####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00067
Uniform title: spandakārikā
Main title: spandakārikā
Secondary title: spandakārikāvṛtti
Secondary title: spandakārikā with vṛtti by kallaṭa bhaṭṭa,     tippaṇī and vivṛti by rāmakaṇṭha
Author : kallaṭa bhaṭṭa
Commentator : kallaṭa bhaṭṭa
Commentator : rāmakaṇṭha
Editor : Mark S. G. Dyczkowski
Manuscript : See Description

Description: 
spandakārikā with vṛtti by kallaṭa bhaṭṭa,     tippaṇī (notes at bottom of printed edition) and vivṛti by rāmakaṇṭha.         Corrections have been made by M. Dyczkowski so the E-text corresponds     to the one translated by the same into English     (published by SUNY Press 1992 as the Stanzas on Vibration).   The photographic facsimiles in DjVu and PDF are from the Kashmir Series of Texts and Studies volume 5 .  Print  copyright (c) Mark S.G. Dyczkowski.   Internet publishing copyright (c) Muktabodha Indological Research Institute.


Notes: 
Data-entered by the staff of Muktabodha under the supervision of Mark S. G. Dyczkowski.    

Internet publisher : Muktabodha Indological Research InstituteMuktabodha Indological Research Institute
Publication year : 2007
Publication city : 
Publication country : United States
####################################################
************************************************************************************************
oṃ śrīcidātmavapuṣe śaṃkarāya namaḥ |

atha

spandakārikāḥ |

śrīmatkallaṭācāryaviracitavṛttyupetāḥ |


oṃ namaḥ svaspandātmasaṃvinmūrtaye śaṃbhave |

atha 

spandakārikāḥ |

śrīrāmakaṇṭhācāryaviracitavivṛtyupetāḥ |

prathamo niḥṣyandaḥ |


vivṛti:

daśādikkālādyairakalitacidālokavapuṣaḥ 
		sadā tādṛksvātmānubhavitṛtayā visphurati yaḥ |
	nijo dharmaḥ śambhoranupamacamatkārasarasaḥ
		paraṃ śāktaṃ tattvaṃ jagati jayati spanda iti tat || 

[(footnote 1) digādivṛttayaḥ śaktāvanudbhinnaprasaratayā tanmayā eva 
svālakṣaṇyena bhātumaprabhaviṣṇavaḥ, śaktirapi 
śaktimadaunmukhyena tanmātrāvaśeṣā 
kevalamanubhavitṛrūpavisphuraṇamāśliṣivātmakā ucyante (gh: iti - 
śabdānantaraṃ te iti padamapyasti |) || 27 ||

ṭippaṇī: idamatra tātparyam - 
śivaśaktireva mantrasaṃniveśādirūpadhāriṇī udayāstamayadaśayoḥ 
śivābhedavattvāt, yatra yatra śivābhedavat -tvaṃ tatra tatra 
śāktarūpatvaṃ, yathā saṃkalpasvapnapurādiṣu, - iti vyāptyādinā 
sudṛḍhapratipattermantravīryānabhijñasya bhedavibhra -māt 
niyatasādhyasādhanāya paryavasāyinaḥ prabuddhasya punarmantrāḥ 
sarvārthasādhanādhikāriṇo bhavanti; na kevalaṃ mantrā eva, 
yāvallaukikabhāṣāmātramapi amoghamantrabhāvamupa -gacchati - 
ityanena kriyājñānaṃ kāryaṃ jñeyaṃ vā vastu 
śivadharmakamevetyupalakṣyate || 27 ||

vivṛti: (p. 80) tena prastutavyākhyānena hetunā ete mantrā 
ārādhyadevatāvācakā varṇādisaṃniveśāḥ, śivadharmiṇaḥ 
śivasya parameśvarasyānanyasādhāraṇaḥ sarvajñatvādirguṇo 
dharmaḥ sa vidyate yeṣāṃ te tathā, śivādabhinnasvarūpā ityarthaḥ | 
kena hetunā ? - yataḥ tat samanantarapratipāditasvarūpasya śivasya 
saṃbandhi balaṃ sāmarthyaṃ śaktim ākramya 
uccicārayiṣāvasthāyāṃ tadabhedopapattyā svīkṛtya 
sarvajñabalaśālinaḥ sarvajñasya śivasya balena śaktyā 
ślāghamānā santaḥ adhikārāya pravartante yathāsvaṃ 
pratiniyatakāryasaṃpādanasvasāmarthyaṃ [-svāmyārthyaṃ] prasaranti 
| ete hi anāsāditaparameśvarābhedadaśā 
utpādavināśadharmakavarṇamātrātmakāḥ tṛṇamapi 
kubjayitumaśaktāḥ; uktabalākramaṇena tu niyatetikartavyatāsahāyā 
dīkṣādivṛścikaviṣākarṣaṇāntaparāparasvakāryasaṃpādanādhi-
kārāpratihataśaktayo bhavanti | yadyevaṃ 
sarvamantrāṇāmuktabalākramaṇalakṣaṇavīryasāmyaṃ, tat 
kathameṣāṃ bhinnādhikāritvaṃ, sarve sarvārthasādhanādhikṛtāḥ 
kathaṃ na bhaveyuḥ ? - ityatra 
parameśvaraparikalpitaniyatiniyantritatvameva (p. 82) hetuṃ 
pratipādayitumupamānamāha - kathamete mantrā niyatādhikārāya 
pravartante sādhakānāṃ ? - dehināṃ karaṇānīva yathā hi 
dehādimātrānityavastuvyavasthitātmābhimānānāṃ 
sarvaśarīrabhṛtāṃ karaṇāni indriyāṇi yataḥ karaṇavargo'yam 
ityatra pratipāditayuktyā parameśvarādeva 
cetanatvāpādanahetupravṛttyādilābhasāmye satyapi karaṇāni 
tatparikalpitaniyatiśaktibalāt 
śabdādiviṣayaprakāśanamātraparyavasitasāmarthyāni yathāsvaṃ 
pṛthakpṛthagadhikārāya pravartante na sarvāṇi sarvasmai?; tathaivaite 
mantrāḥ sādhakānāṃ svīkṛtaparasvabhāvāhaṃbhāvapratipattīnāṃ 
yathāniyamitādhikārāya pravartante, tasmāt karaṇavat 
sarvajñabalaśālino'pi mantrā niyatādhikārā eva | tataśca 
śivadharmiṇo mantrā yatkṛtādhikārāḥ santo nirañjanā añjanāt 
vācyoparāgarūpāt malāt varṇādirūpabhāvanātmakādvā 
niṣkrāntāḥ; ata eva śāntarūpāḥ śāntaṃ śuddhaṃ 
saṃvinmātrāvaśeṣatvāt (p. 83) nirvikāraṃ rūpamātmā yeṣāṃ te 
tādṛśāḥ santaḥ tatraiva śive paramakāraṇe svasvabhāve 
saṃpralīyante tadaikyamupagacchanti | kena sākam ? ārādhakacittena 
saha sādhakamanasā sākaṃ | tasyāṃ hi 
daśāyāmabhisaṃdhyupādhivirahāt svābhāvikamātrāvaśeṣaṃ yat 
sādhakacittaṃ tena sākam | kimanena tāttvikamantravīryaṃ 
pratipāditaṃ bhavati ? tadidaṃ bhavati - mantracetasoḥ 
udayāstamayadaśayoḥ paramakāraṇāt śivādabhedaḥ, - iti 
mantrātmakatayā sādhakacittātmakatayā ca śivaśaktireva 
varṇasaṃkalpādirūpadhāriṇī uditā satī, saṃprati 
anāsāditasvasvabhāvabalasparśapratipattīnāṃ sādhakānāṃ 
bhedavibhramamutpādayantī niyatārthasādhanādhikārāya paryavasyati | 
yastu yathāpratipādite svasvabhāve eva sudṛḍhātmapratipattiḥ, tasya 
udayāstamayajñasya sarvamantrāḥ (p. 84) sarvārthasādhanādhikāriṇo 
bhavanti tattaditikartavyatāsāhityaniyamādyapekṣāṃ vinā; āsatāṃ 
vā mantrāḥ, yadyadvacanaṃ yena yenābhisaṃdhinā uccārayati tat 
tasyāmoghamantratāmāpadyate, - iti svabhāvabalākramaṇenaiva 
[svabhāvabalākramaṇameva siddhaṃ svato mantrāṇāṃ vīryaṃ 
pratyavamraṣṭavyaṃ yoginā, - iti tātparyārthaḥ | upalakṣaṇārthaṃ 
mantavyaṃ caitat | uktopapattyā na kevalaṃ mantrā eva śivadharmiṇo, 
yāvanna kācitkriyā jñānaṃ kāryaṃ jñeyaṃ vā vastu saṃbhavati, 
yat paratattvābhedāpattilabdhātmakaṃ sat śivātmakameva na bhavati, - 
iti samanantarameva vakṣyati | vyākhyātam etat vṛttau 

	yadbalaṃ nirāvaraṇacidrūpam

ityādinā || 11 ||

iti rājānakaśrīrāmaviracitāyāṃ spandavivṛtau 
vyatiriktasvabhāvopalabdhirnāma dvitīyo niḥṣyandaḥ || 2 ||


atha

viśvasvabhāvaśaktyupapattirnāma

tṛtīyo niḥṣyandaḥ ||

	idānīṃ pakṣāntaropanyāsabhaṅgyā 
prakaraṇārambhaślokāparārdhapratijñātaṃ svasvabhāvasyaiva 
śivasya viśvavyaktimayaśakticakravibhavanaśīlatvamavasaraprāptam 
upapattyupalabdhibhyāṃ nirvāhayituṃ ślokatrayamāha


yasmātsarvamayo jīvaḥ sarvabhāvasamudbhavāt |
tatsaṃvedanarūpeṇa tādātmyapratipattitaḥ || 3/1 (28) ||

vṛti: sarvātmaka evāyamātmā sarvabhāvotpattidvāreṇa 
[sarvānubhāvo-] (ayamiti padaṃ; gh: pustakādupanyastam |) (p. 24) 
anubhūyamānasyaiva saṃvedanāt bāhyārthamanubhūya -mānameva 
śarīratvena gṛhṇāti, na tu śiraḥ pāṇyādilakṣitam (kh: 
pāṇyādirakṣitam; g: pāṇyādilakṣaṇam) ekamevāsya śarīram || 28 ||

ṭippaṇī: saṃcetyamānaṃ pratyekaṃ vastu vastuto vijñānino jīvasya 
svāṅgakalpameva - iti na kevalaṃ bhūtātmakamevāsya vapuḥ, 
yāvadbhāvātmakamapi | ghaṭasukhāderbhāvasya hi saṃvedanaṃ 
samutpattiḥ, saṃvedyamānataiva tatsvarūpapratiṣṭhā 
asaṃvedyamānasya svapratiṣṭhānāsādanāt ityato jīvādapi 
sarvavastusamutpādaḥ | tasmātso'pi viśvamayaḥ | avacchinnāhaṃ -
kṛtipadaṃ śiraḥpāṇyādimaccharīraṃ bhūtātmakaṃ, bhāvātmakaṃ 
tu śabdādiviṣayasaṃvedyam || 28 ||


tena śabdārthacintāsu na sāvasthā na yaḥ* śivaḥ |
bhoktaiva bhogyabhāvena sadā sarvatra saṃsthitaḥ || 3/2 (29) ||

(* vivṛti: yā)
vṛti: tena tathāvidhena sarvātmakena svabhāvena, śabdārthayoḥ 
cintāsu na sā avasthā yā śivasvabhāvaṃ na vyañjayati (g: śivaṃ na 
vyañjayati), ato bhoktaiva hi bhogyabhāvena sarvatrāvasthito, na tvanyat 
bhogyamasti || 29 ||

ṭippaṇī: proktaviśvamayatāpratipattyā vācyavācakātmasu 
ṣaḍadhvajāteṣu yā kācit saṃvittipravāhapaddhatiḥ sā 
paraprakāśātmaśivamayyeva, tasmāt grāhakātmā parameśvara 
evecchādicakrapreṣaṇadvārā 
īśitavyātmajñeyakāryavastucamatkaraṇodyuktastattādātmyasaṃpā -
danāt sadoditasārvatrikasthitiriti svasvabhāvasyaiva jagadvikāsamaya -
śaktivibhavanaśīlatā nirvyūḍhā || 29 ||


p. 25) iti vā yasya saṃvittiḥ krīḍātvenākhilaṃ jagat | 
sa paśyansatataṃ yukto jīvanmukto na saṃśayaḥ || 3/3 (30) ||

vṛti: evaṃsvabhāvaṃ yasya cittaṃ, yathā - manmayameva jagat sarvam 
iti, sa sarvaṃ kriḍātvena paśyan nityayuktatvāt jīvanneva īśvaravat 
mukto, na tvasya śarīrādi bandhakatvena vartate || 30 ||

ṭippaṇī: samanantarapadyoddiṣṭanītyā 
avyucchinnaparāmarśāvadhānapari -śīlanavato yoginaḥ 
sarveśvarasvatantracidbhairavīyapūrṇāhaṃ -bhāvapratipattyā 
aśeṣamidaṃ viśvaṃ svaracitakrīḍanakalīlā -mātreṇa vibhāvya 
svalīlājanitaharṣaśokādyuparāge'pi 
śaṅkātaṅkakalaṅkayantraṇābhirmanāgapi nopaliptiriti 
yāthātmyaveditṛtvājjīvata eva muktirityarthaḥ || 30 ||

vivṛti: (p. 86) yasya iti vā saṃvittiḥ sa jīvanmukta iti saṃbandhaḥ, 
ityevam idānīmeva pratipādyaprakāreṇa yasya vā sādhakottamasya 
saṃvittiḥ samyak jñānaṃ sa satatam avyavadhānena sarvāvasthāsu 
yuktaḥ samāhitaḥ, uktavakṣyamāṇopadeśadṛśā 
svabhāvabalapariśīlanāpramattaikāgramānasaḥ sa jīvan 
niyatadehādhikaraṇān prāṇān dhārayan eva muktaḥ 
sarvavyāpakasarvātmakasarveśvarasvatantrasvasvabhāvāhaṃkāra-
pratipattidārḍhyena janmādivirodhāt niṣkrāntaḥ parameśvara eva 
saṃvṛtta - ityatra na saṃśayo na bhrāntiḥ; 
svasaṃvedyopapattyupalabdhiniṣprakampatvāt asya arthasya | kiṃ kurvan 
jīvanmuktaḥ ? - akhilam aśeṣamanantavastuvyaktivicitraṃ jagat viśvaṃ 
krīḍātvena svanirmitacarācarabhāvakrīḍanakoparacitalīlāmātratayā 
paśyan vibhāvayan | sarvo hi janaḥ 
anunmiṣitasvasvabhāvanibhālanakṣamavimalavijñānadṛṣṭi-
rātmano'nyonyataśca (p. 87) vibhinnam idamakhilaṃ bhāvajātaṃ 
kutaścidanyataḥ kāraṇāt udbhūtam aniśaṃ manyamānaḥ, 
tadbhāvajanyaharṣaśokabhayādivikārān anubhavan, bhavādhvani 
punaḥ punaḥ janmādibandhanabhājanatāṃ bhajate | yastu 
pratipādyaprakāreṇa utpannaparasaṃvidabhivyaktiḥ, sa yathā kaścit 
krīḍāparaḥ svaparikalpitaiḥ 
bhayakrodhādikāraṇabhūtabhāvapraticchandakaiḥ krīḍan 
tadyāthātmyaveditvāt bhayādivikārakāluṣyaṃ manāgapi nāpadyate, 
tathaiva bhāvānāṃ svasvabhāvaśaktivijṛmbhitamātratayā 
yāthātmyavedī san manāgapi vikṛtiṃ na āpadyate | evaṃ sarvaṃ 
krīḍātvenaiva paśyan jīvanneva muktaḥ | kathaṃ yasya saṃvittiḥ ? iti, - 
tenetyādiślokena pratipādayati; tena vakṣyamāṇena hetunā 
śabdārthacintāsu sā avasthaiva nāsti yā na śivaḥ - iti yasya 
saṃvittiḥ sa jīvanmuktaḥ, iti | śabdo'rthapratyāyakaḥ padasamudāyaḥ, 
artho jātyādibhedāt bahuvidham (p. 88) abhidheyaṃ vastujātaṃ, tayoḥ 
cintā tathā tathā vikalpanāḥ anantacintanīyavastūparāgāt vicitrāṇi 
jñānāni, yanmayo vyavahāraḥ etāsu śabdārthacintāsu sā avasthā 
daśā na kācit, śabdacintārūpā arthacintārūpā vā saṃbhavati, yā 
śiva eva sākṣāt na bhavati | yata evaṃ tadā bhoktā anubhavitaiva 
īśvaraḥ sadā nityaṃ sarvatra sarvāsu avasthāsu bhogyabhāvena 
anubhavanīyavastvātmanā sthito na pṛthak kiṃcit bhogyaṃ nāmāsti, 
tattvānavamarśamātravijṛmbhitam etat bhoktṛbhogyavibhāgarūpam | 
kena hetunā na sāvasthā na yā śivaḥ ? ityāha, - yasmāt jīvaḥ 
ātmā sarvamayo viśvarūpaḥ parasparavyatiriktapratipattiḥ, jīvasyāpi 
yo vyavahāraḥ so'pi vedyavedakābhedapūrvakatayaiva upapanna - 
ityarthaḥ, kuta etat ? tatsaṃvedanarūpeṇa tādātmyapratipattitaḥ 
sarvabhāvasamudbhavāt sarvamayo jīvaḥ tasya kasyacit saṃvedyasya 
ghaṭasukhādeḥ yat saṃvedanaṃ jñānaṃ, tasya yat rūpaṃ 
svabhāvaḥ, tena hetunā yā tādātmyapratipattiḥ tadabhedasaṃvit, tato 
hetoḥ nirvartamāno yaḥ sarvabhāvasamudbhavaḥ sarveṣāṃ 
bhāvānāṃ utpattiḥ, tasmāt sarvamayo jīvaḥ | kimuktaṃ bhavati - 
jīvasyaiva vyavahāro vicāryamāṇo'yaṃ 
vastuyāthātmyamupapādayati | tathāhi - ayaṃ svaviṣayaṃ 
saṃvidanneva samudbhāvayati sṛjati, saṃvedyamānameva hi vastu 
svarūpaṃ labhate, na tu asaṃvedyamānaṃ; saṃvedyamānatā ca tena 
tena rūpeṇa prakāśamānatā; prakāśamānatvaṃ ca 
prakāśādavyatiriktaṃ, nānyat kiṃcit | yadāha nyāyavādī 

	cetanāccāpi vedyatvādatadrūpāpravedanāt |

iti | evaṃ ca yat yat ayaṃ jīvaḥ saṃvetti tattadasya śarīrameva 
saṃpadyate, na tu niyataśiraḥpāṇyādyavayavasaṃniveśa (p. 90) eva, 
so'pi hi asya saṃvedyamānatāvasthāyāmeva śarīrībhavati, anyadā tu 
vyatirikto viṣaya eva | tathā ca - saṃvedyamānatvasāmānyāt dvividhaṃ 
śarīramasyāmnātaṃ tattvavidbhiḥ, bhūtātmakaṃ bhāvātmakaṃ ca; 
tatra māyāśaktivaibhavavismāritatāttṭā | ata eva digādikalanayā 
akalitaṃ cinmātraṃ vapuḥ iti prathamapādena śaktimān parāmṛṣṭaḥ | 
śeṣeṇa spandaśabdasya sārthakatāṃ prakaṭayituṃ 
śaktimadabhivyañjikā tatsamavāyinī brahmāhlādādiparyāyā 
śāktavijṛmbhaṇā parāmṛśyate | jayati - padābhidheyaṃ 
sarvautkarṣyaśālitvaṃ śāktatattvasya avagamyate | tataśca 
tatsamāveśarasaparibhogavigāhanavatāṃ bhaktibhājāṃ 
bhuktimuktisaṃpattipātratā viśvābhilaṣaṇīyatā ca dhvanyate |] |

(p. 2)

	tajjñairadarśitadiśaḥ svayamāviśantaḥ
		kecinnisargagahanaṃ viṣamaṃ bhramantu |
	tenaiva yatpunaramī hatavartmanānyān
		ākārayanti gamanāya mahānbhramo'yam || 2 ||

[(footnote 2) vijñajanopadiṣṭasatsaṃpradāyamantareṇa 
nisargagambhīraṃ śaivāgamābdhimavagāhamānānāṃ 
vāmākhyaśaktisaṃvṛtasaṃvidāṃ svopajñatayā 
saṃbhāvanāvatāṃ, vastuto vinā pāratīralābhaṃ madhye 
nimagnaprāyataiva | tadīyaduṣpathe tu bhramimanubhavatāṃ 
tadanugānāṃ yā pāradarśanāya taccodanā, hanta tat 
cakṣurunmeṣamandhakūpanipatanam | ataḥ tādṛśajanān pāraṃ 
laṅghayitumayaṃ madīyo yatnaḥ iti |]

nānāvādānilaughānanavasarakṛtānyonyasaṃghaṭṭaghoro-
ddhātānāpādayadbhiḥ śravaṇavidalanoddāmaśabdaprabandhān |
śāstrābdhiḥ kṣobhyate yairvivaraṇarabhasādudyadāvartadhīma-
bhrāntibhraṣṭāgamārthaplavavidhuramatistārito'rthī janastaiḥ || 3 ||

kaścidbhinnarucirvidannapi paraṃ tattvaṃ viparyasyati
dveṣadhvāntaviruddhabuddhiritaro jātyaiva cānyo jaḍaḥ |
itthaṃ durlabha eva sarvahṛdayagrāhī girāṃ saṃgrahaḥ
kiṃtvete'dya vivekinaḥ katipaye santyatra pātraṃ satām || 4 ||

(p. 3)

kenāpi grathitāṃ prasāraṇadhiyā kaiściddvisūtrīkṛtā-
mekīkṛtya yathāgamaṃ viracitāṃ spandārthasūtrāvalīm |
īśānugrahaśaktivajraśikhayā viddheṣu vidvanmano-
māṇikyeṣu niveśayāmyahamimāṃ kartuṃ kṛtārthāṃ dvayīm || 5 || 

[(footnote 3) prathamaṃ śrīvasuguptapādaiḥ sūtrāvaliḥ dṛbdhā | 
tadanu bhaṭṭaśrīkallaṭādibhiḥ siddhaiḥ saṃvṛtārthavivṛtyā 
praguṇīkṛtā | adhunā tu sūtrasaṃdarbhaṇa - praguṇīkaraṇātma 
pūrvasiddhaṃ kāryadvayaṃ saphalīkartuṃ saiva iyaṃ 
spandārthasūtrāvalī, ekīkṛtya saṃyojya, 
vṛttisaṃvāditārthavivaraṇaṃ kroḍīkṛtya ca, 
āgamāmnātaparamārthanirṇītyā viśiṣṭaracanayā upetā, 
parāśaktipātākhyacumbakamaṇiśikhayā anuvidvāsu sahṛdayānāṃ 
vimalamanoratnajātiṣu nigumphyate | yatparimalasaubhāgyādicarcanayā 
sudhāmayasvāmiprāsādamadhyāruhya 
niratiśayasukhānubhūtiranargalavikacitavṛttyā surasyate iti |] 

yasyonmeṣanimeṣābhyāṃ jagataḥ pralayodayau |
taṃ śakticakravibhavaprabhavaṃ śaṃkaraṃ stumaḥ (k: numa)  || 1 
||

vṛti: (p. 2) anena svasvabhāvasyaiva śivātmakasya saṃkalpamātreṇa 
jagadutpattisaṃhārayoḥ kāraṇatvaṃ vijñānadehātmakasya 
śakticakraiśvaryasyotpattihetutvaṃ namaskāradvāreṇa pratipādyate || 

ṭippaṇī:

śrīśivādvaitasadbhāvasaṃbhūtyai bhavatātsadā |
paryāyaḥ saṃgṛhīto'yaṃ spandavṛttyarthadyotakaḥ ||

yathā hi saṃkalpotpipādayiṣāpūrvakoṭāviṣyamāṇaṃ vastu 
eṣituravibhinnam, evamatra śivāvasthāyāṃ niravadhyavabhāsa -
vicchitticitraṃ sadvikasvabhāvatayā 
vastusaṃvedanāvasare svarūpāparāmarśatvamukulitasāmarthyo'yaṃ 
jīvaḥ avacchinnāhaṃkārāspadatayā śiraḥ - pāṇyādimaccharīratvena 
yat parāmṛśati tat asya sṛṣṭyādimayatvāt bhūtātmakam - ityuktam | 
yattu vyatiriktaṃ śabdādiviṣayatvena parāmṛśati tadbhāvātmakaṃ | 
paramārthe tu vicāryamāṇe dvayamapyasya śarīraṃ 
saṃvedyamānatvāviśeṣāt | evaṃ 
saṃvedyamānatālakṣaṇabhāvasaṃsargāvasthāyāṃ jīvaḥ 
saṃvedyavastvavyatirekāt sarvamayo viśvarūpaḥ sthito'pi san 
tathāvastusaṃvedanatattvaparāmarśānunmeṣāt sarvamidam 
ātmavyatiriktakāraṇāntaralabdhātmakatvena ātmanaḥ parasparataśca 
pṛthaktvena vyavacchindan, (p. 91) ātmānaṃ ca 
dehādyanityabhāvāhaṃbhāvena adhyavasyan janmādibandhabhāk 
saṃsārī jīva iti vyapadiśyate | yadā tu 
śivadivākaraśaktyaṃśupātajanitaprabodhonmiṣitaviśadadṛṣṭi-
sphuṭataraprakāśamānadehādivyatiriktasatyātmasvabhāva-
susthitāhaṃpratipattiḥ san 
yathāvasthitavastusaṃvedanaparāmarśaśaktibhirvyaktibhāk bhavati, 
tadā sa eva saṃkalpamātravilikhitavicitraviśvavyaktimayaśakticakraḥ 
śivaḥ saṃpadyate | tena uktam - tattadvastusaṃvedanasvabhāvabalena yā 
tādātmyapratipattiḥ saṃvedyamānavastvabhedasaṃvittitaḥ 
sarvabhāvasamudbhavaḥ, tasmāt jīvaḥ tāvat sarvamayaḥ; tena ca tasya 
sarvamayatvapratipattilakṣaṇena hetunā sā avasthā nāsti yā śivamayī 
na bhavati, tataśca bhoktaiva īśvaro bhogyabhāvena 
īśitavyavasturūpatayā sadā sarvatra saṃsthitaḥ | evaṃ yasya vā 
saṃvittiḥ sa jīvanmukta - iti vākyasamanvayasaṃkalanārthametat (p. 92) 
punaruktam, - ityanena ślokatrayeṇa ātmana eva viśvarūpatvena sthitiḥ 
pratipāditā, viśvaprapañcasya nimittāntarānupapatteḥ | yathoktaṃ 
brahmavidā

	kalpayatyātmanātmānamātmā devaḥ svamāyayā |
	sa eva buddhyate bhedāditi vedāntaniścayaḥ ||

iti | tathā anyenāpi stutidvāreṇoktam
āśivādipṛthivyantaṃ bhāvajātamavyatiriktamāste, 
tadevaśaktiśabdena vyapadeśyaṃ nityāvyabhicaradekasvabhāve śive 
samavetaṃ tayorabhedasya abhyupagatatvāt | vastuvastu parā saktirekai -va 
paripūrṇāhaṃparāmarśaśālitvāt atyadbhutaśaktiparisphurite 
pāramaiśvarye māyāśaktyudbhāvitānantavaicitryā bhāvavyakta -yaḥ 
avaraparāmarśaunmukhyamātrotpannena tu bhedopabhedabhāva -
māpannena bhāvarāśinā avabhāsamānatayā bahuvyapadeśā 
śaktiśaktimatorabhedābhiprāyapratyāyikā | ayaṃ bhāvaḥ - 
śaṃkarātmani tadicchayaiva viśvamunmīlitaṃ labdhasthitikamapi 
tacchaktivijṛṃbhaṇamātraṃ, māyāśaktyā tu nānāvabhāsi iti 
tannutidvārā tatsamāpattirāśaṃsyate ||


vivṛti: (p. 3) taṃ śaṃkaraṃ - śreyasaḥ kartāraṃ stumaḥ - 
praśaṃsāmaḥ | taṃ kaṃ, yasya unmeṣa - nimeṣābhyāṃ - 
śaktiprasarapralayābhyāṃ jagato - viśvasya pralayodayau - 
vināśaprādurbhāvau | atra yathāsaṃkhyaṃ na vivakṣitamiti 
vakṣyāmaḥ | taṃ kīdṛśaṃ śakticakravibhavaprabhavaṃ -
(p. 4) śaktīnāṃ vakṣyamāṇasvarūpāṇāṃ cakraṃ - samūhaḥ, sa 
eva vibhava - aiśvaryaṃ, tasya prabhavaṃ - kāraṇam, - iti 
padasaṃbandhayojanā tāvat subodhā | vastusaṃgatistu kathaṃ ? - iti 
vicāryam | śaṃkarastāvat nityam avyabhicaradekasvabhāva eka eva 
padārthaḥ paramārthasan, - iti prakaraṇasya asya tātparyaṃ 
tathānirvāhāt; tasya parasparaviruddau anityau nimeṣonmeṣātmakau 
avasthāviśeṣau saṃbandhitvena kathaṃ pratipāditau ? kartṛprathayā hi 
anayā evaṃ pratipādyate - śaṃkara unmiṣati nimiṣati iti | evaṃ ca 
anityāvasthāyogitvaṃ nitye bhagavati anupapannam, tat kathamuktaṃ 
yasyonmeṣanimeṣābhyām iti?
	atrocyate | unmeṣa - nimeṣaśabdābhyāṃ tadupacaritavṛttibhyām 
icchāmātramekaṃ śaṃkarasaṃbandhi pratipādyate; sa ca tasya nityo 
dharmaḥ svabhāvabhūtaḥ, tasya unmeṣa - nimeṣaśabdavācyatvaṃ 
dvitvaṃ ca  (p. 5) upacārāt; yato jagata eva 
parameśvaramāyāśaktyudbhāvitakāryarūpatvāt anityasya 
pralayodayasaṃbhave sati, nimeṣonmeṣau vastutaḥ saṃbhavataḥ | tau ca 
īśvarecchāmātranimittakau; - iti udayātmakonmeṣahetutvāt 
īśvarecchaiva unmeṣaśabdena, pralayātmakanimeṣahetutvāt 
nimeṣaśabdena ca upacaryate | yathā āyuṣkāraṇatvāt āyuḥśabdena 
ghṛtam | sā ca avyatiriktā śaṃkarasya śaktiḥ; tadavagama eva ca 
ātmaiśvaryapratyabhijñālakṣaṇasiddherhetuḥ | sā ca didṛkṣayeva 
sarvārthān (ṣp. Kā. 3/11) ityatra vakṣyamāṇanyāyena 
sāṃsārikapuruṣaprasiddhecchāsādṛśyāt tadavagamopāyatayā 
icchāśabdena vyapadiśyate | yathā hi puruṣasya icchāvasthāyām 
iṣyamāṇaḥ padārthaḥ svarūpāvyatirekeṇaiva avatiṣṭhate, tathā 
bhagavataḥ śaktau anantāvabhāsaviśeṣacitraṃ jagat manāgapi 
anupajātaviśeṣāt svarūpāt avyatirekeṇaiva avatiṣṭhate | seyaṃ 
paramārthasatī śivadaśā, yā evaṃ tadvidvadbhiḥ stūyate  (p. 6)

	sadā sṛṣṭivinodāya sadā sthitisukhāsine |
	sadā tribhuvanāhāratṛptāya svāmine namaḥ ||

iti | tathā īśvarapratyabhijñāyām

	yā caiṣā pratibhā tattatpadārthakramarūṣitā |
	akramā?nantacidrūpaḥ pramātā sa maheśvaraḥ ||

iti | ittham ekasyā eva pārameśvaryāḥ śakteḥ icchā - jñāna - 
kriyāvyapadeśaḥ idantonmiṣanmāyāśaktijanita eva; yataḥ 
śivadaśāmekāṃ muktvā māyāśaktiḥ sarvatra kṛtapadā, yadvaśāt 
ekasmin śivatattve paramārthasati sadāśivādi - tattvāntaravyapadeśaḥ 
prakriyāśāstreṣu | etacca purastāt parāmṛtarasāpāyaḥ (ṣp. Kā. 
3/14) ityādiślokavyākhyānāvasare pratipādayiṣyate | sā 
evaṃlakṣaṇā pārameśvarī śaktiḥ svalīlollāsitasya 
jagato'vasthādvayahetutvāt dvitvenāpi ca upacaritā | tena idamatra 
prathamaślokapūrvārdhe tātparyam, - yasya icchāmātreṇa jagataḥ 
pralayodayau taṃ stumaḥ | tacca yathāsaṃkhyam atra mukhyayā (p. 7)
vṛttyā nāpekṣaṇīyam unmeṣeṇa udayo, nimeṣeṇa pralayaḥ, - iti tu 
arthasaṃkhyā samavaiti | etacca, icchāmātram unmeṣanimeṣau - 
ityetāvattātparyaṃ pratipādayituṃ, svayaṃ vṛttikṛtā bhaṭṭakallaṭena 
vyākhyātam

	saṃkalpamātreṇa...............................

iti | ye tu yathāsaṃkhyasamarthanānurodhāt, yasya unmeṣe 
kriyāśaktipratisaṃhārāt svarūpavikāse jagataḥ pralayo vināśaḥ, 
nimeṣe prasṛtakriyāśaktitvāt svarūpasaṃkocarūpe jagataḥ udaya 
udbhavaḥ, iti vyācakṣāṇāḥ, śaṃkarasyaiva pāramārthikau 
unmeṣanimeṣau dharmatvena pratipādayanti, te ca kālpanikameva arthaṃ 
paramārthatvena pratipadyamānāḥ tathā darśanasya asya antaraṃ nanu 
praviṣṭāḥ ? - iti namastebhyaḥ |
	nanu nityāvyabhicaradekasvabhāvasya bhagavataḥ śaktirapi 
tādṛgeva pratipāditā, tayorabhedābhyupagamāt | tat kathaṃ 
vyākhyātaṃ śaktīnāṃ cakramiti ? atra brūmaḥ | nanu idameva tat 
niratiśayam (p. 8) aiśvaryam īśvarasya iha vivakṣitaṃ, yat sarvatra aham 
- iti svarūpaparāmarśamātrāvyabhicāre'pi 
niravadhivijṛmbhamāṇavicitrāvabhāsakhacitaṃ trailokyālekhyam idam 
ullikhati; ittham ullikhyamānamapi etat paramārthataḥ 
parāmṛśyamānaṃ tatsvabhāvāt manāgapi ca yat na bhidyate | 
yathoktam

	parameśvaratā jayatyapūrvā
		tava sarveśa yadīśitavyaśūnyā |
	aparāpi tathaiva te yayedaṃ 
		jagadābhāti yathā tathā na bhāti ||

iti | anyatrāpi

	likhate jagattritayacitramadbhuta-
		pratibhāparisphuritaśaṃsi te namaḥ |
	susitaikasūkṣmanijaśaktivartikā-
		racitāvabhāsaśataśobhi śaṃbhave ||

iti | etacca evaṃvidhaṃ śāṃkaramaiśvaryaṃ 
tadanugrahagrastasamastamāyātamastvaprakāśitaparamārthānāṃ 
svasaṃvedyameva suprabuddhānāṃ mahātmanām | 
īśvaraśaktipātaprabodhitānāṃ tu samyak 
upanatasadgurūpadeśakrameṇa (p. 9) abhyasyatāṃ 
pratyāsannasvānubhavam | aprabuddhāḥ punaḥ anupadeśyā eva, iti | 
etadeva iha purastāt pratipādayiṣyamāṇam | tat evaṃvidhe sthite 
śaṃkarasya pāramaiśvarye yā imāḥ paramādbhutamāyāśaktivaśāt 
cidacidbhedena dvividhā api avāntarabhedāt aparyantā bhāvavyaktayaḥ, 
sā parameśvarasya svarūpāt abhinnā śaktirekaiva tāttvikī, idamiti 
parāmarśabhedamātrajanmanā tu 
nānānāmarūpavibhaktabhāvabhedena avabhāsamānā satī bahutvena 
vyapadiṣṭā śaktīnāṃ cakram - iti | śaktiśabdena ca 
bhāvavyaktīnāṃ vyapadeśe parameśvarāt śaktimato 
bhedābhāvapratipādanameva prayojanam | etā eva vibhavaḥ 
aiśvaryamīśvarasya, tābhireva tasya itthaṃ vibhavanaśīlatvāt | 
yathoktaṃ pārameśvare 

	śaktiśca śaktimāṃścaiva padārthadvayamucyate |
	śaktayo'sya jagatkṛtsnaṃ śaktimāṃśca maheśvaraḥ ||

(p. 10) iti | evaṃ ca svaśaktibhūtasya asya vibhavasya asau prabhavaḥ - 
utpattikāraṇaṃ, na tu svarūpavyatiriktasya anyataḥ kutaścit 
labdhātmanaḥ; ataśca yasya ityādinā prathamaślokapūrvārdhena 
śaṃkarasya jagatkāraṇatve pratipādite'pi, 
śakticakrātmakasvaiśvaryabhūtajagatprabhavatvalakṣaṇaviśeṣa-
pratyāyanaparam idam tam ityādinā ślokāparārdhena viśeṣaṇaṃ, na 
punaruktam | etadeva vṛttikṛtā vyākhyātam

	vijñānadehātmakasya śakticakraiśvaryasya
	utpattihetutvam ...................................................

