####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00153
Uniform title: tantrasāra
Author : abhinavagupta

Description: 
Photographed from volume 17 of the Kashmir Series of Texts and Studies.


Notes: 
Revision 1: Added searchable e-text December 16, 2013      
Revision2: Fixed typos October 1, 2021

Publisher : Research Department Jammu and Kashmir State
Publication year : 1918
Publication city : Srinagar
Publication country : India
####################################################



kāśmīra-saṃskṛtagranthāvaliḥ |

granthāṅkaḥ 17

śrītantrasāraḥ |

śrīmanmahāmāheśvarācāryavarya śrīmadabhinavaguptācāryaviracitaḥ |
śrībhāratadharmamārtaṇḍa kaśmīramahārāja 
śrīpratāpasiṃhavarapratiṣṭhāpite
pratnavidyāprakāśa(risarca)kāryālaye
tadadhyakṣa mahāmahopādhyāya paṇḍita mukundarāma śāstriṇā
uddiṣṭakāryālayasthetarapaṇḍitasahāyena
saṃgṛhya saṃśodhana paryāyāṅkana vivaraṇādisaṃskaraṇottaraṃ
pāścātyavidvatpariṣatsaṃmatādhunikasugamaśuddharītyupanyāsādi##-

mumbayyāṃ
nirṇayasāgarākhyamudraṇālaye mudrāpayitvā prākāśyamupanītaḥ

khraistābdaḥ 1918

kāśmīra śrīnagara



śrīmacchrīkaṇṭhanāthaprabhṛtiguruvarādiṣṭasannītimārgo
labdhvā yatraiva samyakpaṭimani ghaṭanāmīśvarādvaitavādaḥ |
kaśmīrebhyaḥ prasṛtya prakaṭaparimalo rañjayansarvadeśyān
deśe'pyasminnadṛṣṭo ghusṛṇavisaravatstānmude sajjanānām ||1||

tarata tarasā saṃsārābdhiṃ vidhatta pare pade
padamavicalaṃ nityālokapramodasunirbhare |
vimṛśata śivādiṣṭādvaitāvabodhasudhārasaṃ
prasabhavilasatsadyuktyāntaḥsamutplavadāyinam ||2||


oṃ tatsatsvātmasaṃvidvapuṣe śaṃbhave namaḥ |

atha

tantrasāraḥ |

śrīmanmahāmāheśvarācāryavarya śrīmadabhinavaguptaviracitā |

prathamamāhnikam |

vimalakalāśrayābhinavasṛṣṭimahā jananī
bharitatanuśca pañcamukhaguptarucirjanakaḥ |
tadubhayayāmalasphuritabhāvavisargamayaṃ
hṛdayamanuttarāmṛtakulaṃ mama saṃsphuratāt [vimaleti mama ātmano 
hṛdayaṃ jagadānandādiśabdavācyaṃ tathyaṃ vastu saṃsphuratāt 
kālatrayāvacchedaśūnyatvena vikasatāt tacca kīdṛgityāha tadubhayeti 
tatsāmarasyātmanaḥ saṃghaṭṭāt sphuritabhāvaḥ parānapekṣatvena svata eva 
ullasitasattākaḥ yo bahirullilasitāsvabhāvo visargaḥ sa prakṛtiryasya tat 
tādṛśam anuttarāmṛtakulamiti anuttaramutkṛṣṭaṃ ca tat avidyamānaṃ 
mṛtaṃ yatra tat kulaṃ śarīraṃ yasya tat amākhya kalāsvarūpamityarthaḥ | 
tadubhayamāha jananī janakaśceti vigatā malā avacchedakā yasyāḥ tādṛśī 
yā kalā paravimarśaikasvabhāvakartṛtālakṣaṇā sā āśraya ālambanaṃ 
svarūpaṃ yasyāḥ sā śuddhasvātantryaśaktirūpā ityarthaḥ ata eva 
abhinavāyāmādyāyāṃ śuddhādhvamārge mahasṛṣṭau 
pāripūrṇyalakṣaṇaṃ tejo yasyāḥ sā | janakaśca kīdṛk bharitatanuḥ 
sarvākāṅkṣāvirahāt pūrṇasvabhāvaḥ ananyonmukhatayā svatantra iti yāvat 
ata eva padmabhiścidādiśaktyātmakairmukhaiḥ śaktibhirguptā 
prabandhenānuvartamānā ruciḥ pañcakṛtyaviṣayo'bhilāṣo yasyāsau | atha ca 
granthakarturabhinavaguptasya vimalābhidhānā jananī narasiṃhaguptākhyaśca 
janaka iti tayorapi śivaśaktisamāveśamayatvādvimarśanam ||1||] ||1||

2)

vitatastantrāloko vigāhituṃ [vigāhituṃ vivektumiti yāvat sarvairiti 
akṛtatīkṣṇatarkaśāstrapariśramaiḥ ṛjuvacaneti ṛjutā cātra 
tīkṣṇatarkābhāvāt |] naiva śakyate sarvaiḥ |
ṛjuvacanaviracitamidaṃ tu tantrasāraṃ tataḥ śṛṇuta ||2||

śrīśaṃbhunāthabhāskaracaraṇanipātaprabhāpagatasaṃkocam 
[śrīśaṃbhunātho hi granthakartustrikaśāstropadeṣṭā guruḥ sa eva 
bhāskaraḥ paramātmā sūryaśca tasya caraṇe jñānakriye kiraṇāḥ pādāśca 
teṣāṃ nipātena prabhāsphurattayā apagatasaṃkocaṃ svasvarūpavikasattayā 
vidyotamānaṃ abhinavaguptasya hṛdambujaṃ yathā hi sūryakiraṇanipātena 
ambujaṃ vikasati tathā śrīśaṃbhunāthacaraṇaprabhayā vikasitaṃ hṛdayaṃ 
lakṣaṇayā tannirgataṃ śāstraṃ ca | anenāsya prakāśasya 
svarūpavimarśātmakatvameva svarūpamiti bhaṅgyā nirūpitam tadetat vicinuta 
maheśasya pūjanaṃ svātmatayā pratyabhijñānaṃ taddhetoḥ etadvivecanaṃ 
maheśvarapratyabhijñānaphalamityarthaḥ | maheśvaratālābhe hi kimanyena 
phalena ityabhiprāyaḥ |. kh: prabhāvagatasaṃkocam iti pāṭhaḥ] |
abhinavaguptahṛdambujametadvicinuta maheśapūjanahetoḥ ||3||

iha jñānaṃ [jñānaṃ pūrṇaprathārūpam |] mokṣakāraṇaṃ 
bandhanimittasya ajñānasya virodhakatvāt [ajñānavirodhakatvena jñānaṃ 
mokṣakāraṇam nahi etayorvastutaḥ kāryakāraṇabhāvaḥ saṃbhavati 
pūrṇaprathaiva sarvathā muktiriti hi śaivasiddhāntaḥ na tu naiyāyikavat 
jñānādiśaktayo'sya bhinnatayābhyupagamyante | yaduktaṃ | 

mokṣo hi nāma naivānyaḥ svarūpaprathanaṃ hi saḥ | 
svarūpaṃ cātmanaḥ saṃvit ����|| iti |] dvividhaṃ ca ajñānaṃ 

