####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00214
Uniform title: paraśurāmakalpasūtra
Main title: paraśurāmakalpasūtra  with commentary by rāmeśvara
Commentator : rāmeśvara
Editor : a. mahādeva śastri
Editor : s. y. śastri dave

Description: 
paraśurāmakalpasūtra  with commentary by rāmeśvara


Notes: 
Data entered by the staff of Muktabodha under the supervision of Mark S.G. Dyczkowski.

Revision 0: April 5, 2010          
Revision 1: Sept. 18, 2010 - chapters 7 thru end added

Publisher : Baroda Oriental Institute
Publication year : 1950
Publication city : Baroda
Publication country : India
####################################################



oṃ 

śrīmahātripurasundaryai namaḥ |

śrīparaśurāmakalpasūtram 

rāmeśvarakṛtavṛttisahitam |

paraśūjjvalahastābjo jaṭāmaṇḍalamaṇḍitaḥ | 
dadātu cirajīvitvaṃ prasannātmā bhṛgūdvahaḥ ||

prathamaḥ khaṇḍaḥ-dīkṣāvidhiḥ |

vṛttibhūmikā [atra vṛttiśabdena etanmūlagranthasyopari 
saubhāgyodayanāmakaṃ vivaraṇaṃ jñeyam | 
etadattikārābhidhānavṛttiracanāsamayādijñānāya agre dvitīyapariśiṣṭe 1-
viṣayo dṛśyaḥ |]

atra maṅgalam 

śrīvallabhāpayodharasaṃliptāleparañjitoraskam |
vande gajendravadanaṃ bālasahasrāṃśukoṭisacchāyam ||

yā paraśive sphurattā pūrṇā'hantāpadena saṃśliṣṭā |
dvaitaṃ bhāvaṃ prāptā paścādambāṃ parāmimāṃ kalaye || 

yā pañcapretasaṃsthā paraśivanilayapā śaktayaḥ kāmabuddhi-
karmādyā yanmayūkhāḥ samudayaparirakṣā'ntakartryo babhūvuḥ |

yā paśyantyādirūpā sakalajanavacojālamāviṣkaroti 
sā me vāgdevateyaṃ vilasatu vadane cittamālinyahantrī ||

śrīmadyaśovadambābhāsuravāmāṅkamajñatā'dripavim |
mama vidhisuṣirasaroruhakalpitanilayaṃ namāmi nāthendram ||

yo bhṛgavaṃśe bhūtvā kṣatraṃ jaghne trisaptakṛtvastam |
ṣaṣṭhaṃ śrīmadviṣṇoravatāraṃ naumi vīrendram || 

p. 2)

subrahmaṇyaṃ ca pitaraṃ guruvāmbāṃ ca mātaram |
praṇamāmi phalāvāptyai tāveva śaraṇaṃ mama || 

vicārya nānātantrādīn mīmāṃsānyāyavistaram |
nānādeśasamānītapustakaiḥ pariśodhya ca ||

jāmadagnyena racitaṃ kalpasūtraṃ yathāmati |
vistārayati gūḍhārthaṃ śrīvidyopāstisiddhaye ||

rāmeśvaraḥ śrīlalitāpreritaḥ kāśyapodbhavaḥ ||

dīkṣā'dhikāraḥ 

iha khalu śrībhagavān śrīparaśurāmaḥ ādhunikeṣu mandamatiṣu kṛpāluḥ 
śrīśivanirmitānyasaṃkhyāni [etāvatedaṃ pratīyate sarvatantragranthānāṃ 
kartā bhagavān śivaḥ iti-atra dvi0 pariśiṣṭe-3 vi- dṛśyaḥ |] tantrāṇi paryāloḍya 
sarvāṇyupasaṃhṛtya turīyapuruṣārthasādhanaṃ laghumadhvānaṃ darśayan 
pratijānīt-

athāto [ito granthamārabhate bhagavān śrījāmadagnyo rāmaḥ-
taddhyānaprakāraḥ-tatpituḥ śrījamadagnimaharṣeḥ pūrvajanmakathā ca-dvi0 
pariśiṣṭe-2-viṣaye-dṛśyā |] dīkṣāṃ [ita ārabhya purastana-33 
sūtrabhāṣyāntaṃ yāvaddīkṣāvidhau jñātavyamasti dīkṣāprayogārambhastu-
34-sūtrādastīti jñeyam |] vyākhyāsyāmaḥ || 1 ||

atha athaśabdaḥ maṅgaladyotakaḥ,

oṅkāraścāthaśabdaśca dvāvetau brahmaṇaḥ purā |
kaṇṭhaṃ bhittvā viniryātau tasmānmāṅgalikāvubhau || 

iti smaraṇāt | ataḥśabdaśca ānantaryadyotakaḥ | ānantaryasyāvadhyapekṣāyāṃ 
samīpavartitvāt maṅgalācaraṇaṃ nānātantrapariśodhanaṃ vā avadhitvena 
anveti | yadvā- athāta iti militvā ārambhadyotakaḥ athāto darśapūrṇamāsau 
vyākhyāsyāmaḥ ityāpastambasūtrabhāṣye athātaśśabdo'yaṃ 
prakaraṇārambhe prāyaḥ prayujyate vṛddhaiḥ | kvacidānantarye'pi yathā- ime 
bhṛgavo vyākhyātāḥ athātoṅgirasām ityādau | tathā na 
punarihānantaryamarthaḥ pūrvapravṛttasya kasya cidanantarasyānupalambhāt iti 
lekhāt | dīkṣāpadārthaṃ sūtrakāro'gre vivecayiṣyati | vyākhyāpadārthaśca 
nigūḍhābhiprāyakaśabdasya vivicya kathanam | prakṛte gūḍhārthānāṃ 
tantrāṇāmupasaṃhāreṇa vivicya kathanaṃ kalpasūtre iti lakṣaṇasamanvayaḥ | 
dīkṣāviṣayajñānānukūlaśabdaprayogakartā'hamiti 

pa. 3)

phalito'rthaḥ | vyākhyāsyāmaḥ iti 
bahuvacanamupāsanāpravartakācāryānanyānapi saṃgrahītum | yathā loke 
gurutarakāryanirmāṇe vayaṃ kūrmaḥ ityanye'pi saṃgṛhyante tathā | etena 
dīkṣāvyākhyānamatikaṭhinamiti sūcitam | yadvā- asmado dvayośca ekatve dvitve 
ca vivakṣite asmado bahuvacanaṃ syāditi tadarthaḥ | tathā ca asmacchabdasya 
kartṛvācakasya bahuvacanāntatvāt tatsamānavacanatvopapattaye 
vyākhyāsyāmaḥ iti bahuvacanam || 

tantrāprāmāṇyaśaṃkānirāsaḥ 

nanu kalpasūtravyākhyānaṃ vaidikānāmayuktaṃ tasya tantreṣu parigaṇitatvena 
tantrāṇāṃ kevalalobhaikamūlatvenāprāmāṇyāt | taduktaṃ vārtike 
bhaṭṭapādaiḥ-

lobhādikāraṇaṃ cātra bahvevānyat pratīyate |
yasmin sannihite dṛṣṭe nāsti mūlāntarānumā ||

śākyādayaśca sarvatra kurvāṇā dharmadeśanām |
hetujālavinirmuktāṃ na kadācana kurvate ||

na ca tairvedamūlatvamucyate gautamādivat |
hetavaścābhidhīyante ye dharmāddūrataḥ sthitāḥ ||

eta eva ca te yeṣāṃ vāṅmātreṇāpi nārcanam |
pāṣaṇḍino'pi karmasthā haitukāścaita eva hi ||

iti | evaṃ yānyanyāni trayīvidbhiḥ na parigṛhītāni 
kiṃcittanmiśrakañcukachāyāpatitāni 
lokopasaṃgrahalābhapūjākhyātiprayojanaparāṇi 
trayīviparītāsaṃbaddhadṛṣṭalobhādipratyakṣānumānopamānārthā-
pattiyuktimūlopanibaddhāni 
sāṃkhyayogapāñcarātraśākyagranthaparigṛhītadharmādharmanibandhanāni 
viṣacikitsāvaśīkaraṇoccāṭanonmādanādisamarthāni 
kādācitkasiddhidarśanabalena 
ahiṃsāsatyavacanadamadānadayā'diśrutismṛtisaṃvādistokārthagandhavāsita-
jīvikāprāyārthāntaropadeśīni yāni 
mlecchācāramiśrakabhojanācaraṇanibandhanāni 
teṣāmevaitacchrutivirodhahetudarśanābhyāmanapekṣaṇīyatvaṃ pratipādyate iti 
ca granthena | evaṃ śrīsūtasaṃhitāyāṃ brahmagītādvitīyādhyāye'pi-

vedamārgamimaṃ muktvā mārgamanyaṃ samāśritaḥ |
hastasthaṃ pāyasaṃ tyaktvā lihet kūrparamātmanaḥ ||

vinā vedena jantūnāṃ muktirmārgāntareṇa cet |
tamasyapi vinā'lokaṃ te paśyanti ghaṭādikam || 

p. 4)

tasmādvedodito hyarthaḥ satyaṃ satyaṃ mayoditam |
anyena vedito hyarthaḥ na satyaḥ paramārthataḥ || iti ||

tatra tatraiva tarkāṃśca pravadanti yathābalam |
sarve vādāḥ śrutismṛtyorviruddhā iti me matiḥ || iti ||

yajñavaibhavakhaṇḍe ekacatvāriṃśe'dhyāye-

bahunā'tra kimuktena śrutismṛtyuditaṃ vinā |
yatkiṃcidapi kurvāṇaḥ pātakī syānna saṃśayaḥ || 

iti vaidikānyamārganindā śrūyate | agnipurāṇe'pi vedarāśinā sākaṃ 
nārakiṇāṃ saṃvāde-

tantradīkṣāmanuprāptāḥ lobhopahatacetasā |
tyaktvā vaidikamadhvānaṃ tena dahyāmahe vayam || iti ||

padmapurāṇe puṣkaramāhātmye-

ye ca pāṣaṇḍino loke tāntrikā nāstikāśca ye |
tairduṣprāpamidaṃ tīrtham................................... ||

iti tāntrikapuruṣanindayā tantrasyāśraddheyatvaṃ spaṣṭam | evamanyeṣvapi 
bahupurāṇeṣu tantranindāyāḥ bahulamupalambhāt | 
mapañcakādaravidhāyakaśāstrasya lobhaikamūlatvaṃ suspaṣṭam | 
visarjanīyavāsograhaṇaśāstrasya lobhaikamūlatvaṃ sādhitam | kimu 
mapañcakasevakasya lobhamūlatve pratirodhaḥ | tasmāt idaṃ śāstramāstikaiḥ na 
vyākhyeyam iti cet-maivam [itastantraśāstraprāmāṇyasvīkaraṇaśāstrārthaḥ] | 
kiṃ bhaṭṭapādānāṃ purāṇāni pādmādīni pramāṇatvena abhimatāni na vā ? 
yadi pramāṇatvena abhimatāni tarhi teṣu tantraprāmāṇyaṃ bahuśaḥ 
adhikāriviśeṣaviṣaye śrūyate | tathāhi sūtasaṃhitāyāṃ 
brahmagītādvitīyādhyāye-

tathā'pi svapnadṛṣṭaṃ hi vastu svarganivāsinaḥ |
sūcakaṃ hi bhavatyeva jāgratsatyārthasiddhaye ||

tathaiva mārgāt saṃbhrāntā api vedoditasya tu |
arthasya prāptisiddhyarthā bhavantyeva na saṃśayaḥ ||

tasmādvedetarā mārgā naiva tyājyā nirūpaṇe || iti [etāvatā 
vedavadvedetaradharmyamārgāśrayaṇamapyaśāstrīyaṃ neti sidhyati ||] ||

p. 5)

sūtasaṃhitāyāṃ śivamāhātmyakhaṇḍe pañcamādhyāye-

pūjā śakteḥ parāyāstu dvividhā parikīrtitā |
bāhyābhyantarabhedena bāhyā ca dvividhā matā ||

vaidikī tāntrikī ceti dvijendrāstāntrikī tu sā |
tāntrikasyaiva nānyasya vaidikī vaidikasya hi ||

itthaṃ samastadevānāṃ pūjā viprā vyavasthitā || iti ||

evaṃ sūtasaṃhitāyāṃ muktikhaṇḍe-

pāñcarātrāditantrāṇāṃ [etena nāradapāñcarātrāditāntrikagranthānāṃ 
vedamūlatvaṃ tebhyaśca vaidikānāṃ 
vedāviruddhāṃśagrahaṇoktiścetyubhayamapi paraśivoditamiti sidhyati |] 
vedamūlatvamāstike |
na hi svatantrāste tena bhrāntimūlā nirūpaṇe ||

tathā'pi yoṃ'śomārgāṇāṃ vedena na virudhyate |
soṃ'śaḥ pramāṇamityuktaṃ keṣāṃcidadhikāriṇām || iti 

tāntrikāṇāmahaṃ devi labhyo'smi vyavadhānataḥ |
labhyo vedaikaniṣṭhānāmahamavyavadhānataḥ || iti ca ||

evaṃ tatraiva yajñavaibhavakhaṇḍe viśe'dhyāye-

śaivāgamodito dharmo dvidhā pūrvamudīritaḥ |
adhaḥsrotodbhavastveka ūrdhvasrotodbhavo'paraḥ ||

adhaḥsrotodbhavāddharmādūrdhvasrotodbhavo varaḥ |
kāmikādiprabhedena sa bhinno'nekadhā dvijāḥ ||

adhaḥsrotodbhavo dharmo bahudhā bheditastathā |
ūrdhvasrotodbhavāddharmāt smārtā dharmā mahattarāḥ || iti 

tatraiva dvāviṃśe'dhyāye-

tasmānmārgāntarāṇāṃ tu pramāṇyaṃ vedavittamāḥ |
mukteranyatra nātraiva krameṇaivātra mānatā ||

ato vedāntamārgastho mahādevo'cireṇa tu |
muktiṃ dadāti nānyatra sthitaḥ so'pi krameṇa tu ||
dadāti paramāṃ muktimityeṣā śāśvatī śrutiḥ || iti ||

p. 6)

tatraiva-

ato vedasthito martyo nānyamārgaṃ samāśrayet |
ato'dhikāribhedena mārgā mānaṃ na saṃśayaḥ ||

tatraivaikasmin parivṛtte tatratyaślokāḥ-

īśvarasya svarūpe ca brandhahetau tathaiva ca |
jagataḥ kāraṇe muktau jñānādau ca tathaiva ca ||

mārgāṇāṃ ye viruddhāṃśā vedāntena vicakṣaṇāḥ |
te'pi mandamatīnāṃ ca mahāmohāvṛtātmanām ||

vāñchāmātrānuguṇyena [idamatrāvadheyaṃ yat tantraśāstraṃ 
vedasiddhāntān kiyadāśrayatīti |] pravṛttā na yathā'rthataḥ |
darśayitvā tṛṇaṃ martyo dhāvantīṃ gāṃ yathā'grahīt ||

darśayitvā tathā kṣudramiṣṭaṃ pūrvaṃ maheśvaraḥ |
paścāt pākānuguṇyena dadāti jñānamuttamam ||

tasmāduktena mārgeṇa śivena kathitā amī |
mārgā mānaṃ ca cāmānaṃ mṛṣāvādī kathaṃ śivaḥ || iti ||

tathā brahmāṇḍapurāṇe-

svamātṛjāravad gopyā vidyaiṣetyāgamā jaguḥ ||

ityāgamānāṃ pramāṇatvenopanyāsaḥ | tathā [tāntrikasaraṇyā 
śāntikapauṣṭikakarmakaraṇopadeśaḥ tena phalaprāptiścātra nirūpiteti bodhyam 
||] brahmottarakhaṇḍe pradoṣamāhātmye pradoṣapūjā tāntrikasaraṇyā 
brāhmaṇarājaputrayorupadiṣṭā | tena ca phalaprāptiriti itihāsaḥ suspaṣṭaṃ 
pratīyate | śrīmadbhāgavate gajendrastutau śarvāgamāmnāyamahārṇavāya iti | 
āgamāḥ pāñcarātrāditantrāṇi iti śrīdharasvāmivyākhyā | tathā 
brahmastutau 

rūpaṃ tathaitatpuruṣarṣabhejyaṃ śreyo'rthiṃbhirvaidikatāntrikeṇa || iti ||

tathā ekādaśaskandhe karabhojanopadeśe dvārapūjāvidhāne kalipūjāyāṃ ca 
vacanāni yathā-

yajante vedatantrābhyāṃ paraṃ jijñāsavo nṛpa |
nānātantravidhānena kalāvapi tathā śṛṇu || iti ||

nānātantravidhāneneti kalau tantramārgaprādhānyaṃ darśayatīti 
śrīdharasvāmivyākhyānam | evamekādaśaskandhe uddhavopadeśe'pi-

p. 7)

vaidikastāntriko miśra iti me trividho makhaḥ || 27 a. 7 ślo.

iti vaidikatāntrikabhedena dviprakārapūjā śrībhagavatopadiṣṭā [etāvatā 
bhagavatastāntrikyapi pūjā'bhimateti pramāṇīyate |] sarvaiṃrupalabhyate | 
śrīmahābhārate arjunastutau-

āmnāyāgamavedyāya śuddhabuddhāya te namaḥ || iti ||

evamādīni tantraprāmāṇyapratipādakavacanāni sahasraśa upalabhyante | 
granthavistarabhayānneha prapañcyante | evaṃ 
yogamārgaprāmāṇyavyavasthāpakāni vacanāni śrīmanmahābhārate 
bhagavadgītāsu mokṣadharmādau ca asakṛcchrūyante | tathā bhāgavate 
kāśīkhaṇḍādinikhilapurāṇeṣu ca pade pade upalabhyante | evaṃ sati 
bhaṭṭapādāḥ kathaṃ sāṃkhyayogatantrāṇāmaprāmāṇyaṃ brūyuḥ | na vā 
purāṇānāmaprāmāṇyamiti śakyate vaktam 

purāṇaṃ dharmaśāstraṃ ca vidyā hyetāścaturdaśa ||

iti vidyāsuparigaṇanāt yadatharvāṅgiraso brāhmaṇānītihāsān purāṇāni iti 
vede'pi purāṇasya pramāṇamadhyaparigaṇanāt [etena 
tantraśāstrabrāhmaṇetihāsapurāṇadharmaśāstrāṇāṃ vedaniṣṭhaṃ 
pramāṇamupalabhyate eva] | evaṃ uktavacanakalāpaiḥ evaṃvidhairanyaiśca 
tantrāṇāṃ siddhe prāmāṇye aprāmāṇyaṃ brahmaṇā'pi vyavasthāpayituṃ 
na śakyam ||

sarvatantrāṇāṃ vedabāhyatvaśaṃkānirāsaḥ 

nanu bhavatvadhikāriviśeṣe vedabhraṣṭe puruṣe strīśūdrāṇāṃ saṃkareṣu ca 
tantrāṇāṃ prāmāṇyaṃ na vaidike | na ca vaidikātirikte tantrasya 
adhikārasaṃkocakapramāṇābhāva iti vaktuṃ śakyam | pūrvaṃ 
sūtasaṃhitāvacanasya tāntrikasyaiva nānyasya vaidikī vaidikasya hi iti likhitasya 
sattvāt | evaṃ sūtasaṃhitāyāmeva muktikhaṇḍe-

atyantagalitānāṃ tu prāṇināṃ vedamārgataḥ |
pāñcarātrādayo mārgāḥ kālenaivopakārakāḥ || iti ||

tatraiva sūtagītāyām-

śrutipathagalitānāṃ mānuṣāṇāṃ tu tantraṃ 
gurugururakhileśaḥ sarvavit prāha śaṃbhuḥ |
śrutipathaniratānāṃ tatra naivāsti kiṃcit 
hitakaramiha sarvaṃ puṣkalaṃ satyamuktam ||

iti pramāṇāntaravacanāt | tasmāt pramāṇānyapi tantrāṇi vedamārgagalitasyaiva 
na vaidikasyeti cet |

p. 8)

na | yacca śrutipathagalitānāmiti sūtagītāvacanaṃ tatratyaṃ tantrapadaṃ 
tantraviśeṣam | tacca tantraṃ śaivāgama - iti prasiddham dakṣiṇadeśe ca 
bhāṣayā jaṅgama - iti prasiddhairanuṣṭhitam | kathamidameveti jñāpakamiti cet 
asti jñāpakaṃ pūrvoktavacanasamīpa eva-

śrutipathagalitānāṃ sarvatantreṣu liṅgaṃ 
kathitamakhiladuḥkhadhvaṃsakaṃ tatra dhāryam |
śrutipathaniratānāṃ tat sadā naiva dhāryam || iti ||

tatra liṅgadhāraṇaṃ śaivāgamena bahuphalasādhanamiti pratipāditam | 
tatsaṃpradāyānuvartino liṅgaṃ dakṣiṇabāhau gale vā dhārayanti 
ityācāro'pyupalabhyate | yathā cāsmin vacane śrutipathagalitānāṃ sarvatantreṣu 
ityuttaraṃ pratipāditam iti śeṣaḥ | evaṃ ca yasmin tantre liṅgadhāraṇaṃ 
pratipāditaṃ tattantraṃ śrutibhraṣṭānāmityatra liṅgam | yathā chāgasya 
vaṣāyā medasaḥ iti mantraliṅgena paśuśabdasaṃkocaḥ tathā | kiṃ ca 
śrīmadadhyātmarāmāyaṇe śrīlakṣmaṇapraśnaḥ-

brahmakṣatrādivarṇānāmāśramāṇāṃ ca mokṣadam |
strīśūdrāṇāṃ ca rājendra sulabhaṃ muktisādhanam ||
tava bhaktāya me bhrātre brūhi lokopakārakam || iti ||

taduttaraṃ 'śrīrāma uvāca ityārabhya 

daśāvaraṇapūjāṃ vai hyāgamoktāṃ prakārayet |
homaṃ kuryāt prayatnena vidhinā tantrakovidaḥ |
āgamoktena [agastyoktena iti kvacit |] mārgeṇa kuṇḍenāgamavittamaḥ || iti ||

eva brāhmaṇādīnāṃ varṇānāṃ brahmacaryādīnāmāśramāṇāṃ ca 
mokṣopāyapraśne āgamoktapūjā kartavyeti taduttaramananyagatikaṃ vaidike'pi 
tāntrikaṃ yat pratipādayati tanmātsaryaśūnyena tattvabubhutsunā 
tyaktumaśakyam | nahi caitraḥ kuśalo vā - iti praśne maitraḥ kuśalaḥ iti 
prāmāṇikaḥ san brūyāt | tasmāt śrīrāmottaraṃ brāhmaṇādiviṣayam | na 
hyavaidiko brāhmaṇaḥ kṣatriyaśca loke prasiddhaḥ | na ca brāhmaṇaḥ kṣatriyo 
vā brahmahatyā'dimahāpātakena pātityaṃ gataḥ vedamārgabhraṣṭaḥtatra 
brāhmaṇatvaṃ vedamārgagalitatvamubhayaṃ cāstīti sa eva tantroditeṣvadhikārīti 
vācyam brahmakṣatrādikalyāṇapraśne taduttararūpapūjāvidhāne-

p. 9)

svagṛhyoktaprakāreṇa dvijatvaṃ prāpya mānavaḥ |
prātaḥsnānaṃ prakurvīta prathamaṃ dehaśuddhaye |
vedatantroditairmantrairmṛllepanavidhānataḥ ||

iti dvandvasamāsena ekasyaiva puruṣasya vaidikamantrasahitatāntrikamantrāṇāṃ 
snānakaraṇatvaṃ vidhīyate | tathā ca vedabāhyamuddiśya  
tantrasāmānyānuṣṭhānavidhiḥ iti svīkṛtya śrīrāmavākyaprāmāṇyanirvāhaḥ 
gīrvāṇagurūṇāmapyaśakya eva | evaṃ śrībhāgavate ekādaśaskandhe 
uddhavopadeśe-

ubhābhyāṃ vedatantrābhyāṃ mahyaṃ tūbhayasiddhaye || iti ||

upasaṃhāre tatraiva-

evaṃ kriyāyogapathaiḥ pumān vaidikatāntrikaiḥ |
arcannubhayatassiddhiṃ matto vindatyabhīpsitām || iti ||

tasmāt śrutipathagalitānāmiti vacanaṃ jaṅgamādiliṅgadhāriparam | evaṃ 
muktikhaṇḍasthapūrvoktātyantagalitānāmitivacane pāñcarātrādayo mārgāḥ 
iti ādipadena śaivāgamasya jaṅgamaparigṛhītasya grahaṇaṃ na 
jñānārṇavakalpasūtrādīnām tasmin vedabhraṣṭādhikārikatvasya kḷptatvena 
tena sahaikavākyatvāt | yacca śivamāhātmyakhaṇḍe pūjā śakteḥ parāyāstu 
ityārabhya 

vaidikī tāntrikī ceti dvijendrāstāntrikī tu sā |
tāntrikasyaiva nānyasya vaidikī vaidikasya hi || 

iti vacanaṃ tasya ayamabhiprāyaḥ - vaidikaḥ svagṛhyoktopanayanādisaṃskṛtaḥ | 
tāntrikaḥ tantrodīritakuṇḍamaṇḍapādipurassaraṃ dīkṣāsaṃskṛtaḥ | na tāntriko 
nāma śrutipathagalitaḥ tasya pūrvameva nirastatvāt | tathā ca anena vacanena 
upanayanādinimitte vaidikasnānapūjā'dinaimittikam | tantradīkṣānimitte 
naimittikaṃ tāntrikasnānapūjā'di vidhīyate | yatraikaṃ nimittaṃ tatraikaṃ 
kevalavaidike | śūdrādau kevalatāntrikam | yatra ubhayaṃ tatra ubhayānuṣṭhāne 
na kimapi bādhakam [sidhyatyetāvatā ca traivarṇikānāṃ 
vaidikatāntrikobhayakarmopadeśaḥ - dvipariśiṣṭe - 2 - vi0 dṛśyaḥ | 2 pa.] | 
asyaivārthaḥ spaṣṭīkṛtaḥ tripurārṇave-

traivarṇikairvaidikānte tāntrikaṃ kriyate'khilam || iti ||

imamevārthaṃ saṃkṣepeṇa śrīrāmo'pyāha - vedatantroditairmantrairiti | tasmāt 
sarvatantrānuṣṭhānaṃ vedabāhyaparamiti siddhānto 
vacanāntarānavalokanavyāmohavilāsarūpa eva | pāñcarātrādīnāṃ tu 
śrutipathagalitamuddiśyaiva pravṛttiḥ tannāma gṛhītvā āhatyavidhānāt | 
evameva kāpālamapi-

p. 10)

pāñcarātre ca kāpāle tathā kālamukhe'pi ca |
adhikāro vaidikānāṃ nāsti nāsti munīśvarāḥ || 

ityagastyasaṃhitāvacanāt | tathā ca nirṇīta evārthe bhaṭṭapādānāmabhiprāyaḥ 
| ata eva pāñcarātrasyaiva tantramadhye pṛthak nāma gṛhītam | na tu 
sarvatantrāṇāṃ grahaṇaṃ kṛtaṃ tatraiva vedaviruddhānāṃ 
smṛtiviruddhānāṃ ca dharmāṇāṃ bhūriśa upalabhyamānatvāt | na hi 
śākyādivat śāktāditantreṣu vedaviruddhamanuṣṭhānamamīṣadapyupalabhyate | 
yāni tu vedamārgamimaṃ tyaktvā ityādivacanāni tāni vaidikasya 
vaidikamārgaṃ sarvathā tyaktvā kevalatantramārgāśrayaṇe tannindāparāṇi 
muktvā vinetyādiśravaṇāt | yadvā-

pūrvaṃ vedamārgaṃ vinindya tasmādvedodito hyarthaḥ satyaṃ satyaṃ na 
saṃśayaḥ iti sarveṇa nindāpraśaṃsārūpaviśiṣṭārthavādena militvā 
vedamārgācaraṇaṃ kartavyamityekavidhikalpane lāghavam | pūrvapakṣe nindayā 
tāntrikakarmaṇaḥ samuccayaḥ tasmād vedodita iti stutyā vaidikakarmaṇo vidhiḥ 
kalpyaḥ iti gauravaṃ syāt | pūrvoktāgnipurāṇavacanaṃ pādmaṃ ca 
tantraviśeṣaparaṃ pūrvoktayukteḥ | ata eva tantreṣu dīkṣitaḥ ityādivacanāni 
nindārūpāṇi vaidikapraśaṃsāparāṇi iti śrīvidyāraṇyasvāmibhirapi tatraiva 
vyākhyātam | evameva bhaṭṭapādaiḥ yogasya nirastaprāmāṇyasyāpi 
viṣayāntaraṃ sudhībhirūhyam | aprakṛtatvāt granthavistarabhayānneha likhyate | 
bhaṭṭapādoktyapekṣayā purāṇānāṃ tantrāṇāṃ ca prāmāṇaṃ variṣṭham | 
ato durbalapramāṇasya prabalapramāṇānusāreṇa saṃkoco yukta eva | anyathā 
tasminneva adhikaraṇe aṣṭācatvāriṃśadvarṣāṇi brāhmaṇo brahmacaryaṃ caret 
iti smṛtiḥ jātaputraḥ kṛṣṇakeśo'gnīnādadhīta iti śrutiḥ anayorvirodhaḥ ittham-
nahyaṣṭācatvāriṃśadvarṣānantaraṃ vivāhe jātaputraḥ kṛṣṇakeśaśca 
puruṣaḥ prasiddho'gnyādhānādhikārī | ato dvayorvirodhe 
prabalaśrutyanusāreṇa smṛtisthabrāhmaṇapadamandhādiparam | 
tasyāgrimaśrautakarmānadhikāritvena śrutyavirodha iti taireva pratipādito grantho 
virudhyeta | tasmādvaidikānāṃ 
śāktagāṇeśāditantrapratipāditakarmasvadhikāra iti 
bhaṭṭapādānāmastyabhiprāya iti pūrvayuktibhiḥ siddham [etena vaidikānāṃ 
tāntrikakarmaṇyanadhikāra iti durapalapanto dūraṃ parāstāḥ |] | etena 
bhaṭṭojidīkṣitalikhitatantraprāmāṇyakhaṇḍanamapi parāhatamūhyaṃ sūribhiḥ 
| purāṇavacanānāmapi vyavasthoktaiva | yaccoktaṃ dṛṣṭaikaprayojanakatvaṃ 
mapañcakasvīkāravidhāyakaśāstrasya lobhamūlatayā praṇītatvaṃ ceti tacca 
agnīṣomīyaṃ paśumālabheta iti surāgrahā gṛhyante ityatrāpi vede tulyam | na hi 
idaṃ pramāṇamiti śraddhāmutsṛjya prāmāṇyavyavasthāṃ kartuṃ brahmāpi 
samarthaḥ | ato vaidikānāṃ pūrvasaṃskāravaśāt utpanno vedaḥ pramāṇam iti 
śraddhāviśeṣa eva prāmāṇyavyavasthāpakaḥ prathamaḥ | tataśca 
tadaviruddhānāmeva tanmūlakatayā prāmāṇyaṃ tadviruddhaṃ tu vaidikasya 

p. 11)

apramāṇameva | kiṃca - śrīsundarītantrāṇi tu yathā 
taittirīyaśākhāśeṣabhūtāni bodhāyanāpastambādiṣaṭsūtrāṇi pramāṇaṃ 
tathā [etāvatā ca 
bodhāyanāpastambādisūtrasundarītāpinīpañcakabhāvanākaulopaniṣadaḥ 
pramāṇānyevetyatra dhvanyate ||] 
sundarītāpinīpañcakabhāvanākaulopaniṣaccheṣāṇi tadvyākhyānarūpāṇi na 
svakapolakalpitāni | ato'pi vedavyākhyānarūpatvānniḥśaṅkaṃ vaidikaiḥ 
parigṛhītavyāni | mapañcakādisevanasya yathā vedāviruddhatā tathā upariṣṭāt 
vakṣyāmaḥ ||

śuddhacittasyaiva sundarīvidyā'dhikāraḥ 

vaidikairgrāhyatve'pi na sarveṣāṃ vaidikānāmatrādhikāraḥ | yathā 
brahmasvarūpasya upaniṣadbhāgarūpavedapratipādyatve'pi tajjijñāsāyāṃ na 
sarveṣāmadhikāraḥ kiṃtu sādhanacatuṣṭayasaṃpannānāṃ 
vaidikānāmevādhikāraḥ tathā'tra keṣāṃcidevādhikāraḥ | tathāhi 
brāhmaṇasya upanayanādyārabhya prathamabhūmikā svādhyāyādhyayanam | 
tadanantaraṃ sthāṇurayaṃ bhārahāraḥ kilābhūt0 iti anarthajñe nindām 
yo'rthajña it sakalaṃ bhadramaśnute0 ityarthajñāne phalaṃ ca śrutvā 
arthajñānasiddhyarthaṃ kāvyanigamaniruktavyākaraṇanyāyānadhītya 
pūrvamīmāṃsā'dyabhyasya vedārthaṃ jñātvā na jñānamātreṇa 
kṛtārthatāmiyāt iti smṛtyā arthaṃ jñātvā karmānanuṣṭhātari nindāṃ 
śrutvā anuṣṭhānabhūmikāmārūḍho nikhilasmṛtiśrutyuditaṃ karma 
bahujanmasvanutiṣṭhan taiḥkarmabhiḥ pariśuddhacittaḥ saṃsāre 
nātyantamāsaktonāpyatyantamanāsaktaśca yadā bhavati tadā 
bhaktibhūmikā'rohaṇayogyo bhavati | taduktaṃ bhāgavate-

na nirviṇṇo na cāsakto bhaktiyogo'sya siddhidaḥ || iti ||

yadā na nirviṇṇaḥ na cāsaktaḥ bhaktiyogaḥ tadā siddhidaḥ ityarthaḥ | 
tādṛśabhaktibhūmikāmanāruhya na kadā'pi paramapuruṣārthalābhaḥ | 
taduktaṃ śrīmadbhāgavate-

animittā bhagavati bhaktiḥ siddhergarīyasī |
jarayatyāśu yā kośaṃ nigīrṇamanalo yathā || iti || 

bhaktisvarūpam

tatra bhaktirnāma ārādhyatvaprakārakajñānaviśeṣo'nāhāryaḥ svābhāvikaḥ 
iti naiyyāyikāḥ | bhaktirnāma bhagavadviṣayiṇī antaḥkaraṇasya tadākāratayā 
pariṇāmātmikā vṛttiḥ | tatra pramāṇam-

yā prītiravivekānāṃ viṣayeṣvanapāyinī |
tvāmanusmarataḥ sā me hṛdayān mā'pasarpatu ||

iti bhagavadviṣayaprītiyācñāyāṃ prahlādaṃ prati śrībhagavadvākyam-

bhaktirmayi tavāstyeva bhūyo'pyevaṃ bhaviṣyati ||

p. 12)

iti bhaktiprāptirbhaviṣyatīti varadānena smṛtirmamāstviti [itaḥ 
sārthavedādhyayane - bhaktigaurave ca - pramāṇajātamasti |] bhaktiyācñaiveti 
jñāyate | na hi ghaṭaṃ yācataḥ paṭadānaṃ yuktam | tasmāt 
anusyūtabhagavatsmṛtiḥ bhaktiḥ saiva nirupādhikī prītirityapi vyavahriyate iti 
prurāṇikāḥ |

mayi cānanyayogena bhaktiravyabhicāriṇī |

iti śrībhagavadvacanamapi akhaṇḍaśrībhagavatsmṛtiparam | yuktaṃ caitat 
śrībhāgavate asyaivārthasyoktatvāt | tathāhi-

devānāṃ guṇaliṅgānāmanuśravikakarmaṇām |
sattva evaikamanaso vṛttiḥ svābhāvikī tu yā |
bhaktirbhāgavatī saiva............................ || iti ||

guṇāḥ viṣayāḥ liṅgyante jñāyante yaisteṣām indriyādhiṣṭhātṛdevānāṃ 
satvamūrtau harāveva yā vṛttiḥ animittā niṣkāmā svābhāvikī ayatnasādhyā 
sā bhaktirityarthaḥ | anuśravo vedaḥ taduditaṃ karma ānuśravikaṃ karma 
yeṣāmiti devaviśeṣaṇam | etena bhaktau prayojakaṃ ānuśravikaṃ karmeti 
sūcitam | ato bhagavadākārā manovṛttireva bhaktiriti siddham | evam- athāto 
bhaktijijñāsā sā parā'nuraktirīśvare iti śāṇḍilyasūtram ||

upāsanasya bhaktisādhanatvam 

etādṛśabhaktibhūmikāmārurukṣuḥ tatsādhanībhūtāṃ bhagavadupāstiṃ 
kuryāt | upāstirnāma - bhagavaduddeśena niṣkāmaṃ sarvavastutyāgaḥ 
bhagavatkathāśravaṇaṃ bhagavanmantrajapaḥ 
bhagavannāmastotrakīrtanamityetadanyatamam | etasya bhaktihetutvaṃ 
śrīmadbhāgavate-

punaśca kathayiṣyāmi madbhakteḥ kāraṇaṃ param |
śraddhā'mṛtakathāyāṃ me śaśvanmadanukīrtane |
pariniṣṭhā ca pūjāyāṃ stutibhiḥ stavanaṃ mama |
ādaraḥ paricaryāyāṃ sarvāṅgairabhivandanam |
madarthe'rthaparityāgo bhogasya ca sukhasya ca |
iṣṭaṃ dattaṃ hutaṃ japtaṃ madarthaṃ yad vrataṃ kṛtam |
evaṃ dharmairmanuṣyāṇāmuddhavātmanivedinām |
mayi saṃjāyate bhaktiḥ ko'nyo'rtho'syāvaśiṣyate || iti ||

bhaktisādhanatvādevopāstau śrībhāskararāyaiḥ setubandhe - bhaktirdvividhā 
gauṇī mukhyā ceti | tatrādyā saguṇabrahmaṇaḥ 
dhyānārcanajapanāmakīrtanādirūpā saṃbhavatsamuccayikā | parabhaktistu 

p. 13)

etajjanyānurāgaviśeṣarūpā iti kathitam | etādṛśī bhaktiśca saguṇabrahmaṇyeva 
saṃbhavati | etādṛśaṃ saguṇabrahma svopāsakānurāgānusāreṇa 
rāmakṛṣṇādinānāsvarūpaṃ labhate | tattatsvarūpabhaktisādhanānyeva 
pratipādyante tantreṣu purāṇeṣu ca | tanmūlabhūtāḥ śrutayaḥ 
upaniṣatsaṃjñakāścopalabhyante nṛsiṃhatāpinīrāmatāpinyādirūpāḥ 
sundarīviṣaye tripuropaniṣadbhāvanopaniṣadityādayaḥ | 
tatpratipādyaparabrahmaṇaḥ śābdaniścaye jāte sati tadā saṃsāre 
nātyantamāsaktiḥ nāpyatyantamanāsaktirbhavati | sa ca 
bhaktisādhanopāstāvadhikārī | etādṛśādhikāraprāptiśca 
bhaktibhūmikā'rurukṣutvaṃ ca nālpapuṇyena kintu 
anekakoṭijanmasādhitasukṛtalabhyam | tatrāpi sundarībhaktistato'pi dūratarā | 
taduktaṃ brahmāṇḍapurāṇe 

yasyānyadevatānāmakīrtanaṃ janmakoṭiṣu |
tasyaiva bhavati śraddhā śrīdevīnāmakīrtane |
carame janmani yathā śrīvidyopāsako bhavet || iti ||

sthalāntare'pi-

yasya no paścimaṃ janma yadi vā śaṃkaraḥ svayam |
tenaiva labhyate vidyā śrīmatpañcadaśākṣarī |
mokṣaikaheturvidyā [vidyayāmṛtamaśnute - iti śrutirapyatrārthayitavyā |] ca 
śrīvidyā nātra saṃśayaḥ || iti ||

śrutirapi-

aśrutāsaḥ śrutāsaśca | yajvāno ye'pyayajvanaḥ | svaryanto nāpekṣante | 
indramagniṃ ca ye viduḥ | sikatā iva saṃyanti | raśmibhassamudīritāḥ | 
asmāllokādamuṣmācca | ṛṣibhiradāt pṛśnibhiḥ ||

iti taittirīyāraṇyake |

upāsanādhikārasya svāntaḥkaraṇaikavedyanvam 

etādṛśabhaktibhūmikā'dhikāraḥ svāntaḥkaraṇaikavedyaḥ na pareṣāṃ 
pratyakṣaḥ na vā daśāviśeṣeṇa vā vayoviśeṣeṇa vā anumātuṃ śakyaḥ 
teṣāṃ vyabhicārasya darśanāt prahlādadhruvādīnāṃ bālya eva 
īdṛśabhūmikāprāptidarśanāt | kvaciddhetvābhāsenānumitiḥ | sā pramā'pi 
bhavitumarhati kadācit | yathā āgastyasaṃhitāyāṃ virūpākṣaṃ prati 
tatkanyāpraśne brāhmaṇavākyam-

ayi puṇyanidhe putri prāktanaiḥ puṇyasaṃcayaiḥ |
trivarṣā'pi samārūḍhā bhaktibhūmiṃ sudurlabhām |
gaurībījaṃ jagadbījaṃ mattaḥ prāpnuhi suvrate || 

p. 14)

ityanumityaiva kanyakābhūmijñānāt | manthānabhairavatantre'pi anumānaṃ 
kartavyamiti vidhirasti-

ekadvitricatuḥpañcavarṣāṇyālocya yogyatām |
bhaktiyuktān guṇāṃścāpi kramādvarṇe sasaṃkare |
paścāduktakrameṇaiva vadedvidyāmananyadhīḥ || iti ||

tathā'pyanumiteḥ visaṃvādipravṛtteḥ kadācitsaṃbhavāt dīkṣāgrahaṇe yaḥ 
pravartate saḥ svādhikāraṃ samyagvicāryaiva pravṛttiṃ kuryāt | anyathā 
anadhikārī san yadi pravarteta tarhiṃ śūdreṇa vedādhyayane kṛte yatphalaṃ 
tadeva asyāpi syāt anadhikāryanuṣṭhitatvasya tulyatvāt | ato'dhikāraṃ svacetasā 
vicārya niruktabhūmikāmāroḍhuṃ yo yogyaḥ sa eva brāhmaṇaḥ [atra striyo 
vaiśyāstathā śūdrāstepi yānti parāṃ gatim || kiṃ punarbrāhmaṇāḥ puṇyā 
bhaktā rājarṣayastathā-iti gītārtho'pyanveti-9 a- 31-32 ślo.] kṣatriyaḥ vaiśyaḥ 
śūdraḥ saṃkarajātīyaḥ strī yo vā ko vā saṃsāre na nirviṇṇaḥ na cāsaktaḥ 
jitendriyaḥ sa eva adhikārī na śrutipathagalitaḥ adhikārī iti siddham ||

kalpasūtrasya vaidikairvyākhyeyatvam 

ata eva śrīśaṃkarabhagavatpādānāṃ tantrānusāriprapañca [ayaṃ 
tantragranthaḥ śrīśaṅkarabhagavatpādebhyaḥ śrīparadevatayā svapne 
samupadiṣṭaḥ saṃprekṣyaśca tāntrikairavaśyam] 
sāranāmakanibandhanirmāṇamapi sādhu saṃgacchate | na ca vedapathagalitopari 
yathā kṛpayā śivena tantrāṇi nirmitāni tathā tadupari kṛpayaiva bhagavatpādaiḥ 
nirmitamiti vaktuṃ śakyate nedaṃ sādhakamiti vācyam | bhagavatpādānāṃ 
vaidika eva pakṣapāto na tadanyasmin | tathā'sati buddhādiśāstrānusāryapi 
nibandharacanaṃ syāt | kiṃ ca svakṛtamānasapūjāyām-

mantrāṃstāntrivaidikān paripaṭhan sānandamatyādarāt |
snānaṃ te parikalpayāmi janani snehāt tvamaṅgīkuru ||

iti śloke tāntrikavaidikayoḥ samuccayalekhanena tāntrikatvaṃ 
vaidikatvamaviruddhaṃ tadabhipretaṃ suspaṣṭam | tasmāt vaidikaiḥ idaṃ 
vyākhyeyaṃ kalpasūtram ||

tantrānuṣṭhānasya kalivarjyatvaśaṃkānirāsaḥ 

nanu brāhmaṇānāṃ bhavatu tantre adhikāraḥ tathā'pi na kaliyuge | taduktaṃ 
brāhme kalivarjyagaṇanāvasare-

mantrādīkṣā ca sarveṣāṃ kamaṇḍaluvidhāraṇam |
mahāprasthānagamanaṃ gosaṃjñaptiśca gosave ||

p. 15)

ityeteṣāṃ kaliyuge varjyatvaśravaṇāt pūrvavacanāni sarvāṇi 
kṛtādiparatvenopasaṃhāryāṇi | na ca niṣedhasya prāptimujīvyaiva pravṛtteḥ 
pūrvavacanaiḥ prāptau anena niṣedhe tulyabalatvena na tau paśau karoti iti 
dāśamikacaramapādanyāyatulyatvena vikalpa eva kiṃ na syāt iti vācyam | yadi 
niṣedho bhavet tarhi vikalpo bhavet | nāyaṃ niṣedhaḥ | kiṃtu yajatiṣu ye yajāmahe 
karoti nānuyājeṣu itivat | dīkṣāṃ kurvīta matimān iti vacanaṃ kalau 
mantradīkṣā na kartavyā iti vacanaṃ tayorekavākyatāyāṃ kriyamāṇāyāṃ 
kalibhinne kartavyamiti paryudāsasaṃbhavena vikalpānavakāśāt iti cet maivam | 
brāhme bhūripustakeṣu mantradīkṣā ca sarveṣām - iti nopalabhyate | 
ato'lpapustakeṣu upalabhyamāna īdṛśapāṭho'prāmāṇika eva | yadi ca 
prāmāṇika ityāgrahaḥ tathāpi - laiṅge 

kalāvārādhanaṃ [etāvatpramāṇajālena viprādīnāmapi-kalāvapi 
tāntrakarmopadiśyate-smaryate ca |] śaṃbhorāgamenaiva nānyathā || iti ||

śrīmadbhāgavate kaliyuge tantreṇaiva pūjā kartavyā iti vacanaṃ 
pūrvatraivodāhṛtam |

kalau yuge mahādevi brāhmaṇādyaiḥ supūjitā |

iti rahasyārṇavavacanam evaṃ rudrayāmalādibahutantreṣu kalau 
kartavyatvopalabdheḥ - bahuvacanānusāreṇa brāhmapurāṇasthavacanaṃ 
kalāvatisāvadhānena indriyādīn jitvā kartavyatāṃ pratipādayati | ata eva 
brāhmavacanāvasāne kalau na kartavyaṃ iti noktam | kiṃtu imāni 
lokaguptyarthaṃ kalerādau mahātmabhiḥ nivartitāni iti nivṛtteḥ phalaṃ 
lokopakāra uktaḥ | upakāraścettham | yaḥ kaścana jitendriyaḥ ime dharmāḥ 
avaśyaṃ kartavyāḥ iti śāstre bhāraṃ nikṣipya pravṛttaścet anyo'pi rāgāndho 
rāgaṃ puraskṛtya pravṛttaścet patedeveti tadanugrahāyaiva tyāgaḥ | [na] 
naikādaśyāṃ bhojanaṃ kāryaṃ itivanniṣedhaparaḥ | imamevārthaṃ śrīśivaḥ 
tantreṣu prakaṭitavān-paramānandatantre 

asidhārāvratasamo manonigrahahetukaḥ |
sthiracittasya sulabhaḥ saphalastūrṇasiddhidaḥ |
anyasya viphalo duḥkhahetuḥ syāt parameśvari || iti ||

tripurārṇave'pi 

ito madyamito māṃsaṃ bhakṣyamuccāvacaṃ tathā |
taruṇyaścāruveṣāḍhyā madāruṇavilocanāḥ |
tatra saṃyatacittatvaṃ sarvathā hyatiduṣkaram |
bhaktiśraddhāvihīnasya kathaṃ syādetadīśvari || iti ||

tasmāt kaliyuge'pi saṃyatendriyāṇāṃ dīkṣāyāṃ na kimapi bādhakam 
[etāvatā ca sthiracitta eva tantroktakarmādhikārīti dhvanyate |] ||

p. 16)

dīkṣāyāḥ prathamasopānatvam 

nanu dīkṣāṃ vyākhyāsyāmaḥ ityanucitaṃ yasya vyākhyānaṃ pratijñātaṃ 
tasyaivāgre kathanīyatvena dīkṣābhinnānāṃ gaṇeśaśrīvidyopāstyādīnāṃ 
bahūnāṃ kathanena saṃdarbhavirodhāt iti cet - ucyate | atra 
śrīlalitābhaktisādhanībhūtakriyāmātraṃ ajahatsvārthavṛttyā arthaḥ | atra 
dīkṣāpadoccāraṇaṃ ca dīkṣāyāḥ sarvāditvajñāpanārtham | etena adīkṣitena 
upāstirna kāryeti tadabhiprāyaḥ | ata eva paramānandatantre 

muktisaudhasya sopānaṃ prathamaṃ dīkṣaṇaṃ bhavet || iti ||

ata eva hiraṇyakeśisūtravyākhyāne - yajñaṃ vyākhyāsyāmaḥ ityatra 
etādṛśānupapattyaiva yajñaśabde ajahatsvārthā vṛttiraṅgīkṛtā vaijayantīkṛtā 
|| 1 ||

traipurasiddhāntasya paramaśivakartṛkatvam 

tatra dīkṣāyāṃ tadaṅgatvena traipurasiddhāntaṃ śrāvayedityasti | tatra ko nāma 
traipurasiddhāntaḥ ? tasya kutaḥ prāmāṇyaṃ ? ityākāṅkṣāyāṃ tatrādau 
tādṛśasiddhāntasya śivoditatvena prāmāṇyaṃ iti vaktuṃ bhūmikāṃ racayati-

bhagavān paramaśivabhaṭṭārakaḥ śrutyādyaṣṭādaśavidyāḥ 
[etatsūtrādhastanabhāṣye aṣṭādaśavidyāsarvadarśanapañcāmnāyānāṃ 
saṃkṣepato darśanamasti |] sarvāṇi darśanāni līlayā tattadavasthā'pannaḥ 
praṇīya saṃvinmayyā bhagavatyā bhairavyā svātmābhinnayā pṛṣṭaḥ 
pañcabhiḥ mukhaiḥ pañcāmnāyān [ime āmnāyāḥ kutaḥ sambhūtāḥ kiṃ 
prayojanāḥ-ityādyarthaṃ-dvipariśiṣṭavi 4 dṛśyaḥ |] paramārtha [sārarūpān-
ba.] sārabhūtān praṇanāya || 2 ||

atra pratipāditavidyāsu aprāmāṇyaśaṅkāsparśo'pi mā bhavatu ityetadarthaṃ 
bhagavāniti | 

aiśvaryasya samagrasya dharmasya yaśasaḥ śriyaḥ |
jñānavairāgyayoścaiva ṣaṇṇāṃ bhaga iti smṛtaḥ ||

ityetādṛśaṣaḍguṇaiśvaryasaṃpanno bhagavān | nanu paramaśivaḥ tattvātītaḥ 
tasya vidyākartṛtvaṃ na saṃbhavati upādhiśūnyatvāt ityata āha-bhaṭṭāraka iti | 
rājetyarthaḥ rājā bhaṭṭārako devaḥ iti kośāt | jagadīśvaratvarūpadharmavān 
māyopādhikaḥ iti tadarthaḥ | yadvā - bhaṭṭārako jagadrūpanāṭyarañjakaḥ 
bhaṭṭārakaśabdasya prasannarāghavanāṭake nāṭyarañjake re bhaṭṭāraka iti 
saṃbodhanāt rājā bhaṭṭārakaḥ ityasya nāṭyavargasthatvācca | tasya yathā 
jagatkartṛtvaṃ tathā vidyākartṛtvamapi saṃbhavatyeva | yadvā - īśvarasya 
paramaśivasya pūrṇatvena kartavyavastuno'bhāvāt kathaṃ 

p. 17)

vidyākartṛvaṃ ? ata āha-bhaṭṭāraka iti | rājetyarthaḥ | yathā rājñaḥ svasya 
anapekṣite'pi pareṣāṃ hitāya kṛtirdṛśyate tadvat | śrutyādyaṣṭādaśavidyāḥ-
śrutiḥ ādiḥ yāsāmiti tadguṇasaṃvijñānabahuvrīhiḥ | tathā ca śrutayaḥ 
catvāri tadaṅgāni śikṣā vyākaraṇaṃ kalpaḥ chandaḥ jyotiṣaṃ niruktaṃ ceti 
ṣaṭ mīmāṃsā nyāyaḥ purāṇaṃ dharmaśāstraṃ iti caturdaśavidyāḥ | 
āyurvedaḥ dhanurvedaḥ gāndharvaṃ nītiśāstraṃ ceti catasraḥ | 
evamaṣṭādaśavidyāḥ | sarvāṇi darśanāti śāktadarśanādīni | dṛśyate aneneti 
darśanaṃ jñānasādhanaṃ śāstramityarthaḥ śaktidarśanaśāstramiti yāvat | 
evamevāgre'pi | śaivadarśanaṃ vaiṣṇavadarśanaṃ brāhmadarśanaṃ 
sauradarśanaṃ bauddhadarśanaṃ ceti ṣaḍ (?) darśanāni | līlayā anāyāsena 
tattadavasthā'pannaḥ īśvarāvasthā'panno vedān pāṇinivyāsādisvarūpān 
gṛhītvā vyākaraṇapurāṇādīni praṇīya nirmāya ||

vedasya [atra bhagavato vedasyāpauruṣeyapauruṣeyatvayoḥ - dvipariśiṣṭavi.-5 
dṛśyaḥ |] pauruṣeyatvasamarthanam 

nanu vedasya nityatvena apauruṣeyatvāt īśvaranirmitatvaṃ katham ? na ca tasya 
nityatvameva asiddhamiti śaṅkyam vācā virūpanityayā iti śruteriti cet - na | 
vedāstu īśvareṇa nirmitāḥ chandāṁsi jajñire tasmāt iti śruteḥ

aṣṭādaśānāmetāsāṃ vidyānāṃ bhinnavartmanām |
ādikartā [kaviḥ sā-a] śivaḥ sākṣācchūlapāṇirmaheśvaraḥ ||

iti smṛteḥ | vedaḥ pauruṣeyaḥ vākyasamūhatvāt bhāratādivat ityanumānasyāpi 
pramāṇatvāt | ata eva īśānaḥ sarvavidyānāmīśvaraḥ sarvabhūtānām iti 
śrutau īśānatvaṃ kartṛtvarūpameva | na ca tasya pauruṣeyatve puruṣadoṣāṇāṃ 
bhramapramādavipralipsākaraṇāpāṭavānāṃ saṃbhavāt 
aprāmāṇyaśaṅkā'spadatvaṃ syāditi vācyam īśvare 
doṣasādhanānāmavidyā'dīnāmabhāvena doṣāsaṃbhavāt | etena 
tantrāṇāmapi nityatvaṃ pratyuktam | vācā virūpanityayā ityatra nityatvaṃ 
doṣavatpuruṣāpraṇītatvarūpaṃ gauṇaṃ kalpyaṃ 
uktapramāṇakalāpānurodhena | na ca vaiparītye kiṃ vinigamakamiti vācyam 
bhūyo'nugrahasya nyāyyatvāt | tasmāt sarvā api vidyāḥ puruṣapraṇītā eva ||

tantrapraṇayane prayojanaviśeṣaḥ 

nanu aṣṭādaśasu vidyāsu satīṣu punarāmnāyapraṇayanaṃ vyarthamata āha-
saṃvinmayyeti | ayamabhiprāyaḥ - puruṣārthaḥ sukhaṃ tacca naisargikaṃ 
kṛtrimaṃ ceti | naisargikaṃ mokṣarūpam | kṛtrimaṃ yastṛtīyapuruṣārthaḥ 
kāmaḥ ityucyate | ubhayoḥ sādhanaṃ dharmaḥ | tasyāpi sādhanamarthaḥ | evaṃ 
sākṣāt paraṃparayā vā puruṣairabhilaṣaṇīyā arthāścatvāraḥ | tatra 
kṛtrimapuruṣārthasādhanānyeva aṣṭādaśavidyābhiḥ prākaṭyena pratipāditāni 
| akṛtrimapuruṣārtho yaḥ tatsādhanaṃ akṛtrimaṃ 

p. 18)

spaṣṭaṃ na pratipāditam | kṛtrimopadeśaścākiṃcitkaro lokānāmiti jagadeva 
duḥkhapaṅkanimagnamuddidhīrṣurāmnāyavidyāṃ praṇināya | yadvā-
nikhilavedārthānabhijñānāṃ tatrānadhikāriṇāṃ ca muktyupāyaṃ 
nikhilavedasārāmāmnāyavidyāṃ [etadarthaṃ dvipariśiṣṭavi.-4 dṛśyaḥ |] 
praṇināya | tatrāpi saṃvit aparicchinnaṃ caitanyaṃ prakāśa iti yāvat tanmayyā 
tadabhinnayā | etena vimarśāṃśena svātmānaṃ pṛcchatītyarthaḥ siddhaḥ | 
taduktaṃ ratnatrayaparīkṣāyāmappayadīkṣitaiḥ-

nityaṃ nirdoṣagandhaṃ niratiśayasukhaṃ brahmacaitanyamekaṃ 
dharmo dharmīti bhedadvayamiti ca pṛthagbhūya māyāvaśena | 
dharmastatrānubhūtissakalaviṣayiṇī sarvakāryānukūlā śaktiścecchā'dirūpā 
bhavati guṇagaṇaścāśrayastveka eva || iti ||

nanu jīvānāṃ asmadādīnāmapi saṃvinmayatvaṃ astyevevi śrībhairavyā 
jīvebhyaḥ ko viśeṣaḥ ityataḥ āha bhagavatyeti viśeṣaṇam | 
bhagavacchabdārthaśca vyākhyātaḥ pūrvam | tathā ca 
jīvādivadāṇavādimalairāvṛtajñānā satī na pṛcchati kiṃtu sarvajñā'pi 
kenacidabhiprāyeṇa gūḍhena pṛcchatīti bhagavacchabdo jñāpayati | tathā hi-
śivaḥ prakāśarūpaḥ svayameva vimarśo bhūtvā praśnamavatārayati | tatra 
prayojanamidaṃ - vidvān samartho'pi pustakavācanādinā saṃpannajñāno na 
kṛtārtho bhavitumarhati kiṃ tu gurūpadiṣṭamārgeṇaiveti jñāpayituṃ 
svasvarūpāntaraṃ gṛhītvā praśnaḥ | taduktaṃ svacchandatantre-

guruśiṣyapade sthitvā svayameva sadāśivaḥ |
praśnottaraparairvākyaistantraṃ samavatārayat || iti ||

tadvijñānārthaṃ sa gurumevābhigacchet ityevakāro'pi śrutau 
amumevārthamāha | imamevārthaṃ dyotayituṃ bhagavatyā svātmābhinnayeti 
viśeṣaṇadvayam | bhairavyā - bhairavīśabdārthaśca jagato bharaṇādramaṇāt 
pralaye paramaśivakukṣisthitasya sṛṣṭisamaye vamanācca [atra 
śrīlalitāsahasranāma - 126 - ślokagatamahāpralayasākṣiṇī-
ityanyatantrādisthādīni ca bahupramāṇāni santi |] bhairavīti jñeyam | tayā 
pṛṣṭaḥpraśnamavatāritaḥ | idaṃ pūrvavartiparamaśivabhaṭṭāraka ityasyaiva 
viśeṣaṇam | pañcabhiḥ mukhaiḥ sadyojātavāmadeva-aghora-tatpuruṣa-
īśānasaṃjñakaiḥ pañcāmnāyān pūrvāmnāya-dakṣiṇāmnāya-
paścimāmnāyottarāmnāyordhvāmnāyanāmakān 
[etatpañcāmnāyanāmārthopayogīyajñānāya-dvipariśiṣṭavi.-4-dṛśyaḥ |] | 
āmnāyaśabdo vede yadyapi mukhyaḥ śrutiḥ strī veda āmnāyaḥ iti kośāt | 
tathā'pi āmnāyasārapratipādakatvāt [arthāttantrāṇāṃ 
vaidikaviṣayamarmodghāṭanādāmnāya pratipādakatvaṃ mokṣapradatvaṃ ca 
sidhyatyeva |] atrāpi āmnāyaśabdaḥ upacaryate | etena 

p. 19)

keṣāṃcit tantrāṇi vedavat svatantrapramāṇānīti matamapāstam | paramārthaḥ 
akṛtrimasturīyapuruṣārthaḥ tasmin sārabhūtān [sārarūpān-ba.] abhyarhitān | 
etena puruṣasya viśeṣeṇa abhilaṣaṇīyatvaṃ atigopyatvaṃ ca sūcitam | 
nikhilavedārthaṃ grahītuṃ aśaktān prati kṛpayā śivaḥ tatsārabhūtamarthaṃ 
gṛhītvā pañcāmnāyān praṇināya nirmame || 2 ||

traipurasiddhāntapratipādanam 

tatrāpyakṣamān mandatarān prati paramakṛpāluḥ śrīparaśurāmaḥ 
tatratyānarthān saṃgṛhya vaktuṃ prakramate-

tatrāyaṃ siddhāntaḥ || 3 ||

tatra pañcāmnāyeṣu ayaṃ vakṣyamāṇaḥ siddhāntaḥ 
vicāryavādajanitanirṇayaviṣayo'rthaḥ ||

etadantena granthena vakṣyamāṇasiddhāntārthasya [nāma-uparitana 2-
sūtrabhāṣyāntagranthena-evamarthaḥ |] 
svakapolakalpitatvaprayuktāprāmāṇyaśaṅkā nirastā ||

ayaṃ bhāvaḥ-yasmin kāle idaṃ viśvaṃ paraśivakukṣisthaṃ sūkṣmarūpeṇa 
tiṣṭhati sa eva pralayaḥ | īdṛśapralayaśca śāstraikavedyaḥ | evameva sṛṣṭirapi | 
tatra pralayo nāma parabrahmaṇaḥ kevalanijasvarūpeṇa avasthānaṃ jīvasya 
suṣuptāviva | tadānīṃ jīvarāśiḥ tadadṛṣṭaṃ pañcabhūtāni sarvāṇi vaṭabīje 
vaṭavṛkṣa iva sūkṣmarūpeṇa tiṣṭhanti | taduktaṃ śaktisūtrabhāṣye-paramaśivo 
jagat kabalayannapi na sārvātmyena api tvaṃśena saṃskārātmanā tat sthāpayati 
iti | sa eva saṃskāraḥ īśvarasisṛkṣāyāṃ sahakāribhūtaḥ anyathā 
vaiṣamyanairghṛṇyāpatteranivāraṇāt | evaṃ sthite loke dampatyoḥ sāmarasye 
vidhibilasthitaśuklabindoraṃśaḥ yoniṃ praviśya raktabindunā saha ekībhāvaṃ 
prāpnoti yadā tadā bāhyābhyantara [bhāva-ba.] bhānavihīnaṃ kevalaṃ 
brahmaiva bhāsate | tasya garbhotpādakatvaṃ dṛṣṭam | tathā sṛṣṭiprākkāle 
śivaśaktyoryogo'pi prāṇyadṛṣṭavaśāt bhavati || 3 ||

ṣaṭtriṃśattatvāni [teṣāṃ pratyekeṣāṃ sphoṭārthaścādhastāt 
etattatsūtrabhāṣyāntāvadhi dṛśyaḥ |] 

tadeva prapañcayituṃ tattvajālaṃ vyaṣṭumupakramate-

ṣaṭtriṃśattattvāni viśvam || 4 ||

taditthaṃ-kevalanijarūpeṇa avasthitasya yadā bahu syāṃ prajāyeya iti 
icchājñānakriyā'tmikāḥ śaktayaḥ tābhiryoge krameṇa arthaśabdasṛṣṭī 
aṅkuracchāyāvat yugapadbhavataḥ |

p. 20)

nanu icchājñānakriyāśaktīnāṃ sāditvena anityatvāpattiriti cet-iṣṭāpattiḥ | 
tattritayakāraṇībhūtā sūkṣmarūpā śāntānāmnī tasyā eva 
paraśivarūpāyā nityatvāt | tathā ca tādṛśasisṛkṣārūpopādhiviśiṣṭaḥ 
paramaśiva eva kevalaśivapadavācyo bhavati | sa eva tattvānāṃ madhye ādimaḥ |

sā pūrvoditā sisṛkṣā prapañcavāsanārūpā śaktiriti dvitīyaṃ tattvam | 
taduktaṃ ratnatrayaparīkṣāyām-

kartṛtvaṃ tatra dharmī kalayati jagatāṃ pañcasṛṣṭyādikṛtye 
dharmaḥ puṃrūpamādyāt [atra-prathamalikhitaṃ-vi-ityakṣaramivābhāti |] 
sakalajagadupādānabhāvaṃ bibharti |
strīrūpaṃ prāpya divyā bhavati ca mahiṣī svāśrayasyādikartuḥ 
proktau dharmaprabhedāvapi nigamavidāṃ dharmivadbrahmakoṭī || iti ||

pūrvoktatādṛśajagataḥ ahantayā yaddarśanaṃ tadahamiti 
tādṛśaspaṣṭavṛttimān sadāśivapadavācyaḥ tṛtīyaṃ tattvan |

idaṃ jagaditi kevalaṃ bhedaviṣayiṇī yā vṛttiḥ tadvān īśvarapadavācyaḥ 
turīyaṃ tattvam |

jagadahamevetyākārikā yā sadāśivasaṃbandhinī vṛttiḥ sā vidyāpadavācyā 
pañcamaṃ tattvam |

idaṃ jagadityākārikā īśvaraniṣṭhā bhedaviṣayiṇī vṛttiḥ māyāpadavācyā 
ṣaṣṭhaṃ tattvam |

pūrvoktavidyātirodhānaśaktimatī tadvirodhidhī avidyāpadavācyā saptamaṃ 
tattvam |

jīvaniṣṭhaṃ sarvakartṛtvaṃ yatkiṃcitkartṛtvena saṃkucitaṃ tadeva 
kalāpadavācyaṃ aṣṭamaṃ tattvam |

pūrvoktarītyā jīvaniṣṭhā yā nityatṛptiḥ saiva keṣucidviṣayeṣu atṛptyā 
saṃkucitā rāgapadavācyā navamaṃ tattvam |

jivaniṣṭhā yā nityatā tasyā ācchādane sati saiva nityatā asti jāyate vardhate 
vipariṇamate apakṣīyate vinaśyatīti ṣaḍabhāvayogāt saṃkucitā 
kālapadavācyā daśamaṃ tattvam |

paraśivajīvayoḥ abhedāt yathā paraśive sarvasvātantryaṃ tathā jīve'pyasti tasya 
sarvasvātantryasya vi[atra-ādyā-ityādyanekapadāni pāṭhāntare 
pṛthaksantyanyatra |](pi)dhānaṃ pūrvoktavidyayā kṛtaṃ tadeva 
kāraṇāntarāpekṣaṃ yatkāraṇamapekṣate tanniyatipadavācyaṃ ekādaśaṃ 
tattvam |

etādṛśaniyatikālarāgakalā'vidyā'śrayo jīvaḥ dvādaśaṃ tattvam |
satvarajastamoguṇānāṃ sāmyarūpā prakṛtiḥ cittāparaparyāyā trayodaśaṃ 
tattvam |

yadā satvatamasī abhibhūya rajaḥpradhānaṃ tanmanaḥpadavācyaṃ 
saṃkalpahetuścaturdaśaṃ tattvam |

p. 21)

rajastamasī abhibhūya satvapradhānamantaḥkaraṇaṃ tadbuddhipadavācyaṃ 
niścayahetuḥ pañcadaśaṃ tattvam | 

yadā rajassatve abhibhūya tamaḥpradhānamantaḥkaraṇaṃ 
tadahaṃkārapadavācyaṃ vikalpakāraṇaṃ ṣoḍaśaṃ tattvam |

śabdagrāhakamindriyaṃ śrotraṃ saptadaśaṃ tattvam |
sparśagrāhakamindriyaṃ tvagaṣṭādaśaṃ tattvam |
rūpagrāhakamindriyaṃ cakṣurekonaviṃśaṃ tattvam |
rasagrāhakamindriyaṃ rasanaṃ viṃśaṃ tattvam |
gandhagrāhakamindriyaṃ ghrāṇaṃ ekaviṃśaṃ tattvam |
vyaktavāguccāraṇānukūlavāgindriyaṃ dvāviṃśaṃ tattvam |
grahaṇatyāgānukūla mindriyaṃ pāṇiḥ trayoviṃśaṃ tattvam |
gamanānukūla mindriyaṃ pādaḥ caturviṃśaṃ tattvam |
malavisargajanaka mindriyaṃ pāyuḥ pañcaviṃśaṃ tattvam |
maithunajanakamindriyaṃ upasthaḥ ṣaḍviṃśaṃ tattvam |
sūkṣmākāśarūpaḥ śabdaḥ saptaviṃśaṃ tattvam |
sūkṣmavāyurūpaḥ sparśaḥ aṣṭāviṃśaṃ tattvam |
sūkṣmatejorūpaṃ rūpaṃ ekonatriṃśaṃ tattvam |
sūkṣmajalarūpo rasaḥ triṃśaṃ tattvam |
sūkṣmapṛthvīrūpo gandhaḥ ekatriṃśaṃ tattvam |
avakāśātmakākāśaḥ sthūlaḥ dvātriṃśaṃ tattvam |
sadāgatimattvātmakaguṇavān vāyuḥ trayastriṃśaṃ tattvam |
uṣṇatvavat tejaḥ catustriṃśaṃ tattvam |
dravatvavajjalaṃ pañcatriṃśaṃ tattvam |
kāṭhinyaguṇavatī pṛthvī ṣaṭtriṃśaṃ caramaṃ tattvam [atragranthe mūle 
bhāṣye ca-36-ṣaṭtriṃśattattvāni sārthāni nirdiṣṭāni |] |

etādṛśatattvasaṃghāto viśvaṃ jagaditi vyavahāraviṣayābhinnam | uktārthe 
pramāṇaṃ paramānandatantre-

yatkaṭhinyaṃ taddharā syāddravo vai jalamucyate |
uṣṇaṃ tejassaṃcalanaṃ vāyurvyomāvakāśakam ||
eteṣāṃ sūkṣmarūpaṃ tu anudbhinnavibhāgakam [vibhāvakam-ba.] |
gandhasparśau rūparasau śabdastanmātrakāṇi vai |

p. 22)

pañcajñānendriyāṇyeṣāṃ ghrāṇaṃ jihvā ca locanam |
tvak śrotraṃ ceti pañcānāṃ grahaṇavyāpṛtāni vai ||

vacanādānagamanavisargānandapañcakam |
karmasvadhiṣṭhānarūpamatastannapṛthakkṛtam ||

vākpāṇipādapāyūpasthākhyaṃ tatkaraṇaṃ bhavet |
sarvadehagataṃ cāpi sphuṭavyakterudāhṛtam ||

manassaṃkalpakaraṇaṃ buddhirniścayakāriṇī |
vikalpapratibimbānāṃ bhūmirdarpaṇavacchive ||

etāvadabhimānātmā cāhaṃkāra udāhṛtaḥ |
duḥkhanirvṛtimohākhyarajassatvatamomayam ||

antaḥkaraṇamityuktaṃ tattadādhikyasaṃbhavam |
kāraṇānāṃ guṇānāṃ tu sāmyaṃ prakṛtirucyate ||

tadbhinnaḥ puruṣaḥ proktaḥ pūrṇaḥ saṃkṣiptaśaktikaḥ |
cidānandastathecchā ca jñānaṃ tadvat kriyā'pi ca || 

paripūrṇāśśaktayastu saṃkocāttu kalādikāḥ |
sarvakartṛtvarūpā vai kriyāśaktiḥ kalā'bhavat ||

kiṃcitkartṛtvarūpeṇa jñānaṃ sarvajñatā tathā |
buddhistatpratibimbānāṃ [buddhita-ba.] vastūnāmeva bodhakaḥ [bodhataḥ-ba.] ||

saṃkocanāttu vidyā'khyā saivāvidyeti gīyate |
icchā tu nityatṛptyākhyā saiva saṃkocaśālinī ||

rāgaḥ kvacidatṛptyākhyā kvacidrañjanarūpiṇī |
cicchaktirnityasattā'khyā kālaḥ ṣaḍbhāvayogataḥ || 

ānandaśaktissvātantryaṃ sārvatrikamudīritam |
anyāpekṣaṇahetostu saṃkocānniyatiḥ smṛtā ||

akhaṇḍarasametāvadetadbhedananaipuṇā |
svatantrarūpā tvaṃ devi māya bhairavavallabhā ||

bhedanena svarūpasya gopanāt tattvarūpiṇī |
svarūpabhedanaṃ hitvā caikyāvagamanodyatā ||

p. 23)

paramārthaprathārūpā śuddhavidyeti śabditā |
spaṣṭabhedaprathān bhāvān svābhedenāvabhāsayan ||

īśvaraḥ kathito devi tāna spaṣṭānahaṃ [tān aspaṣṭān-iti padacchedo'tra 
kāryaḥ |] tvidam |
iti prabodhanātmā tu sadāśiva itīritaḥ ||

svasvarūpābhedamayānahamityeva paśyatī ||
prapañcavāsanārūpā śaktirityabhidhīyate ||
niṣprapañcaścidekātmā śivatattvaṃ samīritam || iti ||

eteṣāṃ śivādikṣityantānāṃ svarūpanirūpaṇaṃ mṛgendrasaṃhitāyāṃ 
vistareṇāsti vistarabhayādatra na likhitaṃ yāvadupayuktaṃ tāvadeva likhitam ||

tattvasaṃkhyānirṇayaḥ 

nanu sāṅkhyaiḥ caturviṃśatitattvānīti siddhāntitaṃ kathaṃ ṣaṭtriṃśattattvāni 
? iti cet - ucyate caturviṃśatyatiriktāni puruṣādiśivāntāni dvādaśa tattvāni na 
santi pramāṇābhāvāditi tavoktiḥ uta caturviṃśatitattveṣu antarbhūtānīti | 
nādyaḥ śrībhagavataḥ paraśurāmasya uktereva pramāṇatvāt 
ṣaṭtriṃśattattvaprāsādabhūnāthāya namo namaḥ iti skānde śrutatvāt 
ṣaṭtriṃśadvidhametadvai tattvacakraṃ samīritam iti paramānandatantre 
śrutatvācca | na dvitīyaḥ puruṣādiśivāntānāṃ 
pūrvoktalakṣaṇarūpaviruddhadharmavatāmantarbhāvāsaṃbhavāt | na ca 
caturviṃśatitattvāni puruṣastu tataḥ paraḥ iti mahābhāratavacanavirodhaḥ iti 
vācyam agrimadvādaśatattvānāmatikaṭhinavedyatvena mandamatīnāṃ 
prakṛtyantasugamavedyatattvānāmeva kathanīyatayā tatraiva viśrāmāt evaṃ ca 
adhikāribhedena vacanadvayasyāpi prāmāṇyāt | etena - sarvatra pañca bhūtāni 
ṣaṣṭhaṃ kiṃcinna vidyate iti vāsiṣṭhavacanamāśritya pañcaiva tattvānīti vadan 
parāstaḥ tasya atyantamandamatiparatvāt ||

nanu viruddhadharmavattvaṃ yadi tattvavibhāge prayojakaṃ tarhi 
ghaṭatvapaṭatvarūpaviruddhadharmavatoḥ ghaṭapaṭayorapi tattvāntaratvāpattiḥ iti 
cet - na | kiṃ ṣaṭtriṃśattattvātiriktatvamāpādyate ? athavā 
ghaṭarūpatattvāpekṣayā paṭatattvamatiriktaṃ syādityāpādyate ? nādyaḥ yaḥ 
kṣiterasādhāraṇo dharmaḥ kāṭhinyaṃ tena sākaṃ ghaṭatvapaṭatvayoḥ 
virodhābhāvena tadatiriktatvāsiddheḥ | dvitīye tu iṣṭāpattireva | eṣa evārthaḥ 
uktaḥ sūtasaṃhitāyāṃ tattvalakṣaṇakathanapūrvam-

āpralayaṃ yattiṣṭhati sarveṣāṃ bhogadāyi bhūtānām |
tattattvamiti proktaṃ na śarīraghaṭādi tattvamataḥ || iti ||

etena iyamāśaṅkā sutarāṃ parāhatā ||

p. 24)

yadyapi tantrāntare prathamaṃ trīpyeva tattvāni - ātmatattvaṃ vidyātattvaṃ 
śivatattvaṃ ceti | tatra ātmatattvaṃ caturviṃśatidhā kṣityādiprakṛtyantam | 
tadsādhāraṇo dharmaḥ kevalajaḍatvam | puruṣamārabhya māyā'ntaṃ 
vidyātattvaṃ saptadhā | tallakṣaṇaṃ ca jaḍatvaprakāśakatvobhayavattvam | 
tathāhi - yathā ayaḥpiṇḍe vahnitādātmyāpanne jaḍe'pi prakāśakatvaṃ 
ayaḥpiṇḍe jaḍatvaṃ ca vahnitādātmyānāpannatvadaśāyāṃ spaṣṭam | evaṃ 
vahnau ayaḥpiṇḍatādātmyāpannatvadaśāyāṃ jaḍatvaṃ prakāśakatvaṃ ca 
spaṣṭam | tathā puruṣe prakāśarūpe tattādātmyāpanneṣu jaḍeṣu niyatyādiṣu 
prakāśakatvaṃ puruṣe ca jaḍatvam | niyatyādiṣu jaḍatvaṃ puruṣe 
prakāśakatvaṃ ca spaṣṭam | evaṃrītyā vidyātattvasya miśratvam | 
śuddhavidyā'diśivāntaṃ śivatattvaṃ pañcadhā | tadasādhāraṇo dharmaḥ 
kevalaprakāśakatvamityavāntaravibhāgaḥ kṛtaḥ | tathā'pi 
tatrāpyupasaṃhāravelāyāṃ 

ṣaṭtriṃśadvidhamevaṃ vai tattvacakraṃ maheśvari ||

iti yo dharmaḥ uktaḥ sa eva atrāpyuktaḥ iti na tena sākaṃ virodhaḥ ||

vastutastu bhāgavate ekādaśaskandhe dvāviṃśe'dhyāye 

kati tattvāni viśveśa saṃkhyātānyṛṣibhiḥ prabho |
kecit ṣaḍviṃśatiṃ prāhurapare pañcaviṃśatim ||
saptaike nava ṣaṭ caike...........

ityārabhya uddhavapraśne svamate aṣṭāviṃśatitattvāni pratipādya śrībhagavān 
saptādiviruddhasaṃkhyāvādināṃ matānāmupapattiṃ kṛtvā 

iti nānāprasaṃkhyānaṃ tattvānāmṛṣibhiḥ kṛtam |
sarvaṃ nyāyyaṃ yuktimattvādviduṣāṃ kimaśobhanam [etāvatā naiko 
muniryasya vacaḥ pramāṇamiti munivacasāmapramāṇatāvādino durarthakartāro 
dūraṃ yāpitā iti mārmikam tādṛśāśca guhāśabdatathyārthe'pi 
bhramantyeva sāṃpratikāḥ kecit |] ||

ityuvāca | idamevātra samādhānaṃ draṣṭavyam || 4 ||

jīveśvarasvarūpam 

evaṃ tattvānāṃ vibhāgamuktvā jīveśvarasvarūpaṃ vaktumārabhate-

śarīrakañcukitaḥ [kaṃcukito jī-a.] śivo jīvo niṣkañcukaḥ [nirṣkacukaḥ śivaḥ-
a.] paraśivaḥ ||

evaṃ ṣaṭtriṃśattattvānāmapi sāmānyarūpeṇa punardvisvabhāvatvaṃ - 
keṣucit kevaladṛśyatvaṃ keṣucit kevaladraṣṭṛtvameva | ādyaṃ jaḍeṣu dvitīyaṃ 
kevalamiti ||

p. 25)

nanu jīvasya tattvāntaḥpatitvāt paraśivasyātathātvāt dvayorbheda āyātaḥ | 
evaṃ sati kathamadvaitasiddhāntaḥ tāntrikāṇām ? ata āha - śarīreti | ayaṃ 
bhāvaḥ - sarvasvatantaḥ paraśivaḥ svasya māyayā durghaṭayā svaniṣṭhaṃ 
yadanyānapekṣatvarūpaṃ pūrṇaṃ svātantryaṃ tadācchādayati | tatastirohitaṃ 
yatsvātantryaṃ parimitaṃ svātantryaṃ tadāṇavamalamucyate | āṇavamalameva 
avidyetyapyucyate ||

nanu pūrṇasvātantryaṃ svīyaṃ svayameva kathāmācchādayati iti cet - ucyate | 
yathā sūryaḥ svamayūkhaireva sṛṣṭaiḥ meghaiḥ svayamāvṛto bhavati evameva 
svāvidyayā svasyāvaraṇe vādhakābhāvāt | tathā ca aupādhiko bhedo na 
vāstavaḥ | tathā ca nādvaitahāniḥ iti bhāvaḥ ||

nanu aparicchinnacitsvarūpaparaśivaḥ kathaṃ paricchinnena āṇavamalena tirohita 
iti cet - ittham | māyāyāḥ sāmarthyamanirvacanīyam | ato na tatra 
aghaṭitaghaṭanāyāmapi kathaṃbhāvaśaṅkā asti | ata evoktam-

durghaṭaikavidhāyinyāṃ māyāyāṃ kimasaṃbhavi || iti ||

subhagodaye'pi-

māyāvibhinnabuddhirnijāṃśabhūteṣu nikhilabhūteṣu |
nityaṃ tasyā niraṅkuśavibhavaṃ veleva vāridhiṃ rundhe || iti ||

evamāṇavena malena channaḥ tadā svayamaṇurdehaparimitaḥ san anyān 
dehaparimitān anantān jīvān svabhinnatvena paśyati | tanmāyikaṃ malam | evaṃ 
bhedaprathārūpamāyikamalena malinā śubhāśubhakarma anutiṣṭhantaḥ 
tajjanitasaṃskāravanto bhavanti | tadetat kārmaṃ malam | etādṛśatrividhamalaṃ 
śarīrapadenocyate | tadrūpaṃ yat kañcukam ācchādanaṃ tena āvṛtaḥ śiva eva 
jīvaḥ | taduktaṃ paramārthasāre-

paramaṃ yatsvātantryaṃ durghaṭasaṃpādanaṃ maheśasya |
devī māyāśaktiḥ svātmāvaraṇaṃ śivasyaitat || iti ||

subhagodaye'pi-

sa tayā parimitamūrtissaṃkocitasamastaśaktireṣa pumān |
raviriva sandhyāraktassaṃhṛtaraśmissvabhāsane'pyapaṭuḥ iti ||

p. 26)

yadvā - śarīraṃ trividhaṃ sthūlaṃ sūkṣmaṃ paraṃ ceti | ādyaṃ 
dhyānaślokapratipāditam | dvitīyaṃ mantrarūpam | tṛtīyaṃ vāsanā'tmakam | 
etaiḥ śarīraiḥ kañcukitaḥ śivaḥ ādyatattvaṃ so'pi jīva evetyarthaḥ | tasminneva 
jīvatvamasti kā kathā anyeṣviti bhāvaḥ | etena śivasvarūpalābho'pi na 
paramapuruṣārtha iti dhvanitam ||

etādṛśajīvāḥ trividhāḥ - śuddhāḥ aśuddhāḥ miśrāśca iti | ādyāḥ 
śivādisadāśivāntāḥ teṣām ajñānābhāvāt | aśuddhāḥ manuṣyādayaḥ | 
miśrāḥ vasiṣṭhādayaḥ | etādṛśakañcukarahito yaḥ sa tattvātītaḥ paraśivaḥ 
ityarthaḥ || 5 ||

puruṣārthasvarūpam

evaṃ jīveśvarayoḥ svarūpamuktvā kaḥ puruṣārthaḥ iti taṃ nirdiśati-

svavimarśaḥ puruṣārthaḥ || 6 ||

svasya paraśivasvarūpasya vimarśaḥ pratyabhijñānaṃ so'hamityākārakaṃ-
yathā kaṇṭhasthaṃ cāmīkaraṃ vismṛtya tadanveṣaṇāya deśāddeśaṃ dhāvan  
kenacit udbuddhasaṃskāraḥ kaṇṭhasthaṃ paśyati tathā 
vismṛtasvarūpajñānasya punarlābhaḥ-puruṣārthaḥ akṛtrimaḥ ityarthaḥ | 
etādṛśapuruṣārthalābhaśca na bhagavatkṛpāmṛte bhaviṣyati | taduktaṃ 
bhagavatā śrīkṛṣṇena-

māmeva ye prapadyante māyāmetāṃ taranti te || iti || a. 7-14

bhagavatprītiśca bhagavadārādhanenaiva bhavati | ato bhagavadārādhanaṃ 
paraṃparayā mokṣasādhanam || 6 ||

mantraguṇavarṇanam 

nanu yogādinā'pi [ādiśabdena 
vedāntanyāyasāṃkhyamīmāṃsāvaiśeṣikādīni jñeyāni |] 
īdṛśapuruṣārthalābho bhavatīti śāstraṃ bahūpalabhyate [arthāt-
mokṣarūpapuruṣārthapratipādakatattacchāstroktakarmāṇi sapramāṇāni 
bhūyāṃsi bhavantītyarthaḥ |] | kimupāsanāyā āvaśyakatvaṃ varṇyate iti cet-
astyupāsanāyā āvaśyakatā | yogādibhiḥ labhyamokṣastu na punarāvṛttirahitaḥ | 
taduktaṃ svacchandasaṃgrahe-

muktaṃ ca pratibandhāttaṃ punarbadhnāti ceśvaraḥ |
baddhaḥ saṃsarate bhūyo yāvaddevaṃ na vindati || iti ||

evaṃ sthalāntarepi-

sāṃkhyayogādisaṃsiddhān śrīkaṇṭhastadaharmukhe |
sṛjatyeva punastena na sadṛṅmuktirīdṛśī || iti ||

p. 27)

ataḥ upāsanāyā eva mukhyopāyatve siddhe upāsanāyāṃ japasyāpi sattvāt tatra 
mukhyasādhanaṃ mantra [itaḥsaptamāṣṭanavamasūtrairbhagavān rāma 
upāsanāhṛdayībhūtatattaddevatāmantrāvaśyakatvagauravamavatārayatītya-
vadheyam |] iti tatra upāsakasya śraddhotpattaye tadvṛttiguṇān varṇayati-

varṇātmakā nityāḥ śabdāḥ || 7 ||

varṇātmakāḥ varṇasamudāyarūpāḥ śabdāḥ mantrāḥ nityāḥ-
mūlāvidyāsamasattākāḥ ityarthaḥ | na tu kālatrayābādhyatvaṃ 
ajñānanivṛttau svasvarūpātiriktadevatāyāḥ tadvācakamantrāṇāṃ ca asattvāt 
| na ca ānupūrvīviśeṣaviśiṣṭavedādīnāṃ nityatvasya ekakalparathāyitvaraya 
varṇitatvena asyāpi tādṛśatvena kathaṃ tato'pi cirasthāyitvarūpaṃ nityatvam iti 
vācyam mantrāṇāṃ devatāsūkṣmaśarīrarūpatvena devatāśarīrasya 
avidyāsamakālatvāt || 7 ||

athavā-

saptakoṭimahāmantrāḥ śivavaktrādvinirgatāḥ |

iti skāndāt mantrāṇāmapi sāditvena nāvidyāsamakālikatvaṃ tasyā anāditvāt 
| ata eva itarasādhāraṇaguṇatvena nāneti stutiḥ saṃbhavatīti aparitoṣeṇa 
mantrāṇāmasādhāraṇaṃ guṇāntaramāha-

mantrāṇāmacintyaśaktitā || 8 ||

mantrāṇāmiti ṣaṣṭhī saptamyarthe mantreṣvityarthaḥ | na cintyā acintyā 
śaktiryatra te-acintyaśaktayaḥ mantrāḥ teṣāṃ bhāvaḥ tattā astīti śeṣaḥ | 
śaktau acintyatvaṃ ca tarkāviṣayatvam | etena pūrvoditamāyā atarkyā durvārā 
tathā'pi tannivāraṇa samarthā tato'pi adhikaśaktikā mantreṣu līlayā 
jñānāvarakāvidyānivartakatvaśaktirastīti pratipāditam || 8 ||

mantrasiddhau sahakārikāraṇāni 

mantreṇa īpsitakārye jananīye sahakārikāraṇānyāha-

saṃpradāyaviśvāsābhyāṃ sarvasiddhiḥ || 9 ||

saṃpradāyaḥ guruparaṃparā'cārānusaraṇam | viśvāso mantreṣu 
phalasādhanatvaviṣayako niścayaḥ | ābhyāṃ sahitamantreṇa sarvasiddhiḥ 
bhavatīti śeṣaḥ | yadyapi loke ekena daṇḍena ekavyāpāreṇa ghaṭa eva bhavati na 
paṭaḥ | evaṃ turīvemādinā paṭa eva na ghaṭa iti | evaṃ sarvakāraṇeṣu loke 
niyataikakāryajanakatvaṃ dṛṣṭam | tathā'pi mantreṣu na tathā eka eva mantraḥ 
yadyadīpsitaṃ tatsarvaṃ janayati iti jñāpayituṃ sarvapadam | etena 
śrotṛpravṛttaye mantravartiguṇo'pi pratipādito bhavati || 9 ||

p. 28)

nanu kathaṃ lokaviruddhārthakamidaṃ vākyaṃ pramāṇaṃ bhavitumarhati ityata 
āha-

viśvāsabhūyiṣṭhaṃ prāmāṇyam || 10 ||

prāmāṇyaṃ saṃvādipravṛttijanakatadvatitatprakārakajñānajanakatvam | 
sarvasiddhiriti pūrvoktavākyaniṣṭhaṃ viśvāsabhūyiṣṭham | atra 
viśvāsapadārthaśca vākyaprayoktari āptatvaniścayaḥ | bahuśabdāt atiśayārthe 
iṣṭhan pratyayaḥ | tatra-pāṇinisūtraṃ atiśāyane tamabiṣṭhanau 
atiśayaviśiṣṭārthavṛtteḥ svārthe etau staḥ iti tadarthaḥ | evaṃ svārthe iṣṭhani 
jāte iṣṭhasya iti bahoḥ parasya iṣṭhasya lopaḥ syāt | bahorlopo bhū ca bahoḥ iti 
iḍāgamo bhūrādeśaśca iti tadarthaḥ | evaṃ bhūrādeśe iḍāgame ca 
bhūyiṣṭhaśabdena atyantabahutvaviśiṣṭaḥ puruṣārthaḥ | puruṣe 
viśvāsabhūyiṣṭhatvaṃ ca svottarotpannatvasvaviṣayaviṣayakatvasaṃbandhena 
viśvāsaviśiṣṭaśaṅkā'nadhikaraṇatvaṃ tadāśrayapuruṣeṇa 
samamabhedānvayasya bādhitatvāt | bhūyiṣṭhapadasya 
bhūyiṣṭhāśrayajñānaviṣaye lakṣaṇā | tasya prāmāṇye abhedānvayaḥ | 
atyantaviśvāsavatpuruṣaikavedyaṃ etacchāstraprāmāṇyamityarthaḥ | 
kutarkaśālināṃ śāstraprāmāṇyaṃ sarvathā agamyamiti bhāvaḥ | taduktaṃ 
bhaṭṭapādaiḥ-

śāstraikagamyā ye hyarthā na tāṃstarkeṇa dūṣayet || iti ||

kecittu-viśvāsasya bhūyiṣṭhaṃ bāhulyaṃ yatreti bahuvrīhimāhuḥ | taccintyam | 
bhūyiṣṭhapadasya pāṇinyanuśāsanena puruṣaparatvena 
bāhulyarūpadharmaparatvāyogāt | yadi ca dharme lakṣaṇā tadā 
madāśritalakṣaṇāpakṣa eva śreṣṭhaḥ | na saḥ | tathā sati bāhulye ekatra 
lakṣaṇāyāmapi dharmasyāpi prāmāṇyena samaṃ abhedānvayāsaṃbhavāt 
bahuvrīhau anyapadārthe lakṣaṇā vācyābāhulyasaṃbandhiprāmāṇyamiti | 
saṃbandhaśca svāśrayavṛttijñānavedyatvameva vaktavyam | tathā ca 
manmatatulyam | etadaṃśe dharme lakṣaṇādhikyaṃ 
kliṣṭavyadhikaraṇabahuvrīhyāśrayaṇaṃ ca | tasmādidameva vyākhyānaṃ 
varam ||

īdṛśameva śraddhābhūyastvamiti suspaṣṭamuvāca śrīskanda :-

agastya kiṃ bahūktena śṛṇu me niścitaṃ vacaḥ |
saṃśayo nātra kartavyaḥ sandigdhāddhi phalaṃ na hi ||
yāvanti martye tantrāṇi mantrajālānyanekaśaḥ |

sahakāryantaramāha-

gurumantradevatā'tmamanaḥpavanānām 
aikyaniṣphālanādantarātmavittiḥ || 11 ||

p. 29)

gurvādayaḥ spaṣṭāḥ | pavanāḥ pañcaprāṇāḥ | eteṣām aikyaniṣphālanaṃ 
bhāvanayā ekatvasaṃpādanam tena antarātmanaḥ pratyagātmanaḥ vittiḥ 
vedanaṃ bhavatīti śeṣaḥ ātmano devatāyāśca aikyamupādhinirāse spaṣṭam | 
devatāyā mantrasya caikyaṃ vācyavācakabhāvāpannatvena | tathā gurorapi | 
manaḥpavanayoraikyaṃ viṣṇupurāṇe darśitam-

nabhasvānmanaso nātibhinno'tastannirodhanāt mano niścalatāmeti || iti ||

yadyapi īdṛśaniścayaḥ upāsanāvelāyāṃ na bhavitumarhati tathāpi āhāryaṃ 
kṣaṇamātraṃ kāryamidamupāsanāyāmaṅgam ||

japarūpopāstiphalam 

yadvā - saṃpradāyaviśvāsasahitamantrakaraṇakopāsteḥ phalamāha - 
gurumantreti | aikyaniṣphālanaṃ aikyanirṇayaḥ tadvārā pratyagātmajñānaṃ 
bhavatīti viśiṣṭārthaḥ ||

umānandanāthāstu - gurumantretyasya āraṃbhollāse 
gurumantradevatā'tmanāmaikyabhāvanam - ekaṃ sādhanaṃ manaḥpavanayoḥ 
ekayatnaniroddhavyatvajñānaṃ cāparaṃ dvābhyāṃ kāryasiddhiḥ iti 
vyācakruḥ | taccintyam | niṣphālanādityekakriyāyā eko'rthoṃ bhāvanārūpaḥ 
ekayatnaniroddhavyatvajñānarūpo vā budhyeta nānekaḥ śakṛduccaritaśśabdaḥ 
sakṛdevārthaṃ gamayati iti nyāyāt | anyathā haripadāt 
caturdaśānāmapyarthānāṃ yugapadbodhaprasaṅgāt | kiṃca-
dvandvaghaṭakībhūtapadārthānāṃ yadi bhinnakriyayā'nvayaḥ tadā 
bhikṣāmaṭa gāṃ cānaya itivat anvācaya eva syāt kriyābhede anvācayaḥ iti 
tallakṣaṇāt | ekakriyāyāṃ yugapadanvayitvaṃ hi dvandvalakṣaṇaṃ 
tannirvāhastu sarvathā kartumaśakyaḥ tanmate | na ca - dhavakhadirau chindhi paśya 
iti prayogo na syāt iti vācyam īdṛśaprayogo'prāmāṇika eva iti 
sarvairvyavasthāpitatvāt || 11 ||

arcanarūpopāstividhiḥ 

etāvatparyantaṃ mantrastutyā tatsahakārikāraṇakathanena ca 
mantrakaraṇakakriyātadvidhirunneyaḥ | tathā ca tādṛśī japarūpaiva | evaṃ 
japarūpopāstiṃ nirūpya pūjārūpāmupāstiṃ hi vidhatte-

ānandaṃ brahmaṇo rūpaṃ tacca dehe vyavasthitaṃ tasyābhivyañjakāḥ pañca 
makārāḥ tairarcanaṃ guptyā prākaṭyānnirayaḥ || 12 ||

yathā cidrūpaṃ brahma evam ānandarūpamapi vijñānamānandaṃ brahma iti 
śruteḥ | yathā cidrūpamāvṛtamajñānena na jānāti evamānandasvarūpamapi 
duḥkhenāvṛtaṃ na jānāti | yadā kadācit bhārādirūpaduḥkhāpagame 
brahmaṇa eva paricchinnaṃ rūpaṃ śarīrāvacchedena saṃpratyapi 

p. 30)

jānāti tādṛśānandaḥ paricchinno dehe dehāvacchedena vyavasthitaḥ | tasya 
abhivyañjakāḥ tadviṣayakasākṣātkārajanakāḥ pañcamakārāḥ | etadantena 
vidhīyamānadravyastutiḥ anuṣṭhātṛpravṛttaye yata īdṛśāḥ śreṣṭhāḥ pañca 
makārāḥ ataḥ tairarcanaṃ guptyā aprākaṭyena kurvīteti śeṣaḥ | 
guptidravyobhayaviśiṣṭārcanarūpaṃ karma anena vidhīyate ||

nanu viśiṣṭakarmavidhau karmaṇa eva stutirapekṣitā vidheyasyaiva 
stutyatvaniyamāditi cet - na viśiṣṭavidhau viśeṣaṇavidherākṣiptatvena 
asyārthavādasya taccheṣatvasaṃbhavāt yathā vāyavyaṃ śvetamālabheta ityatra 
devatāviśiṣṭakarmavidhāvapi vāyurvai kṣepiṣṭhā ityanena devatāstutiḥ tadvat | 
karmaṇi guptiśca paśuvṛttijñānaviṣayatāsāmānyajñānaśūnyatvam | asya 
viśiṣṭavidhirūpatvāt guptiḥ kratvarthā | tasyaiva prākaṭyānnirayaḥ iti 
nindārūpā stutiḥ | yathā - yad grāmyāṇāṃ paśūnāṃ carmaṇā saṃbhared 
grāmyān paśūñchucā'rpayet iti nindārūpaḥ san kṛṣṇājinena saṃbharati iti 
stutiśeṣaḥ tathā tena daivāt prākaṭye kratvaṅgalopajanitaṃ prāyaścittaṃ na 
narakanirāsāya anyat prāyaścittam ||

prākaṭyāt guptiviparītāt | hetau pañcamī | nirayaḥ nirakaḥ ityarthaḥ ||

śrībhāsurānandanāthapādāstu - dīkṣā'ntaravatāṃ svadharmaprakaṭane 
kratuvaiguṇyamātraṃ iha tu tadvaiguṇye naraka eva tathā ca bhagavān 
paraśurāmaḥ prākaṭyānnirayaḥ ityūcuḥ | tanmate vākyabhedaḥ 
prakṛtahānyaprakṛtapuruṣārthatvakalpanādidoṣaparihāropāyamalpamatirahaṃ na 
jāne || 12 ||

upāsakadharmāḥ - bhāvanādārḍhyam 

evamupāsanāmuktvā upāsakadharmān prāha-

bhāvanādārḍhyādājñāsiddhiḥ || 13 ||

ahamidaṃ jānāmi ityetādṛśavṛttiṣu idaṃ padārthāpekṣayā ahaṃtayā 
bhāsamānaṃ śreṣṭhamiti vivecanam - sarvavṛttiṣu idameva bhāvanāpadārthaḥ | 
tasya dārḍhyaṃ aśithilatā | anena ājñāsiddhiḥ nigrahānugrahasāmarthyaṃ 
bhavatīti śeṣaḥ | bhāvanādārḍhyastutyā sarvadā īdṛśabhāvanāvidhirunneyaḥ 
|| 13 ||

sarvadarśanā[nānindanam-a | ito bhagavatastāntrikaśāsanagauravaṃ 
mananīyataram |]nindā

upāsakasya niyamāntaramāha-

p. 31

sarvadarśanānindā || 14 ||

itaradevatopāsanāvidhāyakāni yāni darśanāni śāstrāṇi teṣāṃ nindā na 
kartavyetyarthaḥ | tannindane tadadhikāriṇāṃ saṃśayotpattyā 
svālambitadarśaneṣvanāśvāsaḥ | asmin śāstre anadhikārāt ubhayabhraṣṭaḥ 
chinnābhramiva naśyet | imamevārthaṃ śrīkṛṣṇo'pyāha-

na buddhibhedaṃ janayedajñānāṃ karmasaṅginām || iti ||

lokānna nindyāt itiśrutirapi ||

nanu pareṣāṃ buddhibhraṃśajanitapratyavāyābhāvo'sya phalamiti siddham | 
ayaṃ puruṣārthaḥ | katham upāsakadharmāṇāṃ kratusādguṇyajanakānāṃ 
madhye pāṭha iti cet-ucyate | ayamapi upāsanājanyasarvātmabhāve upayujyate | 
katham ? iti cet itthaṃ - yadi chinnābhravat pareṣāṃ nāśe svasyopekṣā tadaiva 
nindāyāṃ pravṛttiḥ | tathā ca paranāśe upekṣāyāṃ ātmavat 
sarvabhūtadarśanaṃ nāgataṃ iti sarvātmatāyāḥ asiddhyā 
upāsanājanmaphalāsiddhiḥ | prayājādiṣu kratvarthatvam | idameva 
kratusādhyāpūrvasādhakatvam | prakṛte uktarītyā kratvarthatvaṃ siddhamiti na 
ko'pi doṣaḥ || 14 ||

kasyāpagaṇanam 

tṛtīyaṃ dharmamāha-

agaṇanaṃ kasyāpi || 15 ||

svaśāstraviruddhaṃ yadi gīrvāṇagururvadettarhi sa gururiti gaṇanaṃ na 
krartavyam | ata eva śrutirapi - na gaṇayet kamapi iti || 15 ||

sacchiṣye rahasyakathanam 

caturthamāha-

sacchiṣye rahasyakathanam || 16 ||

kartavyamiti śeṣaḥ | parisaṃkhyāvidhirayam | ātmarahasyaṃ na vadet iti 
niṣedhasyāpavādo'yaṃ na tu guptyārcanam ityasyāpavādaḥ tathā sati 
śiṣyātirikteṣu sāmayikeṣu pūjāprākaṭyānāpatteḥ | ataḥ idamātmarasyaṃ 
svasiddhāntarūpaṃ sāmāyikeṣu śiṣyabhinneṣu na kathayet | sacchiṣye 
kathayedityarthaḥ | śiṣye sattvaṃ pratipāditaṃ tantrarāje-

p. 32)
 
sundaraḥ sumukhaḥ svacchaḥ śraddhāvān susthirāśayaḥ |
alubdhaḥ sthiragātraśca prekṣyakārī jitendriyaḥ ||

āstiko dṛḍhabhaktiśca gurau mantre'tha daivate |
evaṃvidho bhavecchiṣyaḥ itaro duḥkhakṛdguroḥ || iti ||

ātmapurāṇe'pi 

brahmavidyā'tisaṃkhinnā brahmiṣṭhaṃ brāhmaṇaṃ yayau |
gopāya māṃ sadaiva tvaṃ kulajāmiva yoṣitam ||

ityārabhya-

evamādyā yeṣu doṣāstebhyo varjaya māṃ sadā |
evaṃ hi kurvato nityaṃ kāmadhenurivāsmi te || iti ||

asattvalakṣaṇāni śiṣyadoṣāḥ kulārṇavāt vistareṇa jñeyāḥ 
[anarhaśiṣyalakṣaṇajñānāya dvi0 pariśiṣṭe 6 vi. dṛśyaḥ |] || 16 ||

sadā vidyā'nusaṃdhānam 

pañcamaṃ dharmamāha-

sadā vidyā'nusaṃhatiḥ || 17 ||

sadā sarvakālaṃ pūjādivihitanityakarmānuṣṭhānakālavyatirikte sarvadetyarthaḥ 
| vidyāyāḥ svopāsyadevatāvācakamantrasya anusaṃhatiḥ tatpratipāditārthasya 
anusaṃdhānaṃ kartavyamiti śeṣaḥ |

yadvā - sadā anusaṃhatiḥ manasā japaḥ kāryaḥ ityarthaḥ | na ca 
āsanādiniyamarahitasya japo yuktaḥ iti śaṅkanīyam mānase kasyāpi 
niyamasyābhāvāt | taduktaṃ paramānandatantre-

mānase'nantaguṇitaṃ niyamastatra naiva tu |
gacchan śayāna āsīno bhukto vā yatra kutracit |
asnātaścāpavitraśca na doṣastatra vidyate ||

bṛhadvāmakeśvaratantre'pi-

sarvakālaṃ japedvidyāṃ manasā yastu kevalam |
niyato vāpyaniyato'pyatha kurvaṃśca nityakam |
tathā'pi tasya śuddhasya tarasā saṃprasīdati || iti ||

p. 33)

yadi sadāpadasya saṃkoco na syāttarhi nityakarmānuṣṭhānalopāpattiḥ | ataḥ 
sarve hāryojanaṃ lipsanti ityatreva saṃkoca āvaśyakaḥ || 17 ||

satataṃ śivatāsamāveśaḥ 

ṣaṣṭhaṃ dharmamāha-

satataṃ śivatāsamāveśaḥ || 18 ||

satatam asyāpyarthaḥ pūrvasūtrasthasadāśabdavat | śivatāyāḥ samāveśaḥ 
āvirbhāvaḥ kartavya iti śeṣaḥ | nityakarmānuṣṭhānavyatiriktakāle 
śivo'hamasmīti bhāvayet iti tātparyam ||

vastutastu-pūrvadharmeṇa sahāyaṃ vikalpyate anyathā ubhayorbhāvanayoḥ 
yugapatsaṃpādanāsaṃbhavāt | pūjā'divyatiriktakāle 
anyatarasyānuṣṭhānamitibhāvaḥ [arthādantaḥsthamātmānaṃ pūjanāya 
mūrtyādau bahirapi saṃbhāvya saṃpūjyānantaraṃ sa evāhaṃ devaḥ ātmā 
veti vedāntasiddhāntāviruddhabhāvanāvirbhāvostu bhaktānāmiti tātparyam | ] ||

yadvā - pūrvadharmo mandādhikāriṇaḥ ayaṃ mukhyādhikāriṇaḥ || 18 ||

kāmādīnāṃ varjanam 

saptamamāha-

kāmakrodhalobhamohamadamātsaryāvihitahiṃsāsteyalokavidviṣṭavarjanam 
[lokaviruddhastrīvidvi-a] || 19 ||

kāmaḥ vaiṣayikī icchā idaṃ me bhūyāt ityākārikā | krodhaḥ tamasa udrekeṇa 
janito'sau antaḥkaraṇadharmaḥ | lobhaḥ 
dravyādiniṣṭhasvatvatyāgapratibandhako'tyantamanurāgaviśeṣaḥ | mohaḥ 
kāryākāryāvicāraṇam madaḥ garvaḥ | mātsaryaṃ dveṣajanito guṇini 
doṣāropaḥ | avihitahiṃsā rāgeṇa bhakṣaṇārthaṃ paśvādivadhaḥ | steyaṃ 
parānanumatyā paradravyaharaṇam | lokavidviṣṭaṃ mātṛbuddhyā'pi ekānte 
parastrīsaṃlāpādi | eteṣāṃ varjanaṃ tyāgaḥ kartavya iti śeṣaḥ || 19 ||

ekagurūpāstiḥ 

aṣṭamaṃ dharmamāha-

ekagurūpāstirasaṃśayaḥ [etatsūtrabhāṣyasamāptyavadhi-
ekagurūkaraṇādyupadeśo'sti |] || 20 ||

p. 34)

na vidyate saṃśayo yatreti vigraheṇa asaṃśayaḥ ityekagurūpāstiviśeṣaṇam | 
bhinnaliṅgatvamārṣam ||

ayaṃ bhāvaḥ - anekagurūpāstau pūrvagurūktavirūddhaṃ yadi vadet tarhi 
saṃśayo bhavedeva |

ekagurūpāstau na saṃśayo bhavet | ataḥ ekagurūpāstiḥ kāryeti bhāvaḥ | 
gurūpāsteḥ śaṃpradāyaviśvāsābhyām iti pūrvasūtreṇaiva prāptau 
punarvidhānam ekaṃ gurumāśritya na gurvantaramāśrayet iti 
itaragurvāśrayanivṛttiphalakeyaṃ parisaṃkhyā ||

ekagurūpāstividhyarthavicāraḥ 

nanu-na parisaṃkhyā'śrayaṇaṃ yuktaṃ doṣatrayāpatteḥ 
[atroktaparisaṃkhyāyāmuktaṃ laugākṣibhāskarapraṇītārthasaṃgrahe 15 panne 
parisaṅkhyāvivecanāyāṃ yathā śrutārthasya 
parityāgādaśrutārthaprakalpanāt || prāptasya bādhādityevaṃ parisaṅkhyā 
tridūṣaṇā | atraitacchlokārthopi sukhāvagamyaḥ |] | kiṃ tu 
upāsyagurumanūdyaikatvamātraṃ vidhīyate itaranivṛttistu aṅgalopabhiyā 
ekatvasya aṅgatvena itaragurūpāstau tallopāpatteḥ | na ca 
gurūdvayādyāśrayaṇe'pi pratyekaṃ guruṣu pratyekamekatvamastīti 
kathamaṅgalopaḥ iti vācyam ekatvaṃ hi na saṃkhyārūpaṃ vidhīyate tasya 
vastumātrasādhāraṇyena avyāvartakatvāt kiṃtu sajātīyadvitīyarahitatvaṃ 
gurvantarāśrayaṇe tallopastvanivāryaḥ | ato na gurvantarāśrayaṇamiti 
ekatvavidhireva śreṣṭhaḥ iti cet-

āstāṃ vā ekatvavidhiḥ | imamevārthaṃ śrīśivaḥ tantreṣu bhaṅgyantareṇa 
prakaṭitavān | rudrayāmale-

na deyaṃ paraśiṣyebho deyaṃ śiṣyebhya eva ca || iti ||

kulārṇave-

labdhvā kulaguruṃ samyak na gurvantaramāśrayet ||

yoginītantre'pi-

na deyaṃ paraśiṣyebhyo nāstikāya kuleśvari || iti ||

upaniṣadyapi - gururekaḥ iti | kvacicchiṣyadharme imamevārthaṃ prāha | 
kvacidgurudharme paraśiṣyāya na vadet iti bhaṅgyantareṇa | dvayoḥ 
ekagurūpāstirūpaphale eva paryavasānaṃ bhavati | ayamabhiprāya eṣāṃ 
vacanānāṃ pratibhāti - pūrvoktarudrayāmalakulārṇavayoginītantreṣu 
svasaṃśayacchettari gurau satītyadhyāhāryam | anyathā-

p. 35)

madhulubdho yathā bhṛṅga puṣpāt puṣpāntaraṃ vrajet |
jñānalubdhastathā śiṣyo gurorgurvantaraṃ vrajet || iti ||

tantrāntare śaktirahasye'pi-kaulike guravo'nantāḥ iti vacanānāṃ 
niravakāśatā'patteḥ | etena pūrvaguruḥ asarvajñaḥ 
svasaṃśayacchedane'samarthaḥ yadvā samarthaḥ svasya saṃśayamacchittvā 
mṛtaḥ tādṛśaśiṣyaḥ madhulubdhaḥ iti vacanānusāreṇa gurvantaramāśrayet | 
tatrāpyalpajñe'pi gurau jīvati tadanumatyā gṛhṇīyādanyoktam | tadapyuktaṃ 
kulārṇave-

mantrāgamādi cānyatra śrutaṃ nāthe nivedayet ||
gurvājñayā tadgṛhṇīyāt tadaniṣṭaṃ vivarjayet || iti ||

gurāvalpatātāratamyaṃ nirṇetuṃ svayamasamarthaścet yaṃ parigṛhṇāti 
tanmārgatyāgo na kāryaḥ | tādṛśanirṇayasamarthaścet tasmin 
sopapattikamarthaṃ rahasi saṃbodhya tadanumatyā yathāśāstramarthaṃ 
gṛhṇīyāt | yadi jīvannapi guruḥ asūyā'dinā nānujānāti tamullaṃghya 
śāstrīyaṃ sapramāṇaṃ mārgamanusaret | taduktaṃ spaṣṭaṃ tripurārahasye-

gurūktaṃ śāstrasaṃśuddhaṃ samālocya dhiyā budhaḥ |
kurvītopāsanaṃ samyaganyathā parihīyate || iti ||

ete'rthāḥ sarve'pi madhulubdhaḥ iti vacanena jñāpitāḥ | ekagurūpāstiḥ ityasya 
sūtrasya asminnevārthe tātparyamuktayuktigaṇavaśādvarṇanīyam ||

ye ca śrībhāskararāyāṇām anyāyo nyāyaḥ iti kaulopaniṣacchrutibhāṣye 
gurusaṃpradāyaḥ asādhuścedapi grāhyaḥ iti lekhanābhiprāyaṃ varṇayanti te 
tadabhiprāyatattvaṃ na viduḥ | ko'yamabhiprāyaḥ iti cet - ucyate | 
kaulikācāramadhye svasiddhāntaviruddhaṃ yadyācaret svaguruḥ anyaśca kauliko 
dayāparavaśaḥ san bodhayeccet gurau nivedya jīvati gṛhṇīyāt | yadi 
vāvadūṃko'nyaḥ kaulamārgaṃ dūṣayituṃ pravṛttaḥ syāt svayaṃ 
tatkhaṇḍena apaṭurapi tatra prāmāṇyabuddhiṃ na tyajet | ata eva kaulikācāraṃ 
[na ?] dūṣayet ityeva likhitam | evaṃ gurau svasya kiṃcijjñatvasaṃśayo nāsti 
kiṃtu bahutantravettṛtvaṃ niścitaṃ ciravāsena | sa ca na jīvati | 
tadācāraviruddhaṃ yadi tantre kvacidupalabdhaṃ vacanaṃ tadā ācārasya 
durbalatvāt tanmūlabhūtapramāṇopalabdhiparyantaṃ 
tasyānanuṣṭhānarūpamaprāmāṇyaṃ śrautasmārtānuṣṭhāne 
pūrvamīmāṃsānusāreṇa | kaulike tu pūrvoktaniścayadaśāyāṃ 
śāstraviruddho'pyanuṣṭheya eveti viśeṣaḥ | na tu gurau mandamatitvaniścaye | 
tathā īdṛśo'bhiprāyaḥ tatraiva sadgurusaṃpradāyaikalabhyatvena ityatra gurau 

p. 36)

sattvaviśeṣaṇena jñāpitaḥ | idaṃ tattvaṃ-gurau asarvajñatvānumāpako hetuḥ 
prabhūtaśāstraviruddhācāravattvaṃ sarvajñatvānumāpakaśca sarvāṃśena 
śāstrānumatatve sati tadviruddhakvācitkatvam ||

nanu sundaraḥ sumukhaḥ svacchaḥ sulakṣo [sulabhaḥ-iti kvacit |] bahutantravit iti 
kādimate gurulakṣaṇasyoktatvāt bahuśaḥ tantraviruddhānuṣṭhātāraṃ kathaṃ 
guruṃ śiṣyaḥ kuryāt | na hi sevārthaṃ vatsaroṣitasya viduṣaḥ ajñānaṃ 
saṃbhavati | kathamīdṛśamudāharaṇaṃ saṃbhavadyuktikamiti cet - na 
pūrvamajñatādaśāyāṃ kevalaśraddhodrekeṇa dīkṣitasya tādṛśaguruṃ 
svīkṛtavataḥ paścādadhyayanādisaṃpādita jñānasya pūrvoktahetunā 
anumānasaṃbhavāt | tādṛśena pūrvācāraḥ 

tyājya eva | yadyutpathaṃ daivāt pratipannaḥ tadā sadgurorapi saṃpradāya 
utpathapratittyuttarakālīnaḥ tyājya eva aśāstrīyatvanirṇayāt | ityalaṃ pallavitena 
||

amṛtānandanāthāstu - yoginītantravyākhyāne na deyaṃ paraśiṣyebhṇaḥ ityasya 
ye vidyā'ntareṣu pāraṃparyakrameṇa adhigatāśeṣarahasyāśeṣaparamārthāḥ 
saṃprāptapūrṇābhiṣekāśca te paraśiṣyāḥ tebhyo na deyam | 
kulārṇavavacanaṃ caitatparam | etadbhinneṣu deyaṃ madhulubdho yathā bhṛṅgaḥ 
iti vacanāt | īdṛśavyavasthāyāṃ mānaṃ ca pūrṇābhiṣekakartā yo guruḥ 
tasyaiva pāduketyāhuḥ ||

tanna | pūrṇābhiṣekakartari gurutvasyaiva jñāpakamidaṃ vacanam | tarhi tasyaiva 
pādukā iti bhāgo vyarthaḥ | yadi gurutvaṃ gurupādukāmantre tannāma ca 
vidhīyate tadā yo dīkṣākartā sa guruḥ ityekaṃ tasya nāma pādukāyāṃ 
yojyam-ityaparaṃ vākyam | tathā ca vākyabhedaḥ sa ityasya adhyāhāraḥ 
gurutvamātravidhau vacanāntareṇa gurunāmapādukāmantre yojyamityanenaiva 
siddhau śeṣavaiyyarthyaṃ durvāraṃ ca | tasmāt madhulubdhaḥ iti vacanena 
nānāguruṣu siddheṣu pādukāmantre sarveṣāṃ nāmnāṃ pakṣe prāptau 
niyāmakamidam | tathā sati na parasamīhitasiddhiḥ | pratyuta anena vacanena 
nānāguruprāptireva jñāpyate | tasmāt asmaduktā saraṇireva sādhīyasī ||

dṛśyate cādhunikānāṃ śāstraviruddhānāmācārāṇāṃ prāmāṇyaṃ 
pūrvamīmāṃsāvidāmapi yathā āndhrāṇāṃ mātulakanyāpariṇayaḥ | tathā 
drāviḍasuvāsinīṣu kañcukadhāraṇābhāvaḥ 

sa kañcukayatiṃ dṛṣṭvā akañcukasuvāsinīm |
sakeśāṃ vidhavāṃ dṛṣṭvā sacelasnānamācaret ||

ityāṅgirasavacanaviruddhaḥ | ato na kiṃcidbādhakam ||

p. 37)

yadi kevalaṃ gurau viśvaseccet tarhi sa tiṣṭhanneva mūtrapurīṣotsargaṃ kuryāt 
cet tadā svasyāpi karaṇāpattiḥ | yadi ca bahutantraviduṣi kacidvacanaṃ 
tadviruddhaṃ dṛṣṭvā tadācāre aprāmāṇyagrahaḥ sa kiṃ tāvadaṃśe 
svīkriyate uta sarvāṃśe | nādyaḥ loke 
kvaciccaitrādāvajñātāprāmāṇyagrahācāre kadācidaprāmāṇyagrahe sarvatra 
aprāmāṇyaśaṅkayā na viśvasantīti dṛṣṭaṃ loke | tadvadatrāpi 
sakṛdvyabhicāre sarvatra śaṅkayā ananuṣṭhānāpattiḥ | sā ca śaṅkā sarvatra 
mūladarśanamantarā nāpaiti | sarvatra mūlaśodhanārthe udyuktaścet tatra 
saṃpradāyānusaraṇavidhiḥ vyarthaḥ syāt | na ca yatra pakṣadvayarūpo vikalpaḥ 
tatra svagurusaṃpradāyācaraṇavidhiḥ sārthakaḥ syāt iti vācyam 
evamadhikāribhedena yadi pakṣadvayaṃ vyavasthitaṃ tadā tantraśāstre 
vikalpaviṣayatvaṃ sarvathā na syāt | yathā viśeṣārghyapātrādhāre tripadaṃ 
catuṣpadam apadaṃ veti pakṣāstatra guruṇā tripadamevānuṣṭhitaṃ tathaiva 
śiṣyeṇāpyanuṣṭhitam | kadācit tripadaṃ gataṃ - catuṣpadaṃ labdhaṃ tena 
anuṣṭhānaṃ syāt guruṇā ananuṣṭhitatvāt | vikalpasya udbheda evaṃ na syāt | 
ekapuruṣakartṛke karmaṇi prayogabheyena pakṣadvayasamāveśa eva hi vikalpaḥ ||

kiṃca - guruvākye viśvāsavidhirvyarthaḥ | śaṅkānivṛttyarthe 
mūlānveṣaṇārthamudyuktasya kathaṃ kimiti guruvākye ativiśvāsaḥ | tasmāt 
guroryogyatāmanumāya [atroktaguruḥ kīdṛśaścikīrṣitastajjñānārthaṃ 
dvipariśiṣṭe 6 vi. dṛśyaḥ |] ca sadguruvākyaṃ viśvaset ||

umānandanāthāstu ekagurūpāstiḥ itivākyaṃ samāpya asaṃśayassarvatra iti 
yojayitvā guruvākye śāstrādau sarvatra asaṃśayaḥ iti vyācakruḥ | tanna 
saṃpradāyaviśvāsābhyāṃ sarvasiddhiḥ viśvāsabhūyiṣṭhaṃ prāmāṇyam 
ityābhyāmeva asyārthasya prāptatvena punaruktyāpatteḥ || 20 ||

sarvatra niṣparigrahatā 

navamaṃ dharmamāha-

sarvatra niṣparigrahatā || 21 ||

sarvatra mapañcakādiṣu niṣparigrahatā nirgataḥ parigrahaḥ icchā yasya saḥ 
niṣparigrahaḥ tasya bhāvaḥ tattā patnīparijanādānamūlaśāpāḥ parigrahāḥ 
ityamaraḥ | atrādānasya parigrahasya mūlam - icchaiva | etādṛśakośānusāreṇa 
parigrahaśabdaḥ icchāvācakaḥ | mapañcakaṃ me bhūyāt itīcchayā na 
svīkāryamityarthaḥ | ayamevārtho bhāgavate spaṣṭaṃ pratipāditaḥ-

p. 38)

yad ghrāṇabhakṣovihitassurāyāstathā paśorālabhanaṃ na hiṃsā |
evaṃ vyavāyaḥ prajayā na ratyai imaṃ viśuddhaṃ nu viduḥ svadharmam ||

ye tvanevaṃvidaḥ puṃsaḥstabdhāḥ sadabhimāninaḥ |
paśūn druhmanti vistrabdhāḥ pretya khādanti te ca tān ||

iti ghrāṇabhakṣaḥ śāstreṇa kathitaṃ kartavyamiti bhakṣaṇam ālabhanaṃ 
devatoddeśena tyāgabuddhyā paśvādihananam ||

yadvā-sarvatra vastumātre niṣparigrahatā svīyabuddhityāgaḥ saṃpādanīyaḥ | 
sarvatra mamatā tyājyeti yāvat ||

yacca nityotsavanibandhe svabhogabuddhyā dhanaṃ na 
saṃpādanīyamityarthakathanaṃ taccaturthādhyāye dravyārjanaṃ kratvarthamiti 
pūrvapakṣīkṛtya dravyārjanaṃ kevalapuruṣārtha iti jaiminisiddhāntaviruddham || 
21 ||

phalatyāgapūrvakakarma 

daśamaṃ dharmamāha-

phalaṃ tyaktvā karmakaraṇam || 22 ||

phalaṃ pūrvoktaṃ kṛtrimaṃ tatsādhanaṃ ca dharmārthakāmā iti yāvat | 
phalaviṣayiṇī icchā phalapadasyārthaḥ | taṃ tyaktvā karmaṇaḥ vihitasya 
karaṇaṃ bhavatīti śeṣaḥ | kāmyaṃ karma na kartavyamityarthaḥ | kāmyaṃ karma 
na kartavyam iti vaktavye phalaṃ tyaktvā kartavyamiti kathanāt kāmyānāmapi 
karmaṇāmīśvarārpaṇabuddhyā anuṣṭhānaṃ kartavyamiti jñāyate ||

nanu bhagavadgītāyāṃ 

caturvidhā bhajante māṃ janāḥ sukṛtino'rjuna |
ārto jijñāsurarthārthī jñānī ca bharatarṣabha ||

iti sakāmopāsanā bhagavatā pratipāditā tadvirodha iti cet - na caturvidhā bhajanto 
māṃ ityanena lokasvabhāvo darśitaḥ | kāmyaṃ karma na kartavyam - iti jagau | ata 
eva 

yaśca karmaphalatyāgī sa tyāgītyabhidhīyate ||
teṣāṃ jñānī nityayukta ekabhaktirviśiṣyate || 

iti kāmarahitakarmaṇaḥ stutiḥ || 22 ||

p. 39)

nityakarmālopaḥ 

ekādaśaṃ dharmamāha-

anityakarmalopaḥ || 23 ||

nityaṃ ca tatkarma ca nityakarma snānasandhyāpūjā'di tasya lopaḥ 
ananuṣṭhānaṃ nityakarmalopaḥ na vidyate nityakarmalopo yasminnupāsake saḥ 
anityakarmalopaḥ | bhavediti śeṣaḥ | nityakarma avaśyaṃ kartavyamityarthaḥ | 
nityakarma kartavyamiti vaktavye vyatirekamukhena kathanaṃ tyāge na kevalaṃ 
kratuvaiguṇyaṃ pratyavāyo nirayaśceti jñāpayati || 23 ||

nanu nityakarmasādhanībhūtamapañcakālābhe kathaṃ 
kāryamityāśaṅkāyāmāha-

mapañcakālābhe'pi nityakramapratyavamṛṣṭiḥ || 24 ||

mapañcakālābhe mukhyaṃ nāstīti na karmalopaḥ | kiṃ tu pratinidhinā'pi 
nityakramaḥ nityapūjā tasyāḥ pratyavamṛṣṭiḥ anuṣṭhānaṃ kartavyamiti śeṣaḥ 
|| 

nanu ṣaṣṭhādhyāye darśapūrṇamāse vrīhīṇāmabhāve karmalopa iti 
pūrvapakṣaṃ kṛtvā teṣāṃ dṛṣṭapuroḍāśaniṣpattiphalakatvena nīvārairapi 
tatsaṃbhavāt nityakarmaṇi vrīhiniyamalope'pi nityakarmaṇaḥ 
kiṃcidaṅgalopasahiṣṇutvāt nityanaimittike pratinidhinā'pi kārye iti siddhāntitam 
| tādṛśyanyāyamūlakatayā śrautasmārtakarmasu pratinidhipracāro'pi dṛśyate 
atrāpi tādṛśayuktyaiva pratinidhisiddhau vacanaṃ vyarthamiti cet-

na | nityavannyāyena naimittike'pi prāptau tatra pratinidhinā 
naimittikakramanirvṛttirmā bhavatu etadarthakatvāt | na caivaṃ sati alābhe 
nityātiriktaṃ na kāryamityāyātam | tathā sati śrautaparisaṃkhyārūpatvena 
[atraiva khaṇḍe'nugata 20 sūtrabhāṣye ṭippaṇyāṃ kārikā dṛśyā |] 
svārthatyāgaḥ parārthakalpanā prāptabādhaḥ iti doṣatrayāpattiḥ iti vācyam 
tantraratne pārthasārathinā abhyudayeṣṭyadhikaraṇe tredhā taṇḍulān vibhajet iti 
vākyavaiyyarthyabhiyā pratyuddeśaṃ vākyaparisamāptirūpo 
vākyabhedo'ṅgīkṛtaḥ | kimu tādṛśabhītyā doṣatrayāṅgīkāre | ata eva 
[vijñāyaitāvataitadbhāṣyakṛtaḥ śrīpūjyapādapaṃ. bhāskararāyapādāḥ 
paramagurava - iti |] asmatparamagurubhiḥ uttaracatuśśatīsetubandhe 
dviśatottaradvitīyaśloke naimittikaprakaraṇe cakrapūjāṃ viśeṣeṇa yoginīnāṃ 
samācaret iti mūlasthaviśeṣeṇetipadasya nityapūjāmapekṣya 
yoginīvīrādhikyabhakṣyabhojyādyādhikyādineti prathamaṃ vyākhyāya 
tatrāparitoṣeṇa 

p. 40)

viśeṣadravyeṇa vetyarthaḥ | tena nityapūjāyāṃ viśeṣadrayālābhe'pi 
pratinidhinā nirvāhaḥ sūcitaḥ iti nityapūjāyāmeva abhyanujñāṃ natvanyatra iti 
vyākhyāya asminnarthe sādhakatvena idameva vākyaṃ darśitam || 24 ||

sarvatra nirbhayatā 

dvādaśaṃ guṇamāha-

nirbhayatā sarvatra [sarvataḥ-ba |] || 25 ||

sarvatra sarvataḥ mapañcakasvīkāre kaulamārgāvalambane ca 
narakādipratipādakāni yāni śāstrāṇi tebhyaḥ sarvebhyaḥ nirgataḥ bhayaṃ 
yasmāt saḥ nirbhayaḥ tasya bhāvaḥ tattā saṃpādanīyeti śeṣaḥ | tāni sarvāṇi 
śāstrāṇi rāgiṇaṃ bhīṣayanti kāmaṃ bhīṣayantu ahantu na rāgī kiṃtu 
śāstreṇa pravartito na me bhītiriti nirdhāraṇena nirbhayatā saṃpādanīyeti 
bhāvaḥ || 25 ||

sarvasārabhūto dharmaḥ svasya śivāgrau homaḥ 

sakalasiddhāntasārabhūtaṃ dharmamāha-

sarvaṃ vedyaṃ havyam indriyāṇi srucaḥ śaktayojvālāḥ 
svātmā śivaḥ pāvakaḥ svayameva hotā [etatsūtrāditāntrikangrathānāṃ 
śrībrahmabhāvanāgauravaṃ dṛśyamatraṃ |] || 26 ||

iti bhāvayediti śeṣaḥ | antaḥkaraṇavṛttibhiriti 
[etatsūtrasthavedyādipadānāmartho'dhastanabhāṣye susphuṭo'sti |] 
vedyamityasyādau pūraṇīyam | antaḥkaraṇavṛttivedyaṃ sarvaṃ haviṣṭvena 
bhāvayet | yathā agnau prakṣiptaṃ haviḥ tadākāraṃ bhavati evaṃ 
vṛttivedyānāṃ sarveṣāṃ śivarūpe'gnau home sati śivākārasaṃpatteḥ teṣu 
haviṣṭvena bhāvanaṃ yuktam ||

tādṛśahaviṣaḥ ādhārabhūtahomasādhanībhūtajuhureva srukpadena gṛhyate 
dhruvā'dayaḥ teṣāṃ srukpadavācyatve'pi homasādhanatvābhāvena 
homabhāvanāprakaraṇe dhruvā'dīnāmayogyatvāt [ito'gratana-
aprakṛtavicāreṇa-ityantabhāṣyagranthena-
viśeṣaṇībhūtaikapadaniṣṭhaikavacanabahuvacanayoḥ svalpaḥśāstrārtho'sti |] | 
na ca srucaḥ ekatvena bahuvacanamanupapannamiti vācyam indriyāṇāmanekatvena 
tadviśeṣaṇasya tatsamānavacanakatvārthaṃ bahuvacanam | na ca 
āropyāropasthale na casamānavacanatvaniyamaḥ ata eva naiṣadhe-

p. 41)

atraivakāreṇa-karmāntare svasyānuṣṭhānāsāmarthye putra priyādīn 
kartṛpratinidhitvena yojayanti tena ca tatkarmajaṃ phalaṃ bhavatīti śāstrasiddham | 
asmin yajñe pratinidhinā anuṣṭhite karmajanyaphalaṃ svasya na bhavatīti sūcitam || 
26 ||

bhāvanāphalam ātmalābhaḥ 

evamanuṣṭhitabhāvanāyāḥ phalamāha-

nirviṣayacidvimṛṣṭiḥ phalam || 27 ||

nirviṣayāyāḥ nirvikalparūpāyāḥ citaḥ vimṛṣṭiḥ phalam |

pūrvoktabhāvanāyā [pāścātya-30-patrastha 13 sūtrādetat 27-
sūtrāntoktasadbhāvanāyāḥ ityarthaḥ] iti śeṣaḥ || 27 || 

nanu kimīdṛśaphalalābhenetyata āha-

ātmalābhānna paraṃ vidyate || 28 ||

ātmalābhāt svarūpalābhāt paraṃ śreṣṭhaṃ phalam-iti pūrvasūtrastham 
anuṣajyate na vidyate nāstītyarthaḥ | puruṣānna paraṃ kiṃcit sā kāṣṭhā sā 
parā gatiḥ iti tamevaṃ vidvānamṛta iha bhavati iti ca śrutiḥ-imamarthaṃ 
pratipādayati | mokṣaḥ paramapuruṣārthaḥ ityatra na ko'pi vivādaṃ karoti | 
atastādṛśabhāvanayā paramapuruṣārthalābhaḥ iti bhāvaḥ | pūrvaṃ 
[pūrvaṃnāma-1-khaṇḍe 26-patre 6 sūtre-ityarthaḥ-] śvavimarśaḥ puruṣārthaḥ 
ityanena puruṣārthasvarūpaṃ pratipāditaṃ atra stutiriti na paunaruktyam ||

etāvatparyantaṃ [etatpañcāmnāyānāṃ nāmārthamāhātmyādikṛte ddi.-pa-4 
vi.-dṛṣyaḥ] pañcāmnāyasiddhāntarūpaśrīparaśurāmoktayorvicārya 
vikhyātāḥ | keśavaśarmā kaścit tadabhiprāyajñānāsamarthaḥ tā dūṣayāmi 
iti kevalerṣyayā yuktiśūnyān pralāpānabhāṇīt sudhiyāṃ taddarśanenaiva 
yuktirahitatvajñānaṃ bhaviṣyati | mandadhiyāṃ śaṅkānivṛttyarthaṃ mayaiva 
tadyuktiṣu kevalapralāparūpatvaṃ darśitaṃ matkṛtasiddhāntaśiromaṇau | 
granthavistarabhayānneha likhyate | ye tadbubhutsavaḥ te tata eva jānantu || 28 ||

siddhāntopasaṃhāraḥ 

atrāyaṃ siddhāntaḥ ityārabhya prakrāntamartham upasaṃharati-

saiṣā śāstraśailī || 29 ||

saiṣā pūrvoktā śāstraśailī śāstīti śāstraṃ pañcāmnāyarūpaṃ tasya 
śailī rītiḥ bhavatīti śeṣaḥ || 29 ||

p. 42)

eṣā vidyā atiguptā 

etādṛśaṃ śāstraṃ śrotṛpravṛttaye praśaṃsati-

veśyā iva prakaṭā vedādividyāḥ |
sarveṣu darśaneṣu gupteyaṃ vidyā || 30 ||

veśyā iva prakaṭāḥ sulabhāḥ vedādividyāḥ | ādinā smṛtyādiḥ | 
veśyopabhogodravyādivyayena yathā sulabhaḥ evaṃ vedādividyālābhaḥ 
dravyādidānena sulabhaḥ ityarthaḥ | adhyayanasya lobhamūlatā śāstreṇaiva 
pratipāditā ṣaṇṇāṃ tu karmaṇāṃ madhye trīṇi karmāṇi jīvikā iti | asyāḥ 
mokṣasādhanībhūtabrahmavidyāyāstu na koṭikanakavyayenāpi lābhaḥ kiṃ tu 
gurukṛpaikalabhyatvam ||

nanu adhikadravyavyaye guruḥ kṛpāṃ kimiti na kuryāditi cet-na kuryādeva | yena 
guruṇā brahmavidyā prāptā tasya koṭisuvarṇaṃ tṛṇādapi tucchataram | tasmin 
lobhaḥ kathaṃ bhavet || 

nanu lobhena pravṛttimān bhavatu tathā'pi parecchayā vidyādāne pravṛttau svasya 
hānyabhāvāt pravartatām tathā ca pūrvavidyā dravyavataiva labhyā iyaṃ tu 
nirdhanenāpi labdhuṃ śakyeti prakaṭatareti cet - na vidvān parecchayā 
pravartamānaḥ svapravartitavastuni kāryasiddhiṃ dṛṣṭvaiva pravarteta na viphale | 
prakṛte iyaṃ brahmavidyā malināntaḥkaraṇeṣu pravartinā na kevalaṃ viphalā 
pratyuta gurorapi vidyāṃ nāśayati | udāhṛtā etadviṣaye yāskena śrutiḥ-

vidyā ha vai brāhmaṇamājagāma gopāya māṃ śevadhiṣṭe'hamasmi |
asūyakāyānṛjave'yatāya na māṃ brūyā vīryavatī tathā syām |

iti | asyārthaḥ suspaṣṭaḥ ||

brahmavidyā'tisaṃkhinnā brahmiṣṭhaṃ brāhmaṇaṃ yayau |
gopāya māṃ sadaiva tvaṃ kulajāmiva yoṣitam |
śevadhistvakṣayaste'ham iha loke paratra ca |

ityārabhya-

evamādyā yeṣu doṣāstebhyo varjaya māṃ sadā |
evaṃ hi kurvato nityaṃ kāmadhenurivāsmi te |
vandhyā'nyathā bhaviṣyāmi lateva phalavarjitā ||

ityevamādivacanaiḥ guroreva apātre vidyādāne svavidyānāśaḥ śrūyate | sa 
kathaṃ apātre kevalaparecchayā vidyāmupadiśet | tādṛśopadeśapātraṃ 
durlabham || 

p. 43)

ataḥ sarvadarśaneṣu madhye-iti nirdhāraṇe saptamī-iyam uktā vidyā guptā 
durlabhetyarthaḥ |

idānīṃtana guravastu brahmavidyāyāḥ vāṇigvad vikretāraḥ | tatra na gurutvaṃ 
na vā śiṣyasya santāpahāniḥ | pratyuta so'pi dravyasevanarāgapravṛttaḥ 
patatyeva | itthaṃ ca dvāvapi patanasādhanameva kurutaḥ na mokṣasādhanam | 
taduktaṃ kulārṇave [prabodhacandrodaye-ba ba 1.] 

guravo bahavaḥ santi śiṣyavittāpahārakāḥ |
durlabho'yaṃ [gurustu viralo loke-ba ba 1.] gururdevi śiṣyasantāpahārakaḥ ||

ityalaṃ bhūyasā || 30 ||

dīkṣāvidhiḥ 

etāvatparyantaṃ [nāma 30 sūtrāntam] siddhāntamanūdya 
[tattadevatopāsanāmantrādisiddhāntamityarthaḥ] upāsakena prathamaṃ 
kartavyāṃ kriyāmāha-

tatra sarvathā matimān dīkṣeta || 31 ||

saptamī ṣaṣṭhyarthe prakṛtyarthaḥ śrīvidyopāstiḥ ṣaṣṭhyarthaḥ saṃbaṃdhaḥ 
tadavyavahitapūrvavṛttitvaṃ tasya dīkṣāpadārthe āśrayatayā anvayaḥ tasya 
karaṇatvasaṃbandhena bhāvanāyāmanvayaḥ tathā ca 
śrīvidyopāsanā'vyavahitapūrvavṛttidīkṣayā iṣṭaṃ bhāvayet iti 
viśiṣṭabodhaḥ | ata evotpattividhiḥ | sarvathā avaśyaṃ matimān 
pūrvoktabhūmikāmārūḍhaḥ [mārurukṣuḥ-a.] | etatpadasvārasyādeva 
ayamadhikāravidhirapi | tādṛśabhūmikām [ārurukṣoreva-a.] ārūḍhasyaiva 
adhikāro nānyasya iti siddham ||

nanu ekasminneva vidhau utpattividhitvaṃ adhikāravidhitvam ubhayaṃ kathamiti cet-
na citrayā yajeta paśukāmaḥ ityādau tathā dṛṣṭatvāt | na ca upāsanāyāmeva 
tādṛśabhūmikā'rūḍhasyādhikāra [rurukṣoradhi-a.] iti pūrvaṃ vyavasthitam | 
na hi dīkṣā upāsanā kathamatrāpi tādṛśādhikārapekṣā | yacca upāsanāyāṃ 
dīkṣāyā aṅgatvena yaḥ pradhāne adhikriyate so'ṅga [soṅgam-iti 
sādhīyānpāṭhaḥ] iti nyāyaprāptārthasya anuvāda eva matimān ityanena kṛt iti 
samādhānam tanna manoramam anuvādasya phalābhāvena vaiyyarthyāpatteḥ 
dīkṣāyāḥ svatantraphalavattvena anaṅgatvācceti | anenaiva 

p. 44)

tādṛśabhūmikā'rūḍhasya [rurukṣoḥ-a.] dīkṣā'dhikāro vidhīyate | 
upāsanāyāṃ dīkṣitasyaiva adhikāraḥ ityagre vakṣyati | tathā sati upāsanāyāṃ 
pūrvoktabhūmikā'rū.ḍhatvamārthikam [rurukṣutva-a.] ||

dīkṣāsvarūpatatphalanirūpaṇam 

nanu dīkṣātvaṃ kim ? na tāvadupāstiyogyatājanakakriyātvam 
upāstiyogyatājanakatvasya sattve pramāṇābhāvāt | na tāvat pratyakṣam alaukike 
saṃbhavati | nāpyanumānaṃ liṅgābhāvāt | nāpi darśapūrṇamāsābhyāṃ 
svargakāmo yajeta itivacchrutirasti yatastanirūpitaṃ kāraṇatvaṃ syāt | na ca 
vinopanayanaṃ yadvaddvijānāṃ sarvakarmasu | na yogyatā tathā'trāpi vinā 
dīkṣāṃ bhṛgūdvaha || iti tripurārahasye vyatirekavyāpteḥ daṇḍābhāve 
ghaṭābhāvaḥ itivat pratipādanāt vyatirekavyāptimūlaḥ kāryakāraṇabhāvaḥ 
sidhyati iti vācyam dīkṣita upāsīta ityupāsanā'dhikāristāvakatvāt |

tarhi dīkṣāyāḥ phalaṃ kimiti cet-ucyate | anantakoṭijanmasaṃcitaṃ yat 
pāparūpaṃ malaṃ tannāśaḥ | taduktaṃniśāṭanākhyāgamavyākhyāne 
[tantrālokavyākhyāne niśāṭanāmni-a.] tantrāloke-

dīkṣayā galite'pyantarajñāne pauruṣātmani |
dhīgatasyānivṛttatvādvikalpo'pi hi saṃbhavet ||
dehānta eva mokṣaḥ syāt pauruṣājñānahānitaḥ |
bauddhājñānanivṛttau tu vikalponmūlanāt dhruvam ||
tadaiva mokṣa ityuktaṃ dhātrā śrīmanniśāṭane || iti ||

asyārthaḥ-pauruṣaṃ bauddhaṃ ceti jñānaṃ dvividham | tatra pauruṣaṃ 
jñānaṃ svasvarūpātmakam | bauddhaṃ ca yanmahāvākyajanyaṃ 
caramavṛttirūpaṃ tattvajñānamityucyate | etadāvaraṇarūpamajñānamapi 
dvividham | tatra pauruṣaṃ puruṣaniṣṭhapātakam | bauddhaṃ bhedabuddhiḥ | tatra 
dīkṣayā pauruṣajñānanāśe'pi bauddhamalasya śāstrajñānenaiva nāśyatvāt 
dīkṣā'nantaramāgamasiddhāntajñānasaṃpādane tadaiva mokṣaḥ | yadi 
śāstrajñānaṃ na saṃpāditaṃ kevaladīkṣaiva jātā tasya dehānte muktiriti | na 
ca bauddhamalāsattve dehānte kathaṃ muktiriti śaṅkanīyam tripurārahasye

dīkṣāvantastu dehānte prāpya lokaṃ parāt param |
sadāśivena te samyak prabuddhāḥ śivarūpiṇā ||

iti tādṛśaśaṅkāyāḥ nirastatvāt | evaṃ 
śrautāgniṣṭomādidīkṣā'rthavāde'pi pāpmano'pahatyai iti śrūyate | evaṃ 
pūrvamīmāṃsāyāmapi dīkṣāyā yāgajanyāpūrvotpattau sasyādyutpattau 
karṣaṇamiva 

p. 45)

sthalasya ātmanaḥ śodhakatvamityeva siddhāntitam | brahmottarakhaṇḍe 
prathamādhyāye - rājñaḥ pañcākṣaramantrasya karṇapraveśamātreṇa 
taccharīrādanantāḥ kākāḥ nirgatāḥ iti liṅgaṃ ca | evaṃ paramānandatantre 
dīkṣānāmaniruktau-

dīyate śivasāyujyaṃ dīryate [kṣīyate-ba.] pāśabandhanam |
ato dīkṣeti kathitā......................

iti ca | evaṃ bahupramāṇānusāreṇa vyatirekavyāptipratipādakavacanasya 
arthavādarūpatvāt | tathā cāsya lakṣaṇasyāsaṃbhava eva syāt ||

etena saubhāgyānandasandohe dvādaśollāsasyāvataraṇaṃ adhunā tasyāḥ 
sāṅgopāsanayogyatāpratipādakadīkṣāṃ pṛcchati iti tanmukhyārthamanusṛtya 
samarthanamaśakyameva iti cet - na 
muktisādhanībhūtapauruṣamalanivṛttyarthakriyātvasyaivāduṣṭalakṣaṇatvāt ||

na ca prakṛtalakṣaṇavicārasya tadupajīvyakaimarthyavicārasya 
cānuṣṭhāne'nupayogāt kevalapāṇḍityaprakaṭinī kākadantaparīkṣeyamiti 
vācyam astyanuṣṭhāne vaiṣamyaṃ-yadi pūrvoktayogyatājanakaṃ tarhi 
dīkṣāsaṃkalpe yogyatāsiddhyarthamiti itarapakṣe pāpakṣayārthamiti ||

dīkṣāsaṃkalpaprakāravicāraḥ [itaḥ śiṣyasya 
dīkṣāgrahaṇasaṅkalpāyāvasarastadvicāraścāsti - anyacca 
sarvasaṅkalpaviṣayakajñānāya dvi. pari0-10 vi0-dṛśyaḥ ||]

yacca nityotsavanibandhe 
śrayaskāmo'hamamukavidyāgrahaṇārthamamukagurordīkṣāṃ grahīṣyāmi iti 
tadatyantānavadhānalikhitam | tathā hi-yacca śreyaskāma iti padaṃ tadāstāṃ 
kathaṃcitpāpanāśasyāpi śreyorūpatvāt | yacca amukavidyāgrahaṇārtham iti 
tadatyantamaśuddhaṃ dīkṣāyāḥ pāpakṣayaikasādhanatvasya vyavasthāpitatvāt 
| āstāṃ vā bandhyāputravat vidyāgrahaṇārthatvaṃ tathāpi śreyaskāma 
ityanenaiva tallābhe idaṃ padaṃ vyarthameva | na ca śreyovidyāgrahaṇamubhayaṃ 
phalam ataḥ dvayorullekhaḥ iti vācyam sarvebhyodarśapūrṇamāsau ityatra tayoḥ 
sarvaphalasādhanatve'pi prayogabhedenaiva bhinnaphalaṃ naikaprayogaṇa 
phaladvayamiti cāturthikanyāyaviruddhasya anādaraṇīyatvāt | ata eva tantraratne-
ekasyaikajātīyavyāpāreṇa niyataikajātīyaikaphalajanakatvaṃ loke dṛṣṭam | 
tatraikajātīyajanakatvaṃ sarvebhya iti vacanena bādhyatāṃ ekaphalajanakatva kena 
bādhyatām iti pārthasārathinoktam | kiṃ ca dīkṣāpadārthaḥ 
śaktipraveśacaraṇavinyāsamantropadeśarūpaḥ | tādṛśyāḥ dīkṣāyāḥ 
phalasādhanatvaṃ vā tadgrahaṇasya vā | ādye saṃkalpe 
phalasādhanībhūtakriyāmutpādayāmītyarthake phalasādhanakriyāvācakaṃ 
grahīṣyāmīti padaṃ vyartham | dvitīye grahaṇasya sādhanatvaṃ 

p. 46)

nirmūlaṃ pūrvavacanavirodhaśca | kiṃ ca-amukaguroḥ ityuccāraṇaphalaṃ 
dṛṣṭamadṛṣṭaṃ vā tithyādyuccāraṇavat | nādyaḥ ayaṃ mama gururbhavatu iti 
svecchāprakāśādanyat dṛṣṭaṃ phalaṃ durvacam | tacca tallikhitavaraṇenaiva 
bhavitumarhati kimetaduccāraṇena | nāntyaḥ deśakālau saṃkīrtya iti vacanāt 
teṣām apūrvajanakatvam | na hi gurunāmoccārya iti vacanamasti yenādṛṣṭaṃ 
tena bhavet |

kiṃ ca-tadabhimataṃ śreyovidyāgrahaṇarūpaphalaṃ svaniṣṭham | tathā sati 
grahīṣyāmi iti parasmaipadāntaprayogaḥ svaritañitaḥ kartrabhiprāye kriyāphale 
iti pāṇinyanuśāsanaviruddhaḥ | evaṃ anekadoṣagrastatvāt evaṃ 
saṃkalpastvanādaraṇīyaḥ | kiṃ tu pauruṣājñānanivṛttaye śrīvidyayā 
dīkṣiṣye iti saṃkalpa eva śreyān ||

tāntrikasaṃkalpāṅgabhūtaḥ aṣṭāṅgollekhaḥ [aṣṭāṅganirūpaṇamidaṃ 
keṣucidākareṣu nopalabhyate |]

śiṣyasaṃkalpe nāṣṭāṅgollekhaḥ dīkṣāhīnatvena tāntrike'nadhikārāt | agre 
gurusaṃkalpe tadullekha āvaśyakaḥ śiṣyasyāpi 
dīkṣā'nantarabhāvikarmaṇyullekhaḥ ||

nanu aṣṭāṅgasya sūtre anuktatvāt kimiti tadgrahaṇamiti cet-satyam | yadyapi nāsti 
grahaṇaṃ tathā'pi śrautasmārtādinikhilakarmasu ādau saṃkalpaḥ avyabhicarito 
dṛṣṭaḥ | prakṛte'pi tadvat saṃkalpa āvaśyakaḥ | saṃkalpasyāvaśyakatā mūle 
adhikataraṃ gāṇanāyakīyasaparyāmucyate | saṃkalpo nāma 
vidyamānadeśakālollekhanapūrvakaphalollekhanasahitaprakṛtakarmānuṣṭhāna-
viṣayiṇī pratijñā | taduktaṃ rahasyārṇave-

yatra deśe sādhakastu sthitastaddeśamuccaran |
ullikhya tatkālamapi pratijñā karmaṇastu yā |
phalamuddiśyāhamiti saṃkalpo jalahastataḥ || iti ||

tatra kālasya pañcāṅgataḥ aṣṭāṅgasya aśvapratigrahanyāyena 
saṃnikṛṣṭatvāt aṣṭāṅgollekhanaṃ sūtrānuyāyināmāvaśyakam | ataḥ 
aṣṭāṅgaṃ tatsādhanaprakāraśca ucyate || 

tatra aṣṭāṅgāni-1-yugaṃ 2-parivṛttiḥ 3-varṣaḥ 4-māsaḥ 5-divasaḥ 6-nityā 7-
vāraḥ 8-ghaṭikodayaḥ iti | tantraśāstre yugāni 36 ekasya yugasya parivṛttayaḥ 36 
ekasyāḥ parivṛtteḥ varṣāḥ 36 ekavarṣasya māsāḥ 16 ekamāsasya divasāḥ 36 
nityāḥ 30 vārāḥ 9 ghaṭikodayaḥ 5 | evamaṣṭāṅgasiddhāvupāyaḥ kathyate ||

p. 47)

tatrādau śālīvāhanaśakasādhanopāyaḥ kathyate |

ibhākṣiḥ 28 ṣaṣṭi 60 gaṇitaḥ 1680 ibhāgnyaṅkena 38 saṃyutaḥ |

narmadottarabhāge'tha tasyā dakṣiṇabhāgake |
aṅkaveda 48 yutaḥ kārya ibhākṣiḥ ṣaṣṭibhirhataḥ ||

prabhavādigatābdānāṃ saṃkhyayā yojayet punaḥ |
vartamānā śālivāhaśakasaṃkhyā samīritā ||

prabhāvādyakṣayāntānāṃ bhavet parivṛtistu yā |
vartamānā tadīyeyaṃ saṃkhyā'ṣṭāviṃśatiḥ smṛtā ||

itaḥ parivṛtisaṃkhyāṃ dṛṣṭvā ca tāṃ guṇet | ṣaṣṭibhistu śake jñāte na 
yatadīdṛśaśrīrme [iyaṃ śaṅkitākṣarā paṅktiḥ] 
vartamānaśālivāhanaśakasaṃkhyā nandādrikṣyāgni-3179-saṃyuktā 
gatakalyabdagaṇaḥ yathā śake-1755 asmin 3179 etadyoge gatakalyabdagaṇaḥ-4934 | 
evaṃ gatakalyabdagaṇaṃ sādhayitvā tasmāt ahargaṇasiddhyartham upāyaḥ 
kriyate |

gatakalyabdagaṇe naganavebhavedaiḥ-4897 ūnite 

śiṣyate yo'ṅkaḥ ekādidaśāntaḥ tatsaṃkhyākam aṅkajālaṃ 
dhruvakāṅkajāle vighaṭyādi dinānte yojayet | ekādaśaśeṣe 
prathamadaśamāṅkajāladvayaṃ dhruvake yojayet | ekaviṃśatiśeṣe prathamaṃ 
viṃśaṃ ca dhruvake yojayet | evamekatriṃśatamārabhya ekonaṣaṣṭiparyantaṃ 
jñeyam | tadrahasyamittham-nagana vebhavedairūnite kalyabdagaṇa yaḥ śeṣaḥ 
tasmin ṣaṣṭyā bhakte śeṣāṅkaiḥ lekhanasamaye yadi dvau tarhi 
tatsamasaṃkhyākam aṅkajālaṃ dhruvake yojayitvā vighaṭikādiṣaṣṭyā bhakta 
labdhamuparyupari yojayet | sa ca tadvarṣasaṃbandhimeṣasaṃkrāntyahargaṇaḥ | 
evaṃ sa gatakalyabdagaṇe'nenonitaikonapañcāśaccheṣaparyantaṃ ṣaṣṭyā 
bhāgo nāstīti yadā gatakalyabdaḥ etatsaṃkhyākastadā naganavebhavedanyūne 
ṣaṣṭisaṃkhyā śiṣṭā ṣaṣṭyā bhakte śeṣaḥ śūnyaṃ tadā śūnyāṅkajālaṃ 
dhruvake yojayet | sa meṣasaṃkrāntyahargaṇaḥ | yojyāni aṅkajālāni likhanti | 
prathamaṃ dvitīyaṃ caturthaṃ pañcamaṃ ṣaṣṭhaṃ saptamaṃ aṣṭamaṃ 
navamaṃ daśamaṃ viṃśaṃ triṃśaṃ catvāriṃśaṃ pañcāśat [pañcāśat-
ityetannāsti-a.] śūnyaṃ dhruvakāṅkajālam iti siddhāntajālāni | yadā 
gatakalyabdagaṇaḥ ibhabāṇāṅkavedasaṃkhyāko bhavati tadā varṣagaṇaḥ 
śailāṅke bhavedairūnitaḥ kāryaḥ | tato yaccheṣa ṣaṣṭyā bhakte yallabdhaṃ tena 
guṇitaṃ yacchūnyāṅkajālaṃ tatpūrvadhruvakāṅkajāle yojayitvā dhruvakaṃ 
saṃskṛtya paścāt prathamādyaṅkajālaṃ pūrvavadyojayitvā ahargaṇaṃ 
sādhayet | ibhaṣvaṅkavedanyūne gatakalyabdagaṇe uktadhruvakasaṃskāro nāsti | 
evamahargaṇaṃ sādhayitvā gaṇaṃ navabhirvibhajya śeṣo'tītavāsaraḥ tasya 
yallabdhaṃ 

p.48)

taccaturbhirvibhajya tallabdhaṃ pṛthak saṃsthāpya taccheṣaṃ navabhirviguṇya tatra 
gatavārasaṃkhyāṃ yojayet evaṃ sati sā saṃkhyā gatadivasasya jñeyā | 
pūrvasthāpitalabdhe ṣoḍaśabhirbhakte śeṣogatamāsasaṃkhyā bhavati | tallabdhe 
ṣaṭtriṃśatā vibhakte śeṣogatavatsarasaṃkhyā | tallabdhaṃ pañcāśadyutaṃ 
ṣaṭtriṃśadbhaktaṃ śeṣaṃ gataparivṛttisaṃkhyā | labdha gatayugasaṃkhyā | 
evaṃ meṣasaṃkrāntikālīnāhargaṇe sādhite taduttaraṃ madhye yadā 
kadācidahargaṇasādhanecchāyāṃ tadupāya ucyate | tatra meṣamārabhya yasmin 
dine ahargaṇanecchā tadavyavahitapūrvaṃ saṃkrāntiḥ yā tadīyāṃ 
vakṣyamāṇāṃ saṃkhyāṃm ahargaṇe yojayitvā tatsaṃkrāntimārabhya 
iṣṭadinaparyantamatikrāntā yāvanto divasāḥ tāvatsaṃkhyāṃ yojayet | 
iṣṭadināhargaṇaṃ bhavati | tatravṛṣe mithune karke siṃhe kanyāyāṃ tulāyāṃ 
vṛścike dhanuṣi makare kuṃbhe mīne itaḥ paraṃ yugādighaṭikāntānāṃ 
nāmocyate | yugaparivṛttivarṣāṇāṃ ṣaṭtriṃśatāṃ krameṇa ādikṣāntānāṃ 
varṇānāṃ nāmāni yathā prathamam akārātmakayugaṃ ayugaṃ kayugaṃ 
dvitīyam evamagre'pi parivṛttivarṣeṣu jñeyam | māsānāṃ ṣoḍaśānāṃ 
krameṇa ṣoḍaśasvarāḥ nāmāni | ṣaṭtriṃśaddivaseṣu yugapat 
ṣaṭtriṃśadakārādikṣakārāntāḥ varṇāḥ sānusvārāḥ 
śivādyavaniparyantaṃ ṣaṭtriṃśacattvāni ca militvā krameṇa nāmāni | yathā-
aṃ śivatattvadivasa iti | caramasvararahitā akārādyanusvārāntāḥ 
anulomavilomena triṃśadvarṇāḥ | kāmeśvaryādi citrāntāḥ pañcadaśa nityāḥ 
anulomavilomāśca militvā triṃśat | nityānāma yathā-aṃ kāmeśvarī 
nityāyāmiti | vārāṇāṃ navānāṃ krameṇa a ka ca ṭa ta pa ya śa ṣāḥ iti 
varṇāḥ nava | prakāśānandanātha-vimarśānandanātha-ānandānandanātha-
jñānānandanātha-satyānandanātha-pūrṇānandanātha-svabhāvānandanātha-
pratibhānadannātha-subhagānandanātheti navanāthāḥ | vāravarṇā ye nava 
tadyuktanavanāthāḥ krameṇa navavārāḥ | yathā-aṃ 

prakāśānandanāthavāsara iti |

udayaghaṭikānāṃ pañcānāṃ nāma krameṇa-a e ca ta ya iti pañca varṇāḥ 
jñeyāḥ | evamaṣṭāṅgollekhaḥ tāntrikakarmādāvāvaśyakaḥ | deśasya tantre 
anuktatvāt smārtasyaivollekhaḥ ||

kecittu tāntriko'ṣṭāṅgo na sahaja iti śāstraprasiddhakālasya samuccayamicchanti 
deśakālau samullikhya cāṣṭāṅgasthitimeva ca iti paramānandatantrānusāreṇa | 
tanna deśakālāvityatra kālaḥ kīdṛśaḥ ityākāṃkṣāpūrakaṃ 
tantrasthāṣṭāṅgapadaṃ na tu samuccayavidhāyakam evakārasvārasyāt ||

evamagre amukagotro amukaśākhā'dhyāyī amukaśarmādirahaṃ 
caturvidhapuruṣārthasiddhyarthaṃ sveṣṭānugrahāya amukagotra 
amukaśākhā'dhyāyinaṃ amukaśarmāṇa tvāṃ gurutvena vṛṇe iti saṃkalpaḥ 
kiṃ kalpasūtrānusāreṇa-

bahvalpaṃ vā svagṛhyoktaṃ yasya yāvat prakīrtitam |
tasya tāvati śāstrārthe kṛte sarvaḥ kṛto bhavet ||

p. 49)

iti vacanamanusṛtya tantrāntarānupasaṃhāreṇa ayaṃ prayogaḥ kiṃ 
sarvatantramupasaṃhṛtya kiṃ svecchayā | nādyaḥ sūtre varaṇasya anuktatvāt | 
dvitīye tantrāntare 
pratimābrahmādivaraṇacarunirmāṇatadbhakṣaṇādityāgo'nucitaḥ | tṛtīyaśca 
svakapolakalpito'śraddheya eva | kiṃ ca tantrāntare-

kartuṃ kārayituṃ caiva dīkṣākarma maheśvari |
ācāryatvena tvāṃ vṛṇe iti pādasamīpataḥ ||

iti varaṇe kariṣyamāṇe'pi dīkṣākarmaṇi ācāryaṃ vṛṇe ityeva vaktavyamiti 
vadati | sarvatra śraute smārte ca ṛtvigvaraṇe-asminnagnyādhāne'dhvaryuṃ tvāṃ 
vṛṇe asminnudyāpanākhye karmaṇi ācāryaṃ tvāmahaṃ vṛṇe ityācāro 
dṛśyate | iha tu karma nāma tyaktvā phalavācakaṃ puruṣārthasiddhyartham-
anugrahārthaṃ ceti varaṇavākye likhitam | tadatīva citram | tasmāt 
sūtrānusāribhiḥ varaṇaṃ na kāryam | na ca varaṇābhāve guruṇā avṛtena 
karma kathaṃ kāryam-iti vācyam tvaṃ mama dīkṣāṃ kuru iti laukikavaraṇenāpi 
tatsaṃbhavāt | na hi vayaṃ sarvathā nirākurmo varaṇaṃ karmāṅgamityeva 
brūmaḥ ||

evameva puṇyāhavācananāndīśrāddhe na kārye anuktatvāt | na ca 
tantrāntaropasaṃhāro mā bhavatu tathā'pi smṛtiprāptaṃ puṇyāhavācanaṃ 
nāndīśrāddhaṃ ca anivāryam anyathā-kṣute ācāmet iti prāptācamanamapi na 
syāt iti vācyam yadi puṇyāhavācananāndīśrāddhe tāntrike smṛtiprāpte 
evānuvartete tarhi tantrāntare-

gaṇeśaṃ pūjya puṇyāhaṃ vācya nāndīmukhān yajet |

iti vidhiḥ vyartha eva syāt | tasmāt smārtapuṇyāhādidharmāḥ karmāṅgatvena 
nāyānti ityatra idameva jñāpakam | yacca kṣute ācāmet na kalañjaṃ bhakṣayet 
iti puruṣārthaṃ tacca prāptamaparihāryam ||

na ca evaṃ śiṣyagurulakṣaṇadharmāṇāmapi prāptiḥ na syāt iti vācyam asti 
tasya prāptyavakāśaḥ | tatra yena vinā ākāṃkṣā na pūryate tacca 
tantrāntarasthamapi gṛhītvā ākāṃkṣāṃ pūrayet | śābdabodhe ākāṃkṣā 
dvividhā utthitā utthāpyā ceti | yathā ādyā pacatītyukte kaṃ pacati kena pacati 
kaḥ pacatīti | dvitīyā stokaṃ pacatīti | tatra stokapadasya vaiyyarthyabhiyā kathaṃ 
pacati ityākāṃkṣā utthāpyā | prathamasthale svata utthitāyāḥ 
śābdākāṃkṣāyāḥ śabdamantarā'nivṛtteḥ adhyāhṛtasya sthalāntarasthasya 
vā śabdasya pūraṇamāvaśyakam | tatra adhyāhārāt varaṃ 
tantrāntarasthaśabdenaiva ākāṃkṣāpūraṇam | evaṃ sati matimān [idamanugata-
43-patrasthaṃ 31 sūtram |] dīkṣeta ityukte matimattvasya kevalasya 
avyāvartakatayā kīdṛśaṃ matimattvam-ityākāṃkṣā avaśyamudeti | 

p. 50)

uditākāṃkṣāpūrakaṃ tantrāntaroktaśiṣyalakṣaṇavattvameva matimattvaṃ 
kalpyate | evaṃ gurau sadguruḥ [idamapyagre-53-patrasthaṃ 34 sūtram |] kramaṃ 
pravartya ityagrimasūtre uktatvāt sattvaṃ kim-ityākāṃkṣāpūrakatayā 
gurulakṣaṇāni ca yojyāni | ata eva baudhāyanācāryāḥ-tānna mithaḥ 
saṃsādayet ityāhuḥ | atra bhavasvāmī tān śālikīśākhoktān pakṣān 
tadanyaśākhī na saṃsādayet ekaprayoge melanaṃ na kuryāt | brāhmaṇānāṃ 
bahutvāt śākhānāmanantatvāt tadarthasya cāsarvajñena 
upasaṃhartumaśakyatvāt tāvanmātraṃ sukhaṃ buddhvā anuṣṭhāya sarve 
karmaphalaṃ prāpnuyuḥ iti kalpasūtrāṇyārabdhāni ācāryaiḥ iti |

asyāpavādastatraiva aviśeṣoktaiḥ viśeṣoktāśca śeṣatvena saṃbadhyante iti | atra 
bhavasvāmī-aviśeṣoktaiḥ viśeṣoktāḥ sāmānyata uktasya guṇaviśeṣāḥ 
anyasūtroktā api śeṣatvena aṅgatvena saṃbadhyanta iti | tānna mithaḥ 
saṃsādayet ityasyodāharaṇaṃ yathā baudhāyane somābhiṣavārthaṃ 
kevalavasatīvarīgrahaṇam | sūtrāntare vasatīvarīṇāṃ ekadhānānāmapi 
samuccayaḥ | tadanusāreṇa baudhāyanānāmekadhānāprāptau tānna mithaḥ 
saṃsādayet iti | evaṃ baudhāyane kevalaṃ śākhāchedanamātramuktam | 
anyasūtre śākhāchedanamāharaṇaṃ ca samantrakam | tānapi na saṃsādayet | 
anayā diśā anyānyapyudāhāryāṇi | etadapavādodāharaṇaṃ yathā 
baudhāyane palāśaśākhaiva sānnāyye vihitā tasyāstatsūtriṇāmalābhe 
sūtrāntaroktaśamīśākhā grāhyeti | tatra mūlam-uktalābhe kīdṛśī śākhā 
grāhyeti utthitākāṃkṣāvattvāt tatpūrakaṃ sūtrāntaraṃ 
śamīśākhāvidhāyakam | evaṃ baudhāyane-agnīnanvādadhāti ityaviśeṣeṇa 
vihitam | kathamanvādhānaṃ kartavyamiti viśeṣākāṃkṣāyām-apareṇa 
gārhapatyamupasthaṃ kṛtvā iti ūrdhvajñurāsīno'nvāhāryapacanam- 
[atrādhvaryu-iti saṃbhāvyet |] iti sūtrāntaroktadharmāḥ śeṣatvenānvetumarhanti 
| na tathā pūrvoktaikadhānā'kāṃkṣā'sti | ato na samuccayaḥ |

etena etatsūtrānusāribhirapi tantrāntaroktaṃ pātratrayaṃ pātracatuṣṭayaṃ 
vāsādanīyamiti yadabruvan tadasādhviti sphuṭam | yadyaviśeṣeṇa 
pātrāsādanaṃ kuryādityeva syāt tadā kati pātrāṇi kathamāsādayet iti 
viśeṣākāṃkṣā udeti | tadā tadapavādaśāstrapravṛttirapi syāt | na caivamihāsti 
yena tathā syāt |

etena nibandhe sāmayikānāṃ svasya ca tattvaśodhanārthaṃ devyāḥ 
paścādbhāge laukikaṃ kalaśaṃ saṃsthāpya saṃskṛtadravyaṃ kiṃcit kṣipet iti 
lekho'pi nirmūlaḥ śiṣṭaiḥ sārdhaṃ cidagnau haviḥśeṣaṃ hutvā iti 
viśeṣārghyaśeṣasyaiva pratipattikathanāt |

p. 51)

ata eva baudhāyanācāryāḥ śāstrasaṅkaraṃ na kuryādityuktvā saṅkarakaraṇe 
pratyavāyamapyāhuḥ-

svaśāstre vartamāno yaḥ paraśāstreṇa vartate |
bhrūṇahatyāsamaṃ tasya svaśāstramavamanyataḥ || iti ||

na caivaṃ pūrvoktarītyā anuṣṭhitirudāsīnasthale bhavatu yasyākaraṇe 
śāstrāntare nindā bahvī tasyānuṣṭhānaṃ sarvaiḥ kāryam iti vācyam 
ātañcanaprakaraṇe tadyatkvalaiḥ [tadva-a.] rākṣasam iti kvalanindāṃ kṛtvā 
dadhnā'tanakti iti śākhā'ntare vihitam | tadanyaśākhāyāṃ auṣadhayaḥ 
pūtikāḥ kvalāḥ iti kvalaiḥ ātañcanaṃ vihitam | evaṃ 
patnīsaṃyājāsamiṣṭayajuranuṣṭhāne [pitryāyāṃ sami-ba ba 1.] bahunindā 
kvacicchrūyate | baudhāyanairnindā na kṛtā | tāvataiva paranindāmanādṛtya 
samiṣṭayajuranuṣṭhānaṃ baudhāyanānuyāyinaḥ kurvanti śiṣṭāḥ | tasmāt 
paraśāstre nindā akiñcitkarā |

na ca tripurārahasye-

tantrānuktaṃ sūcitaṃ tu tathā'nyeṣvapi dūṣitam |
akṛtaṃ karma yadrāma [ḍāmarivi-a a 1.] vikalpanavivarjitam |
tadanyasmādupādeyameṣa śāstrasya nirṇayaḥ ||

ityasyāḥ gativiraha iti vācyam yasyānanuṣṭhāne paraśāstre nindā svaśāstre ca 
vikalpaḥ tasya tatra nindā yadviṣaye paraśāstre tadādartavyaṃ tāvatā 
svaśāstrahānivirahāt | yathā āpastambasūtre vājapeye agnicayananindā 
baudhāyane na nindā kṛtā kiṃtu codakaśāstreṇa uttaravedyā saha vikalpitam | 
tatra svaśāstrasya uttaravedyanuṣṭhāne'pi hānyabhāvāt 
niṣedho'pyanugrāhyaḥ-uttaravedirevānuṣṭheyā ca cayanamiti ||

tathā atrāpi tādṛśasthale anuṣṭhānārtham idaṃ vacanam na nityavacchrutasya 
śāstrasya bādhārtham | etadvacanasya gatyataraṃ śrīvidyāprakaraṇe vistareṇa 
vakṣyāmaḥ ||

astu vā [asyādhastanabhāṣyagataphalādhikyam-ityanenānvayaḥ |]-

niṣiddhaṃ varjayettantrāntare kiṃcinmaheśvari |
yatastadekaśāstraṃ vai mantraikyāddevataikyataḥ |
tasmāt svaśāstre yatkiṃcinniṣiddhaṃ parivarjayet 

p. 52)

anyatsvatantrānuktaṃ tu samartha upasaṃharet |
svatantreṇāviruddhaṃ tu yāvadanyat samācaret |
tāvadabhyudayādhikyaṃ bhavettasya tu niścitam |
ākāṃkṣitaṃ cāpyanyasmādāharedeva kiṃcana ||

iti tantrāntaravacanānusāreṇa puṇyāhavācanādīnām upasaṃhāre 
phalādhikyam | ananuṣṭhāne avaiguṇyamiti rahasyam |

pātrādhikyaṃ ca svaśāstraviruddhaṃ heyameva vastuto likhitatantravacasām agre 
[agre nāma-āgāmini 3 khaṇḍastha śrīkramīye 31 sūtrabhāṣyāntagranthe |] 
pātrāsādanaprakaraṇe vakṣyamāṇarītyā gatisaṃbhavāt 
anupapattileśābhāvāt | ekaprayoge yatsūcitam ākāṃkṣitaṃ karmasāmānye 
avyabhicaritasaṃbandhaṃ ca [tat] anyasmāt grāhyaṃ nānyaditi rāddhāntaḥ | 
etadvitatyāgre spaṣṭīkariṣyāmaḥ |

itthaṃ ca yaḥ puruṣaḥ sarvatantrāṇyupasaṃhṛtya yāvadaṅgeṣviyattāṃ 
saṃpādya ekarūpaṃ prayogavidhiṃ nirmāya anuṣṭhātuṃ samarthaḥ tasya 
sarvajñasya tādṛśakarmaṇaḥ śreyo'dhikyaṃ bhaviṣyatveva | 
yastvetādṛśe'samarthaḥ saḥ tvākāṃkṣitādimātraṃ tantrāntarāt gṛhītvā 
svaśāstramātrānuṣṭhānena kṛtārtho bhaviṣyatyeva | na tu tantrāntarasthānāṃ 
keṣāṃcidupasaṃhāraḥ keṣāṃcidanupasaṃhāraḥ ityardhajaratīyanyāyo yuktaḥ 
| nibandhakāro nyāyagandhamajānan svecchayā kānicidupasaṃharan kānicit 
parityajan devānāṃ priya iti mantavya ityalamatilekhanena ||

sarvathetyanena [etatpracaladekatriṃśasūtrasthaḥ sarvathā śabdo'tra bodhyaḥ |] 
dīkṣāṃ vinā nātyantikī muktiḥ iti sūcitam | tatra spaṣṭaṃ pramāṇaṃ 
tripurārahasyasthaṃ pūrvameva likhitam || 31 ||

dīkṣātrayam 

evaṃ dīkṣāṃ vidhāya tatra avāntarabhedavatīṣu tāsu ekakālasaṃbandhaṃ 
vidhātum ādau tāṃ vibhajya vibhāgaprayojakaṃ dharmaṃ ca pradarśya tāsu 
tisṛṣvapi ekakālasaṃbandharūpaṃ guṇaṃ vidhatte-

dīkṣāstisraḥ śāktī śāṃbhavī māntrī ceti |
tatra śāktī śaktipraveśanāt śāmbhavī caraṇavinyāsāt 
māntrī mantropadiṣṭayā sarvāśca kuryāt || 32 ||

cetītyantena vibhāgaṃ kṛtvā tāsāṃ nāmakathanam | tatra tāsu madhye 
śāktītyasyārthaṃ vivṛṇoti śaktipraveśanāt | jāteti śeṣaḥ | yadvā-
śaktipraveśanāt iti hetau pañcamī |

p. 53)

śaktipraveśanādyā dīkṣā śaktipraveśahetukītyarthaḥ | evamevāgre'pi | 
praveśanāditi svārthe lyuṭ | śaktipraveśanaṃ nāma agre [agre nāmātraiva 
dīkṣāvidhau-35-36 sūtrayorityarthaḥ |] tadamṛtakṣālitam ityārabhya pāśān 
dagdhvā ityantapratipāditā kriyā | caraṇavinyāso nāma śiṣyaśirasi 
gurukartṛkaṃ kāmeśvarīkāmeśvarayoḥ raktaśuklacaraṇabhāvanam | 
mantropadeśastu spaṣṭaḥ 
śiṣyamātraśrāvaṇaviṣayagurukartṛkaśabdoccāraṇarūpaḥ | sarvāḥ 
pūrvoktāḥ | tisraścetyanena ekakālasaṃbandhaḥ tāsu bodhyate | ca śabdaḥ 
sāhityavācī | sāhityaṃ ca ekakālasaṃbaddhatvarūpam | tathā ca sarvāḥ 
dīkṣāḥ saha kuryāditi phalito'rthaḥ || 32 ||

pareṣāṃ matamāha-

ekaikāṃ vetyeke || 33 ||

vīpsayā trayāṇāṃ samuccayaḥ kālabhedamātramiti jñāpitam | vākāreṇa 
madhye cirakālavyavadhānaṃ kāryaṃ na tu divasatraya iti sūcitam || 33 ||

itaḥ paraṃ gurukartṛkāṃmāha-

sadguruḥ [ito gururdīkṣādānavidhimārabhate |] kramaṃ pravartya sāṅgaṃ hutvā 
taruṇollāsavān śiṣyamāhūya vāsasā mukhaṃ baddhvā 
gaṇapatilalitāśyāmāvārtālīparāpātrabindubhistamavokṣya siddhāntaṃ 
śrāvayitvā || 34 ||

sāṅgam aṅgaiḥsahitaṃ kramaṃ pradhānadevatāpūjāṃ pravartya kṛtvā | atra 
aṅgāni gaṇapatiśyāmāvārtālīparāḥ | pradhānaṃ ca lalitā | atra aṅgapadena 
aṅgakramo lakṣyate | aṅgakramasahitaṃ pradhānakramamityarthaḥ || 

nanu idaṃ kathaṃ jñātamiti cet-śṛṇu | atraiva dvitīyakhaṇḍārambhe itthaṃ 
[dvitīyakhaṇḍasya prathamasūtre itthaṃ sadityādi 1 sūtramasti |] 
sadgurorāhitadīkṣaḥ mahāvidyā'rādhanapratyūhāpohāya gāṇanāyakīṃ 
paddhatimāmṛśet ityatra vighnāpohāya yatkriyate tatpradhānam [aṅgaṃ] loke 
dṛṣṭam | yathā rājadarśanārthamudyuktasya madhye dvārapālaiḥ nirodhe kṛte 
sati tadupāsanaṃ rājadarśanāṅgamiti | na ca prāṇimātrasya 
vighnaśaṃkāsattvāt vighnanāśako gaṇapatiriti ghaṇṭāghoṣāt 
vighnaparihārārthaṃ yathā karmamātre gaṇapatyārādhanaṃ tathā atrāpi 
prāptameveti idaṃ vacanaṃ vyarthamiti vācyam vināyakastavapāṭhenāpi 
kvacidvighnanāśapratipādanāt ārādhanasya pakṣe prāptau 
śrīvidyopāstivighnanirāso'nenaiva kārya iti niyamavidhisaṃbhavāt | evaṃ 
tṛtīyakhaṇḍādau evaṃ gaṇapatimiṣṭvā vidhūtasamastavighnavyatikaraḥ 
śakticakraikanāyikāyāḥ śrīlalitāyāḥ 

p. 54)

kramamārabheta iti ktvāpratyayenāpi agniṃ citvā sautrāmaṇyā yajeta itivat 
lalitopāstyaṅgatvaṃ spaṣṭam | na ca agniṃ citveti vākye pūrvakarmaṇaḥ 
pradhānatvam uttarakarmaṇo'ṅgatvaṃ 
tadvadatrottaramanuṣṭhīyamānalalitopāsteḥ gaṇapatyārādhanāṅgattvāpattiḥ iti 
vācyam na hi ktvāpratyayenaiva pūrvavartinaḥ cayanasya prādhānyanirṇayaḥ 
kiṃ tu prajākāmaścinvīta paśukāmaścinvīta iti phalavattvāt citeḥ 
pradhānatvaṃ tatsannidhau aphalasautrāmaṇeḥ phalavatsannidhāvaphalaṃ 
tadaṅgam iti nyāyena sautrāmaṇyā aṅgatvam | tathā lalitopāsteḥ 
muktiphalakatvaśrutyā vighnopāstidvārā śrīlalitopāsanāyāḥ yatphalaṃ tadeva 
tasyetyaṅgatvaṃ kḷptam | ata eva revatīṣu vāravantīyaṃ sāma kṛtvā 
paśukāmo hyetena yajeta ityatra vāravantīyasāgno na prādhānyam | na ca 
darśapūrṇamāsābhyāmiṣṭvā somena yajeta itivat kevalapaurvāparyavidhireva 
kiṃ na syāt iti vācyam | tatra somena yajeta ityanena somasya darśapūrṇamāsayoḥ 
yadāgneyādivākyaiḥ utpannatvāt kevalakramamātravidhāyakatvam prakṛte ca 
lalitākramotpattivākyāntarābhāvāt kramaviśiṣṭakarmavidhānāt | kiṃ ca tatra 
dvayoḥ svatantraphalavattvena atra tathātvābhāvācca na 
kramamātravidhāyakatvaṃ na vā aṅgāṅgibhāvahāniḥ || 

etena itthaṃ [idaṃ 7 khaṇḍe śrīvārāhīkrame-1 sūtrastham |] 
saṅgītamātṛkāmiṣṭvā kolamukhīṃ vidhivad varivasyeta ityatrāpi 
parasparāṅgāṅgībhāvāpattiriti nirastā ubhayorapi 
rājadarśanarūpaphalakattvena svatantraphalābhāvāt || 

na ca evaṃ sati sautrāmaṇivat pratiprayogamāvṛttyāpattiḥ iti vācyam | na hi 
vayaṃ pradhānāṅgamiti brūmaḥ kiṃtu lalitākramārambhāṅgaṃ 
anvārambhaṇīyāvat | ata eva tasmin vākye lalitākramamārabheta iti śrutam | 
svakartṛkopāstikriyādhvaṃsānadhikaraṇakṣaṇasaṃbandhikramaṃ nirvartayiṣya 
iti saṃkalpa eva āraṃbhapadārthaḥ | ayaṃ sakṛdeva | ato nāvṛttyāpattiḥ ||

etena brāhme muhūrte gaṇapatyupāsanāṅgattvena hṛdayakamale 
gaṇeśadhyānaṃ lalitopāsto tasyā dhyānaṃ caikakāle prāptaṃ viruddhamiti 
śaṃkā'pi nirastā ||

evaṃ śyāmāyā apyaṅgattvaṃ śyāmopāstikhaṇḍe tasyāḥ 
pradhānasacivapadaṃ śyāmā ityanena kolamukhyāśca tatsaparyākhaṇḍe 
mahārājñyāḥ daṇḍanāyikāsthānīyā ityanena parāyāśca 
śiṃhāsanavidyāyāḥ hṛdayaṃ ityanena ca suspaṣṭam ||

tasmādimā aṅgadevatāḥ | tāsāṃ kramasahitaṃ pradhānadevatāyāḥ kramaṃ 
kṛtvā ityarthaḥ phalitaḥ ||

p. 55)

yadyapi pradhānadevatopāstau imāḥ aṅgadevatā iti aṅgapadena vyavahāro 
bhavatu | prakṛtapūjāyāṃ pañcāpi [atra pañcaśabdena gaṇapati lalitā śyāmā 
vārtālī pareti pañcakaṃ jñeyam |] samapradhānāni | anyatra kḷptāṅgatvaṃ 
gṛhītvā tenaiva rūpeṇa gaṇapatyādīn bodhayitvā sahaśabdena sarveṣāṃ 
tantrānuṣṭhānamātraṃ vidhīyate | tantre sati devatākramaḥ pāṭhakrama eva | 

agre vakṣyamāṇa yāvadaṅgakalāpo nāmātideśena prāptaḥ | tatrāṅgānāṃ 
yeṣāṃ tantraṃ saṃbhavati teṣāṃ tathaivānuṣṭhānam | yeṣāṃ 
viruddhadharmāṇāṃ na saṃbhavati teṣāṃ padārthānusamayena [idaṃ 
padārthānusamayakāṇḍānusamayalakṣaṇaṃ-ddi. pariśiṣṭe 8-viṣaye dṛśyam |] | 
yeṣāṃ ca padārthānusamayo na saṃbhavati teṣāṃ kāṇḍānusamayena | 
yathāyathaṃ buddhimatā hi kāryaṃ granthavistarabhayānneha likhyate || 

kramaṃ [kramaṃ pravartya-ityādi anugata 53-patrasthaṃ-34-sūtrasthaṃ padam |] 
pravartyetyanenaiva homasya prāptau hutvā [idamapyadhastāddṛśyam-] iti 
homottarakālasya śiṣyāhvānāṅgatā siddhyartham ||

adyapyagre kramāvasare homasya vaikalpikatvāt atrāpi vikalpena prāptau 
nityatvadyotanāya hutvetyapi vaktuṃ śakyam tathā'pi agre gaṇapati-lalitā-
śyāmā-vārtālī-parā-pātrabindubhiḥ tamavokṣya iti vacanāt 
kramasamāptirnāstīti siddham | tarhi kadā śiṣyāhvānaṃ kāryamiti 
kālākāṃkṣāsattvāt tadvidhānamevocitaṃ na tūbhayavidhiḥ 
vākyabhedaprasaṅgāt | homasyākaraṇapakṣe'pi tadupalakṣitakālottaratvaṃ 
saṃbhavati vatsairamāvāsyāyām itivat |

etena nibandhe viśeṣapātravisarjanānte śiṣyamāhūyeti nirastaḥ | sarveṣāṃ 
viśeṣārghyapātrodvāsanena taccheṣābhāvena 
pātrapañcakasāmānyārghyodakabindubhiḥ tamavokṣyeti svalekhanasyaiva 
sandarbhaviruddhatvācca || 

vastutastu hutveti svātmani haviśśeṣaṃ hutvetyarthaḥ svarasaḥ | ata eva 
tādṛśāhutijanitataruṇollāsavān iti vakṣyamāṇaḥ svarasaḥ 
taruṇollāso'vasthāviśeṣaḥ | tasya vivaraṇaṃ caraṇakhaṇḍavyākhyāne 
spaṣṭam [idaṃ-10-khaṇḍe-82-sūtre-18-khaṇḍe-18-sūtre ca kiñcit kiñcit |] ||

śiṣyamāhūya ityanena tāvatparyantaṃ śiṣyasyāntaḥpraveśo nāstīti jñāpitam 
| tannāma sambuddhyantamuccārya ehīti vadet | yathā pravargye gavāmāhvānaṃ 
karmāṅgam idamapi tathā karmāṅgam | tenopāyāntareṇa āgamanaviṣayaṃ 
svābhiprāyaṃ na prakaṭayet ityarthaḥ ||

p. 56)

etena nibandhe varaṇānantaraṃ tadaiva saśiṣyo viviktaṃ dīkṣāpradeśamāsadyeti 
lekhaḥ parāstaḥ samīpavartiśiṣyasya āhvānāsaṃbhavāt na ca adṛṣṭārtham 
āhvānam iti vācyam dṛṣṭe saṃbhavati adṛṣṭakalpanāyā anyāyyatvāt ||

śeṣaṃ spaṣṭam || 

atra pātrapadena [pātraśabdenātrānugata 53-patrastha-34-sūtrastha-
pātrabindumirityetatpadastha pātraśabdotra grāhyaḥ |] viśeṣārghyapātraṃ 
grāhyam | kathametaditi cet-ittham | yadi sāmānyārghyapātrameva syāt tasya 
praṇītāvat tantrasiddheḥ tasya sarvasaṃbandhina ekatvāt 
sāmānyārghyabindubhiriti laghu sūtritaṃ syāt | na ca tvatpakṣe'pi 
viśeṣārghyapātrāṇāṃ bindubhiriti laghusūtrasaṃbhavāt 
gaṇapatilalitetyādiprayāso vyartha iti vācyam evaṃ sati 
vidheyasaṃkhyāvācakabahutvasya tritve kapiñjalādhikaraṇanyāyena 
paryavasānāt pañcapātrāṇāmalābha eva | na ca evamapi 
pañcaviśeṣārghyapātrairiti laghusūtraṃ saṃbhavati iti vācyam na vayaṃ sūtre 
akṣarādhikyaṃ nyūnatvaṃ vā hetutvenopadiśāmaḥ kiṃ tu 
sāmānyārghyapakṣe tasyaikatvāt parā'ntaṃ vyartham | viśeṣārghyapakṣe 
pañcapātralābhāyeti sārthakam | akṣarādhikyaṃ ca svatantreccheṣu 
niyantumaśakyam ||

vastutastu na praṇītāvattantraṃ sāmānyapātrasya gaṇapatilalitā'diṣu 
sāmānyārghyasaṃskārasya ekarūpatvābhāvāt bhinnadharmayoḥ 
tantrāsaṃbhavāt | na ca bhinnadharmāṇāṃ pradhānānāṃ kathaṃ tantramiti 
śaṅkyam | pradhānānāṃ sahānuṣṭhānaṃ tantraṃ na tu sakṛdanuṣṭhānam | 
iha tu sakṛdanuṣṭhānamuktam ayuktameva sahānuṣṭhānaṃ tu bhavatyeva | ato 
nedaṃ gamakaṃ pātrapadena viśeṣārghyagrahaṇe kiṃtu hutvā 
taruṇollāsavānityuktvā paścāt pātrabindubhirityuktatvāt 
homasādhanībhūtadravyaṃ buddhisthaṃ pātrapadena lakṣyate natvabuddhisthaṃ 
sāmānyārghyadravyam | kiṃ ca binduśabdo mukhyadravye tāntrikāṇāṃ 
saṃketasiddhaḥ bindutarpaṇasaṃtuṣṭā iti lalitā sahasranāmni vyavahārāt | ata 
eva binduśabdo'pi gamakaḥ | itthaṃ ca viśeṣārghyagrahaṇe idameva jñāpakam ||

ta śiṣyam avokṣya prokṣya | idaṃ śiṣyasaṃskārarūpatvāt gurukarma | śeṣaṃ 
sugamam ||

etena nibandhe gaṇapatyādimūlamuccārayan 
pātrapaṃcakasāmānyārghyodakabindubhiḥ tamavokṣya iti yā paṅktiḥ tatra 
mūlamuccārayanniti svakapolakalpitā sarvā nirmalā ||

siddhāntaṃ siddhāntapratipādakavākyasamūhaṃ pūrvoktaṃ [pūrvoktaśabdena 
anugata-3-sūtrataḥ-31-sūtrāntoktajñānaśikṣādivākyānītyarthaḥ |] 
śrāvayitvā | idaṃ śrāvaṇam adṛṣṭārthaṃ kḷptīrvācayati itivat 
nā'rthajñānārtham atigahanasyārthasya tāvatā kālena bodhāsaṃbhavāt | 
tasmāt pūrvoktavākyāni [pūrvoktaśabdena anugata-3-sūtrataḥ-31-
sūtrāntoktajñānaśikṣādivākyānītyarthaḥ |] 
dīkṣā'pūrvasahakāryapūrvajanakatvena śrāvayet || 34 ||

p. 57) śāmbhavī dīkṣā

atha śāmbhavīdīkṣāmāha-

tacchirasi raktaśuklacaraṇaṃ bhāvayitvā tadamṛtakṣālitaṃ 
sarvaśarīramalaṅkuryāt || 35 ||

tacchirasi śiṣyasya śirasi | raktaśuklacaraṇaṃ-raktaṃ kāmeśvaryāḥ 
rajassvabhāvāt | taduktaṃ-raktacaraṇāṃ dhyāyet parāmambikām iti | 
śyāmārahasye'pi-

raktaṃ tu caraṇaṃ devyā rajorūpaṃ prakīrtitam |
śuklaṃ ca tadadhiṣṭhānacaraṇaṃ sātvikaṃ bhavet || iti ||

etena śuklacaraṇamapi vyākhyātam | prāṇyaṅgatvādekavadbhāvaḥ bhāvayitvā 
dhyātvā tadamṛtaṃ caraṇasaṃbandhi yadamṛtam udakaṃ tena kṣālitaṃ 
nāśitaṃ sarvapātakaṃ yasya | īdṛśaṃ śiṣyaṃ kuryādityarthaḥ | 
yadyapyanyapadārthasya śiṣyasya karaṇaṃ na saṃbhavati tathā'pi saviśeṣaṇe hi 
vidhineṣedhau sati viśeṣye bādhe viśeṣaṇamupasaṃkrāmataḥ iti nyāyena 
śiṣyaviśeṣaṇasya pāpanāśasya karaṇaṃ saṃbhavatīti bhāvaḥ | tasya sarvaṃ 
yāvaccharīraṃ gandhavastrabhūṣaṇakusumādibhiḥ guruḥ alaṅkuryāt bhūṣayet 
|| 35 ||

śāktī dīkṣā 

śāktīṃ dīkṣāmāha-

tasyāmūlamābrahmabilaṃ prajvalantīṃ prakāśalaharīṃ jvaladanalanibhāṃ 
dhyātvā tadraśmibhistasya pāpapāśān dagdhvā || 36 ||

tasya śiṣyasya mūlaṃ pāyūpasthamadhyavarticaturdalakamalādhāradeśaḥ 
tanmaryādati āmūlam | evam-adhomaryādāmuktvā ūrdhvamaryādāmāha-
brahmabilaṃ sahasradalakamalādhārabhūtaṃ maryādā asyeti ābrahmabilaṃ 
prajvalantīm ata eva prakāśānāṃ laharyaḥ ūrmayo yasyāṃ tādṛśīm ata eva 
jvālāyukto yo'nalo'gniḥ tannibhāṃ tadupamāṃ dhyātvā saṃvidamiti śeṣaḥ | 
jvaladanalanibhatvādeva pāpapāśadāhakatvamupapannam | pāpapāśasya dāha 
eva na bhāvanam-ata eva dagdhveti ||

yadyapi atratyapāṭhakramamanusṛtya ādau śāmbhavī tataḥ śāktīti pratibhāti 
tathā'pyupakrame dīkṣāvibhāgavelāyāṃ śāktī śāmbhavī māntrī ceti 
coktatvāt upakramānusāreṇa upasaṃhāro'nyathā neyaḥ 
vedopakramādhikaraṇanyāyena | ata eva tatpāśadāhānantaraṃ 
tadbhasmarūpamalasya 

p. 58)

sattvāt caraṇanirgatajalena tatkṣālanarūpārthavattvādarthakramo'pyupapannaḥ | 
tathā cādau śāktīṃ dīkṣāṃ saṃpādya paścācchāmbhavīṃ kuryāditi 
siddham || 

guruḥ kramaṃ pravartya ityārabhya siddhāntaṃ śrāvayitvā 
ityetadanto'ṅgakalāpo'nayoreva prakaraṇasannidhibhyāṃ śundhanamantrasyeva 
sānnāyye iti kecit | tanna | tathā sati tṛtīyāyāṃ dīkṣāyām-uttaratra 
prathamasiktān dvitīyakhaṇḍāgrān grāsayitvā iti vihitaṃ tadanupapannam 
sāṅgakramavidheḥ tadanaṅgatvena tatra kramaprāptyabhāvena 
prathamadvitīyayorabhāvāt | na ca asaṃskṛtaṃ laukikaṃ grahītuṃ śakyam | 
tasmāt liṅgena sannidhiṃ bādhitvā trayāṇām aṅgam | itthaṃ ca yadā ekaikāṃ 
veti pakṣānusaraṇaṃ tadā tṛtīyadīkṣāyāṃ pūrvoktānyaṅgānyanuṣṭheyāni 
||

etena nibandhe amṛtakṣaraṇena bāhyamābhyantaraṃ ca malaṃ dūrīkuryāt atha 
śiṣyasyāmūlādhāramityārabhya tatkiraṇaiḥ [tasyāḥ prakāśalaharyāḥ 
kiraṇairityarthaḥ |] tasya pāśān dahet ityasya dvitīyatvaṃ likhitaṃ nirastam | 
pūrvadīkṣayaiva bāhyābhyantaramaladūrīkaraṇe asmin malasyābhāvena 
uttaradīkṣayā dāhāsaṃbhavācca | na ca pūrvadīkṣayā dūrīkṛtaṃ malaṃ 
bahistiṣṭhati tasyottaradīkṣayā dāha iti vācyam śarīre vibhāvitāgninā 
śarīrasthamalasyaiva nāśo bhavet na dūrīkṛtasya | tasmādasmatsaraṇireva 
sādhvīti yuktamutpaśyāmaḥ || 36 ||

māntrī dīkṣā 

māntrīdīkṣāprayogaṃ vaktumupakramate-

trikaṭu [1] triphalā [2] caturjāta [3] takkola [4] madayantī [5] sahadevī [6] dūrvā 
[7] bhasma [8] mṛttikā [9] candana [10] kuṅkuma [11] rocanā [12] karpūra [13] 
vāsitajalapūrṇaṃ vastrayugaveṣṭitaṃ [navīnavāso-a. śrī.] nūtanakalaśaṃ 
bālāṣaḍaṅgenābhyarcya śrīśyāmāvārtālīcakrāṇi nikṣipya 
tisṛṇāmāvaraṇamantrairabhyarcya saṃrakṣyāstreṇa 
[astradhyenuyoniprabhṛtyanekamudroddhārajñānāya dvi. pariśiṣṭa-15 viṣayaḥ 
svatantro dṛśyaḥ |] pradarśya dhenuyonī || 37 ||

trikaṭuḥ pippalīśuṇṭhīmarīcyaḥ | triphalāḥ harītakīdhātrīvibhītakyaḥ | 
taduktaṃ vaidyasāre-

śuṇṭhīmarīcipippalyaḥ proktastrikaṭusaṃjñakāḥ |
triphaleti samākhyātā pathyādhātrīvibhītakaiḥ || iti ||

caturjātaṃ uśīrailālavaṅganāgakesarāṇi | taduktaṃ madanamahārṇave-

p. 59)

lavaṅgamelośīraṃ ca trisugandhaṃ prakīrtitam |
nāgakesarasaṃyuktaṃ caturjātaṃ pracakṣate || iti ||

takkolaḥ [takkolaḥ gurjaradeśe-cinīkabālā-iti nāmnā-suviditaḥ atra ca prāyaḥ 
kaṅkolaśabdo'vadheyaḥ |]-marīcisadṛśaḥ tāmbūlena saha bhakṣyaḥ 
śaityopacārahetuḥ vastuviśeṣaḥ | 

madayantī sahadevī vaidyake prasiddhe āraṇyake | dūrvā bhasma mṛttikāḥ 
prasiddhāḥ ||

yattu mṛttikāpadena nibandhe saptamṛttikāgrahaṇaṃ tannirmūlam | yadi 
mṛttikāpadena sarvatra saptamṛttikāgrahaṇaṃ tarhi mūlanakṣatrajananaśāntau-
saptamṛdbhiḥ samāyuktaṃ pañcapallavasaṃyutam ityatra saptagrahaṇaṃ vyartham 
| evaṃ snānārthaṃ mṛdamāharet ityatrāpi tathā'pattiśca ||

etairyuktamiti jalena sākaṃ madhyamapadalopasamāsaḥ vāsitamityanena 
dūrvā'dīnāmanvayāsambhavāt | candanaṃ prasiddham | kuṅkumaṃ 
kāśmīram | rocanā gorocanam | karpūraṃ prasiddham | etairvāsitaṃ yajjalaṃ tena 
pūrṇaṃ vastrayugena veṣṭitaṃ nūtanam-abhuktaṃ kalaśaṃ bālāṣaḍaṅgena 
[etacchrībālātryakṣarīmantraṣaḍaṅganyāsaprātyakṣyataddevatā-
mantroddhāraṇarṣicchandoviṣayādijñānāya dvi. pariśiṣṭe-9-vi. dṛśyaḥ|] aiṃ 
hṛdayāya namaḥ iti krameṇa bījatrayadvirāvṛttyā agre [agre nāma 
mantranirdeśamantarā ṣaḍaṅganyāsakaraṇetikartavyatāmātraṃ tvagre-3-khaṇḍe 
śrīkrame 19 sūtre tadbhāṣye cāstītyato'vagamyam-pratyakṣaṃ tu-dvi-pa-śi. 9-
viṣaye vidyate |] vakṣyamāṇarītyā agnīśāsuravāyukoṇeṣu madhye 
pūrvādidikṣu ca krameṇa | atra ṣaḍaṅganāmnā uktadharmātideśaḥ | śrīśca 
śyāmā ca vārtālī ceti tāsāṃ cakrāṇi nikṣipya sthāpayitvetyarthaḥ | 
kutretyākāṃkṣāyāṃ samīpavartitvāt kalaśe eva | tatrāpi na 
pūrṇapātrādyupari nikṣipyeti svārasyāt kiṃ tu jale [atra jale eva nāma-
kalaśasthajale eveti bodhyam] eva ||

yadyapi uddharaṇasyānuktavāt yogyatābalācca kalaśasamīpadeśe ityapi vaktuṃ 
śakyam tathā'pi pūjāyāṃ bhūmau cakrasthāpanaṃ vinā 
pūjā'saṃbhavenārthāpattyā'tideśena vā sthāpanasya prāptatvena kṣiptatvena 
kṣiptvetyasya vaiyyarthyabhiyā jale prakṣepa āvaśyakaḥ || 

na ca yatra kvacana sthāpanam-arthāpattyādinā prāptaṃ na kalaśasamīpadeśe 
tadarthaṃ tat iti vācyam kalaśasamīpadeśāpekṣayā kalaśasyaiva 
ādhāratvakalpane lāghavāt || 

kiṃ ca kalaśasamīpasthacakrapūjā na kalaśasaṃskāro bhavitumarhati 
tadasaṃyuktatvāt | atra pūrvaṃ ṣaḍaṅgairabhyarcyeti kalaśasaṃskāraḥ | 
saṃrakṣyāstreṇetyādirapi tathā | ubhayataḥ sandaṣṭaṃ kathaṃ 
tatsaṃskārabhinnaṃ vijātīyaṃ bhavet | tato jala eva cakrāṇāṃ kṣepaḥ tatraiva 
pūjanaṃ pūjā'rambhasamaya eva jale prakṣepaḥ | tena āvāhanottaraṃ kathaṃ 
cakracālanamiti śaṅkā'navakāśaḥ ||

p. 60)

yadvā-kalaśe kṣiptveti vacanaṃ visarjanaparyantaṃ na cālayet ityasya bādhakaṃ 
bhavitumarhati | yuktaścāyameva pakṣaḥ | anyathā sāṅgaṃ kramaṃ 
nirvartyetyasya samīpa eva kalaśe nikṣipyeti vadet |

tisṛṇāṃ [imāḥ śrīlalitādayastisro devyaḥ-anugate-53-patre 34 sūtroktā 
śrīlalitāśyāmāvārtālyaḥ | iti-jñeyāḥ |] lalitā'dīnām 
āvaraṇamantrairityanena kevalapañcopacārapūjāvyāvṛttiḥ | abhyarcya 
pūjayitvā ||

idaṃ pūjanam apūrvam anena vidhīyate | pūjanottaram uddharaṇam ārthikam | 
pūjanaṃ tu kuladravyeṇaiva tattadviśeṣārghyapātrasthena kusumākṣataiśca 
apūrvapūjāmātravidhānāt | tāvanmātraṃ kṛtvā cakroddharaṇaṃ kāryam | 
jalāduddhṛtacakrāṇāmupari gandhapuṣpākṣatanikṣepo nyāyasiddhaḥ ||

astreṇa [etadastramudrārthaṃ tatpurataḥsthadhenuyonimudrārthaṃca dvi. pa. śi. 15-
7/14 15-8/1-2 15-8/2 vi dṛśyāḥ |] phaṭ iti mantreṇa saṃrakṣya 
rakṣobhūtapiśācānāṃ durādharṣaṃ kṛtvā | dhenuyonimudreprasiddhe te 
pradarśya tadupari kṛtvā || 37 ||

mātṛkāyantram 

mātṛkāyantramāha [tadanantarakṛtyamāha-a śrī.]- 

śivayuksauvarṇakarṇike svaradvandvajuṣṭakiñjalkāṣṭake 
ka ca ṭa ta pa ya śa lākṣaravargāṣṭayuktāṣṭadale 
digaṣṭakasthita ṭhaṃ vaṃ caturaśre mātṛkāyantre 
[adhastanabhāṣyāvalokanenedaṃ mātṛkācakraṃ-suviditameva-syāt |] śiṣyaṃ 
niveśya 
tena kumbhāmbhasā tisṛbhiḥ vidyābhiḥ snapayet || 38 ||

śivo hakāraḥ tena yuktaḥ sauvarṇaḥ sau-iti varṇaḥ saḥ karṇikāyāṃ 
kamalamadhyadeśe yasya etādṛśe | atra pūrvoktavarṇopari visargo'pi yojanīyaḥ 
vyomendvaurasanārṇakarṇikam- iti śrīśaṅkarabhagavatpādaiḥ uktatvāt [evaṃ 
ca-hasauḥ-iti niṣpannaṃ-jñeyam |] | imāni sarvāṇi kamalaviśeṣaṇāni | svarāḥ 
akārādivisargāntāḥ ṣoḍaśa teṣāṃ dvaṃdvaṃ dvayaṃ dvayaṃ tena juṣṭaṃ 
yuktaṃ kiñjalkāṣṭakaṃ patrayugamadhyavartideśaviśeṣaḥ yasyeti bahuvrīhiḥ | 
kaśca caśca ṭaśca taśca paśca yaśca śaśca laśca iti dvandvaḥ dvandvānte 
śrūyamāṇaṃ pratyekaṃ saṃbadhyate iti nyāyena vargapadaṃ sarvaiḥ 
sambadhyate | tathā ca kavargamārabhya 

p. 61)

pavargaparyantaṃ pañca pañca varṇāḥ yavargaścatvāraḥ śavargo'pi tathā 
lakṣ iti lavargaḥ evam-aṣṭavargairyuktāni aṣṭadalāni yasyeti bahuvrīhiḥ | 
ekaikadale ekaikaṃ vargaṃ likhet iti phalitārthaḥ ||

kesareṣu daleṣu ca varṇalekhane kramākāṃkṣāyāṃ prācyadikrama eva 
dhartavyaḥ | yadyapi dalakesarayoḥ dvayorapi prācī na saṃbhavati tathā'pi 
padmakuṇḍalekhanaprakāreṇa lekhane karṇikāyāḥ prācī tadanusāreṇaiva 
daleṣu varṇalekhanakramo'nusandheyaḥ ||

diśāṃ yadaṣṭakaṃ prācyādīśānadigantaṃ teṣu sthitau vakāraṭhakārau 
yasmin īdṛśaṃ caturaśraṃ [atrāgāmigranthe ca asraśabdo dantyasakārānto 
jñeyaḥ |] yasminniti bahuvrīhiḥ | īdṛśe mātṛkāsaṃjñake yantre śiṣyaṃ 
niveśya sthāpayitvā ||

taditthaṃ-padmakuṇḍavadaṣṭadalaṃ padmaṃ vilikhya tadbahirdvārarahitaṃ 
caturaśraṃ [atrāgāmigranthe ca asraśabdo dantyasakārānto jñeyaḥ |] vilikhya 
karṇikāyāṃ hsauḥ iti vilikhya prāgādikesareṣu a ā iti krameṇa 
svaradvayamekaikakesare svaramekaṃ vilikhya patrāntaḥ pūrvoktasthāne 
[pūrvādidiksthapatramadhyavibhāgāśrayeṇeti jñeyam |] kādyaṣṭavargān 
pratyekam-ekaikasyāntaḥ ekaikaṃ vargaṃ vilikhya tadbahiścaturaśre 
[atrāgāmigranthe ca asraśabdo dantyasakārānto jñeyaḥ |] prāgādidigaṣṭake 
vaṃ ṭhaṃ-iti likhediti samuditārthaḥ | taduktaṃ bhagavatpādaiḥ-

vyomendvaurasanārṇakarṇikamacāṃ dvandvaiḥ sphuratkesaraṃ 
patrāntargatapañcavargayaśalārṇāditrivargaṃ kramāt |
āśāsvaśriṣu [atrāgāmigranthe ca asraśabdo dantyasakārānto jñeyaḥ |] 
lāntalāṅgaliyujā kṣoṇīpureṇāvṛtaṃ 
varṇābjaṃ śirasi sthitaṃ viṣagadapradhvaṃsi mṛtyuñjayam || iti ||

vyoma hakāraḥ induḥ sakāraḥ au svarūpaṃ rasanārṇaṃ visargaḥ lānto 
vakāraḥ lāṅgaliḥ ṭhakāraḥ śeṣaṃ spaṣṭam ||

tisṛbhiḥ śrīśyāmāvārtālīvidyābhiḥ [atra vārtālīśabdena-vārāhī-jñeyā- | 
vidyāśabdena ca-tāsāṃ tisṛṇāṃ mūlamantrā jñeyāḥ |] snapayet sarvāṅge 
jalasaṃyogo yathā bhavati tathā kuryāt | tenetiviśeṣaṇāt udakāntaramaparyāptau 
na grāhyamiti sūcitam | ayameva pūrṇābhiṣeka ityucyate || 38||

māntrīṃ dīkṣāmupasaṃharati-

sadukūlaṃ sālepaṃ sābharaṇaṃ samālaṃ suprasannaṃ śiṣyaṃ pārśve 
niveśya mātṛkāṃ tadaṅge vinyasya vimuktamukhakarpaṭasya tasya haste trīn 
prathamasiktān candanokṣitān dvitīyakhaṇḍān puṣpakhaṇḍānnikṣipya 
tattvamantrairgrāsayitvā dakṣiṇakarṇe bālāmupadiśya paścādiṣṭamanuṃ vadet 
||39||

p. 62)

sadukūlamityādi pārśve niveśyetyantaḥ spaṣṭārthaḥ | bahirmātṛkānyāsaḥ 
[ayaṃ nyāso mahānirvāṇatantrādyanekatantragranthastha eva grāhyo 
nādhunikapustakāt |] svāṅge tantrāntarokto yathā kriyate tadvacchiṣyāṅge 
vinyasya vimuktamukhakarpaṭasya pūrvaṃ mukhaṃ yena baddhaṃ vimuktaṃ 
mukhavastraṃ yasya tasya haste ||

idaṃ dīkṣātrayasya tantrapakṣe | kecinmatānusāreṇa kramikadīkṣāpakṣe 
tattaddīkṣā'nte visargaḥ ||

yadvā-sūtrakārasya tantradīkṣāyā eva abhimatatvāt tantrapakṣe eva 
mukhabandhanam ||

prathamasiktān atra prathamam-asaṃskṛtam- ājyena yūpamanakti itivat | evameva 
dvitīyaṃ jāghanyā patnīḥ saṃyājayanti itivat ||

vastutastu-kramasya pūrvaṃ vidhānāt taccheṣasya saṃskṛtasya vidyamānatvāt 
prāyaṇīyasya niṣkāse udayanīyamabhinirvapati itivat 
upayokṣyamāṇasaṃskārārthaṃ tāvatkālaṃ pātravisarjanamakṛtvā 
sthāpitatvāt saṃskṛtaprathamasiktadvitīyakhaṇḍānāmeva dānaṃ na 
tvasaṃskṛtasya ||

bahuvacanenaiva kapiñjalanyāyena tritvālābhe trīniti punarviśeṣaṇāt sakṛdeva 
trayāṇāṃ na nikṣepaḥ kintvekaikamiti dvau paridhī paridadhāti itivat ||

tattvamantraiḥ ātmatattvaṃ śodhayāmi namaḥ svāhā vidyātattvaṃ śodhayāmi 
namaḥ svāhā śivatattvaṃ śodhayāmi namaḥ svāhā iti tribhiḥ | grāsayitveti 
ṇijantaśravaṇāt ācāryānujñā'nantaraṃ bhakṣaṇam | bālāṃ tryakṣarīm | 
upadiśyetyantamaṅgam | iṣṭamanuṃ pañcadaśīṣoḍaśīrūpaṃ vadet 
upadiśedityarthaḥ [ita etat 39 sūtraṭīkāntaṃ dīkṣāvidhau 
pañcadaśīṣoḍaśyubhayagrahaṇakaḥ śāstrārthaḥ |] || 

nanu nāyaṃ ṣoḍaśyā upadeśavidhiḥ manum-ityekavacanena kevalapañcadaśyā 
eva vidhiḥ | na ca vaiparītye kiṃ vinigamakam-iti vācyam bālopadeśānantaraṃ 
pañcadaśyā eva prasaktatvena ekavacanena tasyaiva grahaṇāt [na 
vinigamanāvirahaḥ ityadhikaḥ-ba 2.] | kiṃ ca asmin tantre yadi 
ṣoḍaśyupadeśo'bhimataḥ syāt tarhi taduddhāraṃ kuryāt | 
yato'sminnanuddhāraḥ ata evānabhimata iti cet-na | na [nahi ekavacanānusāreṇa 
tatsiddhiḥ ityadhikaḥ-ba 2.] hi sarvatra vidheyaviśeṣaṇānāṃ 
saṃkhyāvācakānāṃ vivakṣāyāmapi prakṛtyartha evānvayaḥ iti niyamaḥ 
tadavacchedakenāpyanvayasya dṛṣṭatvāt | tathā ca 
jātyanvitamekavacanamupapannam | tathā sati kathaṃ tadanusāreṇa 
ṣoḍaśīnivṛttiḥ | anyathā brāhmaṇaṃ na hanyāt ityatra 
brāhmaṇadvayahanananiṣedhaḥ na syāt | astu vaikavacanavivakṣā | tathā'pi na 
ṣoḍaśīnivṛttiḥ vacanānusāreṇa variṣṭhāyāḥ 

p. 63)

ekasyāḥ ṣoḍaśyā upadeśānantaraṃ paścāt 
śyāmāraśmimālā'dividyopadeśāvasare pañcadaśyupadeśe 
bādhakābhāvāt | anuddhārādagrahaṇamiti yat tadapi na | pañcadaśyā api 
anuddhāreṇa tasyāḥ apyupadeśo na syāt ||

na ca mūlādhāre vibhāvanīyaraśmipañcakamadhye mādanaśaktītyanena 
soddhṛteti vācyam sā pañcadaśī na sarvasādhāraṇyenoddhṛtā kiṃtu [idaṃ 
raśmimālāpañcakaṃ-10-khaṇḍīya-9-sūtrataḥ 28 sūtrāntagranthesti ||] 
raśmipañcakāvayavarūpā | ata eva tatra tasyāḥ mahāvidyetyuktam | anyathā 
tasyā ityasya sārthakyaṃ brahmaṇā'pi durupapādam | ataḥ 
pūrvapratipāditāṅgopāṅgapratyaṅgapādukāsahitavidyā ekā | 
tadavayavabhūtā vidyā kathaṃ pradhānabhūtā bhavet ||

kiṃ ca-svatantre anuddhṛtaṃ na grāhyam-iti kiṃ sūtrakārābhiprāyo niṣkāsyate 
athavā svatantre anuddhṛtaṃ na grāhyam-iti vacanāntareṇa niṣkāsyate ?

nādyaḥ etādṛśābhiprāyaniṣkāsakaliṅgasya sūtre abhāvāt | kiṃca-
bālāmantrastryakṣaro na kutrāpyuddhṛtaḥ svayaṃ ca bālāmupadiśyeti vadati | 
etenānuddhṛto'pi grāhya iti sūtrakārābhiprāyaḥ suspaṣṭaḥ | na ca 
raśmimālāsu [agre-10 khaṇḍīyasarvasādhāraṇakrame-29-sūtre-ityarthaḥ |] 
śriyo'ṅgatvena navārṇabālāyā uddhṛtatvena bālāmupadiśyetyukte saiva 
grāhyā iti vācyam | yadi navākṣarīvidyā bālāpadena vivakṣitā tarhi agre 
pañcadaśanityāmantroddhāre [ || 4- || lalitā-|| 9-sūtre bālā eva-kulasundarī-vā-
kumārī-vā-uktā |] kumārī kulasundarī iti kulasundarīmantre 
kumārīvarṇasādṛśyavidhānena tatrāpi navārṇatvaprasaṅgaḥ | iṣṭāpattau 
dūṣaṇaṃ kulasundarīmantroddhāre vakṣyāmaḥ | evaṃ 
śrīvidyānyāsaprakaraṇe bālādvirāvṛttyā kḷptaṣaḍaṅga ityatra 
navārṇādvirāvṛttyā ṣaḍaṅganyāsastu sarvasaṃpradāyaviruddhaḥ | tasmānna 
navārṇā'tra bālā kiṃ tu tryakṣaryeva | ata eva raśmimālāyāṃ 
navārṇāmantre śriyo'ṅgaṃ bāletyevoktaṃ na tu bāleti | 
ito'pyadhikayuktikalāpaṃ raśmimālāmantroddhāre vakṣyāmaḥ 
[daśamakhaṇḍastha0 9 sūtrādārabhya pañcemā-ityādi-28-sūtrāntena athavā-
50-sūtrāntena granthena vakṣyāma iti sambandho jñeyaḥ |] | ataḥ syāt tryakṣarī | 
bālā tu na kvacanoddhṛtā kiṃ tu tantrāntare kḷptaṃ gṛhītvaivopadiśyeti 
vyavahṛtam | api ca tattvamantraiḥ grāsayitveti sūtritam | mantrāśca noddhṛtāḥ | 
evaṃ vārāhīprakaraṇe trayoguṇamantrāḥ ityādayo noddhṛtāḥ | tena na 
sūtrakārasyāyamabhiprāya iti siddhāntaḥ ||

na dvitīyaḥ tādṛśaśāstrasya kutrāpyanupalabdheḥ ||

kiṃca-etaddīkṣā'vasāne śiṣyo'pi pūrṇatāṃ bhāvayitveti viditaveditavya iti 
aśeṣamantrādhikārīti śiṣyaviśeṣaṇatrayaṃ śrūyate | tatra pūrṇatvaṃ 
gurorgrāhyaśeṣarahitatvam | yadi 

p. 64)

pañcadaśyaiva aśeṣadīkṣāripapūrtiḥ tarhi śeṣasya ṣoḍaśīgrahaṇasya sattvāt 
pūrṇatābhāvanāvidhānaṃ katham | evameva viditaveditavyatvamanupapannam ||

na ca pañcadaśyaiva sūtrakāramate kṛtārthatā pūrṇatā'stu tenaiva 
mokṣasiddhirastu iti na kā'pyanupapattiḥ iti vācyam 
evamapyaśeṣamantrādhikārītyatra kiṃ pañcadaśyupadeśena 
ṣoḍaśyāmapyadhikāraḥ svīkriyate athavā aśeṣapadasya ṣoḍaśībhinne 
saṅkocaḥ kriyate | nādyaḥ pañcadaśyapekṣayā ṣoḍaśyāḥ 
alpaphalajanakatvāpatteḥ | yo gurukārye adhikṛtaḥ saḥ laghukārye adhikṛto bhavati 
| yathā yo gaṅgātaraṇe adhikṛtaḥ sa kulyātaraṇe adhikṛtaḥ | natu viparītaṃ loke 
dṛṣṭam | na dvitīyaḥ saṅkoce mānābhāvāt ||

tasmāt evaṃ niṣpakṣapātena vicāryamāṇe iṣṭamantrapadena 
pañcadaśīṣoḍaśyoḥ grahaṇe na kimapi bādhakaṃ paśyāmaḥ || 

astu vā parasaṃtoṣāya pañcadaśīdīkṣāmātraṃ sūtrakārābhipretam | 
tathā'pi taddīkṣāvān alpadīkṣāvān tanmaṇḍale ṣoḍaśīdīkṣāvatā 
tantrāntarānuyāyinā na praveṣṭavyaṃ sevakagṛhe rājapraveśavat iti 
maheśvarānandanāthā āhuḥ | tanna | tathāhi-dīkṣāyāmalpatvam 
alpākṣaramantratvaṃ vā kimalpaphalasādhanamantratvam | ādye 
śrīvidyādīkṣāto vārāhyāḥ tato'pi śyāmādīkṣāyāḥ variṣṭhatvāpattiḥ | 
dvitīye tantrāntare ṣoḍaśīdīkṣāyāḥ yatphalaṃ tadeva asyāpi phalaṃ śrūyate 
kṛtakṛtyo viditanikhilaveditavyo jīvanmukto bhavatītyādipadaiḥ [nāma 
tattatkhaṇḍasamāptisthasūtrasthapadairityarthaḥ |] pratīyate | tathā ca tulyatvānna 
nyūnadīkṣāvattvam ||

nanu tarhi tantrāntare pañcadaśīdīkṣā nyūnadīkṣā bhavatīti śrūyate | tasya 
kā gatiḥ iti cet-na yasmin tantre ṣoḍaśīpañcadaśyoḥ samuccayaḥ tasmin tantre 
pañcadaśyāḥ aparipūrṇaphalatvāt ṣoḍaśīdīkṣāyāstathātvāt | 
tantrānusāriṇāvubhau tatraikaḥ pañcadaśyā dīkṣitaḥ ekaḥ ṣoḍaśyā dīkṣitaḥ 
tasyāgre kartavyaśeṣasattvādaparipūrṇa iti tasya maṇḍale gurudīkṣitena na 
gantavyamiti yuktam | iha tu tulyaphalaṃ pramāṇena siddhaṃ kathaṃ gurutvaṃ 
laghutvam | vicārayantvanāgraheṇa | 

na ca kāraṇalāghavagauraveṇa phalalāghavagauravamastyeva iti vācyam tathā sati 
kevalavahnyārthinau dvau | tatraikena lohapāṣāṇasambandhena vahnirnirmitaḥ | 
ekena araṇinirmathanena nirmitaḥ | tatra pūrvāpekṣayā parasya vahninirmāṇe 
kālādhikyaṃ puruṣādhikyaṃ śramādhikyamiti bahukāraṇagauravamiti 
tadīyavahneradhikadāhajanakatvaṃ syāt | evaṃ 
baudhāyanasūtrānusāridarśapūrṇamāsaprayogāpekṣayā 

p. 65)

āpastambaprayogasya dviguṇatvena āpastambasūtrānuyāyināṃ 
dviguṇasvargotpattyāpattiḥ | āpastambasūtrānusāriṇo 
baudhāyanasūtrānuyāyito gurutaratvāpattiḥ | 
tasmādadhikaphalajanakatvātiriktaṃ gurutvaṃ dīkṣāyāṃ durvacam ||

prakṛte tadabhāvāt kathaṃ laghudīkṣāvattvaṃ sūtrānuyāyinaḥ gurusādhane 
tulyaphalatve'pi pravṛttiḥ | svapūrvaguruparamparā'gatasādhanamantarā 
tadadhikāriṇaḥ phalaṃ na bhavatīti śāstreṇaiva na phalādhikyecchayā | atirātre 
ṣoḍaśinaṃ gṛhṇāti nātirātre ṣoḍaśinaṃ gṛhṇāti ityādau 
phalatāratamyavyavasthāpanaṃ ca tādṛśaśāstrābhāvādadhikāribhedena 
vyavasthāsaṃbhavādyuktam | tasmādatra na nyūnādhikadīkṣābhāva iti | 
sudhībhiḥ śeṣamūhyam ||

ayaṃ pakṣaḥ paratuṣṭaye aṃgīkṛtya cālitaḥ | vastutastu iṣṭamantrapadena 
ṣoḍaśīgrahaṇe bādhakābhāva uktaḥ prāk ||

na ca uṣaḥkālakriyāyāṃ kādiṃ hādiṃ vā mūlavidyāṃ manasā 
daśavāramāvartyetyatra kādiṃ hādiṃ veti vidyāviśeṣaṇaṃ atra 
ṣoḍaśyabhāve liṅgam iti vācyam tābhyāṃ viśeṣaṇābhyāṃ 
uṣaḥkālakriyāsannidhau paṭhitābhyāṃ tadaṅgatvena ṣoḍaśī nivartatāṃ 
kāmaṃ tathā'pi sarvatra ṣoḍaśīṃ nivartayituṃ tayoḥ kā śaktiḥ | 
ārāmagamanakāle aśvamānaya iti rājño vākyena 
ārāmagamanasādhanaśibikā'diyānabādhe'pi aśvapadaghaṭitaṃ vākyaṃ 
sadā yānāntaraṃ na bādhituṃ samarthaṃ bhavati ||

tasmāt ṣoḍaśyupadeśaḥ āvaśyakaḥ sūtrānuyāyināmapi | ito'pyadhikaṃ 
sudhībhirāgrahaṃ parityajya vicāryam | dharmatattvavivecane svamatapakṣapāto 
narakāyaiva bhavet ityalaṃ bhūyasā || 39 ||

śiṣyanāmanirdeśaḥ 

gurukartṛkaṃ karmaśeṣaṃ vadati-

tatastasya śirasi svacaraṇaṃ nikṣipya sarvān mantrān sakṛdvā krameṇa vā 
yathā'dhikāramupadiśya svāṅgeṣu kimapyaṅgaṃ śiṣyaṃ sparśayitvā 
tadaṅgamātṛkāvarṇādi dvyakṣaraṃ tryakṣaraṃ caturakṣaraṃ vā 
ānandanāthaśabdāntaṃ tasya nāma diśet || 40 ||

tataḥ ityanena vakṣyamāṇānāṃ dharmāṇām uttarāṅgatvaṃ sūcitam | svasya 
guroḥ caraṇam anādeśe dakṣiṇaṃ pratīyāt iti paribhāṣayā dakṣiṇacaraṇameva 
nyaset | sarvān mantrān prakaraṇena sarvapadasaṅkoce sarve hāriyojanaṃ lipsanti 
itivat śrīvidyā'ṅgabhūtān gaṇapati-śyāmāvārtālī-

p. 55)

parā-pañcadaśī-nityā-raśmimālā-mantrādīn [ataḥ paraṃ 
vakṣyamāṇānityarthaḥ |] sarvān | sakṛdvā ityatra vākāra evakārārthaḥ | 
tadānīmevetyarthaḥ | krameṇa vā tattadupāsanavelāyāṃ vā | yathā'dhikāram 
ityanena vyavasthitavikalpaḥ sūcitaḥ | bhaktiśraddhā'dhikyavataḥ tadānīmeva 
kiṃcinnyūnatadvataḥ krameṇeti | svāṅgeṣu ityatra aṅgapadaṃ 
śarīrāvayavaparam | sparśaṃ kurvityājñāṃ dadyāt | tataḥ śiṣyo 
yamavayavaṃ spṛśet tatra mātṛkānyāse yo varṇaḥ saḥ ādiḥ yasmin īdṛśam | 
idaṃ nāmaviśeṣaṇam | yathā śirassparśe tatra mātṛkāvarṇaḥ akāraḥ saḥ 
ādiryasya amṛtānandanātha iti | evameva sarvatra yojyam | dvyakṣaraṃ vetyādiḥ 
spaṣṭārthaḥ | ānandanāthaśabdāntaṃ spaṣṭam | tasya śiṣyasya nāma diśet 
sthāpayet || 40 ||

gurupādukāmantradānam 

vismṛtaṃ punarāha-

bālopadiṣṭeḥ pūrvamātmanaḥ pādukāṃ ṣaṭtārayuktāṃ dadyāt || 41 ||

dvitīyaśakalagrāsānantaraṃ bālopadiṣṭeḥ pūrvam ātmanaḥ pādukām 
ātmanaḥ guroḥ dīkṣākāle dattaṃ yannāma taddhaṭitapādukā'ntaṃ mantraṃ 
ṣaṭtārayuktaṃ tasmai upadiśet | ṣaṭ tārāśca kulārṇave-

vāgbhavaṃ ca parā śrīśca kālībījaṃ tataḥ priye |
bhuvaneśī manmathaṃ ca ṣaṭ tārāśca prakīrtitāḥ || iti ||

amukānandanāthaśrīpādukāṃ pūjayāmīti ||

etena nibandhasthapādukāmantraḥ sūtrānavalokanakalpitaḥ parāstaḥ ||
 
yadyapyatra pāṭhakrameṇa atraivopadeśaḥ prāptaḥ tathā'pi āśvino daśamo 
gṛhyate itivat śrautakrameṇa tasya bādho yuktaḥ || 41 ||

ācārānuśāsanādi 

ācārānanuśiṣya hārdacaitanyamāmṛśya vidyātrayeṇa tadaṅgaṃ triḥ 
parimṛjya parirabhya mūrdhanyavaghrāya svātmarūpaṃ kuryāt || 42 ||

ācārān daśamakhaṇḍe vakṣyamāṇān [agre daśamakhaṇḍastha 
sarvabhūtairavirodhaḥ-iti-57-sūtrāt-80 sūtre vakṣyamāṇānityarthaḥ |] anuśiṣya 
śikṣayitvā hārdaṃ hṛdayākāśasaṃbandhi caitanyaṃ tamiti śeṣaḥ śiṣyam 
āmṛśya dhyātvā svahṛdayasthacaitanyābhinnaṃ śiṣyaṃ bhāvayitvetyarthaḥ | 
vidyātrayeṇa śrī-śyāmā-vārtālīvidyābhiḥ | vidyātrayaṃ ekadā paṭhitvā 
parimārjanaṃ prathamaṃ tato dviḥ tūṣṇīṃ triḥ prokṣati itivat na tu 
tribhistrivāram | tathā sati tisṛbhirvidyābhirityeva 

p. 67)

vadet | vidyātrayeṇetikaraṇe ekatvavaiśiṣṭyaṃ pratīyate | tasmānna tathā | 
parimārjanaṃ nāma svahastena śiṣyasya sarvaśarīrasparśaḥ | parirabhya āliṅgya 
mūrdhanyavaghrāya svātmarūpaṃ kuryāt svasya yathā ātmā 
mokṣapratibandhakapauruṣamalarahitaḥ tathā taṃ kuryāt || 42 ||

śiṣyasya aśeṣamantrādhikāritvam 

sadgururityārabhya etadantaṃ [pāścātyapatrastha 34 sūtrārambhataḥ 
etatsūtrabhāṣyāvadhītyarthaḥ |] gurukartṛkaṃ karma itaḥ paraṃ 
śiṣyakartṛkakriyā bhavati-

śiṣyo'pi pūrṇatāṃ bhāvayitvā kṛtārthastaṃ guruṃ yathāśakti vittairupacarya 
viditaveditavyo'śeṣamantrādhikārī bhavediti śivam || 43 ||

iti śrīreṇukāgarbhasaṃbhūta-duṣṭakṣatriyakulāntaka-śrībhārgavopādhyāya-
jāmadagnya mahādevapradhānaśiṣya-mahākaulācārya-
śrīmatparaśurāmakṛtau kalpasūtre dīkṣāvidhirnāma 

prathamaḥ khaṇḍaḥ 

pūrṇatā pūrvameva vyākhyātā | ata eva kṛto'rtho mokṣasādhanaṃ yena saḥ 
tādṛśaḥ | tam iti kālavācī taṃ kālam asminneva kāla ityarthaḥ guruviśeṣaṇatve 
vaiyyarthyāt | yadvā-gurorgurau samīpasthe praguroreva pūjanam iti vacanena 
kadācit saparyāyā anyayogaprāptau tanmā bhūt iti jñāpayituṃ tamiti | 
yathāśaktivittaiḥ lakṣaṃ lakṣapatirdadyāddaridrastu varāṭikām iti rītyā 
upacarya santoṣya | viditaṃ jñātaṃ veditavyaṃ jñātuṃ yogyaṃ yena saḥ 
sarvajñaḥ ityarthaḥ | aśeṣamantrāṇāṃ sauravaiṣṇavādisaptakoṭimantreṣu 
adhikārī bhavet iti | etena etadupadeśena sarvamantropadeśo jātaḥ 
pustakādivācananiṣedho nāstītyarthaḥ | taduktaṃ tantrāntare-

yasya no paścimaṃ janma tuṣṭo [yadi vā śaṃkaraḥ svayam-a.] yena ca sadguruḥ |
tenaiva labhyate vidyā sākṣācchrīṣoḍaśākṣarī [śrīmatpañcadaśākṣarī-a.] ||
atra sarve mahāmantrāḥ bījāntarvṛkṣagātravat |
saṃsthitāstu maheśāni tasmācchreṣṭhatarā bhavet || iti ||

yaccopakrāntaṃ dīkṣāprakaraṇaṃ [nāma pāścātya2patrasthāt-athāto 
dīkṣāṃ vyākhyāsyāmaḥ-iti-1-sūtrādārabhya etat 67-patra-paryantamityarthaḥ 
|] tatsamāptam itijñāpakaḥ śiva-śabdaḥ || 43 ||

iti śrīrāmeśvararacitāyāṃ saubhāgyodayanāmnyāṃ paraśurāmasūtravṛttau 
prathamakhaṇḍātmakaṃ dīkṣāprakaraṇaṃ samāptam |

sūtrasya punarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || iti prathamaḥ khaṇḍaḥ 
[ito'pyadhikatarasphuṭaprayogo dīkṣāyāḥ-śrīmahānirvāṇāditantreṣu 
dīkṣollāsa-dīkṣāprakāśa-tāntrikasvatantrapaddhatiṣvapyasti-paraṃ 
cāyamuktaprayogo'pi śrībhagavanmukhanirgatasūtrokta iti sādhīyāneva |]



p. 68)

śrīdvitīyaḥ khaṇḍaḥ-gaṇanāyakapaddhatiḥ 

śrīgaṇanāyakopāstividhiḥ 

pūrvakhaṇḍe dīkṣāvidhiṃ parisamāpya śrīlalitopāstiprakaraṇaṃ vivakṣuḥ 
tadupāsteḥ pūrvāṅgabhūtāṃ śrīmahāgaṇapatyupāstiṃ vaktuṃ prakramate-

itthaṃ sadgurorāhitadīkṣaḥ mahāvidyā'rādhanapratyūhāpohāya 
gāṇanāyakīṃ paddhatimāmṛśet || 1 ||

itthaṃ pūrvoktaprakāreṇa sadguroḥ śāstroktalakṣaṇasahitaguroḥ sakāśāt 
āhitā prāptā dīkṣā yena īdṛśaḥ | etena īdṛśadīkṣāvata eva 
śrīvidyopāstāvadhikāro nānyasya iti sūcitam | mahāvidyā pañcadaśī 
ṣoḍaśī vā | tasyā ārādhanaṃ japaḥ | yadvā-mahāvidyā śrīlalitā 
mahāvidyāvācyatvāt vācyavācakayorabhedāt tasyā ārādhanaṃ 
phalaprāptyantaṃ pūjanaṃ tadutpattipratibandhakībhūtāḥ ye pratyūhāḥ 
vighnāḥ-vighno'ntarāyaḥ pratyūhaḥ ityamaraḥ-teṣām apohāya nāśāya 
gāṇanāyakīṃ gaṇeśasaṃbandhinīṃ paddhatiṃ mārgaṃ-saraṇiḥ paddhatiḥ 
padyā vartanyekapadīti ca ityamaraḥ-upāsanāsaraṇimityarthaḥ | āmṛśet 
svīkuryāt | asyāḥ śrīlalitopāstyaṅgatvaṃ yathā syāt tathoktaṃ prāk [prāk-
nāma-1-khaṇḍe-53-patre-34-sūtrabhāṣye-ityartho jñeyaḥ |] || 1 ||

prātaḥkṛtyaṃ dhyānādi tarpaṇāntam 

evaṃ [evaṃ nāma uparitana 1 sūtrānusāreṇa-gaṇapatirlalitādevyā aṅgadevatā-
ityādi hetoḥ |] gaṇanāyakopāsteḥ āvaśyakatāmuktvā tadupāsanāprakāraṃ 
prapañcayati-

brāhme muhūrta [rte cotthā-ba.] utthāya dvādaśānte 
sahasradalakamalakarṇikāmadhyaniviṣṭa 
gurucaraṇayugalavigaladamṛtarasavisarapariplutākhilāṅgo hṛdayakamalamadhye 
jvalantamudyadaruṇakoṭipāṭalamaśeṣadoṣanirveṣabhūtamanekapānanaṃ 
niyamitapavanamanogatirdhyātvā tatprabhāpaṭalapāṭalīkṛtatanuḥ bahirnirgatya 
muktamalamūtro dantadhāvanasnānavastraparidhānasūryārghyadānāni vidhāya 
udyadādityavartine [maṇḍalava-a.] mahāgaṇapataye tatpuruṣāya vidmahe 
vakratuṇḍāya dhīmahi || tanno dantī pracodayāt ityarghyaṃ datvā nityakṛtyaṃ 
vidhāya caturāvṛttitarpaṇaṃ kuryāt 
[etaccaturāvṛttitarpaṇajñānametatsūtrāgāmi 3 sūtrobhayaṭīkāyāṃ 
suspaṣṭam |] |

p. 69)

