####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00094
Uniform title: tāratantra

Description: 



Notes: 
Transcribed by the staff of Muktabodha under the supervision of mark S. G. Dyczkowski.

Revision 0:  May 11, 2006

Publisher : Reprinted by Bani Prakashan 1983 of original edition prior t
Publication year : 1940
Publication city : 
Publication country : India
####################################################

|| tārātantram ||

prathamaḥ paṭalaḥ |

oṃ nama stārinyai * ||


kailāsaśikhare ramye devadevaṃ maheśvaram |

papraccha bhairavī devī śayanīye sukhoṣitā || 1/1 ||

purā yau kathitau buddhavaśiṣṭhau kulabhairavau |

tena mantreṇa deveśa ! siddhau tau vada me prabho ! || 1/2 ||


bhairava uvāca |


kṣa eva paramo devo buddharūpī janārddanaḥ |

ugratārā - mahāmantraṃ pañcārṇaṃ parijapya ca || 1/3 ||

sṛṣṭyādikarmakartā ca ajarāmaratāṃ yayau |

vaśiṣṭhopyena mārādhya nakṣatralokamāgataḥ || 1/4 ||

p. 2) yogasiddhīśvaro bhūtvā dyotate'dyāpi vallabhe ! |

taduddhāramataṃ vakṣye yataḥ sarveśvaro bhavet || 1/5 ||

praṇavaṃ pūrvvamuddhṛtya hṛllekhā kulakāminī |

kūrcamastraṃ mantrarājo devadruma ivāparaḥ || 1/6 ||

anenaiva samārādhya sarvveśo'bhūt sadāśivaḥ |

durvvāsāḥ - vyāsa - vālmīki - bhāradvājādikaḥ kaviḥ || 1/7 ||

bhīmasenārjjunādyāste kṣatriyā jayino'bhavan |

iti te kathitaṃ devi ! rahasyaṃ paramottamam || 1/8 ||

gopanīyaṃ prayatnena yadi sneho'sti māṃ prati || 1/9 ||


bhairavyuvāca |


tvatprasādādahaṃ deva ! śruto mantraḥ suradrumaḥ |

bauddhadevena yaccīrṇaṃ prātaḥ kṛtyaṃ vadasva me || 1/10 ||


bhairava uvāca |


prātaḥkṛtyaṃ pravakṣyāmi yena siddho bhavennaraḥ |

uttaraprahare mantrī sahasradalapaṅkaje || 1/11 ||

karṇikāntargate pīṭhe candramaṇḍalasannidhau |

śuddhasphaṭikasaṅkāśaṃ śuddhakṣaumavirājitam || 1/12 ||

varābhayakaraṃ śāntaṃ prasannavadanekṣaṇam |

gandhapuṣpādibhūṣāḍhyaṃ dayitāśakta mānasam || 1/13 ||

p. 3) iti dhyātvā tu gurave pādyādyai rmmānasai ryajet |

tridhā vā saptadhā vāpi daśadhā prajapenmanum || 1/14 ||

vāgbhavaṃ pūrvvamuccāryya guruṃ taddayitābhidhām |

śrīpādukāṃ pūjayāmi namo mantro gurupriyaḥ || 1/15 ||

guhyātimantrato mantrī samarpya stavamācaret || 1/16 ||

oṃ namaste bhagavannātha ! śivāya gururūpiṇe |

vidyāvatārasaṃsiddhau svīkṛtānekavigraha ! || 1/17 ||

bhavāya bhavarūpāya paramātmasvarūpiṇe |

sarvājñānatamobheda bhānave cinmayāya te || 1/18 ||

svatantrāya dayālipta vigrahāya śivātmane |

paratantrāya bhaktānāṃ bhavyānāṃ bhavadāyine || 1/19 ||

vivekināṃ vivekāya vimarṣāya vimarṣiṇām |

prakāśināṃ prakāśāya jñānināṃ jñānarūpiṇe || 1/20 ||

stutvā'jñāneti - mantreṇa namaskāraṃ samācaret |

mūlādhāre mūlavidyā - svarūpāṃ kulakuṇḍalīm || 1/21 ||

sūryyakoṭi pratīkāśāṃ viṣatantutanīyamīm || 1/22 ||

prasuptabhujagākārāṃ sārddhatribalayānvitām |

haṃso - mantreṇa tasyāśca caitanyaṃ yojayettataḥ || 1/23 ||

p.4) padmaṣaṭkaṃ bhedayitvā karṇikādhaḥ samānayet |

tataśca saṃsmaret kaulān gurūnetān kuleśvari ! || 1/24 ||

prahlādānandanāthākhyaḥ sanakānanda eva ca |

kumārānandanāthaśca vaśiṣṭhānandanāthakaḥ || 1/25 ||

krodhānanda sukhānandau jñānānanda stataḥparam |

bodhānandastato nityaṃ kāraṇānandananditāḥ || 1/26 ||

vighūrṇanayanā stādṛkśaktisaṅgavirājitāḥ |

tato vindusphuranmādhvī - dhārayā tān pratarpayet || 1/27 ||

tasmāttenaiva mārgeṇa svasthānaṃ prāpayet parām |

tatprabhāpaṭalai rdevi ! pāṭalaṃ svaṃ vicintayet || 1/28 ||

iti te kathitaṃ devi ! prātaḥkṛtyamanuttamam |

gopanīyaṃ mamaprītikṛte'vaśyaṃ sureśvari || 1/29 ||


|| iti śrītārātantre prathamaḥ paṭalaḥ ||



dvitīyaḥ paṭalaḥ |


śrībhairavyuvāca |


śrutametanmahābhāga ! prātaḥkṛtyamaho mahat |

mahācīnākhyatantre ca trividhaṃ pūjanaṃ hi yat || 2/1 ||

uktavān buddhadeveśa statra yonyarccanaṃ śrutam |

mānasaṃ yāntrikañcaiva śrotumicchāmi māmpratam || 2/2 ||


p. 5) śrībhairava uvāca |


manaḥ pūjā vidhiṃ vakṣye nyāsaṃ pūrvvaṃ śṛṇu priye ||

akṛte nyāsajāle hi adhikāro na vidyate || 2/3 ||

ṛṣyādinyāsakañcaiva karāṅganyāsa eva ca |

varṇa vyāpakavinyāsau pīṭhanyāsa stataḥ param || 2/4 ||