3)

buddhigataṃ pauruṣaṃ ca tatra buddhigatam aniścayasvabhāvaṃ 
[tāttvikasvabhāvasyājñānamaniścayaḥ |] viparītaniścayātmakaṃ 
[anātmani ātmābhimāno viparītaniścayaḥ |] ca | pauruṣaṃ tu 
vikalpasvabhāvaṃ saṃkucitaprathātmakaṃ tadeva ca mūlakāraṇaṃ saṃsārasya 
iti vakṣyāmo malanirṇaye | tatra pauruṣaṃ ajñānaṃ dīkṣādinā [dīyate 
jñānasadbhāvaḥ kṣīyate paśuvāsanā | ityevaṃ lakṣaṇā dīkṣā ādinā 
śeṣatayā vartamānaṃ saṃdhyopāsanādi |] nivartetāpi kiṃ tu dīkṣāpi 
buddhigate anadhyavasāyātmake ajñāne sati na saṃbhavati 
heyopādeyaniścayapūrvakatvāt [kh: heyopādeyavimarśeti; g: vikalpeti ca 
pāṭhaḥ] tattvaśuddhiśivayojanārūpāyā dīkṣāyā iti | tatra 
adhyavasāyātmakaṃ buddhiniṣṭhameva jñānaṃ pradhānam tadeva ca 
abhyasyamānaṃ pauruṣamapi ajñānaṃ nihanti vikalpasaṃvidabhyāsasya 
avikalpāntatāparyavasānāt [kh: avikalpāsaṃkuciteti pāṭhaḥ] | 
vikalpāsaṃkucitasaṃvitprakāśarūpo hi ātmā śivasvabhāva

4)

iti sarvathā samastavastumiṣṭhaṃ samyaṅniścayātmakaṃ jñānamupādeyam | 
tacca śāstrapūrvakam [na tu anumānagamyamiti śeṣaḥ] | śāstraṃ ca 
parameśvarabhāṣitameva pramāṇam | aparaśāstroktānāmarthānāṃ 
[bauddhavaiṣṇavādibhiḥ svasvāmnāyeṣvanuśiṣṭānām |] tatra 
vaiviktyena abhyupagamāt tadarthātiriktayuktisiddhanirūpaṇācca [te ca arthā 
aparaśāstroktā bauddhavaiṣṇavādiśāstrābhihitāḥ tebhyo'tiriktā vilakṣaṇā yā 
yuktiḥ 
samastanīlasukhādirūpabāhyābhyantaravastuniṣṭhapramānveṣaṇadvāraka##-
vikalpāsaṃkucitapūrṇaprathārūpaṃ śivatattvākhyaṃ tasya nirūpaṇāt |] 
tena aparāgamoktaṃ jñānaṃ tāvata eva bandhāt vimocakam na sarvasmāt 
sarvasmāt tu vimocakaṃ parameśvaraśāstraṃ pañcasroto (mayaṃ) 
[cidānandecchājñānakriyāmaya 
īśatatpuruṣasadyojātavāmadevāghorarūpāṇi pañca srotāṃsi tanmayaṃ 
śāstraṃ bhedābhidhāvakā daśa śivabhedāḥ bhedābhedābhidhāvakā 
aṣṭādaśa rudrabhedāḥ abhedābhidhāyakāḥ vasubhiraṣṭabhirguṇitā aṣṭau 
catuḥṣaṣṭiḥ bhairavabhedāḥ |] daśāṣṭādaśavasvaṣṭabhedabhinnam | 
tato'pi sarvasmāt sāraṃ ṣaḍardhaśāstrāṇi | tebhyo'pi mālinīvijayam | 
tadantargataścārthaḥ saṃkalayyāśakyo nirūpayitum | na ca 
anirūpitavastutattvasya muktatvaṃ mocakatvaṃ vā śuddhasya jñānasyaiva 
tathārūpatvāt 

5)

iti | svabhyastajñānamūlatvāt parapuruṣārthasya tatsiddhaye idam ārabhyate

ajñānaṃ kila [kileti sarvavādivipratipattau ajñānaṃ svasvarūpapracyutiḥ 
śāstre śivasūtrādau tadeva ajñānaṃ malaṃ smṛtam āṇava māyīya 
kārmabhedabhi *?m taditi ajñānam akhilamiti trividham nirmūlatāṃ 
saṃskārasyāpi viraham teneti hetunā |] bandhaheturuditaḥ śāstre malaṃ 
tatsmṛtaṃ
pūrṇajñānakalodaye tadakhilaṃ nirmūlatāṃ gacchati |
dhvastāśeṣamalātmasaṃvidudaye mokṣaśca tenāmunā 
śāstreṇa prakaṭīkaromi nikhilaṃ yajjñeyatattvaṃ bhavet ||

upodghātaḥ [upa iti ātmanaḥ samīpe ṭaṅkavadīśvarābhijñānaṃ hanyate 
viśramyate meva ityupodghātaḥ |]

tatra iha [iha darśane |] svabhāva eva paramopādeyaḥ sa ca 
sarvabhāvānāṃ [bhāvānāṃ prakāśa eva rūpaṃ na tu nīlatādi iti bhāvaḥ 
|] prakāśarūpa eva aprakāśasya [yadaprakāśarūpaṃ tatra prathate 
asya tu svabhāvatā kuta eva syāt |] svabhāvatānupapatteḥ sa ca nānekaḥ 
prakāśasya taditarasvabhāvānupraveśāyoge [prakāśasya yadi 
taditarasvarūpo'nupraviśet tadā tasya bhedaḥ syāt yathā 
ghaṭākārānupraveśena mṛdākārasyeti bhāvaḥ |] 
svabhāvabhedābhāvāt 