āyurārogyamaiśvaryaṃ balaṃ puṣṭirmahadyaśaḥ |
kavitvaṃ bhuktimuktī ca caturāvṛttitarpaṇāt || 2 ||

brāhme muhūrte uṣaḥkāle utthāya śayanāditi śeṣaḥ | dvādaśānte [itadādi 
yadvā ityantaṃ ba. kośe nāsti.]-lalāṭordhvaṃ kapālordhvāvasānaṃ 
dvādaśāntapadavācyaṃ tasmin  taduktaṃ svacchandasaṃgrahe-

dvādaśāntaṃ lalāṭordhvaṃ lalāṭordhvāvasānakam  || iti ||

yadvā-dvādaśānte sthūlaśarīre suṣumṇānāḍīmāśritya 
dvātriṃśatpadmāni santi | teṣu sahasradalakamale dve sarvādhaḥ 
akulanāmakamekamūrdhvamukhaṃ sarvordhvaṃ 
dvādaśāntanāmakamadhomukhamaparam | atra pramāṇaṃ savistaraṃ 
yoginītantrasyottaracatuśśatīvyākhyāne setubandhe asmanparamagurukṛte 
draṣṭavyam | granthavistarabhayānneha likhitam | idaṃ [idam ityanena dvādaśānte-
iti etatsūtrasthaṃ padaṃ-jñeyam |] ca kamale viśeṣaṇam abhedasaṃbandhena | 
yadyapi dvādaśānta iti saptamyantasya samāsaghaṭakībhūtakamalena sākam 
anvayo na saṃbhavati samāsaghaṭakapadasāpekṣatvarūpāsāmarthyāt kamalasya 
samāsaprayojakasāmarthyābhāvena samāsānupapatteḥ | anyathā ṛddhasya 
rājamātaṅgā itivat prayogāpatteḥ | tathā'pi dvādaśānta ityapi samāsāntam 
ṛddharājamātaṅgā itivat | saptamīlopābhāvaḥ chāndasaḥ | 
dvādaśāntasaṃjñakaṃ yatkamalaṃ 
tatkarṇikāmadhyaniviṣṭagurucaraṇayugalaṃ dvandvaṃ tasmāt vigalat sravadyat 
amṛtaṃ tasya rasasya yo visaraḥ vistāraḥ tena pariplutaṃ klinnam akhilāṅgaṃ 
yasya evaṃ bhūtveti śeṣaḥ | bhūtveti pūrvoktam niyamitapavanamanogatiriti ca 
dhyānakartṛviśeṣaṇaṃ kartṛparicchedakatayā dhyānāṅgām abhikrāmaṃ 
juhoti itivat | niyamitā pavanamanasorgatiḥ yena prāṇān manaścācalaṃ 
kṛtvetyarthaḥ | manaḥpavananirodhamantarā aikāgryaṃ na saṃbhavati | 
aikāgryamantarā dhyānaṃ ca na saṃbhavati | atastayorāvaśyakateti bhāvaḥ | 
hṛdayakamalamadhye anāhate [anāhataṃ-nāma-tannāmakaṃ hṛdayasthaṃ 
cakram |] jvalantamityanena svaśarīrasthapāpadāhakartṛtvaṃ sūcitam | 
udyadaruṇakoṭipāṭalamityanena abhūtopamānena brahmāṇḍamadhye 
etadupamamanyannāstīti sūcitam | aśeṣadoṣanirveṣamaśeṣāṇāṃ 
svakīyadoṣāṇāṃ nirveṣaḥ-nirgato veṣaḥ svarūpaṃ yeṣāṃ te nirveṣāḥ 
svarūpaśūnyāḥ naṣṭāḥ ityarthaḥ bhāvapradhāno nirdeśaḥ itthaṃ ca-
nirveṣatvaṃ dhvaṃso yasmāditi vyutpattyā svaśarīrasthanikhiladoṣanāśakamiti 
phalito'rthaḥ  anekapo dvipaḥ gajaḥ | tasya ānanaṃ yasyeti īdṛśaṃ dhyātvā 
tasya devasya prabhāyāḥ paṭalena samūhena pāṭalīkṛtaḥ | abhūtatadbhāve cviḥ 
| śvetaraktatvaṃ saṃpāditā tanuḥ svakīyaśarīraṃ yena | śvetaraktastu pāṭalaḥ 
ityamaraḥ | etena svatanau yāvatparyantaṃ pāṭalatvaṃ saṃbhavati tāvatparyantaṃ 
dhyāyedityarthaḥ | 

p. 70)

etāvatparyantaṃ [etāvatparyantaṃ nāma-uparitanamūlasūtrasthaṃ 
tatprabhāpaṭalapāṭalīkṛtatanuritikriyāntamityarthaḥ |] śayanasthalakṛtyam agre 
bahirnirgatyetyuktatvāt | idaṃ bahirnirgamanaṃ smṛtiprāptam | 
malamūtravisargaścānena anūdyate | atra dantadhāvanaṃ vidhāyeti 
sāmānyavidhau satyāṃ [satīti sādhīyān pāṭhaḥ |] kathaṃ vidhānam 
ityākāṅkṣāyāḥ smārtāpekṣayā tāntrikadharmāṇāṃ 
aśvapratigrahanyāyena sannikṛṣṭatvāt tantrātaroktānāmeva dharmāṇāṃ 
grahaṇaṃ na tu smārtānām | snānādisūryārghyāntānāṃ tantrāntarāt 
śrīkramasya sannikṛṣṭatvāt tata eva kathaṃbhāvākāṅkṣā pūraṇīyā ||

nibandhakārāstu gaṇapatipaddhatau mantreṣu tritārīyoge kartavye 
śrīmāyākāmabījānāṃ yogamuktvā tatra pramāṇaṃ 
śrīvidyā'rṇavatantraṃ darśayāmāsuḥ | taccintyam | tathā hi śrīkrame sarvatra 
mantrādau tritārīti śyāmākrame mantrāṇāmādau kumārīyoga iti 
vārāhīkrame vācamuccārya glaum iti ca paddhatāvasyāṃ sarve manavo japyā iti 
parākrame sarve'pi parākramamanavaḥ sauvarṇapūrvikāḥ kāryāḥ iti sūtre 
paṭhitatvāt gaṇapratikrame apaṭhiṣyataḥ sūtrakārasya atra mantreṣu bījayoga eva 
nāstīti suspaṣṭaṃ pratīyate | tathā sati kathaṃ vidyā'rṇavatantrānusaraṇam | 
athavā śrīkrame vāṅmāyākamalānāṃ yogasya vakṣyamāṇatvena śyenayāge 
drutanavanītavat tasya sarvāṅgatvāt asyāpi śrīvidyā'ṅgatvena prāptau taṃ 
bādhitvā tantrāntarānusaraṇasya niryuktikatvāt | 

svaśāstre vartamāno yaḥ paraśāstreṇa vartate |
bhrūṇahatyāsamaṃ tasya svaśāstramavamanyataḥ [mativartataḥ-a śrī.] ||

iti smṛteśca ||

udyadādityavartine mahāgaṇapataye iti datvā ityasya saṃpradānatvenānveti | 
udyadādityavartine ityanena tādṛśasūrye dhyānaṃ [arghyadānaṃ-a śrī.] agre 
[agre 72 patrastha 4 sūtrasthasiddhalakṣmītyādito vighneśvaraṃ 
dhyātvetyantasūtroktarītyetyarthaḥ |] saparyāprakaraṇe vakṣyamāṇarītyā 
kāryamiti sūcitam ||

nibandhe trirarghyadānamuktam | tatra mūlaṃ mṛgyam | arghyamityekavacanāntena 
vidheyapadenaikatvasya spaṣṭatvāt | nāpyabhyāsaḥ tadbodhakapadābhāvāt | 
nāpi śrīkramoktasyātideśaḥ sūryārghyāntasyaiva vacanenātidiṣṭatvāt 
tadagrimadharmāṇāmatideśe pramāṇābhāvāt ||

nityakṛtyaṃ agnihotrahomādi vidhāya | etena agre 
vakṣyamāṇacaturāvrttitarpaṇaṃ sannidhānādarghyāṅgamiti bhramo nirastaḥ | 
prakaraṇenopāstyaṅgameveti sūcitam ||

ayaṃ caturāvṛttitarpaṇotpattividhiḥ | tatra caturāvṛttitarpaṇamiti 
karmanāmadheyaṃ natu guṇavidhiḥ caturāvṛtteragre [agre nāma āgāmini-3 
sūtre tadbhāṣye ceti jñeyam |] vakṣyamāṇatvāt | tathā ca agnihotraṃ juhoti 
ityatreva vibhaktivipariṇāmena 

p. 71)

tṛtīyāntārthatvaṃ lakṣaṇayā tasya dhātvarthe bhāvanāyāṃ karaṇatvena 
anvayaḥ | catasraḥ āvṛttayo'bhyāsā yādṛśakriyā'vayavakriyāsu 
taccaturāvṛttitarpaṇam | yadyapi prathamatarpaṇe dvādaśāvṛttirasti na 
caturāvṛttiḥ tathā'pi sṛṣṭinyāyena bhūmātvamanusṛtya acaturāvṛttitarpaṇe'pi 
caturāvṛttitarpaṇamiti vyavahāraḥ | atra sādhyākāṅkṣāyāṃ 
kamiyogābhāvāt nāyurārogyādi sādhyatvenānveti | kiṃ tu 
śrīgaṇapatyupāstyupakāra eva | anyathā śamidho yajatyasmin loke pratitiṣṭhati iti 
śrutyā prayājānāmapi pratiṣṭhā'diphalāpatteḥ | ataḥ 
āyurārogyamityarthavādaḥ ||

tathā ca āyurārogyādiprāptaye iti na likhitvā gaṇapatiprītaye iti saṃkalpaṃ 
nibandhakāro yallilekha tat sādhu | paraṃ tu nadyādāvityārabhya 
pañcopacārānācarya ityantaprāpakaṃ pramāṇaṃ mṛgyam | 
svabuddhiracitamaśraddheyameveti dik || 2 ||

tadeva spaṣṭaṃ viśinaṣṭi-

prathamaṃ dvādaśavāraṃ mūlamantreṇa tarpayitvā 
mantrāṣṭāviṃśativarṇān svāhā'ntānekaikaṃ caturvāraṃ mūlaṃ ca 
caturvāraṃ tarpayitvā punaḥ 
śrīśrīpatigirijāgirijāpatiratiratipatimahīmahīpatimahālakṣmīmahālakṣmīpati 
[atrāsandhirārṣaḥ |] 
ṛddhyāmodasamṛddhipramodakāntisumukhamadanāvatīdurmukha-
madadravā'vighnadrāviṇīvighnakartṛvasudhārāśaṅanidhivasumatīpadmanidhi-
trayodaśamithuneṣvekaikāṃ devatāṃ caturvāraṃ mūlaṃ caturvāraṃ ca 
tarpayet evaṃ catuścatvāriṃśadadhikacatuśśatatarpaṇāni bhavanti  || 3 ||

mūlamuccārya tarpayāmi iti mantreṇa tarpaṇam | evameva agre sarvatra mūlasthale 
saṃyojyam | caturāvṛttitarpaṇamityatra na kriyā'vṛttiḥ vidhīyate kiṃ tu 
mantrāvṛttireva | yadyapi dvādaśavāramiti dvitīyā'ntaṃ stokaṃ pacatītivat 
kriyāviśeṣaṇaṃ bhavitumarhati tathāca kriyā'bhyāsa eva siddhaḥ 
tathā'pyasminnagre catuścatvāriṃśadadhikacatuśśatatarpaṇāni bhavanti iti 
sūtrasthasaṃkhyayā karmabhede siddhe na kriyā'bhyāso bhavitumarhati | ataḥ 
dvādaśavāramityanantaram āvṛtteneti pūraṇīyam | ata evāgre mūlaṃ 
caturvāram ekaikaṃ caturvāramityanena mantrābhyāsa eva spaṣṭaḥ śrūyate | 
yadi kriyā'bhyāsaḥ syāt tadā sakṛdeva mantrapaṭhanaṃ prasajyeta | tacca 
agrimasaṃkhyā'nurodhena nirastam | yadvā-dravyapṛthaktvena kriyā'vṛttāvapi 
mantrāvṛttirbhaviṣyati tathāpyagre mantrāvṛtteḥ spaṣṭatvāt tatsahacarite atrāpi 
mantrāvṛttireva | caturvāramityanantaram uccāryeti śeṣaḥ | svāhā'nta ityanena 
prativarṇamantre svāhākāraghaṭakatvaṃ sūcitam | avayavino viśiṣṭamantrasya 

p. 72)

gaṇapatidevatākatve tadavayavānāmapi taddevatākatvaṃ spaṣṭam | ataḥ 
svāhā'nte tarpayāmītyapi yojyam | tathā ca mūlasyaikavarṇaḥ tatra 
binduyogo'pi śiṣṭasaṃpradāyāt tataḥ svāhākāraḥ tatastarpayāmīti 
pūrvoktam | evaṃ caturvāraṃ tato mūlena caturvāram | evaṃ sarveṣu 
varṇeṣūhyam | pūrvaṃ dvādaśavāraṃ tarpayitveti eko gaṇaḥ sūcitaḥ | 
taduttaraṃ caturvāraṃ tarpayitvetyantatarpaṇam eko gaṇaḥ sūcitaḥ | asmin sūtre 
punarityanena trayodaśamithunatarpaṇam anyo gaṇaḥ sūcitaḥ | 
gaṇatrayasūcanaphalaṃ ca-ekaikagaṇasya ekaikāpūrvajanakatvāt tanmadhye 
ekasya vismaraṇe punaḥ tadgaṇamārabhyaiva anuṣṭhanaṃ na sakalādimārabhya |

yathā mantraikadeśe varṇalope tanmantrasyādimārabhyāvartanaṃ tadvat | 
śrīśrīpatītyekaṃ girijāgirijāpatītyekaṃ mithunam evaṃ rītyā ekaṃ 
strīlliṅgāntam ekaṃ pulliṅgāntaṃ mithunaṃ jñeyam | madadravottaraṃ na 
vidyante vighnāḥ yasyeti vyutpattyā avighna iti pulliṅgaḥ | śeṣaṃ spaṣṭam | evaṃ 
trayodaśamithuneṣu ekaikāṃ devatāṃ dvitīyāntamuccārya tarpayāmī iti yojayet 
| itthaṃ coktarītyā ekadevatāyāścaturvāraṃ tarpaṇaṃ tato mūlena caturvāraṃ 
kāryaṃ pūrvavat | evamuktaprakāreṇa krameṇa niruktasaṃkhyākāni tarpaṇāni 
bhavanti | taditthaṃ mūlatarpaṇāni 228 varṇatarpaṇāni 112 mithunatarpaṇāni 104 
āhatya pūrvoktasaṃkhyākāni 444 catuścatvāriṃśaduttaracatuśśatatarpaṇāni 
bhavantītyarthaḥ || 3 ||

yāgagṛhapraveśādi vighneśvaradhyānāntam 

evaṃ tarpaṇakramamuktvā pūjāvidhiṃ vaktumupakramate-

athayāgavidhiḥ-gṛhamāgatya sthaṇḍilamupalipya dvāradeśa 
ubhayapārśvayorbhadrakālyai bhairavāya-dvārordhve lambodarāya namaḥ iti 
antaḥpraviśya āsanamantreṇa āsane sthitvā prāṇānāyamya ṣaḍaṅgāni 
vinyasya mūlena vyāpakaṃ kṛtvā svātmani devaṃ 
siddhalakṣmīsamāśliṣṭapārśvam ardhenduśekharamāraktavarṇaṃ 
mātuluṅgagadāpuṇḍrekṣukārmukaśūlasudarśanaśaṅkhapāśotpaladhānya-
mañjarīnijadantāñcalaratnakalaśapariṣkṛtapāṇyekādaśakaṃ 
prabhinnakaṭamānandapūrṇamaśeṣavighnadhvaṃsanighnaṃ vighneśvaraṃ 
dhyātvā || 4 ||

atha-adhikārāntaravākyamidam | etena tarpaṇaprakaraṇaṃ samāptam | tathā ca 
prakaraṇena tarpaṇopāsanayoḥ aṅgāṅgībhāvaḥ sūcitaḥ | tena 
dīkṣā'ṅgakrame tarpaṇasya nātideśaḥ | ucyate iti śeṣaḥ | gṛhamāgatyetyanena 
tarpaṇaṃ nadyādau gṛhādbahiḥ kāryamiti sūcitam | sthaṇḍilaṃ yāgadeśam 
upalipya gomayeneti śeṣaḥ || 

p. 73)

sthalaśuddhiḥ pramāṇāntaraprāptā anūdyate | anena kramo na vivakṣitaḥ | yadi 
cānuvāde phalābhāvāt vaiyyarthyabhiyā kramaprāptyarthamatra pāṭhaḥ 
ityucyate tadā dvārapūjā'vyavahitaprāgevopalepaḥ kāryaḥ | 

ubhayapārśvayorityatrānādeśāddakṣiṇaṃ prathamaṃ paścādvāmam | 
dakṣavāmau dvārādbahirnirgamanavelāyāṃ yau tau grāhyau tatraiva tathā 
vyavahārāt na tu praveśavelāyām | namaḥ ityuttaraṃ yajediti śeṣaḥ | 
mantraliṅgāvagatā devatā | antaḥ praviśyetyanenaiva dvārapūjā bahiḥ sthitvaiva 
kāryā iti siddham | āsanamantreṇetyanena [ayamāsanamantro'gre-
śyāmākramīya-6-khaṇḍe-6 sūtre ādhāraśaktikamalāsanāya nama iti 
vakṣyamāṇo jñeyaḥ |] śyāmāprakaraṇapaṭhito mantro jñeyaḥ sannikṛṣṭatvāt | 
ata eva na tantrāntarasthaṃ grāhyam || 

nibandhoktanirmūladharmapradarśanam 

yattu nibandhe dīpānabhitaḥ prajvālyeti tāmbūlabhakṣaṇaṃ 
bālātṛtīyabījenāsanaprokṣaṇaṃ [bālātṛtīyaṃ-sauḥ-iti bījam ||] likhitaṃ taṃ 
prati ayaṃ praśnaḥ-etatprāpakaṃ pramāṇaṃ tantrāntare kiṃ vā etattantre 
dīpaprajvalanādikamagre [agre śrīkrame nāma-3-khaṇḍe-11-sūtre-dīpānamito 
datvā-iti sūtre ityarthaḥ |] śrīkrame uktaṃ bālātṛtīyabījenāsanaprokṣaṇaṃ 
parāpaddhatāvuktaṃ [agre-parākrame-8-khaṇḍe-6-sūtre-bhāṣye cedamasti |] 
teṣāṃ sarveṣāṃ prāpakamatideśaśāstraṃ vā | nādyaḥ tasya pūrvameva 
nirastatvāt | dvitīye atideśastrividhaḥ-vacanātideśaḥ nāmātideśaḥ 
ākāṅkṣayā ānumānikātideśaḥ | tanmadhye kīdṛśo'tideśaḥ | na vacanaṃ-
samānamitaracchyenena itivat śeṣaṃ śrīkrameṇa samam iti vacanam asti | ato 
nādyaḥ | evaṃ māsamagnihotraṃ juhoti itivat śrīkramaṃ kuryāt iti tannāmnā 
vyavahāro na hyasti | ato na dvitīyaḥ | tṛtīyo'tideśo yathā-sauryaṃ caruṃ nirvapet 
brahmavarcasakāmaḥ ityukte kamiyogāt brahmavarcasaṃ kiṃ kuryāditi 
karmākāṅkṣāpūrakam | tataḥ kena kuryāt ityākāṅkṣāyāṃ dhātvarthaḥ 
karaṇatvena anveti | kathaṃ kuryāt ityākāṅkṣāparipūrakatayā aṅgakalāpo na 
paṭhitaḥ | tata ākāṅkṣāśāmakam oṣadhīdravyakatvena vyaktaliṅgakatvena 
sādṛśyāt darśapūrṇamāsavaditi padaṃ kalpyate-sauryaṃ caruṃ 
darśapūrṇamāsavat nirvapet iti vākyam | tataśca darśapūrṇamāsadharmāḥ 
prāpnuvanti | nahyatra tathā'kāṅkṣā'sti sāṅgapradhānasyātra pāṭhāt || 

kiṃ ca-yadyatideśenaiva dharmaprāptiḥ tarhi śrīkrame pīṭhamanunā āsane 
samupaviṣṭaḥ iti vacanena āsanamantrasya kḷptatvāt atideśenaiva prāptau 
punarvidhānaṃ vyarthaṃ sat gṛhamedhīyājyabhāganyāyena 

p. 74)

yāvaduktaṃ kartavyaṃ nāto'dhikamiti spaṣṭīkaroti | itthaṃ ca 
kathametadatiriktānāṃ prāptirbhavet | kiṃ ca-śrīkramāddharmaprāptiratideśena 
bhavati tat kiṃ yāvadaṅgānāṃ bhavatītyucyate āhosvit yatkiṃciddharmāṇām | 
ādyaṃ caturnavatimantraiḥ abhimantraṇābhāvaḥ kena siddhaḥ | na hi nārṣevaṃ 
vṛṇīte na hotāram itivat sūtre caturnavatimantrairabhimantraṇaṃ na 
kartavyamityasti yena tannivāryate | yaśca [manmate tu prakṛtivikṛtibhāvābhāvāt 
yāvaduktaṃ kartavyamiti atra taduktyabhāvāt caturnavatimantrairanabhimantraṇaṃ 
yuktam | tava mate saṃdarbhaviruddham ityadhikaḥ pāṭhaḥ-ba. 2] 
yatkiṃciddharmātideśa iti pakṣaḥ sa ca devānāṃpriyāṇāmeva priyo 
bhavitumarhati na paṇḍitānām || 

tasmāt pūrvoktadharmaprāpakaṃ sarṣapamātramapi pramāṇaṃ na paśyāmaḥ | 
evamatratyāḥ kecana nirmūlaṃ śrīkrame likhitāḥ | evaṃ śyāmākramoktāḥ 
niṣpramāṇāḥ śrīkrame anyatra ca prakṣiptāḥ | na hi pramāṇarahito dharmo 
bhavitumarhati | ato mīmāṃsāgandhānabhijñena 
kevalasaṃskṛtabhāṣā'bhijñena svecchayā sāṅkaryaṃ prāpito yo nibandhaḥ 
tamāśritya sudhiyo'pyanutiṣṭhanti | atra ke'pi pariśodhanaṃ na kurvanti | atra 
kaliyugaśaktireva bījaṃ nānyaditi yuktamutpaśyāmaḥ | tasmāt tatratyāni 
nānuṣṭheyāni | yāvaduktaṃ kartavyam yatrānyato grāhyaṃ sūcitaṃ 
yathā'sanamantreṇeti tad grāhyaṃ na kenacidavicārya likhitaṃ pramāṇam | 
pramāṇābhāvāt tadanuṣṭhāne nāpūrvaṃ bhavet | yadi bhavet tarhi agnihotre 
darśapūrṇamāsadharmātideśaḥ darśapūrṇamāsayoḥ 
jyotiṣṭomadharmātideśo'pi bhavet | tasmādapramāṇaṃ svecchayā saṅkīrṇo 
nibandho'śraddheyaḥ ityalamativistareṇa ||

kiṃ ca-ekakriyāyāḥ prakṛtirekā śāstre dṛṣṭā na hi nānāprakṛtikā ekā 
vikṛtirdṛṣṭā śrutapūrvā vā āsīt | ayaṃ nibandhakāraḥ kāṃściddharmān 
parāprakaraṇasthān saurityanena āsanaprokṣaṇādirūpān 
tāmbūlabhakṣaṇādirūpān śrīvidyāprakaraṇasthāṃśca [tantrāntare 
ityadhikaḥ-ba.] ityevaṃ nānāprakaraṇasthān ekatra atidiśan kathaṃ 
dharmatattvajño bhavet ||

na ca yathā jyotiṣṭomasya ye dharmāḥ teṣāṃ dvādaśāhe atideśaḥ tataḥ 
atidiṣṭatatprakaraṇasthadharmayoḥ yathā dvirātrādāvatideśaḥ tadvat 
mūlaprakṛtiḥ śrīvidyā tato'tideśena prāptāḥ parāyāṃ tāmbūlādayaḥ 
tatsahitaḥ yo'sāvāsanaprokṣaṇarūpo viśeṣadharmaḥ sa sarvo'pi 
dvirātrādisthānāpanne gaṇapatāvatidiśyatām | tathā sati na nānāprakṛtikatvam 
iti vācyam | yadi śrīprakṛtikā parā tarhi bhūṣaṇadhāraṇasya atideśenaiva 
prāptau tatprakaraṇe bhūṣitavigraha iti vyartham | evaṃ 
vāmapārṣṇighātādikaṃ bahutaraṃ vyartham | ato na prakṛtivikṛtibhāvastayoḥ 
saṃbhavati | ato yeṣāṃ pratyakṣavacanamasti yathā'traiva sūryārghyāntavidhiḥ 
evaṃ parāprakaraṇe śyāmāvat sāmānyaviśeṣārghye 

p. 75)

sādha(da?)yedityādi yatra cākāṅkṣā'paripūrtiḥ sarvathā tādṛśasthala eva 
anyadharmasparśaḥ anyatra na [yāvaduktaṃ kartavyamiti rā-ba 2.] yuktamiti 
rāddhāntaḥ | anayaiva diśā nibandhe nirmūlasaṃkīrṇadharmāṇāṃ 
parityāgo'nyatra draṣṭavyaḥ || 

prāṇāyāmaḥ śvāsanirodhaḥ taṃ kumbhakarecakādiyuktaṃ vidhāya | 
prāṇāyāme mantro mūlam ||

saṃkalpāvaśyakatā [sarvasaṅkalpaviṣayakajñānāya dvi-pa-śi. 10-vi. dṛśyaḥ] 

tataḥ saṃkalpamapi sāmānyaśāstreṇa prāptaṃ kuryāt | śrīvidyopāstau 
nirvighnatāsiddhyarthaṃ mahāgaṇapatikramaṃ nirvartayiṣye iti saṅkalpaḥ | na ca 
saṅkalpasya sūtre anuktatvāt kathaṃ grahaṇam iti śaṅkanīyam | 
śucitvamupavītam avyabhicāreṇa yathā karmasāmānyena sambaddham evameva 
saṅkalpo'pi | etadanuguṇāni vacanāni ca santi | yathā-

anācamya kṛtaṃ yacca yacca saṅkalpavarjitam | 
rākṣasaṃ tadbhavet karma.......... ||

iti dānadharme mahābhāratavacanam |

ādau saṅkalpa uddiṣṭaḥ paścā tasya samarpaṇam | 
akurvan sādhakaḥ karmaphalaṃ prāpnotyaniścitam ||

iti rudrayāmalavacanācca | tathaiva śiṣṭācāro'pi | ataḥ saḥ āvaśyakaḥ iti 
gāṇanāyakyāḥ saparyāyā api śrīvidyā'ṅgatvādāvaśyaka eva saṅkalpaḥ | 
aṣṭāṅgollekhanaṃ ca-

avaśyaṃ tāntrikaṃ kālamullikhedanyathā śive |
bahirmukhaṃ tu tatkarma bhavedbhasmahutaṃ yathā ||

iti yāmalavacanādaṣṭāṅgollekhanamāvaśyakam 
[idamaṣṭāṅgollekhanamanugata-1-khaṇḍīya sūtrabhāṣye 45 patre'sti. dvi-pa-śi-
10 viṣaye cāpyasti |] | evameva śyāmā'dau jñeyam || 

tataḥ ṣaḍaṅgāni mūlamantraṣaḍaṅgāni hṛdayādisthāneṣu vinyasya 
sthāpayitvā sakalamūlena karatalābhyāṃ sarvāṅge vinyaset | idameva 
vyāpakakaraṇam | taduktaṃ paramānandatantre-

talābhyāṃ nikhilāṅgasya sparśanaṃ vyāpakaṃ bhavet ||

atra nibandhoktaṃ raktadvādaśaśaktiyuktāya [nāthāya-ba.] ityārabhya 
mātṛkānyāsaṃ vidadhyāt ityantam aśraddheyam ||

p. 76)

svātmani svahṛdaye | ātmaśabdo manasi prasiddhaḥ | manohṛdayayoraikyāt 
tadarthatvam | ādyaviśeṣaṇacatuṣṭayārthaḥ spaṣṭaḥ | mātuluṅgaṃ 
phalaviśeṣaḥ | gadā āyudhaviśeṣaḥ | puṇḍrekṣuḥ nānārekhāyuktekṣuḥ 
anekavarṇa [anekarūpa iti-ba 2.] iti yāvat | tadrūpakārmukaścāpaḥ | śūlaḥ 
āyudhaviśeṣaḥ | sudarśanaṃ cakram | śaṅkhapāśau prasiddhau | utpalaṃ 
kamalam | śeṣāṇi prasiddhāni | evaṃ mātuluṅgādiratnakalaśāntaiḥ 
pariṣkṛtaṃ pāṇyekādaśakaṃ yasyedṛśam ||

yadyapi śrīmahāgaṇapatimūrtteḥ daśa bhujāḥ prasiddhāḥ atraikādaśeti 
viruddhaṃ tathā'pi pāṇipadena śuṇḍādaṇḍo'pyatra grāhyaḥ tatra 
pāṇyaparaparyāyeṇa karaḥ hastaḥ iti vyavahārāt karī hastīti sarvalokaprasiddheḥ 
| itthaṃ ca daśa bhujāḥ ekādaśaḥ śuṇḍādaṇḍaḥ iti tadabhiprāyeṇa 
sūtrakṛtā bhagavatā pāṇyekādaśakamityuktam ||

āyudhasthānaniyamaḥ 

atra āyudhānāṃ dakṣavāmādiniyamo noktaḥ tathā'pi sāmānyaparibhāṣayā 
āyudhasthānāni yojyāni | taduktaṃ rudrayāmale-

āyudhānāṃ tu te dhyānaṃ bravīmi śṛṇu śāṅkari | 
khaḍgabāṇāṅkuśagadājñānaśūlabhuśuṇḍikāḥ ||

bhallo daṇḍo vajraśaktī parighaprāsatomarāḥ |
mālāmusalaparaśumukhādakṣakarasthitāḥ [khaḍgādārabhya 
uparitanavyadaṅkāṅkacihnāntā ityarthaḥ |] || 
pāśaśaṅkhaṃ [uparitana-3-aṅkādārabhya muṇḍāntā ityarthaḥ |] cāpaphalaṃ 
carmakhaṭvāṅgapustakam |

ghaṇṭāḍamarumuṇḍaṃ ca vāmahaste susaṃsthitam ||
varābhaye śaṅkhacakraṃ puṣpapātraṃ dvayasthitam ||
anukte [anukteṣu vāmadakṣaprādakṣiṇyetarakramaiḥ | yuktyā sarvatrāyudhāni-a 
ba 1.] [āyudhadānajñānāyāparamapiprakāraṃ purastana 4 khaṇḍagata-5-
sūtrabhāṣye paśyata |] vāmadakṣedhaḥprādakṣiṇyakramānnaraiḥ |
yojyāni sarvāyudhāni jñeyāni parameśvari |
cakraśaṅkhau [pāśāṅkuśau dhanurbāṇakhaḍgacarmāṇi śaṅkari ityadhikaḥ 
ba. kośe.] tathā'bhītivarau saṃmukhasaṃsthitau || iti ||

p. 77)

asyārthaḥ-

āyudhasthānānuktau khaḍgādiparaśvantā [pūraṇīyajalaṃ mūlamantreṇa 
saptadhā abhimantryetyarthaḥ |] dakṣakare niyatāḥ | pāśādimuṇḍāntāḥ 
[etadastrādimudroddhārārtha dvi. pa. 15-7/14 15-8/1-2 15-8/2 vi. dṛśyāḥ |] vāme 
niyatāḥ | śaṅkhādipātrāntāḥ icchayā ubhayatrāpi | 
pāśāṅkuśādiyugmapañcakaṃ saṃmukhe | yatsaṅkhyākadakṣakare 
yugmānyataraṃ tatsaṅkhyākavāmakara evāparam | vāmordhvādārabhya 
dakṣordhvakrame pradakṣiṇakramaḥ viparīte tvapradakṣiṇakramaḥ | dvayorvikalpa 
ityarthaḥ | prakṛte gaṇapatyāyudhe na pradakṣiṇāpradakṣiṇakramau saṃbhavataḥ 
| tathā hi-mātuluṅgacāpaśaṅkhadhānyamañjarīṇāṃ uktavacanānusāreṇa 
vāmakarasaṃbandha āvaśyakaḥ | gadāśūlacakrotpaladantānāṃ 
dakṣasaṃbandhastathā | ataḥ sūtrapāṭhakramānurodhena 
rudrayāmalavacanānurodhena ca vakṣyamāṇadvandvānāṃ saṃmukhataiva 
yuktā | mātuluṅgagade cāpaśūlau śaṅkhacakre pāśotpale dhānyamañjarī 
nijadantau amīṣāṃ dvandvānāṃ madhye prathamaṃ prathamaṃ vāmordhvakare 
dvitīyaṃ dakṣordhvakare | anena krameṇa adho'dho yojyam | evaṃ 
yugmapañcakaiḥ daśabhujeṣu vyāvṛtteṣu kalaśaṃ pariśiṣṭe śuṇḍādaṇḍe 
jñeyam | yadyapi yāmalavacane dantasthānaṃ noktaṃ tathā'pi pariśeṣāt 
dakṣādhaḥ | dhānyamañjarī phalāntarbhūtā ato vāmabhāganiyamaḥ ||

prabhinnaḥ prasravan kaṭo gaṇḍo yasya tam | gaṇḍaḥ kaṭo mado dānam ityamaraḥ | 
ānandapūrṇaṃ pūrṇānandam ityarthaḥ | aśeṣā ye vighnajanitāḥ dhvaṃsāḥ 
aniṣṭakalāpāḥ teṣāṃ nighnaṃ nāśakaṃ vighneśvaram uktaguṇaviśiṣṭaṃ 
dhyāyet || 4 ||

arghyasthāpanam 

evaṃ dhyānāntamuktvā tato'rghyasthāpanavidhiṃ vaktumārabhate-

purato mūlasaptābhimantritena [pūraṇīyajalaṃ mūlamantreṇa saptadhā 
abhimantryetyarthaḥ |] gandhākṣatapuṣpapūjitena śuddhena vāriṇā 
trikoṇaṣaṭkoṇavṛttacaturaśrāṇi vidhāya tasmin puṣpāṇi vikīrya 
vahnīśāsuravāyuṣu madhye dikṣu ca ṣaḍaṅgāni vinyasya agnimaṇḍalāya 
daśakalā'tmane arghyapātrādhārāya namaḥ sūryamaṇḍalāya 
dvādaśakalā'tmane arghyapātrāya namaḥ somamaṇḍalāya ṣoḍaśakalā'tmane 
arghyāmṛtāya namaḥ iti śuddhajalamāpūrya astreṇa 
[etadastrādimudroddhārārtha dvi. pa. 15-7/14 15-8/1-2 15-8/2 vi. dṛśyāḥ |] 
saṃrakṣya kavacenāvakuṇṭhya dhenuyonimudrāṃ [dhenumudrāṃ pradarśya yo-a 
śrī |] [mudre-ba 1 |] pradarśayet || 5 ||

p. 78)

purata ityasya kasyetyākāṅkṣayāṃ yogyatvāt svasyeti śeṣaḥ | etena 
dakṣavāmabhāgayoḥ vyatyāsaḥ | mūlena saptatvaṃ āvṛttyā saṃpādanīyam 
taiḥ abhimantritena gandhapuṣpākṣataiḥ pūjitena śuddhena pavitreṇa paṭapūtena 
[sugandhapuṣpādidravyodvāsitenetyarthaḥ ||] vāriṇā 
trikoṇaṣaṭkoṇavṛttacaturaśrāṇi vidhāya nirmāya tasmin 
nirmitatrikoṇādisaṅghātmake maṇḍale vikīrya kṣiptvā | vahnyādiśabdāḥ 
tattaddiglakṣaṇāḥ | madhye pūrvādidikṣu ca ṣaḍaṅgāni mūlaṣaḍaṅgāni | 
vidikṣviti laghusūtre kartavye vahnīśeti gurusūtraṃ kramaviśeṣalābhārtham | 
atra yadyapi vākyena agnimaṇḍalāya namaḥ ityārabhya 
śuddhajalamāpūryetyantena [mūlasūtrasthavākyenetyarthaḥ |] 
āpūraṇaśeṣatvaṃ sarvasya pratīyate tathā'pi sūktavākena prastaraṃ praharati 
itivat liṅgena vibhajyaiva mantrāṇāṃ trayāṇām ādhārāya namaḥ pātrāya 
namaḥ amṛtāya namaḥ ityantānāṃ 
ādhārasthāpanapātrasthāpanajalapūraṇeṣu pratyekaṃ śeṣatvaṃ vācyam 
vākyāt liṅgasya prabalatvāt | vastutastu-arthaikatvādekaṃ vākyaṃ 
sākāṅkṣaṃ cedvibhāge syāt iti jaiminisūtroktavākyalakṣaṇābhāvāt na 
vākyavirodho'pi | kvacit pustake arghyapātrāya namaḥ ityetaduttaram 
ityādhārapātre dhṛtvā iti pāṭhaḥ | tadā na vivādaḥ | śuddhajalaṃ pūrvoktam | 
atra dvitīyā tṛtīyā'rthe saktuvat dṛṣṭaphalasaṃbhavāt | yadvā-srucaḥ 
saṃmārṣṭi itivat guṇakarma āpūraṇakriyayā jalaṃ saṃskuryāditi | tathā ca 
asmin pakṣe dvitīyaiva yathāśratā | astreṇa [ita ārabhya adhastāt tatra tatra 
tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] astramudrayā saṃrakṣya 
rakṣobhūtādiyāgavighnakartṛdurādharṣaṃ kṛtvā | yadvā-astreṇa [ita ārabhya 
adhastāt tatra tatra tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] phaṭ itimantreṇa pūrvavat kṛtvā | kavacena [ita ārabhya 
adhastāt tatra tatra tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] huṃ-iti mantreṇa avakuṇṭhya [ita ārabhya adhastāt tatra tatra 
tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] anyatra gamanaśaktirahitaṃ kṛtvā ||

nibandhakārastu mantramudrādvayaṃ astrapadenovāca | tanna śakṛduccaritaḥ 
śabdaḥ sakṛdevārthaṃ gamayati iti nyāyāt āvṛttau vākyabhedaprasaṅgāt ||

ata eva pūrvavilakṣaṇatvāt dhenuyonimudrāṃ [ita ārabhya adhastāt tatra tatra 
tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] pradarśayet ityuktam | etena na te mudre pūrvatane mantra iti 
spaṣṭam | mudrām ityekavacanamārṣam | dhenusahitayoniriti madhyamapadalopī 
samāso vā kāryaḥ || 5 ||

arghyasaṃskāraḥ 

evaṃ mudrāpradarśanāntamuktvā sūtrāntareṇa saṃskāraśeṣānāha-

saptavāramabhimantrya [mūlena- sa-śrī.] tajjalavipruḍbhirātmānaṃ 
pūjopakaraṇāni ca saṃprokṣya tajjalena pūrvoktaṃ maṇḍalaṃ parikalpya 
tadvadādimaṃ saṃyojya [saṃśodhya-a.] tatropādimaṃ 

p. 79)

madhyamaṃ [madhyamam iti nāsti-ba 2.] ca nikṣipya vahnyarkendukalāḥ abhyarcya 
vakratuṇḍagāyatryā gaṇānāṃ tvetyanayā ṛcā cābhimantrya astrādirakṣaṇaṃ 
kṛtvā tadbindubhistriśaḥ śirasi gurupādukāmārādhayet || 6 ||

mūleneti saptavāramityasyādiḥ | kvacittathaiva pāṭhaḥ | tajjalena 
sāmānyārghyodakena pūrvoktaṃ [pūrvoktaṃ-nāma uparitana-5-sūtroktarītyā-
iti jñeyam |] trikoṇādirūpaṃ maṇḍalaṃ saṃskṛtadeśaviśeṣam | tadvat 
sāmānyārghyodakavat | ādimaṃ prathamaṃ saṃyojyetyanena tadantā kriyā 
tadvadityatidiśyate | tena ādhārapātrasthāpanayorapi lābhaḥ | kvacit saṃśodhyeti 
pāṭhaḥ | cakāreṇa [ādimopādimayoreva grahaṇāt atra 
caturthapañcamayornivṛttiḥ | yadvā-yogyaiḥ saha mapañcakamurarīkṛtya iti agre 
(etatkhaṇḍīyāntime-10-sūtre) mapañjakasvīkāraliṅgāt cakāreṇa āvaśyakam | 
yuktaścāyameva pakṣaḥ |-iti ba 2 kośe.] caturthapañcamayorgrahaṇam | 
pūrvasmādatra yo viśeṣastamāha-vahnīti | ādhāre vahnikalāḥ [imā 
vahnisūryavidhukalāḥ pratyakṣanāmnā-agre-6-khaṇḍe-śyāmākrame-18-sūtre-
mūle-eva santi tato grāhyāḥ |] dhūmrārcirādayaḥ pātre sūryakalāḥ 
tapinyādayaḥ amṛte amṛtādayaścandrakalāḥ caturthyantatattannāmabhiḥ 
prāgādiprādakṣiṇyena vṛttākāraṃ yajet | diṅniyamo vṛttākāraniyamaśca yaḥ 
tanmūlaṃ paramānandatantre aṣṭamollāse draṣṭavyam | ādhārasthāpanottaraṃ 
tatra daśavahnikalāḥ saṃpūjya tataḥ pātraṃ sthāpayet | evamanyatrāpi | 
vakratuṇḍagāyatryā-tatpuruṣāya vidmahe vakratuṇḍāya dhīmahi | tanno dantī 
pracodayāt | ityanayā | gaṇānāṃ tvā itīyamṛk prasiddhāḥ | kvacitpāṭhe 
samagrapāṭho'pi dṛśyate | abhimantraṇaṃ nāma mantrapaṭhanakāle 
saṃskāryadravyasparśaḥ | astrādītyādipadena kavacam 
[etadādimudroddhārajñānārthaṃ-ddi. pa. śi.-15-vi. dṛśyaḥ |] | te ubhe pūrvaṃ 
vyākhyāte | rakṣaṇamiti avakuṇṭhanasyāpyupalakṣaṇam | tathā ca astramantreṇa 
[etadādimudroddhārajñānārthaṃ-ddi. pa. śi.-15-vi. dṛśya. |] saṃrakṣya 
[etadādimudroddhārajñānārthaṃ-ddi. pa. śi.-15-vi. dṛśya. |] avakuṇṭhya 
[etadādimudroddhārajñānārthaṃ-ddi. pa. śi.-15-vi. dṛśya. |] 
kavacamantreṇetyarthaḥ | yadyapi tadvadādimaṃ saṃyojya ityanenaiva 
astrādīnāṃ prāptisaṃbhave punarvidhānaṃ vyartham tathā'pi pūrvaṃ 
dhenuyonimudre sthite tannivṛttyarthaṃ punaḥkathanaṃ jñeyam | tadbindubhiḥ 
saṃskṛtaprathamabindubhiḥ triśaḥ trivāraṃ śirasi vidhibile 
gurupādukāmārādhayet | ārādhanaṃ nāma gurupādukoddeśena dravyatyāgaḥ 
| tasyāhavanīyādivat deśaniyamaḥ śirasi | bindubhirityanena dravyamānaniyamaḥ 
sāvaraṇagaṇapatipūjāyāmapi [yā deśani-ba.] niyamo'nena kriyate || 6 ||

pīṭhaśakti-dharmādyaṣṭaka-mahāgaṇapati-pañcāvaraṇa-pūjāvidhiḥ 

pīṭhaniyamapūrvakaṃ yantroddhārādikamāha-

p. 80)

purato raktacandananirmite pīṭhe mahāgaṇapatipratimāyāṃ vā 
caturasrāṣṭadalaṣaṭkoṇatrikoṇamaye cakre vā tīvrāyai jvālinyai nandāyai 
bhogadāyai kāmarūpiṇyai ugrāyai tejovatyai satyāyai vighnanāśinyai ṛṃ 
dharmāya ṛṃ jñānāya ḷṃ vairāgyāya ḷṃ aiśvaryāya ṛṃ adharmāya ṛṃ 
ajñānāya ḷṃ avairāgyāya ḷṃ anaiśvaryāya nama iti 
pīṭhaśaktīrdharmādyaṣṭakaṃ cābhyarcya mūlamuccārya 
mahāgaṇapatimāvāhayāmītyāvāhya pañcadhopacarya daśadhā 
[daśadhopatarpya-ba 2.] saṃtarpya mūlena 
mithunāṅgabrāhmyādīndrādirūpapañcāvaraṇapūjāṃ kuryāt || 7 ||

purata iti pīṭhe ityantaṃ mūrttyādhāraniyāmakam | vākāradvayaṃ 
samavikalpadyotakam | caturaśraṃ sarvasmāt bahiḥ tadantaḥ aṣṭadalaṃ tadantaḥ 
ṣaṭkoṇaṃ tadantaḥ trikoṇam iti kramo jñeyaḥ | tīvrādiṣu pīṭhaśaktiriti 
saṅketāt āsāṃ śrīgaṇapatyādhārabhūtapīṭhe raktacandananirmite pūjanamiti 
jñāyate | tatra kramānuktau prāgādiṣvaṣṭadikṣu madhye ca navaśaktayaḥ 
pūjyāḥ | dharmādīnāṃ catuṣṭayaṃ vāyavyādividikṣu adharmādicatuṣṭayaṃ 
paścimādiprādakṣiṇyena pīṭha eva samarcayet pīṭhaśaktīḥ dharmādyaṣṭakaṃ 
ceti dvayorekadeśasya śrutatvāt | dharmādīnāṃ diṅniyamaḥ vāyukoṇataḥ | 
paramānandatantre-

dharmaṃ jñānaṃ ca vairāgyamaiśvaryaṃ paścimāditaḥ |
adharmādicatuṣkaṃ ca................. || iti ||

pañcadhā pañcaprakāraiḥ gandhapuṣpadhūpadīpanaivedyarūpaiḥ upacarya 
pūjayitvā | atra mantrāḥ-laṃ pṛthivyātmane gandhaṃ kalpayāmi haṃ 
ākāśātmane puṣpaṃ kalpayāmi yaṃ vāyvātmane dhūpaṃ kalpayāmi raṃ 
agnyātmane dīpaṃ kalpayāmi vaṃ amṛtātmane amṛtanaivedyaṃ kalpayāmi | atra 
pramāṇaṃ paramānandatantre-

gandhaṃ [etadupacāraviṣaye viśeṣaḥ dvi. pa. śi. 7 vi. dṛśyaḥ |] puṣpaṃ ca 
dhūpaṃ ca dīpaṃ naivedyakaṃ priye |
bhūtapañcakabījena pṛthivyādyātmakaṃ param |
krameṇa pañcabhirdevi mānase tvevamarcayet || iti ||

mūlena daśadhā daśavāram | santarpyetyatra tarpaṇasādhanadravyaṃ 
viśeṣārghyapātrastham | tatprakāraśca kathaṃ kāryam ityākāṅkṣitatvāt 
sannikṛṣṭatvāt śyāmākrame vakṣyamāṇadharma [agre-6 khaṇḍe 
śyāmākramīya 22 sūtroktaḥ iti jñeyam |] eva grāhyaḥ 
evamāvaraṇapūjāyāmapi 

p. 81)

itikartavyatā'kāṅkṣāyāṃ tata eva grāhyam | tarpaṇe 
[etadādisarvatrāvaraṇapūjāyāṃ tattadevatātarpaṇe 
gṛhyamāṇaviśeṣārghādipātrasthabindvakṣatādi vastu kayāṅgulyā grāhyaṃ 
tatra viveka uktaḥ śrīkulārṇavatantre-6- ullāsa samāptau-60 patre śrī śivena 
bhagavatā yathā-

antaḥśaktimanusmṛtya tarpayedvīradevatāḥ | aṅguṣṭo bhairavo devaḥ anāmā 
caṇḍikā priye ||
anāmāṅguṣṭhayogena tattat kulajasantatim | aṅguṣṭhānāmikābhyāñca 
vaśyakarmaṇi tarpayet ||
tarjanyaṅguṣṭhayogena tarpayedabhicārake | kaniṣṭhāṅguṣṭhayogena stambhane 
tarpayet priye ||

evaṃ santarpya deveśi kuladravyairyathāvidhi- || iti ||
anyaccātraiva-6 khaṇḍe śyāmākrame 22 sūtre tadbhāṣye cāpi dṛśyam |] 
tarpaṇe tu mūlamuktvā śrīmahāgaṇapatiṃ tarpayāmīti mantraśeṣaḥ | 
pratitarpaṇaṃ mantrāvṛttiḥ dravyapṛthaktvāt | ata eva hiraṇyakeśisūtre 
dravyapṛthaktve'bhyāvartate iti || 

yattu nibandhe tarpaṇamantre pūjayāmīti mantraśeṣalekhanaṃ tadaśuddham | yadi 
tarpaṇapūjanayorabhedaḥ tarhyagre'pi pañcāvaraṇatarpaṇaṃ kuryādityeva vadet 
na pūjāṃ kuryāditi vadet | yato dhātubhedenoccāraṇam 
ato'rthabhedo'pyāvaśyakaḥ | arthabhede pūjāliṅgakamantrasya 
tarpaṇānaṅgatvaṃ spaṣṭam | evaṃ nibandhe pradhānadevapūjottaraṃ 
ṣaḍaṅgaughatrayapūjā coktā | tatra mūlaṃ yadi tantrāntaraṃ tasyātra praveśo 
nāstīti pūrvamevoktam | atastanna kāryam ||

mithunānāṃ āvaraṇadvayam aṅgadevatāḥ tṛtīyāvaraṇaṃ brāhmyādyāḥ 
caturthāvaraṇam indrādyāḥ pañcamāvaraṇam evaṃ pañcāvaraṇapūjāṃ 
kuryāt || 7 ||

pañcāvaraṇīpūjā 

tatra pradhānadevatātarpaṇadeśamāha-(tadeva savistaraṃ prapañcayati)

trikoṇe devaḥ tasya ṣaḍasrasyāntarāle śrīśrīpatyādicaturmithunāni aṅgāni ca 
ṛddhyāmodādiṣaṇmithunāni ṣaḍasre mithunadvayaṃ 
ṣaḍasrobhayapārśvayostatsandhiṣvaṅgāni brāhmyādyā aṣṭadale 
caturasrāṣṭadikṣvindrādyāḥ pūjyāḥ sarvatra devatānāmasu śrīpūrvaṃ 
pādukāmuccārya pūjayāmītyaṣṭākṣarīṃ yojayet || 8 ||

trikoṇe devaḥ tarpyaḥ iti śeṣaḥ | tat trikoṇaṃ ṣaḍasraṃ ca tayorantarāle 
anuktatvāt prāgādidikṣu caturāvṛttitarpaṇapāṭhakramānurodhena 
śrīśrīpatiprabhṛti mithunacatuṣṭayaṃ pūjyam | etāvat prathamāvaraṇam | 
ṛddhyāmodamithunamārabhya ṣaṇmithunāni ṣaḍasrakoṇeṣu | etaduttaravṛtti 
mithunadvayaṃ ṣaḍasrapārśvadvaye iti dvitīyāvaraṇam | ṣaṭkoṇayantre rekhopari 
rekhā yatra gacchati sa tatsandhiḥ | tatra īdṛśāḥ sandhayaḥ ṣaṭ santi 
tādṛśasandhiṣu | kramasyānuktatvāt 
agnīśāsuravāyukoṇakramasyoktasyāsambhavāt prāgapavargatā 
uttarāpavargatā yathā syāt tathā kramamanādṛtya 

p. 82)

ṣaḍaṅgāni yajet | iti tṛtīyāvaraṇam | aṣṭadale kramākāṅkṣāyāṃ 
śrīvidyā'rṇavoktaḥ | ādyacatasṛṇāṃ paścimādiprādakṣiṇyena agrimāṇāṃ 
vāyavyādividikṣu prādakṣiṇyena pūjyāḥ brāhmyādyaṣṭamātaraḥ iti 
caturthāvaraṇam | caturasre prāgādyaṣṭadikṣu tattaddikpatīn yajet | yatra 
mantrākāṅkṣāsattvāt sannikṛṣṭaśyāmākramoktadikpālamantrāḥ [agre-6 
khaṇḍe śyāmākrame-14 sūtre mūle 10 dikpālamantrāḥ santi |] grāhyāḥ | 
athavā- vakṣyamāṇāṣṭākṣarīyuktanāmamantreṇaiva [atra aṣṭākṣarīmantraḥ 
śrīpādukāṃ pūjayāmīti-nāmamantraśca oṃ śrī indrāya namaḥ 
ityādyabhipreyam |] | iti pañcamāvaraṇam | anuṣṭhāne upayuktāṃ 
sarvasādhāraṇīṃ kāṃcit paribhāṣāmāha-sarvatreti | sarvatra pūjāsāmānye 
devatānāmasu nāmamantreṣu | ghaṭakatvaṃ saptamyarthaḥ | śrīpūrvaṃ 
prathamaṃ śrīpadamuccārya tataḥ pādukām iti tataḥ pūjayāmi iti | tathā ca 
śrīpādukāṃ pūjayāmīti yāvat || 8 ||

gaṇanāthasya punarupatarpaṇādi 

evaṃ pañcāvaraṇīmiṣṭvā punardevaṃ gaṇanāthaṃ daśadhopatarpya 
ṣoḍaśopacārairupacarya praṇavamāyā'nte sarvavighnakṛdbhyaḥ sarvabhūtebhyo 
huṃ svāhā-iti triḥ paṭhitvā baliṃ datvā gaṇapatibuddhyaikaṃ baṭukaṃ 
siddhalakṣmībuddhyaikāṃ śaktiṃ cāhūya 
gandhapuṣpākṣatairabhyarcyādimopādimamadhyamān datvā mama nirvighnaṃ 
mantrasiddhirbhūyādityanugrahaṃ kārayitvā namaskṛtya yathāśakti japet || 9 ||

evam uktaprakāreṇa pañcānāmāvaraṇānām āvaraṇadevatānāṃ samūhaḥ 
pañcāvaraṇī dvigoḥ iti ṅīp tām iṣṭvā pūjayitvā | punarityanena [punarityanena 
yathāpūrvoktapañcāvaraṇapūjāyā iva evaṃ pañcāvaraṇīmiṣṭvetyeva 
anuvādaḥ | tadvat ayamapi anuvāda eva | kamamātravidhiriti bhramo nirastaḥ | 
daśadhā-ba 2. ] pañcāvaraṇāntaḥpātitvaṃ sūcitam | daśadhā daśavāram | 
tarpaṇaprakāraśca [etat khaṇḍe 80-81-patrayoḥ 7 sūtrabhāṣyānte iti jñeyam |] 
pūrvameva vyākhyātaḥ | ṣoḍaśopacārāśca paramānandatantre parigaṇitāḥ | 
yathā-

pādyamarghyaṃ [etadupacāraviṣaye-ddi. pa-śi-7-vi-dṛśyaḥ |] cācamanaṃ 
snānaṃ vastraṃ ca bhūṣaṇam |
gandhaṃ puṣpaṃ dhūpadīpau naivedyaṃ cāpi vīṭikām | 
nīrājanaṃ cāñjaliṃ ca parikrāmaṃ natiṃ śive |
gaṇayedupacārān vai pratyekaṃ ṣoḍaśeśvari || iti ||

agre sūtroktaṣoḍaśopacārā vā ||

atra pūjā'ṅgatvena paddhatau homa uktaḥ saḥ nirmūlaḥ ||

p. 83)

praṇavaḥ prasiddhaḥ māyā hrīm etayoḥ ante agre svāhā'ntaṃ śeṣaṃ paṭhet | 
ayaṃ balidānamantraḥ | imaṃ mantraṃ triḥ paṭhitvā tato balidānaṃ kuryāt | 
balidravyamākāṅkṣitaṃ śrīkramoktaṃ grāhyam | deśākāṅkṣāyāṃ 
śrīkramoktaṃ svavāmabhāgataḥ | gaṇapatibuddhyā ityasya abhyarcya 
ityanenānvayaḥ | gaṇapatisvarūpaṃ bhāvayitveti yāvat | pāṭhakramaṃ 
bādhitvā arthakrameṇa ādau āvāhanaṃ paścāt bhāvanaṃ tato'rcanaṃ 
evamagre'pi | atra dvayorapyāhvānādikaṃ padārthānusamayena 
[kāṇḍānusamayapadārthānusamayavivekāya-ddi. pa. śi. vi. 8 dṛśyaḥ |] 
natvañjanādivat kāṇḍānusamayena tadvat atra bādhakābhāvāt sarveṣāṃ 
tulyapradhānasannikarṣasambhavācca | ādimaṃ spaṣṭaṃ upādimaṃ dvitīyaṃ 
madhyamaṃ tṛtīyaṃ ca dattvā | ayaṃ pratipattisaṃskāraḥ madhyamāniti 
dvitīyāśruteḥ | dānena dravyaṃ saṃskuryāt iti tadarthaḥ | tathā ca 
āvaraṇapūjottaraṃ dravyadoṣe etasya nivṛttireva | anugrahaṃ kārayitvā 
tayoranugraho yathā bhavet tathā tatsaṃtoṣaṃ svayaṃ saṃpādayet iti bhāvaḥ | 
namaḥ ityārabhya japet ityantaḥ spaṣṭārthaḥ || 

yacca nibandhe japānantaraṃ baṭukasuvāsinīpūjanakathanaṃ 
tatsūtraviruddhamityanena spaṣṭīkṛtam || 9 ||

gaṇapatyudvāsanam 

yadyagnikāryasaṃpattiḥ baleḥ pūrvaṃ vidhivat saṃskṛte'gnau svāhā'ntaiḥ 
śrīśrīpatyādivighnakartṛparyantaiḥ mantrairhutvā punarāgatya devaṃ trivāraṃ 
saṃtarpya yogyaissaha mapañcakamurarīkṛtya mahāgaṇapatimātmanyudvāsya 
siddhasaṅkalpaḥ sukhī viharet iti śivam || 10 ||

iti duṣṭakṣatriyakulāntaka-reṇukāgarbhasambhūta-mahādevapradhānaśiṣya-
paraśurāma-śrībhārgavamahopādhyāya-śrīmatkulācāryaviracitakalpasūtre 
gaṇapatiprakaraṇaṃ dvitīyakhaṇḍātmakaṃ samāptam |

yadītyanena homasya kṛtākṛtatvaṃ sūcitam | baleḥ pūrvam-ityanena kramaśeṣaḥ 
[deśaḥ sū-ba 2.] sūcitaḥ | vidhivat iti-agre [agratana 9-
khaṇḍapratipāditahomavidhyuktarītyetyarthaḥ |] vakṣyamāṇavidhinetyarthaḥ | 
śrīśrīpatibhyāṃ svāheti mantrasvarūpam ||

yacca nibandhe śriyai svāhā śrīpataye svāhā iti mantravibhāgaṃ lilekha taṃ 
pratyayaṃ praśnaḥ-mithunamekā devatā uta devatādvayam ? ādye 
mantradvayavibhāgo'nucitaḥ | dvitīye āvaraṇapūjāyāṃ 
śrīśrīpatiśrīpādukāṃ pūjayāmīti nibandhe samaṣṭimantralekho'nucitaḥ | 
tasmāt sandarbhaviruddhamupekṣyam | na ca tava mate caturāvṛttitarpaṇe'pi 
samaṣṭimantrāpattiḥ iti vācyam tatra mithuneṣvekaikāṃ devatāṃ caturvāramiti 
vartate na mithunāni tarpayitveti | pūjāprakaraṇe kevalamithunāni pūjayedityeva | 
tena mithunasya devatātvaṃ spaṣṭam | evaṃ homasthale'pi 

p. 84) 

śrīśrīpatyādītyanena mithunasyaikadevatātvaṃ spaṣṭam | anyathā 
yādivighnakartṛparyantairityeva vadet śrīpatigrahaṇaṃ vyartham | na ca 
vighnakartṛparyantairityatra ekadevatāgrahaṇaṃ pratyekasya devatātve kimiti 
jñāpakaṃ na bhavet iti vācyam | yadīdaṃ mantrasvarūpajñāpakaṃ bhavet 
atrāpi vighnakartrantairityanenaiva śrīśrīpatyādīnāṃ lābhe śrīśrīpatyādīti 
vyarthaṃ sat mantrasvarūpajñāpakaṃ sat sārthakam | vighnakartṛparyantairiti 
agrimamithunanivartakaṃ sat sārthakamiti sarvaṃ samañjasam | tasmāt 
caturāvṛttitarpaṇe pūrvoktayuktyā 
catuścatvāriṃśadadhikacatuśśatatarpaṇasaṅkhyāparipūrtaye ca pratyekaṃ 
devatātvam [devatātve'pi pūjāyāṃ-ba 2 |] | pūjāyāṃ home coktajñāpakena 
vyāsajyavṛttyeva devatātvam | ato mantrasvarūpamasmaduktameva | 
vighnakartṛparyantairityanena agnimamithunaparisaṃkhyā ||

hutvā ityatra dravyākāṅkṣāyām anādiṣṭa ājyaṃ bhavati iti paribhāṣayā 
ājyameva | kāmanāviśeṣe tu dravyaviśeṣo modakā'diḥ | punarāgatya ityanena 
pūjāpradeśādanyo homapradeśaḥ-iti sūcitam | śeṣaṃ pūrvavat | yogyaiḥ 
saṃpradāyābhijñaiḥ saha | etadviśeṣaṇasvarasārthaṃ vitatya 
spaṣṭīkariṣyāmaḥ upariṣṭāt śrīkrame [3 khaṇḍa 30 sūtrabhāṣyānte-saṃprati 
idānīṃtanā ajitendriyā ityādinā |] | mapañcakamurarīkṛtya svīkṛtya śrīkrame 
vakṣyamāṇena vidhinā | atra sahaśabdaśca na yogyābhāve'pyavaśyaṃ 
saṃpādanīyamiti tadabhāve aṅgalopajanitaṃ prāyaścittaṃ vā prāpayati kiṃ tu 
vidyamāne sāhityaṃ avidyamāne kevalaṃ svayameva saha śākhayā prastaraṃ 
praharati itivat | atra gaṇapatyupāsanāmaryādā'nukteḥ śyāmā'divat | 
japasaṅkhyāścānukteḥ tantrāntaraṃ śaraṇīkāryam | tatra tantrāntaravacanaṃ 
tantrasāre-

dhyāyenmantraṃ japenmantraṃ caturlakṣaṃ samāhitaḥ |
catussahasrasaṃyuktaṃ catvāriṃśatsahasrakam |
daśāṃśaṃ juhuyāt dravyairaṣṭabhirmodakādibhiḥ || iti ||

udvāsanamudrayā udvāsya | siddhasaṅkalpaḥ siddhakāryaḥ | sukhī [idametat 
khaṇḍīyāntimasūtrasthapadaṃ jñeyam |] viharet iti pratipāditakarmaṇaḥ na 
kevalaṃ pratyūhanāśaḥ kintvidamapi phalamiti darśitam | etena 
śrīvidyopāstyanaupayikānaṅgasvatantragaṇanāyakopāstyā yadyadapekṣitaṃ tat 
sidhyatīti kṛtasaṅkalpeti padena sūcitam 
[etacchrīgaṇeśapūjāpaddhatyanuṣṭhānaviśeṣajñānāya-śrīprapañcasāra 
gaṇeśapurāṇa śāradātilaka mantramahodadhyāditāntrikagranthā dṛṣṭavyāḥ |] 
| śivam iti pūrvavat prakaraṇasamāptidyotakam ||

iti śrīrāmeśvaranirmitāyāṃ saubhāgyodayanāmnyāṃ 
paraśurāmasūtravṛttau gaṇanāyakapaddhatirnāma dvitīyakhaṇḍaḥ samāptaḥ ||

sūtrasya punarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || (iti dvitīyaḥ khaṇḍaḥ) śrīḥ | 




p. 85)

tṛtīyaḥ khaṇḍaḥ - śrīkramaḥ 

lalitā'dhikāraḥ 

nityaughatrayamilitāmaṣṭāvaraṇāṅgaṣaṭkasaṃvītām |
cintayatāṃ tatkṛpayā vāco niryāntyayatnato vadanāt ||

evaṃ pūrvakhaṇḍena śrīlalitopāstyaṅgabhūtaṃ gaṇapatyupāsanamuktvā 
śrīparadevatāyāḥ śrīlalitāyāḥ kramaṃ vaktumupakramate-

evaṃ gaṇapatimiṣṭvā vidhūtasamastavighnavyatikaraḥ śakticakraikanāyikāyāḥ 
śrīlalitāyāḥ kramamārabheta || 1 || 

evamiti vighnavyatikaraḥ-ityantena granthena pūrvaṃ kaṃcitkālaṃ 
gaṇapatyārādhanaṃ kṛtvā paścāt śrīlalitopāstyārabhya iti sūcitam | evaṃ 
pūrvoktaprakāreṇa iṣṭvā upāsya vidhūtā nirastāḥ samastāḥ saṃpūrṇāḥ 
vighnānāṃ vyatikarāḥ saṅghātāḥ yena ||

gaṇanāyakopāsteḥ pradhānakarmatvam 

idam adhikāriviśeṣaṇam | ayam utpattividhiḥ | pūrvaviśeṣaṇasvārasyāt 
adhikāravidhirapi | yadvā-nādhikāriviśeṣaṇamidam tathā sati 
gaṇapaterupāsanāyāḥ agnimopāsanāṅgatvāpatteḥ | na ceṣṭāpattiḥ | 
tārtīyaśrutiliṅgādīni aṅgatvasādhakāni ṣaṭ pramāṇāni | tanmadhye 
tṛtīyavākyapramāṇasiddham aṅgatvam tadbādhakaliṅgaśrutyorabhāvena 
pramāṇasiddhāṅgatvāpahnavasya kartumaśakyatvāt | kiṃ tu 
gaṇapatyupāstyuttaravṛttitvarūpakramaviśiṣṭalalitopāstiranena vidhīyate | yadvā-
pūrvopāstirūpaguṇaviśiṣṭakramaviśeṣaviśiṣṭo vā ayamārambhaḥ | 
tatkālalalitopāstiḥ anena vidhīyate | vidhūtasamastavighnavyatikara iti 
pūrvoktaphalasyānuvādakam | evaṃ cārambho nāma saṅkalpaviśeṣaḥ 
darśapūrṇamāsāvārapsye itivat | lalitākramamārabheta ityanena yāvajjīvaṃ 
vartiṣye iti saṅkalpaḥ siddhaḥ | tadaṅgaṃ gaṇapatyārādhanam | 
etadguṇakasaṅkalpaśca śrīlalitopāstau prayājādivadārādupakārakaḥ 
pradhānakarma yaistu dravyaṃ na cikīrṣyate iti jaiminisūtroktalakṣaṇasattvāt | na 
ca adhikāriviśeṣaṇatve saṃpratyuktaviśiṣṭavidhirūpatve vā anuṣṭhāne ko 
viśeṣa iti vācyam | yadyadhikāriviśeṣaṇaṃ tarhi pramādādinā 
gaṇapatyupāstimakṛtvā lalitopāstyārambhe anadhikāriṇā andhādinā 
anuṣṭhitadarśapūrṇamāsavat tāvatparyantakṛtasya karmaṇo'phalatvena yadā 
sāvadhānatā tadā lalitopāstiṃ tyaktvā gaṇapatyupāstiṃ saṃpādya 
saṃpannādhikāraḥ tataḥ śrīvidyopāstiṃ kuryāt | viśiṣṭavidhipakṣe 
gaṇapatyupāsterārambhāṅgatvena ārambhasya ca lalitopāstyaṅgatvena 

p. 86) 

vismṛtyārambhe jāte sati aṅgalopajanitadoṣaparihārāya kiṃcidvihitaṃ 
prāyaścittam nāṅgānusāreṇa pradhānāvṛttiḥ | na ca 
atyantamaṅgalopādvaraṃ tasyānuṣṭhānaṃ pradhānasyāṅgānanurodhitvānmā 
bhavatvāvṛttiḥ aṅgaṃ tu kevalamanuṣṭhīyatām iti vācyam | 
pradhānapūrvāṅgānāṃ yāvatāṃ pradhānena apūrve jananīye sahakāritvaṃ 
kāmye pradhānenāpūrve jananīye sahakāriṇo'bhāvāt anantaraṃ pradhānasya 
naṣṭatvena kevalāṅgānuṣṭhāne tadapi vyartham | nitye tu yāvajjīvaṃ kartavyam 
ityaṅgaloparahitaṃ ca kartavyam ityukte aśakyānuṣṭhānarūpatvena śāstrasya 
aprāmāṇyāpattibhiyā sakalāṅgam ityasya 
yāvacchakyayāvajjñātasakalāṅgamiti vākyasaṅkoco yuktaḥ | tathā ca 
yathāśakti yāvajjñātairevāṅgaiḥ sahitapradhānena apūrvotpattiḥkalpyata iti 
kḷptaṃ ṣaṣṭhe | tathā ca lalitopāsternityatvena ajñātayatkiṃcidaṅgalope'pi 
pradhānenetarāṅgasahitena apūrvajananāt punaraṅgānuṣṭhānasya vyarthatvāt 
na gaṇapatyupāstirūpasyāṅgasyājñātasya punaranuṣṭhānam | yadi 
vighnanirāsārthaṃ kiṃcidanuṣṭheyaṃ tarhi vināyakastavapāṭhādikaṃ 
tanmantrajapa eva vā kāryaḥ | evaṃprakārānuṣṭhānabhedo'sti iti tadvicāraḥ 
kṛtaḥ | ito'dhikaṃ sudhiyo vicārayantu ||

śakticakraikanāyikāyāḥ śakticakrāṇi śrīcakrāvayavanavacakrāṇāṃ madhye 
trikoṇādīni pañcacakrāṇi | taduktaṃ brahmāṇḍapurāṇe-

caturbhiḥ śivacakraiśca śakticakraiśca pañcabhiḥ |
navacakraiśca saṃsiddhaṃ śrīcakraṃ śivayorvapuḥ ||
trikoṇamaṣṭakoṇaṃ ca daśakoṇadvayaṃ yathā |
caturdaśāraṃ caitāni śakticakrāṇi pañca ca || iti ||

teṣām ekā mukhyā nāyikā yā tasyāḥ | yadvā-śaktayaḥ sadhavāḥ striyaḥ 
tāsāṃ cakraṃ samūhaḥ teṣāṃ madhye ekā advitīyā ceyaṃ nāyikā [nāthā 
śreṣṭhā | na ca-ba |] jaganniyantrī | na ca na nirdhāraṇe iti ṣaṣṭhīsamāsaniṣedhāt 
kathamayamarthaḥ iti vācyam ṣaṣṭhīsamāsaniṣedhe'pi puruṣottamaḥ-itivat 
saptamīsamāse bādhakābhāvāt | yadvā-tattadvastuniṣṭhatattatkāryanirvāhikāḥ 
śaktayaḥ tāsāṃ samūhasyaikā advitīyā nāyikā prerikā taduktaṃ 
śrīdevībhāgavate-

śivādyavaniparyante śaktayaḥ kāryasādhakāḥ |
mayaiva preritā viddhi tāḥ sarvā munisattama || iti ||

yadvā-śaktayaḥ śyāmāvārtālīprabhṛtayaḥ tā eva cakraṃ parivāraḥ cakraṃ 
sevyaṃ nṛpaḥ sevyaḥ ityabhiyuktaprayogāt | tāsāmekanāyikā advitīyaniyantrī 
ityarthaḥ | etena śrīvidyāyāḥ prādhānyaṃ sūcitam | śakticakraikanāyiketi 
lalitāyā guṇaḥ | tathā ca viśiṣṭasya devatātvaṃ utpattivākye 

p. 87)

śrūyamāṇaguṇaviśiṣṭasya devatātvāt yadagnaye pavamānāya-agnaye 
pāvakāya ityādivat utpattivākye śrutadevatāyāḥ sarvatroccāraṇamiti niyamāt | 
itthaṃ ca yatra devatānāmakīrtanamāvaśyakaṃ tatra guṇaviśiṣṭasyaiva 
kīrtanam yathā sandhyājapādau sandhyāpūjā'dau śakticakraikanāyikāyāḥ 
śrīlalitāyāḥ prītaye amukakarma kariṣya iti | evaṃ nivedane | anyathā 
pavamāneṣṭau agnaye juṣṭaṃ nirvapāmi ityeva syāt | tasmāt 
guṇaviśiṣṭadevatāyojanaṃ mantreṣvatra kāryam | kramaṃ pūjām upāsanāṃ 
vā ārabhet ||

lalitānāmanirvacanam 

lalitānāmanirvacanaṃ padmapurāṇe-

lokānatītya lalate lalitā tena cocyate | iti ||

atra cakāradyotyaṃ niruktyantaraṃ darśayāmāsurasmatparameṣṭhiguravaḥ 
sahasranāmabhāṣye-lalitaṃ śṛṅgārabhāvajanyaḥ kriyāviśeṣaḥ tadvatī lalitā | 
tena śṛṅgārarasapradhāneyaṃ mūrtiriti dhvanitam || 1 || 

brāhmamuhūrtakartavyadhyānādi 

tato [itaḥ paraṃ lalitopāsakena anudinaṃ kartavyāḥ kriyā āha iti ba kośe.] 
gurudhyānādīnupadiśati sūtradvayena-

brāhme muhūrte brāhmaṇo muktasvāpaḥ pāpavilāpāya paramaśivarūpaṃ 
gurumabhimṛśya || 2 ||

brāhmaḥ muhūrtaḥ-divasaṃ ṣaṣṭighaṭikā'tmakaṃ triṃśatā vibhajya 
aṣṭāviṃśo muhūrtaḥ sa brāhmaḥ | taduktaṃ devībhāgavate-

aṣṭāviṃśatitamo yaśca muhūrto brahmanāmakaḥ |
tasminnutthāya matimāṃścintayedātmano hitam [itonyadapi purāṇaprasiddhaṃ 
brāhmamuhūrttalakṣaṇaṃ tatra svāpaniṣedhopi viṣṇupurāṇe 
ratnāvalyādigranthādau ca-yathā-
rātreḥ paścimayāmasya muhūrto yastṛtīyakaḥ | sa brāhma iti vijñeyo vihitaḥ sa 
prabodhane ||
pañca pañca uṣaḥkālāḥ sapta pañcāruṇodayaḥ | aṣṭa pañca 
bhavetprātastataḥ sūryodayaḥ smṛtaḥ ||
tatra phalaṃ dhanvantariḥ-dharmārthakāmaprītyarthe satāṃ grahaṇamuttamam | 
prāpnuyātsvargavāsaṃ ca nityamevaṃ samācaret ||
ratnāvalyāṃ ca | brāhme muhūrte yā nidrā sā puṇyakṣayakāriṇī | tāṃ karoti 
dvijo mohātpādakṛcchreṇa śudhyatīti ||] || iti ||

tasmin brāhmaṇaḥ muktasvāpaḥ nidrāṃ tyaktvā | tasmin samaye nidrātyāgasya 
sāmānyataḥ smṛtiprāptatve'pi kratvarthatvena aprāptamanena vidhīyate | 
darśapūrṇamāsaprakaraṇe nānṛtaṃ vadet itivat kratvarthatvam | 
tasminnidrā'bhāve prāśastyaṃ ca tripurārahasye-

dvimuhūrtāvaśeṣe tu sūryasyodayanaṃ prati |
uṣaḥkālaḥ samākhyātaḥ sādhakānāṃ śubhāvahaḥ ||

p. 88)

tatkāle yo yamarthaṃ vai cintayenniścalāntaraḥ |
tadasya jāyate rāma kālavelāsvabhāvataḥ ||
yastu kalpadrumaprakhye kāle'sminnāvabudhyate |
buddhvā vā svaṃ hitaṃ niava cintayatyatimūḍhadhīḥ ||
sarvaiḥ svārthaiḥ paribhraṣṭaḥ paṅke gauriva sīdati || iti ||

īdṛśe kāla utthāya sarvapāpakṣayāya-tādarthye caturthī | śiva [atra pūrvatane 7 
patre 1 sūtrabhāṣye vṛttikṛdudāhṛte śrutipathagalitānāmityādiśloke śrīsūtopi 
śrīśivaṃ bhagavantaṃ gurugururityāha-tathaivātra sthalepi bhagavān 
śrījāmadagnyo rāmopyenaṃ parameṣthinaṃ śrīśivaparamaśivaṃ 
gurumityācacaṣṭa idamevātiśāyi namasyatvaṃ madādevatvaṃ ceśasya 
guruguroriti-pa.-ka.-sū.-dvitīyāvṛttiddipariśiṣṭakāraḥ ] eva guruḥ na tato'nyaḥ 
iti abhimṛśya manasi dhyātvā || 2 ||

mūlādividhibilaparyantaṃ taḍitkoṭikaḍārāṃ taruṇadivākarapiñjarāṃ 
jvalantīṃ mūlasaṃvidaṃ dhvātvā tadraśminihatakaśmalajālaḥ kādiṃ hādiṃ 
vā mūlavidyāṃ manasā daśavāramāvartya || 3 ||

mūlam ādhāracakraṃ tadādi tadārabhya vidhibilaparyantam etasya 
jvalantīmityanenānvayaḥ | taṭitkoṭayo vidyutkoṭayaḥ tadvat kaḍārāṃ kapiśāṃ 
taruṇadivākaraḥ nabhomadhyavartī sūryaḥ tadvat piñjarām ata eva jvalantīṃ 
mūlasaṃvidaṃ nirviṣayacittaṃ dhyātvā tadraśmibhiḥ cidrūpajvālāraśmibhiḥ 
nihatāni parihṛtāni kaśmalānāṃ jālāni samūhāḥ yena īdṛśaḥ san kādiṃ 
kāmopāsitāṃ hādiṃ lopāmudropāsitāṃ vā vidyāṃ pañcadaśīṃ manasā 
kramaviśiṣṭān varṇān dhyātvā ||

atra nibandhe svagurupādukoccāraḥ pañcamudrābhiḥ namanam anye ca 
svakapolakalpitāḥ ślokāśca likhitāḥ | te sūtrānabhimatā anādaraṇīyāḥ | 
evaṃ dantadhāvane mantrāḥ viṃśatigaṇḍūṣaniyamaḥ sarve'pi 
niṣpramāṇāstyājyāḥ || 3 ||

snānasandhyākarma 

tataḥ snānasandhye vadati-

snānakarmaṇi prāpte mūlena [mūlena mūrdhani datvā-ba.] datvā triḥ 
salilāñjalīn tristadabhimantritāḥ pītvā'pastrissantarpya triḥ prokṣyātmānaṃ 
paridhāya vāsasī [mūlena ityadhikaḥ-ba2.] hrāṃ [gṛhamāgatya dīrghatrayānvito 
haṃsa ityuktvā ityadhikaḥ ta kośe.] hrīṃ hrūṃ saḥ ityuktvā 
mārtāṇḍabhairavāya prakāśaśaktisahitāya svāheti trissavitre dattārghyaḥ || 4 ||

p. 89)

snānakarmaṇi prāpte snānāvasare | etena vaidikasnānottaratvam asya sūcitam | 
ayamevārthaḥ spaṣṭamuktaḥ tripurā'rṇave-

traivarṇikairvaidikā'nte tāntrikaṃ kriyate'khilam || iti ||

atra pratyañjali mantrāvṛttiḥ | añjalīn iti bahuvacanena dravyabhede siddhe 
kriyāyā āvṛttirapi dravyabhede mantrāvṛtterekādaśe vyavasthāpitatvāt | dattvā 
ityasya kutretyākāṅkṣāyāṃ snānarūpatayā yogyatvāt svaśirasīti 
pūraṇīyam | mūlena iti mūlamuccārayanniti tadarthaḥ | triḥ tadabhimantritāḥ 
mūlābhimantritāḥ | trirityasya abhimantritā ityanenānvayaḥ sannihitatvāt na 
pītvetyanena viprakṛṣṭatvāt | tena mūlatrivārābhimantritānām apāṃ sakṛdeva 
prāśanam | triḥ santarpya mūlamuccārya śakticakraikanāyikāṃ śrīlalitāṃ 
tarpayāmīti mantrasya sakṛtpāṭhaḥ kriyā'bhyāsarūpatvāt | caturāvṛttitarpaṇe 
tu mantrāvṛttireva na kriyā'vṛttiḥ iti pūrvameva vyavasthāpitam | na hi 
dravyabhedaprāpakaṃ śāstramasti tasmāt sakṛdeva mantraḥ | 
prokṣaṇe'pyevameva | ātmānam iti śarīravācakaṃ mukhyārthasya 
prokṣaṇajanitasaṃskārāsambhavāt | tarpaṇaprokṣaṇayoḥ mantrānukteḥ 
mūleneti yojayet | taduktaṃ tripurā'rṇave-

mantrānuktau mūlamantraṃ yojayet parameśvari || iti ||

na mūlena dattvā ityasmādanuṣaṅga tathā sati tadabhimantritāḥ 
ityatrāpyanuṣaṅge tatpadavaiyyarthyāt | ato'dhyāhāra eva | vastraparidhānaṃ 
[mūlena mūlamuccārayan iti tadarthaḥ ityadhikaḥ-ba 2.] smṛtiprāptamanūdyate | 
tatphalaṃ snānakarmaparisamāptijñānaṃ jñeyam | ityuktvā 
[vaidikasandhyottaraṃ tāntrikasadhyāṃ kariṣye iti saṅkalpya-ityadhikaḥ-ba. kośe.] 
ityetāvadapahāya svāhā'nto'rghyadānamantraḥ | yadyapi mantraliṅgenaiva 
devatālābhe savitra iti vyartham | tathā'pi dattārghya ityatra dānapadārthaḥ 
svasvatvadhvaṃsapūrvakadevatoddeśyakadravyatyāgaḥ | sa ca amukadevatāyā 
idaṃ na mameti rūpaḥ | tatra mantraliṅgena mārtaṇḍabhairavāyedaṃ na mameti 
siddhaḥ | aindryā gārhapatyamupatiṣṭhate itivat taṃ bādhituṃ caturthyantaṃ 
savitre iti | atrāpi sakṛddattadravyasya punardānāsambhavāt aparārghye 
dravyāntaratvaṃ siddham | tathā ca dravyapṛthaktvāt mantrāvṛttiḥ yathā 
nānābījeṣvavahananamantraḥ || 5 ||

tataḥ śrīcakrabhāvanaṃ savitṛmaṇḍale devyai arghyadānaṃ ca vidhīyate-

tanmaṇḍalamadhye navayonicakramanucintya [iyaṃ śrītripurāgāyatrī spaṣṭā 
yathā-aiṃ tripurasundari vidmahe klīṃ pīṭhakāmini dhīmahi | tannaḥ klinnā 
pracodayāt |] vācamuccārya tripurasundari vidmahe kāmamuccārya pīṭhakāmini 
dhīmahi-śaktimuccārya tannaḥ klinnā pracodayāditi-trirmaheśyai dattārghyaḥ 
śatamaṣṭottaramāmṛśya manuṃ maunamālambya || 5 ||

p. 90)

tasya savitṛmaṇḍalasya dṛśyamānavartulākārasya madhye navayonayaḥ catasraḥ 
parāṅmukhāḥ pañca svābhimukhā yonayo yasmin tat navayonicakraṃ 
śrīcakramityarthaḥ | taduktaṃ kāmikāgame-navayoniḥ śrīcakramiti | 
sundarīhṛdaye'pi-navayoniḥ śrīcakraṃ viśvasyotpattikāraṇaṃ proktam iti | 
śeṣaṃ spaṣṭam | vācaṃ prathamakūṭaṃ 
śrīmadvāgbhavakūṭaikasvarūpamukhapaṅkajā iti pramāṇāt | 
prathamakūṭānantaraṃ vidmahe ityantaṃ paṭhet | tataḥ kāmaṃ madhyakūṭaṃ 
taduktaṃ cidgaganacandrikāyām-

śaktivāgbhavayormadhye kāmarājastu viśrutaḥ |
raktaśuklaprabhāmiśraḥ...................... iti ||

taduccārya pīṭhakāmini dhīmahi iti paṭhet | śaktiṃ śaktikūṭaṃ tṛtīyam 
uccārya paṭhitvā śaktikūṭaikatā'pannakaṭyadhobhāgadhāriṇī iti 
sahasranāmapāṭhāt | tataḥ pracodayādityantaṃ paṭhet | idaṃ 
tripurāgāyatrītyapyucyate | śeṣaṃ pūrvavat | āmṛśya japitvā | śeṣaṃ spaṣṭam 
|| 

atra nibandhakāroktaṃ-snāne jale hastamātramaṇḍalakaraṇamārabhya vam iti 
bījena saptavāramabhimantraṇāntaṃ sandhyāyāṃ trirātmānaṃ 
prokṣyetyantaṃ-tantrāntarastham etattantrānusāriṇā na spraṣṭavyam | yadi 
spṛśyate tantrāntaraṃ tarhi sandhyātrayaṃ pārāyaṇakramaśca kena hetunā 
tyaktaḥ | tanmūlaṃ prāmāṇikaśced vadatu || 5 || 

yāgamandirapraveśādi 

tato yāgamandirapraveśādin vadati-

yāgamandiraṃ gatvā kḷptākalpassaṅkalpākalpo vā pīṭhamanunā āsane 
samupaviṣṭaḥ || 6 ||

yāgamandiraṃ pūjāsthānaṃ gatvā | etena sandhyā bahirjale nadyādāviti 
siddham | kḷptāḥ dhṛtāḥ ākalpāḥ bhūṣaṇāni yenedṛśaḥ | idaṃ 
bhūṣaṇadhāraṇaṃ pūjākarturaṅgam | ato loke pūjākarturdhāryāṇi yāni 
bhūṣaṇāni tānyavaśyaṃ dhāryāṇi | idaṃ ca śrīmatāṃ sambhavati | evaṃ sati 
daridrasya aṅgabhūtabhūṣaṇāsamarthasya andhādivadanadhikāraḥ prasaktaḥ | 
ata āha-saṅkalpākalpo veti | saṅkalpena mānasakriyayā kalpita ākalpo yenedṛśo 
vā | manasā nirmitabhūṣaṇadhāraṇakarteti yāvat | tathā ca 
daridrasyāpyastyadhikāra iti bhāvaḥ | bhūṣaṇāni padmarāgapracurāṇi 
bhūṣaṇaviśeṣaniyamasya tantrāntarasthasyāpi grahaṇamabhimatam ||

p. 91)

yattu nibandhe dvārapūjāyāṃ tāmbūlabhakṣaṇamuktaṃ tat 
sūtrakārānabhimatam | yadvā-yāgamandire kriyāvidhānāt arthasiddhe gamane 
punaryāgamandiraṃ gatveti vyarthaṃ sat 
gaṇapatikramasthāntaḥpraviśyetyarthakaśabdakathanāt tadantadharmātideśaṃ 
jñāpayati | ata eva vārāhīkrame nāyaṃ śabdaḥ | tena śrīkrame śyāmākrame 
dvārapūjā'stu | tathā'pi śrīkrame tāmbūlabhakṣaṇaṃ nirmūlameva ||

pīṭhamanuneti pūrvaṃ vyākhyātam | samupaviṣṭa ityatra samityupasargeṇa ā 
samāpti ekāsanena stheyam iti jñāpayati | ata eva yenāsanena 
samāptiparyantamavasthāne svasya śramo na syāt tena padmādyanyatamenāsanena 
stheyamityarthaḥ ||

nibandhe bālātṛtīyabījena dvādaśavāramabhimantraṇaṃ mūlamantreṇa 
prokṣaṇam uktam | tat sūtrānabhimataṃ jñeyam || 6 ||

etatsaparyopayoginīṃ tritārīmāha-

tritārīmuccārya raktadvādaśaśaktiyuktāya dīpanāthāya nama iti bhūmau 
muñcet puṣpāñjalim || 7 ||

tritārīṃ vakṣyamāṇāmuktvā [atraiva adhastane-sūtre bhāṣye ca-ityarthaḥ |] 
nama ityantamuccaret | ayaṃ dīpanāthārhaṇamanuḥ | anena bhūmau 
puṣpāñjaliṃ dadyāt | puṣpāṇāmañjaligṛhītānāṃ pracayaḥ puṣpāñjaliḥ | 
taduktam agastyasaṃhitāyāṃ somavāravidhiprakaraṇe-

saṃśliṣṭahastadvayamadhyavartī prasūnapuñjaḥ kusumāñjaliḥ syāt || iti || 7 ||

sarvamantreṣu tritārīsaṃyogavidhiḥ 

sarvamantropayuktāṃ kāṃcit paribhāṣāmāha-

sarveṣāṃ mantrāṇāmādau tritārīsaṃyogaḥ | tritārī vāṅmāyākamalāḥ || 8 
||

atra sarvaśabdasya prakaraṇena saṅkocaṃ kṛtvā 
śrīvidyopāstyaṅgabhūtānāmetaduttarapaṭhitānām ityarthaḥ | 
tenaitatpūrvamantreṣu tritārīyogo nāstīti siddham | ata eva setubandhe-
yāgamandirapraveśottaraṃ kalpasūtre tritārīyogapāṭhāt tataḥ prāk mantreṣu na 
tadyoga iti mantavyam iti sthitam | ādāvityanena antavyāvṛttiḥ | yoga iti vaktavye 
samityupargeṇa tritāryuccāraḥ spaṣṭamabhūt | tato 
yatkiṃcidaṅgamantrapāṭhasamaye madhye yadi karaṇāpāṭavādidoṣeṇa eko 
varṇo luptaḥ tadā punarmantraḥ paṭhanīyaḥ tatrāpi punaḥ tritārīyogaḥ sūcitaḥ | 
yadvā-tritārīpāṭhānantaraṃ kenacit pratibandhena mantrapāṭhe yadi 
kṣaṇavilambaḥ tādṛśasthale punastritāryuccāro'vilambenoccāraṇarūpo 

p. 92)

jñāpyate | yadyapyanenaiva dīpanāthārhaṇamantre tritārīyogaprāptau tatra 
tritārīmuccāryeti vyartham | tathā'pi tatra tritārīmuktveti tanmantraghaṭakatvaṃ 
tritāryā jñāpayati | eyaṃ paribhāṣā ca tritārīyogena mantrāṇāṃ 
saṃskāraṃ vadati iti na vaiyyarthyam ||

yattu nibandhe dīpanāthārhaṇottaraṃ gaṇapatinamanaṃ gurunamanam 
aṅguṣṭhādikaniṣṭhāntavyāpakamiti prāṇapratiṣṭhā ca tatsarvaṃ 
tantrāntarastham anyaprakaraṇasthaṃ śrīvidyāprayoge na spraṣṭavyam ||

atra tritārī ketyākāṅkṣāyāmāha-tritārīti | vāk sabinduḥ dvādaśasvaraḥ | 
māyā turīyoṣmasahitadvitīyāntasthottarasabindusturyasvaraḥ | kamalā 
prathamoṣmasahitadvitīyāntasthopari sabindusturyasvaraḥ | ete tritārīpadavācyā 
bhavantīti śeṣaḥ [aiṃ hrīṃ śrīṃ-iti-saṃbhūya-tritārīmantraḥ |] | 
vāgādīnāmuktārthatve pramāṇamagre vakṣyāmaḥ || 8 ||

śrīcakrasvarūpaṃ tatsādhanadravyaṃ ca 

itaḥ paraṃ śrīcakrasvarūpaṃ tatsādhanadravyaṃ cāha-

purataḥ pañcaśakticatuḥśrīkaṇṭhamelanarūpaṃ bhūsadanatrayavalitrayabhūpa-
patradikpatrabhuvanāradruhiṇāravidhikoṇadikkoṇatrikoṇabinducakramayaṃ 
mahācakrarājaṃ sindūrakuṅkumalikhitaṃ [militaṃ-a |] 
cāmīkarakaladhautapañcaloharatnasphaṭikādyutkīrṇaṃ vā niveśya || 9 ||

purata ityasya niveśyetyanena sākamanvayaḥ | pañcaśaktayaḥ śakticakrāṇi 
catuḥśrīkaṇṭhāḥ catvāri śivacakrāṇi eṣāṃ melanarūpam abhinnasvarūpam | 
etena viśeṣaṇena etādṛśasvarūpajñānaṃ pūjā'dāvāvaśyakamiti sūcitam | 
etanmelanaprakāraḥ pūjākāle īdṛśajñānasyāvaśyakatā coktā 
brahmāṇḍapurāṇe-

trikoṇe baindavaṃ śliṣṭamaṣṭāre'ṣṭadalāmbujam |
daśārayoḥ ṣoḍaśāraṃ bhūgṛhaṃ bhuvanāsrake ||

śaivānāmapi śāktānāṃ cakrāṇāṃ ca parasparam |
avinābhāvasambandhaṃ yo jānāti sa cakravit ||

evaṃ vibhāgamajñātvā śrīcakraṃ yo'rcayet sakṛt |
na tatphalamavāpnoti lalitā'mbā na tuṣyati || iti ||

p. 93)

ayamevārthastantreṣu bahu pratipāditaḥ | granthavistarabhayānneha 
tatratyavacanāni likhitāni | bhūsadanatrayaṃ paritaḥ caturasrarekhātrayam | 
caturasrabhūsadanaśaktigrāhakaṃ pramāṇaṃ tu-

tadbāhye vṛttamālikhya tadbāhye caturasrakam |

iti tantrāntaravacanam | asmatparameṣṭhigurubhirapi setubandhe likhitaṃ bhūgṛhaṃ 
nāma caturasram iti ||

śrīcakre dvārarahitacaturasratrayalekhanasamarthanam 

nanu tantrāntaravacane caturasrakamityekavacanena ekameva caturasramiti pratīyate 
iha caturasratrayamityuktam dvayorvirodhe kathametaditi cet-na 
tattattantrānusāripuruṣabhedena vyavasthitavikalpasambhavāt | evaṃ 
sūtrānuyāyināṃ śrīcakre bhūpuraṃ dvārarahitam anuktatvāt ||

nanu tripurā'rṇave vṛttaṃ tato bhūpurāṇāṃ tritayaṃ dvāraśobhitam 
ityuktatvāt evaṃ nityātantre evaṃ tribhūsadanakaṃ caturdvāravibhūṣitam iti 
vāmakeśavaratantre pariveṣaṃ bhūpuraṃ ca caturdvāropaśobhitam iti 
evamāditantrānusāreṇa atrāpi dvāratātparyaṃ kalpyatām-iti cet-na vṛttatrayaṃ 
ca dharaṇīsadanatrayaṃ ca śrīcakrametaduditaṃ paradevatāyāḥ iti yāmalavacane 
evamanyeṣvapi tantreṣu dvārarahitabhūpuraśravaṇena vikalpasya durnivāratvāt | 
na caivaṃ dvārarahitabhūpurasya kenāpi 
nibandhakāreṇālikhitatvādidamaśraddheyam iti vācyam saundaryalaharyāṃ 
trayaścatvāriṃśat iti śloke dvārānukteḥ 
bhagavatpādānāmasmaduktapakṣasyaivābhimatatvāt | evaṃ 
prapañcasāraṅgrahe śrīvidyāraṇyasvāmibhirapi dvārarahitamapi śrīcakre 
caturasramupalabhyate kvaciditi granthena asmadanumatameva likhitam | 
evamaticirantanaśiṅgabhūpālapaddhatāvapi tathā'sti | idamanveṣituṃ pravṛttau 
anyānyapi nibandhāntaravākyāni miliṣyanti | etāvadalamiti na viśeṣayatnaḥ 
kṛtaḥ ||

itthaṃ cāhaṃ sūtrānuyāyīti viśeṣābhimānavatā nityotsavanibandhakāreṇa 
śrīcakralekhanaprakārakathanāvasare caturdvāraṃ bhūpuraṃ samudbhāvayet iti 
yato likhitam ata eva tena sūtraṃ na pariśodhitam | gatānugatikalokānusāreṇa 
likhitamiti sphuṭam ||

kiṃ ca nibandhakāraḥ śrībhāskararāyāṇāṃ śiṣya iti svanibandha eva lilekha | 
śrībhāskararāyoktasetubandhe pratidiśaṃ rekhātrayayuktaṃ 
dvārasāmānyābhāvavat iti tṛtīyaḥ pakṣaḥ | kalpasūtramasmin pakṣe 
anukūlamiti likhitam ||

kiṃ ca sarveṣāṃ mantrāṇām ādau tritārīsaṃyoga iti kalpasūtrasya 
yāgamandirapraveśottarameva pāṭhāt tataḥ prāktanamantreṣu na tadyoga iti 
setubandhe sthite ayaṃ muṣaḥkārī raśmimālāmantreṣu 

p. 94)

sandhyāvandane ca tritārīṃ yojayāmāsa | tathā dvāracatuṣṭayaṃ ca 
yojayāmāsa | evaṃ sati gurumatamapi yaḥ ajānan svecchayā likhati sa kīdṛśa 
upāsakaḥ kīdṛśo vā guruśiṣyabhāvaḥ taṃ na vidmaḥ ||

yadi ca setubandhe prathamaṃ dvārasāmānyābhāvaṃ vilikhya agre tattvaṃ 
vicārya agre tatraiva dvārasāmānyābhāvapakṣastu 
dvārapratiṣedhaparyudāsānyataramantareṇa yāmalakalpasūtrādau 
dvārānuktimātreṇa kalpyamānaḥ sāhasamātram iti likhitatvāt kathaṃ 
gurumatānabhijñatetyucyate-tadā āstāṃ dvāraviṣaye gurumatābhijñatā | 
raśmimālāmantreṣu sandhyāmantreṣu ca tritārīyojane gurumatānabhijñatā 
vajralepāyitā | etenāyaṃ nibandhaḥ sarvatantrasvatantraśrībhāskararāyaiḥ 
pariśodhita ityaitihyamapi nirmūlamiti sphuṭaṃ yuktamutpaśyāmaḥ || 

valitrayaṃ vṛttatrayam [etadviṣaye-ddi. pa.-śi.-11-vi.-dṛśyaḥ |] | atra bahavaḥ-
ṣoḍaśadalasya aṣṭadalasya dve karṇikāvṛtte tayorbahiḥ ekaṃ vṛttaṃ evaṃ ca 
vṛttatrayaṃ na padmadvayasya bahirvṛttatrayam | yattu balitrayam iti kalpasūtram 
vṛttatrayaṃ ca dharaṇīsadanatrayaṃ ca iti yāmalavacanaṃ jyeṣṭārūpaṃ 
catuṣkoṇaṃ vāmārūpaṃ bhramitrayam itti yoginītantravacanam sarvam 
uktavṛttatrayaparamevetyāhuḥ ||

śrīcakre pañcavṛttalekhanasamarthanam 

atra asmatparameṣthiguravaḥ setubandhe vakṣyamāṇaprakārāntareṇa 
śrīcakralekhanāvasare-

bahiḥ padmadvayaṃ kuryādaṣṭaṣoḍaśakacchadam |
guṇavṛttaṃ tataḥ kuryāccaturasraṃ ca tadbahiḥ ||

iti vāmakeśvaratantravacane tataḥ padasvārasyena padmadvayādbahireva trīṇi 
vṛttāni tadanusāreṇa pariśeṣaṃ bhūpūraṃ ceti | atraikavacanamavivakṣitam | 
evaṃ ca pañca vṛttāni | ata eva jñānārṇave [jñānārṇave-10 paṭale-72-73-
ślokāvimau staḥ |]-

etadbāhye maheśāni vṛttaṃ pūrṇendusaṃnibham |
tadyutaṃ kuru mīnākṣi vasupatraṃ manoharam |
tathā ṣoḍaśapatraṃ tu vilikhet suravandite |
tadbāhye devadeveśi trivṛttaṃ mātṛkā'nvitam |

ityatra tadbāhya iti padena karṇikāvṛttādatiriktaṃ vṛttatrayaṃ suspaṣṭamuktam ||

tadvyākhyātāro'nye āgraheṇa tadbāhye iti ślokārdhaṃ svapustapakori 
likhitatvāt akṣaralekhanaprakārasya kasmiṃścittantre alekhanāt 
akasmānmātṛkā'nvitatvokterasaṅgatatvāt bahuṣu 

p. 95)

pustakeṣu anupalabdheśca prakṣiptamiti paramatamanūdya tadupari yadi prakṣiptaṃ 
tarhi tṛtīyavṛttavidhāyakavacanābhāvāt vṛttadvayāpatteriti dūṣitatvāt 
saṃhitāyāṃ tantrāntare ca bahirvṛttatrayaṃ suspaṣṭamastīti likhitatvāt 
pañcavṛttānīti (setubandhe) vyavasthāpayāmāsuḥ |

atra maheśvarānandanāthāḥ-tadbāhye vṛttamālikhya tadbāhye caturasrakam iti 
paramānandatantre vṛttamityekavacanāt vṛttaṃ tato bhūpurāṇām iti vṛttaṃ 
tribhūsadanakam iti pariveṣaṃ bhūpuraṃ ca iti suvṛttaṃ parameśāni iti 
tripurārṇava-nityātantra-vāmakeśvaratantra-dakṣiṇāmūrtisaṃhitāsu 
ekavacanabalāt karṇikāvṛttadvayenaiva saha trivṛttamiti vyavasthāpya tataḥ 
setubandhamatamanūdya taddūṣaṇe setubandha eva 
vāmakeśvaratantrajñānārṇavavacanayoḥ bahuṣu pustakeṣvanupalambhāditi 
śrībhāskararāyalekhaṃ hetutvenopanyasya setubandhaṃ dūṣayāmāsuḥ ||

ayaṃ prakāro'siddhaḥ | setubandhe taiḥ siddhāntāvasare bahuṣu 
pustakeṣvanupalambhāditi noktaḥ | kiṃ tu vādimatānuvādavelāyām upanyastaḥ | 
sa ca vādino lekhaḥ | tena hetunā śrībhāskararāyamataṃ kathaṃ nirastam | 
rāyaiśca pratyuta matpustakamadhyalekhāt pramāṇameveti pratibandyuttaraṃ 
vṛttadvayāpattiśceti dūṣaṇadvayaṃ dattam | kiṃ ca vāmakeśvaratantravacane na 
ko'pi vivādaṃ lilekha | evaṃ sati tatrāpi nirmūla īdṛśo doṣāropaḥ kevalaṃ 
svapāṇḍityaprakaṭanārtha eva | ato vāmakeśvaratantravacanasya 
vṛttatrayaprāpakasya jñānārṇavasya ca gatimakalpayitvā na 
vṛttapañcakanivṛttirbhaviṣyati ||

yadi ca niruktaikavacanabalādeva yāmalakavacanena aṣṭadalaṣoḍaśadaleti 
pṛthaguktvā taduttaraṃ śrūyamāṇavṛttatrayetipade trayamityasya 
samudāyānuvādakatvarūpavaiyyarthyamaṅgīkṛtya evaṃ vāmārūpaṃ 
bhramitrayamityatra aṣṭadalaṣoḍaśadalāvayavasya bhramereva 
vāmārūpatvakalpanāyāsaḥ kriyate | tarhi tadbāhye 
caturasrakamityatrāpyekavacanaṃ tulyam | tadupodbalakāni vacanāni-
vāmakeśvaratantre pariveṣaṃ bhūpuraṃ ca iti tatraiva ṣaṣṭhapaṭale 
vāmārūpaṃ catuṣkoṇam iti pūrvatantre ca guṇavṛttaṃ tataḥ kuryāccaturasraṃ 
ca tadbahiḥ iti dakṣiṇāmūrtisaṃhitāyām-suvṛttaṃ parameśāni tato 
bhubimbamālikhet ityādivacanāni | evaṃ vacaneṣu satsu ekavacane nirbharavataḥ 
atra paramānandatantraṭippaṇyām caturasraṃ caturasratrayam [taccaturasratrayaṃ 
tribhiraṅgulaiḥ ityadhikaḥ-ba 2.] iti maheśvarānandanāthalekhaḥ 
sandarbhaviruddha eva ||

yadi ca bhūpurāṇāṃ tritayaṃ dvāraśobhitam ityāditantravacanairekavacanaṃ 
tatratyamavivakṣitamityucyate tarhi vṛttamityatraikavacanena ko'parādho'nuṣṭhitaḥ 
| evaṃ bahuṣvekavacanaṃ loke vede ca prayujyamānaṃ bahūpalabhyate | loke gṛhe 
dhānyamasti saṃpanno vrīhi iti 

p. 96)

hetustadudbhave iti īdṛśasthale jātyekavacanamiti vadanti śiṣṭāḥ | brāhmaṇo 
mama daivatam iti purāṇaprayogaḥ | śrutau bahupatnīkadarśapūrṇamāse patnīṃ 
saṃnahya gṛhaṃ saṃmārṣṭi ityevamādīni bahūni santi | tadvadupapateḥ 
naikavacanasya sarvathā gatyabhāvaḥ ||

na ca-uktasthaleṣu bādhakavaśādekavacanasya lakṣaṇāṃ bahutve kalpayitvā 
ekavacanaṃ nirvāhyam | prakṛte'pi tadvatpakṣāśrayaṇe 
vāmakeśvaratantrasthasya guṇavṛttaṃ tataḥ ityatra tata ityasyaiva lakṣaṇāyāṃ 
tātparyagrāhakatā vācyā | sā ca na sambhavati | 
tataḥpadaghaṭitavāmakeśvaratantrasya tadbāhye vṛttam iti 
paramānandatantrasyaikavacanaghaṭitasya tulyabalatvena ekavacanānusāreṇa tata 
ityasyaiva lakṣaṇāpakṣaṃ avivakṣāpakṣaṃ vā'śrityaikavacanavivakṣaiva kimiti 
na kriyate | dvayormadhye anyatarasya anyathānayane kārye tata iti 
padasvārasyenaikavacanamavivakṣitaṃ na viparītamityatra niyāmakābhāvāt-iti 
vācyam | pratyayārthaprātipadikārthayormadhye ekānusāreṇa 
aparasyānyathānayane prāpte prātipadikasya prabalatvena tadanusāreṇa 
vacanapratyayārthasyaivānyathā nayanam | taduktaṃ śrīvidyāraṇyasvāmibhiḥ-

triranūktir-ṛco dharmaḥ sthānadharmo'tha nāgrimaḥ |
strīliṅgatvānna tatprātipadikaprabalatvataḥ ||

iti prātipadikaprābalyasādhakayuktayo'pi bahvyaḥ santi | 
granthavistarabhayādabhiyuktoktikḷptaiva likhitā | tasmāt prātipadikībhūta tata 
ityanusāreṇa ekavacanameva anyathā neyam | tathā ca sudhiyā āgrahaṃ parityajya 
kevalatattvabubhutsunā vicāryamāṇe sarvatantreṣvapi vacanamātrasyāvivakṣāṃ 
kṛtvā śrīyantre pañcavṛttānyabhimatānīti sidhyediti | prakṛtamanusarāmaḥ ||

bhūpapatramiti-bhūpā iti ṣoḍaśasaṅkhyāyāḥ saṅketaḥ | ṣoḍaśa patrāṇi 
yasmiṃstat | dikpatraṃ-digityaṣṭasaṅkhyāyāḥ saṃjñā tāvanti patrāṇi 
yasmiṃstat | bhuvanāraṃ-bhuvanamiti caturdaśasaṅkhyāyāḥ saṃjñā 
tāvadaraṃ tāvatkoṇam | druhiṇāraṃ druhiṇa iti daśasaṅkhyāyāḥ saṃjñā 
śrībhāgavatādau sṛṣṭinimittānāṃ daśaprajāpatīnāṃ kardamādīnāṃ 
prasiddhatvāt | tāvadaraṃ daśakoṇamityarthaḥ | etena vidhikoṇamiti ca 
vyākhyātaprāyam | dikpadaṃ ca vyākhyātam | trikoṇabindu spaṣṭau | 
mayamityanena samaṣṭyekarūpatvaṃ jñāpitam | mahācakrarājaṃ-cakrarājamiti 
śrīcakrasya nāma tatra mahattvaṃ pūjyatvaṃ maha pūjāyāṃ ityanuśāsanāt | 
tathā ca brahmaviṣṇurudrādisakalapūjyamityarthaḥ | sindūraṃ prasiddhaṃ 
kuṅkumaṃ kāśmīram etadanyatareṇa | yadvā-dvandvasamāsena sāhityapratīteḥ 
sindūrasahitakuṅkumena likhitam ||

p. 97)

navyāstu-yadā bhūmau prastāro likhyate tadā kuṅkumarajobhiḥ pūraṇaṃ 
meruprastāraścet sindūrarajobhiriti vyavasthāmāhuḥ | tatra mūlaṃ cintyam ||

lekhanaprakārasya asmatparameṣṭigurukṛtasetubandhe savistaramuktatvānnātra 
likhyate | etāvatparyantaṃ pūjāsamaye nityayantranirmāṇaprakāraḥ uktaḥ | 

idānīṃ siddhayantre'pi pūjāprakāraṃ yantranirmāṇadravyaniyamaṃ cāha-
cāmīkaretyādinā | cāmīkaraṃ suvarṇaṃ kaladhautaṃ raupyam | yadyapi 
kaladhautapadaṃ suvarṇavācakamapi bhavati | kaladhautaṃ raupyahemnoḥ iti 
kośāt tathā'pi suvarṇasya pūrvamuktatvādraupyameva | pañcalohaṃ 
tallakṣaṇamuktaṃ tantrasāre bṛhatpāñcarātre ca-

raupyaṃ nṛpaguṇaṃ proktaṃ diksaṅkhyo hemabhāgakaḥ | 
tāmraṃ dvādaśabhāgaḥ syāllohabhāgasya pañcakam |
ārakūṭasya ṣaḍbhāgāḥ pañcalohaṃ prakīrtitam || iti ||

ārakūṭaṃ pittalaṃ śeṣaṃ spaṣṭam | ratnāni marakatādīni teṣu utkīrṇaṃ 
pūrvoktaśāstreṇa nirmitam | ādipadāt tāmradṛṣadādikaṃ 
paramānandatantroktaṃ grāhyam | idamapi pūrvoktacakrarāje viśeṣaṇam | 
īdṛśaṃ cakrarājaṃ purato niveśya ||

atra pūjanaṃ mukhyam | etasyālābhe tantrāntaroktapratinidhisvīkāro'pi kāryaḥ | 
taduktaṃ paramānandatantre-

ādarśe caikaguṇitaṃ pustake dviguṇaṃ phalam |
pratimāyāṃ caturdhāṃ syāt śāligrāmeṣu ṣoḍaśa ||

śivanābhe śataguṇaṃ pūjanāt puruṣārthakam |
sahasradhā nārmade tu phalaṃ devi pracikṣate ||

kuṇḍalyāṃ lakṣaguṇitaṃ devatādarśanaṃ bhavet |
cakrarāje tu yā pūjā sā'nantaphaladāyinī || iti ||

imāni tu paṭhitakrame uttarottarābhāve pūrvaṃ pūrvaṃ grāhyam | 
etādṛśārthatātparyagrāhakameva phalatāratamyaśravaṇam | kuṇḍalī 
śeṣakuṇḍalī | pustakaṃ kulaśāstrapustakam | pratimā dhyānaślokasthākārā | 
śeṣaṃ spaṣṭam ||

yantrapratiṣṭhā sūtre anuktatvāt na kartavyā sūtrānuyāyibhiḥ | evaṃ 
prāṇapratiṣṭhā'pi na kāryā sūtrānuyāyibhiḥ anuktatvāt 
anākāṅakṣitatvācca | vastuvastu-yantrapratiṣṭhāyāḥ 

p. 98)

pūjāprayogabahirbhūtatvāt adhikābhyudayecchāyāṃ 
tantrāntaroktamanuṣṭheyaṃ [etadyantrapratiṣṭhākaraṇākaraṇaviṣaye-ddi0 
pariśiṣṭa 11-vi. dṛśyaḥ |] yathā sahasranāmapāṭhādi | tatkaraṇe abhyudayaḥ 
akaraṇe'pi na hāniḥ sūtrānuyāyinām | yathā vā yajñopavītasaṃskāraḥ 
baudhāyanasūtre paṭhitaḥ | anyasūtrāpaṭhitatvāt bahvalpaṃ vā iti sūtrāt 
ananuṣṭhāne na hāniriti draviḍāndhradeśīyāḥ yajñopavītasya na saṃskāraṃ 
kurvanti | mahārāṣṭradeśīyaistu karaṇe abhyudayaṃ matvā saṃskāraḥ kriyate | 
tadvat cakrarāje saṃskāre abhyudayaḥ akaraṇe sūtrānuyāyināṃ na hāniḥ || 9 ||

mandirārcanam 

tato mandirādyarcanakramamāha-

tatra mahācakre amṛtāmbhonidhaye ratnadvīpāya nānāvṛkṣamahodyānāya 
kalpavṛkṣavāṭikāyai [kalpavāṭikā-ba 2. śrī.] santānavāṭikāyai 
haricandanavāṭikāyai mandāravāṭikāyai pārijātavāṭikāyai 
kadambavāṭikāyai puṣyarāgaratnaprākārāya padmarāgaratnaprākārāya 
gomedharatnaprākārāya [gomeda-ba 2.] vajraratnaprākārāya 
vaiḍūryaratnaprākārāya indranīlaratnaprākārāya muktāratnaprākārāya 
marakataratnaprākārāya vidrumaratnaprākārāya māṇikyamaṇḍapāya 
sahasrastambhamaṇḍapāya amṛtavāpikāyai ānandavāpikāyai 
vimarśavāpikāyai bālātapodgārāya candrikodgārāya 
mahāśṛṅgāraparighāyai mahāpadmāṭavyai cintāmaṇigṛharājāya 
pūrvāmnāyamayapūrvadvārāya dakṣiṇāmnāyamayadakṣiṇadvārāya 
paścimāmnāyamayapaścimadvārāyottarāmnāyamayottaradvārāya 
ratnapradīpavalayāya maṇimayamahāsiṃhāsanāya 
brahmamayaikamañcapādāya viṣṇumayaikamañcapādāya 
rudramayaikamañcapādāya īśvaramayaikamañcapādāya 
sadāśivamayaikamañcaphalakāya haṃsatūlatalpāya 
haṃsatūlamahopadhānāya kausumbhāstaraṇāya mahāvitānakāya 
mahājavanikāyai [etatpustake prāktano yavanikāyai-iti pāṭho lekhāśuddho 
bhātīti-yamanikā-javanikā-vātra śabda ucitaścātra pra. amarakośe-2 kāṇḍe 
manuṣyavarge-yathā - pratisīrā javanikā syāttiraskāriṇī ca sā-120-ślokaḥ atra-
ṭī-pratisīrā-javanikā-tiraskāriṇītiraskāriṇītyalam |] namaḥ-iti 
catuścatvāriṃśanmantraistattadakhilaṃ [catuścatvārimśanmandiramantaiḥ-ba 2.] 
bhāvayitvā arcayitvā || 10 ||

p. 99)

tatra yāgamandire sthite iti śeṣaḥ | idaṃ ca mahācakre-ityasya viśeṣaṇam | yadvā-
tatreti likhitārthakaṃ pūrvasūtre purato niveśyetyanvitam | mahācakre-iti 
bhāvayitvā arcayitvā iti agrimeṇānvitam | amṛtāmbhonidhiḥ amṛtasamudraḥ | 
ratnamayo dvīpaḥ vāsayogyadeśaḥ unnatabhūmiriti yāvat | udyānaṃ 
krīḍāvanaṃ pumānākrīḍa udyānam ityamaraḥ | vṛkṣavāṭikā upavanaṃ 
gehopavane vṛkṣavāṭikā ityamaraḥ | kalpādīni suratarunāmāni | 

pañcaite devataravo mandāraḥ pārijātakaḥ |
santānaḥ kalpavṛkṣaśca puṃsi vā haricandanam || ityamaraḥ ||

kadambaḥ prasiddhaḥ | puṣparāgādividrumāntāḥ navaratnabhedāḥ teṣāṃ 
prākāraḥ paritaḥ gṛhādbahirnirmitā bhittiḥ | māṇikyaṃ padmarāgaṃ tasya 
maṇḍapaḥ | vāpī dīrghikā | udgāro lohitavarṇaṃ samāhlādakaṃ vastu | 
taduktaṃ tryakṣarakośe-udgāro lohite varṇe samāhlādanavastuni iti | ratnamayāḥ 
pradīpāḥ teṣāṃ valayam | haṃsatūlaṃ pakṣiviśeṣasya 
pakṣādhaḥsthitaromamālā'kṛtisūkṣmapakṣāḥ mahārāṣṭrabhāṣāyāṃ 
parā-iti prasiddham | mahopadhānaṃ mahārāṣṭrabhāṣāyāṃ loḍu-iti 
prasiddham | kausumbhāstaraṇaṃ raktavarṇaṃ talpopari tanmālinyābhāvārthaṃ 
sūkṣmaṃ vastraṃ pātyate | tat mahārāṣṭrabhāṣāyāṃ palaṃgapūsa-iti 
prasiddham | vitānam ūrdhvadeśānmṛttikādipātapratibandhakamupari 
badhyamānaṃ vastram | yavanikā [anugate 98 patrasthe-4-5-cihnayoḥ ṭīppaṇyau 
dṛśye |] mahārāṣṭrabhāṣāyāṃ ṣaḍudā-iti prasiddham | śeṣaṃ prasiddham | 
evaṃ caturthyantaiḥ sarvaiḥ namaḥ-iti yogaḥ yā te agne'yāśayā itivat | etaiḥ 
catuścatvāriṃśanmantraiḥ mantravācyānarthān ādau śrīcakre paribhāvya 
teṣāṃ pūjanaṃ kuryāt | ekasya dhyānaṃ tato'rcanaṃ tato'parasya dhyānaṃ 
tataḥ tāsyarcanamiti kramaḥ tattaditi padasvārasyāt labdhaḥ | anyathā nyāyataḥ 
padārthānusamayena dhyānaṃ pūjanaṃ ca prāptaṃ tattaditi vīpsayā tadbādho 
jñeyaḥ || 10 || 

dīpadānaṃ cakrābhyarcanaṃ ca 

gandhapuṣpādisthāpanasthānādikamāha-

gandhapuṣpākṣatādīṃśca dakṣiṇabhāge dīpānabhito [atra dīpaviṣaye-ddi. 
pariśiṣṭe 13/29 vi. dṛśyaḥ ||] dattvā mūlena cakramabhyarcya mūlatrikhaṇḍaiḥ 
prathamatryasre || 11 ||

akṣatādītyatra ādipadena prathamadvitīyādigrahaṇam | etasya 
dattvetyanenānvayaḥ | tatra dānaṃ na yatkiṃciddevatoddeśena tyāgaḥ | kiṃ tu 
yajñāyudhāni sambharati itivat pūjāsāmagryāḥ ekatra saṃpādanam | etasya 
phalaṃ tattadarpaṇavelāyāṃ tasya tasya śīghralābhaḥ | dīpānāmabhitaḥ 

p. 100)

pārśvadvaye dānaṃ sthāpanamadṛṣṭārtham | dattvetyasya cakāreṇa 
āvṛttirjñāpitā pratyuddeśyaṃ vākyaparisamāptyarthamāvṛtterāvaśyakatvāt | 
ato na dadāterarthabhedo doṣajanakaḥ | na ca dādhātorayamarthaḥ kena 
pramāṇeneti vācyam rajakasya vastraṃ dadāti saṃvāhakasya caraṇau dadāti 
śatrave bhayaṃ dadāti ityādau yogyatayā arthakalpanāvat atrāpi 
yogyārthakalpanāt | abhitaḥ ityanena ekasmin pārśve yāvanto dīpāḥ tāvanta eva 
aparapārśve-iti jñāpyate | asya phalaṃ andhakāranivṛttiḥ | etena pūjāgṛhe 
andhakārasāmānyābhāvaḥ kārya ityarthaḥ | ekasmin pārśve 
adhikadīpasthāpane tatpṛṣṭhataḥ tacchāyārūpāndhakāraḥ patiṣyati | 
abhitastulyaprajvālane na kutrāpyandhakāra ityarthaḥ | pārśvadvayaniyamo 
dṛṣṭārthaḥ | cakraṃ navacakrātmakaṃ samaṣṭicakraṃ mūlena pañcadaśyā 
abhyarcya | atra puṣpākṣatakṣepaṇamevābhyarcanam | trikhaṇḍaiḥ 
vāgbhavakāmarājaśaktibhiḥ prathamaṃ cakranirmāṇasamaye prathamasya 
cakrasya trīṇi yānyasrāṇi tāni dvigutvādekavadbhāvaḥ | na bahuvrīhiḥ | tatpakṣe 
trikoṇātmakaikacakre ekadeśe pūjane mantratrayasyānākāṅkṣitatvāt bhago 
vāṃ vibhajatu itivadvikalpāpatteḥ | na ca caturbhirabhrimādatte itivat 
samuccayo'stviti vācyam tathā'pi bahuvrīhipakṣe anyapadārthe 
lakṣaṇākalpanaṃ doṣaḥ | dvigupakṣe tu koṇatraye kūṭatrayaṃ yuktam | abhyarcya 
ityasya pūrvasmādanuvṛttiḥ | kramasyānuktatvāt svāgrādiprādakṣiṇyena || 11 ||

ātmaśuddhihetu śoṣaṇādi 

tataḥ śoṣaṇādīnātmaśuddhihetūnāha-

vāyvagnisalilavarṇayukprāṇāyāmaiḥ śoṣaṇaṃ saṃdahanamāplāvanaṃ ca 
vidhāya || 12 ||

vāyuvarṇaḥ yaṃ-agnivarṇaḥ raṃ-salilavarṇaḥ vaṃ-vāyau śoṣakatāśaktiḥ 
lokaprasiddhā atastadvarṇe'pi sā'sti | ataḥ tena śoṣaṇaṃ jalāṃśanāśanaṃ 
evameva agnivarṇena saṃdahanaṃ bhasmīkaraṇaṃ tathaiva tadbhasmanaḥ 
udakavarṇena piṇḍīkaraṇam āplāvanaṃ vidhāya kṛtvā | cakārāt 
tantrāntaroktaṃ śyāmāprakaraṇasthaṃ vā laṃ-iti pārthivabījena 
kāṭhinyasaṃpādanaṃ śāmbhavaśarīrotpattiśca grāhyā | yadvā-
samīpavṛttitvāt śyāmāprakaraṇasthameva grāhyam [agre-6 khaṇḍe 
śyāmākrame-9 sūtre mūle bhāṣye ca dṛśyam |] | śoṣaṇādikriyāṇāṃ 
karmākāṅkṣāyāṃ dṛśyamānaṃ sthūlaśarīraṃ liṅgaśarīraṃ vā karma 
tantrāntaraprasiddhaṃ grāhyam | varṇayukprāṇāyāmairityuktyā yamityuccaran 
prāṇānabhito niyacchet tataḥ śarīraśoṣaṇaṃ bhāvayet yaśca 
śyāmāprakaraṇe vāyuṃ [agre-6 khaṇḍe śyāmākrame-9 sūtre mūle bhāṣye 
ca dṛśyam |] piṅgalayā ākṛśya ityabhyāsaḥ kṛtaḥ tasyārthasya 
prāṇāyāmairityanena jñāpitatvāt | evamevāgre'pi ||

p. 101)

yattu nibandhe saṅkocaśarīraṃ śoṣayedityādivārāhīprakaraṇasthā mantrā 
likhitāḥ te nirmūlāḥ heyāḥ asūtritatvāt | paraṃ tu śyāmāprakaraṇasthaṃ 
kaṭhinatvasampādanaṃ śāmbhavaśarīrotpattiḥ 
cakārasūcitārthāpattipramāṇasiddhā [sūtrakāra-śrī.] anuṣṭheyā || 12 ||

prāṇāyāmaḥ 

tataḥ prāṇāyāmavidhimāha-

triḥ prāṇānāyamya || 13 ||

prāṇāyāmastu śyāmāprakaraṇe vakṣyamāṇaprakāreṇa [6 khaṇḍa-
śyāmākrame 10 sūtre uktaprakāreṇetyarthaḥ |] jñeyaḥ || 13 ||

vighnakarabhūtotsāraṇam vajrakavacanyāsaśca 

taduttaraṃ vighnakṛdbhūtotsāraṇaṃ kāryamiti tadāha-

apasarpantu te bhūtā ye bhūtā bhuvi saṃsthitāḥ | ye bhūtā vighnakartāraste 
naśyantu śivājñayā | iti 
vāmapādapārṣṇighātakarāsphoṭasamudañcitavakrastālatrayaṃ datvā 
devyahambhāvayutktaḥ svaśarīre vajrakavacanyāsajālaṃ vidadhīta || 14 ||

apasarpantu0-iti mantreṇa pārṣṇyā pādapṛṣṭhabhāgena bhuvo ghātaḥ tāḍanaṃ 
karayoḥ āsphoṭaḥ saṅgharṣaḥ samudañcitaṃ tiryakkṛtaṃ vaktraṃ mukham 
ebhiḥ saheti śeṣaḥ | tālatrayam adhomukhābhyāṃ 
dakṣamadhyamātarjanībhyāṃ vāmakaratale saśabdaṃ trirabhighātaḥ taṃ 
dattvā utpādya | aham upasyadevyabhinna iti bhāvayitvā | svaśarīre ityanena 
devatāśarīravyāvṛttiḥ | vajrakavacam abhedyakavacarūpaṃ nyāsajālaṃ 
nyāsasamūhaṃ vakṣyamāṇaṃ vidadhīta kuryāt || 14 ||

karaśuddhinyāsaḥ 

kiṃ tannyāsajālam ityākāṅkṣāyām ādau karaśuddhinyāsamāha-

binduyukśrīkaṇṭhānantatārtīyaiḥ madhyamāditalaparyantaṃ kṛtakaraśuddhiḥ || 
15 ||

śrīkaṇṭhaḥ śivaḥ akāraḥ yoginītantre pañcadaśyāṃ 
śrīkaṇṭhadaśakamityavarṇagaṇanāt | anantaḥ dīrghākāraḥ tantrasāre āṃ 
hrīṃ kroṃ-iti mantrasya ananto bindusaṃyukto māyābrahmāgnitāravān 
ityuddhārāt | binduyujau ca tau śrīkaṇṭhānantau ceti samāsaḥ | tārtīyaḥ 

p. 102)

bālātṛtīyaḥ sauḥ-iti | evaṃ ca-aṃ āṃ sauḥ-anena mantreṇa 
madhyamāmārabhya talaparyantaṃ kṛtā karaśuddhiḥ yena | 
madhyamā'nāmākaniṣṭhāṅguṣṭhatarjanīkaratalakarapṛṣṭheṣu nyasedityarthaḥ 
| ayaṃ karaśuddhinyāsaḥ || 15 ||

ātmarakṣānyāsaḥ 

ātmarakṣānyāsamāha-

kumārīmuccārya [atra kumārīśabdena-agratanabālāśabdena ca-aiṃ klīṃ sauḥ-
iti tryakṣaro bālāmantro grāhyaḥ |] mahātripurasundarīpadamātmānaṃ 
[mamṛtacaitanyamātmānaṃ-ta.] rakṣa rakṣeti hṛdaye añjaliṃ dattvā || 16 ||

kumārīṃ bālāṃ uccārya padamiti varṇadvayamapahāya rakṣa rakṣetyantaṃ 
paṭhan hṛdaye añjaliṃ dadyāt | ayamātmarakṣānyāsaḥ || 16 ||

caturāsananyāsaḥ 

caturāsananyāsamāha-

māyākāmaśaktīruccārya devyātmāsanāya namaḥ-iti svasyāsanaṃ dattvā || 17 
||

māyā hrīṃ-iti spaṣṭaṃ bahusthale prasiddham | kāmaḥ klīmiti | taduktaṃ 
devībhāgavate-

klībeti muniputrastamājuhāva tadantike |
sudarśanastu tacchrutvā dadhārādyākṣaraṃ sphuṭam || 
anusvārayutaṃ tacca provāca ca punaḥ punaḥ |
bījaṃ vai kāmarājākhyaṃ gṛhītaṃ manasā tadā || iti ||

śaktiḥ sauriti śaktiḥ parā tṛtīyā ca iti kośāt | yadyapi kāmaśaktipadena 
tripurāgāyatrīvat pañcadaśīdvitīyatṛtīyakūṭagrahaṇamapi grahītuṃ śakyate 
tadarthe'pi pramāṇasya darśitatvāt | tathā'pi 

mādanaṃ śaktisaṃyuktaṃ [śakrasaṃ-ba 2.] caturthasvarasaṃyutam |
ūrdhve madhyendubindvāḍhyaṃ kāmarājaṃ samuddhṛtam | 
śāntāntaṃ kādisaṃyuktamaikārāntāntayojitam ||

iti yoginītantre etanmantroddhārādayamevārthaḥ | mādanaṃ kakāraḥ | śaktiḥ 
[śakraḥ-ba 2.] lakāraḥ | caturthasvaraḥ īkāraḥ | śāntāntam sakāraḥ | 
kādirvisargaḥ | aikārāntāntamaukāraḥ | uccāryeti tyaktvā 

p. 103)

namonto manuḥ | itthaṃ ca-hrīṃ klīṃ sauḥ-devyātmāsanāya namaḥ-iti mantreṇa 
svasyāsanaṃ dattveti āsane puṣpākṣatān kṣipet || 17 ||

tataḥ sūtradvayena cakrāsanādimantrānuddharati-

śivayugbālāmuccārya śrīcakrāsanāya namaḥ-śivabhṛguyugbālāmuccārya 
sarvamantrāsanāya-namo bhuvanāmadanau blemuccārya sādhyasiddhāsanāya 
namaḥ-iti cakramantradevatā'sanaṃ tribhirmantraiścakre kṛtvā || 18 ||

śivo hakāraḥ haśśivo gaganaṃ prāṇaḥ [haṃsaḥ-ba 2.] iti kośāt | tena yuktā 
bālā | atra bālāpadena bālāvarṇaḥ tena bālāvarṇamuddiśya havarṇayogo 
vidhīyate | tathā ca bālāvarṇāṅgaṃ hakāra-iti siddham | evaṃ ca 
pratipradhānamaṅgāvṛttiḥ iti nyāyāt varṇatraye'pi hakārayogaḥ | tatrāpi 
svarānte vyañjanasyādṛṣṭatvādādāveva yojyam | itthaṃ-haiṃ hklīṃ hsauḥ-
śrīcakrāsanāya namaḥ-ityeko mantraḥ | śivabhṛguyuk-śivo hakāraḥ bhṛguḥ 
sakāraḥ sakārādhikāre jagadbījaṃ śaktināmā so'haṃ vegavatī bhṛguḥ iti 
nandanakośāt | etadubhayayuktā bālā hsaiṃ hsklī hssauḥ-sarvamantrāsanāya 
namaḥ-iti dvitīyo mantraḥ | bhuvanā bhuvaneśvarī tasya mantro māyābījarūpa 
evoddhṛtaḥ devībhāgavate-śivamāyā'gnibindumān iti vacanāt | śivo hakāraḥ | 
māyā īkāraḥ | agniḥ rephaḥ | binduḥ prasiddhaḥ | eṣāṃ yoge hrīmiti bhavati 
bhuvaneśī ca lajjā ca hṛlekhā kuladevatā iti kośāt | prakṛte'pi sa eva madano 
vyākhyātaḥ | tathā ca-hrīṃ klīṃ bleṃ sādhyasiddhāsanāya namaḥ-iti tṛtīyo 
mantraḥ | evaṃ tribhirmantraiḥ krameṇa cakramantradevatā'sanāni cakre 
kalpayitvā | ayaṃ caturāsananyāsa iti kathyate || 18 ||

bālāṣaḍaṅganyāsaḥ 

tataḥ bālāṣaḍaṅgamāha-

bālādvirāvṛttyā tridvyekadaśatridvisaṅkhyā'ṅgulivinyāsaiḥ kḷptaṣaḍaṅgaḥ 
|| 19 ||

bālādvirāvṛttyā ṣaḍvarṇaiḥ hṛdayādiṣaḍaṅgāni 
[etadbālāmantraṣaḍaṅgādijñānāya ddi. pa. śi. vi. 9-dṛśyaḥ |] krameṇa 
tryādyaṅgulibhiḥ kḷptāni vinyastāni ṣaḍaṅgāni yena īdṛśaḥ | ayamevārthaḥ 
spaṣṭamukto dakṣiṇāmūrtisaṃhitāyām-

p. 104)

kaniṣṭhāṅguṣṭharahitaiḥ tribhistu hṛdi vinyaset |
madhyamānābhikābhyāṃ tu nyasecchirasi mantravit ||
śikhā'ṅguṣṭhena vinyasya daśabhiḥ kavacaṃ nyaset |
hṛduktairnetravinyāsaṃ vinyaset parameśvari ||
tarjanīmadhyamābhyāṃ tu tato'straṃ vinyaset priye || iti ||

iti bālāṣaḍaṅganyāsaḥ || 19 ||

vaśinyādiyoginīnyāsaḥ 

atha vaśinyādiyoginīnyāsamāha-

sabindunacoblūmuccārya [atrasthaśrīvaśinyādyaṣṭadevyabhidhānādau 
grāhyocyārya blaṃ-ityādyabījoddhārajñānāya ddi. pa. śi 13 vi. dṛśyaḥ |] 
vaśinīvāgdevatāyai namaḥ-iti śirasi | sarvatra vargāṇāṃ binduyogaḥ | kavargaṃ 
kalahrīṃ [atra klhrīmiti jñeyam |] ca nigadya kāmeśvarīvāgdevatāyai namaḥ-iti 
lalāṭe | cuṃ gaditvā nvlīṃ modinīvāgdevatāyai namaḥ-iti bhrūmadhye | ṭuṃ 
bhaṇitvā ylūṃ vimalāvāgdevatāyai namaḥ-iti kaṇṭhe | tuṃ ca procya jmrīṃ 
aruṇāvāgdevatāyai namaḥ-iti hṛdi | puṃ ca hslvyūṃ-uccārya 
jayinīvāgdevatāyai namaḥ-iti nābhau | yādicatuṣkaṃ jhmryūṃ-uccārya 
sarveśvarī vāgdevatāyai namaḥ-iti liṅge | śādiṣaṭkaṃ kṣmrīṃ-ākhyāya 
kaulinīvāgdevatāyai namaḥ-iti mūle || 20 ||

sabindūnacobinduyuktāḥ akārādivisargāntāḥ tānuccārya namaḥ-ityanto 
vaśinīmantraḥ | tathā ca-aṃ āṃ - aṃ aḥ blūṃ vaśinīvāgdevatāyai namaḥ iti 
śirasi nyaset | nanvevaṃ sarveṣu binduyogakathanādanyatra netyata āha-sarvatreti | 
spaṣṭo'rthaḥ | kavargamiti | kavargaḥ prasiddhaḥ sabinduḥ | kalahrīṃ ityatra 
kevalavyañjanamātragrahaṇam | samudāyeṣu vidyamānā varṇāḥ tadavayaveṣu 
dṛśyante iti nyāyāt | gṛhītaścāyaṃ pakṣaḥ setubandhe śrībhāskararāyaiḥ 
adhastānnābhasaṃ bījam ityasya vyākhyānāvasare nābhaso haṃsasamudāyaḥ 
tadekadeśaḥ kevalahakāra eva grāhyaḥ iti vyākhyānapaṅktau | atrāpi tathā 
grahaṇe bījaṃ trayoviṃśadakṣaro'sau kāmeśvarīmantraḥ iti setubandhalekha eva 
| kakāralakārayo ravarṇaviśiṣṭayorgrahaṇe dvitārīyuktapādukāṃ pūjayāmīti 
ghaṭite hīṃ śrīṃ klhrīṃ kāmeśvarīvāgdevatākāmeśvarīpādukāṃ 
pūjayāmīti mantre pañcaviṃśativarṇatvāt | tasmāt 
kevalavyañjanamātragrahaṇam | vyañjanānāṃ na varṇatvamiti vistāra uktaḥ 
varivasyārahasye pañcadaśīvarṇaparigaṇane | tathā ca-kaṃ khaṃ gaṃ ghaṃ 
ṅaṃ kalhrīṃ kāmeśvarīvāgdevatāyai

p. 105)

namaḥ-iti lalāṭe nyaset | cuṃ cavargaṃ-cumityasyodittvāt tena 
savarṇagrahaṇaśāstrasya aṇuditsavarṇasya cāpratyayaḥ iti śāstrasya sattvāt 
cavargagrahaṇam | cavargaṃ namaḥ-ityantaṃ mantraṃ paṭhitvā bhrūmadhye 
nyaset | ṭuṃ ṭavargaṃ pūrvavat | śeṣaṃ spaṣṭam | hasalavarṇeṣu 
vyañjanamātragrahaṇaṃ pūrvavat | yaḥ ādiḥ yasya catuṣkasya iti 
tadguṇasaṃvijñānabahubrīhiḥ | itthaṃ ca-yaṃ raṃ laṃ vaṃ-iti | 
śādiṣaṭkamityatrāpi samāsaḥ pūrvavat || 20 ||

mūlamantranyāsaḥ 

evaṃ vaśinyādiyoginīnyāsamuktvā mūlamantranyāsādīn vadati-

mūlavidyāpañcadaśavarṇān mūrghni mūle hṛdi cakṣustritaye 
śrutidvayamukhabhujayugalapṛṣṭhajānuyugalanābhiṣu vinyasya ṣoḍhā cakre 
nyasyānyasya vā || 21 ||

cakṣustritayaṃ bhrūmadhyena saha jñeyam | śrutidvayaṃ śrotradvayam | 
śeṣasthānāni spaṣṭāni | mūlapañcadaśavarṇaiḥ bindusahitaiḥ namo'ntaiḥ 
krameṇoktapañcadaśasthāneṣu nyaset | ṣoḍhā ṣaṭprakāraḥ gaṇeśa-graha-
nakṣatra-yoginī-rāśi-pīṭhabhedena cakranyāsastantrāntaroktaḥ | nyasyānyasya 
ityanena kṛtākṛtatvaṃ sūcitam || 21 || 

pātrāsādanam sāmānyārghyavidhānam 

evaṃ devīrūpatvasiddhaye nyāsānuktvā 
tato'rcanāṅgabhūtapātrasthāpanavidhimupadiśati-

śuddhāmbhasā vāmabhāge trikoṇaṣaṭkoṇavṛttacaturaśramaṇḍalaṃ kṛtvā 
puṣpairabhyarcya sādhāraṃ [ddi0 pa. śi. vi. 12-daśyotra |] śaṅkhaṃ 
pratiṣṭhāpya [saṃsthāpya-śrī.] śuddhajalamāpūrya ādimabinduṃ dattvā 
ṣaḍaṅgenābhyarcya vidyayā abhimantrya tajjalavipruḍbhiḥ ātmānaṃ 
pūjopakaraṇāni ca saṃprokṣya || 22 ||

śuddhāmbhasā ityanena gaṇapatipaddhatau 
kathitagandhākṣatakusumasamarcitatvaṃ [2-khaṇḍe 77 patre 5 sūtre mūle-
kathitamiti jñeyam |] jñāpitam | śuddhena paṭapūtenāmbhasā | svavāmabhāge 
trikoṇādicaturasrāntaṃ niyamavidhirūpatvāt ākāṅkṣāvattvāt 
śyāmākramoktamatsyamudrayā [6 khaṇḍe-18 sūtroktarītyā-ityarthaḥ |] 
nirgamanarītyā kṛtvā puṣpairabhyarcya | sādhāramityasya tatretyādiḥ ||

ādhāraśaṅkhayoḥ pratiṣṭhāpane śuddhajalapūraṇe ca mantrākāṅkṣāyāṃ 
sannihitatvāviśeṣāt  gaṇapatiprakaraṇasthaṃ śyāmāprakaraṇasthaṃ vecchayā 
grāhyam | na tu ādhārādiṣu pāvakādikalāpūjanam 

p. 106)

anuktatvāt asūcitatvāt atrānākāṅkṣitatvācca | vastutastu-
śyāmāgaṇapatyapekṣayā 
śrīvidyāprakaraṇasthaviśeṣārghyapātrādhārādimantrāṇāṃ sannihitatvāt ta 
eva grāhyāḥ | tatrāpi yāvadākāṅkṣitaṃ grāhyam na tvanākāṅkṣitam 
payasā maitrāvaruṇaṃ śrīṇāti itivat ||

ādimabindusaṃyogaḥ śaṅkhajalasaṃskāraḥ | bindumityatra vidheyagatasaṅkhyā 
vivakṣitā | tena bindudvayadānena nādṛṣṭotpattiḥ | na ca bindumityatra 
dvitīyāvibhaktiśravaṇāt sa evoddeśyaḥ kiṃ na syāditi vācyam | 
saṃskṛtabindoḥ viniyogākāṅkṣāyāṃ viniyogāśravaṇāt na bindusaṃskāraḥ | 
kiṃ tu jalasaṃskāraḥ jalasyāgre viniyogaśravaṇāt | tathā ca 
saṃskāryasyaivoddaśyatvaniyamāt bindurvidheyaḥ | tadgatasaṅkhyā vivakṣitaiva | 
ṣaḍaṅgena ṣaḍaṅgamantraiḥ agnīśāsuravāyukoṇeṣu ṣaḍaṅgadevatāḥ 
abhyarcya | aṅgenetyatra ekavacanamārṣaṃ bahutvalakṣakaṃ vā 
pāśādhikaraṇanyāyena ṣaṇmantreṣu ekatvānvayāsambhavāt ||

vastutastu-aṅgamantravṛttisaṅkhyāyāḥ ṣaṭpadenaiva 
bodhitatvādvacanārtho'vivakṣita eva | tathā ca autsargikamekavacanameva yuktam | 
na ca viśeṣaṇavācakaṣaṭpadasamānavacanakatvahāniriti vācyam ṣaṭpadena 
sākaṃ samāsāṅgīkāreṇa anupapattyabhāvāt | anenāpi jalasaṃskāra eva ||

yadvā-ṣaḍaṅgamantraiḥ ṣaḍaṅgadevatāḥ tasminneva śaṅkhodake 
kūṭatrayadvirāvṛttyā krameṇa hṛdayāya namaḥ hṛdayaśaktiśrīpādukāṃ 
tarpayāmītyādimantraistarpayet | na ca abhyarcyetyasya tarpaṇārthatve kiṃ 
mānam-iti vācyam | tarpayettatra yoginīḥ iti vāmakeśvaratantrāt yoginīpadasya 
tripurasundaryāḥ ṣaḍaṅgadevatā-iti setubandhe vyākhyānāt ||

vidyayā pañcadaśyā abhimantrya abhimantraṇena saṃskṛtya tajjalaṃ 
saṃskṛtajalaṃ tasya ye vipruṣaḥ bindavaḥ taiḥ ātmānaṃ svaśarīraṃ 
pūjopakaraṇāni gandhapuṣpaprathamādīni ca saṃprokṣya | atra 
kapiñjalādhikaraṇanyāyena vipruḍbhirityanena prokṣaṇasādhanaṃ 
bindutrayameveti prāptaṃ nyāyaṃ bādhituṃ samityupasargaḥ | tathā ca yathā 
pūjopakaraṇāni jalena samyak siktāni tathā prokṣayedityarthaḥ || 22 ||

viśeṣārghyavidhiḥ (arghyaśodhanam) 

evaṃ sāmānyārghyaiḥ [rghyotpattiṃ vidhāya viśeṣārghyavidhimāha-ba ba 2.] 
tṛptiṃ vidhāya viśeṣārghyāttṛptimāha-

tajjalena trikoṇaṣaṭkoṇavṛttacaturasramaṇḍalaṃ kṛtvā madhyaṃ vidyayā 
vidyākhaṇḍaistrikoṇaṃ bījāvṛttyā [bījadvirāvṛttyā-ga.] ṣaḍaśraṃ 
saṃpūjya vācamuccārya agnimaṇḍalāya daśakalā'tmane 

p. 107)

arghyapātrādhārāya namaḥ-iti pratiṣṭhāpya ādhāraṃ prapūjya pāvakīḥ 
kalāḥ || 23 ||

tajjalena sāmānyārghyodakena | śeṣaṃ pūrvavat | madhyaṃ trikoṇamadhyaṃ 
vidyayā | samaṣṭividyayā saṃpūjyeti sarvatrānuṣajyate | vidyākhaṇḍaiḥ 
kūṭatrayeṇa trikoṇaṃ trikoṇakoṇatrayam | asyopapattirdarśitā prāk | bījāvṛttyā 
[itaḥ pūrvatane-103-105-patrayoḥ-19-22-sūtrayoruktarītyetyarthaḥ |] 
kūṭatrayadvirāvṛttyā | kūṭasya bījarūpatvaṃ śrīṣoḍaśākṣaryāḥ 
ṣoḍaśārṇatvopapattaye ekaikakūṭasyaikaikabījarūpatvaṃ iti sapramāṇaṃ 
varivasyārahasye asmatparameṣṭhigurubhiḥ prapañcitam | granthavistarabhayānneha 
likhyate | kramasyānuktatvāt prāgādiprādakṣiṇyena svāgrādiprādakṣiṇyena 
vā | namo'nto mantraḥ namontaiḥ pādukā'ntairvā iti yoginītantravacananāt | 
vācaṃ-aiṃ-iti | taduktaṃ devībhāgavate-

vāgbhavaṃ [ddi.-pa-śi-9-vi-dṛśyaḥ |] kāmarājaṃ ca māyābījaṃ tṛtīyakam |
citte yasya bhavettaṃ tu na kaścidbādhituṃ kṣamaḥ ||

ityupakramya vāgbhavaṃ prathamabījaṃ stotuṃ kathāmupakramya-

ai ai iti bhayārtena dṛṣṭvā vyāghrādikaṃ vane |
binduhīnamapi proktaṃ vañchitaṃ pradadau kila || iti ||

binduhīnasya kaimutikanyāyena phalahetutvastutyā sabinduḥ aikāro vāgbhava iti 
sidhyati | nityārahasye-vāgbhavaṃ prathamaṃ devi kāmarājaṃ dvitīyakam iti 
bālāmantroddhārācca ravisvaro binduyukto vāgbhavaṃ bījamīritam iti 
bījakośācca | ādhāraṃ kīdṛśam ityākāṅkṣāsattvāt tantrāntaroktaṃ 
[atrādhāravastuno jñānāya-ddi. pariśiṣṭe 12 viṣayo'valokyaḥ |] tripadādi 
grāhyam | pāvakīḥ [etāsāṃ pāvakasūryacandrakalānāṃ nāmāni 
pratyakṣāṇi-purato'traiva śrīśyāmākramīye-6-khaṇḍe-18-mūlasūtre eva 
santi-tato grāhyāṇi |] vahnisambandhinīḥ kalāḥ caturthyantanamo'ntaiḥ [atra 
pātraṃ kasya vastunaḥ kīdṛśākāraṃ ca grāhyaṃ tadarthaṃ ddi.-pa.-śi.-vi.-12-
dṛśyaḥ |] tattannāmabhiḥ prāgādivṛttarūpaṃ yajet prāgādivṛttarūpeṇa iti 
paramānandatantravacanāt | setubandhe bhāskararāyāstu 
paścimādiprādakṣiṇyena ityūcuḥ || 23 ||

madanādupari sūryamaṇḍalāya dvādaśakalā'tmane arghyapātrāya namaḥ iti 
saṃvidhāya pātraṃ saṃspṛśya kalāḥ saurīḥ [etāsāṃ 
pāvakasūryacandrakalānāṃ nāmāni pratyakṣāṇi-purato'traiva 
śrīśyāmākramīye-6-khaṇḍe-18-mūlasūtre eva santi-tato grāhyāṇi |] sauḥ 
somamaṇḍalāya ṣoḍaśakalā'tmane arghyāmṛtāya namaḥ-iti pūrayitvā 
ādimaṃ dattvopādimamadhyamau pūjayitvā vidhoḥ [atra pātraṃ kasya vastunaḥ 
kīdṛśākāraṃ ca grāhyaṃ tadarthaṃ ddi.-pa.-śi.-vi.-12-dṛśyaḥ |] 
kalāṣoḍaśakam || 24 ||

p. 108)

madanastu caturāsananyāse prapañcitaḥ | śeṣaṃ spaṣṭam | saṃspṛśyetyasmāt 
pūrvaṃ tatretyādiḥ tatra pātre saurīḥ kalāḥ tapinyādīḥ saṃspṛśya pūjayitvā 
| yadyapi spṛśidhātoḥ na pūjanamarthaḥ tathā'pi saṃpūjya pāvakīḥ kalāḥ 
pūjayitvā vidhoḥ kalāḥ iti vākyamadhyavṛttitvāt tatra pātraṃ [atra pātraṃ 
kasya vastunaḥ kīdṛśākāraṃ ca grāhyaṃ tadarthaṃ-ddi.-pa.-śi.-vi.-12-dṛśyaḥ 
|] pratiṣṭhāpya tatra sūryakalā yajet iti yoginītantravacanācca pūjāyāmeva 
tātparyaṃ kalpyam | ādimaṃ prathamaṃ pūrayitvā upādimaṃ dvitīyaṃ 
madhyamaṃ tṛtīyaṃ idaṃ caturthapañcamayorapyupalakṣaṇam | siddhāntagranthe 
prathamakhaṇḍe pañca makārāḥ tairarcanaṃ guptyā ityuktam | tatraiva dattvā 
sthāpayitvā | vidhoḥ kalāṣoḍaśakaṃ amṛtādipūrṇāmṛtāntam || 24 ||

tatra vilikhya tryasramakathādimayarekhaṃ halakṣayugāntasthitahaṃsabhāsvaraṃ 
vākkāmaśaktiyuktakoṇaṃ haṃsenārādhya bahirvṛttaṣaṭkoṇaṃ kṛtvā 
ṣaḍasraṃ ṣaḍaṅgena purobhāgādyabhyarcya mūlena saptadhā abhimantrya 
dattagandhākṣatapuṣpadhūpadīpaḥ tadvipruḍbhiḥ prokṣitapūjādravyaḥ sarvaṃ 
vidyāmayaṃ kṛtvā tatspṛṣṭvā caturnavatimantrān japet || 25 ||

tatra prathamadravye pūrvoktakrameṇa pūjayitvā | 
akārādivisargāntaṣoḍaśasvaraiḥ paścimādīśānāntām ekāṃ rekhāṃ 
kuryāt | tata īśānādyāgneyāntāṃ kavargamārabhya tāntaiḥ ṣoḍaśavarṇaiḥ 
aparāṃ rekhāṃ saṃpādayet | tata āgneyādipaścimāntāṃ thādisāntaiḥ 
ṣoḍaśabhiḥ tṛtīyarekhāṃ saṃpādayet | evaṃ sati aśca kaśca thaśca 
ādiryeṣāṃ varṇānāṃ dīrghākārakhakārapakāraprabhṛtīnāṃ tanmayāḥ 
tadabhinnāḥ rekhāḥ yasmin trikoṇe tat akathādimayarekham | idaṃ 
tryasraviśeṣaṇam | haśca lakṣayugaṃ ca tayoḥ antaḥ madhye sthito yo haṃsaḥ-iti 
varṇasamudāyaḥ tena bhāsvaraṃ-dravye svadakṣabhāge ham-iti vilikhya 
taduttarato haṃ sa iti varṇau vilikhya taduttarato lakṣeti vilikhet | evaṃ coktarūpaṃ 
bhavati | evaṃ vākkāmaśaktayaḥ bālāyāḥ varṇatrayam [ddi. pa. śi. 9-viṣaye 
idaṃ varṇatrayaṃ pratyakṣamasti |] | yadvā-mūlakūṭatrayam | pramāṇam 
arthadvaye'pi pūrvamevoktam | tadyuktāni koṇāni yasmiṃstat | 
etādṛśaviśeṣaṇatrayaviśiṣṭaṃ trikoṇaṃ vilikhya | haṃsena haṃsa iti mantreṇa 
ārādhya puṣpādibhiḥ pūjayitvā | bahiḥ trikoṇāt vṛttaṃ ṣaṭkoṇaṃ ca kṛtvā | 
ṣaḍasraṃ ṣaṭkoṇāni mūlaṣaḍaṅgamantraiḥ 
purobhāgādisvābhimukhāgrādiprādakṣiṇyena abhyarcya | mūlena saptadhā 
saptavāramāvṛttena | tasmin dravye dattāḥ arpitāḥ 
gandhākṣatapuṣpadhūpadīpāḥ yena īdṛśaḥ pūjako bhavediti viśiṣṭavidhau 
dānamamīṣāṃ kāryamiti viśeṣaṇavidhirārthikaḥ | vidyā parasaṃvit tanmayaṃ 
tadabhinnaṃ kṛtvā bhāvayitvā | tat prathamādikam | caturnavatimantrān 
vakṣyamāṇān || 25 ||

p. 109)

tān mantrānāha-

tritārīnamassaṃpuṭitāḥ tejastritayakalā aṣṭatriṃśat | sṛṣṭi-
ṛddhismṛtimedhākāntilakṣmīdyutisthirāsthitisiddhayo brahmakalā daśa | jarā 
pālinī śāntirīśvarī ratikāmike varadāhlādinī prītirdīrghā viṣṇukalā daśa | 
tīkṣṇā raudrī bhayā nidrā tandrī kṣudhā krodhinī kriyodgārīmṛtyavo  
[kutracidatra udgārīsthāne-ulketyupāttam |] rudrakalā daśa | pītā 
śvetā'ruṇā'sitāścatasra īśvarakalāḥ | 
nivṛttipratiṣṭhāvidyāśāntīndhikādīpikārecikāmocikāparā-
sūkṣmāsūkṣmāmṛtājñānājñānāmṛtāpyāyinīvyāpinīvyomarūpāḥ 
ṣoḍaśa sadāśivakalāḥ || 
haṁsaśśuciṣadvasurantarikṣasaddhotāvvediṣadatithirduroṇasat | 
nṛṣadvarasadṛtasadvyomasadabjā gojā ṛtajā adrijā ṛtaṃ bṛhat || pra tadviṣṇuḥ 
stavate vīryeṇa mṛgo na bhīmaḥ kucaro giriṣṭhāḥ | yasyoruṣu triṣu 
vikramaṇeṣvadhikṣiyanti bhuvanāni vviśvā || tryambakaṃ yajāmahe sugandhiṃ 
puṣṭivardhanam | urvārukamiva bandhanānmṛtyormukṣīya māmṛtāt || tadviṣṇoḥ 
paramaṃ padaṁsadā paśyanti sūrayaḥ | divīva cakṣurātatam || tadviprāso 
vipanyavo jāgṛvāṁsaḥ samindhate | viṣṇoryat paramaṃ padam || viṣṇuryoniṃ 
kalpayatu tvaṣṭā rūpāṇi piṁśatu | āsiñcatu prajāpatirdhātā garbhaṃ dadhātu 
te || garbhaṃ dhehi sinīvāli garbhaṃ dhehi sarasvati | garbhaṃ te aśvinau 
devāvādhattāṃ puṣkarasrajā [atra-puṣkarasrajau-evaṃ pāṭho jñeyaḥ |] || ityete 
pañca mantrāḥ || mūlavidyā cāhatya caturnavatimantrāḥ || 26 ||

tritārī pūrvoktā [tritāryuddhāraśca anugata-91-patre-3-śrīkramīyakhaṇḍasya-8-
sūtre'sti-pratyakṣaścatraivabhāṣyedhastādasti |] | tritārī namaḥ ityanayormadhye 
caturnavatimantrān paṭhet | tathā ca dvābhyāṃ saṃpuṭito bhavati | yathā loke 
saṃpuṭe karaṇḍe antaḥ kiṃcit kṣiptvā 
ādhārāvayavottarāvayavamadhyavṛttitvaṃ vastunaḥ saṃpādyate tadvat 
prathamaṃ tritārī paścāccaturnavatimantreṣveko mantraḥ tato namaḥ iti | evaṃ 
sati mantraḥ dvābhyāṃ saṃpuṭito bhavati | tejastritayaṃ vahnisūryasomāḥ 
teṣāṃ kalāḥ 

p. 110) 

dhūmrārcirādipūrṇāmṛtāntāḥ śyāmākrame vakṣyamāṇā aṣṭatriṃśat 
[imāstisro vahnisūryacandrakalāḥ-pratyakṣanāmnā-agre-6-khaṇḍe 
śrīśyāmākrame-18-sūtre mūle eva vartante tato grāhyāḥ |] | mantrasvarūpaṃ 
tu aiṃ hrīṃ śrīṃ dhūmrārciṣe [imāstisro vahnisūryacandrakalāḥ-
pratyakṣanāmnā-agre-6-khaṇḍe śrīśyāmākrame-18-sūtre mūle eva vartante 
tato grāhyāḥ |] namaḥ | evaṃ agre'pi jñeyam | sṛṣṭi-ṛddhityatra sandhyabhāvaḥ 
ārṣaḥ | yadvā - ṛtyakaḥ iti pākṣikatvādasandhiḥ | śeṣaṃ spaṣṭam | vahnikalāḥ 
[imāstisro vahnisūryacandrakalāḥ-pratyakṣanāmnā-agre-6-khaṇḍe 
śrīśyāmākrame-18-sūtre mūle eva vartante tato grāhyāḥ |] -10 | sūryakalāḥ 
[imāstisro vahnisūryacandrakalāḥ-pratyakṣanāmnā-agre-6-khaṇḍe 
śrīśyāmākrame-18-sūtre mūle eva vartante tato grāhyāḥ |] -12 | candrakalāḥ 
[imāstisro vahnisūryacandrakalāḥ-pratyakṣanāmnā-agre-6-khaṇḍe 
śrīśyāmākrame-18-sūtre mūle eva vartante tato grāhyāḥ |] - 16 | 
brahmakalāḥ -10 | viṣṇukalāḥ -10 | rudrakalāḥ-10 | īśvarakalāḥ-4 | 
sadāśivakalāḥ-16 | itthaṃ ca kalāḥ sarvāḥ-88 yadyapi haṁsaśśuciṣat 
ityārabhya puṣkarasrajāvityantaṃ sapta ṛcaḥ santi tathā'pi ityete pañcamantrāḥ 
ityuktyā caturthapañcamau militvā eko mantraḥ ṣaṣṭhasaptamau militvā eko 
mantraḥ | ekaliṅgatvā duktayorevaikyaiṃ yuktaṃ natvanyatra | mūlavidyā 
pañcadaśī | pūrvakalāḥ 88 uktamantrāḥ pañca mūlavidyā ca āhatya sarvaṃ 
militvā caturnavatimantrāḥ saṃpadyante | etairabhimantraṇena dravyaṃ 
saṃskuryāditi phalito'rthaḥ || 26 ||

atha haike pa~cabhirakhaṇḍādyairabhimantraṇamāmananti || 27 ||

athetyanena caturnavatimantrottarameveti kramaviśeṣaḥ sūcitaḥ | nātra 
pāṭhakramaḥ sambhavati svamatābhāvāt | ataḥ athetyāvaśyakam | ha iti 
śabdālaṅkāre | eke ityanena pākṣikatvaṃ sūcitam | akhaṇḍaḥ ādyaḥ yeṣāmiti 
tadguṇasaṃvijjñānabahuvrīhiḥ || 27 ||

[atra akhaṇḍādyāḥ ke ityanena uparitana-27-sūtroktākhaṇḍādyairitipadoktāḥ 
akhaṇḍaśabdadyā mantrāḥ ke-ityartho'dhyavaseyaḥ |] akhaṇḍādyāḥ ke? 
ityākāṅkṣāyāmāha-

akhaṇḍaikarasānandakare parasudhā'tmani |
svacchandasphuraṇāmatra nidhehyakulanāyike || 

akulasthāmṛtākāre śuddhajñānakare pare |
amṛtatvaṃ nidhehyasmin vastuni klinnarūpiṇi ||

tadrūpiṇyaikarasyatvaṃ kṛtvā hyetatsvarūpiṇi |
bhūtvā parāmṛtākārā mayi citsphuraṇaṃ kuru ||

iti tisro'nuṣṭubho vidyāḥ || 28 ||

p. 111) 

vedabhāṣye [duradhigamyārthān-uparyuktān-akhaṇḍetyādipañcamantrān 
sārthān vivinakti paṇḍitaḥ sūtrabhāṣyakāraḥ |] vaidikamantrāṇām arthasya 
vivṛtatvāt tān [tan nāma tādṛgvivṛtārthān vaidikamantrānityarthaḥ |] parityajya 
kevalatāntrikasubodhamantrāṇāṃ keṣāñcidarthaṃ prakaṭayāmi  [prakaṭayati -
a] | akhaṇḍeti-akhaṇḍetyādimantratrayaṃ liṅgena sudhādevīprārthanāṅgaṃ 
bhavitumarhati | tato'pi balavatā [atra balavateti liṃgenetyasya viśeṣaṇam |] 
abhimantraṇottaradvitīyāśrutyā abhimantraṇāṅgam | etadanusāreṇa 
paramānandatantre-etattrayaṃ tribījāḍhyaṃ caturdhā tatra vai japet ityatra spṛśan 
ityadhyāhāryam | tathā ca abhimantraṇāṅgatvaṃ siddham | evaṃ ca 
paramānandaṭippaṇyām akhaṇḍetyādi sudhādevīprārthanārūpamiti lekhaḥ 
prāmādika [dvitīyāśrūtyā nāma - uparitana-27-sūtrastha-āmanantītyasya 
karmakārakībhūtam abhimantraṇamiti dvitīyāśrutyetyarthātrāvadheyaḥ |] eva 
liṅgācchrutibādhasya kenāpyanaṅgīkārāt | atra mantrārthastu-akulaṃ nāma 
sahasradalakamaladvayam | sarvakamalānāmādhārabhūtaṃ ūrdhvamukhamekaṃ 
padmaṃ mūlādhārasyādhastiṣṭhati tadekaṃ akulapadavācyam | akule 
viṣusaṃjñe ca iti yoginītantraślokavyākhyānāvasare 
sarvādhaḥsthitasahasradalakamaloparyaṣṭadalaṃ tadupari ṣaḍdalaṃ tadupari 
mūlādhārādicakrāṇi tatra mūlādhārādhaḥsthitaṃ ṣaḍdalaṃ kulapadmaṃ 
tadadhaḥsthite aṣṭadalasahasradale akule-iti setubandhalekhāt | evaṃ 
brahmarandhrasthitādhomukhasahasracchadapadmamapi akulam | taduktaṃ 
tripurārṇave-

suṣumnordhvaṃ sudhāraśmikoṭikāntisamaprabham |
adhomukhaṃ gurusthānaṃ sahasradalaśobhitam ||
akulaṃ tadbijānīyāt * * * * * * iti ||

paramānandatantre'pi -

sādhakaḥ prātarutthāya brahmarandhre nijaṃ gurum |
pūrvoktā kulapadmāntardvādaśāntasaroruhe || iti ||

evaṃ dvayoḥ sahasracchadayorakulavācyatve siddhe prakṛte brahmarandhrasthasyaiva 
grahaṇam tasyaivāmṛtasrāvitvāt | prakṛte akulaṃ yadbrahmarandhrasthakamalaṃ 
tasya nāyikā tadadhiṣṭhātrī tatsambodhane he akulanāyike [atra mūle ca 
akulanāyike iti padamarthaścopāttaḥ-mahānirvāṇatantre-6-ullāse 38 śloke 
mūle ṭīkāyāṃ ca kulaśabda evāstīti śrīśivajāmadagnyobhayavaco'virodhaṃ 
samanvayanīyamityāśāse |] | akhaṇḍo'vicchinnaḥ ekaraso duḥkhāsaṃbhinno ya 
ānandaḥ taṃ karoti vyañjayatīti tādṛśe | parā utkṛṣṭā yā sudhā 
brahmarandhrasthā amaratvakāriṇī tadātmani tatsvarūpe atra dravye 

p. 112)

svacchandā svatantrā yā cit tasyāḥ sphuraṇāṃ prakāśaśaktiṃ nidhehi 
sthāpaya | he pare śreṣṭhe klinnamārdrarūpaṃ tadasminnasti iti klinnarūpiṇi 
asmin | vastuni amṛtatvaṃ nidhehi saṃsthāpaya saṃpādaya | akulaṃ vyākhyātaṃ 
tatra vidyamānaṃ yat amṛtaṃ tasya svarūpamiva svarūpaṃ yasyāḥ 
dravyābhimānidevatāyāḥ | idaṃ paretyasya viśeṣaṇam | śuddhajñānakare 
svarūpajñānāvirbhāvakartri idamapi parāviśeṣaṇam | yattu 
saubhāgyānandasandohe pare iti saptamyantaṃ kṛtvā vastuviśeṣaṇamityuktam 
tanna dūrānvayāpatteḥ | tat parabrahma tasya yadrūpaṃ tadvati 
parabrahmasvarūpe iti yāvat | tadrūpiṇi viśeṣārghyarūpiṇi mayi dehābhimānini 
| paraṃ yat amṛtam ānandaḥ tadākārā bhūtvā aikarasyaṃ citasyaikākāratāṃ 
kṛtvā saṃpādya citsphuraṇaṃ svasvarūpaprakāśaṃ kurviti mantratrayārthaḥ | 
anuṣṭubhaḥ anuṣṭupchandaskā ityarthaḥ dvātriṃśadakṣarā'nuṣṭup iti śruteḥ | 
vidyāḥ mantrāḥ | idaṃ vidyātrayaṃ [vidyātrayaṃ nāmaitat-28 
sūtroktākhaṇḍetyādiślokatrayoktā-3-vidyāmilitvetyarthaḥ | ] militvā 
ekāpūrvajanakaṃ paurṇamāsayāgatrikavat agrimamantreṣu atho iti 
prakramāntaṃ rasattvāt tantrāntare'pi etattrayamiti samaṣṭiviniyogadarśanācca | 
tenaikamantralope punastritayapāṭhaḥ na tāvanmātram 
[atrākhaṇḍetyādiślokatrayabhāṣyaṃ paryavasannam |] || 28 || 2

caturthaṃ amṛteśīmantramāha - 

atho vācaṃ blūṃ jhaumiti jūṃsaḥ-iti coktvā amṛte amṛtodbhave amṛteśvari 
amṛtavarṣiṇi amṛtaṃ srāvaya srāvaya svāheti caturtho mantraḥ || 29 ||

vācyam-aiṃ | iti dvayaṃ coktveti ca tyaktvā śeṣaṃ mantrasvarūpam | he amṛte 
asmin dravye amṛtaṃ srāvaya iti tadarthaḥ | śeṣāṇyamṛte ityasya viśeṣaṇāni | 
tadarthaḥ spaṣṭaḥ || 29 ||

tataḥ pañcamaṃ mantramuddharati-

vāgbhavo vada vada tato vāgvādini vāṅmadanaklinne kledini kledaya 
mahākṣobhaṃ kuruyugalaṃ mādanaṃ śaktirmokṣaṃ kuru kuru śabdo hasa 
caturdaśapañcadaśapiṇḍaḥ sahacaturdaśaṣoḍaśapiṇḍaśceti pañcamīyaṃ 
vidyaitābhiḥ abhimantrya jyotirmayaṃ tadarghyaṃ vidhāya || 30 ||

vāgbhavaḥ aiṃ | vāk aiṃ | madanaḥḥ klīṃ | kuruyugalaṃ dvivāraṃ 
kurvityuccārya | mādanaṃ klīṃ | śaktiḥ sauḥ | caturdaśa acāṃ caturdaśaḥ au | 
pañcadaśaḥ anusvāraḥ | piṇḍaḥ samudāyaḥ | ṣoḍaśo visargaḥ | tathā ca 
mantrasvarūpam - aiṃ vada vada vāgvādini aiṃ klīṃ klinne kledini kledaya 
mahākṣobhaṃ kuru kuru klīṃ sauḥ mokṣaṃ kuru kuru hasauṃ shauḥ |

p 113)

itīyaṃ pañcamī vidyā | etābhiḥ pañcabhiḥ abhimantrya | jyotirmayaṃ nirdoṣaṃ 
tadarghyaṃ vidhāya | etena tantrāntaroktaśāpavimocanādikam anenaiva jātamiti 
sūcitam ||

	nanu jyotirmayamityanena ayamabhiprāyaḥ kathaṃ niṣpādita iti cet-ucyate | 
jyotiriti prakāśāparaparyāyaḥ | prācuryārthe mayaṭ | yasmin prakāśe 
malamiśratvaṃ tatra prakāśaprācuryaṃ na saṃbhavati yathoparaktadivākarādau | 
malanirgame sati tatraiva prakāśaprācuryamanubhūyate | evamevādarśe 
mukhaprakāśake | tadvadatrāpi dravye nānāśāpādimalopahate jyotirmayatvaṃ 
na saṃbhavati | proktaikonaśatamantrairabhimantraṇe sati nirastanikhilamalaṃ sat 
jyotirmayaṃ bhavati | tata eva jyotirmayaṃ kṛtvetyuktam | etena 
tantrāntaroktaśāpavimocanasyāpi samuccaya iti keṣāṃciduktiḥ aśraddheyaiva ||

dvipātravidheḥ [ita etat 30 sūtrabhāṣyasamāptipatrāvadhi-
vṛttikṛtādvipātrasthāpanaṃ maṇḍitam |] mukhyatvasamarthanam

evaṃ ye maheśvarānandanāthaprabhṛtayaḥ tantrāntare nityapūjāyāṃ 
pūrvavattu tripātrakam iti vacanāt sūtre na kartavyamiti niṣedhābhāvāt 
sūtrānusāribhirapi tripātraṃ kartavyamityūcuḥ tān prati ayaṃ praśnaḥ-sūtre 
na kartavyamiti niṣedhābhāvena tripātratvaṃ sādhyate uta tantrāntare uktatvāt uta 
svasūtre niṣedhābhāve sati tantrāntare vidyamānatvena vā uta tantrāntare 
dvipātraniṣedhaśravaṇādvāḥ | nādyaḥ vrīhibhiryajeta ityatra na godhūmairiti 
niṣedhābhāvāt godhūmayogenāpyapūrvaṃ syāt | na dvitīyaḥ tathā sati 
paraśurāmasūtroktasaṅgītamātṛkāvārāhyādyupāsteḥ śrīvidyā'ṅgatvena 
saubhāgyānandasandohe pareṣāmapi īdṛśāṅgatyāgasya niryuktikatvāpattiḥ | 
etena tṛtīyapakṣo'pi nirastaḥ | nāpi caturthaḥ | tathā hi yo'yaṃ tasmāt 
pātradvayaṃ devi naiva kuryāt kadācana iti niṣedhaḥ yā ca nindā-

ālasyenānyathā vā'pi kṛtvā pātradvayaṃ śive |
pūjāphalena hīnastu vikriyāṃ labhate naraḥ ||

iti tripātrakamiti vidhiśeṣārthavādaḥ | anyathā tripātravidhinaiva 
dvipātravyāvṛttau niṣedhasya nivṛttirūpaphalābhāvena vaiyyarthyāpatteḥ | yadi 
ca vidhinā pravṛttimātraṃ niṣedhena ca taditaranivṛttirityucyate tarhi ekādaśa 
prayājān yajati ityatra na dvādaśa na daśa iti vākyābhāvāt 
daśabhirdvādaśabhiśca prayājairapūrvaṃ syāt | tasmādvidhinaiva 
dvipātranivṛttau niṣedho vyarthaḥ san taccheṣo'rthavāda eva | arthavādasya 
stutimātre tātparyam | na tasminniṣedharūpatvamasti | kathaṃ niṣedhena hetunā 
tantrāntare tripātratvasādhanam ||

p. 114)

	kiṃ ca-etattantre kati pātrāṇi ? ityākāṅkṣāyāṃ svasūtre 
viśeṣāśravaṇāt tantrāntarasthaṃ pūrvavattu tripātrakam iti vacanameva 
ākāṅkṣāpūrakaṃ sat tripātraṃ sādhayatīti paramatam | tathā sati 
dvipātraprāpterevābhāvena niṣedhasya dūranirastatvāt ||

	na ca arthavāda iti vadatastava mate dvipātraprāptyabhāvena na dvipātraṃ 
kuryāditi vākyasya prāmāṇyaṃ kathaṃ cintyate iti vācyam | 
arthavādaghaṭakaniṣedhasya prāptipūrvakatvamiti na niyamaḥ tasya svārthe 
tātparyābhāvāt | ato'prāptārthaniṣedho'pi nirvahati yathā-nāntarikṣe na 
divyagniścetavyaḥ iti yadantarikṣe cinvīta antarikṣaṁ śucā'rpayet iti | 
tādṛśārthasya na svārthe tātparyam kiṃ tu prāśastyamātre | taccābādhitam ||

	na vā tantrayoḥ parasparaṃ prakṛtivikṛtibhāvaḥ sapramāṇaḥ yato vā 
prāptaṃ niṣidhyeta | na hyaprāptaniṣedhaḥ svapne'pi śrutaḥ ||

	kiṃ ca-paraprītaye arthavāde'pi āropitaniṣedhatvamastu | tathā'pi na 
teṣāṃ samīhitasiddhiḥ | tathā hi kalpasūtreṇa pātradvayaprāptiḥ 
paramānandatantreṇa tanniṣedhaḥ tathā sati tantrayoḥ samabalatvena 
grahaṇāgrahaṇavadvikalpa eva syāt | niṣedhaśāstrasyaiva svarucyā 
prābalyāṅgīkāre grahaṇapakṣastvatyantaṃ bādhyeta | vikalpa eva na syāt | 
dvipātraprayogo'śāstrīyaḥ iti vadatāṃ maheśvarānandanāthādīnāṃ vikalpo 
na hīṣṭaḥ | sa ca duṣparihāraḥ ||

	na ca-paraśurāmasūtre na kaṇṭharaveṇa dvipātraṃ kartavyamityuktam kiṃ 
tu pātradvayaprayogasthapāṭhānusāreṇa kalpyo vidhiḥ | tasmāt pātradvayaṃ 
devi naiva kuryāt iti pratyakṣo niṣedhaḥ | tathā ca pratyakṣeṇānumānikaṃ 
bādhyate | grahaṇāgrahaṇasthale ubhayaṃ pratyakṣamiti vikalpo yuktaḥ | prakṛte na 
tathā vaiṣamyāt - iti vācyam | agnīṣomīyapaśau adhrigupraiṣe ṣaḍviṁśatirasya 
vaḍkrayaḥ iti mantro'sti | tatra vaḍkrayaḥ prārśvasthīni asya paśoḥ 
ṣaḍviṃśatiriti tadarthaḥ | ayaṃ mantraḥ aśvamedhe agnīṣomīyavikṛtitvāt 
atideśena prāptaḥ | tathā sati aśvamedhe catustriṁśadvājino devabandhoḥ iti 
mantrāntaramasti | tena mantraliṅgena aśvasya pārśvāsthīni catustriṃśat iti 
siddham | tatsiddhau ṣaḍviṁśatirasya vaṅkrayaḥ iti mantre ṣaḍviṃśaliṅgavirodhe 
tatsthāne catustriṁśadasya vaṅkrayaḥ ityūhaḥ prāptaḥ | evaṃ sati 
aśvamedhaprakaraṇe punarevaṃ śrūyate-na catustriṁśaditi brūyāt 
ṣaḍviṁśatirityeva brūyāt iti | atra catustriṃśadityūhaśāstrasyānumānikatvāt 
taṃ bādhitvā na catustriṃśat iti niṣedhaḥ-nityaṃ pravartate iti 
pūrvapakṣamuktvā taduttaraṃ yatrānumāniko vidhiḥ niṣedhaśca pratyakṣaḥ 
tatra dvayorapi samabalatvamaṅgīkāryam | tathā hi�prabaladurbalabhāvo hi na 
vastuni svābhāvikaḥ kutracidasti 

p. 115)

kiṃ tvākāṅkṣāyāṃ śīghropasthitivilambopasthitiprayuktaḥ | yathā vikṛtau 
karmaviśeṣe prakṛtito vedyāstaraṇaṃ prāptam | tatra kena vedyāstaraṇaṃ 
kāryam ityākāṅkṣāyāṃ sādhanabodhakaṃ padaṃ yadi na syāt tadā 
prākṛtavedyāstaraṇasādhanaṃ smṛtvā kuśān buddhau āropya praścāt 
prakṛtivat kuśairāstaraṇaṃ kartavyamiti ānumānikaśabdakalpanayā ākāṅkṣā 
pūraṇīyā | tato'pi jhaṭiti śaramayaṃ barhirbhavati iti 
pratyakṣavākyenopasthitaśaraiḥ ākāṅkṣāśāntau bodhakaśāstrasya tadaṃśe 
ākāṅkṣāvirahāt durbalatvam | prakṛte na catustriṁśaditi brūyāt iti niṣedhasya 
prāptisāpekṣatvāt catustriṁśadvājinaḥ iti liṅgena pūrvaṃ vidhikalpanānantaraṃ 
vidhimanusṛtya pravṛttaṃ puruṣaṃ nivartayituṃ niṣedhaḥ paścāt pravṛttaḥ | na 
[ataḥ yamupajīvya pravṛttaḥ tamatyantaṃ bādhitumasamarthassan pakṣe bādhate | 
ata īdṛśasthale -a. śrī ba2. ] kuśaśāstrāt pūrvaṃ śaraśāstramiva niṣedhaḥ 
vidhikalpanāt pūrvaṃ pravṛttikṣamaḥ | ata īdṛśasthale 
ānumānikavidhipratyakṣaniṣedhayoḥ tulyabalatvādvikalpa eveti navame 
turīyapāde siddhāntitaṃ jaiminitantre | prakṛte'pi tathā tulyabalatvādvikalpo 
duṣparihāraḥ ||

yadi ca sūtre pātradvayetikartavyatāsahitasthāpanakathanena prayogavidhau 
dvipātravidhirna kalpyate tantrāntarānusāreṇa pātradvayakathanaṃ 
tṛtīyasyāpyupalakṣakamiti kalpyate tadā sarveṣvapi tantreṣu tripātraprayogasyaiva 
tantrābhimatatvena dvipātrapravartakābhāvena dvipātravidheḥ 
śaśaśṛṅgasamatvena tanniṣedhasyāpi tādṛśatvena tena hetunā kathaṃ 
tvatsamīhitasiddhiḥ | seyaṃ ubhayataḥ pāśā rajjuḥ | tasmāt 
kalpasūtrayoginītantrānusāribhiḥ dvipātraprayogo niśśaṅkamanuṣṭheyaḥ ||

yattu paramānandatantraṭippaṇyāṃ saubhāgyānandasandohasaṃjñikāyāṃ 
ekonaviṃśollāse pañcadaśaślokavyākhyānāvasare - nanu 
paraśurāmasūtravāmakeśvarāditantreṣu proktapātradvayaṃ virudhyeta-iti 
cecchṛṇu | agrimollāse anukalpapūjāyāṃ pātradvayasya suspaṣṭaṃ 
vakṣyamāṇatvāt anukalpapūjāparaṃ paraśurāmasūtrāditantram | ata eva tatra 
śāpamocanamantrāṇāmabhāva iti suvacam | atha vā - ātmayogābhyāsiparam | 
ata eva tripurārṇave ātmayogaparāṇāṃ tu nāṅgalopena [nāṅgalopo na 
bādhitaḥ-śrī.] hīyate iti | ata eva śrībhāskararāyaiḥ 
ekapātrādisaṃkṣepapūjanaṃ abhyāsaśīlānāmiti setubandhe nirūpitam | atha 
vā 

paramāpatpakṣo vā | taduktaṃ tantre -

pratyakṣayugmapātraṃ vai kṛtvā śāpamavāpnuyāt |
kvacinmayaivopadiṣṭaḥ paramāpattikālikaḥ ||

-iti maheśvarānandanāthāḥ pakṣatrayamūcuḥ taccintyam ||

p. 116)

paraśurāmasūtroktasaraṇirmukhyā na milati | tathā pratinidhisvīkārapakṣa iti 
prathamapakṣe tasyābhivyañjakāḥ pañcamakārāḥ tairarcanaṃ guptyā iti 
tadvadādimaṃ saṃśodhya iti ādimabinduṃ datvā iti pūrayitvā ādimam iti 
mapañcakena santarpya iti prabhṛtīnāṃ śatāvadhivākyānāṃ sūtrasthānāṃ 
kuṇḍalaprakṣepa eva syāt | kiṃ ca-mapañcakālābhe'pi 
nityakramapratyavamṛṣṭiḥ iti sūtreṇa nityapūjāyāṃ mapañcakasya 
mukhyatvaṃ susphuṭam | evaṃ sati sūtramanukalpaparamiti lekhaḥ 
pūrvottarasūtrāpariśodhanamūlaḥ prāmādika iti heya eva ||

kiṃ ca-etatpakṣasya sādhakatayā śāpamocanābhāvo hetutvenopanyastaḥ | sa tu 
atyantanirmūlako'saṅgataśca | tathā hi-śāpavimocanaṃ nāma kiṃ pūrvaṃ 
kṛṣṇaṃ sthitaṃ yat tasyānantarakriyayā śuklatvasaṃpādanarūpaṃ dṛṣṭaṃ 
phalaṃ kiṃ vā saṃmārgādinā srukṣvivādṛṣṭaṃ yāgasādhanaśarīraṃ 
utpadyata iti | nādyaḥ śāpamocakamantrasahasrāvṛttyā'pi 
pūrvarūpaparāvṛttyadarśanāt | na dvitīyaḥ 

kvacittantreṣu vistāraḥ kvacittantreṣu saṃgrahaḥ |
ekaṃ tantraṃ samāśritya samyakkarma kṛtaṃ tathā ||
sarvaṃ tena kṛtaṃ rāma [rāma-śrī ba2.] etacca śrīgurumārgataḥ ||

iti tripurārahasyavacanena |

bahvalpaṃ vā svagṛhyoktaṃ yasya yāvat prakīrtitam |
tasya tāvati śāstrārthe kṛte sarvaḥ [sarvaṃ kṛtaṃ bhavedityapi-pāṭhāntaram |] 
kṛto bhavet ||

iti bodhāyanasmṛtipramāṇena ca ādimadravye yāvaduktasaṃskāraireva 
yāgajanakasvarūpalābhe śāpavimocanamantrāṇāṃ tatrāprayojakatvāt 
kathamanena hetunā sūtraṃ pratinidhiparaṃ sidhyet | kiṃ ca mukhyābhāve 
pratinidhisvīkāre mukhyadharmā yāvantaḥ pratinidhau pravartante yathā 
vrīhyabhāve nīvāre yāvad vrīhidharmāḥ yathā vā somābhāve pūtikeṣu 
yāvatsomadharmāḥ tatra ūho'pi nāstīti sādhitaṃ jaiminitantre | anutiṣṭhanti ca 
tathaiva śiṣṭāḥ | evaṃ sati pratinidhau śāpavimocanamantrābhāvaḥ kena 
vāryate | itthaṃ ca vahnāvanuṣṇatvavadatyantāsiddhahetuṃ prayuñjānāste 
svāvidvattāṃ susphuṭaṃ prakaṭayāmāsuḥ ||

	nāpi dvitīyaḥ pakṣaḥ sādhuḥ | tathā hi-dīkṣā'dyārabhya 
nikhilaparaśurāmasūtrapratipāditaṃ karma yogābhyāsiparaṃ uta pūjāmātram- 
nādyaḥ dīkṣātaḥ prāk yogābhyāsitvaṃ na saṃbhavati | adīkṣitānāṃ purato 
noccarecchivapaddhatim iti niṣedhena tāntrikasiddhāntaśravaṇābhāvena  
śravaṇamṛte yogāsaṃbhavena yogābhyāsināmiyaṃ dīkṣeti vaktumaśakyatvāt | 
dvitīye-īdṛśābhyāsī etattantravihitapūjākartā kimetattantroktadīkṣāvān uta 
tantrāntareṇa  dīkṣitasya kālena 

p. 117)

svatantrānuṣṭhānena paripakvacittasyaiva etatsūtroktapūjāyāmadhikāro vā-
nādyaḥ dīkṣā'vyavahitottarakṣaṇe na bhavadabhimatadhyānasiddhiḥ | 
ayamanubhūyate sarvaiḥ | itthaṃ ca sūtrānusāreṇa dīkṣāṃ saṃpādya 
ayogitvenaitattantroktapūjānadhikārāt tantrāntarāśrayaṇaṃ pūjā'rthaṃ 
kartavyam | tarhi-

svaśāstre vartamāno yaḥ paraśāstraṃ niṣevate |
bhrūṇahatyāmavāpnoti svaśāstramavamanyate ||

iti niṣedhollaṅghanam | kiṃ ca-dīkṣottaraṃ 
mahāvidyā'rādhanapratyūhāpohāya gāṇanāyakīṃ paddhatimāmṛśet iti 
sūtreṇa lalitopāstivighnanāśasādhanatvaṃ gaṇapatyupāsteruktam | 
lalitopāstyanannaraṃ hi tatsādhyaścittaparipākaḥ tato niruktayogaḥ | tadanantaraṃ 
dvipātraprayoge adhikāro vācyaḥ | sa na saṃbhavati gaṇapatyupāsteḥ 
vighnasamānakālikatvena tadānīṃ niruktayogābhāvādapi gaṇapatyupāstau 
dvipātrakathanāt tatrāvaśyaṃ dvipātraprayogo'ṅgīkāryaḥ | itthaṃ ca tatra 
vyabhicaritādhikārasya anyatrāpi kalpanaṃ kena pratibaddham 
sakṛdvyabhicaritāyāḥ striyaḥ kimaparatra vastrāvaguṇṭhaneneti nyāyāt |

na ca-yaścāyogī tena gaṇapatyupāstiṃ tyaktvā kevalalalitopāstireva 
tantrāntaramanusṛtya yogasiddhiparyantaṃ anuṣṭheyā na gaṇapatyupāstiḥ atha vā 
gaṇapatyupāstāvapi tantrāntaramāśrīyatām-iti vācyam | tathā sati evaṃ 
gaṇapatimiṣṭvā vidhūtasamastavighnavyatikaraḥ śakticakraikanāyikāyāḥ 
śrīlalitāyāḥ kramamārabheta iti sūtre'pi aprāmāṇyaṃ vaktavyaṃ syāt | 
sūtre gaṇapatyupāstipāṭhavaiyyarthyam-na lalitopāsteḥ pūrvamanuṣṭhānaṃ 
ayogitvena tasya tadā'nadhikārāt | lalitopāstyā phalasiddhyanantaramapi 
aprayojakatvāt ananuṣṭheyam | evaṃ ca vaiyyarthyaṃ durnivāram ||

na ca-dvipātraniṣedhasya lalitāprakaraṇasthatvāt tatraivāyogināmanadhikāraḥ | 
anyatrāstyeva dvipātraprayoge'dhikāraḥ niṣedhābhāvāt iti vācyam 
śrīlalitāyā mahāyāgānuṣṭhānāvasare nirvighnatāsiddhaye 
paraśurāmasūtrānusāreṇa nikhilagaṇapatyupāstiṃ vidhāya pātrāsādanakāle 
dvipātraprayogaṃ parityajya tripātraprayogamanusaratāṃ 
maheśvarānandanāthānāṃ etatpakṣasyānanumatatvāt | nāpi tantrāntareṇa 
dīkṣitasya svatantrānuṣṭhānena paripakvacittasya sūtroktapūjāyāmadhikāra iti 
dvitīyaḥ pakṣaḥ | tathā sati sūtre dīkṣāpāṭhavaiyyarthyāt | 
evametatpakṣasādhakatvena tripurārṇavavacanam ātmayogaparāṇāṃ tu 
nāṅgalopena hīyate ityalikhat | tadatīva mandam | yogābhyāsināmaṅgalopo na 
doṣāyeti tadarthaḥ | yogirūpādhikāriviśeṣam-uddiśya sūtroktadvipātravidhiriti 
siddhāntastadīyaḥ | evaṃ ca yogiprayoge tṛtīyapātrasya 
vaiśyakartṛkadarśapūrṇamāsasambandhisāmidhenyāṃ 
pāñcadaśyasyevānaṅgatvādaṅgalopa eva nāsti | evaṃ satyaṅgalope doṣo 
nāstīti svamatasādhakatvena 

p. 118)

hetukathanaṃ vandhyāputrasya svakāryasādhakatvena grahaṇavadeva bhavati | yā 
caitadviṣaye ekapātrādisaṅkṣepapūjanamabhyāsaśīlānāmiti 
setubandhalekhasammatirdarśitā sā'pyasiddhā | setubandhe īdṛśī paṅktiḥ na 
kutrāpyasti | pratyuta dvipātraprayoga eva vyavasthāpitaḥ | tathā hi-
pūrvacatuśśatīsambandhinaḥ 

hemādipātre sādhāre sthāpayedarghyamañjasā [mambunā-ba.] |
rocanācandrakāśmīralaghukastūrikāyutam ||
bhāvayedvahnisūryendubhūtāni parameśvari |
japecca daśavāraṃ tattarpayettena yoginīḥ ||

iti ślokadvayasya vyākhyānāvasare idaṃ pūrvatantrasthavacanaṃ 
sāmānyārghyaparaṃ uttaratantrasthaṃ śrīcakrasyātmanaścaiva madhye 
tvarghyaṃ pratiṣṭhayet iti viśeṣārghyaparaṃ tadante tathaivārghyaṃ viśeṣeṇa 
sādhayet sādhakottamaḥ iti gurupātrātmapātrānyataraparamiti 
prācīnavyākhyāṃ nirasya pūrvatantrasthavacanameva viśeṣārghyaparamityapi 
matāntaraṃ nirasya pūrvatantre sāmānyārghyavidhiḥ uttaratantrasthena 
śrīcakrasyātmanaśceti vacanena tasyaiva deśakālavidhiḥ tathaivārghyaṃ 
viśeṣeṇa iti pūrvadharmātideśasahitaviśeṣārghyavidhiriti 
vyavasthāpyopasaṃhārasamaye tasmādetattantrānusāreṇa dvayoreva 
sthāpanamiṣṭam-iti dvipātravyavasthāmātraṃ śrībhāskararāyāścakruḥ | (sā 
ca asmākamanu guṇā pareṣāmananuguṇā ca) yogināmevāyaṃ prayogaḥ iti 
nocuḥ ||

yattu-setubandhe sthalāntare tantrāntareṣu 
yoginītantrasyottaracatuśśatīvadantaryāgaprapañcasyābhāvāt 
tantrarājasyāpyetatsāpekṣatvādatyuttamam-etattantraṃ etatsāpekṣatvaṃ ca 
tantrarāje-nityāhṛdayasaṃproktasphuṭopāyena bhāvayet iti kathanāt | 
nityāhṛdayametaduttaratantranāma | atra bahiryāgāṅgānāmalpānāṃ 
kathane'pi antaraṅgopāstidārḍhyaśīlānāṃ tāvataiva paripūrtisaṃbhavāt iti 
kalpyata iti likhitatvāt | maradvayakhaṇḍanapūrvakapūrvalikhitaitattantrānusāreṇa 
dvayoreva sthāpanamiṣṭam iti vākye etatpadaṃ uttaracatuśśatīparam | 
uttaracatuśśatyāṃ tu śuddhāntaḥkaraṇasyaivādhikārāt teṣāṃ prayoga eva 
pātradvayamiti siddhāntaḥ samīhitaḥ | etadabhiprāyeṇaivāsmākaṃ 
setubandhasaṃmatilekho'pīti-tadapi na | tathā sati uttaratantre 
sāmānyārghyodakotpattividhyabhāvena 
kevalamuttaracatuśśatītantreṇaivānutiṣṭhatāṃ viśeṣārghyapātrasyaivā 
sādhanaṃ prasaktaṃ na pātradvayasya | tathā copasaṃhāravākye 
etattantrānusāreṇa dvayoḥ sthāpanamiṣṭamiti vākyaṃ virudhyata eva | 
tasmādetattantrapadena pūrvottaracatuśśatīmekīkṛtya 
samagratantrānuyāyināmityevābhiprāyaḥ | 

p. 119)
 
ata eva sāmānyārghyasya pūrvacatuśśatyāmutpannasya viniyogo'ṣṭamapaṭale 
vakṣyatīti setubandhalekhaśca saṅgacchate | etena pūrvottaratantroktamekameveti 
spaṣṭam | īdṛśī pūjā aparipakvacittasyāpi prāptā tadanusāreṇa pātradvayaṃ 
durnivāram ||

yaśca bahiryāgāṅgānāmalpānāṃ kathane'pyantaraṅgopāstiśīlānāṃ 
tāvataiva paripūrtiriti setubandhalekhaḥ sa naitattantrānusāriparaḥ | kiṃ tu 
tantrarājānusāreṇa pūrvamupāstiṃ kurvataḥ kālena 
cittaśuddhipūrvakabhāvanāyāṃ saṃpannāyām itthaṃ kurvan hi satataṃ 
mucyate nātra saṃśayaḥ iti vacane sāṅgabahiryāgasya satatamityanena 
taduttaramapi yāvajjīvaṃ sāṅgopāstiprāptau tadbādhakamidaṃ 
nityāhṛdayasaṃproktasphuṭopāyena bhāvayet iti | nityāhṛdayamutaracatuśśatī 
tatra proktaḥ yaḥ sphuṭaḥ upāyaḥ bahiryāgānuṣṭhānapūrvikā bhāvanā tāṃ 
kuryāditi tadarthaḥ-tantrarāje bahiryāgāṅgānāṃ bahutvāt yogābhyāsaṃ 
cikīrṣatāṃ tadanuṣṭhānapūrvakayogābhyāse kālābhāvena kāni heyāni kāni 
saṃgrāhyāṇi iti vicikitsāyāṃ yogamabhyasiṣoḥ 
yāvajjīvaprāptatantrarājoktayāvadaṅgakalāpānuṣṭhānaṃ na kartavyam kiṃ tu 
uttaracatuśśatyuktālpāṅgakalāpenaiva bahiryāgaṃ saṃpādya bhāvanāṃ 
kuryāt tāvataiva tasya paripūrtiriti kalpyata iti tantrarājānuyāyinaḥ 
uttaracatuśśatīdharmaprāptyabhiprāyakaḥ | naitāvatā nikhilaṃ tantraṃ 
yogābhyāsiparamiti brahmāpi sādhayituṃ śaknoti | tathā sati tantrarājavacane 
nityāhṛdayetyanena uttaracatuśśatyā eva yogābhyāsiparatvakathanāt 
pūrvacatuśśatīpāṭhavaiyyarthyāt | atastantrarājavacanena paripakvacittānāṃ 
yogābhyāsadakṣāṇām uttaracatuśśatyuktamekaṃ pātraṃ 
viśeṣārghyarūpaṃ samaṣṭimantreṇa pūjanam | aparipakvacittānāṃ 
yoginītantrānusāriṇāṃ pūrvottaracatuśśatīmekīkṛtya dvipātraprayoga iti 
setubandhābhiprāyatattvam | evameva sūtrānuyāyināmityalaṃ pallavitena ||

nāpi paramāpatpakṣo veti-tṛtīyaḥ pakṣaḥ | tathā hi tṛtīyapakṣasādhakaṃ 
yadvacanaṃ-

pratyakṣe yugmapātraṃ vai kṛtvā śāpamavāpnuyāt |
kvacinmayaivopadiṣṭaḥ paramāpattikālikaḥ ||

iti likhitaṃ tat kiṃ yopagurettaṃ śatena yātayāt 
itivacchāparūpāniṣṭasādhanatvaṃ dvipātre jñāpayati 
uttarārdhastaccheṣo'rthavādaḥ uta pūrvārdhenāniṣṭasādhanatvaṃ 
uttarārdhena āpattau abhyanujñā ceti dvyamucyate atha vā 
kevalamabhyanujñāpara eva vā sarvo'pi ślokaḥ | nādyaḥ uttarārdhasya 
arthavādarūpasya kevalastutau tātparyeṇāpattikāle 
abhyanujñāpakatvāsaṃbhavāt svoktapakṣāsiddheḥ | kiṃ ca-dvipātre 
aniṣṭasādhanatvaṃ pratipādayan dvipātre pravṛttaṃ puruṣaṃ nivartayati iti 
vācyam | tatra dvipātraprayoge pravṛttisādhanaṃ rāgo vā tantrāntaraṃ vā  
nādyaḥ tripātraṃ kartavyamiti |

p. 120)

vidhisattve aṅgalopādbhītasya śraddhāvataḥ dvipātre rāgo na kadā'pi 
saṃbhavati | na dvitīyaḥ vikalpo duṣparihāraḥ iti prāgeva dattottaratvāt | etena 
dvitīyapakṣaḥ pratyuktaḥ | tasmāt agatyā yasmiṃstantre idaṃ vacanaṃ paṭhitaṃ 
tatra tripātravidhiḥ syādeva | taccheṣaḥ pūrvārdho'rthavādaḥ | uttarārdhena 
tripātravidhitantrānuyāyināṃ paramāpattau 
svānyatantroktadvipātraprayogagrahaṇamabhyanujñātam |

anṛtaṃ na vadedvidvānanṛtaṃ dharmanāśanam |
prāṇasaṃśaya āpanne tvanṛtaṃ naiva duṣyati ||

itivat tṛtīyapakṣa eva sādhuḥ | ayamevārthaḥ spaṣṭīkṛto bodhāyanācāryaiḥ-

svaśāstre vidyamāne yaḥ paraśāstreṇa vartate |
bhrūṇahatyāsamaṃ tasya svaśāstramavamanyataḥ ||
ārṣeyasya svaśāstrasya pradeśāstadgu(paraśāstragu)ṇaissaha |
karmaṇāṃ pravicārā[ryā]rthamāpatsu ca samāpnuyāt || iti ||

asyodāharaṇaṃ bhavasvāminā darśitam | yathā tṛtīyasavane saumyaṃ tantraṃ 
tūṣṇīm iti śālikiśākhāyām darśapūrṇamāsavat sarvam iti śākhā'ntare | 
svasvaśākhibhiḥ yathoktamanuṣṭheyam | āpattau tu sarvairapi tūṣṇīmiti | itthaṃ 
ca tryā(dvyā)dipātrāṇāmāpatkāle abhyanujñāpakaṃ śāstraṃ katham 
ā(anā)pannaparamiti vyavasthāpayet | tasmānna kiṃcidetat | 
paraśurāmasūtrayoginītantrānusāribhiḥ niḥśaṅkaṃ dvipātrāsādanameva 
kartavyam ||

nanu tantrāntarasthadvipātradūṣakavacanānāṃ vidhiśeṣārthaparatvaṃ 
vyavasthāpya sūtrānusāribhiḥ dvipātraprayoga eva kāryaḥ tantrāntrarasparśo na 
kāryaḥ iti pratijñāyāṃ tantrānuktaṃ sūcitaṃ ca tathā'nyeṣvapi dūṣitam 
anyatantrāt grāhyam iti vidhyudāharaṇaṃ kimiti cet-śṛṇu | asyaiva 
vacanasyāvyavahitapūrvam 

kvacittantreṣu vistāraḥ kvacittantreṣu saṃgrahaḥ |
ekaṃ tantraṃ samāśritya samyakkarmakṛte tathā |
sarvaṃ tena kṛtaṃ rāma tacca śrīgurumārgataḥ ||

ityanena pūjā'ṅgānāṃ pūjā'naṅgabhūtānāṃ yāvatkarmaṇāṃ 
svatantrānuktānāṃ nivṛttau kathitāyāṃ tantrānuktaṃ sūcitaṃ ca ityanena 
keṣāṃcitpūjā'ṅgānāṃ grahaṇam tathā'nyeṣvapi dūṣitam ityanena 
pūjā'naṅgabhūtānāṃ keṣāṃcidakaraṇe atinindā śrūyate | yathā 
sahasranāmapāṭhaḥ | tasyānanuṣṭhāne-

p. 121)

akīrtayannidaṃ stotraṃ kathaṃ bhakto bhaviṣyati |
apaṭhannāmasāhasraṃ prīṇayedyo maheśvarīm ||
sacakṣuṣā vinā rūpaṃ paśyedeva vimūḍhadhīḥ |
rahasyanāmasāhasraṃ muktvā yaḥ siddhikāmukaḥ ||
sabhojanaṃ vinā nūnaṃ kṣunnivṛttimabhipsati |

ityādivacanaiḥ apāṭhe'pi nindā śrūyate | tattantrāntarasthamavaśyaṃ grāhyam 
| atraiva tripurārahasyavacanābhiprāyaḥ | śvatantreṇāviruddhaṃ tu yāvadanyat 
samācaret iti pūrvalikhitatantrāntaravacanasyāpyatraiva tātparyam na tu 
ekaprayogāṅgeṣu tantrāntarāśrayaṇam | prayogāṅgeṣu sūcitaṃ 
ākāṅkṣitaṃ ca muktvā tantrāntarasthasya īṣadapi praveśo nāstīti 
paramasiddhāntaḥ | ata eva śrībhāgavate'pi 

yastvicchayā kṛtaḥ puṃbhirābhāso hyāśramāt pṛthak |
svabhāvavihito dharmaḥ kasya neṣṭaḥ praśāntaye ||

iti imamevārthamāha | asya ślokasya svadharmānuṣṭhānānantaraṃ 
dharmabhūyastvārthamapi paradharmo nānuṣṭheyaḥ anupayogādityāha-
svabhāveti iti śrīdharasvābhyavataraṇam | etena śloko vyākhyātaḥ || 30 ||

tatpātrasthabindubhiḥ karaṇīyakṛtyamāha-

tadbindubhistriśaḥ śirasi gurupādukāmiṣṭvā 
[atroktaśrīgurupādukātantramantrajñānāyāgratanadvi pariśiṣṭasthāḥ 6-10/1 
6/11 6/14 6-16/1 6-16/5 6/18taḥ 6/20 ete viṣayā dṛśyāḥ |] ārdraṃ jvalati 
jyotirahamasmi jyotirjvalati brahmāhamasmi yo'hamasmi brahmāhamasmi ahamasmi 
brahmāhamasmi ahamevāhaṃ māṃ juhomi svāheti 
tadbindumātmanakuṇḍalinyāṃ juhuyāt || 31 ||

tadbindubhiḥ viśeṣārghyabindubhiḥ triśaḥ trivāraṃ śirasi dvādaśāntasthāne 
[dvādaśasthāne nāma brahmarandhre-ityarthaḥ-pāścātya-2 khaṇḍe-
śrīgaṇapatikrame-2 sūtrabhāṣye-69-patre-sphuṭīkṛtosyārthaḥ |] 
gurupādukāmiṣṭvā gurupādukoddeśena dravyadānaṃ kṛtvā ārdraṃ jvalati iti 
svāhā'ntena mantreṇa tadbinduṃ gurupādukāyāgaśeṣabindumityarthaḥ 
sarvanāmnāṃ sannihitaparatvena pādukādattaśeṣasyaiva sannihitatvāt tadīyaṃ 
śeṣamādāya japan yogaṃ samācaret iti yoginītantravacanācca | ātmanaḥ svasya 
kuṇḍalinyāṃ cidvahnau | kuṇḍalinīsvarūpamuktaṃ tantrāntare-

p. 122)

viśade karṇikāyāṃ ca dhyātvā'dhāre'tha lohite |
karṇikākulakuṇḍāntassārdhatrivalayākṛtim ||
prasuptasarpasadṛśīṃ bisatantutanīyasīm |
dhyātvā kuṇḍalinīśaktim................... || iti ||

juhuyāt ityanena asmin karmaṇi homabuddhiḥ dṛḍhā kāryā na tu pānabuddhiriti 
sūcitā | bindumityanena homadravyasyātyalpatvaṃ sūcitam | bindumiti dvitīyayā 
pratipattisaṃskāro'pi sūcitaḥ | gurupādukāyai dattaśeṣaṃ homena 
saṃskuryādityarthaḥ | tena śeṣābhāve na homaḥ ||

kuladravyasvīkāravidhisamarthanam 

nanu [ita ārabhyaitat-31-sūtrabhāṣyāntaṃ yāvat-surāgrahaṇakhaṇḍanaṃ | 
kvācitkaṃ tanmaṇḍanamapyabhyadhāyītyavagantavyam |] 
sakalaśrutismṛtipurāṇeṣu surāpānasya pañcamahāpātakeṣu [yathāha 
śrīyājñavalkyaḥ-brahmahā madyapaḥ steyī tathaiva gurutalpagaḥ | 
mahāpāpāni catvāri tatsaṃsargī ca pañcamaḥ | prā. a. 3 ślokaḥ 21
manurapi-brahmahatyā surāpānaṃ steyaṃ gurvaṅganāgamaḥ |
mahānti pātakānyāhuḥ saṃsargaścāpi taiḥ saha-a 11 ślokaḥ 54 |] 
pañcamahāpātakeṣu gaṇitatvāt kathaṃ tantroktaḥ dravyasevanaṃ sukhāya 
bhavitumarhati | evaṃ yeṣu tantreṣu dravyasevanaṃ vrihitaṃ teṣveva tantreṣu 
niṣedho bahulamupalabhyate | yathā kulārṇave-

surādarśanamātreṇa kuryāt sūryāvalokanam |
tatsamāghrāṇamātreṇa prāṇāyāmatrayaṃ caret ||
ājānubhyāṃ bhavet snānamānābhyupavasecchive |
ūrdhvaṃ nābhestrirātraṃ syānmadyasya sparśane vidhiḥ ||
surāpāne kāmakṛte jvalantīṃ tāṃ vinikṣipet | 
mukhe tayā vinirdagdhaḥ tataḥ śuddhimavāpnuyāt ||
madyapānajadoṣasya prāyaścittamitīritam || iti ||

tripurārṇave'pi-

kāmānmohādyadi surāṃ pibet sakṛdapi dvijaḥ |
vidvānapi ca saṃtyājyaḥ tantrajñairavicāritam || iti ||

devīyāmale'pi-

āghrāṇaṃ darśanaṃ caiva surāyāssaṃtyajedbudhaḥ || iti ||

p. 123)

darśanameva tyajet kimu pānatyāge iti tadarthaḥ | evaṃ anyatantravacanānyapi 
bahūni santi | granthavistarabhayānneha likhyante | tasmāt 
kuladravyasvīkāraśāstramaśraddheyamiti cet-na 
rāgaprāptasurāpānanivartakānyeva amūni vacanāni | kratvarthapravṛttiriṣṭaiva 
anyathā na brāhmaṇaṃ hanyāt iti niṣedhena brahmaṇe brāhmaṇamālabhate iti 
śruteraprāmāṇyāpatteḥ | ayamevārthaḥ spaṣṭamuktaḥ śrībhāgavate-

yadghrāṇabhakṣo vihitaḥ surāyāḥ tathā paśorālabhanaṃ na hiṃsā | 
evaṃ vyavāyaḥ prajayā na ratyai imaṃ viśuddhaṃ nu viduḥ svadharmam ||
ye tvanevaṃvidaḥ puṃsaḥ stabdhāssadabhimāninaḥ |
paśūn druhyanti visrabdhāḥ pretya khādanti te ca tān ||

iti granthen | tasmāt niravakāśaviśeṣadravyasvīkāravidheḥ kratvarthatvakalpanāt 
niṣedhasya ca kevalapuruṣārthatvena ekārthatvābhāvāt | ata 
evaitadabhiprāyasūcakameva kāmāditi tripurārṇave kulārṇave ca kāmakṛte iti 
padaṃ paṭhitam | evaṃ tantrāntare-

doṣo'nyatra varārohe yajñe doṣo na vidyate |
aśvamedhādiyajñeṣu vājihatyā yathā bhavet ||

iti sadṛṣṭāntamuktārthameva draḍhayati ||

atra tārābhaktisudhārṇave evaṃ ca vīrasyāpi brāhmaṇasya kṣīrameva anyasya 
tadapi na iti bhāvaśodhanaprakaraṇe uktvā evametadagre sthalāntare uktāyā eva 
pratijñāyā dṛḍhīkaraṇārthaṃ bahuvicāraḥ kṛto nṛsiṃhācāryaiḥ | tathā hi-

vīkṣaṇaprokṣaṇadhyānamantramudrāvibhūṣitam |
dravyaṃ tarpaṇayogyaṃ syāddevatāprītikārakam ||

tarpaṇamatra pānameva | idaṃ tu brāhmaṇetaraviṣayam brāhmaṇasya 
tadupādānaniṣedhāt || 

nanu-

brāhmaṇaistu sadā peyaṃ kṣatriyaistu raṇāgame |
vaiśyairdhanaprayoge ca śūdraistu na kadācana ||

iti kulārṇave 

sautrāmaṇyāṃ kulācāre brāhmaṇaḥ prapibet surām |

p. 124)

iti samayācāratantre 

satye kramāccatuvarṇaiḥ kṣīrājyamadhupiṣṭajaiḥ |
tretāyāṃ pūjitā devī ghṛtena sarvajātibhiḥ ||
madhubhiḥ sarvavarṇaistu pūjitā dvāpare yuge |
pūjanīyā kalau devī devalairāsavaiḥ śubhaiḥ ||

iti yāmale coktatvāt kathaṃ brāhmaṇasyānadhikāra iti cet-ucyate |

viprāḥ kṣoṇibhujā viśastaditare kṣīrājyamadhvāsavaiḥ iti laghustave 

varṇānukramabhedena dravyabhedā bhavanti vai iti jñānārṇave dravyeṇa 
sāttvikenaiva brāhmaṇaḥ pūjayecchivām iti tatraivoktam | tathā 
āsavabhedamuktvā 

evaṃ dadyāt kṣatriyo'pi paiṣṭīṃ tu na kadācana |
nārikelodakaṃ kāṃsye tāmre gavyaṃ tathā madhu ||
rājanyavaiśyayordānaṃ [-rdeyaṃ brāhmaṇasya-śrī.] na dvijasya kadācana |
evaṃ pradānamātreṇa hīnāyurbrāhmaṇo [hīno bhavati brāhmaṇaḥ-śrī.-evaṃ 
pāṭhāntare-vrā-ityasyagurutvācchandobhaṅgabhayamatra ca-
hīnāyūrityādipāṭhaḥ susādhuḥ (punarāvṛttikṛt-)] bhavet ||

iti mahākālasaṃhitāyām 

kṣīreṇa brāhmaṇaistarpyā ghṛtena nṛpavaṃśajaiḥ |
mākṣikairvaiśyavarṇaistu āsavaiḥ śūdrajātibhiḥ ||

iti bhairavītantre 

yatrāvaśyaṃ vinirdiṣṭaṃ madirādānapūjanam |
brāhmaṇastāmrapātre tu madhu madyaṃ prakalpayet ||

iti kulacūḍāmaṇau

brāhmaṇo madirāṃ dattvā [pītvā-śrī.] brāhmaṇyādeva hīyate |
svagātrarudhiraṃ dattvā svātmahatyāmavāpnuyāt ||

iti haṃsamāheśvaratantre kalidharmaprakaraṇe gṛhyapariśiṣṭe 
harināthopādhyāyaiḥ sautramiṣyāṃ surāgrahaṇaniṣedhasyoktatvāt 
brāhmaṇaistu sadā'peyā ityakārapraśleṣāt brāhmaṇasya sadā niṣedhaḥ | 
kṣatriyasya saṅgrāmakāle vikalasya saṅgrāmāsaṃbhavāt | vaiśyasya 
dhanaprayogakāle anyathā

p. 125)

vikaladhiyā viṃśatidāne kartavye śatādidānāpatteḥ | śūdrairnaiva kadācana 
apeyā tena sarvadaiva peyetyarthaḥ | evaṃ ca pūjanīyā kalau devi kevalairāsavaiḥ 
ityatra anuṣajyamānasarvavarṇaśabdaśca brāhmaṇetaraviṣaya ityavadhātavyam ||

atha-

kṣīraṃ vṛkṣasamudbhūtamājyaṃ valkalasaṃbhavam |
madhu puṣparasodbhūtam āsavaṃ taṇḍulodbhavam ||

iti bhairavītantre kṣīrādipadānāṃ āsavaviśeṣaparibhāṣaṇāt brāhmaṇasyāpi 
tatrādhikāraḥ pratīyate iti cet-atra pratibhāti | kṣīrādīnāṃ kathaṃ 
bhairavakalpamityatredaṃ vacanam | tena kṣīraṃ vṛkṣasamudbhūtaṃ 
vārkṣamaireyamityarthaḥ | evamagre'pi | anyathā kṣīravṛkṣapadādervaiparītyena 
prayogāpatteḥ anuvādamanuktvā tu na vidheyamudīrayet iti nyāyāt | 
taṇḍulodbhavastvodanaḥ | tena śūdrasyāpyodanasthāne āsavameva tena | 
pṛthagodanaṃ brāhmaṇādibhiḥ āsavaṃ ca na deyamityarthaḥ | likhitavacanāt 
āmaṃ śūdrahastena pakvānnaṃ pakvamucchiṣṭamucyate ityādismṛteśca ||

na ca-śukraśāpasya brāhmaṇaviṣayatvena surāyāṃ 
taduddhāravidhānānupapattiḥ iti vācyam śūdramātrasya sadā'dhikāre 
śāstrasiddhe śukraśāpavimocanasyādṛṣṭārthatvāt ||

kiṃ ca- aindryā gārhapatyamupatiṣṭhate ityādau liṅgāpekṣayā śruteriva 
śāpavimocanakalpyamaireyadānavidhānāpekṣayā brāhmaṇo madirāṃ dattvā 
ityādiniṣedhavidheḥ śrautasya balavattvaṃ yuktisāmyāt ityantena lekhena 
brāhmaṇetaraparamiti pratijñāṃ dṛḍhīcakruḥ nṛsiṃhapaṇḍitāḥ |

tadatīva mandam | tathā hi-dravyeṇa sāttvikeneti jñānārṇavavacanaṃ 
svasādhakatvena likhitam | tadatyantamapariśodhanamūlam | sāttvikadravyaṃ 
nāma vrīhyādivat (na) lokaprasiddhaṃ kiṃcidasti | ataḥ kiṃ tat sāttvikadravyam 
ityākāṅkṣāyāṃ prakṛtipratyayayoḥ vyākaraṇasmṛtivat śāstraikagamyā 
sāttvikapadaśaktiḥ | tacchāstraṃ tripurārṇave-

gauḍī mādhvī ca paiṣṭī ca trividhaṃ dravyamīritam |
aikṣavakṣaudrajātā'dyā gauḍī syāt sāttvikī smṛtā ||
madhūkakusumadrākṣātālavṛkṣādisaṃbhavā |
mādhvīti kīrtitā tajjñaiḥ rājasī sā bhavecchive ||
piṣṭataṇḍulajātā yā tāmasī pauṣṭikī smṛtā |
sāttvikī brāhmaṇe khyātā rājasī nṛpavaiśyayoḥ || iti ||

p. 126)

evaṃ sati śāstre brāhmaṇetaraparamiti pratijñā ajñānamūleti dhruvaṃ 
pratīmaḥ | tathā mahākālasaṃhitāsthaṃ jānīyāt nārikelodakaṃ kāṃsye iti | 
rājanyavaiśyakartṛkaprayoge mukhyadravyapratinidhiniyamaṃ vidhāya 
brāhmaṇakartṛke prayoge uktadravyaparisaṅkhyāṃ kṛtvā 
parisaṅkhyāśeṣatvena evaṃ pradānamātreṇa hīnāyurbrāhmaṇo bhavet iti 
nindayā arthavādarūpayā stauti | idaṃ vacanaṃ bhavatsādhakaṃ kathaṃ bhavet ||

na ca-kṣatriyādikartṛkatvenaiva brāhmaṇādikartukatvanivṛttiḥ yathā 
godhūmanivṛttirvrīhiniyamena tathā ca kathaṃ brāhmaṇakartṛkaprayoge tasya 
prāptiḥ tannivṛttyarthā parisaṅkhyā vā katham-iti vācyam dṛṣṭāntavaiṣamyāt | 
darśapūrṇamāsayāgaḥ dravyamantarā anupapannaḥ ityākṣepeṇa 
itaradravyādivat pakṣe vrīhiprāptau brīhaya eveti niyamyate | tāvatā 
darśapūrṇamāse dravyāntarākāṅkṣā virahādārthikī itaranivṛttiḥ | prakṛtau 
rājanyavaiśyakartṛke prayoge pratinidhiniyamena dravyākāṅkṣāyāḥ virahe'pi 
brāhmaṇakartṛke dravyākāṅkṣāsattvāt pakṣe asyāpi prāptau parisaṅkhyāyā 
yuktatvāt tasmāt anena pratijñāsiddhiḥ ṣaṇḍeneva putrotpattiḥ ||

yacca kṣīreṇa brāhmaṇaistarpyā iti bhairavītantravacanaṃ sādhakatvena likhitaṃ 
tadapi bālapratāraṇāmātraṃ bhairavītantra eva etadvacanasamīpe kṣīraṃ 
vṛkṣasamudbhūtam ityanena kṣīrādipadārthanirṇayāt | yattu kṣīraṃ 
vṛkṣasamudbhūtam ityasya kṣīraṃ vṛkṣasamudbhūtakāryakārītyarthaṃ kṛtvā 
vṛkṣasamudbhūtakāryaṃ tarpaṇaṃ kṣīre prasiddhe vidhīyata iti-tadaśuddham | 
vṛkṣasamudbhavādipadatrayasya kiṃ dravyasāmānyamarthaḥ kiṃ dravyaviśeṣaḥ 
| ādye vṛkṣasamudbhūtatvarūpaśakyārthapravṛttinimittarūpasya 
dravyatvāvacchinne bādhādviśeṣārthe śaktasya sāmānye lakṣaṇā | tathā sati 
śrūyamāṇaśakyārthatyāgaḥ vṛkṣasamudbhūtapadenaiva ājyādiṣu 
vidhānasambhave ekārthānāṃ tat phalasambhavādipadānāṃ vaiyyarthyaṃ ca | 
vṛkṣasamudbhavādipadaṃ dravyaviśeṣaparamiti dvitīyapakṣe dravyaviśeṣasya 
kāryaṃ kṣīre vidhīyate | tat kiṃ dṛṣṭaṃ vā kiṃ vā'dṛṣṭasādhanaṃ 
śāstrīyaṃ kāryaṃ vidhīyate | ādye vidhānavaiyyarthyaṃ lokata eva jñātuṃ 
śakyatvāt | dvitīye yathā khalevālī yūpo bhavati ityatra yūpe paśuṃ niyuñjīta 
ityanena śāstreṇa kṛtaṃ yatkāryaṃ tat khalevālyāṃ vidhīyate | tathā 
śāstrāntaraprāptaṃ vidhīyate uta śāstrāntareṇa aprāptaṃ vidhīyate | ādye 
kṣīraṃ vṛkṣasamudbhūtamityanenaiva vṛkṣasamudbhūtakāryasya 
kṣīratarpaṇāderlābhe kṣīreṇa brāhmaṇaistarpyeti śāstraṃ vyartham | na hi 
khalevālī yūpo bhavati iti procya khalevālyāṃ paśuṃ niyuñjīta iti pṛthaguktam 
aprāptakāryasya vidhānaṃ tadvat vandhyāputrāderapi dampatikāryatvena 
vidhānāpatteḥ | manmate tu kṣīreṇa brāhmaṇaistarpyeti 
tarpaṇasādhanadravyavidhiḥ kṣīrapadasya prasiddhārthaṃ bādhitvā 
arthaviśeṣatātparyagrāhakaṃ kṣīraṃ vṛkṣasamudbhūtam iti vacanamiti na 
kasyā'pi vaiyyarthyam | anyo'pi nānupapattigandhaḥ | yadyapi 
vidhāyakatvābhāvena 

p. 127)

vaiyyarthyaṃ kalpyam | tathā'pi yadāgneyamaṣṭākapālaṃ nirvapati saumyaṃ 
carum ityaṣṭau havīṃṣi cāturmāsye vidhāya punaḥ vaiśvadevena yajet iti 
samudāyasya vaiśvadeva iti saṅketaḥ kṛtaḥ | tena vasante vaiśvadevena yajeta 
ityatra yāgena viśvedevayāgasyaiva vasante prāptau ta bādhitvā navīnasaṅketena 
aṣṭānāṃ yāgānāṃ saṃpattiṃ kurvan sārthakaṃ tadvākyam ityuktaṃ 
jaiminitantre | tathā sārthakaṃ bhavitumarhati | 

na ca - svenaiva kṣīrapadamatyantarūḍhaṃ prayujya rūḍhiśaktiṃ parityaktuṃ 
vyākhyā'ntaraṃ kṛtam evaṃ na kutrāpi dṛṣṭam iti vācyam | kāśīkhaṇḍe-

arundhatīṃ dhruvaṃ caiva tathā saptarṣimaṇḍalam |
āsannamṛtyurno paśyet..................................... ||

iti prathamamuktvā arundhatī nāsikāgraṃ ityādinā svenaiva vyākhyātam | evaṃ 
śataśaḥ santi paraṃ tu prayojanābhāvāt adhikaṃ na likhitam ||

asmin vacane caturthacaraṇe āsavaṃ taṇḍulodbhavam ityatra taṇḍulodbhavamiti 
piṣṭodbhavasyāpi upalakṣakaṃ bṛhadvāmakeśvaratantre-

kṣīramājyaṃ madhu tathā hyāsavaṃ ca maheśvari |
vṛkṣatvakpuṣpapiṣṭotthaṃ kramāt jñeyaṃ vicakṣaṇaiḥ ||

ityatra paiṣṭe'pi āsavasaṅketasya kṛtatvāt | etena paramate daṇḍaprakṣepātmako 
hetuḥ kṣīravṛkṣapadādeḥ vaiparītyena prayogāpatteḥ iti tatsādhakatayā 
anuvādyamanuktveti lekhaḥ saḥ sarvo'pi parāhataḥ 
arthaviśeṣatātparyagrāhakatvena varṇanena atra 
uddeśyavidheyabhāvagandhasyāpyabhāvāt | ata eva nāmadheyapāde udbhidā 
yajeta ityatra nāmadheyasyāvidheyatayā na svataḥ dharme prāmāṇyam kiṃ tu 
ṛtvijāṃ prayogavidhismārakatayā tadvāreti sthitamākare ||

astu vā paraprītaye aśāstrīyaḥ vṛkṣasamudbhūtamuddiśya kṣīrasaṃjñā 
vidhīyate ityaṅgīkāraḥ | tathā'pi paraprakṣiptadaṇḍaḥ asmin mate asahyaḥ | 

yadyat prathamanirdiṣṭam iti vyāptisiddhamūlo hi daṇḍaprakṣepaḥ sa tu asiddhaḥ 
dadhnā juhoti ye yajamānāsta ṛtvijaḥ vāyavyaṃ svetamālabheta bhūtikāmaḥ 
ityādau śataśo vyabhicārāt | tarhyanuvādyamanuktveti prāmāṇikokteḥ kā 
gatiriti cet asati bādhake prathamanirdiṣṭamuddeśyaṃ prāyeṇa bhavatīti 
tasyābhiprāyaḥ | prakṛte kṣīramuddiśya vṛkṣasamudbhūtatvavidhāne 
vaiyyarthyameva bādhakam | idaṃ kathaṃ na jñātaṃ pareṇa | evam āsavaṃ 
taṇḍulodbhavam ityatra taṇḍulodbhavaśabdasya odanamarthaṃ bruvan 
tatsādhakatayā āmaṃ śūdrasya pakvānnam iti ca likhan bālānāmapyupahāsyo 
babhūva | etena laghustavaratnasya 

p. 128)

sādhakatvalekho dūrīkṛtaḥ kṣīrādīnāṃ sāṅketikaśadbānāṃ tatra 
gṛhītatvāt | yattu śukraśāpavimocanaliṅgāpekṣayā brāhmaṇo madirāṃ 
dattvā iti pratyakṣaśruteḥ prābalyamiti kathanaṃ tadapi tuccham | na hi brāhmaṇo 
madirāṃ dattvā brāhmaṇyādeva hīyate ityatra niṣedhārthe nañśrutiḥ 
vidhipratyayarūpā'sti | kiṃ tu madirādānanindayā kalpyo vidhiḥ | itthaṃ ca tasya 
pratyakṣaśrutitvaṃ bruvan vidvatsamāje kimuttaraṃ vadediti na vidmaḥ | itthaṃ ca 
śukraśāpavimocanasahitasya sautrāmaṇyāṃ kulācāre brāhmaṇaḥ prapibet 
surām iti kulācārasthapratyakṣasvalikhitavacanasya gatim akalpayitvā mukhena 
brāhmaṇetaraparamiti pratijñāmātreṇa pareṣāṃ [sarveṣāṃ-śrī0] 
mohamutpādayan tāntrikabahiṣkṛto mantavyaḥ ||

itthaṃ ca vacanānāmiyaṃ vyavasthā dravyeṇa sāttvikena ityatra kṣīreṇa 
brāhmaṇaistarpyā ityasya laghustavasthamahākālasaṃhitāvacanasya vyavasthā 
darśitā | tathā ca yacca bhairavītantravacanaṃ kṣīreṇa brāhmaṇaistarpyā iti 
yacca bṛhadvāmakeśvaratantre 

krameṇa brāhmaṇādyaistu kṣīrājyamākṣikāsavaiḥ [madhupiṣṭajaiḥ-śrī0] iti 

yacca laghustavavacanaṃ teṣāṃ sāmānyarūpatvāt yāmalavacane śatye 
kramāccaturvarṇaiḥ kṣīrājyamadhupiṣṭajaiḥ ityatropasaṃhāraḥ | itthaṃ ca 
kṣīrādīnāṃ bhairavyāditantraiḥ aviśeṣeṇa sadā prāptau kālaviśeṣe 
kartṛviśeṣe kṣīrādidravyaviśeṣa iti saṅkocasampādakaṃ yāmalavacanam | yattu 
jñānārṇavasthaṃ dravyeṇa sāttvikenaiva brāhmaṇaḥ pūjayecchivām iti 
aikṣavakṣaudrajātāyāḥ sāttvika dravyasya kṣīrapadavācyatayā yāmalavacanena 
saṅkocāsambhavāt yugacatuṣṭaye prāpnuvadbrāhmaṇakartṛkaprayoge vikalpaḥ 
prāpnoti | evaṃ rājasī nṛpavaiśyayoḥ ityanena kṣatriyavaiśyakartṛkaprayoge 

madhūkakusumadrākṣātālavṛkṣādisambhavā |
mādhvīti kīrtitā tajjñaiḥ rājasī [rājasī sā bhavecchive iti caturthaḥ 
pādotrāvadheyaḥ |] ||

iti vivaraṇena uktadravyaprakṛtikadravyasya sadā prāptau uktānāmamīṣāṃ 
saṅghāte kṣīrādisaṃjñāyā apravṛtteḥ sambhavatkṣatriyasya 
valkalaprakṛtikadravyasya kṛtayuge prāptau etad [?]drākṣādiprakṛtikasyāpi 
prāptau vikalpaḥ | śūdrasya vacanadvaye ekarūpatvāt kṛte na vikalpaḥ | evaṃ 
tretā'diṣu yathāyathaṃ svayamūhyam | kaliyuge brāhmaṇasya 
jñānārṇavatripurārṇavavacanābhyāṃ aikṣavamadhuprakṛtikaṃ prāptaṃ 
pūjanīyā kalau sarvavarṇaiḥ kevalamāsavaiḥ iti | evaṃ sati-

kṛte tu śūdraiḥ saṃpūjyā pratyakṣairāsavaiḥ priye |
tretāyāṃ vaiśyaśūdrābhyāṃ nṛpādyaiḥ dvāpare yuge |
kalau yuge mahādevi brāhmaṇādyaiḥ prapūjitā ||

p. 129)

iti rahasyārṇavavacanaṃ yadyupatiṣṭhate tadā kṛtetaravacanaiḥ dravyetaraviśeṣaḥ 
sarvavarṇeṣu prāptaḥ rahasyārṇavavacanena śūdrātirikte parisaṅkhyā'pi 
prāptā tathā sati kṛte traivarṇike vikalpaḥ pratyakṣasya dravyasya | yadvā-
rahasyārṇave'pi kṛtayugasambandhiśūdrakartṛkaprayoge pratyakṣāsavaṃ 
taṇḍulaprakṛtikaṃ vidhīyate | tena tantrāntareṇa śūdrasya āsavaprāptau 
vaiyyarthyabhiyā parisaṅkhyātvakalpanam aśraddheyam | tathā sati 
brāhmaṇādikartṛkaprayoge dravyasya ākāṅkṣitatvāt anyasmāt tantrāt 
kṣīrādikaṃ grāhyam | na vikalpaḥ | evameva tretāyāṃ rahasyārṇavavacanaṃ 
śūdravaiśyayorāsavaṃ vidadhāti | tathā sati vaiśyasya anena āsavaṃ prāptam | 
yāmalavacanena dhṛtaṃ prāptam | atra vikalpaḥ | evaṃ dvāpare 
vaiśyakṣatriyayoḥ āsavamadhuvikalpaḥ uktavacanadvayena | kaliyuge tu ubhayoḥ 
ekarūpatayā virodhābhāvāt avicāra eva | yuktaścāyameva pakṣaḥ na 
parisaṅkhyāpakṣaḥ | itthaṃ ca yatrāvaśyaṃ vinirdiṣṭam iti 
kulacūḍāmaṇivacanaṃ tasmin mukhyālābhe iti pūraṇīyam | mukhyālābhe 
brāhmaṇena tatsthāne tāmrapātre madhu yojayet iti tadarthaḥ | evaṃ sati tāmre 
gavyaṃ tathā madhu | rājanyavaiśyayorevaṃ na dvijasya kadācana iti 
mahākālasaṃhitāvacanena virudhyate | tathā tulyabalatvādvikalpo na parihāryaḥ 
paramate'pi ||

yadapi haṃsamāheśvaratantravacanaṃ [haṃsapārameśvara-ba 1.] brāhmaṇo 
madirāṃ dattvā brāhmaṇyādeva hīyate iti tat yadi tattantre kṣatriyādīnāṃ 
kuladravyavidhisamīpe syāt tarhi taccheṣo'rthavādaḥ apaśavo vā anye go 
aśvebhyaḥ itivat | yadi tatsamīpe na syāt tarhi ajitendriyabrāhmaṇaparam tasya 
dravyadānaniṣedhasyāgre vakṣyamāṇatvāt | yacca kulārṇavavacanam 
brāhmaṇaistu sadā'peyam iti tatra akārapraśleṣaṃ kṛtvā yo'yaṃ 
brāhmaṇānāṃ niṣedhaḥ kṛtaḥ sapumarthapara iti parābhiprāyaḥ | kṣatriyasya 
saṅgrāmakāle vikalasya saṅgrāmāsambhavāt ityādiniṣedhahetulekhāt | sa 
cāsmākamiṣṭa eva | 

kratvarthātiriktadravyasvīkāro brāhmaṇasya nāstīti vayamapi brūmaḥ | yaśca 
harināthoktaḥ sautrāmaṇyāṃ kalau surāgrahaniṣedhaḥ so'pyasmākamanumataḥ 
| na tāvatā kulācāre'pi niṣedhaḥ sambhavati | 
kaliyugasambandhisautrāmaṇigrahatvaṃ surāniṣedhoddeśyatā'vacchedakaṃ 
tadanākrāntatvāt kulācārasya kaimutikanyāyapraveśe atiprasaṅgāt | tasmāt 
paroktānāṃ brāhmaṇaviṣaye bādhakānāṃ gandhasyāpyabhāvena 
sādhakasahasrasya darśitatvena tantraprāmāṇyamaṅgīkurvataḥ 
brāhmaṇādikartṛkapūjāyāṃ prathamādaraḥ śāstraprāptaḥ | sa tu 
brāhmaṇā'pi tyaktumaśakyaḥ | itthaṃ ca-

vinā dravyādhivāsena na smarenna japet priye |
ye smaranti mahādevi teṣāṃ duḥkhaṃ pade pade ||
nāsavena vinā mantraṃ na mantreṇa vinā'savam ||

p. 130)

iti kulārṇave 

vinā'lipiśitābhyāṃ ca pūjanaṃ niṣphalaṃ bhavet |

iti samayācāre 

vinā hetukamāsvādya kṣobhayukto maheśvari |
na pūjāṃ na japaṃ kuryānna dhyānaṃ na ca cintanam ||

iti bhāvacūḍāmaṇau 

vinā'lipiśitābhyāṃ ca yaḥ kuryāt pūjanaṃ mama |
duḥkhaṃ sandhākaro bhūtvā yoginīnāṃ paśurbhavet ||

iti kālikāpurāṇe

yaḥ kuryādādimadravyavihīnaṃ tava pūjanam |
tava krodhena dagdhaḥ san bhasmībhavati nānyathā ||

iti samayāṅkamātṛkāyāṃ sthitam-īdṛśāni vacanānyanugṛhītāni bhavanti | 
evaṃ ca brāhmaṇetaraparamityantamaśuddhamiti akṛtrimayā svamatyā 
vicāryamāṇe pratibhāti | ito'dhikaṃ nirmatsarāḥ paṇḍitāḥ vicārayantu | 
imāṃ vijñāya sudhiyā madanti iti 
tripuropaniṣatsaptamamantrabhāṣye'pyevameva sthitam ||

yattu saubhāgyānandasandohe asmadvyavasthāpitārthameva pratijñāya 
vaidikamantrairabhimantraṇasya vihitatvāt śūdrapūjāparatve tatra 
tasyānavakāśādvidheranavakāśāpattihetunā brāhmaṇādhikāraḥ sādhitaḥ sa 
tu atiśithilaḥ | varṣāsu rathakāra ādadhīta ityatra rūḍhiśaktyā yogaṃ bādhitvā 
saṅkarajāterādhānādhikārasiddhau tadanantaraṃ tadupayuktavedādhyayanamapi 
kalpyata iti ṣāṣṭhanyāyena śūdrasya yuktyā adhikārasiddhau vedamantrapāṭhe 
yāvadupayukte adhikārasyānivāryatvena anena hetunā svepsitāsiddheḥ ||

etāvatparyantaṃ brāhmaṇe adhikāravyavasthā kṛtā | 
vyavasthito'pyayamadhikāro na sarvasya kiṃ jitendriyasya kāmādirahitasyaiva | ata 
eva paramānandatantre-

ayaṃ tu paramaḥ kaulamārgaḥ samyaṅmaheśvari |
asidhārāvratasamo manonigrahahetukaḥ ||
sthiracittasya sulabhaḥ saphalastūrṇasiddhidaḥ |
anyasya viphalo duḥkhahetuḥ syāt parameśvari || iti ||

p. 131)

tripurārṇave'pi-

ayaṃ sarvottamo dharmaḥ śivoktaḥ sukhasiddhidaḥ |
jitendriyasya sulabho nānyasyānantajanmabhiḥ ||
yadūrdhvaretasāṃ sarvatyāgināmaniketinām |
kṣaṇena smṛtamātreṇa mohamutpādayatyalam ||
tadevātra hi saṃsiddhau kāraṇaṃ sarvamīritam |
ito madyamito māṃsaṃ bhakṣyamuccāvacaṃ tathā ||
taruṇyaścāruveṣāḍhyā madaghurṇitalocanāḥ |
tatra saṃyatacittatvaṃ sarvathā hyatiduṣkaram ||
bhaktiśraddhāvihīnasya kathaṃ syādetadīśvari || iti ||

bhāvacūḍāmaṇau-

tantrāṇāmatigūḍhatvāttadbhāvo'pyatigopitaḥ |
brāhmaṇo vedaśāstrārthatattvajño buddhimān vaśī ||
gūḍhatantrārthabhāvasya nirmanthyoddharaṇakṣamaḥ |
kaulamārge'dhikārī syāditaro duḥkhabhāk bhavet || iti ||

kulārṇave-

ahobhuktaṃ tu yanmadyaṃ mohayet tridaśānapi |
tanmaireyaṃ śivaṃ pītvā yo na vikriyate naraḥ ||
japan śivaparo bhūtvā sa muktaḥ sa ca kaulikaḥ || iti ||

bhagavatā paraśurāmeṇāpi kaulācāre mukhyadharmatvena 
kāmakrodhalobhamohamadamātsaryāvihitahiṃsāsteyalokaviruddhalokavidviṣṭa-
varjanam" [idaṃ śrībhagavaduktaṃ sūtraṃ pāścātyaikakhaṇḍe 33 patre-19-
saṃkhyākam |] iti pratipāditam | tena yathā ājyāvekṣaṇādyaṅgānusāreṇa 
cakṣuṣmata eva darśapūrṇamāsayoradhikāraḥ nāndhānāṃ tathā 
kāmakrodhādivarjanādyaṅgānusāreṇa jitendriyasyaiva adhikāro nānyasyeti 
sūtrakṛdabhiprāyaḥ | evamanyeṣvapi tantreṣu bahūni vacanānyupalabhyante | tāni 
anatiprayojanatvāt granthavistarabhayācca na likhitāni ||

samprati idānīṃtanā ajitendriyāḥ capalajihvāḥ śiśnodaraparāyaṇāḥ 
rāmāndhatayā āropitakaulikatākāḥ kevaladravyamātralolupāḥ 
likhitavacanānyanādṛtya svādhikāramavicāryaiva svābhiprāyasādhanāni 
pītvā pītvā punaḥ pītvā iti āgalāntaṃ pibet dravyam 
ityādikulārṇavavacanānyeva puraskṛtya tadabhiprāyamajānanto jānanto vā 
dhūrtāḥ santaḥ yathecchā'cāraṃ 

p. 132)

kurvanti | ihāmutra na kutrāpi śarma labhante | pratyuta 
mahāpātakajanitayātanāṃ śrīdharmarājaśāsanāt labhanta eva | nātra 
sandehaḥ | tādṛśāḥ patitāḥ tantragoṣṭhīṣu na smartavyāḥ | ata 
evaitādṛśakaulikānāmupahāso'pi vistareṇa kṛtaḥ prabodhacandrodaye | tasmāt 
jitendriyāṇāṃ bhaktiśraddhāvatāṃ viduṣām ārambhe 
pratipāditabhaktibhūmikāmārūḍhānāmeva atrādhikāraḥ anyeṣāṃ 
patanāyaiva ityalaṃ vistareṇa | uktādhikāribhinnānāṃ viṣṇvādyupāsanaṃ 
kevalavaidikamārgeṇeti tattvam ||

dakṣiṇavāmācāravivekaḥ 

ajitendriyaiḥ kulamārgaṃ praviśya kevalodakādinā pūjā kāryā | ayaṃ dakṣiṇo 
mārgaḥ | jitendriyaiḥ proktadravyeṇa saparyā'nuṣṭheyā | ayaṃ vāmācāra iti 
kaścit | tattuccham vāmācārapadārthasyaiva tenājñātatvāt | tathā ca 
trikūṭārahasye-

vāmācāraṃ pravakṣyāmi śrīvidyāsādhanaṃ priye |
yaṃ vidhāya kalau śīghraṃ māntrikaḥ siddhibhāk bhavet ||
mālā nṛdantasaṃbhūtā pātraṃ mānuṣamuṇḍakam |
āsanaṃ siṃhacarmādi kaṅkaṇaṃ strīkacodbhavam ||

ityādyupakramya vistareṇa varṇitam | tanmadhye mukhyadravyanāmāpi nāsti | 
tadvistarastu savyāpasavyamārgasthā iti lalitānāmavyākhyānāvasare 
asmatparameṣṭhigurubhiḥ vistareṇa prapañcitaḥ | viśeṣajijñāsubhiḥ 
tato'vagantavyam | tathā kālikāpurāṇādapi | granthavistarabhayāneha tanomi ||

ajitendriyasya kaulamārge anadhikāraḥ

yadapi paramānandatantraṭippaṇyāṃ ajitendriyāṇāṃ gandhodakena 
pūjanamuktam tadasat mukhyālābhe cānukalpo nānyathā tu kadācana iti 
paramānandatantre viṃśollāsavacanavirodhāt mukhye'nadhikṛtasya 
pratinidhāvadhikārasya śaśaviṣāṇatulyatvāt | tasmādajitendriyāṇām 
āpātataḥ upāsanecchāyām anyamārgeṇa anyadevatopāsanaṃ kṛtvā tena 
paripakvāntaḥ karaṇaṃ dṛḍhaṃ viditvā paścāt kaulamāśrayet | taduktaṃ 
kulasāre-

anyāsāṃ devatānāṃ tu bhūyo bhūyo niṣevaṇāt |
paripakvamanāḥ kaule labdhaprāmāṇyako naraḥ | 
bāhyendriyāṇi saṃyamya praviśedatra netaraḥ || iti ||

brahmāṇḍapurāṇe'pi-

yasyānyadevatānāmakīrtanaṃ janmakoṭīṣu |
tasyaiva bhavati śraddhā śrīdevīnāmakīrtane |

p. 133)

carame janmani yathā śrīvidyopāsako bhavet |
nāmasāhasrapāṭhaśca tathā caramajanmani || iti ||

yāmale'pi-

śrutismṛtiproktakarmānuṣṭhānādbahujanmasu |
śodhitaṃ ca mano jñātvā śrīvidyopāsako bhavet || iti ||

pheṭkārītantre'pi-

sarvathā gopanīyeyaṃ vidyā syādajitendriye |
tena vīryavatī vidyā na vidyā syāt prakāśataḥ ||
kulapuṣpaṃ kuladravyaṃ kulapūjāṃ kulaṃ japam |
nedṛśānāṃ pravaktavyaṃ yadīcchet priyamātmanaḥ [siddhi-śrī0] || iti ||

ajitendriye pravacanamapi niṣidhyate | kimu vaktavyaṃ svīkāre | 
tasmādajitendriyasya kaulamārge nāstyadhikāra ityalamativistareṇa || 31 ||

etadarghyaśodhanamiti śivam || 31 ||

|| iti... kalpasūtre śrīkramo nāma tṛtīyaḥ khaṇḍaḥ ||

etat sāmānyārghyaśodhanottaraṃ tajjalena iti maṇḍalādikaraṇamuktam 
tadārabhya kuṇḍalinyāṃ juhuyāt ityantaṃ karma arghyaśodhanam 
arghyasaṃskāraḥ | yadyapi pūrvoktasūtre karmakalāpavidhānādeva 
arghyasaṃskāra iti jñātuṃ śakyate tathā'pi 
śāpavimocanādikatipayasaṃskāraḥ [saṃskārān iti pāṭha ucitaḥ pratibhāti | 
|| sūtrasya punarāvṛttau śodhyaṃ sūcayitavyakam ||
|| pariśiṣṭa sthalaṃ caiva pūrṇamādyā prāsādataḥ || (iti tṛtīyaḥ khaṇḍaḥ-) 
śrīḥ- ||] pātrāntarāṇi ca bhrāntyā kecana svīkuryuḥ tanmābhūta ityetadarthaṃ 
paraśurāmaḥ paramakāruṇikaḥ bhrāntinirāsāya idaṃ sūtraṃ praṇināya | etat 
uktaṃ yat tāvadeva śodhanaṃ nānyadityarthaḥ | śiva mityanena 
arghyaprakaraṇasamāptiḥ sūcitā ||

viśeṣārghyaśodhane nibandhe maṇḍalapūjāyāṃ vidyayā madhyapūjanaṃ 
sūtre uktaṃ tattyaktam | anuktaṃ turīyasvaralekhanaṃ hrīṃ mahālakṣmīśvarīti 
mantraṃ sudhādevīpūjanādi gālinyā puṣpaṃ dattvetyantam anuktaṃ 
saṃgṛhītam | atra pramāṇābhāvāt kevalatadbuddhyā racitamasaṅgrāhyam || 31 ||

iti ... kalpasūtravṛttau śrīkramo nāma tṛtīyaḥ khaṇḍaḥ ||





caturthaḥ khaṇḍaḥ-lalitākramaḥ

śrīcakre paracityāvāhanam

hṛdi sthitāyā devatāyāḥ śrīcakre āvāhanaprakāraṃ darśayitumupakramate-

atha hṛccakrasthitāmantassuṣumṇāpadmāṭavīnirbhedanakuśalāṃ nirasta 
mohatimirāṃ śivadīpadīptimādyāṃ saṃvidaṃ vahannāsāpuṭena nirgamayya 
līlā'kalitavapuṣaṃ tāṃ trikhaṇḍamudrāśikhaṇḍe [etad 
trikhaṇḍāmudroddhāraḥ dvi. pa. śi. 15/8-11 viṣaye dṛśyaḥ |] kusumāñjalau 
haste samānīya || 1 ||

atheti kramaviśeṣadyotakam atha jihvāyā atha vakṣasaḥ itivat | yadvā-
pūrvaprakaraṇavicchedadyotakam | hṛccakram anāhataṃ tadeva dahramityapi 
vyavahriyate | tatra sthitāṃ | śāstre devatānivāsasthānaṃ tadeva prasiddham | 
tathā ca śrutiḥ- tatrāpi dahraṃ gaganaṃ viśokastasmin yadantastadupāsitavyam iti 
| skāndapurāṇe'pi hṛtpuṇḍarīkāntarasanniviṣṭam iti | ato devatāyā 
nivāsasthānaṃ hṛccakram | tatra sthitāyā bāhyopacārapūjanaṃ na sambhavati | 
ataḥ tatra sthānādbahirānayanārthaṃ sārvakālikaṃ sthānaṃ jñāpayitumidaṃ 
viśeṣaṇaṃ jñeyam | suṣumṇā'pi 
mūlādhārādibrahmarandhrasthasaroruhāntānāṃ kamalānāṃ 
gumphanādhārabhūtadaṇḍākṛtireko nāḍīviśeṣaḥ | taduktaṃ viṣṇupurāṇe-

mūlādidehacakrāṇāmādhārā'sau prakīrtitā |
yā suṣumṇeti sarvatra gīyate paramarṣibhiḥ ||

iti | tasyāṃ yāni padmāni viśuddhyādīni teṣāṃ aṭavī durgamaṃ vartma tasya 
nirbhedanaṃ gamanāgamanānukūlavartmasaṃpādanaṃ tadviṣaye kuśalām | 
anena viśeṣaṇena hṛdayāt śrīcakrādau āgamane pūjā'nantaraṃ punargamane 
prayāsābhāvaḥ sūcitaḥ | nirasteti nirastaḥ dūrīkutaḥ moho'jñānaṃ tadeva 
timiraṃ yayā tām | etadviśeṣaṇārthaṃ dṛḍhīkartuṃ viśeṣaṇāntaramāha-
śiveti | śivātmako yo dīpaḥ tasya dīptiṃ prakāśarūpām | etena 
prakāśarūpatvakathanena pūrvaviśeṣaṇena pratipāditaṃ 
ajñānatimiranāśanaṃ sūpapādamiti dhvanitam | kiṃ ca yathā 
dīpaprabhayoravinābhāvasambandhaḥ evaṃ śivaśaktyorapyavinābhāvaḥ 
sūcitaḥ | ayamevārthaḥ spaṣṭamukto brahmāṇḍapurāṇe-

trikoṇarūpiṇī śaktiḥ bindurūpaḥ paraḥ śivaḥ |
avinābhāvasambandhaḥ tasmādbindutrikoṇayoḥ || iti ||

p. 135)

śrīdevībhāgavate'pi-

yasmin dharmiṇi yo dharmo'vinābhūtaśca tiṣṭhati |
sa dharmī śivarūpaḥ syāddharmaśśaktisvarūpadhṛk || iti ||

anayorvastunoraupādhiko bhedo na vāstava iti tattvanirūpaṇe prapañcitaṃ 
prāgeva [prāgeva nāma-anugate 3 khaṇḍe-92 patre-śrīkrame-9 sūtrabhāṣye-
ityarthaḥ |] | ādyāṃ saṃvidaṃ aparicchinnasaṃvidaṃ vahan nāsāpuṭena yena 
nāsāpuṭena aprayatnena śvāso nirgacchati tena mārgeṇa nirgamayya yathā 
nirgamanaṃ bhavet tadanukūlavyāpāraṃ kuryāt | atra tādṛśo vyāpāraḥ 
hṛdayasthānāt uktamārgeṇa nirgamanabhāvanameva | tadanantaravyāpāraṃ 
vidhatte līleti | līlayā svecchāmātreṇa ākalitaṃ svīkṛtaṃ vapuḥ 
dhyānaślokoktaṃ yayā | etena itaraśarīravat garbhavāsena vinā 
bhaktānugrahāya svīkṛtamanoharavapuṣṭvaṃ sūcitam | uktaṃ ca gītāyām-

yadā yadā hi dharmasya glānirbhavati bhārata |
abhyutthānamadharmasya tadā'tmānaṃ sṛjāmyaham || iti [śrī bha gī. a. 4 
ślokaḥ-7 |] ||

mārkaṇḍeyapurāṇe'pi-

evaṃ yadā yadā bādhā dānavotthā bhaviṣyati | 
tadā tadā'vatīryāhaṃ kariṣyāmyarisaṃkṣayam || iti [śrī saptaśatī-a. 12 
antimaḥ ślokaḥ |] ||

tām aṅgīkṛtavapuṣaṃ trikhaṇḍamudrā [iyaṃ trikhaṇḍā mudrā ddi. pa. śi. 
15/8-11 viṣaye dṛśyā |] trikhaṇḍā trīn janmamṛtyujarāḥ yadvā 
sattvarajastamoguṇān khaṇḍayatīti trikhaṇḍā kevalamokṣapradetyarthaḥ | yadvā 
trīṇi khaṇḍāni kalāḥ icchājñānakriyā'tmikāḥ tatsvarūpā trikhaṇḍā | 
taduktaṃ yoginītantre-

mudrā'khyā sā yadā saṃvidambikā trikalāmayī | 
trikhaṇḍā rūpamāpannā sadā sannidhikāriṇī |
sarvasya cakrarājasya vyāpikā parikīrtitā || iti ||

mudrāśadbārthaśca viśvasya modanāt drāvaṇācca mudrā | taduktaṃ 
yoginītantre-

cidātmabhittau viśvasya prakāśāmarśane yadā |
karoti svecchayā pūrṇavicikīrṣāsamanvitā ||
kriyāśaktistu viśvasya modanād drāvaṇāttathā ||
mudreti kathitā devī..................... || iti ||

p. 136)

asyārthaḥ yadā cicchaktiḥ svātmābhinnāyāṃ bhittau svecchayā 
īkṣaṇānantaraṃ vikārān pūrṇānicchantī prakāśāmarśane karoti | ayaṃ 
bhāvaḥ jagataḥ ṣaḍbhāvavikārāḥ asti jāyate vardhate vipariṇamate apakṣīyate 
naśyati iti | teṣu dvitīyo vikāraḥ prakāśaḥ sphuṭībhāva iti tallakṣaṇāt | tṛtīyo 
vikāraḥ āmarśanam idaṃ tayā hṛdayaṅgamībhāva iti tallakṣaṇāt | itthaṃ ca 
tripurasundaryāḥ svāntassthitasṛṣṭisattāparyālocanottaraṃ viśvasya 
dvitīyādivikāraviṣayiṇī icchotpadyate | seyaṃ vicikīrṣā | tato viśvasya 
utpattyabhivṛddhikrameṇa karoti | te evaite pūrvoktaprakāśavimarśane 
īdṛśecchākṛtiviśiṣṭacit kriyāśaktirityucyate | iyaṃ kriyāśaktiḥ 
tripurasundaryā kriyamāṇotpattyabhivṛddhī anumodate drāvayati ceti mudrā sā | 
anumodanaṃ nāma svabhinnakartṛkakriyānukūlyam | drāvaṇaṃ nāma ghanasya 
saṅkucitasya praśithilāvayavatā'pādanātmakaḥ prasaraḥ | īdṛśakriyāśaktireva 
svavṛttimudrātvasāmānādhikaraṇyena īkṣaṇādermelanena trikalāmayī 
trikhaṇḍā bhavati iti paramarahasyārthaḥ | ataḥ sarvaśreṣṭheyaṃ vyāpikā 
mudreti tasyā āvāhane viniyogaḥ kṛtaḥ | etādṛśī yā mudrā tasyā 
adṛṣṭasvarūpaṃ pratipāditam | dṛṣṭasvarūpaṃ tu aṅgulīpragrathanarūpaṃ 
nānāvidhaṃ tantrabhedena dṛśyate | asmin na dṛśyate | ato 
gurusampradāyāvagataṃ tantrārthaṃ caikīkṛtyāgre spaṣṭīkrīyate | īdṛśaṃ yat 
trikhaṇḍātmakaṃ bāhyarūpaṃ tena śikhaṇḍitaḥ grathitaḥ kusumayuktaḥ 
añjaliḥ yasmin tasmin haste samānīya gṛhītvā || 1 ||

māyālakṣmī parā uccārya devīnāma cāmṛtacaitanyamūrtiṃ kalpayāmi 
namaḥ iti kalpayitvā || 2 || 

māyā hrīṃ śrīṃ iti lakṣmīśabdārthaḥ parā sauḥ | etadviṣaye pramāṇāni 
pūrvameva darśitāni | evaṃ bījatrayamuccārya devīnāma 
śakticakraikanāyikāyāḥ lalitāyāḥ iti ṣaṣṭhyantaṃ yogyatvāt | tato 
namo'ntamavikṛtaṃ paṭhet | evaṃ ca ādau sādhāraṇaparibhāṣāprāptā tritārī 
aiṃ hrīṃ śrīṃ hrīṃ śrīṃ sauḥ śakticakraikanāyikāyāḥ 
amṛtacaitanyamūrtiṃ kalpayāmi namaḥ iti trayastriṃśadvarṇo mantaḥ | anena 
paradevatāyā mūrtiṃ kalpayitvā bhāvayitvā ||

atra pūrvasūtre līlā'kalitavapuṣaḥ haste āgatāyāḥ punarmūrtikalpane 
vaiyyarthyādataḥ prabalenārthakrameṇa pāṭhakramabādhaḥ | tathā cāyaṃ 
kramaḥ prathamaṃ kevalacitomūrtikalpanamanena mantreṇa tato mūrteḥ 
kalpitāyāḥ nāsāpuṭamārgeṇa nirgamanaṃ tato haste kusumagarbhe'ñjalau 
samānayanamitivivekaḥ || 2 ||

hasarayujaṃ vācaṃ hasayuktāṃ kalarīṃ hasaracaturdaśaṣoḍaśānapyuccārya

mahāpadmavanāntaḥsthe kāraṇānandavigrahe |
sarvabhūtahite mātarehyehi parameśvari ||

iti baindavacakre paracitimāvāhya || 3 ||

p. 137)

pūrvaṃ nyāsaprakaraṇe uktena samudāyagrahaṇa iti nyāyena hasetyādiṣu 
kevalavyañjanamātragrahaṇaṃ sampradāyāt | haśca saśca raśca tairyutaṃ 
vācaṃ hsraiṃ iti | haśca saśca ābhyāṃ yukto'yaṃ 
kakāralakārarephekārabindusamudāyaḥ hsklrīṃ iti | tathā haśca saśca raśca 
caturdaśa aukāraḥ saḥ ca ṣoḍaśo visargaḥ saḥ ca hasaracaturdaśaṣoḍaśāḥ 
hsrauḥ iti etānuccārya parameśvarītyantaṃ yathāśrutaṃ paṭhitvā binducakre 
paracitimāvāhayet | mantrasvarūpaṃ tu prathamaṃ tritārī hasraiṃ hsklrīṃ 
hsrauḥ-

mahāpadmavanāntaḥsthe kāraṇānandavigrahe |
sarvabhūtahite mātarehyehi parameśvari ||

ityaṣṭatriṃśadvarṇo mantraḥ | mahāpadmavanasya yo'ntaḥ pradeśaḥ tatrasthe | 
mahāpadmasvarūpamuktaṃ brahmāṇḍapurāṇe-

padmāṭavīsthalaṃ vakṣye sāvadhāno mune śṛṇu | 
same suratnakhacite tatra ṣaḍyojanāntare |
paritaḥ sthalapadmāni mahākāṇḍāni santi vai ||

setubandhe tu mahāpadmavanaṃ sahasradalakamalasamudāyaḥ ityuktam | 
kāraṇānandaḥ aparicchinnānandaḥ sa eva vigraho yasyāḥ | yadvā kāraṇaṃ 
prathamaṃ tasmin jātaḥ kāraṇaḥ tatra jātaḥ ityaṇ | sa cāsāvānandaśceti | 
śeṣaṃ pūrvavat | śeṣaṃ spaṣṭam | 

yadvā caitanyamahaso bahirnissāraṇaṃ kṛtvā mantreṇa paricchinnāṃ mūrtiṃ 
kalpayitvā haste samānīya mantreṇa pīṭhaniveśanāntam āvāhanapadārthaḥ 
avadānādipradānāntasyeva bahvīnāṃ kriyāṇām ekapadārthatve 
bādhakābhāvāt | tena yatra dīkṣā'dau nānādevatānāṃ tantreṇa pūjanaṃ 
tatra samudāyasyaikapadārthatvāt kāṇḍānusamayaḥ tāvatāṃ siddhaḥ | 
etādṛśāvāhanaikadeśapīṭhanivaśane sādhanībhūto'yaṃ mantraḥ ||

nibandhakārastu jñānārṇavoktaṃ antaryāgakramaṃ āvāhanādimudrāśca 
darśayāmāsa | tadanādaraṇīyaṃ pramāṇābhāvāt || 3 ||

catuṣaṣṭhayupacāravidhiḥ

catuṣṣaṣṭhyupacārān kuryāt | sarve upacāramantrāḥ 
tritārīpūrvāḥ kalpayāmi namaḥ ityantāḥ kartavyāḥ || 4 ||

catuṣṣaṣṭītyanena etattantrānuyāyināṃ 
tantrāntaroktaṣoḍaśādyanyatamapūjāvyāvṛttiḥ || nanu kimayaṃ 
parisaṅkhyāvidhiḥ uta niyamavidhiḥ uta apūrvavidhiḥ nādyaḥ kenāpi 
pramāṇena nityamaprāpteḥ | pakṣe'pi prāptyabhāvena na dvitīyaḥ | tarhi tṛtīyaḥ 
syāditi cediṣṭāpattiḥ | tathā'pi sarvāṃśe nāpūrvavidhiḥ upacārāṃśe 
apūrvaḥ catuṣṣaṣṭyaṃśe niyamaḥ | upacāravidhau upacārāṇāmanantatvena 
tatra nānāsaṅkhyāprāptau catuṣṣaṣṭhisaṅkhyāyā api pakṣe prāptatvāt | na ca-

p. 138)

evamekasminniyamāpūrvasvīkāre vidhisāṅkaryam iti vācyam iṣṭāpatteḥ 
yadāgneyo'ṣṭākapāla iti vākye agnipuroḍāśayoḥ pakṣe prāptau tadaṃśe 
niyamaḥ yāgāṃśe apūrva iti dṛṣṭatvāt | na ca catuṣṣaṣṭhyupacārān vidhāya 
ityagrimasūtreṇa [purastādevāgāmi-5-sūtroktavākyena |] parisaṅkhyāvidhiḥ 
anenopacāravidhiḥ iti vācyam tathā sati asmin sūtre catuṣṣaṣṭhipadavaiyyarthyāt 
| na ca evaṃ sati catuṣṣaṣṭhītyagrimavākyaṃ vyartham iti śaṅkanīyam 
catuṣṣaṣṭhyupacārānanūdya kramaviśeṣavidhānāt | sarvathā nopacārasya 
saṅkhyāyā vidhāyakaṃ tat | kuryāditi spaṣṭavidhyantam idameva 
saṅkhyāviśiṣṭopacāravidhāyakam ||

yadvā pāṭhenaiva kramasiddhau agrimeṇa catuṣṣaṣṭhyupacārān vidhāya ityanena 
kramavidhānāsambhavāt vihitānāmeva iti catuṣṣaṭhyupacāran vidhāya 
ityanuvādakam upasaṃhārarūpam | asya phalaṃ tu tantrāntare 
catuṣṣaṣṭhyupacārānantarbhūtāḥ uktādanye kecana santi tairarcanaṃ mābhūt 
kiṃ tu pratinidhiṃ kalpayitvā mantre śrutadravyanāmnaivārpaṇametadartham | 
itthaṃ coktopacārādadhikaiḥ sambhave sati pūjanaṃ kartavyam | ata eva 
tripurārṇave-

uktopacārādadhikaiḥ sambhave sati pūjayet ||

iti vacanaṃ uktanyāyagarbhameva | niyamavidherayogavyavacchede tātparyam 
natvanyayogavyavacchede | tena catuṣṣaṣṭhyupacāramadhye ekasyāpyayogo mā 
bhavatvityatraiva tātparyam na tvadhikavyavacchede | tasmāt ito'dhikānāṃ 
śibikāgajāśvanṛtyādīnāṃ yāvatāṃ sambhavaḥ tāvatkalpanaṃ 
sūtrāviruddhaṃ mantavyam ||

atra upacārapadārthaśca kalpyamānadravyajanitaḥ sukhaviśeṣaḥ taṃ kuryāt 
utpādayet ityarthaḥ ||

na ca nityatṛptāyāṃ devatāyāṃ kalpyamānadravyeṇa kīdṛśī sukhotpattiḥ iti 
vācyam | nityatṛpte sukhotpattiḥ na bhavatīti satyaṃ tathā'pi 
paricchinnaśarīrakalpanavattaccharīre sukhakalpanena svātmanyadṛṣṭotpattireva na 
tu kalpitena paradevatāyāḥ sukhotpattiḥ | ata evoktaṃ śivamahimne [atra mahimani-
iti-pāṭhaḥ-sambhāvyatām |] na hi svātmārāmaṃ viṣayamṛgatṛṣṇā bhramayati 
iti | ata evopacāramantre kalyayāmītyeva kriyāpadaṃ yojitam | śeṣaṃ suspaṣṭam 
|| 4 ||

tritārīmuccārya pādyaṃ kalpayāmi namaḥ iti krameṇa ābharaṇāvaropaṇaṃ 
sugandhitailābhyaṅgaṃ sajjanaśālāpraveśanaṃ 
majjanamaṇḍapamaṇipīṭhopaveśanaṃ divyasnānīyodvartanam uṣṇodakasnānam 
kanakakalaśacyutasakalatīrthābhiṣekaṃ 

p. 139)

dhautavastraparimārjanam aruṇadukūlaparidhānam 
aruṇakucottarīyamālepamaṇḍapapraveśanamālepamaṇḍapamaṇipīṭhopa-
veśanaṃ [dukūlaku-śrī.] candanāgarukuṅkuma [śilārasamṛga-śrī.] 
saṅkumṛgamadakarpūrakastūrīgorocanādidivyagandhasarvāṅgīṇavilepanaṃ 
keśabharasya kālāgarudhūpaṃ 
mallikāmālatījātīcampakāśokaśatapatrapūgakuḍmalī 
punnāgakalhāramukhyasarvartukusumamālāṃ bhūṣaṇamaṇḍapapraveśanaṃ 
bhūṣaṇamaṇḍapamaṇipīṭhopaveśanaṃ navamaṇimakuṭaṃ candraśakalaṃ 
sīmantasindūraṃ tilakaratnaṃ kālāñjanaṃ pālīyugalaṃ [vālī-śrī.] 
maṇikuṇḍalayugalaṃ nāsābharaṇam adharayāvakaṃ prathamabhūṣaṇaṃ 
kanakacintākaṃ padakaṃ mahāpadakaṃ muktāvalim ekāvaliṃ channavīraṃ 
keyūrayugalacatuṣṭayaṃ valayāvalim ūrmikāvaliṃ kāñcīdāma kaṭisūtraṃ 
saubhāgyābharaṇaṃ pādakaṭakaṃ ratnanūpuraṃ pādāṅgulīyakam ekakare 
pāśam anyakare aṅkuśam itarakare puṇḍrekṣucāpam aparakare puṣpabāṇān 
śrīmanmāṇikyapāduke svasamānaveṣābhirāvaraṇadevatābhiḥ saha 
mahācakrādhirohaṇaṃ kāmeśvarāṅkaparyaṅkopaveśanam amṛtāsavacaṣakam 
ācamanīyaṃ karpūravīṭikām ānandollāsavilāsahāsaṃ maṅgalārārtikaṃ 
chatraṃ cāmarayugalaṃ darpaṇaṃ tālavṛntaṃ gandhaṃ puṣpaṃ dhūpaṃ 
dīpaṃ naivedyaṃ kalpayāmi namaḥ iti catuṣṣaṣṭhyupacārān vidhāya || 5 ||

atra sāmānyaparibhāṣayaiva tritārīsiddhau punarvidhānaṃ dīpanāthamantravat 
tadavayavatvaṃ jñāpayati | śeṣaṃ spaṣṭam | mantrasya svarūpaṃ tu aiṃ hrīṃ 
śrīṃ pādyaṃ kalpayāmi namaḥ iti | na lalitāyā iti | nāmapraveśaḥ 
mānābhāvāt ||

nibandhakārastu nyāyānabhijñaḥ svecchācārī ca tasmāt nāmapraveśaṃ 
svecchayā cakre | na ca sampradānakārakasyākāṅkṣitatvāt 
tadvācakapadābhāvāt abodhakatvaṃ syāt iti vācyam 
adhyāhāreṇākāṅkṣāśānteḥ adhyāhṛtasya padasya mantrāvayavatvena 
nyāyavidbhiranaṅgīkārāt anyathā iṣe tvā chinadmi ūrje tvā unmārjmi iti 
prayogakāle pāṭhāpatteḥ | ato yāvacchruto mantraḥ | yadi nāmamantratvaṃ 
matvā nāmapraveśaḥ tarhi nāmamantrasya namo'ntatvaṃ caturthyantatvaṃ 
lakṣaṇam | atra dvitīyā'ntakalpayāmibhyāṃ madhye vyavadhānānna 
sambhavatīti tattvam | kiṃ ca sarvatropacāramantrāṇāṃ kalpayāmi namaḥ 
ityanenaiva nirvāhe tritārīmuccāryeti sūtraṃ vyarthaṃ 

p. 140)

sat mantrasvarūpaṃ pratipādayati | yāvaduktaṃ paṭhanīyam | utpattivākye 
lalitāpadaprayogāditi nirmūlalalitāpadapraveśe heturvaktavyaḥ | tamajānan 
kevalakāvyapāṭhī nibandhakāraḥ sūtrakāreṇa lalitāpadasya bhūriprayogāditi 
hetuvilekhanena svīyamapāṇḍityaṃ prakāśitavān ||

krameṇetyanena pādyamiti prātipadikasthāne 
ābharaṇāvaropaṇādipadoccāraṇaṃ jñāpayati | snānīyodvartanaṃ 
śarīralagnasnehaviyogasādhanaṃ sugandhicūrṇaviśeṣaḥ | atra dvitīyāntāni 
sarvāṇi tattadvastujanyasukhaviśeṣaparāṇi | kucottarīyaṃ kañcukam | ālepaḥ 
sugandhidravyaśarīrasaṃyogaḥ tajjanako maṇḍapaḥ sthānaviśeṣaḥ | kaṅkumaṃ 
kāśmīram | saṅkuḥ vṛkṣaviśeṣaḥ | taduktaṃ viśvakośe śaṅkuḥ kīle gare 
śastre saṅkhyāpādapabhedayoḥ iti sakāraśakārayornātibhedāt 
ekadeśavikṛtamananyavat iti nyāyena vṛkṣaviśeṣaḥ sugandhiḥ | mṛgamadaḥ 
kastūryavāntarabhedaḥ | yadvā otuviśeṣāvayavo mṛgamadaḥ 
mahārāṣṭrabhāṣayā javvāji iti prasiddhaḥ | kastūrī mṛganābhiḥ | ādipadena 
anyāni lokaprasiddhāni sugandhidravyāṇi | sarvāṅgīṇaṃ sarvāṅgasambandhi | 
sarvāṅgaśadbāt sambandhārthe khapratyaye sarvāṅgīṇam iti rūpaṃ sidhyati | 
tādṛśaṃ yat vilepanam | agaruḥ prasiddhaḥ | tanmadhye atyunnataḥ kālāgaruḥ | 
mallikā mālatītyādinā ṣaḍṛtusamudbhavakusumāni | sīmantaḥ 
keśapāśamadhyasaraṇiḥ tasmin sindūram | tilakasthāne ratnam | kālāñjanam 
atikṛṣṇāñjanaṃ sauvirāñjanaṃ vā | pālī karṇabhūṣaṇaṃ 
mahārāṣṭrabhāṣayā bālī iti prasiddham | tasyāḥ yugalaṃ yugmam | adhare 
oṣṭhe yāvakaṃ lākṣārasaṃ raktatvasaṃpādakam | prathamabhūṣaṇaṃ 
maṅgalasūtram | kanakacintākaṃ āndhrapuradhrībhiḥ dhṛto bhūṣaṇaviśeṣaḥ 
kaṇṭhasya āndhrabhāṣayā golakuttikaṇṭhū iti prasiddhaḥ | padakaṃ 
kaṇṭhabhūṣaṇaṃ mahārāṣṭrabhāṣayā tanmaṇi iti prasiddham | mahāpadakaṃ 
kaṇṭhabhūṣaṇaviśeṣaḥ | mahārāṣṭrabhāṣayā peṭayā iti prasiddhaḥ | 
muktāvaliṃ mahārāṣṭrabhāṣayā kaṇṭhā iti prasiddham | ekāvaliṃ 
saptaviṃśatimauktikaracitā mālā nakṣatramālā iti prasiddhā 
ekāvalyekayaṣṭikā saiva nakṣatramālā syāt ityamaraḥ | channavīraṃ ubhayato 
vaikakṣyadāmātmakaṃ bhūṣaṇam iti nibandhe sthitam | keyūrāṇām 
aṅgadānāṃ yugalaṃ yugmaṃ tasya catuṣṭayam ekaikabāhau dvayaṃ dvayam | 
balayāḥ kaṅkaṇāni teṣāmāvaliṃ paṅktim | ūrmikā aṅgulibhūṣaṇaṃ tasya 
āvalim | kaṭibhūṣaṇānyāha kāñcīti | saubhāgyābharaṇam adhare 
jaghanālambī bhūṣaṇaviśeṣa iti nibandhe sthitam | 
pādakaṭakaratnanūpurapādāṅgulīyottaramekavacanamavivakṣitam tadarthasya 
bādhāt | āyudhānyāha eketi | puṇḍrekṣuḥ citravarṇekṣuḥ | puṣpamayāḥ 
bāṇāḥ puṣpabāṇāḥ tān | āyudhakrama ukto dakṣiṇāmūrtisaṃhitāyām-

dakṣiṇādhaḥ kare bāṇān vāmādhastu śarāsanam | 
vāmordhve pāśamāraktaṃ dakṣordhve tu sṛṇiṃ param || iti ||

p. 141)

mahācakraṃ śrīcakram | kāmeśvarāṅka eva paryaṅkaḥ tatropaveśanam | 
amṛtarūpāsavo madyaṃ tadyukta caṣakam | ācamanīyaṃ spaṣṭam | 
karpūravīṭikā lakṣaṇamuktaṃ tantrāntare-

elālavaṅgakarpūrakastūrīkesarādibhiḥ |
jātīphaladalaiḥ pūgaiḥ lāṅgalyūṣaṇanāgaraiḥ |
cūrṇaiḥ khadirasāraiśca yuktā karpūravīṭikā || iti ||

lāṅgalī nārikelam | ūṣaṇā pippalī | nāgaraṃ śuṇṭhī | khadirasāraṃ 
mahārāṣṭrabhāṣayā kāt iti prasiddham | ānandasya ullāsaḥ udayaḥ tena 
vilāsaḥ āvirbhāvaḥ yasyedṛśahāsam | loke'pi ānandodayajñāpako hāsaḥ | ato 
yuktam īdṛśaṃ viśeṣaṇam | maṅgalārārtilakṣaṇaṃ paramānandatantre-

tata ārārtikaṃ kuryāttadvidhānaṃ śṛṇu priye |
lohabhinne suvarṇādipātre sindūrareṇubhiḥ ||
nānāvidhairvarṇakaiścāpyaṣṭapatraṃ sakarṇikam [manoharaṃ-śrī. 
suvarṇakaṃ - ba 2.] |
svastikaṃ vā prakalpyātha piṣṭajān ḍamaruprabhān ||
ghṛtapakvānnanasaptapañcatritayameva vā |
savartikaṃ ghṛtaiḥ pūrṇaṃ kramādvinyasya pātrake ||
prajvālya māyayā paścānnavaratnaiśca mantrayet |
cakramudrāṃ pradarśyātha navaratnaiśca pūjayet ||
āmastakaṃ tu tatpātramuddharet svayamutthitaḥ |
samastacakracakreśi yute devi navātmike ||
ārārtikamidaṃ divyaṃ gṛhāṇa mama siddhaye ||
iti ghaṇṭāṃ vādayan vai devyā āpādamastakam ||
dakṣahastena trirbhrāmya pātraṃ sthāpya natiṃ caret |
evamārārtikaṃ kuryāt..................... || iti ||

tālavṛntaṃ tālavyajanam | śeṣaṃ spaṣṭam | catuṣṣaṣṭhyupacāramadhye uktasya 
alābhe pratinidhidravyaniyama uktastantrāntare-

tattaddravyeṇopacārānabhāve kusumākṣataiḥ |
manasā bhāvayan kuryāttena pūjāphalaṃ labhet || iti ||

p. 142)

akṣatapūjane viśeṣo yoginītantre-

śvetākṣatairna pūjyā syāt tripurā parameśvarī | 
kāśmīraiḥ kuṅkumairvā'pi [vā haridrairvā-śrī.] raktacandanapaṅkakaiḥ 
[paṅkajaiḥ-śrī.] |
rañjitān śālijān śuddhānakhaṇḍānarpayet budhaḥ || iti ||

idaṃ pratinidhikalpanamapi gandhapuṣpadhūpadīpanaivadyavyatiriktaviṣayameva | 
taduktaṃ yoginītantre-

upacārānalābhe tu puṣpādyairmanasā smaret |
gandhapuṣpadhūpadīpanaivadyānyanmaheśvari |
gandhādipañcakābhāve pūjā vyarthaiva sarvadā [sarvadhā-śrī ba 2.] || iti ||

navamudrāpradarśanam 

navamudrāśca pradarśya || 6 ||

navamudrāḥ saṃkṣobhiṇyādiyonyantāḥ vakṣyamāṇāḥ [etad granthe tattatpatre 
uktāśeṣamudroddhāraḥ ddi0 pa- śi.-15-3/8 viṣaye dṛśyaḥ athavā 5 khaṇḍe 
lalitākrame 15 sūtrabhāṣye dṛśyaḥ |] | cakāreṇa daśamīṃ trikhaṇḍāṃ ca 
pradarśya | devyā iti śeṣaḥ || 6 ||

tridhā saṃtarpaṇam

mūlena tridhā santarpya || 7 ||

bindāviti śeṣaḥ ||

kecit tu viśeṣārghya eva tatsaṃskārarūpaṃ tataḥ kiṃcit uddhṛtya pātrāntareṇa 
tatraiva nikṣeparūpaṃ tarpaṇaṃ vidhīyate ityūcuḥ | tanna 
viśeṣārghyaśodhanaprakaraṇābhāvena tathātve 
prakṛtahānyaprakṛtakalpanāpatteḥ etadarghyasaṃśodhanamiti 
pūrvasūtravirodhācca | na ca bindāviti kathaṃ jñātamiti śaṅkanīyam mūleneti 
turīyakūṭaśravaṇena [tṛtīya-ba.] tajjhānasambhavāt | paraṃ tu iyān viśeṣaḥ-
etadatirikte pūjayitveti atra santarpyeti śravaṇāt atra tarpaṇaṃ anyatra pūjanam | 
anuṣṭhāne viśeṣastu atra bindumātraprakṣepaḥ pūjanasthale 
bindupuṣpākṣatobhayaprakṣepaḥ | kiṃ ca

p. 143)

mūleneti tṛtīyayā itaranairapekṣyaśravaṇāt śrīpāduketyādyaṣṭākṣaryāḥ 
[anugate-82-patre-khaṇḍe-śrīgaṇanāyakapaddhatau-8-mūlasūtre 
uktoyamaṣṭhākṣarīmantraḥ |] pūjāyāmeva yojanavidhānāt śvāhā home 
tarpaṇe ca tarpayāmīti coccaret iti dakṣiṇāmūrtisaṃhitāvacanena mūlānte 
tarpayāmītyeva yogaḥ ||

nanu tantrāntare ekakriyāyāmeva dvayoḥ padayoḥ prayogaḥ paryāyeṇa dṛśyate 
yathā kṣīreṇa brāhmaṇaistarpyā iti dravyeṇa sātvikenaiva brāhmaṇaḥ 
pūjayecchivām iti kvacit asminnevārthe yajdhāturapi dṛśyate yathā-
śurāghaṭasahasreṇa yakṣye tvāṃ parameśvari iti tathā ca 
tarpaṇapūjanayajanāni paryāyāṇīti [paryāyāḥ iti sādhuḥ pāṭhaḥ |] cet na | 
nahyekārthe prayogamātreṇa paryāyatā sidhyati lakṣaṇayā'pyanyasminnarthe 
prayogasambhavāt | anyathā gaṅgāratīrapadayorapi tathātvāpatteḥ | ata eva 
vāyavyaṃ śvetamālabheta bhūtikāmaḥ ityatra dhātoḥ sparśārthakatve'pi 
dravyadevatāyogasya yāgamantarā'nupapatteḥ ālabhatidhātoḥ yāge lakṣaṇā 
kalpitā | tathā anupapattyabhāvena agnihotre śrūyamāṇasya vatsamālabheta 
ityatra dhātoḥ yathāśrutārthatvamevāṅgīkṛtam | prakṛte'pi santarpyetyatra 
vāyavyādivākyavat bādhakābhāvāt vatsamālabheta itivat yathā 
śrutārthatvameva yuktam ||

nanu dravyasyātrāpyanuktatvāt tarpaṇaṃ pūjanaṃ vā kena kāryamiti cet ucyate | 
vihitatarpaṇādikaṃ sādhanamapekṣate | saṃskṛtaṃ viśeṣārghyaṃ ca 
kāryamapekṣate | evaṃ sākāṅkṣayostayoḥ naṣṭāśvadagdharathanyāyena 
viśeṣārghyaṃ saṃskṛtya tena devatāṃ yajet iti vākyaikavākyatā kalpyate ||

na ca evaṃ sati sāmānyārghyasyā'pi tulyatvena tasyāpi pūjāsādhanatvāpattiḥ 
iti vācyam tajjalena trikoṇeti viśeṣārghyamaṇḍalādau śrautaviniyogenāsya kiṃ 
kāryam ityākāṅkṣāvirahāt ||

na ca evaṃ tadbindubhiḥ triśaḥ gurupādukāmiṣṭvā iti tṛtīyayā 
viśeṣārghyasthāpi viniyogaśravaṇāt ubhayatra tulyam iti vācyam 
etadarghyasaṃśodhanamiti [anugata-3-khaṇḍāntimena 32-sūtreṇetyarthaḥ |] 
tadagrimasūtreṇa tāvatparyantaṃ viśeṣārghyasaṃskārasyaivoktatvena 
bindubhirityāderapi saṃskārāntaḥpātitvāt kiṃ ca śyāmākrame sthitena 
sarvacakradevatā'rcanāni [idaṃ-6-khaṇḍe śrīśyāmākramasthaṃ-22 sūtram |] 
vāmakarāṅguṣṭhānāmikāsandaṣṭadvītīyaśakalagṛhītaśrīpātraprathama-
bindusahapatitaiḥ dakṣakarākṣatapuṣpakṣepaiḥ kuryāditi vacanena dravyalābhasya 
niṣpratyūhatvāt ||

p. 144)

na ca tasya śyāmāprakaraṇasthatvāt tatraiva viśrāntiḥ iti vācyam | śyāmāyā 
lalitopāstyaṅgatvaṃ pūrvameva vyavasthāpitam | aṅgasya prakaraṇaṃ nāstīti 
mīmāṃsakasiddhāntaḥ | ataḥ prabalena prakaraṇena sannidhiṃ bādhitvā sarvatra 
viniyoge bādhakābhāvāt ||

na ca tathā'pi śyāmāpadairubhayataḥ saṃdaṃśāt 
prayājābhikramaṇanyāyena avāntaraprakaraṇaṃ mahāprakaraṇabādhakaṃ 
bhaviṣyati iti vācyam sarvaśabdaśrutyā sarvaprabalayā 
avāntaraprakaraṇabādhasambhavāt ||

kiṃ ca anārabhya paṭhitena siddhāntagranthasthena tadabhivyañjakāḥ pañca 
makārāḥ tairarcanam ityanena dravyasya prāptatvena anupapattigandhābhāvāt ||

etā eva yuktayaḥ gaṇapatiprakaraṇasthe sarvatra devatānāmasu śrīpūrvaṃ 
pādukāṃ pūjayāmītyaṣṭākṣaraṃ yojayet iti vākye [idaṃ vākyamanugate-81-
patre-2-khaṇḍe-gaṇanāyakapaddhatau 8-sūtre'pi |] draṣṭavyāḥ || 

tridhā trivāraṃ atra dravyabhedāt mantrāvṛttirjñeyā || 7 ||

ṣaḍaṅgapūjanam

ṣaḍaṅgapūjanamāha-

devyā agnīśāsuravāyuṣu madhye dikṣu ca ṣaḍaṅgāni pūjayitvā || 8 ||

atra pūjanaṃ nāma puṣpākṣatabinduprakṣepa [etat-agre-6 khaṇḍe-śyāmāme-
22-sū-dṛśyam |] eva na tu pañcopacārādyarpaṇarūpaṃ 
śyāmākramoktakalpasūtrānurodhāt tathā śiṣṭasampradāyācca ||

evaṃ sati atrādhunikāḥ yatra yatraitaduttaraṃ pūjayitveti tatra tatra 
pūrvasūtrasthaṃ santarpyetyanuvartyobhayavidhiḥ mūladevīsthale 
tarpaṇamātraṃ bindudravyadānaṃ tarpaṇaṃ puṣpākṣatadānaṃ pūjanaṃ 
itthaṃ ca tritārīśiromantrottaraṃ śiraśśaktiśrīpādukāṃ pūjayāmi 
śiraśśaktiśrīpādukāṃ tarpayāmi ityanutiṣṭhanti | tadanuṣṭhānaṃ 
bhrāntimūlam tathā sati ardhajaratīyanyāyāt | tritārīmārabhya śiromantrāntaṃ 
sakṛdāvṛttiḥ śiraśśaktītyārabhya dvivāramiti kathanasyātihāsāspadatvāt | 
kiṃ ca pūjayāmīti mantreṇa pūjanaṃ agrimamantreṇa tarpaṇam iti 
pūjanatarpaṇayoḥ kramikatvaṃ prāptam | tathā sati bindupuṣpākṣatadānayoḥ 
ekakālabodhakena bindusahapatitaiḥ puṣpākṣataiḥ kuryāt iti sūtreṇa virudhyate | 
api ca vāmakarasambandhābhāvaprasaṅgaśca kramikatvena dvayorapi 
dakṣahastena kartuṃ śakyatvāt | 

p. 145)

na ca vāmakarāṅguṣṭhānāmikāsandaṣṭaḥ iti sūtrānusāreṇa [idaṃ-6 khaṇḍe 
śrīśyāmākrame 22-sūtram |] vāmakarasyāvaśyakatā iti vācyam dakṣakarasya 
puṣpākṣataprakṣepavyāpṛtatvena sahatvānyathā'nupapattyā 
prāptavāmakarasya vidhānāsambhavenānuvādakatvāt | ata eva 
bahiṣpavamānastotrārthaṃ prasarpaṇāvasare chandogānāṃ sūtre savyaiḥ 
pāṇibhistṛṇanti ityatra bhāṣye dakṣahastasya adhvaryuṃ prastotā'nvārabhate 
prastotāraṃ pratihartā pratihartāramudgātā iti vākyena adhvaryvādyanvārambhe 
vyāpṛtatvāt arthaprāptaḥ savyapāṇiḥ anūdyate ityuktam ||

kecittu santarpyetyanuvartya tarpaṇapūjobhayaṃ vidhīyate 
ardhajaratīyanyāyabhītyā tritāryuttaraṃ hṛnmantrānte 
hṛdayaśaktiśrīpādukāṃ pūjayāmi tarpayāmi namaḥ iti mantraṃ paṭhanti | 
tadaśuddham anuvṛttau pramāṇābhāvāt ||

kiṃ ca vidhau ādau tarpaṇaṃ paścāt pūjā mantre viparītakrama iti ca viruddham 
||

tasmāt pūrvavākye tarpaṇaṃ nāma binduprakṣepamātram | tasya anuvṛttau 
ākāṅkṣāvirahāt pūjanameva vidhīyate | pūjāpadārthaśca 
bindupuṣpākṣatasamudāyaprakṣepaḥ | itthaṃ ca ādau tritārī tato hṛnmantraḥ tato 
hṛdayaśaktiśrīpādukāṃ pūjayāmi iti mantrasvarūpaṃ jñeyam | 
evamevāgre'pi sarvatra jñeyam ||

agnīśetyatra agnyādipadena tattaddevatāsambandhidiśāṃ grahaṇam | dikṣu 
ityanena prāgādidikcatuṣṭayagrahaṇam | ṣaḍaṅgayuvatīnāṃ agnyādicatasro 
vidiśaḥ madhyaṃ prāgādidikcatuṣṭayaṃ militvaikaṃ iti ṣaṭ sthānāni jñeyāni 
||

atra kecit-

yaḥ paśyedyatra sūyaṃ tu sā prācī tasya kathyate |
udaye sūryadraṣṭustu meruruttarasaṃsthitaḥ ||

iti digvyavasthā [diṅmukhatvavyavasthāyāṃ-ddi. pa-śi. vi. 13/14-3 dṛśyaḥ-||] 
śrautasmārtakarmaṇi prasiddhā tathaiva śrīvidyopāsanāyāmapi digvyavasthā 
ityāhuḥ || 

anye tu niruktadigvyavasthāyā vaidike karmaṇi sāvakāśatvāt 
pūjyapūjakayormadhye diśaṃ prācīṃ prakalpayet iti tantravacanānusāreṇa 
devyagrabhāgaḥ prācī devīpṛṣṭhabhāgaḥ pratīcī devyā dakṣabhāgo dakṣiṇā 
vāmabhāga udīcī diganusāreṇa vidiśāṃ kalpanam ityūcuḥ || 

p. 146)

tadubhayamapi sthūlamānatvādupekṣyam | vastutastu jñānārṇave 
śrīcakrapūjanasannidhau-

uttarāśāmukho mantrī yadā cakraṃ samuddharet |
uttarāśā tadā devi pūrvāśeti nigadyate ||

īśānakoṇaṃ deveśi tadā'greyaṃ na saṃśayaḥ |
paścimāśāmukho mantrī yadā cakraṃ samuddharet ||

paścimāśā tadā jñeyā pūrvāśeti na saṃśayaḥ |
vāyukoṇaṃ tadā'gneyamaiśānaṃ rākṣasaṃ bhavet ||

dakṣiṇābhimukho mantrī yadā cakraṃ samuddharet |
pūrvāśaiva hyudīcī syāt rakṣaḥkoṇaṃ tu vahnidik || iti ||

uttarāpaścimāśetyatra lokaprasiddhottarāṃ diśamanūdya pūrvādidikkāryaṃ 
vidhīyate khalevālī yūpo bhavati itivat | itthaṃ ca diṅmātrānuvādena 
dikkāryavidhānāt vidiṅmukhaścakraṃ noddharet iti siddham | 
prācīdiganuvādena vidheyābhāvāt tattyaktam | evaṃ kulārṇave'pi-

yadāśā'bhimukho mantrī tripurāṃ paripūjayet |
devīpaścāttadā prācī pratīcī tripurāpuraḥ ||

iti niravakāśavacanaiḥ śrīvidyāviṣaye uktarītyā digvyavasthā | 
śrīvidyā'tirikte tāntrike karmaṇi pūjyapūjakayormadhyaṃ prācī | 
nikhilaśrautasmārtakarmaṇi yaḥ paśyedityādivacanapraveśaḥ iti alaṃ bhūyasā | 
devyā ityuktyā binducakra evāgneyādidiśa uktaśāstreṇa prakalpya tatra 
ṣaḍaṅgayuvatīḥ pūjayet iti siddham || 8 ||

nityāpūjanam [ita ārabhya śrīlalitāmbāyā 
āvaraṇārcanasthaladevatānityādikaṃ 4-khaṇḍasamāptiṃ-10-sūtrāntaṃ-
yāvaddarśayati |]

atha pañcadaśanityāmantroddhārapūrvakaṃ nityāpūjanamāha-

vāksakalahrīṃ nityaklinne madadrave sauḥ iti kāmeśvarī | sarvatra 
nityāśrīpāduketi yojyam | vāgbhagabhuge bhagini bhagodari bhagamāle 
bhagāvahe bhagaguhye bhagayoni bhaganipātini sarvabhagavaśaṅkari bhagarūpe 
nityaklinne bhagasvarūpe sarvāṇi bhagāni me hyānaya varade rete surete 
bhagaklinne klinnadrave kledaya drāvaya amoghe bhagavicce kṣubha kṣobhaya 
sarvasattvān 

p. 147)

bhageśvari aiṃ blūṃ jeṃ blūṃ bheṃ blūṃ moṃ blūṃ heṃ blūṃ heṃ 
klinne sarvāṇi bhagāni me vaśamānaya strīṃ hara bleṃ hrīṃ bhagamālinī | 
tāro māyā nityaklinne madadrave svāhā iti nityaklinnā | praṇavaḥ kroṃ bhroṃ 
krauṃ jhrauṃ chrauṃ jrauṃ svāhā iti bheruṇḍā | praṇavo māyā vahnivāsinyai 
namaḥ iti vahnivāsinī | māyāklinne vāk kroṃ nityamadadrave hrīṃ iti 
mahāvajreśvarī | māyā śivadūtyai namaḥ iti śivadūtī | praṇavo māyā huṃ 
khe ca che kṣaḥ strīṃ huṃ kṣeṃ hrīṃ phaṭ iti tvaritā | kumārī kulasundarī | 
hasakalaraḍavāgbhavahasakalaraḍabindumālinī hasakalaraḍacaturdaśaṣoḍaśā iti 
nityā | māyā phreṃ srūṃ 
aṅkuśapāśasmaravāgbhavablūṃpadanityamadadrave varma phreṃ māyeti 
nīlapatākā | bhamaraya-ūmiti vijayā | svaumiti sarvamaṅgalā | tāro namo 
bhagavati jvālāmālini devadevi sarvabhūtasaṃhārakārike jātavedasi jvalanti 
jvala jvala prajvala prajvala trijātiyuktamāyārephasaptakajvālāmālini 
varmaphaḍagnijāyeti jvālāmālini | (aṃ) ckauṃ iti citreti pañcadaśa nityāḥ 
prathamatryasrarekhāsthitapañcadaśasvareṣu pūjyāḥ | visṛṣṭau ṣoḍaśīṃ 
mūlavidyayā cābhyarcya || 9 ||

vāk aiṃ | śeṣaṃ yathā paṭhitam | mantrānte sarvatra tattannityānāma taduttaraṃ 
aṣṭākṣarīyogaḥ | yathā ādau tritārī aiṃ sakalahrīṃ nityaklinne madadrave sauḥ 
kāmeśvarīnityāśrīpādukāṃ pūjayāmi namaḥ iti | evamagre'pi draṣṭavyam | 
yadyapi śrīpāduketyaṣṭākṣarīyogaḥ sāmānyavacanaprāptaḥ tathā'pi 
nityāpadaghaṭitatvenāprāptatvāt tadartha ārambhaḥ sarvatra 
nityāpūjanamantreṣu | dvitīyamāha vāgiti | tṛtīyamāha tāra iti | tāraḥ praṇavaḥ 
māyā hrīṃ śeṣaṃ yathāśrutaṃ paṭhanīyam | ādau praṇavaḥ tato māyā tataḥ 
svāhā'nto yathāśrutaḥ iti phalito'rthaḥ | caturthamāha praṇava iti svāhetyantena 
| pañcamīmāha praṇava iti namaḥ ityantena | ṣaṣṭhamāha māyeti hrīmityantena | 
saptamamāha māyeti namaḥ ityantena | aṣṭamamāha praṇava iti phaḍityantena | 
navamamāha kumārīti | kumārī bālā saiva kulasundarītyarthaḥ | dasamamāha 
haseti ṣoḍaśā ityantena | atra pūrvoktayuktyā hasaketyādau 
kevalavyañjanānāmeva grahaṇam | anyathā dvādaśārdhā ca nityā syāt iti 
anyatantravacanena dvādaśārdhā mantravarṇātideśe tribījasthā dvādaśārdhā 
iti mantre trivarṇatvasiddheḥ atrāpi tadatideśasiddhatrivarṇatvaṃ virudhyeta | 
hasakalaraḍottaraṃ vāgbhavaḥ aiṃ punaḥ taduttaraṃ binduyuktā mālinī īkāraḥ 

p. 148)

govindaśca trimūrtiśo mālinīvāmalocanam iti kośāt | caturdaśaṣoḍaśau 
pūrvamuktau | itthaṃ ca hsklrḍaiṃ hsklrḍīḥ hsklrḍauḥ nityānityāśrī iti-
mantrasvarūpam ||

yacca nibandhe avarṇasahitahakārādi likhitaṃ tadajñānaprayuktameva | 
tantrāntarānusāreṇa yadi likhitaṃ tarhi vaśinyādinyāse kavargaṃ kalahrīṃ ca 
nigadya iti sūtre sati halmātragrahaṇe tantrāntaramṛte sādhanaṃ mṛgyam | tasmāt 
uktayuktyā tryakṣaryeva nityāvidyā ||

ekādaśamāha māyetyārabhya māyetyantena | ādyāni trīṇi bījāni spaṣṭāni 
aṅkuśaḥ kromiti pāśaḥ āmiti ādyantago mahāpāśa iti yoginītantrāt | 
ādirakāraḥ tasyāntaḥ agrimo deśaḥ tatra sthita ākāra iti tadarthaḥ | evaṃ 
kāmo'gnirvyāpako'ṅkuśaḥ iti tatraiva | kāmaḥ kakāraḥ agniḥ rephaḥ 
vyāpakaḥ praṇavaḥ militvā kromiti sampadyate | ayamaṅkuśa ityarthaḥ | smaraḥ 
klīṃ vāgbhavaḥ aiṃ varma huṃ | itthaṃ ca hrīṃ phreṃ srūṃ kroṃ āṃ klīṃ 
aiṃ blūṃ nityamadadrave huṃ phreṃ hrīṃ nīlapatākānityāśrī iti 
mantrasvarūpam | dvādaśamāha bhamaraya-ūṃ iti | atrapi pūrvayuktyā 
halmātragrahaṇam iyamekākṣarī vidyā vijayā samprakīrtitā iti 
tantrāntaravacanāt ||

tena nibandhe pañcākṣaroccāraṇaṃ aukāroccāraṇaṃ prāmādikam | 
rbhmyūmiti svarūpaṃ jñeyam | yadyapi tantrāntare 
aṅgadādibindusaṃyutabhityasti | aṅgada aukāraḥ | tena caramasvara aukāraḥ iti 
pratibhāti | tathā'pi sūtre ṣaṣṭhasvaroccāraṇāt sūtraviruddhaṃ 
tantrāntaroktaṃ sūtrānusāriṇāmanādartavyameva ||

trayodaśamāha svaumiti | caturdaśamāha tāra iti agnijāyetyantena | 
trijātiyuktamāyā hrāṃ hrīṃ hrūṃ | vahnijāyā svāhā | śeṣaṃ spaṣṭam | 
pañcadaśamāha aṃ ckraumiti | pañcadaśa nityāpūjane deśaniyamamāha 
prathametyādi | prathamatryasraṃ bindusamīpasthaṃ trikoṇaṃ tatratyāḥ 
yāstisrorekhāḥ tāsu vartamānā ye pañcadaśa svarāḥ 
ākārādyanusvārāntāḥ teṣu ekaikasvare ekaikanityā krameṇa pūjyetyarthaḥ | 
atra rekhāsthitapañcadaśasvareṣviti svarāṇāṃ tatra siddhavannirdeśāt 
ekaikarekhāyāṃ pañca pañca svarāḥ bhāvanīyāḥ iti vidhirunneyaḥ | 
kramasyānuktatvāt svāgrādiprādakṣiṇyena | paścimādārabhya 
īśānāntarekhāyāṃ a ā i ī u iti | aiśānādāgneyāntarekhāyām ū ṛ ṝ ḷ ḹ 
iti | āgneyādārābhya paścimāntam e ai o au am iti bhāvanāvivekaḥ | vigatā 
nirgatā sṛṣṭiḥ yasyāḥ sā visṛṣṭiḥ binducakram | tatsṛṣṭiprakāraḥ 
uttaracatuśśatīvyākhyāne setubandhe draṣṭavyaḥ | tasmin ṣoḍaśīṃ 
samaṣṭirūpāṃ mūlavidyayā pañcadaśyā abhyarcya | etāsāmadhiṣṭhānaṃ 
kḹptatrikoṇādanyadeva trikoṇamuktaṃ jñānārṇave-

p. 149)

vibhāvya ca mahātryasramagradakṣottaraṃ kramāt || iti ||

tantrarāje tu bindāveva pūjanamuktam | itthaṃ tattattantrānuyāyibhiḥ tatra tatra 
kartavyam || 9 ||

oghatrayapūjāmāha-

madhye prāktryasramadhyāntaḥ munivedanāgasaṅkhyān yathāsampradāyaṃ 
pādukān divyasiddhamānavaughasiddhāniṣṭvā paścāt svaśirasi nāthaṃ yajet | 
etallayāṅgapūjanam iti śivam [eke yogasūtrasṛṣṭisthitisaṃhāratrike 
pañcapañcikapañcāsūyān prapañcādinyāsadevatādarśanāni ca yajanti-
ityadhikaḥ pāṭhaḥ kvacit |] || 10 ||

|| iti ... kalpasūtre lalitākramo nāma caturthaḥ khaṇḍaḥ || śrīḥ-

prāktryasraṃ prathamatryasram | yadvā prāktryastraṃ pūrvoktaṃ tryasraṃ tasya 
yo madhyaḥ ābhyantarapradeśaḥ tasya yaḥ antaḥ caramāvayavaḥ 
svābhimukhāgrasamīpavartī yaḥ ābhyantarapradeśaḥ tatreti phalito'rthaḥ | 
muniḥ sapta vedaḥ catvāraḥ nāgaḥ aṣṭau saṅkhyā yatreti vyutpattyā oghe 
viśeṣaṇam | yathāsaṃpradāyaṃ pādukāḥ kādihādividyābhedena 
pādukānāṃ gurumaṇḍalānāṃ bhinnatvāt yasya puruṣasya parigṛhītāḥ yā 
yāḥ pādukāḥ tattallābhāya yathāsampradāyaṃ pādukā iti | divyāśca 
siddhāśca mānavāvaśca te oghāśca tādṛśān siddhān | pūrvokte 
oghaviśeṣaṇe | ubhayatra vibhaktivyatyayaḥ ārṣaḥ | divyāḥ 7 siddhāḥ 4 
mānavāḥ 8 iti vivekaḥ | tān iṣṭvā pūjayitvā | ktvāpratyayena pāṭhena ca 
prāptakramaḥ paścādityanena anūdyate | etad-uktaṃ yadvā [nāma-
pāścātyaitatkhaṇḍīya 9 sūtrādārabhyordhvatana 10 sūtrāntam |] etaduttaraṃ 
vakṣyamāṇaṃ [nāma-āgāmipañcamakhaṇḍasthaikasūtrādārabhya |] 
navāvaraṇapūjanaṃ layāṅgaṃ layasvarūpaṃ caturasrādibindvantakramasya 
layasvarūpatvāt layāṅgapūjanaṃ bhavitumarhati | etena 
tantrāntaroktabindvādipūjāvyāvṛttiḥ [idamatratātparyaṃ yat-sarvatra 
yantrapūjāyāṃ-sṛṣṭisthitisaṃhārakramāṇāmanyatama ekaḥ kramaḥ 
pratipadokto gṛhyate arthāt sṛṣṭikrameṇa bindumārabhyārcanamārabhyate-
tathātra krame na grāhyamapi tu-layāṅgaṃ nāma saṃhārakrameṇātra krame 
pūjārambhaḥ kāryaḥ | etaddevatābhinnadevatārcane tu bindumārabhyeti 
mārmikam |] | śivamiti khaṇḍasamāptidyotakam || 10 ||

|| iti ... paraśurāmasūtravṛttau lalitākramo nāma caturthaḥ khaṇḍaḥ [atra pūjā 
na samāptā0 api tu khaṇḍa evetyavaseyam |

sūtrasya punarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || iti caturthaḥ khaṇḍaḥ śrīḥ ||] 
||




pañcamaḥ khaṇḍaḥ lalitānavāvaraṇapūjā 

prathamāvaraṇavyaṣṭipūjā [āgāmi patrataḥ 2 sūtrasamāptyantaṃ punarapi 
samaṣṭyarcanaprayogopyasti |]

etatpadena [nāma pāścātya 10 sūtrānte 
etallayāṅgapūjanamitipadasthotraitacchabdo jñeyaḥ |] nirdiṣṭāṃ pūjāṃ vitatya 
darśayati-

atha prāthamike caturasre 
aṇimālaghimāmahimeśitvavaśitvaprākāmyabhuktīcchāprāpti-
sarvakāmasiddhyantāḥ madhyate caturasre brāhmyādyāmahālakṣmyantāḥ 
tṛtīye caturasre 
saṃkṣobhaṇadrāvaṇākarṣaṇavaśyonmādanamahāṅkuśakhecarībījayoni-
trikhaṇḍāḥ sarvapūrvāstāḥ sampūjyāḥ || 1 ||

atheti navāvaraṇapūjā'dhikāradyotakam | caturasratrayamadhye prāthamike 
sarvabāhye caturasre aṇimetyārabhya sarvakāmaparyantaṃ dvandvaḥ | te sarve'pi 
siddhyantāḥ kāryāḥ | sarveṣāṃ padānām ante siddhiriti yojyam | tathā ca 
tritārī tato'ṇimāsiddhiśrīpādukāṃ pūjayāmīti | evamagre'pi | 
atrāṇimā'dipadatrayaṃ na mannantaṃ kiṃtu ḍābantaṃ 
aṇimālaghimetisamāsāntasūtrapāṭhāt | aṇimāsiddhīti puṃvadbhāvarahitaḥ 
pāṭhaḥ aśāstrīyo'pi sampradāyānurodhādārṣaprāyaḥ | yadvā 
ṣaṣṭhītatpuruṣaḥ | ṣaṣṭhyarthaścābheda eva rāhoḥ śiraḥ itivat | 
prāthamikacaturasre aṇimā'dīnāṃ yathecchaṃ pūjāprāptau tanniyamaḥ 
vāmakeśvaratantre-

aṇimāṃ paścimadvāre laghimāmapi cottare |
pūrvadvāre tu mahimāmīśitvākhyāṃ tu dakṣiṇe ||
vaśitvākhyāṃ tu vāyavye prākāmyāmīśadeśake |
bhuktisiddhiṃ tathā'gneyyāmicchāsiddhiṃ tu nair-ṛtau || 
adhastāt prāptisiddhiṃ ca sarvakāmaṃ [sarvakāmāṃ-śrī.] tathordhvataḥ || iti ||

digvyavasthāsampradāyaśca pūrvamuktaḥ | ūrdhvādharāvapi na lokaprasiddhau 
grāhyau kiṃ tu tāntrikau | taduktaṃ tattvavimarśinyām-

indreśānadiśormadhye sthānamūrdhvasya kīrtitam |
nir-ṛtyambupayormadhye adhaḥsthānaṃ prakīrtitam || iti ||

madhyame caturasre brāhmyādyāḥ brāhmī ādau yāsāṃ tāḥ evaṃ 
mahālakṣmīḥ ante yāsāṃ tāḥ |

p. 151)

brāhmī māheśvarī caiva kaumārī vaiṣṇavī tathā |
vārāhī caiva cendrāṇī cāmuṇḍā sapta mātaraḥ ||

iti prasiddhāḥ sapta mahālakṣmīścetyaṣṭau mātaro madhyacaturasre pūjyāḥ | 
tatra kramākāṅkṣāyāṃ vāmakeśvaratantre-

brahmāṇīṃ paścimadvāre māheśīmapi cottare |
pūrvadvāre tu kaumārīṃ dakṣiṇe vaiṣṇavīmapi ||
vārāhīmapi vāyavye tathaindrīmaiśadeśake |
cāmuṇḍāmapi cāgneye mahālakṣmīṃ ca nair-ṛte || iti ||

atha tṛtīye caturasre daśamudrāpūjanamāha tṛtīye iti | sarvaḥ sarvaśabdaḥ 
pūrvaṃ yannāmasu tāḥ yathā tritāryuttaraṃ 
sarvasaṃkṣobhiṇīśaktiśrīpādukāṃ pūjayāmi iti | etādṛśamudrāśaktayaḥ 
mudrāśadbārthaścoktaḥ prāk [atraiva lalitākrame pāścātya-4-khaṇḍe-1 
sūtrabhāṣye 135-patre-] tādṛśamudrātvavyāpyadharmāvacchinnāḥ imāḥ | 
sarvasaṃkṣobhiṇī padārthaśca itthaṃ sarvān padārtha [mātān-śrī. a.] bhūtān 
kṣobhayatīti utpādayatīti sarvasaṃkṣobhiṇī 
kāryatvāvacchinnakāryatānirūpitakāraṇatā'śca yeti yāvat | iyameva 
vāmāśaktirityucyate | etaduktaṃ yoginītantre-

yoniprācuryatassaiṣā sarvasaṃkṣobhikā punaḥ |
vāmāśaktipradhāneyam............... iti ||

yoniḥ kāraṇatvāni teṣāṃ prācuryato bhūyastvena | ata eva sarvasaṃkṣobhiṇyā 
bāhyasvarūpe aṅguligrathanātmake'pi aṅguṣṭhe 
kaniṣṭhānāmāmadhyamāgrāṇāṃ yoge yonibhūyastvaṃ 
pratyakṣeṇānubhūyate | etena adṛśyarūpamapi tathetyunneyam | dvitīyā 
sarvavidrāviṇī sarvānutpannān drāvayati vardhayati poṣaṇena sā sarvavidrāviṇī 
sarveṣāṃ vastūnāṃ pālakatvādṛjusvabhāvā jyeṣṭhāśaktipracurā ca | 
taduktaṃ yoginītantre kṣubdhaviśvasthitikarī jyeṣṭhā prācuryamāsthitā iti | 
kṣubdhasya utpannasyetyarthaḥ | yaśca saṃrakṣakaḥ sa ṛjuriti loke prasiddhā 
gāthā | ata eva asyā mudrāyāḥ bāhyarūpe'pi aṅguṣṭhena 
kaniṣṭhikānāmāyoge aṅgulicatuṣṭaye ṛjutvaṃ dṛśyate | evamādyatrikoṇe 
rekhātrayamadhye pūrvasyāṃ diśi sthitāyāṃ ṛjurekhāyāmeva tasyāḥ 
adhiṣṭhānaṃ śāstraprasiddham | tṛtīyā sarvākarṣiṇī sarvākarṣaṇaśīlā | 
iyaṃ jyeṣṭhā vāmobhayātmikā | taduktaṃ yoginītantre-

p. 152)

jyeṣṭhā vāmāsamatvena sṛṣṭeḥ prādhānyamāsthitā
ākarṣiṇīti mudreyam...................... || iti ||

pūrvoktamudrādvayavācakapadaśakyatā'vacchedakayoḥ dvayorapi 
sarvākarṣiṇīpadaśakyatā'vacchedakatvaṃ bodhyam puṣpavacchabdavat | tatrāpi 
jyeṣṭhātvaviśiṣṭavāmātvaṃ śakyatāvacchedakaṃ na tu viparītam | tathā sati 
jyeṣṭhāyā viśeṣyatvena pradhānyaṃ vācyam | prādhānye jyeṣṭhāyā 
atisaralatvena pradhānānusāreṇa viśeṣaṇībhūtavāmāyā api 
pradhānānuvartinyāḥ saralatayā tarjanīmadhyamayoḥ bāhyarūpe kuṭilatvaṃ na 
syāt | vāmāyāḥ prādhānye tu tasyāḥ kuṭilatayā tadanusāreṇa apradhānā yā 
jyeṣṭhāyāḥ pradhānānuvartinyāḥ kuṭilatvaṃ yuktam | ata eva bāhyasvarūpe 
aṅguligrathane sarvāsvaṅguliṣu kuṭilatvam | caturthī sarvavaśyakarī sarvān 
kṣityādiśivāntān vaśyaṃ svādhīnaṃ nayati prāpayatīti tathā | loke ākāśo 
dvividhaḥ dahraḥ prākṛtaśca | dahrākāśe'pi susūkṣmo'nyaḥ ākāśo'sti 
tasyānte suṣiṁū?sūkṣmam iti śrutiprasiddhaḥ | tanmadhye gāḍhamāśliṣṭā 
paraśivena yā ānandavigrahā mūrtiḥ sā sarvavaśyakarīpadavācyā | taduktaṃ 
uttaracatuśśatyām-

vyomadvayāntarālasthabindurūpā maheśvarī | 
śivaśaktyātmasaṃśleṣādeṣā vaśyakarī smṛtā || iti ||

bindurūpeti kathanāt kharūpamapi tathā | ata evāṅguli'grathanepi asyā 
bāhyarūpe bindvākāratā sarvāṅgulīnāṃ gāḍhasaṃśleṣo'pi vyaktaḥ | 
pañcamī uktaśivaśaktibindvormadhye sūkṣmarekhā nīvāraśūkavattanvī tasya 
madhye vahniśikhā iti śrutiprasiddhā | tasyāḥ śikhāyāḥ dvisvabhāvatvaṃ 
jyeṣṭhāsvabhāvatvaṃ ca | yathā loke ekasyaiva daṇḍasya 
ghaṭotpādakaśaktimattvaṃ tannāśakaśaktimattvaṃ cāsti tathā'pi sa daṇḍaḥ 
kadācidutpādakaśaktipradhāno bhūtvā ghaṭa mutpādayati 
kadācinnāśaśaktipradhānaḥ taṃ nāśayati | evaṃ loke bahusthale dṛṣṭam | 
tathā daṇḍasthānīyā uktarekhā | sā yadā 
jagadrakṣaṇakartṛtvaviśiṣṭajyeṣṭhāśaktipradhānā tadā sarvonmādinī 
padavācyā | taduktaṃ uttaracatuśśatyām-

bindvāntarālavilasatsūkṣmarūpaśikhāmayī | 
jyeṣṭhāśaktipradhānā tu sarvonmādanakāriṇī || iti ||

ata eva tadaṅguligrathanavelāyāṃ aṅguṣṭhānāmatarjanyaḥ saralāḥ dṛśyante 
bindudvayākāraṃ madhyamādvayaṃ ca bhavati | tatrāpi 
niruktaśikhāsthānāpannagrathanavelāyāṃ anāmādvayameva jñeyam | 
madhyamādvayasya tadānīṃ bindudvayarūpatvena 
tanmadhyavartyanāmādvayasya tasya madhye vahniśikhā iti prasiddhasikhātvaṃ 
yuktam | ṣaṣṭhī tu idameva pūrvoktaṃ śikhādvayaṃ yadāa vāmāpradhānaṃ 
tadā sarvamahāṅkuśā | 

p. 153)

sūkṣmarūpeṇa paramaśivakukṣau sthitaṃ jagat | yathā antastho gajaḥ aṅkuśena 
bahirākṛṣyate tathā sarvasya bahirākarṣaṇāt sarvamahāṅkuśetyucyate | 
paraśivakukṣisthajagato vamanāt vāmā tatpradhānā śikhā sarvamahāṅkuśā 
ityucyate | tadapyuktaṃ yoginītantre-

vāmāśaktipradhānā tu mahāṅkuśamayī punaḥ | 
tadvad viśvaṃ vamantī sā dvitīye tu daśārake || iti ||

ata eva pūrvamudrāyāṃ saralayoranāmayoḥ vakratā dṛśyate | loke 
vamanavelāyāṃ mānavo dhanurākāraḥ vakro bhavati | prasiddhametat | atrāyaṃ 
vivekaḥ kevalavāmātvaṃ sarvasaṃkṣobhiṇīpadapravṛttinimittaṃ 
jyeṣṭhātvaviśiṣṭavāmātvaṃ sarvākarṣiṇīpadapravṛttinimittaṃ 
sūkṣmākāśāntarvṛttibindudvayatvaṃ sarvavaśyakarapadapravṛttinimittaṃ 
jyeṣṭhāśaktipradhānakabindudvayamadhyavṛttirekhātvaṃ 
sarvonmādinīpadaśakyatā'vacchedakaṃ vāmāśaktipradhānatvaṃ 
sarvamahāṅkuśāpadaśakyatā'vacchedakaṃ evaṃ rītyā vailakṣaṇyaṃ 
sūkṣmadhiyā draṣṭavyam | saptamī sarvakhecarī jīvānāṃ 
svakarmajanitarogādiduḥkhanāśanakṣamā śaktiḥ | ata eva sarvarogaharacakrasthā 
bhavati | tadapyuktaṃ yoginītantre-

dharmādharmasya saṅghaṭṭādutthitā vittirūpiṇī |
vikalpotthakriyāloparūpadoṣa[?]vighātinī |
vikalparūparogāṇāṃ hāriṇī khecarī matā || iti ||

asyārthaḥ dharmaḥ śaktiḥ paraśivavṛttitvāt | na vidyate dharmo yatreti adharmaḥ 
paraṃ brahma paraśivaḥ | yadvā na kasyāpi dharmaḥ adharma iti nañtatpuruṣa eva 
yuktaḥ paraśive śaktirūpadharmasattvena pūrvakalpe svoktavyāghātāt | tayoḥ 
saṃghaṭṭaḥ melanaṃ tena utthitā | yāvadvikalpaḥ tenotthitāḥ yāḥ kriyāḥ 
nityanaimittikāḥ tāsāṃ lopena yatpāpaṃ tatsambhavāḥ rogāḥ tannāśinī 
khecarīti | ata evaitādṛśaśivaśaktisāmarasyadyotakaṃ bāhyarūpe 
bāhudvayaparivartanam | aṣṭamī bījamudrā jagataḥ ṣaḍvikāreṣu prāthamiko yo 
bhāvavikāraḥ sūkṣmarūpeṇa sattā tadabhimāninī śaktiḥ | 
taduktamuttaracatuśśatyām-

śivaśaktisamāśleṣasphuradvyomāntare punaḥ |
prakāśayantī viśvaṃ sā sūkṣmarūpasthitaṃ sadā |
bījarūpā mahāmudrā................ || iti ||

ayamarthaḥ vaṭabīje susūkṣme'pi kiñcidākāśo'sti vibhutvāt | tasmin yathā 
mahāvṛkṣaḥ sūkṣmarūpeṇa tiṣṭhati tathā ṣaṭtriṃśattattvāni śivaśaktigarbhe 
vidyante sūkṣmarūpeṇa | saiva sattā ghaṭo'sti paṭo'sti ityatra anuvartate | sā 
bījamudretyarthaḥ | sarvabījasthānāpannatvāt sarvabījā | sūkṣmatvādeva 
aṅgulipragrathanavelāyāṃ saṃkṣobhiṇyādyapekṣayā alpayonitvaṃ 
sūkṣmatvajñāpakam | yā 

p. 154)

navamī yonimudrā tadvṛttyasādhāraṇo dharmaḥ mudrātve sati kalārūpatvam | 
mudrātvasvarūpamuktaṃ prāk | kalāpadārthaścocyate | śaktiviśiṣṭe 
prakāśarūpe paraśive śaktimapahāya kevalasvarūpamātraniṣkarṣaṇe sati 
turīyabindupadavācyatvaṃ yathā jalaniṣṭhaṃ dravatvamapahāya 
svarūpamātraniṣkarṣaṇe jalapadavācyatvam | atrāpahānaṃ nāma 
śakyatā'vacchedakakoṭipraveśābhāva eva na tataḥ pṛthak niṣkāsanaṃ 
asambhavāt | tasya śuddhaśivasya śaktisambandhitvena vivakṣāyāṃ 
kāmabindupadavācyatā | tasyaiva saṃbandhasyābhedatvena 
śakyatā'vabchedakakoṭipraveśe visargo hakāraḥ vimarśaḥ iti 
tāntrikavyavahāraḥ | tādṛśasāmarasyottaraṃ raktaśuklabindumiśraṇena 
āvirbhūtānandāntarbhāveṇa vivakṣāyāṃ kaletyucyate | īdṛśakalārūpā [ṭ. 
kalāpadaśakyatā'vacchedakakoṭau ānandasyādhikasya niveśa iti viśeṣaḥ 
ityadhikaḥ-ba.] yonimudrā | taduktaṃ nityāhṛdaye-

saṃpūrṇasya prakāśasya lābhabhūmiriyaṃ punaḥ |
yonimudrā kalārūpā.................... || iti ||

sarvavaśyakarī kevalabindudvayarūpā asyāḥ śarīre 
bindudvayasaṃsargāvirbhūtānando'pi śakyatā'vacchedakakoṭipraviṣṭa iti tato 
vailakṣaṇyaṃ jñeyam | daśamī trikhaṇḍā pūrvamuktā | evaṃ 
daśamudrāṇāṃ svarūpaṃ śrīgurukṛpāviśeṣeṇāvirbhūtasphūrtikaṃ 
yathāmati lokānāṃ sukhabodhārthaṃ spaṣṭīcakāra | evaṃ 
svarūpajñānaphalaṃ tantreṣu anantaṃ prapañcitaṃ vistarabhayānneha likhitam | 
evaṃ daśamudrāścaturasre tṛtīye pūjyāḥ | atrāpi icchayā prāptau niyāmakaṃ 
vacanaṃ tantre-

purassavye ca vaṃśe ca vāme caivāntarālake |
ūrdhvādho daśamudrāśca.................. || iti ||

pūrvadakṣiṇapaścimottareṣvāgneyādyantarālacatuṣke cordhvamadhaśca daśa 
mudrāḥ pūjyā iti tadarthaḥ || 1 ||

prathamāvaraṇasamaṣṭipūjā

prathamāvaraṇasya vyaṣṭipūjāmuktvā samaṣṭipūjāmāha-

etāḥ prakaṭayoginyastrailokyamohanacakre samudrāḥ sasiddhayaḥ sāyudhāḥ 
saśaktayaḥ savāhanāḥ saparivārāḥ sarvopacāraiḥ sampūjitāḥ santviti 
tāsāmeva samaṣṭyarcanaṃ kṛtvā || 2 ||

etāḥ aṇimā'ditrikhiṇḍā'ntāḥ | prakaṭayoginya iti tāsāmeva samaṣṭināma 
yathā caitro maitra ityādipratyekanāmavatāmapi manuṣya iti samaṣṭināma tadvat | 
uktayoginīṣu prakaṭatvaṃ ca śivādiṣaṭtriṃśattattvānāṃ madhye yā sthūlā 
pṛthivī tadrūpe bhūpure caturaśre vartamānatvāt | taduktaṃ nityāhṛdaye-

p. 155)

tatra prakaṭayoginyaścakre trailokyamohane |
yoginyaḥ prakaṭā jñeyāḥ sthūlaviśvaprathātmani ||
sthitatvāt................................... || iti ||

trailokyamohanamiti yogarūḍhibhyāṃ [yogarūḍhiśaktyā 
bhūsadanātmakacaturasrarekhātrayasya nāma - ba.] caturasratrayātmakaṃ 
sarvabāhyaṃ yaccakraṃ tasya nāma | samudrāḥ iti pūrvaṃ vistareṇa daśa yāḥ 
pratipāditāḥ tāsvekaikā mudrā ekaikacakre'sti | daśamī trikhaṇḍā 
sarvavyāpikā | asminnarthe pramāṇaṃ yoginītantre'sti | śrībhagavān 
paraśurāmo'pi tattaccakrapūjāyāṃ ekaikamudrāpradarśanaṃ vakṣyati 
[adhastanāvaraṇārcaneṣu ityarthaḥ |] | evaṃ ca yasmin yā mudrā'sti tayā sahitā 
ityarthaḥ | sasiddhaya iti atra siddhirnāma tattacchaktisādhyaṃ phalam | tacca 
svākāreṇa sūkṣmarūpeṇa tiṣṭhatyeveti śaktayo'pi sasiddhayaḥ | sāyudhā iti 
spaṣṭam | saśaktayaḥ atra śaktipadena aṇimā'diniṣṭhā yā tattatkāryajanakatā 
tadavacchedako yo dharmaḥ sa grāhyaḥ | na hi kāraṇatā niravacchinnā loke 
prasiddhā | ataḥ svaniṣṭhakāraṇatāyām avacchedakaṃ kiṃcidabhyupagantavyam 
| abhyupagataṃ ca yadrūpaṃ tat adhiṣṭhānādanyannavetyanyadetat | 
tādṛśaśaktyā sahitāḥ | savāhanāḥ iti spaṣṭam | parivārā anucarāḥ taiḥ 
sahitāḥ | śeṣo mantrārthaḥ spaṣṭaḥ | tāsāmaṇimā'ditrikhaṇḍā'ntānāṃ 
samaṣṭhyarcanaṃ samudāyanāmaghaṭitamantreṇārcanaṃ vidhāya | atra 
mantragataliṅgena prārthanāṅgatvaṃ pratīyate loṭśravaṇāt prārthaneṣu liṅ 
loṭa ca iti pāṇinismṛteḥ | tathā'pi mamāgne varcovihaveṣvastu0 iti mantrasya 
vihavyā upadadhāti iti śrutyā liṅgaṃ bādhitvā upadhānāṅgatvavat 
arcanāṅgatvaṃ bodhyam | sampūjitāḥ santu iti samaṣṭhyarcanaṃ kṛtvā ityanena 
arcanāṅgatve pratīyamāne durbalaṃ loṭśravaṇaṃ na bādhakaṃ bhavati || 2 ||

karaśuddhimuccārya tripurācakreśvarīmavamṛśya drāmiti 
sarvasaṃkṣobhiṇīmudrāṃ pradarśayet | cakrayoginīcakreśīnāṃ nāmāni 
bhinnāni | śiṣṭaṃ samānam || 3 ||

atra karaśuddhipadena karaśuddhinyāsāṅgabhūto mantraḥ nyāsaprakaraṇoktaḥ 
[ayaṃ karaśuddhinyāsamaṃtraḥ pāścātya-3-khaṇḍe śrīkramastha-15 sūtre 
tadbhaṣaye 102 patre'sti |] tam uccārya | tripureti trailokyamohanacakrasya nāyikā | 
tripurā cāsau cakreśvarī ceti karmadhārayaḥ | tripuretyatra puṃvadbhrāvābhāva 
ārṣaḥ | īdṛśīṃ cakreśvarīm avamṛśya sampūjya | atrāpi pūjārūpatvāt 
śrīpāduketi mantraśeṣo'sti | paraṃ tu samaṣṭyarcane śrīpādukāmiti 
mantraśeṣo nāsti iti samaṣṭyarcanaṃ vidhāya ityatra iti śabdena 
śeṣavyavacchedāt | drāṃ iti sarvasaṃkṣobhiṇīmudrābījaṃ tāṃ paṭhitvā 

p. 156)

savaṃsaṃkṣobhiṇīmudrām aṅgulipragrathanarūpāṃ vakṣyamāṇarītyā 
pradarśayet | devyā iti śeṣaḥ | evaṃ vakṣyamāṇarītyā devyagrabhāge aṅguliṣu 
grathiteṣu tasyāḥ darśitaṃ bhavati | evamagrimeṣvavagantavyam | evaṃ prakṛte 
samaṣṭhyarcanamantraṃ prakṛtackreśyāśca mantramuktvā 
agrimasamaṣṭyarcanamantre [āgāmi pañcamasūtre |] cakreśīmantre ca keṣāṃcit 
varṇānāṃ paryudāsapūrvakaṃ kāṃścidvarṇānatidiśati cakreti | 
cakranāmāni sarvāśāparipūraketyādīni [adhastana-4 
sūtrāditattadāvaraṇadarśakasūtreṣu vakṣyamāṇāni |] yoginīnāṃ nāmāni 
guptetyādīni cakreśīnāṃ tripuretyādīni yāni nāmāni tadvarṇābhinnāni | 
samudrāḥ [anugata 154 patre-2-sūtre uktaṃ samudrāḥ sasiddhayaḥ ityādi |] 
ityādivarṇakūṭaṃ samānam | anena tattatprakaraṇe uktacakrādināmasthāne 
vakṣyamāṇanāmāni paṭhanīyānīti bhāvaḥ || 3 ||

dvitīyāvaraṇapūjā

atha dvitīyāvaraṇapūjāmāha-

ṣoḍaśapatre kāmākarṣiṇī nityākaleti nityākalā'ntāḥ buddhyākarṣiṇī 
ahaṅkārākarṣiṇī śabdākarṣiṇī sparśākarṣiṇī rūpākarṣiṇīrasākarṣiṇī 
gandhākarṣiṇī cittākarṣiṇī dhairyākarṣiṇī smṛtyākarṣiṇī nāmākarṣiṇī 
bījākarṣiṇī ātmākarṣiṇī amṛtākarṣiṇī śarīrākarṣiṇī etā guptayoginyaḥ 
sarvāśāparipūrake cakre samudrāḥ ityādi pūrvavat ātmarakṣāmuccārya 
tripureśīmiṣṭvā drīṃ iti sarvavidrāviṇīṃ [dvi. pa. śi. 15-8/6 viṣayo dṛśyaḥ |] 
pradarśayet || 4 ||

nityākaleti varṇasamudāyaḥ ante yannāmnaḥ iti vyutpattyā 
buddhyākarṣiṇyādipañcadaśasvapi idaṃ viśeṣaṇamanuṣajya yojyam | sarvatra 
puṃvadbhāvo nā'sti prathamamantrapāṭhānurodhāt | śrīpāduketyādiśeṣaḥ 
pūrvavat | ṣoḍaśapatre kramastu vāmakeśvaratantre ṣoḍaśāre mahādevīṃ 
vāmāvartena pūjayet iti | tatrāpyārambhaḥ kasmāddalādārabhya kartavya iti 
viśeṣajijñāsāyāṃ devyagrakoṇamārabhyeti setubandhe sthitam | 
yoginīcakrayoḥ prakṛtamantrapraveśārthaṃ nāmanī āha etāḥ guptayoginya iti 
bhūpurāpekṣayā ṣoḍaśadalasya antaḥsthatvena tatrasthā yoginyaḥ guptāḥ | 
śiṣṭaṃ samānam iti pūrvasūtreṇaiva prāptamartham anuvadati samudrāḥ 
ityanena | anuvādaphalaṃ ca tadarthakānāṃ

p. 157)

padāntarāṇāṃ mantre prakṣepo mā bhavatvityetadartham | pūrvavat pūrvaṃ 
yathoccaritaṃ tathaivetyarthaḥ [anugate 154 patre asmin khaṇḍe-2-sūtre samudrāḥ-
ityāditaḥ santvintam-ityarthaḥ |] | ātmarakṣā [anugate 102-patre 3 khaṇḍe-
śrīkrame-16 sūtroktarakṣaśabdānto mantraḥ |] tanmantraḥ | śeṣaṃ spaṣṭam || 4 ||

tṛtīyāvaraṇapūjā

tṛtīyāvaraṇapūjāmāha-

dikpatre 
kusumāmekhalāmadanāmadanāturārekhāveginyaṅkuśāmālinīranaṅga-
pūrvāḥ saṃmṛśyaitāguptatarayoginyaḥ sarvasaṃkṣobhaṇacakre samudrāḥ 
ityādi parvavadātmāsanamuccārya tripurasundarīmiṣṭvā klīmiti 
sarvākarṣiṇīmudrāṃ [etatsarvākarṣiṇīmudroddhārārtha dvi. pa. śi. 15-8/7 vi. 
dṛśyaḥ |] pradarśayet || 5 ||

atra dikpadamaṣṭasaṅkhyālakṣakaṃ dikṣu aṣṭasaṅkhyāyāḥ sattvāt | tathā ca 
digvṛttisaṅkhyāni patrāṇi yasminniti vyutpattyā tṛtīyacakraparam | 
dikṣvaṣṭasaṅkhyā ca avāntaradiśo gṛhītvā catasro 
diśaścatasro'vāntaradiśāḥ iti śruteḥ | avāntaradikṣvapi adhikaṃ tu praviṣṭaṃ 
na taddhāniḥ iti nyāyena diktvamabādhitam | anaṅga iti pūrvaṃ yāsāṃ 
kusumādīnāṃ devatānāṃ nāmādau tāḥ devatā anaṅgapūrvāḥ | 
atrānyapadārtho dravyaḥ na kusumādivarṇasamudāyaḥ 
saṃmṛśyetyasyānanvayāpatteḥ | etaddevatāpūjākramaśca yoginītantre-

anaṅgakusumāṃ pūrve dakṣiṇe'naṅgamekhalām |
paścime'naṅgamadanāmuttare madanāturām ||
anaṅgarekhāmāgneye nair-ṛte'naṅgaveginīm |
anaṅgāṅkuśāṃ vāyavye īśāne'naṅgamālinīm || iti ||

pūrvacakradevatā'ntaraṅgatvāt āsāṃ guptataratvam | śeṣaṃ gataprāyam || 5 ||

caturthāvaraṇapūjā

caturthāvaraṇapūjāmāha-

bhuvanāre saṃkṣobhiṇīdrāviṇyākarṣiṇyāhlādinīsaṃmohinīstambhinī 
jṛmbhiṇīvaśaṅkarīrañjanyunmādinyarthasādhinī sampattipūraṇī 
mantrayīdvandvakṣayaṅkarīḥ [atra-dīrghekārāntāḥ saṃkṣobhiṇītyato 
dvandvadvaddakṣayaṅkaryantāḥ-14-devatāḥ |] sarvādīravamṛśyaitāḥ 
sampradāyayoginyaḥ sarvasaubhāgyadāyakacakre 

p. 158)

samudrāḥ ityādi mantraśeṣaḥ cakrāsanamuccārya [anugate 103 patre-3-
śrīkrame�18-sūtrabhāṣye'yaṃ cakrāsanamantro'sti |] tripuravāsinīṃ 
cakreśvarīmiṣṭvā blūṃ iti sarvavaśaṅkarīmudrāmudghāṭayet [dvi. pa. śi. 15-
8/8 vi. dṛśyaḥ |] || 6 ||

bhuvanāre caturdaśāre | bhuvanāni caturdaśa [bhavanasaṅkhyāḥ ārā yatra tatra-
manvasre-ityarthaḥ |] | śeṣaṃ dikpatravat [uparitana-28-sūtravadityarthaḥ |] | sarva 
ādiryannāmāvayavānāmityapi vyākhyātaprāyaṃ anaṅgapūrvāḥ ityanena | 
kramākāṅkṣāyāṃ yoginītantre vāmāvartakrameṇaiva paścimādeva 
dakṣiṇam iti paścime prārambhaḥ tatastato dakṣiṇaṃ grāhyamiti tadarthaḥ | 
paścimādārabhya aprādakṣiṇyeneti phalito'rthaḥ || 6 ||

pañcamāvaraṇapūjā

pañcamāvaraṇapūjāmāha-

bahirdaśāre 
siddhipradāsampatpradāpriyaṅkarīmaṅgalakāriṇīkāmapradāduḥkha 
vimocinīmṛtyupraśamanīvighnanivāriṇyaṅgasundarīsaubhāgyadāyinīḥ 
sarvapūrvāḥ sampūjyaitāḥ kulottīrṇayoginyaḥ sarvārthasādhakacakre [cakre iti 
manu-śrī.] manuśeṣamuktvā [etatkhaṇḍe 154 patre-2-sūtre samudrāḥ-ityataḥ 
santvityantaṃ manuśeṣaṃ jñeyam |] mantrāsanamuccārya [anugate 103 patre-3-
khaṇḍe śrīkrame-18-sūtre cakrāsanamantro'sti |] tripurā śrīcakreśvarīṃ 
pratyavamṛśya sa ityunmādinīmudrāṃ dadyāt || 7 ||

navacakreṣu daśāradvayamasti | tayormadhye yat bahirdaśāraṃ tatretyarthaḥ | 
śeṣaṃ vyākhyātaprāyam | atrāpi kramākāṅkṣāyāṃ pūrvacakravadeva 
kramaḥ | vāmakeśvaratantre tathaivetyanena pūrvacakrakramātideśāt || 7 || 

ṣaṣṭhāvaraṇapūjā 

ṣaṣṭhāvaraṇapūjāmāha-

antardaśāre jñānaśaktyaiśvaryapradājñānamayīvyādhivināśinyādhāra-
svarūpāpāpaharā'nandamayīrakṣāsvarūpiṇīpsitaphalapradāḥ sarvopapadāḥ 

p. 159)

yaṣṭavyā etāni garbhayoginyaḥ sarvarakṣākaracakre śiṣṭaṃ [etatkhaṇḍe-154-
patre-2-sūtre samudrāḥ ityataḥ santvityantaṃ manuśeṣaṃ jñeyam |] tadvat 
sādhyasiddhāsanamuccārya [anugate-103-patre-śrīkramokte-18-sūtre ayaṃ 
sādhyasiddhāsanamantro'sti |] tripuramālinī mānyā kromiti 
sarvamahāṅkuśāṃ [dvi. pa. śi. 15-7/6 vi. dṛśyaḥ |] darśayet || 8 ||

sarvopapadāḥ sarvapūrvāḥ | mānyā pūjyā | kramastu pūrvavat 
[vāmāvartenetyarthaḥ |] pūrvoktena vidhānena iti yoginītantrāt | śeṣaṃ 
vyākhyātakalpam || 8 ||

saptamāvaraṇapūjā 

saptamāvaraṇapūjāmāha-

aṣṭāre vaśinyādyaṣṭakaṃ namaḥsthāne [imā vaśinyādyaṣṭadevyaḥ 3 
khaṇḍe-śrīkrame-20-sūtre-104-patre santi |] pūjāmantrasannāma etā 
rahasyayoginyaḥ sarvarogaharacakre śiṣṭaṃ spaṣṭaṃ mūrtividyāmuccārya 
[ayaṃ mūrtividyāmantraḥ 4 khaṇḍe-136-patre-2 sūtre'sti |] tripurāsiddhā 
mārādhya śivabhṛgu-ṛddhiyukphreṃ iti khecarī deyā || 9 ||

yoginīnyāsaprakaraṇe ye vaśinyādīnāmaṣṭau mantrā uddhṛtāḥ teṣu 
namaḥpadasthāne pūjāmantrasya śrīpāduketi mantrasya sannāma ūhaḥ kāryaḥ 
| caturthīsahitanamaḥpadasthāne pūjāmantraḥ kārya ityarthaḥ anyathā 
caturthīśravaṇāpatteḥ [caturthī pūrvaṃ śrūyamāṇā yā tasyāḥ 
bādhakābhāvena tacchravaṇaṃ syāt-a. śrī.] ||

na ca namaḥpadanivṛttau tadyoganimittacaturthyapi nivartate nimittāpāye 
naimittikāpāyaḥ iti nyāyāt iti vācyam | na hi caturthīsattve namaḥpadaṃ nimittam 
kiṃ tu tadutpattau | tathā ca namaḥpadaṃ nimittīkṛtyotpannā yā caturthī tasyā 
nivartakaparyantaṃ sthitau bādhakābhāvāt ||

na ca caturthyutpatteḥ prāgeva namaḥpadaṃ nivartatām tathā 
satyutpādakābhāvāt na caturthī iti vācyam | nyāsamantrasya 
pūjāmantraprakṛtitve siddhe prakṛtito'tideśena caturthī namaḥ padasahitaprāptau 
namaḥpadaṃ yuktavinyāsenohena bādhitaṃ caturthī kena bādhyatām | śraute 
prakṛtito'gnipadasahitanirvāpamantrasya prāptau sūryayāge arthabādhāt 
agnipadamātrasya sūryapadena bādhaḥ na caturthyāḥ | tathā'trāpi | tasmāt 
caturthīsahitanamaḥpadabādhakaḥ pūjāmantraḥ | śeṣaṃ gataprāyam ||

p. 160)

mūrtividyā mūrtikalpanamantraḥ āvāhanaprakaraṇe uktaḥ | śivo hakāraḥ 
bhṛguḥ sakāraḥ ṛddhiḥ khakāraḥ | atra pramāṇāni prāk [atra prākvāma-103-
patre-3-khaṇḍe śrīkrame 18 sūtrabhāṣye iti jñeyam |] darśitāni | tairyuktaḥ 
phremiti varṇaḥ hskhphreṃ iti | imamuccārya khecarīṃ darśayedityarthaḥ || 9 ||

āyudhapūjā 

āyudhapūjāmāha-

bāṇabījānyuccārya sarvajṛmbhaṇebhyo bāṇebhyo namaḥ dhaṃ thaṃ 
sarvasaṃmohanāya dhanuṣe āṃ hrīṃ sarvavaśīkaraṇāya pāśāya kroṃ 
sarvastambhanāyāṅkuśāya namaḥ iti mahātryasrabāhyacaturdikṣu 
bāṇādyāyudhapūjā || 10 ||

bāṇabījāni saṃkṣobhiṇyādipañcamudrābījāni kāmeśvarabāṇānāṃ 
[taduktaṃ kulasāre-

saṃkṣobhiṇyādimudrāṇāṃ yāni bījāni pañca vai |
tāni sarvāṇi deveśi śarādau samprakīrtayet || iti ||

ityadhikaḥ-ba.] bījāni | taduktaṃ mālinītantre-

thāntadvayaṃ samālikhya vahnisaṃsthaṃ krameṇa tu |
mukhavṛttena netreṇa bindunā paribhūṣitam ||
bāṇadvayamidaṃ proktaṃ mādanaṃ bhūmisaṃsthitam ||
caturthasvarabindvāḍhyaṃ nādarūpaṃ varānane |
phāntaṃ cakreṇa [śakreṇa-śrī.] saṃyuktaṃ vāmakarṇavibhūṣitam ||
bindunādasamāyuktaṃ sargavān candramāḥ priye ||
pañca bāṇānimān viddhi māmakān prāṇavallabhe || iti ||

asyārthaḥ thāntaḥ mātṛkākrame thakārāgrimo dakāraḥ tasya dvayaṃ likhitvā 
tayormadhye prathamadakāraṃ vahninā repheṇa saṃsthaṃ yuktaṃ 
mukhavṛttamākāraḥ mātṛkānyāse tasya tatsthānatvāt | binduśca tābhyāṃ 
sahitaḥ | drāmiti sampannam | dvitīyadakāre'pi vahnisaṃsthatvaṃ tallagnaṃ 
tadanantaraṃ netreṇa vāmanetreṇa īkāreṇa mātṛkānyāse tatsthānatvāt 
bindunā ca samanvitaṃ drīmiti sampannam | evaṃ sampannabījadvayaṃ 
bāṇadvayaṃ bhavati | ādyabāṇadvayabījaṃ bhavati | evaṃ mādanaṃ kakāraḥ 
bhūmiḥ lakāraḥ tasmin saṃsthitaṃ adho lakāraḥ upari kakāraḥ iti bhāvaḥ 
caturthasvaraḥ īkāraḥ binduḥ prasiddhaḥ tābhyām āḍhyaṃ yuktam klīmiti 
sampannam | phāntaṃ bakāraḥ 

p. 161)

vyutpattiḥ thāntavat cakreṇa lakāreṇa yuktaṃ vāmakarṇa ūkāraḥ tena bindunā 
ca yuktaṃ vlūmiti sampannam | sargo visargaḥ tadvān candramāḥ sakāraḥ saḥ iti | 
evaṃ ca drāṃ drīṃ klīṃ blūṃ saḥ iti pañca māmakān bāṇān 
viddhītyarthaḥ | kāmeśvarībāṇabījāni yoginītantre-

tvagasṛṅmāṃsamedo'sthimajjārṇāntāḥ sureśvari |
dvitīyasvarasaṃyuktā ete bāṇāstadīyakāḥ || iti ||

asyārthaḥ tvak yakāraḥ tvagvālī vyāpako vāyuḥ iti kośāt | asṛgrephaḥ ro 
raktaḥ krodhinī rephaḥ iti kośāt | māṃsaṃ lakāraḥ pinākī māṃsasaṃjñikaḥ 
iti kośāt | medo vakāraḥ vo medo varuṇaḥ sūkṣmaḥ iti kośāt | asthimajjānte 
caramadeśe sthitaṃ śukraṃ tadvarṇaḥ sakāraḥ daśapādo bhṛguḥ śukram iti 
kośāt | yadvā asthimajjārṇau saṣau śaṅkukarṇāsthisaṃjñaśca śakāro 
vidbhirīritaḥ iti tathā vṛṣaḥ śveteśvaraḥ pīto majjā iti ṣakārādhikāre ca 
kośāt | tayorante vartamānaḥ sa ityarthaḥ | uktāḥ varṇāḥ 
dvitīyasvarasaṃyuktāḥ ākāreṇa yuktāḥ bījarūpatvāt binduyogo'pi | itthaṃ ca 
yāṃ rāṃ lāṃ vāṃ sāṃ iti devyā bāṇabījāni | uktavarṇeṣu 
binduyogastantrāntare śarve'ntasthāstṛtīyoṣmābindvanantasamanvitāḥ | 
yaralavāḥ antasthāḥ tṛtīyoṣmā sakāraḥ anantaḥ ākāraḥ | atra bāṇabījapadena 
sarveṣāṃ grahaṇam setubandhe yāṃ rāṃ lāṃ vāṃ sāṃ 
sarvajṛmbhaṇebhyaḥ kāmeśvarībāṇebhyo namaḥ drāṃ drīṃ klīṃ blūṃ saḥ 
sarvajṛmbhaṇebhyaḥ kāmeśvarabāṇebhyo namaḥ iti mantradvayaṃ likhitvā agre 
idaṃ ca kalpasūtrānuguṇyenoktam iti likhitvā vastutastu svatantrānusāreṇa ādau 
dvitārī tato [uparitanāni-yāṃ-ityādīni-5-drāṃ-ityādīni ca-5-iti-10 
bāṇabījānītyarthaḥ |] daśabāṇabījānyuccārya 
sarvajṛmbhaṇabāṇaśaktiśrīpādukāṃ pūjayāmi iti lekhāt ||

nibandhe tu kāmeśvarabāṇabījamātraṃ likhitvā sarvajṛmbhaṇebhyo bāṇebhyo 
namaḥ iti mantrasvarūpaṃ likhitam | tatra bāṇabījatvasyobhayasādhāraṇatvena 
bāṇabījānyuccāryetyanena śivabāṇānāmevoccāraṇaṃ na devyāḥ iti 
bhagavato rāmasyābhiprāyaniṣkāsane pramāṇagandhasyāpyabhāvāt pratyuta 
sthūlamānena vicāryamāṇe lalitopāsteḥ upakrāntatvāt tadīyabāṇapūjanameva 
yuktam | tānapahāya kevalaśivabāṇāneva lilekha | tadīyaṃ sāhasaṃ mahattaram 
||

na ca tathā sati uttaramantreṣu dhanuṣe 
pāśāyāṅkuśāyetyekavacanamanupapannam iti vācyam 
pāśādhikaraṇanyāyenopapattisambhavāt | yadvā bījadaśakamuccārya 
sarvajṛmbhaṇebhyo bāṇebhyo namaḥ iti dvayoḥ tantreṇaiva pūjanam | 
devatātvaṃ cāgnīṣomavadvyāsaktam | itthameva pāśādiṣu | evaṃ ca 
āśāsānāmedhapataye medham itivat dhanurdvayaniṣṭhadevatātvasya 
vyāsaktatvāt devatātvāvacchinnasyaikatvāt 

p. 162)

tadabhiprāyeṇaikavacanopapattiḥ | bāṇapadottaraṃ bahuvacanaṃ ca 
devatātvādhiṣṭhānānvayīti medhapatibhyāṃ medhaṃ itivat na 
kā'pyanupapattiḥ ||

na ca nibandhakāraḥ śivabāṇabījānyullikhan babhrāmetyāstām | paraṃ tu 
lalitāprakaraṇasthatvāt śaktibāṇabījānāmevātra grahaṇam 
bāṇabījānyuccārya iti kalpasūtreṇāviśeṣeṇa śrutasyāpi prakaraṇena 
saṅkocasya āgneyyā'gnīdhramupatiṣṭhate ityādau dṛṣṭatvāt iti vācyam 

kāmabāṇān maheśāni dhanustatpāśameva ca |
cakramadhye catuḥkoṇe krameṇa paripūjayet ||

iti vāmakeśvaratantravacanena teṣāṃ śivāyudhānāmapi lalitāprakaraṇe 
pūjanaṃ vihitam prakṛte kalpasūtre bāṇabījānyuccāryeti aviśeṣeṇa śrutasya 
prakaraṇena saṅkoce kartavye tato'pi balavatā vākyāntareṇa 
śrūyamāṇārthasyaiva vyavasthāpanāt | āgneyyā'gnīdhramupatiṣṭhate ityatra 
prakaraṇabādhakaṃ vacanāntaraṃ nāstīti vaiṣamyam ||

na ca tantrāntarāśrayaṇaṃ na kriyata iti pratijñāhāniḥ sūtrārthanirṇayāya 
vacanāntarānusaraṇe pratijñāyāmanupapattyabhāvāt ||

kiṃ ca bahuṣu pustakeṣu kalpasūtrapāṭhaḥ dhaṃ thaṃ sarvasaṃmohanāya 
dhanuṣe namaḥ āṃ hrīṃ sarvavaśīkaraṇāya pāśāya namaḥ iti ayamapi 
bāṇadvayagrahaṇe liṅgam | anyathā dhanurbāṇayorubhayasambandhinoḥ 
grahaṇasūcakaṃ bījadvayaṃ kimiti paṭhet | dṛśyate ca bahuṣu pustakeṣvayameva 
pāṭhaḥ | tasmādubhayapūjanamāvaśyakam | yadi ca keṣucit pustakeṣu 
bījadvayapāṭhasyādarśanāt niśśaṅkaṃ paramatasiddhiriti vibhāvyate tadā'pi 
sarvapustakeṣvavivādena dhaṃ iti dhanurmantre śivadhanurbījamasti 
turīyamaruṇāvargāt dvitīyamapi pārvati | puṃstrīkodaṇḍayugalam iti 
vāmakeśvaratantrāt | asyārthaḥ aruṇāvargastavargaḥ tatra turīyo dhakāraḥ 
dvitīyaḥ thakāraḥ krameṇa puṃstrīdhanuṣī ityarthaḥ | anena dhaṃ iti 
śivadhanurbījaṃ siddham | evaṃ pāśe hrīṃ ityavivādena sarvapustakeṣvasti | 
tacca śaktipāśabījaṃ māyā strīpāśa ucyate iti yoginītantravacanāt | evaṃ 
kvacit pumāyudhabījakathanaṃ kvacit stryāyudhabījakathanaṃ pragrathanarūpam 
āyudhadvayagrahaṇe sarvapustakasādhāraṇaṃ liṅgam | tantrāntaravacanaṃ ca 
spaṣṭarūpaṃ likhitaṃ prāk | ekavacanagatiḥ darśitā ato 
virodhābhāvādāyudhadvayamatra pūjyamiti mamāsaṃśayaṃ pratibhāti | 
dharmasyātīndriyatvāt sādhavaḥ sudhiyaḥ pariśīlayantu ito'pyadhikam | itthaṃ 
ca yasmin pustake dhanurmantre kevalaṃ dhaṃ ityasti tat thaṃ 
ityasyāpyupalakṣakaṃ tṛtīyamantre hrīmiti āmityasyāpyupalakṣakaṃ tasya 
śivapāśarūpatvāt ādyantago mahāpāśaḥ pauruṣeyaḥ prakīrtitaḥ iti 
vāmakeśvaratantrāt |

p. 163)

etadartho'pi prāk nīlapatākāmantroddhāre varṇitaḥ | aṅkuśabījaṃ tu 
ubhayorekaṃ kāmo'gnirvyāpakoṅkuśaḥ ityaviśeṣeṇa yoginītantrapāṭhāt | 
tasya tantreṇa sakṛdeva pāṭhaḥ | itthaṃ ca mantrasvarūpaṃ yāṃ rāṃ lāṃ 
vāṃ sāṃ drāṃ klīṃ blūṃ saḥ sarvajṛmbhaṇebhyo bāṇebhyo namaḥ 
bāṇaśrīpādukāṃ [bāṇaśaktiśrī-śrī.] pūjayāmi | thaṃ dhaṃ 
sarvasaṃmohanāya dhanuṣe namaḥ dhanuḥśrīpādukāṃ pūjayāmi | hrīṃ āṃ 
sarvavaśīkaraṇāya pāśāya namaḥ pāśaśrī0 | kroṃ 
sarvastambhanāyāṅkuśāya namaḥ aṅkuśaśrī0 iti | śaktibījānāṃ prāthamye 
tatprādhānyaṃ gamakam ||

kecittu tantrānuyāyinaḥ daśabījānyuccārya kāmeśvarakāmeśvarībāṇebhyo 
namaḥ iti paṭhanti | tadatīvāśuddham | kāmeśvarī ca kāmeśvaraśceti 
dvandvāpavādakatvāt pumān striyā ityekaśeṣaḥ syāt na dvandvaḥ ||

mahātryasram ādyatrikoṇaṃ tasya bāhyataḥ aṣṭāsratryasramadhye dikṣu 
paścimādiprādakṣiṇyena | taduktaṃ vāmakeśvaratantre-

paścimottarapūrvāśā dakṣiṇāśā krameṇa tu | iti |

atra nibandhe āyudhamantreṣu śrīpādukāmiti śeṣayojanābhāve mūlaṃ sa eva 
praṣṭavyaḥ ||

na ca aṣṭākṣarīprāpakaṃ sarvatra devatānāmasu śrīpūrvakaṃ 
pādukāmityādivākyaṃ tatra devatānāmasvityanena yatra devatāyā nāma 
gṛhyate tatraivāṣṭākṣarī [ādau tattaddevatānāma saṃgṛhya-śrīpādukāṃ 
pūjayāmi-ayamevāṣṭākṣarīmantra uktaḥ prāgapi |]  nānyatra | prakṛte 
vidhāyakavākye bāṇādirūpanāmagrahaṇābhāvāt na tathā iti vācyam | 
devatānāmasvityasya devatānāmaghaṭitamantreṣviti nibandhakāreṇāpyavaśyaṃ 
vācyam | anyathā oghatraye tadyogaḥ tattvato virudhyate | tatra vidhivākye 
devatānāmagrahaṇaṃ nāsti kiṃ tvoghatrayamevāsti | tasmānna kiṃcidetat || 10 ||

aṣṭamāvaraṇapūjā

aṣṭamāvaraṇapūjāmāha-

trikoṇe vākkāmaśaktisamastapūrvāḥ 
kāmeśvarīvajreśvarībhagamālinīmahādevyaḥ bindau caturthī || 11 ||

yā paraśivarūpadīpasya prakāśarūpā parā śaktiḥ sā sṛṣṭyunmukhā tridhā 
jātā vāmā jyeṣṭhā raudrī ceti | kramāt rajassattvatamaḥpradhānāḥ tāḥ | 
tāsāṃ samaṣṭivācakaṃ padaṃ tantraśāstre ambiketi | imā eva kramāt 
icchājñānakriyāśaktayaḥ ityucyante | amūṣāṃ tripurasundarīvyaṣṭirūpatvaṃ 

p. 164)

jñāpayitumeva yoginīṣu atirahasyeti viśeṣaṇaṃ agre dattavān | atra 
vāgbhavapadena [atra-mūle-vāk-ityeva padaṃ-tatotra-vākpadeneti sambhāvyatām 
|] prathamakūṭaṃ grāhyam kāmapadena dvitīyakūṭaṃ śaktipadena 
tṛtīyakūṭaṃ na tu bālāvarṇāḥ vāmakeśvaratantre kūṭānāmeva 
parigṛhītatvāt | yadyapi tantrāntare vāgbhavaṃ cādyakūṭaṃ ca iti samuccayo'pi 
dvayordṛśyate tathā'pi atra vāgādīnāmevoktatvāt yoginītantrānusāreṇa 
kūṭamātragrahaṇam | samastaṃ kūṭatrayam | imāni pūrvaṃ yāsāṃ 
nāmnāṃ tāḥ catasraḥ trikoṇe trikoṇakoṇatraye bindau ca pūjyā ityarthaḥ ||

nibandhakāraḥ caturthadevatāyā mantre samaṣṭimūlāntaraṃ lalitāśrī0 iti 
lilekha | tattuccham | kāmeśvarī vajreśvarī bhagamālinī mahādevyaḥ iti sūtre 
krameṇa catasṛṇāṃ devatānāṃ nāmasu satsu śāstraprasiddhaṃ parityajya 
svakapolakalpitaṃ laliteti nāma mantre praveśayāmāsa | atra śāstraṃ na 
pramāṇam | acintyaśaktimantreṣvapi svecchāpravṛttiśīlo yaḥ tadvacanaṃ 
mahānto'pi viśvasanti | atra mūlaṃ śrībhagavanmāyāsamutpannālasyameva 
nānyat | na ca mahādevīparyāya eva lalitāśabdaḥ tatprayoge kiṃ bādhakam iti 
vācyam | agnimīle iti mantre vahnimīle ityapi prayogenāpūrvaṃ syāt | 
ityalamasadāveśena ||

kramastu vāmakeśvaratantre-

kāmeśvarīmagrakoṇe vajreśīṃ dakṣiṇe tataḥ |
bhagamālinīṃ tathā vāme madhye tripurasundarīm || iti || 11 ||

kāmeśvaryādīnāṃ mūladevyabhinnatvam

nanu pañcadaśanityānāṃ mantreṇa mūlavidyayā cābhyarcya iti vihitaṃ 
prakṛte'pi turīyadevatāyāḥ mūlena pūjanamuktaṃ binducakre'pi vakṣyati 
mūlena pūjanam evaṃ caramacakreśvaryā api | evaṃ ca ekamantrakaraṇakatvāt 
ekadevatākaṃ yāgatrayaṃ abhyāsarūpaṃ vā bhinnadevatākaṃ vā iti 
śaṅkāyāṃ devataikyaṃ pratipādayati-

tisṛṇāmāsāmanantaramabhedāya mūladevyāḥ pūjā | 
kāmeśvaryādicaturthīnityānāṃ ṣoḍaśī cakradevīnāṃ navamī 
binducakrasthā cetyekaiva | na tatra mantradevatābhedaḥ kāryaḥ | tanmahādevyā 
eva | caturṣu sthaleṣu viśeṣārcanamāvartate || 12 ||

p. 165)

āsāṃ kāmeśvaryādīnāṃ tisṛṇāmanantaram āsāṃ 
mūladevyabhinnatvapratipādanāya mūladevyāḥ pūjā | evaṃ sthalāntare'pi 
tripurasundaryā ante pūjanaṃ tatra tatra svasvapūrvadevatākūṭābhedaṃ 
jñāpayati | imamevārthaṃ spaṣṭaṃ darśayati kāmeśvarīti | prakṛtacakre 
kāmeśvaryādibhyaḥ paraṃ caturthī pañcadaśanityābhyaḥ paraṃ ṣoḍaśī 
aṣṭacakrāt paraṃ navame bindau saiva cakārasūcitā punarbindāveva 
aṣṭacakreśīpūjā'nantaraṃ cakreśītvena pūjyā ekaiva | tatra eṣu sthaleṣu 
devatābhedaḥ mantrabhedaśca nāsti | itthaṃ ca nityāḥ samastāvaraṇadevyaśca 
tripurasundaryā avyatiriktā iti jñāpayituṃ tattadante uktamiti bhāvaḥ | nanu 
devataikye dravyaikye mantraikye sakṛdeva pūjanaṃ yuktaṃ kimiti pūjātrayaṃ ata 
āha caturṣu sthaleṣu viśeṣārcanamāvartate iti | darśitacatuḥsthaleṣvityarthaḥ | 
tathā ca yāgaikye'pi tadabhyāsasyāpūrvasādhanatvenāvaśyakatvāditi bhāvaḥ 
| na cābhyāse sati yathā prokṣaṇamantro nāvartate tathā mantrāvṛttirna syāt iti 
vācyam kriyā'ntaravyavadhāne abhyāse'pi mantrāvṛtteḥ agnihotrādau 
dṛṣṭatvāt | tathā'trāpi kriyā'bhyāsarūpatve'pi 
svavijātīyakriyā'ntaravyavadhānādyuktā mantrāvṛttiḥ || 12 ||

prāsaṅgikamuktvā prakṛtamāha-

etā atirahasyayoginyaḥ sarvasiddhiprade cakre | pariśiṣṭaṃ draṣṭavyam | 
āvāhanīmuccārya [patre-4-khaḍe-3 sūtre tadbhāṣye ca eṣā āvāhanī vidyāsti-
tato grāhyā-athavā-ddi. pa. 15/3 vi. dṛśyaḥ |] tripurāmbāṃ sambhāvya hsaum-iti 
bījamudrākṛtiḥ || 13 ||

pariśiṣṭamityanantaraṃ pūrvavat iti śeṣaḥ | āvāhanī tatprakaraṇoddhṛtā vidyā 
| sambhāvya pūjayitvā | kṛtiḥ kartavyetyarthaḥ || 13 ||

navamāvaraṇapūjā

navamāvaraṇapūjāmāha-

binducakre mūlena devīmiṣṭvā eṣā parāpararahasyayoginī sarvānandamaye 
cakre samudrā sasiddhiḥ sāyudhā saśaktiḥ savāhanā saparivārā sarvopacāraiḥ 
saṃpūjitā'stviti punarmūlamuccārya mahācakreśvarīmiṣṭvā vāgbhavena 
yoniṃ [ime dve mudrepi-ddi. pa. śi. 15-8/15-2 15-8/2 viṣayayordṛśye |] pradarśya || 
14 ||

p. 166)

atrāpi nibandhakāraḥ mūlānte śrīlalitāśrīpādukāṃ pūjayāmi iti 
yojayāmāsa | tadaśuddham | etatpūrvasūtre na tatra mantradevatābhedaḥ kāryaḥ 
tanmahādevyā eva caturṣu sthaleṣu iti vākye sthalacatuṣṭaye'pi mahādevyāḥ 
pūjanam iti kaṇṭharaveṇoktam | śrutyā śrutaśabdaṃ parityajya aśrutaśabdasya 
kalpanaṃ aśāstrīyam | anyathā sauryaṃ caruṃ nirvapedbrahmavarcasakāmaḥ 
ityasmin yāge sūryaparyāyaśabdaṃ prakṣipya divākarāya juṣṭaṃ nirvapāmi iti 
syāt | na ca tatra sūryaśabdaḥ utpattivākye śrutaḥ iha tu pūrvasūtraṃ 
notpattivākyaṃ kiṃ tu abhyāsarūpaguṇavidhāyakamiti vaiṣamyam iti vācyam | 
nāyamaikāntiko niyamaḥ utpattivākya eva śravaṇamapekṣitamiti | 
nakṣatreṣṭyupahomotpattivākyaṃ śo'tra juhoti ityetāvanmātram | nātra 
devatāvācakaḥ śabdaḥ śrūyate | tathā'pi mantre- agnaye svāhā kṛttikābhyaḥ 
svāhā ityatra śrūyamāṇo yo'gnyādiśabdaḥ taṃ gṛhītvā 
prathamamanvādhāne'gnimājyena iti vyavaharanti na tu vahnimājyeneti | 
yadyutpattivākya eveti niyamaḥ tarhyatra svecchayā syāt | na ca asya kramasya 
utpattivākye śakticakraikanāyikāyāḥ lalitāyāḥ kramamārabheta ityāsmin 
lalitāśabdasya śrutatvāt tadgrahaṇam iti nibandhābhiprāyaḥ varṇituṃ śakyaḥ | 
tathā sati pūrvasūtre lalitāyā eva caturṣu sthaleṣu iti vaktavye tamapahāya 
mahādevyā eveti kathanasya phalaṃ brahmaṇā'pi vaktuṃ aśakyam | manmate tu 
lalitāmahādevīśabdayoḥ ekārthakatve'pi yatra viśeṣo na śrutaḥ tatra 
lalitāśabdaprayogaḥ yatra śrutaḥ tatra śrutaśabdoccāraṇaṃ apūrvajanakamiti 
jñātvā lalitāśabdaparityāga iti | phalaṃ saṅkalpādau śrīlalitāprītaye iti 
vaktavyam | prakṛte mahādevī śabdasya niravakāśasya prayoga ucitaḥ | ata 
evānayā diśā navamyāḥ cakreśvaryāḥ mantre mahādevīprāptau 
viśeṣataścakreśīmiṣṭveti tatra śrutatvāt mahādevīśabdabādhaḥ 
sāvakāśaniravakāśayoḥ niravakāśaṃ balīyaḥ iti nyāyāt | na ca evaṃ sati 
caturṣu mantrābhedaḥ pradarśitaḥ idānīṃ triṣu mahādevīghaṭito mantraḥ ekatra 
mahācakreśvarīghaṭita iti mantrabhedaḥ patitaḥ kathametat iti vācyam 
nibandhakāreṇāpi lalitāmahācakreśvarīśrī0 iti likhitatvena asya doṣasya 
ubhayasādhāraṇatvenācodyatvāt | pratyuta nibandhakāramantrasya 
lalitāpadaghaṭitatvena astyatyantavailakṣaṇyam | manmate devīsthāne 
cakreśvarīmātraprakṣepe ekadeśavikṛtamananyavat iti 
vaiyyākaraṇaparibhāṣāmāśritya nirvāho bhaviṣyatītyalamati vistareṇa ||

mahādevīśabdaniruktirdevībhāgavate-

bṛhadasya śarīraṃ yadaprameyaṃ pramāṇataḥ | 
dhāturmahati pūjāyāṃ mahādevī tataḥ smṛtā || iti ||

vāgbhavena aiṃ ityanena na prathamakūṭena pūrvāṣṭamudrābījeṣu 
varṇaikatvadarśanāt tatpaṅktisthasyāsyāpi tādṛśatvasyāvaśyakatvāt | ataḥ 
aiṃ ityasyaiva grahaṇaṃ yuktam || 14 ||

p. 167)

dhūpādidānam

evaṃ navāvaraṇapūjāṃ vidhāya agre kartavyakriyāśeṣamāha-

pūrvavaddhūpadīpamudrātarpaṇanaivedyādi [ddi. pari. 15 vi. dṛśyaḥ |] dattvā || 
15 ||

dhūpādinaivedyānteṣu pūrvoktadharmāṇāṃ [atra 
pūrvoktadharmāṇāmityanenaitatkramīyānugata-4-6-7-
sūtroktadharmāṇāmityartho jñeyaḥ ||] prāptyarthaṃ pūrvavaditi | dhūpādiṣu 
ye pūrvoktadharmāḥ taddharmakāḥ te dhūpādayaḥ kāryā ityarthaḥ | te ca 
dharmāḥ dhūpadīpanaivedyeṣu pūrvamantrāḥ | mudrāsu pūrvavattvaṃ tarpaṇe 
mūlamantraḥ trirabhyāsaḥ ityevaṃrūpāḥ jñeyāḥ | ādipadena 
tāmbūlakarpūranīrājanādimaddravyaprajvalanaprabhṛtayo grāhyāḥ ||

nibandhakāraḥ ṣoḍaśyupāsakaḥ trikhaṇḍāmapi pradarśayet ityuvāca | saḥ 
babhrāma tathāvyavasthāyāḥ sūkte anuktatvāt ||

trikhaṇḍā'dimudrāṇāṃ svarūpam

atra saṃkṣobhiṇyādimudrāpradarśanārthaṃ 
[etatsaṃkṣobhiṇyādiyonimudrāntasarvamudrāṇāmuddhāraḥ dvi. pa. śi. 15-
viṣaye dṛśyaḥ |] tatkathaṃbhāvajñānasyāvaśyakatvāt 
tanmudrādarśanaprakāraḥ sapramāṇaṃ saṃkṣepeṇa kathyate | tatrāvāhane 
prathamaṃ viniyuktā trikhaṇḍocyate | trikhaṇḍālakṣaṇamuktaṃ 
vāmakeśvaratantre-

parivartya karau spṛṣṭāvaṅguṣṭhau kārayet samau |
anāmā'ntargate kṛtvā tarjanyau kuṭilākṛtī ||
kaniṣṭhike niyuñjīta nijasthāne maheśvari |
trikhaṇḍeyaṃ samākhyātā tripurā'hvānakarmaṇi || iti ||

parivartanaṃ nāma hastadvayāṅgulimelanam | idaṃ sarvatrādhikārarūpaṃ 
sadanveti | aṅguṣṭhau saralau parasparaspṛṣṭau tathaiva kaniṣṭhe madhyame ca 
kuryāt | vāmānāmopari dakṣānāmāṃ tiryak prasārya tayoradhaḥpradeśāt 
tarjanīdvayamānīya kuṭilākārābhyāṃ tarjanībhyām anāmā'gradvayaṃ 
dhārayet | anāme antargate yathoriti vigraheṇa labdho'rthaḥ | asyā uktarītyā 
nirmāṇe khaṇḍatrayaṃ dṛśyate | upari saralāṅguṣṭhadvayayogaḥ | madhye 
tādṛśamadhyamāyogaḥ | adhaśca kaniṣṭhāyogastādṛśaḥ | evaṃ sati 
pūrvoktavāmājyeṣṭhāraudrīkalātrayarūpamasyāṃ sphuṭam | ata eva trayaḥ 
khaṇḍāḥ kalāḥ yasyām iti vigraheṇa trikhaṇḍeyam atra yadyapi 
khaṇḍadvayanirmāṇaprakāra uktaḥ | madhyamakhaṇḍaracanāprakāro noktaḥ | 
tathā'pi trikhaṇḍeti yogārthasampattaye tantrāntaraṃ śaraṇīkṛtya 
khaṇḍatrayaṃ sampādanīyam | khaṇḍatrayamuktaṃ jñānārṇave-

p. 168)

pāṇidvayaṃ maheśāni parivartanayogataḥ |
yojayitvā tarjanībhyām anāme dhārayet priye ||
madhyame yojayenmadhye kaniṣṭhe tadadhastataḥ |
aṅguṣṭhāvapi saṃyojya tridhā yugmakrameṇa tu ||
trikhaṇḍā mama mudreyaṃ tripurā'hvānakarmaṇi || iti ||

sarvasaṃkṣobhiṇīsvarūpaṃ tatraiva-

madhyame madhyage kṛtvā kaniṣṭhāṅguṣṭharodhite |
tarjanyau daṇḍavat kṛtvā madhyamoparyanāmike ||
eṣā tu prathamā mudrā sarvasaṃkṣobhakāriṇī || iti ||

tantrarāje tu-

kaniṣṭhā'nāmikāmadhyāḥ nakhairanyonyasaṅgatāḥ |
kṛtvā'ṅguṣṭhau kaniṣṭhāsthāvṛjū kuryācca tarjanī ||
sarvasaṃkṣobhiṇī mudrā trailokyakṣobhakāriṇī || iti ||

sarvavidrāviṇī mudrā tatraiva-

etasyā eva mudrāyā madhyame sarale yadi |
kriyate cenmaheśāni sarvavidrāviṇī tadā || iti ||

madhyame madhyame'prītyarthaḥ | etena tarjanīmadhyamayoḥ dvayoḥ saralatvaṃ 
jñeyam ||

tṛtīyamudrā'pi tatraivoktā-

madhyamā tarjanīyugme vakrīkuryāt sulocane ||
etasyā eva mudrāyāstadākarṣaṇakāriṇī || iti ||

tatraiva caturthī mudrā sarvavaśaṅkaryuktā-

puṭākārau karau kṛtvā tarjanyāvaṅkuśākṛtī |
parivartya krameṇaiva madhyame tadadhogate ||
krameṇa devi tenaiva kaniṣṭhā'nāmike api |
saṃyojya nibiḍāḥ sarvāḥ aṅguṣṭhāvagradeśataḥ ||
mudreyaṃ parameśāni sarvavaśyakarī smṛtā || iti ||

asyārthaḥ puṭākārau parasparaṃ pṛṣṭhasaṃlagnau ūrdhvāgrāṅgulikau hastau 
kṛtvā tato'ṅguṣṭhavyatiriktāṅgulayaḥ parasparamaṅgulisandhiṣu praveśya 
tarjanyādikaniṣṭhā'ntā aṅgulayaḥ aṅkuśākārāḥ kuryāt | evaṃ kṛtvā 
tato'ṅguṣṭhadvayaṃ adhomukhaṃ tarjanyupari sthāpayet | iyaṃ sarvavaśaṅkarī 
iti bhāvaḥ ||

p. 169)

pañcamyapi tatraiva-

saṃmukhau tu karau kṛtvā madhyamāmadhyage'nuje |
anāmike tu sarale tadbahistarjanīdvayam ||
daṇḍākārau tato'ṅguṣṭhau madhyamānakhadeśagau |
mudraiṣonmādinī nāma kledinī sarvayoṣitām || iti ||

ayamarthaḥ vāmakaniṣṭhopari dakṣakaniṣṭhāṃ tiryaganāmādvayoparimārgeṇa 
madhyamāparyantaṃ prasārya tādṛśakaniṣṭhā'gradvayaṃ madhyamādvayena 
dṛḍhaṃ gṛhṇīyāt | gṛhītamadhyamānakhopari daṇḍākāramaṅguṣṭhadvayaṃ 
sthāpayet | tathā'nāmādvayaṃ parasparābhimukhyena sarale kuryāt | 
anāmikayoḥ pārśvadvaye tarjanīdvayamapi saralaṃ kuryāt | eṣā sarvonmādinī 
mudrā yoṣidvaśyakarī iti ||

ṣaṣṭhī mudrā'pi sarvamahāṅkuśā tatraiva prakaṭitā-

asyāstvanāmikāyugmamadhaḥ kṛtvā'ṅkuśākṛti |
tarjanyāvapi tenaiva krameṇa viniyojayet ||
iyaṃ mahāṅkuśā mudrā sarvakāryārthasādhinī || iti ||

asyāḥ sarvonmādinyāḥ | tenaiva krameṇa anāmikākrameṇa | 
anāmikā'ṅkuśākārā | tathaiva tarjanīdvayamapi kartavyam | śeṣaṃ 
pūrvamudrāvat iti bhāvaḥ ||

saptamīṃ khecarīmudrāṃ tatraiva vyācacakṣe-

savyaṃ dakṣiṇahaste tu dakṣiṇaṃ savyahastataḥ |
bāhū kṛtvā maheśāni hastau samparivartya ca ||
kaniṣṭhā'nāmike devi yuktvā tena krameṇa tu |
tarjanībhyāṃ samākrānte sarvordhvamapi madhyame ||
aṅguṣṭhau tu maheśāni kārayet saralāvapi |
iyaṃ sā khecarī nāma mudrā sarvottamā priye ||

asya tātparyam bāhū saralau prathamaṃ kṛtvā dakṣabāhūpari vāmaṃ 
sthāpayitvā punarvāmaṃ hasta dakṣahastādhomārgeṇa vāmapārśve 
nirgamayya hastadvayāṅgulīḥ vakṣyamāṇarītyā grathnīyāt | tadyathā 
vāmānāmākaniṣṭhe dakṣamadhyamādhomārgeṇa dakṣatarjanyāṃ nītvā 
evaṃ dakṣānāmākaniṣṭhe vāmamadhyamā'dhomārgeṇa vāmatarjanyāṃ 
nītvā hastadvayatarjanībhyāṃ svasamīpāgatānāmākaniṣṭhe dṛḍhaṃ 
gṛhṇīyāt | madhyame sarvordhvaṃ sarale evāgrābhyāṃ parasparasaṃlagne 
sthāpayet | aṅguṣṭhau saralau kṛtvā yonisādṛśyaṃ sampādayet | iyaṃ 
khecarīmudrā | yadyapyuktārthaḥ sarvo'pi pūrvalikhitavacane nāsti tathā'pi-

p. 170)

vāmaṃ bhujaṃ dakṣabhuje dakṣiṇaṃ vāmadeśataḥ |
niveśya yojayet paścāt parivartya krameṇa hi ||
kaniṣṭhā'nāmikāyugme tarjanībhyāṃ nirodhayet |
madhyame sarale kṛtvā yonivat saralau tataḥ ||
aṅguṣṭhau khecarīmudrā pārthivasthānayojitā ||

iti jñānārṇavavacanena saha ekavākyatāṃ sampādya niṣkāsito'rtho jñeyaḥ ||

aṣṭamīmudrā'pi tatraiva prakaṭitā-

parivartya karau spṛṣṭāvardhacandrākṛtī priye |
tarjanyaṅguṣṭhayugalaṃ yugapat kārayet tataḥ ||
adhaḥkaniṣṭhā'vaṣṭabdhe madhyame viniyojayet |
tathaiva kuṭile yojye sarvādhastādanāmike ||
bījamudreyamacirāt sarvasiddhipravartinī || iti ||

asyārthaḥ anāmāmadhyamāmārgeṇa vyatyaste kaniṣṭhike svādhobhāge 
madhyamā yathā tiṣṭhati tathā kuryāt | tato madhyamādvayaṃ 
kaniṣṭādvayāvaṣṭambhakaṃ yathā tathā kuryāt | sarvādhaḥsthite anāme 
yāvatkuṭile bhavataḥ tāvat kuryāt | aṅguṣṭhatarjanīyugalaṃ ardhacandrākṛti 
yathā bhavati tathā yojayet | iyaṃ bījamudrā bhavati ||

navamīṃ yonimudrāṃ tatraiva viśinaṣṭi-

madhyame kuṭilākāratarjanyupari saṃsthite |
anāmikāmadhyagate tathaiva ca kaniṣṭhike ||
sarvā ekatra saṃyojya aṅguṣṭhaparipīḍitāḥ |
eṣā tu prathamā mudrā yonimudreti yā sthitā || iti ||

asyārthaḥ anāmike madhyamā'dhomārgeṇa kuṭilākāratarjanyupari vyatyaste 
sthāpayet | anāmikāpṛṣṭhalagne vyatyaste kaniṣṭhike saṃyojayet | 
aṅguṣṭhāgradvayaṃ madhyamāmadhyaparvadvaye yojayet | iyaṃ yonimudrā 
bhavati | yadyapi etāvānartho na labhyate tena vacanena tathā'pi-

anāmikāpṛṣṭhabhāge madhyamāmadhyaparvaṇi |
kaniṣṭhāṅguṣṭhasaṃśleṣānmahāyonistrikhaṇḍikā ||

iti sthalāntare | asyārthaḥ yā trikhaṇḍā sā mahāyoniḥ | tato viśeṣastviyān 
madhyamāmadhyaparvaṇī aṅguṣṭhasaṃyogaḥ anāmikāpṛṣṭhabhāgena 
kaniṣṭhikāsaṃyogaḥ | śeṣaṃ trikhaṇḍayā samamityarthaḥ | anena saha 
pūrvavacanasyaikārthatāyāṃ kriyamāṇāyāṃ pūrvalikhitārthaḥ saṃpadyate || 

p. 171)

evaṃ daśamudrāḥ paramagahanāḥ yathāmati saprapaccaṃ sapramāṇaṃ 
prapañcitāḥ prāsaṅgikāḥ | prakṛtamanusarāmaḥ || 15 ||

kāmakalādhyānam

atha kāmakalādhyānaṃ vaktumupakramate-

bindunā mukhaṃ bindudvayena kucau saparārdhena yoniṃ kṛtvā kāmakalāmiti 
dhyātvā || 16 ||

sūkṣmaṃ kalādhyānaṃ sthūlaṃ ceti dvividham | tatra 
sūkṣmakāmakalādhyānasya asmatparameṣṭhigurubhiḥ 
uttaracatuśśatīvyākhyāne vistareṇa setubandhe varivasyārahasye ca 
vyākhyātatvāt tādṛśadhyānakartuḥ upāsakadhaureyasya sāmprataṃ 
śaśaśṛṅgakalpatvena tallekhanasya kevalasvapāṇḍityamātrakhyāpakatvam 
idānīntanavedāntaśāstrādhyayanavat syāt | ataḥ prathamaṃ parityajya 
sthūlameva mandādhikāriṇāmupayogāya varṇayiṣyāmaḥ | tadyathā turīyasvare 
hakāre vā aṃśatrayaṃ parikalpya tatra strīrūpaṃ parikalpya urdhvāṃśe 
mukhakalpanāṃ madhyamāṃśe kucadvayakalpanāṃ jaghanyāṃśe 
yonikalpanāṃ ca kṛtvā dhyāyet | taduktaṃ kuṇḍalinīvimarśe-

śaktimadhyaparikalpitāṃśakeṣvantaraṅgaparibhāvane paṭuḥ |
ūrdhvamadhyatadadho vibhāgaśaḥ cintayenmukhakucāvadhomukham ||

asmin śloke śaktiśabdārthaḥ īkāraḥ iti bahavaḥ | hakāra ityapi kecit | 
adhomukhaṃ yonimityarthaḥ | śeṣaṃ spaṣṭam | mukhaṃ binduṃ kṛtvā 
kucayugamadhastasya tadadho harārdhaṃ dhyāyedyoharamahiṣi te manmathakalām 
iti śrībhāgavatpādairapyuktam | setubandhe tu īkāra eva sthūladhyānamuktam 
īkārasya binduvisargātmanaḥ śivaśaktyoḥ sāmarasyarūpasya svātmatvena 
bhāvanāyāṃ paramānandānubhavaḥ iti paṅktyām | sālagrāme viṣṇubuddhivat 
bhagavatyāḥ dhyānādhiṣṭhānaniyamo'yam | evaṃ sthūladhyānena 
jitāntaḥkaraṇastādṛśopāsakamakuṭamaṇiḥ sūkṣmakalāṃ 
setubandhādilikhitāṃ gurumukhāt jñātvā kāmamupāsīta | nānye 
idānīntanāḥ tadyogyāḥ | tādṛśadhyānaṃ ca 
paradevatāśrīguruprasādaikalabhyam | ayamarthastripurārṇave suspaṣṭamuktaḥ-
sūkṣmadhyāne'samarthaścet sthūlaṃ dhyāyedyathoktavit iti | itthaṃ ca 
pūrvoktānyataravarṇe mukhaṃ kucau yoniṃ cāṃśatraye kṛtvā manasā 
nirmāya kāmakalām iti vakṣyamāṇaprakāreṇa [sannihitādhastha-17-sūtra 
bhāṣyobhayoktyanusāreṇetyarthaḥ |] dhyātvā yathā'vakāśamiti śeṣaḥ || 16 ||

varṇaviśeṣe pūrvoktāvayavakalpanānantaraṃ viśiṣṭe dhyānaprakāramāha-

saubhāgyahṛdayamāmṛśya || 17 ||

p. 172)

saubhāgyasya dharmādisakalapuruṣārthasya hṛdayaṃ sthānaṃ 
upādānakāraṇamiti yāvat | īdṛśaṃ pūrvoktarūpam āmṛśya dhyātvā | 
pūrvasūtrasthetiśabdasya atrāpyanuvṛttiḥ | ayamevārthaḥ spaṣṭamuktaḥ 
yoginītantre-

evaṃ kāmakalārūpam akṣaraṃ yat samutthitam |
kāmādiviṣamokṣāṇāmālayaṃ parameśvari || iti ||

etaduttaraṃ nibandhe homaḥ pākṣika uktaḥ saḥ nirmūlaḥ yadyagnikāryasampattiḥ 
iti sūtrasya gaṇapatiprakaraṇasthasya anyatra prāpakapramāṇābhāvāt || 17 ||

balidānam

atha baliprakāramāha-

vāmabhāgavihitatrikoṇavṛttacaturasre gandhākṣatārcite vāgbhavamuccārya 
vyāpakamaṇḍalāya namaḥ ityardhabhaktabharitāmbhasā ādimopādimamadhya 
mabhājanaṃ tatra nyasya || 18 ||

atra vāmabhāgetyanena śīghropasthitatvāt svasyaiva vāmabhāgo grāhyaḥ | vihite 
nirmite trikoṇavṛttacaturasre | nirgamarītyā trikoṇaṃ svābhimukhaṃ grāhyam 
tathā śiṣṭasampradāyāt ||

kecittu trikoṇe yā baligrāhiṇī devatā sā 
tiryagrekhādvayasaṃyogarūpakoṇābhimukhī trikoṇavartidevatānāṃ 
tathātvaniyamāt | evaṃ ca tantrāntare-

mūladevyunmukhāṃ dhyātvā nyasyāgre balipātrakam ||

iti vacanena tasyā devatāyā mūladevyunmukhatvaniyamāt | trikoṇamapi 
devyunmukhameva na svābhimukhamityāhuḥ | tanna 
anaṅgakusumādiśrīcakrasthakoṇeṣu koṇaparāṅmukhīnāṃ 
mūladevyabhimukhīnāṃ devatānāṃ bahvīnāṃ dṛṣṭatvena 
tādṛśaniyamāsiddheḥ | na kiṃcidetat ||

gandhākṣatetyanena taditaravyāvṛttiḥ darśitā | arcane mantramāha-
vāgbhavamityādi | vāgbhavaṃ aiṃ iti | śeṣaṃ spaṣṭam | ardhaṃ bhaktena annena 
bharitāmbhasā ca sahitamiti śeṣaḥ | idaṃ bhājane viśeṣaṇam | ekasmin pātre 
ardhāṃśam annena ardhāṃśaṃ jalena pūrayet | īdṛśamekaṃ pātraṃ 
kṣīrādipātratrayaṃ ca tatra maṇḍale nyasya | atra balipātraṃ tāmramayam 

balipātraṃ tāmrabhavaṃ naivānyattu kadācana ||

iti tripurārṇavavacanāt | vyañjanādimiśraṇaṃ na kāryam etattantre 
uktadravyeṇaiva dravyākāṅkṣāśānteḥ ||

p. 173)

atra nibandhakāraḥ bāṇamudrayā balidānaṃ vāmapārṣṇighātādikaṃ lilekha | 
saḥ praṣṭavyaḥ kimatra pramāṇam iti | sa yadi brūyāt śyāmāprakaraṇe sūtre 
uktatvāt atrāpi te dharmā gṛhyante iti tarhi tadgrahaṇaṃ ākāṅkṣayā uta 
anākāṅkṣayā | ādye balidāne dravyadevatāmantrāṇāmākāṅkṣoditā 
prakṛtavākyaireva śāntā | bāṇamudrāyā vāmapārṣṇighātasya ca grahaṇaṃ 
kurvataḥ tasyaiva kīdṛśī ākāṅkṣoditeti ca na vidmaḥ | kiṃ ca 
śyāmāprakaraṇasthapārṣṇighātādidharmeṇa kimapakṛtam | 
kṣetrapālavāgīśvaryādibalayo'pi tatra santi | uktavyatiriktā anye'pi mantrāḥ 
santi | taiḥ nibandhakṛto'parādhaḥ ko'nuṣṭhitaḥ | śyāmāprakaraṇasthatvasya 
tulyatve'pi keṣucit anugṛhṇan jagrāha keṣucit ruṣṭaḥ tatyājeti mūlaṃ na vidmaḥ 
| kiṃ ca tata eva trikoṇādimaṇḍaladharmāṇāṃ prāptau punarvidhānamatra 
kimartham iti cet vāgbandhanamevottaraṃ nānyaditi | tasmāt svecchayā 
dharmapravartakasaraṇiḥ aśraddheyā | yāvaduktaṃ kāryam || 18 ||

balidāne mantramāha-

praṇavamāyā'nte sarvavighnakṛdbhyaḥ sarvabhūtebhyo huṃ svāhā iti triḥ 
paṭhitvā baliṃ dattvā || 19 ||

triḥ ityanena mantrābhyāso vihitaḥ | tena triḥpāṭhānte balidānam | devatā ca 
mantraliṅgena jñeyā || 19 ||

pradakṣiṇādi

pradakṣiṇanamaskārajapastotraiḥ santoṣya || 20 ||

pradakṣiṇamekaṃ kāryam

ajeśaśaktigaṇapabhāskarāṇāṃ pradakṣiṇe |
vedārdhacandravahnyadrisaṅkhyāḥ sarvārthasiddhayaḥ ||

iti śaktisaṅgamatantre uktatvāt | ajaḥ viṣṇuḥ | vedāḥ catasraḥ | ardhaṃ tadardhaṃ 
dvayam | candraḥ ekaḥ | vahniḥ tisraḥ | adriḥ sapta | imāḥ saṅkhyāḥ 
ajādipradakṣiṇe kramāt jñeyāḥ ityarthaḥ | śrīmacchaṅkarabhagavatpādairapi 
pradakṣiṇaṃ te paritaḥ karomi ityekavacanāntamevoktam [śrībālā-
mānasapūjā-stotre-matkṛtabālātantracandrikāyāṃ-cāyaṃ ślokosti |] ||

namaskāre tu icchaiva niyāmikā śāstropalabdhiparyantam | namaskāre 
kaścidviśeṣaḥ paramānandatantre-

p. 174)

pūjāgṛhādbahirdevīṃ praṇamet daṇḍavadbhuvi |
maṇḍale namanaṃ naiva sāṣṭāṅgaṃ daṇḍavat caret ||
jānubhyāṃ ca padābhyāṃ ca mūrdhnā hastayugena ca |
caturaṅgapraṇāmo'yaṃ maṇḍale vihitaḥ śive || iti ||

maṇḍalalakṣaṇaṃ yoginītantre-

pūjyate yatra sā devī taccaturdikṣu śaṅkari |
dhanuśśatapramāṇena maṇḍalaṃ parikīrtitam || iti ||

dhanurmānaṃ tu hastacatuṣṭayam | bṛhadvāmakeśvare tu-

maṇḍalaṃ tadvijānīyāt yāvadṛśyā hi devatā || iti ||

rahasyārṇave tu-

dvārapūjā yatra kṛtā tadantarmaṇḍalaṃ viduḥ || iti ||

ayaṃ ca deśataḥ pariccheda uktaḥ | kālataḥ paricchedastu śaktisaṅgamatantre-

dvārapūjāṃ samārabhya yāvadudvāsanaṃ bhavet |
tāvattanmaṇḍalaṃ viddhi.................. || iti ||

tripurārṇave'pi-

idaṃ tanmaṇḍalaṃ devi prārabhyaitasya pūjanam |
mārtaṇḍamaṇḍalārdhyāntaṃ .............. || iti ||

idameva maṇḍalaṃ vakṣyamāṇamaṇḍaladharmeṣu jñeyam |

pūjāgṛhaṃ tato gatvā cakrarājaṃ samarcayet |
vidyāṃ japet sahasraṃ vā triśataṃ śatameva vā ||

iti brahmāṇḍapurāṇoktajapasaṅkhyā jñeyā | ayaṃ japaḥ karmāṅgabhūtaḥ 
aṅgairubhayataḥ sandaṃśāt | yadvā-

āvṛttirgurunityā'rcā samayāmnāyayorapi |
pūjātrayaṃ japaścaiva pradhānaṃ pūjane matam ||

iti svatantratantre trayodaśollāse japasya prādhānyakathanāt pratyakṣavacanena 
kathanasya sarvabādhakatvāt ||

stotrāṇi gaṇeśagrahanakṣatretyādivāmakeśvaratantroktāni sahasranāmapāṭhaḥ 
aparādhastutiḥ satyavakāśe saptaśatīpāṭho'pi tataḥ kṛtāñjalirbhūtvā stuvīta 
caritairimaiḥ iti tatraiva vihitatvāt | evamādibhiḥ santoṣya || 20 ||

p. 175)

śaktipūjā

atha śaktipūjāmāha-

tadrūpiṇīmekāṃ śaktiṃ bālayopacāraiḥ sampūjya tāṃ mapañcakena 
santarpya || 21 ||

tadrūpiṇīṃ tripurasundarīrūpiṇīṃ ekavacanena ekāmityanena advitīyāṃ 
saundaryeṇetyarthaḥ | pratipādyate | etena tantrāntaroktaśaktilakṣaṇāni sūcitāni | 
bālayā mantreṇa upacāraiḥ yathāsambhavaiḥ | mapañcakena santarpaṇaṃ 
tasyāḥ icchāyāṃ satyāṃ jñeyam | ayaṃ bhāvaḥ santarpyetyanena jñāpitaḥ | 
tarpaṇaṃ tṛptisampādanaṃ tat śaktiniṣṭhatattadviṣayakecchānivartako 
vyāpāraḥ | tasyā icchāyāmasatyāṃ tannirvartakavyāpārasyāpi asambhavāt 
icchāyāmeva iti sidhyati | anyathā mapañcakairupacāraiśca pūjayet ityeva vadet | 
tasmādayamarthaḥ siddhaḥ | śaktilakṣaṇāni kulārṇave-

surūpā [etadādiślokāḥ kulārṇavatantre-7 ullāse-mudritapustake 64 patre santi |] 
taruṇī śāntā'nukūlā muditā śuciḥ | 
śaṅkāhīnā bhaktiyuktā guruśāstraparāyaṇā ||
priyākṣarā [priyekṣaṇā-śrī.] viśeṣajñā devatāpūjanotsukā |
manoharā sadācārā śaktirevaṃ sulakṣaṇā || iti ||

yoginītantre'pi

savarṇā hīnavarṇā vā kulasthā kulaṭā'pi vā |
mantropāsanasaṃyuktā pūjyā syāt gaṇikā'pi ca || iti ||

doṣā api kulārṇave

dūṣyā [emepi ślokāḥ pūrvatanoktapatrasthale eva santi |] ca karkaśā lajjāhīnā 
ca kuladūṣiṇī |
durācārā durārādhyā bhītā kruddhā calā'lasā ||
nidrāsaktā'tidurmeghāḥ hīnāṅgī vyādhipīḍitā |
durgandhā duḥkhitā mūḍhā vṛddhonmattā rahasyabhit ||
īdṛśīṃ mantrayuktāṃ ca pūjākāle [mudritakulārṇavapustaketra-śaktiyoge 
vivarjayediti pāṭhosti |] vivarjayet || iti ||

yaśca yoginītantre-

yogyā vā'pi niṣiddhā vā bahudoṣākulā'pi vā |
kāle suvāsinīṃ prāptāṃ sarvathā bhaktito'rcayet || iti ||

p. 176)

saḥ mukhyālābhe pūrvavacanaiḥ niṣiddhāyā abhyanujñāparaḥ vivāhe 
anṛtavadanavat | yadvā pūrvavacanaiḥ niṣedhaḥ pratipādito yaḥ saḥ 
śaktipūjāparaḥ | yogyā vā ityanena tadatiriktaṃ suvāsinīmātre pūjanaṃ 
tatkāle pratipādayati | yuktaścāyameva pakṣaḥ || 21 ||

haviśśeṣapratipattiḥ

haviśśeṣapratipattimāha-

śiṣṭaiḥ sārdhaṃ cidagnau haviśśeṣaṃ hutvā || 22 ||

atra śiṣṭatvaṃ kulārṇave darśitam-

aho bhuktaṃ tu yanmadyaṃ mohayet tridaśānapi |
tanmaireyaṃ śivaṃ pītvā yo na vikriyate naraḥ ||
japan śivaparo bhūtvā sa muktaḥ sa ca kaulikaḥ || iti ||

īdṛśaṃ śiṣṭatvaṃ sāmayikaniṣṭham | etena viśeṣaṇena ādhunikāḥ 
kaulikaṃmanyāḥ kevalaṃ jihvācapalāḥ maṇḍale na praveśyāḥ iti jñāpitaṃ 
bhavati | sāmayikaiḥ saheti sahatvaṃ ekajātīyakriyākartṛtvaṃ putreṇa saha yāti 
ityādau tathā dṛśṭatvāt | prakṛte'pi homarūpaikajātīyakriyākartṛtvamastīti 
sahatvaṃ upapannam | cidagnau cillakṣaṇe'gnau haviśśeṣaṃ devatoddeśena 
saṃskṛtārpitaśeṣam | hutvetyanena tatra kevalahomabuddhireva vidheyā | 
indriyatṛptiviṣayiṇīcchā na kadā'pi kāryeti sūcitaṃ bhavati | maṇḍale praveśe 
indriyatṛptīcchāyāṃ patita eva syāt iti bhāvaḥ | ayaṃ ca 
upayuktadravyasaṃskāraḥ āgneyaṃ caturdhā karoti itivat haviśśeṣam iti 
dvitīyāśravaṇāt || 

etenedānīntanāḥ ekaṃ kalaśaṃ asaṃskṛtadravyeṇa paripūrṇaṃ sthāpayitvā 
tasmin viśeṣārghyabinduṃ kiñcinnikṣipya taddravyaṃ sāmayikebhyaḥ 
prayacchanti | teṣāmanukūlatayā nibandhakāro'pi kṣīrakalaśādikaṃ devyāḥ 
paścādbhāge nidhāyeti viśeṣārghyapātrāt kiñcit kṣīraṃ kalaśe nikṣipet iti ca 
vākyadvayaṃ lilekha | idaṃ mūlaṃ kṛtvā ya īdṛśo'nācāraḥ patanahetuḥ 
pravṛttaḥ saḥ likhitasūtravirodhena nirastaḥ tasmin haviḥśeṣatvābhāvāt | yadi ca 
bindumātraprakṣepeṇa haviśśeṣatvaṃ syāt tarhi āpaṇasthadravye'pi 
binduprakṣepaṃ kṛtvā dravyasvīkāre doṣābhāvena mahānupaplavaḥ syāt ||

yacca tripurārṇave-

tathā pūjānimittaṃ vai prathamādyamupāhṛtam |
yajñiyaṃ tat pavitraṃ syāt dṛṣṭvā spṛṣṭvā śucirbhavet ||

p. 177)

tathaiva maṇḍale prāptaṃ sarvaṃ tadamṛtaṃ bhavet |
vipreṇānyena vā'nītaṃ devatāyai nivedayet ||
prathamādyaiḥ saṃskṛtaistu yuktaṃ tattadagātmaje |
aviśeṣeṇa sarvaistu grāhyaṃ śaṅkāvivarjitaiḥ || iti ||

saṃskṛtadravyeṇa yuktaṃ asaṃskṛtaṃ saṃskṛtaṃ bhavatīti kathayatīti 
yadyucyate tathā'pi saṃskṛtadravyasaṃyogo dvedhā | saṃskṛtadravyasya 
asaṃskṛtadravyapātre prakṣepe sati ekaḥ saṃskṛte viśeṣārghyapātre 
asaṃskṛtadravyaprakṣepeṇāparaḥ | tatra pūrvasmāt pakṣāt uttarapakṣo 
variṣṭhaḥ śraute karmaṇi some droṇakalaśe darśapūrṇamāse dhruvādau tathā 
dṛṣṭatvāt | kiṃ ca yadi saṃskṛtadravyeṇa laukikaṃ bahiṣṭhaṃ saṃskṛtaṃ 
bhavet tarhi atiprasaṅgo darśitaḥ pūrvameva [pūrvameva nāma 176 patrasthe-
āpaṇadravye'pi-ityāditaḥ0 mahānupaplavaḥ syādityantena lekhenetyarthaḥ |] 
bahirdravyasya pātre prakṣepapakṣe pūrvoktātiprasaṅgo'pi nāsti idamapi 
sādhakam | tasmāt dvitīyapakṣa eva śreṣṭhaḥ | tatrāpi pūjānimittaṃ 
bhaktenānītasthala eva ayaṃ prakāro nānyatra aśāstrīyatvāt | idānīntanāḥ 
buddhyā yathecchaṃ dravyaṃ sampādya manaḥpūtaṃ vyavaharanti | 
tatpatanāyaivālaṃ bhaviṣyatīti ||

vastutastu idamapi tantrāntarānuyāyināṃ na tu sūtrānuyāyinām | sūtre 
haviśśeṣaṃ hutvetyuktyā kalaśasthāsaṃskṛtadravye haviśśeṣatvaṃ 
gīrvāṇaguruṇā'pi pratipādayitumaśakyam śāstroktavidhinā saṃskṛtya 
devatāyai dattaśeṣasyaiva haviśśeṣatvāt | tasmāt yāgaśeṣeṇaiva 
homapratipattisaṃskāraḥ sūtrānuyāyināṃ nānyadravyeṇa iti rāddhāntaḥ ||

nanu tarpaṇe āvaraṇapūjane ca kṛte sati yadā tatraiva viniyogaḥ tadā idaṃ karma 
luptaṃ syāt iti cet na | yathā aśvaśaphamātraṃ puroḍāśaṃ karoti 
aṅguṣṭhaparvamātramavadyati iti vidhibhyāṃ anuṣṭhite haviśśeṣo niyataḥ tathā 
tantrāntare-

sāmānyakalaśaṃ pañcapalānyūnajalairyutam |
dikpalādadhikaṃ naiva hetukumbhaṃ tadardhakam |
tadardhaṃ ca viśeṣārghyam.......................... ||

iti mānānusaraṇe sūtrānuyāyināṃ hetukumbhasthānāpannaviśeṣārghye 
hetukumbhamānāṅgīkāre ṣoḍaśaśataguñjāparimitaṃ viśeṣārghyadravyaṃ 
bhavati | yadi ca viśeṣārghyamānameva asya tulyanāmatvāt aṅgīkriyate tadā'pi 
aṣṭaśataguñjāparimitamityavivādam | āvaraṇapūjādiṣu ekaikadevatoddeśena 
ekaikabinduviniyogo dṛśyate | tathā sati sāmayikānāmātmanaśca homāyālaṃ 
dravyaṃ śiṣyata eva | asmin śāstre dravyasvīkārajanito'vasthāviśeṣaḥ ullāsaḥ 
| so'pi dravyasyātyuttamatve bhavitumarhati iti na kā'pyanupapattiḥ ||

p. 178)

atra hometikartavyatāyāḥ [kartavyatāyām-iti saptamyarthotrāvadheyaḥ |] 
śiṣṭānāṃ maṇḍale praveśadharmāṇāṃ ca anukteḥ kathaṃ śiṣṭaiḥ saha 
homaṃ kuryāt ityākāṅkṣāyāṃ tantrāntaraṃ tadviṣaye śaraṇīkāryam | tathā 
sati ādau maṇḍaladharmāḥ ucyante | te coktāḥ paramānandatantre-

kṣatāṅgo jvaritāṅgaśca malināmbaramūrdhajaḥ | 
āśaucāṅgastathoṣṇīṣī kañcukī kṛtabhojanaḥ ||
pūyitāṅgastathocchiṣṭamukho maraṇasūtakī |
apasmārī kleśayuktaḥ chardyatīsārarogavān ||
prāyaścittī tathā'snāto na viśenmaṇḍale kvacit |
sakṛnmohāt praviṣṭo'pi devatāśāpamāpnuyāt ||
yadi teṣāṃ tu bhaktiḥ syādutkaṭā darśanādiṣu |
pūjāgṛhadvāradeśādbahiḥ pūjāṃ samācaret || iti ||

tripurārṇave bhuktasya viśeṣaḥ-

atarkito divā bhukto yadā rātrau samāgataḥ |
tadā gurvādyājñayā tu snātvā sevenna cānyathā || iti ||

idamapi sevanaṃ maṇḍalādbahireva |

bhuktvā na maṇḍalaṃ gacchet sarvathā parameśvari |

iti maṇḍalapraveśaniṣedhabādhakaśāstrābhāvāt ||

yacca kulārṇave-

asnātvā vā'pi bhuktvā vā abhaktyā [abhyaṅktvā-śrī.] vā kuleśvari |

yaḥ seveta kuladravyaṃ sa dāridryamavāpnuyāt ||

iti bhuktasya kuladravyasevananiṣedhaśāstraṃ kāmaṃ bādhatāṃ 
praveśaniṣedhabādhakābhāvāt praveśo na kartavyaḥ | na ca maṇḍalāt bahiḥ 
svātmīkāravidhyabhāvena svātmīkāravidhinā praveśo'pyākṣipyate iti 
vācyam | tathā sati tripurārṇave bhuktvā na maṇḍalaṃ gacchet iti 
praveśaniṣedhenaiva svātmīkāraniṣedhe siddhe-

kuladravyaṃ tathā bhuktvā mohādapi pramādataḥ |
yaḥ seveta sa vai devi devatāśāpamāpnuyāt ||

ityanena unnītaḥ kuladravyasevananiṣedho vyarthaḥ syāt | ato'nenaiva jñāpakena 
bahirapi sevanaṃ dravyasya siddham ||

p. 179)

evaṃ praveśāyogyānuktvā praveṣṭṛguṇānapyāha paramānandatantre-

snātaḥ śucirdhautavastro dhṛtapuṇḍraḥ śubhāśayaḥ |
kṣālitāṅghrikaro devīṃ dhyāyan bhaktyā praṇamya ca ||

ācāryājñā'nurūpeṇa maṇḍalāntarviśet tataḥ |
bhāvayan devatārūpaṃ maṇḍalaṃ praṇamet budhaḥ ||

puṣpāñjaliṃ tataḥ kuryāt tadvidhānaṃ nigadyate |
sāmānyakumbhatoyena karau prakṣālya bhaktitaḥ ||

surabhīkṛtya gandhādyaiḥ puṣpāṇyādāya bhaktitaḥ |
utthāya ca tato devi devatā'bhimukhasthitaḥ ||

śrīnāthādigurutrayaṃ gaṇapatiṃ pīṭhatrayaṃ bhairavaṃ siddhaughaṃ 
baṭukatrayaṃ padayugaṃ dūtīkramaṃ maṇḍalam |

vīrān hyaṣṭacatuṣkaṣaṣṭinavakaṃ vīrāvalīpañcakaṃ 
śrīmanmālinimantrarājasahitaṃ vande gurormaṇḍalam ||

samprāptapañcadaśyādiḥ sādhakastu maheśvari |
samaṣṭiyoginīvidyāmapi tatra paṭhecchive ||

devatāṃ dhyānoktarūpāṃ dhyāyan sampūjya śaṅkari | 
ācāryādīṃstato dhyātvā pūjayet parameśvari ||

praṇameduktavidhinā jñātvā sarvaṃ śivātmakam |
sa dvitīyaṃ samādadyāt pātramācāryasattamāt ||

pātraṃ grāhyaṃ dakṣakare dīkṣāyuktena śaṅkari |
anyena tu samādeyaṃ vāmahastena śaṅkari ||

athavā vāmahastena sarvairgrāhyaṃ maheśvari |
hastāntareṇa tvācchādya gṛhṇīyāt dāpayedapi ||

anācchāditapātraṃ tu bhavedasurabhāgakam |
tarpaṇādyupayoge tu chādanaṃ tu parityajet ||

upaveśakramaṃ devi śṛṇu saṃyatamānasā |
maṇḍalākārato vā'pi caturasratayā'thavā ||

ācāryaṃ madhyataḥ kṛtvā viśet jyeṣṭhakrameṇa tu |
jyeṣṭheṣu satsu na viśet ācāryasya samīpataḥ ||

p. 180)

na sāmyena guroḥ stheyaṃ strīṇāṃ madhye tathaiva ca |
nāgratastu gurordevi nājñāmullaṅghya vai guroḥ ||

evaṃ jñātvā sampradāyaṃ niṣīdenmaṇḍale śive |
ācāryo'pi tathā jyeṣṭhānutthāya praṇipatya ca ||

teṣāmājñāṃ gṛhītvaiva svāsane'tha samāviśet | 
tasmai ca pātraṃ dadyādvai jyeṣṭhāyotthāya sādhakaḥ ||

jyeṣṭhān kaniṣṭho'pi devi gṛhṇīyādutthito naman |
sarvān saṃpūjya pātrāṇi dātavyāni maheśvari ||

asampūjya śiṣyamapi yo dadyāt pātramambike |
tasmai kupyati sā devī yasmāt sarvaṃ hi tanmayam ||

prakṣālya pātraṃ puṣpādiyutamācchādya yatnataḥ |
ācāryāya tathā dadyāt namaskuryācca bhaktitaḥ ||
svīkṛtya tatprasādaṃ vai japtvā stotrādikaṃ paṭhet || iti ||

tripurārṇave-

śaktyā svarṇādisaṃyuktamarpayet pātramambike |
yatkiṃcidvā'pi pātrasthaṃ datvā'nantaphalaṃ labhet || iti ||

suvāsinīnāṃ viśeṣo yoginītantre-

evaṃ santarpya hutvā tu suvāsinyaḥ saśeṣakam |
dadyustṛtīyaṃ turyaṃ vā pātraṃ pīṭhādhikāriṇe || iti ||

tripurārṇave kaścidviśeṣaḥ-

vīrāt jyeṣṭhāt tathā'cāryāt grāhyaṃ śeṣaṃ ca carvaṇam |
tadabhāve'pi cānyasmāt jyeṣṭhāt grāhyaṃ nagātmaje ||

bṛhadvāmakeśvaratantre-

gurvādyabhāve jyeṣṭhāttu carvaṇaṃ śeṣamarpayet |
tadabhāve guruṃ mūrdhni dhyātvā taccheṣakaṃ [māharet-śrī.] nyaset ||
ādau vā guruśeṣaṃ syāt sarvānte vā nagātmaje |
pibedaśabdaṃ pātraṃ tu sakṛnniravaśeṣakam ||
sāvaśeṣaṃ tu yatpātraṃ surāpānasamaṃ tu tat || iti ||

p. 181)

pātrasya oṣṭhāsparśe'pi niṣedhastatraiva-

dūrādoṣṭhāsparśanena pānaṃ tu paśupānavat ||

kulārṇave'pi-

kareṇa pātraṃ dhṛtvā'tha na tiṣṭheta ciraṃ priye |
nālapan pātrahastaḥ san tiṣṭheta kvacidambike ||
pādena na spṛśet pātraṃ na binduṃ pātayedadhaḥ |
nānyonyaṃ tāḍayet pātraṃ na pātraṃ pātayedadhaḥ ||
sādhāraṃ noddharet pātraṃ nirādhāraṃ na nikṣipet |
riktaṃ pātraṃ na kurvīta na pātraṃ bhrāmayet priye ||
na pātraṃ laṅghayedvidvān pātraṃ notpātayet priye |
prakṣālya gopayet pātramityājñā pārameśvarī || iti ||

paramānandatantre kaścana viśeṣaḥ-

arghyasthāpanamārabhya yāvat pātravisarjanam |
sarvaṃ śivamayaṃ paśyedanyathā patito bhavet ||
sarve varṇā dvijāstatra na bhedaṃ cintayet kvacit |
udvāsānantaraṃ naikyaṃ kuryādvidvān kadācana ||
svātmīkārastridhā devi divyavīrapaśukramāt |
udvāsāvadhi divyaḥ syāt tatpaścādvīra ucyate ||
asaṃskṛtaḥ paśuḥ prokto viprāṇāmādya eva tu |
apaśuḥ kṣatriyaviśāṃ śūdrāṇāṃ tritayaṃ bhavet || iti ||

kulārṇave'pi-

bhuktimuktipradaṃ [muktiprada bhaveddivyaṃ-śrī.] divyaṃ vīraṃ bhuktipradaṃ 
bhavet || iti ||

rahasyārṇave'pi-

sampūjyaivaṃ vidhānena vipraścodvāsanāvadhi |
dravyaṃ pibet tadante'pi kṣatriyo vaiśya eva ca |
śūdrastvicchā'nurodhena vidhinā vā'nyathā'pi vā ||
nivedya devatāyai tat saṃtarpya prapibedanu || iti ||

p. 182)

etāvantaḥ atyāvaśyakadharmāḥ nirūpitāḥ | ito'dhikā anekatantrāvalokanena 
jñeyāḥ | granthavistarabhayānneha likhyante ||

atra sāmayikānāṃ kalpasūtrānuyāyinām anyeṣām uktāḥ maṇḍaladharmāḥ 
tulyāḥ | homamantraḥ sūtrānuyāyinām ārdraṃ jvalati iti mantra eva 
mantrākāṅkṣāyāṃ tantrāntaramantrāt asya sannikṛṣṭatvāt | anyeṣāṃ 
svasvatantroktā saraṇiḥ | atreyaṃ vyavasthā cintyate pīṭhādhikāriṇā 
svakartṛkapūjāphalasiddhaye pratipattisaṃskārasya avaśyamanuṣṭheyatayā sa 
maṇḍale dhyānasamartho'samarthaḥ vā kāmaṃ dravyasvīkāraṃ karotu | 
sāmayikastu dravyahomānantaraṃ śāstroktadhyānasamartha eva dravyaṃ hunet | 
nānyaḥ | tathā hi-

antarnirantaramanindhanamedhamāne mohāndhakāraparipanthini saṃvidagnau |
kasmiṃścidadbhutamarīcivikāsamāne viśvaṃ juhomi vasudhā'di 
śivāvasānam ||

dharmādharmahavirdīptāvātmāgnau manasā srucā |
suṣumṇāvartmanā nityamakṣavṛttīrjuhomyaham ||

iti mantraliṅgena kalpito dhyānaprakāra āvaśyakaḥ | devīyāmale'pi-

homena cetanāṃ jitvā dhyāyedātmānamātmanā || iti ||

kulārṇave'pi-

tanmaireyaṃ śivaṃ pītvā yo na vikriyate naraḥ |
japan śivaparo bhūtvā sa muktaḥ sa ca kaulikaḥ || iti ||

paramānandatantre'pi-

svīkṛtya tatprasādaṃ vai dhyāyenniścalamambikām || iti ||

vīracūḍāmaṇau gaṇeśvarasaṃhitāyām-

dravyamāsvādya vidhinā mano niścalatāṃ nayet |
tato dhyāyet paraṃ jyotirātmajyotiḥ sanātanam ||

ityādimanonigrahapūrvakadhyānavidhāyakavacanāni bahūni-

yāvat suṣuptatā na syādavikāritvameva ca |
tāvadeva hunet devi niṣphalaṃ tvanyathā bhavet || iti ||

vikāre tu samutpanne dhyānayogabahiṣkṛtaḥ |
yoginīnāṃ paśurdevi maṇḍalācca bahiṣkṛtaḥ ||

ityadhikapātrahome dhyānabhraṃśamūlānartho'pi tantre | tenāpi 
dhyānāvaśyakatā sidhyati | evamādīni bahūni santi | granthavistarabhayānneha 
likhitametāvadalamiti ||

p. 183)

itthaṃ ca dravyasevanasya prathamaphalaṃ cittaikāgryaṃ tena vinā 
dhyānāsambhavāt | ata eva paramānandatantre-

tāvadeva hunet devi yāvadānandasamplutaḥ |
mano niścalatāṃ yāti cittaṃ cāpi prasādatām ||
vikāre tu samutpanne dhyānayogavihīnataḥ |
yoginīnāṃ paśurdevi maṇḍalācca bahiṣkṛtaḥ |

iti ayogyasya dravyasvīkāre aniṣṭaṃ phalaṃ darśayati | yoginītantre'pi-

kuladravyaṃ samāśritya mano niścalatāṃ nayet || iti ||

tripurārṇave'pi-

ayaṃ sarvottamo dharmaḥ kaulamārgo maheśvari |
asidhārāvratasamo manoniścalahetukaḥ ||
tatra saṃyatacittatvaṃ sarvathā hyatiduṣkaram |
bhaktiśraddhāvihīnasya...................... ||

ityevamādīni tantravacanāni dravyasevanaṃ manonigrahadvārā dhyānārthaṃ 
kartavyaṃ viparīte bādhata iti koṭiśaḥ upalabhyante | 
evamāditantravacanārthānāṃ saṅgrahaṃ kurvanneva śrīparaśurāmaḥ 
śiṣṭaiḥ saha ityuvāca | īdṛśadhyānasamartho vratādidivaseṣvapi avicāreṇa 
anādṛto'pi maṇḍalaṃ praviśya pātraṃ yācitvā hutvā dhyānaṃ sampādayet | 
taduktaṃ tripurārṇave-

evaṃ sāmayiko bhaktyā mānadambhavivarjitaḥ |
anāhūto'pi [anādṛto'pyanāhūto-śrī.] vā'hūto vrajenmaṇḍalamuttamam ||
vratī vā'pi hunedeva na doṣastatra vidyate |
vratādiśaṅkayā yastu na vrajedādṛto'pi san ||
vrataṃ tasya pratihatamanarthaṃ ca samāpnuyāt |
tasmāt kaniṣṭhāhūto'pi praviśedeva maṇḍale || iti ||

atra jyeṣṭhatvaṃ kaniṣṭhatvaṃ ca viprāṇāṃ dīkṣāpūrvāparabhāvena 
jñeyam | taduktaṃ rudrayāmale-

bālo'pi dīkṣitaḥ pūrvaṃ jyeṣṭhaḥ sa tu kulāgame || iti ||

dvijo'pi dīkṣitaḥ paścādantyajaḥ pūrvadīkṣitaḥ |
dvijaḥ kaniṣṭhaḥ sa jyeṣṭha iti śāstraviniścayaḥ || iti ||

p. 184)

tatraiva vacanāt kṣatriyādīnāṃ paścāt dīkṣito'pi dvija eva jyeṣṭhaḥ | 
kvaciducchiṣṭagrahaṇe yonisambandhādapi jyeṣṭhatvaṃ pratipādayati | taduktaṃ 
tripurārṇave-

vidyāsambandhato vā'pi yonisambandhatastathā |
jyeṣṭhānāmapi cocchiṣṭaṃ dīkṣitānāṃ ca bhakṣayet || iti ||
dīkṣāhīnasya cocchiṣṭaṃ janakasyāpi dīkṣitaḥ |
na bhakṣayet sakṛdvā'pi bhuktvā pātityamāpnuyāt || iti ||

atha prasaṅgāt kena kiyaddravyasevanaṃ kāryaṃ ? tadvivicyate | tatra bālopāstau 
tripātraṃ pañcadaśīmantropadeśavataḥ catuṣpātraṃ ṣoḍaśyādidīkṣāvataḥ 
pañcapātram | taduktaṃ paramānandatantre-

saubhāgyatopāsakasya catustattvaṃ bhavecchive |
bālādyupāsakānāṃ tu tatpūjoktavidhānataḥ ||
teṣāṃ tu tattvatritayaṃ anyat sarvaṃ samaṃ bhavet || iti ||
dīkṣāvatāṃ pūrṇapātraṃ pañcamaṃ tu bhavecchive |
hutvā śivāgnau kramaśaḥ tricatuḥpañcapātrakam || iti ||

nanu-

pītvā pītvā punaḥ pītvā yāvat patati bhūtale |
utthāya ca punaḥ pītvā punarjanma na vidyate ||
ānandāt tṛpyate devī mūrcchayā bhairavaḥ svayam |
vamanāt sarvadevāstu tasmāt tritayamācaret ||

ityādikulārṇavaprabhṛtitantreṣvaniyatapānasyoktatvāt kathaṃ pātraniyama iti cet 
śṛṇu śāstrābhiprāyaṃ ajñastattvabubhutsuścet | pītvā pītveti likhitavacanam 
āgalāntaṃ pibeddravyaṃ sa mukto nātra saṃśayaḥ ityādikulārṇavavacanaṃ 
yathecchayā'nurūpaṃ na sarveṣāṃ kiṃ tu pūrṇārūḍhānām | ata eva 
kulārṇave āgalāntam ityasyāvyavahitaprāk pūrṇābhiṣekayuktānāṃ pānaṃ 
devi nigadyate iti pratijñāya āgalāntaṃ pibet dravyam ityādivacanāni likhitāni | 
pūrṇābhiṣekalakṣaṇamapi tatraiva kulārṇave-

yo nindāstutiśītoṣṇasukhaduḥkhādisambhave |
samaḥ sarvatra yogīśo harṣāmarṣavivarjitaḥ || ityādinā
tattvatrayaśrīcaraṇamūlamantrārthatattvavit |
devatāgurubhaktaśca śāmbhavīmudrayā'nvitaḥ ||
sa ca pūrṇābhiṣiktaḥ syāt kauliko na tu dīkṣayā || iti ||

p. 185)

īdṛśo yaḥ pūrṇābhiṣiktaḥ sa eva pūrṇārūḍhaḥ tasyaiva āgalāntamiti 
vidhānam | ata eva amṛtārahasye-

brahmajñānī surāṃ pītvā kulācāre caran muhuḥ |
bhūmau patati tasyāṅge laganti yadi reṇavaḥ |
tāvatkālaṃ reṇusaṅkhyaṃ brahmaloke sa modate ||

iti vacane brahmajñānīti samaṣṭiśabdena kulārṇavoditaṃ viśiṣṭārthamāha | 
idānīntanāḥ tantrārthamajānanto rāgāndhāḥ svādhikāram avicārya pītvā 
pītveti tantravacanāni lokānāṃ darśayitvā svayaṃ yathecchā'cāraṃ kurvantaḥ 
pareṣāṃ buddhimapi tirodadhire | te yāvaccandradivākarau 
tāvannarakayātanāmupalabheyuḥ [atra upalabheran-iti vyākaraṇadṛṣṭyā syāt |] | 
atra pramāṇaṃ paramānandatantre-

yāvanna calate dṛṣṭiryāvanna calate manaḥ |
tāvatpānnaṃ prakurvīta paśupānamataḥ param ||
yāvannendriyavaikalyaṃ yāvanna mukhavaikṛtiḥ |
tāvadeva pibet dravyamanyathā patanaṃ bhavet || iti ||

yathā sādhakaḥ svayogyatā'nusāreṇa dravyaṃ svīkuryāt evamācāryo'pi 
yogyatāṃ dṛṣṭvaiva pātraṃ dadyāt | taduktaṃ kumārītantre-

kaulike pātramadhikaṃ prayacchatyavicārayan |
tadiyamadhikāraṃ saḥ saha tenaiva majjati || iti ||

tatraiva-

pānamekaprayatnena yāvat dravyasya vai bhavet |
tadārambhe bhavet pātraṃ na nyūnaṃ nādhikaṃ śive || iti ||

pānapātramānaṃ nīlātantre | ekaprayatnasādhyapānasādhanadravyamānaṃ 
pātraṃ bhavati iti tadarthaḥ | kiṃ ca tantrāntare-

ullāsabhedamajñātvā prāpya mūḍhatvamambike |
jihvālolupabhāvena cendriyaprīṇanāya ca |
yaḥ pibettaṃ tu tāmisre mātṛkāḥ pātayanti vai || iti ||

itthaṃ ca idānīntanānāṃ atijitendriyāṇāmapi [ajitendriyāṇāmāra-śrī.] 
ārambhollāsaparyantānudhāvanameva yuktam | 

ata evoktaṃ tantre-

p. 186)

aśaktābudhabālānāmārambhaḥ parikīrtitaḥ ||

ārambhollāsalakṣaṇaṃ tatraiva-

yasya yāvat pātramuktamārambhastasya tāvatā || iti ||

prasaktānuprasakte alaṃ pallavitena | itaḥ śeṣamagre ullāsavilāse caramakhaṇḍe 
[atra caramakhaṇḍe ityanena 10-khaṇḍe-68-sūtre bhāṣye ca ityartho jñeyaḥ |

sūtrasya punarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || iti pañcamaḥ khaṇḍaḥ-śrīḥ 
||] vakṣyāmaḥ || 22 ||

devīvisarjanam

khecarīṃ baddhvā kṣamasveti visṛjya tāmātmani saṃyojayet iti śivam || 23 ||

|| iti ..... kalpasūtre lalitānavāvaraṇapūjā nāma pañcamaḥ khaṇḍaḥ ||

khecarīṃ baddhvā bandhanānantaraṃ-

jñānato'jñānato vā'pi yadyadācaritaṃ śive |
tava kṛtyamiti jñātvā kṣamasva parameśvari ||

iti kṣamāpya visṛjet | visargo nāma pūjārthamāhūtāyāḥ punaḥ svasthānaṃ 
prati nayanam |
ātmani hṛtkamale yojayet sthāpayet | śivamiti prakaraṇasamāptidyotakam ||

|| iti...kalpasūtravṛttau śrīlalitānavāvaraṇapūjā nāma pañcamaḥ khaṇḍaḥ ||





ṣaṣṭhaḥ khaṇḍaḥ-śyāmākramaḥ

śyāme saṅgītamātaḥ paraśivanilaye mukhyasācivyabhāro-
dvāhe dakṣe dayāpūritanijahṛdaye māmakīṃ dainyavṛttim |
śrīmatsiṃhāsaneśyāṃ bhavavanapatitān dāvadagdhānnamaste
trātuṃ pīyūṣavarṣaiḥ kathaya parikaraṃ baddhavatyāṃ vivikte ||

śyāmopāstividhiḥ

śrībhagavān paraśurāmaḥ śyāmākramaṃ vivakṣuḥ 
tasyāmupāsakānāmupāsyatvajñānotpattaye aṅgīkṛtaśrīvidyopāsanasya yo 
vai svāṃ devatāmatiyajate prasvāyai devatāyai cyavate na parāṃ prāpnoti 
pāpīyān bhavati iti śrutyā 
svīkṛtaikadevatopāsteranyadevatopāsanamaniṣṭajanakamiti yat pratipāditaṃ tena 
kaluṣitacetasāṃ kāluṣyanivṛttaye ca ādau tadguṇasvarūpaṃ varṇayati-

iyameva mahatī vidyā siṃhāsaneśvarī sāmrājñī tasyāḥ pradhānasacivapadaṃ 
śyāmā tatkramavimṛṣṭiḥ sadā kāryā || 1 ||

parāśakteḥ svarūpaṃ udāsyatvaṃ ca

iyaṃ vakṣyamāṇā | iyamityuttaraṃ yeti śeṣaḥ | yā mahatī 
niravadhikamahattvavatī siṃhāsanaṃ paraśivaḥ svādhiṣṭhānarūpatvāt tasya 
īśvarī tanniṣṭhasṛṣṭisthititirodhānasaṅkalpanirvāhakartrī | taduktaṃ 
śaṅkarabhagavatpādaiḥ-

śivaḥ [ayaṃ ślokaḥ saundaryalaharyāṃ prāthamikaḥ tatpūrvārdhamidam |] 
śaktyā yukto yadi bhavati śaktaḥ prabhavituṃ |
na cedevaṃ devo na khalu kuśalaḥ spanditumapi || iti ||

agastyasaṃhitāyāmapi vidyāvatīstutau-

yayā devyā virahitaḥ śivo'pi hi nirarthakaḥ |
namastasyai sumīnākṣyai devyai maṅgalamūrtaye || iti ||

iyaṃ māyāto vilakṣaṇā cidrūpā na jaḍasvabhāvā | taduktaṃ 
sūtasaṃhitāyām-

sadākārā parānandā saṃsārocchedakāriṇī |
sā śivā paramā devī śivābhinnā śivaṅkarī |
śivābhinnā tayā hīnaḥ śivo'pi hi nirarthakaḥ || iti ||

p. 188)

nanu mukhyaṃ śive sṛṣṭyādikartṛtvaṃ tannirvāhakatvamātraṃ yadi śakteḥ 
tarhi mukhyajagatkartṛtvaniyantṛtvādi śivaniṣṭham | iyaṃ ca sahakāriṇī | tathā 
sati mukhyatvāt śivaḥ evopāsyaḥ na śaktiḥ iti cet śṛṇu | kṣityādikāryajātaṃ 
kāraṇamantareṇānupapannam ityanupapattyaiva hi śivasya śaktervā kalpanam | na 
hi carmacakṣuṣā śaktiṃ śivaṃ vā paśyāmaḥ | evaṃ kalpayitumārambhe atra 
vedāntinaḥ parasya cidrūpasya brahmaṇaḥ dharmo māyā saivāvidyā 
jaḍasvabhāvā saiva jagadupādānaṃ paraṃ brahma tu vivartopādānaṃ ata eva 
jaḍopādānatvāt jagadapi jaḍasvabhāvaṃ māyopādānatvāt mithyātvaṃ ca iti 
prāhuḥ | taṃ pakṣaṃ tāntrikāḥ na kṣamante | tathā hi yā māyā'vidyetyucyate 
sā ciddharmo'nyadharmo vā ādye dharmadharmiṇorabhedasya 
vedāntināmapyanumatatvena ciddharmasya jaḍatvānupapattiḥ | aciddharmatve 
advaitahāniḥ māyāṃ tu prakṛtiṃ vidyānmāyinaṃ tu maheśvaram iti 
pramāṇavirodhaśca | ataḥ gatyabhāvāt sā māyā ciddharma ityavaśyaṃ 
vācyam | tathā sati tasyā jaḍatvaṃ dūrato nirastam | na ca cidatiriktā śaktiḥ nāsti 
iti vācyam vayamapi tamevārthaṃ brūmaḥ | paraṃ tu 
pṛthivīvyatiriktagandhābhāve'pi dharmo dharmī iti vyavahārānurodhena 
īṣadbhedaḥ kalpyate evaṃ dvayoḥ cidrūpatve'pi īṣadbhedo vyavahārārthaṃ 
kalpyaḥ | evaṃ ca jagadupādānatvaṃ dvayorapi na sambhavati jaḍasvabhāvatvāt 
jagataḥ | na hi prakāśāt tamo bhavitumarhati | ataḥ citi jagat sūkṣmarūpeṇa bīje 
vaṭavṛkṣavat sarvadā astyeva | 
tadavayavaśaithilyapūrvakavistārasaṅkocakartṛtvameva citi na tu tadupādānatvaṃ 
yathā vaṇijaḥ prabhāte krayyavastūnāṃ prasāraṇaṃ rātrau saṅkocaḥ 
tādṛśaṃ kartṛtvaṃ citaḥ | tatsahakāriṇī cicchaktiḥ ||

nanu cidatiriktā īṣadbhedavatī tanniṣṭhakartṛtvanirvāhikā śaktiḥ 
kimityaṅgīkriyate cityeva tatkartṛtvamāstām | anyathā tulyayuktyā kulālādiṣvapi 
ghaṭakartṛtvāśrayā ekā śaktiḥ sidhyet iti cet na śrutismṛtilokavyavahārāṇāṃ 
sattvāt | parā'sya śaktirvividhaiva śrūyate iti śrutiḥ | devībhāgavate'pi-

śaktiḥ karoti brahmāṇḍaṃ sā vai pālayate'khilam |
icchayā saṃharatyeṣā jagadetaccarācaram ||
na viṣṇurna haraḥ śakro na brahmā na ca pāvakaḥ |
na sūryo varuṇaḥ śaktāḥ sve sve kārye kathaṃcana ||
tayā yuktā hi kurvanti svāni kāryāṇi te surāḥ |
kāraṇaṃ saiva [naiva-śrī.] kāryeṣu pratyakṣeṇāvagamyate ||

p. 189)

vastujālaṃ śaktihīnaṃ [hīnaiḥ-śrī.] śaktaṃ kartuṃ na kiñcana |
śaktaṃ tu parameśāni śaktyā yuktaṃ yadā bhavet ||

iti bahuvistareṇa | ā gopālaṅganamāca [atrāśuddhāni akṣarāṇi saṃśodhya 
vācyāni |] paṇḍitam idaṃ kāryaṃ kartuṃ mama śaktirasti mama śaktirnāsti iti 
vyavaharantyavivādena | tasmāt bahupramāṇasiddhā śaktiḥ tannirvāhyaṃ 
jagadapi śivakukṣau sadā sūkṣmarūpeṇāstyeva ||

atha vā cito yā śaktiḥ tatpariṇāmarūpaṃ jagat | taduktaṃ vāsiṣṭhe-

cidvilāsaḥ prapañco'yaṃ sakhe [sa ca te-śrī.] te duḥkhadaḥ katham || iti ||

etena cicchaktyoḥ īṣadbhedāṅgīkārāt cito nirvikāratvabodhakaśrutiraviruddhā 
atyantabhedānaṅgīkārāt advaitapratipādakaśrutayo'pyabādhitāḥ | etādṛśī 
śaktiḥ vastumātre anubhūyate kāryotpattyanantaraṃ na tataḥ prāk | 
amumevārthaṃ bhūtapañcakaviveke śrīvidyāraṇyasvāmicaraṇāḥ apyāhuḥ-

nistattvā kāryagamyā'sya śaktirmāyā'gniśaktivat | 
na hi śaktiṃ kvacit kaścit budhyate kāryataḥ purā || iti ||

evaṃ śivaniṣṭhāyāṃ tadabhinnāyāṃ taddharmarūpāyāṃ 
tanniṣṭhakartṛtvanirvāhikāyāṃ siddhāyāṃ saivopāsyā | na cidrūpaḥ śivaḥ 
tasyānupāsyatvāt [tasya nāma śaktyanavachinnasya brahmaṇaḥ ityarthaḥ |] 
upāsanā nāma upāsyaniṣṭhaguṇanāmakīrtanam | śaktirahite kevale 
guṇābhāvāt nirguṇasya dhyānastutikīrtanādi kathaṃ bhavet | taduktaṃ 
yoginītantre-

śaktyā vinā śive sūkṣme nāma dhāma na vidyate || iti ||

yato vāco nivartante aprāpya manasā saha || iti śrutiśca |

neti neti iti sarvaniṣedhaśeṣatvenaiva tasya jñeyatvāt 
kevalaśivaviṣayakajñānasyopāsanādikarmavirodhitvena 
tādṛśacaramavṛtterupāsanāsādhyatvāt kevalaśivastvanupāsyaḥ | taduktaṃ 
devībhāgavate'pi-

śivo'pi śavatāṃ yātaḥ kuṇḍalinyā vivarjitaḥ || iti ||

yoginītantre'pi-

yajjñāne'pi mahādevi śarma varma na kiṃcana || iti ||

kiṃ ca yathā kathaṃcit valayākāreṇa manasaḥ nirākāragrahaṇārthaṃ 
preraṇe'pi śubhāśubhadharmahīnatvāt kṣaṇamātramapi na sthātumarhati | 
taduktaṃ śrībhagavadgītāyām-

p. 190)

kleśo'dhikatarasteṣāmavyaktāsaktacetasām || iti ||

atastasyaiva manasaḥ sthairyārthaṃ kiñcidrūpaṃ kalpanīyam | yacca 
parabrahmaṇi kalpitaṃ rūpaṃ nāmadhāmasahitaṃ tadeva śaktipadavācyam | 
tadapyuktaṃ bhāgavate-

evaṃ sarvagatā śaktiḥ sā brahmeti vivicyate |
saguṇā nirguṇā ceti dvidhoktā sā manīṣibhiḥ |
saguṇā rāgibhiḥ sevyā nirguṇā tu virāgibhiḥ |
dharmārthakāmamokṣāṇāṃ svāminī sā nirākulā ||
dadāti vāñchitānarthānarcitā vidhipūrvakam || iti ||

evamuktapramāṇayuktikalāpaiḥ upāsyā parā śaktiḥ | paraśivaśca nirguṇaḥ | 
tadviṣayiṇī vṛttistu paramapuruṣārtharūpatvāt ambopāsanāsādhyetyupapannaṃ 
siṃhāsaneśvarītvaṃ sāmrājñītvam ||

nirguṇa eva śivaḥ yaḥ bahu syāṃ prajāyeya iti icchāśaktyā yuktaḥ 
sṛṣṭhyunmukhaḥ sa eva śaktipadavācyaḥ śiva eva śaktirūpeṇopāsyaśceti 
tattvamavagantavyam ||

yā īdṛśī tasyāḥ pradhānasacivapadam atra sacivapadaṃ 
sācivyarūpadharmaparaṃ tasya padaṃ āśrayaḥ śyāmeti | tasyāḥ yaḥ kramaḥ 
tasya yā vimṛṣṭiḥ anusaraṇaṃ tat sadā kāryam | atra sadetyanena yāvajjīvaṃ 
prāptau yathā agnihotravidheḥ yāvajjīvaṃ prāptau sāyaṃ juhoti prātarjuhoti iti 
vākyāntareṇa saṅkocaḥ tathā asyā eva śyāmāyāḥ prakaraṇe agre evaṃ 
nityasaparyāṃ kurvan lakṣajapaṃ japtvā iti vākyena [idamatraiva ṣaṣṭhakhaṇḍe-
37 mūlasūtresti |] lakṣajapaparyantaṃ sakṛtpūjā kāryā na tu taduttaramiti 
saṅkocaḥ || 1 ||

śyāmāyāḥ upāsyatopapattiḥ 

nanu yā sāmrājñī sarvaniyantrī svatantrā tāṃ parityajya kiṃ tadanuvartinyāḥ 
śyāmāyāḥ upāsanenetyāśaṅkāyāṃ tadupāsanāmupapādayiṣyan 
prathamaṃ lokadṛṣṭāntena dṛḍhayati-

pradhānadvārā rājaprasādanaṃ hi nyāyyam || 2 ||

loke rājadarśanotsukāḥ ādau pradhānamupasevya tadvārā rājadarśanaṃ 
gṛhṇanti | tena phalaṃ satvaraṃ anāyāsena bhavatīti dṛṣṭaṃ loke | tadvadatrāpi 
prathamaṃ tatpradhānabhūtāyāḥ śyāmāyāḥ prathamamupāsanaṃ 
nyāyyamiti bhāvaḥ | dvāretyanena pradhānopāsanapūrvavṛttitvaṃ sūcitaṃ 
nyāyyam ityanena atyantamanāvaśyakatā'pi sūcitā | paraṃ tu yaḥ ko'pi 
samarthaḥ sacivādīnanādṛtya svayameva rājakṛpāṃ sampādya tasmāt phalaṃ 
sampādayatītyayamapi pakṣo loke kvacidasti | tathā'pi pradhānadvārā 
rājaprasādanaṃ nyāyyaṃ varamityarthaḥ | ayaṃ bhāvaḥ yaśca 
pradhānadevatākṛpāṃ sākṣāt sampādayitumasamarthaḥ 

p. 191)

saḥ prathamaṃ dīkṣāṃ sampādya śrīgaṇapatyupāstiṃ kṛtvā tataḥ 
śyāmopāstiṃ vārāhyupāstiṃ paropāstiṃ ca vidhāya tāsāṃ kṛpāṃ 
sampādya paścāt śrīlalitopāstiṃ ārabheta | samarthastu dīkṣottaraṃ 
gaṇapatyupāstyanantaraṃ śrīlalitākramamārabheta | atirātre ṣoḍaśinaṃ 
gṛhṇāti nātirātre ṣoḍaśinaṃ gṛhṇāti itivadvikalpaḥ iti tattvam | 
phalādhikyakāmaḥ uktakrameṇa lalitopāstiṃ kuryāt | nyunaphalakāmaḥ 
gaṇapatyupāstyanantaraṃ lalitopāstiṃ kuryāt iti vyavasthā || 2 ||

prātaḥkṛtyaṃ sandhyā'ntam

evamupāstyadhikāriṇaṃ pradarśya upāstiprakaraṇaṃ vaktuṃ prakramate-

brāhme muhūrte cotthāya śayane sthitvaiva śrīpādukāṃ praṇamya 
prāṇānāyamya mūlādidvādaśāntaparyantaṃ jvalantīṃ parasaṃvidaṃ 
vicintya manasā mūlaṃ triśo japtvā bahirnirgatya 
vimuktamalamūtrodantadhāvanajihvāgharṣaṇakaphavimocananāsāśodhana-
viṃśatigaṇḍūṣān vidhāya || 3 ||

śrīpādukāṃ gurupādukām [gurupādukāmityasya gurutrayapādukāmityarthe 
tātparyam |] | prāṇāniti prāṇāyāmalakṣaṇamuktaṃ sanatkumāratantre-

prāṇāyāmatrayaṃ kuryāt mūlena praṇavena vā |
atha vā mantrabījena yathoktavidhinā sudhīḥ ||
pūrayet ṣoḍaśabhirvāyuṃ kumbhayecca caturguṇaiḥ |
recayet kumbhakārdhena aśaktastatturīyataḥ ||
tadaśaktau taccaturthaiḥ syādevaṃ prāṇasaṃyamaḥ |
prāṇāyāmaṃ vinā naiva pūjanādiṣu yogyatā || iti ||

samayāṅkamātṛkāyām-

iḍayā pūrayedvāyuṃ sakṛdvai mūlavidyayā |
madhyanāḍyā kumbhayecca vedasaṅkhyā varānane ||
netrasaṅkhyākrameṇaiva recayet piṅgalā'dhvanā |
punaḥ punaḥ krameṇaiva yathā vāratrayaṃ bhavet || iti ||

dantadhāvanādīnāṃ smṛtiprāptānāmuktakramalābhārthaṃ pāṭhaḥ | ataḥ 
pāṭhakrameṇānuṣṭheyam | yadyapi prāṇāyāmaprakārastvagre [agre 
nāmaitatkhaṇḍīya-9-sūtre-194-patre-ityarthaḥ |] sūtre'pi vakṣyate tathā'pi 
vāyudhāraṇasamarthānāṃ vistṛtatayā pradarśanaṃ aśaktānāṃ sūtrasthaṃ 
jñeyam | viṃśatigaṇḍūṣānityantaḥ śeṣaḥ spaṣṭārthaḥ || 3 ||

p. 192) 

mantrabhasmajalasnāneṣviṣṭaṃ vidhāya vastraṃ paridhāya || 4 ||

mantrasnānamuktaṃ tripurārṇave-

vastreṇārdreṇa cāṅgānāṃ kṛtvā proñchanamāditaḥ |
mūlaṃ japan saptadhā tu āpādatalamastakam ||
talābhyāṃ saṃspṛśet devi mantrasnānaṃ prakīrtitam |
etatsnānamaśaktasya vihitaṃ śuddhihetave || iti ||

bhasmasnānamuktaṃ śivarahasye-

śuddhaṃ bhasma kare dhṛtvā mūlamaṣṭaśataṃ japet |
sarvāṅgeṣvanulepena bhasmasnānamudāhṛtam || iti ||

jalasnānaṃ śrīlalitāprakaraṇoktam [idaṃ śrīkrame 3 khaṇḍe-88-patre-4 
mūlasūtre bhāṣye ca uktam |] | atra mukhyaṃ jalasnānaṃ jalādyalābhe 
karmakāle prāpte aśaktau gurukāryārthaṃ kṣipraṃ gacchatā ca mantrasnānādi 
kāryam | taduktaṃ nāradapāñcarātre atha māntraṃ śubhaṃ śṛṇu 
ityupakramya 

toyābhāve tu samaye durgamārge'vasīdataḥ |
gamane kṣiprasiddhyarthaṃ gurukāryeṣvatandritaḥ |
mantrasnānaṃ prakurvīta.............. iti ||

ito'pi laghusnānaṃ vīratantre-

maṇibandhādadhohastau pādau gulphau tathā'nanam |
śodhayet snānametat syāt pañcāṅgaṃ śuddhidāyakam || iti ||

imāni snānāni śaktitāratamyāt aśucitvatāratamyācca vyavasthitāni jñeyāni | 
anyānyapi mānasikadhyānasnānādīni [jñānasnānādīnītyarthaḥ |] 
granthavistarabhayāt neha likhitāni tantrāntarāt draṣṭavyāni || 4 || 

sandhyāṃ vidhatte-

sandhyāmupāsya savitṛmaṇḍale devīṃ sāvaraṇāṃ vicintya mūlena trirarghyaṃ 
dattvā yathāśakti santarpya || 5 ||

sandhyāmitīdamutpattivākyaṃ atra kathambhāvākāṅkṣāyāmāha 
savitṛmaṇḍale ityārabhya santarpyetyantena | tarpaṇamapi mūlamuccārya 
śrīśyāmāṃ tarpayāmi svāhā iti mantreṇa | mālinītantre 
tarpaṇamantroddhārasya mūlānte mālinīṃ procya tarpayāmyagnivallabhām iti 
lekhāt | prakṛte 

p. 193)

mantrasyānuktatvāt mantrākāṅkṣāyāḥ tantrāntarasthamantrādaraḥ | 
yathāśakti ityanena saṅkhyāyāḥ tarpaṇavṛtteranaṅgatvaṃ sūcitam ||

atra nibandhakāraḥ etadantamāhnikaṃ svatantropāstau puraścaraṇakāle ca na tu 
śrīkramāṅgatvena sahānuṣṭhāne iti jagau | tanna | 
pūrvoktalaukikanyāyadṛṣṭāntena lalitopāsteḥ pūrvaṃ śyāmopāstiḥ sidhyati | 
tadanuṣṭhānamaryādā lakṣajapaparyantamiti agrimavākyena [agrimavākyena 
nāma-etatkhaṇḍīya-37-sūtrasthavākyena-ityartho jñeyaḥ |] vyavasthitam | itthaṃ 
ca śaṅgītamātṛkāmiṣṭvā saṃvitsāmrājñīm (ityādi) kolamukhīṃ varivasyeta 
ityagrimasūtre [agrimasūtre nāma-agratana-7-
khaṇḍīyavārāhīkramasthaprathamasūtragatasaṅgītamātṛkāmiṣṭvā 
ityetadvākyāntastha ktvā pratyayena-iti-jñeyam |] ktvāpratyayena 
vārāhyupāstipūrvavṛttitvaṃ spaṣṭam | itthaṃ sati 
kolamukhīvarivasyāpūrvakālasambandhinī yā śyāmāvarivasyā japaśca sa 
sarvo'pi śrīlalitākramārambhāṅgabhūtaḥ nānyo lalitākrameṇa saha 
anuṣṭīyamānaḥ śyāmākramagandho'pi sūtre pratīyate | evaṃ sati 
puraścaraṇādikāle āhnikam anyatra neti kiṃ pramāṇamanusṛtya lilekha | 
tadabhiprāyaṃ sa eva jānāti | vastuno lalitāprayogānaṅgabhūtaśyāmākramaḥ 
sūtre aprasiddhaḥ | aṅgabhūtakramamuddiśyāhnikapāṭhāt aṅgabhūte'pi 
krame sarvamāhnikaṃ niśśaṅkaṃ pravartata eva || 5 ||

yāgagṛhapraveśādi prāṇāyāmāntaṃ kṛtyam

sandhyāmuktvā pūjāṃ vaktumārabhate-

yāgagṛhaṃ praviśyāsane ādhāraśaktikamalāsanāya nama ityupaviśya || 6 ||

atha prāṇāyāmaprakāramāha-

samastaprakaṭaguptasiddhayoginīcakraśrīpādukābhyo [cakra iti nāsti-a.] nama iti 
śirasyañjalimādhāya svagurupādukāpūjāṃ [gaṇapatipūjāṃ ca-śrī.] ca 
vidhāya || 7 ||

svagurupādukāpūjāṃ vidhāya | śyāmāgurupādukā vakṣyamāṇā 
[etatkhaṇḍīya 32 sūtre-203-patre ||] | tena svamūrdhni puṣpākṣatān kṣipet || 7 ||

aiṃ hraḥ astrāya phaṭ ityastramantreṇa aṅguṣṭhādikaniṣṭhāntaṃ karatalayoḥ 
kūrparayoḥ dehe ca vyāpakatvena vinyasya || 8 ||

p. 194)

vyāpakatvalakṣaṇaṃ pūrvamuktam [pūrvaṃ nāma-2-khaṇḍe 
gaṇanāyakapaddhatau 4 sūtrabhāṣye-75-patre-iti jñeyam |] | aṅgulyādibhedena 
mantrāvṛttiḥ pratipradhānamiti nyāyāt || 8 ||

yaṃ iti vāyuṃ piṅgalayā'kṛṣya dehamupaviśoṣya raṃ iti vāyumākṛṣya 
dehaṃ dagdhvā vaṃ iti vāyumākṛṣyamṛtena dagdhadehabhasma siktvā laṃ iti 
vāyumākṛṣya dṛḍhaṃ vidhāya haṃsa iti vāyumākṛṣya śivacaitanya mutpādya 
|| 9 || 

yaṃ ityasya viśoṣya ityanenānvayaḥ vāyubījatve śoṣaṇakāyakṣamatvāt | 
śoṣaṇaṃ nāma jalāṃśasyākarṣaṇam | vāyvākarṣaṇaṃ tu tūṣṇīmeva | 
iḍāpiṅgale nāradīye nirūpite-

piṅgalā vāmanāsā syādiḍā taditarā smṛtā || iti ||

raṃ iti vahnibījena dehadāhaḥ | amṛtena amṛtabījena vaṃ ityanena 
dagdhabhasmasecanaṃ punaḥ śarīrotpādanārtham | laṃ iti pārthivabījena 
siktabhasmani kāṭhinyasampādanam | tataḥ tasmin haṃsaḥ iti mantreṇa 
śivacaitanyasampādanam ||

etāvatparyantaṃ bhūtaśuddhiṃ vidhāya śrīkramoktāṃ prāṇapratiṣṭhāṃ ca 
kuryāt || 9 ||

mūlamekaśa uccārya vāyumākṛṣya triśaḥ uccārya kumbhayitvā sakṛduccārya 
recayet | evaṃ recakapūrakakumbhakaṃ tridhā saptadhā daśadhā ṣoḍaśadhā 
vā viracya tejomayatanuḥ || 10 ||

ekaśaḥ ekavāram | evamagre'pi recakapūrakakumbhakamiti dvandvasamāsāt 
sāhityalābhaḥ | atra yadyapi pūrakaṃ madhye patitaṃ recakaṃ prathamaṃ 
kumbhakaṃ caramam iti vyutkramaḥ tathā'pi nātra krame tātparyaṃ kiṃtu 
sāhitye | kramastu pūrvapāṭhānusāreṇaiva | tridhetyārabhya saṅkhyāvṛddhau 
phalādhikyam | tejomayatanuḥ ityanena prāṇāyāmakriyāyāḥ pāpaśodhakatvaṃ 
sūcitam || 10 ||

ṣaḍaṅgādinyāsapañcakam

atha nyāsajālaṃ vadati-

ṣaḍaṅgaṃ bālāsahitāṃ mātṛkāṃ mūlahṛnmukheṣu ratiprītimanobhavān 
vinyasya || 11 ||

p. 195)

vinyasya iti sarvatrānuṣajya yojyam | tathā ca ṣaḍaṅgaṃ vinyasyetyarthaḥ | 
etanmantrasvarūpaṃ [etadarthametatkhaṇḍasthapurastana-15-20-sūtre tadbhāṣye ca 
dṛśye |] upariṣṭāt spaṣṭīkariṣyāmaḥ | ayameko nyāsaḥ | bālāsahitāṃ 
mātṛkāṃ vinyasya iti dvitīyo nyāsaḥ | mātṛkāṃ bahirmātṛkām | 
nyāsasthānāni tantrāntarādavagantavyāni | 
agrevakṣyamāṇatritārīkumārīkevalakumāryo [ayaṃ tritārīkumārīmantraḥ 
pratyakṣaḥ atraiva khaṇḍe 20 sūtrabhāṣye spaṣṭaḥ | kumārīśabdena ca 
tryakṣaro bālāmantro jñeyaḥ | so'pi atraivādhaḥ tatrāpi ca spaṣṭaḥ |] vikalpena 
prāptau tadbādhakaṃ kevalabālāsahitāmiti viśeṣaṇam | tena 
mātṛkānyāsamantre sadā bālāyoga eva anyatra vikalpena bālāyogaḥ | 
vyāsasthānānāṃ bahuprasiddhyā nātra lekhaḥ | mantrasvarūpaṃ ca aiṃ klīṃ 
sauḥ aṃ namaḥ | evamagre'pi | mūlaṃ mūlādhārasthānam | tadāditriṣu 
ratyāditrayaṃ vinyaset | ayaṃ tṛtīyo nyāsaḥ || 11 ||

mūlaṃ saptadaśadhā khaṇḍayitvā ṣaṭ brahmabile trīṇi lalāṭe catvāri 
bhrūmadhye dakṣavāmekṣaṇayoḥ ṣaṭ cāṣṭau saptāsye 
dakṣavāmaśrutikaṇṭheṣvekaikaṃ dakṣavāmāṃsayoraṣṭau ca daśa hṛdi daśa 
dakṣavāmastanayoraṣṭāvaṣṭau nava nābhau dviḥ svādhiṣṭhāne ṣaḍādhāra 
evaṃ vinyasya || 12 ||

khaṇḍayitvā vibhajya | vibhāgaprakāraṃ vibhaktakhaṇḍaiḥ 
kriyamāṇanyāsasthānāni cāha ṣaḍityādinā | ṣaḍityādisaṅkhyāvācakāni 
padāni mūlasthavarṇaparāṇi | ādimaṣaḍvarṇān namo'ntānuccārya 
brahmarandhre nyaset | evamagre'pi | dakṣavāmekṣaṇayoḥ ṣaṭ cāṣṭāvityatra 
dakṣanetre ṣaḍvarṇāḥ kramaprāptāḥ vāmanetre aṣṭau yathāsaṅkhya yojyam | 
evameva dakṣavāmāṃsayoḥ ityādau draṣṭavyam | sarvatra tritārīkumārīyogaḥ 
kāryaḥ | svādhiṣṭhānaṃ ṣaḍdalakamalaṃ guhyasthānastham | ādhāro 
mūlādhāraḥ sa [etadādhārasvarūpajñānāya 88-patre śrī gaṇeśakrame-3-
sūtrabhāṣye tathā ca-111-patre-śrīkrame-28sūtrabhāṣyaṃ ca paśyantu |] 
pūrvaṃ vyākhyātaḥ | ayaṃ caturtho nyāsaḥ || 12 ||

pañcamamāha-

punarādhārādibrahmabilaparyantaṃ saptadaśakhaṇḍānuktasthāneṣu vinyasya || 
13 ||

pūrvasmādvailakṣaṇyaṃ mūlādhārādisthānavaiparītyamātraṃ na 
[khaṇḍakramaśca pūrvavat khaṇḍavaiparītyabodhakapramāṇābhāvāt-ba.] tu 
saptadaśakhaṇḍavaiparītyaṃ pramāṇābhāvāt ||

nibandhakāraḥ khaṇḍavaiparītyaṃ lilekha | tasya pramāṇaṃ tadīyecchaiva na 
tvanyat | ayaṃ pañcamo nyāsaḥ || 13 ||

p. 196)

mandirārcanam

evaṃ nyāsajālamuktvā mandirārcanaṃ vadati-

amṛtodadhimadhyaratnadvīpe muktāmālādyalaṅkṛtaṃ caturdvārasahitaṃ 
maṇḍapaṃ vicintya tasya prāgādicaturdvāreṣu sāṃ sarasvatyai lāṃ lakṣmyai 
śaṃ śaṅkhanidhaye paṃ padmanidhaye namaḥ lāṃ indrāya vajrahastāya 
surādhipataye airāvatavāhanāya saparivārāya namaḥ rāṃ agnaye śaktihastāya 
tejo'dhipataye ajavāhanāya saparivārāya namaḥ ṭāṃ yamāya daṇḍahastāya 
pretādhipataye mahiṣavāhanāya saparivārāya namaḥ kṣāṃ nir-ṛtaye 
khaḍgahastāya rakṣo'dhipataye naravāhanāya saparivārāya namaḥ vāṃ 
varuṇāya pāśahastāya jalādhipataye makaravāhanāya saparivārāya namaḥ-
yāṃ vāyave dhvajahastāya prāṇadhipataye ruruvāhanāya saparivārāya namaḥ 
sāṃ somāya śaṅkhahastāya nakṣatrādhipataye aśvavāhanāya saparivārāya 
namaḥ hāṃ īśānāya triśūlahastāya vidyā'dhipataye vṛṣabhavāhanāya 
saparivārāya namaḥ oṃ brahmaṇe padmahastāya satyalokādhipataye 
haṃsavāhanāya saparivārāya namaḥ śrīṃ viṣṇave cakrahastāya 
nāgādhipataye garuḍavāhanāya saparivārāya namaḥ oṃ vāstupataye brahmaṇe 
namaḥ ityekādaśadikṣu ekādaśa devānarcayet || 14 ||

ekādaśadiśaśca catasrodiśaḥ catasro'vāntaradiśaḥ ūrdhvam adhaḥ samastaṃ 
ceti jñeyāḥ | śeṣaṃ svayamūhyam || 14 ||

śyāmākramamantreṣu bījaviśeṣayogaḥ 

śyāmākrame sarvamantreṣu bījaviśeṣayogamāha-

śyāmākramamantrāṇāmādau tritārīkumārīyogaḥ kumārīyogo vā tritārī 
pūrvoktā kumārī bālā śeṣamuttānam || 15 ||

arthaḥ spaṣṭaḥ || 15 ||

kartṛguṇaviśeṣavidhiḥ 

karturaṅgabhūtān kāṃścit guṇānāha-

gandhadravyeṇa liptāṅgastāmbūlāmoditavadanaḥ prasannamanā bhūtvā || 16 ||

p. 197)

śyāmācakralekhanaprakāraḥ

atha śyāmācakralekhanaprakāramāha-

suvarṇarajatatāmracandanamaṇḍaleṣu bindutrikoṇapañcakoṇāṣṭadalaṣoḍaśa-
dalāṣṭadalacaturdalacaturasrātmakaṃ cakrarājaṃ vilikhya || 17 ||

maṇḍaleṣu phalakeṣu | pañcakoṇaṃ pañcāsrakuṇḍākāram | nirmāṇaṃ 
bindumārabhya nirgamanarītyā jñeyam || 17 ||

sāmānyārghyavidhiḥ

atha sāmānyārghyavidhimāha-

mūlena trivārajaptena śuddhajalena caturasravṛttaṣaṭkoṇatrikoṇabindūn 
praveśena matsyamudrayā vidhāya aṃ ātmatattvāya ādhāraśaktaye vauṣaṭ-
ityādhāraṃ pratiṣṭhāpya dhūmrārcirūṣmā jvalinī jvālinī visphuliṅginī 
suśrīḥ surūpā kapilā havyavāhā kavyavāhetyagnikalā abhyarcya uṃ 
vidyātattvāya padmānanāya vauṣaṭ-iti pātraṃ pratiṣṭhāpya tapinī tāpinī 
dhūmrā marīcirjvālinī ruciḥ suṣumnā bhogadā viśvā bodhinī dhāriṇī 
kṣamā iti pātre sūryakalā abhyarcya maṃ śivatattvāya somamaṇḍalāya namaḥ-
iti śuddhajalamāpūrya amṛtā mānadā pūṣā tuṣṭiḥ puṣṭī ratiḥ dhṛtiḥ 
śaśinī candrikā kāntirjyotsnā śrīḥ prītiraṅgadā pūrṇā pūrṇāmṛtā ceti 
candrakalā abhyarcya agnīśāsuravāyuṣu madhye dikṣu ca ṣaḍaṅgāni vinyasya 
astreṇa saṃrakṣya kavacenāvakuṇṭhya dhenuyonī pradarśya mūlamantreṇa 
saptaśo'bhimantrya tajjalavipruḍbhiḥ yāgagṛhaṃ pūjopakaraṇāni cāvokṣya || 18 
||

praveśena [saṃskṛtajalaṃ maṇḍalakaraṇārthameva na tu tatpūraṇārthaṃ 
pramāṇābhāvāt pūraṇaṃ tu mūlānabhimantritaśuddhajalenaiva jñeyam 
ityadhikaḥ-ba.] praveśarītyā | matsyamudrayā sā coktā tantre-

adhomukhe vāmakare dakṣiṇaṃ tādṛśaṃ karam |
sthāpayenmatsyamudreyaṃ tāntrikaiḥ parikīrtitā || iti ||
dakṣapāṇitalaṃ devi vāmapṛṣṭhopari nyaset |
aṅguṣṭhadvitayaṃ samyak ṛjurūpamadhomukham ||
matsyamudreyamākhyātā maṇḍalādiprakalpane ||

iti paramānandatantre'pi | ādhāralakṣaṇaṃ tatraiva-

p. 198)

ādhārāṇyapi caiteṣāṃ vartulaṃ vā trikoṇakam |
yonyākāraṃ ca ṣaṭkoṇamaṣṭakoṇamathāpi vā ||
apadaṃ tripadaṃ pañcaṣaṭsaptāṣṭapadaṃ tathā |
madhyachidraṃ yathā pātrapṛṣṭhaṃ na syācca bhūgatam ||
antarnaiva nimagnaṃ syāt tathā kartavyamambike || iti ||

namo'ntaiścaturthyantairetairnāmabhiḥ vahnikalāpūjanamādhāre kuryāt | 
namo'ntatvaṃ caturthyantatvaṃ sūryendukalāsvapi draṣṭavyam | pātraṃ 
pratiṣṭhāpya iti niruktasthāpitādhāre iti śeṣaḥ | vahnyādikalānāmabhyarcanaṃ 
paścimādiprādakṣiṇyena | pramāṇamuktaṃ prāk [atra prākśabdārthe 
śrīkramokta-23-sūtrabhāṣye 107-patre dṛśyam |] | śeṣaṃ spaṣṭam | agnīśeti 
tatprakāraḥ pūrvameva darśitaḥ [pūrvameva ityanena-144-145-patrayoḥ-4 khaṇḍe 
lalitākrame 8-mūlasūtre-tadbhāṣye ca athavā uparitanamūlasūtrepi-iti jñeyam] | 
astreṇa astramantreṇa | kavacena kavacamantreṇa ||

kecittu avakuṇṭhyetyanena avakuṇṭhanamudrākavacamantrayoḥ grahaṇaṃ kāryam 
| avakuṇṭhanamudrāsvarūpamuktaṃ tantre-

hastadvayaṃ muṣṭirūpaṃ tarjanyāvṛjurūpake |
yugapat  bhrāmayet tābhyāṃ mudreyamavakuṇṭhinī ||

iti prajaguḥ ||

dhenuḥ dhenumudrā | iyaṃ loke bahurūḍhā | tathā'pi tatpramāṇaṃ likhyate-

tarjanyādicatuṣkaṃ tu protaṃ hastadvayasthitam |
dakṣatarjanyanāmāyāṃ vāmamadhyakaniṣṭhike ||
vāmatarjanyanāmāyāṃ dakṣamadhyakaniṣṭike |
adhomukhī dhenumudrā..................... ||

iti paramānandatantre sthitam | yonistu [iyaṃ yonimudrā-170-patre-5-khaṇḍe-
śrīlalitākramīya 15 sūtrabhāṣyānte dṛśyā-athavā ddi. pa. 15-8/2 viṣaye 
dṛśyā |] pūrvamuktā saptaśaḥ saptakṛtvaḥ | tajjalavipruḍbhiḥ 
sāmānyārghyavipruḍbhiḥ || 18 ||

viśeṣārghyavidhiḥ

tābhirīkārāṅkitatrikoṇa vṛttacaturasraṃ [ṣaṭkoṇavṛ-śrī.] maṇḍalaṃ vidhāya 
tasmin puṣpāṇi vikīrya pūrvavadādhāraṃ pratiṣṭhāpya agnikalā abhyarcya 
pātraṃ pratiṣṭhāpya tasmin pātre hrīṃ aiṃ mahālakṣmīśvari paramasvāmini 
ūrdhvaśūnyapravāhini 

p. 199)

somasūryāgnibhakṣiṇi paramākāśabhāsure āgacchāgaccha viśa viśa pātraṃ 
pratigṛhṇa pratigṛhṇa huṃ phaṭ svāheti puṣpāñjaliṃ vikīrya sūryakalā 
abhyarcya 

brahmāṇḍākhaṇḍasambhūtamaśeṣarasasambhṛtam |
āpūritaṃ mahāpātraṃ pīyūṣarasamāvaha ||

ityādimamāpūrya dvitīyaṃ nikṣipya akathāditrirekhā'ṅkitakoṇatraye halakṣān 
madhye haṃsaṃ ca vilikhya mūlena daśadhā abhimantrya candrakalāḥ abhyarcya-
agnīśāsuravāyuṣu madhye dikṣu ṣaḍaṅgāni vinyasya astreṇa saṃrakṣya 
kavacenāvakuṇṭhya dhenuyonī pradarśayet || 19 ||

tābhiḥ sāmānyārghyodakasambandhinībhiḥ adbhiḥ | īkārāṅkiteti 
trikoṇaviśeṣaṇam | trikoṇamadhye īkāraṃ [īṃkāraṃ] likhet iti bhāvaḥ | idaṃ 
na pūrvavat praveśarītyā nirmāṇābhiprāyakam kiṃ tu nirgamarītyā 
trikoṇamārabhya caturasrāvasānapāṭhāt trikoṇaṃ sarvāntaḥ caturasraṃ 
sarvasmāt bahiriti prāyo dṛṣṭatvāt | pūrvavaditi [pūrvavat-nāma-atraiva khaṇḍe 
197-patre 18-sūtrokta-aṃ ātmatattvāyetyādivadityarthaḥ |] 
sāmānyārghyādhāravadityarthaḥ | agnikalāḥ [etatkhaṇḍe 197-patre mūlasūtre-
eva etāḥ kalāḥ santi |] dhūmrārcirādīḥ abhyarcya pātraṃ pratiṣṭhāpya 
ityatrāpi pūrvavat ityanuvartate yogyatvāt | tena pātrapratiṣṭhāpane 
pūrvamantralābhaḥ [atra pūrvamantraḥ atraiva khaṇḍe-197-patre-uparitana-18-
mūlasūtre eva- uṃ vidyātatvāyetyādirasti |] | ādimadvitīyau proktau atra sūtre 
tena nātra tṛtīyacaturthapañcamāḥ anuktatvāt | [na hi] gaṇapatikrama eva 
madhyamaṃ cetivat cakāro'sti agre mapañcakamurarīkṛtyeti vā liṅgamasti yena 
tallābho bhavet | tasmāt yāvaduktam | aśca kaśca yaśca te ādau yāsāṃ tāḥ 
trirekhāḥ | avarṇapārabhya visargāntā ekā varṇamayī rekhā tataḥ kāditāntā 
tataḥ thādisānteti bhāvaḥ | viśeṣasyānuktatvāt svāgrādiprādakṣiṇyena 
halakṣān trīn varṇān triṣu vilikhya madhye haṃsa iti uttarasaṃsthaṃ likhitvā | 
idaṃ sarvaṃ pātrasthadravye tatsaṃskārarūpaṃ lekhanam | itthaṃ ca 
īdṛśalekhena dravyasaṃskāraṃ bhāvayet iti tadarthaḥ | daśadhā etadanantaraṃ 
āvartitamūlenetyasya viśeṣaṇam | dhenuyonī pradarśayet iti dhenumudrāṃ 
[etaddhenumudroddhāraḥ 198-patre-atraivānugata-18-sūtrabhāṣye-athavā ddi. pa. 
15-8/1 viṣayesti |] pradarśya yonimudrayā [yonimudroddhāraśca-170-patre-5-
khaṇḍe śrīlalitākrame-15 sūtrabhāṣye-athavā ddi. pa. 15-8/2 vi. dṛśyaḥ |] 
praṇamet | etadarghyasaṃśodhanamiti kvacit pustake pāṭhaḥ || 19 || 

p. 200)

cakradevīpūjā

itthaṃ pātrāsādanamuktvā śrīdevatāyāḥ mūrtikalpanāmantramāha-

cakramadhye śrīmātamuktvā gīśvarīmūrtaye namaḥ iti mūrtiṃ kalpayitvā 
bhūyaḥ śrīmātamuktvā gīśvaryamṛtacaitanyamāvāhayāmi ityāvāhya 
ṣoḍaśabhirupacarya āśuśukṣaṇitryakṣarakṣaḥprabhañjanadikṣu devyā maulau 
paritaśca pūjyā aṅgadevyaḥ | tanmantrāḥ sarvajanādayaḥ aṣṭau saptaikādaśa 
daśa punardaśāṣṭāviṃśatikhaṇḍāḥ tritārīkumārīvāgādayaḥ sajātayaḥ 
sāmānyamanuyuktāḥ || 2 ||

cakramadhye iti āvāhyetyanenānvitam | śrī0 ityārabhya ityantaḥ uktvetyapahāya 
mūrtikalpanamantraḥ | dvitīyaśrī0 ityārabhya āvāhayāmītyantaḥ uktvāvarjam 
āvāhanamantraḥ | ṣoḍaśopacārāḥ sapramāṇaṃ dvitīyakhaṇḍe 
[dvitīyakhaṇḍe-9 sūtrabhāṣye-82-patre-darśitā iti jñeyam |] darśitāḥ | 
āśuśukṣaṇiḥ agniḥ tryakṣaḥ īśānaḥ rakṣaḥ nir-ṛtiḥ prabhañjano vāyuḥ 
eṣāṃ dikṣu uktakrameṇa vidikṣviti bhāvaḥ | devyā maulau madhye ityarthaḥ | 
prāgādidikṣu aṅgadevyaḥ ṣaḍaṅgadevyaḥ pūjyāḥ | tāsāṃ mantrān vaktuṃ 
prakramate tanmantrā iti | mūlamantreṇa sarvajanetyārabhya ṣaṭ khaṇḍāni 
ṣaḍaṅgadevīnāṃ mantrā bodhyāḥ | tatraikaikaṃ kūṭaṃ kiyadvarṇakamiti 
jijñāsāyāmāha aṣṭāviti | sarvajanetyādiṣaṭkhaṇḍāni 
kramādaṣṭādisaṅkhyākānītyarthaḥ prathamakhaṇḍam aṣṭavarṇaṃ dvitīyaṃ 
saptavarṇaṃ tṛtīyam ekādaśavarṇaṃ caturthapañcamau daśavarṇau ṣaṣṭham 
aṣṭāviṃśativarṇakamiti phalitam | na kevalaṃ 
mūlamantraghaṭakoktasaṅkhyākavarṇāḥ eva mantrasvarūpam anye'pi varṇā 
yojyāḥ ityāha tritārīkumārīvācaḥ ādau eṣāṃ khaṇḍānāṃ jātiḥ hṛdayāya 
śirase0 ityādiḥ taiḥ sahitāḥ sajātayaḥ sāmānyamanavo namaḥ svāhā 
vaṣaḍityādayaḥ taiḥ krameṇa yuktāḥ | itthaṃ ca mantrasvarūpam aiṃ hrīṃ 
śrīṃ aiṃ klīṃ sauḥ aiṃ sarvajanamanohāri hṛdayāya namaḥ | uktabījāni aiṃ0 
ityādīni sapta ādau sarvatra yojyāni | 7 sarvamukharañjini śirase svāhā | 7 klīṃ 
hrīṃ śrīṃ sarvarājavaśaṅkari śikhāyai vaṣaṭ | 7 sarvastrīpuruṣavaśaṅkari 
kavacāya huṃ | 7 sarvaduṣṭamṛgavaśaṅkari netratrayāya vauṣaṭ | 7 
sarvasattvavaśaṅkari sarvalokavaśaṅkari amukaṃ me vaśamānaya svāhā | sauḥ 
klīṃ aiṃ śrīṃ hrīṃ aiṃ astrāya phaṭ iti mantrasvarūpam | yadyapi mantre 
trayastriṃśadvarṇāḥ dṛśyante sūtroktāṣṭāviṃśatisaṅkhyayā virudhyante 
tathā'pi svāhā'ntāḥ saptaviṃśativarṇāḥ agrimaṣaḍbījāni militvā 
śrīṣoḍaśākṣaryāṃ praviṣṭapañcadaśavarṇātmakakūṭatraye 
ekaikakūṭasyaikaikavarṇatvavat ṣaṇṇāṃ varṇānāmaikavarṇatvam | itthaṃ ca 
aṣṭāviṃśatisaṅkhyopapannā ||

p. 201)

nibandhakāraḥ svāhā'ntaṃ khaṇḍaṃ cakāra tathā saptaviṃśativarṇātmake 
uktagaterapyabhāvaḥ || 20 ||

āvaraṇapūjā

paścādāvaraṇapūjāṃ kuryāt || 21 ||

paścāditīdaṃ sūtraṃ vyartham eva dṛśyate tathā'pi na tathā mantavyam | tathā 
hi idam āvaraṇapūjotpattivākyam agrimavākyāni 
taditikartavyatāprapañcarūpāṇi somena yajeta aindravāyavaṃ gṛhṇāti itivat | 
etena ekavidhivihitatvena ekapadārtharūpatvāt madhye 
āvaraṇāvayavaikadevatālope'pi punaḥ sarvānuṣṭhānaṃ siddham || 21 ||

atha sarvopayoginīṃ kāṃcit paribhāṣāmāha-

sarvacakradevatā'rcanāni vāmakarāṅguṣṭhānāmikāsandaṣṭadvitīyaśakala 
gṛhītaśrīpātraprathamabindusahapatitaiḥ dakṣakarākṣatapuṣpakṣepaiḥ kuryāt || 
22 ||

sarvacakradevatāḥ gaṇapatyādiparā'ntāḥ sāmānyapaddhatyā yakṣyamāṇā 
anyāśca | śrīpātraṃ viśeṣārghyapātram | sahapatitairityanena 
bindupuṣpākṣatayoḥ patanam ekakāle iti sūcitam || 22 ||

prathamāvaraṇadevatāḥ tatsthānaṃ cāha-

trikoṇe ratiprītimanobhavān || 23 ||

trikoṇe trikoṇakoṇeṣvityarthaḥ | atra kramasyānuktatvāt 
svāgrādiprādakṣiṇyakramaḥ | yadvā āgneyakoṇe tataḥ paścimakoṇe tata 
aiśāne tenodagapavargalābhaḥ | iti prathamāvaraṇam || 23 ||

dvitīyāvaraṇapūjāsthānādikaṃ darśayati-

pañcāramūle pura ādikrameṇa drāṃ drāvaṇabāṇāya drīṃ 
śoṣaṇabāṇāyaklīṃ bandhanabāṇāya blūṃ mohanabāṇāya saḥ 
unmādanabāṇāya namaḥ iti tadagre māyākāmavāgblūṃ strīmupajuṣṭāḥ 
kāmamanmathakandarpamakaraketanamanobhavāḥ || 24 ||

namaḥ iti sarvamantreṣvanuṣajyate | puraḥ prācī | mūle pañcārakoṇamūle | 
tadagre iti pañcārakoṇāgreṣvityarthaḥ | māyā'dipañcakaiḥ krameṇa yuktāḥ 
kāmādayaḥ pūjyā ityarthaḥ | mantrasvarūpaṃ tu hrīṃ kāmaśrīpādukāṃ 
pūjayāmi | evamagre'pi | pūrvavat caturthyantanamo'ntarahitaṃ jñeyam | iti 
dvitīyāvaraṇam || 24 || 

p. 202)

tṛtīyāvaraṇapūjādeśādīnāha-

aṣṭadalamūle brāhmī māheśvarī kaumārī vaiṣṇavī vārāhī māhendrī 
cāmuṇḍā caṇḍikāḥ sendusvarayugmāntyādayaḥ pūjyāḥ | tadagre 
lakṣmīsarasvatī rati prīti kīrti śānti puṣṭi tuṣṭayaḥ || 26 ||

indunā anusvāreṇa sahitāḥ ye svarayugmeṣu aṃ āṃ iṃ īṃ uṃ ūṃ ṛṃ ṝṃ 
ḷṃ ḹṃ eṃ aiṃ oṃ auṃ aṃ aḥ ityaṣṭasu antyāḥ āṃ īṃ ūṃ ṛṃ ḹṃ aiṃ 
auṃ aḥ ityaṣṭau varṇāḥ ādau ebhiḥ krameṇa yuktā brāhmyādayaḥ pūjyāḥ | 
mantrasvarūpam āṃ brāhmīśrīpādukāṃ pūjayāmīti | evamagre'pi | tadagre 
aṣṭadalāgre ityarthaḥ | jātāvekavacanam | pūjyā ityasyānuṣaṅgaḥ | iti 
tṛtīyāvaraṇam || 25 ||

caturthāvaraṇapūjāsthānānyāha-

ṣoḍaśadale vāmā jyeṣṭhā raudrī śānti śraddhā sarasvatī kriyāśaktilakṣmī-
sṛṣṭi mohinī pramathinī āśvāsinī vīcī vidyunmālinī surānandā 
nāgabuddhikāḥ || 25 ||

atra kriyāśaktiḥ vidyunmālinī surānandā ityekaikā devatā | śeṣā devatāḥ 
spaṣṭāḥ | kramasyānuktatvāt devyagradalamārabhya prādakṣiṇyena | iti 
caturthāvaraṇam || 26 ||

pañcamāvaraṇadeśādīnāha-

aṣṭadale asitāṅga ruru caṇḍa krodhana unmatta kapāla bhīṣaṇa saṃhārāḥ 
sadaṇḍisvarayugmādisaṃyuktā bhairavāntāśca bhāvanīyāḥ || 27 ||

sadaṇḍītyatra daṇḍī anusvāraḥ daṇḍī pañcadaśaḥ śūnyaḥ iti medinīkośāt | 
anusvāreṇa sahitāḥ ye pūrvoktasvarayugmādayaḥ aṃ iṃ uṃ0 ityādayaḥ ādau 
taiḥ yuktāḥ bhairavāntāśca ye mantrāḥ taiḥ pūjyāḥ ityarthaḥ | yathā aṃ 
asitāṅgabhairavaśrīpādukāṃ pūjayāmi | evamevāgrimasaptamantrāḥ ūhyāḥ 
| iti pañcamāvaraṇam || 27 ||

ṣaṣṭhāvaraṇadevatāmantrādīnāha-

caturdalaṃ māyuktataṅgī siddhalakṣmīśca mahāmāyuktataṅgī 
mahāsiddhalakṣmīśca || 28 ||

ubhayatra yukteti jñeyam | tathā ca mātaṅgī mahāmātaṅgīti siddham | śeṣaṃ 
spaṣṭam | mātaṅgī siddhalakṣmī mahāmātaṅgī mahāsiddhalakṣmyaḥ catasraḥ 
pūjyāḥ iti vivekaḥ | iti ṣaṣṭhāvaraṇam || 28 ||

p. 203)

saptamāvaraṇapūjāmāha-

gaṃ gaṇapati duṃ durgā baṃ baṭuka kṣaṃ kṣetrapālāḥ caturasre sampūjyāḥ || 
29 ||

kramastu āgneyakoṇamārabhyaiśānāntakoṇeṣu | iti saptamāvaraṇam || 29 ||

āvaraṇabahirbhūtadevatāyajanam

śrīkrame tantrāntare āmnāyādidevatāvat 
āvaraṇabahirbhūtadevatāyajanamāha-

sāṃ sarasvatyai namaḥ iti prabhṛti vāstupataye brahmaṇe namaḥ iti paryantaṃ 
punastatraivābhyarcya || 30 ||

tatraiveti pūrvaṃ [pūrvaṃ nāma 196-patre-anugana-14-sūtre yathoktaṃ tadvat |] 
yatra nyāsottaraṃ pūjitāḥ tatra taireva mantraiḥ śrīpādukāṃ pūjayāmīti 
sahitaiḥ | yathā sāṃ sarasvatyai namaḥ sarasvatīśrīpādukāṃ pūjayāmīti | 
evamagre'pi namaḥpadānte śrīpādukāmiti yogastu sūtre namo'ntānukaraṇena 
sūcitaḥ ||

nibandhe caturasre amīṣāṃ pūjanamuktaṃ tanmandam pūrvaṃ yatraikavāraṃ 
pūjitāḥ tatraiva punaḥ pūjyā iti svarasato lābhāt | loke'pi caitraṃ gṛhāt bahiḥ 
sthāpaya maitraṃ gṛhe bhojaya caitraṃ tatraiva bhojaya ityuktau kathamanubhavaḥ 
śrutuḥ iti sūkṣmabuddhyā vicārayantvāryāḥ || 30 ||

śyāmāvidyā'cāryapūjā

śrīśyāmāvidyāpravartakācāryapūjāṃ [pravartakapūjā'cārya iti kośeṣu.] 
teṣāṃ sthānaṃ cāha-

haṃsamūrtiparaprakāśapūrṇanityakaraṇasampradāyagurūṃścaturasrapūrva-
rekhāyāmabhyarcya || 31 ||

haṃsamūrtiśca paraprakāśaśca pūrṇaśca nityaśca karuṇaśca ye te 
sampradāyaguravaḥ tān caturasrapūrvarekhāyām udagapavargaṃ pūjayet iti 
tadarthaḥ | mantrasvarūpaṃ ca haṃsamūrtisampradāyaguruśrīpādukāṃ 
pūjayāmi | evamagrimamantreṣvapi sampradāyagurviti yojyam dvandvānte 
śrūyamāṇaṃ pratyekaṃ sarvatra sambadhyate iti nyāyāt || 31 ||

gurupādukāpūjā

evaṃ cakrapūjāṃ samāpya gurupādukāpūjāmāha-

svaśirasi sāmānyaviśeṣapāduke abhyarcayet || 32 ||

p. 204)

sāmānyagurupādukāmantraḥ dīkṣākhaṇḍe [dīkṣākhaṇḍe 66-patre sūtre 
tadbhāṣye ca |] pratipāditaḥ | viśeṣagurupādukāmantraḥ caramakhaṇḍe 
śyāmāgurupāduketyuddhṛtaḥ | tābhyāṃ mantrābhyāṃ svaśirasi 
pādukādvayaṃ sampūjayet || 32 ||

devyāḥ punaḥpūjā

evaṃ gurupādukā'rcanāntam āvaraṇapūjāmuktvā 
pradhānadevatāpūjāpurarasaraṃ balipradānaṃ vivṛṇoti-

punardevīmabhyarcya bālayā ṣoḍaśopacārān vidhāya || 33 ||

mūleneti śeṣaḥ | punarityanena ṣaḍaṅgadevatābhyaḥ prāk 
pradhānadevyarcanaṃ jñāpitam | bālayeti spaṣṭam || 33 ||

balidānam 

balidānaprakāraṃ darśayati-

śuddhajalena trikoṇavṛttacaturasraṃ vidhāyārdhānnapūrṇasalilaṃ [ya tasmin 
puṣpāṇi vikīryārdhā-śrī.] sādimopādimamadhyamaṃ su[sa]gandhapuṣpaṃ 
sādhāraṃ pātraṃ nidhāya || 34 ||

śuddhajalena kalaśasthena | ardhānnapūrṇaṃ salilaṃ yasmiṃstat | ādimaṃ 
prathamam upādimaṃ dvitīyaṃ madhyamaṃ tṛtīyam ebhiḥ sahitaṃ 
sugandhapuṣpaṃ yatra īdṛśam ādhārasahitaṃ balipātraṃ nidhāya sthāpayitvā 
|| 34 ||

balidānamantrān taditikartavyatāṃ ca darśayati-

śrīmātamuktvā gīśvarīmaṃ baliṃ gṛhṇa gṛhṇa huṃ phaṭ svāhā 
śrīmātamuktvā gīśvari śaraṇāgataṃ māṃ trāhi trāhi huṃ phaṭ svāhā 
kṣetrapālanāthemaṃ baliṃ gṛhṇa gṛhṇa phaṭ svāhā iti mantratrayeṇa 
vāmapārṣṇighātakarāsphoṭasamudañcitavaktranārā ca mudrābhiḥ baliṃ 
pradāya || 35 ||

śrīmātamiti huṃphaṭ svāhetyantaṃ mantratrayam | nārācamudrā 
paramānandatantre-

vimuṣṭyaṅguṣṭhatarjanyāvūrdhvāṅguṣṭhāgratarjanī |
hastadvayagatā caivaṃ mudrā nārāca saṃjñitā || iti ||

ayamarthaḥ prathamaṃ hastadvaye muṣṭibhāvaṃ sampādya tasyā nirgate vimuṣṭī 
ye aṅguṣṭhatarjanyau tayormadhye ūrdhvāgramaṅguṣṭhaṃ prāgagrām 
ṛjurūpāṃ tarjanīṃ kuryāt | iyaṃ nārācamudretyarthaḥ || 35 ||

p. 205)

suvāsinīpūjādi

evaṃ balipradānakramamuktvā suvāsinīpūjā'dikamupadiśati-

śyāmalāṃ śaktimāhūya bālayā tāmabhyarcya tasyā hasta ādimopādimau 
dattvā tattvaṃ śodhayitvā taccheṣamurarīkṛtya yogyaiḥ saha haviśśeṣaṃ 
svīkuryāt || 36 ||

abhyarcyeti viśeṣānukteḥ yathāvibhavam | tattvaṃ śodhayitvā ityanena 
tattvaśodhanamantrāḥ api prāptāḥ te ca mantrāścatvāraḥ prasiddhāḥ [ime 
tattvamantrāḥ trayaḥ dīkṣāprakaraṇe-62-patre 39 sūtrabhāṣye santi caturthaśca 
mantra sarvatattvāyasvāheti jñeyaḥ || iti tattvamantracatuṣṭayaṃ jñeyam ||] | taiḥ 
pātracatuṣṭayaṃ grāhayitvā caturthapātraṃ saśeṣaṃ grāhayitvā taccheṣaṃ 
svayam urarīkuryāt | haviśśeṣapratipattimāha yogyairiti | yogyapadārthaḥ 
śrīkramoktaśiṣṭapadena vyākhyātaḥ [176-patre-pāścātyapañcamakhaṇḍīya 
22 sūtre tadbhāṣye ca-śiṣṭapadārthaḥ sphoṭitaḥ |] | itthaṃ ca tasya prayojanaṃ 
taditikartavyatā tat sarvamapi śrīkramoktaprakāreṇāvagantavyaṃ bhavati || 36 ||

śyāmāpūjā'vadhiḥ

evaṃ saṅgītamātṛkāpūjā kiyatkālaṃ kartavyā ityavadhyākāṅkṣāyāṃ 
tadavadhimāha-

evaṃ nityasaparyāṃ kurvan lakṣajapaṃ japtvā taddaśāṃśakrameṇa ca 
homatarpaṇabrāhmaṇabhojanāni vidadhyāt || 37 ||

evam uktaprakāreṇa nityasaparyāṃ nityapūjām | atra kurvannityanena pūjanasya 
japāṅgatvaṃ gamayati | tathā hi yadi pūjā pradhānaṃ japaścāṅgaṃ syāt tarhi 
yāvatparyantaṃ lakṣajapaḥ tāvat pūjeti kathanaṃ virudhyeta | na hi 
aṅgānusāriṇī pradhānāvṛttiḥ loke vede ca dṛṣṭā | yāvat bhaṭo dhāvati tāvat 
rājā dhāvati iti na hi brūte | yāvat rājā dhāvati tāvat bhaṭo dhāvati iti 
vyavahāro'sti | ato japaḥ pradhānaṃ tadavadhitvasya pūjāyāṃ kathanāt | ata eva 
japasamāptau pūjānivṛttiḥ | lakṣajapaṃ japtveti lakṣasaṅkhyāviśiṣṭajapo'nena 
vidhīyate | taddaśāṃśakrameṇa homo japadaśāṃśaṃ taddaṃśāṃśaṃ 
tarpaṇaṃ taddaśāṃśaṃ brāhmaṇabhojanamityarthaḥ || 37 ||

śyāmāmanujāpidharmāḥ

athaitanmanujāpidharmānāha-

etanmanujāpī na kadambaṃ chindyāt girā kālīti na vadet 
vīṇāveṇunartanagāyanagāthāgoṣṭhīṣu na parāṅmukho gacchet gāyakaṃ na 
nindyāt || 38 ||

p. 206)

etanmanujāpī śyāmāmanujāpītyarthaḥ | ete dharmāḥ na japasamakālikāḥ kiṃ 
tu japamārabhya yāvajjīvaṃ tasmādagnicid varṣati na dhāvet itivat || 38 ||

lalitopāsakadharmāḥ

evaṃ śyāmopāsakānāṃ dharmānuktvā prasaṅgāt prādhānyācca 
lalitopāsakadharmānapyāha-

lalitopāsako nekṣukhaṇḍaṃ bhakṣayet na divā smared vārtālīṃ na jugupseta 
siddhadravyāṇi na kuryāt strīṣu niṣṭhuratāṃ vīrastriyaṃ na gacchet na taṃ 
hanyāt na taddravyamapaharet nātmecchayā 
mapañcakamurarīkuryātkulabhraṣṭaiḥ saha nāsīta na bahu pralapet yoṣitaṃ 
sambhāṣamāṇāmapratisambhāṣamāṇo na gacchet kulapustakāni gopāyet iti 
śivam || 39 ||

iti...kalpasūtre śyāmākramo nāma ṣaṣṭhaḥ khaṇḍaḥ ||

ikṣukhaṇḍamityanena tadvikārāṇāṃ guḍaśarkarādīnām adoṣaḥ sūcitaḥ | 
vārtālīṃ vārāhīm | siddhadravyāṇi mapañcakarūpāṇi na 
jugupsetasvamanasā'pi na nindyāt | niṣṭhuratāṃ nāsikācchedanādi | 
vīrastriyamiti ṣaṣṭhītatpuruṣaḥ na karmadhārayaḥ | tathā sati agre na taṃ hanyāt 
ityatra puṃstvasyānanvayāpatteḥ | ato bādhakasattvāt laghorapi karmadhārayasya 
tyāgaḥ | vīrastriyam ityatra vīrapadārthaśca nirmūlaparāhatadvaitabhāvaḥ | 
taduktaṃ tantre-

ahami pralayaṃ kurvan idamaḥ pratiyoginaḥ |
saḥ vīra iti vijñeyaḥ svātmānandanimagnadhīḥ ||

taṃ vīram | taddravyaṃ vīradravyam | ātmecchayā svendriyatṛptaye urarīkuryāt 
svīkuryāt | kulabhraṣṭaiḥ prathamaṃ kulamārgamaṅgīkṛtya janmāntarāṃhasā 
tatrotpannāviśvāsāḥ santoye svīkṛtaṃ mārgaṃ parityajanti te kulabhraṣṭāḥ | 
taduktaṃ devībhāgavate-

kulamārgaṃ samāśritya janmāntarakṛtāṃhasā |
tanmārgaṃ tyajatā sākaṃ na tiṣṭhenna ca saṃvadet |
tato varaḥ paśurjñeyaḥ taṃ dṛṣṭvā'paḥ [apsu saṃviśet śrī.

sūtrasyapunarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || iti ṣaṣṭhaḥ khaṇḍaḥ || śrīḥ-
] susaṃspṛśet || iti ||

na bahuvacanaṃ pralapet iti taiḥ sākameva | bahupadena svamārgaguptaye 
tajjanitānarthaparihārārthaṃ yāvadarthasambhāṣī bhavet iti jñāpitam | 
apratisambhāṣamāṇaḥ pratyuttaramadattvā | kulapustakāni kulaśāstrapustakāni | 
śivamityasya vyākhyānaṃ pūrvavat ||

iti...kalpasūtravṛttau śyāmākramo nāmaḥ ṣaṣṭhaḥ khaṇḍaḥ ||

oṃ 

śrīmahātripurasundaryai namaḥ |

śrīparaśurāmakalpasūtram 

rāmeśvarakṛtavṛttisahitam |

paraśūjjvalahastābjo jaṭāmaṇḍalamaṇḍitaḥ | 
dadātu cirajīvitvaṃ prasannātmā bhṛgūdvahaḥ ||

prathamaḥ khaṇḍaḥ-dīkṣāvidhiḥ |

vṛttibhūmikā [atra vṛttiśabdena etanmūlagranthasyopari 
saubhāgyodayanāmakaṃ vivaraṇaṃ jñeyam | 
etadattikārābhidhānavṛttiracanāsamayādijñānāya agre dvitīyapariśiṣṭe 1-
viṣayo dṛśyaḥ |]

atra maṅgalam 

śrīvallabhāpayodharasaṃliptāleparañjitoraskam |
vande gajendravadanaṃ bālasahasrāṃśukoṭisacchāyam ||

yā paraśive sphurattā pūrṇā'hantāpadena saṃśliṣṭā |
dvaitaṃ bhāvaṃ prāptā paścādambāṃ parāmimāṃ kalaye || 

yā pañcapretasaṃsthā paraśivanilayapā śaktayaḥ kāmabuddhi-
karmādyā yanmayūkhāḥ samudayaparirakṣā'ntakartryo babhūvuḥ |

yā paśyantyādirūpā sakalajanavacojālamāviṣkaroti 
sā me vāgdevateyaṃ vilasatu vadane cittamālinyahantrī ||

śrīmadyaśovadambābhāsuravāmāṅkamajñatā'dripavim |
mama vidhisuṣirasaroruhakalpitanilayaṃ namāmi nāthendram ||

yo bhṛgavaṃśe bhūtvā kṣatraṃ jaghne trisaptakṛtvastam |
ṣaṣṭhaṃ śrīmadviṣṇoravatāraṃ naumi vīrendram || 

p. 2)

subrahmaṇyaṃ ca pitaraṃ guruvāmbāṃ ca mātaram |
praṇamāmi phalāvāptyai tāveva śaraṇaṃ mama || 

vicārya nānātantrādīn mīmāṃsānyāyavistaram |
nānādeśasamānītapustakaiḥ pariśodhya ca ||

jāmadagnyena racitaṃ kalpasūtraṃ yathāmati |
vistārayati gūḍhārthaṃ śrīvidyopāstisiddhaye ||

rāmeśvaraḥ śrīlalitāpreritaḥ kāśyapodbhavaḥ ||

dīkṣā'dhikāraḥ 

iha khalu śrībhagavān śrīparaśurāmaḥ ādhunikeṣu mandamatiṣu kṛpāluḥ 
śrīśivanirmitānyasaṃkhyāni [etāvatedaṃ pratīyate sarvatantragranthānāṃ 
kartā bhagavān śivaḥ iti-atra dvi0 pariśiṣṭe-3 vi- dṛśyaḥ |] tantrāṇi paryāloḍya 
sarvāṇyupasaṃhṛtya turīyapuruṣārthasādhanaṃ laghumadhvānaṃ darśayan 
pratijānīt-

athāto [ito granthamārabhate bhagavān śrījāmadagnyo rāmaḥ-
taddhyānaprakāraḥ-tatpituḥ śrījamadagnimaharṣeḥ pūrvajanmakathā ca-dvi0 
pariśiṣṭe-2-viṣaye-dṛśyā |] dīkṣāṃ [ita ārabhya purastana-33 
sūtrabhāṣyāntaṃ yāvaddīkṣāvidhau jñātavyamasti dīkṣāprayogārambhastu-
34-sūtrādastīti jñeyam |] vyākhyāsyāmaḥ || 1 ||

atha athaśabdaḥ maṅgaladyotakaḥ,

oṅkāraścāthaśabdaśca dvāvetau brahmaṇaḥ purā |
kaṇṭhaṃ bhittvā viniryātau tasmānmāṅgalikāvubhau || 

iti smaraṇāt | ataḥśabdaśca ānantaryadyotakaḥ | ānantaryasyāvadhyapekṣāyāṃ 
samīpavartitvāt maṅgalācaraṇaṃ nānātantrapariśodhanaṃ vā avadhitvena 
anveti | yadvā- athāta iti militvā ārambhadyotakaḥ athāto darśapūrṇamāsau 
vyākhyāsyāmaḥ ityāpastambasūtrabhāṣye athātaśśabdo'yaṃ 
prakaraṇārambhe prāyaḥ prayujyate vṛddhaiḥ | kvacidānantarye'pi yathā- ime 
bhṛgavo vyākhyātāḥ athātoṅgirasām ityādau | tathā na 
punarihānantaryamarthaḥ pūrvapravṛttasya kasya cidanantarasyānupalambhāt iti 
lekhāt | dīkṣāpadārthaṃ sūtrakāro'gre vivecayiṣyati | vyākhyāpadārthaśca 
nigūḍhābhiprāyakaśabdasya vivicya kathanam | prakṛte gūḍhārthānāṃ 
tantrāṇāmupasaṃhāreṇa vivicya kathanaṃ kalpasūtre iti lakṣaṇasamanvayaḥ | 
dīkṣāviṣayajñānānukūlaśabdaprayogakartā'hamiti 

pa. 3)

phalito'rthaḥ | vyākhyāsyāmaḥ iti 
bahuvacanamupāsanāpravartakācāryānanyānapi saṃgrahītum | yathā loke 
gurutarakāryanirmāṇe vayaṃ kūrmaḥ ityanye'pi saṃgṛhyante tathā | etena 
dīkṣāvyākhyānamatikaṭhinamiti sūcitam | yadvā- asmado dvayośca ekatve dvitve 
ca vivakṣite asmado bahuvacanaṃ syāditi tadarthaḥ | tathā ca asmacchabdasya 
kartṛvācakasya bahuvacanāntatvāt tatsamānavacanatvopapattaye 
vyākhyāsyāmaḥ iti bahuvacanam || 

tantrāprāmāṇyaśaṃkānirāsaḥ 

nanu kalpasūtravyākhyānaṃ vaidikānāmayuktaṃ tasya tantreṣu parigaṇitatvena 
tantrāṇāṃ kevalalobhaikamūlatvenāprāmāṇyāt | taduktaṃ vārtike 
bhaṭṭapādaiḥ-

lobhādikāraṇaṃ cātra bahvevānyat pratīyate |
yasmin sannihite dṛṣṭe nāsti mūlāntarānumā ||

śākyādayaśca sarvatra kurvāṇā dharmadeśanām |
hetujālavinirmuktāṃ na kadācana kurvate ||

na ca tairvedamūlatvamucyate gautamādivat |
hetavaścābhidhīyante ye dharmāddūrataḥ sthitāḥ ||

eta eva ca te yeṣāṃ vāṅmātreṇāpi nārcanam |
pāṣaṇḍino'pi karmasthā haitukāścaita eva hi ||

iti | evaṃ yānyanyāni trayīvidbhiḥ na parigṛhītāni 
kiṃcittanmiśrakañcukachāyāpatitāni 
lokopasaṃgrahalābhapūjākhyātiprayojanaparāṇi 
trayīviparītāsaṃbaddhadṛṣṭalobhādipratyakṣānumānopamānārthā-
pattiyuktimūlopanibaddhāni 
sāṃkhyayogapāñcarātraśākyagranthaparigṛhītadharmādharmanibandhanāni 
viṣacikitsāvaśīkaraṇoccāṭanonmādanādisamarthāni 
kādācitkasiddhidarśanabalena 
ahiṃsāsatyavacanadamadānadayā'diśrutismṛtisaṃvādistokārthagandhavāsita-
jīvikāprāyārthāntaropadeśīni yāni 
mlecchācāramiśrakabhojanācaraṇanibandhanāni 
teṣāmevaitacchrutivirodhahetudarśanābhyāmanapekṣaṇīyatvaṃ pratipādyate iti 
ca granthena | evaṃ śrīsūtasaṃhitāyāṃ brahmagītādvitīyādhyāye'pi-

vedamārgamimaṃ muktvā mārgamanyaṃ samāśritaḥ |
hastasthaṃ pāyasaṃ tyaktvā lihet kūrparamātmanaḥ ||

vinā vedena jantūnāṃ muktirmārgāntareṇa cet |
tamasyapi vinā'lokaṃ te paśyanti ghaṭādikam || 

p. 4)

tasmādvedodito hyarthaḥ satyaṃ satyaṃ mayoditam |
anyena vedito hyarthaḥ na satyaḥ paramārthataḥ || iti ||

tatra tatraiva tarkāṃśca pravadanti yathābalam |
sarve vādāḥ śrutismṛtyorviruddhā iti me matiḥ || iti ||

yajñavaibhavakhaṇḍe ekacatvāriṃśe'dhyāye-

bahunā'tra kimuktena śrutismṛtyuditaṃ vinā |
yatkiṃcidapi kurvāṇaḥ pātakī syānna saṃśayaḥ || 

iti vaidikānyamārganindā śrūyate | agnipurāṇe'pi vedarāśinā sākaṃ 
nārakiṇāṃ saṃvāde-

tantradīkṣāmanuprāptāḥ lobhopahatacetasā |
tyaktvā vaidikamadhvānaṃ tena dahyāmahe vayam || iti ||

padmapurāṇe puṣkaramāhātmye-

ye ca pāṣaṇḍino loke tāntrikā nāstikāśca ye |
tairduṣprāpamidaṃ tīrtham................................... ||

iti tāntrikapuruṣanindayā tantrasyāśraddheyatvaṃ spaṣṭam | evamanyeṣvapi 
bahupurāṇeṣu tantranindāyāḥ bahulamupalambhāt | 
mapañcakādaravidhāyakaśāstrasya lobhaikamūlatvaṃ suspaṣṭam | 
visarjanīyavāsograhaṇaśāstrasya lobhaikamūlatvaṃ sādhitam | kimu 
mapañcakasevakasya lobhamūlatve pratirodhaḥ | tasmāt idaṃ śāstramāstikaiḥ na 
vyākhyeyam iti cet-maivam [itastantraśāstraprāmāṇyasvīkaraṇaśāstrārthaḥ] | 
kiṃ bhaṭṭapādānāṃ purāṇāni pādmādīni pramāṇatvena abhimatāni na vā ? 
yadi pramāṇatvena abhimatāni tarhi teṣu tantraprāmāṇyaṃ bahuśaḥ 
adhikāriviśeṣaviṣaye śrūyate | tathāhi sūtasaṃhitāyāṃ 
brahmagītādvitīyādhyāye-

tathā'pi svapnadṛṣṭaṃ hi vastu svarganivāsinaḥ |
sūcakaṃ hi bhavatyeva jāgratsatyārthasiddhaye ||

tathaiva mārgāt saṃbhrāntā api vedoditasya tu |
arthasya prāptisiddhyarthā bhavantyeva na saṃśayaḥ ||

tasmādvedetarā mārgā naiva tyājyā nirūpaṇe || iti [etāvatā 
vedavadvedetaradharmyamārgāśrayaṇamapyaśāstrīyaṃ neti sidhyati ||] ||

p. 5)

sūtasaṃhitāyāṃ śivamāhātmyakhaṇḍe pañcamādhyāye-

pūjā śakteḥ parāyāstu dvividhā parikīrtitā |
bāhyābhyantarabhedena bāhyā ca dvividhā matā ||

vaidikī tāntrikī ceti dvijendrāstāntrikī tu sā |
tāntrikasyaiva nānyasya vaidikī vaidikasya hi ||

itthaṃ samastadevānāṃ pūjā viprā vyavasthitā || iti ||

evaṃ sūtasaṃhitāyāṃ muktikhaṇḍe-

pāñcarātrāditantrāṇāṃ [etena nāradapāñcarātrāditāntrikagranthānāṃ 
vedamūlatvaṃ tebhyaśca vaidikānāṃ 
vedāviruddhāṃśagrahaṇoktiścetyubhayamapi paraśivoditamiti sidhyati |] 
vedamūlatvamāstike |
na hi svatantrāste tena bhrāntimūlā nirūpaṇe ||

tathā'pi yoṃ'śomārgāṇāṃ vedena na virudhyate |
soṃ'śaḥ pramāṇamityuktaṃ keṣāṃcidadhikāriṇām || iti 

tāntrikāṇāmahaṃ devi labhyo'smi vyavadhānataḥ |
labhyo vedaikaniṣṭhānāmahamavyavadhānataḥ || iti ca ||

evaṃ tatraiva yajñavaibhavakhaṇḍe viśe'dhyāye-

śaivāgamodito dharmo dvidhā pūrvamudīritaḥ |
adhaḥsrotodbhavastveka ūrdhvasrotodbhavo'paraḥ ||

adhaḥsrotodbhavāddharmādūrdhvasrotodbhavo varaḥ |
kāmikādiprabhedena sa bhinno'nekadhā dvijāḥ ||

adhaḥsrotodbhavo dharmo bahudhā bheditastathā |
ūrdhvasrotodbhavāddharmāt smārtā dharmā mahattarāḥ || iti 

tatraiva dvāviṃśe'dhyāye-

tasmānmārgāntarāṇāṃ tu pramāṇyaṃ vedavittamāḥ |
mukteranyatra nātraiva krameṇaivātra mānatā ||

ato vedāntamārgastho mahādevo'cireṇa tu |
muktiṃ dadāti nānyatra sthitaḥ so'pi krameṇa tu ||
dadāti paramāṃ muktimityeṣā śāśvatī śrutiḥ || iti ||

p. 6)

tatraiva-

ato vedasthito martyo nānyamārgaṃ samāśrayet |
ato'dhikāribhedena mārgā mānaṃ na saṃśayaḥ ||

tatraivaikasmin parivṛtte tatratyaślokāḥ-

īśvarasya svarūpe ca brandhahetau tathaiva ca |
jagataḥ kāraṇe muktau jñānādau ca tathaiva ca ||

mārgāṇāṃ ye viruddhāṃśā vedāntena vicakṣaṇāḥ |
te'pi mandamatīnāṃ ca mahāmohāvṛtātmanām ||

vāñchāmātrānuguṇyena [idamatrāvadheyaṃ yat tantraśāstraṃ 
vedasiddhāntān kiyadāśrayatīti |] pravṛttā na yathā'rthataḥ |
darśayitvā tṛṇaṃ martyo dhāvantīṃ gāṃ yathā'grahīt ||

darśayitvā tathā kṣudramiṣṭaṃ pūrvaṃ maheśvaraḥ |
paścāt pākānuguṇyena dadāti jñānamuttamam ||

tasmāduktena mārgeṇa śivena kathitā amī |
mārgā mānaṃ ca cāmānaṃ mṛṣāvādī kathaṃ śivaḥ || iti ||

tathā brahmāṇḍapurāṇe-

svamātṛjāravad gopyā vidyaiṣetyāgamā jaguḥ ||

ityāgamānāṃ pramāṇatvenopanyāsaḥ | tathā [tāntrikasaraṇyā 
śāntikapauṣṭikakarmakaraṇopadeśaḥ tena phalaprāptiścātra nirūpiteti bodhyam 
||] brahmottarakhaṇḍe pradoṣamāhātmye pradoṣapūjā tāntrikasaraṇyā 
brāhmaṇarājaputrayorupadiṣṭā | tena ca phalaprāptiriti itihāsaḥ suspaṣṭaṃ 
pratīyate | śrīmadbhāgavate gajendrastutau śarvāgamāmnāyamahārṇavāya iti | 
āgamāḥ pāñcarātrāditantrāṇi iti śrīdharasvāmivyākhyā | tathā 
brahmastutau 

rūpaṃ tathaitatpuruṣarṣabhejyaṃ śreyo'rthiṃbhirvaidikatāntrikeṇa || iti ||

tathā ekādaśaskandhe karabhojanopadeśe dvārapūjāvidhāne kalipūjāyāṃ ca 
vacanāni yathā-

yajante vedatantrābhyāṃ paraṃ jijñāsavo nṛpa |
nānātantravidhānena kalāvapi tathā śṛṇu || iti ||

nānātantravidhāneneti kalau tantramārgaprādhānyaṃ darśayatīti 
śrīdharasvāmivyākhyānam | evamekādaśaskandhe uddhavopadeśe'pi-

p. 7)

vaidikastāntriko miśra iti me trividho makhaḥ || 27 a. 7 ślo.

iti vaidikatāntrikabhedena dviprakārapūjā śrībhagavatopadiṣṭā [etāvatā 
bhagavatastāntrikyapi pūjā'bhimateti pramāṇīyate |] sarvaiṃrupalabhyate | 
śrīmahābhārate arjunastutau-

āmnāyāgamavedyāya śuddhabuddhāya te namaḥ || iti ||

evamādīni tantraprāmāṇyapratipādakavacanāni sahasraśa upalabhyante | 
granthavistarabhayānneha prapañcyante | evaṃ 
yogamārgaprāmāṇyavyavasthāpakāni vacanāni śrīmanmahābhārate 
bhagavadgītāsu mokṣadharmādau ca asakṛcchrūyante | tathā bhāgavate 
kāśīkhaṇḍādinikhilapurāṇeṣu ca pade pade upalabhyante | evaṃ sati 
bhaṭṭapādāḥ kathaṃ sāṃkhyayogatantrāṇāmaprāmāṇyaṃ brūyuḥ | na vā 
purāṇānāmaprāmāṇyamiti śakyate vaktam 

purāṇaṃ dharmaśāstraṃ ca vidyā hyetāścaturdaśa ||

iti vidyāsuparigaṇanāt yadatharvāṅgiraso brāhmaṇānītihāsān purāṇāni iti 
vede'pi purāṇasya pramāṇamadhyaparigaṇanāt [etena 
tantraśāstrabrāhmaṇetihāsapurāṇadharmaśāstrāṇāṃ vedaniṣṭhaṃ 
pramāṇamupalabhyate eva] | evaṃ uktavacanakalāpaiḥ evaṃvidhairanyaiśca 
tantrāṇāṃ siddhe prāmāṇye aprāmāṇyaṃ brahmaṇā'pi vyavasthāpayituṃ 
na śakyam ||

sarvatantrāṇāṃ vedabāhyatvaśaṃkānirāsaḥ 

nanu bhavatvadhikāriviśeṣe vedabhraṣṭe puruṣe strīśūdrāṇāṃ saṃkareṣu ca 
tantrāṇāṃ prāmāṇyaṃ na vaidike | na ca vaidikātirikte tantrasya 
adhikārasaṃkocakapramāṇābhāva iti vaktuṃ śakyam | pūrvaṃ 
sūtasaṃhitāvacanasya tāntrikasyaiva nānyasya vaidikī vaidikasya hi iti likhitasya 
sattvāt | evaṃ sūtasaṃhitāyāmeva muktikhaṇḍe-

atyantagalitānāṃ tu prāṇināṃ vedamārgataḥ |
pāñcarātrādayo mārgāḥ kālenaivopakārakāḥ || iti ||

tatraiva sūtagītāyām-

śrutipathagalitānāṃ mānuṣāṇāṃ tu tantraṃ 
gurugururakhileśaḥ sarvavit prāha śaṃbhuḥ |
śrutipathaniratānāṃ tatra naivāsti kiṃcit 
hitakaramiha sarvaṃ puṣkalaṃ satyamuktam ||

iti pramāṇāntaravacanāt | tasmāt pramāṇānyapi tantrāṇi vedamārgagalitasyaiva 
na vaidikasyeti cet |

p. 8)

na | yacca śrutipathagalitānāmiti sūtagītāvacanaṃ tatratyaṃ tantrapadaṃ 
tantraviśeṣam | tacca tantraṃ śaivāgama - iti prasiddham dakṣiṇadeśe ca 
bhāṣayā jaṅgama - iti prasiddhairanuṣṭhitam | kathamidameveti jñāpakamiti cet 
asti jñāpakaṃ pūrvoktavacanasamīpa eva-

śrutipathagalitānāṃ sarvatantreṣu liṅgaṃ 
kathitamakhiladuḥkhadhvaṃsakaṃ tatra dhāryam |
śrutipathaniratānāṃ tat sadā naiva dhāryam || iti ||

tatra liṅgadhāraṇaṃ śaivāgamena bahuphalasādhanamiti pratipāditam | 
tatsaṃpradāyānuvartino liṅgaṃ dakṣiṇabāhau gale vā dhārayanti 
ityācāro'pyupalabhyate | yathā cāsmin vacane śrutipathagalitānāṃ sarvatantreṣu 
ityuttaraṃ pratipāditam iti śeṣaḥ | evaṃ ca yasmin tantre liṅgadhāraṇaṃ 
pratipāditaṃ tattantraṃ śrutibhraṣṭānāmityatra liṅgam | yathā chāgasya 
vaṣāyā medasaḥ iti mantraliṅgena paśuśabdasaṃkocaḥ tathā | kiṃ ca 
śrīmadadhyātmarāmāyaṇe śrīlakṣmaṇapraśnaḥ-

brahmakṣatrādivarṇānāmāśramāṇāṃ ca mokṣadam |
strīśūdrāṇāṃ ca rājendra sulabhaṃ muktisādhanam ||
tava bhaktāya me bhrātre brūhi lokopakārakam || iti ||

taduttaraṃ 'śrīrāma uvāca ityārabhya 

daśāvaraṇapūjāṃ vai hyāgamoktāṃ prakārayet |
homaṃ kuryāt prayatnena vidhinā tantrakovidaḥ |
āgamoktena [agastyoktena iti kvacit |] mārgeṇa kuṇḍenāgamavittamaḥ || iti ||

eva brāhmaṇādīnāṃ varṇānāṃ brahmacaryādīnāmāśramāṇāṃ ca 
mokṣopāyapraśne āgamoktapūjā kartavyeti taduttaramananyagatikaṃ vaidike'pi 
tāntrikaṃ yat pratipādayati tanmātsaryaśūnyena tattvabubhutsunā 
tyaktumaśakyam | nahi caitraḥ kuśalo vā - iti praśne maitraḥ kuśalaḥ iti 
prāmāṇikaḥ san brūyāt | tasmāt śrīrāmottaraṃ brāhmaṇādiviṣayam | na 
hyavaidiko brāhmaṇaḥ kṣatriyaśca loke prasiddhaḥ | na ca brāhmaṇaḥ kṣatriyo 
vā brahmahatyā'dimahāpātakena pātityaṃ gataḥ vedamārgabhraṣṭaḥtatra 
brāhmaṇatvaṃ vedamārgagalitatvamubhayaṃ cāstīti sa eva tantroditeṣvadhikārīti 
vācyam brahmakṣatrādikalyāṇapraśne taduttararūpapūjāvidhāne-

p. 9)

svagṛhyoktaprakāreṇa dvijatvaṃ prāpya mānavaḥ |
prātaḥsnānaṃ prakurvīta prathamaṃ dehaśuddhaye |
vedatantroditairmantrairmṛllepanavidhānataḥ ||

iti dvandvasamāsena ekasyaiva puruṣasya vaidikamantrasahitatāntrikamantrāṇāṃ 
snānakaraṇatvaṃ vidhīyate | tathā ca vedabāhyamuddiśya  
tantrasāmānyānuṣṭhānavidhiḥ iti svīkṛtya śrīrāmavākyaprāmāṇyanirvāhaḥ 
gīrvāṇagurūṇāmapyaśakya eva | evaṃ śrībhāgavate ekādaśaskandhe 
uddhavopadeśe-

ubhābhyāṃ vedatantrābhyāṃ mahyaṃ tūbhayasiddhaye || iti ||

upasaṃhāre tatraiva-

evaṃ kriyāyogapathaiḥ pumān vaidikatāntrikaiḥ |
arcannubhayatassiddhiṃ matto vindatyabhīpsitām || iti ||

tasmāt śrutipathagalitānāmiti vacanaṃ jaṅgamādiliṅgadhāriparam | evaṃ 
muktikhaṇḍasthapūrvoktātyantagalitānāmitivacane pāñcarātrādayo mārgāḥ 
iti ādipadena śaivāgamasya jaṅgamaparigṛhītasya grahaṇaṃ na 
jñānārṇavakalpasūtrādīnām tasmin vedabhraṣṭādhikārikatvasya kḷptatvena 
tena sahaikavākyatvāt | yacca śivamāhātmyakhaṇḍe pūjā śakteḥ parāyāstu 
ityārabhya 

vaidikī tāntrikī ceti dvijendrāstāntrikī tu sā |
tāntrikasyaiva nānyasya vaidikī vaidikasya hi || 

iti vacanaṃ tasya ayamabhiprāyaḥ - vaidikaḥ svagṛhyoktopanayanādisaṃskṛtaḥ | 
tāntrikaḥ tantrodīritakuṇḍamaṇḍapādipurassaraṃ dīkṣāsaṃskṛtaḥ | na tāntriko 
nāma śrutipathagalitaḥ tasya pūrvameva nirastatvāt | tathā ca anena vacanena 
upanayanādinimitte vaidikasnānapūjā'dinaimittikam | tantradīkṣānimitte 
naimittikaṃ tāntrikasnānapūjā'di vidhīyate | yatraikaṃ nimittaṃ tatraikaṃ 
kevalavaidike | śūdrādau kevalatāntrikam | yatra ubhayaṃ tatra ubhayānuṣṭhāne 
na kimapi bādhakam [sidhyatyetāvatā ca traivarṇikānāṃ 
vaidikatāntrikobhayakarmopadeśaḥ - dvipariśiṣṭe - 2 - vi0 dṛśyaḥ | 2 pa.] | 
asyaivārthaḥ spaṣṭīkṛtaḥ tripurārṇave-

traivarṇikairvaidikānte tāntrikaṃ kriyate'khilam || iti ||

imamevārthaṃ saṃkṣepeṇa śrīrāmo'pyāha - vedatantroditairmantrairiti | tasmāt 
sarvatantrānuṣṭhānaṃ vedabāhyaparamiti siddhānto 
vacanāntarānavalokanavyāmohavilāsarūpa eva | pāñcarātrādīnāṃ tu 
śrutipathagalitamuddiśyaiva pravṛttiḥ tannāma gṛhītvā āhatyavidhānāt | 
evameva kāpālamapi-

p. 10)

pāñcarātre ca kāpāle tathā kālamukhe'pi ca |
adhikāro vaidikānāṃ nāsti nāsti munīśvarāḥ || 

ityagastyasaṃhitāvacanāt | tathā ca nirṇīta evārthe bhaṭṭapādānāmabhiprāyaḥ 
| ata eva pāñcarātrasyaiva tantramadhye pṛthak nāma gṛhītam | na tu 
sarvatantrāṇāṃ grahaṇaṃ kṛtaṃ tatraiva vedaviruddhānāṃ 
smṛtiviruddhānāṃ ca dharmāṇāṃ bhūriśa upalabhyamānatvāt | na hi 
śākyādivat śāktāditantreṣu vedaviruddhamanuṣṭhānamamīṣadapyupalabhyate | 
yāni tu vedamārgamimaṃ tyaktvā ityādivacanāni tāni vaidikasya 
vaidikamārgaṃ sarvathā tyaktvā kevalatantramārgāśrayaṇe tannindāparāṇi 
muktvā vinetyādiśravaṇāt | yadvā-

pūrvaṃ vedamārgaṃ vinindya tasmādvedodito hyarthaḥ satyaṃ satyaṃ na 
saṃśayaḥ iti sarveṇa nindāpraśaṃsārūpaviśiṣṭārthavādena militvā 
vedamārgācaraṇaṃ kartavyamityekavidhikalpane lāghavam | pūrvapakṣe nindayā 
tāntrikakarmaṇaḥ samuccayaḥ tasmād vedodita iti stutyā vaidikakarmaṇo vidhiḥ 
kalpyaḥ iti gauravaṃ syāt | pūrvoktāgnipurāṇavacanaṃ pādmaṃ ca 
tantraviśeṣaparaṃ pūrvoktayukteḥ | ata eva tantreṣu dīkṣitaḥ ityādivacanāni 
nindārūpāṇi vaidikapraśaṃsāparāṇi iti śrīvidyāraṇyasvāmibhirapi tatraiva 
vyākhyātam | evameva bhaṭṭapādaiḥ yogasya nirastaprāmāṇyasyāpi 
viṣayāntaraṃ sudhībhirūhyam | aprakṛtatvāt granthavistarabhayānneha likhyate | 
bhaṭṭapādoktyapekṣayā purāṇānāṃ tantrāṇāṃ ca prāmāṇaṃ variṣṭham | 
ato durbalapramāṇasya prabalapramāṇānusāreṇa saṃkoco yukta eva | anyathā 
tasminneva adhikaraṇe aṣṭācatvāriṃśadvarṣāṇi brāhmaṇo brahmacaryaṃ caret 
iti smṛtiḥ jātaputraḥ kṛṣṇakeśo'gnīnādadhīta iti śrutiḥ anayorvirodhaḥ ittham-
nahyaṣṭācatvāriṃśadvarṣānantaraṃ vivāhe jātaputraḥ kṛṣṇakeśaśca 
puruṣaḥ prasiddho'gnyādhānādhikārī | ato dvayorvirodhe 
prabalaśrutyanusāreṇa smṛtisthabrāhmaṇapadamandhādiparam | 
tasyāgrimaśrautakarmānadhikāritvena śrutyavirodha iti taireva pratipādito grantho 
virudhyeta | tasmādvaidikānāṃ 
śāktagāṇeśāditantrapratipāditakarmasvadhikāra iti 
bhaṭṭapādānāmastyabhiprāya iti pūrvayuktibhiḥ siddham [etena vaidikānāṃ 
tāntrikakarmaṇyanadhikāra iti durapalapanto dūraṃ parāstāḥ |] | etena 
bhaṭṭojidīkṣitalikhitatantraprāmāṇyakhaṇḍanamapi parāhatamūhyaṃ sūribhiḥ 
| purāṇavacanānāmapi vyavasthoktaiva | yaccoktaṃ dṛṣṭaikaprayojanakatvaṃ 
mapañcakasvīkāravidhāyakaśāstrasya lobhamūlatayā praṇītatvaṃ ceti tacca 
agnīṣomīyaṃ paśumālabheta iti surāgrahā gṛhyante ityatrāpi vede tulyam | na hi 
idaṃ pramāṇamiti śraddhāmutsṛjya prāmāṇyavyavasthāṃ kartuṃ brahmāpi 
samarthaḥ | ato vaidikānāṃ pūrvasaṃskāravaśāt utpanno vedaḥ pramāṇam iti 
śraddhāviśeṣa eva prāmāṇyavyavasthāpakaḥ prathamaḥ | tataśca 
tadaviruddhānāmeva tanmūlakatayā prāmāṇyaṃ tadviruddhaṃ tu vaidikasya 

p. 11)

apramāṇameva | kiṃca - śrīsundarītantrāṇi tu yathā 
taittirīyaśākhāśeṣabhūtāni bodhāyanāpastambādiṣaṭsūtrāṇi pramāṇaṃ 
tathā [etāvatā ca 
bodhāyanāpastambādisūtrasundarītāpinīpañcakabhāvanākaulopaniṣadaḥ 
pramāṇānyevetyatra dhvanyate ||] 
sundarītāpinīpañcakabhāvanākaulopaniṣaccheṣāṇi tadvyākhyānarūpāṇi na 
svakapolakalpitāni | ato'pi vedavyākhyānarūpatvānniḥśaṅkaṃ vaidikaiḥ 
parigṛhītavyāni | mapañcakādisevanasya yathā vedāviruddhatā tathā upariṣṭāt 
vakṣyāmaḥ ||

śuddhacittasyaiva sundarīvidyā'dhikāraḥ 

vaidikairgrāhyatve'pi na sarveṣāṃ vaidikānāmatrādhikāraḥ | yathā 
brahmasvarūpasya upaniṣadbhāgarūpavedapratipādyatve'pi tajjijñāsāyāṃ na 
sarveṣāmadhikāraḥ kiṃtu sādhanacatuṣṭayasaṃpannānāṃ 
vaidikānāmevādhikāraḥ tathā'tra keṣāṃcidevādhikāraḥ | tathāhi 
brāhmaṇasya upanayanādyārabhya prathamabhūmikā svādhyāyādhyayanam | 
tadanantaraṃ sthāṇurayaṃ bhārahāraḥ kilābhūt0 iti anarthajñe nindām 
yo'rthajña it sakalaṃ bhadramaśnute0 ityarthajñāne phalaṃ ca śrutvā 
arthajñānasiddhyarthaṃ kāvyanigamaniruktavyākaraṇanyāyānadhītya 
pūrvamīmāṃsā'dyabhyasya vedārthaṃ jñātvā na jñānamātreṇa 
kṛtārthatāmiyāt iti smṛtyā arthaṃ jñātvā karmānanuṣṭhātari nindāṃ 
śrutvā anuṣṭhānabhūmikāmārūḍho nikhilasmṛtiśrutyuditaṃ karma 
bahujanmasvanutiṣṭhan taiḥkarmabhiḥ pariśuddhacittaḥ saṃsāre 
nātyantamāsaktonāpyatyantamanāsaktaśca yadā bhavati tadā 
bhaktibhūmikā'rohaṇayogyo bhavati | taduktaṃ bhāgavate-

na nirviṇṇo na cāsakto bhaktiyogo'sya siddhidaḥ || iti ||

yadā na nirviṇṇaḥ na cāsaktaḥ bhaktiyogaḥ tadā siddhidaḥ ityarthaḥ | 
tādṛśabhaktibhūmikāmanāruhya na kadā'pi paramapuruṣārthalābhaḥ | 
taduktaṃ śrīmadbhāgavate-

animittā bhagavati bhaktiḥ siddhergarīyasī |
jarayatyāśu yā kośaṃ nigīrṇamanalo yathā || iti || 

bhaktisvarūpam

tatra bhaktirnāma ārādhyatvaprakārakajñānaviśeṣo'nāhāryaḥ svābhāvikaḥ 
iti naiyyāyikāḥ | bhaktirnāma bhagavadviṣayiṇī antaḥkaraṇasya tadākāratayā 
pariṇāmātmikā vṛttiḥ | tatra pramāṇam-

yā prītiravivekānāṃ viṣayeṣvanapāyinī |
tvāmanusmarataḥ sā me hṛdayān mā'pasarpatu ||

iti bhagavadviṣayaprītiyācñāyāṃ prahlādaṃ prati śrībhagavadvākyam-

bhaktirmayi tavāstyeva bhūyo'pyevaṃ bhaviṣyati ||

p. 12)

iti bhaktiprāptirbhaviṣyatīti varadānena smṛtirmamāstviti [itaḥ 
sārthavedādhyayane - bhaktigaurave ca - pramāṇajātamasti |] bhaktiyācñaiveti 
jñāyate | na hi ghaṭaṃ yācataḥ paṭadānaṃ yuktam | tasmāt 
anusyūtabhagavatsmṛtiḥ bhaktiḥ saiva nirupādhikī prītirityapi vyavahriyate iti 
prurāṇikāḥ |

mayi cānanyayogena bhaktiravyabhicāriṇī |

iti śrībhagavadvacanamapi akhaṇḍaśrībhagavatsmṛtiparam | yuktaṃ caitat 
śrībhāgavate asyaivārthasyoktatvāt | tathāhi-

devānāṃ guṇaliṅgānāmanuśravikakarmaṇām |
sattva evaikamanaso vṛttiḥ svābhāvikī tu yā |
bhaktirbhāgavatī saiva............................ || iti ||

guṇāḥ viṣayāḥ liṅgyante jñāyante yaisteṣām indriyādhiṣṭhātṛdevānāṃ 
satvamūrtau harāveva yā vṛttiḥ animittā niṣkāmā svābhāvikī ayatnasādhyā 
sā bhaktirityarthaḥ | anuśravo vedaḥ taduditaṃ karma ānuśravikaṃ karma 
yeṣāmiti devaviśeṣaṇam | etena bhaktau prayojakaṃ ānuśravikaṃ karmeti 
sūcitam | ato bhagavadākārā manovṛttireva bhaktiriti siddham | evam- athāto 
bhaktijijñāsā sā parā'nuraktirīśvare iti śāṇḍilyasūtram ||

upāsanasya bhaktisādhanatvam 

etādṛśabhaktibhūmikāmārurukṣuḥ tatsādhanībhūtāṃ bhagavadupāstiṃ 
kuryāt | upāstirnāma - bhagavaduddeśena niṣkāmaṃ sarvavastutyāgaḥ 
bhagavatkathāśravaṇaṃ bhagavanmantrajapaḥ 
bhagavannāmastotrakīrtanamityetadanyatamam | etasya bhaktihetutvaṃ 
śrīmadbhāgavate-

punaśca kathayiṣyāmi madbhakteḥ kāraṇaṃ param |
śraddhā'mṛtakathāyāṃ me śaśvanmadanukīrtane |
pariniṣṭhā ca pūjāyāṃ stutibhiḥ stavanaṃ mama |
ādaraḥ paricaryāyāṃ sarvāṅgairabhivandanam |
madarthe'rthaparityāgo bhogasya ca sukhasya ca |
iṣṭaṃ dattaṃ hutaṃ japtaṃ madarthaṃ yad vrataṃ kṛtam |
evaṃ dharmairmanuṣyāṇāmuddhavātmanivedinām |
mayi saṃjāyate bhaktiḥ ko'nyo'rtho'syāvaśiṣyate || iti ||

bhaktisādhanatvādevopāstau śrībhāskararāyaiḥ setubandhe - bhaktirdvividhā 
gauṇī mukhyā ceti | tatrādyā saguṇabrahmaṇaḥ 
dhyānārcanajapanāmakīrtanādirūpā saṃbhavatsamuccayikā | parabhaktistu 

p. 13)

etajjanyānurāgaviśeṣarūpā iti kathitam | etādṛśī bhaktiśca saguṇabrahmaṇyeva 
saṃbhavati | etādṛśaṃ saguṇabrahma svopāsakānurāgānusāreṇa 
rāmakṛṣṇādinānāsvarūpaṃ labhate | tattatsvarūpabhaktisādhanānyeva 
pratipādyante tantreṣu purāṇeṣu ca | tanmūlabhūtāḥ śrutayaḥ 
upaniṣatsaṃjñakāścopalabhyante nṛsiṃhatāpinīrāmatāpinyādirūpāḥ 
sundarīviṣaye tripuropaniṣadbhāvanopaniṣadityādayaḥ | 
tatpratipādyaparabrahmaṇaḥ śābdaniścaye jāte sati tadā saṃsāre 
nātyantamāsaktiḥ nāpyatyantamanāsaktirbhavati | sa ca 
bhaktisādhanopāstāvadhikārī | etādṛśādhikāraprāptiśca 
bhaktibhūmikā'rurukṣutvaṃ ca nālpapuṇyena kintu 
anekakoṭijanmasādhitasukṛtalabhyam | tatrāpi sundarībhaktistato'pi dūratarā | 
taduktaṃ brahmāṇḍapurāṇe 

yasyānyadevatānāmakīrtanaṃ janmakoṭiṣu |
tasyaiva bhavati śraddhā śrīdevīnāmakīrtane |
carame janmani yathā śrīvidyopāsako bhavet || iti ||

sthalāntare'pi-

yasya no paścimaṃ janma yadi vā śaṃkaraḥ svayam |
tenaiva labhyate vidyā śrīmatpañcadaśākṣarī |
mokṣaikaheturvidyā [vidyayāmṛtamaśnute - iti śrutirapyatrārthayitavyā |] ca 
śrīvidyā nātra saṃśayaḥ || iti ||

śrutirapi-

aśrutāsaḥ śrutāsaśca | yajvāno ye'pyayajvanaḥ | svaryanto nāpekṣante | 
indramagniṃ ca ye viduḥ | sikatā iva saṃyanti | raśmibhassamudīritāḥ | 
asmāllokādamuṣmācca | ṛṣibhiradāt pṛśnibhiḥ ||

iti taittirīyāraṇyake |

upāsanādhikārasya svāntaḥkaraṇaikavedyanvam 

etādṛśabhaktibhūmikā'dhikāraḥ svāntaḥkaraṇaikavedyaḥ na pareṣāṃ 
pratyakṣaḥ na vā daśāviśeṣeṇa vā vayoviśeṣeṇa vā anumātuṃ śakyaḥ 
teṣāṃ vyabhicārasya darśanāt prahlādadhruvādīnāṃ bālya eva 
īdṛśabhūmikāprāptidarśanāt | kvaciddhetvābhāsenānumitiḥ | sā pramā'pi 
bhavitumarhati kadācit | yathā āgastyasaṃhitāyāṃ virūpākṣaṃ prati 
tatkanyāpraśne brāhmaṇavākyam-

ayi puṇyanidhe putri prāktanaiḥ puṇyasaṃcayaiḥ |
trivarṣā'pi samārūḍhā bhaktibhūmiṃ sudurlabhām |
gaurībījaṃ jagadbījaṃ mattaḥ prāpnuhi suvrate || 

p. 14)

ityanumityaiva kanyakābhūmijñānāt | manthānabhairavatantre'pi anumānaṃ 
kartavyamiti vidhirasti-

ekadvitricatuḥpañcavarṣāṇyālocya yogyatām |
bhaktiyuktān guṇāṃścāpi kramādvarṇe sasaṃkare |
paścāduktakrameṇaiva vadedvidyāmananyadhīḥ || iti ||

tathā'pyanumiteḥ visaṃvādipravṛtteḥ kadācitsaṃbhavāt dīkṣāgrahaṇe yaḥ 
pravartate saḥ svādhikāraṃ samyagvicāryaiva pravṛttiṃ kuryāt | anyathā 
anadhikārī san yadi pravarteta tarhiṃ śūdreṇa vedādhyayane kṛte yatphalaṃ 
tadeva asyāpi syāt anadhikāryanuṣṭhitatvasya tulyatvāt | ato'dhikāraṃ svacetasā 
vicārya niruktabhūmikāmāroḍhuṃ yo yogyaḥ sa eva brāhmaṇaḥ [atra striyo 
vaiśyāstathā śūdrāstepi yānti parāṃ gatim || kiṃ punarbrāhmaṇāḥ puṇyā 
bhaktā rājarṣayastathā-iti gītārtho'pyanveti-9 a- 31-32 ślo.] kṣatriyaḥ vaiśyaḥ 
śūdraḥ saṃkarajātīyaḥ strī yo vā ko vā saṃsāre na nirviṇṇaḥ na cāsaktaḥ 
jitendriyaḥ sa eva adhikārī na śrutipathagalitaḥ adhikārī iti siddham ||

kalpasūtrasya vaidikairvyākhyeyatvam 

ata eva śrīśaṃkarabhagavatpādānāṃ tantrānusāriprapañca [ayaṃ 
tantragranthaḥ śrīśaṅkarabhagavatpādebhyaḥ śrīparadevatayā svapne 
samupadiṣṭaḥ saṃprekṣyaśca tāntrikairavaśyam] 
sāranāmakanibandhanirmāṇamapi sādhu saṃgacchate | na ca vedapathagalitopari 
yathā kṛpayā śivena tantrāṇi nirmitāni tathā tadupari kṛpayaiva bhagavatpādaiḥ 
nirmitamiti vaktuṃ śakyate nedaṃ sādhakamiti vācyam | bhagavatpādānāṃ 
vaidika eva pakṣapāto na tadanyasmin | tathā'sati buddhādiśāstrānusāryapi 
nibandharacanaṃ syāt | kiṃ ca svakṛtamānasapūjāyām-

mantrāṃstāntrivaidikān paripaṭhan sānandamatyādarāt |
snānaṃ te parikalpayāmi janani snehāt tvamaṅgīkuru ||

iti śloke tāntrikavaidikayoḥ samuccayalekhanena tāntrikatvaṃ 
vaidikatvamaviruddhaṃ tadabhipretaṃ suspaṣṭam | tasmāt vaidikaiḥ idaṃ 
vyākhyeyaṃ kalpasūtram ||

tantrānuṣṭhānasya kalivarjyatvaśaṃkānirāsaḥ 

nanu brāhmaṇānāṃ bhavatu tantre adhikāraḥ tathā'pi na kaliyuge | taduktaṃ 
brāhme kalivarjyagaṇanāvasare-

mantrādīkṣā ca sarveṣāṃ kamaṇḍaluvidhāraṇam |
mahāprasthānagamanaṃ gosaṃjñaptiśca gosave ||

p. 15)

ityeteṣāṃ kaliyuge varjyatvaśravaṇāt pūrvavacanāni sarvāṇi 
kṛtādiparatvenopasaṃhāryāṇi | na ca niṣedhasya prāptimujīvyaiva pravṛtteḥ 
pūrvavacanaiḥ prāptau anena niṣedhe tulyabalatvena na tau paśau karoti iti 
dāśamikacaramapādanyāyatulyatvena vikalpa eva kiṃ na syāt iti vācyam | yadi 
niṣedho bhavet tarhi vikalpo bhavet | nāyaṃ niṣedhaḥ | kiṃtu yajatiṣu ye yajāmahe 
karoti nānuyājeṣu itivat | dīkṣāṃ kurvīta matimān iti vacanaṃ kalau 
mantradīkṣā na kartavyā iti vacanaṃ tayorekavākyatāyāṃ kriyamāṇāyāṃ 
kalibhinne kartavyamiti paryudāsasaṃbhavena vikalpānavakāśāt iti cet maivam | 
brāhme bhūripustakeṣu mantradīkṣā ca sarveṣām - iti nopalabhyate | 
ato'lpapustakeṣu upalabhyamāna īdṛśapāṭho'prāmāṇika eva | yadi ca 
prāmāṇika ityāgrahaḥ tathāpi - laiṅge 

kalāvārādhanaṃ [etāvatpramāṇajālena viprādīnāmapi-kalāvapi 
tāntrakarmopadiśyate-smaryate ca |] śaṃbhorāgamenaiva nānyathā || iti ||

śrīmadbhāgavate kaliyuge tantreṇaiva pūjā kartavyā iti vacanaṃ 
pūrvatraivodāhṛtam |

kalau yuge mahādevi brāhmaṇādyaiḥ supūjitā |

iti rahasyārṇavavacanam evaṃ rudrayāmalādibahutantreṣu kalau 
kartavyatvopalabdheḥ - bahuvacanānusāreṇa brāhmapurāṇasthavacanaṃ 
kalāvatisāvadhānena indriyādīn jitvā kartavyatāṃ pratipādayati | ata eva 
brāhmavacanāvasāne kalau na kartavyaṃ iti noktam | kiṃtu imāni 
lokaguptyarthaṃ kalerādau mahātmabhiḥ nivartitāni iti nivṛtteḥ phalaṃ 
lokopakāra uktaḥ | upakāraścettham | yaḥ kaścana jitendriyaḥ ime dharmāḥ 
avaśyaṃ kartavyāḥ iti śāstre bhāraṃ nikṣipya pravṛttaścet anyo'pi rāgāndho 
rāgaṃ puraskṛtya pravṛttaścet patedeveti tadanugrahāyaiva tyāgaḥ | [na] 
naikādaśyāṃ bhojanaṃ kāryaṃ itivanniṣedhaparaḥ | imamevārthaṃ śrīśivaḥ 
tantreṣu prakaṭitavān-paramānandatantre 

asidhārāvratasamo manonigrahahetukaḥ |
sthiracittasya sulabhaḥ saphalastūrṇasiddhidaḥ |
anyasya viphalo duḥkhahetuḥ syāt parameśvari || iti ||

tripurārṇave'pi 

ito madyamito māṃsaṃ bhakṣyamuccāvacaṃ tathā |
taruṇyaścāruveṣāḍhyā madāruṇavilocanāḥ |
tatra saṃyatacittatvaṃ sarvathā hyatiduṣkaram |
bhaktiśraddhāvihīnasya kathaṃ syādetadīśvari || iti ||

tasmāt kaliyuge'pi saṃyatendriyāṇāṃ dīkṣāyāṃ na kimapi bādhakam 
[etāvatā ca sthiracitta eva tantroktakarmādhikārīti dhvanyate |] ||

p. 16)

dīkṣāyāḥ prathamasopānatvam 

nanu dīkṣāṃ vyākhyāsyāmaḥ ityanucitaṃ yasya vyākhyānaṃ pratijñātaṃ 
tasyaivāgre kathanīyatvena dīkṣābhinnānāṃ gaṇeśaśrīvidyopāstyādīnāṃ 
bahūnāṃ kathanena saṃdarbhavirodhāt iti cet - ucyate | atra 
śrīlalitābhaktisādhanībhūtakriyāmātraṃ ajahatsvārthavṛttyā arthaḥ | atra 
dīkṣāpadoccāraṇaṃ ca dīkṣāyāḥ sarvāditvajñāpanārtham | etena adīkṣitena 
upāstirna kāryeti tadabhiprāyaḥ | ata eva paramānandatantre 

muktisaudhasya sopānaṃ prathamaṃ dīkṣaṇaṃ bhavet || iti ||

ata eva hiraṇyakeśisūtravyākhyāne - yajñaṃ vyākhyāsyāmaḥ ityatra 
etādṛśānupapattyaiva yajñaśabde ajahatsvārthā vṛttiraṅgīkṛtā vaijayantīkṛtā 
|| 1 ||

traipurasiddhāntasya paramaśivakartṛkatvam 

tatra dīkṣāyāṃ tadaṅgatvena traipurasiddhāntaṃ śrāvayedityasti | tatra ko nāma 
traipurasiddhāntaḥ ? tasya kutaḥ prāmāṇyaṃ ? ityākāṅkṣāyāṃ tatrādau 
tādṛśasiddhāntasya śivoditatvena prāmāṇyaṃ iti vaktuṃ bhūmikāṃ racayati-

bhagavān paramaśivabhaṭṭārakaḥ śrutyādyaṣṭādaśavidyāḥ 
[etatsūtrādhastanabhāṣye aṣṭādaśavidyāsarvadarśanapañcāmnāyānāṃ 
saṃkṣepato darśanamasti |] sarvāṇi darśanāni līlayā tattadavasthā'pannaḥ 
praṇīya saṃvinmayyā bhagavatyā bhairavyā svātmābhinnayā pṛṣṭaḥ 
pañcabhiḥ mukhaiḥ pañcāmnāyān [ime āmnāyāḥ kutaḥ sambhūtāḥ kiṃ 
prayojanāḥ-ityādyarthaṃ-dvipariśiṣṭavi 4 dṛśyaḥ |] paramārtha [sārarūpān-
ba.] sārabhūtān praṇanāya || 2 ||

atra pratipāditavidyāsu aprāmāṇyaśaṅkāsparśo'pi mā bhavatu ityetadarthaṃ 
bhagavāniti | 

aiśvaryasya samagrasya dharmasya yaśasaḥ śriyaḥ |
jñānavairāgyayoścaiva ṣaṇṇāṃ bhaga iti smṛtaḥ ||

ityetādṛśaṣaḍguṇaiśvaryasaṃpanno bhagavān | nanu paramaśivaḥ tattvātītaḥ 
tasya vidyākartṛtvaṃ na saṃbhavati upādhiśūnyatvāt ityata āha-bhaṭṭāraka iti | 
rājetyarthaḥ rājā bhaṭṭārako devaḥ iti kośāt | jagadīśvaratvarūpadharmavān 
māyopādhikaḥ iti tadarthaḥ | yadvā - bhaṭṭārako jagadrūpanāṭyarañjakaḥ 
bhaṭṭārakaśabdasya prasannarāghavanāṭake nāṭyarañjake re bhaṭṭāraka iti 
saṃbodhanāt rājā bhaṭṭārakaḥ ityasya nāṭyavargasthatvācca | tasya yathā 
jagatkartṛtvaṃ tathā vidyākartṛtvamapi saṃbhavatyeva | yadvā - īśvarasya 
paramaśivasya pūrṇatvena kartavyavastuno'bhāvāt kathaṃ 

p. 17)

vidyākartṛvaṃ ? ata āha-bhaṭṭāraka iti | rājetyarthaḥ | yathā rājñaḥ svasya 
anapekṣite'pi pareṣāṃ hitāya kṛtirdṛśyate tadvat | śrutyādyaṣṭādaśavidyāḥ-
śrutiḥ ādiḥ yāsāmiti tadguṇasaṃvijñānabahuvrīhiḥ | tathā ca śrutayaḥ 
catvāri tadaṅgāni śikṣā vyākaraṇaṃ kalpaḥ chandaḥ jyotiṣaṃ niruktaṃ ceti 
ṣaṭ mīmāṃsā nyāyaḥ purāṇaṃ dharmaśāstraṃ iti caturdaśavidyāḥ | 
āyurvedaḥ dhanurvedaḥ gāndharvaṃ nītiśāstraṃ ceti catasraḥ | 
evamaṣṭādaśavidyāḥ | sarvāṇi darśanāti śāktadarśanādīni | dṛśyate aneneti 
darśanaṃ jñānasādhanaṃ śāstramityarthaḥ śaktidarśanaśāstramiti yāvat | 
evamevāgre'pi | śaivadarśanaṃ vaiṣṇavadarśanaṃ brāhmadarśanaṃ 
sauradarśanaṃ bauddhadarśanaṃ ceti ṣaḍ (?) darśanāni | līlayā anāyāsena 
tattadavasthā'pannaḥ īśvarāvasthā'panno vedān pāṇinivyāsādisvarūpān 
gṛhītvā vyākaraṇapurāṇādīni praṇīya nirmāya ||

vedasya [atra bhagavato vedasyāpauruṣeyapauruṣeyatvayoḥ - dvipariśiṣṭavi.-5 
dṛśyaḥ |] pauruṣeyatvasamarthanam 

nanu vedasya nityatvena apauruṣeyatvāt īśvaranirmitatvaṃ katham ? na ca tasya 
nityatvameva asiddhamiti śaṅkyam vācā virūpanityayā iti śruteriti cet - na | 
vedāstu īśvareṇa nirmitāḥ chandāṁsi jajñire tasmāt iti śruteḥ

aṣṭādaśānāmetāsāṃ vidyānāṃ bhinnavartmanām |
ādikartā [kaviḥ sā-a] śivaḥ sākṣācchūlapāṇirmaheśvaraḥ ||

iti smṛteḥ | vedaḥ pauruṣeyaḥ vākyasamūhatvāt bhāratādivat ityanumānasyāpi 
pramāṇatvāt | ata eva īśānaḥ sarvavidyānāmīśvaraḥ sarvabhūtānām iti 
śrutau īśānatvaṃ kartṛtvarūpameva | na ca tasya pauruṣeyatve puruṣadoṣāṇāṃ 
bhramapramādavipralipsākaraṇāpāṭavānāṃ saṃbhavāt 
aprāmāṇyaśaṅkā'spadatvaṃ syāditi vācyam īśvare 
doṣasādhanānāmavidyā'dīnāmabhāvena doṣāsaṃbhavāt | etena 
tantrāṇāmapi nityatvaṃ pratyuktam | vācā virūpanityayā ityatra nityatvaṃ 
doṣavatpuruṣāpraṇītatvarūpaṃ gauṇaṃ kalpyaṃ 
uktapramāṇakalāpānurodhena | na ca vaiparītye kiṃ vinigamakamiti vācyam 
bhūyo'nugrahasya nyāyyatvāt | tasmāt sarvā api vidyāḥ puruṣapraṇītā eva ||

tantrapraṇayane prayojanaviśeṣaḥ 

nanu aṣṭādaśasu vidyāsu satīṣu punarāmnāyapraṇayanaṃ vyarthamata āha-
saṃvinmayyeti | ayamabhiprāyaḥ - puruṣārthaḥ sukhaṃ tacca naisargikaṃ 
kṛtrimaṃ ceti | naisargikaṃ mokṣarūpam | kṛtrimaṃ yastṛtīyapuruṣārthaḥ 
kāmaḥ ityucyate | ubhayoḥ sādhanaṃ dharmaḥ | tasyāpi sādhanamarthaḥ | evaṃ 
sākṣāt paraṃparayā vā puruṣairabhilaṣaṇīyā arthāścatvāraḥ | tatra 
kṛtrimapuruṣārthasādhanānyeva aṣṭādaśavidyābhiḥ prākaṭyena pratipāditāni 
| akṛtrimapuruṣārtho yaḥ tatsādhanaṃ akṛtrimaṃ 

p. 18)

spaṣṭaṃ na pratipāditam | kṛtrimopadeśaścākiṃcitkaro lokānāmiti jagadeva 
duḥkhapaṅkanimagnamuddidhīrṣurāmnāyavidyāṃ praṇināya | yadvā-
nikhilavedārthānabhijñānāṃ tatrānadhikāriṇāṃ ca muktyupāyaṃ 
nikhilavedasārāmāmnāyavidyāṃ [etadarthaṃ dvipariśiṣṭavi.-4 dṛśyaḥ |] 
praṇināya | tatrāpi saṃvit aparicchinnaṃ caitanyaṃ prakāśa iti yāvat tanmayyā 
tadabhinnayā | etena vimarśāṃśena svātmānaṃ pṛcchatītyarthaḥ siddhaḥ | 
taduktaṃ ratnatrayaparīkṣāyāmappayadīkṣitaiḥ-

nityaṃ nirdoṣagandhaṃ niratiśayasukhaṃ brahmacaitanyamekaṃ 
dharmo dharmīti bhedadvayamiti ca pṛthagbhūya māyāvaśena | 
dharmastatrānubhūtissakalaviṣayiṇī sarvakāryānukūlā śaktiścecchā'dirūpā 
bhavati guṇagaṇaścāśrayastveka eva || iti ||

nanu jīvānāṃ asmadādīnāmapi saṃvinmayatvaṃ astyevevi śrībhairavyā 
jīvebhyaḥ ko viśeṣaḥ ityataḥ āha bhagavatyeti viśeṣaṇam | 
bhagavacchabdārthaśca vyākhyātaḥ pūrvam | tathā ca 
jīvādivadāṇavādimalairāvṛtajñānā satī na pṛcchati kiṃtu sarvajñā'pi 
kenacidabhiprāyeṇa gūḍhena pṛcchatīti bhagavacchabdo jñāpayati | tathā hi-
śivaḥ prakāśarūpaḥ svayameva vimarśo bhūtvā praśnamavatārayati | tatra 
prayojanamidaṃ - vidvān samartho'pi pustakavācanādinā saṃpannajñāno na 
kṛtārtho bhavitumarhati kiṃ tu gurūpadiṣṭamārgeṇaiveti jñāpayituṃ 
svasvarūpāntaraṃ gṛhītvā praśnaḥ | taduktaṃ svacchandatantre-

guruśiṣyapade sthitvā svayameva sadāśivaḥ |
praśnottaraparairvākyaistantraṃ samavatārayat || iti ||

tadvijñānārthaṃ sa gurumevābhigacchet ityevakāro'pi śrutau 
amumevārthamāha | imamevārthaṃ dyotayituṃ bhagavatyā svātmābhinnayeti 
viśeṣaṇadvayam | bhairavyā - bhairavīśabdārthaśca jagato bharaṇādramaṇāt 
pralaye paramaśivakukṣisthitasya sṛṣṭisamaye vamanācca [atra 
śrīlalitāsahasranāma - 126 - ślokagatamahāpralayasākṣiṇī-
ityanyatantrādisthādīni ca bahupramāṇāni santi |] bhairavīti jñeyam | tayā 
pṛṣṭaḥpraśnamavatāritaḥ | idaṃ pūrvavartiparamaśivabhaṭṭāraka ityasyaiva 
viśeṣaṇam | pañcabhiḥ mukhaiḥ sadyojātavāmadeva-aghora-tatpuruṣa-
īśānasaṃjñakaiḥ pañcāmnāyān pūrvāmnāya-dakṣiṇāmnāya-
paścimāmnāyottarāmnāyordhvāmnāyanāmakān 
[etatpañcāmnāyanāmārthopayogīyajñānāya-dvipariśiṣṭavi.-4-dṛśyaḥ |] | 
āmnāyaśabdo vede yadyapi mukhyaḥ śrutiḥ strī veda āmnāyaḥ iti kośāt | 
tathā'pi āmnāyasārapratipādakatvāt [arthāttantrāṇāṃ 
vaidikaviṣayamarmodghāṭanādāmnāya pratipādakatvaṃ mokṣapradatvaṃ ca 
sidhyatyeva |] atrāpi āmnāyaśabdaḥ upacaryate | etena 

p. 19)

keṣāṃcit tantrāṇi vedavat svatantrapramāṇānīti matamapāstam | paramārthaḥ 
akṛtrimasturīyapuruṣārthaḥ tasmin sārabhūtān [sārarūpān-ba.] abhyarhitān | 
etena puruṣasya viśeṣeṇa abhilaṣaṇīyatvaṃ atigopyatvaṃ ca sūcitam | 
nikhilavedārthaṃ grahītuṃ aśaktān prati kṛpayā śivaḥ tatsārabhūtamarthaṃ 
gṛhītvā pañcāmnāyān praṇināya nirmame || 2 ||

traipurasiddhāntapratipādanam 

tatrāpyakṣamān mandatarān prati paramakṛpāluḥ śrīparaśurāmaḥ 
tatratyānarthān saṃgṛhya vaktuṃ prakramate-

tatrāyaṃ siddhāntaḥ || 3 ||

tatra pañcāmnāyeṣu ayaṃ vakṣyamāṇaḥ siddhāntaḥ 
vicāryavādajanitanirṇayaviṣayo'rthaḥ ||

etadantena granthena vakṣyamāṇasiddhāntārthasya [nāma-uparitana 2-
sūtrabhāṣyāntagranthena-evamarthaḥ |] 
svakapolakalpitatvaprayuktāprāmāṇyaśaṅkā nirastā ||

ayaṃ bhāvaḥ-yasmin kāle idaṃ viśvaṃ paraśivakukṣisthaṃ sūkṣmarūpeṇa 
tiṣṭhati sa eva pralayaḥ | īdṛśapralayaśca śāstraikavedyaḥ | evameva sṛṣṭirapi | 
tatra pralayo nāma parabrahmaṇaḥ kevalanijasvarūpeṇa avasthānaṃ jīvasya 
suṣuptāviva | tadānīṃ jīvarāśiḥ tadadṛṣṭaṃ pañcabhūtāni sarvāṇi vaṭabīje 
vaṭavṛkṣa iva sūkṣmarūpeṇa tiṣṭhanti | taduktaṃ śaktisūtrabhāṣye-paramaśivo 
jagat kabalayannapi na sārvātmyena api tvaṃśena saṃskārātmanā tat sthāpayati 
iti | sa eva saṃskāraḥ īśvarasisṛkṣāyāṃ sahakāribhūtaḥ anyathā 
vaiṣamyanairghṛṇyāpatteranivāraṇāt | evaṃ sthite loke dampatyoḥ sāmarasye 
vidhibilasthitaśuklabindoraṃśaḥ yoniṃ praviśya raktabindunā saha ekībhāvaṃ 
prāpnoti yadā tadā bāhyābhyantara [bhāva-ba.] bhānavihīnaṃ kevalaṃ 
brahmaiva bhāsate | tasya garbhotpādakatvaṃ dṛṣṭam | tathā sṛṣṭiprākkāle 
śivaśaktyoryogo'pi prāṇyadṛṣṭavaśāt bhavati || 3 ||

ṣaṭtriṃśattatvāni [teṣāṃ pratyekeṣāṃ sphoṭārthaścādhastāt 
etattatsūtrabhāṣyāntāvadhi dṛśyaḥ |] 

tadeva prapañcayituṃ tattvajālaṃ vyaṣṭumupakramate-

ṣaṭtriṃśattattvāni viśvam || 4 ||

taditthaṃ-kevalanijarūpeṇa avasthitasya yadā bahu syāṃ prajāyeya iti 
icchājñānakriyā'tmikāḥ śaktayaḥ tābhiryoge krameṇa arthaśabdasṛṣṭī 
aṅkuracchāyāvat yugapadbhavataḥ |

p. 20)

nanu icchājñānakriyāśaktīnāṃ sāditvena anityatvāpattiriti cet-iṣṭāpattiḥ | 
tattritayakāraṇībhūtā sūkṣmarūpā śāntānāmnī tasyā eva 
paraśivarūpāyā nityatvāt | tathā ca tādṛśasisṛkṣārūpopādhiviśiṣṭaḥ 
paramaśiva eva kevalaśivapadavācyo bhavati | sa eva tattvānāṃ madhye ādimaḥ |

sā pūrvoditā sisṛkṣā prapañcavāsanārūpā śaktiriti dvitīyaṃ tattvam | 
taduktaṃ ratnatrayaparīkṣāyām-

kartṛtvaṃ tatra dharmī kalayati jagatāṃ pañcasṛṣṭyādikṛtye 
dharmaḥ puṃrūpamādyāt [atra-prathamalikhitaṃ-vi-ityakṣaramivābhāti |] 
sakalajagadupādānabhāvaṃ bibharti |
strīrūpaṃ prāpya divyā bhavati ca mahiṣī svāśrayasyādikartuḥ 
proktau dharmaprabhedāvapi nigamavidāṃ dharmivadbrahmakoṭī || iti ||

pūrvoktatādṛśajagataḥ ahantayā yaddarśanaṃ tadahamiti 
tādṛśaspaṣṭavṛttimān sadāśivapadavācyaḥ tṛtīyaṃ tattvan |

idaṃ jagaditi kevalaṃ bhedaviṣayiṇī yā vṛttiḥ tadvān īśvarapadavācyaḥ 
turīyaṃ tattvam |

jagadahamevetyākārikā yā sadāśivasaṃbandhinī vṛttiḥ sā vidyāpadavācyā 
pañcamaṃ tattvam |

idaṃ jagadityākārikā īśvaraniṣṭhā bhedaviṣayiṇī vṛttiḥ māyāpadavācyā 
ṣaṣṭhaṃ tattvam |

pūrvoktavidyātirodhānaśaktimatī tadvirodhidhī avidyāpadavācyā saptamaṃ 
tattvam |

jīvaniṣṭhaṃ sarvakartṛtvaṃ yatkiṃcitkartṛtvena saṃkucitaṃ tadeva 
kalāpadavācyaṃ aṣṭamaṃ tattvam |

pūrvoktarītyā jīvaniṣṭhā yā nityatṛptiḥ saiva keṣucidviṣayeṣu atṛptyā 
saṃkucitā rāgapadavācyā navamaṃ tattvam |

jivaniṣṭhā yā nityatā tasyā ācchādane sati saiva nityatā asti jāyate vardhate 
vipariṇamate apakṣīyate vinaśyatīti ṣaḍabhāvayogāt saṃkucitā 
kālapadavācyā daśamaṃ tattvam |

paraśivajīvayoḥ abhedāt yathā paraśive sarvasvātantryaṃ tathā jīve'pyasti tasya 
sarvasvātantryasya vi[atra-ādyā-ityādyanekapadāni pāṭhāntare 
pṛthaksantyanyatra |](pi)dhānaṃ pūrvoktavidyayā kṛtaṃ tadeva 
kāraṇāntarāpekṣaṃ yatkāraṇamapekṣate tanniyatipadavācyaṃ ekādaśaṃ 
tattvam |

etādṛśaniyatikālarāgakalā'vidyā'śrayo jīvaḥ dvādaśaṃ tattvam |
satvarajastamoguṇānāṃ sāmyarūpā prakṛtiḥ cittāparaparyāyā trayodaśaṃ 
tattvam |

yadā satvatamasī abhibhūya rajaḥpradhānaṃ tanmanaḥpadavācyaṃ 
saṃkalpahetuścaturdaśaṃ tattvam |

p. 21)

rajastamasī abhibhūya satvapradhānamantaḥkaraṇaṃ tadbuddhipadavācyaṃ 
niścayahetuḥ pañcadaśaṃ tattvam | 

yadā rajassatve abhibhūya tamaḥpradhānamantaḥkaraṇaṃ 
tadahaṃkārapadavācyaṃ vikalpakāraṇaṃ ṣoḍaśaṃ tattvam |

śabdagrāhakamindriyaṃ śrotraṃ saptadaśaṃ tattvam |
sparśagrāhakamindriyaṃ tvagaṣṭādaśaṃ tattvam |
rūpagrāhakamindriyaṃ cakṣurekonaviṃśaṃ tattvam |
rasagrāhakamindriyaṃ rasanaṃ viṃśaṃ tattvam |
gandhagrāhakamindriyaṃ ghrāṇaṃ ekaviṃśaṃ tattvam |
vyaktavāguccāraṇānukūlavāgindriyaṃ dvāviṃśaṃ tattvam |
grahaṇatyāgānukūla mindriyaṃ pāṇiḥ trayoviṃśaṃ tattvam |
gamanānukūla mindriyaṃ pādaḥ caturviṃśaṃ tattvam |
malavisargajanaka mindriyaṃ pāyuḥ pañcaviṃśaṃ tattvam |
maithunajanakamindriyaṃ upasthaḥ ṣaḍviṃśaṃ tattvam |
sūkṣmākāśarūpaḥ śabdaḥ saptaviṃśaṃ tattvam |
sūkṣmavāyurūpaḥ sparśaḥ aṣṭāviṃśaṃ tattvam |
sūkṣmatejorūpaṃ rūpaṃ ekonatriṃśaṃ tattvam |
sūkṣmajalarūpo rasaḥ triṃśaṃ tattvam |
sūkṣmapṛthvīrūpo gandhaḥ ekatriṃśaṃ tattvam |
avakāśātmakākāśaḥ sthūlaḥ dvātriṃśaṃ tattvam |
sadāgatimattvātmakaguṇavān vāyuḥ trayastriṃśaṃ tattvam |
uṣṇatvavat tejaḥ catustriṃśaṃ tattvam |
dravatvavajjalaṃ pañcatriṃśaṃ tattvam |
kāṭhinyaguṇavatī pṛthvī ṣaṭtriṃśaṃ caramaṃ tattvam [atragranthe mūle 
bhāṣye ca-36-ṣaṭtriṃśattattvāni sārthāni nirdiṣṭāni |] |

etādṛśatattvasaṃghāto viśvaṃ jagaditi vyavahāraviṣayābhinnam | uktārthe 
pramāṇaṃ paramānandatantre-

yatkaṭhinyaṃ taddharā syāddravo vai jalamucyate |
uṣṇaṃ tejassaṃcalanaṃ vāyurvyomāvakāśakam ||
eteṣāṃ sūkṣmarūpaṃ tu anudbhinnavibhāgakam [vibhāvakam-ba.] |
gandhasparśau rūparasau śabdastanmātrakāṇi vai |

p. 22)

pañcajñānendriyāṇyeṣāṃ ghrāṇaṃ jihvā ca locanam |
tvak śrotraṃ ceti pañcānāṃ grahaṇavyāpṛtāni vai ||

vacanādānagamanavisargānandapañcakam |
karmasvadhiṣṭhānarūpamatastannapṛthakkṛtam ||

vākpāṇipādapāyūpasthākhyaṃ tatkaraṇaṃ bhavet |
sarvadehagataṃ cāpi sphuṭavyakterudāhṛtam ||

manassaṃkalpakaraṇaṃ buddhirniścayakāriṇī |
vikalpapratibimbānāṃ bhūmirdarpaṇavacchive ||

etāvadabhimānātmā cāhaṃkāra udāhṛtaḥ |
duḥkhanirvṛtimohākhyarajassatvatamomayam ||

antaḥkaraṇamityuktaṃ tattadādhikyasaṃbhavam |
kāraṇānāṃ guṇānāṃ tu sāmyaṃ prakṛtirucyate ||

tadbhinnaḥ puruṣaḥ proktaḥ pūrṇaḥ saṃkṣiptaśaktikaḥ |
cidānandastathecchā ca jñānaṃ tadvat kriyā'pi ca || 

paripūrṇāśśaktayastu saṃkocāttu kalādikāḥ |
sarvakartṛtvarūpā vai kriyāśaktiḥ kalā'bhavat ||

kiṃcitkartṛtvarūpeṇa jñānaṃ sarvajñatā tathā |
buddhistatpratibimbānāṃ [buddhita-ba.] vastūnāmeva bodhakaḥ [bodhataḥ-ba.] ||

saṃkocanāttu vidyā'khyā saivāvidyeti gīyate |
icchā tu nityatṛptyākhyā saiva saṃkocaśālinī ||

rāgaḥ kvacidatṛptyākhyā kvacidrañjanarūpiṇī |
cicchaktirnityasattā'khyā kālaḥ ṣaḍbhāvayogataḥ || 

ānandaśaktissvātantryaṃ sārvatrikamudīritam |
anyāpekṣaṇahetostu saṃkocānniyatiḥ smṛtā ||

akhaṇḍarasametāvadetadbhedananaipuṇā |
svatantrarūpā tvaṃ devi māya bhairavavallabhā ||

bhedanena svarūpasya gopanāt tattvarūpiṇī |
svarūpabhedanaṃ hitvā caikyāvagamanodyatā ||

p. 23)

paramārthaprathārūpā śuddhavidyeti śabditā |
spaṣṭabhedaprathān bhāvān svābhedenāvabhāsayan ||

īśvaraḥ kathito devi tāna spaṣṭānahaṃ [tān aspaṣṭān-iti padacchedo'tra 
kāryaḥ |] tvidam |
iti prabodhanātmā tu sadāśiva itīritaḥ ||

svasvarūpābhedamayānahamityeva paśyatī ||
prapañcavāsanārūpā śaktirityabhidhīyate ||
niṣprapañcaścidekātmā śivatattvaṃ samīritam || iti ||

eteṣāṃ śivādikṣityantānāṃ svarūpanirūpaṇaṃ mṛgendrasaṃhitāyāṃ 
vistareṇāsti vistarabhayādatra na likhitaṃ yāvadupayuktaṃ tāvadeva likhitam ||

tattvasaṃkhyānirṇayaḥ 

nanu sāṅkhyaiḥ caturviṃśatitattvānīti siddhāntitaṃ kathaṃ ṣaṭtriṃśattattvāni 
? iti cet - ucyate caturviṃśatyatiriktāni puruṣādiśivāntāni dvādaśa tattvāni na 
santi pramāṇābhāvāditi tavoktiḥ uta caturviṃśatitattveṣu antarbhūtānīti | 
nādyaḥ śrībhagavataḥ paraśurāmasya uktereva pramāṇatvāt 
ṣaṭtriṃśattattvaprāsādabhūnāthāya namo namaḥ iti skānde śrutatvāt 
ṣaṭtriṃśadvidhametadvai tattvacakraṃ samīritam iti paramānandatantre 
śrutatvācca | na dvitīyaḥ puruṣādiśivāntānāṃ 
pūrvoktalakṣaṇarūpaviruddhadharmavatāmantarbhāvāsaṃbhavāt | na ca 
caturviṃśatitattvāni puruṣastu tataḥ paraḥ iti mahābhāratavacanavirodhaḥ iti 
vācyam agrimadvādaśatattvānāmatikaṭhinavedyatvena mandamatīnāṃ 
prakṛtyantasugamavedyatattvānāmeva kathanīyatayā tatraiva viśrāmāt evaṃ ca 
adhikāribhedena vacanadvayasyāpi prāmāṇyāt | etena - sarvatra pañca bhūtāni 
ṣaṣṭhaṃ kiṃcinna vidyate iti vāsiṣṭhavacanamāśritya pañcaiva tattvānīti vadan 
parāstaḥ tasya atyantamandamatiparatvāt ||

nanu viruddhadharmavattvaṃ yadi tattvavibhāge prayojakaṃ tarhi 
ghaṭatvapaṭatvarūpaviruddhadharmavatoḥ ghaṭapaṭayorapi tattvāntaratvāpattiḥ iti 
cet - na | kiṃ ṣaṭtriṃśattattvātiriktatvamāpādyate ? athavā 
ghaṭarūpatattvāpekṣayā paṭatattvamatiriktaṃ syādityāpādyate ? nādyaḥ yaḥ 
kṣiterasādhāraṇo dharmaḥ kāṭhinyaṃ tena sākaṃ ghaṭatvapaṭatvayoḥ 
virodhābhāvena tadatiriktatvāsiddheḥ | dvitīye tu iṣṭāpattireva | eṣa evārthaḥ 
uktaḥ sūtasaṃhitāyāṃ tattvalakṣaṇakathanapūrvam-

āpralayaṃ yattiṣṭhati sarveṣāṃ bhogadāyi bhūtānām |
tattattvamiti proktaṃ na śarīraghaṭādi tattvamataḥ || iti ||

etena iyamāśaṅkā sutarāṃ parāhatā ||

p. 24)

yadyapi tantrāntare prathamaṃ trīpyeva tattvāni - ātmatattvaṃ vidyātattvaṃ 
śivatattvaṃ ceti | tatra ātmatattvaṃ caturviṃśatidhā kṣityādiprakṛtyantam | 
tadsādhāraṇo dharmaḥ kevalajaḍatvam | puruṣamārabhya māyā'ntaṃ 
vidyātattvaṃ saptadhā | tallakṣaṇaṃ ca jaḍatvaprakāśakatvobhayavattvam | 
tathāhi - yathā ayaḥpiṇḍe vahnitādātmyāpanne jaḍe'pi prakāśakatvaṃ 
ayaḥpiṇḍe jaḍatvaṃ ca vahnitādātmyānāpannatvadaśāyāṃ spaṣṭam | evaṃ 
vahnau ayaḥpiṇḍatādātmyāpannatvadaśāyāṃ jaḍatvaṃ prakāśakatvaṃ ca 
spaṣṭam | tathā puruṣe prakāśarūpe tattādātmyāpanneṣu jaḍeṣu niyatyādiṣu 
prakāśakatvaṃ puruṣe ca jaḍatvam | niyatyādiṣu jaḍatvaṃ puruṣe 
prakāśakatvaṃ ca spaṣṭam | evaṃrītyā vidyātattvasya miśratvam | 
śuddhavidyā'diśivāntaṃ śivatattvaṃ pañcadhā | tadasādhāraṇo dharmaḥ 
kevalaprakāśakatvamityavāntaravibhāgaḥ kṛtaḥ | tathā'pi 
tatrāpyupasaṃhāravelāyāṃ 

ṣaṭtriṃśadvidhamevaṃ vai tattvacakraṃ maheśvari ||

iti yo dharmaḥ uktaḥ sa eva atrāpyuktaḥ iti na tena sākaṃ virodhaḥ ||

vastutastu bhāgavate ekādaśaskandhe dvāviṃśe'dhyāye 

kati tattvāni viśveśa saṃkhyātānyṛṣibhiḥ prabho |
kecit ṣaḍviṃśatiṃ prāhurapare pañcaviṃśatim ||
saptaike nava ṣaṭ caike...........

ityārabhya uddhavapraśne svamate aṣṭāviṃśatitattvāni pratipādya śrībhagavān 
saptādiviruddhasaṃkhyāvādināṃ matānāmupapattiṃ kṛtvā 

iti nānāprasaṃkhyānaṃ tattvānāmṛṣibhiḥ kṛtam |
sarvaṃ nyāyyaṃ yuktimattvādviduṣāṃ kimaśobhanam [etāvatā naiko 
muniryasya vacaḥ pramāṇamiti munivacasāmapramāṇatāvādino durarthakartāro 
dūraṃ yāpitā iti mārmikam tādṛśāśca guhāśabdatathyārthe'pi 
bhramantyeva sāṃpratikāḥ kecit |] ||

ityuvāca | idamevātra samādhānaṃ draṣṭavyam || 4 ||

jīveśvarasvarūpam 

evaṃ tattvānāṃ vibhāgamuktvā jīveśvarasvarūpaṃ vaktumārabhate-

śarīrakañcukitaḥ [kaṃcukito jī-a.] śivo jīvo niṣkañcukaḥ [nirṣkacukaḥ śivaḥ-
a.] paraśivaḥ ||

evaṃ ṣaṭtriṃśattattvānāmapi sāmānyarūpeṇa punardvisvabhāvatvaṃ - 
keṣucit kevaladṛśyatvaṃ keṣucit kevaladraṣṭṛtvameva | ādyaṃ jaḍeṣu dvitīyaṃ 
kevalamiti ||

p. 25)

nanu jīvasya tattvāntaḥpatitvāt paraśivasyātathātvāt dvayorbheda āyātaḥ | 
evaṃ sati kathamadvaitasiddhāntaḥ tāntrikāṇām ? ata āha - śarīreti | ayaṃ 
bhāvaḥ - sarvasvatantaḥ paraśivaḥ svasya māyayā durghaṭayā svaniṣṭhaṃ 
yadanyānapekṣatvarūpaṃ pūrṇaṃ svātantryaṃ tadācchādayati | tatastirohitaṃ 
yatsvātantryaṃ parimitaṃ svātantryaṃ tadāṇavamalamucyate | āṇavamalameva 
avidyetyapyucyate ||

nanu pūrṇasvātantryaṃ svīyaṃ svayameva kathāmācchādayati iti cet - ucyate | 
yathā sūryaḥ svamayūkhaireva sṛṣṭaiḥ meghaiḥ svayamāvṛto bhavati evameva 
svāvidyayā svasyāvaraṇe vādhakābhāvāt | tathā ca aupādhiko bhedo na 
vāstavaḥ | tathā ca nādvaitahāniḥ iti bhāvaḥ ||

nanu aparicchinnacitsvarūpaparaśivaḥ kathaṃ paricchinnena āṇavamalena tirohita 
iti cet - ittham | māyāyāḥ sāmarthyamanirvacanīyam | ato na tatra 
aghaṭitaghaṭanāyāmapi kathaṃbhāvaśaṅkā asti | ata evoktam-

durghaṭaikavidhāyinyāṃ māyāyāṃ kimasaṃbhavi || iti ||

subhagodaye'pi-

māyāvibhinnabuddhirnijāṃśabhūteṣu nikhilabhūteṣu |
nityaṃ tasyā niraṅkuśavibhavaṃ veleva vāridhiṃ rundhe || iti ||

evamāṇavena malena channaḥ tadā svayamaṇurdehaparimitaḥ san anyān 
dehaparimitān anantān jīvān svabhinnatvena paśyati | tanmāyikaṃ malam | evaṃ 
bhedaprathārūpamāyikamalena malinā śubhāśubhakarma anutiṣṭhantaḥ 
tajjanitasaṃskāravanto bhavanti | tadetat kārmaṃ malam | etādṛśatrividhamalaṃ 
śarīrapadenocyate | tadrūpaṃ yat kañcukam ācchādanaṃ tena āvṛtaḥ śiva eva 
jīvaḥ | taduktaṃ paramārthasāre-

paramaṃ yatsvātantryaṃ durghaṭasaṃpādanaṃ maheśasya |
devī māyāśaktiḥ svātmāvaraṇaṃ śivasyaitat || iti ||

subhagodaye'pi-

sa tayā parimitamūrtissaṃkocitasamastaśaktireṣa pumān |
raviriva sandhyāraktassaṃhṛtaraśmissvabhāsane'pyapaṭuḥ iti ||

p. 26)

yadvā - śarīraṃ trividhaṃ sthūlaṃ sūkṣmaṃ paraṃ ceti | ādyaṃ 
dhyānaślokapratipāditam | dvitīyaṃ mantrarūpam | tṛtīyaṃ vāsanā'tmakam | 
etaiḥ śarīraiḥ kañcukitaḥ śivaḥ ādyatattvaṃ so'pi jīva evetyarthaḥ | tasminneva 
jīvatvamasti kā kathā anyeṣviti bhāvaḥ | etena śivasvarūpalābho'pi na 
paramapuruṣārtha iti dhvanitam ||

etādṛśajīvāḥ trividhāḥ - śuddhāḥ aśuddhāḥ miśrāśca iti | ādyāḥ 
śivādisadāśivāntāḥ teṣām ajñānābhāvāt | aśuddhāḥ manuṣyādayaḥ | 
miśrāḥ vasiṣṭhādayaḥ | etādṛśakañcukarahito yaḥ sa tattvātītaḥ paraśivaḥ 
ityarthaḥ || 5 ||

puruṣārthasvarūpam

evaṃ jīveśvarayoḥ svarūpamuktvā kaḥ puruṣārthaḥ iti taṃ nirdiśati-

svavimarśaḥ puruṣārthaḥ || 6 ||

svasya paraśivasvarūpasya vimarśaḥ pratyabhijñānaṃ so'hamityākārakaṃ-
yathā kaṇṭhasthaṃ cāmīkaraṃ vismṛtya tadanveṣaṇāya deśāddeśaṃ dhāvan  
kenacit udbuddhasaṃskāraḥ kaṇṭhasthaṃ paśyati tathā 
vismṛtasvarūpajñānasya punarlābhaḥ-puruṣārthaḥ akṛtrimaḥ ityarthaḥ | 
etādṛśapuruṣārthalābhaśca na bhagavatkṛpāmṛte bhaviṣyati | taduktaṃ 
bhagavatā śrīkṛṣṇena-

māmeva ye prapadyante māyāmetāṃ taranti te || iti || a. 7-14

bhagavatprītiśca bhagavadārādhanenaiva bhavati | ato bhagavadārādhanaṃ 
paraṃparayā mokṣasādhanam || 6 ||

mantraguṇavarṇanam 

nanu yogādinā'pi [ādiśabdena 
vedāntanyāyasāṃkhyamīmāṃsāvaiśeṣikādīni jñeyāni |] 
īdṛśapuruṣārthalābho bhavatīti śāstraṃ bahūpalabhyate [arthāt-
mokṣarūpapuruṣārthapratipādakatattacchāstroktakarmāṇi sapramāṇāni 
bhūyāṃsi bhavantītyarthaḥ |] | kimupāsanāyā āvaśyakatvaṃ varṇyate iti cet-
astyupāsanāyā āvaśyakatā | yogādibhiḥ labhyamokṣastu na punarāvṛttirahitaḥ | 
taduktaṃ svacchandasaṃgrahe-

muktaṃ ca pratibandhāttaṃ punarbadhnāti ceśvaraḥ |
baddhaḥ saṃsarate bhūyo yāvaddevaṃ na vindati || iti ||

evaṃ sthalāntarepi-

sāṃkhyayogādisaṃsiddhān śrīkaṇṭhastadaharmukhe |
sṛjatyeva punastena na sadṛṅmuktirīdṛśī || iti ||

p. 27)

ataḥ upāsanāyā eva mukhyopāyatve siddhe upāsanāyāṃ japasyāpi sattvāt tatra 
mukhyasādhanaṃ mantra [itaḥsaptamāṣṭanavamasūtrairbhagavān rāma 
upāsanāhṛdayībhūtatattaddevatāmantrāvaśyakatvagauravamavatārayatītya-
vadheyam |] iti tatra upāsakasya śraddhotpattaye tadvṛttiguṇān varṇayati-

varṇātmakā nityāḥ śabdāḥ || 7 ||

varṇātmakāḥ varṇasamudāyarūpāḥ śabdāḥ mantrāḥ nityāḥ-
mūlāvidyāsamasattākāḥ ityarthaḥ | na tu kālatrayābādhyatvaṃ 
ajñānanivṛttau svasvarūpātiriktadevatāyāḥ tadvācakamantrāṇāṃ ca asattvāt 
| na ca ānupūrvīviśeṣaviśiṣṭavedādīnāṃ nityatvasya ekakalparathāyitvaraya 
varṇitatvena asyāpi tādṛśatvena kathaṃ tato'pi cirasthāyitvarūpaṃ nityatvam iti 
vācyam mantrāṇāṃ devatāsūkṣmaśarīrarūpatvena devatāśarīrasya 
avidyāsamakālatvāt || 7 ||

athavā-

saptakoṭimahāmantrāḥ śivavaktrādvinirgatāḥ |

iti skāndāt mantrāṇāmapi sāditvena nāvidyāsamakālikatvaṃ tasyā anāditvāt 
| ata eva itarasādhāraṇaguṇatvena nāneti stutiḥ saṃbhavatīti aparitoṣeṇa 
mantrāṇāmasādhāraṇaṃ guṇāntaramāha-

mantrāṇāmacintyaśaktitā || 8 ||

mantrāṇāmiti ṣaṣṭhī saptamyarthe mantreṣvityarthaḥ | na cintyā acintyā 
śaktiryatra te-acintyaśaktayaḥ mantrāḥ teṣāṃ bhāvaḥ tattā astīti śeṣaḥ | 
śaktau acintyatvaṃ ca tarkāviṣayatvam | etena pūrvoditamāyā atarkyā durvārā 
tathā'pi tannivāraṇa samarthā tato'pi adhikaśaktikā mantreṣu līlayā 
jñānāvarakāvidyānivartakatvaśaktirastīti pratipāditam || 8 ||

mantrasiddhau sahakārikāraṇāni 

mantreṇa īpsitakārye jananīye sahakārikāraṇānyāha-

saṃpradāyaviśvāsābhyāṃ sarvasiddhiḥ || 9 ||

saṃpradāyaḥ guruparaṃparā'cārānusaraṇam | viśvāso mantreṣu 
phalasādhanatvaviṣayako niścayaḥ | ābhyāṃ sahitamantreṇa sarvasiddhiḥ 
bhavatīti śeṣaḥ | yadyapi loke ekena daṇḍena ekavyāpāreṇa ghaṭa eva bhavati na 
paṭaḥ | evaṃ turīvemādinā paṭa eva na ghaṭa iti | evaṃ sarvakāraṇeṣu loke 
niyataikakāryajanakatvaṃ dṛṣṭam | tathā'pi mantreṣu na tathā eka eva mantraḥ 
yadyadīpsitaṃ tatsarvaṃ janayati iti jñāpayituṃ sarvapadam | etena 
śrotṛpravṛttaye mantravartiguṇo'pi pratipādito bhavati || 9 ||

p. 28)

nanu kathaṃ lokaviruddhārthakamidaṃ vākyaṃ pramāṇaṃ bhavitumarhati ityata 
āha-

viśvāsabhūyiṣṭhaṃ prāmāṇyam || 10 ||

prāmāṇyaṃ saṃvādipravṛttijanakatadvatitatprakārakajñānajanakatvam | 
sarvasiddhiriti pūrvoktavākyaniṣṭhaṃ viśvāsabhūyiṣṭham | atra 
viśvāsapadārthaśca vākyaprayoktari āptatvaniścayaḥ | bahuśabdāt atiśayārthe 
iṣṭhan pratyayaḥ | tatra-pāṇinisūtraṃ atiśāyane tamabiṣṭhanau 
atiśayaviśiṣṭārthavṛtteḥ svārthe etau staḥ iti tadarthaḥ | evaṃ svārthe iṣṭhani 
jāte iṣṭhasya iti bahoḥ parasya iṣṭhasya lopaḥ syāt | bahorlopo bhū ca bahoḥ iti 
iḍāgamo bhūrādeśaśca iti tadarthaḥ | evaṃ bhūrādeśe iḍāgame ca 
bhūyiṣṭhaśabdena atyantabahutvaviśiṣṭaḥ puruṣārthaḥ | puruṣe 
viśvāsabhūyiṣṭhatvaṃ ca svottarotpannatvasvaviṣayaviṣayakatvasaṃbandhena 
viśvāsaviśiṣṭaśaṅkā'nadhikaraṇatvaṃ tadāśrayapuruṣeṇa 
samamabhedānvayasya bādhitatvāt | bhūyiṣṭhapadasya 
bhūyiṣṭhāśrayajñānaviṣaye lakṣaṇā | tasya prāmāṇye abhedānvayaḥ | 
atyantaviśvāsavatpuruṣaikavedyaṃ etacchāstraprāmāṇyamityarthaḥ | 
kutarkaśālināṃ śāstraprāmāṇyaṃ sarvathā agamyamiti bhāvaḥ | taduktaṃ 
bhaṭṭapādaiḥ-

śāstraikagamyā ye hyarthā na tāṃstarkeṇa dūṣayet || iti ||

kecittu-viśvāsasya bhūyiṣṭhaṃ bāhulyaṃ yatreti bahuvrīhimāhuḥ | taccintyam | 
bhūyiṣṭhapadasya pāṇinyanuśāsanena puruṣaparatvena 
bāhulyarūpadharmaparatvāyogāt | yadi ca dharme lakṣaṇā tadā 
madāśritalakṣaṇāpakṣa eva śreṣṭhaḥ | na saḥ | tathā sati bāhulye ekatra 
lakṣaṇāyāmapi dharmasyāpi prāmāṇyena samaṃ abhedānvayāsaṃbhavāt 
bahuvrīhau anyapadārthe lakṣaṇā vācyābāhulyasaṃbandhiprāmāṇyamiti | 
saṃbandhaśca svāśrayavṛttijñānavedyatvameva vaktavyam | tathā ca 
manmatatulyam | etadaṃśe dharme lakṣaṇādhikyaṃ 
kliṣṭavyadhikaraṇabahuvrīhyāśrayaṇaṃ ca | tasmādidameva vyākhyānaṃ 
varam ||

īdṛśameva śraddhābhūyastvamiti suspaṣṭamuvāca śrīskanda :-

agastya kiṃ bahūktena śṛṇu me niścitaṃ vacaḥ |
saṃśayo nātra kartavyaḥ sandigdhāddhi phalaṃ na hi ||
yāvanti martye tantrāṇi mantrajālānyanekaśaḥ |

sahakāryantaramāha-

gurumantradevatā'tmamanaḥpavanānām 
aikyaniṣphālanādantarātmavittiḥ || 11 ||

p. 29)

gurvādayaḥ spaṣṭāḥ | pavanāḥ pañcaprāṇāḥ | eteṣām aikyaniṣphālanaṃ 
bhāvanayā ekatvasaṃpādanam tena antarātmanaḥ pratyagātmanaḥ vittiḥ 
vedanaṃ bhavatīti śeṣaḥ ātmano devatāyāśca aikyamupādhinirāse spaṣṭam | 
devatāyā mantrasya caikyaṃ vācyavācakabhāvāpannatvena | tathā gurorapi | 
manaḥpavanayoraikyaṃ viṣṇupurāṇe darśitam-

nabhasvānmanaso nātibhinno'tastannirodhanāt mano niścalatāmeti || iti ||

yadyapi īdṛśaniścayaḥ upāsanāvelāyāṃ na bhavitumarhati tathāpi āhāryaṃ 
kṣaṇamātraṃ kāryamidamupāsanāyāmaṅgam ||

japarūpopāstiphalam 

yadvā - saṃpradāyaviśvāsasahitamantrakaraṇakopāsteḥ phalamāha - 
gurumantreti | aikyaniṣphālanaṃ aikyanirṇayaḥ tadvārā pratyagātmajñānaṃ 
bhavatīti viśiṣṭārthaḥ ||

umānandanāthāstu - gurumantretyasya āraṃbhollāse 
gurumantradevatā'tmanāmaikyabhāvanam - ekaṃ sādhanaṃ manaḥpavanayoḥ 
ekayatnaniroddhavyatvajñānaṃ cāparaṃ dvābhyāṃ kāryasiddhiḥ iti 
vyācakruḥ | taccintyam | niṣphālanādityekakriyāyā eko'rthoṃ bhāvanārūpaḥ 
ekayatnaniroddhavyatvajñānarūpo vā budhyeta nānekaḥ śakṛduccaritaśśabdaḥ 
sakṛdevārthaṃ gamayati iti nyāyāt | anyathā haripadāt 
caturdaśānāmapyarthānāṃ yugapadbodhaprasaṅgāt | kiṃca-
dvandvaghaṭakībhūtapadārthānāṃ yadi bhinnakriyayā'nvayaḥ tadā 
bhikṣāmaṭa gāṃ cānaya itivat anvācaya eva syāt kriyābhede anvācayaḥ iti 
tallakṣaṇāt | ekakriyāyāṃ yugapadanvayitvaṃ hi dvandvalakṣaṇaṃ 
tannirvāhastu sarvathā kartumaśakyaḥ tanmate | na ca - dhavakhadirau chindhi paśya 
iti prayogo na syāt iti vācyam īdṛśaprayogo'prāmāṇika eva iti 
sarvairvyavasthāpitatvāt || 11 ||

arcanarūpopāstividhiḥ 

etāvatparyantaṃ mantrastutyā tatsahakārikāraṇakathanena ca 
mantrakaraṇakakriyātadvidhirunneyaḥ | tathā ca tādṛśī japarūpaiva | evaṃ 
japarūpopāstiṃ nirūpya pūjārūpāmupāstiṃ hi vidhatte-

ānandaṃ brahmaṇo rūpaṃ tacca dehe vyavasthitaṃ tasyābhivyañjakāḥ pañca 
makārāḥ tairarcanaṃ guptyā prākaṭyānnirayaḥ || 12 ||

yathā cidrūpaṃ brahma evam ānandarūpamapi vijñānamānandaṃ brahma iti 
śruteḥ | yathā cidrūpamāvṛtamajñānena na jānāti evamānandasvarūpamapi 
duḥkhenāvṛtaṃ na jānāti | yadā kadācit bhārādirūpaduḥkhāpagame 
brahmaṇa eva paricchinnaṃ rūpaṃ śarīrāvacchedena saṃpratyapi 

p. 30)

jānāti tādṛśānandaḥ paricchinno dehe dehāvacchedena vyavasthitaḥ | tasya 
abhivyañjakāḥ tadviṣayakasākṣātkārajanakāḥ pañcamakārāḥ | etadantena 
vidhīyamānadravyastutiḥ anuṣṭhātṛpravṛttaye yata īdṛśāḥ śreṣṭhāḥ pañca 
makārāḥ ataḥ tairarcanaṃ guptyā aprākaṭyena kurvīteti śeṣaḥ | 
guptidravyobhayaviśiṣṭārcanarūpaṃ karma anena vidhīyate ||

nanu viśiṣṭakarmavidhau karmaṇa eva stutirapekṣitā vidheyasyaiva 
stutyatvaniyamāditi cet - na viśiṣṭavidhau viśeṣaṇavidherākṣiptatvena 
asyārthavādasya taccheṣatvasaṃbhavāt yathā vāyavyaṃ śvetamālabheta ityatra 
devatāviśiṣṭakarmavidhāvapi vāyurvai kṣepiṣṭhā ityanena devatāstutiḥ tadvat | 
karmaṇi guptiśca paśuvṛttijñānaviṣayatāsāmānyajñānaśūnyatvam | asya 
viśiṣṭavidhirūpatvāt guptiḥ kratvarthā | tasyaiva prākaṭyānnirayaḥ iti 
nindārūpā stutiḥ | yathā - yad grāmyāṇāṃ paśūnāṃ carmaṇā saṃbhared 
grāmyān paśūñchucā'rpayet iti nindārūpaḥ san kṛṣṇājinena saṃbharati iti 
stutiśeṣaḥ tathā tena daivāt prākaṭye kratvaṅgalopajanitaṃ prāyaścittaṃ na 
narakanirāsāya anyat prāyaścittam ||

prākaṭyāt guptiviparītāt | hetau pañcamī | nirayaḥ nirakaḥ ityarthaḥ ||

śrībhāsurānandanāthapādāstu - dīkṣā'ntaravatāṃ svadharmaprakaṭane 
kratuvaiguṇyamātraṃ iha tu tadvaiguṇye naraka eva tathā ca bhagavān 
paraśurāmaḥ prākaṭyānnirayaḥ ityūcuḥ | tanmate vākyabhedaḥ 
prakṛtahānyaprakṛtapuruṣārthatvakalpanādidoṣaparihāropāyamalpamatirahaṃ na 
jāne || 12 ||

upāsakadharmāḥ - bhāvanādārḍhyam 

evamupāsanāmuktvā upāsakadharmān prāha-

bhāvanādārḍhyādājñāsiddhiḥ || 13 ||

ahamidaṃ jānāmi ityetādṛśavṛttiṣu idaṃ padārthāpekṣayā ahaṃtayā 
bhāsamānaṃ śreṣṭhamiti vivecanam - sarvavṛttiṣu idameva bhāvanāpadārthaḥ | 
tasya dārḍhyaṃ aśithilatā | anena ājñāsiddhiḥ nigrahānugrahasāmarthyaṃ 
bhavatīti śeṣaḥ | bhāvanādārḍhyastutyā sarvadā īdṛśabhāvanāvidhirunneyaḥ 
|| 13 ||

sarvadarśanā[nānindanam-a | ito bhagavatastāntrikaśāsanagauravaṃ 
mananīyataram |]nindā

upāsakasya niyamāntaramāha-

p. 31

sarvadarśanānindā || 14 ||

itaradevatopāsanāvidhāyakāni yāni darśanāni śāstrāṇi teṣāṃ nindā na 
kartavyetyarthaḥ | tannindane tadadhikāriṇāṃ saṃśayotpattyā 
svālambitadarśaneṣvanāśvāsaḥ | asmin śāstre anadhikārāt ubhayabhraṣṭaḥ 
chinnābhramiva naśyet | imamevārthaṃ śrīkṛṣṇo'pyāha-

na buddhibhedaṃ janayedajñānāṃ karmasaṅginām || iti ||

lokānna nindyāt itiśrutirapi ||

nanu pareṣāṃ buddhibhraṃśajanitapratyavāyābhāvo'sya phalamiti siddham | 
ayaṃ puruṣārthaḥ | katham upāsakadharmāṇāṃ kratusādguṇyajanakānāṃ 
madhye pāṭha iti cet-ucyate | ayamapi upāsanājanyasarvātmabhāve upayujyate | 
katham ? iti cet itthaṃ - yadi chinnābhravat pareṣāṃ nāśe svasyopekṣā tadaiva 
nindāyāṃ pravṛttiḥ | tathā ca paranāśe upekṣāyāṃ ātmavat 
sarvabhūtadarśanaṃ nāgataṃ iti sarvātmatāyāḥ asiddhyā 
upāsanājanmaphalāsiddhiḥ | prayājādiṣu kratvarthatvam | idameva 
kratusādhyāpūrvasādhakatvam | prakṛte uktarītyā kratvarthatvaṃ siddhamiti na 
ko'pi doṣaḥ || 14 ||

kasyāpagaṇanam 

tṛtīyaṃ dharmamāha-

agaṇanaṃ kasyāpi || 15 ||

svaśāstraviruddhaṃ yadi gīrvāṇagururvadettarhi sa gururiti gaṇanaṃ na 
krartavyam | ata eva śrutirapi - na gaṇayet kamapi iti || 15 ||

sacchiṣye rahasyakathanam 

caturthamāha-

sacchiṣye rahasyakathanam || 16 ||

kartavyamiti śeṣaḥ | parisaṃkhyāvidhirayam | ātmarahasyaṃ na vadet iti 
niṣedhasyāpavādo'yaṃ na tu guptyārcanam ityasyāpavādaḥ tathā sati 
śiṣyātirikteṣu sāmayikeṣu pūjāprākaṭyānāpatteḥ | ataḥ idamātmarasyaṃ 
svasiddhāntarūpaṃ sāmāyikeṣu śiṣyabhinneṣu na kathayet | sacchiṣye 
kathayedityarthaḥ | śiṣye sattvaṃ pratipāditaṃ tantrarāje-

p. 32)
 
sundaraḥ sumukhaḥ svacchaḥ śraddhāvān susthirāśayaḥ |
alubdhaḥ sthiragātraśca prekṣyakārī jitendriyaḥ ||

āstiko dṛḍhabhaktiśca gurau mantre'tha daivate |
evaṃvidho bhavecchiṣyaḥ itaro duḥkhakṛdguroḥ || iti ||

ātmapurāṇe'pi 

brahmavidyā'tisaṃkhinnā brahmiṣṭhaṃ brāhmaṇaṃ yayau |
gopāya māṃ sadaiva tvaṃ kulajāmiva yoṣitam ||

ityārabhya-

evamādyā yeṣu doṣāstebhyo varjaya māṃ sadā |
evaṃ hi kurvato nityaṃ kāmadhenurivāsmi te || iti ||

asattvalakṣaṇāni śiṣyadoṣāḥ kulārṇavāt vistareṇa jñeyāḥ 
[anarhaśiṣyalakṣaṇajñānāya dvi0 pariśiṣṭe 6 vi. dṛśyaḥ |] || 16 ||

sadā vidyā'nusaṃdhānam 

pañcamaṃ dharmamāha-

sadā vidyā'nusaṃhatiḥ || 17 ||

sadā sarvakālaṃ pūjādivihitanityakarmānuṣṭhānakālavyatirikte sarvadetyarthaḥ 
| vidyāyāḥ svopāsyadevatāvācakamantrasya anusaṃhatiḥ tatpratipāditārthasya 
anusaṃdhānaṃ kartavyamiti śeṣaḥ |

yadvā - sadā anusaṃhatiḥ manasā japaḥ kāryaḥ ityarthaḥ | na ca 
āsanādiniyamarahitasya japo yuktaḥ iti śaṅkanīyam mānase kasyāpi 
niyamasyābhāvāt | taduktaṃ paramānandatantre-

mānase'nantaguṇitaṃ niyamastatra naiva tu |
gacchan śayāna āsīno bhukto vā yatra kutracit |
asnātaścāpavitraśca na doṣastatra vidyate ||

bṛhadvāmakeśvaratantre'pi-

sarvakālaṃ japedvidyāṃ manasā yastu kevalam |
niyato vāpyaniyato'pyatha kurvaṃśca nityakam |
tathā'pi tasya śuddhasya tarasā saṃprasīdati || iti ||

p. 33)

yadi sadāpadasya saṃkoco na syāttarhi nityakarmānuṣṭhānalopāpattiḥ | ataḥ 
sarve hāryojanaṃ lipsanti ityatreva saṃkoca āvaśyakaḥ || 17 ||

satataṃ śivatāsamāveśaḥ 

ṣaṣṭhaṃ dharmamāha-

satataṃ śivatāsamāveśaḥ || 18 ||

satatam asyāpyarthaḥ pūrvasūtrasthasadāśabdavat | śivatāyāḥ samāveśaḥ 
āvirbhāvaḥ kartavya iti śeṣaḥ | nityakarmānuṣṭhānavyatiriktakāle 
śivo'hamasmīti bhāvayet iti tātparyam ||

vastutastu-pūrvadharmeṇa sahāyaṃ vikalpyate anyathā ubhayorbhāvanayoḥ 
yugapatsaṃpādanāsaṃbhavāt | pūjā'divyatiriktakāle 
anyatarasyānuṣṭhānamitibhāvaḥ [arthādantaḥsthamātmānaṃ pūjanāya 
mūrtyādau bahirapi saṃbhāvya saṃpūjyānantaraṃ sa evāhaṃ devaḥ ātmā 
veti vedāntasiddhāntāviruddhabhāvanāvirbhāvostu bhaktānāmiti tātparyam | ] ||

yadvā - pūrvadharmo mandādhikāriṇaḥ ayaṃ mukhyādhikāriṇaḥ || 18 ||

kāmādīnāṃ varjanam 

saptamamāha-

kāmakrodhalobhamohamadamātsaryāvihitahiṃsāsteyalokavidviṣṭavarjanam 
[lokaviruddhastrīvidvi-a] || 19 ||

kāmaḥ vaiṣayikī icchā idaṃ me bhūyāt ityākārikā | krodhaḥ tamasa udrekeṇa 
janito'sau antaḥkaraṇadharmaḥ | lobhaḥ 
dravyādiniṣṭhasvatvatyāgapratibandhako'tyantamanurāgaviśeṣaḥ | mohaḥ 
kāryākāryāvicāraṇam madaḥ garvaḥ | mātsaryaṃ dveṣajanito guṇini 
doṣāropaḥ | avihitahiṃsā rāgeṇa bhakṣaṇārthaṃ paśvādivadhaḥ | steyaṃ 
parānanumatyā paradravyaharaṇam | lokavidviṣṭaṃ mātṛbuddhyā'pi ekānte 
parastrīsaṃlāpādi | eteṣāṃ varjanaṃ tyāgaḥ kartavya iti śeṣaḥ || 19 ||

ekagurūpāstiḥ 

aṣṭamaṃ dharmamāha-

ekagurūpāstirasaṃśayaḥ [etatsūtrabhāṣyasamāptyavadhi-
ekagurūkaraṇādyupadeśo'sti |] || 20 ||

p. 34)

na vidyate saṃśayo yatreti vigraheṇa asaṃśayaḥ ityekagurūpāstiviśeṣaṇam | 
bhinnaliṅgatvamārṣam ||

ayaṃ bhāvaḥ - anekagurūpāstau pūrvagurūktavirūddhaṃ yadi vadet tarhi 
saṃśayo bhavedeva |

ekagurūpāstau na saṃśayo bhavet | ataḥ ekagurūpāstiḥ kāryeti bhāvaḥ | 
gurūpāsteḥ śaṃpradāyaviśvāsābhyām iti pūrvasūtreṇaiva prāptau 
punarvidhānam ekaṃ gurumāśritya na gurvantaramāśrayet iti 
itaragurvāśrayanivṛttiphalakeyaṃ parisaṃkhyā ||

ekagurūpāstividhyarthavicāraḥ 

nanu-na parisaṃkhyā'śrayaṇaṃ yuktaṃ doṣatrayāpatteḥ 
[atroktaparisaṃkhyāyāmuktaṃ laugākṣibhāskarapraṇītārthasaṃgrahe 15 panne 
parisaṅkhyāvivecanāyāṃ yathā śrutārthasya 
parityāgādaśrutārthaprakalpanāt || prāptasya bādhādityevaṃ parisaṅkhyā 
tridūṣaṇā | atraitacchlokārthopi sukhāvagamyaḥ |] | kiṃ tu 
upāsyagurumanūdyaikatvamātraṃ vidhīyate itaranivṛttistu aṅgalopabhiyā 
ekatvasya aṅgatvena itaragurūpāstau tallopāpatteḥ | na ca 
gurūdvayādyāśrayaṇe'pi pratyekaṃ guruṣu pratyekamekatvamastīti 
kathamaṅgalopaḥ iti vācyam ekatvaṃ hi na saṃkhyārūpaṃ vidhīyate tasya 
vastumātrasādhāraṇyena avyāvartakatvāt kiṃtu sajātīyadvitīyarahitatvaṃ 
gurvantarāśrayaṇe tallopastvanivāryaḥ | ato na gurvantarāśrayaṇamiti 
ekatvavidhireva śreṣṭhaḥ iti cet-

āstāṃ vā ekatvavidhiḥ | imamevārthaṃ śrīśivaḥ tantreṣu bhaṅgyantareṇa 
prakaṭitavān | rudrayāmale-

na deyaṃ paraśiṣyebho deyaṃ śiṣyebhya eva ca || iti ||

kulārṇave-

labdhvā kulaguruṃ samyak na gurvantaramāśrayet ||

yoginītantre'pi-

na deyaṃ paraśiṣyebhyo nāstikāya kuleśvari || iti ||

upaniṣadyapi - gururekaḥ iti | kvacicchiṣyadharme imamevārthaṃ prāha | 
kvacidgurudharme paraśiṣyāya na vadet iti bhaṅgyantareṇa | dvayoḥ 
ekagurūpāstirūpaphale eva paryavasānaṃ bhavati | ayamabhiprāya eṣāṃ 
vacanānāṃ pratibhāti - pūrvoktarudrayāmalakulārṇavayoginītantreṣu 
svasaṃśayacchettari gurau satītyadhyāhāryam | anyathā-

p. 35)

madhulubdho yathā bhṛṅga puṣpāt puṣpāntaraṃ vrajet |
jñānalubdhastathā śiṣyo gurorgurvantaraṃ vrajet || iti ||

tantrāntare śaktirahasye'pi-kaulike guravo'nantāḥ iti vacanānāṃ 
niravakāśatā'patteḥ | etena pūrvaguruḥ asarvajñaḥ 
svasaṃśayacchedane'samarthaḥ yadvā samarthaḥ svasya saṃśayamacchittvā 
mṛtaḥ tādṛśaśiṣyaḥ madhulubdhaḥ iti vacanānusāreṇa gurvantaramāśrayet | 
tatrāpyalpajñe'pi gurau jīvati tadanumatyā gṛhṇīyādanyoktam | tadapyuktaṃ 
kulārṇave-

mantrāgamādi cānyatra śrutaṃ nāthe nivedayet ||
gurvājñayā tadgṛhṇīyāt tadaniṣṭaṃ vivarjayet || iti ||

gurāvalpatātāratamyaṃ nirṇetuṃ svayamasamarthaścet yaṃ parigṛhṇāti 
tanmārgatyāgo na kāryaḥ | tādṛśanirṇayasamarthaścet tasmin 
sopapattikamarthaṃ rahasi saṃbodhya tadanumatyā yathāśāstramarthaṃ 
gṛhṇīyāt | yadi jīvannapi guruḥ asūyā'dinā nānujānāti tamullaṃghya 
śāstrīyaṃ sapramāṇaṃ mārgamanusaret | taduktaṃ spaṣṭaṃ tripurārahasye-

gurūktaṃ śāstrasaṃśuddhaṃ samālocya dhiyā budhaḥ |
kurvītopāsanaṃ samyaganyathā parihīyate || iti ||

ete'rthāḥ sarve'pi madhulubdhaḥ iti vacanena jñāpitāḥ | ekagurūpāstiḥ ityasya 
sūtrasya asminnevārthe tātparyamuktayuktigaṇavaśādvarṇanīyam ||

ye ca śrībhāskararāyāṇām anyāyo nyāyaḥ iti kaulopaniṣacchrutibhāṣye 
gurusaṃpradāyaḥ asādhuścedapi grāhyaḥ iti lekhanābhiprāyaṃ varṇayanti te 
tadabhiprāyatattvaṃ na viduḥ | ko'yamabhiprāyaḥ iti cet - ucyate | 
kaulikācāramadhye svasiddhāntaviruddhaṃ yadyācaret svaguruḥ anyaśca kauliko 
dayāparavaśaḥ san bodhayeccet gurau nivedya jīvati gṛhṇīyāt | yadi 
vāvadūṃko'nyaḥ kaulamārgaṃ dūṣayituṃ pravṛttaḥ syāt svayaṃ 
tatkhaṇḍena apaṭurapi tatra prāmāṇyabuddhiṃ na tyajet | ata eva kaulikācāraṃ 
[na ?] dūṣayet ityeva likhitam | evaṃ gurau svasya kiṃcijjñatvasaṃśayo nāsti 
kiṃtu bahutantravettṛtvaṃ niścitaṃ ciravāsena | sa ca na jīvati | 
tadācāraviruddhaṃ yadi tantre kvacidupalabdhaṃ vacanaṃ tadā ācārasya 
durbalatvāt tanmūlabhūtapramāṇopalabdhiparyantaṃ 
tasyānanuṣṭhānarūpamaprāmāṇyaṃ śrautasmārtānuṣṭhāne 
pūrvamīmāṃsānusāreṇa | kaulike tu pūrvoktaniścayadaśāyāṃ 
śāstraviruddho'pyanuṣṭheya eveti viśeṣaḥ | na tu gurau mandamatitvaniścaye | 
tathā īdṛśo'bhiprāyaḥ tatraiva sadgurusaṃpradāyaikalabhyatvena ityatra gurau 

p. 36)

sattvaviśeṣaṇena jñāpitaḥ | idaṃ tattvaṃ-gurau asarvajñatvānumāpako hetuḥ 
prabhūtaśāstraviruddhācāravattvaṃ sarvajñatvānumāpakaśca sarvāṃśena 
śāstrānumatatve sati tadviruddhakvācitkatvam ||

nanu sundaraḥ sumukhaḥ svacchaḥ sulakṣo [sulabhaḥ-iti kvacit |] bahutantravit iti 
kādimate gurulakṣaṇasyoktatvāt bahuśaḥ tantraviruddhānuṣṭhātāraṃ kathaṃ 
guruṃ śiṣyaḥ kuryāt | na hi sevārthaṃ vatsaroṣitasya viduṣaḥ ajñānaṃ 
saṃbhavati | kathamīdṛśamudāharaṇaṃ saṃbhavadyuktikamiti cet - na 
pūrvamajñatādaśāyāṃ kevalaśraddhodrekeṇa dīkṣitasya tādṛśaguruṃ 
svīkṛtavataḥ paścādadhyayanādisaṃpādita jñānasya pūrvoktahetunā 
anumānasaṃbhavāt | tādṛśena pūrvācāraḥ 

tyājya eva | yadyutpathaṃ daivāt pratipannaḥ tadā sadgurorapi saṃpradāya 
utpathapratittyuttarakālīnaḥ tyājya eva aśāstrīyatvanirṇayāt | ityalaṃ pallavitena 
||

amṛtānandanāthāstu - yoginītantravyākhyāne na deyaṃ paraśiṣyebhṇaḥ ityasya 
ye vidyā'ntareṣu pāraṃparyakrameṇa adhigatāśeṣarahasyāśeṣaparamārthāḥ 
saṃprāptapūrṇābhiṣekāśca te paraśiṣyāḥ tebhyo na deyam | 
kulārṇavavacanaṃ caitatparam | etadbhinneṣu deyaṃ madhulubdho yathā bhṛṅgaḥ 
iti vacanāt | īdṛśavyavasthāyāṃ mānaṃ ca pūrṇābhiṣekakartā yo guruḥ 
tasyaiva pāduketyāhuḥ ||

tanna | pūrṇābhiṣekakartari gurutvasyaiva jñāpakamidaṃ vacanam | tarhi tasyaiva 
pādukā iti bhāgo vyarthaḥ | yadi gurutvaṃ gurupādukāmantre tannāma ca 
vidhīyate tadā yo dīkṣākartā sa guruḥ ityekaṃ tasya nāma pādukāyāṃ 
yojyam-ityaparaṃ vākyam | tathā ca vākyabhedaḥ sa ityasya adhyāhāraḥ 
gurutvamātravidhau vacanāntareṇa gurunāmapādukāmantre yojyamityanenaiva 
siddhau śeṣavaiyyarthyaṃ durvāraṃ ca | tasmāt madhulubdhaḥ iti vacanena 
nānāguruṣu siddheṣu pādukāmantre sarveṣāṃ nāmnāṃ pakṣe prāptau 
niyāmakamidam | tathā sati na parasamīhitasiddhiḥ | pratyuta anena vacanena 
nānāguruprāptireva jñāpyate | tasmāt asmaduktā saraṇireva sādhīyasī ||

dṛśyate cādhunikānāṃ śāstraviruddhānāmācārāṇāṃ prāmāṇyaṃ 
pūrvamīmāṃsāvidāmapi yathā āndhrāṇāṃ mātulakanyāpariṇayaḥ | tathā 
drāviḍasuvāsinīṣu kañcukadhāraṇābhāvaḥ 

sa kañcukayatiṃ dṛṣṭvā akañcukasuvāsinīm |
sakeśāṃ vidhavāṃ dṛṣṭvā sacelasnānamācaret ||

ityāṅgirasavacanaviruddhaḥ | ato na kiṃcidbādhakam ||

p. 37)

yadi kevalaṃ gurau viśvaseccet tarhi sa tiṣṭhanneva mūtrapurīṣotsargaṃ kuryāt 
cet tadā svasyāpi karaṇāpattiḥ | yadi ca bahutantraviduṣi kacidvacanaṃ 
tadviruddhaṃ dṛṣṭvā tadācāre aprāmāṇyagrahaḥ sa kiṃ tāvadaṃśe 
svīkriyate uta sarvāṃśe | nādyaḥ loke 
kvaciccaitrādāvajñātāprāmāṇyagrahācāre kadācidaprāmāṇyagrahe sarvatra 
aprāmāṇyaśaṅkayā na viśvasantīti dṛṣṭaṃ loke | tadvadatrāpi 
sakṛdvyabhicāre sarvatra śaṅkayā ananuṣṭhānāpattiḥ | sā ca śaṅkā sarvatra 
mūladarśanamantarā nāpaiti | sarvatra mūlaśodhanārthe udyuktaścet tatra 
saṃpradāyānusaraṇavidhiḥ vyarthaḥ syāt | na ca yatra pakṣadvayarūpo vikalpaḥ 
tatra svagurusaṃpradāyācaraṇavidhiḥ sārthakaḥ syāt iti vācyam 
evamadhikāribhedena yadi pakṣadvayaṃ vyavasthitaṃ tadā tantraśāstre 
vikalpaviṣayatvaṃ sarvathā na syāt | yathā viśeṣārghyapātrādhāre tripadaṃ 
catuṣpadam apadaṃ veti pakṣāstatra guruṇā tripadamevānuṣṭhitaṃ tathaiva 
śiṣyeṇāpyanuṣṭhitam | kadācit tripadaṃ gataṃ - catuṣpadaṃ labdhaṃ tena 
anuṣṭhānaṃ syāt guruṇā ananuṣṭhitatvāt | vikalpasya udbheda evaṃ na syāt | 
ekapuruṣakartṛke karmaṇi prayogabheyena pakṣadvayasamāveśa eva hi vikalpaḥ ||

kiṃca - guruvākye viśvāsavidhirvyarthaḥ | śaṅkānivṛttyarthe 
mūlānveṣaṇārthamudyuktasya kathaṃ kimiti guruvākye ativiśvāsaḥ | tasmāt 
guroryogyatāmanumāya [atroktaguruḥ kīdṛśaścikīrṣitastajjñānārthaṃ 
dvipariśiṣṭe 6 vi. dṛśyaḥ |] ca sadguruvākyaṃ viśvaset ||

umānandanāthāstu ekagurūpāstiḥ itivākyaṃ samāpya asaṃśayassarvatra iti 
yojayitvā guruvākye śāstrādau sarvatra asaṃśayaḥ iti vyācakruḥ | tanna 
saṃpradāyaviśvāsābhyāṃ sarvasiddhiḥ viśvāsabhūyiṣṭhaṃ prāmāṇyam 
ityābhyāmeva asyārthasya prāptatvena punaruktyāpatteḥ || 20 ||

sarvatra niṣparigrahatā 

navamaṃ dharmamāha-

sarvatra niṣparigrahatā || 21 ||

sarvatra mapañcakādiṣu niṣparigrahatā nirgataḥ parigrahaḥ icchā yasya saḥ 
niṣparigrahaḥ tasya bhāvaḥ tattā patnīparijanādānamūlaśāpāḥ parigrahāḥ 
ityamaraḥ | atrādānasya parigrahasya mūlam - icchaiva | etādṛśakośānusāreṇa 
parigrahaśabdaḥ icchāvācakaḥ | mapañcakaṃ me bhūyāt itīcchayā na 
svīkāryamityarthaḥ | ayamevārtho bhāgavate spaṣṭaṃ pratipāditaḥ-

p. 38)

yad ghrāṇabhakṣovihitassurāyāstathā paśorālabhanaṃ na hiṃsā |
evaṃ vyavāyaḥ prajayā na ratyai imaṃ viśuddhaṃ nu viduḥ svadharmam ||

ye tvanevaṃvidaḥ puṃsaḥstabdhāḥ sadabhimāninaḥ |
paśūn druhmanti vistrabdhāḥ pretya khādanti te ca tān ||

iti ghrāṇabhakṣaḥ śāstreṇa kathitaṃ kartavyamiti bhakṣaṇam ālabhanaṃ 
devatoddeśena tyāgabuddhyā paśvādihananam ||

yadvā-sarvatra vastumātre niṣparigrahatā svīyabuddhityāgaḥ saṃpādanīyaḥ | 
sarvatra mamatā tyājyeti yāvat ||

yacca nityotsavanibandhe svabhogabuddhyā dhanaṃ na 
saṃpādanīyamityarthakathanaṃ taccaturthādhyāye dravyārjanaṃ kratvarthamiti 
pūrvapakṣīkṛtya dravyārjanaṃ kevalapuruṣārtha iti jaiminisiddhāntaviruddham || 
21 ||

phalatyāgapūrvakakarma 

daśamaṃ dharmamāha-

phalaṃ tyaktvā karmakaraṇam || 22 ||

phalaṃ pūrvoktaṃ kṛtrimaṃ tatsādhanaṃ ca dharmārthakāmā iti yāvat | 
phalaviṣayiṇī icchā phalapadasyārthaḥ | taṃ tyaktvā karmaṇaḥ vihitasya 
karaṇaṃ bhavatīti śeṣaḥ | kāmyaṃ karma na kartavyamityarthaḥ | kāmyaṃ karma 
na kartavyam iti vaktavye phalaṃ tyaktvā kartavyamiti kathanāt kāmyānāmapi 
karmaṇāmīśvarārpaṇabuddhyā anuṣṭhānaṃ kartavyamiti jñāyate ||

nanu bhagavadgītāyāṃ 

caturvidhā bhajante māṃ janāḥ sukṛtino'rjuna |
ārto jijñāsurarthārthī jñānī ca bharatarṣabha ||

iti sakāmopāsanā bhagavatā pratipāditā tadvirodha iti cet - na caturvidhā bhajanto 
māṃ ityanena lokasvabhāvo darśitaḥ | kāmyaṃ karma na kartavyam - iti jagau | ata 
eva 

yaśca karmaphalatyāgī sa tyāgītyabhidhīyate ||
teṣāṃ jñānī nityayukta ekabhaktirviśiṣyate || 

iti kāmarahitakarmaṇaḥ stutiḥ || 22 ||

p. 39)

nityakarmālopaḥ 

ekādaśaṃ dharmamāha-

anityakarmalopaḥ || 23 ||

nityaṃ ca tatkarma ca nityakarma snānasandhyāpūjā'di tasya lopaḥ 
ananuṣṭhānaṃ nityakarmalopaḥ na vidyate nityakarmalopo yasminnupāsake saḥ 
anityakarmalopaḥ | bhavediti śeṣaḥ | nityakarma avaśyaṃ kartavyamityarthaḥ | 
nityakarma kartavyamiti vaktavye vyatirekamukhena kathanaṃ tyāge na kevalaṃ 
kratuvaiguṇyaṃ pratyavāyo nirayaśceti jñāpayati || 23 ||

nanu nityakarmasādhanībhūtamapañcakālābhe kathaṃ 
kāryamityāśaṅkāyāmāha-

mapañcakālābhe'pi nityakramapratyavamṛṣṭiḥ || 24 ||

mapañcakālābhe mukhyaṃ nāstīti na karmalopaḥ | kiṃ tu pratinidhinā'pi 
nityakramaḥ nityapūjā tasyāḥ pratyavamṛṣṭiḥ anuṣṭhānaṃ kartavyamiti śeṣaḥ 
|| 

nanu ṣaṣṭhādhyāye darśapūrṇamāse vrīhīṇāmabhāve karmalopa iti 
pūrvapakṣaṃ kṛtvā teṣāṃ dṛṣṭapuroḍāśaniṣpattiphalakatvena nīvārairapi 
tatsaṃbhavāt nityakarmaṇi vrīhiniyamalope'pi nityakarmaṇaḥ 
kiṃcidaṅgalopasahiṣṇutvāt nityanaimittike pratinidhinā'pi kārye iti siddhāntitam 
| tādṛśyanyāyamūlakatayā śrautasmārtakarmasu pratinidhipracāro'pi dṛśyate 
atrāpi tādṛśayuktyaiva pratinidhisiddhau vacanaṃ vyarthamiti cet-

na | nityavannyāyena naimittike'pi prāptau tatra pratinidhinā 
naimittikakramanirvṛttirmā bhavatu etadarthakatvāt | na caivaṃ sati alābhe 
nityātiriktaṃ na kāryamityāyātam | tathā sati śrautaparisaṃkhyārūpatvena 
[atraiva khaṇḍe'nugata 20 sūtrabhāṣye ṭippaṇyāṃ kārikā dṛśyā |] 
svārthatyāgaḥ parārthakalpanā prāptabādhaḥ iti doṣatrayāpattiḥ iti vācyam 
tantraratne pārthasārathinā abhyudayeṣṭyadhikaraṇe tredhā taṇḍulān vibhajet iti 
vākyavaiyyarthyabhiyā pratyuddeśaṃ vākyaparisamāptirūpo 
vākyabhedo'ṅgīkṛtaḥ | kimu tādṛśabhītyā doṣatrayāṅgīkāre | ata eva 
[vijñāyaitāvataitadbhāṣyakṛtaḥ śrīpūjyapādapaṃ. bhāskararāyapādāḥ 
paramagurava - iti |] asmatparamagurubhiḥ uttaracatuśśatīsetubandhe 
dviśatottaradvitīyaśloke naimittikaprakaraṇe cakrapūjāṃ viśeṣeṇa yoginīnāṃ 
samācaret iti mūlasthaviśeṣeṇetipadasya nityapūjāmapekṣya 
yoginīvīrādhikyabhakṣyabhojyādyādhikyādineti prathamaṃ vyākhyāya 
tatrāparitoṣeṇa 

p. 40)

viśeṣadravyeṇa vetyarthaḥ | tena nityapūjāyāṃ viśeṣadrayālābhe'pi 
pratinidhinā nirvāhaḥ sūcitaḥ iti nityapūjāyāmeva abhyanujñāṃ natvanyatra iti 
vyākhyāya asminnarthe sādhakatvena idameva vākyaṃ darśitam || 24 ||

sarvatra nirbhayatā 

dvādaśaṃ guṇamāha-

nirbhayatā sarvatra [sarvataḥ-ba |] || 25 ||

sarvatra sarvataḥ mapañcakasvīkāre kaulamārgāvalambane ca 
narakādipratipādakāni yāni śāstrāṇi tebhyaḥ sarvebhyaḥ nirgataḥ bhayaṃ 
yasmāt saḥ nirbhayaḥ tasya bhāvaḥ tattā saṃpādanīyeti śeṣaḥ | tāni sarvāṇi 
śāstrāṇi rāgiṇaṃ bhīṣayanti kāmaṃ bhīṣayantu ahantu na rāgī kiṃtu 
śāstreṇa pravartito na me bhītiriti nirdhāraṇena nirbhayatā saṃpādanīyeti 
bhāvaḥ || 25 ||

sarvasārabhūto dharmaḥ svasya śivāgrau homaḥ 

sakalasiddhāntasārabhūtaṃ dharmamāha-

sarvaṃ vedyaṃ havyam indriyāṇi srucaḥ śaktayojvālāḥ 
svātmā śivaḥ pāvakaḥ svayameva hotā [etatsūtrāditāntrikangrathānāṃ 
śrībrahmabhāvanāgauravaṃ dṛśyamatraṃ |] || 26 ||

iti bhāvayediti śeṣaḥ | antaḥkaraṇavṛttibhiriti 
[etatsūtrasthavedyādipadānāmartho'dhastanabhāṣye susphuṭo'sti |] 
vedyamityasyādau pūraṇīyam | antaḥkaraṇavṛttivedyaṃ sarvaṃ haviṣṭvena 
bhāvayet | yathā agnau prakṣiptaṃ haviḥ tadākāraṃ bhavati evaṃ 
vṛttivedyānāṃ sarveṣāṃ śivarūpe'gnau home sati śivākārasaṃpatteḥ teṣu 
haviṣṭvena bhāvanaṃ yuktam ||

tādṛśahaviṣaḥ ādhārabhūtahomasādhanībhūtajuhureva srukpadena gṛhyate 
dhruvā'dayaḥ teṣāṃ srukpadavācyatve'pi homasādhanatvābhāvena 
homabhāvanāprakaraṇe dhruvā'dīnāmayogyatvāt [ito'gratana-
aprakṛtavicāreṇa-ityantabhāṣyagranthena-
viśeṣaṇībhūtaikapadaniṣṭhaikavacanabahuvacanayoḥ svalpaḥśāstrārtho'sti |] | 
na ca srucaḥ ekatvena bahuvacanamanupapannamiti vācyam indriyāṇāmanekatvena 
tadviśeṣaṇasya tatsamānavacanakatvārthaṃ bahuvacanam | na ca 
āropyāropasthale na casamānavacanatvaniyamaḥ ata eva naiṣadhe-

p. 41)

atraivakāreṇa-karmāntare svasyānuṣṭhānāsāmarthye putra priyādīn 
kartṛpratinidhitvena yojayanti tena ca tatkarmajaṃ phalaṃ bhavatīti śāstrasiddham | 
asmin yajñe pratinidhinā anuṣṭhite karmajanyaphalaṃ svasya na bhavatīti sūcitam || 
26 ||

bhāvanāphalam ātmalābhaḥ 

evamanuṣṭhitabhāvanāyāḥ phalamāha-

nirviṣayacidvimṛṣṭiḥ phalam || 27 ||

nirviṣayāyāḥ nirvikalparūpāyāḥ citaḥ vimṛṣṭiḥ phalam |

pūrvoktabhāvanāyā [pāścātya-30-patrastha 13 sūtrādetat 27-
sūtrāntoktasadbhāvanāyāḥ ityarthaḥ] iti śeṣaḥ || 27 || 

nanu kimīdṛśaphalalābhenetyata āha-

ātmalābhānna paraṃ vidyate || 28 ||

ātmalābhāt svarūpalābhāt paraṃ śreṣṭhaṃ phalam-iti pūrvasūtrastham 
anuṣajyate na vidyate nāstītyarthaḥ | puruṣānna paraṃ kiṃcit sā kāṣṭhā sā 
parā gatiḥ iti tamevaṃ vidvānamṛta iha bhavati iti ca śrutiḥ-imamarthaṃ 
pratipādayati | mokṣaḥ paramapuruṣārthaḥ ityatra na ko'pi vivādaṃ karoti | 
atastādṛśabhāvanayā paramapuruṣārthalābhaḥ iti bhāvaḥ | pūrvaṃ 
[pūrvaṃnāma-1-khaṇḍe 26-patre 6 sūtre-ityarthaḥ-] śvavimarśaḥ puruṣārthaḥ 
ityanena puruṣārthasvarūpaṃ pratipāditaṃ atra stutiriti na paunaruktyam ||

etāvatparyantaṃ [etatpañcāmnāyānāṃ nāmārthamāhātmyādikṛte ddi.-pa-4 
vi.-dṛṣyaḥ] pañcāmnāyasiddhāntarūpaśrīparaśurāmoktayorvicārya 
vikhyātāḥ | keśavaśarmā kaścit tadabhiprāyajñānāsamarthaḥ tā dūṣayāmi 
iti kevalerṣyayā yuktiśūnyān pralāpānabhāṇīt sudhiyāṃ taddarśanenaiva 
yuktirahitatvajñānaṃ bhaviṣyati | mandadhiyāṃ śaṅkānivṛttyarthaṃ mayaiva 
tadyuktiṣu kevalapralāparūpatvaṃ darśitaṃ matkṛtasiddhāntaśiromaṇau | 
granthavistarabhayānneha likhyate | ye tadbubhutsavaḥ te tata eva jānantu || 28 ||

siddhāntopasaṃhāraḥ 

atrāyaṃ siddhāntaḥ ityārabhya prakrāntamartham upasaṃharati-

saiṣā śāstraśailī || 29 ||

saiṣā pūrvoktā śāstraśailī śāstīti śāstraṃ pañcāmnāyarūpaṃ tasya 
śailī rītiḥ bhavatīti śeṣaḥ || 29 ||

p. 42)

eṣā vidyā atiguptā 

etādṛśaṃ śāstraṃ śrotṛpravṛttaye praśaṃsati-

veśyā iva prakaṭā vedādividyāḥ |
sarveṣu darśaneṣu gupteyaṃ vidyā || 30 ||

veśyā iva prakaṭāḥ sulabhāḥ vedādividyāḥ | ādinā smṛtyādiḥ | 
veśyopabhogodravyādivyayena yathā sulabhaḥ evaṃ vedādividyālābhaḥ 
dravyādidānena sulabhaḥ ityarthaḥ | adhyayanasya lobhamūlatā śāstreṇaiva 
pratipāditā ṣaṇṇāṃ tu karmaṇāṃ madhye trīṇi karmāṇi jīvikā iti | asyāḥ 
mokṣasādhanībhūtabrahmavidyāyāstu na koṭikanakavyayenāpi lābhaḥ kiṃ tu 
gurukṛpaikalabhyatvam ||

nanu adhikadravyavyaye guruḥ kṛpāṃ kimiti na kuryāditi cet-na kuryādeva | yena 
guruṇā brahmavidyā prāptā tasya koṭisuvarṇaṃ tṛṇādapi tucchataram | tasmin 
lobhaḥ kathaṃ bhavet || 

nanu lobhena pravṛttimān bhavatu tathā'pi parecchayā vidyādāne pravṛttau svasya 
hānyabhāvāt pravartatām tathā ca pūrvavidyā dravyavataiva labhyā iyaṃ tu 
nirdhanenāpi labdhuṃ śakyeti prakaṭatareti cet - na vidvān parecchayā 
pravartamānaḥ svapravartitavastuni kāryasiddhiṃ dṛṣṭvaiva pravarteta na viphale | 
prakṛte iyaṃ brahmavidyā malināntaḥkaraṇeṣu pravartinā na kevalaṃ viphalā 
pratyuta gurorapi vidyāṃ nāśayati | udāhṛtā etadviṣaye yāskena śrutiḥ-

vidyā ha vai brāhmaṇamājagāma gopāya māṃ śevadhiṣṭe'hamasmi |
asūyakāyānṛjave'yatāya na māṃ brūyā vīryavatī tathā syām |

iti | asyārthaḥ suspaṣṭaḥ ||

brahmavidyā'tisaṃkhinnā brahmiṣṭhaṃ brāhmaṇaṃ yayau |
gopāya māṃ sadaiva tvaṃ kulajāmiva yoṣitam |
śevadhistvakṣayaste'ham iha loke paratra ca |

ityārabhya-

evamādyā yeṣu doṣāstebhyo varjaya māṃ sadā |
evaṃ hi kurvato nityaṃ kāmadhenurivāsmi te |
vandhyā'nyathā bhaviṣyāmi lateva phalavarjitā ||

ityevamādivacanaiḥ guroreva apātre vidyādāne svavidyānāśaḥ śrūyate | sa 
kathaṃ apātre kevalaparecchayā vidyāmupadiśet | tādṛśopadeśapātraṃ 
durlabham || 

p. 43)

ataḥ sarvadarśaneṣu madhye-iti nirdhāraṇe saptamī-iyam uktā vidyā guptā 
durlabhetyarthaḥ |

idānīṃtana guravastu brahmavidyāyāḥ vāṇigvad vikretāraḥ | tatra na gurutvaṃ 
na vā śiṣyasya santāpahāniḥ | pratyuta so'pi dravyasevanarāgapravṛttaḥ 
patatyeva | itthaṃ ca dvāvapi patanasādhanameva kurutaḥ na mokṣasādhanam | 
taduktaṃ kulārṇave [prabodhacandrodaye-ba ba 1.] 

guravo bahavaḥ santi śiṣyavittāpahārakāḥ |
durlabho'yaṃ [gurustu viralo loke-ba ba 1.] gururdevi śiṣyasantāpahārakaḥ ||

ityalaṃ bhūyasā || 30 ||

dīkṣāvidhiḥ 

etāvatparyantaṃ [nāma 30 sūtrāntam] siddhāntamanūdya 
[tattadevatopāsanāmantrādisiddhāntamityarthaḥ] upāsakena prathamaṃ 
kartavyāṃ kriyāmāha-

tatra sarvathā matimān dīkṣeta || 31 ||

saptamī ṣaṣṭhyarthe prakṛtyarthaḥ śrīvidyopāstiḥ ṣaṣṭhyarthaḥ saṃbaṃdhaḥ 
tadavyavahitapūrvavṛttitvaṃ tasya dīkṣāpadārthe āśrayatayā anvayaḥ tasya 
karaṇatvasaṃbandhena bhāvanāyāmanvayaḥ tathā ca 
śrīvidyopāsanā'vyavahitapūrvavṛttidīkṣayā iṣṭaṃ bhāvayet iti 
viśiṣṭabodhaḥ | ata evotpattividhiḥ | sarvathā avaśyaṃ matimān 
pūrvoktabhūmikāmārūḍhaḥ [mārurukṣuḥ-a.] | etatpadasvārasyādeva 
ayamadhikāravidhirapi | tādṛśabhūmikām [ārurukṣoreva-a.] ārūḍhasyaiva 
adhikāro nānyasya iti siddham ||

nanu ekasminneva vidhau utpattividhitvaṃ adhikāravidhitvam ubhayaṃ kathamiti cet-
na citrayā yajeta paśukāmaḥ ityādau tathā dṛṣṭatvāt | na ca upāsanāyāmeva 
tādṛśabhūmikā'rūḍhasyādhikāra [rurukṣoradhi-a.] iti pūrvaṃ vyavasthitam | 
na hi dīkṣā upāsanā kathamatrāpi tādṛśādhikārapekṣā | yacca upāsanāyāṃ 
dīkṣāyā aṅgatvena yaḥ pradhāne adhikriyate so'ṅga [soṅgam-iti 
sādhīyānpāṭhaḥ] iti nyāyaprāptārthasya anuvāda eva matimān ityanena kṛt iti 
samādhānam tanna manoramam anuvādasya phalābhāvena vaiyyarthyāpatteḥ 
dīkṣāyāḥ svatantraphalavattvena anaṅgatvācceti | anenaiva 

p. 44)

tādṛśabhūmikā'rūḍhasya [rurukṣoḥ-a.] dīkṣā'dhikāro vidhīyate | 
upāsanāyāṃ dīkṣitasyaiva adhikāraḥ ityagre vakṣyati | tathā sati upāsanāyāṃ 
pūrvoktabhūmikā'rū.ḍhatvamārthikam [rurukṣutva-a.] ||

dīkṣāsvarūpatatphalanirūpaṇam 

nanu dīkṣātvaṃ kim ? na tāvadupāstiyogyatājanakakriyātvam 
upāstiyogyatājanakatvasya sattve pramāṇābhāvāt | na tāvat pratyakṣam alaukike 
saṃbhavati | nāpyanumānaṃ liṅgābhāvāt | nāpi darśapūrṇamāsābhyāṃ 
svargakāmo yajeta itivacchrutirasti yatastanirūpitaṃ kāraṇatvaṃ syāt | na ca 
vinopanayanaṃ yadvaddvijānāṃ sarvakarmasu | na yogyatā tathā'trāpi vinā 
dīkṣāṃ bhṛgūdvaha || iti tripurārahasye vyatirekavyāpteḥ daṇḍābhāve 
ghaṭābhāvaḥ itivat pratipādanāt vyatirekavyāptimūlaḥ kāryakāraṇabhāvaḥ 
sidhyati iti vācyam dīkṣita upāsīta ityupāsanā'dhikāristāvakatvāt |

tarhi dīkṣāyāḥ phalaṃ kimiti cet-ucyate | anantakoṭijanmasaṃcitaṃ yat 
pāparūpaṃ malaṃ tannāśaḥ | taduktaṃniśāṭanākhyāgamavyākhyāne 
[tantrālokavyākhyāne niśāṭanāmni-a.] tantrāloke-

dīkṣayā galite'pyantarajñāne pauruṣātmani |
dhīgatasyānivṛttatvādvikalpo'pi hi saṃbhavet ||
dehānta eva mokṣaḥ syāt pauruṣājñānahānitaḥ |
bauddhājñānanivṛttau tu vikalponmūlanāt dhruvam ||
tadaiva mokṣa ityuktaṃ dhātrā śrīmanniśāṭane || iti ||

asyārthaḥ-pauruṣaṃ bauddhaṃ ceti jñānaṃ dvividham | tatra pauruṣaṃ 
jñānaṃ svasvarūpātmakam | bauddhaṃ ca yanmahāvākyajanyaṃ 
caramavṛttirūpaṃ tattvajñānamityucyate | etadāvaraṇarūpamajñānamapi 
dvividham | tatra pauruṣaṃ puruṣaniṣṭhapātakam | bauddhaṃ bhedabuddhiḥ | tatra 
dīkṣayā pauruṣajñānanāśe'pi bauddhamalasya śāstrajñānenaiva nāśyatvāt 
dīkṣā'nantaramāgamasiddhāntajñānasaṃpādane tadaiva mokṣaḥ | yadi 
śāstrajñānaṃ na saṃpāditaṃ kevaladīkṣaiva jātā tasya dehānte muktiriti | na 
ca bauddhamalāsattve dehānte kathaṃ muktiriti śaṅkanīyam tripurārahasye

dīkṣāvantastu dehānte prāpya lokaṃ parāt param |
sadāśivena te samyak prabuddhāḥ śivarūpiṇā ||

iti tādṛśaśaṅkāyāḥ nirastatvāt | evaṃ 
śrautāgniṣṭomādidīkṣā'rthavāde'pi pāpmano'pahatyai iti śrūyate | evaṃ 
pūrvamīmāṃsāyāmapi dīkṣāyā yāgajanyāpūrvotpattau sasyādyutpattau 
karṣaṇamiva 

p. 45)

sthalasya ātmanaḥ śodhakatvamityeva siddhāntitam | brahmottarakhaṇḍe 
prathamādhyāye - rājñaḥ pañcākṣaramantrasya karṇapraveśamātreṇa 
taccharīrādanantāḥ kākāḥ nirgatāḥ iti liṅgaṃ ca | evaṃ paramānandatantre 
dīkṣānāmaniruktau-

dīyate śivasāyujyaṃ dīryate [kṣīyate-ba.] pāśabandhanam |
ato dīkṣeti kathitā......................

iti ca | evaṃ bahupramāṇānusāreṇa vyatirekavyāptipratipādakavacanasya 
arthavādarūpatvāt | tathā cāsya lakṣaṇasyāsaṃbhava eva syāt ||

etena saubhāgyānandasandohe dvādaśollāsasyāvataraṇaṃ adhunā tasyāḥ 
sāṅgopāsanayogyatāpratipādakadīkṣāṃ pṛcchati iti tanmukhyārthamanusṛtya 
samarthanamaśakyameva iti cet - na 
muktisādhanībhūtapauruṣamalanivṛttyarthakriyātvasyaivāduṣṭalakṣaṇatvāt ||

na ca prakṛtalakṣaṇavicārasya tadupajīvyakaimarthyavicārasya 
cānuṣṭhāne'nupayogāt kevalapāṇḍityaprakaṭinī kākadantaparīkṣeyamiti 
vācyam astyanuṣṭhāne vaiṣamyaṃ-yadi pūrvoktayogyatājanakaṃ tarhi 
dīkṣāsaṃkalpe yogyatāsiddhyarthamiti itarapakṣe pāpakṣayārthamiti ||

dīkṣāsaṃkalpaprakāravicāraḥ [itaḥ śiṣyasya 
dīkṣāgrahaṇasaṅkalpāyāvasarastadvicāraścāsti - anyacca 
sarvasaṅkalpaviṣayakajñānāya dvi. pari0-10 vi0-dṛśyaḥ ||]

yacca nityotsavanibandhe 
śrayaskāmo'hamamukavidyāgrahaṇārthamamukagurordīkṣāṃ grahīṣyāmi iti 
tadatyantānavadhānalikhitam | tathā hi-yacca śreyaskāma iti padaṃ tadāstāṃ 
kathaṃcitpāpanāśasyāpi śreyorūpatvāt | yacca amukavidyāgrahaṇārtham iti 
tadatyantamaśuddhaṃ dīkṣāyāḥ pāpakṣayaikasādhanatvasya vyavasthāpitatvāt 
| āstāṃ vā bandhyāputravat vidyāgrahaṇārthatvaṃ tathāpi śreyaskāma 
ityanenaiva tallābhe idaṃ padaṃ vyarthameva | na ca śreyovidyāgrahaṇamubhayaṃ 
phalam ataḥ dvayorullekhaḥ iti vācyam sarvebhyodarśapūrṇamāsau ityatra tayoḥ 
sarvaphalasādhanatve'pi prayogabhedenaiva bhinnaphalaṃ naikaprayogaṇa 
phaladvayamiti cāturthikanyāyaviruddhasya anādaraṇīyatvāt | ata eva tantraratne-
ekasyaikajātīyavyāpāreṇa niyataikajātīyaikaphalajanakatvaṃ loke dṛṣṭam | 
tatraikajātīyajanakatvaṃ sarvebhya iti vacanena bādhyatāṃ ekaphalajanakatva kena 
bādhyatām iti pārthasārathinoktam | kiṃ ca dīkṣāpadārthaḥ 
śaktipraveśacaraṇavinyāsamantropadeśarūpaḥ | tādṛśyāḥ dīkṣāyāḥ 
phalasādhanatvaṃ vā tadgrahaṇasya vā | ādye saṃkalpe 
phalasādhanībhūtakriyāmutpādayāmītyarthake phalasādhanakriyāvācakaṃ 
grahīṣyāmīti padaṃ vyartham | dvitīye grahaṇasya sādhanatvaṃ 

p. 46)

nirmūlaṃ pūrvavacanavirodhaśca | kiṃ ca-amukaguroḥ ityuccāraṇaphalaṃ 
dṛṣṭamadṛṣṭaṃ vā tithyādyuccāraṇavat | nādyaḥ ayaṃ mama gururbhavatu iti 
svecchāprakāśādanyat dṛṣṭaṃ phalaṃ durvacam | tacca tallikhitavaraṇenaiva 
bhavitumarhati kimetaduccāraṇena | nāntyaḥ deśakālau saṃkīrtya iti vacanāt 
teṣām apūrvajanakatvam | na hi gurunāmoccārya iti vacanamasti yenādṛṣṭaṃ 
tena bhavet |

kiṃ ca-tadabhimataṃ śreyovidyāgrahaṇarūpaphalaṃ svaniṣṭham | tathā sati 
grahīṣyāmi iti parasmaipadāntaprayogaḥ svaritañitaḥ kartrabhiprāye kriyāphale 
iti pāṇinyanuśāsanaviruddhaḥ | evaṃ anekadoṣagrastatvāt evaṃ 
saṃkalpastvanādaraṇīyaḥ | kiṃ tu pauruṣājñānanivṛttaye śrīvidyayā 
dīkṣiṣye iti saṃkalpa eva śreyān ||

tāntrikasaṃkalpāṅgabhūtaḥ aṣṭāṅgollekhaḥ [aṣṭāṅganirūpaṇamidaṃ 
keṣucidākareṣu nopalabhyate |]

śiṣyasaṃkalpe nāṣṭāṅgollekhaḥ dīkṣāhīnatvena tāntrike'nadhikārāt | agre 
gurusaṃkalpe tadullekha āvaśyakaḥ śiṣyasyāpi 
dīkṣā'nantarabhāvikarmaṇyullekhaḥ ||

nanu aṣṭāṅgasya sūtre anuktatvāt kimiti tadgrahaṇamiti cet-satyam | yadyapi nāsti 
grahaṇaṃ tathā'pi śrautasmārtādinikhilakarmasu ādau saṃkalpaḥ avyabhicarito 
dṛṣṭaḥ | prakṛte'pi tadvat saṃkalpa āvaśyakaḥ | saṃkalpasyāvaśyakatā mūle 
adhikataraṃ gāṇanāyakīyasaparyāmucyate | saṃkalpo nāma 
vidyamānadeśakālollekhanapūrvakaphalollekhanasahitaprakṛtakarmānuṣṭhāna-
viṣayiṇī pratijñā | taduktaṃ rahasyārṇave-

yatra deśe sādhakastu sthitastaddeśamuccaran |
ullikhya tatkālamapi pratijñā karmaṇastu yā |
phalamuddiśyāhamiti saṃkalpo jalahastataḥ || iti ||

tatra kālasya pañcāṅgataḥ aṣṭāṅgasya aśvapratigrahanyāyena 
saṃnikṛṣṭatvāt aṣṭāṅgollekhanaṃ sūtrānuyāyināmāvaśyakam | ataḥ 
aṣṭāṅgaṃ tatsādhanaprakāraśca ucyate || 

tatra aṣṭāṅgāni-1-yugaṃ 2-parivṛttiḥ 3-varṣaḥ 4-māsaḥ 5-divasaḥ 6-nityā 7-
vāraḥ 8-ghaṭikodayaḥ iti | tantraśāstre yugāni 36 ekasya yugasya parivṛttayaḥ 36 
ekasyāḥ parivṛtteḥ varṣāḥ 36 ekavarṣasya māsāḥ 16 ekamāsasya divasāḥ 36 
nityāḥ 30 vārāḥ 9 ghaṭikodayaḥ 5 | evamaṣṭāṅgasiddhāvupāyaḥ kathyate ||

p. 47)

tatrādau śālīvāhanaśakasādhanopāyaḥ kathyate |

ibhākṣiḥ 28 ṣaṣṭi 60 gaṇitaḥ 1680 ibhāgnyaṅkena 38 saṃyutaḥ |

narmadottarabhāge'tha tasyā dakṣiṇabhāgake |
aṅkaveda 48 yutaḥ kārya ibhākṣiḥ ṣaṣṭibhirhataḥ ||

prabhavādigatābdānāṃ saṃkhyayā yojayet punaḥ |
vartamānā śālivāhaśakasaṃkhyā samīritā ||

prabhāvādyakṣayāntānāṃ bhavet parivṛtistu yā |
vartamānā tadīyeyaṃ saṃkhyā'ṣṭāviṃśatiḥ smṛtā ||

itaḥ parivṛtisaṃkhyāṃ dṛṣṭvā ca tāṃ guṇet | ṣaṣṭibhistu śake jñāte na 
yatadīdṛśaśrīrme [iyaṃ śaṅkitākṣarā paṅktiḥ] 
vartamānaśālivāhanaśakasaṃkhyā nandādrikṣyāgni-3179-saṃyuktā 
gatakalyabdagaṇaḥ yathā śake-1755 asmin 3179 etadyoge gatakalyabdagaṇaḥ-4934 | 
evaṃ gatakalyabdagaṇaṃ sādhayitvā tasmāt ahargaṇasiddhyartham upāyaḥ 
kriyate |

gatakalyabdagaṇe naganavebhavedaiḥ-4897 ūnite 

śiṣyate yo'ṅkaḥ ekādidaśāntaḥ tatsaṃkhyākam aṅkajālaṃ 
dhruvakāṅkajāle vighaṭyādi dinānte yojayet | ekādaśaśeṣe 
prathamadaśamāṅkajāladvayaṃ dhruvake yojayet | ekaviṃśatiśeṣe prathamaṃ 
viṃśaṃ ca dhruvake yojayet | evamekatriṃśatamārabhya ekonaṣaṣṭiparyantaṃ 
jñeyam | tadrahasyamittham-nagana vebhavedairūnite kalyabdagaṇa yaḥ śeṣaḥ 
tasmin ṣaṣṭyā bhakte śeṣāṅkaiḥ lekhanasamaye yadi dvau tarhi 
tatsamasaṃkhyākam aṅkajālaṃ dhruvake yojayitvā vighaṭikādiṣaṣṭyā bhakta 
labdhamuparyupari yojayet | sa ca tadvarṣasaṃbandhimeṣasaṃkrāntyahargaṇaḥ | 
evaṃ sa gatakalyabdagaṇe'nenonitaikonapañcāśaccheṣaparyantaṃ ṣaṣṭyā 
bhāgo nāstīti yadā gatakalyabdaḥ etatsaṃkhyākastadā naganavebhavedanyūne 
ṣaṣṭisaṃkhyā śiṣṭā ṣaṣṭyā bhakte śeṣaḥ śūnyaṃ tadā śūnyāṅkajālaṃ 
dhruvake yojayet | sa meṣasaṃkrāntyahargaṇaḥ | yojyāni aṅkajālāni likhanti | 
prathamaṃ dvitīyaṃ caturthaṃ pañcamaṃ ṣaṣṭhaṃ saptamaṃ aṣṭamaṃ 
navamaṃ daśamaṃ viṃśaṃ triṃśaṃ catvāriṃśaṃ pañcāśat [pañcāśat-
ityetannāsti-a.] śūnyaṃ dhruvakāṅkajālam iti siddhāntajālāni | yadā 
gatakalyabdagaṇaḥ ibhabāṇāṅkavedasaṃkhyāko bhavati tadā varṣagaṇaḥ 
śailāṅke bhavedairūnitaḥ kāryaḥ | tato yaccheṣa ṣaṣṭyā bhakte yallabdhaṃ tena 
guṇitaṃ yacchūnyāṅkajālaṃ tatpūrvadhruvakāṅkajāle yojayitvā dhruvakaṃ 
saṃskṛtya paścāt prathamādyaṅkajālaṃ pūrvavadyojayitvā ahargaṇaṃ 
sādhayet | ibhaṣvaṅkavedanyūne gatakalyabdagaṇe uktadhruvakasaṃskāro nāsti | 
evamahargaṇaṃ sādhayitvā gaṇaṃ navabhirvibhajya śeṣo'tītavāsaraḥ tasya 
yallabdhaṃ 

p.48)

taccaturbhirvibhajya tallabdhaṃ pṛthak saṃsthāpya taccheṣaṃ navabhirviguṇya tatra 
gatavārasaṃkhyāṃ yojayet evaṃ sati sā saṃkhyā gatadivasasya jñeyā | 
pūrvasthāpitalabdhe ṣoḍaśabhirbhakte śeṣogatamāsasaṃkhyā bhavati | tallabdhe 
ṣaṭtriṃśatā vibhakte śeṣogatavatsarasaṃkhyā | tallabdhaṃ pañcāśadyutaṃ 
ṣaṭtriṃśadbhaktaṃ śeṣaṃ gataparivṛttisaṃkhyā | labdha gatayugasaṃkhyā | 
evaṃ meṣasaṃkrāntikālīnāhargaṇe sādhite taduttaraṃ madhye yadā 
kadācidahargaṇasādhanecchāyāṃ tadupāya ucyate | tatra meṣamārabhya yasmin 
dine ahargaṇanecchā tadavyavahitapūrvaṃ saṃkrāntiḥ yā tadīyāṃ 
vakṣyamāṇāṃ saṃkhyāṃm ahargaṇe yojayitvā tatsaṃkrāntimārabhya 
iṣṭadinaparyantamatikrāntā yāvanto divasāḥ tāvatsaṃkhyāṃ yojayet | 
iṣṭadināhargaṇaṃ bhavati | tatravṛṣe mithune karke siṃhe kanyāyāṃ tulāyāṃ 
vṛścike dhanuṣi makare kuṃbhe mīne itaḥ paraṃ yugādighaṭikāntānāṃ 
nāmocyate | yugaparivṛttivarṣāṇāṃ ṣaṭtriṃśatāṃ krameṇa ādikṣāntānāṃ 
varṇānāṃ nāmāni yathā prathamam akārātmakayugaṃ ayugaṃ kayugaṃ 
dvitīyam evamagre'pi parivṛttivarṣeṣu jñeyam | māsānāṃ ṣoḍaśānāṃ 
krameṇa ṣoḍaśasvarāḥ nāmāni | ṣaṭtriṃśaddivaseṣu yugapat 
ṣaṭtriṃśadakārādikṣakārāntāḥ varṇāḥ sānusvārāḥ 
śivādyavaniparyantaṃ ṣaṭtriṃśacattvāni ca militvā krameṇa nāmāni | yathā-
aṃ śivatattvadivasa iti | caramasvararahitā akārādyanusvārāntāḥ 
anulomavilomena triṃśadvarṇāḥ | kāmeśvaryādi citrāntāḥ pañcadaśa nityāḥ 
anulomavilomāśca militvā triṃśat | nityānāma yathā-aṃ kāmeśvarī 
nityāyāmiti | vārāṇāṃ navānāṃ krameṇa a ka ca ṭa ta pa ya śa ṣāḥ iti 
varṇāḥ nava | prakāśānandanātha-vimarśānandanātha-ānandānandanātha-
jñānānandanātha-satyānandanātha-pūrṇānandanātha-svabhāvānandanātha-
pratibhānadannātha-subhagānandanātheti navanāthāḥ | vāravarṇā ye nava 
tadyuktanavanāthāḥ krameṇa navavārāḥ | yathā-aṃ 

prakāśānandanāthavāsara iti |

udayaghaṭikānāṃ pañcānāṃ nāma krameṇa-a e ca ta ya iti pañca varṇāḥ 
jñeyāḥ | evamaṣṭāṅgollekhaḥ tāntrikakarmādāvāvaśyakaḥ | deśasya tantre 
anuktatvāt smārtasyaivollekhaḥ ||

kecittu tāntriko'ṣṭāṅgo na sahaja iti śāstraprasiddhakālasya samuccayamicchanti 
deśakālau samullikhya cāṣṭāṅgasthitimeva ca iti paramānandatantrānusāreṇa | 
tanna deśakālāvityatra kālaḥ kīdṛśaḥ ityākāṃkṣāpūrakaṃ 
tantrasthāṣṭāṅgapadaṃ na tu samuccayavidhāyakam evakārasvārasyāt ||

evamagre amukagotro amukaśākhā'dhyāyī amukaśarmādirahaṃ 
caturvidhapuruṣārthasiddhyarthaṃ sveṣṭānugrahāya amukagotra 
amukaśākhā'dhyāyinaṃ amukaśarmāṇa tvāṃ gurutvena vṛṇe iti saṃkalpaḥ 
kiṃ kalpasūtrānusāreṇa-

bahvalpaṃ vā svagṛhyoktaṃ yasya yāvat prakīrtitam |
tasya tāvati śāstrārthe kṛte sarvaḥ kṛto bhavet ||

p. 49)

iti vacanamanusṛtya tantrāntarānupasaṃhāreṇa ayaṃ prayogaḥ kiṃ 
sarvatantramupasaṃhṛtya kiṃ svecchayā | nādyaḥ sūtre varaṇasya anuktatvāt | 
dvitīye tantrāntare 
pratimābrahmādivaraṇacarunirmāṇatadbhakṣaṇādityāgo'nucitaḥ | tṛtīyaśca 
svakapolakalpito'śraddheya eva | kiṃ ca tantrāntare-

kartuṃ kārayituṃ caiva dīkṣākarma maheśvari |
ācāryatvena tvāṃ vṛṇe iti pādasamīpataḥ ||

iti varaṇe kariṣyamāṇe'pi dīkṣākarmaṇi ācāryaṃ vṛṇe ityeva vaktavyamiti 
vadati | sarvatra śraute smārte ca ṛtvigvaraṇe-asminnagnyādhāne'dhvaryuṃ tvāṃ 
vṛṇe asminnudyāpanākhye karmaṇi ācāryaṃ tvāmahaṃ vṛṇe ityācāro 
dṛśyate | iha tu karma nāma tyaktvā phalavācakaṃ puruṣārthasiddhyartham-
anugrahārthaṃ ceti varaṇavākye likhitam | tadatīva citram | tasmāt 
sūtrānusāribhiḥ varaṇaṃ na kāryam | na ca varaṇābhāve guruṇā avṛtena 
karma kathaṃ kāryam-iti vācyam tvaṃ mama dīkṣāṃ kuru iti laukikavaraṇenāpi 
tatsaṃbhavāt | na hi vayaṃ sarvathā nirākurmo varaṇaṃ karmāṅgamityeva 
brūmaḥ ||

evameva puṇyāhavācananāndīśrāddhe na kārye anuktatvāt | na ca 
tantrāntaropasaṃhāro mā bhavatu tathā'pi smṛtiprāptaṃ puṇyāhavācanaṃ 
nāndīśrāddhaṃ ca anivāryam anyathā-kṣute ācāmet iti prāptācamanamapi na 
syāt iti vācyam yadi puṇyāhavācananāndīśrāddhe tāntrike smṛtiprāpte 
evānuvartete tarhi tantrāntare-

gaṇeśaṃ pūjya puṇyāhaṃ vācya nāndīmukhān yajet |

iti vidhiḥ vyartha eva syāt | tasmāt smārtapuṇyāhādidharmāḥ karmāṅgatvena 
nāyānti ityatra idameva jñāpakam | yacca kṣute ācāmet na kalañjaṃ bhakṣayet 
iti puruṣārthaṃ tacca prāptamaparihāryam ||

na ca evaṃ śiṣyagurulakṣaṇadharmāṇāmapi prāptiḥ na syāt iti vācyam asti 
tasya prāptyavakāśaḥ | tatra yena vinā ākāṃkṣā na pūryate tacca 
tantrāntarasthamapi gṛhītvā ākāṃkṣāṃ pūrayet | śābdabodhe ākāṃkṣā 
dvividhā utthitā utthāpyā ceti | yathā ādyā pacatītyukte kaṃ pacati kena pacati 
kaḥ pacatīti | dvitīyā stokaṃ pacatīti | tatra stokapadasya vaiyyarthyabhiyā kathaṃ 
pacati ityākāṃkṣā utthāpyā | prathamasthale svata utthitāyāḥ 
śābdākāṃkṣāyāḥ śabdamantarā'nivṛtteḥ adhyāhṛtasya sthalāntarasthasya 
vā śabdasya pūraṇamāvaśyakam | tatra adhyāhārāt varaṃ 
tantrāntarasthaśabdenaiva ākāṃkṣāpūraṇam | evaṃ sati matimān [idamanugata-
43-patrasthaṃ 31 sūtram |] dīkṣeta ityukte matimattvasya kevalasya 
avyāvartakatayā kīdṛśaṃ matimattvam-ityākāṃkṣā avaśyamudeti | 

p. 50)

uditākāṃkṣāpūrakaṃ tantrāntaroktaśiṣyalakṣaṇavattvameva matimattvaṃ 
kalpyate | evaṃ gurau sadguruḥ [idamapyagre-53-patrasthaṃ 34 sūtram |] kramaṃ 
pravartya ityagrimasūtre uktatvāt sattvaṃ kim-ityākāṃkṣāpūrakatayā 
gurulakṣaṇāni ca yojyāni | ata eva baudhāyanācāryāḥ-tānna mithaḥ 
saṃsādayet ityāhuḥ | atra bhavasvāmī tān śālikīśākhoktān pakṣān 
tadanyaśākhī na saṃsādayet ekaprayoge melanaṃ na kuryāt | brāhmaṇānāṃ 
bahutvāt śākhānāmanantatvāt tadarthasya cāsarvajñena 
upasaṃhartumaśakyatvāt tāvanmātraṃ sukhaṃ buddhvā anuṣṭhāya sarve 
karmaphalaṃ prāpnuyuḥ iti kalpasūtrāṇyārabdhāni ācāryaiḥ iti |

asyāpavādastatraiva aviśeṣoktaiḥ viśeṣoktāśca śeṣatvena saṃbadhyante iti | atra 
bhavasvāmī-aviśeṣoktaiḥ viśeṣoktāḥ sāmānyata uktasya guṇaviśeṣāḥ 
anyasūtroktā api śeṣatvena aṅgatvena saṃbadhyanta iti | tānna mithaḥ 
saṃsādayet ityasyodāharaṇaṃ yathā baudhāyane somābhiṣavārthaṃ 
kevalavasatīvarīgrahaṇam | sūtrāntare vasatīvarīṇāṃ ekadhānānāmapi 
samuccayaḥ | tadanusāreṇa baudhāyanānāmekadhānāprāptau tānna mithaḥ 
saṃsādayet iti | evaṃ baudhāyane kevalaṃ śākhāchedanamātramuktam | 
anyasūtre śākhāchedanamāharaṇaṃ ca samantrakam | tānapi na saṃsādayet | 
anayā diśā anyānyapyudāhāryāṇi | etadapavādodāharaṇaṃ yathā 
baudhāyane palāśaśākhaiva sānnāyye vihitā tasyāstatsūtriṇāmalābhe 
sūtrāntaroktaśamīśākhā grāhyeti | tatra mūlam-uktalābhe kīdṛśī śākhā 
grāhyeti utthitākāṃkṣāvattvāt tatpūrakaṃ sūtrāntaraṃ 
śamīśākhāvidhāyakam | evaṃ baudhāyane-agnīnanvādadhāti ityaviśeṣeṇa 
vihitam | kathamanvādhānaṃ kartavyamiti viśeṣākāṃkṣāyām-apareṇa 
gārhapatyamupasthaṃ kṛtvā iti ūrdhvajñurāsīno'nvāhāryapacanam- 
[atrādhvaryu-iti saṃbhāvyet |] iti sūtrāntaroktadharmāḥ śeṣatvenānvetumarhanti 
| na tathā pūrvoktaikadhānā'kāṃkṣā'sti | ato na samuccayaḥ |

etena etatsūtrānusāribhirapi tantrāntaroktaṃ pātratrayaṃ pātracatuṣṭayaṃ 
vāsādanīyamiti yadabruvan tadasādhviti sphuṭam | yadyaviśeṣeṇa 
pātrāsādanaṃ kuryādityeva syāt tadā kati pātrāṇi kathamāsādayet iti 
viśeṣākāṃkṣā udeti | tadā tadapavādaśāstrapravṛttirapi syāt | na caivamihāsti 
yena tathā syāt |

etena nibandhe sāmayikānāṃ svasya ca tattvaśodhanārthaṃ devyāḥ 
paścādbhāge laukikaṃ kalaśaṃ saṃsthāpya saṃskṛtadravyaṃ kiṃcit kṣipet iti 
lekho'pi nirmūlaḥ śiṣṭaiḥ sārdhaṃ cidagnau haviḥśeṣaṃ hutvā iti 
viśeṣārghyaśeṣasyaiva pratipattikathanāt |

p. 51)

ata eva baudhāyanācāryāḥ śāstrasaṅkaraṃ na kuryādityuktvā saṅkarakaraṇe 
pratyavāyamapyāhuḥ-

svaśāstre vartamāno yaḥ paraśāstreṇa vartate |
bhrūṇahatyāsamaṃ tasya svaśāstramavamanyataḥ || iti ||

na caivaṃ pūrvoktarītyā anuṣṭhitirudāsīnasthale bhavatu yasyākaraṇe 
śāstrāntare nindā bahvī tasyānuṣṭhānaṃ sarvaiḥ kāryam iti vācyam 
ātañcanaprakaraṇe tadyatkvalaiḥ [tadva-a.] rākṣasam iti kvalanindāṃ kṛtvā 
dadhnā'tanakti iti śākhā'ntare vihitam | tadanyaśākhāyāṃ auṣadhayaḥ 
pūtikāḥ kvalāḥ iti kvalaiḥ ātañcanaṃ vihitam | evaṃ 
patnīsaṃyājāsamiṣṭayajuranuṣṭhāne [pitryāyāṃ sami-ba ba 1.] bahunindā 
kvacicchrūyate | baudhāyanairnindā na kṛtā | tāvataiva paranindāmanādṛtya 
samiṣṭayajuranuṣṭhānaṃ baudhāyanānuyāyinaḥ kurvanti śiṣṭāḥ | tasmāt 
paraśāstre nindā akiñcitkarā |

na ca tripurārahasye-

tantrānuktaṃ sūcitaṃ tu tathā'nyeṣvapi dūṣitam |
akṛtaṃ karma yadrāma [ḍāmarivi-a a 1.] vikalpanavivarjitam |
tadanyasmādupādeyameṣa śāstrasya nirṇayaḥ ||

ityasyāḥ gativiraha iti vācyam yasyānanuṣṭhāne paraśāstre nindā svaśāstre ca 
vikalpaḥ tasya tatra nindā yadviṣaye paraśāstre tadādartavyaṃ tāvatā 
svaśāstrahānivirahāt | yathā āpastambasūtre vājapeye agnicayananindā 
baudhāyane na nindā kṛtā kiṃtu codakaśāstreṇa uttaravedyā saha vikalpitam | 
tatra svaśāstrasya uttaravedyanuṣṭhāne'pi hānyabhāvāt 
niṣedho'pyanugrāhyaḥ-uttaravedirevānuṣṭheyā ca cayanamiti ||

tathā atrāpi tādṛśasthale anuṣṭhānārtham idaṃ vacanam na nityavacchrutasya 
śāstrasya bādhārtham | etadvacanasya gatyataraṃ śrīvidyāprakaraṇe vistareṇa 
vakṣyāmaḥ ||

astu vā [asyādhastanabhāṣyagataphalādhikyam-ityanenānvayaḥ |]-

niṣiddhaṃ varjayettantrāntare kiṃcinmaheśvari |
yatastadekaśāstraṃ vai mantraikyāddevataikyataḥ |
tasmāt svaśāstre yatkiṃcinniṣiddhaṃ parivarjayet 

p. 52)

anyatsvatantrānuktaṃ tu samartha upasaṃharet |
svatantreṇāviruddhaṃ tu yāvadanyat samācaret |
tāvadabhyudayādhikyaṃ bhavettasya tu niścitam |
ākāṃkṣitaṃ cāpyanyasmādāharedeva kiṃcana ||

iti tantrāntaravacanānusāreṇa puṇyāhavācanādīnām upasaṃhāre 
phalādhikyam | ananuṣṭhāne avaiguṇyamiti rahasyam |

pātrādhikyaṃ ca svaśāstraviruddhaṃ heyameva vastuto likhitatantravacasām agre 
[agre nāma-āgāmini 3 khaṇḍastha śrīkramīye 31 sūtrabhāṣyāntagranthe |] 
pātrāsādanaprakaraṇe vakṣyamāṇarītyā gatisaṃbhavāt 
anupapattileśābhāvāt | ekaprayoge yatsūcitam ākāṃkṣitaṃ karmasāmānye 
avyabhicaritasaṃbandhaṃ ca [tat] anyasmāt grāhyaṃ nānyaditi rāddhāntaḥ | 
etadvitatyāgre spaṣṭīkariṣyāmaḥ |

itthaṃ ca yaḥ puruṣaḥ sarvatantrāṇyupasaṃhṛtya yāvadaṅgeṣviyattāṃ 
saṃpādya ekarūpaṃ prayogavidhiṃ nirmāya anuṣṭhātuṃ samarthaḥ tasya 
sarvajñasya tādṛśakarmaṇaḥ śreyo'dhikyaṃ bhaviṣyatveva | 
yastvetādṛśe'samarthaḥ saḥ tvākāṃkṣitādimātraṃ tantrāntarāt gṛhītvā 
svaśāstramātrānuṣṭhānena kṛtārtho bhaviṣyatyeva | na tu tantrāntarasthānāṃ 
keṣāṃcidupasaṃhāraḥ keṣāṃcidanupasaṃhāraḥ ityardhajaratīyanyāyo yuktaḥ 
| nibandhakāro nyāyagandhamajānan svecchayā kānicidupasaṃharan kānicit 
parityajan devānāṃ priya iti mantavya ityalamatilekhanena ||

sarvathetyanena [etatpracaladekatriṃśasūtrasthaḥ sarvathā śabdo'tra bodhyaḥ |] 
dīkṣāṃ vinā nātyantikī muktiḥ iti sūcitam | tatra spaṣṭaṃ pramāṇaṃ 
tripurārahasyasthaṃ pūrvameva likhitam || 31 ||

dīkṣātrayam 

evaṃ dīkṣāṃ vidhāya tatra avāntarabhedavatīṣu tāsu ekakālasaṃbandhaṃ 
vidhātum ādau tāṃ vibhajya vibhāgaprayojakaṃ dharmaṃ ca pradarśya tāsu 
tisṛṣvapi ekakālasaṃbandharūpaṃ guṇaṃ vidhatte-

dīkṣāstisraḥ śāktī śāṃbhavī māntrī ceti |
tatra śāktī śaktipraveśanāt śāmbhavī caraṇavinyāsāt 
māntrī mantropadiṣṭayā sarvāśca kuryāt || 32 ||

cetītyantena vibhāgaṃ kṛtvā tāsāṃ nāmakathanam | tatra tāsu madhye 
śāktītyasyārthaṃ vivṛṇoti śaktipraveśanāt | jāteti śeṣaḥ | yadvā-
śaktipraveśanāt iti hetau pañcamī |

p. 53)

śaktipraveśanādyā dīkṣā śaktipraveśahetukītyarthaḥ | evamevāgre'pi | 
praveśanāditi svārthe lyuṭ | śaktipraveśanaṃ nāma agre [agre nāmātraiva 
dīkṣāvidhau-35-36 sūtrayorityarthaḥ |] tadamṛtakṣālitam ityārabhya pāśān 
dagdhvā ityantapratipāditā kriyā | caraṇavinyāso nāma śiṣyaśirasi 
gurukartṛkaṃ kāmeśvarīkāmeśvarayoḥ raktaśuklacaraṇabhāvanam | 
mantropadeśastu spaṣṭaḥ 
śiṣyamātraśrāvaṇaviṣayagurukartṛkaśabdoccāraṇarūpaḥ | sarvāḥ 
pūrvoktāḥ | tisraścetyanena ekakālasaṃbandhaḥ tāsu bodhyate | ca śabdaḥ 
sāhityavācī | sāhityaṃ ca ekakālasaṃbaddhatvarūpam | tathā ca sarvāḥ 
dīkṣāḥ saha kuryāditi phalito'rthaḥ || 32 ||

pareṣāṃ matamāha-

ekaikāṃ vetyeke || 33 ||

vīpsayā trayāṇāṃ samuccayaḥ kālabhedamātramiti jñāpitam | vākāreṇa 
madhye cirakālavyavadhānaṃ kāryaṃ na tu divasatraya iti sūcitam || 33 ||

itaḥ paraṃ gurukartṛkāṃmāha-

sadguruḥ [ito gururdīkṣādānavidhimārabhate |] kramaṃ pravartya sāṅgaṃ hutvā 
taruṇollāsavān śiṣyamāhūya vāsasā mukhaṃ baddhvā 
gaṇapatilalitāśyāmāvārtālīparāpātrabindubhistamavokṣya siddhāntaṃ 
śrāvayitvā || 34 ||

sāṅgam aṅgaiḥsahitaṃ kramaṃ pradhānadevatāpūjāṃ pravartya kṛtvā | atra 
aṅgāni gaṇapatiśyāmāvārtālīparāḥ | pradhānaṃ ca lalitā | atra aṅgapadena 
aṅgakramo lakṣyate | aṅgakramasahitaṃ pradhānakramamityarthaḥ || 

nanu idaṃ kathaṃ jñātamiti cet-śṛṇu | atraiva dvitīyakhaṇḍārambhe itthaṃ 
[dvitīyakhaṇḍasya prathamasūtre itthaṃ sadityādi 1 sūtramasti |] 
sadgurorāhitadīkṣaḥ mahāvidyā'rādhanapratyūhāpohāya gāṇanāyakīṃ 
paddhatimāmṛśet ityatra vighnāpohāya yatkriyate tatpradhānam [aṅgaṃ] loke 
dṛṣṭam | yathā rājadarśanārthamudyuktasya madhye dvārapālaiḥ nirodhe kṛte 
sati tadupāsanaṃ rājadarśanāṅgamiti | na ca prāṇimātrasya 
vighnaśaṃkāsattvāt vighnanāśako gaṇapatiriti ghaṇṭāghoṣāt 
vighnaparihārārthaṃ yathā karmamātre gaṇapatyārādhanaṃ tathā atrāpi 
prāptameveti idaṃ vacanaṃ vyarthamiti vācyam vināyakastavapāṭhenāpi 
kvacidvighnanāśapratipādanāt ārādhanasya pakṣe prāptau 
śrīvidyopāstivighnanirāso'nenaiva kārya iti niyamavidhisaṃbhavāt | evaṃ 
tṛtīyakhaṇḍādau evaṃ gaṇapatimiṣṭvā vidhūtasamastavighnavyatikaraḥ 
śakticakraikanāyikāyāḥ śrīlalitāyāḥ 

p. 54)

kramamārabheta iti ktvāpratyayenāpi agniṃ citvā sautrāmaṇyā yajeta itivat 
lalitopāstyaṅgatvaṃ spaṣṭam | na ca agniṃ citveti vākye pūrvakarmaṇaḥ 
pradhānatvam uttarakarmaṇo'ṅgatvaṃ 
tadvadatrottaramanuṣṭhīyamānalalitopāsteḥ gaṇapatyārādhanāṅgattvāpattiḥ iti 
vācyam na hi ktvāpratyayenaiva pūrvavartinaḥ cayanasya prādhānyanirṇayaḥ 
kiṃ tu prajākāmaścinvīta paśukāmaścinvīta iti phalavattvāt citeḥ 
pradhānatvaṃ tatsannidhau aphalasautrāmaṇeḥ phalavatsannidhāvaphalaṃ 
tadaṅgam iti nyāyena sautrāmaṇyā aṅgatvam | tathā lalitopāsteḥ 
muktiphalakatvaśrutyā vighnopāstidvārā śrīlalitopāsanāyāḥ yatphalaṃ tadeva 
tasyetyaṅgatvaṃ kḷptam | ata eva revatīṣu vāravantīyaṃ sāma kṛtvā 
paśukāmo hyetena yajeta ityatra vāravantīyasāgno na prādhānyam | na ca 
darśapūrṇamāsābhyāmiṣṭvā somena yajeta itivat kevalapaurvāparyavidhireva 
kiṃ na syāt iti vācyam | tatra somena yajeta ityanena somasya darśapūrṇamāsayoḥ 
yadāgneyādivākyaiḥ utpannatvāt kevalakramamātravidhāyakatvam prakṛte ca 
lalitākramotpattivākyāntarābhāvāt kramaviśiṣṭakarmavidhānāt | kiṃ ca tatra 
dvayoḥ svatantraphalavattvena atra tathātvābhāvācca na 
kramamātravidhāyakatvaṃ na vā aṅgāṅgibhāvahāniḥ || 

etena itthaṃ [idaṃ 7 khaṇḍe śrīvārāhīkrame-1 sūtrastham |] 
saṅgītamātṛkāmiṣṭvā kolamukhīṃ vidhivad varivasyeta ityatrāpi 
parasparāṅgāṅgībhāvāpattiriti nirastā ubhayorapi 
rājadarśanarūpaphalakattvena svatantraphalābhāvāt || 

na ca evaṃ sati sautrāmaṇivat pratiprayogamāvṛttyāpattiḥ iti vācyam | na hi 
vayaṃ pradhānāṅgamiti brūmaḥ kiṃtu lalitākramārambhāṅgaṃ 
anvārambhaṇīyāvat | ata eva tasmin vākye lalitākramamārabheta iti śrutam | 
svakartṛkopāstikriyādhvaṃsānadhikaraṇakṣaṇasaṃbandhikramaṃ nirvartayiṣya 
iti saṃkalpa eva āraṃbhapadārthaḥ | ayaṃ sakṛdeva | ato nāvṛttyāpattiḥ ||

etena brāhme muhūrte gaṇapatyupāsanāṅgattvena hṛdayakamale 
gaṇeśadhyānaṃ lalitopāsto tasyā dhyānaṃ caikakāle prāptaṃ viruddhamiti 
śaṃkā'pi nirastā ||

evaṃ śyāmāyā apyaṅgattvaṃ śyāmopāstikhaṇḍe tasyāḥ 
pradhānasacivapadaṃ śyāmā ityanena kolamukhyāśca tatsaparyākhaṇḍe 
mahārājñyāḥ daṇḍanāyikāsthānīyā ityanena parāyāśca 
śiṃhāsanavidyāyāḥ hṛdayaṃ ityanena ca suspaṣṭam ||

tasmādimā aṅgadevatāḥ | tāsāṃ kramasahitaṃ pradhānadevatāyāḥ kramaṃ 
kṛtvā ityarthaḥ phalitaḥ ||

p. 55)

yadyapi pradhānadevatopāstau imāḥ aṅgadevatā iti aṅgapadena vyavahāro 
bhavatu | prakṛtapūjāyāṃ pañcāpi [atra pañcaśabdena gaṇapati lalitā śyāmā 
vārtālī pareti pañcakaṃ jñeyam |] samapradhānāni | anyatra kḷptāṅgatvaṃ 
gṛhītvā tenaiva rūpeṇa gaṇapatyādīn bodhayitvā sahaśabdena sarveṣāṃ 
tantrānuṣṭhānamātraṃ vidhīyate | tantre sati devatākramaḥ pāṭhakrama eva | 

agre vakṣyamāṇa yāvadaṅgakalāpo nāmātideśena prāptaḥ | tatrāṅgānāṃ 
yeṣāṃ tantraṃ saṃbhavati teṣāṃ tathaivānuṣṭhānam | yeṣāṃ 
viruddhadharmāṇāṃ na saṃbhavati teṣāṃ padārthānusamayena [idaṃ 
padārthānusamayakāṇḍānusamayalakṣaṇaṃ-ddi. pariśiṣṭe 8-viṣaye dṛśyam |] | 
yeṣāṃ ca padārthānusamayo na saṃbhavati teṣāṃ kāṇḍānusamayena | 
yathāyathaṃ buddhimatā hi kāryaṃ granthavistarabhayānneha likhyate || 

kramaṃ [kramaṃ pravartya-ityādi anugata 53-patrasthaṃ-34-sūtrasthaṃ padam |] 
pravartyetyanenaiva homasya prāptau hutvā [idamapyadhastāddṛśyam-] iti 
homottarakālasya śiṣyāhvānāṅgatā siddhyartham ||

adyapyagre kramāvasare homasya vaikalpikatvāt atrāpi vikalpena prāptau 
nityatvadyotanāya hutvetyapi vaktuṃ śakyam tathā'pi agre gaṇapati-lalitā-
śyāmā-vārtālī-parā-pātrabindubhiḥ tamavokṣya iti vacanāt 
kramasamāptirnāstīti siddham | tarhi kadā śiṣyāhvānaṃ kāryamiti 
kālākāṃkṣāsattvāt tadvidhānamevocitaṃ na tūbhayavidhiḥ 
vākyabhedaprasaṅgāt | homasyākaraṇapakṣe'pi tadupalakṣitakālottaratvaṃ 
saṃbhavati vatsairamāvāsyāyām itivat |

etena nibandhe viśeṣapātravisarjanānte śiṣyamāhūyeti nirastaḥ | sarveṣāṃ 
viśeṣārghyapātrodvāsanena taccheṣābhāvena 
pātrapañcakasāmānyārghyodakabindubhiḥ tamavokṣyeti svalekhanasyaiva 
sandarbhaviruddhatvācca || 

vastutastu hutveti svātmani haviśśeṣaṃ hutvetyarthaḥ svarasaḥ | ata eva 
tādṛśāhutijanitataruṇollāsavān iti vakṣyamāṇaḥ svarasaḥ 
taruṇollāso'vasthāviśeṣaḥ | tasya vivaraṇaṃ caraṇakhaṇḍavyākhyāne 
spaṣṭam [idaṃ-10-khaṇḍe-82-sūtre-18-khaṇḍe-18-sūtre ca kiñcit kiñcit |] ||

śiṣyamāhūya ityanena tāvatparyantaṃ śiṣyasyāntaḥpraveśo nāstīti jñāpitam 
| tannāma sambuddhyantamuccārya ehīti vadet | yathā pravargye gavāmāhvānaṃ 
karmāṅgam idamapi tathā karmāṅgam | tenopāyāntareṇa āgamanaviṣayaṃ 
svābhiprāyaṃ na prakaṭayet ityarthaḥ ||

p. 56)

etena nibandhe varaṇānantaraṃ tadaiva saśiṣyo viviktaṃ dīkṣāpradeśamāsadyeti 
lekhaḥ parāstaḥ samīpavartiśiṣyasya āhvānāsaṃbhavāt na ca adṛṣṭārtham 
āhvānam iti vācyam dṛṣṭe saṃbhavati adṛṣṭakalpanāyā anyāyyatvāt ||

śeṣaṃ spaṣṭam || 

atra pātrapadena [pātraśabdenātrānugata 53-patrastha-34-sūtrastha-
pātrabindumirityetatpadastha pātraśabdotra grāhyaḥ |] viśeṣārghyapātraṃ 
grāhyam | kathametaditi cet-ittham | yadi sāmānyārghyapātrameva syāt tasya 
praṇītāvat tantrasiddheḥ tasya sarvasaṃbandhina ekatvāt 
sāmānyārghyabindubhiriti laghu sūtritaṃ syāt | na ca tvatpakṣe'pi 
viśeṣārghyapātrāṇāṃ bindubhiriti laghusūtrasaṃbhavāt 
gaṇapatilalitetyādiprayāso vyartha iti vācyam evaṃ sati 
vidheyasaṃkhyāvācakabahutvasya tritve kapiñjalādhikaraṇanyāyena 
paryavasānāt pañcapātrāṇāmalābha eva | na ca evamapi 
pañcaviśeṣārghyapātrairiti laghusūtraṃ saṃbhavati iti vācyam na vayaṃ sūtre 
akṣarādhikyaṃ nyūnatvaṃ vā hetutvenopadiśāmaḥ kiṃ tu 
sāmānyārghyapakṣe tasyaikatvāt parā'ntaṃ vyartham | viśeṣārghyapakṣe 
pañcapātralābhāyeti sārthakam | akṣarādhikyaṃ ca svatantreccheṣu 
niyantumaśakyam ||

vastutastu na praṇītāvattantraṃ sāmānyapātrasya gaṇapatilalitā'diṣu 
sāmānyārghyasaṃskārasya ekarūpatvābhāvāt bhinnadharmayoḥ 
tantrāsaṃbhavāt | na ca bhinnadharmāṇāṃ pradhānānāṃ kathaṃ tantramiti 
śaṅkyam | pradhānānāṃ sahānuṣṭhānaṃ tantraṃ na tu sakṛdanuṣṭhānam | 
iha tu sakṛdanuṣṭhānamuktam ayuktameva sahānuṣṭhānaṃ tu bhavatyeva | ato 
nedaṃ gamakaṃ pātrapadena viśeṣārghyagrahaṇe kiṃtu hutvā 
taruṇollāsavānityuktvā paścāt pātrabindubhirityuktatvāt 
homasādhanībhūtadravyaṃ buddhisthaṃ pātrapadena lakṣyate natvabuddhisthaṃ 
sāmānyārghyadravyam | kiṃ ca binduśabdo mukhyadravye tāntrikāṇāṃ 
saṃketasiddhaḥ bindutarpaṇasaṃtuṣṭā iti lalitā sahasranāmni vyavahārāt | ata 
eva binduśabdo'pi gamakaḥ | itthaṃ ca viśeṣārghyagrahaṇe idameva jñāpakam ||

ta śiṣyam avokṣya prokṣya | idaṃ śiṣyasaṃskārarūpatvāt gurukarma | śeṣaṃ 
sugamam ||

etena nibandhe gaṇapatyādimūlamuccārayan 
pātrapaṃcakasāmānyārghyodakabindubhiḥ tamavokṣya iti yā paṅktiḥ tatra 
mūlamuccārayanniti svakapolakalpitā sarvā nirmalā ||

siddhāntaṃ siddhāntapratipādakavākyasamūhaṃ pūrvoktaṃ [pūrvoktaśabdena 
anugata-3-sūtrataḥ-31-sūtrāntoktajñānaśikṣādivākyānītyarthaḥ |] 
śrāvayitvā | idaṃ śrāvaṇam adṛṣṭārthaṃ kḷptīrvācayati itivat 
nā'rthajñānārtham atigahanasyārthasya tāvatā kālena bodhāsaṃbhavāt | 
tasmāt pūrvoktavākyāni [pūrvoktaśabdena anugata-3-sūtrataḥ-31-
sūtrāntoktajñānaśikṣādivākyānītyarthaḥ |] 
dīkṣā'pūrvasahakāryapūrvajanakatvena śrāvayet || 34 ||

p. 57) śāmbhavī dīkṣā

atha śāmbhavīdīkṣāmāha-

tacchirasi raktaśuklacaraṇaṃ bhāvayitvā tadamṛtakṣālitaṃ 
sarvaśarīramalaṅkuryāt || 35 ||

tacchirasi śiṣyasya śirasi | raktaśuklacaraṇaṃ-raktaṃ kāmeśvaryāḥ 
rajassvabhāvāt | taduktaṃ-raktacaraṇāṃ dhyāyet parāmambikām iti | 
śyāmārahasye'pi-

raktaṃ tu caraṇaṃ devyā rajorūpaṃ prakīrtitam |
śuklaṃ ca tadadhiṣṭhānacaraṇaṃ sātvikaṃ bhavet || iti ||

etena śuklacaraṇamapi vyākhyātam | prāṇyaṅgatvādekavadbhāvaḥ bhāvayitvā 
dhyātvā tadamṛtaṃ caraṇasaṃbandhi yadamṛtam udakaṃ tena kṣālitaṃ 
nāśitaṃ sarvapātakaṃ yasya | īdṛśaṃ śiṣyaṃ kuryādityarthaḥ | 
yadyapyanyapadārthasya śiṣyasya karaṇaṃ na saṃbhavati tathā'pi saviśeṣaṇe hi 
vidhineṣedhau sati viśeṣye bādhe viśeṣaṇamupasaṃkrāmataḥ iti nyāyena 
śiṣyaviśeṣaṇasya pāpanāśasya karaṇaṃ saṃbhavatīti bhāvaḥ | tasya sarvaṃ 
yāvaccharīraṃ gandhavastrabhūṣaṇakusumādibhiḥ guruḥ alaṅkuryāt bhūṣayet 
|| 35 ||

śāktī dīkṣā 

śāktīṃ dīkṣāmāha-

tasyāmūlamābrahmabilaṃ prajvalantīṃ prakāśalaharīṃ jvaladanalanibhāṃ 
dhyātvā tadraśmibhistasya pāpapāśān dagdhvā || 36 ||

tasya śiṣyasya mūlaṃ pāyūpasthamadhyavarticaturdalakamalādhāradeśaḥ 
tanmaryādati āmūlam | evam-adhomaryādāmuktvā ūrdhvamaryādāmāha-
brahmabilaṃ sahasradalakamalādhārabhūtaṃ maryādā asyeti ābrahmabilaṃ 
prajvalantīm ata eva prakāśānāṃ laharyaḥ ūrmayo yasyāṃ tādṛśīm ata eva 
jvālāyukto yo'nalo'gniḥ tannibhāṃ tadupamāṃ dhyātvā saṃvidamiti śeṣaḥ | 
jvaladanalanibhatvādeva pāpapāśadāhakatvamupapannam | pāpapāśasya dāha 
eva na bhāvanam-ata eva dagdhveti ||

yadyapi atratyapāṭhakramamanusṛtya ādau śāmbhavī tataḥ śāktīti pratibhāti 
tathā'pyupakrame dīkṣāvibhāgavelāyāṃ śāktī śāmbhavī māntrī ceti 
coktatvāt upakramānusāreṇa upasaṃhāro'nyathā neyaḥ 
vedopakramādhikaraṇanyāyena | ata eva tatpāśadāhānantaraṃ 
tadbhasmarūpamalasya 

p. 58)

sattvāt caraṇanirgatajalena tatkṣālanarūpārthavattvādarthakramo'pyupapannaḥ | 
tathā cādau śāktīṃ dīkṣāṃ saṃpādya paścācchāmbhavīṃ kuryāditi 
siddham || 

guruḥ kramaṃ pravartya ityārabhya siddhāntaṃ śrāvayitvā 
ityetadanto'ṅgakalāpo'nayoreva prakaraṇasannidhibhyāṃ śundhanamantrasyeva 
sānnāyye iti kecit | tanna | tathā sati tṛtīyāyāṃ dīkṣāyām-uttaratra 
prathamasiktān dvitīyakhaṇḍāgrān grāsayitvā iti vihitaṃ tadanupapannam 
sāṅgakramavidheḥ tadanaṅgatvena tatra kramaprāptyabhāvena 
prathamadvitīyayorabhāvāt | na ca asaṃskṛtaṃ laukikaṃ grahītuṃ śakyam | 
tasmāt liṅgena sannidhiṃ bādhitvā trayāṇām aṅgam | itthaṃ ca yadā ekaikāṃ 
veti pakṣānusaraṇaṃ tadā tṛtīyadīkṣāyāṃ pūrvoktānyaṅgānyanuṣṭheyāni 
||

etena nibandhe amṛtakṣaraṇena bāhyamābhyantaraṃ ca malaṃ dūrīkuryāt atha 
śiṣyasyāmūlādhāramityārabhya tatkiraṇaiḥ [tasyāḥ prakāśalaharyāḥ 
kiraṇairityarthaḥ |] tasya pāśān dahet ityasya dvitīyatvaṃ likhitaṃ nirastam | 
pūrvadīkṣayaiva bāhyābhyantaramaladūrīkaraṇe asmin malasyābhāvena 
uttaradīkṣayā dāhāsaṃbhavācca | na ca pūrvadīkṣayā dūrīkṛtaṃ malaṃ 
bahistiṣṭhati tasyottaradīkṣayā dāha iti vācyam śarīre vibhāvitāgninā 
śarīrasthamalasyaiva nāśo bhavet na dūrīkṛtasya | tasmādasmatsaraṇireva 
sādhvīti yuktamutpaśyāmaḥ || 36 ||

māntrī dīkṣā 

māntrīdīkṣāprayogaṃ vaktumupakramate-

trikaṭu [1] triphalā [2] caturjāta [3] takkola [4] madayantī [5] sahadevī [6] dūrvā 
[7] bhasma [8] mṛttikā [9] candana [10] kuṅkuma [11] rocanā [12] karpūra [13] 
vāsitajalapūrṇaṃ vastrayugaveṣṭitaṃ [navīnavāso-a. śrī.] nūtanakalaśaṃ 
bālāṣaḍaṅgenābhyarcya śrīśyāmāvārtālīcakrāṇi nikṣipya 
tisṛṇāmāvaraṇamantrairabhyarcya saṃrakṣyāstreṇa 
[astradhyenuyoniprabhṛtyanekamudroddhārajñānāya dvi. pariśiṣṭa-15 viṣayaḥ 
svatantro dṛśyaḥ |] pradarśya dhenuyonī || 37 ||

trikaṭuḥ pippalīśuṇṭhīmarīcyaḥ | triphalāḥ harītakīdhātrīvibhītakyaḥ | 
taduktaṃ vaidyasāre-

śuṇṭhīmarīcipippalyaḥ proktastrikaṭusaṃjñakāḥ |
triphaleti samākhyātā pathyādhātrīvibhītakaiḥ || iti ||

caturjātaṃ uśīrailālavaṅganāgakesarāṇi | taduktaṃ madanamahārṇave-

p. 59)

lavaṅgamelośīraṃ ca trisugandhaṃ prakīrtitam |
nāgakesarasaṃyuktaṃ caturjātaṃ pracakṣate || iti ||

takkolaḥ [takkolaḥ gurjaradeśe-cinīkabālā-iti nāmnā-suviditaḥ atra ca prāyaḥ 
kaṅkolaśabdo'vadheyaḥ |]-marīcisadṛśaḥ tāmbūlena saha bhakṣyaḥ 
śaityopacārahetuḥ vastuviśeṣaḥ | 

madayantī sahadevī vaidyake prasiddhe āraṇyake | dūrvā bhasma mṛttikāḥ 
prasiddhāḥ ||

yattu mṛttikāpadena nibandhe saptamṛttikāgrahaṇaṃ tannirmūlam | yadi 
mṛttikāpadena sarvatra saptamṛttikāgrahaṇaṃ tarhi mūlanakṣatrajananaśāntau-
saptamṛdbhiḥ samāyuktaṃ pañcapallavasaṃyutam ityatra saptagrahaṇaṃ vyartham 
| evaṃ snānārthaṃ mṛdamāharet ityatrāpi tathā'pattiśca ||

etairyuktamiti jalena sākaṃ madhyamapadalopasamāsaḥ vāsitamityanena 
dūrvā'dīnāmanvayāsambhavāt | candanaṃ prasiddham | kuṅkumaṃ 
kāśmīram | rocanā gorocanam | karpūraṃ prasiddham | etairvāsitaṃ yajjalaṃ tena 
pūrṇaṃ vastrayugena veṣṭitaṃ nūtanam-abhuktaṃ kalaśaṃ bālāṣaḍaṅgena 
[etacchrībālātryakṣarīmantraṣaḍaṅganyāsaprātyakṣyataddevatā-
mantroddhāraṇarṣicchandoviṣayādijñānāya dvi. pariśiṣṭe-9-vi. dṛśyaḥ|] aiṃ 
hṛdayāya namaḥ iti krameṇa bījatrayadvirāvṛttyā agre [agre nāma 
mantranirdeśamantarā ṣaḍaṅganyāsakaraṇetikartavyatāmātraṃ tvagre-3-khaṇḍe 
śrīkrame 19 sūtre tadbhāṣye cāstītyato'vagamyam-pratyakṣaṃ tu-dvi-pa-śi. 9-
viṣaye vidyate |] vakṣyamāṇarītyā agnīśāsuravāyukoṇeṣu madhye 
pūrvādidikṣu ca krameṇa | atra ṣaḍaṅganāmnā uktadharmātideśaḥ | śrīśca 
śyāmā ca vārtālī ceti tāsāṃ cakrāṇi nikṣipya sthāpayitvetyarthaḥ | 
kutretyākāṃkṣāyāṃ samīpavartitvāt kalaśe eva | tatrāpi na 
pūrṇapātrādyupari nikṣipyeti svārasyāt kiṃ tu jale [atra jale eva nāma-
kalaśasthajale eveti bodhyam] eva ||

yadyapi uddharaṇasyānuktavāt yogyatābalācca kalaśasamīpadeśe ityapi vaktuṃ 
śakyam tathā'pi pūjāyāṃ bhūmau cakrasthāpanaṃ vinā 
pūjā'saṃbhavenārthāpattyā'tideśena vā sthāpanasya prāptatvena kṣiptatvena 
kṣiptvetyasya vaiyyarthyabhiyā jale prakṣepa āvaśyakaḥ || 

na ca yatra kvacana sthāpanam-arthāpattyādinā prāptaṃ na kalaśasamīpadeśe 
tadarthaṃ tat iti vācyam kalaśasamīpadeśāpekṣayā kalaśasyaiva 
ādhāratvakalpane lāghavāt || 

kiṃ ca kalaśasamīpasthacakrapūjā na kalaśasaṃskāro bhavitumarhati 
tadasaṃyuktatvāt | atra pūrvaṃ ṣaḍaṅgairabhyarcyeti kalaśasaṃskāraḥ | 
saṃrakṣyāstreṇetyādirapi tathā | ubhayataḥ sandaṣṭaṃ kathaṃ 
tatsaṃskārabhinnaṃ vijātīyaṃ bhavet | tato jala eva cakrāṇāṃ kṣepaḥ tatraiva 
pūjanaṃ pūjā'rambhasamaya eva jale prakṣepaḥ | tena āvāhanottaraṃ kathaṃ 
cakracālanamiti śaṅkā'navakāśaḥ ||

p. 60)

yadvā-kalaśe kṣiptveti vacanaṃ visarjanaparyantaṃ na cālayet ityasya bādhakaṃ 
bhavitumarhati | yuktaścāyameva pakṣaḥ | anyathā sāṅgaṃ kramaṃ 
nirvartyetyasya samīpa eva kalaśe nikṣipyeti vadet |

tisṛṇāṃ [imāḥ śrīlalitādayastisro devyaḥ-anugate-53-patre 34 sūtroktā 
śrīlalitāśyāmāvārtālyaḥ | iti-jñeyāḥ |] lalitā'dīnām 
āvaraṇamantrairityanena kevalapañcopacārapūjāvyāvṛttiḥ | abhyarcya 
pūjayitvā ||

idaṃ pūjanam apūrvam anena vidhīyate | pūjanottaram uddharaṇam ārthikam | 
pūjanaṃ tu kuladravyeṇaiva tattadviśeṣārghyapātrasthena kusumākṣataiśca 
apūrvapūjāmātravidhānāt | tāvanmātraṃ kṛtvā cakroddharaṇaṃ kāryam | 
jalāduddhṛtacakrāṇāmupari gandhapuṣpākṣatanikṣepo nyāyasiddhaḥ ||

astreṇa [etadastramudrārthaṃ tatpurataḥsthadhenuyonimudrārthaṃca dvi. pa. śi. 15-
7/14 15-8/1-2 15-8/2 vi dṛśyāḥ |] phaṭ iti mantreṇa saṃrakṣya 
rakṣobhūtapiśācānāṃ durādharṣaṃ kṛtvā | dhenuyonimudreprasiddhe te 
pradarśya tadupari kṛtvā || 37 ||

mātṛkāyantram 

mātṛkāyantramāha [tadanantarakṛtyamāha-a śrī.]- 

śivayuksauvarṇakarṇike svaradvandvajuṣṭakiñjalkāṣṭake 
ka ca ṭa ta pa ya śa lākṣaravargāṣṭayuktāṣṭadale 
digaṣṭakasthita ṭhaṃ vaṃ caturaśre mātṛkāyantre 
[adhastanabhāṣyāvalokanenedaṃ mātṛkācakraṃ-suviditameva-syāt |] śiṣyaṃ 
niveśya 
tena kumbhāmbhasā tisṛbhiḥ vidyābhiḥ snapayet || 38 ||

śivo hakāraḥ tena yuktaḥ sauvarṇaḥ sau-iti varṇaḥ saḥ karṇikāyāṃ 
kamalamadhyadeśe yasya etādṛśe | atra pūrvoktavarṇopari visargo'pi yojanīyaḥ 
vyomendvaurasanārṇakarṇikam- iti śrīśaṅkarabhagavatpādaiḥ uktatvāt [evaṃ 
ca-hasauḥ-iti niṣpannaṃ-jñeyam |] | imāni sarvāṇi kamalaviśeṣaṇāni | svarāḥ 
akārādivisargāntāḥ ṣoḍaśa teṣāṃ dvaṃdvaṃ dvayaṃ dvayaṃ tena juṣṭaṃ 
yuktaṃ kiñjalkāṣṭakaṃ patrayugamadhyavartideśaviśeṣaḥ yasyeti bahuvrīhiḥ | 
kaśca caśca ṭaśca taśca paśca yaśca śaśca laśca iti dvandvaḥ dvandvānte 
śrūyamāṇaṃ pratyekaṃ saṃbadhyate iti nyāyena vargapadaṃ sarvaiḥ 
sambadhyate | tathā ca kavargamārabhya 

p. 61)

pavargaparyantaṃ pañca pañca varṇāḥ yavargaścatvāraḥ śavargo'pi tathā 
lakṣ iti lavargaḥ evam-aṣṭavargairyuktāni aṣṭadalāni yasyeti bahuvrīhiḥ | 
ekaikadale ekaikaṃ vargaṃ likhet iti phalitārthaḥ ||

kesareṣu daleṣu ca varṇalekhane kramākāṃkṣāyāṃ prācyadikrama eva 
dhartavyaḥ | yadyapi dalakesarayoḥ dvayorapi prācī na saṃbhavati tathā'pi 
padmakuṇḍalekhanaprakāreṇa lekhane karṇikāyāḥ prācī tadanusāreṇaiva 
daleṣu varṇalekhanakramo'nusandheyaḥ ||

diśāṃ yadaṣṭakaṃ prācyādīśānadigantaṃ teṣu sthitau vakāraṭhakārau 
yasmin īdṛśaṃ caturaśraṃ [atrāgāmigranthe ca asraśabdo dantyasakārānto 
jñeyaḥ |] yasminniti bahuvrīhiḥ | īdṛśe mātṛkāsaṃjñake yantre śiṣyaṃ 
niveśya sthāpayitvā ||

taditthaṃ-padmakuṇḍavadaṣṭadalaṃ padmaṃ vilikhya tadbahirdvārarahitaṃ 
caturaśraṃ [atrāgāmigranthe ca asraśabdo dantyasakārānto jñeyaḥ |] vilikhya 
karṇikāyāṃ hsauḥ iti vilikhya prāgādikesareṣu a ā iti krameṇa 
svaradvayamekaikakesare svaramekaṃ vilikhya patrāntaḥ pūrvoktasthāne 
[pūrvādidiksthapatramadhyavibhāgāśrayeṇeti jñeyam |] kādyaṣṭavargān 
pratyekam-ekaikasyāntaḥ ekaikaṃ vargaṃ vilikhya tadbahiścaturaśre 
[atrāgāmigranthe ca asraśabdo dantyasakārānto jñeyaḥ |] prāgādidigaṣṭake 
vaṃ ṭhaṃ-iti likhediti samuditārthaḥ | taduktaṃ bhagavatpādaiḥ-

vyomendvaurasanārṇakarṇikamacāṃ dvandvaiḥ sphuratkesaraṃ 
patrāntargatapañcavargayaśalārṇāditrivargaṃ kramāt |
āśāsvaśriṣu [atrāgāmigranthe ca asraśabdo dantyasakārānto jñeyaḥ |] 
lāntalāṅgaliyujā kṣoṇīpureṇāvṛtaṃ 
varṇābjaṃ śirasi sthitaṃ viṣagadapradhvaṃsi mṛtyuñjayam || iti ||

vyoma hakāraḥ induḥ sakāraḥ au svarūpaṃ rasanārṇaṃ visargaḥ lānto 
vakāraḥ lāṅgaliḥ ṭhakāraḥ śeṣaṃ spaṣṭam ||

tisṛbhiḥ śrīśyāmāvārtālīvidyābhiḥ [atra vārtālīśabdena-vārāhī-jñeyā- | 
vidyāśabdena ca-tāsāṃ tisṛṇāṃ mūlamantrā jñeyāḥ |] snapayet sarvāṅge 
jalasaṃyogo yathā bhavati tathā kuryāt | tenetiviśeṣaṇāt udakāntaramaparyāptau 
na grāhyamiti sūcitam | ayameva pūrṇābhiṣeka ityucyate || 38||

māntrīṃ dīkṣāmupasaṃharati-

sadukūlaṃ sālepaṃ sābharaṇaṃ samālaṃ suprasannaṃ śiṣyaṃ pārśve 
niveśya mātṛkāṃ tadaṅge vinyasya vimuktamukhakarpaṭasya tasya haste trīn 
prathamasiktān candanokṣitān dvitīyakhaṇḍān puṣpakhaṇḍānnikṣipya 
tattvamantrairgrāsayitvā dakṣiṇakarṇe bālāmupadiśya paścādiṣṭamanuṃ vadet 
||39||

p. 62)

sadukūlamityādi pārśve niveśyetyantaḥ spaṣṭārthaḥ | bahirmātṛkānyāsaḥ 
[ayaṃ nyāso mahānirvāṇatantrādyanekatantragranthastha eva grāhyo 
nādhunikapustakāt |] svāṅge tantrāntarokto yathā kriyate tadvacchiṣyāṅge 
vinyasya vimuktamukhakarpaṭasya pūrvaṃ mukhaṃ yena baddhaṃ vimuktaṃ 
mukhavastraṃ yasya tasya haste ||

idaṃ dīkṣātrayasya tantrapakṣe | kecinmatānusāreṇa kramikadīkṣāpakṣe 
tattaddīkṣā'nte visargaḥ ||

yadvā-sūtrakārasya tantradīkṣāyā eva abhimatatvāt tantrapakṣe eva 
mukhabandhanam ||

prathamasiktān atra prathamam-asaṃskṛtam- ājyena yūpamanakti itivat | evameva 
dvitīyaṃ jāghanyā patnīḥ saṃyājayanti itivat ||

vastutastu-kramasya pūrvaṃ vidhānāt taccheṣasya saṃskṛtasya vidyamānatvāt 
prāyaṇīyasya niṣkāse udayanīyamabhinirvapati itivat 
upayokṣyamāṇasaṃskārārthaṃ tāvatkālaṃ pātravisarjanamakṛtvā 
sthāpitatvāt saṃskṛtaprathamasiktadvitīyakhaṇḍānāmeva dānaṃ na 
tvasaṃskṛtasya ||

bahuvacanenaiva kapiñjalanyāyena tritvālābhe trīniti punarviśeṣaṇāt sakṛdeva 
trayāṇāṃ na nikṣepaḥ kintvekaikamiti dvau paridhī paridadhāti itivat ||

tattvamantraiḥ ātmatattvaṃ śodhayāmi namaḥ svāhā vidyātattvaṃ śodhayāmi 
namaḥ svāhā śivatattvaṃ śodhayāmi namaḥ svāhā iti tribhiḥ | grāsayitveti 
ṇijantaśravaṇāt ācāryānujñā'nantaraṃ bhakṣaṇam | bālāṃ tryakṣarīm | 
upadiśyetyantamaṅgam | iṣṭamanuṃ pañcadaśīṣoḍaśīrūpaṃ vadet 
upadiśedityarthaḥ [ita etat 39 sūtraṭīkāntaṃ dīkṣāvidhau 
pañcadaśīṣoḍaśyubhayagrahaṇakaḥ śāstrārthaḥ |] || 

nanu nāyaṃ ṣoḍaśyā upadeśavidhiḥ manum-ityekavacanena kevalapañcadaśyā 
eva vidhiḥ | na ca vaiparītye kiṃ vinigamakam-iti vācyam bālopadeśānantaraṃ 
pañcadaśyā eva prasaktatvena ekavacanena tasyaiva grahaṇāt [na 
vinigamanāvirahaḥ ityadhikaḥ-ba 2.] | kiṃ ca asmin tantre yadi 
ṣoḍaśyupadeśo'bhimataḥ syāt tarhi taduddhāraṃ kuryāt | 
yato'sminnanuddhāraḥ ata evānabhimata iti cet-na | na [nahi ekavacanānusāreṇa 
tatsiddhiḥ ityadhikaḥ-ba 2.] hi sarvatra vidheyaviśeṣaṇānāṃ 
saṃkhyāvācakānāṃ vivakṣāyāmapi prakṛtyartha evānvayaḥ iti niyamaḥ 
tadavacchedakenāpyanvayasya dṛṣṭatvāt | tathā ca 
jātyanvitamekavacanamupapannam | tathā sati kathaṃ tadanusāreṇa 
ṣoḍaśīnivṛttiḥ | anyathā brāhmaṇaṃ na hanyāt ityatra 
brāhmaṇadvayahanananiṣedhaḥ na syāt | astu vaikavacanavivakṣā | tathā'pi na 
ṣoḍaśīnivṛttiḥ vacanānusāreṇa variṣṭhāyāḥ 

p. 63)

ekasyāḥ ṣoḍaśyā upadeśānantaraṃ paścāt 
śyāmāraśmimālā'dividyopadeśāvasare pañcadaśyupadeśe 
bādhakābhāvāt | anuddhārādagrahaṇamiti yat tadapi na | pañcadaśyā api 
anuddhāreṇa tasyāḥ apyupadeśo na syāt ||

na ca mūlādhāre vibhāvanīyaraśmipañcakamadhye mādanaśaktītyanena 
soddhṛteti vācyam sā pañcadaśī na sarvasādhāraṇyenoddhṛtā kiṃtu [idaṃ 
raśmimālāpañcakaṃ-10-khaṇḍīya-9-sūtrataḥ 28 sūtrāntagranthesti ||] 
raśmipañcakāvayavarūpā | ata eva tatra tasyāḥ mahāvidyetyuktam | anyathā 
tasyā ityasya sārthakyaṃ brahmaṇā'pi durupapādam | ataḥ 
pūrvapratipāditāṅgopāṅgapratyaṅgapādukāsahitavidyā ekā | 
tadavayavabhūtā vidyā kathaṃ pradhānabhūtā bhavet ||

kiṃ ca-svatantre anuddhṛtaṃ na grāhyam-iti kiṃ sūtrakārābhiprāyo niṣkāsyate 
athavā svatantre anuddhṛtaṃ na grāhyam-iti vacanāntareṇa niṣkāsyate ?

