upaniṣads with the commentary of śrī upaniṣad brahmayogin
Secondary title: pāśupatabrahma upaniṣat
Commentator : brahmayogin
Alternate name : śrī upaniṣad brahmayogin
Editor : śāstrī mahādeva

Description: 



Notes: 
Transcribed by the staff of Muktabodha under the supervision of Mark S. G. Dyczkowski.

Revision 0: June 14, 2007


Publisher : Adyar library and research centre
Publication year : 1920
Publication city : Madras
Publication country : India
####################################################




pāśupatabrahmopaniṣat

bhadraṃ karṇebhiḥ- iti śāntiḥ

pūrvakāṇḍaḥ

jaganniyantṛviṣayāḥ sapta praśnāḥ

	atha ha vai svayaṃbhūrbrahmā prajāḥ sṛjānīti kāmakāmo jāyate 
kāmeśvaro vaiśravaṇaḥ || 1 || vaiśravaṇo brahmaputro vālakhilyaḥ 
svayaṃbhuvaṃ paripṛcchati- jagatāṃ kā vidyā kā devatā 
jāgratturīyayorasya ko devo yāni kasya vaśāni kālāḥ kiyatpramāṇāḥ 
kasyājñayā ravicandragrahādayo bhāsante kasya mahimā gaganasvarūpa 
etadahaṃ śrotumicchāmi nānyo jānāti tvaṃ brūhi brahman || 2 ||

vivaraṇam

pāśupatabrahmavidyāsaṃvedyaṃ paramākṣaram |
paramānandasaṃpūrṇaṃ rāmacandrapadaṃ bhaje ||

	iha khalu atharvaṇavedapravibhakteyaṃ pāśupatabrahmopaniṣat 
haṃsasūtrasvarūpaprakaṭanavyagrā 
niṣpratiyogikabrahmamātraparyavasannā vijayate | asyāḥ saṃkṣepato

p. 228) vivaraṇamārabhyate | 
vālakhilyasvayaṃbhūpraśnaprativacanarūpeyamākhyāyikā 
vidyāstutyarthā | ākhyāyikāmavatārayati- atheti | atha 
prāṇyadṛṣṭaparipākānantaram | ha vā iti vṛttārthasmaraṇārthau nipātau | 
svayameva bhavatīti svayaṃbhūḥ brahmā tasya prajāḥ sṛjeyamiti kāmaṃ 
kāmaḥ kāmakāmo jāyate prādurbabhūva | tatsaṃkalpānurodhena 
kāmeśvaro rudraḥ, lalāṭāt krodhajo rudro'jāyata iti śruteḥ, 
vaiśravaṇaśca || 1 || vaiśravaṇanāmakaḥ brahmaputraḥ vālakhilyaḥ 
ṛṣipūgaśca svayaṃbhuvaṃ paricchati | kimiti ? jagatāṃ kā vidyetyādi 
saptadhā praśnaḥ kṛtaḥ | etadahaṃ tvattaḥ sakāśāt śrotumicchāmi | 
tvadvinaitadvaktā na hi ko'pi vidyate | ato brahman tvaṃ brūhi || 2 ||

saptapraśnānāmuttarāṇi

svayaṃbhūruvāca- kṛtsnajagatāṃ mātṛkā vidyā || 3 || 
dvitrivarṇasahitā dvivarṇamātā trivarṇasahitā caturmātrātmakoṃkāro 
mama prāṇātmikā devatā || 4 || ahameva jagattrayasyaikaḥ patiḥ || 5 || mama 
vaśāni sarvāṇi yugānyapi ca || 6 || ahorātrādimatisaṃvardhitāḥ kālāḥ || 
7 || mama rūpā ravestejaścandranakṣatragrahatejāṃsi || 8 || gagano mama 
triśaktimāyāsvarūpaḥ nānyo madasti || 9 || tamomāyātmako rudraḥ 
sātvikamāyātmako viṣṇū rājasamāyātmako brahmā | 
indrādayastāmasarājasātmikā na sāttvikaḥ ko'pi aghoraḥ 
sādhāraṇasvarūpaḥ || 10 ||

p. 229) iti pṛṣṭho bhagavān svayaṃbhūruvāca | kimiti ? jagatāṃ kā vidyā 
ityādyapraśnamapākaroti- kṛtsnajagatāṃ mātṛkā 
akārādikṣakārāntarūpiṇī vidyā, tasyā vaikharīprapañcanirvāhakatvāt 
|| 3 || kā devatā iti dvitīyapraśnamapākaroti- dvitrivarṇeti | padarūpeṇa 
dvitrivarṇasahitā svayamakārokārākhyadvivarṇato mīyata iti 
dvivarṇamātā makāreṇa saha trivarṇasahitā 
sthūlametaddhrasvadīrghaplutam iti śrutyanurodhena ya oṃkāraḥ 
caturmātrātmako bhavati so'yaṃ mama prāṇātmikā devatā || 4 || 
jāgratturīyayorasya ko devaḥ iti praśnamapākaroti- ahameveti | asya 
jāgradāditurīyāntakalanākalitasya jagattrayasya ahameka eva devaḥ, mama 
sūtrādirūpeṇa jagattrayacālakatvāt || 5 || yāni kasya vaśāni iti 
praśnamapākaroti- mameti | kṛtādiyugāni, apicaśabdābhyāṃ 
sthāvarajaṅgamātmakaṃ jagacca madvaśe vartata ityarthaḥ || 6 || kālāḥ 
kiyatpramāṇāḥ iti praśnamapākaroti- ahorātreti | nimeṣāhorātrādimatyā 
saṃvardhitāḥ kalpāvasānāḥ kālāḥ || 7 || kasyājñayā 
ravicandragrahādayo bhāsante iti praśnamapākaroti- mama rūpā iti |

yadādityagataṃ tejo jagadbhāsayate'khilam |
yaccandramasi yaccāgnau tattejo viddhi māmakam ||