6)

deśakālāvapi ca asya na bhedakau tayorapi tatprakāśasvabhāvatvāt iti eka eva 
prakāśaḥ sa eva ca saṃvit arthaprakāśarūpā hi saṃvit iti sarveṣāmatra avivāda 
eva | sa ca prakāśo na paratantraḥ prakāśyataiva hi pāratantryam prakāśyatā ca 
prakāśāntarāpekṣitaiva na ca prakāśāntaraṃ kiṃcit asti iti svatantra ekaḥ 
prakāśaḥ svātantryādeva ca deśakālākārāvacchedavirahāt vyāpako nityaḥ 
sarvākāranirākārasvabhāvaḥ tasya ca svātantryam ānandaśaktiḥ taccamatkāra 
icchāśaktiḥ prakāśarūpatā cicchaktiḥ āmarśātmakatā jñānaśaktiḥ 
sarvākārayogitvaṃ kriyāśaktiḥ ityevaṃ mukhyābhiḥ śaktibhiḥ yukto'pi vastuta 
icchājñānakriyāśaktiyuktaḥ anavacchinnaḥ prakāśo nijānandaviśrāntaḥ 
śivarūpaḥ sa eva svātantryāt ātmānaṃ saṃkucitam avabhāsayan aṇuriti ucyate | 
punarapi ca svātmānaṃ svatantratayā prakāśayati yena 
anavacchinnaprakāśaśivarūpatayaiva prakāśate | tatrāpi svātantryavaśāt 

7)

anupāyameva svātmānaṃ prakāśayati sopāyaṃ vā sopāyatve'pi icchā vā 
jñānaṃ vā kriyā vā abhyupāya iti traividhyaṃ śāmbhavaśāktāṇavabhedena 
samāveśasya tatra caturvidhamapi etadrūpaṃ krameṇa atra upadiśyate |

ātmā prakāśavapureṣa śivaḥ svatantraḥ
svātantryanarmarabhasena nijaṃ svarūpam |
saṃcchādya yatpunarapi prathayeta pūrṇaṃ 
tacca kramākramavaśādathavā tribhedāt ||5||

[chāyā 
eṣa prakāśarūpa ātmā svacchando ḍhaukayati nijarūpam | 
punaḥ prakaṭayati jhaṭiti atha kramavaśād eṣa paramārthena śivarasam |]
ehu pa āsa ū u [k: pahāsa ū u iti pāṭhaḥ] attāṇata
sacchanda u ḍhakka i ṇi a ū u |
pūṇu pa a ḍha i [k: pa a thu i iti pāthaḥ] jhaḍhi aha kamavasva
ehata paramarthiṇa śivarasu ||

iti śrīmadabhinavaguptācāryaviracite tantrasāre vijñānabhedaprakāśanaṃ 
nāma prathamamāhnikam ||1||


atha dvitīyamāhnikam |

atha anupāyameva [atra anudarā kanyā itivat naño'lpārthatvam |] tāvat 
vyākhyāsyāmaḥ |

yadā khalu dṛḍhaśaktipātāviddhaḥ svayameva itthaṃ vivecayati sakṛdeva 
guruvacanam avadhārya tadā punarupāyavirahito [vakṣyamāṇopāyarahitaḥ 
svayamevetyarthaḥ |; kh: tatrānupāyamiti pāṭhaḥ] nityoditaḥ asya 
samāveśaḥ | atra ca tarka eva yogāṅgam iti kathaṃ vivecayati iti cet ? 
ucyate - yo'yaṃ parameśvaraḥ svaprakāśarūpaḥ svātmā tatra kim upāyena 
kriyate na svarūpalābho [kh: svabhāvalābha iti pāṭhaḥ] nityatvāt na 
jñaptiḥ svayaṃprakāśamānatvāt [kh: svayaṃprakāśatvāditi 
pāṭhaḥ] na āvaraṇavigamaḥ āvaraṇasya kasyacidapi asaṃbhavāt na 
tadanupraveśaḥ anupraveṣṭuḥ vyatiriktasya abhāvāt [kh: abhāvāditi 
pāṭhaḥ] | kaścātra upāyaḥ tasyāpi vyatiriktasya anupapatteḥ tasmāt 
samastamidamekaṃ cinmātratattvaṃ kālena akalitaṃ deśena aparicchinnam 

9)

upādhibhiramlānam ākṛtibhiraniyantritaṃ śabdairasaṃdiṣṭaṃ [k: 
asaṃdaṣṭamiti pāṭhaḥ |] pramāṇairaprapañcitaṃ kālādeḥ 
pramāṇaparyantasya svecchayaiva svarūpalābhanimittaṃ ca svatantraṃ tattvaṃ 
tadeva ca aham tatraiva antarmayi viśvaṃ pratibimbitam evaṃ dṛḍhaṃ 
viviñcānasya śaśvadeva pārameśvaraḥ samāveśo nirupāyaka eva tasya ca na 
mantra pūjā dhyāna caryādiniyantraṇā [idaṃ kāryamidaṃ na kāryamiti 
niyamo niyantraṇā |] kācit |

upāyajālaṃ na śivaṃ prakāśayed
ghaṭena kiṃ bhāti sahasradīdhitiḥ |
vivecayannitthamudāradarśanaḥ 
svayaṃprakāśaṃ śivamāviśetkṣaṇāt ||6||

[chāyā 

yatra yatra sphuraṇaṃ sphurati sa sakalaḥ parameśvaro bhāsate mayi amalaḥ | 
ātmā sa eva paramārthena iti jñātvā kārya paramasti na ||] jahi jahi phuraṇa 
phura-i so sa-ala-u
paramesaru bhāsa-i ma-i amala-u |
attā nata so ściva paramatthiṇa 
i-a jāna-a kajja paramatthi ṇa ||

iti śrīmadabhinavaguptācāryaviracite tantrasāre anupāyaprakāśanaṃ nāma 
dvitīyamāhnikam ||2||


atha tṛtīyamāhnikam |

atha śāmbhavopāyaḥ |

yadetat prakāśarūpaṃ śivatattvam uktam tatra akhaṇḍamaṇḍale yadā 
praveṣṭuṃ na śaknoti tadā svātantryaśaktimeva adhikāṃ [adhikāmiti 
kalpanāmātreṇa na hi vastuto vastunaḥ svabhāvo'tiricyata iti bhāvaḥ |] 
paśyan nirvikalpameva bhairavasamāveśam anubhavati ayaṃ ca asya upadeśaḥ 
sarvamidaṃ bhāvajātaṃ bodhagagane pratibimbamātraṃ 
pratibimbalakṣaṇopetatvāt idaṃ hi pratibimbasya lakṣaṇaṃ yat bhedena bhāsitam 
aśaktam anyavyāmiśratvenaiva bhāti tat pratibimbam [yathoktam | 

hanta mukhaṃ pratibimbati pratibimbayatu tathā tadapi darpaṇaḥ | 
darpaṇaḥ punaryasmin pratibimbati so'pi jñātavyaḥ || 

iti mahārthamañjaryām | tathā 

sadṛśaṃ bhāti nayanadarpaṇāmbaravāriṣu | 
tathāhi nirmale rūpe rūpamevāvabhāsate || 

pracchannarāgiṇī kāntapratibimbitasundaram | 
darpaṇaṃ kucakumbhābhyāṃ spṛśantyapi na tṛpyati ||] mukharūpamiva 
darpaṇe rasa iva dantodake 