ityādinā | vijñānadeho - viśuddhasaṃvinmātramūrtiḥ maheśvaraḥ, 
sa ātmā - svabhāvo yasya śakticakrātmana aiśvaryasya - iti hi tasya 
artho'bhimataḥ | kiṃ ca yasya evaṃvidhadharmāvyabhicāraḥ sa 
parameśvaro vyākhyāsyamānārthena śaṃkaraśabdena iha 
pratipāditaḥ | (p. 11) sa ca ātmaiva nānyaḥ, - iti 
yattacchabdopalakṣitavākyopanibandhaḥ sūcayati; yataḥ 
ślokapañcāśatprapañcitaprakaraṇārthaparyālocanayā tasyaiva 
proktaviśeṣaṇāvyabhicāraḥ paryavasyati | etadeva vṛttikṛtā darśitam 

	anena svasvabhāvasyaiva śivātmakasya

iti vyācakṣāṇena; svasya - ātmanaḥ sva - ātmīyo bhāvaḥ - 
svarūpaṃ, svasvabhāvaḥ, - iti hi tasya vigraho'bhipretaḥ | tat asya 
ādyaślokasya ayaṃ tātparyārthaḥ 
prakaraṇanirvāhyavastupratijñābandharūpaḥ yat, - parameśvaraḥ 
icchāmātreṇa jagataḥ pralayodayau vidadhāti, labdhasthitikamapi jagat 
tacchaktivibhūtirekaiva māyāvaśāt tu nānātvena avabhāsate, - iti | 
idameva arthadvayam atra prakaraṇe vistāryate 
upapattyupalabdhipradarśanakrameṇa | tathā ca - prathamata eva 
māyāvaśāt svarūpapratyavamarśasya anullāsāt, vedyāt 
dehāderavyatirekeṇa pratibhāsamānasyaiva  (p. 12) ātmano vyatirekaḥ 
pradarśyate | tato vedyasyaiva jagato vedakāt tasmāt 
upalabdhatāttvikasvabhāvāt śaktibhāvena avyatiriktatvam, - iti asminneva 
arthadvaye upapattyupalabdhī, - iti caturniḥṣyandaḥ spandasiddhānto'nena 
ślokena āsūtritaḥ | siddhāntatā ca asya, siddhasyaiva - na sādhyasya - 
īśvaratattvasya, anto - niṣṭhā niścayaḥ, iti kṛtvā; yadi vā 
nānāsiddhāntoditasya jñāna - kriyā - yoga - caryātmakasya 
catuṣṭayasya etadvijñānaṃ saṃskārakatvāt sāphalyakāraṇam 
ityasyaiva siddhāntatā | kiṃ ca 
prārabdhaprakaraṇāvighnaparisamāptiprayojanenāpi anena ādiślokena 
saṃbandhādayo'pi sūcyante - ityādiśanti guravaḥ | tacca sarvaṃ 
śaṃkaraṃ stumaḥ ityata eva vākyāt labhyate | yataḥ upāyalakṣaṇaṃ 
śreyaḥśāstrarūpaṃ mukhyatayā, upeyalakṣaṇaṃ ca 
ātmaiśvaryapratyabhijñārūpaṃ; tadubhayamapi (p. 13) śam ityanena 
padena uktam | tasya kartā śakaraḥ ityanvarthā iyaṃ saṃjñā 
parameśvarasya | ata etacchāstrātmakaśreyasaḥ sākṣāt kartā 
parameśvara eva | tatsaṃpradāyamimaṃ nibadhnadbhiḥ 
kartṛvyapadeśo'dhigataḥ | evam īśvaraśāstrayoḥ kartṛkāryalakṣaṇaḥ 
saṃbandhaḥ | abhidheyamiha śaṃkarasvarūpamiti stumaḥ iti padāt 
pratīyate | upādeyavastusvarūpapratipādanameva stutyarthaḥ, - iti hi 
niścitaṃ vipaścidbhiḥ | ataḥ śāstrābhidheyayoḥ pratipādya - 
pratipādakabhāvalakṣaṇaḥ saṃbandhaḥ | prayojanaṃ ca 
ātmaiśvaryapratyabhijñātmakaṃ śaṃkarapadādeva avasīyate | 
parasyāpi hi śreyasaḥ kartṛtvena īśvara eva vyākhyātaḥ; - iti abhidheya 
- prayojanayoḥ upāyopeyabhāvalakṣaṇaḥ saṃbandhaḥ | iti 
vyākhyātāḥ saṃbandhādayastrayaḥ | abhidhānamasya śāstrasya 
spanda iti | yataḥ spandatattvaviviktaye | (ṣp. Kā. 1/21) ityādau ihaiva 
vyavahāraḥ | spanda - śabdaśca ayaṃ svasvabhāvaparāmarśamātrasya 
(p. 14) nityasya śūnyatāvyatirecanakāraṇabhūtasya 
tāvanmātrasaṃrambhātmanaḥ śaktyaparābhidhānasya 
pārameśvarasya dharmasya kiṃciccalanāt spanda iti, arthānugamāt 
vācakatvena vyapadiṣṭaḥ | tatpratipādanahetutvāt śāstramapi idaṃ 
spandaśabdena abhidhīyate | viṣayaśca [atra viṣayaśabdena 
upadeśaviṣayaḥ adhikārī nirdiśyate, śāstrāntareṣu 
viṣayaśabdenābhidheyaṃ vivakṣitam, iha tu abhidheyaṃ 
vyākhyātapūrvam |] asya 
viśuddhaśraddhābhaktiprakarṣapiśunitaparameśvaraparaśaktipāta-
pronmīlyamānasvabhāvālokatiraskṛtasakalasaṃdehāndhakāratvāt 
prabuddhaḥ samyagupanatadīkṣādisaṃskāro 
guruvacanacodanāmātrāvaśeṣasvātmaiśvaryopalabdhiḥ; tādṛśasyaiva 
iha upadeśyatvena purastāt parigṛhītatvāt | - iti abhidhāna - viṣayāvapi 
avagantavyau | vyākhyātaśca ayamādiślokaḥ 
samastaprakaraṇārthopakṣepagarbhaḥ || 1 ||
	nanu sura - nara - tiryagādibhedena pravibhakta - tanu - karaṇa - 
bhuvanābhogādeḥ aparisaṃkhyeyāvāntarabhedabhinnasya (p. 15)
prāṇabhṛtprapañcasya sukha - duḥkha - kṣuttṛṣṇā - 
jarāmaraṇadvandvānuviddhasya jātyādyavacchinnābhimānabhājaḥ 
satataṃ saṃsarataḥ parasparadūrabhinno yaḥ svabhāvaḥ, sa kathaṃ 
samanantarapratipāditādbhutaiśvaryaśaṃkarābhedena pratijñātaḥ 
yena evaṃ vyākhyātam ? yasya evaṃpratipāditaviśeṣaṇāvyabhicāraḥ, 
sa kathaṃ śaṃkaro mamaiva ātmā ? - iti ata āha

yatra sthitamidaṃ sarvaṃ (g: idaṃ viśvam) kāryaṃ yasmācca 
nirgatam |
tasyānāvṛtarūpatvānna nirodho'sti kutracit || 2 ||

vṛti: (p. 3) kathaṃ punaḥ svasvabhāvasyaiva saṃsāriṇaḥ śivatvena 
nirdeśaḥ - iti yadyucyate (gh: ityucyate iti yadi - śabdahīnaḥ pāṭhaḥ |), tat 
yatra sthitam idaṃ jagat, yasmāt ca utpannaṃ tasya 
saṃsāryavasthāyāmapi anācchāditasvabhāvatvāt na kvacit nirodhaḥ, 
ataḥ śivatvamucyate


ṭippaṇī: nānāvibhaktavedyātmatattvanicayasya 
prakāśanasthitihetutayā kartṛtayā ca ya ādhārakāraṇabhūtaḥ 
prameyasaṃparkāsahiṣṇu -tayā 
aprameyoniravacchinnamahimacinmātraikasvarūpaḥ sa eveha 
svasvabhāvaśavdābhimato, na tu jātivyaktyabhimānavato māyāpahṛ -
taiśvaryasaṃvido'ṇoḥ svarūpaṃ, tasya niruddhasvabhāvatvāt || 2 ||

vivṛti:  (p. 15) tasya - asya vakṣyamāṇasya tattvasya na kvacit - 
kasmiṃścit deśe kāle ākāre avasthāviśeṣe vā nirodhaḥ - 
avacchedaḥ idanteyattāvyapadeśahetuḥ vedyavastudharmaḥ asti - vidyate; 
kuto hetoḥ ? anāvṛtarūpatvāt - jātyādyabhimānarūpeṇa (p. 16)
malena anāvṛtam anācchāditaṃ rūpaṃ yasya tat, tathā tasya bhāvaḥ 
tattvaṃ tasmāt | tasya anāvṛtatvopapattipratipādanāya viśeṣaṇamāha 
yatra sthitamidaṃ sarvaṃ kāryaṃ yasmācca nirgatam - iti | idam iti 
vedyatayāvasthitaṃ; sarvam iti yatra yatra darśane yathā yathā 
parikalpitaṃ; tat aśeṣaṃ kāryaṃ kartradhīnasadbhāvaṃ yatra - yasmin 
vedakatvena kartṛtvena ca avasthite 
ādheyasamastapadārthasārthasāmānyādhārabhūte ekasmin sthitaṃ - 
tena tena pṛthivyādinā ghaṭapaṭa - gavādinā vā rūpeṇa 
labdhapratiṣṭhaṃ, yadantargatasya sarvasya vastunaḥ prakāśamānatvāt 
svarūpasattāsādanamityarthaḥ | nanu sūryādiprakāśāntargataṃ 
ghaṭapaṭādidravyaṃ tena tena rūpeṇa prakāśamānatvāt sattām 
āsādayati, tathaiva sarvamidaṃ kāryaṃ yatra sthitam ityuktam, uta 
anyena prakāreṇa ? ityāha - yasmācca nirgatam iti, - 
pradhānādikāraṇāntaraparihāreṇa yasmāt  (p. 17)
ekakartṛbhūtāt ekasmāt kāraṇāt nirgatam udbhūtam | tat 
ayamatrārthaḥ, - yaḥ padārthaḥ sarvasya idantāpannatayā 
prameyabhūtasya śāstreṣu nānāvibhāgena saṃgṛhītasya 
tattvavrātasya ekaḥ prakāśakatvena sthitihetutvāt ādhārabhūtaḥ, 
kartṛtvāt ca prabhavaḥ kāraṇaṃ, svayaṃ ca 
vedyatvasaṃsparśāsahiṣṇutvāt 
māyīyapramātrantarāviṣayabhūto'navacchinnamahimā 
nirmalacinmātraikarūpaḥ, sa iha svasvabhāvaśabdenābhimataḥ, na tu 
jātyādyavacchinnābhimānasaṃkocitātmano 
māyāśaktyapahnutasvaiśvaryasaṃvidaḥ kāryavargāntaḥpātinaḥ 
prāṇiprabandhasya svarūpaṃ svasvabhāvaḥ | - iti yuktam uktam 
ātmaiva śaṃkara iti | tat etat vṛttikṛtā

	kathaṃ punaḥ svasvabhāvasyaiva saṃsāriṇaḥ śivatvena 
vyapadeśaḥ 

iti ākṣipya

	yatra sthitam idaṃ jagat, yasmāt ca utpannam

(p. 18) iti vivṛṇvatā pratisamāhitam |

	tasya saṃsāryavasthāyām

iti | vṛttirevaṃ boddhavyā, - saṃsāriṇāṃ 
tanmāyāvabhāsitajātyādyabhimānā māyīyāvasthā, tasyāmapi tasya 
svasvabhāvasya tattvato nirodho nāsti iti || 2 ||
	nanu yo'yaṃ svabhāvākhya evaṃpratipāditaḥ padārthaḥ, sa kiṃ 
kevalāt āgamājñāmātrāt oṃ iti abhyupagantavyaḥ, uta 
praguṇābhyām upapattyupalabdhibhyāṃ vyutpādyābhyāṃ 
pratipattigocaratāṃ netuṃ śakyaḥ ? - iti saṃśayacchedāya 
ślokāntareṇa upapattiṃ yāṃ pratipādayiṣyati tadavatāraṇārtham 
idaṃ tāvat ucyate, - 
sakalaprakaraṇapratipādyārthatattvalabdhapratiṣṭhayā parayā prajñayā 
svasvabhāvasya parāmarśāvasare 
ravikiraṇaspṛṣṭanīhāranikaraniḥsāranaśyatsvarūpayā, saṃprati tu 
dvaitamahāmohatimirātmanā vijṛmbhamāṇayā māyāśaktyā (p. 19)
āviṣṭānāṃ sarvapramātṝṇāṃ pāramārthikāt vedakāt svabhāvāt 
pracyutyeva vedya eva dehādau vedakabhāvena ahamiti pratyayaḥ 
paramadurbhedasya bhedagranthermūlam | tatastebhyo dehādibhyaḥ tasya 
ahaṃpratyayātmanaḥ svasvabhāvasya vyatirecanāya 
samanantarapratijñātasya sarvathā nirodhābhāvasya upalabdhaye 
svānubhavapramāṇām upapattiṃ prastāvayan āha

jāgradādivibhede'pi tadabhinne prasarpati |
nivartate nijānnaiva svabhāvādupalabdhṛtaḥ || 3 ||

vṛti: (p. 4) jāgradādināpi bhede prathamānena (kh, gh: bhede 
pravartamāne) tasya svarūpam āvriyate, yasmāt upalabdhṛrūpatvaṃ 
triṣvapi padeṣu sādhāraṇam, na tasya svarūpānyathābhāvaḥ, yathā 
viṣasyāṅkurādiṣu (vṛkṣsyāṅkurādiṣu iti kvācitkaḥ 
pāṭho'maulikaḥ |) ca pañcasu skandheṣu ||

ṭippaṇī: ādiśabdanirdeśena svapnasuṣuptākhye avasthe vijñeye | 
smṛtimadamūrchādayastayorevāntarbhūtāḥ | tatra yasyāṃ 
buddhīndriyairbahirviṣayān parigrahītuṃ vikasitakaraṇeśvarīko janaḥ 
parispandate sā jāgarāvasthā | yatra bāhyato vyuparatakaraṇacakrasya 
manasaiva sakalakaraṇaśaktimatā upakalpitaviṣayopabhogaparigraha -ṇaṃ 
sā svapnāvasthā | yatra manaso'pi vyāpṛtyuparatau satyāṃ 
proktobhayathākāraviṣayajātāsaṃvedanaṃ sā suṣuptāvasthā | 
smṛtiranubhūtaviṣayāsaṃpramoṣaḥ | madaḥ pānātiśayajatyaścitta -
vṛttisaṃmohaḥ | mūrchā viṣādādijanitamohātmā iti etāsu 
vijṛmbhamāṇāsvatrasthāsu anusaṃdhānaikyabalavatsvānubhavapra -
māṇena upalabdhṛtāyāvasthāturabhedaḥ siddhaḥ | tadabhinneti 
bahuvrīhirbodhyaḥ | 

vivṛti: (p. 19) ataḥ tasya svabhāvasya na kvacit nirodhaḥ asti, yataḥ asau 
nijāt ātmīyāt anupādheḥ svabhāvāt svarūpāt na nivartate 
nānyathā bhavati, na cyavate iti saṃbandhaḥ | kīdṛśāt svabhāvāt ? 
upalabdhṛtaḥ upalambhakāt jñātuḥ anubhavituḥ ityarthaḥ | kadā ca na 
nivartate ? jāgradādivibhede prasarpati api jāgradādinā (p. 20) yo 
vibhedo vyatirekaḥ, avasthānām anyonyavailakṣaṇyaṃ, tasmin 
prasarpati vijṛmbhamāṇe | ādigrahaṇāt svapna - suṣuptāvasthe 
gṛhyete; smṛtyādyavasthāḥ svapnenaiva saṃgṛhītāḥ, tulyarūpatvāt; 
madamūrchādyavasthāśca suṣuptena | tatra jāgrat iti jāgarāvasthaiva 
śāstreṣu prasiddhā, yasyāṃ śrotrādibhiḥ indriyaiḥ śabdādīn 
indriyārthān gṛhṇan prasṛtaśaktiḥ puruṣaḥ parispandate | svapnaḥ 
svāpāvasthā, yasyāṃ svavyāpārapariśrāntaḥ 
śrotrādivihāraviratāvapi manasaiva asau viṣayān parigṛhṇāti | 
suṣuptaṃ gāḍhanidrārūpā sukhasvāpāvasthā, manovyāpārasyāpi 
vyuparame sati yatra vyatiriktavedyasaṃvedanaṃ tātkālikaṃ nāsti | 
smṛtyavasthā anubhūtaviṣayāsaṃpramoṣātmikā svapnasadṛśī, 
manasaiva viṣayagrahaṇasāmyāt | madaḥ pānātiśayajaḥ 
cittendriyavṛttipramoṣarūpo vikāraḥ | mūrchā 
viṣādaviṣādibhojanādijanitamohātmā | 
evamādivedyagrahaṇābhāvasāmyāt suṣuptatulyā (p. 21) anyā api 
yāḥ kāścanāpi avasthāḥ saṃbhavanti, tā etāsu eva antarbhavanti | 
etannimittake vibhede pravartamāne'pi, nijāt upalabdhuḥ svabhāvāt asau 
na nivartate | yadi avasthātmaka eva ayam upalabdhā syāt, tat avasthāvat 
so'pi vibhidyeta | yāvatā tāsāṃ vibhede prasarpati, ayaṃ svabhāvāt 
avasthāvyatiriktāt na nivartate, - iti apiśabdasya arthaḥ | katham etat 
pratipadyāmahe, - yat avasthātāpi san avasthāsu bhinnarūpāsu 
prasarantīṣvapi sa ekasmāt svabhāvāt na nivartate iti ? atra hetugarbhaṃ 
viśeṣaṇam āha, - kīdṛśi tasmin prasarpati ? tadabhinne abhinna ekarūpo 
nirviśeṣopalabdhṛtvamātreṇa lakṣaṇena yuktaḥ svasvabhāvo 
vyāpakatvena svayam anubhūyamāno yatra sa tathā tasmin | 
avasthābhede'pi upalabdhṛlakṣaṇasya avasthātuḥ abhedaḥ, - (p. 22) iti 
sarvasya atra svānubhavaḥ pramāṇam | tathāhi, - yo'ham asvāpsaṃ sa 
jāgarmi iti ekānusaṃdhātṛsūtranibaddhatvena svayam anubhūyamānā 
jāgarādayo'vasthāḥ prasarpanti | etābhyaśca anyadavasthāntaram 
ānantye'pi saṃsāriṇāṃ jantūnāṃ na saṃbhavati | ato yathā ekasmin 
dehe avasthāvyatiriktarūpa upalabdhā vyāpaka ekaḥ, tathā 
sarvadeheṣvapi sa eva eko vyāpakaḥ siddhaḥ; dehabhede'pi tasya 
upalabdhṛmātravyatiriktalakṣaṇāntarābhāvāt | pratiprāṇi pṛthaktvena 
ahamiti tu pratyayo māyīyo, na tāttvikaḥ | tadvyudāsārthameva 
prakaraṇārambhaḥ | so'pi ca upalabdhṛtvamātram ekaṃ svalakṣaṇaṃ na 
vyabhicaratyeva | - iti svasvabhāva eva śaṃkara - iti samyak upapāditaṃ 
svānubhavānapahnavinaḥ prabuddhān prati | etābhireva avasthābhiḥ 
yogaśāstraprasiddhāsvapi jāgarādyavasthāsu tasya abhedaḥ pratipādito 
veditavyaḥ | (p. 23) tāsvapi tasya upalabdhṛtvena vyāpakatayā 
avasthānāt | tāśca saṃkṣepato lakṣyante | - tatra dhyeye arthe cetasā 
jhagiti pravṛttimātraṃ jāgarāvasthā, dhāraṇā iti kvacitprasiddhā | 
tatraiva visadṛśapratyayaparihāreṇa 
samānapratyayapravāhaikatānatānusaṃdhānaṃ svapnāvasthā, 
dhyānam iti yām āhuḥ | krameṇa aikāgryātiśayāt 
pratyayāntarāsaṃkīrṇasūkṣmadhyeyābhāsamātraviśeṣatā cittasya 
savedyasuṣuptāvasthā, yāṃ 
vitarkavicārānandāsmitānurūpānugamalakṣaṇasya saṃprajñātasya 
samādheḥ ānandāsmitāmātrānugatam avasthāviśeṣam ācakṣate | 
yastu

virāmapratyayābhyāsapūrvaḥ saṃskāraśeṣo'nyaḥ (yo sū 1/17)

iti kṛtalakṣaṇaḥ asaṃprajñātaḥ samādhiḥ, tat apavedyasuṣuptam | 
sarvāsu etāsu ca anubhavitṛrūpasya vyāpakasya ekasya svabhāvasya 
sattā (p. 24) sthitaiva | yataḥ sālambane tāvat samādhau 
vyatiriktavedyasadbhāvāt laukikāvasthāvat vedakasya upalabdhuḥ 
sattvaṃ sphuṭam eva | yatra tu nirālambanatvāt abhāvarūpatvaṃ tatra 
tatkālameva vedyāsaṃvedanamātraṃ, na tu vedakasya 
vedakatvābhāvaḥ suṣuptādivat; tato niḥsṛtasya sā avasthā 
smartavyatayā vedyatvam āpannā vyāpakasya sadbhāvam 
abhivyañjayatyeva | ye punaḥ 
vedyasaṃvedanasāmarthyābhāvamātravyāmohitā 
upalabdhāramātmānameva asatyaṃ manyante tān purastāt 
pratibodhayiṣyati | etat sarvaṃ vṛttikṛtā

	jāgradādināpi bhede pravartamāne na tasya 
svarūpamāvriyate

ityādinā granthena sūcayitvā viṣaśaktidṛṣṭāntena pramāṇīkṛtam || 3 
||
	nanu jāgarādiṣu avasthāviśeṣeṣu svabhāvāt upalabdhuḥ asau na 
nivartate, svasya ātmana (p. 25) upalabdhurjñānasya bhāvāt 
svānubhavarūpāt ekarūpatayā avasthānāt, - iti yat pratipāditam tat 
katham? yataḥ tāsu avasthāsu anubhavituḥ evaṃvidhāḥ pratyayāḥ 
prādurbhavanti, tat yathā, - manuṣyo'haṃ, brāhmaṇo'haṃ, 
devadatto'haṃ, yuvāhaṃ, vṛddho'haṃ, kṛśo'haṃ, sthūlo'ham, - 
ityādayo dehālambanāḥ; sukhito'haṃ, duḥkhito'ham, - ityādayo 
buddhyālambanāḥ; kṣudhito'haṃ, tṛṣito'ham, - ityādayaḥ 
prāṇālambanāḥ | śūnyatāpramātṛpratyayaśca nāhaṃ kiṃcit 
avediṣam, - iti pratyavamarśapratyeyaḥ suṣuptādyavasthātaḥ 
pratibuddhasya śūnyālambanaḥ prādurbhavati | ta ete dehādayaḥ sarva 
eva anityāḥ, tadālambanaśca ahaṃpratyayo'pi anitya eva | - iti 
kathamuktam upalabdhuḥ svabhāvāt asau na nivartate ? - ityata āha


ahaṃ sukhī ca duḥkhī ca raktaścetyādisaṃvidaḥ |
sukhādyavasthānusyūte vartante'nyatratāḥ sphuṭam || 4 ||

vṛti: sa cānusyūta eva sarvāsvavasthāsu, yasmāt 'ya eva ahaṃ sukhī sa 
eva ahaṃ duḥkhī' 'rakto vā  p. 5) paścāt sthita' (k: pṛthaksthita; gh: 
paścātsita) iti anusyūtatvena; anyatra avasthāvyatirikte | yadāgamaḥ

'................ṣa svabhāvaḥ paraḥ smṛtaḥ |' iti 

ṭippaṇī: saṃvida iti bahuvacanasya (jñānasaṃtāna eva kṣaṇikaḥ 
svatantraḥ sa eva smṛtyutprekṣādipaddhatyā dūrataraṃ visāryamāṇo 
bahuprakāraṃ śākhopaśākhodbhinno'haṃpratītyāpi 
buddhyādyālambano nānyasya smartṛdraṣṭṭatābhimatasya 
saṃbandhitāmavalambate) ityevamabhiprāyaḥ, tathātve 
smṛtipratyabhijñādyanusaṃdhānaṃ na syāt asati ca tasmin 
sarvavyavahārocchedaḥ prasajyetetyetat sarvaṃ prasaktaṃ parihartuṃ 
viśiṣyate anyatreti, sukhitvādipratyayasaṃtānena pravartamānā -
vasthānāmupalabdhari pūrvāparavyavasthāvyāpakatayā 
sarvapramātṛsvānubhavasiddhe nirnirodhānusaṃdhātrekāśrayatva -
svabhāvaḥ śaṃkaraḥ suvyaktaḥ || 4 ||

vivṛti: (p. 26) ahaṃ sukhī ityādayo yāḥ saṃvidaḥ tā anyatra 
vartante tataḥ asau svabhāvāt ekasmāt na nivartate, - iti saṃbandhaḥ | 
antaraṅgatvāt mukhyā buddhyālambanāḥ saṃvido'tra nirdiṣṭāḥ | 
ādigrahaṇāt tu dehādyālambanāḥ saṃgṛhītāḥ | tāśca pūrvaṃ 
pratipāditāḥ | tena sarvā etāḥ saṃvidaḥ anyatra 
yathāpratipāditābhyaḥ sukhādibhyaḥ avasthābhyo vyatirikte 
sukhādyupalabdhari vartante, saritaḥ sāgare iva tatra vigalitānyonyabhedā 
aikyena avatiṣṭhante, tādātmyam āpadyante ityarthaḥ | etat ca sphuṭaṃ 
svānubhavasaṃvedyatvāt suprakaṭameva | ataśca ekaiva saṃvit 
upalabdhṛrūpā ahamiti sphurantī pāramārthikī, 
māyāśaktijanitatathāvidhasvabhāvaparāmarśābhāvabalāt 
sukhādyanityavastuvedakatvena (p. 27) ahaṃ sukhī duḥkhī ca - 
ityādinā buddhyādyavasthāsāmānādhikaraṇyam upagatā satī, 
saṃvida iti bahuvacanena nirdiṣṭā | yadi punaḥ 
sukhādivedyavastusaṃbandhāt sukhādivat saṃvido'pi ahaṃ 
pratyayarūpāḥ paramārthata eva vahvyaḥ syuḥ, tadā 
smṛtipratyabhijñādyanusaṃdhānaṃ na syāt; asati ca tasmin 
sarvavyavahārocchedaḥ prasaktaḥ; sa ca neṣṭaḥ; tataḥ anyatra iti 
nirdiṣṭasya arthasya viśeṣaṇam āha, - etāḥ saṃvidaḥ kīdṛśi anyatra 
vartante ? sukhādyavasthānusyūte sarveṣu sukhādiṣu 
sukhaduḥkhamoharūpeṣu avasthāviśeṣeṣu, 
utpādavināśadharmakatvāt anityeṣu, vedyatvasāmānyāt 
śabdādiviṣayasamānavṛttiṣu ahamiti upalabdhātmakena ekena rūpeṇa 
vyāpakatayā sthite | yataḥ ahaṃ sukhī duḥkhī ca ityevamādiṣu 
pratyayeṣu ullasatsu dvau arthau sphurataḥ | ekaḥ sukhādyātmā (p. 28) 
vedyarūpaḥ, - sa vedyatvādeva ghaṭādivat anityatvena nānātvena ca 
pratipadyate; ahamiti aparo vedakarūpaḥ, - sa ca 
pūrvāparāvasthāvyāpakatvena samastapramātṛprasiddhaḥ, 
sakalavyavahārahetoḥ anusaṃdhānasya kartā, nitya 
upalabdhṛmātrarūpatvāt eka eva prakāśate | tat evam, - yathā 
jāgradādinā hetunā vibhede prasarpatyapi ayam abhinnasvalakṣaṇa eka 
eva, tathā jāgradādyavasthāntargatasukhitvādipratyayasaṃtānena 
hetunā vibhede pravartamāne'pi abhinnasvalakṣaṇa eka eva; yataḥ ihāpi 
yo'haṃ sukhī jātaḥ, sa idānīṃ duḥkhī rakto vā sthita - iti 
ekānusaṃdhātṛnibaddhā eva avasthāḥ pratīyante | tasmāt 
anantajantusaṃtānavartibhiḥ aśeṣaiḥ avasthāviśeṣaiḥ īṣadapi 
anupajanitopalabdhṛmātrasvabhāvānyathābhāvaḥ, svayaṃsiddho, 
nityanirāvaraṇarūpatvāt (p. 29) sarvatra aniruddhaḥ, tāttvikaḥ, 
svasvabhāva eva śaṃkara iti | tat etat

	sa ca anusyūta eva sarvāsu avasthāsu

ityādinā vyākhyāya

	................................. sa svabhāvaḥ paraḥ smṛtaḥ ||

iti siddhāntīkṛtaṃ vṛttikṛtā || 4 ||
	evaṃ svasvabhāvasya śivatvena vyapadeśo yukta iti upapādya, 
idānīṃ tasya saṃgraheṇa lakṣaṇam anuvadan paramārthasattāṃ 
pratipādayitum āha 


na duḥkhaṃ na sukhaṃ yatra na grāhyo* (gh: na grāhyam) 
grāhako na ca |
na cāsti mūḍhabhāvo'pi tadasti paramārthataḥ || 5 ||

(* vivṛti: grāhyaṃ)
vṛti: tasya cāyaṃ svabhāvo - yat sukhaduḥkhagrāhyagrāhaka -
mūḍhatādibhāvairaspṛṣṭaḥ sa eva ca paramārthato'sti (k: 
paramārtho'sti) nityatvāt; sukhādayaḥ punaḥ saṃkalpotthāḥ kṣaṇa - 
(p. 6) bhaṅgurā ātmasvarūpabāhyāḥ śabdādiviṣayatulyāḥ ; na ca, 
sukhādisvarūpo yadā nāsau tadā pāṣāṇaprakhya eva || 5 ||

ṭippaṇī: sukhādirūpatāpratiṣedhena vāhyābhyantaratayā 
dvividhavedyatā pratiṣidhyate | grāhakaśabdena 
dehādimāyīyapramātṛbhāvaprati -kṣepaḥ | 
vedyavedanāsaṃcetanāvasthāpi uttarakālaṃ pratyava -
mṛśyamānatvāt vedyabhūmimāśritaiva iti jñānagocaraprameya -
vastutvaniṣedhāt abhāvamātraṃ pratikṣeptumāha tadastīti | 
sadoditāviluptopalabdhrekasvabhāvaṃ tat vedyavedakayoranyonyaṃ 
viprakṛṣṭasvabhāvatvāt, vedyamasatyasvabhāvaṃ kṣaṇabhaṅguraṃ, 
veditaiva paramārthasan iti pratipādyate |] || 5 ||

vivṛti: (p. 29) tat vakṣyamāṇaviśeṣaṇaṃ vastu 
svasvabhāvaśabdavācyaṃ paramārthataḥ tattvataḥ asti, tadvyatiriktaṃ 
sarvam asatyasadbhāvam ityarthaḥ | kiṃ tat ? yatra na duḥkhaṃ, na 
sukhaṃ, na ca grāhyaṃ, na grāhako, na mūḍhabhāvo'pi asti | 
anena sukhādirūpatāpratiṣedhena vedyatvam asya pratiṣidhyate | 
dvividhaṃ (p. 30) hi vedyam, - bāhyam ābhyantaraṃ ca | tatra 
ābhyantaraṃ sukhādi antaḥkaraṇavedyatvāt; tat yatra nāsti, 
pratipāditaviviktavedakaikasvabhāvatvāt tasya | bāhyaṃ tu śabdādi 
vedyaṃ, tat grāhyaśabdena nirdiṣṭaṃ, śrotrādibāhyendriyagṛhītaṃ hi 
tat antaḥkaraṇena sukhādyātmakaṃ vedyate; tadapi yatra nāsti | na hi 
tasya rūpaṃ śabdādiviṣayātmakatvena grāhyatām āpadyate | 
grāhako'pi māyīyaḥ pramātā atra vivakṣitaḥ, na tu tāttvika 
upalabdhṛmātrasvarūpaḥ, tasya evaṃ nityasattvena pratipādyamānatvāt 
| evaṃ māyīyo dehādyahaṃkāramayo grāhako'pi yatra nāsti | 
grāhakamiti tu pāṭhe, grāhakam indriyam iti vyācakṣate; tadapi yatra 
nāsti | evaṃ grāhyagrahaṇasvarūpavyatiriktaṃ 
grahītṛmātrasvabhāvaṃ yat tattvaṃ tat asti iti |

	nanu ca evaṃ sati, mūḍhāvasthaiva asau -

(p. 31) iti pratipāditaṃ bhavati, tasyāṃ hi sukhādirūpatābhāvaḥ | etat 
nirākartum āha, - na cāsti mūḍhabhāvo'pi iti, - mūḍhasya bhāvo 
mūḍhatvaṃ vedyavedanasāmarthyābhāvaḥ; so'pi yatra nāsti na 
vidyate; yataḥ tasyāpi avasthāntare mūḍho'hamāsam - iti 
pratyavamṛśyamānatvāt vedyatvaṃ sthitameva, kevalaṃ 
tatkālamanupalambhaḥ | vedyatvasadbhāve ca mūḍhāvasthāyāḥ 
kathaṃ vedakaikasvabhāvavasturūpatvaṃ syāt ? yadyevaṃ 
mūḍhabhāvo'pi tatra nāsti, 
tatpratipattigocarasamastavedyavasturūpatāpratiṣedhāt abhāvamātraṃ 
tat, - iti pratipāditaṃ syāt | tatpratikṣepārtham āha, - tadasti 
paramārthataḥ iti; - yat evaṃviśiṣṭatayā vyākhyātaṃ, tat vastu 
paramārthataḥ asti, satatam aviluptopalabdhṛmātralakṣaṇasvabhāvatvāt | 
yat punaḥ sukhādi, tat kalpanāmātralabdhātmakaṃ kṣaṇabhaṅguraṃ 
sarvadā vedyameva, vedakaikasvabhāvāt ātma (p. 32) no dūrabhinnam | 
ato yat yat vedyabhūmikāyāṃ vartate, tat sarvam asat, anityatvāt | yastu 
vedakaḥ, sa eka eva paramārthasan ityarthaḥ | tat idaṃ 

	tasya cāyaṃ svabhāva

ityādinā granthena vṛttikṛtā vyākhyātam || 5 ||
	idānīm asya paramārthasata ātmana eva śivasya 
samastavastusaṃpādanasvatantraśaktitvapratipādanapūrvam 
upādeyatamatvam upadeṣṭuṃ yugalakamāha


yataḥ karaṇavargo'yaṃ vimūḍho'mūḍhavat svayam |
sahāntareṇa cakreṇa pravṛttisthitisaṃhṛtīḥ || 6 ||
labhate, tat prayatnena parīkṣyaṃ tattvamādarāt |
yataḥ svatantratā tasya sarvatreyamakṛtrimā || 7 ||

(yugalakaṃ)

vṛti: (p. 7) 	yataḥ (kh: yata ityanantaraṃ 'caitanyasvabhāvāt' 
ityapyadhikaḥ pāṭho'sti |) karaṇavargasya antaścakrasahitasya 
vibhūḍhasyāpya -mūḍhavat utpattisthitinirodhāḥ, so'nyeṣāṃ 
caitanyāpādane samarthaḥ kathaṃ niḥsvabhāvaḥ || tasmāt tat tattvaṃ 
yatnena parīkṣitavyaṃ yoginā, yathāsya karaṇādiṣu caitanyadāne 
svātantryam, tathā parapurādiṣvapi saṃbhāvyate; svātantryasya 
svasvabhāvabhūtasya sarvatrākṛtṛmasyābhyāsāt yato vyaktiḥ (k, g, gh: 
yadā vyaktiḥ) || 6 - 7||