iti smṛteḥ || 8 || kasya mahimā gaganasvarūpaḥ iti caramapraśnamapākaroti- 
gagana iti | gaganaḥ gaganam | kriyājñānecchārūpeṇa 
durgālakṣmīsarasvatīrūpeṇa vā māyāmayāḥ tisraḥ śaktayaḥ 
tatkāryajātaṃ ca manmahimāsvarūpamityarthaḥ | ahametādṛśaḥ 
parameśvaraḥ, madatirekeṇa na kiṃcidastītyāha- nānya iti || 9 || rudrādayaḥ 
kiṃguṇaviśiṣṭā ityata āha- tama iti | tasya sarvasaṃhārakatayā 
tāmasaguṇopādhitvāt | viṣṇvatirekeṇa na sāttvikaḥ ko'pi, tasya 
sarvamaryādāpālakatayā śuddhasattvarūpatvāt | ata evā'yaṃ aghoraḥ 
sarvasādhāraṇasvarūpaḥ sattvaguṇāvaṣṭambhataḥ śāntarūpeṇa 
bhaktakoṭisādhāraṇatvāt || 10 ||

p. 230) 			sṛṣṭiyajñe kartrādinirūpaṇam

	samastayāgānāṃ rudraḥ paśukartā rudro yāgadevo 
viṣṇuradhvaryurhotendro devatā yajñabhuṅ mānasaṃ brahma maheśvaraṃ 
brahma || 11 ||

	sṛṣṭiyajñe rudrādayaḥ kīdṛśāḥ santaḥ kiṃ kurvanti ityata āha- 
samasteti | tatra rudrastu agniṣṭomādivājimedhāntasamastayāgānāṃ 
viśasanakarmaṇi paśūn karotīti paśukartā yāgasāmānyasya 
paśupradhānatvāt rudraḥ | yāgadevaḥ, yāgapradhānāhutidravyasya 
viṣṇvāyattatvāt, viṣṇuḥ adhvaryuḥ anyūnādhikatayā tat pālayan | 
cālakatvāt hotā indraḥ, stutaśastrakṛttvāt | tattaddevatārūpeṇa 
paśupatireva yajñabhuk | mānasaṃ brahma- vāṅmaunapūrvaṃ mānasaṃ 
manasā sarvartviṅnirvartyaprayogadraṣṭṛtvena yajñopabṛṃhaṇāt- 
maheśvaraṃ brahma brahmaṇaḥ sarvadraṣṭṛtayā brahma brahmāṇaṃ 
maheśvaraṃ viddhi || 11 ||

nādānusaṃdhānayajñaḥ

	mānaso haṃsaḥ so'haṃ haṃsa iti tanmayaṃ yajño 
nādānusaṃdhānam | tanmayavikāro jīvaḥ || 12 ||

	ko'yaṃ yajña ityatra nādānusaṃdhānam ityāha- mānasa iti | 
haṃsaḥ- so'hamiti cirabhāvanātaḥ tanmayaṃ tadbhāvasādhanaṃ yat 
nādānusaṃdhānaṃ tadeva mānaso yajño bhavatītyarthaḥ | 
evamanusaṃdhātā jīvastu ucchvāsaniḥśvāsavadyanmanaḥ 
tanmayavikāraḥ | jīvasya prāṇamana-upādhikatvāt tadvikāratvaṃ yujyata 
ityarthaḥ || 12 ||

paramātmano haṃsatvanirūpaṇam

	paramātmasvarūpo haṃsaḥ | antarbahiścarati haṃsaḥ | 
antargato'navakāśāntargatasuparṇasvarūpo haṃsaḥ || 13 ||

p. 231) haṃsastu svatattvajñānena svātiriktabhramaṃ hanti apahnavaṃ 
karotīti haṃsaḥ paramātmā bhavati | sa kutra āsanamarhatītyatra- so'yaṃ 
haṃsaḥ prāṇāpānopādhiyogāt antarbahiścarati | yadvā- 
sarvaprāṇyantarbahiścarati pratyagabhinnabrahmarūpeṇa upalabhyate, 
antarbahiśca tat sarvaṃ vyāpya nārāyaṇaḥ sthitaḥ iti śruteḥ | 
sarvaprāṇyantaḥ kāmādayo vartante, bāhye śabdādiviṣayāśca, tathā sati 
svavyāpteḥ anavakāśāt kathamantargato bahirgato vā bhaviturmahatītyatra- 
sarvaprāṇyantarbāhyagatakāmaśabdādiviṣasarpagrāsasuparṇasvarūpo 
haṃsaḥ | pratyagabhinnaṃ brahmāsmīti samyagjñānasya 
svāntarbāhyakalanāvilayapūrvakatvāt haṃsaḥ svāntarbahiḥ vyāpya 
paripūrṇau bhavatītyarthaḥ | tathāca smṛtiḥ-

viṣayā bāhyadeśasthā dehasyāntarahaṃkṛtiḥ |
sarvagrahopasaṃśāntau svayamevāvaśiṣyate ||

iti || 13 ||

yajñasūtrabrahmasūtrayoḥ sāmyam

	ṣaṇṇavatitattvatantuvadvyaktaṃ citsūtratrayacinmayalakṣaṇaṃ 
navatattvatrirāvṛtaṃ brahmaviṣṇumaheśvarātmakamagnitrayakalopetaṃ 
cidgranthibandhanam advaitagranthiḥ || 14 || yajñasādhāraṇāṅgaṃ 
bahirantarjvalanaṃ yajñāṅgalakṣaṇabrahmasvarūpo haṃsaḥ || 15 ||

	bāhyāntarbhāsamānayajñabrahmasūtrayoḥ sāmyamāha- 
ṣaṇṇavatīti | caturaṅgulamānena ṣaṇṇavatisaṃkhyāviśiṣṭaṃ 
yajñasūtraṃ yathā vyaktaṃ bhavati tathā ṣaṇṇavatitattvatantuviśiṣṭaṃ 
brahmasūtraṃ vyaktaṃ bhavati | yajñasūtraṃ tu 
sūtratrayaviśiṣṭatantulakṣaṇaṃ, brahmasūtraṃ tu dvituryāvikalpātmanā 
citsūtratrayacinmayalakṣaṇaṃ bhavati | yathā yajñasūtraṃ sūtratrayaṃ 
trirāvṛtaṃ yadi tadā navasūtraṃ bhavati tathā brahmasūtramapi 
dvituryāvikalpatrayaṃ trirāvṛtaṃ cet navamahātattvātmakaṃ bhavati | 
yadvā- turyaviśvavirāḍotrādibhedena navatattvaṃ 
turyaprājñabījānujñaikarasātmanā trirāvṛtaṃ 
tṛtīyapādaparyavasannaṃ

