####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00530
Uniform title: sanatkumāratantra

Description: 
Vaiṣṇava tantra. Probably a late work of possibly Bengali origin. Teaches a program of daily worship focusing on the morning rites.


Notes: 
Data-entered by the staff of Muktabodha under the supervision of Mark S.G. Dyczkowski.

Revision 0: Sept. 13, 2021.

Publisher : Rasika Monana Caṭṭopādhyāya
Publication year : Pre-1900
Publication city : Calcutta
Publication country : India
####################################################



sanatkumāratantram

prathamaḥ paṭalaḥ

oṃ namo gaṇeśāya

namaḥ kanaka - kiñjalka - pīta - nirmala - vāsase |

mahābhuja - ripuskandha - ghṛṣṭacakrāya cakriṇe || 1 ||

vivikte bhuvane ramye siddhacāraṇasevite |

sanatkumāraṃ natvā'tha papracchedaṃ pulastyakaḥ || 2 ||

kṛṣṇasya ca mahābāhormāhātmyaṃ vaktumarhasi |

mantrarājaṃ yathānyāyaṃ prasādaṃ kuru suvrata || 3 ||


sanatkumāra uvāca


śṛṇu rūpaṃ pravakṣmyāmi kṛṣṇasyārbhakakarmaṇaḥ |

yasyā'haṃ vaśagā nityaṃ ravirudrāḥ savāsavāḥ || 4 ||

kiṃ vā te mahimā tasya vaktavyo dvijasattamaḥ |

divi bhuvyantarikṣe ca viṣṇurityabhidhīyate || 5 ||

vidhānaṃ tasya vakṣyāmi yathātattvaṃ niśāmaya |

ādau gurumukhāllabdhvā mantraṃ bhaktisamanvitaḥ || 6 ||

gurave dakṣiṇāṃ dattvā pūrvasevāṃ samācaret |

dvijasantarpaṇaṃ kṛtvā prahṛṣṭenā'ntarātmanā || 7 ||

ādau naimittikaṃ kṛtvā sūryaṃ sampūjya bhaktitaḥ |

devārcanaṃ tathā kṛtvā yāgaṃ kuryād dayānvitaḥ || 8 ||

girau nadyāṃ vane tīrthe goṣṭhe devālaye tathā |

aśvatthe sāgarānte vā japet pratisahasrakam || 9 ||

śataṃ caivāṣṭakaṃ kṛtvā bhuktvā sthāneṣu buddhimān |

ṣoḍaśenopacāreṇa saṃpūjya madhusūdanam || 10 ||

kāle dhyātvā yathānyāyaṃ naivedyaṃ ca nivedayet |

viṣṇave hṛdayāhvānaṃ mantrarājaṃ niśāmaya || 11 ||

samāhitaḥ śucirbhūtvā bhaktimānuddharet budhaḥ |

oṅkāraṃ pūrvamuddhṛtya trivāraṃ parameśvaram || 12 ||

yad yat kāmo bhavenmantrī mantrasyādau nivedayet |

padmajaṃ tanmukhopetaṃ śakrasyopari saṃsthitam || 13 ||

sendubinduśikhopetaṃ prathamaṃ sarvakāmadam |

tīrthaṃ vahnisamārūḍhaṃ śriyā mūrdhniṃ vyavasthitam || 14 ||

śaśibinduśikhāvyāptaṃ dvitīyaṃ śrīpradāyakam |

rudraṃ padmasamāyuktaṃ pāvakopari saṃsthitam || 15 ||

sendubinduśikhākrāntaṃ tṛtīyaṃ mokṣadaṃ matam |

khāntaṃ nāntaṃ tathā chāntaṃ dhāntaṃ lāntaṃ caladvayam || 16 ||

vāntaṃ māntaṃ tathā ṣāntaṃ lāntaṃ sāntāntakaṃ tathā |

eparam aiparaṃ caiva aparāntaṃ parātrayaṃ || 17 ||

ādyaṃ gopījanapadaṃ vallabhāya tataḥ param |

svāhā śabdaṃ tato dadyāt sampūrṇaṃ siddhidāyakam || 18 ||

|| iti sanatkumārīye prathamaḥ paṭalaḥ samāptaḥ || 1 ||

atha dvitīyaḥ paṭalaḥ

atha samyak pravakṣyāmi yajanaṃ dhyānameva ca |

dhyānaṃ caiva trikālasya naivedyaṃ ca niśāmaya || 1 ||

brāhme muhūrte utthāya śucirbhūtvā samāhitaḥ |

āsane upaviśyātha guruṃ natvā puṭāñjaliḥ || 2 ||

ātmānaṃ brahmaṇo rūpaṃ cintayecca muhurmuhuḥ |

japtvāmantraṃ ca sarveṣāṃ vādināṃ vijayī bhavet || 3 ||

tataḥ snātvā śucirbhūtvā sandhyādīn vaidikāṃstathā |

kuryād gurūpadeśena laukikānapi deśikaḥ || 4 ||

śrīkṛṣṇaṃ tarpayāmīti mūlamuccārya tarpayet |

pūjādvāre copaviśya pādaprakṣālanaṃ sudhīḥ || 5 ||

śikhāyā bandhanaṃ caiva cāstramantreṇa mantravit |

ācamya dvāradevāṃstu pūjayet sādhakottamaḥ || 6 ||

vighnānutsādayitvā tu hastabhūmyorviśodhanam |

guruṃ natvā gaṇeśaṃ ca vāstupūjāṃ samācaret || 7 ||

brahmāṇaṃ pūjayitvā tu ātmāsanamataḥ param |

bhūtaśuddhiṃ vidhāyā'tha deve'haṃ cintayed budhaḥ || 8 ||

ṛṣyādinyāsasarvāṃśca mātṛkāṇāṃ tato nyaset |

prāṇāyāmatrayaṃ kuryādaṅganyāsaṃ ca mantravit || 9 ||

ācakraṃ ca sucakraṃ ca vicakraṃ ca dvijottamaḥ |

trailokyarakṣaṇaṃ cakramasurāntakameva ca || 10 ||

ekaikaṃ pūrvataḥ kṛtvā cakraśabdaṃ niyojayet |

caturthyantaṃ tu saṃsādhya svāhāśabdamanantaram || 11 ||

tathā cāṅgaṃ samuccārya pratyekaikaṃ niyojayet |

namaḥ svāhā svadhā vauṣaṭ vaṣaṭkāraṃ tathāstrakam || 12 ||

hṛdi mūrdhni śikhādeśe tanau dikṣu tathākramam |

svaśaktibhiḥ keśavādyairnyāsaṃ kuryād vicakṣaṇaḥ || 13 ||

vibhūtipañjaraṃ nyasya nyaset tanmūrtipañjaram |

tattvanyāsaṃ prakurvīta karanyāsaṃ tathā budhaḥ || 14 ||

mantranyāsaṃ prakurvīta vyāpakaṃ ca tridhā nyaset |

vibhūtipañjaranyāsaṃ yatra yatra daśākṣaram || 15 ||

evaṃ kalpoktakān nyāsān krameṇa parikalpayet |

śaṅkhasthāpanakaṃ cāpi kuryād gurupadeśataḥ || 16 ||

arghyaṃ cāpi tathā kṛtvā dravyamabhyukṣya yatnataḥ |

pīṭhaṃ prakalpya dehe sve dharmādīna vai prapūjayet || 17 ||

hṛdi caivamanantādīn pūjayecca yathāvidhi |

bāhyaṃ mukhyaṃ gṛhasthasya varṇino'ntaḥprapūjanam || 18 ||

yantraṃ nirmāya tāmre tu hyanantādīn prakalpayet |

tasya koṇeṣu dharmādīn tatpārśve pūrvadharmakān || 19 ||

madhye'pi pūjayennityamanantādi caturdaśa |

keśareṣu ca pūjā vai vimalādyāśca devatāḥ || 20 ||

ātmānaṃ devatāṃ bhāvya svanāsāpuṭakena tu |

niḥsārya pūjayed devaṃ samāvāhya ca yatnataḥ || 21 ||

anantādyaiśca bījaiśca prāṇasthānaṃ samācaret |

pādyādīṃścaiva yatnena pūjayedākṛtīgaṇān || 22 ||

dhūpadīpau samāsādya naivedyaṃ ca nivedayet |

japtvā mantraṃ ca tantroktaṃ pūjayed devavat svayam || 23 ||

śrīkṛṣṇaṃ tarpayāmīti mūlamucārya yatnataḥ |

vāratrirarghyatoyena tarpayenmantramadhyake || 24 ||

prāṇāyāmatrayaṃ kuryād vyāpakaṃ ca trayaṃ nyaset |

tantroktena vidhānena prayogaṃ kurute sudhīḥ || 25 ||

|| iti sanatkumāratantre pūjāsūtraṃ nāma dvitīyaḥ paṭalaḥ || 2 ||

atha tṛtīyaḥ paṭalaḥ


atha vistārya vakṣyāmi sādhakānāṃ hitāya ca |

haṃsamantreṇa jīvaṃ vai satattvaṃ kuṇḍalīyutam || 1 ||

yogayuktena vidhinā paraṃ brahmaṇi yojayet |

vāmanāsāpuṭe dhūmraṃ vāyubījaṃ vicintayet || 2 ||

tena saṃśodhitatanurdakṣe vātaṃ virecayet |

dakṣanāsāpuṭe raktaṃ vahnibījaṃ vicintayet || 3 ||

tena sañjanito vahniḥ śuṣkaṃ dehaṃ ca bhasmasāt |

kṛtvā taṃ vāmayā secyaṃ ṭhaṃ bījaṃ śuklavarṇakam || 4 ||

lalāṭe yojya candrasthaṃ tena vai tāḍayet tataḥ |

tena sañjanitaṃ dehaṃ pavitraṃ sumanoharam || 5 ||

bhāvayitvā vidhānena jīvaṃ svasthānamānayet |

so'haṃ mantreṇa kuṇḍalyā tattvaiśca parivāritam || 6 ||

bhūtaśuddhiriyaṃ proktā sarvasampatpradāyinī |

prāṇayāmamatho vakṣye yathāvadavadhāraya || 7 ||

dakṣayā recayed vāyuṃ dvātriṃśanmānamānataḥ |

īḍayā karṣayed vāyuṃ manoḥ ṣoḍaśamātrayā || 8 ||

suṣumnāmadhyagaṃ kṛtvā vidyāsaṅkhyena dhārayet |

yenaiva pūrayed vāyuṃ tenaiva recayet punaḥ || 9 ||

yenaiva recayet pūrvaṃ tenaiva pūrayet punaḥ |

ubhayormadhyagaṃ kṛtvā tattanmātrābhidhāraṇam || 10 ||

tataḥ pūrvoktarūpaṃ tat prāṇāyāmaṃ vyavasthitam |

mātṛkānyāsakaṃ vakṣye yathāvadavadhāraya || 11 ||

lalāṭe ca mukhe caiva cakṣuṣoḥ karṇayostathā |

nasośca gaṇḍayoścaiva oṣṭhayordantayostathā || 12 ||

mastake ca mukhe caiva svarān vai kramato nyaset |

hastayoḥ pādayoścaiva sandhiṣvagre yathāvidhi || 13 ||

pārśvayoḥ pṛṣṭhataścaiva nābhau ca udare tathā |

kakārādīn makārāntān varṇān tattadgatān nyaset || 14 ||

hṛdaye skandhadvandve ca aṃsayośca nirāmayaḥ |

yādayaścaiva catvāro nyasanīyāḥ prayatnataḥ || 15 ||

śādayaśca ṣaḍevaite hṛdayādiṣu nirdirśat |

hastapādayuge nābhau vaktrauṣṭhasuviniścayaḥ || 16 ||

mātṛkānyāsametaddhi proktaṃ sarvasamṛddhidam |

pīṭhanyāsamatho vakṣye yathāvadavadhāraya || 17 ||

kalpayedātmano dehe pāṭhaṃ dharmāditaḥ kramāt |

bhāskaraṃ ca gaṇeśānaṃ śivaṃ durgāṃ prapūjayet || 18 ||

aṃśoruyugayorvidvān prādakṣiṇyena deśikaḥ |

dharmaṃ jñānaṃ ca vairāgyamaiśvaryaṃ nyasatu kramāt || 19 ||

mukhapārśvanābhipārśveṣvadharmādīn prakalpayet |

dharmādayaḥ smṛtāḥ pādāḥ pīṭhagātrāṇi cāpare || 20 ||

anantahṛdaye padmamasmin sūryendupāvakān |

eṣāṃ svasvakalā nyasyāḥ praṇavākṣarapūrvikāḥ || 21 ||

satvādīṃstrīn guṇān nyasyet tathaiva trigurūttamaḥ |

ātmānamantarātmānaṃ paramātmānameva ca || 22 ||

jñānātmānaṃ nyased dhīmān māyābījapuraḥsaram |

namo bhagavate brūyāt viṣṇave ca padaṃ vadet || 23 ||

sarvātmasaṃyogapadaṃ yogapadmapadaṃ vadet |

pīṭhātmane hṛdanto'yaṃ manustavādirīritaḥ || 24 ||

vimalotkarṣiṇī jñānā kriyāyogā ca śaktayaḥ |

brahmīśayostatheśānā nāntargrahā navamī matā || 25 ||

yadāsanaṃ bhaved yasya tasmin devāsane yajet |

icchā jñānaṃ kriyā caiva kāminī kāmadāyinī || 26 ||

ratī ratipriyā caiva madhye caiva manonmanī |

so'haṃ sadāśivapretaṃ ṅe'taṃ devyā samāśrayet ||

pīṭhanyāsaṃ vidhāyetthaṃ cintayediṣṭadevatām || 27 ||

|| iti sanatkumāratantre pīṭhayajanaṃ nāma tṛtīyaḥ paṭalaḥ || 3 ||

atha caturthaḥ paṭalaḥ


dhyātvā viśvamayaṃ devaṃ navīnajaladaprabham |

navanītaṃ dakṣahaste dadhānaṃ pītavāsasam || 1 ||

āvāhya pūjayenmaṃtre śaṅkhasthāpanapūrvakam |

śaṅkhamantrāmbubhiḥ prokṣya vāmato vahnimaṇḍale || 2 ||

sādhāraṃ sthāpayed vidvān binduśrutasudhāmayaiḥ |

toyaiḥ sugandhipuṣpādyaiḥ pūjayet taṃ yathāvidhi || 3 ||

ādhāraṃ pāvakaṃ śaṅkhaṃ sūryaṃ toyaṃ sudhākaram |

smared vahnyarkacandrāṇāṃ kalāstāstāṣvanukramāt || 4 ||

mūlamantraṃ japet spṛṣṭvā nyaset tasyā'ṅgamantravit |

hṛnmantreṇā'bhisampūjya hastābhyāṃ chādayet punaḥ || 5 ||

japenmantraṃ yathākālaṃ deśiko devatādhiyā |

astramantreṇa saṃrakṣya kavacenā'vaguṇṭhya ca || 6 ||

dhenumudrāṃ samāpādya bodhayet taṃ svamudrayā |

gaṃge ca yamune caiva godāvari sarasvati || 7 ||

narmade sindhu kāveri jale'smin sannidhiṃ kuru |

tīrthāvāhanamantro'yaṃ proktaḥ sarvasamṛddhidaḥ || 8 ||

dakṣiṇe prokṣaṇīpātramādāyā'dbhiḥ prapūritam |

kiñcidarghyāmbu saṅgṛhya prokṣaṇyambhasi yojayet || 9 ||

arghyasyottarataḥ kāryaṃ pādyārghyācamanīyakam |

ātmānaṃ yāgavastūni sarvatra prokṣayed guruḥ || 10 ||

śaṅkhasthāpanakaṃ samyak proktaṃ sarvasamṛddhidam |

śivādayaśca sampūjyāḥ keśaveṣvaṅgadevatāḥ || 11 ||

āvāhya prāṇamanunā prāṇasthāpanamācaret |

pāśāditryakṣarasyānte haṃso'muṣya padaṃ punaḥ || 12 ||

kramāt prāṇā iha prāṇāstathā jīva iha sthitaḥ |

amuṣya sarvendriyāṇi bhūyo'muṣyapadaṃ vadet || 13 ||

vāṅmanonayanaśrotraghrāṇaprāṇāḥ padānyatha |

paścādihāgatya mukhaṃ ciraṃ tiṣṭhantu ṭhadvayam || 14 ||

ayaṃ prāṇamanuḥ proktaḥ sarveṣāṃ prāṇadāyakaḥ |

svāgataṃ kuśalapraśnaṃ nigadedagrato guruḥ || 15 ||

pādyaṃ pādāmbuje dadyād devasya hṛdayātmanā |

etacchyāmākadūrvābjaviṣṇukrāntābhirīritam || 16 ||

svadhāmantreṇa vadane dadyādācamanīyakam |

jātī - lavaṅga - kakkolaistaduktaṃ tantravedibhiḥ || 17 ||

arghyaṃ diśet tato mūrdhni śiromantreṇa deśikaḥ |

gandha - puṣpā'kṣata - yava - kuśāmbu - tila - sarṣapaiḥ || 18 ||

dūrvābhiḥ sarva - devānāmetadarghyamudīritam |

svadhātmanā tataḥ kuryānmadhuparkaṃ samāhitaḥ || 19 ||

ājyaṃ dadhimadhūnmiśrametaduktaṃ manīṣibhiḥ |

svadhātmanā tataḥ kuryādadbhirācamanīyakam || 20 ||

gandhādbhiḥ kārayet snānaṃ vāsasī paridhāpayet |

dadyād yajñopavītaṃ ca hārādyābharaṇaiḥ saha || 21 ||

arghyeṇā'bhyukṣya deveśaṃ gandhādyaiḥ pūjayet tadā |

gandha - candana - karpūra - kālāgurubhirīritam || 22 ||

ṣoḍaśairupacāraiśca pūjayitvā pratyatnataḥ |

āvṛtīḥ pūjayed bhaktyā yathāvadavadhāraya || 23 ||

vāsudevaṃ devakīṃ ca nandaṃ nandapriyaṃ tathā |

kamalāṃ bhāratīṃ caiva ratiṃ śāntaṃ ca patrataḥ || 24 ||

śaṅkhaṃ cakraṃ gadāṃ caiva padmaṃkaustubhameva ca |

śrīvatsaṃ vatsakaṃ caiva vanamālāṃ samarcayet || 25 ||

mūlainaiva khagādhyakṣaṃ pūjayet tadanantaram |

svabījena tato devaṃ gandhapuṣpādibhiḥ kramāt || 26 ||

yathāsaṅkhyaṃ tato mantraṃ padmākṣeṇa japedatha |

samarcayet tato devaṃ hṛdayādīnanantaram || 27 ||

ātmadehamayaṃ kṛtvā prāṇāyāmaṃ samācaret |

atha devasya nirmālyairviṣvaksenaṃ samarcayet || 28 ||

evaṃ krameṇa kartavyā kṛṣṇapūjā samāhitaiḥ |

paścād gobhyaḥ samabhyarcyagrāsaṃ kuryāt suśobhanam || 29 ||

keyūrāṅgadahāraiśca kuṇḍalaiḥ kaṭisūtrakaiḥ |

nūpurairvanyapuṣpaiśca nānāratnairvibhūṣitam || 30 ||

sacandragrahanakṣatrairnirmalaṃ gaganecaraṃ |

atha ratnaprabhāyuktaṃ sarvālaṅkārabhūṣitam || 31 ||

sanakādyaiḥ stūyamānaṃ vimānasthairnabhogataiḥ |

sarvalakṣaṇasaṃyuktaṃ prātaḥ kṛṣṇaṃ samarcayet || 32 ||

tathā kalpaprabhāyukte vanye kāñcanamaṇḍape |

ratnapīṭhe samāsīnaṃ kāminīśatamadhyagam || 33 ||

cāmarādyairvījyamānaṃ candanā'gurucarcitam |

dhyāyenmadhyandinaṃ kṛṣṇaṃ sundaraṃ smaravardhanam || 34 ||

gopālagaṇamadhyasthaṃ sundarīśatamadhyagam |

tatsarvaṃ svavaśaṃ kṛtvā krīḍayantaṃ mudānvitam || 35 ||

gandhacandanamālādyairbhūṣitaṃ nayanotsavam |

yathā madhye tathāratrau cintayet kañjalocanam || 36 ||

kāñcane rājate pātre tāmrake vā'pyabhāvataḥ |

bhaktyā kṛṣṇaṃ samabhyarcya naivedyaṃ ca nivedayet || 37 ||

prātardadhyaudanaṃ dadyāt pāyasaṃ ca tathottaram |

tathā saśarkaraṃ kṣīraṃ rātrau dadyāt suśobhanam || 38 ||

ebhireva vidhānaiśca saṃsevyaḥ parameśvaraḥ |

dharmārthakāmamokṣāṃśca labhate japakṛnnaraḥ || 39 ||

|| iti sanatkumāratantre caturthaḥ paṭalaḥ || 4 ||

atha pañcamaḥ paṭalaḥ


atha mantrāntaraṃ vakṣye yathāvadavadhāraya |

mantradehaṃ pravakṣyāmi triṣu lokeṣu durlabham || 1 ||

yasya grahaṇamātreṇa sarvajño jāyate naraḥ |

acalāṃ ca labhet lakṣmīṃ kavitvaṃ bhavasammatam || 2 ||

asādhyaṃ sādhayenmantrī devānāmapi durlabham |

idaṃ me hṛdayaṃ guhyaṃ yat praṣṭavyaṃ mahāmune || 3 ||

anyeṣu sādhitā mantrāḥ sarve ca phaladāyakāḥ |

gṛhītasya phalaṃ dātā mantroyadyapyasādhitaḥ || 4 ||

santuṣṭo hi gururyatra tasya tuṣṭo jagatpatiḥ |

mantraṃ nyasya gurorvākyaṃ na kadācid vikalpayet || 5 ||

gurordehaṃ samāśritya mantradeho'vatiṣṭhate |

tataḥ sarveṇa bhāvena guruṃ mantreṇa pūjayet || 6 ||

gandhamālyairdhūpadīpaiḥ sampūjya gurumantrataḥ |

tato mantraṃ ca gṛhṇīyāt vastreṇā''cchādya mastakam || 7 ||

dakṣiṇāṃ gurave dadyāt suvarṇaṃ dhenumeva vā |

sarvakarma prakurvīta vittaśāṭhyavivarjitaḥ || 8 ||

adakṣiṇaṃ kṛtaṃ karma vṛthā viprendraniścitam |

nāradāya purā proktaṃ svayaṃ viṣṇuratandritaḥ || 9 ||

svarṇaṃ me dakṣiṇā dehi sākṣasūtrakamaṇḍalum |

tato mantraṃ gṛhāṇa tvaṃ yathāvidhi mahāmune || 10 ||

vidhihīnaṃ kṛtaṃ karma siddhiṃ naiva prayacchati |

bhūmibhāge same śuddhe gomayenopalepite || 11 ||

tatra śaṅkhaṃ pratiṣṭhāpya mātṛkāvapuṣi nyaset |

paraṃ brahmāditaḥ kṛtvā varṇasaṅghaṃ samuddharet || 12 ||

sāntaṃ mathāntaṃ māṃ vahniṃ vāmatrikabindusaṃyutam |

tribhirekārṇavībhūtaṃ svāhāntaṃ mantramuddharet || 13 ||

tato gurumukhāllabdhvā hṛdaye ca niveśayet |

ayutaṃ ca japaṃ kṛtvā haviṣyāśī jitendriyaḥ || 14 ||

daśāṃśaṃ juhuyādagnau madhuratrayasaṃyutam |

sahasraṃ vā'pi puṣpāṇāṃ vaiṣṇavānāṃ susaṃyataḥ || 15 ||

māṇikyasādhanārthaṃ ca sahasramadhikaṃ japet |

daśāṃśaṃ juhuyāt tasya japasya dviguṇaṃ smṛtam || 16 ||

tasya tattvaṃ nibodha tvaṃ vāhyamānaṃ mahāmune |

śaṃbhormūlākṣaraṃ hyasya triśaktiścāpyavasthitā || 17 ||

śivomantaṃ tathā brahmā cendubindusvarūpavān |

etat te kathitaṃ vatsa hṛdayaṃ mantramuttamam || 18 ||

kasyacinna hi vaktavyaṃ triṣu lokeṣu durlabham |

evaṃ saṃsādhite mantre sādhitaṃ bhuvanatrayam || 19 ||

kāmaṃ kṛtvā japenmantraṃ śucirbhūtvā jitendriyaḥ |

karmaṇā manasā vācā kuryād yadabhivāñchitam || 20 ||

tat tasya siddhyati kṣipraṃ yadyapi syāt suduṣkaram |

viṣṇurbrahmā ca rudraśca durgā ca sarvadevatāḥ || 21 ||

ayaṃ mantro mahāmantraḥ sarveṣāṃ hṛdaye sthitaḥ |

mantramenaṃ samuccārya labhate dviguṇaṃ phalam || 22 ||

pūjanaṃ cāsya mantrasya yathākāryaṃ tathā śṛṇu |

aṅganyāsakaranyāsau mantrasyā'pyakṣareṇa tu || 23 ||

kṛtvā cā'ṣṭadalaṃ padmaṃ devamāvāhya yatnataḥ |

sthaṇḍile vā jale vā'pi gopālaṃ pūjayet tadā || 24 ||

dhyānaṃ caiva pravakṣyāmi gopālasya jagadguroḥ |

jaṭilaṃ dvibhujaṃ nagnaṃ nīlotpaladalaprabham || 25 ||

bālaṃ ṣaṇmāsadeśīyaṃ devaṃ jānucalaṃ harim |

dāmnā caivodare baddhaṃ vṛkṣāvudūkhalena ca || 26 ||

līlayā karṣamāṇaṃ ca tiryakkṛtamudūkhalam |

yamalārjunayormadhye drutamāgatya līlayā || 27 ||

mantreṇā'nena cotpāṭya vṛkṣau dvau yojanāyatau |

dāmni vāsukimāropya mantreṇā'nena yantritam || 28 ||

udūkhale drutaṃ lagnaṃ nāgarājena veṣṭitam |

samākṛṣya samutpāṭya hasantaṃ yamalārjunau || 29 ||

hāhākāraparaiḥ sarvairgopagopījanairvṛtam |

yaśodayā kṛtaṃ kroḍe krandantyā''gatya satvaram || 30 ||

sarvato jagato rūpaṃ gopaveśatirohitam |

evaṃ sañcintya gopālaṃ māyāmayamanāmayam || 31 ||

pādyādibhiḥ samabhyarcya japakarma samāpayet |

ebhirevā'thavā pūjā kartavyā suravairiṇaḥ ||

dhūpaṃ dīpaṃ ca naivedyaṃ tāmbūlādikamarpayet || 32 ||


|| iti sanatkumārīye pañcamaḥ paṭalaḥ || 5 ||

atha ṣaṣṭhaḥ paṭalaḥ


kṛṣṇāya padamābhāṣya govindāya tataḥ param |

gopījanapadasyā'nte vallabhāya dviṭhāvadhiḥ || 1 ||

kāmabījādirākhyāto manuraṣṭādaśākṣaraḥ |

aṣṭādaśārṇasaṃyukta ukto mantro yathāvidhi || 2 ||

śaktiśrīpūrvako'ṣṭādaśārṇo viṃśativarṇakaḥ |

smaraḥ kṛṣṇāya ṭhadvandvaṃ ṣaḍvarṇo manurīritaḥ || 3 ||

praṇavaṃ hṛdayaṃ kṛṣṇaṃ ḍe'ntamuktvā tataḥ param |

tādṛśaṃ devakīputraṃ huṁphaṭ - svāhāsamanvitam || 4 ||

ṣoḍaśākṣaramantro'yaṃ govindasya samīritaḥ |

śrīmanmukundacaraṇaṃ yadeti śaraṇaṃ tataḥ || 5 ||

ahaṃ prasanna ityukto maukundo'ṣṭādaśākṣaraḥ |

pañcāntako dharāsaṃstho manurbinduvibhūṣitaḥ || 6 ||

piṇḍabījamidaṃ proktaṃ sarvasiddhipradāyakam |

piṇḍaṃ ratipaterbījaṃ namo bhagavate tataḥ || 7 ||

nandaputrāya bālādivapuṣe śyāmalāya ca |

gopījanapadasyānte vallabhāya dviṭhāvadhiḥ || 8 ||

anuṣṭub mantra ākhyāto gopālasya jagatpateḥ |

gopālāyā'gnijāyāntaḥ ṣaḍakṣara udāhṛtaḥ || 9 ||

kṛṣṇagovindakau ḍentau saptavarṇo manurmataḥ |

śrīśaktimārāḥ kṛṣṇāya māraḥ saptākṣaraḥ paraḥ || 10 ||

klīṃ glauṃ śrīṃ śyāmalāṅgāya natiḥ syād daśavarṇakaḥ |

cakrī vāmanasargau ca manurekākṣaraḥ smṛtaḥ || 11 ||

kāmamindraśca māyā ca lavalāñchitamastakaḥ |

ekavarṇo manuḥ proktaḥ kāmamantraḥ puroditaḥ || 12 ||

etat sarvaṃ hṛṣīkeśaṃ caturthyantaṃ namaḥpadam |

aṣṭavarṇo manuḥ proktaḥ sarveṣāṃ hṛdayasthitaḥ || 13 ||

vāgbhavaṃ kāmabījaṃ ca kṛṣṇāya surasundarī |

govindaṃ ṅeyutaṃ caiva ramābījamanantaram || 14 ||

daśākṣaraṃ tataḥ paścāt svabījaṃ tadanantaram |

dvāviṃśatyakṣaro mantraḥ sarvasiddhipradāyakaḥ || 15 ||

kāmaṃ māyāṃ ca lakṣmīṃ ca daśārṇaṃ ca tataḥ param |

trayodaśārṇamantro'yaṃ proktaḥ sarvasamṛddhidaḥ || 16 ||

kāmaṃ lakṣmīṃ ca māyāṃ ca jayakṛṣṇapadadvayam |

māyāṃ lakṣmīṃ tathā kāmaṃ jayaṃ dehi padadvayam || 17 ||

caturviṃśatyakṣarātmā svāhānto manurīritaḥ |

kāmaṃ piṇḍaṃ tathā lakṣmīṃ gopālāya tataḥ param || 18 ||

lakṣmīṃ piṇḍaṃ tathā kāmaṃ govindāya padaṃ tathā |

kāmapiṇḍaṃ tathā lakṣmīṃ svāhāntaḥ praṇavādikaḥ || 19 ||

|| iti sanatkumārīye ṣaṣṭhaḥ paṭalaḥ || 6 ||

atha saptamaḥ paṭalaḥ


kramāt pūjāvidhiṃ vakṣye yathāvadavadhāraya |

nārado'sya ṛṣiḥ prokto gāyatrīcchanda īritam || 1 ||

devatā kathitaḥ kṛṣṇaḥ sarvakāmaphalapradaḥ |

catuṣkaraṇavedāddhi netrayugmākṣaraiḥ kramāt || 2 ||

pañcāṅgāni manoḥ kuryāt mantravinnetravarjitam |

anyeṣāmapi mantrāṇāṃ ṛṣyādyāḥ pūrvadevatāḥ || 3 ||

aṅgāni kāmabījena sanetraṃ dīrghayuktakaiḥ |

daśākṣare virāṭ chanda ācakrādyaiśca pañcakam || 4 ||

pūrvaproktāni karmāṇi nyāsādīni vidhānataḥ |

kuryācchuddhamatirdhīmān dhyānamevaṃ jagatpateḥ || 5 ||

smared vṛndāvane ramye mohayantamanāratam |

govindaṃ puṇḍarīkākṣaṃ gopakanyāḥ sahasraśaḥ || 6 ||

ātmano vadanāmbhoje preritākṣimadhuvratāḥ |

piḍitāḥ kāmabāṇena ciramāśleṣaṇotsukāḥ || 7 ||

muktāhāralasatpīnatuṅgastanabharānatāḥ |

srastadhammillavasanā madaskhalitabhūṣaṇā || 8 ||

dantapaṅktiprabhodbhāsispandamālādharāñcitāḥ |

vilokayantīrvividhairvibhramairbhāvagarvitaiḥ || 9 ||

phullendīvarakāntiminduvadanaṃ barhāvataṃsapriyaṃ
	śrīvatsāṅkamudārakaustubhadharaṃ pītāmbaraṃ sundaram |
gopīnāṃ nayanotpalārcitatanuṃ gogopasaṅghāvṛtaṃ
	govindaṃ kalaveṇunādanaparaṃ divyāṅgabhūṣaṃ bhaje || 10 ||

evaṃ dhyātvā japellakṣaṃ pañca cā'ṣṭādaśākṣaram |

anyeṣāṃ lakṣamekaṃ ca daśalakṣaṃ daśārṇakam || 11 ||

pūrvasevāṃ purā kuryāt pūrvoktavidhinā smṛtaḥ |

bālagopālamantrāṇāṃ dhyānaṃ śṛṇu yathāvidhi || 12 ||

navīnanīradaśyāmaṃ pakvabimbādharaṃ vibhum |

navanītaṃ pāyasaṃ ca dhārayantaṃ karadvaye || 13 ||

homaścaiva tathā kāryo japasyaiva daśāṃśataḥ |

sarpiṣā navanītena dadhnā vā pāyasena vā || 14 ||

mallikā - mālatī - puṣpaiḥ śuklapadmena caiva hi |

tarpaṇaṃ taddaśāṃśena viśuddhena jalena vā || 15 ||

gandhapuṣpākṣatairyuktamabhiṣekaṃ ca mastake |

brāhmaṇān bhojayeccaiva daśāṃśakramayogataḥ || 16 ||

yad yadaṅgaṃ bhaved bhaṅgaṃ tatsaṅkhyādviguṇo japaḥ |

homāśaktau japaḥ prokto homasaṅkhyācaturguṇaḥ || 17 ||

viprāṇāṃ kṣatriyāṇāṃ ca rasasaṅkhyāguṇaḥ smṛtaḥ |

vaiśyānāṃ vasusaṅkhyākameṣāṃ strīṇāmayaṃ vidhiḥ || 18 ||

yaṃ varṇamāśritaḥ śūdraḥ sa ca tasya vidhiṃ caret |

vaiśyāśritasya śūdrasya daśasaṅkhyāguṇaḥ smṛtaḥ || 19 ||

homārtho'yaṃ vidhiḥ proktastarpaṇe'pi nibodhata |

tarpaṇe dviguṇaṃ proktaṃ śaktau ca sarvasādhanam || 20 ||

|| iti sanatkumārīye japahomādinirṇayaḥ saptamaḥ paṭalaḥ || 7 ||

athāṣṭamaḥ paṭalaḥ


atha prayogān vakṣyāmi yathāvadavadhāraya |

lakṣmīprasūnairjuhuyāt śriyamicchannaninditām || 1 ||

sājyenā'nnena juhuyād ājyānnasya samṛddhaye |

āraṇyaiḥ kusumairviprān jātibhiḥ pṛthivīpatīn || 2 ||

campakaiśca sitopetairvaiśyāṃśca kamalaiḥ śubhaiḥ |

śūdrāṃśca vaśayenmantrī trimadhvaktairyathākramāt || 3 ||

evaṃ hutvā dvijaśreṣṭhaḥ sarvān kāmānavāpnuyāt |

tato bhaktyā śyāmalāṅgaṃ prasannaṃ gokulaśriyam || 4 ||

śiśuveṣadharaṃ devaṃ kiṅkiṇīdāmamaṇḍitam |

smṛtvā taṃ tarpayenmantrī dugdhabuddhyā śubhairjalaiḥ || 5 ||

dhanadhānyāṃśukādīni prītastasmai dadāti saḥ |

mālatī kusumairdevamarcayitvā yathāvidhi || 6 ||

āyurārogyamaiśvaryaṃ mano'bhīṣṭāni vindati |

kāśaprasūnairjuhuyādaṣṭottarasahasrakam || 7 ||

nāmamātreṇa vaśagāstasya syuḥ sakalā nṛpāḥ |

hutvā bilvaphalaiḥ pakvaiḥ śriyamāpnotthaninditām || 8 ||

praphullairaruṇāmbhojaistāmeva labhate punaḥ |

hutvā jyotiṣmatītailaṃ sahasraṃ bahusaṅkhyayā || 9 ||

subhago jāyate samyak sarveṣāṃ nā'tra saṃśayaḥ |

vidhānenā'munā mantrī mahārogāt pramucyate || 10 ||

aśvatthasamidhairhomaḥ parāhṛtadhanāvahaḥ |

ājyāktadūrvāhomena mucyate mahato bhayāt || 11 ||

yasya nāmayutaṃ puṇyaṃ japedayutasaṅkhyayā |

sa bhaved dāsavat tasya nātra kāryā vicāraṇā || 12 ||

bahunā'tra kimuktena manunā sādhakottamaḥ |

sādhayedakhilān kāmān sākṣād viṣṇurivā'paraḥ || 13 ||

aputro dvādaśīṃ prāpya pūjayitvā jagadgurum |

devakīsuta govinda vāsudeva jagatpate || 14 ||

dehi me tanayaṃ deva tvāmahaṃ śaraṇaṃ gataḥ |

iti stutvā vidhānena pūjayedāvṛtigaṇān || 15 ||

ādāvaṅgāvṛtīḥ pūjyā dāmādi tadanantaram |

dikṣu dāmasudāmau ca vasudāmaśca kiṅkiṇī || 16 ||

rukmiṇyādyaṣṭamahiṣīrdaleṣu pūjayet tataḥ |

dakṣiṇakaradhṛtakamalārasapūritamudri tānyakarāḥ || 17 ||

rukmiṇyākhyā tathā satyā nāgajityā sunandā ca |

mittavindhā sulakṣaṇā ṛkṣajā suśīlā tathā || 18 ||

tato yajed dalāgreṣu vasudevaṃ ca devakīm |

nandagopaṃ yaśodāṃ ca balabhadraṃ subhadrikām || 19 ||

gopā gopyaśca sampūjyāścitramālyānulepanāḥ |

yathāvidhi imāḥ pūjyā brahmādyāstadanantaram || 20 ||

indrādyāḥ pūjanīyāśca vajrādyāstadanantaram |

brāhmī māheśvarī caiva kaumārī vaiṣṇavīti ca || 21 ||

varāhī ca tathendrāṇī cāmuṇḍā saptamī tathā |

aṣṭamī syānmahālakṣmīḥ proktāḥ syurviśvamātaraḥ || 22 ||

indrādīn pūjayed bāhye jātihetisaśaktikān |

vajraṃ śaktiṃ ca daṇḍaṃ ca khaḍgaṃ pāśaṃ tathā'ṅkuśam || 23 ||

gadāṃ śūlaṃ ca cakraṃ ca padmaṃ tatraiva pūjayet |

naivedyaṃ vidhivad datvā devaṃ dhyātvā japet sudhīḥ || 24 ||

stutvā praṇamya śirasā jalenā''tmānamarpayet |

itaḥ pūrvaṃ padaṃ dattvā prāṇabuddhipadaṃ tataḥ || 25 ||

dehadharmādhikārato jāgratsvapnapadānyatha |

suṣuptyavasthāsu manasā vācā karmaṇā tathā || 26 ||

hastābhyāṃ ca yathā padbhyāmudareṇa padaṃ tathā |

śiśnā ca yat smṛtaṃ caiva yaduktaṃ yat kṛtaṃ tathā || 27 ||

tat sarvaṃ brahmārpaṇamato bhavatu vahnisundarī |

māṃ madīyaṃ ca sakalaṃ haraye samyak samarpayet || 28 ||

oṃ tatsaditi ca prokto mantraḥ svātmasamarpaṇe |

pratyahaṃ pūjayed devaṃ ṣoḍaśairupacārakaiḥ || 29 ||

tadaśaktau tu pūjā syād deśopacārikī tathā |

tadaśaktau pañcabhistu pūjā syādupacārakaiḥ || 30 ||

āsanaṃ svāgataṃ caiva pādyādipañcakaṃ tathā |

snānaṃ vāso bhūṣaṇaṃ ca gandhapuṣpaṃ ca dhūpakam || 31 ||

pradīpaṃ caiva naivedyaṃ puṣpāñjalirataḥ param |

gandhādayo naivedyāntā pūjā pañcopacārikā || 32 ||

arghyādyāḥ pañca pañcaiva gandhādyā iti bhedataḥ |

namaskṛtya ṣaḍaṅgaṃ ca pañcāṅgaṃ ca vidhānataḥ || 33 ||

devaṃ visṛjya hṛdaye viṣvaksenaṃ samarcayet |

daṇḍavat praṇipatyā'tha gaṇḍābhyāṃ cibukena ca || 34 ||

nāsayā ca kapālena manasā vacasā tathā |

sāṣṭāṅgakaḥ praṇāmaḥ syāt hareḥ prītipradāyakaḥ || 35 ||

etat sarvaṃ mayā''khyātaṃ krameṇa vyutkrameṇa ca |

kathitaṃ yanna kathitaṃ tat sarvaṃ kramataḥ śṛṇu || 36 ||

prātaḥ kṛtyamanupradāya vinatiḥ snānaṃ svasandhyātmakaṃ
saṅkalpāntakabhūtaśūdhisakalāmālāmayaṃ nyāsanam |
antaryāgavidhirbahiryajanakaṃ śaṅkhādisaṃsthāpanaṃ
piṭhasyā'rcanamaṅgadevayajanaṃ prāṇapratiṣṭhā tataḥ || 37 ||

āhvānaṃ nijamudrikāviracanaṃ dhyānaṃ prabhoḥ pūjanaṃ
vṛtyā''rādhanadhūpadīpavaranaivedyaṃ japo guhyataḥ |
jāpasyā'rpaṇavāyudhāraṇamataḥ svātmārpaṇaṃ saṃstuti-
rlabhyante ca visarjanaṃ muraripoḥ pūjākramaḥ kīrtitaḥ || 38 ||

sūtraṃ caitat prakathitamanenā''rādhayedacyutam |

iti nārāyaṇenaiva sūtraṃ prakathitaṃ purā || 39 ||

brahmaṇe brahmaṇā pūrvaṃ mayi snehāt prakāśitam |

pulastyavidhinā'nena mayā kṛṣṇa upāsitaḥ || 40 ||

|| iti sanatkumārīye pūjāvidhānaṃ nāmā'ṣṭamaḥ paṭalaḥ || 8 ||

atha navamaḥ paṭalaḥ


pulastya uvāca


bhagavan sarvadharmajña kavacaṃ yat prakāśitam |

trailokyamaṅgalaṃ nāma kṛpayā kathaya prabho || 1 ||


sanatkumāra uvāca


śṛṇu vakṣyāmi viprendra kavacaṃ paramādbhutam |

nārāyaṇena kathitaṃ kṛpayā brahmaṇe purā || 2 ||

brahmaṇā kathitaṃ mahyaṃ paraṃ snehād vadāmi te |

atiguhyataraṃ tattvaṃ brahmamantraughavigraham || 3 ||

yad dhṛtvā paṭhanād brahmā sṛṣṭiṃ vitanute dhruvam |

yad dhṛtvā paṭhanāt pāti mahālakṣmīrjagattrayam || 4 ||

paṭhanād dhāraṇāt śambhuḥ saṃhartā sarvatattvavit |

trailokyajananī durgā mahiṣādimahāsurān || 5 ||

naradṛptān jaghānaiva paṭhanād dhāraṇād yataḥ |

evamindrādayaḥ sarve sarvaiśvaryamavāpnuyuḥ || 6 ||

śiṣyāya viṣṇubhaktāya sādhakāya prakāśayet |

śaṭhāya paraśiṣyāya dattvā mṛtyumavāpnuyāt || 7 ||

trailokyamaṅgalasyā'sya kavacasya prajāpatiḥ |

ṛṣiḥ cchandaśca gāyatrī devo nārāyaṇaḥ svayam || 8 ||

dharmārthakāmamokṣeṣu viniyogaḥ prakīrtitaḥ |

praṇavo me śiraḥ pātu namo nārāyaṇāya ca || 9 ||

bhālaṃ pāyānnetrayugmamaṣṭārṇo bhuktimuktidaḥ |

klīṃ pāyāt śrautrayugmaṃ caikākṣaraḥ sarvamohanaḥ || 10 ||

klīṃ kṛṣṇāya sadā ghrāṇaṃ govindāyeti jihnikām |

gopījanapadaṃ vallabhāyaṃ svāhāṅanaṃ mama || 11 ||

aṣṭādaśākṣaro mantraṃ kaṇṭhaṃ pātu daśākṣaraḥ |

gopījanapadaṃ vallabhāya svāhā bhujadvayam || 12 ||

klīṃ glīṃ klīṃ śyāmalāṅgāya namaḥ skandhau daśākṣaraḥ |

klīṃ kṛṣṇa klīṃ karau pāyāt klīṃ kṛṣṇāya cāṅgajo'vatu || 13 ||

hṛdayaṃ śrīṃ klīṃ bhuvaneśīṃ klīṃ kṛṣṇāya klīṃ stanau mama |

gopālāyā'gnijāyāntaṃ kukṣiyugmaṃ sadā'vatu || 14 ||

klīṃ kṛṣṇāya sadā pātu pārśvayugmaṃ manūttamaḥ |

kṛṣṇagovindakau pātu smarādyau ṅeyutau manuḥ || 15 ||

aṣṭākṣaraḥ pātu nābhi kṛṣṇeti dvyakṣaro'vatu |

pṛṣṭhaṃ klīṃ kṛṣṇa kaṅkālaṃ klīṃ kṛṣṇāya dviṭhāntakaḥ || 16 ||

sakthinī satataṃ pātu śrīṃ hrīṃ klīṃ kṛṣṇa ṭhadvayam |

ūrū saptākṣaraḥ pātu trayodaśākṣaro'vatu || 17 ||

śrīṃ hrīṃ klīṃ padato gopījanavallabhadaṃ tataḥ |

bhāyasvāheti pāyuṃ vai klīṃ hrīṃ śrīṃ daśavarṇakaḥ || 18 ||

jānunī ca sadā pātu hrīṃ śrīṃ klīṃ sadaśākṣaraḥ |

trayodaśākṣaraḥ pātu jaṅghe cakrāyudhaḥ svayam || 19 ||

aṣṭādaśākṣaro hrīṃ śrīṃ pūrvako viṃśavarṇakaḥ |

sarvāṅgaṃ me sadā pātu dvārakānāyako balī || 20 ||

namo bhagavate paścād vāsudevāya tatparam |

tārādyā dvādaśārṇo'yaṃ prācyāṃ māṃ sarvadā'vatu || 21 ||

śrīṃ hrīṃ klīṃ daśavarṇaṃ tu klīṃ hrīṃ śrīṃ ṣoḍaśākṣaraḥ |

gadādyudāyudho viṣṇurmāmagnerdiśi rakṣatu || 22 ||

hrīṃ śrīṃ daśākṣaro mantro dakṣiṇe māṃ sadā'vatu |

tāro namo bhagavate rukmiṇīvallabhāya ca || 23 ||

svāheti ṣoḍaśārṇo'yaṃ nair-ṛtyāṃ diśi rakṣatu |

klīṃ hṛṣīke padaṃśāya namo māṃ vāruṇe'vatu || 24 ||

aṣṭādaśārṇaḥ kāmānto vāyavye māṃ sadā'vatu |

śrīṃ māyākāmakṛṣṇāya govindāya dviṭho manuḥ || 25 ||

dvādaśākṣarake viṣṇuruttare māṃ sadā'vatu |

vāgbhavaṃ kāmakṛṣṇāya hrīṃ govindāya tataḥ param || 26 ||

śrīṃ gopījanavallabhānte bhāyasvāheti saustataḥ |

dvāviṃśatyakṣaro mantro māmaiśānyāṃ sadā'vatu || 27 ||

kālī yasya phaṇāmadhye divyaṃ nṛtyaṃ karoti yaḥ |

namāmi devakīputraṃ nṛtyarājānamacyutam || 28 ||

dvāviṃśatyakṣaro mantro'pyadho māṃ sarvato'vatu |

kāmadevāya vidmahe puṣpabāṇāya dhīmahi || 29 ||

tanno'naṅgaḥ pracodayādeṣa māṃ pātu corddhvataḥ |

iti te kathitaṃ vipra brahmamantraughavigraham || 30 ||

trailokyamaṅgalaṃ nāma kavacaṃ brahmarūpakam |

brahneśapramukhā'dhīśanārāyaṇamukhā'cyutam || 31 ||

tava snehānmayākhyātaṃ pravaktavyaṃ na kasya cit |

guruṃ praṇamya vidhivat kavacaṃ prapaṭhet tataḥ || 32 ||

sakṛd dvitriryathājñānaṃ so'pi sarvatapomayaḥ |

mantreṣu sakaleṣveva deśiko nā'tra saṃśayaḥ || 33 ||

śatamaṣṭottaraṃ cāsya puraścaryāṃvidhiḥ smṛtaḥ |

havanādīn daśāṃśena kṛtvā tat sādhayed dhruvam || 34 ||

yadi syāt siddhakavaco viṣṇureva bhavet svayam |

mantrasiddhirbhavet tasya puraścaryāvidhānataḥ || 35 ||

spardhāmuddhūya satataṃ lakṣmīrvāṇī vaset sadā |

puṣpāñjalyaṣṭakaṃ dattvā mūlenaiva paṭhet sakṛt || 36 ||

daśavarṣasahasrāṇāṃ pūjāyāḥ phalamāpnuyāt |

bhūrje vilikhya gulikāṃ svarṇasthāṃ dhārayed yadi || 37 ||

kaṇṭhe vā dakṣiṇe bāhau so'pi viṣṇurna saṃśayaḥ |

aśvamedhasahasrāṇi vājapeyaśatāni ca || 38 ||

mahādānāni yānyeva prādakṣiṇyaṃ bhuvastathā |

kalāṃ nārhanti tānyeva sakṛduccāraṇāt tataḥ || 39 ||

kavacasya prasādena jīvanmukto bhavennaraḥ |

trailokyaṃ kṣobhayatyeva trailokyavijayī bhavet || 40 ||

idaṃ kavacamajñātvā bhajed yaḥ puruṣottamam |

śatalakṣaprajapto'pi na mantraḥ siddhidāyakaḥ || 41 ||

iti sanatkumārīye trailokyamaṅgala nāma navamaḥ paṭalaḥ || 9 ||

atha daśamaḥ paṭalaḥ


pulastya uvāca


karamālāntare mālā japamālā ca kathyatām |


sanatkumāra uvāca


śṛṇu vakṣyāmi viprendra mālā pṛṣṭā tvayā hi yā || 1 ||

anāmāmadhyamārabhya kaniṣṭhādita eva ca |

tarjanīmūlaparyantaṃ daśaparvasu sañjapet || 2 ||

tarjanī madhyamā ceti kaniṣṭhā cāpi tāḥ kramāt |

tisro'ṅgulyastriparvāḥ syurmadhyamā caikaparvikā || 3 ||

pūrvadvayaṃ madhyamāyā merutvenopakalpayet |

kramotkramagatairmālā mātṛkārṇaiḥ sabindukaiḥ || 4 ||

kṣamekakaiḥ sāṣṭavargairantaryajanakarmaṇi |

ādikacaṭatapayaśalā ityevaṃ cāṣṭavargāḥ || 5 ||

padmabījādibhirmālā bahiryāge śṛṇuṣva tāḥ |

rudrākṣa - śaṅkha - padmākṣa - putra - jīvaka - mauktikaiḥ || 6 ||

sphāṭikairmaṇiratnaiśca sauvarṇairvidrumaistathā |

kuśapatrairdvādaśa syurgṛhasthasyā'kṣamālikā || 7 ||

aṅgulīgaṇanādekaṃ rekhāyā'ṣṭaguṇaṃ bhavet |

putrajīvairdaśaguṇaṃ śataśaṅkhaiḥ sahasrakam || 8 ||

pravālairmaṇiratnaiśca daśasāhasrakaṃ smṛtam |

tadeva sphaṭikaṃ proktaṃ mauktikairlakṣamucyate || 9 ||

kuśagranthyā koṭiśataṃ rudrākṣaṃ syādanantakam |

tulasīkāṣṭhaghaṭitairmālābhirjapamālikā || 10 ||

sarvakarmāṇi sarveṣāmīpsitārthaphalapradā |

aṣṭottaraśatairmālā pañcāśattūttarādhikaiḥ || 11 ||

saptaviṃśatibhiḥ kāryā sarvasādhāraṇe jape |

mokṣārthī pañcaviṃśatyā dhanārthī rtriśatā japet || 12 ||

puṣṭyarthī pañcaviṃśatyā pañcadaśyābhicārake |

mālāsaṅgrathanaṃ vakṣye yaduktaṃ brahmaṇā purā || 13 ||

gopucchasadṛśī mālā yadvā sarpākṛtirbhavet |

mukhaṃ mukhena saṃyojya pucchaṃ pucchena yojayet || 14 ||

sūtraṃ viprendra kanyābhiḥ strībhirvā'pi vinirmitam |

triguṇaṃ triguṇīkṛtya tadeva triguṇaṃ tathā || 15 ||

śuklaṃ raktaṃ tathā kṛṣṇaṃ paṭṭasūtramathāpi vā |

śāntivaśyābhicāreṣu tathaiva māraṇe'pi ca || 16 ||

śuklaṃ raktaṃ tathā pītaṃ kṛṣṇaṃ varṇeṣu ca kramāt |

sarveṣāmeva varṇānāṃ raktaṃ sarvepsitapradam || 17 ||

āśrameṣu tathā'pyevaṃ raktaṃ sarveṣu siddhidam |

phalopacārataḥ kṛṣṇamiṣṭvā tantrānusārataḥ || 18 ||

ekaikaṃ mātṛkārṇaṃ tu śatāraṃ prajapet sudhīḥ |

maṇimādāya sūtreṣu grathanaṃ madhyamāgrataḥ || 19 ||

madhyagranthiṃ vidhāyetthaṃ meruṃ ca granthiyantritam |

grathayitvā puro mālāṃ tataḥ saṃskāramārabhet || 20 ||

kṣālayet pañcagavyaistu sadyojātena sajjalaiḥ |

candanāgarugandhādyairvāmadevena gharṣayet || 21 ||

dhūpayet tāmaghoreṇa prīṇayet puruṣeṇa tu |

mantrayet pañcamenaiva pratyekaṃ tu sakṛt skṛt || 22 ||

meruṃ sakṛnmantrayecca manasā ca śataṃ śatam |

yena pratiṣṭhitā mālā tayaiva tu manuṃ japet || 23 ||

anyamantraṃ japed vidvān na kāryā kārhicid budhaiḥ |

sadyojātaṃ prapadyāmi sadyojātāya vai namaḥ || 24 ||

bhave bhave'nādibhave bhajasva māṃ bhavodbhavam |

ṅentāntapraṇāvādyena namo'ntena kramājjapet || 25 ||

vāmadevāya namo jyeṣṭhāya namaḥ rudrāya namaḥ |

kālāya namaḥ kalavikaraṇāya namo balapramathanāya || 26 ||

aghorebhyo'tha ghorebhyo ghoraghoratarebhyaśca |

sarvataḥ sarvebhyo namaste rudrarupebhyaḥ || 27 ||

tatpuruṣāya vidmahe mahādevāya dhīmahi
	
	tanno rudraḥ pracodayāt || 28 ||

iśānaḥ sarvavidyānāmīśvaraḥ sarvabhūtānāṃ

brahmādhipatirbrahmaṇo'dhipatirbrahmaṇi me śivo'stu sadāśivo'm || 
29 ||

praṇavādyo mahāmantraḥ sadāśivamiti kramāt |

saṃskṛtyaivaṃ budho mālāṃ tatprāṇāṃstatra yojayet || 30 ||

mūlamantreṇa tāṃ mālāṃ pūjayed dvijasattamaḥ |

guruṃ sampūjya taddhastāt gṛhṇīyādakṣamālikām || 31 ||

na spṛśed vāmahastena karabhraṣṭāṃ na kārayet |

aṅguṣṭhaṃ mokṣadaṃ proktaṃ tarjanī śatrunāśinī || 32 ||

madhyamā ghanasiddhiḥ syāt śāntikarmaṇyanāmikā |

kaniṣṭhā''karṣaṇe jñeyā japakarmaṇi siddhidā || 33 ||

aṅguṣṭhaparvamadhyasthaṃ parivartta samācaret |

puraścaryāṃ tataḥ kuryāt svayameva samāhitaḥ || 34 ||

guruṇā svānugenaiva tadbhrātṛputrakaistathā |

sarvāsu dīkṣitenaiva puraścaryāṃ samācaret || 35 ||


pulastya uvāca


saṅkalpaśca puraścaryāvidhānaṃ tatra kīdṛśam |

tat sarvaṃ kṛpayā nātha saṅkṣepeṇa prakathyatām || 36 ||


sanatkumāra uvāca


praṇavaṃ tatsaditi ca māsapakṣatithāvapi |

amuko'mukagotro'haṃ mūlamuccārya tatparam || 37 ||

siddhikāmo'sya mantrasya iyatsaṅkhyaṃ japet tataḥ |

daśāṃśaṃ havanaṃ kuryād daśāṃśaṃ tarpaṇaṃ tataḥ || 38 ||

daśāṃśaṃ mārjanaṃ tasmād daśāṃśaṃ viprabhojanam |

puraścaraṃamevaṃ hi kariṣye prāgudaṅmukhaḥ || 39 ||

iti saṅkalpya viprendra japayajñādikaṃ caret |

mantraṃ ca prātarārambhya japenmadhyandināvadhi || 40 ||

ityādi vidhinā''labya puraścaryāṃ samācaret |

athavā'nyaprakāreṇa puraścaraṇamucyate || 41 ||

grahaṇe'rkasya cendorvā śuciḥ pūrvamupoṣitaḥ |

nadyāṃ samudragāminyāṃ nābhimātrodake sthitaḥ || 42 ||

grahaṇānmokṣaparyantaṃ japenmantraṃ samāhitaḥ |

dṛṣṭvā snātvā tu saṅkalpapya vimokṣāntaṃ japaṃ caret || 43 ||

tāvajjapādikaṃ kuryād grahaṇānte śuciḥ pumān |

iti jāpānmantrasiddhirbhavatyeva na saṃśayaḥ || 44 ||

śrāddhāderanurodhena yadi jāpaṃ tyajennaraḥ |

sa bhaved devatādrohī pitṝn sapta nayatyadhaḥ || 45 ||

māsakṛtyaṃ pravakṣyāmi sāvadhāno'vadhāraya |

kṛṣṇabhaktasya suddhyarthaṃ yaduktaṃ brahmaṇā purā || 46 ||

tattat sarvaṃ samāsena vakṣye'hamañjasā śṛṇu |

pūrṇīmāpratipatsandhau phalgunyāṃ phālgune mune || 47 ||

rājopacāraiḥ sampūjya dolayed yo janārdanam |

aśvamedhasahasrasya bājapeyaśatasya ca || 48 ||

gosasahasrapradānasya phalaṃ prāpnoti mānavaḥ |

dakṣiṇābhimukhaṃ kṛṣṇaṃ dolamānañca sannaraḥ || 49 ||

dṛṣṭvā'parādhanicayairmuktāste nā'tra saṃśayaḥ |

dolārūḍhasya kṛṣṇasya ye'gre kurvanti jāgaram || 50 ||

sarvapuṇyaphalāvāptiṃ nimeṣāllabhate naraḥ |

tato vidhiṃ pravakṣyāmi yatra yattu samācaret || 51 ||

paurṇamāsyāṃ mahatpūjā saṅghī ca dolayet prabhuḥ |

trayodaśākṣareṇaiva aṣṭādaśākṣareṇa vā || 52 ||

phalgunyāṃ ca prakartavyā pūjā pūrvoktavartmanā |

utthāya mantraṃ japtavyamaṣṭādhikasahasrakam || 53 ||

sūtraṃ caitat prakathitaṃ vistareṇa śṛṇuṣva me |

revatyāṃ tu vāstubaliṃ maṇḍalaṃ racayet sudhīḥ || 54 ||

dikṣu dhvajān samāropya lokapālasamaprabhān |

govindaṃ phalakādhastād dolārūḍhaṃ jagatpatim || 55 ||

pūjayed vidhivad bhaktyā maṇḍale ca samāhitaḥ |

ṛgyayuḥsāmasūktaiśca mantraiḥ paurāṇikastathā || 56 ||

mantrairāgamikaiścaiva vaiṣṇavaiḥ pūjayeddharim |

tadguṇotkīrtanaṃ caiva divārātriṃ nayed budhaḥ || 57 ||

keśavāgre nṛtyagītaṃ yaḥ karoti kalau yuge |

aparādhasahasraistairmuktaḥ syānnātra saṃśayaḥ || 58 ||

karmāntaraṃ pravakṣyāmi yena viṣṇuḥ prasīdati |

brahmaṇā kathitaṃ pūrvaṃ pratiṣṭhāvidhinirṇayam || 59 ||

gṛhasya bhagavadviṣṇoḥ sāvadhāno'vadhāraya |

tṛṇaistṛṇadhvajaiścaiva mandiraṃ nirmitaṃ śuciḥ || 60 ||

vidhinā'nena yo dadyād viṣṇave manujottamaḥ |

koṭyabdaśatasaṅkhyāni viṣṇuloke bhaveddhruvam || 61 ||

mandiraṃ dāravaṃ citraṃ vāsudevāya yo dadet |

yugānāmayutaṃ tatra nivaset satyamīritam || 62 ||

iṣṭakairvividhaiścitraṃ vāsudevāya yo janaḥ |

tatrānusaṅkhyakān kalpān viṣṇuloke vaset sadā || 63 ||

pāṣāṇairmandiraṃ citraṃ vāsudevāya yo naraḥ |

pradadyāt vidhivad bhaktyā proktaṃ śataguṇaṃ tataḥ || 64 ||


pulastya uvāca


kena vā vidhinā nātha pradadyānmandiraṃ budhaḥ

mokṣapradāya kṛṣṇāya kramaśaḥ kathyāṃ prabho || 65 ||


sanatkumāra uvāca


ādau vāstubaliṃ dattvā lokeśā'nudhvajeṣu ca |

uktavarṇeṣu gandhādyairmūlapāriṣadānvitān || 66 ||

hetijātyadhipopetān pūrvādikkramato yajet |

vajrādīna tantrakumbheṣu gandhādyaistatkramād yajet || 67 ||

tattanmaṇḍapataḥ pūrve yāgamandiramācaret |

tatribhāgamite kṣetre'ratnimātrasamunnatām || 68 ||

vediṃ kṛtvā tu tatraiva sarvatobhadramālikhet |

pradhānamandire cāpi sarvatobhadramaṇḍalam || 69 ||

vidhāya pūjayet tatra toraṇeṣu samāhitaḥ |

jayaṃ ca vijayaṃ caiva vighneśaṃ kṣetranāyakam || 70 ||

gaṅgā ca yamunāṃ caiva mahālakṣmīṃ sarasvatīm |

pūrvadikkramato yugmaṃ kramśo gandhapūrvakaiḥ || 71 ||

sampūjya vidhivad bhaktyā gandhapuṣpaiśca dhūpakaiḥ |

tato gṛhaṃ praviśyā'tha vāstvīśamajamarcayet || 72 ||

pañcagavyā'rghyatoyābhyāṃ prokṣayenmaṇḍalaṃ tataḥ |

nirasya vighnān tatraiva baddhapadmāsano bhavet || 73 ||

pūrvoktenaiva vidhinā bhūtaśuddhyādikaṃ caret |

arghyapātraṃ tataḥ kṛtvā maṇḍale pīṭhamarcayet || 74 ||

pratimāṃ vāsudevākhyāṃ tatra saṃsthāpayed budhaḥ |

gṛtpadme devamārādhya gandhādyairmānasairyajet || 75 ||

karasthakusume tejaḥ samānīya śvāsamārgataḥ |

mūrtau tasyāṃ sasāropya tat tejomūlamantrataḥ || 76 ||

hṛdaye karamādāya jīvanyāsaṃ samācaret |

māyāpāśāṅkuśādyantā yādīn saptasabindukān || 77 ||

viyatsatyendusaṃyuktaṃ samaste'haṃ samuccaret |

tasya prāṇā iha prāṇāḥ punarjīva iha sthitaḥ || 78 ||

punaruccārya tasyaiva sarvendriyāṇi pnarvadet |

tasyāpi vāṅmanaścakṣuḥśrotraghrāṇapadānyatha || 79 ||

prāṇā ihā''gatya sukhaṃ ciraṃ tiṣṭhantu ṭhadvayam |

iti prāṇān pratiṣṭhāpya devamāvāhya pūrvat |

karakacchapikāṃ kṛtvā tato dhyāyedananyadhīḥ || 80 ||

viṣṇuṃ śāradakoṭicandrasadṛśaṃ śaṅkhaṃ rathāṅgaṃ gadā -
mambhojaṃdhataṃ sitābjanilayaṃ kāntyā jaganmohanam |
ābaddhāṅgadahārakuṇḍalamahāmauliṃ sphuratkaṅkaṇaṃ
śrīvatsāṅkamudārakaustubhadharaṃ vande munīndraiḥ stutam || 81 ||