akṣobhyaśca ṛṣiḥ prokto vṛhatī cchanda īritam |

ugratārā devatoktā kūrccavījasudāhṛtam || 2/5 ||

śaktirastraṃ śeṣavarṇāḥ kīlakāni bhavantyuta |

akhilavāgrūpiṇīmuktvā hṛdayāya namo vadet || 2/6 ||

akhaṇḍavāgrūpiṇīmuktvā śirase vahnivallabhā |

brahmavāgrūpiṇīmuktvā śikhāyai vaṣaḍityapi || 2/7 ||

viṣṇuvāgrūpiṇīmuktvā kavacāya imīritam |

viṣṇuvāgrūpiṇī netratrayāya vauṣaḍityapi || 2/8 ||

sarvvavāgrūpiṇīmuktvā astrāya phaḍiti smaret |

ṣaḍdīrghamāyayā caiva vījānāmeva coccaret || 2/9 ||

aṅgasthāne'ṅgulīnāntu pāṇito yojanañcaret |

ādiḹvarṇaparyyantān hṛdaye vinyaset priye || 2/10 ||

ekārādyān ṅādiḍhāntān krameṇa bāhuyugmake |

ṇādibhāntān makārādikṣāntān jaṅghādvaye priye ! || 2/11 ||

p. 6) mūlena vyāpakaṃ nyasya pīṭhanyāsaṃ samācaret |

hṛtsaroje sudhāsindhuṃ madhye dvīpaṃ suvarṇajam || 2/12 ||

paritaḥ pārijātāṃśca madhye kalpataruṃ tataḥ |

tanmūle hemanirmmāṇaṃ dvāścatuṣṭaya bhūṣitam || 2/13 ||

maṇḍapaṃ mandavātena parākrāntaṃ sudhūpitam |

tatra yantraṃ pratiṣṭhāpya tatra pūjāṃ samācaret || 2/14 ||

evaṃ pīṭhamaye dehe cintayedugratāriṇīm |

hṛdipāṇyagramādāya jīvanyāsaṃ samācaret || 2/15 ||

iti te kathitaṃ kānte ! nyāsajālamanuttamam |

paripāṭī gurorjñeyā nyāsānāṃ racanaṃ priye || 2/16 ||

tataḥ pūjāṃ prakurvvīta yena tanmayatāmiyāt |

snāyācca vimale tīrthe puṣkare hṛdayāśrite || 2/17 ||

śivaśakti samāyogaḥ sandhyā proktā ca tāntrikaiḥ |

vinducyutasudhābhi stāṃ tarpayet prāṇavallabhe ! || 2/18 ||

tata statpaparivārādīn tatśarīre vilāpya ca |

udvarttanādikaṃ dattvā snāpayeddivyavāriṇā || 2/19 ||

mṛduvastreṇa saṃmārjya nayane kajjalaṃ dadet |

lalāṭe caiva sindūraṃ alaktaṃ caraṇāmbuje || 2/20 ||

p. 7) cintayenmanasā mūrtiṃ sarvālaṅkārabhūṣitām |

tataḥ so'hamiti dhyātvā pādyaṃ dadyāt padoḥ priye || 2/21 ||

maulāvarghyaṃ mukhe toyaṃ gandho'ṅge sarvataḥ kṣipet |

sugandhi - śvetalauhityaṃ javāṃ kṛṣṇāparājitām || 2/22 ||

pade śīrṣe tathā karṇe kaṇṭhe mālāṃ nidhāpayet |

sammukhe dhūpadīpau ca naivedyaṃ bhojayedatha || 2/23 ||

kāraṇaṃ palalaṃ bhūyaḥ kāraṇaṃ mīnamuttamam |

punaśca kāraṇaṃ deyaṃ tato bharjjitaśālijam || 2/24 ||

punarmadyaṃ tato'pūpaśaṣkulīṃ devi ! dāpayet |

tato madyaṃ pradāyaiva nānā - temana - saṃyutam * || 2/25 ||

dadhikṣīrājyasahitaṃ dāpayedodanaṃ priye ! |

 ācamanaṃ tato dadyāttāmbūlaṃ vinivedayet || 2/26 ||

tato vai mānasaṃ jāpaṃ kṛtvā tarpaṇa mācaret |

stutvā natvā tattadaṅgadevatā [:] prāpayedatha || 2/27 ||

sva sva sthānaṃ tataḥ śeṣaṃ śaktibhirbhojayet svayam |

tataḥ sohamiti dhyāyedātmānaṃ tāriṇīmayam || 2/28 ||

idaṃ mānasamākhyātam pūjanaṃ devi ! durlabham |

ekāntanirmalaṃ cittaṃ hṛdambhojārccanāt priye || 2/29 ||

p. 8) gurvarccocita kāle ca prātarmadhyāhnato'pi vā |

karttavya metadvidhivadgurupādaprasādataḥ || 2/30 ||

athātaḥ saṃpravakṣyāmi pūjāṃ yantrasamīritām |

atha yāgagṛhaṃ gatvā puṣpāharaṇamācaret || 2/31 ||

śatābhiṣeketi padaṃ dviruccārya tato vadet |

kūrcāstravahnilalanā tārādyaḥ puṣpakarṣaṇe || 2/32 ||

māyāṃ pūrvaṃ samucārya ādhāraśaktisaṃvadet |

kamalāsanaṃ ṅentañca hṛnmanuścāsanārcane || 2/33 ||

arghyapātraṃ sthāpayitvā pañcānāṃ śodhanañcaret |

ādau śodhanamevoktaṃ nīlatantre tava priye || 2/34 ||

dvitīyaśodhane devi ! prataddhiṣṇu - manuṃ japet |

tṛtīyaśodhane devi ! tryambakenaiva mantravit || 2/35 ||

tadviṣṇoriti mantreṇa caturthaśodhanañcaret |

pratadviṣṇuriti mantreṇa svayambhvādiviśodhanam || 2/36 ||

śaktestu śodhanenaiva maithunaṃ śudhyati priye ! |

tato devi ! mahāyantraṃ kathayāmi tava priye || 2/37 ||

sayoniṃ candanenāṣṭapatramabjaṃ likhettataḥ |

caturasraṃ caturdvāraṃ yantraṃ devi ! samālikhet || 2/38 ||

gaṇeśaṃ prāci saṃpūjya dakṣiṇe vaṭukaṃ yajet |

paścime kṣetrapālañca yoginīmuttare yajet || 2/39 ||

p. 9) śmāśānaṃ tatra saṃpūjyaṃ tatra kalpadrumaṃ yajet |

tanmūle maṇipīṭhañca nānāmaṇivibhūṣitam || 2/40 ||

nānālaṅkāra - bhūṣāḍhyaṃ munidevaiśca maṇḍitam |

śivābhirvahumāṃsāsthi - modamānābhirantataḥ || 2/41 ||

caturddikṣu śavān muṇḍāṃścitāṅgārāsthibhūṣitān |

(caturdikṣu śavamuṇḍacitāṅgārāsthi - bhūṣitam)

hasauḥ sadāśivetyuktvā mahāpreta tataḥ param || 2/42 ||

padmāsanāya hṛdayaṃ pīṭhanyāsamanurmataḥ |

lakṣmīḥ sarasvatī caiva ratiḥ prīti stathaiva ca || 2/43 ||

kīrttiḥ śāntiśca puṣṭhiśca tuṣṭi rityaṣṭaśaktayaḥ |

etāḥ pūjyāḥ patradeśe krameṇa prāṇaballabhe || 2/44 ||

tataḥ puṣpāñjaliṃ nītvā kūrmatattvena kaulikaḥ |

hṛdaye dyautanaṃ tejaḥ parivārasamanvitam || 2/45 ||

yaṃkārāditayā devi ! śavopari nidhāpayet |

āṃ sohamiti mantreṇa jīvanyāsaṃ samācaret || 2/46 ||

tataḥ pādyādinā devi ! pūjayedugratāriṇīm |

namaḥ svāhā svadhāñcaiva namo vauṣaṭ tathā kramāt || 2/47 ||

tato nivedayāmīti sarvaṃ dadyānmaheśvari !

idaṃ dravyaṃ tataḥ procya devatābodhanaṃ tataḥ || 2/48 ||

p. 10) vajrapuṣpaṃ praticchedaṃ hū/ - phaṭ - svāhā tato vadet |

mūlamantraṃ samuccārya ṅentaṃ nāma niyojayet || 2/49 ||

tataśca parivārāṇi pūjayeddevi ! kauntikaḥ |

idaṃ dravyaṃ samucārya parivārebhyo namo'ntataḥ || 2/50 ||

praṇavādyena manunā kulīnaḥ pūjanañcaret |

akṣobhyaṃ * maulideśe tu prāgādyaṣṭadaleṣu ca || 2/51 ||

śaktayo'ṣṭau bhairavāṃśca dvāreṣu caturaḥ surān |

vāyavyādīśaparyantaṃ gurupaṅktirvyavasthitā || 2/52 ||

tato japtvā stavaiḥ stutvā natvā ca visṛjeddhṛdi |

naivedyaṃ sādhakebhyaśca strībhyo dadyānna kutracit || 2/53 ||

iti te kathitaṃ bhadre ! tārāyāḥ pūjanaṃ mahat |

mānasaṃ yāntrikañcaiva nityaṃ nṛṇāmiti smṛtam || 2/54 ||

nādhikāro yaunike ca strīṇāṃ mānasa - yantrayoḥ |

vidheyaṃ pūjanaṃ devi ! na kuryādvā nijecchayā || 2/55 ||

|| iti śrītārātantre dvitīyaḥ paṭalaḥ ||



tṛtīyaḥ paṭalaḥ

śrībhairava uvāca |


athātaḥ saṃpravakṣyāmi śṛṇu tvaṃ parvatātmaje |

pātramekaṃ dvayaṃ vāpi trayaṃ vā pañca vā priye || 3/1 ||

pivedvīravaraśreṣṭho yaḥ sa rudra itīritam |

sambidānandayogena yaḥ kāraṇamado bhavet || 3/2 ||

sa eva paramānando brahmasāyujyadāyakaḥ |

tasmādbhuktvā siddhimūlaṃ sādhakaḥ kāraṇaṃ pivet || 3/3 ||

vinānandaṃ sambidāyāḥ pānaṃ yatkāraṇasya ca |

tanna cānanda - janakaṃ bauddhadeva - vaco yathā || 3/4 ||

pūjyoḥ guruḥ sadā cātra tadvattattanayopi ca |

tatpatnī sarvabhāvena sadā kaulikapūruṣaiḥ || 3/5 ||

tasyāḥ santoṣamātrena devī tuṣṭā bhavet priye ! |

tasmāt stotrairdhanairvākyai stoṣayet brahmadāyakam || 3/6 ||

naktaṃ japavidhānañca śṛṇuṣvaikamanāḥ priye ! |

ādau ṣaṅaṅgaṃ vinyasya gurordhyānaṃ tataḥparam || 3/7 ||

mantradhyānaṃ * tataḥpaścāt devaudhyānaṃ tataścaret |

seturūpaṃ tata stāraṃ japtvā japamathācaret || 3/8 ||

p. 12) punastāraṃ tato devīdhyānaṃ kṛtvā samarpayet |

śivo'haṃ tāriṇīrūpamātmānamiti cintayet || 3/9 ||

parivāramayaścāhamiti dhyāyedanāratam |

iti te kathitaṃ devi ! rahasyaṃ tāriṇīmayam || 3/10 ||

na deyaṃ paśave tasmāt śapatho me tvayi priye ! || 3/11 ||

|| iti śrītārātantre tṛtīyaḥ paṭalaḥ ||



caturthaḥ paṭalaḥ

śrībhairavyuvāca |


yat prasādādidaṃ sarvaṃ kulācāravidhānakam |

tasyaivādyantamāhātmyaṃ śrotumicchāmi sāmpratam || 4/1 ||


śrībhairava uvāca |


guruḥ paramaguruścaiva parāparagurustathā |

parameṣṭiguruścaiva catvāro guravaḥ smṛtāḥ || 4/2 ||

ṛṣiratra guruḥ prokto mantradaḥ paramo guruḥ |

parāparaguruścāhaṃ tvameva parameṣṭikā || 4/3 ||

sarveṣāmeva madhye tu pradhānaṃ paramo guruḥ |

gurorvinā mahāmokṣaṃ na kāśī na ca gaṅgayā (?) || 4/4 ||

māhātmyaṃ tasya vakṣyāmi yena tuṣṭā ca śāmbhavī |

gurumantreṣṭadevīnāmekatvaṃ parikathyate || 4/5 ||

tatpatnī ca viśeṣeṇa paradevīviśeṣabhāk |

saralyā'saralā vāpi niṣṭhurā vā priyoditā || 4/6 ||

p. 14) kutsitā vyādhitā vāpi mūḍhā'mūḍhāpi vā priye |

sadeṣṭadevobhāvena bhāvanīyā kulottamaiḥ || 4/7 ||

tattanujoditañcaiva yadvā sādhakabhāṣitam |

yatnenaiva vidhātavyamaśakye yatnavān bhavet || 4/8 ||

vīrocchiṣṭaṃ vināmadyaṃ śaktyucchiṣṭaṃ tadapyuta |

bhojayennirvikalpena manasā vīravallabhaḥ || 4/9 ||

purā proktāni pañcaiva ekaṃ vā śṛṇu bhairavi ! |

śodhayitvā nivedyaiva yo'śnīyāt sa ca bhairavaḥ || 4/10 ||

susiddhāḥ pīṭhasaṃsthā ye sādhakā ste'rcanāśrayāḥ |

guru taddayitāputraputrī - sādhakayoṣitāṃ || 4/11 ||

yatnecchā vartate tattu samarpyaṃ parameśvari ! |

avaśyaṃ tāriṇīmantre śaktipūjā vidhīyate || 4/12 ||

nijakānteṣṭhadevī tu pūjanīyā viśeṣataḥ |

samānadevatāmantraṃ nijakrāntā japedyadi || 4/13 ||

tadā sarvārthasiddhiḥ syāt tuṣṭā bhavati tāriṇo |

śarīrārdhaṃ smṛtā kāntā yasmāttadyatnavān bhavet || 4/14 ||

tasyāḥ kiñcicca māhātmyaṃ cīnatantre mayoditam |

maithune varjanīyā yā stāsāṃ vidhi rihocyate || 4/15 ||

p. 15) gurupatnī gurusutā guruputrabadhū stathā |

satīrthasya tu vīrasya sādhakasya tathā priye ! || 4/16 ||

kāntāyā mantraputryāśca ramaṇānnārakī bhavet |

maithunasya vidhānantu kathyate śṛṇu bhairavi ! || 4/17 ||

adhaḥ kṛtvā mahādevīṃ svayaṃ bhairavarūpadhṛk |

purato mūlamuccārya dharmādharmādikaṃ paṭhan || 4/18 ||

gajatuṇḍākhyatattvena yojayelliṅgabhairavam |

tasmāt śataṃ viṃśatiṃ vā japtvā tejastu pātayet || 4/19 ||

mūlānte tu prakāśeti vacanaṃ paripaṭhya ca |

iti taṃ kathitaṃ devi ! yathoktaṃ buddharūpiṇā || 4/20 ||

siddhipradaṃ samācārād gopanīyaṃ svayonivat || 4/21 ||

|| iti tārātantre caturthaḥ paṭalaḥ ||



pañcamaḥ paṭalaḥ

śrībhairavyuvāca |

tvatprasādānmahādeva ! jñātametanmayākhilam |

puraścaraṇahīnena mantreṇa na phalaṃ bhavet || 5/1 ||

tasmācca phaladānantu puraścaraṇamucyatām * |


p. 16) śrībhairava ucāca |


athātaḥ saṃpravakṣyāmi puraścaraṇamuttamam |

kuje vā śanivāre vā naramuṇḍaṃ samāharet || 5/2 ||

vitastimātre khāte tu nikhanet saṅgavarjitaḥ |

tatra naktaṃ daśaśataṃ prajapenmantrasiddhaye || 5/3 ||

anenaiva vidhānena puraścaryā vidhīyate |

athavānyaprakāreṇa puraścaraṇamucyate || 5/4 ||

guruṃ taddayitāṃ vāpi tatsutaṃ tatsutāñca vā |

devavat pūjanaṃ kṛtvā japettāvad varānane ! || 5/5 ||

aṣṭādhikaṃ śataṃ vāpi puraścaraṇamucyate |

athavā mūrddhnipadme tu dhyātvā pūjāṃ vidhyāya ca || 5/6 ||

aṣṭādhika sahasrañca japedbhairavarūpadhṛk |

anenaiva vidhānena puraścaraṇamucyate || 5/7 ||

athavānyaprakāreṇa puraścaraṇamucyate |

caturdaśīṃ samārabhya yāvadanyā caturdaśī || 5/8 ||

sahasraṃ pratyahaṃ sāṣṭaṃ japet siddhīśvaro bhavet |

etat sarvaṃ śmaśāne ca rātrau vīrairvidhīyate || 5/9 ||

iti te kathitaṃ bhadre ! puraścaraṇamuttamam |

gopanīyaṃ prayatnena jananyā jāravat priye ! || 5/10 ||

jīvahīno yathā dehī sarvakarmasu na kṣamaḥ |

puraścaraṇahīno'pi tathā mantraḥ prakīrtitaḥ || 5/11 ||

sakṛt dvidhā tridhā vāpi caturddhā yugabhedataḥ |

kartavyañca prayatnena puraścaraṇamuttamam || 5/12 ||

idānīṃ raktadānasya vidhānaṃ varavarṇini ! |

grāmyāraṇyajalasthānāṃ rudhiraṃ prītibarddhanam || 5/13 ||

ghṛtāktaṃ madhunāktañca viśeṣāt prāṇaballabhe ! |

janturaktena sampūrṇa - kalasāt parvatātmaje ! || 5/14 ||

tilapramāṇaṃ rudhiraṃ nijadehasya śasyate |

lalāṭa - hasta - hṛdaya śirobhrūmadhya deśataḥ || 5/15 ||

svadeharudhire datte rudradeha ivāparaḥ |

brāhmaṇo yadi vā kṣatro vaiśyaḥ śūdraśca eva vā || 5/16 ||

pradadyānnijaraktañca mantrayitvā prayatnataḥ |

śaktīnāṃ nādhikāro'sti svadeharudhirārpaṇe || 5/17 ||

mantrāntaraṃ pravakṣyāmi śṛṇu bhairavi ! sādaram |

pūrvoktamantrarājasya madhyavījatrayaṃ priye ! || 5/18 ||

kulvukā nāma devī ca mahānīlasarasvatī |

ekaiva hi mahādevī nāmamātraṃ tridhā bhavet || 5/19 ||

praṇavavyatirekena tṛtīyaikajaṭā bhavet |

yathā pañcākṣarī tryarṇā tathā varṇacatuṣṭayam || 5/20 ||

p. 18) māhātmyaṃ na ca bhedaḥ syāt sāmyamityabhidhīyate |

iti te kathitaṃ tattvaṃ durlabhaṃ mayakā priye || 5/21 ||

gopanīyaṃ prayatnena yoniḥ paranare yathā || 5/22 ||

iti śrītārātantre pañcamaḥ paṭalaḥ ||



ṣaṣṭhaḥ paṭalaḥ

śrībhairava uvāca |


athānyat saṃpravakṣyāmi rahasyaṃ tāriṇīmayam |

ugrāditrayamantrasya māhātmyaṃ varṇayāmyaham || 6/1 ||

saṃkṣepata stathāpīha varṇayāmi maheśvari ! |

tārāmantravido mantrī kālīmantravida stathā || 6/2 ||

śivādapyadhiko devi ! nātra kāryaśca saṃśayaḥ |

tārāmantraṃ vinā devi ! kālikāmantrameva ca || 6/3 ||

nāpnuyāt parameśāni ! bhogamokṣau yaśaḥśriyau |

tāriṇīhṛdayajñānī latāsādhana - tatparaḥ || 6/4 ||

pañcamaprāśanaprājño devairapi namasyate |

nijakāntā - svarūpeṇa nijabandhusvarūpataḥ || 6/5 ||

p. 19) dāridryeṇa virodhena nyakkārādiprayogataḥ |

pīḍādinā vidhīyeta devairbhaṅgo'tra sādhane || 6/6 ||

tasmādyatnena vīrendro gurave vinivedayet |

sarvathā sarvayatnena sarvopāsyā ca tāriṇī || 6/7 ||

bhadrābhadravicārañca yaḥ karoti sa durmatiḥ |

iti te kathitaṃ tattvamanuṣṭheśca samāsataḥ || 6/8 ||

darśanādbhaktaśāktā ye sukhante paribhuñjate |

tārātantraṃ cīnatantraṃ kālītantraṃ guruditam || 6/9 ||

sarvathā gopanāyaiva śaktiṃ vakṣaḥsthale'rpayet |

deyaṃ viṣyāya śāntāya sādhakāya mahātmane || 6/10 ||

vilāsine svantrāya gurutantrāya suvrate ! |

anyadyannoktamatrāpi tatsarvaṃ guruvaktrataḥ || 6/11 ||

viruddhaṃ vedavāde'pi śrotavyaṃ nātra saṃśayaḥ || 6/12 ||

|| iti śrībhairavabhairavīsaṃvāde tārātantre ṣaṣṭhaḥ paṭalaḥ ||

[ samāpto'yaṃ granthaḥ ]




buddhavaśiṣṭhavṛttāntaḥ

(1)

[ rudrayāmale saptadaśapaṭalaḥ ]

vaśiṣṭho brahmaputro'pi cirakālaṃ susādhanam |

cakāra nirjane deśe kṛcchreṇa tapasā vaśī || 7/1 ||

ṣaṭsahasraṃ vatsarañca vyāpya yogādisādhanam |

tathāpi sākṣād girijā na babhūva mahītale || 7/2 ||

tato jagāma kruddho'sau tātasya nikaṭe prabhuḥ |

sarvaṃ tatkathayāmāsa svīyācārakramaṃ prabho ! || 7/3 ||

anyamantraṃ dehi nātha ! eṣā vidyā na siddhidā |

anyathā sudṛḍhaṃ śāpaṃ tadāgra (tvadagre) pradadāmi hi || 7/4 ||

tatastaṃ vārayāmāsa evaṃ na kuru bho ! suta ! |

punastāṃ bhaja bhāvena yogamārgeṇa paṇḍitaḥ || 7/5 ||

tataḥ sā varadā bhūtvā āgamiṣyati te'grataḥ |

sā devo paramā śaktiḥ sarvasaṅkaṭatāriṇī || 7/6 ||

koṭisūryaprabhā nīlā candrakoṭisuśītalā |

sthiravidyullatākoṭisadṛśī kālakāminī || 7/7 ||

p. 22) sarvasvarūpā sarvādyā dharmādharmavivarjitā |

śuddhacīnācāraratā śakticakrapravartikā || 7/8 ||

anantānantamahimā saṃsārāṇavatāriṇī |

buddheśvarī buddhirūpā atharvavedaśākhinī || 7/9 ||

sā pāti jagatāṃ lokāṃ stasyā karma carācaram |

bhaja putra ! sthirānandaḥ kathaṃ śaptuṃ samudyataḥ || 7/10 ||

ekāntacetasā nityaṃ bhaja putra dayānidhe |

tasya (syā) darśanamevaṃ hi avaśyaṃ samavāpsyasi || 7/11 ||

etacchrutvā gurorvākyaṃ praṇamya ca punaḥ punaḥ |

jagāma udadhe stīre vaśī vedāntavit śuciḥ || 7/12 ||

sahasravatsaraṃ samyak jajāpa paramaṃ japam |

ādeśopi na babhūva tataḥ krodhaparo muniḥ || 7/13 ||

vyākulātmā mahāvidyāṃ vaśiṣṭhaḥ śaptumudyataḥ |

dvirācamya mahāśāpaḥ pradattaśca sudāruṇaḥ || 7/14 ||

tenaiva muninā nātha ! muneragre kuleśvarī |

ājagāma mahāvidyā yogināmabhayapradā || 7/15 ||

akāraṇamare vipra ! śāpo dattaḥ sudāruṇaḥ |

mama pūjāṃ na jānāsi matkulāgamacintanam || 7/16 ||

kathaṃ yogāabhyāsavaśāt matpādāmbhojadarśanam |

prāpnoti mānuṣo devo mama dhyānamaduḥkhadam || 7/17 ||

yaḥ kulārthī siddhamantrī mahedācāranirmalam |

mamaiva sādhanaṃ puṇyaṃ vedānāmapyagocaram || 7/18 ||

bauddhadeśe'tharvavede mahācīne sadā braja |

tatra gatvā mahābhāvaṃ vilokya matpadāmbujam || 7/19 ||

matkulajño maharṣe ! tvaṃ mahāsiddho bhaviṣyasi |

etadvākyaṃ kathitvā sā vāyavyākāśagāminī || 7/20 ||

nirākārā'bhavat śīghraṃ tataḥ sākāśavāhinī |

tato munivaraḥ śrutvā mahāvidyāsarasvatīm || 7/21 ||

jagāma cīnabhūmau ca yatra buddhaḥ pratiṣṭhitaḥ |

punaḥ punaḥ praṇamyāsau vaśiṣṭhaḥ kṣitimaṇḍale || 7/22 ||

rakṣa rakṣa mahādeva ! buddharūpadharāvyayaḥ (ya !) |

ati dīnaṃ vaśiṣṭhaṃ māṃ sadāvyākulacetasam || 7/23 ||

brahmaputraṃ mahādevīsādhanāyājagāma ca (yaḥ) |

siddhimārgaṃ na jānāmi devamārgaparoharaḥ |

tavācāraṃ samālokya bhayāni santi me hṛdi || 7/24 ||

tannāśaya mama kṣipraṃ durvuddhi vedagāminīm |

vedavahiṣkṛtaṃ karma sadā te cālaye prabho ! || 7/25 ||

kathametatprakārañca madyaṃ māṃsaṃ tathāṅganāṃ (nā)

sarve digambarāḥ siddhāḥ raktapānodyatā varāḥ |

muhurmuhuḥ prapivanti ramayanti varāṅganām || 7/26 ||

sadā māṃsāsavaiḥ pūrṇā mattā raktavilocanāḥ |

nigrahānugrahe śaktāḥ pūrṇāntaḥkaraṇodyatāḥ || 7/27 ||

vedasyāgocarāḥ sarve madyastrī - sevane ratāḥ |

ityuvāca mahāyogī dṛṣṭvā vedavahiṣkṛtam || 7/28 ||

prāñjalirvinayāviṣṭo vada caitatkulaprabho ! |

manaḥ pravṛttireteṣāṃ kathaṃ bhavati pāvana (nī) || 7/29 ||

p. 24) kathaṃ vā jāyate siddhirvedakāryaṃ vinā prabho ! |


buddha uvāca |


vaśiṣṭha ! śṛṇu vakṣyāmi kulamārgamanuttamam |

yena vijñānamātrena rudrarūpī bhavet kṣaṇāt || 7/30 ||

saṅkṣepeṇa sarvasāraṃ kulasiddhyarthamāgamam |

ādau śucirbhavedvīro vivekākrāntamānasaḥ |

paśubhāvasthira cetāḥ paśusaṅgavivarjitaḥ || 7/31 ||

ekākī nirjane sthitvā kāmakrodhādivarjitaḥ |

sadā yogābhyāsarato yogaśikṣādṛḍhabrataḥ || 7/32 ||

vedamārgāśrayo nityaṃ vedārthanipuṇo mahān |

evaṃ krameṇa dharmātmā śīlaudāryaguṇānvitaḥ || 7/33 ||

dhārayenmārutaṃ nityaṃ śvāsamārge manolayam |

evamabhyāsayogena vaśī yogī dine dine || 7/34 ||

śanaiḥ śanaiḥ kṛtābhyāsāddehe svedodgamo'dhamaḥ |

madhyamaḥ svalpasaṃyukto bhūmityāgaḥ paro mataḥ || 7/35 ||

prāṇāyāmena siddhiḥ (ddhaḥ) syānnaro yogeśvaro bhavet |

yogī bhūtvā kumbhakajño maunī bhakto divāniśam || 7/36 ||

śive kṛṣṇe brahmapade ekāntabhaktisaṃyutaḥ |

brahma - viṣṇu - śivā ete vāyavīgaticañcalā || 7/37 ||

evaṃ vibhāvya manasā karmaṇā vacasā śuciḥ |

śaktau cittaṃ samādhāya cidrūpāyāṃ sthirāśayaḥ || 7/38 ||

tato mahāvīrabhāvaṃ kulamārgamahodayam |

śakticakraṃ satvacakraṃ vaiṣṇavaṃ navavigraham || 7/39 ||

p. 25) samāśritya bhajenmantrī kulakātyāyanīṃ parām |

pratyakṣadevatāṃ śrīdāṃ caṇḍo devagā (?) nikṛntanīm || 7/40 ||

cidrūpāṃ jñānanilayāṃ caitanyānandavigrahām |

koṭisaudāminībhāsāṃ sarvatattvasvarūpiṇīm || 7/41 ||

aṣṭādaśabhujāṃ raudrīṃ śivamāṃsācalapriyām |

āśritya prajapenmantraṃ kulamārgāśrayo naraḥ |

kulamārgāt paraṃ mārgaṃ ko jānāti jagattraye |

etanmārgaprasādena brahmā sraṣṭā svayaṃ mahān || 7/42 ||

viṣṇuśca pālane śakto nirmalaḥ satvarūpadhṛk |

sarvasevyo mahāpūjyo yajurvedādhipo mahān || 7/43 ||

haraḥ saṃhārakartā ca vīreśottamamānasaḥ |

sarveṣāmantakaḥ krodhī krodharājo mahābalau || 7/44 ||

vīrabhāvaprasādena dikpālā rudrarupiṇaḥ |

māsenākarṣaṇaṃ siddhirdvimāse vākpatirbhavet || 7/45 ||

māsatrayeṇa saṃyoge jāyate suravallabhaḥ |

evaṃ catuṣṭaye māsi bhaveddikpālagocaraḥ || 7/46 ||

pañcame pañcavāṇaḥ syāt ṣaṣṭhe rudro bhaveddhruvam |

etadācārasāraṃ hi sarveṣāmapyagocaram || 7/47 ||

etanmārgaṃ kaulamārgaṃ kaulamārgāt paraṃ na hi |

yogināṃ dṛḍhacittānaṃ bhaktānāmekamāsataḥ || 7/48 ||

kāryasiddhirbhavennārī kulamārgaprasādataḥ |

pūrṇayogī bhavedvipraḥ ṣaṇmāsābhyāsayogataḥ || 7/49 ||

p. 26) śaktiṃ vinā śivo'śaktaḥ kimanye jaḍabuddhayaḥ |

ityuktvāṃ buddharūpī ca kārayāmāsa sādhanam || 7/50 ||

kuru vipra ! mahāśaktisevanaṃ madyasādhanam |

mahāvidyāpadāmbhojanadarśanaṃ samavārupasi || 7/51 ||

etat śrutvā gurorvākyaṃ smṛtvā devīṃ sarasvatīm |

madirāsādhanaṃ kartuṃ jagāma kulamaṇḍape || 7/52 ||

madyaṃ māṃsaṃ tathā matsyaṃ mudrā maithunameva ca |

punaḥ punaḥ sādhayitvā pūrṇayogī babhūva saḥ || 7/53 ||

(2)

[ brahmayāmale devīśvarasaṃvāde prathamapaṭale |]

brahmaṇo mānasaḥ putro vaśiṣṭhaḥ sthirasaṃyamī |

tārāmārādhayāmāsa purā nīlācale muniḥ || 7/13 ||

japan sa tāriṇīṃ vidyāṃ kāmākhyāyonimaṇḍale |

gamayāmāsa varṣāṇāmayutaṃ dhyānatatparaḥ || 7/14 ||

varṣāyutena tasyaivaṃ ciramārādhitā satī |

nānugrahaṃ cakārāsau tārā saṃsāratāriṇī || 7/15 ||

athāsau pitaraṃ gatvā brahmāṇaṃ parameṣṭhinam |

kopena jvalito vidyāṃ tatyāja piturantike || 7/16 ||

dvādaśādityasaṅkāśaṃ tapobhirjvalitaṃ munim |

brahmā hi sa muniṃ prāha śṛṇu putra ! vaco mama || 7/17 ||

tattvajñāmayī vidyā tārā bhuvanatāriṇī |

ārādhaya śrīcaraṇamanudvignena cetasā || 7/18 ||

asyāḥ prasādādevāhaṃ bhuvanāni caturdaśa |

sṛjāmi caturo vedān kalpayāmi sma līlayā || 7/19 ||

enāmeva samārādhya vidyāṃ bhuvanatāriṇīm |

tattvajñānamayo viṣṇurbhuvanaṃ pālayatyasau || 7/20 ||

saṃhārakāle ca haro rudramūrtidharaḥ paraḥ (.) |

tārāmeva samārādhya saṃharatyakhilaṃ jatat || 7/21 ||

------------------------------------------------------------------

vaśiṣṭha uvāca |


devānāmādibhūtastvaṃ sarvavidyāmayaḥ prabho ! |

kathaṃ dattā durārādhyā vidyā mahyamiyaṃ tvayā || 7/23 ||

sahasravatsarān pūrva miyamāradhitā purā |

nīlācale nivasatā haviṣyaṃ bhuñjatā mayā || 7/24 ||

tathāpi tāta ! tāriṇyāḥ karuṇā mayi nābhavat |

tato gaṇḍūṣamātrantu kāle kāle pivan jalam || 7/25 ||

ārādhayāmi tāṃ devīṃ vatsarāṇāṃ sahasrakam |

tathāpi yadi naivābhūttāriṇyāḥ karuṇā mayi || 7/26 ||

tathā (dā) hameka - pādena tiṣṭhannīlācalopari |

paraṃ samādhimāsādya nirāhāro dṛḍhavrataḥ || 7/27 ||

tāmevākaruṇāṃ dhyāyan japaṃstāmeva sarvadā |

ativāhitavān varṣaṃ sahasrāṣṭakamuttamam || 7/28 ||

evaṃ daśasahasrantu varṣāṇāmahamīśvarīm |

kāmākhyāyonimāśriya samārādhitavān prabho ! || 7/29 ||

adyāpyanugraha stasyā stathāpi na hi dṛśyate |

ata styajāmi duḥsādhyāṃ vidyāmetāṃ suduḥkhitaḥ || 7/30 ||

iti tadvacanaṃ śrutvā brahmā lokapitāmahaḥ |

uvāca śāntayan putraṃ vaśiṣṭhaṃ munīnāṃ varam || 7/31 ||


brahmovāca |

vaśiṣṭha ! vatsa ! gacchatvaṃ punarnīlācalaṃ prati |

tatrasthito mahādevī mārādhaya dṛḍhavrataḥ || 7/32 ||

kāmākhyā - yonimāśritya jagataḥ parameśvarīm |

acirādeva te siddhirbhaviṣyati na saṃśayaḥ || 7/33 ||

etasyāḥ sadṛśī vidyā kācinna hi jagattraye |

imāṃ tyaktvā punarvidyāṃ anyāṃ kāṃ tvaṃ grahauṣyasi || 7/34 ||

iti tasya vacaḥ śrutvā praṇamya pitaraṃ muniḥ |

punarjagāma kāmākhyā - yonimaṇḍalasannidhim || 7/35 ||

tatra gatvā munivaraḥ pūjāsambhāratatparaḥ |

ārādhayan mahāmāyāṃ vaśiṣṭho'pi jitendriyaḥ || 7/36 ||

athārādhayata stasya sahasraṃ parivatsarān |

jagmustārā - mahādevī - pādāmbhojā - nuvartiṇaḥ || 7/37 ||

tathāpi tāṃ prati prītā yadā nābhūnmaheśvarī |

tadā roṣeṇa mahatā jajvāla sa munīśvaraḥ || 7/38 ||

tadā jalaṃ samādāya tāṃ śaptumupacakrame |

etasminneva kāle tu ruṣṭamālokya taṃ munim || 7/39 ||

cacāla vasudhā sarvā saśaila - vanakānanā |

hāhākāro mahānāsīddevi ! deveṣu sarvataḥ || 7/40 ||

tato babhūva purata stārā saṃsāra - tāriṇī |

vaśiṣṭha stāṃ samālokya śaśapātovadāruṇam || 7/41 ||

p. 29) tato devī vaśiṣṭhena śaptā na phaladā bhavet |

cīnācāraṃ vinā naiva prasīdāmi kadācana || 7/42 ||

uvāca sādhakaśreṣṭhaṃ vaśiṣṭhamanunīya sā |

roṣeṇa dāruṇamanāḥ kathaṃ mā manuśaptavān || 7/43 ||

mayi ārādhanācāraṃ buddharūpī janārdanaḥ |

eka eva vijānāti nānyaḥ kaścana tatvataḥ || 7/44 ||

vṛthaivāyāsa bahula (laṃ) kāloyaṃ gamita stvayā |

viruddhācāraśīlena mama tattvamajānatā || 7/45 ||

udbodharūpiṇo viṣṇoḥ sānnidhyaṃ yāhi sāmpratam |

tenopadiṣṭācāreṇa māmārādhaya suvrata ! || 7/46 ||

tadaivāśu prasannāsmi tvayi yasyā (vipra) na saṃśayaḥ ||

[dvitīya paṭale]

śrībhairva uvāca |


tataḥ praṇamya tāṃ devīṃ vaśiṣṭho'sau mahāmuniḥ |

jagāmācāravijñānavāñchayā buddharūpiṇam || 7/1 ||

tato gatvā mahācīnadeśe jñānamayo muniḥ |

dadarśa himavatpārśve sādhakeśvarasevite || 7/2 ||

raṇajjaghanarāveṇa rūpayauvanaśālinā |

madirāmodacittena vilāsollasitena ca || 7/3 ||

śṛṅgārasāraveśena jaganmohanakāriṇā |

bhayalajjāvihīnena devyā dhyānapareṇa ca || 7/4 ||

p. 30) kāminīnāṃ sahasreṇa parivāritamīśvaram |

madirāpānasañjāta - mandamandavilocana || 7/5 ||

dūrādeva vilokyainaṃ vaśiṣṭho buddharūpiṇam |

vismayena samāviṣṭaḥ smaran saṃsāratāriṇīm || 7/6 ||

kimidaṃ kriyate karmaṃ viṣṇunā buddharūpiṇā |

vedavādaviruddhoyamācāro'sammato mama || 7/7 ||

iti cintayata stasya vaśiṣṭhasya mahātmanaḥ |

ākāśavāṇī prāhāśu maivaṃ cintaya suvrata ! || 7/8 ||

ācāraḥ paramārtho'yaṃ tāriṇīsādhane mune ! |

etadviruddhabhāvasya mate nāsau prasīdati || 7/9 ||

yadi tasyāḥ prasādaṃ tvamacireṇābhivāñchasi |

etena cīnācāreṇa tadā tāṃ bhaja suvrata ! || 7/10 ||

ākāśavāṇīmākarṇya romāñcitakalevaraḥ |

vaśiṣṭho daṇḍavadbhūmau papātātīvaharṣitaḥ || 7/11 ||

athotthāyācireṇāsau kṛtāñjalipuṭo muniḥ |

jagāma viṣṇoḥ śaraṇaṃ buddharūpasya pārvati ! || 7/12 ||

athāsau taṃ samālokya madirāmadavihvalaḥ |

prāha buddhaḥ prasannātmā kimarthaṃ tvamihāgataḥ || 7/13 ||

atha buddhaṃ praṇamyāha bhaktinasro mahāmuniḥ |

yaduktaṃ tāriṇīdevyā nijārādhanakarmaṇi || 7/14 ||

tat śrutvā bhagavān buddha stattvajñānamayo hariḥ |

vaśiṣṭhaṃ prāhamajñānaṃ cīnācārādhikāraṇān (ṇam) || 7/15 ||

na prakāśyoyamācāra stāriṇyāḥ sarvadā mune ! |

tava bhaktivaśenāsmi prakāśyamiha tatparaḥ || 7/16 ||


buddha uvāca


prathācāravidhiṃ vakṣye tārādevyāḥ samṛddhidam |

yasyānuṣṭhānamātreṇa bhavābdhau na nimajjasi || 7/17 ||

samastaśokaśamana - mānandādivibhūtidam |

tattvajñānamayaṃ sākṣādvimuktiphaladāyakam || 7/18 ||

snānādi mānasaḥ śauco mānasaḥ pravaro japaḥ |

pūjanaṃ mānasaṃ divyaṃ mānasaṃ tarpaṇādikam || 7/19 ||

sarva eva śubhaḥ kālo nāśubho vidyate kvacit |

na viśeṣo divārātrau na sandhyāyāṃ mahāniśi || 7/20 ||

vastrāsana - sthānageha - dehasparśādivāriṇaḥ |

śuddhiṃ na cācarettatra nirvikalpaṃ manaścaret || 7/21 ||

nātra śuddhyādyapekṣāsti na cāmedhyādidūṣaṇam |

sarvadā pūjayeddevīmasnātaḥ kṛtabhojanaḥ || 7/22 ||

mahāniśyaśucau deśe baliṃ mantreṇa dāpayet |

strīdveṣo naiva kartavyo viśeṣāt pūjanaṃ striyāṃ || 7/23 ||

[ ataḥ paraṃ yaduktañca tadanyatra prapañcitam |]

[tṛtīya paṭale ]

pūjākālaṃ vinā naiva paśyecchaktiṃ digambarām |

pūjākālaṃ vinā naiva surā peyā ca sādhakaiḥ |

āyuṣā hīyate dṛṣṭvā pītvā ca narakaṃ brajet ||

[ayameva vṛttānto mahācīnācārakrame'pi savistaraṃ varṇitaḥ |]

(3)

[buddhasya kāmaśāstrācāryatvaṃ spaṣṭamuktaṃ 
mīnanāthakṛtasmaradīpikāyām |]

sāraṃ niṣkramya buddhādimunīnāṃ pramukhāt śrutam |

śrīmatā mīnanāthena kriyate smaradīpikā ||

kāmaśāstrasya tattvajñā bhavanti yoṣitaḥ sadāḥ |

ye vai śāstraṃ jānanti ramante vṛṣabhā yathā ||

[mahācīnakramo gāndharve'pi varṇitaḥ |]



###########   END OF FILE  #######