p. 232) bhavati | yadvā- navatattvatrirāvṛtaṃ brahmasūtraṃ brahmaviṣṇu 
maheśvarātmakaṃ gārhapatyādyagnitrayakalopetaṃ vā bhavati | evaṃ 
tridhābhinnabrahmasūtraikyopāyastu cinmātrādatiriktaṃ tridhā vibhaktaṃ 
na kiṃcidastīti cidgranthibandhanam | 
vyaṣṭisamaṣṭitadaikyāvabhāsakacitāmaikyaṃ granthibandhanataḥ 
kathamityatra- advaitagranthiḥ tadaikyagrantheḥ tadbhedagrāsatvāt 
advaitagranthiḥ advitīyaparamātmā bhavatītyarthaḥ | yadā 
yajñasūtrabrahmagranthiḥ tadaikyahetuḥ tathā atrāpītyarthaḥ || 14 || 
bāhyāntaḥsūtrayoḥ sāmānādhikaraṇyamāha- yajñeti | yajñasūtraṃ 
bahiḥ jvalatīti yathā bāhyayajñasādhāraṇāṅgaṃ bhavati tathā 
brahmasūtramantarjvalatītyantaryajñasādhāraṇāṅgaṃ bhavatīti jñeyam | 
haṃsastu antaryajñāṅgalakṣaṇabrahmasvarūpo bhavati || 15 ||

brahmayajño brāhamaṇādhikārikaḥ

	upavītalakṣaṇasūtrabrahmagā yajñāḥ | brahmāṅgalakṣaṇayukto 
yajñasūtram | tadbrahmasūtram | yajñasūtrasaṃbandhī brahmayajñaḥ 
tatsvarūpaḥ || 16 ||

	bāhyayajñāstu upavītalakṣaṇasūtravadbrahmagā brahmaṇāśrayā 
bhavanti | yajñasūtraṃ brahmāṅgalakṣaṇayukto vedāṅgalakṣaṇayukto 
brāhmaṇo bhajati | tat brahmasūtramapi sa eva bhajati | tat kathamityatra- 
yajñasūtravadbrāhmaṇasaṃbandhī brahmayajñaḥ, brahmaniṣṭhāyā 
brāhmaṇanirvartyatvāt | yo yanniṣṭhaḥ sa tatsvarūpo bhavati || 16 ||

praṇavahaṃsasya brahmayajñatvam

	aṅgāni mātrāṇi | manoyajñasya haṃso yajñasūtram | praṇavaṃ 
brahmasūtraṃ brahmayajñamayam | praṇavāntarvatīṃ haṃso 
brahmasūtram | tadeva brahmayajñamayaṃ mokṣakramam || 17 ||

p. 233) yatpraṇavaniṣṭhaḥ praṇavo bhavati tadaṅgāni kānītyatra- mātrāṇi 
akārādimātrāḥ | aṅgipraṇavasvarūpaṃ kīdṛśamityatra- manoyajñasya 
antaryajñasya phalatvena yo virājate haṃsaḥ tatsvarūpameva yajñasūtram | 
praṇavaṃ praṇavaḥ brahmasūtramayaṃ brahmayajñaśca | yata evam ato 
haṃsa eva sarvaṃ, tadatiriktaṃ na kiṃcidasti ityarthaḥ | yo haṃsaḥ 
praṇavārthatayā praṇavāntarupalabhyate sa eva brahmasūtram | 
pratyagabhinnaṃ brahma yat brahmasūtraṃ tadeva brahmayajñamayaṃ 
nirviśeṣabrahmajñānam | tadeva mokṣakramaṃ 
svātiriktabhramamokṣaṇasya svamātrajñānameva sādhanaṃ, 
tadatiriktasādhanajālasya tanmokṣaṇe'kiṃcitkaratvāt | ayameva hi kramaḥ ; 
nānyaḥ panthā ayanāya vidyate iti śruteḥ || 17 ||

brahmasaṃdhyākriyārūpo manoyāgaḥ

	brahmasaṃdhyākriyā manoyāgaḥ | saṃdhyākriyā manoyāgasya 
lakṣaṇam || 18 ||

	manoyāgaḥ kīdṛśa ityata āha- brahmeti | tat tvamasi ahaṃ 
brahmāsmi iti pratyakparabrahmaṇoraikyameva saṃdhyākriyā manoyāga 
ucyate | tayoḥ saṃdhyākriyā hi manoyāgasya lakṣaṇam ityatra- 
jīvātmaparamātmanoḥ ekatvajñānena tayoḥ bheda eva vibhagnaḥ, sā 
saṃdhyeti-

nodakairjāyate saṃdhyā na mantroccāraṇena tu |
saṃdhau jīvātmanoraikyaṃ sā saṃdhyā sadbhirucyate |

iti śruteḥ smṛteśca || 18 ||

haṃsapraṇavābhedānusaṃdhānaṃ antaryāgaḥ

	yajñasūtraṃ praṇavam | brahmayajñakriyāyukto brāhmaṇaḥ | 
brahmacaryeṇa caranti devāḥ | haṃsasūtracaryā yajñāḥ | 
haṃsapraṇavayorabhedaḥ || 19 ||

p. 234) haṃsasya prārthanāstrikālāḥ | trikālāstrivarṇāḥ | 
tretāgnyanusaṃdhāno yāgaḥ | 
tretāgnyātmākṛtivarṇoṃkārahaṃsānusaṃdhāno'ntaryāgaḥ || 20 || 
citsvarūpavattanmayaṃ turīyasvarūpam | antarāditye jyotiḥsvarūpo 
haṃsaḥ || 21 || yajñāṅgaṃ brahmasaṃpattiḥ | 
brahmapravṛttitatpraṇavahaṃsasūtreṇaiva dhyānamācaranti || 22 ||