ṭippaṇī: utpattiḥ vividiṣitaviṣayamukhaprekṣitvātmasamunmiṣada-
vasthā | sthitiḥ uparaktārthacamatkṛtiviśrāntyavasthā | nirodhaḥ 
kṛtakṛtya -tayā viṣayasya svātmasātkaraṇe 
svatryāpāroparatyātmapratyasta -mayāvasthā ityetā yatsaṃparkabalāt 
trayodaśasaṃkhyānāṃ karaṇānāṃ 
jaḍatayābhimatānāmupalabhyāḥ | paramārthatattva -mātmabhāvena 
vijñātaṃ karaṇasvātantryādhānavat sarva -
sādhāraṇārthasvātantryalābhāyāpi abhyāsātiśayadaśāparipāke 
kalpate, tasya svecchāmātrādhīnasamastanirmātṛtvalakṣaṇaṃ 
svātantryaṃ samāveśasaṃpattimatsu dehataddaśāviśeṣeṣu 
upādānasahakāryādikāraṇanirapekṣaṃ sahajasiddhaṃ 
saṃsāridaśāyāmapi tanmahimnaiva vyavahārasiddheḥ, māyāvyā -
mohamātravaśāt tu svātmapratyavamarśābhāve vyatiriktakāraṇa -
sāpekṣatayā vastusiddheḥ pāratantryavyavahāra ityatra 
svātantryapratipādanāt upādeyatātiśayyate | || 6-7 ||


vivṛti: (p. 32) tat tattvaṃ svasvabhāvākhyaṃ vastu paramārthasattvena 
avasthitaṃ prayatnena prakṛṣṭena yatnena satatam aviluptena udyogena, 
ādarāt śraddhātiśayāt (p. 33) parīkṣyaṃ sarvāsu anubhavadaśāsu 
vakṣyamāṇopadeśānusāreṇa krameṇa, 
vedyavedakalakṣaṇarāśidvayavibhajanaparatayā, 
vedakasvarūpaparāmarśāt ātmatvena sphuṭīkāryam | yataḥ tasya iyam 
adhunaiva prastutavyākhyānā svatantratā 
svecchāmātrādhīnasakalakāryakartṛtvarūpā sarvatra sarvasmin dehe 
daśāviśeṣe vā avasthitasyāpi akṛtrimā sahajaiva, na tu 
upādānasahakāryādikāraṇāntarāpekṣiṇī, - yataḥ saṃsāriṇāmapi 
tatsvātantryamahimnaiva samastavyavahārasaṃpattiḥ; 
māyāvyāmohavaśāt tu satyasvabhāvaparāmarśābhāvāt sarvaḥ 
saṃsārī paratantra iva vyavaharati sarvakriyāsu 
vyatiriktakāraṇāpekṣasarvārthasiddhikatvāt, - tasmāt 
svābhāvikasvātantryaprāptaye tat tattvaṃ parīkṣyam, na tu 
sukhaduḥkhamohagrāhyagrāhakarūpapratiṣedhāt tat avastubhūtam 
avagantavyam iti upadiṣṭam | idānīm (p. 34) iyam iti nirdiṣṭāṃ 
svatantratāṃ pratipādayituṃ yacchabdaviśiṣṭaṃ viśeṣaṇaṃ 
vyākhyāyate | - kiṃ tat tattvaṃ parīkṣyaṃ ? yato yasmāt ayaṃ 
karaṇavargaḥ karaṇānāṃ śrotrādīnāṃ bāhyānāṃ, 
manaḥprabhṛtīnām ābhyantarāṇām indriyāṇāṃ vargaḥ 
trayodaśakaraṇasamūhaḥ pravṛttisthitisaṃhṛtīḥ labhate pravṛttiḥ 
jighṛkṣitārthonmukhatāsamunmipadavasthā, sthitiḥ 
gṛhītārthaviśrāntyavasthā, saṃhṛtiḥ kṛtakṛtyatvāt 
bāhyārthaparityāge svavyāpāroparamaḥ pratyastamayāvasthā, etāḥ 
labhate prāpnoti | kīdṛśaḥ karaṇavargaḥ ? vimūḍhaḥ prāyaśo 
jaḍatayaiva prasiddhaḥ | kathaṃ labhate ? amūḍhavat cetanavat | etat 
uktaṃ bhavati - prākṛtaṃ jaḍamapi etat bāhyābhyantaram indriyacakraṃ 
pravṛttyādicetanavyāpārasamarthaṃ yatsaṃsparśabalāt bhavati, tat 
tattvam ātmatvena sphuṭīkṛtaṃ sat indriyacaitanyāpādanasvātantryavat 
sarvaviṣayasvātantryalābhāya (p. 35) kalpate eva; ataḥ parīkṣyaṃ, yena 
abhyāsadaśāyāmeva abhivyajyamāne svātantrye 
paraśarīrāveśādikrīḍā upapadyate | tat idam

	na ca sukhādirūpo yadā nāsau

ityādinā

	tasmāttattattvaṃ yatnena parīkṣitavyam

ityādinā ca pṛthak vyākhyātaṃ vṛttau || 7 ||
	nanu kimidam ucyate, - tat kiṃcit tattvaṃ parīkṣyaṃ yadvaśāt 
indriyāṇi cetanībhavantīti, kila evaṃ vyavahāro vyavasthitaḥ, - sarvaḥ 
kaścit cetanaḥ pramātā dharmādharmasaṃbandhāt icchākhyena 
guṇena saṃyujyamāno heye upādeye vā viṣayabhūte prayatnavān 
bhūtvā, tenaiva icchākhyena guṇena karaṇavargaṃ jaḍameva 
tattadviṣayahānopādānādau prerayati; sa ca tatprerito jaḍa eva 
dātrādivat svakāryaṃ karoti | tat kathamuktam; - yataḥ kāraṇabhūtāt 
amūḍhavat (p. 36) pravṛttyādi labhate iti; vyākhyātaṃ ca, - 
yatsaṃsparśabalāt eva hetoḥ 
pravṛttyādicetanavyāpārasaṃpādanasamartho bhavati ? - ityāśaṅkya 
yathā eṣa karaṇavargaḥ cetanībhavati tathā saṃsāripuruṣasya 
vyavahārapradarśanena sphuṭīkartumāha 


na hīcchānodanasyāyaṃ prerakatvena vartate |
api tvātmabalasparśātpuruṣastatsamo bhavet || 8 ||

vṛti: (p. 8)	na ca icchāpreṣaṇena karaṇāni preṣayati (g: icchāpreraṇena 
karaṇāni prerayatītyapi pāṭhāntaraṃ vartate |), api tu svasvarūpe 
sthitvā kevalaṃ yādṛśī tasyecchā pravartate tathāvidhameva sa 
bāhyāntaraṃ kāryamutpādayati, tena na karaṇaviṣayameva 
sāmarthyam, kiṃ tu tatsya sarvatra || 8 ||

ṭippaṇī: ayamatrāśayaḥ - yathā parameśvaraḥ 
pūrṇajñātṛtvakartṛtvaśakti -bhyāṃ jaganti pravṛttyādivyāpāraṃ 
lambhayan viśvatra jñāna - kriyāvattāmadhirohati 
evamanuttaratadbalasaṃparkādeva yogino 
jñātṛtvādisāmathyaimupajāyate māyāvaśāt saṃkoconmukhī -
bhāvena jñānakriye śaktī api antarbahiṣkaraṇatayā saṃkucitībhūya 
prasṛte pratinijaniyataviṣayeṣu vyāparituṃ śaknutaḥ ityato'ṇurapi 
svasvabhāvamadhyāsya karaṇacakrapreraṇādau svatantro na tu asya 
dharmādharmasaṃbaddhecchākhyaguṇapreraṇayā 
karaṇacoditadātrādivadupacaritakartṛtvam || 8 ||


vivṛti: (p. 36) nahi na khalu icchānodanasya icchaiva nodanaṃ, nudyate 
anena iti pratodādi karaṇaṃ, tasya prerakatvena indriyavargaṃ prati 
codakatvena asau puruṣaḥ saṃsārī pramātā vartate avatiṣṭhate | yathā 
kaścit devadattādiḥ kenacit karaṇabhūtena hastādinā jaḍaṃ pratodādi 
prerayati, na evam ayam āntaraḥ puruṣaḥ icchayā jaḍaṃ karaṇavargaṃ 
svaviṣaye pravartayati; api tu ātmabalasparśāt ātmanaḥ parasya 
pramātuḥ sarvakartuḥ īśvarasyaiva (p. 37) svabhāvasyaiva yat balaṃ 
sāmarthyaṃ kāraṇāntaranairapekṣyeṇa akhilavastusaṃpādanaśaktatā, 
tatsparśāt tatsaṃparkāt tatsamo bhavet tena ātmaśabdoktena pareṇa 
kartrā tulyaḥ saṃpadyate | idamatra tātparyam, - yatraiva svasvabhāve 
sthitvā ātmaśabdapratipāditaḥ parameśvaro jagadidaṃ 
pravṛttisthitisaṃhṛtīḥ yatheṣṭaṃ lambhayituṃ svatantraḥ, tatraiva 
sthitvā puruṣo'pi ayaṃ saṃsārī karaṇavargaṃ svaviṣaye pravṛttyādi 
lambhayituṃ svatantraḥ, tena tatsamo bhavet iti uktam | tato yathā īśvaraḥ 
sarvavyāpikābhyāṃ jñānakriyākhyābhyāṃ śaktibhyāṃ, viśvaṃ 
pravṛttyādi prāpayan sarvaṃ jānāti ca karoti ca, tathā puruṣaḥ 
tadbalasparśādeva upajātajñatvakartṛtvasāmarthyo māyāvaśāt 
niyataviṣayābhyāṃ jñānakriyāśaktibhyāṃ 
antarbahīrūpakaraṇavargatayā prasṛtābhyāṃ svaviṣayaṃ jānāti ca 
karoti ca, - iti tatsāmyam asya uktam

	na ca icchāpreraṇena karaṇāni prerayati

(p. 38) ityādi vivṛtametat vṛttau || 8 ||
	nanu svavyāpāre karaṇavargaṃ pravartayan puruṣaḥ 
īśvarabhūmikāsādanāt tadvat svātantryam āpnoti, - iti tayoḥ 
īśvarapuruṣayoḥ abhedaḥ eva pratipāditaḥ syāt; kathaṃ 
bhedanibandhanam īśvarasāmyaṃ puruṣasya pratipāditaṃ tasyāṃ 
daśāyām ? - ityata āha


nijāśuddhyāsamarthasya kartavyeṣvabhilāṣiṇaḥ |
yadā kṣobhaḥ pralīyeta tadā syātparamaṃ padam || 9 ||

vṛti: sa cāsya ātmabalasparśaḥ (kh: sa ātmabala) sahajayā aśuddhyā 
vyāptasya kāryamicchato'pi na bhavati, kiṃtu yadā kṣobhaḥ 'ahamiti' 
(gh: kṣobho dehādyahamiti śodhitapāṭhaḥ, pralīyate iti ca pāṭho'sti |) 
pratyayabhāvarūpo'sya pralīyeta (p. 9) tadāsya bhavati parame pade 
pratiṣṭhānam || 9 ||

ṭippaṇī: satyapi parameśvarasāmyāsādanāt īśvarapuruṣayorabhede 
kevalaṃ puruṣasya rāgādinibandhanamalākrāntatayā 
anityaparipūrṇatṛptitā, yayā sādhyasādhanopārjaneṣu aśaktatvena 
śaktidāridryam, ata eva bhedanibandhanamīśvarasāmyaṃ 
māyīyopadravapralaye punaḥ saṃvidaikātmyamanupacaritaprathaṃ saiva 
paramaśuddhiḥ |] || 9 ||


vivṛti: (p. 38) satyam, asti abhedaḥ tasyām avasthāyām anayoḥ | kintu 
ayaṃ puruṣo nijayā sahajayā 
dehādyātmapratipattimūlarāgādirūpayā aśuddhyā malena hetunā 
abhilāṣī kṣaṇikasukhalavalubdhaḥ, tayaiva ca 
tatsādhanabhūtaviṣayāvāptihetuṣu kartavyeṣu kriyāsu asamarthaḥ 
śaktidaridro - yataḥ icchan api abhimataṃ na āpnoti - ; evaṃvidhasya asya 
yadā yasmin (p. 39) kāle kṣobhaḥ 
pratiniyataśarīrādyālambanāhaṃpratyayātmā māyīya upaplavaḥ 
pralīyeta kṛtrimālambanottirṇasvābhāvikāhaṃpratyayaprabhākara-
prakāśasaṃparkāt prāleyapaṭalavat vigalet vinaśyet; tadā paramaṃ 
niruttaraṃ padaṃ sthānaṃ syāt sadbhāvena prakāśeta - abhedaḥ 
ātmapuruṣaśabdapratipāditayoḥ parāparayoḥ saṃvidoḥ tasyāmeva 
daśāyām upalabhyatayā pratheta ityarthaḥ | tadetat - svasvabhāve 
pratiṣṭhānam idam (iti) anena ślokena pratipāditam | upapādyatāṃ 
nāma darśanāntareṣu taistaiḥ prakāraiḥ aśuddhiḥ asya puṃsaḥ; iha tu 
etāvatyeva asau, - yat acitsvarūpeṣu anityeṣu paratantreṣu dehādiṣu 
tadvilakṣaṇārthaniṣṭhatayā upapannaḥ ahaṃpratyayaḥ pravartate; 
tāvanmātranibandhanā hi sarvāḥ saṃsāritvapratipattayaḥ; tasminneva 
vigalite svasvabhāvābhivyaktilakṣaṇā parā (p. 40) śuddhiriti | yaduktam

	jāte dehapratyayadvīpabhaṅge
		prāptaikadhye nirmale bodhasindhau |
	avyāvartyaivendriyagrāmamanta-
		rviśvātmā tvaṃ nityameko'vabhāsi ||

tathā

	nātmādhīnatve'pi viśvaṃ niyoktuṃ
	sarvo hastādīniveṣṭe yatheṣṭam |
		bālo rājevātmaśaktyaprabodhāt
	tvayyantaḥsthe sarvaśaktistu sarvaḥ ||

iti | tadetat tāvat

	sa cāsya

ityādinā vṛttau vyākhyātam || 9 ||
	nanu pralīnadehādyahaṃpratyayalakṣaṇakṣobho 
nirvātaniścalajaladhivat supraśāntasthitiḥ ātmaiva 
paramapadaśabdapratipāditaḥ; tat kathaṃ tadbalasparśāt puruṣaḥ 
tadvilakṣaṇaṃ kṣobhātmakameva dharmam āsādayet, yena yukta 
indriyavargaṃ pravṛttyādi lambhayan, ahaṃ karomi, ahaṃ jānāmi, (p. 
41) iti svaviṣayaṃ pratipadyamānaḥ kṣubhita eva bhavati ? - iti 
anātmajñānāṃ mativibhramabhaṅgāyāha


tadāsyākṛtrimo (k: tadā syātkṛtrima) dharmo 
jñatvakartṛtvalakṣaṇaḥ |
yatastadīpsitaṃ sarvaṃ jānāti ca karoti ca || 10 ||


vṛti: yataḥ, tasmin pralīnakṣobhātmake kāle akṛtrimaḥ sahajo 
jñatvakartṛtvabhāvarūpo dharmo (kh, gh: dharma iti śabdo nāsti |) 
yasmāt, tasmin eva prāptayogātma -ke kāle yat yat jñātum icchati tat tat 
jānāti ca karoti ca; nānyadā saṃsāryavasthāyām || 10 ||

ṭippaṇī:  ekameva avyabhicāri ātmana upalabdhṛtvaṃ nāma 
ayutasiddho guṇaḥ svātmapratyavamarśarūpaḥ, sa eva 
jñeyakāryaviṣayatayā jñāna -kriyādvairūpyeṇa āmnāyate asyaiva 
guṇasya svamahimavijṛmbha -ṇaṃ niruparodhaṃ svasaṃvedanīyaṃ 
kevalaṃ sarvajñatvasarvakartṛtvaśaktivikāsinyupalabdhṛlakṣaṇe 
āspadevi -kalpakalaṅkopaplavāsaṃpṛkte | yasmāt tatra 
jñeyakāryapratyava -mṛśyeṣu niryantraṇaṃ svātantryaṃ, yattu 
saṃsāryavasthāyāma -khyātimugdhatayā vedyeṣu 
jñatvakartṛtvāhaṃmatiḥ sā kṛtrimā parimitā ca 
niyamitasvātantryagatimattvāt ato jñatvakartṛtvalakṣaṇo dharmaḥ 
svabhāva eva na punaḥ kṣubdhāvasthā | tasmāt svabalasaṃsparśāt 
karaṇacakrapravartanādikāryavṛttyā saṃyujya -mānasya 
tatsāmyopalabdhiḥ || 10 ||


vivṛti: (p. 41) tadā tasmin yathoktakṣobhaparikṣayopalakṣite kāle, 
ātmanaḥ asya akṛtrimaḥ sahajasiddhaḥ satatamavyatirikto 
jñatvakartṛtvalakṣaṇo dharmaḥ guṇo'styeveti śeṣaḥ; yato yasmāt 
avyabhicāriṇo guṇāt kāraṇabhūtāt sarvam akhilam īpsitaṃ 
jñeyatayā kāryatayā avāptumiṣṭaṃ vastu, sa puruṣaḥ tadā tasyāṃ 
daśāyāṃ satyasvabhāvasaṃbandhalakṣaṇayogātmikāyāṃ, na tu 
anyadā - dehādyālambanāhaṃpratītisārasaṃsāripuruṣadaśāyāṃ 
jānāti ca karoti ca | kim uktaṃ bhavati ? - jñatvamupalabdhṛtvaṃ 
nāma asyātmano'vyatirikto guṇaḥ; sa ca idantāvaseyasya (p. 42) vastuno 
jñeyatayā kāryatayā ca dvaividhyāt dvitvena upacaryate | vastuta ekaiva 
īśvarasya svabhāvapratyavamarśarūpā śaktiḥ; sā 
saṃvedanarūpatvāt jñānaśabdena ucyate, 
tāvanmātrasaṃrambharūpatvāt kriyāśabdena ca udghoṣyate | sa ca 
evaṃvidho dharmaḥ asya vedyatvapratītyupaplavāsaṃspṛṣṭe 
vedakaikalakṣaṇe svabhāve sthitasya sarvajñatayā sarvakartṛtayā ca 
vijṛmbhate | yat punaḥ tādṛksvabhāvapratyavamarśābhāvāt vedya eva 
dehādau vedakapratyayanibandhanaṃ jñatvaṃ kartṛtvaṃ ca, tat 
kṛtrimaṃ parimitaviṣayaṃ ca | tasmāt ātmano 
jñatvakartṛtvalakṣaṇāvyatiriktadharmatā svabhāva eva, na tu 
kṣobhāvasthā | tādṛśaṃ ca ātmabalaṃ spṛśan saṃsāripuruṣaḥ 
karaṇavargapravartanādinā svaviṣaye jñatvakartṛtvābhyāṃ 
yujyamānastatsamo bhavet - iti yat uktaṃ tadeva upapannam | tadetat

	yatastasminpralīnakṣobhātmake kāle

ityādinā vṛttikṛt vyācaṣṭe || 10 ||

(p. 43) ittham ātmasvarūpam upapattyā vyavasthāpya 
tatpratipattiphalaṃ pradarśayitum āha

tamadhiṣṭhātṛbhāvena svabhāvamavalokayan |
smayamāna ivāste yastasyeyaṃ kusṛtiḥ kutaḥ || 11 ||

vṛti: tadevam, yataḥ sarvānusyūtaḥ sarvasāmarthyayuktaśca 
ātmasvabhāvaḥ, tasmāt tam adhiṣṭhātṛbhāvena sarvavyāpakatvena 
svabhāvaṃ paśyan, vismayāviṣṭa iva yastiṣṭhati, tasya kutsitā sṛtiḥ 
saraṇaṃ na bhavati || 11 ||

ṭippaṇī: upapattivyavasthāpitasya śaṃkarasvabhāvasya 
aviratakālaprabandha -tayā sadoditāntarbahīrūpatayā 
sphuradadhiṣṭhātṛtvaṃ pratyabhijā -nato 
vismṛtaśivasvarūpavijñānāt 'māyīyapramātṛbhāvo'sanneva itthaṃ 
śuktikārajatavadbhāsamānaḥ' ityevaṃ vimraṣṭuranukṣaṇaṃ 
navanavānuttarātiśayacamatkārarasāsvādanena vismayāvasthitira -
laukikī anubhavapadavīmadhiśete yatprāptau parimitāhaṃmatiniban -
dhanaḥ saṃsaraṇāyāsakṣobho viramyate iti || 11 ||


vivṛti: (p. 43) tam iti sarvanāmnā ślokadaśakapratipāditamātmatattvaṃ 
pratyavamṛśyate | tam evaṃlakṣaṇaṃ svabhāvam ātmānam 
adhiṣṭhātṛbhāvena sarvaśarīreṣu sarvāvasthāsu sarvadā sarvatra 
anubhavitṛmātreṇa sarvam ākramya avasthitatvāt ananyādhiṣṭheyaḥ 
ahameva ekaḥ svatantraḥ parameśvaraḥ adhiṣṭhātā ityevaṃrūpatayā 
avalokan uktayā upapattidṛśā vakṣyamāṇayā ca 
upalabdhyupadeśadṛśā paśyan pratyabhijānan smayamān iva 
vismṛtaparapramātṛrūpātmatattvapratyabhijñānāt 
māyīyapramātṛsvarūpam asatyamapi itthaṃ prathamānaṃ vimṛśan 
vismayamiva āpanno ya āste nirviplavāṃ sthitim anubhavati, tasya 
evaṃlakṣaṇasya (p. 44) yoginaḥ iyaṃ suprasiddhā 
dehādyahaṃpratītimātramūlā kusṛtiḥ 
janmajarāmaraṇādidvandvayogāt kutsitā garhitā sṛtiḥ saraṇaṃ 
nānāyonyantarabhramaṇaṃ kutaḥ ? - pratipāditakṣobharūpāyā 
aśuddheḥ hetubhūtāyā abhāvāt asīnasya gatiriva nāstyeva ityarthaḥ | 
vṛttikṛtā ca

	evaṃ yataḥ sarvānusyūta eva ayamātmā

ityādinā vyākhyātametat || 11 ||
	idānīṃ samastavedyadharmavirahitasvarūpasyātmatattvasyo-
pādeyatayā pratipādanādabhāva eva prāpyatayopadiṣṭo bhavati - iti 
manyamānān pratibodhayitumāha


nābhāvo bhāvyatāmeti na ca tatrāstyamūḍhatā |
yato'bhiyogasaṃsparśāttadāsīditi niścayaḥ || 12 ||

vṛti: (p. 11) na tu abhāvo bhāvanīyo, yathā anyairyogibhiḥ upadiśyate, 

'abhāvaṃ bhāvayettāvadyāvattanmayatāṃ vrajet |'

iti | na caitat yuktam, yasmāt nābhāve bhāvanā yujyate mūḍhāvas -
thaiva sā, yasmāt uttarakālam abhiyogasaṃsparśāt (k: abhilāṣeti; g: 
saṃyogātmā śūnyeti ca pāṭhaḥ|) abhilāpasaṃyogāt sā 
śūnyāvasthā atītā mama iti smaryate, na ca ātmasvabhāva eṣaḥ, 
yasmāt na tvevaṃ cidrūpatvaṃ mūḍhāvasthāvat smaryate, tasya 
sarvakālamanubhavitṛtvenānubhavo nityoditatvāt || 12 ||


ṭippaṇī: vedyavedanollekhocchedarūpe samādhau kaiścidabhāva iti 
manyate, na caitat tasya bhāvyamānatayā vyāghātāt 
tatralabdhapratiṣṭhena yoginā abhāvasamādhervyutthāya uttarakālaṃ 
'sā daśā mayānva -bhūyata' ityanusaṃdhānena taddaśāntaraṃ 
smaryamāṇatāṃ nīyate tat smaraṇameva tadānīmanubhavitṛsattāṃ 
viviktāmupalambhayet iti smaryamāṇaṃ vastu abhāvarūpaṃ svātmā 
bhavituṃ nārhati sukhādivat tasya vedyatvāt iti | tasmāt 
samastavedyadharmojjhitaḥ parasvabhāva upādeyaḥ || 12 ||


vivṛti: (p. 44) abhāvo vastuśūnyatā bhāvyatāṃ bhāvanīyatvaṃ 
samādhāvālambanabhāvaṃ naiti na gacchati, 
abhāvabhāvabhāvanayoḥ parasparavirodhāt | bhāvo (p. 45) hi 
saṃvidviṣayatāyogyaḥ padārtho, dhyeyatayā ālambanībhavitumarhati, 
na punaḥ na kiṃcit | yathā kvacit upadiṣṭam

	abhāvaṃ bhāvayettāvadyāvattanmayatāṃ vrajet ||

iti | bhavatu vāsau dhyātṛ - dhyāna - dhyeyavikalpocchedarūpā 
samādhyavasthā, yāmabhāva iti manyante vismṛtātmānaḥ | na ca tatra 
tasminnavasthāviśeṣe amūḍhatā mūḍhatvābhāvo vidyate, 
yato'bhiyogasaṃsparśāt vyutthānāvasare 
tādṛgdaśāntarānusaṃdhānaviṣayeṇābhiyogena 
tatkālapratyuditenābhilāpena saṃsparśāt saṃparkāt tat daśāntaram 
āsīt abhūdatītam iti niścayaḥ adhyavasāyaḥ syāt | kim uktaṃ bhavati 
? - abhāvasamādhilabdhapratiṣṭho yogī tato vyutthitaḥ san yadi 
tāmavasthāṃ nānusaṃdadhyāt tat kathaṃ labdhapratiṣṭho'smi - iti 
pratyayo'sya syāt ? asati ca tasmin samādhivyutthānayoḥ (p. 46) 
vyatirekāgrahaṇam | tasmāt tadānīṃ tādṛśīṃ daśām aham 
anvabhavam - iti avaśyaṃ smaryate | tacca atītatvena smaryamāṇatvādeva 
anityaṃ sukhādivat ātmanaḥ svarūpaṃ na bhavati; tasya cidrūpasya 
anubhavitṛtvena sarvadā vartamānatvāt smartrantareṇa 
smaryamāṇatvaṃ na saṃbhavati | vyākhyātam etat vṛttau

	na tvabhāvo bhāvanīyaḥ,

ityādinā || 12 ||

	tat sphuṭīkartum āha

	atastatkṛtrimaṃ jñeyaṃ sauṣuptapadavatsadā |
na tvevaṃ smaryamāṇatvaṃ tattattvaṃ pratipadyate || 13 ||

vṛti: (p. 12) abhāvabhāvanālabdhabhūmikasyāpi kṛtrimā anityā sā 
avasthā, yathā sauṣupte pade; yasmāt cidrūpatvaṃ tu ātmanaḥ 
svarūpaṃ nityasaṃnihitam, tadeva gurupadeśena nityamevānu -
śīlanīyam || 13 ||

ṭippaṇī: atraitaducyate - yathā mohaghanā suṣuptāvasthā tadātve 
vedyavedakavibhāgāgrahaṇamayī abhāvarūpeva upalabhyamānā 
prabodhadaśāyāmuditāvamarśagocaratāmāpadya smaryamāṇatve -
nānityā | evamabhāvasamādhyavasthāpi atītatvena prabodhakāle 
vicintyatvāt anityā - ityevaṃ - prāyāḥ samādhiviśeṣāḥ suṣupti -
daśāntarbhāvyāḥ, na punarupeyatamasvarūpe evaṃrūpo bhūta -
kālākrāntaḥ smaraṇapratyavamarśaḥ smartrantarasmāryaḥ, 
paratattvasya sadodita vijñātṛsvabhāvatayā śāśvatāvicalavidya -
mānaparamasattvāt || 13 ||

vivṛti: (p. 46) ata āsīt tat iti bhūtatvena abhiyujyamānatvāt tat 
abhāvasamādhisaṃjñitaṃ vastu kṛtrimaṃ jñeyaṃ 
bhāvābhāvadaśāyogitvāt kalpanākṛtam (p. 47) anityaṃ boddhavyaṃ 
sadā na kācidasau kālakalā vidyate, yasyāṃ sā tādṛśī 
samādhyavasthā nityatvena avatiṣṭhate | kathaṃ kṛtrimaṃ jñeyaṃ ? - 
sauṣuptapadavat suṣuptameva sauṣuptaṃ sukhasvāpāvasthā tadeva 
padaṃ saṃvidadhikaraṇaṃ tena tulyam | kimuktaṃ bhavati ? - yathā 
laukikī suṣuptāvasthā niviḍamohātmakatvāt sato'pi 
vedyavedakavibhāgasya tatkālam agrahaṇe sati abhāvarūpā iva satī 
prabodhakālapratyuditānusaṃdhānaviṣayatām āpādyamānā 
atītatvena smaryamāṇatvāt anityā, tadvat abhāvasamādhyavasthāpi 
anityā, vyutthānasamaye bhutatvena smaryamāṇatvasāmyāt | etena sarve 
evaṃprāyāḥ samādhayaḥ suṣuptāvasthāyāmeva antarbhavanti - iti 
pratipāditam na tu punaḥ tat tattvam iha upādeyatamatayā upadiṣṭaṃ 
svasvabhāvalakṣaṇaṃ vastu evam anena uktaprakāreṇa 
smaryamāṇatvaṃ pratipadyate tasya hi nityoditatvāt (p. 48) sadā 
vartamānatvameva | tadetat 

	ato'bhāvabhāvanayā samādhilabdhabhūmikasyāpi

ityādinā vṛttau vivṛtam || 13 ||
	athaivaṃ nityoditatvāt sadā prakāśamānamapi tat tattvam 
apratyabhijñāyamānatvāt bandhahetuḥ; ato labdhopadeśena 
sarvāvasthāsu 
vedyavedakarūpatattvadvayasaṃgṛhītaviśvaprapañcavibhajanaparatayā 
vedakāṃśam ahamiti sarvavedyasvarūpottirṇameva pratyavamṛśatām 
ātmīkāryam | - iti upadeṣṭuṃ tasya tattvasya 
svamāyāvaibhavodbhāsitaṃ dvairūpyaṃ pratipādayitumāha


avasthāyugalaṃ cātra kāryakartṛtvaśabditam |
kāryatākṣayiṇī tatra kartṛtvaṃ punarakṣayam || 14 ||

vṛti: (p. 13) avasthāyugalam (k, g: avasthāyugalamiti vākyaṃ nāsti |), 
avasthādvayameva kāryakartṛtvasaṃjñaṃ bhogyabhoktṛbhedabhinnaṃ, 
tatra yo bhogyarūpo bhedaḥ sa utpadyate naśyati ca; bhoktṛbhedastu (kh: 
bhoktṛrūpa) cidrūpaḥ punarnajāyate, na kadācit vinaśyati tena nityaḥ || 
14 ||


ṭippaṇī: avasthāśabdenedamatra uddeśyam | eka eva svatantraḥ 
parameśvaro viśvatra paramārthataḥ samasti | sa eva 
anuttaraniryantraṇasvātmai -śvaryaśaktivijṛmbhaṇayā 
nirupādānasaṃbhāraṃ dvividhaṃ svātmānamavabhāsya vikrīḍati | 
dvaividhyaṃ ca kāryakartṛtvā -khyaṃ, yena heyatayopādeyatayā ca 
dvailakṣaṇyaṃ vastu saṃgṛhyate | tatra kāryāvasthā 
paraprakāśopajīvinī antareṇa prāśayitāramava -sthātumaprabhuḥ 
tadabhinnaṃ nijarūpamāvedayati śāktollāsamaya -tvāt, kevalaṃ 
kāryatopādhiracirāyaiva anuvilayī, kartṛtāvasthitiḥ punaḥ 
sadoditāviluptadṛśimātradharmakatvāt avināśinī iti | tadevaṃ 
svamāyodbhāsitaviśvollāsajñaptipūrvaṃ svasaṃvedyamuttirṇa -
tamamātmānaṃ nididhyāsatāṃ sarvāvasthāsu bandhahetunivṛttiḥ || 14 
||

vivṛti: (p. 48) atra asmin iha pratipādite ātmākhye parasmin tattve 
avasthāyugalaṃ dve avasthe saṃbhavataḥ | anena 
vividhadarśanaprakriyāprabandhavyavasthāpitatattvādibhedān [-bhedāt] 
aparyantamapi heyopādeyarūpaṃ vastu lakṣaṇadvayayogāt dvitvenaiva 
saṃgṛhya pratipāditam; ānantye'pi viśvavaicitryasya dve eva tattve 
ityarthaḥ | eka eva tu paramārthasan parameśvara ātmā nirupama - 
niṣpratīghāta - nirupādānanijaiśvaryaśaktibalād dvitvena ātmānam 
avabhāsayan krīḍati - iti pratipādayitum avasthāśabdena nirdeśaḥ 
kṛtaḥ, ekameva tat tattvaṃ dvitvena avatiṣṭhate ityarthaḥ | kīdṛśam 
avasthāyugalaṃ ? kāryakartṛtvaśabditaṃ kartṛtvena bhoktṛtvena 
vedakatvena cetanabhāvena aham iti ekā avasthā svatantrā, dvitīyā tu 
tadviparītā kāryarūpā bhogyā vedyā jaḍā paratantrā tābhyāṃ 
śabditaṃ kathitam | śabditaśabdena anayoḥ saṃjñāmātrabhedo, na 
vāstavaḥ - iti pratipāditam | tataḥ kāryarūpā (p. 50) yā iyam avasthā 
sā prakāśamānatvamātralabdhātmakatvāt ātmanaḥ paramakāraṇāt 
kartṛśabdena vyapadiṣṭāt prakāśaikasvabhāvāt na bhidyate, yataḥ 
śakticakrātmakasya svavibhavasya prabhavatvena etat tattvaṃ prāgeva 
pratipāditam | tatra tasmin itthaṃbhūte avasthāyugale kāryatā kṣayiṇī 
kāryarūpāvasthā kṣaṇabhaṅginī, yat yat idaṃ 
mukulitatattvaparāmarśatayā kāryarūpatvenaiva avasīyate, tat sarvam 
udayavyayasaṃbandhāt pratikṣaṇavinaśvaram kartṛtvaṃ 
punarakṣayaṃ kartṛrūpāvasthā nityā 
nityoditasarvāvasthāvyāpakatvopalabdhṛtvamātradharmakatvāt avināśi 
| tadevam ekameva kartāraṃ jñātāraṃ sarvādhiṣṭhātāraṃ satatam 
ātmatvena anusaṃdadhāno yastiṣṭhati tasya bandhānupapatīḥ - iti 
pūrvaślokena saṃbandhaḥ | tadetat 

	avasthādvayameva

ityādinā vṛttau vyākhyātam || 14 ||
(p. 51) nanu yat upalabdhṛrūpaṃ tattvaṃ tat akṣayamityuktaṃ; 
tacca nopapadyata eva; abhāvasamādhyavasthāsu 
upalabhyasvarūpābhāvāt; kathaṃ tasyākṣayatvam ? - ityākṣepe 
prākpratijñātaṃ samādhānamāha


kāryonmukhaḥ prayatno yaḥ kevalaṃ so'tra lupyate |
tasmiṃllupte vilupto'smītyabudhaḥ pratipadyate  || 15 ||


vṛti: kāryasaṃpādanasāmarthyaṃ bāhyakaraṇavyāpārarūpaṃ 
kevalaṃ vilupyate, sthagitendriyasya tasmin vilupte sāmarthye (p. 14) 
svabhāvo me (me iti padaṃ; gh: pustakādupanyastam |) vilupta iti abudho 
jānāti, na tu bhāvasya vināśo'sti || 15 ||

ṭippaṇī: vedyonmukhatāmavalambyaiva 
sahajodyamanaśakterviśvavaicitryo -llekhanakāritayā bahirvilasituṃ yaḥ 
prasaraṇādaraḥ sa kevalamindriya -
vyāpāraviratidaśāyāmanabhivyaktatayā ātmanyeva avalīnaḥ, 
tadavyaktidaśāyāmabuddhasya ayaṃ parāmarśo yat nāhamasmīti 
svābhāvaṃ sa manyate; naitat jānāti yat abhāvaparāmarśa eva pratyuta 
tatsākṣitayā svātmānaṃ sthirībhāvayati iti ato'bhāva -
samādhyādyavasthāsu tātkālikānupalabhyatayā ātmanaḥ kṣayitvaṃ 
naivākṣeptavyam || 15 ||

vivṛti: (p. 51) kārye nirmeye vedye vā vastuni unmukhaḥ tasya 
tathāsaṃpādane pravaṇo yaḥ prayatnaḥ kartṛtve (-tvaṃ) sahaja 
utsāhaḥ sa kevalaṃ sa eva paraṃ kāraṇaṃ vyāpārahetuḥ, tasyāṃ 
daśāyāṃ kāryasya sthūlarūpasya abhāvāt lupyate anabhivyaktatayā 
ātmanyeva nyagbhūyeva avatiṣṭhate | tasmin prayatne tatkālameva lupte 
sati abudhaḥ tattvāvabodhaśūnyo vilupto'smi - iti pratipadyate 
nāhamasmīti bhāvavilakṣaṇatayā vastu paricchindata evaṃvidhaḥ 
pratyaya upapannaḥ; (p. 52) paricchinatti cet kartṛtvena prathamataraṃ 
sanneva asau siddhaḥ kathaṃ niṣedhasya viṣayaḥ syāt ? tat idam āyātam, 
- yathā kaścit devadatto gṛhādyavasthitaḥ kenāpi āhūto - bho devadatta 
? - iti, sa ātmānam apahnotukāmaḥ pratyāha, - nāhamasmīti; evamukte 
pratyuta sthito'hamasmi - iti pratipāditaṃ bhavati, na tvasaṃnidhānam | 
tasmāt abhāvasamādhyavasthāsu kāryābhāvāt 
karaṇavyāpāraviratimātreṇātmābhāvapratyayo bhrāntireveti | 
vyākhyātametat vṛttau

	kāryasaṃpādanasāmarthyam

ityādinā || 15 ||
	enamevārthaṃ viśeṣayitum āha |


na tu yo'ntarmukho bhāvaḥ sarvajñatvaguṇāspadam |
tasya lopaḥ kadācitsyādanyasyānupalambhanāt || 16 ||


vṛti: na tu yaḥ antarmukhaḥ antaścakrārūḍhasvabhāḥ 
sarvajñatvādiguṇāśrayaḥ tasya vināśaḥ kadācit, (p. 15) tasmāt 
dvitīyasyānyasyābhāvāt tatsvarūpameva vyomavat cidrūpatayā 
sarvatra anubhavati iti || 16 ||

ṭippaṇī: ekaiva pārameśvarī śaktiḥ saṃkocagrahaṇopakrame 
svātmānaṃ dvidhā avabhāsya 
jñānakriyāyugalodbhāvanottaramatyantamarvā -cīnapade 
antarbahiṣkaraṇabhāvamupāśrayate saṃkocahānadaśā -
pariśīlanādau vividhībhūtaṃ svaṃ rūpaṃ pratyāhṛtya sarvato 
vimalanabhaḥprakhye vitatābhoge svasmin svānubhūtipāripūrṇya -
camatkṛtimāsvadate | tatra vibhinnavibhaktavedyābhāvāt antarmukha -
tattvasya vilopaḥ saṃbhāvayitumanarho yo bāhyavedyagrahaṇā -
grahavadbhiḥ vyāmūḍhaiḥ pratipadyate, athavā caturthapādasya 
hetubhāvena prayogaḥ, yasmādupalabdhṛsvarūpasya viluptau 
viśvamanelamūkaprāyaṃ syāt viśvavyavahāro'pi vyucchidyeta iti || 16 
||

vivṛti: na tu punaḥ tasya paramārthasataḥ parasya tattvasya (p. 53) 
kadācit kasyācidapi samādhyādyupalakṣitāyāṃ kālakalāyāṃ 
lopaḥ svarūpocchedaḥ syāt upapadyeta; anyasya tadvyatiriktasya 
vedyarūpasya anityasya vastunaḥ anupalambhanāt anubhavābhāvāt, na 
hi vedyaṃ nāsti, vedako'pi nāsti - iti vaktuṃ śakyam | kasya tasya lopo 
na syāt ? yaḥ antarmukho vyatiriktabāhyavedyābhāvāt antaḥ 
svātmanyeva mukhaṃ jñaśaktiryasya sa tādṛśo bhāva ātmākhyaṃ 
tattvaṃ, yataḥ sarvajñatvaguṇāspadaṃ 
sakalavedyavargavedakatārūpasya guṇasya dharmasyāspadam 
ananyasādhāraṇam adhikaraṇam | idamatra tātparyam - ātmano 
jñānakriyābhedena dvividhā yā śaktiḥ sā puruṣāvasthāyām 
antaḥkaraṇabahiṣakaraṇavyāpāroparame sati, 
kevalasvātmamātrābhimukhajñaśaktimātratvenāvaśiṣyate; tena 
antarmukho bhāva ityuktam | mukhaśabdena ca śakteḥ vyavahāro 
dṛṣṭo yathā pārameśvare (p. 54)

	..........................śaivīmukhamihocyate ||

ityādau | evaṃ ca vyutthānāvasare 
tādṛgdaśānyathānupapattisadbhāvaḥ | sa bhāvo 
bāhyaviṣayāgrahaṇamātravyāmohaiḥ abhāva iti taiḥ yogibhiḥ 
pratipadyate; na tu satatam aviluptajñaśakteḥ tasya bhāvasya 
ātmavilakṣaṇavastvanupalambhāt kathaṃcit lopa upapadyate; tadā hi asau 
svabhāvameva amalagaganatalavat sarvato vyatiriktaṃ sarvavyāpakaṃ 
citmātrarūpatayā anubhavati, kevalaṃ mohaparavaśatayā 
vismṛtānusaṃdhāyakasvātmarūpaḥ tathā na pratipadyate | prabuddhastu 
yathā pratipadyate tathā upāyaṃ purastāt upadekṣyati | vyākhyātametat

	na tu yo'ntarmukho'ntaścakrārūḍha

ityādinā vṛttau || 16 ||
	iti śrī rājānakarāmakṛtāyāṃ vivṛtyākhyāyāṃ 
spandakārikāṭīkāyāṃ vyatirekopapattinirdeśo nāma prathamo 
niḥṣyandaḥ || 1 ||


vivṛti: (p. 55)

atha

vyatiriktasvabhāvopalabdhirnāma

dvitīyo niḥṣyandaḥ ||

	evaṃ yathā pratijñātaṃ dehādivyatiriktamātmatattvaṃ 
svānubhavasiddhayopapattyā vyavasthāpya idānīṃ 
tadupalabdhyupāyopadeśāvasare 
suprabuddhaprabuddhāprabuddhabhedena trividhe lokatantre, kastāvat 
prastutopadeśapātram ? - iti viṣayavyavasthāpanāya āha


tasyopalabdhiḥ satataṃ tripadāvyabhicāriṇī |
nityaṃ syātsuprabuddhasya tadādyante'parasya tu || 2/1 (17)  ||

vṛti: tasya cidrūpasya sarvagatasya svasvabhāvasya upalabdhiḥ triṣu 
jāgradādiṣu padeṣu nityaṃ suprabuddhasya bhavati; tadādyante aparasya 
prabuddhasya svapnasuṣuptādau; jāgratturyau (kh: jāgratturye 
āgamamātragamye iti; g: svapnasuṣuptyādau 
jāgatturyayostvāgamamātragamyā iti pāṭhaḥ |) tvāgamamātragamyau 
|| 17 ||


ṭippaṇī: sarvottīrṇacinmātraviṣayo viśvamayaśakticakraviṣayaśca - iti 
upakrāntanirvāhyātmakatayā dvividhopadeśasya 
prāyaśo'prabuddhaviṣaye'nupayogitaiva suprabuddhasyeva padatraye 
svātmopalabdherayatnasiddhatvāt, prabuddhasya hi padadvayavarti 
sākṣirūpaṃ prabodhāvasthāyāṃ parāmṛśato 
viśvottīrṇaniruparāgacetayitṛmātrasvarūpopalabdhiḥ 
sauṣuptapratyavamṛśyā, svapnāvagamyā ca 
viśvamayanirmāṇavisphuraṇaśālinaḥ kāraṇantaranirapekṣasya 
sarvakartṛtvadhāmnaḥ svātmana upalabdhiranāyāsaṃ siddhyati | 
aprabuddhaḥ punaryuktisahasrairapi upadeśyamānaṃ paratattvaṃ naiva 
pārayati hṛdayaṃgamīkartum, ato'vaśiṣṭapadadvaye 
vyavahityaparicitibhyāṃ durbodhasya paratattvasyopadeśamapekṣate 
ityupadeśaviṣayavyavasthitiḥ kevalaṃ prabuddhasyaiva || 17 ||


vivṛti: tasya yathāpratipāditasya svātmana eva parameśvarasya 
upalabdhiḥ anubhavo nirvikalpā pratipattiḥ nityaṃ sarvadā sarvāsu 
anubhavadaśāsu suprabuddhasya suṣṭu prabuddhasya 
dehādyahaṃpratyayadīrghaduḥsvapnamayyā (p. 56) mohamahānidrayā 
manāgapi anāvṛtasaṃvidaḥ siddhasādhyasya samyagdarśinaḥ syāt 
upapadyate | kīdṛśī ? satatam avyavadhānena tripadāvyabhicāriṇī 
triṣu jāgarasvapnasuṣupteṣu padeṣu saṃvedanabhūmikāsu 
avyabhicāriṇī avisaṃvādinī kayācidapi avasthayā anabhibhūtatvāt 
avyavahitasaṃnidhiḥ | evam etasya suprabuddhasya 
svīkṛtasvātmaiśvaryalakṣaṇaparasiddherihopadeśaviṣayatvaṃ nāstyeva 
kṛtakṛtyatvāt | aparasya tatsamanantarasya dvitīyasya prabuddhasya 
paraśaktipātaprabhātālokavilupyamānamāyātamisratayā 
samunmiṣadviśadavivekacakṣuṣaḥ kṣīyamāṇamohavaśāt 
avijṛmbhamāṇamohotsāhasaṃpadaḥ tadādyante teṣāṃ 
jāgarādīnāṃ trayāṇāṃ padānām ādibhūtaṃ yat padaṃ 
jāgradavasthātmakaṃ, tasya antabhūtaṃ yatpadadvayaṃ 
svapnasuṣuptākhyaṃ, tatra tasya (p. 57) ātmatattvasya upalabdhiḥ syāt | 
vṛttikṛdabhiprāyānusāreṇa tadādyantapadasya evaṃ vigrahaḥ kṛtaḥ 
yataḥ

	svapnasuṣuptādau

iti tena etatpadaṃ vyākhyātam | atra ca ādiśabdena 
svapnasuṣuptāvasthāsaṃgṛhītasmṛtimohādyavasthāparigrahaḥ 
tasyābhipretaḥ | evaṃ ca vyākhyānasya ayamāśayaḥ - iha dvividha 
ātmatattvasya upalabdhyupadeśaḥ upakrānto nirvāhyaśca; ekaḥ 
sarvavyatiriktacinmātrasvasvarūpaviṣayaḥ; aparo 
viśvātmakatacchakticakraviṣayaḥ | ubhayarūpopi ayamupadeśaḥ asmin 
suṣuptasvapnarūpapadadvaye'pi prabuddhasya prāyaśo nopayujyate, 
padatraya iva suprabuddhasya, tattvopalabdheraprayatnasiddhatvāt; yata 
etatpadadvayavartisaṃvitpratyavamarśamātrādeva 
yathāpratipāditaparatattvopalabdhiḥ svayameva tasya upapadyate, (p. 58) 
tathāhi - yadā vigalitasakalavedyavikalpatvāt niṣkalāṃ [niṣkevalāṃ] 
suṣuptāvasthāṃ prabodhadaśāyām ātmanaḥ parāmṛśati, tadā 
sarvoparāgarahitasvarūpamātraviśrāntanityāviluptacetayitṛmātra-
svabhāvam ātmatattvaṃ svayameva upalabhate | yadā ca 
tattadvibhinnasvakāraṇavirahe'pi 
sphuṭatarāvabhāsacetanācetanavicitrabhāvacakranirmāṇamayīṃ 
vinidraḥ san ātmanaḥ svapnāvasthāṃ parāmṛśati tadā tenaiva 
dṛṣṭāntena prabodhabalāt paramakāraṇasya svabhāvasyaiva 
parameśvarasya 
svecchāmātravyatiriktakāraṇāntaranirapekṣasarvakartṛtārūpaṃ 
tattvamupalabhate | aprabuddhasya punaretat prayatnaśatairapi 
samarpyamāṇaṃ tumbakatoyadravavat nāntaḥ sparśaṃ karoti | tadevam 
asmin padadvaye prabuddhasya upalabdhiḥ syāt - iti pratipādyate | 
pariśiṣṭe jāgratturyākhye padadvaye (p. 59) sā asya nāsti - iti arthāt 
uktaṃ bhavati | ato jāgarāvasthāyāṃ 
śabdādiviṣayagrahaṇavyagrendriyavyāpāravyavahitaṃ, 
turyāvasthāyāṃ ca lokottaratvāt atyantāparicitaṃ svayaṃ durlakṣaṃ 
paraṃ tattvam iti tadupalabdhau tatra prabuddho'pi upadeśamapekṣata eva | 
yata āha vṛttikāraḥ

	jāgratturyau tvāgamamātragamyau

iti |

	tasya cidrūpasya sarvagatasya

ityādinā vyākhyātavān vṛttikṛt etat || 1 ||
	evamupadeśaviṣayaṃ vyavasthāpya idānīṃ pārameśvarasya 
tattvasya sarvavyatiriktatvena sārvarūpyeṇa ca dviprakārasya jāgarādiṣu 
caturṣvapi padeṣu pravibhāgapratipādanāyāha


	jñānajñeyasvarūpiṇyā śaktyā paramayā yutaḥ |
padadvaye vibhurbhāti tadanyatra tu cinmayaḥ || 2/2 (18)  ||

vṛti: jñānajñeyabhedena dvirūpaṃ [dvirūpe] jāgratsvapnātmake 
padadvaye saṃvedanam, suṣuptaturyātmake padadvaye 
punaścidrūpatvena kevalam anubhavaḥ, na tu dvitīyamanyatvena 
upalabhyate || 18 ||

ṭippaṇī: parameśvara eva svamāyāśaktimahimnā 
vicitrakṣetrajñabhāvena prathamānaḥ svavyatirekiṇī parāśaktiṃ 
padadvaye jāgratsvapnākhye ābhyantarakaraṇasukhādīnā 
bahiṣkaraṇanīlādinā ca avabhāsya tattaddaśāvyavahārānudbhāvayati 
parantu etadeva śakteḥ paratvaṃ - yat śivaprakāśamatirodhāya 
anantavaibhavena sphuraṇaṃ, suṣuptaturyayostu 
vibhaktabhinnasaṃvedanīyābhāvāt svātmani 
samarasībhūtaśaktirīśvara eva prakāśate | bhāvānāṃ 
sthairyāsyathairyapratipattivikalpena prathamapadayorbhedaḥ | aparatra 
cinmātrarūpasya upalabdhṛcamatkṛtisadbhāvāsadbhāvābhyāṃ 
bhedaḥ iti caturṣu padeṣu sarvottīrṇatayā sārvarūpyeṇa ca 
prakāśavijṛmbhaṇam || 18 ||


vivṛti: (p. 60) vibhuḥ vyāpaka īśvaraścinmātramūrtirātmā 
padadvaye jāgarasvapnābhidhāne paramayā atyadbhūtarūpatvāt 
sarvātiśāyinyā śaktyā nijena sāmarthyena yutaḥ sahito bhāti 
cakāsti prakāśate | kīdṛśyā śaktyā ? jñānajñeyasvarūpiṇyā 
jñāyate'nena iti jñānaṃ, bāhyābhyantaraṃ karaṇacakraṃ 
grahaṇātmakaṃ jñaptimātraṃ vā, jñeyaṃ grāhyaṃ śabdādi 
sukhādi ca viṣayajātamanantaviśeṣaṃ, tadeva rūpaṃ vidyate yasyāḥ 
sā tathā tayā | kimuktaṃ bhavati ? - parameśvara eva svamāyāvaśāt 
nānākṣetrajñarūpatayāvabhāsamānaḥ svāmeva avyatiriktāṃ 
parāṃ śaktiṃ jñānajñeyabhāvena avabhāsayan 
jāgarasvapnadaśāvyavahāramudbhāvayati; etadeva ca asyāḥ śakteḥ 
pāramyam - yat svasva vaibhavasvarūpasya 
prakāśamānatāmatirodadhatī jñānajñeyamayānantarūpatayā 
sphurati | bhinne tu abhedāprathanamātraprāṇe (p. 61) māyātamasi 
vigalitajñātṛjñānajñeyavibhāgavibhramam ekameva paramārthasat 
citprakāśaikarūpaṃ 
tādṛksvabhāvānubhavitṛtāmātradharmalakṣaṇaśaktikaṃ 
tattvamiṣyate, yata āha tadanyatra tu cinmaya iti | tasmāt uktarūpāt 
padadvayāt anyatra aparatra suṣuptaturyābhidhāne padadvaye cinmayo 
vibhurbhāti cetayata iti cit upalabdhṛsvabhāva ātmā īśvaraḥ 
tanmātraprakṛtiḥ, tayoḥ padayorvyatiriktavedanīyābhāvāt 
niṣkalasvātmamātraviśrāntaśaktirīśvara eva prakāśata ityarthaḥ | 
nanu jāgarasvapnayorjñānajñeyamayatvena, 
suṣuptaturyayościnmayatvenaiva prakāśanābhedāt padadvayameva, 
tatkathaṃ padacatuṣṭayam iti ? - atra ucyate, jāgarasvapnapadārthānāṃ 
sthairyāsthairyapratipattivikalpakṛto'sti bheda iti tatpadadvayam; yataḥ 
īśvaraparikalpitaḥ sargo jāgarāvasthāyā dṛḍhatvena (p. 62) 
pratipadyate, svapne tu adṛḍhatvena kṣetrajñaparikalpita ityanayoḥ 
padayorbhedakāraṇam | suṣuptāvasthāyāṃ tu sadapi cinmātrarūpaṃ 
tattvaṃ mohavaśādahamityupalabdhṛcamatkāravirahāt asadivābhāti; 
tasyaiva tu tattvasya paramārthasattayā ātmatvenopalabdhisturyapade; - 
ityayaṃ suṣuptaturyayorbhedaḥ | tena catvāryeva padāni viśva - taijasa - 
prājña - turyādisaṃjñābhiḥ śāstrāntareṣvapi prasiddhāni |

	jñānajñeyabhedena dvirūpam

ityādinā vyākhyātametadvṛttau || 2 ||
	idānīmuktena prakāreṇa prabuddhasyaiva 
upadeśyatvamupakrāntaṃ draḍhayitum, aprabuddhānāṃ ca 
tatpratiṣeddhuṃ ślokatrayamāha


guṇādispandaniḥṣyandāḥ sāmānyaspandasaṃśrayāt |
labdhātmalābhāḥ satatam syurjñasyāparipanthinaḥ ||  2/3 (19) ||

vṛti: (p. 17) guṇaspandasya sattvarajastamorūpasya ye niḥṣyandāḥ 
pravāhāḥ, te sāmānyaspandamāśritya prasṛtā api satataṃ jñasya 
viditavedyasya yoginaḥ syurbhaveyuḥ, bhavantyaparipanthinaḥ 
anācchādakāḥ svabhāvasya || 19 ||

ṭippaṇī: pārameśvaryānugrahaśaktyā 
pratyutpannaheyopādeyavivekasya nairvikalpikāṃ pratiṣṭhāmāśritya 
sattarkāgamayuktyabhyāsot -sāhena uccapadārurukṣāṃ pariśīlayato 
jñasya sukhiduḥkhimūḍha -tādipratyayapravāhāḥ 
khecaryādyadhiṣṭhitāḥ kroḍīkṛtaviśva -spandaṃ paraśaktisphuritaṃ 
samāśrityaiva labdhasvātmapratiṣṭhāḥ svātmavīryāvirbhāvanāt 
vigalitāvaraṇasāmarthyāḥ paratattvopalambhaṃ vihantuṃ na 
śaknuyuriti tātparyam || 19 ||


aprabuddhadhiyastvete svasthitisthaganodyatāḥ |
pātayanti duruttāre ghore saṃsāravartmani || 2/4 (20) ||

vṛti: svalpaprabodhāṃstu (k, kh: alpaprabodhānām) svasthiteḥ 
cidrūpāyāḥ sthaganaṃ kṛtvā, te guṇāḥ pātayanti duruttāre asmin 
viṣame saṃsāravartmani, yatastadātmakameva nityamātmānaṃ 
paśyanti, na tu śuddhabuddhasvarūpatayā || 20 ||

ṭippaṇī: aprabhuddho vidyamānamapi svaiśvaryaṃ 
sārvajñādiguṇāspadaṃ spandatattvamavidan sarvathā paratantraṃ 
dehādikameva ātmatvena svīkaroti | ata eva jñānaguṇaprasarāḥ 
paramātmasthitiṃ tirodhāpya yāvat prabodhaprāptimaprabuddhaṃ 
janmādisrotasyāvartayantyeva - ityataḥ prabuddhasyaivopadeśyatā 
nirūḍhadraḍhimā, aprabuddhaviṣaye vihitaniṣedheti bhāvārthaḥ || 20||


p. 18) ataḥ satatamudyuktaḥ spandatattvaviviktaye |
jāgradeva nijaṃ bhāvaṃ na cireṇādhigacchati* (gh: 
bhāvamacireṇeti śodhitaḥ pāṭhaḥ |) || 2/5 (21) ||


(* vivṛti: bhāvamacireṇādhigacchati)
vṛti: ataḥ satataṃ sarvakālaṃ yaḥ karotyudyogaṃ spandatattvasya 
svarūpābhivyaktyarthaṃ, sa jāgradavasthāyāmeva nijamātmīyaṃ 
turyabhogākhyaṃ svabhāvam acireṇaiva kālena prāpnoti 

ṭippaṇi: prakṛtaślokanirdiṣṭahetoḥ 
prabuddhasyātmīyaparamārthasattāyāḥ 
adhigamo'nativilambenaivetyarthaḥ || 21 ||


vivṛti: (p. 63) ataḥ prastutavyākhyānaślokatrayanirdiṣṭāt hetoḥ 
jāgradeva prabuddha eva nijaṃ bhāvam ātmīyāṃ pāramārthikīṃ 
sattām acireṇa alpīyasā kālena adhigacchati samyag upalabdhyā 
svīkaroti | evakāreṇāprabuddhaṃ vyavacchinatti | kīdṛśaḥ 
sannadhigacchati ? - spandatattvaviviktaye satatamudyuktaḥ spandasya, 
parasya śāktasya tattvasya upacaritasāmānyaviśeṣātmakatayā 
dviprakāratvena vyākhyāsyamānasya, yattattvaṃ paramārthaḥ 
yathākramamupādeyatayā heyatayā ca niścitaṃ rūpaṃ, tasya viviktaye 
vivekāya pṛthakkaraṇāya, eṣa upādeyatamaḥ (p. 64) 
paramakāraṇabhūtasya satyasya ātmasvarūpasya - ayamahamasmi, ataḥ 
sarvaṃ prabhavati, atraiva ca pralīyate - iti pratyavamarśātmako nijo 
dharmaḥ sāmānyaspandaḥ; tathaite atyantaheyā viśeṣaspandā 
anātmabhūteṣu dehādiṣu ātmābhimānamudbhāvayantaḥ 
parasparabhinnamāyīyapramātṛviṣayāḥ - sukhito'haṃ duḥkhito'ham - 
ityādayo guṇamayāḥ pratyayapravāhāḥ saṃsārahetavaḥ; - iti 
vibhāgāya satataṃ sarvāsu avasthāsu avyavadhānena udyuktaḥ 
uktavakṣyamāṇopapattyupalabdhyupāyapratipattyabhivyajyamāna - 
svabalavṛṃhaṇatvāt avyāhatotsāhādhyāsitaḥ 
[avyāhatotsāhamadhyavasitaḥ] | etena prabuddha eva 
upāyapariśīlanaikatānaḥ san acireṇa svarūpamupalabhate nānyaḥ, - iti 
pratipāditam | kuto hetoḥ sa evādhigacchati nānyaḥ ? ityāha - 
guṇādispandaniḥṣyandā ityādi yato guṇādispandaniḥṣyandā 
jñasyāparipanthinaḥ syuḥ iti saṃbandhaḥ | spandānāṃ 
kṣetrajñajñānādiśaktīnāṃ, (p. 65) niḥṣyandā 
nānārthaunmukhyena prasṛtāḥ pravāhā bhinnāḥ pratyayāḥ 
spandaniḥṣyandāḥ guṇā ādayaḥ prathame pradhānaṃ yeṣāṃ te 
guṇādayaḥ, sukhādyātmakatvena sattvādimayāḥ guṇādayaśca te 
spandaniḥṣyandā, - ahaṃ sukhī, duḥkhī, mūḍhaḥ - ityādayo 
jñānabhedāḥ | kiṃrūpāḥ ? sāmānyaspandasaṃśrayāt 
labdhātmalābhāḥ sāmānyasya 
sarvavyāpakasyāntarlīnānantaviśeṣaspandasya parasya śaktisphuritasya 
saṃśrayāt samyak ananyaśaraṇatayā śrayaṇād bhajanāddhetoḥ 
labdhātmalābhāḥ labdha āsāditaḥ tena tena bhinnenākāreṇa 
ātmanaḥ svasvarūpasya lābha udayo yaiste tathāvidhā 
guṇādispandaniḥṣyandāḥ jñasya 
parameśvarānugrahoṇoditaheyopādeyapratyayapramātṛbhāvasya 
[parameśvarānugrahodita-], sāmānyaspanda eva 
parameśvaramukhyaśaktitvena (p. 66) pratiṣṭhitanirvikalpapratipatteḥ 
sukhādyupādhyuparāgajanitānyonyabhinnarūpebhyo viśeṣaspandebhyo 
vyāvṛttasvaśaktyabhimānasya 
uktavakṣyamāṇayuktyabhyāsanityodyogena vijigīṣamāṇasya 
aparipanthinaḥ syuḥ svabalāvirbhāvāt 
pratihatasvabhāvāvaraṇasāmarthyāḥ santaḥ apratidvandvinaḥ 
saṃpadyeran, paratattvopalabdhyutsāhaṃ nihantuṃ na prabhaveyuriti 
yāvat | idamatra tātparyam - ye kecana yasya kasyacinmāyīyasya 
pramātuḥ sukhādyātmakatvāt guṇamayāḥ spandaniḥṣyandāḥ 
pratyayasaṃdhānāḥ prasaranti te sarve ekameva 
sāmānyaspandamāśritya taṃ tamātmānaṃ pratilabhante; prabuddha 
eva tu tadudayābhijñaprajñāpātram; atastasya nityodyoginaḥ sataḥ ete 
prayogino bhavituṃ na prabhavanti | ye (p. 67) tvaprabuddhāḥ tairete 
durnivāraprasarāḥ, ityāha - aprabuddhadhiyastu ityādi, - aprabuddhā 
pārameśvaraparānugrahavirahādavigalitagāḍhājñānanidrā dhīḥ 
prajñā yeṣāṃ te tathā, tān punaramī yathāvyākhyātā 
guṇādispandaniḥṣyandā ghore vibhīṣikāśatasaṃkulatvād dāruṇe, ata 
eva duruttāre durlaṅghye saṃsāravartmani janmādiprabandhamārge 
pātayanti tatrānavarataṃ bhrāmayanti | kīdṛśāḥ santaḥ | - 
svasthitisthaganodyatāḥ svasmin paramātmani 
sāmānyaspandamātrakarmake sthitirnirvikalpapratipattiprabhavā susthirā 
pratiṣṭhā tasyāḥ sthagane sadya eva ācchādane udyatā 
gṛhītodyogāḥ pratipakṣabhūtasya prabodhasyābhāvāt 
labdhaprasaratvādevamupacaritāḥ | kim uktaṃ bhavati ? - yathā 
kāṃścid rājādīn (p. 68) pramāditvādyavasthāsattvāt sadapi 
sainyādisvasāmarthyaṃ sattvenāpratipadyamānān antaraprekṣiṇo 
vipakṣāḥ svapadavyaparopaṇabaddhābhiyogā mahati vyasane pātayanti, 
ā svasāmarthyasadbhāvapratipatteḥ | evamaprabuddhasya 
sarvakartṛtvādilakṣaṇaṃ nijaṃ mahimānaṃ sāmānyaspandarūpaṃ 
vidyamānamapi apratibuddhyamānasya sarvakāryaparatantraṃ 
dehādisargamevātmatvenāvagacchata ete labdhaprasarāḥ sukhito'ham 
ityādayo guṇapradhānāḥ pratyayapravāhāḥ satye svātmani sthitiṃ 
vyavadhāya saṃsāramevāsādayanti, ā prabodhaprāpteḥ, - iti 
prabuddhā evāsyopadeśasya viṣayā nāprabuddhāḥ | teṣāṃ hi 
kathaṃcid gṛhītamapyupadeśavacanaṃ 
niścāyakapratipattiśithilaprajñatvānnāntarviśrāmyati | yathoktaṃ 
kenāpi

	jñeyatvamapyupagatā hṛdaye na roḍhuṃ
		śaktāḥ pramūḍhamanasāmupadeśavācaḥ |
	ārdratvamādadhati kiṃ nalinīdalānāṃ
		śliṣṭā nirantaratayāpi nabho'mbudhārāḥ ||

(p. 69) iti | tatra

	jāgradavasthāyāmeva

iti vṛttigranthaḥ, prakṛtānusāreṇa prabuddhāvasthāyām, - iti 
boddhavyam | yadi vā satatodyuktapadena prabuddhasvīkāre sati 
satatodyuktaḥ prabuddho vakṣyamāṇopadeśakrameṇa 
jāgradavasthāyāṃ vyavahāradaśāyāmeva nijaṃ bhāvamadhigacchati, 
- iti vyākhyeyam | vyākhyātametat ślokatrayaṃ vṛttau vibhāgena 

	ataḥ satataṃ sarvakālaṃ yaḥ karoti

ityādinā | tathā

	guṇaspandasya sattvarajastamorūpasya

ityādinā | tathā

	svalpabodhāṃstu

ityādinā granthena || 3 || 4 || 5 ||

	evaṃ prabuddhasyaiva jāgaraturyapadayorupadeśyatve 
vyavasthāpite sarvaśarīrisādhāraṇajāgradvṛttyantaralīnāmeva 
tāvatparatattvopalabdhimupadeṣṭumāha


atikruddhaḥ prahṛṣṭo vā kiṃ karomīti vā mṛśan |
dhāvan vā yatpadaṃ gacchet tatra spandaḥ pratiṣṭhitaḥ || 2/6 (22) ||

vṛti: tasya ca spandatattvasya atikruddhe prahṛṣṭe dhāvamāne (p. 19) ca 
kiṃ karomi, - ityevaṃ cintāviṣṭe yadā śaktipratyastamayaḥ, tadā 
spandatattvasya sphuṭa evodayo gurūpadeśāt adhigantavyaḥ || 22 ||

ṭippaṇī: tīvrataropadravadviṣaddarśanādau 
mṛtapratyujjīvitapriyāsaṃga -mādau balavadabhiyuktatāyāṃ ca 
tatpratīkārakiṃkartavyatā -vicāraṇe'pi nirālambanacittavṛttitayā 
tattaddharṣādivyañjakavas -tūtpatteḥ prāgeva 
samudbhūtamātrasthāyibhāvasya pratiṣṭhita -spandasyopalabdhiḥ | 
evaṃ karmendriyavyāpṛtiviśeṣe'pi aiśvara -rūpasamāveśaḥ || 22 ||
	
vivṛti: (p. 70) sāmānyaviśeṣabhedena pratiṣṭhitāpratiṣṭhitarūpatvāt 
spandasya dvaividhye sthite, upādeyaḥ pratiṣṭhitaḥ spandaḥ tatra pade 
upalabhyate iti saṃbandhaḥ | yaḥ 
pratiṣṭhitaścalatvavyapadeśahetusukhitvādyanityaviśeṣaspandāviṣayatv
ādaprakampasthitiḥ [-hetuḥ sukhitvādya-] svabhāvamātrādhāraḥ 
sāmānyarūpo mukhyaḥ spandaḥ 
pratyastamitasamastaviśeṣaśakticakraparamātmadharmaḥ, sa tatra tasmin 
adhunaiva nirdiśyamāne pade upalakṣaṇīyaḥ | kasmin ? yatpadam 
atikruddho gacchet pratyagrakṣata - dāruṇopadrava - 
dviṣaddarśanādinā tīvratarakopāviṣṭaḥ tajjanyavikārāvasthāyāḥ 
prāgeva jhaṭiti jātamātrakrodho yatpadaṃ yāṃ bhūmikāṃ gacchet 
manasā āsādayet; tathā atiprahṛṣṭo yatpadaṃ gacchet 
mṛtpratyutthitaprāṇasamapramadādidarśanādinā prahṛṣṭaḥ 
prakṛṣṭena parameṇātiśayena hṛṣṭaḥ pramudita ānandanirbharaḥ, 
tathaiva utpannamātraharṣo yatpadaṃ gacchet; tathā kiṃ karomi iti (p. 
71) mṛśan yat padaṃ gacchet; kruddhena rājñā ripuṇā vā 
balavatābhiyuktastatpratīkārāya kartavyaniścayamalabhamānaḥ 
kevalaṃ kiṃ karomi kimupāyamatrāvalambeya - iti pratipattimūḍha eva 
mṛśan vikalpayan nirālambanacittavṛttiryāṃ bhūmikāmadhitiṣṭhet 
tatra pratiṣṭhitaspandopalabdhirityarthaḥ etena prakāratrayeṇa duḥkha - 
sukha - mohātmaviṣayagrahaṇarūpāntaḥkaraṇavyāpāramayajāgrada-
vasthāviṣayeṇa evaṃvidhāni prakārāntarāṇi saṃgṛhītāni 
veditavyāni | tena atikruddhavat aśaṅkiteṣṭajanavināśaśravaṇādinā 
kāraṇena atiśokāviṣṭo'pi śokavyañjakāsrupralayādivikṛteḥ prāgeva 
samunmiṣitamātraśoko yatpadaṃ gacchet; tathā akasmāt 
kupitakṛṣṇoragavyāghrādigrāsagocaragamanādinā nimittena atibhītaḥ 
tathaiva sadyaḥ samudbhūtamātrabhayo yatpadaṃ gacchet; 
tathātyantajugupsāspada (p. 72) padārthadarśanādihetunā 
jātamātrajugupso yatpadaṃ gacchet, tatrāpi pratiṣṭhitaspandopalabdhiḥ, - 
ityupadiṣṭaṃ bhavati; krodha - śoka - bhaya - jugupsābhedena 
caturvidhasya duḥkharāśeḥ atikruddhaśabdena upalakṣitatvāt | tathā 
prahṛṣṭavannijavīryabalasaṃpattisaṃbhāvanādihetunā suduṣkaramapi 
kāryaṃ nirvartayituṃ nirvikalpameva utsahamāno jhaṭiti yatpadaṃ 
gacchet; tathaiva adṛṣṭapūrvaparamaramaṇīyādipadārthadarśanādinā 
sapadi ativismayāviṣṭo yatpadaṃ gacchet; tathā kuhanādinā kāraṇena 
utpannamātrātihāso yatpadaṃ gacchet, tatrāpi 
pratiṣṭhitaspandopalabdhiḥ, - ityupadiṣṭaṃ bhavati; harṣotsāha - vismaya 
- hāsabhedena catūrūpasukharāśeratiprahṛṣṭaśabdenopalakṣitatvāt | 
tathā kiṃkartavyatāmūḍhavat dūratvādinā 
dṛṣṭārthaniścayāvadhāraṇābhāvāt saṃśayāviṣṭo yatpadaṃ 
gacchet, tatrāpi pūrvavadupalabdhiḥ, - ityupadiṣṭaṃ bhavati; 
vismaraṇādidaśāsu tattvāpratipattilakṣaṇasya (p. 73) bahuvidhasya 
moharāśeḥ kiṃkartavyatāmūḍhabhāvena upalakṣaṇāt | 
evamantaḥkaraṇavyāpārarūpajāgradavasthāśrayaṃ 
paratattvopalabdhyupāyamabhidhāya, 
buddhindriyavyāpārarūpajāgradavasthāśrayasya asya yathā 
hyartho'sphuṭo dṛṣṭaḥ (ṣp kā 4/6) ityatra 
prasaṅgādvakṣyamāṇatvāt; saṃprati 
karmendriyavyāpārarūpajāgradavasthāśrayaṃ taṃ padaṃ 
pratipādayitumāha - dhāvanvā yatpadaṃ gacchet tatra iti, tatra 
tasminnapi pade pratiṣṭhitaspandopalabdhiḥ | tatra hi 
icchāprayatnajñānakriyādi vṛttīnāṃ vibhāgāgrahaṇād 
advayeśvararūpābhivyaktiḥ | tathā hi - dhāvataḥ pratipadaṃ 
padojjihirṣoddhāraprayatnadeśāvadhāraṇapadavinyāsakriyādiṣu 
vṛttiviśeṣeṣu satsveva anavadhāryamāṇavibhāgatvāt asatsviva saṃvit 
avibhāgaparasvabhāvamātrapratiṣṭhitā bhavati, tadā paravaśa eva 
pumānaiśvaraṃ rūpamāviśati | etadapi 
vāgādikarmendriyavyāpāropalakṣaṇārthaṃ veditavyam | tena 
dhāvadvad (p. 74) aticaturavarṇasvaroccāravyagravāgvṛttirapi yatpadaṃ 
gacchet, tathā 
vīṇāveṇuvādanāditvaritataravyāpāryamāṇakarāṅgulikalāpo 
yatpadaṃ gacchet; tatrāpi pratiṣṭhitaspandopalabdhiḥ, - ityupadiṣṭaṃ 
bhavati; sarvakarmendriyavyāpārāṇāṃ dhāvatpadena upalakṣaṇāt | 
yathā hyartho'sphuṭo dṛṣṭa ityādi śloke 
buddhīndriyavyāpāragatām etāmupalabdhiṃ darśayiṣyati | yadyapi ca 
sarvasya prāṇabhṛtaḥ sarvāsu avasthāsu sarvendriyavṛttayo na antareṇa 
nityoditapratiṣṭhitaspandaprakāśaparisphuritasamāpattim unmiṣitumeva 
prabhavanti, tathāpi māyāśaktyudbhāvitabhedāvabhāsabalāt 
nānātvena ullasadbhiḥ anantaiḥ jñānakriyāviśeṣaiḥ vyavadhīyamāna 
ivāsau pratiṣṭhitaḥ spandaḥ prabuddhasyāpi upalabdhigocaratvaṃ 
gamayitumaśakya, - iti tadupalabdhiyogyāḥ kāścideva atikruddhatvādayo 
daśā upāyatvena saṃgṛhya upadiṣṭāḥ | etāśca prabuddhasya 
pratyavamṛśyamānāḥ sadyaḥ pratiṣṭhitaspandopalabdhyupāyatāṃ (p. 
75) bhajante, na tu anubhūyamānāḥ; sā hi avasthā duḥkhādimayyeva | 
tato niṣkrāntastu prabuddha upadeśabalād 
upajātatādṛśātmasvarūpavivecanakṣamaprajñātiśayaḥ 
spandatattvamanubhavati; yadanuśīlanaikāgryāt krameṇa 
suprabuddhapadavīmadhirūḍhaḥ sarvatra anubhaviṣyati, - iti | vivṛtametat

	tasya ca spandatattvasya

ityādinā vṛttau || 6 ||
	atha jāgradvṛttyantarlīnaturyadaśāgatasvabhāvopalabdhaye 
ślokatrayamupāyopadeśamāha, tatra yugalakaṃ tāvat


yāmavasthāṃ samālambya yadayaṃ mama vakṣyati |
tadavaśyaṃ kariṣye'hamiti saṃkalpya tiṣṭhati || 2/7 (23) ||

vṛti: yāṃ spandasvarūparūpāmavasthāmavalambya yatkiṃcit ayaṃ 
mama vakṣyati, tat avaśyaṃ kariṣyāmi - ityadhyavasoyana 
(adhyavasāyenetyato'nantaraṃ; kh, gh: 'vartate tathāvidhādhyava -
sāyena' itī yānpāṭho'dhiko'sti |) spandatattvamadhiṣṭhāya yo vartate || 
23 ||

ṭippaṇī: atra sāmalambanakriyātaḥ pūrvabhāvini kriyāntare 
paritiṣṭhitavā -kyasyāyamāśayaḥ - yathā 
prabhorājñānirvahaṇe'vahitamanaska -tayā sarvā vṛttayo vilīnāḥ 
saṃpadyante, nistaraṅgadaśā codeti | evaṃ sarvātmanā 
samastānyakaraṇīyatāṃ parihṛtya spandadaśā -
vadhānaniviḍāvamarśasyābhyāsāt paratattvopalabdhiriti || 23 ||


tāmāśrityordhvamārgeṇa somasūryāvubhāvapi* |
sauṣumne'dhvanyastamito (kh, g: astamitau) hitvā 
brahmāṇḍagocaram || 2/8 (24) ||


(* vivṛti: candrasūryāvubhāvapi)
vṛti: (p. 20) tasya, tāmavasthāmāśritya puruṣasya, somasūryau dvāvapi 
sauṣumne adhvani madhyanāḍyabhidhāne, astamayaṃ kurutaḥ; 
brahmāṇḍagocaraṃ śarīramārgaṃ parityajya yoginaḥ || 24 ||

ṭippaṇī: somasūryāvityasya tātparyamidam | spandadaśāmāśritasya 
manaḥ prāṇau madhyanāḍyāṃ līyete | saṃvideva yathottaraṃ saṃkoca 
-grahaṇena saṃkucitā jñānakriyāśaktibhāvaprāptipūrvaṃ manaḥ - 
prāṇaprasararūpatāmāpadyate | pratyāharaṇakāṣṭhādhirohaṇe 
ubhāveva jñānakriyāśaktimayāvubhayavidhameva heyopādeya -
viṣayavedanaṃ nāḍīsaṃcāraṇātmakāryamapi parihāya sāmānya -
maulikarūpaṃ pratyāpadyete iti || 24 ||

vivṛti: tāṃ yacchabdopalakṣitavākyanirdiṣṭām avasthāṃ (p. 76) 
daśām āśritya āsādya puruṣasya candrasūryau manaḥprāṇau 
dvāvapi yugapadeva astamitaḥ pralīyete | kiṃ kṛtvā ? 
tādṛgdaśāśrayaṇasāmarthyādeva brahmāṇḍagocaraṃ hitvā 
yadantastadbahiḥ - iti brahmāṇḍaṃ śarīraṃ sa eva gocaraḥ 
svaprasarādhikaraṇaṃ, taṃ hitvā tyaktvā 
saṃvedyatābhāvādatikramyetyarthaḥ | kena pathā astamitaḥ ? 
ūrdhvamārgeṇa sarvātiriktena alaukikena vartmanā | tathā ca - 
candraśabdapratipāditā manaḥprasararūpā jñānaśaktiḥ idaṃ 
heyamidamupādeyam - iti dvidhā saṃsāragocaraiva, ālambanīyaṃ 
nijaṃ viṣayamatītya tasyāṃ daśāyāṃ madhyasthatāṃ prāpya 
svakāraṇa eva astameti; tathā sūryaśabdoditā prāṇaprasararūpā 
kriyāśaktiḥ nānānāḍīsaṃcāralakṣaṇāṃ kusṛtimakhilāṃ 
khilīkṛtya sāmānyaprāṇarūpatāmāpannā lokātiriktena pathā 
svapada eva śāmyati | tataḥ sauṣumne'dhvanyastamita  ityāha - 
suṣumanābhidhā śarīramadhyamadhyāsitā yā nāḍī (p. 77) tadīye 
adhvani parasyāḥ pārameśvaryāḥ śakteḥ pravahaṇamārge 
praśāmyataḥ; jñeyakāryoparāgaparityāgāt 
paraśaktirūpatāmāpadyete, - iti yāvat | kāṃ tāṃ daśāmāśritya ? 
ityāha - yāmavasthāṃ samālambya 
samyaktyaktasamastavastuvyāpṛtistimitasarvaśaktitayā avalambya 
avaṣṭabhya kasmiṃścidavasare puruṣastiṣṭhati | kiṃ kṛtvā ? 
samālambyeti, samālambanakriyāpūrvabhāvikriyāntaraniṣṭhaṃ 
vākyamāha - iti saṃkalpya iti, ityevaṃ saṃkalpaṃ kṛtvā | kathaṃ 
yadayaṃ mama vakṣyati tadavaśyaṃ kariṣye'ham iti, yasya 
ājñātikramāt sadya eva prāṇātyayādiranarthaḥ samāpatati, so'tra 
rājādiḥ ayam iti nirdiṣṭaḥ, ayaṃ yad vastu mama kartavyatayā 
vakṣyati jalpiṣyati tadavaśyaṃ sarvātmanā 
parihṛtasamastānyakaraṇīyo'haṃ kariṣye saṃpādayāmi, - iti 
yugalakasya vākyārthasaṃgatiḥ | idaṃ tu tātparyam - kenacitkāraṇena 
avaśyakaraṇīyavacasā prabhaviṣṇunā kārayitavyavastuvivakṣayā (p. 
78) ākṣiptasya puṃsaḥ tadvacanaśuśruṣāmātraniviḍāvadhānatvāt 
samastavṛttipratyastamaye sati, saṃvit turīyāṃ daśām 
avaśyamevāviśati, tatpratyavamarśābhyāsāt paratattvopalabdhiḥ, - iti | 
atra brahmāṇḍagocaraśabdena śarīrākāśasya 
candrasūryaśabdābhyāṃ manaḥprāṇaprasarayośca pratipādanam | 
prayojanam | anena upadeśena 
pratyabhijñāpitaturīyadaśāpratyavamarśābhyāsakāṣṭhādhirohiṇaḥ 
prabuddhasya 
nikhilabāhyābhyantarādhvātikrāntaparamapadaviśrāntilābhaḥ, - iti | 
vyākhyātametat pṛthak vṛttikṛtā

	yāṃ spandarūpāmavasthām

ityādinā

	tasya tāmavasthām

ityādinā ca granthena || 8 ||
	nanu evaṃvidhā daśā sarvasya kasyacitkathaṃcit upajāyata eva, 
tatkimupadeśena - ityāha 

tadā tasminmahāvyomni pralīnaśaśibhāskare |
sauṣuptapadavanmūḍhaḥ prabuddhaḥ syādanāvṛtaḥ || 2/9 (25) ||

vṛti: tasmin mahāvyomni pratyastamitaśaśibhāskare yasya 
svasvabhāvābhivyaktiḥ na samyak vṛttā, sa (p. 21) svapnādinā 
muhyamāno'prabuddho niruddhaḥ syāt; prabuddhaḥ punaranāvṛta eva 
bhavati || 25 ||

ṭippaṇī: paramākāśe samastajñeyakāryāṇāṃvilīnaprāyatvāt 
mūḍhā -nāṃ varṇitapūrvā turyadaśā sauṣuptapadavat 
śūnyarūpā, īśitṛśaktipātena samuditajñānadṛṣṭīnāṃ 
punastasyāṃ daśāyāmanubhūyamānaturyacamatkṛtirnirāvaraṇaṃ 
nirbhāsate iti tatra daśāyāṃ yathākathaṃcit 
sarveṣāmupajāyamānāyāṃ satyāmapi upadeśanirapekṣaṇaṃ 
tamaḥpadapraveśānarthaḥ syāt tatparihārāyopadeśasya sāpekṣateti || 
25 ||


iti śrīkallaṭācāryaviracitāyāṃ spandakārikāvṛttau svarūpaspandaḥ 
prathamo niḥṣyandaḥ || 1 ||

vivṛti: (p. 79) tadā tatra tādṛśadaśāviśiṣṭe kāle 
sauṣumnādhvaśabdapratipādite mahāvyomni paramākāśe 
samastavedyavyatiriktasvarūpatvāt 
śabdaguṇātmakabhūtākāśasvarūpavailakṣaṇyācca 
mahāvyomaśabdapratipādite svasvabhāva eva, kīdṛśe ? 
pralīnaśaśibhāskare 
pratyastamitasamastajñānakriyāprasaraprapañce, mūḍhaḥ 
parameśatigmaraśmiparamaśaktyaṃśusparśābhāvād 
anidrāṇapaśupratyayanidrāvasādaḥ sauṣuptapadavat syāt 
suṣuptāvasthāyāmiva bhavet | yathā suṣuptāvasthā 
pralīnākhilavedyaprapañcarūpāpi aprabuddhasya tatkālam 
anubhavasāmarthyābhāvāt mohamayyeva, tathā eṣā turyadaśāpi 
mohātmikaiva | prabuddhaḥ punarīśvaraśaktipātaprabhāvāt 
prakarṣeṇa lokātiriktātiśayena buddhaḥ pratyuditasamyagjñānadṛṣṭiḥ 
tādṛgdaśāpratyavamarśāvasarānubhūtaturyābhogaḥ anāvṛto 
dehādyavacchinnāhaṃpratyayarūpeṇa (p. 80) āvaraṇena viyuktaḥ syāt 
saṃpadyeta | tadetat

	tasminmahāvyomni

ityādianā granthena vyākhyātaṃ vṛttau || 9 ||
	evaṃ dehādivedyavargavyatiriktatvena 
sarvadaśānusyūtopalabdhṛmātralakṣaṇaikasvabhāvatvena ca 
upapāditasya pratipāditopalabdhyupāyasya svātmana eva śaṃkarasya 
yatsāmarthyaṃ tadeva 
avaśyakaraṇīyaśāstracoditakriyāsādhanabhūtānāṃ mantrāṇāṃ 
vīryam - iti prabuddhameva upalabdhatādṛgātmasvabhāvaṃ prati 
upadeṣṭuṃ yugalakamāha


atha sahajavidyodayākhyo dvitīyo niḥṣyandaḥ |


tadākramya balaṃ mantrāḥ sarvajñabalaśālinaḥ |
pravartante'dhikārāya karaṇānīva dehinām || 2/10 (26) ||

vṛti: tat balaṃ nirāvaraṇacidrūpamadhiṣṭhāya, mantrāḥ 
sarvajñatvādinā balena ślāghāyuktāḥ pravartante anugrahādau 
svādhikāre | karaṇāni yathā dehinām, nānyena ākārādiviśeṣeṇa || 
26 ||
 
ṭippaṇī: śāktabalākramaṇādeva niyantritetikartavyatāsacivā 
mantrāḥ prāṇabhṛtkaraṇavat yathāsvaṃ 
pratiniyataprayoktavyakāryasiddhiṣu apratihataśaktayaḥ, tadvinā 
tṛṇamātramapi kubjayitumasamarthāḥ, niyatiśaktibalāt 
bhinnabhinnaniyogebhyaḥ pravartante na sarve sarvebhya iti bhāvaḥ || 26 ||


tatraiva saṃpralīyante śāntarūpā nirañjanāḥ |
sahārādhakacittena tena te* śivadharmiṇaḥ || 2/11 (27) ||


(* vivṛti: tenaite)
vṛti: (p. 23) tatraiva svasvabhāvavyomni nivṛttādhikārāḥ pralīyante, 
śāntarūpāḥ, māyākāluṣyarahitāḥ, saha sādhakacittena; anena 
kāraṇena śivasaṃyojanāsvabhāvena, iti śivātmakā ucyante (gh: iti - 
śabdānantaraṃ te iti padamapyasti |) || 27 ||

ṭippaṇī: idamatra tātparyam - 
śivaśaktireva mantrasaṃniveśādirūpadhāriṇī udayāstamayadaśayoḥ 
śivābhedavattvāt, yatra yatra śivābhedavat -tvaṃ tatra tatra 
śāktarūpatvaṃ, yathā saṃkalpasvapnapurādiṣu, - iti vyāptyādinā 
sudṛḍhapratipattermantravīryānabhijñasya bhedavibhra -māt 
niyatasādhyasādhanāya paryavasāyinaḥ prabuddhasya punarmantrāḥ 
sarvārthasādhanādhikāriṇo bhavanti; na kevalaṃ mantrā eva, 
yāvallaukikabhāṣāmātramapi amoghamantrabhāvamupa -gacchati - 
ityanena kriyājñānaṃ kāryaṃ jñeyaṃ vā vastu 
śivadharmakamevetyupalakṣyate || 27 ||

vivṛti: (p. 80) tena prastutavyākhyānena hetunā ete mantrā 
ārādhyadevatāvācakā varṇādisaṃniveśāḥ, śivadharmiṇaḥ 
śivasya parameśvarasyānanyasādhāraṇaḥ sarvajñatvādirguṇo 
dharmaḥ sa vidyate yeṣāṃ te tathā, śivādabhinnasvarūpā ityarthaḥ | 
kena hetunā ? - yataḥ tat samanantarapratipāditasvarūpasya śivasya 
saṃbandhi balaṃ sāmarthyaṃ śaktim ākramya 
uccicārayiṣāvasthāyāṃ tadabhedopapattyā svīkṛtya 
sarvajñabalaśālinaḥ sarvajñasya śivasya balena śaktyā 
ślāghamānā santaḥ adhikārāya pravartante yathāsvaṃ 
pratiniyatakāryasaṃpādanasvasāmarthyaṃ [-svāmyārthyaṃ] prasaranti 
| ete hi anāsāditaparameśvarābhedadaśā 
utpādavināśadharmakavarṇamātrātmakāḥ tṛṇamapi 
kubjayitumaśaktāḥ; uktabalākramaṇena tu niyatetikartavyatāsahāyā 
dīkṣādivṛścikaviṣākarṣaṇāntaparāparasvakāryasaṃpādanādhi-
kārāpratihataśaktayo bhavanti | yadyevaṃ 
sarvamantrāṇāmuktabalākramaṇalakṣaṇavīryasāmyaṃ, tat 
kathameṣāṃ bhinnādhikāritvaṃ, sarve sarvārthasādhanādhikṛtāḥ 
kathaṃ na bhaveyuḥ ? - ityatra 
parameśvaraparikalpitaniyatiniyantritatvameva (p. 82) hetuṃ 
pratipādayitumupamānamāha - kathamete mantrā niyatādhikārāya 
pravartante sādhakānāṃ ? - dehināṃ karaṇānīva yathā hi 
dehādimātrānityavastuvyavasthitātmābhimānānāṃ 
sarvaśarīrabhṛtāṃ karaṇāni indriyāṇi yataḥ karaṇavargo'yam 
ityatra pratipāditayuktyā parameśvarādeva 
cetanatvāpādanahetupravṛttyādilābhasāmye satyapi karaṇāni 
tatparikalpitaniyatiśaktibalāt 
śabdādiviṣayaprakāśanamātraparyavasitasāmarthyāni yathāsvaṃ 
pṛthakpṛthagadhikārāya pravartante na sarvāṇi sarvasmai?; tathaivaite 
mantrāḥ sādhakānāṃ svīkṛtaparasvabhāvāhaṃbhāvapratipattīnāṃ 
yathāniyamitādhikārāya pravartante, tasmāt karaṇavat 
sarvajñabalaśālino'pi mantrā niyatādhikārā eva | tataśca 
śivadharmiṇo mantrā yatkṛtādhikārāḥ santo nirañjanā añjanāt 
vācyoparāgarūpāt malāt varṇādirūpabhāvanātmakādvā 
niṣkrāntāḥ; ata eva śāntarūpāḥ śāntaṃ śuddhaṃ 
saṃvinmātrāvaśeṣatvāt (p. 83) nirvikāraṃ rūpamātmā yeṣāṃ te 
tādṛśāḥ santaḥ tatraiva śive paramakāraṇe svasvabhāve 
saṃpralīyante tadaikyamupagacchanti | kena sākam ? ārādhakacittena 
saha sādhakamanasā sākaṃ | tasyāṃ hi 
daśāyāmabhisaṃdhyupādhivirahāt svābhāvikamātrāvaśeṣaṃ yat 
sādhakacittaṃ tena sākam | kimanena tāttvikamantravīryaṃ 
pratipāditaṃ bhavati ? tadidaṃ bhavati - mantracetasoḥ 
udayāstamayadaśayoḥ paramakāraṇāt śivādabhedaḥ, - iti 
mantrātmakatayā sādhakacittātmakatayā ca śivaśaktireva 
varṇasaṃkalpādirūpadhāriṇī uditā satī, saṃprati 
anāsāditasvasvabhāvabalasparśapratipattīnāṃ sādhakānāṃ 
bhedavibhramamutpādayantī niyatārthasādhanādhikārāya paryavasyati | 
yastu yathāpratipādite svasvabhāve eva sudṛḍhātmapratipattiḥ, tasya 
udayāstamayajñasya sarvamantrāḥ (p. 84) sarvārthasādhanādhikāriṇo 
bhavanti tattaditikartavyatāsāhityaniyamādyapekṣāṃ vinā; āsatāṃ 
vā mantrāḥ, yadyadvacanaṃ yena yenābhisaṃdhinā uccārayati tat 
tasyāmoghamantratāmāpadyate, - iti svabhāvabalākramaṇenaiva 
[svabhāvabalākramaṇameva siddhaṃ svato mantrāṇāṃ vīryaṃ 
pratyavamraṣṭavyaṃ yoginā, - iti tātparyārthaḥ | upalakṣaṇārthaṃ 
mantavyaṃ caitat | uktopapattyā na kevalaṃ mantrā eva śivadharmiṇo, 
yāvanna kācitkriyā jñānaṃ kāryaṃ jñeyaṃ vā vastu saṃbhavati, 
yat paratattvābhedāpattilabdhātmakaṃ sat śivātmakameva na bhavati, - 
iti samanantarameva vakṣyati | vyākhyātam etat vṛttau 

	yadbalaṃ nirāvaraṇacidrūpam

ityādinā || 11 ||

iti rājānakaśrīrāmaviracitāyāṃ spandavivṛtau 
vyatiriktasvabhāvopalabdhirnāma dvitīyo niḥṣyandaḥ || 2 ||


atha

viśvasvabhāvaśaktyupapattirnāma

tṛtīyo niḥṣyandaḥ ||

	idānīṃ pakṣāntaropanyāsabhaṅgyā 
prakaraṇārambhaślokāparārdhapratijñātaṃ svasvabhāvasyaiva 
śivasya viśvavyaktimayaśakticakravibhavanaśīlatvamavasaraprāptam 
upapattyupalabdhibhyāṃ nirvāhayituṃ ślokatrayamāha


yasmātsarvamayo jīvaḥ sarvabhāvasamudbhavāt |
tatsaṃvedanarūpeṇa tādātmyapratipattitaḥ || 3/1 (28) ||

vṛti: sarvātmaka evāyamātmā sarvabhāvotpattidvāreṇa 
[sarvānubhāvo-] (ayamiti padaṃ; gh: pustakādupanyastam |) (p. 24) 
anubhūyamānasyaiva saṃvedanāt bāhyārthamanubhūya -mānameva 
śarīratvena gṛhṇāti, na tu śiraḥ pāṇyādilakṣitam (kh: 
pāṇyādirakṣitam; g: pāṇyādilakṣaṇam) ekamevāsya śarīram || 28 ||

ṭippaṇī: saṃcetyamānaṃ pratyekaṃ vastu vastuto vijñānino jīvasya 
svāṅgakalpameva - iti na kevalaṃ bhūtātmakamevāsya vapuḥ, 
yāvadbhāvātmakamapi | ghaṭasukhāderbhāvasya hi saṃvedanaṃ 
samutpattiḥ, saṃvedyamānataiva tatsvarūpapratiṣṭhā 
asaṃvedyamānasya svapratiṣṭhānāsādanāt ityato jīvādapi 
sarvavastusamutpādaḥ | tasmātso'pi viśvamayaḥ | avacchinnāhaṃ -
kṛtipadaṃ śiraḥpāṇyādimaccharīraṃ bhūtātmakaṃ, bhāvātmakaṃ 
tu śabdādiviṣayasaṃvedyam || 28 ||


tena śabdārthacintāsu na sāvasthā na yaḥ* śivaḥ |
bhoktaiva bhogyabhāvena sadā sarvatra saṃsthitaḥ || 3/2 (29) ||

(* vivṛti: yā)
vṛti: tena tathāvidhena sarvātmakena svabhāvena, śabdārthayoḥ 
cintāsu na sā avasthā yā śivasvabhāvaṃ na vyañjayati (g: śivaṃ na 
vyañjayati), ato bhoktaiva hi bhogyabhāvena sarvatrāvasthito, na tvanyat 
bhogyamasti || 29 ||

ṭippaṇī: proktaviśvamayatāpratipattyā vācyavācakātmasu 
ṣaḍadhvajāteṣu yā kācit saṃvittipravāhapaddhatiḥ sā 
paraprakāśātmaśivamayyeva, tasmāt grāhakātmā parameśvara 
evecchādicakrapreṣaṇadvārā 
īśitavyātmajñeyakāryavastucamatkaraṇodyuktastattādātmyasaṃpā -
danāt sadoditasārvatrikasthitiriti svasvabhāvasyaiva jagadvikāsamaya -
śaktivibhavanaśīlatā nirvyūḍhā || 29 ||


p. 25) iti vā yasya saṃvittiḥ krīḍātvenākhilaṃ jagat | 
sa paśyansatataṃ yukto jīvanmukto na saṃśayaḥ || 3/3 (30) ||

vṛti: evaṃsvabhāvaṃ yasya cittaṃ, yathā - manmayameva jagat sarvam 
iti, sa sarvaṃ kriḍātvena paśyan nityayuktatvāt jīvanneva īśvaravat 
mukto, na tvasya śarīrādi bandhakatvena vartate || 30 ||

ṭippaṇī: samanantarapadyoddiṣṭanītyā 
avyucchinnaparāmarśāvadhānapari -śīlanavato yoginaḥ 
sarveśvarasvatantracidbhairavīyapūrṇāhaṃ -bhāvapratipattyā 
aśeṣamidaṃ viśvaṃ svaracitakrīḍanakalīlā -mātreṇa vibhāvya 
svalīlājanitaharṣaśokādyuparāge'pi 
śaṅkātaṅkakalaṅkayantraṇābhirmanāgapi nopaliptiriti 
yāthātmyaveditṛtvājjīvata eva muktirityarthaḥ || 30 ||

vivṛti: (p. 86) yasya iti vā saṃvittiḥ sa jīvanmukta iti saṃbandhaḥ, 
ityevam idānīmeva pratipādyaprakāreṇa yasya vā sādhakottamasya 
saṃvittiḥ samyak jñānaṃ sa satatam avyavadhānena sarvāvasthāsu 
yuktaḥ samāhitaḥ, uktavakṣyamāṇopadeśadṛśā 
svabhāvabalapariśīlanāpramattaikāgramānasaḥ sa jīvan 
niyatadehādhikaraṇān prāṇān dhārayan eva muktaḥ 
sarvavyāpakasarvātmakasarveśvarasvatantrasvasvabhāvāhaṃkāra-
pratipattidārḍhyena janmādivirodhāt niṣkrāntaḥ parameśvara eva 
saṃvṛtta - ityatra na saṃśayo na bhrāntiḥ; 
svasaṃvedyopapattyupalabdhiniṣprakampatvāt asya arthasya | kiṃ kurvan 
jīvanmuktaḥ ? - akhilam aśeṣamanantavastuvyaktivicitraṃ jagat viśvaṃ 
krīḍātvena svanirmitacarācarabhāvakrīḍanakoparacitalīlāmātratayā 
paśyan vibhāvayan | sarvo hi janaḥ 
anunmiṣitasvasvabhāvanibhālanakṣamavimalavijñānadṛṣṭi-
rātmano'nyonyataśca (p. 87) vibhinnam idamakhilaṃ bhāvajātaṃ 
kutaścidanyataḥ kāraṇāt udbhūtam aniśaṃ manyamānaḥ, 
tadbhāvajanyaharṣaśokabhayādivikārān anubhavan, bhavādhvani 
punaḥ punaḥ janmādibandhanabhājanatāṃ bhajate | yastu 
pratipādyaprakāreṇa utpannaparasaṃvidabhivyaktiḥ, sa yathā kaścit 
krīḍāparaḥ svaparikalpitaiḥ 
bhayakrodhādikāraṇabhūtabhāvapraticchandakaiḥ krīḍan 
tadyāthātmyaveditvāt bhayādivikārakāluṣyaṃ manāgapi nāpadyate, 
tathaiva bhāvānāṃ svasvabhāvaśaktivijṛmbhitamātratayā 
yāthātmyavedī san manāgapi vikṛtiṃ na āpadyate | evaṃ sarvaṃ 
krīḍātvenaiva paśyan jīvanneva muktaḥ | kathaṃ yasya saṃvittiḥ ? iti, - 
tenetyādiślokena pratipādayati; tena vakṣyamāṇena hetunā 
śabdārthacintāsu sā avasthaiva nāsti yā na śivaḥ - iti yasya 
saṃvittiḥ sa jīvanmuktaḥ, iti | śabdo'rthapratyāyakaḥ padasamudāyaḥ, 
artho jātyādibhedāt bahuvidham (p. 88) abhidheyaṃ vastujātaṃ, tayoḥ 
cintā tathā tathā vikalpanāḥ anantacintanīyavastūparāgāt vicitrāṇi 
jñānāni, yanmayo vyavahāraḥ etāsu śabdārthacintāsu sā avasthā 
daśā na kācit, śabdacintārūpā arthacintārūpā vā saṃbhavati, yā 
śiva eva sākṣāt na bhavati | yata evaṃ tadā bhoktā anubhavitaiva 
īśvaraḥ sadā nityaṃ sarvatra sarvāsu avasthāsu bhogyabhāvena 
anubhavanīyavastvātmanā sthito na pṛthak kiṃcit bhogyaṃ nāmāsti, 
tattvānavamarśamātravijṛmbhitam etat bhoktṛbhogyavibhāgarūpam | 
kena hetunā na sāvasthā na yā śivaḥ ? ityāha, - yasmāt jīvaḥ 
ātmā sarvamayo viśvarūpaḥ parasparavyatiriktapratipattiḥ, jīvasyāpi 
yo vyavahāraḥ so'pi vedyavedakābhedapūrvakatayaiva upapanna - 
ityarthaḥ, kuta etat ? tatsaṃvedanarūpeṇa tādātmyapratipattitaḥ 
sarvabhāvasamudbhavāt sarvamayo jīvaḥ tasya kasyacit saṃvedyasya 
ghaṭasukhādeḥ yat saṃvedanaṃ jñānaṃ, tasya yat rūpaṃ 
svabhāvaḥ, tena hetunā yā tādātmyapratipattiḥ tadabhedasaṃvit, tato 
hetoḥ nirvartamāno yaḥ sarvabhāvasamudbhavaḥ sarveṣāṃ 
bhāvānāṃ utpattiḥ, tasmāt sarvamayo jīvaḥ | kimuktaṃ bhavati - 
jīvasyaiva vyavahāro vicāryamāṇo'yaṃ 
vastuyāthātmyamupapādayati | tathāhi - ayaṃ svaviṣayaṃ 
saṃvidanneva samudbhāvayati sṛjati, saṃvedyamānameva hi vastu 
svarūpaṃ labhate, na tu asaṃvedyamānaṃ; saṃvedyamānatā ca tena 
tena rūpeṇa prakāśamānatā; prakāśamānatvaṃ ca 
prakāśādavyatiriktaṃ, nānyat kiṃcit | yadāha nyāyavādī 

	cetanāccāpi vedyatvādatadrūpāpravedanāt |

iti | evaṃ ca yat yat ayaṃ jīvaḥ saṃvetti tattadasya śarīrameva 
saṃpadyate, na tu niyataśiraḥpāṇyādyavayavasaṃniveśa (p. 90) eva, 
so'pi hi asya saṃvedyamānatāvasthāyāmeva śarīrībhavati, anyadā tu 
vyatirikto viṣaya eva | tathā ca - saṃvedyamānatvasāmānyāt dvividhaṃ 
śarīramasyāmnātaṃ tattvavidbhiḥ, bhūtātmakaṃ bhāvātmakaṃ ca; 
tatra māyāśaktivaibhavavismāritatāttvikasvabhāvatayā 
vastusaṃvedanāvasare svarūpāparāmarśatvamukulitasāmarthyo'yaṃ 
jīvaḥ avacchinnāhaṃkārāspadatayā śiraḥ - pāṇyādimaccharīratvena 
yat parāmṛśati tat asya sṛṣṭyādimayatvāt bhūtātmakam - ityuktam | 
yattu vyatiriktaṃ śabdādiviṣayatvena parāmṛśati tadbhāvātmakaṃ | 
paramārthe tu vicāryamāṇe dvayamapyasya śarīraṃ 
saṃvedyamānatvāviśeṣāt | evaṃ 
saṃvedyamānatālakṣaṇabhāvasaṃsargāvasthāyāṃ jīvaḥ 
saṃvedyavastvavyatirekāt sarvamayo viśvarūpaḥ sthito'pi san 
tathāvastusaṃvedanatattvaparāmarśānunmeṣāt sarvamidam 
ātmavyatiriktakāraṇāntaralabdhātmakatvena ātmanaḥ parasparataśca 
pṛthaktvena vyavacchindan, (p. 91) ātmānaṃ ca 
dehādyanityabhāvāhaṃbhāvena adhyavasyan janmādibandhabhāk 
saṃsārī jīva iti vyapadiśyate | yadā tu 
śivadivākaraśaktyaṃśupātajanitaprabodhonmiṣitaviśadadṛṣṭi-
sphuṭataraprakāśamānadehādivyatiriktasatyātmasvabhāva-
susthitāhaṃpratipattiḥ san 
yathāvasthitavastusaṃvedanaparāmarśaśaktibhirvyaktibhāk bhavati, 
tadā sa eva saṃkalpamātravilikhitavicitraviśvavyaktimayaśakticakraḥ 
śivaḥ saṃpadyate | tena uktam - tattadvastusaṃvedanasvabhāvabalena yā 
tādātmyapratipattiḥ saṃvedyamānavastvabhedasaṃvittitaḥ 
sarvabhāvasamudbhavaḥ, tasmāt jīvaḥ tāvat sarvamayaḥ; tena ca tasya 
sarvamayatvapratipattilakṣaṇena hetunā sā avasthā nāsti yā śivamayī 
na bhavati, tataśca bhoktaiva īśvaro bhogyabhāvena 
īśitavyavasturūpatayā sadā sarvatra saṃsthitaḥ | evaṃ yasya vā 
saṃvittiḥ sa jīvanmukta - iti vākyasamanvayasaṃkalanārthametat (p. 92) 
punaruktam, - ityanena ślokatrayeṇa ātmana eva viśvarūpatvena sthitiḥ 
pratipāditā, viśvaprapañcasya nimittāntarānupapatteḥ | yathoktaṃ 
brahmavidā

	kalpayatyātmanātmānamātmā devaḥ svamāyayā |
	sa eva buddhyate bhedāditi vedāntaniścayaḥ ||

iti | tathā anyenāpi stutidvāreṇoktam

	vividhairupādhibhiravasthitairvahiḥ
		sphaṭikādivattava vicitratocyatām |
	yadi te kadācana kathaṃcana kvaci-
dbhavituṃ kṣamāstvadavabhāsataḥ pṛthak ||
	paramāṇupākapariṇāmavibhramā-
		dyuta vā vivarta iti viśvamiṣyatām |
	vibudhottamairyadiha tadvikalpanā-
		stava śaktireva na tathopapādayet ||
	tadihāpi ca pratinimeṣamunmiṣa-
		nnimiṣadvikalpavividhāṃśumaṇḍalaḥ |
	atha cātiśuddhavapuradbhutaikabhūḥ
		sphurasi tvameva śiva cinmayo maṇiḥ ||

(p. 93) vyākhyātametat vṛttau pṛthak pṛthak

	sarvātmaka evāyamātmā

ityādinā

	tena tathāvidhena

ityādinā

	evaṃ svabhāve yasya

ityādinā ca granthena || 1 || 2 || 3 ||

iti śrīrājānakaśrīrāmaviracitāyāṃ spandavivṛtau
viśvasya svasvabhāvaśaktimātratvopapattirnāma
tṛtīyo niḥṣyandaḥ || 3 ||


(p. 94)
atha

abhedopalabdhirnāma

caturtho niḥṣyandaḥ

	idānīmiyameva upapattiḥ sugṛhītā satī, abhedopalabdhyupāyaḥ - 
iti pradarśayituṃ mantranyāsādisamastavidhisaṃskārakatvamasyāḥ 
pratipādayitumāha


ayamevodayastasya dhyeyasya dhyāyicetasi |
tadātmatāsamāpattiricchataḥ sādhakasya yā || 4/1 (31) ||

vṛti: tatsaṃvedanadvāreṇa yaḥ tadātmagraho mantranyāsātmakaḥ sa 
evodayaḥ tasya dhyeyasya mantrātmanaḥ (p. 26) sādhakacetasi, 
tādātmyaṃ tatsvabhāvatvaprāptiḥ mantradevata -yā (k: mantrasya 
devatayā) saha sādhakasya mantroccāraṇecchayā (kh, g: 
mantroccāreṇecchayā saṃpādikā) saṃpāditā || 31 ||

ṭippaṇī: idamiha pratipādanīyam, sādhakacetaso 
mantroccicārayiṣāvasthā -yāṃ yadanāyāsena dhyeyavastunā 
sahaikātmyaṃ saṃpādyamā -naṃ sa eva mantrābhidheyasya 
smartavyadevasya tattadarthakriyākārya -moghaśaktinā upāsyākāreṇa 
pratyakṣāvalokanātmodayaḥ, na tu vibhāvyamānā vyatiriktākṛtiriti 
prāguktopapattyā sugṛhītayābhedopalabdhirupeyate iti || 31 ||

vivṛti: tasya kasyacid dhyeyasya tena tenākāreṇa smartavyasya 
mantravācyasya devatāviśeṣasya udayaḥ tattadarthakriyāsaṃpādinā 
amoghaśaktinā tena tenopāsyenākāreṇa prathanam; kva adhikaraṇe ? - 
dhyāyicetasi dhyāyinaḥ smartuḥ saṃbandhini cetasi saṃkalpe; 
ko'sāvudayaḥ ? - icchataḥ icchāvasthāyāṃ (p. 95) vartamānasya 
mantramuccicārayiṣoḥ sādhakasya abhiyuktasya, vastusāmarthyasiddhā 
yā tadātmatāsamāpattiḥ tasya dhyeyasya ya ātmā svarūpaṃ tasya 
bhāvastadātmatā tayā samāpattirekībhāvaḥ | idamatra tātparyam - 
nyāsādihetormantroccāraṇecchāvasthāyāṃ 
mantraruddhadevatākārārāyāṃ [mantraruddhānyadevatākārāyāṃ] 
sādhakacetasaḥ svayamaprayatnena saṃpādyamānaṃ 
yadabhinnarūpatvaṃ, sa eva parāmarśakṣamasaṃvido dhyāturmukhya 
ārādhyadevatāyāḥ pratyakṣadarśanarūpa udayo, na tu 
vyatirekavibhāvyamānākāratā, - iti anayaiva saṃvidā 
śivarūpatāpattḥḥ [-patteḥ] |

	......................... śivo bhūtvā śivaṃ yajet |

ityasya vidheḥ caritārthatvam |

	ayameva tatsaṃvedanadvāreṇa

ityādinā vyākhyātametat vṛttau || 1 ||

	asyā eva saṃvido vidhyantarasaṃskārakatvamāha

iyamevāmṛtaprāptirayamevātmano grahaḥ |
iyaṃ nirvāṇadīkṣā ca śivasadbhāvadāyinī || 4/2 (32) ||

vṛti: iyameva sā mithyājñānaśūnyasya sādhakasya nirāvaraṇa -
svasvarūpasaṃvittiḥ amṛtatvaprāptiḥ, na tu rasāsvādarūpasya 
dhātusārasya sthūlasyāsvādanam amṛtaprāptiruktā, yaiva 
mantroccāraṇamātreṇaiva (kh, g: mātreṇaiva svasvarūpāvasthiti) 
mantrasvarūpāvasthitiprāptiḥ saivātmano grahaṇamityuktā | yasmāt

	ātmano grahaṇaṃ kuryāddīkṣākāle gururdhiyā

(p. 27) iti | na punarloṣṭādivat hastena tasyāmūrtasya grahaṇaṃ bhavati, 
ata eva ceyameva sā nirvāṇadīkṣā śivasadbhāvadāyinī, 
paramaśivasvarūpābhivyañjikā || 32 ||


ṭippaṇī: prāgvarṇitāyāḥ saṃvida eva anityajaḍavastvātmano'mṛtāt 
bāhyasādhanādyadhīna -dīkṣāto'pi anuttamavailakṣyeṇa 
anuttarāmṛtarasamayatā, uttama vidhisaṃskaraṇakāraṇatvaṃ ceti || 32 ||


iti śrīkallaṭācāryaviracitāyāṃ spandakārikāvṛttau sahajavidyodayo 
nāma dvitīyo niḥṣyandaḥ || 2 ||


vivṛti: (p. 96) iyameva yathāpratipāditā 
śarīrādivinaśvaravastvālambanāhaṃpratyayarūpasya 
svaprakāśavyatiriktavedyabhāvapratītimayasya mithyājñānasya 
ucchedāt anavacchinnasvacchasvacchandasvabhāvamātraikatattvopalabdhi-
rūpā saṃvit samyag jñānam amṛtaprāptiḥ amṛtasya avināśinaḥ 
śivātmakasyātmanaḥ prāptirupalabdhiḥ kila 
arthānugatāmṛtaprāptirbhavati, na tu dravyaviśeṣātmakasya 
jaḍasyānityasya vastunaḥ kasyacit prāptiramṛtaprāptiḥ, sā hi jīvasya 
kālāntarasthāyiśarīratvakāraṇabhāvāt etadupacāreṇa evamucyate | 
tathā ayamevātmano grahaḥ yā evaṃvidhā 
mantroccāraṇecchākṣaṇabhāvinī saṃvit so'yamevātmano jīvasya 
graho grahaṇaṃ, teṣu teṣu hi dīkṣādiṣu vidhiviśeṣeṣu ātmanaḥ 
śiṣyasaṃbandhinaḥ svasya vā grahaṇaṃ śāstreṣu upadiśyate | yathā 
udāhṛtaṃ vṛttau

	ātmano grahaṇaṃ kuryāddikṣākāle gururdhiyā |

(p. 97) iti | tena tādṛgvidhisaṃpattaye parikalpitarūpaviśeṣasyātmano yā 
paramakāraṇabhūtasvabhāvābhedasamāpattirupajāyate, sā 
parāmṛśyamānā ātmagrahaṇātmakavidhisaṃpadikā bhavati, na tu 
anyathā tasyāmūrtasya grahaṇaṃ saṃbhavati, grahītuḥ paramātmanaḥ 
sarvavyāpakasaṃvidrūpāt tasyābhinnatvāt | tathā iyameva 
nirvāṇadīkṣā nirvāṇaṃ 
nirvṛtirdvaitapratyayalakṣaṇakṣobhaparikṣayāt ātyantikī praśāntiḥ 
saṃvidaḥ svasvabhāvavyavasthitiḥ, tadarthā dīkṣā 
svarūpasaṃbodhadānātmako bhedamayabandhakṣapaṇalakṣaṇaśca 
saṃskāraviśeṣaḥ, sā caivaṃrūpā nirvāṇadīkṣā iyameva 
pratipāditā saṃvit, etatkāraṇatvāt tasyāḥ | yata eṣā saṃvit 
śivasadbhāvadāyinī śivasya svasvabhāvasyaiva parameśvarasya yaḥ 
sadbhāvaḥ sattā, yena rūpeṇa ahamevāsmi - (p. 98) iti 
pratipattirabādhitā siddhyavasthāyāmupapadyate tasya dāyinī 
pratipādikā, sa hi niruttaraḥ saṃskāraḥ suprabuddhagurorgocaraḥ 
paramaśivātmakasvarūpaprāptimātro, na tu 
bāhyasādhanasādhyavidhiviśeṣātmaka iti | vyākhyātametat 

	iyameva sā mithyājñānaśūnyasya

ityādinā vṛttau || 2 ||
	evamuttamavidhisaṃskārakāraṇatvamasyāḥ saṃvidaḥ 
pratipādya, idānīṃ siddhyantarakāraṇatvaṃ 
saṃsārivyavahāranidarśanena pratipādayituṃ ślokadvayamāha


atha vibhūtispandākhyastṛtīyo niḥṣyandaḥ |


yathecchābhyarthito dhātā jāgrato'rthānhṛdisthitān |
somasūryodayaṃ kṛtvā saṃpādayati dehinaḥ || 4/3 (33) ||

vṛti: (p. 28) yathāsyānabhivyaktasvasvarūpasya yogino 
jāgradavasthāyāṃ yathā yathā icchā bhavati, tathaiva 
tasyānekārthasaṃnidhāne'bhima -tasyaiva kasyacidarthasya darśanaṃ 
bhavati naṭamallaprekṣādiṣu somasūryodayaṃ kṛtvā 
cakṣurādiṣvavadhānena || 33 ||

ṭippaṇī: arthadidṛkṣordidṛkṣāvasthāyāmīpsitavastvavadhāraṇā-
vadhānasvabhāvamāviśyaiva iṣṭārthaprāptiriti sāvasthā 
prārthanātmetyupa -caritā | vṛttau tu cakṣuṣoriti 
indriyāntaropalakṣaṇam, tena śuśraṣāpi -spṛkṣāvasthāpi 
evamevopacaryate icchāpūrvakatvādeva samastārthasphuraṇasyeti || 33 ||


tathā svapne'pyabhīṣṭārthānpraṇayasyānatikramāt |
nityaṃ sphuṭataraṃ madhye sthito'vaṃśyaṃ* prakāśayet || 4/4 
(34) ||


(* vivṛti: sthito'vaśyaṃ)
vṛti: tathā svapne'pi abhīṣṭārthāneva paśyati, praṇayasyānati -
kramāt (p. 29) icchābhyarthanāyā anatikramāt, yacca tanmadhye 
hṛdayaṃ sphuṭataram abhivyaktaṃ nityaṃ tadetat svapnasvātantryam 
ityucyate, ayameva tamovaraṇanirbheda ityarthaḥ || 34 ||

ṭippaṇī: uktaprakāreṇa nikhilagrāhyagrāhakasaṃbandhidaśāsu 
tādātmya -pratipattirūpasya praṇayasyānullaṅghanāt 
manovedyasṛṣṭiviṣaye'pi abhimatārthānāṃ suprakaṭatarameva 
prathanamiti svāpnikā arthāḥ svātantryeṇa prasartuṃ naiva 
prabhaveyuriti ato yogino nirdiṣṭadaśa -yoraviśeṣāt tamovaraṇanirbheda 
āvirbhavet yena siddhyantaraprasavaḥ || 34 ||

vivṛti: (p. 99) yathā dehino dehamātrameva ātmatvena pratipannasya 
sarvasya saṃsāriṇo jāgrato yathāsvaṃ 
viṣayagrahaṇavyagrendriyavṛttilakṣaṇāṃ jāgarāvasthām anubhavato 
hṛdi sthitān āśayaniviṣṭān draṣṭum abhīṣṭān bhāvān 
icchābhyarthitaḥ icchayādidṛkṣārūpayā abhyarthitaḥ, 
tadavasthāsvabhāvabalāt tādātmyasamāpattyā tadarthasaṃpatteḥ 
yācita iva dhātā sarvakartā parameśvaraḥ paramātmā saṃpādayati 
yathābhiprāyaṃ prakāśayati | kiṃ kṛtvā ? - somasūryayoḥ 
cakṣuṣoḥ udayam abhipretārthāvadhāraṇamātrāvadhānarūpa-
svarūpaprathanaṃ vidhāya, - ityupamānavākyam | idamatra tātparyam - 
yo yaḥ kaścit saṃsārī yamevārthaṃ draṣṭumutpanneccho bhavati, sa 
taddidṛkṣāvasthāyāṃ jhagityavaśa eva paramātmānaṃ 
dhātāramabhedena āviśati, sā avasthā asya prārthanā - ityupacaritā, 
tatpūrvakatayā abhīṣṭārthaprāpteḥ | (p. 100) sa tayā abhyarthito dhātā 
tāvanmātrārthaprathanāya avadhānātmanā cakṣuṣoḥ 
svarūpavyaktilakṣaṇamudayaṃ kṛtvā, saṃnihiteṣvapi anyeṣu bahuṣu 
dṛśyeṣu yaddidṛkṣayaiva abhyarthitaḥ tamevārthaṃ pradarśayati, 
nānyat | cakṣuṣorudayaṃ kṛtvā - iti upalakṣaṇamātrametat mantavyam | 
tena śuśrūṣābhyarthitaḥ śravaṇayorudayaṃ kṛtvā 
śravyāntarasaṃnidhāvapi śuśrūṣitameva arthaṃ śrāvayati dhātā 
dehinaḥ, - iti sarvendriyeṣvapi yojyam | cakṣuṣośca somasūryaśabdena 
pratipādanena viśvarūpāt dhāturjīvasya 
vāstavābhedapratipādanaprayojanam | upalakṣaṇārthaṃ ca vṛttikṛtaiva 
vyākhyātam

	cakṣurādiṣvavadhānena

ityatrādigrahaṇāt | itthaṃ sarvajīvānāṃ 
sarvārthaprathanamicchāpūrvakaṃ bhavati, sā ca icchāvasthā 
saṃsāriṇaḥ paramakāraṇābhedarūpā, - iti parameśvara eva svatantro 
yatheṣṭamidamakhilaṃ prakāśayati (p. 101) iti paramārthaṃ 
tadīyamāyāśaktijanitadehādivyavacchedāḥ saṃsāriṇo na prapadyante | 
yastu prabuddha uktopadeśābhyāsaprakarṣakaṣaṇapāṣāṇāniśitī-
kṛtaprajñākṛpāṇīnikṛttakalpakāyādyahaṃkārakarkaśagranthirudita-
nirāvaraṇasatyātmasaṃvitsa eva saṃsmaryamāṇaḥ taṃ 
pratyabhijñātumalam, - iti siddhāvyatirekasamādhiyoginaṃ prati 
idamupameyavākyenopadiśyate | yathā vā taireva pratipāditayuktyā 
icchābhyarthitaḥ san sarvārthān prathayati; tathaiva tena prakāreṇa 
nityaṃ sarvadā sarvāsu jñātṛjñeyasaṃbandhadaśāsu praṇayasya 
icchāvasthāyāṃ tādātmyapratipattirūpāyāḥ prārthanāyāḥ 
anatikramāt anullaṅghanāt pratyavamarśāvahitatvena anupekṣaṇāt 
svapne'pi svavyāpāroparatacakṣurādau 
manomātragrāhyasvasṛṣṭiviṣayāyāṃ svāpāvasthāyāṃ yāvad 
abhīṣṭān sādhakābhimatāneva arthān sphuṭataram (p. 102) 
atiprakaṭaṃ kṛtvā madhye sthito hṛdaye sadāsīno 'vaśyaṃ niyamena 
asau dhātā prakāśayet prathayet - iti 
tathetyāderupameyavākyasyārthaḥ | tātparyaṃ punaridaṃ - yaḥ 
sarvadā sarvānubhaveṣu, dhātuḥ sarveśvarasya svasvabhāvasya 
tallīnatvalakṣaṇaṃ praṇayaṃ svasāmarthyasiddhaṃ 
pratikṣaṇapratyavamarśāvahitatvāt nātikrāmati, tasyāsau dhātā 
jāgaravat svapne'pi abhimatānevārthān prakāśayati, na tasya 
svapnapadārthāḥ svātantryeṇa pravartamānāḥ 
sarvakartṛtvalakṣaṇasvaśaktipratibandhamudbhāvayanti asaṃsāritvāt; 
kiṃtu svatantraḥ svaśaktyā yatheṣṭaṃ tān sṛjati | yathāha bhartṛhariḥ

	pravibhajyātmanātmānaṃ sṛṣṭvā bhāvān pṛthagvidhān |
	sarveśvaraḥ sarvaśaktiḥ svapne bhoktā prapadyate ||

iti | ata eva svapnasvātantryametat - ityuktam | tasya svapnajāgarayorviśeṣo 
nāsti, - iti tamovaraṇanirbhedaḥ sa evoktaḥ | 
dehādyahantājanito'navacchinnasvamāhātmyanirodhaḥ (p. 103) tamaḥ, 
tena varaṇaṃ sthaganaṃ svabhāvatirodhānaṃ, tasya 
nirbhedo'nantanijavaibhavābhivyaktivaśāt vināśaḥ, sa hi 
tasyāmavasthāyāmāvirbhavati | vyākhyātametat vṛttau pṛthak pṛthak

	yathā asya anabhivyaktasvasvarūpasya

ityādinā | tathā

	svapne'pyabhīṣṭārthāneva paśyati 

ityādinā granthena || 3 || 4 ||

atha evaṃvidhasamādhivyutthānamātrāt saṃsārisamānatāṃ 
yoginaḥ pratipādayan, nityayuktatāṃ draḍhayitumāha


anyathā tu svatantrā syātsṛṣṭistaddharmakatvataḥ |
satataṃ laukikasyeva jāgratsvapnapadadvaye || 4/5 (35) ||

vṛti: anyathā tu svarūpasthityabhāve svatantrā syāt svapne 
ālabiḍāladarśanarūpā (kh, g: āḍabiḍa) sṛṣṭiḥ, yasmāt tattattvaṃ 
sṛṣṭisvabhāvaṃ prasavadharmatvāt; yathā satataṃ (k, kh: yayā satatam) 
sarvasya (p. 30) lokasya jāgradvṛttau svapnāvasthāyāṃ ca 
saṃbandhāsaṃbandhavikalpāḥ (gh: svapnāvasthāyāṃ ca saṃbaddhā 
vikalpā iti pāṭhāntaraṃ ca saṃdṛśyate |) 

ṭippaṇī: jñānajñeyabhāvena vijṛmbhamāṇe padadvayātmani 
śāktaprasare svasaṃvitsamādhānaniviḍapariśīlanānapāyāt 
nityayuktasya sṛṣṭisvabhāvamuktapadadvayaṃ śaktipratibandhaṃ 
vidhātuṃ naiva prabhu, anyathāvartamānastu lokavat svayaiva 
bhāvasṛṣṭyā paravaśīkriyate * * * *?hitena bhāvyamityarthaḥ || 35 ||

vivṛti: anyathā tu uktātprakārāt anyena prakāreṇa, sarvakartuḥ 
svatantrasya parameśvarasya ekasya mamaivedaṃ (p. 104) jagatkāryam - iti 
pratipattyabhāvarūpeṇa vartamānasya yogino jāgratsvapnapadadvaye 
jāgarasvāpadaśayoḥ taddharmakatvataḥ sargaguṇātmakatvāt sṛṣṭiḥ 
nānābhāvanirmitiḥ satatam ātmatattvasaṃvidapāyād [-
saṃvidudayāt] svatantrā syāt vāstavena 
svatantrasvātmamātrakartṛtvena aparāmṛśyamānā satī, 
vicitravibhramadānasvacchandā durnivāratādṛksāmarthyaprasarā bhavet 
| kasyeva ? - laukikasyeva saṃsāriṇo lokasya yathā | idamatra tātparyam - 
jāgarāsvapnalakṣaṇaṃ padadvayaṃ sargasvabhāvaṃ, tatra hi 
jñānajñeyabhāvena pārameśvaryāḥ śakteḥ sthitiḥ pratipāditā, 
tādṛśi asmin dvayātmake padadvaye yo yogī 
yathoktasaṃvittisamādhānāparityāgāt apyutthitaḥ syāt, tasya sarvathā 
svatantre sarvakartari svātmani suvyavasthitasya (p. 105) sṛṣṭisvabhāvaṃ 
tatpadadvayaṃ śaktipratibandhāya na prabhavati; yastu ato'nyathā syāt 
sa lokavannijayaiva bhāvasṛṣṭyā paravaśīkriyate - iti nityayuktena 
yoginā bhāvyamityarthaḥ | tadetat 

	anyathā svarūpasthityabhāve

ityādinā vyākhyātametadvṛttau || 5 ||
	idānīmatītānāgatavyavahitaviprakṛṣṭādivastuvijñānamanayaiva 
saṃvidā sulabham, - iti yugalakenāha

yathā hyartho'sphuṭo dṛṣṭaḥ sāvadhāne'pi cetasi |
bhūyaḥ sphuṭataro bhāti svabalodyogabhāvitaḥ || 4/6 (36) ||

vṛti: yathā kila dūrasthitaḥ kaścidarthaḥ puruṣeṇa pūrvaṃ 
sāvadhānenāpi na lakṣyate sa eva sphuṭaro bhavati, prayatnaviśeṣeṇa 
nirūpyamāṇastatraiva sthitasya || 36 ||

ṭippaṇī: didṛkṣoścakṣuvisphāraṇamātropakrame 
viṣayasyāsphuṭatayopalam -bhāt kṣaṇāntare sphuṭataraprakāśaḥ, 
yasmāddraṣṭurdarśanaviṣaye -'tiriktadarśanasādhanaṃ naiva kimapi 
āhriyate vāstavasvabhāvānu -praveśamantareṇa, tadanākramaṇādeva 
yathātmyaprathopapatteḥ ityevamarthaprathā sarvasādhāraṇāpi kevalaṃ 
yogina evoktabala -pratyavamarśaprakāśinī, nānyasya 
māyātimirāndhasyeti || 36 ||


tathā yatparamārthena yadā yatra yathā sthitam* |
tattathā balamākramya na cirātsaṃpravartate || 4/7 (37) ||

(* vivṛti: evaṃ yatparamārthena yatra yena yathā sthitam)
vṛti: (p. 31) tathā tenaiva prayatnaviśeṣeṇa yat vastu yena rūpeṇa (k, kh: 
svena rūpeṇa) yadā yasmin kāle, yatra deśe, yathā yenākāreṇa 
saṃsthitaṃ, tat vastu tathā svabalaṃ svasvarūpamāśritasyācireṇaiva 
kālena pratibhāti nirāvaraṇasvarūpatvāt tenātītānāgataṃ jñānaṃ 
parimitaviṣayaṃ na kiṃcidāścaryam || 37 ||

ṭippaṇī: evamuktabalādhiṣṭhānādeva 
tattadavasthākāradeśakālādyavisaṃ -vāditayā 
atītādivyavahitaviprakṛṣṭavastūnāṃ vijñānaṃ sulabha -meveti pūrva 
ślokadṛṣṭāntadvāropodbalitamiti bhāvaḥ || 37 ||

vivṛti: (p. 106) yathā hi kasyacit sāvadhāne 
tadarthadidṛkṣāniviḍaprayatne'pi cetasi sati, jhagiti dṛṣṭamātro 'rthaḥ 
asphuṭaḥ aprakaṭo bhāti prathate, bhūyo 'nantaraṃ 
svabalodyogabhāvitaḥ svasyātmanaḥ sarvajñasya balaṃ sāmarthyaṃ 
jñatvādilakṣaṇā śaktiḥ tayā, udyogaḥ udyamo 
niviḍatarāvadhānatayā darśanotsāhaḥ, tena bhāvito lakṣitaḥ san 
sphuṭataro bhāti pratyabhijñāyamānaniravaśeṣaviśeṣaḥ so'yam iti 
prathate, - ityupamānavākyam | asyedaṃ tātparyaṃ - yasya kasyacit 
draṣṭumabhīṣṭo'rtho jhagiti visphāritamātracakṣuṣo na samyak 
dṛśyatāmāpadyate, punaḥ kṣaṇāntare taddeśagatasyaiva tathaiva 
nyakṣanikṣiptākṣasya sphuṭataraḥ prakāśate, tatra ko hetuḥ ? - na hi tena 
draṣṭṛvyatiriktaṃ viśeṣadarśanasādhanaṃ kiṃcidāhriyate, tena 
tāttvikasvabhāvānupraveśa (p. 107) eva tasya saṃjāyate, 
yadbalasparśāt tasya so'rtho yāthātmyena prathate-; tataḥ 
svabalodyogamātraṃ sarvārthaprakāśanasādhanaṃ sarvadehināṃ, 
nānyatkiṃcit | evaṃvidhārthaprakāśanaṃ sarvaprāṇisādhāraṇamapi 
prabuddhasya yogina eva pratyavamṛśyamānaṃ sat tathā prakāśate, 
nānyasya māyātimiratiraskṛtasamyagdarśanasya, - iti yogī eva anena 
upadeśena smāryate evam ityādyupameyavākyoktena | yathā hi 
asphuṭadṛṣṭo'rthaḥ svabalamevākramya sphuṭataraṃ prakāśate, evam 
anenaiva upamānavākyoktena prakāreṇa balaṃ 
svasvabhāvasāmarthyam ākramya didṛkṣākṣaṇe tat abhedena 
adhiṣṭhāya, vartamānasya yoginaḥ tathā tenaiva 
tattadavasthākāradeśakālādyavisaṃvādinā prakāreṇa 
saṃpravartate samyagabhivyaktimeti samyak (p. 108) jñeyatayā 
abhimukhībhavati | kiṃ tadvastu ? - paramārthena tattvato yat vastu 
gavādi yathā yena avasthātmanā prakāreṇa yena yādṛśena 
viśiṣṭasāsnādimatā ākāreṇa yatra yasmin vyavahitaviprakṛṣṭādau 
deśe, bhūtādau vā kāle sthitaṃ tattathā saṃpravartata - iti | 
ayamatra bhāvārthaḥ - asphuṭe'rthe dṛṣṭe tasya sphuṭatarāvabhāsāya 
sarvajñasvasvabhāvābhedo yaḥ sarvasya kasyacit aprayatnena utpadyate, 
prabuddhaḥ tatparāmarśābhyāsāt deśakālādivyavahitānapi 
yathābhimatānarthān tattvato jānāti - ityabādhitāyāṃ yuktau 
sthitāyāṃ sarvajñatvādiguṇābhivyaktau ayameva hetuḥ | ata evoktam 

	parimitaviṣayamatītānāgatajñānaṃ na
	kiṃcidāścaryaṃ nirāvaraṇasvasvabhāvatvāt

iti | tasyāṃ hi daśāyāṃ deśakālādyaniruddhaṃ 
svasvabhāvabalamabhivyajyate | (p. 109) asphuṭo'rtho dṛṣṭaḥ 
ityupalakṣaṇārthametanmantavyam, tena śrutādiṣvevameva yojyam | 
etena ca dṛśyāderarthasya sphuṭataradarśanādyarthaṃ 
prayatnaviśeṣāvasthāyāṃ saṃpādyamānena 
pratiṣṭhitaspandānupraveśena 
sarvabuddhyakṣavyāpārātmakajāgradavasthāśrayaḥ 
paratattvopalabdhyupāyaḥ prasaṅgāt pratipādito veditavyaḥ 
vyākhyātametadvṛttikṛtā ślokadvayaṃ pṛthak pṛthak

	yathā kila durasthita

ityādinā,

	tathā tenaiva prayatnaviśeṣeṇa

ityādinā granthena || 6 || 7 ||
	athaitayaiva yuktyā kṣuttṛṣṇādijayaṃ pratipādayitumāha


durbalo'pi tadākramya yataḥ kārye pravartate |
ācchādayedbubhukṣāṃ ca tathā yo'tibubhukṣitaḥ || 4/8 (38) 
||

vṛti: kṣīṇadhāturapi tadvalamutsāhalakṣaṇamākramya yataḥ kārye 
pravartate, yathā ca kaścit (kh: tathā ca kaścid) aśakto'pi 
vyāyāmābhyāsena mahatīṃ śaktiṃ prāpnoti udyogabalena, tathānena 
svabhāvānuśīlanena bubhukṣāmapi ācchādayati yo'tibubhukṣitaḥ 
syāt, yataḥ sarvatraivātmasvarūpasya (p. 32) 
kāryakāraṇasaṃpādanasāmarthyamavilambam || 38 ||

ṭippaṇī: bubhukṣānivṛttyādyapi nityatṛptākṛtakasvabalaprathanādeva 
sidhyati ityādyupalakṣito'nyaḥ siddhiprapañco'pi 
proktatattvāsādanādeva pronmīlyate || 38 ||

vivṛti: yato yasmāddhetorbalaṃ sarvakartṛtvasvātantryalakṣaṇaṃ (p. 
110) sāmarthyamātmīyamākramya, pūrvoktayā yuktyā 
tatrāvyatirekeṇa sthitvā durbalo'pi apacitadehadhātutvāt asamartho'pi 
san, kaścit kārye bhārodvahanādivyāpāre pravartate kriyāpradhāno 
bhavati, - etat dṛṣṭāntavākyam | asyedaṃ tātparyam - yaḥ 
parikṛśakāyatvāt aśakta eva saṃdhyādivyāpāramārabhamāṇaḥ, 
abhyāsabalāt viṣayāntare balavattareṇāpyaśakyaṃ vyāyāmādikarma 
kartuṃ prabhavati, tasya tathā sāmarthyotpattau prāk pratipāditayuktyā 
svasvabhāvabalākramaṇamekaṃ varjayitvā nānyatkiṃcinnimittam | tattu 
yatheṣṭasarvakartṛtvalakṣaṇaṃ balamātmatattvasya, māyīyaḥ kartā 
māyāprativaddhaśaktitvāt 
niyatakāraṇāntarāpekṣaniyatakāryasaṃpādanasāmarthyaṃ manyate | 
so'pīdamahaṃ kartuṃ śaknomi - ityavikalotsāhadaśāyāṃ tadeva 
balamavalambamānaḥ tatkāryasaṃpādanakṣamo bhavati, - iti 
yuktiryogina eva pratipattigocarībhavati - iti, tāmetāṃ dṛṣṭāntīkṛtya (p. 
111) taṃ pratyeva idaṃ dārṣṭāntikavākyena upadiśyate, - yathā 
durbalo'pi balavatsaṃpādyakāryasaṃpādanasamarthaḥ 
svasvabhāvabalākramaṇādeva bhavati, tathā tenaiva prakāreṇa 
sarvakāryasaṃpādanasvatantraṃ svabalamākramya tat svaśaktitayā 
adhiṣṭhāya yo'tibubhukṣitaḥ atyarthaṃ bhojanecchāviṣṭaḥ, sa tāṃ 
bubhukṣām ācchādayet sthagayet nyakkuryāt, 
nityatṛptākṛtakasvarūpasāmarthyaprathanāt 
annādyabhyavahārakāraṇameva kṣunnivṛttyādikāryam, - iti 
niyatiśaktipratibandhavidalane sati atyantaṃ tāṃ tirobhāvayet, nityatṛpta 
eva syādityarthaḥ | 

	durbalaḥ kṣīṇadhāturapi

ityādinā vyākhyātametadvṛttau || 8 ||
	evaṃ pṛthak sarvajñatvasarvakartṛtvādiguṇavyaktyupāyopapattīḥ 
pratipādya punarekopapattinidarśanena tāḥ pratipādayitumāha


anenādhiṣṭhite dehe yathā sarvajñatādayaḥ |
tathā svātmanyadhiṣṭhānātsarvatraivaṃ bhaviṣyati || 4/9 (39) 
||

vṛti: anenātmasvabhāvena adhiṣṭhite vyāpte śarīre sarvajañatādayo 
yasmāt, tatra svalpayūkābhakṣaṇamapi kṣiprameva jānāti, tathā 
svātmanyavahitasya sarvatra sarvajñatā bhaviṣyati || 39 ||

ṭippaṇī: kalpitāhaṃbhāvapratyayapratibandhabhaṅgāt cinmātrātmani 
prapramātari pūrṇāhaṃbhāvavatāṃ niṣpratyūhaṃ sarvaviṣayāḥ 
pūrṇajñātṛtvādayo guṇā abhivyajyante | atra ca sarvakartṛtvasarva -
jñatvādiguṇānāṃ vyaktyupāyaḥ sanidarśanaṃ pratipādyate iti || 39 ||

vivṛti: (p. 112) anena ātmanā cetayitrā adhiṣṭhite ahamiti pratipattyā 
adhyāsite dehe śarīre sarvajñatādayaḥ śarīrāśrayāṇi sarvāṇi 
jñeyāni kāryāṇi ca, teṣu jñatā jñātṛtvamādiryeṣāṃ tānyeva 
kartṛtvādayo dharmāḥ yathā sarvasya sthitā - iti dṛṣṭāntavākyam | 
asyedaṃ tātparyam - yadyadayamātmā ahamiti - pratipattyā adhitiṣṭhati 
tattadasya śarīram, tadāśrayaṃ ca sarvamayaṃ sthūlaṃ sūkṣmaṃ vā 
jñeyaṃ kāryaṃ ca jānāti ca karoti ca - ityanena nidarśanena tathaiva 
tenaiva prakāreṇa ahaṃtayā dehādhiṣṭhānavat svātmani svasvabhāve 
na duḥkhaṃ na sukhaṃ yatra ityādinoktalakṣaṇe 
dehādivyatiriktaviśuddhādvayacinmātravapuṣi adhiṣṭhānāt 
ahaṃtayā adhyāsanāt, evaṃ śarīrāśrayasamastajñeyakāryavastu (p. 
113) jñātṛtvādivat sarvatra sakaleṣvapi bhuvaneṣu, yoginaḥ 
sarvajñatādayo bhaviṣyanti avaśyamabhivyaktiṃ yāsyanti; 
parasparavyatirikta - dehamātrāhaṃbhāvalakṣaṇa - pratibandhabhaṅgād 
advayacinmātrasvātmapratiṣṭhitāhaṃkārasya yogino nirvighnāḥ 
sarvajñatādayaḥ sarvatra abhivyajyanta eva ityarthaḥ |

	anena ātmasvabhāvena

ityādinā vyākhyātametat vṛttau || 9 ||
	evaṃ vyādhivalīpalitādyucchedāya upapattimāha


glānirvilumpikā* (k: viluṇṭhikā) dehe tasyāścājñānataḥ sṛtiḥ |
tadunmeṣaviluptaṃ cetkutaḥ sā syādahetukā || 4/10 (40) ||


(* vivṛti: glānirviluṇṭhikā)
vṛti: (p. 33) glāniḥ kila śarīrasya vināśinī, sā ca glānirajñānādut -
padyate, tadajñānam unmeṣeṇātmasvabhāvena yadi nityojjhitaṃ (yadi 
padaṃ; gh: pustakāśrayeṇopanyastam |) tadā sā kutaḥ, kāraṇarahitā 
bhavet; anenaiva kāraṇena valīpalitābhāvaḥ śarīradārḍhyaṃ ca 
yoginām || 40 ||

ṭippaṇī: ajñānenaiva pāramārthikasvabhāvākhyāteḥ 
śarīropacayāpaca -
yādivikārāstadrahitacidānandaghanatattvapratyabhijñānāt 
punarglānyāderabhāvaḥ iti tattvapratyabhijñānameva 
vyādhivalīpalitāderucchedopāyaḥ || 40 ||

vivṛti: glāniḥ māndyādijanitā harṣahāniḥ, sā dehe śarīre 
viluṇṭhikā dhātubalavarṇatejaḥśaktyādīnāṃ haṭhena hartrī; 
tasyāścājñānataḥ pratipāditatattvāvagamābhāvāt (p. 114) sṛtiḥ 
saraṇaṃ pravṛttiḥ; tat ajñānam unmeṣaviluptaṃ cet unmeṣeṇa 
vakṣyamāṇena svabhāvālokavikāsena, viluptaṃ vicchinnaṃ 
nirmūlatāṃ nītaṃ yadi, tadā asau glāniḥ ahetukā kāraṇarahitā kuto 
bhavet na bhavedeva, nirnimittasya utpādābhāvāt; ajñānaṃ nāma 
janma - pariṇāma - vivṛddhi - kṣaya - vināśātmaka - 
vikāravirahitanityanirvikārasvasvabhāvāpratyabhijñānāt 
janmādivikārādhikaraṇe kalevarādau ātmābhimānaḥ, yasmiṃśca sati 
aprabuddho janaḥ tadvikārān janmādīn ātmani āropayan glānyā 
viluṇṭhyate | yastu vakṣyamāṇonmeṣapariśīlanād 
āvirbhūtasatyātmapratyayaḥ tasya kutaḥ glāniḥ, - iti mukhyaṃ phalaṃ 
sahajānandahānirūpāyā (p. 115) glānerabhāvaḥ; gauṇastu 
valīpalitādyabhāvaḥ, yataḥ tadā kutaḥ sā glāniḥ kāraṇarahitā 
bhavet, - iti vyākhyāya punarvṛttikṛtā vyākhyātam

anenaiva kāraṇena valīpalitābhāvaḥ śarīradārḍhyaṃ ca 
yoginām

iti || 10 ||
	atha unmeṣasya glānikāraṇabhūtājñānavināśahetoḥ 
svarūpapratipādanāya āha


ekacintāprasaktasya yataḥ syādaparodayaḥ |
unmeṣaḥ sa tu vijñeyaḥ svayaṃ tamupalakṣayet || 4/11 (41) ||

vṛti: ekatra viṣaye vyāpṛtacittasya yato yasmāt svabhāvāt jhagi [ṭi] 
tyanyā cintopadyate, sa cintāyāḥ kāraṇaṃ unmeṣo jñātavyaḥ, sa tu 
svayameva yoginā lakṣaṇīyaḥ, cintādvayāntarvyāpakatayānubhūya -
mānaḥ (k: dvayānte vyāpaka) ||

ṭippaṇī: anusaṃdhātavyavastudvayavyāpino viśuddhacinmātrasya 
sarvakāraṇasyātmana unmeṣaśabdena vyapadeśyatvāt tatpariśīlanā -
vadhānādikameva uktājñānavijāśītyarthaḥ || 41 ||


vivṛti: (p. 115) sa tu sa punarunmeṣaḥ svasvabhāvābhāsavikāso 
vijñeyo boddhavyo lakṣaṇīyaḥ | ko'sau ? - ekacintāprasaktasya 
ekasyāṃ cintāyāṃ dṛśyamāna - smaryamāṇatattadvastūparakte 
jñāne prasaktasya, ekāgrasya cintayituḥ yato yasmāt 
cintyābhāsānuparaktajñānātmanaḥ svasvabhāvaprakāśāt 
kāraṇabhūtāt (p. 116) aparasyāḥ cintāyāḥ grāhyālambino 
jñānāntarasya udayaḥ utpattiḥ syāt | taṃ ca yogī svayaṃ ātmanaiva 
upalakṣayet - paramārtha - parameśvaraḥ sarvato viviktaḥ 
paramakāraṇaṃ paramātmā ayamahamasmi - iti pratipadyeta | nahi tasya 
śabdādivat idantayā svarūpamupalakṣayituṃ śakyaṃ, - 
svasaṃvedanasaṃviditasvabhāvatvāt | tasyaivaṃvidhasya nityoditasyāpi 
upadeśyaṃ prati tadānīmeva abhivyajyamānatvāt unmeṣaśabdena 
vyapadeśaḥ kṛtaḥ | yastvevaṃ manyate - yasyāṃ cintāyāṃ satyām 
aparacintodayaḥ sā cintaiva cintāntarakāraṇaṃ nāntarālavarti 
vastvantaraṃ vidyate, yaccintādvayasvarūpavyatirekeṇa 
upalakṣaṇīyātmakaṃ dvitīyacintākāraṇaṃ syāt - iti, taṃ prati 
kāraṇabhāvena kāryabhāvena ca abhimatasya pūrvāparībhūtasya 
cintādvayasya eṣa saṃbandho na siddhyati, anusaṃdhātāraṃ tṛtīyaṃ 
vinā | pūrvaṃ kāraṇam (p. 117) aparā ca kāryabhūtā cintā, - iti 
yo'nusaṃdhatte, yaścāsau anapahnavanīyo'nusaṃdhātā 
so'nusaṃdheyacintādvayavyāpakaviśuddhacinmātrasvarūpaḥ 
sarvakāraṇamātmaivonmeṣa ityuktaḥ | ata eva vṛttikṛtā vyākhyātam 

	cintādvayānte vyāpakatayā anubhūyamānaḥ

ityādinā || 11 ||
	idānīṃ tattatsādhanaviśeṣābhiniviṣṭānāṃ yogināṃ prāyeṇa 
yāḥ prāpyaphalatayā abhīṣṭāḥ siddhayaḥ tā etadupāsāyogino 
vighnaparamparā eva, ityunmeṣābhyāsaprabhāvaṃ pratipādayitumāha


p. 34)	ato bindurato nādo rūpamasmādato rasaḥ |
pravartante'cireṇaiva kṣobhakatvena dehinaḥ || 4/12 (42) ||

vṛti: ataḥ, asmādunmeṣādanuśīlyamānāt binduḥ tejorūpaḥ, nādaḥ 
praṇavākhyaḥ śabdaḥ, rūpamandhakāre darśanaṃ (g: prāṇākhya iti 
pāṭhaḥ, andhakāre darśanamitivākyaṃ tu; gh: eva 
saṃdṛṣṭamupanyastam |), rasaḥ amṛtāsvādo mukhe, ete kṣobhakatvena 
pravartante ācireṇa kālena || 42 ||

ṭippaṇī: dharātattvavadhyāyināṃ bhrūmadhyādipradeśe 
prathamānastejo -viśeṣo binduḥ | vyomadhāraṇābhyāsavatāṃ 
svayamuccarito dhvaniviśeṣo nādaḥ | 
tejodhāraṇābhyāsināmandhatamase'pi dṛśyavastudarśanaṃ rūpam | 
rasavadvasturāhitye'pi tadāsvādo raso'ptattvadhyāyigamyaḥ 
ityetatsarvamunmeṣābhyāsino vighnarūpaṃ siddhijātaṃ 
samullasatītyarthaḥ || 42 ||

vivṛti: ataḥ asmāt pratipāditasvarūpāt unmeṣāt, 
jāgarādyavasthāgatasukhaduḥkhādyanubhavadaśāsu aviluptena 
avadhānena, pratikṣaṇavinaśvaravicitraparatantratuccharūpāt 
vedyavastuno vaidharmyeṇa bhāvyamānāt sarvakāraṇabhūtāt acireṇa 
alpena kālena, etāni siddhacihnāni, kṣobhakatvena saṃtoṣa-
smayābhimānādibhiḥ cittavyutthāpakatvena dehino 
nitarāmanunmūlitadehādyahaṃpratyayasya yoginaḥ pravartante 
prādurbhavanti | kāni tāni ? - binduḥ bhrūmadhyādau pradeśe 
dhyānābhyāsaprakarṣapravardhamānottarottaraprasādastejo - viśeṣo, yo 
bindubhedābhyāsāt dharātattvadhyāyināmabhivyajyate | tathā - nādo 
vegavannadyoghanirghoṣaghanopakramaḥ 
kramasūkṣmībhāvābhivyajyamānamadhumattamadhukaradhvanitānu-
kārī svoccarito dhvaniviśeṣo, yaṃ vyomatattvābhyāsinaḥ śṛṇvanti | 
tathā - rūpaṃ santamasādyāvaraṇe'pi sati tattad - 
dṛśyavastvākāradarśanaṃ, yat tejastattvanyakṣanikṣiptamatayo (p. 119) 
nirīkṣante | tathā - raso rasavadvastu - virahe'pi amṛtāsvādo mukhe, 
lolāgralambikādidhāraṇānirataiḥ aptattvadhyāyibhirya upalabhyate; 
pavanatattvadhyāyināṃ sparśaviśeṣo'pi yo'bhivyajyate so'pi asmāt 
pravartata, - iti atra draṣṭavyam | idamatra tātparyam - 
unmeṣābhyāsayoginā tattaddhāraṇādyabhyāsaciralabhyāsvapi 
aciraprāpyāsu etāsu upalabdhiṣu saṃtoṣiṇā na bhāvyam, - 
niruttarapadārohapratyūhabhūtatvādāsām | etāścetarayogināṃ 
kramabhāvinyo'pi unmeṣābhyāsayogināṃ tadabhisaṃdhivirahāt 
akrameṇāpi pravartante iti tathaiva nirdiṣṭāḥ | vyākhyātametat 

	ato'smāt unmeṣāt

ityādinā vṛttau || 12 ||
(p. 120) evam unmeṣopadeśena ātmano 
dehādivedyavyatiriktasvarūpatāṃ prāk bahubhiḥ prakāraiḥ 
pratipāditāṃ saṃgraheṇa pratipādya, idānīṃ tathaiva tasya 
sakalalokasvānubhavasiddhaṃ vyavahāraṃ pradarśanīkṛtya 
viśvarūpatāṃ saṃkṣepataḥ pratipādayan 
samastaprakaraṇārthatātparyamāha


didṛkṣayeva sarvārthān yadā vyāpyāvatiṣṭhate |
tadā kiṃ bahunoktena svayamevāvabhotsyate (kh, g: 
svayamevāvagaṃsyati) || 4/120 (43) ||

vṛti: didṛkṣā draṣṭumicchā, tadavasthāstha iva sarvān (p. 35) bhāvān 
yadā vyāpyāvatiṣṭhate, tadā kiṃ bahunā uktena, svayameva 
tattvasvabhāvamavabhotsyate (k: tattvasvabhāvo'vagamyate iti; g: 
svabhāvamavagacchatīti; gh: svabhāvo'vagaṃsyate) jñāsyati || 43 ||

ṭippaṇī: yathā kṣetrajñānāṃ svasaṃvido didṛkṣita -bhāvānāṃ 
darśane -cchāyāmabhedaḥ tathaiva viśvagatabhāvā -nāṃ 
paramātmatattvā -davyatireka iti saṃvittattvāntarlīnān bhāvāt vidhāya 
proktaparatattvaparāmarśā -bhyāsāt sādhanāntaranirape -kṣaṃ 
taddaśāphalaṃ kevalaṃ yogina eva svasaṃvedyaṃ, 
vikalpatimiropahatacakṣuṣastu pāśavasṛṣṭau svābhedamapi vastu 
parāmraṣṭumakṣamatā kuto nu jagadbhāvābhedaparāmarśa -pratipaditi 
yogyeva etatprajñāpātram || 43 ||

vivṛti: (p. 120) yadā yasmin kāle, sādhako didṛkṣayeva 
draṣṭumicchayā yathā sarvārthān akhilān prameyapadavījuṣo 
bhāvān vyāpya svasaṃvitprakāśena ācchādya, tadantarlīnān kṛtvā 
avatiṣṭhate nānātvadarśanabhrāntinivṛtterekatra tattve viśrāmyati; 
tadā tasyāṃ daśāyāṃ yatphalamanubhūyate tatra bahunā bhūyasā 
uktena phalābhidhānena kiṃ ? (p. 121) tatpratipādanecchayā 
granthasahasrāṇyapi uktāni nirarthakāni bhavanti, tasya 
vacanagocarātītatvāt, ata āha svayaṃ tadavabhotsyate iti, tat tādṛśaṃ 
phalaṃ, svayamātmanaiva, vyatiriktasādhananirapekṣeṇa pratipatsyate 
abhiyuktaḥ, svasaṃvedyatvāt tasya | idamatra tātparyam, - yoginā 
sarvabhāvānāṃ svasvabhāvāvyatirekajijñāsunā 
svānubhūtādidṛkṣāvasthā nidarśanīkāryā, tathā hi - 
draṣṭumabhīṣṭā bhāvāḥ svasvabhāvābhedena vyavatiṣṭhante, 
bhāvabhedahetoridantāpratyayasya anunmeṣāt, tadā yathā 
didṛkṣāvasthāyāṃ kṣetrajñasvabhāvādabhedaḥ taddidṛkṣitānāṃ 
bhāvānāṃ, tathā paramātmasvabhāvāt akhilajagadbhāvānāmabheda 
eva, - iti pūrvopadiṣṭavyatiriktātmasvarūpopalabdhiparāmarśā-
bhyāsāt unmiṣitadidṛkṣākṣaṇopalakṣaṇakṣamavijñānacakṣuṣaṃ 
yoginaṃ pratyeva ayamupadeśaḥ; māyāśaktijanitena hi vikalpatimireṇa 
tiraskṛtasamyagjñānadṛśa ekameva 
nirvibhāgacinmātrasvarūpamātmatattvaṃ pramātṛbhedena 
prameyabhedena ca nānārūpaṃ paśyanto 
didṛkṣitadṛśyamānadṛṣṭādyavasthāvibhāgaṃ bhāvānāṃ 
parikalpya, didṛkṣitānāmapi teṣāṃ jīvasvabhāvādabhedaṃ 
vastusantameva parāmraṣṭumaśaktāḥ, kuto jagadbhāvānāṃ 
paramātmasvabhāvānām abhedaṃ pratipadyeran, tadā yoginaiva 
dṛṣṭāntīkṛtasvadidṛkṣākṣaṇaparāmarśadiśā 
svasvabhāvābhedamakhilabhuvanabhāvābhāsānāṃ bhāvayatā 
bhedadhvāntanirbhedabhāsakareṇa bhavitavyam - | vyākhyātametat 

	didṛkṣā draṣṭumicchā tadavasthāstha iva

ityādinā vṛttau || 13 ||

	enameva upadeśaṃ draḍhayitumāha

prabuddhaḥ sarvadā tiṣṭhejjñānenālocya gocaram |
ekatrāropayetsarvaṃ tato'nyena na pīḍyate || 4/14 (44) ||

vṛti: prabuddho'saṃkucitaśaktiḥ sarvakālaṃ tiṣṭhet, jñānenālocya 
gocaram jñeyaṃ paricchidya, evamekatra tattvasadbhāve (gh: 
tattvasvabhāve iti pāṭhāntaraṃ ca dṛśyate |)
vidyātmake āropayet sarvam, tato'nyena vakṣyamāṇena kalāsamūhena 
na pīḍyate || 44 ||

ṭippaṇī: yatkiṃcidvastu pramāṇopārohakrameṇa 
parapramātrāveśabhāk anyathā 
prakāśapadavyāmanārūḍhervastusattānupapatteḥ, 
ityetatsaṃbandhe'vahitā udriktāyamāneneva kalādikṣityantena 
vedyābhimānena naiva khidyante ityuktopadeśadraḍhimā samarthyate || 
44 ||

vivṛti: (p. 123) sarvadā sarvāsu anubhavadaśāsu prabuddhastiṣṭhet 
pratipāditopadeśābhyāsaparatvāt animīlitasamyagjñānadṛṣṭiḥ 
jāgradeva āsīta | kathaṃ ? - jñānena saṃvedanena gocaraṃ viṣayam 
ālocya paricchedya, tathārūpatayā niścitya ekatra jñātari svātmani 
sarvaṃ paricchedyam āropayet arpayet, tadabhinnatayā pratipadyeta 
ityarthaḥ | tataśca 
sarvabhāvānāmekapramātṛsvarūpābhedapratipattirūpāt āropaṇāt 
anyena vyatiriktatayā avabhāsamānena prameyeṇa, vakṣyamāṇena 
kalādyātmakena bhāvajātena na pīḍyate 
vinaśvarabhāvāhaṃbhāvapratipattyādinā pāśena saṃsāracakre 
nibadhya na kadarthyate | idamatra tātparyam, - yaṃ (p. 124) yamarthaṃ 
rūpādikaṃ cakṣurādijñānena pramātā ālocayati niścinoti, sa sa 
niścayāvasthāyāṃ pramātṛrūpāt abhinna eva bhavati; niścitatvaṃ hi 
nāma vastunaḥ prakāśamānatvaṃ, tacca 
prakāśamānatvādabhinnameva, nānyadbhavitumarhati, 
prakāśavyatiriktarūpatve tasya prakāśamānatānupapatteḥ | evaṃ 
niścayāvasthāyāṃ prakāśamātrasvarūpapramātrabhedaḥ 
sarvabhāvānāṃ svabhāvasiddhaḥ, tata evaṃvidho 
grāhyagrahītṛgrahaṇasaṃbandhaḥ sthito'pi aparāmṛśyamāno 
nānātvamohajālena badhnāti sarvajantūn, ataḥ sarvāvasthāsu 
avirataparāmarśo bhavet, yenaikapramātṛparamārthatvaṃ 
jagadbhāvānāṃ pratipannaḥ san punaḥ saṃsārī na syāt | tadevaṃ 
prabuddhaḥ sarvadā tiṣṭhet ityuktam |

	prabuddho'saṃkucitaśaktiḥ

ityādinā vyākhyātametat vṛttau || 14 ||

(p. 125) idānīmevaṃ svayaṃ saṃvyavasthitaḥ svātmaiva 
parameśvaraḥ ekaḥ padārthaḥ san nijayaiva māyāśaktyā pratipaśu 
bhedena ātmānamavabhāsayan krīḍati - iti tattvato 
dvitīyapadārthābhāvameva samarthayamānaḥ 
paśusvarūpapratipādanadvāreṇa śaktiprasarakriḍāmeva asya 
pratipādayitumāha 


p. 36) śabdarāśisamutthasya śaktivargasya bhogyatām |
kalāviluptavibhavo gataḥ sansa paśuḥ smṛtaḥ || 4/15 (45) ||

vṛti: śabdarāśirakārādikṣakārāntaḥ, tatsamudbhūtasya 
kādivargātmakasya brāhmyādiśaktisamūhasya, bhogyatāṃ gataḥ 
puruṣo, brāhmyādīnāṃ kalābhiḥ kakārādyakṣarairviluptavibhavaḥ 
svasvabhāvāt pracyāvitaḥ paśurucyate || 45 ||

ṭippaṇī: bhūcaryādiśaktibhiranavarataṃ 
pradarśyamānabhedaprathatvāt parādhīnākhilavṛttiko'pahṛtaiśvaryaḥ 
svavaśīkriyate ityarthaḥ || 45 ||

vivṛti: (p. 125) sa iyatā prabandhena pratipādayitavyasvarūpa ātmaiva 
īśvaro, vakṣyamāṇena hetunā parādhīnasarvavṛttitvena 
anavabhāsitātmā paśuḥ tiryakprāyaḥ smṛtaḥ anāditvāt 
saṃsārakrīḍāvyavahārasya sadā smaryamāṇatvena sthitaḥ | kīdṛśaḥ 
san ? - śabdarāśisamutthasya śaktivargasya (p. 126) 
kalāviluptavibhavo bhogyatāṃ gataḥ san pārameśvaryāḥ śakteḥ 
vakṣyamāṇavāgrūpaprasarābhiprāyeṇa ādi - 
kṣāntavarṇasamudāyātmika(a yā) stadviparītaṃ .... .... .... .... .... .... ....  

[(1 footnote) viparītam ityato'nantaramasya 
ślokasyāvaśiṣṭavyākhyābhāgo yāvatsamastamūlādarśapustakeṣu 
vinaṣṭasattayā truṭito'sti | ataḥ idaṃ vyākhyānaṃ 
padyārthābhijñānāya spandapradīpikāgranthāt prakṣipyopanyasyate - 

śabdānāṃ rāśiḥ śabdarāśiḥ varṇasamūhaḥ, mātṛkā akārādi 
kṣakārāntā śabdajananī varṇātmakatvāt śabdānām, tatsamutthasya 
kādivargātmakasya brāhmyādiśakticakrasya kalābhiḥ 
kakārādyakṣaraiḥ viluptavibhavaḥ hṛtamahāvyāptiḥ 
svasvabhāvātpracyāvitaḥ ata evāsya bhogyatāṃ gataḥ san puruṣaḥ 
paśuḥ ucyate ajñatvāt | uktaṃ ca īśvarapratyabhijñāyām

svāṅgarūpeṣu bhāveṣu pramātā kathyate patiḥ |
māyāto bhediṣu kleśakarmādikaluṣaḥ paśuḥ ||

iti | anyatrāpi

bhedagranthivibhaṅge hi karmātmaikyaṃ prapadyate |
so'vijñātaḥ paśuḥ prokto vijñātaḥ patireva saḥ ||

iti || 15 ||] .... .... .... .... .... .... .... ....  


parāmṛtarasāpāyastasya yaḥ pratyayodbhavaḥ |
tenāsvatantratāmeti sa ca tanmātragocaraḥ || 4/16 (46) ||

vṛti: parāmṛtarasāt svarūpāt apāyaḥ pracyutiḥ tasya yaḥ pratyayod -
bhavo viṣayadarśane smaraṇodayo (g: viṣayadarśanasmaraṇeti samastaḥ 
pāṭhaḥ |) yataḥ, tena puruṣo'svatantratām asarvagatvaṃ ca prāpnoti, (p. 
37) sa ca pratyayaḥ tanmātragocaro rūpādyabhilāṣātmakaḥ || 46 ||

ṭippaṇī: sahajamalamūlakameva paśorasvātantryaṃ tadadhikaraṇena 
viśeṣavṛttimāyīyaprākṛtikāvaraṇena atyantāśyānadurbheda -
sudṛḍhāvaraṇapratibandho'nartharūpo'nantapratāna iti bhāvaḥ || 46 ||

vivṛti: (p. 127) .... .... .... .... .... .... .... .... .... .... .... .... .... [(1 footnote) 
parāmṛteti asya padyasyāpi asvatantra ityanta ādyavyākhyābhāgaḥ 
samastamūlādarśapustakeṣu 
pūrvapadyavyākhyābhāgavadvinaṣṭasattayā truṭito'sti | ato'sya 
padyasyāpyarthajñāpakaṃ vyākhyānaṃ spandapradīpikāgranthādeva 
prakṣipya upanyasyate -

tasya ca paśoryaḥ pratyayodbhavaḥ śrotrādidvāreṇa viṣayadarśane 
smaraṇādijñānotpattiḥ, sa eva parāmṛtarasāt svarūpodayāt 
apāyaḥ pracyutiḥ yataḥ sa pumān tenāsvatantratāṃ pāratantryam 
asarvagatādim eti prāpnoti, sa ca pratyayodbhavaḥ tanmātragocaraḥ 
śabdādiviṣayaviṣayaḥ tadabhilāṣātmaka ityarthaḥ || 16 || ]

asvatantro vyatiriktasādhanasāmagryapekṣasakalasamīhitārthaḥ pumān 
tadbhāvamāpadyate, jāgarasvapnasuṣuptāvasthopameyasakala - 
vijñānākala - pralayakevalākhyabhedatrayayogī 
sahajādimalatrayāvṛtaḥ paśurbhavati ityarthaḥ | yatastasya 
pratyayodbhava eva parāmṛtarasāpāyaḥ param anuttaram 
amṛtamavināśi advayacinmayaṃ śivākhyaṃ svarūpaṃ tasya rasaḥ 
tathāpratyavamarśātmaka āsvādaḥ, tasmāt apāyaḥ 
pṛthagbhāvo'nyathāvṛttiḥ idamityādivikalparūpaḥ | (p. 128) idamatra 
vākye garbhīkṛtam - ekasyaiva parasya tattvasya 
svecchāparikalpitānugrāhyānugrāhakabhāvaviviktātmano'nugrāhyo-
pāyārthaṃ, tathaiva svecchayā 
parikalpitaśivaśaktisadāśiveśvaravidyātmakavibhāgābhāsasya 
prakriyāśāstreṣu yat pañcarūpatvaṃ vyavasthitaṃ, tat 
parāmṛtaśabdena rasaśabdena ca saṃgraheṇa uktam | tathā ca - 
ahamityeva atyantabhedasaṃsparśaśūnyaparamaśivākhyasvabhāva-
vācakatvena parāmṛtaśabdaḥ, 
tatparāmarśarūpaśaktitattvavācakatvena ca rasaśabdaḥ 
atyantapraśāntaniṣparāmarśaśūnyaprāyaśivatattvavādimatanirā-
sarthaṃ yaḥ prayuktaḥ sa pūrvaṃ vyākhyāta eva; tadevaṃ 
tattvadvayaṃ śivaśaktyākhyaṃ, yadabhinnamapi 
svarūpapratipādanānyathānupapattyā vibhajya tattvavidbhiḥ (p. 129) 
prakāśyate | tathā ca tattvagarbhastotre gurubhiḥ 
satatamaviluptopalabdhṛtvalakṣaṇasvadharmarūpāyāḥ śakteḥ 
prādhānyapratipādanābhiprāyeṇa śivatattvamevamastūyata |

	yasyā nirupadhijyotīrūpāyāḥ śivasaṃjñayā |
	vyapadeśaḥ parāṃ tāṃ tvāmambāṃ nityamupāsmahe ||

iti | śaktitattvaṃ ca viditaparamārthaiḥ 
svarūpapratyavamarśasāmānyaspandādisaṃjñābhiḥ 
vyavahriyamāṇaṃ tatparyāyabhūtonmeṣādipadābhidheyatayā 
pratipāditam | yaduktam 

	kiṃciducchūnatāpatterunmeṣādipadābhidhāḥ |
	pravartante tvayi śive śaktitā te yadāmbike ||

iti | na ca yadāśabdaśrutibhramāt kadācideṣā śaktyavasthā bhavati, 
kadācinna bhavati iti mantavyam; yataḥ svabhāvasaṃvedanātmako nityaḥ 
sāmānyaspandarūpa eva dharmaḥ kiṃciducchūnatā ityuktam | (p. 130) 
tataḥ paraṃ sadāśiveśvaravidyākhyaṃ tattvatrayamapi 
parāmṛtaśabdavācyameva; yataḥ parameśvarasya paramārthataḥ 
ekatve'pi atyadbhutasvaiśvaryavīryeṇa viśuddhacinmātrarūpatayā 
viśvātmakatvena ca antarbahīrūpaṃ dvaividhyaṃ yadavasthitam, tatra 
viśvātmakasya bāhyasya rūpasya jñeyakāryabhāvena 
labdhasvarūpatvāt ekāpi tacchaktiḥ jñānakriyārūpatayā dvitvena 
upacaryate | tacca jñānakriyātmakatvaṃ yatra bahiragṛhītonmeṣamantaḥ 
sāmyenaivāvatiṣṭhate traiguṇyamiva avyaktāvasthāyāṃ, sā 
parameśvarabhogātmakajñānakriyārūpatve'pi antarmukhatvāt 
nimeṣātmikā sadāśivadaśā | yatra punaḥ śakteḥ kriyāprādhānyena 
bahirgṛhītonmeṣāyāḥ parāhaṃbhāvaviśrāntiḥ sā īśvaradaśā | 
yasyāṃ punarjñānaśaktyudrekeṇa asyā bahirmukhatvaṃ 
bāhyābhyantararūpasāmānādhikaraṇyaparyavasāyitvāt 
svarūpaviśrāntiniṣṭhatvameva (p. 131) sā vidyādaśā iti | tisṛṣvapi 
etāsu daśāsu bhedapratipattimūlatvāt labdhātmikāpi māyāśaktiḥ 
parasyāḥ saṃvidaḥ sarvāpūrakaparipūrṇāhaṃkāralakṣaṇe 
svabhāve eva viśrāntatvāt pratyastamitā satī 
paramānandanirbharaśivarūpaṃ tirodhātuṃ nālam, iti 
padatrayametatparāmṛtameva | yaduktaṃ tattvagarbha eva

	jñānakriyāsvarūpeṇa pravṛttāyāstu te śive |
	sadāśivatvaṃ jagadurbhogāhvaṃ tattvavedinaḥ ||
	guṇībhūtajñaśaktistvaṃ vyaktībhūtakriyātmikā |
	yadā tadaiśvaraṃ tattvaṃ vyaktatāmeti vṛttimat ||
	pravṛttāvunmukhībhūtā bhavestvaṃ parame yadā |
	jñānaśaktistadodārā vidyā tvaṃ parigīyase ||

iti | tathā īśvarapratyabhijñāyām

	evamantarbahirvṛttiḥ kriyā kālakramānugā |
	mātureva tadanyonyāviyukte jñānakarmaṇī ||

(p. 132)

	kiṃ tvāntaradaśodrekātsādākhyaṃ tattvamāditaḥ |
	bahirbhāvaparatve tu parataḥ pārameśvaram ||
	īśvaro bahirunmeṣo nimeṣo'ntaḥ sadāśivaḥ |
	sāmānādhikaraṇyaṃ ca sadvidyāhamidaṃdhiyoḥ ||
	idaṃbhāvopapannānāṃ vedyabhūmimupeyuṣām |
	bhāvānāṃ bodhasāratvādyathāvastvavalokanāt ||

iti | tataḥ paraṃ tu 
parasparaparihārāvasthitāhaṃpratītilakṣaṇabhinnaviṣayāpekṣiṇi 
nānābhedaniyatātmābhimānatvāt tāttvikasvaiśvaryānabhijñe 
kṣetrajñatattve māyāśaktireva kevalā 
prabhorviśvarūpaiśvaryaprathāspadabhūtā vijṛmbhate | yathoktaṃ 
tattvagarbhe eva 

	yadā tvevaṃvidhādatra nijā bhogājñatā paśoḥ |
	tadā māyāsvarūpeti gīyase vaibhavāśrayaḥ ||

iti | pratyabhijñāyāmapi

(p. 133)

	bhede tvekarase bhāte'haṃtayānātmanīkṣite |
	śūnye buddhau śarīre vā māyāśaktirvijṛmbhate ||

iti | sā iha pratyayodbhavaśabdena pratipāditā, yato'hamityeva 
śivātmakasya svabhāvasya parāmarśātmakaṃ samyak jñānaṃ, 
tasyaiva ca svabhāvasya viśvarūpatayā avabhāsamānasya idantollekhane 
bhedodbhāvanasāmarthyaṃ māyākhyā śaktirākhyātā, na tu 
vastvantaraṃ kiṃcit | idamiti ca parāmṛśyamāno'rthaḥ 
prakāśamānatvamatikramya anyathābhavituṃ yato na śaknoti tato 
bhedarūpāpi asau māyā 
prakāśātmakapārameśvaradharmatvānatikramāt bhagavataḥ śaktireva 
iyamatyadbhutā, yat svarūpaṃ sa eva evaṃ pratyapādayat |

	daivī hyeṣā guṇamayī mama māyā duratyayā |
	māmeva ye prapadyante māyāmetāṃ taranti te ||

iti | tathāhi atrāyamarthaḥ - eṣā mama daivīmāyā, devasya 
itthaṃkrīḍanaikarasasya īśvarasya (p. 134) sataḥ śaktitvena 
saṃbandhinī; kiṃsvarūpā ? - guṇamayī, guṇāḥ sukhādyātmānaḥ 
sattvādyabhidhānāḥ tatprakṛtikā; sā hi bhedāvabhāsasvabhāvā, 
bhinnaścārthaḥ śabādiviṣayātmakaḥ, viṣayaśca 
sukhādisaṃvedanaparyavasitātmā, - iti 
sukhādirūpagrāhyākāranirbhāsinī māyā guṇamayī ityuktā | tathā 
duratyayā duḥkhena atyetuṃ śakyā, tadatikramaṇe kṛtotsāhaiḥ 
prabuddhairapi sapadi sakalasaṃsāryavasthocchedānupapatteḥ 
bhedavyavahārasya durlaṅghyatvāt | kiṃ tu māmeva ye prapadyante 
chinnadvaitadaśāpratiṣṭhitasaṃvidaḥ suprabuddhāḥ santo māmevaikaṃ 
tattvamabhedenātmatayā pratyabhijānate, te madbhāvamāpannā 
enāmatitaranti | tasyāṃ hi daśāyāṃ divasadyutāviva dyotamānāyām 
iyaṃ yāminīva nirmūlanaṣṭasvarūpā tairevātikrāntā (p. 135) bhavati 
| yaduktaṃ stotre

	samādhivajreṇāpyanyairabhedyo bhedabhūdharaḥ |
	parāmṛṣṭaśca naṣṭaśca tvadbhaktivalaśālibhiḥ ||

evaṃpratyayodbhavamātraṃ māyā, tanmūlaṃ ca kṣetrajñatattvaṃ 
paśuparyāyeṇa asvatantraśabdenātra pratipāditam | 
pratyayodbhavarūpayā hi anayā māyayā svabhāvāt pracyāvitasya asya 
taddharmaviparītena kālādirūpeṇa suprasavena pāśapañcakena 
grathitasya pāratantryaṃ paśutvamudbhāvyate | tathā ca - ayam anayā 
vyāmohitaḥ anavacchinnatvādirūpaṃ svadharmam aparāmṛśan, 
tadviparītena avacchedakena kalanātmanā 
bhūtabhaviṣyadādivikalpavibhaktena kālākhyena, tathā 
sarvātmakatvadharmavismṛteḥ sarvatra 
niyatakāryakāraṇabhāvākhyātmakena niyatināmnā, tathā 
sarvakartṛtvasarvajñatvalakṣaṇadharmadvayaudāsīnyāt kiṃcitkartṛtva - 
kiṃcijjñatvarūpābhyāṃ (p. 136) kalāvidyābhidhānābhyāṃ, tathā 
prepsitārthavirahāt nityanirabhilāṣatvalakṣaṇasvadharmāparāmarśāt 
viṣayābhilāṣitārūpeṇa rāgākhyena ca pāśena badhyamānaḥ 
parādhīnavṛttiḥ paśuḥ saṃbadhyate | eṣa ca māyāśakteḥ 
pañcabhedaḥ prasavaḥ samastasya paśuprabandhasya aviśeṣeṇa 
svarūpamāvṛtya vyavasthitaḥ | yastu pratiprāṇi 
vicitrabuddhyādirūpatayā pariṇaman tamāvṛṇoti, tasya 
pradhānākhyasya prasavasya prapañcaṃ 
pratyayodbhavaviṣayapratipādanadvāreṇāha sa ca tanmātragocaraḥ iti, 
sa ca paśutvakāraṇaṃ pratyayodbhavaḥ, tanmātragocaraḥ tanmātrāṇi 
śabdādisāmānyāni gocaro viṣayo yasya sa tathā; pratyayo hi ayaṃ 
pratyeyaṃ bhinnaṃ viṣayamapekṣya prādurbhavati, 
viṣayaviṣayibhāvaśca grahītṛgrahaṇagrāhyarūpe tritaye sati upapadyate 
| tadapi tritayaṃ sādhāraṇaṃ pravṛttikāraṇaṃ vinā na (p. 137) syāt iti 
| taccatuṣṭayamanena vākyenākṣiptam | tatra grahītā pratyayavān 
paśuḥ, grāhyāḥ prādhānyena śabdasparśarasarūpagandhāḥ 
ākāśādisthūlabhūtāśrayā viśeṣātmakā guṇāḥ, tadātmanā 
samastaviṣayopalabdheḥ | teṣāṃ cātropādāne upapanne sāmānye 
sarvaviśeṣāṇāmantarbhāvaḥ, - iti sāmānyavācinā tanmātraśabdena 
upāttāḥ | taiḥ śabdādibhirāśrayabhūtāni sthūlāni 
ākāśādibhūtāni ākṣiptāni, nirāśrayāṇāṃ teṣāmanupapatteḥ | 
tadetat daśavidhaṃ kāryam | sa ca pratyayavān paravaśaḥ paśuḥ 
viṣayitve sati iṣṭāniṣṭaviṣaye hānādānakriyāyāṃ karaṇamapekṣate | 
tatra yena viṣayaṃ niścinoti tatprakāśapradhānaṃ buddhyākhyaṃ 
karaṇaṃ | yena ca anātmabhūtaṃ dehādikamartham ātmatayā 
abhimanyate tadviparyayātmakaṃ niyamapradhānamahaṃkārākhyaṃ, 
yena ca pravṛttipradhānena viṣayaṃ vikalpayati tatsaṃśayātmakaṃ 
mano'bhidhānam, - (p. 138) iti trividhamantaḥkaraṇaṃ yathottaraṃ 
kāryatvenoktam | yena tu śabdādīn gṛhṇāti 
tacchrotrādibuddhindriyapañcakam | yena vacanādikriyāṃ karoti 
tadvāgādikarmendriyapañcakam, - iti daśavidhaṃ bahiṣkaraṇam | tacca 
ahaṃkārakāryatayaiva uktam | tadetadābhyantaraṃ bāhyaṃ ca karaṇam 
| evaṃ trayoviṃśatividhaḥ kāryakaraṇavargo 
viṣayitvānyathānupapattyā atrākṣiptaḥ | tathā pravartakaṃ 
hetumantareṇa viṣayapravṛtterabhāvādapi viṣayatvaṃ na upapadyate, - iti 
sa heturatra sukhādyātmā pradhānābhidhāna ākṣiptaḥ | tathāhi - 
sukhaṃ pratiprāṇi svavāsanānuguṇeṣṭaviṣayaprāptestṛptiranitya 
ānandaḥ, tena prayuktaḥ san iṣṭaviṣayādānāya pravartate, tadviparyayo 
duḥkham anirvṛtiḥ tato'niṣṭaviṣayahānāya; ubhayanyagbhāvastu 
mohaḥ, tasmin sati vyavatiṣṭhate, - iti sukhaduḥkhamohātmakaṃ 
prakāśapravṛttiniyamārthaṃ sattvādyabhidhānaguṇatrayamayaṃ 
vikārāvasthāyāmapi anyonyāvinābhūtatvāt (p. 139) ekameva 
pradhānākhyaṃ sarvaprāṇabhṛtāṃ 
vividhavāsanānuguṇanānārūpakāryakaraṇātmakasvapariṇāma-
prapañcānugatasādhāraṇaṃ pravṛttikāraṇaṃ 
rāgākhyamāyīyamalaprapañcabhūtam | anenaivābhiprāyeṇa 
vṛttikṛtā sa ca tanmātragocaraḥ, ityasya padasya 

	rūpādyabhilāṣātmakaḥ

iti paryāyaḥ prayuktaḥ | rūpādiṣu yo'bhilāṣo rāgaḥ, tannimittakatvāt 
tadātmakaḥ pratyayodbhavaḥ; tataśca abhilāṣaprapañca eva 
sukhādyātmakaṃ pradhānaṃ kāraṇam ityeṣā prādhānikī 
tattvacaturviṃśatiḥ sa ca tanmātragocaraḥ ityanenākṣiptā | prāk ca 
dvādaśa tattvāni nirṇītāni, tadyathā - śivādividyāntāni pañca, 
māyā, kālādipañcakaṃ, paśutattvaṃ ca, - iti 
ṣaṭtriṃśattattvarūpatayā pārameśvarī ekaiva śaktirvijṛmbhate | 
vyākhyātaprāyametat vṛttau (p. 140) 

	parāmṛtarasāt svarūpāt apāyaḥ pracyutiḥ

ityādinā || 16 ||

	evaṃ pratyayodbhavasya paśutvakāraṇabhāve pratipādite 
śaktivargasya bhogyatāṃ gataḥ san paśuḥ smṛtaḥ, - iti 
pūrvoktavirodhaparihārārthamāha


svarūpāvaraṇe cāsya śaktayaḥ satatotthitāḥ |
yataḥ śabdānuvedhena na vinā pratyayodbhavaḥ || 4/17 (47) ||

vṛti:  svarūpasya svabhāvasyācchādane cāsya puruṣasya śaktayo 
brāhmyādyāḥ pūrvamuktā yāḥ, tāḥ satatam udyuktāḥ, yataḥ 
śabdarahitasya pratyayasya jñānasya nāstyeva kasyacidudbhavaḥ || 47 ||

ṭippaṇī: kavargādyutpannā eva pratyayāḥ, tadadhiṣṭhātryaḥ 
pīṭheśvaryo māheśyādyāstā eva paśoḥ pārasvarūpamāvarītuṃ 
sadodyuktāḥ, ata evottarottaraṃ viṣayabhogāsaktānāmaṇūnāṃ 
saṃsṛtiravirataprasaraṇeti || 47 ||

vivṛti: (p. 140) asya evaṃpratyayāpāditapaśutvasya ātmanaḥ 
svarūpāvaraṇe svarūpasya śivātmakasya svabhāvasya āvaraṇe, 
tathāpratyavamarśābhāvamātreṇa hetunā vyavadhāne sthagane; 
tannimittaṃ śaktayaḥ prāguktāḥ satatotthitāḥ patipaśuvyavahārasya 
na kadācit uparamāt satataṃ nityam utthitāḥ uditāḥ; yataḥ 
asvatantratāpādanātmanā amṛtarasāpāyahetutvena pratipādito yaḥ 
pratyayodbhavaḥ (p. 141) sa śabdānuvedhena śabdasaṃbhedena vinā 
na saṃbhavati, - iti śeṣaḥ | etadeva kutaḥ ? iti cet, taducyate, - śabdaḥ 
khalu pratyavamarśātmā avabhāsātmano'rthasya anyataḥ 
khaḍgodakādarśāderantaḥkroḍīkṛtatattatpadārthasārthāt jaḍāt 
bhedataḥ svabhāvabhūta eva | tathā ca pratyabhijñā

	svabhāvamavabhāsasya vimarśaṃ viduranyathā |
	prakāśo'rthoparakto'pi sphaṭikādijaḍopamaḥ ||

iti | anyatrāpi uktam

	na so'sti pratyayo loke yaḥ śabdānugamaṃ vinā |
	anuviddhamiva jñānaṃ sarvaṃ śabdena bhāsate ||

iti | sa ca sarvāvacchedavirahitaviśuddhacitprakāśātmakamukhyārtha-
niṣṭaḥ san pratyavamarśa ityucyate | jātiguṇakriyābhidhānādivividha-
viśeṣāvacchinnabhinnarūpaviśvātmakārthāvabhāsaniṣṭastu 
vividhakalpanātmakatvāt vikalpa ityucyate | tadeva śabdasya mukhyaṃ 
rūpaṃ, tatsaṃketatvena vyavasthitaḥ (p. 142) śrotragrāhyo 
dhvaniviśeṣātmako'rtha eva prāyeṇa śabdaḥ iti vyavahriyate | 
tasmācchabdarūpatāmāpannāḥ pratyayodbhavaprāṇabhūtāḥ 
śaktaya evāsya svarūpāvaraṇe sadodyuktā, - iti śaktivargasya 
bhogyatāṃ gataḥ san paśuḥ smṛtaḥ, - iti pūrvoktenāvirodhaḥ 
pratipāditaḥ |

	svarūpasya svasvabhāvasyācchādane

ityādinā vṛttau vyākhyātametat || 17 ||

	athāsya śabdaparyantasya prasarasya, parasyāśca 
śakterabhedapratipādanapūrvaṃ 
tatsvarūpāpratyabhijñāmātranibandhanau bandhamokṣau 
pratipādayitumāha 


seyaṃ kriyātmikā śaktiḥ śivasya paśuvartinī |
bandhayitrī svamārgasthā jñātā siddhyupadādikā || 4/18 (48) ||


vṛti: sā ceyaṃ kriyāsvabhāvā bhagavataḥ paśuvartinī śaktiḥ | 
yaduktam (p. 38)

	'na sā jīvakalā kācitsaṃtānadvayavartinī |
vyāptrī śivakalā yasyāmadhiṣṭhātrī na vidyate ||'

iti | saiva ca bandhakāraṇam ajñātā, jñātā sā ca punaḥ 
parāparasiddhipradā bhavati puṃsām || 48 ||

ṭippaṇī: bahirbhāvaparyantaṃ prasṛtāyāḥ pārameśvaryāḥ 
kriyāśaktereva hetorbhedābhedasaṃvedananibandhanaiva 
bandhamokṣavikalpanetyarthaḥ || 48 ||

vivṛti: sā śivasya svasvabhāvasyaiva parameśvarasya kriyātmikā 
tatsvarūpapratyavamarśalakṣaṇavyāpāraśarīrā (p. 143) śaktiḥ 
avyabhicārī dharmaḥ samarthatārūpaḥ iyaṃ pratipāditaprasararūpā 
śaktiḥ yaiva advayacinmātrasvabhāvapratyavamarśinī parā śaktiḥ 
parameśvarasya saiva iyam itthaṃ - prasṛtya avabhāsate, tattvato nāsti 
asyāḥ tato bheda ityarthaḥ | yathoktaṃ vṛttau 

	na sā jīvakalā kācitsaṃtānadvayavartinī |
	vyāptrī śivakalā yasyāmadhiṣṭhātrī na vidyate ||

iti | asya hi ślokasyāyamarthaḥ - jīvasya puṃsaḥ paśoḥ kalānāṃ 
dvividhaḥ saṃtāno - jñānarūpaḥ kriyārūpaśca; tatra 
jñānarūpo'ntaḥkaraṇātmakaḥ trividhaḥ, kriyārūpo 
bahiṣkaraṇātmakaḥ svabhāvasthaprāṇaśaktisahita ekādaśavidhaḥ, - iti 
caturdaśavidho jīvakalāsaṃtānaḥ saṃgrahāt dvividha eva, 
saṃtānadvayavartinī jīvasyātmanaḥ kalā sā na kācit saṃbhavati iti 
śeṣaḥ yasyāṃ vyāptrī deśakālādyanavacchinnavaibhavādhiṣṭhātrī 
vedyatvādinā sarvamadhiṣṭhāya ātmaparatantraṃ kṛtvā vartamānā 
(p. 144) śivakalā, śivasya paramātmanaḥ kalā parā śaktiḥ uktarūpā 
na vidyate sattāṃ vyabhicarati, saiva itthamavabhāsate ityarthaḥ | 
vaiśvarūpye'pi avabhāsalakṣaṇasya sāmānyarūpasya śivadharmasya 
vyāpakasya atirobhāvāt, saiva parā śaktirityam, aparā 
sthūlakriyārūpā, - iti parāparayoḥ śaktyorabheda eva pāramārthikaḥ 
pratyabhijñāpitaḥ | tadetat jñānagarbhastotre'pyuktam

	bahiṣakaraṇabuddhyahaṃkṛtimanaḥsuṣumnāśrayā-
		ccaturdaśasu caṇḍike pathiṣu yena yena vrajet |
	kalā śivaniketanaṃ janani tatra tatra sma te
		daśodayati durlabhā jagati yā surairapyaho ||

asyāpi ślokasyāyaṃ tātparyārthaḥ - śrotrādipañcakaṃ 
vāgādipañcakaṃ daśavidhaṃ bahiṣkaraṇaṃ, 
buddhyahaṃkāramanāṃsi trividhamantaḥkaraṇaṃ 
madhyamaprāṇaśca, - iti kalāyāḥ cidātmikāyāḥ śakteḥ caturdaśa 
bhedāḥ | teṣāṃ ye tāvanta eva panthānaḥ (p. 145) prasaramārgāsteṣu 
madhye yena yena kenacidekatamena pathā eṣā kalā śivaniketanaṃ 
vrajet, śivaḥ paramātmā sa eva niketanamālayastad gacchet, tatra daśā 
udayati - iti saṃbandhaḥ | śivaniketanaṃ vrajet - iti 
māyīyabhedapratyayavyatirekeṇa śivākhyasvapadāśrayaṇarūpaḥ 
pāramārthikaḥ kalāyā vyāpāraḥ siddhavat vyavahṛtaḥ | iyaṃ hi kalā 
śivātmakāt nijāspadāt na duḥkhaṃ na sukham ityādinā 
kṛtalakṣaṇāt udeti, kṛtakṛtyā ca tatraivānte(ntaḥ)praviśya 
samarasībhavati saridiva sāgare; madhye'pi 
buddhyādyanyonyabhinnaprasararūpatayā nānātvena avabhāsamānāpi 
jalarūpatvamiva sāmānyaṃ cidātmakatvaṃ na vyabhicarati, - iti na 
kadācit śivasvabhāvāt apaiti; kiṃtu māyāśaktivyāmohitaiḥ na tathā 
pratyabhijñāyate - iti | evameṣā kalā yena yena pathā śivaniketanaṃ 
vrajet, (p. 146) tatra sā tādṛśī svasaṃvedyatvāt vyapadeṣṭumaśakyā 
kasyacit prabuddhasyaiva daśā avasthā udayati abhivyajyate, yā 
surairbrahmādibhirapi durlabhā, te hi 
pratyayodbhavajanitabrahmatvādyavacchinnapāśavābhimānānati-
kramāt śivarūpāṃ patidaśāṃ kathamāpnuyuḥ - iti | 
prakṛtamidānīṃ vyākhyāyate, - kiṃtu evaṃ - rūpāpi asau 
pārameśvarī kriyātmikā parā śaktiḥ paśuvartinī bandhayitrī paśau 
bhedapratyayodbhavāpāditapāratantrye puṃsi vartamānā, bandhasya 
janmādiprabandhaparivartanātmakasya saṃsārasya kartrī | - paśuḥ kila 
sarvato vyavacchinnasya ātmana eva svatvena enām adhyavasyan 
iṣṭāniṣṭaviṣayopādānahānajanitasukhādyanubhavamātraparya-
vasitanijajñānakriyāparispandatvāt aparāmṛṣṭatatparamārtho 
vyavacchinnatti; | sā caivaṃ vyavacchinnatvena gṛhyamāṇā tam ā 
prabodhapratyudayāt (p. 147) paśutvena badhnāti; - iti paśuvartinī 
bandhayitrī ityuktam | nanu evaṃ - svabhāvatvāt asyāḥ, paśoḥ 
bandhadhvaṃsābhāvaprasaṅgaḥ ? tata āha - jñātā viditā 
śivātmakasvasvabhāvapratyavamarśakriyārūpatayā pratyabhijñātā 
satī siddhyupapādikā siddheḥ ātmaiśvaryādhigamalakṣaṇāyāḥ 
parāyāḥ, ānuṣaṅgikavividhavibhūtyāvirbhāvarūpāyāśca 
aparāyāḥ upapādikā, vastusvabhāvabalāt saṃpādayitrī; yata eṣā 
svamārgasthā svasmin ātmīye śivasvabhāvarūpe mārge adhvani 
sthitā, tadvyatiriktaviṣayāntaranivṛttagatirityarthaḥ; 
pratyayodbhavarūpamāyāvaibhavodbhāvitabhidāpekṣayā tu 
paśuvartinī jīvakalā - ityucyate; pratyuditaprabodhasya tu 
yathāvasthitatvena pratyabhijñāyamānā sarvāḥ siddhīrupapādayati | - 
iti ślokārthaṃ vyākhyāya, idānīṃ yathā eṣā svamārgasthā tathā 
vitatya pratipādyate | eṣā (p. 148) hi 
parame"varasvarūpaprakāśapratyavamarśamātrarūpā paraiva śaktiḥ 
vāgrūpatayā prasṛtā, - iti parameśvareṇa śāstreṣu bahuśaḥ 
pradarśayatā sarvadā svamārgasthatvamasyāḥ pratipāditam | tathā ca 
śrīmālinīvijaye

	yā sā śaktirjagaddhātuḥ kathitā samavāyinī |
	icchātvaṃ tasya sā devi sisṛkṣoḥ saṃprapadyate ||
	saikāpi satyanekatvaṃ yathā gacchati tacchṛṇu |
	evametaditi jñeyaṃ nānyatheti suniścitam ||
	jñāpayantī jagatyatra jñānaśaktirnigadyate |
	evaṃ bhavatvidaṃ sarvamiti kāryonmukhī yadā ||
	jātā tadaiva tattadvatkurvatyatra kriyā matā |
	evaṃ yathā dvirūpaiva punarbhedairanekatām ||
	arthopādhivaśādyāti cintāmaṇirivaiśvarī |
	tatra tāvatsamāpannā mātṛbhāvaṃ vibhidyate ||
	dvidhā ca navadhā bhedaiḥ pañcāśaddhā ca mālinī |

ityādinā prakāśito'yamarthaḥ | tathā śabdādvayavādibhirapi (p. 149) 
vivṛttivācoyuktyā tatprasaraṃ pratipādayadbhiḥ svamārgasthatvameva 
asyāḥ pradarśitam | yadāhuḥ 

	vāgrūpatā cedutkrāmedavabodhasya śāśvatī |
	na prakāśaḥ prakāśeta sā hi pratyavamarśinī ||

iti | saiṣā atyantābhedadaśā, yasyāṃ sphuṭameva asyāḥ 
svamārgasthatvam | yadā punaḥ idamiti nānārūpaṃ vibhaktatvena 
kramikatvena ca antaḥ parisphuritamakhilaṃ jagat avimarśāt upasaṃhṛtya 
vibhāgakramaśūnyasvamahimni svabhāvavyomni nimiṣantī 
svarūpaprakāśamātrapariśeṣaiva bhavati, tadā āntarasya parasya 
jñātuḥ paśyantyabhidhānavāgrūpā vivṛttiḥ - ityuktā | yadāhuḥ

	avibhāgā tu paśyantī sarvataḥ saṃhṛtakramā |
	svarūpajyotirevāntaḥ sūkṣmā vāganapāyinī ||

iti | atrāpi svamārgasthaiva eṣā | yadā prāṇaprayatnavyatirekeṇa 
pratiprāṇi śarīrāntarasvoditānādinidhanadhvaniviśeṣātmakatayā (p. 
150) kālādikramaṃ varṇādivibhāgaṃ bhāvinamanugacchantī 
prasaraṃ gṛhṇāti, tadā madhyamākhyavāgrūpā vivṛttiḥ - ityabhihitā; 
tadāpi saṃvinmātraprakṛtikatvamanatikrāntā svamārgasthaiva eṣā | 
yaduktam 

	kevalaṃ buddhyupādānā kramarūpānupātinī |
	prāṇavṛttimatikramya madhyamā vāk pravartate ||

iti | yadā tu prayoktṛpuruṣecchānuvidhāyiprayatnaprerite 
prāṇābhidhāne maruti śarīroddeśeṣu uraḥprabhṛtiṣu jātābhighāte, 
saiva sāmānyadhvanirūpā svaravyañjanādibhedavibhaktākārādi-
niyatavarṇarūpatāṃ prayoktṛbhede'pi avyabhicarantī prasarati, tadā 
varṇabhedādivyañjakaprāṇamātrāśrayā 
vaikharyabhidhānavāgrūpā vivṛttiḥ - ityuktam | (p. 151) yaduktam

	sthāneṣvabhihate vāyau kṛtavarṇaparigrahā |
	vaikharī vāk prayoktṝṇāṃ prāṇavṛttinibandhanā ||

iti | tadāpi asau deśakālādhāraprayoktādivaicitryaiḥ 
avikāryaniyatavarṇasamudāyātmikatāṃ 
puruṣecchādisāpekṣābhivyaktikāmajahatī nityaiva, saṃvidrūpatvamapi 
anugatameva madhyamāvadasyāmapi; - iti svamārgasthatvamapi asyā na 
vyāhanyate | evamasau vaikharīrūpatāmāpannāpi 
mātṛkāvargavarṇapadavākyārthabhedena aparyantaṃ prasaraṃ 
gṛhṇāti | yathā ca varṇavaikharīrūpā iyam evamanantaprasarā, tathā 
svaravaikharīrūpāpi svaragrāmamūrcchanātānajātarāgādibhedenāpi 
anantaprasarā | tadevam iyaṃ pārameśvarī parā śaktiḥ (p. 152) 
svabhāvapratyavamarśakriyādinā sāṃketikaśabdaparyantena 
niravadhinā svamahimnā prasṛtāpi, sarvasyaiva padārthajātasya 
sāmānyasaṃvitprakāśavyatirekeṇa anupapannasvātmalābhasya 
pratyavamarśinī satī, sarvadā svamārgasthatvaṃ na vyabhicarati | tataśca 
- jagatkrīḍārtham īśvarodbhāvitamāyāśaktijanitaiḥ 
nānāvikalparūpairāvaraṇaiḥ saṃbadhyamānāpi 
anugrahaśaktisparśonmeṣitasatyatadrūpagrahaṇakuśalavimala-
vijñānadṛśaḥ pramātṝn prati taiḥ sthagayitumatyantaṃ 
tirodhātumaśakyaiva - | 

yaduktam

	seyamākīryamāṇāpi nityamāgantukairmalaiḥ |
	antyā kaleva somasya nātyantamabhibhūyate ||

iti | tat itthaṃ paramameva kāraṇaṃ yathāvibhaktaśabdarūpatayāpi 
prasṛtam - iti sthitam |

	satyaṃ parāgataṃ sūkṣmaṃ niravadyamanuttaram |
	atha brahma paraṃ śāntamādivarṇatvamāgatam ||

(p. 153) ityādi | tathā ca śabdādvayavāde sāmānyena 
śabdārthobhayarūpo'paryantāvāntarabhedo yo'yamīśvarasya 
śaktiprasaraḥ, taṃ vivartavācoyuktyā vyavaharati sma | yadāha

	athāyamāntaro jñātā sūkṣme vāgātmani sthitaḥ |
	vyaktaye svasya rūpasya śabdatvena vivartate ||
	anādinidhanaṃ brahma śabdatattvaṃ yadakṣaram |
	vivartate'rthabhāvena prakriyā jagato yataḥ ||

iti | atra brahmaparyāyaśabdatattvatayā pārameśvarameva rūpaṃ 
nirdiṣṭam | tat - iyaṃ parā śaktireva svamārgasthā jñātā tathā 
samyakpratipannasvabhāvā satī saṃpūrṇāṃ siddhim upapādayati, - 
ityuktam | seyameva vaikharīrūpatāmāpannā 
puruṣaprāṇaparispandādhinābhivyaktikatvāt sthūlā kriyāśaktiḥ, - 
ityapi kvaciduktā, tatpūrvā ca madhyamā vāk icchāśaktiḥ, tatpūrvā 
ca paśyantī (p. 154) jñānaśaktiḥ - iti | tadevaṃ śaktitve sati 
śaktimantamiyam apekṣate, - ityabhinnamātṛkātmakaḥ 
śabdarāśirūpakriyāśaktipradhāna aiśvaro vigraho'syāḥ 
samāśrayaḥ, yatra iyaṃ vargādibhiḥ vākyaparyantaiḥ 
svaprasarabhedaiḥ vijṛmbhate | yo'pi vākyarūpaḥ prasaro'syāḥ, sa 
nityānityabhedena dvividhaḥ, - tatra mantrātmakaḥ śāstrātmakaśca 
nityaḥ, lokikavyavahāraviṣayalaukikavākyātmakastu anityaḥ | evaṃ 
parameśvaraśaktitvena pratyabhijñāyamānā eṣā vāṅmayī vibhūtiḥ 
parasiddhipradā, nānāpaśusaṃbandhitayā tu avacchidyamānā 
bandhaheturbhavati - iti | vyākhyātametad vṛttau

	sā ceyaṃ kriyātmikā kriyāsvabhāvā

ityādinā || 18 ||
	evaṃ patisvabhāvasyaiva ātmatattvasya svamāyāvabhāsitaṃ 
paśutvaṃ pratipādya, idānīṃ paśoḥ sato vidyodayāt 
svamārgasthatvena abhijñāyamānā eṣā (p. 155) parā śaktiḥ, 
patitvābhivyaktimāvahantī saṃsāravicchedahetuḥ yathā bhavati, tathā 
saṃsārakāraṇapratipādanapūrvaṃ hetukathanaṃ pratijānānaḥ 
ślokadvayamāha


tanmātrodayarūpeṇa mano'haṃbuddhivartinā* |
puryaṣṭakena saṃruddhastadutthaṃ pratyayodbhavam || 4/19 (49) ||


(* vivṛti: mano'haṃbuddhivṛttinā)
vṛti: tanmātrodayaḥ, tanmātrāṇāṃ śabdādīnāmanubhava -rūpeṇa, 
mano'haṃkārabuddhibhiḥ iti tribhiḥ parāmṛśyamānena puryaṣṭakena 
baddhaḥ, tadutthaṃ tasmādudbhūtaṃ sukhaduḥkhasaṃvedanarūpaṃ 
tadā || 49 ||

ṭippaṇī: puryaṣṭakasaṃruddhatvādevāsya paśoḥ karmacakra 
bhramyanubhavaḥ || 49 ||


bhuṅkte paravaśo bhogaṃ tadbhāvātsaṃsaratyataḥ* |
saṃsṛtipralayasyāsya kāraṇaṃ saṃpracakṣmahe (gh: 
saṃsṛtipratyayasyetītthaṃ śodhitaḥ pāṭhaḥ saṃlakṣyate |) || 4/20 
(50) ||

(* vivṛti: tadbhāvātsaṃsaredataḥ)
vṛti: bhuṅkte aśnāti, asvatantro, bhogaṃ sukhaduḥkhasaṃvedana -
rūpaṃ, tasya puryaṣṭakasya bhāvāt saṃsarati (p. 39) saṃsāraśarīre, 
ataḥ saṃsṛtipralayasya (gh: saṃsṛtipratyayasyetītthaṃ śodhitaḥ pāṭhaḥ 
|) janmamaraṇapravāha -rūpasya saṃsārasya vināśakāraṇaṃ 
saṃpracakṣmahe vakṣyāmaḥ || 50 ||

ṭippaṇī: ityataḥ saṃsṛtivināśakāraṇaṃ sādhanaṃ 
vakṣyamāṇamupapadyate || 50 ||

vivṛti: (p. 155) ato hetoḥ asya uktavakṣyamāṇarūpasya paśoḥ, yaḥ 
saṃsṛtipralayaḥ saṃsārakṣayaḥ, tasya kāraṇaṃ hetuṃ 
saṃpracakṣmahe yugalakāt asmāduttareṇa ślokena samyak prakarṣeṇa 
ca brūmahe | atra vyadhikaraṇena ṣaṣṭhyau vyākhyeye | kuto hetoḥ ? - 
yato'yaṃ paśuḥ puryaṣṭakena saṃruddhaḥ san bhogaṃ bhuṅkte 
puryāṃ sūkṣme śarīre tanmātrapañcakaṃ guṇatrayam - iti 
sthūlaśarīrakāraṇabhūtamaṣṭakam (p. 156) yat saṃniviṣṭaṃ, 
tanmukhyaṃ [tanmukhaṃ] puryaṣṭakam, tatkāryatvāt sthūlamapi 
śarīraṃ tacchabdena iha puryaṣṭakam - ityucyate, tena saṃruddhaḥ 
tāvanmātramātmatvenābhimanyamāno 
vismṛtasarvātmakatvādisvasāmarthyavaśāt baddhaḥ, ata eva 
paravaśaḥ 
sarvaśaktisvabhāvavyatiriktakāraṇāntarādhīnasakalasamīhitārtha-
siddhatvāt asvatantraḥ san bhogaṃ 
māyāvabhāsitānādinijakarmopacitavāsanānuguṇasukhādi-
saṃvedanātmakatayā paryavasitaṃ svaviṣayamātraṃ bhuṅkte 
anubhavati | kīdṛśaṃ ? tadutthaṃ tasmāt puryaṣṭakāt 
utthitamudbhūtaṃ, - dehabandhe hi sati bhoganirvṛttirupapadyate - | kaṃ 
taṃ bhogam ? - pratyayodbhavaṃ 
prāgvyākhyātasvarūpaniyatasvaviṣayajñānotpādarūpaṃ, - 
svaviṣayamātrabhoktṛtvābhimānarūpasya pratyayasya utpāda eva 
bhogaḥ - ityarthaḥ | kīdṛśena puryaṣṭakena saṃruddhaḥ ? - 
tanmātrodayarūpeṇa tanmātrāṇi (p. 157) 
sthūlabhūtakāraṇabhāvena īśvarecchayaiva avabhāsitāḥ sūkṣmāḥ 
śabdādayaḥ, teṣāmudayaḥ 
sthūlaśarīrabhāvapariṇatākāśādyātmanā abhivyaktiḥ | tathā ca - 
atra yadyannāḍyādi suṣiraṃ tadākāśaṃ śabdatanmātrodayaḥ, yadyat 
sakriyaṃ prāṇādi sa vāyuḥ sparśatanmātrodayaḥ, yadyat 
uṣṇaprabhāsvarādirūpaṃ agnyādi tattejo rūpatanmātrodayaḥ, yadyat 
dravarūpaṃ rudhirādi tā āpaḥ rasatanmātrodayaḥ, yadyat kaṭhinaṃ 
māṃsāsthisnāyvādi sā pṛthvī gandhatanmātrodayaḥ, - iti 
tanmātrodayo rūpamākāro yasya tat tathā tena | evaṃ 
tanmātrodayarūpatvaṃ vyākhyāya, guṇodayarūpatvaṃ darśayituṃ 
viśeṣaṇāntaramāha, - mano'haṃbuddhivṛttinā iti | 
anubhūyamānasya asya ātmalābho'nubhavaśca antaḥkaraṇaniṣṭhaḥ - 
iti manasi rajoguṇodaye, ahaṅkāre tamoguṇodaye, buddhau ca 
sattvaguṇodayarūpāyāṃ vṛttirvartanam (p. 158) avasthitiḥ yasya 
tādṛśena | sa ca evaṃvidhena puryaṣṭakena saṃruddhaḥ san paśuḥ 
tadbhāvāt tasya puryaṣṭakasya sthūlasūkṣmasya bhāvāt 
vidyamānatvāt aprabodhe sati anucchedāt saṃsaret anavarataṃ 
nānāśarīrabhogavāsanākarmacakrabhramamanubhavet ā 
prabodhapratyudayāt | idamatra tātparyam - dehasaṃruddhasya puṃsaḥ 
pratiniyatasukhādisaṃvedanātmani bhoge yo bhoktṛtvābhimānaḥ, tat 
saṃsārakāraṇam, ato'sya nirāvaraṇasvarūpasthitimātraṃ [nirāva * 
ṇa-] saṃsāravināśahetuṃ saṃpracakṣmahe - iti | vyākhyātametat 
vṛttikṛtā

	tanmātrodaya

ityādinā

	bhuṃkte'śnāti paravaśaḥ

ityādinā ca || 19 || 20 ||
	adhunā ātmana eva śivasya yathoktaiśvaryarūpaṃ patitvaṃ yena 
abhivyajyate, tat samanantaraṃ (p. 159) pratijñātam upāyāntaram 
upadiśan prakaraṇamupasaṃharati


yadā tvekatra saṃrūḍhastadā tasya layodayau* |
niyacchanbhoktṛtāmeti tataścakreśvaro bhavet || 4/21 (51) ||

(* vivṛti: layodbhavau)
vṛti: yadā punastvekatra sthūle sūkṣme vā saṃrūḍho līnacittaḥ, tadā 
tasya pratyayodbhavasya layodbhavau dhvaṃsaprādurbhāvau niyacchan 
kurvan bhoktṛtāṃ prāpnoti, tataḥ cakreśvaro bhavet sarvādhipatirbhavati 
|| 51 ||

ṭippaṇī: evaṃ prākpratipāditasyopalabdhrekasvabhāvasya svātmano 
niviḍa -vitarkapariśīlanayā vikalpahānyādyupāyavṛttyā 
bhūtabhāvātma -kayoḥ śarīrayoranyatarasmin 
avikalpasaṃvitsvarūpaprāpteḥ gocaryādiśakticakrasyānadhīnavṛttitvāt 
svaiśvaryavijṛmbhāmātra -vijñānena tadīśvaraḥ patiḥ saṃpadyate iti |

kaśmīrendraiḥ śrīmatpratāpasiṃhaiḥ purāṇavidyānām |
jīrṇoddhārādikarmaṇi niyuktasadbhirmukundarāmādyaiḥ ||
śākegnighnaśivāṅkendumite spandasya kārikāvṛtteḥ 
saṃkṣiptārthaprakāśaḥ samagrāhistācchivāya bhavyānām || 51 ||


vivṛti: (p. 159) yadā tu yasmin punaḥ kāle sthūlasūkṣmatvāt anayoḥ 
puryaṣṭakasaṃjñānirdiṣṭayoḥ pratyayodbhavamātramūlayoḥ 
śarīrayoḥ madhyāt ekatra anyatarasmin, athavā - 
prākpratipāditopapattyā saṃvedyamānasyaiva arthasya śarīratve 
vyavasthite bhūtātmakabhāvātmakabhedena sthūlasūkṣmayoḥ 
śarīrayormadhyādekatra, athavā - dhyeyatayā ālambanīyayoḥ 
sthūlasūkṣmayorbhāvayormadhyāt ekatra saṃrūddhaḥ samyak 
avilambatayā rūḍhaḥ, (p. 160) ekāgratāprakarṣāt abhedena 
pariṇatasaṃvit sādhakaḥ tadā, tasmin kṣaṇe tasya abhedena 
pratipannasya yathoktasya śarīrasya layodbhavau tyāgagraharūpau 
vināśotpādau niyacchan bhoktṛśabdena vakṣyamāṇasya satyasya 
kartuḥ ātmana eva kāryatayā avadhārayan, - ahameva 
nityanirāvaraṇasvatantracinmātrasvarūpaḥ anayoḥ kartā - iti 
nirvikalpatayā vyavasthāpayan bhoktṛtāmeti 
bhokturupalabdhṛmātrasvabhāvasya paramātmano bhāvo bhoktṛtā 
tāmāpnoti, satīmapi tadānīmeva pratyabhijñayā svīkurute tataḥ 
satyātmasvarūpapratyabhijñālakṣaṇāt hetoḥ cakreśvaro bhavet 
cakrasya prākpratipāditasthityā carācarabhāvaparyantena prapañcena 
prasṛtasya śabdarāśisamutthasya svaśaktisamūhasya, 
īśvaro'dhiṣṭhātā, svaiśvaryavijṛmbhāmātratayā avagamyamānasya 
(p. 161) yatheṣṭaviniyoktā saṃpadyeta | tadaiva 
svābhāvikasvātantryābhivyakteḥ paśupratyayapradhvaṃse sati, 
śakticakrabhogyatāṃ vimucya, tadbhoktṛbhāvarūpamaiśvaryaṃ 
pratipādyeta; ataḥ tau layodbhavau tatra bhoktari ātmani niyacchet - iti 
vākyārthaḥ | idamatra tātparyam - yathā sarvaḥ kaścit dehī 
dehamātrapratiṣṭhitātmābhimāno vāhyasya ghaṭādeḥ padārthasya 
grāhyatayaiva pratipannasya tyāgagrahau tādṛśi svātmani niyacchan 
ahameva etayoḥ kartā - iti niścinvan, tāvati svatantraṃ kartāraṃ 
śarīritāniviṣṭamātmānaṃ manyate, tathaiva tasya śarīrasya 
vedyabhūmikāpādanena kriyamāṇau tyāgagrahau tadvilakṣaṇe sarvadā 
vedyatvasaṃsparśāsahiṣṇau ananyasādhāraṇakartṛtvasvabhāve satye 
svātmani vastusāmarthyāt niyamaṃ (p. 162) bhajantāvapi 
aprabuddhatvāt na pratipadyate; tataḥ 
śarīraśarīrivivekagrahaṇayogyaprajñaprabuddhameva prati 
ayamupadeśaḥ; yataḥ tādṛśa eva 
anugrahaśaktiśakalitasaṃśayagranthiḥ parameśvarasya 
evaṃvidhaviśeṣopadeśapātram | yadāha

	ayaṃ sarvasya prabhava itaḥ sarvaṃ pravartate |
	iti matvā bhajante māṃ budhā bhāvasamanvitāḥ ||
	maccittā madgataprāṇā bodhayantaḥ parasparam |
	kathayantaśca māṃ nityaṃ tuṣyanti ramayanti ca ||
	teṣāṃ satatayuktānāṃ bhajatāṃ prītipūrvakam |
	dadāmi buddhiyogaṃ taṃ yena māṃ prāpayanti te ||
	teṣāmevānukampārthamahamajñānajaṃ tamaḥ |
	nāśayāmyātmabhāvastho jñānadīpena bhāsvatā ||

iti | yasmāt upadeśāt anuśīlyamānāt, asya ekatra iti pratipāditasya 
śarīrasya abhedena pratibhāsamānasya sataḥ, samanantaraṃ (p. 163) 
vedyīkriyamāṇasya tyāgagrahātmakau layodbhavau tadvidharmiṇi 
bhoktari sarveśvare svātmanyeva svātantryeṇa kāryatayā 
niyamyamānau niyantuḥ parasvabhāvapratyabhijñāmāvahantau 
sarvaiśvaryāya kalpete, tataḥ tau tatra niyacchet - iti vākyārthaḥ | tat 
anena ātmana eva śivasya svecchāmātrādhīnau jagataḥ pralayodayau, 
jagadapi tatsvarūpābhedāt tasya svaśakticakramayo vibhava - iti 
yathopakrāntārthanirvāhāt ekameva tattvaṃ 
svarūpaparāmarśamātrāvyabhicāradharmakaṃ paramārthasan, ato 
vyatiriktaṃ kiṃcit na saṃbhavati - iti upapāditam | yaduktam 

	paramārthe tu naikatvaṃ pṛthaktvādbhinnalakṣaṇam |
	pṛthaktvaikatvarūpeṇa tattvamekaṃ prakāśate ||
	yatpṛthaktvamasaṃdigdhaṃ tadekatvānna bhidyate |
	yadekatvamasaṃdigdhaṃ tatpṛthaktvānna bhidyate ||

(p. 164)

	dyauḥ kṣamā vāyurādityaḥ sāgarāḥ sarito diśaḥ |
	antaḥkaraṇatattvasya bhāgā bahiravasthitāḥ ||

iti | ayamevārthaḥ uktyantareṇa svastotre pratipādito'smābhiḥ

citrālokavikalpakalpitanavākalpāṅkanānākṛtiṃ
nṛtyantīṃ bahudhā bahiḥ svavapuṣo'pyantarna bhinnāṃ punaḥ |
nityaṃ nūtanakautukaḥ priyatamāṃ svāṃ śaktimālokayan
acchinnāpratimapramodamahimā śaṃbhurjayatyekakaḥ ||

iti | tat atra samanantaravyākhyāte śloke 
prakaraṇārambhaślokapratijñātaḥ svasaṃvedanasaṃvedya 
ātmaiśvaryādvayalakṣaṇo'rtho nirvāhitaḥ | vyākhyātametat vṛttikṛtā

	yadā punarekatra sthūle sūkṣme vā

ityādinā granthena || 21 ||

iti śrīrājānakaśrīrāmaviracitāyāṃ spandavivṛtau 
śaktyātmakaviśvāvyatirekopalabdhiḥ prakīrṇaṃ ca caturtho 
niḥṣyandaḥ samāptaḥ || 4 ||


(p. 165)

vivṛti: idānīm ātmana eva ekasya tattvasya saṃśayamātram aprathane 
kāraṇaṃ, tacca sadgurūpadeśavyatirekeṇa na śakyamunmūlayitum, 
parameśvaro hi gurumūrtimāviśya anugrāhyān svapratyabhijñāpanena 
prabodhayati, - iti nijagurusarasvatīstavanadvāreṇāha

agādhasaṃśayāmbhodhisamuttaraṇatāriṇīm (k: 
saṃśayāmbhodheriti; g: saṃśayāmbhodhau) |
vande vicitrārthapadāṃ citrāṃ tāṃ gurubhāratīm || 5/1 (52) ||

vṛtī agādho hyapratiṣṭho'nantaḥ || 52 ||


iti śrībhaṭṭakallaṭaviracitāyāṃ spandakārikāvṛttau vibhūtispandas -
tṛtīyo niḥṣyandaḥ || 3 ||


(p. 40) samāptaṃ spandasarvasvaṃ pravṛttaṃ bhaṭṭakallaṭāt |
svaprakāśaikacittattvaparirambharasotsukāt || 1 ||

dṛbdhaṃ mahādevagirau maheśasvapnopadiṣṭācchivasūtrasindhoḥ |
spandāmṛtaṃ yadvasuguptapādaiḥ śrīkallaṭastatprakaṭīcakāra (k: 
cittattve parirambha) || 2 ||

ā tapanānmoṭakāntaṃ yasya me gurusaṃtatiḥ |
tasya me sarvaśiṣyasya nopadeśadaridratā || 3 ||

paripūrṇeyaṃ spandavṛttiḥ 
kṛtistatrabhavanmahāmāheśvarācāryavaryabhaṭṭaśrīkallaṭa-
pādānām ||


vivṛti: (p. 165) tām aśakyasvarūpapratipādanāṃ hṛdi sphurantīṃ 
gurubhāratīṃ vande guroḥ vasuguptābhidhānasya sākṣāt 
siddhamukhasaṃkrāntasamastarahasyopaniṣadbhūtaspandatattvā-
mṛtaniḥṣyandasya, bhāratīṃ vācaṃ staumi | kīdṛśīm ? - agādha (p. 
166) ityādyārdhena viśeṣaṇam, avidyamāno gādho viśrāntibhūmikā 
yatra tādṛśo yaḥ saṃśayaḥ tattvāpratipattirūpo vibhramaḥ, sa eva 
durjaravikalpormijālasaṃkulatvādinā ambhodhiḥ samudraḥ, tasya 
samuttaraṇe samyak vilaṅghane tāriṇīm nāvam | tathā 
vicitrārthapadāṃ vicitraḥ atyadbhutaḥ artho'bhidheyaṃ vastu yeṣāṃ 
tādṛṃśi padāni yasyāṃ sā | tathā tāṃ citrāṃ 
ghaṭanāviśeṣaśālitvāt vismayādhāyinīm | viśeṣaṇadvayena anena 
arthagataṃ śabdagataṃ ca atiśayaṃ tuṣṭāva, yato'tra 
sakalalokāśayanirviṣayaḥ katipayalokottaraprabuddhahṛdayasaṃvādī 
vicitro'rthaḥ padānāṃ, tādṛgarthapratipādanaśālinī ca citrā 
padavākyaracanā - iti oṃ | vyākhyātametat vṛttau

	agādho hi apratiṣṭho'ntaḥ

ityādinā granthena || 1 ||

(p. 167) eṣa spandābhidhāno nidhiriha vivṛto vītasaṃdehasarpa-
trāsaḥ saṃpūrṇāsiddhipradaniratiśayajñānamāṇikyagarbhaḥ |
sarvārthibhyo vilabdhyā svayamapi sahajānandabhogopalabdhyā
bhavyānāmasya lābhaṃ saphalayatu paraḥ śaṃkarasya prasādaḥ || 1 ||
sadvidyāsarasīvibhūṣaṇavarasphārotpaloccāśaya-
protsarpatparipakvavodhamadhupenedaṃ mayāgāyi yat |
rāmeṇānupamapramodamadhuraṃ baddhāvadhānasya ta-
cchrotuḥ kasya na cetanasya tanute viśrāntimantaḥ parām || 2 ||
cetasyākulite kvacitkuviṣaye tūṣṇīṃ vivṛtya sthitāṃ
vyāvartya praṇayātprasādya ca śanaiḥ kāntāṃ nijāṃ cetanām |
cumbanto vigaladvibhāganiviḍāśleṣollasannūtanā-
nandaspandanimīlitākṣamaniśaṃ bhūyāsta bhavyāśayāḥ || 3 ||
atyuktaṃ yadihāstyanuktamapi yadyadvā duruktaṃ budhai-
statsūkṣmāṃśanirūpaṇaikanibhṛtaprajñairavajñāyatām |
puṣpāntarmakarandasārakaṇikāsvādotsukāḥ kānane
kiṃ vindanti kaṭhorakaṇṭakaśikhāsparśavyathāṃ ṣaṭpadāḥ || 4 ||
śaśijyotirdīpaprabhṛtibhiraśakyaṃ śamayituṃ
yadāsīnniḥspandīkṛtasakalalokaṃ kila tamaḥ |
gate tatredānīṃ kṣayamamalasūryāgamahate
kṛtārthāḥ saṃkocaṃ vijahatu vinidrā janadṛśaḥ || 5 ||
jayati janamariṣṭāduddharantī bhavānī
jayati nijavibhūtivyāptaviśvaḥ smarāriḥ |
jayati ca gajavaktraḥ so'tra yasya prasādā-
duparamati samasto vighnavargopasargaḥ || 6 ||

saṃpūrṇā iyaṃ vṛttyanusāriṇī spandavivṛtiḥ |

kṛtistatrabhavato mahāmāheśvarācāryaśiromaṇirājānaka-
śrīmadutpaladevapādapadmānujīvino rājānakaśrīrāmakaṇṭhasya
iti śivam || ||



###########   END OF FILE  #######