nādyaḥ etādṛśābhiprāyaniṣkāsakaliṅgasya sūtre abhāvāt | kiṃca-
bālāmantrastryakṣaro na kutrāpyuddhṛtaḥ svayaṃ ca bālāmupadiśyeti vadati | 
etenānuddhṛto'pi grāhya iti sūtrakārābhiprāyaḥ suspaṣṭaḥ | na ca 
raśmimālāsu [agre-10 khaṇḍīyasarvasādhāraṇakrame-29-sūtre-ityarthaḥ |] 
śriyo'ṅgatvena navārṇabālāyā uddhṛtatvena bālāmupadiśyetyukte saiva 
grāhyā iti vācyam | yadi navākṣarīvidyā bālāpadena vivakṣitā tarhi agre 
pañcadaśanityāmantroddhāre [ || 4- || lalitā-|| 9-sūtre bālā eva-kulasundarī-vā-
kumārī-vā-uktā |] kumārī kulasundarī iti kulasundarīmantre 
kumārīvarṇasādṛśyavidhānena tatrāpi navārṇatvaprasaṅgaḥ | iṣṭāpattau 
dūṣaṇaṃ kulasundarīmantroddhāre vakṣyāmaḥ | evaṃ 
śrīvidyānyāsaprakaraṇe bālādvirāvṛttyā kḷptaṣaḍaṅga ityatra 
navārṇādvirāvṛttyā ṣaḍaṅganyāsastu sarvasaṃpradāyaviruddhaḥ | tasmānna 
navārṇā'tra bālā kiṃ tu tryakṣaryeva | ata eva raśmimālāyāṃ 
navārṇāmantre śriyo'ṅgaṃ bāletyevoktaṃ na tu bāleti | 
ito'pyadhikayuktikalāpaṃ raśmimālāmantroddhāre vakṣyāmaḥ 
[daśamakhaṇḍastha0 9 sūtrādārabhya pañcemā-ityādi-28-sūtrāntena athavā-
50-sūtrāntena granthena vakṣyāma iti sambandho jñeyaḥ |] | ataḥ syāt tryakṣarī | 
bālā tu na kvacanoddhṛtā kiṃ tu tantrāntare kḷptaṃ gṛhītvaivopadiśyeti 
vyavahṛtam | api ca tattvamantraiḥ grāsayitveti sūtritam | mantrāśca noddhṛtāḥ | 
evaṃ vārāhīprakaraṇe trayoguṇamantrāḥ ityādayo noddhṛtāḥ | tena na 
sūtrakārasyāyamabhiprāya iti siddhāntaḥ ||

na dvitīyaḥ tādṛśaśāstrasya kutrāpyanupalabdheḥ ||

kiṃca-etaddīkṣā'vasāne śiṣyo'pi pūrṇatāṃ bhāvayitveti viditaveditavya iti 
aśeṣamantrādhikārīti śiṣyaviśeṣaṇatrayaṃ śrūyate | tatra pūrṇatvaṃ 
gurorgrāhyaśeṣarahitatvam | yadi 

p. 64)

pañcadaśyaiva aśeṣadīkṣāripapūrtiḥ tarhi śeṣasya ṣoḍaśīgrahaṇasya sattvāt 
pūrṇatābhāvanāvidhānaṃ katham | evameva viditaveditavyatvamanupapannam ||

na ca pañcadaśyaiva sūtrakāramate kṛtārthatā pūrṇatā'stu tenaiva 
mokṣasiddhirastu iti na kā'pyanupapattiḥ iti vācyam 
evamapyaśeṣamantrādhikārītyatra kiṃ pañcadaśyupadeśena 
ṣoḍaśyāmapyadhikāraḥ svīkriyate athavā aśeṣapadasya ṣoḍaśībhinne 
saṅkocaḥ kriyate | nādyaḥ pañcadaśyapekṣayā ṣoḍaśyāḥ 
alpaphalajanakatvāpatteḥ | yo gurukārye adhikṛtaḥ saḥ laghukārye adhikṛto bhavati 
| yathā yo gaṅgātaraṇe adhikṛtaḥ sa kulyātaraṇe adhikṛtaḥ | natu viparītaṃ loke 
dṛṣṭam | na dvitīyaḥ saṅkoce mānābhāvāt ||

tasmāt evaṃ niṣpakṣapātena vicāryamāṇe iṣṭamantrapadena 
pañcadaśīṣoḍaśyoḥ grahaṇe na kimapi bādhakaṃ paśyāmaḥ || 

astu vā parasaṃtoṣāya pañcadaśīdīkṣāmātraṃ sūtrakārābhipretam | 
tathā'pi taddīkṣāvān alpadīkṣāvān tanmaṇḍale ṣoḍaśīdīkṣāvatā 
tantrāntarānuyāyinā na praveṣṭavyaṃ sevakagṛhe rājapraveśavat iti 
maheśvarānandanāthā āhuḥ | tanna | tathāhi-dīkṣāyāmalpatvam 
alpākṣaramantratvaṃ vā kimalpaphalasādhanamantratvam | ādye 
śrīvidyādīkṣāto vārāhyāḥ tato'pi śyāmādīkṣāyāḥ variṣṭhatvāpattiḥ | 
dvitīye tantrāntare ṣoḍaśīdīkṣāyāḥ yatphalaṃ tadeva asyāpi phalaṃ śrūyate 
kṛtakṛtyo viditanikhilaveditavyo jīvanmukto bhavatītyādipadaiḥ [nāma 
tattatkhaṇḍasamāptisthasūtrasthapadairityarthaḥ |] pratīyate | tathā ca tulyatvānna 
nyūnadīkṣāvattvam ||

nanu tarhi tantrāntare pañcadaśīdīkṣā nyūnadīkṣā bhavatīti śrūyate | tasya 
kā gatiḥ iti cet-na yasmin tantre ṣoḍaśīpañcadaśyoḥ samuccayaḥ tasmin tantre 
pañcadaśyāḥ aparipūrṇaphalatvāt ṣoḍaśīdīkṣāyāstathātvāt | 
tantrānusāriṇāvubhau tatraikaḥ pañcadaśyā dīkṣitaḥ ekaḥ ṣoḍaśyā dīkṣitaḥ 
tasyāgre kartavyaśeṣasattvādaparipūrṇa iti tasya maṇḍale gurudīkṣitena na 
gantavyamiti yuktam | iha tu tulyaphalaṃ pramāṇena siddhaṃ kathaṃ gurutvaṃ 
laghutvam | vicārayantvanāgraheṇa | 

na ca kāraṇalāghavagauraveṇa phalalāghavagauravamastyeva iti vācyam tathā sati 
kevalavahnyārthinau dvau | tatraikena lohapāṣāṇasambandhena vahnirnirmitaḥ | 
ekena araṇinirmathanena nirmitaḥ | tatra pūrvāpekṣayā parasya vahninirmāṇe 
kālādhikyaṃ puruṣādhikyaṃ śramādhikyamiti bahukāraṇagauravamiti 
tadīyavahneradhikadāhajanakatvaṃ syāt | evaṃ 
baudhāyanasūtrānusāridarśapūrṇamāsaprayogāpekṣayā 

p. 65)

āpastambaprayogasya dviguṇatvena āpastambasūtrānuyāyināṃ 
dviguṇasvargotpattyāpattiḥ | āpastambasūtrānusāriṇo 
baudhāyanasūtrānuyāyito gurutaratvāpattiḥ | 
tasmādadhikaphalajanakatvātiriktaṃ gurutvaṃ dīkṣāyāṃ durvacam ||

prakṛte tadabhāvāt kathaṃ laghudīkṣāvattvaṃ sūtrānuyāyinaḥ gurusādhane 
tulyaphalatve'pi pravṛttiḥ | svapūrvaguruparamparā'gatasādhanamantarā 
tadadhikāriṇaḥ phalaṃ na bhavatīti śāstreṇaiva na phalādhikyecchayā | atirātre 
ṣoḍaśinaṃ gṛhṇāti nātirātre ṣoḍaśinaṃ gṛhṇāti ityādau 
phalatāratamyavyavasthāpanaṃ ca tādṛśaśāstrābhāvādadhikāribhedena 
vyavasthāsaṃbhavādyuktam | tasmādatra na nyūnādhikadīkṣābhāva iti | 
sudhībhiḥ śeṣamūhyam ||

ayaṃ pakṣaḥ paratuṣṭaye aṃgīkṛtya cālitaḥ | vastutastu iṣṭamantrapadena 
ṣoḍaśīgrahaṇe bādhakābhāva uktaḥ prāk ||

na ca uṣaḥkālakriyāyāṃ kādiṃ hādiṃ vā mūlavidyāṃ manasā 
daśavāramāvartyetyatra kādiṃ hādiṃ veti vidyāviśeṣaṇaṃ atra 
ṣoḍaśyabhāve liṅgam iti vācyam tābhyāṃ viśeṣaṇābhyāṃ 
uṣaḥkālakriyāsannidhau paṭhitābhyāṃ tadaṅgatvena ṣoḍaśī nivartatāṃ 
kāmaṃ tathā'pi sarvatra ṣoḍaśīṃ nivartayituṃ tayoḥ kā śaktiḥ | 
ārāmagamanakāle aśvamānaya iti rājño vākyena 
ārāmagamanasādhanaśibikā'diyānabādhe'pi aśvapadaghaṭitaṃ vākyaṃ 
sadā yānāntaraṃ na bādhituṃ samarthaṃ bhavati ||

tasmāt ṣoḍaśyupadeśaḥ āvaśyakaḥ sūtrānuyāyināmapi | ito'pyadhikaṃ 
sudhībhirāgrahaṃ parityajya vicāryam | dharmatattvavivecane svamatapakṣapāto 
narakāyaiva bhavet ityalaṃ bhūyasā || 39 ||

śiṣyanāmanirdeśaḥ 

gurukartṛkaṃ karmaśeṣaṃ vadati-

tatastasya śirasi svacaraṇaṃ nikṣipya sarvān mantrān sakṛdvā krameṇa vā 
yathā'dhikāramupadiśya svāṅgeṣu kimapyaṅgaṃ śiṣyaṃ sparśayitvā 
tadaṅgamātṛkāvarṇādi dvyakṣaraṃ tryakṣaraṃ caturakṣaraṃ vā 
ānandanāthaśabdāntaṃ tasya nāma diśet || 40 ||

tataḥ ityanena vakṣyamāṇānāṃ dharmāṇām uttarāṅgatvaṃ sūcitam | svasya 
guroḥ caraṇam anādeśe dakṣiṇaṃ pratīyāt iti paribhāṣayā dakṣiṇacaraṇameva 
nyaset | sarvān mantrān prakaraṇena sarvapadasaṅkoce sarve hāriyojanaṃ lipsanti 
itivat śrīvidyā'ṅgabhūtān gaṇapati-śyāmāvārtālī-

p. 55)

parā-pañcadaśī-nityā-raśmimālā-mantrādīn [ataḥ paraṃ 
vakṣyamāṇānityarthaḥ |] sarvān | sakṛdvā ityatra vākāra evakārārthaḥ | 
tadānīmevetyarthaḥ | krameṇa vā tattadupāsanavelāyāṃ vā | yathā'dhikāram 
ityanena vyavasthitavikalpaḥ sūcitaḥ | bhaktiśraddhā'dhikyavataḥ tadānīmeva 
kiṃcinnyūnatadvataḥ krameṇeti | svāṅgeṣu ityatra aṅgapadaṃ 
śarīrāvayavaparam | sparśaṃ kurvityājñāṃ dadyāt | tataḥ śiṣyo 
yamavayavaṃ spṛśet tatra mātṛkānyāse yo varṇaḥ saḥ ādiḥ yasmin īdṛśam | 
idaṃ nāmaviśeṣaṇam | yathā śirassparśe tatra mātṛkāvarṇaḥ akāraḥ saḥ 
ādiryasya amṛtānandanātha iti | evameva sarvatra yojyam | dvyakṣaraṃ vetyādiḥ 
spaṣṭārthaḥ | ānandanāthaśabdāntaṃ spaṣṭam | tasya śiṣyasya nāma diśet 
sthāpayet || 40 ||

gurupādukāmantradānam 

vismṛtaṃ punarāha-

bālopadiṣṭeḥ pūrvamātmanaḥ pādukāṃ ṣaṭtārayuktāṃ dadyāt || 41 ||

dvitīyaśakalagrāsānantaraṃ bālopadiṣṭeḥ pūrvam ātmanaḥ pādukām 
ātmanaḥ guroḥ dīkṣākāle dattaṃ yannāma taddhaṭitapādukā'ntaṃ mantraṃ 
ṣaṭtārayuktaṃ tasmai upadiśet | ṣaṭ tārāśca kulārṇave-

vāgbhavaṃ ca parā śrīśca kālībījaṃ tataḥ priye |
bhuvaneśī manmathaṃ ca ṣaṭ tārāśca prakīrtitāḥ || iti ||

amukānandanāthaśrīpādukāṃ pūjayāmīti ||

etena nibandhasthapādukāmantraḥ sūtrānavalokanakalpitaḥ parāstaḥ ||
 
yadyapyatra pāṭhakrameṇa atraivopadeśaḥ prāptaḥ tathā'pi āśvino daśamo 
gṛhyate itivat śrautakrameṇa tasya bādho yuktaḥ || 41 ||

ācārānuśāsanādi 

ācārānanuśiṣya hārdacaitanyamāmṛśya vidyātrayeṇa tadaṅgaṃ triḥ 
parimṛjya parirabhya mūrdhanyavaghrāya svātmarūpaṃ kuryāt || 42 ||

ācārān daśamakhaṇḍe vakṣyamāṇān [agre daśamakhaṇḍastha 
sarvabhūtairavirodhaḥ-iti-57-sūtrāt-80 sūtre vakṣyamāṇānityarthaḥ |] anuśiṣya 
śikṣayitvā hārdaṃ hṛdayākāśasaṃbandhi caitanyaṃ tamiti śeṣaḥ śiṣyam 
āmṛśya dhyātvā svahṛdayasthacaitanyābhinnaṃ śiṣyaṃ bhāvayitvetyarthaḥ | 
vidyātrayeṇa śrī-śyāmā-vārtālīvidyābhiḥ | vidyātrayaṃ ekadā paṭhitvā 
parimārjanaṃ prathamaṃ tato dviḥ tūṣṇīṃ triḥ prokṣati itivat na tu 
tribhistrivāram | tathā sati tisṛbhirvidyābhirityeva 

p. 67)

vadet | vidyātrayeṇetikaraṇe ekatvavaiśiṣṭyaṃ pratīyate | tasmānna tathā | 
parimārjanaṃ nāma svahastena śiṣyasya sarvaśarīrasparśaḥ | parirabhya āliṅgya 
mūrdhanyavaghrāya svātmarūpaṃ kuryāt svasya yathā ātmā 
mokṣapratibandhakapauruṣamalarahitaḥ tathā taṃ kuryāt || 42 ||

śiṣyasya aśeṣamantrādhikāritvam 

sadgururityārabhya etadantaṃ [pāścātyapatrastha 34 sūtrārambhataḥ 
etatsūtrabhāṣyāvadhītyarthaḥ |] gurukartṛkaṃ karma itaḥ paraṃ 
śiṣyakartṛkakriyā bhavati-

śiṣyo'pi pūrṇatāṃ bhāvayitvā kṛtārthastaṃ guruṃ yathāśakti vittairupacarya 
viditaveditavyo'śeṣamantrādhikārī bhavediti śivam || 43 ||

iti śrīreṇukāgarbhasaṃbhūta-duṣṭakṣatriyakulāntaka-śrībhārgavopādhyāya-
jāmadagnya mahādevapradhānaśiṣya-mahākaulācārya-
śrīmatparaśurāmakṛtau kalpasūtre dīkṣāvidhirnāma 

prathamaḥ khaṇḍaḥ 

pūrṇatā pūrvameva vyākhyātā | ata eva kṛto'rtho mokṣasādhanaṃ yena saḥ 
tādṛśaḥ | tam iti kālavācī taṃ kālam asminneva kāla ityarthaḥ guruviśeṣaṇatve 
vaiyyarthyāt | yadvā-gurorgurau samīpasthe praguroreva pūjanam iti vacanena 
kadācit saparyāyā anyayogaprāptau tanmā bhūt iti jñāpayituṃ tamiti | 
yathāśaktivittaiḥ lakṣaṃ lakṣapatirdadyāddaridrastu varāṭikām iti rītyā 
upacarya santoṣya | viditaṃ jñātaṃ veditavyaṃ jñātuṃ yogyaṃ yena saḥ 
sarvajñaḥ ityarthaḥ | aśeṣamantrāṇāṃ sauravaiṣṇavādisaptakoṭimantreṣu 
adhikārī bhavet iti | etena etadupadeśena sarvamantropadeśo jātaḥ 
pustakādivācananiṣedho nāstītyarthaḥ | taduktaṃ tantrāntare-

yasya no paścimaṃ janma tuṣṭo [yadi vā śaṃkaraḥ svayam-a.] yena ca sadguruḥ |
tenaiva labhyate vidyā sākṣācchrīṣoḍaśākṣarī [śrīmatpañcadaśākṣarī-a.] ||
atra sarve mahāmantrāḥ bījāntarvṛkṣagātravat |
saṃsthitāstu maheśāni tasmācchreṣṭhatarā bhavet || iti ||

yaccopakrāntaṃ dīkṣāprakaraṇaṃ [nāma pāścātya2patrasthāt-athāto 
dīkṣāṃ vyākhyāsyāmaḥ-iti-1-sūtrādārabhya etat 67-patra-paryantamityarthaḥ 
|] tatsamāptam itijñāpakaḥ śiva-śabdaḥ || 43 ||

iti śrīrāmeśvararacitāyāṃ saubhāgyodayanāmnyāṃ paraśurāmasūtravṛttau 
prathamakhaṇḍātmakaṃ dīkṣāprakaraṇaṃ samāptam |

sūtrasya punarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || iti prathamaḥ khaṇḍaḥ 
[ito'pyadhikatarasphuṭaprayogo dīkṣāyāḥ-śrīmahānirvāṇāditantreṣu 
dīkṣollāsa-dīkṣāprakāśa-tāntrikasvatantrapaddhatiṣvapyasti-paraṃ 
cāyamuktaprayogo'pi śrībhagavanmukhanirgatasūtrokta iti sādhīyāneva |]



p. 68)

śrīdvitīyaḥ khaṇḍaḥ-gaṇanāyakapaddhatiḥ 

śrīgaṇanāyakopāstividhiḥ 

pūrvakhaṇḍe dīkṣāvidhiṃ parisamāpya śrīlalitopāstiprakaraṇaṃ vivakṣuḥ 
tadupāsteḥ pūrvāṅgabhūtāṃ śrīmahāgaṇapatyupāstiṃ vaktuṃ prakramate-

itthaṃ sadgurorāhitadīkṣaḥ mahāvidyā'rādhanapratyūhāpohāya 
gāṇanāyakīṃ paddhatimāmṛśet || 1 ||

itthaṃ pūrvoktaprakāreṇa sadguroḥ śāstroktalakṣaṇasahitaguroḥ sakāśāt 
āhitā prāptā dīkṣā yena īdṛśaḥ | etena īdṛśadīkṣāvata eva 
śrīvidyopāstāvadhikāro nānyasya iti sūcitam | mahāvidyā pañcadaśī 
ṣoḍaśī vā | tasyā ārādhanaṃ japaḥ | yadvā-mahāvidyā śrīlalitā 
mahāvidyāvācyatvāt vācyavācakayorabhedāt tasyā ārādhanaṃ 
phalaprāptyantaṃ pūjanaṃ tadutpattipratibandhakībhūtāḥ ye pratyūhāḥ 
vighnāḥ-vighno'ntarāyaḥ pratyūhaḥ ityamaraḥ-teṣām apohāya nāśāya 
gāṇanāyakīṃ gaṇeśasaṃbandhinīṃ paddhatiṃ mārgaṃ-saraṇiḥ paddhatiḥ 
padyā vartanyekapadīti ca ityamaraḥ-upāsanāsaraṇimityarthaḥ | āmṛśet 
svīkuryāt | asyāḥ śrīlalitopāstyaṅgatvaṃ yathā syāt tathoktaṃ prāk [prāk-
nāma-1-khaṇḍe-53-patre-34-sūtrabhāṣye-ityartho jñeyaḥ |] || 1 ||

prātaḥkṛtyaṃ dhyānādi tarpaṇāntam 

evaṃ [evaṃ nāma uparitana 1 sūtrānusāreṇa-gaṇapatirlalitādevyā aṅgadevatā-
ityādi hetoḥ |] gaṇanāyakopāsteḥ āvaśyakatāmuktvā tadupāsanāprakāraṃ 
prapañcayati-

brāhme muhūrta [rte cotthā-ba.] utthāya dvādaśānte 
sahasradalakamalakarṇikāmadhyaniviṣṭa 
gurucaraṇayugalavigaladamṛtarasavisarapariplutākhilāṅgo hṛdayakamalamadhye 
jvalantamudyadaruṇakoṭipāṭalamaśeṣadoṣanirveṣabhūtamanekapānanaṃ 
niyamitapavanamanogatirdhyātvā tatprabhāpaṭalapāṭalīkṛtatanuḥ bahirnirgatya 
muktamalamūtro dantadhāvanasnānavastraparidhānasūryārghyadānāni vidhāya 
udyadādityavartine [maṇḍalava-a.] mahāgaṇapataye tatpuruṣāya vidmahe 
vakratuṇḍāya dhīmahi || tanno dantī pracodayāt ityarghyaṃ datvā nityakṛtyaṃ 
vidhāya caturāvṛttitarpaṇaṃ kuryāt 
[etaccaturāvṛttitarpaṇajñānametatsūtrāgāmi 3 sūtrobhayaṭīkāyāṃ 
suspaṣṭam |] |

p. 69)

āyurārogyamaiśvaryaṃ balaṃ puṣṭirmahadyaśaḥ |
kavitvaṃ bhuktimuktī ca caturāvṛttitarpaṇāt || 2 ||

brāhme muhūrte uṣaḥkāle utthāya śayanāditi śeṣaḥ | dvādaśānte [itadādi 
yadvā ityantaṃ ba. kośe nāsti.]-lalāṭordhvaṃ kapālordhvāvasānaṃ 
dvādaśāntapadavācyaṃ tasmin  taduktaṃ svacchandasaṃgrahe-

dvādaśāntaṃ lalāṭordhvaṃ lalāṭordhvāvasānakam  || iti ||

yadvā-dvādaśānte sthūlaśarīre suṣumṇānāḍīmāśritya 
dvātriṃśatpadmāni santi | teṣu sahasradalakamale dve sarvādhaḥ 
akulanāmakamekamūrdhvamukhaṃ sarvordhvaṃ 
dvādaśāntanāmakamadhomukhamaparam | atra pramāṇaṃ savistaraṃ 
yoginītantrasyottaracatuśśatīvyākhyāne setubandhe asmanparamagurukṛte 
draṣṭavyam | granthavistarabhayānneha likhitam | idaṃ [idam ityanena dvādaśānte-
iti etatsūtrasthaṃ padaṃ-jñeyam |] ca kamale viśeṣaṇam abhedasaṃbandhena | 
yadyapi dvādaśānta iti saptamyantasya samāsaghaṭakībhūtakamalena sākam 
anvayo na saṃbhavati samāsaghaṭakapadasāpekṣatvarūpāsāmarthyāt kamalasya 
samāsaprayojakasāmarthyābhāvena samāsānupapatteḥ | anyathā ṛddhasya 
rājamātaṅgā itivat prayogāpatteḥ | tathā'pi dvādaśānta ityapi samāsāntam 
ṛddharājamātaṅgā itivat | saptamīlopābhāvaḥ chāndasaḥ | 
dvādaśāntasaṃjñakaṃ yatkamalaṃ 
tatkarṇikāmadhyaniviṣṭagurucaraṇayugalaṃ dvandvaṃ tasmāt vigalat sravadyat 
amṛtaṃ tasya rasasya yo visaraḥ vistāraḥ tena pariplutaṃ klinnam akhilāṅgaṃ 
yasya evaṃ bhūtveti śeṣaḥ | bhūtveti pūrvoktam niyamitapavanamanogatiriti ca 
dhyānakartṛviśeṣaṇaṃ kartṛparicchedakatayā dhyānāṅgām abhikrāmaṃ 
juhoti itivat | niyamitā pavanamanasorgatiḥ yena prāṇān manaścācalaṃ 
kṛtvetyarthaḥ | manaḥpavananirodhamantarā aikāgryaṃ na saṃbhavati | 
aikāgryamantarā dhyānaṃ ca na saṃbhavati | atastayorāvaśyakateti bhāvaḥ | 
hṛdayakamalamadhye anāhate [anāhataṃ-nāma-tannāmakaṃ hṛdayasthaṃ 
cakram |] jvalantamityanena svaśarīrasthapāpadāhakartṛtvaṃ sūcitam | 
udyadaruṇakoṭipāṭalamityanena abhūtopamānena brahmāṇḍamadhye 
etadupamamanyannāstīti sūcitam | aśeṣadoṣanirveṣamaśeṣāṇāṃ 
svakīyadoṣāṇāṃ nirveṣaḥ-nirgato veṣaḥ svarūpaṃ yeṣāṃ te nirveṣāḥ 
svarūpaśūnyāḥ naṣṭāḥ ityarthaḥ bhāvapradhāno nirdeśaḥ itthaṃ ca-
nirveṣatvaṃ dhvaṃso yasmāditi vyutpattyā svaśarīrasthanikhiladoṣanāśakamiti 
phalito'rthaḥ  anekapo dvipaḥ gajaḥ | tasya ānanaṃ yasyeti īdṛśaṃ dhyātvā 
tasya devasya prabhāyāḥ paṭalena samūhena pāṭalīkṛtaḥ | abhūtatadbhāve cviḥ 
| śvetaraktatvaṃ saṃpāditā tanuḥ svakīyaśarīraṃ yena | śvetaraktastu pāṭalaḥ 
ityamaraḥ | etena svatanau yāvatparyantaṃ pāṭalatvaṃ saṃbhavati tāvatparyantaṃ 
dhyāyedityarthaḥ | 

p. 70)

etāvatparyantaṃ [etāvatparyantaṃ nāma-uparitanamūlasūtrasthaṃ 
tatprabhāpaṭalapāṭalīkṛtatanuritikriyāntamityarthaḥ |] śayanasthalakṛtyam agre 
bahirnirgatyetyuktatvāt | idaṃ bahirnirgamanaṃ smṛtiprāptam | 
malamūtravisargaścānena anūdyate | atra dantadhāvanaṃ vidhāyeti 
sāmānyavidhau satyāṃ [satīti sādhīyān pāṭhaḥ |] kathaṃ vidhānam 
ityākāṅkṣāyāḥ smārtāpekṣayā tāntrikadharmāṇāṃ 
aśvapratigrahanyāyena sannikṛṣṭatvāt tantrātaroktānāmeva dharmāṇāṃ 
grahaṇaṃ na tu smārtānām | snānādisūryārghyāntānāṃ tantrāntarāt 
śrīkramasya sannikṛṣṭatvāt tata eva kathaṃbhāvākāṅkṣā pūraṇīyā ||

nibandhakārāstu gaṇapatipaddhatau mantreṣu tritārīyoge kartavye 
śrīmāyākāmabījānāṃ yogamuktvā tatra pramāṇaṃ 
śrīvidyā'rṇavatantraṃ darśayāmāsuḥ | taccintyam | tathā hi śrīkrame sarvatra 
mantrādau tritārīti śyāmākrame mantrāṇāmādau kumārīyoga iti 
vārāhīkrame vācamuccārya glaum iti ca paddhatāvasyāṃ sarve manavo japyā iti 
parākrame sarve'pi parākramamanavaḥ sauvarṇapūrvikāḥ kāryāḥ iti sūtre 
paṭhitatvāt gaṇapratikrame apaṭhiṣyataḥ sūtrakārasya atra mantreṣu bījayoga eva 
nāstīti suspaṣṭaṃ pratīyate | tathā sati kathaṃ vidyā'rṇavatantrānusaraṇam | 
athavā śrīkrame vāṅmāyākamalānāṃ yogasya vakṣyamāṇatvena śyenayāge 
drutanavanītavat tasya sarvāṅgatvāt asyāpi śrīvidyā'ṅgatvena prāptau taṃ 
bādhitvā tantrāntarānusaraṇasya niryuktikatvāt | 

svaśāstre vartamāno yaḥ paraśāstreṇa vartate |
bhrūṇahatyāsamaṃ tasya svaśāstramavamanyataḥ [mativartataḥ-a śrī.] ||

iti smṛteśca ||

udyadādityavartine mahāgaṇapataye iti datvā ityasya saṃpradānatvenānveti | 
udyadādityavartine ityanena tādṛśasūrye dhyānaṃ [arghyadānaṃ-a śrī.] agre 
[agre 72 patrastha 4 sūtrasthasiddhalakṣmītyādito vighneśvaraṃ 
dhyātvetyantasūtroktarītyetyarthaḥ |] saparyāprakaraṇe vakṣyamāṇarītyā 
kāryamiti sūcitam ||

nibandhe trirarghyadānamuktam | tatra mūlaṃ mṛgyam | arghyamityekavacanāntena 
vidheyapadenaikatvasya spaṣṭatvāt | nāpyabhyāsaḥ tadbodhakapadābhāvāt | 
nāpi śrīkramoktasyātideśaḥ sūryārghyāntasyaiva vacanenātidiṣṭatvāt 
tadagrimadharmāṇāmatideśe pramāṇābhāvāt ||

nityakṛtyaṃ agnihotrahomādi vidhāya | etena agre 
vakṣyamāṇacaturāvrttitarpaṇaṃ sannidhānādarghyāṅgamiti bhramo nirastaḥ | 
prakaraṇenopāstyaṅgameveti sūcitam ||

ayaṃ caturāvṛttitarpaṇotpattividhiḥ | tatra caturāvṛttitarpaṇamiti 
karmanāmadheyaṃ natu guṇavidhiḥ caturāvṛtteragre [agre nāma āgāmini-3 
sūtre tadbhāṣye ceti jñeyam |] vakṣyamāṇatvāt | tathā ca agnihotraṃ juhoti 
ityatreva vibhaktivipariṇāmena 

p. 71)

tṛtīyāntārthatvaṃ lakṣaṇayā tasya dhātvarthe bhāvanāyāṃ karaṇatvena 
anvayaḥ | catasraḥ āvṛttayo'bhyāsā yādṛśakriyā'vayavakriyāsu 
taccaturāvṛttitarpaṇam | yadyapi prathamatarpaṇe dvādaśāvṛttirasti na 
caturāvṛttiḥ tathā'pi sṛṣṭinyāyena bhūmātvamanusṛtya acaturāvṛttitarpaṇe'pi 
caturāvṛttitarpaṇamiti vyavahāraḥ | atra sādhyākāṅkṣāyāṃ 
kamiyogābhāvāt nāyurārogyādi sādhyatvenānveti | kiṃ tu 
śrīgaṇapatyupāstyupakāra eva | anyathā śamidho yajatyasmin loke pratitiṣṭhati iti 
śrutyā prayājānāmapi pratiṣṭhā'diphalāpatteḥ | ataḥ 
āyurārogyamityarthavādaḥ ||

tathā ca āyurārogyādiprāptaye iti na likhitvā gaṇapatiprītaye iti saṃkalpaṃ 
nibandhakāro yallilekha tat sādhu | paraṃ tu nadyādāvityārabhya 
pañcopacārānācarya ityantaprāpakaṃ pramāṇaṃ mṛgyam | 
svabuddhiracitamaśraddheyameveti dik || 2 ||

tadeva spaṣṭaṃ viśinaṣṭi-

prathamaṃ dvādaśavāraṃ mūlamantreṇa tarpayitvā 
mantrāṣṭāviṃśativarṇān svāhā'ntānekaikaṃ caturvāraṃ mūlaṃ ca 
caturvāraṃ tarpayitvā punaḥ 
śrīśrīpatigirijāgirijāpatiratiratipatimahīmahīpatimahālakṣmīmahālakṣmīpati 
[atrāsandhirārṣaḥ |] 
ṛddhyāmodasamṛddhipramodakāntisumukhamadanāvatīdurmukha-
madadravā'vighnadrāviṇīvighnakartṛvasudhārāśaṅanidhivasumatīpadmanidhi-
trayodaśamithuneṣvekaikāṃ devatāṃ caturvāraṃ mūlaṃ caturvāraṃ ca 
tarpayet evaṃ catuścatvāriṃśadadhikacatuśśatatarpaṇāni bhavanti  || 3 ||

mūlamuccārya tarpayāmi iti mantreṇa tarpaṇam | evameva agre sarvatra mūlasthale 
saṃyojyam | caturāvṛttitarpaṇamityatra na kriyā'vṛttiḥ vidhīyate kiṃ tu 
mantrāvṛttireva | yadyapi dvādaśavāramiti dvitīyā'ntaṃ stokaṃ pacatītivat 
kriyāviśeṣaṇaṃ bhavitumarhati tathāca kriyā'bhyāsa eva siddhaḥ 
tathā'pyasminnagre catuścatvāriṃśadadhikacatuśśatatarpaṇāni bhavanti iti 
sūtrasthasaṃkhyayā karmabhede siddhe na kriyā'bhyāso bhavitumarhati | ataḥ 
dvādaśavāramityanantaram āvṛtteneti pūraṇīyam | ata evāgre mūlaṃ 
caturvāram ekaikaṃ caturvāramityanena mantrābhyāsa eva spaṣṭaḥ śrūyate | 
yadi kriyā'bhyāsaḥ syāt tadā sakṛdeva mantrapaṭhanaṃ prasajyeta | tacca 
agrimasaṃkhyā'nurodhena nirastam | yadvā-dravyapṛthaktvena kriyā'vṛttāvapi 
mantrāvṛttirbhaviṣyati tathāpyagre mantrāvṛtteḥ spaṣṭatvāt tatsahacarite atrāpi 
mantrāvṛttireva | caturvāramityanantaram uccāryeti śeṣaḥ | svāhā'nta ityanena 
prativarṇamantre svāhākāraghaṭakatvaṃ sūcitam | avayavino viśiṣṭamantrasya 

p. 72)

gaṇapatidevatākatve tadavayavānāmapi taddevatākatvaṃ spaṣṭam | ataḥ 
svāhā'nte tarpayāmītyapi yojyam | tathā ca mūlasyaikavarṇaḥ tatra 
binduyogo'pi śiṣṭasaṃpradāyāt tataḥ svāhākāraḥ tatastarpayāmīti 
pūrvoktam | evaṃ caturvāraṃ tato mūlena caturvāram | evaṃ sarveṣu 
varṇeṣūhyam | pūrvaṃ dvādaśavāraṃ tarpayitveti eko gaṇaḥ sūcitaḥ | 
taduttaraṃ caturvāraṃ tarpayitvetyantatarpaṇam eko gaṇaḥ sūcitaḥ | asmin sūtre 
punarityanena trayodaśamithunatarpaṇam anyo gaṇaḥ sūcitaḥ | 
gaṇatrayasūcanaphalaṃ ca-ekaikagaṇasya ekaikāpūrvajanakatvāt tanmadhye 
ekasya vismaraṇe punaḥ tadgaṇamārabhyaiva anuṣṭhanaṃ na sakalādimārabhya |

yathā mantraikadeśe varṇalope tanmantrasyādimārabhyāvartanaṃ tadvat | 
śrīśrīpatītyekaṃ girijāgirijāpatītyekaṃ mithunam evaṃ rītyā ekaṃ 
strīlliṅgāntam ekaṃ pulliṅgāntaṃ mithunaṃ jñeyam | madadravottaraṃ na 
vidyante vighnāḥ yasyeti vyutpattyā avighna iti pulliṅgaḥ | śeṣaṃ spaṣṭam | evaṃ 
trayodaśamithuneṣu ekaikāṃ devatāṃ dvitīyāntamuccārya tarpayāmī iti yojayet 
| itthaṃ coktarītyā ekadevatāyāścaturvāraṃ tarpaṇaṃ tato mūlena caturvāraṃ 
kāryaṃ pūrvavat | evamuktaprakāreṇa krameṇa niruktasaṃkhyākāni tarpaṇāni 
bhavanti | taditthaṃ mūlatarpaṇāni 228 varṇatarpaṇāni 112 mithunatarpaṇāni 104 
āhatya pūrvoktasaṃkhyākāni 444 catuścatvāriṃśaduttaracatuśśatatarpaṇāni 
bhavantītyarthaḥ || 3 ||

yāgagṛhapraveśādi vighneśvaradhyānāntam 

evaṃ tarpaṇakramamuktvā pūjāvidhiṃ vaktumupakramate-

athayāgavidhiḥ-gṛhamāgatya sthaṇḍilamupalipya dvāradeśa 
ubhayapārśvayorbhadrakālyai bhairavāya-dvārordhve lambodarāya namaḥ iti 
antaḥpraviśya āsanamantreṇa āsane sthitvā prāṇānāyamya ṣaḍaṅgāni 
vinyasya mūlena vyāpakaṃ kṛtvā svātmani devaṃ 
siddhalakṣmīsamāśliṣṭapārśvam ardhenduśekharamāraktavarṇaṃ 
mātuluṅgagadāpuṇḍrekṣukārmukaśūlasudarśanaśaṅkhapāśotpaladhānya-
mañjarīnijadantāñcalaratnakalaśapariṣkṛtapāṇyekādaśakaṃ 
prabhinnakaṭamānandapūrṇamaśeṣavighnadhvaṃsanighnaṃ vighneśvaraṃ 
dhyātvā || 4 ||

atha-adhikārāntaravākyamidam | etena tarpaṇaprakaraṇaṃ samāptam | tathā ca 
prakaraṇena tarpaṇopāsanayoḥ aṅgāṅgībhāvaḥ sūcitaḥ | tena 
dīkṣā'ṅgakrame tarpaṇasya nātideśaḥ | ucyate iti śeṣaḥ | gṛhamāgatyetyanena 
tarpaṇaṃ nadyādau gṛhādbahiḥ kāryamiti sūcitam | sthaṇḍilaṃ yāgadeśam 
upalipya gomayeneti śeṣaḥ || 

p. 73)

sthalaśuddhiḥ pramāṇāntaraprāptā anūdyate | anena kramo na vivakṣitaḥ | yadi 
cānuvāde phalābhāvāt vaiyyarthyabhiyā kramaprāptyarthamatra pāṭhaḥ 
ityucyate tadā dvārapūjā'vyavahitaprāgevopalepaḥ kāryaḥ | 

ubhayapārśvayorityatrānādeśāddakṣiṇaṃ prathamaṃ paścādvāmam | 
dakṣavāmau dvārādbahirnirgamanavelāyāṃ yau tau grāhyau tatraiva tathā 
vyavahārāt na tu praveśavelāyām | namaḥ ityuttaraṃ yajediti śeṣaḥ | 
mantraliṅgāvagatā devatā | antaḥ praviśyetyanenaiva dvārapūjā bahiḥ sthitvaiva 
kāryā iti siddham | āsanamantreṇetyanena [ayamāsanamantro'gre-
śyāmākramīya-6-khaṇḍe-6 sūtre ādhāraśaktikamalāsanāya nama iti 
vakṣyamāṇo jñeyaḥ |] śyāmāprakaraṇapaṭhito mantro jñeyaḥ sannikṛṣṭatvāt | 
ata eva na tantrāntarasthaṃ grāhyam || 

nibandhoktanirmūladharmapradarśanam 

yattu nibandhe dīpānabhitaḥ prajvālyeti tāmbūlabhakṣaṇaṃ 
bālātṛtīyabījenāsanaprokṣaṇaṃ [bālātṛtīyaṃ-sauḥ-iti bījam ||] likhitaṃ taṃ 
prati ayaṃ praśnaḥ-etatprāpakaṃ pramāṇaṃ tantrāntare kiṃ vā etattantre 
dīpaprajvalanādikamagre [agre śrīkrame nāma-3-khaṇḍe-11-sūtre-dīpānamito 
datvā-iti sūtre ityarthaḥ |] śrīkrame uktaṃ bālātṛtīyabījenāsanaprokṣaṇaṃ 
parāpaddhatāvuktaṃ [agre-parākrame-8-khaṇḍe-6-sūtre-bhāṣye cedamasti |] 
teṣāṃ sarveṣāṃ prāpakamatideśaśāstraṃ vā | nādyaḥ tasya pūrvameva 
nirastatvāt | dvitīye atideśastrividhaḥ-vacanātideśaḥ nāmātideśaḥ 
ākāṅkṣayā ānumānikātideśaḥ | tanmadhye kīdṛśo'tideśaḥ | na vacanaṃ-
samānamitaracchyenena itivat śeṣaṃ śrīkrameṇa samam iti vacanam asti | ato 
nādyaḥ | evaṃ māsamagnihotraṃ juhoti itivat śrīkramaṃ kuryāt iti tannāmnā 
vyavahāro na hyasti | ato na dvitīyaḥ | tṛtīyo'tideśo yathā-sauryaṃ caruṃ nirvapet 
brahmavarcasakāmaḥ ityukte kamiyogāt brahmavarcasaṃ kiṃ kuryāditi 
karmākāṅkṣāpūrakam | tataḥ kena kuryāt ityākāṅkṣāyāṃ dhātvarthaḥ 
karaṇatvena anveti | kathaṃ kuryāt ityākāṅkṣāparipūrakatayā aṅgakalāpo na 
paṭhitaḥ | tata ākāṅkṣāśāmakam oṣadhīdravyakatvena vyaktaliṅgakatvena 
sādṛśyāt darśapūrṇamāsavaditi padaṃ kalpyate-sauryaṃ caruṃ 
darśapūrṇamāsavat nirvapet iti vākyam | tataśca darśapūrṇamāsadharmāḥ 
prāpnuvanti | nahyatra tathā'kāṅkṣā'sti sāṅgapradhānasyātra pāṭhāt || 

kiṃ ca-yadyatideśenaiva dharmaprāptiḥ tarhi śrīkrame pīṭhamanunā āsane 
samupaviṣṭaḥ iti vacanena āsanamantrasya kḷptatvāt atideśenaiva prāptau 
punarvidhānaṃ vyarthaṃ sat gṛhamedhīyājyabhāganyāyena 

p. 74)

yāvaduktaṃ kartavyaṃ nāto'dhikamiti spaṣṭīkaroti | itthaṃ ca 
kathametadatiriktānāṃ prāptirbhavet | kiṃ ca-śrīkramāddharmaprāptiratideśena 
bhavati tat kiṃ yāvadaṅgānāṃ bhavatītyucyate āhosvit yatkiṃciddharmāṇām | 
ādyaṃ caturnavatimantraiḥ abhimantraṇābhāvaḥ kena siddhaḥ | na hi nārṣevaṃ 
vṛṇīte na hotāram itivat sūtre caturnavatimantrairabhimantraṇaṃ na 
kartavyamityasti yena tannivāryate | yaśca [manmate tu prakṛtivikṛtibhāvābhāvāt 
yāvaduktaṃ kartavyamiti atra taduktyabhāvāt caturnavatimantrairanabhimantraṇaṃ 
yuktam | tava mate saṃdarbhaviruddham ityadhikaḥ pāṭhaḥ-ba. 2] 
yatkiṃciddharmātideśa iti pakṣaḥ sa ca devānāṃpriyāṇāmeva priyo 
bhavitumarhati na paṇḍitānām || 

tasmāt pūrvoktadharmaprāpakaṃ sarṣapamātramapi pramāṇaṃ na paśyāmaḥ | 
evamatratyāḥ kecana nirmūlaṃ śrīkrame likhitāḥ | evaṃ śyāmākramoktāḥ 
niṣpramāṇāḥ śrīkrame anyatra ca prakṣiptāḥ | na hi pramāṇarahito dharmo 
bhavitumarhati | ato mīmāṃsāgandhānabhijñena 
kevalasaṃskṛtabhāṣā'bhijñena svecchayā sāṅkaryaṃ prāpito yo nibandhaḥ 
tamāśritya sudhiyo'pyanutiṣṭhanti | atra ke'pi pariśodhanaṃ na kurvanti | atra 
kaliyugaśaktireva bījaṃ nānyaditi yuktamutpaśyāmaḥ | tasmāt tatratyāni 
nānuṣṭheyāni | yāvaduktaṃ kartavyam yatrānyato grāhyaṃ sūcitaṃ 
yathā'sanamantreṇeti tad grāhyaṃ na kenacidavicārya likhitaṃ pramāṇam | 
pramāṇābhāvāt tadanuṣṭhāne nāpūrvaṃ bhavet | yadi bhavet tarhi agnihotre 
darśapūrṇamāsadharmātideśaḥ darśapūrṇamāsayoḥ 
jyotiṣṭomadharmātideśo'pi bhavet | tasmādapramāṇaṃ svecchayā saṅkīrṇo 
nibandho'śraddheyaḥ ityalamativistareṇa ||

kiṃ ca-ekakriyāyāḥ prakṛtirekā śāstre dṛṣṭā na hi nānāprakṛtikā ekā 
vikṛtirdṛṣṭā śrutapūrvā vā āsīt | ayaṃ nibandhakāraḥ kāṃściddharmān 
parāprakaraṇasthān saurityanena āsanaprokṣaṇādirūpān 
tāmbūlabhakṣaṇādirūpān śrīvidyāprakaraṇasthāṃśca [tantrāntare 
ityadhikaḥ-ba.] ityevaṃ nānāprakaraṇasthān ekatra atidiśan kathaṃ 
dharmatattvajño bhavet ||

na ca yathā jyotiṣṭomasya ye dharmāḥ teṣāṃ dvādaśāhe atideśaḥ tataḥ 
atidiṣṭatatprakaraṇasthadharmayoḥ yathā dvirātrādāvatideśaḥ tadvat 
mūlaprakṛtiḥ śrīvidyā tato'tideśena prāptāḥ parāyāṃ tāmbūlādayaḥ 
tatsahitaḥ yo'sāvāsanaprokṣaṇarūpo viśeṣadharmaḥ sa sarvo'pi 
dvirātrādisthānāpanne gaṇapatāvatidiśyatām | tathā sati na nānāprakṛtikatvam 
iti vācyam | yadi śrīprakṛtikā parā tarhi bhūṣaṇadhāraṇasya atideśenaiva 
prāptau tatprakaraṇe bhūṣitavigraha iti vyartham | evaṃ 
vāmapārṣṇighātādikaṃ bahutaraṃ vyartham | ato na prakṛtivikṛtibhāvastayoḥ 
saṃbhavati | ato yeṣāṃ pratyakṣavacanamasti yathā'traiva sūryārghyāntavidhiḥ 
evaṃ parāprakaraṇe śyāmāvat sāmānyaviśeṣārghye 

p. 75)

sādha(da?)yedityādi yatra cākāṅkṣā'paripūrtiḥ sarvathā tādṛśasthala eva 
anyadharmasparśaḥ anyatra na [yāvaduktaṃ kartavyamiti rā-ba 2.] yuktamiti 
rāddhāntaḥ | anayaiva diśā nibandhe nirmūlasaṃkīrṇadharmāṇāṃ 
parityāgo'nyatra draṣṭavyaḥ || 

prāṇāyāmaḥ śvāsanirodhaḥ taṃ kumbhakarecakādiyuktaṃ vidhāya | 
prāṇāyāme mantro mūlam ||

saṃkalpāvaśyakatā [sarvasaṅkalpaviṣayakajñānāya dvi-pa-śi. 10-vi. dṛśyaḥ] 

tataḥ saṃkalpamapi sāmānyaśāstreṇa prāptaṃ kuryāt | śrīvidyopāstau 
nirvighnatāsiddhyarthaṃ mahāgaṇapatikramaṃ nirvartayiṣye iti saṅkalpaḥ | na ca 
saṅkalpasya sūtre anuktatvāt kathaṃ grahaṇam iti śaṅkanīyam | 
śucitvamupavītam avyabhicāreṇa yathā karmasāmānyena sambaddham evameva 
saṅkalpo'pi | etadanuguṇāni vacanāni ca santi | yathā-

anācamya kṛtaṃ yacca yacca saṅkalpavarjitam | 
rākṣasaṃ tadbhavet karma.......... ||

iti dānadharme mahābhāratavacanam |

ādau saṅkalpa uddiṣṭaḥ paścā tasya samarpaṇam | 
akurvan sādhakaḥ karmaphalaṃ prāpnotyaniścitam ||

iti rudrayāmalavacanācca | tathaiva śiṣṭācāro'pi | ataḥ saḥ āvaśyakaḥ iti 
gāṇanāyakyāḥ saparyāyā api śrīvidyā'ṅgatvādāvaśyaka eva saṅkalpaḥ | 
aṣṭāṅgollekhanaṃ ca-

avaśyaṃ tāntrikaṃ kālamullikhedanyathā śive |
bahirmukhaṃ tu tatkarma bhavedbhasmahutaṃ yathā ||

iti yāmalavacanādaṣṭāṅgollekhanamāvaśyakam 
[idamaṣṭāṅgollekhanamanugata-1-khaṇḍīya sūtrabhāṣye 45 patre'sti. dvi-pa-śi-
10 viṣaye cāpyasti |] | evameva śyāmā'dau jñeyam || 

tataḥ ṣaḍaṅgāni mūlamantraṣaḍaṅgāni hṛdayādisthāneṣu vinyasya 
sthāpayitvā sakalamūlena karatalābhyāṃ sarvāṅge vinyaset | idameva 
vyāpakakaraṇam | taduktaṃ paramānandatantre-

talābhyāṃ nikhilāṅgasya sparśanaṃ vyāpakaṃ bhavet ||

atra nibandhoktaṃ raktadvādaśaśaktiyuktāya [nāthāya-ba.] ityārabhya 
mātṛkānyāsaṃ vidadhyāt ityantam aśraddheyam ||

p. 76)

svātmani svahṛdaye | ātmaśabdo manasi prasiddhaḥ | manohṛdayayoraikyāt 
tadarthatvam | ādyaviśeṣaṇacatuṣṭayārthaḥ spaṣṭaḥ | mātuluṅgaṃ 
phalaviśeṣaḥ | gadā āyudhaviśeṣaḥ | puṇḍrekṣuḥ nānārekhāyuktekṣuḥ 
anekavarṇa [anekarūpa iti-ba 2.] iti yāvat | tadrūpakārmukaścāpaḥ | śūlaḥ 
āyudhaviśeṣaḥ | sudarśanaṃ cakram | śaṅkhapāśau prasiddhau | utpalaṃ 
kamalam | śeṣāṇi prasiddhāni | evaṃ mātuluṅgādiratnakalaśāntaiḥ 
pariṣkṛtaṃ pāṇyekādaśakaṃ yasyedṛśam ||

yadyapi śrīmahāgaṇapatimūrtteḥ daśa bhujāḥ prasiddhāḥ atraikādaśeti 
viruddhaṃ tathā'pi pāṇipadena śuṇḍādaṇḍo'pyatra grāhyaḥ tatra 
pāṇyaparaparyāyeṇa karaḥ hastaḥ iti vyavahārāt karī hastīti sarvalokaprasiddheḥ 
| itthaṃ ca daśa bhujāḥ ekādaśaḥ śuṇḍādaṇḍaḥ iti tadabhiprāyeṇa 
sūtrakṛtā bhagavatā pāṇyekādaśakamityuktam ||

āyudhasthānaniyamaḥ 

atra āyudhānāṃ dakṣavāmādiniyamo noktaḥ tathā'pi sāmānyaparibhāṣayā 
āyudhasthānāni yojyāni | taduktaṃ rudrayāmale-

āyudhānāṃ tu te dhyānaṃ bravīmi śṛṇu śāṅkari | 
khaḍgabāṇāṅkuśagadājñānaśūlabhuśuṇḍikāḥ ||

bhallo daṇḍo vajraśaktī parighaprāsatomarāḥ |
mālāmusalaparaśumukhādakṣakarasthitāḥ [khaḍgādārabhya 
uparitanavyadaṅkāṅkacihnāntā ityarthaḥ |] || 
pāśaśaṅkhaṃ [uparitana-3-aṅkādārabhya muṇḍāntā ityarthaḥ |] cāpaphalaṃ 
carmakhaṭvāṅgapustakam |

ghaṇṭāḍamarumuṇḍaṃ ca vāmahaste susaṃsthitam ||
varābhaye śaṅkhacakraṃ puṣpapātraṃ dvayasthitam ||
anukte [anukteṣu vāmadakṣaprādakṣiṇyetarakramaiḥ | yuktyā sarvatrāyudhāni-a 
ba 1.] [āyudhadānajñānāyāparamapiprakāraṃ purastana 4 khaṇḍagata-5-
sūtrabhāṣye paśyata |] vāmadakṣedhaḥprādakṣiṇyakramānnaraiḥ |
yojyāni sarvāyudhāni jñeyāni parameśvari |
cakraśaṅkhau [pāśāṅkuśau dhanurbāṇakhaḍgacarmāṇi śaṅkari ityadhikaḥ 
ba. kośe.] tathā'bhītivarau saṃmukhasaṃsthitau || iti ||

p. 77)

asyārthaḥ-

āyudhasthānānuktau khaḍgādiparaśvantā [pūraṇīyajalaṃ mūlamantreṇa 
saptadhā abhimantryetyarthaḥ |] dakṣakare niyatāḥ | pāśādimuṇḍāntāḥ 
[etadastrādimudroddhārārtha dvi. pa. 15-7/14 15-8/1-2 15-8/2 vi. dṛśyāḥ |] vāme 
niyatāḥ | śaṅkhādipātrāntāḥ icchayā ubhayatrāpi | 
pāśāṅkuśādiyugmapañcakaṃ saṃmukhe | yatsaṅkhyākadakṣakare 
yugmānyataraṃ tatsaṅkhyākavāmakara evāparam | vāmordhvādārabhya 
dakṣordhvakrame pradakṣiṇakramaḥ viparīte tvapradakṣiṇakramaḥ | dvayorvikalpa 
ityarthaḥ | prakṛte gaṇapatyāyudhe na pradakṣiṇāpradakṣiṇakramau saṃbhavataḥ 
| tathā hi-mātuluṅgacāpaśaṅkhadhānyamañjarīṇāṃ uktavacanānusāreṇa 
vāmakarasaṃbandha āvaśyakaḥ | gadāśūlacakrotpaladantānāṃ 
dakṣasaṃbandhastathā | ataḥ sūtrapāṭhakramānurodhena 
rudrayāmalavacanānurodhena ca vakṣyamāṇadvandvānāṃ saṃmukhataiva 
yuktā | mātuluṅgagade cāpaśūlau śaṅkhacakre pāśotpale dhānyamañjarī 
nijadantau amīṣāṃ dvandvānāṃ madhye prathamaṃ prathamaṃ vāmordhvakare 
dvitīyaṃ dakṣordhvakare | anena krameṇa adho'dho yojyam | evaṃ 
yugmapañcakaiḥ daśabhujeṣu vyāvṛtteṣu kalaśaṃ pariśiṣṭe śuṇḍādaṇḍe 
jñeyam | yadyapi yāmalavacane dantasthānaṃ noktaṃ tathā'pi pariśeṣāt 
dakṣādhaḥ | dhānyamañjarī phalāntarbhūtā ato vāmabhāganiyamaḥ ||

prabhinnaḥ prasravan kaṭo gaṇḍo yasya tam | gaṇḍaḥ kaṭo mado dānam ityamaraḥ | 
ānandapūrṇaṃ pūrṇānandam ityarthaḥ | aśeṣā ye vighnajanitāḥ dhvaṃsāḥ 
aniṣṭakalāpāḥ teṣāṃ nighnaṃ nāśakaṃ vighneśvaram uktaguṇaviśiṣṭaṃ 
dhyāyet || 4 ||

arghyasthāpanam 

evaṃ dhyānāntamuktvā tato'rghyasthāpanavidhiṃ vaktumārabhate-

purato mūlasaptābhimantritena [pūraṇīyajalaṃ mūlamantreṇa saptadhā 
abhimantryetyarthaḥ |] gandhākṣatapuṣpapūjitena śuddhena vāriṇā 
trikoṇaṣaṭkoṇavṛttacaturaśrāṇi vidhāya tasmin puṣpāṇi vikīrya 
vahnīśāsuravāyuṣu madhye dikṣu ca ṣaḍaṅgāni vinyasya agnimaṇḍalāya 
daśakalā'tmane arghyapātrādhārāya namaḥ sūryamaṇḍalāya 
dvādaśakalā'tmane arghyapātrāya namaḥ somamaṇḍalāya ṣoḍaśakalā'tmane 
arghyāmṛtāya namaḥ iti śuddhajalamāpūrya astreṇa 
[etadastrādimudroddhārārtha dvi. pa. 15-7/14 15-8/1-2 15-8/2 vi. dṛśyāḥ |] 
saṃrakṣya kavacenāvakuṇṭhya dhenuyonimudrāṃ [dhenumudrāṃ pradarśya yo-a 
śrī |] [mudre-ba 1 |] pradarśayet || 5 ||

p. 78)

purata ityasya kasyetyākāṅkṣayāṃ yogyatvāt svasyeti śeṣaḥ | etena 
dakṣavāmabhāgayoḥ vyatyāsaḥ | mūlena saptatvaṃ āvṛttyā saṃpādanīyam 
taiḥ abhimantritena gandhapuṣpākṣataiḥ pūjitena śuddhena pavitreṇa paṭapūtena 
[sugandhapuṣpādidravyodvāsitenetyarthaḥ ||] vāriṇā 
trikoṇaṣaṭkoṇavṛttacaturaśrāṇi vidhāya nirmāya tasmin 
nirmitatrikoṇādisaṅghātmake maṇḍale vikīrya kṣiptvā | vahnyādiśabdāḥ 
tattaddiglakṣaṇāḥ | madhye pūrvādidikṣu ca ṣaḍaṅgāni mūlaṣaḍaṅgāni | 
vidikṣviti laghusūtre kartavye vahnīśeti gurusūtraṃ kramaviśeṣalābhārtham | 
atra yadyapi vākyena agnimaṇḍalāya namaḥ ityārabhya 
śuddhajalamāpūryetyantena [mūlasūtrasthavākyenetyarthaḥ |] 
āpūraṇaśeṣatvaṃ sarvasya pratīyate tathā'pi sūktavākena prastaraṃ praharati 
itivat liṅgena vibhajyaiva mantrāṇāṃ trayāṇām ādhārāya namaḥ pātrāya 
namaḥ amṛtāya namaḥ ityantānāṃ 
ādhārasthāpanapātrasthāpanajalapūraṇeṣu pratyekaṃ śeṣatvaṃ vācyam 
vākyāt liṅgasya prabalatvāt | vastutastu-arthaikatvādekaṃ vākyaṃ 
sākāṅkṣaṃ cedvibhāge syāt iti jaiminisūtroktavākyalakṣaṇābhāvāt na 
vākyavirodho'pi | kvacit pustake arghyapātrāya namaḥ ityetaduttaram 
ityādhārapātre dhṛtvā iti pāṭhaḥ | tadā na vivādaḥ | śuddhajalaṃ pūrvoktam | 
atra dvitīyā tṛtīyā'rthe saktuvat dṛṣṭaphalasaṃbhavāt | yadvā-srucaḥ 
saṃmārṣṭi itivat guṇakarma āpūraṇakriyayā jalaṃ saṃskuryāditi | tathā ca 
asmin pakṣe dvitīyaiva yathāśratā | astreṇa [ita ārabhya adhastāt tatra tatra 
tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] astramudrayā saṃrakṣya 
rakṣobhūtādiyāgavighnakartṛdurādharṣaṃ kṛtvā | yadvā-astreṇa [ita ārabhya 
adhastāt tatra tatra tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] phaṭ itimantreṇa pūrvavat kṛtvā | kavacena [ita ārabhya 
adhastāt tatra tatra tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] huṃ-iti mantreṇa avakuṇṭhya [ita ārabhya adhastāt tatra tatra 
tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] anyatra gamanaśaktirahitaṃ kṛtvā ||

nibandhakārastu mantramudrādvayaṃ astrapadenovāca | tanna śakṛduccaritaḥ 
śabdaḥ sakṛdevārthaṃ gamayati iti nyāyāt āvṛttau vākyabhedaprasaṅgāt ||

ata eva pūrvavilakṣaṇatvāt dhenuyonimudrāṃ [ita ārabhya adhastāt tatra tatra 
tryaṅkasaṅketitamudrāṇāmanyāsāṃ 
cātroktātyupayuktānuktamudrāṇāmuddhārasambodhārthaṃ dvitīyapariśiṣṭa-
15-viṣayo dṛśyaḥ ||] pradarśayet ityuktam | etena na te mudre pūrvatane mantra iti 
spaṣṭam | mudrām ityekavacanamārṣam | dhenusahitayoniriti madhyamapadalopī 
samāso vā kāryaḥ || 5 ||

arghyasaṃskāraḥ 

evaṃ mudrāpradarśanāntamuktvā sūtrāntareṇa saṃskāraśeṣānāha-

saptavāramabhimantrya [mūlena- sa-śrī.] tajjalavipruḍbhirātmānaṃ 
pūjopakaraṇāni ca saṃprokṣya tajjalena pūrvoktaṃ maṇḍalaṃ parikalpya 
tadvadādimaṃ saṃyojya [saṃśodhya-a.] tatropādimaṃ 

p. 79)

madhyamaṃ [madhyamam iti nāsti-ba 2.] ca nikṣipya vahnyarkendukalāḥ abhyarcya 
vakratuṇḍagāyatryā gaṇānāṃ tvetyanayā ṛcā cābhimantrya astrādirakṣaṇaṃ 
kṛtvā tadbindubhistriśaḥ śirasi gurupādukāmārādhayet || 6 ||

mūleneti saptavāramityasyādiḥ | kvacittathaiva pāṭhaḥ | tajjalena 
sāmānyārghyodakena pūrvoktaṃ [pūrvoktaṃ-nāma uparitana-5-sūtroktarītyā-
iti jñeyam |] trikoṇādirūpaṃ maṇḍalaṃ saṃskṛtadeśaviśeṣam | tadvat 
sāmānyārghyodakavat | ādimaṃ prathamaṃ saṃyojyetyanena tadantā kriyā 
tadvadityatidiśyate | tena ādhārapātrasthāpanayorapi lābhaḥ | kvacit saṃśodhyeti 
pāṭhaḥ | cakāreṇa [ādimopādimayoreva grahaṇāt atra 
caturthapañcamayornivṛttiḥ | yadvā-yogyaiḥ saha mapañcakamurarīkṛtya iti agre 
(etatkhaṇḍīyāntime-10-sūtre) mapañjakasvīkāraliṅgāt cakāreṇa āvaśyakam | 
yuktaścāyameva pakṣaḥ |-iti ba 2 kośe.] caturthapañcamayorgrahaṇam | 
pūrvasmādatra yo viśeṣastamāha-vahnīti | ādhāre vahnikalāḥ [imā 
vahnisūryavidhukalāḥ pratyakṣanāmnā-agre-6-khaṇḍe-śyāmākrame-18-sūtre-
mūle-eva santi tato grāhyāḥ |] dhūmrārcirādayaḥ pātre sūryakalāḥ 
tapinyādayaḥ amṛte amṛtādayaścandrakalāḥ caturthyantatattannāmabhiḥ 
prāgādiprādakṣiṇyena vṛttākāraṃ yajet | diṅniyamo vṛttākāraniyamaśca yaḥ 
tanmūlaṃ paramānandatantre aṣṭamollāse draṣṭavyam | ādhārasthāpanottaraṃ 
tatra daśavahnikalāḥ saṃpūjya tataḥ pātraṃ sthāpayet | evamanyatrāpi | 
vakratuṇḍagāyatryā-tatpuruṣāya vidmahe vakratuṇḍāya dhīmahi | tanno dantī 
pracodayāt | ityanayā | gaṇānāṃ tvā itīyamṛk prasiddhāḥ | kvacitpāṭhe 
samagrapāṭho'pi dṛśyate | abhimantraṇaṃ nāma mantrapaṭhanakāle 
saṃskāryadravyasparśaḥ | astrādītyādipadena kavacam 
[etadādimudroddhārajñānārthaṃ-ddi. pa. śi.-15-vi. dṛśyaḥ |] | te ubhe pūrvaṃ 
vyākhyāte | rakṣaṇamiti avakuṇṭhanasyāpyupalakṣaṇam | tathā ca astramantreṇa 
[etadādimudroddhārajñānārthaṃ-ddi. pa. śi.-15-vi. dṛśya. |] saṃrakṣya 
[etadādimudroddhārajñānārthaṃ-ddi. pa. śi.-15-vi. dṛśya. |] avakuṇṭhya 
[etadādimudroddhārajñānārthaṃ-ddi. pa. śi.-15-vi. dṛśya. |] 
kavacamantreṇetyarthaḥ | yadyapi tadvadādimaṃ saṃyojya ityanenaiva 
astrādīnāṃ prāptisaṃbhave punarvidhānaṃ vyartham tathā'pi pūrvaṃ 
dhenuyonimudre sthite tannivṛttyarthaṃ punaḥkathanaṃ jñeyam | tadbindubhiḥ 
saṃskṛtaprathamabindubhiḥ triśaḥ trivāraṃ śirasi vidhibile 
gurupādukāmārādhayet | ārādhanaṃ nāma gurupādukoddeśena dravyatyāgaḥ 
| tasyāhavanīyādivat deśaniyamaḥ śirasi | bindubhirityanena dravyamānaniyamaḥ 
sāvaraṇagaṇapatipūjāyāmapi [yā deśani-ba.] niyamo'nena kriyate || 6 ||

pīṭhaśakti-dharmādyaṣṭaka-mahāgaṇapati-pañcāvaraṇa-pūjāvidhiḥ 

pīṭhaniyamapūrvakaṃ yantroddhārādikamāha-

p. 80)

purato raktacandananirmite pīṭhe mahāgaṇapatipratimāyāṃ vā 
caturasrāṣṭadalaṣaṭkoṇatrikoṇamaye cakre vā tīvrāyai jvālinyai nandāyai 
bhogadāyai kāmarūpiṇyai ugrāyai tejovatyai satyāyai vighnanāśinyai ṛṃ 
dharmāya ṛṃ jñānāya ḷṃ vairāgyāya ḷṃ aiśvaryāya ṛṃ adharmāya ṛṃ 
ajñānāya ḷṃ avairāgyāya ḷṃ anaiśvaryāya nama iti 
pīṭhaśaktīrdharmādyaṣṭakaṃ cābhyarcya mūlamuccārya 
mahāgaṇapatimāvāhayāmītyāvāhya pañcadhopacarya daśadhā 
[daśadhopatarpya-ba 2.] saṃtarpya mūlena 
mithunāṅgabrāhmyādīndrādirūpapañcāvaraṇapūjāṃ kuryāt || 7 ||

purata iti pīṭhe ityantaṃ mūrttyādhāraniyāmakam | vākāradvayaṃ 
samavikalpadyotakam | caturaśraṃ sarvasmāt bahiḥ tadantaḥ aṣṭadalaṃ tadantaḥ 
ṣaṭkoṇaṃ tadantaḥ trikoṇam iti kramo jñeyaḥ | tīvrādiṣu pīṭhaśaktiriti 
saṅketāt āsāṃ śrīgaṇapatyādhārabhūtapīṭhe raktacandananirmite pūjanamiti 
jñāyate | tatra kramānuktau prāgādiṣvaṣṭadikṣu madhye ca navaśaktayaḥ 
pūjyāḥ | dharmādīnāṃ catuṣṭayaṃ vāyavyādividikṣu adharmādicatuṣṭayaṃ 
paścimādiprādakṣiṇyena pīṭha eva samarcayet pīṭhaśaktīḥ dharmādyaṣṭakaṃ 
ceti dvayorekadeśasya śrutatvāt | dharmādīnāṃ diṅniyamaḥ vāyukoṇataḥ | 
paramānandatantre-

dharmaṃ jñānaṃ ca vairāgyamaiśvaryaṃ paścimāditaḥ |
adharmādicatuṣkaṃ ca................. || iti ||

pañcadhā pañcaprakāraiḥ gandhapuṣpadhūpadīpanaivedyarūpaiḥ upacarya 
pūjayitvā | atra mantrāḥ-laṃ pṛthivyātmane gandhaṃ kalpayāmi haṃ 
ākāśātmane puṣpaṃ kalpayāmi yaṃ vāyvātmane dhūpaṃ kalpayāmi raṃ 
agnyātmane dīpaṃ kalpayāmi vaṃ amṛtātmane amṛtanaivedyaṃ kalpayāmi | atra 
pramāṇaṃ paramānandatantre-

gandhaṃ [etadupacāraviṣaye viśeṣaḥ dvi. pa. śi. 7 vi. dṛśyaḥ |] puṣpaṃ ca 
dhūpaṃ ca dīpaṃ naivedyakaṃ priye |
bhūtapañcakabījena pṛthivyādyātmakaṃ param |
krameṇa pañcabhirdevi mānase tvevamarcayet || iti ||

mūlena daśadhā daśavāram | santarpyetyatra tarpaṇasādhanadravyaṃ 
viśeṣārghyapātrastham | tatprakāraśca kathaṃ kāryam ityākāṅkṣitatvāt 
sannikṛṣṭatvāt śyāmākrame vakṣyamāṇadharma [agre-6 khaṇḍe 
śyāmākramīya 22 sūtroktaḥ iti jñeyam |] eva grāhyaḥ 
evamāvaraṇapūjāyāmapi 

p. 81)

itikartavyatā'kāṅkṣāyāṃ tata eva grāhyam | tarpaṇe 
[etadādisarvatrāvaraṇapūjāyāṃ tattadevatātarpaṇe 
gṛhyamāṇaviśeṣārghādipātrasthabindvakṣatādi vastu kayāṅgulyā grāhyaṃ 
tatra viveka uktaḥ śrīkulārṇavatantre-6- ullāsa samāptau-60 patre śrī śivena 
bhagavatā yathā-

antaḥśaktimanusmṛtya tarpayedvīradevatāḥ | aṅguṣṭo bhairavo devaḥ anāmā 
caṇḍikā priye ||
anāmāṅguṣṭhayogena tattat kulajasantatim | aṅguṣṭhānāmikābhyāñca 
vaśyakarmaṇi tarpayet ||
tarjanyaṅguṣṭhayogena tarpayedabhicārake | kaniṣṭhāṅguṣṭhayogena stambhane 
tarpayet priye ||

evaṃ santarpya deveśi kuladravyairyathāvidhi- || iti ||
anyaccātraiva-6 khaṇḍe śyāmākrame 22 sūtre tadbhāṣye cāpi dṛśyam |] 
tarpaṇe tu mūlamuktvā śrīmahāgaṇapatiṃ tarpayāmīti mantraśeṣaḥ | 
pratitarpaṇaṃ mantrāvṛttiḥ dravyapṛthaktvāt | ata eva hiraṇyakeśisūtre 
dravyapṛthaktve'bhyāvartate iti || 

yattu nibandhe tarpaṇamantre pūjayāmīti mantraśeṣalekhanaṃ tadaśuddham | yadi 
tarpaṇapūjanayorabhedaḥ tarhyagre'pi pañcāvaraṇatarpaṇaṃ kuryādityeva vadet 
na pūjāṃ kuryāditi vadet | yato dhātubhedenoccāraṇam 
ato'rthabhedo'pyāvaśyakaḥ | arthabhede pūjāliṅgakamantrasya 
tarpaṇānaṅgatvaṃ spaṣṭam | evaṃ nibandhe pradhānadevapūjottaraṃ 
ṣaḍaṅgaughatrayapūjā coktā | tatra mūlaṃ yadi tantrāntaraṃ tasyātra praveśo 
nāstīti pūrvamevoktam | atastanna kāryam ||

mithunānāṃ āvaraṇadvayam aṅgadevatāḥ tṛtīyāvaraṇaṃ brāhmyādyāḥ 
caturthāvaraṇam indrādyāḥ pañcamāvaraṇam evaṃ pañcāvaraṇapūjāṃ 
kuryāt || 7 ||

pañcāvaraṇīpūjā 

tatra pradhānadevatātarpaṇadeśamāha-(tadeva savistaraṃ prapañcayati)

trikoṇe devaḥ tasya ṣaḍasrasyāntarāle śrīśrīpatyādicaturmithunāni aṅgāni ca 
ṛddhyāmodādiṣaṇmithunāni ṣaḍasre mithunadvayaṃ 
ṣaḍasrobhayapārśvayostatsandhiṣvaṅgāni brāhmyādyā aṣṭadale 
caturasrāṣṭadikṣvindrādyāḥ pūjyāḥ sarvatra devatānāmasu śrīpūrvaṃ 
pādukāmuccārya pūjayāmītyaṣṭākṣarīṃ yojayet || 8 ||

trikoṇe devaḥ tarpyaḥ iti śeṣaḥ | tat trikoṇaṃ ṣaḍasraṃ ca tayorantarāle 
anuktatvāt prāgādidikṣu caturāvṛttitarpaṇapāṭhakramānurodhena 
śrīśrīpatiprabhṛti mithunacatuṣṭayaṃ pūjyam | etāvat prathamāvaraṇam | 
ṛddhyāmodamithunamārabhya ṣaṇmithunāni ṣaḍasrakoṇeṣu | etaduttaravṛtti 
mithunadvayaṃ ṣaḍasrapārśvadvaye iti dvitīyāvaraṇam | ṣaṭkoṇayantre rekhopari 
rekhā yatra gacchati sa tatsandhiḥ | tatra īdṛśāḥ sandhayaḥ ṣaṭ santi 
tādṛśasandhiṣu | kramasyānuktatvāt 
agnīśāsuravāyukoṇakramasyoktasyāsambhavāt prāgapavargatā 
uttarāpavargatā yathā syāt tathā kramamanādṛtya 

p. 82)

ṣaḍaṅgāni yajet | iti tṛtīyāvaraṇam | aṣṭadale kramākāṅkṣāyāṃ 
śrīvidyā'rṇavoktaḥ | ādyacatasṛṇāṃ paścimādiprādakṣiṇyena agrimāṇāṃ 
vāyavyādividikṣu prādakṣiṇyena pūjyāḥ brāhmyādyaṣṭamātaraḥ iti 
caturthāvaraṇam | caturasre prāgādyaṣṭadikṣu tattaddikpatīn yajet | yatra 
mantrākāṅkṣāsattvāt sannikṛṣṭaśyāmākramoktadikpālamantrāḥ [agre-6 
khaṇḍe śyāmākrame-14 sūtre mūle 10 dikpālamantrāḥ santi |] grāhyāḥ | 
athavā- vakṣyamāṇāṣṭākṣarīyuktanāmamantreṇaiva [atra aṣṭākṣarīmantraḥ 
śrīpādukāṃ pūjayāmīti-nāmamantraśca oṃ śrī indrāya namaḥ 
ityādyabhipreyam |] | iti pañcamāvaraṇam | anuṣṭhāne upayuktāṃ 
sarvasādhāraṇīṃ kāṃcit paribhāṣāmāha-sarvatreti | sarvatra pūjāsāmānye 
devatānāmasu nāmamantreṣu | ghaṭakatvaṃ saptamyarthaḥ | śrīpūrvaṃ 
prathamaṃ śrīpadamuccārya tataḥ pādukām iti tataḥ pūjayāmi iti | tathā ca 
śrīpādukāṃ pūjayāmīti yāvat || 8 ||

gaṇanāthasya punarupatarpaṇādi 

evaṃ pañcāvaraṇīmiṣṭvā punardevaṃ gaṇanāthaṃ daśadhopatarpya 
ṣoḍaśopacārairupacarya praṇavamāyā'nte sarvavighnakṛdbhyaḥ sarvabhūtebhyo 
huṃ svāhā-iti triḥ paṭhitvā baliṃ datvā gaṇapatibuddhyaikaṃ baṭukaṃ 
siddhalakṣmībuddhyaikāṃ śaktiṃ cāhūya 
gandhapuṣpākṣatairabhyarcyādimopādimamadhyamān datvā mama nirvighnaṃ 
mantrasiddhirbhūyādityanugrahaṃ kārayitvā namaskṛtya yathāśakti japet || 9 ||

evam uktaprakāreṇa pañcānāmāvaraṇānām āvaraṇadevatānāṃ samūhaḥ 
pañcāvaraṇī dvigoḥ iti ṅīp tām iṣṭvā pūjayitvā | punarityanena [punarityanena 
yathāpūrvoktapañcāvaraṇapūjāyā iva evaṃ pañcāvaraṇīmiṣṭvetyeva 
anuvādaḥ | tadvat ayamapi anuvāda eva | kamamātravidhiriti bhramo nirastaḥ | 
daśadhā-ba 2. ] pañcāvaraṇāntaḥpātitvaṃ sūcitam | daśadhā daśavāram | 
tarpaṇaprakāraśca [etat khaṇḍe 80-81-patrayoḥ 7 sūtrabhāṣyānte iti jñeyam |] 
pūrvameva vyākhyātaḥ | ṣoḍaśopacārāśca paramānandatantre parigaṇitāḥ | 
yathā-

pādyamarghyaṃ [etadupacāraviṣaye-ddi. pa-śi-7-vi-dṛśyaḥ |] cācamanaṃ 
snānaṃ vastraṃ ca bhūṣaṇam |
gandhaṃ puṣpaṃ dhūpadīpau naivedyaṃ cāpi vīṭikām | 
nīrājanaṃ cāñjaliṃ ca parikrāmaṃ natiṃ śive |
gaṇayedupacārān vai pratyekaṃ ṣoḍaśeśvari || iti ||

agre sūtroktaṣoḍaśopacārā vā ||

atra pūjā'ṅgatvena paddhatau homa uktaḥ saḥ nirmūlaḥ ||

p. 83)

praṇavaḥ prasiddhaḥ māyā hrīm etayoḥ ante agre svāhā'ntaṃ śeṣaṃ paṭhet | 
ayaṃ balidānamantraḥ | imaṃ mantraṃ triḥ paṭhitvā tato balidānaṃ kuryāt | 
balidravyamākāṅkṣitaṃ śrīkramoktaṃ grāhyam | deśākāṅkṣāyāṃ 
śrīkramoktaṃ svavāmabhāgataḥ | gaṇapatibuddhyā ityasya abhyarcya 
ityanenānvayaḥ | gaṇapatisvarūpaṃ bhāvayitveti yāvat | pāṭhakramaṃ 
bādhitvā arthakrameṇa ādau āvāhanaṃ paścāt bhāvanaṃ tato'rcanaṃ 
evamagre'pi | atra dvayorapyāhvānādikaṃ padārthānusamayena 
[kāṇḍānusamayapadārthānusamayavivekāya-ddi. pa. śi. vi. 8 dṛśyaḥ |] 
natvañjanādivat kāṇḍānusamayena tadvat atra bādhakābhāvāt sarveṣāṃ 
tulyapradhānasannikarṣasambhavācca | ādimaṃ spaṣṭaṃ upādimaṃ dvitīyaṃ 
madhyamaṃ tṛtīyaṃ ca dattvā | ayaṃ pratipattisaṃskāraḥ madhyamāniti 
dvitīyāśruteḥ | dānena dravyaṃ saṃskuryāt iti tadarthaḥ | tathā ca 
āvaraṇapūjottaraṃ dravyadoṣe etasya nivṛttireva | anugrahaṃ kārayitvā 
tayoranugraho yathā bhavet tathā tatsaṃtoṣaṃ svayaṃ saṃpādayet iti bhāvaḥ | 
namaḥ ityārabhya japet ityantaḥ spaṣṭārthaḥ || 

yacca nibandhe japānantaraṃ baṭukasuvāsinīpūjanakathanaṃ 
tatsūtraviruddhamityanena spaṣṭīkṛtam || 9 ||

gaṇapatyudvāsanam 

yadyagnikāryasaṃpattiḥ baleḥ pūrvaṃ vidhivat saṃskṛte'gnau svāhā'ntaiḥ 
śrīśrīpatyādivighnakartṛparyantaiḥ mantrairhutvā punarāgatya devaṃ trivāraṃ 
saṃtarpya yogyaissaha mapañcakamurarīkṛtya mahāgaṇapatimātmanyudvāsya 
siddhasaṅkalpaḥ sukhī viharet iti śivam || 10 ||

iti duṣṭakṣatriyakulāntaka-reṇukāgarbhasambhūta-mahādevapradhānaśiṣya-
paraśurāma-śrībhārgavamahopādhyāya-śrīmatkulācāryaviracitakalpasūtre 
gaṇapatiprakaraṇaṃ dvitīyakhaṇḍātmakaṃ samāptam |

yadītyanena homasya kṛtākṛtatvaṃ sūcitam | baleḥ pūrvam-ityanena kramaśeṣaḥ 
[deśaḥ sū-ba 2.] sūcitaḥ | vidhivat iti-agre [agratana 9-
khaṇḍapratipāditahomavidhyuktarītyetyarthaḥ |] vakṣyamāṇavidhinetyarthaḥ | 
śrīśrīpatibhyāṃ svāheti mantrasvarūpam ||

yacca nibandhe śriyai svāhā śrīpataye svāhā iti mantravibhāgaṃ lilekha taṃ 
pratyayaṃ praśnaḥ-mithunamekā devatā uta devatādvayam ? ādye 
mantradvayavibhāgo'nucitaḥ | dvitīye āvaraṇapūjāyāṃ 
śrīśrīpatiśrīpādukāṃ pūjayāmīti nibandhe samaṣṭimantralekho'nucitaḥ | 
tasmāt sandarbhaviruddhamupekṣyam | na ca tava mate caturāvṛttitarpaṇe'pi 
samaṣṭimantrāpattiḥ iti vācyam tatra mithuneṣvekaikāṃ devatāṃ caturvāramiti 
vartate na mithunāni tarpayitveti | pūjāprakaraṇe kevalamithunāni pūjayedityeva | 
tena mithunasya devatātvaṃ spaṣṭam | evaṃ homasthale'pi 

p. 84) 

śrīśrīpatyādītyanena mithunasyaikadevatātvaṃ spaṣṭam | anyathā 
yādivighnakartṛparyantairityeva vadet śrīpatigrahaṇaṃ vyartham | na ca 
vighnakartṛparyantairityatra ekadevatāgrahaṇaṃ pratyekasya devatātve kimiti 
jñāpakaṃ na bhavet iti vācyam | yadīdaṃ mantrasvarūpajñāpakaṃ bhavet 
atrāpi vighnakartrantairityanenaiva śrīśrīpatyādīnāṃ lābhe śrīśrīpatyādīti 
vyarthaṃ sat mantrasvarūpajñāpakaṃ sat sārthakam | vighnakartṛparyantairiti 
agrimamithunanivartakaṃ sat sārthakamiti sarvaṃ samañjasam | tasmāt 
caturāvṛttitarpaṇe pūrvoktayuktyā 
catuścatvāriṃśadadhikacatuśśatatarpaṇasaṅkhyāparipūrtaye ca pratyekaṃ 
devatātvam [devatātve'pi pūjāyāṃ-ba 2 |] | pūjāyāṃ home coktajñāpakena 
vyāsajyavṛttyeva devatātvam | ato mantrasvarūpamasmaduktameva | 
vighnakartṛparyantairityanena agnimamithunaparisaṃkhyā ||

hutvā ityatra dravyākāṅkṣāyām anādiṣṭa ājyaṃ bhavati iti paribhāṣayā 
ājyameva | kāmanāviśeṣe tu dravyaviśeṣo modakā'diḥ | punarāgatya ityanena 
pūjāpradeśādanyo homapradeśaḥ-iti sūcitam | śeṣaṃ pūrvavat | yogyaiḥ 
saṃpradāyābhijñaiḥ saha | etadviśeṣaṇasvarasārthaṃ vitatya 
spaṣṭīkariṣyāmaḥ upariṣṭāt śrīkrame [3 khaṇḍa 30 sūtrabhāṣyānte-saṃprati 
idānīṃtanā ajitendriyā ityādinā |] | mapañcakamurarīkṛtya svīkṛtya śrīkrame 
vakṣyamāṇena vidhinā | atra sahaśabdaśca na yogyābhāve'pyavaśyaṃ 
saṃpādanīyamiti tadabhāve aṅgalopajanitaṃ prāyaścittaṃ vā prāpayati kiṃ tu 
vidyamāne sāhityaṃ avidyamāne kevalaṃ svayameva saha śākhayā prastaraṃ 
praharati itivat | atra gaṇapatyupāsanāmaryādā'nukteḥ śyāmā'divat | 
japasaṅkhyāścānukteḥ tantrāntaraṃ śaraṇīkāryam | tatra tantrāntaravacanaṃ 
tantrasāre-

dhyāyenmantraṃ japenmantraṃ caturlakṣaṃ samāhitaḥ |
catussahasrasaṃyuktaṃ catvāriṃśatsahasrakam |
daśāṃśaṃ juhuyāt dravyairaṣṭabhirmodakādibhiḥ || iti ||

udvāsanamudrayā udvāsya | siddhasaṅkalpaḥ siddhakāryaḥ | sukhī [idametat 
khaṇḍīyāntimasūtrasthapadaṃ jñeyam |] viharet iti pratipāditakarmaṇaḥ na 
kevalaṃ pratyūhanāśaḥ kintvidamapi phalamiti darśitam | etena 
śrīvidyopāstyanaupayikānaṅgasvatantragaṇanāyakopāstyā yadyadapekṣitaṃ tat 
sidhyatīti kṛtasaṅkalpeti padena sūcitam 
[etacchrīgaṇeśapūjāpaddhatyanuṣṭhānaviśeṣajñānāya-śrīprapañcasāra 
gaṇeśapurāṇa śāradātilaka mantramahodadhyāditāntrikagranthā dṛṣṭavyāḥ |] 
| śivam iti pūrvavat prakaraṇasamāptidyotakam ||

iti śrīrāmeśvaranirmitāyāṃ saubhāgyodayanāmnyāṃ 
paraśurāmasūtravṛttau gaṇanāyakapaddhatirnāma dvitīyakhaṇḍaḥ samāptaḥ ||

sūtrasya punarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || (iti dvitīyaḥ khaṇḍaḥ) śrīḥ | 




p. 85)

tṛtīyaḥ khaṇḍaḥ - śrīkramaḥ 

lalitā'dhikāraḥ 

nityaughatrayamilitāmaṣṭāvaraṇāṅgaṣaṭkasaṃvītām |
cintayatāṃ tatkṛpayā vāco niryāntyayatnato vadanāt ||

evaṃ pūrvakhaṇḍena śrīlalitopāstyaṅgabhūtaṃ gaṇapatyupāsanamuktvā 
śrīparadevatāyāḥ śrīlalitāyāḥ kramaṃ vaktumupakramate-

evaṃ gaṇapatimiṣṭvā vidhūtasamastavighnavyatikaraḥ śakticakraikanāyikāyāḥ 
śrīlalitāyāḥ kramamārabheta || 1 || 

evamiti vighnavyatikaraḥ-ityantena granthena pūrvaṃ kaṃcitkālaṃ 
gaṇapatyārādhanaṃ kṛtvā paścāt śrīlalitopāstyārabhya iti sūcitam | evaṃ 
pūrvoktaprakāreṇa iṣṭvā upāsya vidhūtā nirastāḥ samastāḥ saṃpūrṇāḥ 
vighnānāṃ vyatikarāḥ saṅghātāḥ yena ||

gaṇanāyakopāsteḥ pradhānakarmatvam 

idam adhikāriviśeṣaṇam | ayam utpattividhiḥ | pūrvaviśeṣaṇasvārasyāt 
adhikāravidhirapi | yadvā-nādhikāriviśeṣaṇamidam tathā sati 
gaṇapaterupāsanāyāḥ agnimopāsanāṅgatvāpatteḥ | na ceṣṭāpattiḥ | 
tārtīyaśrutiliṅgādīni aṅgatvasādhakāni ṣaṭ pramāṇāni | tanmadhye 
tṛtīyavākyapramāṇasiddham aṅgatvam tadbādhakaliṅgaśrutyorabhāvena 
pramāṇasiddhāṅgatvāpahnavasya kartumaśakyatvāt | kiṃ tu 
gaṇapatyupāstyuttaravṛttitvarūpakramaviśiṣṭalalitopāstiranena vidhīyate | yadvā-
pūrvopāstirūpaguṇaviśiṣṭakramaviśeṣaviśiṣṭo vā ayamārambhaḥ | 
tatkālalalitopāstiḥ anena vidhīyate | vidhūtasamastavighnavyatikara iti 
pūrvoktaphalasyānuvādakam | evaṃ cārambho nāma saṅkalpaviśeṣaḥ 
darśapūrṇamāsāvārapsye itivat | lalitākramamārabheta ityanena yāvajjīvaṃ 
vartiṣye iti saṅkalpaḥ siddhaḥ | tadaṅgaṃ gaṇapatyārādhanam | 
etadguṇakasaṅkalpaśca śrīlalitopāstau prayājādivadārādupakārakaḥ 
pradhānakarma yaistu dravyaṃ na cikīrṣyate iti jaiminisūtroktalakṣaṇasattvāt | na 
ca adhikāriviśeṣaṇatve saṃpratyuktaviśiṣṭavidhirūpatve vā anuṣṭhāne ko 
viśeṣa iti vācyam | yadyadhikāriviśeṣaṇaṃ tarhi pramādādinā 
gaṇapatyupāstimakṛtvā lalitopāstyārambhe anadhikāriṇā andhādinā 
anuṣṭhitadarśapūrṇamāsavat tāvatparyantakṛtasya karmaṇo'phalatvena yadā 
sāvadhānatā tadā lalitopāstiṃ tyaktvā gaṇapatyupāstiṃ saṃpādya 
saṃpannādhikāraḥ tataḥ śrīvidyopāstiṃ kuryāt | viśiṣṭavidhipakṣe 
gaṇapatyupāsterārambhāṅgatvena ārambhasya ca lalitopāstyaṅgatvena 

p. 86) 

vismṛtyārambhe jāte sati aṅgalopajanitadoṣaparihārāya kiṃcidvihitaṃ 
prāyaścittam nāṅgānusāreṇa pradhānāvṛttiḥ | na ca 
atyantamaṅgalopādvaraṃ tasyānuṣṭhānaṃ pradhānasyāṅgānanurodhitvānmā 
bhavatvāvṛttiḥ aṅgaṃ tu kevalamanuṣṭhīyatām iti vācyam | 
pradhānapūrvāṅgānāṃ yāvatāṃ pradhānena apūrve jananīye sahakāritvaṃ 
kāmye pradhānenāpūrve jananīye sahakāriṇo'bhāvāt anantaraṃ pradhānasya 
naṣṭatvena kevalāṅgānuṣṭhāne tadapi vyartham | nitye tu yāvajjīvaṃ kartavyam 
ityaṅgaloparahitaṃ ca kartavyam ityukte aśakyānuṣṭhānarūpatvena śāstrasya 
aprāmāṇyāpattibhiyā sakalāṅgam ityasya 
yāvacchakyayāvajjñātasakalāṅgamiti vākyasaṅkoco yuktaḥ | tathā ca 
yathāśakti yāvajjñātairevāṅgaiḥ sahitapradhānena apūrvotpattiḥkalpyata iti 
kḷptaṃ ṣaṣṭhe | tathā ca lalitopāsternityatvena ajñātayatkiṃcidaṅgalope'pi 
pradhānenetarāṅgasahitena apūrvajananāt punaraṅgānuṣṭhānasya vyarthatvāt 
na gaṇapatyupāstirūpasyāṅgasyājñātasya punaranuṣṭhānam | yadi 
vighnanirāsārthaṃ kiṃcidanuṣṭheyaṃ tarhi vināyakastavapāṭhādikaṃ 
tanmantrajapa eva vā kāryaḥ | evaṃprakārānuṣṭhānabhedo'sti iti tadvicāraḥ 
kṛtaḥ | ito'dhikaṃ sudhiyo vicārayantu ||

śakticakraikanāyikāyāḥ śakticakrāṇi śrīcakrāvayavanavacakrāṇāṃ madhye 
trikoṇādīni pañcacakrāṇi | taduktaṃ brahmāṇḍapurāṇe-

caturbhiḥ śivacakraiśca śakticakraiśca pañcabhiḥ |
navacakraiśca saṃsiddhaṃ śrīcakraṃ śivayorvapuḥ ||
trikoṇamaṣṭakoṇaṃ ca daśakoṇadvayaṃ yathā |
caturdaśāraṃ caitāni śakticakrāṇi pañca ca || iti ||

teṣām ekā mukhyā nāyikā yā tasyāḥ | yadvā-śaktayaḥ sadhavāḥ striyaḥ 
tāsāṃ cakraṃ samūhaḥ teṣāṃ madhye ekā advitīyā ceyaṃ nāyikā [nāthā 
śreṣṭhā | na ca-ba |] jaganniyantrī | na ca na nirdhāraṇe iti ṣaṣṭhīsamāsaniṣedhāt 
kathamayamarthaḥ iti vācyam ṣaṣṭhīsamāsaniṣedhe'pi puruṣottamaḥ-itivat 
saptamīsamāse bādhakābhāvāt | yadvā-tattadvastuniṣṭhatattatkāryanirvāhikāḥ 
śaktayaḥ tāsāṃ samūhasyaikā advitīyā nāyikā prerikā taduktaṃ 
śrīdevībhāgavate-

śivādyavaniparyante śaktayaḥ kāryasādhakāḥ |
mayaiva preritā viddhi tāḥ sarvā munisattama || iti ||

yadvā-śaktayaḥ śyāmāvārtālīprabhṛtayaḥ tā eva cakraṃ parivāraḥ cakraṃ 
sevyaṃ nṛpaḥ sevyaḥ ityabhiyuktaprayogāt | tāsāmekanāyikā advitīyaniyantrī 
ityarthaḥ | etena śrīvidyāyāḥ prādhānyaṃ sūcitam | śakticakraikanāyiketi 
lalitāyā guṇaḥ | tathā ca viśiṣṭasya devatātvaṃ utpattivākye 

p. 87)

śrūyamāṇaguṇaviśiṣṭasya devatātvāt yadagnaye pavamānāya-agnaye 
pāvakāya ityādivat utpattivākye śrutadevatāyāḥ sarvatroccāraṇamiti niyamāt | 
itthaṃ ca yatra devatānāmakīrtanamāvaśyakaṃ tatra guṇaviśiṣṭasyaiva 
kīrtanam yathā sandhyājapādau sandhyāpūjā'dau śakticakraikanāyikāyāḥ 
śrīlalitāyāḥ prītaye amukakarma kariṣya iti | evaṃ nivedane | anyathā 
pavamāneṣṭau agnaye juṣṭaṃ nirvapāmi ityeva syāt | tasmāt 
guṇaviśiṣṭadevatāyojanaṃ mantreṣvatra kāryam | kramaṃ pūjām upāsanāṃ 
vā ārabhet ||

lalitānāmanirvacanam 

lalitānāmanirvacanaṃ padmapurāṇe-

lokānatītya lalate lalitā tena cocyate | iti ||

atra cakāradyotyaṃ niruktyantaraṃ darśayāmāsurasmatparameṣṭhiguravaḥ 
sahasranāmabhāṣye-lalitaṃ śṛṅgārabhāvajanyaḥ kriyāviśeṣaḥ tadvatī lalitā | 
tena śṛṅgārarasapradhāneyaṃ mūrtiriti dhvanitam || 1 || 

brāhmamuhūrtakartavyadhyānādi 

tato [itaḥ paraṃ lalitopāsakena anudinaṃ kartavyāḥ kriyā āha iti ba kośe.] 
gurudhyānādīnupadiśati sūtradvayena-

brāhme muhūrte brāhmaṇo muktasvāpaḥ pāpavilāpāya paramaśivarūpaṃ 
gurumabhimṛśya || 2 ||

brāhmaḥ muhūrtaḥ-divasaṃ ṣaṣṭighaṭikā'tmakaṃ triṃśatā vibhajya 
aṣṭāviṃśo muhūrtaḥ sa brāhmaḥ | taduktaṃ devībhāgavate-

aṣṭāviṃśatitamo yaśca muhūrto brahmanāmakaḥ |
tasminnutthāya matimāṃścintayedātmano hitam [itonyadapi purāṇaprasiddhaṃ 
brāhmamuhūrttalakṣaṇaṃ tatra svāpaniṣedhopi viṣṇupurāṇe 
ratnāvalyādigranthādau ca-yathā-
rātreḥ paścimayāmasya muhūrto yastṛtīyakaḥ | sa brāhma iti vijñeyo vihitaḥ sa 
prabodhane ||
pañca pañca uṣaḥkālāḥ sapta pañcāruṇodayaḥ | aṣṭa pañca 
bhavetprātastataḥ sūryodayaḥ smṛtaḥ ||
tatra phalaṃ dhanvantariḥ-dharmārthakāmaprītyarthe satāṃ grahaṇamuttamam | 
prāpnuyātsvargavāsaṃ ca nityamevaṃ samācaret ||
ratnāvalyāṃ ca | brāhme muhūrte yā nidrā sā puṇyakṣayakāriṇī | tāṃ karoti 
dvijo mohātpādakṛcchreṇa śudhyatīti ||] || iti ||

tasmin brāhmaṇaḥ muktasvāpaḥ nidrāṃ tyaktvā | tasmin samaye nidrātyāgasya 
sāmānyataḥ smṛtiprāptatve'pi kratvarthatvena aprāptamanena vidhīyate | 
darśapūrṇamāsaprakaraṇe nānṛtaṃ vadet itivat kratvarthatvam | 
tasminnidrā'bhāve prāśastyaṃ ca tripurārahasye-

dvimuhūrtāvaśeṣe tu sūryasyodayanaṃ prati |
uṣaḥkālaḥ samākhyātaḥ sādhakānāṃ śubhāvahaḥ ||

p. 88)

tatkāle yo yamarthaṃ vai cintayenniścalāntaraḥ |
tadasya jāyate rāma kālavelāsvabhāvataḥ ||
yastu kalpadrumaprakhye kāle'sminnāvabudhyate |
buddhvā vā svaṃ hitaṃ niava cintayatyatimūḍhadhīḥ ||
sarvaiḥ svārthaiḥ paribhraṣṭaḥ paṅke gauriva sīdati || iti ||

īdṛśe kāla utthāya sarvapāpakṣayāya-tādarthye caturthī | śiva [atra pūrvatane 7 
patre 1 sūtrabhāṣye vṛttikṛdudāhṛte śrutipathagalitānāmityādiśloke śrīsūtopi 
śrīśivaṃ bhagavantaṃ gurugururityāha-tathaivātra sthalepi bhagavān 
śrījāmadagnyo rāmopyenaṃ parameṣthinaṃ śrīśivaparamaśivaṃ 
gurumityācacaṣṭa idamevātiśāyi namasyatvaṃ madādevatvaṃ ceśasya 
guruguroriti-pa.-ka.-sū.-dvitīyāvṛttiddipariśiṣṭakāraḥ ] eva guruḥ na tato'nyaḥ 
iti abhimṛśya manasi dhyātvā || 2 ||

mūlādividhibilaparyantaṃ taḍitkoṭikaḍārāṃ taruṇadivākarapiñjarāṃ 
jvalantīṃ mūlasaṃvidaṃ dhvātvā tadraśminihatakaśmalajālaḥ kādiṃ hādiṃ 
vā mūlavidyāṃ manasā daśavāramāvartya || 3 ||

mūlam ādhāracakraṃ tadādi tadārabhya vidhibilaparyantam etasya 
jvalantīmityanenānvayaḥ | taṭitkoṭayo vidyutkoṭayaḥ tadvat kaḍārāṃ kapiśāṃ 
taruṇadivākaraḥ nabhomadhyavartī sūryaḥ tadvat piñjarām ata eva jvalantīṃ 
mūlasaṃvidaṃ nirviṣayacittaṃ dhyātvā tadraśmibhiḥ cidrūpajvālāraśmibhiḥ 
nihatāni parihṛtāni kaśmalānāṃ jālāni samūhāḥ yena īdṛśaḥ san kādiṃ 
kāmopāsitāṃ hādiṃ lopāmudropāsitāṃ vā vidyāṃ pañcadaśīṃ manasā 
kramaviśiṣṭān varṇān dhyātvā ||

atra nibandhe svagurupādukoccāraḥ pañcamudrābhiḥ namanam anye ca 
svakapolakalpitāḥ ślokāśca likhitāḥ | te sūtrānabhimatā anādaraṇīyāḥ | 
evaṃ dantadhāvane mantrāḥ viṃśatigaṇḍūṣaniyamaḥ sarve'pi 
niṣpramāṇāstyājyāḥ || 3 ||

snānasandhyākarma 

tataḥ snānasandhye vadati-

snānakarmaṇi prāpte mūlena [mūlena mūrdhani datvā-ba.] datvā triḥ 
salilāñjalīn tristadabhimantritāḥ pītvā'pastrissantarpya triḥ prokṣyātmānaṃ 
paridhāya vāsasī [mūlena ityadhikaḥ-ba2.] hrāṃ [gṛhamāgatya dīrghatrayānvito 
haṃsa ityuktvā ityadhikaḥ ta kośe.] hrīṃ hrūṃ saḥ ityuktvā 
mārtāṇḍabhairavāya prakāśaśaktisahitāya svāheti trissavitre dattārghyaḥ || 4 ||

p. 89)

snānakarmaṇi prāpte snānāvasare | etena vaidikasnānottaratvam asya sūcitam | 
ayamevārthaḥ spaṣṭamuktaḥ tripurā'rṇave-

traivarṇikairvaidikā'nte tāntrikaṃ kriyate'khilam || iti ||

atra pratyañjali mantrāvṛttiḥ | añjalīn iti bahuvacanena dravyabhede siddhe 
kriyāyā āvṛttirapi dravyabhede mantrāvṛtterekādaśe vyavasthāpitatvāt | dattvā 
ityasya kutretyākāṅkṣāyāṃ snānarūpatayā yogyatvāt svaśirasīti 
pūraṇīyam | mūlena iti mūlamuccārayanniti tadarthaḥ | triḥ tadabhimantritāḥ 
mūlābhimantritāḥ | trirityasya abhimantritā ityanenānvayaḥ sannihitatvāt na 
pītvetyanena viprakṛṣṭatvāt | tena mūlatrivārābhimantritānām apāṃ sakṛdeva 
prāśanam | triḥ santarpya mūlamuccārya śakticakraikanāyikāṃ śrīlalitāṃ 
tarpayāmīti mantrasya sakṛtpāṭhaḥ kriyā'bhyāsarūpatvāt | caturāvṛttitarpaṇe 
tu mantrāvṛttireva na kriyā'vṛttiḥ iti pūrvameva vyavasthāpitam | na hi 
dravyabhedaprāpakaṃ śāstramasti tasmāt sakṛdeva mantraḥ | 
prokṣaṇe'pyevameva | ātmānam iti śarīravācakaṃ mukhyārthasya 
prokṣaṇajanitasaṃskārāsambhavāt | tarpaṇaprokṣaṇayoḥ mantrānukteḥ 
mūleneti yojayet | taduktaṃ tripurā'rṇave-

mantrānuktau mūlamantraṃ yojayet parameśvari || iti ||

na mūlena dattvā ityasmādanuṣaṅga tathā sati tadabhimantritāḥ 
ityatrāpyanuṣaṅge tatpadavaiyyarthyāt | ato'dhyāhāra eva | vastraparidhānaṃ 
[mūlena mūlamuccārayan iti tadarthaḥ ityadhikaḥ-ba 2.] smṛtiprāptamanūdyate | 
tatphalaṃ snānakarmaparisamāptijñānaṃ jñeyam | ityuktvā 
[vaidikasandhyottaraṃ tāntrikasadhyāṃ kariṣye iti saṅkalpya-ityadhikaḥ-ba. kośe.] 
ityetāvadapahāya svāhā'nto'rghyadānamantraḥ | yadyapi mantraliṅgenaiva 
devatālābhe savitra iti vyartham | tathā'pi dattārghya ityatra dānapadārthaḥ 
svasvatvadhvaṃsapūrvakadevatoddeśyakadravyatyāgaḥ | sa ca amukadevatāyā 
idaṃ na mameti rūpaḥ | tatra mantraliṅgena mārtaṇḍabhairavāyedaṃ na mameti 
siddhaḥ | aindryā gārhapatyamupatiṣṭhate itivat taṃ bādhituṃ caturthyantaṃ 
savitre iti | atrāpi sakṛddattadravyasya punardānāsambhavāt aparārghye 
dravyāntaratvaṃ siddham | tathā ca dravyapṛthaktvāt mantrāvṛttiḥ yathā 
nānābījeṣvavahananamantraḥ || 5 ||

tataḥ śrīcakrabhāvanaṃ savitṛmaṇḍale devyai arghyadānaṃ ca vidhīyate-

tanmaṇḍalamadhye navayonicakramanucintya [iyaṃ śrītripurāgāyatrī spaṣṭā 
yathā-aiṃ tripurasundari vidmahe klīṃ pīṭhakāmini dhīmahi | tannaḥ klinnā 
pracodayāt |] vācamuccārya tripurasundari vidmahe kāmamuccārya pīṭhakāmini 
dhīmahi-śaktimuccārya tannaḥ klinnā pracodayāditi-trirmaheśyai dattārghyaḥ 
śatamaṣṭottaramāmṛśya manuṃ maunamālambya || 5 ||

p. 90)

tasya savitṛmaṇḍalasya dṛśyamānavartulākārasya madhye navayonayaḥ catasraḥ 
parāṅmukhāḥ pañca svābhimukhā yonayo yasmin tat navayonicakraṃ 
śrīcakramityarthaḥ | taduktaṃ kāmikāgame-navayoniḥ śrīcakramiti | 
sundarīhṛdaye'pi-navayoniḥ śrīcakraṃ viśvasyotpattikāraṇaṃ proktam iti | 
śeṣaṃ spaṣṭam | vācaṃ prathamakūṭaṃ 
śrīmadvāgbhavakūṭaikasvarūpamukhapaṅkajā iti pramāṇāt | 
prathamakūṭānantaraṃ vidmahe ityantaṃ paṭhet | tataḥ kāmaṃ madhyakūṭaṃ 
taduktaṃ cidgaganacandrikāyām-

śaktivāgbhavayormadhye kāmarājastu viśrutaḥ |
raktaśuklaprabhāmiśraḥ...................... iti ||

taduccārya pīṭhakāmini dhīmahi iti paṭhet | śaktiṃ śaktikūṭaṃ tṛtīyam 
uccārya paṭhitvā śaktikūṭaikatā'pannakaṭyadhobhāgadhāriṇī iti 
sahasranāmapāṭhāt | tataḥ pracodayādityantaṃ paṭhet | idaṃ 
tripurāgāyatrītyapyucyate | śeṣaṃ pūrvavat | āmṛśya japitvā | śeṣaṃ spaṣṭam 
|| 

atra nibandhakāroktaṃ-snāne jale hastamātramaṇḍalakaraṇamārabhya vam iti 
bījena saptavāramabhimantraṇāntaṃ sandhyāyāṃ trirātmānaṃ 
prokṣyetyantaṃ-tantrāntarastham etattantrānusāriṇā na spraṣṭavyam | yadi 
spṛśyate tantrāntaraṃ tarhi sandhyātrayaṃ pārāyaṇakramaśca kena hetunā 
tyaktaḥ | tanmūlaṃ prāmāṇikaśced vadatu || 5 || 

yāgamandirapraveśādi 

tato yāgamandirapraveśādin vadati-

yāgamandiraṃ gatvā kḷptākalpassaṅkalpākalpo vā pīṭhamanunā āsane 
samupaviṣṭaḥ || 6 ||

yāgamandiraṃ pūjāsthānaṃ gatvā | etena sandhyā bahirjale nadyādāviti 
siddham | kḷptāḥ dhṛtāḥ ākalpāḥ bhūṣaṇāni yenedṛśaḥ | idaṃ 
bhūṣaṇadhāraṇaṃ pūjākarturaṅgam | ato loke pūjākarturdhāryāṇi yāni 
bhūṣaṇāni tānyavaśyaṃ dhāryāṇi | idaṃ ca śrīmatāṃ sambhavati | evaṃ sati 
daridrasya aṅgabhūtabhūṣaṇāsamarthasya andhādivadanadhikāraḥ prasaktaḥ | 
ata āha-saṅkalpākalpo veti | saṅkalpena mānasakriyayā kalpita ākalpo yenedṛśo 
vā | manasā nirmitabhūṣaṇadhāraṇakarteti yāvat | tathā ca 
daridrasyāpyastyadhikāra iti bhāvaḥ | bhūṣaṇāni padmarāgapracurāṇi 
bhūṣaṇaviśeṣaniyamasya tantrāntarasthasyāpi grahaṇamabhimatam ||

p. 91)

yattu nibandhe dvārapūjāyāṃ tāmbūlabhakṣaṇamuktaṃ tat 
sūtrakārānabhimatam | yadvā-yāgamandire kriyāvidhānāt arthasiddhe gamane 
punaryāgamandiraṃ gatveti vyarthaṃ sat 
gaṇapatikramasthāntaḥpraviśyetyarthakaśabdakathanāt tadantadharmātideśaṃ 
jñāpayati | ata eva vārāhīkrame nāyaṃ śabdaḥ | tena śrīkrame śyāmākrame 
dvārapūjā'stu | tathā'pi śrīkrame tāmbūlabhakṣaṇaṃ nirmūlameva ||

pīṭhamanuneti pūrvaṃ vyākhyātam | samupaviṣṭa ityatra samityupasargeṇa ā 
samāpti ekāsanena stheyam iti jñāpayati | ata eva yenāsanena 
samāptiparyantamavasthāne svasya śramo na syāt tena padmādyanyatamenāsanena 
stheyamityarthaḥ ||

nibandhe bālātṛtīyabījena dvādaśavāramabhimantraṇaṃ mūlamantreṇa 
prokṣaṇam uktam | tat sūtrānabhimataṃ jñeyam || 6 ||

etatsaparyopayoginīṃ tritārīmāha-

tritārīmuccārya raktadvādaśaśaktiyuktāya dīpanāthāya nama iti bhūmau 
muñcet puṣpāñjalim || 7 ||

tritārīṃ vakṣyamāṇāmuktvā [atraiva adhastane-sūtre bhāṣye ca-ityarthaḥ |] 
nama ityantamuccaret | ayaṃ dīpanāthārhaṇamanuḥ | anena bhūmau 
puṣpāñjaliṃ dadyāt | puṣpāṇāmañjaligṛhītānāṃ pracayaḥ puṣpāñjaliḥ | 
taduktam agastyasaṃhitāyāṃ somavāravidhiprakaraṇe-

saṃśliṣṭahastadvayamadhyavartī prasūnapuñjaḥ kusumāñjaliḥ syāt || iti || 7 ||

sarvamantreṣu tritārīsaṃyogavidhiḥ 

sarvamantropayuktāṃ kāṃcit paribhāṣāmāha-

sarveṣāṃ mantrāṇāmādau tritārīsaṃyogaḥ | tritārī vāṅmāyākamalāḥ || 8 
||

atra sarvaśabdasya prakaraṇena saṅkocaṃ kṛtvā 
śrīvidyopāstyaṅgabhūtānāmetaduttarapaṭhitānām ityarthaḥ | 
tenaitatpūrvamantreṣu tritārīyogo nāstīti siddham | ata eva setubandhe-
yāgamandirapraveśottaraṃ kalpasūtre tritārīyogapāṭhāt tataḥ prāk mantreṣu na 
tadyoga iti mantavyam iti sthitam | ādāvityanena antavyāvṛttiḥ | yoga iti vaktavye 
samityupargeṇa tritāryuccāraḥ spaṣṭamabhūt | tato 
yatkiṃcidaṅgamantrapāṭhasamaye madhye yadi karaṇāpāṭavādidoṣeṇa eko 
varṇo luptaḥ tadā punarmantraḥ paṭhanīyaḥ tatrāpi punaḥ tritārīyogaḥ sūcitaḥ | 
yadvā-tritārīpāṭhānantaraṃ kenacit pratibandhena mantrapāṭhe yadi 
kṣaṇavilambaḥ tādṛśasthale punastritāryuccāro'vilambenoccāraṇarūpo 

p. 92)

jñāpyate | yadyapyanenaiva dīpanāthārhaṇamantre tritārīyogaprāptau tatra 
tritārīmuccāryeti vyartham | tathā'pi tatra tritārīmuktveti tanmantraghaṭakatvaṃ 
tritāryā jñāpayati | eyaṃ paribhāṣā ca tritārīyogena mantrāṇāṃ 
saṃskāraṃ vadati iti na vaiyyarthyam ||

yattu nibandhe dīpanāthārhaṇottaraṃ gaṇapatinamanaṃ gurunamanam 
aṅguṣṭhādikaniṣṭhāntavyāpakamiti prāṇapratiṣṭhā ca tatsarvaṃ 
tantrāntarastham anyaprakaraṇasthaṃ śrīvidyāprayoge na spraṣṭavyam ||

atra tritārī ketyākāṅkṣāyāmāha-tritārīti | vāk sabinduḥ dvādaśasvaraḥ | 
māyā turīyoṣmasahitadvitīyāntasthottarasabindusturyasvaraḥ | kamalā 
prathamoṣmasahitadvitīyāntasthopari sabindusturyasvaraḥ | ete tritārīpadavācyā 
bhavantīti śeṣaḥ [aiṃ hrīṃ śrīṃ-iti-saṃbhūya-tritārīmantraḥ |] | 
vāgādīnāmuktārthatve pramāṇamagre vakṣyāmaḥ || 8 ||

śrīcakrasvarūpaṃ tatsādhanadravyaṃ ca 

itaḥ paraṃ śrīcakrasvarūpaṃ tatsādhanadravyaṃ cāha-

purataḥ pañcaśakticatuḥśrīkaṇṭhamelanarūpaṃ bhūsadanatrayavalitrayabhūpa-
patradikpatrabhuvanāradruhiṇāravidhikoṇadikkoṇatrikoṇabinducakramayaṃ 
mahācakrarājaṃ sindūrakuṅkumalikhitaṃ [militaṃ-a |] 
cāmīkarakaladhautapañcaloharatnasphaṭikādyutkīrṇaṃ vā niveśya || 9 ||

purata ityasya niveśyetyanena sākamanvayaḥ | pañcaśaktayaḥ śakticakrāṇi 
catuḥśrīkaṇṭhāḥ catvāri śivacakrāṇi eṣāṃ melanarūpam abhinnasvarūpam | 
etena viśeṣaṇena etādṛśasvarūpajñānaṃ pūjā'dāvāvaśyakamiti sūcitam | 
etanmelanaprakāraḥ pūjākāle īdṛśajñānasyāvaśyakatā coktā 
brahmāṇḍapurāṇe-

trikoṇe baindavaṃ śliṣṭamaṣṭāre'ṣṭadalāmbujam |
daśārayoḥ ṣoḍaśāraṃ bhūgṛhaṃ bhuvanāsrake ||

śaivānāmapi śāktānāṃ cakrāṇāṃ ca parasparam |
avinābhāvasambandhaṃ yo jānāti sa cakravit ||

evaṃ vibhāgamajñātvā śrīcakraṃ yo'rcayet sakṛt |
na tatphalamavāpnoti lalitā'mbā na tuṣyati || iti ||

p. 93)

ayamevārthastantreṣu bahu pratipāditaḥ | granthavistarabhayānneha 
tatratyavacanāni likhitāni | bhūsadanatrayaṃ paritaḥ caturasrarekhātrayam | 
caturasrabhūsadanaśaktigrāhakaṃ pramāṇaṃ tu-

tadbāhye vṛttamālikhya tadbāhye caturasrakam |

iti tantrāntaravacanam | asmatparameṣṭhigurubhirapi setubandhe likhitaṃ bhūgṛhaṃ 
nāma caturasram iti ||

śrīcakre dvārarahitacaturasratrayalekhanasamarthanam 

nanu tantrāntaravacane caturasrakamityekavacanena ekameva caturasramiti pratīyate 
iha caturasratrayamityuktam dvayorvirodhe kathametaditi cet-na 
tattattantrānusāripuruṣabhedena vyavasthitavikalpasambhavāt | evaṃ 
sūtrānuyāyināṃ śrīcakre bhūpuraṃ dvārarahitam anuktatvāt ||

nanu tripurā'rṇave vṛttaṃ tato bhūpurāṇāṃ tritayaṃ dvāraśobhitam 
ityuktatvāt evaṃ nityātantre evaṃ tribhūsadanakaṃ caturdvāravibhūṣitam iti 
vāmakeśavaratantre pariveṣaṃ bhūpuraṃ ca caturdvāropaśobhitam iti 
evamāditantrānusāreṇa atrāpi dvāratātparyaṃ kalpyatām-iti cet-na vṛttatrayaṃ 
ca dharaṇīsadanatrayaṃ ca śrīcakrametaduditaṃ paradevatāyāḥ iti yāmalavacane 
evamanyeṣvapi tantreṣu dvārarahitabhūpuraśravaṇena vikalpasya durnivāratvāt | 
na caivaṃ dvārarahitabhūpurasya kenāpi 
nibandhakāreṇālikhitatvādidamaśraddheyam iti vācyam saundaryalaharyāṃ 
trayaścatvāriṃśat iti śloke dvārānukteḥ 
bhagavatpādānāmasmaduktapakṣasyaivābhimatatvāt | evaṃ 
prapañcasāraṅgrahe śrīvidyāraṇyasvāmibhirapi dvārarahitamapi śrīcakre 
caturasramupalabhyate kvaciditi granthena asmadanumatameva likhitam | 
evamaticirantanaśiṅgabhūpālapaddhatāvapi tathā'sti | idamanveṣituṃ pravṛttau 
anyānyapi nibandhāntaravākyāni miliṣyanti | etāvadalamiti na viśeṣayatnaḥ 
kṛtaḥ ||

itthaṃ cāhaṃ sūtrānuyāyīti viśeṣābhimānavatā nityotsavanibandhakāreṇa 
śrīcakralekhanaprakārakathanāvasare caturdvāraṃ bhūpuraṃ samudbhāvayet iti 
yato likhitam ata eva tena sūtraṃ na pariśodhitam | gatānugatikalokānusāreṇa 
likhitamiti sphuṭam ||

kiṃ ca nibandhakāraḥ śrībhāskararāyāṇāṃ śiṣya iti svanibandha eva lilekha | 
śrībhāskararāyoktasetubandhe pratidiśaṃ rekhātrayayuktaṃ 
dvārasāmānyābhāvavat iti tṛtīyaḥ pakṣaḥ | kalpasūtramasmin pakṣe 
anukūlamiti likhitam ||

kiṃ ca sarveṣāṃ mantrāṇām ādau tritārīsaṃyoga iti kalpasūtrasya 
yāgamandirapraveśottarameva pāṭhāt tataḥ prāktanamantreṣu na tadyoga iti 
setubandhe sthite ayaṃ muṣaḥkārī raśmimālāmantreṣu 

p. 94)

sandhyāvandane ca tritārīṃ yojayāmāsa | tathā dvāracatuṣṭayaṃ ca 
yojayāmāsa | evaṃ sati gurumatamapi yaḥ ajānan svecchayā likhati sa kīdṛśa 
upāsakaḥ kīdṛśo vā guruśiṣyabhāvaḥ taṃ na vidmaḥ ||

yadi ca setubandhe prathamaṃ dvārasāmānyābhāvaṃ vilikhya agre tattvaṃ 
vicārya agre tatraiva dvārasāmānyābhāvapakṣastu 
dvārapratiṣedhaparyudāsānyataramantareṇa yāmalakalpasūtrādau 
dvārānuktimātreṇa kalpyamānaḥ sāhasamātram iti likhitatvāt kathaṃ 
gurumatānabhijñatetyucyate-tadā āstāṃ dvāraviṣaye gurumatābhijñatā | 
raśmimālāmantreṣu sandhyāmantreṣu ca tritārīyojane gurumatānabhijñatā 
vajralepāyitā | etenāyaṃ nibandhaḥ sarvatantrasvatantraśrībhāskararāyaiḥ 
pariśodhita ityaitihyamapi nirmūlamiti sphuṭaṃ yuktamutpaśyāmaḥ || 

valitrayaṃ vṛttatrayam [etadviṣaye-ddi. pa.-śi.-11-vi.-dṛśyaḥ |] | atra bahavaḥ-
ṣoḍaśadalasya aṣṭadalasya dve karṇikāvṛtte tayorbahiḥ ekaṃ vṛttaṃ evaṃ ca 
vṛttatrayaṃ na padmadvayasya bahirvṛttatrayam | yattu balitrayam iti kalpasūtram 
vṛttatrayaṃ ca dharaṇīsadanatrayaṃ ca iti yāmalavacanaṃ jyeṣṭārūpaṃ 
catuṣkoṇaṃ vāmārūpaṃ bhramitrayam itti yoginītantravacanam sarvam 
uktavṛttatrayaparamevetyāhuḥ ||

śrīcakre pañcavṛttalekhanasamarthanam 

atra asmatparameṣthiguravaḥ setubandhe vakṣyamāṇaprakārāntareṇa 
śrīcakralekhanāvasare-

bahiḥ padmadvayaṃ kuryādaṣṭaṣoḍaśakacchadam |
guṇavṛttaṃ tataḥ kuryāccaturasraṃ ca tadbahiḥ ||

iti vāmakeśvaratantravacane tataḥ padasvārasyena padmadvayādbahireva trīṇi 
vṛttāni tadanusāreṇa pariśeṣaṃ bhūpūraṃ ceti | atraikavacanamavivakṣitam | 
evaṃ ca pañca vṛttāni | ata eva jñānārṇave [jñānārṇave-10 paṭale-72-73-
ślokāvimau staḥ |]-

etadbāhye maheśāni vṛttaṃ pūrṇendusaṃnibham |
tadyutaṃ kuru mīnākṣi vasupatraṃ manoharam |
tathā ṣoḍaśapatraṃ tu vilikhet suravandite |
tadbāhye devadeveśi trivṛttaṃ mātṛkā'nvitam |

ityatra tadbāhya iti padena karṇikāvṛttādatiriktaṃ vṛttatrayaṃ suspaṣṭamuktam ||

tadvyākhyātāro'nye āgraheṇa tadbāhye iti ślokārdhaṃ svapustapakori 
likhitatvāt akṣaralekhanaprakārasya kasmiṃścittantre alekhanāt 
akasmānmātṛkā'nvitatvokterasaṅgatatvāt bahuṣu 

p. 95)

pustakeṣu anupalabdheśca prakṣiptamiti paramatamanūdya tadupari yadi prakṣiptaṃ 
tarhi tṛtīyavṛttavidhāyakavacanābhāvāt vṛttadvayāpatteriti dūṣitatvāt 
saṃhitāyāṃ tantrāntare ca bahirvṛttatrayaṃ suspaṣṭamastīti likhitatvāt 
pañcavṛttānīti (setubandhe) vyavasthāpayāmāsuḥ |

atra maheśvarānandanāthāḥ-tadbāhye vṛttamālikhya tadbāhye caturasrakam iti 
paramānandatantre vṛttamityekavacanāt vṛttaṃ tato bhūpurāṇām iti vṛttaṃ 
tribhūsadanakam iti pariveṣaṃ bhūpuraṃ ca iti suvṛttaṃ parameśāni iti 
tripurārṇava-nityātantra-vāmakeśvaratantra-dakṣiṇāmūrtisaṃhitāsu 
ekavacanabalāt karṇikāvṛttadvayenaiva saha trivṛttamiti vyavasthāpya tataḥ 
setubandhamatamanūdya taddūṣaṇe setubandha eva 
vāmakeśvaratantrajñānārṇavavacanayoḥ bahuṣu pustakeṣvanupalambhāditi 
śrībhāskararāyalekhaṃ hetutvenopanyasya setubandhaṃ dūṣayāmāsuḥ ||

ayaṃ prakāro'siddhaḥ | setubandhe taiḥ siddhāntāvasare bahuṣu 
pustakeṣvanupalambhāditi noktaḥ | kiṃ tu vādimatānuvādavelāyām upanyastaḥ | 
sa ca vādino lekhaḥ | tena hetunā śrībhāskararāyamataṃ kathaṃ nirastam | 
rāyaiśca pratyuta matpustakamadhyalekhāt pramāṇameveti pratibandyuttaraṃ 
vṛttadvayāpattiśceti dūṣaṇadvayaṃ dattam | kiṃ ca vāmakeśvaratantravacane na 
ko'pi vivādaṃ lilekha | evaṃ sati tatrāpi nirmūla īdṛśo doṣāropaḥ kevalaṃ 
svapāṇḍityaprakaṭanārtha eva | ato vāmakeśvaratantravacanasya 
vṛttatrayaprāpakasya jñānārṇavasya ca gatimakalpayitvā na 
vṛttapañcakanivṛttirbhaviṣyati ||

yadi ca niruktaikavacanabalādeva yāmalakavacanena aṣṭadalaṣoḍaśadaleti 
pṛthaguktvā taduttaraṃ śrūyamāṇavṛttatrayetipade trayamityasya 
samudāyānuvādakatvarūpavaiyyarthyamaṅgīkṛtya evaṃ vāmārūpaṃ 
bhramitrayamityatra aṣṭadalaṣoḍaśadalāvayavasya bhramereva 
vāmārūpatvakalpanāyāsaḥ kriyate | tarhi tadbāhye 
caturasrakamityatrāpyekavacanaṃ tulyam | tadupodbalakāni vacanāni-
vāmakeśvaratantre pariveṣaṃ bhūpuraṃ ca iti tatraiva ṣaṣṭhapaṭale 
vāmārūpaṃ catuṣkoṇam iti pūrvatantre ca guṇavṛttaṃ tataḥ kuryāccaturasraṃ 
ca tadbahiḥ iti dakṣiṇāmūrtisaṃhitāyām-suvṛttaṃ parameśāni tato 
bhubimbamālikhet ityādivacanāni | evaṃ vacaneṣu satsu ekavacane nirbharavataḥ 
atra paramānandatantraṭippaṇyām caturasraṃ caturasratrayam [taccaturasratrayaṃ 
tribhiraṅgulaiḥ ityadhikaḥ-ba 2.] iti maheśvarānandanāthalekhaḥ 
sandarbhaviruddha eva ||

yadi ca bhūpurāṇāṃ tritayaṃ dvāraśobhitam ityāditantravacanairekavacanaṃ 
tatratyamavivakṣitamityucyate tarhi vṛttamityatraikavacanena ko'parādho'nuṣṭhitaḥ 
| evaṃ bahuṣvekavacanaṃ loke vede ca prayujyamānaṃ bahūpalabhyate | loke gṛhe 
dhānyamasti saṃpanno vrīhi iti 

p. 96)

hetustadudbhave iti īdṛśasthale jātyekavacanamiti vadanti śiṣṭāḥ | brāhmaṇo 
mama daivatam iti purāṇaprayogaḥ | śrutau bahupatnīkadarśapūrṇamāse patnīṃ 
saṃnahya gṛhaṃ saṃmārṣṭi ityevamādīni bahūni santi | tadvadupapateḥ 
naikavacanasya sarvathā gatyabhāvaḥ ||

na ca-uktasthaleṣu bādhakavaśādekavacanasya lakṣaṇāṃ bahutve kalpayitvā 
ekavacanaṃ nirvāhyam | prakṛte'pi tadvatpakṣāśrayaṇe 
vāmakeśvaratantrasthasya guṇavṛttaṃ tataḥ ityatra tata ityasyaiva lakṣaṇāyāṃ 
tātparyagrāhakatā vācyā | sā ca na sambhavati | 
tataḥpadaghaṭitavāmakeśvaratantrasya tadbāhye vṛttam iti 
paramānandatantrasyaikavacanaghaṭitasya tulyabalatvena ekavacanānusāreṇa tata 
ityasyaiva lakṣaṇāpakṣaṃ avivakṣāpakṣaṃ vā'śrityaikavacanavivakṣaiva kimiti 
na kriyate | dvayormadhye anyatarasya anyathānayane kārye tata iti 
padasvārasyenaikavacanamavivakṣitaṃ na viparītamityatra niyāmakābhāvāt-iti 
vācyam | pratyayārthaprātipadikārthayormadhye ekānusāreṇa 
aparasyānyathānayane prāpte prātipadikasya prabalatvena tadanusāreṇa 
vacanapratyayārthasyaivānyathā nayanam | taduktaṃ śrīvidyāraṇyasvāmibhiḥ-

triranūktir-ṛco dharmaḥ sthānadharmo'tha nāgrimaḥ |
strīliṅgatvānna tatprātipadikaprabalatvataḥ ||

iti prātipadikaprābalyasādhakayuktayo'pi bahvyaḥ santi | 
granthavistarabhayādabhiyuktoktikḷptaiva likhitā | tasmāt prātipadikībhūta tata 
ityanusāreṇa ekavacanameva anyathā neyam | tathā ca sudhiyā āgrahaṃ parityajya 
kevalatattvabubhutsunā vicāryamāṇe sarvatantreṣvapi vacanamātrasyāvivakṣāṃ 
kṛtvā śrīyantre pañcavṛttānyabhimatānīti sidhyediti | prakṛtamanusarāmaḥ ||

bhūpapatramiti-bhūpā iti ṣoḍaśasaṅkhyāyāḥ saṅketaḥ | ṣoḍaśa patrāṇi 
yasmiṃstat | dikpatraṃ-digityaṣṭasaṅkhyāyāḥ saṃjñā tāvanti patrāṇi 
yasmiṃstat | bhuvanāraṃ-bhuvanamiti caturdaśasaṅkhyāyāḥ saṃjñā 
tāvadaraṃ tāvatkoṇam | druhiṇāraṃ druhiṇa iti daśasaṅkhyāyāḥ saṃjñā 
śrībhāgavatādau sṛṣṭinimittānāṃ daśaprajāpatīnāṃ kardamādīnāṃ 
prasiddhatvāt | tāvadaraṃ daśakoṇamityarthaḥ | etena vidhikoṇamiti ca 
vyākhyātaprāyam | dikpadaṃ ca vyākhyātam | trikoṇabindu spaṣṭau | 
mayamityanena samaṣṭyekarūpatvaṃ jñāpitam | mahācakrarājaṃ-cakrarājamiti 
śrīcakrasya nāma tatra mahattvaṃ pūjyatvaṃ maha pūjāyāṃ ityanuśāsanāt | 
tathā ca brahmaviṣṇurudrādisakalapūjyamityarthaḥ | sindūraṃ prasiddhaṃ 
kuṅkumaṃ kāśmīram etadanyatareṇa | yadvā-dvandvasamāsena sāhityapratīteḥ 
sindūrasahitakuṅkumena likhitam ||

p. 97)

navyāstu-yadā bhūmau prastāro likhyate tadā kuṅkumarajobhiḥ pūraṇaṃ 
meruprastāraścet sindūrarajobhiriti vyavasthāmāhuḥ | tatra mūlaṃ cintyam ||

lekhanaprakārasya asmatparameṣṭigurukṛtasetubandhe savistaramuktatvānnātra 
likhyate | etāvatparyantaṃ pūjāsamaye nityayantranirmāṇaprakāraḥ uktaḥ | 

idānīṃ siddhayantre'pi pūjāprakāraṃ yantranirmāṇadravyaniyamaṃ cāha-
cāmīkaretyādinā | cāmīkaraṃ suvarṇaṃ kaladhautaṃ raupyam | yadyapi 
kaladhautapadaṃ suvarṇavācakamapi bhavati | kaladhautaṃ raupyahemnoḥ iti 
kośāt tathā'pi suvarṇasya pūrvamuktatvādraupyameva | pañcalohaṃ 
tallakṣaṇamuktaṃ tantrasāre bṛhatpāñcarātre ca-

raupyaṃ nṛpaguṇaṃ proktaṃ diksaṅkhyo hemabhāgakaḥ | 
tāmraṃ dvādaśabhāgaḥ syāllohabhāgasya pañcakam |
ārakūṭasya ṣaḍbhāgāḥ pañcalohaṃ prakīrtitam || iti ||

ārakūṭaṃ pittalaṃ śeṣaṃ spaṣṭam | ratnāni marakatādīni teṣu utkīrṇaṃ 
pūrvoktaśāstreṇa nirmitam | ādipadāt tāmradṛṣadādikaṃ 
paramānandatantroktaṃ grāhyam | idamapi pūrvoktacakrarāje viśeṣaṇam | 
īdṛśaṃ cakrarājaṃ purato niveśya ||

atra pūjanaṃ mukhyam | etasyālābhe tantrāntaroktapratinidhisvīkāro'pi kāryaḥ | 
taduktaṃ paramānandatantre-

ādarśe caikaguṇitaṃ pustake dviguṇaṃ phalam |
pratimāyāṃ caturdhāṃ syāt śāligrāmeṣu ṣoḍaśa ||

śivanābhe śataguṇaṃ pūjanāt puruṣārthakam |
sahasradhā nārmade tu phalaṃ devi pracikṣate ||

kuṇḍalyāṃ lakṣaguṇitaṃ devatādarśanaṃ bhavet |
cakrarāje tu yā pūjā sā'nantaphaladāyinī || iti ||

imāni tu paṭhitakrame uttarottarābhāve pūrvaṃ pūrvaṃ grāhyam | 
etādṛśārthatātparyagrāhakameva phalatāratamyaśravaṇam | kuṇḍalī 
śeṣakuṇḍalī | pustakaṃ kulaśāstrapustakam | pratimā dhyānaślokasthākārā | 
śeṣaṃ spaṣṭam ||

yantrapratiṣṭhā sūtre anuktatvāt na kartavyā sūtrānuyāyibhiḥ | evaṃ 
prāṇapratiṣṭhā'pi na kāryā sūtrānuyāyibhiḥ anuktatvāt 
anākāṅakṣitatvācca | vastuvastu-yantrapratiṣṭhāyāḥ 

p. 98)

pūjāprayogabahirbhūtatvāt adhikābhyudayecchāyāṃ 
tantrāntaroktamanuṣṭheyaṃ [etadyantrapratiṣṭhākaraṇākaraṇaviṣaye-ddi0 
pariśiṣṭa 11-vi. dṛśyaḥ |] yathā sahasranāmapāṭhādi | tatkaraṇe abhyudayaḥ 
akaraṇe'pi na hāniḥ sūtrānuyāyinām | yathā vā yajñopavītasaṃskāraḥ 
baudhāyanasūtre paṭhitaḥ | anyasūtrāpaṭhitatvāt bahvalpaṃ vā iti sūtrāt 
ananuṣṭhāne na hāniriti draviḍāndhradeśīyāḥ yajñopavītasya na saṃskāraṃ 
kurvanti | mahārāṣṭradeśīyaistu karaṇe abhyudayaṃ matvā saṃskāraḥ kriyate | 
tadvat cakrarāje saṃskāre abhyudayaḥ akaraṇe sūtrānuyāyināṃ na hāniḥ || 9 ||

mandirārcanam 

tato mandirādyarcanakramamāha-

tatra mahācakre amṛtāmbhonidhaye ratnadvīpāya nānāvṛkṣamahodyānāya 
kalpavṛkṣavāṭikāyai [kalpavāṭikā-ba 2. śrī.] santānavāṭikāyai 
haricandanavāṭikāyai mandāravāṭikāyai pārijātavāṭikāyai 
kadambavāṭikāyai puṣyarāgaratnaprākārāya padmarāgaratnaprākārāya 
gomedharatnaprākārāya [gomeda-ba 2.] vajraratnaprākārāya 
vaiḍūryaratnaprākārāya indranīlaratnaprākārāya muktāratnaprākārāya 
marakataratnaprākārāya vidrumaratnaprākārāya māṇikyamaṇḍapāya 
sahasrastambhamaṇḍapāya amṛtavāpikāyai ānandavāpikāyai 
vimarśavāpikāyai bālātapodgārāya candrikodgārāya 
mahāśṛṅgāraparighāyai mahāpadmāṭavyai cintāmaṇigṛharājāya 
pūrvāmnāyamayapūrvadvārāya dakṣiṇāmnāyamayadakṣiṇadvārāya 
paścimāmnāyamayapaścimadvārāyottarāmnāyamayottaradvārāya 
ratnapradīpavalayāya maṇimayamahāsiṃhāsanāya 
brahmamayaikamañcapādāya viṣṇumayaikamañcapādāya 
rudramayaikamañcapādāya īśvaramayaikamañcapādāya 
sadāśivamayaikamañcaphalakāya haṃsatūlatalpāya 
haṃsatūlamahopadhānāya kausumbhāstaraṇāya mahāvitānakāya 
mahājavanikāyai [etatpustake prāktano yavanikāyai-iti pāṭho lekhāśuddho 
bhātīti-yamanikā-javanikā-vātra śabda ucitaścātra pra. amarakośe-2 kāṇḍe 
manuṣyavarge-yathā - pratisīrā javanikā syāttiraskāriṇī ca sā-120-ślokaḥ atra-
ṭī-pratisīrā-javanikā-tiraskāriṇītiraskāriṇītyalam |] namaḥ-iti 
catuścatvāriṃśanmantraistattadakhilaṃ [catuścatvārimśanmandiramantaiḥ-ba 2.] 
bhāvayitvā arcayitvā || 10 ||

p. 99)

tatra yāgamandire sthite iti śeṣaḥ | idaṃ ca mahācakre-ityasya viśeṣaṇam | yadvā-
tatreti likhitārthakaṃ pūrvasūtre purato niveśyetyanvitam | mahācakre-iti 
bhāvayitvā arcayitvā iti agrimeṇānvitam | amṛtāmbhonidhiḥ amṛtasamudraḥ | 
ratnamayo dvīpaḥ vāsayogyadeśaḥ unnatabhūmiriti yāvat | udyānaṃ 
krīḍāvanaṃ pumānākrīḍa udyānam ityamaraḥ | vṛkṣavāṭikā upavanaṃ 
gehopavane vṛkṣavāṭikā ityamaraḥ | kalpādīni suratarunāmāni | 

pañcaite devataravo mandāraḥ pārijātakaḥ |
santānaḥ kalpavṛkṣaśca puṃsi vā haricandanam || ityamaraḥ ||

kadambaḥ prasiddhaḥ | puṣparāgādividrumāntāḥ navaratnabhedāḥ teṣāṃ 
prākāraḥ paritaḥ gṛhādbahirnirmitā bhittiḥ | māṇikyaṃ padmarāgaṃ tasya 
maṇḍapaḥ | vāpī dīrghikā | udgāro lohitavarṇaṃ samāhlādakaṃ vastu | 
taduktaṃ tryakṣarakośe-udgāro lohite varṇe samāhlādanavastuni iti | ratnamayāḥ 
pradīpāḥ teṣāṃ valayam | haṃsatūlaṃ pakṣiviśeṣasya 
pakṣādhaḥsthitaromamālā'kṛtisūkṣmapakṣāḥ mahārāṣṭrabhāṣāyāṃ 
parā-iti prasiddham | mahopadhānaṃ mahārāṣṭrabhāṣāyāṃ loḍu-iti 
prasiddham | kausumbhāstaraṇaṃ raktavarṇaṃ talpopari tanmālinyābhāvārthaṃ 
sūkṣmaṃ vastraṃ pātyate | tat mahārāṣṭrabhāṣāyāṃ palaṃgapūsa-iti 
prasiddham | vitānam ūrdhvadeśānmṛttikādipātapratibandhakamupari 
badhyamānaṃ vastram | yavanikā [anugate 98 patrasthe-4-5-cihnayoḥ ṭīppaṇyau 
dṛśye |] mahārāṣṭrabhāṣāyāṃ ṣaḍudā-iti prasiddham | śeṣaṃ prasiddham | 
evaṃ caturthyantaiḥ sarvaiḥ namaḥ-iti yogaḥ yā te agne'yāśayā itivat | etaiḥ 
catuścatvāriṃśanmantraiḥ mantravācyānarthān ādau śrīcakre paribhāvya 
teṣāṃ pūjanaṃ kuryāt | ekasya dhyānaṃ tato'rcanaṃ tato'parasya dhyānaṃ 
tataḥ tāsyarcanamiti kramaḥ tattaditi padasvārasyāt labdhaḥ | anyathā nyāyataḥ 
padārthānusamayena dhyānaṃ pūjanaṃ ca prāptaṃ tattaditi vīpsayā tadbādho 
jñeyaḥ || 10 || 

dīpadānaṃ cakrābhyarcanaṃ ca 

gandhapuṣpādisthāpanasthānādikamāha-

gandhapuṣpākṣatādīṃśca dakṣiṇabhāge dīpānabhito [atra dīpaviṣaye-ddi. 
pariśiṣṭe 13/29 vi. dṛśyaḥ ||] dattvā mūlena cakramabhyarcya mūlatrikhaṇḍaiḥ 
prathamatryasre || 11 ||

akṣatādītyatra ādipadena prathamadvitīyādigrahaṇam | etasya 
dattvetyanenānvayaḥ | tatra dānaṃ na yatkiṃciddevatoddeśena tyāgaḥ | kiṃ tu 
yajñāyudhāni sambharati itivat pūjāsāmagryāḥ ekatra saṃpādanam | etasya 
phalaṃ tattadarpaṇavelāyāṃ tasya tasya śīghralābhaḥ | dīpānāmabhitaḥ 

p. 100)

pārśvadvaye dānaṃ sthāpanamadṛṣṭārtham | dattvetyasya cakāreṇa 
āvṛttirjñāpitā pratyuddeśyaṃ vākyaparisamāptyarthamāvṛtterāvaśyakatvāt | 
ato na dadāterarthabhedo doṣajanakaḥ | na ca dādhātorayamarthaḥ kena 
pramāṇeneti vācyam rajakasya vastraṃ dadāti saṃvāhakasya caraṇau dadāti 
śatrave bhayaṃ dadāti ityādau yogyatayā arthakalpanāvat atrāpi 
yogyārthakalpanāt | abhitaḥ ityanena ekasmin pārśve yāvanto dīpāḥ tāvanta eva 
aparapārśve-iti jñāpyate | asya phalaṃ andhakāranivṛttiḥ | etena pūjāgṛhe 
andhakārasāmānyābhāvaḥ kārya ityarthaḥ | ekasmin pārśve 
adhikadīpasthāpane tatpṛṣṭhataḥ tacchāyārūpāndhakāraḥ patiṣyati | 
abhitastulyaprajvālane na kutrāpyandhakāra ityarthaḥ | pārśvadvayaniyamo 
dṛṣṭārthaḥ | cakraṃ navacakrātmakaṃ samaṣṭicakraṃ mūlena pañcadaśyā 
abhyarcya | atra puṣpākṣatakṣepaṇamevābhyarcanam | trikhaṇḍaiḥ 
vāgbhavakāmarājaśaktibhiḥ prathamaṃ cakranirmāṇasamaye prathamasya 
cakrasya trīṇi yānyasrāṇi tāni dvigutvādekavadbhāvaḥ | na bahuvrīhiḥ | tatpakṣe 
trikoṇātmakaikacakre ekadeśe pūjane mantratrayasyānākāṅkṣitatvāt bhago 
vāṃ vibhajatu itivadvikalpāpatteḥ | na ca caturbhirabhrimādatte itivat 
samuccayo'stviti vācyam tathā'pi bahuvrīhipakṣe anyapadārthe 
lakṣaṇākalpanaṃ doṣaḥ | dvigupakṣe tu koṇatraye kūṭatrayaṃ yuktam | abhyarcya 
ityasya pūrvasmādanuvṛttiḥ | kramasyānuktatvāt svāgrādiprādakṣiṇyena || 11 ||

ātmaśuddhihetu śoṣaṇādi 

tataḥ śoṣaṇādīnātmaśuddhihetūnāha-

vāyvagnisalilavarṇayukprāṇāyāmaiḥ śoṣaṇaṃ saṃdahanamāplāvanaṃ ca 
vidhāya || 12 ||

vāyuvarṇaḥ yaṃ-agnivarṇaḥ raṃ-salilavarṇaḥ vaṃ-vāyau śoṣakatāśaktiḥ 
lokaprasiddhā atastadvarṇe'pi sā'sti | ataḥ tena śoṣaṇaṃ jalāṃśanāśanaṃ 
evameva agnivarṇena saṃdahanaṃ bhasmīkaraṇaṃ tathaiva tadbhasmanaḥ 
udakavarṇena piṇḍīkaraṇam āplāvanaṃ vidhāya kṛtvā | cakārāt 
tantrāntaroktaṃ śyāmāprakaraṇasthaṃ vā laṃ-iti pārthivabījena 
kāṭhinyasaṃpādanaṃ śāmbhavaśarīrotpattiśca grāhyā | yadvā-
samīpavṛttitvāt śyāmāprakaraṇasthameva grāhyam [agre-6 khaṇḍe 
śyāmākrame-9 sūtre mūle bhāṣye ca dṛśyam |] | śoṣaṇādikriyāṇāṃ 
karmākāṅkṣāyāṃ dṛśyamānaṃ sthūlaśarīraṃ liṅgaśarīraṃ vā karma 
tantrāntaraprasiddhaṃ grāhyam | varṇayukprāṇāyāmairityuktyā yamityuccaran 
prāṇānabhito niyacchet tataḥ śarīraśoṣaṇaṃ bhāvayet yaśca 
śyāmāprakaraṇe vāyuṃ [agre-6 khaṇḍe śyāmākrame-9 sūtre mūle bhāṣye 
ca dṛśyam |] piṅgalayā ākṛśya ityabhyāsaḥ kṛtaḥ tasyārthasya 
prāṇāyāmairityanena jñāpitatvāt | evamevāgre'pi ||

p. 101)

yattu nibandhe saṅkocaśarīraṃ śoṣayedityādivārāhīprakaraṇasthā mantrā 
likhitāḥ te nirmūlāḥ heyāḥ asūtritatvāt | paraṃ tu śyāmāprakaraṇasthaṃ 
kaṭhinatvasampādanaṃ śāmbhavaśarīrotpattiḥ 
cakārasūcitārthāpattipramāṇasiddhā [sūtrakāra-śrī.] anuṣṭheyā || 12 ||

prāṇāyāmaḥ 

tataḥ prāṇāyāmavidhimāha-

triḥ prāṇānāyamya || 13 ||

prāṇāyāmastu śyāmāprakaraṇe vakṣyamāṇaprakāreṇa [6 khaṇḍa-
śyāmākrame 10 sūtre uktaprakāreṇetyarthaḥ |] jñeyaḥ || 13 ||

vighnakarabhūtotsāraṇam vajrakavacanyāsaśca 

taduttaraṃ vighnakṛdbhūtotsāraṇaṃ kāryamiti tadāha-

apasarpantu te bhūtā ye bhūtā bhuvi saṃsthitāḥ | ye bhūtā vighnakartāraste 
naśyantu śivājñayā | iti 
vāmapādapārṣṇighātakarāsphoṭasamudañcitavakrastālatrayaṃ datvā 
devyahambhāvayutktaḥ svaśarīre vajrakavacanyāsajālaṃ vidadhīta || 14 ||

apasarpantu0-iti mantreṇa pārṣṇyā pādapṛṣṭhabhāgena bhuvo ghātaḥ tāḍanaṃ 
karayoḥ āsphoṭaḥ saṅgharṣaḥ samudañcitaṃ tiryakkṛtaṃ vaktraṃ mukham 
ebhiḥ saheti śeṣaḥ | tālatrayam adhomukhābhyāṃ 
dakṣamadhyamātarjanībhyāṃ vāmakaratale saśabdaṃ trirabhighātaḥ taṃ 
dattvā utpādya | aham upasyadevyabhinna iti bhāvayitvā | svaśarīre ityanena 
devatāśarīravyāvṛttiḥ | vajrakavacam abhedyakavacarūpaṃ nyāsajālaṃ 
nyāsasamūhaṃ vakṣyamāṇaṃ vidadhīta kuryāt || 14 ||

karaśuddhinyāsaḥ 

kiṃ tannyāsajālam ityākāṅkṣāyām ādau karaśuddhinyāsamāha-

binduyukśrīkaṇṭhānantatārtīyaiḥ madhyamāditalaparyantaṃ kṛtakaraśuddhiḥ || 
15 ||

śrīkaṇṭhaḥ śivaḥ akāraḥ yoginītantre pañcadaśyāṃ 
śrīkaṇṭhadaśakamityavarṇagaṇanāt | anantaḥ dīrghākāraḥ tantrasāre āṃ 
hrīṃ kroṃ-iti mantrasya ananto bindusaṃyukto māyābrahmāgnitāravān 
ityuddhārāt | binduyujau ca tau śrīkaṇṭhānantau ceti samāsaḥ | tārtīyaḥ 

p. 102)

bālātṛtīyaḥ sauḥ-iti | evaṃ ca-aṃ āṃ sauḥ-anena mantreṇa 
madhyamāmārabhya talaparyantaṃ kṛtā karaśuddhiḥ yena | 
madhyamā'nāmākaniṣṭhāṅguṣṭhatarjanīkaratalakarapṛṣṭheṣu nyasedityarthaḥ 
| ayaṃ karaśuddhinyāsaḥ || 15 ||

ātmarakṣānyāsaḥ 

ātmarakṣānyāsamāha-

kumārīmuccārya [atra kumārīśabdena-agratanabālāśabdena ca-aiṃ klīṃ sauḥ-
iti tryakṣaro bālāmantro grāhyaḥ |] mahātripurasundarīpadamātmānaṃ 
[mamṛtacaitanyamātmānaṃ-ta.] rakṣa rakṣeti hṛdaye añjaliṃ dattvā || 16 ||

kumārīṃ bālāṃ uccārya padamiti varṇadvayamapahāya rakṣa rakṣetyantaṃ 
paṭhan hṛdaye añjaliṃ dadyāt | ayamātmarakṣānyāsaḥ || 16 ||

caturāsananyāsaḥ 

caturāsananyāsamāha-

māyākāmaśaktīruccārya devyātmāsanāya namaḥ-iti svasyāsanaṃ dattvā || 17 
||

māyā hrīṃ-iti spaṣṭaṃ bahusthale prasiddham | kāmaḥ klīmiti | taduktaṃ 
devībhāgavate-

klībeti muniputrastamājuhāva tadantike |
sudarśanastu tacchrutvā dadhārādyākṣaraṃ sphuṭam || 
anusvārayutaṃ tacca provāca ca punaḥ punaḥ |
bījaṃ vai kāmarājākhyaṃ gṛhītaṃ manasā tadā || iti ||

śaktiḥ sauriti śaktiḥ parā tṛtīyā ca iti kośāt | yadyapi kāmaśaktipadena 
tripurāgāyatrīvat pañcadaśīdvitīyatṛtīyakūṭagrahaṇamapi grahītuṃ śakyate 
tadarthe'pi pramāṇasya darśitatvāt | tathā'pi 

mādanaṃ śaktisaṃyuktaṃ [śakrasaṃ-ba 2.] caturthasvarasaṃyutam |
ūrdhve madhyendubindvāḍhyaṃ kāmarājaṃ samuddhṛtam | 
śāntāntaṃ kādisaṃyuktamaikārāntāntayojitam ||

iti yoginītantre etanmantroddhārādayamevārthaḥ | mādanaṃ kakāraḥ | śaktiḥ 
[śakraḥ-ba 2.] lakāraḥ | caturthasvaraḥ īkāraḥ | śāntāntam sakāraḥ | 
kādirvisargaḥ | aikārāntāntamaukāraḥ | uccāryeti tyaktvā 

p. 103)

namonto manuḥ | itthaṃ ca-hrīṃ klīṃ sauḥ-devyātmāsanāya namaḥ-iti mantreṇa 
svasyāsanaṃ dattveti āsane puṣpākṣatān kṣipet || 17 ||

tataḥ sūtradvayena cakrāsanādimantrānuddharati-

śivayugbālāmuccārya śrīcakrāsanāya namaḥ-śivabhṛguyugbālāmuccārya 
sarvamantrāsanāya-namo bhuvanāmadanau blemuccārya sādhyasiddhāsanāya 
namaḥ-iti cakramantradevatā'sanaṃ tribhirmantraiścakre kṛtvā || 18 ||

śivo hakāraḥ haśśivo gaganaṃ prāṇaḥ [haṃsaḥ-ba 2.] iti kośāt | tena yuktā 
bālā | atra bālāpadena bālāvarṇaḥ tena bālāvarṇamuddiśya havarṇayogo 
vidhīyate | tathā ca bālāvarṇāṅgaṃ hakāra-iti siddham | evaṃ ca 
pratipradhānamaṅgāvṛttiḥ iti nyāyāt varṇatraye'pi hakārayogaḥ | tatrāpi 
svarānte vyañjanasyādṛṣṭatvādādāveva yojyam | itthaṃ-haiṃ hklīṃ hsauḥ-
śrīcakrāsanāya namaḥ-ityeko mantraḥ | śivabhṛguyuk-śivo hakāraḥ bhṛguḥ 
sakāraḥ sakārādhikāre jagadbījaṃ śaktināmā so'haṃ vegavatī bhṛguḥ iti 
nandanakośāt | etadubhayayuktā bālā hsaiṃ hsklī hssauḥ-sarvamantrāsanāya 
namaḥ-iti dvitīyo mantraḥ | bhuvanā bhuvaneśvarī tasya mantro māyābījarūpa 
evoddhṛtaḥ devībhāgavate-śivamāyā'gnibindumān iti vacanāt | śivo hakāraḥ | 
māyā īkāraḥ | agniḥ rephaḥ | binduḥ prasiddhaḥ | eṣāṃ yoge hrīmiti bhavati 
bhuvaneśī ca lajjā ca hṛlekhā kuladevatā iti kośāt | prakṛte'pi sa eva madano 
vyākhyātaḥ | tathā ca-hrīṃ klīṃ bleṃ sādhyasiddhāsanāya namaḥ-iti tṛtīyo 
mantraḥ | evaṃ tribhirmantraiḥ krameṇa cakramantradevatā'sanāni cakre 
kalpayitvā | ayaṃ caturāsananyāsa iti kathyate || 18 ||

bālāṣaḍaṅganyāsaḥ 

tataḥ bālāṣaḍaṅgamāha-

bālādvirāvṛttyā tridvyekadaśatridvisaṅkhyā'ṅgulivinyāsaiḥ kḷptaṣaḍaṅgaḥ 
|| 19 ||

bālādvirāvṛttyā ṣaḍvarṇaiḥ hṛdayādiṣaḍaṅgāni 
[etadbālāmantraṣaḍaṅgādijñānāya ddi. pa. śi. vi. 9-dṛśyaḥ |] krameṇa 
tryādyaṅgulibhiḥ kḷptāni vinyastāni ṣaḍaṅgāni yena īdṛśaḥ | ayamevārthaḥ 
spaṣṭamukto dakṣiṇāmūrtisaṃhitāyām-

p. 104)

kaniṣṭhāṅguṣṭharahitaiḥ tribhistu hṛdi vinyaset |
madhyamānābhikābhyāṃ tu nyasecchirasi mantravit ||
śikhā'ṅguṣṭhena vinyasya daśabhiḥ kavacaṃ nyaset |
hṛduktairnetravinyāsaṃ vinyaset parameśvari ||
tarjanīmadhyamābhyāṃ tu tato'straṃ vinyaset priye || iti ||

iti bālāṣaḍaṅganyāsaḥ || 19 ||

vaśinyādiyoginīnyāsaḥ 

atha vaśinyādiyoginīnyāsamāha-

sabindunacoblūmuccārya [atrasthaśrīvaśinyādyaṣṭadevyabhidhānādau 
grāhyocyārya blaṃ-ityādyabījoddhārajñānāya ddi. pa. śi 13 vi. dṛśyaḥ |] 
vaśinīvāgdevatāyai namaḥ-iti śirasi | sarvatra vargāṇāṃ binduyogaḥ | kavargaṃ 
kalahrīṃ [atra klhrīmiti jñeyam |] ca nigadya kāmeśvarīvāgdevatāyai namaḥ-iti 
lalāṭe | cuṃ gaditvā nvlīṃ modinīvāgdevatāyai namaḥ-iti bhrūmadhye | ṭuṃ 
bhaṇitvā ylūṃ vimalāvāgdevatāyai namaḥ-iti kaṇṭhe | tuṃ ca procya jmrīṃ 
aruṇāvāgdevatāyai namaḥ-iti hṛdi | puṃ ca hslvyūṃ-uccārya 
jayinīvāgdevatāyai namaḥ-iti nābhau | yādicatuṣkaṃ jhmryūṃ-uccārya 
sarveśvarī vāgdevatāyai namaḥ-iti liṅge | śādiṣaṭkaṃ kṣmrīṃ-ākhyāya 
kaulinīvāgdevatāyai namaḥ-iti mūle || 20 ||

sabindūnacobinduyuktāḥ akārādivisargāntāḥ tānuccārya namaḥ-ityanto 
vaśinīmantraḥ | tathā ca-aṃ āṃ - aṃ aḥ blūṃ vaśinīvāgdevatāyai namaḥ iti 
śirasi nyaset | nanvevaṃ sarveṣu binduyogakathanādanyatra netyata āha-sarvatreti | 
spaṣṭo'rthaḥ | kavargamiti | kavargaḥ prasiddhaḥ sabinduḥ | kalahrīṃ ityatra 
kevalavyañjanamātragrahaṇam | samudāyeṣu vidyamānā varṇāḥ tadavayaveṣu 
dṛśyante iti nyāyāt | gṛhītaścāyaṃ pakṣaḥ setubandhe śrībhāskararāyaiḥ 
adhastānnābhasaṃ bījam ityasya vyākhyānāvasare nābhaso haṃsasamudāyaḥ 
tadekadeśaḥ kevalahakāra eva grāhyaḥ iti vyākhyānapaṅktau | atrāpi tathā 
grahaṇe bījaṃ trayoviṃśadakṣaro'sau kāmeśvarīmantraḥ iti setubandhalekha eva 
| kakāralakārayo ravarṇaviśiṣṭayorgrahaṇe dvitārīyuktapādukāṃ pūjayāmīti 
ghaṭite hīṃ śrīṃ klhrīṃ kāmeśvarīvāgdevatākāmeśvarīpādukāṃ 
pūjayāmīti mantre pañcaviṃśativarṇatvāt | tasmāt 
kevalavyañjanamātragrahaṇam | vyañjanānāṃ na varṇatvamiti vistāra uktaḥ 
varivasyārahasye pañcadaśīvarṇaparigaṇane | tathā ca-kaṃ khaṃ gaṃ ghaṃ 
ṅaṃ kalhrīṃ kāmeśvarīvāgdevatāyai

p. 105)

namaḥ-iti lalāṭe nyaset | cuṃ cavargaṃ-cumityasyodittvāt tena 
savarṇagrahaṇaśāstrasya aṇuditsavarṇasya cāpratyayaḥ iti śāstrasya sattvāt 
cavargagrahaṇam | cavargaṃ namaḥ-ityantaṃ mantraṃ paṭhitvā bhrūmadhye 
nyaset | ṭuṃ ṭavargaṃ pūrvavat | śeṣaṃ spaṣṭam | hasalavarṇeṣu 
vyañjanamātragrahaṇaṃ pūrvavat | yaḥ ādiḥ yasya catuṣkasya iti 
tadguṇasaṃvijñānabahubrīhiḥ | itthaṃ ca-yaṃ raṃ laṃ vaṃ-iti | 
śādiṣaṭkamityatrāpi samāsaḥ pūrvavat || 20 ||

mūlamantranyāsaḥ 

evaṃ vaśinyādiyoginīnyāsamuktvā mūlamantranyāsādīn vadati-

mūlavidyāpañcadaśavarṇān mūrghni mūle hṛdi cakṣustritaye 
śrutidvayamukhabhujayugalapṛṣṭhajānuyugalanābhiṣu vinyasya ṣoḍhā cakre 
nyasyānyasya vā || 21 ||

cakṣustritayaṃ bhrūmadhyena saha jñeyam | śrutidvayaṃ śrotradvayam | 
śeṣasthānāni spaṣṭāni | mūlapañcadaśavarṇaiḥ bindusahitaiḥ namo'ntaiḥ 
krameṇoktapañcadaśasthāneṣu nyaset | ṣoḍhā ṣaṭprakāraḥ gaṇeśa-graha-
nakṣatra-yoginī-rāśi-pīṭhabhedena cakranyāsastantrāntaroktaḥ | nyasyānyasya 
ityanena kṛtākṛtatvaṃ sūcitam || 21 || 

pātrāsādanam sāmānyārghyavidhānam 

evaṃ devīrūpatvasiddhaye nyāsānuktvā 
tato'rcanāṅgabhūtapātrasthāpanavidhimupadiśati-

śuddhāmbhasā vāmabhāge trikoṇaṣaṭkoṇavṛttacaturaśramaṇḍalaṃ kṛtvā 
puṣpairabhyarcya sādhāraṃ [ddi0 pa. śi. vi. 12-daśyotra |] śaṅkhaṃ 
pratiṣṭhāpya [saṃsthāpya-śrī.] śuddhajalamāpūrya ādimabinduṃ dattvā 
ṣaḍaṅgenābhyarcya vidyayā abhimantrya tajjalavipruḍbhiḥ ātmānaṃ 
pūjopakaraṇāni ca saṃprokṣya || 22 ||

śuddhāmbhasā ityanena gaṇapatipaddhatau 
kathitagandhākṣatakusumasamarcitatvaṃ [2-khaṇḍe 77 patre 5 sūtre mūle-
kathitamiti jñeyam |] jñāpitam | śuddhena paṭapūtenāmbhasā | svavāmabhāge 
trikoṇādicaturasrāntaṃ niyamavidhirūpatvāt ākāṅkṣāvattvāt 
śyāmākramoktamatsyamudrayā [6 khaṇḍe-18 sūtroktarītyā-ityarthaḥ |] 
nirgamanarītyā kṛtvā puṣpairabhyarcya | sādhāramityasya tatretyādiḥ ||

ādhāraśaṅkhayoḥ pratiṣṭhāpane śuddhajalapūraṇe ca mantrākāṅkṣāyāṃ 
sannihitatvāviśeṣāt  gaṇapatiprakaraṇasthaṃ śyāmāprakaraṇasthaṃ vecchayā 
grāhyam | na tu ādhārādiṣu pāvakādikalāpūjanam 

p. 106)

anuktatvāt asūcitatvāt atrānākāṅkṣitatvācca | vastutastu-
śyāmāgaṇapatyapekṣayā 
śrīvidyāprakaraṇasthaviśeṣārghyapātrādhārādimantrāṇāṃ sannihitatvāt ta 
eva grāhyāḥ | tatrāpi yāvadākāṅkṣitaṃ grāhyam na tvanākāṅkṣitam 
payasā maitrāvaruṇaṃ śrīṇāti itivat ||

ādimabindusaṃyogaḥ śaṅkhajalasaṃskāraḥ | bindumityatra vidheyagatasaṅkhyā 
vivakṣitā | tena bindudvayadānena nādṛṣṭotpattiḥ | na ca bindumityatra 
dvitīyāvibhaktiśravaṇāt sa evoddeśyaḥ kiṃ na syāditi vācyam | 
saṃskṛtabindoḥ viniyogākāṅkṣāyāṃ viniyogāśravaṇāt na bindusaṃskāraḥ | 
kiṃ tu jalasaṃskāraḥ jalasyāgre viniyogaśravaṇāt | tathā ca 
saṃskāryasyaivoddaśyatvaniyamāt bindurvidheyaḥ | tadgatasaṅkhyā vivakṣitaiva | 
ṣaḍaṅgena ṣaḍaṅgamantraiḥ agnīśāsuravāyukoṇeṣu ṣaḍaṅgadevatāḥ 
abhyarcya | aṅgenetyatra ekavacanamārṣaṃ bahutvalakṣakaṃ vā 
pāśādhikaraṇanyāyena ṣaṇmantreṣu ekatvānvayāsambhavāt ||

vastutastu-aṅgamantravṛttisaṅkhyāyāḥ ṣaṭpadenaiva 
bodhitatvādvacanārtho'vivakṣita eva | tathā ca autsargikamekavacanameva yuktam | 
na ca viśeṣaṇavācakaṣaṭpadasamānavacanakatvahāniriti vācyam ṣaṭpadena 
sākaṃ samāsāṅgīkāreṇa anupapattyabhāvāt | anenāpi jalasaṃskāra eva ||

yadvā-ṣaḍaṅgamantraiḥ ṣaḍaṅgadevatāḥ tasminneva śaṅkhodake 
kūṭatrayadvirāvṛttyā krameṇa hṛdayāya namaḥ hṛdayaśaktiśrīpādukāṃ 
tarpayāmītyādimantraistarpayet | na ca abhyarcyetyasya tarpaṇārthatve kiṃ 
mānam-iti vācyam | tarpayettatra yoginīḥ iti vāmakeśvaratantrāt yoginīpadasya 
tripurasundaryāḥ ṣaḍaṅgadevatā-iti setubandhe vyākhyānāt ||

vidyayā pañcadaśyā abhimantrya abhimantraṇena saṃskṛtya tajjalaṃ 
saṃskṛtajalaṃ tasya ye vipruṣaḥ bindavaḥ taiḥ ātmānaṃ svaśarīraṃ 
pūjopakaraṇāni gandhapuṣpaprathamādīni ca saṃprokṣya | atra 
kapiñjalādhikaraṇanyāyena vipruḍbhirityanena prokṣaṇasādhanaṃ 
bindutrayameveti prāptaṃ nyāyaṃ bādhituṃ samityupasargaḥ | tathā ca yathā 
pūjopakaraṇāni jalena samyak siktāni tathā prokṣayedityarthaḥ || 22 ||

viśeṣārghyavidhiḥ (arghyaśodhanam) 

evaṃ sāmānyārghyaiḥ [rghyotpattiṃ vidhāya viśeṣārghyavidhimāha-ba ba 2.] 
tṛptiṃ vidhāya viśeṣārghyāttṛptimāha-

tajjalena trikoṇaṣaṭkoṇavṛttacaturasramaṇḍalaṃ kṛtvā madhyaṃ vidyayā 
vidyākhaṇḍaistrikoṇaṃ bījāvṛttyā [bījadvirāvṛttyā-ga.] ṣaḍaśraṃ 
saṃpūjya vācamuccārya agnimaṇḍalāya daśakalā'tmane 

p. 107)

arghyapātrādhārāya namaḥ-iti pratiṣṭhāpya ādhāraṃ prapūjya pāvakīḥ 
kalāḥ || 23 ||

tajjalena sāmānyārghyodakena | śeṣaṃ pūrvavat | madhyaṃ trikoṇamadhyaṃ 
vidyayā | samaṣṭividyayā saṃpūjyeti sarvatrānuṣajyate | vidyākhaṇḍaiḥ 
kūṭatrayeṇa trikoṇaṃ trikoṇakoṇatrayam | asyopapattirdarśitā prāk | bījāvṛttyā 
[itaḥ pūrvatane-103-105-patrayoḥ-19-22-sūtrayoruktarītyetyarthaḥ |] 
kūṭatrayadvirāvṛttyā | kūṭasya bījarūpatvaṃ śrīṣoḍaśākṣaryāḥ 
ṣoḍaśārṇatvopapattaye ekaikakūṭasyaikaikabījarūpatvaṃ iti sapramāṇaṃ 
varivasyārahasye asmatparameṣṭhigurubhiḥ prapañcitam | granthavistarabhayānneha 
likhyate | kramasyānuktatvāt prāgādiprādakṣiṇyena svāgrādiprādakṣiṇyena 
vā | namo'nto mantraḥ namontaiḥ pādukā'ntairvā iti yoginītantravacananāt | 
vācaṃ-aiṃ-iti | taduktaṃ devībhāgavate-

vāgbhavaṃ [ddi.-pa-śi-9-vi-dṛśyaḥ |] kāmarājaṃ ca māyābījaṃ tṛtīyakam |
citte yasya bhavettaṃ tu na kaścidbādhituṃ kṣamaḥ ||

ityupakramya vāgbhavaṃ prathamabījaṃ stotuṃ kathāmupakramya-

ai ai iti bhayārtena dṛṣṭvā vyāghrādikaṃ vane |
binduhīnamapi proktaṃ vañchitaṃ pradadau kila || iti ||

binduhīnasya kaimutikanyāyena phalahetutvastutyā sabinduḥ aikāro vāgbhava iti 
sidhyati | nityārahasye-vāgbhavaṃ prathamaṃ devi kāmarājaṃ dvitīyakam iti 
bālāmantroddhārācca ravisvaro binduyukto vāgbhavaṃ bījamīritam iti 
bījakośācca | ādhāraṃ kīdṛśam ityākāṅkṣāsattvāt tantrāntaroktaṃ 
[atrādhāravastuno jñānāya-ddi. pariśiṣṭe 12 viṣayo'valokyaḥ |] tripadādi 
grāhyam | pāvakīḥ [etāsāṃ pāvakasūryacandrakalānāṃ nāmāni 
pratyakṣāṇi-purato'traiva śrīśyāmākramīye-6-khaṇḍe-18-mūlasūtre eva 
santi-tato grāhyāṇi |] vahnisambandhinīḥ kalāḥ caturthyantanamo'ntaiḥ [atra 
pātraṃ kasya vastunaḥ kīdṛśākāraṃ ca grāhyaṃ tadarthaṃ ddi.-pa.-śi.-vi.-12-
dṛśyaḥ |] tattannāmabhiḥ prāgādivṛttarūpaṃ yajet prāgādivṛttarūpeṇa iti 
paramānandatantravacanāt | setubandhe bhāskararāyāstu 
paścimādiprādakṣiṇyena ityūcuḥ || 23 ||

madanādupari sūryamaṇḍalāya dvādaśakalā'tmane arghyapātrāya namaḥ iti 
saṃvidhāya pātraṃ saṃspṛśya kalāḥ saurīḥ [etāsāṃ 
pāvakasūryacandrakalānāṃ nāmāni pratyakṣāṇi-purato'traiva 
śrīśyāmākramīye-6-khaṇḍe-18-mūlasūtre eva santi-tato grāhyāṇi |] sauḥ 
somamaṇḍalāya ṣoḍaśakalā'tmane arghyāmṛtāya namaḥ-iti pūrayitvā 
ādimaṃ dattvopādimamadhyamau pūjayitvā vidhoḥ [atra pātraṃ kasya vastunaḥ 
kīdṛśākāraṃ ca grāhyaṃ tadarthaṃ ddi.-pa.-śi.-vi.-12-dṛśyaḥ |] 
kalāṣoḍaśakam || 24 ||

p. 108)

madanastu caturāsananyāse prapañcitaḥ | śeṣaṃ spaṣṭam | saṃspṛśyetyasmāt 
pūrvaṃ tatretyādiḥ tatra pātre saurīḥ kalāḥ tapinyādīḥ saṃspṛśya pūjayitvā 
| yadyapi spṛśidhātoḥ na pūjanamarthaḥ tathā'pi saṃpūjya pāvakīḥ kalāḥ 
pūjayitvā vidhoḥ kalāḥ iti vākyamadhyavṛttitvāt tatra pātraṃ [atra pātraṃ 
kasya vastunaḥ kīdṛśākāraṃ ca grāhyaṃ tadarthaṃ-ddi.-pa.-śi.-vi.-12-dṛśyaḥ 
|] pratiṣṭhāpya tatra sūryakalā yajet iti yoginītantravacanācca pūjāyāmeva 
tātparyaṃ kalpyam | ādimaṃ prathamaṃ pūrayitvā upādimaṃ dvitīyaṃ 
madhyamaṃ tṛtīyaṃ idaṃ caturthapañcamayorapyupalakṣaṇam | siddhāntagranthe 
prathamakhaṇḍe pañca makārāḥ tairarcanaṃ guptyā ityuktam | tatraiva dattvā 
sthāpayitvā | vidhoḥ kalāṣoḍaśakaṃ amṛtādipūrṇāmṛtāntam || 24 ||

tatra vilikhya tryasramakathādimayarekhaṃ halakṣayugāntasthitahaṃsabhāsvaraṃ 
vākkāmaśaktiyuktakoṇaṃ haṃsenārādhya bahirvṛttaṣaṭkoṇaṃ kṛtvā 
ṣaḍasraṃ ṣaḍaṅgena purobhāgādyabhyarcya mūlena saptadhā abhimantrya 
dattagandhākṣatapuṣpadhūpadīpaḥ tadvipruḍbhiḥ prokṣitapūjādravyaḥ sarvaṃ 
vidyāmayaṃ kṛtvā tatspṛṣṭvā caturnavatimantrān japet || 25 ||

tatra prathamadravye pūrvoktakrameṇa pūjayitvā | 
akārādivisargāntaṣoḍaśasvaraiḥ paścimādīśānāntām ekāṃ rekhāṃ 
kuryāt | tata īśānādyāgneyāntāṃ kavargamārabhya tāntaiḥ ṣoḍaśavarṇaiḥ 
aparāṃ rekhāṃ saṃpādayet | tata āgneyādipaścimāntāṃ thādisāntaiḥ 
ṣoḍaśabhiḥ tṛtīyarekhāṃ saṃpādayet | evaṃ sati aśca kaśca thaśca 
ādiryeṣāṃ varṇānāṃ dīrghākārakhakārapakāraprabhṛtīnāṃ tanmayāḥ 
tadabhinnāḥ rekhāḥ yasmin trikoṇe tat akathādimayarekham | idaṃ 
tryasraviśeṣaṇam | haśca lakṣayugaṃ ca tayoḥ antaḥ madhye sthito yo haṃsaḥ-iti 
varṇasamudāyaḥ tena bhāsvaraṃ-dravye svadakṣabhāge ham-iti vilikhya 
taduttarato haṃ sa iti varṇau vilikhya taduttarato lakṣeti vilikhet | evaṃ coktarūpaṃ 
bhavati | evaṃ vākkāmaśaktayaḥ bālāyāḥ varṇatrayam [ddi. pa. śi. 9-viṣaye 
idaṃ varṇatrayaṃ pratyakṣamasti |] | yadvā-mūlakūṭatrayam | pramāṇam 
arthadvaye'pi pūrvamevoktam | tadyuktāni koṇāni yasmiṃstat | 
etādṛśaviśeṣaṇatrayaviśiṣṭaṃ trikoṇaṃ vilikhya | haṃsena haṃsa iti mantreṇa 
ārādhya puṣpādibhiḥ pūjayitvā | bahiḥ trikoṇāt vṛttaṃ ṣaṭkoṇaṃ ca kṛtvā | 
ṣaḍasraṃ ṣaṭkoṇāni mūlaṣaḍaṅgamantraiḥ 
purobhāgādisvābhimukhāgrādiprādakṣiṇyena abhyarcya | mūlena saptadhā 
saptavāramāvṛttena | tasmin dravye dattāḥ arpitāḥ 
gandhākṣatapuṣpadhūpadīpāḥ yena īdṛśaḥ pūjako bhavediti viśiṣṭavidhau 
dānamamīṣāṃ kāryamiti viśeṣaṇavidhirārthikaḥ | vidyā parasaṃvit tanmayaṃ 
tadabhinnaṃ kṛtvā bhāvayitvā | tat prathamādikam | caturnavatimantrān 
vakṣyamāṇān || 25 ||

p. 109)

tān mantrānāha-

tritārīnamassaṃpuṭitāḥ tejastritayakalā aṣṭatriṃśat | sṛṣṭi-
ṛddhismṛtimedhākāntilakṣmīdyutisthirāsthitisiddhayo brahmakalā daśa | jarā 
pālinī śāntirīśvarī ratikāmike varadāhlādinī prītirdīrghā viṣṇukalā daśa | 
tīkṣṇā raudrī bhayā nidrā tandrī kṣudhā krodhinī kriyodgārīmṛtyavo  
[kutracidatra udgārīsthāne-ulketyupāttam |] rudrakalā daśa | pītā 
śvetā'ruṇā'sitāścatasra īśvarakalāḥ | 
nivṛttipratiṣṭhāvidyāśāntīndhikādīpikārecikāmocikāparā-
sūkṣmāsūkṣmāmṛtājñānājñānāmṛtāpyāyinīvyāpinīvyomarūpāḥ 
ṣoḍaśa sadāśivakalāḥ || 
haṁsaśśuciṣadvasurantarikṣasaddhotāvvediṣadatithirduroṇasat | 
nṛṣadvarasadṛtasadvyomasadabjā gojā ṛtajā adrijā ṛtaṃ bṛhat || pra tadviṣṇuḥ 
stavate vīryeṇa mṛgo na bhīmaḥ kucaro giriṣṭhāḥ | yasyoruṣu triṣu 
vikramaṇeṣvadhikṣiyanti bhuvanāni vviśvā || tryambakaṃ yajāmahe sugandhiṃ 
puṣṭivardhanam | urvārukamiva bandhanānmṛtyormukṣīya māmṛtāt || tadviṣṇoḥ 
paramaṃ padaṁsadā paśyanti sūrayaḥ | divīva cakṣurātatam || tadviprāso 
vipanyavo jāgṛvāṁsaḥ samindhate | viṣṇoryat paramaṃ padam || viṣṇuryoniṃ 
kalpayatu tvaṣṭā rūpāṇi piṁśatu | āsiñcatu prajāpatirdhātā garbhaṃ dadhātu 
te || garbhaṃ dhehi sinīvāli garbhaṃ dhehi sarasvati | garbhaṃ te aśvinau 
devāvādhattāṃ puṣkarasrajā [atra-puṣkarasrajau-evaṃ pāṭho jñeyaḥ |] || ityete 
pañca mantrāḥ || mūlavidyā cāhatya caturnavatimantrāḥ || 26 ||

tritārī pūrvoktā [tritāryuddhāraśca anugata-91-patre-3-śrīkramīyakhaṇḍasya-8-
sūtre'sti-pratyakṣaścatraivabhāṣyedhastādasti |] | tritārī namaḥ ityanayormadhye 
caturnavatimantrān paṭhet | tathā ca dvābhyāṃ saṃpuṭito bhavati | yathā loke 
saṃpuṭe karaṇḍe antaḥ kiṃcit kṣiptvā 
ādhārāvayavottarāvayavamadhyavṛttitvaṃ vastunaḥ saṃpādyate tadvat 
prathamaṃ tritārī paścāccaturnavatimantreṣveko mantraḥ tato namaḥ iti | evaṃ 
sati mantraḥ dvābhyāṃ saṃpuṭito bhavati | tejastritayaṃ vahnisūryasomāḥ 
teṣāṃ kalāḥ 

p. 110) 

dhūmrārcirādipūrṇāmṛtāntāḥ śyāmākrame vakṣyamāṇā aṣṭatriṃśat 
[imāstisro vahnisūryacandrakalāḥ-pratyakṣanāmnā-agre-6-khaṇḍe 
śrīśyāmākrame-18-sūtre mūle eva vartante tato grāhyāḥ |] | mantrasvarūpaṃ 
tu aiṃ hrīṃ śrīṃ dhūmrārciṣe [imāstisro vahnisūryacandrakalāḥ-
pratyakṣanāmnā-agre-6-khaṇḍe śrīśyāmākrame-18-sūtre mūle eva vartante 
tato grāhyāḥ |] namaḥ | evaṃ agre'pi jñeyam | sṛṣṭi-ṛddhityatra sandhyabhāvaḥ 
ārṣaḥ | yadvā - ṛtyakaḥ iti pākṣikatvādasandhiḥ | śeṣaṃ spaṣṭam | vahnikalāḥ 
[imāstisro vahnisūryacandrakalāḥ-pratyakṣanāmnā-agre-6-khaṇḍe 
śrīśyāmākrame-18-sūtre mūle eva vartante tato grāhyāḥ |] -10 | sūryakalāḥ 
[imāstisro vahnisūryacandrakalāḥ-pratyakṣanāmnā-agre-6-khaṇḍe 
śrīśyāmākrame-18-sūtre mūle eva vartante tato grāhyāḥ |] -12 | candrakalāḥ 
[imāstisro vahnisūryacandrakalāḥ-pratyakṣanāmnā-agre-6-khaṇḍe 
śrīśyāmākrame-18-sūtre mūle eva vartante tato grāhyāḥ |] - 16 | 
brahmakalāḥ -10 | viṣṇukalāḥ -10 | rudrakalāḥ-10 | īśvarakalāḥ-4 | 
sadāśivakalāḥ-16 | itthaṃ ca kalāḥ sarvāḥ-88 yadyapi haṁsaśśuciṣat 
ityārabhya puṣkarasrajāvityantaṃ sapta ṛcaḥ santi tathā'pi ityete pañcamantrāḥ 
ityuktyā caturthapañcamau militvā eko mantraḥ ṣaṣṭhasaptamau militvā eko 
mantraḥ | ekaliṅgatvā duktayorevaikyaiṃ yuktaṃ natvanyatra | mūlavidyā 
pañcadaśī | pūrvakalāḥ 88 uktamantrāḥ pañca mūlavidyā ca āhatya sarvaṃ 
militvā caturnavatimantrāḥ saṃpadyante | etairabhimantraṇena dravyaṃ 
saṃskuryāditi phalito'rthaḥ || 26 ||

atha haike pa~cabhirakhaṇḍādyairabhimantraṇamāmananti || 27 ||

athetyanena caturnavatimantrottarameveti kramaviśeṣaḥ sūcitaḥ | nātra 
pāṭhakramaḥ sambhavati svamatābhāvāt | ataḥ athetyāvaśyakam | ha iti 
śabdālaṅkāre | eke ityanena pākṣikatvaṃ sūcitam | akhaṇḍaḥ ādyaḥ yeṣāmiti 
tadguṇasaṃvijjñānabahuvrīhiḥ || 27 ||

[atra akhaṇḍādyāḥ ke ityanena uparitana-27-sūtroktākhaṇḍādyairitipadoktāḥ 
akhaṇḍaśabdadyā mantrāḥ ke-ityartho'dhyavaseyaḥ |] akhaṇḍādyāḥ ke? 
ityākāṅkṣāyāmāha-

akhaṇḍaikarasānandakare parasudhā'tmani |
svacchandasphuraṇāmatra nidhehyakulanāyike || 

akulasthāmṛtākāre śuddhajñānakare pare |
amṛtatvaṃ nidhehyasmin vastuni klinnarūpiṇi ||

tadrūpiṇyaikarasyatvaṃ kṛtvā hyetatsvarūpiṇi |
bhūtvā parāmṛtākārā mayi citsphuraṇaṃ kuru ||

iti tisro'nuṣṭubho vidyāḥ || 28 ||

p. 111) 

vedabhāṣye [duradhigamyārthān-uparyuktān-akhaṇḍetyādipañcamantrān 
sārthān vivinakti paṇḍitaḥ sūtrabhāṣyakāraḥ |] vaidikamantrāṇām arthasya 
vivṛtatvāt tān [tan nāma tādṛgvivṛtārthān vaidikamantrānityarthaḥ |] parityajya 
kevalatāntrikasubodhamantrāṇāṃ keṣāñcidarthaṃ prakaṭayāmi  [prakaṭayati -
a] | akhaṇḍeti-akhaṇḍetyādimantratrayaṃ liṅgena sudhādevīprārthanāṅgaṃ 
bhavitumarhati | tato'pi balavatā [atra balavateti liṃgenetyasya viśeṣaṇam |] 
abhimantraṇottaradvitīyāśrutyā abhimantraṇāṅgam | etadanusāreṇa 
paramānandatantre-etattrayaṃ tribījāḍhyaṃ caturdhā tatra vai japet ityatra spṛśan 
ityadhyāhāryam | tathā ca abhimantraṇāṅgatvaṃ siddham | evaṃ ca 
paramānandaṭippaṇyām akhaṇḍetyādi sudhādevīprārthanārūpamiti lekhaḥ 
prāmādika [dvitīyāśrūtyā nāma - uparitana-27-sūtrastha-āmanantītyasya 
karmakārakībhūtam abhimantraṇamiti dvitīyāśrutyetyarthātrāvadheyaḥ |] eva 
liṅgācchrutibādhasya kenāpyanaṅgīkārāt | atra mantrārthastu-akulaṃ nāma 
sahasradalakamaladvayam | sarvakamalānāmādhārabhūtaṃ ūrdhvamukhamekaṃ 
padmaṃ mūlādhārasyādhastiṣṭhati tadekaṃ akulapadavācyam | akule 
viṣusaṃjñe ca iti yoginītantraślokavyākhyānāvasare 
sarvādhaḥsthitasahasradalakamaloparyaṣṭadalaṃ tadupari ṣaḍdalaṃ tadupari 
mūlādhārādicakrāṇi tatra mūlādhārādhaḥsthitaṃ ṣaḍdalaṃ kulapadmaṃ 
tadadhaḥsthite aṣṭadalasahasradale akule-iti setubandhalekhāt | evaṃ 
brahmarandhrasthitādhomukhasahasracchadapadmamapi akulam | taduktaṃ 
tripurārṇave-

suṣumnordhvaṃ sudhāraśmikoṭikāntisamaprabham |
adhomukhaṃ gurusthānaṃ sahasradalaśobhitam ||
akulaṃ tadbijānīyāt * * * * * * iti ||

paramānandatantre'pi -

sādhakaḥ prātarutthāya brahmarandhre nijaṃ gurum |
pūrvoktā kulapadmāntardvādaśāntasaroruhe || iti ||

evaṃ dvayoḥ sahasracchadayorakulavācyatve siddhe prakṛte brahmarandhrasthasyaiva 
grahaṇam tasyaivāmṛtasrāvitvāt | prakṛte akulaṃ yadbrahmarandhrasthakamalaṃ 
tasya nāyikā tadadhiṣṭhātrī tatsambodhane he akulanāyike [atra mūle ca 
akulanāyike iti padamarthaścopāttaḥ-mahānirvāṇatantre-6-ullāse 38 śloke 
mūle ṭīkāyāṃ ca kulaśabda evāstīti śrīśivajāmadagnyobhayavaco'virodhaṃ 
samanvayanīyamityāśāse |] | akhaṇḍo'vicchinnaḥ ekaraso duḥkhāsaṃbhinno ya 
ānandaḥ taṃ karoti vyañjayatīti tādṛśe | parā utkṛṣṭā yā sudhā 
brahmarandhrasthā amaratvakāriṇī tadātmani tatsvarūpe atra dravye 

p. 112)

svacchandā svatantrā yā cit tasyāḥ sphuraṇāṃ prakāśaśaktiṃ nidhehi 
sthāpaya | he pare śreṣṭhe klinnamārdrarūpaṃ tadasminnasti iti klinnarūpiṇi 
asmin | vastuni amṛtatvaṃ nidhehi saṃsthāpaya saṃpādaya | akulaṃ vyākhyātaṃ 
tatra vidyamānaṃ yat amṛtaṃ tasya svarūpamiva svarūpaṃ yasyāḥ 
dravyābhimānidevatāyāḥ | idaṃ paretyasya viśeṣaṇam | śuddhajñānakare 
svarūpajñānāvirbhāvakartri idamapi parāviśeṣaṇam | yattu 
saubhāgyānandasandohe pare iti saptamyantaṃ kṛtvā vastuviśeṣaṇamityuktam 
tanna dūrānvayāpatteḥ | tat parabrahma tasya yadrūpaṃ tadvati 
parabrahmasvarūpe iti yāvat | tadrūpiṇi viśeṣārghyarūpiṇi mayi dehābhimānini 
| paraṃ yat amṛtam ānandaḥ tadākārā bhūtvā aikarasyaṃ citasyaikākāratāṃ 
kṛtvā saṃpādya citsphuraṇaṃ svasvarūpaprakāśaṃ kurviti mantratrayārthaḥ | 
anuṣṭubhaḥ anuṣṭupchandaskā ityarthaḥ dvātriṃśadakṣarā'nuṣṭup iti śruteḥ | 
vidyāḥ mantrāḥ | idaṃ vidyātrayaṃ [vidyātrayaṃ nāmaitat-28 
sūtroktākhaṇḍetyādiślokatrayoktā-3-vidyāmilitvetyarthaḥ | ] militvā 
ekāpūrvajanakaṃ paurṇamāsayāgatrikavat agrimamantreṣu atho iti 
prakramāntaṃ rasattvāt tantrāntare'pi etattrayamiti samaṣṭiviniyogadarśanācca | 
tenaikamantralope punastritayapāṭhaḥ na tāvanmātram 
[atrākhaṇḍetyādiślokatrayabhāṣyaṃ paryavasannam |] || 28 || 2

caturthaṃ amṛteśīmantramāha - 

atho vācaṃ blūṃ jhaumiti jūṃsaḥ-iti coktvā amṛte amṛtodbhave amṛteśvari 
amṛtavarṣiṇi amṛtaṃ srāvaya srāvaya svāheti caturtho mantraḥ || 29 ||

vācyam-aiṃ | iti dvayaṃ coktveti ca tyaktvā śeṣaṃ mantrasvarūpam | he amṛte 
asmin dravye amṛtaṃ srāvaya iti tadarthaḥ | śeṣāṇyamṛte ityasya viśeṣaṇāni | 
tadarthaḥ spaṣṭaḥ || 29 ||

tataḥ pañcamaṃ mantramuddharati-

vāgbhavo vada vada tato vāgvādini vāṅmadanaklinne kledini kledaya 
mahākṣobhaṃ kuruyugalaṃ mādanaṃ śaktirmokṣaṃ kuru kuru śabdo hasa 
caturdaśapañcadaśapiṇḍaḥ sahacaturdaśaṣoḍaśapiṇḍaśceti pañcamīyaṃ 
vidyaitābhiḥ abhimantrya jyotirmayaṃ tadarghyaṃ vidhāya || 30 ||

vāgbhavaḥ aiṃ | vāk aiṃ | madanaḥḥ klīṃ | kuruyugalaṃ dvivāraṃ 
kurvityuccārya | mādanaṃ klīṃ | śaktiḥ sauḥ | caturdaśa acāṃ caturdaśaḥ au | 
pañcadaśaḥ anusvāraḥ | piṇḍaḥ samudāyaḥ | ṣoḍaśo visargaḥ | tathā ca 
mantrasvarūpam - aiṃ vada vada vāgvādini aiṃ klīṃ klinne kledini kledaya 
mahākṣobhaṃ kuru kuru klīṃ sauḥ mokṣaṃ kuru kuru hasauṃ shauḥ |

p 113)

itīyaṃ pañcamī vidyā | etābhiḥ pañcabhiḥ abhimantrya | jyotirmayaṃ nirdoṣaṃ 
tadarghyaṃ vidhāya | etena tantrāntaroktaśāpavimocanādikam anenaiva jātamiti 
sūcitam ||

	nanu jyotirmayamityanena ayamabhiprāyaḥ kathaṃ niṣpādita iti cet-ucyate | 
jyotiriti prakāśāparaparyāyaḥ | prācuryārthe mayaṭ | yasmin prakāśe 
malamiśratvaṃ tatra prakāśaprācuryaṃ na saṃbhavati yathoparaktadivākarādau | 
malanirgame sati tatraiva prakāśaprācuryamanubhūyate | evamevādarśe 
mukhaprakāśake | tadvadatrāpi dravye nānāśāpādimalopahate jyotirmayatvaṃ 
na saṃbhavati | proktaikonaśatamantrairabhimantraṇe sati nirastanikhilamalaṃ sat 
jyotirmayaṃ bhavati | tata eva jyotirmayaṃ kṛtvetyuktam | etena 
tantrāntaroktaśāpavimocanasyāpi samuccaya iti keṣāṃciduktiḥ aśraddheyaiva ||

dvipātravidheḥ [ita etat 30 sūtrabhāṣyasamāptipatrāvadhi-
vṛttikṛtādvipātrasthāpanaṃ maṇḍitam |] mukhyatvasamarthanam

evaṃ ye maheśvarānandanāthaprabhṛtayaḥ tantrāntare nityapūjāyāṃ 
pūrvavattu tripātrakam iti vacanāt sūtre na kartavyamiti niṣedhābhāvāt 
sūtrānusāribhirapi tripātraṃ kartavyamityūcuḥ tān prati ayaṃ praśnaḥ-sūtre 
na kartavyamiti niṣedhābhāvena tripātratvaṃ sādhyate uta tantrāntare uktatvāt uta 
svasūtre niṣedhābhāve sati tantrāntare vidyamānatvena vā uta tantrāntare 
dvipātraniṣedhaśravaṇādvāḥ | nādyaḥ vrīhibhiryajeta ityatra na godhūmairiti 
niṣedhābhāvāt godhūmayogenāpyapūrvaṃ syāt | na dvitīyaḥ tathā sati 
paraśurāmasūtroktasaṅgītamātṛkāvārāhyādyupāsteḥ śrīvidyā'ṅgatvena 
saubhāgyānandasandohe pareṣāmapi īdṛśāṅgatyāgasya niryuktikatvāpattiḥ | 
etena tṛtīyapakṣo'pi nirastaḥ | nāpi caturthaḥ | tathā hi yo'yaṃ tasmāt 
pātradvayaṃ devi naiva kuryāt kadācana iti niṣedhaḥ yā ca nindā-

ālasyenānyathā vā'pi kṛtvā pātradvayaṃ śive |
pūjāphalena hīnastu vikriyāṃ labhate naraḥ ||

iti tripātrakamiti vidhiśeṣārthavādaḥ | anyathā tripātravidhinaiva 
dvipātravyāvṛttau niṣedhasya nivṛttirūpaphalābhāvena vaiyyarthyāpatteḥ | yadi 
ca vidhinā pravṛttimātraṃ niṣedhena ca taditaranivṛttirityucyate tarhi ekādaśa 
prayājān yajati ityatra na dvādaśa na daśa iti vākyābhāvāt 
daśabhirdvādaśabhiśca prayājairapūrvaṃ syāt | tasmādvidhinaiva 
dvipātranivṛttau niṣedho vyarthaḥ san taccheṣo'rthavāda eva | arthavādasya 
stutimātre tātparyam | na tasminniṣedharūpatvamasti | kathaṃ niṣedhena hetunā 
tantrāntare tripātratvasādhanam ||

p. 114)

	kiṃ ca-etattantre kati pātrāṇi ? ityākāṅkṣāyāṃ svasūtre 
viśeṣāśravaṇāt tantrāntarasthaṃ pūrvavattu tripātrakam iti vacanameva 
ākāṅkṣāpūrakaṃ sat tripātraṃ sādhayatīti paramatam | tathā sati 
dvipātraprāpterevābhāvena niṣedhasya dūranirastatvāt ||

	na ca arthavāda iti vadatastava mate dvipātraprāptyabhāvena na dvipātraṃ 
kuryāditi vākyasya prāmāṇyaṃ kathaṃ cintyate iti vācyam | 
arthavādaghaṭakaniṣedhasya prāptipūrvakatvamiti na niyamaḥ tasya svārthe 
tātparyābhāvāt | ato'prāptārthaniṣedho'pi nirvahati yathā-nāntarikṣe na 
divyagniścetavyaḥ iti yadantarikṣe cinvīta antarikṣaṁ śucā'rpayet iti | 
tādṛśārthasya na svārthe tātparyam kiṃ tu prāśastyamātre | taccābādhitam ||

	na vā tantrayoḥ parasparaṃ prakṛtivikṛtibhāvaḥ sapramāṇaḥ yato vā 
prāptaṃ niṣidhyeta | na hyaprāptaniṣedhaḥ svapne'pi śrutaḥ ||

	kiṃ ca-paraprītaye arthavāde'pi āropitaniṣedhatvamastu | tathā'pi na 
teṣāṃ samīhitasiddhiḥ | tathā hi kalpasūtreṇa pātradvayaprāptiḥ 
paramānandatantreṇa tanniṣedhaḥ tathā sati tantrayoḥ samabalatvena 
grahaṇāgrahaṇavadvikalpa eva syāt | niṣedhaśāstrasyaiva svarucyā 
prābalyāṅgīkāre grahaṇapakṣastvatyantaṃ bādhyeta | vikalpa eva na syāt | 
dvipātraprayogo'śāstrīyaḥ iti vadatāṃ maheśvarānandanāthādīnāṃ vikalpo 
na hīṣṭaḥ | sa ca duṣparihāraḥ ||

	na ca-paraśurāmasūtre na kaṇṭharaveṇa dvipātraṃ kartavyamityuktam kiṃ 
tu pātradvayaprayogasthapāṭhānusāreṇa kalpyo vidhiḥ | tasmāt pātradvayaṃ 
devi naiva kuryāt iti pratyakṣo niṣedhaḥ | tathā ca pratyakṣeṇānumānikaṃ 
bādhyate | grahaṇāgrahaṇasthale ubhayaṃ pratyakṣamiti vikalpo yuktaḥ | prakṛte na 
tathā vaiṣamyāt - iti vācyam | agnīṣomīyapaśau adhrigupraiṣe ṣaḍviṁśatirasya 
vaḍkrayaḥ iti mantro'sti | tatra vaḍkrayaḥ prārśvasthīni asya paśoḥ 
ṣaḍviṃśatiriti tadarthaḥ | ayaṃ mantraḥ aśvamedhe agnīṣomīyavikṛtitvāt 
atideśena prāptaḥ | tathā sati aśvamedhe catustriṁśadvājino devabandhoḥ iti 
mantrāntaramasti | tena mantraliṅgena aśvasya pārśvāsthīni catustriṃśat iti 
siddham | tatsiddhau ṣaḍviṁśatirasya vaṅkrayaḥ iti mantre ṣaḍviṃśaliṅgavirodhe 
tatsthāne catustriṁśadasya vaṅkrayaḥ ityūhaḥ prāptaḥ | evaṃ sati 
aśvamedhaprakaraṇe punarevaṃ śrūyate-na catustriṁśaditi brūyāt 
ṣaḍviṁśatirityeva brūyāt iti | atra catustriṃśadityūhaśāstrasyānumānikatvāt 
taṃ bādhitvā na catustriṃśat iti niṣedhaḥ-nityaṃ pravartate iti 
pūrvapakṣamuktvā taduttaraṃ yatrānumāniko vidhiḥ niṣedhaśca pratyakṣaḥ 
tatra dvayorapi samabalatvamaṅgīkāryam | tathā hi�prabaladurbalabhāvo hi na 
vastuni svābhāvikaḥ kutracidasti 

p. 115)

kiṃ tvākāṅkṣāyāṃ śīghropasthitivilambopasthitiprayuktaḥ | yathā vikṛtau 
karmaviśeṣe prakṛtito vedyāstaraṇaṃ prāptam | tatra kena vedyāstaraṇaṃ 
kāryam ityākāṅkṣāyāṃ sādhanabodhakaṃ padaṃ yadi na syāt tadā 
prākṛtavedyāstaraṇasādhanaṃ smṛtvā kuśān buddhau āropya praścāt 
prakṛtivat kuśairāstaraṇaṃ kartavyamiti ānumānikaśabdakalpanayā ākāṅkṣā 
pūraṇīyā | tato'pi jhaṭiti śaramayaṃ barhirbhavati iti 
pratyakṣavākyenopasthitaśaraiḥ ākāṅkṣāśāntau bodhakaśāstrasya tadaṃśe 
ākāṅkṣāvirahāt durbalatvam | prakṛte na catustriṁśaditi brūyāt iti niṣedhasya 
prāptisāpekṣatvāt catustriṁśadvājinaḥ iti liṅgena pūrvaṃ vidhikalpanānantaraṃ 
vidhimanusṛtya pravṛttaṃ puruṣaṃ nivartayituṃ niṣedhaḥ paścāt pravṛttaḥ | na 
[ataḥ yamupajīvya pravṛttaḥ tamatyantaṃ bādhitumasamarthassan pakṣe bādhate | 
ata īdṛśasthale -a. śrī ba2. ] kuśaśāstrāt pūrvaṃ śaraśāstramiva niṣedhaḥ 
vidhikalpanāt pūrvaṃ pravṛttikṣamaḥ | ata īdṛśasthale 
ānumānikavidhipratyakṣaniṣedhayoḥ tulyabalatvādvikalpa eveti navame 
turīyapāde siddhāntitaṃ jaiminitantre | prakṛte'pi tathā tulyabalatvādvikalpo 
duṣparihāraḥ ||

yadi ca sūtre pātradvayetikartavyatāsahitasthāpanakathanena prayogavidhau 
dvipātravidhirna kalpyate tantrāntarānusāreṇa pātradvayakathanaṃ 
tṛtīyasyāpyupalakṣakamiti kalpyate tadā sarveṣvapi tantreṣu tripātraprayogasyaiva 
tantrābhimatatvena dvipātrapravartakābhāvena dvipātravidheḥ 
śaśaśṛṅgasamatvena tanniṣedhasyāpi tādṛśatvena tena hetunā kathaṃ 
tvatsamīhitasiddhiḥ | seyaṃ ubhayataḥ pāśā rajjuḥ | tasmāt 
kalpasūtrayoginītantrānusāribhiḥ dvipātraprayogo niśśaṅkamanuṣṭheyaḥ ||

yattu paramānandatantraṭippaṇyāṃ saubhāgyānandasandohasaṃjñikāyāṃ 
ekonaviṃśollāse pañcadaśaślokavyākhyānāvasare - nanu 
paraśurāmasūtravāmakeśvarāditantreṣu proktapātradvayaṃ virudhyeta-iti 
cecchṛṇu | agrimollāse anukalpapūjāyāṃ pātradvayasya suspaṣṭaṃ 
vakṣyamāṇatvāt anukalpapūjāparaṃ paraśurāmasūtrāditantram | ata eva tatra 
śāpamocanamantrāṇāmabhāva iti suvacam | atha vā - ātmayogābhyāsiparam | 
ata eva tripurārṇave ātmayogaparāṇāṃ tu nāṅgalopena [nāṅgalopo na 
bādhitaḥ-śrī.] hīyate iti | ata eva śrībhāskararāyaiḥ 
ekapātrādisaṃkṣepapūjanaṃ abhyāsaśīlānāmiti setubandhe nirūpitam | atha 
vā 

paramāpatpakṣo vā | taduktaṃ tantre -

pratyakṣayugmapātraṃ vai kṛtvā śāpamavāpnuyāt |
kvacinmayaivopadiṣṭaḥ paramāpattikālikaḥ ||

-iti maheśvarānandanāthāḥ pakṣatrayamūcuḥ taccintyam ||

p. 116)

paraśurāmasūtroktasaraṇirmukhyā na milati | tathā pratinidhisvīkārapakṣa iti 
prathamapakṣe tasyābhivyañjakāḥ pañcamakārāḥ tairarcanaṃ guptyā iti 
tadvadādimaṃ saṃśodhya iti ādimabinduṃ datvā iti pūrayitvā ādimam iti 
mapañcakena santarpya iti prabhṛtīnāṃ śatāvadhivākyānāṃ sūtrasthānāṃ 
kuṇḍalaprakṣepa eva syāt | kiṃ ca-mapañcakālābhe'pi 
nityakramapratyavamṛṣṭiḥ iti sūtreṇa nityapūjāyāṃ mapañcakasya 
mukhyatvaṃ susphuṭam | evaṃ sati sūtramanukalpaparamiti lekhaḥ 
pūrvottarasūtrāpariśodhanamūlaḥ prāmādika iti heya eva ||

kiṃ ca-etatpakṣasya sādhakatayā śāpamocanābhāvo hetutvenopanyastaḥ | sa tu 
atyantanirmūlako'saṅgataśca | tathā hi-śāpavimocanaṃ nāma kiṃ pūrvaṃ 
kṛṣṇaṃ sthitaṃ yat tasyānantarakriyayā śuklatvasaṃpādanarūpaṃ dṛṣṭaṃ 
phalaṃ kiṃ vā saṃmārgādinā srukṣvivādṛṣṭaṃ yāgasādhanaśarīraṃ 
utpadyata iti | nādyaḥ śāpamocakamantrasahasrāvṛttyā'pi 
pūrvarūpaparāvṛttyadarśanāt | na dvitīyaḥ 

kvacittantreṣu vistāraḥ kvacittantreṣu saṃgrahaḥ |
ekaṃ tantraṃ samāśritya samyakkarma kṛtaṃ tathā ||
sarvaṃ tena kṛtaṃ rāma [rāma-śrī ba2.] etacca śrīgurumārgataḥ ||

iti tripurārahasyavacanena |

bahvalpaṃ vā svagṛhyoktaṃ yasya yāvat prakīrtitam |
tasya tāvati śāstrārthe kṛte sarvaḥ [sarvaṃ kṛtaṃ bhavedityapi-pāṭhāntaram |] 
kṛto bhavet ||

iti bodhāyanasmṛtipramāṇena ca ādimadravye yāvaduktasaṃskāraireva 
yāgajanakasvarūpalābhe śāpavimocanamantrāṇāṃ tatrāprayojakatvāt 
kathamanena hetunā sūtraṃ pratinidhiparaṃ sidhyet | kiṃ ca mukhyābhāve 
pratinidhisvīkāre mukhyadharmā yāvantaḥ pratinidhau pravartante yathā 
vrīhyabhāve nīvāre yāvad vrīhidharmāḥ yathā vā somābhāve pūtikeṣu 
yāvatsomadharmāḥ tatra ūho'pi nāstīti sādhitaṃ jaiminitantre | anutiṣṭhanti ca 
tathaiva śiṣṭāḥ | evaṃ sati pratinidhau śāpavimocanamantrābhāvaḥ kena 
vāryate | itthaṃ ca vahnāvanuṣṇatvavadatyantāsiddhahetuṃ prayuñjānāste 
svāvidvattāṃ susphuṭaṃ prakaṭayāmāsuḥ ||

	nāpi dvitīyaḥ pakṣaḥ sādhuḥ | tathā hi-dīkṣā'dyārabhya 
nikhilaparaśurāmasūtrapratipāditaṃ karma yogābhyāsiparaṃ uta pūjāmātram- 
nādyaḥ dīkṣātaḥ prāk yogābhyāsitvaṃ na saṃbhavati | adīkṣitānāṃ purato 
noccarecchivapaddhatim iti niṣedhena tāntrikasiddhāntaśravaṇābhāvena  
śravaṇamṛte yogāsaṃbhavena yogābhyāsināmiyaṃ dīkṣeti vaktumaśakyatvāt | 
dvitīye-īdṛśābhyāsī etattantravihitapūjākartā kimetattantroktadīkṣāvān uta 
tantrāntareṇa  dīkṣitasya kālena 

p. 117)

svatantrānuṣṭhānena paripakvacittasyaiva etatsūtroktapūjāyāmadhikāro vā-
nādyaḥ dīkṣā'vyavahitottarakṣaṇe na bhavadabhimatadhyānasiddhiḥ | 
ayamanubhūyate sarvaiḥ | itthaṃ ca sūtrānusāreṇa dīkṣāṃ saṃpādya 
ayogitvenaitattantroktapūjānadhikārāt tantrāntarāśrayaṇaṃ pūjā'rthaṃ 
kartavyam | tarhi-

svaśāstre vartamāno yaḥ paraśāstraṃ niṣevate |
bhrūṇahatyāmavāpnoti svaśāstramavamanyate ||

iti niṣedhollaṅghanam | kiṃ ca-dīkṣottaraṃ 
mahāvidyā'rādhanapratyūhāpohāya gāṇanāyakīṃ paddhatimāmṛśet iti 
sūtreṇa lalitopāstivighnanāśasādhanatvaṃ gaṇapatyupāsteruktam | 
lalitopāstyanannaraṃ hi tatsādhyaścittaparipākaḥ tato niruktayogaḥ | tadanantaraṃ 
dvipātraprayoge adhikāro vācyaḥ | sa na saṃbhavati gaṇapatyupāsteḥ 
vighnasamānakālikatvena tadānīṃ niruktayogābhāvādapi gaṇapatyupāstau 
dvipātrakathanāt tatrāvaśyaṃ dvipātraprayogo'ṅgīkāryaḥ | itthaṃ ca tatra 
vyabhicaritādhikārasya anyatrāpi kalpanaṃ kena pratibaddham 
sakṛdvyabhicaritāyāḥ striyaḥ kimaparatra vastrāvaguṇṭhaneneti nyāyāt |

na ca-yaścāyogī tena gaṇapatyupāstiṃ tyaktvā kevalalalitopāstireva 
tantrāntaramanusṛtya yogasiddhiparyantaṃ anuṣṭheyā na gaṇapatyupāstiḥ atha vā 
gaṇapatyupāstāvapi tantrāntaramāśrīyatām-iti vācyam | tathā sati evaṃ 
gaṇapatimiṣṭvā vidhūtasamastavighnavyatikaraḥ śakticakraikanāyikāyāḥ 
śrīlalitāyāḥ kramamārabheta iti sūtre'pi aprāmāṇyaṃ vaktavyaṃ syāt | 
sūtre gaṇapatyupāstipāṭhavaiyyarthyam-na lalitopāsteḥ pūrvamanuṣṭhānaṃ 
ayogitvena tasya tadā'nadhikārāt | lalitopāstyā phalasiddhyanantaramapi 
aprayojakatvāt ananuṣṭheyam | evaṃ ca vaiyyarthyaṃ durnivāram ||

na ca-dvipātraniṣedhasya lalitāprakaraṇasthatvāt tatraivāyogināmanadhikāraḥ | 
anyatrāstyeva dvipātraprayoge'dhikāraḥ niṣedhābhāvāt iti vācyam 
śrīlalitāyā mahāyāgānuṣṭhānāvasare nirvighnatāsiddhaye 
paraśurāmasūtrānusāreṇa nikhilagaṇapatyupāstiṃ vidhāya pātrāsādanakāle 
dvipātraprayogaṃ parityajya tripātraprayogamanusaratāṃ 
maheśvarānandanāthānāṃ etatpakṣasyānanumatatvāt | nāpi tantrāntareṇa 
dīkṣitasya svatantrānuṣṭhānena paripakvacittasya sūtroktapūjāyāmadhikāra iti 
dvitīyaḥ pakṣaḥ | tathā sati sūtre dīkṣāpāṭhavaiyyarthyāt | 
evametatpakṣasādhakatvena tripurārṇavavacanam ātmayogaparāṇāṃ tu 
nāṅgalopena hīyate ityalikhat | tadatīva mandam | yogābhyāsināmaṅgalopo na 
doṣāyeti tadarthaḥ | yogirūpādhikāriviśeṣam-uddiśya sūtroktadvipātravidhiriti 
siddhāntastadīyaḥ | evaṃ ca yogiprayoge tṛtīyapātrasya 
vaiśyakartṛkadarśapūrṇamāsasambandhisāmidhenyāṃ 
pāñcadaśyasyevānaṅgatvādaṅgalopa eva nāsti | evaṃ satyaṅgalope doṣo 
nāstīti svamatasādhakatvena 

p. 118)

hetukathanaṃ vandhyāputrasya svakāryasādhakatvena grahaṇavadeva bhavati | yā 
caitadviṣaye ekapātrādisaṅkṣepapūjanamabhyāsaśīlānāmiti 
setubandhalekhasammatirdarśitā sā'pyasiddhā | setubandhe īdṛśī paṅktiḥ na 
kutrāpyasti | pratyuta dvipātraprayoga eva vyavasthāpitaḥ | tathā hi-
pūrvacatuśśatīsambandhinaḥ 

hemādipātre sādhāre sthāpayedarghyamañjasā [mambunā-ba.] |
rocanācandrakāśmīralaghukastūrikāyutam ||
bhāvayedvahnisūryendubhūtāni parameśvari |
japecca daśavāraṃ tattarpayettena yoginīḥ ||

iti ślokadvayasya vyākhyānāvasare idaṃ pūrvatantrasthavacanaṃ 
sāmānyārghyaparaṃ uttaratantrasthaṃ śrīcakrasyātmanaścaiva madhye 
tvarghyaṃ pratiṣṭhayet iti viśeṣārghyaparaṃ tadante tathaivārghyaṃ viśeṣeṇa 
sādhayet sādhakottamaḥ iti gurupātrātmapātrānyataraparamiti 
prācīnavyākhyāṃ nirasya pūrvatantrasthavacanameva viśeṣārghyaparamityapi 
matāntaraṃ nirasya pūrvatantre sāmānyārghyavidhiḥ uttaratantrasthena 
śrīcakrasyātmanaśceti vacanena tasyaiva deśakālavidhiḥ tathaivārghyaṃ 
viśeṣeṇa iti pūrvadharmātideśasahitaviśeṣārghyavidhiriti 
vyavasthāpyopasaṃhārasamaye tasmādetattantrānusāreṇa dvayoreva 
sthāpanamiṣṭam-iti dvipātravyavasthāmātraṃ śrībhāskararāyāścakruḥ | (sā 
ca asmākamanu guṇā pareṣāmananuguṇā ca) yogināmevāyaṃ prayogaḥ iti 
nocuḥ ||

yattu-setubandhe sthalāntare tantrāntareṣu 
yoginītantrasyottaracatuśśatīvadantaryāgaprapañcasyābhāvāt 
tantrarājasyāpyetatsāpekṣatvādatyuttamam-etattantraṃ etatsāpekṣatvaṃ ca 
tantrarāje-nityāhṛdayasaṃproktasphuṭopāyena bhāvayet iti kathanāt | 
nityāhṛdayametaduttaratantranāma | atra bahiryāgāṅgānāmalpānāṃ 
kathane'pi antaraṅgopāstidārḍhyaśīlānāṃ tāvataiva paripūrtisaṃbhavāt iti 
kalpyata iti likhitatvāt | maradvayakhaṇḍanapūrvakapūrvalikhitaitattantrānusāreṇa 
dvayoreva sthāpanamiṣṭam iti vākye etatpadaṃ uttaracatuśśatīparam | 
uttaracatuśśatyāṃ tu śuddhāntaḥkaraṇasyaivādhikārāt teṣāṃ prayoga eva 
pātradvayamiti siddhāntaḥ samīhitaḥ | etadabhiprāyeṇaivāsmākaṃ 
setubandhasaṃmatilekho'pīti-tadapi na | tathā sati uttaratantre 
sāmānyārghyodakotpattividhyabhāvena 
kevalamuttaracatuśśatītantreṇaivānutiṣṭhatāṃ viśeṣārghyapātrasyaivā 
sādhanaṃ prasaktaṃ na pātradvayasya | tathā copasaṃhāravākye 
etattantrānusāreṇa dvayoḥ sthāpanamiṣṭamiti vākyaṃ virudhyata eva | 
tasmādetattantrapadena pūrvottaracatuśśatīmekīkṛtya 
samagratantrānuyāyināmityevābhiprāyaḥ | 

p. 119)
 
ata eva sāmānyārghyasya pūrvacatuśśatyāmutpannasya viniyogo'ṣṭamapaṭale 
vakṣyatīti setubandhalekhaśca saṅgacchate | etena pūrvottaratantroktamekameveti 
spaṣṭam | īdṛśī pūjā aparipakvacittasyāpi prāptā tadanusāreṇa pātradvayaṃ 
durnivāram ||

yaśca bahiryāgāṅgānāmalpānāṃ kathane'pyantaraṅgopāstiśīlānāṃ 
tāvataiva paripūrtiriti setubandhalekhaḥ sa naitattantrānusāriparaḥ | kiṃ tu 
tantrarājānusāreṇa pūrvamupāstiṃ kurvataḥ kālena 
cittaśuddhipūrvakabhāvanāyāṃ saṃpannāyām itthaṃ kurvan hi satataṃ 
mucyate nātra saṃśayaḥ iti vacane sāṅgabahiryāgasya satatamityanena 
taduttaramapi yāvajjīvaṃ sāṅgopāstiprāptau tadbādhakamidaṃ 
nityāhṛdayasaṃproktasphuṭopāyena bhāvayet iti | nityāhṛdayamutaracatuśśatī 
tatra proktaḥ yaḥ sphuṭaḥ upāyaḥ bahiryāgānuṣṭhānapūrvikā bhāvanā tāṃ 
kuryāditi tadarthaḥ-tantrarāje bahiryāgāṅgānāṃ bahutvāt yogābhyāsaṃ 
cikīrṣatāṃ tadanuṣṭhānapūrvakayogābhyāse kālābhāvena kāni heyāni kāni 
saṃgrāhyāṇi iti vicikitsāyāṃ yogamabhyasiṣoḥ 
yāvajjīvaprāptatantrarājoktayāvadaṅgakalāpānuṣṭhānaṃ na kartavyam kiṃ tu 
uttaracatuśśatyuktālpāṅgakalāpenaiva bahiryāgaṃ saṃpādya bhāvanāṃ 
kuryāt tāvataiva tasya paripūrtiriti kalpyata iti tantrarājānuyāyinaḥ 
uttaracatuśśatīdharmaprāptyabhiprāyakaḥ | naitāvatā nikhilaṃ tantraṃ 
yogābhyāsiparamiti brahmāpi sādhayituṃ śaknoti | tathā sati tantrarājavacane 
nityāhṛdayetyanena uttaracatuśśatyā eva yogābhyāsiparatvakathanāt 
pūrvacatuśśatīpāṭhavaiyyarthyāt | atastantrarājavacanena paripakvacittānāṃ 
yogābhyāsadakṣāṇām uttaracatuśśatyuktamekaṃ pātraṃ 
viśeṣārghyarūpaṃ samaṣṭimantreṇa pūjanam | aparipakvacittānāṃ 
yoginītantrānusāriṇāṃ pūrvottaracatuśśatīmekīkṛtya dvipātraprayoga iti 
setubandhābhiprāyatattvam | evameva sūtrānuyāyināmityalaṃ pallavitena ||

nāpi paramāpatpakṣo veti-tṛtīyaḥ pakṣaḥ | tathā hi tṛtīyapakṣasādhakaṃ 
yadvacanaṃ-

pratyakṣe yugmapātraṃ vai kṛtvā śāpamavāpnuyāt |
kvacinmayaivopadiṣṭaḥ paramāpattikālikaḥ ||

iti likhitaṃ tat kiṃ yopagurettaṃ śatena yātayāt 
itivacchāparūpāniṣṭasādhanatvaṃ dvipātre jñāpayati 
uttarārdhastaccheṣo'rthavādaḥ uta pūrvārdhenāniṣṭasādhanatvaṃ 
uttarārdhena āpattau abhyanujñā ceti dvyamucyate atha vā 
kevalamabhyanujñāpara eva vā sarvo'pi ślokaḥ | nādyaḥ uttarārdhasya 
arthavādarūpasya kevalastutau tātparyeṇāpattikāle 
abhyanujñāpakatvāsaṃbhavāt svoktapakṣāsiddheḥ | kiṃ ca-dvipātre 
aniṣṭasādhanatvaṃ pratipādayan dvipātre pravṛttaṃ puruṣaṃ nivartayati iti 
vācyam | tatra dvipātraprayoge pravṛttisādhanaṃ rāgo vā tantrāntaraṃ vā  
nādyaḥ tripātraṃ kartavyamiti |

p. 120)

vidhisattve aṅgalopādbhītasya śraddhāvataḥ dvipātre rāgo na kadā'pi 
saṃbhavati | na dvitīyaḥ vikalpo duṣparihāraḥ iti prāgeva dattottaratvāt | etena 
dvitīyapakṣaḥ pratyuktaḥ | tasmāt agatyā yasmiṃstantre idaṃ vacanaṃ paṭhitaṃ 
tatra tripātravidhiḥ syādeva | taccheṣaḥ pūrvārdho'rthavādaḥ | uttarārdhena 
tripātravidhitantrānuyāyināṃ paramāpattau 
svānyatantroktadvipātraprayogagrahaṇamabhyanujñātam |

anṛtaṃ na vadedvidvānanṛtaṃ dharmanāśanam |
prāṇasaṃśaya āpanne tvanṛtaṃ naiva duṣyati ||

itivat tṛtīyapakṣa eva sādhuḥ | ayamevārthaḥ spaṣṭīkṛto bodhāyanācāryaiḥ-

svaśāstre vidyamāne yaḥ paraśāstreṇa vartate |
bhrūṇahatyāsamaṃ tasya svaśāstramavamanyataḥ ||
ārṣeyasya svaśāstrasya pradeśāstadgu(paraśāstragu)ṇaissaha |
karmaṇāṃ pravicārā[ryā]rthamāpatsu ca samāpnuyāt || iti ||

asyodāharaṇaṃ bhavasvāminā darśitam | yathā tṛtīyasavane saumyaṃ tantraṃ 
tūṣṇīm iti śālikiśākhāyām darśapūrṇamāsavat sarvam iti śākhā'ntare | 
svasvaśākhibhiḥ yathoktamanuṣṭheyam | āpattau tu sarvairapi tūṣṇīmiti | itthaṃ 
ca tryā(dvyā)dipātrāṇāmāpatkāle abhyanujñāpakaṃ śāstraṃ katham 
ā(anā)pannaparamiti vyavasthāpayet | tasmānna kiṃcidetat | 
paraśurāmasūtrayoginītantrānusāribhiḥ niḥśaṅkaṃ dvipātrāsādanameva 
kartavyam ||

nanu tantrāntarasthadvipātradūṣakavacanānāṃ vidhiśeṣārthaparatvaṃ 
vyavasthāpya sūtrānusāribhiḥ dvipātraprayoga eva kāryaḥ tantrāntrarasparśo na 
kāryaḥ iti pratijñāyāṃ tantrānuktaṃ sūcitaṃ ca tathā'nyeṣvapi dūṣitam 
anyatantrāt grāhyam iti vidhyudāharaṇaṃ kimiti cet-śṛṇu | asyaiva 
vacanasyāvyavahitapūrvam 

kvacittantreṣu vistāraḥ kvacittantreṣu saṃgrahaḥ |
ekaṃ tantraṃ samāśritya samyakkarmakṛte tathā |
sarvaṃ tena kṛtaṃ rāma tacca śrīgurumārgataḥ ||

ityanena pūjā'ṅgānāṃ pūjā'naṅgabhūtānāṃ yāvatkarmaṇāṃ 
svatantrānuktānāṃ nivṛttau kathitāyāṃ tantrānuktaṃ sūcitaṃ ca ityanena 
keṣāṃcitpūjā'ṅgānāṃ grahaṇam tathā'nyeṣvapi dūṣitam ityanena 
pūjā'naṅgabhūtānāṃ keṣāṃcidakaraṇe atinindā śrūyate | yathā 
sahasranāmapāṭhaḥ | tasyānanuṣṭhāne-

p. 121)

akīrtayannidaṃ stotraṃ kathaṃ bhakto bhaviṣyati |
apaṭhannāmasāhasraṃ prīṇayedyo maheśvarīm ||
sacakṣuṣā vinā rūpaṃ paśyedeva vimūḍhadhīḥ |
rahasyanāmasāhasraṃ muktvā yaḥ siddhikāmukaḥ ||
sabhojanaṃ vinā nūnaṃ kṣunnivṛttimabhipsati |

ityādivacanaiḥ apāṭhe'pi nindā śrūyate | tattantrāntarasthamavaśyaṃ grāhyam 
| atraiva tripurārahasyavacanābhiprāyaḥ | śvatantreṇāviruddhaṃ tu yāvadanyat 
samācaret iti pūrvalikhitatantrāntaravacanasyāpyatraiva tātparyam na tu 
ekaprayogāṅgeṣu tantrāntarāśrayaṇam | prayogāṅgeṣu sūcitaṃ 
ākāṅkṣitaṃ ca muktvā tantrāntarasthasya īṣadapi praveśo nāstīti 
paramasiddhāntaḥ | ata eva śrībhāgavate'pi 

yastvicchayā kṛtaḥ puṃbhirābhāso hyāśramāt pṛthak |
svabhāvavihito dharmaḥ kasya neṣṭaḥ praśāntaye ||

iti imamevārthamāha | asya ślokasya svadharmānuṣṭhānānantaraṃ 
dharmabhūyastvārthamapi paradharmo nānuṣṭheyaḥ anupayogādityāha-
svabhāveti iti śrīdharasvābhyavataraṇam | etena śloko vyākhyātaḥ || 30 ||

tatpātrasthabindubhiḥ karaṇīyakṛtyamāha-

tadbindubhistriśaḥ śirasi gurupādukāmiṣṭvā 
[atroktaśrīgurupādukātantramantrajñānāyāgratanadvi pariśiṣṭasthāḥ 6-10/1 
6/11 6/14 6-16/1 6-16/5 6/18taḥ 6/20 ete viṣayā dṛśyāḥ |] ārdraṃ jvalati 
jyotirahamasmi jyotirjvalati brahmāhamasmi yo'hamasmi brahmāhamasmi ahamasmi 
brahmāhamasmi ahamevāhaṃ māṃ juhomi svāheti 
tadbindumātmanakuṇḍalinyāṃ juhuyāt || 31 ||

tadbindubhiḥ viśeṣārghyabindubhiḥ triśaḥ trivāraṃ śirasi dvādaśāntasthāne 
[dvādaśasthāne nāma brahmarandhre-ityarthaḥ-pāścātya-2 khaṇḍe-
śrīgaṇapatikrame-2 sūtrabhāṣye-69-patre-sphuṭīkṛtosyārthaḥ |] 
gurupādukāmiṣṭvā gurupādukoddeśena dravyadānaṃ kṛtvā ārdraṃ jvalati iti 
svāhā'ntena mantreṇa tadbinduṃ gurupādukāyāgaśeṣabindumityarthaḥ 
sarvanāmnāṃ sannihitaparatvena pādukādattaśeṣasyaiva sannihitatvāt tadīyaṃ 
śeṣamādāya japan yogaṃ samācaret iti yoginītantravacanācca | ātmanaḥ svasya 
kuṇḍalinyāṃ cidvahnau | kuṇḍalinīsvarūpamuktaṃ tantrāntare-

p. 122)

viśade karṇikāyāṃ ca dhyātvā'dhāre'tha lohite |
karṇikākulakuṇḍāntassārdhatrivalayākṛtim ||
prasuptasarpasadṛśīṃ bisatantutanīyasīm |
dhyātvā kuṇḍalinīśaktim................... || iti ||

juhuyāt ityanena asmin karmaṇi homabuddhiḥ dṛḍhā kāryā na tu pānabuddhiriti 
sūcitā | bindumityanena homadravyasyātyalpatvaṃ sūcitam | bindumiti dvitīyayā 
pratipattisaṃskāro'pi sūcitaḥ | gurupādukāyai dattaśeṣaṃ homena 
saṃskuryādityarthaḥ | tena śeṣābhāve na homaḥ ||

kuladravyasvīkāravidhisamarthanam 

nanu [ita ārabhyaitat-31-sūtrabhāṣyāntaṃ yāvat-surāgrahaṇakhaṇḍanaṃ | 
kvācitkaṃ tanmaṇḍanamapyabhyadhāyītyavagantavyam |] 
sakalaśrutismṛtipurāṇeṣu surāpānasya pañcamahāpātakeṣu [yathāha 
śrīyājñavalkyaḥ-brahmahā madyapaḥ steyī tathaiva gurutalpagaḥ | 
mahāpāpāni catvāri tatsaṃsargī ca pañcamaḥ | prā. a. 3 ślokaḥ 21
manurapi-brahmahatyā surāpānaṃ steyaṃ gurvaṅganāgamaḥ |
mahānti pātakānyāhuḥ saṃsargaścāpi taiḥ saha-a 11 ślokaḥ 54 |] 
pañcamahāpātakeṣu gaṇitatvāt kathaṃ tantroktaḥ dravyasevanaṃ sukhāya 
bhavitumarhati | evaṃ yeṣu tantreṣu dravyasevanaṃ vrihitaṃ teṣveva tantreṣu 
niṣedho bahulamupalabhyate | yathā kulārṇave-

surādarśanamātreṇa kuryāt sūryāvalokanam |
tatsamāghrāṇamātreṇa prāṇāyāmatrayaṃ caret ||
ājānubhyāṃ bhavet snānamānābhyupavasecchive |
ūrdhvaṃ nābhestrirātraṃ syānmadyasya sparśane vidhiḥ ||
surāpāne kāmakṛte jvalantīṃ tāṃ vinikṣipet | 
mukhe tayā vinirdagdhaḥ tataḥ śuddhimavāpnuyāt ||
madyapānajadoṣasya prāyaścittamitīritam || iti ||

tripurārṇave'pi-

kāmānmohādyadi surāṃ pibet sakṛdapi dvijaḥ |
vidvānapi ca saṃtyājyaḥ tantrajñairavicāritam || iti ||

devīyāmale'pi-

āghrāṇaṃ darśanaṃ caiva surāyāssaṃtyajedbudhaḥ || iti ||

p. 123)

darśanameva tyajet kimu pānatyāge iti tadarthaḥ | evaṃ anyatantravacanānyapi 
bahūni santi | granthavistarabhayānneha likhyante | tasmāt 
kuladravyasvīkāraśāstramaśraddheyamiti cet-na 
rāgaprāptasurāpānanivartakānyeva amūni vacanāni | kratvarthapravṛttiriṣṭaiva 
anyathā na brāhmaṇaṃ hanyāt iti niṣedhena brahmaṇe brāhmaṇamālabhate iti 
śruteraprāmāṇyāpatteḥ | ayamevārthaḥ spaṣṭamuktaḥ śrībhāgavate-

yadghrāṇabhakṣo vihitaḥ surāyāḥ tathā paśorālabhanaṃ na hiṃsā | 
evaṃ vyavāyaḥ prajayā na ratyai imaṃ viśuddhaṃ nu viduḥ svadharmam ||
ye tvanevaṃvidaḥ puṃsaḥ stabdhāssadabhimāninaḥ |
paśūn druhyanti visrabdhāḥ pretya khādanti te ca tān ||

iti granthen | tasmāt niravakāśaviśeṣadravyasvīkāravidheḥ kratvarthatvakalpanāt 
niṣedhasya ca kevalapuruṣārthatvena ekārthatvābhāvāt | ata 
evaitadabhiprāyasūcakameva kāmāditi tripurārṇave kulārṇave ca kāmakṛte iti 
padaṃ paṭhitam | evaṃ tantrāntare-

doṣo'nyatra varārohe yajñe doṣo na vidyate |
aśvamedhādiyajñeṣu vājihatyā yathā bhavet ||

iti sadṛṣṭāntamuktārthameva draḍhayati ||

atra tārābhaktisudhārṇave evaṃ ca vīrasyāpi brāhmaṇasya kṣīrameva anyasya 
tadapi na iti bhāvaśodhanaprakaraṇe uktvā evametadagre sthalāntare uktāyā eva 
pratijñāyā dṛḍhīkaraṇārthaṃ bahuvicāraḥ kṛto nṛsiṃhācāryaiḥ | tathā hi-

vīkṣaṇaprokṣaṇadhyānamantramudrāvibhūṣitam |
dravyaṃ tarpaṇayogyaṃ syāddevatāprītikārakam ||

tarpaṇamatra pānameva | idaṃ tu brāhmaṇetaraviṣayam brāhmaṇasya 
tadupādānaniṣedhāt || 

nanu-

brāhmaṇaistu sadā peyaṃ kṣatriyaistu raṇāgame |
vaiśyairdhanaprayoge ca śūdraistu na kadācana ||

iti kulārṇave 

sautrāmaṇyāṃ kulācāre brāhmaṇaḥ prapibet surām |

p. 124)

iti samayācāratantre 

satye kramāccatuvarṇaiḥ kṣīrājyamadhupiṣṭajaiḥ |
tretāyāṃ pūjitā devī ghṛtena sarvajātibhiḥ ||
madhubhiḥ sarvavarṇaistu pūjitā dvāpare yuge |
pūjanīyā kalau devī devalairāsavaiḥ śubhaiḥ ||

iti yāmale coktatvāt kathaṃ brāhmaṇasyānadhikāra iti cet-ucyate |

viprāḥ kṣoṇibhujā viśastaditare kṣīrājyamadhvāsavaiḥ iti laghustave 

varṇānukramabhedena dravyabhedā bhavanti vai iti jñānārṇave dravyeṇa 
sāttvikenaiva brāhmaṇaḥ pūjayecchivām iti tatraivoktam | tathā 
āsavabhedamuktvā 

evaṃ dadyāt kṣatriyo'pi paiṣṭīṃ tu na kadācana |
nārikelodakaṃ kāṃsye tāmre gavyaṃ tathā madhu ||
rājanyavaiśyayordānaṃ [-rdeyaṃ brāhmaṇasya-śrī.] na dvijasya kadācana |
evaṃ pradānamātreṇa hīnāyurbrāhmaṇo [hīno bhavati brāhmaṇaḥ-śrī.-evaṃ 
pāṭhāntare-vrā-ityasyagurutvācchandobhaṅgabhayamatra ca-
hīnāyūrityādipāṭhaḥ susādhuḥ (punarāvṛttikṛt-)] bhavet ||

iti mahākālasaṃhitāyām 

kṣīreṇa brāhmaṇaistarpyā ghṛtena nṛpavaṃśajaiḥ |
mākṣikairvaiśyavarṇaistu āsavaiḥ śūdrajātibhiḥ ||

iti bhairavītantre 

yatrāvaśyaṃ vinirdiṣṭaṃ madirādānapūjanam |
brāhmaṇastāmrapātre tu madhu madyaṃ prakalpayet ||

iti kulacūḍāmaṇau

brāhmaṇo madirāṃ dattvā [pītvā-śrī.] brāhmaṇyādeva hīyate |
svagātrarudhiraṃ dattvā svātmahatyāmavāpnuyāt ||

iti haṃsamāheśvaratantre kalidharmaprakaraṇe gṛhyapariśiṣṭe 
harināthopādhyāyaiḥ sautramiṣyāṃ surāgrahaṇaniṣedhasyoktatvāt 
brāhmaṇaistu sadā'peyā ityakārapraśleṣāt brāhmaṇasya sadā niṣedhaḥ | 
kṣatriyasya saṅgrāmakāle vikalasya saṅgrāmāsaṃbhavāt | vaiśyasya 
dhanaprayogakāle anyathā

p. 125)

vikaladhiyā viṃśatidāne kartavye śatādidānāpatteḥ | śūdrairnaiva kadācana 
apeyā tena sarvadaiva peyetyarthaḥ | evaṃ ca pūjanīyā kalau devi kevalairāsavaiḥ 
ityatra anuṣajyamānasarvavarṇaśabdaśca brāhmaṇetaraviṣaya ityavadhātavyam ||

atha-

kṣīraṃ vṛkṣasamudbhūtamājyaṃ valkalasaṃbhavam |
madhu puṣparasodbhūtam āsavaṃ taṇḍulodbhavam ||

iti bhairavītantre kṣīrādipadānāṃ āsavaviśeṣaparibhāṣaṇāt brāhmaṇasyāpi 
tatrādhikāraḥ pratīyate iti cet-atra pratibhāti | kṣīrādīnāṃ kathaṃ 
bhairavakalpamityatredaṃ vacanam | tena kṣīraṃ vṛkṣasamudbhūtaṃ 
vārkṣamaireyamityarthaḥ | evamagre'pi | anyathā kṣīravṛkṣapadādervaiparītyena 
prayogāpatteḥ anuvādamanuktvā tu na vidheyamudīrayet iti nyāyāt | 
taṇḍulodbhavastvodanaḥ | tena śūdrasyāpyodanasthāne āsavameva tena | 
pṛthagodanaṃ brāhmaṇādibhiḥ āsavaṃ ca na deyamityarthaḥ | likhitavacanāt 
āmaṃ śūdrahastena pakvānnaṃ pakvamucchiṣṭamucyate ityādismṛteśca ||

na ca-śukraśāpasya brāhmaṇaviṣayatvena surāyāṃ 
taduddhāravidhānānupapattiḥ iti vācyam śūdramātrasya sadā'dhikāre 
śāstrasiddhe śukraśāpavimocanasyādṛṣṭārthatvāt ||

kiṃ ca- aindryā gārhapatyamupatiṣṭhate ityādau liṅgāpekṣayā śruteriva 
śāpavimocanakalpyamaireyadānavidhānāpekṣayā brāhmaṇo madirāṃ dattvā 
ityādiniṣedhavidheḥ śrautasya balavattvaṃ yuktisāmyāt ityantena lekhena 
brāhmaṇetaraparamiti pratijñāṃ dṛḍhīcakruḥ nṛsiṃhapaṇḍitāḥ |

tadatīva mandam | tathā hi-dravyeṇa sāttvikeneti jñānārṇavavacanaṃ 
svasādhakatvena likhitam | tadatyantamapariśodhanamūlam | sāttvikadravyaṃ 
nāma vrīhyādivat (na) lokaprasiddhaṃ kiṃcidasti | ataḥ kiṃ tat sāttvikadravyam 
ityākāṅkṣāyāṃ prakṛtipratyayayoḥ vyākaraṇasmṛtivat śāstraikagamyā 
sāttvikapadaśaktiḥ | tacchāstraṃ tripurārṇave-

gauḍī mādhvī ca paiṣṭī ca trividhaṃ dravyamīritam |
aikṣavakṣaudrajātā'dyā gauḍī syāt sāttvikī smṛtā ||
madhūkakusumadrākṣātālavṛkṣādisaṃbhavā |
mādhvīti kīrtitā tajjñaiḥ rājasī sā bhavecchive ||
piṣṭataṇḍulajātā yā tāmasī pauṣṭikī smṛtā |
sāttvikī brāhmaṇe khyātā rājasī nṛpavaiśyayoḥ || iti ||

p. 126)

evaṃ sati śāstre brāhmaṇetaraparamiti pratijñā ajñānamūleti dhruvaṃ 
pratīmaḥ | tathā mahākālasaṃhitāsthaṃ jānīyāt nārikelodakaṃ kāṃsye iti | 
rājanyavaiśyakartṛkaprayoge mukhyadravyapratinidhiniyamaṃ vidhāya 
brāhmaṇakartṛke prayoge uktadravyaparisaṅkhyāṃ kṛtvā 
parisaṅkhyāśeṣatvena evaṃ pradānamātreṇa hīnāyurbrāhmaṇo bhavet iti 
nindayā arthavādarūpayā stauti | idaṃ vacanaṃ bhavatsādhakaṃ kathaṃ bhavet ||

na ca-kṣatriyādikartṛkatvenaiva brāhmaṇādikartukatvanivṛttiḥ yathā 
godhūmanivṛttirvrīhiniyamena tathā ca kathaṃ brāhmaṇakartṛkaprayoge tasya 
prāptiḥ tannivṛttyarthā parisaṅkhyā vā katham-iti vācyam dṛṣṭāntavaiṣamyāt | 
darśapūrṇamāsayāgaḥ dravyamantarā anupapannaḥ ityākṣepeṇa 
itaradravyādivat pakṣe vrīhiprāptau brīhaya eveti niyamyate | tāvatā 
darśapūrṇamāse dravyāntarākāṅkṣā virahādārthikī itaranivṛttiḥ | prakṛtau 
rājanyavaiśyakartṛke prayoge pratinidhiniyamena dravyākāṅkṣāyāḥ virahe'pi 
brāhmaṇakartṛke dravyākāṅkṣāsattvāt pakṣe asyāpi prāptau parisaṅkhyāyā 
yuktatvāt tasmāt anena pratijñāsiddhiḥ ṣaṇḍeneva putrotpattiḥ ||

yacca kṣīreṇa brāhmaṇaistarpyā iti bhairavītantravacanaṃ sādhakatvena likhitaṃ 
tadapi bālapratāraṇāmātraṃ bhairavītantra eva etadvacanasamīpe kṣīraṃ 
vṛkṣasamudbhūtam ityanena kṣīrādipadārthanirṇayāt | yattu kṣīraṃ 
vṛkṣasamudbhūtam ityasya kṣīraṃ vṛkṣasamudbhūtakāryakārītyarthaṃ kṛtvā 
vṛkṣasamudbhūtakāryaṃ tarpaṇaṃ kṣīre prasiddhe vidhīyata iti-tadaśuddham | 
vṛkṣasamudbhavādipadatrayasya kiṃ dravyasāmānyamarthaḥ kiṃ dravyaviśeṣaḥ 
| ādye vṛkṣasamudbhūtatvarūpaśakyārthapravṛttinimittarūpasya 
dravyatvāvacchinne bādhādviśeṣārthe śaktasya sāmānye lakṣaṇā | tathā sati 
śrūyamāṇaśakyārthatyāgaḥ vṛkṣasamudbhūtapadenaiva ājyādiṣu 
vidhānasambhave ekārthānāṃ tat phalasambhavādipadānāṃ vaiyyarthyaṃ ca | 
vṛkṣasamudbhavādipadaṃ dravyaviśeṣaparamiti dvitīyapakṣe dravyaviśeṣasya 
kāryaṃ kṣīre vidhīyate | tat kiṃ dṛṣṭaṃ vā kiṃ vā'dṛṣṭasādhanaṃ 
śāstrīyaṃ kāryaṃ vidhīyate | ādye vidhānavaiyyarthyaṃ lokata eva jñātuṃ 
śakyatvāt | dvitīye yathā khalevālī yūpo bhavati ityatra yūpe paśuṃ niyuñjīta 
ityanena śāstreṇa kṛtaṃ yatkāryaṃ tat khalevālyāṃ vidhīyate | tathā 
śāstrāntaraprāptaṃ vidhīyate uta śāstrāntareṇa aprāptaṃ vidhīyate | ādye 
kṣīraṃ vṛkṣasamudbhūtamityanenaiva vṛkṣasamudbhūtakāryasya 
kṣīratarpaṇāderlābhe kṣīreṇa brāhmaṇaistarpyeti śāstraṃ vyartham | na hi 
khalevālī yūpo bhavati iti procya khalevālyāṃ paśuṃ niyuñjīta iti pṛthaguktam 
aprāptakāryasya vidhānaṃ tadvat vandhyāputrāderapi dampatikāryatvena 
vidhānāpatteḥ | manmate tu kṣīreṇa brāhmaṇaistarpyeti 
tarpaṇasādhanadravyavidhiḥ kṣīrapadasya prasiddhārthaṃ bādhitvā 
arthaviśeṣatātparyagrāhakaṃ kṣīraṃ vṛkṣasamudbhūtam iti vacanamiti na 
kasyā'pi vaiyyarthyam | anyo'pi nānupapattigandhaḥ | yadyapi 
vidhāyakatvābhāvena 

p. 127)

vaiyyarthyaṃ kalpyam | tathā'pi yadāgneyamaṣṭākapālaṃ nirvapati saumyaṃ 
carum ityaṣṭau havīṃṣi cāturmāsye vidhāya punaḥ vaiśvadevena yajet iti 
samudāyasya vaiśvadeva iti saṅketaḥ kṛtaḥ | tena vasante vaiśvadevena yajeta 
ityatra yāgena viśvedevayāgasyaiva vasante prāptau ta bādhitvā navīnasaṅketena 
aṣṭānāṃ yāgānāṃ saṃpattiṃ kurvan sārthakaṃ tadvākyam ityuktaṃ 
jaiminitantre | tathā sārthakaṃ bhavitumarhati | 

na ca - svenaiva kṣīrapadamatyantarūḍhaṃ prayujya rūḍhiśaktiṃ parityaktuṃ 
vyākhyā'ntaraṃ kṛtam evaṃ na kutrāpi dṛṣṭam iti vācyam | kāśīkhaṇḍe-

arundhatīṃ dhruvaṃ caiva tathā saptarṣimaṇḍalam |
āsannamṛtyurno paśyet..................................... ||

iti prathamamuktvā arundhatī nāsikāgraṃ ityādinā svenaiva vyākhyātam | evaṃ 
śataśaḥ santi paraṃ tu prayojanābhāvāt adhikaṃ na likhitam ||

asmin vacane caturthacaraṇe āsavaṃ taṇḍulodbhavam ityatra taṇḍulodbhavamiti 
piṣṭodbhavasyāpi upalakṣakaṃ bṛhadvāmakeśvaratantre-

kṣīramājyaṃ madhu tathā hyāsavaṃ ca maheśvari |
vṛkṣatvakpuṣpapiṣṭotthaṃ kramāt jñeyaṃ vicakṣaṇaiḥ ||

ityatra paiṣṭe'pi āsavasaṅketasya kṛtatvāt | etena paramate daṇḍaprakṣepātmako 
hetuḥ kṣīravṛkṣapadādeḥ vaiparītyena prayogāpatteḥ iti tatsādhakatayā 
anuvādyamanuktveti lekhaḥ saḥ sarvo'pi parāhataḥ 
arthaviśeṣatātparyagrāhakatvena varṇanena atra 
uddeśyavidheyabhāvagandhasyāpyabhāvāt | ata eva nāmadheyapāde udbhidā 
yajeta ityatra nāmadheyasyāvidheyatayā na svataḥ dharme prāmāṇyam kiṃ tu 
ṛtvijāṃ prayogavidhismārakatayā tadvāreti sthitamākare ||

astu vā paraprītaye aśāstrīyaḥ vṛkṣasamudbhūtamuddiśya kṣīrasaṃjñā 
vidhīyate ityaṅgīkāraḥ | tathā'pi paraprakṣiptadaṇḍaḥ asmin mate asahyaḥ | 

yadyat prathamanirdiṣṭam iti vyāptisiddhamūlo hi daṇḍaprakṣepaḥ sa tu asiddhaḥ 
dadhnā juhoti ye yajamānāsta ṛtvijaḥ vāyavyaṃ svetamālabheta bhūtikāmaḥ 
ityādau śataśo vyabhicārāt | tarhyanuvādyamanuktveti prāmāṇikokteḥ kā 
gatiriti cet asati bādhake prathamanirdiṣṭamuddeśyaṃ prāyeṇa bhavatīti 
tasyābhiprāyaḥ | prakṛte kṣīramuddiśya vṛkṣasamudbhūtatvavidhāne 
vaiyyarthyameva bādhakam | idaṃ kathaṃ na jñātaṃ pareṇa | evam āsavaṃ 
taṇḍulodbhavam ityatra taṇḍulodbhavaśabdasya odanamarthaṃ bruvan 
tatsādhakatayā āmaṃ śūdrasya pakvānnam iti ca likhan bālānāmapyupahāsyo 
babhūva | etena laghustavaratnasya 

p. 128)

sādhakatvalekho dūrīkṛtaḥ kṣīrādīnāṃ sāṅketikaśadbānāṃ tatra 
gṛhītatvāt | yattu śukraśāpavimocanaliṅgāpekṣayā brāhmaṇo madirāṃ 
dattvā iti pratyakṣaśruteḥ prābalyamiti kathanaṃ tadapi tuccham | na hi brāhmaṇo 
madirāṃ dattvā brāhmaṇyādeva hīyate ityatra niṣedhārthe nañśrutiḥ 
vidhipratyayarūpā'sti | kiṃ tu madirādānanindayā kalpyo vidhiḥ | itthaṃ ca tasya 
pratyakṣaśrutitvaṃ bruvan vidvatsamāje kimuttaraṃ vadediti na vidmaḥ | itthaṃ ca 
śukraśāpavimocanasahitasya sautrāmaṇyāṃ kulācāre brāhmaṇaḥ prapibet 
surām iti kulācārasthapratyakṣasvalikhitavacanasya gatim akalpayitvā mukhena 
brāhmaṇetaraparamiti pratijñāmātreṇa pareṣāṃ [sarveṣāṃ-śrī0] 
mohamutpādayan tāntrikabahiṣkṛto mantavyaḥ ||

itthaṃ ca vacanānāmiyaṃ vyavasthā dravyeṇa sāttvikena ityatra kṣīreṇa 
brāhmaṇaistarpyā ityasya laghustavasthamahākālasaṃhitāvacanasya vyavasthā 
darśitā | tathā ca yacca bhairavītantravacanaṃ kṣīreṇa brāhmaṇaistarpyā iti 
yacca bṛhadvāmakeśvaratantre 

krameṇa brāhmaṇādyaistu kṣīrājyamākṣikāsavaiḥ [madhupiṣṭajaiḥ-śrī0] iti 

yacca laghustavavacanaṃ teṣāṃ sāmānyarūpatvāt yāmalavacane śatye 
kramāccaturvarṇaiḥ kṣīrājyamadhupiṣṭajaiḥ ityatropasaṃhāraḥ | itthaṃ ca 
kṣīrādīnāṃ bhairavyāditantraiḥ aviśeṣeṇa sadā prāptau kālaviśeṣe 
kartṛviśeṣe kṣīrādidravyaviśeṣa iti saṅkocasampādakaṃ yāmalavacanam | yattu 
jñānārṇavasthaṃ dravyeṇa sāttvikenaiva brāhmaṇaḥ pūjayecchivām iti 
aikṣavakṣaudrajātāyāḥ sāttvika dravyasya kṣīrapadavācyatayā yāmalavacanena 
saṅkocāsambhavāt yugacatuṣṭaye prāpnuvadbrāhmaṇakartṛkaprayoge vikalpaḥ 
prāpnoti | evaṃ rājasī nṛpavaiśyayoḥ ityanena kṣatriyavaiśyakartṛkaprayoge 

madhūkakusumadrākṣātālavṛkṣādisambhavā |
mādhvīti kīrtitā tajjñaiḥ rājasī [rājasī sā bhavecchive iti caturthaḥ 
pādotrāvadheyaḥ |] ||

iti vivaraṇena uktadravyaprakṛtikadravyasya sadā prāptau uktānāmamīṣāṃ 
saṅghāte kṣīrādisaṃjñāyā apravṛtteḥ sambhavatkṣatriyasya 
valkalaprakṛtikadravyasya kṛtayuge prāptau etad [?]drākṣādiprakṛtikasyāpi 
prāptau vikalpaḥ | śūdrasya vacanadvaye ekarūpatvāt kṛte na vikalpaḥ | evaṃ 
tretā'diṣu yathāyathaṃ svayamūhyam | kaliyuge brāhmaṇasya 
jñānārṇavatripurārṇavavacanābhyāṃ aikṣavamadhuprakṛtikaṃ prāptaṃ 
pūjanīyā kalau sarvavarṇaiḥ kevalamāsavaiḥ iti | evaṃ sati-

kṛte tu śūdraiḥ saṃpūjyā pratyakṣairāsavaiḥ priye |
tretāyāṃ vaiśyaśūdrābhyāṃ nṛpādyaiḥ dvāpare yuge |
kalau yuge mahādevi brāhmaṇādyaiḥ prapūjitā ||

p. 129)

iti rahasyārṇavavacanaṃ yadyupatiṣṭhate tadā kṛtetaravacanaiḥ dravyetaraviśeṣaḥ 
sarvavarṇeṣu prāptaḥ rahasyārṇavavacanena śūdrātirikte parisaṅkhyā'pi 
prāptā tathā sati kṛte traivarṇike vikalpaḥ pratyakṣasya dravyasya | yadvā-
rahasyārṇave'pi kṛtayugasambandhiśūdrakartṛkaprayoge pratyakṣāsavaṃ 
taṇḍulaprakṛtikaṃ vidhīyate | tena tantrāntareṇa śūdrasya āsavaprāptau 
vaiyyarthyabhiyā parisaṅkhyātvakalpanam aśraddheyam | tathā sati 
brāhmaṇādikartṛkaprayoge dravyasya ākāṅkṣitatvāt anyasmāt tantrāt 
kṣīrādikaṃ grāhyam | na vikalpaḥ | evameva tretāyāṃ rahasyārṇavavacanaṃ 
śūdravaiśyayorāsavaṃ vidadhāti | tathā sati vaiśyasya anena āsavaṃ prāptam | 
yāmalavacanena dhṛtaṃ prāptam | atra vikalpaḥ | evaṃ dvāpare 
vaiśyakṣatriyayoḥ āsavamadhuvikalpaḥ uktavacanadvayena | kaliyuge tu ubhayoḥ 
ekarūpatayā virodhābhāvāt avicāra eva | yuktaścāyameva pakṣaḥ na 
parisaṅkhyāpakṣaḥ | itthaṃ ca yatrāvaśyaṃ vinirdiṣṭam iti 
kulacūḍāmaṇivacanaṃ tasmin mukhyālābhe iti pūraṇīyam | mukhyālābhe 
brāhmaṇena tatsthāne tāmrapātre madhu yojayet iti tadarthaḥ | evaṃ sati tāmre 
gavyaṃ tathā madhu | rājanyavaiśyayorevaṃ na dvijasya kadācana iti 
mahākālasaṃhitāvacanena virudhyate | tathā tulyabalatvādvikalpo na parihāryaḥ 
paramate'pi ||

yadapi haṃsamāheśvaratantravacanaṃ [haṃsapārameśvara-ba 1.] brāhmaṇo 
madirāṃ dattvā brāhmaṇyādeva hīyate iti tat yadi tattantre kṣatriyādīnāṃ 
kuladravyavidhisamīpe syāt tarhi taccheṣo'rthavādaḥ apaśavo vā anye go 
aśvebhyaḥ itivat | yadi tatsamīpe na syāt tarhi ajitendriyabrāhmaṇaparam tasya 
dravyadānaniṣedhasyāgre vakṣyamāṇatvāt | yacca kulārṇavavacanam 
brāhmaṇaistu sadā'peyam iti tatra akārapraśleṣaṃ kṛtvā yo'yaṃ 
brāhmaṇānāṃ niṣedhaḥ kṛtaḥ sapumarthapara iti parābhiprāyaḥ | kṣatriyasya 
saṅgrāmakāle vikalasya saṅgrāmāsambhavāt ityādiniṣedhahetulekhāt | sa 
cāsmākamiṣṭa eva | 

kratvarthātiriktadravyasvīkāro brāhmaṇasya nāstīti vayamapi brūmaḥ | yaśca 
harināthoktaḥ sautrāmaṇyāṃ kalau surāgrahaniṣedhaḥ so'pyasmākamanumataḥ 
| na tāvatā kulācāre'pi niṣedhaḥ sambhavati | 
kaliyugasambandhisautrāmaṇigrahatvaṃ surāniṣedhoddeśyatā'vacchedakaṃ 
tadanākrāntatvāt kulācārasya kaimutikanyāyapraveśe atiprasaṅgāt | tasmāt 
paroktānāṃ brāhmaṇaviṣaye bādhakānāṃ gandhasyāpyabhāvena 
sādhakasahasrasya darśitatvena tantraprāmāṇyamaṅgīkurvataḥ 
brāhmaṇādikartṛkapūjāyāṃ prathamādaraḥ śāstraprāptaḥ | sa tu 
brāhmaṇā'pi tyaktumaśakyaḥ | itthaṃ ca-

vinā dravyādhivāsena na smarenna japet priye |
ye smaranti mahādevi teṣāṃ duḥkhaṃ pade pade ||
nāsavena vinā mantraṃ na mantreṇa vinā'savam ||

p. 130)

iti kulārṇave 

vinā'lipiśitābhyāṃ ca pūjanaṃ niṣphalaṃ bhavet |

iti samayācāre 

vinā hetukamāsvādya kṣobhayukto maheśvari |
na pūjāṃ na japaṃ kuryānna dhyānaṃ na ca cintanam ||

iti bhāvacūḍāmaṇau 

vinā'lipiśitābhyāṃ ca yaḥ kuryāt pūjanaṃ mama |
duḥkhaṃ sandhākaro bhūtvā yoginīnāṃ paśurbhavet ||

iti kālikāpurāṇe

yaḥ kuryādādimadravyavihīnaṃ tava pūjanam |
tava krodhena dagdhaḥ san bhasmībhavati nānyathā ||

iti samayāṅkamātṛkāyāṃ sthitam-īdṛśāni vacanānyanugṛhītāni bhavanti | 
evaṃ ca brāhmaṇetaraparamityantamaśuddhamiti akṛtrimayā svamatyā 
vicāryamāṇe pratibhāti | ito'dhikaṃ nirmatsarāḥ paṇḍitāḥ vicārayantu | 
imāṃ vijñāya sudhiyā madanti iti 
tripuropaniṣatsaptamamantrabhāṣye'pyevameva sthitam ||

yattu saubhāgyānandasandohe asmadvyavasthāpitārthameva pratijñāya 
vaidikamantrairabhimantraṇasya vihitatvāt śūdrapūjāparatve tatra 
tasyānavakāśādvidheranavakāśāpattihetunā brāhmaṇādhikāraḥ sādhitaḥ sa 
tu atiśithilaḥ | varṣāsu rathakāra ādadhīta ityatra rūḍhiśaktyā yogaṃ bādhitvā 
saṅkarajāterādhānādhikārasiddhau tadanantaraṃ tadupayuktavedādhyayanamapi 
kalpyata iti ṣāṣṭhanyāyena śūdrasya yuktyā adhikārasiddhau vedamantrapāṭhe 
yāvadupayukte adhikārasyānivāryatvena anena hetunā svepsitāsiddheḥ ||

etāvatparyantaṃ brāhmaṇe adhikāravyavasthā kṛtā | 
vyavasthito'pyayamadhikāro na sarvasya kiṃ jitendriyasya kāmādirahitasyaiva | ata 
eva paramānandatantre-

ayaṃ tu paramaḥ kaulamārgaḥ samyaṅmaheśvari |
asidhārāvratasamo manonigrahahetukaḥ ||
sthiracittasya sulabhaḥ saphalastūrṇasiddhidaḥ |
anyasya viphalo duḥkhahetuḥ syāt parameśvari || iti ||

p. 131)

tripurārṇave'pi-

ayaṃ sarvottamo dharmaḥ śivoktaḥ sukhasiddhidaḥ |
jitendriyasya sulabho nānyasyānantajanmabhiḥ ||
yadūrdhvaretasāṃ sarvatyāgināmaniketinām |
kṣaṇena smṛtamātreṇa mohamutpādayatyalam ||
tadevātra hi saṃsiddhau kāraṇaṃ sarvamīritam |
ito madyamito māṃsaṃ bhakṣyamuccāvacaṃ tathā ||
taruṇyaścāruveṣāḍhyā madaghurṇitalocanāḥ |
tatra saṃyatacittatvaṃ sarvathā hyatiduṣkaram ||
bhaktiśraddhāvihīnasya kathaṃ syādetadīśvari || iti ||

bhāvacūḍāmaṇau-

tantrāṇāmatigūḍhatvāttadbhāvo'pyatigopitaḥ |
brāhmaṇo vedaśāstrārthatattvajño buddhimān vaśī ||
gūḍhatantrārthabhāvasya nirmanthyoddharaṇakṣamaḥ |
kaulamārge'dhikārī syāditaro duḥkhabhāk bhavet || iti ||

kulārṇave-

ahobhuktaṃ tu yanmadyaṃ mohayet tridaśānapi |
tanmaireyaṃ śivaṃ pītvā yo na vikriyate naraḥ ||
japan śivaparo bhūtvā sa muktaḥ sa ca kaulikaḥ || iti ||

bhagavatā paraśurāmeṇāpi kaulācāre mukhyadharmatvena 
kāmakrodhalobhamohamadamātsaryāvihitahiṃsāsteyalokaviruddhalokavidviṣṭa-
varjanam" [idaṃ śrībhagavaduktaṃ sūtraṃ pāścātyaikakhaṇḍe 33 patre-19-
saṃkhyākam |] iti pratipāditam | tena yathā ājyāvekṣaṇādyaṅgānusāreṇa 
cakṣuṣmata eva darśapūrṇamāsayoradhikāraḥ nāndhānāṃ tathā 
kāmakrodhādivarjanādyaṅgānusāreṇa jitendriyasyaiva adhikāro nānyasyeti 
sūtrakṛdabhiprāyaḥ | evamanyeṣvapi tantreṣu bahūni vacanānyupalabhyante | tāni 
anatiprayojanatvāt granthavistarabhayācca na likhitāni ||

samprati idānīṃtanā ajitendriyāḥ capalajihvāḥ śiśnodaraparāyaṇāḥ 
rāmāndhatayā āropitakaulikatākāḥ kevaladravyamātralolupāḥ 
likhitavacanānyanādṛtya svādhikāramavicāryaiva svābhiprāyasādhanāni 
pītvā pītvā punaḥ pītvā iti āgalāntaṃ pibet dravyam 
ityādikulārṇavavacanānyeva puraskṛtya tadabhiprāyamajānanto jānanto vā 
dhūrtāḥ santaḥ yathecchā'cāraṃ 

p. 132)

kurvanti | ihāmutra na kutrāpi śarma labhante | pratyuta 
mahāpātakajanitayātanāṃ śrīdharmarājaśāsanāt labhanta eva | nātra 
sandehaḥ | tādṛśāḥ patitāḥ tantragoṣṭhīṣu na smartavyāḥ | ata 
evaitādṛśakaulikānāmupahāso'pi vistareṇa kṛtaḥ prabodhacandrodaye | tasmāt 
jitendriyāṇāṃ bhaktiśraddhāvatāṃ viduṣām ārambhe 
pratipāditabhaktibhūmikāmārūḍhānāmeva atrādhikāraḥ anyeṣāṃ 
patanāyaiva ityalaṃ vistareṇa | uktādhikāribhinnānāṃ viṣṇvādyupāsanaṃ 
kevalavaidikamārgeṇeti tattvam ||

dakṣiṇavāmācāravivekaḥ 

ajitendriyaiḥ kulamārgaṃ praviśya kevalodakādinā pūjā kāryā | ayaṃ dakṣiṇo 
mārgaḥ | jitendriyaiḥ proktadravyeṇa saparyā'nuṣṭheyā | ayaṃ vāmācāra iti 
kaścit | tattuccham vāmācārapadārthasyaiva tenājñātatvāt | tathā ca 
trikūṭārahasye-

vāmācāraṃ pravakṣyāmi śrīvidyāsādhanaṃ priye |
yaṃ vidhāya kalau śīghraṃ māntrikaḥ siddhibhāk bhavet ||
mālā nṛdantasaṃbhūtā pātraṃ mānuṣamuṇḍakam |
āsanaṃ siṃhacarmādi kaṅkaṇaṃ strīkacodbhavam ||

ityādyupakramya vistareṇa varṇitam | tanmadhye mukhyadravyanāmāpi nāsti | 
tadvistarastu savyāpasavyamārgasthā iti lalitānāmavyākhyānāvasare 
asmatparameṣṭhigurubhiḥ vistareṇa prapañcitaḥ | viśeṣajijñāsubhiḥ 
tato'vagantavyam | tathā kālikāpurāṇādapi | granthavistarabhayāneha tanomi ||

ajitendriyasya kaulamārge anadhikāraḥ

yadapi paramānandatantraṭippaṇyāṃ ajitendriyāṇāṃ gandhodakena 
pūjanamuktam tadasat mukhyālābhe cānukalpo nānyathā tu kadācana iti 
paramānandatantre viṃśollāsavacanavirodhāt mukhye'nadhikṛtasya 
pratinidhāvadhikārasya śaśaviṣāṇatulyatvāt | tasmādajitendriyāṇām 
āpātataḥ upāsanecchāyām anyamārgeṇa anyadevatopāsanaṃ kṛtvā tena 
paripakvāntaḥ karaṇaṃ dṛḍhaṃ viditvā paścāt kaulamāśrayet | taduktaṃ 
kulasāre-

anyāsāṃ devatānāṃ tu bhūyo bhūyo niṣevaṇāt |
paripakvamanāḥ kaule labdhaprāmāṇyako naraḥ | 
bāhyendriyāṇi saṃyamya praviśedatra netaraḥ || iti ||

brahmāṇḍapurāṇe'pi-

yasyānyadevatānāmakīrtanaṃ janmakoṭīṣu |
tasyaiva bhavati śraddhā śrīdevīnāmakīrtane |

p. 133)

carame janmani yathā śrīvidyopāsako bhavet |
nāmasāhasrapāṭhaśca tathā caramajanmani || iti ||

yāmale'pi-

śrutismṛtiproktakarmānuṣṭhānādbahujanmasu |
śodhitaṃ ca mano jñātvā śrīvidyopāsako bhavet || iti ||

pheṭkārītantre'pi-

sarvathā gopanīyeyaṃ vidyā syādajitendriye |
tena vīryavatī vidyā na vidyā syāt prakāśataḥ ||
kulapuṣpaṃ kuladravyaṃ kulapūjāṃ kulaṃ japam |
nedṛśānāṃ pravaktavyaṃ yadīcchet priyamātmanaḥ [siddhi-śrī0] || iti ||

ajitendriye pravacanamapi niṣidhyate | kimu vaktavyaṃ svīkāre | 
tasmādajitendriyasya kaulamārge nāstyadhikāra ityalamativistareṇa || 31 ||

etadarghyaśodhanamiti śivam || 31 ||

|| iti... kalpasūtre śrīkramo nāma tṛtīyaḥ khaṇḍaḥ ||

etat sāmānyārghyaśodhanottaraṃ tajjalena iti maṇḍalādikaraṇamuktam 
tadārabhya kuṇḍalinyāṃ juhuyāt ityantaṃ karma arghyaśodhanam 
arghyasaṃskāraḥ | yadyapi pūrvoktasūtre karmakalāpavidhānādeva 
arghyasaṃskāra iti jñātuṃ śakyate tathā'pi 
śāpavimocanādikatipayasaṃskāraḥ [saṃskārān iti pāṭha ucitaḥ pratibhāti | 
|| sūtrasya punarāvṛttau śodhyaṃ sūcayitavyakam ||
|| pariśiṣṭa sthalaṃ caiva pūrṇamādyā prāsādataḥ || (iti tṛtīyaḥ khaṇḍaḥ-) 
śrīḥ- ||] pātrāntarāṇi ca bhrāntyā kecana svīkuryuḥ tanmābhūta ityetadarthaṃ 
paraśurāmaḥ paramakāruṇikaḥ bhrāntinirāsāya idaṃ sūtraṃ praṇināya | etat 
uktaṃ yat tāvadeva śodhanaṃ nānyadityarthaḥ | śiva mityanena 
arghyaprakaraṇasamāptiḥ sūcitā ||

viśeṣārghyaśodhane nibandhe maṇḍalapūjāyāṃ vidyayā madhyapūjanaṃ 
sūtre uktaṃ tattyaktam | anuktaṃ turīyasvaralekhanaṃ hrīṃ mahālakṣmīśvarīti 
mantraṃ sudhādevīpūjanādi gālinyā puṣpaṃ dattvetyantam anuktaṃ 
saṃgṛhītam | atra pramāṇābhāvāt kevalatadbuddhyā racitamasaṅgrāhyam || 31 ||

iti ... kalpasūtravṛttau śrīkramo nāma tṛtīyaḥ khaṇḍaḥ ||





caturthaḥ khaṇḍaḥ-lalitākramaḥ

śrīcakre paracityāvāhanam

hṛdi sthitāyā devatāyāḥ śrīcakre āvāhanaprakāraṃ darśayitumupakramate-

atha hṛccakrasthitāmantassuṣumṇāpadmāṭavīnirbhedanakuśalāṃ nirasta 
mohatimirāṃ śivadīpadīptimādyāṃ saṃvidaṃ vahannāsāpuṭena nirgamayya 
līlā'kalitavapuṣaṃ tāṃ trikhaṇḍamudrāśikhaṇḍe [etad 
trikhaṇḍāmudroddhāraḥ dvi. pa. śi. 15/8-11 viṣaye dṛśyaḥ |] kusumāñjalau 
haste samānīya || 1 ||

atheti kramaviśeṣadyotakam atha jihvāyā atha vakṣasaḥ itivat | yadvā-
pūrvaprakaraṇavicchedadyotakam | hṛccakram anāhataṃ tadeva dahramityapi 
vyavahriyate | tatra sthitāṃ | śāstre devatānivāsasthānaṃ tadeva prasiddham | 
tathā ca śrutiḥ- tatrāpi dahraṃ gaganaṃ viśokastasmin yadantastadupāsitavyam iti 
| skāndapurāṇe'pi hṛtpuṇḍarīkāntarasanniviṣṭam iti | ato devatāyā 
nivāsasthānaṃ hṛccakram | tatra sthitāyā bāhyopacārapūjanaṃ na sambhavati | 
ataḥ tatra sthānādbahirānayanārthaṃ sārvakālikaṃ sthānaṃ jñāpayitumidaṃ 
viśeṣaṇaṃ jñeyam | suṣumṇā'pi 
mūlādhārādibrahmarandhrasthasaroruhāntānāṃ kamalānāṃ 
gumphanādhārabhūtadaṇḍākṛtireko nāḍīviśeṣaḥ | taduktaṃ viṣṇupurāṇe-

mūlādidehacakrāṇāmādhārā'sau prakīrtitā |
yā suṣumṇeti sarvatra gīyate paramarṣibhiḥ ||

iti | tasyāṃ yāni padmāni viśuddhyādīni teṣāṃ aṭavī durgamaṃ vartma tasya 
nirbhedanaṃ gamanāgamanānukūlavartmasaṃpādanaṃ tadviṣaye kuśalām | 
anena viśeṣaṇena hṛdayāt śrīcakrādau āgamane pūjā'nantaraṃ punargamane 
prayāsābhāvaḥ sūcitaḥ | nirasteti nirastaḥ dūrīkutaḥ moho'jñānaṃ tadeva 
timiraṃ yayā tām | etadviśeṣaṇārthaṃ dṛḍhīkartuṃ viśeṣaṇāntaramāha-
śiveti | śivātmako yo dīpaḥ tasya dīptiṃ prakāśarūpām | etena 
prakāśarūpatvakathanena pūrvaviśeṣaṇena pratipāditaṃ 
ajñānatimiranāśanaṃ sūpapādamiti dhvanitam | kiṃ ca yathā 
dīpaprabhayoravinābhāvasambandhaḥ evaṃ śivaśaktyorapyavinābhāvaḥ 
sūcitaḥ | ayamevārthaḥ spaṣṭamukto brahmāṇḍapurāṇe-

trikoṇarūpiṇī śaktiḥ bindurūpaḥ paraḥ śivaḥ |
avinābhāvasambandhaḥ tasmādbindutrikoṇayoḥ || iti ||

p. 135)

śrīdevībhāgavate'pi-

yasmin dharmiṇi yo dharmo'vinābhūtaśca tiṣṭhati |
sa dharmī śivarūpaḥ syāddharmaśśaktisvarūpadhṛk || iti ||

anayorvastunoraupādhiko bhedo na vāstava iti tattvanirūpaṇe prapañcitaṃ 
prāgeva [prāgeva nāma-anugate 3 khaṇḍe-92 patre-śrīkrame-9 sūtrabhāṣye-
ityarthaḥ |] | ādyāṃ saṃvidaṃ aparicchinnasaṃvidaṃ vahan nāsāpuṭena yena 
nāsāpuṭena aprayatnena śvāso nirgacchati tena mārgeṇa nirgamayya yathā 
nirgamanaṃ bhavet tadanukūlavyāpāraṃ kuryāt | atra tādṛśo vyāpāraḥ 
hṛdayasthānāt uktamārgeṇa nirgamanabhāvanameva | tadanantaravyāpāraṃ 
vidhatte līleti | līlayā svecchāmātreṇa ākalitaṃ svīkṛtaṃ vapuḥ 
dhyānaślokoktaṃ yayā | etena itaraśarīravat garbhavāsena vinā 
bhaktānugrahāya svīkṛtamanoharavapuṣṭvaṃ sūcitam | uktaṃ ca gītāyām-

yadā yadā hi dharmasya glānirbhavati bhārata |
abhyutthānamadharmasya tadā'tmānaṃ sṛjāmyaham || iti [śrī bha gī. a. 4 
ślokaḥ-7 |] ||

mārkaṇḍeyapurāṇe'pi-

evaṃ yadā yadā bādhā dānavotthā bhaviṣyati | 
tadā tadā'vatīryāhaṃ kariṣyāmyarisaṃkṣayam || iti [śrī saptaśatī-a. 12 
antimaḥ ślokaḥ |] ||

tām aṅgīkṛtavapuṣaṃ trikhaṇḍamudrā [iyaṃ trikhaṇḍā mudrā ddi. pa. śi. 
15/8-11 viṣaye dṛśyā |] trikhaṇḍā trīn janmamṛtyujarāḥ yadvā 
sattvarajastamoguṇān khaṇḍayatīti trikhaṇḍā kevalamokṣapradetyarthaḥ | yadvā 
trīṇi khaṇḍāni kalāḥ icchājñānakriyā'tmikāḥ tatsvarūpā trikhaṇḍā | 
taduktaṃ yoginītantre-

mudrā'khyā sā yadā saṃvidambikā trikalāmayī | 
trikhaṇḍā rūpamāpannā sadā sannidhikāriṇī |
sarvasya cakrarājasya vyāpikā parikīrtitā || iti ||

mudrāśadbārthaśca viśvasya modanāt drāvaṇācca mudrā | taduktaṃ 
yoginītantre-

cidātmabhittau viśvasya prakāśāmarśane yadā |
karoti svecchayā pūrṇavicikīrṣāsamanvitā ||
kriyāśaktistu viśvasya modanād drāvaṇāttathā ||
mudreti kathitā devī..................... || iti ||

p. 136)

asyārthaḥ yadā cicchaktiḥ svātmābhinnāyāṃ bhittau svecchayā 
īkṣaṇānantaraṃ vikārān pūrṇānicchantī prakāśāmarśane karoti | ayaṃ 
bhāvaḥ jagataḥ ṣaḍbhāvavikārāḥ asti jāyate vardhate vipariṇamate apakṣīyate 
naśyati iti | teṣu dvitīyo vikāraḥ prakāśaḥ sphuṭībhāva iti tallakṣaṇāt | tṛtīyo 
vikāraḥ āmarśanam idaṃ tayā hṛdayaṅgamībhāva iti tallakṣaṇāt | itthaṃ ca 
tripurasundaryāḥ svāntassthitasṛṣṭisattāparyālocanottaraṃ viśvasya 
dvitīyādivikāraviṣayiṇī icchotpadyate | seyaṃ vicikīrṣā | tato viśvasya 
utpattyabhivṛddhikrameṇa karoti | te evaite pūrvoktaprakāśavimarśane 
īdṛśecchākṛtiviśiṣṭacit kriyāśaktirityucyate | iyaṃ kriyāśaktiḥ 
tripurasundaryā kriyamāṇotpattyabhivṛddhī anumodate drāvayati ceti mudrā sā | 
anumodanaṃ nāma svabhinnakartṛkakriyānukūlyam | drāvaṇaṃ nāma ghanasya 
saṅkucitasya praśithilāvayavatā'pādanātmakaḥ prasaraḥ | īdṛśakriyāśaktireva 
svavṛttimudrātvasāmānādhikaraṇyena īkṣaṇādermelanena trikalāmayī 
trikhaṇḍā bhavati iti paramarahasyārthaḥ | ataḥ sarvaśreṣṭheyaṃ vyāpikā 
mudreti tasyā āvāhane viniyogaḥ kṛtaḥ | etādṛśī yā mudrā tasyā 
adṛṣṭasvarūpaṃ pratipāditam | dṛṣṭasvarūpaṃ tu aṅgulīpragrathanarūpaṃ 
nānāvidhaṃ tantrabhedena dṛśyate | asmin na dṛśyate | ato 
gurusampradāyāvagataṃ tantrārthaṃ caikīkṛtyāgre spaṣṭīkrīyate | īdṛśaṃ yat 
trikhaṇḍātmakaṃ bāhyarūpaṃ tena śikhaṇḍitaḥ grathitaḥ kusumayuktaḥ 
añjaliḥ yasmin tasmin haste samānīya gṛhītvā || 1 ||

māyālakṣmī parā uccārya devīnāma cāmṛtacaitanyamūrtiṃ kalpayāmi 
namaḥ iti kalpayitvā || 2 || 

māyā hrīṃ śrīṃ iti lakṣmīśabdārthaḥ parā sauḥ | etadviṣaye pramāṇāni 
pūrvameva darśitāni | evaṃ bījatrayamuccārya devīnāma 
śakticakraikanāyikāyāḥ lalitāyāḥ iti ṣaṣṭhyantaṃ yogyatvāt | tato 
namo'ntamavikṛtaṃ paṭhet | evaṃ ca ādau sādhāraṇaparibhāṣāprāptā tritārī 
aiṃ hrīṃ śrīṃ hrīṃ śrīṃ sauḥ śakticakraikanāyikāyāḥ 
amṛtacaitanyamūrtiṃ kalpayāmi namaḥ iti trayastriṃśadvarṇo mantaḥ | anena 
paradevatāyā mūrtiṃ kalpayitvā bhāvayitvā ||

atra pūrvasūtre līlā'kalitavapuṣaḥ haste āgatāyāḥ punarmūrtikalpane 
vaiyyarthyādataḥ prabalenārthakrameṇa pāṭhakramabādhaḥ | tathā cāyaṃ 
kramaḥ prathamaṃ kevalacitomūrtikalpanamanena mantreṇa tato mūrteḥ 
kalpitāyāḥ nāsāpuṭamārgeṇa nirgamanaṃ tato haste kusumagarbhe'ñjalau 
samānayanamitivivekaḥ || 2 ||

hasarayujaṃ vācaṃ hasayuktāṃ kalarīṃ hasaracaturdaśaṣoḍaśānapyuccārya

mahāpadmavanāntaḥsthe kāraṇānandavigrahe |
sarvabhūtahite mātarehyehi parameśvari ||

iti baindavacakre paracitimāvāhya || 3 ||

p. 137)

pūrvaṃ nyāsaprakaraṇe uktena samudāyagrahaṇa iti nyāyena hasetyādiṣu 
kevalavyañjanamātragrahaṇaṃ sampradāyāt | haśca saśca raśca tairyutaṃ 
vācaṃ hsraiṃ iti | haśca saśca ābhyāṃ yukto'yaṃ 
kakāralakārarephekārabindusamudāyaḥ hsklrīṃ iti | tathā haśca saśca raśca 
caturdaśa aukāraḥ saḥ ca ṣoḍaśo visargaḥ saḥ ca hasaracaturdaśaṣoḍaśāḥ 
hsrauḥ iti etānuccārya parameśvarītyantaṃ yathāśrutaṃ paṭhitvā binducakre 
paracitimāvāhayet | mantrasvarūpaṃ tu prathamaṃ tritārī hasraiṃ hsklrīṃ 
hsrauḥ-

mahāpadmavanāntaḥsthe kāraṇānandavigrahe |
sarvabhūtahite mātarehyehi parameśvari ||

ityaṣṭatriṃśadvarṇo mantraḥ | mahāpadmavanasya yo'ntaḥ pradeśaḥ tatrasthe | 
mahāpadmasvarūpamuktaṃ brahmāṇḍapurāṇe-

padmāṭavīsthalaṃ vakṣye sāvadhāno mune śṛṇu | 
same suratnakhacite tatra ṣaḍyojanāntare |
paritaḥ sthalapadmāni mahākāṇḍāni santi vai ||

setubandhe tu mahāpadmavanaṃ sahasradalakamalasamudāyaḥ ityuktam | 
kāraṇānandaḥ aparicchinnānandaḥ sa eva vigraho yasyāḥ | yadvā kāraṇaṃ 
prathamaṃ tasmin jātaḥ kāraṇaḥ tatra jātaḥ ityaṇ | sa cāsāvānandaśceti | 
śeṣaṃ pūrvavat | śeṣaṃ spaṣṭam | 

yadvā caitanyamahaso bahirnissāraṇaṃ kṛtvā mantreṇa paricchinnāṃ mūrtiṃ 
kalpayitvā haste samānīya mantreṇa pīṭhaniveśanāntam āvāhanapadārthaḥ 
avadānādipradānāntasyeva bahvīnāṃ kriyāṇām ekapadārthatve 
bādhakābhāvāt | tena yatra dīkṣā'dau nānādevatānāṃ tantreṇa pūjanaṃ 
tatra samudāyasyaikapadārthatvāt kāṇḍānusamayaḥ tāvatāṃ siddhaḥ | 
etādṛśāvāhanaikadeśapīṭhanivaśane sādhanībhūto'yaṃ mantraḥ ||

nibandhakārastu jñānārṇavoktaṃ antaryāgakramaṃ āvāhanādimudrāśca 
darśayāmāsa | tadanādaraṇīyaṃ pramāṇābhāvāt || 3 ||

catuṣaṣṭhayupacāravidhiḥ

catuṣṣaṣṭhyupacārān kuryāt | sarve upacāramantrāḥ 
tritārīpūrvāḥ kalpayāmi namaḥ ityantāḥ kartavyāḥ || 4 ||

catuṣṣaṣṭītyanena etattantrānuyāyināṃ 
tantrāntaroktaṣoḍaśādyanyatamapūjāvyāvṛttiḥ || nanu kimayaṃ 
parisaṅkhyāvidhiḥ uta niyamavidhiḥ uta apūrvavidhiḥ nādyaḥ kenāpi 
pramāṇena nityamaprāpteḥ | pakṣe'pi prāptyabhāvena na dvitīyaḥ | tarhi tṛtīyaḥ 
syāditi cediṣṭāpattiḥ | tathā'pi sarvāṃśe nāpūrvavidhiḥ upacārāṃśe 
apūrvaḥ catuṣṣaṣṭyaṃśe niyamaḥ | upacāravidhau upacārāṇāmanantatvena 
tatra nānāsaṅkhyāprāptau catuṣṣaṣṭhisaṅkhyāyā api pakṣe prāptatvāt | na ca-

p. 138)

evamekasminniyamāpūrvasvīkāre vidhisāṅkaryam iti vācyam iṣṭāpatteḥ 
yadāgneyo'ṣṭākapāla iti vākye agnipuroḍāśayoḥ pakṣe prāptau tadaṃśe 
niyamaḥ yāgāṃśe apūrva iti dṛṣṭatvāt | na ca catuṣṣaṣṭhyupacārān vidhāya 
ityagrimasūtreṇa [purastādevāgāmi-5-sūtroktavākyena |] parisaṅkhyāvidhiḥ 
anenopacāravidhiḥ iti vācyam tathā sati asmin sūtre catuṣṣaṣṭhipadavaiyyarthyāt 
| na ca evaṃ sati catuṣṣaṣṭhītyagrimavākyaṃ vyartham iti śaṅkanīyam 
catuṣṣaṣṭhyupacārānanūdya kramaviśeṣavidhānāt | sarvathā nopacārasya 
saṅkhyāyā vidhāyakaṃ tat | kuryāditi spaṣṭavidhyantam idameva 
saṅkhyāviśiṣṭopacāravidhāyakam ||

yadvā pāṭhenaiva kramasiddhau agrimeṇa catuṣṣaṣṭhyupacārān vidhāya ityanena 
kramavidhānāsambhavāt vihitānāmeva iti catuṣṣaṭhyupacāran vidhāya 
ityanuvādakam upasaṃhārarūpam | asya phalaṃ tu tantrāntare 
catuṣṣaṣṭhyupacārānantarbhūtāḥ uktādanye kecana santi tairarcanaṃ mābhūt 
kiṃ tu pratinidhiṃ kalpayitvā mantre śrutadravyanāmnaivārpaṇametadartham | 
itthaṃ coktopacārādadhikaiḥ sambhave sati pūjanaṃ kartavyam | ata eva 
tripurārṇave-

uktopacārādadhikaiḥ sambhave sati pūjayet ||

iti vacanaṃ uktanyāyagarbhameva | niyamavidherayogavyavacchede tātparyam 
natvanyayogavyavacchede | tena catuṣṣaṣṭhyupacāramadhye ekasyāpyayogo mā 
bhavatvityatraiva tātparyam na tvadhikavyavacchede | tasmāt ito'dhikānāṃ 
śibikāgajāśvanṛtyādīnāṃ yāvatāṃ sambhavaḥ tāvatkalpanaṃ 
sūtrāviruddhaṃ mantavyam ||

atra upacārapadārthaśca kalpyamānadravyajanitaḥ sukhaviśeṣaḥ taṃ kuryāt 
utpādayet ityarthaḥ ||

na ca nityatṛptāyāṃ devatāyāṃ kalpyamānadravyeṇa kīdṛśī sukhotpattiḥ iti 
vācyam | nityatṛpte sukhotpattiḥ na bhavatīti satyaṃ tathā'pi 
paricchinnaśarīrakalpanavattaccharīre sukhakalpanena svātmanyadṛṣṭotpattireva na 
tu kalpitena paradevatāyāḥ sukhotpattiḥ | ata evoktaṃ śivamahimne [atra mahimani-
iti-pāṭhaḥ-sambhāvyatām |] na hi svātmārāmaṃ viṣayamṛgatṛṣṇā bhramayati 
iti | ata evopacāramantre kalyayāmītyeva kriyāpadaṃ yojitam | śeṣaṃ suspaṣṭam 
|| 4 ||

tritārīmuccārya pādyaṃ kalpayāmi namaḥ iti krameṇa ābharaṇāvaropaṇaṃ 
sugandhitailābhyaṅgaṃ sajjanaśālāpraveśanaṃ 
majjanamaṇḍapamaṇipīṭhopaveśanaṃ divyasnānīyodvartanam uṣṇodakasnānam 
kanakakalaśacyutasakalatīrthābhiṣekaṃ 

p. 139)

dhautavastraparimārjanam aruṇadukūlaparidhānam 
aruṇakucottarīyamālepamaṇḍapapraveśanamālepamaṇḍapamaṇipīṭhopa-
veśanaṃ [dukūlaku-śrī.] candanāgarukuṅkuma [śilārasamṛga-śrī.] 
saṅkumṛgamadakarpūrakastūrīgorocanādidivyagandhasarvāṅgīṇavilepanaṃ 
keśabharasya kālāgarudhūpaṃ 
mallikāmālatījātīcampakāśokaśatapatrapūgakuḍmalī 
punnāgakalhāramukhyasarvartukusumamālāṃ bhūṣaṇamaṇḍapapraveśanaṃ 
bhūṣaṇamaṇḍapamaṇipīṭhopaveśanaṃ navamaṇimakuṭaṃ candraśakalaṃ 
sīmantasindūraṃ tilakaratnaṃ kālāñjanaṃ pālīyugalaṃ [vālī-śrī.] 
maṇikuṇḍalayugalaṃ nāsābharaṇam adharayāvakaṃ prathamabhūṣaṇaṃ 
kanakacintākaṃ padakaṃ mahāpadakaṃ muktāvalim ekāvaliṃ channavīraṃ 
keyūrayugalacatuṣṭayaṃ valayāvalim ūrmikāvaliṃ kāñcīdāma kaṭisūtraṃ 
saubhāgyābharaṇaṃ pādakaṭakaṃ ratnanūpuraṃ pādāṅgulīyakam ekakare 
pāśam anyakare aṅkuśam itarakare puṇḍrekṣucāpam aparakare puṣpabāṇān 
śrīmanmāṇikyapāduke svasamānaveṣābhirāvaraṇadevatābhiḥ saha 
mahācakrādhirohaṇaṃ kāmeśvarāṅkaparyaṅkopaveśanam amṛtāsavacaṣakam 
ācamanīyaṃ karpūravīṭikām ānandollāsavilāsahāsaṃ maṅgalārārtikaṃ 
chatraṃ cāmarayugalaṃ darpaṇaṃ tālavṛntaṃ gandhaṃ puṣpaṃ dhūpaṃ 
dīpaṃ naivedyaṃ kalpayāmi namaḥ iti catuṣṣaṣṭhyupacārān vidhāya || 5 ||

atra sāmānyaparibhāṣayaiva tritārīsiddhau punarvidhānaṃ dīpanāthamantravat 
tadavayavatvaṃ jñāpayati | śeṣaṃ spaṣṭam | mantrasya svarūpaṃ tu aiṃ hrīṃ 
śrīṃ pādyaṃ kalpayāmi namaḥ iti | na lalitāyā iti | nāmapraveśaḥ 
mānābhāvāt ||

nibandhakārastu nyāyānabhijñaḥ svecchācārī ca tasmāt nāmapraveśaṃ 
svecchayā cakre | na ca sampradānakārakasyākāṅkṣitatvāt 
tadvācakapadābhāvāt abodhakatvaṃ syāt iti vācyam 
adhyāhāreṇākāṅkṣāśānteḥ adhyāhṛtasya padasya mantrāvayavatvena 
nyāyavidbhiranaṅgīkārāt anyathā iṣe tvā chinadmi ūrje tvā unmārjmi iti 
prayogakāle pāṭhāpatteḥ | ato yāvacchruto mantraḥ | yadi nāmamantratvaṃ 
matvā nāmapraveśaḥ tarhi nāmamantrasya namo'ntatvaṃ caturthyantatvaṃ 
lakṣaṇam | atra dvitīyā'ntakalpayāmibhyāṃ madhye vyavadhānānna 
sambhavatīti tattvam | kiṃ ca sarvatropacāramantrāṇāṃ kalpayāmi namaḥ 
ityanenaiva nirvāhe tritārīmuccāryeti sūtraṃ vyarthaṃ 

p. 140)

sat mantrasvarūpaṃ pratipādayati | yāvaduktaṃ paṭhanīyam | utpattivākye 
lalitāpadaprayogāditi nirmūlalalitāpadapraveśe heturvaktavyaḥ | tamajānan 
kevalakāvyapāṭhī nibandhakāraḥ sūtrakāreṇa lalitāpadasya bhūriprayogāditi 
hetuvilekhanena svīyamapāṇḍityaṃ prakāśitavān ||

krameṇetyanena pādyamiti prātipadikasthāne 
ābharaṇāvaropaṇādipadoccāraṇaṃ jñāpayati | snānīyodvartanaṃ 
śarīralagnasnehaviyogasādhanaṃ sugandhicūrṇaviśeṣaḥ | atra dvitīyāntāni 
sarvāṇi tattadvastujanyasukhaviśeṣaparāṇi | kucottarīyaṃ kañcukam | ālepaḥ 
sugandhidravyaśarīrasaṃyogaḥ tajjanako maṇḍapaḥ sthānaviśeṣaḥ | kaṅkumaṃ 
kāśmīram | saṅkuḥ vṛkṣaviśeṣaḥ | taduktaṃ viśvakośe śaṅkuḥ kīle gare 
śastre saṅkhyāpādapabhedayoḥ iti sakāraśakārayornātibhedāt 
ekadeśavikṛtamananyavat iti nyāyena vṛkṣaviśeṣaḥ sugandhiḥ | mṛgamadaḥ 
kastūryavāntarabhedaḥ | yadvā otuviśeṣāvayavo mṛgamadaḥ 
mahārāṣṭrabhāṣayā javvāji iti prasiddhaḥ | kastūrī mṛganābhiḥ | ādipadena 
anyāni lokaprasiddhāni sugandhidravyāṇi | sarvāṅgīṇaṃ sarvāṅgasambandhi | 
sarvāṅgaśadbāt sambandhārthe khapratyaye sarvāṅgīṇam iti rūpaṃ sidhyati | 
tādṛśaṃ yat vilepanam | agaruḥ prasiddhaḥ | tanmadhye atyunnataḥ kālāgaruḥ | 
mallikā mālatītyādinā ṣaḍṛtusamudbhavakusumāni | sīmantaḥ 
keśapāśamadhyasaraṇiḥ tasmin sindūram | tilakasthāne ratnam | kālāñjanam 
atikṛṣṇāñjanaṃ sauvirāñjanaṃ vā | pālī karṇabhūṣaṇaṃ 
mahārāṣṭrabhāṣayā bālī iti prasiddham | tasyāḥ yugalaṃ yugmam | adhare 
oṣṭhe yāvakaṃ lākṣārasaṃ raktatvasaṃpādakam | prathamabhūṣaṇaṃ 
maṅgalasūtram | kanakacintākaṃ āndhrapuradhrībhiḥ dhṛto bhūṣaṇaviśeṣaḥ 
kaṇṭhasya āndhrabhāṣayā golakuttikaṇṭhū iti prasiddhaḥ | padakaṃ 
kaṇṭhabhūṣaṇaṃ mahārāṣṭrabhāṣayā tanmaṇi iti prasiddham | mahāpadakaṃ 
kaṇṭhabhūṣaṇaviśeṣaḥ | mahārāṣṭrabhāṣayā peṭayā iti prasiddhaḥ | 
muktāvaliṃ mahārāṣṭrabhāṣayā kaṇṭhā iti prasiddham | ekāvaliṃ 
saptaviṃśatimauktikaracitā mālā nakṣatramālā iti prasiddhā 
ekāvalyekayaṣṭikā saiva nakṣatramālā syāt ityamaraḥ | channavīraṃ ubhayato 
vaikakṣyadāmātmakaṃ bhūṣaṇam iti nibandhe sthitam | keyūrāṇām 
aṅgadānāṃ yugalaṃ yugmaṃ tasya catuṣṭayam ekaikabāhau dvayaṃ dvayam | 
balayāḥ kaṅkaṇāni teṣāmāvaliṃ paṅktim | ūrmikā aṅgulibhūṣaṇaṃ tasya 
āvalim | kaṭibhūṣaṇānyāha kāñcīti | saubhāgyābharaṇam adhare 
jaghanālambī bhūṣaṇaviśeṣa iti nibandhe sthitam | 
pādakaṭakaratnanūpurapādāṅgulīyottaramekavacanamavivakṣitam tadarthasya 
bādhāt | āyudhānyāha eketi | puṇḍrekṣuḥ citravarṇekṣuḥ | puṣpamayāḥ 
bāṇāḥ puṣpabāṇāḥ tān | āyudhakrama ukto dakṣiṇāmūrtisaṃhitāyām-

dakṣiṇādhaḥ kare bāṇān vāmādhastu śarāsanam | 
vāmordhve pāśamāraktaṃ dakṣordhve tu sṛṇiṃ param || iti ||

p. 141)

mahācakraṃ śrīcakram | kāmeśvarāṅka eva paryaṅkaḥ tatropaveśanam | 
amṛtarūpāsavo madyaṃ tadyukta caṣakam | ācamanīyaṃ spaṣṭam | 
karpūravīṭikā lakṣaṇamuktaṃ tantrāntare-

elālavaṅgakarpūrakastūrīkesarādibhiḥ |
jātīphaladalaiḥ pūgaiḥ lāṅgalyūṣaṇanāgaraiḥ |
cūrṇaiḥ khadirasāraiśca yuktā karpūravīṭikā || iti ||

lāṅgalī nārikelam | ūṣaṇā pippalī | nāgaraṃ śuṇṭhī | khadirasāraṃ 
mahārāṣṭrabhāṣayā kāt iti prasiddham | ānandasya ullāsaḥ udayaḥ tena 
vilāsaḥ āvirbhāvaḥ yasyedṛśahāsam | loke'pi ānandodayajñāpako hāsaḥ | ato 
yuktam īdṛśaṃ viśeṣaṇam | maṅgalārārtilakṣaṇaṃ paramānandatantre-

tata ārārtikaṃ kuryāttadvidhānaṃ śṛṇu priye |
lohabhinne suvarṇādipātre sindūrareṇubhiḥ ||
nānāvidhairvarṇakaiścāpyaṣṭapatraṃ sakarṇikam [manoharaṃ-śrī. 
suvarṇakaṃ - ba 2.] |
svastikaṃ vā prakalpyātha piṣṭajān ḍamaruprabhān ||
ghṛtapakvānnanasaptapañcatritayameva vā |
savartikaṃ ghṛtaiḥ pūrṇaṃ kramādvinyasya pātrake ||
prajvālya māyayā paścānnavaratnaiśca mantrayet |
cakramudrāṃ pradarśyātha navaratnaiśca pūjayet ||
āmastakaṃ tu tatpātramuddharet svayamutthitaḥ |
samastacakracakreśi yute devi navātmike ||
ārārtikamidaṃ divyaṃ gṛhāṇa mama siddhaye ||
iti ghaṇṭāṃ vādayan vai devyā āpādamastakam ||
dakṣahastena trirbhrāmya pātraṃ sthāpya natiṃ caret |
evamārārtikaṃ kuryāt..................... || iti ||

tālavṛntaṃ tālavyajanam | śeṣaṃ spaṣṭam | catuṣṣaṣṭhyupacāramadhye uktasya 
alābhe pratinidhidravyaniyama uktastantrāntare-

tattaddravyeṇopacārānabhāve kusumākṣataiḥ |
manasā bhāvayan kuryāttena pūjāphalaṃ labhet || iti ||

p. 142)

akṣatapūjane viśeṣo yoginītantre-

śvetākṣatairna pūjyā syāt tripurā parameśvarī | 
kāśmīraiḥ kuṅkumairvā'pi [vā haridrairvā-śrī.] raktacandanapaṅkakaiḥ 
[paṅkajaiḥ-śrī.] |
rañjitān śālijān śuddhānakhaṇḍānarpayet budhaḥ || iti ||

idaṃ pratinidhikalpanamapi gandhapuṣpadhūpadīpanaivadyavyatiriktaviṣayameva | 
taduktaṃ yoginītantre-

upacārānalābhe tu puṣpādyairmanasā smaret |
gandhapuṣpadhūpadīpanaivadyānyanmaheśvari |
gandhādipañcakābhāve pūjā vyarthaiva sarvadā [sarvadhā-śrī ba 2.] || iti ||

navamudrāpradarśanam 

navamudrāśca pradarśya || 6 ||

navamudrāḥ saṃkṣobhiṇyādiyonyantāḥ vakṣyamāṇāḥ [etad granthe tattatpatre 
uktāśeṣamudroddhāraḥ ddi0 pa- śi.-15-3/8 viṣaye dṛśyaḥ athavā 5 khaṇḍe 
lalitākrame 15 sūtrabhāṣye dṛśyaḥ |] | cakāreṇa daśamīṃ trikhaṇḍāṃ ca 
pradarśya | devyā iti śeṣaḥ || 6 ||

tridhā saṃtarpaṇam

mūlena tridhā santarpya || 7 ||

bindāviti śeṣaḥ ||

kecit tu viśeṣārghya eva tatsaṃskārarūpaṃ tataḥ kiṃcit uddhṛtya pātrāntareṇa 
tatraiva nikṣeparūpaṃ tarpaṇaṃ vidhīyate ityūcuḥ | tanna 
viśeṣārghyaśodhanaprakaraṇābhāvena tathātve 
prakṛtahānyaprakṛtakalpanāpatteḥ etadarghyasaṃśodhanamiti 
pūrvasūtravirodhācca | na ca bindāviti kathaṃ jñātamiti śaṅkanīyam mūleneti 
turīyakūṭaśravaṇena [tṛtīya-ba.] tajjhānasambhavāt | paraṃ tu iyān viśeṣaḥ-
etadatirikte pūjayitveti atra santarpyeti śravaṇāt atra tarpaṇaṃ anyatra pūjanam | 
anuṣṭhāne viśeṣastu atra bindumātraprakṣepaḥ pūjanasthale 
bindupuṣpākṣatobhayaprakṣepaḥ | kiṃ ca

p. 143)

mūleneti tṛtīyayā itaranairapekṣyaśravaṇāt śrīpāduketyādyaṣṭākṣaryāḥ 
[anugate-82-patre-khaṇḍe-śrīgaṇanāyakapaddhatau-8-mūlasūtre 
uktoyamaṣṭhākṣarīmantraḥ |] pūjāyāmeva yojanavidhānāt śvāhā home 
tarpaṇe ca tarpayāmīti coccaret iti dakṣiṇāmūrtisaṃhitāvacanena mūlānte 
tarpayāmītyeva yogaḥ ||

nanu tantrāntare ekakriyāyāmeva dvayoḥ padayoḥ prayogaḥ paryāyeṇa dṛśyate 
yathā kṣīreṇa brāhmaṇaistarpyā iti dravyeṇa sātvikenaiva brāhmaṇaḥ 
pūjayecchivām iti kvacit asminnevārthe yajdhāturapi dṛśyate yathā-
śurāghaṭasahasreṇa yakṣye tvāṃ parameśvari iti tathā ca 
tarpaṇapūjanayajanāni paryāyāṇīti [paryāyāḥ iti sādhuḥ pāṭhaḥ |] cet na | 
nahyekārthe prayogamātreṇa paryāyatā sidhyati lakṣaṇayā'pyanyasminnarthe 
prayogasambhavāt | anyathā gaṅgāratīrapadayorapi tathātvāpatteḥ | ata eva 
vāyavyaṃ śvetamālabheta bhūtikāmaḥ ityatra dhātoḥ sparśārthakatve'pi 
dravyadevatāyogasya yāgamantarā'nupapatteḥ ālabhatidhātoḥ yāge lakṣaṇā 
kalpitā | tathā anupapattyabhāvena agnihotre śrūyamāṇasya vatsamālabheta 
ityatra dhātoḥ yathāśrutārthatvamevāṅgīkṛtam | prakṛte'pi santarpyetyatra 
vāyavyādivākyavat bādhakābhāvāt vatsamālabheta itivat yathā 
śrutārthatvameva yuktam ||

nanu dravyasyātrāpyanuktatvāt tarpaṇaṃ pūjanaṃ vā kena kāryamiti cet ucyate | 
vihitatarpaṇādikaṃ sādhanamapekṣate | saṃskṛtaṃ viśeṣārghyaṃ ca 
kāryamapekṣate | evaṃ sākāṅkṣayostayoḥ naṣṭāśvadagdharathanyāyena 
viśeṣārghyaṃ saṃskṛtya tena devatāṃ yajet iti vākyaikavākyatā kalpyate ||

na ca evaṃ sati sāmānyārghyasyā'pi tulyatvena tasyāpi pūjāsādhanatvāpattiḥ 
iti vācyam tajjalena trikoṇeti viśeṣārghyamaṇḍalādau śrautaviniyogenāsya kiṃ 
kāryam ityākāṅkṣāvirahāt ||

na ca evaṃ tadbindubhiḥ triśaḥ gurupādukāmiṣṭvā iti tṛtīyayā 
viśeṣārghyasthāpi viniyogaśravaṇāt ubhayatra tulyam iti vācyam 
etadarghyasaṃśodhanamiti [anugata-3-khaṇḍāntimena 32-sūtreṇetyarthaḥ |] 
tadagrimasūtreṇa tāvatparyantaṃ viśeṣārghyasaṃskārasyaivoktatvena 
bindubhirityāderapi saṃskārāntaḥpātitvāt kiṃ ca śyāmākrame sthitena 
sarvacakradevatā'rcanāni [idaṃ-6-khaṇḍe śrīśyāmākramasthaṃ-22 sūtram |] 
vāmakarāṅguṣṭhānāmikāsandaṣṭadvītīyaśakalagṛhītaśrīpātraprathama-
bindusahapatitaiḥ dakṣakarākṣatapuṣpakṣepaiḥ kuryāditi vacanena dravyalābhasya 
niṣpratyūhatvāt ||

p. 144)

na ca tasya śyāmāprakaraṇasthatvāt tatraiva viśrāntiḥ iti vācyam | śyāmāyā 
lalitopāstyaṅgatvaṃ pūrvameva vyavasthāpitam | aṅgasya prakaraṇaṃ nāstīti 
mīmāṃsakasiddhāntaḥ | ataḥ prabalena prakaraṇena sannidhiṃ bādhitvā sarvatra 
viniyoge bādhakābhāvāt ||

na ca tathā'pi śyāmāpadairubhayataḥ saṃdaṃśāt 
prayājābhikramaṇanyāyena avāntaraprakaraṇaṃ mahāprakaraṇabādhakaṃ 
bhaviṣyati iti vācyam sarvaśabdaśrutyā sarvaprabalayā 
avāntaraprakaraṇabādhasambhavāt ||

kiṃ ca anārabhya paṭhitena siddhāntagranthasthena tadabhivyañjakāḥ pañca 
makārāḥ tairarcanam ityanena dravyasya prāptatvena anupapattigandhābhāvāt ||

etā eva yuktayaḥ gaṇapatiprakaraṇasthe sarvatra devatānāmasu śrīpūrvaṃ 
pādukāṃ pūjayāmītyaṣṭākṣaraṃ yojayet iti vākye [idaṃ vākyamanugate-81-
patre-2-khaṇḍe-gaṇanāyakapaddhatau 8-sūtre'pi |] draṣṭavyāḥ || 

tridhā trivāraṃ atra dravyabhedāt mantrāvṛttirjñeyā || 7 ||

ṣaḍaṅgapūjanam

ṣaḍaṅgapūjanamāha-

devyā agnīśāsuravāyuṣu madhye dikṣu ca ṣaḍaṅgāni pūjayitvā || 8 ||

atra pūjanaṃ nāma puṣpākṣatabinduprakṣepa [etat-agre-6 khaṇḍe-śyāmāme-
22-sū-dṛśyam |] eva na tu pañcopacārādyarpaṇarūpaṃ 
śyāmākramoktakalpasūtrānurodhāt tathā śiṣṭasampradāyācca ||

evaṃ sati atrādhunikāḥ yatra yatraitaduttaraṃ pūjayitveti tatra tatra 
pūrvasūtrasthaṃ santarpyetyanuvartyobhayavidhiḥ mūladevīsthale 
tarpaṇamātraṃ bindudravyadānaṃ tarpaṇaṃ puṣpākṣatadānaṃ pūjanaṃ 
itthaṃ ca tritārīśiromantrottaraṃ śiraśśaktiśrīpādukāṃ pūjayāmi 
śiraśśaktiśrīpādukāṃ tarpayāmi ityanutiṣṭhanti | tadanuṣṭhānaṃ 
bhrāntimūlam tathā sati ardhajaratīyanyāyāt | tritārīmārabhya śiromantrāntaṃ 
sakṛdāvṛttiḥ śiraśśaktītyārabhya dvivāramiti kathanasyātihāsāspadatvāt | 
kiṃ ca pūjayāmīti mantreṇa pūjanaṃ agrimamantreṇa tarpaṇam iti 
pūjanatarpaṇayoḥ kramikatvaṃ prāptam | tathā sati bindupuṣpākṣatadānayoḥ 
ekakālabodhakena bindusahapatitaiḥ puṣpākṣataiḥ kuryāt iti sūtreṇa virudhyate | 
api ca vāmakarasambandhābhāvaprasaṅgaśca kramikatvena dvayorapi 
dakṣahastena kartuṃ śakyatvāt | 

p. 145)

na ca vāmakarāṅguṣṭhānāmikāsandaṣṭaḥ iti sūtrānusāreṇa [idaṃ-6 khaṇḍe 
śrīśyāmākrame 22-sūtram |] vāmakarasyāvaśyakatā iti vācyam dakṣakarasya 
puṣpākṣataprakṣepavyāpṛtatvena sahatvānyathā'nupapattyā 
prāptavāmakarasya vidhānāsambhavenānuvādakatvāt | ata eva 
bahiṣpavamānastotrārthaṃ prasarpaṇāvasare chandogānāṃ sūtre savyaiḥ 
pāṇibhistṛṇanti ityatra bhāṣye dakṣahastasya adhvaryuṃ prastotā'nvārabhate 
prastotāraṃ pratihartā pratihartāramudgātā iti vākyena adhvaryvādyanvārambhe 
vyāpṛtatvāt arthaprāptaḥ savyapāṇiḥ anūdyate ityuktam ||

kecittu santarpyetyanuvartya tarpaṇapūjobhayaṃ vidhīyate 
ardhajaratīyanyāyabhītyā tritāryuttaraṃ hṛnmantrānte 
hṛdayaśaktiśrīpādukāṃ pūjayāmi tarpayāmi namaḥ iti mantraṃ paṭhanti | 
tadaśuddham anuvṛttau pramāṇābhāvāt ||

kiṃ ca vidhau ādau tarpaṇaṃ paścāt pūjā mantre viparītakrama iti ca viruddham 
||

tasmāt pūrvavākye tarpaṇaṃ nāma binduprakṣepamātram | tasya anuvṛttau 
ākāṅkṣāvirahāt pūjanameva vidhīyate | pūjāpadārthaśca 
bindupuṣpākṣatasamudāyaprakṣepaḥ | itthaṃ ca ādau tritārī tato hṛnmantraḥ tato 
hṛdayaśaktiśrīpādukāṃ pūjayāmi iti mantrasvarūpaṃ jñeyam | 
evamevāgre'pi sarvatra jñeyam ||

agnīśetyatra agnyādipadena tattaddevatāsambandhidiśāṃ grahaṇam | dikṣu 
ityanena prāgādidikcatuṣṭayagrahaṇam | ṣaḍaṅgayuvatīnāṃ agnyādicatasro 
vidiśaḥ madhyaṃ prāgādidikcatuṣṭayaṃ militvaikaṃ iti ṣaṭ sthānāni jñeyāni 
||

atra kecit-

yaḥ paśyedyatra sūyaṃ tu sā prācī tasya kathyate |
udaye sūryadraṣṭustu meruruttarasaṃsthitaḥ ||

iti digvyavasthā [diṅmukhatvavyavasthāyāṃ-ddi. pa-śi. vi. 13/14-3 dṛśyaḥ-||] 
śrautasmārtakarmaṇi prasiddhā tathaiva śrīvidyopāsanāyāmapi digvyavasthā 
ityāhuḥ || 

anye tu niruktadigvyavasthāyā vaidike karmaṇi sāvakāśatvāt 
pūjyapūjakayormadhye diśaṃ prācīṃ prakalpayet iti tantravacanānusāreṇa 
devyagrabhāgaḥ prācī devīpṛṣṭhabhāgaḥ pratīcī devyā dakṣabhāgo dakṣiṇā 
vāmabhāga udīcī diganusāreṇa vidiśāṃ kalpanam ityūcuḥ || 

p. 146)

tadubhayamapi sthūlamānatvādupekṣyam | vastutastu jñānārṇave 
śrīcakrapūjanasannidhau-

uttarāśāmukho mantrī yadā cakraṃ samuddharet |
uttarāśā tadā devi pūrvāśeti nigadyate ||

īśānakoṇaṃ deveśi tadā'greyaṃ na saṃśayaḥ |
paścimāśāmukho mantrī yadā cakraṃ samuddharet ||

paścimāśā tadā jñeyā pūrvāśeti na saṃśayaḥ |
vāyukoṇaṃ tadā'gneyamaiśānaṃ rākṣasaṃ bhavet ||

dakṣiṇābhimukho mantrī yadā cakraṃ samuddharet |
pūrvāśaiva hyudīcī syāt rakṣaḥkoṇaṃ tu vahnidik || iti ||

uttarāpaścimāśetyatra lokaprasiddhottarāṃ diśamanūdya pūrvādidikkāryaṃ 
vidhīyate khalevālī yūpo bhavati itivat | itthaṃ ca diṅmātrānuvādena 
dikkāryavidhānāt vidiṅmukhaścakraṃ noddharet iti siddham | 
prācīdiganuvādena vidheyābhāvāt tattyaktam | evaṃ kulārṇave'pi-

yadāśā'bhimukho mantrī tripurāṃ paripūjayet |
devīpaścāttadā prācī pratīcī tripurāpuraḥ ||

iti niravakāśavacanaiḥ śrīvidyāviṣaye uktarītyā digvyavasthā | 
śrīvidyā'tirikte tāntrike karmaṇi pūjyapūjakayormadhyaṃ prācī | 
nikhilaśrautasmārtakarmaṇi yaḥ paśyedityādivacanapraveśaḥ iti alaṃ bhūyasā | 
devyā ityuktyā binducakra evāgneyādidiśa uktaśāstreṇa prakalpya tatra 
ṣaḍaṅgayuvatīḥ pūjayet iti siddham || 8 ||

nityāpūjanam [ita ārabhya śrīlalitāmbāyā 
āvaraṇārcanasthaladevatānityādikaṃ 4-khaṇḍasamāptiṃ-10-sūtrāntaṃ-
yāvaddarśayati |]

atha pañcadaśanityāmantroddhārapūrvakaṃ nityāpūjanamāha-

vāksakalahrīṃ nityaklinne madadrave sauḥ iti kāmeśvarī | sarvatra 
nityāśrīpāduketi yojyam | vāgbhagabhuge bhagini bhagodari bhagamāle 
bhagāvahe bhagaguhye bhagayoni bhaganipātini sarvabhagavaśaṅkari bhagarūpe 
nityaklinne bhagasvarūpe sarvāṇi bhagāni me hyānaya varade rete surete 
bhagaklinne klinnadrave kledaya drāvaya amoghe bhagavicce kṣubha kṣobhaya 
sarvasattvān 

p. 147)

bhageśvari aiṃ blūṃ jeṃ blūṃ bheṃ blūṃ moṃ blūṃ heṃ blūṃ heṃ 
klinne sarvāṇi bhagāni me vaśamānaya strīṃ hara bleṃ hrīṃ bhagamālinī | 
tāro māyā nityaklinne madadrave svāhā iti nityaklinnā | praṇavaḥ kroṃ bhroṃ 
krauṃ jhrauṃ chrauṃ jrauṃ svāhā iti bheruṇḍā | praṇavo māyā vahnivāsinyai 
namaḥ iti vahnivāsinī | māyāklinne vāk kroṃ nityamadadrave hrīṃ iti 
mahāvajreśvarī | māyā śivadūtyai namaḥ iti śivadūtī | praṇavo māyā huṃ 
khe ca che kṣaḥ strīṃ huṃ kṣeṃ hrīṃ phaṭ iti tvaritā | kumārī kulasundarī | 
hasakalaraḍavāgbhavahasakalaraḍabindumālinī hasakalaraḍacaturdaśaṣoḍaśā iti 
nityā | māyā phreṃ srūṃ 
aṅkuśapāśasmaravāgbhavablūṃpadanityamadadrave varma phreṃ māyeti 
nīlapatākā | bhamaraya-ūmiti vijayā | svaumiti sarvamaṅgalā | tāro namo 
bhagavati jvālāmālini devadevi sarvabhūtasaṃhārakārike jātavedasi jvalanti 
jvala jvala prajvala prajvala trijātiyuktamāyārephasaptakajvālāmālini 
varmaphaḍagnijāyeti jvālāmālini | (aṃ) ckauṃ iti citreti pañcadaśa nityāḥ 
prathamatryasrarekhāsthitapañcadaśasvareṣu pūjyāḥ | visṛṣṭau ṣoḍaśīṃ 
mūlavidyayā cābhyarcya || 9 ||

vāk aiṃ | śeṣaṃ yathā paṭhitam | mantrānte sarvatra tattannityānāma taduttaraṃ 
aṣṭākṣarīyogaḥ | yathā ādau tritārī aiṃ sakalahrīṃ nityaklinne madadrave sauḥ 
kāmeśvarīnityāśrīpādukāṃ pūjayāmi namaḥ iti | evamagre'pi draṣṭavyam | 
yadyapi śrīpāduketyaṣṭākṣarīyogaḥ sāmānyavacanaprāptaḥ tathā'pi 
nityāpadaghaṭitatvenāprāptatvāt tadartha ārambhaḥ sarvatra 
nityāpūjanamantreṣu | dvitīyamāha vāgiti | tṛtīyamāha tāra iti | tāraḥ praṇavaḥ 
māyā hrīṃ śeṣaṃ yathāśrutaṃ paṭhanīyam | ādau praṇavaḥ tato māyā tataḥ 
svāhā'nto yathāśrutaḥ iti phalito'rthaḥ | caturthamāha praṇava iti svāhetyantena 
| pañcamīmāha praṇava iti namaḥ ityantena | ṣaṣṭhamāha māyeti hrīmityantena | 
saptamamāha māyeti namaḥ ityantena | aṣṭamamāha praṇava iti phaḍityantena | 
navamamāha kumārīti | kumārī bālā saiva kulasundarītyarthaḥ | dasamamāha 
haseti ṣoḍaśā ityantena | atra pūrvoktayuktyā hasaketyādau 
kevalavyañjanānāmeva grahaṇam | anyathā dvādaśārdhā ca nityā syāt iti 
anyatantravacanena dvādaśārdhā mantravarṇātideśe tribījasthā dvādaśārdhā 
iti mantre trivarṇatvasiddheḥ atrāpi tadatideśasiddhatrivarṇatvaṃ virudhyeta | 
hasakalaraḍottaraṃ vāgbhavaḥ aiṃ punaḥ taduttaraṃ binduyuktā mālinī īkāraḥ 

p. 148)

govindaśca trimūrtiśo mālinīvāmalocanam iti kośāt | caturdaśaṣoḍaśau 
pūrvamuktau | itthaṃ ca hsklrḍaiṃ hsklrḍīḥ hsklrḍauḥ nityānityāśrī iti-
mantrasvarūpam ||

yacca nibandhe avarṇasahitahakārādi likhitaṃ tadajñānaprayuktameva | 
tantrāntarānusāreṇa yadi likhitaṃ tarhi vaśinyādinyāse kavargaṃ kalahrīṃ ca 
nigadya iti sūtre sati halmātragrahaṇe tantrāntaramṛte sādhanaṃ mṛgyam | tasmāt 
uktayuktyā tryakṣaryeva nityāvidyā ||

ekādaśamāha māyetyārabhya māyetyantena | ādyāni trīṇi bījāni spaṣṭāni 
aṅkuśaḥ kromiti pāśaḥ āmiti ādyantago mahāpāśa iti yoginītantrāt | 
ādirakāraḥ tasyāntaḥ agrimo deśaḥ tatra sthita ākāra iti tadarthaḥ | evaṃ 
kāmo'gnirvyāpako'ṅkuśaḥ iti tatraiva | kāmaḥ kakāraḥ agniḥ rephaḥ 
vyāpakaḥ praṇavaḥ militvā kromiti sampadyate | ayamaṅkuśa ityarthaḥ | smaraḥ 
klīṃ vāgbhavaḥ aiṃ varma huṃ | itthaṃ ca hrīṃ phreṃ srūṃ kroṃ āṃ klīṃ 
aiṃ blūṃ nityamadadrave huṃ phreṃ hrīṃ nīlapatākānityāśrī iti 
mantrasvarūpam | dvādaśamāha bhamaraya-ūṃ iti | atrapi pūrvayuktyā 
halmātragrahaṇam iyamekākṣarī vidyā vijayā samprakīrtitā iti 
tantrāntaravacanāt ||

tena nibandhe pañcākṣaroccāraṇaṃ aukāroccāraṇaṃ prāmādikam | 
rbhmyūmiti svarūpaṃ jñeyam | yadyapi tantrāntare 
aṅgadādibindusaṃyutabhityasti | aṅgada aukāraḥ | tena caramasvara aukāraḥ iti 
pratibhāti | tathā'pi sūtre ṣaṣṭhasvaroccāraṇāt sūtraviruddhaṃ 
tantrāntaroktaṃ sūtrānusāriṇāmanādartavyameva ||

trayodaśamāha svaumiti | caturdaśamāha tāra iti agnijāyetyantena | 
trijātiyuktamāyā hrāṃ hrīṃ hrūṃ | vahnijāyā svāhā | śeṣaṃ spaṣṭam | 
pañcadaśamāha aṃ ckraumiti | pañcadaśa nityāpūjane deśaniyamamāha 
prathametyādi | prathamatryasraṃ bindusamīpasthaṃ trikoṇaṃ tatratyāḥ 
yāstisrorekhāḥ tāsu vartamānā ye pañcadaśa svarāḥ 
ākārādyanusvārāntāḥ teṣu ekaikasvare ekaikanityā krameṇa pūjyetyarthaḥ | 
atra rekhāsthitapañcadaśasvareṣviti svarāṇāṃ tatra siddhavannirdeśāt 
ekaikarekhāyāṃ pañca pañca svarāḥ bhāvanīyāḥ iti vidhirunneyaḥ | 
kramasyānuktatvāt svāgrādiprādakṣiṇyena | paścimādārabhya 
īśānāntarekhāyāṃ a ā i ī u iti | aiśānādāgneyāntarekhāyām ū ṛ ṝ ḷ ḹ 
iti | āgneyādārābhya paścimāntam e ai o au am iti bhāvanāvivekaḥ | vigatā 
nirgatā sṛṣṭiḥ yasyāḥ sā visṛṣṭiḥ binducakram | tatsṛṣṭiprakāraḥ 
uttaracatuśśatīvyākhyāne setubandhe draṣṭavyaḥ | tasmin ṣoḍaśīṃ 
samaṣṭirūpāṃ mūlavidyayā pañcadaśyā abhyarcya | etāsāmadhiṣṭhānaṃ 
kḹptatrikoṇādanyadeva trikoṇamuktaṃ jñānārṇave-

p. 149)

vibhāvya ca mahātryasramagradakṣottaraṃ kramāt || iti ||

tantrarāje tu bindāveva pūjanamuktam | itthaṃ tattattantrānuyāyibhiḥ tatra tatra 
kartavyam || 9 ||

oghatrayapūjāmāha-

madhye prāktryasramadhyāntaḥ munivedanāgasaṅkhyān yathāsampradāyaṃ 
pādukān divyasiddhamānavaughasiddhāniṣṭvā paścāt svaśirasi nāthaṃ yajet | 
etallayāṅgapūjanam iti śivam [eke yogasūtrasṛṣṭisthitisaṃhāratrike 
pañcapañcikapañcāsūyān prapañcādinyāsadevatādarśanāni ca yajanti-
ityadhikaḥ pāṭhaḥ kvacit |] || 10 ||

|| iti ... kalpasūtre lalitākramo nāma caturthaḥ khaṇḍaḥ || śrīḥ-

prāktryasraṃ prathamatryasram | yadvā prāktryastraṃ pūrvoktaṃ tryasraṃ tasya 
yo madhyaḥ ābhyantarapradeśaḥ tasya yaḥ antaḥ caramāvayavaḥ 
svābhimukhāgrasamīpavartī yaḥ ābhyantarapradeśaḥ tatreti phalito'rthaḥ | 
muniḥ sapta vedaḥ catvāraḥ nāgaḥ aṣṭau saṅkhyā yatreti vyutpattyā oghe 
viśeṣaṇam | yathāsaṃpradāyaṃ pādukāḥ kādihādividyābhedena 
pādukānāṃ gurumaṇḍalānāṃ bhinnatvāt yasya puruṣasya parigṛhītāḥ yā 
yāḥ pādukāḥ tattallābhāya yathāsampradāyaṃ pādukā iti | divyāśca 
siddhāśca mānavāvaśca te oghāśca tādṛśān siddhān | pūrvokte 
oghaviśeṣaṇe | ubhayatra vibhaktivyatyayaḥ ārṣaḥ | divyāḥ 7 siddhāḥ 4 
mānavāḥ 8 iti vivekaḥ | tān iṣṭvā pūjayitvā | ktvāpratyayena pāṭhena ca 
prāptakramaḥ paścādityanena anūdyate | etad-uktaṃ yadvā [nāma-
pāścātyaitatkhaṇḍīya 9 sūtrādārabhyordhvatana 10 sūtrāntam |] etaduttaraṃ 
vakṣyamāṇaṃ [nāma-āgāmipañcamakhaṇḍasthaikasūtrādārabhya |] 
navāvaraṇapūjanaṃ layāṅgaṃ layasvarūpaṃ caturasrādibindvantakramasya 
layasvarūpatvāt layāṅgapūjanaṃ bhavitumarhati | etena 
tantrāntaroktabindvādipūjāvyāvṛttiḥ [idamatratātparyaṃ yat-sarvatra 
yantrapūjāyāṃ-sṛṣṭisthitisaṃhārakramāṇāmanyatama ekaḥ kramaḥ 
pratipadokto gṛhyate arthāt sṛṣṭikrameṇa bindumārabhyārcanamārabhyate-
tathātra krame na grāhyamapi tu-layāṅgaṃ nāma saṃhārakrameṇātra krame 
pūjārambhaḥ kāryaḥ | etaddevatābhinnadevatārcane tu bindumārabhyeti 
mārmikam |] | śivamiti khaṇḍasamāptidyotakam || 10 ||

|| iti ... paraśurāmasūtravṛttau lalitākramo nāma caturthaḥ khaṇḍaḥ [atra pūjā 
na samāptā0 api tu khaṇḍa evetyavaseyam |

sūtrasya punarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || iti caturthaḥ khaṇḍaḥ śrīḥ ||] 
||




pañcamaḥ khaṇḍaḥ lalitānavāvaraṇapūjā 

prathamāvaraṇavyaṣṭipūjā [āgāmi patrataḥ 2 sūtrasamāptyantaṃ punarapi 
samaṣṭyarcanaprayogopyasti |]

etatpadena [nāma pāścātya 10 sūtrānte 
etallayāṅgapūjanamitipadasthotraitacchabdo jñeyaḥ |] nirdiṣṭāṃ pūjāṃ vitatya 
darśayati-

atha prāthamike caturasre 
aṇimālaghimāmahimeśitvavaśitvaprākāmyabhuktīcchāprāpti-
sarvakāmasiddhyantāḥ madhyate caturasre brāhmyādyāmahālakṣmyantāḥ 
tṛtīye caturasre 
saṃkṣobhaṇadrāvaṇākarṣaṇavaśyonmādanamahāṅkuśakhecarībījayoni-
trikhaṇḍāḥ sarvapūrvāstāḥ sampūjyāḥ || 1 ||

atheti navāvaraṇapūjā'dhikāradyotakam | caturasratrayamadhye prāthamike 
sarvabāhye caturasre aṇimetyārabhya sarvakāmaparyantaṃ dvandvaḥ | te sarve'pi 
siddhyantāḥ kāryāḥ | sarveṣāṃ padānām ante siddhiriti yojyam | tathā ca 
tritārī tato'ṇimāsiddhiśrīpādukāṃ pūjayāmīti | evamagre'pi | 
atrāṇimā'dipadatrayaṃ na mannantaṃ kiṃtu ḍābantaṃ 
aṇimālaghimetisamāsāntasūtrapāṭhāt | aṇimāsiddhīti puṃvadbhāvarahitaḥ 
pāṭhaḥ aśāstrīyo'pi sampradāyānurodhādārṣaprāyaḥ | yadvā 
ṣaṣṭhītatpuruṣaḥ | ṣaṣṭhyarthaścābheda eva rāhoḥ śiraḥ itivat | 
prāthamikacaturasre aṇimā'dīnāṃ yathecchaṃ pūjāprāptau tanniyamaḥ 
vāmakeśvaratantre-

aṇimāṃ paścimadvāre laghimāmapi cottare |
pūrvadvāre tu mahimāmīśitvākhyāṃ tu dakṣiṇe ||
vaśitvākhyāṃ tu vāyavye prākāmyāmīśadeśake |
bhuktisiddhiṃ tathā'gneyyāmicchāsiddhiṃ tu nair-ṛtau || 
adhastāt prāptisiddhiṃ ca sarvakāmaṃ [sarvakāmāṃ-śrī.] tathordhvataḥ || iti ||

digvyavasthāsampradāyaśca pūrvamuktaḥ | ūrdhvādharāvapi na lokaprasiddhau 
grāhyau kiṃ tu tāntrikau | taduktaṃ tattvavimarśinyām-

indreśānadiśormadhye sthānamūrdhvasya kīrtitam |
nir-ṛtyambupayormadhye adhaḥsthānaṃ prakīrtitam || iti ||

madhyame caturasre brāhmyādyāḥ brāhmī ādau yāsāṃ tāḥ evaṃ 
mahālakṣmīḥ ante yāsāṃ tāḥ |

p. 151)

brāhmī māheśvarī caiva kaumārī vaiṣṇavī tathā |
vārāhī caiva cendrāṇī cāmuṇḍā sapta mātaraḥ ||

iti prasiddhāḥ sapta mahālakṣmīścetyaṣṭau mātaro madhyacaturasre pūjyāḥ | 
tatra kramākāṅkṣāyāṃ vāmakeśvaratantre-

brahmāṇīṃ paścimadvāre māheśīmapi cottare |
pūrvadvāre tu kaumārīṃ dakṣiṇe vaiṣṇavīmapi ||
vārāhīmapi vāyavye tathaindrīmaiśadeśake |
cāmuṇḍāmapi cāgneye mahālakṣmīṃ ca nair-ṛte || iti ||

atha tṛtīye caturasre daśamudrāpūjanamāha tṛtīye iti | sarvaḥ sarvaśabdaḥ 
pūrvaṃ yannāmasu tāḥ yathā tritāryuttaraṃ 
sarvasaṃkṣobhiṇīśaktiśrīpādukāṃ pūjayāmi iti | etādṛśamudrāśaktayaḥ 
mudrāśadbārthaścoktaḥ prāk [atraiva lalitākrame pāścātya-4-khaṇḍe-1 
sūtrabhāṣye 135-patre-] tādṛśamudrātvavyāpyadharmāvacchinnāḥ imāḥ | 
sarvasaṃkṣobhiṇī padārthaśca itthaṃ sarvān padārtha [mātān-śrī. a.] bhūtān 
kṣobhayatīti utpādayatīti sarvasaṃkṣobhiṇī 
kāryatvāvacchinnakāryatānirūpitakāraṇatā'śca yeti yāvat | iyameva 
vāmāśaktirityucyate | etaduktaṃ yoginītantre-

yoniprācuryatassaiṣā sarvasaṃkṣobhikā punaḥ |
vāmāśaktipradhāneyam............... iti ||

yoniḥ kāraṇatvāni teṣāṃ prācuryato bhūyastvena | ata eva sarvasaṃkṣobhiṇyā 
bāhyasvarūpe aṅguligrathanātmake'pi aṅguṣṭhe 
kaniṣṭhānāmāmadhyamāgrāṇāṃ yoge yonibhūyastvaṃ 
pratyakṣeṇānubhūyate | etena adṛśyarūpamapi tathetyunneyam | dvitīyā 
sarvavidrāviṇī sarvānutpannān drāvayati vardhayati poṣaṇena sā sarvavidrāviṇī 
sarveṣāṃ vastūnāṃ pālakatvādṛjusvabhāvā jyeṣṭhāśaktipracurā ca | 
taduktaṃ yoginītantre kṣubdhaviśvasthitikarī jyeṣṭhā prācuryamāsthitā iti | 
kṣubdhasya utpannasyetyarthaḥ | yaśca saṃrakṣakaḥ sa ṛjuriti loke prasiddhā 
gāthā | ata eva asyā mudrāyāḥ bāhyarūpe'pi aṅguṣṭhena 
kaniṣṭhikānāmāyoge aṅgulicatuṣṭaye ṛjutvaṃ dṛśyate | evamādyatrikoṇe 
rekhātrayamadhye pūrvasyāṃ diśi sthitāyāṃ ṛjurekhāyāmeva tasyāḥ 
adhiṣṭhānaṃ śāstraprasiddham | tṛtīyā sarvākarṣiṇī sarvākarṣaṇaśīlā | 
iyaṃ jyeṣṭhā vāmobhayātmikā | taduktaṃ yoginītantre-

p. 152)

jyeṣṭhā vāmāsamatvena sṛṣṭeḥ prādhānyamāsthitā
ākarṣiṇīti mudreyam...................... || iti ||

pūrvoktamudrādvayavācakapadaśakyatā'vacchedakayoḥ dvayorapi 
sarvākarṣiṇīpadaśakyatā'vacchedakatvaṃ bodhyam puṣpavacchabdavat | tatrāpi 
jyeṣṭhātvaviśiṣṭavāmātvaṃ śakyatāvacchedakaṃ na tu viparītam | tathā sati 
jyeṣṭhāyā viśeṣyatvena pradhānyaṃ vācyam | prādhānye jyeṣṭhāyā 
atisaralatvena pradhānānusāreṇa viśeṣaṇībhūtavāmāyā api 
pradhānānuvartinyāḥ saralatayā tarjanīmadhyamayoḥ bāhyarūpe kuṭilatvaṃ na 
syāt | vāmāyāḥ prādhānye tu tasyāḥ kuṭilatayā tadanusāreṇa apradhānā yā 
jyeṣṭhāyāḥ pradhānānuvartinyāḥ kuṭilatvaṃ yuktam | ata eva bāhyasvarūpe 
aṅguligrathane sarvāsvaṅguliṣu kuṭilatvam | caturthī sarvavaśyakarī sarvān 
kṣityādiśivāntān vaśyaṃ svādhīnaṃ nayati prāpayatīti tathā | loke ākāśo 
dvividhaḥ dahraḥ prākṛtaśca | dahrākāśe'pi susūkṣmo'nyaḥ ākāśo'sti 
tasyānte suṣiṁū?sūkṣmam iti śrutiprasiddhaḥ | tanmadhye gāḍhamāśliṣṭā 
paraśivena yā ānandavigrahā mūrtiḥ sā sarvavaśyakarīpadavācyā | taduktaṃ 
uttaracatuśśatyām-

vyomadvayāntarālasthabindurūpā maheśvarī | 
śivaśaktyātmasaṃśleṣādeṣā vaśyakarī smṛtā || iti ||

bindurūpeti kathanāt kharūpamapi tathā | ata evāṅguli'grathanepi asyā 
bāhyarūpe bindvākāratā sarvāṅgulīnāṃ gāḍhasaṃśleṣo'pi vyaktaḥ | 
pañcamī uktaśivaśaktibindvormadhye sūkṣmarekhā nīvāraśūkavattanvī tasya 
madhye vahniśikhā iti śrutiprasiddhā | tasyāḥ śikhāyāḥ dvisvabhāvatvaṃ 
jyeṣṭhāsvabhāvatvaṃ ca | yathā loke ekasyaiva daṇḍasya 
ghaṭotpādakaśaktimattvaṃ tannāśakaśaktimattvaṃ cāsti tathā'pi sa daṇḍaḥ 
kadācidutpādakaśaktipradhāno bhūtvā ghaṭa mutpādayati 
kadācinnāśaśaktipradhānaḥ taṃ nāśayati | evaṃ loke bahusthale dṛṣṭam | 
tathā daṇḍasthānīyā uktarekhā | sā yadā 
jagadrakṣaṇakartṛtvaviśiṣṭajyeṣṭhāśaktipradhānā tadā sarvonmādinī 
padavācyā | taduktaṃ uttaracatuśśatyām-

bindvāntarālavilasatsūkṣmarūpaśikhāmayī | 
jyeṣṭhāśaktipradhānā tu sarvonmādanakāriṇī || iti ||

ata eva tadaṅguligrathanavelāyāṃ aṅguṣṭhānāmatarjanyaḥ saralāḥ dṛśyante 
bindudvayākāraṃ madhyamādvayaṃ ca bhavati | tatrāpi 
niruktaśikhāsthānāpannagrathanavelāyāṃ anāmādvayameva jñeyam | 
madhyamādvayasya tadānīṃ bindudvayarūpatvena 
tanmadhyavartyanāmādvayasya tasya madhye vahniśikhā iti prasiddhasikhātvaṃ 
yuktam | ṣaṣṭhī tu idameva pūrvoktaṃ śikhādvayaṃ yadāa vāmāpradhānaṃ 
tadā sarvamahāṅkuśā | 

p. 153)

sūkṣmarūpeṇa paramaśivakukṣau sthitaṃ jagat | yathā antastho gajaḥ aṅkuśena 
bahirākṛṣyate tathā sarvasya bahirākarṣaṇāt sarvamahāṅkuśetyucyate | 
paraśivakukṣisthajagato vamanāt vāmā tatpradhānā śikhā sarvamahāṅkuśā 
ityucyate | tadapyuktaṃ yoginītantre-

vāmāśaktipradhānā tu mahāṅkuśamayī punaḥ | 
tadvad viśvaṃ vamantī sā dvitīye tu daśārake || iti ||

ata eva pūrvamudrāyāṃ saralayoranāmayoḥ vakratā dṛśyate | loke 
vamanavelāyāṃ mānavo dhanurākāraḥ vakro bhavati | prasiddhametat | atrāyaṃ 
vivekaḥ kevalavāmātvaṃ sarvasaṃkṣobhiṇīpadapravṛttinimittaṃ 
jyeṣṭhātvaviśiṣṭavāmātvaṃ sarvākarṣiṇīpadapravṛttinimittaṃ 
sūkṣmākāśāntarvṛttibindudvayatvaṃ sarvavaśyakarapadapravṛttinimittaṃ 
jyeṣṭhāśaktipradhānakabindudvayamadhyavṛttirekhātvaṃ 
sarvonmādinīpadaśakyatā'vacchedakaṃ vāmāśaktipradhānatvaṃ 
sarvamahāṅkuśāpadaśakyatā'vacchedakaṃ evaṃ rītyā vailakṣaṇyaṃ 
sūkṣmadhiyā draṣṭavyam | saptamī sarvakhecarī jīvānāṃ 
svakarmajanitarogādiduḥkhanāśanakṣamā śaktiḥ | ata eva sarvarogaharacakrasthā 
bhavati | tadapyuktaṃ yoginītantre-

dharmādharmasya saṅghaṭṭādutthitā vittirūpiṇī |
vikalpotthakriyāloparūpadoṣa[?]vighātinī |
vikalparūparogāṇāṃ hāriṇī khecarī matā || iti ||

asyārthaḥ dharmaḥ śaktiḥ paraśivavṛttitvāt | na vidyate dharmo yatreti adharmaḥ 
paraṃ brahma paraśivaḥ | yadvā na kasyāpi dharmaḥ adharma iti nañtatpuruṣa eva 
yuktaḥ paraśive śaktirūpadharmasattvena pūrvakalpe svoktavyāghātāt | tayoḥ 
saṃghaṭṭaḥ melanaṃ tena utthitā | yāvadvikalpaḥ tenotthitāḥ yāḥ kriyāḥ 
nityanaimittikāḥ tāsāṃ lopena yatpāpaṃ tatsambhavāḥ rogāḥ tannāśinī 
khecarīti | ata evaitādṛśaśivaśaktisāmarasyadyotakaṃ bāhyarūpe 
bāhudvayaparivartanam | aṣṭamī bījamudrā jagataḥ ṣaḍvikāreṣu prāthamiko yo 
bhāvavikāraḥ sūkṣmarūpeṇa sattā tadabhimāninī śaktiḥ | 
taduktamuttaracatuśśatyām-

śivaśaktisamāśleṣasphuradvyomāntare punaḥ |
prakāśayantī viśvaṃ sā sūkṣmarūpasthitaṃ sadā |
bījarūpā mahāmudrā................ || iti ||

ayamarthaḥ vaṭabīje susūkṣme'pi kiñcidākāśo'sti vibhutvāt | tasmin yathā 
mahāvṛkṣaḥ sūkṣmarūpeṇa tiṣṭhati tathā ṣaṭtriṃśattattvāni śivaśaktigarbhe 
vidyante sūkṣmarūpeṇa | saiva sattā ghaṭo'sti paṭo'sti ityatra anuvartate | sā 
bījamudretyarthaḥ | sarvabījasthānāpannatvāt sarvabījā | sūkṣmatvādeva 
aṅgulipragrathanavelāyāṃ saṃkṣobhiṇyādyapekṣayā alpayonitvaṃ 
sūkṣmatvajñāpakam | yā 

p. 154)

navamī yonimudrā tadvṛttyasādhāraṇo dharmaḥ mudrātve sati kalārūpatvam | 
mudrātvasvarūpamuktaṃ prāk | kalāpadārthaścocyate | śaktiviśiṣṭe 
prakāśarūpe paraśive śaktimapahāya kevalasvarūpamātraniṣkarṣaṇe sati 
turīyabindupadavācyatvaṃ yathā jalaniṣṭhaṃ dravatvamapahāya 
svarūpamātraniṣkarṣaṇe jalapadavācyatvam | atrāpahānaṃ nāma 
śakyatā'vacchedakakoṭipraveśābhāva eva na tataḥ pṛthak niṣkāsanaṃ 
asambhavāt | tasya śuddhaśivasya śaktisambandhitvena vivakṣāyāṃ 
kāmabindupadavācyatā | tasyaiva saṃbandhasyābhedatvena 
śakyatā'vabchedakakoṭipraveśe visargo hakāraḥ vimarśaḥ iti 
tāntrikavyavahāraḥ | tādṛśasāmarasyottaraṃ raktaśuklabindumiśraṇena 
āvirbhūtānandāntarbhāveṇa vivakṣāyāṃ kaletyucyate | īdṛśakalārūpā [ṭ. 
kalāpadaśakyatā'vacchedakakoṭau ānandasyādhikasya niveśa iti viśeṣaḥ 
ityadhikaḥ-ba.] yonimudrā | taduktaṃ nityāhṛdaye-

saṃpūrṇasya prakāśasya lābhabhūmiriyaṃ punaḥ |
yonimudrā kalārūpā.................... || iti ||

sarvavaśyakarī kevalabindudvayarūpā asyāḥ śarīre 
bindudvayasaṃsargāvirbhūtānando'pi śakyatā'vacchedakakoṭipraviṣṭa iti tato 
vailakṣaṇyaṃ jñeyam | daśamī trikhaṇḍā pūrvamuktā | evaṃ 
daśamudrāṇāṃ svarūpaṃ śrīgurukṛpāviśeṣeṇāvirbhūtasphūrtikaṃ 
yathāmati lokānāṃ sukhabodhārthaṃ spaṣṭīcakāra | evaṃ 
svarūpajñānaphalaṃ tantreṣu anantaṃ prapañcitaṃ vistarabhayānneha likhitam | 
evaṃ daśamudrāścaturasre tṛtīye pūjyāḥ | atrāpi icchayā prāptau niyāmakaṃ 
vacanaṃ tantre-

purassavye ca vaṃśe ca vāme caivāntarālake |
ūrdhvādho daśamudrāśca.................. || iti ||

pūrvadakṣiṇapaścimottareṣvāgneyādyantarālacatuṣke cordhvamadhaśca daśa 
mudrāḥ pūjyā iti tadarthaḥ || 1 ||

prathamāvaraṇasamaṣṭipūjā

prathamāvaraṇasya vyaṣṭipūjāmuktvā samaṣṭipūjāmāha-

etāḥ prakaṭayoginyastrailokyamohanacakre samudrāḥ sasiddhayaḥ sāyudhāḥ 
saśaktayaḥ savāhanāḥ saparivārāḥ sarvopacāraiḥ sampūjitāḥ santviti 
tāsāmeva samaṣṭyarcanaṃ kṛtvā || 2 ||

etāḥ aṇimā'ditrikhiṇḍā'ntāḥ | prakaṭayoginya iti tāsāmeva samaṣṭināma 
yathā caitro maitra ityādipratyekanāmavatāmapi manuṣya iti samaṣṭināma tadvat | 
uktayoginīṣu prakaṭatvaṃ ca śivādiṣaṭtriṃśattattvānāṃ madhye yā sthūlā 
pṛthivī tadrūpe bhūpure caturaśre vartamānatvāt | taduktaṃ nityāhṛdaye-

p. 155)

tatra prakaṭayoginyaścakre trailokyamohane |
yoginyaḥ prakaṭā jñeyāḥ sthūlaviśvaprathātmani ||
sthitatvāt................................... || iti ||

trailokyamohanamiti yogarūḍhibhyāṃ [yogarūḍhiśaktyā 
bhūsadanātmakacaturasrarekhātrayasya nāma - ba.] caturasratrayātmakaṃ 
sarvabāhyaṃ yaccakraṃ tasya nāma | samudrāḥ iti pūrvaṃ vistareṇa daśa yāḥ 
pratipāditāḥ tāsvekaikā mudrā ekaikacakre'sti | daśamī trikhaṇḍā 
sarvavyāpikā | asminnarthe pramāṇaṃ yoginītantre'sti | śrībhagavān 
paraśurāmo'pi tattaccakrapūjāyāṃ ekaikamudrāpradarśanaṃ vakṣyati 
[adhastanāvaraṇārcaneṣu ityarthaḥ |] | evaṃ ca yasmin yā mudrā'sti tayā sahitā 
ityarthaḥ | sasiddhaya iti atra siddhirnāma tattacchaktisādhyaṃ phalam | tacca 
svākāreṇa sūkṣmarūpeṇa tiṣṭhatyeveti śaktayo'pi sasiddhayaḥ | sāyudhā iti 
spaṣṭam | saśaktayaḥ atra śaktipadena aṇimā'diniṣṭhā yā tattatkāryajanakatā 
tadavacchedako yo dharmaḥ sa grāhyaḥ | na hi kāraṇatā niravacchinnā loke 
prasiddhā | ataḥ svaniṣṭhakāraṇatāyām avacchedakaṃ kiṃcidabhyupagantavyam 
| abhyupagataṃ ca yadrūpaṃ tat adhiṣṭhānādanyannavetyanyadetat | 
tādṛśaśaktyā sahitāḥ | savāhanāḥ iti spaṣṭam | parivārā anucarāḥ taiḥ 
sahitāḥ | śeṣo mantrārthaḥ spaṣṭaḥ | tāsāmaṇimā'ditrikhaṇḍā'ntānāṃ 
samaṣṭhyarcanaṃ samudāyanāmaghaṭitamantreṇārcanaṃ vidhāya | atra 
mantragataliṅgena prārthanāṅgatvaṃ pratīyate loṭśravaṇāt prārthaneṣu liṅ 
loṭa ca iti pāṇinismṛteḥ | tathā'pi mamāgne varcovihaveṣvastu0 iti mantrasya 
vihavyā upadadhāti iti śrutyā liṅgaṃ bādhitvā upadhānāṅgatvavat 
arcanāṅgatvaṃ bodhyam | sampūjitāḥ santu iti samaṣṭhyarcanaṃ kṛtvā ityanena 
arcanāṅgatve pratīyamāne durbalaṃ loṭśravaṇaṃ na bādhakaṃ bhavati || 2 ||

karaśuddhimuccārya tripurācakreśvarīmavamṛśya drāmiti 
sarvasaṃkṣobhiṇīmudrāṃ pradarśayet | cakrayoginīcakreśīnāṃ nāmāni 
bhinnāni | śiṣṭaṃ samānam || 3 ||

atra karaśuddhipadena karaśuddhinyāsāṅgabhūto mantraḥ nyāsaprakaraṇoktaḥ 
[ayaṃ karaśuddhinyāsamaṃtraḥ pāścātya-3-khaṇḍe śrīkramastha-15 sūtre 
tadbhaṣaye 102 patre'sti |] tam uccārya | tripureti trailokyamohanacakrasya nāyikā | 
tripurā cāsau cakreśvarī ceti karmadhārayaḥ | tripuretyatra puṃvadbhrāvābhāva 
ārṣaḥ | īdṛśīṃ cakreśvarīm avamṛśya sampūjya | atrāpi pūjārūpatvāt 
śrīpāduketi mantraśeṣo'sti | paraṃ tu samaṣṭyarcane śrīpādukāmiti 
mantraśeṣo nāsti iti samaṣṭyarcanaṃ vidhāya ityatra iti śabdena 
śeṣavyavacchedāt | drāṃ iti sarvasaṃkṣobhiṇīmudrābījaṃ tāṃ paṭhitvā 

p. 156)

savaṃsaṃkṣobhiṇīmudrām aṅgulipragrathanarūpāṃ vakṣyamāṇarītyā 
pradarśayet | devyā iti śeṣaḥ | evaṃ vakṣyamāṇarītyā devyagrabhāge aṅguliṣu 
grathiteṣu tasyāḥ darśitaṃ bhavati | evamagrimeṣvavagantavyam | evaṃ prakṛte 
samaṣṭhyarcanamantraṃ prakṛtackreśyāśca mantramuktvā 
agrimasamaṣṭyarcanamantre [āgāmi pañcamasūtre |] cakreśīmantre ca keṣāṃcit 
varṇānāṃ paryudāsapūrvakaṃ kāṃścidvarṇānatidiśati cakreti | 
cakranāmāni sarvāśāparipūraketyādīni [adhastana-4 
sūtrāditattadāvaraṇadarśakasūtreṣu vakṣyamāṇāni |] yoginīnāṃ nāmāni 
guptetyādīni cakreśīnāṃ tripuretyādīni yāni nāmāni tadvarṇābhinnāni | 
samudrāḥ [anugata 154 patre-2-sūtre uktaṃ samudrāḥ sasiddhayaḥ ityādi |] 
ityādivarṇakūṭaṃ samānam | anena tattatprakaraṇe uktacakrādināmasthāne 
vakṣyamāṇanāmāni paṭhanīyānīti bhāvaḥ || 3 ||

dvitīyāvaraṇapūjā

atha dvitīyāvaraṇapūjāmāha-

ṣoḍaśapatre kāmākarṣiṇī nityākaleti nityākalā'ntāḥ buddhyākarṣiṇī 
ahaṅkārākarṣiṇī śabdākarṣiṇī sparśākarṣiṇī rūpākarṣiṇīrasākarṣiṇī 
gandhākarṣiṇī cittākarṣiṇī dhairyākarṣiṇī smṛtyākarṣiṇī nāmākarṣiṇī 
bījākarṣiṇī ātmākarṣiṇī amṛtākarṣiṇī śarīrākarṣiṇī etā guptayoginyaḥ 
sarvāśāparipūrake cakre samudrāḥ ityādi pūrvavat ātmarakṣāmuccārya 
tripureśīmiṣṭvā drīṃ iti sarvavidrāviṇīṃ [dvi. pa. śi. 15-8/6 viṣayo dṛśyaḥ |] 
pradarśayet || 4 ||

nityākaleti varṇasamudāyaḥ ante yannāmnaḥ iti vyutpattyā 
buddhyākarṣiṇyādipañcadaśasvapi idaṃ viśeṣaṇamanuṣajya yojyam | sarvatra 
puṃvadbhāvo nā'sti prathamamantrapāṭhānurodhāt | śrīpāduketyādiśeṣaḥ 
pūrvavat | ṣoḍaśapatre kramastu vāmakeśvaratantre ṣoḍaśāre mahādevīṃ 
vāmāvartena pūjayet iti | tatrāpyārambhaḥ kasmāddalādārabhya kartavya iti 
viśeṣajijñāsāyāṃ devyagrakoṇamārabhyeti setubandhe sthitam | 
yoginīcakrayoḥ prakṛtamantrapraveśārthaṃ nāmanī āha etāḥ guptayoginya iti 
bhūpurāpekṣayā ṣoḍaśadalasya antaḥsthatvena tatrasthā yoginyaḥ guptāḥ | 
śiṣṭaṃ samānam iti pūrvasūtreṇaiva prāptamartham anuvadati samudrāḥ 
ityanena | anuvādaphalaṃ ca tadarthakānāṃ

p. 157)

padāntarāṇāṃ mantre prakṣepo mā bhavatvityetadartham | pūrvavat pūrvaṃ 
yathoccaritaṃ tathaivetyarthaḥ [anugate 154 patre asmin khaṇḍe-2-sūtre samudrāḥ-
ityāditaḥ santvintam-ityarthaḥ |] | ātmarakṣā [anugate 102-patre 3 khaṇḍe-
śrīkrame-16 sūtroktarakṣaśabdānto mantraḥ |] tanmantraḥ | śeṣaṃ spaṣṭam || 4 ||

tṛtīyāvaraṇapūjā

tṛtīyāvaraṇapūjāmāha-

dikpatre 
kusumāmekhalāmadanāmadanāturārekhāveginyaṅkuśāmālinīranaṅga-
pūrvāḥ saṃmṛśyaitāguptatarayoginyaḥ sarvasaṃkṣobhaṇacakre samudrāḥ 
ityādi parvavadātmāsanamuccārya tripurasundarīmiṣṭvā klīmiti 
sarvākarṣiṇīmudrāṃ [etatsarvākarṣiṇīmudroddhārārtha dvi. pa. śi. 15-8/7 vi. 
dṛśyaḥ |] pradarśayet || 5 ||

atra dikpadamaṣṭasaṅkhyālakṣakaṃ dikṣu aṣṭasaṅkhyāyāḥ sattvāt | tathā ca 
digvṛttisaṅkhyāni patrāṇi yasminniti vyutpattyā tṛtīyacakraparam | 
dikṣvaṣṭasaṅkhyā ca avāntaradiśo gṛhītvā catasro 
diśaścatasro'vāntaradiśāḥ iti śruteḥ | avāntaradikṣvapi adhikaṃ tu praviṣṭaṃ 
na taddhāniḥ iti nyāyena diktvamabādhitam | anaṅga iti pūrvaṃ yāsāṃ 
kusumādīnāṃ devatānāṃ nāmādau tāḥ devatā anaṅgapūrvāḥ | 
atrānyapadārtho dravyaḥ na kusumādivarṇasamudāyaḥ 
saṃmṛśyetyasyānanvayāpatteḥ | etaddevatāpūjākramaśca yoginītantre-

anaṅgakusumāṃ pūrve dakṣiṇe'naṅgamekhalām |
paścime'naṅgamadanāmuttare madanāturām ||
anaṅgarekhāmāgneye nair-ṛte'naṅgaveginīm |
anaṅgāṅkuśāṃ vāyavye īśāne'naṅgamālinīm || iti ||

pūrvacakradevatā'ntaraṅgatvāt āsāṃ guptataratvam | śeṣaṃ gataprāyam || 5 ||

caturthāvaraṇapūjā

caturthāvaraṇapūjāmāha-

bhuvanāre saṃkṣobhiṇīdrāviṇyākarṣiṇyāhlādinīsaṃmohinīstambhinī 
jṛmbhiṇīvaśaṅkarīrañjanyunmādinyarthasādhinī sampattipūraṇī 
mantrayīdvandvakṣayaṅkarīḥ [atra-dīrghekārāntāḥ saṃkṣobhiṇītyato 
dvandvadvaddakṣayaṅkaryantāḥ-14-devatāḥ |] sarvādīravamṛśyaitāḥ 
sampradāyayoginyaḥ sarvasaubhāgyadāyakacakre 

p. 158)

samudrāḥ ityādi mantraśeṣaḥ cakrāsanamuccārya [anugate 103 patre-3-
śrīkrame�18-sūtrabhāṣye'yaṃ cakrāsanamantro'sti |] tripuravāsinīṃ 
cakreśvarīmiṣṭvā blūṃ iti sarvavaśaṅkarīmudrāmudghāṭayet [dvi. pa. śi. 15-
8/8 vi. dṛśyaḥ |] || 6 ||

bhuvanāre caturdaśāre | bhuvanāni caturdaśa [bhavanasaṅkhyāḥ ārā yatra tatra-
manvasre-ityarthaḥ |] | śeṣaṃ dikpatravat [uparitana-28-sūtravadityarthaḥ |] | sarva 
ādiryannāmāvayavānāmityapi vyākhyātaprāyaṃ anaṅgapūrvāḥ ityanena | 
kramākāṅkṣāyāṃ yoginītantre vāmāvartakrameṇaiva paścimādeva 
dakṣiṇam iti paścime prārambhaḥ tatastato dakṣiṇaṃ grāhyamiti tadarthaḥ | 
paścimādārabhya aprādakṣiṇyeneti phalito'rthaḥ || 6 ||

pañcamāvaraṇapūjā

pañcamāvaraṇapūjāmāha-

bahirdaśāre 
siddhipradāsampatpradāpriyaṅkarīmaṅgalakāriṇīkāmapradāduḥkha 
vimocinīmṛtyupraśamanīvighnanivāriṇyaṅgasundarīsaubhāgyadāyinīḥ 
sarvapūrvāḥ sampūjyaitāḥ kulottīrṇayoginyaḥ sarvārthasādhakacakre [cakre iti 
manu-śrī.] manuśeṣamuktvā [etatkhaṇḍe 154 patre-2-sūtre samudrāḥ-ityataḥ 
santvityantaṃ manuśeṣaṃ jñeyam |] mantrāsanamuccārya [anugate 103 patre-3-
khaṇḍe śrīkrame-18-sūtre cakrāsanamantro'sti |] tripurā śrīcakreśvarīṃ 
pratyavamṛśya sa ityunmādinīmudrāṃ dadyāt || 7 ||

navacakreṣu daśāradvayamasti | tayormadhye yat bahirdaśāraṃ tatretyarthaḥ | 
śeṣaṃ vyākhyātaprāyam | atrāpi kramākāṅkṣāyāṃ pūrvacakravadeva 
kramaḥ | vāmakeśvaratantre tathaivetyanena pūrvacakrakramātideśāt || 7 || 

ṣaṣṭhāvaraṇapūjā 

ṣaṣṭhāvaraṇapūjāmāha-

antardaśāre jñānaśaktyaiśvaryapradājñānamayīvyādhivināśinyādhāra-
svarūpāpāpaharā'nandamayīrakṣāsvarūpiṇīpsitaphalapradāḥ sarvopapadāḥ 

p. 159)

yaṣṭavyā etāni garbhayoginyaḥ sarvarakṣākaracakre śiṣṭaṃ [etatkhaṇḍe-154-
patre-2-sūtre samudrāḥ ityataḥ santvityantaṃ manuśeṣaṃ jñeyam |] tadvat 
sādhyasiddhāsanamuccārya [anugate-103-patre-śrīkramokte-18-sūtre ayaṃ 
sādhyasiddhāsanamantro'sti |] tripuramālinī mānyā kromiti 
sarvamahāṅkuśāṃ [dvi. pa. śi. 15-7/6 vi. dṛśyaḥ |] darśayet || 8 ||

sarvopapadāḥ sarvapūrvāḥ | mānyā pūjyā | kramastu pūrvavat 
[vāmāvartenetyarthaḥ |] pūrvoktena vidhānena iti yoginītantrāt | śeṣaṃ 
vyākhyātakalpam || 8 ||

saptamāvaraṇapūjā 

saptamāvaraṇapūjāmāha-

aṣṭāre vaśinyādyaṣṭakaṃ namaḥsthāne [imā vaśinyādyaṣṭadevyaḥ 3 
khaṇḍe-śrīkrame-20-sūtre-104-patre santi |] pūjāmantrasannāma etā 
rahasyayoginyaḥ sarvarogaharacakre śiṣṭaṃ spaṣṭaṃ mūrtividyāmuccārya 
[ayaṃ mūrtividyāmantraḥ 4 khaṇḍe-136-patre-2 sūtre'sti |] tripurāsiddhā 
mārādhya śivabhṛgu-ṛddhiyukphreṃ iti khecarī deyā || 9 ||

yoginīnyāsaprakaraṇe ye vaśinyādīnāmaṣṭau mantrā uddhṛtāḥ teṣu 
namaḥpadasthāne pūjāmantrasya śrīpāduketi mantrasya sannāma ūhaḥ kāryaḥ 
| caturthīsahitanamaḥpadasthāne pūjāmantraḥ kārya ityarthaḥ anyathā 
caturthīśravaṇāpatteḥ [caturthī pūrvaṃ śrūyamāṇā yā tasyāḥ 
bādhakābhāvena tacchravaṇaṃ syāt-a. śrī.] ||

na ca namaḥpadanivṛttau tadyoganimittacaturthyapi nivartate nimittāpāye 
naimittikāpāyaḥ iti nyāyāt iti vācyam | na hi caturthīsattve namaḥpadaṃ nimittam 
kiṃ tu tadutpattau | tathā ca namaḥpadaṃ nimittīkṛtyotpannā yā caturthī tasyā 
nivartakaparyantaṃ sthitau bādhakābhāvāt ||

na ca caturthyutpatteḥ prāgeva namaḥpadaṃ nivartatām tathā 
satyutpādakābhāvāt na caturthī iti vācyam | nyāsamantrasya 
pūjāmantraprakṛtitve siddhe prakṛtito'tideśena caturthī namaḥ padasahitaprāptau 
namaḥpadaṃ yuktavinyāsenohena bādhitaṃ caturthī kena bādhyatām | śraute 
prakṛtito'gnipadasahitanirvāpamantrasya prāptau sūryayāge arthabādhāt 
agnipadamātrasya sūryapadena bādhaḥ na caturthyāḥ | tathā'trāpi | tasmāt 
caturthīsahitanamaḥpadabādhakaḥ pūjāmantraḥ | śeṣaṃ gataprāyam ||

p. 160)

mūrtividyā mūrtikalpanamantraḥ āvāhanaprakaraṇe uktaḥ | śivo hakāraḥ 
bhṛguḥ sakāraḥ ṛddhiḥ khakāraḥ | atra pramāṇāni prāk [atra prākvāma-103-
patre-3-khaṇḍe śrīkrame 18 sūtrabhāṣye iti jñeyam |] darśitāni | tairyuktaḥ 
phremiti varṇaḥ hskhphreṃ iti | imamuccārya khecarīṃ darśayedityarthaḥ || 9 ||

āyudhapūjā 

āyudhapūjāmāha-

bāṇabījānyuccārya sarvajṛmbhaṇebhyo bāṇebhyo namaḥ dhaṃ thaṃ 
sarvasaṃmohanāya dhanuṣe āṃ hrīṃ sarvavaśīkaraṇāya pāśāya kroṃ 
sarvastambhanāyāṅkuśāya namaḥ iti mahātryasrabāhyacaturdikṣu 
bāṇādyāyudhapūjā || 10 ||

bāṇabījāni saṃkṣobhiṇyādipañcamudrābījāni kāmeśvarabāṇānāṃ 
[taduktaṃ kulasāre-

saṃkṣobhiṇyādimudrāṇāṃ yāni bījāni pañca vai |
tāni sarvāṇi deveśi śarādau samprakīrtayet || iti ||

ityadhikaḥ-ba.] bījāni | taduktaṃ mālinītantre-

thāntadvayaṃ samālikhya vahnisaṃsthaṃ krameṇa tu |
mukhavṛttena netreṇa bindunā paribhūṣitam ||
bāṇadvayamidaṃ proktaṃ mādanaṃ bhūmisaṃsthitam ||
caturthasvarabindvāḍhyaṃ nādarūpaṃ varānane |
phāntaṃ cakreṇa [śakreṇa-śrī.] saṃyuktaṃ vāmakarṇavibhūṣitam ||
bindunādasamāyuktaṃ sargavān candramāḥ priye ||
pañca bāṇānimān viddhi māmakān prāṇavallabhe || iti ||

asyārthaḥ thāntaḥ mātṛkākrame thakārāgrimo dakāraḥ tasya dvayaṃ likhitvā 
tayormadhye prathamadakāraṃ vahninā repheṇa saṃsthaṃ yuktaṃ 
mukhavṛttamākāraḥ mātṛkānyāse tasya tatsthānatvāt | binduśca tābhyāṃ 
sahitaḥ | drāmiti sampannam | dvitīyadakāre'pi vahnisaṃsthatvaṃ tallagnaṃ 
tadanantaraṃ netreṇa vāmanetreṇa īkāreṇa mātṛkānyāse tatsthānatvāt 
bindunā ca samanvitaṃ drīmiti sampannam | evaṃ sampannabījadvayaṃ 
bāṇadvayaṃ bhavati | ādyabāṇadvayabījaṃ bhavati | evaṃ mādanaṃ kakāraḥ 
bhūmiḥ lakāraḥ tasmin saṃsthitaṃ adho lakāraḥ upari kakāraḥ iti bhāvaḥ 
caturthasvaraḥ īkāraḥ binduḥ prasiddhaḥ tābhyām āḍhyaṃ yuktam klīmiti 
sampannam | phāntaṃ bakāraḥ 

p. 161)

vyutpattiḥ thāntavat cakreṇa lakāreṇa yuktaṃ vāmakarṇa ūkāraḥ tena bindunā 
ca yuktaṃ vlūmiti sampannam | sargo visargaḥ tadvān candramāḥ sakāraḥ saḥ iti | 
evaṃ ca drāṃ drīṃ klīṃ blūṃ saḥ iti pañca māmakān bāṇān 
viddhītyarthaḥ | kāmeśvarībāṇabījāni yoginītantre-

tvagasṛṅmāṃsamedo'sthimajjārṇāntāḥ sureśvari |
dvitīyasvarasaṃyuktā ete bāṇāstadīyakāḥ || iti ||

asyārthaḥ tvak yakāraḥ tvagvālī vyāpako vāyuḥ iti kośāt | asṛgrephaḥ ro 
raktaḥ krodhinī rephaḥ iti kośāt | māṃsaṃ lakāraḥ pinākī māṃsasaṃjñikaḥ 
iti kośāt | medo vakāraḥ vo medo varuṇaḥ sūkṣmaḥ iti kośāt | asthimajjānte 
caramadeśe sthitaṃ śukraṃ tadvarṇaḥ sakāraḥ daśapādo bhṛguḥ śukram iti 
kośāt | yadvā asthimajjārṇau saṣau śaṅkukarṇāsthisaṃjñaśca śakāro 
vidbhirīritaḥ iti tathā vṛṣaḥ śveteśvaraḥ pīto majjā iti ṣakārādhikāre ca 
kośāt | tayorante vartamānaḥ sa ityarthaḥ | uktāḥ varṇāḥ 
dvitīyasvarasaṃyuktāḥ ākāreṇa yuktāḥ bījarūpatvāt binduyogo'pi | itthaṃ ca 
yāṃ rāṃ lāṃ vāṃ sāṃ iti devyā bāṇabījāni | uktavarṇeṣu 
binduyogastantrāntare śarve'ntasthāstṛtīyoṣmābindvanantasamanvitāḥ | 
yaralavāḥ antasthāḥ tṛtīyoṣmā sakāraḥ anantaḥ ākāraḥ | atra bāṇabījapadena 
sarveṣāṃ grahaṇam setubandhe yāṃ rāṃ lāṃ vāṃ sāṃ 
sarvajṛmbhaṇebhyaḥ kāmeśvarībāṇebhyo namaḥ drāṃ drīṃ klīṃ blūṃ saḥ 
sarvajṛmbhaṇebhyaḥ kāmeśvarabāṇebhyo namaḥ iti mantradvayaṃ likhitvā agre 
idaṃ ca kalpasūtrānuguṇyenoktam iti likhitvā vastutastu svatantrānusāreṇa ādau 
dvitārī tato [uparitanāni-yāṃ-ityādīni-5-drāṃ-ityādīni ca-5-iti-10 
bāṇabījānītyarthaḥ |] daśabāṇabījānyuccārya 
sarvajṛmbhaṇabāṇaśaktiśrīpādukāṃ pūjayāmi iti lekhāt ||

nibandhe tu kāmeśvarabāṇabījamātraṃ likhitvā sarvajṛmbhaṇebhyo bāṇebhyo 
namaḥ iti mantrasvarūpaṃ likhitam | tatra bāṇabījatvasyobhayasādhāraṇatvena 
bāṇabījānyuccāryetyanena śivabāṇānāmevoccāraṇaṃ na devyāḥ iti 
bhagavato rāmasyābhiprāyaniṣkāsane pramāṇagandhasyāpyabhāvāt pratyuta 
sthūlamānena vicāryamāṇe lalitopāsteḥ upakrāntatvāt tadīyabāṇapūjanameva 
yuktam | tānapahāya kevalaśivabāṇāneva lilekha | tadīyaṃ sāhasaṃ mahattaram 
||

na ca tathā sati uttaramantreṣu dhanuṣe 
pāśāyāṅkuśāyetyekavacanamanupapannam iti vācyam 
pāśādhikaraṇanyāyenopapattisambhavāt | yadvā bījadaśakamuccārya 
sarvajṛmbhaṇebhyo bāṇebhyo namaḥ iti dvayoḥ tantreṇaiva pūjanam | 
devatātvaṃ cāgnīṣomavadvyāsaktam | itthameva pāśādiṣu | evaṃ ca 
āśāsānāmedhapataye medham itivat dhanurdvayaniṣṭhadevatātvasya 
vyāsaktatvāt devatātvāvacchinnasyaikatvāt 

p. 162)

tadabhiprāyeṇaikavacanopapattiḥ | bāṇapadottaraṃ bahuvacanaṃ ca 
devatātvādhiṣṭhānānvayīti medhapatibhyāṃ medhaṃ itivat na 
kā'pyanupapattiḥ ||

na ca nibandhakāraḥ śivabāṇabījānyullikhan babhrāmetyāstām | paraṃ tu 
lalitāprakaraṇasthatvāt śaktibāṇabījānāmevātra grahaṇam 
bāṇabījānyuccārya iti kalpasūtreṇāviśeṣeṇa śrutasyāpi prakaraṇena 
saṅkocasya āgneyyā'gnīdhramupatiṣṭhate ityādau dṛṣṭatvāt iti vācyam 

kāmabāṇān maheśāni dhanustatpāśameva ca |
cakramadhye catuḥkoṇe krameṇa paripūjayet ||

iti vāmakeśvaratantravacanena teṣāṃ śivāyudhānāmapi lalitāprakaraṇe 
pūjanaṃ vihitam prakṛte kalpasūtre bāṇabījānyuccāryeti aviśeṣeṇa śrutasya 
prakaraṇena saṅkoce kartavye tato'pi balavatā vākyāntareṇa 
śrūyamāṇārthasyaiva vyavasthāpanāt | āgneyyā'gnīdhramupatiṣṭhate ityatra 
prakaraṇabādhakaṃ vacanāntaraṃ nāstīti vaiṣamyam ||

na ca tantrāntarāśrayaṇaṃ na kriyata iti pratijñāhāniḥ sūtrārthanirṇayāya 
vacanāntarānusaraṇe pratijñāyāmanupapattyabhāvāt ||

kiṃ ca bahuṣu pustakeṣu kalpasūtrapāṭhaḥ dhaṃ thaṃ sarvasaṃmohanāya 
dhanuṣe namaḥ āṃ hrīṃ sarvavaśīkaraṇāya pāśāya namaḥ iti ayamapi 
bāṇadvayagrahaṇe liṅgam | anyathā dhanurbāṇayorubhayasambandhinoḥ 
grahaṇasūcakaṃ bījadvayaṃ kimiti paṭhet | dṛśyate ca bahuṣu pustakeṣvayameva 
pāṭhaḥ | tasmādubhayapūjanamāvaśyakam | yadi ca keṣucit pustakeṣu 
bījadvayapāṭhasyādarśanāt niśśaṅkaṃ paramatasiddhiriti vibhāvyate tadā'pi 
sarvapustakeṣvavivādena dhaṃ iti dhanurmantre śivadhanurbījamasti 
turīyamaruṇāvargāt dvitīyamapi pārvati | puṃstrīkodaṇḍayugalam iti 
vāmakeśvaratantrāt | asyārthaḥ aruṇāvargastavargaḥ tatra turīyo dhakāraḥ 
dvitīyaḥ thakāraḥ krameṇa puṃstrīdhanuṣī ityarthaḥ | anena dhaṃ iti 
śivadhanurbījaṃ siddham | evaṃ pāśe hrīṃ ityavivādena sarvapustakeṣvasti | 
tacca śaktipāśabījaṃ māyā strīpāśa ucyate iti yoginītantravacanāt | evaṃ 
kvacit pumāyudhabījakathanaṃ kvacit stryāyudhabījakathanaṃ pragrathanarūpam 
āyudhadvayagrahaṇe sarvapustakasādhāraṇaṃ liṅgam | tantrāntaravacanaṃ ca 
spaṣṭarūpaṃ likhitaṃ prāk | ekavacanagatiḥ darśitā ato 
virodhābhāvādāyudhadvayamatra pūjyamiti mamāsaṃśayaṃ pratibhāti | 
dharmasyātīndriyatvāt sādhavaḥ sudhiyaḥ pariśīlayantu ito'pyadhikam | itthaṃ 
ca yasmin pustake dhanurmantre kevalaṃ dhaṃ ityasti tat thaṃ 
ityasyāpyupalakṣakaṃ tṛtīyamantre hrīmiti āmityasyāpyupalakṣakaṃ tasya 
śivapāśarūpatvāt ādyantago mahāpāśaḥ pauruṣeyaḥ prakīrtitaḥ iti 
vāmakeśvaratantrāt |

p. 163)

etadartho'pi prāk nīlapatākāmantroddhāre varṇitaḥ | aṅkuśabījaṃ tu 
ubhayorekaṃ kāmo'gnirvyāpakoṅkuśaḥ ityaviśeṣeṇa yoginītantrapāṭhāt | 
tasya tantreṇa sakṛdeva pāṭhaḥ | itthaṃ ca mantrasvarūpaṃ yāṃ rāṃ lāṃ 
vāṃ sāṃ drāṃ klīṃ blūṃ saḥ sarvajṛmbhaṇebhyo bāṇebhyo namaḥ 
bāṇaśrīpādukāṃ [bāṇaśaktiśrī-śrī.] pūjayāmi | thaṃ dhaṃ 
sarvasaṃmohanāya dhanuṣe namaḥ dhanuḥśrīpādukāṃ pūjayāmi | hrīṃ āṃ 
sarvavaśīkaraṇāya pāśāya namaḥ pāśaśrī0 | kroṃ 
sarvastambhanāyāṅkuśāya namaḥ aṅkuśaśrī0 iti | śaktibījānāṃ prāthamye 
tatprādhānyaṃ gamakam ||

kecittu tantrānuyāyinaḥ daśabījānyuccārya kāmeśvarakāmeśvarībāṇebhyo 
namaḥ iti paṭhanti | tadatīvāśuddham | kāmeśvarī ca kāmeśvaraśceti 
dvandvāpavādakatvāt pumān striyā ityekaśeṣaḥ syāt na dvandvaḥ ||

mahātryasram ādyatrikoṇaṃ tasya bāhyataḥ aṣṭāsratryasramadhye dikṣu 
paścimādiprādakṣiṇyena | taduktaṃ vāmakeśvaratantre-

paścimottarapūrvāśā dakṣiṇāśā krameṇa tu | iti |

atra nibandhe āyudhamantreṣu śrīpādukāmiti śeṣayojanābhāve mūlaṃ sa eva 
praṣṭavyaḥ ||

na ca aṣṭākṣarīprāpakaṃ sarvatra devatānāmasu śrīpūrvakaṃ 
pādukāmityādivākyaṃ tatra devatānāmasvityanena yatra devatāyā nāma 
gṛhyate tatraivāṣṭākṣarī [ādau tattaddevatānāma saṃgṛhya-śrīpādukāṃ 
pūjayāmi-ayamevāṣṭākṣarīmantra uktaḥ prāgapi |]  nānyatra | prakṛte 
vidhāyakavākye bāṇādirūpanāmagrahaṇābhāvāt na tathā iti vācyam | 
devatānāmasvityasya devatānāmaghaṭitamantreṣviti nibandhakāreṇāpyavaśyaṃ 
vācyam | anyathā oghatraye tadyogaḥ tattvato virudhyate | tatra vidhivākye 
devatānāmagrahaṇaṃ nāsti kiṃ tvoghatrayamevāsti | tasmānna kiṃcidetat || 10 ||

aṣṭamāvaraṇapūjā

aṣṭamāvaraṇapūjāmāha-

trikoṇe vākkāmaśaktisamastapūrvāḥ 
kāmeśvarīvajreśvarībhagamālinīmahādevyaḥ bindau caturthī || 11 ||

yā paraśivarūpadīpasya prakāśarūpā parā śaktiḥ sā sṛṣṭyunmukhā tridhā 
jātā vāmā jyeṣṭhā raudrī ceti | kramāt rajassattvatamaḥpradhānāḥ tāḥ | 
tāsāṃ samaṣṭivācakaṃ padaṃ tantraśāstre ambiketi | imā eva kramāt 
icchājñānakriyāśaktayaḥ ityucyante | amūṣāṃ tripurasundarīvyaṣṭirūpatvaṃ 

p. 164)

jñāpayitumeva yoginīṣu atirahasyeti viśeṣaṇaṃ agre dattavān | atra 
vāgbhavapadena [atra-mūle-vāk-ityeva padaṃ-tatotra-vākpadeneti sambhāvyatām 
|] prathamakūṭaṃ grāhyam kāmapadena dvitīyakūṭaṃ śaktipadena 
tṛtīyakūṭaṃ na tu bālāvarṇāḥ vāmakeśvaratantre kūṭānāmeva 
parigṛhītatvāt | yadyapi tantrāntare vāgbhavaṃ cādyakūṭaṃ ca iti samuccayo'pi 
dvayordṛśyate tathā'pi atra vāgādīnāmevoktatvāt yoginītantrānusāreṇa 
kūṭamātragrahaṇam | samastaṃ kūṭatrayam | imāni pūrvaṃ yāsāṃ 
nāmnāṃ tāḥ catasraḥ trikoṇe trikoṇakoṇatraye bindau ca pūjyā ityarthaḥ ||

nibandhakāraḥ caturthadevatāyā mantre samaṣṭimūlāntaraṃ lalitāśrī0 iti 
lilekha | tattuccham | kāmeśvarī vajreśvarī bhagamālinī mahādevyaḥ iti sūtre 
krameṇa catasṛṇāṃ devatānāṃ nāmasu satsu śāstraprasiddhaṃ parityajya 
svakapolakalpitaṃ laliteti nāma mantre praveśayāmāsa | atra śāstraṃ na 
pramāṇam | acintyaśaktimantreṣvapi svecchāpravṛttiśīlo yaḥ tadvacanaṃ 
mahānto'pi viśvasanti | atra mūlaṃ śrībhagavanmāyāsamutpannālasyameva 
nānyat | na ca mahādevīparyāya eva lalitāśabdaḥ tatprayoge kiṃ bādhakam iti 
vācyam | agnimīle iti mantre vahnimīle ityapi prayogenāpūrvaṃ syāt | 
ityalamasadāveśena ||

kramastu vāmakeśvaratantre-

kāmeśvarīmagrakoṇe vajreśīṃ dakṣiṇe tataḥ |
bhagamālinīṃ tathā vāme madhye tripurasundarīm || iti || 11 ||

kāmeśvaryādīnāṃ mūladevyabhinnatvam

nanu pañcadaśanityānāṃ mantreṇa mūlavidyayā cābhyarcya iti vihitaṃ 
prakṛte'pi turīyadevatāyāḥ mūlena pūjanamuktaṃ binducakre'pi vakṣyati 
mūlena pūjanam evaṃ caramacakreśvaryā api | evaṃ ca ekamantrakaraṇakatvāt 
ekadevatākaṃ yāgatrayaṃ abhyāsarūpaṃ vā bhinnadevatākaṃ vā iti 
śaṅkāyāṃ devataikyaṃ pratipādayati-

tisṛṇāmāsāmanantaramabhedāya mūladevyāḥ pūjā | 
kāmeśvaryādicaturthīnityānāṃ ṣoḍaśī cakradevīnāṃ navamī 
binducakrasthā cetyekaiva | na tatra mantradevatābhedaḥ kāryaḥ | tanmahādevyā 
eva | caturṣu sthaleṣu viśeṣārcanamāvartate || 12 ||

p. 165)

āsāṃ kāmeśvaryādīnāṃ tisṛṇāmanantaram āsāṃ 
mūladevyabhinnatvapratipādanāya mūladevyāḥ pūjā | evaṃ sthalāntare'pi 
tripurasundaryā ante pūjanaṃ tatra tatra svasvapūrvadevatākūṭābhedaṃ 
jñāpayati | imamevārthaṃ spaṣṭaṃ darśayati kāmeśvarīti | prakṛtacakre 
kāmeśvaryādibhyaḥ paraṃ caturthī pañcadaśanityābhyaḥ paraṃ ṣoḍaśī 
aṣṭacakrāt paraṃ navame bindau saiva cakārasūcitā punarbindāveva 
aṣṭacakreśīpūjā'nantaraṃ cakreśītvena pūjyā ekaiva | tatra eṣu sthaleṣu 
devatābhedaḥ mantrabhedaśca nāsti | itthaṃ ca nityāḥ samastāvaraṇadevyaśca 
tripurasundaryā avyatiriktā iti jñāpayituṃ tattadante uktamiti bhāvaḥ | nanu 
devataikye dravyaikye mantraikye sakṛdeva pūjanaṃ yuktaṃ kimiti pūjātrayaṃ ata 
āha caturṣu sthaleṣu viśeṣārcanamāvartate iti | darśitacatuḥsthaleṣvityarthaḥ | 
tathā ca yāgaikye'pi tadabhyāsasyāpūrvasādhanatvenāvaśyakatvāditi bhāvaḥ 
| na cābhyāse sati yathā prokṣaṇamantro nāvartate tathā mantrāvṛttirna syāt iti 
vācyam kriyā'ntaravyavadhāne abhyāse'pi mantrāvṛtteḥ agnihotrādau 
dṛṣṭatvāt | tathā'trāpi kriyā'bhyāsarūpatve'pi 
svavijātīyakriyā'ntaravyavadhānādyuktā mantrāvṛttiḥ || 12 ||

prāsaṅgikamuktvā prakṛtamāha-

etā atirahasyayoginyaḥ sarvasiddhiprade cakre | pariśiṣṭaṃ draṣṭavyam | 
āvāhanīmuccārya [patre-4-khaḍe-3 sūtre tadbhāṣye ca eṣā āvāhanī vidyāsti-
tato grāhyā-athavā-ddi. pa. 15/3 vi. dṛśyaḥ |] tripurāmbāṃ sambhāvya hsaum-iti 
bījamudrākṛtiḥ || 13 ||

pariśiṣṭamityanantaraṃ pūrvavat iti śeṣaḥ | āvāhanī tatprakaraṇoddhṛtā vidyā 
| sambhāvya pūjayitvā | kṛtiḥ kartavyetyarthaḥ || 13 ||

navamāvaraṇapūjā

navamāvaraṇapūjāmāha-

binducakre mūlena devīmiṣṭvā eṣā parāpararahasyayoginī sarvānandamaye 
cakre samudrā sasiddhiḥ sāyudhā saśaktiḥ savāhanā saparivārā sarvopacāraiḥ 
saṃpūjitā'stviti punarmūlamuccārya mahācakreśvarīmiṣṭvā vāgbhavena 
yoniṃ [ime dve mudrepi-ddi. pa. śi. 15-8/15-2 15-8/2 viṣayayordṛśye |] pradarśya || 
14 ||

p. 166)

atrāpi nibandhakāraḥ mūlānte śrīlalitāśrīpādukāṃ pūjayāmi iti 
yojayāmāsa | tadaśuddham | etatpūrvasūtre na tatra mantradevatābhedaḥ kāryaḥ 
tanmahādevyā eva caturṣu sthaleṣu iti vākye sthalacatuṣṭaye'pi mahādevyāḥ 
pūjanam iti kaṇṭharaveṇoktam | śrutyā śrutaśabdaṃ parityajya aśrutaśabdasya 
kalpanaṃ aśāstrīyam | anyathā sauryaṃ caruṃ nirvapedbrahmavarcasakāmaḥ 
ityasmin yāge sūryaparyāyaśabdaṃ prakṣipya divākarāya juṣṭaṃ nirvapāmi iti 
syāt | na ca tatra sūryaśabdaḥ utpattivākye śrutaḥ iha tu pūrvasūtraṃ 
notpattivākyaṃ kiṃ tu abhyāsarūpaguṇavidhāyakamiti vaiṣamyam iti vācyam | 
nāyamaikāntiko niyamaḥ utpattivākya eva śravaṇamapekṣitamiti | 
nakṣatreṣṭyupahomotpattivākyaṃ śo'tra juhoti ityetāvanmātram | nātra 
devatāvācakaḥ śabdaḥ śrūyate | tathā'pi mantre- agnaye svāhā kṛttikābhyaḥ 
svāhā ityatra śrūyamāṇo yo'gnyādiśabdaḥ taṃ gṛhītvā 
prathamamanvādhāne'gnimājyena iti vyavaharanti na tu vahnimājyeneti | 
yadyutpattivākya eveti niyamaḥ tarhyatra svecchayā syāt | na ca asya kramasya 
utpattivākye śakticakraikanāyikāyāḥ lalitāyāḥ kramamārabheta ityāsmin 
lalitāśabdasya śrutatvāt tadgrahaṇam iti nibandhābhiprāyaḥ varṇituṃ śakyaḥ | 
tathā sati pūrvasūtre lalitāyā eva caturṣu sthaleṣu iti vaktavye tamapahāya 
mahādevyā eveti kathanasya phalaṃ brahmaṇā'pi vaktuṃ aśakyam | manmate tu 
lalitāmahādevīśabdayoḥ ekārthakatve'pi yatra viśeṣo na śrutaḥ tatra 
lalitāśabdaprayogaḥ yatra śrutaḥ tatra śrutaśabdoccāraṇaṃ apūrvajanakamiti 
jñātvā lalitāśabdaparityāga iti | phalaṃ saṅkalpādau śrīlalitāprītaye iti 
vaktavyam | prakṛte mahādevī śabdasya niravakāśasya prayoga ucitaḥ | ata 
evānayā diśā navamyāḥ cakreśvaryāḥ mantre mahādevīprāptau 
viśeṣataścakreśīmiṣṭveti tatra śrutatvāt mahādevīśabdabādhaḥ 
sāvakāśaniravakāśayoḥ niravakāśaṃ balīyaḥ iti nyāyāt | na ca evaṃ sati 
caturṣu mantrābhedaḥ pradarśitaḥ idānīṃ triṣu mahādevīghaṭito mantraḥ ekatra 
mahācakreśvarīghaṭita iti mantrabhedaḥ patitaḥ kathametat iti vācyam 
nibandhakāreṇāpi lalitāmahācakreśvarīśrī0 iti likhitatvena asya doṣasya 
ubhayasādhāraṇatvenācodyatvāt | pratyuta nibandhakāramantrasya 
lalitāpadaghaṭitatvena astyatyantavailakṣaṇyam | manmate devīsthāne 
cakreśvarīmātraprakṣepe ekadeśavikṛtamananyavat iti 
vaiyyākaraṇaparibhāṣāmāśritya nirvāho bhaviṣyatītyalamati vistareṇa ||

mahādevīśabdaniruktirdevībhāgavate-

bṛhadasya śarīraṃ yadaprameyaṃ pramāṇataḥ | 
dhāturmahati pūjāyāṃ mahādevī tataḥ smṛtā || iti ||

vāgbhavena aiṃ ityanena na prathamakūṭena pūrvāṣṭamudrābījeṣu 
varṇaikatvadarśanāt tatpaṅktisthasyāsyāpi tādṛśatvasyāvaśyakatvāt | ataḥ 
aiṃ ityasyaiva grahaṇaṃ yuktam || 14 ||

p. 167)

dhūpādidānam

evaṃ navāvaraṇapūjāṃ vidhāya agre kartavyakriyāśeṣamāha-

pūrvavaddhūpadīpamudrātarpaṇanaivedyādi [ddi. pari. 15 vi. dṛśyaḥ |] dattvā || 
15 ||

dhūpādinaivedyānteṣu pūrvoktadharmāṇāṃ [atra 
pūrvoktadharmāṇāmityanenaitatkramīyānugata-4-6-7-
sūtroktadharmāṇāmityartho jñeyaḥ ||] prāptyarthaṃ pūrvavaditi | dhūpādiṣu 
ye pūrvoktadharmāḥ taddharmakāḥ te dhūpādayaḥ kāryā ityarthaḥ | te ca 
dharmāḥ dhūpadīpanaivedyeṣu pūrvamantrāḥ | mudrāsu pūrvavattvaṃ tarpaṇe 
mūlamantraḥ trirabhyāsaḥ ityevaṃrūpāḥ jñeyāḥ | ādipadena 
tāmbūlakarpūranīrājanādimaddravyaprajvalanaprabhṛtayo grāhyāḥ ||

nibandhakāraḥ ṣoḍaśyupāsakaḥ trikhaṇḍāmapi pradarśayet ityuvāca | saḥ 
babhrāma tathāvyavasthāyāḥ sūkte anuktatvāt ||

trikhaṇḍā'dimudrāṇāṃ svarūpam

atra saṃkṣobhiṇyādimudrāpradarśanārthaṃ 
[etatsaṃkṣobhiṇyādiyonimudrāntasarvamudrāṇāmuddhāraḥ dvi. pa. śi. 15-
viṣaye dṛśyaḥ |] tatkathaṃbhāvajñānasyāvaśyakatvāt 
tanmudrādarśanaprakāraḥ sapramāṇaṃ saṃkṣepeṇa kathyate | tatrāvāhane 
prathamaṃ viniyuktā trikhaṇḍocyate | trikhaṇḍālakṣaṇamuktaṃ 
vāmakeśvaratantre-

parivartya karau spṛṣṭāvaṅguṣṭhau kārayet samau |
anāmā'ntargate kṛtvā tarjanyau kuṭilākṛtī ||
kaniṣṭhike niyuñjīta nijasthāne maheśvari |
trikhaṇḍeyaṃ samākhyātā tripurā'hvānakarmaṇi || iti ||

parivartanaṃ nāma hastadvayāṅgulimelanam | idaṃ sarvatrādhikārarūpaṃ 
sadanveti | aṅguṣṭhau saralau parasparaspṛṣṭau tathaiva kaniṣṭhe madhyame ca 
kuryāt | vāmānāmopari dakṣānāmāṃ tiryak prasārya tayoradhaḥpradeśāt 
tarjanīdvayamānīya kuṭilākārābhyāṃ tarjanībhyām anāmā'gradvayaṃ 
dhārayet | anāme antargate yathoriti vigraheṇa labdho'rthaḥ | asyā uktarītyā 
nirmāṇe khaṇḍatrayaṃ dṛśyate | upari saralāṅguṣṭhadvayayogaḥ | madhye 
tādṛśamadhyamāyogaḥ | adhaśca kaniṣṭhāyogastādṛśaḥ | evaṃ sati 
pūrvoktavāmājyeṣṭhāraudrīkalātrayarūpamasyāṃ sphuṭam | ata eva trayaḥ 
khaṇḍāḥ kalāḥ yasyām iti vigraheṇa trikhaṇḍeyam atra yadyapi 
khaṇḍadvayanirmāṇaprakāra uktaḥ | madhyamakhaṇḍaracanāprakāro noktaḥ | 
tathā'pi trikhaṇḍeti yogārthasampattaye tantrāntaraṃ śaraṇīkṛtya 
khaṇḍatrayaṃ sampādanīyam | khaṇḍatrayamuktaṃ jñānārṇave-

p. 168)

pāṇidvayaṃ maheśāni parivartanayogataḥ |
yojayitvā tarjanībhyām anāme dhārayet priye ||
madhyame yojayenmadhye kaniṣṭhe tadadhastataḥ |
aṅguṣṭhāvapi saṃyojya tridhā yugmakrameṇa tu ||
trikhaṇḍā mama mudreyaṃ tripurā'hvānakarmaṇi || iti ||

sarvasaṃkṣobhiṇīsvarūpaṃ tatraiva-

madhyame madhyage kṛtvā kaniṣṭhāṅguṣṭharodhite |
tarjanyau daṇḍavat kṛtvā madhyamoparyanāmike ||
eṣā tu prathamā mudrā sarvasaṃkṣobhakāriṇī || iti ||

tantrarāje tu-

kaniṣṭhā'nāmikāmadhyāḥ nakhairanyonyasaṅgatāḥ |
kṛtvā'ṅguṣṭhau kaniṣṭhāsthāvṛjū kuryācca tarjanī ||
sarvasaṃkṣobhiṇī mudrā trailokyakṣobhakāriṇī || iti ||

sarvavidrāviṇī mudrā tatraiva-

etasyā eva mudrāyā madhyame sarale yadi |
kriyate cenmaheśāni sarvavidrāviṇī tadā || iti ||

madhyame madhyame'prītyarthaḥ | etena tarjanīmadhyamayoḥ dvayoḥ saralatvaṃ 
jñeyam ||

tṛtīyamudrā'pi tatraivoktā-

madhyamā tarjanīyugme vakrīkuryāt sulocane ||
etasyā eva mudrāyāstadākarṣaṇakāriṇī || iti ||

tatraiva caturthī mudrā sarvavaśaṅkaryuktā-

puṭākārau karau kṛtvā tarjanyāvaṅkuśākṛtī |
parivartya krameṇaiva madhyame tadadhogate ||
krameṇa devi tenaiva kaniṣṭhā'nāmike api |
saṃyojya nibiḍāḥ sarvāḥ aṅguṣṭhāvagradeśataḥ ||
mudreyaṃ parameśāni sarvavaśyakarī smṛtā || iti ||

asyārthaḥ puṭākārau parasparaṃ pṛṣṭhasaṃlagnau ūrdhvāgrāṅgulikau hastau 
kṛtvā tato'ṅguṣṭhavyatiriktāṅgulayaḥ parasparamaṅgulisandhiṣu praveśya 
tarjanyādikaniṣṭhā'ntā aṅgulayaḥ aṅkuśākārāḥ kuryāt | evaṃ kṛtvā 
tato'ṅguṣṭhadvayaṃ adhomukhaṃ tarjanyupari sthāpayet | iyaṃ sarvavaśaṅkarī 
iti bhāvaḥ ||

p. 169)

pañcamyapi tatraiva-

saṃmukhau tu karau kṛtvā madhyamāmadhyage'nuje |
anāmike tu sarale tadbahistarjanīdvayam ||
daṇḍākārau tato'ṅguṣṭhau madhyamānakhadeśagau |
mudraiṣonmādinī nāma kledinī sarvayoṣitām || iti ||

ayamarthaḥ vāmakaniṣṭhopari dakṣakaniṣṭhāṃ tiryaganāmādvayoparimārgeṇa 
madhyamāparyantaṃ prasārya tādṛśakaniṣṭhā'gradvayaṃ madhyamādvayena 
dṛḍhaṃ gṛhṇīyāt | gṛhītamadhyamānakhopari daṇḍākāramaṅguṣṭhadvayaṃ 
sthāpayet | tathā'nāmādvayaṃ parasparābhimukhyena sarale kuryāt | 
anāmikayoḥ pārśvadvaye tarjanīdvayamapi saralaṃ kuryāt | eṣā sarvonmādinī 
mudrā yoṣidvaśyakarī iti ||

ṣaṣṭhī mudrā'pi sarvamahāṅkuśā tatraiva prakaṭitā-

asyāstvanāmikāyugmamadhaḥ kṛtvā'ṅkuśākṛti |
tarjanyāvapi tenaiva krameṇa viniyojayet ||
iyaṃ mahāṅkuśā mudrā sarvakāryārthasādhinī || iti ||

asyāḥ sarvonmādinyāḥ | tenaiva krameṇa anāmikākrameṇa | 
anāmikā'ṅkuśākārā | tathaiva tarjanīdvayamapi kartavyam | śeṣaṃ 
pūrvamudrāvat iti bhāvaḥ ||

saptamīṃ khecarīmudrāṃ tatraiva vyācacakṣe-

savyaṃ dakṣiṇahaste tu dakṣiṇaṃ savyahastataḥ |
bāhū kṛtvā maheśāni hastau samparivartya ca ||
kaniṣṭhā'nāmike devi yuktvā tena krameṇa tu |
tarjanībhyāṃ samākrānte sarvordhvamapi madhyame ||
aṅguṣṭhau tu maheśāni kārayet saralāvapi |
iyaṃ sā khecarī nāma mudrā sarvottamā priye ||

asya tātparyam bāhū saralau prathamaṃ kṛtvā dakṣabāhūpari vāmaṃ 
sthāpayitvā punarvāmaṃ hasta dakṣahastādhomārgeṇa vāmapārśve 
nirgamayya hastadvayāṅgulīḥ vakṣyamāṇarītyā grathnīyāt | tadyathā 
vāmānāmākaniṣṭhe dakṣamadhyamādhomārgeṇa dakṣatarjanyāṃ nītvā 
evaṃ dakṣānāmākaniṣṭhe vāmamadhyamā'dhomārgeṇa vāmatarjanyāṃ 
nītvā hastadvayatarjanībhyāṃ svasamīpāgatānāmākaniṣṭhe dṛḍhaṃ 
gṛhṇīyāt | madhyame sarvordhvaṃ sarale evāgrābhyāṃ parasparasaṃlagne 
sthāpayet | aṅguṣṭhau saralau kṛtvā yonisādṛśyaṃ sampādayet | iyaṃ 
khecarīmudrā | yadyapyuktārthaḥ sarvo'pi pūrvalikhitavacane nāsti tathā'pi-

p. 170)

vāmaṃ bhujaṃ dakṣabhuje dakṣiṇaṃ vāmadeśataḥ |
niveśya yojayet paścāt parivartya krameṇa hi ||
kaniṣṭhā'nāmikāyugme tarjanībhyāṃ nirodhayet |
madhyame sarale kṛtvā yonivat saralau tataḥ ||
aṅguṣṭhau khecarīmudrā pārthivasthānayojitā ||

iti jñānārṇavavacanena saha ekavākyatāṃ sampādya niṣkāsito'rtho jñeyaḥ ||

aṣṭamīmudrā'pi tatraiva prakaṭitā-

parivartya karau spṛṣṭāvardhacandrākṛtī priye |
tarjanyaṅguṣṭhayugalaṃ yugapat kārayet tataḥ ||
adhaḥkaniṣṭhā'vaṣṭabdhe madhyame viniyojayet |
tathaiva kuṭile yojye sarvādhastādanāmike ||
bījamudreyamacirāt sarvasiddhipravartinī || iti ||

asyārthaḥ anāmāmadhyamāmārgeṇa vyatyaste kaniṣṭhike svādhobhāge 
madhyamā yathā tiṣṭhati tathā kuryāt | tato madhyamādvayaṃ 
kaniṣṭādvayāvaṣṭambhakaṃ yathā tathā kuryāt | sarvādhaḥsthite anāme 
yāvatkuṭile bhavataḥ tāvat kuryāt | aṅguṣṭhatarjanīyugalaṃ ardhacandrākṛti 
yathā bhavati tathā yojayet | iyaṃ bījamudrā bhavati ||

navamīṃ yonimudrāṃ tatraiva viśinaṣṭi-

madhyame kuṭilākāratarjanyupari saṃsthite |
anāmikāmadhyagate tathaiva ca kaniṣṭhike ||
sarvā ekatra saṃyojya aṅguṣṭhaparipīḍitāḥ |
eṣā tu prathamā mudrā yonimudreti yā sthitā || iti ||

asyārthaḥ anāmike madhyamā'dhomārgeṇa kuṭilākāratarjanyupari vyatyaste 
sthāpayet | anāmikāpṛṣṭhalagne vyatyaste kaniṣṭhike saṃyojayet | 
aṅguṣṭhāgradvayaṃ madhyamāmadhyaparvadvaye yojayet | iyaṃ yonimudrā 
bhavati | yadyapi etāvānartho na labhyate tena vacanena tathā'pi-

anāmikāpṛṣṭhabhāge madhyamāmadhyaparvaṇi |
kaniṣṭhāṅguṣṭhasaṃśleṣānmahāyonistrikhaṇḍikā ||

iti sthalāntare | asyārthaḥ yā trikhaṇḍā sā mahāyoniḥ | tato viśeṣastviyān 
madhyamāmadhyaparvaṇī aṅguṣṭhasaṃyogaḥ anāmikāpṛṣṭhabhāgena 
kaniṣṭhikāsaṃyogaḥ | śeṣaṃ trikhaṇḍayā samamityarthaḥ | anena saha 
pūrvavacanasyaikārthatāyāṃ kriyamāṇāyāṃ pūrvalikhitārthaḥ saṃpadyate || 

p. 171)

evaṃ daśamudrāḥ paramagahanāḥ yathāmati saprapaccaṃ sapramāṇaṃ 
prapañcitāḥ prāsaṅgikāḥ | prakṛtamanusarāmaḥ || 15 ||

kāmakalādhyānam

atha kāmakalādhyānaṃ vaktumupakramate-

bindunā mukhaṃ bindudvayena kucau saparārdhena yoniṃ kṛtvā kāmakalāmiti 
dhyātvā || 16 ||

sūkṣmaṃ kalādhyānaṃ sthūlaṃ ceti dvividham | tatra 
sūkṣmakāmakalādhyānasya asmatparameṣṭhigurubhiḥ 
uttaracatuśśatīvyākhyāne vistareṇa setubandhe varivasyārahasye ca 
vyākhyātatvāt tādṛśadhyānakartuḥ upāsakadhaureyasya sāmprataṃ 
śaśaśṛṅgakalpatvena tallekhanasya kevalasvapāṇḍityamātrakhyāpakatvam 
idānīntanavedāntaśāstrādhyayanavat syāt | ataḥ prathamaṃ parityajya 
sthūlameva mandādhikāriṇāmupayogāya varṇayiṣyāmaḥ | tadyathā turīyasvare 
hakāre vā aṃśatrayaṃ parikalpya tatra strīrūpaṃ parikalpya urdhvāṃśe 
mukhakalpanāṃ madhyamāṃśe kucadvayakalpanāṃ jaghanyāṃśe 
yonikalpanāṃ ca kṛtvā dhyāyet | taduktaṃ kuṇḍalinīvimarśe-

śaktimadhyaparikalpitāṃśakeṣvantaraṅgaparibhāvane paṭuḥ |
ūrdhvamadhyatadadho vibhāgaśaḥ cintayenmukhakucāvadhomukham ||

asmin śloke śaktiśabdārthaḥ īkāraḥ iti bahavaḥ | hakāra ityapi kecit | 
adhomukhaṃ yonimityarthaḥ | śeṣaṃ spaṣṭam | mukhaṃ binduṃ kṛtvā 
kucayugamadhastasya tadadho harārdhaṃ dhyāyedyoharamahiṣi te manmathakalām 
iti śrībhāgavatpādairapyuktam | setubandhe tu īkāra eva sthūladhyānamuktam 
īkārasya binduvisargātmanaḥ śivaśaktyoḥ sāmarasyarūpasya svātmatvena 
bhāvanāyāṃ paramānandānubhavaḥ iti paṅktyām | sālagrāme viṣṇubuddhivat 
bhagavatyāḥ dhyānādhiṣṭhānaniyamo'yam | evaṃ sthūladhyānena 
jitāntaḥkaraṇastādṛśopāsakamakuṭamaṇiḥ sūkṣmakalāṃ 
setubandhādilikhitāṃ gurumukhāt jñātvā kāmamupāsīta | nānye 
idānīntanāḥ tadyogyāḥ | tādṛśadhyānaṃ ca 
paradevatāśrīguruprasādaikalabhyam | ayamarthastripurārṇave suspaṣṭamuktaḥ-
sūkṣmadhyāne'samarthaścet sthūlaṃ dhyāyedyathoktavit iti | itthaṃ ca 
pūrvoktānyataravarṇe mukhaṃ kucau yoniṃ cāṃśatraye kṛtvā manasā 
nirmāya kāmakalām iti vakṣyamāṇaprakāreṇa [sannihitādhastha-17-sūtra 
bhāṣyobhayoktyanusāreṇetyarthaḥ |] dhyātvā yathā'vakāśamiti śeṣaḥ || 16 ||

varṇaviśeṣe pūrvoktāvayavakalpanānantaraṃ viśiṣṭe dhyānaprakāramāha-

saubhāgyahṛdayamāmṛśya || 17 ||

p. 172)

saubhāgyasya dharmādisakalapuruṣārthasya hṛdayaṃ sthānaṃ 
upādānakāraṇamiti yāvat | īdṛśaṃ pūrvoktarūpam āmṛśya dhyātvā | 
pūrvasūtrasthetiśabdasya atrāpyanuvṛttiḥ | ayamevārthaḥ spaṣṭamuktaḥ 
yoginītantre-

evaṃ kāmakalārūpam akṣaraṃ yat samutthitam |
kāmādiviṣamokṣāṇāmālayaṃ parameśvari || iti ||

etaduttaraṃ nibandhe homaḥ pākṣika uktaḥ saḥ nirmūlaḥ yadyagnikāryasampattiḥ 
iti sūtrasya gaṇapatiprakaraṇasthasya anyatra prāpakapramāṇābhāvāt || 17 ||

balidānam

atha baliprakāramāha-

vāmabhāgavihitatrikoṇavṛttacaturasre gandhākṣatārcite vāgbhavamuccārya 
vyāpakamaṇḍalāya namaḥ ityardhabhaktabharitāmbhasā ādimopādimamadhya 
mabhājanaṃ tatra nyasya || 18 ||

atra vāmabhāgetyanena śīghropasthitatvāt svasyaiva vāmabhāgo grāhyaḥ | vihite 
nirmite trikoṇavṛttacaturasre | nirgamarītyā trikoṇaṃ svābhimukhaṃ grāhyam 
tathā śiṣṭasampradāyāt ||

kecittu trikoṇe yā baligrāhiṇī devatā sā 
tiryagrekhādvayasaṃyogarūpakoṇābhimukhī trikoṇavartidevatānāṃ 
tathātvaniyamāt | evaṃ ca tantrāntare-

mūladevyunmukhāṃ dhyātvā nyasyāgre balipātrakam ||

iti vacanena tasyā devatāyā mūladevyunmukhatvaniyamāt | trikoṇamapi 
devyunmukhameva na svābhimukhamityāhuḥ | tanna 
anaṅgakusumādiśrīcakrasthakoṇeṣu koṇaparāṅmukhīnāṃ 
mūladevyabhimukhīnāṃ devatānāṃ bahvīnāṃ dṛṣṭatvena 
tādṛśaniyamāsiddheḥ | na kiṃcidetat ||

gandhākṣatetyanena taditaravyāvṛttiḥ darśitā | arcane mantramāha-
vāgbhavamityādi | vāgbhavaṃ aiṃ iti | śeṣaṃ spaṣṭam | ardhaṃ bhaktena annena 
bharitāmbhasā ca sahitamiti śeṣaḥ | idaṃ bhājane viśeṣaṇam | ekasmin pātre 
ardhāṃśam annena ardhāṃśaṃ jalena pūrayet | īdṛśamekaṃ pātraṃ 
kṣīrādipātratrayaṃ ca tatra maṇḍale nyasya | atra balipātraṃ tāmramayam 

balipātraṃ tāmrabhavaṃ naivānyattu kadācana ||

iti tripurārṇavavacanāt | vyañjanādimiśraṇaṃ na kāryam etattantre 
uktadravyeṇaiva dravyākāṅkṣāśānteḥ ||

p. 173)

atra nibandhakāraḥ bāṇamudrayā balidānaṃ vāmapārṣṇighātādikaṃ lilekha | 
saḥ praṣṭavyaḥ kimatra pramāṇam iti | sa yadi brūyāt śyāmāprakaraṇe sūtre 
uktatvāt atrāpi te dharmā gṛhyante iti tarhi tadgrahaṇaṃ ākāṅkṣayā uta 
anākāṅkṣayā | ādye balidāne dravyadevatāmantrāṇāmākāṅkṣoditā 
prakṛtavākyaireva śāntā | bāṇamudrāyā vāmapārṣṇighātasya ca grahaṇaṃ 
kurvataḥ tasyaiva kīdṛśī ākāṅkṣoditeti ca na vidmaḥ | kiṃ ca 
śyāmāprakaraṇasthapārṣṇighātādidharmeṇa kimapakṛtam | 
kṣetrapālavāgīśvaryādibalayo'pi tatra santi | uktavyatiriktā anye'pi mantrāḥ 
santi | taiḥ nibandhakṛto'parādhaḥ ko'nuṣṭhitaḥ | śyāmāprakaraṇasthatvasya 
tulyatve'pi keṣucit anugṛhṇan jagrāha keṣucit ruṣṭaḥ tatyājeti mūlaṃ na vidmaḥ 
| kiṃ ca tata eva trikoṇādimaṇḍaladharmāṇāṃ prāptau punarvidhānamatra 
kimartham iti cet vāgbandhanamevottaraṃ nānyaditi | tasmāt svecchayā 
dharmapravartakasaraṇiḥ aśraddheyā | yāvaduktaṃ kāryam || 18 ||

balidāne mantramāha-

praṇavamāyā'nte sarvavighnakṛdbhyaḥ sarvabhūtebhyo huṃ svāhā iti triḥ 
paṭhitvā baliṃ dattvā || 19 ||

triḥ ityanena mantrābhyāso vihitaḥ | tena triḥpāṭhānte balidānam | devatā ca 
mantraliṅgena jñeyā || 19 ||

pradakṣiṇādi

pradakṣiṇanamaskārajapastotraiḥ santoṣya || 20 ||

pradakṣiṇamekaṃ kāryam

ajeśaśaktigaṇapabhāskarāṇāṃ pradakṣiṇe |
vedārdhacandravahnyadrisaṅkhyāḥ sarvārthasiddhayaḥ ||

iti śaktisaṅgamatantre uktatvāt | ajaḥ viṣṇuḥ | vedāḥ catasraḥ | ardhaṃ tadardhaṃ 
dvayam | candraḥ ekaḥ | vahniḥ tisraḥ | adriḥ sapta | imāḥ saṅkhyāḥ 
ajādipradakṣiṇe kramāt jñeyāḥ ityarthaḥ | śrīmacchaṅkarabhagavatpādairapi 
pradakṣiṇaṃ te paritaḥ karomi ityekavacanāntamevoktam [śrībālā-
mānasapūjā-stotre-matkṛtabālātantracandrikāyāṃ-cāyaṃ ślokosti |] ||

namaskāre tu icchaiva niyāmikā śāstropalabdhiparyantam | namaskāre 
kaścidviśeṣaḥ paramānandatantre-

p. 174)

pūjāgṛhādbahirdevīṃ praṇamet daṇḍavadbhuvi |
maṇḍale namanaṃ naiva sāṣṭāṅgaṃ daṇḍavat caret ||
jānubhyāṃ ca padābhyāṃ ca mūrdhnā hastayugena ca |
caturaṅgapraṇāmo'yaṃ maṇḍale vihitaḥ śive || iti ||

maṇḍalalakṣaṇaṃ yoginītantre-

pūjyate yatra sā devī taccaturdikṣu śaṅkari |
dhanuśśatapramāṇena maṇḍalaṃ parikīrtitam || iti ||

dhanurmānaṃ tu hastacatuṣṭayam | bṛhadvāmakeśvare tu-

maṇḍalaṃ tadvijānīyāt yāvadṛśyā hi devatā || iti ||

rahasyārṇave tu-

dvārapūjā yatra kṛtā tadantarmaṇḍalaṃ viduḥ || iti ||

ayaṃ ca deśataḥ pariccheda uktaḥ | kālataḥ paricchedastu śaktisaṅgamatantre-

dvārapūjāṃ samārabhya yāvadudvāsanaṃ bhavet |
tāvattanmaṇḍalaṃ viddhi.................. || iti ||

tripurārṇave'pi-

idaṃ tanmaṇḍalaṃ devi prārabhyaitasya pūjanam |
mārtaṇḍamaṇḍalārdhyāntaṃ .............. || iti ||

idameva maṇḍalaṃ vakṣyamāṇamaṇḍaladharmeṣu jñeyam |

pūjāgṛhaṃ tato gatvā cakrarājaṃ samarcayet |
vidyāṃ japet sahasraṃ vā triśataṃ śatameva vā ||

iti brahmāṇḍapurāṇoktajapasaṅkhyā jñeyā | ayaṃ japaḥ karmāṅgabhūtaḥ 
aṅgairubhayataḥ sandaṃśāt | yadvā-

āvṛttirgurunityā'rcā samayāmnāyayorapi |
pūjātrayaṃ japaścaiva pradhānaṃ pūjane matam ||

iti svatantratantre trayodaśollāse japasya prādhānyakathanāt pratyakṣavacanena 
kathanasya sarvabādhakatvāt ||

stotrāṇi gaṇeśagrahanakṣatretyādivāmakeśvaratantroktāni sahasranāmapāṭhaḥ 
aparādhastutiḥ satyavakāśe saptaśatīpāṭho'pi tataḥ kṛtāñjalirbhūtvā stuvīta 
caritairimaiḥ iti tatraiva vihitatvāt | evamādibhiḥ santoṣya || 20 ||

p. 175)

śaktipūjā

atha śaktipūjāmāha-

tadrūpiṇīmekāṃ śaktiṃ bālayopacāraiḥ sampūjya tāṃ mapañcakena 
santarpya || 21 ||

tadrūpiṇīṃ tripurasundarīrūpiṇīṃ ekavacanena ekāmityanena advitīyāṃ 
saundaryeṇetyarthaḥ | pratipādyate | etena tantrāntaroktaśaktilakṣaṇāni sūcitāni | 
bālayā mantreṇa upacāraiḥ yathāsambhavaiḥ | mapañcakena santarpaṇaṃ 
tasyāḥ icchāyāṃ satyāṃ jñeyam | ayaṃ bhāvaḥ santarpyetyanena jñāpitaḥ | 
tarpaṇaṃ tṛptisampādanaṃ tat śaktiniṣṭhatattadviṣayakecchānivartako 
vyāpāraḥ | tasyā icchāyāmasatyāṃ tannirvartakavyāpārasyāpi asambhavāt 
icchāyāmeva iti sidhyati | anyathā mapañcakairupacāraiśca pūjayet ityeva vadet | 
tasmādayamarthaḥ siddhaḥ | śaktilakṣaṇāni kulārṇave-

surūpā [etadādiślokāḥ kulārṇavatantre-7 ullāse-mudritapustake 64 patre santi |] 
taruṇī śāntā'nukūlā muditā śuciḥ | 
śaṅkāhīnā bhaktiyuktā guruśāstraparāyaṇā ||
priyākṣarā [priyekṣaṇā-śrī.] viśeṣajñā devatāpūjanotsukā |
manoharā sadācārā śaktirevaṃ sulakṣaṇā || iti ||

yoginītantre'pi

savarṇā hīnavarṇā vā kulasthā kulaṭā'pi vā |
mantropāsanasaṃyuktā pūjyā syāt gaṇikā'pi ca || iti ||

doṣā api kulārṇave

dūṣyā [emepi ślokāḥ pūrvatanoktapatrasthale eva santi |] ca karkaśā lajjāhīnā 
ca kuladūṣiṇī |
durācārā durārādhyā bhītā kruddhā calā'lasā ||
nidrāsaktā'tidurmeghāḥ hīnāṅgī vyādhipīḍitā |
durgandhā duḥkhitā mūḍhā vṛddhonmattā rahasyabhit ||
īdṛśīṃ mantrayuktāṃ ca pūjākāle [mudritakulārṇavapustaketra-śaktiyoge 
vivarjayediti pāṭhosti |] vivarjayet || iti ||

yaśca yoginītantre-

yogyā vā'pi niṣiddhā vā bahudoṣākulā'pi vā |
kāle suvāsinīṃ prāptāṃ sarvathā bhaktito'rcayet || iti ||

p. 176)

saḥ mukhyālābhe pūrvavacanaiḥ niṣiddhāyā abhyanujñāparaḥ vivāhe 
anṛtavadanavat | yadvā pūrvavacanaiḥ niṣedhaḥ pratipādito yaḥ saḥ 
śaktipūjāparaḥ | yogyā vā ityanena tadatiriktaṃ suvāsinīmātre pūjanaṃ 
tatkāle pratipādayati | yuktaścāyameva pakṣaḥ || 21 ||

haviśśeṣapratipattiḥ

haviśśeṣapratipattimāha-

śiṣṭaiḥ sārdhaṃ cidagnau haviśśeṣaṃ hutvā || 22 ||

atra śiṣṭatvaṃ kulārṇave darśitam-

aho bhuktaṃ tu yanmadyaṃ mohayet tridaśānapi |
tanmaireyaṃ śivaṃ pītvā yo na vikriyate naraḥ ||
japan śivaparo bhūtvā sa muktaḥ sa ca kaulikaḥ || iti ||

īdṛśaṃ śiṣṭatvaṃ sāmayikaniṣṭham | etena viśeṣaṇena ādhunikāḥ 
kaulikaṃmanyāḥ kevalaṃ jihvācapalāḥ maṇḍale na praveśyāḥ iti jñāpitaṃ 
bhavati | sāmayikaiḥ saheti sahatvaṃ ekajātīyakriyākartṛtvaṃ putreṇa saha yāti 
ityādau tathā dṛśṭatvāt | prakṛte'pi homarūpaikajātīyakriyākartṛtvamastīti 
sahatvaṃ upapannam | cidagnau cillakṣaṇe'gnau haviśśeṣaṃ devatoddeśena 
saṃskṛtārpitaśeṣam | hutvetyanena tatra kevalahomabuddhireva vidheyā | 
indriyatṛptiviṣayiṇīcchā na kadā'pi kāryeti sūcitaṃ bhavati | maṇḍale praveśe 
indriyatṛptīcchāyāṃ patita eva syāt iti bhāvaḥ | ayaṃ ca 
upayuktadravyasaṃskāraḥ āgneyaṃ caturdhā karoti itivat haviśśeṣam iti 
dvitīyāśravaṇāt || 

etenedānīntanāḥ ekaṃ kalaśaṃ asaṃskṛtadravyeṇa paripūrṇaṃ sthāpayitvā 
tasmin viśeṣārghyabinduṃ kiñcinnikṣipya taddravyaṃ sāmayikebhyaḥ 
prayacchanti | teṣāmanukūlatayā nibandhakāro'pi kṣīrakalaśādikaṃ devyāḥ 
paścādbhāge nidhāyeti viśeṣārghyapātrāt kiñcit kṣīraṃ kalaśe nikṣipet iti ca 
vākyadvayaṃ lilekha | idaṃ mūlaṃ kṛtvā ya īdṛśo'nācāraḥ patanahetuḥ 
pravṛttaḥ saḥ likhitasūtravirodhena nirastaḥ tasmin haviḥśeṣatvābhāvāt | yadi ca 
bindumātraprakṣepeṇa haviśśeṣatvaṃ syāt tarhi āpaṇasthadravye'pi 
binduprakṣepaṃ kṛtvā dravyasvīkāre doṣābhāvena mahānupaplavaḥ syāt ||

yacca tripurārṇave-

tathā pūjānimittaṃ vai prathamādyamupāhṛtam |
yajñiyaṃ tat pavitraṃ syāt dṛṣṭvā spṛṣṭvā śucirbhavet ||

p. 177)

tathaiva maṇḍale prāptaṃ sarvaṃ tadamṛtaṃ bhavet |
vipreṇānyena vā'nītaṃ devatāyai nivedayet ||
prathamādyaiḥ saṃskṛtaistu yuktaṃ tattadagātmaje |
aviśeṣeṇa sarvaistu grāhyaṃ śaṅkāvivarjitaiḥ || iti ||

saṃskṛtadravyeṇa yuktaṃ asaṃskṛtaṃ saṃskṛtaṃ bhavatīti kathayatīti 
yadyucyate tathā'pi saṃskṛtadravyasaṃyogo dvedhā | saṃskṛtadravyasya 
asaṃskṛtadravyapātre prakṣepe sati ekaḥ saṃskṛte viśeṣārghyapātre 
asaṃskṛtadravyaprakṣepeṇāparaḥ | tatra pūrvasmāt pakṣāt uttarapakṣo 
variṣṭhaḥ śraute karmaṇi some droṇakalaśe darśapūrṇamāse dhruvādau tathā 
dṛṣṭatvāt | kiṃ ca yadi saṃskṛtadravyeṇa laukikaṃ bahiṣṭhaṃ saṃskṛtaṃ 
bhavet tarhi atiprasaṅgo darśitaḥ pūrvameva [pūrvameva nāma 176 patrasthe-
āpaṇadravye'pi-ityāditaḥ0 mahānupaplavaḥ syādityantena lekhenetyarthaḥ |] 
bahirdravyasya pātre prakṣepapakṣe pūrvoktātiprasaṅgo'pi nāsti idamapi 
sādhakam | tasmāt dvitīyapakṣa eva śreṣṭhaḥ | tatrāpi pūjānimittaṃ 
bhaktenānītasthala eva ayaṃ prakāro nānyatra aśāstrīyatvāt | idānīntanāḥ 
buddhyā yathecchaṃ dravyaṃ sampādya manaḥpūtaṃ vyavaharanti | 
tatpatanāyaivālaṃ bhaviṣyatīti ||

vastutastu idamapi tantrāntarānuyāyināṃ na tu sūtrānuyāyinām | sūtre 
haviśśeṣaṃ hutvetyuktyā kalaśasthāsaṃskṛtadravye haviśśeṣatvaṃ 
gīrvāṇaguruṇā'pi pratipādayitumaśakyam śāstroktavidhinā saṃskṛtya 
devatāyai dattaśeṣasyaiva haviśśeṣatvāt | tasmāt yāgaśeṣeṇaiva 
homapratipattisaṃskāraḥ sūtrānuyāyināṃ nānyadravyeṇa iti rāddhāntaḥ ||

nanu tarpaṇe āvaraṇapūjane ca kṛte sati yadā tatraiva viniyogaḥ tadā idaṃ karma 
luptaṃ syāt iti cet na | yathā aśvaśaphamātraṃ puroḍāśaṃ karoti 
aṅguṣṭhaparvamātramavadyati iti vidhibhyāṃ anuṣṭhite haviśśeṣo niyataḥ tathā 
tantrāntare-

sāmānyakalaśaṃ pañcapalānyūnajalairyutam |
dikpalādadhikaṃ naiva hetukumbhaṃ tadardhakam |
tadardhaṃ ca viśeṣārghyam.......................... ||

iti mānānusaraṇe sūtrānuyāyināṃ hetukumbhasthānāpannaviśeṣārghye 
hetukumbhamānāṅgīkāre ṣoḍaśaśataguñjāparimitaṃ viśeṣārghyadravyaṃ 
bhavati | yadi ca viśeṣārghyamānameva asya tulyanāmatvāt aṅgīkriyate tadā'pi 
aṣṭaśataguñjāparimitamityavivādam | āvaraṇapūjādiṣu ekaikadevatoddeśena 
ekaikabinduviniyogo dṛśyate | tathā sati sāmayikānāmātmanaśca homāyālaṃ 
dravyaṃ śiṣyata eva | asmin śāstre dravyasvīkārajanito'vasthāviśeṣaḥ ullāsaḥ 
| so'pi dravyasyātyuttamatve bhavitumarhati iti na kā'pyanupapattiḥ ||

p. 178)

atra hometikartavyatāyāḥ [kartavyatāyām-iti saptamyarthotrāvadheyaḥ |] 
śiṣṭānāṃ maṇḍale praveśadharmāṇāṃ ca anukteḥ kathaṃ śiṣṭaiḥ saha 
homaṃ kuryāt ityākāṅkṣāyāṃ tantrāntaraṃ tadviṣaye śaraṇīkāryam | tathā 
sati ādau maṇḍaladharmāḥ ucyante | te coktāḥ paramānandatantre-

kṣatāṅgo jvaritāṅgaśca malināmbaramūrdhajaḥ | 
āśaucāṅgastathoṣṇīṣī kañcukī kṛtabhojanaḥ ||
pūyitāṅgastathocchiṣṭamukho maraṇasūtakī |
apasmārī kleśayuktaḥ chardyatīsārarogavān ||
prāyaścittī tathā'snāto na viśenmaṇḍale kvacit |
sakṛnmohāt praviṣṭo'pi devatāśāpamāpnuyāt ||
yadi teṣāṃ tu bhaktiḥ syādutkaṭā darśanādiṣu |
pūjāgṛhadvāradeśādbahiḥ pūjāṃ samācaret || iti ||

tripurārṇave bhuktasya viśeṣaḥ-

atarkito divā bhukto yadā rātrau samāgataḥ |
tadā gurvādyājñayā tu snātvā sevenna cānyathā || iti ||

idamapi sevanaṃ maṇḍalādbahireva |

bhuktvā na maṇḍalaṃ gacchet sarvathā parameśvari |

iti maṇḍalapraveśaniṣedhabādhakaśāstrābhāvāt ||

yacca kulārṇave-

asnātvā vā'pi bhuktvā vā abhaktyā [abhyaṅktvā-śrī.] vā kuleśvari |

yaḥ seveta kuladravyaṃ sa dāridryamavāpnuyāt ||

iti bhuktasya kuladravyasevananiṣedhaśāstraṃ kāmaṃ bādhatāṃ 
praveśaniṣedhabādhakābhāvāt praveśo na kartavyaḥ | na ca maṇḍalāt bahiḥ 
svātmīkāravidhyabhāvena svātmīkāravidhinā praveśo'pyākṣipyate iti 
vācyam | tathā sati tripurārṇave bhuktvā na maṇḍalaṃ gacchet iti 
praveśaniṣedhenaiva svātmīkāraniṣedhe siddhe-

kuladravyaṃ tathā bhuktvā mohādapi pramādataḥ |
yaḥ seveta sa vai devi devatāśāpamāpnuyāt ||

ityanena unnītaḥ kuladravyasevananiṣedho vyarthaḥ syāt | ato'nenaiva jñāpakena 
bahirapi sevanaṃ dravyasya siddham ||

p. 179)

evaṃ praveśāyogyānuktvā praveṣṭṛguṇānapyāha paramānandatantre-

snātaḥ śucirdhautavastro dhṛtapuṇḍraḥ śubhāśayaḥ |
kṣālitāṅghrikaro devīṃ dhyāyan bhaktyā praṇamya ca ||

ācāryājñā'nurūpeṇa maṇḍalāntarviśet tataḥ |
bhāvayan devatārūpaṃ maṇḍalaṃ praṇamet budhaḥ ||

puṣpāñjaliṃ tataḥ kuryāt tadvidhānaṃ nigadyate |
sāmānyakumbhatoyena karau prakṣālya bhaktitaḥ ||

surabhīkṛtya gandhādyaiḥ puṣpāṇyādāya bhaktitaḥ |
utthāya ca tato devi devatā'bhimukhasthitaḥ ||

śrīnāthādigurutrayaṃ gaṇapatiṃ pīṭhatrayaṃ bhairavaṃ siddhaughaṃ 
baṭukatrayaṃ padayugaṃ dūtīkramaṃ maṇḍalam |

vīrān hyaṣṭacatuṣkaṣaṣṭinavakaṃ vīrāvalīpañcakaṃ 
śrīmanmālinimantrarājasahitaṃ vande gurormaṇḍalam ||

samprāptapañcadaśyādiḥ sādhakastu maheśvari |
samaṣṭiyoginīvidyāmapi tatra paṭhecchive ||

devatāṃ dhyānoktarūpāṃ dhyāyan sampūjya śaṅkari | 
ācāryādīṃstato dhyātvā pūjayet parameśvari ||

praṇameduktavidhinā jñātvā sarvaṃ śivātmakam |
sa dvitīyaṃ samādadyāt pātramācāryasattamāt ||

pātraṃ grāhyaṃ dakṣakare dīkṣāyuktena śaṅkari |
anyena tu samādeyaṃ vāmahastena śaṅkari ||

athavā vāmahastena sarvairgrāhyaṃ maheśvari |
hastāntareṇa tvācchādya gṛhṇīyāt dāpayedapi ||

anācchāditapātraṃ tu bhavedasurabhāgakam |
tarpaṇādyupayoge tu chādanaṃ tu parityajet ||

upaveśakramaṃ devi śṛṇu saṃyatamānasā |
maṇḍalākārato vā'pi caturasratayā'thavā ||

ācāryaṃ madhyataḥ kṛtvā viśet jyeṣṭhakrameṇa tu |
jyeṣṭheṣu satsu na viśet ācāryasya samīpataḥ ||

p. 180)

na sāmyena guroḥ stheyaṃ strīṇāṃ madhye tathaiva ca |
nāgratastu gurordevi nājñāmullaṅghya vai guroḥ ||

evaṃ jñātvā sampradāyaṃ niṣīdenmaṇḍale śive |
ācāryo'pi tathā jyeṣṭhānutthāya praṇipatya ca ||

teṣāmājñāṃ gṛhītvaiva svāsane'tha samāviśet | 
tasmai ca pātraṃ dadyādvai jyeṣṭhāyotthāya sādhakaḥ ||

jyeṣṭhān kaniṣṭho'pi devi gṛhṇīyādutthito naman |
sarvān saṃpūjya pātrāṇi dātavyāni maheśvari ||

asampūjya śiṣyamapi yo dadyāt pātramambike |
tasmai kupyati sā devī yasmāt sarvaṃ hi tanmayam ||

prakṣālya pātraṃ puṣpādiyutamācchādya yatnataḥ |
ācāryāya tathā dadyāt namaskuryācca bhaktitaḥ ||
svīkṛtya tatprasādaṃ vai japtvā stotrādikaṃ paṭhet || iti ||

tripurārṇave-

śaktyā svarṇādisaṃyuktamarpayet pātramambike |
yatkiṃcidvā'pi pātrasthaṃ datvā'nantaphalaṃ labhet || iti ||

suvāsinīnāṃ viśeṣo yoginītantre-

evaṃ santarpya hutvā tu suvāsinyaḥ saśeṣakam |
dadyustṛtīyaṃ turyaṃ vā pātraṃ pīṭhādhikāriṇe || iti ||

tripurārṇave kaścidviśeṣaḥ-

vīrāt jyeṣṭhāt tathā'cāryāt grāhyaṃ śeṣaṃ ca carvaṇam |
tadabhāve'pi cānyasmāt jyeṣṭhāt grāhyaṃ nagātmaje ||

bṛhadvāmakeśvaratantre-

gurvādyabhāve jyeṣṭhāttu carvaṇaṃ śeṣamarpayet |
tadabhāve guruṃ mūrdhni dhyātvā taccheṣakaṃ [māharet-śrī.] nyaset ||
ādau vā guruśeṣaṃ syāt sarvānte vā nagātmaje |
pibedaśabdaṃ pātraṃ tu sakṛnniravaśeṣakam ||
sāvaśeṣaṃ tu yatpātraṃ surāpānasamaṃ tu tat || iti ||

p. 181)

pātrasya oṣṭhāsparśe'pi niṣedhastatraiva-

dūrādoṣṭhāsparśanena pānaṃ tu paśupānavat ||

kulārṇave'pi-

kareṇa pātraṃ dhṛtvā'tha na tiṣṭheta ciraṃ priye |
nālapan pātrahastaḥ san tiṣṭheta kvacidambike ||
pādena na spṛśet pātraṃ na binduṃ pātayedadhaḥ |
nānyonyaṃ tāḍayet pātraṃ na pātraṃ pātayedadhaḥ ||
sādhāraṃ noddharet pātraṃ nirādhāraṃ na nikṣipet |
riktaṃ pātraṃ na kurvīta na pātraṃ bhrāmayet priye ||
na pātraṃ laṅghayedvidvān pātraṃ notpātayet priye |
prakṣālya gopayet pātramityājñā pārameśvarī || iti ||

paramānandatantre kaścana viśeṣaḥ-

arghyasthāpanamārabhya yāvat pātravisarjanam |
sarvaṃ śivamayaṃ paśyedanyathā patito bhavet ||
sarve varṇā dvijāstatra na bhedaṃ cintayet kvacit |
udvāsānantaraṃ naikyaṃ kuryādvidvān kadācana ||
svātmīkārastridhā devi divyavīrapaśukramāt |
udvāsāvadhi divyaḥ syāt tatpaścādvīra ucyate ||
asaṃskṛtaḥ paśuḥ prokto viprāṇāmādya eva tu |
apaśuḥ kṣatriyaviśāṃ śūdrāṇāṃ tritayaṃ bhavet || iti ||

kulārṇave'pi-

bhuktimuktipradaṃ [muktiprada bhaveddivyaṃ-śrī.] divyaṃ vīraṃ bhuktipradaṃ 
bhavet || iti ||

rahasyārṇave'pi-

sampūjyaivaṃ vidhānena vipraścodvāsanāvadhi |
dravyaṃ pibet tadante'pi kṣatriyo vaiśya eva ca |
śūdrastvicchā'nurodhena vidhinā vā'nyathā'pi vā ||
nivedya devatāyai tat saṃtarpya prapibedanu || iti ||

p. 182)

etāvantaḥ atyāvaśyakadharmāḥ nirūpitāḥ | ito'dhikā anekatantrāvalokanena 
jñeyāḥ | granthavistarabhayānneha likhyante ||

atra sāmayikānāṃ kalpasūtrānuyāyinām anyeṣām uktāḥ maṇḍaladharmāḥ 
tulyāḥ | homamantraḥ sūtrānuyāyinām ārdraṃ jvalati iti mantra eva 
mantrākāṅkṣāyāṃ tantrāntaramantrāt asya sannikṛṣṭatvāt | anyeṣāṃ 
svasvatantroktā saraṇiḥ | atreyaṃ vyavasthā cintyate pīṭhādhikāriṇā 
svakartṛkapūjāphalasiddhaye pratipattisaṃskārasya avaśyamanuṣṭheyatayā sa 
maṇḍale dhyānasamartho'samarthaḥ vā kāmaṃ dravyasvīkāraṃ karotu | 
sāmayikastu dravyahomānantaraṃ śāstroktadhyānasamartha eva dravyaṃ hunet | 
nānyaḥ | tathā hi-

antarnirantaramanindhanamedhamāne mohāndhakāraparipanthini saṃvidagnau |
kasmiṃścidadbhutamarīcivikāsamāne viśvaṃ juhomi vasudhā'di 
śivāvasānam ||

dharmādharmahavirdīptāvātmāgnau manasā srucā |
suṣumṇāvartmanā nityamakṣavṛttīrjuhomyaham ||

iti mantraliṅgena kalpito dhyānaprakāra āvaśyakaḥ | devīyāmale'pi-

homena cetanāṃ jitvā dhyāyedātmānamātmanā || iti ||

kulārṇave'pi-

tanmaireyaṃ śivaṃ pītvā yo na vikriyate naraḥ |
japan śivaparo bhūtvā sa muktaḥ sa ca kaulikaḥ || iti ||

paramānandatantre'pi-

svīkṛtya tatprasādaṃ vai dhyāyenniścalamambikām || iti ||

vīracūḍāmaṇau gaṇeśvarasaṃhitāyām-

dravyamāsvādya vidhinā mano niścalatāṃ nayet |
tato dhyāyet paraṃ jyotirātmajyotiḥ sanātanam ||

ityādimanonigrahapūrvakadhyānavidhāyakavacanāni bahūni-

yāvat suṣuptatā na syādavikāritvameva ca |
tāvadeva hunet devi niṣphalaṃ tvanyathā bhavet || iti ||

vikāre tu samutpanne dhyānayogabahiṣkṛtaḥ |
yoginīnāṃ paśurdevi maṇḍalācca bahiṣkṛtaḥ ||

ityadhikapātrahome dhyānabhraṃśamūlānartho'pi tantre | tenāpi 
dhyānāvaśyakatā sidhyati | evamādīni bahūni santi | granthavistarabhayānneha 
likhitametāvadalamiti ||

p. 183)

itthaṃ ca dravyasevanasya prathamaphalaṃ cittaikāgryaṃ tena vinā 
dhyānāsambhavāt | ata eva paramānandatantre-

tāvadeva hunet devi yāvadānandasamplutaḥ |
mano niścalatāṃ yāti cittaṃ cāpi prasādatām ||
vikāre tu samutpanne dhyānayogavihīnataḥ |
yoginīnāṃ paśurdevi maṇḍalācca bahiṣkṛtaḥ |

iti ayogyasya dravyasvīkāre aniṣṭaṃ phalaṃ darśayati | yoginītantre'pi-

kuladravyaṃ samāśritya mano niścalatāṃ nayet || iti ||

tripurārṇave'pi-

ayaṃ sarvottamo dharmaḥ kaulamārgo maheśvari |
asidhārāvratasamo manoniścalahetukaḥ ||
tatra saṃyatacittatvaṃ sarvathā hyatiduṣkaram |
bhaktiśraddhāvihīnasya...................... ||

ityevamādīni tantravacanāni dravyasevanaṃ manonigrahadvārā dhyānārthaṃ 
kartavyaṃ viparīte bādhata iti koṭiśaḥ upalabhyante | 
evamāditantravacanārthānāṃ saṅgrahaṃ kurvanneva śrīparaśurāmaḥ 
śiṣṭaiḥ saha ityuvāca | īdṛśadhyānasamartho vratādidivaseṣvapi avicāreṇa 
anādṛto'pi maṇḍalaṃ praviśya pātraṃ yācitvā hutvā dhyānaṃ sampādayet | 
taduktaṃ tripurārṇave-

evaṃ sāmayiko bhaktyā mānadambhavivarjitaḥ |
anāhūto'pi [anādṛto'pyanāhūto-śrī.] vā'hūto vrajenmaṇḍalamuttamam ||
vratī vā'pi hunedeva na doṣastatra vidyate |
vratādiśaṅkayā yastu na vrajedādṛto'pi san ||
vrataṃ tasya pratihatamanarthaṃ ca samāpnuyāt |
tasmāt kaniṣṭhāhūto'pi praviśedeva maṇḍale || iti ||

atra jyeṣṭhatvaṃ kaniṣṭhatvaṃ ca viprāṇāṃ dīkṣāpūrvāparabhāvena 
jñeyam | taduktaṃ rudrayāmale-

bālo'pi dīkṣitaḥ pūrvaṃ jyeṣṭhaḥ sa tu kulāgame || iti ||

dvijo'pi dīkṣitaḥ paścādantyajaḥ pūrvadīkṣitaḥ |
dvijaḥ kaniṣṭhaḥ sa jyeṣṭha iti śāstraviniścayaḥ || iti ||

p. 184)

tatraiva vacanāt kṣatriyādīnāṃ paścāt dīkṣito'pi dvija eva jyeṣṭhaḥ | 
kvaciducchiṣṭagrahaṇe yonisambandhādapi jyeṣṭhatvaṃ pratipādayati | taduktaṃ 
tripurārṇave-

vidyāsambandhato vā'pi yonisambandhatastathā |
jyeṣṭhānāmapi cocchiṣṭaṃ dīkṣitānāṃ ca bhakṣayet || iti ||
dīkṣāhīnasya cocchiṣṭaṃ janakasyāpi dīkṣitaḥ |
na bhakṣayet sakṛdvā'pi bhuktvā pātityamāpnuyāt || iti ||

atha prasaṅgāt kena kiyaddravyasevanaṃ kāryaṃ ? tadvivicyate | tatra bālopāstau 
tripātraṃ pañcadaśīmantropadeśavataḥ catuṣpātraṃ ṣoḍaśyādidīkṣāvataḥ 
pañcapātram | taduktaṃ paramānandatantre-

saubhāgyatopāsakasya catustattvaṃ bhavecchive |
bālādyupāsakānāṃ tu tatpūjoktavidhānataḥ ||
teṣāṃ tu tattvatritayaṃ anyat sarvaṃ samaṃ bhavet || iti ||
dīkṣāvatāṃ pūrṇapātraṃ pañcamaṃ tu bhavecchive |
hutvā śivāgnau kramaśaḥ tricatuḥpañcapātrakam || iti ||

nanu-

pītvā pītvā punaḥ pītvā yāvat patati bhūtale |
utthāya ca punaḥ pītvā punarjanma na vidyate ||
ānandāt tṛpyate devī mūrcchayā bhairavaḥ svayam |
vamanāt sarvadevāstu tasmāt tritayamācaret ||

ityādikulārṇavaprabhṛtitantreṣvaniyatapānasyoktatvāt kathaṃ pātraniyama iti cet 
śṛṇu śāstrābhiprāyaṃ ajñastattvabubhutsuścet | pītvā pītveti likhitavacanam 
āgalāntaṃ pibeddravyaṃ sa mukto nātra saṃśayaḥ ityādikulārṇavavacanaṃ 
yathecchayā'nurūpaṃ na sarveṣāṃ kiṃ tu pūrṇārūḍhānām | ata eva 
kulārṇave āgalāntam ityasyāvyavahitaprāk pūrṇābhiṣekayuktānāṃ pānaṃ 
devi nigadyate iti pratijñāya āgalāntaṃ pibet dravyam ityādivacanāni likhitāni | 
pūrṇābhiṣekalakṣaṇamapi tatraiva kulārṇave-

yo nindāstutiśītoṣṇasukhaduḥkhādisambhave |
samaḥ sarvatra yogīśo harṣāmarṣavivarjitaḥ || ityādinā
tattvatrayaśrīcaraṇamūlamantrārthatattvavit |
devatāgurubhaktaśca śāmbhavīmudrayā'nvitaḥ ||
sa ca pūrṇābhiṣiktaḥ syāt kauliko na tu dīkṣayā || iti ||

p. 185)

īdṛśo yaḥ pūrṇābhiṣiktaḥ sa eva pūrṇārūḍhaḥ tasyaiva āgalāntamiti 
vidhānam | ata eva amṛtārahasye-

brahmajñānī surāṃ pītvā kulācāre caran muhuḥ |
bhūmau patati tasyāṅge laganti yadi reṇavaḥ |
tāvatkālaṃ reṇusaṅkhyaṃ brahmaloke sa modate ||

iti vacane brahmajñānīti samaṣṭiśabdena kulārṇavoditaṃ viśiṣṭārthamāha | 
idānīntanāḥ tantrārthamajānanto rāgāndhāḥ svādhikāram avicārya pītvā 
pītveti tantravacanāni lokānāṃ darśayitvā svayaṃ yathecchā'cāraṃ kurvantaḥ 
pareṣāṃ buddhimapi tirodadhire | te yāvaccandradivākarau 
tāvannarakayātanāmupalabheyuḥ [atra upalabheran-iti vyākaraṇadṛṣṭyā syāt |] | 
atra pramāṇaṃ paramānandatantre-

yāvanna calate dṛṣṭiryāvanna calate manaḥ |
tāvatpānnaṃ prakurvīta paśupānamataḥ param ||
yāvannendriyavaikalyaṃ yāvanna mukhavaikṛtiḥ |
tāvadeva pibet dravyamanyathā patanaṃ bhavet || iti ||

yathā sādhakaḥ svayogyatā'nusāreṇa dravyaṃ svīkuryāt evamācāryo'pi 
yogyatāṃ dṛṣṭvaiva pātraṃ dadyāt | taduktaṃ kumārītantre-

kaulike pātramadhikaṃ prayacchatyavicārayan |
tadiyamadhikāraṃ saḥ saha tenaiva majjati || iti ||

tatraiva-

pānamekaprayatnena yāvat dravyasya vai bhavet |
tadārambhe bhavet pātraṃ na nyūnaṃ nādhikaṃ śive || iti ||

pānapātramānaṃ nīlātantre | ekaprayatnasādhyapānasādhanadravyamānaṃ 
pātraṃ bhavati iti tadarthaḥ | kiṃ ca tantrāntare-

ullāsabhedamajñātvā prāpya mūḍhatvamambike |
jihvālolupabhāvena cendriyaprīṇanāya ca |
yaḥ pibettaṃ tu tāmisre mātṛkāḥ pātayanti vai || iti ||

itthaṃ ca idānīntanānāṃ atijitendriyāṇāmapi [ajitendriyāṇāmāra-śrī.] 
ārambhollāsaparyantānudhāvanameva yuktam | 

ata evoktaṃ tantre-

p. 186)

aśaktābudhabālānāmārambhaḥ parikīrtitaḥ ||

ārambhollāsalakṣaṇaṃ tatraiva-

yasya yāvat pātramuktamārambhastasya tāvatā || iti ||

prasaktānuprasakte alaṃ pallavitena | itaḥ śeṣamagre ullāsavilāse caramakhaṇḍe 
[atra caramakhaṇḍe ityanena 10-khaṇḍe-68-sūtre bhāṣye ca ityartho jñeyaḥ |

sūtrasya punarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || iti pañcamaḥ khaṇḍaḥ-śrīḥ 
||] vakṣyāmaḥ || 22 ||

devīvisarjanam

khecarīṃ baddhvā kṣamasveti visṛjya tāmātmani saṃyojayet iti śivam || 23 ||

|| iti ..... kalpasūtre lalitānavāvaraṇapūjā nāma pañcamaḥ khaṇḍaḥ ||

khecarīṃ baddhvā bandhanānantaraṃ-

jñānato'jñānato vā'pi yadyadācaritaṃ śive |
tava kṛtyamiti jñātvā kṣamasva parameśvari ||

iti kṣamāpya visṛjet | visargo nāma pūjārthamāhūtāyāḥ punaḥ svasthānaṃ 
prati nayanam |
ātmani hṛtkamale yojayet sthāpayet | śivamiti prakaraṇasamāptidyotakam ||

|| iti...kalpasūtravṛttau śrīlalitānavāvaraṇapūjā nāma pañcamaḥ khaṇḍaḥ ||





ṣaṣṭhaḥ khaṇḍaḥ-śyāmākramaḥ

śyāme saṅgītamātaḥ paraśivanilaye mukhyasācivyabhāro-
dvāhe dakṣe dayāpūritanijahṛdaye māmakīṃ dainyavṛttim |
śrīmatsiṃhāsaneśyāṃ bhavavanapatitān dāvadagdhānnamaste
trātuṃ pīyūṣavarṣaiḥ kathaya parikaraṃ baddhavatyāṃ vivikte ||

śyāmopāstividhiḥ

śrībhagavān paraśurāmaḥ śyāmākramaṃ vivakṣuḥ 
tasyāmupāsakānāmupāsyatvajñānotpattaye aṅgīkṛtaśrīvidyopāsanasya yo 
vai svāṃ devatāmatiyajate prasvāyai devatāyai cyavate na parāṃ prāpnoti 
pāpīyān bhavati iti śrutyā 
svīkṛtaikadevatopāsteranyadevatopāsanamaniṣṭajanakamiti yat pratipāditaṃ tena 
kaluṣitacetasāṃ kāluṣyanivṛttaye ca ādau tadguṇasvarūpaṃ varṇayati-

iyameva mahatī vidyā siṃhāsaneśvarī sāmrājñī tasyāḥ pradhānasacivapadaṃ 
śyāmā tatkramavimṛṣṭiḥ sadā kāryā || 1 ||

parāśakteḥ svarūpaṃ udāsyatvaṃ ca

iyaṃ vakṣyamāṇā | iyamityuttaraṃ yeti śeṣaḥ | yā mahatī 
niravadhikamahattvavatī siṃhāsanaṃ paraśivaḥ svādhiṣṭhānarūpatvāt tasya 
īśvarī tanniṣṭhasṛṣṭisthititirodhānasaṅkalpanirvāhakartrī | taduktaṃ 
śaṅkarabhagavatpādaiḥ-

śivaḥ [ayaṃ ślokaḥ saundaryalaharyāṃ prāthamikaḥ tatpūrvārdhamidam |] 
śaktyā yukto yadi bhavati śaktaḥ prabhavituṃ |
na cedevaṃ devo na khalu kuśalaḥ spanditumapi || iti ||

agastyasaṃhitāyāmapi vidyāvatīstutau-

yayā devyā virahitaḥ śivo'pi hi nirarthakaḥ |
namastasyai sumīnākṣyai devyai maṅgalamūrtaye || iti ||

iyaṃ māyāto vilakṣaṇā cidrūpā na jaḍasvabhāvā | taduktaṃ 
sūtasaṃhitāyām-

sadākārā parānandā saṃsārocchedakāriṇī |
sā śivā paramā devī śivābhinnā śivaṅkarī |
śivābhinnā tayā hīnaḥ śivo'pi hi nirarthakaḥ || iti ||

p. 188)

nanu mukhyaṃ śive sṛṣṭyādikartṛtvaṃ tannirvāhakatvamātraṃ yadi śakteḥ 
tarhi mukhyajagatkartṛtvaniyantṛtvādi śivaniṣṭham | iyaṃ ca sahakāriṇī | tathā 
sati mukhyatvāt śivaḥ evopāsyaḥ na śaktiḥ iti cet śṛṇu | kṣityādikāryajātaṃ 
kāraṇamantareṇānupapannam ityanupapattyaiva hi śivasya śaktervā kalpanam | na 
hi carmacakṣuṣā śaktiṃ śivaṃ vā paśyāmaḥ | evaṃ kalpayitumārambhe atra 
vedāntinaḥ parasya cidrūpasya brahmaṇaḥ dharmo māyā saivāvidyā 
jaḍasvabhāvā saiva jagadupādānaṃ paraṃ brahma tu vivartopādānaṃ ata eva 
jaḍopādānatvāt jagadapi jaḍasvabhāvaṃ māyopādānatvāt mithyātvaṃ ca iti 
prāhuḥ | taṃ pakṣaṃ tāntrikāḥ na kṣamante | tathā hi yā māyā'vidyetyucyate 
sā ciddharmo'nyadharmo vā ādye dharmadharmiṇorabhedasya 
vedāntināmapyanumatatvena ciddharmasya jaḍatvānupapattiḥ | aciddharmatve 
advaitahāniḥ māyāṃ tu prakṛtiṃ vidyānmāyinaṃ tu maheśvaram iti 
pramāṇavirodhaśca | ataḥ gatyabhāvāt sā māyā ciddharma ityavaśyaṃ 
vācyam | tathā sati tasyā jaḍatvaṃ dūrato nirastam | na ca cidatiriktā śaktiḥ nāsti 
iti vācyam vayamapi tamevārthaṃ brūmaḥ | paraṃ tu 
pṛthivīvyatiriktagandhābhāve'pi dharmo dharmī iti vyavahārānurodhena 
īṣadbhedaḥ kalpyate evaṃ dvayoḥ cidrūpatve'pi īṣadbhedo vyavahārārthaṃ 
kalpyaḥ | evaṃ ca jagadupādānatvaṃ dvayorapi na sambhavati jaḍasvabhāvatvāt 
jagataḥ | na hi prakāśāt tamo bhavitumarhati | ataḥ citi jagat sūkṣmarūpeṇa bīje 
vaṭavṛkṣavat sarvadā astyeva | 
tadavayavaśaithilyapūrvakavistārasaṅkocakartṛtvameva citi na tu tadupādānatvaṃ 
yathā vaṇijaḥ prabhāte krayyavastūnāṃ prasāraṇaṃ rātrau saṅkocaḥ 
tādṛśaṃ kartṛtvaṃ citaḥ | tatsahakāriṇī cicchaktiḥ ||

nanu cidatiriktā īṣadbhedavatī tanniṣṭhakartṛtvanirvāhikā śaktiḥ 
kimityaṅgīkriyate cityeva tatkartṛtvamāstām | anyathā tulyayuktyā kulālādiṣvapi 
ghaṭakartṛtvāśrayā ekā śaktiḥ sidhyet iti cet na śrutismṛtilokavyavahārāṇāṃ 
sattvāt | parā'sya śaktirvividhaiva śrūyate iti śrutiḥ | devībhāgavate'pi-

śaktiḥ karoti brahmāṇḍaṃ sā vai pālayate'khilam |
icchayā saṃharatyeṣā jagadetaccarācaram ||
na viṣṇurna haraḥ śakro na brahmā na ca pāvakaḥ |
na sūryo varuṇaḥ śaktāḥ sve sve kārye kathaṃcana ||
tayā yuktā hi kurvanti svāni kāryāṇi te surāḥ |
kāraṇaṃ saiva [naiva-śrī.] kāryeṣu pratyakṣeṇāvagamyate ||

p. 189)

vastujālaṃ śaktihīnaṃ [hīnaiḥ-śrī.] śaktaṃ kartuṃ na kiñcana |
śaktaṃ tu parameśāni śaktyā yuktaṃ yadā bhavet ||

iti bahuvistareṇa | ā gopālaṅganamāca [atrāśuddhāni akṣarāṇi saṃśodhya 
vācyāni |] paṇḍitam idaṃ kāryaṃ kartuṃ mama śaktirasti mama śaktirnāsti iti 
vyavaharantyavivādena | tasmāt bahupramāṇasiddhā śaktiḥ tannirvāhyaṃ 
jagadapi śivakukṣau sadā sūkṣmarūpeṇāstyeva ||

atha vā cito yā śaktiḥ tatpariṇāmarūpaṃ jagat | taduktaṃ vāsiṣṭhe-

cidvilāsaḥ prapañco'yaṃ sakhe [sa ca te-śrī.] te duḥkhadaḥ katham || iti ||

etena cicchaktyoḥ īṣadbhedāṅgīkārāt cito nirvikāratvabodhakaśrutiraviruddhā 
atyantabhedānaṅgīkārāt advaitapratipādakaśrutayo'pyabādhitāḥ | etādṛśī 
śaktiḥ vastumātre anubhūyate kāryotpattyanantaraṃ na tataḥ prāk | 
amumevārthaṃ bhūtapañcakaviveke śrīvidyāraṇyasvāmicaraṇāḥ apyāhuḥ-

nistattvā kāryagamyā'sya śaktirmāyā'gniśaktivat | 
na hi śaktiṃ kvacit kaścit budhyate kāryataḥ purā || iti ||

evaṃ śivaniṣṭhāyāṃ tadabhinnāyāṃ taddharmarūpāyāṃ 
tanniṣṭhakartṛtvanirvāhikāyāṃ siddhāyāṃ saivopāsyā | na cidrūpaḥ śivaḥ 
tasyānupāsyatvāt [tasya nāma śaktyanavachinnasya brahmaṇaḥ ityarthaḥ |] 
upāsanā nāma upāsyaniṣṭhaguṇanāmakīrtanam | śaktirahite kevale 
guṇābhāvāt nirguṇasya dhyānastutikīrtanādi kathaṃ bhavet | taduktaṃ 
yoginītantre-

śaktyā vinā śive sūkṣme nāma dhāma na vidyate || iti ||

yato vāco nivartante aprāpya manasā saha || iti śrutiśca |

neti neti iti sarvaniṣedhaśeṣatvenaiva tasya jñeyatvāt 
kevalaśivaviṣayakajñānasyopāsanādikarmavirodhitvena 
tādṛśacaramavṛtterupāsanāsādhyatvāt kevalaśivastvanupāsyaḥ | taduktaṃ 
devībhāgavate'pi-

śivo'pi śavatāṃ yātaḥ kuṇḍalinyā vivarjitaḥ || iti ||

yoginītantre'pi-

yajjñāne'pi mahādevi śarma varma na kiṃcana || iti ||

kiṃ ca yathā kathaṃcit valayākāreṇa manasaḥ nirākāragrahaṇārthaṃ 
preraṇe'pi śubhāśubhadharmahīnatvāt kṣaṇamātramapi na sthātumarhati | 
taduktaṃ śrībhagavadgītāyām-

p. 190)

kleśo'dhikatarasteṣāmavyaktāsaktacetasām || iti ||

atastasyaiva manasaḥ sthairyārthaṃ kiñcidrūpaṃ kalpanīyam | yacca 
parabrahmaṇi kalpitaṃ rūpaṃ nāmadhāmasahitaṃ tadeva śaktipadavācyam | 
tadapyuktaṃ bhāgavate-

evaṃ sarvagatā śaktiḥ sā brahmeti vivicyate |
saguṇā nirguṇā ceti dvidhoktā sā manīṣibhiḥ |
saguṇā rāgibhiḥ sevyā nirguṇā tu virāgibhiḥ |
dharmārthakāmamokṣāṇāṃ svāminī sā nirākulā ||
dadāti vāñchitānarthānarcitā vidhipūrvakam || iti ||

evamuktapramāṇayuktikalāpaiḥ upāsyā parā śaktiḥ | paraśivaśca nirguṇaḥ | 
tadviṣayiṇī vṛttistu paramapuruṣārtharūpatvāt ambopāsanāsādhyetyupapannaṃ 
siṃhāsaneśvarītvaṃ sāmrājñītvam ||

nirguṇa eva śivaḥ yaḥ bahu syāṃ prajāyeya iti icchāśaktyā yuktaḥ 
sṛṣṭhyunmukhaḥ sa eva śaktipadavācyaḥ śiva eva śaktirūpeṇopāsyaśceti 
tattvamavagantavyam ||

yā īdṛśī tasyāḥ pradhānasacivapadam atra sacivapadaṃ 
sācivyarūpadharmaparaṃ tasya padaṃ āśrayaḥ śyāmeti | tasyāḥ yaḥ kramaḥ 
tasya yā vimṛṣṭiḥ anusaraṇaṃ tat sadā kāryam | atra sadetyanena yāvajjīvaṃ 
prāptau yathā agnihotravidheḥ yāvajjīvaṃ prāptau sāyaṃ juhoti prātarjuhoti iti 
vākyāntareṇa saṅkocaḥ tathā asyā eva śyāmāyāḥ prakaraṇe agre evaṃ 
nityasaparyāṃ kurvan lakṣajapaṃ japtvā iti vākyena [idamatraiva ṣaṣṭhakhaṇḍe-
37 mūlasūtresti |] lakṣajapaparyantaṃ sakṛtpūjā kāryā na tu taduttaramiti 
saṅkocaḥ || 1 ||

śyāmāyāḥ upāsyatopapattiḥ 

nanu yā sāmrājñī sarvaniyantrī svatantrā tāṃ parityajya kiṃ tadanuvartinyāḥ 
śyāmāyāḥ upāsanenetyāśaṅkāyāṃ tadupāsanāmupapādayiṣyan 
prathamaṃ lokadṛṣṭāntena dṛḍhayati-

pradhānadvārā rājaprasādanaṃ hi nyāyyam || 2 ||

loke rājadarśanotsukāḥ ādau pradhānamupasevya tadvārā rājadarśanaṃ 
gṛhṇanti | tena phalaṃ satvaraṃ anāyāsena bhavatīti dṛṣṭaṃ loke | tadvadatrāpi 
prathamaṃ tatpradhānabhūtāyāḥ śyāmāyāḥ prathamamupāsanaṃ 
nyāyyamiti bhāvaḥ | dvāretyanena pradhānopāsanapūrvavṛttitvaṃ sūcitaṃ 
nyāyyam ityanena atyantamanāvaśyakatā'pi sūcitā | paraṃ tu yaḥ ko'pi 
samarthaḥ sacivādīnanādṛtya svayameva rājakṛpāṃ sampādya tasmāt phalaṃ 
sampādayatītyayamapi pakṣo loke kvacidasti | tathā'pi pradhānadvārā 
rājaprasādanaṃ nyāyyaṃ varamityarthaḥ | ayaṃ bhāvaḥ yaśca 
pradhānadevatākṛpāṃ sākṣāt sampādayitumasamarthaḥ 

p. 191)

saḥ prathamaṃ dīkṣāṃ sampādya śrīgaṇapatyupāstiṃ kṛtvā tataḥ 
śyāmopāstiṃ vārāhyupāstiṃ paropāstiṃ ca vidhāya tāsāṃ kṛpāṃ 
sampādya paścāt śrīlalitopāstiṃ ārabheta | samarthastu dīkṣottaraṃ 
gaṇapatyupāstyanantaraṃ śrīlalitākramamārabheta | atirātre ṣoḍaśinaṃ 
gṛhṇāti nātirātre ṣoḍaśinaṃ gṛhṇāti itivadvikalpaḥ iti tattvam | 
phalādhikyakāmaḥ uktakrameṇa lalitopāstiṃ kuryāt | nyunaphalakāmaḥ 
gaṇapatyupāstyanantaraṃ lalitopāstiṃ kuryāt iti vyavasthā || 2 ||

prātaḥkṛtyaṃ sandhyā'ntam

evamupāstyadhikāriṇaṃ pradarśya upāstiprakaraṇaṃ vaktuṃ prakramate-

brāhme muhūrte cotthāya śayane sthitvaiva śrīpādukāṃ praṇamya 
prāṇānāyamya mūlādidvādaśāntaparyantaṃ jvalantīṃ parasaṃvidaṃ 
vicintya manasā mūlaṃ triśo japtvā bahirnirgatya 
vimuktamalamūtrodantadhāvanajihvāgharṣaṇakaphavimocananāsāśodhana-
viṃśatigaṇḍūṣān vidhāya || 3 ||

śrīpādukāṃ gurupādukām [gurupādukāmityasya gurutrayapādukāmityarthe 
tātparyam |] | prāṇāniti prāṇāyāmalakṣaṇamuktaṃ sanatkumāratantre-

prāṇāyāmatrayaṃ kuryāt mūlena praṇavena vā |
atha vā mantrabījena yathoktavidhinā sudhīḥ ||
pūrayet ṣoḍaśabhirvāyuṃ kumbhayecca caturguṇaiḥ |
recayet kumbhakārdhena aśaktastatturīyataḥ ||
tadaśaktau taccaturthaiḥ syādevaṃ prāṇasaṃyamaḥ |
prāṇāyāmaṃ vinā naiva pūjanādiṣu yogyatā || iti ||

samayāṅkamātṛkāyām-

iḍayā pūrayedvāyuṃ sakṛdvai mūlavidyayā |
madhyanāḍyā kumbhayecca vedasaṅkhyā varānane ||
netrasaṅkhyākrameṇaiva recayet piṅgalā'dhvanā |
punaḥ punaḥ krameṇaiva yathā vāratrayaṃ bhavet || iti ||

dantadhāvanādīnāṃ smṛtiprāptānāmuktakramalābhārthaṃ pāṭhaḥ | ataḥ 
pāṭhakrameṇānuṣṭheyam | yadyapi prāṇāyāmaprakārastvagre [agre 
nāmaitatkhaṇḍīya-9-sūtre-194-patre-ityarthaḥ |] sūtre'pi vakṣyate tathā'pi 
vāyudhāraṇasamarthānāṃ vistṛtatayā pradarśanaṃ aśaktānāṃ sūtrasthaṃ 
jñeyam | viṃśatigaṇḍūṣānityantaḥ śeṣaḥ spaṣṭārthaḥ || 3 ||

p. 192) 

mantrabhasmajalasnāneṣviṣṭaṃ vidhāya vastraṃ paridhāya || 4 ||

mantrasnānamuktaṃ tripurārṇave-

vastreṇārdreṇa cāṅgānāṃ kṛtvā proñchanamāditaḥ |
mūlaṃ japan saptadhā tu āpādatalamastakam ||
talābhyāṃ saṃspṛśet devi mantrasnānaṃ prakīrtitam |
etatsnānamaśaktasya vihitaṃ śuddhihetave || iti ||

bhasmasnānamuktaṃ śivarahasye-

śuddhaṃ bhasma kare dhṛtvā mūlamaṣṭaśataṃ japet |
sarvāṅgeṣvanulepena bhasmasnānamudāhṛtam || iti ||

jalasnānaṃ śrīlalitāprakaraṇoktam [idaṃ śrīkrame 3 khaṇḍe-88-patre-4 
mūlasūtre bhāṣye ca uktam |] | atra mukhyaṃ jalasnānaṃ jalādyalābhe 
karmakāle prāpte aśaktau gurukāryārthaṃ kṣipraṃ gacchatā ca mantrasnānādi 
kāryam | taduktaṃ nāradapāñcarātre atha māntraṃ śubhaṃ śṛṇu 
ityupakramya 

toyābhāve tu samaye durgamārge'vasīdataḥ |
gamane kṣiprasiddhyarthaṃ gurukāryeṣvatandritaḥ |
mantrasnānaṃ prakurvīta.............. iti ||

ito'pi laghusnānaṃ vīratantre-

maṇibandhādadhohastau pādau gulphau tathā'nanam |
śodhayet snānametat syāt pañcāṅgaṃ śuddhidāyakam || iti ||

imāni snānāni śaktitāratamyāt aśucitvatāratamyācca vyavasthitāni jñeyāni | 
anyānyapi mānasikadhyānasnānādīni [jñānasnānādīnītyarthaḥ |] 
granthavistarabhayāt neha likhitāni tantrāntarāt draṣṭavyāni || 4 || 

sandhyāṃ vidhatte-

sandhyāmupāsya savitṛmaṇḍale devīṃ sāvaraṇāṃ vicintya mūlena trirarghyaṃ 
dattvā yathāśakti santarpya || 5 ||

sandhyāmitīdamutpattivākyaṃ atra kathambhāvākāṅkṣāyāmāha 
savitṛmaṇḍale ityārabhya santarpyetyantena | tarpaṇamapi mūlamuccārya 
śrīśyāmāṃ tarpayāmi svāhā iti mantreṇa | mālinītantre 
tarpaṇamantroddhārasya mūlānte mālinīṃ procya tarpayāmyagnivallabhām iti 
lekhāt | prakṛte 

p. 193)

mantrasyānuktatvāt mantrākāṅkṣāyāḥ tantrāntarasthamantrādaraḥ | 
yathāśakti ityanena saṅkhyāyāḥ tarpaṇavṛtteranaṅgatvaṃ sūcitam ||

atra nibandhakāraḥ etadantamāhnikaṃ svatantropāstau puraścaraṇakāle ca na tu 
śrīkramāṅgatvena sahānuṣṭhāne iti jagau | tanna | 
pūrvoktalaukikanyāyadṛṣṭāntena lalitopāsteḥ pūrvaṃ śyāmopāstiḥ sidhyati | 
tadanuṣṭhānamaryādā lakṣajapaparyantamiti agrimavākyena [agrimavākyena 
nāma-etatkhaṇḍīya-37-sūtrasthavākyena-ityartho jñeyaḥ |] vyavasthitam | itthaṃ 
ca śaṅgītamātṛkāmiṣṭvā saṃvitsāmrājñīm (ityādi) kolamukhīṃ varivasyeta 
ityagrimasūtre [agrimasūtre nāma-agratana-7-
khaṇḍīyavārāhīkramasthaprathamasūtragatasaṅgītamātṛkāmiṣṭvā 
ityetadvākyāntastha ktvā pratyayena-iti-jñeyam |] ktvāpratyayena 
vārāhyupāstipūrvavṛttitvaṃ spaṣṭam | itthaṃ sati 
kolamukhīvarivasyāpūrvakālasambandhinī yā śyāmāvarivasyā japaśca sa 
sarvo'pi śrīlalitākramārambhāṅgabhūtaḥ nānyo lalitākrameṇa saha 
anuṣṭīyamānaḥ śyāmākramagandho'pi sūtre pratīyate | evaṃ sati 
puraścaraṇādikāle āhnikam anyatra neti kiṃ pramāṇamanusṛtya lilekha | 
tadabhiprāyaṃ sa eva jānāti | vastuno lalitāprayogānaṅgabhūtaśyāmākramaḥ 
sūtre aprasiddhaḥ | aṅgabhūtakramamuddiśyāhnikapāṭhāt aṅgabhūte'pi 
krame sarvamāhnikaṃ niśśaṅkaṃ pravartata eva || 5 ||

yāgagṛhapraveśādi prāṇāyāmāntaṃ kṛtyam

sandhyāmuktvā pūjāṃ vaktumārabhate-

yāgagṛhaṃ praviśyāsane ādhāraśaktikamalāsanāya nama ityupaviśya || 6 ||

atha prāṇāyāmaprakāramāha-

samastaprakaṭaguptasiddhayoginīcakraśrīpādukābhyo [cakra iti nāsti-a.] nama iti 
śirasyañjalimādhāya svagurupādukāpūjāṃ [gaṇapatipūjāṃ ca-śrī.] ca 
vidhāya || 7 ||

svagurupādukāpūjāṃ vidhāya | śyāmāgurupādukā vakṣyamāṇā 
[etatkhaṇḍīya 32 sūtre-203-patre ||] | tena svamūrdhni puṣpākṣatān kṣipet || 7 ||

aiṃ hraḥ astrāya phaṭ ityastramantreṇa aṅguṣṭhādikaniṣṭhāntaṃ karatalayoḥ 
kūrparayoḥ dehe ca vyāpakatvena vinyasya || 8 ||

p. 194)

vyāpakatvalakṣaṇaṃ pūrvamuktam [pūrvaṃ nāma-2-khaṇḍe 
gaṇanāyakapaddhatau 4 sūtrabhāṣye-75-patre-iti jñeyam |] | aṅgulyādibhedena 
mantrāvṛttiḥ pratipradhānamiti nyāyāt || 8 ||

yaṃ iti vāyuṃ piṅgalayā'kṛṣya dehamupaviśoṣya raṃ iti vāyumākṛṣya 
dehaṃ dagdhvā vaṃ iti vāyumākṛṣyamṛtena dagdhadehabhasma siktvā laṃ iti 
vāyumākṛṣya dṛḍhaṃ vidhāya haṃsa iti vāyumākṛṣya śivacaitanya mutpādya 
|| 9 || 

yaṃ ityasya viśoṣya ityanenānvayaḥ vāyubījatve śoṣaṇakāyakṣamatvāt | 
śoṣaṇaṃ nāma jalāṃśasyākarṣaṇam | vāyvākarṣaṇaṃ tu tūṣṇīmeva | 
iḍāpiṅgale nāradīye nirūpite-

piṅgalā vāmanāsā syādiḍā taditarā smṛtā || iti ||

raṃ iti vahnibījena dehadāhaḥ | amṛtena amṛtabījena vaṃ ityanena 
dagdhabhasmasecanaṃ punaḥ śarīrotpādanārtham | laṃ iti pārthivabījena 
siktabhasmani kāṭhinyasampādanam | tataḥ tasmin haṃsaḥ iti mantreṇa 
śivacaitanyasampādanam ||

etāvatparyantaṃ bhūtaśuddhiṃ vidhāya śrīkramoktāṃ prāṇapratiṣṭhāṃ ca 
kuryāt || 9 ||

mūlamekaśa uccārya vāyumākṛṣya triśaḥ uccārya kumbhayitvā sakṛduccārya 
recayet | evaṃ recakapūrakakumbhakaṃ tridhā saptadhā daśadhā ṣoḍaśadhā 
vā viracya tejomayatanuḥ || 10 ||

ekaśaḥ ekavāram | evamagre'pi recakapūrakakumbhakamiti dvandvasamāsāt 
sāhityalābhaḥ | atra yadyapi pūrakaṃ madhye patitaṃ recakaṃ prathamaṃ 
kumbhakaṃ caramam iti vyutkramaḥ tathā'pi nātra krame tātparyaṃ kiṃtu 
sāhitye | kramastu pūrvapāṭhānusāreṇaiva | tridhetyārabhya saṅkhyāvṛddhau 
phalādhikyam | tejomayatanuḥ ityanena prāṇāyāmakriyāyāḥ pāpaśodhakatvaṃ 
sūcitam || 10 ||

ṣaḍaṅgādinyāsapañcakam

atha nyāsajālaṃ vadati-

ṣaḍaṅgaṃ bālāsahitāṃ mātṛkāṃ mūlahṛnmukheṣu ratiprītimanobhavān 
vinyasya || 11 ||

p. 195)

vinyasya iti sarvatrānuṣajya yojyam | tathā ca ṣaḍaṅgaṃ vinyasyetyarthaḥ | 
etanmantrasvarūpaṃ [etadarthametatkhaṇḍasthapurastana-15-20-sūtre tadbhāṣye ca 
dṛśye |] upariṣṭāt spaṣṭīkariṣyāmaḥ | ayameko nyāsaḥ | bālāsahitāṃ 
mātṛkāṃ vinyasya iti dvitīyo nyāsaḥ | mātṛkāṃ bahirmātṛkām | 
nyāsasthānāni tantrāntarādavagantavyāni | 
agrevakṣyamāṇatritārīkumārīkevalakumāryo [ayaṃ tritārīkumārīmantraḥ 
pratyakṣaḥ atraiva khaṇḍe 20 sūtrabhāṣye spaṣṭaḥ | kumārīśabdena ca 
tryakṣaro bālāmantro jñeyaḥ | so'pi atraivādhaḥ tatrāpi ca spaṣṭaḥ |] vikalpena 
prāptau tadbādhakaṃ kevalabālāsahitāmiti viśeṣaṇam | tena 
mātṛkānyāsamantre sadā bālāyoga eva anyatra vikalpena bālāyogaḥ | 
vyāsasthānānāṃ bahuprasiddhyā nātra lekhaḥ | mantrasvarūpaṃ ca aiṃ klīṃ 
sauḥ aṃ namaḥ | evamagre'pi | mūlaṃ mūlādhārasthānam | tadāditriṣu 
ratyāditrayaṃ vinyaset | ayaṃ tṛtīyo nyāsaḥ || 11 ||

mūlaṃ saptadaśadhā khaṇḍayitvā ṣaṭ brahmabile trīṇi lalāṭe catvāri 
bhrūmadhye dakṣavāmekṣaṇayoḥ ṣaṭ cāṣṭau saptāsye 
dakṣavāmaśrutikaṇṭheṣvekaikaṃ dakṣavāmāṃsayoraṣṭau ca daśa hṛdi daśa 
dakṣavāmastanayoraṣṭāvaṣṭau nava nābhau dviḥ svādhiṣṭhāne ṣaḍādhāra 
evaṃ vinyasya || 12 ||

khaṇḍayitvā vibhajya | vibhāgaprakāraṃ vibhaktakhaṇḍaiḥ 
kriyamāṇanyāsasthānāni cāha ṣaḍityādinā | ṣaḍityādisaṅkhyāvācakāni 
padāni mūlasthavarṇaparāṇi | ādimaṣaḍvarṇān namo'ntānuccārya 
brahmarandhre nyaset | evamagre'pi | dakṣavāmekṣaṇayoḥ ṣaṭ cāṣṭāvityatra 
dakṣanetre ṣaḍvarṇāḥ kramaprāptāḥ vāmanetre aṣṭau yathāsaṅkhya yojyam | 
evameva dakṣavāmāṃsayoḥ ityādau draṣṭavyam | sarvatra tritārīkumārīyogaḥ 
kāryaḥ | svādhiṣṭhānaṃ ṣaḍdalakamalaṃ guhyasthānastham | ādhāro 
mūlādhāraḥ sa [etadādhārasvarūpajñānāya 88-patre śrī gaṇeśakrame-3-
sūtrabhāṣye tathā ca-111-patre-śrīkrame-28sūtrabhāṣyaṃ ca paśyantu |] 
pūrvaṃ vyākhyātaḥ | ayaṃ caturtho nyāsaḥ || 12 ||

pañcamamāha-

punarādhārādibrahmabilaparyantaṃ saptadaśakhaṇḍānuktasthāneṣu vinyasya || 
13 ||

pūrvasmādvailakṣaṇyaṃ mūlādhārādisthānavaiparītyamātraṃ na 
[khaṇḍakramaśca pūrvavat khaṇḍavaiparītyabodhakapramāṇābhāvāt-ba.] tu 
saptadaśakhaṇḍavaiparītyaṃ pramāṇābhāvāt ||

nibandhakāraḥ khaṇḍavaiparītyaṃ lilekha | tasya pramāṇaṃ tadīyecchaiva na 
tvanyat | ayaṃ pañcamo nyāsaḥ || 13 ||

p. 196)

mandirārcanam

evaṃ nyāsajālamuktvā mandirārcanaṃ vadati-

amṛtodadhimadhyaratnadvīpe muktāmālādyalaṅkṛtaṃ caturdvārasahitaṃ 
maṇḍapaṃ vicintya tasya prāgādicaturdvāreṣu sāṃ sarasvatyai lāṃ lakṣmyai 
śaṃ śaṅkhanidhaye paṃ padmanidhaye namaḥ lāṃ indrāya vajrahastāya 
surādhipataye airāvatavāhanāya saparivārāya namaḥ rāṃ agnaye śaktihastāya 
tejo'dhipataye ajavāhanāya saparivārāya namaḥ ṭāṃ yamāya daṇḍahastāya 
pretādhipataye mahiṣavāhanāya saparivārāya namaḥ kṣāṃ nir-ṛtaye 
khaḍgahastāya rakṣo'dhipataye naravāhanāya saparivārāya namaḥ vāṃ 
varuṇāya pāśahastāya jalādhipataye makaravāhanāya saparivārāya namaḥ-
yāṃ vāyave dhvajahastāya prāṇadhipataye ruruvāhanāya saparivārāya namaḥ 
sāṃ somāya śaṅkhahastāya nakṣatrādhipataye aśvavāhanāya saparivārāya 
namaḥ hāṃ īśānāya triśūlahastāya vidyā'dhipataye vṛṣabhavāhanāya 
saparivārāya namaḥ oṃ brahmaṇe padmahastāya satyalokādhipataye 
haṃsavāhanāya saparivārāya namaḥ śrīṃ viṣṇave cakrahastāya 
nāgādhipataye garuḍavāhanāya saparivārāya namaḥ oṃ vāstupataye brahmaṇe 
namaḥ ityekādaśadikṣu ekādaśa devānarcayet || 14 ||

ekādaśadiśaśca catasrodiśaḥ catasro'vāntaradiśaḥ ūrdhvam adhaḥ samastaṃ 
ceti jñeyāḥ | śeṣaṃ svayamūhyam || 14 ||

śyāmākramamantreṣu bījaviśeṣayogaḥ 

śyāmākrame sarvamantreṣu bījaviśeṣayogamāha-

śyāmākramamantrāṇāmādau tritārīkumārīyogaḥ kumārīyogo vā tritārī 
pūrvoktā kumārī bālā śeṣamuttānam || 15 ||

arthaḥ spaṣṭaḥ || 15 ||

kartṛguṇaviśeṣavidhiḥ 

karturaṅgabhūtān kāṃścit guṇānāha-

gandhadravyeṇa liptāṅgastāmbūlāmoditavadanaḥ prasannamanā bhūtvā || 16 ||

p. 197)

śyāmācakralekhanaprakāraḥ

atha śyāmācakralekhanaprakāramāha-

suvarṇarajatatāmracandanamaṇḍaleṣu bindutrikoṇapañcakoṇāṣṭadalaṣoḍaśa-
dalāṣṭadalacaturdalacaturasrātmakaṃ cakrarājaṃ vilikhya || 17 ||

maṇḍaleṣu phalakeṣu | pañcakoṇaṃ pañcāsrakuṇḍākāram | nirmāṇaṃ 
bindumārabhya nirgamanarītyā jñeyam || 17 ||

sāmānyārghyavidhiḥ

atha sāmānyārghyavidhimāha-

mūlena trivārajaptena śuddhajalena caturasravṛttaṣaṭkoṇatrikoṇabindūn 
praveśena matsyamudrayā vidhāya aṃ ātmatattvāya ādhāraśaktaye vauṣaṭ-
ityādhāraṃ pratiṣṭhāpya dhūmrārcirūṣmā jvalinī jvālinī visphuliṅginī 
suśrīḥ surūpā kapilā havyavāhā kavyavāhetyagnikalā abhyarcya uṃ 
vidyātattvāya padmānanāya vauṣaṭ-iti pātraṃ pratiṣṭhāpya tapinī tāpinī 
dhūmrā marīcirjvālinī ruciḥ suṣumnā bhogadā viśvā bodhinī dhāriṇī 
kṣamā iti pātre sūryakalā abhyarcya maṃ śivatattvāya somamaṇḍalāya namaḥ-
iti śuddhajalamāpūrya amṛtā mānadā pūṣā tuṣṭiḥ puṣṭī ratiḥ dhṛtiḥ 
śaśinī candrikā kāntirjyotsnā śrīḥ prītiraṅgadā pūrṇā pūrṇāmṛtā ceti 
candrakalā abhyarcya agnīśāsuravāyuṣu madhye dikṣu ca ṣaḍaṅgāni vinyasya 
astreṇa saṃrakṣya kavacenāvakuṇṭhya dhenuyonī pradarśya mūlamantreṇa 
saptaśo'bhimantrya tajjalavipruḍbhiḥ yāgagṛhaṃ pūjopakaraṇāni cāvokṣya || 18 
||

praveśena [saṃskṛtajalaṃ maṇḍalakaraṇārthameva na tu tatpūraṇārthaṃ 
pramāṇābhāvāt pūraṇaṃ tu mūlānabhimantritaśuddhajalenaiva jñeyam 
ityadhikaḥ-ba.] praveśarītyā | matsyamudrayā sā coktā tantre-

adhomukhe vāmakare dakṣiṇaṃ tādṛśaṃ karam |
sthāpayenmatsyamudreyaṃ tāntrikaiḥ parikīrtitā || iti ||
dakṣapāṇitalaṃ devi vāmapṛṣṭhopari nyaset |
aṅguṣṭhadvitayaṃ samyak ṛjurūpamadhomukham ||
matsyamudreyamākhyātā maṇḍalādiprakalpane ||

iti paramānandatantre'pi | ādhāralakṣaṇaṃ tatraiva-

p. 198)

ādhārāṇyapi caiteṣāṃ vartulaṃ vā trikoṇakam |
yonyākāraṃ ca ṣaṭkoṇamaṣṭakoṇamathāpi vā ||
apadaṃ tripadaṃ pañcaṣaṭsaptāṣṭapadaṃ tathā |
madhyachidraṃ yathā pātrapṛṣṭhaṃ na syācca bhūgatam ||
antarnaiva nimagnaṃ syāt tathā kartavyamambike || iti ||

namo'ntaiścaturthyantairetairnāmabhiḥ vahnikalāpūjanamādhāre kuryāt | 
namo'ntatvaṃ caturthyantatvaṃ sūryendukalāsvapi draṣṭavyam | pātraṃ 
pratiṣṭhāpya iti niruktasthāpitādhāre iti śeṣaḥ | vahnyādikalānāmabhyarcanaṃ 
paścimādiprādakṣiṇyena | pramāṇamuktaṃ prāk [atra prākśabdārthe 
śrīkramokta-23-sūtrabhāṣye 107-patre dṛśyam |] | śeṣaṃ spaṣṭam | agnīśeti 
tatprakāraḥ pūrvameva darśitaḥ [pūrvameva ityanena-144-145-patrayoḥ-4 khaṇḍe 
lalitākrame 8-mūlasūtre-tadbhāṣye ca athavā uparitanamūlasūtrepi-iti jñeyam] | 
astreṇa astramantreṇa | kavacena kavacamantreṇa ||

kecittu avakuṇṭhyetyanena avakuṇṭhanamudrākavacamantrayoḥ grahaṇaṃ kāryam 
| avakuṇṭhanamudrāsvarūpamuktaṃ tantre-

hastadvayaṃ muṣṭirūpaṃ tarjanyāvṛjurūpake |
yugapat  bhrāmayet tābhyāṃ mudreyamavakuṇṭhinī ||

iti prajaguḥ ||

dhenuḥ dhenumudrā | iyaṃ loke bahurūḍhā | tathā'pi tatpramāṇaṃ likhyate-

tarjanyādicatuṣkaṃ tu protaṃ hastadvayasthitam |
dakṣatarjanyanāmāyāṃ vāmamadhyakaniṣṭhike ||
vāmatarjanyanāmāyāṃ dakṣamadhyakaniṣṭike |
adhomukhī dhenumudrā..................... ||

iti paramānandatantre sthitam | yonistu [iyaṃ yonimudrā-170-patre-5-khaṇḍe-
śrīlalitākramīya 15 sūtrabhāṣyānte dṛśyā-athavā ddi. pa. 15-8/2 viṣaye 
dṛśyā |] pūrvamuktā saptaśaḥ saptakṛtvaḥ | tajjalavipruḍbhiḥ 
sāmānyārghyavipruḍbhiḥ || 18 ||

viśeṣārghyavidhiḥ

tābhirīkārāṅkitatrikoṇa vṛttacaturasraṃ [ṣaṭkoṇavṛ-śrī.] maṇḍalaṃ vidhāya 
tasmin puṣpāṇi vikīrya pūrvavadādhāraṃ pratiṣṭhāpya agnikalā abhyarcya 
pātraṃ pratiṣṭhāpya tasmin pātre hrīṃ aiṃ mahālakṣmīśvari paramasvāmini 
ūrdhvaśūnyapravāhini 

p. 199)

somasūryāgnibhakṣiṇi paramākāśabhāsure āgacchāgaccha viśa viśa pātraṃ 
pratigṛhṇa pratigṛhṇa huṃ phaṭ svāheti puṣpāñjaliṃ vikīrya sūryakalā 
abhyarcya 

brahmāṇḍākhaṇḍasambhūtamaśeṣarasasambhṛtam |
āpūritaṃ mahāpātraṃ pīyūṣarasamāvaha ||

ityādimamāpūrya dvitīyaṃ nikṣipya akathāditrirekhā'ṅkitakoṇatraye halakṣān 
madhye haṃsaṃ ca vilikhya mūlena daśadhā abhimantrya candrakalāḥ abhyarcya-
agnīśāsuravāyuṣu madhye dikṣu ṣaḍaṅgāni vinyasya astreṇa saṃrakṣya 
kavacenāvakuṇṭhya dhenuyonī pradarśayet || 19 ||

tābhiḥ sāmānyārghyodakasambandhinībhiḥ adbhiḥ | īkārāṅkiteti 
trikoṇaviśeṣaṇam | trikoṇamadhye īkāraṃ [īṃkāraṃ] likhet iti bhāvaḥ | idaṃ 
na pūrvavat praveśarītyā nirmāṇābhiprāyakam kiṃ tu nirgamarītyā 
trikoṇamārabhya caturasrāvasānapāṭhāt trikoṇaṃ sarvāntaḥ caturasraṃ 
sarvasmāt bahiriti prāyo dṛṣṭatvāt | pūrvavaditi [pūrvavat-nāma-atraiva khaṇḍe 
197-patre 18-sūtrokta-aṃ ātmatattvāyetyādivadityarthaḥ |] 
sāmānyārghyādhāravadityarthaḥ | agnikalāḥ [etatkhaṇḍe 197-patre mūlasūtre-
eva etāḥ kalāḥ santi |] dhūmrārcirādīḥ abhyarcya pātraṃ pratiṣṭhāpya 
ityatrāpi pūrvavat ityanuvartate yogyatvāt | tena pātrapratiṣṭhāpane 
pūrvamantralābhaḥ [atra pūrvamantraḥ atraiva khaṇḍe-197-patre-uparitana-18-
mūlasūtre eva- uṃ vidyātatvāyetyādirasti |] | ādimadvitīyau proktau atra sūtre 
tena nātra tṛtīyacaturthapañcamāḥ anuktatvāt | [na hi] gaṇapatikrama eva 
madhyamaṃ cetivat cakāro'sti agre mapañcakamurarīkṛtyeti vā liṅgamasti yena 
tallābho bhavet | tasmāt yāvaduktam | aśca kaśca yaśca te ādau yāsāṃ tāḥ 
trirekhāḥ | avarṇapārabhya visargāntā ekā varṇamayī rekhā tataḥ kāditāntā 
tataḥ thādisānteti bhāvaḥ | viśeṣasyānuktatvāt svāgrādiprādakṣiṇyena 
halakṣān trīn varṇān triṣu vilikhya madhye haṃsa iti uttarasaṃsthaṃ likhitvā | 
idaṃ sarvaṃ pātrasthadravye tatsaṃskārarūpaṃ lekhanam | itthaṃ ca 
īdṛśalekhena dravyasaṃskāraṃ bhāvayet iti tadarthaḥ | daśadhā etadanantaraṃ 
āvartitamūlenetyasya viśeṣaṇam | dhenuyonī pradarśayet iti dhenumudrāṃ 
[etaddhenumudroddhāraḥ 198-patre-atraivānugata-18-sūtrabhāṣye-athavā ddi. pa. 
15-8/1 viṣayesti |] pradarśya yonimudrayā [yonimudroddhāraśca-170-patre-5-
khaṇḍe śrīlalitākrame-15 sūtrabhāṣye-athavā ddi. pa. 15-8/2 vi. dṛśyaḥ |] 
praṇamet | etadarghyasaṃśodhanamiti kvacit pustake pāṭhaḥ || 19 || 

p. 200)

cakradevīpūjā

itthaṃ pātrāsādanamuktvā śrīdevatāyāḥ mūrtikalpanāmantramāha-

cakramadhye śrīmātamuktvā gīśvarīmūrtaye namaḥ iti mūrtiṃ kalpayitvā 
bhūyaḥ śrīmātamuktvā gīśvaryamṛtacaitanyamāvāhayāmi ityāvāhya 
ṣoḍaśabhirupacarya āśuśukṣaṇitryakṣarakṣaḥprabhañjanadikṣu devyā maulau 
paritaśca pūjyā aṅgadevyaḥ | tanmantrāḥ sarvajanādayaḥ aṣṭau saptaikādaśa 
daśa punardaśāṣṭāviṃśatikhaṇḍāḥ tritārīkumārīvāgādayaḥ sajātayaḥ 
sāmānyamanuyuktāḥ || 2 ||

cakramadhye iti āvāhyetyanenānvitam | śrī0 ityārabhya ityantaḥ uktvetyapahāya 
mūrtikalpanamantraḥ | dvitīyaśrī0 ityārabhya āvāhayāmītyantaḥ uktvāvarjam 
āvāhanamantraḥ | ṣoḍaśopacārāḥ sapramāṇaṃ dvitīyakhaṇḍe 
[dvitīyakhaṇḍe-9 sūtrabhāṣye-82-patre-darśitā iti jñeyam |] darśitāḥ | 
āśuśukṣaṇiḥ agniḥ tryakṣaḥ īśānaḥ rakṣaḥ nir-ṛtiḥ prabhañjano vāyuḥ 
eṣāṃ dikṣu uktakrameṇa vidikṣviti bhāvaḥ | devyā maulau madhye ityarthaḥ | 
prāgādidikṣu aṅgadevyaḥ ṣaḍaṅgadevyaḥ pūjyāḥ | tāsāṃ mantrān vaktuṃ 
prakramate tanmantrā iti | mūlamantreṇa sarvajanetyārabhya ṣaṭ khaṇḍāni 
ṣaḍaṅgadevīnāṃ mantrā bodhyāḥ | tatraikaikaṃ kūṭaṃ kiyadvarṇakamiti 
jijñāsāyāmāha aṣṭāviti | sarvajanetyādiṣaṭkhaṇḍāni 
kramādaṣṭādisaṅkhyākānītyarthaḥ prathamakhaṇḍam aṣṭavarṇaṃ dvitīyaṃ 
saptavarṇaṃ tṛtīyam ekādaśavarṇaṃ caturthapañcamau daśavarṇau ṣaṣṭham 
aṣṭāviṃśativarṇakamiti phalitam | na kevalaṃ 
mūlamantraghaṭakoktasaṅkhyākavarṇāḥ eva mantrasvarūpam anye'pi varṇā 
yojyāḥ ityāha tritārīkumārīvācaḥ ādau eṣāṃ khaṇḍānāṃ jātiḥ hṛdayāya 
śirase0 ityādiḥ taiḥ sahitāḥ sajātayaḥ sāmānyamanavo namaḥ svāhā 
vaṣaḍityādayaḥ taiḥ krameṇa yuktāḥ | itthaṃ ca mantrasvarūpam aiṃ hrīṃ 
śrīṃ aiṃ klīṃ sauḥ aiṃ sarvajanamanohāri hṛdayāya namaḥ | uktabījāni aiṃ0 
ityādīni sapta ādau sarvatra yojyāni | 7 sarvamukharañjini śirase svāhā | 7 klīṃ 
hrīṃ śrīṃ sarvarājavaśaṅkari śikhāyai vaṣaṭ | 7 sarvastrīpuruṣavaśaṅkari 
kavacāya huṃ | 7 sarvaduṣṭamṛgavaśaṅkari netratrayāya vauṣaṭ | 7 
sarvasattvavaśaṅkari sarvalokavaśaṅkari amukaṃ me vaśamānaya svāhā | sauḥ 
klīṃ aiṃ śrīṃ hrīṃ aiṃ astrāya phaṭ iti mantrasvarūpam | yadyapi mantre 
trayastriṃśadvarṇāḥ dṛśyante sūtroktāṣṭāviṃśatisaṅkhyayā virudhyante 
tathā'pi svāhā'ntāḥ saptaviṃśativarṇāḥ agrimaṣaḍbījāni militvā 
śrīṣoḍaśākṣaryāṃ praviṣṭapañcadaśavarṇātmakakūṭatraye 
ekaikakūṭasyaikaikavarṇatvavat ṣaṇṇāṃ varṇānāmaikavarṇatvam | itthaṃ ca 
aṣṭāviṃśatisaṅkhyopapannā ||

p. 201)

nibandhakāraḥ svāhā'ntaṃ khaṇḍaṃ cakāra tathā saptaviṃśativarṇātmake 
uktagaterapyabhāvaḥ || 20 ||

āvaraṇapūjā

paścādāvaraṇapūjāṃ kuryāt || 21 ||

paścāditīdaṃ sūtraṃ vyartham eva dṛśyate tathā'pi na tathā mantavyam | tathā 
hi idam āvaraṇapūjotpattivākyam agrimavākyāni 
taditikartavyatāprapañcarūpāṇi somena yajeta aindravāyavaṃ gṛhṇāti itivat | 
etena ekavidhivihitatvena ekapadārtharūpatvāt madhye 
āvaraṇāvayavaikadevatālope'pi punaḥ sarvānuṣṭhānaṃ siddham || 21 ||

atha sarvopayoginīṃ kāṃcit paribhāṣāmāha-

sarvacakradevatā'rcanāni vāmakarāṅguṣṭhānāmikāsandaṣṭadvitīyaśakala 
gṛhītaśrīpātraprathamabindusahapatitaiḥ dakṣakarākṣatapuṣpakṣepaiḥ kuryāt || 
22 ||

sarvacakradevatāḥ gaṇapatyādiparā'ntāḥ sāmānyapaddhatyā yakṣyamāṇā 
anyāśca | śrīpātraṃ viśeṣārghyapātram | sahapatitairityanena 
bindupuṣpākṣatayoḥ patanam ekakāle iti sūcitam || 22 ||

prathamāvaraṇadevatāḥ tatsthānaṃ cāha-

trikoṇe ratiprītimanobhavān || 23 ||

trikoṇe trikoṇakoṇeṣvityarthaḥ | atra kramasyānuktatvāt 
svāgrādiprādakṣiṇyakramaḥ | yadvā āgneyakoṇe tataḥ paścimakoṇe tata 
aiśāne tenodagapavargalābhaḥ | iti prathamāvaraṇam || 23 ||

dvitīyāvaraṇapūjāsthānādikaṃ darśayati-

pañcāramūle pura ādikrameṇa drāṃ drāvaṇabāṇāya drīṃ 
śoṣaṇabāṇāyaklīṃ bandhanabāṇāya blūṃ mohanabāṇāya saḥ 
unmādanabāṇāya namaḥ iti tadagre māyākāmavāgblūṃ strīmupajuṣṭāḥ 
kāmamanmathakandarpamakaraketanamanobhavāḥ || 24 ||

namaḥ iti sarvamantreṣvanuṣajyate | puraḥ prācī | mūle pañcārakoṇamūle | 
tadagre iti pañcārakoṇāgreṣvityarthaḥ | māyā'dipañcakaiḥ krameṇa yuktāḥ 
kāmādayaḥ pūjyā ityarthaḥ | mantrasvarūpaṃ tu hrīṃ kāmaśrīpādukāṃ 
pūjayāmi | evamagre'pi | pūrvavat caturthyantanamo'ntarahitaṃ jñeyam | iti 
dvitīyāvaraṇam || 24 || 

p. 202)

tṛtīyāvaraṇapūjādeśādīnāha-

aṣṭadalamūle brāhmī māheśvarī kaumārī vaiṣṇavī vārāhī māhendrī 
cāmuṇḍā caṇḍikāḥ sendusvarayugmāntyādayaḥ pūjyāḥ | tadagre 
lakṣmīsarasvatī rati prīti kīrti śānti puṣṭi tuṣṭayaḥ || 26 ||

indunā anusvāreṇa sahitāḥ ye svarayugmeṣu aṃ āṃ iṃ īṃ uṃ ūṃ ṛṃ ṝṃ 
ḷṃ ḹṃ eṃ aiṃ oṃ auṃ aṃ aḥ ityaṣṭasu antyāḥ āṃ īṃ ūṃ ṛṃ ḹṃ aiṃ 
auṃ aḥ ityaṣṭau varṇāḥ ādau ebhiḥ krameṇa yuktā brāhmyādayaḥ pūjyāḥ | 
mantrasvarūpam āṃ brāhmīśrīpādukāṃ pūjayāmīti | evamagre'pi | tadagre 
aṣṭadalāgre ityarthaḥ | jātāvekavacanam | pūjyā ityasyānuṣaṅgaḥ | iti 
tṛtīyāvaraṇam || 25 ||

caturthāvaraṇapūjāsthānānyāha-

ṣoḍaśadale vāmā jyeṣṭhā raudrī śānti śraddhā sarasvatī kriyāśaktilakṣmī-
sṛṣṭi mohinī pramathinī āśvāsinī vīcī vidyunmālinī surānandā 
nāgabuddhikāḥ || 25 ||

atra kriyāśaktiḥ vidyunmālinī surānandā ityekaikā devatā | śeṣā devatāḥ 
spaṣṭāḥ | kramasyānuktatvāt devyagradalamārabhya prādakṣiṇyena | iti 
caturthāvaraṇam || 26 ||

pañcamāvaraṇadeśādīnāha-

aṣṭadale asitāṅga ruru caṇḍa krodhana unmatta kapāla bhīṣaṇa saṃhārāḥ 
sadaṇḍisvarayugmādisaṃyuktā bhairavāntāśca bhāvanīyāḥ || 27 ||

sadaṇḍītyatra daṇḍī anusvāraḥ daṇḍī pañcadaśaḥ śūnyaḥ iti medinīkośāt | 
anusvāreṇa sahitāḥ ye pūrvoktasvarayugmādayaḥ aṃ iṃ uṃ0 ityādayaḥ ādau 
taiḥ yuktāḥ bhairavāntāśca ye mantrāḥ taiḥ pūjyāḥ ityarthaḥ | yathā aṃ 
asitāṅgabhairavaśrīpādukāṃ pūjayāmi | evamevāgrimasaptamantrāḥ ūhyāḥ 
| iti pañcamāvaraṇam || 27 ||

ṣaṣṭhāvaraṇadevatāmantrādīnāha-

caturdalaṃ māyuktataṅgī siddhalakṣmīśca mahāmāyuktataṅgī 
mahāsiddhalakṣmīśca || 28 ||

ubhayatra yukteti jñeyam | tathā ca mātaṅgī mahāmātaṅgīti siddham | śeṣaṃ 
spaṣṭam | mātaṅgī siddhalakṣmī mahāmātaṅgī mahāsiddhalakṣmyaḥ catasraḥ 
pūjyāḥ iti vivekaḥ | iti ṣaṣṭhāvaraṇam || 28 ||

p. 203)

saptamāvaraṇapūjāmāha-

gaṃ gaṇapati duṃ durgā baṃ baṭuka kṣaṃ kṣetrapālāḥ caturasre sampūjyāḥ || 
29 ||

kramastu āgneyakoṇamārabhyaiśānāntakoṇeṣu | iti saptamāvaraṇam || 29 ||

āvaraṇabahirbhūtadevatāyajanam

śrīkrame tantrāntare āmnāyādidevatāvat 
āvaraṇabahirbhūtadevatāyajanamāha-

sāṃ sarasvatyai namaḥ iti prabhṛti vāstupataye brahmaṇe namaḥ iti paryantaṃ 
punastatraivābhyarcya || 30 ||

tatraiveti pūrvaṃ [pūrvaṃ nāma 196-patre-anugana-14-sūtre yathoktaṃ tadvat |] 
yatra nyāsottaraṃ pūjitāḥ tatra taireva mantraiḥ śrīpādukāṃ pūjayāmīti 
sahitaiḥ | yathā sāṃ sarasvatyai namaḥ sarasvatīśrīpādukāṃ pūjayāmīti | 
evamagre'pi namaḥpadānte śrīpādukāmiti yogastu sūtre namo'ntānukaraṇena 
sūcitaḥ ||

nibandhe caturasre amīṣāṃ pūjanamuktaṃ tanmandam pūrvaṃ yatraikavāraṃ 
pūjitāḥ tatraiva punaḥ pūjyā iti svarasato lābhāt | loke'pi caitraṃ gṛhāt bahiḥ 
sthāpaya maitraṃ gṛhe bhojaya caitraṃ tatraiva bhojaya ityuktau kathamanubhavaḥ 
śrutuḥ iti sūkṣmabuddhyā vicārayantvāryāḥ || 30 ||

śyāmāvidyā'cāryapūjā

śrīśyāmāvidyāpravartakācāryapūjāṃ [pravartakapūjā'cārya iti kośeṣu.] 
teṣāṃ sthānaṃ cāha-

haṃsamūrtiparaprakāśapūrṇanityakaraṇasampradāyagurūṃścaturasrapūrva-
rekhāyāmabhyarcya || 31 ||

haṃsamūrtiśca paraprakāśaśca pūrṇaśca nityaśca karuṇaśca ye te 
sampradāyaguravaḥ tān caturasrapūrvarekhāyām udagapavargaṃ pūjayet iti 
tadarthaḥ | mantrasvarūpaṃ ca haṃsamūrtisampradāyaguruśrīpādukāṃ 
pūjayāmi | evamagrimamantreṣvapi sampradāyagurviti yojyam dvandvānte 
śrūyamāṇaṃ pratyekaṃ sarvatra sambadhyate iti nyāyāt || 31 ||

gurupādukāpūjā

evaṃ cakrapūjāṃ samāpya gurupādukāpūjāmāha-

svaśirasi sāmānyaviśeṣapāduke abhyarcayet || 32 ||

p. 204)

sāmānyagurupādukāmantraḥ dīkṣākhaṇḍe [dīkṣākhaṇḍe 66-patre sūtre 
tadbhāṣye ca |] pratipāditaḥ | viśeṣagurupādukāmantraḥ caramakhaṇḍe 
śyāmāgurupāduketyuddhṛtaḥ | tābhyāṃ mantrābhyāṃ svaśirasi 
pādukādvayaṃ sampūjayet || 32 ||

devyāḥ punaḥpūjā

evaṃ gurupādukā'rcanāntam āvaraṇapūjāmuktvā 
pradhānadevatāpūjāpurarasaraṃ balipradānaṃ vivṛṇoti-

punardevīmabhyarcya bālayā ṣoḍaśopacārān vidhāya || 33 ||

mūleneti śeṣaḥ | punarityanena ṣaḍaṅgadevatābhyaḥ prāk 
pradhānadevyarcanaṃ jñāpitam | bālayeti spaṣṭam || 33 ||

balidānam 

balidānaprakāraṃ darśayati-

śuddhajalena trikoṇavṛttacaturasraṃ vidhāyārdhānnapūrṇasalilaṃ [ya tasmin 
puṣpāṇi vikīryārdhā-śrī.] sādimopādimamadhyamaṃ su[sa]gandhapuṣpaṃ 
sādhāraṃ pātraṃ nidhāya || 34 ||

śuddhajalena kalaśasthena | ardhānnapūrṇaṃ salilaṃ yasmiṃstat | ādimaṃ 
prathamam upādimaṃ dvitīyaṃ madhyamaṃ tṛtīyam ebhiḥ sahitaṃ 
sugandhapuṣpaṃ yatra īdṛśam ādhārasahitaṃ balipātraṃ nidhāya sthāpayitvā 
|| 34 ||

balidānamantrān taditikartavyatāṃ ca darśayati-

śrīmātamuktvā gīśvarīmaṃ baliṃ gṛhṇa gṛhṇa huṃ phaṭ svāhā 
śrīmātamuktvā gīśvari śaraṇāgataṃ māṃ trāhi trāhi huṃ phaṭ svāhā 
kṣetrapālanāthemaṃ baliṃ gṛhṇa gṛhṇa phaṭ svāhā iti mantratrayeṇa 
vāmapārṣṇighātakarāsphoṭasamudañcitavaktranārā ca mudrābhiḥ baliṃ 
pradāya || 35 ||

śrīmātamiti huṃphaṭ svāhetyantaṃ mantratrayam | nārācamudrā 
paramānandatantre-

vimuṣṭyaṅguṣṭhatarjanyāvūrdhvāṅguṣṭhāgratarjanī |
hastadvayagatā caivaṃ mudrā nārāca saṃjñitā || iti ||

ayamarthaḥ prathamaṃ hastadvaye muṣṭibhāvaṃ sampādya tasyā nirgate vimuṣṭī 
ye aṅguṣṭhatarjanyau tayormadhye ūrdhvāgramaṅguṣṭhaṃ prāgagrām 
ṛjurūpāṃ tarjanīṃ kuryāt | iyaṃ nārācamudretyarthaḥ || 35 ||

p. 205)

suvāsinīpūjādi

evaṃ balipradānakramamuktvā suvāsinīpūjā'dikamupadiśati-

śyāmalāṃ śaktimāhūya bālayā tāmabhyarcya tasyā hasta ādimopādimau 
dattvā tattvaṃ śodhayitvā taccheṣamurarīkṛtya yogyaiḥ saha haviśśeṣaṃ 
svīkuryāt || 36 ||

abhyarcyeti viśeṣānukteḥ yathāvibhavam | tattvaṃ śodhayitvā ityanena 
tattvaśodhanamantrāḥ api prāptāḥ te ca mantrāścatvāraḥ prasiddhāḥ [ime 
tattvamantrāḥ trayaḥ dīkṣāprakaraṇe-62-patre 39 sūtrabhāṣye santi caturthaśca 
mantra sarvatattvāyasvāheti jñeyaḥ || iti tattvamantracatuṣṭayaṃ jñeyam ||] | taiḥ 
pātracatuṣṭayaṃ grāhayitvā caturthapātraṃ saśeṣaṃ grāhayitvā taccheṣaṃ 
svayam urarīkuryāt | haviśśeṣapratipattimāha yogyairiti | yogyapadārthaḥ 
śrīkramoktaśiṣṭapadena vyākhyātaḥ [176-patre-pāścātyapañcamakhaṇḍīya 
22 sūtre tadbhāṣye ca-śiṣṭapadārthaḥ sphoṭitaḥ |] | itthaṃ ca tasya prayojanaṃ 
taditikartavyatā tat sarvamapi śrīkramoktaprakāreṇāvagantavyaṃ bhavati || 36 ||

śyāmāpūjā'vadhiḥ

evaṃ saṅgītamātṛkāpūjā kiyatkālaṃ kartavyā ityavadhyākāṅkṣāyāṃ 
tadavadhimāha-

evaṃ nityasaparyāṃ kurvan lakṣajapaṃ japtvā taddaśāṃśakrameṇa ca 
homatarpaṇabrāhmaṇabhojanāni vidadhyāt || 37 ||

evam uktaprakāreṇa nityasaparyāṃ nityapūjām | atra kurvannityanena pūjanasya 
japāṅgatvaṃ gamayati | tathā hi yadi pūjā pradhānaṃ japaścāṅgaṃ syāt tarhi 
yāvatparyantaṃ lakṣajapaḥ tāvat pūjeti kathanaṃ virudhyeta | na hi 
aṅgānusāriṇī pradhānāvṛttiḥ loke vede ca dṛṣṭā | yāvat bhaṭo dhāvati tāvat 
rājā dhāvati iti na hi brūte | yāvat rājā dhāvati tāvat bhaṭo dhāvati iti 
vyavahāro'sti | ato japaḥ pradhānaṃ tadavadhitvasya pūjāyāṃ kathanāt | ata eva 
japasamāptau pūjānivṛttiḥ | lakṣajapaṃ japtveti lakṣasaṅkhyāviśiṣṭajapo'nena 
vidhīyate | taddaśāṃśakrameṇa homo japadaśāṃśaṃ taddaṃśāṃśaṃ 
tarpaṇaṃ taddaśāṃśaṃ brāhmaṇabhojanamityarthaḥ || 37 ||

śyāmāmanujāpidharmāḥ

athaitanmanujāpidharmānāha-

etanmanujāpī na kadambaṃ chindyāt girā kālīti na vadet 
vīṇāveṇunartanagāyanagāthāgoṣṭhīṣu na parāṅmukho gacchet gāyakaṃ na 
nindyāt || 38 ||

p. 206)

etanmanujāpī śyāmāmanujāpītyarthaḥ | ete dharmāḥ na japasamakālikāḥ kiṃ 
tu japamārabhya yāvajjīvaṃ tasmādagnicid varṣati na dhāvet itivat || 38 ||

lalitopāsakadharmāḥ

evaṃ śyāmopāsakānāṃ dharmānuktvā prasaṅgāt prādhānyācca 
lalitopāsakadharmānapyāha-

lalitopāsako nekṣukhaṇḍaṃ bhakṣayet na divā smared vārtālīṃ na jugupseta 
siddhadravyāṇi na kuryāt strīṣu niṣṭhuratāṃ vīrastriyaṃ na gacchet na taṃ 
hanyāt na taddravyamapaharet nātmecchayā 
mapañcakamurarīkuryātkulabhraṣṭaiḥ saha nāsīta na bahu pralapet yoṣitaṃ 
sambhāṣamāṇāmapratisambhāṣamāṇo na gacchet kulapustakāni gopāyet iti 
śivam || 39 ||

iti...kalpasūtre śyāmākramo nāma ṣaṣṭhaḥ khaṇḍaḥ ||

ikṣukhaṇḍamityanena tadvikārāṇāṃ guḍaśarkarādīnām adoṣaḥ sūcitaḥ | 
vārtālīṃ vārāhīm | siddhadravyāṇi mapañcakarūpāṇi na 
jugupsetasvamanasā'pi na nindyāt | niṣṭhuratāṃ nāsikācchedanādi | 
vīrastriyamiti ṣaṣṭhītatpuruṣaḥ na karmadhārayaḥ | tathā sati agre na taṃ hanyāt 
ityatra puṃstvasyānanvayāpatteḥ | ato bādhakasattvāt laghorapi karmadhārayasya 
tyāgaḥ | vīrastriyam ityatra vīrapadārthaśca nirmūlaparāhatadvaitabhāvaḥ | 
taduktaṃ tantre-

ahami pralayaṃ kurvan idamaḥ pratiyoginaḥ |
saḥ vīra iti vijñeyaḥ svātmānandanimagnadhīḥ ||

taṃ vīram | taddravyaṃ vīradravyam | ātmecchayā svendriyatṛptaye urarīkuryāt 
svīkuryāt | kulabhraṣṭaiḥ prathamaṃ kulamārgamaṅgīkṛtya janmāntarāṃhasā 
tatrotpannāviśvāsāḥ santoye svīkṛtaṃ mārgaṃ parityajanti te kulabhraṣṭāḥ | 
taduktaṃ devībhāgavate-

kulamārgaṃ samāśritya janmāntarakṛtāṃhasā |
tanmārgaṃ tyajatā sākaṃ na tiṣṭhenna ca saṃvadet |
tato varaḥ paśurjñeyaḥ taṃ dṛṣṭvā'paḥ [apsu saṃviśet śrī.

sūtrasyapunarāvṛttau śodhyaṃ sūcayitavyakam |
pariśiṣṭasthalaṃ caiva pūrṇamādyāprasādataḥ || iti ṣaṣṭhaḥ khaṇḍaḥ || śrīḥ-
] susaṃspṛśet || iti ||

na bahuvacanaṃ pralapet iti taiḥ sākameva | bahupadena svamārgaguptaye 
tajjanitānarthaparihārārthaṃ yāvadarthasambhāṣī bhavet iti jñāpitam | 
apratisambhāṣamāṇaḥ pratyuttaramadattvā | kulapustakāni kulaśāstrapustakāni | 
śivamityasya vyākhyānaṃ pūrvavat ||

iti...kalpasūtravṛttau śyāmākramo nāmaḥ ṣaṣṭhaḥ khaṇḍaḥ ||

p. 497)

1 oṃ aiṃ prāṇāya svāhā 2 oṃ klīṃ apānāya svāhā 3 oṃ sauḥvyānāya svāhā 
4 oṃ ai klīṃ udānāya svāhā 5 oṃ aiṃ klīṃ sauḥ samānāya svāhā
atra kecit prāṇāhutiviṣaye pratyekāhutau mudrāṃ pradarśayanti | sā yathā -

(1) oṃ prāṇāya svāhā - ityaṅguṣṭhatarjanīmadhyamābhiḥ
(2) oṃ apānāya svāhā - ityaṅguṣṭhamadhyamānāmikābhiḥ
(3) oṃ vyānāya svāhā- ityaṅguṣṭhānāmikākaniṣṭhikābhiḥ
(4) oṃ udānāya svāhā- ityaṅguṣṭhatarjanīkaniṣṭhikābhiḥ
(5) oṃ samānāya svāhā- iti sarvābhiḥ |

evaṃ ānandāśramasaṃskṛtagranthāvali 73 granthāṅke pustake 
śrīmacchaṅkarācārya- ghāre- ityubhābhyāmapi - 
viracitaśrīgāyatrīpuraścaraṇapaddhatau 45 patre tathā 52 patre ca

anyatrāpi śāradātilakādigrantheṣu naivedyāvasare dīyamānā mudrā vartante 
tāḥ apekṣyante cet tato grāhyāḥ || (atra granthe'pi ca dvi0 pa0 śi0 15 vi0 dṛśyaḥ) 
|| 
bahuṣu grantheṣu tadgrahaṇe tallekhābhāvo'pi vibhāvyatām-

ata eva - keṣāṃcit tā acikīrṣitā iti bhāti -

imāḥ 5 prāṇāhutaya ekavārameva deyāḥ |

etat pañcaprāṇāhutīnāṃ dvirāvartane na spaṣṭatarā pramāṇopalabdhiriti 
sakṛdevātra tā nirūpitāḥ || iti jñeyaṃ ||
 
naivedyamadhye iṣṭadevatāyāstarpaṇaprayogo yathā- ||

pūrvavat khaṇḍādinā viśeṣārghajalamādāya
 
(1) oṃ aiṃ ātmatattvavyāpinī śrītripurasundarī (amukī) devatā-tṛpyatu
(2) oṃ klīṃ vidyātattva0 śrītripurasundari (amukī) devata- tṛpyatu
(3) oṃ sauḥ śivatattva0 śrītripurasundarī (amukī) devatā-tṛpyatu
(4) oṃ aiṃ klīṃ sauḥ sarvatattva0 śrītripurasundarī (amukī) devatā-tṛpyatu

evaṃ śrībhagavatīṃ tarpayitvā bhuñjānāṃ ca tāṃ dhyātvā 
uśīracandanādisuvāsitasalilaṃ śuddhapātre nihitaṃ gṛhītvā naivedyapārśve 
saṃsthāpya
oṃ namaste devadeveśi ! sarvatṛptikaraṃ param || 
akhaṇḍānandasampūrṇaṃ gṛhāṇa jalamuttamam || 1 || 
63 paraśu0

p. 498)

oṃ aiṃ śrī-amukadevatāyai namaḥ pānārthaṃ jalaṃ samarpayāmi evamuktvā 
sāmānyārghajalaṃ kiṃcit devatāyai samarpya śrībhagavatyā tajalaṃ 
prāśitamiti bhāvayitvā ātmadevatayormadhye antaḥpaṭaṃ dhṛttvā 
śivādidevaiḥ saha- ānandamūrtiḥ śrījagadambikā bhagavatī bhuṅkte tāṃ 
tasyā dūtikāḥ vyajanaṃ kurvate tathā bhāvayitvā

sarvān devān hāsayantī suvarṇapātrapariveṣitamahānaivedyaṃ 
samāsvādatītyevaṃ sveṣṭadevatāṃ dhyāyan adhastanau ślokau ca paṭhet

1 oṃ brahmeśādyaissarasamabhitaḥ sūpaviṣṭaiḥ samāntāt
siñjadvālavyajananikarairvījyamānā sakhībhiḥ ||
narmakrīḍāprahasanaparā paṅktibhoktṛn hasantī
bhuṅkte pātre kanakaghaṭite ṣaḍrasān devadevī || 1 ||

2 oṃ śālībhaktaṃ supakvaṃ śiśirakarasitaṃ pāyasāpūpasūpaṃ
lehyaṃ peyaṃ ca coṣyaṃ sitamamṛtaphalaṃ ghārikādyaṃ sukhādyam |
ājyaṃ prājyaṃ subhojyaṃ nayanarucikaraṃ rājikailāmarīcaiḥ
svādīyaiḥ śākapākaiḥ parikaramamṛtāhārajoṣaṃ juṣasva || 2 ||

13-30 | 8 || evaṃ samprārthya bhuñjānāmeva devatāṃ dhyātvā 
aṣṭottaraśatamanavakāśe ca daśavāraṃ vā mūlaṃ japet [ayaṃ 
japavidhiragratanahomabalyapūrṇanaivedyatāmbūlachatracāmarādyarpaṇānta-
raṃ- vidheyaḥ iti- saṭīkaśāradā0 4 paṭale 305 patre - 124 ślokaḥ 
pramāṇamastītyavadhīyatām iti - pa0 ka0 sū0 dvitīyāvṛttikāraḥ-] || 
atrāgratanaḥ- 13-30 | 25 vi0 dṛśyaḥ iti ||
tato mālāṃ - svamūrdhni saṃsthāpya - oṃ aiṃ hṛdayāya namaḥ ityādi 
tattaddevatāmūlena ṣaḍaṅganyāsān kṛtvā -

oṃ guhyātiguhyagoptrī tvaṃ gṛhāṇāsmatkṛtaṃ japam |
siddhirbhavatu me devi ! tvatprasādān maheśvari ||

ityuktvā sāmānyarghajalamādāya

oṃ anena yathāśakti mulamantrajapakarmaṇā śrībhagavatī (amukī) devatā 
prīyatāmityuktvā devyai samarpya yonimudrayā praṇamet || (13-30 | 8 vi0 saṃ0)

30 | 9 etadavadhikanaivedyavidhirapūrṇa evātra samāpanīyaḥ |
purastano'pūrṇanaivedyavidhiratraiva dvi0 pariśiṣṭe 30-25 aṅke'sti tataḥ 
pūrayitavyaḥ iti jñeyam || (ityekaḥ prakāraḥ 30-9 vi0 saṃ0)

p. 499)

13-30 | 10 naivedyabalyāvaraṇapūjāṅgahomānāṃ prathamaṃ kiṃ 
karaṇīyamityāśaṅkāyāṃ samādadhe kiñcit ||

1 mahānirvāṇatantre 6 ullāse 89 ślokataḥ 176 ślokāntagranthe 

śrīśivobhagavān ādau naivedyaṃ paścāt baliḥ paścāt homaḥ tato japaḥ 
ityanukramamāha |

2 || saṭīkaśāradāyāmapi - 4 paṭale 297 patre 109 ślokataḥ 125 ślokaiḥ 

sahomanaivedyaṃ balirjapaḥ evamevānukramo'bhyadhāyi ||

3 śrīparaśurāmakalpasūtre ca śrīmatā bhagavatā 2 khaṇḍe 10 sūtre mūle 83 
patre

yadyagnikāryasampattirityādināṃ homānantarameva balidānamuktam || 
arthādādau naivedyaṃ tato homo'vaśiṣṭānnādinā ca balirityanukrama upāttaḥ 
|| 

|| pūjāṅgahomasya kṛtākṛtatvam || 

4 atraiva patre pa0 ka0 sū0  vṛttikāraḥ yathāha-

yadītyanena homasya kṛtākṛtatvaṃ sucitaṃ ityāha ||

5 śrīlalitānavāvaraṇapūjāyāṃ 5 khaṇḍe 17 sūtrabhāṣye ca
eṣa eva vṛttikāraḥ etaduttaraṃ nibandhe homaḥ pākṣika uktaḥ sa nirmūlaḥ
yadyagnikāryasampattiḥ iti sūtrasya gaṇapatiprakaraṇasthasya anyatra 
prāpakapramāṇābhāvāt iti granthena homasya pākṣikatvamapi khṇḍayāmāseti 
vettavyamavalokayitṛbhiḥ || iti ||  (30 | 10 vi0 saṃ0) 

30 | 11 upari 10 viṣaye0 cihnitena aṅgaśabdena kimabhipretaṃ ko'rtho vā 
aṅgaśabdasya ? tatra tantroditamevānūdyate kiñcit ||

1 || aṅgalakṣaṇam || mīmāṃsāgranthe yathā -

mukhyaphalājanakatve sati mukhyaphalavyāpārajanakamaṅgamiti ||

2 || puraścaraṇe imānyaṅgāni daśasaṅkhyāni tebhyaḥ pañca-
saptaṭīkāyuksaptaśatī 1 patre - yathā-

1paṭalaṃ 2paddhati3rvarma tathā 4nāmasahasrakam || 43 ||
5stotrāṇi ceti pañcāṅgaṃ devatopāsane smṛtam || iti ||

pañcāṅgānāṃ devatāṅgatvena ghaṭanam - 

kavacaṃ devatāgātraṃ paṭalaṃ devatāśiraḥ || 44 ||

p. 500)

paddhatirdevahastau tu mukhaṃ sāhasrakaṃ smṛtam | 
stotrāṇi devatāpādau pañcāṅgaṃ pañcabhiḥ smṛtam || 45 ||
iti pañcapāṭhyaviṣayakānyaṅgāni || iti ||

aparāṇyapi pañca tatraiva yathā-

1japo 2homa3starpaṇaṃ ca 4mārjanaṃ 5viprabhojanam |
ārādhanaṃ pañcavidhaṃ devatānāṃ prakīrtitam || 46 || 

pañcāṅgaiḥ sahitaṃ tvetaddaśāṅgaṃ kathyate budhaiḥ ||

iti kriyātmakānyapi pañca ityevaṃ 10 aṅgāni jātāni tāni ca puraścaraṇe 
niyatāni || iti || 

3 || tathaiva ca saṭīkaśāradāyāṃ 16 paṭale 660 patre ṭīkāyāmapi yathā-

daśāṅgopāsanaṃ bhaktyā puraścaraṇamucyate |

ityapi daśāṅgapuraścaraṇe'paraṃ pramāṇam paraṃ caitāni 
puraścaraṇakriyāmadhikṛtyaiva jñeyāni || iti || 

4 || ito'parāṇi japādipañcāṅgāni tatraiva śāradāyāṃ yathā-

1japo 2homas3tarpaṇaṃ ca 4pūjā 5brāhmaṇabhojanam ||

pūrvapūrvadaśāṃśena kuryāt pañcāṅgasaṃyutam || iti ||
(13-30 | 11-4 vi0 saṃ0) 

30-11 | 5-1 tantraiva || āvaraṇapūjāṅgahomo'pyekaṃ pūjāṅgameva tatra ||

arthāt - puraścaraṇamantarāpi tadatideśena 
kevalaśrīṣṭadevatāsāvaraṇārcanakarmaṇyapi 
tantraśāstroktāvaraṇapūjāṅgahomo'pyekamaṅgamevetyādṛtaṃ 
prācīnaśiṣṭaisadanavadyameva || 
tatra pramāṇaṃ śrītantrakartrā śrīmatā guruguruṇā śrīśivenaiva uktam ||

mahānirvāṇatantre - 6 ullāse- mahābalidānānantaraṃ yathā ||
tato homaṃ prakurvīta0 iti 119 ślokataḥ 
homakarma samāpyaiva sādhako japamācaredityantena 165 ślokāntagranthena || iti 
|| 

2 || anyatra caitat śrīparaśurāmakalpasūtre śrīmadbhagavatā 2 khaṇḍe 10 sūtre 
mūle 83 patre yadyagnikāryamityādināpi pūjāṅgahomaḥ
baleḥ pūrvaṃ pratyapādyeveti kiṃ bahunā pallavitena || iti ||
arthādāvaraṇapūjāyāmapi tadaṅgatvena vidhīyamānahomo'pi
tadaṅgamevetyādṛtamāstāṃ sudhiyāṃ dhiyāmiti ||
pa0 ka0 sū0 dvitīyāvṛttikāraḥ || (5 vi0 tathā ca 30 | 11 vi0 saṃ0 )

p. 501)

30 | 12 - || tasmāttadakaraṇe mantrasidhyabhāvādyapāyo darśitaḥ śrībhagavatā 
śivenaiva bahutantragrantheṣu śāradāyāñcāpi nimnasthagranthalekhena 
tasmādayamāvaraṇapūjaṅgahomavidhiravaśyaṃ kāryastadabhāve 
tattaddevatārcanaparatvenoktapañcāṅgagatakahomakarmākaraṇamapi 
nyūnatvasampādakaṃ syādevetyalaṃ || tadyathā -

1-|| ekāṅgakaraṇābhāve brāhmaṇabhojanābhāve ca karmaniṣphalatā 
viprabhojanakarmarahasyaṃ ca ||

saṭīkaśāradā- 20 paṭale 660-661 patrayorbhāṣye yathā-

anyatrāpi -

aṅgahīnaṃ bhavedyadyat tattanneṣṭārthasādhakam | 
sarvathā bhojayedviprān kṛtasāṅgatvasiddhaye ||
viprārādhanamātreṇa vyaṅgaṃ sāṅgaṃ bhavet sadā |
nyūnātiriktakarmāṇi na phalanti manorathān ||
tānyeva pūrṇatāṃ yānti samastāni kṛtāni ca |
ato yatnena viduṣo bhojayet sarvakarmasu ||
yāni yānyapi karmāṇi hīyante dvijabhojanaiḥ | 
nirarthakāni tāni syurbījānyūṣaragāṇi ca || iti ||

2 tatraiva kulaprakāśakatantre'pi yathā-

ekamaṅgaṃ vihīyeta mantrānneṣṭamavāpnuyāt |
annaiścaturvidhairdevi ! padārthaiḥ ṣaḍrasānvitaiḥ ||
subhojiteṣu sarvaṃ hi saphalaṃ bhavet || iti ||
(30 | 12 vi0 saṃ0) 

13-30 | 13 || evamāvaraṇapūjaṅgahomākaraṇajanyāpāyaṃ darśayitvā 
kadāciddaivopaghātādinā tatkaraṇāsāmarthye tatpratinidhimāha || tadyathā-

|| āvaraṇapūjāṅgahomāśaktau ||

1 ānandāśramasaṃskṛtagranthāvali 13 
aṅkamudritaśrīmacchaṅkarācāryaviracitagāyatrīpuraścaraṇopaddhatau 52 patre 
yathā-
 
tatraiva rudrayāmale -

homāśaktau japaṃ kuryāddhomasaṅkhyācaturguṇam |
ṣaḍguṇaṃ cāṣṭaguṇitaṃ yathāsaṅkhyaṃ dvijātayaḥ ||

p. 502)

sāṅgatādi vinā devi ! japahomādi niṣphalam |
tasmāt kuryāt prayatnena devīpūjanamādarāt || iti ||

2 brahmasaṃhitāyāṃ -

aśaktāvuktahomastu (sya) japastaddviguṇo bhavet ||

3 saṭīkaśāradā0 16 paṭale 660 patre 53 ślokaṭīkāyāṃ yathā-

mantratantraprakāśe nārāyaṇāṣṭākṣare yathā-

yadyadaṅgaṃ vihīyet tatsaṅkhyādviguṇo japaḥ |
kartavyaścāṅgasiddhayarthaṃ tadaśaktena bhaktitaḥ || iti ||

4 tatraiva || asambhave tu homasya homāt syād dviguṇo japaḥ || iti ||

5 anyatrāpi || homābhāvakajape varṇaparatvena dviguṇatriguṇādirjapaḥ ||
homakarmaṇyaśaktānāṃ viprāṇāṃ dviguṇo japaḥ |
itareṣāṃ tu varṇāṇāṃ triguṇādiḥ samīritaḥ || iti || saṭīkaśāradāyāṃ 
tatraiva

6 saṭīkaśāradātilake 15 paṭale 660 patre kulaprakāśatantre'pi-
 
yadyadaṅgaṃ vihīyet tatsaṅkhyādviguṇaṃ japam |
kurvīta tricatuḥpañcasaṅkhyā sādhakaḥ priye ||
kurvīta sāṅgasiddhyarthaṃ tadaśaktena bhaktitaḥ |
ekamaṅgaṃ vihīyeta mantrānneṣṭamavāpnuyāt || iti ||

7 tatraiva saṭīkaśāradā0 661 patre 16 paṭale varṇaparatvena strīśūdrayośca 
homaśaktau tadarthakajapasaṅkhyā uktā yathā -

anyatraḥ viśeṣaḥ -

aśaktānāṃ home nigamarasanāgendraguṇito
japaḥ kāryaśceti dvijanṛpaviśāmāhurapare |
sa homaścedeṣāṃ sama iha japo homarahito
ya ukto varṇānāṃ sa khalu vihitastaccaladaśām || iti ||
yaṃ varṇamāśrito yaḥ śūdraḥ sa ca tannatabhruvāṃ vihitam | 
vidadhīta japaṃ vidhivacchraddhāvān bhaktibhāranamratanuḥ || iti ||
13 | 30-1 vi0 sarvaḥ saṃ0)

13 | 30-2- naivedyamadhye homavidhipramāṇakārikāḥ ||
1 ānandāśramasaṃskṛtagranthāvali 73 
aṅkamudritaśrīmacchaṅkarācāryaviracita śrī0 gā0 pu0 paddhatau 46 patre -

p. 503)

brahmeśādyairityetacchlokapaṭhanāntaṃ yāvat śrīmukhyadevatāṃ 
bhuñjānāṃ dhyāyan atrāvasare naivedyapūjāṅgahomaṃ kuryāt | tatra 
pramāṇam | vasiṣṭhasaṃhitāyām yathā -

bhojanāvasare mantrī vaiśvadevaṃ samācaret |
dakṣiṇe sthaṇḍilaṃ kṛtvā tatrā'dhāya hutāśanam ||

saṃskṛtya vidhinā vidvān vaiśvadevaṃ samācaret |
tatra sampūjya gandhādyairgāyatrīmuktavigrahām ||

saptavyāhṛtibhirhutvā gandhādyaiḥ punararcayet |
devatāṃ yojayet pīṭhamūrtau vahniṃ visarjayet ||

avaśiṣṭena haviṣā vikire parito balim |
devatāyāḥ pārṣadebhyo gandhapuṣpākṣatānvitam || iti ||

2 nityahome sthaṇḍilalakṣaṇaṃ tatraiva yathā-

nityaṃ naimittikaṃ homaṃ sthaṇḍile vā samācaret |
hastamātraṃ hi tat kuryādvālukābhiḥ suśobhanam ||

aṅgulotsedhasaṃyuktaṃ caturasraṃ samantataḥ ||
sarpiṣā vā tilairvā'pi bhaktena pāyasena vā ||
juhuyāt sādhakaśreṣṭhaścaturviṃśatisaṅkhyayā || iti ||

3 svalpo nityahomavidhirapi jñānārṇave 16 paṭale 76 patre 216 - ślokato yathā-

saṅkalpya [atra saṅkalpyetyanena mahānaivedyamiti 
pūrvagranthānusandhānamanusaṃdheyam||] parameśānyai nityahomavidhiṃ caret 
|
mūlena prāṇasahitā āhutīḥ pañca homayet || 216 ||
ṣaḍāhutīḥ ṣaḍaṅgānāṃ nityahomaḥ prakīrtitaḥ || iti ||

4 āvaraṇapūjāṅgahomabalividhau kārikāḥ saṭīkaśāradā0 4 paṭale 118 
ślokataḥ 304 patre yathā -

|| homavidhau kartavyam ||

evaṃ sampūjya vidhivannivedyāntaṃ tato guruḥ |
dakṣiṇe sthaṇḍilaṃ kṛtvā tatrā'dhāya hutāśanam || 118 || 
saṃskṛtya vidhivadvidvān viśvadevaṃ samācaret ||


p. 504)

tatra sampūjya gandhādyairdevatāmuktavigrahām || 119 ||
tāravyāhṛtibhirhutvā mūlamantreṇa mantravit |

|| pūjāṅgahome 25 āhutipramāṇam ||

sarpiṣmatā pāyasena pañcaviṃśatisaṅkhyayā || 120 ||

hutvā vyāhṛtibhirbhūyo gandhādyaiḥ punararcayet |
tāṃ yojayitvā pīṭhasthamurttau vahniṃ visarjayet || 121 || 

|| homāvaśiṣṭānnena balidānapramāṇam ||

avaśiṣṭena haviṣā vikiret parito balim |
devatāyāḥ parṣadebhyo gandhapuṣpākṣatānvitam || 122 || 

tato nivedyamuddhṛtya śodhayitvā jalaṃ punaḥ |
pañcopacāraiḥ sampūjya darśayecchatracāmare || 123 ||

|| balitāmbūlādi dattvā japaḥ kāryaḥ ||

karpūraśakalonmiśraṃ tāmbulañca nivedayet |
sahasrāvṛtya saṃjapya mūlamantramananyadhīḥ |
tajjaptaṃ sarvasampatyai devatāyai samarpayet || 124 ||

4 saṭīkamahānirvāṇatantrasthāvaraṇapūjāṅgahomakārikāḥ śrīśiboktāḥ - 6 
ullāse 139 patre 119 ślokato tathā -

tato homaṃ prakurvīta tadvidhānaṃ śṛṇu priye ! || 119 ||

svadakṣiṇe vālukābhirmaṇḍalaṃ catursrakam |
caturhastaparimitaṃ kṛtvā mūlena vīkṣaṇam |
astreṇa tāḍayitvā ca tenaiva prokṣaṇaṃ caret || 120 || 

kūrccabījenāvaguṇṭhya devatānāmapūrvakam |
sthaṇḍilāya namaḥ iti yajet sādhakasattamaḥ || 121 || 

prāgagrā udagagrāśca rekhāḥ prādeśasammitāḥ |
tisrastisro vidhātavyāstatra sampūjayedimān || 122 || 

prāgagrāsu ca rehāsu mukundeśapurandarān |
brahmavaisvatenduṃśca uttarāgrāsu pūjayet || 123 ||

tataḥ sthaṇḍilamadhye tu hsauṃgarbhaṃ trikoṇakam ||
ṣaṭkoṇaṃ tadbahirvṛttaṃ tato'ṣṭadalapaṅkajam || 

p. 505)

bhūpuraṃ tadbahirvidvān vilikhedyantramuttamam || 124 || 
mūlena puṣpāñjalinā sampūjya praṇavena tu |
homadravyāṇi samprokṣya karṇikāyāṃ yajet sudhīḥ |
māyāmādhāraśaktyādīn pratyekaṃ vā prapūjayet || 125 ||

agnyādikoṇe dharmañca jñānaṃ vairāgyameva ca | 
aiśvaryaṃ pūjayitvā tu pūrvādiṣu diśāṃ kramāt || 126 || 

adharmamajñānamiti avairāgyamanantaram |
anaiśvaryaṃ yajenmantrī madhye'nantañca pañcamam || 127 ||

kalāsahitasūryasya tathā somasya maṇḍalam |
prāgādikeśareṣveṣu madhye caitāḥ prapūjayet || 128 || 

pītā śvetāruṇā kṛṣṇā dhūmrā tīvrā tathaiva ca |
sphuliṅginī ca rucirā jvalinīti tathā kramāt || 129 || 

praṇavādinamo'ntena sarvatra pūjanaṃ caret |
raṃ vahnerāsanāyeti namo'ntena prapūjayet || 130 || 

vāgīśvarīmṛtusnātāṃ nīlendīvaralocanām |
vāgīśvareṇa saṃyuktāṃ dhyātvā mantrī tadāsane || 131 || 

māyayā tau prapūjyātha vidhivadvahnimānayet |
mūlena vīkṣaṇaṃ kṛtvā phaṭāvāhanamācaret || 132 ||

praṇavaṃ ca tato vahneryogapīṭhāya hṛnmanuḥ |
yantre pīṭhaṃ pūjayitvā dikṣu caitāḥ prapūjayet ||
vāmā jyeṣṭhā tathā raudri ambiketi yathākramāt || 133 ||

tato'mukyā devatāyāḥ sthaṇḍilāya namaḥ padam |
iti sthaṇḍilamāpūjya tanmadhye mūlarūpiṇīm || 134 || 

dhyātvā vāgīśvarīṃ devīṃ vahnibījapuraḥsaram |
vahnimuddhṛtya mūlānte kūrccamantraṃ samuccaran || 135 || 

kravyādibhyo vahnijāyāṃ kravyādāṃśaṃ parityajet 
astreṇa vahniṃ saṃvīkṣya kūrcenaivāvaguṇṭhayet || 136 || 

dhenvā caivamṛtīkṛtya hastābhyāmagnimuddharet |
prādakṣiṇyakrameṇāgniṃ bhrāmayan sthaṇḍilopari || 137 ||

p. 506)

tridhā jānuspṛṣṭabhūmiḥ śivabījaṃ vicintayan |
ātmano'bhimukhīkṛtya yoniyantre niyojayet || 138 || 

tato māyāṃ samuccārya vahnimūrtīñca ṅeyutām |
namo'ntena prapūjyātha raṃ vahniparataḥ sudhīḥ | 
caitanyāya namo vahneścaitanyaṃ paripūjayet || 139 || 

namasā vahnimūrtiñca caitanyaṃ parikalpya ca |
prajvālayettato vahniṃ mantreṇānena mantravit || 140 || 

praṇavaṃ pūrvamuddhṛtya cit piṅgalapadaṃ tathā |
hanadvayaṃ daha daha paca paceti tato vadet || 141 || 

sarvajñājñāpaya svāhā vahniprajvālane manuḥ |
tataḥ kṛtāñjalirbhūtvā prakuryādagnivandanam || 142 || 

agniṃ prajvalitaṃ vande jātavedaṃ hutāśanam |
suvarṇavarṇamamalaṃ samiddhaṃ sarvatomukham || 143 || 

ityumasthāpya dahanaṃ chādayet sthaṇḍilaṃ kuśaiḥ |
sveṣṭanāmnā vahnināma kṛtvābhyarccanamācaret || 144 ||

tāro vaiśvānarapadāt jātavedapadaṃ vadet |
ihāvahāvahetyuktvā lohitākṣapadāntaram || 145 || 

sarvakarmāṇi padataḥ sādhayānte'gnivallabhā |
ityabhyarcya hiraṇyādisaptajihvāḥ prapūjayet || 146 || 

sahasrārciḥpadaṃ ṅe'ntaṃ hṛdayāya namo vadet |
ṣaḍaṅgaṃ pūjayedvahnestato murtīryajet sudhīḥ || 147 ||

jātavedaprabhṛtayo mūrtayo'ṣṭau prakīrttitāḥ || 148 ||

tato yajedaṣṭa śaktīrbrāhmyādyāstadanantaram |
padmādyaṣṭanidhīniṣṭvā yajedindrādidikpatīn ||  149 ||

vajrādyastrāṇi sampūjya prādeśaparimāṇakam |
kuśapatradvayaṃ nītvā ghṛtamadhye nidhāpayet || 150 ||

vāme dhyāyediḍāṃ nāḍīṃ dakṣiṇe piṅgalāntathā |
madhye suṣumṇāṃ sañcintya dakṣabhāgāt samāhitaḥ || 151 ||

ājyaṃ gṛhītvā matimān dakṣanetre hutāśituḥ |
mantreṇānena juhuyāt praṇavānte'gnaye padam || 152 ||

p. 507)

svāhānto manurākhyāto vāmabhāgāddhaviharet |
vāmanetre hunedvahne roṃ somāya dviṭho manuḥ || 153 ||

madhyādājyaṃ samānīya lalāṭe havanaṃ caret |
agnīṣomau sapraṇavau tūryadvivacanānvitau || 154 ||

svāhānto'yaṃ manuḥ proktaḥ punardakṣiṇato haviḥ |
gṛhītvā namasā mantrī praṇavaṃ pūrvamuddharet || 155 ||

agnaye ca sviṣṭikṛte vahnikāntāṃ tato vadet |
anena vahnivadane juhuyāt sādhakottamaḥ ||
bhūrbhuvaḥsvardviṭhāntena vyāhṛtyā homamācaret || 156 ||

tāro vaiśvānarapadāt jātaveda ihāvaha |
vaha lohipadānte ca tākṣasarvapadaṃ vadet ||
karmāṇi sādhaya svāhā tridhānenāhutīrharet || 157 ||

tato'gnau sveṣṭamāvāhya pīṭhādyaiḥ sahapūjanam |
kṛtvā svāhāntapranunā mūlena pañcaviṃśatiḥ || 158 ||

hutvā vahnyātmanordevyā aikyaṃ sambhāvayan dhiyā |
ekādaśāhutīrhutvā mūlenaivāṅgadevatāḥ || 159 ||

hutvā svakāmamuddiśya tilājyamadhumiśritaiḥ || 160 ||

puṣpairbilvadalairvāpi yathāvihitavastubhiḥ |
yathāśaktyāhutiṃ dadyānnāṣṭanyūnāṃ prakalpayet || 161 || 

tataḥ pūrṇāhutiṃ dadyāt phalapatrasamanvitam | 
svāhāntamūlamantreṇa tataḥ saṃhāramudrayā |
tasmāddevīṃ samānīya sthāpayet hṛdayāmbuje || 162 ||

kṣamasveti ca mantreṇa visṛjettaṃ hutāśanam |
kṛtadakṣiṇako mantrī acchidramavadhārayet || 163 ||
 
hutaśeṣaṃ bhuvormadhye dhārayet sādhākottamaḥ || 164 ||

eṣa homavidhiḥ proktaḥ sarvatrāgamakarmaṇi |
homakarma samāmyaivaṃ sādhako japamācaret [13-31-1 | 10- vi0 dṛśyaḥ] || 165 || 
iti 

p. 508)

6 || vaiśvadevaṃ kṛtvā naivedyaṃ deyaṃ tatra pramāṇam || āśvalāyanaḥ 
yathā-

vaiśvadevaṃ purā kṛtvā nitye cābhyudaye tathā |
svābhīṣṭadevatādibhyo naivedyaṃ ca nivedayet ||

akṛtvā vaiśvadevaṃ tu naivedyaṃ yo nivedayet |
tadannaṃ na ca gṛhṇanti devā viṣṇvādayo dhruvam || iti ||
(atra prastutaviṣaye pūjāṅgahoma eva vaiśvadevaśadvāparanāmadheya 
ityavagamyaṃ) iti ||
ato nihitoyaṃ viṣayosmābhiḥ śrībālātantracandrikāyāṃ 
śrīmahānaivedyamadhye eva | apūrṇaśca 
śrīmahānaivedyavidhirhomānantarameva parisamāpitastena ca -

akṛtvā vaiśvadevamityasya niṣedhasyāpyapravṛttirityanavadyatāṃ sudhiyo 
vibhāvayantvityalam || pa0 ka0 sū0 dvitīyāvṛttikāraḥ ||
asya nityahomasya prayogaścikīrṣitaśced  bālātantracantrikāyāṃ 294 atha vā 
303 patratopyastīti tato grāhyaḥ atha vā etanmūlagranthokta eva grāhyaḥ iti |
atra mahānaivedyapūjāṅgahomāvubhāvapi sampannāviti jñeyam || 
(13 | 30-2 vi0 sarvo'pi saṃ0)

|| homānantaraṃ balidānaviṣaye ||

evamanūktarītyā yatheṣṭamāvaraṇapūjāṅgahomaṃ parisamāpya purastana - 
dvi- pariśiṣṭastha 13 | 30-3 viṣayagataḥ prakīrṇaviṣayasahito 
balidānaproyogaviṣaya āśrayaṇīyaḥ karaṇīyaścetyāśāse || pa0 ka0 sū0 
dvitīyāvṛttikāraḥ ||

|| vi0 13 | 30-3 baliviṣaye prakīrṇam ||

1 || baliśabdārthaḥ - yathā-

baṅgadeśīsaṃskṛtabhāratīti mudritamāsike - 4 aṅkīyapustake 
śrīyutabalarāmaśāstriṇo yathāhuḥ ||

balaṅga dāne vadhe ca- | balak- ca nirūpaṇe | iti kavikalpadrume |
baldāne nirūpaṇe hiṃsāyāṃ- ca iti dhātukaumudyām |
baldhāto rin pratyayena niṣpanno'yaṃ baliśadvaḥ |
ityādyatroktapramāṇena dānavadhanirūpaṇārtheṣu baliśadvaḥ pravartate 
tathāpyatra pustake lakṣaṇādiśāstrārthabalena baliśadvasya 
hiṃsārthakatvamupapāditameveti |

2 || baliśabdaniruktiḥ kulārṇavatantre 17 ullāse 157 patre'pi yathā - 

p. 509)

bahuprakāravicaradbhūtaughavinivāraṇāt |
liptapāpapraśamanādbalirityabhidhīyate || iti ||

3 || ayaṃ balirupacāro vā upahāro vā tatra pramāṇam 

tatraiva baṅgadeśīya 5 bhāgīyamudritamāsike yathā -

ayaṃ baliḥ- ṣaṭtriṃśadupacārāntargata ekaḥ upacāraḥ - iti toḍalatantre iti ||

4 || baliviṣaye prācāmācāraḥ ||

atra balidānaviṣaye taṭasthena mayā kiñcidetaducyate ||
adho nirdekṣyamāṇabaliviṣayabrātena śrīśivoktiprāmāṇyagaṇena ca sarvatra 
karmaṇi balidānāvaśyakatāstyeveti niḥśaṅkamudvoṣyata eva tadvidbhiḥ ||

akṛte ca balau pūjāphalaṃ na labhyate devatāpi prasannā na syāt rājaprajānāṃ 
ca daḥkhaṃ syādetādṛk tantrasiddhānto jāgartyeveti ||
ayaṃ baliḥ paśunaiva vidheyaḥ ityekāntasiddhāntābhāvaḥ ||
etadādyarthamadho nirūpyamaṇo baliviṣayako'śeṣalekhaḥ kṛpayāvalokya 
ityāśāste || pa0 ka0 sūtradvitīyāvṛttikāraḥ

30-3 | 2 || balibhedāḥ amāṃsasamāṃsabaliśca || samāyācāratantre yathā -

1- || baliśca dvividho devi ! sāttviko rājasastathā ||
tatra sāttvikabalilakṣaṇaṃ yathā-
 
sāttvikī [atra sāttvikī pūjā-iti sambandho jñeyaḥ] japayajñādyairnaivedyaiśca 
nirāmiṣaiḥ |
sāttviko balirākhyāto raktamāṃsavivarjitaḥ || iti ||
(arthāt sādhakānāṃ jātiguṇabhedena balau bhedo jñeyaḥ iti ||)

2- || māṃsapratinidhitvena tatsamānavastūni ||
7- ṭīkāyuktasaptaśatīguptavatīṭīkāyāṃ 9 patre yathā-
 
tatrāśaktānāmapi tatraiva -

[kūṣmāṇḍamikṣudaṇḍaṃ ca madyamāsavameva ca ||] 
ete balisamāḥ proktāstṛptau chāgasamāḥ sadā |
chāgasamāḥ pañcaviṃśativarṣāvasthāyitṛptijanakāḥ || iti || 

p. 510)

3- samāṃsādibaliḥ ||

ajāvikānāṃ rudhiraiḥ pañcaviṃśativārṣikīm |
tṛptimāpnoti paramāṃ śārdūlarudhiraistathā || iti || tatraivokteḥ ||

4- chāgabalirbrāhmaṇairna kāryaḥ | madyāsave api ca na deye ||
ityapi tatraiva yathā-

vastutastu na hiṃsyāditi niṣedhasya saṅkocamantareṇaiva
chāgasamānatṛptisambhave chāgabalirbrāhmaṇairna kārya eva |
evaṃ madyāsave api na deye |
varaṃ prāṇāḥ pragacchantu brāhmaṇo nārpayet surām ||
brāhmaṇo madirāṃ dattvā brāhmaṇyādeva hīyate || iti ca 
bṛhatsaṅgamatantravacanāt || iti ||

5- viprasya madyapratinidhivastudvayam || 

ata eva tatpratinidhirapi kālikāpurāṇe smaryate -

avaśyaṃ vihitaṃ yatra madyaṃ tara dvijaḥ punaḥ ||
nārikelajalaṃ kāṃsye tāmre vā visṛjenmadhu || iti || kātyāyanītantra eveti ||

6- sāttvikarājasikabaliviṣaye | saṭīkaśāradā 20 paṭale 768 patre yathā -

dvividho balirākhyāto rājasaḥ srāttviko budhaiḥ |
rājasabaliḥ | rājaso māṃsaraktāḍhyaḥ palatrayayamanvitaḥ || 95 ||
mudgapāyasasaṃyukto madhuratrayalolitaḥ |
sāttkikabaliḥ | sāttviko māṃsarahitaḥ śeṣamanyat puroktavat || 96 || iti ||
(30-3 | 2- vi0 saṃ0)

sarvasādhāraṇatvena balau uktadravyāṇi-

30-3 | 3-1 balyarthamuktadravyaviṣaye -

saṭīkaśāradātilake 16 paṭale 672 patre 102 śloke yathā-

prasthārdhaṃ caruṇā piṇḍaṃ kṛtvā tasmin vinikṣipet |
bāhye balipradānārthaṃ tadardhamavaśeṣayet || 102 || iti || 

2- || hutāvaśeṣānnena balidānapramaṇam ||
tatraiva saṭīkaśāradātilake 16 paṭale 673 patre 105 śloke yathā-

p. 511)

daśadikpālabalidānaprasaṅge'pi yathā-

hutvā vahnau yathāpūrvaṃ śiṣṭānnena baliṃ haret |
manunā vakṣyamāṇena daśadikṣu yathāvidhi || 105 ||

sahṛdviṣṇugaṇebhyo'nte sarvaśāntikare punaḥ |
bho baliṃ pratigṛhṇantu śāntaye hṛdayaṃ tataḥ || 106 ||

atra ṭīkā- yathāpūrvamityaṣṭabhirdravyaiḥ uktapramāṇena ca śiṣṭānneneti 
hutaśiṣṭānnena |
taduktaṃ nārāyaṇīye dadyādanena mantreṇa hutaśeṣāndhasā balim | iti || 
ācāryāḥ api hutaśeṣānnena balim || iti ||
yathāvidhīti | lokapālabalirapi sūcitaḥ || 105 || iti ||
atra dikpālabalidāne uparitanasahṛd0 ityādi 106 ślokopyastīti jñeyaṃ |

3 || sādhakecchāvaśādbalau deyavastusiddhāntaḥ ||
mahānirvāṇatantre 6 ullāse 4 ślokataḥ śrīśivavaco yathā -

yasmāt tasmāt samānītaṃ yena tena vighātitam |
tat sarvaṃ devatāprītyai bhavedeva na saṃśayaḥ || 4 ||
sādhakecchā balavatī deye vastuni daivate |
yadyadātmapriyaṃ dravyaṃ tattadiṣṭāya kalpayet || 5 || iti ||

balau strīpaśuniṣedho'traiva-

balidānavidhau devi ! vihitaḥ puruṣaḥ paśuḥ |
strīpaśurna ca hantavyastatra śāmbhavaśāsanāt || iti ||

4 || tattadevatāvāhanārcanapūrvakabalivastuviṣaye saṭīkaprapañcasāratantre 5 
paṭale 70 patre dīkṣāvidhau 16 śloko yathā-

itīritānāmapi devatānāṃ citrāṇi kṛtvā rajasā padāni |
payo'ndhasā sadhu baliḥ pradeyo dravyaiśca vā tantraviśeṣasiddhaiḥ || 16 ||

atra ṭīkā-itīritānāmapīti apiśadvaḥ kṣetrapālādisūcanārthaḥ |
sādhviti muṣṭimātraiḥ darbhāgraiḥ sakūrcaiḥ padāni āstīrya tāṃ tāṃ 
devatāmāvāhya jalādibhaiḥ sampūjya- praṇavaśaktipūrvaiḥ namo'ntaiḥ 
nāmabhiḥ balirdeyaḥ ityarthaḥ |
dravyaiśca vā tantreti dadhyājyaguḍamiśramannaṃ brahmaṇaḥ 
pāyasakṛsaramāṣānnamudgrānnagulānnaghṛtānnadadhyannairekaikasya vargasya 
balirityarthaḥ || 16 || iti ||

p. 512)

5 || balivastūni tatprokṣaṇamantraśca ||

śrī-ānandāśramasaṃskṛtagranthāvali 73 granthāṅkamudrite ghāre-
ityupanāmakaśaṅkarasūriviricita- śrīgāyatrīpuraścaraṇapaddhatau 94 patre 
gāyatrīpuraścaraṇāṅgatvena śrīgāyatryāḥ balidānāvasare yathā-

tato gāyatrīpīṭhasamīpe dadhyaktaṃ payasā'ktaṃ ca ghṛtāktaṃ 
cā'hāraparimitaṃ baliṃ śirovyāhṛtisahitagāyatryā trivāraṃ prokṣitaṃ 
dadyāt || iti ||

6 || punaścāpi balau deyavastūni
 
saṭīkaśāradātilake 20 paṭale 766 patre 76 ślokataḥ dūrgābalidāne yathā -

śālyannaṃ palalaṃ sarpirlājācūrṇāni śarkarā |
guḍamikṣurasāpūpairmadhvaktaiḥ parimiśritaiḥ || 77 ||

kṛtvā kavalamārādhya devaṃ prāguktavartmanā |
raktacandanapuṣpādyairniśi tasmai baliṃ haret || 78 || 
tataḥ sidhyanti kāryāṇi balinā'nena mantriṇaḥ || iti ||

7 || rājasabalipadārthāḥ ||

saṭikaśāradā0 20 paṭale 768 patre 95 ślokaṭīkāyāṃ taduktaṃ viśvasārodhāre 
yathā -

meṣakukkuṭayormāṃsaṃ śālyannaṃ ghṛtasaṃyutam | 
lājācūrṇamapūpaṃ ca guḍamikṣurasānvitam ||

madhumatsyakapitthādi balidravyaṃ samīritam || iti ||

marīcairjīrakaiścaiva guḍakhaṇḍaistathaiva ca |
śālitandulasambhaktagokṣīreṇa samanvitam ||

saindhavaṃ dagdhamīnena palatrayasamanvitam || iti ||
kecit phalatrayamiti pāṭhaṃ paṭhanti | taccintyam || 95 || iti tatraiva || 

8 || tathā'nyatrāpi balau deyapadārthāḥ -

palatrayaṃ māṣacūrṇaṃ dadhi kṣīraṃ ghṛtaṃ tathā | 
guḍaudanena saṃyukta miśrīkṛtya vicakṣaṇaḥ ||

9 || kulārṇavatantre 7 ullāse 61 patre api -

baṭukādīn yajettasmād gandhapuṣpāsavāmiṣaiḥ |
tattanmantrairvidhānena devatāprītimāpnuyāt ||

p. 513)

yat kiñciddravyasaṅghātaṃ pūjārthaṃ bhogahetunā |
ānītaṃ dīyate bhaktyā kṣetrebhyaśca kuleśvari ! || iti ||

idamidaṃ balau na syāt ||

10 atrāvaraṇapūjāntargatabaliṣu anyatra vā sāmānyabalau sarvasādhāraṇatvena 
grahyavastuṣu dvidalasūpādisāmānyabhojyapadārthābhāvaḥ | 

api tu 
ghṛtatailapācitamāṣacaṇakapiṣṭamayauṇḍerakasaṃyāvaudanapalalatpratinidhi 
kuṣmāṇḍakhaṇḍānyatamaśarkarāghṛtayuksupācitānnasalavaṇapācitamāṣaca
ṇakadadhyādyuttamasaṅketitasamayalabhyapadārthā yathārhaṃ grahītuṃ 
śakyante || iti || pa0 ka0 sūtradvitīyāvṛttikāraḥ || 

brāhmaṇādivarṇaparatvena balau deyavastūni ||

11 | 1 varṇaparatvena balivastūni śrīyoginītantre 7 paṭale 195 patre yathā -

viprāṇāṃ kṣīrabalayaḥ śālyannaṃ vātha pāyasam |
ghṛtaplutaṃ carvyaphalaṃ puṣpaṃ tasya ghṛtānvitam ||
dadyāt kṣīrañca dugdhānnaṃ bhaktānnaṃ vā nivedayet ||

śālyannaṃ vātha samadhu kṛṣaraṃ khaṇḍamodakam |
rājñāṃ hi paśavaḥ śastā vaiśyānāṃ vrīhayastathā || 

kṣaudraṃ vṛṣalajātīnāṃ sarveṣāṃ paśavo'tha vā ||
atra sarvavarṇasādhāraṇatvena paśvādibalayopyuktāḥ || iti ||

2- ṭīkāyuktasaptaśatīguptavatīṭīkāyāṃ 9 patre yathā-

baliśca brāhmaṇādibhedena vyavasthayoktaḥ kālikāpurāṇe draṣṭavyaḥ || iti ||
brāhmaṇena sāttviko balirdeyaḥ ||

3- saṭīkaśāradātilake - 20 paṭale 769 patrepi yathā -

brāhmaṇo niyataḥ śuddhaḥ sāttvikaṃ balimāharet || iti ||
(30-3 | 3 vi0 sarvaḥ saṃ0)

30-3 | 4 avidhānena balyarthaṃ paśuvadhe narake vāsaḥ ||

1 || aśāstrapaddhatyā- ātmārthaṃ vā paśuhanane doṣātiśaya uktaḥ 
śrīkulārṇavatantre 2 ullāse 21 patre śrīmahādevavaco yathā-

avidhānena yo hanyādātmārthaṃ prāṇinaḥ priye ! | 
nivasennarake ghore dināni paśuromabhiḥ || 

p. 514)

sammitāni durācārastiryagyoniṣu jāyate ||
anumantā viśasitā nihantā krayavikrayī ||
saṃskarttā copaharttā ca khāditāṣṭau ca ghātakāḥ ||

dhanena ca kretā hanti khāditā copabhogataḥ |
ghātako ghātabandhābhyāmityeṣa trividho vadhaḥ ||

māṃsasaṃdarśanaṃ kṛtvā sūryadarśanamācaret |
tasmādavidhinā māṃsaṃ madyañca nācaret kvacit ||

vidhivat sevyate devi ! paramārthaṃ prasīdasi |
nāśayasvaparajñānaṃ satyametadvarānane ! ||
tṛṇaṃ vāpyavidhānena chedayenna kadācana || iti ||

2 - tathaiva kulārṇavatantre 5 ullāse 46 patre'pi yathā -

ātmārthaṃ prāṇināṃ hiṃsā kadācinnoditā priye ! |
svanimittaṃ tṛṇaṃ vāpi chedayenna kadācana || iti ||
pāścātya 30 | 3-3 viṣayo dṛśyaḥ || iti || (30-3 | 4 vi0 saṃ0)

30-3 | 5 || māṃsādyabhāve balau pratinidhiḥ ||

kulārṇavatantre 6 ullāse 47 patre yathā-
 
māṃsābhāve tu laśunamārdrakaṃ nāgapallavam |
ādāya pūjayeddevīmanyathā niṣphalaṃ bhavet || iti ||

30-3	| 6 || āvaraṇapūjāṅgabalayaḥ kasya karmaṇo'nantaraṃ deyāstatra 
siddhāntaḥ [mahānirvāṇāditantragranthānāmādāveva-mahābalistato 
naivedyamiti-śrīśivoktiḥ pra0 ubhayathā śāstrasadbhāvotra -]|| 
balidānasamayaśca | 

1- svatantratantranāmni tantragranthe yathā-
 
pūjānte bhojanādau tu baliṃ dadyānmaheśvari ! || iti ||
prāmāṇyena mahānaivedyāt prāgeva balidānaṃ prāptaṃ tarhi sāmprataṃ 
kathaṃ tatprayogo vidhīyate iti kaiścidāśaṅkyet || iti ||

tato'troparitananaivedyavidhyullikhitabrahmeśādyairityādi
ślokadvayaṃ paṭhitvā bhuñjānāṃ devatāṃ sāmprataṃ dhyāyedityavirodhaḥ |
arthāt bhojanaparisamāpteḥ prāgeva balidānaprayogakaraṇena uparitanapūjānte 
bhojanādau tu etacchlokoktiḥ  saṅgateti vibhāvayantu sudhiyaḥ || iti ||

p. 415)

2 - homābhāvakarmaṇi balyavasaraḥ ||

kutracit tādṛśaprasaṅge āvaraṇapūjāṅgahomo anuktaścettatra tamakṛtvā 
vakṣyamāṇabalīn dadyāt || iti vṛttikāraḥ ||

3- homātmakakarmaṇi balyavasaraḥ ||

śrīparaśurāmasya bhagavato mate tatsūtrānuyāyibhistu yadyagnikāryamityādi 2 
khaṇḍagata śrīgaṇapatikramīya 10 sūtrapramāṇataḥ ime 
āvaraṇapūjāṅgatvena dīyamānā balayaḥ agnikāryānantaraṃ deyā iti 
tatsidhāntaḥ || iti || 

4- tatraiva || svagurupadiṣṭānusāreṇa balyavasaraḥ ||
śriparaśurāmasutretaratantragranthānusāribhistu 
svasāmpradāyikagurūpadiṣṭavidhinā te sarve balayo arpaṇīyāḥ ityavaseyaṃ || iti 
|| pa0 ka0 sūtradvitīyāvṛttikāraḥ ||

5-1 || śrīmadādyārcanapaddhatistho balyavasaraḥ ||

kutracinnepāladeśollikhitaśrīmadādyārcanapaddhatau 
naivedyānantaramāvaraṇahomastadanu balayo likhitāḥ || iti || 

2- kutracidanyasyāṃ śrīśyāmārcanapaddhatau devatāpurato 

naivedyapātranidhānapūjanānantarbhāvīyabhūtāntapañcabalidānaṃ tadanu ca 
naivedyasampūrṇavidhistadanu cāvaraṇārcanāṅgahomaḥ tatpaścācca 
mukhyadevatābalirullikhitaḥ || iti || (30-3 | 6-5 vi0 saṃ0) 

30-3 | 6-6 tathātraiva pa0 ka0 sū0 6 khaṇḍe śrīśyāmākrame 204 patre 34 sūtre 
āvaraṇapūjāgurupādukārcanaṣoḍaśopacārānantaraṃ balayo gṛhītāḥ || iti ||

7- pa0 ka0 sūtramātrānusāriṇāṃ balisamayaḥ ||

anyaccātraiva pa0 ka0 sūtre 5 khṇḍe śrīlalitākrame'pi 
pañcadaśasūtroktanaivedyānantaraṃ 18 sūtre balirupāttaḥ tataścaiṣaprakāraḥ 
pa0 ka0 sūtrānusāryāśrayaṇiya eveti || iti || 

8- śrīśrīvidyārcanapaddhatau balisamayaḥ ||

anyasyāṃ sapādaśata 125 varṣebhyaḥ prāglikhitaśrīśrīvidyārcanapaddhatau ca 
mahānaivedyaṃ tadanupūjāṅgahomaḥ tadanu balayaḥ tataśca 
pūrvatano'pūrṇo naivedyavidhirastīti ||

9 śrīmahānirvāṇatantre 6 ullāse 53 śloke baṭukādibhyo balidāna 
samayoktiryathā-

yoginīpātrasaṃsthena sāyudhāṃ saparīkarām |
saṃtarpya kālikāmādyāṃ baṭukebhyo baliṃ haret ||

p. 516)

etāvatā ca tāṃ tāṃ pradhānadevatāṃ saparivārāmabhyarcya baṭukādibhyo 
baliṃ haredityupapannaṃ iti ||
tatraivoparyuktaśrībaṭukādibalidānānantaraṃ 119 śloke
tato homaṃ prakurvīta tadvidhānaṃ śṛṇu priye0 ityādinā-
 
uparilikhitavat balipradānānantarbhāvī homaḥ pratipādito bhagavatā śrīśiveneti 
mārmikam || iti ||

homānantaraṃ baliḥ ||

10 - śrījñānārṇave 5 paṭale 19 patre 26 śloke -||

nityahomavidhiṃ kṛtvā balidānavidhiṃ caret ||

etāvatā ca śrīmadbhagavacchrīparaśurāmoktivadatrāpi nityahomānantaraṃ 
balividhiriti sidhyati iti || (30-3 | 6-10 vi0 saṃ0)

30-3 | 6-11 || nivedanaṃ ||

pṛthak pṛthak devatārcanapaddhatiṣu baliviṣayakanānāvidhayo varīvartanta iti 
tataḥ -

mohamaprāpya etat pa0 ka0 
sūtrāparatantragranthobhayoktamaśeṣamapyādaraṇīyamiti nivedayābhyāpta-
vidvadbhya ityalaṃ || 30-3 | 6 vi0 saṃ0 ||

30-3 | 7 - āvaraṇapūjāṅgabalayaḥ kāṃ kāṃ devatāmuddiśya kutra kutra sthale 
deyāstatra pramāṇāni ||

saṭīkajñānārṇave 16 paṭale 77 patre yathā -

1 baṭukāya maheśāni ! yoginībhyaśca vallabhe ! || 222 ||
 
kṣetrapālagaṇeśābhyāṃ pūrvavad balimutsṛjet || iti ||
vāmabhāge kṛtasyātha maṇḍalasyopari kṣipet || 223 ||

ādhāraṃ pūjayettatra pātraṃ cānnodakānvitam |
sakāraṇaṃ mantrayitvā sarvabhūtabaliṃ haret || iti || 224 ||
atra kārikāyāmanuktamiti pradhānadevatābalimapi saṃdadhyādeveti jñeyam || iti 
||

p. 517)

2 - sarvadevatāvaraṇārcanasādhāraṇadharmeṇa dīyamānāḥ 
śrībaṭukādipradhānadevatānāṃ balayaḥ kasyāṃ kasyāṃ diśi deyāstatra 
bhinnabhinnabhidā vartante tāssarvā apyanupekṣyā eveti rāddhāntaḥ pratibhāti | 
atratanāḥ kāścid bhidāḥ pradarśayante'dhastāt-

tatrādau - baṭukādidevatābalīnāṃ sthānāni-

kulārṇavatantre 7 ullāse 63 patre śrīśivavaco yathā-

paścime baṭukaṃ [bāṭukaṃ deyamiti pāṭhaḥ sādhuḥ] deyamuttare yoginībalim |
pūrve bhūtabaliṃ dadyāt kṣetrapālaṃ ca dakṣiṇe |
rājarājeśvaraṃ [etadviṣaye agratanabalicitraṃ 1 - ka cihne draṣṭavyaṃ] madhye 
pūjayet kulanāyike ! || iti ||

3- anyatra ca sāmpratamudritadurgākalpadrumasaṃkṣiptapustikāyām 163 
patre'pyuktaṃ yathā-

uktaṃ ca kulārṇve ||

aiśāne [balicitraṃ 2-kha cihne draṣṭavyam ||] baṭukaṃ deyamāgneye yoginībalim |
nair-ṛtye kṣetrapālaṃ ca vāyavye gaṇanāyakam || 1 ||
uttare sarvabhūtebhyo madhye ca [ime pramāṇaślokāḥ 
mannikaṭasthamudritakulārṇave na santi || syurnāma kadācit 
prāglikhitālabhyapustakeṣu ||] mukhyadevatām || iti ||

4 || śrīnepāladeśīyaśrīśyāmārcanapaddhatāvapi -

uparitanāṅkagata 2 viṣayavadeva śrīgaṇapatibalyantaṃ tulyamevāsti |
atha ca śrīpradhānadevatābaliḥ uttare | ityeva vyatyayo'sti ityādi [blicitraṃ 3-ga 
dṛśyaṃ] ||
aparasyāmapi - śrīmadādyārcanapaddhatyāṃ - pūrvapūjitamaṇḍale 
baṭukādīnāṃ baliṃ dadyāt ityuktvā | dakṣiṇe yoginībaliḥ paścime 
kṣetrapālabaliḥ uttare srīgaṇapatibaliḥ svavāme sarvabhūtabaliḥ 
svadakṣiṇabhāge mukhyadevatā [balicitraṃ 4-gha cihne dṛśyaṃ |] balirityevaṃ 
bhinnā balisthānabhidā vartante iti |
atrānuktopi śrībaṭukabalirīśāne deya iti svabuddhivilāso'stu || 30-3 | 7-4 vi0 
saṃ0

30-3 | 7-5 aparasyāṃ śatādhikavarṣasamayaprāglikhitāyāṃ 
śrīvidyārcanapaddhatyāṃ ca || śrīcakrasya īśānakoṇe vyāpakamaṇḍale 
śrībaṭukabaliḥ |
āgneyyāṃ śrīyoginībaliḥ | nair-ṛtyāṃ kṣetrapālapaliḥ | śrīcakrasya 
vāyukoṇe śrīgaṇapatibaliḥ | śrīcakrasya uttarabhāge sarvabhūtabaliriti 
prapañcitam || 

p. 518)

pradhānadevatābalistvanyayā vidhayā pratyapādīti tāntrikaṃ mārmikam || pa0 
ka0 sū0 dvitīyāvṛttikāraḥ ||

6- śrīmahānirvāṇatantre 6 ullāse 25 ślokataḥ śrībaṭukādibalisthānāni yathā-
 
sampūjya pūrvabhāge ca baṭukasyabaliṃ haret || 55 ||

tatastu yāṃ yoginībhyaḥ svāhā yāmyāṃ hared balim || 56 ||

ṣaḍdīrghayuktaṃ samvartaṃ kṣetrapālāya hṛnmanuḥ |
anena kṣetrapālāya baliṃ dadyāttu paścime || 57 ||

khāntabījaṃ samuddhṛtya ṣaḍdīrghasvarasaṃyutam |
ṅentaṃ gaṇapatiṃ coktvā vahnijāyāṃ tato vadet || 58 ||
 
uttarasyāṃ gaṇeśāya balimetena kalpayet |
madhye tathā sarvabhūtabaliṃ dadyād yathāvidhi || 59 || iti ||
(atra 117 śloke pradhānabalirapi)

7- saṭīkajñānārṇave 5 paṭale 19 patre yathā-
 
īśāne [atra balicitraṃ 5 ṅa cihne dṛśyam] ca tathā'gneye nair-ṛtye ca tathā priye 
! |
vāyavye kramato devi ! maṇḍalānāṃ catṛṣṭayam || 27 || 
śrīcakramabhito devi ! trikoṇaṃ vyoma cālikhet || 27 || iti ||

8- punaścāpi tatraiva jñānārṇave 16 paṭale 76 patre śrīśrīvidyāyajanavidhau 
yathā-

īśānavahninair-ṛtyavāyukoṇeṣu [etayoḥ -7-8 aṅkayościtrapratyakṣamagratana 
kha-2 ga-3 cihnitacitratulyatvānna citritaṃ ||] pūrvat ||
maṇḍalāni vidhāyātha pūrvavat pūjayet priye ! || 221 || iti ||
30-3	| 79 || uparyuktāvaraṇapūjāṅgabalisthānabhidādarśakacitrāṇi ||

1- ka- kulārṇavamate- 



pūrvādik




1 bhūtabaliḥ
0


uttarā
4 
yoginībaliḥ
0
5 
śrīrājarājeśvarabaliḥ
0
kṣetrapālabaliḥ
0
dakṣiṇā


baṭukabaliḥ
0




paścimā




2- kh- uparyuktādanyathā idamapi kulārṇave-




pūrvā



1 baṭukaba.

2 yo. ba.

uttarā 5 
sarvabhūtaba.
0

6 pradhānade. 
ba.
0 madhye

dakṣiṇā

4 śrī. ga. pa. 
ba.
0

3 kṣe. ba.
0



paścimā




3- ga- śrīnepāladeśīyaśrīśyāmārcanapaddhatau -




pūrvā



1 baṭukaba.
0

3 yoginība.
0

uttarā
atra 
bhūtabalirnoktaḥ 
|
5 pradhānade. 
ba.
0


dakṣiṇā

4 gaṇapatiba.
0

3 kṣe. ba.
0



paścimā




4- gh- apasyāṃ śrīśyāmārcanapaddhatau -



pū.




1 baṭukaba.


5 svavāme 
bhūta baliḥ u.
0
4 gaṇeśaba.
0

2 yoginī ba.
0
da. 6 
svadakṣiṇe 
pradhānade. 
baliḥ
0


3 kṣe. ba.
0




pa.



5- ṅa- nirvāṇatantre-



1 baṭukaba.
0


4 gaṇeśaba.
0
5 bhūtaba.
0
2 yo. ba.
0
atra 117 ślokoktaḥ 
pradhānabalirapyasti-

kṣe. ba.
0




30-3 | 8 śrībaṭukādidevatābalyarthakamaṇḍalākṛtistattadevatānāṃ pūjanaṃ 
tanmantrādijñānaṃ ca
śrījñānārṇave 16 paṭale 76 patre 217 ślokato yathā-

sarvasādhāraṇam || 

1 || upaviśyā'sane ramye vāmabhāgaḥ tataḥ param || 217 || 
vahatkarordhvapuṭataḥ sādhako bhūmijānukaḥ |
maṇḍalaṃ caurasraṃ tu tanmadhye vilikhet priye ! || 218 ||

trikoṇamadhye vyomākhyaṃ maṇḍalaṃ pūjayettataḥ |
vyāpakānte maṇḍalāya hṛdanto vāgbhavaṃ param || 219 || 

mukhe kṛtvā pūjanīyaṃ maṇḍalaṃ manunā priye ! |
etanmaṇḍalamabhyarcya maṇḍalānāṃ catuṣṭayam || 220 || iti ||

9 || balipañcakaviṣaye jñānārṇave 16 paṭale 77 patre yathā -

1baṭukāya maheśāni ! 2yoginībhyaśca vallabhe ! |
3kṣetrapālagaṇeśābhyāṃ pūrvavadbalimutsṛjet ||
vāmabhāge kṛtasyātha maṇḍalasyopari kṣipet || 223 || 

ādhāraṃ pūjayettatra  pātraṃ cānnodakānvitam | 
sakāraṇaṃ mantrayitvā 5sarvabhūtabaliṃ haret || 224 ||

ṣoḍaśārṇena manunā trivāraṃ vīravandite ! |
tāraṃ ca bhuvaneśāni ! sarvavighnapadaṃ tataḥ || 225 || 

kṛdbhyaśca sarvabhūtebhyo huṃkāraṃ vahnivallabhām |
samuccaran baliṃ dadyānmudrayā tattvasaṃjñayā || 226 ||

balipañcakamākhyātaṃ sarvarakṣākaraṃ satām || iti || 226 || 
(30-3 | 9 vi0 saṃ0)

30-3 | 10 ekapātre eva 5 balayaḥ ||

1- ime āvaraṇapūjāṅgabalayo bhinnabhinnasthāneṣu nidarśitāstathāpi pṛthak 
pṛthak pātreṣu balidānānicchayā ekasmin pātre eva dātuṃ śakyante iti jñeyaṃ 
|| 

(pradhānablistu svatantra eva deya ityābhāti)
atra pramāṇaṃ bhairavayāmale-
 
ekapātre n mpṛthak pātre dadyāt pañca balīn priye ! |
vāmabhāgasthito devi ! sarvavighnaharo bhavet || iti ||

2- jñānārṇavatantre 5 paṭalānte 20 patre'pi yathā-

athavā vāmabhāge tu maṇḍalaṃ caikamādiśet |
tatraiva balidānaṃ tu kuryāt sarvārthasiddhaye || 44 || iti || 

3- jñānārṇvatantre 16 paṭale 77 patre'pi -

balipañcakamākhyātaṃ sarvarakṣākaraṃ satām |
ekatra vā pañca balīn dadyādvyāpakamaṇḍale || iti || 227 ||
vāmabhāge sthito devi ! sarvavighnaharo bhavet || (30-3 | 10 vi0 saṃ)

30-3 | 11 || mukhyadevatābaliviṣaye ||

1- āvaraṇapūjāṅgatvena dīyamānabaliṣu pradhānadevatāyāḥ baliḥ kasya 
baleranantaraṃ deyastatra pramāṇam -

śrīmahānirvāṇatantre 6 ullāse 105 ślokataḥ 117 ślokaiḥ bhairava 
dikpālabaleranantaraṃ pradhānadevatābaliruktaḥ || iti ||

2- || ānandāśramasaṃskṛtagranthāvali 73 
granthāṅkamudritaśrīimacchaṅkarājāryaviracitagāyatrī puraścaraṇapaddhatau 
48 patre -

naivedyamadhye - āvaraṇapūjāṅgahomaṃ vidhāya- tataḥ stutistato nīrājanaṃ 
tato japastadanu ca kasmaicidapi balimadatvā śrībhagavatyāḥ pradhānadevatāyāḥ 
śrīgāyatryā balirukto yathā -

p. 522)

nātyuccaṃ nātinīcaṃ ca dhyātvā mantrī japenmanum |
baliṃ dattvā namaskṛtya stutvā devīṃ visarjayet ||

agrataścaturasravṛttatrikoṇamaṇḍalaṃ kṛtvā tatra gāyatrīṃ dhyātvā mūlena 
puṣpākṣataiḥ sampūjya catuṣpadāṃ gāyatrīmuccārya yathālābhānnādinā 
nityabaliṃ dadyāt || iti || (30-3 | 11 vi0 sarvaḥ saṃ)

30-3 | 12 || mukhyadevatābalisthānaviṣaye ||

(atra pa0 ka0 sūtre) anyatantreṣu ca amukāmukadevatānāmāvaraṇapūjānte 
dīyamānamukhyadevatāmātrabalisthānaṃ amukāmukadiṣyuktaṃ tatra smaraṇī 
yathā -

1- śrīgaṇapateḥ pa0 ka0 sū0 2 khaṇḍe śrīgaṇapanāyakapaddhatau 83 patre 9 
sūtre mūle pradhānadeyatāyāḥ śrīgaṇapateḥ pūjāṅgabalidānāvasare 
kasyāṃ diśyayaṃ balirdeya iti nābhyadhāyi-

api tu etatsūtrabhāṣyakāramahodayena deśākāṅkṣāyāṃ śrīkramoktaṃ 
svavāmabhāgataḥ ityuktam etāvatā balinidhānasthalamupalabdhaprāyameveti |

2- pa0 ka0 sū0 5 khaṇḍe navāvaraṇapūjānte 172 patre 18 sūtre 

atha baliprakāramāha-

vāmabhāgavihitatrikoṇavṛttacaturasre gandhākṣatārcite ityuktam |

atraitatsūtrabhāṣyakāro yathā-

atra vāmabhāgetyanena śīghropasthitatvāt svasyaiva vāmabhāgo grāhya ityāha || 
etāvatā ca svavāmabhāge'yaṃ balirdeya iti tadabhimatam || 

3- || atra pa0 ka0 sūtre 6 khaṇḍe śrīśyāmākrame 34 sūtre ca śrīmatpradhāna 
devatāyā ādyāyā balidānasthānameva na prāṇāyi tathāpi 
śrīmallalitāmbābalisthānamevaitaddevatābalisthānaṃ mantuṃ yogyam 

athavā anugate - 30-3-7- viṣaye- balisthānacitrāṅka 3 - ga0 4 - gha0 
sthānayorekatamasthāne deyamityadoṣaleśaṃ || iti

tathā ca- pa0 ka0 sūtre 7 khaṇḍe śrīvārāhīkrame 8 khaṇḍe śrīparākrame 
cānayorbhagavatyormukhyabalistatsthānaṃ ca na spaṣṭīkṛtam mūle tadbhāṣye ca
tathāpyatra yathāyogyaṃ tadvidheyameva sampradāyikairiti vinayāmi pa0 ka0 sū0 
dvitīyāvṛttikāraḥ 	(30-3 | 12 vi0 saṃ0) 

p. 523)

30-3 | 13 || balidāne śrīkramoktadharmagrahaṇapramāṇam ||
atra spaṣṭīkṛtaṃ pa0 ka0 sūtre 8 khaṇḍe parākrame 245 patre 27 sūtrabhāṣye 
vṛttikṛtā yathā -

balidāne dharmāḥ śrīkramoktā grāhyāḥ ekadevatākatvena sājātyāt iti ||
etadapi pa0 ka0 sūtrānusāriṇāṃ prāyo jñeyam - anyathā tattaditaragranthokta 
tattaddevatāsvatantravidhivaiyarthyaṃ syādevetyalaṃ || iti ||

14 || pārṣadebhyaḥ eka eva baliḥ ||

ānandāśramagranthāvali 73 aṅkamudritaśrīmacchaṅkarācāryaviracitaśrīgā0 
pu0 paddhatau 46 patre āvaraṇapūjāṅgahomānantaraṃ yathā tataḥ 
pārṣadabalimantrāḥ - | 

ye raudrā raudrakarmāṇo raudrasthānanivāsinaḥ |
yoginyo'pyugrarupāśca gaṇānāmadhipāśca ye ||

vighnabhūtāstathā cānye digvidikṣu samāśritāḥ |
te sarve tṛptimanaso bhūtā gṛhṇantvimaṃ balim || 

gandhapuṣpākṣatānvitabalimaṣṭadikṣu vikiret |
bhūtāni yānīha vasanti bhūtale baliṃ gṛhītvā vidhivat prayuktam | 
anyatra vāsaṃ parikalpayantu kṣamantu tānyatra namo'stu tebhyaḥ |
anena aṣṭadikṣu vikirediti bhūtabaliḥ ||
atra pradhānadevatābaliranuktopi vidheya eveti |

30-3 | 15 || āvaraṇapūjāṅgaśrībaṭukādibalidanasaṅkalpe jalamocane 
aṅgulyādikam | 

1- prathamaḥ prakāraḥ |

sarvasādhāraṇatvena śrībaṭukādibhyo balyarpaṇasaṅkalpe pṛthak 
pṛthagaṅgulyāikam | kaulārṇavatantre 7 ullāse 63 patre yathā-

1 śrībaṭukasya balidāne ||

aṅguṣṭhānāmikābhyāñca baṭukasya baliḥ smṛtaḥ ||

2- śrīyoginīnām 0 ||

tarjanīmadhyamā'nāmā aṅguṣṭho yoginībaliḥ ||

3 - bhūtānām ||

aṅgulībhiśca sarvābhirukto bhūtabaliḥ priye ! ||


p. 524)

4- śrīkṣetrapālasya ||

aṅguṣṭhatarjanībhyāṃ ca kṣetrapālabaliṃ haret | 

5- śrīrājarājeśvarasya ||

aṅguṣṭhamadhyamābhyāṃ ca rājarājeśvarasya ca || iti ||
atra tattatpradhānadevatābalau aṅgulyādi nopadiṣṭaṃ tathāpi tatra tatra 
svatantraprakaraṇoktamathavā svagurūpadiṣṭamatha vā 
sāmānyasaṅkalpakalpoditamabādhakaṃ pramāṇaṃ grāhyamityalaṃ 
tadvidāṃkṛte viśiṣṭalekharekhābhiḥ - || iti || (30-3 | 15-1 vi0 saṃ0) 

30-3 | 15-2 dvitīyaḥ prakāraḥ |
pūjāṅgaśrībaṭukādibalidāne jñānārṇavatantre 5 paṭalasamāptau 20 patre 
yathā-

1- ba0 balau | vāmāṅṣṭhānāmikābhyāṃ baṭukasya baliṃ haret |

2- yo0 tarjanyanāmike caiva madhyamopari yojayet || 40 ||

yonyākāreṇa vāmena yoginīnāṃ balirbhavet |
aṅguṣṭhamadhyamānāmā yonyākāreṇa yojayet || 41 || 

3 - kṣe0 vamamuṣṭiṃ vidhāyādau tarjanīṃ saralāṃ kuru |
anayā mudrayā devi ! kṣetrapālabalirbhavet || 42 ||

4- gaṇeśa0 tathā muṣṭestu madhyasthāmaṅgulīṃ daṇḍavat kuru |
gajatuṇḍā mahāmudrā gaṇapasya balirbhavet || 43 || iti ||
(30-3 | 25 vi0 sarvaḥ saṃ0)

30-3 | 16 || balerakaraṇe doṣaḥ ||
1 || baṅgadeśīyasaṃskṛtabhāratīti mudritamāsike 4 aṅkīyapustake nibandhe 
tṛtīya paṭale ca yathā -


balidānaṃ vinā yastu pūjayettāriṇīṃ naraḥ | 
na dharmo na ca mokṣaḥ syātteṣāṃ paśudhiyāṃ priye || iti || 

2 || śrīkulārṇavatantre 7 ullāsārambhe eva 60 patrataḥ 
baṭukādibalyāvaśyakatve- śrīpārvatīpṛcchāyāṃ śrīśivoktottaraṃ yathā-

devyuvāca-

kuleśabaṭukādīnāṃ baliñca śaktilakṣaṇam | 
taddravyasyaiva svīkāraṃ vada me karuṇānidhe ! || 

p. 525)

īśvara uvāca -

śṛṇu devi! pravakṣyāmi yanmāṃ tvaṃ paripṛcchasi |
tasya śravaṇamātreṇa tattvajñānaṃ prakāśate ||
yāvanno baṭuke dadyāttāvannaiva kuleśvari ! |
tṛpyanti devatāḥ sarvāḥ smaraṇād yajanādapi ||
baṭukādīn yajettasmāt0 ityādi ||

3- mahānirvāṇatantre 6 ullāse 118 ślokaḥ śrīśivavaco yathā-

evaṃ balividhiḥ proktaḥ kaulikānāṃ kulārcane |
anyathā devatāprītirjāyate na kadācana || iti ||  (30-3 | 16 vi0 saṃ0)

30-3 | 17 || balerāvaśyakatvaṃ balikaraṇe phalaṃ ca ||

1 - balidānena pūjāphalaṃ prāpnoti tatra pramāṇaṃ 
saptaṭīkāyuktasaptaśatīguptavatīṭīkāyāṃ 9 patre kamyaprayoge viśeṣaḥ ityatra 
yathā -

ekāvṛttādipāṭhānāṃ pratyahaṃ paṭhatāṃ nṛṇām |
saṅkalpapūrvaṃ sampūjya nyasyāṅgeṣu manūn sakṛta |
paścādbalipradānena phalaṃ prāpnoti mānavaḥ || iti ||

2- balidānaphalam ||

śrīkālikāpurāṇe'pi saptaṣaṣṭitame'dhyāye yathā-

balibhiḥ sādhyate muktirbalibhiḥ sādhyate divam |
balidānena satataṃ jayecchatrūn nṛpān nṛpaḥ || iti ||

evaṃ dadad baliṃ vīro yathoktavidhināmunā |
balidānādeva caturvargamāpnotyasaṃśayam || iti ||

3- tatraiva mātṛkābhedatantre 10 paṭale yathā -

vidhinā parameśāni ! yadi pūjādikaṃ caret |
vatsarānte pradātavyo balirekaḥ sureśvari ! ||

anyathā naiva siddhiḥ syādājanmapūjanādapi |
balidānaṃ mahāyajñaḥ kalikāle ca caṇḍike ! ||

aśvamedhādiko yajñaḥ kalau nāsti sureśvari ! |
kevalaṃ balidānena cāśvamedhaphalaṃ labhet || iti ||

p. 526)

4- tathā ca nibandhe pañcamapaṭale yathā-

sarvvatra koṭitīrtheṣu snātvā yat phalamaśnute |
tatphalaṃ labhate bhaktyā balibhiḥ pūjanānmama || iti ||

5- etad balidānamaṇḍanaviṣayaḥ brahmavaivartapurāṇe uttarakhaṇḍe'pyasti || iti ||

6- balidānāvaśyakatve śrīmadādyāḥ karpūrastavarāje || salomāsthi 
svairamityādiślokoktavidhirapyatra sambhājyatām || iti ||

7- śrībaṭukārcanaphalaṃ saṭīkaśāradā0 20 paṭale 766 patre 75 śloke yathā-

iti sampūjayeddevaṃ baṭukaṃ proktavartmanā |
dharmārthakāmamokṣāṇāṃ patirbhavati mānavaḥ || 75 || iti ||

8- āvaraṇapūjāṅgaśrībaṭukādibalidāne phalamuktaṃ jñānārṇavatantre 16 
paṭale 76 patre yathā-

pūrvavad balidānaṃ ca dadyāt sarvasamṛddhaye || iti || 222 ||

9- tatraiva 76 patre -

balipañcakamākhyātaṃ sarvarakṣākaraṃ satām || iti || 226 || 
(30-3 | 17 vi0 sarvaḥ saṃ0)

30-3 | 18 || uparyuktapūjāṅgaśrībaṭukādiśrīrājarājeśvaradevatānta 
balidānaprayogakārikāḥ ||

1 kulārṇavatantre 7 ullāse 61 patrato yathā-
 
baṭukamantrān vakṣyāmi śṛṇuṣva kulanāyike ! |
yaiḥ samarcitamātreṇa sarve naśyantyupadravāḥ ||

tāratrayaṃ tato devī putreti baṭuketi ca |
nāthaśca kapilajaṭābhārabhāsurapiṅgala ||

trinetreti padaṃ paścāt jvālāmukhapadaṃ tataḥ |
imāṃ pūjāṃ baliṃ gṛhṇa dvayaṃ pāvakavallabhā ||

ukto baṭukamantro'yaṃ catvāriṃśadbhirakṣaraiḥ |
balinānena santuṣṭo baṭukaḥ sarvasiddhidaḥ || 

p. 527)

śāntiṃ karotu me nityaṃ bhūtavetālasevitaḥ |
tāratrayaṃ tataḥ sarvayoginībhyaḥ padaṃ vadet ||

tatpaścāt sarvabhūtebhyaḥ sarvabhūtādhipāya ca |
padaṃ tato ḍākinībhyaḥ śākinībhyaḥ padaṃ vadet ||

trailokyanipadaṃ caiva vāsinībhya imāṃ vadet | 
pūjāṃ baliṃ guhṇa yugmaṃ svāhānto yoginīmanuḥ ||

kathito'yaṃ maheśāni ! mantraḥ pañcadaśākṣaraḥ |
yā kācid yoginī raudrā saumyā saumyatarā yadi ||

khecarī bhūcarī vyomacarī prītāstu me sadā | 
tāratrayaṃ vadet sarvabhūtebhyaḥ sarva eva hi || 

paścād bhūpatibhyo huṁ phaṭ saptadaśākṣaraḥ |
bhūtā ye vividhākārā dikṣu bhaumāntarikṣagāḥ ||

pātālasaṃsthā ye kecicchive ye ca na bhāvitāḥ |
brahmādyāḥ satyasandhāśca bhṛtyāḥ śaktyupabṛṃhitāḥ ||

tṛpyantu prītamanasaḥ pratigṛhṇantvimaṃ baliṃ |
tāratrayaṃ tato devi ! yagmaṃ devīpadaṃ vadet |
sarvavighnān padaṃ paścānnāśaya dvitīyaṃ tathā ||

sarvopacārasahitāmimāṃ pūjāṃ baliṃ vadet |
gṛhṇa gṛhṇa dviṭhānto'yaṃ bhairavādhiṣṭhitāya ca ||

akṣobhyavanditaḥ paścād hṛdayādhiṣṭhitaṃ param |
siddhārthaṃ padamābhāṣya paścādavataradvayam || 

kṣetrapāladvayaṃ paścānmahākṣetrapadaṃ tataḥ |
asmin grāmādhipataye'smin deśādhipataye tataḥ ||

vadedbaṭukanātheti devīputrapadaṃ tataḥ |
meghanādapadaṃ paścāt pracaṇḍograpadaṃ vadet ||

kapālīti padaṃ paścādbhīṣaṇeti padaṃ vadet |
syāt sarvavighnādhipataye imāṃ pūjāṃ baliṃ vadet ||

gṛhṇa gṛhṇa kurudvandvaṃ mama duraya yugmakam |
jvalayugmaṃ prajvalayugmaṃ sarvavighnānitīrayet ||

p. 528)

nāśayadvitayaṃ kṣāṃ kṣīṃ kṣūṃ kṣaiṃ kṣauṃ kṣaṃ- tataḥ paraṃ |
mātṛputrapadaṃ paścāt kulaputrapadaṃ tataḥ ||

kṣetrapālāya vauṣaṭ huṁ ṣaḍuttaraśatākṣaraḥ |
tāratrayaṃ vadet paścādamukakṣetrapāla ca ! ||

rājarājeśvara ! imāṃ pūjāṃ balimataḥ param |
gṛhṇayugmaṃ dviṭhānto'yamaṣṭāviṃśākṣaro manuḥ ||

anena balidānena baṭuvṛndasamanvitaḥ |
rajarājeśvaro devo me prasīdatu sarvadā || iti || 

30-3 | 19 - tatrādau śrībaṭukabalidānavidhau kartavyapramāṇam |

śrīmahānirvāṇatantre 6 ullāse yathā -

1- saṃtarpya kālikāmādyāṃ baṭukebhyo baliṃ haret || 53 ||
svavāmabhāge sāmānyaṃ maṇḍalaṃ racayet sudhīḥ |

saṃpūjya sthāpayeattra sāmiṣānnaṃ sudhānvitam || 54 ||

vāṅmāyā kamalā baṃ ca baṭukāya namaḥ padam |

atra ṭīkā- baṭukādibhyo balidānasya vidhimāha svavāmabhāge0 ityādi |

sudhīḥ dhīraḥ svavāmabhāge sāmānyaṃ catuṣkoṇaṃ maṇḍalaṃ racayet 
tanmaṇḍalaṃ sampūjya tatra maṇḍale caturddikṣu tanmadhye ca sūdhānvitaṃ 
surāsaṃyuktaṃ sāmiṣānnaṃ māṃsādisahitamannaṃ sthāpayet || 54 ||

2- jñānārṇave 5 paṭale 19 patre yathā-

śrīcakramabhito devi ! trikoṇaṃ vyoma cā'likhet |
[vāṃkāraṃ pūrvamuccārya baṭukāya namo likhet || 73 || (baṃ- iti- sādhvatra-)
yāṃkāraṃ bījamuccārya yoginībhyo namastathā ||
kṣāṃkāraṃ bījamuccārya kṣetrapālāya vai namaḥ || 74 ||
gāṃkāraṃ bījamuccārya tato gaṇapatiṃ yajet ||
ime catvāro mantrāḥ śrībaṭukādidevatāpūjopayoginaḥ || iti ||
idaṃ jñānārṇave 16 patre 4 paṭale || 
atra mahānirvāṇatantre 6 ullāse 54 ślokataḥ 58 ślokā dṛśyāḥ tatra ca 
baṭukabalimantre vā iti na api tu vaṃ ityasti ] pūrvamantraiḥ samabhyarcya 
baṭukādibhiradrije ! || 28 || iti

p. 529)

śrībaṭukabalimantroddhāraḥ || yathā-

ehyehi devi ! putrānte baṭukānte'tha nātha. ! ca |
kapilānte jaṭābhāra bhāsurānte trinetra ca || 29 ||

jvālāmukha ca sarvānte vighnānnāśaya nāśaya |
sarvopacārasahitaṃ baliṃ gṛhṇa dvidhā padam || 30 || 

vahnijāyānvito mantro baṭukasya udāhṛtaḥ ||
anena vidhinā devi ! baṭukasya baliṃ priye ! || 31 || iti ||

3- śrībaṭukabalidānaphalam ||

saṭīkaśāradā0 20 paṭale- 767 patrato rājño janapadasya ca nirvighnakaraṇa 
prasaṅge yathā-

baṭukeśvaramabhyarcya bhakṣyabhojyaphalānvitam || 87 ||

nityaṃ nivedya naivedyaṃ madhyarātre baliṃ haret |
evaṃ japitvā prayataḥ sahasrāṇyekaviṃśati || 88 ||

samāptidivase rātravajaṃ hatvā baliṃ haret |
tataḥ kārayitā rājā toṣayet sādhakaṃ dhanaiḥ || 89 ||

vidhinā'nena santuṣṭo baṭukeśaḥ prayacchati |
tejo balaṃ yaśaḥ putrān kāntiṃ lakṣmīmarogatām || 90 ||

naśyanti śatravaḥ sarve vardhante bandhubāndhavāḥ |
avagraho na jāyeta viṣaye tasya bhūpateḥ || 91 || iti || (30-3 | 19 vi0 saṃ0)

30-3 | 20-1 śrīyoginībalividhau kartavyaṃ śrīmahānirvāṇa tantre 6 ullāse yathā-

tatastu yāṃ yoginībhyaḥ svāhā yāmyāṃ haredbalim || 56 ||

atra ṭīkā - tatastviti | tato'nantaraṃ eṣaḥ sudhāmiṣānvito baliryāṃ 
yoginībhyaḥ svāheti mantreṇa yāmyāṃ maṇḍalasya dakṣiṇe bhāge yoginībhyo 
baliṃ haret || 56 || iti ||

2 śrījñānārṇave 5 paṭale 19 patre yathā-

ūrdhvaṃ brahmāṇḍato vā divi gaganatale bhūtale niṣkale vā |
pātāle va'nale vā salilapavanayoryatra kutra sthitā vā ||

kṣetre pīṭhopapiṭhādiṣu ca kṛtapadā dhūpadīpādikena |
prītā devyaḥ sadā naḥ śubhabalividhinā pāntu vīrendravandyāḥ || 32 || 
 

p. 530)

etadante maheśāni ! yāṃ bījaṃ yoginī tataḥ ||
bhyaḥ svāhā sarvavarṇānte yoginīpadamālikhet || 33 ||

kavacaṃ cāstramālikhya vahṇijāyāṃ punarlikhet | 
anena manunā devi ! yoginīnāṃ baliṃ haret || 34 || iti || (30-3 | 20-1 vi0 saṃ0)

30-3 | 21-1- śrīkṣetrapālabalividhau0 | śrīmahānirvāṇatantre 6 ullāse yathā-

ṣaḍdīrghayaktaṃ samvartaṃ kṣetrapālāya hṛnmanuḥ |
anena kṣetrapālāya baliṃ dadyāttu paścime || 57 ||

atra ṭīkā - ṣaḍityādi | ṣaḍdīrghayuktaṃ samvartaṃ kṣakāramuktvā tataḥ 
kṣetrapālāyetyuktvā tato hṛt namaḥ - iti vadet sarvapadayojanayā kṣāṃ kṣīṃ 
kṣūṃ kṣaiṃ kṣauṃ kṣaḥ kṣetrapālāya namaḥ - iti manurjātaḥ eṣaḥ 
sudhāmiṣānvitānnabalirityādyanenaiva manunā maṇḍalasya paścime bhāge 
kṣetrapālāya baliṃ dadyāt || 57 || 
 
2- śrījñānārṇave 5 paṭale 19 patre yathā-

ṣaḍdīrghasvarasaṃbhinnaṃ kṣakāraṃ vilikhet priye ! |
sthānakṣetrapadaṃ pāla dhūpadīpādi cā'likhet || 35 ||
sahitaṃ balimālikhya gṛhṇa gṛhṇa tato vadet |
vahnijāyānvito mantraḥ kṣetrapālasya sundari ! || 36 ||
anena manunā devi ! kṣetrapālabaliḥ smṛtaḥ || iti ||

3- śrīkṣetrapālabalidāne mantrādikaṃ vidhiśca saṭīkaśāradātilake 20 paṭale 
761 patre yathā -

tasmai saparivārāya balimetena nirharet |
pūrvamehidvayaṃ paścādviduṣi ! syāt purudvayam || 39 || 

bhañjayadvitayaṃ bhūyo narttayadvitayaṃ punaḥ |
tato vighnapadadvandvaṃ mahābhairava tatparam || 40 ||

kṣetrapālabaliṃ gṛhṇadvayaṃ pāvakasundari |
balimantro'yamākhyātaḥ sarvakāmaphalapradaḥ || 41 ||

sopadaṃśaṃ bṛhat piṇḍaṃ kṛtvā rātriṣu sādhakaḥ |
smṛtvā yathoktaṃ kṣetreśaṃ tasya haste baliṃ haret || 42 ||

p. 531)

balinā'nena santuṣṭāḥ kṣetrapālaḥ prayacchati |
kāntiṃ medhāṃ balārogyatejaḥpuṣṭiyaśaḥśriyaḥ || 43 || iti ||

4- śrīkṣetrapālapūjanākaraṇe apāya uktaḥ saṭīkaśāradā 20 paṭale 760 patre 
32 ślokaṭīkāyāṃ yathā-

kṣetrapālamasampūjya yaḥ karma kurute kvacit |
tasya karmaphalaṃ hanti kṣetrapālo na saṃśayaḥ || iti ||

30-3 | 22-1 śrīgaṇapatibalividhau0 | śrīmahānirvāṇatantre 6 ullāse yathā-

1- khāntabījaṃ samuddhṛtya ṣaḍdīrghasvarasaṃyutam |
ṅe'ntaṃ gaṇapatiṃ coktvā vahnijāyāntato vadet || 58 ||
uttarasyāṃ gaṇeśāya balimetena kalpayet || iti ||

atra ṭīkā-khāntetyādi | ṣaḍdīrghasvarasaṃyutaṃ khāntabījaṃ
khasyānto gakārastadrūpaṃ bījaṃ samuddhṛtya tato ṅe'ntaṃ gaṇapatiṃ -
ñcoktvā tato vahnijāyāṃ svāheti vadet yojanayā
gāṃ gīṃ gūṃ gaiṃ gauṃ gaḥ gaṇapataye svāheti mantro jātaḥ
eṣaḥ sudhāmiṣānvitānnabalirityādyenānenaiva mantreṇa
uttarasyāṃ maṇḍalasyottare bhāge gaṇeśāya baliṃ kalpayeddadyāt || iti ||

2- ito'nyaprakāreṇa śrījñānārṇave 5 paṭale 20 patre yathā-

gāṃ gīṃ gūṃ trayamālikhya .ṅentaṃ gaṇapatiṃ tataḥ || 37 ||

varānte varadānte ca sarvānte janamālikhet |
me vaśaṃ cā'naya procya sarvopapadamālikhet || 38 ||

cārānte sahitaṃ coktvā baliṃ gṛhṇa dvidhā padam |
vahnijāyānvito mantro gaṇapasya baliṃ haret || 39 || iti || (30-3 | 22 vi0 saṃ0)

30-3 | 23- sarvabhūtabalividhau0 | śrīmahānirvāṇatantre 6 ullāse yathā-

madhye tathā sarvabhūtabaliṃ dadyād yathāvidhi || 59 ||
hṛīṃ śrīṃ sarvapadaṃ coktvā vighnakṛdbhyastato vadet |
sarvabhūtebhya ityuktvā hūṃ phaṭ svāhā manurmataḥ || 60 || iti ||

p. 532)

atra ṭīkā- tathaiva maṇḍalasya madhye yathāvidhi vidhivat sarvabhūtabaliṃ 
dadyāt || 59 ||

sarvabhūtebhyo balidānasya mantramāha ekena hṛīmiti | hrīṃ śrīṃ 
sarvapadamuktvā tato vighnakṛdbhayaḥ iti vadet tataḥ sarvabhūtebhyo ityuktvā 
hūṃ phaṭ svāheti vadet yojanayā hrīṃ śrīṃ sarvavighnakṛdbhyaḥ 
sarvabhūtebhyo hūṃ phaṭ svāheti manurjātaḥ eṣa-
sudhāmiṣānvitānnabalirityādyo'yameva manuḥ sarvabhūtebhyo balidāne mataḥ 
|| 61 || iti ||

kiñcinnivedanamatra ||

anyacca naivedyopayogipadārthāḥ pramāṇagranthasahitāḥ prāgabhīritāḥ | 
balyupayuktapadārthāścāpi vi0 13 | 30-3 taḥ 13 | 30-23 | 508 patrataḥ 531 
patrāntaṃ yāvannirūpitāḥ | anyaccātra baliviṣayakaṃ nānāgranthato 
yathāmatyalikhīti kiṃ bahunā tadvidāṃ purato viśiṣṭapratipādanaśrameṇa | 

atha caitatsūtroktadevatetaratantragranthānusāribaliditsūnāṃ kṛte 
tāntrikapaddhatyaivāvaraṇapūjāṅgaśrībaṭukādipañcabalayaḥ 
pradhānadevatābaliśca 
sarvasādhāraṇatayāsmadgrathitabālātantracandrikāgranthasthaścādhastāllikhy-
te so'pekṣitaścet svasvakārye upādeya iti

30-3 | 24 atha 
śrīvaḍodarārājyādhipatividvatpriyasvaryātaśrīmatsayājīrāvanṛpendramudrā-
pitaśrībālātantracandrikānāmakagranthasthāvaraṇapūjāṅgaḥ
śrībaṭukādidevatābaliprayogaḥ || 316 patrasthaḥ -

1- tatrādau śrībaṭukabalidānaprayogo yathā-

īśānyāṃ prokṣaṇīpātrajalena maṇḍalaṃ vidhāya | tadupari candanādinā 
athavā viśeṣārghajalena bindutrikoṇavṛttacaturasrātmakaṃ maṇḍalaṃ vilikhya 
tanmaṇḍalapūjā kāryā yathā-

dakṣahaste gandhākṣatapuṣpāṇyupādāya oṃ aiṃ hrīṃ vyāpakamaṇḍalāya 
namaḥ iti sampūjya oṃ astrāya phaṭ ityuktvā kṣālitamādhārapātraṃ 
tanmaṇḍale nidhāya tatra ca caturdikprakaṭitadīpapradīptaṃ yathādhikāraṃ 
sakhaṇḍaṃ sadhūpaśalākaṃ haviḥ śeṣapūritabalipātramāsthāpya 
mṛnmayajalapātraṃ cāsthāpya [etadavadhikamadhastanaśrīyoginī - kṣetrapāla- 
gaṇapati- sarvabhūta- baliṣvapyūhyam ||]

atha śrībaṭukatadbalipūjā ca yathā-

oṃ śrīdevīputrāya baṭukāya namaḥ - gandhapuṣpābhyāṃ pūjayāmi 
namaskaromi ityuktvā śrībaṭukaṃ dhyātvā ākaśe tat samarpya tasmai namaḥ 
kuryāt
punaścāpi gandhākṣatapuṣpādyupādāya oṃ śrībaṭukabalidravyāya namaḥ 
gandhākṣatapuṣpābhyāṃ pūjayāmi iti baliṃ sampūjya namaskuryāt -

p. 533)

tato balipātrāttadabhāve sāmānyārghājjalamādāya
oṃ aiṃ hrīṃ ehyehi devīputra baṭukanātha kapilajaṭābhārabhāsura piṅgalatrinetra 
jvālāmukhasarvavighnānnāśaya sarvopacārasahitamimaṃ baliṃ gṛhṇa gṛhṇa 
svāhā iti 

athavā

oṃ hrīṃ baṭukāya me āpaduddhāraṇaṃ kuru kuru baṭukāya hrīṃ baṭuka eṣa te 
balirna mama-ityuktvā vāmāṅguṣṭhānāmike ekīkṛtya dakṣiṇahastasthaṃ 
balipātrasāmānyārghapātrānyatamajalaṃ tatra prasiñcet | tataḥ 
puṣpāñjalimādāya 

oṃ balidānena saṃtuṣṭo baṭukaḥ sarvasiddhidaḥ |
śāntiṃ karotu me nityaṃ bhūtavetālasevitaḥ ||

iti paṭhitvā śrībaṭukenāyaṃ balirgṛhīta evaivaṃ dhyātvā puṣpāñjaliṃ 
samarpya oṃ eṣa baliḥ śrībaṭukāya na mama ityuktvā sāmānyarghajalaṃ 
prakṣipedyonyā ca praṇamediti śrībālātantracandrikāsthaśrībaṭukabaliprayogaḥ 
saṃpūrṇaḥ ||

2- atha śrīyoginībaliprayogaḥ || tatraiva ||

tata āgneyakoṇe śrībaṭukabalivanmaṇḍalaṃ viracya tathaiva sampūjya tathaiva 
tatrādhāraṃ saṃsthāpya tathaiva dīpādisahitaṃ balidravyasambhṛtaṃ 
pātramāsthāpya | dakṣakare gandhapuṣpādi saṅgṛhya

oṃ yāṃ yoginībhyo namaḥ ityuktvā śrīpradhānadevatāyāḥ parisevikāḥ 
śrīviśvadurgādi 64 yoginīrdhyātvā tathaivākāśe puspādi samarpya | 
punaścāpi candanākṣatapuṣpāṇi haste kṛtvā-


oṃ śrīyoginidevatābalidravyāya namaḥ iti baliṃ sampūjya namaskṛtya tato yoginī 
pātraṃ pātrāsādane sthāpitaṃ cettasmān no cet sāmānyārghājjalaṃ 
gṛhītvā

oṃ ūrdhvaṃ brahmāṇḍato vā divi gaganatale bhutale nistale vā |
pātāle vā tale vā salilapavanayoryatra kutra sthitā vā ||

kṣetre pīṭhopapiṭhādiṣu ca kṛtapadā dhūpadīpādikena ||
pritā devyaḥ sadā naḥ śubhabalividhinā pāntu vīrendravandyāḥ || 1 ||

oṃ śuklavarṇe triśūlaḍamarupāśāsidhare sarvālaṅkārabhūṣite sasainye 
saumye catuḥṣaṣṭhiyoginīsahite ehyehi āgaccha āgaccha sarvayoginībhyaḥ 
sarvabhūtebhyaḥ sarvabhūtādhipatibhyo ḍākinībhyaḥ śākinībhyaḥ 
trailokyanivāsinībhyaḥ imaṃ baliṃ gṛhṇīta mamepsitaṃ kāryaṃ kuruta kuruta 
svāhā | ityubhayamantimaṃ vā paṭhitvā balipātrāt sāmānyārghādvā jalaṃ 
gṛhītvā 

p. 534)

vāmahastamadhyamānāmikāṅguṣthaṃ miśrīkṛtya tadupari tajjalaṃ 
nikṣipedyathā balau patet tataśca pūrvavat puṣpāñjalimādāya
 
oṃ yāḥ kāścidyoginī raudrāḥ saumyā ghoratarāḥ parāḥ | 
khecarībhūcarīvyomacaryaḥ pritāstu me sadā ||

ityuktvā śrīyoginīrdhyātvākṣatapuṣpāpaṇyañjalisthāni tābhyo'rpayet | oṃ eṣa 
baliryoginībhyo na mama ityuktvā sāmānyārghajalamutsṛjya namaskṛtya yonyā 
praṇamediti -

śrībālātantracandrikāyāṃ yoginībaliprayogaḥ sampūrṇaḥ ||

3- || tatraiva || atha śrīkṣetrapālabaliḥ ||

tato nair-ṛtyakoṇe śrībaṭukabalidānavanmaṇḍalam vidhāya sampūjya pūrvavat 
tatra balipātrādhāraṃ muktvā tatra pūrvavat sadīpadhūpabalipātraṃ nidhāya oṃ 
kṣaṃ kṣetrapālāya namaḥ ityuktvā taṃ dhyātvā candanākṣatapuṣpāṇi 
ākāśe tasmai samarpya namaskṛtya |

oṃ śrīkṣetrapālabalidravyāya namaḥ ityuccārya baliṃ candanādinā sampūjya | 
balipātrāttadabhāve sāmānyārghapātrājjalamādāya oṃ kṣāṃ kṣīṃ kṣūṃ 
kṣaiṃ kṣauṃ kṣaḥ ehyehi devīputra ucchiṣṭahārin muhurmuhūrakṣa rakṣa 
kṣetrapāla sarvavighnānnāśāya nāśaya sarvopacārasahitaṃ imaṃ baliṃ 
gṛhṇa gṛhṇa svāhā ityuktvā vāmāṅguṣṭhaṃ tarjanīṃ ca miśrīkṛtya tajjalaṃ 
tatra pātayedyathā balau patet | tatastaṃ prārthayedyathā puṣpāñjalimādāya

oṃ yaṃ yaṃ yaṃ yakṣarūpaṃ daśadiśivadanaṃ bhumikampāyamānam | 
saṃ saṃ saṃhāramūrti śirasi dhṛtajaṭāśekharaṃ candrabimbam ||

daṃ daṃ daṃ dīrghakāyaṃ kṛtanaravapuṣaṃ ūrdhvarekhākarālam [atra 
cordhvarekhā0 iti pāṭhaḥ samīcīnaḥ ||] |
paṃ paṃ paṃ pāpanāśaṃ praṇamata satataṃ bhairavaṃ kṣetrapālam || 1||
yo yasmin kṣetravāsī ca kṣetrapālaḥ sakiṅkaraḥ | 
prīto'sau balidānena sarvarakṣāṃ karotu me |

iti dhyātvā śrīkṣetrapālāya puṣpāñjali samarpya -

eṣa baliḥ kṣetrapālāya na mama iti jalamutsṛjya yonyā praṇamediti || iti 
śrīkṣetrapālabaliḥ sampūrṇaḥ ||

4- tatraiva || atha śrīgaṇapatibaliḥ ||

tato vāyavyakoṇe śrībaṭukabalivanmaṇḍalaṃ vidhāya sampūjya pūrvavattatra 
balipātrādhāramuktvā tatra pūrvavat sadīpadhūpaṃ balipātraṃ nidhāya oṃ 
gaṃ gaṇapataye namaḥ ityuktvā taṃ dhyātvā

p. 535)

ākāśe gandhādyarpayet namecca tataḥ śrīgaṇapatibalidravyāya namaḥ ityuktvā 
balimapi pūjayennamecca | tataḥ balipātrāttadabhāve 
sāmānyārghapātrājjalamādāya oṃ gāṃ gīṃ gūṃ gaiṃ goṃ gaḥ śrīṃ 
hrīṃ klīṃ glauṃ gaṃ gaṇapataye varavarada sarvajanaṃ me vaśamanaya 
sarvopacārasahitaṃ imaṃ baliṃ gṛhṇa gṛhṇa svāhā ityuktvā 
vāmāṅguṣṭhamadhyame miśrīkṛtya pūrvavat balau jalaṃ pātayet tataśca 
puṣpāñjalimādāya

sarvadā sarvakāryāṇi nirvighnaṃ sadhayāmyaham |
śāntiṃ karotu me nityaṃ vighnarājaḥ sadā kriyām ||

ityuktvā taṃ dhyātvākāśe puṣpādi prakṣipet |
oṃ eṣa baliḥ śrīgaṇapataye na mama iti jalamutsṛjya yonyā praṇamecca iti ||
iti śrīgaṇapatibaliḥ sampūrṇaḥ ||

uparyuktaśrībaṭukayoginīkṣetrapālagaṇapatīnāṃ caturṇāṃ devānāṃ 
balidānaprārthanayoranantaraṃ punaścāpi tāṃścaturo devān prārthayet 
athavā svasvadiśi eṣāṃ caturṇāṃ caturo balīn pṛthagevoktarītyā 
pūrvavaddatvā prārthayedyathā

oṃ gaṇādhināthaṃ baṭukaṃ ca yoginīḥ |
kṣetrādhināthaṃ ca vidikcatuṣṭaye ||

sarvopacāraiḥ paripūjya bhaktito |
nivedayāmo balimuktayuktibhiḥ ||

evaṃ ślokoktadevānnamaskuryādityaparaḥ pakṣaḥ || iti ||

5- tatraiva0 || atha sārvabhautabaliḥ ||

caturṇāṃ śrībaṭukādibalīnāmuttare (śuddhottarasyāṃ diśi) 
śrībaṭukādibalivanmaṇḍalaṃ vidhāya

oṃ śrīsarvabhūtabalimaṇḍalāya namaḥ ityuktvā tatra candanādi samarpya 
namaskṛtya | tatrādhārapātraṃ saṃsthāpya tatra sadīpadhūpaṃ 
balidravyapūritaṃ pātraṃ nidhāya |

oṃ hrīṃ sarvabhūtagaṇa ihāgaccha āgaccha sarvabhūtagaṇāya namaḥ iti 
candanākṣata puṣpādyākāśe nikṣipya punaśca candanākṣatādyādāya oṃ 
śrīsarvabhūtabalidravyāya namaḥ ityuktvā tat puṣpādikaṃ balau prakṣipya 
namaskuryācca | tato balipātrāttadabhāve sāmānyārghapātrādvā jalamādāya |

oṃ hrīṃ sarvavighnakṛdbhyaḥ sarvabhūtebhyo huṃ phaṭ imaṃ baliṃ gṛhṇa gṛhṇa 
svāhā |

p. 536)

ityuktvā vāmāṅguṣṭhatarjanyagramekīkṛtya (athavā 
vāmahastasarvāṅgulibhiḥ) tajjalaṃ balau prakṣipet
tataḥ puṣpāñjalimādāya

oṃ bhūtā ye vividhākārā divyabhūmyantarikṣagāḥ | 
pātālatalasaṃsthāśca śivayogena bhāvitāḥ || 1 ||

krūrādyāḥ śatasaṅkhyākāḥ pākhṇḍādyā vyavasthitāḥ |
tṛpyantu prītamanaso bhūtā gṛhṇantvimaṃ balim || 2 ||

nānāvarṇākṛtairvakrairnānābhūṣāmbarāyudhaiḥ |
nānābhūtagaṇairyūthaṃ sarvabhūteśvaraṃ bhaje || 3 ||

ityuktvā sarvabhūtagaṇebhya ākāśe taṃ puṣpāñjaliṃ kṣipet praṇamecca ||
tataḥ eṣa baliḥ sarvabhūtagaṇebhyo na mametyuktvā jalamutsṛjya bāṇamudrayā 
bhūtāni visṛjya tṛptāḥ santo bhūtagaṇāḥ prayātāḥ iti bhāvayet yonyā 
praṇamecca |
tato hastapādaṃ prakṣālya mūlenācamya prāṇānāyamya svaśarīre 
sāmānyārghajalaṃ prokṣaṇīpātrajalaṃ vā kiñcit siñcediti || iti 
sarvabhūtabaliprayogaḥ sampūrṇaḥ ||

6- tatraiva - || atha mukhyadevāgre mukhyabaliprayogo yathā-

tataḥ śrīmukhyadevatāgre athavā śrīyantrasamīpe śrībaṭukabalivanmaṇḍalaṃ 
kṛtvā oṃ śrī-amukadevatābalimaṇḍalāya namaḥ iti sampūjya | tatra 
pūrvavadādhārapātramāsthāpya caturmukhadīpapradīptaṃ sadhūpaṃ 
balidravyapūritaṃ balipātraṃ nidhāya | tato gandhākṣatapuṣpāṇyādāya 
sapraṇavaṃ mūlaṃ paṭhitvā saparivārāyai śrī-amukamukhyadevatāyai namaḥ | 
ityuktvā gandhākṣatapuṣpairarcayitvā |

punaśca gandhākṣatapuṣpāṇyādāya oṃ śrī-amukapradhānadevatābalidravyāya 
namaḥ gandhākṣatapuṣpāṇyarpayāmi namaskaromītyuktvā tad gandhādikaṃ 
balerupari prakṣipya praṇamet |

tataśca balipātrāt sāmānyārghapātrādvā jalamādāya oṃ hrīṃ sāṅgāyai 
saparivārāyai savāhanāyai sāyudhāyai saśaktikāyai 
(śrīmadamukeśvarasahitāyai) śrī-amukamukhyadevatāyai namaḥ |

oṃ ehyehi jagatāṃ mātarjanani imaṃ samīpaṃ baliṃ gṛhṇa gṛhṇa siddhiṃ dehi 
dehi śatrukṣayaṃ kuru kuru aiṃ hrīṃ huṃ phaṭ svāhā ||

ityuktvā devatīrthena tajjalaṃ balāvarpayet mūlena puṣpāñjalimarpayet 
praṇamecca | 
tataśca eṣa baliḥ śrī-amukamukhyadevatāyai na mama ityuktvā jalamutsṛjya 
yonyā praṇamediti |

p. 537)

iti mukhyadevatābaliḥ sampūrṇaḥ ||

iti śrīsarvasādhāraṇatvena 
śrībālātantracandrikāgranthasthāvaraṇapūjāṅgaśrībaṭukādimukhyadeva-
tāntabaliprayogaḥ sampūrṇaḥ || 
 
idaṃ baliviśeṣakaṃ hi pariśiṣṭamuktaṃ mayā
na tatra mama kiñcidapyabhihitaṃ śivocchiṣṭakam | 
svatantranijatantrataśca vidadhīta vai tān balīn
yathādhikṛti sādhakaḥ paramamambikārādhakaḥ || pa0 ka0 sū0 
dvitīyāvṛtīkarttā- || (30-3 | 24 vi0 saṃ0)

30-3 | 25 || pūrvatana 489 patragata 13-30 | 8-30 | 9 
viṣayasthāpūrṇamahanaivedyavidhisamāptiḥ -

evamāvaraṇapūjāṅgahomaṃ nirvartya punaścāpi yonimudrayā 
praṇamedityato'pūrṇo mahānaivedyavidhiradhastanavidhayā sudhiyā 
pūrayitavyaḥ iti -

sa yathā-
 
evaṃ havanabalyātmakamahānaivedyāśanena sveṣṭadevatāmatitṛptāṃ 
vibhāvya sāmānyārghajalaṃ gṛhītvā oṃ0 amṛtāpidhānamasi svāhā iti 
(paścādācamanaṃ0 śrī0 mā0 pū0 ślokaṃ) paṭhitvā oṃ uttarāpośanaṃ 
samarpayāmi ityuktvā tat sāmānyārghajalaṃ sveṣṭadevatāyai samarpya | (tata 
uṣṇodakaiḥ0 ma0 pū0 35 ślokaṃ paṭhitvā |) oṃ0 namaḥ hastaprakṣālanaṃ sa0 
mukhaprakṣālanaṃ sa0 gaṇḍūṣapādyādikaṃ karodvartanāya gandhāṃśca 
samarpayāmi ityuktvā iṣṭa devyai yantre vā sāmānyārghajalaṃ trirarpayet |

tato mukhyadevatāyai niveditaṃ naivedyapātram oṃ astrāya phaṭ ityuktvā nair-
ṛtyakoṇe athavā pūjāsthānād bahirbhūtapavitrasthale nidadhyāt hastau 
kṣālayecca |

tata ācamanīyapātrādathavā sāmānyārghapātrājjalamādāya (oṃ atiśīta0 iti 
patrasthaṃ 36 ślokamantramathavā)

oṃ0 gaṅgottarīvegasamudbhavena suśītalenātimanohareṇa ||
tvaṃ padmapatrākṣi ! mayārpitena śaṅkhodakenācamanaṃ gṛhāṇa ||

iti ślokamathavobhāvapi paṭhitvā oṃ namaḥ naivedyānte śaṅkhodakenācamanaṃ 
sa0 ityuktvā tajjalaṃ śrīkare vā śriyantrarājasyopari vā samarpayet || 

evamācamanaṃ dattvā'nantaraṃ sāmānyārghajalena punarapi śrīhastaṃ 
kṣālayediti ||

p. 538)

iti śrībālātantracandrikāsthastāntriko mahānaivedyavidhiḥ sampūrṇaḥ || 
atrāpūrṇaṃ sudhiyā svasvasampradāyānusāritvena pūraṇīyaṃ kimadhikaṃ 
tadvidāṃ puraḥ pracurapratipādanena
evamantargatahavanabalyātmakamahānaivedyasamāpterūrdhvamadhastanarītyā 
śrīṣṭadevatāyai tāmbūlādimukhavāsaṃ samarpayediti ||

30-3 | 26- || devāya naivedyārpaṇaphalam || skānde yathā-

nānāvyañjanasaṃyuktaṃ rasaṣaṭkena saṃskṛtam | 
nivedyā'nnaṃ samāpnoti phalaṃ yajñādhikaṃ dvija ! | iti ||

iti śrīmahānaivedyāntargataśrībaṭukādipradhānadevatāntabalividhisahito 
mahānaivedyavidhiḥ sarvo'pi sampūrṇaḥ || (13 | 30-3 vi0 sarvaḥ saṃ0)

śrīḥ

dvi0 pa0 vi0 13 | 31- || śrīparadevatāyai 
tāmbūlādimukhavāsaphaladakṣiṇāsamarpaṇam || 
tatrādau- || tāmbūlasāhityadhṛk śrīdūtīdhyānam || 
śrībalātantracandrikāyāṃ 322 patre yathā- 

1 || 
tāmbūlādimukhavāsasāhityasambhṛtaratnakhacitahiraṇmayānarghyatāmbūla-
karaṇḍadhāriṇī- śrīdūtīrdhyāyed yathā -

oṃ karpūrādikavastujātamakhilaṃ sauvarṇaśṛṅgārakaṃ
tāmbūlasya karaṇḍakaṃ maṇimayaṃ cailāñcalaṃ darpaṇaṃ ||
 
visphūrjanmaṇipāduke ca dadhatīḥ siṃhāsanasyābhita
stiṣṭhantīḥ paricārikāstava sadā vandāmahe sundari ! ||
ityuktvā śrīparāmbikāmahāsiṃhāsanaparitaḥ sthitāḥ 
tāmbūlakaraṇḍahastāḥ śrīdūtīrdhyāyan namet ||

2 | 1 atha tāmbūlādimukhavāsārpaṇaṃ tatra vaidikatāntrikamantrāśca ||
oṃ yat puruṣeṇa0 - oṃ yāḥ phalinīryā0
iti vaidikamantradvayaṃ paṭhitvā 

p. 539)

2 || oṃ devānāṃ lalanādibhiḥ pradalitaṃ karpūracūrṇākulam
pūgīnāgalatādalaṃ muhuraho mātarmayā te'rpitam ||

svarṇālaṅkṛtaratnapātraracitaṃ śaityaṃ payaḥ pīyatām
tāmbūlaṃ punararpayāmi manasā śrīsundari ! svīkuru || śrī0 mā0 pū0

3 || oṃ pūgīnāgalatādalaṃ jalakaṇākarpūracūrṇākulam 
jatīpatralavaṅgalāṅgaliphalaṃ drākṣākaṣāyānvitam ||

jihvoṣṭhādharapallavojjvalakaraṃ kandarpadarpoditam
tāmbūlaṃ parameśvari ! priyataraṃ dattaṃ mayā gṛhyatām || śrī0 mā0 pū0
imau dvau ślokau paṭhitvā oṃ0 namaḥ mukhavāsārthe pūgīphalatāmbūlaṃ ca 
samarpayāmi

4 athavā śrīmānasapūjoktatāmbūlārpaṇaślokamantrā yathā -

karpūreṇa yutairlavaṅgasahitaiḥ kaṅkolacūrṇānvitaiḥ
susvādukramukaiḥ sagaurakhadiraiḥ susnigdhajātīphalaiḥ |
mātaḥ ! ketakipatrakendurucibhistāmbūlavallīdalaiḥ
sānandaṃ mukhamaṇḍanīyamatulaṃ tāmbūlamaṅgīkuru || 47 ||

5 || tatraiva -

elālavaṅgādisamanvitāni kaṅkolakarpūrasumiśritāni |
tāmbūlavallīdalasaṃyutāni pūgāni te devi ! samarpayāmi || 48 ||

6 || tatraiva-

tāmbūlavallidalanirjitahemavarṇaṃ
svarṇāktapūgaphalamauktikacūrṇayuktam ||
ratnasthalīsthitamidaṃ khadireṇa sārdhaṃ
tāmbulamamba ! vadanāmburuhe gṛhāṇa || 41||  
 
7 || athavā- śrī0 du0 ka0 pustikāyāṃ 169 patroktatāmbūlārpaṇaśloka-
mantro yathā-

tāmbūlaṃ vinivedayāmi vilasatkarpūrakastūrikā- 
jātīpūgalavaṅgacūrṇakhadirairbhaktyā samullāsitam ||

sphūrjadratnasamudgakapraṇihitaṃ sauvarṇapātre sthitai-
rdīpairujjavalamannacūrṇaracitairārārtikaṃ gṛhyatām [eteṣāṃ 
ślokamantrāṇāmeko vā sarve'pi vā yathāvakāśaṃ pāṭhyāḥ ||] || 9 || iti || 

p. 540)

uparitanān sarvānekaṃ vā paṭhitvā dvābhyāṃ caturbhistāmbulairvā 
suviracitāṃ tāmbūlavīṭikāṃ śrīpurato dhṛtvā yathāmilitatāmbūlaṃ 
samarpayāmītyuktvā0 śrīyai sāmānyārghajalamarpayediti ||
(31 | 2 tathā ca 13-31 vi0 sarvaḥ saṃ0) 

13 | 32 || atha phalārpaṇam ||

śrīṣṭadevatāyai phalārpaṇe ślokamantrāḥśrī0 bā0 taṃ0 caṃ0 113-114 
patrayoḥ śrībālāmānasopacārastotre yathā-

1 || elālavaṅgādisamanvitāni
kaṅkolakarpūravimiśrītāni |
tāmbūlavallīdalasaṃyutāni
phalāni te devi ! samarpayāmi || 40 || iti ||

etasmin samaye'dhastanaślokadvyoktānyapi nānāphalānyarpaṇīyāni tāni ca 
tatraiva yathā -

2 || [imāni phalānipūrvadattatāmbūlato bhinnānyakhaṇḍitāni ceti 
subuddhivilasitamāstāmiti pa0 ka0 sū0 dvitīyāvṛttikāraḥ ||
ātāmrarambhāphalasaṃyutāni
drākṣāphalākṣoṭasamanvitāni |
sanārikelāni sadāḍimāni
phalāni te devi ! samarpayāmi ||37 || 

3 tatraiva || kaliṅgakośātakasaṃyutāni
jambīranāriṅgasamanvitāni
sabījapūrāṇi sadāḍimāni
phalāni te devi ! samarpayāmi || 38 || iti ||(13 | 32 vi0 saṃ0) 

13 | 33 || atha mahādakṣiṇārpaṇaṃ || dakṣiṇāyāṃ jñeyaṃ yathā-

1 || pūjānte dīyamāneyaṃ mahādakṣiṇā saddhanināṃ kṛte 
raupyasauvarṇānyatamamudrātmikā jñeyā ||

2 || svalpadhanināṃ kṛte ca svalpadravyādānātmikā jñeyā-

3 kevalaviraktānāṃ kṛte ca yathālabdhaṃ kiñcinnivedanīyamiti vivekaḥ -

p. 541)

4 atraikaḥ praśna upatiṣṭhate yathā-

kimeṣā dakṣiṇā bhaktakṛte athavā devatākṛte ?-
yadi devatārthikā syāttadā mahādhanādisampattpradātryai
śrībhagavatyai dakṣiṇādānānaucityāt taddānamayuktaṃ syāt
tato bhaktajanārthamātraiveyaṃ dakṣiṇeti niścīyate || iti ||
pa0 ka0 sū0 dvitīyāvṛttikāraḥ ||

5- || dakṣiṇārpaṇe viśeṣaślokamantraḥ ||

śrīmadjagadgurupūjyapādaśrīśaṅkarācāryakṛtabālāmānasapūjāśrīvidyā
mānasapūjāstotrayoryathā-

atha bahumaṇimiśrairmauktikaistvāṃ vikīrya
tribhuvanakamanīyaiḥ pūjayitvā ca vastraiḥ ||
militavividhamuktāṃ divyamāṇikyayuktāṃ
janani ! kanakavṛṣṭiṃ dakṣiṇāṃ te'rpayāmi || 42 || iti ||
(13 | 33 vi0 sarvaḥ saṃ0)

13 | 34 || pūjānte kriyamāṇo japaḥ kadā kāryastatra vicāraḥ ||

gā0 pu0 paddhatau0 tu 47-55 patrayostvayaṃ japaḥ nīrājanānantaraṃ 
mantrapuṣpānantaraṃ copāttastato yathārhamanuṣṭheyamiti pa0 ka0 sū0 
dvitīyāvṛttikāraḥ ||
atrānugata dvi0 pa0 śi0 13-3 | 1 viṣayo dṛśyaḥ || iti ||
vi0 35 | 1 || [etajjapakāraṇasamayapramāṇāyānugata dvi0 pa0 śi0 13 | 30-2 | 10 vi0 
gataṭīpaṇyādi dṛśyam | tathātraiva viṣaye purastanaḥ 13 | 35-1 | 2-5 vi0 dṛśyaḥ] 
japaviṣaye ||

1 || sarveṣāṃ karmaṇāṃ japayajñaḥ śreṣaṭhaḥ tatra pramāṇam ||

yoginītantre 13 paṭale 75 patre śrīguruguruśrīśivoktaṃ yathā-

sarveṣāṃ karmaṇāṃ śreṣṭhaṃ japajñānaṃ maheśvari!|
japayajño maheśāni ! matsvarūpo na saṃsayaḥ || iti ||

japena devatā nityaṃ stūyamānā prasīdati || 
prasannāvipulān kāmān dadyānmuktiṃ ca śāśvatīm || ityādi tatraiva
76 patre -

tathaiva śrī0 bha0 gī0 10 a0 25 śloke yathā -

2 || yajñānāṃ japayajño'smi sthāvaraṇāṃ himālayaḥ || iti ||

p. 542)

3 || japayajñaḥ vaidikatāntrikadharmebhyo'pi śreṣṭhaḥ || yā0 taṃ0 13 paṭale 75 
tatre yathā-

vaidikāstāntrikā ye ye dharmāḥ santi maheśvari ! |
sarve te japayajñasya kalāṃ nārhanti ṣoḍaśīm || iti || (35 | 1 sarvaḥ saṃ0) 

35 | 2 || japayajño dvividhaḥ tatphalaṃ ca || tatraiva yathā-

1 || japayajñe hi tiṣṭhed yo bāhye vā cāntare'pi vā |
sarvadā parameśāni ! jīvanmukto na saṃśayaḥ || iti ||

2- || japayajñasya vidhā guṇaśca || tatraiva 76 patre yathā-

upāṃśuḥ syāt śataguṇaḥ sahasro mānaso mataḥ |
mantramuccārayedvācā vāciko japa īritaḥ ||

kiñcit suśravaṇopeta upāṃśuḥ parikīrttitaḥ |
nijakarṇāgocaro yo mānasaḥ parikīrttitaḥ |
vācikastu japo bāhyo mānaso'bhyantaro mataḥ ||
upāṃśurmiśra eva syāt trividho'yaṃ japaḥ smṛtaḥ || iti ||

3- tathaiva manuḥ yathā -

vidhiyajñājjapayajño viśiṣṭo daśabhirguṇaiḥ |
upāṃśuḥ syācchataguṇaḥ sāhasro mānasaḥ smṛtaḥ || iti || ya0 ā0 sū0 53 patre

4 tathaiva nṛsiṃhapurāṇe || yathā-

trividho japayajñaḥ syāttasya bhedaṃ nibodhata |
vācikaśca upāṃśuśca mānasastrividhaḥ smṛtaḥ ||
trayāṇāṃ japayajñānāṃ śreyān syāduttarottaraḥ ||

eteṣāṃ lakṣaṇānyāha viśvāmitraḥ -

yaduccanīcasvaritaiḥ śabdaiḥ spaṣṭapadākṣaraiḥ |
mantramuccārayedvācā vāciko'yaṃ japaḥ smṛtaḥ ||

śanairuccārayenmantramīṣadoṣṭhau ca cālayet |
aparairna śrutaḥ kiñcit sa upāṃśurjapaḥ smṛtaḥ || 

p. 543)

dhiyā yadakṣaraśreṇyā varṇādvarṇaṃ padāt padam |
śabdārthacintanaṃ bhūpa ! kathyata mānaso japaḥ || iti ya0 ā0 sū0 53 patre 
(35 | 2 vi0 saṃ0) 

35 | 3-1 japakaraṇavidhikārikāḥ mahānirvāṇatantre 6 ullāse yathā-

homakarmasamāpyaivaṃ sādhako japamācaret || 165 ||

vidhānaṃ śṛṇu deveśi ! yena vidyā prasīdati |
devatāgurumantrāṇāmaikyaṃ sambhāvayedhiyā || 166 || 

mantrāṇāṃ devatā proktā devatā gururūpiṇī |
abhedena yajed yastu tasya siddhiranuttamā || 167 ||

guruṃ śirasi sañcintya devatāṃ hṛdayāmbuje |
rasanāyāṃ mūlavidyāṃ tejorupāṃ vicintya ca ||
trayāṇāṃ tejasātmānamekībhūtaṃ vicintayet || 168 ||

tāreṇa sampuṭīkṛtya mūlayantrañca saptadhā |
japtvā tu sādhakaḥ paścānmātṛkāpuṭitaṃ smaret || 169 ||

māyābījaṃ svaśirasi daśadhā prajapet sudhīḥ |
vadane praṇavaṃ tadvat punarmāyāṃ hṛdambuje ||
prajapya saptadhā mantrī prāṇāyāmaṃ samācaret || 170 ||

tato mālāṃ samādāya pravālādisamudbhavām |
māle ! māle ! mahābhāge ! sarvaśaktisvarūpiṇi ! || 171 ||

caturvargastvayi nyastastasmānme siddhidā bhava ||
iti sampūjya mālāṃ tāṃ śrīpātrasthāmṛtena ca || 172 ||

tridhā mūlena santarpya sthiracitto japaṃ caret |
aṣṭottarasahasraṃ vāpyathavāṣṭottaraṃ śatam || 173 ||

prāṇāyāmaṃ tataḥ kṛtvā śrīpātrajalapuṣpakaiḥ |
guhyātiguhyagoptrī tvaṃ gṛhāṇāsmatkṛtaṃ japam || 174 ||

siddhirbhavatu me devi ! tvatprasādānmaheśvari ! |
iti mantreṇa matimān devyā vāmakarāmbuje || 175 ||

tejorūpaṃ japaphalaṃ samarpya praṇamedbhuvi 
tataḥ kṛtāñjalirbhūtvā stotrañca kavacaṃ paṭhet || 176 || iti ||

p. 544)

35-3 | 2 || śrīguruguruśrīśaṅkaroktaṃ japakartṛkartavyam ||
japakaraṇasthalaṃ - kulārṇavatantre 15 ullāse 136 patre yathā-

puṇyakṣetraṃ nadītīraṃ guhāparvatamastakam |
tīrthapradeśāḥ sindhūnāṃ saṅgamaḥ pāvanaṃ vanam ||

udyānāni viviktāni bilvamūlaṃ taṭaṃ gireḥ |
devatāyatanaṃ kūlaṃ samudrasya nijaṃ gṛham ||

sādhaneṣu praśastāni sthānānyetāni mantriṇām | 
athavā nivasettatra yatra cittaṃ prasīdati ||

sūryyasyāgnergurerindordīpasya syandanasya ca |
gorakṣakulavṛkṣāṇāṃ sannidhau śasyate japaḥ ||

gṛhe śataguṇaṃ vindyādgoṣṭhe lakṣaguṇaṃ bhavet ||
koṭirdevālaye puṇyamanantaṃ śivasannidhau ||

mlecchaduṣṭamṛgavyālaśaṅkātaṅkavivarjitaḥ |
ekāntapāvane nindārahite bhaktisaṃyute ||

svadeśe dhārmike deśe subhikṣe nirupadrave |
ramye bhaktajanasthāne nivasettāpasāśraye ||

rājānaḥ sacivā rājñaḥ prabhavāḥ puruṣā janāḥ |
caranti yena mārgeṇa nivasettatra mantravit || 

jīrṇadevālayodyāne gṛhe vṛkṣataleṣu ca |
nadītaḍāgakūpeṣu bhūcchidrādiṣu no viśet ||

dīpanāthamavijñāya yo japādikamācaret |
vaṃśāśmadharaṇīdārutṛṇavannavanirmitam ||

varjayedāsanaṃ dhīmān dāridryavyādhiduḥkhadam |
tūlakambalavastrāṇāṃ siṃhavyāghramṛgājinam ||

kalpayedāsanaṃ dhīmān saubhāgyajñānavṛddhidam |
padmasvastikavīrādiṣvāsaneṣupaviśya ca ||

japārcanādikaṃ kuryyādanyathā niṣphalaṃ bhavet |
dvādaśāvarttayedbuddhyā praṇavantu trimātṛkam ||

muñcet piṅgalayā vāyuṃ antasthaṃ recako bhavet |
ṣoḍaśāvarttakaṃ tāraṃ pūrayedbāhyamārutam ||

p. 545)

śanakairiḍayā badvā pūrakaṃ parikīrttitam |
dvādaśāvartakaṃ tāraṃ vāyumadhye tu kumbhayet ||

śoṣayedvāyubījena dehaśoṣaṇamīritaṃ |
punaśca pūrayedvāyuṃ viracyāpūryya kumbhayet ||

dehaṃ dahanabījena dehadāhanamīritam |
punaśca pūrvavadvāyuṃ virecyāpūryya kumbhayet ||

śivakuṇḍalinīyogaspandanāmṛtadhārayā |
āpādamastakaṃ devi ! prāpayet plāvanaṃ bhavet ||

japo dhyānaṃ vinā garbhaḥ sagarbhastadviparyyayaḥ |
agarbhagarbhasaṃyuktaḥ prāṇāyāmaḥ śatādhikaḥ ||

tapāṃsi tīrthayātrādyamatha dānavratādayaḥ |
prāṇāyāmasya tasyaite kalāṃ nārhanti ṣoḍaśīm ||

mānasaṃ vācikaṃ pāpaṃ kāyikaṃ vāpi yat kṛtam |
tat sarvaṃ nirdahecchīghraṃ prāṇāyāmatrayeṇa vai ||

dahmate dhmāyamānānāṃ dhātūnāñca yathā malam |
tathendriyāṇāṃ dahyante doṣāḥ prāṇasya saṃyamāt ||

prāṇāyāmairviśuddhātmā yad yat karma karoti hi |
tattat phalatyasandehādaprayatnena vā kṛtam |
āgamoktena mārgeṇa nyāsaṃ nityaṃ karoti yaḥ |
devatābhāvamāpnoti mantrasiddhiḥ prajāyate ||

yo nyāsakavacacchando mantraṃ japati ca priye ! |
vighnā dṛṣṭvā palāyante siṃhaṃ dṛṣṭvā yathā gajāḥ ||

akṛtvā nyasajālaṃ yo mūḍhatvāt prajapenmanum ||
bādhyate sarvavighnaiśca siṃhairmṛgapaśuryathā ||

akṣamālā dvidhā proktā kalpitākalpiteti ca |
kalpitā mālābhiḥ kḷptā mātṛkā syādakalpitā ||

ādikṣāntākṣarāntatvādakṣamāleti kīrtitā |
anulomavilomābhyāṃ gaṇayenmantravittamaḥ ||

p. 546)

ekaikamaṅgulibhiḥ syādrekhābhirdaśadhā phalam | 
mālābhiḥ śatasāhasraṃ mālinyānantamucyate ||

triṃśadbhiḥ syāddhanaṃ puṣṭiḥ saptaviṃśatibhirbhavet ||
pañcaviṃśatibhirmokṣaṃ pañcadaśyābhicārake ||

pañcāśadbhiḥ kuleśāni ! sarvasiddhiritīritā |
aṅguṣṭhena ca mokṣaḥ syāttarjanī śatrunāśinī ||

madhyamā dhanadāṃ vidyāt śāntikarmaṇyanāmikā |
kaniṣṭhā stambhanākarṣi cāṅguliṣu prakīrtitā ||

etāvacca japiṣyāmītyādau saṅkalpya mantravit |
sthirāsano japitvā ca devyai sodakamarpayet ||

uccairjapo'dhamaḥ prokta upāṃśurmadhyamaḥ smṛtaḥ |
uttamo mānaso devi ! trividhaḥ kathito japaḥ ||

atihrasvo vyādhiheturatidīrghe tapakṣayaḥ |
akṣarākṣarasaṃyuktyā japenmauktikapaṅktivat || 

manasā yaḥ smaret stotraṃ vacasā vā manuṃ japet |
ubhayaṃ niṣphalaṃ devi bhinnabhāṇḍodakaṃ yathā ||

jātasūtakamādau syāttadante mṛtasūtakam |
sūtakadvayasaṃyukto yo mantraḥ sa na sidhyati ||

atastadrahitaṃ kṛtvā mantramāvartayet sadā ||

sūtakadvayāsaṃyukto yo mantraḥ sa hi sidhyati |
mantrārthaṃ mantracaitanyaṃ yonimudrāṃ na vetti yaḥ ||

śatakoṭijapenāpi tasya siddhirna jāyate |
guptavīryyāśca ye mantrā na dāsyanti phalam priye ! ||

mantrāścaitanyasahitāḥ sarvasiddhikarāḥ smṛtāḥ |
caitanyarahitā mantrāḥ proktā varṇāstu kevalam || 

phalaṃ naiva prayacchanti lakṣakoṭijapādapi |
mantroccāre kṛte yādṛka svarūpaṃ prathamaṃ bhavet ||

śataiḥ sahasrairlakṣairvā koṭijāpena tat phalam |
hṛdaye granthibhedaśca sarvāvayavavarddhanam ||

p. 547)

ānandāśru ca pulako dehāveśaḥ kuleśvari |
gadgadoktiśca sahasā jāyate nātra saṃśayaḥ || 

sakṛduccarite'pyevaṃ mantre caitanyasampuṭe |
dṛśyante pratyayā yatra pāramparyaṃ taducyate ||

bahukūṭākṣaro mugdho baddhaḥ kruddhaśca bheditaḥ |
bālaḥ kumāro yuvako vṛddhaḥ prauḍhaśca garvitaḥ ||

stambhito mūrcchitaḥ kaṣṭaḥ saṃvītaḥ khaṇḍitaḥ priye ! |
mantraḥ parāṅmukhaśchinno badhiro'ndhastvacetanaḥ ||

kekaraḥ kṣudhitaḥ kḷptaḥ sthānaduṣṭaśca pīḍitaḥ |
nisneho vikalaḥ stabdho nirjīvaḥ khaṇḍitārikaḥ ||

suptastiraskṛto līḍho malinaśca durāsadaḥ |
niḥsatvo nirdayo dagdhaścapalaśca bhayaṅkaraḥ ||

nistriṃso vikṛtācāraḥ phalahīno nikṛntanaḥ |
nirbījo bhūmitaḥ śapto rūkṣaḥ kṛṣṭo'ṅgahīnataḥ ||

jaḍo ripurudāsīno lajjito mohitaḥ priye ! |
santyetān mantradoṣāṃśca jñātvā paścājjapenmanum ||

siddhirna jāyate tasya lakṣakoṭijapādapi |
kathyante daśasaṃskārā mantradoṣaharāḥ priye ! ||

jananaṃ jīvanaṃ paścāttāḍanaṃ bodhanaṃ tataḥ |
abhiṣeko'tha vimalīkaraṇāpyāyane tathā ||

tarpaṇaṃ dīpanaṃ guptiḥ saṃskārāḥ kulanāyike ! |
śāṇollīḍhāni śastrāṇi yathāsyurniśitāni vai ||

mantrāśca sphūrtimāyānti saṃskārairdaśabhistathā |
bhakṣyaṃ haviṣyaṃ śākādivihitāni phalānyapi ||

mūlaṃ sakturyavānāñca śastānyetāni mantriṇām ||
yasyānnapānamaśnāti kurute dharmasañcayam ||
annadātuḥ phalaṃ cārddhaṃ karttuścārddhaṃ na saṃśayaḥ ||
tasmāt sarvaprayatnena parānnaṃ varjayet sudhīḥ ||
puraścaraṇakāle ca kāmyakarmasvapīśvari ! ||

p. 548)

jihvā dagdhā parānnena karau dagdhau pratigrahāt |
mano dagdhaṃ parastrībhiḥ kāryyasiddhiḥ kathaṃ bhavet ||

indvagnirudragrahayugvedārkadikṣaḍaṣṭasu ||
ṣoḍaśamanubāṇābdhitithitrayodaśasvapi |
likhet ṣoḍaśakoṣṭheṣu mātṛkārṇān vicakṣaṇaḥ ||

svanāmādyakṣarād yāvanmantrādyakṣaradarśanam |
siddhādīn kalpayenmantrī kuryāt siddhādibhiḥ punaḥ ||

siddhasiddho japāt siddho dviguṇāt siddhasādhyakaḥ |
siddhasusiddho'rddhajapāt siddhārirhanti bāndhavān || 

sādhyasiddho'tisaṅkleśāt sādhyasādhyo nirarthakaḥ |
sādhyasusiddho bhajanāt sādhyārirhanti gotrajān ||

susiddhasiddho'rddhajapāt tatsādhyastu yathoktataḥ |
tat susiddho grahādeva susiddhāriḥ sagotrahā ||

arisiddhaḥ sutaṃ hanyādarisādhyastu yoṣitam | 
tat susiddhaḥ kulaṃ hanti svātmānaṃ hanti tadripuḥ ||

siddhārṇā bāndhavāḥ proktāḥ sādhyāste sevakāḥ smṛtāḥ ||
susiddhāḥ poṣakā jñeyāḥ śatravo ghātakāḥ smṛtāḥ ||

bāndhavā navabāṇaikāḥ syurdviṣaḍdaśasevakāḥ |
prāpalepapaṭuprāpa [atrāśuddhaṃ śodhyaṃ-]rudraścātivakaṃ naraḥ || 
lokālokapaṭuprāpaghanaghāteṣu bheditaḥ ||
varṇāḥ kramāt yuvāntyau tu revatyaṃśagatau tayoḥ ||

janmasampadvipatkṣemapratyariḥ sādhako vadhaḥ |
mitraṃ paramamitraśca janmādīni punaḥ punaḥ ||

bāṇaṃ gauraṃ khuraṃ śoṇaṃ samīno bheti rāśiṣu |
krameṇa bheditā varṇāḥ kanyāyāṃ śādayaḥ smṛtāḥ ||

lagno dhanaṃ bhrātṛbandhuputraśatrukalatrakāḥ |
maraṇaṃ dharmakarmāyavyayā dvādaśa rāśayaḥ ||

nāmādyakṣaramārabhya yāvanmantrādimākṣaram | 
tridhā kṛtvā svarairbhindyāt tadanyadviparītakam || 

p. 549)

kṛtvādhikamṛṇaṃ jñeyamṛṇī cenmantravittamaḥ |
svayamṛṇī cettanmantraṃ japet pūrvamṛṇī yataḥ ||

vāyvagnibhūjalākāśāḥ pañcāśallipayaḥ sthitāḥ |
mahīsalilayormitramanilānalayorapi ||

śātravaṃ vaiparītyena maitraṃ sarvatra cāparam |
parasparaviruddhānāṃ varṇānāṃ yatra saṅgatiḥ ||

varjayettādṛśaṃ mantraṃ nāsakṛt tat kuleśvari ! |
ekākṣare tathā kūṭe traipure mantranāyake ||

strīdatte svapnalabdhe ca siddhādīnnaiva śodhayet |
mantrasiddhopadiṣṭeṣu caturāmnāyajeṣu ca ||

mālāmantreṣu deveśi ! siddhādīnnaiva śodhayet |
nṛsiṃhārkavarāhāṇāṃ prāsādapraṇavasya ca ||

sapiṇḍākṣaramantrāṇāṃ siddhādīnnaiva śodhayet |
mano'nyatra śivo'nyatra śaktiranyatra mārutaḥ ||

na sidhyati varārohe ! lakṣakoṭijapādapi |
vādārthaṃ paṭhyate vidyā parārthaṃ kriyate japaḥ ||

khyātyarthaṃ dīyate dānaṃ kathaṃ siddhirvarānane ! |
dhanārthaṃ gamyate tīrthaṃ dambhārthaṃ kriyate tapaḥ ||

amedhyena tu dehena nyāsaṃ devārcanaṃ japam |
homaṃ kurvanti ye mūḍhāstat sarvaṃ niṣphalaṃ bhavet ||

viṇmūtratyāgaśeṣādiyuktaḥ karma karoti yaḥ |
japārcanādikaṃ sarvamapavitraṃ bhavet priye ! ||

malināmbarakeśādimukhadaurgandhyasaṃyutaḥ |
yo japettaṃ dahatyāśu devatā sujugupsitam ||

ālasyaṃ jṛmbhaṇaṃ nidrāṃ kṣutaṃ niṣṭhīvanaṃ bhayam |
nīcāṅgasparśanaṃ kopaṃ japakāle vivarjayet ||

atyāhāraḥ pralāpaśca prajalpo niyamāgrahaḥ |
anyāsaṅgañca laulyañca ṣaḍbhirmantro na sidhyati ||

uṣṇiṣī kañcukī nagno muktakeśo gaṇīvṛtaḥ |
apavitrottarīyastu nirgacchanna japet priye ! ||

p. 550)

jāḍyaṃ duḥkhaṃ tṛṇacchedaṃ vivādaṃ vā manoratham |
bahiḥsvadeśavāsaṃ ca japakāle vivarjayet ||

śāntaḥ śucirmitāhāre bhūśāyī bhaktimān vaśī |
nirdvandvaḥ sthiradhīrmaunī saṃyatātmā japet priye ! ||

viśvāsāstikyakaruṇāśraddhāniṣṭhamaniścayaiḥ |
santoṣautsukyadharmādiguṇairyukte japennaraḥ ||

sugandhipuṣpābharaṇavastrādibhiralaṅkṛtaḥ |
tasya hastagatā siddhirnānyasya japakoṭitaḥ ||

tanniṣṭhastadgataprāṇastaccittastatparāyaṇaḥ |
tatpadārthānusandhānaṃ kurvan mantraṃ japet priye ! ||

japāt śrāntaḥ punardhyāyet dhyānāt śrāntaḥ punarjapet |
iti te kathitaṃ kiñcit puraścaraṇalakṣaṇam ||

samāsena kuleśāni ! kimbhūyaḥ śrotumicchasi || iti ||
iti kulārṇave mahārahasye puraścaraṇakathanaṃ nāma pañcadaśa ullāsaḥ ||

vi0 13 | 35-3-3 japasthānaśuddhiḥ | vyāsaḥ yathā-

dhṛtvā pavitraṃ samprokṣya japasthānaṃ kuśodakaiḥ |
ādhārādīn namaskṛtya kuśāgrairāsanaṃ tataḥ ||

baddhvā padmāsanaṃ vāpi svastikaṃ vā yathā sukham |
oṃ bhūrbhuvaḥ svaromiti japitvāsanamupaviśet || iti || ya0 ā0 sū0 53 patre -

4 || japasamaye śirogrīvādikampanādiniṣedhaḥ japaguhyakaraṇamapi ||
tatraiva śrīyājñavalkyaḥ ||

dhyāyettu manasā mantraṃ jihvoṣṭhau na vicāyelat |
na kampayecchirogrīvāṃ dantānnaiva prakāśayet ||

yakṣarakṣaḥ piśācāśca siddhavidyādharā gaṇāḥ |
yasmāt prabhāvaṃ gṛhṇanti tasmādguhyaṃ tu kārayet || iti || tatraiva ||
(35-3 vi0 sarvaḥ saṃ0)

35-4 || japasamaye samāliko hastaḥ kutra sthāpyaḥ ? ||

tatraiva dharmapravṛttau yathā-


p. 551)

prātarnābhau karaṃ kṛtvā madhyāhne hṛdi saṃsthitam |
sāyaṃ japati nāsāgre japastu trividhaḥ smṛtaḥ ||

prātarmadhyāhnayostiṣṭhan gāyatrījapamārabhet |
ūrdhvajānustu sāyāhne dhyānālokanatatparaḥ ||

kṛtvottānau karau prātaḥ sāyaṃ nyubjau karau tathā |
madhyāhne hṛdayasthau tu kṛtvā japamudīrayet || iti ||
idaṃ śrīgāyatrījapamātraviṣayakaṃ -

5 || nityakāmyadharmeṇa jape mālāgrahaṇāgrahaṇayoḥ ||

gā0 pu0 paddhatau 55 patre vasiṣṭhasaṃhitāyāṃ yathā -

nityaṃ japaṃ kare kuryānna tu kāmyaṃ kadācana || iti ||

6 || japakaraṇe mālāyuktahastasya gaumukhīvastrānyantaracchādanāvaśyakatvam 
| vṛddhamanuḥ yathā-

vastreṇācchādya tu karaṃ dakṣiṇaṃ yaḥ sadā japet |
tasya syāt saphalaṃ jāpyaṃ taddhīnamaphalaṃ smṛtaṃ ||
ata eva japārthaṃ sā (gomukhī) dhriyate janaiḥ || iti || ya0 ā0 sū0 53 patre

7 || puraścaraṇamantarā jape saṅkhyāvikalpaḥ || vyāsaḥ yathā-

aṣṭottaraśataṃ nityamaṣṭāviṃśatireva vā |
vidhinā daśakaṃ vāpi trikāleṣu japedbudhaḥ || iti || tatraiva

8 || japasamaye mūlamantrasya uccārasaṅketaḥ
śrīviśvāmitraḥ

yaduccanīcasvaritaiḥ śabdaiḥ spaṣṭapadākṣaraiḥ |
mantramuccārayedvācā vāciko'yaṃ japaḥ smṛtaḥ || iti || tatraiva

9 || japasaṅkhyāsamāptau ca mālā cettāṃ svamūrdhni nidhāya 
ṣaḍaṅganyāsādi vidhāya guhyeti tejomayaṃ japaphalamiṣṭadevatāyai 
samarpyetyādividhiḥ svagurūpadiṣṭasampradāyena paryavasādayitavya ityalaṃ 
tadvidāṃ purataḥ | iti-pa0 ka0 sū0 dvitīyāvṛttikāraḥ -

10-1 || japakaraṇaphalam ||

yoginitantre 13paṭale 75 patre yathā- 

p. 552)

grahabhūtapiśācādyā yakṣarakṣogaṇāśca ye |
vyāgrādyā jantavo devi ! tathaiva kupitāntarāḥ ||

ḍākinyo guhyakāścaiva gandharvāśca sarīsṛpāḥ |
dānavā bhairavā duṣṭā ye vai śmaśānavāsinaḥ ||

ke'pi nekṣanti taṃ devi jāpinaṃ bhayavihvalāḥ |
na spṛśanti ca pāpāni ca kadāpi sādhakaṃ priye ! ||
phalametadvācikasya japasya parikīrtitaṃ || iti ||

10-2 punaścāpi japayajñaphalaṃ gauravaṃ ca || tatraiva -

japena devatā nityaṃ stūyamānā prasīdati |
prasannā vipulān kāmān dadyānmuktiṃ ca śāśvatīm ||

sādhanaṃ ca japaścaiva dhyānañcaiva varānane ! |
nālpena tapasā devi ! kenāpi kutra labhyate |
yadi bhāgyena deveśi ! bahujanmārjitena ca ||

prāpyate yatra taccettu janmanāpyekamokṣabhāk |
brahmajñānañca yat proktaṃ samādhistat prakīrtyate ||

ityevaṃ kathitaṃ ramyaṃ samāsena maheśvari ! |
itaḥ paraṃ mahādevi ! kiṃ punaḥ śrotumicchasi || iti ||

10-3 || japaphalaṃ || vāmakeśvaratantre 2 viśrāme 102 patre yathā-

cakraṃ samarcayeddevi ! sakalaṃ niyatavrataḥ | 
bāhyamadhyagataṃ vā'pi madhyaṃ vā cakramarcayet ||

upacāraiḥ samārādhya sahasraṃ prajapedbudhaḥ |
tadagre saṃsthito mantrī tato'nantaphalaṃ labhet ||

dhyātvā'tha vā cakrarājaṃ manaḥpūjāsamanvitaḥ |
japārambhaṃ sudhīḥ kuryānmahāpātakahā bhavet || iti ||

10-4 tathaiva tatraiva 104 patre yathā-

tatra sthitvā japellakṣaṃ sākṣāddevīsvarūpakaḥ ||
tato bhavati vidyeyaṃ trailokyavaśakāriṇī || iti ||

10-5 tathaiva tatraiva 105 patre śrīkramasaṃhitāyāṃ yathā-

lakṣamekamimāṃ japtvā sarvapāpaharo bhavet || iti ||

p. 553)

10-6 || tathaiva 5 viśrāme 162 patre yathā-

śrīdevyuvāca-

idānīṃ japahomānāṃ vidhānaṃ vada śaṅkara ! |
yenānuṣṭhitamātreṇa mandabhāgyo'pi sidhyati || 2 ||

śrībhairava uvāca -

śṛṇu devi ! pravakṣyāmi tripurāmantrasādhanam |
japahomavidhānaṃ ca samīhitaphalapradam || 3 ||

atra bhāṣyaṃ - mantrasādhane hi dvāvupāyau yāvajjīvaṃ niyato japaḥ 
puraścaraṇarūpaśca |

aihike kāmyaprayoge tu puraścaraṇaṃ vinā nādhikāraḥ |
āmuṣmikamātrārthe puraścaraṇaṃ vinā'pi nityajapamātreṇa nirvāha iti sthitiḥ 
|| 3 ||
tatrā'dyamāha- cakramabhyarcya sakalaṃ vidhivat parameśvari ! | 
madhyaṃ vā kevalaṃ devi ! bāhyamadhyagataṃ ca vā || 4 ||
tadagrasaṃsthito mantrī sahasraṃ yadi vā japet |
vratasthaḥ parameśāni ! tato'nantaphalaṃ bhavet || 5 ||

atra bhāṣyaṃ- trividhacakrārcaneṣu pūrvokteṣu śaktyanusāreṇaikaṃ kṛtvā 
pratyahaṃ sahasraṃ niyamaviśiṣṭo japedityarthaḥ || iti ||

10-7 tathaiva tatraiva 8 viśrāme 346 patre yathā-

evaṃ cintayamānasya japakāle tu pārvati ! |
siddhayaḥ sakalāstūrṇaṃ siddhyanti tvatprasādataḥ || 197 ||
japavidhimupasaṃharan katicid guṇavidhīnāha-

evaṃ kṛtvā japaṃ devyā vāmahaste nivedayet |
anāmāṅguṣṭhayogena tarpayeccakradevatāḥ ||198 ||

tsyaṃ saṃ thā dyaṃ ma māṃ ta ma devyai tu vinivedayet |
kaulācārasusaṃyuktairvīraistu saha pūjayet || 199 || iti ||

iti samāptaṃ 
śrīmahāpūjāvidhyaṅgabhūtanaivedyahomabalitāmbūlaphaladakṣiṇājapa-
kārya prakaraṇaṃ || iti || (35-10 tathā ca 13-35 vi0 sarvaḥ saṃ0)

pariśiṣṭa vi0 13 | 36 || maṅgalārārtisāmānyārātrikaviṣaye ||
atraiva pa0 ka0 sū0 141 patre 4 khaṇḍe śrīlalitākrame 5 sūtrabhāṣye 

p. 554)

1- || maṅgalārārtilakṣaṇamathavā tadvidhikārikāḥ || paramānandatantre -

tata ārārtikaṃ kuryāttadvidhānaṃ śṛṇu priye ! |
lohabhinne suvarṇādipātre sindūrareṇubhiḥ ||

nānāvidhairvarṇakaiścāpyaṣṭapatraṃ sakarṇikam |
svastikaṃ vā prakalpyātha piṣṭajān ḍamaruprabhān ||

ghṛtapakvān nava sapta pañca tritayameva vā |
savartikaṃ ghṛtaiḥ pūrṇaṃ kramādvinyasya pātrake ||

prajvālya māyayā paścānnavaratnaiśca mantrayet |
cakramudrāṃ pradarśyātha navaratnaiśca pūjayet ||

āmastakaṃ tu tatpātramuddharet svayamutthitaḥ |
samastacakracakreśīyute ! devi ! navātmike ||

ārārtikamidaṃ divyaṃ gṛhāṇa mama siddhaye |
iti ghaṇṭāṃ vādayan vai devyā āpādamastakam ||

dakṣahastena trirbhrāmya pātram sthāpya natiṃ caret |
evamārārtikaṃ kuryāt || iti ||

uparitanakārikārthaḥ -

nīrājanakaraṇāya ādau lohabhinnasvarṇādipātre sindūrarajasā 
nānāvidhavarṇairmadhye sakarṇikamaṣṭapatraṃ lekhyaṃ -|

athavā- svastikameva lekhyaṃ - ||

tatra ca godhūmapiṣṭamayān ghṛtapakvān ḍamarusamānākārān nava sapta 
pañca trīn vā savarttikān ghṛtaiḥ pūrṇān dīpān māyayā prajvālya 
agratananavaratneśvarīmantreṇa abhimantrya
cakramudrāṃ pradarśya tenaiva navaratneśvarīmantreṇa sampūjya | 
śrīṣṭadevatāyāḥ āmastakaṃ uttolya svayamutthitaḥ san

samastacakracakreśīyute ! devi ! navātmike ! |
ārārtikamidaṃ divyaṃ gṛhāṇa mama siddhaye ||

imaṃ mantramuccaran ghaṇṭāṃ ca dhvanayan śrīdevatāyāḥ pādataḥ 
āmastakaṃ dakṣiṇahastena pradakṣiṇakrameṇa trirbhrāmya pātramadhaḥ 
saṃsthāpya nivedya praṇamediti || (ekaḥ prakāraḥ-) ||

2 - ni0 prakāraḥ dvitīyaḥ śrīkulārṇave 7 ullāse 63 patre 
śrīśivoktanīrājanakarmakārikā || nīrājanadīpādhārākṛtimānasaṅkhyā ca ||

p. 555)

baṭukādīn samarcyaivaṃ kuladīpān samarcayet |
īṣatpalalapaiṣṭena kuryād vedāṅgulāvnitān || 

dīpān ḍamarukākārān trikoṇānatiśobhitān | 
karṣājyagrāhiṇaḥ kuryānnava saptātha pañca vā ||

nīrājananivedanamantrāḥ ||

antastejo bahisteja ekīkṛtyāmitaprabhān |
tridhā devyupari brāmyan kuladīpānnivedayet ||

samastacakracakreśīyute ! devi ! kulātmike ! |
ārātrikamidaṃ devi ! gṛhāṇa mama siddhaye ||

kuladīpān pradarśyātha0 | śaktipūjāṃ samācaret || iti ||

3- tṛtīya ārātrikaprakāraḥ | jñānārṇave 5 paṭale 17 patre yathā -

ārātrikaṃ tataḥ kuryāt sarvakāryārthasiddhaye |

nīrājane pātrādi ||

sauvarṇe rājate kāṃsye sthālake parameśvari ! | 
kuṅkumena likhet padmaṃ vasupatraṃ manoharam || 6 ||

dīparacanā ||

candrarūpaṃ caruṃ kṛtvā tanmadhye mastake śive ! | 
dīpamekaṃ vinikṣipya vasupatre'ṣṭadīpakān || 7 ||

yavagodhūmamudgādiracitāñśarkarāyutān

caṣakānvitamudrābhiḥ śobhitān ghṛtapūritān || 8 || 

abhimantrya maheśāni ! ratneśvaryā tataḥ param |
śrībījaṃ ca parābījaṃ saṃlikhya varavarṇini ! || 9 ||

śrī navākṣarīratneśvarīmantroddhāraḥ || tatraiva jñānā0 5 pa0- 18 patre-

gasau ca mapanāḥ paścādindrasthāḥ kramataḥ priye ! |
vāmakarṇasamāyuktā bindunādavibhūṣitāḥ || 10 ||

bijapañcakametattu pañcaratnāni sundari ! |
pūrvabījaṃ vilomena ratneśīyaṃ navākṣarī || 11 || 

p. 556)

mūlamantreṇa cābhyarcya tataścā'rātrikaṃ caret |
sthālakaṃ tu samuddhṛtya mastakāntaṃ punaḥ punaḥ || 12 ||

navavāraṃ maheśāni | tato nīrājanaṃ caret |
samastacakracakreśīyute ! devi ! navātmike ! || 13 ||

ārātrikamidaṃ devi ! gṛhāṇa mama siddhaye |
nīrājanamanurdevi ! vidyānte prakaṭīkṛtaḥ || 14 ||

tatra mudrā ||

ārātrike maheśāni ! cakramudrā vyavasthitā |
vāmahastāṅguṣṭhagarbhe kaniṣṭhāṃ dakṣiṇāṃ nayet || 15 ||

kaniṣṭhāgarbhage vāme dakṣāṅguṣṭhaṃ vinikṣipet |
anyonyakarayordevi | cakramudreyamīritā || 16 ||

ārātrikavidhiṃ kṛtvā [ayamārātrikavidhiranena lekhena naivedyāat prāktanaḥ 
atha ca etadadhastānnirdekṣyamāṇo'paropi nīrājanavidhiśca punarāśraṇīyaya 
eveti dvāvapyetau vidhī mānyatarāveveti savinayanivedanaṃ ||] naivedyaṃ tu 
nivedayet || iti ||

4 - uparyuktādanyo mahānīrājanavidhiḥ | tatraiva jñānārṇave vi0 16 paṭale 75 
patre yathā-

dhūpadīpau nivedyātha tarpayet pūrvavat priye ! || 203 ||

ārātrikavidhiṃ kuryāt pūrvavaddevavandite |
anyadārārtikaṃ vakṣye sarvakāmaprapūrakam || 204 ||

svarṇādinirmite pātre madhye cakraṃ likhed budhaḥ |
taṇḍulollāsitaṃ kṛtvā navadhā kārayettataḥ || 205 ||

navagolāṃścandrarūpān viracya tadantaram |
śarkarāgarbhabharitān maṇḍakān yugmarūpakān || 206 || 

viracya ghaṭikāḥ kāryā yojayitvā tu saptakam |
saptasaptaprakāreṇa ghaṭikā nava yojayet || 207 ||

aṣṭakoṇeṣu saṃsthāpya golakāṃścopari kṣipet |
caṇamudrā vikīryātha dīpakān ghṛtapācitān || 208 ||

muṣṭikākṛtimuṣṭīśca sthāpayet tatra tatra tu |
dīpān prajvālya paścāttu pañcaratnaiḥ prapūjayet || 209 || 

p. 557)

pañcasiṃhāsanagatā vidyāstatra prapūjayet | 
āmastakaṃ samuddhṛtya navavāraṃ punaḥ punaḥ || 210 ||

navāvaraṇavaddevi ! paribhrāmya punaḥ punaḥ |
uttirya sthāpayet paścāddīpamālāmayaṃ mahaḥ || 211 ||
netrayoḥ susthiraṃ dhyāyedārārtikavidhiḥ priye ! || iti ||

5 || ekadīpātmakaḥ pañcadīpātmakanīrājanavidhiśca | śrīśivapurāṇe vāyu 
saṃhitāyāṃ yathā -

dhenumudrāṃ ca sandarśya pāṇibhyāṃ pātramuddharet |
athavā ropayet pātre pañca dīpān yathākramam ||

vidikṣvapi ca madhye ca dīpamekamathāpi vā |
tatastatpātramuddhṛtya liṅgāderupari kramāt ||

nīrājanabhrāmaṇe saṅkhyā ||

triḥ pradakṣiṇayogena bhrāmayenmūlavidyayā || iti 60 ślokato 62 ślokān yāvat ||

13 | 36-6 || devyā mahānīrājanārātrikayorvidhiḥ ||

prāktanaśīvidyānityārcanapaddhatau yathā-

6 prakāraḥ -

athārātrikaṃ ||
1prathamaṃ mahānīrājanaṃ kṛtvā 2paścādārātrikaṃ kāryaṃ || taduktaṃ || 
sauvarṇe rājate kāṃsye sthālake parameśvari ! | kuṅkumena likhetpadmaṃ 
vasuputraṃ manoharaṃ || 1 || madhye caruṃ candrarūpaṃ kṛtvā tanmastake priye ! | 
dīpamekaṃ vinikṣipya vasupatre'ṣṭadīpakān || 2 || yavagodhūmapiṣṭādiracitān 
śarkarāyutān | caṇakānvitamudrābhiḥ śobhitān ghṛtapācitān || 3 || 
karpūravartikāyuktān goghṛtena ca pūrayet | saṅkalpaṃ kārayet paścāt 
kāmanāmanasepsitam || 4 || abhimantrya maheśāni ! ratneśvaryā tataḥ paraṃ || 
taṃ sthālakaṃ samuddhṛtya mastakāntaṃ punaḥ punaḥ || 5 || navakṛtvo maheśāni 
| tato nīrājanaṃ caret || iti mahānīrājanaṃ ||

tadanaṃtaramārātrikaṃ kāryaṃ | lohavarjyasvarṇādipātre candanenāṣṭadalaṃ 
kamalaṃ likhitvā || tatra madhyadalāṣṭake yavagodhūmapiṣṭādiracitāni 
navapātrāṇi saṃsthāpya ||
ghṛtenāpūrya || vartīrnikṣipya || bhuvaneśvaryā prajvālya || śrīṃ hrīṃ glūṃ 
slūṃ mlūṃ plūṃ nlūṃ hrīṃ śrīṃ ebhirnavabhirbījairnavadīpān sampūjya 
|| cakramudrāṃ pradarśya || (vāmahastāṅguṣṭhagarbhekaniṣṭhāṃ

p. 558)

dakṣiṇāṃ kṣipet || kaniṣṭhāgarbhake vāme dakṣāṅguṣṭhaṃ vinikṣipet || 
anyonyayogato devi ! cakramudrā samīritā || 1 ||) mūlenābhimantrya || mūlena 
devyāḥ puṣpāñjaliṃ dattvā jānubhyāmavanīṃ gataḥ utthāya ||

tat pātramāmastakamuddhṛtya ghaṇṭāvādanapūrvakaṃ devyā 
mastakādipādaparyataṃ mūlamuccārya ||
oṃ antastejao bahisteja ekīkṛtyāmitaprabhaṃ || tridhā devyupari bhrāmyan 
kuladīpān nivedayet || 1 ||

samastacakracakreśīyute ! devi ! navātmike ! || ārātrikamidaṃ devi  ! gṛhāṇa 
parameśvari || 2 || 
iti - (atra śeṣavidhiḥ svadhiyā pūraṇīyaḥ) ityārātrikavidhiḥ ||

2- dvitīyaḥ prakāraḥ-

śrī-ānandāśramasaṃskṛtagranthāvali 73 granthāṅkamudritaśrīdhāre 
ityupānāmakaśaṅkarasūriviracita śrīgāyatrīpuraścaraṇapaddhatau 53 patre 
yathā-
 
mūlaṃ - sāvitri te nīrājanaṃ | tato yathāvidhi vihitamārātrikapātramānīya |
cakramudrāṃ pradarśya vamiti dhenumudrayā'mṛtīkṛtya mūlenābhyarcya

oṃ samastadevatācakramuni pitṛgaṇāvṛte ! |
ārātrikaṃ gṛhāṇedaṃ sāvitri mama siddhaye ||

ityanena ghṇṭāvādanapūrvakaṃ pārāvatabhramākāramuccairdevīṃ 
pūrvavannīrājayet-iti -

śrīḥ

aparaśca mahānīrājanārātrikayorvidhiḥ

3 pra0 || śrīvaṭapattaneśasva0 - śrīmatsayājirāvagāyakavāḍa- sarakāra- 
ityeteṣāmājñānurodhena 
matsaṅgrathitabahucaracintāmaṇyaparanāmakaśrībālātantracandrikā 
ityetatpustaka 332 patrollikhitamahānīrājanārātrikayorvidhiḥ | yathā-

lohavarjite svarṇaraupyādyanyatamabhājane gairikasindūrakuṅkumādyanyatamena 
lalaitaṃ aṣṭadalaṃ viracayya |

tatrāṣṭadalapatreṣu ghṛtapakvagodhūmacūrṇanirmitaḍamarusadṛśākṛtīni aṣṭa 
dīpapātrāṇi saṃsthāpya madhye caikaṃ tādṛśameva saṃsthāpya |

mūlena tatra vartikāṃ nikṣipya mulenājyaṃ saṃpūrya māyābījena vahnibījena 
vā prākaṭayya oṃ śrīṃ hrīṃ glūṃ slūṃ mlūṃ plūṃ nlūṃ hrīṃ śrīṃ 
namaḥ | iti navaratneśvarīmantreṇārcayitvā namaskṛtya cakramudrāṃ pradarśya 
tadārātrikapātraṃ spṛṣṭvā | mūlamantreṇa paradevatāyai candanapuṣpāṇi 
samarpya | jānuyugmaṃ dharaṇyāṃ pātayitvā devatāyāṃ dṛkparyantaṃ 
ārātrikapātramuttolya adholikhitaṃ paṭhan sārdhatrivāraṃ athavā navavāraṃ - 
ārātrikapātraṃ devatāyāḥ mastakāt pādāvadhi pradakṣiṇakrameṇa 
bhrāmayet || 

p. 559)

oṃ aiṃ klīṃ sauḥ - ambe ambike'mbālike na mā nayati kaścana |
sasastyaśvakaḥ subhadrikāṅkāmpīlavāsinīm || 1 || yajuḥ saṃ0 23 a0 18 mantraḥ
oṃ idaṁhaviḥ prajananamme'-astu daśavīrasarvagaṇasvastaye || ātmasani prajāsani 
paśusani lokasannyabhayasani || agniḥ prajāṃ bahulāṃ me karotvannam payo 
reto'-asmāsu dhatta | ya0 saṃ0 19 a0 48 maṃ0

nīrājane geyaṃ -1

oṃ jaya devi ! jaya devi ! jaya janani ! śaraṇye ! jaya jaya namacakreśvari ! 
sakalāgamagamye - dhruvam |
aparimitāmṛtasāgaravipulamaṇidvīpe tapanopamacintāmaṇidhāmani dhananīpe ||
kṛpayā parayāviṣkṛtakevalanijarūpe tripure jaya jagadīśvari dhṛtacandra kapāle || 
jaya devi0 || 1 ||

jaya himagirikulanandini samuditalāvaṇye | jaya bhagavati kātyāyani 
saṃtatakāruṇye |
paramakṛpārasasambhṛtaparadaivatarūpe | 
karavinihitapāśāṅkuśakausumaśaracāpe || jaya devi0 || 2 ||

kamanīyānanahimakarakastūrītilake | suracāmīkaracāmaramarudullasadalake ||
kalpakakusumālaṅkṛtakacabharamaṇimaule | muktātāṭaṃkadyutimaṇḍitasukapole 
| jaya devi0 || 3 ||

kavivaranikarārādhitakoṇatrayaśaraṇe | tripure jaya jagadīśvari jaya bālakapāle ||
sanakādikabahumunijanasaṃstutaśubhacarite | 
padapallavaśaraṇāgataparipālananirate || jaya devi0 || 4 ||

duṣṭagrahabhayabhañjani dūrikṛtadurite || girije mayi karuṇāṃ kuru 
guṇagaṇamaṇigaṇite ||
madhurāruṇabimbādharamandasmitavadane | jagadīśvari lalite jaya 
campakavanasadane || jaya devi0 || 5 ||

ya imāṃ śaṅkarapaṭhitāṃ stutimiti bhāvayate | tribhuvajananīmevaṃ yo 
nīrājayate ||
sa bhavati kaviratuladhanaḥ sakalāgamavettā | upaiti mātuḥ padavīṃ 
ravimṇḍalamettā || jaya devi0 || 6 ||

p. 260)

1- oṃ mahati kanakapātre sthāpayitvā viśālān | ḍamaru sadaśarūpān pakva 
godhūmadīpān ||
bahughṛtamatha teṣu nyasya dīpairakampairbhuvanajanani ! kurve nityamārātrikaṃ 
te || 
2- savinayamatha dattvā jānuyugmaṃ dharāyāṃ sapadi śirasi dhṛtvā 
pātramārātrikasya ||
mukhakamalasamīpe te'mba sārdhatrivāraṃ bhramayāti mayi bhūyāt te 
kṛpārdraḥ kaṭākṣaḥ ||

3- oṃ karpūrākalitaiḥ suvartivalibhiḥkārpāsasūtrodbhavai-
rdīpaiḥ pañcabhirebhiramba navabhiḥ sauvarṇapātrasthitaiḥ |
pūrṇairgoghṛtaguggulaistu saralaistailaiśca vā prajvalai-
retattadbahirantaraṃ girisute nīrājanaṃ dīyate ||

4- oṃ samastacakracakreśi ! navāvaraṇasaṃyute ! ārātrikamidaṃ devi ! gṛhāṇa 
mama siddhaye || 7 ||

5- oṃ antastejo bahisteja ekīkṛtya ca tatprabham | ārātrikaṃ maheśāni ! sāmprataṃ 
te samarpitam || 8 || etebhyaḥ pañcabhyo yatheṣṭaślokā grāhyāḥ ||

ārātrikapātraṃ bhūmau saṃsthāpya | oṃ bhū0 aiṃ klīṃ sauḥ sāṅgāyai0 
śrītripurasundaryai namaḥ nīrājanadīpaṃ darśayāmi iti janamutsṛjya | 
puṣpādina paradevatāyai mahānīrājanaṃ nivedya0 |

punaścāpi karpūrādinā tathaiva sāmānyārātrikaṃ prākaṭya sampūjya ||

savinayamatha dattvā jānuyugmaṃ dharaṇyāṃ ! sapadi śirasi dhṛtvā 
pātramārātrikasya |
mukhakamalasamīpe te'mba sārdhatrivāraṃ ! bhramayati mayi bhūyāt te 
kṛpārdraḥ kaṭākṣaḥ ||
kadalīgarbhasambhūtaṃ hemabījaṃ bibhāvasoḥ | 
anantapuṇyaphaladamataḥśāntiṃ prayaccha me ||

iti paṭhitvā pātramadhaḥ saṃsthāpya | oṃ bhū0 aiṃ klīṃ sauḥ śrīparadevatāyai 
namaḥ karpūrātrikyaṃ samarpayāmi ityuktvā puṣpādinā iṣṭadevatāyai nivedya 
svayamapi vandanaṃ kuryāt || iti ||

4- atra mahānīrājane viṣamā vartiḥ | śāradāyāṃ 4 paṭale 297 patre 207 
ślokaṭīkāyāṃ yathā-

ārātrikaṃ tu viṣamabahuvartisamanvitaṃ arthādārātrikadīpe tu 
viṣamasaṅkhyākā bahuvartayaḥ kṣepyāḥ ityarthaḥ - (36-6 vi0 sarvopi saṃ0)

p. 561)

13 | 36-7 || śrīdevyā geyasaṃskṛtanānānīrājanāni ||
nīrājane geyaṃ dvitīyaṃ - 2 - || atha śrīcakranīrājanam ||

jaya devi ! jaya devi ! jaya mātastripure ! 2
dīpāvalimavalokaya 2 māmava sukhasāre ! || jaya devi ! 0 || 1 ||
bindvaṅkitaguṇakoṇe taduparivasukoṇe ! 2
daśārayugme bhagavati 2 bhūtavamanukoṇe ! [bhūtavamanukoṇe iti saṃśodhya 
vācyaṃ ||]|| jaya devi0 ! 0 || 2 ||
cetaḥ krīḍati cāṣṭau ṣoḍaśadalaramye ! 2
mudāpi valayatritaye ! 2 dharaṇīgṛharamye ! || jaya devi ! 0 || 3 ||
rekhātrayaparinirmitanigamadvārayute ! 2
suvarṇamaṇigaṇakhacite 2 śrīcakre yuvate ! || jaya devi ! 0 || 4 ||
brahmādikamayamañcakamṛdvāsanakhacite ! 2
tadupari bhūṣaṇasāyudha 2 kāmeśvarasahite ! || jaya devi ! 0 || 5 ||
aṅkuśapāśaśarāsanaśaraśobhitahaste ! 2
kiśoraveṣālaṅkṛta 2 tripureśīnamite ! || jaya devi ! 0 || 6 || 
svarṇābharaṇasugehe'ruṇakañcukicaile ! 2
nidhehi śivapadacidghanacidrasakallole ! || jaya devi ! 0 || 7 ||

iti - śrī-
amadāvādasthamanmitraśāstrīgaṇapatatryambakarāmadvivedikṛtaśrīvidyārcana
-pustikāyaṃ || 

nīrā0 geyaṃ tṛtīyam - 3 - || śrīnavacakreśvarīnīrājanam || 
oṃ jaya devi ! jaya devi ! jaya janani ! śaraṇye ! |
jaya jaya navacakreśvari ! sakalāgamagamye ! dhruvam || 
aparimitāmṛtasāgaravipulamaṇidvīpe |
tapanopamacintāmaṇidhāmani ghananīpe ||
kṛpayā parayāviṣkṛtakevalanijarūpe ! | 
tripure jaya jagadīśvari ! dhṛtacandrakapāle ! jaya devi ! 0 || 1 ||
jaya himagirikulanandini ! samuditalāvaṇye ! |
jaya bhagavati ! kātyāyani ! [kāmeśvari ityapi pāṭhaḥ |] santatakāruṇye ! ||
sindūrarasāruṇarucike ! sandohiśarīre |
sadā ca nijakucagirivarataṭacandanasāre ! || 2 ||

p. 562)

mandasmitamadhurādharasundararadahīre !
kandarpārātipriyasundarakusumāre ! ||

paramakṛpārasasambhṛtaparadaivatarūpe ! |
karavinihitapāśāṅkuśakausumaśaracāpe ! || jaya devi ! 0 || 3 ||

aṇimādimayūkhādibhiradhirūḍhasamīpe ! |
sapurandaradivijādhipasamudayadūrvāpe ! || 

kamanīyānanahimakarakastūrītīlake ! | 
suracāmīkaracāmaramarudullasadalake ! || jaya devi ! 0 || 4 ||

kalajhaṅkṛtamadabambharakarṇotpalakalike ! |
navamuktāphalarañjitanāsāmaṇinalike ! ||

kalpakakusumālaṅkṛtakacabharamaṇimaule ! |
muktātāṭaṅkakadyutimaṇḍitasukapole ! || jaya devi ! 0 || 5 ||

kuṅkumarasapaṅkilaghanakucabahuhārāle ! |
kāñcīguṇavalayitakaṭīsatkausumadukūle ! ||

nikhilāgamamukuṭitamaṇinīrājitacaraṇe ! |
mihiropamahīrojvalamañjīrābharaṇe ! || jaya devi ! 0 || 6 ||

kavivaranikarārādhitakoṇatrayaśaraṇe ! |
tripure ! jaya jagadīśvari ! jayabālakapāle ! ||

sanakādikabahumunijanasaṃstutaśubhacarite ! |
padapallavaśaraṇāgataparipālananirate ! || jaya devi ! 0 || 7 ||

duṣṭagrahabhayabhañjani ! dūrīkṛtadurite ! |
girije ! mayi karuṇāṃ kuru guṇagaṇamaṇigaṇite ! ||

madhurāruṇabimbādharamandasmitavadane ! |
vipulāyatanayanocitavikacotpalavadane ! || jaya devi ! 0 || 8 ||

kalitākhilavaradāyini ! kāmeśvari ! madane ! |
jaya jagadīśvari ! lalite ! jaya campakavanasadane ! || jaya devi0 ||

ya imāṃ śaṅkarapaṭhitāṃ stutimiti bhāvayate | 
tribhuvanajananīmevaṃ yo nīrājayate ||

p. 563)

sa bhavati kavivaratulyaḥ sakalāgamavettā |
upaiti mātuḥ padaviṃ ravimaṇḍalabhettāṃ [atrāśuddhaṃ kvācitkaṃsvadhiyā 
śodhyaṃ -] || jaya devi 0 || 9 || iti

iti- śrībahucaracintāmaṇyaparanāmakaśrībālātantracandrikāyāṃ 333 patre ||

nī0 ge0 caturthaṃ - 4 - || śrīlalitāmbikānīrājanam || 

jaya devi ! jaya devi ! jaya lalite ! janani ! |
kāruṇyaṃ kuru varade ! paṅkajadalanayane ! || dhruvam || 

dhyānastavanaparāyaṇaśamitākhilatāpe ! |
raktakabījavināśini ! pāvitakṛtatāpe ! ||

danujādhīśavimarddani ! pāvakakṛtavimale ! |
vidhivṛṣavāhanamādhavavanditapadakamale ! || jaya devi0 || 1 ||

prāpya tavāntikamagaje ! rakṣitasuravṛnde ! |
caraṇasaroruhayugmaṃ nityamahaṃ vande ||

śumbhāsuramathini ! tvaṃ māmāśrayahīnam | 
karuṇāpūritanayane ! paśya janaṃ dīnaṃ || jaya devi ! 0 || 2 || 

nijabhaktābhayavarade ! kalpitabahurūpe ! |
mātastvaṃ māmuddhara patitaṃ bhavakūpe ||

mahiṣāsurahananenā [maravihitānande iti sādhuḥ pāṭhaḥ ||] marakṛtasānande ! |
magnaṃ kuru māmīśvari ! tava bhajanānande || jaya devi ! 0 || 3 ||

niśumbhamānadhvaṃsini ! racitāsuramaraṇe ! |
mātarmayi kuru karuṇāmaruṇadyuticaraṇe ! ||

pāpaṃ me hara girije ! tava pūjanakaraṇe
bhaktiṃ dehi maheśvari ! bhītiharasmaraṇe ! || jaya devi ! 0 || 4 ||

mātrā tanayaguṇānāmaruṇāmbujavadane ! |
kriyate'nveṣaṇamapi nākhilabhayaharabhajane ! ||

nirguṇamapi yadi saguṇaṃ matvāva maheśi ! |
śaraṇāgatamasurārdini ! māmiha bhūteśi ! || jaya devi ! 0 || 5 ||

cedaparādho yadi vā saṃhṛtajanaśoke ! |
kṣantavyo me'suravadhatoṣitasuraloke ! ||

p. 564)

nirjaramukuṭasthitamaṇīrājitacaraṇe ! |
śaktaṃ kuru māṃ kṛpayā bhavavāridhitaraṇe ! || jaya devi ! || 6 ||

aṅgīkuru giritanaye ! nīrājanakaraṇam |
dānavakulapatihantri ! tvaṃ bhava mama śaraṇam ||

yadyaṅgīkuruṣe no madracitastavanam | 
jagati na ko'pi kariṣyati bhaktyā tava bhajanam || jaya devi ! 0 || 7 ||

dhanadābhidhakaviricchati mama cetaḥ satatam |
tiṣṭhatu caraṇasamīpe tvaṃ bhava sukhaśaraṇam ||

yaḥ kaścitprapaṭhiṣyati nīrājanasamaye |
tuṣṭhā bhavatu bhave'smin devi ! duḥkhamaye || jaya devi ! 0 || 8 ||
śrī durgākalpadrumapustikāyāṃ 174- patre 

nīrā0 geyaṃ pañcamaṃ - 5 - || śrīlalitāmbānīrājanamaparaṃ || tatraiva 171- 
patre

jaya devi ! jaya devi ! jaya sundari ! tanaye jaya sundari lalite ! |
śaśvadvasatiṃ kuru bhorīśvari mama hṛdaye || jaya devi ! jagadamba ! || dhruvam ||

bindutrikoṇasahitaṃ ṣaṭkoṇaṃ vṛttam |
tadupari vasudalapatraṃ vartulamapi dhattam ||

dviguṇīkṛtavasupatraṃ mohitaharacittam |
dvāracatuṣṭayanirmitayantropari tantram || jaya devi ! 0 || 1 ||

vāme kalaśe pūjitapūritamādhāram |
tasminnarpitapūjitapūritamādhāram ||

evaṃ pañcāvaraṇitakarṇitaguṇasāram | 
mā dehi tvaṃ bhuvane durghaṭasaṃsāram || jaya devi ! 0 || 2 ||

kalaśāmṛtajalapūjitanavapātrasametam | 
gaṇapatiyoginībaṭukakṣetrādhipayuktam ||

arcanavidhinā sahitaṃ śrīguruvidhiyuktam |
tārakapaṇḍitavidyābhaktyākhiladattam || jaya devi ! 0 || 3 ||

nīrājanamālikāyām - 72 patre || atrāśuddhaṃ śodhyam

p. 565)

nīrā0 ge0 ṣaṣṭhaṃ - 6 -|| śrīmahālakṣmīnīrājanam || 

jaya devi ! jaya devi ! jaya mātaḥ kamale ! |
drutajāmbūnadavimale suranutapadakamale [padayugale ityapi pāṭhaḥ |]! || 
dhruvam0 ||

alikulakomalabāle ! dhṛtamauktikamāle ! |
stanayuganirjitatāle ! kṣīrāmbudhibāle ! ||

kāśmīrāṅkitabhāle ! nāśitabhavajāle ! | 
līlāmarditakole ! śaraṇāgatapāle ! || jaya devi ! 0 || 1 || 

kamaladalāyatanayane ? śaśinibhaśubhavadane ! |
siṃhavirājitagamane ! hīrāvaliradane ! ||
munijanaviracitanamane ! kṛtarākṣasakadane ! |
kokilamañjulagadane ! viṣṇūraḥsadane ! jaya devi ! 0 || 2 ||

nāgādyaṅkitamastakabhuvanāvanasakte ! |
prāśanabhājanakheṭādikakṛtakarayekte ! ||

kṛtakaravīranivāse ! ripumardanasakte ! |
śukanāsāsamanāse ! tāritanijabhakte ! jaya devi ! 0 || 3 ||

adharavinirjitabimbe ! viśvastutarūpe ! |
pṛthutaracārunitambe ! kṛtadānavakope ! ||

bhrūjitamanmathacāpe ! nijajanahṛtatāpe !
śukasanakādika [tattaditisādhu |] nāradapadanatihṛtatāpe ! jaya devi ! 0 || 4 || iti ||
dājījyotirvidvatpraṇati hṛtatāpe ! || jaya devi 0 || 4 || iti || du0 ka0 pu0 113 patre ||

nīrā0 ge0 saptamam-7 - || śrīmahālakṣmīnīrājanam ||

jaya devi ! jaya devi ! kṣīrasāgaratanaye ! |
lakṣyālakṣyasvarūpe ! lakṣmi suravarade ! || dhruvam | 

nānāmaṇimayabhūṣāmaṇḍitadoryugale ! | 
nūpuramadhuradhvanibhirnāditadikpaṭale ! ||

udyaddinakarabhānupratibhaṭarucirāsye ! | 
dhyānaṃ kiṃ kiṃ durlabhamahamiha na hi jāne || jaya devi ! 0 || 1 || 

p. 566)

bhavabhayasāgarapāraṃ kartuṃ daśahastā |
viditāviditādanyat prāpayitaṃ muditā ||

sarvāpyevaṃ līlā janitā janatāyai |
kathaṃ na dravase [kathaṃ na dayase hṛdaye - iti paṭhaḥ sādhuḥ |] hṛdaye japato 
mamatāyai || jaya devi ! 0 || 2 ||

jagataḥ sṛṣṭiḥ sthitayo hṛtayaḥ pratikalpe |
locanamīlanalīlonmeṣaṇataḥ kuruṣe ||

ko vā prabhavati tasyāḥ smṛtaye manasā ye |
mahatā vedā yatra smṛtibhiḥ saha cakitāḥ || jaya devi ! 0 || 3 ||

madhyasthāpitadīpairālīśatasaṃhitaiḥ |
nijakaratāladhvanibhirnāditadikpaṭale ! ||

krīḍanagāyanahāsairnanditamṛduhṛdayām |
bhāvaya cetaḥ satataṃ bhuvaneśīṃ sadayām || jaya devi ! 0 || 4 ||
dharṣitadhīṃ dhīṃ dhinanaṃ dundubhi nādayate [śaṅkyamidamapadaṃ padam |] 
|
gharṣita jhaṃ jhaṃ jhaṇaṇa jhaṃjhari vādayate ||
karśitaghaṇaṇaṇaghaṇṭāghoṣaṃ śrāvayate | 
harṣitamadhurāmṛtaghanasurapatirādriyate || jaya devi ! 0 || 5 || iti
(nīrājanamālikāpustikāyāṃ 71 patre - atra kvācitkamaśuddhaṃ śodhyam)

nīrā0 ge0 aṣṭamaṃ-8- || śrībālātripurānīrājanam || 

jaya devi ! jaya devi ! jaya himagiribāle ! ||
bhavabhayabhañjini ! bhagavati ! bhuvanatrayapāle ! ||

yogeśvari ! viśveśvari ! bhuvaneśvari ! durge ! ||
jvālāmukhi ! parameśvari ! śāntīśvari ! durge ! ||

jaya mahiṣāsuramardini ! marditasurabhīte ! |
mṛgapativāhini ! vande mukundasutagīte ! || jaya devi ! 0 || 1 ||

vindhyācalavanavāsini ! śākambhari ! durge ! |
bhrāmari ! lohitaratne ! racitākhilasvarge ! ||

śrīpatigopativarade ! jaya mātarlalite ! |
saptasvaravinivāsini bhava mama tāpahare ! || jaya devi ! 0 || 2 || iti || 
nīrājanamālikāpu0- 88 patre ||

p. 567)

nīrā0 ge0 navamam - 9- || śrībhagavatyāḥ śrīdurgādevatāyā nīrājanam ||

jaya devi ! jaya devi ! jaya mātastripure ! |
dāsānugrahakāriṇi ! [bhaktānugrahakāriṇi īśvari suravarade-ityapi pāṭhaḥ |] 
īśvari ! sukhavarade ! || dhruva0 ||

durge ! durgatināśini ! bhavasāgaratāre ! |
mṛgendravāhanagirije ! dānavasaṃhāre ! ||

aṣṭādaśabhujamūrtiḥ kaṇṭhamuṇḍamāle
saptaśṛṅganivāsini ! rudrātmakaśakte ! || jaya devi ! 0 || 1||

bālārkāruṇaśobhitabandhukakusumābhe !
kuṅkumaśobhitadehe ! dāḍimakusumābhe ! ||

pādāhatamahiṣāsuradevāsurasarge ! |
nānādānavamarddini !  alikularipuvarge ! || jaya devi ! 0 || 2 ||

jaya tripurāsuramarddini ! dardaya mama doṣān |
tāraya tāraya mātarbhavajalakūpasthān ||

kāmakrodhādīn [kāmakrodhādikamayi māraya dehasthamityapi sādhuḥ pāṭho 
bhāti ||] mama māraya dehasthan |
karuṇādṛṣṭyā mātā rakṣaya nijabhaktān || jaya devi ! 0 || 3 ||

mūle cādhiṣṭhāne maṇipūre cakre |
hṛdaye'nāhatacakre ṣoḍaśadalapadme ||

ājñācakre bālaya [atre bālyeti dvirapi śaṅkyam ||] bālayakṛtavalaye |
brahmasthāne viharasi mātaḥ śivasahite ! || jaya devi ! 0 || 4 ||

vidhihariśaṅkaravandye ! piṇḍitajanavandye ! |
sanakādikamunivandye ! yakṣāsuravandye ! ||
nāradatumbarukinnaragīte ! suravandye !
aghanāśīni ! bhavaśoṣiṇi ! mātaḥ sukhasahite ! || jaya devi ! 0 || 5 || iti ||
nīrājanamālikāpustikāyāṃ - 73 patre- 

p. 568)

nīrā0 geyaṃ daśamaṃ - 10 - || śrīmadbhāgīrathīgaṅgānīrājanam || 

jaya devi ! jaya devi ! viśveśvari ! gaṅge ! gaṅgottari ! gange ! |
kāśīpuranivāsini janimṛtibhayabhaṅge ! || dhruvam || 

pravarātīranivāsini ! nigamapratipādye ! |
pārāvāravihāriṇi ! nārāyaṇi ! hṛdye ! ||

prapañcasāre ! jagadādhāre ! śrīvidye ! |
prapannapālananirate ! munivṛndārādhye ! || jaya devi ! 0 || 1||

gabhīraghoṣavirājitajanamohanaūpe ! |
māmiha janani ! samuddhara patitaṃ bhavakūpe ||

divyasudhākaravadane ! kundojjvalaradane ! |
padanakhanirjitamadane ! pāpavrajakadane ! || jaya devi ! 0 || 2 ||

mañjīrāñcitacaraṇe ! maṇimuktābharaṇe ! |
kañcukīvastrāvaraṇe ! vaktrāmbujadharaṇe ! || 

śakrāmayabhayaharaṇe ! bhūsurasukhakaraṇe ! | 
karuṇāṅkuru mayi śaraṇe gajanakroddharaṇe ! || jaya devi ! 0 || 3 ||

kuṅkumakesarapaṭikābibhrājitabhāle ! |
mālaticampakapāṭalikaṇṭhasthitamāle ! ||

ratnajaḍitamaṇimaṇḍitahemāṅkitasāre ! |
udyaddinakarabhānucūḍāmaṇihāre ! || jaya devi ! 0 || 4 ||

nānāmaṇimayabhūṣāmaṇḍitadoryugale ! |
nūpuramadhuradhvanibhirnāditadikpaṭale ! | |

duṣṭagrahabhayabhañjini ! dūrīkṛtadurite ! |
girije ! mayi karuṇāṃ kuru gunagaṇamabhigaṇite ! || jaya devi ! 0 || 5 || iti 
du0 ka0 pu0 176 patre -

ityādinā svagurūpadiṣṭācāreṇāyaṃ vidhiḥ samāpanīya iti || (13 | 36-7 vi0 
sarvopi - saṃ0)

13 | 36-8- || devanīrājanaphalam ||

śrīyoginītantre-9- paṭale-227 patre-śrīśivabhagavadvaco yathā-

nīrājanena yaḥ pūjāṃ karoti varavarṇini ! |
anuktaṃ prāpnuyāt sa'pi iha loke paratra ca || iti ||

p. 569)

36 | 9 || nīrājanaśabdārthasphoṭaḥ ||
atra nīrājanaśabdena sarvatra dīparūpo dīpādbhinnaśca 
tattaddevapūjopacārāntargataikopacāraḥ-

athavā nīrājanaṃ nāma anekadīpaprakāśena tattaddevasya sarvāṅganiṣṭhaṃ 
saundaryamādhuryanirīkṣaṇaṃ ityartho jñeyaḥ || iti || (pa0 ka0 sū0 
dvitīyāvṛttikāraḥ)

iti śrīmahānīrājanavidhiḥ || 13 | 36 sarvo'pisampūrṇaḥ ||
vi0 13 | 37 || mantrapuṣpāñjaliviṣaye jñeyaṃ prayogaśca ||

1 || mantrapuṣpāñjaliśabdārtho yathā-

tadvidhipratipādakapramāṇagranthoktamantrādipaṭhanapūrvakaḥ
puṣpādisambhṛto'ñjaliḥ) |

mantrapuṣpāñjaliriti sāmānyārthaḥ -( pa0 ka0 sū0 dvitīyāvṭtikāraḥ)

2 - aparaśca śrīkulārṇavatantramāśritya mantrapuṣpāñjaliśabdasamāsārthau 
yathā-

atra samāsastu uparyuktavat | tatra ca mantraśabdārthaḥ kulārṇave 156 patre 17 
ullāse yathā -

mananāt tattvarūpasya devasyāmitatejasaḥ |
trāyate sarvabhayatastasmānmantra itīritaḥ || iti ||

atha puṣpaśabdārtho'pi tatraiva - 157 patre yathā-

puṇyasaṃvarddhanāccāpi pāpaughaparihārataḥ |
puṣkalārthapradānācca puṣpa ityabhidhīyate || iti |

arthāt mantrapaṭhanapūrvakaḥ puṣpasambhṛtoñjaliriti śabdārthassugamaḥ 
śiṣṭasammataḥ syādeveti || (37 | 1 vi0 sarva0 saṃ0)
37 | 2 || kasyopacārasyānantaramayaṃ mantrapuṣpāñjalyupacāraḥ 
ācaritavyastatra vicāraḥ || yathā -

ayaṃ mantrapuṣpāñjaliḥ kutracidgranthe nīrājanāt pūrvamanantaraṃ 
cābhihitastatastatsiddhāntaikajñānāya
atraiva dvipariśiṣṭe upacārāṇāṃ saṅkhyāviṣayaka 7 viṣaye 386 patrataḥ 390 
patreṣu draṣṭavyamiti suviditamāstāṃ satām || iti pa0 ka0 sū0 dvitīyāvṛttikāraḥ 
|| 

3 || vaidikatāntrikamantrapuṣpāñjaliprayogaḥ ||

ayaṃ vaidikatāntrikamantrapuṣpāñjaliprayogaḥ śrībālātantracandrikāyāṃ 
334 patre yathā-

p. 570)

1 oṃ0 mūlaṃ
 
oṃ ambe.āmbike'mbālike na mā nayatikaścana ||
sasastyaśvakaḥ subhadrikāṅkāmpīlavāsinīm || ya0 saṃ0 23-18

2 yajñena yajña0 (pu0 sū0 15 mantraḥ ya0 saṃ0 31 | 15)
3 oṃ yaḥ śuciḥ prayato0 (śrī0 sū0 maṃ0 16-)
4 oṃ rājādhirājāya0 ityataḥ sabhāsadaḥ - ityantaṃ
5 oṃ viśvataścakṣuruta0 (ya0 saṃ0 17 | 19)
6 caraṇanalinayugmaṃ0 (śrī0 bā0 mā0 pū0 53 śloka bālātaṃ0 ca 117-335 
patrayośca)
7 oṃ śive ! śivasuśītalāmṛtataraṅgagandhollasa-
nnavāraṇadevate ! navanavāmṛtasyandini ! |
gurukramapuraskṛte ! guṇaśarīranityojjvale !
ṣaḍaṅgaparivārite ! kalita eṣa puṣpāñjaliḥ ||

ityuktvā oṃ0 mūlaṃ namaḥ - mantrapuṣpāñjaliṃ samarpayāmi
ityuktvā añjalisthākṣatapuṣpādikaṃśrīyai yantre vā samarpya ||
sāmānyārghajalamarpayediti mantrapuṣpāñjalividhiḥ - 13-37 | 3 -vi0 saṃ0

4 | 1 || mantrapuṣpāñjalikaraṇaphalaṃ || ya0 ā0 sū0 131 patre devapūjā vidhau 
yathā- 

1 || nānāsugandhapuṣpāṇi yathākālodbhavāni ca | 
puṣpāñjaliḥ śubho deyaḥ devatāprītaye sadā || iti ||

2 anyacca tathaiva -

śrībālāmānasapūjāstotre śrīmacchaṅkarapādairabhihitaṃ yathā-

caraṇanalinayugmaṃ paṅkjaiḥ pūjayitvā
kanakakamalamālāṃ kaṇṭhadeśe'rpayitvā |
śirasi vinihito'yaṃ ratnapuṣpāñjaliste
hṛdayakamalamadhye devi ! harṣaṃ tanotu || iti || (37-4 vi0 saṃ0)

5 || atha śrīśrīvidyopāsanavidhipustikāyāṃ puṣpāñjalistotraṃ ||
 
oṃ  samastamuniyakṣakiṃpuruṣasiddhavidyādharagrahāsurasurāpsarogaṇamukhair-
gaṇaiḥ sevite ! [atra sarvaślokādau mūlamantroccāra iti praṇayinaḥ 
śrīvidyārcanapustikākārāḥ śrīgaṇapatarāmaśāstriṇaḥ ||] ||
nivṛttitilakāmbarā prakṛtiśāntividyākalākalāpamadhurākṛte ! kalita eṣa 
puṣpāñjaliḥ || 1 ||

p. 571)

trivedakṛtavigrahe ! trividhakṛtyasandhāyini ! trirūpasamavāyini ! 
tripuramārgasañcāriṇi ! ||
trilocanakuṭumbini ! triguṇasaṃvidudyatpade ! trayi ! tripurasundari ! trijagadīśi ! 
puṣpāñjaliḥ || 2 ||

purandarajalādhipāntakakuberarakṣoharaprabhañjanadhanañjayaprabhṛtivandanā-
nandite ! || 
pravālapadapīṭhikānikaṭanityavarttisvabhūviriñcivihitastute ! vihita eṣa 
puṣpāñjaliḥ || 3 || 

yadā natibalādahaṅkṛtirudeti 
vidyāvayastapodraviṇarūpasaurabhakavitvasaṃvinmayi ! ||
jarāmaraṇajanmajaṃ bhayamupaiti tasyaisamākhilasamīhitaprasavabhūmi ! 
tubhyaṃ namaḥ || 4 ||
 
nirāvaraṇasaṃvidudbhramaparāstabhedollasatparātparacidekatāvaraśarīriṇi ! 
svairiṇi ! ||
rasāyanataraṅgiṇīrucitaraṅgasañcāriṇi ! prakāmaparipūriṇi ! prakṛta eṣa 
puṣpāñjaliḥ || 5 ||
 
taraṅgayati sampadaṃ tadanu saṃharatyāpadaṃ sukhaṃ vitarati śriyaṃ paricinoti 
hanti dviṣaḥ ||
kṣiṇoti duritāni yat praṇatiramba ! tasyai sadā śivaṅkari ! śive pade ! 
śivapurandhri ! tubhyaṃ namaḥ || 6 ||