iti dhyātvā japenmantraṃ rājopacāravat sudhīḥ |

tārohṛdbhagavān ḍento vāsudevāya tatparam || 82 ||

sarveṣu viṣṇumantreṣu pradhānamanurīritaḥ |

manunā'nena tatsarvānāsanādīn pradāpayet || 83 ||

āsanaṃ svāgataṃ pādyamarghyamācamanīyakam |

madhuparkā''camanaṃsnānaṃ vasanā''bharaṇāni ca || 84 ||

gandhapuṣpadhūpadīpanaivedyācamanaṃ tathā |

pradakṣiṇaṃ namaskāro visargaścaiva ṣoḍaśa || 85 ||

chāyāmaṇḍalamāgatya maṇḍale pūrvavaddharim |

abhyarcya juhuyād vanhau saṃskṛte pūrvavartmanā || 86 ||

śatamaṣṭottaraṃ hutvā manunā'nena vaiṣṇavaḥ |

punaryajed devatāgre tataḥ pāriṣadān yajet || 87 ||

prathamā''vṛttiraṅgaiḥ syād vāsudevādibhiḥ parā |

śāntyādiśaktisahitaiḥ parā dvādaśamūrtibhiḥ || 88 ||

caturthī suranāthādyairvajrādyaiḥ pañcamī matā |

evaṃ sampūjito viṣṇuḥ prasīdatyeva satvaram || 89 ||

tāreṇa hṛdayaṃ proktaṃ namasā śira īritam |

caturvarṇaiḥ śikhā proktā pañcārṇaiḥ kavacaṃ matam || 90 ||

samastena bhavedastramaṅgakalpanamīritam |

vāsudevaḥ saṅkarṣaṇaḥ pradyumnaścā'niruddhakaḥ || 91 ||

śaṅkhacakragadāmbhojadharā ete caturbhujāḥ |

tataśca mandiraṃ dadyānmanunā'nena mānavaḥ || 92 ||

puṇyātmā vaiṣṇavaśreṣṭhaḥ sa devo na tu mānavaḥ |

kṛtvaivaṃ kṛtakṛtyaḥ syāt satyaṃ satyaṃ na saṃśayaḥ || 93 ||

ṛgyajuḥsāmasūktaiśca smārtaiḥ paurāṇikairapi |

mantrairāgamikaiścaiva vaiṣṇavaiḥ kīrtayeddhām || 94 ||

darpaṇaṃ cāmaraṃ chatraṃ vyañjanaṃ ca pṛthak pṛthak |

dattvā ca manunā'nena prāṇāyāmaṃ tataścaret || 95 ||

śatamaṣṭottaraṃ japtvā pūrṇāṃ dadyāt tataḥ param |

gāyatryā mūlamantreṇa svāhāntena dvijottamaḥ || 96 ||

pūrṇāgutiṃ tataḥ kṛtvā visarjanamataḥ param |

ṛtvigbhyo dakṣiṇāṃ dattvā bhojayecca dvijottamān || 97 ||

evaṃ kṛtvā tu puṇyātmā sākṣānnārāyaṇo bhavet |

gṛhādīnāṃ ca dāneṣu brāhmaḥaḥ kṣatrīyastathā |

vaiśyaśca pādajaścaiva sarve'pyatrā'dhikāriṇaḥ || 98 ||

|| iti sanatkumārīye mālānirṇayo nāma daśamaḥ paṭalaḥ || 10 ||

athaikādaśa paṭalaḥ

tato dīkṣāvadhiṃ vakṣye yathāvadavadhāraya |

kriyāvatī kalāvatī varṇātmā vedamapyapi || 1 ||

pañcāyatanadīkṣāyāṃ sarvadīkṣottamottamā |

pitṛmātṛkṛtaṃ nāma tyaktāyurvarṇavarṇakān || 2 ||

saṃsṛṣtimantrato vidvān cakreṣu gaṇayet kramāt |

āṣāḍho nindito jyeṣṭhaḥ pauṣo bhādrapadastathā || 3 ||

māseṣvaninditeṣveva dīkṣoktā grahaṇe śubhā |

puruṣārthasamāvāptyai sa śiṣyo gurumāśrayet || 4 ||

mātṛtaḥ pitṛtaḥ śuddhaḥ śuddhabhāvo jitendriyaḥ |

sarvāgamānāṃ sārajñaḥ sarvaśāstrārthatattvavit || 5 ||

paropakāranirataḥ pūjājapaparāyaṇaḥ |

amoghavacanaḥ śānto vedavedāṅgapāragaḥ || 6 ||

yogamārgānusandhāyī devatāhṛdayaṅgamaḥ |

ityādiguṇasampanno gururbhavati mānavaḥ || 7 ||

śiṣyaḥ kulīnaḥ śuddhātmā puruṣārthaparāyaṇaḥ |

adhītavedaḥ kuśalo dūramuktamanobhavaḥ || 8 ||

hitaiṣī prāṇināṃ nityamāstikastyaktanāstikaḥ |

svadharmanirato nityaṃ pitṛmātṛhite rataḥ || 9 ||

vāṅmanaḥkāyakṛtibhirguruśuśrūṣaṇodyataḥ |

ebhireva guṇairyuktaḥ śiṣyo bhavati nā'paraḥ || 10 ||

dvādaśeṣu ca māseṣu yānyeva śubhadāni ca |

dināni tāni viprendra sāvadhānā'vadhāraya || 11 ||

caitre trayodaśī śuklā vaiśākhaikādaśī sitā |

jyeṣṭhe ca daśamī kṛṣṇā cā''ṣāḍhe nāgapañcamī || 12 ||

śrāvaṇe dvādaśī bhādre rohiṇīsahitā'ṣṭamī |

āśvine ca mahāpuṇyā mahāṣṭamyapayabhīṣṭadā || 13 ||

kārtike pūrṇimā śuklā mārgaśīrṣe sitā tathā |

ṣaṣṭhī caturdaśī pauṣe māghe'pyekādaśī sitā || 14 ||

phālgune ca sitā ṣaṣṭhī ceti kālavinirṇayaḥ |

praśastāstithayaḥ puṇyāḥ siddhidāḥ śrūyatām budhaḥ || 15 ||

pañcamī saptamī ṣaṣṭhī pūrṇimā ca sitā tathā |

trayodaśī tu daśamī praśastā sarvakarmaṇi || 16 ||

ekādaśī sitā kṛṣṇā praśastā kīrtitā budhaiḥ |

aśvinī śravaṇā''rdrā ca revatī cottarātrayam || 17 ||

puṇyā śatabhiṣā caiva dīkṣādiṣu prakīrtitā |

atha yogaṃ pravakṣyāmi sādhakānāṃ hitāya ca || 18 ||

aikyaṃ jīvātmanorāhuryogaṃ yogaviśāradāḥ |

śivātmanorabhedena pratipattiṃ pare viduḥ || 19 ||

kāmakrodhau lobhamohau tatparaṃ madamatsarau |

vadanti viṣamānetān viṣamaṃ durgamātmanaḥ || 20 ||

iḍayā karṣayed vāyuṃ bāhyaṃ ṣoḍaśamātrayā |

madhyamā kumbhayed vāyuṃ vidyayā mātrayā śanaiḥ || 21 ||

nāḍyā piṅgalayā cainaṃ recayed yogavittamaḥ |

prāṇāyāmamidaṃ prāhuryogaśāstraviśāradāḥ || 22 ||

bhūyo bhūyaḥ samākramya abhyāsena samācaret |

sanatkumāratantraṃ tat sambhūtaṃ munipuṅgavāt || 23 ||

sanatkumārāt sāraṃ ca tantrāṇāṃ brahmabhāvanāt |

yaḥ paṭhecchuṇuyād vā'pi so'pi puṇyavatāṃ varaḥ || 24 ||

pustakaṃ likhitaṃ yasya gṛhe tiṣṭhati nityaśaḥ |

lakṣmīstasya gṛhaṃ sākṣāt trisandhyaṃ na vimuñcati || 25 ||

|| iti sanatkumāratantre sanatkumārapulastyasaṃvāde 
śrīgopālapūjāprayogavidhānaṃ nāmaikadaśaḥ paṭalaḥ || 11 ||





###########   END OF FILE  #######