	haṃsapraṇavayoḥ abhedaṃ vaktuṃ bhūmikāṃ karoti- 
yajñasūtramiti | yajñatvena sūcanāt yajñasūtraṃ brahmapraṇavaṃ 
praṇavaḥ, yajñasya viṣṇoḥ praṇavārthatvāt brahmayajñakriyā 
niṣkāmakarmāniṣṭhānasahakṛtadhyānasamādhiḥ, tadanuṣṭhātā 
brāhmaṇaḥ, tasya parāparabrahmavittvāt | brahmabhāve manaścāro 
brahmacaryaṃ vidurbudhāḥ iti śrutyanurodhena devā indrādayo'pi sadā 
brahmacaryeṇa caranti, teṣāṃ prajāpatiśiṣyatvena brahmavittvāt | yajñā 
api haṃsasūtracaryāḥ antaryajñānāṃ 
pratyāhāradhāraṇādhyānasamādhīnāṃ 
haṃsasūtracaryābhirvāvahetutvāt | ātmamantrasya haṃsasya 
parasparasamanvayāt iti smṛtisiddhaḥ haṃsapraṇavayorabhedaḥ, 
vācyavācakayorekatvāt || 19 || haṃsapraṇavayorekatvaṃ kathamityatrāha- 
haṃsasyeti | pratyagabhinnaparamātmano haṃsasya āptyupāyabhūtāḥ 
prārthanāḥ śraṇavādayaḥ | te trikālāḥ, śravaṇādīnāṃ 
kālaparicchedyatvāt | bhūtāditrikālā eva akārāditrivarṇāḥ | 
viśvavirāḍotrāditretāgnyanusaṃdhāno'nusaṃdhānamantaryāgaḥ | tat 
kathamityatra- viśvāditretāgnyātmanāṃ dvituryāvikalpaparyavasannā-
nāṃ vyaṣṭisamaṣṭitadubhayaikyākārādyākṛtivarṇavadoṃkārārtha-
niṣpratiyogikaturyaturyahaṃsaḥ 
svamātramityanusaṃdhāno'nusaṃdhānamantaryāgaḥ || 20 || 
viśvavirāḍotrādicitsvarūpavattanmayaṃ tadgataheyāṃśāpāyasiddhaṃ 
turyapravibhaktaturīyasvarūpam | tadvikalpitāntarāditye 
svāntaḥkāmādivṛttyavabhāsakapratyaksūrye tadabhedena 
vidyotamānajyotiḥsvarūpo haṃsaḥ paramātmā || 21 || 
tadanusaṃdhānātmakāntaryajñābhidhānāṅgaṃ 
samyagjñānamaṅgibrahmasaṃpattihetuḥ, 
svāptesvātiriktāsaṃbhavasiddhasvajñānapūrvakatvāt |

p. 235) ata eva brahmavidādayaḥ parākpravṛttinirasanapūrvakaṃ 
pratyagabhinnabrahmagocarā pravṛttiḥ tadālambanabhūtaḥ praṇavaḥ 
tadarthabhūtapratyakparavibhāgaikyāsahaturyaturyahaṃsarūpeṇa 
turīyoṃkārāgravidyotaṃ turyaturyaṃ brahmamātramasanna hi 
ityādiśrutitatisūcanāt haṃsasūtraṃ madvyatiriktamaṇumātraṃ na vidyate 
iti nirviśeṣabrahmajñānaṃ tenaiva haṃsaḥ svamātramiti 
dhyānamācaranti | evaṃniṣṭhāḥ tatsvarūpā eva bhavantītyarthaḥ || 22 ||

ṣaṇṇavatihaṃsasūtrāṇi

	provāca punaḥ svayaṃbhuvaṃ pratijānīte brahmapūtro 
ṛṣirvālakhilyaḥ | haṃsasūtrāṇi katisaṃkhyāni kiyadvā pramāṇam || 23 || 
hṛdādityamarīcīnāṃ padaṃ ṣaṇṇavatiḥ | citsūtrāghrāṇayoḥ 
svarnirgatā praṇavādhārā ṣaḍṅguladaśāśītiḥ || 24 ||

	bālakhilyaḥ svayaṃbhūmukhāt evamavagamya punaḥ 
svāvagatidārḍhyāya brahmayajñasūtreyattāṃ pṛcchatītyāha- provāceti | 
vālakhilyo muniḥ punaḥ svayaṃbhuvaṃ prati he bhagavan- bhavān sarvaṃ 
pratijānīte, tava niraṅkuśasarvajñatvāt- haṃsasya paramātmanaḥ 
prāpakatayā sūcanāt sūtrāṇi katisaṃkhyākāni kiyadvā tatpramāṇaṃ 
tadiyatteti tadbubhutsayā provāca pṛṣṭavān || 23 || praśnottaraṃ 
bhagavānāha- hṛdīti | hṛdi 
vilasitakāmādivṛttisahasrabhāvābhāvaprakāśacidādityamarīcīnāṃ 
tattvakiraṇānāṃ varāhopaniṣatprakāśitānāṃ padaṃ svarūpaṃ 
ṣaṇṇavatiḥ, kārpāsakayajñasūtraṣaṇṇavatitulyamityarthaḥ 
ṣaṇṇavatisaṃkhyākacittattvamarīcayaḥ kva āvirbhūtā ityatra- 
citsūtropalabdhihetuhṛdayādyāghrāṇayoḥ viśvakāyavirāḍḍhṛdaye 
tatsaṃkalpata āvirbhūya- āghrāṇa ityatrākāraḥ chāndasaḥ- ghrāṇayoḥ 
ghrāṇābhyāṃ akārādisvarātmakocchvāsarūpeṇa bahirnirgatāni 
tattvāni

p. 236) teṣāṃ bhedāḥ | kimādhārā ityatra 
parāparabrahmādhiṣṭhitapraṇavādhārāḥ santaḥ adyāpi vartante | 
katividhā ityatra ṣaḍaṅguladaśāśītiḥ ṣaṇṇavatividhā bhavanti | yadvā- 
ṣaṇṇavatyaṅgulaparimitaṣaṇṇavatitattvātmakā bhavanti || 24 ||

haṃsātmavidyaiva muktiḥ

	vāmabāhudakṣiṇakaṭyorantaścarati haṃsaḥ paramātmā 
brahmaguhyaprakāro nānyatra viditaḥ || 25 || ye jānanti te'mṛtaphalakāḥ | 
sarvakālaṃ haṃsaṃ na prakāśakam | praṇavahaṃsāntardhyānaprakṛtiṃ 
vinā na muktiḥ || 26 ||

	itthaṃbhūtavirāṭcharīravāmabāhudakṣiṇakaṭyorantaścarati 
haṃsaḥ paramātmā yathā yajñasūtraṃ vāmabāhudakṣiṇakaṭyantaṃ 
virājate tathā vāmabāhudakṣiṇakaṭyupalakṣitasarvāṅgaṃ 
svāvidyāpadatatkāryajātaṃ tadantarbahiśca 
viśvaviśvādyavikalpānujñaikarasāntabhedena carati | vastutastu haṃsaḥ 
tatsarvāpahnavasiddhaparamātmarūpeṇa avaśiṣyata iti yo'rthaḥ 
so'yamartho brahmaguhyaprakāraḥ nānyatra viditaḥ, atraiva viśeṣataḥ 
prakaṭitatvāt || 25 || vidyāphalamāha- ya iti | kiṃ sarve'pyevaṃ haṃsaṃ 
ātmatayā viditvā tadvedanaphalaṃ amṛtatvaṃ nāpnuyuḥ ityata āha- sarveti 
|

śrutiḥ smṛtirmamaivājñā yastāmullaṅghya vartate |
ājñācchedī mama drohī madbhakto'pi na vaiṣṇavaḥ ||

iti smṛtisiddhasvājñārūpaśrutismṛtimārgollaṅghakānāṃ 
niṣpratiyogikabrahmamātraṃ bhāvarūpaṃ 
brahmātiriktāvidyāpadatatkāryajātamapi niṣpratiyogikābhāvarūpaṃ 
nānayoḥ vācyavācakakāryakāraṇādhārādheyatvam astīti sarvakālaṃ 
sadā na prakāśakaṃ

p. 237) haṃsamātmānaṃ, viddhīti śeṣaḥ | teṣāṃ 
svāparādhadoṣāvṛtatvāt divābhītasūryavadātmā svarūpaprakāśako 
na bhavatītyarthaḥ | sattvakṛteḥ muktiḥ netarasyetyāha- praṇaveti | 
praṇavahaṃsaḥ svāntaḥpraṇavārthaturyaturyahaṃsaḥ so'hamiti 
dhyānaprakṛtiḥ dhyānaśīlo jīvanmuktaḥ | tasya muktiḥ karasthā | taṃ 
vinā na kasyāpimuktirasti || 26 ||

bāhyāpekṣayā āntarayāgasya śreṣṭhatvam

	navasūtrān paricarcitān | te'pi yadbrahma caranti | antarādityaṃ na 
jñāataṃ manuṣyāṇām || 27 || jagadādityo rocana iti jñātvā te martyā 
vibudhāstapanaprārthanāyuktā ācaranti || 28 || vājapeyaḥ paśuhartā 
adhvaryurindro devatā ahiṃsā dharmayāgaḥ paramahaṃso'dhvaryuḥ 
paramātmā devatā paśupatiḥ || 29 || brahmopaniṣado brahma | 
dvādhyāyayuktā brahmaṇāścaranti || 30 ||

	ye tu punaḥ viśvavirāḍotrādiprājñabījānujñaikarasāntatayā 
mitho bhidācarcitān parasparabhedena vyāhṛtān navasūtrān ātmeti 
bhajanti te'pi yat brahmeti vadanti tadeva caranti bhajanti, 
viśvādinavakagataheyāṃśāpāye teṣāmapi brahmarūpatvāt | tathāpi te 
yathāvat na jānantītyāha- antariti | manuṣyāṇāṃ manuṣyaiḥ 
svāntarvilasitacidādityasvarūpaṃ na jñātaṃ, teṣāṃ 
svājñānāvṛtatvāt || 27 || teṣāṃ kutra ruciḥ ? jagadātmakādityo rocate, 
teṣāṃ nāmarūpamohitadṛṣṭitvāt | te paramārthāt hīyanta ityarthaḥ | 
kecana evaṃ jñātvā martyā vibudhāśca 
svājñānajasvātiriktadhvāntagrāsacittapanaprārthanāyuktāḥ 
cidādityo'smīti nityānusaṃdhānaśīlāḥ paramārthatattvamācaranti || 28 || 
kimācarantītyatra antaryāgamityāha- vājapeya iti | vājaṃ 
svātiriktānnarasaṃ pibatīti

p. 238) vājapeyo nirviśeṣajñānayajñaḥ | 
dehādāvātmātmīyābhimatipaśuṃ haratīti paśuhartā | ya indraḥ 
parameśvaro devatātvena abhimataḥ sa eva adhvaryuḥ bhūtvā 
jñānayajñacālako bhavati | bāhyayajñāpekṣayā asya śraiṣṭhye hetuḥ 
ahiṃsātmako'yaṃ mokṣadharmayāgaḥ | jñānayāganirvāhako'dhvaryuḥ 
paramahaṃsaparivrājaka eva | yajñadevatā tu paśupatiḥ paramātmaiva 
devatā || 29 || itthaṃbhūtabrahmopaniṣadaḥ paramatātparyārthastu 
brahmaiva netarat, brahmaṇo vedavedāntārthatvāt | ke evaṃ ācarantītyatra- 
svādhyāyayuktā vedavedāntārthapārīṇāḥ brāhmaṇāḥ ācaranti, 
teṣāṃ jñānayajñe mukhyādhikāritvāt || 30 ||

jñānayajñarūpo'śvamedhaḥ

	aśvamedho mahāyajñakathā | tadrājñā brahmacaryamācaranti | 
sarveṣāṃ pūrvoktabrahmayajñakramaṃ muktikramamiti || 31 ||

	mahāyajñakathā kīdṛśī ityatra- svātiriktaprapañcapaśumedhanaṃ 
viśasanaṃ apahnavaḥ, śvaḥ paraśvo vā bhavatviti 
viśvāsānarho'śvamedhaḥ svajñānasamakālameva 
svātiriktasāmānyasya apahnotuṃ yuktatvāt | iyameva hi 
nirviśeṣamahājñānayajñakathā khyātirityarthaḥ | 
tādṛśāśvamedhamahāyajñe niṣpratiyogikasvamātratayā rājata iti 
tadrājā tena tadrājñā svakṛtasādhanānuṣṭhānena ye anugṛhītāḥ 
kṛtārthā bhavantviti te hi dvividhabrahmacaryamācaranti brahmacaryasya 
tatprasādabahirbhūtānāṃ sudurlabhatvāt iti yat tat sarveṣāṃ 
mumukṣūṇāṃ yo brahmaprāpakamārgo'sti taṃ 
pūrvoktabrahmayajñakramaṃ muktikramaṃ ceti viddhi || 31 ||

tārakahaṃsajyotiḥ

	brahmaputraḥ provāca | udito haṃsa ṛṣiḥ | svayaṃbhūstirodadhe | 
rudro brahmopaniṣado haṃsajyotiḥ paśupatiḥ praṇavastārakaḥ sa evaṃ veda 
|| 32 ||

p. 239) iti svayaṃbhuvā anugṛhītaḥ brahmaputraḥ vālakhilyagaṇaḥ 
provāca | kimiti ? bhagavadupadeśamahimnā udito haṃsa ṛṣiḥ 
sarvāpahnavasiddhaniṣpratiyogikasvamātratayā haṃsaḥ paramātmā 
prādurbhūtaḥ, tena ahaṃ kṛtakṛtyo'smīti śiṣyoktimākarṇya atīva 
harṣitaḥ san svayaṃbhūstirodadhe | svasvarūpaṃ gatavānityarthaḥ | rudro 
vaiśravaṇo'pyevaṃ vedetyāha- rudra iti | vaiśravaṇena sākaṃ rudro'pi 
svayaṃbhūmukhataḥ brahmopaniṣadaḥ paramāśayo brahmatārakārthaḥ 
paśupatiḥ haṃsajyotirasmītyevaṃ viditavānityarthaḥ || 32 ||



uttarakāṇḍaḥ

akhaṇḍavṛttyā brahmasaṃpattiḥ

haṃsātmamālikā varṇabrahmakālapracoditā |
paramātmā pumāniti brahmasaṃpattikāriṇī |
adhyātmabrahmakalpasya ākṛtiḥ kīdṛśī kathā || 1 ||

	kathaṃ evaṃ viditavānityata āha- haṃseti | abhidheyarūpasya 
haṃsātmano mālikāvarṇo'bhidhānātmako'yamoṃkāraḥ 
tadartharūpaṃ brahmaiva kāleśvarasvarūpamāsādya evaṃ 
kartavyamevamakartavyamiti sarvaprāṇihitāhitaviṣayapracoditā pracodayitā 
prerako bhavati | svena rūpeṇa pumān īśvaraḥ svagataviśeṣāpāye 
niṣpratiyogikaparamātmā svamātramavaśiṣyata iti yā 
saṃvidakhaṇḍākāravṛttirudeti seyaṃ brahmasaṃpattiṃ karotīti 
brahmasaṃpattikāriṇī bhavati iti yā brahma veda brahmaiva bhavati 
ityādivedāntaprasiddhā saivādhyātmabrahmakalpasyāptāvākṛtiḥ 
niraṅkuśopāyabhūtetyarthaḥ | uktārthadārḍhyāya codayatyevam- kīdṛśī 
katheti || 1 ||

p. 240)		paramātmani jagadāvirbhāvo māyikaḥ

brahmajñānaprabhā saṃdhyā kālo gacchati dhīmatām
haṃsākhyo devamātmākhyamātmatattvaprajā katham || 2 ||

antaḥpraṇavanādākhyo haṃsaḥ pratyayabodhakaḥ |
antargatapramāgūḍhaṃ jñānanālaṃ virājitam || 3 ||

śivaśaktyātmakaṃ rūpaṃ cinmayānandaveditam |
nādabindukalā trīṇi netraviśvaviceṣṭitam || 4 ||

triyaṅgāni śikhā trīṇi dvitrīṇi saṃkhyamākṛtiḥ |
antargūḍhapramā haṃsaḥ pramāṇānnirgataṃ bahiḥ || 5 ||

	brahmākāravṛttikathā kīdṛśī ityatra- brahmajñānasūryaprabhā 
pratyakparacitsiddhimaikyaṃ karotīti saṃdhyetyucyate | tayā hi khalu 
dhīmatāṃ jīvanmuktānāṃ kālo gacchati, jīvanmuktānāṃ 
nirviśeṣabrahmasamādhikṣapitakālatvāt | 
svātiriktaparākprapañcagrāsahaṃsākhyaḥ pratyagdevaṃ 
svaprakāśacinmātraṃ paramātmānaṃ bhajati cet tadā svātmatattve 
kathaṃ viśvavirāḍotrādiprajā jāyate || 2 || ityatra- paramārthataḥ 
svātirekeṇa kāpi prajā na jāyate, māyayā punaḥ pratyagādibhāvametya 
yadā bhāsate tadā tadbhāsyavargo'pi jāta iva lakṣyata ityāha- antariti | 
nāradaparivrājakopaniṣadyaṣṭamātrātmako'ntaḥpraṇavaḥ samyak 
prapañcitaḥ | tatrāntaḥpraṇavanādāvabhāsakaḥ pratyak haṃsaḥ 
svāntarbāhyavikalpitaparākpratyayakadambabodhako'vabhāsako bhavati | 
tathā cet kiṃ tat pratyaktattvaṃ na dṛśyata ityatra- 
parāgdṛśāmantargatapramayā gūḍhaṃ bhāti

p. 241) taddṛṣṭyā jñānanālaṃ sarvaprakāśakajñānapratyagrūpeṇa 
prakāśituṃ nālaṃ nālaṃ, samarthamiva na hi sthitamityarthaḥ | kiṃ 
tadaprakāśātmakam ? ityatra- svena rūpeṇa virājitaṃ tasya 
svayaṃprakāśatvena sarvaprakāśakatvāt || 3 || kaiḥ evaṃ viditam ityatra- 
pratyagdṛṣṭibhiḥ yat śivaśaktyātmakaṃ śabalarūpaṃ tadeva 
svagataviśeṣāṃśāpāyataḥ saccidānando'smīti veditaṃ bhavatītyatra

eṣa sarveṣu bhūteṣu gūḍhotmā na prākāśate |
dṛśyate tvagryayā buddhyā sūkṣmayā sūkṣmadarśibhiḥ ||

iti śruteḥ | punaḥ svājñadṛṣṭyā nādabindukalā iti praṇavāvayavāḥ 
tatkāryāṇi anugrahopasaṃhāratirodhānāni trīṇi 
sadāśivādyadhiṣṭhitāni etadvikalpajātaṃ dakṣiṇākṣimukhe viśvaḥ iti, 
netrasthaṃ jāgaritaṃ vidyāt iti ca, śrutisiddhanetrādicaturdaśakaraṇa-
nirvartyajāgradavasthābhimāniviśvaviceṣṭitaṃ vikalpitamityarthaḥ || 4 || 
viśvena kāni kāni vikalpitānītyatra- sthūlasūkṣmakāraṇabhedena 
tryaṅgāni śarīrāṇi tadārūḍhaviśvataijasaprājñākhyaśikhārūpāṇi 
trīṇi dvitrīṇi pañcabhūtatatkāryabhautikāni saṃkhyaṃ saṃkhyāni yāni 
saṃkhyāvācakāni sarvatra ākṛtiḥ nāmarūpavikṛtiśca uktāni anuktāni 
ca sarvāṇi viśvasvājñānavikalpitānītyarthaḥ | 
evaṃvikalpakaviśvagatavikalpāpāye sa eva pratyak bhavatītyāha- antariti | 
yaḥ purā sarvaprāṇyantargūḍhapramārūpeṇa haṃso vartate satyaṃ 
jñānamanantaṃ brahma ityādiśrutipramāṇāt 
pratyagabhinnabrahmatattvaṃ bahirnirgataṃ prakāśitaṃ bhavati | yadevaṃ 
śrutipramāṇasiddhaṃ tadeva saccidānandamātmānamadvitīyaṃ brahma 
bhāvayet || 5 ||

haṃsārkapraṇavadhyānavidhiḥ

brahmasūtrapadaṃ jñeyaṃ brāhmyaṃ vidhyuktalakṣaṇam |
haṃsārkapraṇavadhyānamityukto jñānasāgare || 6 ||

etadvijñānamātreṇa jñānasāgarapāragaḥ |

p. 242) ātmānamevāvedahaṃ brahmāsmi iti 
vidhicchāyāpahnava[panna]vākyoktalakṣaṇaṃ brāhmyaṃ 
brahmamātratayā sūcanāt brahmasūtraṃ svāvaśeṣatayā padyata iti 
padaṃ sadaikarūpeṇa vijṛmbhata iti jñeyam | evaṃ 
haṃsārkapraṇavadhyānaṃ yaḥ karoti so'yaṃ jñānasāgare brahmaṇi 
samāpto bhavedityukto bhavati || 6 || yaḥ ko'pi mumukṣuḥ etaduktalakṣaṇaṃ 
brahmāhamasmīti vijñānamātreṇa svāntarbāhyavijṛmbhitasvātirikta-
jñānājñānatatkāryabhramasāgarapāraniṣpratiyogikabrahmamātrā-
vasthānalakṣaṇavikalebarakaivalyato bhavatītyarthaḥ ||

paracita eva karaṇaprerakatvam

svataḥ śivaḥ paśupatiḥ sākṣī sarvasya sarvadā || 7 ||

sarveṣāṃ tu manastena preritaṃ niyamena tu |
viṣaye gacchati prāṇaśceṣṭate vāgvadatyapi || 8 ||

cakṣuḥ paśyati rūpāṇi śrotraṃ sarvaṃ śṛṇotyapi |
anyāni khāni sarvāṇi tenaiva preritāni tu || 9 ||

svaṃ svaṃ viṣayamuddiśya pravartante nirantaram |
pravartakatvaṃ cāpyasya māyayā na svabhāvataḥ || 10 ||

śrotramātmani cādhyastaṃ svayaṃ paśupatiḥ pumān |
anupraviśya śrotasya dadāti śrotratāṃ śivaḥ || 11 ||

manaḥ svātmani cādhyastaṃ praviśya parameśvaraḥ |
manastvaṃ tasya sattvastho dadāti niyamena tu || 12 ||

sa eva viditādanyastathaivāviditādapi |
anyeṣāmindriyāṇāṃ tu kalpitānāmapīśvaraḥ || 13 ||

tattadrūpamanuprāpya dadāti niyamena tu |

p. 243) svājñavikalpitakaraṇagrāmasattve taccālakaḥ kaḥ ? ityata āha- 
svata iti || 7 || svasvaviṣaye || 8-9 || na svabhāvataḥ, svato nirvikāratvāt || 10-12 
|| svasyaiva karaṇatvaṃ karaṇagrāmacālakatvaṃ yadi tadā ayaṃ saṃsārī 
syādityāśaṅkya tatrātmātmīyābhimānābhāvāt tadvilakṣaṇato na 
saṃsārītyāha- sa eveti | yaḥ karaṇajātasvarūpī san taccālako'pi bhavati sa 
eva || 13-14 ||

ātmānyasya māyākalpitatvam

tataścakṣuśca vāk caiva manaścānyāni khāni ca || 14 ||

na gacchanti svayaṃjyotiḥsvabhāve paramātmani |
akartṛviṣayapratyakprakāśaṃ svātmanaiva tu || 15 ||

vinā tarkapramāṇābhyāṃ brahma yo veda veda saḥ |

	ityādi kenopaniṣadi samyak prapañcitamityarthaḥ | 
samānaprakaraṇatvāt pratyaktvamapi māyikamityatrāha- akartṛviṣayeti || 15 
||

vastutaḥ svātmani māyāsaṃbhavaḥ

pratyagātmā paraṃ jyotirmāyā sā tu mahattamaḥ || 16 ||

tathā sati kathaṃ māyāsaṃbhavaḥ pratyagātmani |
tasmāt tarkapramāṇābhyāṃ svānubhūtyā ca cidghane || 17 ||

svaprakāśaikasaṃsiddhe nāsti māyā parātmani |
vyāvahārikadṛṣṭyeyaṃ vidyāvidyā na cānyathā || 18 ||

p. 244) tattvadṛṣṭyā tu nāstyeva tattvamevāsti kevalam |
vyāvahārikadṛṣṭistu prakāśāvyabhicārataḥ || 19 ||

prakāśa eva satataṃ tasmādadvaita eva hi |
advaitamiti coktiśca prakāśāvyabhicārataḥ || 20 ||

prakāśa eva satataṃ tasmānmaunaṃ hi yujyate |

	vastutaḥ svātmani māyāsaṃbhavamāha- pratyagiti || 16 || 
yasmādevaṃ tasmāt || 17-18 || svātirekeṇa vyāvahārikadṛṣṭirapi 
nāstītyāha- vyāvahāriketi || 19 || advaitamityuktirapi na tāttvikītyāha- 
advaitamiti, taddvaitasāpekṣā advaitamiti coktiḥ || 20 ||

ātmajñāninaḥ brahmātmatvam

ayamartho mahān yasya svayameva prakāśitaḥ || 21 ||

na sa jīvo na ca brahmā na cānyadapi kiṃcana |
na tasya varṇā vidyante nāśramāśca tathaiva ca || 22 ||

na tasya dharmo'dharmaśca na niṣedho vidhirna ca |
yadā brahmātmakaṃ sarvaṃ vibhāti svata eva tu || 23 ||

tadā duḥkhādibhedo'yamābhāso'pi na bhāsate |
jagajjīvādirūpeṇa paśyannapi parātmavit || 24 ||

na tat paśyati cidrūpaṃ brahmavastveva paśyati |
dharmadharmitvavārtā ca bhede sati hi bhidyate || 25 ||

p. 245) bhedā[do']bhedastathā bhedābhedaḥ sākṣāt parātmanaḥ |
nāsti svātmātirekeṇa svayamevāsti sarvadā || 26 ||

brahmaiva vidyate sākṣādvastuto'vastuto'pi ca |
tathaiva brahmavijjñānī kiṃ gṛhṇāti jahāti kim || 27 ||

adhiṣṭhānamanaupamyamavāṅmanasagocaram |
yattadadreśyamagrāhyamagotraṃ rūpavarjitam || 28 ||

acakṣuḥśrotramatyarthaṃ tadapāṇipadaṃ tathā |
nityaṃ vibhuṃ sarvagataṃ susūkṣmaṃ ca tadavyayam || 29 ||

brahmaivedamamṛtaṃ tat purastād
brahmānandaṃ paramaṃ caiva paścāt |
brahmānandaṃ paramaṃ dakṣiṇe ca
brahmānandaṃ paramaṃ cottaraṃ ca || 30 ||

svātmanyeva svayaṃ sarvaṃ sadā paśyati nirbhayaḥ |
tadā mukto na muktaśca baddhasyaiva vimuktatā || 31 ||

	evaṃjñānī śiva evetyāha- ayamiti || 21 || brahmā caturmukhaḥ || 22-
25 || bhedābhedaḥ sākṣāt parātmanaḥ- sāpekṣabhedābhedayoḥ 
saviśeṣatvāt- nāsti || 26-28 || tadapāṇipadaṃ tathā- ityādi 
muṇḍakopaniṣatsamānaprakaraṇamityarthaḥ || 29-35 ||

satyādi paravidyāsādhanam

evaṃrūpā parā vidyā satyena tapasāpi ca |
brahmacaryādibhirdharmairlabhyā vedāntavartmanā || 32 ||

p. 246) svaśarīre svayaṃjyotiḥsvarūpaṃ pāramārthikam |
kṣīṇadoṣāḥ prapaśyanti netare māyayāvṛtāḥ || 33 ||

svajñasya kvacit gamanābhāvaḥ

evaṃ svarūpavijñānaṃ yasya kasyāsti yoginaḥ |
kutracidgamanaṃ nāsti tasya saṃpūrṇarūpiṇaḥ || 34 ||

ākāśamekaṃ saṃpūrṇaṃ kutracinna hi gacchati |
tadvabrahmātmavicchreṣṭhaḥ kutracinnaiva gacchati || 35 ||

brahmajñāninaḥ abhakṣyābhāvaḥ

abhakṣyasya nivṛttyā tu viśuddhaṃ hṛdayaṃ bhavet |
āhāraśuddhau cittasya viśuddhirbhavati svataḥ || 36 ||

citte śuddhe kramājjñānaṃ truṭyante granthayaḥ sphuṭam |
abhakṣyaṃ brahmavijñānavihīnasyaiva dehinaḥ || 37 ||

na samyagjñāninastadvat svarūpaṃ sakalaṃ khalu |
ahamannaṃ sadānnāda iti hi brahmavedanam || 38 ||

brahmavid grasati jñānāt sarvaṃ brahmātmanaiva tu |
brahmakṣatrādikaṃ sarvaṃ yasya syādodanaṃ sadā || 39 ||

yasyopasecanaṃ mṛtyustajjñānī tādṛśaḥ khalu |
brahmasvarūpavijñānājjagadbhojyaṃ bhavet khalu || 40 ||

p. 247) jagadātmatayā bhāti yadā bhojyaṃ bhavet tadā |
brahmasvātmatayā nityaṃ bhakṣitaṃ sakalaṃ tadā || 41 ||

yadābhānena rūpeṇa jagadbhojyaṃ bhavettu tat |
mānataḥ svātmanā bhātaṃ bhakṣitaṃ bhavati dhruvam || 42 ||

svasvarūpaṃ svayaṃ bhuṅkte nāsti bhojyaṃ pṛthak svataḥ |
asti cedastitārūpaṃ brahmaivāstitvalakṣaṇam || 43 ||

	āhāraśuddhiḥ cittaśuddhidvārā jñānahetuḥ svājñānām | 
svajñānī tu svātiriktaṃ sarvaṃ svamātratayā grasatītyāha- abhakṣyasyeti 
|| 36 || jñānaṃ jāyate tena truṭyante || 37-45 ||

jñāninaḥ svasarvātmatvadarśanam

astitālakṣaṇā sattā sattā brahma na cāparā |
nāsti sattātirekeṇa nāsti māyā ca vastutaḥ || 44 ||

yogināmātmaniṣṭhānāṃ māyā hyātmani kalpitā |
sākṣirūpatayā bhāti brahmajñānena bādhitā || 45 ||

brahmavijñānasaṃpannaḥ pratītamakhilaṃ jagat |
paśyannapi sadā naiva paśyati svātmanaḥ pṛthak || 46 ||

ityupaniṣat ||

	sarvāpahnavasiddhaṃ brahma niṣpratiyogikaṃ svamātramavaśiṣyate 
na kadācit tadatiriktamastīti brahmavijñānasaṃpanno yogī 
svājñadṛṣṭipratītam akhilaṃ jagat

p. 248) marumarīcitulyatayā kadācit paśyannapi sadā tat svātmanaḥ pṛthak 
naiva paśyati | brhmamātrasya niṣpratiyogikatvena brahmātiriktamasti nāstīti 
nahi vibhrabhāvakāśo'stītyarthaḥ || 46 || ityupaniṣacchabdaḥ 
prakṛtopaniṣatsamāptyarthaḥ ||

śrīvāsudevendraśiṣyopaniṣadbrahmayoginā |
pāśupatopaniṣado vyākhyānaṃ likhitaṃ laghu |
pāśupatīyavivṛtiḥ dviśatagranthabhūṣitā ||

iti śrīmadīśādyaṣṭottaraśatopaniṣacchāstravivaraṇe 
saptasaptatisaṃkhyāpūrakaṃ pāśupatabrahmopaniṣadvivaraṇaṃ  
saṃpūrṇam


###########   END OF FILE  #######