śive ! śivasuśītalāmṛtataraṅgagandhollasannavāvaraṇadevate ! 
navanavāmṛtasyandini ! ||
gurukramapuraskṛte ! guṇaśarīranityojjvale ! ṣaḍaṅgaparivārite! kalita eṣa 
puṣpāñjaliḥ || 7 ||

tvameva janani pitā tvamatha bandhavastvaṃ sakhā tvamāyuraparā 
tvamābharaṇamātmanastvaṃ kalā ||
tvameva vapuṣaḥ sthitistvamakhilā yatistvaṃ guruḥ prasīda parameśvari ! 
praṇatapātri ! tubhyaṃ namaḥ || 8 ||

kañjāsanādisuravṛndalasatkirīṭakoṭipragharṣaṇasamujjvaladaṅghripīṭhe ! ||
tvāmeva yāmi śaraṇaṃ vigatānyabhāvaṃ dīnaṃ vilokaya dayārdravilokanena || 
9 || iti || (13 | 37 vi0 sarvaḥ saṃ0)

vi0 13 | 38 pūjopacārāntargatapradakṣiṇāviṣaye jñeyaṃ ||
 
1 pradakṣiṇāśabdaḥ devasya kakṣiṇato vā sāmānyadakṣiṇadiktaḥ ityarthaṃ 
samarthayati arthāt śudhāgneyyāḥ dakṣiṇādidiganukrameṇa īśānīdigantaṃ 
parikramaṇamiti tadarthaḥ ||

atra kutracidudaṅmukhadevasya tāmevodīcīṃ prācīṃ 
prakalpya tata āgneyyādikramaḥ iti na vismartavyam iti || (pa0 ka0 sū0 
dvitīyāvṛttikāraḥ)

38-2 | 1 || iyaṃ pradakṣiṇā kasyopacārasyānantaraṃ vidheyetyatra vicāraṇā ||
iyamupacārāntargatā devapradakṣiṇā kutracid granthe 
nīrājanadīpamantrapuṣpāñjalyorapyantarā tatpūrvaṃ tadanantaraṃ ca 
pratipāditāsti ! kutracid granthe tu-

 paunaḥpunyenāpyabhidhāyi tadarthaṃ tanniścetavyamiti kṛtvaitadyathājñānaṃ 
śiṣṭoktamevedāniṃ kiñcidvivicyate - (pa0 ka0 sū0 dvitīyāvṛttikāreṇa)

p. 572)

2- yathā atraiva dvipariśiṣṭe 7-9 | 4 viṣaye 388 patre 
nāgadevakṛtaṣoḍaśopacārakārikāsu naivedyānantarīyanamaskārānantaraṃ 
pradakṣiṇoktā-

3- tatraiva patre etat pa0 ka0 sū0 -2 khaṇḍe paramānandatantre ca 
puṣpāñjalyanantaraṃ pradakṣiṇoktā-

4- karmapradīpe ca naivedyatāmbūlayoranantaraṃ puṣpāñjaleḥ prāgeṣā 
pradakṣiṇoktā ityādi0

evamṛṣivacobhedaḥ pradakṣiṇāyāṃ vidyate tatrāsaṃmuhya sarvāṇyapi tāni
pramāṇānyādaraṇīyānyeveti vinayāmi sānātanikānityalam || 

5- athavā- etatsiddhāntāvalokanāya pāścātyaḥ dvipariśiṣṭe0 
śoḍaśopacāraviṣaye 388 taḥ 390 patreṣu - 7 | 9-1-7 | 9-4- 7 | 9-6- 7 | 10-1- 7 | 10-2-
ete viṣayāḥ dṛśyāḥ || iti ||

6- || kutracit ṣodaśopacāre iyaṃ pradakṣinaiva noktā iti jñeyam ||
(iti pa0 ka0 sū0 dvitīyāvṛttikāraḥ) (38 | 2 vi0 sarvaḥ saṃ0)

vi0 38-3 || devatāparatvena pradakṣināsaṅkhyāpramāṇam ||

bahvṛcapariśiṣṭe - |

1 - ekaṃ vināyake kuryāt dve sūrye trīṇi śaṅkare ||
catvāri keśave kuryāt saptāśvatthe pradakṣiṇam ||

anyacca - ekā caṇḍyā raveḥ sapta tisro dadyādvināyake || catasro viṣṇave deyāḥ 
śivasyārdhā pradakṣiṇā || iti ||

2 - ekā pradakṣiṇā- śridevyā uktā -atraiva pa0 ka0 sūtre 5 khṇḍe 173 patre śrī 
śrīkrame 20 sūtre tadbhāṣye ca yathā -

pradakṣiṇanamaskārajapastotraiḥ santoṣya 20 mūlasūtram |
atra bhāṣyaṃ yathā - | pradakṣiṇamekaṃ kāryaṃ (tatrānyat pramāṇaṃ)
ajeśaśaktigaṇapabhāskarāṇāṃ pradakṣiṇe |
vedā'rdhacandravahnyādrisaṅkhyāḥ sarvārthasiddhayaḥ || iti ||

4	0 ||	1 	3	7

iti saṅgamatantre uktatvāt | (asyārtho yathā-)

1- ajo viṣṇuḥ (tasya) vedāḥ catasraḥ 4 pradakṣiṇāḥ

2- īśaḥ śivaḥ || ardhaṃ [ardham - ardhā pradakṣiṇā sāmānyasaṃpādakaḥ |] 
tadardhaṃ dvayam || 

p. 573)

3- śaktiḥ devī tasyāḥ candraḥ ekā || 1 ||
4- gaṇapaḥ gaṇeśaḥ tasya vahniḥ tisraḥ || 3 ||
5- bhāskaraḥ sūryaḥ || tasya adriḥ sapta || 7 ||

imāḥ saṅkhyāḥ ajādipradakṣiṇe kramād jñeyāḥ ityarthaḥ | (13-38 | 3-2 vi0 
saṃ0) 

3 || devyā ekato lakṣasaṅkhyākānta pṛthak pradakṣiṇākaraṇe pramāṇaṃ -

śrīmacchaṅkarapādairapi- pradakṣiṇaṃ te paritaḥ karomi- 
ityekavacanāntamevoktaṃ0 || iti ||

ayaṃ ślokamantraḥ atraiva pa0 ka0 sū0 173 patresti -

punaśca - śrījagadambāyāḥ 1-3-9-5-7-21 - 
saṅkhyapradakṣiṇakaraṇapramāṇaṃ- śrībālātantracandrikā 336 patre 
śrīvidyāmānasapūjāyāṃ 52 śloke yathā -

ekaṃ trayaṃ vā nava pañca sapta pradakṣināṃ yaḥ paradevatāyāḥ |
ekādhikaṃ viṃśatikaṃ tu kṛtvā pramāṇamasyā vibudho bhavet saḥ || 52 || iti ||
(atrārṣaprayogatvādvyākaraṇaṃ na vimṛśyaṃ)

ekalakṣāṣṭottarasaṅkhyapradakṣiṇāpramāṇam ||

punaśca - 108 ekalakṣasaṅkhyapradakṣiṇākaraṇamapi - tatraiva 335 patre
śrīvidyāmānasapūjāyām - yathā-

aṣṭottaraṃ yacchatamuttamaṃ tat pradakṣiṇaṃ caiva tathā praṇāmān |
bhaktyā punarlakṣamitaṃ ca kṛtvā kailāsavāsaṃ labhate manuṣyaḥ || 53 || iti ||

tatraiva ekapradakṣiṇāpyuktā yathā-

oṃ śrīcakrarājasya saparyayāsya śrīsundarīśaṅkaramandirasya |
pradakṣiṇālokanamekavāraṃ kṛtvāpavargaṃ labhate manuṣyaḥ || iti || 
pradakṣiṇāyāṃ namaskārakaraṇe vidhijñānaṃ - yoginītantre 9 paṭale 231 
patre'pi yathā-

pradakṣiṇatrayaṃ kuryāt padmākāraṃ namettataḥ |
dakṣiṇāduttaraṃ gatvā devasya ca maheśvari ! |
kṛtvāñjalistato bhaktyā bhramayitvā namettataḥ [namaskaraṇaṃ 
maṇḍalādbahiriti na vismaraṇīyam-] ||
pratyekaṃ praṇameddevi ! daṇḍavat praṇipātayet || 
yo no named bhramitvā ca aparādho bhavettadā || iti || (37 | 3 vi0 sarvaḥ saṃ0)

p. 574) 

38 | 4 || pradakṣiṇākaraṇe phalam ||

1 śrī0 bā0 mā0 pūjāyāṃ gaditameva 
śrīmajjagadguruśrīśaṅkarācāryapādairyathā-

pade pade yā paripūjakebhyaḥ sadyo'śvamedhādiphalaṃ dadāti |
tāṃ sarvapāpakṣayahetubhūtāṃ pradakṣiṇāṃ te paritaḥ karomi || 61 || iti ||

2 anyacca śrīśrīvidyā-śrī0 mā0 pūjāyāṃ śrīmacchaṅkarācāryapādāḥ - 
yathā-
 
2 || ekaṃ trayaṃ vā nava pañca sapta pradakṣiṇāṃ yaḥ paradevatāyāḥ |
ekādhikaṃ viṃśatikaṃ tu kṛtvā pramāṇamasyā vibudho bhavet saḥ || 52 ||

3 || aṣṭottaraṃ yacchatamuttamaṃ tat pradakṣiṇaṃ caiva tathā praṇāmān |
bhaktyā punarlakṣamitaṃ ca kṛtvā kailāsavāsaṃ labhate manuṣyaḥ || 53 || iti ||

4 || śrīcakrarājasya saparyayāsya śrīsundarīśaṅkaramandirasya |
pradakṣiṇālokanamekavāraṃ kṛtvāpavargaṃ labhate manuṣyaḥ || iti ||

purāṇe karmagrantheṣu ca yathā-

5 || yāni kāni ca pāpāni janmāntarakṛtāni vai |
tāni sarvāṇi naśyanti pradakṣiṇapade pade || iti || (38 | 4 tahtā ca 13 | 38 vi0 sarvaḥ 
saṃ0)

vi0 13 | 39 - 1 stutiviṣaye ||

atha śrīmajjagadguruśrīśaṅkarācāryaviracitaṃ 
śrībālātripurasundarīmānasapūjāstotraṃ ||

1 oṃ - uṣasi māgadhamaṅgalagāyanai -
rjhaṭiti jāgṛhi jāgṛhi jāgṛhi ||
atikṛpārdrakaṭākṣanirīkṣaṇai-
rjagadidaṃ jagadamba ! sukhīkuru || 1 ||

kanakamayavitardiśobhamānaṃ diśi diśi pūrṇasuvarṇakumbhayuktam ||
maṇimayamaṇḍapamadhyame hi mātarmayo kṛpayā hi samarcanaṃ grahītum || 2 ||

kanakakalaśaśobhamānaśīrṣaṃ jaladharacumbisamullasatpatākam ||
bhagavati ! tava saṃnivāsahetormaṇimayamandirametadarpayāmi || 3 ||

tapanīyamayī satūlikā kamanīyā mudulottāracchadā ||
navaratnavibhūṣitā mayā śibikeyaṃ jagadamba ! terpitā || 4 ||

kanakamayavitardisthāpite tūlikāḍhye vividhakusumakīrṇe koṭibālārkavarṇe ||
bhagavati ! ramaṇīye ratnasiṃhāsane'sminnupaviśa padayugmaṃ hemapīṭhe 
nidhehi || 5 || 

p. 575)

maṇimayamauktikanirmitaṃ mahāntaṃ kanakastambhacatuṣṭayena yuktam ||
kamanīyatamaṃ bhavāni ! tubhyaṃ navamullocamahaṃ samarpayāmi || 6 ||

dūrvayā sarasijānvitaviṣṇukrāntayā ca sahitaṃ kusumāḍhayam ||
padmayugmasadṛśe padmayugme pādyametadurarīkuru mātaḥ ! || 7 ||

gandhapuṣpayavasarṣapadurvāsaṃmitaṃ tilakuśākṣatamiśram ||
hemapātranihitaṃ saharatnairarghyametadudarīkuru mātaḥ ! || 8 ||

jalajadyutinā kareṇa jātīphalakaṅkolalavaṅgagandhayuktaiḥ ||
amṛtairamṛtairivāhṛtairbhagavatyācamanaṃ vidhīyatām || 9 || 

nihitaḥ kanakasya sampuṭe pihito ratnapidhānakena saḥ ||
tadayaṃ bhavatīkare'rpito madhuparko bhavati ! pragṛhyatām || 10 ||

etaccampakatailameva vividhaiḥ puṣpairmuhurvāsitaṃ
nyastaṃ ratnamaye suvarṇacaṣake bhṛṅgairbhramadbhirvṛtam |
sānandaṃ surasundarībhirabhito hastairdhṛtaṃ yanmayā
keśeṣu bhramaraprabheṣu sakaleṣvaṅgeṣu cālipyatām || 11||

mātaḥ ! kuṅkumapaṅkanirmitamidaṃ dehe tavodvartanam
bhaktyāhaṃ kalayāmi hemarajasā saṃmiśritaṃ kesaram |
keśānāmalakairviśodhya viśadān kastūrikādyanvitam 
snānaṃ te navaratnakumbhasahitaiḥ saṃvāsitoṣṇodakaiḥ || 12 ||

dadhidugdhaghṛtai sapākṣikaiḥ sitayā śarkarayā samanvitaiḥ |
snapayāmi tavāhamādṛto janani ! tvāṃ punaruṣṇavāribhiḥ || 13 || 

elośīrasuvāsitaiḥ sukusumairgaṅgāditīrthodakai-
rmāṇikyāmalamauktikāmṛtayutaiḥ svacchaiḥ suvarṇodakaiḥ |
mantrān vaidikatāntrikān paripaṭhan sānandamatyādarāt
snānaṃ te parikalpayāmi janani ! snehāttvamaṅgīkuru || 14 ||

bālārkadyutidāḍimīyakusumapraspardhi sarvottamam
mātastvaṃ paridhehi divyavasanaṃ bhaktyā mayā kalpitam |
muktābhirgrathitaṃ sakañcukamidaṃ svīkṛtya pītaprabhaṃ 
taptasvarṇasamānavarṇabahulaṃ prāvarṇamaṅgīkuru || 15 ||

navaratnayute mayārpite kamanīye tapanīyapāduke ||
savilāsamidaṃ padadvayaṃ kṛpayā devi ! tayornidhīyatāṃ || 16 || 

p. 576)

bahubhiragarudhūpaiḥ sādaraṃ dhūpayitvā
bhagavati ! tava keśān kaṅkatairmārjayitvā |
surabhibhiraravindaiścampakaiścārcayitvā
jhaṭiti kanakasūtrairjūṭamāveṣṭayāmi || 17 ||

sauvīrāñjanamidamamba ! cakṣuṣoste
vinyastaṃ kanakaśalākayā mayā yat |
tannūnaṃ malinamapi tvadakṣisaṅgād
brahmendrādyabhilaśaṇīyatāmiyāya || 18 ||

mañjīre padayornidhāya rucire vinyasya kāñcīṃ kaṭau
muktāhāramurojayoranupamāṃ nakṣatramālāṃ gale |
keyūrāṇi bhujeṣu ratnavalayaśreṇīḥ kareṣu kramāt
tāṭaṅke tava karṇayorvinidadhe śīrṣe ca cūḍāmaṇim || 19 ||

dhaṃmille tava devi ! hemakusumānyādhāya bhālasthle
muktārājivirājihematilakaṃ nāsāpuṭe mauktikam |
mātarmauktikajālikāṃ ca kucayoḥ sarvāṅgulīṣūrmikāḥ
kaṭyāṃ kāñcanakiṅkiṇīrvinidadhe ratnāvataṃsaṃ śrutau || 20 ||

mātarbhālatale tavātivimale kāśmīrakastūrikā
karpūrāgurubhiḥ karomi tilakaṃ dehe'ṅgarāgaṃ tataḥ ||
vakṣojādiṣu yakṣakardamarasaiḥ sitkāñcapuṣpadravaiḥ
pādau kuṅkumalepanādibhirahaṃ sampūjayāmi kramāt || 21||

ratnākṣataistvāṃ paripūjayāmi muktāphalaiścārurucairvicitraiḥ |
akhaṇḍitairdevi ! yavādibhirvā kāśmīrapaṅkāṅkitataṇḍulairvā || 22 ||

janani ! campakatailamidaṃ puro
mṛgamado'yamayaṃ paṭavāsakaḥ |
surabhigandhamidaṃ ca catuḥsamaṃ
sapadi sarvamidaṃ pratigṛhyatām || 23 ||

sīmante te bhagavati ! yayā sādaraṃ nyastametat
sindūraṃ me hṛdayakamale devi ! harṣaṃ tanotu |
bālādityadyutiriva sadā lohitā yasya kānti-
rantardhvāntaṃ haratu sakalaṃ cetasā cintayāmi || 24 ||

p. 577)

mandārakundakaravīralavaṅgapuṣpai-
stvāṃ devi ! saṃtatamahaṃ paripūjayāmi |
jātījapābakulacampakaketakādi-
nānāvidhāni kusumāni ca te'rpayāmi || 25 ||

mālatībakulahemapuṣpikā-
kāñcanārakaravīracampakaiḥ |
karṇikāragirikarṇikādibhiḥ |
pūjayāmi jagadamba ! te vapuḥ || 26 ||

pārijātaśatapatrapāṭalai -
rmallikābakulacampakādibhiḥ |
ambujaiśca kusumaiśca sādaraṃ pūja0 || 27 ||

lākṣāsammilitaiḥ śilārasayutaiḥ śrīvāsasammiśritaiḥ
karpūrākalitaiḥ sitāmadhuyutairgosarpiṣā'loḍitaiḥ |
śrīkhaṇḍāguruguggalaprabhṛtibhirnānāvidhairvastubhi-
rdhūpaṃ te parikalpayāmi janani ! tvaṃ dhūpamaṅgīkuru || 28 ||

ratnālaṅkṛtahemapātranihitairgosarpiṣoddīpitai-
rdīpairdīrghatarāndhakārabhidurairbālārkakoṭiprabhaiḥ |
ātāmrajvaladujjvalajvalanavadratnapradīpaiḥ sadā
mātastvāmahamādarādanudinaṃ nīrājayāmyuccakaiḥ || 29 ||

mahati kanakapātre sthāpayitvā viśālān
ḍamarusadṛśarūpān pakvagodhūmadīpān |
bahughṛtamatha teṣu nyasya dīpairakampai-
rbhuvanajanani ! kurve nityamārātrikaṃ te || 30 ||

savinayamatha datvā jānuyugmaṃ dharāyāṃ
sapadi śirasi dhṛtvā pātramārātrikasya |
mukhakamalasamīpe te'mba ! sārdhatrivāraṃ
bhramayati mayi bhūyāt te kṛpārdraḥ kaṭākṣaḥ || 31|| 

mātastvāṃ dadhidugdhapāyasamahāśālyanyasantānakān
sūpāpūpasitāghṛtaiḥ savaṭakaiḥ sakṣaudrarambhāphalaiḥ ||

p. 578)

elājīrakahiṅgunāgaraniśākaustumbarīsaṃyutaiḥ
śākaiḥ sākamahaṃ sudhādhikarasaiḥ saṃtarpayāmyarpayan || 32 ||

sāpūpasūpadadhidugdhasitāghṛtāni
susvādubhakṣyaparamānnapuraḥsarāṇi ||
śākollasanmaricajīrakavallikāni
bhakṣyāṇi bhuṅkṣva jagadamba ! mayārpitāni || 33 ||

kṣīrametadidamuttamottamam 
prājyamājyamidamujjvalaṃ madhu |
mātaretadamṛtopamaṃ tvayā
sambhrameṇa paripīyatāṃ muhuḥ  || 34 ||

uṣṇodakaiḥ pāṇiyugaṃ mukhaṃ ca
prakṣālya mātaḥ kaladhautapātre |
karpūramiśreṇa sakuṅkumena
hastau samudvartaya candanena || 35 ||

atiśītamuśīravāsitaṃ
tava pāṇau ca mayā niveditam |
paṭapūtamidaṃ jitāmṛtam
śuci gaṅgāmṛtamamba ! pīyatām || 36 ||

ātāmrarambhāphalasaṃyutāni
drākṣāphalākṣoṭasamanvitāni ||
sanārikelāni sadāḍimāni
phalāni te devi ! samarpayāmi || 37 ||

kaliṅgakośātakasaṃyutāni
jambīranāriṅgasamanvitāni |
sabījapūrāṇi sadāḍimāni
phalāni te devi ! samarpayāmi || 38 ||

karpūreṇa yutairlavaṅgasahitaiḥ kaṅkolacūrṇānvitaiḥ
susvādukramukaiḥ sagaurakhadiraiḥ susnigdhajātīphalaiḥ |
mātaḥ ketakipatrapāṇḍuruciraistāmbūlavallīdalaiḥ 
sānandaṃ mukhamaṇḍanārthamatulaṃ tāmbūlamaṅgīkuru || 39 ||

p. 579)

elālavaṅgādisamanvitāni
kaṅkolakarpūravimiśritāni |
tāmbūlavallīdalasaṃyutāni
phalāni te devi ! samarpayāmi || 40 ||

tāmbūlavallīdalanirjitahemavarṇaṃ
svarṇāktapūgaphalamauktikacūrṇayuktam |
ratnasthalīsthitamidaṃ khadireṇa sārdham
tāmbūlamamba ! vadanāmburuhe gṛhāṇa || 41|| 

atha bahumaṇimiśrairmauktikaistvāṃ vikīrya
tribhuvanakamanīyaiḥ pūjayitvā ca vastraiḥ |
militavividhamuktāṃ divyamāṇikyayuktām
janani ! kanakavṛṣṭiṃ dakṣiṇāṃ te'rpayāmi || 42 ||

mātaḥ kāñcanadaṇḍamaṇḍitamidaṃ pūrṇendubimbaprabham 
nānāratnaviśobhi hemakalaśaṃ lokatrayālhādakam |
bhāsvanmauktikajālikāparivṛtaṃ prītyātmahaste dhṛtam
chatraṃ te parikalpayāmi śirasi tvaṣṭrā svayaṃ nirmitam || 43 ||

śaradindumarīcigauravarṇai-
rmaṇiyuktairvilasatsuvarṇadaṇḍaiḥ |
jagadamba ! vicitracāmarai - 
stvāmahamānandabhareṇa vījayāmi || 44 ||

mārtaṇḍamaṇḍalanibho jagadamba ! yo'yam 
bhaktyā mayā maṇimayo mukuṭo'rpitaste |
pūrṇendubimbaruciraṃ vadanaṃ svakīya-
masmin vilokaya vilolavilocane ! tvam || 45 ||

indrādayo natinatairmukuṭapradīpai-
rnīrājayanti satataṃ tava pādapīṭham |
tasmādahaṃ tava śarīramaśeṣametan-
nīrājayāmi jagadamba ! sahastradīpaiḥ || 46 ||

priyagatiratituṅgo ratnapallāṇayuktaḥ
kanakamayavibhūṣaḥ snigdhagambhīraghoṣaḥ ||

p. 580)

bhagavati ! kalito'yaṃ vāhanārthaṃ mayā te
turagaśatasameto vāyuvegasturaṅgaḥ || 47 ||

madhukaravṛtakumbho nyastasindūrareṇuḥ
kanakakalitaghaṇṭaḥ kiṅkiṇīśobhikaṇṭhaḥ |
śravaṇayugalacañcaccāmaro meghatulyo
janani ! tava mude syānmattamātaṅga eṣaḥ || 48 ||

drutataraturagairvirājamānaṃ maṇimayacakracatuṣṭayena yuktam |
kanakamayamahaṃ vitānavantaṃ bhagavati ! hi rathaṃ samarpayāmi || 49 ||

hayagajarathapattiśobhamānam 
diśi diśi dudumbhimeghanādayuktam |
abhinavacaturaṅgasainyametad
bhagavati ! bhaktibhareṇa ta'rpayāmi || 50 ||

paridhīkṛtasaptasāgaram
bahusampatsahitaṃ mayā'mba te ||
vipulaṃ dharaṇītalābhidham
prabalaṃ durgamidaṃ samarpitam || 51 ||

śatapatrayutaiḥ svabhāvaśītai -
ratisaurabhyayutaiḥ parāgapītaiḥ |
bhramarīmukharīkṛtairanekai-
rvyajanaistvāṃ jagadamba ! vījayāmi || 52 ||

bhramavilulitalolakuntalāli-
rvigalitamālyavikirṇaraṅgabhūmiḥ |
iyamaticaturā naṭī naṭantī
tava hṛdaye mudamātanotu mātaḥ ! || 53 ||

mukhacalanavilāsalolaveṇī
vilasitanirṇitalolabhṛṅgamālā |
yuvajanasukhakāricārulīlā
bhagavati ! te purato naṭanti bālāḥ [atra naṭanti bālā ityatra ārṣaṃ mantavyaṃ | ] 
|| 54 || 

rucirakucataṭīnāṃ nāṭyakāle naṭīnām 
pratigṛhamatha tatra pratyahaṃ prādurāsīt |

p. 581)

dhimiki dhimiki dhiddhi dhiddhi dhiddheti dhiddhi
dhikiti dhikiti tatthai tthai tyathe ttheti śabdaḥ || 55 || 

bhramadalikulatulyā loladhammilabhārā
smitamukhakamalodyaddivyalāvaṇyapūrā ||
abhinavanavaveṣā vārayoṣā naṭantī
paramṛtakalakaṇṭhi devi ! modaṃ tanotu || 56 ||

ḍamaruḍiṇḍimajharjharajhallarī-
mṛduravārdraghaṭārdraghaṭādayaḥ |
jhaṭiti jhāṅkṛtibhirjagadambike !
bahudayaṃ hṛdayaṃ sukhayantu te || 57 ||

vipañcīṣu saptasvarān vādayantya-
stava dvāri gāyanti gandharvakanyāḥ ||
kṣaṇaṃ sāvadhānena cittena mātaḥ
samākarṇaya tvaṃ mayā prārthitāsi || 58 ||

atiśayakamanīyairnartanairnartakīnām
jhaṭiti ca ramayitvā ceta evaṃ tvadīyam ||
svayamahamapi citrairnṛtyavāditragītai -
rbhagavati ! bhavadīyaṃ mānasaṃ rañjayāmi || 59 ||

tava devi ! guṇānuvarṇane
caturā no caturānanādayaḥ |
tadihaikamukheṣu jantuṣu
stavanaṃ kastava kartumīśvaraḥ || 60 ||

pade pade yā paripūjakebhyaḥ
sadyo'śvamedhādiphalaṃ dadāti ||
tāṃ sarvapāpakṣayahetubhūtām
pradakṣiṇāṃ te paritaḥ karomi || 61||

raktotpalāraktatalaprabhābhyāṃ
dhvajordhvarekhākuliśāṅkitābhyām ||
aśeṣavṛndārakavanditābhyāṃ
namo bhavānīpadapaṅkajābhyām || 62 ||

p. 582)

caraṇanalinayugmaṃ paṅkajaiḥ pūjayitvā
kanakakamalamālāṃ kaṇṭhadeśe'rpayitvā |
śirasi vinihito'yaṃ ratnapuṣpāñjaliste
hṛdayakamalamadhye devi ! harṣaṃ tanotu || 63 ||

atha maṇimayamañcakābhirāme
dyutimati puṣpavitānarājamāne | 
prasaradagarudhūpairdhūpite'smin
bhagavati ! vāsagṛhestu te nivāsaḥ || 64 ||

etasmin maṇikhacite suvarṇapīṭhe
trailokyābhayavaradau nidhāya pādau | 
vistīrṇe mṛdulataracchade'smin
paryaṅke kanakamaye niṣīda mātaḥ ! || 65 ||

tava devi sarojacihnayoḥ
padayornijitapadmarāgayoḥ |
atiraktatarairalaktakaiḥ
punaruktāṃ racayāmi raktatām || 66 ||

atha mātaruśīravāsitam
nijatāmbūlarasena rājitam |
tapanīyamaye hi pātrake
mukhagaṇḍūṣajalaṃ vidhīyatām || 67 ||

kṣaṇamatha jagadamba mañcake'smin
mṛdutaratūlikayā virājamāne |
atimahati mudā nijecchayā tvaṃ
sukhaśayanaṃ kuru māṃ hṛdi smarantī || 68 ||

muktākundendugaurāṃ maṇimayamukuṭāṃ ratnatāṭaṅkayuktā-
makṣasrakpuṣpahastāmabhayavarakarāṃ candracūḍāṃ trinetrām |
nānālaṅkārayuktāṃ suramukuṭalasaddyotitasvarṇapīṭhām
sānandāṃ suprasannāṃ tribhuvanajananīṃ cetasām cintayāmi || 69 ||

eṣā bhaktyā tava viracitā yā mayā devi ! pūjā
svīkṛtyaināṃ sapadi sakalān me'parādhān kṣamasva |

p. 583)

nyūnaṃ yattat tava karuṇayā pūrṇatāmetu sadyaḥ
sānandaṃ me hṛdayakamale te'stu nityaṃ nivāsaḥ || 70 ||

pūjāmimāṃ paṭhet prājñaḥ pūjāṃ kartumanīśvaraḥ |
pūjāphalamavāpnoti vāñchitārthāṃśca vindati || 71 ||

pratyahaṃ bhaktiyukto yo devīpūjāmimāṃ paṭhet |
vāgvādinyāḥ prasādena vatsarāt sa kavirbhavet || 72 ||

|| iti śrīmatparamahaṃsaparivrājakācāryaviracitaṃ devīmānasapūjanastotraṃ 
sampūrṇaṃ ||

śubhamastu
 
(anena stotrapāṭhakarmaṇā śrīkālikā bālāmbā prīyatām ||)

39 | 2- atha saṭīkaprapañcasāre - 11 paṭale - 156 patre śrībhuvaneśvarī 
stutiratnaṃ yathā-

oṃ śrībhuvaneśvaryai namaḥ ||

oṃ ebhirvidhānairbhuvaneśvarīṃ tāṃ samarcya siddhyai tu japaṃśca mantri |
stutyā'nayā stautu sadā samagraprītyai samastārttivibhañjikāyāḥ || 48 ||

prasīda prapañcasvarūpe ! pradhāne ! prakṛtyātmike ! prāṇināṃ 
prāṇasaṃjñe ! |
praṇantuṃ prabho ! prārabhe prāñjalistvāṃ prakṛtyā'pratarkye 
prakāmapravṛtte || 49 ||

stutirvākyabaddhā padātmaiva vākyaṃ padaṃ tvakṣarātmā'kṣaraṃ tvaṃ 
maheśi ! |
dhruvaṃ tvāṃ tvamevā'kṣaraistvanmayaistoṣyasi tvanmayī vākpravṛttiryataḥ 
syāt || 50 ||
ajādhokṣajatrīkṣaṇāścā'pi rūpaṃ paraṃ nābhijānanti māyāmayaṃ te |
stuvantīśi ! tāṃ tvāmamī sthūlarūpāṃ tadetāvadambetyayuktaṃ mamāpi || 51 
|| 

namaste samasteśi ! bindusvarūpe ! namaste paratvena tatvābhidhāne ! |
namaste mahattvaṃ prapanne pradhāne ! namaste tvahaṅkāratattvasvarūpe ! || 52 ||

namaḥ śabdarūpe ! namo vyomarūpe ! namaḥ sparśarūpe ! namo vāyurūpe ! |
namo rūpatejorasāmbhaḥsvarūpe ! namaste'stu gandhātmike ! bhūsvarūpe ! || 53 
|| 

namaḥ śrotracarmākṣijihvākhyanāsāsyavākpāṇipatpāyusopastharūpe ! |
manobuddhyahaṅkāracittasvarūpe ! virūpe ! namaste vibho ! viśvarūpe ! || 54 ||

ravitvena bhūtvā'ntarātmā dadhāsi prajāścandramastvena puṣṇāsi bhūyaḥ |
dahasyagnimūrtiṃ vahantyāhutiṃ vā mahādevi ! tejastrayaṃ tvatta eva || 55 ||

p. 584)

caturvaktrayuktā lasaddhaṃsavāhā rajaḥsaṃśritā brahmasaṃjñāṃ dadhānā |
jagatsṛṣṭikāryā jaganmātṛbhūte ! paraṃ tvatpadaṃ dhyāyasīśi ! tvameva || 56 ||

virājatkirīṭā lasaccakraśaṅkhā vahantī ca nārāyaṇākhyāṃ jagatsu | 
guṇaṃ sattvamāsthāya viśvasthitiṃ ya karotīha saṃ'śo'pi devi ! tvameva || 57 ||

jaṭābaddhacandrāhigaṅgā trinetrā jagat saṃharantī ca kalpāvasāne |
tamaḥsaṃśritā rudrasaṃjñāṃ dadhānā vahantī paraśvakṣamāle vibhāsi || 58 
||
sacintākṣamālā sudhākumbhalekhādharā trīkṣaṇārdhendurājatkapardā |
suśuklāṃśukā kalpadehā sarasvatyapi tvanmayaiveśi ! vācāmadhīśā || 59 ||

lasacchaṅkhacakrā calatkhaḍgabhīmā nadatsiṃhavāhā jvalattuṅgamauliḥ |
dravaddaityavargā stuvatsiddhasaṅgā tvameveśi ! durgā'pi sargādihīne ! || 60 || 

purārātidehārdhabhāgā bhavānī girīndrātmajātvena yaiṣā vibhāti |
mahāyogivandyā maheśā sunāthā maheśyambikā tattvatastvanmayaiva || 61 ||

lasatkaustubhodbhāsite ! vyomanīle ! vasantīṃ ca vakṣaḥsthale kaiṭabhāreḥ | 
jagadvallabhāṃ sarvalokaikanāthāṃ śriyaṃ tāṃ mahādevyahaṃ tvāmavaimi || 
62 ||

ajādrīḍgṛhābjākṣapotrīndrakāṇāṃ mahābhairavasyāpi cihnaṃ vahantyaḥ |
vibho ! mātaraḥ sapta tadrūparūpāḥ sphurantyastvadaṃśā mahādevi ! tāśca || 
63 || 

samudyaddivākṛtsahasrābhabhāsā sadā santatāśeṣaviśvāvakāśe |
lasanmaulibaddhendulekhe ! sapāśāṅkuśābhītyabhīṣṭāttahaste ! namaste || 64 ||

prabhā kīrtikāntī divārātrisandhyāḥ kriyāśā tamisrākṣudhābuddhimedhāḥ |
dhṛtirvāṅmatiḥ sannatiḥ śrīśca bha(śa)ktistvameveśi ! ye'nye ! ca 
śaktiprabhedāḥ || 65 ||

hare ! bindunādaiḥ saśaktyākhyaśāntairnamaste'stu bhedaprabhinnairabhinne ! |
sadā saptapātālalokācalabdhigrahadvīpadhātusvarādisvarūpe ! || 66 ||

namaste samaste samastasvarūpe ! samasteṣu vastuṣvanusyūtaśakte ! |
śritasthūlasūkṣmasvarūpe ! maheśi ! smṛte ! bodharūpe'pyabodhasvarūpe ! || 67 
|| 

manovṛttirastu smṛtiste samastā tathā vākpravṛttiḥ stutiḥ syānmaheśi ! |
śarīrapravṛttiḥ praṇāmakriyā syāt prasīda kṣamasva prabho ! santataṃ me || 68 ||

hṛllekhājapavidhimarcanāviśeṣānetāstāṃ stutimapi nityamādareṇa |
yo'bhyasyet sa khalu parāṃ śriyaṃ ca gatvā śuddhaṃ tadvrajati padaṃ parasya 
dhāmnaḥ || 69 ||

iti hṛllekhāvihito vidhiruktaḥ saṅgraheṇa sakalo'yam |
yo'sminniyatamanā mantrī yogī syāt sa eva bhogī ca || 70 || iti ||

p. 585)

3 || śrīśrīrājarājeśvarītarpaṇastotraṃ || śrīvidyārcanapaddhatau 37- patre 
yathā-

kalyāṇāyutapūrṇabimbavadanāṃ pūrṇeśvarānandinīm
pūrṇāpūrṇaparāpareśamahiṣīṃ pūrṇāmṛtāsvādinīm |
sampūrṇāṃ paramottamāmṛtakalāṃ vidyāvatīṃ bhāratiṃ
śrīcakrapriyabindutarpaṇaparāṃ śrīrājarājeśvarīm || 1 ||

ekānekamanekakāryavividhāṃ kāryaikacidrūpiṇīṃ 
caitanyātmaka ekacakraracitāṃ cakrāṅka ekākinīm |
bhāvābhāvavivarddhinīṃ bhayaharāṃ sadbhakticintāmaṇiṃ
śrī--------------------------------------------------------------------- || 2 ||

īśādhīśvarayogavṛndaviditāṃ sānandabhūtām parāṃ
paśyantīṃ tanumadhyamāṃ vilasatīṃ śrīviṣṇusadrūpiṇīm |
ātmānātmavicāriṇīṃ trivaraṇāṃ vidyātribījatrayīm
śrī--------------------------------------------------------------------- || 3 || 

lakṣmīlakṣanirīkṣaṇāṃ nirupamāṃ rudrākṣamālādharāṃ
sākṣātkāraṇadakṣavaṃśakalitāṃ dīrghākṣadīrgheśvarīm |
bhadrāṃ bhadravarapradāṃ bhagavatīṃ bhadreśvarīṃ mudriṇīm
śrī--------------------------------------------------------------------- || 4 || 

hrīṃbījānvitanādabindubharitāṃ oṃkāranādātmikāṃ
brahmānandaghanodarīṃ guṇavatīṃ jñāneśvarīṃ jñānadām |
icchājñānakriyāvatīṃ jitavalīṃ [ārṣatvācchandobhaṅgo 
vyākaraṇadoṣaścātrādoṣāya |] gandharvasaṃsevitām
śrī --------------------------------------------------------------------- || 5 || 

harṣonmattasuvarṇapātrabharitāṃ pānonnatāghūrṇitāṃ
huṅkārapriyaśabdabrahmaniratāṃ sārasvatollāsinīm |
sārāsāravicāravādacaturāṃ varṇāśramākariṇīṃ
śrī--------------------------------------------------------------------- || 6 ||

sarvajñānakalāvatīṃ sakaruṇāṃ svaṃnādinīṃ mādinīṃ
sarvāntargataśālinīṃ śivatanuṃ sandīpinīṃ dīpinīm |

p. 586)

saṃyogapriyarūpiṇīṃ priyavatīṃ prītipratāponnatāṃ
śrī--------------------------------------------------------------------- || 7 || 

karmākarmavivarjitāṃ kulavatīṃ karmapradāṃ kaulinīṃ
kāruṇyāṃ tanubuddhikarmaviratāṃ sindhupriyāṃ śālinīm |
pañcabrahmasanātanāntaragatāṃ jñeyāṅgayogānvitāṃ
śrī--------------------------------------------------------------------- || 8 || 

haste kumbhanibhāṃ payoktabharitāṃ pīnonnatāṃ naumi tāṃ
hīrāḍhyābharaṇāṃ surendravanitāṃ śṛṅgārapīṭhālayām |
yogyākāriṇī [atra yonyākāriṇī ityatra chandobhaṅgaḥ soḍhavya ārṣatvāt 
|]yonimudritakarāṃ nityāmavarṇātmikāṃ 
śrī--------------------------------------------------------------------- || 9 || 

lakṣmīlakṣaṇapūrṇabhaktivaradāṃ līlāvinodasthitām
lakṣmyā rañjitapādapadmayugalāṃ brahmendrasaṃsevitāṃ |
lokālokitalokakāmajananīṃ lokapriyāṅkasthitāṃ
śrī--------------------------------------------------------------------- || 10 || 

hrīṃkārīṃ sutarāṃ karapriyatanuṃ śrīyogapīṭheśvarīm 
māṅgalyāyatapaṅkajābhanayanāṃ māṅgalyasiddhipradām |
tāruṇyāntapasārcitāntaruṇikāṃ tantryarcitāṃ nartinīṃ
śrī --------------------------------------------------------------------- || 11 ||

sarveśāṅgavihāriṇīṃ sakaruṇāṃ sarveśvarīṃ sarvagāṃ
satyāṃ sarvamayīṃ sahasradalanāṃ saptārṇavopasthitām |
saṃsargādivivarjinīṃ śubhakarīṃ bālārkakoṭiprabhāṃ
śrī --------------------------------------------------------------------- || 12 || 

kādikṣāntasuvarṇabindusutanuṃ svarṇādisiṃhāsinīṃ
nānāvarṇavicitracitracaritāṃ cāturyacintāmaṇim |
cittānandavidhāyinīṃ suvipulāṃ ruḍhatrayāṃ śeṣikāṃ
śrī --------------------------------------------------------------------- ||13||

lakṣmīśādividhīndracandramukuṭāṃ ṣaṣṭhāṅgapīṭhārcitāṃ
sūryendrāgnimayaikapīṭhanilayāṃ tristhāṃ trikoṇeśvarīm |

p. 587)

gośrīgurviṇī [ārṣatvānna chandobhaṅgo doṣāya |] garvitāṃ gaganagāṃ 
gaṅgāgaṇeśapriyāṃ
śrī --------------------------------------------------------------------- || 14 || 

hṛīṃkūṭatrayarūpiṇīṃ samayagāṃ saṃsāriṇīṃ haṃsinīṃ
vāmācāraparāyaṇāṃ sukulajāṃ bījāvatīṃ [atrāśuddhaṃ svayaṃ 
śodhyaṃ |] mudrikām |
kāmākṣīṃ karuṇārdracitracaritāṃ śrīmantramūrtyātmikāṃ
śrī cakrapriyabindutarpaṇaparāṃ śrīrājarājeśvarīṃ (15 saṃ0)
(atra stotre mūlalekhavaśādaśudhāṃ saṃśodhyaṃ)

4 || śrīhayagrīvāvatārāya śrīvedakṛtā śrīdevīstutiḥ ||
śrī0 de0 bhā0 1-skaṃ0 50 - a0

oṃ śrīvedā ūcuḥ ||

oṃ namo devi ! mahāmāye ! viśvotpattikare ! śive ! |
nirguṇe ! sarvabhūteśi ! mātaḥ śaṅkarakāmade ! || 1 ||

tvaṃ bhūmiḥ sarvabhūtānāṃ prāṇaḥ prāṇavatāṃ tathā |
dhīḥ śrīḥ kāntiḥ kṣamā śāntiḥ śraddhā medhā dhṛtiḥ smṛtiḥ || 2 ||

tvamudgīthe'rdhamātrāsi gāyatri vyāhṛtistathā |
jayā ca vijayā dhātri lajjā kīrtiḥ spṛhā dayā || 3 ||

tvāṃ saṃstumomba ! bhuvanatrayasaṃvidhānadakṣāṃ dayārasayutāṃ jananiṃ 
janānām |
vidyāṃ śivāṃ sakalalokahitāṃ vareṇyāṃ vāgbījavāsanipuṇāṃ 
bavanāśakartrīm || 4 || 

brahmā haraḥ śaurisahasranetravāgvahnisūryā bhuvanādhināthāḥ |
te tvatkṛtāḥ santi tato na mukhyā mātā yatastvaṃ sthirajaṅgamānām || 5 ||

sakalabhuvanametat kartukāmā yadā tvaṃ sṛjasi janani ! devān 
viṣṇurudrājamukhyān |
sthitilayajananaṃ taiḥ kārayasyekarūpā na khalu tava kathaṃciddevi ! 
saṃsāraleśaḥ || 6 ||

na te rūpaṃ vettuṃ sakalabhuvane ko'pi nipuṇo na nāmnāṃ saṅkhyāṃ te 
kathitumiha yogyo'sti puruṣaḥ |
yadalpaṃ kīlālaṃ kalayitumaśaktaḥ sa tu naraḥ kathaṃ pārāvārākalanacaturaḥ 
syāddhṛtamatiḥ || 7 ||

na devānāṃ madhye bhagavati ! tavānantavibhavaṃ vijānātyeko'pi tvamiha 
bhuvanaikāsi janani ! |
kathaṃ mithyā viśvaṃ sakalamapi caikā racayasi pramāṇaṃ 
tvetasminnigamavacanaṃ devi ! vihitam ||

p. 588)

nirīhaivāsi tvaṃ nikhilajagatāṃ kāraṇamaho caritraṃ te citraṃ bhagavati ! mano 
no vyathayati |
kathaṅkāraṃ vācyaḥ sakalanigamāgocaraguṇaprabhāvaḥ svaṃ yasmāt 
svayamapi na jānāsi paramam || 9 ||

na kiṃ jānāsi tvaṃ janani ! madhujinmaulipatanaṃ śive ! kiṃ vā jñātvā 
vividiṣasi śaktiṃ madhujitaḥ |
hareḥ kiṃ vā mātarduritatatireṣā balavati bhavatyāḥ pādābje bhajananipuṇe 
kvāsti duritam || 10 ||
(|| śrīhayagrīvāvatārāya śrīvedāḥ prārthayante śrībhagavatīṃ parāṃ 
devatāṃ || )

upekṣā kiṃ ceyaṃ tava surasamūhe'tiviṣamā harermūrdhno nāśo matamiha 
mahāścaryajanakam ||
mahadduḥkaṃ mātastvamasi jananacchedakuśalā na jānīmo 
maulervighaṭanavilambaḥ kathamabhut || 11 ||

jñātvā doṣaṃ sakalasuratāpāditaṃ devi ! citte  kiṃ vā viṣṇāvamarajanitaṃ 
duṣkṛtaṃ pātitaṃ te |
viṣṇorvā kiṃ samarajanitaḥ kopi garvo'tivegāt chettuṃ mātastava vilasitaṃ naiva 
vidmo'tra bhāvam || 12 ||

kiṃ vā daityaiḥ samaravijitaistīrthadeśe suramye ghoraṃ tīrtvā bhagavati ! varaṃ 
labdhavadbhirbhavatyāḥ |
antardhānaṃ gamitamadhunā viṣṇuśīrṣaṃ bhavāni ! draṣṭuṃ kiṃ vā 
vigataśirasaṃ vāsudevaṃ vinodaḥ || 13 ||

sindhoḥ putryāṃ roṣitā kiṃ tvamādye kasmādenāṃ prekṣase nāthahīnām | 
kṣantavyaste svāṃśajātāparādho'pyutthāpyainaṃ moditaṃ māṃ kuruṣva || 
14 || 

ete surāstvāṃ satataṃ namanti kāryeṣu mukhyāḥ prathitaprabhāvāḥ |
śokārṇavāttāraya devi ! devān utthāpya devaṃ sakalādhinātham || 15 ||

murdhā gataḥ kvāmba harerna vidmo nānyostyupāyaḥ khalu jīvane'dya |
yathā sudhājīvanakarmadakṣā tathā jagajjīvitadā'si devi || 16 || iti saṃ0

5 || atha madhukaiṭabhanāśāya śrīviṣṇukṛtā śrījagadambāstutiḥ
de0 bhā0 3 skandha-4 adhyāye -

oṃ śrībhagavānuvāca -

namo devyai prakṛtyai ca vidhātryai satataṃ namaḥ |
kalyāṇyai kāmadāyai ca vṛddhyai siddhyai namo namaḥ || 1 ||

p. 589)

saccidānandarūpiṇyai saṃsārāraṇaye namaḥ |
pañcakṛtyavidhātryai te bhuvaneśyai namo namaḥ || 2 ||

sarvādhiṣṭhānarūpāyai kūṭasthāyai namo namaḥ  |
ardhamātrārthabhūtāyai hṛllekhāyai namo namaḥ || 3 ||

jñātaṃ mayākhilamidaṃ tvayi sanniviṣṭaṃ tvatto'sya sambhavalayāvapi 
mātaradya | 
śaktiśca te'sya karaṇe vitataprabhāvā jñātā'dhunā sakalalokamayīti nūnam || 
4 ||
vistārya sarvamakhilaṃ sadasadvikāraṃ saṃdarśayasyavikalaṃ puruṣāya kāle |
tattvaiśca ṣoḍaśabhireva ca saptabhiśca bhāsīndrajālamiva naḥ kila rañjanāya || 
5 ||

na tvāmṛte kimapi vastugataṃ vibhāti vyāpyaiva sarvamakhilaṃ tvamavasthitā'si |
śaktiṃ vinā vyavahṛtau puruṣo'pyaśakto bambhaṇyate janani ! buddhimatā janena 
|| 6 || 

prīṇāsi viśvamakhilaṃ satataṃ prabhāvaiḥ svaistejasā ca sakalaṃ prakaṭīkaroṣi 
|
atsyeva devi ! tarasā kila kalpakāle ko veda devi ! caritaṃ tava vaibhavasya || 7 ||

trātā vayaṃ janani ! te madhukaiṭabhābhyāṃ lokāśca te suvitatāḥ khalu 
darśitā vai |
nītāḥ sukhsya bhavane paramāṃ ca koṭiṃ yaddarśanaṃ tava bhavāni ! 
mahāprabhāvam || 8 ||

nāhaṃ bhavo na ca viriñci [atrāpadamārṣatvāt soḍhvyaṃ |] viveda mātaḥ ! 
ko'nyo hi vetti caritaṃ tava durvibhāvyam |
kānīha santi bhuvanāni mahāprabhāve hyasmin bhavāni ! carite racanākalāpe || 9 
|| 

asmābhiratra bhuvane hariranya eva dṛṣṭaḥ śivaḥ kamalajaḥ prathitaprabhāvaḥ |
anyeṣu devi ! bhuvaneṣu na santi kiṃ te kiṃ vidma devi ! vitataṃ tava suprabhāvam 
|| 10 || 

yāce'mba te'ṅghrikamalaṃ praṇipatya kāmaṃ citte sadā vasatu rūpamidaṃ 
tavaitat |
nāmāpi vaktrakuhare satataṃ tavaiva saṃdarśanaṃ tava padāmbujayoḥ sadaiva || 
11 || 

bhṛtyo'yamasti satataṃ mayi bhāvanīyaṃ tvāṃ svāminīti manasā nanu 
cintayāmi |
eṣāvayoraviratā kila devi ! bhūyād vyāptiḥ sadaiva jananīsutayorivārye !  || 12 ||

tvaṃ vetsi sarvamakhilaṃ bhuvanaprapañcaṃ 
sarvajñatāparisamāptinitāntabhūmiḥ |
kiṃ pāmareṇa jagadamba ! nivedanīyaṃ
yadyuktamācara bhavāni ! taveṅgitaṃ syāt || 13 || 

brahmā sṛjatyavati viṣṇurumāpatiśca saṃhārakāraka iyaṃ tu jane prasiddhiḥ |
kiṃ satyametadapi devi ! tavecchayā vai kartuṃ kṣamā vayamaje ! tava 
śaktiyuktāḥ || 14 ||

dhātrī dharādharasute ! na jagad bibharti ādhāraśaktirakhilaṃ tava vai bibharti |
sūryo vibhāti varade ! prabhayā yutaste tvaṃ sarvametadakhilaṃ virajā vibhāsi || 
15 || 

p. 590)

brahmāhamīśvaravaraḥ kila te prabhāvāt sarve vayaṃ janiyutā na yadā tu 
nityāḥ |
ke'nye surāḥ śatamakhapramukhāśca nityānitye ! tvameva janani prakṛtiḥ 
purāṇā || 16 ||

tvaṃ cedbhavāni ! dayase puruṣaṃ purāṇaṃ jāne'hamadya tava sannidhigaḥ 
sadaiva |
no cedahaṃ vibhuranādiranīha īśo viśvātmadhīriti tamaḥprakṛtiḥ sadaiva || 17 ||

vidyā tvameva nanu buddhimatāṃ narāṇāṃ śaktistvameva kila śaktimatāṃ 
sadaiva |
tvaṃ kīrtikāntikamalāmalatuṣṭirūpā muktipradā viratireva manuṣyaloke || 18 ||

gāyatryasi prathamavedakalā tvameva svāhā svadhā bhagavatī 
suguṇārdhamātrā |
āmnāya eva vihito nigamo bhavatyā sañjīvanāya satataṃ surapūrvajānām || 19 
|| 

mokṣārthameva racayasyakhilaṃ prapañcaṃ teṣāṃ gatāḥ khalu yato nanu 
jīvabhāvam |
aṃśā anādinidhanasya kilānaghasya pūrṇārṇavasya vitatā hi yathā taraṅgāḥ 
|| 20 || 

jīvo yadā tu parivetti tavaiva kṛtyaṃ tvaṃ saṃharasyakhilametaditi prasiddham |
nāṭyaṃ naṭena racitaṃ vitathe'ntaraṅge kārye kṛte viramasi prathitaprabhāvā || 
21 || 

trātā tvameva mama mohamayādbhavābdhestvāmambike ! satatamemi mahārtide 
ca |
rāgādibhirviracite vitathe kilānte māmeva pāhi bahuduḥkhakare ca kāle || 22 ||

namo devi ! mahāvidye ! namāmi caraṇau tava |
sadā jñānaprakāśaṃ me dehi sarvārthade ! śive ! || 23 || iti || saṃ0 || 

6 || śrīśivena bhagavatoktā śrījagadambāstutiḥ | śrīdevībhāgavate 3 skaṃ - 5 
a0

oṃ śrīśiva uvāca ||

yadi haristava devi bibhāvajastadanu padmaja eva tavodbhavaḥ |
kimahamatra tavāpi na sadguṇaḥ sakalalokavidhau caturā śive ! || 1 ||

tvamasi bhūḥ salilaṃ pavanastathā khamapi vahniguṇaśca tathā punaḥ |
janani ! tāni punaḥ karaṇāni ca tvamasi buddhimano'pyatha haṅkṛtiḥ || 2 ||

na ca vidanti vadanti ca ye'nyathā hariharājakṛtaṃ nikhilaṃ jagat |
tava kṛtāśraya eva sadaiva te viracayanti jagat sacarācaram || 3 ||

avanivāyukhavahnijalādibhiḥ saviṣayaiḥ saguṇaiśca jagadbhavet |
yadi tadā kathamadya ca tat sphuṭaṃ prabhavatīti tavāmba ! kalāmṛte || 4 ||

bhavasi sarvamidaṃ sacarācaraṃ tvamajaviṣṇuśivākṛtikalpitam |
vividhaveṣavilāsakutūhalairviramase [ārṣo'yamavibhaktikaḥ prayogaḥ 
ātmanepadaprayogaśca |] ramase'mba yathāruci || 5 ||

p. 591)

sakalalokasisṛkṣurahaṃ hariḥ kamalabhūśca bhavābhayade'mbike ! |
tava padāmbujapāṃsuparigrahaṃ samadhigamya tadā na ca cakrima || 6 ||

yadi dayārdramanā na sadāmbike ! kathamahaṃ vihitaśca tamoguṇaḥ |
kamalajaśca rajoguṇasambhavaḥ suvihitaḥ kimu sattvaguṇo hariḥ || 7 ||

yadi na te viṣamā matirambike ! kathamidaṃ bahudhā vihitaṃ jagat |
sacivabhūpatibhṛtyajanāvṛtaṃ bahudhanairadhanaiśca samākulam || 8 || 

tava guṇāstraya eva sadā kṣamāḥ prakaṭanāvanasaṃharaṇeṣu vai |
hariharadruhiṇāśca kramāt tvayā viracitā jagatāṃ kila kāraṇam || 9 ||

paricitāni mayā hariṇā tathā kamalajena vimānagatena vai ||
pathigatairbhuvanāni kṛtāni vā kathaya kena bhavāni ! navāni ca || 10 ||

sṛjasi pāsi jagajjagadambike ! svakalayā kiyadicchasi nāśitum |
ramayase svapatiṃ puruṣaṃ sadā tava gatiṃ na hi vidma [ārṣo'yaṃ prayogaḥ |] 
vayaṃ śive ! || 11 ||

(|| śrīmaṇidvīpe yavatibhāvamāpananaḥ śrībrahmaviṣṇurudrāḥ ||)

janani ! devi ! padāmbujasevanaṃ yuvatibhāvagatānapi naḥ sadā |
puruṣatāmadhigamya padāmbujād virahitāḥ kva labhema sukhaṃ sphuṭam || 12 ||

na rucirasti mamāmba ! padāmbuje tava vihāya śive ! bhuvaneṣvalam |
nivasituṃ naradehamavāpya ca tribhuvanasya patitvamavāpya vai || 13 ||

sudati ! nāsti manāgapi me ratiryuvatibhāvamavāpya tavāntike |
puruṣatā kva sukhāya bhavatyalaṃ tava padaṃ na yadīkṣaṇagocaram || 14 || 

tribhuvaneṣu bhavatviyamambike ! mama sadaiva hi kīrtiranāvilā |
yuvatibhāvamavāpya padāmbujaṃ paricitaṃ tava saṃsṛtināśanam || 15 ||

bhuvi vihāya tavāntikasevanaṃ ka iva vāñchati rājyamakaṇṭakam |
truṭirasau kila yāti yugātmatāṃ na nikaṭaṃ yadi te'ṅghrisaroruham || 16 ||

tapasi ye niratā munayo'malāstava vihāya padāmbujapūjanam |
janani ! te vidhinā kila vañcitāḥ paribhavo vibhave parikalpitaḥ || 17 || 

na tapasā na damena samādhinā na ca tathā vihitaiḥ kratubhiryathā |
tava padābjaparāganiṣevaṇād bhavati muktiraje bhavasāgarāt || 18 ||

kuru dayāṃ dayase yadi devi ! māṃ kathaya mantramanāvilamadbhutam ||
samabhavaṃ prajapan sukhito hyahaṃ suviśadaṃ ca navārṇavamuttamam || 19 ||

p. 592)

prathamajanmani cādhigato mayā tadadhunā na vibhāti navākṣaraḥ |
kathaya māṃ manumadya bhavārṇavājjanani ! tāraya tārake ! || 20 ||

brahmovāca -

ityuktā sā tadā devi śivenādbhutatejasā |
uccacārāmbikā mantraṃ prasphuṭaṃ ca navākṣaram || 21 ||

taṃ gṛhītvā mahādevaḥ parāṃ mudamavāpa ha |
praṇamya caraṇau devyāstatraivāvasthitaḥ śivaḥ || 22 ||

japannavākṣaraṃ mantraṃ kāmadaṃ mokṣadaṃ tathā ||
bījayuktaṃ śubhoccāraṃ śaṅkarastasthivāstadā || 23 || iti saṃ0 ||

7- || atha madhukaiṭabhadaityārditena brahmaṇā kṛtā śrīdevīstutiḥ ||
(śrī0 de0 bhā0 3 skaṃ0 5. a0 yathā-)

oṃ śrībrahmovāca -

na vedāstvāmevaṃ kalayitumihāsannapaṭavo yatastenocustvāṃ 
sakalajanadhātrīmavikalām |
svāhābhūtādevī [ārṣotra chandobhaṅgaḥ |] sakalamakhahome suvihitā tadā 
tvaṃ sarvajñā janani ! khalu jātā tribhuvane || 1 ||

kartāhaṃ prakaromi sarvamakhilaṃ brahmāṇḍamatyadbhutaṃ ko'nyo'stīha 
carācare tribhuvane mattaḥ samarthaḥ pumān |
dhanyosmyatra na saṃśayaḥ kila yadā brahmāsmi lokātigo magnohaṃ 
bhavasāgare pravitate garvābhiveśāditi || 2 ||

adyāhaṃ tava pādapaṅkajaparāgādānagarveṇa vai dhanyo'smīti 
yathārthavādanipuṇo jātaḥ prasādācca te |
yāce tvāṃ bhavabhītināśacaturāṃ muktipradāṃ ceśvarīṃ hitvā mohakṛtaṃ 
mahārtinigaḍaṃ tvadbhaktiyuktaṃ kuru  || 3 ||

ato'haṃ ca jāto vimuktaḥ kathaṃ syāṃ sarojādameyāttvadāviṣkṛtādvai |
tavājñākaraḥ kiṅkaro'smīti nūnaṃ śive ! pāhi māṃ mohamagnaṃ 
bhavābdhau || 4 ||

na jānanti ye mānavāste vadanti prabhuṃ māṃ tavādyaṃ caritraṃ pavitram |
yajantīha ye yājakāḥ svargakāmā na te te prabhāvaṃ vidantyeva kāmam || 5 ||

tvayā nirmito'haṃ vidhitve vihāraṃ vikartuṃ caturdhā vidhāyādisargam |
ahaṃ vedmi ko'nyo vivedādimāye ! kṣamasvāparādhaṃ tvahaṅkārajaṃ me || 6 
|| 

p. 593)

śramaṃ ye'ṣṭadhā yogamārge pravṛttāḥ prakurvanti mūḍhāḥ samādhau 
sthitā vai |
na jānanti te nāma mokṣapradaṃ vā samuccāritaṃ jātu mātarmiṣeṇa || 7 ||

vicāre pare tattvasaṅkhyāvidhāne pade mohitā nāma te saṃvihāya |
na kiṃ te vimuḍhā bhavābdhau bhavāni ! tvamevāsi saṃsāramuktipradā vai || 8 ||

paraṃ tattvavijñānamādyairjanairyairaje cānubhūtaṃ tyajantyeva te kim ||
nimeṣārdhamātraṃ pavitraṃ caritraṃ śivā cāmbikā śaktirīśeti nāma || 9 ||

(|| śrīmadādyāprakṛtibhavānī brahmāṇamapi janayatīti brahmaivāṅgīkurute ||)

na kiṃ tvaṃ samarthāsi viśvaṃ vidhātuṃ dṛśevāśu sarvaṃ caturdhā 
vibhaktam |
vinodārthamevaṃ vidhiṃ māṃ vidhāyādisarge kiledaṃ karoṣīti kāmam || 10 ||

hariḥ pālakaḥ kiṃ tvayā'sau madhorvā tathā kaiṭabhādrakṣitaḥ sindumadhye |
haraḥ saṃhṛtaḥ kiṃ tvayāsau na kāle kathaṃ me bhruvormadhyadeśāt sa jātaḥ || 
11 || 

na te janma kutrāpi dṛṣṭaṃ śrutaṃ vā kutaḥ sambhavaste na ko'pīha veda |
kolādyāsi śaktistvamekā bhavāni ! svatantraiḥ samastairato bodhitā'si || 12 ||

tvayā saṃyuto'haṃ vikartuṃ samartho haristrātumamba tvayā saṃyutaśca |
haraḥ samprahartuṃ tvayaiveha yuktaḥ kṣamā nādya sarve tvayā viprayuktāḥ || 13 
||

yathā'haṃ hariḥ śaṅkaraḥ kiṃ tathā'nye na jātā na santīha no vā'bhaviṣyan 
|| 
na muhyanti ke'smiṃstavātyantacitre vinode vivādāspade'lpāśayānām || 14 ||

akartā guṇaspaṣṭa evādyadevo nirīho'nupādhiḥ sadaivākalaśca |
tathāpīśvaraste vitīrṇaṃ vinodaṃ susaṃpaśyatītyāhurevaṃ vidhijñāḥ || 15 ||

(|| dvaitādvaitaviṣayamugdho brahmā śrībhagavatīṃ prārthayate ||)

dṛṣṭādṛṣṭavibhedesmin prāk tvatto vai pumān paraḥ |
nānyaḥ ko'pi tṛtiyo'sti prameye suvicārite || 16 ||

na mithyā vedavākyaṃ vai kalpanīyaṃ kadācana |
virodho'yaṃ mayātyantaṃ hṛdaye tu viśaṅkitaḥ || 17 ||

ekamevādvitīyaṃ yad brahma vedā vadanti vai |
sā kiṃ tvaṃ vāpyasau vā kiṃ saṃdehaṃ vinivartaya || 18 ||

niḥsaṃśayaṃ na me cetaḥ prabhavatyaviśaṅkitam |
dvitvaikatvavicāre'smin nimagnaṃ kṣullakaṃ manaḥ || 19 ||

p. 594)

svamukhenāpi saṃdehaṃ chettumarhasi māmakam |
puṇyayogācca me prāptā saṅgatistava pādayoḥ || 20 ||

pumānasi tvaṃ strī vā'si vada vistarato mama |
jñātvā'haṃ paramāṃ śaktiṃ muktaḥ syāṃ bhavasāgarāt || 21 || iti ||
 
(ita ūrdhvatano'tra sambandhotraiva de0 bhā0 sthale draṣṭavyaḥ || iti-saṃ0 ||)

|| atha śrīlalitāmbātriśatīstotraṃ ||

8 || asya śrīlalitātriśatīstotramantrasya || bhagavān hayagrīva-ṛṣiḥ || 
anuṣṭupchandaḥ || śrīlalitāmahābhaṭṭārikā devatā || vāgbhavakūṭaṃ bījaṃ || 
śaktikūṭaṃ śaktiṃ || kāmarājakūṭaṃ kīlakaṃ || 
śrīlalitāprasādasiddhyarthaṃ pāṭhe viniyogaḥ || atha ṛṣyādīn vidhāya || 
kūṭatrayeṇa dvirāvṛtya karahṛdayādiṣaḍa.ṅgadvayaṃ vidhāya dhyāyedyathā-

atimadhuracāpahastāmaparājitā(ta) modabāṇasaubhāgyām |
aruṇāmatiśayakaruṇāmabhinavakulasundarīṃ vande |

iti dhyātvā mānasopacāraiḥ sampūjya paṭhet ||

oṃ śrīhayagriva uvāca ||

kakārarūpā kalyāṇī kalyāṇaguṇaśālinī |
kalyāṇaśailanilayā kamanīyā kalāvatī || 1 ||

kamalākṣī kalmaṣaghnī karuṇāmṛtasāgarā |
kadambakānanāvāsā kadambakusumapriyā || 2 ||

kandapavidyā kandarpajanakāpāṅgavīkṣaṇā | 
karpūravīṭīsaurabhyakallolitakakuptaṭā || 3 ||

kalidoṣaharā kañjalocanā karmavigrahā |
karmādhisākṣiṇī kārayitrī karmaphalapradā || 4 ||

ekārarūpā ekākṣaryekānekākṣarākṛtiḥ |
etattadityanirdeśyā ekānandacitākṛtiḥ || 5 || 

evamityāgamābodhyā ekabhaktimadarcitā |
ekāgracittanirdhyātā eṣaṇārahitādṛtā || 6 ||

elāsugandhicikurā enaḥkūṭavināśinī |
ekabhogā ekarasā ekaiśvaryapradāyinī || 7 || 

p. 595)

ekātapatrasāmrājyapradā ekāntapūjitā |
edhamānaprabhā ejadanekajagadīśvarī || 8 ||

ekavīrādisaṃsevyā ekaprabhavaśālinī |
īkārarūpiṇīśitrī [atrāśuddhaṃ śodhyaṃ |] īpsitārthapradāyinī || 9 ||

īdagityavinirdeśyā īśvaratvavidhāyinī |
īśānādibrahmamayī īśitvādyaṣṭasiddhidā || 10 ||

īśītrīkṣaṇasṛṣṭāṇḍakoṭirīśvaravallabhā |
īḍitā īśvarārdhāṅgaśarīreśādhidevatā || 11 ||

īśvarapreraṇakarī īśatāṇḍavasākṣiṇī |
īśvarotsaṅganilayā ītibādhāvināśinī || 12 ||

īhāvirahitā īśaśaktirīṣatsmitānanā |
lakārarūpā lalitā lakṣmīrvāṇīniṣevitā || 13 ||

lākinī lalanārūpā lasaddāḍimapāṭalā |
lalantikā lasatphālā lalāṭanayanārcitā || 14 ||

lakṣaṇojvaladivyāṅgī lakṣakoṭyaṇunāyikā |
lakṣyārthā lakṣaṇāgamyā labdhakāmā latātanuḥ || 15 ||

lalāmarājadalikā lambamuktā latāñcitā |
lambodaraprasūrlabhyā lajjāḍhyā layavarjitā || 16 ||

hrīṅkārarūpā hrīṅkāranilayā hrīmpadapriyā |
hrīṅkārabījā hrīṅkāramantrā hrīṅkāralakṣaṇā || 17 ||

hrīṅkārajapasuprītā hrīmatī hrīṃvibhūṣaṇā |
hrīṃśīlā hrīṃpadārādhyā hrīṃgarbhā hrīṃpadābhidhā || 18 ||

hrīṅkāravācyā hrīṅkārapūjyā hrīṅkārapīṭhikā |
hrīṅkāravedyā hrīṅkāracintyā hrīṃhrīṃśarīriṇī || 19 ||

hakārarūpā haladhṛkrapūjitā hariṇekṣaṇā |
harapriyā harārādhyā haribrahmendravanditā || 20 || 

hayārūḍhā sevitāṅghrirhayamedhasamarcitā |
haryakṣavāhanā haṃsavāhanā hatadānavā || 21 || 

p. 596)

hatyādipāpaśamanī haridaśvādisevitā |
hastikumbhonnatakucā hastikṛttipriyāṅganā || 22 ||

haridrākuṅkumādigdhā haryaśvādyamarārcitā |
harikeśasakhī hādividyā hālāmadālasā || 23 ||

sakārarūpā sarvajñā sarveśī sarvamaṅgalā |
sarvakartrī sarvabhartrī sarvahartrī sanātanī || 24 ||

sarvānavadyā sarvāṅgasundarī sarvasākṣiṇī |
sarvātmikā sarvasaukhyadātrī sarvavimohinī || 25 ||

sarvādhārā sarvagatā sarvāpaguṇavarjitā |
sarvāruṇā sarvamātā sarvabhūṣaṇabhūṣitā || 26 ||

kakārārthā kālahantrī kāmeśī kāmitārthadā |
kāmasañjīvinī kalpā(lyā) kaṭhinastanamaṇḍalā || 27 ||

karabhoruḥ kalānāthamukhī kacajitāmbudā |
kaṭākṣasyandikaruṇā kapāliprāṇanāyikā || 28 || 

kāruṇyavigrahā kāntā kāntidhūtajapāvaliḥ |
kalālāpā kambukaṇṭhi karanirjitapallavā || 29 ||

kalpavallīsamabhūjā kastūrītilakojjvalā |
hakārārthā haṃsagatirhāṭakābharaṇojjvalā || 30 ||

hārahārikucābhogā hākinī halyavarjitā |
haritpatisamārādhyā haṭhātkārahatāsurā || 31 ||

harṣapradā havirbhoktri hārdasaṃtamasāpahā |
hallīsaṃlāsyasantuṣṭā haṃsamantrārtharūpiṇī || 32 || 

hānopādānanirmuktā harṣiṇī harisodarī |
hā hā hū hū mukhastutyā hānivṛddhivivarjitā || 33 ||

haiyyaṅgavīnahṛdayā harigopāruṇāṃśukā |
lakārārthā latāpūjyā layasthityudbhaveśvarī || 34 ||

lāsyadarśanasantuṣṭā lābhālābhavivarjitā |
laṅghyetarājñā lāvaṇyaśālinī laghusidhidā || 35 ||

lākṣārasasavarṇābhā lakṣmaṇāgrajapūjitā |
labhyetarā labdhabhaktisulabhā lāṅgalāyudhā || 36 || 

p. 597)

lagnacāmarahastaśrīśāradāparisevitā |
lajjāpadasamārādhyā lampaṭā lakuleśvarī || 37 ||

labdhamānā labdharasā labdhasampatsamunnatiḥ |
hrīṅkāriṇī hrīṅkārādyā hrīṃmadhyā hrīṃśikhāmaṇiḥ || 38 ||

hrīṅkārakuṇḍāgniśikhā hrīṅkāraśaśicandrikā |
hrīṅkārabhāskararuci hrīṅkārāmbhodacañcalā || 39 ||

hrīṅkārakandāṅkurikā hrīṅkāraikaparāyaṇā |
hrīṅkāradīrghikāhaṃsī hrīṅkārodyānakekinī || 40 ||

hrīṅkārāraṇyahariṇī hrīṅkārāvālavallarī |
hrīṅkārapañjaraśukī hrīṅkārāṅgaṇadīpikā || 41 ||

hrīṅkārakandarāsiṃhī hrīṅkārāmbujabhṛṅgikā |
hrīṅkārasumanomādhvī hrīṅkāratarumañjarī || 42 ||

sakārākhyā samarasā sakalāgamasaṃstutā |
sarvavedāntatātparyabhūmiḥ sadasadāśrayā || 43 ||

sakalā saccidānandā sādhvī sadgatidāyinī |
sanakādimunidhyeyā sadāśivakuṭumbinī || 44 ||

sakalādhiṣṭhānarūpā satyarūpā samākṛtiḥ |
sarvaprapañcanirmātrī samānādhikavarjitā || 45 ||

sarvottuṅgā saṅgahīnā saguṇā sakaleṣṭadā |
kakāriṇī kāvyalolā kāmeśvaramanoharā || 46 ||

kāmeśvaraprāṇanāḍī kāmeśotsaṅgavāsinī |
kāmeśvarāliṅgitāṅgī kāmeśvarasukhapradā || 47 ||

kāmeśvarapraṇayinī kāmeśvaravilāsinī |
kāmeśvaratapaḥsiddhiḥ kāmeśvaramanaḥpriyā || 48 ||

kāmeśvaraprāṇanāthā kāmeśvaravimohinī |
kāmeśvarabrahmavidyā kāmeśvaragṛheśvarī || 49 ||

kāmeśvarāhlādakarī kāmeśvaramaheśvarī |
kāmeśvarī kāmakoṭīnilayā kāṅkṣitārthadā || 50 ||

lakāriṇī labdharūpā labdhadhīrlabdhavāñchitā |
labdhapāpamanodūrā labdhāhaṅkāradurgamā || 51 ||

p. 598)

labdhaśatirlabdhadehā labdhaiśvaryasamunnatiḥ |
labdhavṛdhirlabdhalīlā labdhayauvanaśālinī || 52 ||

labdhātiśayasarvāṅgasaundaryā labdhavibhramā |
labdharāgā labdhapatirlabdhanānāgamasthitiḥ || 53 ||

labdhabhogā labdhasukhā labdhaharṣābhipūjitā |
hrīṅkāramūrtirhrīṅkārasaudhaśṛṅgakapotikā || 54 ||

hrīṅkāradugdhābdhisudhā hrīṅkārakamalendirā |
hrīṅkāramaṇidīpārcirhnīṅkāratarusārikā || 55 ||

hrīṅkārapeṭakamaṇirhrīṅkārādarśabimbikā |
hrīṅkārakośāsilatā hrīṅkārāsthānanartakī || 56 ||

hrīṅkāraśuktikāmuktāmaṇirhrīṅkārabodhitā |
hrīṅkāramayasauvarṇastambhavidrumaputrikā || 57 ||

hrīṅkāravedopaniṣadhrīṅkārādhvaradakṣiṇā |
hrīṅkāranandanārāmanavakalpakavallarī || 58 ||

hrīṅkārahimavadgaṅgā hrīṅkārārṇavakaustubhā |
hrīṅkāramantrasarvasvā hṛīṅkāraparasaukhyadā || 59 ||

ityevaṃ te mayākhyātaṃ devyā nāmaśatatrayam |
rahasyātirahasyatvād gopanīyaṃ tvayā mune ! || iti ||

(punarhṛdayādiṣaḍaṅgaṃ vidhāyā'rpayet ||)

|| iti triśatīnāmastotraṃ saṃ0 || tantraśāstrīyapūjāpaddhatau || 

vi0 9- jñeyaṃ stutiviṣaye

|| iyaṃ-śrīparamakṛpāmṛtābdhisveṣṭadevatāstuterapāraṇīyatve -yathā

1 atītaḥ panthānaṃ0
2 asitagirisamaṃ syāt0 (mahimnaḥstotre0)
3 tvadyātrayā vyāpakatā hatā te dhyānena cetaḥparatā hatā te |
stutyā'nayā vākparatā hatā te mamāparādhāṃstrividhān kṣamasva || iti || 
vedānte śāstre ||
4 tava devi ! guṇānuvarṇane caturā no caturānanādayaḥ ||
tadihaikamukheṣu jantuṣu stavanaṃ kastava kartumīśvaraḥ || iti || 
śrībālāstavarāje ||

p. 599)

5 bhavāni ! stotuṃ tvāṃ prabhavati caturbhirna vadanaiḥ
prajānāmīśānastripuramathanaḥ pañcabhirapi ||
na ṣaḍbhiḥ senānīrdaśaśatamukhairapyahipati-
stadānyeṣāṃ keṣāṃ kathaya kathamasminnavasaraḥ  || iti ||
(ānandalaharyāṃ prathamaślokaḥ)

|| ityādiśiṣṭoktyā bhaktyāpi kṛtayā stutyā devatāguṇānuvarṇanaṃ pārayituṃ 
na śaknoti janastata uktābhyo'dhikāpi cikīrṣitā sā syātccettadā 
nānātantragranthebhyo'thavā'smatkṛtabālātantracandrikāparanāmakaśrībahu-
caracintāmaṇyādigranthebhya ādeyā ityabhyarthayāmi 
śrīparāmbopāsanāpriyān || iti || (pa0 ka0 sū0 dvitīyāvṛttikāraḥ)

10- || atha kṣmāpanaṃ ||

idaṃ kṣamāpanapi keṣāṃcinmate upacārāntargatamityavaśyamādaraṇīyaṃ 
tacca yathā -

1 || eṣā bhaktyā tava viracitā yā mayā devi ! pūjā
svīkṛtyaināṃ sapadi sakalān me'parādhān kṣamasva ||
nyūnaṃ yattat tava karuṇyā pūrṇatāmetu sadyaḥ
sānandaṃ me hṛdayakamale te'stu nityaṃ nivāsaḥ || 70 || bā0 mā0 pū0 stotre

2 || jñānato'jñānato vāpi yanmayā kriyate śive ! ||
mama kṛtyamidaṃ sarvamiti matvā kṣamasva me ||

3 || oṃ mādṛśaḥ kṛpaṇo nāsti tvādṛśī na dayāparā |
iti matvā maheśāni ! yathāyogyaṃ tathā kuru ||

4 || bhūmau skhalitapādānāṃ bhūmirevāvalambanam |
tvayi jātāparādhānāṃ tvameva śaraṇaṃ mama || śrīvidyārcanapaddhatau

5 || āvāhanaṃ yajanavarṇanamagnihotraṃ karmārpaṇaṃ tava visarjanamatra devi ! 
| 
mohānmayā kṛtamidaṃ sakalāparādhān mātaḥ ! kṣamasva varade ! 
bahirantarasthe ! ||

6 || mayā yat kriyate karma jāgratsvapnasuṣuptiṣu |
tat sarvaṃ tāvakī pūjā bhūyād bhūtyai ca me śive ||

7 || kṣantumarhasi deveśi ! tripure ! devi ! pūjite ! ||
tava pādāmbuje nityaṃ niścalā bhaktirastu me ||

8 || athavā na mantraṃ no yantramityaparādhakṣamākārakaṃ stotraṃ paṭhanīyam 
|| (tadapi tatraiva bā0 taṃ0 ca0 348 patre'sti)

p. 600)

12 || pūjāṃ grahītuṃ bhaktakutā śrībhagavatīprārthanā ||
(śrī0 mā0 pū0 bā0 taṃ0 candrikāyāṃ 391 patre yathā-) 

oṃ || vijñaptīravadhehi me sumahatā yatnena te saṃnidhiṃ
prāptuṃ māmiha kāndiśīkamadhunā mātarna dūrīkuru |
no cet tvatpadabhāvanāpaharaṇadrāgvāṭapāṭaccara-
cceto me svaguṇairbadhāna na yathā bhuyo vinirgacchati || 1 ||

kvāhaṃ mandamatiḥ kva cedamakhilairekāntabhaktaiḥ stutaṃ
dhyātaṃ devi ! rahasyamadritanayāśrīpādukāpūjanam |
kādācitkamanīyacintanavidhau saṃtuṣṭayā śarmadaṃ
stotraṃ devi ! tava tvayā prakaṭitaṃ manye madīyānane || 2 || iti || (13 | 39 vi0 saṃ0)

|| samāptaḥ stutiviṣayaḥ ||

13 | 40 || namaskāre jñeyam ||
1 || ayaṃ ṣoḍaśopacārāntargato namaskāraḥ kasya karmaṇo'nantaraṃ 
kartavyastatrāpi bahuśobhidā vartante taśca atraiva pa0 ka0 sū0 dvi0 pariśiṣṭe 
upacārāṇāṃ saṅkhyāviṣayakaviṣaye 386 patrataḥ 392 patreṣu dṛśyāḥ |

2 || ayaṃ namaskārarūpopacāraḥ yatra pūjāṅkartuṃ sādhakavara 
upaviṣṭastatraiva athavā devatā tisānnidhye'pi na kāryo'pi tu maṇḍalād 
bahireva kāryastatra pramāṇamadhastāt

|| maṇḍalalakṣaṇamuktamatraiva - pa0 ka0 sū0 5 - khaṇḍe 174 patre - 20 sūtre 
tadbhāṣye ca yathā -


pradakṣiṇanamaskārajapastotraiḥ santoṣya || 20 ||
atra bhāṣyaṃ yathā pradakṣiṇamekaṃ kāryam
ajeśaśaktigaṇapabhāskarāṇāṃ pradakṣiṇe |
vedārdhacandravahnyadrisaṅkhyāḥ sarvārthasidhayaḥ ||

iti śaktisaṅgamatantre uktatvāt | ajaḥ viṣṇuḥ | vedāścatasraḥ | ardhaṃ tadardhaṃ 
dvayam | candraḥ ekaḥ | vahniḥ tisraḥ | adriḥ sapta | imāḥ saṅkhyāḥ 
ajādipradakṣiṇe kramāt jñeyāḥ ityarthaḥ | śrīmacchaṅkarabhagavatpādairapi 
pradakṣiṇaṃ [ayaṃ ślokaḥ atraiva 173 patre bā0 mā0 pū0 stotre'sti-] te paritaḥ 
karomi ityeka vacanāntamevoktam || 

p. 601)

namaskāre tu icchaiva niyāmikā śāstropalabdhiparyantaṃ | namaskāre 
kaścidviśeṣaḥ

3- paramānandatantre caturaṅgapraṇāmo maṇḍale namo niṣedhaśca yathā-

pūjāgṛhādbahirdevīṃ praṇamed daṇḍavadbhuvi |
maṇḍale namanaṃ naiva sāṣṭāṅgaṃ daṇḍavat caret ||
1jānubhyāṃ ca 2padābhyāṃ ca 3mūrdhnā 4hastayugena ca |
caturaṅgapraṇāmo'yaṃ maṇḍale vihitaḥ śive || iti

4- maṇḍalalakṣaṇaṃ yoginītantre -

pūjyate yatra sā devī taccaturdikṣu śaṅkari ! |
dhanuśśatapramāṇena maṇḍalaṃ parikīrtitam || iti ||
dhanurmānaṃ tu hastacatuṣṭayam |

5- bṛhadvāmakeśvare tu -

maṇḍalaṃ tadvijānīyāt yāvad dṛśyā hi devatā || iti ||
rahasyārṇave tu -

6- dvārapūjā yatra kṛtā tadantarmaṇḍalaṃ viduḥ || iti ||
ayaṃ ca deśataḥ pariccheda uktaḥ kālataḥ paricchedastu śaktisaṅgamatantre -

dvārapūjāṃ samārabhya yāvadudvāsanaṃ bhavet |
tāvattanmaṇḍalaṃ viddhi..................... || iti ||

tripurārṇave'pi -

7- idaṃ tanmaṇḍalaṃ devi ! prārabhyaitasya pūjanam |

mārtaṇḍamaṇḍalārghyāntaṃ ................|| iti ||
idameva maṇḍalaṃ vakṣyamāṇamaṇḍaladharmeṣu jñeyaṃ | iti | (idaṃ 
maṇḍalamanyat)
arthādetasya saṅketitapūjāsthalasya bahiṣṭādevopetya namaskuryāditi tātparyaṃ 
jñeyamiti -

7- aṣṭāṅganamaskārakaraṇe -

ya0 ā0 sū0 131 patre sāṣṭāṅganamaskāraḥ granthāntare yathā-

śirasā urasā dṛṣṭyā manasā vacasā tathā |
padbhyāṃ karābhyāṃ jānubhyāṃ praṇāmo'ṣṭāṅga ucyate || iti ||

8- pañcāṅganamaskāre -

kulārṇavatantre 7 ullāse 66 patre yathā-
 
p. 602)

śiṣyopāyanamādāya śuddhātmā kusumādikam ||
yathāśakti vinītātmā vittaśāṭhyavivarjitaḥ ||

praṇamya bahiraṣṭāṅgaṃ praviśyāntaḥ śanaiḥ priye ! |
samarpyopāyanaṃ bhaktyā śivāya gururūpiṇe ||

gṛhītvāṅguṣṭhakau kṛtvā karau namrāgratarjanī |
jānubhyāmavaniṃ gatvā pañcāṅgaṃ praṇamed gurum || iti ||

9 - sāmānyato devanamaskārakaraṇe baddhāñjalireva syāt tatra pramāṇaṃ yo0 
taṃ0 9 paṭale 232 patre yathā-

abaddhāñjalilokānāṃ [atrāśuddhaṃ svayaṃ śodhyaṃ |] namaskāraṃ karoti 
yaḥ | 
mohāndhakāranarake pacyate nātra saṃśayaḥ  ||
patrāntare ca praṇamenmūrdhnā na ca kṣitiṃ spṛśet |
śapanti devatāstasya viphalaṃ parikīrtitaṃ || iti ||

10- saparivāraśrīnamaskāraślokamantra uttamaḥ śrī0 mā0 pū0 yathā-

oṃ santuṣṭāṃ paramāmṛtena vilasatkāmeśvarāṅkasthitāṃ
puṣpādyairatipūjitāṃ bhagavatīṃ tvāṃ vandamāno mudā |
sphūrjattāvakadeharaśmikalanāprāptasvarūpābhidāḥ
śrīcakrāvaraṇasthitāḥ savinayaṃ vandāmahe devatāḥ || iti ||

11- devapraṇāmakaraṇe phalaṃ - tatraiva yoginītantre 9 paṭale 232 patre yathā -

praṇāmo devadevasya yāvatyo mūrtikāḥ priye ! |
śarīre vā maheśāni ! tasya puṇyaphalaṃ śṛṇu ||
yāvanto reṇavastasya tāvatkālaṃ vasanti vai |
tāvadvarṣasahasrāṇi brahmaloke mahīyate || iti || (13 | 40 vi0 saṃ0)
vi0 13 | 41 || pūjopacārārpaṇaphalaviṣaye śrīyoginītantre 9 paṭale 229 patre-

1- śrīviṣṇuhayagrīvayorvā kasyacidapi devasya pūjāyāṃ phalaṃ yathā-

evaṃ sampūjya deveśaṃ maṇḍapasthaṃ janārdanam |
labhedabhimatān kāmānnaro nāsya tu saṃśayaḥ ||

p. 603)

anenaiva vidhānena maṇḍapasthaṃ hayānanam |
pūjitaṃ paśyate yastu na vighnaṃ viṣṇumavyayam ||

sakṛdapyarcito yena vidhinānena keśavaḥ |
janmamṛtyujvarātītaḥ sa viṣṇoḥ padamāpnuyāt ||

yaḥ smaret satataṃ bhaktyā hayagrīvamatandritaḥ |
anvahaṃ tasya dve sandhye śvetadvīpaḥ prakalpitaḥ ||

2- śrī kulārṇave 10 ullāse 96 patre śrīśivavaco yathā-

pūjātrikaṃ tu yaḥ kūryādicchājñānakriyānvitam || 

āgamoktena vidhinā pūrvavattadvidhānavit |
padārthaiḥ ṣaḍrasaiḥ samyag yathāvibhavavistaram ||
 
santuṣṭā devatāḥ sarvāḥ sarvajñānaphalapradāḥ |
deveśi ! sādhakābhīṣṭaṃ prayacchanti na saṃśayaḥ ||

ityādidevatāpūjāṃ viśeṣadivaseṣu ca |
bhajeyuḥ śāstravidhinā sa bhavedāvayoḥ priyaḥ ||

śrīcakraṃ kauliko mohādviśeṣadivaseṣu ca |
na karoti samarthaḥ san sa bhaved yoginīpaśuḥ ||

kulapūjāṃ tu niyataṃ yaḥ karoti sa kaulikaḥ |
kuleśi ! samavāpnoti yoginīvīramelanam || 

nīco'pi vā sakṛdbhaktyā kārayed yaḥ kulārcanam |
sa sadgatimavāpnoti kimutānye dvijātayaḥ ||

tasmāt sarvaprayatnena sarvāvasthāsu sarvadā |
kulapūjārato bhūyādabhīṣṭaphalasiddhaye ||

kulapūjādhikaṃ dānaṃ kulapūjādhikaṃ phalaṃ |
kulapūjādhiko yogaḥ kulapūjādhikā gatiḥ ||

kulapūjādhikaṃ bhāgyaṃ kulapūjādhikaṃ tapaḥ |
kulapūjādhikā vidyā kulapūjādhikārcanā ||

nāsti nāsti punarnāsti tvāṃ śape kulanāyike ! |
bahunātra kimuktena rahasyaṃ śṛṇu pārvati ! ||

p. 604)

vedaśāstroktamārgeṇa kulapūjāṃ karoti yaḥ |
tatsamīpasthitaṃ māṃ tvaṃ viddhi nānyatra bhāvini ! ||

idaṃ satyamidaṃ satyaṃ satyaṃ satyaṃ na saṃśayaḥ |
sabhūmidigjalagirinabhovanacarāḥ priye ! |

sahasrakoṭiyoginyastāvanto bhairavā api |
niyuktā hi mayā devi ! kulasaṃrakṣaṇāya ca ||

divaseṣu viśeṣeṣu sarve ca muditā narāḥ |
sādhakāneva vīkṣante svayaṃ pūjanalipsayā ||
apūjitāstu vighnanti prasīdanti supūjitāḥ || iti ||

3 - svayamanyadvārā vā pūjākaraṇe phalaprāptau saṭīkaśāradā 4 paṭale 300 
patre yathā-

yastu bhaktyā prayatnena svayaṃ sampādya cākhilam | 
sādhanaṃ cā'rcayedvidvān sa samagraṃ phalaṃ labhet ||

yo'rcayedvidhivadbhaktyā parānītaiśca sādhanaiḥ |
pūjāphalārddhamevā'sya na samagraphalaṃ labhet || iti ||

4- śambhurahasye

svayaṃ yajati ceddevamuttamā sodarātmajaiḥ |
madhyamā yā yajedbhutyairadhamā yājanakriyā ||

|| dharmārjitadhanaiḥ pūjākaraṇaphalam || 

5 - bhaviṣye yathā-

dharmārjitadhanakrītairyaḥ kuryāt keśavārcanam |
uddharet svena sahitān daśa pūrvān daśāparān ||

|| śrīharisevākaraṇaphalam ||

6- mahābhārate -

kalau kalimaladhvaṃsaṃ sarvapāpaharaṃ harim |
ye'rcayanti narā nityaṃ te'pi vandyā yathā hariḥ ||

|| śrījagadambāyāstrikālapūjāphalam ||

7- yoginītantre 7 paṭale 200 patre 

p. 605)

śuklapakṣe navamyāṃ tu aṣṭamyāṃ parameśvarīm |
trikālaṃ pūjayed yastu caturdaśyāṃ mama priye ! |

sa gacchati paraṃ sthānaṃ yatra devī vyavasthitā ||

kroḍayitvā ciraṃ kāle rājā bhavati bhūtale |
snātvopavāsaniyamapūjājāgaramārjanaiḥ ||

sarvakāleṣu sarveṣu kāmeśīṃ yastu pūjayet |
vimānavaramāruhya dhvajamālākulaṃ tathā ||

brahmaloke naro yāti modate śāśvatīḥ samāḥ |
vividhairbhaktibhāvena tasmād vibhavavistaraiḥ ||
pūjayet satataṃ durgāṃ mahāpuṇyaphalecchayā |

8- śrī0 de0 bhā0 skandhe -40 adhyāye śrīdevīgītāyāṃ śrīhimālayaṃ prati 
śrīvaco yathā-

vimṛśyaitadaśeṣeṇāpyadhikārānurūpataḥ |
kuru me pūjanaṃ tena kṛtārthastvaṃ bhaviṣyasi ||

vividhairbhaktibhāvena tasmād vibhavavistaraiḥ |
pūjayet satataṃ durgāṃ mahāpuṇyaphalecchayā ||

9- jñānārṇavatantre 16 paṭale 77 patre yathā -

cakramabhyarcya sakalaṃ vidhivat parameśvari ! ||
śrīguroḥ kṛpayā devi sarvajñaḥ sarvatattvavit || 228 || iti ||

|| śrīkulapūjāphalaṃ ||

10- kulārṇavatantre 5 ullāse 47 patrepi yathā-

kulapūjāsamaṃ nāsti puṇyamanyajjagatraye ||
tasmād yaḥ pūjayedbhaktyā bhaktimuktyoḥ sa bhājanam |
anadhīto'pyaśāstrajño gurubhakto dṛḍhavrataḥ ||

kulapūjārato yastu mama priyatamo bhavet |
caturṇāmapi varṇānāmāśramāṇāmapīśvari ! ||

puṃstrīnapuṃsakānāṃ tu pūjite'ṣṭaphalapradā |
ihāmutra śubhaṃ dadyāt pūjitā suvadhūriva ||

p. 606)

apūjitā tvaṃ deveśi duḥkhadā kuvadhūriva ||
kulapūjāṃ vinā yastu karotyevaṃ sudurmatiḥ |
sa yāti narakaṃ ghoramekaviṃśatibhiḥ saha ||

tasmāt sarvaprayatnena kulapūjārato bhavet |
labhate sarvasiddhīśca nātra kāryā vicāraṇā || iti ||

vaidikatāntrikapūjāphalam ||

11 śrīmadbhāgavatepi 11 skandhe śrīvaco yathā -

evaṃ kriyāyogapathaiḥ pumān vaidikatāntrikaiḥ |
arcannubhayatassiddhiṃ matto vindatyabhīpsitām || iti ||

|| pūjayā bhogamokṣobhayaprāptiḥ ||

12 jñānārṇavatantre 8 paṭale 25 patre yathā-

evaṃ pūjāvidhiṃ kuryādbhogamokṣaphalāptaye |
anenaiva vidhānena nityākhyāṃ bhairavīṃ yajet || 13 ||
sarvasaubhāgyadāṃ nityāṃ sarvasāmrājyadāyinīm || iti ||

evaṃ pratyakṣasāhityāddevatāpūjākaraṇaphalamuktvā 
purastoṣṭāṣṭakārcanapūjāphalam || 

13-41 | 13 aṣṭāṣṭakārcanamahāphalaṃ || kulārṇave 10 ullāse 94 patre 
śrīguruguruḥ śrīśivo bhagavānāha yathā-

evaṃ yaḥ kurute devi ! sakṛdaṣṭāṣṭakārścanam ||

brahmaviṣṇumaheśādidevatābhiḥ sa pūjyate |
kiṃ punarmānavādyaiśca sākṣāt śiva ivāparaḥ ||

yadarccanāccatuḥṣaṣṭiyoginīgaṇasaṃsthitaḥ |
punarāvṛttirahito nivasettava sannidhau ||

samastadevatāprītikāriṇī parameśvarī |
tasmāt paratarā pūjā nāsti satyaṃ na saṃśayaḥ ||

paśyedevaṃvidhaṃ cakraṃ yo bhaktyāṣṭāṣṭakaṃ priye ! |
yajñadānavrataistīrthavratakoṭiphalaṃ labhet || iti ||

14 śrīdevīpūjayā sārvabhaumo rājā syāt || tatraiva yathā-
 
rājā yaḥ kārayeddevi ! bhaktyāṣṭāṣṭakapūjanam |
catuḥsāgaraparyyantāṃ mahīṃ śāsti na saṃśayaḥ || iti ||

p. 607)

13-41 | 15 mānasapūjopacāraphalam || bā0 taṃ0 candrikāyāṃ 392 patre śrī0 
mā0 pūjāyāṃ yathā-

1 śrīcakrasyādibindūdbhavasadanagatāṃ sarvadānandadātrīṃ
śrīvidyāṃ devavandyāṃ vividhabalivarai rājalakṣmīsametaiḥ |

pūrṇaiḥ sarvopacārairavanipativarābhūtibhiḥ pūjayanti
te vai svargādhipatyaṃ dhanadaśacipatisthanamevāpnuvanti ||

dravyābhāve budhendrā girivaratanayāṃ sundarīṃ yogamāyā-
metairvākyopacāraiḥ pramuditamanaso yogino ye yajanti |

sadyo brahmāṇḍabhāṇḍādipataya iva vai brahmavidyāvidaste
sadbhiste vandyapādā divi vibudhavarairījyamānā narendraiḥ ||

śrīcakrarājārcanasatkramaṃ yaḥ karoti karmātiśayaṃ yatātmā |
sa eva dhanyo vibudhādhiko'tra vaikuṇṭhavāsaṃ labhate tadante || iti || 
tathaiva 

2 śrīśrīvidyāmānasapūjane yathā-

śrīcakrarājasya saparyayāsya śrīsundarīśaṅkaramandirasya |
pradakṣiṇālokanamekavāraṃ kṛtvāpavargaṃ labhate manuṣyaḥ ||

śrīsundarīmandiramindirāyā nidhānamādhānamihāgamānām |
sandarśnaṃ sparśanakaṃ ca kṛtvā svargādhipatyaṃ labhate manuṣyaḥ ||

śrīcakrarājārcanasatkramaṃ yaḥ karoti karmātiśayaṃ yatātmā ||
sa eva dhanyo vibudhādhiko'tra vaikuṇṭhavāsaṃ labhate manuṣyaḥ || iti ||
(13-41-13 tathā ca 13-41 vi0 sarvaḥ saṃ0) 

|| śrīpūjayā sarvakāryasiddhiḥ ||

3 śrīyoginītantre 18 paṭale 100 patre yathā-
 
yaṃ yaṃ bhāvamupāśritya yajet kālīṃ hi sādhakaḥ |
prāpnuyādacirādeva mahākālyāḥ prasādataḥ || iti ||  (13-41-15 vi0 saṃ0)

13-42 || pūjāsamāptau bhūmiprokṣaṇaviṣaye || śāradāpaṭale yathā-

aprokṣitajapasthānācchakro harati yajjapam |
tasmājjapānte tatprokṣya lalāṭe tilakaṃ kriyāt || iti || ya-ā-sū0 

p. 608)

iti śrī pa0 ka0 sūtre dvitīyāvṛttau dvipariśiṣṭe 13-1 vi0 taḥ 
13-42 tathā ca 13 sarvopi viṣayo'tra parisamāpitaḥ śrīṣṭakṛpayā ||
|| atha dvipariśiṣṭa vi- 14 || pātrodvāsanādiviṣaye || 

atra pūjānte kriyamāṇaṃ pātrodvāsanādisamāptisaṅkalpāntaṃ karma 
svagurūpadiṣṭaparamparayā'tha vā tantragranthato'tha 
vā'smatkṛtaśrībālātantracandrikāpustaka 393 patrastha 26-3 | 1 viṣayato'tha 
vaitatparaśurāmakalpasūtrasthatattaddevatārcanāntoktaprayogānusāreṇa 
vidheyamityabhyarthaye sādhakānāptān || iti || dvi-pariśiṣṭakāraḥ

|| sapraśrayaṃ nivedanam ||

maduktavidhināmunā vidadhatāṃ śrīyaḥ pūjanaṃ
aho na vitathāgraho mama manāgapi prāgapi |
svatantranijatantraśambhukṛtatantraśāstrāśrayaṃ
vidhāya paripūraṇīyamayi śeṣamīṣyarcanam ||
|| pa0 ka0 sū0 dvitīyāvṛttikāraḥ ||

oṃ śrī0

śrī

|| atha śrīparaśurāmakalpasūtrasya dvipariśiṣṭe mudroddhāre pariśiṣṭaviṣaya 15 
prārambhaḥ ||

bhūmikātra

etacchrīparaśurāmakalpasūtrapipaṭhiṣūṇāṃ 
tattanmudrāvalokanakaraṇasugamatāsiddhyai etadgranthasya 
tattatpatradarśitamudrāṇāṃ patrānusandhānapūrvakamanyāsāṃ 
cānuktānāmapyatyupayuktamudrāṇāṃ caitadgranthānyatantragranthato 
mudroddhāraḥ pradarśyate ||

15-1 atha mudrāśabdārthaḥ -

1 || mudrāśabdārthaḥ atraiva pa0 ka0 sū0 4 khaṇḍe śrī lalitākrame 135 patre 1 
sūtrabhāṣye yathā -

mudrāśabdārthaśca viśvasyamodanāt drāvaṇācca mudrā |
taduktaṃ - yoginītantre
 
cidātmabhittau viśvasya prakāśāmarśane yadā |
karoti svecchayā pūrṇavicikīrṣā samanvitā ||

kriyāśaktistu viśvasya modanād drāvaṇāttathā |

p. 609)

mudreti kathitā devī................|| iti ||
iyaṃ kriyāśaktiḥ tripurasundaryā kriyamāṇotpattyabhivṛddhī anumodate 
drāvayati ceti sā mudrā | anumodanaṃ nāma svabhinnakartṛkakriyā'nukūlyaṃ | 
drāvaṇaṃ nāma ghanasya saṅkucitasya praśithilāvayavatā'pādanātmakaḥ 
prasaraḥ | īdṛśakriyāśaktireva svavṛttimudrātvasāmānādhikaraṇyena 
īkṣaṇādermelanena trikālamayī trikhaṇḍā bhavati |
iti paramarahasyārthaḥ || iti ||

2 saṭīkaśāradātilake'pi - 23 paṭale 842 patre ṭīkāyām

mudrāśabdārthaḥ mudrākaraṇaphalaṃ ca yathā -

āvāhanyādikā mudrāḥ pravakṣyāmi yathākramam |
yābhirviracitābhistu modante sarvadevatāḥ || 106 ||

atra ṭīkā mudrāḥ āha āvāhanīti | rā dāne mudaṃ rāti dadāti iti mudrā- iti 
nirvacanaṃ | idamevamodante sarvadevatāḥ - ityanena sūcitam | ata eva 
taddarśanena devatā harṣetpattiḥ | svāṅgulyo hi 
pañcabhūtātmikā'ṅguṣṭhādyāḥ ākāśavāyvagnisalilabhūrūpāḥ | 
tāsāṃ mithaḥ saṃyogarūpasaṅketāt ko'pi devatāpraguṇībhāvapūrvako 
modaḥ sānnidhyakaro bhavati | taduktam-

pṛthivyādīni bhūtāni kaniṣṭhādyāḥ kramān matāḥ |
teṣāmanyonyasambhedaprakāraistatprapañcatā ||

arcane japakāle tu dhyāne kāmye ca karmaṇi |
tattanmudrāḥ prayoktavyā devatāsannidhāpikāḥ || iti ||

3 anyatrāpi - mudaṃ rātīti mudrā syādyenaikā muṣṭireva tu |
svalpabhedāt kopaharṣau prāṇināṃ janayatyataḥ ||

tenaiva sarvadevānāṃ mudrā harṣapradā matā |
pūjākāle darśanīyā mudrāstāḥ sarvadā śive ! || iti ||

tathā- khādimārgakramādbhūtānyaṅguṣṭhādyaṅgulikramāt |
kāpi [atrāśuddhaṃ bhātīti śodhyaṃ |] muttanmitho yogāt 
sānnidhyaprahvatākarī || iti ||

4 tantrasāre - yojanāt sarvadevānāṃ drāvaṇāt pāpasaṃhateḥ |
tasmānmudreti sā khyātā sarvakāmārthasādhinī || iti || ya0 ā0 sū0 51 patre

5 atrātra mudrākartavyatopadeśaḥ |

mudrāprakāranāmakagranthe prathamapatre ārambhe yathā - 

p. 610)

arcane japakāle ca dhyāne kāmye ca karmaṇi |
snāne cāvāhane śaṅkhe pratiṣṭhāyāṃ ca rakṣaṇe || 2 ||

naivedye ca tathānyatra tattatkalpaprakāśite |
sthāne mudrāḥ pradraṣṭavyāḥ sarvalakṣaṇalakṣitāḥ || 3 || iti ||

6 || devatāparatvena tattanmudrāgrāhyatā ukta -

mudrāprakāranāmakagranthe yathā-

lakṣmīmudrārcane lakṣmyā vāgvādinyāstu pūjane |
akṣamālā tathā vīṇā vyākhyā pustakamudrikā || 12 ||

saptajihvāhvayā caiva vijñeyā vahnipūjane |
matsyamudrā ca kūrmākhyā lelihā muṇḍasaṃjñakā ||

mahāyoniriti khyātā sarvasidhisamṛddhidā ||
śaktyarcane mahāyoniḥ śyāmādau mṇḍasaṃjñakā ||

matsyakūrmākhyalelihā [ārṣaśchandobhaṅgo'tra |] sarvasādhāraṇī matā |
tārārcane ca kathyante pañcamudrāvilokitāḥ ||

yoniśca bhūtinī caiva bījākhyā dainyadhūminī |
lelihāneti samproktāḥ pañca mudrā prakīrtitāḥ ||

daśamī mudrikā jñeyā tripurāyāḥ prapūjane |
saṃkṣobhadrāvaṇākarṣavaśyonmādamahāṅkuśāḥ |
khecarībījayonyākhyā trikhaṇḍā parikīrtitā ||

kumbhamudrābhiṣeke syāt padmamudrāsane tathā |
kālakarṇā prayoktavyā vighnamaśramakarmaṇi [vighnamaśrama-iti saṃśodhyam 
|] || 
gālinī ca prayoktavyā jalaśodhanakarmaṇi |
śrīgopālārcane veṇuḥ nṛharernārasiṃhikā ||

varāhasya ca pūjāyāṃ vārāhyākhyāṃ pradarśayet |
hayagrīvārcane nityaṃ hayagrīvīṃ ca darśayet ||

rāmārcane dhanurbāṇamudre paraśurarcane |
paraśurāmasya vijñeyā jaganmohinikā tathā ||

p. 611)

vāsudevāhvayā dhyāne kumbhamudrā tu rakṣaṇe |
sarveṣāṃ prārthane caiva prārthanākhyāṃ prayojayet || iti ||

7- śaktipriyāmudrāḥ mudrāprakāragranthe 1 patre yathā-

pāśāṅkuśavarābhītikhaḍgacarmadhanuḥśarāḥ |
mauśalī mudrikā dorgī mudrāḥ śaktipriyaṅkarāḥ || iti ||

8 - mudrākaraṇāvaśyakatā - gā0 pu0 41 patre - śrīmacchaṅkarācāryapādā 
yathā-

āvāhanādihīnena kṛtā pūjā nirarthakā || viparītaphalaṃ dadyādabhaktyā 
cārcanaṃ yathā || iti ||

9 || samāje mudrākaraṇaniṣedhaḥ | saṭīkaśāradā0 23 paṭale 844 patre 114 
ślokaṭīkāyāṃ yathā-

etā mudrāstattanmantrān maduktaviśeṣamudrāśca na kasyaciddarśayet | 
taduktaṃ mahākālasaṃhitāyām -

na jātu darśayen mudrā mahājanasamāgame |
guhyametanmuniśreṣṭha tasmādrahasi yojayet ||

nā'dīkṣitasya mudrāṇāṃ lakṣaṇāni prakāśayet |
kṣubhyanti devatāstasya viphalaṃ ca bhavediti || iti ||

10 || mudrāṇāṃ gopyatvaṃ | tatraiva yathā-

anyatrā'pi - akṣamālāṃ ca mudrāṃ ca gurorapi na darśayet || iti ||

11 || adhikāribhedena mudrākaraṇabhedaḥ | tatraiva yathā-

atha caitāḥ sarvā rahasyeva kuryāt | mokṣārthinā manasaiva darśayitavyāḥ | 
tadāhuḥ- 

mānasarūpasaṅkalpā mudrā mokṣārthināṃ viduḥ |
itareṣāṃ tu sarveṣāṃ hastabhyāṃ śasyate budhaiḥ || iti || 113 | 114 ||
iti mudrāprakīrṇaṃ (15 | 1 vi0 sarvaḥ saṃ0 )

dvi0 pari0 vi0 15 | 2- nānāmudroddhāraḥ ||

15-2 | 1 || atha sarvādau śrīgaṇeśamudroddhāraḥ likhyate ||
sā ca saṭīkaśāradā0 -13 paṭale śrīgaṇeśopāsanāyāṃ 548 patre - 4 
ṭīkāyāṃ yathā-

p. 612)

atra dhyānānantaramiyaṃ gaṇapatimudrā pradarśanīyā ityuktam | 
mukhāt pralambitaṃ hastaṃ kṛtvā saṅkucitāṅgulim |
madhyā tarjanigatāgrāṅguṣṭhaṃ cādhasthamadhyamam ||
kuryānmudrāṃ gaṇeśasya prokteyaṃ sarvasiddhidā || iti ||

2 || gaṇeśvarīmudroddhāropi -tatraiva ||
yadvā | kuñcitāgrasya hastasya mūle nāsā niyogataḥ |
gaṇeśvarī bhavenmudrā0 || iti iyaṃ sarvagaṇapatimantrasādhāraṇīti jñeyam || 4 
||

3 || avighnamudrikā - tatraiva ||

yadvā || tarjanīmadhyamāsandhirnirgatāṅguṣṭhamuṣtikā |
adhomukhī dīrgharūpā madhyamā vighnamudrikā || iti ||

4 - tathaiva || mudrāprakāroktā vighnamudrā 53 śloke yathā-
 
tarjanīmadhyamānāmākaniṣṭhāṅguṣṭhamuṣṭikā |
adhomukhi dīrgharūpā madhyamā vighnamudrikā || 53 || iti ||

5 || śrīgaṇapatiprasādasampādayitrī dantamudrā - ||
asyāḥ uddhāraḥ mudrāprakāre 50 śloke -

uttānordhvamukhī madhyaśirasā baddhamuṣṭikā |
dantamudrā samākhyātā sarvāgamaviśāradaiḥ || iti ||

|| iti śrīgaṇeśamudrāḥ || saṃ - | (15-2 vi0 saṃ0)
vi0 15-3 atha - yugapanmudroddhāraḥ |
1āvāhana 2saṃsthāpana 3saṃnidhāpana 4saṃnirodhana 5saṃmukhīkaraṇa 
6sakalīkaraṇetyādiyugapanmudroddhāraḥ ||

tatrādau- āvāhanādipañcamudroddāraḥ
1 pa0 ka0 sū0 7 khaṇḍe śrīvārāhīkrame 21 sūtrabhāṣye 218 patre yathā-

hastadvayaṃ cordhvamukhamṛjvaṅguliyutaṃ yutam |
aṅgulyagrāṇi bhugnāni kaniṣṭhāmūlabhāgataḥ ||

aṅguṣṭha grasamāyogānmudraiṣā'1vāhinī matā
adhomukhī ceyameva 2sthāpanākhyā samīritā ||

muṣṭidvayodarayutā bhavet sā 3saṃnidhāpanī |
iyamaṅguṣṭhagarbhā tu 4saṃnirodhanarūpiṇī ||
iyamevottānarūpā 5sammukhīkaraṇābhidhā || iti || (adhastanaḥ -3 vi0 dṛśyaḥ) 

p. 613)

atra bhāṣyam - āvāhanādimudra  anūdya tadaṅgatvena mūlamantravidhānāt 
pratipradhānamaṅgāvṛtti iti nyāyena sṛṣṭīrupadadhāti itivat yāvatyo mudrā 
vihitāḥ tāvatīṣu mudrāsu badhyamānāsu tāvadvāraṃ mūlamāvartayet na tu 
sakṛnmūlamuccārya sarvamudrā bandhanaṃ iti jñeyaṃ || 21 || iti ||

2 - āvāhanādiṣaṇmudroddhāraḥ- saṭīkaśāradā0 23 paṭale - 843 patre yathā-

samyak sampūritaḥ puṣpaiḥ karābhyāṃ kalpito'ñjaliḥ |
1āvāhanī samākhyātā mudrā deśikasattamaiḥ || 107 ||

adhomukhī kṛtā saiva proktā 2sthāpanakarmaṇi |
āśliṣṭamuṣṭiyugalā pronnatāṅguṣṭhayugmakā || 108 ||

3sannidhāne samuddiṣṭā mudreyaṃ tantravedibhiḥ |
aṅguṣṭhagarbhiṇī saiva 4sannirodhe samīritā || 109 ||

uttānau dvau kṛtau muṣṭī 5sanmukhīkaraṇī smṛtā |
devatāṅge ṣaḍaṅgānāṃ nyāsaḥ syāt 6sakalīkṛtiḥ || 110 ||

3- athavā- jñānārṇavatantre - āvāhanādipañcamudroddhāraḥ 4 paṭale 13 patre 
yathā -

āvāhanādimudrāstu kathayāmi tavānaghe ! || 31 || 

ūrdhvāñjalimadhaḥ kuryādiyamāvāhanī bhavet |
iyaṃ tu viparītā syāttadā vai sthāpanī matā || 32 ||

militaṃ muṣṭiyugalaṃ saṃnidhāpanarūpiṇī |
antaraṅguṣṭhamuṣṭibhyāṃ saṃnirodhanarūpiṇī || 33 ||

etasyā eva mudrāyāstarjanyau sarale yadā |
savyāpasavyabhramaṇānmudreyamavaguṇṭhanī || 34 ||
(uparitanaḥ 15 | 3-1 vi0 dṛśyaḥ)

saṃsthāpinī - sannidhāpanī- sannirodhinī- prārthanī- mudrāṇāṃ 
yugapaduddhāraḥ śrīśrīmajjagadguru śrīmacchaṅkarācāryaviracita 
śrīśrīvidyāmahātripurasundarīcakrarājamānasapūjāstotre yathā -

kṛtvā hastayugāñjaliṃ ca tadadho vakrāṃ tu saṃsthāpinī |
muṣṭayaṅguṣṭhayugā sumuṣṭibhiriyaṃ sā sannidhākhyā parā ||

aṅguṣṭhadvayagarbhiṇīyamuditā saṃrodhinīmudrikā |
hastau sampuṭasaṃsthitau svahṛdaye mudroditā prārthanī || iti ||

p. 614)

5- || āvāhani - saṃsthāpanī- sannidhāpani - sannirodhinī - 
mudrāṇāmuddhāraḥ ||

ānandāśramagranthāvali 73 aṅkamudritaśrīgā0 pu0 paddhatau 9 patre dhāre 
ityupanāmakaśrīśaṅkarasūrirdarśayati yathā -

hastābhyāmañjaliṃ kṛtvā'nāmikāmūlaparvaṇoḥ ||
aṅguṣṭhau nikṣipeducchrau mudraṣā'vāhanī smṛtā |
adhomukhī tviyaṃ cet syāt sthāpanī mudrikā bhavet |
ucchritā'ṅguṣṭhamuṣṭyostu saṃyogāt saṃnidhāpinī |
antaḥpraveśitāṅguṣṭhā saiva saṃrodhinī matā ||

aṅguṣṭhatarjanyagraṃ tu mīlitaṃ svahṛdi sthitam |
sthānamudrā bhavedevaṃ .........................|| iti || 

6- || āvāhana - sthirīkaraṇa - sānnidhya - sannirodha - śabdānāmarthaḥ || 

saṭīkaśāradā0 4 paṭale 287 patre 89-90 ślokaṭīkāyām 
siddhāntasāgare āvāhanādīnāmanyathā lakṣaṇamuktaṃ | yathā-

1 svata evābhipūrṇasya tattvasyehārcanādiṣu |
sādaraṃ sanmukhībhāvastadāvāhanamucyate ||

2 śivasyā'vāhitasyāsya vidyādehe tu santatam | 
sthirīkaraṇamuddiṣṭaṃ sthāpanaṃ bhaktito'rcane ||

3 pūjāṃ prayojyamānāṃ tu gṛhītvā'nugrahādikam | 
karttuṃ sāmarthyamamyeha tat sānnidhyaṃ pracakṣate ||

4 āsamāptestu pūjāyāḥ sānnidhyaṃ hi śivasya yat |
sa sannirodha uddiṣṭo vibhorasyāpi śaktitaḥ || ityādinā ||
(anantaramityanena sanmukhīkaraṇaṃ prārthanaṃ ca mudrādvayenoktaṃ tatra 
pramāṇam) 
ajñānād durmanastvādvā vaikalyāt sādhanasya ca |
yadā'pūrṇaṃ bhavet kṛtyaṃ tadā'pyabhimukho bhava ||

dṛśā pīyūṣavarṣiṇyā pūrayan yajñaviṣṭaram |
mūrttāvāyajñasampūrtteḥ sthiro bhava maheśvara ! || iti ||

7 athāvāhanādinavamudroddhāraḥ |
ayaṃ navamudroddhāraḥ durgākalpadrumapustikāyāṃ - 372 patre ṭippaṇyāṃ 
yathā-

p. 615)

hastābhyāmañjaliṃ baddhvā'nāmikāmūlaparvabhiḥ |
aṅguṣṭhau niḥkṣipet seyaṃ mudrā 1tvāvāhinī smṛtā || 1 ||
adhomukhī tviyaṃ cet syāt 2sthāpanī mudrikā smṛtā || 2 || 
ucchritāṅguṣṭhamuṣṭyostu saṃyogāt 3saṃnidhāpanī || 3 ||
antaḥpraveśitāṅguṣṭhā saiva 4saṃrodhanī smṛtā || 4 ||
uttānamuṣṭiyagalā 5sanmukhīkaraṇī matā || 5 ||
devatānāṃ ṣaḍaṅgānāṃ nyāsaḥ syāt 6sakalīkṛtīḥ || 6 ||

savyahastakṛtā muṣṭirdīrghādhomukhatarjjanī |
7avaguṇṭhanamudreyamabhito bhrāmitā matā || 7 ||

anyonyābhimukhāśliṣṭā kaniṣṭhānāmikā punaḥ ||
tathaiva tarjanīmadhyā 8dhenumudrā samīritā || 8 || 

amṛtīkaraṇaṃ kuryāttathā sādhakasattamaḥ |
ityamṛtīkaraṇe dhenumudrā jñeyā || 9 ||

anyonyagrathitāṅguṣṭhā prasāritakarāṅgulī |
mahāmudreyamuditā 1paramīkaraṇe bhudhaiḥ || 10 ||
 
iti paramīkaraṇe mahāmudrā |
prayojayedimā mudrā devatāhvānakarmaṇi ||

|| ityāvāhanādayo nava mudrāḥ saṃ - ||

15-3 | 8 atha ghandha- puṣpa-dhūpa-dīpa- naivedyādipañcamudrāṇāmuddhāraḥ 
|| 

1- saṭīkaśāradā0 4 paṭale - 298 patre- 109 ślokaṭīkāyāṃ yathā-

jyeṣṭhāṅguṣṭhasya puṣpasya yuktā dhūpasya tarjanī |
dīpasya madhyamānāmā naivedyasya prakīrtitā |
itarāṅgulisaṃyogāt pañca mudrāḥ prakīrtitāḥ ||
gandhādiṣvapi datteṣu (bhedeṣu) mudrāścemāḥ pradarśayet || iti ||
mudrayā yat kṛtaṃ karma tadakṣayaphalapradam ||

2 - punaścāpi gandhamudrāviṣaye ||

saṭīkaśāradā0 4 paṭale 293 patre 100 śloka0 ṭīkāyāṃ yathā-

idaṃ gandhadānaṃ kaniṣṭhikayeti jñeyaṃ | yadāhuḥ - 

p. 616)

śaṅkhapātrasthitaṃ gandhaṃ mantrairdadyāt kaniṣṭhayā || iti ||
tato gandhamudrāṃ pradarśayet | tallakṣaṇantu -

kaniṣṭhāṅguṣṭhasamyuktā gandhamudrā prakīrtitā || iti ||

15-3 | 8-3 - etāsāṃ gandhādimudrāṇāmuddhāraḥ | 
prāktanaśrīmadādyārcanapaddhatau yathā -

1 kaniṣṭhāṅguṣṭhayogena gandhamudrāṃ pradarśya || iti
2 adhomukhatarjanyaṅguṣṭhayogena puṣpamudrāṃ pradarśya || iti ||
3 tarjanyaṅguṣṭhayogena 1dhūpamudrāṃ0 pradarśya || iti ||
4 madhyamāṅguṣṭhayogena dīpa0 pradarśya || iti ||
5 oṃ prāṇāya svāhā - iti aṅguṣṭhakaniṣṭhānāmābhiḥ | oṃ apānāya svāhā - 
ityaṅguṣṭhatarjanīmadhyamābhiḥ || oṃ vyānāya svāhā 
ityaṅguṣṭhamadhyamānāmābhiḥ || oṃ udānāya svāhā - 
ityaṅguṣṭhatarjanīmadhyamābhiḥ | oṃ samānāya svāhā - ityaṅguṣṭhādi 
sarvābhiḥ || iti ||

15 | 3-8-4 || sarvatra pūjopayuktagandhapuṣpadhūpanaivedyamudroddhāraḥ -

1- gandhamudroddharaḥ || - ya0 ā0 sū0 51 patre yathā-

madhyamānāmikāṅguṣṭhairaṅgulyagreṇa pārvati ! ||
dadyācca vimalaṃ gandhaṃ mūlamantreṇa sādhakaḥ || iti ||

2- puṣpamudroddhāro'pi jñānā0 16 pa0 136 śloke yathā -

puṣpaṃ samarpayeddevi ! mudrayā jñānasaṃjñayā ||
aṅguṣṭhatarjanīyogājjñānamudrā prakīrtitā |
aṅguṣṭhatarjanībhyāṃ ca puṣ.paṃ cakre nivedayet || iti yaju0 ā0 sū0 51 patre ||

3- dhūpamudroddhāro'pi tatraiva yathā-

madhyamānāmikābhyāṃ tu madhyaparvaṇi deśikaḥ |
aṅguṣṭhāgreṇa deveśi ! dhṛtvā dhūpaṃ nivedayet [du0 ka0 pustake 155 patre | 
devīvāmabhāge dhūpapātraṃ nidhāya tarjanīmūlayoraṅguṣṭayogātmikāṃ 
dhūpamudrāṃ pradarśayedityasti ||, atra dīpamudrā noktā tathā'pyuparyukta 15 | 
3-8 |1 15 | 3-8 | 3 viṣaye tathā ca du0 ka0 pustake 155 patre ca madhyame 
aṅguṣṭhamūlalagne dīpamudrā tāṃ pradarśayedityuktam |] || iti ||

4 | 1 - naivedyamudroddhāro'pi tatraiva yathā-

uttolanaṃ tridhā kṛtvā gāyatryā mūlayogataḥ |
tattvākhyamudrayā devyai naivedyaṃ vinivedayet ||

p. 617)

mūlenācamanaṃ dadyāttāmbulaṃ tattvamudrayā |
aṅguṣṭhānāmikābhyāṃ tu tattvamudreyamīritā || (jñānārṇave 16 paṭale 135 
patre) 

1prāṇādimudrāḥ | kaniṣṭhānāmike aṅguṣṭhena spṛśediti || prāṇamudrā ||
2 ............................... anāmāmadhye aṅguṣṭhena spṛśediti || apānamudrā ||
3 ............................... madhyamātarjanyāvaṅguṣṭhena spṛśediti || vyānamudrā ||
4 ............................... tarjanīmadhyamānāmāḥ aṅguṣṭhena spṛśediti || 
udānamudrā ||

5 ............................... tarjanyādyaṅgulicatuṣṭayamaṅguṣṭhena spṛśediti || 
samānamudrā ||
6 ............................... || grāsamudrā-

aṅgulyaḥ kuṭilībhūtā viralāgrāḥ parasparam | 
grāsamudrā samākhyātā savyapāṇau niyojitā || iti || (15 | 3-8 | 4 vi0 saṃ0) 
15-3 | 8-5- du0 ka0 pu0 157 patre yathā -

anāmāmūlayoraṅguṣṭhayoge naivedyamudrā tāṃ pradarśya

sapuṣpakarābhyāṃ pātramuddharan | naivedyaṃ nivedayāmi oṃ bhagavati 
havīṃṣi juṣāṇa iti paṭhangrāsamudrāṃ pradarśayet | yathā-

vāmahastena padmābhāṃ prāṇādyāṃ dakṣiṇena tu ||

1 kaniṣṭhikānāmikāṅguṣṭhaiḥ hrīṃ prāṇāya svāhā ||
2 tarjanīmadhyamāṅguṣṭhaiḥ0 apānāya svāhā |
3 tarjanyanāmāmadhyamāṅguṣṭhaiḥ0 vyānāya svāhā ||
4 anāmāmadhyamāṅguṣṭhaiḥ0 udānāya svāhā |
5 sarvāṅgulibhiḥ samānāya0 svāhā ||

evaṃ māyābījapūrvāḥ prāṇādimudrāpūrvāśca 5 prāṇāhutīḥ samarpayet 
|| iti |(15 | 3 vi0 sarva0 saṃ0) 

vi-15 | 4 kevalaśrīvaiṣṇavīmudrāviṣaye -

1- śrīlakṣmīmudroddhāraḥ | saṭīkaśāradā0 8 paṭale 414 patre- 4 śloka 
ṭīkāyām atra dhyānānantaraṃ lakṣmīmudrā darśanīyā ityuktam - 

p. 618)

lakṣmīmudroddhāro yathā-

cakramudrāṃ tathā baddhvā madhyame dve prasāryya ca |
kaniṣṭhike tathānīya tadagre'ṅguṣṭhakau kṣipet ||
lakṣmīmudrā parā hyeṣā sarvasampatpradāyikā || iti ||

15 | 4-2 - kamalapadmamudroddhāraḥ | jñānārṇavatantre 4 paṭale 14 patre yathā-

1 || hastābhyāṃ kamalākāro yadā tat kamalaṃ bhavet || 46 ||

eṣā kamalamudrā ca lakṣmīvṛddhikarī matā || iti ||

2- anyathā kamalamudroddhāraḥ - saṭīkaśāradā 4 paṭale 583 patre - 36 
ślokaṭīkāyām yathā-

karau tu sammukhau kṛtvā saṃhatāvunnatāṅgulī |
talāntarmilitāṅguṣṭhau kuryādeṣā'bjamudrikā || iti ||

3- padmamudroddhāraḥ ||

1 mudrāprakāranāmakagranthe 14 śloke yathā-

hastau tu sanmukhau kṛtvā saṃhataprathitāṅgulī |
talāntarmilitāṅguṣṭhau kṛtvaiṣā padmamudrikā || iti ||

2 du- ka- pustikāyāṃ 374 patre yathā-

hastau ca sanmukhau kṛtvā saṃhatapronnatāṅgulī ||
talāntarmilitāṅguṣṭhau kṛtvaiṣā padmamudrikā || iti || (15 | 4-2 vi0 saṃ0)

15 | 4-3- matsyamudroddhāraḥ pa-ka-sū 6 khaṇḍe śyāmākrame 197 patre 18 
sūtrabhāṣye yathā-

1 adhomukhe vāmakare dakṣiṇaṃ tādṛśaṃ karam |
sthāpayenmatsyamudreyaṃ tāntrikaiḥ parikīrtitā || iti ||

2 dakṣapāṇitalaṃ devi ! vāmapṛṣṭhopari nyaset |
aṅguṣṭhadvitayaṃ samyak ṛjurūpamadhomukham ||
matsyamudreyamākhyātā maṇḍalādiprakalpane || iti || 

3- mudrāprakāre yathā-

dakṣapāṇipṛṣṭhadeśe vāmapāṇitalaṃ nyaset |
aṅguṣṭhau cālayet samyak mudreyaṃ matsyarūpiṇī || 79 || iti || (vi0 15 | 4-3 saṃ )

p. 619)

15 | 4-4 - kūrmamudroddhāraḥ mudrāprakāre yathā-

vāmahastasya tarjanyāṃ dakṣiṇasya kaniṣṭhikām |
tathā dakṣiṇatarjanyāṃ vāmāṅguṣṭhaṃ niyojayet ||

unnataṃ dakṣiṇāṅguṣṭhaṃ vāmasya madhyamādikāḥ |
aṅgulīryojayet pṛṣṭhe dakṣiṇasya karasya ca ||

vāmasya pitṛtīrthena madhyamānāmike tathā |
adhomukhe ca te kuryāddakṣiṇasya karasya ca ||

kūrmapṛṣṭhasamaṃ kuryāddakṣapāṇiṃ ca sarvataḥ |
kūrmamudreyamākhyātā devatādhyānakarmaṇi || iti 6 patre 81 ślo0 ||

15 | 4-5- śrīhayagrīvamudroddhāraḥ | saṭīkaśāradā0 15 paṭale - 624 patre 72 
ślo0 ṭīkāyāṃ yathā-

(atra dhyānānantaramiyaṃ mudrā darśanīyā |)

vāmahastatale dakṣā aṅgulīstāstvadhomukhīḥ |
saṃropya madhyamāṃ [mudrāprakāranāmakagranthe || saṃropya 
madhyamānāmāṃ mūlasyādho vikuñcayet || iti pāthaḥ] tāsāmunnamyā'dho 
vikuñcayet ||
hayagrīvapriyā mudrā tanmūrteranukāriṇī || iti || 72 ||

15 | 4-6 - śrīnārasiṃhīmudroddhāraḥ | saṭīkaśāradā0 16 paṭale - 646 patre 7 
ślo0 ṭīkāyāṃ yathā-

1 atra dhyānānantarametā mudrāḥ pradarśayet
jānumadhyagatau kṛtvā cibukoṣṭhau samāvubhau |
hastau ca bhūmisaṃlagnau kampamānaḥ punaḥ punaḥ ||

mukhaṃ vijṛmbhitaṃ kṛtvā lelihānāṃ ca jihvikām |
eṣā mudrā nārasiṃhī pradhāneti prakīrtitā || iti ||

vāmasyāṅguṣṭhato baddhvā kaniṣṭhāmaṅgulītrayam | 
triśūlavat sammukhordhvaṃ kuryānmudrāṃ nṛsiṃhagām ||

aṅguṣṭhābhyāṃ ca karayostathākramya kaniṣṭhike |
adhomukhābhiḥ śliṣṭābhiḥ śeṣābhirnṛharermatā || iti ||

2 mudrāprakāranāmakagranthe -
 
aṅguṣṭhābhyāṃ ca karayorathākramya kaniṣṭhike |
adhomukhībhiḥ sarvābhirmudreyaṃ nṛharermatā || iti || 28 ślo0 (15 | 4-6-2 saṃ)

p. 620)

15 | 4-6 | 3 āntramudroddhāraḥ | tatraiva yathā-

hastāvadhomukhau  kṛtvā nābhideśe prasārya ca |
tarjanībhyāṃ nayet skandhau prauktaiṣā'ntrākhyamudrikā ||

4 vaktramudroddhāraḥ | tatraiva yathā-

hastābūrdhvamukhau kṛtvā tale saṃyojya madhyame |
anāmāyāṃ tu vāmāyāṃ dakṣiṇāṃ tu vinikṣipet ||

tarjanyau prṣṭhato lagne aṅguṣṭhau tarjanīśritau |
vaktramudrā bhavedeṣā nṛhareḥ sannidhau matā || 

5 daṃṣṭrāmudroddhāraḥ | tatraiva yathā-

vaktramudrāṃ tathā kṛtvā tarjanībhyāṃ tu madhyame |
pīḍayeddaṃṣṭramudraiṣā [ārṣotra daṃṣṭraśabdo'thavā-api māṣaṃ maṣaṃ 
brūyācchandobhaṅgaṃ na kārayet- iti samādheyaṃ |] sarvapāpapraṇāśīnī || iti 
|| 

6 dāraṇamudroddhāraḥ | saṭīkaśāradā0 - 16 paṭale - 656 patre - 50 śloka- 
ṭīkāyāṃ yathā-
 
evaṃ krameṇa caturthābhyāṃ dakṣavāmābhyāṃ dāraṇamudrā | tallakṣaṇaṃ 
tu |
mithaḥ saṃsṛṣṭasaṃmukhyo'ṅgulya ṛjvadho'grakāḥ |
svasthānasaralāṅguṣṭhau mudreyaṃ dāraṇā matā || iti || (15 | 4-6 | 6 vi0 saṃ0)

15|4-7- vārāhamudroddharaḥ | saṭīkaśāradā0 15 paṭale- 637 patre 108 
ślokaṭīkāyām yathā -

1 atra dhyānānantaramidaṃ mudrādvayaṃ darśanīyamiti jñeyaṃ | tallakṣaṇaṃ 
yathā -

vāmahastamathottānaṃ kṛtvā devasya copari |
nāmayediti samproktā mudrā vārāhasaṃjñitā || iti ||

2 dakṣahastaṃ cordhvamukhaṃ vāmahastamadhomukham || iti || 108 ||
 
aṅgulyagraṃ tu saṃyuktaṃ mudrā vārāhasaṃjñitā || iti || 108 ||

3 mudrāprakāranāmakagranthe 29 śloke
devopari karaṃ vāmaṃ kṛtvottānamadhaḥ sudhīḥ |
āmayediti samproktā mudrā vārāhasaṃjñitā || iti || (15 | 4-7 vi0 saṃ0)

p. 621)

15 | 4-8 śrīvatsamudroddhāraḥ

saṭīkaśāradā0 15 paṭale 612 patre 22 ślokaṭīkāyāṃ yathā-
 
anyonyapṛṣṭhakarayormadhyamānāmikāṅgulī |
aṅguṣṭhena tu badhnīyāt kaniṣṭhāmūlasaṃśrite ||
tarjanyau kārayedeṣā mudrā śrīvatsasaṃjñikā || iti ||

15 | 4-9 śrīkaustubhamudroddhāraḥ | tatraiva śāradāpatre yathā -

1 anāmāpṛṣṭhasaṃlagnā dakṣiṇasya kaniṣṭhikā ||
kaniṣṭhikānyā [atrāśuddhaṃ svayaṃ śodhyaṃ-] badhnīyādanāmā 
dakṣatarjanīm |
gṛhītvā dakṣiṇāṅguṣṭhamadhyamānāmikātrayam ||

ucchrayitvā tatra vāme tarjanīmadhyame nyaset |
dakṣiṇe maṇibandhe ca vāmāṅguṣṭhaṃ tu yojayet ||
mudreyaṃ kaustubhasyoktā darśanīyā prayatnataḥ || iti ||

2 prakāraḥ | mudrāprakāranāmakagranthe yathā-

anāmāpṛṣṭhasaṃlagnā dakṣiṇasya kaniṣṭhikā ||

kaniṣṭhayānyayā baddhvā tarjanyā dakṣayā tathā |
vāmānāmā ca badhnīyāddakṣiṇāṅguṣṭhamūlake ||

aṅguṣṭhamadhyame vāme saṃyojya saralāḥ parāḥ |
caturo'pyagrasaṃlagnā mudrā kaustubhasaṃjñakā || iti || (20 ślo0 15 | 4-9 vi0 
saṃ0) 

15 | 4-10 | vanamālāmudroddhāraḥ | saṭīkaśā0 15 paṭale 612 patre-

3 spṛśet kaṇṭhādipādāntaṃ tarjanyāṅguṣṭhaniṣṭhayā |
karadvayena mālāvat mudreyaṃ vanamālikā || iti ||

15 | 4-11 śrīgovindadhyānapūrvaka veṇumudroddhāraḥ | saṭīkaśāradā0 17 
paṭale 696 patre - 89-90 ślo0 ṭīkāyāṃ yathā-

phullendīvarakāntiminduvadanaṃ barhāvataṃsapriyam |
śrīvatsāṅkamudārakaustubhadharaṃ pītāmbaraṃ sundaram || 

gopīnāṃ nayanotpalārcitatanuṃ gopālasaṅghāvṛtam |
govindaṃ kalaveṇuvādanaparaṃ divyāṅgabhūṣaṃ bhaje || 89 ||

p. 622)

etacchlokaṭīkāyāṃ veṇumudroddhāro yathā-

oṣṭhe vāmakarāṅguṣṭho lagnastasya kaniṣṭhikā |
dakṣiṇāṅguṣṭhasaṃsaktā tatkaniṣṭhā prasāritā ||

tarjanīmadhyamānāmāḥ kiñcit saṅkucya cālitāḥ |
veṇumudreha kathitā suguptā preyasī hareḥ || iti

15-4 | 12 garuḍamudroddharaḥ | ānandāśramagranthāvali 73 aṅkamudritaśrī0 
gā0 pu0 paddhatau 9 patre dhāre ityupanāmakaśrīśaṅkarasūrirdarśayati yathā-
 
1- karadvayasya pṛṣṭhe saṃyojya kaniṣṭhikābhyāmavaṣṭabhyādho'ṅguṣṭhau
purastarjanyau saṃyojya madhyamānāmikayorvakrayoḥ pakṣatulyatvena 
garuḍamudrā || iti ||

2- saṭīkaśāradā0 4 paṭale 264 patre 48 ślo0 ṭīkāyāṃ yathā-

hastāvabhimukhau kṛtvā racayitvā kaniṣṭhike |
mithastarjanike śliṣṭe śliṣṭāvaṅguṣṭhakau tathā ||

madhyamānāmike dve tu dvau pakṣāviti kuñcayet |
eṣā garuḍamudrā syādaśeṣaviṣanāśini || 48 || iti ||

3- mudrāprakāranāmakagranthe- yathā-

hastau tu vimukhau grathitvā ca kaniṣṭhike |
mithastarjanike śliṣṭe śliṣṭāvaṅguṣṭhakau tathā ||
madhyamānāmike dve tu dvau pakṣāviva cālayet
eṣā garuḍamudrā syād viṣṇoḥ saṃtoṣavardhanī || iti 25 ślo0 ||

|| iti śrīvaiṣṇavīmudroddhāraḥ sampannaḥ ||
(15 | 4-12 tathā ca 15 | 4 vi0 sarvaḥ saṃ0)

|| dvi0 pari0 vi0 15 | 5 kevalaśrīśaivamudrāviṣaye ||

1- bilvamudrodhāraḥ | tatraiva saṭīkaśāradā0 17 paṭale 696 patre 89 ślo0 
ṭīkāyāṃ yathā-

ucyate'cyutamudrāṇāṃ bhadrā bilvaphalākṛtiḥ |
aṅguṣṭhaṃ vāmamuddaṇḍitamitarakarāṅguṣṭhakenā'tha baddhvā |
tasyā'gra pīḍayitvā'ṅgulibhīrapi ca tā vāmahastāṅgulībhiḥ ||
baddhvā gāḍhaṃ hṛdi vimaladhīrvyāharan mārabījam |
bilvākhyā mudrikaiṣā sphuṭamiha gaditā gopanīyā vidhijñaiḥ || iti ||

p. 623)

2-1 kapālamudroddhāraḥ | jñānārṇavatantre 4 paṭale 14 patre yathā-

vāmahastatalaṃ devi ! kapālākṛti kārayet ||
kapālamudrā deveśi ! devyānandakarī sadā || iti ||

2 kapālamudrodhāraḥ praktanaśrīmadādyārcanapadhatau yathā-

asyāḥ kāpālikā mudrā viśeṣeṇa priyaṅkarī ! |
pātravad vāmahastaṃ ca kṛtvāṅke vāmake tathā ||
vidhāyocchritavat kuryāt mudrā kāpālikī tathā || iti || (15-5 | 2 vi0 saṃ0)

3- khaṭvāṅgamudrodhāraḥ | mudrāprakāre yathā-
 
pañcāṅgulyo dakṣiṇāstu militā hyūrdhvamucchritāḥ |
khaṭvāṅgamudrā vikhyātā śivasyātipriyā matā || 45 || iti ||

4- ḍamarumudroddhāraḥ | saṭīkaśāradā0 20 paṭale - 764 patre - 53 
ślo0ṭīkāyām yathā-
 
atha- (śrībaṭuka) dhyānānantaraṃ ḍamarumudrāṃ pradarśyet tallakṣaṇaṃ tu-
 
muṣṭiṃ suśithilāṃ baddhvā īṣaducchritamadhyamām |
dakṣiṇāmūrdhvamunnamya [mudrāprakāre tu dakṣiṇāmūrdhvamunprayya- iti - 
pāthaḥ - cintyaḥ-] karṇadeśe pracālayet
eṣā mudrā ḍamarukā sarvavighnavināśinī || iti 48 ślo0 ||

5- mṛgamudrālakṣaṇam-

saṭīkaśāradā0 14 paṭale 603 patre ṭīkāyāṃ yathā-
 
militvā'nāmikāṅguṣṭhamadhyamāgrāṇi yajayet |
śiṣṭāṅgulyucchrite kuryānmṛgamudreyamīritā || iti ||

6- muṇḍamudroddhāraḥ mudrāprakāre 6 patrādhaḥ- 82 ślo0 yathā-

pṛṣṭe kroḍe'ntarāṅguṣṭhamuṣṭiṃ vāmakarasya ca |
madhyamāgraṃ dakṣiṇasya tathālambya prayatnataḥ ||
madhyamenātha tarjanyā aṅguṣṭhāgraṃ tu yojayet |
dakṣiṇaṃ yojayet pāṇiṃ vāmamuṣṭau ca sādhakaḥ ||
darśayeddakṣiṇe bhāge muṇḍamudreyamīritā || 57-9 iti ||

p. 624)

7- carmamudrodhāraḥ | mudrāprakāre yathā-

vāmahastaṃ tathā tiryak kṛtvā caiva prasārya ca |
ākuñcitāṅguliṃ kuryāccarmamudreyamīritā || 57 || iti ||

8- paraśumudroddhāraḥ saṭīkaśāradā0 18 paṭale 715 patre - 13 ślokaṭīkāyāṃ 
yathā-
 
kare [mudrāprakāre tu | tale talaṃ tu karayoriti pāthaḥ |] karaṃ tu karayostiryak 
saṃyojya cā'ṅgulīḥ |
saṃhatāḥ prasṛtāḥ kuryānmudreyaṃ paraśormatā || iti ||

9 | 1 khaḍgamudrodhāraḥ | saṭīkaśāradā0 17 paṭale - 684 patre 22 
ślokaṭīkāyāṃ yathā-

kaniṣṭhānāmike baddhvā svāṅguṣṭhenaiva vāmataḥ |
śiṣṭāṅgulī tu prasṛte saṃśliṣṭe khaḍgamudrikā || iti ||

2 mudrāprakāre -

kaniṣṭhānāmike baddhvā prāṅguṣṭhenaiva dakṣataḥ |
śiṣṭāṅgulī tu prasṛte saṃsṛṣṭe khaḍgamudrikā || 55 || iti ||
(vi0 15 | 5-9 sarvaḥ saṃ0)

10 | 1 triśūlamudrodhāraḥ | saṭīkaśāradā0 10 paṭale 479 patre yathā-

triśūlamudrāṃ pāṇibhyāṃ baddhvātmānaṃ trikaṇṭakīm
dhyāyan spṛṣṭvā japed grastaṃ sadyastaṃ muñcati grahaḥ || 47 ||

2- etacchlokaṭīkāyāṃ yathā-

triśūlamudrāmiti | sā tu kaniṣṭhāṅguṣṭhasaṃyogāt śeṣāṇāṃ tu 
prasāraṇāt || ityādi ṭīkā dṛśyātra - (uparitanapatre-)

3- mudrāprakāre 42 śloke tu-

aṅguṣṭhena kaniṣṭhāntu baddhvā śliṣṭāṅgulitrayam |
prasārayet triśūlākhyā mudraiṣā parikīrtitā || iti ||
(15 | 5-10 vi0 saṃ0)

11 - liṅgamudrālakṣaṇaṃ tu - | saṭīkaśāradā0 18 paṭale0 716 patre- 
śrīśivapūjāyāṃ dhyāyennityamiti 13 ślokaṭīkāyāṃ yathā-

ucchritaṃ dakṣiṇāṅguṣṭhaṃ vāmāṅguṣṭhena bandhayet |
vāmāṅgulīrdakṣiṇābhiraṅgulībhiśca veṣṭayet [mudrāprakāre tu bandhayediti 
pāṭhaḥ |] | 
liṅgamudreyamākhyātā śivasānnidhyakāriṇī || iti ||

p. 625)

iyaṃ sarvaśaivamantrasādhāraṇīti jñeyaṃ || [arthāt-vidyāmudrā-
pustakamudrā- ekā-eveti - dhvanitaṃ-] (15 | 5 - vi0 sarvaḥ saṃ0)

|| iti yathopalabdhaśrīśaivamudrāḥ sampannāḥ ||
dvi0 pari0 vi0 15 | 6 | kevalaśrīsarasvatīmudroddhāraviṣaye ||
15 | 6-1 - śrījñānamudroddhāraḥ jñānārṇavatantre 4 paṭale 14 patre yathā-

tarjanyaṅguṣṭhayoge tu dakṣahaste tu pārvati ! || 40 ||
 
akṣamāleti mudreyaṃ jñānamudrā ca vai bhavet || iti ||

2 prakāra- | saṭīkaśāradātilake 6 paṭale 358 patre 4 ślokaṭīkāyāṃ yathā-

jñānamudrā | aṅguṣṭhatarjanīyogarūpā pārśvābhimukhī | yadāhuḥ -

śliṣṭāgre'ṅguṣṭhatarjanyo prasāryā'nyāḥ prayojayet |
pārśvasyābhimukhī seyaṃ jñānamudrā prakīrttitā || iti ||

3 pra0 mudrāprakāranāmakagranthe yathā-

tarjanyaṅguṣṭhakau saktāvagrato hṛdi vinyaset ||
vāmahastāmbujaṃ vāmajānumūrdhani vinyaset ||
jñānamudrā bhavedeṣā rāmacandrasya preyasī || iti 22 ślo0 ||
15 | 6-1 vi0 sarvaḥ saṃ0) 

15 | 6-2 | 1- akṣamālāmudrodhāraḥ | tatraiva mudrāprakāre 4 patre yathā-

aṅguṣṭhatarjanyagre tu grathayitvāṅgulitrayam 
prasārayedakṣamālā mudreyaṃ parikīrtitā || iti ||

15 | 6-2 | 2 jñānārṇave 4 paṭale 14 patre 40 ślo0 yathā-

tarjanyaṅguṣṭhayoge tu dakṣahaste tu pārvati ! | 
akṣamāleti mudreyaṃ jñānamudrā ca vai bhavet || (15 | 6-2-2 vi0 saṃ0)

15 | 6-3- pustakamudroddhāraḥ | saṭīkaśāradātilake - 6 paṭale 358 patre 4 
ślokaṭīkāyāṃ yathā vidyā pustakaṃ tanmudretyarthaḥ -

vāmamuṣṭiḥ svābhimukhī baddhvā pustakamudrikā || iti ||

2- mudrāprakāre

vāmamuṣṭiṃ svābhimukhīṃ kṛtvā saṃcālayecchiraḥ || iti ||

3- jñānārṇavatantre 4 paṭale 14 patre yathā-

pustakavadvāmakaraṃ kuryāt samatalaṃ priye |
pustakaṃ nāma mudreyaṃ vāgvilāsaṃ prayacchati || iti || (15 | 6-3 vi0 sarvaḥ 
saṃ0) 

p. 626)

4- vīṇāmudroddhāraḥ || mudrāprakāre yathā-

vīṇāvādanabaddhastau kṛtvā saṃcālayecchiraḥ |
vīṇāmudrā samākhyātā sarasvatyāḥ priyaṅkarī || 64 || iti ||

5 | 1 vyākhyānamudroddhāraḥ | saṭīkaśāradā0 7 paṭale 405 patre 82 
ślokaṭīkāyāṃ yathā-
 
śliṣṭāgre'ṅguṣṭhatarjanyau prasāryā'nyāḥ pradarśayet |
prayojyā'bhimukhaṃ saiṣā mudrā vyākhyānasajñitā || iti ||

2- mudrāprakāre

dakṣiṇāṅguṣṭhatarjanyāvagralagne parāṅgulī |
prasārya saṃhatottāna eṣā vyākhyānamudrikā || 66 || iti || (15 | 6-5 vi0 saṃ0)

|| iti śrīsarasvatīdevatāmudroddhāraḥ vi0 15 | 6 sarvaḥ sampannaḥ ||
|| dvi0 pari0 vi0 15 | 7 śrīdurgāmudroddhāraviṣaye ||

1-śrīdurgāmudroddhāraḥ- saṭīkaśāradā0 - 11 paṭale 494 patre 5 
ślokaṭīkāyāṃ yathā-

sarvadurgāmantreṣu dhyānānantaramiyaṃ mudrā darśanīyā | 
muṣṭiṃ baddhvā karābhyāṃ tu vāmasyopari dakṣiṇam |
kṛtvā śirasi saṃpūjyā [saṃyojya - iti mudrāprakāre pāthaḥ ||] 
durgāmudreyamīritā || iti ||

gadāmudrodhāraḥ saṭīkaśāradā0 15 paṭale 608 patre 7 ślokaṭīkāyāṃ yathā-

vāmamuṣṭyantare'ṅguṣṭhe dakṣiṇe saralāṅgulīḥ |
vāmāṅguṣṭhaḥ spṛśedagre yojitaḥ saralodaraḥ ||

anyonyābhimukhau hastau kṛtvā tu grathitāṅgulīḥ |
aṅgulyau madhyame bhūyaḥ saṃlagne suprasārite ||
gadāmudreyamākhyātā bhuktimuktikarī tathā || iti ||

3- vajramudroddhāraḥ | saṭīkaśāradā0 23 paṭale 851 patre 132 ślo0 ṭīkāyāṃ 
yathā- 

p. 627)

kaniṣṭhāṅguṣṭhayuṅmudrā trikoṇā tvaśanermatā ||

iti aśanimudrālakṣaṇam 

4- tarjanīmudroddhāraḥ | mudrāprakāre'ntimapatre yathā-

vāmamuṣṭiṃ vidhāyāya tarjanīmadhyame tataḥ |
prasārya tarjanīmudrā nirdiṣṭā vajrapāṇinā || 114 || iti ||

5- musalamudroddhāraḥ | saṭīkaśāradā0 -4 paṭale 264 patre anyāsāṃ 
lakṣaṇāni ityatra yathā-

muṣṭiṃ kṛtvā tu hastābhyāṃ vāmasyopari dakṣiṇam |
kuryyānmusalamudreyaṃ sarvavighnapraṇāśinī || iti ||

15 | 7-6- || aṅkuśasarvamahāṅkuśamudroddhāraḥ ||

1- jñānārṇavatantre 4 paṭale 14 patre yathā-

muṣṭiṃ baddhvā dakṣakare tarjanyaṅkuśarūpiṇī || 41 ||
aṅkuśākhyā mahāmudrā trailokyākarṣiṇī bahvet || iti ||

2- prakāraḥ || ānandāśramagranthāvali 73 aṅkamudritaśrī0 gā0 pu0 paddhatau
9 patre dhāre ityupanāmakaśrīśaṅkarasūrirdarśayati yathā-

sarvāṅgulyaḥ samākuñcya vāmahastasya tarjanīm |
pragṛhya sādhakendrastu dakṣiṇena tu pṛṣṭhinā ||

prasārya tarjanī tasya īṣadagre vikuñcayet |
aṅkuśā tu iyaṃ mudrā vaśyakarmavidhau matā || iti ||

3- mudrāprakāre -

ṛjvīṃ ca madhyamāṃ kṛtvā tarjanīmadhyaparvaṇi |
saṃyojyākuñcayet kiñcit mudraiṣāṅkuśasaṃjñakā || 52 || iti ||

4- sarvamahāṅkuśāmudrāśabdārthaḥ pa0 ka0 sū0 5 khaṇḍe śrīlalitākrame 
152 -153 patrayoḥ 1 sūtrabhāṣye yathā-

ṣaṣṭhī tu - idameva pūrvoktaṃ śikhādvayaṃ yadā vāmāpradhānaṃ tadā 
sarvamahāṅkuśā |
sūkṣmarūpeṇa paramaśivakukṣau sthitaṃ jagat | yathā antastho gajaḥ aṅkuśena 
bahirākṛṣyate tathā sarvasya bahirākarṣaṇāt sarvamahāṅkuśetyucyate | 
paraśivakukṣisthajagato vamanāt vāmā tatpradhānā śikhā sarvamahāṅkuśā 
ityucyate | tadapyuktaṃ - yoginītantre -

p. 628)

vāmāśaktipradhānā tu mahāṅkuśamayī punaḥ |
tadvadviśvaṃ vamantī sā dvitīye tu daśārake || iti ||

ata eva- pūrvamudrāyāṃ saralayoranāmayoḥ vakratā dṛśyate | loke 
vamanavelāyāṃ mānavo dhanurākāro vakro bhavati | prasiddhametat |

atrāyaṃ vivekaḥ - kevalavāmātvaṃ sarvasaṃkṣobhiṇīpadapravṛttinimittaṃ 
jyeṣṭhātvaviśiṣṭavāmātvaṃ sarvākarṣaṇīpadapravṛttinimittaṃ 
sūkṣmākāśāntarvṛttibindudvayatvaṃ sarvavaśyakarapadapravṛttinimittaṃ 
jyeṣṭhāśaktipradhānakabindudvayamadhyavṛttirekhātvaṃ 
sarvonmādinīpadaśakyatā'vacchedakaṃ vāmāśaktipradhānatvaṃ 
sarvamahāṅkuśāpadaśakyatā'vacchedakaṃ evaṃ rītyā vailakṣaṇyaṃ 
sūkṣmadhiyā draṣṭavyam || iti || 

5- || sarvamahāṅkuśāmudroddhāraḥ - pa0 ka0 sū0 5 khaṇḍe śrīlalitākrame 169 
patre - 15 sūtrabhāṣye yathā-

ṣaṣṭhī mudrā'pi sarvamahāṅkuśā tatraiva prakaṭitā-
 
asyāstvanāmikāyugmamadhaḥkṛtvā'ṅkuśākṛti [atra asyāḥ nāma unmādinī 
- ityavaseyam | ] | 
tarjanyāvapi tenaiva krameṇa viniyojayet ||
iyaṃ mahāṅkuśā mudrā sarvakāryārthasādhinī || iti ||

6- atra bhāṣyaṃ - asyāḥ sarvonmādinyāḥ | tenaiva krameṇa anāmikākrameṇa |
anāmikāṅkuśākārā | tathaiva tarjanīdvayamapi kartavyam |
śeṣaṃ pūrvamudrāvat - iti bhāvaḥ || (15 | 7-6 vi0 saṃ0)

15 | 7-7 nārācamudroddhāraḥ pa0 ka0 sū0 6 khaṇḍe śyāmātkrame 204 patre 35 
sūtrabhāṣye paramānandatantre yathā-

1- || vimuṣṭyaṅguṣṭhatarjanyāvūrdhvāṅguṣṭhāgratarjanī |
hastadvayagatā caivaṃ mudrā nārācasaṃjñitā || iti ||

ayamarthaḥ - prathamaṃ hastadvaye muṣṭibhāvaṃ sampādya tasyānirgate 
vimuṣṭīye aṅguṣṭhatarjanyau tayormadhye urdhvāgramaṅguṣṭhaṃ prāgagrāṃ 
ṛjurūpāṃ tarjanīṃ kuryāt | iyaṃ nārācamudretyarthaḥ || 35 || iti || 

2 saṭīkaśāradā-4 paṭale 248 patre 24 ślokaṭīkāyāṃ yathā- 
anyatrāpi

p. 629)

aṅguṣṭhamagraṃ yadi madhyamāgraṃ spṛśet syuranyāṅgulayastvalagnāḥ |
tadā bhavet bhūtaniṣūdanasya nārācanāmno'stravarasya mudrā || iti ||

3 - tatraiva 256 patre 33 śloke ṭīkāyāṃ ca yathā-

aṅguṣṭhatarjanyagrābhyāṃ sphoṭo nārācamudrikā || iti ||
(15 | 7-7 vi0 sarva0 saṃ0)

pāśamudrāyām
 
15 | 7-8 pāśamudroddhāraḥ || jñānārṇave 4 paṭale 14 patre yathā -

1- tarjanīyugalaṃ devi vāmāṃse śṛṅkhalākṛti |
pāśamudrā samākhyātā trailokyākarṣaṇakṣamā || iti ||

2- pāśamudrālakṣaṇaṃ yathā- saṭīkaśāradā0 9 paṭale 443 patre 16 
ślokaṭīkāyāṃ yathā-

vāmamuṣṭisthatarjanyā dakṣamuṭisthatarjanīm |
saṃyojyā'ṅguṣṭhakāgrābhyāṃ tarjjanyagre svake kṣipet ||
eṣā pāśasya mudreti vidvadbhiḥ parikīrtitā || iti ||

3- saṭīkaśāradā0 17 paṭale 684 patre yathā-

athaveyaṃ pāśamudrā | yadāhuḥ -

tarjanyaṅguṣṭhakau kṛtvā saktāgrau kuñcitāḥ parāḥ |
pāśamudrā samākhyātā || iti ||

4- mudrāprakāre 51 śloke yathā-

vāmamuṣṭestu tarjanyā dakṣamuṣṭestu tarjanīm |
saṃyojyāṅguṣṭhakāgrābhyāṃ tarjanyagre samutkṣipet ||
eṣā pāśāhvayā mudrā vidvadbhiḥ parikīrtitā || 51|| iti ||
(15 | 7-8 vi0- sarva0 saṃ0) 

15 | 7-9 | 1- cakramudroddhāraḥ || ānandāśramagranthāvali 73 aṅkamudrita ghāre 
ityupanāmakaśaṅkarasūriviracita śrī0 gā0 pu0 paddhatau -10 patre yathā-

hastau tu saṃmukhau kṛtvā saṃlagnau [mudrāprakāragranthe tu-subhugnau 
suprasāritau- iti pāthaḥ ||] tu prasāritau |
kaniṣṭhāṅguṣṭhakau lagnau mudrā cakrasya siddhidā || iti ||

p. 630)

saṭīkaśāradā0 4 paṭale 364 patre 49 ślokaṭīkāyāṃ yathā-

viparyaste tale kṛtvā vāmadakṣiṇahastayoḥ |
aṅguṣṭhau grathayeścaiva kaniṣṭhānāmikāntare ||
cakramudreyamuddiṣṭā sarvasiddhikarī śubhā || iti || (15 | 7-9 vi0 sarva0 saṃ0)

15 | 7-10 || cāpamudroddhāraḥ-

1- jñānārṇavatantre 4 paṭale 14 patre yathā-

yathā hastagataṃ cāpaṃ tathā hastaṃ kuru priye ! || 44 ||
cāpamudreyamākhyātā vāmahaste vyavasthitā || iti ||

2- saṭīkaśāradā0 17 paṭale 684 patre ṭīkāyāṃ yathā-

vāmasya madhyamāgraṃ tu tarjanyagre niyojayet |
anāmikāṃ kaniṣṭhāṃ ca tasyāṅguṣṭhena pīḍayet |
darśayeddakṣiṇaskandhe dhanurmudreyamīritā || iti ||

4- tatraiva

athaveyaṃ dhanurmudrāṃ jñeyā | yadāhuḥ -

bāhumūlaṃ spṛśettena bāhvagreṇaiva sādhakaḥ |
dhanurmudrā yaśaḥkīrtibalavīryavivardhinī || iti || (15 | 7-10 vi0 saṃ0)

11 | 1 bāṇamudroddhāraḥ
jñānārṇave 4 paṭale 14 patre yathā-

yathā hastagato bāṇastathā hastaṃ kuru priye ! || 44 ||
bāṇamudreyamākhyātā ripuvarganikṛntanī || iti ||

2- mudrāprakāre -

dakṣamuṣṭistu tarjanyā dīrghayā bāṇamudrayā || iti || 34 ślo0 ||
(15 | 7-11 vi0 sarvaḥ saṃ0)

15 | 7-12- śikhā [mudrāprakāranāmni granthe -darśayedvāmake skandhe - iti -33 
śloke -] -kavaca - netrāstramudrāṇāṃ yugapaduddhāraḥ |
saṭīkaśāradā0 4 paṭale 258 patre 34 ślokaṭīkāyāṃ yathā-

p. 631)

1- jyeṣṭhāvadhaḥprasaktāgrau kaniṣṭhāvūrdhvatastathā ||
kuryāt seyaṃ śikhāmudrā sarvopadravanāśinī |

2- kṛtvā'ṅguṣṭhau prasaktāgrau tarjanyau ca trikoṇavat ||
mūrddhni paścānmukhaṃ kṛtvā nayedubhayapārśvataḥ |
karau hṛdantarmudreyaṃ kavacasyā'bhayapradā ||

3- kṛtvā netronmukhaṃ hastaṃ saktāṅguṣṭhakaniṣṭhikam |
prasārya madhyamāṃ kiñcinnamayeditarāṅgulīḥ ||
netramudreyamuddiṣṭā rakṣobhūtārttibhañjinī |

4- parasparataladvandvaṃ punarāsphoṭayed bhṛśam || iti || (iyamastramudrā 
jñeyetyarthaḥ)

13- punarapi cāstraśikhākavacamudroddhāraḥ |
pa0 ka0 sū0 3 khaṇḍe śrīkrame 19 sūtrabhāṣye 104 patre yathā-

śikhā'ṅguṣṭhena vinyasya daśabhiḥ kavacaṃ nyaset || iti ||

15 | 7-14 kevalāstramudroddhāraḥ ||

1 atha pramāṇāni 1 pa0 ka0 sū0- 3 khaṇḍe 104 patre-19 sūtrabhāṣye yathā-
 
tarjanīmadhyamābhyāṃ tu tatostraṃ vinyaset priye ! | iti śrīśivoktiḥ śrīśivāṃ 
pratīti ||

2- iyaṃ vicitrā agniprākārarupā'pi astramudrā- saṭīkaśāradā0 4 paṭale 248 
patre -24 ślokaṭīkāyāṃ agniprākāramudroktā pryogasāre yathā-

triśūlāgrau karau kṛtvā vyatyastāvabhito nayet |
astramudreyamākhyātā vahniprākāralakṣaṇā |
paradrohopaśamanī nāgāśanibhayāpahā | iti ||

taduktaṃ - tato'stramantreṇa viśodhya pāṇitritāladigbandhahutāśaśālām iti | 
eṣāṃ phalamāha teneti || 24 || iti ||

3- || saṭīkaśāradātilake 4 paṭale 256 patre 33 śloko yathā-

astraṃ tattalayornyasya kuryāttālatrayādikam || iti mūlagranthaḥ ||
atra talaśabdenāntarbāhyamapi talaṃ gṛhyate0 ityādi0 || iti ||

4- atra ṭīkā tatraiva - kuryāttālatrayādikamiti aṅgāstraviniyogaḥ
tatsvarūpamuktamanyatra-
prasāritatalābhyāṃ tu tālatrayamudīrayet || iti ||

p. 632)

5- tadagre tatraiva 258 patre 33 ślokaṭīkāyāṃ ca yathā-

parasparataladvandvaṃ punarāsphoṭayed bhṛśam || iti || 32-33 ||

6- ya0 ā- sū0 51 patre astramudroddhāro yathā-

dakṣasya tarjanīmadhye savye karatale kṣipet |
abhighātena śabdaḥ syādastramudrā samīritā || iti || (15 | 7-14 vi0 sarvaḥ0 saṃ0)

|| iti śrīdurgāmudroddhāravi0 15 | 7 sarvaḥ sapannaḥ ||
|| dvi0 pari0 vi0 15-8 | nyāsapūjopayuktamudroddhāraḥ ||

15-8 | 1 lelihānākhyamudroddhāraḥ saṭīka śrīmahānirvāṇatantre 131 patre 6 
ullāse śrīmadādyā-prāṇapratiṣṭhāvidhau yathā-

iti tredhā yantramadhye lelihānākhyamudrayā |
saṃsthāpya vidhivat prāṇān kṛtāñjalipuṭo vadet || 75 || iti |

2 etacchlokaṭīkāyām || lelihānākhyamudrā śrīdakṣiṇāmūrtisaṃhitāyāṃ 
yathā-

tarjanīmadhyamānāmāḥ samāḥ kuryādadhomukhīḥ |
anāmāyāṃ kṣipedvṛddhāmūrddhvaṃ [dūrddhvāmiti-mudrāprakāre pathaḥ] 
kṛtvā kaniṣṭhikām ||
lelihā nāma mudreyaṃ jīvanyāse prakīrtitā || iti || (15-8 | 1- saṃ)

15-8 | 2 dhenumudrodhāraḥ | pa0 ka0 sū0 1 khaṇḍe 37 sūtre 57-58 patrayoḥ mūle 
ca dhenuyonimudrākaraṇaṃ ājñaptaṃ |
atra- ṭīkāyāṃ vṛttikāraḥ dhenuyonimudre prasiddhe ityāha tathāpi 
sādhakānāṃ sadupayogāya eṣā uddhriyate -

atraiva- pa0 ka0 sūtre 6 khṇḍe śyāmākrame 18 sūtrabhāṣyānte 198 patre yathā-

iyaṃ loke bahurūḍhā | tathāpi tatpramāṇaṃ likhyate -

tarjanyādicatuṣkaṃ tu protaṃ hastadvayasthitam |
dakṣatarjanyanāmāyāṃ vāmamadhyakaniṣṭhike ||
vāmatarjanyanāmāyāṃ dakṣamadhyakaniṣṭhike |
adhomukhī dhenumudrā- || iti ||

p. 633)

3- jñānārṇave- 4 paṭale 14 patre 37 śloke yathā-

parivartya karau paścāt tarjanīmadhyamāyugam |
kaniṣṭhānāmikāyugmaṃ parasparayutaṃ kuru || 37 ||
dhenumudreyamākhyātā amṛtīkaraṇaṃ bhavet || iti ||

4- ānandāśramagranthāvali 73 aṅkamudritaśrīgā0 pu0 paddhatau 9 patre ghāre 
ityupanāmakaśrīśaṅkarasūrirdarśayati yathā-

vāmāṅgulīnāṃ madhye tu aṅguṣṭhaṃ tvatha dakṣiṇam |
niyojya tarjanīṃ dakṣāṃ madhyayā vāmatarjanīm ||

vāmayā'nāmayā dakṣāṃ kaniṣṭhāṃ ca niyojayet |
dakṣayā'nāmayā vāmāṃ kaniṣṭhāṃ ca niyojayet ||
tatastvadhomukhāḥ kuryāddhenumudrā prakīrtitā || iti ||

5- tatraiva tadanu 10 patre prakārānteraṇa mudrā ityatra yathā -

dhenumudraivāmṛtī mudrā -

anyonyāṅguṣṭhasaṃlagnavistāritakaradvayā |
mahāmudreyamākhyātā nyūnādhikasamāpanī || iti ||

6- saṭīkaśāradā0 23 paṭale 843 patre yathā-

anyonyābhimukhāśliṣṭhā kaniṣṭhānāmikā punaḥ |
tathā ca tarjanīmadhyā dhenumudrā samīritā || 112 ||

amṛtīkaraṇaṃ kuryāttayā deśikasattaṃaḥ || iti ||

atra ṭīkā yathā - dhenumudrāmāha anyonyeti | kaniṣṭhā'nāmikā 
anyonyābhimukhāśliṣṭā tarjanīmadhyā 
tathaivānyonyābhimukhāśliṣṭetyarthaḥ | hastadvayāṅgulyaḥ 
anyonyāntarālapradeśena pūrvamadhyataḥ kṛtadakṣakaniṣṭhāvyatiṣaktāḥ 
kāryāḥ | tatra dakṣakaniṣṭhā dakṣānāmāpṛṣṭhamullaṅghya 
tadvāmabhāgamāgatā vāmānāmikayā yojyā | vāmā kaniṣṭhā tu 
yathāsthitaiva dakṣānāmayā | evaṃ vāmatarjanīvāmamadhyamā-
pṛṣṭhamullaṅghya taddakṣabhāgāgatadakṣamadhyamayā yojyā | dakṣatarjanī 
yathāsthitaiva vāmamadhyamayā yojyā |
taduktaṃ tatraiva -

7 - vāmāṅgulīrdakṣiṇānāmāṅgulīnāṃ ca sandhiṣu |
praveśya madhyamābhyāṃ tu tarjjanyau dve prayojayet |
kaniṣṭhe dve'nāmikābhyāṃ yuñjyāt sā dhenumudrikā || iti ||

p. 634)

8- ya0 ā0 sū0 - 51 patre dhenumudroddhāro dvidhā'bhihito yathā-

dakṣānāmāsamāyuktā vāmahastakaniṣṭhikā |
vāmānāmāsamāyuktā dakṣapāṇikaniṣṭhikā ||
dakṣasya madhyamākrāntā vāmahastasya tarjanī |
vāmamadhyamayākrāntā dakṣahastasya tarjanī ||
saṃyuktau kārayedvidvānaṅguṣṭhāvubhayorapi |
dhenumudrā nigaditā gopitā sādhakottamaiḥ ||
parivṛttakarau paścāttarjanīmadhyame yute |
kaniṣṭhānāmikāṅguṣṭhaṃ parasparayutaṃ kuru ||
dhenumudreyamākhyātā amṛtīkaraṇaṃ bhavet || iti | (15-8 | 1 vi0 saṃ0)

15 | 8-2 || yonimahāyonimudroddhāraḥ ||

1- || yonimudrodhāraḥ | pa0 ka0 sū0 1 khaṇḍe 37 sūtre 1 
ṭippaṇyāmanusandhānam ||

asyāḥ yonimudrāyā uddhāro'traiva pa0 ka0 sū0 5 khaṇḍe śrīlalitākrame 170 
patre 15 sūtrabhāṣye madhyame kuṭiletyādita uditaḥ || tato vijñāya eṣā mudrā 
kāryā yadyapariśīlitā syāt - || iti ||

2 - || mahāyonimudroddhāropyatraiva 170 patre yonimudroddhārāntaraṃ likhitaḥ -
iti vidāṅkurvantu vidvāṃsaḥ || iti ||

3- || yonimudroddhāraḥ saṭīkaśāradā0 4 paṭale 264 patre yathā-
 
mithaḥ kaniṣṭhike baddhvā tarjanībhyāmanāmike | 
anāmikordhvagāśliṣṭadīrghamadhyamayoradhaḥ [mudrāprakāre 41 śloke - tu 
anāmikordhvasaṃśliṣṭa-iti pāthaḥ ||] |
aṅṣṭhāgradvayaṃ nyasyed yonimudreyamīritā || iti ||

4- || mahāyonimudroddhāraḥ | mudrāprakāre -88 ślokato yathā-

tarjanyanāmikāmadhye kaniṣṭhākramayogataḥ |
karayoryojayitvaiva kaniṣṭhāmūladeśataḥ ||
aṅguṣṭhāgre tu nikṣipya mahāyoniḥ prakīrtitā || iti ||

p. 635)

pañcamudrāmayī yonimudrā || lallakṣaṇaṃ - viśeṣaśca-

5- || yonimudrātaḥ | trailokyakṣobhiṇī trailokyadrāviṇī trailokyākarṣiṇī 
trailokyavaśaṅkarī trailokyonmādakāriṇī iti pañcamudrāmayī yonimudrā 
yathā-
 
jñānārṇavatantre 4 paṭale 15 patre 51 ślokataḥ 56 ślokāntaṃ yāvat yathā -

parivartya karau samyaktarjanīvāhanī same || 51 ||
 
madhyame kuru tanmadhye yojayettadanantaram |
anyonyānāmike devi ! kaniṣṭhe tu yathā sthite || 52 ||

aṅguṣṭhābhyāṃ yojitābhyāṃ yonyākāraṃ tu kalpayet |
yonimudreyamākhyātā parā trailokyamātṛkā || 53 ||

iyameva hṛdi kṣiptā trailokyakṣobhiṇī bavet |
trailokyadrāviṇī nāma mukhasthā parameśvari ! || 54 ||

bhrūmadhyasthā mahādevi ! trailokyākarśaṇī bavet |
lalāṭasthā mahādevi ! trailokyavaśakāriṇī || 55 ||

brahmarandhrasthitā devi ! trailokyonmādakāriṇī |
pañcamudrāmayīṃ mudrāṃ yonimudrāṃ ca darśayet || 56 || iti ||

6- || itaraprakāreṇa yonimudrā yonibandhastatphalaṃ ca yathā -

saṭīkaśāradā0 2 paṭale 95 patre mantraśodhanaviṣaye-

śodhayedūrdhvapavano baddhayā yonimudrayā || iti mūlagranthaḥ - ślokaḥ 111 || 
iti ||

atra ṭīkā-
 
prakārāntareṇa śodhanamāha- śodhayediti | vakṣyamāṇalakṣaṇāṃ 
yonimudrāṃ baddhvā mūlādhārotpannān mantravarṇān 
brahmarandhraparyantaṃ gatāgatāni kurvato dhyātvā vāyudhāraṇaṃ kṛtvā 
sahasraṃ japediti śodhanaprakāramāhuḥ | taduktam - yoniṃ baddhvā bījaṃ 
bindvādipathena conmanīṃ prāpya tatra sahasraṃ mantraṃ japet sa mantraḥ 
prabuddhaḥ syāt - iti |

yonibandhalakṣaṇaṃ yathā-

pārṣṇibhāgāt susampīḍya yonimārgaṃ tathā gudam |
apānamūrdhvamākarṣenmūlabandho nigadyate ||
gudameḍhrāntaraṃ yonistāmākuñcya prabandhayet | 
yuvā bahvati vṛddho'pi satataṃ mūlabandhanāt || iti ||

yonisthānamudraṇāt yonimudrātvamasyāḥ | tadāhuḥ -

seyaṃ mayoktā khalu yonimudrā bandhaśca devairapi durlabho'syāḥ ||
(atra-sphoṭaḥ) 

p. 636)

anena bandhena na sādhyate yannāstyeva tat sādhakapuṅgavasya ||
chinnā rudhāḥ kilitāḥ stambhitā ye suptā mattā mūrcchitā hīnavīryāḥ |
dagdhāḥ srastāḥ śatrupakṣe sthitā ye bālā vṛddhā garvitā yauvanena |
ye nirbījā ye ca sattvena hīnāḥ khaṇḍībhūtāścāṅgamantrairvihīnāḥ |

ete mudrābandhanenaiva yonyā mantrāḥ sarve vīryavanto bhavanti || iti || 111 ||
(15 | 8-2 vi0 saṃ0)

15 | 8-3-|| vyāpakamudroddhāraḥ ||

1 iyaṃ vyāpakamudrā atraiva pa0 ka0 sū0 2 khaṇḍe gaṇanāyakapaddhatau 75 
patre 4 sūtrabhāṣye uktā yathā-

sakalamūlena karatalābhyāṃ sarvāṅge vinyaset | idameva vyāpakakaraṇam | 
taduktaṃ paramānandatantre -

talabhyāṃ nikhilāṅgasya sparśanaṃ vyāpakaṃ bhavet || iti ||

2 - śrīsaṭīkamahānirvāṇatantre -5 ullāse 124 ślokaṭīkāyāṃ ca yathā -

mūlamantreṇa hastābhyāmāpādamastakāvadhi |
mastakāt pādaparyantaṃ saptadhā vā tridhā nyaset |
ayaṃ tu vyāpakanyāso yathoktaphalasiddhidaḥ || 124 ||

atra ṭīkā - atha vyāpakanyāsaṃ brute | mūletyādinā | āpādamastakāvadhi 
pādamārabhya mastakaparyantaṃ mastakamārabhya pādaparyantaṃ ca 
pratihastābhyāṃ mūlamantreṇa saptadhā saptavāraṃ tridhā vā nyasennyāsaṃ 
kuryāt | mastakāditi- lyablope karmaṇyadhikaraṇe ceti karmaṇi pañcamī || 124 || || 
iti || 

3- vyāpakakaraṇāya prāktanaśrīmadādyārcanapadhatau yathā-

atha vyāpakanyāsaḥ || tatra praṇavādinamontena mūlamantreṇa 
keśādipādāntam āpādādi keśāntaṃ saptadhā vyāpakaṃ kuryāt || iti 
vyāpakanyāsaḥ || iti || (15 | 8-3 vi0 saṃ0)

15 | 8-4- || avaguṇṭhinīmudrāyām ||

1- avaguṇṭhinīmudrāśabdārthaḥ | kulārṇave 17 u0 158 patre yathā-

ācchādanaṃ samuddiṣṭamavaguṇṭhanamīritaṃ  || iti ||

2- avaguṇṭhanamudroddhāraḥ pa0 ka0 sū0 6 khaṇḍe 198 patre 18 sūtrabhāṣye 
avakuṇṭhana-mudrāsvarūpamuktaṃ tantre yathā -

p. 637)

hastadvayaṃ muṣṭirūpaṃ tarjanyāvṛjurūpake |
yugapat bhrāmayet tābhyāṃ mudreyamavakuṇṭhinī [atra 
mudrāvācakaśabdasamūhe -avakuṇṭhinī-avaguṇṭhanī-evaṃ śabdadvayamapi 
suprasiddhaṃ vartate tato na mugdhavyam |] ||
iti prajaguḥ || iti ||

3- || avakuṇṭhinyantatrimudrāṇāmuddhāraḥ jñānārṇave - 4 paṭale - 14 patre 
33-34 ślokayoḥ yathā-

aparā ca-

militaṃ muṣṭiyugalaṃ saṃnidhāpanarūpiṇī |
antaraṅguṣṭhamuṣṭibhyāṃ saṃnirodhanarūpiṇī ||

etasyā eva mudrāyāstarjanyau sarale yadā |
savyāpasavyabhramaṇānmudreyamavaguṇṭhanī || iti ||

4- kevalāvaguṇṭhanamudroddhāraḥ
ānandāśramagranthāvali 73 aṅka mudritaghāre 
ityupanāmakaśaṅkarasūriviracitaśrī gā0 pu0 paddhatau 10 patre yathā-

tarjanībhramaṇenaiva avaguṇṭhanamīritam || iti || (15 | 8-4 vi0 saṃ0)

15 | 8-5- || sarvasaṃkṣobhiṇīmudrāyām || 

1 - sarvasaṃkṣobhiṇīmudrāśabdārthaḥ pa0 ka0 sū0 5 khaṇḍe śrīlalitākrame 
151 patre 1 sūtrabhāṣye yathā-

sarvasaṃkṣobhiṇīpadārthaśca itthaṃ - sarvān padārthabhūtān kṣobhayatīti 
utpādayatīti sarvasaṃkṣobhiṇī 
kāryatvāvacchinnakāryatānirūpitakāraṇatā'śrayeti yāvat | iyameva vāmā 
śaktirityucyate |

taduktaṃ - yoginītantre -

yoniprācuryatassaiṣā sarvasaṃkṣobhikā punaḥ |
vāmā śaktipradhāneyam ......................|| iti || 

yoniḥ kāraṇatvāni teṣāṃ prācuryato bhūyastvena | ata eva sarvasaṃkṣobhiṇyā 
bāhyasvarūpe aṅgulīgrathanātmake'pi aṅguṣṭhe 
kaniṣṭhānāmāmadhyamāgrāṇāṃ yoge yonibhūyastvaṃ 
pratyakṣeṇānubhūyate | etena adṛśyarūpamapi tathetyunneyam || iti ||

2 - sarvasaṃkṣobhiṇīmudroddhāraḥ | atraiva pa0 ka0 sū0 śrīlalitākrame 5 
khaṇḍe 15 sūtrabhāṣye 168 patre yathā-

p. 638)

madhyame madhyage kṛtvā kaniṣṭhāṅguṣṭharodhite |
tarjanyau daṇḍavat kṛtvā madhyamoparyanāmike ||
eṣā tu prathamā mudrā sarvasaṃkṣobhakāriṇī || iti ||

3- tatraiva tantrarāje tu - ||

kaniṣṭhā'nāmikāmadhyāḥ nakhairanyonyasaṅgatā |
kṛtvā'ṅguṣṭhau kaniṣṭhāsthāvṛjū kuryācca tarjanīm |
sarvasaṃkṣobhiṇī mudrā trailokyakṣobhakāriṇī || iti ||

4- jñānārṇavatantre 4 paṭale 15 patre 54 śloke yathā -

parivartya karau samyak tarjanīvāhani same |
madhyame kuru tanmadhye yojayettadanantaram | 
anyonyānāmike devi ! kaniṣṭhe tu yathāsthite ||
aṅguṣṭhābhyāṃ yojitābhyāṃ yonyākāraṃ tu kalpayet |
yonimudreyamākhyātā parā trailokyamātṛkā |
iyameva [iyameva nāma uparyuktā yonimudretyarthaḥ |] hṛdi kṣiptā 
trailokyakṣobhiṇī bhavet || iti || (15 | 8-5 vi0 saṃ0)

15-8 | 6 || sarvavidrāviṇīmudrāyām ||

1- pra-sarvavidrāviṇīmudrāśabdārthaḥ pa0 ka0 sū0 5 khaṇde 151 patre 1 
sūtrabhāṣye yathā-

dvitīyā sarvavidrāviṇī sarvānutpannān drāvayati vardhayati poṣaṇena sā 
sarvavidrāviṇī sarveṣāṃ vastūnāṃ pālakatvādṛjusvabhāvā 
jyeṣṭhāśaktipracurā ca |

taduktaṃ yoginītantre

kṣubdhaviṣvasthitikarī jyeṣṭhā prācuryamāsthitā iti ||
kṣubdhasya utpannasyetyarthaḥ | yaśca saṃrakṣakaḥ sa ṛjuriti loke prasiddhā 
gāthā | ata eva asyā mudrāyāḥ bāhyarūpe'pi aṅguṣṭhena 
kaniṣṭhikānāmāyoge aṅgulicatuṣṭaye ṛjutvaṃ dṛśyate | evamādyatrikoṇe 
rekhātrayamadhye pūrvasyāṃ diśi sthitāyāṃ ṛjurekhāyāmeva tasyā 
adhiṣṭhānaṃ śāstraprasiddham || iti ||

2- || sarvavidrāviṇīmudroddhāraḥ pa0 ka0 sū0 khaṇḍe 168 patre 15 sūtrabhāṣye 
yathā -

etasyā eva mudrāyā madhyame sarale yadi | 
kriyate cenmaheśāni ! sarvavidrāviṇī tadā || iti ||
etasyā nāma uparyuktāyāḥ kṣobhiṇīmudrāyāḥ ityarthaḥ | 

p. 639)

atra bhāṣyaṃ yathā- madhyame madhyamepītyarthaḥ | etena tarjanīmadhyamayoḥ
dvayoḥ saralatvaṃ jñeyaṃ || iti vidrāviṇī || iti ||

3- jñānārṇavatantre 4 paṭale 15 patre yathā-

trailokyadrāviṇī nāma mukhasthā parameśvari ! || 54 || iti || (15 | 8-6 vi0 saṃ0)

15 | 8-7 || sarvākarṣiṇīmudreyam ||

1- sarvākarṣiṇīmudrāśabdārthaḥ atraiva pa0 ka0 sū0 5 khaṇḍe śrīlalitākrame 
151-152 patrayoḥ -1 sūtrabhāṣye yathā-

tṛtīyā sarvākarṣiṇī sarvākarṣaṇaśīlā | iyaṃ jyeṣṭhāvāmobhayātmikā |
taduktaṃ yoginītantre
- jyeṣṭhāvāmāsamatvena sṛṣṭeḥ prādhānyamāsthitā |
ākarṣiṇīti mudreyam ................. || iti ||

pūrvoktamudrādvayavācakapadaśakyatā'vacchedakayoḥ dvayorapi 
sarvākarṣiṇīpadaśakyatā'vacchedakatvaṃ bodhyam puṣpavacchabdavat | tatrāpi 
jyeṣṭhātvaviṣiṣṭavāmātvaṃ śakyatā'vacchedakaṃ na tu viparītaṃ | tathā sati 
jyeṣṭhāyā viśeṣyatvena prādhānyaṃ vācyam | prādhānye jyeṣṭhāyāḥ 
atisaralatvena pradhānānusāreṇa viśeṣaṇībhūtavāmāyā api 
pradhānānuvartinyāḥ saralatayā tarjanīmadhyamayoḥ bāhyarūpe kuṭilatvaṃ na 
syāt | vāmāyāḥ prādhānye tu tasyāḥ kuṭilatayā tadanusāreṇa apradhānāyā 
jyeṣṭhāyāḥ pradhānānuvartinyāḥ kuṭilatvaṃ yuktaṃ | ata eva bāhyasvarūpe 
aṅguligrathane sarvāsvaṅguliṣu kuṭilatvam || iti ||

2- sarvākarṣiṇīmudroddhāraḥ
atraiva - pa0 ka0 sū0 5 khṇḍe lalitākrame 168 patre 15 sūtrabhāṣye yathā-

madhyamātarjanīyugme vakrīkuryāt sulocane ! |
etasyā eva mudrāyāstadākarṣaṇakāriṇī || iti ||

3- jñānārṇavatantre 4 paṭale 15 patre yathā-
 
bhrūmadhyasthā mahādevi ! trailokyākarṣiṇī bhavet || iti ||

4- mudrāprakāre yathā-

madhyamātarjanībhyāṃ ca kaniṣṭhānāmike same |
aṅkuśākārarūpābhyāṃ madhyame parameśvari ! ||

p. 640)

aṅguṣṭhaṃ ca viyuñjīta kaniṣṭhānāmikopari |
iyamākarṣaṇīmudrā trailokyākarṣiṇī matā || iti || (15 | 8-7 vi0 saṃ0)

15-8 | 8- || sarvavaśaṅkarīmudrāyām ||

1- sarvavaśaṅkarimudrāśabdārthaḥ - pa0 ka0 sū0 5 khaṇḍe śrīlalitākrame 152 
patre 1 sūtrabhāṣye yathā-

caturthī sarvavaśyakarī- sarvān kṣityādiśivāntān vaśyaṃ svādhīnaṃ nayati 
prāpayatīti tathā | loke ākāśo dvividhaḥ dahraḥ prākṛtaśca | dahrākāśe'pi 
susūkṣmo'nya ākāśo'sti tasyānte suṣiraṃ sūkṣmaṃ iti- śrutiprasiddhaḥ | 
tanmadhye gāḍhamāśliṣṭā paraśivena yā ānandavigrahā mūrtiḥ sā 
sarvavaśyakarī- padavācyā | taduktaṃ uttaracatuśśatyām -

vyomadvayāntarālasthā bindurūpā maheśvari ! |
śivaśaktyātmasaṃśleṣādeṣā vaśyakarī smṛtā || iti ||

bindurūpeti kathanāt svarūpamapi tathā | ata evāṅguligrathane'pi asyā 
bhāhyarūpe bindvākāratā sarvāṅgulīnāṃ gāḍhasaṃśleṣo'pi vyaktaḥ || iti ||

2- || sarvavaśaṅkarīmudroddhāraḥ ||

pa0 ka0 sū0 5 khaṇḍe śrīlalitākrame 158 patre 15 sūtrabhāṣye-tatraiva caturthī 
mudrā sarvavaśaṅkaryuktā-

puṭākārau karau kṛtvā tarjanyāvaṅkuśākṛtī |
parivartya krameṇaiva madhyame tadadhogate ||

krameṇa devi ! tenaiva kaniṣṭhānāmike [nāmikādayaḥ-iti mudrāprakāre-
pāṭhaḥ] api |
saṃyojya nibiḍāḥ sarvāḥ aṅguṣṭhāvagradeśataḥ ||
mudreyaṃ parameśāni ! sarvavaśyakarī smṛtā || iti ||

asyārthaḥ - puṭākārau parasparaṃ pṛṣṭhasaṃlagnau ūrdhvāgrāṅgulikau 
hastau kṛtvā tatoṅguṣṭhavyatiriktāṅgulīḥ parasparamaṅgulisandhiṣu praveśya 
tarjanyādikaniṣṭhā'ntā aṅgulīḥ aṅkuśākārāḥ kuryāt | evaṃ kṛtvā 
tato'ṅguṣṭhadvayaṃ adhomukhaṃ tarjanyupari sthāpayet | iyaṃ sarvavaśaṅkarī 
iti bhāvaḥ ||

p. 641)

3- jñānārṇavatantre 4 paṭale 15 patre yathā-

[atroṭṭṅkitavaśaṅkarīmudroddhāronugata 635 patre -15 | 8-2 vi0 gata0 
yonimudroddhāramāśrityaiva jñeyaḥ kāryaśceti vinayāmi ||] lalāṭasthā 
mahādevi ! trailokyavaśakāriṇī || 55 || iti || (15 | 8-8 vi0 saṃ0)

15 | 8-9- unmādinīmudrāyām ||

1- unmādinīmudrāviṣaye pa0 ka0 sū0 5 khaṇḍe śrīlalitākrame 152 patre 1 
sūtrabhāṣye uktaṃ yathā-

pañcamī- uktaśivaśaktibindvormadhye sūkṣmarekhā nīvāraśūkavattanvī tasya 
madhye vahniśikhā iti- śrutiprasidhā | tasyāḥ śikhāyāḥ dvisvabhāvatvaṃ 
jyeṣṭhāsvabhāvatvaṃ ca | yathā loke- ekasyaiva daṇḍasya 
ghaṭotpādakaśaktimattvaṃ tannāśakaśaktimattvaṃ cāsti tathā'pi sa daṇḍaḥ 
kadācidutpādakaśaktipradhāno bhūtvā ghaṭamutpādayati 
kadācinnāśaśaktipradhānaḥ taṃ nāśayati | evaṃ loke bahusthale dṛṣṭam | 
tathā daṇḍasthānīyā uktarekhā | sā yadā 
jagadrakṣaṇakartṛtvaviśiṣṭajyeṣṭhāśaktipradhānā - tadā 
sarvonmādinīpadavācyā | taduktaṃ uttaracatuśśatyām yathā -

bindvantarālavilasatsūkṣmarūpaśikhāmayī |
jyeṣṭhāśaktipradhānā tu sarvonmādanakāriṇī || iti ||

ata eva tadaṅguligrathanavelāyāṃ aṅguṣṭhānāmātarjanyaḥ saralāḥ dṛśyante 
bindudvayākāraṃ madhyamādvayaṃ ca bhavati | tatrāpi 
niruktaśikhāsthānāpannagrathanavelāyāṃ anāmādvayameva jñeyam | 
madhyamādvayasya tadānīṃ bindudvayarūpatvena 
tanmadhyavartyanāmādvayasya tasya madhye vahniśikhā iti prasiddhaśikhātvaṃ 
yuktam || iti ||

2- unmādinīmudrāviṣaye | jñānārṇavatantre 4 paṭale 15 patre yathā -

[atroṭṭaṅkita-unmādinīmudroddhāronugata 635 patre 15 | 8-2 patre vi0 
gatayonimudroddhāramāśrītyaiva jñeyaḥ kāryaśceti vinayāmi || 
brahmarandhrasthitā devi ! trailokyonmādakāriṇī || iti ||

3- anyathā unmādinīmudrodhāraḥ | pa0 ka0 sū0 5 khaṇḍe śrīlalitākrame 169 
patre 15 sūtrabhāṣye yathā-

pañcamyapi tatraiva-

saṃmukhau tu karau kṛtvā madhyamāmadhyage'nuje |
anāmike tu sarale tadbahistarjanīdvayam ||

p. 642)

daṇḍākārau tato'ṅguṣṭhau madhyamānakhadeśagau |
mudraiṣonmādinī nāma kledinī sarvayoṣitām || iti ||

ayamarthaḥ - vāmakaniṣṭhopari dakṣakaniṣṭhāṃ 
tiryaganāmādvayoparimārgeṇa madhyamāparyantaṃ prasārya 
tādṛśakaniṣṭhā'gradvayaṃ madhyamādvayena dṛḍhaṃ gṛhnīyāt | 
gṛhītamadhyamānakhopari daṇḍākāramaṅguṣṭhadvayaṃ sthāpayet | 
tathā'nāmādvayaṃ parasparābhimukhyena sarale kuryāt | anāmikayoḥ 
pārśvadvaye tarjanīdvayamapi saralaṃ kuryāt | eṣā sarvonmādinī mudrā-
yoṣidvaśyakarī || iti || (15 | 8-9 vi0 saṃ0)

15 | 8-10 || khecarīmudrāyām ||

1- khecarīmudrāśabdārthaḥ pa0 ka0 sū0 5 khaṇḍe śrīlalitākrame 153 patre 1 
sūtrabhāṣye yathā-

saptami sarvakhecarī jīvānāṃ svakarmajanitarogādiduḥkhanāśanakṣamā 
śaktiḥ | ataḥ eva sarvarogaharacakrasthā bhavati | tadapyuktaṃ yoginītantre -

dharmādharmasya saṅghaṭṭādutthitā vittirūpiṇī |
vikalpotthakriyāloparūpadoṣavighātinī |

vikalparūparogāṇāṃ hāriṇī khecarī matā || iti ||

atra bhāṣyam | dharmaḥ śaktiḥ paraśivavṛttitvāt | na vidyate dharmo yatreti 
adharmaḥ paraṃ brahma paraśivaḥ | yadvā- na (kasyāpi) dharmaḥ adharmaḥ iti-
nañtatpuruṣa eva yuktaḥ paraśive śaktirūpadharmasattvena pūrvakalpe 
svoktavyāghātāt | tayoḥ saṅghaṭṭaḥ melanaṃ tena utthitā | yāvadvikalpaḥ 
tenotthitāḥ | yāḥ kriyāḥ nityanaimittikāḥ- tāsāṃ lopena yat pāpaṃ 
tatsambhavāḥ rogāḥ - tannāśinī khecarīti | ata 
evaitādṛśaśivaśaktisāmarasyadyotakaṃ bhāhyarūpe bāhudvayaparivartanam || 
iti ||

2 - || khecarīmudroddhāraḥ || pa0 ka0 sū0 5 khaṇḍe lalitākrame 169 patre 15 
sūtrabhāṣye yathā -

saptamīṃ khecarīmudrāṃ tatraiva vyācacakṣe yathā-

savyaṃ dakṣiṇahaste tu dakṣiṇaṃ savyahastataḥ |
bāhū kṛtvā maheśāni ! hastau samparivartya ca ||
kaniṣṭhānāmike devi ! yuktvā tena krameṇa tu |
tarjanībhyāṃ samākrānte sarvordhvamapi madhyame ||

p. 643)

aṅguṣṭhau tu maheśāni ! kārayet saralāvapi |
iyaṃ sā khecarīnāma mudrā sarvottamā priye ! || iti ||

3- atra tātparyaṃ - tatraiva yathā-

bāhū saralau prathamaṃ kṛtvā dakṣabāhūpari vāmaṃ sthāpayitvā 
punarvāmaṃ hastaṃ dakṣahastādho mārgeṇa vāmapārśve nirgamayya 
hastadvayāṅgulīḥ vakṣyamāṇarītyā grathnīyāt | tadyathā vāmānāmā 
kaniṣṭhe dakṣamadhyamādhomārgeṇa dakṣatarjanyāṃ nītvā- evaṃ 
dakṣānāmākaniṣṭhe vāmamadhyamā'dhomārgeṇa vāmatarjanyāṃ nītvā0 
hastadvayatarjanībhyāṃ svasamīpāgatānāmākaniṣṭhe dṛḍhaṃ gṛhṇīyāt | 
madhyame sarvordhvaṃ sarale evāgrābhyāṃ parasparasaṃlagne sthāpayet | 
aṅguṣṭhau saralau kṛtvā yonisādṛśyaṃ sampādayet | iyaṃ khecarimudrā | 
yadyapyuktārthaḥ sarvo'pi pūrvalikhitavacane nāsti tathā'pi-

vāmaṃ bhujaṃ dakṣabhuje dakṣiṇaṃ vāmadeśataḥ |
niveśya yojayet paścāt parivartya krameṇa hi ||

kaniṣṭhā'nāmikāyugme tarjanībhyāṃ nirodhayet |
madhyame sarale kṛtvā yonivat saralau tataḥ ||
aṅguṣṭhau khecarīmudrā pārthivasthānayojitā iti -
jñānārṇavavacanena saha ekavākyatāṃ sampādya niṣkāsito'rtho jñeyaḥ || iti 
|| 

4- khecarīmudroddhāraḥ | mudrāprakāranāmakagranthe 7 patredhaḥ 
mahāṅkuśamudroddhārānantaraṃ yathā-

savyaṃ dakṣiṇadeśe tu savyadeśe tu dakṣiṇam || 
bāhuṃ kṛtvā mahādevi ! hastau samparivartya ca |
kaniṣṭhānāmike devi ! yuktā tena krameṇa ca |
tarjanībhyāṃ samākrānte sarvordhvamapi madhyame ||
aṅguṣṭhau ca maheśāni ! saralāvapi kārayet |
iyaṃ tu khecarī nāma pārthivasthānayojitā || iti || (15-8 | 10 vi0 saṃ0)

15-8 | 11 || trikhaṇḍā'vāhanamudrayoḥ |

1 trikhaṇḍāmudrāśabdārthaḥ | pa0 ka0 sū0 4 khaṇḍe 135 patre sūtrabhāṣye 
yathā-

trikhaṇḍā mudrā trīn janmamṛtyujarāḥ
yadvā- sattvarajastamoguṇān khaṇḍayatīti trikhaṇḍā kevalamokṣapradetyarthaḥ |
yadvā- trīṇi khaṇḍāni - kalāḥ icchājñānakriyā'tmikāḥ tatsvarūpā 
trikhaṇḍā || taduktaṃ yoginītantre -

p. 644)

mudrā'khyā sā yadā saṃvidambikā trikalāmayī |
trikhaṇḍārūpamāpannā sadā sannidhikāriṇī |
sarvasya cakrarājasya vyāpikā parikīrtitā || iti ||

15-8 | 11-2 - trikhaṇḍāmudroddhāraḥ | pa0 ka0 sū0 5 khaṇḍe 15 sūtrabhāṣye 
167 patre yathā-

1- tatrāvāhane prathamaṃ viniyuktā trikhaṇḍocyate | trikhṇḍālakṣaṇamuktaṃ 
vāmakeśvaratantre -

parivartya karau spṛṣṭāvaṅguṣṭhau kārayet samau |
anāmā'ntargate kṛtvā tarjanyau kuṭilākṛtī ||

kaniṣṭhike niyuñjīta nijasthāne maheśvari ! |
trikhaṇḍeyaṃ samākhyātā tripurā'hvānakarmaṇi || iti ||

atra bhāṣyam - parivartanaṃ nāma hastadvayāṅgulimelanam | idaṃ 
sarvatrādhikārarūpaṃ sadanveti | aṅguṣṭhau saralau parasparaspṛṣṭau tathaiva 
kaniṣṭhe madhyame ca kuryāt | vāmānāmopari dakṣanāmāṃ tiryak prasārya- 
tayoradhaḥpradeśāt tarjanīdvayamānīya- kuṭilākārābhyāṃ tarjanībhyāṃ 
anāmā'gradvayaṃ dhārayet | anāme antargate yayoriti vigraheṇa labdho'rthaḥ | 
asyā uktarītyā nirmāṇe - khaṇḍatrayaṃ dṛśyate | upari 
saralāṅguṣṭhadvayayogaḥ | madhye tādṛśamadhyamāyogaḥ | adhaśca 
kaniṣṭhāyogastādṛśaḥ | evaṃ sati 
pūrvoktavāmājyeṣṭhāraudrīkalātrayarūpamasyāṃ sphuṭam | ata eva traya 
khaṇḍāḥ kalāḥ yasyāṃ-iti vigraheṇa trikhaṇḍeyam | atra-yadyapi 
khṇḍadvayanirmāṇaprakāra uktaḥ | madhyamakhaṇḍaracanāprakāro noktaḥ | 
tathā'pi trikhaṇḍeti yogārthasampattaye tantrāntaraṃ śaraṇīkṛtya 
khaṇḍatrayaṃ sampādanīyaṃ | khaṇḍatrayamuktamadhastāt yathā-

3 trikhaṇḍāmudrāyāḥ dvitīyaḥ prakāraḥ -

jñānārṇave -15 paṭale -59 patre 49 ślokottarārdhe -

pāṇidvayaṃ maheśāni ! parivartanayogataḥ |
yojayitvā tarjanībhyāṃ anāme dhārayet priye ||

madhyame yojayenmadhye kaniṣṭhe tadadhastataḥ |
aṅguṣṭhāvapi saṃyojya tridhā yugmakrameṇa tu ||
trikhaṇḍā mama mudreyaṃ tripurā'hvānakarmaṇi || iti ||

15 | 8-4 kevalāvāhanamudroddhāraḥ ||

asyāḥ āvāhanamudrāyā uddhāraḥ pa0 ka0 sū0 7 khaṇḍe śrīvārāhīkrame 21 
sūtrabhāṣye 217 patre'sti tatto jñeyaḥ-

p. 645)

5 jñānamālāyām-

devatā na ca santuṣṭā sarvadā saṃmukhī bhavet |
aṅguṣṭhau nikṣipet seyaṃ mudrā tvāvāhani matā || iti || ya0 ā0 sū0 124 patre -

6 saṭīkaśāradā0 23 paṭale 843 patre yathā-

samyak sampūritaḥ puṣ.paiḥ karābhyāṃ kalpito'ñjaliḥ |
āvāhanī samākhyātā mudrā deśikasattamaiḥ || iti || 107 ||

7 etacchlokaṭīkāyāṃ ca yathā-

hastābhyāmañjaliṃ kṛtvā'nāmikāmūlaparvaṇoḥ |
aṅguṣṭhau nikṣipet seyaṃ mudrā tvāvāhanī smṛtā || iti ||

8 jñānārṇavatantre 4 paṭale 13 patre yathā-

āvāhanādimudrāstu kathayāmi tavānaghe ! |
ūrdhvāñjalimadhaḥ kuryādiyamāvāhanī bhavet || iti || (15-8 | 11 vi0 saṃ)

15-8 | 12 || sannirodhanamudrāyām

1 sannirodhanamudroddhāraḥ
jñānārṇave 4 paṭale 14 patre yathā-

antaraṅguṣṭhamuṣṭibhyāṃ saṃnirodhanarūpiṇī || 33 || iti ||

2 ānandāśramagranthāvali 73 aṅkamudritaśrī0 gā0 pu0 paddhatau 9 patre ghāre-
ityupanāmaka śrīśaṅkarasūrirdarśayati yathā -

antaḥpraveśitāṅguṣṭhā saiva saṃrodhinī matā || iti ||

3 kevalasaṃnirodhanamudroddhāraḥ

saṭīkaśāradā0 23 paṭale 843 patre 108 ślokataḥ 109 ślokāntaṃ yāvat-
 
āśliṣṭamuṣṭiyugalā pronnatāṅguṣṭhayugmakā |
sannidhāne samuddiṣṭā mudreyaṃ tantravedibhiḥ |
aṅguṣṭhagarbhiṇī saiva sannirodhe samīritā || 109 || iti || (15-8 | 12 vi0 saṃ0) 

15 | 8-13- || varābhayamudrāviṣaye ||

1- varābhayamudrayordakṣiṇavāmahastagrahaṇaviṣayako matabhedaśāstrārthaḥ 
|| śrīvahnikalāpūjopadeśe saṭīkaśāradā0 2 paṭale 73 patre 16 śloke 
taṭṭikāyāṃ ca

p. 646)

yādīnāṃ daśavarṇānāṃ kalā dharmapradā imāḥ ||
abhayeṣṭakarā dhyeyā0 ityādi0 || 16 ||
tatra bhāṣyaṃ - abhayeṣṭeti | iṣṭo varaḥ | tatra dakṣiṇahaste abhayaṃ-vāmahaste 
varaḥ iti sampradāyavidaḥ
varadānamudroddhāraḥ - tatraiva uktañca-

ūrdhvīkṛto dakṣahastaḥ prasṛto'bhayamudrikā |
adhomukho vāmahastaḥ prasṛto varamudrikā || iti ||

daśamapaṭalyāmapi bhuvaneśīdhyāne -

dakṣeṅkuśābhaye prokte vāme pāśamatheṣṭadam | iti |

tantrāntare sarasvatīdhyāne -

sākṣasrakkalaśordhvabāhuyugalaṃ cādhaḥsamudrābhayaṃ
hastaṃ dakṣiṇamanyataḥ savaradaṃ yasyāḥ kare pustakam || iti ||

sautrāmaṇitantre pañcamīdhyāne -

cakraṃ khaḍgaṃ musalamabhayaṃ dakṣiṇābhirbhujābhiḥ |
śaṅkhaṃ kheṭaṃ halamapi varaṃ bibhratī vāmadorbhiḥ || iti ||

tantrāntare nityādhyāne -

kapālamabhayantathā |

dadhānāṃ dakṣiṇairhastaiḥ | ityādi |

anyatrāpi -

pāśaṃ patākāṃ carmā'pi śārṅgaṃ cāpaṃ varaṃ karaiḥ |
dadhānāṃ vāmapārśvasthaiḥ sarvābharaṇabhūṣitaiḥ ||

aṅkuśaṃ ca tato daṇḍaṃ khaḍgaṃ bāṇaṃ tathā'bhayam !
dadhānāṃ dakṣiṇairhastairāsīnāṃ padmaviṣṭare || iti ||

kādimate'pi-

brūhi deva maheśāna ! sthūlasūkṣmasvarūpayoḥ |
dhyānayoḥ karmaṇāṃ siddhiṃ vividhāṃ phalayogataḥ ||

tāsāṃ tattatkareṣūkteṣvāyudhānyatha śeṣataḥ |
śṛṇu vakṣye maheśāni ! krameṇa tvaṃ hi sāmpratam ||

vāmadakṣiṇayoḥ syātāṃ dvibhuje tu varābhayau [atra varābhaye iti pāṭhaḥ 
sādhuḥ] |
pāśāṅkuśau caturbāhau ṣaḍbhuje cāpasāyakau ||

carmakhaḍgāvaṣṭabhuje gadāśūle daśodite | iti |

ato yatra śaktidhyāne varābhaye tatra tatra prāyo'bhayaṃ dakṣiṇe vāme varamiti 
jñeyam | yattūttaraṣaṭke -

p. 647)

vāmenābhayasaṃyuktāṃ varadāṃ dakṣiṇena tu | iti ||

anyatrāpi-

pustakaṃ cābhayaṃ vāme dakṣiṇe cākṣamālikām |
varadānaratāṃ devīm0 | iti |

etat svasvagurusampradāyānusāreṇa tattaddevatāviśeṣe boddhavyamityalam || iti ||

2 abhaya varadamudrayoruddhāraḥ -

etayoruddhāraḥ saṭīkaśāradā0 18 paṭale 715 patre ṭīkāyāṃ yathā -

urddhvīkṛto vāmahastaḥ prasṛto'bhayamudrikā |
adhomukho dakṣahastaḥ prasṛto varamudrikā || iti | (15-8 | 13 vi0 saṃ0)

|| prārthanāmudrāyām ||

15 | 8-14 prārthanāmudroddhāraḥ | saṭīkaśāradā 4 paṭale 287 patre 90 
ślokaṭīkāyāṃ yathā -

prasṛtāṅgulikau hastau mithaḥ śliṣṭau ca sanmukhau |
kuryāt sve hṛdaye seyaṃ mudrā prārthanasaṃjñikā || iti ||

15-8 | 15 bījamudrāmudrāyām

1- bījamudrāśabdārthaḥ pa0 ka0 sū0 5 khaṇḍe śrīlalitākrame 153 patre 1 
sūtrabhāṣye yathā -

aṣṭamī bījamudrā jagataḥ ṣaḍvikāreṣu prāthamiko yo bhāvavikāraḥ 
sūkṣmarūpeṇa sattā tadabhimāninī śaktiḥ | taduktamuttaracatuśśatyām-

śivaśaktisamāśleṣasphuradvyomāntare punaḥ |
prakāśayantī viśvaṃ sā sūkṣmarūpasthitaṃ sadā |
bījarūpā mahāmudrā ........................... || iti ||

ayamarthaḥ vaṭabīje susūkṣme'pi kiṃcidākāśo'sti vibhutvāt | tasmin yathā 
mahāvṛkṣaḥ sūkṣmarūpeṇa tiṣṭati tathā ṣaṭtriṃśattattvāni śivaśaktigarbhe 
vidyante sūkṣmarūpeṇa saiva sattāghaṭo'sti paṭo'sti ityatra anuvartate | sā 
bījamudretyarthaḥ | sarvabījasthānāpannatvāt sarvabījā | sūkṣmatvādeva 
aṅguligrathanavelāyāṃ saṃkṣobhiṇyādyapekṣayā alpayonitvaṃ 
sūkṣmatvādvyāpakam || iti ||

2 bījamudroddhāraḥ pa0 ka0 sū0 5 khaṇḍe 170 patre 15 sūtrabhāṣye yathā -

p. 648)

aṣṭamī mudrā'pi tatraiva prakaṭitā -

parivartya karau spṛṣṭāvardhacandrākṛtī priye ! |
tarjanyaṅguṣṭhayugalaṃ yugapat kārayet tataḥ ||
adhaḥkaniṣṭhā'vaṣṭabdhe madhyame viniyojayet |
tathaiva kuṭile yojye sarvādhastādanāmike ||

bījamudreyamacirāt sarvasiddhipravartinī || iti ||

asyārthaḥ anāmāmadhyamāmārgeṇa vyatyaste kaniṣṭhike svādhobhāge 
madhyamā yathā tiṣṭhati tathā kuryāt | tato madhyamādvayaṃ 
kaniṣṭhādvayāvaṣṭambhakaṃ yathā tathā kuryāt | sarvādhaḥ sthite anāme 
yāvat kuṭile bhavataḥ tāvat kuryāt | aṅguṣṭhatarjanīyugalaṃ ardhacandrākṛti 
yathā bhavati tathā yojayet | iyaṃ bījamudrā bhavati || iti || (15-8 | 15 vi0 saṃ0)

15-8 | 16 śaṅkhamudroddhāraḥ ānandāśramagranthāvali 73 aṅkamudrita śrī0 
ghāre ityupanāmakaśaṅkarasūriviracitaśrī0 gā0 pu0 paddhatau 9 patre yathā -

1 vāmāṅguṣṭhaṃ tu saṅgṛhya dakṣiṇena tu muṣṭinā |
kṛtvottānaṃ tato muṣṭimaṅguṣṭhaṃ tu prasārayet ||
vāmāṅgulyastathā'śliṣṭāḥ saṃyuktāḥ syuḥ prasāritāḥ |
dakṣiṇāṅguṣṭhake lagnā mudrā śaṅkhasya bhūtidā || iti ||

2 ya0 ā0 sū0 52 patre yathā -

vāmāṅguṣṭhaṃ tu saṅgṛhya dakṣiṇena tu muṣṭinā |
kṛtvottānaṃ tato muṣṭiṃ aṅguṣṭhaṃ tu prasārayet ||
vāmāṅgulyastathāśliṣṭāḥ saṃyutāḥ suprasāritāḥ |
dakṣiṇāṅguṣṭhasaṃspṛṣṭā jñeyaiṣā śaṅkhamudrikā || iti ||
(15-8 | 16 vi0 saṃ0)

|| gālinīmudrāyām ||

15-8 | 17 gālinīmudroddhāraḥ || saṭīkaśāradā0 4 paṭale 264 patre 47 
ślokaṭīkāyāṃ yathā -

1 kaniṣṭhāṅguṣṭhakau saktau karayoritaretaram |
tarjanīmadhyamānāmāḥ saṃhatā bhugnavarjitāḥ (sajjitāḥ) |
mudraiṣā gālinī proktā śaṅkhasyopari cālitā || iti ||

p. 649)

2- śrīdurgākalpadrumapustikāyāṃ tu 122 patre yathā -

karadvayāṅguṣṭhatarjanyagrasaṃyoge gālinīmudrā || ityuktā iti ||
(15-8 | 17 vi0 saṃ0)

15-8 | 18 || saṃsthāpanamudrāyām ||

1- saṃsthāpanī śabdārthaḥ ||
kulārṇave 17 u 158 patre yathā-

āsane sanniveśaḥ syāt sthāpanaṃ kulanāyike ! || iti ||

2- saṃsthāpanīmudroddhāraḥ jñānārṇavatantre 4 paṭale 13  patre yathā -

ūrdhvāñjalimadhaḥ kuryādiyamāvāhanī bhavet
iyaṃ tu viparītā syāttadā vai sthāpanī matā || 32 || iti ||

3- ānandāśramagranthāvali 73 aṅkamudritaśrī gā0 pu0 paddhatau -9 patre ghāre 
ityupanāmakaśrīśaṅkarasūrirdarśayati yathā -

hastābhyāmañjaliṃ kṛtvā'nāmikāmūlaparvaṇoḥ ||
aṅguṣṭhau nikṣipeducchrau mudraiṣā'vāhanī smṛtā |
adhomukhī tviyaṃ cet syāt sthāpanī mudrikā bhavet || iti ||

4- saṭīkaśāradā 23 paṭale 843 patre 108 śloke yathā-

samyak sampūritaḥ puṣpaiḥ karābhyāṃ kalpito'ñjaliḥ |
āvāhanī samākhyātā mudrā deśikasattamaiḥ || 107 ||
adhomukhī kṛtā saiva proktā sthāpanakarmaṇi || iti || (15 | 8-18 vi0 saṃ0)

15 | 8-19 || sannidhāpanamudrāyām ||

1 - sannidhāpanamudrāśabdārthaḥ | kulārṇave 17 u0 158 patre yathā-

anyo'nyasammukhākāraḥ sannidhāpanamīritam || iti ||

2 - sannidhāpanamudroddhāraḥ || jñānārṇavatantre 4 paṭale 14 patre yathā -

militaṃ muṣṭiyugalaṃ sannidhāpanarūpiṇī || iti ||

3 - ānandāśramagranthāvali 73 aṅkamudritaśrī0 gā0 paddhatau 9 patre ghāre 
ityupanāmakaśrīśaṅkarasūrirdarśayati yathā -

ucchritā'ṅguṣṭhamuṣṭyostu saṃyogāt sannidhāpanī || iti ||

p. 650)

4- saṭīkaśāradā0 23 paṭale 843 patre 108 ślokepi yathā -

āśliṣṭamuṣṭiyugalā pronnatāṅguṣṭhayugmakā || 108 ||
sannidhāne samuddiṣṭā mudreyaṃ tattvavedibhiḥ || iti || (15 | 8-19 vi0 saṃ0)

15 | 8-20 || sammukhīkaraṇamudrāyām ||

1- sammukhīkaraṇamudroddhāraḥ || saṭīkaśāradā0 4 paṭale 287 patre 9 
ślokaṭīkāyāṃ yathā -

muṣṭidvayasthitāṅguṣṭhau sammukhau ca parasparam |
saṃśliṣṭāvucchritau kuryāt seyaṃ sammukhamudrikā || iti ||

2- saṭīkaśāradā0 23 paṭale 843 patre'pi yathā-

uttānau dvau kṛtau muṣṭī sammukhīkaraṇī smṛtā || iti || (15 | 8-20 vi0 saṃ0)

15 | 8-21 || sakalīkaraṇamudrāyām ||

1- sakalīkaraṇamudrāśabdārthaḥ || kulārṇave 17 ullāse 158 patre yathā -

devatāṅge ṣaḍaṅgānāṃ nyāsaḥ syāt sakalīkṛtiḥ || iti ||

2- sakalīmudroddhāraḥ | jñānārṇave 4 paṭale 14 patre yathā-

aṅgamantrairnyased devi ! devyaṅge sādhakottamaḥ |
sakalīkaraṇaṃ nāma mudreyaṃ vyāptikāriṇī || 35 || iti ||

3- saṭīkaśāradā0 23 paṭale 843 patre'pi yathā-

devatāṅge ṣaḍaṅgānāṃ nyāsaḥ syāt sakalīkṛtiḥ || iti ||

4- ya0 ā0 sū0 51 patre ṣaḍaṅganyāsamudrā uktā yathā-

hṛnnetraṃ tribhirākhyātaṃ dvābhyāmastraṃ śiro nyaset |
aṅguṣṭhena śikhā jñeyā digbhiḥ kavacamīritam || iti ||

arthādevaṃ ṣaḍaṅganyāsāḥ kāryāḥ na samastapāṇineti mārmikam || iti ||
(15 | 8-21 vi0 saṃ0)

15-8 | 22 || paramīkaraṇamudrāyāmatha ca mahāmudrāyāṃ ca ||

1- paramīkaraṇamudroddhāraḥ || kulārṇave 17 ullāse 158 patre yathā-

kṣamasvetyaṅgulirdevi ! paramikaraṇaṃ bhavet || iti ||

p. 651)

2- jñānārṇave 4 paṭale 14 patre 36 śloke'pi yathā-

karāvekatra saṃyojyāvaṅguṣṭhau bandhayet priye ! |
paramīkaraṇaṃ nāma mudreyaṃ tu tataḥ param || iti ||

3- mahāmudroddhāraḥ || saṭīkaśāradā0 23 paṭale 844 patre 113 ślokaṭīkāyāṃ 
ca yathā-

anyo'nyagrathitāṅguṣṭhā prasāritakarāṅgulī || 113 ||
mahāmudreyamuditā paramīkaraṇe budhaiḥ |
prayojayedimāṃ mudrāṃ devatāyāgakarmaṇi [mudrāprakāragranthe tu 
devatāhvānakarmaṇītipāṭhaḥ ||] || 114 || iti ||

atra ṭīkā yathā-

mahāmudrāmāha | anyo'nyeti pāṇyoraṅguṣṭhau paraspara-
grathanena granthirūpau śeṣāḥ saralāḥ || iti || (15-8 | 22 vi0 saṃ0)

15-8 | 23 || amṛtīkaraṇamudrāyām ||

1- amṛtīkaraṇamudrāśabdārthaḥ || kulārṇave 17 ullāse 158 patre yathā-

darśayeddhenumudrāṃ ca amṛtīkaraṇaṃ priye || iti ||

2- dvi0 pra0 amṛtīkaraṇamudrārthe | saṭīkaśāradā0  23 paṭale 843 patre 112 
ślokānte yathā-

anyo'nyābhimukhāśliṣṭā kaniṣṭhānāmikā punaḥ |
tathā ca tarjanī madhyā dhenumudrā samīritā ||
amṛtīkaraṇaṃ kuryāttayā deśikasattamaḥ || iti ||

3- atredaṃ jñeyaṃ-

ayamupariṣṭhāducyamāno mudroddhārastu dhenumudrāyā eva 
nāmṛtīkaraṇamudrāyāḥ iti nāśaṅkyam ||

amṛtīkaraṇamudrāyāḥ prāyaḥ prārthakyena 
nirūpaṇābhāvāddhenumudrayaivaitadamṛtīkaraṇavidhānamupadiṣṭaṃ yathā-

jñānārṇave śrī0 gā0 pu0 paddhatau |

amṛtīkaraṇaṃ kuryāt tayā deśikasattamaḥ | ityādinā śāradātilake ceti śam ||
(15-8 | 23 vi0 saṃ0)

p. 652)

15-8 | 24 bindumudroddhāraḥ | mudrāprakāre 76 śloke-

tarjanyaṅguṣṭhasaṃyogādagrato bindumudrikā || iti ||

15-8 | 25 saṃhāramudroddhārastatraiva yathā-

adhomukhe vāmahaste ūrdhvāsyaṃ dakṣahastakam |
kṣiptvāṅgulīraṅgulibhiḥ saṅgrathya parivartakam ||
eṣā saṃhāramudrā syādvisarjanavidhau smṛtā || iti ||

15-8 | 26 lokapālamudroddhāraḥ || saṭīkaśāradā0 4 paṭale 304 patre ṭīkāyāṃ 
yathā-

eṣāṃ pūjāyāṃ lokapālamudrā darśanīyā | yadāhuḥ-

pāṇimūle susaṃlagne śākhāḥ sarvāḥ prasāritāḥ |
lokeśānāmiyaṃ mudrā teṣāmarcāsu darśayet || iti || (15-8 vi0 sarvo'pi0 saṃ0)

|| iti śrīnyāsapūjopayuktamudroddhāraḥ samāptaḥ ||

15-9 atha śrīmadagniviṣayaka 1 jvālinī 2 saptajihvā 3 mṛgī 4 haṃsī 5 
sūkarīmudrāṇāmuddhāraḥ ||

1- jvālinīmudroddhāraḥ | ānandāśramagranthāvali 73 aṅkamudritaśrī0 gā0 
pu0 paddhatau 9 patre ghāre ityupanāmakaśrīśaṅkarasūrirdarśayati yathā -

padmākārau karau kṛtvā aṅguṣṭhau yojayedubhau |
vāmamadhyānāmikayoryugmenetaramadhyayā ||
saṃyojyāṅgulayaḥ śeṣāḥ saralā jvālinī bhavet || iti |

2- śrīsaṭīkaśāradā0 5 paṭale 318 patre 18 ślokaṭīkāyāṃ yathā-

maṇibandhau samau kṛtvā karau tu prasṛtāṅgulī |
madhyame milite kṛtvā tanmadhye'ṅguṣṭhau kṣipet ||
iyaṃ sā paramā mudrā jvālinī homakarmaṇi || iti ||

3- mudrāprakāre -

maṇibandhayutau kṛtvā prasṛtāṅgulikau karau |
kaniṣṭhāṅguṣṭhayugale militvāntaḥ prasārayet
jvālinī nāma mudreyaṃ vaiśvānarapriyaṅkarī || 115 || iti ||

p. 653)

4- mṛgīhaṃsīsūkarīmudrāsu ||

mṛgīhaṃsīsūkarīmudroddhāraḥ ānandāśramagranthāvali 73 
aṅkamudritaghāre ityupanāmakaśaṅkarasūriviracita śrī0 gā0 pu0 paddhatau 10 
patre yathā-

home mudrāḥ smṛtāstisro mṛgī haṃsī ca sūkarī |
mudrāṃ vinā kṛto homaḥ sarvo bhavati niṣphalaḥ ||
sūkarī karasaṅkocā haṃsī muktakaniṣṭhikā |
kaniṣṭhātarjanīmuktā mṛgī mudrā prakīrtitā || iti ||

5 | 1 saptajihvāmudroddhāraḥ saṭīkaśāradā0 14 paṭale 598 patre 95 
ślokaṭīkāyāṃ dhyānānantaraṃ saptajihvākhyamudrāṃ pradarśayet || 
tallakṣaṇaṃ yathā-

maṇibandhasthitau kṛtvā prasṛtāṅgulikau karau |
kaniṣṭhāṅguṣṭhayugale militvā'nyāḥ prasārayet ||

saptajihvākhyamudreyaṃ vaiśvānaravaśaṅkarī || iti ||

5 | 2 mudrāprakāre yathā-

maṇibandhasthitau kṛtvā prasṛtāṅgulikau karau |
kaniṣṭhāṅguṣṭhayugale militvāntaḥ prasārayet ||
kaniṣṭhāṅguṣṭhakau saktau kārayeditaretaram |

saptajihvākhyamudreyaṃ vaiśvānarapriyaṅkarī || iti ||

iti śrīmadagniviṣayakamudroddhāraḥ - saṃ || (159 vi0 saṃ0)

atha dvi0 pari0 vi0 15 | 10 prakīrṇamudroddhāraḥ

1- mālinīmudroddhāraḥ | ānandāśramagranthāvali 73 aṅkamudritaśrī0 gā0 
pu0 paddhatau 9 patre ghāre ityupanāmakaśrīśaṅkarasūrirdarśayati yathā-

karadvayāṅguṣṭhatarjanyagrasaṃyoge mālinī mudrā || iti ||

2 | 1 kumbhamudroddhāro'thavā kalaśamudroddhāraḥ | mudrā || iti ||

dakṣāṅguṣṭhaṃ parāṅguṣṭhe kṣiptvā hastadvayena tu |
sāvakāśāmekamuṣṭiṃ kuryāt sā kumbhamudrikā || 71 || iti ||

2 | 1 aparaḥ prakārastatraiva yathā -

muṣṭyorūrdhvakṛtāṅguṣṭhau tarjanyagre tu vinyaset ||
sarvarakṣākarī hyeṣā kumbhamudreyamīritā || 72 || iti || (15 | 10-2 vi0 saṃ0)

p. 654)

3- bhūtinīmudroddhāraḥ mudrāprakāre yathā-

tatrādau bhūtinīmudroddhāraḥ ||

baddhvā tu yonimudrāṃ vai madhyame kuṭile kuru |
aṅguṣṭhena tadagraṃ tu mudreyaṃ bhūtinī matā || iti ||

4- daṇḍinīmudroddhāro'pi tatraiva yathā-

vāmahastena muṣṭiṃ tu baddhvā karṇapradeśake |
tarjanī saralīkṛtya bhrāmayenmanuvittamaḥ ||
saubhāgyadaṇḍinī mudrā nyāsakāle'pi sūcitā || iti ||

5- trailokyamohinīkāmamudroddhāraviṣaye ||

taduddhāraḥ saṭīkaśāradā0 17 paṭale 705 patre 12 ślokaṭīkāyāṃ yathā-

(atra dhyānānantaramete mudre darśanīye)
hastau tu sampuṭau kṛtvā prasṛtāṅgulikau tathā |
tarjanyau madhyamāṅguṣṭhe aṅguṣṭau madhyamānvitau ||
kāmamudreyamākhyātā sarvasattvapriyaṅkarī [mudrāprakāre tu | 
sarvadevapriyaṅkarī iti pāṭhaḥ] |
mūrdhanyaṅguṣṭhamuṣṭī dve mudrā trailokyamohinī || iti || 120 ||

|| iti śrīmudrāviṣayaka 15 | 1 viṣayataḥ 15 | 10 viṣayāvadhiḥ 15 viṣayaḥ sarvo'pi 
sampūrṇaḥ ||

15 | 11-1 mudrākaraṇaphalam ||

śrīvāmakeśvaratantre 4 viśrāme 159 patre 67 śloke ṭīkāyāṃ ca |
mudrāyāstripurāyāstu devi siddhyaṣṭakānvitāḥ |
tā eva sarvacakreṣu pūjākāle pradarśayet || 67 ||

tripurāsambandhinyo yā mudrāstāḥ svarūpeṇaiva siddhyaṣṭakapradāḥ na 
punarmantrasādhanādi sāpekṣatayā | ataḥ pūjākāle praticakraṃ tā eva 
pradarśayet || iti ||

2- saṭīkaśāradā0 caturthapaṭale 298 patre 109 ślokaṭīkāyām

mudrayā yat kṛtaṃ karma tadakṣayyaphalapradam || iti ||

3- mudrāprakāranāmakagranthārambhe yathā-

atha mudrāḥ pravakṣyāmi sarvatantreṣu gopitāḥ |

yābhirviracitābhiśca modante mantradevatāḥ || iti ||

4- punarapi tatraiva-

vāmakeśvaratantroktāḥ prakāśyante'tra mudrikāḥ |

p. 655)

śṛṇu devi ! pravakṣyāmi mudrāḥ sarvārthasiddhidāḥ |
yābhirviracitābhiśca sānnidhyaṃ traipuraṃ bhavet || iti ||

|| iti śrīmudrāviṣayakaḥ 15 viṣayaḥ sarvopi sampūrṇaḥ ||

savinayam-

[nivedya] sutarāṃ suvācyamapi pustakādvismṛte-
rihaiva pariśeṣayāmi pariśiṣṭamiṣṭādṛtam |
vilokya tadidaṃ madīyaracanāśramaṃ cāntimaṃ
khalāya tadadānataḥ suphalayantu santaściram || iti ||

(śrīparaśurāmakalpasūtradvitīyapariśiṣṭadvitīyāvṛtyubhayakāraḥ)
etadgranthasya dvirāvṛttidvipariśiṣṭobhayakartrā saṅgrathitā granthānte 
śrīmadādyā devatāyāḥ saṅgītastutī rāgabaddhā yathā-

mandadādarātālena bhairavībhīmapalāsarāgābhyāṃ gīyate ||

kālike sakalalokapālike
prasīda devi sadya eva bhakte mayi kālike |		dhruvam
padanakhanatasurasurāribhāsitamaṇimaulike ||
karanikaranikḹptakāmyakāñcanakaṭimekhale |
mūrdhakhaḍgabhītyabhāvavaradapāṇijālike ||1 ||	prasīda0

kuṭajahāraguñjanmadhukaramanojñamālike |
yuddhabhāṇḍacaṇḍamuṇḍacitrakelidālike ||
pracaṇḍatuṇḍamuṇḍakhaṇḍabhārahāraśīlike || 2 ||	prasīda0

karṇakaryalaṅkṛte sudantakalikarālike ||
rasanākhiladevārisuvāridhiviṣajvālike ||
praśasyanasyayuktamauktikābhūṣaṇaśālike || 3 ||	prasīda0

nayanatrayayukkapālaphālakālakālike |
vyālacandraratnamukuṭabālacandrabhālike ||
muktakeśaleśaveṣahāsitaharatālike |
(kāsitakaravālike śoṣitaharahālike) || 4 ||		prasīda0

brahmamahiṣi brahma te pṛthaṅnate'dribālike |
sacarācarajantumanujadanujavitanujālike ||
gṛhāṇa namanamambike'mba kātyāyani kālike (kātyāyana bālike) || 5 || 
prasīda0

p. 656)

praṇetāsyāḥ stuteḥ

bhavadvidvadvaśaṃvadaḥśrīkṛpākāṅkṣī || sākaralālaśāstrī ||

|| sarvajanakalyāṇaśubhāśā ||

aputrāḥ putriṇaḥ santu putriṇaḥ santu pautriṇaḥ |
adhanāḥ sadhanāḥ santu jīvantu śaradāṃ śatam || 1 ||

kāle varṣatu parjanyaḥ pṛthivī sasyaśālinī |
deśo'yaṃ kṣobharahito brāhmaṇāḥ santu nirbhayāḥ || 2 ||

oṃ sahanāvavatu sahanau bhunaktu sahavīryaṃ karavāvahai |
tejasvi nāvadhītamastu mā vidviṣāvahai || 3 || oṃ śāntiḥ 3 (upaniṣat)

sarveṣāṃ manasāmaikyamastu

vṛttau maduktau mama dūṣaṇoktyā kiṃ vā guṇoktyā vibudhā vicārya |
grāhyaṃ guṇāḍhyaṃ sadasadviśodhyaṃ sarvān guṇān vetti śivāt paraḥ kaḥ ||

bhākānanapurabhūsurasāgniśrīprāgajijjayajñeśaḥ [atrastha bhākāna śabdena 
bhāvanagara śabdo jñeyaḥ iti śivam 7-9-49 saṅkhyārvācīnāhe 2005 
bhādrapada pūrṇimāyāṃ budhe susamāpitaṃ pustakam oṃ tatsat || śrī ||]
tajjena vyaracīyaṃ punarāvṛttiḥ sadiṣṭatoṣārtham- (pratāpanṛpakīrtyai-) śrīḥ-

punarāvṛttikālaḥ |

sudhāṅkāṅkadurgārase vaikrame'smin |
madhau kalpasūtradvirāvṛttireṣā ||
samārambhitā tat tayā devatāstāṃ |
ramārogyabhogapradā prekṣakāraṇam ||

1996 saṃvadi 1962 śāke caitrakṛṣṇa 10 tithyāṃ bhaume 1-5-40 dine 
śrīsaurāṣṭradeśāntargatabhāvanagaravāstavyaśrautasmārtāgnihotriṣaṭtriṃśa
ccāturmāsayājidvivedi-
śrīprāgajiprapautraḥ yajñeśvaratanujanmā sākaralālaśāstrī 
śrīdeśikendrapaṇḍitavaśaṃvadaḥ ||

śrīvaḍodarā śrīrājakīyasaṃskṛtamahāvidyālayādhyāpakaḥ 
rājakīyadevagṛhasatatāśritaḥ śrīdharmaparāyaṇa 
bhāvanagarādhīśaparamparāśritaśca -

|| samāpto samastagranthaḥ oṃ śrītatsajjagadambācaraṇārpitostu śivamastu 
sarveṣām- ||

|| śrīḥ ||


tṛtīyapariśiṣṭam |

a [40 pṛṣṭhe'ntimapaṅktyanantaramavaśiṣṭo'yaṃ bhāgaḥ]

ata eva naiṣadhe-

vibhajya merurna yadarthisātkṛto na sindhurutsargajalavyayairmaruḥ |
amāni tattena nijāyaśoyugaṃ dviphālabaddhāścikurāḥ śiraḥsthitam ||

iti bhinnaliṅgavacanakaḥ prayogaḥ tathā ca bahuvacanasyāgatiriti vācyam sruve 
sruktvamasti | srucaḥ saṃmārṣṭi ityuktapūrvoktasamuhāt pṛthakkṛtya snuvamagre 
iti vidhānāt homasādhanatvaṃ cāsti iti tamādāya bahuvacanopapattiḥ | na ca 
evamapi dvayaṃ jātaṃ bahutvaṃ kathaṃ iti vācyam srugbhyāṃ sruvābhyāṃ 
vā patnīssaṃyājayanti iti vākyena kvacitsruvadvayasya sattvāt | yadvā dhruvayā 
samaṣṭiya jurjuhoti iti dhruvāyā api homaśeṣatvāt juhūdhruvāsruvān gṛhītvā 
bahuvacanopapattiḥ suvacetyalaṃ aprakṛtavicāreṇa ||

juhvādyanyatamatvena indriyāṇi daśa bhāvayet | indriyāṇāṃ 
pūrvoktahavirādhāratvena yuktaṃ tadbhāvanam | śaktayaḥ svaniṣṭhāḥ 
saṃkucitāḥ yāḥ icchājñānakriyāḥ śaktayaḥ tā eva jvālāḥ | agnau 
homakartuḥ jvālā hastādidāhakatvena duḥkhadā iti loke spaṣṭam | tadvat hotuḥ 
saṃkucitaparamaśivasyemāḥ śaktayo duḥkhadā iti jvālātvena bhāvanaṃ 
yuktam |  evaṃ svasaṃkucitacaitanyarūpo jīvaḥ tadabhinno yaḥ śivaḥ 
śuddhacaitanyaṃ taṃ homādhāra bhūtāgnitvena bhāvayet | svābhinneti 
viśeṣaṇāt svaśivayorapyabhedaṃ bhāvayediti bhāvanāntaraṃ jñāpitam | 
yadyapi iyaṃ bhāvanā satataṃ śivatāsamāveśaḥ ityanenaiva prāptā tathā'pi 
sā śivo'hamiti bhāvanā atra pāvako'hamiti śivasya pāvakatvena bhāvanamiti 
vailakṣyaṇam | pāvake prakāśatvaṃ śive'pi prakāśatvamiti yuktaṃ tathā 
bhāvanam | svayaṃ paricchinnacidrūpo hotā homakartṛtvena bhāvayet | 
ayamarthaḥ tantrāntare mantraviśeṣe sphuṭaḥ -

antarnirantaramanindhanamedhamāne
mohāndhakāraparipanthini saṃvidagnau |
kasmiṃścidadbhutamarīcivikāsabhūmni
viśvaṃ juhomi vasudhā'diśivāvasānam || iti ||

atraivakāreṇa .....................

ā [48 pṛ0 26 paṅktyanantaramavaśiṣṭamidaṃ śirṣakam]

- tantrāntaropasaṃhāravicāraḥ -



###########   END OF FILE  #######