11)

gandha iva ghrāṇe mithunasparśa iva ānandendriye śūlakuntādisparśo [kh: 
sthūlaśūnyādisparśo vā iti pāṭhaḥ |] vā antaḥsparśanendriye 
pratiśrutkeva vyomni | na hi sa raso mukhyaḥ 
tatkāryavyādhiśamanādyadṛṣṭeḥ | nāpi gandhasparśau mukhyau guṇinaḥ 
tatra abhāve tayorayogāt kāryaparamparānārambhāt ca | na ca tau na staḥ 
dehoddhūlanavisargādidarśanāt | śabdo'pi na mukhyaḥ ko'pi vakti iti 
āgacchantyā iva pratiśrutkāyāḥ śravaṇāt | evaṃ yathā etat pratibimbitaṃ 
[k: bimbapratibimbeti pāṭhaḥ |] bhāti tathaiva viśvaṃ 
parameśvaraprakāśe [kh: parameśvarasvarūpaṃ nānā spaṣṭamiti pāṭhaḥ 
|] | nanu atra bimbaṃ [vimbalakṣaṇaṃ yathā - avyāmiśraṃ 
svatantraṃ sadbhāsamānaṃ mukhaṃ yathā |] kiṃ syāt? mābhūt kiṃcit 
| nanu kim akāraṇakaṃ tat ? hanta tarhi hetupraśnaḥ tat kiṃ 
bimbavācoyuktyā hetuśca parameśvaraśaktireva svātantryāparaparyāyā 
bhaviṣyati viśvapratibimbadhāritvācca viśvātmakatvaṃ bhagavataḥ 
saṃvinmayaṃ hi viśvaṃ 

12)

caitanyasya vyaktisthānam iti tadeva hi viśvam atra pratīpam iti 
pratibimbadhāritvam asya tacca tāvat viśvātmakatvaṃ parameśvarasya 
svarūpaṃ na anāmṛṣṭaṃ bhavati citsvabhāvasya 
svarūpānāmarśanānupapatteḥ | svarūpānāmarśane hi vastuto jaḍataiva 
[kh: vastuno jaḍatā iti pāṭhaḥ |] syāt āmarśaśca ayaṃ na 
sāṃketikaḥ api tu citsvabhāvatāmātranāntarīyakaḥ paranādagarbha uktaḥ sa ca 
yāvān viśvavyavasthāpakaḥ [śaktayo'sya jagat sarvam ityuktyā śaktīnāṃ 
viśvavyavasthāpakatvam |] parameśvarasya śaktikalāpaḥ tāvantam 
āmṛśati | tatra mukhyāstāvat tisraḥ parameśvarasya śaktayaḥ anuttaraḥ 
icchā unmeṣa iti tadeva parāmarśatryam a-ha-u iti etasmādeva tritayāt 
sarvaḥ śaktiprapañcaḥ carcyate anuttara eva hi viśrāntirānandaḥ icchāyāmeva 
[icchāśakterlakṣaṇaṃ yathā 

saṃghaṭṭe'smiṃścidātmatvādyattatpratyavamarśanam | 
icchāśaktiḥ ����������.||] viśrāntiḥ īśanam 

13)

unmeṣa [yaduktam 

svātmapratyavamarśo yaḥ prāgabhūdekavīrakaḥ |
jñātavyaviśvonmeṣātmā jñānaśaktiḥ prakīrtyate ||] eva hi 
viśrāntirūrmiḥ yaḥ kriyāśakteḥ prārambhaḥ tadeva parāmarśatrayam ā##-
sūryātmakaṃ caramaṃ parāmarśatrayaṃ viśrāntisvabhāvāhlādaprādhānyāt 
somātmakam iyati yāvatkarmāṃśasya anupraveśo nāsti 
[kriyāśaktyaṃśasya jñānaśaktiprādhānyāt ityarthaḥ |] | yadā tu 
icchāyām īśane ca karma anupraviśati yat tat iṣyamāṇam īśyamāṇam iti ca 
[yaduktam 

icchāśaktirdvirūpoktā kṣubhitākṣubhitā ca yā | 
iṣyamāṇaṃ hi sā vastu dvairūpyeṇāvabhāsayet ||] ucyate tadā asya dvau 
bhedau prakāśamātreṇa raśrutiḥ viśrāntyā laśrutiḥ ralayoḥ 
prakāśastambhasvabhāvatvāt [stambhaḥ sthairyamityarthaḥ |] 
iṣyamāṇaṃ ca na bāhyavat sphuṭam sphuṭarūpatve tadeva nirmāṇaṃ syāt na 
icchā īśanaṃ vā ataḥ asphuṭatvāt eva śrutimātraṃ [na sākṣādvarṇaḥ |
] ralayoḥ na vyañjanavat sthitiḥ |

14)

tadetadvarṇacatuṣṭayaṃ ubhayacchāyādhāritvāt 
[bījayonirūpatvādubhayatvam | ata eva narasiṃhavajrāsyantaramiti 
mahābhāṣyakāraḥ] napuṃsakam ṛ ṝ ḷ ḹ iti | anuttarānandayoḥ 
icchādiṣu yadā prasaraḥ tadā varṇadvayam e o iti | tatrāpi 
punaranuttarānandasaṃghaṭṭāt varṇadvayam ai au iti | sā iyaṃ kriyāśaktiḥ 
tadeva ca varṇacatuṣṭayam e ai o au iti | tataḥ punaḥ kriyāśaktyante sarvaṃ 
kāryabhūtaṃ yāvat anuttare pravekṣyati [tathā ca mālinīvārtike

anuttarātsamārabhya jñānaśaktyantamīdṛśam | 
icchaiva tu kriyāśaktimīśanena samāsthitā || 

prakāśasthitileśāṃśaṃ gṛhṇatī gaṇyatāṃ gatā | 
icchādi yacca tatpūrvānuttarānandasaṃgateḥ || 

tadādiśleṣayogena saṃdhyakṣaracatuṣṭayam | 
tataḥ svarūpasaṃvittilābhādvindvādikā sthitiḥ ||
 
tataḥ samagrasaṃdarbhabharitākārarūpiṇi | 
visargaḥ kila śākto'sau vikṣepa iti yaḥ smṛtaḥ || 

visargasyaiva viśleṣa iti saptadaśī kalā | 
kvacidaṣṭādaśī saiva punaḥ prakṣobhayogataḥ || 

anuttarasyākārasya parabhairavarūpiṇaḥ | 
akulasya parā yeyaṃ kaulikī śaktiruttamā || 

sa evāyaṃ visargastu tasmājjātamidaṃ jagat | 
tasya prakṣobhayogyatvaṃ prakṣobhakalanodayaḥ || 

prakṣobhapūrṇatābhāvāttadakulakramonatā | 
iti ṣaṭkasvarūpātmavimarśāndolanoditam || 

anuttarasvabhāvatvādādyasyaiva vijṛmbhitam | 
sa eva bhagavānantarnityaṃ prasphuradātmakaḥ || 

antaḥsthasarvabhāvaughapūrṇamadhyamaśaktikaḥ | 
svecchākṣobhasvabhāvodyajjagadānandasundaraḥ || 

nityaṃ sphurati saṃpūrṇavisargarasasundaraḥ | 
śivaśaktyoḥ sa saṃghaṭṭaḥ sneha ityabhidhīyate || 

atraiva pūrṇavaisargapade labdhuṃ praveśanam | 
lehanāmanthanetyādi saṃpradāyamupāsate || 

tathāhi madhyamāṃ nāḍīmadhiṣṭhāyākhilaṃ vapuḥ | 
prāṇayatparamaṃ tejaḥ prakṣubdhāmṛtamānyataḥ || 

visṛṣṭirūpatāṃ gacchedyātyānandacamatkriyām | 
apūrṇāṃ kevalaṃ sā tu pūrṇāṃ tu bhagavanmayī || 

tena vaisargikī śaktirekaiveyaṃ vijṛmbhate | 
visarga eva prakṣubdhaḥ prayatnadviguṇatvataḥ || 
hakāro nāma viśveṣāṃ vyañjanānāṃ prasūtikṛt | 
sa eva ca punarbinduyogāt svāmeva bhūmikām | 
anuttarāmāśrayate sohaṃ bhāva iheṣyate || iti |] tāvadeva pūrvaṃ 
saṃvedanasāratayā pakāśamātratvena

15)

bindutayā āste amiti | tatastatraiva anuttarasya visargo jāyate aḥ iti | evaṃ 
ṣoḍaśakaṃ parāmarśānāṃ bījasvarūpam ucyate | tadutthaṃ [kh: 
taduktamiti pāṭhaḥ |] vyañjanātmakaṃ yonirūpam | tatra [tathāhi 

akulātpadaśaktyātmā prathamo varga utthitaḥ | 
anārūpitarūpāyā icchāyāśca tataḥ param || 

vahnikṣamājuṣastasya ṭa-tādyaṃ ca dvayaṃ tataḥ | 
ṣādirunmeṣato jāta iti sparśāḥ prakīrtitāḥ || 

icchāśaktirdvidhā yā ca kṣubhitākṣubhitasvataḥ | 
sā vijātīyaśaktyaṃśaḥ pronmukhe yāti yatra tām || 

saiva śīghrataropāttajñeyā kāluṣyarūṣitā | 
vijātīyonmukhatvena ratvaṃ latvaṃ ca gacchati || 

tadvadunmeṣaśaktirdvirūpā vaijrātyaśaktigā | 
vakāratvaṃ �� sṛṣṭisārapravartakam || 
iti mālinīvārtike eva |] anuttarāt 

16)

kavargaḥ śraddhāyāḥ icchāyāḥ cavargaḥ sakarmikāyā icchāyā dvau 
ṭavargastavargaśca unmeṣāt pavargaḥ śaktipañcakayogāt pañcakatvam | 
icchāyā eva trividhāyā ya ra lāḥ unmeṣāt vakāraḥ icchāyā eva trividhāyāḥ 
śa ṣa sāḥ visargāt hakāraḥ yonisaṃyogajaḥ kṣakāraḥ | ityevam eṣa bhagavān 
anuttara eva kuleśvararūpaḥ | tasya ca ekaiva kaulikī visargaśaktiḥ yayā 
ānandarūpāt prabhṛti iyatā bahiḥsṛṣṭiparyantena praspandataḥ 
vargādiparāmarśā [k: prasṛtāḥ kakārādi iti kavargādi iti ca pāṭhaḥ |
] eva bahistattvarūpatāṃ prāptāḥ [akārādi visargāntaṃ śivatattvam 
kādi ṅāntaṃ dharādi nabhontaṃ bhūtapañcakam cādi ñāntaṃ gandhādi 
śabdāntaṃ tanmātrapañcakam ṭādi ṇāntaṃ pādādi 
vāgantakarmendriyapañcakam tādi nāntaṃ ghrāṇādi śrotrāntaṃ 
buddhikaraṇapañcakam ṣādi māntaṃ mano'haṃkāra buddhi prakṛti 
puruṣākhyaṃ pañcakam vādyādiśabdavācyā yakārādayo vakārāntā rāga 
vidyā kalā māyākhyāni tattvāni dhāraṇākhyāntarāṇi dhārayanti 
pṛthagbhūtatayābhimānayantīti dhāraṇāni iti |] | sa ca eṣa visargastridhā 

17)

āṇavaḥ [yaduktam
 
pūrvaṃ visṛjya sakalaṃ kartavyaṃ śūnyatānale | 
cittaviśrāntisaṃjño'yamāṇavaḥ saṃprakīrtitaḥ ||] cittaviśrāntirūpaḥ 
śāktaḥ cittasaṃbodhalakṣaṇaḥ śāṃbhavaḥ cittapralayarūpaḥ iti | evaṃ visarga 
eva viśvajanane bhagavataḥ śaktiḥ | ityevam iyato [kh: iyati iti pāṭhāntaraṃ 
ca |] yadā nirvibhāgatayā eva parāmarśaḥ tadā eka eva bhagavān 
bījayonitayā bhāgaśaḥ parāmarśe śaktimān śaktiśca | pṛthak 
aṣṭakaparāmarśe cakreśvarasāhityena [kṣakārasāhityena ityarthaḥ |] 
navavargaḥ ekaikaparāmarśaprādhānye pañcāśadātmakatā | tatrāpi 
saṃbhavadbhāgabhedaparāmarśane [bhāgā ardhamātrārūpāḥ |] 
ekāśītirūpatvam | vastutastu ṣaṭ eva parāmarśāḥ 
prasaraṇapratisaṃcaraṇayogena 

18)

dvādaśa [yadā anuttara ānandecchādirūpeṇa prasṛtastadā ṣaṭ 
punaryadāsau icchādiṣu pratisaṃcaraṃstadā ekārādayaḥ ṣaṭ ataḥ 
ṣaṇḍhasvaravarjaṃ dvādaśa iti |] bhavantaḥ parameśvarasya 
viśvaśaktipūrṇatvaṃ puṣṇanti | tā eva etāparāmarśarūpatvāt śaktayo 
bhagavatyaḥ śrīkālikā [kalayanti kramante iti kālikāḥ | yaduktam 

parāmarśātmakatvena visargākṣepayogataḥ | 
iyattākalanājjñānāt tāḥ proktāḥ kālikāḥ kvacit || iti |] iti niruktāḥ | ete ca 
śaktirūpā eva śuddhāḥ parāmarśāḥ śuddhavidyāyāṃ parāpararūpatvena 
māyonmeṣamātrasaṃkocāt vidyāvidyeśvararūpatāṃ [k: 
vidyeśvaratārūpā mantrarūpatāmiti pāṭhaḥ |; kh: vidyāvidyeśvarabījarūpā 
mantrarūpatāmiti pāṭhāntaraṃ ca |] bhajante | māyāyāṃ punaḥ 
sphuṭībhūtabhedavibhāgā māyīyavarṇatāṃ bhajante ye 
paśyantīmadhyamāvaikharīṣu vyāvahārikatvam [kh: vyavahārakāritvamiti 
pāṭhaḥ |] āsādya bahīrūpatattvasvabhāvatāpattiparyantāḥ te ca māyīyā 
api śarīrakalpatvena [māyīyā varṇā jīvarahitaṃ śarīramiva teṣāṃ tu 
parāmarśo jīva ivāsti anyathā te'kiṃcitkarā iti bhāvaḥ |] yadā dṛśyante 
yadā ca teṣām 

19)

uktanayairetaiḥ jīvitasthānīyaiḥ śuddhaiḥ parāmarśaiḥ pratyujjīvanaṃ kriyate 
tadā te savīryā bhavanti te ca tādṛśā bhogamokṣapradāḥ ityevaṃ 
sakalaparāmarśaviśrāntimātrarūpaṃ 
pratibimbitasamastatattvabhūtabhuvanabhedam ātmānaṃ paśyato nirvikalpatayā 
śāṃbhavena samāveśena jīvanmuktatā | atrāpi pūrvavat na mantrādiyantraṇā 
kāciditi |

antarbibhāti sakalaṃ jagadātmanīha
yadvadvicitraracanā mukurāntarāle |
bhodhaḥ paraṃ nijavimarśarasānuvṛttyā [kh: nijavimarśanasāramūrtyā 
iti pāṭhaḥ; g: vimarśanasārayuktyā iti sārayogāditi ca pāṭhāntaram |]
viśvaṃ parāmṛśati no mukurastathā tu ||

[atreyaṃ chāyā 

saṃvedananirmaladarpaṇe'smin sakalaṃ sphurannijasāram | 
āmarśanarasasarahasyavisṛṣṭarūpaṃ satyaṃ bhāti ||] saṃve-aṇa 
nimmala dappaṇasmi
sa-alaṃ phuratta ni-asāraṃ |
āmarisaṇa rasa sarahasa
vimaṭṭarū-aṃ sa-iṃ bhā-i ||

20)

[iti śrutvā vimalamenaṃ nijātmānaṃ samastavastumayam | 
yo yojayati sa parabhairavo bhūtvā paranirvṛttiṃ labhate ||] i-a suṇa##-
ni-a appāṇaṃ samatthavatthama-am |
jo jo-aya so parabhaira-i
bovva paraṇivva-iṃ laha-i ||

iti śrīmadabhinavaguptācāryaviracite tantrasāre śāṃbhavopāyaprakāśanaṃ 
[kh, g: paropāyaprakāśanamiti pāṭhaḥ |] nāma tṛtīyamāhnikam 
||3||


caturthamāhnikam |

atha śāktopāyaḥ |

tatra yadā vikalpaṃ krameṇa saṃskurute [guṇāntarotpādanaṃ saṃskāraḥ 
sa cābhyāsātiśayatāratamyena bhavati |] samanantaroktasvarūpapraveśāya 
tadā bhāvanākramasya sattarkasadāgamasadgurūpadeśapūrvakasya asti 
upayogaḥ | tathāhi vikalpabalāt eva jantavo baddham ātmānam abhimanyante sa 
abhimānaḥ saṃsārapratibandhahetuḥ [kh: saṃsāraprabandheti prabandhaḥ 
saṃtatiḥ iti paryāyopetaḥ pāṭhaḥ |] ataḥ pratidvandvirūpo vikalpa uditaḥ 
saṃsārahetuṃ vikalpaṃ dalayati iti abhyudayahetuḥ | sa ca evaṃ rūpaḥ 
samastebhyaḥ paricchinnasvabhāvebhyaḥ śivāntebhyaḥ tattvebhyo yat uttīrṇam 
aparicchinnasaṃvinmātrarūpaṃ tadeva ca paramārthaḥ tat 
vastuvyavasthāsthānaṃ tat viśvasya ojaḥ tena prāṇiti viśvam tadeva ca aham ato 
viśvottīrṇo viśvātmā ca aham iti | sa ca ayaṃ 

22)

māyāndhānāṃ na utpadyate sattarkādīnām abhāvāt | vaiṣṇavādyā hi 
tāvanmātra eva āgame rāgatattvena niyamitā iti na ūrdhvadarśane'pi 
tadunmukhatāṃ [k: apyunmukhatāmiti pāṭhaḥ |] bhajante tataḥ 
sattarkasadāgamasadgurūpadeśadveṣiṇa eva | yathoktaṃ pārameśvare 

vaiṣṇavādyāḥ samastāste vidyārāgeṇa rañjitāḥ |
na vindanti paraṃ tattvaṃ sarvajñajñānavarjitāḥ [kh: sarvajñaṃ 
sarvaśaktikam iti pāṭhaḥ |] ||

iti tasmāt śāṃbhavadṛḍhaśaktipātāviddhā eva sadāgamādikrameṇa 
vikalpaṃ saṃskṛtya [vikalpasaṃskāro yathā 

vikalpaḥ saṃskṛtaḥ sūte vikalpaṃ svātmasaṃskṛtam | 
svatulyaṃ so'pi so'pyanyaṃ so'pyanyaṃ sadṛśātmakam || 
asphuṭaḥ sphuṭatābhāvī prasphuṭaḥ sphuṭatātmakaḥ | ityādi |] paraṃ 
svarūpaṃ praviśanti | nanu itthaṃ paraṃ tattvaṃ vikalpyarūpaṃ syāt ? 
maivam vikalpasya dvaitādhivāsasaṅgamātre 

23)

caritārthasvāt paraṃ tattvaṃ tu sarvatra sarvarūpatayā svaprakāśameva iti na 
tatra vikalpaḥ kasyaicit upakriyāyai khaṇḍanāyai vā | tatra 
atidṛḍhaśaktipātāviddhasya svayameva sāṃsiddhikatayā sattarka udeti yo'sau 
devībhiḥ dīkṣita iti ucyate | anyasya āgamakrameṇa ityādi savistaraṃ 
śaktipātaprakāśane vakṣyāmaḥ | kiṃ tu gurorāgamanirūpaṇe vyāpāraḥ 
āgamasya ca 
niḥśaṅkasajātīyatatprabandhaprasavanibandhanasamucitavikalpodaye vyāpāraḥ 
tathāvidhavikalpaprabandha eva sattarka iti uktaḥ sa eva ca bhāvanā bhaṇyate 
asphuṭatvāt bhūtamapi aryam abhūtamiva sphuṭatvāpādanena bhāvyate yayā iti | 
na ca atra sattarkāt śuddhavidyāprakāśarūpāt ṛte anyat yogāṅgaṃ 
[yogāṅgāni ca 

prāṇāyāmastathā dhyānaṃ pratyāhāro'tha dhāraṇā | 
tarkaścaiva samādhiśca ṣaḍaṅgo yoga ucyate || 
iti tadāgamaprasiddhāni |] sākṣāt upāyaḥ tapaḥprabhṛteḥ niyamavargasya 
ahiṃsādeśca yamaprakārasya [ahiṃsā satyamasteyabrahmacaryāparigrahāḥ 
| iti yamāḥ |]

24)

pūrakādeḥ prāṇāyāmavargasya vedyamātraniṣṭhatvena ka iva saṃvidi 
vyāpāraḥ | pratyāhāro'pi karaṇabhūmimeva sātiśayāṃ kuryāt 
dhyānadhāraṇāsamādhayo'pi yathottaram abhyāsakrameṇa nirvartyamānā 
dhyeyavastutādātmyaṃ dhyātuḥ vitareyuḥ | abhyāsaśca pare tattve śivātmani 
svasvabhāve na saṃbhavatyeva | saṃvidrūḍhasya 
prāṇabuddhidehaniṣṭhīkaraṇarūpo hi abhyāsaḥ [saṃvidgataṃ hi 
prāṇādiniṣṭhaṃ kriyate ityetadrūpo'bhyāsaḥ |] 
bhārodvahanaśāstrārthabodhanṛttābhyāsavat saṃvidrūpe tu na kiṃcit 
ādātavyaṃ na apasaraṇīyam iti katham abhyāsaḥ | kiṃ tarkeṇāpi iti cet uktamatra 
dvaitādhivāsanirāsaprakāra eva ayaṃ na tu anyat kiṃciditi | laukike'pi vā abhyāse 
cidātmatvena sarvarūpa tasya tasya dehādeḥ abhimatarūpatāprakaṭīkaraṇaṃ 
taditararūpanyagbhāvanaṃ ca iti eṣa eva abhyāsārthaḥ | paratattve tu na kiṃcit 
apāsyam iti uktam | dvaitādhivāso'pi nāma na kaścana pṛthak vastubhūtaḥ api 
tu svarūpākhyātimātraṃ tat ato 

25)

dvaitāpāsanaṃ vikalpena kriyata ityukteḥ | ayaṃ paramārthaḥ svarūpaṃ 
prakāśamānam akhyātirūpatvaṃ svayaṃ svātantryāt gṛhītaṃ krameṇa 
projjhya vikāsonmukham atha vikasat atha vikasitam ityanena krameṇa prakāśate 
tathā prakāśanamapi parameśvarasya svarūpameva tasmāt na atra yogāṅgāni 
sākṣāt upāyaḥ | tarkaṃ tu anugṛhṇīyurapi [yadāhuḥ 

kiṃ tvetadatra deveśi niyamena vidhīyate | 
tattve cetaḥ sthirīkāryam ���. || 

ityādyuktayuktyā tarkānugrāhakatvam | tathā 

tattattarkasādhanasya yamāderapyupāyatā | iti |] sattarka eva sākṣāt tatra 
upāyaḥ sa eva ca śuddhavidyā sa ca bahuprakāratayā saṃskṛto bhavati 
tadyathā yāgo homo japo vrataṃ yoga iti tatra bhāvānāṃ [k: 
sarvabhāvānāmiti pāṭhaḥ |] sarveṣāṃ parameśvara eva sthitiḥ nānyat 
vyatiriktam asti iti vikalparūḍhisiddhaye parameśvara eva sarvabhāvārpaṇaṃ 
yāgaḥ sa ca hṛdyatvāt 

26)

ye saṃvidanupraveśaṃ svayameva bhajante teṣāṃ suśakaṃ parameśvare 
arpaṇam ityabhiprāyeṇa hṛdyānāṃ [yaduktam 

yatkiṃcinmanasāhlādi yatra kvāpīndriyasthitau | 
yojite brahmasaddhāmni pūjopakaraṇaṃ hi tat || iti |] 
kusumatarpaṇagandhādīnāṃ bahirupayoga uktaḥ | sarve bhāvāḥ 
parameśvaratejomayā iti rūḍhavikalpaprāptyai parameśasaṃvidanalatejasi 
samastabhāvagrāsarasikatābhimate 
tattejomātrāvaśeṣatvasahasamastabhāvavilāpanaṃ homaḥ [yaduktam 

saptendriyaśikhājālajaṭile jātavedasi | 
bodhākhye bhāvavargasya bhasmībhāvo'gnitarpaṇam || 

iti | anyatrāpi 

yatrendhanaṃ dvaitavanaṃ mṛtyureva mahāpaśuḥ | 
alaukikena yajñena tena nityaṃ yajāmahe || iti |] tathā 
ubhayātmakaparāmarśodayārthaṃ 
bāhyābhyantarādiprameyarūpabhinnabhāvānapekṣayaiva evaṃ vidhaṃ tat paraṃ 
tattvaṃ svasvabhāvabhūtam iti antaḥ parāmarśanaṃ japaḥ [yaduktam 

akṛtrimaitaddhṛdayārūḍho yatkiṃcidācaret | 
prāṇyādau vimṛśedvāpi sa sarvo'sya japo mataḥ || iti |]

27)

sarvatra sarvadā nirupāyaparameśvarābhimānalābhāya [kh: nirapāyeti 
pāṭhaḥ |] parameśvarasamatābhimānena dehasyāpi ghaṭāderapi 
avalokanaṃ vratam | yathoktaṃ śrīnandiśikhāyām 

�����.. sarvasāmyaṃ paraṃ vratam |

iti | itthaṃ vicitraiḥ śuddhavidyāṃśarūpaiḥ vikalpaiḥ yat anapekṣitavikalpaṃ 
svābhāvikaṃ paramārthatattvaṃ prakāśate tasyaiva 
sanātanatathāvidhaprakāśamātratārūḍhaye tatsvarūpānusaṃdhānātmā 
vikalpaviśeṣo yogaḥ | tatra parameśvaraḥ pūrṇasaṃvitsvabhāvaḥ pūrṇataiva 
asya śaktiḥ kulaṃ sāmarthyaṃ ūrmiḥ [yaduktam 

kiṃciccalanametāvadananyasphuraṇaṃ hi yat | 
ūrmireṣā vibodhābdherna saṃvidanayā vinā || iti |] hṛdayaṃ 
[yaduktam  

parāmarśasvabhāvatvādetasyā yaḥ svayaṃ dhvaniḥ | 
sadoditaḥ sa evokto hṛdayaṃ paramaṃ mahat || iti |] sāraṃ spandaḥ 
vibhūtiḥ trīśikā [tisṛṇāṃ śaktīnāmicchā jñānakriyāṇāmīśikā 
īśvarīti śrīśikā akṣaravarṇanasāmyāśca triṃśiketyapi guravaḥ paṭhanti |
] kālī karṣaṇī caṇḍī vāṇī bhogo dṛk nityā 

28)

ityādibhiḥ āgamabhāṣābhiḥ tattadanvarthapravṛttābhiḥ abhidhīyate tena tena 
rūpeṇa dhyāyināṃ hṛdi āstām iti | sā ca samagraśaktitādarśanena 
pūrṇatāsaṃvit prakāśate | śaktayaśca asya asaṃkhyeyāḥ | kiṃ bahunā yat 
viśvaṃ tā asya [asya pūrṇasaṃvitsvabhāvasya |] śaktayaḥ tāḥ 
katham upadeṣṭuṃ śakyāḥ iti | tisṛṣu tāvat viśvaṃ samāpyate yayā idaṃ 
śivādidharaṇyantam avikalpyasaṃvinmātrarūpatayā bibharti ca paśyati ca 
bhāsayati ca parameśvaraḥ sā asya śrīparāśaktiḥ | yayā ca darpaṇahastyādivat 
bhedābhedābhyāṃ sā asya śrīparāparāśaktiḥ | yayā parasparaviviktātmanā 
bhedenaiva [kh: viviktatābhedeneti pāṭhaḥ |] sā asya 
śrīmadaparāśaktiḥ | etat trividhaṃ yayā dhāraṇam ātmanyeva kroḍīkāreṇa 
anusandhānātmanā grasate sā asya bhagavatī śrīparaiva 
śrīmanmātṛsadbhāvakālakarṣiṇyādiśabdāntaraniruktā | tā etāḥ catasraḥ 
śaktayaḥ svātantryāt pratyekaṃ tridhaiva vartante | sṛṣṭau 

29)

sthitau saṃhāre ca iti dvādaśa bhavanti | tathāhi- 1 saṃvit pūrvam antareva 
bhāvaṃ kalayati 2 tato bahirapi sphuṭatayā kalayati 3 tatraiva raktimayatāṃ 
gṛhītvā tataḥ tameva bhāvam antarupasaṃjihīrṣayā kalayati 4 tataśca 
tadupasaṃhāravighnabhūtāṃ śaṅkāṃ [śaṅkā hi śāstrānantyāt 
kāryākāryavibhāgasya viparyayadarśanāt kiṃkartavyatāmūḍhatārūpā |] 
nirmiṇoti ca grasate [yaduktam 

vilāpanātmikāṃ tāṃ ca bhāvasaṃhṛtimātmani | 
āmṛśatyeva yenaiṣā mayā grastamiti sphuret || iti |] ca 5 
grastaśaṅkāṃśaṃ bhāvabhāgam [kh: bhāvabharamiti pāṭhāntaraṃ ca |
] ātmani upasaṃhāreṇa kalayati 6 tata upasaṃhartṛtvaṃ mamedaṃ 
rūpamityapi svabhāvameva kalayati 7 tata upasaṃhartṛsvabhāvakalane 
[yaduktam 

vilāpite'pi bhāvaughe kaṃcidbhāvaṃ tathaiva sā | 
āśyānayedya evāste śaṅkāsaṃskārarūpakaḥ || iti |] kasyacidbhāvasya 
vāsanātmanā [kh: grasanātmanā iti pāṭhāntaraṃ ca |] avasthitiṃ 
kasyacit tu saṃvinmātrāvaśeṣatāṃ

30)

kalayati 8 tataḥ svarūpakalanānāntarīyakatvenaiva karaṇacakraṃ kalayati 9 tataḥ 
karaṇeśvaramapi kalayati 10 tataḥ kalpitaṃ māyīyaṃ pramātṛrūpamapi 
kalayati 11 saṅkocatyāgonmukhavikāsagrahaṇarasikamapi pramātāraṃ kalayati 
12 tato vikasitamapi rūpaṃ kalayati iti etā dvādaśa bhagavatyaḥ saṃvidaḥ 
pramātṝn ekaṃ vāpi uddiśya yugapat krameṇa dviśaḥ triśa ityādisthityāpi 
udayabhāginyaḥ cakravadāvartamānā bahirapi māsakalārāśyādikrameṇa 
antato vā ghaṭapaṭādikrameṇāpi bhāsamānāḥ cakreśvarasya svātantryaṃ 
puṣṇatyaḥ śrīkālīśabdavācyāḥ | kalanaṃ [yaduktam 

itthaṃ bhogye'pi saṃbhukte sati tatkaraṇānyapi | 
saṃharantī kalayati dvādaśaivāhamātmani || iti |] ca gatiḥ kṣepo jñānaṃ 
gaṇanaṃ bhogīkaraṇaṃ śabdanaṃ svātmalayīkaraṇaṃ ca | yadāhuḥ 
śrībhūtirājaguravaḥ 

kṣepājjñānācca kālī kalanavaśatayātha�.. |

iti | eṣa ca arthaḥ tatra tatra madviracite vivaraṇe 

31)

prakaraṇastotrādau viratya vīkṣyaḥ | na atirahasyam ekatra khyāpyaṃ na ca 
sarvathā gopyam iti hi asmadguravaḥ | tadevam yaduktaṃ yāgahomādi tat evaṃ 
vidhe [kh: evaṃ vidhamiti pāṭhaḥ |] maheśvara [na tu 
māyāgarbhādhikāriṇi anyasminniti bhāvaḥ |] eva mantavyam | sarve hi 
heyameva upādeyabhūmirūpaṃ [kh: pāśabhūmirūpamiti pāṭhāntaraṃ ca |
] viṣṇutaḥ prabhṛti śivāntaṃ paramaśivatayā paśyanti tacca 
mithyādarśanam avaśyatyājyam anuttarayogibhiriti tadarthameva vidyādhipateḥ 
[ācāryaviśeṣasya |] anubhavastotre mahān saṃrambhaḥ evaṃ vidhe 
yāgādau yogānte ca pañcake pratyekaṃ bahuprakāraṃ nirūḍhiḥ yathā yathā 
bhavati tathaiva ācaret na tu [vaidikakriyāmātraparatve | ādinā 
kāryākāryādi gṛhyate |] bhakṣyābhakṣyaśuddhyaśuddhyādivivecanayā 
vastudharmojjhitayā kalpanāmātrasārayā svātmā khedanīya iti uktaṃ 
śrīpūrvādau na hi śuddhiḥ vastuno rūpaṃ nīlatvavat anyatra tasyaiva 
aśuddhicodanāt dānasyeva dīkