####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: 
Uniform title: saundaryalaharī
Author : śaṃkarācārya attributed to
Commentator : lakṣmīdhara

Description: 
saundaryalaharī with the commentary of lakṣmīdhara


Notes: 
Data-entered by the staff of Muktabodha under the supervision of Mark S. G. Dyczkowski.

Publisher : 
Publication year : 1959
Publication city : 
Publication country : India
####################################################

prācyavidyāsaṃśodhanālayagranthamālā-114 

śrī śaṅkarācāryaviracitā 

saundaryalaharī 

lakṣmīdharavyākhyāsamalaṅkṛtā 

karṇāṭakabhāṣānuvādena anubandhaiśca sahitā 

bhāvanopaniṣat śrībhāskararāyabhāṣyasahitā 

devīpañcastavī ca 

saṃpādakaḥ 

vidvān en. es. veṅkaṭanāthācāryaḥ 

sīniyar risarca asisṭeṇṭ 

prācyavidyāsaṃśodhanālayaḥ 

maisūru 

prācyavidyāsaṃśodhanālayaḥ 

maisūru viśvavidyānilayaḥ 

maimūru 

1959 

|| oṃ || 

śrīśaṅkarabhagavatpūjyapādaviracitā 

saundaryalaharī 

lakṣmīdharadeśikaviracitayā lakṣmīdharākhyayā 

vyākhyayā sahitā 

śivaḥ śaktyā yukto yadi bhavati śaktaḥ prabhavituṃ na cedevaṃ 
devo na khalu kuśalaḥ spanditumapi | atastvāmārādhyāṃ 
hariharaviriñcādibhirapi praṇantuṃ stotuṃ vā kathamakṛtapuṇyaḥ 
prabhavati || 1 || vyākhyānaprārambhaḥ 

vandāmahe mahīyāṃsamaṃsalambijaṭābharam | 
yattkaṅkaṇajhaṇatkāraravaḥ śabdānuśāsanam || 

śeṣāśeṣoktibhūṣāḥ kaṇacaraṇacaṇagranthasaugandhyajighrāḥ 
bhaṭṭoktiprauḍhilīḍhā gurugurutaragīrgumbhaśumbhadvijṛmbhāḥ | 
niśśaṅkāḥ śaṅkaroktau paśupatimatanirvāhakāḥ 
sāṃkhyasaṃkhyāḥ yasya śrīlollalakṣmīdharavibudhamaṇerbhānti 
vācāṃ nigumbhāḥ || 

p. 2) 

so'haṃ lakṣmīdharaḥ prāha ṭīkāṃ lakṣmīdharābhidhām | 
enāṃ samāhitasvāntāḥ sevantāṃ satataṃ budhāḥ || 

syādeva me'lasatayā matimāndyato vā doṣaḥ kvacitkvacidathāpi na 
kāpi śaṅkā | naisargikī khalu guṇīkaraṇapravīṇā śaktiḥ 
sadā vijayate bhuvi [khalu] sajjanānām || 

iha khalu śaṅkarabhagavatpūjyāpādāḥ samayamatatattvavedinaḥ 
samayākhyāṃ candrakalāṃ ślokaśatena prastuvanti śiva iti | 
śivaḥ sarvamaṅgalopetaḥ sadāśivatattvam | vaśa kāntau 
ityasmāddhātoḥ śivaśabdo niṣpannaḥ | yathoktam- 

hisidhātoḥ siṃhaśabdo vaśakāntau śivaḥ smṛtaḥ | 
varṇavyatyayataḥ siddhau paśyakaḥ kaśyapo yathā || 

iti | vaśa kāntau ityayaṃ dhātuḥ tudādiḥ adādiśca 
saṃgṛhītaḥ | tudādervaśateḥ dīptirarthaḥ | kāntirdīptiḥ | 
adādervaṣṭiriti kāmanā arthaḥ | icchāśaktyāśrayatvāt 
īśvarasya śivatvam | vaśati prakāśate svayaṃprakāśa iti yadvā 
svasmin prapañcaṃ prakāśayatīti śivaḥ yadvā śīṅ svapne 
ityasmāddhātoḥ śivaśabdo niṣpannaḥ | svapnaṃ vāti kṣipatīti 
śivaḥ jāḍyarahitaḥ avidyānirmukta ityarthaḥ | yadvā 
svapnamavidyāṃ vāti gacchatīti śivaḥ sādākhyakalāsaṃvalita iti 
yāvat | tasyaiva śivaśabdavācyatvaṃ vakṣyate | tādṛśaḥ śivaḥ 
śaktyā jagannirmāṇaśaktyā yuktaḥ avacchinnaḥ 
avidyāvacchinnacaitanyasyaiva brahmaṇaḥ jagannirmāṇe śaktatvāt | 
yadi bhavati bhavati cet tarhi śaktaḥ samarthaḥ prabhavituṃ 
prapañcaṃ nirmātum | 

p. 3) 

na cedevaṃ śaktyā yukto na [na bhavedityarthaḥ] cedityarthaḥ | 
dīvyatīti devaḥ pūrvoktaḥ sadāśivaḥ | nakhalū [na khalū 
niṣedhasambhāvanayoḥ] niṣedhasambhāvanāyām | spanditumapi 
calitumapi kuśalaḥ samarthaḥ | nirākārasya vibhorākāśatulyasya 
spandanāyogāditi hṛdgato'rthaḥ || 

vācyārthastu śivaśaktyoḥ jāyāpatinyāyena jāyayā śaktyā 
yuktaścet prapañcarūpasantānaṃ nirmātuṃ śaknoti tayā 
viyuktaścenna śaknotīti || 

āgamarahasyārthastu śivaśabdena [śivaśabdena śivayoḥ saṃbandhi 
caturbhiḥ śrīkaṇṭhaiḥ iti 
nirūpayiṣyamāṇanavayonyātmakaśrīcakramadhye-ma.] 
navayonicakramadhye caturyonyātmakamardhacakramucyate | śaktiśabdena 
avaśiṣṭaṃ pañcayonyātmakamardhacakramucyate | 
evamardhadvayamilitaṃ navayonyātmakaṃ cakraṃ bhavati | 
etasmāccakrādeva jagadutpattisthitilayā bhavantīti 
purastānnivedayiṣyate | uktaṃ ca- 

caturbhiḥ śivacakraiśca śakticakraiśca pañcabhiḥ | 
śivaśaktyātmakaṃ jñeyaṃ śrīcakraṃ śivayorvapuḥ || 

iti | śivaśaktyormelanaṃ ṣaḍviṃśaṃ sarvatattvātītaṃ 
tattvāntaramiti purastānnivedayiṣyate | tasmānmelanādeva 
jagadutpattisthitilayāḥ na kevalādeveti ca vakṣyate | yathoktaṃ 
vāmakeśvaramahātantre catuśśatyām- 

paro'pi śaktirahitaḥ śaktyā yukto bhavedyadi | sṛṣṭisthitilayān 
kartumaśaktaḥ śakta eva hi || iti | 

etacca caturbhiḥ śrīkaṇṭhaiḥ ityādiślokavyākhyānāvasare 
[11ślokaḥ] nipuṇataramupapādayiṣyāmaḥ || 

p. 4) 

ataḥ tasmāddhetoḥ tvāṃ bhavatīṃ ārādhyāṃ ārādhayituṃ 
pūjayitumarhāṃ hariharaviriñcādibhiḥ harirviṣṇuḥ haro rudraḥ 
viriñco brahmā ādiśabdena indrādayaḥ saṃgṛhyante | te ca 
adhikārapuruṣāḥ prapañcānta pātinaḥ | tairnamaskāryatvaṃ 
prapañcajanayitryāḥ bhagavatyāḥ yuktamevetyuktaṃ 
atastvāmārādhyāṃ iti na tu āropastutiriti dhyeyam | yadvā nigamā 
vā ādiśabdena saṃgṛhyante nigamasevyatvāt bhagavatyāḥ | 
taduttaratra śrūtīnāṃ mūrdhāna [84 ślokaḥ] ityādau sphoryate | 
viriñcaśabdaḥ akārāntaḥ | apiśabdaḥ 
kathaṃśabdārthamupaskaroti | praṇantuṃ namaskartum | praśabdaḥ 
kāyikaṃ vācikaṃ mānasikaṃ ca trividhaṃ namaskāramāha | stotuṃ 
vā kevalaṃ stutimātramapi kartuṃ vetyarthaḥ | akṛtapuṇyaḥ 
pūrvajatmārjitaṇyanipacayaḥ kṛtapuṇyaḥ tadanyaḥ akṛtapuṇyaḥ 
prabhavati īṣṭe śaktaḥ || 

atretthaṃ padayojanā he bhagavati śivo devaḥ śaktyā yukto bhavati 
yadi tadā prabhavituṃ śaktaḥ | evaṃ na cet spanditumapi kuśalo na 
khalu | ataḥ hariharaviriñcādibhirapi ārādhyāṃ tvāṃ 
akṛtapuṇyaḥ praṇantuṃ stotuṃ vā kathaṃ prabhavati || 1 || 

tanīyāṃsaṃ pāṃsuṃ tava caraṇapaṅkeruhabhavaṃ viriñciḥ 
sañcinvanviracayati lokānavikalam | bahatyenaṃ śauriḥ kathamapi 
sahasreṇa śirasāṃ haraḥ saṃkṣudyainaṃ [kṣubhyainaṃ iti 
pāṭhāntaram] bhajati bhasitoddhūlanavidhim || 2 || 

p. 5) 

tanīyāṃsaṃ atisūkṣmaṃ pāṃsuṃ rajaḥkaṇaṃ tava bhavatyāḥ 
devyāḥ caraṇapaṅkeruhabhavaṃ caraṇau paṅkeruhe iva tābhyāṃ 
bhavaṃ viriñciḥ brahmā viriñciśabda ikārāntaḥ viriñciśca 
viriñcanaḥ iti amaraśeṣe abhidhānāt | saṃcinvan sampādayan 
bhāṇḍīkurvannityarthaḥ viracayati vividhān karoti lokān lokyanta 
iti lokāḥ sthāvarajaṅgamātmakaprapañca ityarthaḥ | yadvā 
ūrdhvalokāḥ sapta bhūrādayaḥ adholokāḥ sapta atalādayaḥ evaṃ 
caturdaśalokān [caturdaśalokāḥ tān] | avikalaṃ 
parasparāsaṅkīrṇaṃ yathā bhavati tathā | yadvā 
yāvatpralayameṣāṃ vaikalyaṃ yathā na bhavati tathā | vahati 
prāpayati rakṣati enaṃ pāṃsukaṇaṃ caturdaśalokātmakatayā 
avasthitam | śauriḥ śūrasya yadorapatyaṃ śauriḥ balabhadraḥ tena 
śeṣo lakṣyate śeṣāvatāratvāt balabhadrasya | yadvā śṛṇāti 
hinasti daśatīti śauriḥ sarparājaḥ śeṣa iti yāvat | yadvā 
śauriḥ viṣṇuḥ | tathoktaṃ catuḥśatyām- 

śiṃśumārātmanā viṣṇuḥ saptalokānadhaḥ sthitān | dadhre 
śeṣatayā lokān bhūrādīnūrdhvataḥ sthitān || iti | 

śeṣapakṣe'pi śeṣa eva viṣṇuḥ rakṣaṇe viṣṇorevādhikārāt | 
kathamapi kathaṃcit sahasreṇa śirasām | haraḥ antakāle prapañcaṃ 
haratīti haraḥ saṃkṣudya samyak mardayitvā enaṃ 
caturdaṃśabhuvanātmakatayā avasthitaṃ pādarajaḥkaṇaṃ bhajati 
sevate upadihatītyarthaḥ [upajīvatītyarthaḥ] | 
bhasitoddhūlanavidhiṃ bhasitena yaduddhūlanaṃ upadehanaṃ 
aṅgarāgakaraṇaṃ tasya vidhiḥ anuṣṭhānaṃ taṃ tathoktam || 

p. 6) 

atretthaṃ padayojanā he bhagavati viriñciḥ tava 
caraṇapaṅkeruhabhavaṃ tanīyāṃsaṃ pāṃsuṃ sañcinvan lokān 
avikalaṃ viracayati | he bhagavati śaurirenaṃ śirasāṃ sahasreṇa 
kathamapi vahati | he bhagavati enaṃ saṃkṣudya haraḥ 
bhasitoddhūlanavidhiṃ bhajati || 

ayaṃ bhāvaḥ brahmaviṣṇumaheśvarāṇāṃ 
prapañcaviṣayasṛṣṭisthitilayakartṛtvaṃ bhagavatyāḥ 
pādābjareṇumahimāyattamiti || 2 || 

tameva pāṃsuṃ prastauti- 

avidyānāmantastimiramiharadvīpanagarī jaḍānāṃ 
caitanyastabakamakarandasrutijharī | daridrāṇāṃ 
cintāmaṇiguṇanikā janmajaladhau nimagnānāṃ daṃṣṭrā 
muraripuvarāhasya bhavati || 3 || 

eṣaḥ pāṃsuḥ avidyānāṃ avidyāviṣṭacittānāṃ 
ajñānināmityarthaḥ na tu avidyamānavidyānāṃ avidyāyā 
bhāvarūpatvāt | arśa-āditvāt acpratyayaḥ avidyāvantaḥ avidyā 
iti | yadvā-avidyāviṣṭacittā api upacāreṇa avidyā iti | teṣāṃ 
antastimiramihiradvīpanagarī-antastimiraṃ antaḥ sthitājñānam 
ajñānasya timiratvāropaṇaṃ āvarakatvasāmyāt yathā 
bāhyapadārthānāvṛṇoti tamaḥ tathā āntarapadārthaṃ ātmānaṃ 
āvṛṇoti avidyā | tasya timirasya mihiradvīpanagarī mihirasya 
sūryasya dvīpaḥ samudramadhye udayapradeśaḥ tatra nagarī pattanaṃ 
vāsagṛhamiti yāvat | jaḍānāṃ mandānāṃ durmedhasāṃ 

p. 7) 

caitanyastabakamakarandasrutijharī cetanaiva caitanyam svārthe ṣyañ 
cetanā nāma ātmagatapadārthaprabodhakāriṇī cittavistārarūpā 
kācana śaktiḥ tadeva stabakaḥ kalpavṛkṣapuṣpagucchaḥ tasya 
makarandaḥ puṣparasaḥ tasya srutiḥ sravaṇaṃ niṣyandaḥ tasya 
jharī pravāhaḥ | daridrāṇāṃ dīnānāṃ cintāmaṇiguṇanikā 
cintāmaṇeḥ ratnaviśeṣasya guṇanikā guṇanā āmreḍanaṃ samūha 
iti yāvat | janmajaladhau janmaiva saṃsāra eva jaladhiḥ samudraḥ 
saṃsāre samudratvāropaṇaṃ apāratvasāmyāt | tatra nimagnānāṃ 
nitarāṃ unmajjanarāhityena magnānām | daṃṣṭrā spaṣṭam | 
muraripuvarāhasya muro nāma daityaḥ tasya ripuḥ viṣṇuḥ ayaṃ 
muraripuśabdaḥ viśeṣaṇavācyapi viśeṣyaṃ viṣṇumeva kathayati 
śabdasvābhāvyāt | na cātra paṅkajādipadavat śaktisaṅkocaḥ 
dravyavācakatvādasyeti | tasya varāhaḥ avatāraviśeṣaḥ tasya 
tathoktasya bhavati vartate || 

atretthaṃ padayojanā he bhagavati tava [bhavat] pādābjareṇuḥ 
eṣaḥ avidyānāṃ antastimiramihiradvīpanagarī jaḍānāṃ 
caitanyastabakamakarandasrutijharī daridrāṇāṃ cintāmaṇiguṇanikā 
janmajaladhau nimagnānāṃ muraripuvarāhasya daṃṣṭrā bhavati || 

atra pariṇāmālaṅkāraḥ āropyamāṇasya āropaviṣayātmatayā 
sthiteḥ | tathā ca maṅkhakasūtram āropyamāṇasya prakṛtopayogitve 
pariṇāmaḥ iti | asyaivārthaḥ āropyamāṇasya prakṛtopayogitvaṃ 
āropaviṣayātmatayā sthitinibandhanameveti phalābhiprāyeṇokta iti 
| 

p. 8) 

yadvā ullekhālaṅkāraḥ nagaryādirūpeṇa pāṃsorullekhanāt | 
rūpakaṃ vā bhavatu prakṛtopayogo na vivakṣyata iti || 3 || 

tvadanyaḥ pāṇibhyāmabhayavarado daivatagaṇaḥ tvamekā naivāsi 
prakaṭitavarābhītyabhinayā | bhayāttrātuṃ dātuṃ phalamapi ca 
vāñchāsamadhikaṃ śaraṇye lokānāṃ tava hi caraṇāveva nipuṇau 
|| 4 || 

tvat bhavatyāḥ sakāśāt anyaḥ itaraḥ pāṇibhyāṃ hastābhyāṃ 
abhayavaradaḥ abhayaṃ bhayarāhityaṃ bhayāttrāṇamiti yāvat varaḥ 
iṣṭārthaḥ tau dadātīti abhayavaradaḥ ekena hastena abhayadaḥ 
anyena varada ityarthaḥ | daivatagaṇaḥ devatā eva daivatāni 
vinayāditvāt svārthe aṇ svārthikāḥ pratyayāḥ prakṛtito 
liṅgavacanānyativartante yathā cetanaiva caitanyamiti | teṣāṃ 
gaṇaḥ indrādayaḥ ādityādayaśca gaṇadevatāḥ | tvaṃ bhavatī 
ekā mukhyā ekasaṃkhyāsaṃkhyeyā vā naivāsi na bhavasyeva | 
prakaṭitavarābhītyabhinayā prakaṭitaḥ prakāśitaḥ 
hastābhyāmiti śeṣaḥ varaḥ iṣṭārthaḥ abhītiḥ abhayaṃ bhayāt 
trāṇaṃ tayorabhinayaḥ abhivyañjanaṃ yasyāḥ sā tathoktā | 
hastābhyāṃ abhayavarapradānaṃ sarvadaivatasādhāraṇamiti asyāḥ 
asādhāraṇaṃ abhayavarapradānaprakāramāha bhayāt trātuṃ 
saṃsārādrakṣituṃ dātuṃ phalaṃ vāñchitārthānurūpaṃ api ca 
samuccaye vāñchāsamadhikaṃ vāñchāyāḥ kāmanāyāḥ 
samyagadhikaṃ kāmitārthādadhikamityarthaḥ | śaraṇye śaraṇārhe 
lokānāṃ caturdaśabhuvanānām | tava bhavatyāḥ | hiśabdaḥ 
ityarthe iti saṃcintyetyarthaḥ | caraṇau pādau | evakāraḥ 
avadhāraṇe | nipuṇau samarthau || 

p. 9) 

atretthaṃ padayojanā he bhagavati ! lokānāṃ śaraṇye ! tvadanyo 
daivatagaṇaḥ pāṇibhyāmabhayavaradaḥ | ekā tvaṃ pāṇibhyāṃ 
prakaṭitavarābhītyabhinayā naivāsi hi | iti saṃcintya tava 
caraṇāveva bhayāttrātuṃ vāñchāsamadhikaṃ phalamapi ca dātuṃ 
nipuṇau || 

ayaṃ bhāvaḥ hastābhyāmabhayavaradānaṃ sarvasādhāraṇamiti 
kṛtvā tvaccaraṇāveva tādṛśābhayavarapradāne svayameva 
vyāpṛtau | atastava na kartavyaṃ hastābhyāmabhayavarapradānaṃ 
prayojanābhāvāt sarvasādhāraṇyaprasaṅgāt 
lokaikaśaraṇyatvavyāghātāccetyupadeśa hi || 

atra vyatirekālaṅkāraḥ spaṣṭaḥ | vākyaliṅgakaḥ 
kāvyaliṅgālaṅkāro'pi spaṣṭaḥ | tayoraṅgāṅgibhāvena 
saṅkaraḥ || 4 || 

haristvāmārādhya praṇatajanasaubhāgyajananīṃ purā nārī 
bhūtvā puraripumapi kṣobhamanayat | smaro'pi tvāṃ natvā 
ratinayanalehyena vapuṣā munīnāmapyantaḥ prabhavati hi mohāya 
mahatām || 5 || 

hariḥ viṣṇuḥ tvāṃ bhavatīṃ cakrarūpiṇīṃ vidyārūpiṇīṃ ca 
ārādhya pūjayitvā japitvā dhyātvā ca | ata eva 
tripurasundarīprastārabhedeṣu ekasya prastārasya ṛṣiḥ viṣṇuḥ | 
ṛṣirnāma vedasthito mantro yena dṛṣṭaḥ sa iti | ata evāhuḥ 
darśanādṛṣiḥ iti | iyaṃ pañcadaśākṣarī 

p. 10) 

vidyā ṛgvede āmnātā catvāra īṃ bibhrati kṣemayantaḥ [ṛ. 
5-47-4] ityādau | na cātra īṃkāratrayaṃ hṛllekhātrayasyaiva 
śrutasvāt iti vācyam | ṣoḍaśakalātmakasya śrībījasya 
gurusampradāyavaśādvijñeyasya sthitatvāt caturṇāmīṃkārāṇāṃ 
siddheḥ mūlavidyāyāḥ vedasthitatvaṃ siddham | 

atra kecittu kulasamayācārābhijñāḥ catvāra īṃ bibhrati 
kṣemayantaḥ [ṛ. 5-47-4] ityādiśrutibodhitāścatvāra īṃkārāḥ 
īkāreṇa sārdhaṃ hṛllekhātrayamityāhuḥ | tanna īkārasya 
īṃkāratvokterayuktatvāt mūlavidyāyāḥ ṣoḍaśavarṇātmakatvāt 
ṣoḍaśavarṇātmakatvaṃ ca ṣoḍaśanityāprakṛtibhūtatvāt 
mūlavidyāyāḥ | etacca catuṣṣaṣṭyā tantraiḥ [31 ślo.] iti 
śivaḥ śaktiḥ kāmaḥ [32 ślo.] iti ca ślokadvayavyākhyānāvasare 
nipuṇataramupapādayiṣyāmaḥ | kiñcāsya mantrasya vedamūlatvaṃ 
saṃjñānānuvākena [tai. brā. 3-10-1] iyaṃ vāva saraghā [tai. 
brā. 3-10-10] ityanuvākena ca pratipādyata iti vakṣyate || 

prakṛtamanusarāmaḥ praṇatajanasaubhāgyajananīṃ prakarṣeṇa 
natāḥ praṇatāḥ kāyikavācikamānasikanamaskāravantaḥ janāḥ 
bhaktalokāḥ teṣāṃ saubhāgyasya jananī prasavitrī tāṃ purā 
pūrvaṃ nārī kāntā bhūtvā nārīrūpaṃ dhṛtvā puraripuṃ 
tripurāntakam | apiśabdo jitendriyatvaṃ saṃbhāvayati | kṣobhaṃ 
manovikāraṃ anayat nayati sma | gatibuddhi ityādisūtreṇa 
dvikarmakatvam | smaro'pi manmatho'pi | apiśabdaḥ 
pūrvoktaviṣṇudharmaṃ samuccinoti | yathā viṣṇurbhavanmantrasya 
ṛṣiḥ evaṃ smaro'pi | tvāṃ bhavatīṃ natvā śaraṇamupagamya 
śrīcakraṃ samyagabhyarcya tvanmūlavidyāṃ samyagabhyasya 
tvatprabhāvāpannasattvaḥ 

p. 11) 

ratinayanalehyena rateḥ svapatnyāḥ nayanābhyāṃ lehyena 
lehanārheṇa ratinayanaikadṛśyenetyarthaḥ | yadvā ratirnāma 
atisundarī tasyāḥ nayanapeyena ityatisaundaryaṃ kāmadehasyeti | 
vapuṣā dehena | munīnāṃ jitendriyāṇām | apiśabdaḥ 
saṃbhāvanāyām | antaḥ antaraṅge cittavṛttau | prabhavati 
samarthaḥ | hiḥ prasiddhau | mohāya 
śabdādiviṣayavāñchotpādanāya | mahatāṃ mahātmanām | 

atretthaṃ padayojanā he bhagavati ! praṇatajanasaubhāgyajananīṃ 
tvāṃ harirārādhya purā nārī bhūtvā puraripumapi kṣobhamanayat 
| smaro'pi tvāṃ natvā ratinayanalehyena vapuṣā mahatāṃ 
munīnāmapyantarmohāya prabhavati hi || 

purā kila nārāyaṇaḥ strīrūpadhārī kanakasvāminaṃ pralobhya 
avadhīt | tādṛśaṃ strīrūpaṃ śambhunā prārthitaḥ san tasmai 
darśayitvā taṃ vyāmohayāmāseti kathā anusandheyā | manmatho'pi 
sakalamunimanassaṃkṣobhaṃ kurvāṇaḥ pravartate | etacca 
vāmakeśvaramahātantre catuḥśatyāṃ nirūpitam- 

etāmeva purā''rādhya [purā dhyātvā] vidyāṃ trailokyamohinīm | 
trailokyaṃ mohayāmāsa kāmāriṃ bhagavān hariḥ || kāmadevo'pi 
deveśīṃ [mahātripurasundarīm] devīṃ tripurasundarīm | 
samārādhyābhavalloke sarvasaubhāgyasundaraḥ || iti || 

ataśca yatra yatra ratimūlakaṃ manassaṃkṣobhakaraṇaṃ bhavati 
tattadbhagavatīprasādalabhyamiti vaktuṃ kaverayamārambhaḥ || 5 || 

p. 12) 

yadyapi pūrvasmin śloke bhagavatīprasādāsāditaṃ manmathasya 
prāgalbhyamuktaṃ tathāpi manmathasya anaṅgavidyāyāṃ 
manmathaprastārasya ṛṣitvāt tadāyattamatiprāgalbhyamāha- 

dhanuḥ pauṣpaṃ maurvī madhukaramayī pañca viśikhāḥ vasantaḥ 
sāmanto malayamarudāyodhanarathaḥ | tathāpyekaḥ sarvaṃ 
himagirisute kāmapi kṛpāṃ apāṅgātte labdhvā jagadidamanaṅgo 
vijayate || 6 || 

atra padye yattadoradhyāhāraḥ | umayādhyāhāraḥ 
sakalakavisamayasiddhaḥ | yathā raghuvaṃśe vāgarthāviva sampṛktau 
ityatra yau sampṛktau tau vande iti | tathā ye nāma kecidiha naḥ 
prathayantyavajñām [mālatīmādhave] ityādau ya atpatsyate taṃ 
pratyeṣa yatna iti | dhanuḥ āyodhanasādhanaṃ cāpaḥ pauṣpaṃ 
puṣpamayam | puṣpāṇāmatimṛdulatvāt sparśāsahatvāt 
namanākarṣaṇādicāpakāryānarhatvamiti tātparyam | maurvī 
śiñjinī madhukaramayī padhukaraiḥ bhramaraiḥ pracurā 
bhramarapaṅktinirmitetyarthaḥ | parasparāsambaddhānāṃ 
śiñjinītvaṃ na saṅgacchata iti tātparyam | pañca 
pañcasaṅkhyāsaṅkhyayāḥ viśikāḥ bāṇāḥ | pañcānāṃ 
vikṣepaṇe tūṣṇīmbhāva eva śaraṇamiti tātparyam | kiñca pañca 
viśikhāḥ ityanena tadviśikhānāṃ prasūnātmakatvaprasiddheḥ 
viśikhakāryakāritvābhāva iti tātparyam | vasantaḥ kālaviśeṣaḥ 
vasanto madhumādhavau ityabhidhānāt | sāmantaḥ sacivaḥ | tasya 
kālātmakatvāt 

p. 13) 

sācivyakāritvaṃ na saṅgacchata iti tātparyam | malayamarut 
dakṣiṇānilaḥ āyodhanarathaḥ āyodhanasya yuddhasya sādhanaṃ 
syandanaḥ | malayamaruto malaye sthitatvāt na sārvatrikatvam 
sārvatrikatve'pi na sarvadā sadbhāvaḥ sarvadā sadbhāve'pi 
nīrūpatvādrathakāryakāritvābhāva iti tātparyam | tathāpi 
uktaprakāre sārvajanīne siddhe'pi ekaḥ asahāyaśūraḥ sarvaṃ 
sakalaṃ prapañcam | himagirisute himapradhāno giriḥ himagiriḥ 
śākapārthivāditvātsādhuḥ tasya sutā nandinī tasyāḥ 
sambuddhiḥ | kāṃ anirvācyām | api śabdaḥ sambhāvanāyām 
kṛpāṃ anukampām | apāṅgāt kaṭākṣāt te tava labdhvā prāpya | 
jagat jaṅgamātmakaṃ lokaṃ sthāvarātmakasyāprasakteḥ | idaṃ 
paridṛśyamānam | anaṅgaḥ aṅgarahitaḥ | atra sādhakasyāpi 
daurbalyaṃ sūcitam | hastābhāvādeva cāpākarṣaṇaśarasandhāne 
apyasambhāvite | pādābhāvācca rathādau [rathāvasthitirapi] 
sthitirapyasaṃbhāvitā | vaktranayanādyabhāvāt vayasyena madhunā 
sārdhaṃ sambhāṣaṇasannirīkṣaṇasahāsanādayaḥ asambhāvyā iti 
tātparyam | vijayate viparābhyāṃ jeḥ ityātmanepadam || 

atretthaṃ padayojanā he himagirisute ! yasyānaṅgasya dhanuḥ 
pauṣpaṃ maurvī madhukaramayī viśikhāḥ pañca sāmanto vasantaḥ 
āyodhanarathaḥ malayamarut tathā'pi so'naṅgaḥ ekaḥ te apāṅgāt 
kāmapi kṛpāṃ labdhvā sarvamidaṃ jagat vijayate || 

atra vibhāvanālaṅkāraḥ vijayasādhanābhāve'pi vijayotpatteḥ | 
kāraṇena vinā kāryotpattirvibhāvanā iti lakṣaṇam || 6 || 

sudhāsindhormadhye ityuttaraślokopayogitayā samayināṃ 
caturvidhaikyānusandhānamahimnā maṇipūre bhagavatyā yādṛśaṃ 
sphurati rūpaṃ tādṛśaṃ prastauti- 

p. 14) 

kvaṇatkāñcīdāmā karikalabhakumbhastananatā parikṣīṇā madhye 
pariṇataśaraccandravadanā | dhanurbāṇān pāśaṃ sṛṇimapi 
dadhānā karatalaiḥ purastādāstāṃ naḥ puramathiturāhopuruṣikā 
|| 7 || 

kvaṇatkāñcīdāmā śiñjanmaṇimekhalā | 
karikalabhakumbhastananatā karikalabhakumbhatulyābhyāṃ 
stanābhyāmīṣannamramadhyetyarthaḥ | parikṣīṇā kṛśā madhye 
avalagne tanumadhyetyarthaḥ | pariṇataśaraccandravadanā pariṇataḥ 
sampūrṇakalaḥ śaradi śaraskāle candraḥ induḥ tadvadvadanaṃ 
yasyāḥ sā | dhanuḥ cāpaṃ bāṇān puṣpamayān pāśaṃ dāma 
sṛṇiṃ aṅkuśam | apiśabdaḥ uktameva samuccinoti | dadhānā 
bibhratī karatalaiḥ caturbhiḥ hastāmbujaiḥ | purastāt 
hṛdayakamale maṇipūrānnirgatyeti śeṣaḥ | āstāṃ upaviśatu | 
naḥ asmākam | puramathituḥ tripurāntakasya | yadvā-purāṇi trīṇi 
varṇāni tripurābījāni mathnāti mathitvā navanītaṃ karoti yasmin 
rudrayāmale sa rudraḥ puramathitetyucyate | āhopuruṣikā ahośabda 
āścaryavācī puruṣaśabdasya pratyagātmavācinaḥ 
ahaṃśabdavācyatvaṃ lakṣyate ataḥ aho ahambhāvaḥ āhopuruṣikā 
ahaṅkāra iti yāvat | rudrasyāhaṅkārarūpitvaṃ bhagavatyāḥ 
śivaḥ śaktyā [1 ślokaḥ] ityādiślokavyākhyāne prapañcitam 
prapañcayiṣyate ca || 

atretthaṃ padayojanā kvaṇatkāñcīdāmā karikalabhakumbhastananatā 
madhye parikṣīṇā pariṇataśaraccandravadanā dhanuḥ bāṇān 
pāśaṃ sṛṇimapi karatalaiḥ dadhānā puramathiturāhopuruṣikā 
naḥ purastādāstām || 

p. 15) 

atra yadvaktavyaṃ tattu tavājñācakrastham [36 ślokaḥ] 
ityādiślokaṣaṭkavyākhyānānte nipuṇataramupapādayiṣyate tattata 
evāvadhāryam || 7 || 

sudhāsindhormadhye suraviṭapivāṭīparivṛte maṇidvīpe 
nīpopavanavati cintāmaṇigṛhe | śivākāre mañce 
paramaśivaparyaṅkanilayāṃ bhajanti tvāṃ dhanyāḥ katicana 
cidānandalaharīm || 8 || 

sudhāsindhoḥ amṛtasamudrasya madhye suraviṭapivāṭīparivṛte 
suraviṭapināṃ kalpavṛkṣāṇāṃ vāṭībhiḥ jhampābhiḥ parivṛte 
maṇidvīpe maṇimaye antarīpe nīpopavanavati nīpaiḥ [nīpānāṃ 
kadambānām] kadambaiḥ upavanavati cintāmaṇigṛhe 
cintāmaṇiviracite mandire śivākāre śivātmake śaktirūpe trikoṇe 
iti yāvat mañce khaṭvāyāṃ paramaśivaparyaṅkanilayāṃ 
paramaśiva eva paryaṅkaḥ talpaṃ tatra nilayaḥ avasthitiryasyāḥ 
tāṃ bhajanti sevante tvāṃ bhavatīṃ dhanyāḥ tvatprasādavaśāt 
kṛtārthāḥ katicana viralāḥ cidānandalaharīṃ cit jñānaṃ 
tadākāraḥ ānandaḥ niratiśayasukhaṃ tasya laharīṃ utsekarūpām 
|| 

atretthaṃ padayojanā he bhagavati ! sudhāsindhoḥ madhye 
suraviṭapivāṭīparivṛte maṇidvīpe nīpopavanavati cintāmaṇigṛhe 
śivākāre mañce paramaśivaparyaṅkanilayāṃ tvāṃ 
cidānandalaharīṃ katicana dhanyāḥ bhajanti || 

p. 16) 

atredamanusandheyam bhagavatpādācāryāḥ samayamatapāradṛśvānaḥ 
samayācārapravaṇāḥ samayarūpāṃ bhagavatīṃ stuvanti | 
samayācāro nāma āntarapūjāratiḥ | kulācāro nāma 
bāhyapūjāratiriti rahasyam | etacca tavādhāre mūle saha samayayā 
ityādiślokavyākhyānāvasare [41 ślokaḥ] 
nipuṇataramupapādayiṣyāmaḥ | śrīcakrasya viyaccakramiti 
nāmāntaramasti viyaccakratvaṃ tu viyatpūjyatvāt | viyatpūjyatvaṃ 
dvividhaṃ daharākāśajaṃ bāhyākāśajaṃ ceti | bāhyākāśajaṃ 
nāma bāhyākāśāvakāśe pīṭhādau 
bhūrjapatraśuddhapaṭahemarajatādipaṭṭatale likhitvā 
samārādhanam | etadeva kaulapūjetyāhurvṛddhāḥ | taduttaratra 
sphoryate | daharākāśajaṃ nāma hṛdayākāśāvakāśe cakrasya 
pūjanam | idameva samayapūjetyāhuḥ samayinaḥ | etadapyuttaratra 
sphoryate | tatra navayoniṣvadhaḥ sthitaśivātmakayonicatuṣkasyopari 
ūrdhvasthitaśaktyātmakayonipañcakādhaḥpradeśasya 
baindavasthānasya nāma sudhāsindhuriti || 

bindusthānaṃ sudhāsindhuḥ pañcayonyaḥ suradrumāḥ | tatraiva 
nīpaśreṇī ca tanmadhye maṇimaṇṭapam || tatra cintāmaṇikṛtaṃ 
devyā mandiramuttamam | śivātmake mahāmañce maheśānopabarhaṇe || 
atiramyatare tatra kaśipuśca sadāśivaḥ | bhṛtakāśca catuṣpādā 
mahendraśca patadgrahaḥ || tatrāste parameśānī 
mahātripurasundarī | śivārkamaṇḍalaṃ bhittvā 
drāvayantīndumaṇḍalam || tadudbhūtāmṛtasyandiparamānandananditā 
| kulayoṣittkulaṃ tyaktvā paraṃ varṣaṇametya sā || 

p. 17) 

iti bhairavayāmale vāmakeśvaramahātantre 
bahurūpāṣṭakavidyāyāṃ kathitam | devyā mandiramuttamam 
ityasyārthaḥ devīmandiraṃ trayaścatvāriṃśattrikoṇātmakaṃ 
śrīcakramucyate | ata uktaṃ śivākāre mañce iti | 
trikoṇātmakaśrīcakrasya baindavasthānaṃ pratyaṅgatvāt 
baindavasthānasya pradhānatvāt pradhāne guṇasyāntarbhāvāt 
tadantarbhāva ukta iti rahasyam | bhṛtakāḥ ityasyārthaḥ 
bhṛtakāḥ bhṛtyāḥ druhiṇaharirudreśvarāḥ | etacca gatāste 
mañcatvaṃ druhiṇa [92 ślokaḥ] ityādiślokavyākhyānāvasare 
vakṣyate | śivārkamaṇḍalaṃ bhitvā ityasyārthaḥ śivā nāma 
śaktiḥ kuṇḍalinī arkamaṇḍalaṃ hṛtkamalopari sthitaṃ bhittvā 
bhinnaṃ kṛtvā avayutya ācchādyetyarthaḥ | arkamaṇḍalopari 
sthitaṃ brahmadvāraṃ pidhāya 
sahasrakamalāntassthitamindumaṇḍalaṃ daśati drāvayati | ata eva 
kulayoṣit kuṇḍalinīśaktiḥ kulaṃ kulamārgaṃ suṣumnāmārgaṃ 
tyaktvā tatraivendumaṇḍale āsthāya paraṃ varṣaṇaṃ 
utkṛṣṭavarṣaṇaṃ dvisaptatisahasranāḍīṣu pravarṣaṇaṃ 
kṛtveti śeṣaḥ | sā kuṇḍalinī punaḥ svasthānametya 
svādhiṣṭhānaṃ prāpya svapitīti tātparyam | śivādīnāṃ 
mañcatvopadhānatvapatadgrahatvāvasthāpannatvaṃ 
[mañcatvopapādanaṃ patadgrahatvāddevānām] 
kāmarūpatvāddevānāṃ atyantāsannasevārthaṃ ghaṭate | 
imamevārthaṃ saṃkṣepeṇoktavān sadāśivaḥ- 

sudhābdhau nandanodyāne ratnamaṇṭapamadhyagām | 
bālārkamaṇḍalābhāsāṃ caturbāhāṃ trilocanām || 
pāśāṅkuśaśarāṃścāpaṃ dhārayantīṃ śivāṃ [śraye] śriyam 
| dhyātvā ca hṛdgataṃ [yantram] cakraṃ vratasthaḥ parameśvarīm 
|| pūrvoktadhyānayogena cintayan japamācaret [sañcintya 
dhyānamācaret] || iti || 

p. 18) 

anena kvaṇatkāñcīdāmā iti sudhāsindhormadhye iti ca 
ślokadvayamekīkṛtya vyākhyātamityavagantavyam || 

mahīṃ mūlādhāre kamapi maṇipūre hutavahaṃ sthitaṃ 
svādhiṣṭhāne hṛdi marutamākāśamupari | mano'pi bhrūmadhye 
sakalamapi bhittvā kulapathaṃ sahasrāre padme saha rahasi patyā 
viharase || 9 || 

mahīṃ pṛthivītattvaṃ mūlādhāre mūle gudasthāne 
sarvādhārabhūtaṃ cakraṃ mūlādhārabhūtamiti tasmin mūlādhāre 
| 

sarvādhārā mahī yasmāt mūlādhāratayā sthitā | tadabhāve tu 
dehasya pātaḥ syādudgamo'pi vā || 

iti rudrarahasye | pṛthivītattvātmakasya mūlādhārasyābhāve deha 
ūrdhvaṃ vā gacchet adho vā patedityarthaḥ | kaṃ udakatattvam | 
apiśabdaḥ svādhiṣṭhānoktavahniṃ samuccinoti | maṇipūre 
maṇipūracakre yatra sthitā bhagavatī maṇibhiḥ tatpradeśaṃ 
pūrayati sa deśo maṇipūraḥ | samayināṃ āntarapūjāvasare 
tṛtīyakamale nānāvidhamaṇigaṇakhacitabhūṣaṇārpaṇaṃ devyāḥ 
kartavyamiti rahasyam | hutavahaṃ agnitattvam sthitaṃ pratiṣṭhitaṃ 
svādhiṣṭhāne svādhiṣṭhānanāmake cakre kuṇḍalinyāḥ 
bhagavatyāḥ svayamadhiṣṭhāya [svecchayādhiṣṭhāya] granthiṃ 
kṛtvā avasthānaṃ svādhiṣṭhānam | yathoktaṃ yogadīpikāyām- 

rudragranthirayaṃ śakteḥ svādhiṣṭhānāgrasīmani || iti || 

p. 19) 

yadyapi ādhāracakrasyopari svādhiṣṭhānaṃ varṇanīyaṃ tathāpi 
ākāśāditattvotpattikramamavalambya vyutkrameṇa 
maṇipūracarakravarṇanaṃ kṛtamityanusandheyam | etacca 
tavājñācakrastham [36 ślokaḥ] 
ityādiślokaṣaṭkavyākhyānāvasare samyagupavarṇitam | hṛdi 
hṛdayākāśe anāhatanāmani cakre anāhatanādasthānatvāt 
anāhatanāmāsya | marutaṃ maruttattvam ākāśaṃ ākāśatattvam 
upari pūrvoktānāmupari viśuddhicake śuddhasphaṭikasaṅkāśatvāt 
viśuddhināmāsya | manaḥ manastattvam apiśabdaḥ 
uktasamuccayārthaḥ bhrūmadhye bhruvorantarāle ājñācakre atra āṅ 
īṣadarthaḥ jñā jñānam īṣat jñānaṃ yatra jāyate 
sādhakānāṃ bhagavatīviṣayam | brahmagranthibhedanātivyagratayā 
bhagavatyā ājñācakre kṣaṇamātrāvasthānāt sādhakānāṃ 
taṭillekhārūpeṇa avabhāsanāt ājñācakranāmāsya | sthitamiti 
tiṅgavyatyayena sarvatrānuṣajyate | sakalaṃ sarvam apiḥ samuccaye 
bhittvā (hitvā) kulapathaṃ suṣumnāmārgam sahasrāre sahasradale 
padme kamale saha militvā rahasi ekānte patyā sadāśivena viharase 
krīḍase || 

atretthaṃ padayojanā he bhagavati ! mūlādhāre mahīṃ kaṃ 
maṇipūre hutavahamapi svādhiṣṭhāne hutavahameva hṛdi marutaṃ 
ākāśamupari mano'pi bhrūmadhye ākāśamapi sthitamiti 
liṅgavyatyayena sarvatrānuṣajyate | sakalaṃ kulapathamapi bhittvā 
sahasrāre padme rahasi patyā saha viharase || 

atredamanusandheyam 
mūlādhārasvādhiṣṭhānamaṇipūrānāhataviśuddhyājñātmakāni 
ṣaṭ cakrāṇi | etāni 
pṛthivyagnijalapavanākāśamanastattvātmakāni | tāni tattvāni 
teṣu cakreṣu tanmātratayā'vasthitāni | 

p. 20) 

tanmātrāstu gandharūparasasparśaśabdātmakāḥ | 
ājñācakrasthitena manastattvena ekādaśendriyagaṇaḥ saṃgṛhītaḥ 
| evamekaviṃśatitattvāni pratipāditāni | patyā saha rahasi 
sahasrapatre viharase ityanena tattvacatuṣṭayaṃ sūcitam | tacca 
māyāśuddhavidyāmaheśvarasadāśivātmakaṃ tattvacatuṣṭayam | 
evaṃ militvā pañcaviṃśatitattvāni māyāparyantāni 
[pratipāditāni, tānītyadhikam] māyayā yuktatvāt prākṛtāni | 
māyā maheśvareṇa saṃyuktā satī tasya jīvabhāvamāpādayati | sa 
jīvaḥ prākṛta eva | śuddhavidyā tu sadāśivena yuktā satī 
sādākhyā kaleti vyavahriyate | ato bhagavatī caturviṃśatitattvā 
[nyatikrāntā śivena] nyatikrāntā sadāśivena pañcaviṃśena 
sārdhaṃ viharamāṇā ṣaḍviṃśatattvātmatāmāpannā paramātmeti 
gīyate | etaduktaṃ bhavati sādākhyā kalā pañcaviṃśena 
sadāśivena militā ṣaḍviṃśā bhavati melanasya tattvāntaratvāt | 
na cobhayormelanamubhayātmakam | tasya tādātmyarūpatvāt 
tattvāntarameveti rahasyam | yattu śrutivākyaṃ pañcaviṃśa ātmā 
bhavati [tai. brā. 1-2-6] iti tattu sadāśivatattvapratipādanaparam 
na melanaparamiti dhyeyam || 

nanu baindavasthānaṃ śrīcakrasya madhyasthitaṃ śivacakrāṇāṃ 
caturṇāmupari śakticakrāṇāṃ pañcānāmadhastādavasthitatvāt 
sahasrārapadmasya tu śirassthitatvāt sarveṣāmupari vartamānatvāt 
tasya baindasthānatvaṃ nopapadyata iti cet - 

niśamyatāṃ bhāgavatamatarahasyam - 

caturbhiḥ śivacakraiśca śakticakraiśca pañcabhiḥ | 
śivaśaktimayaṃ jñeyaṃ śrīcakraṃ śivayorvapuḥ || 

p. 21) 

ityādau śakticakrāṇi 
trikoṇāṣṭakoṇadaśāradvitayacaturdaśakoṇātmakāni pañca 
cakrāṇi | śivacakrāṇi tu aṣṭadalaṣoḍaśadalamekhalātritayabhū 
puratrayātmakānīti | ataḥ śakticakrāṇāṃ bāhyataḥ 
śivacakrāṇi | śivasya śaktibāhyatvāyogāt tāni śivacakrāṇi 
bindurūpeṇākṛṣya śakticakrāntare sthāpitāni | ata eva binduḥ 
śivacakracatuṣṭayātmakaḥ śakticakreṣu pañcasu vyaśnuvānaḥ 
samāpta iti śivaśaktyoraikyamiti kecit || 

anye tu bindutrikoṇayoraikyaṃ aṣṭakoṇāṣṭadalāmbujayoḥ 
daśārayugmaṣoḍaśadalāmbujayoḥ caturdaśārabhūpurayoraikyam 
anena prakāreṇa śivaśaktyoraikyamityāhuḥ | atra binduśabdena 
śivacakracatuṣṭayapratinidhibhūto vartulākāro lakṣyate na tu 
catuṣkoṇamadhyavartī binduḥ | sa tu sahasrakamalāntargataḥ 
ādhārasvādhiṣṭhānadaśadalaprakṛtibhūtaḥ 
śivaśaktimelanāviṣṭatanuḥ sādākhyaṃ ṣaḍviṃśaṃ tattvam | 
tena saha nādabindukalānāmaikyaṃ nāsti tasya nādabindu 
kalātītatvāt | etacca purastātprapañcayiṣyate | ata eva 
sahasrakamalāntargatacandramaṇḍalamadhyavartī sudhāsindhureva 
bhagavatyā viharaṇasthānamiti sahasrāre padme saha rahasi patyā 
viharase iti sudhāsindhormadhye iti ca ślokadvayasyaika evārtha iti 
rahasyam | imamevārthaṃ bhairavayāmale candrajñānavidyāyāṃ śiva 
āha pārvatīm - 

caturbhiḥ śivacakraiśca śakticakraiśca pañcabhiḥ | navacakraiśca 
saṃsiddhaṃ śrīcakraṃ śivayoryapuḥ || 

trikoṇamaṣṭakoṇaṃ ca daśakoṇadvayaṃ tathā | caturdaśāraṃ 
caitāni śakticakrāṇi pañca ca || 

binduścāṣṭadalaṃ padmaṃ padmaṃ ṣoḍaśapatrakam | caturaśraṃ 
ca catvāri śivacakrāṇyanukramāt || 

trikoṇe baindavaṃ śliṣṭaṃ aṣṭāre'ṣṭadalāmbujam | 
daśārayoḥ ṣoḍaśāraṃ bhūgṛhaṃ bhuvanāśrake || 

p. 22) 

śaivānāmapi śāktānāṃ cakrāṇāṃ ca parasparam | 
avinābhāvasambandhaṃ ko jānāti sa cakravit || 

trikoṇamaṣṭakoṇaṃ ca daśakoṇadvayaṃ tathā | manukoṇaṃ 
catuṣkoṇaṃ koṇacakrāṇi ṣaṭ kramāt || 

mūlādhāraṃ tathā svādhiṣṭhānaṃ ca maṇipūrakam | anāhataṃ 
viśuddhyākhyamājñācakraṃ vidurbudhāḥ || 

tavādhārasvarūpāṇi koṇacakrāṇi pārvati | trikoṇarūpiṇī 
śaktiḥ bindurūpaśśivaḥ smṛtaḥ || 

avinābhāvasambandhaḥ tasmādbindutrikoṇayoḥ || iti || 

itaḥ pūrvam - 

adhomukhaṃ catuṣkoṇaṃ śivacakrātmakaṃ viduḥ || 

ityanusāreṇa adhomukhāni catvāri trikoṇāni śivātmakāni 
ityuktiḥ śivacakrāṇi bāhyāni tadrūpeṇāvasthitāni 
ityevaṃpareti dhyeyam || 

yadvā - kaulamatānusāreṇa adhomukhāni catvāri trikoṇāni 
śivātmakāni ūrdhvamukhāni pañca trikoṇāni śaktyātmakāni | 
kaulamate saṃhārakrameṇa lekhane navatrikoṇātmakaṃ śrīcakram | 
etatsarvaṃ caturbhiḥ śrīkaṇṭhaiḥ [11 ślokaḥ] 
ityādiślokavyākhyānāvasare vaktavyamapi sahasrāre padme saha 
rahasi patyā viharase ityatrāvaśyaṃ vaktavyatvāt ubhayopayogitayā 
atraiva kiñcitkathitam | vistarastu tatraivāvadhāryaḥ || 9 || 

sudhādhārāsāraiścaraṇayugalāntarvigalitaiḥ prapañcaṃ 
siñcantī punarapi rasāmnāyamahasaḥ | āvāpya svāṃ bhūmiṃ 
bhujaganibhamadhyuṣṭavalayaṃ svamātmānaṃ kṛtvā svapiṣi 
kulakuṇḍe kuhariṇi || 10 || 

p. 23) 

sudhāyā amṛtasya dhārāṇāmāsāraiḥ sampātaiḥ | 
atrāsāraśabda eva dhārāsampātavacana iti dhārāśabdasāhacaryāt 
āsāraśabdaḥ sampātamātravacana iti na paunaruktyam | yadvā 
sudhāyā ādhārabhūtā āsārā dhārāsampātāḥ taiḥ 
caraṇayugalāntarvigalitaiḥ caraṇayugalasya pādāravindadvitayasya 
antarvigalitaiḥ madhyapradeśāt sravadbhiḥ prapañcaṃ 
dvisaptatisahasrasaṅkhyākanāḍīmārgaṃ siñcantī sektrī punarapi 
secanānantaramapi rasāmnāyamahasaḥ candrasakāśāt 
rasāmnāyamahaśśabdo yāmaleṣu kalānidhau prasiddhaḥ rasasya 
sudhāyā āmnāyo guṇānāmādhikyamiti yāvat tadātmakaṃ mahaḥ 
kāntiryasya saḥ rasāmnāyamahā iti vyutpatteḥ | avāpya prāpya 
svāṃ svakīyāṃ bhūmiṃ ādhāracakraṃ bhujaganibhaṃ 
sarpasadṛśaṃ adhyuṣṭavalayaṃ adhiṣṭhitakuṇḍalanāviśeṣaṃ 
svaṃ nijaṃ ātmānaṃ kṛtvā dhṛtvā svasvarūpamavalambya uṣitvā 
svapiṣi nidrāsi kulakuṇḍe kuḥ pṛthivītattvaṃ līyate yatra 
tatkulaṃ ādhāracakram | lakṣaṇayā suṣumnāmārgaḥ kulamityucyate 
| ata eva kaulāḥ kulapūjakāḥ ādhārasevakā iti kaulatvaṃ 
teṣāmiti rahasyam | etaduttaratra prasphoryate | kulamārgasya 
suṣumnāyā mūle yatkuṇḍaṃ kamalakandākāraṃ ādhārakandaṃ 
tasmin kuhariṇi kamalakandamadhyasthitachidratulyaṃ chidraṃ yasya 
kuṇḍasya tattathoktam | ādhārakandamadhyasthitasuṣiramadhye 
bisatantunibhā tatra kuṇḍalinī śaktiḥ vartata iti tātparyam || 

atretthaṃ padayojanā he bhagavati ! caraṇayugalāntarvigalitaiḥ 
sudhādhārāsāraiḥ prapañcaṃ siñcantī rasāmnāyamahasaḥ 
sakāśāt svāṃ bhūmiṃ punarapyavāpya 
bhujaganibhamadhyuṣṭavalayaṃ svamātmānaṃ kṛtvā kuhariṇi 
kulakuṇḍe svapiṣi || 

atredamanusandheyam śirassthitaṃ candramaṇḍalaṃ 
sarvayogaśāstrasiddham | 

p. 24) 

tattu samayināṃ mate śrīcakrameva | candramaṇḍalasya 
ṣoḍaśakalātmakatvāt śrīvidyāyāḥ pratipadādiṣoḍaśadineṣu 
kalāvṛddhikṣayayoḥ vakṣyamāṇatvāt candramaṇḍalametadeva | 
bāhyasthitamapi candramaṇḍalaṃ śrīcakrameveti 
subhagodayavyākhyāne nidarśitam | tattu mahārahasyam | ataśca 
śirassthitasahasradalakamalāntargataśrīcakrātmakaśaśibimbamadhyas 
thitāyā bhagavatyāścaraṇakamalanirṇejanajalaiḥ sudhāmayaiḥ 
sādhakasya sakalaśarīraṃ saṃplāvya punaḥ bhujaṅgarūpeṇa 
ādhārakuṇḍaṃ praviśya suṣumnāmavaṣṭabhya sā bhagavatī 
svapitīti | yathoktaṃ vāmakeśvaramahātantre- 

bhujaṅgākārarūpeṇa mūlādhāraṃ samāśritā | śaktiḥ 
kuṇḍalinī nāma bisatantunibhā''śubhā || 

āśubhā kṣaṇaprabhā vidyunnibhetyarthaḥ | 

mūlakandaṃ phaṇāgreṇa daṣṭvā kamalakandavat | mukhena pucchaṃ 
saṃgṛhya brahmarandhraṃ samāśritā || 

padmāsanagataḥ svastho gudamākuñcya sādhakaḥ | vāyumūrdhvagatiṃ 
kurvan kumbhakāviṣṭamānasaḥ || 

vāyvāghātavaśādagniḥ svādhiṣṭhānagato jvalan | 
jvalanāghātapavanāghātairunnidrito'hirāṭ || 

rudragranthiṃ tato bhittvā viṣṇugranthiṃ bhinattyataḥ | 
brahmagranthiṃ ca bhittvaiva kamalāni bhinatti ṣaṭ || 

sahasrakamale śaktiḥ śivena saha modate | sā cāvasthā parā 
jñeyā saiva nirvṛtikāraṇam || iti || 

p. 25) 

śrutirapi bhagavatyāḥ caraṇāmbujasudhādhārāsāraiḥ 
prapañcasecanaṃ pratipādayati | tathā hi - 

lokasya dvāramarcimatpavitram | jyotiṣmadbhrājamānaṃ mahasvat | 
amṛtasya dhārā bahudhā dohamānam | caraṇaṃ no loke sudhitān 
dadhātu || [tai. brā. 3-1-32] 

asyārthaḥ - lokasya svanivāsasthānasya sāyujyasya vā 
sārṣṭyādervā brahmalokādervā dvāraṃ tatprāpakamityarthaḥ | 
arcimat arciṃṣi mayūkhāḥ asya santīti arcimat arciṣmadityarthaḥ 
| chāndasaḥ sakāralopaḥ | mayūkhāḥ kiraṇāḥ | pavitraṃ 
svayamatiśuddham anyaśuddhihetuśca | jyotiṣmadbhrājamānaṃ 
mahasvat ityāmreḍanaṃ arciṣmatstutyartham | yadvā - 

trikhaṇḍaṃ [trividham] mātṛkācakraṃ somasūryānalātmakam | 

iti vakṣyate | arciṣmat ityanena 
āgneyānyarcīṃṣyaṣṭottaraśataṃ kathyante | jyotiṣmat ityanena 
aindavāni ṣaṭtriṃśaduttaraśataṃ jyotīṃṣi nirdiśyante | 
mahasvat ityanena bhānavīyāni ṣoḍaśottaraśataṃ mahāṃsi 
kiraṇāḥ saṃgṛhyante | etacca kṣitau ṣaṭpañcāśat [14 ślo.] 
itiślokavyākhyānāvasare nipuṇataramupāpadayiṣyāmaḥ | amṛtasya 
dhārāḥ sudhāpravāhān bahudhā bahuprakāreṇa 
dvisaptatisahasranāḍīmārgeṣu dohamānaṃ kirat 
candramaṇḍalagatasudhādhārāpravāhān svanirṇejanapavitritān 
varṣedityarthaḥ | taccaraṇaṃ 

p. 26) 

caraṇaśabdo napuṃsakaḥ padaṅghriścaraṇo'striyām ityamaraḥ | 
naḥ asmān sādhakān loke prapañce sudhitān tṛptān yadvā 
sañjātabuddhiprakāśān sudhiyaḥ kṛtvā dadhātu puṣṇātu || 

nanvayaṃ mantraḥ apāghāsviṣṭiṣu yājyātvenāmnātaḥ | 
mantrāṇāṃ samavetārtha [svasvadevatā] prakāśanaśīlatvāt 
caraṇāya svāhā iti caturthyarthopahitaśabdasyaiva 
[caturthyantopahitaḥ] devatātvāt etadvyākhyānaṃ na saṅgacchata 
iti cet - 

ucyate - atrāhuḥ bhagavatpādāḥ - siddhamannaṃ parityajya 
bhikṣāmaṭati durmatiḥ | 

iti | ayamāśayaḥ - vedasya sakartṛkatvāsiddheḥ 
phaladānasamarthatvena sarvavidvadabhimataṃ 
vṛddhavyavahārāvasitaśaktikaṃ lokasya dvāram ityādiviśeṣaṇa 
viśiṣṭatvārhaṃ bhagavatyāścaraṇameva caraṇāya svāhā ityatra 
caraṇaśabde nābhidhīyata iti || 10 || 

pūrvaśloke indumaṇḍalātmakaṃ śrīcakramityuktam | tadeva 
śrīcakramupadiśati- 

caturbhiśśrīkaṇṭhaiḥ śivayuvatibhiḥ pañcabhirapi 
prabhinnābhiḥ śambhornavabhirapi mūlaprakṛtibhiḥ | 
catuścatvāriṃśadvasudalakalāśratrivalaya- trirekhābhiḥ sārdhaṃ 
tava śaraṇakoṇāḥ pariṇatāḥ || 11 || 

p. 27) 

caturbhiḥ catussaṅkhyāsaṅkhyeyaiḥ śrīkaṇṭhaiḥ śṛṇāti 
hinastīti śrīḥ viṣaṃ kaṇṭhe yasyāsau śrīkaṇṭhaḥ haraḥ te 
koṇā api śrīkaṇṭhāḥ tādātmyāt tadvyapadeśaḥ ata eva 
bahuvacanasiddhiḥ | śrīkaṇṭhātmakairityarthaḥ | śivayuvatibhiḥ 
śaktibhiḥ pūrvavadbahuvacanasiddhiḥ | śaktyātmakairityarthaḥ | 
pañcabhiḥ | apiśabdo bhede prabhinnābhiḥ prakarṣeṇa bhinnābhiḥ 
| prakarṣastu śivaśakticakramadhye baindavasthānasya vidyamānatvāt 
etacca samayamatena sṛṣṭikrameṇa pañcacakralekhane jñeyam | 
kaulamatena saṃhārakrameṇa navayonicakralekhane ūrdhvādhomukhatayā 
avasthiteḥ prabhinnatvaṃ jñeyam | tenobhayaṃ pṛthakpṛthak 
sthitamityarthaḥ | śambhoḥ iti pañcamī śambhuśabdena catvāraḥ 
śrīkaṇṭhāḥ ucyante navabhiḥ navasaṅkhyaiḥ apiśabdo 
vakṣyamāṇabāhulyaṃ samuccinoti | mūlaprakṛtibhiḥ prapañcasya 
mūlakāraṇaiḥ ata eva teṣāṃ yoniśabdena vyavahāraḥ | nava 
yonayo navadhātvātmakāḥ | tathā coktaṃ kāmikāyām - 

tvagasṛṅmāsamedosthidhātavaḥ śaktimūlakāḥ | 
majjāśuklaprāṇajīvadhātavaḥ śivamūlakāḥ || navadhāturayaṃ 
deho navayonisamudbhavaḥ | [jīvadhāturnāma jīvādhiṣṭhānatvāt 
ojodhātureva jīvadhāturityucyate | taduktaṃ vāgbhaṭena - 
rasādiśukrāntānāṃ dhātūnāṃ prasādaśreṣṭho 
jīvādhārabhūto dhātuḥ oja iti ityayamadhiko vyākhyānarūpaḥ 
pāṭha ta-pustake dṛśyate] daśamī yonirekaiva [daśamo 
dhāturekaiva iti pāṭhāntaram] parā śaktistadīśvarī || iti || 

daśamī yoniḥ baindavasthānam tadīśvarī tasya dehasyetyarthaḥ || 

p. 28) 

evaṃ [ekaṃ] piṇḍāṇḍamutpannaṃ tadvadbrahmāṇḍamudbabhau | 
pañca bhūtāni śāktāni māyādīni śivasya tu || māyā ca 
śuddhavidyā ca maheśvarasadāśivau | pañcaviṃśatitattvāni 
tatraivāntarbhavanti te || 

ekādaśendriyāṇi śabdāditanmātrāḥ tacchabdena parāmṛśyante | 

śivaśaktyātmakaṃ viddhi jagadetaccarācaram | 

caraṃ piṇḍāṇḍaṃ acaraṃ brahmāṇḍamityarthaḥ || 

kecittu ekapañcāśattatvānyāhuḥ | tathāhi - 

pañca bhūtāni tanmātrapañcakaṃ cendriyāṇi ca | jñānendriyāṇi 
pañcaiva tathā karmendriyāṇi ca || tvagādidhātavassapta pañca 
prāṇādivāyavaḥ | manaścāhaṅkṛtiḥ khyātirguṇāḥ 
prakṛtipūruṣau || rāgo vidyā kalā caiva niyatiḥ kāla eva ca | 
māyā ca śuddhavidyā ca maheśvarasadāśivau || śaktiśca 
śivatattvaṃ ca tattvāni kramaśo viduḥ || iti || 

etānyekapañcāśattatvāni vāyavīyasaṃhitādiśaivapurāṇeṣū 
sarveṣu pratipāditāni | asyārthaḥ - pañca bhūtāni 
pṛthivyaptejovāyvākāśātmakāni kāryakāraṇarūpeṇāvasthitāni 
| gandhāditanmātrapañcakaṃ pṛthivyādīnāṃ kāraṇabhūtam | 
jñānendriyāṇi śrotratvakcakṣurjihvāghrāṇātmakāni | 
karmendriyāṇi vākpāṇipādapāyūpasthātmakāni | dhātavaḥ 
tvagasṛṅmāṃsamedosthimajjāśuklāni | vāyavaḥ 
prāṇāpānavyānodānasamānāḥ | manaḥ mananātmikā śaktiḥ | 
ahaṅkṛtiḥ ahaṅkārajanikā śaktiḥ | khyātiḥ jñānam | guṇāḥ 
satvarajastamāṃsi | 

p. 29) 

prakṛtiḥ mūlaprakṛtiḥ | puruṣo jīvaḥ | rāgaḥ icchā | vidyā 
śāstrajanitavikalpajñānam | kalāḥ 
ṣaṣṭyuttaratriśatasaṅkyākāḥ | niyatiḥ niyāmikā śaktiḥ | 
kālaḥ saṃharaṇaśaktiḥ | māyā aindrajālikādijñānam 
[kādyajñānaṃ iti ca pāṭhaḥ] śuddhavidyā mocakajñānam | 
maheśvaraḥ rajoguṇāviṣṭaḥ sṛṣṭikartā | sadāśivaḥ 
sṛṣṭisthitikartā | śaktiḥ maheśvarasadāśivayoḥ 
rakṣaṇasarjanaśaktiḥ | cakārāt kālātmikā [kālasya] 
saṃhāriṇīśaktiśca | śivatattvaṃ śuddhabuddhamuktasvarūpam | 
eteṣu sarveṣu tattveṣu katicana tattvāni kutracidantarbhavanti | 
tvagādisaptadhātavaḥ bhūteṣvantarbhavanti | prāṇādivāyavaḥ 
vāyāvantarbhavanti | ato bhūteṣveva teṣāmantarbhāvaḥ | 
ahaṅkārasya manasyantarbhāvaḥ | khyātervidyāyāmantarbhāvaḥ | 
guṇānāṃ prakṛtāvantarbhāvaḥ prakṛtestu śaktāvantarbhāvaḥ | 
puruṣasya maheśvare'ntarbhāvaḥ | kalāyāḥ 
śuddhavidyāyāmantarbhāvaḥ | niyatestu śaktāvevāntarbhāvaḥ | 
kālasya maheśvare sadāśive cāntarbhāvaḥ | śaktestu 
śuddhavidyāyāmantarbhāvaḥ | śivatattvasya 
sadāśivatattve'ntarbhāvaḥ | iti tattvāni pañcaviṃśatireva | 
pañca bhūtāni tanmātrapañcakaṃ pañca jñānendriyāṇi pañca 
karmendriyāṇi manastattvaṃ 
māyāviśuddhavidyāmaheśvarasadāśivātmakāni catvāri | etāni 
pañcaviṃśatitattvāni sarvasaṃmatāni śrutyanugṛhītatvāt | 
tathā ca śrutiḥ pañcaviṃśa ātmā bhavati [tai. brā. 1-2-6] iti | 
ataśca ṣaṭtriṃśattattvānītyāditattvavikalpaḥ śruttyanusāreṇa 
pañcaviṃśatitattvapara ityanusandheyam | ataśca sarvatattvātītaṃ 
śivaśaktisampuṭam | tasmādeva jagadutpattiḥ | taduktaṃ subhagodaye 
- 

paro'pi śaktirahitaḥ śaktaḥ kartuṃ na kiñcana | śaktaḥ 
syātparameśāni śaktyā yukto bhavedyadi || iti || 

p. 30) 

atra bahu vaktavyamasti | tattu subhagodayavyākhyānāvasare 
nipuṇataramupapāditamasmābhiriti alamativistareṇa | 
prakṛtamanusarāmaḥ || 

catuścatvāriṃśata etatsaṃkhyābhiḥ 
vasudalakalāśratrivalayatrirekhābhiḥ vasavo'ṣṭau tena 
vasuśabdena aṣṭasaṃkhyā lakṣyate | vasudalaṃ aṣṭadalaṃ 
kalāśraṃ kalāḥ ṣoḍaśa tena kalāśadena ṣoḍaśasaṃkhyā 
lakṣyate | aśraśabdena dalaṃ lakṣyate | ataḥ kalāśraṃ 
ṣoḍaśadalamityarthaḥ | trivalayaṃ trayāṇāṃ balayānāṃ 
samāhāraḥ trivalayaṃ trimekhalamityarthaḥ | trirekhāḥ 
prākāravalayākārarekhāḥ bhūpuratrayamityarthaḥ | etacca 
bhūpuratrayaṃ caturdikṣu dvārayuktam | tathācoktam || 

bindutrikoṇavasukoṇadaśārayugmamanvaśranāgadalasaṃyutaṣoḍaśār 
am | vṛttatribhūpurayutaṃ paritaścaturdvāḥ śrīcakrametaduditaṃ 
paradevatāyāḥ || 

iti śrutirapi - 

satadvā'ṭṭāragamaṃ tā | sahāryaṃ nagaraṃ tava || [tai. ā. 
1-31] 

iti | asyārthaḥ - satadvā caturdvāramityarthaḥ | 
chāndaso'varṇalopaśca | aṭṭāragamaṃ aṭṭāraiḥ 
prākāravalayaiḥ tribhiḥ agamaṃ durgamam | tā tānīmāni bhūtāni 
| bhagavati ! tava nagaraṃ puraṃ śrīcakrātmakaṃ saṃhāryaṃ 
saṃhārakamityarthaḥ | pṛthivyādimaheśvarāntāni tattvāni 
tatraiva līyanta iti tātparyam || 

kecidevaṃ vyācakṣate saṃhāryaṃ saṃhārakrameṇa lekhanīyamiti | 
tanna kaulamata eva saṃhārakrameṇa cakrasya lekhanīyatvāditi | 

prakṛtamanusarāmaḥ - 

p. 31) 

tābhiḥ sārdhaṃ saha tava bhavatyāḥ śaraṇakonāḥ śaraṇaṃ 
gṛhaṃ baindavaṃ mandiraṃ tacca koṇāśceti dvandvasamāsaḥ | 
tataḥ koṇāścatuścatvāriṃśadityarthaḥ | 

nanu bindutrikoṇetyādikrameṇa trikoṇabindubhyāṃ yoge 
ṣaṭcatvāriṃśatkoṇāḥ binduparityāge pañcacatvāriṃśatkoṇā 
iti cet - 

satyaṃ prastāravaśāt trikoṇasyādhassthitaṃ koṇadvayamaṣṭakoṇe 
antargatam | tataśca koṇāḥ tricatvāriṃśadeveti || 

śaraṇena sārdhaṃ koṇā iti dvandvasamāsagatyā vyākhyānam | 
yadvā trayaścatvāriṃśaditi pāṭhāntaram | tatra spaṣṭa 
evārthaḥ | pariṇatāḥ pariṇāmaṃ prāptāḥ | ayamarthaḥ 
trikoṇāṣṭakoṇadaśakoṇayugalacaturdaśakoṇātmakāni 
śakticakrāṇi | 
aṣṭadalaṣoḍaśadalamekhalātrayabhūpuratrayātmakāni catvāri 
śivacakrāṇi | trikoṇe vasudalaṃ vasukoṇe ṣoḍaśadalaṃ 
daśārayugme mekhalātritayaṃ bhuvanāśrake bhūgṛhaṃ 
antarbhūtamiti pariṇatamityucyate | etacca pūrvameva pratipāditam || 

atretthaṃ padayojanā he bhagavati ! caturbhiḥ śrīkaṇṭhaiḥ 
śambhoḥ sakāśātprabhinnābhiḥ pañcabhiḥ śivayuvatibhiḥ 
navabhirapi mūlaprakṛtibhiḥ tava śaraṇakoṇāḥ 
vasudalakalāśratrivalayatrirekhābhiḥ sārdhaṃ pariṇatāḥ santaḥ 
catuścatvāriṃśaditi || 

atredamanusandheyam asmin cakre aṣṭāviṃśatimarmasthānāni | 
sandhayastu caturviṃśatiḥ || 

nanu marmāṇi caturviṃśatireva kathamaṣṭāviṃśatiḥ ? 

p. 32) 

dvirekhāsaṅgamasthānaṃ sandhirityabhidhīyate | 
trirekhāsaṅgamasthānaṃ marma marmavido viduḥ || iti || 

ucyate - aṣṭadalaṣoḍaśadalamekhalātrayabhūpuratrayāṇāṃ 
śivacakrāṇāṃ trirekhāsaṅgamasthānatvābhāve'pi vācanikī 
marmasaṃjñā | yathoktaṃ candrajñānavidyāyām - 

manvaśradvidaśārāṣṭakoṇavṛttacatuṣṭayam | 
aṣṭāviṃśatimarmāṇi caturviṃśatisandhayaḥ || iti || 

asyārthaḥ - caturdaśakoṇe daśārayugme aṣṭakoṇe ca 
trirekhāsaṅgamasthānagaṇanāyāṃ caturviṃśatimarmasthānāni 
vṛttacatuṣṭayena śivacakrātmakena sārdhaṃ aṣṭāviṃśatiriti || 

etatsarvaṃ cakralekhanā'parijñāne jñātuṃ duśśakamiti 
cakralekhanaprakāro nirūpyate | sa ca dviprakāraḥ sṛṣṭikrameṇa 
saṃhārakrameṇa ceti | saṃhārakrameṇa lekhanaṃ kaulamārga eva | 
tathāpi navayoniparijñānārthaṃ sa prakāro nirūpyate || 

saṃhārakrameṇa tāvat vṛttamālikhya vṛttamadhye nava rekhāḥ 
likhitvā paścimarekhāprāntābhyāṃ trikoṇamutpādya svāpekṣayā 
ṣaṣṭhyā rekhayā yojayet | evaṃ prāgrekhāprāntābhyāṃ 
trikoṇamutpādya svāpekṣayā saptamyā rekhayā yojayet | 
paścimadvitīyarekhāprāntābhyāṃ trikoṇamutpādya svāpekṣayā 
aṣṭamyā yojayet | prāgdvitīyarekhāprāntābhyāṃ 
trikoṇamutpādya svāpekṣayā aṣṭamyā yojayet | tataḥ 
prākpaścimatṛtīyarekhāprāntābhyāṃ ṣaṭkoṇamālikhet 
[ṇamutpādya vṛttena yojayet iti pa. pustake] | 
ṣaṭkoṇamadhyasthitahrasvarekhātritaye paścimarekhāprāntābhyāṃ 
trikoṇamutpādya svāpekṣayā pañcamyā yojayet | evaṃ 
prāgrekhāprāntābhyāṃ trikoṇamutpādya svāpekṣayā pañcamyā 
yojayet | 

p. 33) 

madhyasthitātihrasvarekhāprāntābhyāṃ trikoṇamutpādya 
svāpekṣayā tṛtīyarekhayā yojayet | evaṃ caturviṃśatimarmāṇi 
caturviṃśatisandhayaḥ navayonicakram | etat kaulamatarahasyam || 

sṛṣṭikramastu samayamārgaḥ | sa ca nirūpyate ādau 
trikoṇamālikhya madhye binduṃ nikṣipya bindorupari trikoṇaṃ 
bhitvā [likhitvā. ma.] trikoṇāntaraṃ prāgagraṃ vilikhya 
prathamatrikoṇāgrāt trikoṇāntaraṃ paścimābhimukhaṃ vilikhet | 
evaṃ aṣṭakoṇacakramutpannam | etasmādeva daśāramutpādayet | 
tadyathā aṣṭakoṇaprākpaścimarekhāprāntābhyāṃ 
ṣaṭkoṇamutpādya vidiggatamarmasthānebhyaḥ caturbhyaḥ 
caturastrikoṇānutpādya aṣṭakoṇagatayonerupari 
dakṣiṇottarāyatarekhā īśānāgnikoṇatrikoṇeṣu yojayet evaṃ 
paścimato yojayet daśāraṃ bhavati | etasmādeva daśārāt punaḥ 
daśārāntaraṃ uktarītyā utpādayet | etasmādeva 
daśārāccaturdaśāramutpādayet | tadyathā - 
prathamadaśārapūrvapaścimarekhāprāntābhyāṃ 
ṣaṭkoṇamutpādayet | ṣaṭkoṇagatamarmasthānebhyaḥ caturbhyaḥ 
trikoṇacatuṣkamutpādayet | tataḥ uparisthitamarmacatuṣṭayāt 
daśāranyāyena trikoṇacatuṣkamutpādya prākpaścimarekhā melayet | 
evaṃ trayaścatvāriṃśatkoṇāḥ caturviṃśatisandhayaḥ 
caturviṃśatimarmāṇi iti | etat samayamatarahasyam || asmin cakre 
trikoṇamūrdhvamukhaṃ lekhanīyam | kaulacakre trikoṇamadhyagato 
binduḥ | samayacakre catuṣkoṇa [ṣaṭkoṇa iti kvacit pāṭhaḥ] 
madhyagato binduḥ | kaulacakre koṇasaṃkhyā nāsti 
navatrikoṇātmakatvāt | navānāṃ trikoṇānāṃ melane marmasandhaya 
evotpadyanta iti mahadrahasyam || 

ubhayacakrasādhāraṇamata ūrdhvamaṣṭadalapadmaṃ tataḥ 
ṣoḍaśadalapadmaṃ tataḥ mekhalātritayam tataścaturdvārayuktaṃ 
bhūpuratritayam iti śrīcakroddhāro vijñātavyaḥ || 

p. 34) 

atra meruprastārakailāsaprastārabhūprastārāḥ trayaḥ sambhavanti 
| meruprastāro nāma nityāṣoḍaśatādātmyam | kailāsaprastāro 
nāma mātṛkātādātmyam | bhūprastāro nāma vaśinyāditādātmyam 
| etatsarvaṃ catuṣṣaṣṭyā tantraiḥ [31 śloka.] 
ityādiślokavyākhyānāvasare nipuṇataramupapādayiṣyāmaḥ || 

atra rudrayāmale viśeṣa uktaḥ - 

pṛśnayo nāma munayaḥ sarve cakrasamāśrayāḥ | 
sevamānāścakravidyāṃ devagandharvapūjitām || agnīṣomātmakaṃ 
cakramagnīṣomamayaṃ jagat | agnāvantarbabhau bhānuḥ 
agnīṣomamayaṃ smṛtam || trikhaṇḍaṃ mātṛkācakraṃ 
somasūryānalātmakam | trikoṇaṃ baindavaṃ saumyamaṣṭakoṇaṃ ca 
miśrakam || cakraṃ candramayaṃ caiva daśāradvitayaṃ tathā | 
caturdaśāraṃ vahnestu catuścakraṃ ca bhānumat || 
etatprasādādindrādyā vasavoṣṭau marudgaṇāḥ | ye ye samṛddhā 
loke'smin tripurācakrasevakāḥ || puratrayaṃ ca cakrasya 
somasūryānalātmakam | mahālakṣmyāḥ puraṃ cakraṃ tatraivāste 
sadāśivaḥ || iti || 

imamevārthaṃ śrutirapyāha taittirīyake aruṇopaniśat imā nukaṃ 
bhuvanā sīṣadhema [tai. ā. 1-27] ityārabhya ṛṣibhiradāt 
pṛśnibhiḥ [tai. ā. 1-27] ityantā | aruṇopaniṣannāma aruṇāyāḥ 
bhagavatyāḥ pratipādikā upaniṣat | bhadraṃ karṇebhiḥ [tai. ā. 
1. praśnaḥ] ityārabhya tapasvī puṇyo bhavati [tai. ā. 1. 
praśnaḥ] ityantā aruṇopaniṣat aruṇāmeva pratipādayati | 

p. 35) 

imamarthaṃ dṛṣṭavān aruṇaketuḥ ṛṣiḥ | śrutyarthastāvat - 

imā nukaṃ bhuvanā sīṣadhema || 

asyārthaḥ - pṛśnayo nāma munayaḥ parasparaṃ saṅgirante | imāṃ 
cakravidyām | nukaṃ vitarke | bhuvanā bhuvanāni | sīṣadhema 
avagacchāma | cakravidyāmupāśrityaiva bhuvanānyavatiṣṭhanta iti 
vitarkayāma ityarthaḥ | yadvā imāṃ cakravidyāṃ bhuvanā 
bhuvanātmatayā sīṣadhema nukaṃ nu pṛcchāyām | nu pṛcchāyāṃ 
vitarke ca ityamaraḥ [nuḥ pṛcchāyām | bhuvanātmatayā kaṃ 
pṛṣṭvā avagacchāma ityarthaḥ | nupṛcchāyāṃ vitarke ca 
ityamaraḥ - iti kārveṭinagaramudritakośe] 

indraśca viśve ca devāḥ || 

asya vākyasyārthaḥ spaṣṭa eva | cakravidyāmupāśrityaiva āsata 
iti śeṣaḥ || 

yajñaṃ ca nastanvaṃ ca prajāṃ ca | ādityairindraḥ saha 
sīṣadhātu || 

asyārthaḥ - yajñamagniṣṭomādikaṃ na asmākaṃ tanvaṃ tanūṃ 
śarīrārdhaṃ patnīmiti yāvat | prajāṃ santānam | 
cakārātsarvāssampadaḥ | ādityaiḥ marudgaṇaiḥ saha indraḥ 
cakravidyopāsanāt prāptaparamaiśvaryaḥ | 
indraścakravidyāmasmākaṃ upadiśya sīṣadhātu 
sampā(dayatu)ditavān | prāptakāle loṭ || 

ādityairindraḥ sagaṇo marudbhiḥ | asmākaṃ bhūtvavitā tanūnām 
|| 

p. 36) 

mantradvayasyārthaḥ - tanūnāṃ puttramitrakalatrādīnāṃ avitā 
rakṣakaḥ bhūtu bhavatītyarthaḥ | indra evāsmākaṃ 
yogakṣemasampādaka iti bhāvaḥ || 

āplavasva praplavasva || 

pṛśnayaścakravidyāṃ prastuvanti | āpādamastakaṃ plavanaṃ 
amṛtaniṣyandasecanaṃ kuru | prakarṣeṇa plavanaṃ 
dvisaptatisahasranāḍīmārgeṣu āsecanaṃ kuru || 

āṇḍībhava ja mā muhuḥ || 

āṇḍī piṇḍāṇḍaṃ brahmāṇḍaṃ ca cvipratyayāntaḥ | bhava 
piṇḍāṇḍarūpeṇāsmadīyena brahmāṇḍarūpeṇa bāhyena 
bhavadīyena prāpnuhi bhavatsāyujyaṃ dehītyarthaḥ | ja avagaccha | 
muhurmāmavagaccha anugṛhāṇetyarthaḥ | aja gatau iti dhātoḥ 
akāralopaśchāndasaḥ || 

sukhādīṃduḥkhanidhanām || 

asyārthaḥ - sukhamatti adayatīti sukhādi sukhasampādakaḥ induḥ 
candraḥ baindavasthānagataḥ | khanidhanāṃ khaṃ baindavasthānameva 
nitarāṃ dhanaṃ yasyāssā tām | yadvā sukhādīṃ sukhaprathamāṃ 
sukhātmikām | duḥkhasya nidhanaṃ nāśo tatreti duḥkhanidhanāṃ 
avijñātaduḥkhagandhāmityarthaḥ | yadvā sukhādīṃ śobhanena 
khena indriyeṇa manasā ādīṃ ādyāṃ manovedyāmityarthaḥ | 
duḥkhanidhanāṃ duḥkhānāṃ duṣṭendriyāṇāṃ cakṣurādīnāṃ 
agocarāmiti || 

pratimuñcasva svāṃ puram || 

svāṃ bhāgavatīṃ puraṃ dehaṃ rephāntaḥśabdaḥ pratimuñcasva 
adhitiṣṭha || 

p. 37) 

marīcayaḥ svāyaṃbhuvāḥ || 

asyārthaḥ - svayaṃ bhagavatyāḥ sakāśāt bhavā utpannāḥ 
marīcayo mayūkhāḥ | sarvāṇi bhuvanāni āvṛtya vartanta iti 
vākyaśeṣaḥ | sūryacandrāgnīnāṃ prakāśakatvaṃ 
svāyaṃbhuvamarīciprasādādeveti uttaratra vakṣyate || 

ye śarīrāṇyakalpayan || 

asyārthaḥ - ye mayūkhāḥ ṣaṣṭyuttaratriśatasaṅkhyākāḥ 
śarīrāṇi kālātmakāni ṣaṣṭyuttaratriśatasaṅkhayākāni 
dināni tānyeva saṃvatsaraḥ saṃvatsaro vai prajāpatiḥ [tai. brā. 
1-6-2] iti śruteḥ || 

te te dehaṃ kalpayantu || 

te marīcayaḥ te tava bhagavatyāḥ dehaṃ kalpayantu dehamāśrayantu 
| dehaśabdena dehāvayavacaraṇamucyate | bhavavaccaraṇotpannā 
ityarthaḥ || 

mā ca te khyā sma tīriṣat || 

te tava khyā khyatiḥ jñānaṃ mā ca tīriṣat asmān na jahātu 
bhavadviṣayajñānaṃ asmākaṃ sadā siddhyatvityarthaḥ || 

itaḥ paraṃ pṛśnayaścakravidyānuṣṭhāne tvaramāṇāḥ 
parasparaṃ saṅgirante - 

uttiṣṭhata mā svapta | agnimicchadhvaṃ bhāratāḥ | rājñaḥ 
somasya tṛptāsaḥ | sūryeṇa sayujopasaḥ || 

p. 38) 

ṛco'yamarthaḥ he bhāratāḥ bhāyāṃ bhārūpāyāṃ 
jyotīrūpāyāṃ cakravidyāyāmiti yāvat ratāḥ upāsanāratāḥ | 
yadvā bhāratyāḥ sarasvatyāḥ śrīvidyāyāḥ upāsakāḥ | 
sāmānyavihitapratyayasya viśeṣavācitvāt bhāratā iti | 
uttiṣṭhata upāsanopakramaṃ kuruta | mā svapta apramattā bhavata | 
agnimicchadhvaṃ svādhiṣṭhānagatāgniṃ prajvalayata | 
rājñaścandrasya | umayā sahitaḥ somaḥ | 
candramaṇḍalāntargatabaindavasthānagatatvāt devyāḥ candrasya 
somaśabdavācyatvasiddhiḥ | tasya candrasya niṣyandaiḥ tṛptāsaḥ 
tṛptāḥ | sūryeṇa anāhatacakraviśuddhicakrayormadhye sthitena 
sūryeṇa sayujā agnicandrayormadhyavartinā ityarthaḥ | yadvā 
sūryeṇa sayujā rājñā tṛptāsa ityanvayaḥ | kīdṛśāḥ ? - 
uṣasaḥ pluṣṭamāyāmayakleśāḥ | yadvā uṣasaḥ uṣaḥkāle 
dhyānaratāḥ tasmin kāla eva bhagavatīnididhyāsanādervihitatvāt 
|| 

itaḥparaṃ pūjāsāmagrīmupadiśanti pṛśnayaḥ - 

yuvā suvāsāḥ | 

yuvā dṛḍhāṅgaḥ svasthaḥ | suvāsāḥ śubhravastraḥ | idaṃ 
śubhrābharaṇaśubhramālyādīnāmupalakṣakam | evaṃ vidhaḥ san 
pūjayediti śeṣaḥ || 

śrīcakrasya svarūpaṃ tāvadāhuḥ - 

aṣṭācakrā navadvārā || 

aṣṭakoṇa daśakoṇadvitaya caturdaśakoṇa aṣṭapatra ṣoḍaśapatra 
trivalaya trirekhātmakāni aṣṭau cakrāṇi yasyāḥ sā aṣṭācakrā 
| ata eva navadvārā navasaṅkhyākāni dvārāṇi trikoṇarūpāṇi 
yasyāḥ sā navadvārā || 

devānāṃ pūrayodhyā || 

p. 39) 

devānāmindrādīnāṃ pūjyatvena sambandhinī pūḥ 
śrīvidyānagaram | yadvā dīvyantīti devāḥ 
pañcaviṃśatitattvāni teṣāṃ pūradhiṣṭhānam | yadvā sūrya 
candrāgnīnāṃ pūḥ somasūryānalātmakatvāt śrīcakrasya | tasya 
puratrayasamaṣṭirūpatvāt pūrityekavacanasiddhiriti dhyeyam | 
ayodhyā asādhyā mandabhāgyānāmiti śeṣaḥ || 

tasyā hiraṇmayaḥ kośaḥ | svargo loko jyotiṣā''vṛtaḥ || 

asyārthaḥ - tasyāṃ puri śrīcakramadhye hiraṇmayaḥ kośaḥ 
sahasradalakamalakośa ityarthaḥ baindavasthāne 
sahasradalakamalakośasya vidyamānatvāt | tasya kośasya jyotiṣā 
svargo lokaḥ āvṛtaḥ | jyotirlokaḥ svargaloka ityarthaḥ || 

atha pṛśnayaḥ cakravidyopāsanāyāḥ phalamāhuḥ - 

yo vai tāṃ brahmaṇo veda | amṛtenāvṛtāṃ purīm | tasmai brahma 
ca brahmā ca | āyuḥ kīrtiṃ prajāṃ daduḥ || 

ayamarthaḥ brahmaṇaḥ brahmasvarūpāyāḥ bhagavatyāḥ tāṃ 
pūrvoktāṃ amṛtena āvṛtāṃ 
candramaṇḍalagalatpīyūṣadhārāvṛtāṃ purīṃ śrīcakrarūpāṃ 
tripurāyāḥ puraṃ yo veda jñānapūrvakamarcanaṃ karoti tasmai 
viduṣe arcakāya brahma ca brahmasvarūpā bhagavatī brahmā ca 
brahmarūpo bhagavān | cakāradvayaṃ ubhayormelanaṃ samuccinoti 
militayoreva baindavathāne sahasrāre sudhāsindhumadhye maṇidvīpe 
cintāmaṇigṛhe nivāsāt | etau ubhau āyuḥ jīvitaṃ kīrtiṃ 
yaśaḥ prajāṃ santānaṃ daduḥ dadyātāṃ ityarthaḥ | vyatyayo 
bahulam iti vacanavyatyayaḥ || 

p. 40) 

śivaśaktyoḥ tatraiva nivāsamāhuḥ - 

vibhrājamānā hariṇīm | yaśasā saṃparīvṛtām | pura 
hiraṇmayīṃ brahmā | viveśāparājitā || 

ṛco'yamarthaḥ vibhrājamānāṃ anantakoṭisaṃkhyākakiraṇairiti 
śeṣaḥ prakāśamānām | hariṇīṃ hiraṇyavarṇāṃ 
hiraṇyavarṇāṃ hariṇīṃ [śrīsūkte] iti śruteḥ | yaśasā 
kīrtyā samyakparivṛtām ye ye loke kīrtimantaste sarve bhagavatī 
prasādasamāsāditakīrtimanta ityarthaḥ | tāṃ baindavīṃ puraṃ 
cintāmaṇigṛhaṃ brahmā sadāśivaḥ brahmā śivo me astu 
sadāśivom [tai. u. 4-29] iti śruteḥ 
pulliṅgabrahmaśabdasadāśivaśabdayoḥ eka evārthaḥ pratītaḥ | 
viveśa aparājitā sādākhyā candrakalā viveśa | vākyadvayena 
ubhayoḥ praveśabhedapratipādanaṃ baindave cintāmaṇigṛhe 
sadāśivaḥ sarvadā sannihitaḥ aparājitā kuṇḍilinīśaktiḥ 
ṣaṭcakrāṇi bhitvā bhūyo bhūyaḥ praviśati itīmamarthaṃ 
jñāpayitum || 

śivaśaktyoḥ tasmin cakre avasthitiprakāramāhuḥ - 

parāṅetyajyāmayī | parāṅetyanāśakī || 

asyārthaḥ - parāṅ adhomukhī cakrarūpiṇī [candrarūpiṇī] 
śivaśaktyormadhye śaktiḥ ajyāmiyī jyānirahitā [jyāvirahitā] 
nāśarahitā nityā duḥkharahitā ānandamayī ityarthaḥ | eti 
vartate | yadvā ajyāmayī jyā bhūmiḥ tena pañcabhūtāni 

p. 41) 

lakṣyante tanmayī na bhavatītyajyāmayī manastattvādimayī 
śivacakrātmakacaturyonyātmiketi yāvat śivayonīnāṃ 
baindavasthānādadhaḥ avāṅmukhatayā avasthānāt | anāśakī 
nāśarahitā śakticakrātmakapañcayonyātmikā | parāṅ adhomukhī 
eti śaktiyonīnāmapi śivayonyapekṣayā avāṅmukhatvāt | evaṃ 
śivayoniśaktiyonyoḥ parasparamavāṅmukhatvaṃ 
cakralekhanakramādavagamyate || 

viduṣaḥ phalamāhuḥ - 

iha cāmutra cānveti | vidvān devāsurānubhayān || 

dīvyantīti devāḥ ekādaśendriyāṇi | asurāḥ asavaḥ prāṇāḥ 
prāṇādipañcavāyavaḥ tān rānti ādadata iti pañca tanmātrā 
[mahadādayaḥ ityadhikaḥ pāṭhaḥ kvacit dṛśyate] ucyante | 
ubhayān ubhayatra devāsureṣu anvitān 
māyāśuddhavidyāmaheśvarasadāśivān | yo vidvān 
pañcaviṃśatitattvajātaṃ viditvā śivaśaktisampuṭātmakaṃ 
pañcaviṃśatitattvavilakṣaṇaṃ ṣaḍviṃśatattvaṃ yastu vetti sa 
vidvān iha ca iha loke pūjātāratamyavaśāt amutra ca paraloke 
sārṣṭisālokyasāmīpyasārūpyasāyujyātmikayā pañcavidhayā 
muktyā anveti yujyate | sārṣṭyādisvarūpaṃ saprapañcaṃ purastāt 
[99 ślokavyākhyāne] prapañcyate || 

atha devāsurobhayajñānopāyamāhuḥ - 

yattkumārī mandrayate | yadyoṣidyatpativratā | ariṣṭaṃ yatkiṃca 
kriyate | agnistadanuvedhati || 

ayamarthaḥ kuṇḍalinīśakteravasthātrayaṃ vidyate | yasmin cakre 
kumārī kaumārāvasthāmāpannā prathamaṃ suptotthitā mandrayate 
mandrasvaraṃ karoti kuṇḍalinyāḥ sarpātmakatvāt | sarpo hi 
suptotthāne mandrasvaraṃ karoti tadvadityarthaḥ | 

p. 42) yadyoṣit yasmin cakre kulayoṣit viṣṇugranthiparyantaṃ gatvā 
rātīti śeṣaḥ | 

kulayoṣit kulaṃ tyaktvā rāti viṣṇoḥ prabhedane | 

iti sanatkumāravacanāt | yat yasmin cakre pativratā patyā 
sadāśivena sārdhaṃ sahasradalakamale viharamāṇā | riṣṭaṃ 
śubhābhāvaṃ riṣṭaṃ kṣeme śubhābhāve ityabhidhānāt 
tadanyadariṣṭaṃ śubhaṃ amṛtāsvādamityarthaḥ yatkiñcitkriyate 
tat svādhiṣṭhānagato'gniḥ anuvedhati sahāyaṃ karoti | ataśca 
abhyāsavaśāt vāyunā agniṃ prajvālya 
agniśikhānuviddhavilīnacandramaṇḍalagalatpīyūṣadhārānubhave 
pañcaviṃśatitattvātītā parameśvarī iti jñātuṃ 
suśakamityupadeśaḥ || 

cakravikropāsanaṃ varṇināṃ āśramiṇāṃ jñānināmajñānināṃ 
ca phaladāyakamityabhisandhāyāhuḥ - 

aśṛtāsaśśṛtāsaśca | yajvāno ye'pyayajvanaḥ | 

svaryanto nāpekṣante || 

ayamarthaḥ aśṛtāsaḥ apakvāḥ akṣapitāntaḥkaraṇakalmaṣā 
ityarthaḥ | śṛtāsaśca pakvāśca ājjaserasuk ityasugāgamaḥ 
kṣapitāntaḥkaraṇakalmaṣā ityarthaḥ | yajvānaḥ yajanaśīlāḥ 
traivarṇikāḥ āśramiṇaśca | ayajvanaḥ yāgarahitāḥ 
śūdrādayaḥ | tasmācchūdro yajñe'navaklaptaḥ [tai. saṃ 7-1-1] 
iti śrutiḥ 
traivarṇikaikaniyatādhikārayajñaśabdavācyāgniṣṭomādiparā | 
cakravidyopāsane śūdrāṇāmapi adhikāracodanāt niṣādasthapativat 
vaidike karmaṇyadhikārasiddheḥ na kācit kṣatiḥ ! yantaḥ iṇ gatau 
cakravidyāmavagacchantaḥ svaḥ svargaṃ nāpekṣante || 

p. 43) 

cakravidyopāsanāvyatirekeṇa devatāntaropāsanāyāmaniṣṭamāhuḥ - 

indramagniṃ ca ye viduḥ | sikatā iva saṃyanti | raśmibhiḥ 
samudīritāḥ | asmāllokādamuṣmācca || 

ayamarthaḥ surāsuramukhyavanditacaraṇāravindāyāḥ 
sarvabhūtāntaryāminyāḥ sarvavyāpinyāḥ 
jagadutpattisthitilayahetoścakravidyāyā anyatvena ye indramagniṃ 
cakārāt yamādilokapālāt pṛthivyādisadāśivāntatattvāni ca 
upāsyatvena ye viduḥ te sikatā iva vālukākaṇā iva saṃyanti 
parasparaṃ viralāḥ bhraṣṭā bhaveyurityarthaḥ | kiñca raśmibhiḥ 
yamapāśaiḥ uttaraprabandhe apeta vīta ityādau pratipāditaiḥ 
samudīritāḥ saṃyatā baddhā bhaveyuḥ ityarthaḥ | kiñca 
asmāllokāt amuṣmāllokācca bhraṣṭā bhaveyuriti śeṣaḥ | ata eva 
śrutyantaram - 

andhaṃ tamaḥ praviśanti ye'vidyāmupāsate || [ī. u. 9] 

ayamarthaḥ avidyāṃ vidyāviruddhāṃ jñānamārgaviruddhāṃ 
indrādisevāṃ vācaṃ dhenumupāsīta [bṛ. 7-8-1] 
ityevamadhyāropitasevāṃ ca ye kurvate te avidvāṃsaḥ andhaṃ tamaḥ 
praviśanti andhatāmisraṃ praviśantītyarthaḥ | cakāraḥ 
prakaraṇasamāptidyotakaḥ || 

ṛṣibhiradāt pṛśnibhiḥ || 

pṛśnināmabhiḥ ṛṣibhiḥ etatsarvamadāt adāyi | karmaṇi 
luṅchāndasaḥ karmaṇi pratyayalopaḥ kartṛpratyayavyatyayaśca | 
ṛṣibhiḥ pṛśnibhirevamuktamityarthaḥ | yadvā pṛśnibhiḥ 
ṛṣibhiḥ sahitaḥ ṛṣisaṅghaḥ evamadāt vācamiti śeṣaḥ 
uktavānityarthaḥ || 11 || 

p. 44) 

tvadīyaṃ saundaryaṃ tuhinagirikanye tulayituṃ kavīndrāḥ kalpante 
kathamapi viriñciprabhṛtayaḥ | yadālokautsukyādamaralalanā yānti 
manasā tapobhirduṣprāpāmapi giriśasāyujyapadavīm || 

tvadīyaṃ tava sambandhi tvaddehagatamityarthaḥ | saundaryaṃ 
lāvaṇyam | tuhinagirikanye tuhinapradhāno giriḥ himādriḥ tasya 
kanyā putrī tasyāḥ sambuddhiḥ | tulayituṃ tulayā samīkartum | 
kavīndrāḥ vidvacchreṣṭhāḥ kalpante śaknuvanti kathamapi 
kathaṃcidapi na kalpanta ityarthaḥ | viriñciprabhṛtayaḥ viriñciḥ 
brahmā prabhṛtiryaṣāṃ te harīndrādayaḥ | yat yasmātkāraṇāt 
ālokautsukyāt āloke bhavatsaundaryāloke yadautsukyaṃ tasmāt 
lyablope pañcamī autsukyamavalambya | yadvā nimittapañcamī | 
amaralalanāḥ devayoṣitaḥ yānti prāpnuvanni manasā antaḥkaraṇena 
tapobhiḥ tapasyābhiḥ kucchracāndrāyaṇādibhiḥ duṣprāpāṃ 
prāptumaśakyāṃ apirvirodhe giriśasāyujyapadavīm || 

atretthaṃ padayojanā he tuhinagirikanye ! tvadīyaṃ saundaryaṃ 
tulayituṃ viriñciprabhṛtayaḥ kavīndrāḥ kathamapi kalpante | 
yadyasmātkāraṇāt amaralalanāḥ ālokautsukyāt tapobhiḥ 
duṣprāpāmapi giriśasāyujyapadavīṃ manasā yānti || 

ayamarthaḥ vāṇīpativācaspatiprabhṛtīnāmapi tvatsaundaryaṃ 
sadṛśāntaraṃ parikalpya varṇayitumaśakyam 
tvatsadṛśasundaravastvantarābhāvāt | 
ūrvaśītilottamādīnāmapsarasāṃ tvatsaundaryaleśatulāyāmapi 
tatkoṭipraveśo dūrata evāpāstaḥ | yataścāpsarasaḥ 
tvatsaundaryadarśane pumbhāvaṃ prārthayamānāḥ 
puruṣāntaraduradhigame tvatsaundaryavastuni sadāśivaikagamye 
durlabhasadāśivasāyujyamanorathā vartanta iti | 

p. 45) 

svayamevāpsarasaḥ svasaundarye juguṣsitavatya iti bhāvaḥ || 

atra ananvayālaṅkāro dhvanyate loke kvāpi tulyavastuno'sadbhāvāt 
svasya svayameva tulyamiti pratīteḥ || 12 || 

naraṃ varṣīyāṃsaṃ nayanavirasaṃ narmasu jaḍaṃ tavāpāṅgāloke 
patitamanudhāvanti śataśaḥ | galadveṇībandhāḥ 
kucakalaśavisrastasicayāḥ haṭhāttruṭyatkāñcyo vigalitadukūlā 
yuvatayaḥ || 

naraṃ manuṣyamātraṃ varṣīyāṃsaṃ ativṛddhaṃ nayanavirasaṃ 
nayanābhyāṃ virasaṃ kācakāmilapaṭalādinetradoṣayuktam narmasu 
jaḍaṃ narmasu ratikalāsu jaḍaṃ atimūḍham tava bhavatyāḥ 
apāṅgāloke kaṭākṣavīkṣaṇe patitaṃ 
kaṭākṣaikagocaramityarthaḥ anudhāvanti anudhāvamānāḥ śataśaḥ 
śatasaṅkhyākāḥ śataśabdaḥ saṅkhyātītopalakṣakaḥ 
bhūrbhuvassvarlokasthitāḥ sarvā ityarthaḥ | galadveṇībandhāḥ 
galanto veṇībandhā yāsāṃ tāḥ kucakalaśavisrastasicayāḥ 
kucakalaśābhyāṃ visrastāḥ śithilāḥ sicayāḥ celāñcalā 
yāsāṃ tāḥ haṭhāttruṭyatkāñcyaḥ haṭhāt śīghraṃ 
truṭyantyaḥ galantyaḥ kāñcyo raśanākalāpāḥ yāsāṃ tāḥ 
vigalitadukūlāḥ srastanīvībandhāḥ yuvatayaḥ taruṇyaḥ || 

atretthaṃ padayojanā he bhagavati ! varṣīyāṃsaṃ nayanavirasaṃ 
narmasu jaḍaṃ tavāpāṅgāloke patitaṃ naraṃ śataśaḥ yuvatayaḥ 
galadveṇībandhāḥ kucakalaśavisrastasicayāḥ 
haṭhāttruṭyatkāñcyaḥ vigalitadukūlāḥ satyaḥ tādṛśaṃ naraṃ 
madanamiti matveti śeṣaḥ anudhāvanti || 

p. 46) 

etādṛśān mādanaprayogān mukhaṃ binduṃ kṛtvā [19 ślokaḥ] 
ityādiślokavyākhyānāvasare nipuṇataramupapādayiṣyāmaḥ || 13 || 

kṣitau ṣaṭpañcāśaddvisamadhikapañcāśadudake hutāśe 
dvāṣaṣṭiścaturadhikapañcāśadanile | divi 
dviṣṣaṭtriṃśanmanasi ca catuṣṣaṣṭiriti ye 
mayūkhāsteṣāmapyupari tava pādāmbujayugam || 

kṣitau pṛthivītattvayukte mūlādhāre ṣaṭpañcāśat 
ṣaḍuttarapañcāśatsaṃkhyākāḥ dvisamadhikapañcāśat dvābhyāṃ 
samadhikāḥ pañcāśat udake udakatattvayukte maṇipūrasthāne 
hutāśe vahnitattvayukte svādhiṣṭhānacakre dvāṣaṣṭiḥ dvau ca 
ṣaṣṭiśca dvāṣaṣṭiḥ | vibhāṣā catvāriṃśatprabhṛtau 
sarveṣām iti sūtreṇa dviśabdādikārasya ākāraḥ | 
caturadhikapañcāśat catussaṃkhyayā adhikāḥ pañcāśat anile 
vāyutattvayukte anāhatacakre divi ākāśatattvayukte viśuddhicakre 
dviṣṣaṭtriṃśat dvirāvṛttaṣaṭtriṃśatsaṃkhyākāḥ 
dvisaptatisaṅkhyākā ityarthaḥ manasi [manaḥ śabdena 
ekādaśendriyāṇāṃ grahaṇam] manastattvayukte ājñācakre 
catuṣṣaṣṭiḥ | iti evaṃprakāreṇa ye prasiddhāḥ śāstreṣu 
āgameṣu svāsaṃvedyatvena ca yogināṃ prasiddhāḥ mayūkhāḥ santi 
teṣāṃ mayūkhānāṃ apyupari sahasradalamadhyavarti 
candrabimbātmake baindavāparanāmake sudhāsindhau tava bhavatyāḥ 
pādāmbujayugaṃ vartate vidyate | evaṃ samayasampradāya iti śeṣaḥ 
|| 

atretthaṃ padayojanā he bhagavati ! ye mayūkhāḥ kṣitau 
ṣaṭpañcāśat udake dvisamadhikapañcāśat hutāśe dvāṣaṣṭiḥ 
anile caturadhikapañcāśat 

p. 47) 

divi dviṣṣaṭtriṃśat manasi catuṣṣaṣṭiḥ iti teṣāmupari tava 
pādāmbujayugaṃ vartate iti śeṣaḥ || 

atra ṣaṭpañcāśadityādisaṅkhyāśabdānāṃ saṅkhyeyaparatvāt 
saṅkhyeyānāṃ mayūkhānāṃ buhutve'pi ekavacanāntatvameva | 
yathā - 

viṃśatyādyāḥ sadaikatve sarvāḥ saṅkhyeyasaṅkhyayoḥ | 
saṅkhyārthe dvibahutve staḥ * * * * * * * || 

na tu saṃkhyeye iti niyamāt | saṃkhyeyānāṃ mayūkhānāṃ 
niyamāprasakteḥ bahuvacanāntatvaṃ siddham | atredaṃ tattvam 
ṣaṭpañcāśadityādisaṃkhyānāṃ saṃkhyeya viśeṣaṇatve'pi na 
śuklādiguṇataulyaṃ yathā''ha padamañjarīkāraḥ viṃśatyādayo 
guṇāḥ na śuklādibhiḥ guṇaiḥ samānadharmāṇo bhavitumarhanti | 
viṃśatyādayo hi tāvat pṛthaktvayogiṣu dravyeṣu vartanta iti 
vyāsajyavṛttayaḥ śuklādayastu pratyekaparyavasāyinaḥ iti | 
atredamatirahasyam saṃkhyeyaparāṇāṃ saṃkhyāśabdānāṃ 
bahuvacane ṣaṭpañcāśato mayūkhā iti prāptau 
ṣaṭtriṃśaduttaraśatottaratrisahasrasaṃkhyākāḥ bhaveyuḥ | ato 
vivakṣitārthasiddhiriti niyamaphalamiti || 

atredamanusandheyam 
ādhārasvādhiṣṭhānamaṇipūrānāhataviśuddhyājñācakrātmakaṃ 
śrīcakraṃ trikhaṇḍaṃ somasūryānalātmakam | 
mūlādhārasvādhiṣṭhānacakradvayamekaṃ khaṇḍam | 
maṇipūrānāhatacakradvayamekaṃ khaṇḍam | 
viśuddhyājñācakradvayamekaṃ khaṇḍam | atra prathamakhaṇḍopari 
agnisthānam | tadeva rudragranthirityucyate | dvitīyakhaṇḍopari 
sūryasthānam | tadeva viṣṇugranthirityucyate | tṛtīyakhaṇḍopari 
candrasthānam | tadeva brahmagranthirityucyate | 
somasūryānalātmakaṃ iti avarohaṇakrameṇāvagantavyam | tatra 
prathamakhaṇḍopari sthito vahniḥ svajvālābhiḥ 
prathamakhaṇḍamāvṛṇoti | dvitīyakhaṇḍopari sthitaḥ sūryaḥ 
svakīyaiḥ kiraṇaiḥ dvitīyakhaṇḍamāvṛṇoti | 
tṛtīyakhaṇḍopari sthitaḥ candraḥ svakalābhiḥ 
tṛtīyakhaṇḍamāvṛṇoti | 

p. 48) 

ādhāracakre mahītattvātmake vahneḥ ṣaṭpañcāśajjvālāḥ 
maṇipūrake udakatattvātmake svoparisthite dvipañcāśajjvālāḥ | 
evamaṣṭottaraśataṃ vahneḥ jvālāḥ | sūryasya agnitattvātmake 
svādhiṣṭhāne dvāṣaṣṭikiraṇāḥ anilatattvātmake anāhatacakre 
catuḥpañcāśatkiraṇāḥ | sūryakiraṇānāṃ maṇipūraṃ vihāya 
svādhiṣṭhānapraveśaḥ sūryāgnyorekatvāt 
sūryāntarbhāvādagneśca | svādhiṣṭhānamaṇipūrayostu 
sūryāgnisthānayoḥ madhye agnisthāne sūryapraveśaḥ sūryasthāne 
agnipraveśaḥ jagaddahanāgniśāmaka [nāmaka ityapi pāṭhaḥ] 
saṃvartameghātmakasūryakiraṇajanitavarṣotpattyartham | etattu 
taṭitvantaṃ śaktyā [40 ślokaḥ] ityādiślokavyākhyānāvasare 
nipuṇataramupapādayiṣyāmaḥ | evaṃ sūryasya ṣoḍaśottaraśataṃ 
kiraṇā bhavanti | candrasya kalāḥ viyattattvātmake viśuddhicakre 
dvisaptatiḥ manastattvātmake ājñācakre catuṣṣaṣṭiḥ | evaṃ 
candrasya ṣaṭtriṃśaduttaraśataṃ kalāḥ bhavanti | yathoktaṃ 
bhairavayāmale bhairavāṣṭakaprastāve - 

aṣṭottaraśataṃ vahneḥ ṣoḍaśottarakaṃ raveḥ | 
ṣaṭtriṃśaduttaraśataṃ candrasya ca vinirṇayaḥ || iti || 

evaṃ somasūryānalāḥ piṇḍāṇḍabrahmāṇḍe āvṛtya vartante | 
piṇḍāṇḍabrahmāṇḍayoraikyāt piṇḍāṇḍavṛtireva 
brahmāṇḍāvṛtiriti rahasyam | evaṃ piṇḍāṇḍamatītya [āvṛtya 
ityapi pāṭhaḥ] vartate sahasrakamalam | tacca jyotsnāmayo lokaḥ | 
tatratyaścandramā nityakalaḥ | etacca tavājñācakrastham [36 
ślokaḥ] ityādiślokavyākhyānāvasare 
nipuṇataramupapādayiṣyāmaḥ | ājñācakropari sthitaścandraḥ iti 
yaduktaṃ tattu candrakalāvasthānamātram na tu candrasya sthānamiti 
| yaduktaṃ subhagodaye ṣoḍaśakalānāṃ ṣoḍaśanityātmakatvāt 
tāsāṃ pratipadādiśuklapakṣakṛṣṇapakṣatithyātmakatayā 
vṛddhikṣayasadbhāvāt candrasyāpi sahasrakamalagatasya 
vṛddhikṣayau bhavata eveti 

p. 49) 

tattu candramasaḥ vṛddhikṣayau na bhavataḥ kintu 
ṣoḍaśanityātmakāḥ ṣoḍaśacandrakalāḥ [candrāḥ ityeva 
kvacitpāṭhaḥ] pratipadādipaurṇamāsyantatithipravartikāḥ tathaiva 
kṛṣṇapratipadamārabhya amāvāsyānta [amāvāsyāprabhṛti 
kṛṣṇapratipadanta iti bahuṣu kośeṣu pāṭhaḥ] tithipravartikāḥ 
svātmatirodhānātirodhānābhyāmiti mantravidrahasyam || 

idamatrānusandheyam śrīvidyāyāḥ 
candrakalāvidyāparanāmadheyāyāḥ pañcadaśatithirūpatvāt 
ṣaṣṭyuttaratriśataṃ mayūkhāḥ divasātmakāḥ tena saṃvatsaro 
lakṣyate | tasya kālaśaktyātmakasya saṃvatsarasya 
prajāpatirūpatvāt prajāpateḥ jagatkartṛtvāt marīcīnāṃ 
jagadutpattisthitilayakaratvam | te ca marīcayaḥ asmin brahmāṇḍe 
piṇḍāṇḍe ca ṣaṣṭyuttaratriśatasaṃkhyākāḥ | evaṃ 
anantakoṭipiṇḍāṇḍabrahmāṇḍeṣu | evameva pratibrahmāṇḍaṃ 
pratipiṇḍāṇḍaṃ ṣaṣṭyuttaratriśatasaṃkhyākāḥ mayūkhāḥ | 
ataścānantamayūkhāḥ | te ca mayūkhāḥ 
sūryacandrāgnisampṛktāḥ bhagavatīpādāravindajanmānaḥ tān tān 
lokān prakāśayanti | ayaṃ ca lokasya dvāramarcimatpavitram [tai. 
brā. 3-12-3] iti śrutyā mayūkhānāṃ 
bhagavatīpādāravindasambhava uktaḥ | tathaiva ca 
marīcayassvāyaṃbhuvāḥ [tai. ā. 1-27] iti śrutyā teṣāṃ 
marīcīnāṃ sṛṣṭisthitilayakaratvamuktam | etaduktaṃ bhavati 
sūryacandrāgnayaḥ 
bhagavatīpādāravindodbhūtānantakoṭikiraṇamadhye katipayān 
kiraṇānāhṛtya 
bhagavatīprasādasamāsāditajagatprakāśanasāmarthyāt jaganti 
prakāśayantīti | ataśca sarvalokātikrāntaṃ candrakalācakraṃ 
baindavasthānamiti | tatra vartamānaṃ caraṇāmbujam | 
anekakoṭibrahmāṇḍapiṇḍāṇḍāvacchinnamayūkhānāṃ uparyeva 
vartamānatvāt teṣāmāpyupari tava pādāmbujaṃ tartate iti 
siddhānuvādaḥ na tvāropastutirityanusandheyam | yathoktaṃ 
bhairavayāmale candrajñānavidyāyāṃ gaurīṃ prati maheśvareṇa - 

p. 50) 

sādhu sādhu mahābhāge pṛṣṭaṃ trailokyasundari | 
guhyādguhyatamaṃ jñānaṃ na kutrāpi prakāśitam || kalāvidyā 
parāśakteḥ [śaktiḥ iti ca pāṭhaḥ] śrīcakrākārarūpiṇī | 
tanmadhye baindavasthānaṃ tatrāste parameśvarī || sadāśivena 
sampṛktā sarvatattvātigā satī | cakraṃ tripurasundaryāḥ 
brahmāṇḍākāramīśvari || pañcabhūtātmakaṃ caiva 
tanmātrātmakameva ca | indriyātmakamevaṃ ca manastattvātmakaṃ 
tathā || māyāditattvarūpaṃ ca tattvātītaṃ ca baindavam | 
baindave jagadutpattisthitisaṃhārakāriṇī || sadāśivena sampṛktā 
tattvātītā maheśvarī | jyotīrūpā parākārā yasyā 
dehodbhavāśśive || kiraṇāśca sahasraṃ ca dvisahasraṃ ca 
lakṣakam | koṭirarbudameteṣāṃ parā saṅkhyā na vidyate || 
tāmevānupraviśyaiva bhāti lokaṃ carācaram | yasyā devyā 
maheśāni bhāsā sarvaṃ vibhāsate || tadbhāsā rahitaṃ kiñcit na 
ca yacca prakāśate | tasyāśca śivaśakteśca cidrūpāyāścitim 
vinā || āndhyamāpadyate nūnaṃ jagadetaccarācaram | 
teṣāmanantakoṭīnāṃ mayūkhānāṃ maheśvari || madhye 
ṣaṣṭyuttaraṃ te'mī triśataṃ kiraṇāśśive | brahmāṇḍaṃ 
vyaśnuvānāste somasūryānalātmanā || agneraṣṭottaraśataṃ 
ṣoḍaśottarakaṃ raveḥ | 

p. 51) 

ṣaṭtriṃśaduttaraśataṃ candrasya kiraṇāśśive || brahmāṇḍaṃ 
bhāsayantaste piṇḍāṇḍamapi śāṅkari | divā sūryastathā 
rātrau somo vahniśca sandhyayoḥ || prakāśayantaḥ kālāṃste 
tasmātkālātmakāstrayaḥ | ṣaṣṭyuttaraṃ ca triśataṃ dinānyeva 
ca hāyanam || hāyanātmā mahādevaḥ prajāpatiriti śrutiḥ | 
prajāpatirlokakartā marīcipramukhān munīn || sṛjantyete [sṛjanti 
te] lokapālān te sarve lokarakṣakāḥ | saṃhāraśca harāyattaḥ 
utpattirbhavanirmitā || rakṣā tu mṛḍasaṃlagnā sṛṣṭisthitilaye 
śivaḥ | niyuktaḥ parameśānyā jagadevaṃ pravartate || iti || 

tāmevānupraviśya ityādinā tameva bhāntamanubhāti sarvaṃ tasya 
bhāsā sarvamidaṃ vibhāti [kaṭha. 5-25] iti śrutyartho'nūditaḥ | 
atra bahu vaktavyamasti taduttaratra samyaṅnirūpayiṣyāmaḥ || 

sārasvataprayogamāha- 

śarajjyotsnāśuddhāṃ śaśiyutajaṭājūṭamakuṭāṃ 
varatrāsatrāṇasphaṭikaghiṭikā [ghuṭhikā ityapi pāṭhaḥ] 
pustakakarām | sakṛnna tvā natvā kathamiva satāṃ saṃnidadhate 
madhukṣīradrākṣāmadhurimadhurīṇāḥ phaṇitayaḥ || 15 || 

śarajjyotsnāśuddhāṃ śaradi śaratkāle jyotsnā candrikā 
tadvacchuddhāṃ atiśubhrām | śaśiyutajaṭājūṭamakuṭāṃ 
śaśinā candreṇa yuto yuktaḥ jaṭājūṭo makuṭo yasyāstāṃ 
candrakalāvataṃsāmityarthaḥ | 
varatrāsatrāṇasphaṭikaghaṭikāpustakakarām - 

p. 52) 

varaḥ iṣṭadānamudrā trāsatrāṇaṃ abhayadānamudrā 
sphaṭikaghaṭikā sphaṭikapānapātram | sphaṭikākṣamāleti kecit | 
tatpakṣe sphaṭikaguliketi [ghuṭikā ityapi pāṭhaḥ] pāṭhaḥ | 
pustakaṃ vidyāmudrā pustakaṃ vā etairyuktakarām | 
śākapārthivāditvāt madhyamapadalopaḥ | na tu 
sphaṭikaghaṭikāpustakāni kareṣu yasyāḥ iti saptamībahubrīhiḥ | 
praharaṇādibhya upasaṅkhyānam iti tasya praharaṇādibhya eveti 
niyatatvāt | sakṛt ekavāram nakāro niṣedhārthaḥ tvā 
tvāmityarthaḥ natvā namaskāraṃ kṛtvā kathaṃ kathaṃcit iveti 
vākyālaṅkāre satāṃ kavīśvarāṇām saṃnidhate saṃnidhānaṃ 
prāpnuvanti | madhukṣīradrākṣāmadhurimadhurīṇāḥ phaṇitayaḥ 
madhu kṣaudraṃ kṣīraṃ payaḥ drākṣā mṛdvikā eteṣāṃ 
madhurimā mādhuryaṃ tatra dhurīṇāḥ dhuraṃ vahantīti 
dhurīṇāḥ agresarāḥ tadvanmadhurā ityarthaḥ | phaṇitayaḥ 
vāgvaikharyaḥ || 

atretthaṃ padayojanā he bhagavati ! śarajjyotsnāśuddhāṃ 
śaśiyutajaṭājūṭamakuṭāṃ 
varatrāsatrāṇasphaṭikraghaṭikāpustakakarāṃ tvā sakṛnnatvā 
satāṃ madhukṣīradrākṣāmadhurimadhurīṇāḥ phaṇitayaḥ 
kathamiva na sannidadhate || 

ayamarthaḥ atra vyatirekamukhena sakṛnnamaskāro'pi 
kavitvabījabhūtasaṃskārotpādakaḥ | tadbhāve prakārāntareṇa 
yena kenāpi tadbījotpattirnāstīti sūcitam || 15 || kavīndrāṇāṃ 
cetaḥkamalavanabālātaparuciṃ bhajante ye santaḥ katicidaruṇāmeva 
bhavatīm | viriñcipreyasyāstaruṇataraśṛṅgāralaharī- 
gabhīrābhirvāgbhirvidadhati satāṃ rañjanamamī || 16 || p. 53) 

kavīndrāṇāṃ kavīśvarāṇām cetaḥkamalavanabālātaparuciṃ 
cetāṃsyeva kamalāni padmāni teṣāṃ vanaṃ ṣaṇḍaṃ tasya 
bālātaparuciḥ prābhātikāruṇakāntiḥ tāṃ bhajante sevante ye 
santaḥ satpuruṣāḥ katicit viralāḥ aruṇāmeva aruṇākhyāṃ 
aruṇavarṇāṃ ca bhavatīṃ tvāṃ viriñcipreyasyāḥ viriñciḥ 
brahmā tasya preyasyāḥ priyāyāḥ sarasvatyāḥ 
taruṇataraśṛṅgāralaharīgabhīrābhiḥ taruṇatare atiyauvane | 
yadvā taruṇataraścāsau śṛṅgāraśca tasya laharī 
udriktapravāhaḥ | yadvā laharīśabdena samudrasya candrodaye 
yādṛśa utsekaḥ saḥ ucyate | laharīyuktagabhīrābhiḥ 
atigambhīrābhirityarthaḥ | vāgbhiḥ vāgvilāsaiḥ | vidadhati 
kurvanti satāṃ sabhāsadāṃ rañjanaṃ hṛdayānurañjanam amī 
santaḥ parāmṛśyante | 

atretthaṃ padayojanā he bhagavati ! kavīndrāṇāṃ 
cetaḥkamalavanabālātaparuciṃ aruṇāmeva bhavatīṃ katicit ye 
santaḥ bhajante amī santaḥ viriñcipreyasyāḥ 
taruṇataraśṛṅgāralaharīgabhīrābhiḥ vāgbhiḥ satāṃ rañjanaṃ 
vidadhati || 

ayamarthaḥ hṛdayakamale bhagavatīmaruṇāṃ dhyāyantaḥ 
pumbhāvamāpannā sarasvatīva śṛṅgārarasapradhānaiḥ 
vāgvilāsaiḥ sabhārañjanaṃ kurvanti | bhagavatyāḥ 
mātṛkātmakatvāt sarasvatīrūpatvenaiva sārasvatapradatvam | 
aruṇavarṇadhyānamahimnā śṛṅgārarasaprādhānyena 
vāgvilāsapravṛttiriti | yathoktaṃ vāmakeśvaratantre - 

aruṇākhyāṃ bhagavatīṃ aruṇābhāṃ vicintayet | 
pāśāṅkuśadharāṃ devīṃ dhanurbāṇadharāṃ śivām || 
varadābhayahastāṃ ca pustakākṣasraganvitām | aṣṭabāhuṃ 
trinayanāṃ khelantīmamṛtāmbudhau || sa karotyeva 
śṛṅgararasāsvādanalampaṭān | sabhāsadaḥ sadā sarvān 
sādhakendraḥ sabhāsthale || iti || 

p. 54) 

atra paramparitaṃ rūpakamalaṅkāraḥ bālātaparucitvāropaṇasya 
cetasi kamalatvāropaṇasya nimittatvāt rūpakaheturūpakaṃ 
paramparitam iti lakṣaṇāt || 16 || 

savitrībhirvācāṃ śaśimaṇiśilābhaṅgarucibhiḥ 
vaśinyādyābhistvāṃ saha janani saṃcintayati yaḥ | sa kartā 
kāvyānāṃ bhavati mahatāṃ bhaṅgirucibhiḥ 
vacobhirvāgdevīvadanakamalāmodamadhuraiḥ || 17 || 

savitrībhiḥ janayitrībhiḥ vācāṃ girāṃ 
śaśimaṇiśilābhaṅgarucibhiḥ 
candrakāntamaṇiśakalatulyakāntibhiḥ dalitacandrakāntamaṇeḥ 
atidhāvalyaṃ lokasiddham | vaśinyādyābhiḥ vaśinīpramukhābhiḥ | 
tadguṇasaṃvijñāno bahuvrīhiḥ vaśinī ādyā yāsāṃ tāḥ 
śaktayo'ṣṭau vaśinyādyāḥ yoginyo dvādaśa 
gandhākarṣiṇyādayaścatasraḥ iti vaśinyādyāḥ | atra ekasya 
ādyaśabdasya lopaḥ vaśinyādyādyā ityarthaḥ | vaśinyaṣṭakaṃ 
vaśinī kāmeśvarī modinī vimalā aruṇā jayinī sarveśvarī 
kaulinī | etābhiḥ tvāṃ bhavatīṃ saha sākaṃ janani he mātaḥ ! 
sañcintayati yaḥ saḥ sādhakaḥ kartā racayitā kāvyānāṃ 
prabandhānāṃ bhavati samarthaḥ prabhavati | mahatāṃ mahātmanāṃ 
kālidāsaprabhṛtīnāṃ bhaṅgirucibhiḥ bhaṅgīnāṃ rekhāṇāṃ 
rucibhiḥ svādubhiḥ vacobhiḥ vāgvilāsaiḥ 
vāgdevīvadanakamalāmodamadhuraiḥ vāgdevyā bhāratyāḥ 
vadanakamale yaḥ āmodaḥ parimalaḥ tena madhuraiḥ avyaktaiḥ 
puṃbhāvamāpannāyāḥ bhāratyāḥ vāgvilāsāḥ ime ityevaṃ 
bhramajanakairityarthaḥ || 

p. 55) 

atretthaṃ padayojanā he janani ! vācāṃ savitrībhiḥ 
śaśimaṇiśilābhaṅgarucibhiḥ vaśinyādyābhiḥ saha tvāṃ yaḥ 
sañcintayati sa mahatāṃ bhaṅgirucibhiḥ 
vāgdevīvadanakamalāmodamadhuraiḥ vacobhiḥ kāvyānāṃ kartā 
bhavati || 

atredamanusandheyam vaśinyādyābhiḥ tvāṃ ityatra tvāmityanena 
bhagavatyāḥ svarūpamuktam | bhagavatyāḥ svarūpaṃ tu 
pañcāśadvarṇātmikā mātṛkaiva | etattu śivaḥ śaktiḥ kāmaḥ 
[32 ślokaḥ] ityādiślokavyākhyānāvasare prapañcayiṣyate | seyaṃ 
pañcāśadvarṇātmikā mātṛkā aṣṭavargātmikā bhavati | te 
cāṣṭavargāḥ akacaṭatapayaśādayaḥ | akārādayaḥ ṣoḍaśa 
svarāḥ prathamavargaḥ | kādayaḥ pañca dvitīyaḥ | cādayaḥ 
pañca tṛtīyaḥ | ṭādayaḥ pañca caturthaḥ | tādayaḥ pañca 
pañcamaḥ | pādayaḥ pañca ṣaṣṭhaḥ | yādayaścatvāraḥ 
saptamaḥ | śādayaḥ pañca aṣṭamaḥ | evaṃ aṣṭavargātmikā 
bhagavatī mātṛkā tripurasundarī akacaṭatapayaśavargeṣu 
yathākramaṃ vaśinyādiśaktibhiryojitā 
bindutrikoṇātmakaśivacakracatuṣṭayavasukoṇadaśāradvitayacaturda" 
sa-koṇātmakeṣu aṣṭasu cakreṣu yojitā dhyātā satī 
kāvyakartṛtvasaṃpādikā | vaśinyādyubhiriti ādiśabdena 
kāmeśvarīprabhṛtīnāṃ aṣṭānāṃ saṅgrahaṇaṃ 
vidyādidvādaśayoginīsaṅgrahaṇaṃ 
gandhākarṣiṇyādicatuṣṭayasaṅgrahaṇaṃ kṛtamityuktaṃ bhavati | 
vaśinyaṣṭakamuktam | yoginīdvādaśakaṃ tu vidyāyoginī 
recikāyoginī mocikāyoginī amṛtāyoginī dipikāyoginī 
jñānayoginī āpyāyanīyoginī vyāpinīyoginī medhāyoginī 
vyomarūpā yoginī siddhirūpā yoginī lakṣmīyoginī | evaṃ 
dvādaśayoginībhiḥ sārdhaṃ vaśinyādyāṣṭakaṃ militvā 
viṃśatikalāḥ bhavanti | tāḥ viṃśatikalāḥ 
śuddhasphaṭikasaṅkāśāḥ daśārayugmakoṇeṣu sañcintanīyāḥ 
uktaphaladāḥ | ayaṃ ca bhūprastārabhedaḥ | bhūprastāraḥ 
catuṣṣaṣṭyā tantraiḥ [31 ślo.] ityādiślokavyākhyānāvasare 
nipuṇataraṃ nirūpyate | gandhākarṣiṇī rasākarṣiṇī 

p. 56) 

rūpākarṣiṇī sparśākarṣiṇī ca caturdvāreṣu yojitāḥ 
[yājñikī u. 1] uktaphaladāḥ | tathā ca śrutiḥ - 

gandhadvārāṃ durādharṣāṃ nityapuṣṭāṃ karīṣiṇīm | 
īśvarīsarvabhūtānāṃ tāmihopa hvaye śriyam || 
[dhyātāstattaduktaphaladāḥ] 

asyā arthaḥ gandhadvārāṃ gandharasarūpasparśāḥ gandhaśabdena 
saṃgṛhītāḥ tena gandhākarṣiṇyādayaḥ adhidevatāḥ 
saṃgṛhītā bhavanti gandhākarṣiṇī rasākarṣiṇī 
rūpākarṣiṇī sparśākarṣiṇī ceti | tābhiryuktāni 
caturdvārāṇi yasyāṃ sā gandhadvārā tāṃ gandhadvārām | 
durādharṣāṃ duṣpradharṣāṃ mandabhāgyānāmiti śeṣaḥ | 
nityapuṣṭāṃ nityānandasvarūpiṇīm karīṣiṇīṃ 
gandhādyākarṣiṇīmityarthaḥ | yadvā karibhiḥ gajaiḥ īṣiṇīṃ 
parivṛtām | īśvarīṃ adhidevatāṃ sarvabhūtānām tāṃ iha cakre 
upahvaye śriyaṃ śrīvidyām | gandhadvārāmiti 
gandhākarṣiṇīcatuṣkaṃ vaśinyādyaṣṭakaṃ yoginīdvādaśakaṃ 
saṃgṛhītam | tathā ca śaṃbhuvacanam - 

mātṛkāṃ vaśinīyuktāṃ yoginībhiḥ samanvitām | 
gandhādyākarṣiṇīyuktāṃ saṃsmaret tripurāmbikām | 

atredamanusandheyam vaśinyādayaḥ śaktayaḥ pañcāśadvarṇātmikā 
ityuktam | tatra vaśinīśaktiḥ svarātmikā | svarāḥ ṣoḍaśa 
akārādayaḥ | teṣāṃ svarūpaṃ sanatkumārasaṃhitāyāṃ 
pañcaśatyāmuktaṃ saṃkṣepeṇa kathyate akārātmikā śaktiḥ 
aṣṭabhujā 
pāśāṅkuśavarābhayapustakākṣamālākamaṇḍaluvyākhyāmudrākara 
a | evaṃ ākārādyātmikāḥ śaktayaḥ śubhravarṇāḥ | iyāṃstu 
viśeṣaḥ akārātmikāyāḥ śakteḥ maṇḍalaṃ 
aśītilakṣayojanāyatam | ākārasya taddviguṇam | ikārasya 
navatilakṣayojanāyatam | īkārasya taddviguṇam | ukārasya 
koṭiyojanaparimitapariṇāhaṃ maṇḍalam | 

p. 57) 

ūkārasya taddviguṇam | ṛkārasya pañcāśallakṣayojanaparimitaṃ 
maṇḍalam | taddviguṇam ṝkārasya | taddviguṇaṃ ḷkāra 
ḹkārayorapi | evaṃ ekārasya sārdhakoṭipariṇāhaṃ maṇḍalam | 
aikāra okāra aukārāṇāṃ samameva ekāreṇa | binduvisargayostu 
akāradviguṇaṃ maṇḍalam | vyañjanaśaktīnāṃ 
akāramaṇḍalādardhaṃ maṇḍalam | tāḥ śaktayaḥ 
pāśāṅkuśākṣamālākamaṇḍaludharāḥ | antasthāstu 
pāśāṅkuśābhayavarakarāḥ | ūṣmāṇestu 
pāśāṅkuśākṣamālāvarakarāḥ | lakārakṣakārau 
pāśāṅkuśaikṣavaśarāsanapuṣpabāṇayuktakarau | etāḥ 
śaktayaḥ pañcāśadvarṇātmikāḥ || 

kecittu svarātmikāḥ śaktayaḥ sphaṭikābhāḥ | kādayo 
māvasānāḥ vidrumābhāḥ yādayo nava pītavarṇāḥ kṣakāraḥ 
aruṇavarṇaḥ iti || 

apare tu akārādayo dhūmravarṇāḥ kakārādayaḥ ṭhāntāḥ 
sindūravarṇāḥ ḍādiphāntāḥ gauravarṇāḥ bādilāntāḥ 
aruṇavarṇāḥ vādisāntāḥ kanakavarṇāḥ [hakṣayostu pādau 
sādau vā antarbhāvaḥ ityadhikaḥ pāṭhaḥ pa. - pustake dṛśyate] 
hakṣau taṭidābhau lakārastu lakāra evāntarbhūtaḥ iti vadanti | 
idamevāsmanmataṃ bhagavatpādācāryāṇāmapi sammatam | etatsarvaṃ 
subhagodayavyākhyānāvasare candrakalāyāṃ 
samyaṅnirūpitamasmābhiḥ || 17 || 

tanucchāyābhiste taruṇataraṇiśrīsaraṇibhiḥ divaṃ 
sarvāmurvīmaruṇimani magnāṃ smarati yaḥ | bhavantyasya 
trasyadvanahariṇaśālīnanayanāḥ sahorvaśyā vaśyāḥ katikati na 
gīrvāṇagaṇikāḥ || 17 || 

p. 58) 

tanucchāyābhiḥ tanoḥ dehasya chāyābhiḥ kāntibhiḥ te bhavatyāḥ 
taruṇataraṇiśrīsaraṇibhiḥ taruṇataraṇiḥ bālasūryaḥ tasya 
śrīḥ śobhā tasyā iva saraṇiḥ mārgaḥ saubhāgyamiti yāvat 
yāsāṃ tābhiḥ divaṃ ākāśaṃ sarvāṃ urvīṃ kṛtsnāṃ bhūmiṃ 
rodaḥ pradeśamityarthaḥ | aruṇimani āruṇye magnāṃ atyaruṇāmiti 
yāvat | yadvā aruṇimanimagnāṃ nitarāṃ magnām | yathoktaṃ 
śambhunā - 

yāvakābdhau nimagnāṃ yo divaṃ bhūmiṃ vicintayet | tasya sarvā 
vaśaṃ yātāḥ trailokyavanitā drutam [dhruvam iti pāṭhāntaram] || 
iti | 

ataśca aruṇimaśabdena yāvakābdhirlakṣyate 
yāvakābdhimadhyasthitāmityarthaḥ | smarati cintayati yaḥ sādhakaḥ 
bhavanti asya sādhakasya trasyadvanahariṇaśālīnanayanāḥ trasyanto 
vanahariṇāḥ vana(hariṇa)śabdaḥ svacchandacāritvalakṣaṇayā 
atitrāsaṃ lakṣayati teṣāmiva śālīne hrīṇe atisundare iti 
yāvat nayane yāsāṃ tāḥ tathoktāḥ saha sākam ūrvaśī nāma 
devagaṇikā tayā vaśyāḥ vaśaṅgatāḥ katikati ābhīkṣṇye 
dviruktiḥ | naḥ niṣedhe | gīrvāṇagaṇikāḥ devavārāṅganāḥ || 

atretthaṃ padayojanā he bhagavati ! taruṇataraṇiśrīsaraṇibhiḥ te 
tanucchāyābhiḥ sarvāṃ divaṃ urvīṃ ca aruṇimani magnāṃ yaḥ 
smarati asya trasyadvanahariṇaśālīnanayanāḥ gīrvāṇagaṇikāḥ 
ūrvaśyā saha katikati na vaśyā bhavanti ? sarvā apsaraso vaśyā 
bhavantītyarthaḥ || 18 || 

mukhaṃ binduṃ kṛtvā kucayugamadhastasya tadadho harārdhaṃ 
dhyāyedyo haramahiṣi te manmathakalām | sa sadyaḥ saṃkṣobhaṃ 
nayati vanitā ityatilaghu trilokīmapyāśu bhramayati 
ravīndustanayugām || 

p. 59) 

mukhaṃ vaktraṃ binduṃ bindurūpaṃ kṛtvā bindusthāne mukhaṃ 
dhyātvetyarthaḥ | kucayugaṃ stanadvayaṃ adhaḥ adhastāt tasya 
mukhasya | tadadhaḥ tasya kucayugasya adhaḥpradeśe harārdhaṃ 
harasya ardhaṃ śaktiḥ trikoṇaṃ yoniriti yāvat | dhyāyet cintayet 
yaḥ sādhakaḥ | tatra ityadhyāhāryam | haramahiṣi harasya 
sadāśivasya mahiṣi jāye te bhavatyāḥ manmathakalāṃ 
kāmarājabījam saḥ sādhakaḥ sadyaḥ tadānīmeva saṃkṣobhaṃ 
sarvajagatsaṃkṣobhaṃ cittavikāraṃ nayati prāpayati vanitāḥ 
striyaḥ | itiśabdaḥ kriyāviśeṣaṇadyotakaḥ | atilaghu atituccham 
trilokīmapi tribhuvanamapi āśu śīghraṃ bhramayati 
ravīndustanayugāṃ ravīndū sūryacandrau tāveva stanau tayoḥ 
yugaṃ yasyāḥ sā tām || 

atretthaṃ padayojanā he haramahiṣi ! mukhaṃ binduṃ kṛtvā 
tasyādhaḥ kucayugaṃ kṛtvā tadadhaḥ harārdhaṃ kṛtvā tatra te 
manmathakalāṃ yaḥ dhyāyet saḥ sadyaḥ vanitāḥ saṃkṣobhaṃ 
nayatīti yat tat atilaghu kiṃtu ravīndustanayugāṃ trilokīmapi 
āśu bhramayati || 

atra trilokyāḥ ravīndustanayugavatvaviśeṣaṇena strītvāropaṇaṃ 
ayaṃ mādanaprayogo vanitāsveva prayoktavya iti jñāpayitum || 

atredamanusandheyam sādhakaḥ trikoṇe bindusthāne sādhyāyāḥ 
kāntāyāḥ vaktraṃ dhyātvā tadadhastāt tasyāḥ kucayugaṃ 
dhyātvā tatkucadvayasyādhastāt tasyāḥ yoniṃ vicintya tatra 
vaktrakucadvayayoniṣu pradhānāṅgeṣu mārabījaṃ sañcintya tayā 
kāntayā ātmanastādātmyaṃ sampādayet | yathoktaṃ catuśśatyām - 

binduṃ saṅkalpya vaktraṃ tu tadadhastātkucadvayam | tadadhaśca 
harārdhaṃ tu cintayettadadhomukham || tatra kāmakalārūpāmaruṇāṃ 
cintayediha | tatastenaiva rūpeṇa nijarūpaṃ vicintayet || iti || 

p. 60) 

evaṃ mādanaprayogāḥ aneke sanatkumārasaṃhitāyāṃ 
saptaśatyāmuktāḥ | atra katicana nirūpyante - 

bindau tadvaktramāropya tadadho bāhuyugmakam | tadadhaḥ kucayugmaṃ 
tu tadadho yonimeva ca || eteṣu pañcasthāneṣu 
pañcabāṇānvicintayet || 

pañcabāṇabījāni mukhe bāhuyugme kucamadhye yonimadhye 
yathākramaṃ drāṃ drīṃ klīṃ blūṃ sa iti cintayet ityarthaḥ | 
ayaṃ prayogaḥ kāmarājaprayogasamaya eva || 

trikoṇe baindavasthāne adhovaktraṃ vicintayet | bindoruparibhāge tu 
vaktraṃ sañcintya sādhakaḥ || taduparyeva vakṣojadvitayaṃ 
saṃsmaredbudhaḥ | taduparyeva yoniṃ ca kramaśo bhuvaneśvarīm || 
śrīvidyāṃ kāmarājaṃ ca vinyasyāśu vimohayet || 

ayaṃ prayogaḥ mukhaṃ binduṃ kṛtvā iti prayogāt atiśīghrakaraḥ 
| atrāpi pañcabāṇaprayogaḥ pūrvavat | 
evametādṛśamādanaprayogāḥ sanatkumārasaṃhitāyāṃ 
avagantavyāḥ granthavistarabhayānnoktāḥ || 19 || 

kirantīmaṅgebhyaḥ kiraṇanikurumbāmṛtarasaṃ hṛdi tvāmādhatte 
himakaraśilāmūrtimiva yaḥ | sa sarpāṇāṃ darpaṃ śamayati 
śakuntādhipa iva jvara pluṣṭān dṛṣṭyā sukhayati 
sudhādhārasirayā || 20 || 

kirantīṃ varṣantīṃ aṅgebhyaḥ avayavebhyaḥ 
kiraṇanikurumbāmṛtarasaṃkiraṇānāṃ marīcīnāṃ nikurambaḥ 
samūhaḥ tasmādutpannaḥ amṛtarasaḥ tam | hṛdi 

p. 61) 

hṛdaye tvāṃ bhavatīṃ ādhatte smaratīti yāvat | 
himakaraśilāmūrtiṃ himakaraśilāyāḥ candrakāntamaṇeḥ mūrtiṃ 
putthalikāṃ sālabhañjikāṃ candrakāntamaṇinirmitadehāṃ iva yaḥ 
sādhakaḥ saḥ sādhakaḥ sarpāṇāṃ darpaṃ śamayati 
śakuntādhipaḥ śakuntānāṃ pakṣiṇāṃ adhipo garutmān iva | 
iveti sambhāvanāyām garutmadākārākāritvamātraṃ na bhavati api 
tu tatkāryakāritvaṃ sambhāvitamiti gurutmān bhūtvā pratyakṣo 
garutmānivetyarthaḥ | jvarapluṣṭān jvareṇa pluṣṭān santaptān 
dṛṣṭyā vīkṣaṇena | atra dṛṣṭiprayogaḥ kathitaḥ | sukhayati 
sukhinaḥ karoti | tatkaroti iti ṇici ṇāviṣṭhavatprātipadikasya 
iti ṭilopaḥ | evaṃ sukhayatīti rūpaṃ siddham | sudhādhārasirayā 
sudhāyāḥ ādhārabhūtā sirā amṛtasyandinī nāḍī | yadvā 
sudhā dhārātmikā yasyāṃ sirāyāmiti bahuvrīhiḥ | striyāḥ 
puṃvat bhāṣitapuṃskāt ityādinā puṃvadbhāvaḥ ? | sudhādhārā 
cāsau sirā ca tayā | sudhāsārasirayeti vā pāṭhaḥ 
sudhāsārātmikā sirā || 

atretthaṃ padayojanā he devi ! yaḥ sādhakaḥ aṅgebhyaḥ 
kiraṇanikurumbāmṛtarasaṃ kirantīṃ himakaraśilāmūrtimiva hṛdi 
tvāṃ ādhatte saḥ śakuntādhipa iva dṛṣṭyā sarpāṇāṃ darpaṃ 
śamayati | sudhādhārasirayā dṛṣṭyā jvarapluṣṭān sukhayati || 

anena ślokena gāruḍaprayoga uktaḥ | taduktaṃ śatuśśatyām - 

ṣaṇmāsadhyānayogena jāyate garuḍopamaḥ | dṛṣṭyā karṣayate 
lokaṃ dṛṣṭyaiva kurute vaśam || dṛṣṭyā saṃkṣobhayennārīṃ 
dṛṣṭyaiva harate viśam | dṛṣṭyā cāturthikādīṃśca jvarān 
nāśayate kṣaṇāt || candrakāntaśilāmūrtiṃ cintayitvā 
vināśayet | tāpajvarānaśeṣāṃśca śīghraṃ tārkṣya ivāparaḥ 
|| garuḍadhyānayogena smaraṇānnāśayedviṣam || iti | 

p. 62) 

ataśca prātītikamanvayaṃ yathā śakuntādhipaḥ sarpāṇāṃ 
darpaṃ śamayati evaṃ sādhakendraḥ jvarapluṣṭān sukhayatīti 
tiraskṛtya sādhakendro jvarapluṣṭān sarpāṇāṃ darpamapi 
śakuntādhipa iveti āśrita iti anusandheyam || 20 || 

taṭillekhātanvīṃ tapanaśaśivaiśvānaramayīṃ niṣaṇṇāṃ 
ṣaṇṇāmapyupari kamalānāṃ tava kalām | mahāpadmāṭavyāṃ 
mṛditamalamāyena manasā mahāntaḥ paśyanto dadhati 
paramāhlādalaharīm || 21 || 

taṭillekhā vidyullekhā tadvat tanvī dīrghasūkṣmā jyotirmayī 
kṣaṇaprabhā ca tām | sthirasaudāminyāḥ kṣaṇaprabhātvaṃ 
ājñācakre kṣaṇamātradarśanāt | etacca 
ājñāśabdārthanirūpaṇāvasare pūrvameva pratipāditam | 
tapanaśaśivaiśvānaramayīṃ sūryacandrānalātmikām | etacca 
trikhaṇḍanirūpaṇāvasare samyaṅnirūpitam | niṣaṇṇāṃ āsīnām 
ṣaṇṇāṃ ṣaṭsaṅkhyākānām apiḥ samuccaye granthitrayaṃ 
sasuccinoti | granthitrayasyāpi | upari kamalānāṃ padmānām 
ṣaṭcakrāṇāṃ 
ādhārasvādhiṣṭhānamaṇipūrakānāhataviśuddhyājñātmakānāṃ 
kamalasvarūpatvaṃ pūrvameva nirūpitam | tava bhavatyāḥ kalāṃ 
sādākhyāṃ baindavīkalām | mahāpadmāṭavyāṃ mahānti bahūni 
padmāni padmadalāni sahasrasaṃkhyākāni tānyeva aṭavī tasyāṃ 
sahasradalakamalakarṇikāyāmityarthaḥ | yadvā mahāpadmaṃ 
sahasradalakamalaṃ tadeva aṭavī tasyām | mṛditamalamāyena 
mṛditāḥ kṣapitāḥ malāḥ kāmādayaḥ 
māyā'vidyā'smitāhaṅkārādayaḥ yasya tan tena manasā 
antaḥkaraṇena mahāntaḥ yogīśvarāḥ paśyantaḥ 
sādākhyakalāsudhādhārāniṣyandaṃ anubhavantaḥ dadhati 
avarundhate | paramāhlādalaharīṃ paramaḥ niratiśayaḥ āhlādaḥ 

p. 63) 

sukhaviśeṣaḥ tasya laharīṃ udrekaṃ udriktaparamānandaṃ 
sādākhyakalāmṛtānubhavajanitaṃ sarvadā sampādayantītyarthaḥ || 

atretthaṃ padayojanā he bhagavati ! taṭillekhātanvīṃ 
tapanaśaśivaiśvānaramayīṃ niṣaṇṇāṃ ṣaṇāṃ 
kamalānāmapyupari mahāpadmāṭavyāṃ niṣaṇṇāṃ tava kalāṃ 
mṛditamalamāyena manasā paśyanto mahāntaḥ paramāhlādalaharīṃ 
dadhati || 21 || 

bhavāni tvaṃ dāse mayi vitara dṛṣṭiṃ sakaruṇāṃ iti stotuṃ 
vāñchan kathayati bhavāni tvamiti yaḥ | tadaiva tvaṃ tasmai diśasi 
nijasāyujyapadavīṃ mukundabrahmendrasphuṭamakuṭanīrājitapadām || 
22 || 

he bhavāni ! bhavasya patni ! tvaṃ bhavatī dāse mayi dāsabhūte 
kiṅkare mayi vitara dehi | dṛṣṭiṃ kaṭākṣaṃ sakaruṇāṃ 
karuṇāyuktāṃ iti evaṃprakāreṇa stotuṃ stotraṃ kartuṃ vāñchan 
icchan kathayati vadati | bhavāni tvamiti bhavāni tvaṃ dāse mayi 
vitara dṛṣṭiṃ sakaruṇām iti vākyapratīkaṃ bhavāni tvaṃ 
ityevaṃ yaḥ sādhakaḥ tadaiva bhavāni tvam iti 
vākyaikadeśoccāraṇasamaya eva tvaṃ bhavatī tasmai 
vākyaikadeśoccārakāya diśasi dadāsi | nijasāyujyapadavīṃ 
nijasya ātmanaḥ sāyujyapadavīṃ tādātmyam | 
mukundabrahmendrasphuṭamakuṭanīrājitapadāṃ mukundo viṣṇuḥ 
brahmā druhiṇaḥ indraḥ ākhaṇḍalaḥ teṣāṃ sphuṭaṃ yathā 
bhavati tathā makuṭaiḥ nīrājite nirājanavidhikriyāñcite pade 
padāmbuje yasyāstām || 

atretthaṃ padayojanā he bhavāni ! tvaṃ dāse mayi sakaruṇāṃ 
dṛṣṭiṃ vitareti stotuṃ vāñchan bhavāni tvamiti yaḥ kathayati 
tasmai tadaiva tvaṃ mukundabrahmendrasphuṭamakuṭanīrājitapadāṃ 
nijasāyujyapadavīṃ diśasi || 

p. 64) 

ayamarthaḥ bhavāni tvaṃ dāse mayi ityādivākyapratīke bhavāni 
tvaṃ iti padadvaye bhavāni iti padasya 
loḍuttamapuruṣaikavacanāntatvamavagamya tatsāmānādhikaraṇyena 
tvaṃ padasyānvaye mahāvākyaprayogo'nena sādhakena prayukta iti 
mattvā mahāvākyaphalaṃ tādātmyaṃ diśati bhagavatī 
japahomādyupāsanāvidhibhyaḥ tādātmyopāsanāyāḥ sadyaḥ 
phaladāyitvāt - 

anicchayāpi saṃspṛṣṭo dahatyeva hi pāvakaḥ || 

iti nyāyena avivakṣayā prayuktamapi mahāvākyaṃ phaladāyakamiti 
nāpi avimṛśyakāritvaṃ devyā iti rahasyam || 22 || 

tvayā hṛtvā vāmaṃ vapuraparitṛptena manasā śarīrārdhaṃ 
śambhoraparamapi śaṅke hṛtamabhūt | yadetattvadrūpaṃ 
sakalamaruṇābhaṃ trinayanaṃ kucābhyāmānamraṃ 
kuṭilaśaśicūḍālamakuṭam || 23 || tvayā bhavatyā hṛtvā 
apahṛtya vāmaṃ vāmārdhaṃ vapuḥ śarīraṃ aparitṛptena 
asantuṣṭena manasā antaḥkaraṇena śarīrārdhaṃ śambhoraparamapi 
dakṣiṇamapi śaṅke manye hṛtaṃ gṛhītaṃ abhūt | yat yasmāt etat 
hṛdayakamalāntaḥpratibhāsi tvadrūpaṃ tava śarīraṃ sakalaṃ 
kṛtsnaṃ vāmadakṣiṇabhāgātmakaṃ aruṇābhaṃ aruṇasya 
prātaḥkālasūryasyābhevābhā yasya tat | yadvā aruṇā 
raktavarṇā ābhā prabhā yasya tat aruṇābham | trinayanaṃ 
nayanatrayayuktaṃ kucābhyāmānamraṃ stanābhyāmīṣannamraṃ 
kuṭilaśaśicūḍālamakuṭaṃ kuṭilaśaśinā vakracandrakalayā 
cūḍālaṃ cūḍāvantaṃ makuṭaṃ yasya tat || 

p.65) 

atretthaṃ padayojanā he bhagavati ! śambhorvāmaṃ vapuḥ tvayā 
hṛtvā aparitṛptena manasā aparamapi śarīrārdhaṃ hṛtamabhūditi 
śaṅke yat etat tvadrūpaṃ sakalamaruṇābhaṃ trinayanaṃ 
kucābhyāmānamraṃ kuṭilaśaśicūḍālamakuṭam || 

ayamarthaḥ bhagavatyā śambhoḥ ekasminnardhe apahṛte 
aparārdhasyāpyapahāra utprekṣyate | yadvā 
uttarakaulasiddhāntapratipādako'yaṃ ślokaḥ | uttarakaulasiddhānte 
śaktitattvāt anyat śivatattvaṃ nāsti | ataśca śivatattvaṃ 
śaktitattve antarbhūtamiti tadeva upāsyamiti prastutam | etacca 
manastvaṃ vyoma tvam [35 ślokaḥ] iti ślokavyākhyānāvasare 
tavādhāre mūle [49 ślokaḥ] iti ślokavyākhyānāvasare ca 
nipuṇataramupapādayiṣyāmaḥ || 23 || 

jagatsūte dhātā hariravati rudraḥ kṣapayate tiraskurvannetatsvamapi 
vapurīśastirayati | sadāpūrvaḥ sarvaṃ tadidamanugṛhṇāti ca 
śivaḥ tavājñāmālambya kṣaṇacalitayorbhrūlatikayoḥ || 24 || 

jagat sthāvarajaṅgamātmakaṃ jagat sūte sṛjati dhātā sraṣṭā | 
hariḥ viṣṇuḥ avati rakṣati | rudraḥ kṣapayate saṃharati | 
dhātṛharirudrāḥ sṛṣṭisthiti layādhikāriṇaḥ [layakāriṇaḥ] | 
tiraskurvan upasaṃharan etat dhātṛharirudrātmakaṃ tritayaṃ svamapi 
svakīyamapi vapuḥ dehaṃ īśaḥ maheśvaratattvaṃ tirayati 
antarhitaṃ karoti | īśvaraḥ dhātṛharirudrān ātmanyāropya 
svayamapi sadāśivatattve antarbhūta ityarthaḥ | anena 
brahmāṇḍapralaya uktaḥ | tadanantaraṃ brahmāṇḍotpipitsā 
sadāśivasya jāyate | tadānīmāha sadāpūrva iti | sadāśabdaḥ 
pūrvaḥ yasya śivaśabdasya saḥ sadāpūrvaḥ śivaśabdaḥ | tena 
sadāśivaśabdena 

p. 66) 

vācyavācakayoḥ abhedopacārāt sadāśivarūpaṃ tattvaṃ upacaryate 
| sarvaṃ tadidaṃ pūrvoktaṃ dhātṛharirudreśānātmakaṃ 
tattvacatuṣṭayaṃ anugṛhṇāti | cakāraḥ śaṅkācchede | śivaḥ 
sadāśivaḥ | kathamanugṛhṇātītyāśaṅkāyāmāha 
tāvājñāmālambya iti | tava bhavatyāḥ kṣaṇacalitayoḥ 
bhrūlatikayoḥ kṣaṇamātraṃ calitayoḥ bhrūlatikācalanena 
vijñeyāmājñāmālambyetyarthaḥ | bhavadbhrūvikṣepamātreṇa 
dhātṛharirudreśānātmakaṃ tattvacatuṣṭayamutpannaṃ 
bhrakuṭīkaraṇamātreṇa tadvinaṣṭamiti 
anekakoṭibrahmāṇḍānāmutpādane saṃharaṇe ca 
tvadbhrūvikṣepamātrarūpā śaktiḥ sācivyaṃ sadāśivasya 
karotīti tātparyam || 

atretthaṃ padayojanā he bhagavati ! dhātā jagat sūte | hariḥ jagat 
avati | rudraḥ jagat kṣapayate | īśaḥ etat tiraskurvan svamapi 
vapuḥ tirayati ! sadāpūrvaḥ śivaḥ sarvaṃ tadidaṃ tava 
kṣaṇacalitayoḥ bhrūlatikayoḥ ājñāmālambya anugṛhṇāti || 24 
|| 

trayāṇāṃ devānāṃ triguṇajanitānāṃ tava śive bhavetpūjā 
pūjā tava caraṇayoryā viracitā || tathā hi 
tvatpādodvahanamaṇipīṭhasya nikaṭe sthitā hyete 
śaśvanmukulitakarottaṃsamakuṭāḥ || 25 || 

trayāṇāṃ devānāṃ dhātṛharirudrāṇāmityarthaḥ | 
triguṇajanitānāṃ sattvarajastamaḥ prabhavānām tava bhavatyāḥ he 
śive ! śivamahiṣi ! bhavet bhavatyeva | prāptakāle liṅ ! pūjā 
saparyā saiva pūjā nānyeti dvitīyapūjāśabdasyārthaḥ | tava 
caraṇayoḥ yā pūjā viracitā nirmitā | yuktaṃ caitadityāha 
tathāhītyādinā | tathāhi yuktametat | 
tvatpādodvahanamaṇipīṭhasya tava pādayoḥ udvahanārthaṃ 
yanmaṇipīṭhaṃ parikalpitaṃ tasya nikaṭe 

p. 67) 

upasiṃhāsanasamīpe sthitāḥ vartante sma | hi yasmāt ete 
dhātṛharirudrāḥ adhikāripuruṣāḥ śaśvat anavarataṃ 
mukulitakarottaṃsamakuṭāḥ mukulitāḥ kṛtāñjalayaḥ karā eva 
uttasāḥ tadyuktāḥ makuṭāḥ yeṣāṃ te || 

atretthaṃ padayojanā he śive ! tava triguṇajanitānāṃ 
trayāṇāmapi devānāṃ tava caraṇayoḥ yā pūjā viracitā bhavet 
saiva pūjā | tathāhi tvatpādodvahanamaṇipīṭhasya nikaṭe hi 
yasmāt mukulitakarottaṃsamakuṭāḥ śaśvadete sthitāḥ || 

ayaṃ bhāvaḥ bhagavatyāḥ pādapīṭhasevā pūjāmātreṇa na 
labhyate api tu bhagavatyāḥ prasādavaśādeveti || 25 || 

viriñciḥ pañcatvaṃ vrajati harirāpnoti viratiṃ vināśaṃ 
kīnāśo bhajati dhanado yāti nidhanam | vitandrī māhendrī 
vitatiripi sammīlita dṛśā mahāsaṃhāre'smin viharati sati 
tvatpatirasau || 26 || 

viriñciḥ brahmā pañcatvaṃ pañcabhūtānāṃ vyaṣṭirūpatāṃ 
maraṇamiti yāvat vrajati yāti | hariḥ viṣṇuḥ āpnoti prāpnoti 
viratiṃ uparatiṃ maraṇamiti yāvat | vināśaṃ mṛtiṃ kīnāśaḥ 
yamaḥ bhajati | dhanadaḥ kuberaḥ nidhanaṃ maraṇaṃ yāti prāpnoti 
| vitandrī viśeṣaṇa tandrī pramīlā jāḍyaṃ yasyāssā 
nidrāṇetyarthaḥ māhendrī mahendrasyeyaṃ māhendrī 
caturdaśānāṃ manūnāṃ indrāṇāṃ vitatirapi saṅgho'pi 
sammīlitadṛśā sammīlitā dṛśā dṛṣṭiryasyāḥ sā | 
halantādapi ṭābiṣyate iti ṭāp | yadvā sammīlitadṛśā karaṇena 
vitandrīmāhendrī | mahāsaṃhāre kalpānte asmin viharati 
viśṛṅkhalatayā vartate | he sati ! prativrate ! tvatpatiḥ 
sadāśivaḥ haraḥ asau sahasradalakamale paridṛśyamānaḥ || 

p. 68) 

atretthaṃ padayojanā viriñciḥ pañcatvaṃ vrajati | hariḥ viratiṃ 
āpnoti | kīnāśaḥ vināśaṃ bhajati | dhanadaḥ nidhanaṃ yāti | 
māhendrī vitatirapi sammīlitadṛśā vitandrī | asmin mahāsaṃhāre 
sati ! asau tvatpatiḥ haraḥ viharati || 

ayaṃ bhāvaḥ sarveṣāṃ adhikāripuruṣāṇāṃ 
[īśvarāṇāmityadhikam] ca saṃhāre brahmāṇḍabhaṅgasamaye tava 
patyuryat viharaṇaṃ tat tava pātivratyamahimāyattamiti || 26 || 

japo jalpaḥ śilpaṃ sakalamapi mudrāviracanā gatiḥ 
prādakṣiṇyakramaṇamaśanādyāhutividhiḥ | praṇāmaḥ saṃveśaḥ 
sukhamakhilamātmārpaṇadṛśā saparyāparyāyastava bhavatu yanme 
vilasitam || 27 || 

japaḥ mantrajapaḥ upāṃśūccairvā kriyate ityādibhiścoditaḥ saḥ 
jalpaḥ yādṛcchikasallāpaḥ | śilpaṃ sakalamapi 
hastavinyāsādikriyānicayaḥ mudrāviracanā mudrāṇāṃ 
saṃkṣobhadrāvaṇākarṣavaśyonmādamahāṅkuśakhecarībījayoni-tri 
khaṇḍātmakānāṃ viracanā karaṇam | gatiḥ yādṛcchikagamanaṃ 
prādakṣiṇyakramaṇaṃ pradakṣiṇakriyā | aśanādi 
odanādiyatkiñcitpadārthacarvaṇaṃ āhutividhiḥ āhutīnāṃ 
devatoddeśena haviḥprakṣepaṇātmakānāṃ vidhiḥ karaṇam | 
praṇāmaḥ namaskāraḥ saṃveśaḥ yādṛcchikadaṇḍavalluṭhanam 
jalpaśilpavyatirekeṇa aṅgabhaṅganayanonmīlananimīlanādikaṃ ca 
sukhaṃ sukhakaraṃ vastu akhilaṃ samastaṃ 
śabdasparśarūparasagandhādikaṃ ātmārpaṇadṛśā 
ātmārpaṇabuddhyā saparyāparyāyaḥ saparyā pūjā tasyāḥ 
paryāyaḥ rūpāntaraṃ saparyaivetyarthaḥ tava te bhavatu bhūyāt | 
yat prasiddhaṃ me mama vilasitaṃ vilāsaḥ || 

p. 69) 

atretthaṃ padayojanā he bhagavati ! ātmārpaṇadṛśā japaḥ jalpaḥ 
sakalamapi śilpaṃ mudrāviracanā gatiḥ prādakṣiṇyakramaṇaṃ 
aśanādi āhutividhiḥ saṃveśaḥ praṇāmaḥ akhilaṃ sukhaṃ me 
yadvilasitaṃ ca tava saparyāparyāyaḥ bhavatuḥ || 

ayamarthaḥ jalpādīnāṃ japādirūpatā yathārhaṃ kalpitā | evaṃ 
nayanonmīlananimīlananimeṣonmeṣāṅgabhaṅgajṛmbhādīnāṃ 
yathārhaṃ saparyāparyāyatā ūhyā | śabdādeḥ sukhakarasya 
vastunaḥ ṣoḍaśopacāravyatirekeṇa ātmārpaṇabuddhyā tyāga eva 
saparyāparyāyaḥ na tu svīkṛtānām | yadvā śabdādīnāṃ 
yādṛcchikasambhavena sukhaprādurbhāve tatsukhaṃ maccheṣaṃ na 
bhavati kintu sadāśivāyetyarpaṇaṃ saparyāparyāyaḥ || 

atredamanusandheyam samayināṃ mate samayasya sādākhyatattvasya 
saparyā sahasradalakamala eva na tu bāhye pīṭhādau | ye ye samayino 
yogīśvarā jīvanmuktāḥ saṃsārayātrāmanuvartamānāḥ 
sādākhyatattvamanucintayantaḥ ātmaikapravaṇāḥ vartante teṣāṃ 
japo jalpaśśilpam ityādinā saparyāprakāro nirūpitaḥ | ye tu 
samayino yogīśvarāḥ vijane guhāntare vā baddhapadmāsanāḥ 
nigṛhītendriyāḥ sādākhyatattvadhyānaikaniṣṭhāḥ vartante 
teṣāṃ vakṣyamāṇacaturvidhaṣaḍvidhaikyānusandhānameva 
bhagavatyāḥ saparyeti arthāduktaṃ bhavati | ataśca pakṣadvaye'pi 
bāhyapūjāyāṃ tatkriyākalāpe ca tatsampādanāyāṃ 
[tatsampādanāyāsaleśo nāsti] ca kleśo nāsti samayināmiti 
rahasyam | yattu candrajñānavidyāyāmuktam - 

sūryamaṇḍalamadhyasthāṃ devīṃ tripurasundarīm | 
pāśāṅkuśadhanurbāṇān dhārayantīṃ prapūjayet || iti || 

bāhyapūjāprakārakathanaṃ tattu samayaikadeśimatamiti 
purastātprapañcyate || 27 || 

p. 70) 

viriñciḥ pañcatvam iti ślokena yaduktaṃ tadeva sopaskaramāha- 

sudhāmapyāsvādya pratibhayajarāmṛtyuhariṇīṃ vipadyante viśve 
vidhiśatamakhādyā diviṣadaḥ | karālaṃ yatkṣvelaṃ kabalitavataḥ 
kālakalanā na śambhostanmūlaṃ tava janani tāṭaṅkamahimā || 28 
|| 

sudhāṃ amṛtam apiḥ virodhe āsvādya pītvā 
pratibhayajarāmṛtyuhariṇīṃ pratibhayau bhayaṅkarau jarāmṛtyū 
jarāmaraṇe haratīti pratibhayajarāmṛtyuhariṇī tām | vipadyante 
mriyante viśve akhilāḥ vidhiśatamakhādyāḥ vidhiḥ brahmā 
śatamakho devendraḥ tau ādyau prabhṛtibhūtau yeṣāṃ te 
diviṣadaḥ surāḥ karālaṃ atyugraṃ yat kṣvelaṃ viṣaṃ 
kālakūṭaṃ kabalitavataḥ bhakṣitavataḥ kālakalanā kālena 
avasānakālenā kalanā avacchedaḥ maraṇamiti yāvat na śambhoḥ 
tanmūlaṃ tasya kālakalanābhāvasya mūlaṃ kāraṇaṃ tava 
bhavatyāḥ janani ! he mātaḥ ! tāṭaṅkamahimā tāṭaṅkasya 
karṇābharaṇasya sāmarthyam || 

atretthaṃ padayojanā he janani ! viśve vidhiśatamakhādyāḥ 
diviṣadaḥ pratibhayajarāmṛtyuhariṇīṃ sudhāṃ āsvādyāpi 
vipadyante | karālaṃ kṣvelaṃ kabalitavataḥ śambhoḥ kālakalanā 
nāstīti yat tanmūlaṃ tava tāṭaṅkamahimā || 

ayaṃ bhāvaḥ yadi śambhorapi vipattissyāt tāṭaṅkacyutiḥ tarhi 
syāt | tāṭaṅkacyāvakatvaṃ kālasya nāsti 
kālotpattisthitilayānāṃ tāṭaṅkaikaniyatatvāditi devyāḥ 
pātivratyamahimā sarvātiśāyī iti || 28 || 

kirīṭaṃ vairiñcaṃ parihara puraḥ kaiṭabhabhidaḥ kaṭhore 
koṭīre skhalasi jahi jambharimakuṭam | praṇamreṣveteṣu 
prasabhamupayātasya bhavanaṃ bhavasyābhyutthāne tava 
parijanoktirvijayate || 29 || 

p. 71) 

kirīṭaṃ makuṭaṃ vairiñcaṃ viriñcisaṃbandhi parihara dūrata eva 
kuru puraḥ agrabhāge | kaiṭabhabhidaḥ kaiṭabhāsuraṃ bhinattīti 
kaiṭabhabhit tasya viṣṇoḥ kaṭhore koṭīre makuṭāñcale skhalasi 
| atra kākuḥ anusandheyā | jahi tyaja jambhārimakuṭaṃ jamhāreḥ 
indrasya makuṭaṃ kirīṭam | praṇamreṣu prakarṣeṇa daṇḍavat 
nateṣu eteṣu viriñcikaiṭabhajijjambhāriṣu prasabhaṃ atiśīghraṃ 
sasaṃbhramamityarthaḥ | upayātasya samāgatasya bhavanaṃ mandiraṃ 
bhavasya parameśvarasya abhyutthāne abhimukhotthitau tava 
parijanoktiḥ sevakānāṃ vacanaṃ vijayate savotkarṣeṇa vartate || 

atretthaṃ padayojanā he bhagavati ! puraḥ vairiñcaṃ kirīṭaṃ 
parihara kaiṭabhabhidaḥ kaṭhore koṭīre skhalasi jambhārimakuṭaṃ 
jahi (ityevaṃrūpā) eteṣu praṇamreṣu satsu bhavanamupayātasya 
bhavasya prasabhaṃ tavābhyutthāne parijanoktirvijayate | atra 
udāttālaṅkāraḥ samṛddhimadvastuvarṇanamudāttam iti lakṣaṇāt 
|| 29 || 

svadehodbhūtābhirghṛṇibhiraṇimādyābhirabhitaḥ niṣevye nitye 
tvāmahamiti sadā bhāvayati yaḥ | kimāścaryaṃ tasya 
trinayanasamṛddhiṃ tṛṇayataḥ mahāsaṃvartāgnirviracayati 
nīrājanavidhim || 30 || 

svadehodbhūtābhiḥ svasyāḥ dehaḥ svadehaḥ tasmādudbhūtābhiḥ 
atra dehaśabdo dehāvayavaṃ caraṇaṃ lakṣayati | ghṛṇibhiḥ 
mayūkhaiḥ mayūkhānāṃ caraṇodbhavatvamuktaṃ prāk | 
aṇimādyābhiḥ aṇimāgarimetyādibhiḥ aṣṭasiddhibhiḥ abhitaḥ 
āvaraṇatvena avasthitābhiḥ [nityābhiḥ tripurasundaryādibhiḥ iti 
pa. śū.-kośayoḥ] yuktāmiti śeṣaḥ | 

p. 72) niṣevye ! saṃsevye ! nitye ! ādyantarahite ! tvāmetādṛśīm 
ahamiti ahaṃbhāvanayā sadā sarvakālaṃ bhāvayati dhyānaṃ karoti 
yaḥ sādhakaḥ kimāścaryaṃ nāstyāścaryaṃ tasya sādhakasya 
trinayanasamṛddhiṃ trīṇi nayanāni mārgāḥ prāpakāḥ 
[prakārāḥ] sūryacandrāgnirūpāḥ yasya darśanāyeti sa 
trinayanaḥ | yadvā iḍāpiṅgalāsuṣumnāmārgāḥ trayaḥ 
taddarśane upāyā iti trinayanaḥ sadāśivaḥ | yadvā trīṇi 
nayanāni cakṣūṃṣi yasya saḥ trinayanaḥ | kṣubhnāditvāt 
ṇatvābhāvaḥ | tasya samṛddhiṃ aiśvaryaṃ tṛṇayataḥ 
tṛṇīkurvataḥ mahāsaṃvartāgniḥ pralayakālāgniḥ viracayati 
karoti | nirājanavidhiṃ nīrājanānuṣṭhānam | tasya [tasyām] 
nīrājanakriyāyāmavasthitaḥ pralayāgnirapītyarthaḥ || 

atretthaṃ padayojanā he nitye ! niṣevye ! svadehodbhūtābhiḥ 
ghṛṇibhiḥ aṇimādyābhiḥ abhito'vasthitābhiḥ [prakārāḥ] 
parivṛtāṃ tvāṃ yaḥ sādhakaḥ ahamiti sadā bhāvayati 
trinayanasamṛddhiṃ tṛṇayataḥ tasya mahāsaṃvartāgniḥ 
nīrājanavidhiṃ viracayatītyatra kimāścaryam ? 

ayaṃ bhāvaḥ ahamiti bhāvanayā tādātmyasiddhau bhagavatyāḥ 
tannīrājanavidhirāścaryakaro na bhavatīti || 30 || 

catuṣṣaṣṭyā tantraiḥ sakalamatisandhāya bhuvanaṃ 
sthitastattatsiddhiprasavaparatantraiḥ paśupatiḥ | 
punastvannirbandhādakhilapuruṣārthaikaghaṭanā- svatantraṃ te 
tantraṃ kṣititalamavātītaradidam || 31 || 

catuṣṣaṣṭyā catuṣṣaṣṭisaṅkhyākaiḥ 
mahāmāyāśambarādibhiḥ tantraiḥ siddhāntaiḥ | 

p. 73) 

atra catuṣṣaṣṭiśabdasya saṅkhyeyaparatvāt ekavacanāntatvam | 
sakalaṃ samastaṃ atisaṃdhāya apavāhya vañcayitvā bhuvanaṃ 
prapañcaṃ sthitaḥ nivṛttavyāpāra tattatsiddhiprasavaparatantraiḥ 
tāśca tāśca siddhayaḥ tattatsiddhayaḥ catuṣṣaṣṭitantreṣu 
ekasmin ekasmin tantre prayojanabhūtāḥ ekaikasiddhaya ityarthaḥ 
tāsāṃ prasavaḥ utpattiḥ tatra paratantraiḥ | yadvā teṣāṃ 
siddhayaḥ tattatsiddhayaḥ yeṣāṃ yeṣāṃ sādhakānāṃ 
svasvābhimatāḥ siddhayaḥ tāsāṃ prasavaparatantraiḥ 
utpādakaikaniyataiḥ | paśupatiḥ paśūnāṃ prāṇināṃ patiḥ 
paśyantīti paśavaḥ yadvā indriyāṇyeva paśyantīti vyutpattya 
paśavaḥ tān paśūn pāti rakṣatīti paśupatiḥ jīvaḥ śiva eva 
jīva iti paśupatiḥ śivaḥ punaḥ bhūyaḥ tvannirbandhāt tvayā 
nirbandhaḥ tasmāt | catuṣṣaṣṭitantrapratipādita 
sarvasiddhāntarūpasakalapuruṣārthasādhanabhūtatantrāntaropadeśa- 
svīkāravyagrayā devyā bhavatyā kṛto nirbandha iti yāvat | yadvā 
tvaditi bhinnaṃ padaṃ pañcamyantam | 
akhilapuruṣārthaikaghaṭanāsvatantraṃ akhilānāṃ 
puruṣārthānāṃ mukhyatvena ghaṭanāyāṃ svatantraṃ svayameva 
pradhānaṃ te bhavatyāḥ tantraṃ kṣititalaṃ bhūtalaṃ avātītarat 
| taraterṇau caṅi rūpam | gatyarthatvāt gatibuddhi ityādisūtreṇa 
dvikarmakatvam | idaṃ vakṣyamāṇam || 

atretthaṃ padayojanā he bhagavati ! paśupatiḥ sakalaṃ bhuvanaṃ 
tattatsiddhiprasavaparatantraiḥ catuṣṣaṣṭyā tantraiḥ atisandhāya 
sthitaḥ | punastvannirbandhāt 
akhilapuruṣārthaikaghaṭanāsvatantraṃ te tantramidaṃ 
kṣititalamavātītarat || 

catuṣṣaṣṭitantrāṇi catuśśatyām- 

catuṣṣaṣṭiśca tantrāṇi mātṝṇāmuttamāni ca | 
mahāmāyāśambaraṃ ca yoginījālaśambaram || tattvaśambarakaṃ 
caiva bhairavāṣṭakameva ca | 

p. 74) 

bahurūpāṣṭakaṃ caiva yāmalāṣṭakameva ca || candrajñānaṃ 
mālinī ca mahāsaṃmohanaṃ tathā | vāmajuṣṭaṃ mahādevaṃ 
vātulaṃ vātulottaram || hṛdbhedaṃ tantrabhedaṃ ca guhyayantraṃ ca 
kāmikam | kalāvādaṃ kalāsāraṃ tathānyat kubjikāmatam || 
tantrottaraṃ ca vīṇākhyaṃ trotalaṃ trotalottaram | pañcāmṛtaṃ 
rūpabhedaṃ bhūtoḍḍāmarameva ca || kulasāraṃ kuloḍḍīśaṃ 
kulacūḍāmaṇiṃ tathā | sarvajñānottaraṃ deva mahākālīmataṃ 
tathā || aruṇeśaṃ [mahālakṣmīmataṃ caiva siddhayogeśvarīmatam 
| kurūpikāmataṃ devarūpikāmatameva ca || sarvavīramataṃ caiva 
vimalāmatamuttamam | pūrvapaścimadakṣaṃ ca uttaraṃ ca niruttaram 
|| tantraṃ vaiśeṣikaṃ jñānaṃ vīrāvali tathā param | 
aruṇeśaṃ mohinīśaṃ viśuddheśvarameva ca || iti 
vāmakeśvaratantrapāṭhaḥ] modinīśaṃ vikuṇṭheśvarameva 
[mahālakṣmīmataṃ caiva siddhayogeśvarīmatam | kurūpikāmataṃ 
devarūpikāmatameva ca || sarvavīramataṃ caiva vimalāmatamuttamam | 
pūrvapaścimadakṣaṃ ca uttaraṃ ca niruttaram || tantraṃ 
vaiśeṣikaṃ jñānaṃ vīrāvali tathā param | aruṇeśaṃ 
mohinīśaṃ viśuddheśvarameva ca || iti vāmakeśvaratantrapāṭhaḥ] 
ca | pūrvapaścimadakṣaṃ ca uttaraṃ ca niruttaram || vimalaṃ 
vimalotthaṃ ca devīmatamataḥ param || 

ityevaṃ catuṣṣaṣṭitantrāṇi pārvatīṃ prati kathitāni | etāni 
tantrāṇi jagatāṃ atisandhānakāraṇāni vināśahetubhūtāni 
vaidikamārgadūravartitvāt | ata evoktaṃ bhagavatpādaiḥ 
catuṣṣaṣṭyā tantraiḥ sakalamatisandhāya bhuvanam 
sakalavidvallokapratārakāṇi imāni catuṣṣaṣṭitantrāṇi iti | 
tathāhi - 

p. 75) 

mahāmāyāśambaratantraṃ māyāprapañcanirmāṇaphalam | 
māyāprapañcanirmāṇaṃ nāma sarveṣāṃ cakṣurādīnāṃ 
anyathāpadārthagrahaṇakāraṇaṃ yathā ghaṭasya paṭākāreṇa 
pratibhāsanam || 

yoginījālaśambaram māyāpradhānatantraṃ śambaramityucyate | tatra 
tantre yoginīnāṃ jaladarśanam | tacca śmaśānādikumārgeṇa 
sādhyate || 

tattvaśambaram tattvānāṃ pṛthivyādīnāṃ śambaraṃ 
mahendrajālavidyā | mahendrajālavidyāyāṃ pṛthivītattve 
udakatattvādīni udakatattvaṃ pṛthivyādīni tattvāni evamanyonyaṃ 
pratibhāsante || 

bhairavāṣṭakaṃ nāma siddhabhairava vaṭukabhairava 
kaṅkālabhairava kālabhairava kālāgnibhairava yoginībhairava 
mahābhairava śaktibhairavapradhānāni aṣṭatantrāṇi 
nidhyādyaihikaphalasādhanānyapi kāpālikamatatvāt 
vaidikamārgadūrāṇi || 

bahurūpāṣṭakam - śaktessamudbhūtāni rūpāṇi brāhmī 
māheśvarī kaumārī vaiṣṇavī vārāhī māhendrī cāmuṇḍā 
śivadūtī cetyaṣṭau rūpāṇi | etānya valambya pravṛttāni 
tantrāṇi aṣṭau teṣāṃ gaṇaḥ aṣṭakam | etadapi 
vedamārgadūratvāt heyam | atra śrīvidyāyāḥ prasaṅgaḥ 
bahurūpāṣṭakaprastāve prasaktānuprasaktyā pātita iti na 
kaściddoṣaḥ || 

yamalāṣṭakam yamalo nāma kāmasiddhāntaḥ ? tatpratipādakāni 
tantrāṇi yāmalānyaṣṭau | teṣāṃ gaṇaḥ yāmalāṣṭakam | 
tadapi vaidikamārgadūram | yadyapi catuṣṣaṣṭi tantrāṇāṃ 
yamalatvaṃ lokavyavahārasiddham tattu avaidikatvasāmyāt 
upacārāditi dhyeyam || 

candrajñānam candrajñānavidyāyāṃ ṣoḍaśanityāpratipādanam | 
nityāpratipādakatve'pi kāpālikamatāntaḥpātitvāt heyameva | 
upādeyacandrajñānavidyā catuṣṣaṣṭitantrātītā || 

p. 76) 

mālinīvidyā samudrayānopāyahetuḥ | sāpi 
vaidikamārgadūravartinī || 

mahāsaṃmohanam jāgratāmapi nidrāhetuḥ | sāpi 
bālajihvācchedanādikumārgeṇa sādhyeti niṣiddhā || 

vāmajuṣṭamahādevatantre vāmācārapravartake iti heye || 

vātulaṃ vātulottaraṃ kāmikaṃ ca tantratrayaṃ 
karṣaṇādipratiṣṭhāntavidhi pratipādakam | tasmin tantratraye 
karṣaṇādipratiṣṭhāntā vidhayaḥ ekadeśe pratipāditāḥ | sa 
caikadeśo vaidikamārga eva | avaśiṣṭastu avaidikaḥ || 

hṛdbhedatantraṃ kāpālikameva | yadyapi hṛdbhedatantre 
ṣaṭkamalabhedasahasrārapraveśau pratipāditau tathāpi tasmin tantre 
vāmācāra eva pravṛtta iti kāpālikameva tattantram || 

tantrabhedaḥ guhyatantrayoḥ prakāśena rahasyena ca 
parakṛtatantrāṇāṃ bheda iti tadvidyānuṣṭhāne 
bahuhiṃsāprasakteḥ tattantradvayaṃ vaidikamārgadūram || 

kalāvādam kalānāṃ candrakalānāṃ vādaḥ pratipādanaṃ yasmin 
tantre tat kalāvādaṃ vātsyāyanādikam | yadyapi 
kāmapuruṣārthatve'pi 
kalāgrahaṇamokṣaṇadaśasthānagrahaṇacandrakalāropaṇādīnāṃ 
kāmapuruṣārthe anupayogāt 
paradāragamanādiniṣiddhācāropadeśācca ekadeśe niṣiddham | 
yadyapi niṣiddhāṃśaḥ kāpālikatantraṃ na bhavati tathāpi tatra 
pravartamānaḥ puruṣaḥ avaśyaṃ kāpālikācāro bhavatīti 
kāpālikatvena gaṇanā tantrasya || 

kalāsāram varṇotkarṣavidhiryatra pravartate tat kalāsāraṃ 
vāmācārapradhānam || 

kubjikāmatam ghuṭikāsiddhihetuḥ | so'pi vāmācārapradhāna eva || 

tantrottaramate rasasiddhiḥ || 

p. 77) 

vīṇākhye vīṇā nāma yoginī | sā siddhyatīti vīṇākhyam | sā 
vīṇā saṃbhogayakṣiṇīti kecidāhuḥ || 

trotale ghuṭikāñjanapādukāsiddhiḥ | ghuṭikā pānapātram || 

trotalottare catuṣṣaṣṭisahasrasaṅkhyākayakṣiṇīnāṃ darśanam 
|| 

pañcāmṛtam pañcānāṃ pṛthivyādīnāṃ piṇḍāṇḍe amṛtaṃ 
yatra maraṇābhāvaḥ pratipāditaḥ tat pañcāmṛtaṃ tantram | 
tadapi kāpālikameva || 

rūpabhedāditantrapañcakaṃ māraṇaheturiti avaidikam || 

sarvajñānāditantrapañcakaṃ 
kāpālikasiddhāntaikadeśidigambaramatamiti dūrata eva heyam || 

pūrvādidevīmataparyantaṃ digambaraikadeśakṣapaṇakamatamiti 
tattato'pi dūrata eva heyam || 

evaṃ catuṣṣaṣṭitantrāṇi parijñātṝṇāmapi vañcakāni | 
aihikasiddhimātraparatvāt vaidikamārgadūrāṇi | parijñātāropi 
aihikaphalāpekṣayā tatra katicana pravṛttāḥ pratāritā eveti 
rahasyam || 

nanu vipralipsādyāśayadoṣarahitasya bhagavataḥ parameśvarasya 
paśupateḥ kāṃścitprati vipralambhatvaṃ kathamiti cet - 

maivam parameśvare paramakāruṇike vipralipsādyāśayadoṣāḥ na 
santyeva | kintu parameśvaraḥ paśupatiḥ 
brahmakṣatravaiśyaśūdrajātīyān 
mūrdhāvasiktādyanulomapratilomajātīyānadhikṛtya tantrāṇi 
nirmitavān | tatra traivarṇikānāṃ candrakalāvidyāsu 
vakṣyamāṇāsvadhikāraḥ | śūdrādīnāṃ [śūdrāṇāṃ 
saṅkīrṇānāṃ ca] catuṣṣaṣṭitantreṣvadhikāraḥ | 

p. 78) 

evamadhikārabhedamajānānāḥ amīmāṃsakāḥ vyāmuhyanti | 
teṣāmevāyaṃ doṣaḥ na paśupateḥ parameśvarasyeti dhyeyam || 

candrakalāvidyāṣṭakaṃ śrīvidyāpratipādakaṃ tantraṃ 
candrakalā jyotsnāvatī kalānidhiḥ kulārṇavam kuleśvarī 
bhuvaneśvarī bārhaspatyaṃ dūrvāsamataṃ ceti | asmin 
tantrāṣṭake traivarṇikānāṃ śūdrādīnāṃ ca adhikāro'sti | 
tatra brāhmaṇādīnadhikṛtya savyamārgeṇa prādakṣiṇyena 
sarvo'pyanuṣṭhānakalāpaḥ pratipāditaḥ | śūdrādīnadhikṛtya 
apasavyamārgeṇa vāmācāro nirūpitaḥ || 

śubhāgamatantrapañcake vaidikamārgeṇa anuṣṭhānakalāpo 
nirūpitaḥ | ayaṃ śubhāgamapañcakanirūpito mārgaḥ 
vasiṣṭhasanakaśukasanandanasanatkumāraiḥ pañcabhiḥ munibhiḥ 
pradarśitaḥ | ayameva samayācāra iti vyavahriyate | 
tathaivāsmābhirapi śubhāgamapañcakānusāreṇa 
samayamatamavalambyaiva bhagavatpādamatamanusṛtya vyākhyā racitā | 
candrakalāvidyāṣṭakaṃ tu kulasamayānusāritvena miśrakamityucyate 
vidvadbhiḥ | catuṣṣaṣṭitantrāṇi kulamārga eva - 

miśrakaṃ kaulamārgaṃ ca parityājyaṃ hi śāṅkari || 

iti īśvaravacanāt miśrakamataṃ kaulamārgaṃ ca parityājyam | 
kaulaiḥ mṛgyate avalambyata iti kaulamārgaḥ kaulamatam | karmaṇi 
ghañ | ataśca śubhāgamapañcakameva vaidikairādaraṇīyam | 
kevalasamayamārgapradarśanaparatvāt | samayamārgasvarūpaṃ tu 
tavādhāre mūle saha samayayā [ślokaḥ 41] 
ityādiślokavyākhyānāvasare nipuṇataramupapādayiṣyāmaḥ || 

tatra śubhāgamapañcake ṣoḍaśanityānāṃ pratipādanaṃ 
mūlavidyāyāmantarbhāvamaṅgīkṛtya aṅgatayā | cakravidyāyāṃ 
aṅgatayaivāntarbhāvaḥ kathitaḥ | ata eva 
catuṣṣaṣṭividyāntarbhūtāyāṃ candrajñānavidyāyāṃ 
ṣoḍaśanityāḥ pradhānatvena pratipāditā 

p. 79) 

iti tatpratipādakaṃ tantraṃ kaulamārgaḥ ayaṃ tu samayamārga iti 
bhedaḥ || 

atredamanusandheyam śubhāgamapañcakaṃ nāma vāsiṣṭhasaṃhitā 
sanakasaṃhitā śukasaṃhitā sanandanasaṃhitā sanatkumārasaṃhitā 
iti pañca saṃhitāḥ śubhāgamapañcakam | tatra 
vasiṣṭhasaṃhitāyāṃ devīṃ prati īśvaravacane vasiṣṭhena 
śaktirbodhitā | 

yathā - 

śṛṇu devi pravakṣyāmi nityāṣoḍaśakaṃ tava [ṣoḍaśakaṃ navam 
ṣoḍaśikārṇavaṃ tava ityapi pāṭhāntare viśveśvarī] | na 
kasyacinmayā''khyātaṃ sarvatantreṣu gopitam || tatrādau prathamā 
nityā mahātripurasundarī | tataḥ kāmeśvarī nityā nityā ca 
bhagamālinī || nityāklinnā tathā caiva bheruṇḍā vahnivāsinī | 
mahāvidye [vajre]śvarī raudrī tvaritā kulasundarī || nityā 
nīlapatākā ca vijayā sarvamaṅgalā | jvālāmālini cidrūpāḥ 
etā nityāstu ṣoḍaśa || pratipatprabhṛtau devyāḥ 
paurṇamāsyantamarcayet | ekādivṛddhyā hānyā ca darśāntaṃ devi 
vigraham || 

etacca ṣoḍaśanityānāṃ ṣoḍaśatithyātmakatvaṃ uttaraśloke 
nirūpyate || 

idānīṃ ṣoḍaśanityānāṃ śrīcakre aṅgatayā antarbhāvo 
nirūpyate - ṣoḍaśanityāstu aṣṭavargātmakatayā aṣṭadalapadme 
aṣṭapatreṣu sthitāḥ yathākramaṃ aṣṭakoṇacakre 
prāgādikoṇamārabhya ekaikasmin koṇe dvikaṃdvikamantarbhūtam | 
evamaṣṭadvikāni aṣṭakoṇeṣu antarbhūtāni | etā eva nityāḥ 
ṣoḍaśasvarātmakatayā ṣoḍaśadalapadme sthitāḥ 
dvidaśāre'ntarbhūtāḥ | etāsāṃ nityānāṃ 

p. 80) 

madhye prathamaṃ nityādvayaṃ trikoṇabindurūpeṇa sthitam | 
avaśiṣṭāstu caturdaśa nityāḥ manvaśre antarbhūtāḥ 
mekhalātrayabhūpuratraye baindavatrikoṇayorantarbhūte | evaṃ 
nityānāṃ cakre antarbhāvaḥ | imamevāntarbhāvaṃ 
meruprastāramāhuḥ | ata eva candrakalāvidyāyāḥ cakravidyāyāḥ 
saṅgatvaṃ nityānāṃ siddham | 

sanandanasaṃhitāyāṃ ṛṣīn prati sanandanavacanam etāstu 
ṣoḍaśanityāḥ candrakalāyāḥ cakravidyāyā aṅgabhūtāḥ | 
etāśca ṣoḍaśanityāḥ svarātmakāḥ pañcadaśākṣarīmantragata 
ekārādibhūta akāravisargātmaka sa kārābhyāṃ saṅgṛhītāḥ 
jīvakalārūpāḥ baindavasthāne sthāpitāḥ tatraiva antarbhūtāḥ 
| kādayo māvasānāḥ pāśāṅkuśabījayuktāssantaḥ aṣṭāre 
daśakoṇadvaye ca antarbūtāḥ | śiṣṭāstu yakārādayo nava 
varṇāḥ dvirāvṛttyā manvaśre caturdaśakoṇeṣu caturdaśa 
antarbhūtāḥ śiṣṭaṃ varṇacatuṣṭayaṃ 
śivacakracatuṣṭaye'ntarbhūtam | imameva kailāsaprastāramāhuḥ | 
evaṃ nityānāṃ cakravidyāyā aṅgatvaṃ pratipāditam || 

sanatkumārasaṃhitāyāmapi cakravidyāyāṃ ṣoḍaśanityānāṃ 
aṅgatvaṃ pratipāditam | yathā sanatkumāravacanam 
śrīcakrasyāṅgabhūtāḥ nityāḥ vaśinyādibhiḥ dvikaṃdvikaṃ 
melayitvā baindavaṃ trikoṇaṃ vihāya aṣṭasu 
koṇeṣvantarbhāvyāḥ | madhye tripurasundarī antarbhāvyā | 
aṣṭavargāstu aṣṭa vaśinyādayaḥ ṣoḍaśa nityāḥ dvādaśa 
yoginyaḥ catasro gandhākarṣiṇyādayaḥ evaṃ catuścatvāriṃśat | 
atra ekāṃ śaktiṃ vihāya trayaścatvāriṃśatkoṇeṣu 
trayaścatvāriṃśaddevatā antarbhāvyāḥ ekāṃ tripurasundarīṃ 
baindavasthānādadhastāt gandhākarṣiṇyādā yastu caturdvāreṣu 
iti nityānāṃ aṅgatvaṃ pratipāditam | imameva bhūprastāramāhuḥ 
| aṣṭānāṃ vaśinyādīnāṃ dvādaśayoginīnāṃ 
gandhākarṣiṇyādīnāṃ nāmadheyāni savitrībhirvācām [17 
ślokaḥ] ityādiślokavyākhyānāvasare kathitāni || 31 || 

p. 81) 

atha nikhilapuruṣārthaikaghaṭanāsvatantraṃ bhagavatyāstantraṃ 
paśupatiḥ kṣititalamavātītaradityuktaṃ pūrvaśloke | tadeva 
tantraṃ prastauti - 

śivaśśaktiḥ kāmaḥ kṣitiratha raviśśītakiraṇaḥ smaro 
haṃsaśśakrastadanu ca parāmāraharayaḥ | amī 
hṛllekhābhistisṛbhiravasāneṣu ghaṭitāḥ bhajante varṇāste tava 
janani nāmāvayavatām || 32 || 

śivaḥ kakāraḥ | śaktiḥ ekāraḥ | kāmaḥ īkāraḥ | kṣitiḥ 
lakāraḥ | athaśabdaḥ avasānadyotakaḥ | raviḥ hakāraḥ | 
śītakiraṇaḥ sakāraḥ | smaraḥ kakāraḥ | haṃsaḥ hakāraḥ | 
śakraḥ lakāraḥ | tadanu ca iti avasānaṃ dyotayati | parā 
sakāraḥ | māraḥ kakāraḥ | hariḥ lakāraḥ | amī dvādaśa 
varṇāḥ | hṛllekhābhiḥ hrīṅkāraiḥ tisṛbhiḥ 
tritvaviśiṣṭaiḥ avasāneṣu virāmasthāneṣu 
catuṣkapañcakatrikāṇāmupari ghaṭitāḥ yojitāḥ bhajante 
prāpnupanti | varṇāḥ te pūrvoktāḥ kakārādayaḥ tava bhavatyāḥ 
janani ! he mātaḥ nāmāvayavatāṃ nāmnaḥ tripurasundarīmantrasya 
avayavatāṃ pratīkatvam || 

atretthaṃ padayojanā he janani ! śivaḥ śaktiḥ kāmaḥ kṣitiḥ 
atha raviḥ śītakiraṇaḥ svaraḥ haṃsaḥ śakraḥ tadanu ca 
parāmāraharayaḥ ityete varṇāḥ tisṛbhiḥ hṛllekhābhiḥ 
avasāneṣu ghaṭitāḥ te varṇāḥ tava nāmāvayavatāṃ bhajante || 

atredamanusandheyam śivaḥ śaktiḥ kāmaḥ kṣitiriti 
varṇacatuṣṭayaṃ āgneyaṃ khaṇḍam | raviḥ śītakiraṇaḥ smaraḥ 
haṃsaḥ śakra iti varṇapañcakaṃ sauraṃ khaṇḍam | 

p. 82) 

ubhayoḥ khaṇḍayoḥ madhye rudragranthisthānīyaṃ hṛllekhābījam | 
parāmāraharaya iti varṇatrayeṇa saumyaṃ khaṇḍaṃ nirūpitam | 
saumyasaurakhaṇḍayormadhye viṣṇugranthisthānīyaṃ 
bhuvaneśvarībījam | turīyamekākṣaraṃ candrakalākhaṇḍam | 
saumyacandrakalākhaṇḍayormadhye brahmagranthisthānīyaṃ 
hṛllekhābījam | candrakalākhaṇḍaṃ tu 
gurūpadeśavaśādavagantavyamiti na prakāśitam | ata eva - 

trikhaṇḍo mātṛkāmantraḥ somasūryānalātmakaḥ || iti || 

avarohakrameṇeti śeṣaḥ | somasūryānalātmakaḥ ityetāvanmātre 
vaktavye trikhaṇḍa ityuktiḥ 
jñānaśaktīcchāśaktikriyāśaktyātmakaṃ khaṇḍatrayamiti 
jāgratsvapnasuṣuptyavasthātrayātmakaṃ 
viśvataijasaprājñavṛttitrayātmakam tamorajassattvaguṇātmakaṃ 
ityevaṃ parā | etacca purastātprapañcayiṣyāmaḥ || 

atra śivaśśaktirityādiśabdāḥ kvacit lakṣitalakṣaṇayā kvacit 
lakṣaṇayā kakārādivarṇaparāḥ | tathāhi tripurasundarīmantrasya 
ṣoḍaśavarṇāḥ | te ca ṣoḍaśa varṇāḥ ṣoḍaśanityātmatayā 
sthitāḥ | atra ṣoḍaśyāḥ kalāyāḥ nityātvavyapadeśaḥ 
candrakalātvarūpasāmyāt | sā ca parā kalā cidekarasā | 
tasyāśchāyā viśuddhicakre ṣoḍaśāre kalātmatayā bhramatīti 
[bhrājatīti iti taṃ pustake] rahasyam | sā pradhānaṃ prakṛtiśca 
| asyā aṅgabhūtāḥ pañcadaśa nityā iti pūrvaśloke pratipāditam 
| 

yadyapi kakārādayaḥ śrūyamāṇāḥ pañcadaśa varṇāḥ 
saṃpradāyato jñātavyāḥ eko varṇaḥ ṣoḍaśakalātmakaḥ 
pradhānabhūta [prakṛtibhūta] iti yadyapi ṣoḍaśī kalā 
gurumukhādeva avagantavyā tathāpi tasyā apratipādane vyākhyānaṃ 
sāpekṣameva | ato'nupādeyaṃ syādeveti sā kalā nirūpyate || 

p. 83) 

na ca- 

sacchiṣyāyopadeṣṭavyā gurubhaktāya sā kalā || iti || 

śiṣyāṇāmevopadeṣṭavyā nānyeṣāmiti vācyam | ye tu madīyaṃ 
granthaṃ dṛṣṭvā tāṃ kalāṃ jānanti te macchiṣyā 
evetyasmākamanugrahaḥ || 

nanu pādavandana pādopasaṅgrahaṇa hastamastakasaṃyogādeḥ 
aṅgakalāpasya śiṣyatvāpādakasyābhāve kathaṃ teṣu 
śiṣyatvamiti cet- 

satyam asmadīyagranthaṃ dṛṣṭvā ṣoḍaśyāḥ kalāyāḥ svarūpaṃ 
gurvantaramukhādeva jānatāṃ śiṣyatvaṃ māstu | ye tu na jānanti 
gurumukhādapi teṣāmupadeśo na sambhāvyata eva tadānīṃ 
gurvekaparatantre asmin mantre ke vā'smākaṃ guravaḥ iti 
jijñāsāyāmudayamānāyāṃ teṣāṃ jijñāsūnāṃ vartamānānāṃ 
vartiṣyamāṇānāṃ ca vayameva gurava iti teṣvanugrahaḥ 
kṛto'smābhiḥ || 

ṣoḍaśī kalā nāma śakāra repha īkāra bindvanto mantraḥ | 
etasyaiva bījasya nāma śrīvidyeti | śrībījātmikā vidyā 
śrīvidyeti rahasyam | evaṃ ṣoḍaśanityānāṃ prakṛtibhūtāḥ 
kakārādayaḥ | tāśca ṣoḍaśa nityāḥ śuklapratipadamārabhya 
paurṇamāsyantatithirūpāḥ kṛṣṇapakṣapratipadamārabhya 
amāvāsyāntatithirūpāḥ | etā eva candrakalābhidhānāḥ | 
candrakalā eva pratipadāditithaya iti suprasiddham | yathoktaṃ 
jyotiśśāstre- 

pratipannāma vijñeyā candrasya prathamā kalā | dvitīyādyā 
dvitīyādyāḥ pakṣayośśuklakṛṣṇayoḥ || iti || 

ayamarthaḥ candrasya prathamāyāḥ kalāyāḥ pratipaditi nāmadheyam 
| saiva kalātmikā sūryamaṇḍalānnirgatā | kṛṣṇapakṣe tu 
sūryamaṇḍalaṃ praviṣṭā | evaṃ śuklapakṣe 
sūryamaṇḍalānnirgatā dvitīyā kalā dvitīyā tithiḥ | 
kṛṣṇapakṣe tu sūryamaṇḍalaṃ praviṣṭā dvitīyā kalā 
dvitīyā tithiriti | evaṃ sarvatra ūhanīyam | 

p. 84) 

ataśca pañcadaśakalāvyavadhānaṃ sūryacandrayoryatra sā 
paurṇamāsī | pañcadaśyāṃ kalāyāṃ 
sūryacandrayoratyantasaṃyogaḥ sā amāvāsyeti jñeyam | ataḥ 
kaulamate candrakalātmikānāṃ ṣoḍaśānāṃ nityānāṃ pratidinaṃ 
ekasyā evānuṣṭhānam | sarvāsāṃ samayimate | ṣoḍaśyāḥ 
kalāyāstu pañcadaśasvapi tithiṣu anuṣṭhānaṃ siddham 
pañcadaśānāṃ nityānāṃ atraiva antarbhāvāt || 

ayaṃ ca sampradāyakramaḥ samyagukto'pi durvijñeyaṃ 
prameyajātamiti vispaṣṭārthaṃ punarucyate | pratipadi 
tripurasundarīkalā dhyeyā | dvitīyāyāṃ kāmeśvarīkalā | 
tṛtīyāyāṃ bhagamālinīkalā | caturthyāṃ nityaklinnākalā 
upāsyā | pañcamyāṃ bheruṇḍākhyā kalā | ṣaṣṭhyāṃ 
vahnivāsinīkalā | saptamyāṃ mahāvidye[vajre]śvarīkalā 
[viśveśvarīkalāḥ] | aṣṭamyāṃ raudrīkalā | navamyāṃ 
tvaritākalā | daśamyāṃ kulasundarīkalā | ekādaśyāṃ 
nīlapatākākhyā kalā | dvādaśyāṃ vijayākhyā kalā | 
trayodaśyāṃ sarvamaṅgalākhyā kalā | caturdaśyāṃ jvālākhyā 
kalā | pañcadaśyāṃ mālinyākhyā kalā | sarvāsu tithiṣu 
cidrūpākhyā kalā ṣoḍaśī upāsyā | pratipadi yā tripurasundarī 
kathitā sā cidrūpātmikā na bhavati cidrūpātmikāyāḥ 
mūlavidyāyāḥ bhinnatvena anuṣṭhānāt | mantrabhedaśca sa 
mantraḥ pratipadyeva anuṣṭheyo na dvitīyāyāmiti | 
tripurasundarīnityāyāḥ nāmasāmyamityavagantavyam || 

etāsāṃ ṣoḍaśanityānāṃ candrakalātmikānāṃ viśuddhicakraṃ 
ṣoḍaśāraṃ sthānam | tatra prāgādikrameṇa ṣoḍaśa nityāḥ 
tatkoṇeṣu parivartante | tadadhassthitadvādaśāre saṃvitkamale 
dvādaśasūryamaṇḍalāni prādakṣiṇyakrameṇa parivartante | 
teṣāṃ dvādaśānāṃ sūryāṇāṃ dvādaśamāseṣu adhikāraḥ || 

etaca sanatkumārasaṃhitāyāṃ ślokaiḥ saptaśatyā nirūpitaṃ 
[tattu saṃkṣepeṇocyate] saṃkṣepeṇocyate sūryacandrayoḥ 
deyayānapitṛyānātmakeḍāpiṅgalānāḍīmārgeṇa ahorātrayoḥ 
sañcaraṇam | 

p. 85) 

candrastu vāmanāḍīmārgeṇa sañcaran 
dvisaptatisahasranāḍīmārgaṃ amṛtena siñcati | sūryastu 
dakṣiṇanāḍīmārgeṇa sañcaran tadutkṣiptān amṛtabindūn 
upāharati | yadā candrasūryayoḥ ubhayoḥ ādhāracakre samāveśaḥ 
tadā amāvāsyātithirutpadyate | kṛṣṇapakṣatithayaḥ tataḥ 
utpadyante | ata eva kuṇḍalinīśaktiḥ ādhārakuṇḍe 
sūryakiraṇasamparkāt 
vilīnacandramaṇḍalamadhyagalatpīyūṣaparipūrite svapiti | 
svāpāvasthaiva kṛṣṇapakṣa ityucyate | yogī yadā samāhitacittaḥ 
candraṃ candrasthāne sūryaṃ sūryasthāne vāyunā niroddhuṃ 
kṣamate tadā candrasūryau niruddhau amṛtasecanatadāharaṇayoḥ 
aśaktau | tadānīṃ vāyunā preritena svādhiṣṭhānavahninā 
śuṣkībhūte amṛtakuṇḍe nirāhārā kuṇḍalinī suptotthitā satī 
sarpavat phūtkāraṃ kurvatī granthitrayaṃ bhitvā 
sahasradalakamalamadhyavarti candramaṇḍalaṃ daśati | 
tasmādgalatpīyūṣadhārāḥ ājñācakroparisthitacandramaṇḍalaṃ 
āplāvayanti | tasmādgalitābhiḥ amṛtadhārābhiḥ sarvaṃ 
dehamāplāvayanti | tataśca ājñācakroparisthitasya candramasaḥ 
kalāḥ pañcadaśa nityāḥ | tāḥ pañcadaśa 
tadadhassthitaviśuddhicakramāśritya parivartante | 
sahasradalakamalāntassthitacandramaṇḍalaṃ baindavasthānam | 
tatkalā cinmayī ānandarūpā ātmeti gīyate | saiva tripurasundarī 
| evaṃ śuklapakṣa eva kuṇḍalinīprabodhaḥ kartuṃ śakyate 
yogīśvarāṇāṃ na tu kṛṣṇapakṣa iti rahasyam | sarvāḥ 
śuklapakṣatithayaḥ paurṇamāsīsaṃjñakāḥ | sarvāḥ 
kṛṣṇapakṣatithayastu amāvāsyāyāṃ antarbhavanti | 
ekaivāmāvāsyā kṛṣṇapakṣa iti gīyate | ata eva ādhāraṃ 
andhatāmisram | svādhiṣṭhānaṃ tu sūryakiraṇasamparkāt 
miśralokaḥ | maṇipūrastu agnisthānatve'pi tatra sthite jale 
sūryakiraṇapratibimbāt miśraka eva lokaḥ | anāhataṃ jyotirlokaḥ 
| evaṃ anāhatacakraparyantaṃ jyotistamomiśrako lokaḥ | 
viśuddhicakraṃ cāndro lokaḥ | ājñācakraṃ tu candrasthānatvāt 
sudhālokaḥ | anayorlokayoḥ sūryakiraṇasamparkāt jyotsnā nāsti | 
sahasrakamalaṃ tu jyotsnāmaya eva lokaḥ | tatra sthitaścandro 
nityakalāyuktaḥ | 

p. 86) 

candrabimbaṃ śrīcakram | kalā sādākhyā | ataśca trikoṇaṃ 
ādhāraḥ aṣṭakoṇaṃ svādhiṣṭhānam daśāraṃ maṇipūraṃ 
dvitīyadaśāraṃ anāhataṃ caturdaśāraṃ viśuddhicakram 
śivacakracatuṣṭayaṃ ājñācakraṃ bindusthānaṃ caturaśraṃ 
sahasrakamalamiti siddham | ājñācakragatacandre pañcadaśa kalāḥ 
ṣoḍaśyāḥ kalāyāḥ pratiphalanaṃ ca | śrīcakrarūpacandrabimbe 
ekaiva kalā sā paramā kalā | militvā ṣoḍaśakalāḥ | yathā- 

ṣoḍaśendoḥ kalā bhānoḥ dvirdvādaśa daśānale | sā 
pañcāśatkalā jñeyā mātṛkācakrarūpiṇī || iti || 

etāḥ pañcāśatkalāḥ pañcāśadvarṇātmakāḥ 
pañcadaśākṣarīmantre antarbhūtāḥ | yatha ādimena kakāreṇa 
antimo lakāraḥ pratyāhṛtaḥ tanmadhyavartināṃ varṇānāṃ 
grāhakaḥ | ayameva lakāraḥ ekāraparvavartinā akāreṇa 
pratyāhṛtaḥ pañcāśadvarṇagrāhakaḥ || 

nanu anenaiva pratyāhāragrahaṇena 
pañcāśadvarṇātmakamātṛkāgrahaṇe kimarthaṃ kakāralakārayoḥ 
pratyāhāragrahaṇaprayāsaḥ ? 

ucyate kakārādilakārāntānāṃ kalāśabdavācyatvaṃ gauṇam 
vyañjanānāṃ svarān prati aṅgatvāt kalānaṃ svarāṇāṃ 
pradhānatvamiti guṇapradhānabhāvapradarśanārthaṃ 
pratyāhāradvayāśrayaṇaṃ kṛtaṃ sanakādibhiriti dhyeyam || 

catvāro'nusvārāḥ bindulakṣakāḥ | tena bindunā tadupari 
pratīyamāno nādaḥ saṅgṛhītaḥ | evaṃ nādabindukalātmakaṃ 
śrīcakraṃ trikhaṇḍamiti kathitam | sādākhyā kalā 
śrīvidyāparaparyāyā nādabindukalātītā || 

etāḥ ṣoḍaśanityāsu antarbhūtāḥ | tathāhi ṣoḍaśa svarāḥ 
kādayaḥ tāntāḥ ṣoḍaśa thādayaḥ sāntāśca ṣoḍaśa | 
ṣoḍaśatrikaṃ ṣoḍaśanityāsu antarbhūtam | 

p. 87) 

hakāraḥ ākāśabījaṃ baindavākāśe nilīnam | lakāraḥ 
antasthāsvantarbhūto'pi kakāreṇa pratyāhārārthaṃ 
punargṛhītaḥ | kṣakārastu kakāraṣakārasamudāyarūpatvāt | 
kakārādayaḥ sāntāḥ niṣṣoḍaśa nityāsu antarbhūtāḥ 
svarasahitāḥ | 

akāreṇa pratyāhṛtaḥ kṣakāraḥ akṣamāleti gīyate | ataḥ 
kṣakāreṇa [ataḥ ajña iti pratyāhareṇa iti pa.-kośe] sarvā 
mātṛkāḥ saṅgṛhītā bhavanti | ata eva [athavā iti pa] 
antimakhaṇḍe sakalahrīmiti kakāralakārayoryoge 
kalāśabdaniṣpattiḥ kaṣayoryoge kṣakāraniṣpattiriti evaṃ 
mantreṇa sarvā mātṛkāḥ saṅgṛhītā iti tātparyam || 

ataśca ṣoḍaśanityānāṃ mantragataṣoḍaśavarṇātmakatvaṃ 
ṣoḍaśavarṇānāṃ pañcāśadvarṇātmakatvaṃ 
pañcāśadvarṇānāṃ sūryacandrāgnikalātmakatvaṃ 
sūryacandrāgnirūpeṇa trikhaṇḍatvamiti 
aikyacatuṣṭayamanusandheyam [vidyācatuṣṭaya iti ta-kośe] || 

evaṃ cakramantrayorapi | yathā hrīṅkāratrayaṃ śrībījaṃ ca 
śivacakracatuṣṭayātmakatrikoṇe bindurūpeṇa antarbhūtam | 
sakaleti varṇatrayeṇa saṅgṛhīta mātṛkā akṣamālātmikā 
mātṛkā ubhayamapi yathāyogaṃ cakre antarbhūtam | tathāhi 
antasthāścatvāraḥ ūṣmāṇaścatvāraḥ evamaṣṭau varṇāḥ 
aṣṭakoṇātmakāḥ | kādayo māvasānāḥ vargapañcamān vihāya 
daśārayugme antarbhūtāḥ | vargapañcamāstu anusvārarūpeṇa 
bindāvantarbhūtāḥ | caturdaśāre caturdaśa svarā antarbhūtāḥ | 
anusvāravisargayoḥ bindāvantarbhāvaḥ | iti cakramantrayoraikyaṃ 
subhagodayamatānusāreṇa kathitam || 

pūrṇodayamatānusāreṇa tu somasūryānalātmakatayā cakrasya 
trikhaṇḍatvam | evaṃ mantrasyāpi trikhaṇḍatvaṃ suprasiddham | 
candrasya [baindavyaḥ] kalāḥ ṣoḍaśa indukhaṇḍe antarbhūtāḥ | 

p. 88) 

sa ca [sacāyaṃ khaṇḍadvayātmake] indukhaṇḍaḥ indvātmake 
yantrakhaṇḍe'ntarbhūtaḥ | evaṃ bhānoḥ caturviṃśatikalāḥ 
bhānukhaṇḍe'ntarbhūtāḥ | sa ca khaṇḍaḥ 
yantrakhaṇḍe'ntarbhūtaḥ | evamāgneya daśakalā āgneyakhaṇḍe 
antarbhūtāḥ | sa ca khaṇḍaḥ yantre agneyakhaṇḍe antarbhavatīti 
kalāyantramantrāṇāṃ aikyamanusandheyam || 

subhagodaye nityānāṃ svarūpamuktam- 

darśādyāḥ pūrṇimāntāśca kalāḥ pañcadaśaiva tu | ṣoḍaśī 
tu kalā jñeyā saccidānandarūpiṇī || iti || 

asyārthaḥ darśādyāḥ pūrṇimāntāśca tithayaḥ | darśā nāma 
amāvāsyānantarabhāvinī pratipatkalā | tasyā īṣaddarśanāt 
darśā | darśā ādyā yāsāṃ tāḥ | pūrṇimā anto yāsāṃ tāḥ 
| 

darśā dṛṣṭā darśatā viśvarūpā sudarśanā āpyāyamānā 
āpyāyamānā āpyāyā sūnṛtā irā āpūryamāṇā āpūryamāṇā 
pūrayantī pūrṇā paurṇamāsī etāni nāmadheyāni śrutibodhitāni 
saṅgṛhītāni darśādyāḥ pūrṇimāntāḥ ityanena | etāsāṃ 
svarūpaṃ purastāt nivedayiṣyate | darśādīnāṃ pañcadaśānāṃ 
kalānāṃ yathākramaṃ tripurasundarīprabhṛtayaḥ pañcadaśa 
nityāḥ adhidevatāḥ | ṣoḍaśyāḥ cidrūpātmikāyāḥ kalāyāḥ 
sādākhyatattvarūpatvāt adhidevatāntaraṃ nāsti | svayameva 
sarvasya adhidevateti dhyeyam | etāsāṃ nityānāṃ abhimāninī 
devatā kāmadevaḥ eka eva | adhiṣṭhānadevatā kāmeśvarī ekaiva | 
ataśca mūlavidyāgatapañcadaśavarṇānāṃ darśādayaḥ kalāḥ 
nityāḥ kalāśca vigrahāntaramiti anusandheyam | ata eva 
darśādikalānāṃ trikhaṇḍatvaṃ spaṣṭam | darśā dṛṣṭā 
darśatā viśvarūpā sudarśanā eṣa āgneyaḥ khaṇḍaḥ | 
āpyāyamānā āpyāyamānā āpyāyā sūnṛtā irā eṣa sauraḥ 
khaṇḍaḥ | āpūryamāṇā 

p. 89) 

āpūryamāṇā pūrayantī pūrṇā paurṇamāsīti eṣa cāndraḥ 
khaṇḍaḥ tṛtīyo nirūpitaḥ | etāsāṃ kalānāṃ nityātvena 
aikyaṃ sampādya pratipadādau upāsanāprakāraḥ pūrvameva 
diṅmātraṃ udāhṛtaḥ | darśā kalā śivatattvātmikā | dṛṣṭā 
kalā śaktitattvātmikā | darśatā kalā māyātattvātmikā | 
viśvarūpā kalā śuddhavidyātattvātmikā | sudarśanā kalā 
jalatattvātmikā | evaṃ pañcatattvātmakaṃ khaṇḍaṃ āgneyam 
agniratra adhidevatā kāmadevastu sarvatra adhidevatā kāmeśvarī 
sarvatra adhiṣṭhātrītyuktam | āpyāyamānā kalā 
tejastattvātmikā | āpyāyamānā kalā vāyutattvātmikā | āpyāyā 
kalā manastattvātmikā | sūnṛtā kalā pṛthivītattvātmikā | irā 
kalā ākāśatattvātmikā | āpūryamāṇā kalā vidyātattvātmikā 
| eṣa sauraḥ khaṇḍo dvitīyaḥ | tatra sūryo devatā | kāmadevastu 
sarvatra adhidevatā | kāmeśvarī sarvatra adhiṣṭhātrītyuktam | 
āpūryamāṇāyāḥ kalāyāḥ candrakhaṇḍāntassthitāyā api 
saurakhaṇḍe antarbhāvaḥ | irākalāprabhedatvāt 
irā''pūryamāṇayoḥ aikyamiti anusandheyam | āpūryamāṇā kalā 
maheśvaratatvātmikā | pūrayantī kalā paratattvātmikā | pūrṇā 
kalā ātmatattvātmikā | paurṇamāsī kalā sadāśivatattvātmikā | 
eṣa saumyaḥ khaṇḍaḥ | somaḥ atra adhidevatā | kāmadevaḥ 
sarvatra adhidevatā | kāmeśvarī sarvatra adhiṣṭhātrītyuktam | 
nityā kalā sādākhyatattvātmikā | etāstu viśuddhicakre 
ṣoḍaśāre prāgādikrameṇa ṣoḍaśadikṣu paribhramanti || 

tāstu ājñācakroparisthitacandramaṇḍalasya ṣoḍaśa kalāḥ iti 
subhagodaye yat prapañcitaṃ tattu pañcadaśakalānāmeva ṣoḍaśāre 
paribhramaṇaṃ ṣoḍaśyāḥ kalāyāḥ sahasradalakamala eva 
avasthānaṃ tatra avasthitāyāḥ nityāyāḥ kalāyāḥ 
prabhāpaṭalaṃ ṣoḍaśāre sphuraṃti ityevaṃparamityeva 
anusandheyam || 

p. 90) 

ayamarthaḥ śivaḥ śaktiḥ kāmaḥ kṣitiriti śivaśabdena 
śivatattvātmikā darśākhyā kalā tripurasundarīnāmadheyā 
kathyate | tayā tatprakṛtibhūtaḥ kakāro lakṣyate | evaṃ 
śaktiśabdena śaktitattvātmikā yā dṛṣṭā kalā tayā ekāro 
lakṣyate | kāma ityanena kāmadevatyā yā darśatā kalā tayā 
īkāro lakṣyate | kṣitirityanena lakāraḥ kṣititattvaṃ iti 
śāstrāntaraprasiddhyā lakāro lakṣyate | ravirityanena 
sūryakhaṇḍātmatayā raviḥ hakāro lakṣyate | śītakiraṇaḥ 
candraḥ | sakāraḥ candrabījaṃ iti śāstrāntaraprasiddhyā 
śītakiraṇaśabdena sakāro lakṣyate | smaraśabdena 
kāmarājaprakṛtibhūtaḥ kakāro lakṣyate | haṃsaḥ sūryaḥ 
hakārādhipatiritityuktaṃ prāk | śakraḥ indraḥ | lakāraḥ 
indrabījaṃ iti śāstrāntaraprasiddheḥ śakraśabdena lakāro 
lakṣyate | parā candrakaleti candrabījaṃ sakāro lakṣyate | māraḥ 
kāmarājabījamiti tatprakṛtibhūtaḥ kakāro lakṣyate | hariḥ 
indraḥ lakāro lakṣyate | evaṃ mantragatavarṇānāṃ 
kakārādīnāṃ śivādipadāni lakṣakāṇi kvacit 
lakṣitalakṣakāṇīti dhyeyam || 

evaṃ pañcadaśanityānāṃ samudāyātmakasya mantrasya 
pañcadaśatithiṣu anuṣṭhānaṃ vihitam | pṛthak nityānuṣṭhānaṃ 
tu pratidinaṃ pṛthak niyatam | etacca atirahasyaṃ gurumukhādeva 
avagantavyamapi śiṣyānujighṛkṣayā kathitam | ataśca imameva 
arthaṃ śrutirapyāha- 

darśādyāḥ pūrṇimāntāśca kalāḥ pañcadaśaiva tu | 

ityatra yat bahu vaktavyaṃ tattu śrutivyākhyānāvasare 
nirūpayiṣyāmaḥ | tathā ca taittirīyaśākhāyāṃ kāṭhake 
śrūyate iyaṃ vāva saraghā ityanuvākaḥ [tai. brā. 3-10-10] | 
tatra ṣoḍaśanityātmakadivasaparijñāne phalaṃ pratipāditaṃ 
jñānamātraphalapratipādakatvāt | anārabhyādhītaṃ 
aśvamedhakāṇḍānantaraṃ saṃjñānaṃ vijñānam [tai. brā. 
3-10-1] iti tithipratipādakavākyānāṃ prakaraṇabheda eva | tasya 
anuvākasya brāhmaṇaṃ iyaṃ vāva saraghā [tai. brā. 3-10-10] iti | 

p. 91) 

evaṃ ubhayaṃ mantrabrāhmaṇātmakaṃ anārabhyādhītaṃ 
jñānaikaphalaṃ vākyajātam || 

iyaṃ [tai. brā. 3-10-10] vāva saraghā 

asyārthaḥ iyaṃ candrakalā sādākhyā saraghā saraghāvat 
madhusyandinī amṛtasyandinīti śrīcakrātmakacandrasya 
saraghātvanirūpaṇam || 

tasyā [tai. brā. 3-10-10] agnireva sāraghaṃ madhu | 

tasyāḥ saraghāyāḥ agnireva agnisthānameva baindavaṃ trikoṇaṃ 
sāraghaṃ saraghodbhūtaṃ madhu tasyaiva sudhāsindhurūpatvāt || 

sāraghasya madhunaḥ upacayāpacayaprakāramāha- 

yā [tai. brā. 3-10-10] pūrvapakṣāparapakṣayo rātrayaḥ | 

etāḥ [yasyāḥ saraghāyāḥ ityadhikaḥ] saṃjñānānuvāke 
kathiāḥ | pūrvapakṣāparapakṣayoḥ śuklakṛṣṇapakṣayoḥ 
rātrayaḥ || 

tā [tai. brā. 3-10-10] madhukṛtaḥ | 

tāḥ rātrayaḥ madhu kurvantīti madhukṛtaḥ | rātriṣveva madhunaḥ 
saṅgraha iti lokaprasiddhiḥ | rātrāveva candrakalārūpāyāḥ 
śrīvidyāyāḥ anuṣṭhānaṃ na ca divase iti upadeśaḥ | 
pūrvapakṣarātrayaḥ darśādipaurṇamāsyantāḥ pūrvaṃ 
nirūpitāḥ | kṛṣṇapakṣarātrināmadheyāni tu- 

sutā [tai. brā. 3-10-1] sunvatī prasutā 
sūyamānā'bhiṣūyamāṇā | pītī prapā saṃpā tṛptistarpayantī 
| kāntā kāmyā kāmajātā''yuṣmatī kāmadughā || 

p. 92) 

etāḥ kṛṣṇapakṣarātrayaḥ | etāsāṃ kṛṣṇapakṣarātrīṇāṃ 
ādhāracakre eva amāvāsyātmakatayā avasthānāt samayināṃ tatra 
vyavahārābhāvāt śuklapakṣaratriṣveva candrakalāsañcārāt 
tatraiva kuṇḍalinīprabodhāt svarūpamātroddeśa eva kṛtaḥ | 
śuklapakṣarātrīṇāmeva kalātvam | tatsvarūpaṃ pūrvameva 
nirūpitam || 

ata eva kuṇḍalinīprabodho rātrāveva na divā divasānāṃ madhunaḥ 
srāvakatvādityāha- 

yānyahāni [tai. brā. 3-10-10] | te madhuvṛṣāḥ | 

madhu varṣantīti madhuvṛṣāḥ | ata eva divā yoginaḥ 
kuṇḍalinīṃ (na) bodhayantīti śuklakṛṣṇapakṣayoḥ divasānāṃ 
nāmāni noktāni aprastutatvāt | tathāpi vede phalaśravaṇāt | 
uddeśamātreṇa kathyante | suklapakṣadivasanāmāni- 

saṃjñānaṃ [tai. brā. 3-10-9] vijñānaṃ prajñānaṃ 
jānadabhijānat | saṅkalpamānaṃ 
prakalpamānamupakalpamānamupaklptaṃ klptam | śrayo vasīya āyat 
saṃbhūtaṃ bhūtam || 

iti śuklapakṣadivasanāmāni | kṛṣṇapakṣadivasanāmāni tu- 

prastutaṃ [tai. brā. 3-10-9] viṣṭuta sastutaṃ kalyāṇaṃ 
viśvarūpam | 

śukramamṛtaṃ tejasvi tejaḥ samiddham | aruṇaṃ 
bhānumanmarīcimadabhitapattapasvat || 

eteṣāmubhayeṣāṃ śuklakṛṣṇapakṣāhorātrāṇāṃ nāmadheyāni 
yo [teṣāṃ vedasya] veda tasya phalamāha- 

p. 93) 

sa [tai. brā. 3-10-10] yo ha vā etā madhukṛtaśca madhuvṛṣāśca 
veda | kurvanti hāsyaitā agnau madhu | nāsyeṣṭāpūrtaṃ dhayanti 
|| 

saḥ yaḥ etāḥ madhukṛto rātrīḥ madhuvṛṣān divasān pūrvoktān 
yo veda asya vettu etāḥ agnau baindavasthāne madhu sudhāsindhuṃ 
kurvanti | asya iṣṭāpūrtaṃ vāñchitārthapūrtiṃ na dhayanti na 
riktīkurvanti || 

vyatireke aniṣṭamāha- 

atha [tai. brā. 3-10-10] yo na veda | na hāsyaitā agnau madhu 
kurvanti | 

dhayantyasyeṣṭāpūrtam || 

vyākhyātaprāyametat || 

ayamarthaḥ candrakalāvidyānuṣṭhānaṃ nāma 
mātṛkāmantrayoraikyam | mantracakrayoraikyaṃ cakranityayoraikyaṃ 
nityāpratipadādikalayoraikyamiti samayimatatattvam | etadanuṣṭhāne 
śuklapakṣakṛṣṇapakṣavivekaḥ divasarātrivivekaśca upayujyate | 
darśādipaurṇamāsyantāsveva kalāsu caturvidhaikyānusandhānaṃ 
[catuṣṭayaikyānusandhānam ?] na amāvāsyāyām | 
kṛṣṇapakṣaśabdaḥ amāvāsyāparaḥ ityuktaṃ prāgeva | ataśca 
amāvāsyāyāmiva śuklapakṣadivaseṣvapi na anuṣṭhānamiti dhyeyam 
| evaṃ pariśeṣavṛttyā amāvāsyāyāṃ upāsanāniṣedhaḥ na tu 
sarvasmin kṛṣṇapakṣe | ataśca sarvāsu rātriṣu 
amāvāsyāvyatiriktāsu upāsanā na sarveṣu divaseṣu iti 
gurūpadeśavaśāt jñeyaṃ rahasyam || 

p. 94) 

ata uttaram- 

yo [tai. brā. 3-10-9] ha vā ahorātrāṇāṃ nāmadheyāni veda | 
nāhorātreṣvārtimārchati | saṃjñānaṃ vijñānaṃ darśā 
dṛṣṭeti etāvanuvākau pūrvapakṣasyāhorātrāṇāṃ nāmadheyāni 
| prastutaṃ viṣṭutasutā sunvatīti | 
etāvanuvākāvaparapakṣasyāhorātrāṇāṃ nāmadheyāni | 
nāhorātreṣvārtimārchati | ya evaṃ veda || 

iti vākyajātaṃ pūrvavyākhyayaiva vyākṛtam | itaḥ paraṃ 
vakṣyamāṇaṃ muhūrtārdhamāsaghaṭikādīnāṃ kalānāṃ 
nāmadheyajātaṃ tatraiva antarbhūtamiti tadvyākhyānenaiva 
vyākhyātamiti anusandheyam | ata eva saṃjñānānuvākaḥ iyaṃ vāva 
saraghā ityanuvākaśca vyākṛtāveveti avagantavyam | yattu 
sāvitraprakāśake prajāpatirdevānasṛjata ityanuvāke [tai. brā. 
3-10-9] sa yadāha ityārabhya janako ha vaidehaḥ ityantena 
tithyātmakatvaṃ savituḥ pratipāditam tattu 
sādākhyatattvātmikāyāḥ candrakalāvidyāyāḥ 
śrīvidyā'paranāmadheyāyāḥ pañcadaśatithyātmikāyāḥ 
[vidyātmikāyāḥ ?] prasādasamāsāditasāmarthyaṃ savituḥ 
nānyatheti pratipādayituṃ gauṇyā vṛttyā āha śrutiḥ | ata eva 
eṣa eva tat | [tai. brā. 3-10-9] iti gauṇavṛttyāśrayaṇaṃ 
prakaṭīkṛtam | ata etadgranthakalāpānantaravākyam- 

janako ha vaidehaḥ ahorātraiḥ samājagāma [tai. brā. 3-10-9] || 

iti āmnātam | janakaḥ utpādakaḥ śrīvidyāyāḥ ṛṣiḥ | videha 
eva vaidehaḥ manmathaḥ | ahorātraiḥ ahorātrātmakaiḥ 
pañcadaśākṣarīmantravarṇaiḥ darśādipūrṇimāntakalātmakaiḥ 

p. 95) 

samājagāma taṃ mantraṃ āhṛtavānityarthaḥ | yastu mantraṃ 
āharati sa ṛṣirityucyate | ata eva aruṇopaniṣadi- 

putro nir-ṛtyā vaidehaḥ | [tai. ā. 11-1] 

nir-ṛtyāḥ lakṣmyāḥ | yadvā anir-ṛtyāḥ lakṣmyāḥ | putra 
vaidehaḥ manmathaḥ || 

acetā yaśca cetanaḥ |* [tai. ā. 11-1] 

anaṅgatvādeva cetorahitaḥ | cetanaśca sarvabhūtāntaryāmitvāt || 

sa taṃ maṇimavindat | [tai. ā. 11-1] 

saḥ anaṅaḥ taṃ prasiddhaṃ maṇiṃ vidyātmakaṃ ratnaṃ avindat 
labdhavān apaśyat | asau anaṅga andho'pi apaśyaditi andho 
maṇimavindit [tai. ā. 11-1] iti vākyaśeṣabalāt labhyate | ata eva 
paracitkalāyāḥ vidyāyāḥ tripurasundaryāḥ manmathaḥ ṛṣirabhūt 
|| 

so'naṅgulirāvayat | [tai. ā. 11-1] 

sa manmathaḥ anaṅgatvādeva anaṅguliḥ āvayat asīvyat || 

sīvanānantarakṛtyamāha- 

so'grīvaḥ pratyamuñcat | [tai. ā. 11-1] 

saḥ manmathaḥ anaṅgatvādeva agrīvaḥ maṇisampādanaphalaṃ 
pratyāmocanaṃ akarot dhṛtavānitvarthaḥ || 

vidyāratne maṇitvāropaṇasya phalaṃ dhāraṇameva na bhavatītyāha- 

p. 96) 

so'jihvo asaścata | [tai. ā. 1-11] 

saḥ anaṅgaḥ anaṅgatvādeva ajihvaḥ jihvārahitaḥ asaścata acoṣat 
āsvāditavānityarthaḥ || 

etaduktaṃ bhavati anaṅgaḥ pūrvaṃ vidyāratnaṃ 
pañcāśadvarṇātmakaṃ ṣoḍaśanityātmakaṃ ṣoḍaśakalātmakaṃ 
nānāvedeṣu nānāsmṛtiṣu nānāpurāṇeṣu nānāvidhāgameṣu 
viprakīrṇaṃ dṛṣṭavān | tadanantaraṃ viprakīrṇaṃ imaṃ 
mantraṃ dṛṣṭvā sīvanaṃ kṛtavān | pañcāśadvarṇān tridhā 
vibhajya khaṇḍatrayaṃ kṛtvā tripurasundaryādiṣoḍaśanityāḥ 
tatra antarbhāvya pratipadāditithīn ṣoḍaśa tatraiva antarbhāvya 
pañcadaśavarṇātmakaṃ trikhaṇḍaṃ kṛtvā tatra 
somasūryānalātmakatayā brahmaviṣṇumaheśvarātmakatayā 
sattvarajastamastattvavyavasthitatayā 
jāgratsvapnasuṣuptyavasthāpannatayā 
sṛṣṭisthitilayahetubhūtatayā niścitya śrīvidyātmake caturthe 
khaṇḍe pañcadaśakalānāṃ antarbhāvaṃ niścitya 
bhuvaneśvarīprabhṛtīnāṃ yoginīvidyānāṃ navānāṃ trikasya 
trikasya ekaikahrīṅkāreṇa antarbhāvaṃ aṅgīkṛtya 
sarvabhūtātmakaṃ sarvamantrātmakaṃ sarvatattvātmakaṃ 
sarvāvasthātmakaṃ sarvadevātmakaṃ sarvavedārthātmakaṃ 
sarvaśabdātmakaṃ sarvaśaktyātmakaṃ triguṇātmakaṃ trikhaṇḍaṃ 
triguṇātītaṃ sādākhyāparaparyāyaṃ [sādākhyakalāparyāyam] 
ṣaḍviṃśaśivaśaktisaṃpuṭātmakaṃ niścitya varṇapañcadaśakena 
mūlavidyāṃ asīvyat | tadanantaraṃ syūtaṃ mantrarājaṃ 
grīvāyāṃ [gṛhītvā] dhṛtavān cirakālaṃ dhyānayogena 
pūjitavān | tadanantaraṃ candrakalāmṛtāsvādaṃ kṛtavāniti saḥ 
manmathaḥ ṛṣiḥ asya mantrasyetyarthaḥ || 

naitamṛṣiṃ viditvā nagaraṃ praviśet | [tai. ā. 1-11] 

etaṃ ṛṣiṃ manmathaṃ viditvā nagaraṃ śrīcakrātmakaṃ na 
praviśet ṛṣijñānapūrvakaṃ śrīcakrātmakaṃ nagaraṃ na pūjayet 
bāhyapūjāṃ na kuryāditi niṣedhavidhiḥ 

p. 97) 

bāhyapūjāyāmeva ṛṣicchandaḥprabhṛtijñānapūrvakatvam | 
āntarapūjāyāṃ tādātmyānusandhānātmikāyāṃ ṛṣyādijñānaṃ 
nāstyeva | upayogastu dūrata eva | ato 
vastusiddha-ṛṣyādiparyudāsamukhena śrīcakrasya bāhyapūjanaṃ 
traivarṇikaiḥ na kartavyamiti niyamyate | taduktaṃ 
sanatkumārasaṃhitāyām- 

bāhyapūjā na kartavyā kartavyā bāhyajātibhiḥ | sā 
kṣudraphaladā [kṣudradharmadā] nṝṇāṃ aihikārthaikasādhanāt || 
bāhyapūjārataḥ kaulāḥ kṣapaṇāśca kapālikāḥ | 
digambarāścetihāsā [vītāvāsā ityapi kacit dṛśyate] 
vāmakāstantravādinaḥ || āntarārādhanaparā vaidikā 
brahmavādinaḥ | jīvanmuktāścaranyete triṣu lokeṣu sarvadā || iti 
|| 

kaulāḥ ādhāracakrapūjāratāḥ | kṣapaṇakāḥ 
yoṣittrikoṇapūjāratāḥ | kāpālikāḥ digambarāśca ubhayatra 
niratāḥ | itihāsāḥ bhairavayāmalaprāmāṇyavādinaḥ 
[vītāvāsā ityapi kacit dṛśyate] | vāmakāḥ tantravādinaḥ 
ityeke vadanti vāmakeśvaratantraprāmāṇyavādinaḥ | 
kevalacakrapūjakāḥ te vedabāhyā ityanvayaḥ | āntarapūjāratāḥ 
brahmavādinaḥ śubhāgamatattvavedinaḥ | śubhāgamapañcakaṃ 
pūrvamevoktam | āntarapūjāprakāraḥ purastādvakṣyate ca || 

yadi [tai. ā. 1-11] praviśet | 

asaṃśaye saṃśayoktiḥ yadi vedāḥ pramāṇaṃ itivat | 
praviśedevetyarthaḥ || 

mithau [tai. ā. 1-11] caritvā praviśet | 

mithau [mithau=mitha ityarthaḥ] rahasye ekānte caritvā avagatya | 
cara gatibhakṣaṇayoḥ | praviśet āntarapūjāṃ kuryādityarthaḥ | 
yadvā mithau mithunībhūtau śivau 

p. 98) 

ubhayo melanaṃ avagatya praviśet anusandadhīteti | 
pūrvavyākhyāne'pi aikātmyānusandhāne sahāyāntaraṃ na kartavyam 
| ekānte eva vidyā phalatītyupadeśaḥ | tatkathamityāśaṅkya 
dṛṣṭāntena draḍhayati- 

tatsambhavasya [tai. ā. 1-11] vratam | 

sambhavo manmathaḥ cittajātatvāt | tasya vrataṃ māhātmyaṃ 
sahāyāntaraṃ tiraskṛtya ekākinaiva rahasye 
strīpuruṣasaṃyojanarūpam | ataḥ 
manmathopadiṣṭamantrānuṣṭhānavatāṃ tathaiva tadanuṣṭhānamiti 
gopyeyaṃ vidyeti tātparyam | dvitīyavyākhyāne manmatho mithunaṃ 
avagatya tasmin mithune praviśati | evaṃ śivaśaktisaṃpuṭaṃ 
avagatya sādhakena praveṣṭavyamiti śruterarthaḥ | ataśca putro 
nir.-rtyā vaidehaḥ [tai. ā. 1-11] janako ha vaidehaḥ [tai. brā. 
3-10-9] iti ca śrutidvayasya vaidehayoḥ ubhayoḥ 
ekapratyabhijñāviṣayatvāt sa yadāha [tai. brā. 3-10-9] 
ityādivākyakadambakaṃ pratipadāditithirūpacandrakalātmikāyāḥ 
śrīvidyāyāḥ pratipādanadvārā savituḥ tatprasādajanyaṃ 
māhātmyaṃ nānyathetyevaṃparamiti sarvaṃ anavadyam || 32 || 

smaraṃ yoniṃ lakṣmīṃ tritayamidamādau tava manoḥ nidhāyaike 
nitye niravadhimahābhogarasikāḥ | bhajanti tvāṃ 
cintāmaṇiguṇanibaddhākṣavalayāḥ śivāgnau 
juhvantassurabhighṛtadhārāhutiśataiḥ || 33 || 

smaraṃ kāmarājaṃ yoniṃ bhuvaneśvarīṃ lakṣmīṃ śrībījam 
idaṃ tritayaṃ ādau tava manoḥ mantrasya nidhāya saṃyojya eke 
viralāḥ samayinaḥ nitye ! ādyantarahite ! 
niravadhimahābhogarasikāḥ aparicchinnanityānubhavarasajñāḥ 
paramayogīśvarā iti yāvat | 

p. 99) 

bhajanti sevante | tvāṃ bhavatīṃ sahasradalakramalāt avaropya 
hṛtkamale saṃsthāpya tādṛgvidhāṃ 
cintāmaṇiguṇanibaddhākṣavalayāḥ cintāmaṇīnāṃ guṇaḥ 
guṇanaṃ āmreḍanaṃ samūha iti yāvat tena nibaddho racitaḥ 
akṣavalayaḥ akṣamālikā yeṣāṃ te | yadvā cintāmaṇaya eva 
guṇanibaddhākṣāḥ sūtraracitākṣāḥ padmabījāni teṣāṃ 
valayaḥ mālikā yeṣāṃ te tathoktāḥ śivāgnau śivā śaktiḥ 
trikoṇamiti yāvat tatra saṃskṛtaḥ agniḥ śivāgniḥ | trikoṇe 
baindavasthāne svādhiṣṭhānāgniṃ avayutya tatra nikṣipya 
pāśāṅkuśābhyāṃ sannirudhya bhuvaneśvaryā avakuṇṭhya agneḥ 
jātakarmādiṣoḍaśasaṃskārāḥ yatra kriyante saḥ śivāgniriti 
rahasyamiti | ayamāśayaḥ trikoṇe baindavasthāne 
svādhiṣṭhānāgniṃ nikṣipyeti | yadyapi baindavasthānaṃ 
catuṣkoṇaṃ tathāpi puraścaraṇātmakakriyāyāṃ saṃvitkamale 
trikoṇaṃ āropya sahasrakamalāt baindavasthānasthāṃ kāmeśvarīṃ 
avaropya puraścaraṇaṃ kāryamiti samayimatarahasyamiti 
ācāryāṇāṃ āśaya iti | juhvantaḥ santarpayantaḥ 
surabhighṛtadhārāhutiśataiḥ surabhiḥ kāmagavī tasyāḥ ghṛtaṃ 
ājyaṃ tasya dhārāḥ tābhiḥ āhutayaḥ haviḥ prakṣepāḥ tāsāṃ 
śatāni sahasraṃ taiḥ || 

atretthaṃ padayojanā he nitye ! tava manoḥ ādau smaraṃ yoniṃ 
lakṣmīṃ idaṃ tritayaṃ nidhāya niravadhimahābhogarasikāḥ eke 
cintāmaṇiguṇa nibaddhākṣavalayāḥ śivāgnau tvāṃ 
surabhighṛtadhārāhutiśataiḥ juhvantaḥ bhavanti || 

atredaṃ tattvam samayināṃ mantrasya puraścaraṇaṃ nāsti | japo 
nāsti | bāhyahomo'pi nāsti | bāhyapūjāvidhayo na santyeva | 
hṛtkamala eva sarvaṃ yāvat anuṣṭheyam | etacca japo jalpaśśilpam 
[27 ślokaḥ] ityādiślokavyākhyānāvasare kiñciduktam | 
avaśiṣṭaṃ kṛtsnaṃ tavājñācakrastham [36 ślokaḥ] ityādi 
ślokaṣaṭkavyākhyānāvasare nipuṇataramupapādayiṣyāmaḥ || 

p. 100) 

tavājñācakrastham [36 ślokaḥ] ityādiślokaṣaṭkena sāmayikaṃ 
mataṃ nirūpayiṣyan saprabhedaṃ kaulamataṃ tadupayogitayā 
nirūpayati | kaulamataṃ dvividhaṃ pūrvakaulaṃ uttarakaulaṃ ceti | 
etaddvitayaṃ krameṇa ślokadvitayenāha- 

śarīraṃ tvaṃ śambhośśaśimihiravakṣoruhayugaṃ tavātmānaṃ 
manye bhagavati navātmānamanagham | ataśśeṣaḥ 
śeṣītyayamubhayasādhāraṇatayā sthitaḥ sambandho vāṃ 
samarasaparānandaparayoḥ || 34 || śarīraṃ dehaḥ tvaṃ bhavatī 
mahābhairavī śambhoḥ ānandabhairavasya śaśimihiravakṣoruhayugaṃ 
śaśī candraḥ mihiraḥ sūryaḥ tāveva vakṣoruhau kucau tayoryugaṃ 
yugmaṃ tat | tava bhavatyāḥ mahābhairavyāḥ ātmānaṃ dehaṃ manye 
jānāmi | bhagavati ! bhagaḥ asyā astīti bhagavatī tasyāḥ 
sambuddhiḥ | 

utpattiṃ ca vināśaṃ ca bhūtānāmāgatiṃ gatim | vetti 
vidyāmavidyāṃ ca sa vācyo bhagavāniti || 

iti smaraṇāt utpattyādivedanaṃ bhagaḥ tadvatī bhagavatī | yadvā 
indukalāvidyāyāḥ navayonyātmakatvāt navayonimatī bhagavatī | 
prāśastye matup | navayonibhiḥ praśastetyarthaḥ | navātmānaṃ 
ānandabhairavam [ānandabhairavo navavyūhātmatayodāhṛtaḥ | 
ānanda] navavyūhātmakam | ānandabhairavasya navavyūhātmakatvaṃ 
upariṣṭāt vakṣyate | anaghaṃ nirdoṣam ataḥ asmāddhetoḥ yataḥ 
kāraṇāt parānandaparayoḥ aikyaṃ tasmādityarthaḥ | śeṣaḥ 
guṇabhūtaḥ apradhānam śeṣī pradhānam ityayaṃ evaṃprakāraḥ 
ubhayasādhāraṇatayā 

p. 101) 

ubhayoḥ bhairavībhairavayoḥ sādhāraṇatayā sādhāraṇyāt 
sthitaḥ avasthitaḥ sambandhaḥ śeṣaśeṣibhāvarūpaḥ vāṃ 
yuvayoḥ samarasaparānandaparayoḥ samarase sāmarasyayukte 
parānandaḥ ānandabhairavaḥ parā ānandabhairavīrūpā cicchaktiḥ 
kalā samarase ca te parānandapare ca tayoḥ || 

atretthaṃ padayojanā he bhagavati ! śambhostvaṃ 
śaśimihiravakṣoruhayugaṃ śarīraṃ bhavasīti śeṣaḥ | 
ānandabhairavasya kālavyūhāntaḥpātitvāt sūryacandrayoḥ 
vakṣoruhayugatvāropaṇaṃ yuktam | yadvā ayamanvayaḥ he bhagavati ! 
śaśimihiravakṣoruhayugaṃ śarīraṃ śambhostvameva | 

sūryacandrau stanau devyāḥ tāveva nayane smṛtau | ubhau 
tāṭaṅkayugalamityeṣā vaidikī śrutiḥ || 

ityanena bhagavatyāḥ śambhuṃ prati śeṣatvamuktam | he bhagavati ! 
tavātmānamanaghaṃ navātmānaṃ manye | ataḥ śeṣaḥ śeṣī 
ityayaṃ sambandhaḥ samarasaparānandaparayoḥ vāṃ 
ubhayasādhāraṇatayā sthitaḥ || 

atredamanusandheyam mahābhairavasya navātmeti saṃjñā 
navavyūhātmakatvāt | nava vyūhāstu- 

kālavyūhaḥ kulavyūho nāmavyūhastathaiva ca | jñānavyūhastathā 
cittavyūhaḥ syāttadanantaram || nādavyūhastathā binduvyūhaḥ 
syāttadanantaram | kalāvyūhastathā jīvavyūhaḥ syāditi te nava || 

asyārthaḥ- 

kālavyūho nāma nimeṣādikalpāntāvacchinnakālasamudāyaḥ 
kālavyūhaḥ | sūryacandrayorapi kālāvacchedakatayā kālavyūhe 
antarbhāva uktaḥ || 

kulavyūho nāma nīlādirūpavyūhaḥ || nāmavyūho nāma 
saṃjñāskandhaḥ || 

p. 102) 

jñānavyūho nāma vijñānaskandhaḥ | bhāgavyūha [bhogavyūha] iti 
nāmāntaramasti | sa ca dvividhaḥ sabhāgavibhāgabhedāt 
[sambhogavisambhogabhedāt] | sabhāgo [sambhogo vikalpaḥ] vikalpaḥ 
vibhāgo [visambhogo] nirvikalpaḥ || 

cittavyūho nāma ahaṅkārapañcakaskandhaḥ | ahaṅkārapañcakaṃ 
nāma ahaṅkāracittabuddhimahanmanāṃsi || 

nādavyūho nāma rāgecchākṛtiprayatnaskandhaḥ | anena 
mātṛkāyāḥ parā paśyantī madhyamā vaikharī iti catvāri 
rūpāṇi | parā nāma sāntaroharūpā | antare antaḥkaraṇe ūhena 
tarkeṇa sahitaṃ rūpaṃ yasyāḥ sā sāntaroharūpā | 
yuktāvasthāyāmeva jñātavyetyabhisandhiḥ | yathoktaṃ 
kāmakalāvidyāyām- 

yā sāntaroharūpā parā [maheśī tribhāvitā saiva] maheśī parā 
nāma | 

paśyantī nāma eṣaiva spaṣṭā ucyate | yathoktaṃ tatraiva- 

spaṣṭā [paśyantyāditrimātṛkā iti kvacitpāṭho dṛśyate] 
paśyantyākhyā trimātṛkā cakratāṃ yātā || 

trimātṛkā trikhaṇḍayuktā mātṛkā pañcadaśākṣarī tadātmikā 
| sā ca cakratāṃ cakratvaṃ yātā | trikhaṇḍātmakacakraikyaṃ 
trikhaṇḍātmakamātṛkāyā iti rahasyam | etacca pūrvaṃ bahudhā 
prapañcitam | spaṣṭā yuktāvasthāyāṃ atisūkṣmatayā pratītā 
ityabhisandhiḥ | madhyamā nāma parāpaśyantyoḥ 
uccānuccāvasthātmikā | sā dvividhā vāmādivyaṣṭirūpā 
vāmādisamaṣṭirūpā ceti | vāmādisamaṣṭirūpā sūkṣmā 
vāmādivyaṣṭirūpā sthūlā | vāmādayaḥ śaktayaḥ vāmā 
jyeṣṭhā raudrī ambikā | etāścatasraḥ śaktayaḥ 
cakrāntargatādhomukhacaturyonyātmikāḥ | 

p. 103) 

icchā jñānaṃ kriyā śāntā parā ceti pañca śaktayaḥ 
śrīcakrāntargatordhvamukhaśaktiyonyātmikāḥ | etābhiḥ 
śaktibhiḥ navavyūhātmikābhiḥ bhagavatyāḥ navātmatvaṃ ucyate | 
yathoktaṃ tatraiva- 

ekā parā tadanyā vāmādivyaṣṭimātṛsṛṣṭyātmā | tena 
navātmā mātā jātā sā madhyamā'bhidhānābhyām || dvividhā hi 
madhyamā sā sūkṣmā sthūlākṛtiḥ sthirā sūkṣmā | 
navanādamayī sthūlā navavargātmā tu bhūtalipyākhyā || ādyā 
kāraṇamanyā kāryaṃ tvanayoryatastato hetoḥ | saiveyaṃ na hi 
bhedastādātmyaṃ hetuhetumadabhīṣṭam || 

asyārthaḥ ekā pareti sattvarajastamoguṇasāmyarūpā | tadanyā 
paśyantī anyataraguṇavaiṣamyarūpetyarthaḥ | madhyamā 
vāmādivyaṣṭirūpā sthūlātmikā | vāmādayaḥ śaktayo 
baindavasthānasya ubhayatra sampuṭatvenāvasthitāḥ | ata eva etāḥ 
vyūhaśabdavācyāssatyaḥ navātmaśabdena vyavahriyante | 
samaṣṭirūpāstu parāyāmantarbhūtāḥ | tena kāraṇena mātā 
mātṛkā navātmā jātā | sā madhyamā abhidhānābhyāṃ dvividhā 
hi yasmāt sā madhyamā sūkṣmā sthūlākṛtiśceti dvividhā | 
sūkṣmāsvarūpamāha sthireti | sthairyāvasthāyāṃ 
yuktāvasthāyāmeva avabhāsyā | navanādamayīti nava nādāḥ 
akacaṭatapayaśakṣāḥ | ete parasparaṃ bhinnajātīyāḥ 
svarakavargacavargaṭavargatavargapavargayavargaśavargakṣavargāṇāṃ 
parasparaṃ bhinnatvena pratīyamānatvāt | tatra pramāṇamāha 
bhūtalipyākhyeti | mithyāvijñeyamithyārūpāyāḥ lipeḥ 
ākhyāpakatvaṃ darpaṇapratibimbasya mukhajñāpakatvamiva na 
virudhyate | ādyā kāraṇamanyeti ādyā sūkṣmarūpā madhyamā 
kāraṇaṃ 

p. 104) 

sthūlarūpāyāḥ madhyamāyāḥ navavargātmikāyāḥ | anayoḥ 
kāryakāraṇayoḥ yatastato hetoḥ saiveyaṃ sūkṣmaiveyaṃ sthūlā | 
ataḥ sthūlasūkṣmayoḥ aikye abhede vimarśa daśāyāmapi na ko'pi 
heturastīti tātparyeṇoktam yatastato hetoriti | tadeva pratipādayati 
na hi bheda iti | hetuhetumaditi hetuhetumattādātmyaṃ 
abhīṣṭamityanvayaḥ | sarvatra tādātmyaṃ hetuhetumadvyatirekeṇa 
nāstītyarthaḥ | ataśca madhyamātmikāyāḥ cicchakteḥ navātmatā 
siddhā | rāgecchākṛtiprayatnānāṃ kāraṇatvenāgameṣu 
prasiddhāḥ māyāśuddhavidyāmaheśvarasadāśivāḥ rāgādīnāṃ 
tattvabhūtāḥ saṅgṛhītāḥ | taiḥ 
parāpaśyantīmadhyamāvaikharyaḥ adhiṣṭhānabhūtāḥ saṅgṛhītā 
ityavagantavyam || 

binduvyūho nāma ṣaṭcakrasaṅghaḥ || kalāvyūho nāma 
pañcāśatkalānāṃ varṇātmikānāṃ saṅghaḥ || jīvavyūho nāma 
bhoktṛskandhaḥ || 

evaṃ navānāṃ vyūhānāṃ bhoktṛbhogyabhogarūpeṇa traividhyam | 
ātmavyūhasya bhoktṛtve'pi bhogyabhogatādātmyāt traividhyam 
[avirudvam | evaṃ bhogyavyūhasya bhogavyūhasyāpyūhyam] | evaṃ 
bhogavyūhasyāpyūhyam | ayamāśayaḥ ātmavyūhasya bhoktṛtvaṃ 
jñānavyūhasya bhogatvam kālavyūhādīnāṃ bhogyatvameveti 
ācāryāṇāṃ traividhyamabhipretamiti | sarveṣāṃ vyūhānāṃ 
jīvavyūhasya sarvatra anvayādaikyam | kālavyūhasya 
avacchedakatvādaikyam | kulanāmavyūhayoḥ nirūpakatvādaikyam | 
jñānavyūhasya binduvyūhe tādātmyādaikyam | nādakalayoraikyāt 
navavyūhātmakatvaṃ parameśvarasya siddhameva | ato navavidhaikyaṃ 
bhairavībhairavayoḥ jñātavyamiti kaulamatarahasyam | ata eva 
kaulāḥ parameśvaraṃ navātmeti [parameśvarasya navātmateti] 
vyavaharanti | yathāhuḥ kaulāḥ- 

p. 105) 

navavyūhātmako devaḥ parānandaparātmakaḥ | navātmā bhairavo devo 
bhuktimuktipradāyakaḥ || parānandaparāśaktiḥ 
cidrūpā''nandabhairavī | tayoryadā sāmarasyaṃ jagadutpadyate 
tadā || 

iti diṅmātramuktam | avaśiṣṭaṃ tavādhāre mūle [41 ślokaḥ] 
ityādau nirūpyate | ayaṃ bhāvaḥ ānandabhairavamahābhairavyoḥ 
parānandaparāsaṃjñayoḥ tādātmye siddhe navātmatā dvayoḥ 
samānā | ataḥ śeṣaśeṣibhāvaḥ āpekṣikaḥ sadā 
sṛṣṭisthitilayeṣu ānandabhairavasya parānandasaṃjñikasya 
paracitsvarūpāyāśca mahābharavyāḥ prayatnaḥ utpadyate tadā 
bhairavīprādhānyāt pradhānaṃ prakṛtiśabdavācyā 
mahābhairavīti tasyāḥ pradhānatvaṃ śeṣitvaṃ ānandabhairavasya 
apradhānatvaṃ guṇabhāvaḥ śeṣatvam | yadā sarvopasaṃhāre 
prakṛteḥ tanmātrāvasthitau bhairavyāḥ svātmani antarbhāvāt 
bhairavasya śeṣitvaṃ tadā bhairavyāḥ śeṣatvamiti || 34 || 

manastvaṃ vyoma tvaṃ marudasi marutsārathirasi tvamāpastvaṃ 
bhūmistvayi pariṇatāyāṃ na hi param | tvameva svātmānaṃ 
pariṇamayituṃ viśvavapuṣā cidānandākāraṃ śivayuvati bhāvena 
bibhṛṣe || 35 || 

manaḥ manastattvaṃ ājñācakrasthitaṃ tvaṃ eva | vyoma 
ākāśatattvaṃ viśuddhicakrāntasthitaṃ tvaṃ eva | marut 
vāyutattvaṃ anāhatanāmakasaṃviccakrāntargatam | asi iti 
tvamityarthe avyayam | marutsārathiḥ vāyusakhaḥ agnitattvaṃ 
svādhiṣṭhānagatam | asi iti pūrvavat avyayam | tvaṃ āpaḥ 
aptattvaṃ maṇipūrāntargatam | tvaṃ bhūmiḥ bhūmitattvaṃ 
mūlādhārāntargatam | evaṃ rūpeṇa 

p. 106) 

tvayi pariṇatāyāṃ pariṇatiṃ tādātmyaṃ gatāyāṃ na hi paraṃ 
itaḥ paraṃ na kiñcidastītyarthaḥ | tvameva svātmānaṃ 
svasvarūpaṃ pariṇamayituṃ pariṇāmavantaṃ kartuṃ viśvavapuṣā 
prapañcarūpeṇa cidānandākāraṃ cicchakteḥ ānandabhairavasya ca 
ākāraṃ śivayuvati ! śivayuvatiḥ harapatnī yuvatiśabdāt 
sarvato'ktinnarthādityeke iti ṅīp | tasyāḥ sambuddhiḥ | bhāvena 
cittena bibhṛṣe | yadvācidānandākāraṃ ca brahmasvarūpaṃ 
śivatattvaṃ śivayuvatibhāvena śivasya yuvatirjāyā tasyāḥ 
bhāvaḥ tattvaṃ tena || 

atretthaṃ padayojanā he bhagavati ! manastvaṃ vyoma tvaṃ marudasi 
marutsārathirasi tvamāpastvaṃ bhūmiḥ | tvayi pariṇatāyāṃ paraṃ 
na hi | tvameva svātmānaṃ viśvavapuṣā pariṇamayituṃ śivayuvati 
! bhāvena cidānandākāraṃ bibhṛṣe || 

ayamarthaḥ manastvaṃ ityādi bhūmiḥ ityantena pañcabhūtātmakaḥ 
kāryarūpaḥ pariṇāmo vikāraḥ uktaḥ | tvayi pariṇatāyām 
ityanena nirvikārātmakaḥ kāraṇarūpeṇāvasthitiviśeṣaḥ 
prakṛtyāḥ pariṇāmaḥ uktaḥ | na hi param ityanena 
apariṇāminyāḥ pariṇāmo nāsti anavasthāpatteḥ iti hi 
śabdārthaḥ | tathoktaṃ catuśśatyām- 

śṛṇu devi mahājñānaṃ sarvajñānottamaṃ priye | yena 
vijñānamātreṇa bhavābdhau na nimajjati || tripurā paramā 
śaktirādyā jātā maheśvari | sthūlasūkṣmavibhāgena 
trailokyotpattimātṛkā || 
kabalīkṛtaniśśeṣatattvagrāmasvarūpiṇī | yasyāṃ 
pariṇatāyāṃ tu na kiñcitparamiṣyate || 

ayamarthaḥ 
[kabalīkṛtaniśśeṣatattvagrāmasvarūpiṇītyasyāyamarthaḥ]-kabali 
ikṛtaḥ ātmanyāropitaḥ kāraṇātmatayā avasthitaḥ yathā 

p. 107) 

mṛdi ghaṭa iva niśśeṣaṃ yathā bhavati tathā tattvānāṃ 
pañcatattvānāṃ grāmaḥ samūhaḥ 
kabalīkṛtaniśśeṣatattvagrāmaḥ sa eva svarūpaṃ yasyāssā 
kāryāṇi kāraṇe upasaṃhṛtya svayaṃ kāraṇātmanā 
avasthitetyarthaḥ satkāryavādināṃ mate kāraṇe kāryasyāpi 
śaktirūpeṇa vidyamānatvāt iti | etaduktaṃ bhavati uttarakaulamate 
pradhānameva jagatkartṛ | pradhānatvādeva śeṣabhāvo nāsti 
śivasyābhāvāt | tasya pariṇatiḥ pañcatatvātmikā | 
manastattvādirūpeṇa pradhānātmikā śaktiḥ pariṇatā | ataḥ 
manaḥprabhṛtīnāṃ śaktipariṇāmaḥ tattvānāṃ 
svarūpapariṇāmaḥ | evaṃ prapañcaṃ kāryarūpaṃ svasyāmāropya 
kāraṇarūpeṇa avasthitā | sā ca ādhārakuṇḍalinītyabhidhīyate 
[ādhārakuṇḍe kuṇḍalinī] | itaḥparaṃ yadvaktavyamasti tadapi 
tavādhāre mūle [41 ślokaḥ] ityādiślokavyākhyānāvasare 
nipuṇataramupapādayiṣyāmaḥ || 35 || 

tavājñācakrasthaṃ tapanaśaśikoṭidyutidharaṃ paraṃ śaṃbhuṃ 
vande parimilitapārśvaṃ paracitā | yamārādhyan bhaktyā 
raviśaśiśucīnāmaviṣay nirāloke'loke nivasati hi bhālokabhuvane 
|| 36 || 

tava tvadīye ājñācakrasthaṃ ājñācakre sthitaṃ 
tapanaśaśikoṭidyutidharaṃ tapanaḥ sūryaḥ śaśiḥ candraḥ tayoḥ 
koṭayaḥ agaṇitakoṭisaṅkhyākā ityarthaḥ tāsāṃ śrutiḥ 
kāntiḥ tāṃ dharatīti dharaḥ taṃ paraṃ śaṃbhum [vande 
ityadhikaḥ] | para iti saṃjñā śaṃbhoḥ | parimilitapārśvaṃ 
parimilitau pārśvau dakṣiṇottarau yasya tam | parā cāsau cicca 
paracit | paraśabdaḥ citsaṃjñāyāṃ prasiddhaḥ | yaṃ 
paracitsaṃvalitaṃ paraśivaṃ ārādhyan prasādayan bhaktyā 
bhajanaprītyā 

p. 108) 

raviśaśiśucīnāṃ sūryacandrāgnīnāṃ aviṣaye agocare ata eva 
nirāloke ālokarahite aloke vijane ekānte nivasati tvatsāyujyaṃ 
prāpyeti śeṣaḥ | hiḥ prasiddhau | bhālokabhuvane jyotsnāmaye loke 
sahasrakamale || 

atretthaṃ padayojanā he bhagavati ! tavājñācakrasthaṃ 
tapanaśaśikoṭidyutidharaṃ paraṃ śambhuṃ paracitā 
parimilitapārśvaṃ vande | yaṃ bhaktyā ārādhyan 
raviśaśiśucīnāṃ aviṣaye nirāloke aloke bhālokabhuvane nivasati 
hi || 

atredamanusandheyam tavājñācakrasthaṃ iti cakraśabdena sādhakasya 
bhrūmadhyāntaragataśrīcakrāntargataśivacakracatuṣṭayaṃ kathyate 
| na tu dvidalaṃ padmaṃ tavetipadānanvayāditi | 
evamuttaratrāpyūhyam | atra svādhiṣṭhānāgre agnimaṇḍalaṃ 
anāhatacakrāgre sūryamaṇḍalaṃ ājñācakrāgre candramaṇḍalamiti 
pūrvameva pratipāditam | ataśca agnisūryacandrāṇāṃ mayūkhāḥ 
[kiraṇa ityadhikaḥ] ṣaṣṭyuttaratriśatasaṅkhyākāḥ 
ādhāracakraprabhṛti ājñācakraparyantameva vicaranti | etadapi 
pūrvameva samyak nirūpitam | ājñācakrasthitacandrāt anya eva 
sahasrakamalasthitaścandraḥ śrīcakrātmakaḥ nityakala ityapi 
pūrvameva samyak nirūpitam || 36 || 

viśuddhau te śuddhasphaṭikaviśadaṃ vyomajanakaṃ śivaṃ seve 
devīmapi śivasamānavyavasitām | yayoḥ kāntyā yāntyāḥ 
śaśikiraṇasārūpyasaraṇeḥ vidhūtāntardhvāntā vilasati 
cakorīva jagatī || 37 || 

viśuddhau viśuddhicakre te bhavatyāḥ śuddhasphaṭikaviśadaṃ 
trāsarahitasphaṭikopalasadṛśaṃ [trāsaḥ maṇyādiniṣṭho doṣaḥ 
iti medinī] atinirmalaṃ vyomajanakaṃ vyomnaḥ ākāśatattvasya 
janakaṃ utpādakaṃ tasmādvā etasmādātmana ākāśassaṃbhūtaḥ 
[tai. u. 2-1] ityādiśruteḥ | ājñācakre 

p. 109) 

ātmatattvāt utpannaṃ ākāśatattvamityarthaḥ | atra ātmaśabdo 
manaḥparyāyavacanaḥ | śivaṃ śivatattvaṃ seve upāse | devīṃ 
bhagavatīm apiśabdaḥ samuccaye | śivasamānavyavasitāṃ śivena 
samānaṃ vyavasitaṃ vyavasāyaḥ prayatnaḥ yasyāḥ tāṃ svayamapi 
śivaśabdavācyetyarthaḥ [śivatattvaṃ] | yayoḥ śivayoḥ kāntyāḥ 
prabhāyāḥ yāntyāḥ sarantyāḥ śaśikiraṇasārūpyasaraṇeḥ 
candrakiraṇasādṛśyamārgāt vidhūtāntardhvāntā vidhūtaṃ 
antardhvāntaṃ ajñānaṃ yasyāssā vilasati prakāśate | cakorīva 
cakoravihagīva jagatī trilokī || 

atretthaṃ padayojanā he bhagavati ! te viśuddhau 
śuddhasphaṭikaviśadaṃ vyomajanakaṃ śivaṃ | 
śivasamānavyavasitāṃ devīmapi seve yayoḥ yāntyāḥ 
śaśikiraṇasārūpyasaraṇeḥ kāntyāssakāśāt jagatī 
vidhūtāntardhvāntā cakorīva vilasati || 

ayamarthaḥ yathā jyotsnāpānena cakorī santuṣṭāntaraṅgā evaṃ 
śivayoḥ jyotsnāsadṛśaprabhāyāḥ vidhūtāntardhvāntaḥ 
santuṣṭāntaraṅgaḥ sādhakalokaḥ iti || 

atredamanusandheyam viśuddhicakrapūjāyāṃ sūryacandranirodhāt 
ṣoḍaśāragatānāṃ śrītripurasundarīprabhṛtīnāṃ 
ṣoḍaśakalānāṃ jyotsnāśoṣaṇāt taccakrasthitayoḥ śivayoreva 
prabhayā jyotsnākāryamiti || 37 || 

samunmīlatsaṃvitkamalamakarandaikarasikaṃ bhaje haṃsadvandvaṃ 
kimapi mahatāṃ mānasacaram | 
yadālāpādaṣṭādaśaguṇitavidyāpariṇatiḥ yadādatte 
doṣādguṇamakhilamadbhyaḥ paya iva || 38 || 

p. 110) 

samunmīlatsaṃvitkamalamakarandaikarasikaṃ samunmīlat vikasat saṃvit 
jñānaṃ tadeva kamalaṃ tatra makarandaḥ puṣparasaḥ sa cāsau 
ekaśca na ca ekaśabdasya pūrvanipātaḥ viśeṣaṇaṃ viśeṣyeṇa 
bahulam iti paranipātāt yadvā ekaścāsau rasikaśceti ekarasikaḥ 
makarandena ekarasikaḥ iti paścāt samāsaḥ taṃ tathoktam | 
paramahaṃsasvarūpayoḥ śivayoḥ haṃsatvāropaṇaṃ saṃvidaḥ 
kamalatvāropaṇe nimittam | ataḥ saṃvidaḥ kamalatve siddhe 
ekadeśarūpeṇa makarandena carvyamāṇataikapramāṇo rasa āropyate | 
ata eva makarandaikaśabdasya tṛtīyāsamāsaḥ | bhaje seve | 
haṃsadvandvaṃ kimapi anirvācyaṃ idantayā nirdeṣṭuṃ aśakyaṃ 
ṣaḍviśaṃ tattvaṃ śivaśaktisaṃpuṭitaṃ mahatāṃ 
yogīśvarāṇāṃ mānasacaram | atra mānasaśabdena manasi 
mānasasarastvaṃ āropyate mānasasarasi haṃsānāṃ nityavāsāt | 
yadālāpāt yasya haṃsadvandvasya ālāpāt 
aṣṭādaśaguṇitavidyāpariṇatiḥ aṣṭādaśavidyāḥ 
ālāparūpeṇa pariṇatā ityarthaḥ | yat haṃsadvandvaṃ ādatte 
gṛhṇāti | doṣāt lyablope pañcamī doṣaṃ avayutya guṇaṃ 
guṇaśabdo doṣābhāvasyāpyupalakṣakaḥ guṇavat doṣabhāvasyāpi 
grāhyatvāt | akhilaṃ samastaṃ adbhyaḥ udakebhyaḥ paya iva 
dugdhamiva || 

atretthaṃ padayojanā he bhagavati ! 
samunmīlatsaṃvitkamalamakarandaikarasikaṃ [tavetyadhikaḥ] mahatāṃ 
mānasacaraṃ kimapi haṃsadvandvaṃ bhaje yadālāpāt 
aṣṭādaśaguṇitavidyāpariṇatiḥ yat doṣāt akhilaṃ guṇaṃ 
adbhyaḥ paya iva ādatte || 

atredamanusandheyam saṃvitkamalaṃ anāhatacakranāmakamiti 
pūrvamevoktam | upāsakāḥ paramahaṃsamithunaṃ [paramahaṃsāḥ 
haṃsamithunam] saṃvitkamale upāsate iti samayaikadeśimatam | ata eva 
mahatāṃ mānasacaramityuktam | bhagavatpādamataṃ tu 
śikhijvālārūpaḥ parameśvaraḥ śikhinyā svaśaktyā saṃvalitaḥ 
anāhatacakre dīpāṅkuravat pratibhātīti | 

p. 111) 

yathoktaṃ bhagavatpādaiḥ subhagodayavyākhyāne- 

śikhijvālārūpaḥ samaya iha saivātra samayā tayossambhedo me 
diśatu hṛdayābjaikanilayaḥ || 

iti | etadeva asmākamapi abhimatam || 38 || 

tava svādhiṣṭhāne hutavahamadhiṣṭhāya nirataṃ tamīḍe 
saṃvartaṃ janani mahatīṃ tāṃ ca samayām | yadāloke lokān dahati 
mahati krodhakalite dayārdrā yā dṛṣṭiḥ śiśiramupacāraṃ 
racayati || 39 || 

tava bhavatyāḥ svādhiṣṭhāne svādhiṣṭhānacakre hutavahaṃ 
agnitattvaṃ adhiṣṭhāya āśritya nirataṃ anavarataṃ taṃ 
prasiddhaṃ īḍe stuve samvartaṃ saṃvartanāmakaṃ agniṃ janani ! he 
mātaḥ ! mahatīṃ mahacchabdavācyāṃ tāṃ 
saṃvartāgnirūpāmityarthaḥ samayām | yadāloke darśane lokān 
bhūrādīn dahati sati mahati krodhakalite dayārdrā kṛpāviṣṭā 
yā dṛṣṭiḥ ālokaḥ śiśiraṃ śītalaṃ upacāraṃ racayati || 

atretthaṃ padayojanā he janani ! tava svādhiṣṭhāne hutavahaṃ 
saṃvartamadhiṣṭhāya nirataṃ taṃ īḍe samayāṃ tāṃ mahatīṃ ca 
īḍe | mahati krodhakalite yadāloke lokān dahati sati yā dayārdrā 
dṛṣṭiḥ śiśiramupacāraṃ racayati sā tvadīyā dṛṣṭiriti 
śeṣaḥ || 

atredamanusandheyam svādhiṣṭhānaṃ agnitattvotpattisthitam | tatra 
utpannaṃ agniṃ saṃvartāgnitayā āropya tatraiva 
mahāsaṃvartāgnijvālākāraśaktirūpatayā avasthitā śaktiḥ 
saṃbhāvyā | tataḥ tayoḥ ālokena jaganti dagdhāni | 

p. 112) 

tāni jaganti punaḥ prasannāyāḥ bhagavatyā eva kṛpārasapūritā 
dṛṣṭiḥ maṇipūrapratipāditā śiśiropacāraṃ racayatīti 
stutimātraṃ na vastuta iti || 39 || taṭittvantaṃ śaktyā 
timiraparipanthisphuraṇayā 
sphurannānāratnābharaṇapariṇaddhendradhanuṣam | tava śyāmaṃ 
meghaṃ kamapi maṇipūraikaśaraṇaṃ niṣeve varṣantaṃ 
haramihirataptaṃ tribhuvanam || 40 || 

taṭittvantaṃ taṭit saudāminī sā asyāstīti taṭittvān taṃ 
śaktyā taṭidrūpayā timiraparipanthisphuraṇayā timirasya 
maṇipūragatasya maṇipūracakraṃ tāmisraloka iti prāguktaḥ tasya 
paripanthi virodhi sphuraṇaṃ yasyāssā | anena sthirasaudāminītvaṃ 
bhagavatyāḥ sūcitam | idamapi meghasya prāvṛṣeṇyatvasūcakaṃ 
viśeṣaṇam | sphurannānāratnābharaṇapariṇaddhendradhanuṣaṃ 
sphuranti ca tāni ratnāni nānāvidhāni taiḥ nirmitāni 
ābharaṇāni bhūṣaṇāni taiḥ pariṇaddhaṃ nirmitaṃ indradhanuḥ 
yasya tam | vā saṃjñāyām iti nānaṅ | 
nānavidharatnakāntisaṃvalitā sthirasaudāminī indracāpabhrāntiṃ 
janayatīti prāvṛṣeṇyatve hetvantaram | yathoktaṃ 
siddhaghuṭikāyām- 

maṇipūraikavasatiḥ prāvṛṣeṇyaḥ sadāśivaḥ | ambudātmatayā 
bhāti sthirasaudāminī śivā || iti || 

tava bhavatyāḥ śyāmaṃ śyāmavarṇaṃ meghaṃ meghātmanā 
avasthitaṃ paśupatiṃ kamapi iyattayā nirdeṣṭumaśakyaṃ 
maṇipūraikaśaraṇaṃ maṇipūrameva ekaṃ śaraṇaṃ gṛhaṃ yasya 
tam | maṇiśabdena maṇidhanurucyate maṇidhanussvarūpatvāt 
bhagavatyāḥ tayā pūryate śaraṇaṃ maṇipūramiti rahasyam | 
niṣeve nitarāṃ seve | varṣantaṃ vṛṣṭiṃ 

p. 113) 

kurvantaṃ haramihirataptaṃ hara eva mihiraḥ sūryaḥ 
mahāsaṃvartāgniriti yāvat tena taptaṃ dagdhaṃ tribhuvanam || 

atretthaṃ padayojanā he bhagavati ! tava maṇipūraikaśaraṇam 
timiraparipanthisphuraṇayā śaktyā taṭittvantaṃ 
sphurannānāratnābharaṇapariṇaddhendradhanuṣaṃ śyāmaṃ 
haramihirataptaṃ tribhuvanaṃ varṣantaṃ kamapi meghaṃ niṣeve || 

atredamanusandheyam maṇipūrasthāne jalatattvaṃ [mukhyamupatnnamiti] 
utpannamiti prāk pratipāditam | tatprakāraḥ sūryakiraṇā eva 
agnisambhinnāḥ meghatvamāpannāḥ jalarūpeṇeti maṇipūrasya 
ādhārasvādhiṣṭhānayormadhye niveśaḥ | 
anāhatoparisthitasūryakiraṇāḥ svādhiṣṭhānāgninā saṃvalitāḥ 
santaḥ maṇipūraṃ praviśya jalatvamāpannāḥ tena jalena 
svādhiṣṭhānāgninā dagdhaṃ jagat āplāvayantīti āgamarahasyam | 
atra sphurannānāratnābharaṇapariṇaddhendradhanuṣam ityanena 
mairvīrahitaṃ dhanurityāhuḥ āgamavidaḥ | tacca śrūyate 
aruṇopaniṣadi- 

tadindradhanurityajyam | abhravarṇeṣu cakṣate | etadeva 
śaṃyorbārhaspatyasya | etadrudrasya dhanuḥ | [tai. ā. 1-5] 

iti | asyārthaḥ-rudrasya meghātmakasya dhanuḥ ajyaṃ jyayā maurvyā 
rahitamiti | avaśiṣṭāni śrutisthapadāni subhagodayavyākhyāne 
vyākhyātāni | etatsarvaṃ aruṇopaniṣadi yo'pāṃ puṣpaṃ [tai. 
ā. 1-22] ityanuvāke yo'pām ityārabhya ime vai lokā apsu 
pratiṣṭhitāḥ ityantena pratipāditam | udakāt candrotpattiḥ 
sūryotpattiḥ agnyutpattiśca divasānāṃ candrakalātmakānāṃ 
tadaṃśānāṃ nakṣatrāṇāṃ ca utpattiḥ pratipāditā 
tadanantaraṃ sammatitvena ṛgapyuktā- 

p. 114) 

tadeṣā'bhyuktā | apārasamudayasan | sūrye śukrasamābhṛtam apā 
rasasya yo rasaḥ | taṃ vo gṛhṇāmyuttamam | iti | 

ṛco'yamarthaḥ apāṃ rasaṃ candraṃ udayaṃsan yogīśvarāḥ 
prāpnuvannityarthaḥ | sūrye sūryamaṇḍale śukraṃ amṛtaṃ 
samābhṛtaṃ samyak āsamantātpūritam | 
candramaṇḍalagalatpīyūṣadhārābhireva sūryasya nirvāha 
ityarthaḥ | apāṃ rasasya puṣparūpasya candramasaḥ yo rasaḥ 
baindavasthānasthitaḥ [ityuktakalātmatayā taṃ vo 
gṛhṇāmyuttamamityadhikam] nityakalātmakaḥ taṃ nityakalātmakaṃ 
rasaṃ vaḥ yuṣmatsakāśāt | udakānāṃ prastutatvāt vaḥ iti 
udakānāmābhimukhyaṃ maṇipūre udakamutpannamiti | tā āpaḥ 
svādhiṣṭhānāgneḥ utpādikāḥ ājñācakrasthitasya candrasya 
utpādikāḥ anāhatacakroparisthitasūryasyāpi utpādikāḥ ata uktaṃ 
taṃ vo gṛhṇāmyuttamam iti | taṃ uttamaṃ candraṃ 
sahasrakamalasthitaṃ vaḥ sakāśāt jānāmītyarthaḥ || 

asminneva anuvāke- 

yopsu nāvaṃ pratiṣṭhitāṃ veda | pratyeva tiṣṭhati | [tai. ā. 
1-22] 

iti śrutam | apsu udakatattvātmake maṇipūre pratiṣṭhitāṃ nāvaṃ 
śrīcakrātmikām [veda] || 

tathā ca śrutyantaram- 

sutrāmāṇaṃ pṛthivīṃ dyāmanehasa suśarmā- ṇamaditi 
supraṇītim | daivīṃ nāvasvari- trāmanāgasamasravantīmāruhemā 
svastaye [tai. saṃ 1-5-11] || 

p. 115) 

asyā ṛco'yamarthaḥ ṣuñ abhiṣave | sunotīti sutrāmā agniḥ 
agnitattvaṃ svādhiṣṭhānagatamityarthaḥ pṛthivīṃ 
mūlādhārasthitāṃ dyāṃ gaganaṃ viśuddhisthitāṃ anehasaṃ 
kālaṃ manastatvaṃ ajñācakrasthitaṃ suśarmāṇaṃ vāyutattvaṃ 
aditiṃ adityātmakaṃ jalatatvaṃ supraṇītiṃ sumārge mokṣe 
praṇītiṃ prakarṣeṇa nayantīm | daivīṃ devyā imāṃ 
cakravidyāmityarthaḥ nāvaṃ naukāṃ 
saṃsārasāgarataraṇopāyabhūtāṃ svaritrāṃ sudṛḍhāni 
aritrāṇi lāṅgalāni yasyāḥ sā tāṃ duṣkarmajañjhāpavanaiḥ 
acalamiti yāvat | anāgasaṃ asravantīṃ [asravantīṃ arandhrām] 
svayaṃ dṛḍhāṃ āruhema tatpravaṇā bhavema tadekaniratāḥ 
tadupāsanaparāḥ syāmetyarthaḥ | svastaye mokṣāya 
niratiśayasukhāvāptaya iti | avaśiṣṭaṃ śrutijātaṃ 
subhagodayavyākhyānāvasare samyak nirūpitamasmābhiḥ || 40 || 

tavādhāre mūle saha samayayā lāsyaparayā navātmānaṃ manye 
navarasamahātāṇḍavanaṭam | ubhābhyāmetābhyāmudayavidhimuddiśya 
dayayā sanāthābhyāṃ jajñe janakajananīmajjagadidam || 41 || 

tava bhavatyāḥ ādhāre (ādhāracakre)mūle mūlādhāracakra 
ityarthaḥ | saha sākaṃ samayayā samayasaṃjñayā lāsyaparayā 
lāsye nṛtye paraṃ tātparyaṃ yasyāḥ tayā | strīkartṛkaṃ 
nṛtyaṃ lāsyamityucyate | navātmānaṃ ānanda bhairavaṃ manye 
jānāmi | navarasamahātāṇḍavanaṭaṃ navabhiḥ śṛṅgārādibhiḥ 
rasaiḥ mahat adbhutaṃ tāṇḍavaṃ puṃkartṛkaṃ nṛtyaṃ 
tāṇḍavamityucyate tatra naṭaṃ abhinetāram | 

p. 116) 

ubhābhyāṃ etābhyāṃ ānandabhairavīmahābhairavābhyāṃ 
[ānandabhairavamahābhairavībhyāṃ. pā.] udayavidhiṃ utpattiṃ 
uddiśya [jagadutpattimuddiśya] | kuta ityāha dayayeti | dagdhalokasya 
punarutpādananimittaṃ dayayā sanāthābhyāṃ militābhyāṃ jajñe 
utpannam | janakajananīmat mātāpitṛmat jagat prapañcaṃ idaṃ 
pūrvoktam | lāsyanāṭyasaṃvidhānapratipādanāt prakṛtipuruṣayoḥ 
darśane jagadutpattiḥ lāsyanṛttāvasānameva jagatsaṃhṛtiriti 
kaulasiddhāntaḥ || 

atretthaṃ padayojanā he bhagavati ! tava mūle ādhāre lāsyaparayā 
samayayā saha navarasamahātāṇḍavanaṭaṃ navātmānaṃ manye | 
udayavidhimuddiśya etābhyāṃ ubhābhyāṃ dayayā sanāthābhyāṃ 
idaṃ jagat janakajananīmat jajñe || 

ayaṃ bhāvaḥ ādhārasvādhiṣṭhānayoḥ tāmisralokatvāt tatra 
kaulānāṃ adhikārāt samayināṃ ārādhanābhāve'pi 
svamatānusāreṇa sahasrakamale niṣevyaiva bhagavatī 
ādhārasvādhiṣṭhānayoḥ sevyeti mahābhairavī samayāpadena 
[padeśena iti ca pāṭhaḥ] ucyata iti || ucyata iti || 

atredamanusandheyam ādhāracakraṃ trikoṇam ādhāre binduḥ 
tiṣṭhatīti ca tāvat prasiddham | atra kaulamate trikoṇameva 
bindusthānam | sa eva binduḥ tatra ārādhyaḥ | ata eva kaulāḥ 
trikoṇe binduṃ nityaṃ samarcayanti | tat trikoṇaṃ dvividhaṃ 
śrīcakrāntargatanavayonimadhyavartinī yoniḥ sundaryāḥ taruṇyāḥ 
pratyakṣayoniśca | śrīcakrasthitanavayonimadhyagatayoniṃ 
bhūrjahemapaṭṭavastrapīṭhādau likhitāṃ pūrvakaulāḥ pūjayanti 
| taruṇyāḥ pratyakṣayoniṃ uttarakaulāḥ pūjayanti | ubhayaṃ 
yonidvayaṃ bāhyameva na āntaram | ataḥ teṣāṃ ādhāracakrameva 
pūjyam | tatra sthitā kuṇḍalinī śaktiḥ kaulinī ityucyate | saiva 
upāsyā trikoṇapūjakānāṃ iti rahasyam | eṣā kuṇḍalinī 
śaktiḥ 

p. 117) 

bindurūpiṇī nidrāṇaiva saṃpūjyā tasyāḥ sadā 
nidrāṇasvābhāvyāt | sā pūjā tāmisrā | kuṇḍalinīprabodho 
yadā syāt tatkṣaṇameva muktiḥ kaulānām | ata eva kṣaṇamuktāḥ 
kaulā iti vyavahāraḥ | [tasmāt kaulānāṃ trikoṇe 
ānandabhairavīmahābhairavau saṃpūjyau | sādhakānāṃ tābhyāṃ 
tādātmyenāvasthānam | ata eva kaulāḥ bindupūjāvasare 
bhairavākāraṃ digambaratvamāśritya samarcayanti strīpuruṣāḥ iti 
adhikaḥ pāṭhaḥ keṣucitkośeṣu] tatra 
surāmāṃsamadhumatsyādidravyaiḥ samārādhanaṃ 
vāmācārapravṛtyā | pratyakṣatrikoṇe bindusthānaṃ 
manmathacchatraṃ kṛtvā saṃpūjayanti adhomukhaṃ trikoṇaṃ 
adhomukhameva chatraṃ pūjayanti | digambarakṣapaṇakādayastu 
striyaṃ uttānāṃ kṛtvā ūrdhvaṃ trikoṇaṃ pūjayantīti rahasyam 
| atra bahu vaktavyamasti tattu avaidikamārgatvāt smaraṇārhamapi na 
bhavati | tathāpi diṅmātraṃ niṣedhyatvena 
samayamatamārgapradarśanopayogitayā uktamiti alaṃ vistareṇa || 

atra samayimataṃ nirūpyate trikoṇādi ṣaṭcakraṃ [cakrātmakaṃ] 
ādhārādiṣaṭcakrātmanā pariṇatamiti prāgeva pratipāditam | 
tatra śrīcakre trikoṇaṃ baindavasthānamiti tāvat suprasiddham | 
tatra trikoṇatrayeṇa [koṇāṣṭakoṇanirmāṇe] aṣṭakoṇanirmāṇe 
trikoṇādeva bindusthānaṃ bhavati | tacca catuṣkoṇameva | tattu 
sahasrakamalāntargataṃ candramaṇḍalamiti pūrvameva bahudhā 
prapañcitam | etat catuṣkoṇamadhyaṃ baindavasthānaṃ sudhāsindhuḥ 
saraghā iti bahudhā prapañcitam pūrvameva | etat catuṣkoṇamadhyaṃ 
bindusthānamiti bāhyapūjā taruṇītrikoṇapūjā [taruṇīpūjā] ca 
dūrata eva nirasteti dhyeyam | ata eva samayināṃ sahasrakamale 
samayāyāḥ samayasya ca śambhoḥ pūjā | samayā nāma śambhunā 
sāmyaṃ pañcavidhaṃ yātīti samayā | samayatvaṃ [dūtīsamayasya] 
śambhorapi pañcavidhaṃ sāmyaṃ devyā saha yātīti | ataḥ ubhayoḥ 
samaprādhānyenaiva sāmyaṃ vijñeyam | pañcavidhasāmyaṃ tu 
adhiṣṭhānasāmyaṃ avasthānasāmyaṃ 

p. 118) 

anuṣṭhānasāmyaṃ rūpasāmyaṃ nāmasāmyaṃ ceti pañcavidhaṃ 
samapradhānayoreva [samayayoḥ pradhānayoḥ iti ca pāṭhaḥ] 
śivayoḥ | yathā tavādhāre iti adhiṣṭhānasāmyamuktam ubhayoḥ 
ādhāracakrasya adhiṣṭhānarūpatvāt | anuṣṭhānasāmyaṃ 
janakajananīmajjagadidam ityanena pratipāditam utpādanakriyāyāṃ 
ubhayoḥ vyāpriyamāṇatvāt | avasthānasāmyaṃ 
lāsyatāṇḍavaśabdābhyāṃ pratipāditam | lāsyatāṇḍavayoḥ 
nṛtyarūpeṇa ekatvaṃ uktaṃ prāk | rūpasāmyaṃ tu āruṇyaṃ 
ubhayoḥ tantrāntarasiddham- 

japākusumasaṅkāśau madaghūrṇitalocanau | jagataḥ pitarau vande 
bhairavībhairavātmakau || iti | 

yadvā navātmānamiti rūpasāmyaṃ nāmasāmyaṃ ca pratipaditamiti 
dhyeyam | evameva itaratrāpi ūhyam | yathā taṭittvantam ityādau 
taṭittvān taṭittvatī iti nāmarūpasāmye | yadyapi 
sthirasaudāminīrūpāyāḥ taṭidrūpatvāt tadvattvaṃ nāsti 
tathāpi saudāminyāḥ sthiratvameva sarvadā taṭidyuktatvamiti 
taṭittvatīti uktiḥ yuktā iti anusandheyam | maṇipūrasthānaṃ 
adhiṣṭhānamiti maṇipūraikaśaraṇaṃ ityanena 
adhiṣṭhānasāmyamuktam | 
sphurannānāratnābharaṇapariṇaddhendradhanuṣam ityanena varṣantaṃ 
ityanena ca prāvṛṣeṇyatvāvasthānasāmyaṃ pratipāditam | tava 
svādhiṣṭhāne ityādiśloke svādhiṣṭhāne ityanena 
adhiṣṭhānasāmyaṃ uktam | mahatīṃ ityanena 
mahāsaṃvartātmakarūpanāmasāmye pratipādite | 
svādhiṣṭhānagatāgnisaṃśrayaṇaṃ avasthānasāmyam | lokān 
dahatīti anuṣṭhānasāmyaṃ pratipāditam | anāhatacake anāhataṃ 
adhiṣṭhānamiti adhiṣṭhānasāmyamuktam | hutabhukkaṇikārūpatayā 
rūpasāmyaṃ nāmasāmyaṃ ca | nivātadīpatvoktyā avasthānasāmyam 
| vāyutattvotpādakatvaṃ anuṣṭhānasāmyamiti rahasyam | 

p. 119) 

viśuddhicakraṃ adhiṣṭhānamiti adhiṣṭhānasāmyaṃ uktam | 
śuddhasphaṭikaviśadaṃ ityanena rūpasāmyaṃ uktam | vyomajanakaṃ 
ityanena anuṣṭhānasāmyaṃ uktam | śivaṃ seve ityanena nāmasāmyam 
śaśikiraṇasārūpyasaraṇeḥ ityanena avasthānasāmyamiti | 
tavājñācakrasthaṃ ityanena adhiṣṭhānasāmyamuktam | 
tapanaśaśikoṭidyutidharaṃ ityanena rūpasāmyamuktam | paraṃ 
śambhuṃ ityanena nāmasāmyamuktam | yamārādhyan bhaktyā ityanena 
avasthānasāmyamuktam | muktipradatvamanuṣṭhānasāmyamiti 
sāmyapañcakaṃ vijñeyam | etat atirahasyaṃ śiṣyānujighṛkṣayā 
prakāśitam || 

ataḥ samayapūjakāḥ samayinaḥ | teṣāṃ ṣaṭcakrapūjā na niyatā 
api tu sahasrakamala eva pūjā | sahasrakamalapūjā nāma 
sahasrakamalasya baindavasthānatvena tanmadhyagatacandramaṇḍalasya 
caturaśrātmanā tanmadhyabindoḥ 
pañcaviṃśatitattvātītaṣaḍviṃśātmakaśivaśaktimelanarūpasāda 
akhyātmanā ca anusandhānam | ata eva samayimate bāhyārādhanaṃ 
dūrata eva nirastam | ṣoḍaśocārarūpapūjāṅgakalāpaśca tato'pi 
dūrata eva || 

tathā hi ādhārādiṣaṭcakrāṇāṃ trikoṇādiṣaṭcakratvena 
tādātmyam bindusthānasya caturaśrasahasrakamalatvena tādātmyaṃ 
binduśivayostādātmyam evaṃ devīśivayostādātmyamiti [deha ityapi 
pāṭhaḥ] tādātmyatrayam | cakramantrayoḥ aikyaṃ pūrvamevoktamiti 
tena saha caturdhāṃ aikyaṃ samayināṃ samayārādhanamiti mahat 
rahasyam || 

atra kiṃcit ucyate samayināṃ caturvidhaikyānusandhānameva 
bhagavatyāḥ samārādhanamityetat sarvasammatam | kecittu ṣoḍhā 
aikyamāhuḥ | yathā nādabindukalātītaṃ bhāgavataṃ tattvamiti 
sarvāgamarahasyam | nādaḥ parāpaśyantīmadhyamāvaikharīrūpeṇa 
caturvidhaḥ iti prāgevoktam | parā trikoṇātmikā 

p. 120) 

paśyantī aṣṭakoṇacakrarūpiṇī madhyamā dvidaśārarūpiṇī 
[miśrāra ityapi pāṭhaḥ] vaikharī caturdaśārarūpiṇī | 
śivacakrāṇāṃ atraiva antarbhāvaḥ pratipādita iti 
catuścakrātmakaṃ śrīcakraṃ nādaśabdavācyam | bindurnāma 
ṣaṭcakrāṇi 
mūlādhārasvādhiṣṭhānamaṇipūrānāhataviśuddhyājñātma-kāni 
binduśabdavācyāni pūrvameva uktāni | kalāḥ pañcāśat 
ṣaṣṭyuttaratriśatasaṅkhyakā vā | evaṃ nādabindukalātītā 
bhagavatīti | sahasrakamalaṃ bindvatītaṃ baindavasthānātmakaṃ 
sudhāsindhvaparaparyāyaṃ saraghāśabdavācyam | nādātītatattvaṃ 
tu tripurasundaryādiśabdābhidheyam darśā dṛṣṭā darśatā 
ityādyaparaparyāya ka e īlahrīm ityādimantravarṇanāmaka 
pañcāśadvarṇātmaka 
ṣaṣṭyuttaratriśatasaṅkhyāparigaṇitamahākālātmaka 
pañcadaśakalātītā sādākhyā śrīvidyāparaparyāyā 
citkalāśabdavācyā brahmavidyāpararyāyā bhagavatī 
nādabindukalātītaṃ bhāgavataṃ tattvamiti tattvavidrahasyam | atra 
nādabindukalānāṃ parasparaikyānusandhānaṃ ṣoḍhā bhavatīti 
ṣoḍhā aikyamāhuḥ | evaṃ bhagavatīṃ ṣaḍvidhaikyena sambhāvya 
pūjayitvā sādākhyāyāṃ vilīno bhavati | tadanantaraṃ 
ṣaḍvidhaikyānusandhānamahimnā 
gurukaṭākṣasañjātamahāvedhamahimnā ca bhagavatī jhaḍiti 
mūlādhārasvādhiṣṭhānātmakacakradvayaṃ bhitvā maṇipūre 
pratyakṣaṃ pratibhāti | mahāvedhaprakāraḥ pūrvaṃ 
abhyāsadaśāyāṃ gurvekaparatantraḥ mahāvidyāṃ gurumukhādeva 
svīkṛtya ṛṣicchandodevatāpūrvakaṃ mūlamantrasya śuṣkajapaṃ 
gurūpadiṣṭamārgeṇa kurvan āśvayujaśuklapakṣe 
mahānavamīśabdābhidheyāṣṭamyāṃ niśīthasamaye guroḥ 
padopasaṅgrahaṇaṃ kartavyam | tanmahimnā guroḥ tadānīṃ 
kartavyahastamastakasaṃyoga punarmantropadeśa 
ṣaṭcakrapūjāprakāropadeśa ṣaḍvidhaikyānusandhānopadeśavaśāt 
mahāvedhaḥ śaivaḥ sādākhyāyāḥ prakāśarūpo jāyate iti 
gururahasyam | evaṃ mahāvedhe jāte bhagavatī maṇipūre pratyakṣā 
bhavati | sā samārādhyā | 

p. 121) 

arghyapādyādibhūṣaṇapratipādanaparyantaṃ pūjākalāpaṃ 
maṇipūre nirvartya anāhatamandiraṃ bhagavatīṃ nītvā 
dhūpādinaivedyahastaprakṣālanāntaṃ karmakalāpaṃ tatraiva 
samāpya viśuddhau bhagavatīṃ siṃhāsanāsīnāṃ sakhībhiḥ 
sallāpāt sambhāṣamāṇāṃ śuddhasphaṭikasadṛśaiḥ maṇibhiḥ 
pūjayet | śuddhasphaṭikasadṛśamaṇayo na mauktikādayaḥ kiṃtu 
tadīyaṣoḍaśadalagataṣoḍaśacandrakalā iti rahasyam | evaṃ 
saṃpūjya ājñācakraṃ nītvā devīṃ kāmeśvarīṃ 
nīrājanavidhibhiḥ anekaiḥ saṃprīṇayet | ata eva uktaṃ 
karṇāvataṃsastutau madīyāyām- 

ājñātmakadvidalapadmagate tadānīṃ vidyunnibhe 
raviśaśiprayatotkaṭābhe | gaṇḍasthalapratiphalatkaradīpajāla- 
karṇāvataṃsakalike kamalāyatākṣi || iti | 

evamājñācakre nīrājanavidhiṃ kṛtvā saṃprīṇayet | 
tadanantaraṃ jhaḍiti vidyullateva sahasrakamalaṃ anupraviṣṭā 
sudhābdhau pañcakalpatarucchāyāyāṃ maṇidvīpe saraghāmadhye 
sadāśivena sārdhaṃ viharamāṇā vartate | tadā tiraskariṇīṃ 
prasārya samīpe mandire svayaṃ nivesat | yāvat bhagavatī vinirgatā 
punaḥ mūlādhārakuṇḍaṃ praviśati tāvatparyantaṃ sthātavyamiti 
samayamatatattvarahasyam || 

atra śaṅkarabhagatpādānāṃ caturvidhaikyānusandhānānantaraṃ 
maṇipūre pratyakṣāyāḥ bhagavatyāḥ svarūpaṃ 
kvaṇatkāñcīdāmā ityādidhyānapratipāditaṃ caturbhujaṃ 
dhanurbāṇapāśāṅkuśayuktarahasyam | tanmatānusāriṇāmapi 
tathaiva pratibhāti bhagavatī || 

asmākaṃ tu ṣaḍvidhaikyānusandhānānantaraṃ mūlādhāradvikaṃ 
bhitvā maṇipūre prasannā bhagavatī daśabhujā 
dhanurbāṇapāśāṅkuśavaradābhayapustakākṣamālāvīṇāhastā | 
manmataikadeśināṃ 
pāśāṅkuśapuṇḍrekṣucāpapuṣpabāṇajapamālikāśukābhayavarada 
karā karadvayavakṣassthalasthāpitavīṇā | ubhayamasmākaṃ 
sammatameva | karṇasastutāṃvatau madīyāyām- 

p. 122) 

bhavāni śrīhastairvahasi phaṇipāśaṃ sṛṇimadho dhanuḥ 
pauṇḍraṃ pauṣpaṃ śaramatha japasrakśukavaram | atha dvābhyāṃ 
mudrāmabhayavaradānaikarasik kvaṇadvīṇāṃ dvābhyāmurasi ca 
karābhyāṃ ca bibhṛṣe || 

samayināṃ pratyakṣaṃ paridṛśyamānā āste bhagavatī | 
samayināṃ sahasrakamalaparyantaṃ āntarapūjā kartavyā | 
sahasrakamale tu tiraskariṇīprasāraṇaparyantaṃ darśanameva 
samārādhanam | yaduktaṃ subhagodaye- 

sūryamaṇḍalamadhyasthāṃ devīṃ tripurasundarīm | 
pāśāṅkuśadhanurbāṇahastāṃ dhyāyetsusādhakaḥ || trailokyaṃ 
mohayedāśu varanārīgaṇairyutam [naranārīgaṇaiḥ śata] || iti | 

carcāstotre'pi kālidāsakṛte- 

ye cintayantyaruṇamaṇḍalamadhyavarti rūpaṃ tavāmba 
navayāvakapaṅkaramyam [śoṇam ityapi pāṭhaḥ] | teṣāṃ sadaiva 
kusumāyudhabāṇabhinna- vakṣassthalā mṛgadṛśo vaśagā bhavanti 
|| iti | 

atra samayināṃ bāhyapūjāniṣedhāt sūryamaṇḍalāntargatatvena 
pūjanaṃ niṣiddhamityāhuḥ | tanna 
brahmāṇḍasthitapiṇḍāṇḍasthitacandrasūryayoḥ aikyāt sūryasya 
candrakalāmṛtaniṣyandavaśāt ujjīvanāt | yataḥ apāṃ 
rasamudayaṃsan ityādiśrutyā [tai. ā. 1-22] pratipāditamiti prāk 
pratipāditam ataḥ candrakalāvidyāyāḥ sūryasamparkāt 
tejastirodhānaṃ syāditi kecana saṅgirante tadapi apāstaṃ 
veditavyam | ata eva piṇḍāṇḍabrahmāṇḍacandrayoraikyāt 
candramaṇḍalāntargatatvena candrakalāvidyāyāḥ pūjanaṃ yujyate 
yattu pūrvoktaṃ candrabimbagatatvena devyāḥ pūjananiṣedha 

p. 123) 

vacanaṃ tattu āntaracandrasya ājñācakroparisthitasya 
sahasrakamalāntargatacandrakalāmṛtaniṣyandaiḥ ujjīvanamiti tatra 
tasyāḥ pūjānirbandho nāstīti ata eva 
piṇḍāṇḍabrahmāṇḍacandrayoraikyāt 
brahmāṇḍasthitacandramaṇḍale'pi pūjānirbandho 
nāstītyevaṃparam || 

evaṃ hṛdayakamala eva samārādhitā bhagavatī aihikāni phalāni 
sarvāṇi dadāti | yadā vaśinyādiyuktā dhyātā sārasvataṃ 
dadāti | yāvakarasāplutā dhyātā vaśīkaraṇaṃ dadāti | mukhaṃ 
binduṃ kṛtvā ityādinā [19 ślokaḥ] dhyātā tādṛśaṃ phalaṃ 
dadāti | hṛdayakamale eva homādikaṃ tarpaṇādikaṃ ca kāryaṃ 
aihikaphalasādhanamiti smaraṃ yoniṃ lakṣmīm 
ityādiślokavyākhyānāvasare [33 ślokaḥ] nipuṇataramupapāditam | 
ataḥ samayināṃ aihikāmuṣmikaphalasādhanopāyaḥ āntarapūjeti 
samayamatatattvam || 

atra bhagavatpādaiḥ ādhārakamalādikramaṃ vihāya 
ājñācakrādikrameṇa avarohakrameṇa pūjāprakāraḥ kathitaḥ | 
ayamāśayaḥ ātmana ākāśassambhūtaḥ | ākāśādvāyuḥ | 
vāyoragniḥ | agnerāpaḥ | adbhyaḥ pṛthivī | [tai. u. 2-1] iti 
śrautakramamavalambya avarohakrama uktaḥ | ata eva 
svādhiṣṭhānānantarabhāvinaḥ maṇipūrasya tadadhaḥpradeśe 
nirūpaṇaṃ yujyate | ādhārasvādhiṣṭhānānantaraṃ 
maṇipūrakāvasthānamiti sarvayogaśāstrasiddham | tadapi 
saṃvartāgnidagdhasya jagataḥ ujjīvanānantaraṃ utpattiṃ 
vaktumityavagantavyam | etacca śukasaṃhitāyāṃ śṛṇu devi 
pravakṣyāmi ityārabhya ekanavatiślokaiḥ śrīcakrasya 
ṣaṭcakrāṇi prastutya idānīṃ saṃpravakṣyāmi ityārabhya 
sārdhaśatyā ślokaiśca saprapañcaṃ pratipāditam | tat tata 
evāvadhāryam || 

p. 124) 

na ca ūrdhvamūlamavākchākhaṃ vṛkṣaṃ yo veda saṃprati [tai. ā. 
1-11] iti śruteḥ deharūpavṛkṣasya śira eva mūlaṃ 
karacaraṇādyavayavāśśākhāḥ ataśca ṣaṭkamalānāṃ 
kadalīkusumopamānānāṃ adhomukhānāṃ avarohakrameṇa 
kamalānyuktānīti tatra pūjā sukareti tadānuguṇyena 
bhagavatpādairuktamiti vācyam tādātmyadhyānavyatirekeṇa 
pūjāyāḥ asaṃbhavāt | saṃbhave vā 
śrīcakragatatrikoṇādiṣaṭcakrāṇāṃ adhomukhatvābhāvāt 

mūlādhārasthitāmeva devīṃ suptāṃ prabodhayet iti | 

tatraiva prabodhaniyamāt mūlādhārādikrameṇaiva pūjā samayināṃ 
kaulādīnāṃ ca kāryeti [kāyiketi] paramagurumukhādeva avagataṃ 
rahasyam | vāmakeśvaratantre ātmapūjāyāṃ viśeṣa uktaḥ- 

pāśāṅkuśau tadīyau tu rāgadveṣātmakau smṛtau | 
śabdasparśādayo bāṇāḥ manastasyābhavaddhanuḥ || 
karaṇendriyacakrasthāṃ devīṃ saṃvitsvarūpiṇīm | 
viśvāhaṅkārapuṣpeṇa pūjayetsarvasiddhibhāk || iti | 

iyaṃ [ayamupāsanāvidhiḥ iti syāt] upāsanā | vidhiḥ kriyātmako 
nādaraṇīyaḥ || 41 || 

evaṃ samayamataṃ samyakprapañcya samayāyāḥ bhagavatyāḥ 
kirīṭaprabhṛti pādāntaṃ varṇayati- 

gatairmāṇikyatvaṃ gaganamaṇibhissāndraghaṭitaṃ kirīṭaṃ te 
haimaṃ himagirisute kīrtayati yaḥ | sa 
nīḍeyacchāyācchuraṇaśabalaṃ candraśakalaṃ dhanuḥ 
śaunāsīraṃ kimiti na nibadhnāti dhiṣaṇām || 42 || 

p. 125) 

gataiḥ prāptaiḥ māṇikyatvaṃ ratnabhāvaṃ gaganamaṇibhiḥ 
dvādaśādityaiḥ | teṣāṃ atyantasannikṛṣṭasevārthaṃ 
bhūṣaṇagatamaṇitvaṃ yujyate | sāndraghaṭitaṃ sāndraṃ 
nīrandhraṃ yathā bhavati tathā ghaṭitaṃ khacitaṃ kirīṭaṃ 
makuṭaṃ te haimaṃ hemno vikāraṃ himagirisute ! he pārvati ! 
kīrtayati varṇayati yaḥ sa kavīndraḥ 
nīḍeyacchāyācchuraṇaśabalaṃ nīḍaṃ golaṃ tatra khacitaṃ 
nīḍeyaṃ ratnajātaṃ tasya chāyā tayā churaṇena vyāpanena 
śabalaṃ śabalavarṇaṃ candraśakalaṃ candrakhaṇḍaṃ dhanuḥ 
kodaṇḍaṃ śaunāsīraṃ śunāsīraḥ indraḥ tasya saṃbandhi 
śaunāsīraṃ kimiti na nibadhnāti dhiṣaṇāṃ buddhim || 

atretthaṃ padayojanā he himagirisute ! māṇikyatvaṃ gataiḥ 
gaganamaṇibhiḥ sāndraghaṭitaṃ haimaṃ te kirīṭaṃ yaḥ kīrtayati 
saḥ nīḍeyacchāyācchuraṇaśabalaṃ candraśakalaṃ śaunāsīraṃ 
dhanuriti dhiṣaṇāṃ kiṃ na nibadhnāti || 

ayaṃ bhāvaḥ kirīṭavarṇanāṃ kartumudyuñjānaḥ kavīśvaraḥ 
tatra sthitāṃ candrarekhāṃ nānāratnamaṇikānticchuritāṃ 
dṛṣṭvā indracāpatvena kathaṃ nāśaṅkate ? avaśyaṃ tasya 
tacchaṅkā jāyata eveti || 

atra utprekṣālaṅkāraḥ candraśakalasya indracāpatvenotprekṣeṇāt 
| yadvā apahnavālaṅkāraḥ idaṃ candraśakalaṃ na bhavati api tu 
indracāpa ityapahnavasya pratibhānāt | yadvā sandehālaṅkāraḥ 
ayamindracāpaḥ uta candraśakalamiti saṃśayāt | yadvā 
atiśayoktiralaṅkāraḥ induśakalasya indracāpatvena adhyavasānāt 
svādhiṣaṇāṃ indracāpe kimiti na nibadhnāti iti sāmānyokteḥ | 
eteṣāṃ madhye ekasya prādhānyaṃ itarasyopasarjanatvamiti 
vinigamakapramāṇābhāvāt sandehasaṅkaraḥ | (utprekṣātiśayoktī 
spaṣṭe | apahnavastu talliṅgābhāvādapi kimiti dhiṣaṇāṃ na 
nibadhnāti ityapahnavollekhasya śakyatvāt | sandehastu candraśakale 
dṛṣṭe indracāpasya smṛtyārūḍhatvāt ullekhayituṃ śakya eveti 
sandehasaṅkara eva jyāyān) || 42 || 

p. 126) 

dhunotu dhvāntaṃ nastulitadalitendīvaravanaṃ 
ghanasnigdhaślakṣṇaṃ cikuranikurumbaṃ tava śive | yadīyaṃ 
saurabhyaṃ sahajamupalabdhuṃ sumanaso vasantyasminmanye 
valamathanavāṭīviṭapinām || 43 || 

dhunotu apanudatu dhvāntaṃ antastimiraṃ naḥ asmākaṃ 
tulitadalitendīvaravanaṃ tulitaṃ sadṛśīkṛtaṃ dalitaṃ bhinnaṃ 
vikasitamityarthaḥ indīvarāṇāṃ nīlotpalānāṃ vanaṃ yasya | tat 
| ghanasnigdhaślakṣṇaṃ ghanaṃ sāndraṃ aviralaṃ snigdhaṃ 
snehayuktamiva sthitaṃ ślakṣṇaṃ mṛdu | evameteṣāṃ 
viśeṣaṇānāṃ samāsaḥ | cikuranikurumbaṃ cikurāṇāṃ 
keśānāṃ nikurumbaṃ samūhaḥ keśapāśaḥ dhammilla ityarthaḥ | 
tava bhavatyāḥ śive ! bhagavati ! yadīyaṃ yasya dhammillasya 
sambandhi saurabhyaṃ parimalaṃ sahajaṃ svabhāvasiddhaṃ upalabdhuṃ 
samākraṣṭuṃ sumanasaḥ puṣpāṇi vamanti āsate | asmin dhammille 
manye dhruvaṃ valamathanavāṭīviṭapināṃ valamathanaḥ balāriḥ 
[balārātiḥ, indra iti yāvat] vabayorabhedopacāraḥ 
anuprāsārthamaṅgīkṛtaḥ tasya vāṭī udyānaṃ tatra viṭapinaḥ 
kalpavṛkṣāḥ teṣām || 

atretthaṃ padayojanā he śive ! tulitadalitendīvaravanaṃ 
ghanasnigdhaślakṣṇaṃ tava cikuranikurumbaṃ naḥ dhvāntaḥ dhunotu 
| yadīyaṃ sahajaṃ saurabhyaṃ upalabdhuṃ asmin 
valamathanavāṭīviṭapināṃ sumanasaḥ vasantīti manye || 

atra utprekṣālaṅkāraḥ keśapāśavāsanārthameva dhṛtāyāṃ 
kalpavṛkṣakusumānāṃ anyathātvenotprekṣaṇāt | tallakṣaṇam- 

sambhāvanamathotprekṣā prakṛtasya pareṇa yat || iti | 

p. 127) 

tulitadalitendīvaravanamityatra upamālaṅkāraḥ | 
anayossaṃsṛṣṭiḥ tilataṇḍulavat saṃsṛjyamānatvāt | 
kṣīranīravat sambandhaḥ saṅkaraḥ || 43 || 

tanotu kṣemaṃ nastava vadanasaundaryalaharī- 
parīvāhasrotassaraṇiriva sīmantasaraṇiḥ | vahantī sindūraṃ 
prabalakabarībhāratimira- dviṣāṃ bṛndairbandīkṛtamiva 
navīnārkakiraṇam || 44 || 

tanotu vistārayatu diśatvityarthaḥ | kṣemaṃ yogakṣemātmakaṃ 
śubhaṃ naḥ asmākaṃ tava 
vadanasaundaryalaharīparīvāhasrotassaraṇiriva idamekaṃ padam ivena 
saha nityasamāso vibhaktyalopaḥ pūrvapadaprakṛtisvaratvaṃ ca iti 
niyamāt | vadanaṃ mukhaṃ tasya saundaryasya sundarabhāvasya laharī 
utsekaḥ tasya parīvāhaḥ pravāhaḥ upasargasya ghañyamanuṣye 
bahulam iti pariśabdekārasya dīrghaḥ | tatra srotassaraṇiriva 
srotasaḥ pravāhasya saraṇiriva mārga iva sthitā sīmantasaraṇiḥ 
sīmante dhamillamadhyapradeśe saraṇiḥ saraṇyākārākāritā rekhā 
vahantī dhārayantī sindūraṃ sindūraparāgaṃ 
prabalakabarībhāratimiradviṣāṃ prabalāḥ keśapāśātmanā 
labdhajanmatayā prabalāḥ te ca te kabarībhārāḥ ta eva 
keśapāśanicayā eva timirāṇi tānyeva dviṣaḥ śatravaḥ teṣāṃ 
vṛndaiḥ samūhaiḥ bandīkṛtaṃ bandīgrahaṇāvaruddham | iva iti 
saṃbhāvanāyām | kaviprauḍhoktisthale ivaśabdasya 
saṃbhāvanaivārthaḥ anyatra [arthataḥ ? iti pā] sādṛśyamiti 
vivekaḥ | navīnārkakiraṇaṃ navīnaḥ prātaḥkālīnaḥ arkaḥ 
sūryaḥ tasya kiraṇaḥ tam || 

p. 128) 

atretthaṃ padayojanā he bhagavati ! tava 
vadanasaundaryalaharīparīvāhasrotassaraṇiriva sthitā tava 
sīmantasaraṇiḥ prabalakabarībhāratimiradviṣāṃ bṛndaiḥ 
bandīkṛtaṃ navīnārkakiraṇamiva sindūraṃ vahantī naḥ kṣemaṃ 
tanotu || 

atra utprekṣālaṅkāraḥ sīmantasaraṇeḥ 
srotassaraṇitvenotprekṣaṇāt | na cāyamupamālaṅkāraḥ 
svatassiddhamanupajīvya kaviprauḍhoktimevopajīvyotthānāt | na ca 
saṃbhāvanāparasyevaśabdasya samāsavidhānābhāvāt upamaiveti 
vācyam | ivena saha iti samānyenobhayārthasya ivaśabdasya grahaṇāt 
ubhayatrāpi samaso'stīti dhyeyam | 
uttarārdhe'pyutprekṣālaṅkāraḥ sindūrasya sūryakiraṇātmanā 
saṃbhāvanāt | kabarībhārasya timiratvāropaṇāt 
rūpakālaṅkāro'pi vartate | evamanayoraṅgāṅgibhāvena saṅkaraḥ 
saṃbhāvanāṃ prati rūpakasya nimittatvāt || 44 || 

arālaiḥ svābhāvyādalikalabhasaśrībhiralakaiḥ parītaṃ te 
vaktraṃ parihasati paṅkeruharucim | darasmere yasmin 
daśanarucikiñjalkarucire sugandhau mādyanti 
smaradahanacakṣurmadhulihaḥ || 45 || 

arālaiḥ kuṭilaiḥ svābhāvyāt svabhāvataḥ alikalabhasaśrīmiḥ 
alikalabhaiḥ bhramarapotaiḥ saśrībhiḥ samānābhaiḥ | 
samāsāntavidheranityatvāt kapratyayābhāvaḥ | alakaiḥ 
cūrṇakuntalaiḥ parītaṃ paritaḥ itaṃ parītaṃ vyāptaṃ te tava 
vaktraṃ parihasati tattulyaṃ na bhavatītyarthaḥ | paṅkeruharuciṃ 
paṅkeruhasya kamalasya ruciṃ saubhāgyaṃ darasmere daramīṣat smero 
vikāsaḥ yasya tādṛśe yasmin daśanarucikiñjalkarucire 
daśānānāṃ dantānāṃ rucaya eva kiñjalkāḥ kesarāḥ taiḥ 
rucire subhage sugandhau supadmagandhau mādyanti nandanti | 

p. 129) 

smaradahanacakṣurmadhulihaḥ smaradahanasya smarāreḥ īśvarasya 
cakṣūṃṣyeva madhulihaḥ bhramarāḥ | jitamanmathasyāpi 
vadanasaundaryadarśanaṃ mādanaheturiti kimu vaktavyaṃ 
tvadvadanasaundaryasvarūpamiti bhāvaḥ || 

atretthaṃ padayojanā he bhagavati ! svābhāvyādarālaiḥ 
alikalabhasaśrībhiḥ alakaiḥ parītaṃ te vaktraṃ paṅkeruharuciṃ 
parihasati | darasmere daśanarucikiñjalkarucire sugandhau yasmin 
smaradahanacakṣurmadhulihaḥ mādyanti || 

atra upamālaṅkāraḥ paṅkeruharuciṃ parihasatītyanena vaktrasya 
kamalasādṛśyapratīteḥ | alikalabhasaśrībhirityatra 
upamālaṅkāraḥ | anayoraṅgāṅgibhāvena saṅkaraḥ | 
daśanarucikiñjalkarucire ityatra rūpakālaṅkāraḥ daśanarucīnāṃ 
kiñjalkatvenāropaṇāt | smaradahanacakṣurmadhulihaḥ ityatra 
rūpakālaṅkāraḥ cakṣuṣāṃ madhuliṭtvenāropaṇāt | 
anayoraṅgāṅgibhāvena saṅkaraḥ saṅkaradvayasya saṃsṛṣṭiḥ || 
45 || 

lalāṭaṃ lāvaṇyadyativimalamābhāti tava yat dvitīyaṃ tanmanye 
makuṭaghaṭitaṃ candraśakalam | viparyāsanyāsādubhayamapi 
saṃbhūya ca mithaḥ sudhālepasyūtiḥ pariṇamati rākāhimakaraḥ || 
46 || 

lalāṭaṃ niṭilaṃ lāvaṇyadyutivimalaṃ lāvaṇyaṃ tāralyameva 
dyutirjyotsnā tayā vimalaṃ snigdhaṃ ābhāti ā samantādbhāti | 
tava yat dvitīyaṃ tat manye śaṅke | makuṭaghaṭitaṃ 
kirīṭakalitaṃ candraśakalaṃ candrārdhakhaṇḍam viparyāsanyāsāt 
lalāṭaṃ avākkoṇaṃ vartate candraśakalaṃ lalāṭasyopari 
ūrdhvaśṛṅgaṃ vartate ubhayorviparyāsanyāsaḥ 
śṛṅgacatuṣkasammelanaṃ tasmāt ubhayamapi lalāṭacandraśakale 
saṃbhūya militvā cakāro'tiśayavācī | 

p. 130) 

mithaḥ anyonyaṃ sudhālepasyūtiḥ sudhāyāḥ amṛtasya lepaḥ 
vilepanaṃ tasya syūtiḥ sīvanaṃ yasya saḥ amṛtarasasāndra 
ityarthaḥ | pariṇamati tādrūpyaṃ bhajati tadākārākārita 
ityarthaḥ | rākāhimakaraḥ rākāyāṃ pūrṇimāyāṃ 
himakaraścandraḥ || 

atretthaṃ padayojanā he bhagavati ! tava yat lalāṭaṃ 
lāvaṇyadyutivimalaṃ ābhāti tat makuṭaghaṭitaṃ dvitīyaṃ 
candraśakalaṃ manye | yadyasmātkāraṇāt ubhayamapi 
viparyāsanyāsāt mithaḥ sambhūya ca sudhālepasyūtiḥ 
rākāhimakaraḥ pariṇamati || 

pūrṇimāyāṃ sampūrṇatā candrasya kathaṃ bhavet kirīṭe 
ardhadehāviṣṭatayā candraḥ paridṛśyata iti pūrṇimācandraṃ 
nimittīkṛtya lalāṭamutprekṣyate || 

atra utprekṣālaṅkāraḥ lalāṭasya ardhacandratvenotprekṣaṇāt | 
yadvā dvitīyārdhe atiśayoktiralaṅkāraḥ rākāhimakarasya 
lalāṭakirīṭaghaṭitacandrarekhādvitayanirmāṇāsambandhe'pi 
sambandhakathanāt | atra 
kavikalpitavastuvṛttasaundaryayorabhedādhyavasāyaḥ | 
utprekṣātiśayoktyoḥ aṅgāṅgibhāvena saṅkaraḥ | 
adhyavasāyavyāpāraprādhānye utprekṣā adhyavasitaprādhānye 
tvatiśayoktiḥ sūtradvayasyāyamarthaḥ adhyavasāyaviṣayabhūte 
adhyavasānakriyārūpasya vyāpārasya prādhānyaṃ yatra 
tatrotprekṣotthānam | yadā adhyavasāyaviṣayabhūte 
adhyavasitasyaiva prādhānyaṃ pratīyate tadā atiśayokterutthānam | 
adhyavasāyo nāma niścayajñānam | tacca kaviprauḍhoktisiddham na 
vāstavam | utprekṣāstu adhyavasānakriyāprādhānyasya dyotakāḥ | 
manye śaṅke dhruvam ityevamādayaḥ svarūpotprekṣādyotakāḥ | 
hetūprekṣāyāṃ hetureva | phalotprekṣāyāṃ phalameva dyotakam | 
ata eva svarūpotprekṣāyāṃ ivādyabhāve hetuphalayorasambhavāt 
atiśayoktyutprekṣayoḥ bhedābhāvāt saivotprekṣā atiśayoktau 
antarbhūteti diṅmātramuktam || 46 || p. 131) 

bhruvau bhugne kiñcidbhuvanabhayabhaṅgavyasanini tvadīye 
netrābhyāṃ madhukararucibhyāṃ dhṛtaguṇam | dhanurmanye 
savyetarakaragṛhītaṃ ratipateḥ prakoṣṭhe muṣṭau ca sthagayati 
nigūḍhāntaramume || 47 || 

bhruvau bhrūvallī bhugne avākchṛṅgatayā valayite kiṃcit 
nātyantaṃ bhuvanabhayabhaṅgavyasanini ! bhuvanānāṃ jagatāṃ 
bhayasya upadravasya bhaṅge nāśakaraṇe vyasanaṃ tadekapravaṇatā 
asyā astīti bhuvanabhayabhaṅgavyasaninī tasyāḥ sambuddhiḥ | 
tvadīye bhavatsaṃbandhinyau netrābhyāṃ akṣibhyāṃ 
madhukararucibhyāṃ madhukarāṇāṃ bhramarāṇāmiva ruciḥśobhā 
yayostābhyāṃ madhukarākārākāritābhyāmityarthaḥ | dhṛtaguṇaṃ 
dhṛtaḥ sampāditaḥ guṇaḥ jyāvallī yasya tat dhanuḥ cāpaṃ manye 
śaṅke | savyetarakaragṛhītaṃ savyo dakṣiṇaḥ taditaro vāmaḥ sa 
cāsau karaśca tena gṛhītam | savyetaraśabdena ekenaiva hastena 
sarvadā dhṛtam na tu bāṇaprayogārthamiti sūcyate | ratipateḥ 
manmathasya prakoṣṭhe maṇibandhe muṣṭau aṅgulīnāṃ granthau 
ayaṃ muṣṭiśabdaḥ anuśāsanavaśāt strīliṅgo'pi 
prayogabāhulyāt pulliṅgatāmāpannaḥ gaṇḍūṣaśabdavat | yathā 
udaraṃ parimāti muṣṭinā iti naiṣadhe prayogaḥ | sthagayati 
sthaganaṃ chādanaṃ kurvati sati nigūḍhāntaraṃ nigūḍhe antare 
maurvidaṇḍayoryasya tat ume ! he pārvati || 

atretthaṃ padayojanā he ume ! bhuvanabhayabhaṅgavyasanini | tvadīye 
kiñcidbhugne bhrūvau madhukararucibhyāṃ netrābhyāṃ dhṛtaguṇaṃ 
ratipateḥ savyetarakaragṛhītaṃ prakoṣṭhe muṣṭau ca sthagayati 
sati nigūḍhāntaraṃ dhanurmanye || 

atra bhrūvau dhanuriti rūpakam bhruvoḥ dhanurūpeṇa nirūpaṇāt | 
ata eva dvivacanaikavacanayoḥ sāmānādhikaraṇyaṃ bhruvau dhanuriti 
|| 

p.132) 

ayaṃ bhāvaḥ viśeṣaṇaṃ caturvidham vyāvartakaviśeṣaṇaṃ 
uparañjakaviśeṣaṇaṃ upalakṣaṇaviśeṣaṇaṃ 
upadhānaviśeṣaṇaṃ ceti | tatra vyāvartakaviśeṣaṇaṃ 
nīlotpalamityādau tatra nailyasya śvetādivyāvartakatvāt | 
uparañjakaviśeṣaṇaṃ dvividham uparañjanasya 
āropaviṣayagocaratvena āropyamāṇagocaratvena ceti | tatra 
āropaviṣayagocaratvaṃ mukhaṃ candraḥ ityādau | tatra candratvena 
mukhasya uparañjanam | ata eva liṅgabhede'pi 
viśeṣaṇaviśeṣyabhāvaḥ siddhaḥ | sa taduccakucau bhavan iti 
naiṣadhe | tatra saḥ iti kalaśa ekaḥ dvau kucau 
ubhayorviṣaṇaviśeṣyabhāvaḥ | āropyamāṇaviśeṣaṇaṃ tu 
tiraskariṇyo jaladā bhavanti atra āropyamāṇatiraskariṇītvaṃ 
āropaviṣayātmatayā sthitam | etacca pūrvameva nirūpitam | 
upalakṣaṇaviśeṣaṇam kākavaddevadattagṛham | pṛthak 
sthite(tiḥ)hi dharmiṇi upalakṣaṇamiti upalakṣaṇavidaḥ | 
kākatvādijātyāviṣṭasyaiva upalakṣaṇatvāt viśeṣaṇato bhedaḥ 
| upādhānaviśeṣaṇam raktaṃ sphaṭikam iti | dharmātmanā 
upādhāyakatvāt upalakṣaṇato bhedaḥ | vyavartakatvāt 
nīlotpalādervyāvṛttiḥ || 

atredaṃ tattvam uparañjakaviśeṣaṇasthale mukhaṃ candraḥ kalaśaḥ 
stanau bhruvau dhanuḥ ityādisthale 
candrakalaśādyuparañjakaviśeṣaṇāni āśritaliṅgasaṅkhyānyeva 
mukhādikaṃ stanādikaṃ ca viśiṃṣantīti na stanādeḥ mukhādervā 
liṅgaṃ saṅkhyāṃ vā bhajante | niyataliṅgatayā 
viśeṣyanighnatvābhāvāt itarebhyo viśeṣaṇebhyo vyāvṛttiḥ | 
manyeśabdaprayogāt saṃbhāvanotthānāt utprekṣālaṅkāro'pi | 
anayoḥ anusṛṣṭiḥ apṛthaksthitayoḥ alaṅkārayoḥ 
aṅgāṅgibhāvāt | apṛthaksthitayoḥ 
alaṅkārayoraṅgāṅgibhāvo'nusarjanam pṛthaksthitayostu saṅkaraḥ 
ityālaṅkārikarahasyam | atiśayoktirapi bhrūmadhyanāsikāmadhyayoḥ 
muṣṭiprakoṣṭhasthagitatvenādhyavasānāt | atra nāsikāyāḥ 
savyetarakaratvenāropaṇapratīteḥ rūpakālaṅkāro dhvanyate | 
yadvā savyetarakaratvena nāsikāyāḥ adhyavasānapratīteḥ 
atiśayoktiḥ | anayoḥ sandehaḥ saṅkaraḥ || 47 || 

p. 133) 

ahaḥ sūte savyaṃ tava nayanamarkātmakatayā- triyāmāṃ vāmaṃ te 
sṛjati rajanīnāyakatayā [mayam] | tṛtīyā te 
dṛṣṭirdaradalitahemāmbujaruciḥ- samādhatte sandhyāṃ 
divasaniśayorantaracarīm || 48 || 

ahaḥ divasaṃ sūte janayati | savyaṃ dakṣiṇaṃ tava nayanaṃ 
netraṃ arkātmakatayā sūryātmakatayā triyāmāṃ rātriṃ vāmaṃ 
savyetaraṃ te tava sṛjati sūte rajanīnāyakatayā candrātmakatayā 
[rajanīnāyakamayaṃ candrātmakam] | tṛtīyā niṭilasthitā te tava 
dṛṣṭiḥ daradalitahemāmbujaruciḥ daradalitamīṣadvikasitaṃ 
hemāmbujaṃ raktāmbujaṃ [suvarṇakamalam] tasyeva ruciryasyāḥ sā 
samādhatte samyagādhatte karoti divasaniśayoḥ ahorātrayoḥ 
antaracarīṃ madhyavartinīṃ sandhyām 
sāyaṃprātarātmakasandhyākāladvitayasya agnihotrasādhyatvāditi 
bhāvaḥ || 

atretthaṃ padayojanā he bhagavati ! tava savyaṃ nayanaṃ 
arkātmakatayā ahaḥ sūte vāmaṃ nayanaṃ rajanīnāyakatayā [mayaṃ 
sat triyāmāṃ rātrim] triyāmāṃ sṛjati | te tṛtīyā dṛṣṭiḥ 
daradalitahemāmbujaruciḥ divasaniśayoḥ antaracarīṃ sandhyāṃ 
samādhatte || 

atra sūryacandrāgnyātmakanayanatrayeṇa bhagavatyāḥ 
avayavaviśeṣaṇa [avayavarūpeṇa] 
divasaniśāsandhyātmakakālatrayopalakṣitapakṣamāsartuyuga-kalpādi 
kālotpattikathanāt bhagavatyāḥ kālāvacchedyatvaṃ dūrata 
evāpāstamiti dhvanyate | idamuttamaṃ kāvyam | 
madhyamakāvyatāpratītirapi arkātmatayā rajanīnāyakamayam iti 
vācyamānatvāt | 

p. 134) 

daradalitahemāmbujarucirityanena agninetratvaṃ dhvayante | 
ayamanuprāṇanātmakaḥ madhyamottamakāvyaprayojakadhvanyoḥ 
saṃsṛṣṭiḥ | saṃsṛjyamānaṃ vyaṅgyadvayaṃ pradhānadhvaninā 
aṅgāṅgibhāvena saṅkīryata iti dik || 48 || 

viśālā kalyāṇī sphuṭarucirayodhyā kuvalayaiḥ- 
ṛpādhārā''dhārā kimapi madhurā''bhogavatikā | avantī 
dṛṣṭiraste bahunagaravistāravijayā dhruvaṃ 
tattannāmavyavaharaṇayogyā vijayate || 49 || 

viśālā vipulā kalyāṇī maṅgalātmikā sphuṭaruciḥ 
prasphuṭakāntiḥ ayodhyā yoddhumaśakyā kuvalayaiḥ indīvaraiḥ 
kṛpādhārā''dhārā kṛpādhārāṇāṃ karuṇāpravāhāṇāṃ 
ādhārabhūtā | ādhāraśabdasya karmaṇi ghañantatvāt 
viśeṣyanighnatvena rūpakatvam | kimapi madhurā avyaktamadhurā 
ābhogavatikā ābhogaḥ antaḥpariṇāhaḥ dairghyamiti yāvat | 
avantī rakṣakā dṛṣṭiḥ te nayanaṃ bahunagaravistāravijayā 
bahūnāṃ nagarāṇāṃ vistāreṇa sāmastyena vijayā sphurantī 
dhruvaṃ niścayaḥ | tattannāmavyavaharaṇayogyā tāni tāni ca 
nāmāni tattannāmāni viśālā kalyāṇī ayodhyā dhārā madhurā 
bhogavatī avantī vijayā ityaṣṭa nagaranāmāni taiḥ 
tadvyavaharaṇaṃ vyavahāraḥ tatra yogyā vijayate sarvotkarṣeṇa 
vartate || 

atretthaṃ padayojanā he bhagavati ! te dṛṣṭiḥ viśālā kalyāṇī 
sphuṭaruciḥ kuvalayaiḥ ayodhyā kṛpādhārā''dhārā kimapi 
madhurā ābhogavatikā avantī bahunagaravistāravijayā 
tattannāmavyavaharaṇayogyā dhruvaṃ vijayate || 

p. 135) 

atredamanusandheyam viśālāprabhṛtayo vijayāntāḥ aṣṭa nagaryaḥ 
aṣṭa dṛṣṭayaśca viśālā nāma dṛṣṭiḥ antarvikāsarūpā | 
kalyāṇīdṛṣṭirvismitā | ayodhyādṛṣṭiḥ smerakanīnikā | 
dhārādṛṣṭiḥ alasā | madhurādṛṣṭiḥ valitā [vilasitā] | 
bhogavatīdṛṣṭiḥ snigdhā | avantīdṛṣṭiḥ mugdhā | 
vijayādṛṣṭiḥ prāntakanīnikā ākekarākhyā dṛṣṭiḥ | etā 
aṣṭa dṛṣṭayaḥ sarvayoṣitsamānāḥ | bhagavatyāṃ tu viśeṣaḥ 
etāḥ dṛṣṭayaḥ yathākramaṃ 
saṃkṣobhākarṣaṇadrāvaṇonmādavaśyoccāṭanavidveṣaṇamāraṇakr 
iyāsu saṃbhinnāḥ || 

etaduktaṃ bhavati bhagavatī yatra pradeśe sthitvā 
antarvikāsayuktatayā viśālākhyayā dṛṣṭyā 
janasaṃkṣobhamakarot sa deśo viśālānagarī | yatra pradeśe 
sthitvā sā ākekarayā dṛṣṭyā vijayākhyā śatrumāraṇamakarot 
sa deśo vijayānagarī evaṃ madhyavartinīnāṃ ṣaṇṇāṃ purāṃ 
nāmadheyānyūhyāni | yathoktaṃ bhagavatpādaiḥ viśālādyāḥ 
bhagavatyāḥ dṛṣṭiviśeṣāḥ saṃkṣobhādikarmasādhanabhūtāḥ 
antarvikāsādirūpāśceti sarvamanavadyamiti | etadeva 
spaṣṭīkṛtaṃ tadvyākhyākāraiḥ | tat tata eva avadhāryam || 49 
|| 

kavīnāṃ sandarbhastabakamakarandaikarasikaṃ 
kaṭākṣavyākṣepabhramarakalabhau karṇayugalam | amuñcantau 
dṛṣṭvā tava navarasāsvādataralau asūyāsaṃsargādalikanayanaṃ 
kiñcidaruṇam || 50 || 

kavīnāṃ kavīśvarāṇāṃ sandarbhastabakamakarandaikarasikaṃ 
sandarbhaḥ kāvyasandarbhaḥ sa eva stabakaḥ puṣpagucchaṃ tatra 
makarande ekaṃ mukhyaṃ rasikaṃ mukhyarasikaṃ 
kāvyāmṛtāsvādaikarasikamityarthaḥ | 
kaṭākṣavyākṣepabhramarakalabhau kaṭākṣāveva 

p. 136 

vyākṣepau vyājau yayostau tau ca tau bhramarakalabhau ceti samāsaḥ 
| bhramarakalabhau dvirephaḍimbhau | atra yadyapi kalabhaśabdaḥ 
kariḍimbhavacanaḥ mahākaviprayogaprācuryavaśāt 
viśeṣaṇasamānyalakṣaṇā bhramarakalabhāviti | karṇayugalaṃ 
karṇayoḥ śravaṇayoḥ yugmaṃ amuñcantau rasāsvādalampaṭatayā 
atyajantau dṛṣṭvā tṛtīyasya nayanasya ūrdhvasthitatvāt | tava 
navarasāsvādataralau navarasāḥ śṛṅgārādayaḥ 
navatvasaṅkhyāyuktāḥ rasāḥ navarasāḥ 
śākapārthivāditvāduttarapadalopaḥ anyathā dvigoḥ iti ṅīṣi 
kṛte navarasī iti syāt | navarasānāmāsvāde bhoge taralau 
lampaṭau asūyāsaṃsargāt asūyā īrṣyā tasyāḥ saṃsargaḥ 
sambandhaḥ tasmāt alikanayanaṃ niṭilanetraṃ kiñcidaruṇaṃ 
kiñcitkopādivāruṇam || 

atretthaṃ padayojanā he bhagavati ! kavīnāṃ 
sandarbhastabakamakarandaikarasikaṃ tava karṇayugalaṃ 
kaṭākṣavyākṣepabhramarakalabhau navarasāsvādataralau amuñcantau 
dṛṣṭvā asūyāsaṃsargāt alikanayanaṃ kiñcidaruṇam || 

ayamarthaḥ nayanatrayamadhye dvayoramṛtapāne siddhe ekasya nayanasya 
asūyā yujyate | ākarṇāntanetrā bhagavatī iti vastudhvaniḥ || 

atra atiśayoktiralaṅkāraḥ śravaṇayoḥ [netrayoḥ śravaṇagata iti 
kalyāṇapuramudritakośapāṭhaḥ] 
kāvyāmṛtāsvādasambandhābhāve'pi sambandhakathanāt | 
bhramarakalabhāvityatra apahnavālaṅkāraḥ | yadvā rūpakaṃ 
kaṭākṣavyākṣepaḥ kaṭākṣātmatayā avasthitiriti vyākhyeyam | 
atiśayoktyantaramapi bhramarakalabhayoḥ 
makarandāsvādāsaṃbandhe'pi sambandhakathanāt | 
kavikṛtavastukṛtasaundaryayorabhedādhyavasāyāt 
atiśayoktyoranuprāṇyānurāṇakabhāvaḥ saṃbandhaḥ | apahnavastu 
aṅgabhāvena saṅkīrṇaḥ || 50 || 

p. 137) 

śive śṛṅgārārdrā taditarajane kutsanaparā saroṣā gaṅgāyāṃ 
giriśacarite vismayavatī | harāhibhyo bhītā 
sarasiruhasaubhāgyajananī sakhīṣu smerā te mayi janani dṛṣṭiḥ 
sakaruṇā || 51 || 

śive sadāśive śṛṅgārārdrā śṛṅgāreṇa śṛṅgārarasena 
ārdrā āplutā taditarajane tasmāt sadāśivāt itarajane tadviṣaye 
kutsanaparā bībhatsarasāviṣṭā | atra kutsanaṃ 
bībhatsarasāsvādanajanyāntaḥkaraṇamukulībhāvaḥ 
kāryakāraṇayorabhedena rasatvenopacaritaḥ | saroṣā 
raudrarasāviṣṭā roṣasya sthāyibhāvasya rasatvoktirupacārāt | 
gaṅgāyāṃ sapatnyāmiti śeṣaḥ | giriśacarite tripuravijayādau 
vismayavati adbhutarasāviṣṭā giriśanayane iti pāṭhe 
tṛtīyanayanenaiva manmathadahanam tādṛśanayana eva idānīṃ 
sākūtadarśanamityadbhutamiti dhyeyam | harāhibhyaḥ harasya 
parameśvarasya ahibhyaḥ sarpebhyaḥ bhītā bhayarasāviṣṭā 
sarasiruhasaubhāgyajananī sarasiruhāṇāṃ saubhāgyaṃ raktimā 
tasya jananī utpādikā kokanadakāntiḥ raktavarṇā 
vīrarasāviṣṭetyarthaḥ | atra anubhāvena nayanaraktimnā vīraraso 
dhvanitaḥ | sakhīṣu vayasyāsu smerā stabdhakanīnikā 
atrāpyanubhāvena hāsyaraso dhvanyate | te tava mayi janani ! he 
mātaḥ ! dṛṣṭiḥ sakaruṇā karuṇarasāviṣṭā || 

atretthaṃ padayojanā he janani ! te dṛṣṭiḥ śive śṛṅgārārdrā 
taditarajane kutsanaparā gaṅgāyāṃ saroṣā giriśacarite 
[giriśanayanayorvismayavatī] vismayavatī harāhibhyo bhītā 
sarasiruhasaubhāgyajananī sakhīṣu smerā mayi sakaruṇā || 

p. 138) 

atra parasparaviruddhānāṃ rasānāṃ ekatra nayane 
samāveśakathanāt virodhālaṅkāraḥ avasthābhedena parihārāt 
tasya virodhasya ābhāsatvam | tallakṣaṇaṃ virodhābhāso virodhaḥ 
iti | vikriyājanakā eva rasā iti aṣṭau rasāḥ | bharatamate- 

śāntasya nirvikāratvānna śāntaṃ menire rasam | 

iti śāntasya rasatvābhāvāt aṣṭāveva rasāḥ saṅgṛhītāḥ || 
51 || 

gate karṇābhyarṇaṃ garuta iva pakṣmāṇi dadhatī purāṃ 
bhettuścittapraśamarasavidrāvaṇaphale | ime netre 
gotrādharapatikulottaṃsakalike tavākarṇākṛṣṭasmaraśaravilāsaṃ 
kalayataḥ || 52 || 

gate prāpte karṇābhyarṇaṃ karṇayoḥ samīpaṃ garuta iva 
kaṅkapatrāṇīva pakṣmāṇi dadhatī | purāṃ purāṇāṃ bhettuḥ 
bhedakasya cittapraśamarasavidrāvaṇaphale citte antaḥkaraṇe 
praśamarasaḥ [śantarasa ityadhikaḥ] naispṛhyamityarthaḥ tasya 
vidrāvaṇaṃ vināśanaṃ śṛṅgārarasotpādanamiti yāvat tadeva 
phalaṃ prayojanaṃ yayoste cittapraśamarasavidrāvaṇaphale | atra 
phalaśabdena adhyavasitena ayomayī bāṇāgrasūcī kathyate | ime 
hṛdayāmbuje paridṛśyamāne netre nayane 
gotrādharapatikulottaṃsakalike ! gotrā bhūmiḥ dharatīti dharaḥ 
pacādyac gotrāyāḥ dharo gotrādharaḥ anyathā gotrāṃ 
dhārayatīti vigrahe karmaṇyaṇi prāptau gotrādhāra iti syāt | 
anenaivābhiprāyeṇa śaktidhara ityatra śakteḥ dharaḥ śaktidharaḥ 
ityuktaṃ kṣīrasvāminā | gotrādharapatiḥ himavān tasya 
kulottaṃsakalikā korakaḥ tasyāḥ sambuddhiḥ | tava bhavatyāḥ 

p. 139) 

ākarṇākṛṣṭasmaraśaravilāsaṃ karṇaparyantamākṛṣṭayoḥ 
smaraśarayoḥ manmathabāṇayoḥ vilāsaṃ saubhāgyaṃ kalayataḥ 
kurutaḥ | laṭparasmaipadadvivacanāntam || 

atretthaṃ padayojanā he gotrādharapatikulottaṃsakalike ! tava ime 
netre karṇābhyarṇaṃ gate pakṣmāṇi garuta iva dadhatī purāṃ 
bhettuḥ cittapraśamarasavidrāvaṇaphale 
ākarṇākṛṣṭasmaraśaravilāsaṃ kalayataḥ || 

ayamarthaḥ pañcabāṇasya strīṇāṃ kaṭākṣaḥ ṣaṣṭho bāṇaḥ 
| pañcabāṇa iti prasiddhaḥ prācuryābhiprāyeṇa | 
kaṭākṣātmakabāṇo bāṇapañcakatulya iti na ṣaṭbrāṇa iti 
vyavahāraḥ | 

atra nidarśanālaṅkāraḥ | 
smaraśaravilāsasadṛśavilāsakaraṇapratibhānāt pratibimbākṣepāt 
|| 52 || 

vibhaktatraivarṇyaṃ vyatikaritalīlāñjanatayā vibhāti 
tvannetratritayamidamīśānadayite | punaḥ sraṣṭuṃ devān 
drahiṇaharirudrānuparatān rajaḥ sattvaṃ bibhrattama iti guṇānāṃ 
trayamiva || 53 || 

vibhaktatraivarṇyaṃ vibhaktaṃ parasparāsaṅkīrṇaṃ traivarṇyaṃ 
trayo varṇāḥ sitāsita raktāḥ yasyeti bahubrīhiḥ svārthe ṣyañ 
| mahābhāgyapuruṣāṇāṃ nayane raktarekhāḥ santi 
nayanagoladvayaṃ śvetam yadyapi kanīnikā nīlā tathāpi 
tṛtīyanayane kanīnikāyāḥ nailyābhāvāt ityāha 
vyatikaritalīlāñjanatayā iti | vyatikaritaṃ saṃvalitaṃ 
līlārthaṃ vilāsārthaṃ dhṛtaṃ añjanaṃ yasya tat tasya 
bhāvastattā tayā | tṛtīyanayanagolasya śvaityamaṅgīkṛtyoktam | 
vibhāti virājate | tvannetratritayaṃ 

p. 140) 

tava netrāṇāṃ tritayaṃ idaṃ paridṛśyamānaṃ īśānadayite 
īśānasya mahādevasya dayitā preyasī tasyāssambuddhiḥ punaḥ 
sraṣṭuṃ gatabrahmāṇḍānantaramasmin brahmāṇḍe bhūyo nirmātuṃ 
devān devanadharmayuktān druhiṇaharirudrānuparatān 
[druhiṇaharirudrān brahmaviṣṇumaheśvarān uparatān] ātmani 
vilīnān rajaḥ rajoguṇaḥ sattvaṃ sattvaguṇaḥ bibhrat dadhat 
tamaḥ tamoguṇaḥ iti evaṃ guṇānāṃ 
sattvarajastamaḥsaṃjñikānāṃ trayaṃ tritayaṃ iva || 

atretthaṃ padayojanā he īśānadayite ! idaṃ tvannetratritayaṃ 
vyatikaritalīlāñjanatayā vibhaktatraivarṇyaṃ uparatān 
druhiṇaharirudrān devān punaḥ sraṣṭuṃ rajaḥ sattvaṃ tama iti 
guṇānāṃ trayamiva bibhrat vibhāti || 

atra sattvaguṇaḥ śvetavarṇaḥ rajoguṇo raktavarṇaḥ tamoguṇo 
nīlavarṇaḥ iti kaviprasiddhiḥ | tama iti nipātenāpyabhihite 
karmaṇi na karmavibhaktiḥ parigaṇanasya prāyikatvāditi 
nipātetiśabdenābhidhānāt rajaḥsattvatamaḥśabdāḥ 
prathamāntāḥ | yadvā dvitīyāntāḥ nipātābhidhānasya 
prāyikatvāt | yathoktaṃ vāgbhaṭena- 

hiṃsā steyānyathākāmaṃ paiśunyaṃ puruṣānṛte | 
saṃbhinnālāpavyāpādamabhidhyāṃ dṛgviparyayam || pāpaṃ karmeti 
daśadhā kāyavāṅmanasaistyajet | iti | 

atra utprekṣālaṅkāraḥ nayanagatasya 
śvetaraktanīlarekhātritayasya sattvarajastamoguṇatvenotprekṣaṇāt 
| atra bhagavatyāḥ nayanāñjanadarśanādeva sṛṣṭisthitilayā iti 
mahānatiśayo dhvanyata ityalaṅkāreṇa vastudhvaniḥ || 53 || 

p. 141) 

pavitrīkartuṃ naḥ paśupatiparādhīnahṛdaye 
dayāmitrairnetrairaruṇadhavalaśyāmarucibhiḥ | nadaḥ śoṇo gaṅgā 
tapanatanayeti dhruvamamuṃ trayāṇāṃ tīrthānāmupanayasi 
saṃbhedamanagham || 54 || 

etadeva traivarṇyaṃ punarutprekṣyate pavitrīkartuṃ apavitrān 
pavitrān saṃpadyamānān kartuṃ abhūtatadbhāve sampadyakartari 
cviḥ | naḥ asmān paśupatiparādhīnahṛdaye ! harāyattacitte ! 
dayāmitraiḥ dayārdraiḥ netraiḥ aruṇadhavalaśyāmarucibhiḥ 
pratyekamiti śeṣaḥ | nadaḥ puṃpravāhaḥ [puṇyapravāhaḥ] 
śoṇaḥ hiraṇyavāhaḥ sa tu raktavarṇaḥ gaṅgā bhāgīrathī 
śvetavarṇā tapanatanayā kālindī nīlavarṇā iti kaviprasiddhiḥ | 
iti evaṃ dhruvaṃ satyaṃ amuṃ paridṛśyamānaṃ trayāṇāṃ 
tīrthānāṃ jalāvatārāṇāṃ saṃbhedaṃ nadīsaṅgamaṃ upanayasi 
saṃpādayasi | anaghaṃ aghāpanodakam || 

atretthaṃ padayojanā he paśupatiparādhīnahṛdaye ! dayāmitraiḥ 
aruṇadhavalaśyāmarucibhiḥ netraiḥ śoṇo nado gaṅgā 
tapanatanayeti trayāṇāṃ tīrthānāṃ amuṃ anaghaṃ saṃbhedaṃ 
naḥ pavitrīkartuṃ upanayasi dhruvam | bhaktavatsalatvāddevyā iti 
bhāvaḥ || 

atrotprekṣālaṅkāraḥ svabhāvasiddhasya nayanagatarekhātritayasya 
sitāsitaraktavarṇātmakasya 
gaṅgāyamunāśoṇasaṅgamatvenotprekṣan.āt || 54 || 

p. 142) 

nimeṣonmeṣābhyāṃ pralayamudayaṃ yāti jagatī tavetyāhuḥ santo 
dharaṇidhararājanyatanaye | tvadunmeṣājjātaṃ jagadidamaśeṣaṃ 
pralayataḥ paritrātuṃ śaṅke parihṛtanimeṣāstava dṛśaḥ || 55 
|| 

nimeṣo nāma pakṣmaṇāṃ mukulībhāvaḥ atra unmeṣo nāma nayane 
pakṣmavikāsaḥ tābhyāṃ yathākramaṃ pralayaṃ saṃhāraṃ udayaṃ 
udbhavaṃ yāti prāpnoti | jagatī jagat tava bhavatyāḥ iti evaṃ 
āhuḥ bruvate | bruvaḥ pañcānāmāditaḥ ityādinā āhādeśaḥ | 
santaḥ satpuruṣāḥ vyāsādayaḥ | dṛṣṭisṛṣṭivādimate 
jñānavyatirekeṇa jñeyābhāvāt 
nimeṣonmeṣābhyāmityukterāñjasyamiti dhyeyam | 
dharaṇidhararājanyatanaye ! himācalaputrike ! tvadunmeṣāt tava 
pakṣmaspandāt jātaṃ jagat bhuvanaṃ idaṃ paridṛśyamānaṃ 
aśeṣaṃ kṛtsnaṃ pralayataḥ mahāsaṃhārāt paritrātuṃ rakṣituṃ 
śaṅke [śaṅke manye] | parihṛtanimeṣāḥ tiraskṛtākṣispandāḥ 
tava dṛśaḥ nayanāni || 

atretthaṃ padayojanā dharaṇidhararājanyatanaye ! tava 
nimeṣonmeṣābhyāṃ jagatī pralayamudayaṃ yātīti santaḥ āhuḥ | 
ataḥ tvadunmeṣāt jātaṃ aśeṣaṃ idaṃ jagat pralayataḥ 
paritrātuṃ tava dṛśaḥ parihṛtanimeṣāḥ iti śaṅke || 

atrotprekṣālaṅkāraḥ | devatānāmanimeṣatvaṃ svabhāvasiddham 
tacca jagatsaṃrakṣaṇārthamiti phalatvenotprekṣaṇāt phalotprekṣā 
| tatra nimeṣonmeṣadaśāyāṃ tau jagadutpattilayāviti devyāḥ 
mahimā avāṅmanasagocara iti vastu dhvanyate | ataḥ alaṅkāreṇa 
vastudhvaniḥ || 55 || 

p. 143) 

tavāparṇe karṇejapanayanapaiśunyacakitāḥ nilīyante toye 
niyatamanimeṣāḥ śapharikāḥ | iyaṃ ca 
śrīrbaddhacchadapuṭakavāṭaṃ kuvalayaṃ jahāti pratyūṣe niśi ca 
vighaṭayya praviśati || 56 || 

tava bhavatyāḥ aparṇe ! pārvati ! karṇejapanayanapaiśunyacakitāḥ 
karṇejape karṇasamīpaṃ sadā gate nayane tābhyāṃ 
yatkariṣyamāṇaṃ paiśunyaṃ piśūnabhāvaḥ marmodghāṭanaṃ 
tasmāccakitāḥ nilīyante ākāragopanena sthitāḥ ityarthaḥ | toye 
udake niyataṃ niścayaḥ animeṣāḥ nimeṣarahitāḥ śapharikāḥ 
mīnayoṣitaḥ iyaṃ ca paridṛśyamānā netragatā śrīḥ lakṣmīḥ 
baddhacchadapuṭakavāṭaṃ baddhaṃ saṃkalitaṃ chadapuṭā eva 
kavāṭaṃ yasya tat kavāṭasaṅghaṭitagṛhamiva vartata ityarthaḥ | 
kuvalayaṃ indīvaraṃ jahāti tyajati | pratyūṣe uṣaḥkāle niśi ca 
rātrau ca vighaṭayya praviśati saṃviśati || 

atretthaṃ padayojanā he aparṇe ! tava 
karṇejapanayanapaiśunyacakitāḥ śapharikāḥ animeṣāstoye 
nilīyante niyatam | kiñca iyaṃ ca śrīḥ baddhacchadapuṭakavāṭaṃ 
kuvalayaṃ pratyūṣe jahāti niśi ca tat vighaṭayya praviśati || 

ayamarthaḥ loke netrasamaṃ vastu śapharikā indīvarāṇīti 
etaddvitayasamaṃ netramiti ca suprasiddhaṃ ubhayoḥ sāmyaṃ atra 
kaviḥ netrasaubhāgyaṃ śapharikāsu indīvareṣu ca vartate 
tatsaubhāgyamāhartukāmaṃ netradvayaṃ tatra paiśunyaṃ 
karotīmamarthamavalambyotprekṣate || 

atra pūrvārdhe utprekṣālaṅkāraḥ śapharikāṇāṃ jalādhivāsaḥ 
animeṣatvaṃ ca svabhāvasiddham tadanyathātvenotprekṣaṇāt | 
dvitīyārdhe atiśayoktiḥ netralakṣmyāḥ 

p.144) 

netraṃ vihāya indīvareṣu bhaktyatiśayāt rātrau 
tadrakṣaṇārthaṃ tadgarbhāntarvartitvaṃ divā tadvihāya 
netravartitvaṃ asaṃbhavīti asaṃbandhe saṃbandhanibandhanāt | 
indīvarasya rātrau vikāsaḥ svabhāvasiddhaḥ divā mukulībhāvaśca 
| etaddvayasya lakṣmīkṛtatvāsaṃbandhe'pi saṃbandhakathanāt 
atiśayoktyantaram | ubhayoranusṛṣṭiḥ | anusṛṣṭilakṣaṇaṃ 
pūrvamevoktam [47 ślokavyākhyāyām] | atra indīvarasya rātrau 
vikāsaḥ netradvayasya divā vikāsaḥ | ataśca divā lakṣmīḥ netre 
vasati rātrau kuvalaye | evaṃ lakṣmīḥ naktaṃdivamubhayatraiva 
carati nānyatreti | śapharīprabhṛtīnāṃ loke 
netropamānavastūnāṃ bhagavatīnetratulyatā nāstīti 
śapharikāṇāmudakamadhyavilīnatvameva yuktamiti 
kāvyaliṅgadhvanirityalaṅkāradhvaniḥ || 56 || 

dṛśā drāghīyasyā daradalitanīlotpalarucā davīyāṃsaṃ dīnaṃ 
snapaya kṛpagā māmapi śive | anenāyaṃ dhanyo bhavati na ca te 
hāniriyatā vane vā harmye vā samakaranipāto himakaraḥ || 57 || 

dṛśā kaṭākṣadṛṣṭyā drāghīyasyā dīrghatarayā 
daradalitanīlotpalarucā daradalitamīṣadvikasitaṃ nīlotpalaṃ 
indīvaraṃ tasyeva ruciḥ kāntiryasyāḥ tayā davīyāṃsaṃ 
dūravartinam | dūraśabdasya sthūladūra ityādinā sūtreṇa yaṇo 
lopaḥ pūrvavarṇasya guṇe kṛte avādeśe kṛte siddhaṃ rūpaṃ 
davīyāniti īyasunpratyayāntam | dīnaṃ daridraṃ snapaya snapanaṃ 
kuru | kṛpayā dayayā māmapi itarajanasādhāraṇyamapiśabdārthaḥ 
| śive ! maṅgalātmike ! anena etāvanmātreṇa snapanenāpi ayaṃ 
janaḥ ahamityarthaḥ | 

p. 145) 

dhanyo bhavati kṛtārtho bhavati | na ca te tava hāniḥ dravyanāśaḥ 
iyatā sādhāraṇadarśanamātreṇa vane vā araṇye vā harmye 
prāsāde vā samakaranipātaḥ samaṃ tulyaṃ yathā bhavati tathā 
karāṇāṃ kiraṇānāṃ nipātaḥ vyāpanaṃ yasya sa tathoktaḥ | 
himakaraḥ śītaraśmiḥ || 

atretthaṃ padayojanā he śive ! drāghīyasyā 
daradalitanīlotpalarucā dṛśā davīyāṃsaṃ dīnaṃ kṛpayā 
māmapi snapaya ayaṃ anena dhanyo bhavati | iyatā te hānirna ca | 
tathā hi himakaraḥ vane vā harmye vā samakaranipāto hi | 
svacchāntaḥkaraṇānāṃ sarvasādhāraṇyaṃ svabhāvasiddhamiti 
bhāvaḥ || 

arthāntaranyāso'laṅkāraḥ sāmānyena viśeṣasamarthanāt | 
sarvasādhāraṇyadarśanaṃ sarvotkṛṣṭatve heturiti 
nātmīyatādarśanāpekṣā astīti dhvaniḥ || 57 || 

arālaṃ te pālīyugalamagarājanyatanaye na keṣāmādhatte 
kusumaśarakodaṇḍakutukam | tiraścīno yatra 
śravaṇapathamullaṅghya vilasan apāṅgavyāsaṅgo diśati 
śarasandhānadhiṣaṇām || 58 || 

arālaṃ kuṭilaṃ te pālīyugalaṃ karṇayugalanayanayugalayormadhyaṃ 
agarājanyatanaye ! nagendratanaye ! na keṣāmādhatte sarveṣāṃ 
karotyeva | kusumaśarakodaṇḍakutukaṃ manmathacāpasaubhāgyaṃ 
tiraścīnaḥ tiryakprasāritaḥ yatra pālīyugale 
śravaṇapathamullaṅghya karṇāntikaṃ prāpya vilasan sphuran 
apāṅgavyāsaṅgaḥ apāṅgasya kaṭākṣasya vyāsaṅgaḥ dairghyaṃ 
diśati karoti śarasandhānadhiṣaṇāṃ śarasandhānasya 
bāṇasaṃyojanasya dhiṣaṇāṃ buddhiṃ tadbhrāntiṃ 
saṃhitaśaradhiṣaṇāmiti yāvat || 

p. 146) 

atretthaṃ padayojanā he agarājanyatanaye ! te pālīyugalamarālaṃ 
kusumaśarakodaṇḍakutukaṃ keṣāṃ nādhatte | yadyasmāt yatra 
tiraścīnaḥ vilasan apāṅgavyāsaṅgaḥ śravaṇapathamullaṅghya 
śarasandhānadhiṣaṇāṃ diśati || 

atra bhrāntimadalaṅkāraḥ apāṅge saṃhitaśarabhrānterutthānāt | 
pālīyugale kusumaśarakodaṇḍabuddhiḥ niścayātmikā 
saṃśayapūrviketi sandehālaṅkāra eva | anayoraṅgāṅgibhāvena 
saṅkaraḥ || 58 || 

sphuradgaṇḍābhogapratiphalitatāṭaṅkayugalaṃ catuścakraṃ manye 
tava mukhamidaṃ manmatharatham | yamāruhya 
druhyatyavanirathamarkenducaraṇaṃ mahāvīro māraḥ pramathapataye 
sajjitavane || 59 || 

sphuradgaṇḍābhogapratiphalitatāṭaṅkayugalaṃ sphurantau ca tau 
gaṇḍābhogau ca gaṇḍasthale darpaṇavannirmalāvityarthaḥ | tatra 
pratiphalitaṃ pratibimbitaṃ tāṭaṅkayugalaṃ yasya saḥ taṃ 
catuścakraṃ catvāri cakrāṇi rathacaraṇāni yasya taṃ 
catuścakraṃ manye śaṅke | tava bhavatyā mukhaṃ āsyaṃ idaṃ 
hṛdayakamale paridṛśyamānaṃ manmatharathaṃ madanasya syandanaṃ 
yaṃ rathaṃ āruhya adhiṣṭhāya druhyati aparādhyati vidhyatīti 
yāvat | avanirathaṃ bhūmirathaṃ arkenducaraṇaṃ arkendū 
sūryacandrau tāveva caraṇau yasya saḥ mahāvīraḥ 
catuścakrarathārohaṇamahimnā apratihatapratāpaḥ māraḥ manmathaḥ 
pramathapataye tripurāntakāya sajjitavate sajjaṃ kurvate sannaddhaṃ 
kurvata ityarthaḥ || 

atretthaṃ padayojanā he bhagavati ! tava idaṃ mukhaṃ 
sphuradgaṇḍābhogapratiphalitatāṭaṅkayugalaṃ catuścakraṃ 
manmatharathaṃ manye | yamāruhya māraḥ mahāvīraḥ san 

p. 147) 

avanirathamarkenducaraṇaṃ sajjitavate pramathapataye druhyati | 
krudhadruherṣyāsūyārthānāṃ yaṃ prati kopaḥ iti caturthī || 

atra pūrvārdhe utprekṣālaṅkāraḥ bhagavatyāḥ mukhasya 
rathatvenotprekṣaṇāt | dvitīyārdhe ārohaṇasya 
mahāvīratvasampādakatvakathanāt padārthahetukaṃ 
kāvyaliṅgamalaṅkāraḥ | parameśvarasya manmathena sārdhaṃ 
yuddhasannāhāsaṃbandhe'pi saṃbandhakathanādatiśayoktiḥ | 
kāvyaliṅgātiśayoktyoraṅgāṅgibhāvena saṅkaraḥ | 
utprekṣāyāstu kāvyaliṅgaṃ pratyanuprāṇakataiva na saṃsṛṣṭiḥ 
nāpi saṅkaraḥ iti dhyeyam | pṛthaksthityā upakārakamanuprāṇakam 
| apṛthaksthityā prayojakaṃ upasarjanam | pṛthaksthityā 
prayojakamaṅgam | etadvilakṣaṇaṃ 
saṃsṛṣṭirityālaṅkārikamatarahasyam | etacca pūrvamuktamapi 
spaṣṭārthaṃ punaḥ pratipāditamiti || 59 || 

sarasvatyāḥ sūktīramṛtalaharīkauśalaharīḥ pibantyāḥ 
śarvāṇi śravaṇaculukābhyāmaviralam | 
camatkāraślāghācalitaśirasaḥ kuṇḍalagaṇo haṇatkāraistāraiḥ 
prativacanamācaṣṭa iva te || 60 || 

sarasvatyāḥ bhāratyāḥ sūktīḥ madhuravacāṃsi 
amṛtalaharīkauśalaharīḥ amṛtalaharyāḥ sudhāpravāhotsekasya 
kauśalaṃ saubhāgyaṃ harantīti tāḥ | hariśabdaḥ auṇādiko 
nipratyayāntaḥ kṛdikārādaktino vā ṅīṣ vaktavyaḥ iti ṅīṣ | 
pibantyāḥ dhayantyāḥ śarvāṇi ! śarvasya parameśvarasya patni ! 
śravaṇaculukābhyāṃ culukaṃ prasṛtyardhaṃ śravaṇe śrotre 
culuke tābhyāṃ aviralaṃ yathā bhavati tathā sāvadhānenetyarthaḥ 
| camatkāraślāghācalitaśirasaḥ 
camadityavyayamāścaryānukaraṇavāci | 

p. 148) 

kāraśabdaḥ svarūpaparaḥ | yadvā sukhaduḥkhodbhūtānandaiḥ 
haṭhotthitacittavikriyā camatkāraḥ 
sasītkāraśarīrollāsanādikṛt | camatkāraślāghāsu 
āścaryānukaraṇasandoheṣu calitaṃ śiro yasyāstasyāḥ 
kuṇḍalagaṇaḥ karṇābharaṇasamūhaḥ jhaṇatkāraiḥ 
jhaṇadityavyayaṃ bhūṣaṇaravānukaraṇe | kāraśabdaḥ 
svarūpavācī | jhaṇatkāraiḥ tāraiḥ atibahulaiḥ uccataraiḥ 
prativacanaṃ pratiśabdaṃ anumodavacanaṃ ācaṣṭa iva te || 

atretthaṃ padayojanā he śarvāṇi ! te amṛtalaharīkauśalaharīḥ 
sūktīḥ śravaṇaculukābhyāmaviralaṃ pibantyāḥ 
camatkāraślāghācalitaśirasaḥ sarasvatyāḥ kuṇḍalagaṇaḥ 
tāraiḥ jhaṇatkāraiḥ prativacanamācaṣṭa iva || 

atra uttarārdhe utprekṣālaṅkāraḥ jhaṇatkārāṇāṃ 
prativacanatvena saṃbhāvanāt | pūrvordhe atiśayoktiralaṅkāraḥ 
sarasvatyāḥ śiraḥkampanasaṃbandhābhāve'pi 
saṃbandhokterasaṃbandhe saṃbandhanibandhanāt | 
ubhayoraṅgāṅgibhāvena saṅkaraḥ || 60 || 

asau nāsāvaṃśastuhinagirivaṃśadhvajapaṭi tvadīyo nedīyaḥ 
phalatu phalamasmākamucitam | vahatyantarmuktāḥ 
śiśirakaraniḥśvāsagalitaṃ samṛddhyā yattāsāṃ bahirapi ca 
muktāmaṇidharaḥ || 61 || 

asau paridṛśyamānaḥ nāsāvaṃśaḥ nāsā nāsikā vaṃśaḥ 
vaṃśadaṇḍaḥ rupakametat | tuhinagirivaṃśadhvajapaṭi ! 
tuhinagireḥ himācalasya vaṃśasya anvayasya dhvajapaṭi patāke ! 
tvadīyaḥ bhavadīyaḥ nedīyaḥ sannikṛṣṭataraṃ phalatu 
niṣpādayatu | phalaṃ iṣṭārthaṃ asmākaṃ matsaṃbandhināṃ mama 
cetyarthaḥ | ucitaṃ kriyāviśeṣaṇametat yathepsitaṃ vahati 
dhārayati | antaḥ abhyantare 

p. 149) 

muktāḥ muktāmaṇīn śiśirakaṇaniśvāsagalitaṃ śiśirakaraḥ 
candraḥ tasya niśvāso vāmanāḍīmārgavāyuḥ tena galitaṃ sṛtaṃ 
samṛddhyā ādhikyena yat yasmātkāraṇāt tāsāṃ muktānāṃ 
bahirapi ca bāhyapradeśe'pi nāsikāgravāmabhāge'pītyarthaḥ | 
nāsikākārito vaṃśadaṇḍaḥ muktāmaṇidharaḥ muktāmaṇiṃ 
dhṛtavān | muktāmaṇimadhāt iti samyakpāṭhaḥ || 

atretthaṃ padayojanā he tuhinagirivaṃśadhvajapaṭi ! tvadīyo'sau 
nāsāvaṃśaḥ asmākaṃ ucitaṃ nedīyaḥ phalaṃ phalatu | saḥ 
antaḥ muktāḥ vahati | yadyasmātkāraṇāt tāsāṃ samṛddhyā 
śiśirakaraniśvāsalagalitaṃ bahirapi ca muktāmaṇidharaḥ || 

atra nāsikāyāḥ vaṃśatvāropaṇāt rūpakam | 
vaṃśatvasādhakapratipādakaṃ uttarārdham | vaṃśagarbhe 
mauktikāni udbhavantīti lokaśāstramaryādā | ato 
nāsāvaṃśadaṇḍe'pi abhyantare mauktikānyudbhūtāni vartante | no 
cennāsādaṇḍasya bahiḥ muktāmaṇidharatvaṃ kathaṃ saṅghaṭata 
ityarthāpattyā vaṃśadaṇḍākāro nāsikāyāḥ samarthita iti 
rūpakameva samyak || 61 || 

prakṛtyā''raktāyāstava sudati dantacchadaruceḥ pravakṣye 
sādṛśyaṃ janayatu phalaṃ vidrumalatā | na bimbaṃ 
tadbimbapratiphalanarāgādaruṇitaṃ tulāmadhyāroḍhuṃ kathamiva 
vilajjeta kalayā || 62 || 

prakṛtyā svabhāvena āraktāyāḥ ātāmrāyāḥ tava sudati 
śobhanāḥ dantāḥ yasyāḥ tasyāḥ sambuddhiḥ | dantacchadaruceḥ 
dantacchadayoroṣṭhayoḥ ruceḥ saubhāgyasya pravakṣye prakarṣeṇa 
kathaye | sādṛśyaṃ sadṛśasya bhāvaḥ sādṛśyaṃ janayatu 
utpādayatu | 

p. 150) 

āśaṃsāyāṃ loṭ | vidrumasya phalaṃ yadi syāt tadā 
sadṛśavastusadbhāvaḥ na tu vidrumamātraṃ sadṛśamiti | phalaṃ 
pakvaphalaṃ pītavarṇābhyo latābhyaḥ utpannaṃ phalaṃ atiriktaṃ 
raktalatotpannasya raktimā kimu vaktavya iti tadeva sadṛśamiti 
tātparyam | vidrumalatā pravālalatikā | na bimbaṃ bimbaphalaṃ 
tadbimbapratiphalanarāgāt tayoḥ dantacchadayoḥ bimbasya 
pratiphalanaṃ pratibimbanaṃ tena rāgaḥ raktimā tasmāt | 
bimbaphalamiti vyavahāraḥ adharabimbapratibimbaprasādāsādit 
anyathā tasya bimbavyavahāro na syāt | yathā sphaṭikādau 
japākusumādeḥ pratibimbavaśādeva sphaṭikādīnāṃ raktatā evaṃ 
bimbaphalasyāpīti | tadbimbapratiphalanarāgāt aruṇitaṃ 
tulāmadhyāroḍhuṃ tulāyāṃ sāmyakathāyāṃ sthātuṃ kathamiva | 
iveti vākyālaṅkāre | vilañjeta vrīḍeta kalayā leśena || 

atretthaṃ padayojanā he sudati ! tava prakṛtyā āraktāyāḥ 
dantacchadaruceḥ sādṛśyaṃ pravakṣye | vidrumalatā phalaṃ 
janayatu | bimbaṃ punaḥ tadbimbapratiphalanarāgādaruṇitaṃ 
kalayāpi tulāmadhyāroḍhuṃ kathamiva na vilajjeta | 
lajjadhāturātmanepadī || 

atrātiśayoktiralaṅkāraḥ yadyarthoktau kalpanāt | dvitīyārdhe 
asambandhe saṃbandhanibandhanātiśayoktiḥ 
bimbapratiphalanāsaṃbandhe'pi saṃbandhakathanenābhedakathanāt | 
ubhayoḥ saṃsṛṣṭiḥ || 62 || 

smitajyotsnājālaṃ tava vadanacandrasya pibatāṃ 
cakorāṇāmāsīdatirasatayā cañcujaḍimā | ataste 
śītāṃśoramṛtalaharīmāmlarucayaḥ pibanti svacchandaṃ niśi 
niśi bhṛśaṃ kāñjikadhiyā || 63 || 

p. 151) 

smitajyotsnājālaṃ smitamīṣaddhasitameva jyotsnā tasyāḥ jālaṃ 
vitānaṃ tava vadanacandrasya vadanameva candraḥ tasya pibatāṃ 
āsvādayatāṃ cakorāṇāṃ pakṣiviśeṣāṇāṃ āsīt atirasatayā 
atimādhuryāt cañcujaḍimā jihvājāḍyam | ataḥ kāraṇāt te 
cakorāḥ śītāṃśoḥ candrasya amṛtalaharīṃ amṛtasya sudhāyā 
utsekaṃ jyotsnāmṛtamityarthaḥ | āmlarucayaḥ āmle amlarase 
rucirvāñchā yeṣāṃ te āmlarucayaḥ pibanti bhakṣayanti | 
svacchandaṃ yathecchaṃ niśiniśi pratiniśaṃ jyotsnāsviti śeṣaḥ 
| bhṛśaṃ atyarthaṃ kāñjikadhiyā āranālabhrāntyā || 

atretthaṃ padayojanā he bhagavati ! tava vadanacandrasya 
smitajyotsnājālaṃ pibatāṃ cakorāṇāṃ atirasatayā cañcujaḍimā 
āsīt ataste āmlarucayaḥ śītāṃśoramṛtalaharīṃ kāñjikadhiyā 
svacchandaṃ niśiniśi bhṛśaṃ pibanti || 

atra atiśayoktiralaṅkāraḥ 
cañcujaḍimanibandhanajyotsnāpānāsambandhe'pi tatsambandhakathanāt 
atimadhurastanyapānaprasaktajihvājāḍyanibandhanāmlapipāsubhiḥ 
bālakairabhedādhyavasānasya pratīteḥ || 63 || aviśrāntaṃ 
patyurguṇagaṇakathāmreḍanajapā japāpuṣpacchāyā tava janani 
jihvā jayati sā | yadagrāsīnāyāḥ sphaṭikadṛṣadacchacchavimayī 
sarasvatyā mūrtiḥ pariṇamati māṇikyavapuṣā || 64 || 

aviśrāntaṃ anārataṃ patyuḥ sadāśivasya 
guṇagaṇakathāmreḍanajapāguṇānāṃ tripuravijayādīnāṃ gaṇaḥ 
samūhaḥ tasya kathā vṛttāntaḥ tasya āmreḍanaṃ 

p. 152) 

dvistriruktiḥ tadeva japo yasyāssā ananyamanasketyarthaḥ | 
japāpuṣpacchāyā japāpuṣpaṃ raktapuṣpīpuṣpaṃ tasya chāyeva 
chāyā kāntiḥ yasyāḥ sā | tava janani ! he mātaḥ ! jihvā 
rasanā jayati sphurati | sā tacchabdo vartiṣyamāṇāṃ prasiddhiṃ 
parāmṛśati | yadagrāsīnāyāḥ yasyā jihvāyāḥ agre 
āsīnāyāḥ niṣaṇṇāyāḥ sphaṭikadṛṣadacchacchavimayī 
sphaṭikadṛṣadaḥ sphaṭikopalasyeva acchā chaviḥ kāntiḥ tayā 
pracurā | prācuryārthe mayaṭ | sphaṭikadhavaletyarthaḥ | 
sarasvatyāḥ bhāratyāḥ mūrtiḥ svarūpaṃ pariṇamati 
vikāramāpadyate rūpāntaraṃ prāpnotīti yāvat | māṇikyavapuṣā 
padmarāgavapuṣā || 

atretthaṃ padayojanā he janani ! tava sā jihvā aviśrāntaṃ patyuḥ 
guṇagaṇakathāmreḍanajapā japāpuṣpacchāyā jayati 
yadagrāsīnāyāḥ sarasvatyāḥ sphaṭikadṛṣadacchacchavimayī 
mūrtiḥ māṇikyavapuṣā pariṇamati | jihvāyāṃ raktatvamātraṃ na 
bhavati | taṭasthānāṃ raktīkaraṇe raktimnaḥ śaktirapi | ata eva 
jayatīti prayuktam || 

tadguṇālaṅkāraḥ tadguṇaḥ 
svaguṇatyāgādanyotkṛṣṭaguṇāhṛtiḥ iti lakṣaṇāt | devyāḥ 
vadanāmbuje sarvadā sarasvatī svamūrtyā vasatītyāgamarahasyam || 
64 || 

raṇe jitvā daityānapahṛtaśirastraiḥ kavacibhiḥ 
nivṛttaiścaṇḍāṃśatripuraharanirmālyavimukhaiḥ | 
viśākhendropendraiḥ śaśiviśadakarpūraśakalāḥ vilīyante 
mātastava vadanatāmbūlakabalāḥ || 65 || 

p. 153) 

raṇe yuddhe jitvā parājitān kṛtvā daityān apahṛtaśirastraiḥ 
[apahṛtāni śiroveṣṭanāni yaistaiḥ 
svāmikārthanirvartanānantaraṃ sevakānāṃ rājasaṃmukhe 
praṇāmavelāyāṃ uṣṇīṣaśirastrādikaṃ nirmucya praṇāmaḥ 
kartavya iti paripāṭī tāṃ 
paripāṭīmāśrityāha-apahṛtaśirastrairiti ||] kavacibhiḥ 
varmayuktaiḥ nivṛttaiḥ yuddhānnivṛttaiḥ 
caṇḍāṃśatripuranirmālyavimukhaiḥ caṇḍāṃśaḥ caṇḍabhāgaḥ 
caṇḍo nāma pramathaḥ tasya bhāgaḥ sa eva tripuraharasya 
nirmālyaṃ svīkṛtāvaśiṣṭaṃ gandhatāmbūlādi tatra vimukhaiḥ | 
haranirmālyaṃ parityājyam ityādismṛtayaḥ 
caṇḍāṃśarūpaharanirmālyaniṣedhaparā [viśeṣaparā] 
ityavagantavyamiti bodhayanti | bodhayanti | viśākhendropendraiḥ 
viśākhaḥ senānīḥ yuddheṣu tasyaiva prāmukhyamityagre gaṇanā 
indro mahendraḥ upendraḥ viṣṇuḥ taiḥ 
śaśiviśadakarpūraśakalāḥ candravadviśadāḥ karpūraśakalāḥ 
ghanasārakhaṇḍāḥ yeṣāṃ te | vilīyante vilayanaṃ kriyante | 
mātaḥ ! he janani ! tava vadanatāmbūlakabalāḥ 
vadananirgatāstāmbūlakabalāḥ || 

atretthaṃ padayojanā he mātaḥ ! raṇe daityān jitvā 
apahṛtaśirastraiḥ kavacibhiḥ nivṛttaiḥ 
caṇḍāṃśatripuraharanirmālyavimukhaiḥ viśākhendropendraiḥ 
śaśiviśadakarpūraśakalāḥ tava vadanatāmbūlakabalāḥ vilīyante 
|| 

ayamarthaḥ viśākhendropendrāḥ daityān saṃhṛtya bhagavatyāḥ 
kumāraṃ puraskṛtya pādavandanārthamāgatya śirastrāṇyapahārya 
pādopasaṅgrahaṇamakurvan | tadanantaraṃ prasannā bhagavatī 
īṣatkhāditān tāmbūlakabalān vitatāra | 
tadgatakarpūraśakalavilayanaparyantaṃ khāditavantaḥ ityuktyā 
etādṛśo'nugrahaḥ bhagavatyāḥ kumārasvāminyeva | indrādiṣvapi 
kvācitka ityabhiprāyaḥ || 65 || p. 154) 

vipañcyā gāyantī vividhamapadānaṃ paśupateḥ tvayā''rabdhe 
vaktuṃ calitaśirasā sādhuvacane | 
tadīyairmādhuryairapalapitatantrīkalaravāṃ nijāṃ vīṇāṃ 
vāṇī niculayati colena nibhṛtam || 66 || vipañcyā vīṇayā 
gāyantī gānaṃ kurvantī vividhaṃ anekaprakāraṃ 
tripuravijayadakṣayāgadhvaṃsahālāhaladhāraṇajalandharavadha-gajā 
suravadhādikaṃ apadānaṃ vṛttaṃ karma paśupateḥ īśvarasya 
tvayā bhavatyā ārabdhe upakrānte sati vaktuṃ nigadituṃ 
calitaśirasā antaḥ santoṣavaśāt svayaṃ śiraḥkampavatyā 
sādhuvacane madhuravacane tadīyaiḥ tasya vacanasya sambandhibhiḥ 
mādhuryaiḥ mādhuryaguṇaiḥ apalapitatantrīkalaravāṃ apalapitā 
apahasitāḥ svakīyatantrīkalaravāḥ yasyāḥ sā tāṃ nijāṃ 
svakīyāṃ vīṇāṃ vipañcīṃ vāṇī bhāratī niculayati 
niculavatīṃ karoti | niculaḥ kūrpāsaḥ | colena colaḥ 
kūrpāsaviśeṣaḥ vīṇākūrpāsaḥ | colena niculavatīṃ karotīti 
sāmānyaviśeṣabhāve na paunaruktyam | kecuttu bhojamatāvalambina 
āhuḥ culidhātuḥ tirodhānavācaka iti | nitarāṃ culayati 
acchādayatītyarthaḥ | nibhṛtaṃ gūḍhaṃ yathā bhavati tathā || 

atretthaṃ padayojanā he bhagavati ! paśupateḥ vividhaṃ apadānaṃ 
vipañcyā gāyantī tvayā vaktuṃ calitaśirasā sādhuvacane ārabdhe 
sati tadīyaiḥ mādhuryaiḥ apalapitatantrīkalaravāṃ nijāṃ 
vīṇāṃ vāṇī colena niculayati || 

atrātiśayoktiralaṅkāraḥ vīṇāyāḥ nicolanāsaṃbandhe'pi 
saṃbandhakathanāt 

p. 155) 

yaḥ parājito vaiṇikaḥ svavīṇāṃ colena niculayati tena 
sahābhedādhyavasāyapratīteḥ || 66 || 

karāgreṇa spṛṣṭaṃ tuhinagiriṇā vatsalatayā girīśenodastaṃ 
muhuradharapānākulatayā | karagrāhyaṃ śambhormukhamukuravṛttaṃ 
girisute kathaṃkāraṃ brūmastava cubukamaupamyarahitam || 67 || 

karāgreṇa agrakareṇa spṛṣṭaṃ saṃmṛṣṭaṃ tuhinagiriṇā 
himādriṇā janakena vatsalatayā vātsalyena pitrādīnāṃ 
putrādiṣu prītiḥ vātsalyaśabdenocyate | yathoktaṃ 
sarvajñasomeśvareṇa putrādau vātsalyaṃ patnyādau prema 
śiṣyādāvanugrahaḥ agrajādau bhaktiḥ | atra ādiśabdena 
gauṇaputragauṇapatnīgauṇaśiṣyagauṇāgrajāḥ gṛhyante iti | 
gauṇaputraḥ putratvena kalpitasaṃbandhaḥ na tu krītādiḥ tasya 
putratvāt | gauṇapatnī bhujiṣyā | gauṇaśiṣyaḥ śiṣyatvena 
kalpitasaṃbandha eva na tu svīkṛtamantragrahaṇamātraḥ | 
gauṇāgrajaḥ kalpitasaṃbandhaḥ na tu kṣetrajādiḥ | girīśena 
śambhunā udastaṃ unnamitaṃ muhuḥ atyarthaṃ adharapānākulatayā 
adharapānavyagratayā atipremṇetyarthaḥ | karagrāhyaṃ kareṇa 
gṛhītuṃ yogyaṃ mukhāvalokanacumbanavyagratayā śambhoḥ 
mukhamukuravṛntaṃ mukhameva mukuro darpaṇaḥ tasya vṛntaṃ 
tadādhāradaṇḍaḥ taṃ girisute ! himādritanaye ! kathaṃkāraṃ 
kathaṃkṛtvā brūmaḥ varṇayāmaḥ | vibhāṣā kathami liṅca iti 
liṅarthe saṃpradhāraṇāyāṃ laṭ | tava bhavatyāḥ cubukaṃ 
adharādhaḥkarṇikāṃ aupamyarahitaṃ upamārahitam | upamārāhityaṃ 
tu kamalakarṇikādarpaṇavṛntodayādriśikharaśilādīnāṃ 
śambhuhimagirikaropalālanājanitasaubhāgyātiśayābhāvena 
bhagavatīcubukasya tulanā nāstīti || 

p. 156) 

atretthaṃ padayojanā he himagirisute | tuhinagiriṇā vatsalatayā 
karāgreṇa spṛṣṭaṃ girīśena adharapānākulatayā muhurudastaṃ 
śaṃbhoḥ karagrāhyaṃ aupamyarahitaṃ tava mukhamukuravṛntaṃ 
cubukaṃ kathaṃkāraṃ brūma iti || 

atrānanvayālaṅkāro dhvanyate sarvopamāniṣedhena svasya svayameva 
sadṛśamityananvayālaṅkārapratīteḥ || 67 || 

bhujāśleṣānnityaṃ puradamayituḥ kaṇṭakavatī tava grīvā dhatte 
mukhakamalanālaśriyamiyam | svataḥ śvetā 
kālāgurubahulajambālamalinā mṛṇālīlālityaṃ vahati yadadho 
hāralatikā || 68 || 

bhujāśleṣāt bhujābhyāmāliṅganāt nityaṃ satataṃ puradamayituḥ 
purāntakasya kaṇṭakavatī saromāñcā tava grīvā kaṇṭhanālaḥ 
dhatte dadhati mukhakamalanālaśriyaṃ mukhameva kamalaṃ tasya 
nālaśriyaṃ daṇḍasaubhāgyaṃ iyaṃ grīvā svataḥ śvetā 
svabhāvataḥ svacchā kālāgurubahulajambālamalinā kālo 
nīlavarṇaḥ aguruḥ laghukāṣṭhaṃ kṛṣṇāgururityarthaḥ tasya 
bahulaḥ samṛddhaḥ jambālaḥ paṅkaḥ tena malinā malīmasā 
mṛṇālīlālityaṃ bisalatāsaubhāgyaṃ vahati prāpnoti | yat 
yasmātkāraṇāt adhaḥ adhaḥpradeśe hāralatikā muktāvaliḥ || 

atretthaṃ padayojanā he bhagavati ! taveyaṃ grīvā puradamayituḥ 
bhujāśleṣāt nityaṃ kaṇṭakavatī mukhakamalanālaśriyaṃ dhatte 
yat adhaḥ svataḥ śvetā kālāgurubahulajambālamalinā hāralatikā 
mṛṇālīlālityaṃ vahati || 

pūrvārdhe nidarśanālaṅkāraḥ mukhakamalanālaśriyamityatra 
śrīsadṛśī śrīriti pratibimbākṣepāt | rūpakamapyalaṅkāraḥ 
mukhakamalamityatra mukhe kamalatvarūpaṇāt | 

p. 157) 

anayoraṅgāṅgibhāvena saṅkaraḥ | uttarārdhe'pi 
nidarśanālaṅkāraḥ mṛṇālīlālityamityatra 
lālityasadṛśalālityamiti pratibimbākṣepāt | 
ubhayoraṅgāṅgibhāvena saṅkaraḥ || 68 || 

gale rekhāstisro gatigamakagītaikanipuṇe 
vivāhavyānaddhapraguṇaguṇasaṃkhyāpratibhuvaḥ | virājante 
nānāvidhamadhurarāgākarabhuvāṃ trayāṇāṃ grāmāṇāṃ 
sthitiniyamasīmāna iva te || 69 || 

gale kaṇṭhapradeśe rekhāḥ bhāgyarekhāḥ valīrūpāḥ tisraḥ- 

lalāṭe ca gale caiva madhye cāpi valitrayam | strīpuṃsayoridaṃ 
jñeyaṃ mahāsaubhāgyasūcakam || 

iti sāmudrikam | gatigamakagītaikanīpuṇe ! gatiḥ saṅgītagatiḥ 
saṅgītasya dve gatī mārgo deśī ceti | gamakaḥ svarasya kampaḥ- 

svarasya gamakaḥ kampaḥ sa ca pañcavidhassmṛtaḥ | 

iti bharate | te ca pañcaprakārāstatraiva jñātavyāḥ | gītaṃ 
dhātumātvātmakaṃ dvividham | 

vāṅmāturucyate geyaṃ dhāturityabhidhīyate | iti || 

tatra ekā mukhyā cāsau nipuṇā ca tasyāḥ sambuddhiḥ | 
vivāhavyānaddhapraguṇaguṇasaṅkhyāpratibhuvaḥ vivāhe 
udvāhasamaye vyānaddhāḥ viśeṣeṇa maṅgalasūtrabandhanānantaraṃ 
tatsamīpe ā samantāt kaṇṭhaṃ kṛtsnamāvṛtya naddhāḥ baddhāḥ 
praguṇaguṇāḥ bahutantunirmitasūtrāṇi | tāni trīṇyeva 
yathoktaṃ gṛhyakāraiḥ- 

māṅgalyatantunānena badhvā maṅgalasūtrakam | vāmahaste saraṃ 
badhvā kaṇṭhe ca trisaraṃ tathā || iti | 

p. 158) 

idaṃ cānuṣṭhānaṃ deśato vyavasthāpitam | ata eva kvaciddeśe 
maṅgalasūtrabandhanaṃ kvaciddeśe saratrayabandhanaṃ ca 
kvacidubhayamapi nāstīti | asya mataṃ sarvatrāstīti | yadvā 
granthakṛto deśe etadubhayānuṣṭhānaṃ vidyata eveti jñeyam | 
praguṇaguṇānāṃ saṅkhyā tritvaṃ tasyāḥ pratibhuvaḥ | tathā 
pratibhūḥ uttamarṇasya adhamarṇaṃ jñāpayati evaṃ saṅkhyāṃ 
jñāpayatīti pratibhuva ityuktam | saṅkhyājñāpakāḥ 
asmadāśrayakaṇṭhe śaṃbhunā pūrvaṃ bhagavatīvivāhasamaye 
saratrayamasmin sthale baddhamiti draṣṭṝṇāṃ jñāpayati 
valitrayamiti bhāvaḥ | virājante atitarāṃ prakāśante | 
nānāvidhamadhurarāgākarabhuvāṃ nānāvidhāḥ anekaprakārāḥ 
madhurāḥ manoramāḥ rāgāḥ teṣāmākarabhuvaḥ khanisthānāni 
[svarasthānāni] āśrayabhūtāḥ teṣām || 

ayamarthaḥ gītayaḥ [gatayaḥ] pañca tadutthāḥ grāmarāgāḥ 
triṃśat uparāgāḥ aṣṭau rāgāstu viṃśatiḥ janakarāgāḥ 
pañcadaśa bhāṣārāgāḥ ṣaṇṇavatiḥ vibhāṣārāgāḥ 
viṃśatiḥ āntarā bhāṣāśca trayaḥ ityādikaṃ 
rāgādhyāyapratipādyamatrāvagantavyam | te ca rāgāḥ prasiddhāḥ 
madhyamāvatīmālavīśrībhairavīvaṅgālīvasantādhanyāsīdeśyād 
ikaṃ rāgāṅgam | 
velāvatīśuddhavarālīpunnāgavarālīnāṭyādikaṃ bhāṣāṅgam | 
rāmakriyādikaṃ kriyāṅgam | pravīdhī [draviḍī] 
ghūrjarīvarālīmalaharīpramukhaṃ upāṅgaṃ [uparāgam] ca 
rāgaśabdena saṅgṛhītaṃ ityuktaṃ 
nānāvidhamadhurarāgākarabhuvāṃ iti | trayāṇāṃ grāmāṇāṃ 
grāmaśabdaḥ samūhavācakaḥ sarve svarāḥ tredhā saṃhatāḥ 
ṣaḍjagrāmo madhyamagrāmo gāndhāragrāmaḥ iti tredhā 
svarasaṃhatiḥ | tatra bhūloke grāmadvayasyaiva prasaraḥ | 
saptasvarāṇāmārohāvarohakrameṇa mūrchanāśrayatvam | tacca 
mandramadhyatārātmanā tredhā bhavati | gāndhāragrāmasya 
śarasthānatvānmandrādikrameṇopakramāsaṃbhavāt gāndhāragrāmo 
devaloke prasṛtaḥ | yathoktaṃ śārṅgadevena- 

p. 159) 

grāmaḥ svarasamūhassyānmūrchanādessamāśrayaḥ | tau dvau 
dharātale syātāṃ ṣaḍjagrāmastathādimaḥ [tadādimaḥ] || 
dvitīyo madhyamagrāmaḥ tayorlakṣaṇamucyate | kramātsvarāṇāṃ 
saptānāmarohaścāvarohaṇam || mūrchanetyucyate grāmadvaye tāḥ 
sapta sapta ca || iti || 

etāḥ mūrchanāḥ śuddhatānāḥ ityucyante | ataśca bhagavatyāḥ 
kaṇṭhavalitrayavarṇanāyāṃ grāmatrayakathanaṃ 
devalokavyavahārādyujyata ityanusandheyam | teṣāṃ grāmāṇāṃ 
sthitiniyamasīmānaḥ sthiteḥ avasthānasya niyamārthaṃ parasparaṃ 
grāmāṇāṃ saṅkaro mā bhūditi teṣāmante racitāḥ sīmānaḥ 
setava iva te tava || 

atretthaṃ padayojanā he bhagavati ! gatigamakagītaikanipuṇe ! te 
gale tisro rekhāḥ vivāhavyānaddhapraguṇaguṇasaṅkhyāpratibhuvaḥ 
nānāvidhamadhurarāgākarabhuvāṃ trayāṇāṃ grāmāṇāṃ 
sthitiniyamasīmāna iva virājante || 

pūrvārdhe anumānālaṅkāraḥ rekhāgatatritvasya 
maṅgalasaratritvānumāpakatvāt | anumānasya vicchityātmakatvaṃ 
laukikālaṅkāravailakṣaṇyādeva | tadvailakṣaṇyaṃ ca 
pakṣadharmatāmātrāt vyāptyabhāva eva ubhayasadbhāve laukikameva 
syāditi rahasyam | vicchittiralaukikī śobhā | uttarārdhe 
utprekṣālaṅkāraḥ bhagavatyāḥ 
kaṇṭhamadhyavartisvaragrāmatritayahetucihnatayā valitrayasya 
saṃbhāvanāt || 69 || 

mṛṇālīmṛdvīnāṃ tava bhujalatānāṃ catasṛṇāṃ caturbhiḥ 
saundaryaṃ sarasijabhavasstauti vadanaiḥ | nakhebhyaḥ saṃtrasyan 
prathamamathanādandhakaripoḥ caturṇāṃ śīrṣāṇāṃ 
samamabhayahastārpaṇadhiyā || 70 || p. 160) 

mṛṇālī bisalatā tadvat mṛdvīnāṃ mṛdūnāṃ voto guṇavacanāt 
iti ṅīp | tava bhavatyāḥ bhujalatānāṃ bāhulatānāṃ 
catasṛṇāṃ caturbhiḥ saundaryaṃ saubhāgyaṃ sarasijabhavo brahmā 
stauti prastauti | vadanaiḥ vaktraiḥ nakhebhyaḥ karajebhyaḥ 
sakāśāt saṃtrasyan bibhyat mītrārthānāṃ bhayahetuḥ 
ityapādāne pañcamī | prathamamathanāt pūrvaṃ marditavataḥ | 
kartari lyuṭ | yadāha vṛttikāraḥ voto guṇavacanāt ityatra 
guṇamuktavān guṇavacanaḥ iti | 

brahmaṇaḥ pañcamaśiraḥ nakhāgreṇācchinaddharaḥ | 

iti purāṇam | tasmāt prathamamathanāt andhakaripoḥ sadāśivasya 
caturṇāṃ śīrṣāṇāṃ śirasāṃ samaṃ sakṛdeva 
abhayahastārpaṇadhiyā abhayahastāngrahītukāma ityarthaḥ || 

atretthaṃ padayojanā he bhagavati ! tava mṛṇālīmṛdvīnāṃ 
catasṛṇāṃ bhujalatānāṃ saundaryaṃ sarasijabhavaḥ 
caturbhirvadanaiḥ prathamamathanāt andhakaripoḥ nakhebhyaḥ 
saṃtrasyan samaṃ caturṇāṃ śīrṣāṇāṃ abhayahastārpaṇadhiyā 
stauti || 

kāvyaliṅgamalaṅkāraḥ brahmaikaniyatastotrasya nakhebhyaḥ 
saṃtrasyan ityādinā samarthanāt | vākyārthahetukaṃ 
kāvyaliṅgamiti dhyeyam | bhujalatāvarṇane brahmaṇa evādhikāro 
nānyeṣāmiti kāvyaliṅgena dhvanyate vastviti alaṅkāreṇa 
vastudhvaniḥ || 70 || 

nakhānāmudyotairnavanalinarāgaṃ vihasatā karāṇāṃ te kāntiṃ 
kathaya kathayāmaḥ kathamume | kayācidvā sāmyaṃ bhajatu kalayā 
hanta kamalaṃ yadi krīḍallakṣmīcaraṇatalalākṣārasacaṇam || 71 
|| 

p. 161) 

nakhānāṃ nakharāṇāṃ udyotaiḥ prabhāpaṭalaiḥ navanalinarāgaṃ 
prātarvikasitāmbujakāntiṃ vihasatāṃ apalapatāṃ karāṇāṃ 
hastānāṃ te tava kāntiṃ śobhāṃ kathaya vada kathayāmaḥ 
kāvyaprabandhaṃ racayāmaḥ kathaṃ kena prakāreṇa ume ! pārvati ! 
kayācidvā vidhayā | vetyasaṃśaye saṃśayoktiḥ | kenāpi 
prakāreṇa nāstītyarthaḥ | sāmyaṃ sādṛśyaṃ bhajatu svīkarotu 
kalayā leśenāpi hanta ! vākyārambhe- 

hanta harṣe'nukampāyāṃ vākyārambhaviṣādayoḥ | 

ityamaraḥ | kamalaṃ padmam yadi saṃśaye tathāpi sandeha ityarthaḥ 
| krīḍallakṣmīcaraṇatalalākṣārasacaṇaṃ krīḍantyāḥ 
lakṣmyāḥ padmālayāyāḥ caraṇatalayoḥ lākṣārasena caṇaṃ 
vittaṃ yuktam | tena vittaścuñcupcaṇapau iti caṇap || 

atretthaṃ padayojanā he ume ! nakhānāmudyotaiḥ navanalinarāgaṃ 
vihasatāṃ te karāṇāṃ kāntiṃ kathaṃ kathayāmaḥ kathaya 
kamalaṃ kalayāpi sāmyaṃ kayācidvā bhajatu | hanta kamalaṃ 
krīḍallakṣmīcaraṇatalalākṣārasacaṇaṃ yadi tadā hi sāmyaṃ 
bhajatviti | yadvā kayācidvā sāmyaṃ bhajatu vidhayeti pāṭhaḥ | 
tadā hanta ! kamalaṃ kayācidvā vidhayā sāmyaṃ bhajatu prāpnotu 
ityanvayaḥ | tāmeva vidhāmāhayadi 
krīḍallakṣmīcaraṇatalalākṣārasacaṇaṃ tadā 
nānyathetyekavākyatayā anvayaḥ || 

atrātiśayoktiralaṅkāraḥ yadyarthoktyā'tiśayakalpanāt | 
pūrvārdhe tadguṇālaṅkāraḥ nakhakāntibhiratiraktatvāt karāṇām 
| navanalinarāgaṃ vihasatāmityatra upamālaṅkāraḥ 
ubhayossaṃsṛṣṭiḥ apṛthaksthityā prayojakatvāt ubhayoḥ 
saṃsṛṣṭiḥ || 71 || 

samaṃ devi skandadvipavadanapītaṃ stanayugaṃ tavedaṃ naḥ khedaṃ 
haratu satataṃ prasnutamukham | 

p. 162) 

yadālokyāśaṅkākulitahṛdayo hāsajanakaḥ svakumbhau herambaḥ 
parimṛśati hastena jhaḍiti || 72 || 

samaṃ tulyakālaṃ devi ! bhagavati ! skandadvipavadanapītaṃ skandaḥ 
kumāraḥ dvipavadano vināyakaḥ tābhyāṃ pītaṃ stanayugaṃ 
kucadvandvaṃ tava bhavatyāḥ idaṃ naḥ asmākaṃ khedaṃ kleśaṃ 
haratu apanudatu | satataṃ sarvadā prasnutamukhaṃ kṣīrasrāvimukham 
yat kucadvandvaṃ ālokya vilokya āśaṅkākulitahṛdayaḥ 
āśaṅkāyāḥ madīyau kumbhau apahṛtavatītyāśaṅkāyāḥ 
ākulitaṃ avaskanditaṃ vyagrataramityarthaḥ tādṛśaṃ hṛdayaṃ 
mano yasya hāsajanakaḥ mātāpitroḥ (kumārasya ca) | asau bāliśa 
iti premṇā hasitavantāvityarthaḥ | svasya kumbhau kumbhasthale 
herambaḥ vināyakaḥ parimṛśati parāmṛśati | vidyate na veti 
hastena nimārṣṭītyarthaḥ ! jhaḍati śīghram || 

atretthaṃ padayojanā he devi ! tava samaṃ skandadvipavadanapītaṃ 
idaṃ stanayugaṃ prasnutamukhaṃ naḥ khedaṃ satataṃ haratu yat 
ālokya āśaṅkākulitahṛdayaḥ herambaḥ hāsajanakaḥ hastena 
jhaḍiti svakumbhau parimṛśati || 

yasyāḥ putrau jagatpūjyapādau vināyakakumārasvāmināviti devyāḥ 
sarvātiśāyi māhātmyaṃ iti pratīyate | devyāḥ kucakumbhasāmyaṃ 
yadi syāttadā vināyakakumbhayoreva taulyamityatiśayoktirapi 
pratīyate | vināyakaḥ hastena parimṛśatītyanena 
vināyakakumbhayostulyau devīkucāveveti upameyopamāpi dhvanyate | 
vastvalaṅkāradhvanīnāṃ ekavyañjakānupraveśena saṅkaraḥ || 72 
|| 

amū te vakṣojāvamṛtarasamāṇikyakutupau na saṃdehaspando 
nagapatipatāke manasi naḥ | 

p. 163) 

pibantau tau yasmādaviditavadhūsaṅgarasikau kumārāvadyāpi 
dviradavadanakauñcadalanau || 73 || 

amū paridṛśyamānau te tava vakṣojau kucau 
amṛtarasamāṇikyakutupau amṛtarasasya māṇikyakutupau 
amṛtarasapūritamāṇikyakutupāvityarthaḥ | kutupaśabdo yadyapi 
carmanirmitadhṛtatailādyādhārabhūtaghaṭasannibhapātrīvācakaḥ 
tathāpi tasyāḥ bhagavatīstanasādṛśyāvagāhane anadhikārāt 
tadarthaṃ māṇikyaracitatvamaṅgīkṛtaṃ kutupayoḥ | na 
sandehaspandaḥ sandehasya spandanaṃ leśamātramiti yāvat | 
nagapatipatāke ! manasi naḥ asmākaṃ pibantau tau māṇikyakutupau 
yasmāt kāraṇāt aviditavadhūsaṅgarasikau kumārau śiśū bhūtvā 
adyāpi idānīmapi ślokaracanākāle'pi dviradavadanakrauñcadalanau 
dviradavadano vināyakaḥ krauñcadalanaḥ krauñcādribhedanaḥ 
kumārasvāmī tau || 

atretthaṃ padayojanā he nagapatipatāke ! amū te vakṣojau 
amṛtarasamāṇikyakutupau | asminnarthe naḥ manasi sandehaspando 
nāsti | yasmāttau pibantau aviditavadhūsaṅgarasikau 
dviradavadanakrauñcadalanau adyāpi kumārau bhavataḥ || 

atra vākyārthahetukaṃ kāvyaliṅgamalaṅkāraḥ spaṣṭa eva | 
pūrvapāde rūpakaṃ vakṣojayoḥ kutupatvenāropaṇāt | yadvā 
niścayāntassandehaḥ imau vakṣojau uta kutupāviti sandehe 
kutupāveveti niścayaḥ yato'mṛtapānāt kumārayoḥ śiśutvam | 
stanyapānamātrāt śiśutvāvasthaiveti niyamo nāsti 
śaiśavānantaraṃ yauvanāderanubhūtatvāditi [anubhāvyatvāditi] | 
vināyakakumārayostu sarvadā śiśutvaṃ amṛtapānavaśādeveti 
amṛtarasakutupasandehāpanayane sādhakaṃ pramāṇaṃ 
dvitīyārdhaprameyamiti sūktaṃ niścayāntassandeha iti | 

p. 164) 

kavikalpitakoṭidvayasyāvācyatvaṃ nāsti iti maṅkhukaḥ || 73 || 

vahatyamba stamberamadanujakumbhaprakṛtibhiḥ samārabdhāṃ 
muktāmaṇibhiramalāṃ hāralatikām | kucābhogo 
bimbādhararucibhirantaśśabalitāṃ pratāpavyāmiśrāṃ 
puradamayituḥ kīrtimiva te || 74 || 

vahati dadhati | amba ! mātaḥ ! stamberamadanujakumbhaprakṛtibhiḥ 
stamberamadanujaḥ gajāsuraḥ tasya kumbhasthalameva prakṛtiḥ 
janmabhūmiḥ yeṣāṃ taiḥ gajakumbheṣu muktāmaṇaya udbhavanti | 
yathoktaṃ sarvajñasomeśvareṇa- 

gajakumbheṣu vaṃśeṣu phaṇāsu jaladeṣu ca | 
śuktikāyāmikṣudaṇḍe ṣoḍhā mauktikasaṃbhavaḥ || gajakumbhe 
karburābhāḥ vaṃśe raktasitāḥ smṛtāḥ | phaṇāsu vāsukereva 
nīlavarṇā prakīrtitāḥ || jyotirvarṇāstu jalade śuktikāyāṃ 
sitāḥ smṭāḥ | ikṣudaṇḍe pītavarṇāḥ maṇayo mauktikāḥ 
smṛtāḥ || iti | 

gajakumbhaprakṛtayo mauktikamaṇayaḥ karburavarṇāḥ 
gajāsurakumbhaprakṛtayastu viśeṣata eveti bhāvaḥ | samārabdhāṃ 
khacitāṃ muktāmaṇibhiḥ mauktikaiḥ amalāṃ trāsādidoṣarahitāṃ 
na tu śvetāṃ gajakumbhodbhavānāṃ karburatvāt | hāralatikāṃ 
muktāvaliṃ kucābhogaḥ kucamadhyapradeśaḥ bimbādhararucibhiḥ 
bimbākāro'dharo bimbādharaḥ | śākapārthivāditvātsādhuḥ | 
bimbādharasya adharabimbasyeva rucibhiḥ antaśśabalitāṃ 
sañjātacitravarṇām- 

p. 165) 

citrakimmīrakalmāṣaśabalaitāśca karbure | 

ityamaraḥ | adharakāntisaṃvalitā śuktimuktāmaṇimālikeva 
bhātīti bhāvaḥ | pratāpavyāmiśrāṃ puradamayituḥ 
tripurāntakasya kīrtimive te tava | pratāpastu raktavarṇaḥ 
kīrtistu śvetavarṇeti mahākaviprasiddhiḥ | ata evāsya kaveḥ 
gajakumbhodbhavāḥ maṇayaḥ pāṭalavarṇāḥ na śabalavarṇāḥ 
antaśśabalitāmityuktirapi pāṭalavarṇaparetyabhiprāya 
ityanusandheyam || 

atretthaṃ padayojanā he amba ! te kucābhogaḥ 
stamberamadanujakumbhaprakṛtibhiḥ muktāmaṇibhiḥ samārabdhāṃ 
amalāṃ hāralatikāṃ bimbādhararucibhiḥ antaḥ śabalitāṃ 
pratāpavyāmiśrāṃ puradamayituḥ kīrtimiva vahati || 

atrotprekṣālaṅkāraḥ hāralatikāyāḥ pratāpasaṃvalitakīrtitvena 
saṃbhāvanāt bimbādhararucibhirityatra utprekṣā svabhāvato 
raktavarṇeṣu bimbādhararucibhiḥ saṃvalanādiveti 
hetorutprekṣaṇāt | ubhayoranuprāṇyānuprāṇakabhāvena 
saṃbandhaḥ apṛthaksthityā upakārakatvāt || 74 || 

tava stanyaṃ manye dharaṇidharakanye hṛdayataḥ payaḥpārāvāraḥ 
parivahati sārasvatamiva | dayāvatyā dattaṃ dravilaśiśurāsvādya 
tava yat kavīnāṃ prauḍhānāmajani kamanīyaḥ kavayitā || 75 || 

tava stanyaṃ stanodbhavaṃ kṣīraṃ manye jānāmi | 
dharaṇidharakanye ![tuhinagirikanye] hṛdayataḥ hṛdayāt 
payaḥpārāvāraḥ kṣīrasamudraḥ | sudhādhārāsāraḥ iti vā 
pāṭhaḥ | sudhāyāḥ dhārāṇāmāsāraḥ sudhāpravāhaḥ 
parivahati sārasvataṃ sarasvatīmayamiva 

p. 166) 

stanyasya śvetavarṇatvāt sarasvatīmayatvenotprekṣaṇam 
mādhuryātsudhārūpatvena ca | dayāvatyā praśastakṛpāyuktayā 
dattaṃ stanyaṃ dravilaśiśuḥ dravilajātisamudbhavaḥ bālaḥ 
etatstotrakartā āsvādya pītvā tava yat kāraṇāt kavīnāṃ 
kavīśvarāṇāṃ prauḍhānāṃ pragalbhānāṃ madhye iti 
nirdhāraṇe ṣaṣṭhī | ajani jātaḥ | kamanīyaḥ atiramaṇīyaḥ 
kavayitā kaviḥ || 

atretthaṃ padayojanā he dharaṇidharakanye ! tava stanyaṃ hṛdayataḥ 
utthitaḥ sudhādhārāsāraḥ payaḥpārāvāraḥ sārasvatamiva 
parivahatīti manye | yadyasmāt dayāvatyā tvayā dattaṃ tava 
stanyaṃ dravilaśiśurāsvādya prauḍhānāṃ kavīnāṃ madhye 
kamanīyaḥ kavayitā ajani | 

atrotprekṣādvayaṃ padavyākhyānāvasare kathitam | ubhayoḥ 
saṃsṛṣṭiḥ || 75 || 

harakrodhajvālāvalibhiravalīḍhena vapuṣā gabhīre te nābhīsarasi 
kṛtasaṅgo manasijaḥ | samuttasthau tasmādacalatanaye dhūmalatikā 
janastāṃ jānīte tava janani romāvaliriti || 76 || 

harasya krodhajvālāvalibhiḥ [krodhāgneḥ] avalīḍhena āviṣṭena 
vapuṣā gabhīre nimne ata eva te tava nābhīsarasi nābhyeva saraḥ 
tasmin kṛtasaṅgo manasijaḥ manmathaḥ nimagna ityarthaḥ | 
samuttasthau udabhūt | tasmāt nābhīsarasaḥ acalatanaye ! pārvati ! 
dhūmalatikā dhūmāvaliḥ aṅgārapraśamasamayodbhavā | janaḥ 
lokaḥ tāṃ dhūmalatikāṃ jānīte varṇayati | janani ! mātaḥ tava 
romāvaliriti romarājiriti || 

p. 167) 

atretthaṃ padayojanā he acalatanaye ! manasijaḥ 
harakrodhajvālāvalibhiḥ avalīḍhena vapuṣā gabhīre te 
nābhīsarasi kṛtasaṅgaḥ ! tasmāddhūmalatikā samuttasthau | he 
janani ! tāṃ janaḥ tava romāvaliriti jānīte || 

atrotprekṣālaṅkāraḥ romarājeḥ dhūmalatikātvenotprekṣaṇāt | 
yadvā janastāṃ jānīte ityanena bhrāntimān pratīyate 
romarekhādarśanasya dhūmarekhābhrāntijanakatvāt | yadvā 
atiśayoktiḥ janastāṃ romāvalimadhyavasyatīti pratīteḥ | yadvā 
niścayāntasandehaḥ tāṃ romāvaliriti niścinotīti | evaṃ 
caturṇāmalaṅkārāṇāṃ jānīte iti padādutthānāt 
ekavācakānupraveśena saṅkaraḥ || 76 || 

yadetatkālindītanutarataraṅgākṛti śive kṛśe madhye 
kiñciñjanani tava yadbhāti sudhiyām | vimardādanyonyaṃ 
kucakalaśayorantaragataṃ tanūbhūtaṃ vyoma praviśadiva nābhiṃ 
kuhariṇīm || 77 || 

yatetat puraḥ sphurat | yacchabdasya etacchabdasahacaritasya 
prasiddhivācakatvaṃ nāsti | ata eva punaryacchabdopādānam | 
kālindītanutarataraṅgākṛti kālindyāḥ yamunāyāḥ 
tanutarataraṅgaḥ atisūkṣmataraṅgaḥ tasyākṛtiriva ākṛtiryasya 
tat | śive ! bhagavati ! kṛśe tanuni madhye avalagne kiñcit janani ! 
tava yat bhāti sphurati sudhiyāṃ viduṣāṃ vimardāt saṅgharṣāt 
anyonyaṃ parasparaṃ kucakalaśayoḥ antaragataṃ madhyavarti 
tanūbhūtaṃ sūkṣmabhūtaṃ vyoma gaganaṃ praviśadiva praveśaṃ 
kurvadiva | nīlaṃ nabhaḥ ityābālagopālaprasiddham | gaganasya 
nīlimā ca mūrtatvaṃ ca kaviprasiddham | nābhiṃ kuhariṇīṃ 
kuharavatīm || 

p. 168) 

atretthaṃ padayojanā he śive ! janani ! tava kṛśe madhye 
yadetatkālindītanutarataraṅgākṛti kiñcit romāvalirūpaṃ vastu 
sudhiyāṃ yadbhāti kucakalaśayorantaragataṃ tanūbhūtaṃ vyoma 
anyonyaṃ vimardādeva kuhariṇīṃ nābhiṃ praviśadiva bhāti | 
nīlaṃ mūrta nabhaḥ kucakalaśavimardavaśāt adhobhāge srastaṃ 
nābhiparyantaṃ jatulatānyāyenāvatiṣṭhate tadromāvaliṃ 
vadantīti bhāvaḥ || 

atrotprekṣālaṅkāraḥ romalatāyāḥ gaganalatikātvena sambhāvanāt 
| prathamapāde nidarśanālaṅkāraḥ | taraṅgākṛtīti 
bimbapratibimbabhāvākṣepāt | anayossaṃsṛṣṭiḥ || 77 || 

sthiro gaṅgāvartaḥ stanamukularomāvalilatā- kalāvālaṃ 
[kulāvālam] kuṇḍaṃ kusumaśaratejohutabhujaḥ | raterlīlāgāraṃ 
kimapi tava nābhirgirisute biladvāraṃ siddhergiriśanayanānāṃ 
vijayate || 78 || 

sthiraḥ vināśarahitaḥ gaṅgāvartaḥ gaṅgāyāḥ ambhasāṃ 
bhramaḥ āvartasya kṣaṇikatvāt tadvyatirekaḥ sthira iti | 
stanamukularomāvalilatākalāvālaṃ [kulāvālam] stanāveva mukulau 
puṣpakorakau tayoḥ romāvalireva latā ādhārabhūtā janayitrī 
[jagajjananī tasyāḥ kulā kiśoraḥ] tasyāḥ kalā rekhā tasyāḥ 
āvālaṃ ālavālam | kuṇḍaṃ homārdhaṃ saṃpāditaṃ vṛttaṃ 
agnisthānaṃ kusumacaratejohutabhujaḥ kusumaśarasya manmathasya 
tejaḥ dīptireva hutabhuk vahniḥ tasya | rateḥ madanapatnyāḥ 
līlāgāraṃ vilāsagṛhaṃ tatraiva sarvadā manmathasadbhāvāt 
tatpreyasī tatraiva vartata iti | kimapi anirvācyaṃ 
atisundaramityarthaḥ | tava nābhiḥ girisute ! pārvati ! biladvāraṃ 
guhādvāraṃ siddheḥ tapaḥsiddheḥ giriśanayanānāṃ 
sadāśivacakṣuṣāṃ vijayate sarvotkarṣeṇa sphurati || 

p. 169) 

atretthaṃ padayojanā he girisute ! tava nābhiḥ sthiro gaṅgāvartaḥ 
stanamukularomāvalilatākalāvālaṃ kusumaśaratejohutabhujaḥ 
kuṇḍaṃ raterlīlāgāraṃ giriśanayanānāṃ siddherbiladvāraṃ 
kimapi vijayate || 

atrollekhālaṅkāraḥ ekasyā nābheranekarītyā ullekhāt | 
nāyamatiśayoktiḥ ekasyānekatvollekhanādeva | nāpyatiśayoktimālā 
kimapītyadhyavasitumaśakyatvāt kimapītyanena sārdhaṃ 
mālātvasyānucitatvāditi rahasyam || 78 || 

nisargakṣīṇasya stanataṭabhareṇa klamajuṣo 
namanmūrternārītilaka śanakaistruṭyata iva | ciraṃ te madhyasya 
truṭitataṭinītīrataruṇā samāvasthāsthemno bhavatu kuśalaṃ 
śailatanaye || 79 || 

nisargakṣīṇasya svabhāvena kṣīṇasyātikṛśasya 
stanataṭabhareṇa stanataṭayoḥ kucataṭayoḥ bhareṇa klamajuṣaḥ 
klāntimataḥ namanmūrteḥ nārītilaka ! strīratnabhūte ! śanakaiḥ 
stokaṃ truṭyata iva bhidyamānasyeva ciraṃ bahukālaṃ te tava 
madhyasya avalagnasya truṭitataṭinītīrataruṇā truṭite bhagne 
taṭinyāḥ vāhinyāḥ tīre taruḥ vṛkṣaḥ tena 
samāvasthāsthemnaḥ samāyāṃ tulyāyāṃ avasthāyāṃ sthemā 
sthairyaṃ yasya tasya bhavatu bhūyāt | kuśalaṃ kṣemaṃ 
truṭanābhāvaḥ śailatanaye pārvati ! 

atretthaṃ padayojanā he śailananaye ! nārītilaka ! 
nisargakṣīṇasya stanataṭabhareṇa klamajuṣaḥ namanmūrteḥ 
śanakaiḥ truṭyata iva truṭitataṭinītīrataruṇā 
samāvasthāsthemnaḥ te madhyasya ciraṃ kuśalaṃ bhavatu || 

p. 170) 

madhyasyetyevamādiprayogāḥ sahṛdayahṛdayāhlādakāriṇo 
mahākaviśikṣābhyāsasamāsāditāḥ | etādṛśaprayoganipuṇaḥ 
mahākavirityucyate || 

atropamālaṅkāraḥ 
bhagnanadīkūlavartimahīruhaśikhāmūlikāsāmyaṃ madhyasyeti || 79 
|| 

kucau sadyassvidyattaṭaghaṭitakūrpāsabhidurau kaṣantau dormūle 
kanakakalaśābhau kalayatā tava trātuṃ bhaṅgādalamiti valagnaṃ 
tanubhuvā tridhā naddhaṃ devi trivali lavalīvallibhiriva || 80 || 

kucau stanau sadyaḥ tadānīmeva svidyattaṭaghaṭitakūrpāsabhidurau 
svidyantau svedavantau taṭau pārśvau tayorghaṭitasya kūrpāsasya 
bhidurau [bhidurau bhedakarau] | karmakartari kurac ityutra kartaryapi 
kurac | rakṣitastu karmaṇi kartari ca kurac iti vyācaṣṭe | 
sadyastanaghaṭitakūrpāsabhidurau | iti pāṭhe sadyastanaṃ 
tadānīntanaṃ nūtanatvena ghaṭitaṃ kūrpāsakaṃ tasya bhidurau | 
pratikṣaṇaṃ prāṇeśvarasya sadāśivasya rūpānusandhānena 
utsiktāvayavairbhidyate sandhibandheṣu kañculiketi bhāvaḥ | 
kaṣantau nikaṣantau dormūle kakṣaprāntadeśe kanakakalaśābhau 
kanakakalaśayorhemakumbhayoriva ābhā saubhāgyaṃ yayostau kalayatā 
racayatā nirmimāṇena tava bhavatyāḥ trātuṃ rakṣituṃ valagnamiti 
śeṣaḥ | yadvā prathamāntasya valagnaśabdasya atra 
karmatvenānvayaḥ | bhaṅgāt stanabharajanitāt alamiti 
alaṃśabdo'tra vāraṇārthaḥ | bhaṅgo mā bhūdityarthaḥ | 
valagnaṃ madhyapradeśaṃ tanubhuvā 

p. 171) 

manmathena tridhā triprakāreṇa naddhaṃ baddhaṃ devi ! dīvyanti ! 
bhagavati ! trivali tisro valayo vibhaṅgāḥ yasya tat | 
lavalīvallibhiriva lavalīnāṃ vallayaḥ tābhiḥ | pītavallī 
lavalī tatpuṣpāṇi śvetāni | akārādinighaṇṭau tulavalītyuktvā 
tallatā vanakulatthalatetyuktam | yathātrāpi svīkāryam | 
ivaśabdaḥ saṃbhāvanāyāṃ dhruvamityarthaḥ | ivaśabdasya 
saṃbhāvanādyotakatvamapyastīti pūrvamevoktam || 

atretthaṃ padayojanā he devi ! sadyaḥ 
svidyattaṭaghaṭitakūrpāsabhidurau dormūle kaṣantau 
kanakakalaśābhau kucau kalayatā tanubhuvā bhaṅgādalamiti valagnaṃ 
trātuṃ trivali tava valagnaṃ lavalīvallibhiḥ tridhā naddhamiva || 

atra utprekṣālaṅkāraḥ trivalīnāṃ lavalīvallītvena 
saṃbhāvanāt | pūrvārdhe atiśayoktiralaṅkāraḥ bhagavatyāḥ 
kucanirmāṇe manmathasyaivādhikāro na jaradbrahmaṇa iti 
jaradbrahmanirmāṇasaṃbandhe'pyasaṃbaṃdhoktyā abhedādhyavasāyaḥ 
kavikṛtavastukṛtayoḥ saundaryayoreveti | ubhayoraṅgāṅgibhāvena 
saṅkaraḥ | nanvevaṃ kucau racayatā 
manmathenetyanuvādyaviśeṣaṇamahimnā manmathakartṛtvasya 
siddhavadanumānāt kucanirmāṇe vartamānasaṃbandhābhāvāt 
asaṃbandhe saṃbandhokterapyāñjasyameveti cet maivam kucau 
kanakakalaśābhau kalayateti śatṛpratyayena vartamānārthena 
kucakaraṇasya vartamānakālasaṃbandhapratīterasaṃbandhe 
saṃbadhoktirāñjasīti na vācyam | bhūtakālasambandhe'pi 
bhūtakālakriyāvācakākhyātāntadhātuprayoge yujyate 
sambandhe'pyasaṃbadhakathanaṃ na tvanuvādyagatatvena 
siddhavadanuvāde || 80 || 

gurutvaṃ vistāraṃ kṣitidharapatiḥ pārvati nijāt 
nitambādācchidya tvayi haraṇarūpeṇa nidadhe | 

p. 172) 

ataste vistīrṇo gururayamaśeṣāṃ vasumatīṃ 
nitambaprāgbhārassthagayati laghutvaṃ nayati ca || 81 || 

gurutvaṃ gauravaṃ vistāraṃ āyāmapariṇāhaṃ kṣitidharapatiḥ 
himavān pārvati ! śailatanaye ! nijāt svakīyāt nitambāt 
nitambapradeśāt ācchidya avayutya tvayi bhavatyāṃ haraṇarūpeṇa 
haraṇātmanā nidadhe samarpitavān | haraṇaṃ nāma strīdhanaṃ 
adhyagnyadhyāvāhanikam | yathoktaṃ hārītena- 

adhyagnyadhyāvāhanikaṃ haraṇaṃ strīdhanaṃ smṛtam | iti 

asyārthaḥ agnimadhikṛtya dattamadhyagni vivāhasamaye agnisamīpe 
pitrādibhiryaddattaṃ tadadhyagni vivāhānantaraṃ vadhūṃ gṛhītvā 
svagṛhaṃ pratijigamiṣāvasare pitrādirbhiyaddattaṃ 
tadadhyāvāhanikamiti [kecit | apare-āhavanīyasamīpe yajñādau 
pitrādibhiryaddattaṃ-tadadhyāhavanīyakamiti ityadhikaḥ pāṭhaḥ] | 
etadubhayaṃ haraṇaśabdavācyamiti manvādibhiḥ smṛtamiti | ataḥ 
tasmātkāraṇāt te tava vistīrṇaḥ āyāmataḥ guruḥ pṛthuḥ ayaṃ 
paridṛśyamānaḥ aśeṣāṃ kṛtsnāṃ vasumatīṃ pṛthvīṃ 
nitambaprāgbhāraḥ nitambasya prāgbhāraḥ atiśayaḥ sthagayati 
chādayati | laghutvaṃ lāghavaṃ nayati prāpayati ca | śakāraḥ 
śaṅkācchede asminnarthe na śaṅkitavyamityarthaḥ || 

atretthaṃ padayojanā he pārvati ! kṣitidharapatiḥ gurutvaṃ 
vistāraṃ nijāt nitambādācchidya tvayi haraṇarūpeṇa nidadhe | 
ataḥ te ayaṃ nitambaprāgbhāraḥ guruḥ vistīrṇassan aśeṣāṃ 
vasumatīṃ sthagayati laghutvaṃ nayati ca || 

vistāreṇa sthaganaṃ gurutvena lāghavāpādanamityarthaḥ | prapañce 
vasumatyāmeva gurutvavistārau ekatra sthitau tayostiraskaraṇamekatra 
sthitābhyāṃ gurutvavistārābhyāmeva 

p. 173) 

vidheyamiti himādrigatagurutvavistārau himādreḥ bhūdharatvāt 
bhūmigatagurutvavistārābhyāmadhikāviti bhāvena gṛhītvā 
tattiraskaraṇamiti kṣitidharapatiḥ aśeṣāṃ vasumatīmiti ca padaṃ 
prayuñjānasya bhāvaḥ || 

atrātiśayoktiralaṅkāraḥ himādrigatagurutvavistārayoḥ 
pārvatīnitambagatagurutvavistārayorbhede'pyabhedenādhyavasānāt | 
seyaṃ bhede abhedanibandhanādatiśayoktiralaṅkāraḥ || 81 || ūrū 
jānunī ca sakṛdeva varṇayati- 

karīndrāṇāṃ śuṇḍān kanakakadalīkāṇḍapaṭalīṃ 
ubhābhyāmūrubhyāmubhayamapi nirjitya bhavati | suvṛttābhyāṃ 
patyuḥ praṇatikaṭhinābhyāṃ girisute vidhijñe jānubhyāṃ 
vibudhakarikumbhadvayamasi || 82 || 

karīndrāṇāṃ gajendrāṇāṃ śuṇḍān karadaṇḍān 
śuṇḍāśabdasya pulliṅgatāpyasti iti rakṣitamatam | 
kanakakadalīkāṇḍapaṭalīṃ suvarṇarambhāstambhasaṃhatiṃ 
ubhābhyāmūrubhyāṃ ubhayaṃ karikararambhāstambhātmakaṃ api 
nirjitya vijitya bhavati ! tvaṃ suvṛttābhyaḥ śobhanābhyāṃ 
vartulābhyāṃ patyuḥ parameśvarasya praṇatikaṭhinābhyāṃ 
praṇatibhiḥ kaṭhinābhyāṃ praṇatidaśāyāṃ jānvoḥ 
bhūmisparśādityarthaḥ | girisute ! himādritanaye vidhijñe ! 
vidhiṃ vedārthaṃ jānātīti vidhijñā sarvajñetyarthaḥ | yadvā 
vedārthānuṣṭhātrī | ata eva patyurnamaskāraḥ pratidinaṃ vaidha 
iti kṛtaḥ na tu tasyādhikyānurodhāditi narmavacanam | tasyāḥ 
sambuddhiḥ | jānubhyāṃ vibudhakarikumbhadvayaṃ 
digdantikambhasthaladvitayaṃ asi bhavasi || 

atretthaṃ padayojanā he vidhijñe ! girisute ! bhavati ! 
karīndrāṇāṃ 

p. 174) 

śuṇḍān kanakakadalīkāṇḍapaṭalīṃ ubhābhyāmūrubhyāṃ 
ubhayamapi nirjitya suvṛttābhyāṃ patyuḥ praṇatikaṭhinābhyāṃ 
jānubhyāṃ vibudhakarikumbhadvayamapi nirjitya asi vartase sphurasīti 
yāvat || 

atra bhavacchabdayoge'pi asīti madhyamapuruṣa eva bhavati tasya 
saṃbodhanamātraparatvāt | atredaṃ tattvam bhavacchabdo dvividhaḥ 
saṃbodhyaparaḥ saṃbodhanamātraparaśceti | sambodhyaparatve 
bhavacchabdasya yuṣmadarthatvābhāvāt yuṣmadyupapade ityādinā 
prāptyabhāvāt śeṣe prathama eva tadyoge | yathā sūte 
[carcāstavaḥ ślo. 4] jaganti bhavatī bhavatī bibharti jāgarti 
tatkṣayakṛte bhavatī bhavāni ityādi | yadā 
saṃbodhanamātraparatvaṃ bhavacchabdasya tadā yuṣmadarthatvāt 
madhyamapuruṣaḥ syādeva | yathā bhavati bhikṣāṃ dehi iti | tatra 
saṃbodhanamātraparatve'pi ṅīppratyayaḥ gaurādau bhavateḥ 
prātipadikasya pāṭhāt siddhaḥ | ata eva rakṣita āha bhavatu 
prātipādikasāmarthyāt strīliṅga eva bhavacchabdasya 
saṃbodhanamātraparatvam iti | ayamāśayaḥ bhavacchabdasya 
sarvanāmasu bhavatu iti prātipādikagrahaṇāt ugitaśca iti ṅīp 
siddha eveti atra gaurādau paṭhitasya bhavacchabdasya vaiyarthyāt 
strītva eva saṃbodhanamātraparatvamiti jñāpayatīti || 

nanvevaṃ rakṣitenaiva yuṣmadasmadoḥ strīpunnapuṃsakeṣu 
tulyaliṅgatvaṃ saṃbodhanamātraparatvāt yuṣmadasmadoḥ 
ekadvibahutvaparatvaṃ tu saṃbodhyalakṣaṇatayā | na ca 
liṅgalakṣaṇā ākāṃkṣābhāvāt ityuktam | 
tadvadbhavacchabdasyāpyaliṅgatvaṃ prāpnotīti | maivaṃ 
dattottaratvādityalamativistareṇa | yattu tvāmasmi vacmi viduṣāṃ 
iti ślokavyākhyānāvasare kāvyaprakāśikāṭīkākāreṇa 
bhāskareṇoktaṃ tadamūlamiti nopanyasya dūṣitam || 

atropamālaṅkārasspaṣṭa iva || 82 || 

p. 175) 

parājetuṃ rudraṃ dviguṇaśaragarbhau girisute niṣaṅgau jaṅghe te 
viṣamaviśikho bāḍhamakṛta | yadagre dṛśyante daśaśaraphalāḥ 
pādayugalī- nakhāgracchadmānaḥ suramakuṭaśāṇaikaniśitāḥ || 
83 || parājetuṃ tiraskartuṃ rudraṃ haraṃ dviguṇaśaragarbhau 
dviguṇīkṛtāḥ śarāḥ pañcabāṇāḥ garbhe yayostau | girisute ! 
pārvati ! niṣaṅgau tūṇīrau jaṅghe jaṅghākāṇḍau te tava 
viṣimaviśikhaḥ pañcabāṇaḥ bāḍhaṃ dhruvaṃ akṛta kṛtavān | 
yadagre yayoḥ niṣaṅgayoragre dṛśyante | daśaśaraphalāḥ 
daśānāṃ śarāṇāṃ dviguṇitānāṃ pañcānāmityarthaḥ teṣāṃ 
phalāḥ ayomukhāni pādayugalīnakhāgracchadmānaḥ pādayoḥ 
prapadayoḥ yugalī dvitayaṃ tasyā nakhāgrāṇāṃ daśānāṃ chadma 
vyājo yeṣāṃ te suramakuṭaśāṇaikaniśitāḥ surāṇāṃ 
indrādīnāṃ makuṭeṣveva śāṇeṣu ekaniśitāḥ mukhyatayā 
uttejitāḥ || 

atretthaṃ padayojanā he girisute ! viṣamaviśikhaḥ rudraṃ 
parājetuṃ dviguṇaśaragarbhau niṣaṅgau te jaṅghe akṛta bāḍham | 
yadagre pādayugalīnakhāgracchadmānaḥ 
suramakuṭaśāṇaikaniśitāḥ daśaśaraphalā dṛśyante || 

atra utprekṣālaṅkāraḥ jaṅghayoḥ tūṇīratayā saṃbhāvanāt | 
apahnavālaṅkāraśca nakhāgrāṇāṃ phalatvenāpahnavāt | 
anayossaṃsṛṣṭiḥ apṛthaksthityā prayojyaprayojakabhāvāvagateḥ | 
viṣamaviśikho bāḍhamakṛtetyatra atiśayoktiralaṅkāraḥ 
sādhāraṇabrahmasṛṣṭivyatiriktatvena pratīteḥ | etacca pūrvameva 
spaṣṭīkṛtaṃ kucau sadyaḥ svidyat [80 ślo.] iti 
[ityādiślokadvaya] ślokavyākhyānāvasare | alaṅkāreṇa 
alaṅkāradhvanirapi dviguṇaśaragarbhau 

p. 176) 

daśaśaraphalā iti padadvayena pādāṅgulīnāṃ śarāṇāṃ ca 
abhedādhyavasāya pratīterityalam || 83 || 

śrutīnāṃ mūrdhāno dadhati tava yau śekharatayā mamāpyetau 
mātaḥ śirasi dayayā dhehi caraṇau | yayoḥ padyaṃ pāthaḥ 
paśupatijaṭājūṭataṭinī 
yayorlākṣālakṣmīraruṇaharicūḍāmaṇiruciḥ || 84 || 

śrutīnāṃ nigamānāṃ mūrdhānaḥ śirāṃsi vedāntā ityarthaḥ | 
dadhati dhārayanti pratipādayantītyarthaḥ | tava bhavatyāḥ yau 
caraṇau pādau śekharatayā uttaṃsatayā | yadvā śrutīnāṃ 
śrutivadhūnāṃ mūrdhānaḥ śrutayaḥ bhagavatīpādābjaṃ 
uttaṃsayanti | yathoktam śrutivākyaṃ śaktiṃ prati vasiṣṭhena- 

namo devyai mahālakṣmyai śriyai siddhyai namo namaḥ | 
brahmaviṣṇumaheśānavedakaiḥ pūjitāṅghraye || 

vedakairityatra vedānāṃ kaiḥ śirobhiriti | namastripurasundaryai 
śivāyai viśvamūrtaye | 

ityādi || 

evaṃ stutā mahādevī śrutibhiḥ prītamānasā | prāha tāḥ prati 
tādṛgbhiḥ vacobhiramareśvarī || 

ityādi vasiṣṭhasaṃhitāyām | mamāpi etau caraṇau mātaḥ ! janani 
! śirasi mūrdhani dayayā kṛpayā kṛpāviṣṭacittenetyarthaḥ | 
dhehi nidhehi | caraṇau pādau yayoḥ caraṇayoḥ sambandhi pādyaṃ 
pāthaḥ pādanirṇejanajalam | yadyapi pādyamityukte pādasambandhaḥ 
pratīyate tathāpi pādyamityukte pādaprakṣālanārthaṃ 
pādyamityarhatāmātrapratītau 

p. 177) 

viśeṣākāreṇa yayorityasyānvaya iti na paunaruktyam | 
paśupatijaṭājūṭataṭinī paśupateḥ śivasya jaṭājūṭe kaparde 
taṭinī gaṅgā yayoḥ caraṇayoḥ lākṣālakṣmīḥ 
lākṣārasakāntiḥ aruṇaharicūḍāmaṇiruciḥ aruṇaścāsau 
haricūḍāmaṇiśca kaustubhaḥ tasya ruciḥ raktimā || 

ayamarthaḥ praṇayakopaśāntaye praṇatasya paśupateḥ 
jaṭājūṭavartinī gaṅgā pādāgravartinī āsīditi gaṅgāyāḥ 
pādyajalatvaṃ kathitam | pratidinaṃ sāyaṃprātaḥ sevārthaṃ 
namaskurvāṇasya viṣṇoḥ makuṭaghaṭitakaustubhamaṇeḥ 
śvetavarṇasya lākṣārasaprasādajanyo'ruṇimeti dhyeyam || 

atretthaṃ padayojanā he janani ! tava yau caraṇau śrutīnāṃ 
mūrdhānaḥ śekharatayā dadhati | he mātaḥ ! etau caraṇau mamāpi 
śirasi dayayā dhehi | yayoḥ pādyaṃ pāthaḥ 
paśupatijaṭājūṭataṭinī yayoḥ lākṣālakṣmīḥ 
aruṇaharicūḍāmaṇiruciḥ || 

etaduktaṃ bhavati bhagavatyāḥ pādāmbujadvitayasya vedamūrdhani 
sadāśivamūrdhani viṣṇumūrdhanyeva sañcāra iti 
mūrdhasañcārasvābhāvyamasti | ato mama mūrdhanyapi sañcaratu 
pādāmbujamiti prārthanāsāmañjasyamiti kaverabhiprāyaḥ | yadvā 
prapañcajanayitryāḥ sādākhyāyāḥ prapañcāntaḥpātinaḥ 
hariviriñcipaśupativedāntāḥ pādāmbujaṃ śirasi dhārayanti 
tannirṇejanajalena pavitritagātrāḥ tanmahimnā tattadadhikārān 
bhajanta iti yujyata eveti || 

atra rūpakālaṅkāraḥ spaṣṭaḥ || 84 || 

namovākaṃ brūmo nayanaramaṇīyāya padayoḥ tavāsmai dvandvāya 
sphuṭarucirasālaktakavate | 

p. 178) 

asūyatyatyantaṃ yadabhihananāya spṛhayate paśūnāmīśānaḥ 
pramadavanakaṅkelitarave || 85 || 

namovākaṃ nama iti vākyam | namovākaśabdo nipātanātsādhuḥ | 
brūmaḥ vadāmaḥ namaskurma ityarthaḥ | nayanaramaṇīyāya netrayoḥ 
priyakarāya padayoḥ caraṇayoḥ tava asmai paridṛśyamānāya 
dvandvāya yugmāya sphuṭarucirasālaktakavate sphuṭarucaye 
sphuratprabhāya rasālaktakavate sārdrālaktakāya 
viśeṣaṇasamāsaḥ | asūyati īrṣyati | atyantaṃ nitarāṃ 
yadabhihananāya yena padayugena abhihananaṃ tāḍanaṃ tasmai 
abhihananaṃ na sahata ityarthaḥ | aśokaścaraṇāhativyaktapuṣpa iti 
dohalakautuke | spṛhayate spṛhāṃ kurvate paśūnāmīśānaḥ 
paśupatiḥ pramadavanakaṅkelitarave pramadavanaṃ udyānavanaṃ tatra 
kaṅkelitaruraśokaḥ tasmai asūyati īrṣyati | ubhayatra krūdhadruha 
ityādinā spṛherīṣsitaḥ ityanena ca saṃpradāne caturthī || 

atretthaṃ padayojanā he bhagavati ! tava nayanaramaṇīyāya 
sphuṭarucirasālaktakavate padayorasmai dvandvāya namovākaṃ brūmaḥ 
paśūnāmīśānaḥ yadabhihananāya spṛhayate 
pramadavanakaṅkelitarave atyantaṃ asūyati || 

praṇayakalahasamaye anugrahātmā pādāghāto na kasyāpi 
saṃbhāvyata iti [ityucyate | tena tasyāpi kaṅkelitaroḥ (pā.)] 
acetanavastu'nopi kaṅkelitaroḥ kathaṃ syāditi tatraivāsūyā 
nānyatreti bhāvaḥ | anenātyantaṃ pātivratyaṃ pārvatyāḥ 
pratipāditam | etādṛśaṃ pātivratyaṃ lakṣmīsarasvatyornāstīti 
dhvanyate || 

atrātiśayoktiralaṅkāraḥ paśupaterīrṣyayā'saṃbandhe'pi 
saṃbandhakathanādabhedādhyavasāyapratīteḥ || 85 || 

p. 179) 

mṛṣā kṛtvā gotraskhalanamatha vailakṣyanamitaṃ lalāṭe 
bhartāraṃ caraṇakamale tāḍayati te | cirādantaśśalyaṃ 
dahanakṛtamunmūlitavatā tulākoṭikvāṇaiḥ 
kilikilitamīśānaripuṇā || 86 || 

mṛṣā akasmādeva kṛtvā gotraskhalanaṃ gotrasya skhalanaṃ nāma 
nāyikāyāmanurāgaṃ prakaṭayatastatsamīpa eva pramādāt 
nāyikāntarāviṣṭacittasya tannāmoccāraṇam | atha 
gotraskhalanānantaraṃ vailakṣyanamitaṃ vailakṣyeṇa iti 
kartavyatāmauḍhyena namitam | atra namitamiti vailakṣyaprādhānyāt 
vailakṣyeṇaiva namitaḥ na tu svayaṃ vailakṣyānnamitaḥ | 
atyutkṛṣṭaṃ vailakṣyamāsīditi namitaśabdaṃ prayuñjānasya 
bhāvaḥ | lalāṭe niṭilapradeśe bhartāraṃ paśupatiṃ 
caraṇakamale pādāmbuje tāḍayati ghnati sati caraṇakamalena 
bharturlalāṭaṃ tāḍitavatyāṃ bhavatyāmityarthaḥ | 
lalāṭatāḍanaṃ bhartṛparyantaṃ gacchatīti bhartāraṃ 
tāḍayatītyuktirāñjasīti etādṛśaprayogāḥ 
mahākaviśakṣāvaśādāyātāḥ sahṛdayahṛdayāhlādakāḥ | te 
tava cirāt cirakālamanusyūtaṃ antaśśalyaṃ hṛdayaśalyaṃ 
vairamityarthaḥ | dahanakṛtaṃ nayanāgninā ploṣaṇakṛtaṃ 
unmūlitavatā tulākoṭikvāṇaiḥ tulā nūpuraṃ tasya koṭayaḥ 
agrāṇi tairantargatā maṇayaḥ kṣudraghaṇṭādayaḥ lakṣyante 
teṣāṃ kvāṇaiḥ śiñjitaiḥ | kilikilitam kilikiletyanukaraṇaṃ 
vijayinaḥ suprasiddham | kilikiliravaḥ kṛta ityarthaḥ | 
īśānaripuṇā manmathena | manmathasya īśānaṃ prati riputvaṃ 
tadā siddhamiti bhāvaḥ || 

atretthaṃ padayojanā he bhagavati ! mṛṣā gotraskhalanaṃ kṛtvā 
atha vailakṣyanamitaṃ bhartāraṃ te caraṇakamale lalāṭe tāḍayati 
sati īśānaripuṇā cirāt dahanakṛtaṃ antaḥśalyaṃ unmūlitavatā 
tulākoṭikvāṇaiḥ kilikilitam || 

p. 180) 

atrātiśayoktiralaṅkāraḥ tulākoṭikvāṇānāṃ 
kilikilitadhvanitvenādhyavasānāt bhede abhedanibandhanātiśayoktiḥ 
|| 86 || 

himānīhantavyaṃ himagirinivāsaikacaturau niśāyāṃ nidrāṇaṃ 
niśi caramabhāge ca viśadau | varaṃ lakṣmīpātraṃ 
śriyamatisṛjantau samayināṃ sarojaṃ tvatpādau janani 
jayataścitramiha kim || 87 || 

himānīhantavyaṃ himānyā himasaṃhatyā hantavyaṃ nāśitavyaṃ 
himagirinivāsaikacaturau sarvadā himagirāveva vasantāvityarthaḥ | 
niśāyāṃ śarvaryāṃ nidrāṇaṃ mukulitaṃ niśi caramabhāge ca 
viśadau prasannau cetanāśakteḥ tatraivotpatteriti bhāvaḥ | 
cakārāt divāpi prasannāvityarthaḥ | varaṃ īpsitaṃ 
lakṣmīpātraṃ lakṣmyā adhiṣṭhitamityarthaḥ | śriyaṃ lakṣmīṃ 
atisṛjantau utpādayantau samayināṃ svabhaktānām samayasvarūpaṃ 
tavādhāre mūle [47 ślo] iti śloke nirūpitam | sarojaṃ kamalaṃ 
karmabhūtaṃ tvatpādau janani ! he mātaḥ ! jayataḥ vijayate | 
citraṃ āścaryaṃ iha asminnarthe kiṃ na kimapītyarthaḥ || 

atretthaṃ padayojanā he janani ! himagirinivāsaikacaturau niśi 
caramabhāge ca viśadau samayināṃ śriyamatisṛjantau tvatpādau 
himānīhantavyaṃ niśāyāṃ nidrāṇaṃ varaṃ lakṣmīpātraṃ 
sarojaṃ jayataḥ iha kiṃ citraṃ ādhikyasya sphuṭatvādityarthaḥ || 

atra vyatirekālaṅkāraḥ sphuṭaḥ || 87 || 

p. 181) 

padaṃ te kīrtīnāṃ prapadamapadaṃ devi vipadāṃ kathaṃ nītaṃ 
sadbhiḥ kaṭhinakamaṭhīkarparatulām | kathaṃ vā 
bāhubhyāmupayamanakāle purabhidā yadādāya nyastaṃ dṛṣadi 
dayamānena manasā || 88 || 

padaṃ sthānaṃ te tava kīrtīnāṃ yaśasāṃ prapadaṃ pādāgraṃ 
apadaṃ asthānaṃ devi ! dyotanaśīle ! bhagavati ! vipadāṃ 
āpadāṃ kathaṃ kathaṅkāraṃ nītaṃ prāpitaṃ sadbhiḥ 
kavīndraiḥ kaṭhinakamaṭhīkarparatulāṃ kaṭhinasya 
kamaṭhīkarparasya kūrmapṛṣṭhakapālasya tulāṃ kathaṃ vā 
kathaṃkṛtvā bāhubhyāṃ hastābhyāṃ upayamanakāle vivāhasamaye 
purabhidā sadāśivena yat padaṃ ādāya gṛhītvā nyastaṃ kṣiptaṃ 
dṛṣadi upalādhārabhūtā śilā dṛṣat upalaṃ haridrādidravyasya 
peṣaṇikā śilā | tadādhārabhūtā śilā dṛṣat | sā 
vivāhasamaye aśmasthāpanānuṣṭhānārthaṃ pātratvena prayuktā | 
tasyāṃ dṛṣadi dayamānena dayāvatā manasā | dayāṃ 
vihāyātimṛdulaṃ pādāmbujaṃ dṛṣadi kathaṃ sthāpitaṃ 
śambhunā | amṛtasyandinībhiḥ vāgvilāsaiḥ kavīśvarāḥ 
kamaṭhapṛṣṭhena tulyatayā kathaṃ ? etadubhayamuktamityarthaḥ || 

atretthaṃ padayojanā he devi ! kīrtīnāṃ padaṃ vipadāmapadaṃ te 
prapadaṃ sadbhiḥ kaṭhinakamaṭhīkarparatulāṃ kathaṃ nītam ? 
dayamānena manasā purabhidā upayamanakāle bāhubhyāṃ yadādāya 
kathaṃ vā dṛṣadi nyastam ? 

atrānanvayālaṅkāro dhvanyate sadṛśāntaraniṣedhāt asadṛśasya 
pādāmbujavastunaḥ svayameva svasya tulyamiti pratīteḥ || 88 || 

p. 182) 

nakhairnākastrīṇāṃ karakamalasaṅkocaśaśibhiḥ tarūṇāṃ 
divyānāṃ hasata iva te caṇḍi caraṇau || phalāni svassthebhyaḥ 
kisalayakarāgreṇa dadatāṃ daridrebhyo bhadrāṃ 
śriyamaniśamahnāya dadatau || 89 || 

nakhaiḥ nakharaiḥ nākastrīṇāṃ surāṅganānāṃ śacyādīnāṃ 
karakamalasaṅkocaśaśibhiḥ karā eva kamalāni teṣāṃ saṅkoce 
mukulībhāve śaśinaḥ candrātmakāḥ pādadarśanavelāyāṃ 
nakhakāntayaḥ candrakiraṇā eva tatkarāt mukulayanti 
añjalisandhānaṃ kārayanti | tarūṇāṃ vṛkṣāṇāṃ divyānāṃ 
divi bhavānāṃ hasataḥ | tarūṇāṃ hasata iti karmaṇi ṣaṣṭhī | 
hasantau eva te tava caṇḍi ! bhagavati ! caraṇau phalāni 
svassthebhyaḥ svargasthebhya eva na tu daridrebhya iti 
viśeṣaṇavaśātpratīyate | kisalayakarāgreṇa kisalayā eva karāḥ 
teṣāmagraṃ tena dadatāṃ diśatāṃ daridrebhyo dīnebhyaśca 
bhadrāṃ amandāṃ śriyaṃ lakṣmīṃ aniśaṃ sarvadā ahnāya 
śīghraṃ dadatau || 

ayamarthaḥ kalpavṛkṣāḥ kisalayakaraiḥ svassthebhya eva 
āśānusāreṇa śanaiḥ śanaiḥ phalaṃ dadati | te pādāmbujaṃ tu 
svassthebhyo daridrebhyaśca śīghraṃ bhadrāṃ śriyaṃ dadātīti 
vyatirekaḥ || 

atretthaṃ padayojanā he caṇḍi ! kisalayakarāgreṇa svassthebhyaḥ 
eva phalāni dadatāṃ divyānāṃ tarūṇāṃ daridrebhyo bhadrāṃ 
śriyaṃ aniśamahnāya dadatau te caraṇau nākastrīṇāṃ 
karakamalasaṅkocaśaśibhiḥ nakhaiḥ hasata iva || 

atra vyatirekālaṅkāraḥ sphuṭa eva | sa ca svassthebhya ityatra 
śleṣānuprāṇita ityanusandheyam || 89 || 

p. 183) 

dadāne dīnebhyaśśriyamaniśamāśānusadṛśīṃ amandaṃ 
saundaryaprakaramakarandaṃ vikirati | tavāsmin mandārastabakasubhage 
yātu caraṇe nimajjan majjīvaḥ karaṇacaraṇaṣṣaṭcaraṇatām || 90 
|| 

dadāne dadati dīnebhyo daridrebhyaḥ śriyaṃ lakṣmīṃ aniśaṃ 
āśānusadṛśīṃ vāñchānurūpāṃ amandaṃ adhikaṃ 
saundaryaprakaramakarandaṃ saundaryasya lāvaṇyasya prakaraḥ samūha 
eva makarandaḥ puṣparasaḥ taṃ vikirati kṣipati tava bhavatyāḥ 
asmin dṛśyamāne mandārastambakasubhage 
kalpavṛkṣagucchasaubhāgyavati yātu prāpnuyāt | caraṇe pādābje 
nimajjan nitarāṃ majjanaṃ kurvan majjīvaḥ ahaṃ cāsau jīvaśca 
majjīvaḥ karaṇacaraṇaḥ karaṇāni pañcendriyāṇi 
manaṣṣaṣṭhāni tānyeva caraṇā yasya saḥ ṣaṭcaraṇatāṃ 
bhramaratvam || 

atretthaṃ padayojanā he bhagavati ! dīnebhyaḥ āśānusadṛśīṃ 
śriyaṃ aniśaṃ dadāne amandaṃ saundaryaprakaramakarandaṃ vikirati 
mandārastabakasubhage asmin tava caraṇe karaṇacaraṇaḥ majjīvaḥ 
nimajjan ṣaṭcaraṇatāṃ yātu || 

atrātiśayoktiralaṅkāraḥ caraṇasya kamalatvena 
nigīryādhyavasānāt | mandārastabakasubhaga ityatra 
upamālaṅkāraḥ | anayoḥ saṃsṛṣṭiḥ | karaṇacaraṇa ityatra 
rūpakaṃ karaṇānāṃ caraṇatvena [āropaṇāt] rūpaṇāt | 
majjīvaṣṣaṭcaraṇatāṃ yātvityatra pariṇāmālaṅkāraḥ 
spaṣṭaḥ | anayoraṅgāṅgibhāvena saṅkaraḥ | 
saundaryaprakaramakarandaṃ vikiratītyatra rūpakaṃ 
nigīryādhyavasāne nimittam | ata eva naikadeśarūpakam avayavānāṃ 
pratipādanāt | karaṇacaraṇaṣṣaṭcaraṇatāṃ yātviti 
phalatvenoddeśāt avayavatvaṃ tasya | ato'smin caraṇa iti 
āropaviṣayā caraṇamupādāya 

p. 184) 

kamalamāropyamāṇabuddhyā nigīrṇamiti samyak | evaṃ 
pariṇāmātiśayayoḥ saṅkara eva na tu saṃsṛṣṭiriti dhyeyam || 90 
|| 

padanyāsakrīḍāparicayamivārabdhumanasaḥ skhalantaste khelaṃ 
bhavanakalahaṃsā na jahati | atasteṣāṃ śikṣāṃ 
subhagamaṇimañjīraraṇita cchalādācakṣāṇaṃ caraṇakamalaṃ 
cārucarite || 91 || 

padanyāsakrīḍāparicayaṃ padayornyāsaḥ tasmin krīḍā vinodaḥ 
tasya paricayamiva abhyāsamiva | ivaśabdaḥ saṃbhāvanāvacanaḥ 
nūnamityarthaḥ | ārabdhumanasaḥ saṃpādayitukāmāḥ skhalantaḥ 
skhaladgatayaḥ te tava khelaṃ khelanaṃ vilāsaṃ sañcāraṃ 
bhavanakalahaṃsāḥ bhavane paripoṣitāḥ kalahaṃsāḥ 
haṃsaviśeṣāḥ na jahati na parityajanti tvadanusaraṇaṃ na 
kadācidapi tyajantītyarthaḥ | ataḥ kāraṇāt teṣāṃ 
kalahaṃsānāṃ śikṣāṃ khelanaśikṣāṃ 
subhagamaṇimañjīraraṇitacchalāt maṇimañjīro 
maṇipradhānanūpuraḥ sa cāsau subhagaḥ ramyataraḥ yadvā 
subhagaiḥ maṇibhiḥ padmarāgādibhiḥ yuktaḥ tasya mañjīrasya 
raṇitānāṃ śiñjitānāṃ chalāt vyājāt | ācakṣāṇaṃ 
upadiśat caraṇakamalaṃ pādāmbujaṃ cārucarite ! śobhanagamane ! 

atretthaṃ padayojanā he cārucarite ! padanyāsakrīḍāparicayaṃ 
ārabdhumanasaḥ bhavanakalahaṃsāḥ skhalantaḥ te khelaṃ na jahati 
ataḥ caraṇakamalaṃ subhagamaṇimañjīraraṇitacchalāt teṣāṃ 
śikṣāṃ ācakṣāṇamiva || 

atrotprekṣālaṅkāraḥ mañjīraraṇitānāṃ śikṣāvacanātmatayā 
saṃbhāvanāt | pūrvārdhe atiśayoktiḥ bhavanakalahaṃsānāṃ 
svābhāvike poṣakajanānusaraṇe 

p. 185) 

padanyāsakrīḍāparicayārthatvena adhyavasānāt asaṃbandhe 
saṃbandhanibandhanāti śayoktiḥ | ubhayoraṅgāṅgibhāvena 
saṅkaraḥ || 91 || evaṃ makuṭādipādāntaṃ varṇayitvā punaḥ 
svarūpaṃ rastauti- 

gatāste mañcatvaṃ drahiṇaharirudreśvarabhṛtaḥ śivaḥ 
svacchacchāyāghaṭitakapaṭapracchadapaṭaḥ | tvadīyānāṃ 
bhāsāṃ pratiphalanarāgāruṇatayā śarīrī śṛṅgāro rasa iva 
dṛśāṃ dogdhiṃ kutukam || 92 || 

gatāḥ prāptāḥ te tava mañcatvaṃ khaṭvārūpatvaṃ 
druhiṇaharirudreśvarabhṛtaḥ druhiṇo brahmā harirviṣṇuḥ rudraḥ 
īśvaraḥ ete adhikārapuruṣāḥ maheśvaratattvāntargatāḥ te ca te 
bhṛtaśca | kvibanto'yaṃ śabdaḥ bahuvacanāntaḥ | bhṛto 
bhṛtakāḥ viśeṣaṇasamāsaḥ | teṣāṃ kāmarūpāṇāṃ 
atyantasannikṛṣṭasevārthaṃ mañcasya pādacatuṣṭayarūpatā 
yujyata eva | śivaḥ śivaśabdo vyākhyātaḥ śivatattvātmaka 
evādhikāripuruṣaḥ | yadvā sadāśivatattvam | 
svacchachāyāghaṭitakapaṭapracchadapaṭaḥ svacchā cāsauchāyā ca 
svacchacchāyā kāntiḥ saiva ghaṭitaḥ kapaṭapracchadapaṭaḥ 
śubhrakāntireva vastrātmanāvasthita irtthaḥ | tvadīyānāṃ 
bhavatsambandhinīnāṃ bhāsāṃ kāntīnāṃ 
pratiphalanarāgāruṇatayā pratiphalanena yo rāgaḥ raktimā 
saṅkrāntaḥ tenāruṇo raktavarṇaḥ tasya bhāvastattā tayā | 
śarīrī mūrtaḥ śṛṅgāraḥ śṛṅgārākhyo rasa iva | 
śṛṅgārarasaḥ raktavarṇa iti mahākaviprasiddhiḥ | ivaśabdaḥ 
saṃbhāvanāyām | dṛśāṃ bhavadvīkṣaṇānāṃ dogdhi dugdhe 
prasūte karotīti yāvat kutukaṃ ānandam || 

atretthaṃ padayojanā he bhagavati ! te mañcatvaṃ 
druhiṇaharirudreśvarabhṛtaḥ gatāḥ śivaḥ 
svacchacchāyāghaṭitakapaṭapracchadapaṭaḥ san tvadīyānāṃ 
bhāsāṃ pratiphalanarāgāruṇatayā śarīrī śṛṅgāro rasa iva 
dṛśāṃ kutukaṃ dogdhi || 

p. 186) 

atredamanusandheyam 
ādhārasvādhiṣṭhānamaṇipūrānāhataviśuddhyājñā-cakrātmakaṃ 
ṣaṭcakrasadanaṃ pṛthivyagnijalavāyugaganamanastattvādhiṣṭhitāni 
ekādaśendriyādhiṣṭhānaṃ ca | evaṃ ājñācakrānte 
ekaviṃśatitattvānyadhiṣṭhitāni tadātmanāvasthitāni | tava upari 
māyāśuddhavidyāmaheśvarasadāśivātmakatattvacatuṣṭayaṃ 
brahmagranthyanantarabhāvicaturdvārātmakabhūpuratritayātmaka 
śrīcakradvāracatuṣṭaye sthitam | prāgādidvāradeśeṣu 
māyādīni catvāri tattvāni | tānyeva mañcasya catuṣpadāni | 
śuddhavidyāyāḥ sadāśivatattvābhiniveśāt tacchāyāpattyā 
sahasrakamalāntargataśivaḥ sadāśivātmā anurāgavaśāt 
śuddhavidyāyāḥ saṃvalanāt tādātmyaṃ pratīyate | 
sahasrakamalāntassthitasya caturdvārātmakasya karṇikārūpasya 
śrīcakrasya 
madhyavarticaturaśrātmakabaindavāparapararyāyasaraghāśabdavācyasu 
dhā-sindhau śivaśaktyormelanamiti | avaśiṣṭaṃ sarvaṃ 
sudhāsindhormadhye iti [8maḥ ślokaḥ] ślokavyākhyānāvasare 
kathitam || 

atra tadguṇālaṅkārānuprāṇita utprekṣālaṅkāraḥ 
śivasyātidhavalasya kāmeśvarītanukāntyā tādguṇyāt śarīrī 
śṛṅgāro rasa ivetyutprekṣaṇāditi || 92 || arālā keśeṣu 
prakṛtisaralā mandahasite śirīṣābhā citte [dṛṣadiva kaṭhorā] 
dṛṣadupalaśobhā kucataṭe | bhṛśaṃ tanvī madhye 
pṛthururasijārohaviṣaye jagattrātuṃ śaṃbhorjayati karuṇā 
kācidaruṇā || 93 || 

arālā vakrā keśeṣu nānyatretyarthaḥ | prakṛtisaralā prakṛtyā 
svabhāvena saralā ṛjvī mandahasite mandasmite śirīṣābhā 
śirīṣakusumābhā atimṛdvītyarthaḥ | citte ataḥkaraṇe 
dṛṣadupalaśobhā dṛṣadi [dṛṣadivopala iva kucataṭe stanapradeśe 
kaṭhorā] ya upalaḥ peṣaṇikā 

p. 187) 

dṛṣadupula iti pūrvamevoktaṃ tasyeva śobhā yasyāḥ sā | 
kucataṭe stanataṭe bhṛśaṃ atyarthaṃ tanvī kṛśā madhye valagne 
pṛthuḥ sthūlā urasijārohaviṣaye stanaviṣaye nitambaviṣaye ca | 
viṣayaśabdaḥ sthalavācī | jagat prapañcaṃ trātuṃ rakṣituṃ 
śambhoḥ sadāśivasya jayati ahameveti sphuratītyarthaḥ | karuṇā 
kṛpātmikā kācit anirvācyā aruṇā aruṇākhyā śaktiḥ | yadvā 
aruṇavarṇā kācit karuṇā kṛpā karuṇāyā āruṇyāropāt mūrtā 
karuṇeva bhātīti vākyārthaḥ | aruṇākhyā śaktirarthādavagatā 
|| 

atretthaṃ padayojanā śaṃbhoḥ kācit keśeṣu arālā mandahasite 
prakṛtisaralā citte śirīṣābhā kucataṭe dṛṣadupalaśobhā 
madhye bhṛśaṃ tanvī urasijārohaviṣaye pṛthuḥ aruṇā karuṇā 
jagat trātuṃ jayati || 

atra kāmeśvaryāḥ aruṇākaruṇāśabdābhyāṃ 
nigīryādhyavasānāt atiśayoktiḥ || 93 || kalaṅkaḥ kastūrī 
rajanikarabimbaṃ jalamayaṃ kalābhiḥ karpūrairmarakatakaraṇḍaṃ 
nibiḍitam | atastvadbhogena pratidinamidaṃ riktakuharaṃ 
vidhirbhūyobhūyo nibiḍayati nūnaṃ tava kṛte || 94 || kalaṅkaḥ 
lāñchanaṃ kastūrī mṛganābhiḥ rajanikarabimbaṃ candrabimbaṃ 
jalamayam | svārthe mayaṭ | pannīrabhityarthaḥ | kalābhiḥ 
kalātmakaiḥ karpūraiḥ saha marakatakaraṇḍaṃ marakatamaṇinā 
racitam | marakataśabdo varṇavyatyayena makaraśabdādutpannaḥ 
makarāt makarataḥ | makaravaktrājjātaṃ makaratamiti bhojarājaḥ | 
karaṇḍaṃ nibiḍitaṃ antaḥpūritam | ataḥ tvadbhogena tava devyāḥ 
upabhogenānubhavena 

p. 188) 

kastūrīpannīrakarpūrāṇāṃ anubhavena pratidinaṃ dinedine idaṃ 
paridṛśyamānamindumaṇḍalaṃ riktakuharaṃ śūnyāntaraṃ vidhiḥ 
brahmā bhūyobhūyaḥ pratidinaṃ nibiḍayati pūrayati | nūnaṃ tava 
kṛte tubhyamityarthaḥ | 

arthe kṛte ca tādarthye nipātadvayamīritam | 

iti kṛteśabdastādarthye nipātitaḥ tadyoge ṣaṣṭhyeva || 

atretthaṃ padayojanā he bhagavati ! kalaṅkaḥ kastūrī 
rajanikarabimbaṃ jalamayaṃ kalābhiḥ karpūraiḥ nibiḍitaṃ 
marakatakaraṇḍam | ataḥ idaṃ pratidinaṃ tvadbhogena riktakuharaṃ 
vidhiḥ bhūyobhūyaḥ tava kṛte nibiḍayati nūnam | 

atrātiśayoktiralaṅkāraḥ marakatakaraṇḍatvena 
candramaṇḍalasyādhyavasānāt | yadvā apahnavālaṅkāraḥ ayaṃ 
kalaṅko na bhavati api tu kastūrī idaṃ rajanikarabimbaṃ na bhavati 
kintu bahiḥpratiphalitamantargataṃ pannīraṃ imāḥ kalāḥ na 
bhavanti api tu karpūrarajaḥ idamindumaṇḍalaṃ 
antassthitadravyapratiphalanavaśāt pītavarṇaṃ pratīyate vastutastu 
śvetavarṇamevetyādyavasthāpahnavamālāyāḥ pratīteḥ | 
utprekṣālaṅkāraśca pratipadādidineṣu vṛddhikṣayavataḥ 
candramasaḥ kastūryādidravyavyayapraveśābhyāṃ 
īṣadriktatvasaṃpūrṇatvayossambhāvanāt | ataḥ anayoranusṛṣṭiḥ 
aṅgāṅgibhāvena pṛthaksthityā avasthānāt || 94 || 

purārāterantaḥpuramasi tatastvaccaraṇayoḥ saparyāmaryādā 
taralakaraṇānāmasulabhā | tathā hyete nītāḥ śatamakhamukhāḥ 
siddhimatulāṃ tava dvāropāntasthitibhiraṇimādyābhiramarāḥ || 95 
|| 

purārāteḥ purāntakasya antaḥpuraṃ avarodhaḥ paṭṭamahiṣīti 
yāvat | asi bhavasi | tataḥ tasmātkāraṇāt tvaccaraṇayoḥ tava 
padayoḥ saparyāmaryādā 

p. 189) 

pūjāprakāraḥ taralakaraṇānāṃ cañcalacittānāṃ asulabhā 
durlabhā | antaḥpurapraveśaḥ cañcalacittānāṃ nāstīti 
prasiddham | ato niścalacittaistu sauvidallaiḥ praveṣṭavyam iti 
nītivākyāmṛte | nirmalacittaireva sudhāmbhodhimadhyasthitāyāḥ 
pādāmbujasevā jñāyate nānyairityarthaḥ | tathā hiḥ prasiddhau | 
ete nītāḥ śatamakhamukhāḥ indramukhyāḥ suraguṇāḥ siddhiṃ 
saṃsiddhiṃ atulāṃ asadṛśīṃ tava bhavatyāḥ 
dvāropāntasthitibhiḥ dvārasamīpe stitayo yāsāṃ tābhiḥ | 
aṇimādyābhiḥ aṇimāpramukhābhiḥ siddhibhiḥ saha amarāḥ 
nirjarāḥ || 

atretthaṃ padayojanā he bhagavati ! purārāterantaḥpuramasi | 
tatastvaccaraṇayossaparyāmaryādā taralakaraṇānāmasulabhā | 
tathā hi ete śatamakhamukhāḥ amarāḥ tava dvāropāntasthitibhiḥ 
aṇimādyābhiḥ saha atulāṃ siddhiṃ nītāḥ | 

yathā tava dvāropāntameva aṇimādisiddhayassevante 
evamindrādayo'pi | iyāṃstu viśeṣaḥ aṇimādyaṣṭasiddhīnāṃ 
dvārapālakatvena sarvadā tatra vāsaḥ svabhāvasiddhaḥ | 
indrādīnāṃ tu taralakaraṇatvāt antaḥpurapraveśānarhatvāt 
dauvārikānumatyā dvāradeśe'vasthānaṃ siddhiśabdārthaḥ iti 
tātparyam || 95 || kalatraṃ vaidhātraṃ katikati bhajante na kavayaḥ 
śriyo devyāḥ ko vā na bhavati patiḥ kairapi dhanaiḥ | mahādevaṃ 
hitvā tava sati satīnāmacarame kucābhyāmāsaṅgaḥ 
kuravakatarorapyasulabhaḥ || 96 || 

kaśmalāttrāyata iti kalatraṃ patnī | kaśmalaṃ narakaṃ 
madhyavarṇalopaḥ pṛṣodarāditvātsādhuḥ | kalatraṃ kaśmalāt 
trāyata iti rakṣitaḥ | vaidhātraṃ vidhātṛsambandhi | 
vidhātṛśabdasya tasyedam ityaṇi kṛte saṃbandhamātraparatve 
tadviśeṣajijñāsāyāṃ kalatraśabdasyānvaya iti | 

p. 190) 

dhātuḥ kalatramityukte tu saṃbandhamātre nihitā ṣaṣṭhī 
sabandhinyeva paryavasyatīti sākṣādanvaya iti bhāvaḥ | ato nāyaṃ 
prayogo doṣāvahaḥ | vaidhātraṃ kalatraṃ sarasvatīṃ katikati 
bhajante sevante | na kavayaḥ ke vā kavayo na bhajante sarve'pi 
bhajanta ityarthaḥ | śriyo devyāḥ lakṣmyāḥ ko vā na bhavati 
patiḥ kairapi [adhipatirityadhikaḥ pā.] dhanaiḥ | mahādevaṃ 
sadāśivaṃ hitvā tava bhavatyāḥ sati ! pativrate ! satīnāṃ 
pativratānāṃ acarame ! agragaṇye ! kucābhyāṃ āsaṅgaḥ 
āliṅgaḥ kuravakatarorapi asulabhaḥ sulabho na bhavati | 
kucāliṅganaṃ dohadatvenāpi kuravakataroracetanasyāpi na sambhavati 
kimu vaktavyaṃ puruṣāntara iti pātivratyaṃ vācāmagocaramiti 
bhāvaḥ || 

atretthaṃ padayojanā he sati ! vaidhātraṃ kalatraṃ katikati 
kavayaḥ na bhajante ! śriyo devyāḥ kairapi dhanaiḥ ko vā patiḥ na 
bhavati | he satīnāmacarame ! mahādevaṃ hitvā tava 
kucābhyāmāsaṅgaḥ kuravakatarorapyasulabhaḥ || 

ayamarthaḥ ye mantrajapādyāsāditasārasvatāḥ te 
sarasvatīvallabhā iti gīyante | ye 
dhanadhānyāśvagajādisamṛddhimantaḥ te lakṣmīpatayaḥ iti 
gīyante | pārvatīpatistu mahādeva eveti pātivratyamahimā 
avāṅmanasagocara iti || 96 || 

girāmāhurdevīṃ druhiṇagṛhiṇīmāgamavido hareḥ patnīṃ padmāṃ 
harasahacarīmadritanayām | turīyā kāpi tvaṃ 
duradhigamanissīmamahimā mahāmāyā viśvaṃ bhramayasi 
parabrahmamahiṣi || 97 || 

p. 191) 

girāṃ vācāṃ āhuḥ kathayanti | devīṃ adhidevatāṃ 
duhiṇagṛhiṇīṃ brahmaṇaḥ patnīṃ āgamavidaḥ 
āgamarahasyavedinaḥ hareḥ viṣṇoḥ patnīṃ jāyāṃ padmāṃ 
padmālayāṃ harasahacarīṃ śaṃbhupatnīṃ adritanayāṃ pārvatīm 
| turīyā caturthī kāpi anirvācyā tvaṃ duradhigamanissīmamahimā 
duḥkhena adhigantuṃ śakyaḥ sa cāsau nissīmo mahimā yasyāḥ sā 
deśataḥ kālato vastutaścāparicchedyetyarthaḥ | mahāmāyā 
śuddhavidyāntargataṃ māyātattvaṃ viśvaṃ prapañcaṃ bhramayasi 
vivartayasīti vivartaṃ brahmadharmaṃ māyāyāmatidiśati | 
parabrahmamahiṣi parabrahmaṇaḥ sadāśivasya mahiṣi ! tathā ca 
śrūyate hrīśca te lakṣmīśca patnyau [tai. ā. 3-13] iti 
puruṣasūkte | hrīḥ bhuvaneśvarī lakṣmīḥ śrīvidyā ubhe 
brahmaṇaste patnyau | atra tayormadhye śrīvidyāyāḥ prādhānyaṃ 
śrīvidyāyāṃ bhuvaneśvaryā antarbhāvāt | bhuvaneśvaryāṃ na 
śrīvidyāyā antarbhāva iti candrakalāprādhānyena saiva mahiṣīti 
dhyeyam || 

atretthaṃ padayojanā he parabrahmamahiṣi ! āgamavidaḥ tvāmeva 
druhiṇagṛhiṇīṃ girāṃ devīmāhuḥ tvāmeva hareḥ patnīṃ 
padmāmāhuḥ tvāmeva harasahacarīṃ adritanayāmāhuḥ tvaṃ turīyā 
kāpi duradhigamanissīmamahimā mahāmāyā satī viśvaṃ bhramayasi 
|| 

ayamarthaḥ ekāmeva bhagavatīṃ nānānāmabhiḥ gṛṇantyāgamavidaḥ 
parabrahmamahiṣī śrīvidyāparanāmadheyā candrakalā ekaiveti || 97 
|| 

kadā kāle mātaḥ kathatha kalitālaktakarasaṃ pibeyaṃ vidyārthī 
tava caraṇanirṇejanajalam | 

p. 192) 

prakṛtyā mūkānāmapi ca kavitākāraṇatayā kadā dhatte 
vāṇīmukhakamalatāmbūlarasatām || 98 || 

kadā kāle janmaprabhṛtyavasānaparyanta iti śeṣaḥ | mātaḥ ! 
janani ! kathaya samyagupadiśa | kalitālaktakarasaṃ kalitaṃ 
upadigdhaṃ alaktakarasaṃ lakṣārasaṃ yāvakaṃ vā | strīṇāṃ 
pādādharoṣṭharañjanārthaṃ alaktakadravaṃ upadihanti 
sairandhryaḥ | pibeyaṃ prārthanāyāṃ laṅ | vidyārthī vidyāḥ 
arthayata iti vidyārthī | yadvā arthaḥ prayojanamasya arthī 
vidyābhiḥ arthīti | atra rakṣita āha arthaśabdānmatvarthe 
[śabdāt bhāvārthe. pā.] inipratyayaḥ iti | ata eva tenārthavān 
lobhaparāṅmukhena iti kālidāsena matubeva prayuktaḥ | māghe 
nitāntamarthinaḥ iti ṇinireva | arthī samarthī vidvān ityādāvapi 
ṇinireva | ata eva pūrvavyākhyaiva samīcīnā | tava bhavatyāḥ 
caraṇanirṇejanajalaṃ caraṇayoḥ pādayoḥ nirṇejanajalaṃ 
pādyodakaṃ prakṛtyā svabhāvena mūkānāṃ apiḥ virodhe 
cakāraśśaṅkācchede kavitākāraṇatayā kavitāyāḥ hetutayā 
kadā dhatte vāṇīmukhakamalatāmbūlarasatāṃ vāṇyāḥ 
sarasvatyāḥ mukhakamale yastāmbūlarasaḥ tasya bhāvastattā tām || 

ayaṃ bhāvaḥ bhagavatīpādāravindanirṇejanajalaṃ sālaktakaṃ 
kavitāhetuḥ kavīśvarasya vadane sthitaṃ sarasvatītāmbūlarasa iva 
pratyakṣaṃ bhāti | sa tu kavīśvaraḥ puṃbhāvamāpannā 
sarasvatīvābhātīti || 

atretthaṃ padayojanā he mātaḥ ! tava kalitāsaktakarasaṃ 
caraṇanirṇejanajalaṃ vidyārthī ahaṃ kadā kāle pibeyaṃ kathaya | 
tacca prakṛtyā mūkānāṃ aneḍamūkānāṃ vaktuṃ śrotuṃ 
aśikṣitānāmapi ca kavitākāraṇatayā 
vāṇīmukhakamalatāmbūlarasatāṃ kadā dhatte || 

p. 193) 

atredamanusandheyam bhagatpādaiḥ aneḍamūkebhyaḥ 
laghucarcāstotradvayaṃ hastamastakasaṃyogamahimnā avāci | 
tanmahimnā bhagavatī pādāravindanirṇejanajalaṃ tanmukhe dattavatī 
| tannirṇejanajalaṃ punaḥ prārthayatyācāryaḥ | anena 
sāmīpyamuktiruditā | tadviśeṣānuttaraśloke vivariṣyāmaḥ | 
caraṇanirṇejanajalamiti vadatā samayimatamevoktaṃ kaulamate 
bhujagākāreṇaiva devyā avasthānāt 
caraṇanirṇejanajalasyābhāvāt ! sahasrakamala eva 
caraṇanirṇejanajalamiti pūrvameva bahudhā prapañcitam | ata eva- 

sudhādhārāsāraiścaraṇayugalāntarvigalitaiḥ prapañcaṃ 
siñcantī punarapi rasāmnāyamahasaḥ || [daśamaḥ ślokaḥ] 

itīdamardhaṃ samayamatapratipādakam | 

avāpya svāṃ bhūmiṃ bhujaganibhamadhyuṣṭavalayaṃ svamātmānaṃ 
kṛtvā svapiṣi kulakuṇḍe kuhariṇi || [daśamaḥ ślokaḥ] 

itīdamardhaṃ kaulamatapratipādakamiti vivekaḥ || 

atrotprekṣālaṅkāraḥ caraṇanirṇejanālaktakarasasya 
sarasvatītāmbūlarasatvenādhyavasānāt | samayinaḥ 
sākṣātsarasvatīsvarūpatvenādhyavasānācca utprekṣātiśayoktyoḥ 
saṅkaraḥ || 98 || 

prakrāntāṃ stutiṃ upasaṃharan ṣaṭkamalabhedasiddhāntaṃ 
[śāstrabheda] nirdiśati- 

sarasvatyā lakṣmyā vidhiharisapatno viharate rateḥ pātivratyaṃ 
śithilayati ramyeṇa vapuṣā | ciraṃjīvanneva 
kṣapitapaśupāśavyatikaraḥ parānandābhikhyaṃ rasayati rasaṃ 
tvadbhajanavāt || 

p. 194) 

sarasvatyā bhāratyā lakṣmyā padmālayayā vidhiharisapatnaḥ 
yathākramamiti śeṣaḥ | sarasvatīpatitvena vidhiḥ brahmaṇaḥ 
sapatnaḥ asūyāspadam lakṣmīpatitvena hareḥ asūyāspadamityarthaḥ 
| viharate viharamāṇaḥ rateḥ kāmamahiṣyāḥ pātivratyaṃ 
pativratādharmaṃ puruṣāntarāsaṃparkarūpaṃ śithilayati 
manmathākāratayā rateḥ manmathabhrāntiṃ janayan sambhogecchāṃ 
janayatīti bhāvaḥ | ramyeṇa atisundareṇa vapuṣā śarīreṇa 
tādātmyabuddhyeti yāvat | evaṃ sādākhyāyāḥ kalāyāḥ 
upāsakasya aihikaphalamuktvā āmuṣmikamapyāha ciraṃjīvanneva 
nityajīvanassan | sāvayavadravyasya nityatvaṃ 
paśupāśavyatikarakṣapaṇahetukam | atra kevalavyatireki anumānaṃ 
sādhanatvena prayojyam sāvayavaṃ yat kṣapitapaśupāśavyatikaraṃ 
na bhavati tannityaṃ na bhavati yathā paśvādi iti 
jīvanmuktisiddhiḥ | sāvayavāḥ kapilādayaḥ mārkaṇḍeyādayo 
nityasiddhāḥ ataḥ anvayavyatireki vā bhavatu sāvayavasya 
nityatāyāṃ sādhanam | evaṃ nityajīvanaḥ san 
kṣapitapaśupāśavyatikaraḥ kṣapitaḥ vinaṣṭaḥ paśupāśayoḥ 
vyatikaraḥ | paśuḥ jīvaḥ indriyaiḥ prapañcaṃ paśyatīti | 
yadvā paśa bandhane ityasmāddhātoḥ paśuḥ avidyābaddho jīvaḥ 
pāśaḥ avidyā | etacca śrūyate- 

aditiḥ pāśaṃ pra mumoktvetannamaḥ paśubhyaḥ paśupataye karomi || 
[tai. saṃ. 3 -1-4] 

asyārthaḥ aditiḥ ādityamaṇḍalāntargatā baindavī śaktiḥ | 
pāśaṃ avidyākṛtaṃ bandhaṃ pramumoktu prakarṣeṇa atyantaṃ 
mocayatu | etat namaḥ namaskāraṃ paśupataye karomi | paśubhya iti 
tādarthye caturthī | tadarthatvaṃ nivṛttiḥ | paśutvanivṛttyartham 
| ayamarthaḥ aditiḥ paśupatinā sadāśivena yuktā pāśavimocanaṃ 
karotviti | paśuśabdasya jīvavācitvaṃ 

p. 195) 

taittirīyake saumyakāṇḍe teṣāmasurāṇām [tai. saṃ. 6-1-3] 
ityanuvāke teṣāmasurāṇāmityārabhya tasmādrudraḥ 
paśūnāmadhipatiḥ ityantena [tai. saṃ. 6-1-3] pratipāditam | ataḥ 
paśupāśau jīvāvidye tayorvyatikaraḥ saṃbandhaḥ sa ca kṣapitaḥ 
vidalitapaśupāśasaṃbandhaḥ sadāśivatattvātmanā'vasthitaḥ 
parānandābhikhyaṃ parānandātmikā abhikhyā jyotiryasya saḥ taṃ 
parānandābhikhyaṃ jyotīrūpaṃ rasayati āsvādayati rasaṃ sukhaṃ 
tvadbhajanavān tvadbhaktaḥ tava bhajanaṃ sevā || 

atretthaṃ padayojanā he bhagavati ! tvadbhajanavān sarasvatyā 
lakṣmyā vidhiharisapatnaḥ san viharate | ramyeṇa vapuṣā rateḥ 
pātivratyaṃ śithilayati | kṣapitapaśupāśavyatikaraḥ 
ciraṃjīvanneva parānandābhikhyaṃ rasaṃ rasayati || 

atredamanusandheyam jīvanmuktānāṃ avidyānivṛttāvapi 
kulālacakrabhramaṇanyāyena dehasaṃbandhaḥ | yathoktaṃ 
ṣaṣṭitantre saptatyām- 

samyajjñānādhigamāddharmādīnāmakāraṇaprāptau | tiṣṭhati 
saṃskāravaśāccakrabhramavaddhṛtaśarīraḥ || iti || 

atra tvadbhajanavānityatra dvividhaṃ bhajanaṃ ṣaṭcakrasevātmakaṃ 
dhāraṇātmakaṃ ca | ādyaṃ nirūpyate ādhārasvādhiṣṭhāne 
tāmisralokatvāt nopāsye | maṇipūraprabhṛtisahasrakamalaparyantaṃ 
pañca cakrāṇi pūjyānīti | tatra maṇipūrakapūjāparāṇāṃ 
sārṣṭirūpā muktiḥ | sārṣṭirnāma devyāḥ purasamīpe 
purāntaraṃ nirmāya sevāṃ kurvāṇasya avasthitiḥ | 
saṃvitkamalapūjāratānāṃ sālokyamuktiḥ sālokyaṃ nāma devyāḥ 
paṭṭaṇe nivāsaḥ | viśuddhicakropāsakānāṃ sāmīpyamuktiḥ | 
samīpyaṃ nāma aṅgasevakatvam | ajñācakropāsakanāṃ 
sārūpyamuktiḥ | 

p. 196) 

sārūpyaṃ nāma samānarūpatvam | pṛthagdehadhāritveneti 
sāyujyādbhedaḥ | etat caturvidhaṃ gauṇaṃ 
bāhyaduḥkhātivartitvamātrāt muktiriti vyapadiśyate | paraṃ tu 
sāyujyātmikaiva śāśvatī muktiḥ sahasrakamalopāsakānāmeveti | 
ata eva parānandābhikhyaṃ rasaṃ yathāyogyaṃ tvadbhajanavān 
rasayati iti || 

atredaṃ matatattvam ṣaṭkamalabhedamate sukhasvarūpaiva muktiḥ | 
sukhaṃ tu laukikadṛṣṭāntena strīsaṃbhogātmikai(tmakame)va | 
loke'pi strīsammelanāt paraṃ sukhaṃ nāsti | 
evamatyantaduḥkhochedānantaraṃ sāyujyasaṃsiddhau 
śivaśaktisampuṭāntarbhāvāt tadātmikaiva muktiriti || 

tadayamatra niṣkarṣaḥ pūrvaṃ mūlādhārādiṣaṭcakrāṇāṃ 
trikoṇāṣṭakoṇadaśāradvitayamanvaśraśivacakrātmanā 
tādātmyaṃ pratipāditam | etadeva nādabindvoraikyam | tathā hi 
nādo nāma śrīcakram | bindurnāma ṣaṭkamalagahanaṃ vakṣyate | 
tayoraikyaṃ nāma ādhāracakraṃ caturdalaṃ tatkarṇikā 
trikoṇātmikā svādhiṣṭhānaṃ ṣaḍdalaṃ tatkarṇikā 
aṣṭakoṇātmikā maṇipūraṃ daśadalaṃ padmaṃ tatkarṇikā 
daśakoṇātmikā anāhataṃ dvādaśadalaṃ tatkarṇikā 
dvitīyadaśakoṇātmikaiva viśuddhicakraṃ ṣoḍaśadalaṃ 
tatkarṇikā caturdaśakoṇātmikā etāvatparyantaṃ śakticakraikyam | 
ājñācakraṃ dvidalaṃ aṣṭakoṇamekatra ṣoḍaśakoṇamaparatreti 
dvidhā bhinnā karṇikā | ayaṃ bhāvaḥ dvidhā [dvidalādbhinnam] 
bhinnaṃ caturaśraprakṛtikaṃ śivacakracatuṣṭayātmakaṃ 
ādhārasvādhiṣṭhānātmakaṃ ceti prapañcitam | vṛttatrayaṃ 
svādhiṣṭhānānte ekaṃ vṛttaṃ rudragranthyātmakaṃ anāhatānte 
ekaṃ viṣṇugranthyātmakaṃ ājñācakrānte ekaṃ 
brahmagranthyātmakam | tata upari caturdvāropetaṃ bhūpuratritayaṃ 
[tritayopetaṃ puratrayam] dvāreṣu caturṣu sopānayuktam | tacca 
sahasradalakarṇikā | tasya kamalasya dalāni sahasram | 
baindavasthānaṃ caturdvāropetaṃ karṇikāmadhye | 

p. 197) 

evaṃ prāsādanyāyena śrīcakrasya kamalānāṃ caikyamanusandheyam | 
etacca nādabindvaikyaṃ guhyāt guhyatamaṃ śiṣyānugrahāt 
upadiṣṭam || 

asmin ṣaṭcakre pañcāśatkalānāmantarbhāvaḥ kathitaḥ | 
candrakhaṇḍe svarāḥ sūryakhaṇḍe sparśāḥ agnikhaṇḍe 
antasthāḥ ūṣmāṇaśca hakāravarjitāḥ hakāralakārau baindave 
kṣakārassarvatreti savitrībhiḥ [17 śloka] iti ślokena prāgeva 
pratipāditam | mūlādhārādidaleṣu kalānāṃ antarbhāvaḥ prāgeva 
pratipāditaḥ | kalānāṃ tithyātmakatvaṃ nityānāṃ 
kalātmakatvaṃ kalānāṃ mūlamantragatapañcadaśākṣarātmakatvaṃ 
pañcadaśākṣarāṇāṃ trikhaṇḍatvaṃ trikhaṇḍasya 
somasūryānalātmakatvaṃ somasūryānalānāṃ granthitrayātmakatvaṃ 
granthitrayasya mantragatahrīṅkāratrayātmakatvaṃ hrīṅkārasya 
bhuvaneśvarīmantratvaṃ bhuvaneśvarīmantrasya 
mūlamantrāntargatatvaṃ mūlamantrasya cakreṇaikyaṃ 
taccakranavakasya mūlādhārādiṣaṭcakreṣu 
brahmagranthyāditrike'pi sahasrakamalakarṇikādau tādātmyam | 
etadeva kalānādayoraikyaṃ nāma || 

ayamatra niṣkarṣaḥ nādena bindoraikyaṃ bindunā kalāyāḥ aikyaṃ 
kalāyāśca nādenaikyaṃ evaṃ tritayaṃ kalayā bindoraikyaṃ kalayā 
nādasyaikyaṃ śrīvidyāyā pañcakasyaikyamiti 
ṣaḍvidhatvamaikyasyeti paramarahasyaṃ gurūpadeśavaśāt jñeyam | 
evaṃ ṣoḍhaikyaṃ bhagavatyāḥ saparyeti samyagupavarṇitam | 
ṣoḍhaikyānusandhānānantaraṃ daśabhujā bhagavatī śrīvidyā 
maṇipūre pratyakṣaṃ paridṛśyamānā saparyayā sannidheyeti 
aikyānusandhānameva saparyeti vadato mamāśayaḥ iti vijñeyam | 

adhunā bindusvarūpaṃ prapañcyate binduriti 
mūlādhārādicakraṣaṭkam | binduḥ jagadutpattilayahetuḥ śivasya 
śaktiviśeṣaḥ | sa ca eka eva 
sahasrakamalāntacaturdvārātmakakarṇikāmadhyagatacatuṣkoṇātmakaṃ 
śaktitattvam | tanmadhyagataśivatattvaṃ nāda ityucyate | sa 
caturvidha iti prāgevoktam | ubhayoḥ 

p. 198) 

śaktiśivayoḥ śabdārtharūpatvāt kalātmakatvaṃ 
ubhayasādhāraṇam | ataśca melanaṃ nādabindukalātītamiti 
samayamatarahasyam | sa ca binduḥ daśadhā bhidyate | yathoktam- 

daśadhā bhidyate bindureka eva parātmakaḥ | 
caturdhā''dhārakamale ṣoḍhā'dhiṣṭhānapaṅkaje || 
ubhayākārarūpatvāditareṣāṃ tadātmatā | iti | 

asyārthaḥ eka eva binduḥ mūlādhārakamalagatacaturdaleṣu caturdhā 
svādhiṣṭhānapadmagataṣaḍdaleṣu ṣoḍhā evaṃ daśadhā bhidyate 
| ayaṃ bhāvaḥ mūlādhāraṃ catuṣpatraṃ sarasijaṃ 
svādhiṣṭhānaṃ ṣaḍdalaṃ maṇipūraṃ daśadalaṃ anāhatapadmaṃ 
dvādaśadalaṃ viśuddhipadmaṃ ṣoḍaśadalaṃ ājñācakraṃ 
dvidalamiti sarvayogaśāstrasiddham | atra ādhārapadmasya 
dalacatuṣṭayaṃ binducatuṣṭayātmakam | te ca bindavo 
manobuddhyahaṅkāracittākhyāḥ prakṛtyātmakāḥ 
jagannirmāṇahetava iti sarvayogaśāstrasiddham | 
svādhiṣṭhānapadmagataṣaḍdalānāṃ 
kāmakrodhalobhamohamadamātsaryātmakāḥ ṣaḍbindavaḥ | ata eva te 
saṃhṛtibindava ityāhuḥ | taduktaṃ bhagavatā patañjalinā 
svādhiṣṭhāne saṃhāraḥ ṣaḍabindukṛtaḥ iti | evaṃ daśa 
bindavaḥ kamaladvayadalātmakāḥ | maṇipūraṃ 
mūlādhārasvādhiṣṭhānātmakamiti kṛtvā daśadalam | 
anāhatacakre maṇipūraprakṛtikaṃ daśadalaṃ 
pūrvakamaladvayaprakṛtikaṃ daladvayaṃ dvādaśadalaṃ anāhatapadmam 
| viśuddhipadmaṃ tu anāhatacakraprakṛtikaṃ dvādaśadalam 
ādhāraprakṛtikaṃ caturdalaṃ evaṃ ṣoḍaśadalam | tathā 
maṇipūraprakṛtikaṃ daśadalaṃ svādhiṣṭhānaprakṛtikaṃ 
ṣaḍdalamiti ṣoḍaśadalam | ājñācakraṃ tu 
ādhārasvādhiṣṭhānātmakamiti dvidalam | evaṃ maṇipūraprabhṛti 
ājñāntāni catvāri kamalāni 
mūlādhārasvādhiṣṭhānaprakṛtikāni | ata eva mūlādhāradvike 
uttarakamalacatuṣkamantarbhūtamiti ekasyaiva bindoḥ daśadhātvaṃ 
nānyatheti siddham || 

p. 199) 

yadyapi kaulānāṃ dvikānusandhānāt ṣaṭkamalānusandhānaphalaṃ 
setsyati tathāpi ṣaḍvidhaikyānusandhānābhāvāt kulamārga eveti 
na devyā maṇipūre sānnidhyaṃ pañcavidhamuktiyuktyabhāvaśca 
nādabindukalātītatvamapyasaṃbhāvyameva kaulamate iti | samayināṃ 
tu kāryabhūtacatuṣkānusandhānādeva 
kāraṇabhūtakamaladvayānusaṃdhānaphalaṃ setsyatīti | ata eva 
pañcavidhasāmyasiddhau samayasamayibhāvaḥ pratyakṣaṃ paridṛśyate 
samayasamayinoḥ samayināṃ sevakānāmiti bhagavatpādamatatattvam || 

evaṃ bhajanaśabdārthaṃ pratipādya prakārāntareṇa 
bhajanaśabdārtho nirūpyateyadāyuḥ bhagavatpādāḥ 
dhāraṇāparijñānānmuktiḥ iti | asyārthaḥ dharaṇāḥ 
ṣaṣṭyuttaratriśatasaṅkhyākāḥ | dhāraṇā nāma vāyoḥ 
kamaleṣu nādakalābhyāṃ nirodhaḥ | sa ca ṣaṭkamaleṣu ṣoḍhā 
saptame kamale samayaśabdābhilapyena sārdhaṃ saptavidhaḥ | 
ekaikasmin kamale pañcāśaditi ṣaṣṭyuttaratriśataṃ dhāraṇāḥ 
(?) | tāśca pṛthak nādabindukalābhissārdhaṃ 
melanaprakārairanantā dhāraṇā gurūpadeśavaśādavagantavyāḥ | 
dhāraṇānāṃ phalaṃ ādhārādicakraṣaṭke yathākramaṃ 
matismṛtibuddhiprajñāmedhāpratibhāsaṃvidrūpaṃ diṅmātraṃ 
darśitam | adhikaṃ tu subhagodaye caraṇāgame ca saprapañcaṃ 
bahudhā pratipāditaṃ tata evāvadhāryaṃ 
granthavistarabhayānnopavarṇitamiheti | ata eva 
kālidāsabhagavatpādaiḥ kulasamayamatabhedapratipādakaślokena 
sakalajananīstotre kathitam | yathā- 

catuṣpatrāntaṣṣaḍdalapuṭabhagāntastrivalaya-sphuradvidyudvahnidyu 
maṇiniyutābhadyutilate || ṣaḍaśraṃ bhitvā''dau daśadalamatha 
dvādaśadalaṃ kalāśraṃ ca dvyaśraṃ gatavati namaste girisute || 

asyārthaḥ catuṣpatraṃ ādhārakamalaṃ antaḥ antassthitaṃ 
antarbhūtamityarthaḥ yasmin tat | 

p. 200) 

svādhiṣṭhānamiti bahuvrīhiḥ na tu tatpuruṣaḥ uttarasya 
pūrvasminnantarbhāvāyogāt | ṣaḍaśraṃ bhitvā''dau 
ityuttaravākyānanvayācca bahuvrīhireva | catuṣpatrāntaśca tat 
ṣaḍdalaṃ svādhiṣṭhānaṃ ca catuṣpatrāntaṣṣaḍdalam | tasya 
puṭabhagāḥ puṭātmakāḥ sampuṭātmakāḥ tatprakṛtikā iti yāvat 
te ca te bhagāḥ trikoṇāni | maṇipūraprabhṛti catuścakrasya 
mūlādhāraprakṛtikatvasyoktatvāt teṣāṃ trikoṇātmakatvam | 
trikoṇe baindavaṃ śliṣṭaṃ aṣṭāre'ṣṭadalāmbujam ityatra 
samyaṅnirṇitam | puṭabhagānāṃ antaḥ madhye | trivalayaṃ 
granthitrayaṃ svādhiṣṭhānānāhatājñānteṣu 
agnisūryacandrātmakarudragranthiviṣṇugranthibrahmagranthiparyāyatve 
na sthitamityarthaḥ | tatra sphurat sphurantī | striyāḥ 
puṃvadbhāṣitapuṃskādanūṅ samānādhikaraṇe ityādinā 
puṃvadbhāvaḥ | vidyutaḥ saudāminyāḥ vahneḥ agneḥ 
dyumaṇessūryasya | niyutaśabdaḥ agāṇeyāṃ saṅkhyāṃ lakṣayati 
| tasyevābhā yasyāssā sā ca sā dyutilatā nityā taṭidvallī 
sthirasaudāminīti yāvat | tasyāḥ sambuddhiḥ | ājñācakrānte 
brahmagranthibhedanasamaye vidyunniyutābhā svādhiṣṭhānānte 
rudragranthibhedanasamaye vahniniyutābhā anāhatacakrānte 
viṣṇugranthibhedanasamaye dyumaṇiniyutābhā iti vivekaḥ | 
ṣaḍaśraṃ mūlādhāragarbhitaṃ svādhiṣṭhānaṃ ādau bhittvā 
atha tadanantaraṃ daśadalaṃ maṇipūraṃ bhittvā dvādaśadalaṃ 
anāhatacakraṃ bhittvā kalāśraṃ viśuddhicakraṃ bhittvā 
dvyaśraṃ ājñācakraṃ bhittvā gatavati sahasrakamalamiti śeṣaḥ | 
he girisute ! himācalatanaye ! te namaḥ || 

atra catuṣpatraṃ mūlādhāraṃ svādhiṣṭhāne antarbhūtaṃ 
kaulāḥ upāsata iti prāgeva pratipāditam | samayinastu 
svādhiṣṭhānaṃ bhitvā maṇipūraṃ praviṣṭāyāḥ devyāḥ 
upāsanaṃ kurvantīti samayamatatattvaṃ ca pratipāditam ! 
atredamupahvaraṃ ṣaṭkamaleṣu manaṣṣaṣṭhaṃ bhūtapañcakaṃ 
tādātmyenāvatiṣṭhate | tacca 
piṇḍāṇḍabrahmāṇḍayoraikyānusandhānamahimnā 
ṣaṭakamalānusandhānasahimnā pañcavidhasāmyānusandhānamahimnā 
ṣaḍvidhaikyānusandhānamahimnā piṇḍāṇḍaṃ 
brahmāṇḍavadavabhāsata iti sarvayogaśāstrarahasyam | 

p. 201) 

ata eva yoginā caturvidhaikyānusandhānaṃ kartavyameva | tathā ca 
śrūyate- 

piṇḍabrahmāṇḍayaurekyaṃ liṅgasūtrātmanorapi | 
svāpāvyākṛtayoraikyaṃ kṣetrajñaparamātmanoḥ | 

ayamarthaḥ piṇḍāṇḍabrahmāṇḍayoraikyaṃ jñātavyam | 
tadanantaraṃ liṅgātmasūtrātmanoraikyaṃ avagantavyam | liṅgātmā 
liṅgaśarīraṃ ekādaśendriyagaṇaḥ tanmātrāpañcakaṃ 
ṣoḍaśakaṃ liṅgaśarīram | sūtrātmā brahmāṇḍāvacchinno 
vāyuḥ liṅgaśarīrasya arcirādimārgaprāpakaḥ | 
tayoraikyamavagantatryam | svāpāvyākṛtayoḥ svāpaḥ 
suṣuptyavasthāpannaḥ sākṣī prājñaḥ avyākṛtaḥ 
avidyāśabalitaṃ brahma tayoraikyam | kṣetrajñaḥ jīvaḥ 
paramātmā brahmasvarūpaṃ tayoraikyaṃ jñātavyam | evaṃ 
saṃpradāyarahasyasaṃkṣepaḥ | vistarastu subhagodaye śārīrake 
jñātavyaḥ | asmin śloke saundaryalaharyā yāvatprameyajātaṃ 
samayasiddhāntarahasyatvena kaulasiddhāntarahasyatvena ca 
pratipāditamasmābhiḥ saṃkṣepataḥ tatsarvaṃ sūkṣmadṛśā 
mahātmabhiranusandheyamiti sarvamanavadyam || 99 || 

pradīpajvālābhirdivasakaranīrājanavidhiḥ 
sudhāsūteścandropalajalalavairardhyaracanā | svakīyairambhobhiḥ 
salilanidhisauhityakaraṇaṃ tvadīyābhirvāgbhistava janani vācāṃ 
stutiriyam || 100 || 

pradīpasya karadīpikāyāḥ jvālābhiḥ kīlābhiḥ divasakarasya 
sūryasya nīrājanavidhiḥ nīrājanakṛtyam sudhāsūteḥ candrasya 
candropalajalalavaiḥ candropalānāṃ candrakāntānāṃ jalalavaiḥ 
niṣyandaiḥ ardhyaracanā | svakīyaiḥ ātmasaṃbandhibhiḥ 
etatsvakīyapadaṃ pradīpajvālābhirityādau vyatyayenānveti 
svakīyābhiriti | 

p. 202) 

ambhobhiḥ jalaiḥ salilanidhisauhityakaraṇaṃ samudrasya tṛptihetuḥ 
tarpaṇaviśeṣaḥ | tvadīyābhiḥ tvadutpannaiḥ tvatsvarūpaiḥ 
vāgbhiḥ vākyasaṃdarbhaiḥ tava bhavatyāḥ janani ! mataḥ ! 
savitrītyarthaḥ | vācāṃ vākyaprapañcasya stutiriyam | 

atretthaṃ padayojanā-he vācāṃ janani ! yathā svakīyābhiḥ 
pradīpajvālābhiḥ divasakaranīrājanavidhiḥ yathā 
svakīyaiścandropalajalalavaiḥ sudhāsūterardhyaracanā bhavati 
yathā svakīyairambhobhiḥ salilanidhisauhityakaraṇaṃ bhavati tathā 
tvadīyābhiḥ vāgbhireva taveyaṃ stutiḥ || 

atra iyaṃ stutiriti yadā 
pūrvoktapradīpajvālādivākyapratipāditārthasāmyaparāmarśaḥ 
tadā prativastūpamālaṅkāraḥ 
upamānopameyayorvastuprativastubhāvenānvayāt | yadā iyaṃ stutiriti 
svarūpamātraṃ parāmṛśyate tadā bhinnavākyatvena 
bimbapratibimbākṣepāt dṛṣṭāntālaṅkāraḥ | evaṃ 
prativastūpamādṛṣṭāntālaṅkārayoḥ anvayabhedena 
pratīyamānatvāt vākyadvayāśrayaṇāt saṃsṛṣṭireveti dhyeyam || 

asmin saundaryalaharīślokaśatake samānītaḥ padbhyāṃ [ayaṃ 
arālā keśeṣu ityanantaraṃ paṭhyate] iti 
samudbhūtasthūlastanabharam [ayaṃ girimāhuḥ ityanantaraṃ 
paṭhyate] iti nidhe nityasmere [ayaṃ sarasvatyā ityanantaraṃ 
paṭhyate ime ślokāḥ prathamānubandhasyāntime bhāge nirdiṣṭāḥ] 
iti ślokatrayaṃ vartate | tattu bhagavatpādaracitaṃ na bhavati 
kenacitprakṣiptamiti na vyākhyātam | ślokaśatakameva vyākhyātam 
|| 100 || iti 
śrīlollakulasaṃpradāyapravartakabhramarāmbikāvaraprasādasamullasi 
tamahā sārasvatabhaṭṭalollapatigranthavivaraṇakartṛ 
śrīmahopādhyāyamahādevācāryasaptamena 
sāhityapārijātasmṛtikalpataruprabandhaprabandhṛlakṣmīdharāryaṣa 
ṣṭhena 
bharatārṇavapotākhyasāhityamīmāṃsāgranthadvayapraṇetṛviriñcim 
iśra-pañcamena 
mīmāṃsādvayajīvātunirmātṛpuruṣottamamahopādhyāyanaṣtrā 

p. 203) 

prābhākarāmṛtavāhinīprabhāvalīkhaṇḍanādyanekaprabandhasandarb 
ha-pravartakabirudapadamahopādhyāyalakṣmaṇāryapautreṇa 
nayavivekadīpikāprabandhasaṃvidhātṛmahopādhyāyavidvatsārvabhauma 
-nūtanavyāsādyanekabirudāṅkitaśrīviśvanāthabhaṭṭārakatanayen 
a adhītadaśaśatanayena pārvatīgarbhaśuktimuktāratnena 
bahūkṛtadhīciratnena lollakulakalaśāmbudhisudhāṃśunā 
yaśaḥprāṃśunā haritagotrakalpaśākhinā āpastambaśākhinā 
ṣaḍdarśanīpāradṛśvanā pratipakṣavṛkṣajañjhāmātariśvanā 
bhramarāmbikāprasādasamāsāditapratibhāviśeṣeṇa bhuvi śeṣeṇa 
nikhilayāmalatantrārṇavāvagāhanarudreṇa 
āśrayīkṛtagajapativīrarudreṇa 
nīlagirisundaracaraṇāravindacañcarīkeṇa vāṇīsahacarīkeṇa 
sarasvatīvilāsādyanekasmṛtinibandhanalakṣmīdharādyanekasāhityani 
bandhana-nayavivekabhūṣaṇādyanekagurumatanibandhanayogadīpikādyane 
kapātañjala-matanibandhana 
mahānibandhanākhyamānavadharmaśāstra-ṭīkākarṇāvataṃsasabarhā 
vataṃsādyanekakāvyakalpakena āśritajanakalpakena 
nigrahānugrahakauśikena śrīmahopādhyāyalakṣmīdharadeśikena 
kṛteyaṃ lakṣmīdharākhyā saundaryalaharīstutivyākhyā || 

anayā santuṣṭā bhavatu bhagavatī bhavānī || 

asmadīyānāṃ lakṣmīdharācāryāṇāṃ padyam- 

vayamiha padavidyāṃ tantramānvīkṣakīṃ vā yadi pathi vipathe vā 
vartayāmaḥ sa panthāḥ | upayati diśi yasyāṃ bhānumānsaiva 
pūrvā na hi taraṇirudīte dikparādhīnavṛttiḥ || 

sāyaṃ samphullamallīsumasurabhisudhāmādhurīsādhurīti- 
preṅkhatpuṅkhānupuṅkhasphuradamarasari dvīcivācālavācaḥ | 
lollaśrīlakṣmaṇākhyo guṇamaṇijaladhirbhāsate 
bhūsurālī-kelīnālīkapālīdaśaśatakiraṇo vidvadagresaro'sau || 

p. 204) 

yasya saptamaḥ- 

yaḥ karṇāṭavasundharādhipamahāsthāne suvarṇāyito- yo 
vidvannikaṣāyito nṛpagṛhe vemākhyapṛthvīśituḥ | 
śrīmallollaṭabhaṭṭaśiṣya iti yo lollākhyayā śrūyate 
śrīśeṣānvayaśekharaḥ sa hi mahādevo vipaścinmahān || 

tasyoktiḥ- 

nikaṣāyitumīhe vā suvarṇāyitumeva vā | suvarṇāyitumevehe 
nikaṣo na hyalaṅkriyā || 

tarkanyakkṛtavāvadūkanicayaṃ vāditvamāstāṃ mama 
vyākhyātṛtvamudāraśiṣyanivahaślādhyaṃ tathā tiṣṭhatu | 
svarlokacyavamānasiddhataṭinīkallolasallāpināṃ ullāsā vacasāṃ 
na kasya manasāṃ matkāścamatkāriṇaḥ | 

gato'yaṃ śaṅkarācāryo vīramāheśvaro gataḥ | ṣaṭcakrabhedene 
ko vā jānīte matpariśramam || 

samāpto'yaṃ granthaḥ 

anubandhaḥ 1 

saundaryalaharīsthaślokānāṃ 
bījākṣarayutayantrapūjāpuraścaraṇa naivedyaphalāni 

p. 206) 

sūcanā- 

atha saundaryalaharīsthānāṃ sarveṣāmapi ślokānāṃ 
bījākṣarayutayantrapūjāpuraścaraṇanaivedyaphalāni 
keralāṅgalabhāṣayoḥ saṃmudrya prakāśitānyupalabhyante khalu | 
tānyeva aihikaphalākāṅkṣiṇāmupāsakānāṃ saukaryāya saṃskṛte 
parivartyātra saṃyojitāni | iti vibhāvanīyam || 

p. 207) 

śrī tripurasundaryai namaḥ 

asya śrīsaundaryalaharīstotrasya govindaḥ ṛṣiḥ | 
anuṣṭupchandaḥ | śrīmahātripurasundarī devatā | śivaḥ śaktyā 
yukta iti bījam | sudhāsindhormadhya iti śaktiḥ | japo jalpaḥ 
śilpamiti kīlakam | śrī lalitāmahātripurasundarīprītyarthejape 
viniyogaḥ | 

hrāṃ aṅguṣṭhābhyāṃ namaḥ hrīṃ tarjanībhyāṃ namaḥ hrūṃ 
madhyamābhyāṃ namaḥ hraiṃ anāmikābhyāṃ hrauṃ hraṃ 
kaniṣṭhikābhyāṃ vauṣaṭ hraḥ karatalakarapṛṣṭhābhyāṃ phaṭ 
| hrāṃ hṛdayāya namaḥ hrīṃ śirase svāhā hraṃ śikhāyai 
vauṣaṭ hraiṃ kavacāya huṃ hrauṃ netratrayāya vauṣaṭ hraḥ 
astrāya phaṭ || 

dhyānam 

lauhityanirjitajapākusumānurāgāṃ pāśāṅkuśe dhanuriṣūnapi 
dhārayantīm | tāmrekṣaṇāmaruṇamālyaviśeṣabhūṣāṃ 
tāmbūlapūritamukhīṃ tripurāṃ namāmi || 

laṃ pṛthivyātmane gandhaṃ kalpayāmi haṃūṣāṃ 
tāmbūlapūritamukhīṃ tripurāṃ namāmi || ākāśātmane puṣpaṃ 
kalpayāmi yaṃ vāyvātmane dhūpaṃ kalpayāmi raṃ vahnyātmane 
dīpaṃ kalpayāmi vaṃ jalātmane naivedyaṃ kalpayāmi || oṃ || 

p. 208) 

ślo. 1. (P. 1) 

(i) yantramidaṃ taṇḍulapiṣṭena sthaṇḍile vilikhya 
ghṛtadīpasaṃsthāpanapūrvakaṃ dvādaśa dināni saṃpūjya 
pratyahaṃ ślokamimaṃ sahasramāvartayet | anena sakalakāryajayaḥ | 

(ī) idameva yantraṃ hemapaṭṭatale vilikhya pūrvābhimukho dvādaśa 
dināni saṃpūjya ślokamimaṃ pratidinaṃ sahasramāvartya kaṇṭhe 
dhārayet | anena sakalābhivṛddhiḥ | ubhayatra naivedyaṃ trimadhuram 
| trimadhuraṃ nāma guḍanārikelakadalīphalānāṃ miśraṇena 
saṃpāditaṃ dravyam | 

p. 209) 

ślo. 2. (P. 4) 

yantramidaṃ svarṇapaṭṭe vilikhya uttarābhimukhaḥ 
pañcapañcāśaddināni saṃpūjya ślokamimaṃ prativāsaraṃ 
sahasramāvayartya dhārayet | anena sarvalokavaśyatā prakṛtijayaśca 
| naivedyaṃ kṣīrapāyasam | 

ślo. 3. (p. 6) 

(i) idaṃ yantraṃ kanakapaṭṭatale vilikhya īśānābhimukhaḥ 
pañcadaśa dināni saṃpūjya ślokamimaṃ pratyahaṃ sahasramāvartya 
dhārayet | anena sarvaiśvaryavidye bhavataḥ | 

(ī) idameva yantraṃ catuḥpañcāśaddināni pūrvavadabhyarcya 
prativāsaraṃ ślokamimaṃ dvisahasramāvartya sādhayet | sādhako 
vedavidbhavet | ubhayatra naivedyaṃmāṣāpūpaḥ | 

p. 210) 

ślo. 4. (P. 8) 

(i) yatramidaṃ rajatapaṭṭe vilikhya pūrvābhimukhaḥ ṣoḍaśa 
dinānyabhyarcya ślokamimaṃ pratidinaṃ sahasramāvartya dhārayet | 
phalaṃ sāmrājyasiddhiḥ | 

(ī) idameva yantraṃ ṣaṭtriṃśaddināni pūrvavadabhyarcya 
ślokamimaṃ pratyahaṃ sahasramāvartayet | anena sādhakaṃ 
dāridryarogādayo na bādhante | ubhayatra naivedyaṃ haridrānnam | 
atra keralabhāṣāpustake śrīmiti bījākṣaraṃ dṛśyate | 

p. 211) 

ślo. 5. (P. 9) 

idaṃ yantraṃ tāmrapapaṭṭe vilikhya vāyavyābhimukho'ṣṭau 
dināni saṃpūjya pratyahaṃ ślokamimaṃ dvisahasramāvartya śirasi 
dharayet | phalaṃ sakalajanasaṃmohanaṃ strīṇāṃ puruṣavaśyatā 
ca | naivedyaṃ guḍapāyasam | 

ślo. 6. (P. 12) 

yantramidaṃ kanakapaṭṭatale vilikhya pūrvābhimukhaḥ 
ekaviṃśatidināni samārādhya padyamidaṃ pratidinaṃ 
pañcaśatamāvartya dhārayet | phalaṃ sādhakasya 
ṣaṇḍatvanivṛttyā putrāvāptiḥ | naivedyaṃ ikṣukhaṇḍaḥ | 

p. 212) 

ślo. 7. (P. 14) 

yantramidaṃ hāṭakapaṭṭe vilikhya pūrvābhimukhaḥ 
pañcacatvāriṃśaddināni samabhyarcya ślokamimaṃ prativāsaraṃ 
sahasramāvartya śirasi dhārayet | bhasma vā'bhimantrya dhārayet | 
anena śatrujayaḥ | naivedyaṃ kṣīrapāyasam | 

ślo. 8. (P. 15) 

yantramidaṃ raktacandanakhaṇḍe nirmāya dvādaśa dināni 
raktapuṣpairabhyarcya padyamidaṃ pratyahaṃ 
dviśatottarasahasramāvartya dhārayet | phalaṃ kārāgṛhanivṛttiḥ 
sakalakāryajayaśca | naivedyaṃ kṛṣṇamaricaḥ | 

p. 213) 

ślo. 9. (P. 18) 

(i) yantramidaṃ kanakapaṭṭe vilikhya daśa dinānyabhyarcya 
pratyahaṃ ślokamimaṃ sahasramāvartayet | phalaṃ deśāntaragatasya 
kṣiprāgamanam | 

(ī) idameva yantraṃ gandhacolikayālipya pañcacatvāriṃśaddināni 
sārādhya padyamidaṃ prativāsaraṃ sahasramāvartayet | anena 
sādhakaḥ pañcabhūtāni jayiṣyati | ubhayatra naivedyaṃ 
kṣīrapāyasam | 

ślo. 20. (P. 22) 

idaṃ yantraṃ hāṭakapaṭṭatale vilikhya ṣaḍdinānyabhyarcya 
pratidinaṃ ślokamimaṃ sahasramāvartya raktakṣaumatantau nibadhya 
dhārayet | phalaṃ-vṛṣyaṃ strīṇāṃ rajodarśanaṃ ca | naivedyaṃ 
kadalīphalam | 

p. 214) 

ślo. 11. (P. 26) 

idaṃ yantraṃ kanakapaṭṭatale vilikhya ekāśītidināni saṃpūjya 
ślokamimanudinaṃ sahasramāvartya dhārayet | navanītaṃ 
vā'bhimantrya sevayet | anena vandhyādoṣo nivartate | naivedyaṃ 
guḍapāyasam | 

ślo. 12. (P. 44) 

yantramidaṃ jale vilikhya pañcacatvāriṃśaddinānyabhyarcya jalaṃ 
spṛṣṭvā ślokamimaṃ pratyahaṃ sahasramāvartya pibet | anena 
mūko'pi kavirbhavet vaśitvaṃ sidhyet | naivedyaṃ madhu | 

p. 215) 

ślo. 13. (P. 45) 

idaṃ yantraṃ hemapaṭṭe vilikhya ṣaḍdināni samārādhya 
ślokamimamanudinaṃ sahasramāvartya dhārayet | phalaṃ strīvaśyatā 
| naivedyaṃ trimadhuram | 

ślo. 14. (P. 46) 

yantramidaṃ hāṭakapaṭṭatale vilikhya 
pañcacatvāriṃśaddinānyabhyarcya ślokamimaṃ prativāsaraṃ 
sahasramāvartya dhārayet | anena vasantādirogāḥ durbhikṣaṃ ca na 
bādheta | naivedyaṃ kṣīrapāyasam | 

p. 216) 

ślo. 15. (P. 51) 

(i) yantramidaṃ suvarṇapaṭṭe vilikhya ekacatvāriṃśaddināni 
saṃpūjya ślokamimaṃ pratyahaṃ sahasramāvartya dhārayet | anena 
sādhakaḥ kavirvijñānī ca bhavet | 

(ī) idameva yantraṃ jale vilikhya pūrvavatsaṃpūjya japtvā pivet | 
phalaṃ pūrvavat | ubhayatra naivedyaṃ madhu kadalīphalaṃ śarkarā 
ca | 

ślo. 16. (P. 52) 

yantramidaṃ hemapaṭṭatale vilikhya ekacatvāriṃśadahāni 
samārādhya ślokamimanudinaṃ sahasramāvartya dhārayet | phalaṃ 
vedaśāstrādijñānam | naivedyaṃ madhu | 

p. 217) 

ślo. 17. (P. 54) 

idaṃ yantraṃ hāṭakapaṭṭe vilikhya ekanavatidinānyabhyarcya 
ślokamimamanudinaṃ sahasramāvartya dhārayet | anena sādhakaḥ 
sakalakalākovido bhevet | naivedyaṃ madhu kadalīphalaṃ kṣīraṃ 
śarkarā khaṇḍaśarkarā ca | 

ślo. 18. (P. 57) 

yantramidaṃ suvarṇapaṭṭatale vilikhya 
pañcacatvāriṃśaddinānyarcayitvā pratyahaṃ ślokamimaṃ 
sahasramāvartya dharayet | candanaṃ kuṅkamaṃ puṣpaṃ 
vā'bhimantrya dadyāt phalaṃ sakalaprāṇivaśyatā | naivedyaṃ 
kṣīrapāyasaṃ tāmbūlaṃ ca | 

p. 218) 

ślo. 19. (P. 58) 

idaṃ yantraṃ hemapaṭṭatale vilikhya pañcaviṃśatidinānyārādhya 
ślokamimaṃ prativāsaraṃ dviśatādhikasahasramāvartya dhārayet | 
candanaṃ puṣpaṃ bhasma kuṅkumaṃ vā'bhimantrya dhārayet | anena 
sakalarājarākṣasamṛgastrīvaśyatā bhavati | naivedyaṃ kṣīraṃ 
madhu kadalīphalaṃ ca | 

p. 219) 

ślo. 20. (P. 20) 

(i) yantramidaṃ bhasmani vilikhya ślokamimaṃ sahasramāvartya 
tadbhasma dadyāt | anena viṣanivṛttirbhavati | idaṃ bhasma sarpe 
lagnaṃ cet muhyāt | jvarāśca nivarteta | 

(ī) imameva ślokaṃ pañcacatvāriṃśaddināni pratyahaṃ 
dvisahasramāvartya sādhayet | anena sādhakasya kadāpi viṣabhītirna 
jāyate | 

(īi) idameva yantraṃ mayūratāmreṇa punnāgatāmreṇa vā 
miśritasuvarṇapaṭṭatale vilikhya ślokamimaṃ pūrvavatsaṃsādhya 
tadyantramaṅgulīyakaṃ kṛtvā dhārayet | taddhastena sarpadaṣṭe 
jale prokṣite viṣanivṛttirbhavati | 

p. 220) 

ślo. 21. (P. 21) 

yantramidaṃ svarṇapaṭṭe rajatapaṭṭe tāmrapaṭṭe vā vilikhya 
pañcacatvāriṃśadahāni pūjayitvā ślokamimamanudinaṃ 
sahasramāvartya dhārayet | anena sakalajanavirodhanāśaḥ vaśyatā 
ca | naivedyaṃ kadalīphalaṃ madhu guḍaṃ ca | 

p. 221) 

ślo. 22. (P. 63) 

cakramidaṃ suvarṇapaṭṭatale vilikhya kasmiṃścitpuṇyatīrthe 
kṣetre devīsannidhau vā upaviśya pañcacatvāriṃśadahāni 
saṃpūjya ślokamimamaharahassahasramāvartya sādhayet | anena 
aihikasarvābhīṣṭasiddhi sakalaiśvaryaprāptiḥ 
sāmrājyāvāptiśca bhavati | naivedyaṃ madhu trimadhuraṃ dadhi 
kṣīraṃ citrānnaṃ ca | 

p. 222) 

ślo. 23. (P. 64) 

yantramidaṃ hemapaṭṭe vilikhya gṛhe saṃsthāpya 
triṃśaddinānyabhyarcya pratyahaṃ ślokamimaṃ trisahasramāvartayet 
| phalaṃ sarvāpannivṛttiḥ ṛṇamocanaṃ bhūtapretaśamanaṃ tta 
bhavati | naivedyaṃ kṣīrapāyasam | 

p. 223) 

ślo. 24. (P. 65) 

śivayantramidaṃ hāṭakapaṭṭatale vilikhya triṃśaddināni 
sampūjya ślokamimamaharahassahasramāvartya dhārayet | phalaṃ 
bhūtapretapiśācāpasmārādinivāraṇam | naivedyaṃ madhu 
māṣāpūpaḥ tilapiṣṭaṃ ca | 

ślo. 25. (P. 66) 

idaṃ yantraṃ hemapaṭṭatale vilikhya 
pañcacatvāriṃśaddinānyabhyarcya ślokamimaṃ sahasramāvartya 
dhārayet | phalaṃ rājakīyādhikāraḥ utkṛṣṭhapadavīlābhaśca | 
naivedyaṃ madhu | 

p. 224) 

ślo. 26. (P. 67) 

(i) yantramidaṃ suvarṇapaṭṭatale vilikhyārcayitvamāvāsyāyāṃ 
ślokamimaṃ sahasramāvartya dhārayet | phalaṃ sarvasiddhiḥ | 

(ī) idameva yantraṃ ṣaḍdināni pūjayitvā'nudinaṃ ślokamimaṃ 
sahasramāvartayet | anena śatrujayo bhavati | ubhayatra naivedyaṃ 
guḍapāyasam | 

ślo. 27. (P. 68) 

idaṃ yantraṃ hemapaṭṭe likhitvā pañcacatvāriṃśadahāni 
pūjayitvā ślokamimamaharahaḥ sahasramāvartya dhārayet | phalam 
mantrasiddhiḥ devīdarśanaṃ ātmajñānaṃ ca | naivedyaṃ 
guḍapāyasam | 

p. 225) 

ślo. 28. (P. 70) 

yantramidaṃ hāṭakapaṭṭe vilikhya pañcacatvāriṃśaddināni 
samārādhya pratyahaṃ ślokamimaṃ sahasramāvartya dhārayet | 
phalaṃ strīṇāṃ sakalakāryasiddhiḥ 
puruṣāṇāmapamṛtyunivāraṇaṃ ca | naivedyaṃ kṣīrapāyasaṃ 
trimadhuraṃ tāmbūlaṃ ca | 

ślo. 29. (P. 70) 

idaṃ yantraṃ hemapaṭṭe vilikhya 
pañcacatvāriṃśaddinānyarcayitvā ślokamimaṃ prativāsaraṃ 
sahasramāvartya dhārayet | phalaṃ duṣṭān mūrkhāṃśca sataḥ 
kṛtvā svavaśīkaraṇam | naivedyaṃ madhu māṣāpūpaśca | 

p. 226) 

ślo. 30. (P. 71) 

yantramidaṃ kanakapaṭṭatale vilikhya ṣaṇṇavatidināni samārādhya 
ślokamimamaharahassahasramāvartya dhārayet | phalaṃ 
aṇimādyaṣṭasiddhiḥ parakāyapraveśaḥ agnistambhanaṃ ca | 
naivedyaṃ madhu trimadhuraṃ tāmbūlaṃ ca | 

ślo. 31. (P. 72) 

cakramidaṃ hāṭakapaṭṭe vilikhya 
pañcacatvāriṃśadahānyarcayitvā haste nidhāya ślokamimamanudinaṃ 
sahasramāvartayet | anena sakalajanavaśyaṃ rājavaśyaṃ ca bhavet | 
naivedyaṃ madhu kṣīraṃ ca | 

p. 227) 

ślo. 32. (P. 81) 

idaṃ yantraṃ svarṇapaṭṭatale vilikhya pañcacatvāriṃśaddināni 
saṃpūjya pratyahaṃ ślokamimaṃ sahasramāvartya dhārayet | phalaṃ 
sakalavidyāsiddhiḥ rasāyanasiddhiśca | naivedyaṃ dadhyannaṃ 
māṣāpūpaśca | (atra keralabhāṣāpustake yamiti bījākṣaraṃ na 
dṛśyate |) 

ślo. 33. (P. 98) 

yantramidaṃ kanakapaṭṭatale vilikhya tatra raupyakaṃ nidhāya 
pañcacatvāriṃśaddināni saṃpūjya ślokamimamanudinaṃ 
sahasramāvartayet | phalaṃ bhūridhanāvāptiḥ | naivedyaṃ 
mudgānnaṃ madhu | 

p. 228) 

ślo. 34. (P. 100) 

yantramidaṃ hemapaṭṭe vilikhya pañcacatvāriṃśadahānyabhyarca 
padyamidaṃ pratyahaṃ sahasravāraṃ japtvā dhārayet | anena 
sādhakaḥ mahābuddhimān bhavet | naivedyaṃ madhu | 

ślo. 35. (P. 105) 

idaṃ yantraṃ svarṇapaṭṭatale vilikhya 
pañcacatvāriṃśaddinānyabhyarcya ślokamimaṃ prativāsaraṃ 
sahasramāvartya dhārayitvā harītakīmabhimantrya sevayet | anena 
kṣayarogo nivartate | naivedyaṃ madhu kṣīrapāyasaṃ ca | 

p. 229) 

ślo. 36. (P. 107) 

yantramidaṃ kanakapaṭṭe vilikhya pañcacatvāriṃśadahānyarcayitvā 
padyabhidamaharahaḥ sahasravāraṃ japtvā dhārayet rogaśāntaye 
jalaṃ vā'bhimantrya pāyayet | phalaṃ 
nāanāvidhakaṭhiṇaroganivṛttiḥ naivedyaṃ-madhu māṣāpūpaśca | 

ślo. 37. (P. 108) 

idaṃ yantraṃ jātarūpapaṭṭe vilikhyārcayitvā padyamidaṃ 
pañcasahasramāvartya dhārayet | jalaṃ vābhimantrya pibet | phalaṃ 
brahmarakṣobādhānivṛttiḥ | naivedyaṃ guḍapāyasaṃ 
nārikelaphalaṃ kadalīphalaṃ ca | 

p. 230) 

ślo. 38. (P. 109) 

yantramidaṃ hemapaṭṭe vilikhya pañcacatvāriṃśaddināni 
pūjayitvā'nudinaṃ ślokamimaṃ sahasravāraṃ japtvā dhārayet | 
jalaṃ vā'bhimantrya prokṣayet | phalaṃ bālāriṣṭanivṛttiḥ | 
naivedyaṃ-11 māṣāpūpāḥ tāmbūlaṃ nārīkelaphalaṃ 
kadalīphalaṃ ca | 

ślo. 39. (P. 111) 

yantramidaṃ kanakapaṭṭatale vilikhya dvādaśadinānyabhyarcya 
pratyahaṃ ślokamimamaṣṭottaraśatamāvartya dhārayet | anena 
dussvapnaṃ śāmyati | naivedyaṃ kṣīraṃ kṣīrapāyasaṃ madhu ca | 

p. 231) 

ślo. 40. (P. 112) 

idaṃ yantraṃ hemapaṭṭe vililya pañcacatvāriṃśadahānyarcayitvā 
padyamidamanudinaṃ sahasramāvartyopadhāne nikṣipya śayīta | 
phalaṃ-iṣṭārthasya svapne darśanam | naivedyaṃ madhu 
kṣīrapāyasaṃ tāmbūlaṃ ca | 

ślo. 41. (P. 115) 

yantramidaṃ hemapaṭṭatale vilikhya triṃśadahāni pūjayitvā 
padyamidamaharahaścatussahasramāvartya dhārayet | phalaṃ 
sakalodararoganivṛttiḥ naivedyaṃ madhu | 

p. 232) 

ślo. 42. (P. 124) 

idaṃ yantraṃ svarṇapaṭṭe vilikhya pañcatvāriṃśaddināni 
samārādhya ślokamimamanudinaṃ sahasravāraṃ japtvā dhārayet | 
anena mahodaravyādhirnaśyati | naivedyaṃ śarkarā | 

ślo. 43. (P. 126) 

yantramidaṃ hāṭakapaṭṭe vilikhya catvāriṃśadahānyabhyarcya 
padyamidamanudinaṃ trisahasramāvartyāṅgulīyakaṃ kṛtvā dhārayet 
| phalaṃ sakalajanavaśyatā | naivedyaṃ madhu | 

p. 233) 

ślo. 44. (P. 127) 

yantramidaṃ kanakapaṭṭatale vilikhya dvādaśāhānyarcayitvā 
ślokamimaṃ prativāsaraṃ sahasramāvartya dhārayet | kuṅkumaṃ 
haridrācūrṇaṃ vā'bhimantrya tilakaṃ dhārayet | anena vaśyatā 
bādhānivṛttiśca bhavet | naivedyaṃ guḍapāyasam | 

ślo. 45. (P. 128) 

idaṃ yantraṃ svarṇapaṭṭatale vilikhya catvāriṃśadahāni 
samārādhya padyamidamanudinaṃ sahasravāraṃ japtvā dhārayet | 
phalaṃ vāksiddhiḥ | naivedyaṃ trimadhuraṃ madhu ca | 

p. 234) 

ślo. 46. (P. 129) 

yantramidaṃ kanakapaṭṭatale vilikhya pañcacatvāriṃśaddināni 
saṃpūjya pratyahaṃ ślokamimaṃ sahasramāvartya dhārayet | anena 
bhartṛsamāgamo garbhadhāraṇaṃ ca bhavati | naivedyaṃ 
kṣīrapāyasaṃ madhu ca | 

ślo. 47. (P. 131) 

(i) idaṃ suvarṇapaṭṭe vilikhya pañcaviṃśatidināni saṃpūjya 
padyamidamanudinaṃ saptasahasramāvartya dhārayet | anena devatā 
vaśameṣyati | 

(ī) bhasma vā'bhimantrya dhārayet | phalaṃ sakalavaśyatā | 
ubhayatra naivedyaṃ nārikelaphalaṃ kadalīphalaṃ madhu ca | 

p. 235) 

ślo. 48. (P. 133) 

yantramidaṃ kanakapaṭṭatale vilikhya ekonaviṃśatidināni 
samārādhya ślokamimaṃ sahasravāraṃ japtvā dhārayet | anena 
navagrahadoṣaśāntirbhavati | naivedyaṃ citrānnaṃ kadalīphalaṃ 
madhu ca | 

ślo. 49. (P. 134) 

yantramidaṃ haridrākhaṇḍe likhitvā pañcaviṃśatidinānyabhyarcya 
ślokamimamaharahassahasramāvartya haridrākhaṇḍamagnau dagdhvā 
tattailena piṣṭvā pañcadaśavarṣīyasya mārjāladṛśo bālakasya 
hastena akṣṇorlepayitvā paśyato nidhidarśanaṃ bhavati | naivedyaṃ 
mudgānnaṃ madhu ca | 

p. 236) 

ślo. 50. (P. 135) 

idaṃ yantraṃ kanakapaṭṭatale vilikhya catvāryahānyarcayitvā 
padyamanudinaṃ sahasravāraṃ japtvā dhārayet | jalaṃ vābhimantrya 
seveta | evaṃ kṛte masūrikā na samāgamiṣyati | naivedyaṃ 
śarkarā khaṇḍaśarkarā guḍaṃ kadalīphalaṃ madhu nārikelaṃ ca 
| 

ślo. 51. (P. 137) 

yantramidaṃ suvarṇapaṭṭe vilikhya pañcacatvāriṃśadahāni 
saṃpūjya pratyahaṃ ślokamimaṃ sahasravāraṃ japtvā dhārayet | 
candane vā vilikhya pūrvavatpūjādikaṃ kṛtvā tilakaṃ dhārayet | 
phalaṃ sarvajanavaśyatā | naivedyaṃ māṣāpūpaḥ madhu ca | 

p. 237) 

ślo. 52. (P. 138) 

idaṃ yantraṃ kalakapaṭṭatale vilikhya pañcacatvāriṃśadahāni 
samārādhya ślokamimamanudinaṃ sahasramāvartya dhārayet | phalaṃ 
karṇarogaśamanaṃ netraroganivṛttiśca | naivedyaṃ tilānnaṃ 
kṣīrapāyasaṃ ca | 

ślo. 53. (P. 139) 

yantramidaṃ svarṇapaṭṭe vilikhya bhūmau saṃsthāpya tatra dīpaṃ 
nidhāya ślokamimaṃ trisahasramāvartayet | anukūlatāyāṃ dīpaṃ 
ujjvalet na cetprātikūlyam | naivedyaṃ guḍāpūpaḥ māṣāpūpaḥ 
kṣīrapāyasaṃ ca | 

p. 238) 

ślo. 54. (P. 141) 

yantramidaṃ kanakapaṭṭatale vilikhya pañcacatvāriṃśaddināni 
saṃpūjya padyamidamanudinaṃ sahasravāraṃ japtvā dhārayet | anena 
yonirogo nivartate | naivedyaṃ guḍapāyasam | 

ślo. 55. (P. 142) 

idaṃ yantraṃ hāṭakapaṭṭe vilikhya padyamidaṃ sahasravāraṃ 
japtvā dhārayet | kalidrumaphalaṃ vā'bhimantrya badhnīyāt | 
anenāṇḍavyādhiśśāmyati | naivedyaṃ kadalīphalaṃ 
kṣīrapāyasaṃ madhu tāmbūlaṃ ca | (atra keralabhāṣāpustake 
baṃlā saṃlā iti bījākṣarabhedo dṛśyate |) 

p. 239) 

ślo. 56. (P. 143) 

yantramidaṃ jātarūpapaṭṭatale makaramatsyadante vā likhitvā 
pañcacatvāriṃśadahānyabhyarcya ślokamimaṃ pratyahaṃ 
viṃśatisahasramāvartya svasminniveśayet | anena dvārapālako 
dhāvet | mudritaṃ kavāṭaṃ svayamuddhāṭayet | vṛṣṭiśca bhavet 
| naivedyaṃ madhu | 

ślo. 57. (P. 144) 

idaṃ yantraṃ hemapaṭṭe vilikhya ṣaḍahānyabhyarcya 
padyamidamanudinaṃ sahasramāvartya dhārayet | sādhako 
bahubhāgyavān bhavet | naivedyaṃ kṣīrapāyasaṃ madhu ca | 

p. 240) 

ślo. 58. (P. 145) 

yantramidaṃ kuṅkamacūrṇe likhitvā pañcacatvāriṃśaddināni 
samārādhya ślokamimamanudinaṃ sahasravāraṃ japtvā tilakaṃ 
dhārayet | phalaṃ sakalarājavaśyatā sarvavyādhihṛtiśca | 
naivedyaṃ madhu | 

ślo. 59. (P. 146) 

idaṃ yantraṃ svarṇapaṭṭatale vilikhya pañcacatvāriṃśaddināni 
saṃpūjya padyamidamanudinaṃ sahasramāvartya dhārayet | phalaṃ 
sakalajanavaśyatā | naivedyaṃ guḍodanaṃ madhu ca | 

p. 241) 

ślo. 60. (P. 147) 

yantramidaṃ hāṭakapaṭṭe vilikhya 
pañcacatvāriṃśadahānyabhyarcya ślokamimamaharahassa-isramāvartya 
dhārayet | anena sādhakaḥ sakalavidyāmāpnuyāt | naivedyaṃ madhu 
kṣīrapāyasaṃ ca | 

ślo. 61. (P. 148) 

idaṃ yantraṃ kanakapaṭṭe vilikhyāṣṭau dināni samārādhya 
padyamidamanudinaṃ dvādaśasahasramāvartya strīṇāmābharaṇe 
nikṣipet | anena sakalapuruṣavaśyatā bhavet | naivedyaṃ 
nārikelaphalaṃ kadalīphalaṃ madhu ca | 

p. 242) 

ślo. 62. (P. 149) 

yantramidaṃ hemapaṭṭatale likhitvāṣṭau dināni saṃpūjya 
ślokamimaṃ pratyahamaṣṭasahasravāraṃ japtvā rātrau 
nidrāvihīnasya samīpe sthāpitaṃ cet sa nidrāṃ labhate | 
naivedyaṃ māṣāpūpaḥ madhu ca | 

ślo. 63. (P. 150) 

yantramidaṃ hāṭakapaṭṭatale vilikhya triṃśaddinānyārādhya 
padyamidamanudinaṃ triṃśatsahasravāraṃ japtvā dhārayet | anena 
sarvo'pi yathoktamācaret | naivedyaṃ nārikelaphalam | 
(keralabhāṣāpustake yantramidaṃ na dṛśyate |) 

p. 243) 

ślo. 64. (P. 151) 

idaṃ yantraṃ kuṅkame viracyāṣṭāvahāni pūjayitvā pratyahaṃ 
ślokamimamayutavāraṃ japtvā dhārayet | phalaṃ sakalajanavaśyatā 
| naivedyaṃ guḍapāyasaṃ madhu ca | 

ślo. 65. (P. 152) 

yantramidaṃ hemapaṭṭatale vilikhya guggulena dhūpayitvā 
pañcacatvāriṃśaddināni raktapuṣpaiḥ śrīcakravadabhyarcya 
ślokamimaṃ prativāsaraṃ sahasramāvartya dhārayet | anena sarvo'pi 
svavaśago bhavet | naivedyaṃ madhu | 

p. 244) 

ślo. 66. (P. 154) 

idaṃ yantraṃ kanakapaṭṭatale likhitvā pañcacatvāriṃśaddināni 
samārādhya padyamidamanudinaṃ sahasravāraṃ japtvā dhārayet | 
anena sādhakaḥ vīṇādisaṅgītavidyākuśalo bhavet | naivedyaṃ 
guḍapāyasaṃ madhu ca | 

ślo. 67. (P. 155) 

yantramidaṃ sarṇapaṭṭatale vilikhya patnyā sākaṃ 
pañcacatvāriṃśadahāni samārādhya padyamidamanudinaṃ 
sahasramāvartya dhārayet | phalaṃ sakalastrīvaśyatā | naivedyaṃ 
madhu kṣīrapāyasaṃ tāmbūlaṃ ca | 

p. 245) 

ślo. 68. (P. 156) 

idaṃ yantraṃ kuṃkume vilikhya pa~cacatvāriṃśaddināni 
śrīcakravadabhyarcya pratyahaṃ ślokamimaṃ sahasravāraṃ japtvā 
dhārayet | phalaṃ sakalarājavaśyatā | naivedyaṃ madhu tāṃbūlaṃ 
ca | (keralabhāṣāpustake yantramidaṃ nāsti |) 

ślo. 69. (P. 157) 

yantramidaṃ svarṇapaṭṭatale likhitvā pañcacatvāriṃśaddināni 
samārādhya pratyahaṃ ślokamimaṃ sahasramāvartya sādhayet | 
campakapuṣpamabhimantryābhilaṣitastriyai dadyāt | sā vaśameṣyati 
| naivedyaṃ-madhu | (keralabhāṣāpustake yantramidaṃ na dṛyate |) 

p. 246) 

ślo. 70. (P. 159) 

idaṃ yantraṃ kanakapaṭṭe vilikhya pañcacatvāriṃśaddināni 
samabhyarcya padyamidamanudinaṃ sahasravāraṃ japtvā dhārayet | 
phalaṃ-sakalapuruṣavaśyatā | naivedyaṃ nārikelaphalaṃ madhu ca | 

ślo. 71. (P. 160) 

yantramidaṃ hāṭakapaṭṭatale vilikhya pañcacatvāriṃśaddināni 
pūjayitvā vaṭavṛkṣe upaviśya padyamidamanudinaṃ 
dvādaśasahasramāvartya sādhayet | anena yakṣiṇī vaśameṣyati | 
naivedyaṃ madhu | 

p. 247) 

ślo. 72. (P. 161) 

idaṃ yantraṃ kanakapaṭṭatale vilikhya 
pañcacatvāriṃśadahānyarcayitvā ślokamimaṃ pratyahaṃ 
sahasramāvartya dhārayet | evaṃ kṛte sādhakaḥ rātrau yatra kutra 
vā gantuṃ śaknuyāt | bhayaleśo'pi nāsti | naivedyaṃ madhu | 

ślo. 73. (P. 162) 

idaṃ yantraṃ kanakapaṭṭe vilikhya saptadinānyabhyarcya 
padyamidamanudinaṃ sahasravāraṃ japtvā dhārayet | phalaṃ 
strīṇāṃ stanyābhāve stanyaprāptiḥ dhenūnāṃ sthagitasya payaso 
vahirnissaraṇaṃ ca | naivedyaṃ madhu kṣīraṃ ca | 

p. 248) 

ślo. 74. (P. 164) 

yantramidaṃ hevapaṭṭatale vilikhya devasannidhau 
pañcacatvāriṃśadahāni samārādhya ślokamimaṃ 
prativāsaramaṣṭottaraśatamāvartya dhārayet | anena sādhakaḥ 
kīrtimāṣnuyāt | naivedyaṃ kṣīrapāyasaṃ madhu ca | 

ślo. 75. (P. 165) 

idaṃ yantraṃ hāṭakapaṭṭatale vilikhya trīṇi dinānyārādhya 
ślokamimaṃ pratyahaṃ sahasravāraṃ japtvā dhārayet | anena 
sādhakaḥ kavirbhavet | naivedyaṃ kadalīphalaṃ madhu ca | 

p. 249) 

ślo. 76. (P. 166) 

yantramidaṃ svarṇapaṭṭatale likhitvā'ṣṭau dinānyarcya 
padyamidamanudinaṃ dvādaśasahasramāvartya dhārayet | phalaṃ 
sakalajanavaśyatā | naivedyaṃ nārikelaphalaṃ kadalīphalaṃ 
dadhyannaṃ madhu ca | 

ślo. 77. (P. 167) 

kapilāgoghṛtamarditaraktotpaleṅgāle yantramidaṃ ślokaṃ ca 
vilikhya daśa dināni saṃpūjya ślokamimamanudinaṃ 
dvisahasramāvartya tilakaṃ dhārayet | phalaṃ rājavaśyatā | 
naivedyaṃ kadalīphalaṃ madhu ca | 

p. 250) 

ślo. 78. (P. 168) 

raktacandanaṃ pannīrākhyapuṣpadraveṇa piṣṭvā 
gandhacelikāmiśrite tasmin yantramidaṃ viracya catvāriṃśaddināni 
saṃpūjya padyamidamanudinamaṣṭottaraśatamāvartya lalāṭe 
dhārayet anena sakalarājavaśyatā bhavet | naivedyaṃ madhu 
māṣāpūpaśca | 

ślo. 79. (P. 149) 

yantramidaṃ hemapaṭṭe vilikhya pañcacatvāriṃśaddinānyabhyarcya 
padyamidaṃ pratyahaṃ sahasravāraṃ japtvā dhārayet | sādhakaḥ 
indrajālavidyānipuṇo bhavet | naivedyaṃ madhu kṣīrapāyasaṃ ca | 

p. 251) 

ślo. 80. (P. 170) 

idaṃ yantraṃ kanakapaṭṭatale likhitvā prathamapuṣpiṇyā yonau 
saṃsthāpya pañcadinānyarcayitvā padyamidamanudinaṃ 
sahasramāvartya haste nibadhya tilakaṃ dhārayet | anena sādhakaḥ 
indrajālaṃ darśayituṃ samartho bhavet | naivedyaṃ madhu | 

ślo. 81. (P. 171) 

yantramidaṃ hāṭakapaṭṭatale likhitvā''gneyābhimukhaḥ ṣoḍaśa 
dināni samārādhya pratyahaṃ ślokamimaṃ sahasramāvartya sādhayet 
| anena agnistambhanaṃ kartuṃ śakyate | naivedyaṃ guḍapāyasaṃ 
madhu māṣāpūpaśca | 

p. 252) 

ślo. 82. (P. 173) 

idaṃ yantraṃ bhūrjapatre likhitvā pādukāyāṃ nikṣiṣya 
catvāriṃśadahāni saṃpūjya padyamidamanudinaṃ sahasravāraṃ 
japtvā tatpādukāṃ dhārayet | anena sādhako jale carituṃ samartho 
bhavet | naivedyaṃ nārīkelaphalaṃ kadalīphalaṃ madhu ca | 

ślo. 83. (P. 175) 

yantramidaṃ kanakapaṭṭe vilikhya dvādaśadināni 
japākusumairabhyarcya padyamidamaharahassahasramāvartya dhārayet | 
phalaṃ gajaturagasainyastambhanam | naivedyaṃ guḍapāyasaṃ madhu ca 
| 

p. 253) 

ślo. 84. (P. 176) 

idaṃ yantraṃ hemapaṭṭatale likhitvā saṃvatsaramekamabhyarcya 
ślokamimaṃ pratyahaṃ sahasravāraṃ japtvā dhārayet | evaṃ kṛte 
sādhakaḥ parakāyapraveśe śakto bhayet | naivedyaṃ kṣīrapāyasaṃ 
citrānnaṃ madhu ca | 

p. 254) 

ślo. 85. (P. 177) 

yantramidaṃ svarṇapaṭṭatale likhitvā dvādaśāhāni raktapuṣpaiḥ 
saṃpūjya padyamidamanudinaṃ sasramāvartya dhārayet | anena 
bhūtabādhānivṛttiḥ | naivedyaṃ kṣīrapāyasaṃ guḍodakaṃ 
kadalīphalaṃ ca | 

ślo. 86. (p. 179) 

idaṃ yantraṃ hāṭakapaṭṭe vilikhya ekaviṃśatidināni saṃpūjya 
pratyahaṃ ślokamimaṃ sahasramāvartya dhārayet | 
kalaśodakamabhimantryābhiṣiñcet | anena samastapiśācabādhā 
nivṛttiḥ | naivedyaṃ kṣīrapāyasaṃ nārīkelaphalaṃ 
kadalīphalaṃ madhu ca | 

p. 255) 

ślo. 87. (P. 180) 

yantramidaṃ śmaśānabhasmani viracya daśadinānyārādhya 
padyamidamaharahaḥ sahasramāvartya sādhayet | sādhakaḥ sarpānayane 
samartho bhavet | naivedyaṃ kṣīrapāyasaṃ madhu kadalīphalaṃ 
nārīkelaphalaṃ ca | 

ślo. 88. (P. 181) 

idaṃ yantraṃ svarṇapaṭṭe rajatapaṭṭe vā likhitvā 
pañcadaśadināni samārādhya ślokamimaṃ gratyahaṃ sahasravāraṃ 
japtvā dhārayet | sādhakaḥ mṛgānayane prabhavati | naivedyaṃ 
guḍapāyasaṃ nārikelaphalaṃ kadalīphalaṃ ca | 

p. 256) 

ślo. 89. (P. 182) 

yantramidaṃ hāṭakapaṭṭatale likhitvā triṃśadahānyarcayitvā 
padyamidamanudinaṃ sahsramāvartya dhārayet | phalaṃ 
sarvarogaśamanam | naivedyaṃ guḍapāyasaṃ madhu ca | 

ślo. 90. (P. 183) 

idaṃ yantraṃ hāṭakapaṭṭe likitvā pañcadaśāhānyabhyarcya 
ślokamimamaharahassahasratmāvartya dhārayet | phalaṃ 
kṣudrabādhānivṛttiḥ naivedyaṃ kṣīrapāyasaṃ madhu ca | 

p. 257) 

ślo. 91. (P. 184) 

yantramidaṃ padyaṃ ca kanakapaṭṭatale likhitvā 
pañcaviṃśatyahāni samārādhya padyamidamanudinaṃ sahasravāraṃ 
japtvā dhārayet | sādhakasya bhūlābho dhanalābhaśca bhavati | 
naivedyaṃ kṣīrapāyasam | 

ślo. 92. (P. 185) 

idaṃ yantraṃ suvarṇapaṭṭe vilikhya pañcaviṃśatidinānyabhyarcya 
pratyahaṃ ślokamimaṃ sahasramāvartya dhārayet | anena sādhako 
rājyaṃ labhate | naivedyaṃ citrānnaṃ kṣīraṃ kṣīrapāyasaṃ 
tāmbūlaṃ ca | 

p. 258) 

ślo. 93. (P. 186) 

yantramidaṃ hemapaṭṭatale vilikhya pañcaviṃśatidināni pūjayitvā 
padyamidamanudinaṃ sahasramāvartya dhārayet | anena 
sakalābhīṣṭasiddhirbhavati | naivedyaṃ madhu | 

ślo. 94. (P. 187) 

idaṃ yantraṃ hāṭakapaṭṭe likhitvā pañcaviṃśatyahānyabhyarcya 
ślokamimaṃ prativāsaraṃ sahasramāvartayet | phalaṃ 
iṣṭārthasiddhiḥ | naivedyaṃ-mudgānnaṃ nārikelaphalaṃ 
kadalīphalaṃ ca | 

p. 259) 

ślo. 95. (P. 188) 

yantramidaṃ kanakapaṭṭatale vilikhya tilataile nikṣipya 
tryahamārādhya padyamidamanudinamaṣṭottaraśatamāvartya tattailaṃ 
vraṇe vilimpet | phalaṃ sadyovraṇaviropaṇam | naivedyaṃ tilānnaṃ 
guḍaṃ ca | 

ślo. 96. (P.189) 

idaṃ yantraṃ śvetārkakṣīreṇa dhāraṇayogye kasmiṃścidvastuni 
likhitvā'ṣṭau dināni saṃpūjya ślokamimaṃ pratyahaṃ 
sahasravāraṃ japtvā dhārayet | sādhako vidyāvān bhavet | 
navedyaṃ madhu kṣīrapāyasaṃ ca | 

p. 260) 

ślo. 97. (P. 190) 

yantramidaṃ svarṇapaṭṭe tāmrapaṭṭe vā likhitvā'ṣṭa dināni 
samārādhya ślokamimamaharahaḥsahasramāvartya dhārayet | sādhako 
dṛḍhakāyo bhavet | naivedyaṃ-śālyannaṃ madhu ca | 

ślo. 98. (P. 191) 

idaṃ yantraṃ kanakapaṭṭatale vilikhya ṣoḍaśadinānyarcayitvā 
padyamidamanudinaṃ sahasravāraṃ japtvā dhārayet | anena strīṇāṃ 
garbhadhāraṇaṃ puruṣāṇāṃ bahuvṛṣyatā ca bhavet | naivedyaṃ 
madhu | 

p. 261) 

ślo. 99. (P. 193) 

yantramidaṃ hemapaṭṭe likhitvā ṣoḍaśa dinānyabhyarcya pratyahaṃ 
ślokamimaṃ sahasramāvartya dhārayet | anena sādhakaḥ śūro bhavet 
| naivedya trimadhuraṃ māṣāpupa madhu ca | 

ślo. 100. (P. 201) 

idaṃ yantraṃ svarṇapaṭṭatale vilikhya ṣoḍaśa dinānyārādhya 
ślokamimaṃ prativāsaraṃ sahasramāvartya dhārayet | anena 
sakalakāryasiddhirbhavet | naivedyaṃ nārikelaphalaṃ kadalīphalaṃ 
ca | 

śaṃ bhūyāt 

|| śrīmahātripurasundarīcaraṇāravindārpaṇamastu || 

p. 262) 

(sūcanā- 

saundaryalaharyāḥ 202 tame puṭe vyākhyāṭippaṇyoḥ dattāṃ 
sūcanāmanusṛtya lakṣmīdharācāryeṇa avyākhyātaṃ padyatrayaṃ 
kaivalyāśramikṛtayā saubhāgyavardhinīṃvyākhyayā saha 
pāṭhakānāṃ avagāhanāya atra nirdiśyate-) 

(ślo. 94.) (p. 186) 

śrībhagavatyā vadanapratibimbamahimānaṃ prastauti- 

samānītāḥ padmāṃ maṇimukuratāmambaramaṇi- 
rbhayādāsyasyāntaḥ stimitakiraṇaśreṇimasṛṇaḥ | dadhāti 
tvadvaktrapratiphalanamaśrāntavikacaṃ nirātaṅkaṃ 
candrānnijahṛdayapaṅkeruhamiva || 

samānīta iti | maṇimukuratāṃ padmāṃ maṇimayādarśarūpāṃ 
lakṣmīṃ śobhāṃ samānītaḥ prāptaḥ ambaramaṇiḥ āsyasya 
bhayāt antaḥstimitakiraṇaśreṇimasṛṇaḥ svakiraṇasaṃparkāt 
jagadambikāvadanasya glānirbhaviṣyatīti bhayāt antaḥ 
saṃkucitakiraṇaśreṇibhiḥ masṛṇaḥ cikkaṇaḥ san 
tvadvaktrapratiphalanaṃ dadhāti | kimiva ? aśrāntavikacam 
anavaratavikasvaram candrānnirātaṅkam amlānaṃ 
nijahṛdayapaṅkeruhamiva darpaṇībhūte dinamaṇau tava vadanaṃ 
pratibimbitam tasya hṛdayakamalāyata iti bhāvaḥ | samānītaḥ 
padbhyāmiti kvacitpāṭhaḥ | tava caraṇābhyāṃ mukuratāṃ 
samānītaḥ | tādarthye caturthī | tava caraṇārthaṃ mukurutāṃ 
prāpta ityarthaḥ | tava caraṇapratiphalanayogyo'yaṃ 
vadanapratibimbadhāraṇe kā śaktirasya ? tathāpi tava 
caraṇakaruṇayā vadanapratibimbaṃ dadhāneti bhāvaḥ || 

(ślo. 98) (P. 190) 

atha śrīdevyupāsanāyā sārūpyarūpakaphalamāha- 

samudbhūtasthūlastanabharamuraścāruhasitaṃ kaṭākṣe kaṃdarpāḥ 
katicana kadambadyutivapuḥ | 

p. 263 

harasya tvadbhrāntiṃ manasi janayanti sma vimalā bhavatyā ye 
bhaktāḥ pariṇatiramīṣāmiyamume || 

samudbhūteti | he ume ! bhavatyā ye bhaktāḥ vimalāḥ 
manovākkāyakarmabhiḥ bhavaccaraṇopāsanaparāḥ 
dambhādidoṣarahitāḥ eteṣāṃ iyaṃ pariṇatiḥ upasanāyāḥ 
pariṇāmaḥ sā kā ? samudbhūtasthūlastanabharam uraḥ cāruhasitaṃ 
kaṭākṣe kandarpāḥ kaṭākṣavikṣepeṇa bahava ujjīvitā 
bhavantīti bhāvaḥ | kadambadyutivapuḥ romāñcakañcukitaṃ vapuḥ 
mahādevāvalokanasamudbhūtasātvikabhāva iti rahasyam | manasi 
tvadbhrāntiṃ janayati evaṃrūpā pariṇatirbhavati | tvatsārūpyaṃ 
prāpya tavaiva saṃnidhau sakhya iva vartamānāḥ tvamiva mahādevasya 
manasi bhānti | anenā pūrvoktāyā bhāvanāyāḥ phalamahimā 
pratipāditaḥ | atra bhrāntimānalaṅkāraḥ || 

(ślo. 100) (P. 193) 

svakṛtastutiṃ nigamayati- 

nidhe nityasmere niravadhiguṇe nītinipuṇe nirāghāṭajñāne 
niyamaparacittaikanilaye | niyatyā nirmukte nikhilanigamāntastutapade 
nirātaṅke nitye nigamaya mamāpi stutimimām || 

nidhe iti | nidhīyate jagadasyāmiti nidhiḥ he nidhe ! 
jagadādhārabhūte tathāca mārkaṇḍeye ādhārabhūtā 
jagatastvameka iti | nityasmere ! sarvadānandanirbharonmeṣalasadvadane 
| nanu jagadādhārabhūtā iti pūrvaṃ pratipāditam | adhunā 
nityasmere ityucyate | smeratā śarīradharmaḥ jagadādhārabhūtā 
śaktiraśarīrā | atra pūrvottarasaṃbodhanayoḥ parasparaṃ virodha 
ityata āha niravadhiguṇa iti | niravadhiguṇe ! niravadhayaḥ 
asaṃkhyātaśaktivilāsāḥ guṇāḥ yasyāḥ 
bhaktānugrahaśarīrāyāḥ smeratā 
acintyarūpādhāraśaktiraśarīreti na virodhaḥ | yadi 
bhaktānugrahāya 

p. 264) 

śarīraparigrahastarhi bhaktaṣu tāratamyaṃ kutaḥ ? kaścidrājā 
kaścitprabhuḥ kaściddaridraḥ kaścidvirakta ityata āha nītinipuṇe 
iti | nītinipuṇe ! nītau nipuṇā | yādṛśo yasyānugraha ucitaḥ 
anādyavidyāsaṃvalitatatkarmānubaddhaḥ tādṛganugrahaḥ | tarhi 
karmapāratantryaṃ bhagavatyāḥ na tu svātantryamityasmadādivatsā 
jātetyatrāha nirāghāṭajñāna iti | āghāṭaḥ 
iyattāparimāṇaghaṭanā nirāghāṭaḥ akhaṇḍaḥ 
tādṛśasaṃvidullāsarūpe | asyāḥ sānnidhyavaśāt 
tattacchaktisamavāyena tattatkarmānugraho bhavatītyarthaḥ | 
etādṛśī kathamupāsyā bhavati ? 
dhyānādibhirākalitumayogyatvādityata āha niyameti | 
niyamaparacittaikanilaye ! ye japapūjādhyānādiniyamairupāsate 
teṣāṃ cittaikanilaye ! teṣāṃ citte āvirbhūya prakāśata 
ityarthaḥ | tarhi bhagavatyāḥ niyamaparacittaikanilayaṃ 
prakāśamānatā nānyatreti niyatiparatantratā jātā ityata āha 
niyatyeti | niyatyā nirmukte ! līlayā niyamaparacitte prakāśate 
natu niyatiparatantratayā ! yathā kalpadrumaḥ sarvasādhāraṇo'pi 
sevāparāṇāṃ phaladātā nānyeṣāṃ yathā vā sūryaḥ jalādau 
nirmale vastuni pratibimbate nānyatra tena na sūryasya 
niyatipāratantryaṃ tatheti bhāvaḥ | etasyā devatāyāḥ sadbhāve 
kiṃ pramāṇamityata āha nikhileti | nikhilanigamāntastutapade ! 
nigamāḥ vedāntā upaniṣadaḥ tābhirupalakṣitapade upaniṣadaḥ 
pramāṇamityarthaḥ | kena prakāreṇa stutapadā ? tameva 
prakāramāha nirātaṅke iti | nirātaṅke nitye ! tathā ca śrutiḥ 
abhayamakṣaramamitamanaṇvasthūlamavikāraṃ kevalaṃ cinmātramayaṃ 
brahma iti | evaṃprakāreṇa stute iti | nigamaya mamāpi stutimimāṃ 
nigamaya nigamīkuru | tatkarotītyarthe ṇic | vedamiva 
sarvasaṃpratipannāṃ kuru | yathā vālmīkivyāsādīnāṃ vācaḥ 
smṛtipurāṇeti hāsādayaḥ nigamavat sarvasaṃpratipannāstvayā 
kṛtāḥ tathā mamāpīyaṃ stutiḥ nigamīkriyatāmityarthaḥ | tathā 
ca kaurme bhagavatyā vacanaṃ himavantaṃ prati 

p. 265) 

vedarūpā parāśaktirmama loke pravartate | tayādhiṣṭhāni 
karmāṇi kurvanti surasattamāḥ || devarṣayo rājarṣayo 
vyāsādimunayastathā | taiḥ praṇītāni sarvāṇi 
kalpasūtramukhāni vai || dharmaśāstrapurāṇāni setihāsasmṛtīni 
ca | jñeyāni vedavattāni nātra kāryā vicāraṇā || 

iti | atra bahukāraṇeṣu ekakriyāyogāt mālādīpakālaṃkāraḥ || 

p. 266) 

śrīcakram || 

p. 267) 

anubandhaḥ 2 

1. bhāvanopaniṣat sabhāṣyā 

2. laghustutiḥ 

3. carcāstavaḥ 

4. ghaṭastvaḥ 

5. ambāstavaḥ 

6. sakalajananīstotram 

|| śriyai namaḥ || 

bhāvanopaniṣat 

bhāskararājaviracitabhāṣyasahitā 

śrīnāthāṅghriparāgaikoparāgādaparāgadhīḥ | 
bhāvanopaniṣadbhāṣyaṃ bhāṣate bhāskaraḥ sudhīḥ || 

iha khalu śrītripurasundaryāḥ sthūlasūkṣmapararūpabhedena 
trividhāyāḥ upāstirūpāḥ kriyā api trividhāḥ kāyikī vācikī 
mānasī ceti | tāsāṃ bahiryāgajapāntaryāgarūpāṇāṃ 
ekaikasyāmitarayoḥ saṃvalitatve'pi prādhānyaprācuryābhyāṃ 
kāyikatvādivyapadeśaḥ | etāsvādimaṃ dvayaṃ 
tripuratāpinyādyupaniṣatsūpadiśya tato'pi rahasyabhūtāṃ 
kālacakrāntargataśrīcakrasya bhāvanānāmnīṃ 
tṛtīyāmupāstimatharvanāmā vedapuruṣo yogijanānujighṛkṣayā 
prakāśayannādau sadguroḥ pararūpatvamabhidhatte-śrīguruḥ 
sarvakāraṇabhūtāḥ śaktiḥ ityādivākyadvayena | atra 
copaniṣadante śrūyamāṇaṃ bhāvanāparo jīvanmukto bhavati iti 
vākyaṃ yadāgneyādivākyavat bhāvanayā jīvanmuktiṃ bhāvayediti 
vipariṇataṃ sat apūrvo vidhiḥ | arthabhāvanākaraṇībhūtāyāśca 
bhāvārtharūpāyāḥ pararūpabhāvanāyāḥ svargavadalaukikatvena 
[bhāvanāyāḥ vyūḍhāvadatāsvikatvena-kha] 
tatsvarūpanirūpaṇārthaḥ śrīguruḥ ityādiḥ sarvo'pi tadvidheḥ 
śeṣaḥ | tena yanna duḥkhena ityādivākyavat vidhyekavākyatayā 
svārthe prāmāṇyamasyāvaseyam | tāśca bhāvanāḥ yadyapi 
kādimatakaulamatabhedena 

p. 270) 

dvilakṣaṇā [matabhedena parasparavilakṣaṇā-kha] 
stantreṣūpalabhyante tathāpi prakṛtopaniṣadi 
kādimatānusāreṇaiva varṇyante | kādimatenāntaścakrabhāvanāḥ 
pratipāditāḥ ya evaṃ veda ityupasaṃhārāt | tenāsyāmevopaniṣadi 
śākhābhedena pāṭhabhedadarśane'pi 
kādimatīyatantrasūtrādyupabṛṃhaṇānuguṇaṃ 
pāṭhamanusṛtyehāsmābhirvyākhyāyate | ata eva 
prayogavidhilekhanāvasare 
prakṛtaśākhāyāmaśrūyamāṇo'pyaṃśo'pekṣitatvānnityāhṛdaya 
tantrarāja-bindusūtrādibhya upasaṃhṛtya varṇayiṣyate || 

śrīguruḥ sarvakāraṇabhūtā śaktiḥ || 1 || 

tena navarandhrarūpo dehaḥ || 2 || 

idaṃ ca vākyadvayamupaṃbṛhitaṃ tantrarāje- 

gururādyā bhavecchaktiḥ sā vimarśamayī matā | navatvaṃ tasya 
dehasya randhratvenāvabhāsate || iti | 

atra ādyā iti sarvakāraṇabhūtā ityasya vivaraṇaṃ kāraṇasya 
kāryapūrvabhāvitvenādyatvāt | īśvarānugrahavaśena jāyamāno 
viveka eva sarvasaṃśayabhedanena mantravīryaprakāśanena 
tāttvikapadārthānāmavakāśapradānādvimarśapadābhidheyo guruḥ | 
gurvabhinnarandhravān | 

taduktam gururupāyaḥ iti śivasūtre vārtikakṛtā- 

gurureva parā śaktirīśvarānugrahātmikā | avakāśapradānena 
saiva yāyādupāyatām ! akṛtrimāhamāmarśasvarūpādyantavedanāt | 
parameṣṭhisamatvena paramopāyatā guroḥ || iti | 

p. 271) 

mālinītantre'pi- 

sa gururmatsamaḥ prokto mantravīryaprakāśakaḥ | 
ādimāntyavihīnāstu mantrāḥ syuḥ śaradabhravat | 
gurorlakṣaṇametāvadādimāntyaṃ nivedayet || iti | 

tādṛśavivekākhyavṛttyavacchinnacicchaktistu 
prāṇaśaktivihārāvasānā suṣumnākhyā nāḍyeva 
vimarśamayītyucyate | śrīgurostāvaddivyasiddhamānavabhedena 
rūpatrayam | tatraikaikaṃ punastrividhamiti 
prakāśānandanāthādisubhagānandanāthāntabhedena navarūpatā 
tantre prasiddhā | tadvāsanāmāha teneti | ṣaṣṭhyarthe tṛtīyā | 
tasyāḥ vimarśaśakteḥ dehaḥ svarūpaṃ navarandhramayam | 
śrotracakṣurnāsānāṃ dvayaṃ dvayam | jihvāguhyapāyavaḥ 
ekaikamiti navamī randhraiḥ svasvaviṣayavimarśaḥ 
upādeyopadeśagrahaṇamanupādeyamocanādikaṃ ca 
bhavatītyādisādharmyāttāni vimarśarūpāṇyeva | vastutaḥ 
dhānyena dhanī itivadabhede tṛtīyā | tadabhinnarandhranavakavān 
svadeha ityarthaḥ | tantrarāje'pi tasyetyasya navatva evānvayaḥ na 
dehapadenānvayaḥ | deharandhranavatvena gurornavatvaṃ bhāsata 
ityarthaḥ | svadehagatanavarandhrāṇi nava nāthā iti yāvat | 

teṣu śrotradvayaṃ vākca divyaughaḥ | dṛgdvayamupasthaśca 
siddhaughaḥ | itare mānavaugha iti sampradāyaḥ | 
etadvimarśanavakasya mūlabhūtā suṣumnānāḍyeva 
sarandhrasuṣumnāmūlabhāge śrotrādināḍīnāṃ militatvena 
suṣumnāvacchinnacicchaktereva tattannāḍīdvārā 
tattadviṣayāvabhāsakatvāt | nāḍīnāmavasthānaprakāro yathā- 

prāguktamūlādhārasya madhyasthatryaśramadhyataḥ | 
suṣumnāpṛṣṭhavaṃśākhyavīṇādaṇḍasya madhyagā || mūrdhani 
brahmarandhrāntā nāsāgrāddvādaśāṅgulā | tanmūlātpāyugā 
proktā'lambusākhyā tu nāḍikā || 

p. 272) 

tryaśrāgrādutthitā nāḍī kuhūrnāma dhvajāntagā | 
tadvāmadakṣapārśvābhyāṃ saviśvodaravāraṇe || jaṭharāntā 
sarvagā ca prokte tadvadanantare | hastijihvāyaśasvinyau 
pādāṅguṣṭhāntavistṛte || tathaiveḍāpiṅgale dve 
nāsārandhradvayāntage | gāndhārī ca tathā pūṣā netradvayagate 
kramāt || tathaiva karṇagāminyau śaṅkhinī ca payasvinī | 
jihvāgragā sarasvatyākhyaivaṃ nāḍyaścaturdaśa || 

mūlādhāre nāḍīnāṃ sthitikramo yathā- 

mūlādhāre tryaśramadhye suṣumnālambuse ubhe | prākpratyagāsthite 
anyāstrikoṇāgrātpradakṣiṇāḥ || lekhāsu saṃsthitā nāḍyaḥ 
kuhūścaiva tu vāraṇā | yaśasvinī piṅgalā ca pūṣānāmnī 
payasvinī || sarasvatī śaṅkhinī ca gāndhārī tadanantaram | iḍā 
ca hastijihvā ca tato viśvodarābhidhā || 
randhrapāyudhvajāśeṣapannāsānetrakarṇagāḥ | 
jihvākarṇākṣināsāṅghrijaṭharāntāścaturdaśa || iti | 

tenaitadrandhranavakakāryabhūtasvasvaviṣayavimarśanavakasamaṣṭiṃ 
gurvabhedena bhāvayediti sidhyati | kecittu śrotrādyavayavānāṃ ca 
tattannāḍīnāṃ ca tattannāthābhedabhāvanamicchanti || 

navacakrarūpaṃ śrīcakram || 3 || 

p. 273) 

deha ityanuvartate | svakīyo deha eva 
trailokyamohanādinavacakrasamaṣṭirūpaśrīcakrābhinnaḥ | 
avāntaracakravibhāgastu āvaraṇadevatāsthānairvyaktībhaviṣyati | 
tāni ca sthānāni śākhābhedenaiva vivṛtāni rahasyatvāt | ata eva 
tantrarāje'pyanuktāni nityāṣoḍaśikārṇave vivṛtatvāt ! 
tadidamuktaṃ bindusūtre 
aparaśivoditavyākulasthānanirṇīticaṇadeśikaprasādādhigatavibhā 
vanārahasyamupahvaram iti | ekaḥ śivastantrakartā prasiddhaḥ | 
aparaśśivo vedapuruṣaḥ tenāpi vyākulatayā 
śākhābhedenoktānāṃ sthānānāṃ nirṇayanasamarthasya guroḥ 
prasādādadhigataṃ yadīyavibhāvanārahasyaṃ tādṛśadeharūpaṃ 
śrīcakraṃ aparokṣānubhavopāyeṣu rahasyaṃ ityupahvaramiti 
tadarthaḥ padmapādācāryairvarṇitaḥ | aṭṭaśūlā janapadāḥ 
śivaśūlāścatuṣpathāḥ iti bhārataśloke śivaśabdasya 
vedaparatvenaiva prayogāt aparaśivaiḥ śākhāntarairityarthaḥ 
suvacaḥ || 

vārāhī pitṛrūpā kurukullābalidevatā mātā || 4 || 

puruṣārthāssāgarāḥ || 5 || 

svadehe jñānendriyakarmendriyabuddhyādiṣu saṃkrāntā ye 
janakajananyoraṃśaviśeṣāḥ asthyādimāṃsādirūpāste 
vārāhītvena kurukullātvena kāmādbhāvanīyāḥ | vārāhyāḥ 
strītve'pi tanmukhasya puṃrūpatvātpitṛrūpatopapattiḥ | 
paścimādyuttarāntadikṣu vidyamānā ikṣvirāghṛtakṣīrasāgarāḥ 
svīyadharmādipuruṣārthacatuṣṭayarūpāḥ | tantrarāje'pyuktam- 

balidevyaḥ svamāyāḥ syuḥ pañcamī janakātmikā | kurukullā 
bhavenmātā puruṣārthāstu sāgarāḥ || iti | 

atra prathamaścaraṇaḥ śākhāntaramūlakaḥ 
sarvavedāntapratyayanyāyenopāstyaikye'pi na tasyopasaṃhāraḥ 
kurukullāyā eva balidevatātvaviśeṣaṇasāmarthyāt | 
atasmiṃstadbuddhiṃ 

p. 274) 

janayitvā unmārgapravartikāḥ śaktayaḥ svamāyāpadenocyanta tu iti 
manoramākāraḥ || 

deho navaratnadvīpaḥ || 6 || 

tvagādisaptadhāturomasaṃyuktaḥ || 7 || 

saṅkalpāḥ kalpataravastejaḥ kalpakodyānam || 8 || 

tvagādirityatadguṇasaṃvijñāno bahubrīhiḥ tena tvagekā 
rudhirādyasthyantāḥ sapta lomāni ceti navakaṃ navaratnātmakaṃ 
khaṇḍanavakamiti sidhyati | atrāyaṃ sampradāyalabhyo'rthaḥ 
rasamāṃsaromatvagrudhiraśukramajjāsthimedāṃsi 
puṣyarāganīlavaiḍūryavidrumamauktikamarakatavajragomedhapadmarāgā 
tmaka-navaratnamayakhaṇḍarūpāṇi pratīcyādini-ṛtyantadikṣu 
madhye'vasthitānīti [madhye ca sthi.] vibhāvayediti | 
sarvaśākhāpratyayamekaṃ karma sarvavedāntapratyayamekamupāsanam 
iti pūrvottaramīmāṃsānyāyābhyāṃ 
guṇopasaṃhārasyāvaśyakatayā 
kālacakreśvaryādidevatānavakābhedo'pyeteṣveva dhātuṣu 
śākhāntarokto vibhāvanīyaḥ | tatprakāraḥ prayogavidhau 
spaṣṭīkariṣyate | mānasāḥ saṅkalpaviśeṣā eva 
santānādikalpavṛkṣāḥ saṅkalpapurassaraṃ karmasu 
pravṛttyā'bhimataphalasiddheḥ | teṣāmādhārabhūtaṃ tejo mana 
eva kalpakodyānam | mano jyotiḥ [tai. saṃ. 1-5-2] iti 
śrativyavahārādiha saṅkalpavikalpātmakaṃ mana eva 
tejaḥpadenocyate || 

rasanayā bhāvyamānā madhurāmlatiktakaṭukaṣāyalavaṇarasāḥ 
ṣaḍṛtavaḥ || 9 || 

p. 275) 

madhurādayo yadā rasanayānubhūyante tadā 
tādṛśānubhūyamānatvaviśiṣṭeṣu teṣu 
vasantādi-ṛtvabhedabhāvanaṃ kevalānāṃ tu teṣāṃ 
svābhinnapadārthāntaraniṣṭhatvena manasaḥ parāgvṛttayāpatteḥ 
asyā bhāvanāyāḥ pratyagvṛttyabhyāsarūpatvena 
taditaranirodhāyogāt | ata eva rasanābhāvyattvaviśeṣaṇam | tena 
tvagādiniṣṭhānāṃ vyāvṛttiripi phalati || tantrarāje tu- 

ratnadvīpo bhaveddeho navatvaṃ tu tvagādibhiḥ | saṅkalpāḥ 
kalpataravaḥ svādhārā ṛtavaḥ smṛtāḥ || 

ityuktam | atra svādhārapadena 
ḍākinyādiyoginīṣaṭcakrādhārabhūtāni suṣumnāntargatāni 
ṣaṭcakrāṇyucyante | suṣumnāyā 
iḍāpiṅgalātmakacandrārkasaṃyogenānumitakalātmakatayā 
tadgatānāṃ cakrāṇāmṛtvātmakatvaṃ yuktamiti vyācakṣate | 
vastutaḥ pratyakṣaśrutyanurodhātsvānubhūyamānarasaparatvameva 
svādhārapadasya yuktam | nanu bhāvyamāna iti śānacā 
vartamānakālakathanāt upāstikāle anubhūyamānarasābhāva iti cet 
na anubhavānāmeva saṃskārātmanā tadānīmapi sattvāt svamātmā 
ādhārassamavāyī yeṣāmiti vyutpattyā svādhārapadasya 
rasānubhavajanyasaṃskāraparatvasyaiva suvacatvāt 
ḍākinyādīnāmitaḥpūrvamanupasthitatayā svapadena 
tatparāmarśāyogāt vaidyake ṛtubhedena rasavyavasthāyāḥ kathanena 
ṛturasasaṃskārayorabhedasya yuktatvācca | evaṃrītyopapattau 
śākhāntaramūlakatvānumiteraprasaṅgācca | ihāśvagajānāṃ 
parikhāmaṇṭapayośca bhāvanopasaṃhāraḥ || 

jñanamarghyaṃ jñeyaṃ haviḥ jñātā hotā 
jñātṛjñānajñeyānāmabhedabhāvanaṃ śrīcakrapūjanam || 10 || 

etaccopabṛṃhitaṃ tantrarāje- 

jñātā svātmā bhaved jñānamarghyaṃ jñeyaṃ haviḥ (bahiḥ) 
sthitam | śrīcakrapūjanaṃ teṣāmekīkaraṇamīritam || iti | 

p. 276) 

jñānaśabdo ghaṭādijñānaparaḥ arghyaśabdaḥ 
pūjāsāmagrīparaḥ jñeya(bahiḥ)śabdo bāhyaviṣayamātraparaḥ | 
yāvānidaṃtāviṣayaḥ sa sarvo'pi haviṣṭvena śrutau nirdiṣṭaḥ 
naivedyamiti yāvat | ata 
evārghyaśabdastaditaraviśeṣārghyaparatayā saṃkocyaḥ | pūjyā 
devatā tu cidrūpā prasiddhatvānnoktā | ahantāviṣayo jñātā 
pūjakaḥ prakṛtatvādviśiṣya śrutāvanukto'pi tantre nirdiṣṭaḥ 
| svātmacaitanyādbhedena pratīyamānānāṃ 
jñātṛjñānajñeyānāṃ bhedakanāmarūpānanusandhānapūrvakaṃ 
cinmātrarūpatayā vibhāvanamiha vidhīyate | tantre bhāve 
lyuḍantapūjanapadārthastu tritayābhedamātraṃ na 
tvabhedavibhāvanam | loke hi viśeṣārghyajalabindvādernaivedyasya 
svātmanaśca devatāyāṃ samarpaṇarūpasaṃbandha eva pūjā | 
tadvatprakṛte'pi trayāṇāṃ citā saha tādātmyasyaiva 
tathātvamucitam | tadanukūlā kṛtirhi vibhāvanamatrābhidhīyate | 
vibhāvanasyaiva pūjanapadārthatve vibhāvanapūjanayorabhedena 
vibhāvanāntaramāpadyeta | tena karaṇelyuḍantaḥ śrautaḥ 
pūjanaśabdaḥ pūjānukūlakṛtipara iti 
dyotanāyaikīkaraṇamityupabṛṃhitam || 

niyatiḥ śṛṅgārādayo rasā aṇimādayaḥ | 
kāmakrodhalobhamohamadamātsaryapuṇyapāpamayyo 
brāhmyādyaṣṭaśaktayaḥ || 19 || 

niyatiḥ prārabdhamekam | śṛṅgārādayo nava | 
ādipadādbhayānakaraudravībhatsahāsyavīrakaruṇādbhutaśāntaparig 
rahaḥ | eteṣāṃ daśānāṃ krameṇāṇimādisiddhidaśakābhedaḥ | 
atra krame mūlaṃ bindusūtrato jñeyaṃ śṛṅgārādītyādipadena 
gṛhītānāṃ kramasyājñātatvenānyato grahaṇasyocitatvāt | 
kāmākarṣiṇyādivakṣyamāṇavāsanānāṃ tu pāṭhakrameṇa 
nirṇayasambhavānnidhikāroktavyutkramo yāvanmūladarśanaṃ na 
viśvāsanīyaḥ | atra mayaṭpratyayo brahmamayaṃ 
jagadityādāvivābhedārthakaḥ | yattu tantrarāje- 

p. 277) 

śrīcakre siddhayaḥ proktā rasā niyatisaṃyutāḥ | ūrmayaḥ 
puṇyapāpe ca brāhmyādyā mātaraḥ smṛtāḥ || 

ityuktam tatrāpyūrmiśabdaḥ kāmādyariṣaḍvargapara eva purāṇeṣu 
kāmāderapyūrmipadena kvacidvyavahāradarśanāt | tena 
kṣudhāpipāsāśokamohajarāmaraṇaparatvena pareṣāṃ vyākhyānaṃ 
pratyakṣaśrutivirodhādanādeyam || 

ādhāranavakaṃ mudrāśaktayaḥ || 12 || 

pṛthivyaptejovāyvākāśaśrotratvakcakṣurjihvāghrāṇa- 
vākpādapāṇiṃpāyūpasthāni manovikāraḥ 
kāmā-karṣiṇyādiṣoḍaśaśaktayaḥ || 13 || 

mūlādhārādiṣaṭkamūrdhvādhaḥ sahasradalakamale dve 
lambikāgramekamiti navādhārāḥ | teṣāmeva samaṣṭireketi daśa | 
etaiḥ 
saṃkṣobhiṇyāditrikhaṇḍāntamudrābhimāniśaktidaśakasyābhedāḥ 
| tantrāntareṣu 
tṛtīyarekhādevatābhāvāttadanuyāyibindusūtroktānāṃ 
āvaraṇadevatāsthānānāmiha (na) grahaṇam | anye tu 
yoginīhṛdayasyāpi kādimatānuyāyitvāttatra mudrādevatānāṃ 
śarīrāvayaveṣu avasthānakathanāttānyeva sthānāni grāhyāṇi | 
etadupaniṣaduktadevatāvibhāvanasya pūjānyāsobhayarūpatāyāḥ 
nidhikārādisāmpradāyikasamsatatvāt | tena katipaye 
nyāsadharmāstantroktā iha yojanīyā ityāhuḥ | te ca 
caturaśrādyarekhāyai sama ityādito nyaset ityādayaḥ prayogavidhau 
upasaṃhariṣyante | pratyāvaraṇamekaikasyāḥ siddhermudrāyāśca 
vibhāvanamagre vidhāsyate | 
tattaccakreśvarīvibhāvanamapyanyatroktamupasaṃhāryam | pañca 
bhūtāni ekādaśendriyāṇi ca 
sarvāśāparipūrakacakrasthadevatābhinnāḥ | atra vikāraśabdaḥ 
ṣodaśasaṅkhyāparaḥ | manovikāra ityekaṃ padaṃ vā vikṛtaṃ mana 
ityarthaḥ kṛdabhihito bhāvo dravyavatprakāśate iti vyutpatteḥ | 
tena mana ikṣudhanuḥ ityanena na paunaruktyam || 

p. 278) 

vacanādānagamanavisargānandahānopādānopekṣākhyabuddhayo'naṅga- 
kusumādyaṣṭau || 14 || 

karmendriyāṇāṃ vacanādayo viṣayāḥ pañca | hānaṃ tyāgaḥ | 
upādānaṃ grahaṇam | upekṣā audāsīnyam | īdṛśabuddhitrayaṃ 
cetyaṣṭau | idameva buddhitrayaṃ doṣapadenoktaṃ tantrarāje- 

bhūtendriyamanāṃsyeva kramānnityāḥ kalāḥ punaḥ | 
karmendriyārthadoṣaśca jñeyāḥ syuḥ śaktayo'ṣṭadhā || 

iti | vātapitthakaphā doṣā ityanye | 

alambusā kuhūrviśvodarā vāraṇā hastijihvā yaśovatī payaskhinī 
gāndhārī pūṣā śaṅkhinī sarasvatī iḍā piṅgalā suṣumnā 
ceti caturdaśa nāḍyaḥ sarvasaṃkṣobhiṇyādicaturdaśa śaktayaḥ 
|| 15 || 

nāthanavakavyākhyānāvasare nāḍīnāṃ svarūpaṃ prāgvivṛtaṃ 
tadabhinnā manvaśradevatāḥ | etāsāṃ nāḍīnāṃ 
pūrvoktapṛthivyādiṣoḍaśakasya ca vyutkramo bhūyāneva 
nidhigranthe dṛśyate | 
śrautakramabodhakapratyakṣaśrutimantareṇā'tratyapāṭhakra 
mabādhasyāyogāttatra mūlaṃ cintyam || 

prāṇāpānavyānodānasamānanāgakūrmakṛkaradevadattadhanañjayāḥ 
daśa vāyavassarvasiddhipradādibahirdaśāradevatāḥ || 16 || 

p. 279) 

etadvāyusaṃsargakopādhibhedena recakaḥ pācakaḥ śoṣako dāhakaḥ 
plāvakaḥ iti prāṇamukhyatvena pañcadhā jaṭharāgnirbhavati || 17 
|| 

kṣāraka udgārakaḥ kṣobhako jṛmbhako mohaka iti nāgaprādhānyena 
pañcavidhāste manuṣyāṇāṃ dehagāḥ 
bhakṣyabhojyacoṣyalehyapeyātmakaṃ pañcavidha mannaṃ pācayanti || 
18 || 

etā daśa vahnikalāḥ sarvajñādyā antardaśāragā devatāḥ || 19 
|| 

prāṇādyāḥ pañca mahāvāyavaḥ nāgādyāḥ upavāyavaḥ 
prañcetyevaṃ daśāpi sarvārthasādhakacakrasthadevatābhirabhinnāḥ 
| tantrārāje'pi- 

nāḍyaścaturdaśa proktāḥ kṣobhiṇyādyāstu śaktaḥ | vāyavo 
daśa saṃproktāḥ sarvasiddhyādiśaktayaḥ || iti || 

ekasyaivaudaryāgneḥ prāṇādidaśavāyusaṃbandhenaupādhikatvaṃ 
vākyadvayena vivṛtam | tṛtīyavākyena pācakasya kāryam | 
caturthavākyena sarvārthasādhakacakrasthadevatābhirabhedaḥ uktaḥ | 
dhātusaptake doṣatraye ca vidyamānatvāddaśadhātvamagneranye 
manyante | tantrarāje tu- 

p. 280) 

vahnayo daśa saṃproktāḥ sarvajñādyāśca śaktayaḥ || 

ityatra samproktāḥ ityasya śrutau kathitā recakādaya ityevārthaḥ 
| kecitproktapadaṃ vakṣyamāṇārthakaṃ manyante | tasminneva 
paṭale- 

agnirvahniḥ śucistejaḥ prabhā dāvaḥ śikhī dyutiḥ | 

dāho grāsaḥ........................ || 

iti nāmadaśakasyottaratra kathanāt | parantu prayoge 
mantraghaṭakatā śrautanāmnamevocitā vidhiśabdasya mantratve 
[jaiminis 10-4-22] iti dāśamikādhikaraṇanyāyāt || 

śītoṣṇasukhaduḥkhecchāḥ sattvarajastamoguṇāḥ 
vaśinyādiśaktayo'ṣṭau || 20 || 

śītoṣṇe sukhaduḥkhe ceti dvandvadvayam icchaikā 
sattvāditrayamityaṣṭau vāgdevatāṣṭakarūpāḥ | tantrarāje'pi- 

śītoṣṇasukhaduḥkhecchāguṇāḥ proktāḥ krameṇa vai | 
vaśinyādyāḥ śaktayassyuḥ ........... || iti || 

śabdāditanmātrāḥ pañcapuṣpabāṇāḥ || 21 || 

mana ikṣudhanuḥ || 22 || 

rāgaḥ pāśaḥ || 23 || 

dveṣo'ṅkuśaḥ || 24 || 

śabdasparśarūparasagandhāstanmātrapadenocyante | te ca mukhe 
abhimukhāḥ ante paruṣāḥ ata eva bāṇābhinnāḥ | avikṛtaṃ tu 
manaḥ puṇḍrekṣucāparūpam 
viṣayaparāmarśarūpāṇāmindriyāṇāṃ prerakatvāt | rāgaḥ 
prītiḥ ṣaṭtriṃśadantargatā 

p. 281) 

tattvaviśeṣaḥ na tvicchāsāmānyam | 
tenāruṇāvāgdevatāvasānayā na paunaruktyam | bandhakatvena 
sāmyāttasya pāśābhedaḥ | dveṣaḥ krodhaḥ tasya 
dveṣyānnivārakatvādaṅkuśatā | uktaṃ ca rahasyanāmasāhasre- 

rāgasvarūpapāśāḍhyā krodhākārāṅkuśojjvalā | 
manorūpekṣukodaṇḍā pañcatanmātrasāyakā || iti || 

tantrarāje'pi- 

.* * * * * * * * tanmātrāḥ puṣpasāyakāḥ || mano 
bhavedikṣudhanuḥ pāśo rāga udīritaḥ | dveṣaḥ syādaṅkuśaḥ 
proktaḥ krameṇa varavarṇini || iti || 

avyaktamahadahaṅkārāḥ 
kāmeśvarīvajreśvarībhagamālinyo'ntastrikoṇagā devatāḥ || 25 
|| 

atra mahadavyaktaśabdau buddhiprakṛtitattvaparau | avyaktādipadatraye 
samāhāradvandvaḥ | paraṃ tu na yathāsaṅkhyaṃ tritayayorabhedaḥ 
api tu avyaktāhaṅkṛtimahadākārāḥ pratilomataḥ 
kāmeśvaryādidevyaḥ syuḥ iti tantropabṛṃhaṇānurodhena 
vyutkrameṇa vāsanāḥ || 

atra mukhyaviśeṣyā lalitā | viśeṣyatāvacchedakaḥ kāmeśvaraḥ | 
anayośca raktacaraṇaśuklacaraṇarūpate raktavaśuklavarṇau 
anayoreva saṃbandhaviśeṣaḥ | tasyaiva 
sthūlasūkṣmamiśracaraṇatvaṃ ceti trividhaṃ rūpam | prakāratvena 
viṣaya upāsakaḥ | tasya mukhyaviśeṣyeṇa saha saṃbandhaḥ 
prakāratāvacchedakaścetyekādaśa padārthān 
tribhirvākyairvivecayati nirupādhiketyādibhiḥ- 

p. 282) 

nirupādhikā saṃvideva kāmeśvaraḥ || 26 || 

upādhirahitaṃ śuddhaṃ caitanyameva bindurūpaḥ kāmeśvaraḥ 
saṃvitkāmeśvaraḥ smṛtaḥ ityupabṛhmaṇāt || 

sadānandapūrṇā svātmaiva paradevatā lalitā || 27 || 

saṃvido nirupādhikatvaviśeṣaṇabalāttadaṅkanilayāyāḥ 
paradevatāyāḥ kiñcidupādhiviśiṣṭatvamātreṇa tato 
bhinnatayopāsyatvam | tādṛśaśca svātmaiva | svābhinna eva 
paradevatā 
upāstijñarūpānaviśeṣanirūpitamukhyaviśeṣyatāśālinī 
tāmevāsādhāraṇanāmnā nidiśati laliteti | atra 
sadānandapūrṇetyupādhikathanam | tenāntaḥkaraṇāvacchinnasya na 
lalitātvaṃ tasyopāsakakoṭau praveśāt | ata eva svātmetyuktaṃ 
svasyopāsakasyātmā'ntaryāmīti tadarthatvāt | itthaṃ ca eka 
evātmā'ntaḥkaraṇopādhikassannupāsako bhavati | 
sattvacittvānandatvarūpadharmatrayaviśiṣṭaveṣeṇa lalitā 
bhavatyupāsyā | dharmatrayavinirmuktaṃ 
dharmimātramupāsyadevatādhārabhūtaḥ kāmeśvaro bhavatīti 
vivekaḥ | taduktaṃ ratnatrayaparīkṣāyām- 

nityaṃ nirdoṣagandhaṃ niratiśayasukhaṃ brahmacaitanyamekaṃ dharmo 
dharmīti bhedastritayamiti pṛthagbhūya māyāvaśena | 
dharmastatrānubhūtiḥ sakalaviṣayiṇī sarvakāryānukūlā śaktiḥ 
svecchādirūpā bhavati guṇagaṇasyāśrayastveka eva || kartṛtvaṃ 
tatra dharmī kalayati jagatāṃ pañcasṛṣṭyādikṛty dharmaḥ 
puṃrūpamāptvā sakalajagadupādānabhāvaṃ bibharti | strīrūpaṃ 
prāpya divyā bhavati ca mahiṣī svāśrayasyādikartuḥ proktau 
dharmaprabhedāvapi nigamavidāṃ dharmivadbrahmakoṭī || iti || 

lauhityametasya sarvasya vimarśaḥ || 28 || 

p. 283) 

sarvapadena kāmeśvaro lalitā svayaṃ ceti tritayam | etasya vimarśo 
nusandhānameva devīniṣṭhaṃ lauhityaṃ sarvasya svātmanyanurāgāt 
rāgalauhityayorabhedāt | uktaṃ ca tantrarāje- 

svātmaiva devatā proktā lalitā viśvavigrahā | lauhityaṃ 
tadvimarśaḥ syādupāstiriti bhāvanā || iti || 

atredaṃ gurumukhaikavedyaṃ rahasyam nirupādhikapadena kevalatvasya 
sadānandapūrṇapadena dharmaviśiṣṭatvasya ca kathanena 
viśiṣṭakevalayoravayavāvayavinorivāyutasiddhayostādātmyarūpa eva 
sambandhaḥ na saṃyogādirūpo bhedaghaṭitaḥ | sa ca 
tripurasundarīkāmeśvarayorvigrahātmakasthūlarūpadvayasambadhaḥ 
kāmeśvarāṅkanilayatvapadena 
vyavahriyamāṇaśśivaśaktisāmarasyātmako lākṣādravapaṭayoriva 
saṃyogaviśeṣa eveti vāsanā | evamupādhivinirmuktasyaiva 
śuddhatvena sphaṭike varṇāntaroparāgābhāvadaśāyameva 
avijyamānatvasya śuklatvasya śuddhasphaṭikābheda eva 
paryavasitatvena kāmeśvare śuklacaraṇatvavāsanā | 
anusandhānasyāhamātmakamānasavṛttiviśeṣamātrarūpatvena 
tadviṣayatāyāḥ viṣayatāsambandhena vṛttervā vṛttisambandhena 
manasa eva vā rāgābhedena paryavasānāttadviśiṣṭāyāṃ 
raktacaraṇatvavāsanā | sarvasyetyanena viṣayatāyā 
viśeṣyaviśeṣaṇatatsambandheṣu 
vyāptikathanāccaraṇaprabhayossamarasabhāvasambandharūpamiśracaraṇ 
asyāpi vāsanā sūcitā bhavatīti dik | tantraśloke gururādyā 
bhavecchaktiḥ ityādinoktānāṃ 
vāsanānāmanusandhānamupāstipadavācyamiti 
kathanārthaścaturthacaraṇaḥ | atha vā upāsterapi trīṇi rūpāṇi 
vigrahādipūjanaṃ sthūlarūpaṃ mānaso japassūkṣmaṃ eṣā 
bhāvanā paraṃ rūpamiti | 

ananyacittatvena ca siddhiḥ || 29 || pratyāvaraṇamekaikā 
siddhirekaikā mudrā ca bahiryāge pūjyate | 
tadvāsanāvidhānārthamiyaṃ śrutiḥ || 

p. 284) 

ananyacittatvenetyabhede tṛtīyā | cakāro mudrāsaṅgrahārthaḥ | 
tathā copabṛṃhitaṃ tantrarāje- 

siddhistvananyacittatvaṃ mudrā vaibhavabhāvanam | iti || 

tattadāvaraṇadevānāṃ svaśarīrāvayavaviśeṣābhedena 
bhāvitānāmapi svātmānanyatvena citte bhāvanameva 
tattadāvaraṇasthā siddhiḥ | etā matto na bhidyante iti buddhireva 
siddhiriti yāvat | siddhipadamupāstiphalasiddhiparamiti kecit | 
tatpakṣe avyavahitapūrvoktabhāvanāyāṃ 
viṣayatāvailakṣaṇyaprayuktadabhedasya anirāsenopāsanā 
phalatītyarthaḥ | vastuto vakṣyamāṇatarpaṇe 
viṣayavailakṣaṇyanirāsādayaṃ granthassiddhyādipara eva | 
tāsāmeva vaibhavaṃ vibhutvamaparicchinnatā | tadbhāvanameva 
tattadāvaraṇasthamudrābhāvanamityarthaḥ | 

bhāvanāyāḥ kriyā upacārāḥ || 30 || 

uktāyāḥ svātmābhedena lalitābhāvanāyāḥ kriyāḥ 
punaḥpunaḥkaraṇāni dhārāvāhinyo bhāvanā iti yāvat | 
upacārasamarpaṇasya bhedaghaṭitatvena yathā- 
sthitagandhādibhāvanāpakṣe pūrvavibhāvitasya bhedasya 
pramoṣāpattestadavirodhinīrevopacārabhāvanāḥ svecchayā 
kalpayediti bhāvaḥ | taduktaṃ tantrarāje- 

upacāraścalatve'pi tanmayatvāpramattatā || iti || 

calatvaṃ cāñcalyaṃ abhedabhāvanāsthairyābhāvaḥ 
tādṛśasvabhāvaśīlatve'pi brahmamayatvāṃśe 
pramādābhāvo'tīva sāvadhānatā yathā syāttathā vibhāvanā 
evopacāra iti tadarthaḥ | yadyapi 
calaśabdo'vaśyaṃbhāvipramādasvapnādyavasthāparatvena 
manoramāyāṃ vyākhyātaḥ tathāpyapiśabdasvārasyena jāgratkāle 
sāvadhānatāmātrāvaśyakatāparavai soktiriti mantavyam | 
tādṛśo'pramādaśca yogavāsiṣṭhoktaśivapūjāyāṃ draṣṭavyaḥ 
| ātmano viṣayopabhogajanitānandasya sarvasya 
svātmābhedenānusandhānaṃ 

p. 285) 

prārabdhalabdhasukhaduḥkhasyāpi karmakṣayakārakatvena 
pariṇāmasukhāvahatvātkaṭukaṣāya vastukṛtasvāṅgodvartanāderiva 
bhāvanayā saparyārūpataiveti tatratyo niṣkarṣaḥ | 
saparyāparyāyastava bhavatu yanme vilasitam ityādayo 
[saundaryalaharī] bhagavatpādādīnāmuktayo'pyamuvārthaṃ vadanti | 
parantvīdṛśapūjāyā ahorātrakālasādhyatvena prakṛte 
vidhitsitāyāśca bhāvanāyā uttaratra muhūrtādikālaniyamavidhinā 
virodhādanyathaivopacārāḥ kalpanīyāḥ | tatprakāro yathā sve 
mahimni pratiṣṭhitivibhāvanamāsanam | pādo'sya viśvā bhūtāni 
[tai. ā. 3-12] iti śrutyā vādarūpe viyadādiprapañce 
astibhātipriyāṃśamātrabhāvanārūpābhiradbhirnāmarūpamalakṣāl 
anaṃ pādyam | tasyaiva sūkṣmaprapañcasya 
ekadeśatvāviśeṣādhyastatvenāpi parikalpanayā uktarītyā 
malanirāso'rghyam | bhāvanārūpajalasyāpi kabalīkāra ācamanam | 
sattvacittvānandatvādyakhilāvayavābhedena bhāvanājalasamparkaḥ 
snānam | teṣvevāvayaveṣūktajalasamparkeṇa prasaktāyā 
vṛttiviṣayatāyāḥ pracchannabhāvanaṃ vastram | 
nirviṣayatvanirañjanatvādyanekabrahmaliṅgabhūtatadabhinnadharma-vib 
hāvanamābharaṇam | 
svaśarīrāntargatapārthivanābhasavāyavīyataijasabhāgānāṃ 
candramaṇḍalasthāmṛtasya tanmaṇḍalasya ca 
jaḍabhāgāpanayanapūrvakaṃ saccidānandamātrāvaśeṣeṇa 
brahmamayatvavibhāvanāni gandhāditāmbūlāntāṣṣaḍupacārāḥ | 
uktaṃ nityāhṛdaye- 

bhavatīṃ tvanmayaireva naivedyādibhirarcayet | iti | 
pañcabhūtamayaṃ viśvaṃ tanmayī sā sanātanī || iti ca | 

prakṛtabhāvanāṅgamantre parāpaśyantītyādinikhilaśabdānāṃ 
svīyānāṃ nādadvārā brahmaṇyupasaṃhāravavibhāvanā stotram | 
cittavṛttīnāṃ viṣayeṣvitastato dhāvamānānāṃ 
viṣayagatajaḍatānirāsapūrvakaṃ brahmaṇi vilāpanaṃ pradakṣiṇam 
| viṣayebhyaḥ parāvartanena vṛtīnāṃ brahmekapravaṇatā 
namaskāra iti | yadyapi bāhyāntaḥkaraṇānāṃ 
ekarūpasthitirāsanaṃ 

p. 286) 

ityādīni vākyāni mūle'pi kvaciddṛśyante | tathāpi teṣu 
katipayānāmupacārāṇāṃ prakṛtabhāvanānuguṇyābhāvādbahuṣu 
pustakeṣvanulambhāttantreṣu tadupabṛṃhaṇādarśanācca 
tānyasmābhiriha nādṛtāni || 

ahaṃ tvamasti nāsti kartavyamakartavyamupā- sitavyamiti 
vikalpānāmātmani vilāpanaṃ homaḥ || 31 || 

santi śrīcakre pūrvabhāvitebhyo anyā apyanantāśśaktayaḥ- 

anyāstu śaktayaścakragāminyo yāssamantataḥ | tāstu 
viśvavikalpānāṃ hetavaḥ samudīritāḥ || 

ityādinā tantre varṇitāḥ | tāsāṃ 
tripurasundaryabhedabhāvanāphalikāṃ homavāsanāmāha ahamityādinā 
| tena naivedyāṅgahomasya upacārādbahiḥ pārthakyena kathanasya 
nāsāṅgatyam | tathā ca visarjanātmakopacāraparāṇyeva aham 
ityārabhya trīṇi vākyānīti paryavasannam | 
yuṣmadasmapratyayayorahaṃ tvamityanena grahaṇam | asti nāsti 
ityanena laukikayorvidhiniṣedhayoḥ kartavyamakartavyaṃ ityanena 
vaidikayoḥ karmakāṇḍasthayoḥ upāsitavyam ityanena 
vedaśirasthavidhergrahaṇam | nopāsīta iti 
niṣedhasyopaniṣatsvadarśanādeva tadanullekhaḥ | etatsaptakena 
vṛttisāmagryupalakṣyate | 
īdṛśavikalpānāmapyātmasvarūpatvamātmāviśeṣavibhāvanameva 
homabhāvanā || 

homo viśvavikalpānāṃ svātmanyastamayo dṛḍham | 

ityupabṛṃhaṇāt | vikalpānāṃ nirvyutthānavilāpanapūrvakaṃ 
taddhetuśaktikadambasya devatāyāṃ vilīnatāṃ bhāvayediti 
phalitārthaḥ || 

bhāvanā viṣayāṇāmabhedabhāvanā tarpaṇam || 32 || 

śrīgurvādiviśeṣahomāntā yāvantaḥ padārthā iha bhāvitā ye ca 
bhāvayiṣyante teṣāṃ sarveṣāmapi parasparābhedabhāvanena 
viṣayatāvailakṣaṇyaprayuktabhedabhāvanasyāpi 

p. 287) 

nigaraṇena nirvikalpaturīyākhaṇḍaviṣayatāmāpādya tasyā api 
tyāgena svātmamātrāvaśeṣaḥ tarpaṇavāsanā | yadyapi- 

tāmbūlamarcanā stotraṃ tarpaṇaṃ ca namaskriyā | 

iti parigaṇitamupacārāntarameva tarpaṇaṃ tathāpi 
tadihāvaraṇadevopacārarūpa- tvādvisarjanaikadeśa eva 
svetarabhāvananirodhakatvāttarpaṇatāpi | 

eṣāmanyonyasaṃbhedabhāvanaṃ tarpaṇaṃ smṛtam | 

iti tantrarāje eṣāmityasya nyāsajapahomānāmiti saṃkucitaṃ 
nidhikṛto vyākhyānaṃ śrutivirodhādanādeyam || 

etāvatā prabandhena deharūpaśrīcakrasya 
svātmamātrāvaśeṣatāmuktvā tena saha bahiraṅgasambandhaśālinaḥ 
prapañcasyāpi svātmani vilāpanamāha- 

pañcadaśatithirūpeṇa kālasya pariṇāmāvalokanaṃpañcadaśa 
nityāḥ || 33 || 

sa ca prapañcastrividhaḥ kālarūpo deśarūpo ubhayarūpaśceti | 
tatrādyo yathā candramaṇḍalaniṣṭhasādākhyakalātiriktaḥ darśā 
dṛṣṭā darśatā [tai. brā. 3-10-1] ityādiśrutiparigaṇitāḥ 
pañcadaśa kalāssanti tāvat pratipadādipūrṇimāntatithirūpāstā 
eva ca kāmeśvaryādicitrāntanityābhirabhinnāḥ | sādaiva tu 
lalitā | īdṛśasya ca nityaṃ parivartamānasya 
kālarūpatithicakrasyāntareva śrīcakraṃ tiṣṭhati na bahiḥ | 
dvitīyo yathā bhūgolasyottarabhāge sthito meruḥ taddakṣiṇato 
jambūplakṣaśālmāsikuśakrauñcaśākapuṣkarākhyāssapta dvīpāḥ 
| teṣāmantarāleṣu bhūgolasya 
valayākāralavaṇekṣusurāsarpirmadhukṣīrākhyāḥ ṣaṭ samudrāḥ 
puṣkarādbahirmadhurodassamudrassaptamaḥ | tato'pi dakṣiṇataḥ 
paraṃ vyometyevaṃ ṣoḍaśa devatāḥ | 

p. 288) 

teṣu mervādivyomānteṣu krameṇa lalitādicitrāntāḥ nityāḥ 
yugaprathamavarṣe tiṣṭhanti | dvitīye tu varṣe 
jambūdvīpādimervanteṣu ca gacchanti | tṛtīye tu 
lavaṇasāgarādijambūdvīpānteṣvityādirītyā ṣoḍaśavaṣe 
paravyomādimadhurasamudrāntadeśeṣu lalitādyāṣṣoḍaśa 
nityāstiṣṭhanti | evaṃ 
ṣoḍaśabhiṣṣoḍaśabhirvarṣairnityānāmekaikāparivṛttiḥ | 
īdṛśadeśarūpaśakrasyāpyantareva śrīcakraṃ na bahiḥ | tṛtīyo 
yathā bhūgolasyoparyadhaśca 
valayitāścandrabudhaśukraravibhaumaguruśaninakṣatrakakṣā aṣṭau 
tattadantarālānyaṣṭau iti ṣoḍaśa deśāḥ kālacakrarūpāssanti 
| teṣu sthāneṣu deśaparivṛttiviparītakramataṣṣoḍaśa nityāḥ 
parivartante | asyāpi cakrasyāntareva śrīcakraṃ na bahiḥ | asya 
trividhasyāpi cakrasya pāramārthikarūpaṃ nityācakrameva | 
brahmātiriktasya sarvasya deśakālāvacchinnatadabhedātsarvo'pi 
prapañco nityārūpa eva | tāsāṃ svātmābhedabhāvanaiva hyatra 
vidhīyate- 

atha ṣoḍaśanityānāṃ svātmatve vāsanāṃ śṛṇu ! yayā 
tanmayatāsiddhiḥ pratyakṣā bhavati dhruvam || 

ityupakramya gururādyā bhavecchaktiḥ ityādinā lalitāyāḥ 
saṅgopāṅgāyāḥ svātmatvavāsanāmuktvā ante- 

tithirūpeṇa kālasya pariṇāmāvalokanam | nityāḥ 
pañcadaśānyāssyuḥ iti proktāstu vāsanāḥ || 

ityupasaṃhārasya tantrarāje darśanāt | sa ca 
prapañcopasaṃhāraphalikaiva tithirūpeṇeti 
trividhacakropalakṣaṇadvārā prapañcaparam | prapañcātmakatayā 
kāla aiva pariṇato'stīti vibhāvanamevānyāsāṃ 
pañcadaśanityānāṃ vibhāvanamityarthaḥ | tāsāṃ 
tripurasundaryabhedasya kḷptatvāttadanuktiḥ 
bhāvanāviṣayapadenoktānāṃ vakṣyamāṇānāṃ krīḍīkāreṇa 
pūrvavākya evābhedabhāvanāyā vihitatvādvā | vastutastu sarvā 
api tithayaḥ 
ṣaṭchatādhikaikaviṃśatisahasrasaṅkhyāśvāsātmakakālarūpāḥ | 
tatsamaṣṭivigrahavatī lalitā | anyāḥ pañcadaśa 
vyaṣṭiviśeṣeṇa pratyekaṃ 
catvāriṃśadadhikacaturdaśaśataśvāsarūpā bhavanti | 

p. 289) 

tāstathā vibhāvayedityarthaḥ | etatpakṣadvayabhāvanā 
āvaraṇapūjātaḥ kāryeti kecit | bāhyapūjāyāṃ tatraiva 
sthānakḷpteḥ sarvavilāpottaraṃ bhāvanāntarānavakāśāditi 
tadāśayaḥ | vastutastu svātmamātraparatvena manasasstambhe sati 
śvāsastambhasyāvaśyaṃbāvāddevatāyā raśmivilāpanasya 
visarjanakāla evocitatvānmanaḥpavanobhayastambhasyaivottaratra 
kālavidhānāyehaivāvasarasadbhāvānnirarthakavākyāpakarṣasyāyukt 
a-tvāccehaiva nityā bhāvanā yukteti draṣṭavyam || 

evamāntarabāhyanikhilaprapañcavilāpanapūrvakasvātmamātrāvaśeṣa 
-bhāvanāyāḥ aharniśaṃ dhārāvāhikatāvaśyakatāṃ dhvanayan 
tadaśakteṣūttamamadhyamādhamasādhakabhedena trividhaṃ 
kālaniyamamāha- 

evaṃ muhūrtatritayaṃ muhūrtadvitayaṃ muhūrtamātraṃ vā 
bhāvanāparo jīvanmukto bhavati sa eva śivayogīti gadyate || 34 || 

evamityanena avyavahitapūrvoktā svātmamātraviṣayiṇī 
śvāsastambhasahitā nirvikalpakavṛttirucyate | 
tadavabhinnabhāvanāyāṃ paraḥ tatraivāsaktaḥ 
bhāvanetaravyāpāraśūnyaḥ dhārāvāhikabhāvanāvāniti yāvat | 
sa jīvanmuktirūpaphalabhāk acirādeva jāyate | 
jaigīṣavyādayaśśivayogitvena ye vyavahriyante 
te'pyetādṛśabhāvanāśalitvādeveti 
tatpadapravṛttinimittamīdṛśabhāvanetyarthaḥ || 

kādimatenāntaścakrabhāvanāḥ pratipāditāḥ || 35 || 

ya evaṃ veda so'tharvaśiro'dhīte || 36 || 

vedatrayaṃ bahiraṅgakarmapratipādakam | atharvaṇavedastu 
antaraṅgakarmāṇyeva pracuraṃ pratipādayati | tasyāpi 
śirorūpeyamupaniṣattu tato'pyantaraṅgatamāṃ bhāvanāṃ vakti || 

p. 290) 

asyāṃ yā antaścakrabhāvanāḥ kathitāstāḥ 
kādināmakaśaktimatarītyaiva na tu kaulamatena | asyā upaniṣada 
īdṛśabhāvanāpratipādakatvamiti padaśo vākyaśaśca yo veda sa 
evātharvaśirodhyayanavān na tu śabdamātrādhyayanavān | 
adhyayanakaraṇakabhāvanāyā arthāvabodhabhāvyakatvāditi bhāvaḥ | 
yo'rthajña itsakalaṃ bhadramaśnute iti śrutyantare 
sakalapadasvārasyāt śabdamātrapāṭhādapi kiñcidbhadramastyeveti 
ca labhyata iti śivam || 

iti bhāvanopaniṣadaḥ atharvaṇaśiraso'tanodbhāṣyam | 
bhāskararāyo viduṣāṃ tuṣṭyai jīvanmumukṣūṇām || 

iti sabhāṣyā bhāvanopaniṣat sampūrṇā 

śrī devīstotrapañcakam 

(1) laghustutiḥ 

aindrasyeva śarāsanasya dadhatī madhyelalāṭaṃ prabhāṃ śauklīṃ 
kāntimanuṣṇagoriva śirasyātanvatī sarvataḥ | eṣāsau tripurā 
hṛdi dyutirivoṣṇāṃśossadāhasthitāt chindyānnassahasā 
padaistribhiraghaṃ jyotirmayī vāṅmayī || 1 || 

yā mātrā trapunnīlatātanulasattantusthitispardhinī vāgbīje 
prathame sthitā tava sadā tāṃ manmahe te vayam | śaktiḥ 
kuṇḍalinīti viśvajananavyāpārabaddhodyamāḥ jñātvetthaṃ na 
punasspṛśanti jananīgarbhe'rbhakatvaṃ narāḥ || 2 || 

dṛṣṭvā sambhramakāri vastu sahasā ai ai iti vyāhṛtaṃ 
yenākūtavaśādapīha varade ! binduṃ vināpyakṣaram | tasyāpi 
dhruvameva devi ! tarasā jāte tavānugrahe 
vācassūktisudhārasadravamuco niryānti vaktrāmbujāt || 3 || 

yannitye ! tava kāmarājamaparaṃ mantrākṣaraṃ niṣkalaṃ 
tatsārasvatamityavaiti viralaḥ kaścidbudhaścedbuvi | ākhyānaṃ 
pratiparva satyatapaso yatkīrtayanto dvijāḥ prārambhe 
praṇavāspadapraṇayitāṃ nītvoccaranti sphuṭam || 

yatsadyo vacasāṃ pravṛttikaraṇe dṛṣṭaprabhāvaṃ budhaiḥ 
tārtīyaṃ tadahaṃ namāmi manasā tvadbījaminduprabham | 
astyaurvo'pi sarasvatīmanugato jāḍyāmbuvicchittaye gośabdo giri 
vartate suniyataṃ yogaṃ vinā siddhidaḥ || 5 || 

p. 292) 

ekaikaṃ tava devi ! bījamanaghaṃ savyañjanāvyañjanaṃ kūṭasthaṃ 
yadi vā pṛthakkramagataṃ yadvā sthitaṃ vyutkramāt | yaṃ yaṃ 
kāmamapekṣya yena vidhinā kenāpi vā cintitaṃ japtaṃ vā 
saphalīkaroti satataṃ taṃ taṃ samastaṃ nṛṇām || 6 || 

vāme pustakadhāriṇīmabhayadāṃ sākṣasrajaṃ dakṣiṇe bhaktebhyo 
varadānapeśalakarāṃ karpūrakundojvalām | 
ujjṛmbhāmbujapatrakāntanayanasnigdhaprabhālokinīṃ ye tvāmamba ! 
na śīlayanti manasā teṣāṃ kavitvaṃ kutaḥ || 7 || 

ye tvāṃ pāṇḍurapuṇḍarīkapaṭalaspaṣṭābhirāmaprabhāṃ 
siñcantīmamṛtadravairiva śiro dhyāyanti mūrdhni sthitām | 
aśrāntā vikaṭasphuṭākṣarapadā niryāti vaktrāmbujāt teṣāṃ 
bhārati ! bhāratī surasaritkallolalolormivat || 8 || 

ye sindūraparāgapiñjapihitāṃ tvattejasā''dyāmimāṃ urvī cāpi 
vilīnayāvakarasaprastāramagnāmiva | paśyanti 
kṣaṇamapyananyamanasasteṣāmanaṅgajvara-klāntasrastakuraṅgaśābak 
adṛśo vaśyā bhavanti sphuṭam || 9 || 

cañcatkāñcanakuṇḍalāṅgadadharāmābaddhakāñcīsrajaṃ ye tvāṃ 
cetasi tadgate kṣaṇamapi dhyāyanti kṛtvā sthirām | teṣāṃ 
veśmasu vibhramādaharahaḥ sphārībhavantyaściraṃ 
mādyatkuñjarakarṇatālataralāḥ sthairyaṃ bhajante śriyaḥ || 10 
|| 

ārbhaṭyā śaśikhaṇḍamaṇḍitajaṭājūṭāṃ nṛmuṇḍasrajaṃ 
bandhūkaprasavāruṇāmbaradharāṃ pretāsanādhyāsinīm | tvāṃ 
dhyāyanti caturbhujāṃ trinayanāmāpīnatuṅgastanīṃ madhye 
nimnavalitrayāṅkitatanuṃ tvadrūpasaṃvittaye || 11 || 

p. 293) 

jāto'pyalpaparicchade kṣitibhujāṃ sāmānyamātre kule 
niśśeṣāvanicakravartipadavīṃ labdhvā pratāponnataḥ | 
yadvidyādharabṛndavanditapadaśśrīvatsarājo'bhavat devi ! 
tvaccaraṇāmbujapraṇatijaḥ so'yaṃ prasādodayaḥ || 12 || 

caṇḍi ! tvaccaraṇāmbujārcanakṛte bilvādilolluṇṭhana- 
truṭyatkaṇṭakakoṭibhiḥ paricayaḥ yeṣāṃ na jagmuḥ karāḥ | te 
daṇḍāṅkuśacakracāpakuliśaśrīvatsamatsyāṅkitaiḥ jāyante 
pṛthivībhujaḥ kathamivāmbhojaprabhaiḥ pāṇibhiḥ || 13 || 

viprāḥ kṣoṇibhujo viśastaditare kṣīrājyamadhvāsavaiḥ tvāṃ 
devi ! tripure ! parāparamayīṃ santarpya pūjāvidhau | yāṃ yāṃ 
prārthayate manaḥsthiradhiyāṃ teṣāṃ ta eva dhruvaṃ tāṃ tāṃ 
siddhimavāpnuvanti tarasā vighnairavighnīkṛtāḥ || 14 || 

śabdānāṃ jananī tvamatra bhuvane vāgvādinītyucyase tvattaḥ 
keśavavāsavaprabhṛtayo'pyāvirbhavanti sphuṭam | līyante khalu 
yatra kalpavirame brahmādayaste'pyamī sa tvaṃ 
kācidacintyarūpamahimā śaktiḥ parā gīyase || 15 || 

devānāṃ tritayaṃ trayī hutabhujāṃ śaktitrayaṃ triḥ svarāḥ 
trailokyaṃ tripadī tripuṣkaramatho tribrahma varṇāstrayaḥ | 
yatktiñcijjagati tridhā niyamitaṃ vastu trivargādikaṃ tatsarvaṃ 
tripureti nāma bhagavatyanveti te tattvataḥ || 16 || 

lakṣmīṃ rājakule jayāṃ raṇabhuvi kṣemaṅkarīmadhvani 
kravyādadvipasarpabhāji śabarīṃ kāntāradurge girau | 
bhūtapretapiśācajambukabhaye smṛtvā mahābhairavīṃ vyāmohe 
tripurāṃ taranti vipadastārāṃ ca toyaplave || 17 || 

p. 294) 

māyā kuṇḍalinī kriyā madhumatī kālī kalāmālinī mātaṅgī 
vijayā jayā bhagavatī devī śivā śāmbhavī | 
śaktiśśaṅkaravallabhā trinayanā vāgvādinī bhairavī 
hrīṃkārī tripurā parāparamayī mātā kumārītyasi || 18 || 

ā-īpallavitaiḥ parasparayutairdvitrikramādyakṣarai kādyaiḥ 
kṣāntagataissvarādibhiratha kṣāntaiśca taissasvaraiḥ | nāmāni 
tripure bhavanti khalu yānyatyantaguhyāni te tebhyo bhairavapatni ! 
viṃśatisahasrebhyaḥ parebhyo namaḥ || 19 || 

boddhavyā nipuṇaṃ budhaisstutiriyaṃ kṛtvā manastadgataṃ 
bhāratyāstripuretyananyamanasā yatrādyavṛtte sphuṭam | 
ekadvitripadakrameṇa kathitastatpādasaṅkhyākṣaraiḥ 
mantroddhāravidhirviśeṣasahitassatsaspradāyānvitaḥ || 20 || 

sāvadyaṃ niravadyamastu yadi vā kiṃ vānayā cintayā nūnaṃ 
stotramidaṃ paṭhiṣyati jano yasyāsti bhaktistvayi | sañcintyāpi 
laghutvamātmani dṛḍhaṃ sañjāyamānaṃ haṭhāt tvadbhakyā 
mukharīkṛtena racitaṃ yasmānmayāpi dhruvam || 21 || 

iti laghustavaḥ prathamaḥ 

(2) carcāstavaḥ 

saundaryavibhramabhuvo bhuvanādhipatya- saṅkalpakalpataravastripure ! 
jayanti | ete kavitvakumudaprakarāvabodha- pūrṇendavastvayi 
jagajjanani ! praṇāmāḥ || 1 || 

p. 295) 

devi ! stutivyatikare kṛtabuddhayaste vācaspatiprabhṛtayo'pi 
jaḍībhavanti | tasmānnisargajaḍimā katamo'hamatra stotraṃ tava 
tripuratāpanapatni ! kartum || 2 || 

mātastathāpi bhavatīṃ bhavatīvratāpa- vicchittaye 
stavamahārṇavakarṇadhāraḥ | stotuṃ bhavāni ! sa 
bhavaccaraṇāravinda- bhaktigrahaḥ kimapi māṃ mukharīkaroti || 3 || 
sūte jaganti bhavatī bhavatī bibharti jāgarti tatkṣayakṛte 
bhavatī bhavāni ! | mohaṃ bhinatti bhavatī bhavatī ruṇaddhi 
līlāyitaṃ jayati citramidaṃ bhavatyāḥ || 4 || 

yasminmanāgapi navāmbujapatragaurīṃ gaurīṃ prasādamadhurāṃ 
dṛśamādadhāsi | tasminnirantaramanaṅgaśarāvakīrṇa- 
sīmantinīnayanasantatayaḥ patanti || 5 || 

pṛthvībhujo'pyudayanaprabhavasya tasya 
vidyādharapraṇaticumbitapādapīṭhaḥ | 
taccakravartipadavīpraṇayassa eṣaḥ tvatpādapaṅkajarajaḥkaṇajaḥ 
prasādaḥ || 6 || 

tvatpādapaṅkajarajapraṇipātapūrvaiḥ puṇyairanalpamatibhiḥ 
kṛtibhiḥ kavīndraiḥ | kṣīrakṣapākaradukūlahimāvadātā 
kairapyavāpi bhuvanatritaye'pi kīrtiḥ || 7 || 

p. 296) 

kalpadrumaprasavakalpitacitrapūjāṃ uddīpitapriyatamāmadaraktagītim 
| nityaṃ bhavāni ! bhavatīmupavīṇayanti vidyādharāḥ 
kanakaśailaguhāgṛheṣu || 8 || 

lakṣmīvaśīkaraṇakarmaṇi kāminīnāṃ akarṣaṇavyatikareṣu ca 
siddhamantraḥ | nīrandhramohatimiracchidurapradīpo devi ! 
tvadaṅghrijanito jayati prasādaḥ || 9 || 

devi ! tvadaṅghrinakharatnabhuvo mayūkhāḥ pratyagramauktikaruco 
mudamudvahanti | sevānativyatikare surasundarīṇāṃ 
sīmantasīmnikusumastabakāyitaṃ yaiḥ || 10 || 

mūrdhni sphurattuhinadīdhitidīptidīptaṃ 
madhyelalāṭamamarāyudharaśmicitram | hṛccakracumbi 
hutabhukkaṇikānukāri jyotiryadetadidamamba ! tava svarūpam || 11 || 

rūpaṃ tava sphuritacandramarīcigauraṃ ālokate śirasi 
vāgadhidaivataṃ yaḥ | nissīmasūktiracanāmṛtanirjharasya tasya 
prasādamadhurāḥ prasaranti vācaḥ || 12 || 

sindūrapāṃsupaṭalacchuritāmiva dyāṃ tvattejasā 
jaturasasnapitāmivorvīm | yaḥ paśyati kṣaṇamapi tripure vihāya 
vrīḍāṃ mṛḍāni ! sudṛśastamanudravanti || 13 || 

p. 297) 

mātarmuhūrtamapi yaḥ smarati svarūpaṃ 
lākṣārasaprasaratantunibhaṃ bhavatyāḥ | 
dhyāyantyananyamanasastamanaṅgataptāḥ pradyumnasīmni 
subhagatvaguṇaṃ taruṇyaḥ || 14 || yo'yaṃ cakāsti 
gaganārṇavaratnaminduḥ yo'yaṃ surāsuraguruḥ puruṣaḥ purāṇaḥ 
| yadbhāgamardhamidamandhakasūdanasya devi ! tvameva taditi 
pratipādayanti || 15 || 

icchānurūpamanurūpaguṇaprakarṣa- saṅkarṣiṇi ! tvamabhimṛśya 
yadā bibharṣi | jāyeta sa tribhavanaikagurustadānīṃ 
devaśśivo'pi bhuvanatrayasūtradhāraḥ || 16 || 

dhyātāsi hemavati ! yena himāṃśuraśmi- 
mālāmaladyutirakalmaṣamānasena | 
tasyāvilambamanavadyamanantakalpaṃ alpairdinaissṛjasi sundari ! 
vāgvilāsam || 17 || 

ādhāramārutanirodhavaśena yeṣāṃ 
sindūrarañjitasarojaguṇānukāri | dīptaṃ hṛdi sphurati devi 
vapustvadīyaṃ dhyāyanti tāniha samīhitasiddhisārthāḥ || 18 || 

ye cintayantyaruṇamaṇḍalamadhyavarti rūpaṃ tāvāmba ! 
navayāvakapaṅkapiṅgam | teṣāṃ sadaiva kusumāyudhabāṇabhinna- 
vakṣaḥsthalā mṛgadṛśo vaśagā bhavanti || 19 || 

p. 298) 

tvāmaindavīmiva kalāmanuphāladeśaṃ 
udbhāsitāmbaratalāmavalokayantaḥ | sadyo bhavāni ! sudhiyaḥ kavayo 
bhavanti tvaṃ bhāvanāhitadhiyāṃ kulakāmadhenuḥ || 20 || 

śarvāṇi ! sarvajanavanditapādapadme ! 
padmacchadadyutiviḍambitanetralakṣmi ! 
niṣpāpamūrtijanamānasarājahaṃsi ! haṃsi tvamāpadamanekavidhāṃ 
janasya || 21 || 

uttaptahemarucire ! tripure ! punīhi cetaścirantanamaghaughavanaṃ 
lunīhi | kārāgṛhe nigalabandhanayantritasya tvatsaṃsmṛtau jhaḍiti 
me nigalāstruṭanti || 22 || 

tvāṃ vyāpinīti sumanā iti kuṇḍalīti tvāṃ kāminīti kamaleti 
kalāvatīti | tvāṃ mālinīti lalitetyaparājiteti devi ! stuvanti 
vijayeti jayetyumeti || 23 || 

uddāmakāmaparamārthasarojakhaṇḍa- 
caṇḍadyutidyutimapāsitaṣaḍvikārām | 
mohadvipendrakadanodyatabodhasiṃha- līlāguhāṃ bhagavatīṃ 
tripurāṃ namāmi || 24 || 

gaṇeśavaṭukastutā ratisahāyakāmānvitā smarārivaraviṣṭarā 
kusumabāṇabāṇairyutā | anaṅgakusumādibhiḥ parivṛtā ca 
siddhaistribhiḥ kadambavanamadhyagā tripurasundarī pātuḥ naḥ || 25 
|| 

p. 299) 

rudrāṇi ! vidrumamayīṃ pratimāmiva tvāṃ ye 
cintayantyaruṇakāntimananyarūpām | tānetya pakṣmaladṛśaḥ 
prasabhaṃ bhajante kaṇṭhāvasaktamṛdubāhulatāṃstaruṇyaḥ || 26 
|| 

tvadrūpaikanirūpaṇapraṇayitābandho dṛśostvadguṇa- 
grāmākarṇanarāgitā śravaṇayostvatsaṃsmṛtiścetasi | 
tvatpādārcanacāturī karayuge tvatkīrtitaṃ vāci me kutrāpi 
tvadupāsanavyasanitā me devi mā śāmyatu || 27 || 

tvadrūpamullasitadāḍimapuṣparaktaṃ 
udbhāvayenmadanadaivatamakṣaraṃ yaḥ | taṃ rūpahīnamapi 
manmathanirviśeṣaṃ ālokayantyurunitambataṭāstaruṇyaḥ || 28 || 

brahmendrarudraharicandrasahasraraśmi- 
skandadvipānanahutāśanavanditāyai | vāgīśvari ! tribhuvaneśvari 
! viśvamātaḥ ! antarbahiśca kṛtasaṃsthitaye namaste || 29 || 

yaḥ stotrametadanuvāsaramīśvarāyāḥ śreyaskaraṃ paṭhati vā 
yadi vā śṛṇoti | tasyepsitaṃ phalati rājabhirīḍyate'sau jāyeta 
sa priyatamo madirekṣaṇānām || 30 || 

iti carcāstavaḥ dvitīyaḥ 

(3) ghaṭastavaḥ 

ānandamantharapurandaramuktamālyaṃ maulau haṭhena nihitaṃ 
mahiṣāsurasya | pādāmbujaṃ bhavatu me vijayāya 
mañju-mañjīraśiñjitamanoharamambikāyāḥ || 1 || 

devi ! tryambakapatni ! pārvati ! sati ! trailokyamātaśśive ! 
śarvāṇi ! tripure ! mṛḍāni ! varade ! rudrāṇi ! kātyāyani | 
bhīme ! bhairavi ! caṇḍi ! śarvarikale ! kālakṣaye ! śūlini ! 
tvatpādapraṇayānananyamanasaḥ paryākulānpāhi naḥ || 2 || 

devi ! tvāṃ sakṛdeva yaḥ praṇamati kṣoṇībhṛtastaṃ nama- 
ntyājanmasphuradaṅghripīṭhaviluṭhatkoṭīrakoṭicchaṭāḥ 
yastvāmarcati so'rcyate suragaṇairyasstauti sa stūyate yastvāṃ 
dhyāyati taṃ smarārtividhurā dhyāyanti vāmabhruvaḥ || 3 || 

unmattā iva sagrahā iva viṣavyāsaktamūrchā iva 
prāptaprauḍhamadā ivārtivirahagrastā ivārtā iva | ye dhyāyanti 
hi śailarājatanayāṃ dhanyāsta evāgrataḥ 
tyaktopādhivivṛddharāgamanaso dhyāyanti tān subhruvaḥ || 4 || 

dhyāyanti ye kṣaṇamapi tripure ! hṛdi vāṃ 
lāvaṇyayauvanadhanairapi viprayuktāḥ | te visphuranti 
lalitāyatalocanānāṃ cittaikabhittilikhitapratimāḥ pumāṃsaḥ || 5 
|| 

etaṃ kiṃ nu dṛśā pibāmyuta viśāmyasyāṅgamaṅgairnijaiḥ kiṃ 
vā'muṃ nigarāmyanena sahasā kiṃ vaikatāmāśraye | yasyetthaṃ 
vivaśo vikalpalalitākūtena yoṣijjanaḥ kiṃ tadyanna karoti devi ! 
hṛdaye yasya tvamāvartase || 6 || 

p. 301) 

viśvavyāpini yadvadīśvara iti sthāṇāvananyāśrayaḥ 
śabdaśaktiriti trilokajanani ! tvayyeva tathyasthitiḥ | itthaṃ 
satyapi śaknuvanti yadimāḥ kṣudrā rujo bādhituṃ tvadbhaktānapi 
na kṣiṇoṣi ca ruṣā taddevi ! citraṃ mahat || 7 || 

indormadhyagatāṃ mṛgāṅkasadṛśacchāyāṃ manohāriṇīṃ 
pāṇḍūtphullasaroruhāsanagatāṃ snigdhapradīpacchavim | 
varṣantīmamṛtaṃ bhavāni ! bhavatīṃ dhyāyanti ye dehinaḥ te 
nirmuktarujo bhavanti ripavaḥ projjhanti tān dūrataḥ || 8 || 

pūrṇendośśakalairivātibahalaiḥ pīyūṣapūrairiva 
kṣīrābdherlaharībharairiva sudhāpaṅkasya piṇḍairiva | 
prāleyairiva nirmitaṃ tava vapurdhyāyanti ye śraddhayā 
cittāntarnihitārtitāpavipadaste sampadaṃ bibhrati || 9 || 

ye saṃsmaranti taralāṃ sahasollasantīṃ tvāṃ 
granthipañcakabhidaṃ taruṇārkaśoṇām | rāgārṇave bahalarāgiṇi 
majjayantīṃ kṛtsnaṃ jagaddadhati cetasi tān mṛgākṣyaḥ || 10 || 

lākṣārasasnapitapaṅkajatantutanvīṃ antaḥ smaratyanudinaṃ 
bhavatīṃ bhavāni ! yastaṃ smarapratimamapratimasvarūpāḥ 
netrotpalairmṛgadṛśo bhṛśamarcayanti || 11 || 

stumastvāṃ vācamavyaktāṃ himakundendurociṣam | kadambamālāṃ 
bibhrāṇāmāpādatalalambinīm || 12 || 

mūrdhnīndossitapaṅkajāsanagatāṃ prāleyapāṇḍutviṣaṃ 
varṣantīmamṛtaṃ saroruhabhuvo vaktre'pi randhre'pi ca | 

p. 302) 

acchinnā ca manoharā ca lalitā cātiprasannāpi ca tvāmevaṃ 
smaratassmarāridayite vāksarvato valgati || 13 || 

dadātīṣṭān bhogān kṣapayati ripūn hanti vipado dahatyādhīn 
vyādhīn śamayati sukhāni pratanute | haṭhādantarduḥkhaṃ dalayati 
pinaṣṭīṣṭavirahaṃ sakṛddhyātā devī kimiva niravadyaṃ na 
kurute || 14 || 

yastvāṃ dhyāyati vetti vindati japatyālokate cintaya- tyanveti 
pratipadyate kalayati stautyāśrayatyarcati | yaśca tryambakavallabhe 
! tava guṇānākarṇayatyādarāt tasya śrīrna gṛhādapaiti 
vijayastasyāgrato dhāvati || 15 || 

kiṃkiṃ duḥkhaṃ danujadalini ! kṣīyate na smṛtāyāṃ kā kā 
kīrtiḥ kulakamalini ! khyāpyate na stutāyām | kā kā 
siddhissuravaranute ! prāpyate nārcitāyāṃ kaṃ kaṃ yogaṃ tvayi na 
cinute cittamālambitāyām || 16 || 

ye devi ! durdharakṛtāntamukhāntarasthāḥ ye kāli ! 
kālaghanapāśanitāntabaddhāḥ | ye caṇḍi ! 
caṇḍagurukalmaṣasindhumagnāḥ tān pāsi mocayasi tārayasi 
smṛtaiva || 17 || 

lakṣmīvaśīkaraṇacūrṇasahodarāṇi tvatpādapaṅkajarajāṃsi 
ciraṃ jayanti | yāni praṇāmamilitāni nṛṇāṃ lalāṭe lumpanti 
daivalikhitāni durakṣarāṇi || 18 || 

re mūḍhāḥ ! kimayaṃ vṛthaiva tapasā kāyaḥ parikliśyate 
yajñairvā bahudakṣiṇaiḥ kimitare riktīkriyante gṛhāḥ | 

p. 303) 

bhaktiścedavināśinī bhagavatīpādadvayī sevyatāṃ 
unnidrāmburuhātapatrasubhagā lakṣmīḥ puro dhāvati || 19 || 

yāce na kañcana na kañcana vañcayāmi seve na kañcana 
nirastasamastadainyaḥ | ślakṣṇaṃ vase madhuramadmi bhaje 
varastrīḥ devī hṛdi sphurati me kulakāmadhenuḥ || 20 || 

namāmi yāminīnāthalekhālaṅkṛtakuntalām | bhavānīṃ 
bhavasantāpanirvāpaṇasudhānadīm || 21 || 

iti ghaṭastavaḥ tṛtīyaḥ 

(4) ambāstavaḥ 

yāmāmananti munayaḥ prakṛtiṃ purāṇīṃ vidyeti yāṃ 
śrutirahasyavido vadanti | tāmardhapallavitaśaṅkararūpamudrāṃ 
devīmananyaśaraṇaśśaraṇaṃ prapadye || 1 || 

amba staveṣu tava tāvadakartṛkāṇi kuṇṭhībhavanti vacasāmapi 
gumbhanāni | ḍimbhasya me stutirasāvasamañjasāpi 
vātsalyanighnahṛdayāṃ bhavatīṃ dhinotu || 2 || 

vyometi binduriti nāda itīndulekhā- rūpeti vāgbhavatanūriti 
mātṛketi nissyandamānasukhabodha sudhāsvarūpā vidyotase manasi 
bhāgyavatāṃ janānām || 3 || 

p. 304) 

āvirbhavatpulakasantatibhiśśarīraiḥ 
nissyandamānasalilairnayanaiśca nityam | vāgbhiśca 
gadgadapadābhirupāsate ye pādau tavāmba ! bhuvaneṣu ta eva 
dhanyāḥ || 4 || 

vaktraṃ yadudyatamabhiṣṭutaye bhavatyāḥ tubhyaṃ namo yadapi devi ! 
śiraḥ karoti | cetaśca yattvayi parāyaṇamamba ! tāni kasyāpi 
kairapi bhavanti tapoviśeṣaiḥ || 5 || 

mūlālavālakuharāduditā bhavāni ! nirbhidya ṣaṭsarasijāni 
taṭillateva | bhūyo'pi tatra viśasi dhruvamaṇḍalendu- 
nissyandamānaparamāmṛtatoyarūpā || 6 || 

dagdhaṃ yadā madanamekamanekadhā te mugdhaḥ 
kaṭākṣavidhiraṅkurayāñcakāra | dhatte tadāprabhṛti devi 
lalāṭanetraṃ satyaṃ hriyaiva mukulīkṛtamindumauleḥ || 7 || 

ajñātasambhavamanākalitānvavāyaṃ bhikṣuṃ 
kapālinamavāsasamadvitīyam | pūrvaṃ karagrahaṇamaṅgalato 
bhavatyāḥ śambhuṃ ka eva bubudhe girirājakanye || 8 || 

carmāmbaraṃ ca śavabhasmavilepanaṃ ca bhikṣāṭanaṃ ca naṭanaṃ 
ca paretabhūmau | vetālasaṃhatiparigrahatā ca śambhoḥ śobhāṃ 
bibharti girije ! tava sāhacaryāt || 9 || 

p. 305) 

kalpopasaṃharaṇakelipu paṇḍitāni caṇḍāni khaṇḍaparaśorapi 
tāṇḍavāni | ālokanena tava komalitāni mātaḥ ! lāsyātmanā 
pariṇamanti jagadvibhūtyai || 10 || 

jantorapaścimatanossati karmasāmye niśśeṣapāśapaṭalacchidurā 
nimeṣāt kalyāṇi ! deśikakaṭākṣasamāśrayeṇa kāruṇyato 
bhavati śambhavavedhadīkṣā || 11 || 

muktāvibhūṣaṇavatī navavidrumābhā yaccetasi sphurasi tārakiteva 
sandhyā | ekasya eva bhuvanatrayasundarīṇāṃ kandarpatāṃ vrajati 
pañcaśarīṃ vināpi || 12 || 

ye bhāvayantyamṛtavāhibhiraṃśujālaiḥ 
āpyāyamānabhuvanāmamṛteśvarīṃ tvām | te laṅghayanti nanu 
mātaralaṅghanīyāṃ brahmādibhissuravarairapi kālakakṣām || 13 || 

yassphāṭikākṣaguṇapustakakuṇḍikāḍhyāṃ 
vyākhyāsamudyatakarāṃ śaradinduśubhrām | padmāsanāṃ ca hṛdaye 
bhavatīmupāste mātaḥ ! sa viśvakavitārkikacakravatī || 14 || 

barhāvataṃsayutabarbarakeśapāśāṃ 
guñjāvalīkṛtaghanastanahāraśobhām | śyāmāṃ pravālavadanāṃ 
sukumārahastāṃ tvāmeva naumi śabarīṃ śabarasya jāyām || 15 || 

p. 306) 

ardhena kiṃ navalatālalitena mugdhe krītaṃ vibhoḥ 
paruṣamardhamidaṃ tvayeti | ālījanasya parihāsavacāṃsi manye 
mandasmitena tava devi ! jaḍībhavanti || 16 || 

brahmāṇḍabudbudakadambakasaṅkulo'yaṃ 
māyodadhirvividhatattvataraṅgamālāḥ āścaryamamba ! jhaḍiti 
pralayaṃ prayāti tvadhdyānasantatimahābaḍabāmukhāgnau || 17 || 

dākṣāyaṇīti kuṭileti kuhāriṇīti kātyāyanīti kamaleti 
kalāvatīti | ekā satī bhagavatī paramārthato'pi saṃdṛśyase 
bahuvidhā nanu nartakīva || 18 || 

ānandalakṣaṇamanāhatanāmni deśe nādātmanā pariṇataṃ tava 
rūpamīśe | pratyaṅmukhena manasā paricīyamānaṃ śaṃsanti 
netrasalilaiḥ pulakaiśca dhanyāḥ || 19 || 

tvaṃ candrikā śaśini tigmarucau rucisttaṃ tvaṃ cetanāsi puruṣe 
pavane balaṃ tvam | tvaṃ svādutāsi salile śikhini tvamūṣmā 
nissārameva nikhilaṃ tvadṛte yadi syāt || 20 || 

jyotīṃṣi yaddivi caranti yadantarikṣaṃ sūte payāṃsi 
yadahirdharaṇīṃ ca dhatte | yadvāti vāyuranalo yadudarcirāste 
tatsarvamamba ! tava kevalamājñayaiva || 21 || 

p. 307) 

saṅkocamicchasi yadā girije ! tadānīṃ vāktarkayostvamasi 
bhūmiranāmarūpā | yadvā vikāsamupayāsi yadā tadānīṃ 
tvannāmarūpagaṇanāssukarā bhavanti || 22 || 

bhogāya devi ! bhavatīṃ kṛtinaḥ praṇamya 
bhrūkiṅkarīkṛtasarojagṛhāssahasram | 
cintāmaṇipracayakalpitakeliśaile kapadrumopavana eva ciraṃ ramante 
|| 23 || 

hartuṃ tvameva bhavasi tvadadhīnamīśe saṃsāratāpamakhilaṃ 
dayayā paśūnām | vaikartanī kiraṇasaṃhatireva śaktā dharmaṃ 
nijaṃ śamayituṃ nijayaiva vṛṣṭyā || 24 || 

śaktiśśarīramadhidaivatamantarātmā jñānaṃ kriyā 
karaṇamānasajālamicchā | aiśvaryamāyatanamāvaraṇāni ca tvaṃ 
kiṃ tanna yadbhavasi devi śaśāṅkamauleḥ || 25 || 

bhūmau nivṛttiruditā payasi pratiṣṭhā vidyā'nale maruti 
śāntiratīva kāntiḥ | vyomnīti yāḥ kila kalāḥ kalayanti 
viśvaṃ tāsāṃ hi dūrataramamba ! padaṃ tvadīyam || 26 || 

yāvatpadaṃ padasarojayugaṃ tvadīyaṃ nāṅgīkaroti hṛdayeṣu 
jagaccharaṇye ! tāvadvikalpajaṭilāḥ kuṭilaprakārāḥ 
tarkagrahāssamayināṃ pralayaṃ na yānti || 27 || 

p. 308) 

nirdevayānapitṛyānavihārameke kṛtvā manaḥ 
karaṇamaṇḍalasārvabhaumam | dhyāne niveśya tava 
kāraṇapañcakasya parvāṇi pārvati ! nayanti nijāsanatvam || 28 || 

sthūlāsu mūrtiṣu mahīpramukhāsu mūrteḥ kasyāścanāpi tava 
vaibhavamamba ! yasyāḥ | patyā girāmapi na śakyata eva vaktuṃ 
sāpi stutā kila mayeti titikṣitavyam || 29 || 

kālāgnikoṭirucimamba ṣaḍadhvaśuddhau āplāvaneṣu 
bhavatīmamṛtaughavṛṣṭim | śyāmāṃ ghanastanataṭāṃ 
śakalīkṛtāghāṃ dhyāyanta eva jagatāṃ guravo bhavanti || 30 || 

vidyāṃ parāṃ katicidambaramamba ! kecit ānandameva katicitkaticicca 
māyām | tvāṃ viśvamāhurapare vayamāmanāmaḥ 
sākṣādapārakaruṇāṃ gurumūrtimeva || 31 || 

kuvalayadalanīlaṃ barbarasnigdhakeśaṃ 
pṛthutarakucabhārākrāntakāntāvalagnam | kimiha 
bahubhiruktaistvatsvarūpaṃ paraṃ naḥ sakalajanani ! mātaḥ ! 
santataṃ sannidhattām || 32 || 

ityambāstavaḥ caturthaḥ 

(5) salakajananīstotram 

ajānanto yānto kṣayamavaśamanyonyakalahaiḥ amī māyāgranthau tava 
pariluṭhantassamayinaḥ | jaganmātaḥ ! janmajvarabhayatamaḥkaumudi ! 
vayaṃ namaste kurvāṇāśśaraṇamupayāmo bhagavatīm || 1 || 

vacastarkāgamyasvarasaparamānandavibhava- prabodhākārāya 
dyutitulitanīlotpalaruce | śivādyārādhyāya stanabharavinamrāya 
satataṃ namastasmai kasmaicana bhavatu mugdhāya mahase || 2 || 

anādyantābhedapraṇayarasikāpi praṇayinī śivasyāsīryattvaṃ 
pariṇayavidhau devi ! gṛhiṇī | savitrī bhūtānāmapi 
yadudabhūśśailatanayā tadetatsaṃsārapraṇayanamahānāṭakamukham 
|| 3 || 

bruvantyeke tattvaṃ bhagavati sadanye vidurasat pare mātaḥ ! 
prāhustava sadasadanye sukavayaḥ | pare naitatsarvaṃ samabhidadhate 
devi ! sudhiyaḥ tadetattvanmāyāvilasitamaśeṣaṃ nanu śive || 4 || 

luṭhadguñjāhārastanabharanamanmadhyalatikāṃ 
udañcadgharmāmbhaḥkaṇaguṇitavaktrāmbujarucam 
[nīlotpalarucim-pā.] | śivaṃ 
pārthatrāṇapravaṇamṛgayākāraguṇitaṃ śivāmanvagyāntīṃ 
śaraṇamahamanvemi śabarīm || 5 || 

mithaḥkeśākeśiprathananidhanāstarkaghaṭanāḥ 
bahuśraddhābhaktipraṇativiṣayāśśāstravidhayaḥ | 

p. 310) 

prasīda pratyakṣībhava girusute ! dehi śaraṇaṃ nirālambaṃ cetaḥ 
pariluṭhati pāriplavamidam || 6 || 

śunāṃ vā vahnervā khagapariṣado vā yadaśanaṃ kadā kena kveti 
kvacidapi na kaścitkalayati | amuṣmin viśvāsaṃ vijahihi mamāhnāya 
vapuṣi prapadyethāścetaḥ ! sakalajananīmeva śaraṇam || 7 || 

taṭitkoṭijyotirdyutidalitaṣaḍgranthigahanaṃ praviṣṭaṃ 
svādhāraṃ punarapi sudhāvṛṣṭivapuṣā | 
kimapyaṣṭāviṃśatkiraṇasakalībhūtamaniśaṃ bhaje dhāma 
śyāmaṃ kucabharanataṃ barbarakacam || 8 || 

catuṣpatrāntaṣṣaḍdalapuṭabhagāntasstrivalaya-sphuradvidyudvahnidy 
umaṇiniyutābhadyutilate | ṣaḍaśraṃ bhittvā''dau daśadalamatha 
dvādaśadalaṃ kalāśraṃ ca dvyaśraṃ gatavati namaste girisute || 9 
|| 

kulaṃ kecitprāhurvapurakulamanye tava budhāḥ pare tatsaṃbhedaṃ 
samabhidadhate kaulamapare | caturṇāmapyeṣāmupari kimapi 
prāhurapare mahāmāye ! tattvaṃ tava kathamamī niścinumahe || 10 || 

ṣaḍadhvāraṇyānīṃ pralayaravikoṭipratirucā rucā bhasmīkṛtya 
svapadakamalaprahvaśirasām | vitanvānaśśaivaṃ kimapi 
vapurindīvararuciḥ kucābhyāmānamrastava puruṣakāro vijayate || 11 
|| 

prakāśānandābhyāmaviditacarīṃ madhyapadavīṃ 
praviśyaitaddvandvaṃ raviśaśisamākhyaṃ kabalayan | 

p. 311) 

prapadyordhvaṃ nādaṃ layadahanabhasmīkṛtakulaḥ prasādātte 
jantuśśivamakulamamba ! praviśati || 12 || 

manuṣyāstiryañjo maruta iti lokatrayamidaṃ bhavāmbhodhau magnaṃ 
triguṇalaharīkoṭiluṭhitam | kaṭākṣaścedyatra kvacana tava 
mātaḥ karuṇayā śarīrī sadyo'yaṃ vrajati paramānandatanutām || 
13 || 

priyaṅguśyāmāṅgīmaruṇataravāsakisalayāṃ 
samunmīlanmuktāphalavahalanepathyasubhagām | 
stanadvandvasphārastabakanamitāṃ kalpalatikāṃ 
sakṛddhyāyantastvāṃ dadhati śivacintāmaṇipadam || 14 || 

ṣaḍādhārāvartairaparimitamantrormipaṭalaiḥ 
lasanmudrāphenairbahuvidhacaladdaivatajhaṣaiḥ | kramasrotobhistvaṃ 
vahasi paranādāmṛtanadī bhavāni ! pratyagrā 
śivacidamṛtābdhipraṇayinī || 15 || 

mahīpāthovahniśvasanaviyadātmenduravibhiḥ vapurbhirgrastāśairapi 
tava kiyānamba ! mahimā | amūnyālolyante bhagavati ! na 
kutrāpyaṇutamāṃ avasthāṃ prāptāni tvayi tu paramavyomavapuṣi || 
16 || 

kalāmājñāṃ prajñāṃ samayamanubhūtiṃ samarasaṃ guruṃ 
pāramparyaṃ vinayamupadeśaṃ śivapadam | pramāṇaṃ nirvāṇaṃ 
prakṛtimabhibhūtiṃ paraguhāṃ vidhiṃ vidyāmāhussakalajananīmeva 
munayaḥ || 17 || 

pralīne śabdaughe tadanu virate binduvibhave tatastattve 
cāṣṭadhvanibhiranapāyinyadhigate | 

p. 312) 

śrite śākte parvaṇyanukalitacinmātragahanāṃ svasaṃvittiṃ yogī 
rasayati śivākhyāṃ bhagavatīm || 18 || parānandākārāṃ 
niravadhiśivaiśvaryavapuṣaṃ nirākārāṃ 
jñānaprakṛtimaparicchinnakaruṇām | savitrīṃ lokānāṃ 
niratiśayadhāmāspadapadāṃ bhavo vā mokṣo vā bhavatu bhavatīmeva 
bhajatām || 19 || 

jagatkāye kṛtvā tadapi hṛdaye tacca puruṣe pumāṃsaṃ bindusthaṃ 
tadapi viyadākhye ca gahane | tadetadjñānākhye tadapi 
paramānandagahane mahāvyomākāre tvadanubhavaśīlo vijayate || 20 || 

vidhe ! vedye ! vidye ! vividhasamaye ! vedagulike ! vicitre ! 
viśvādye ! vinayasulabhe ! vedajanani ! śivajñe ! śūlasthe ! 
śivapadavadānye ! śivanidhe ! śive ! mātaḥ ! mahyaṃ tvayi vitara 
bhaktiṃ nirupamām || 21 || 

vidhermuṇḍaṃ hṛtvā yadakuruta pātraṃ karatale hariṃ 
śūlaprotaṃ yadagamayadaṃsābharaṇatām | alaṃcakre kaṇṭhaṃ 
yadapi garalenāmba ! giriśaḥ śivasthāyāśśaktestadidamakhilaṃ te 
vilasitam || 22 || 

viriñcyākhyā mātaḥ ! ssṛjasi harisaṃjñā tvamavasi trilokīṃ 
rudrākhyā harasi vidadhāsīśvaradaśām | bhavantī nādākhyā 
viharasi ca pāśaughadalanī tvamevaikā'nekā bhavasi 
kṛtibhedairgirisute || 23 || 

munīnāṃ cetobhiḥ pramuditakaṣāyairapi manāk aśakyaṃ 
saṃspraṣṭuṃ cakitacakitairamba ! satatam | 

p. 313) 

śrutīnāṃ mūrdhānaḥ prakṛtikaṭhināḥ komalatare kathaṃ te 
vindante padakisalaye pārvati ! padam || 24 || 

taṭidvallīṃ nityāmamṛtasaritaṃ pārarahitāṃ malottīrṇāṃ 
jyotsnāṃ prakṛtimaguṇagranthigahanām | girāṃ dūrāṃ 
vidyāmavinatakucāṃ viśvajananīṃ aparyantāṃ lakṣmīmabhidadhati 
santo bhagavatīm || 25 || 

śarīraṃ kṣityambhaḥprabhṛtiracitaṃ kevalamacit sukhaṃ duḥkhaṃ 
cāyaṃ kalayati pumāṃścetana iti | sphuṭaṃ jānāno'pi prabhavati 
na dehī rahayituṃ śarīrāhaṅkāraṃ tava samayabāhyo girisute || 
26 || 

pitā mātā bhrātā suhṛdanucarassadma gṛhiṇī vapuḥ kṣetraṃ 
mitraṃ dhanamapi yadā māṃ vijahati | tadā me bhindānā sapadi 
bhayamohāndhatamasaṃ mahājyotsne ! mātaḥ ! bhava karuṇayā 
sannidhikarī || 27 || 

sutā dakṣasyādau kila sakalamātaḥ ! tvamudabhūḥ sadoṣaṃ taṃ 
hitvā tadanu girirājasya duhitā | anādyantā śambhorapṛthagapi 
śaktirbhagavatī vivāhājjāyā'sītyahaha caritaṃ vetti tava kaḥ 
|| 28 || 

kaṇāstvaddīptīnāṃ raviśaśikṛśānuprabhṛtayaḥ paraṃ brahma 
kṣudraṃ tava niyatamānandakaṇikā | śivādi kṣityantaṃ 
trivalayatanossarvamudare tavāste bhaktasya sphurasi hṛdi citraṃ 
bhagavati || 29 || 

puraḥ paścādantarbahiraparimeyaṃ parimitaṃ paraṃ sthūlaṃ 
sūkṣmaṃ sakalamakalaṃ guhyamaguham | 

p. 314) 

davīyo nedīyassadasaditi viśvaṃ bhagavatī sadā paśyantyākhyāṃ 
vahasi bhuvanakṣobhajananīm || 30 || 

praviśya tvanmārgaṃ sahajadayayā deśikadṛśā 
ṣaḍadhvadhvāntaughacchiduragaṇanātītakaruṇām | 
parāmājñākārāṃ sapadi śivayantīṃ śivatanuṃ svamātmānaṃ 
dhanyāściramupalabhante bhagavatīm || 31 || 

mayūkhāḥ pūṣṇīva jvalana iva taddīptikaṇikāḥ payodhau 
kallolāḥ pratihatamahimnīva pṛṣataḥ | udetyodetyāmba ! tvayi sa 
nijaissāttvikaguṇaiḥ bhajante tattvaughāḥ praśamamanukalpaṃ 
paravaśāḥ || 32 || 

vidurviṣṇubrahmā prakṛtiraṇurātmā dinakaraḥ svabhāvo 
jainendrassugatamunirākāśamalinaḥ | śivaśśaktiśceti 
śrutiviṣayatāṃ tāmupagatā vikalpairebhistvāmabhidadhati santo 
bhagavatīm || 33 || 

śivastvaṃ śaktistvaṃ tvamasi samayā tvaṃ samayinī tvamātmā 
tvaṃ dīkṣā tvamayamaṇimādirguṇagaṇaḥ | avidyā tvaṃ vidyā 
tvamasi nikhilaṃ tvaṃ kimaparaṃ pṛthaktatvaṃ tvatto bhagavati na 
vīkṣāmaha ime || 34 || 

tvayāsau jānīte racayati bhavatyaiva satataṃ tvayaivecchatyamba ! 
tvamasi nikhilā yasya tanavaḥ | jagatsāmyaṃ śambhorvahasi 
paramavyomavapuṣaḥ tathāpyardhaṃ bhūtvā viharasi śivasyeti 
kimidam || 35 || 

asaṅkhyaiḥ prācīnairjanani ! jananaiḥ karmavilayāt 
sakṛjjanmanyante guruvapuṣamāsādya giriśam | 

p. 315) 

avāpyājñāṃ śaivīṃ śivatanumapi tvāṃ viditavān nayeyaṃ 
tvatpūjāstutiviracanenaiva divasān || 36 || 

yat ṣaṭpatraṃ kamalamuditaṃ tasya yā karṇikākhyā yonistasyāḥ 
prathitamudare yattadoṅkārapīṭham | tasyāpyantaḥ kucabharanatāṃ 
kuṇḍalīti prasiddhāṃ śyāmākārāṃ sakalajananīṃ santataṃ 
bhāvayāmi || 37 || 

bhuvi payasi kṛśānau mārute khe śaśāṅke savitari 
yajamāne'pyaṣṭadhā śaktirekā | vahasi kucabharābhyāṃ 
yā'vanamrāpi viśvaṃ sakalajanani ! sā tvaṃ pāhi māmityavācyam 
|| 38 || 

iti pañcastavī ca samāptā sakalajananīstavaḥ pañcamaḥ 

###########   END OF FILE  #######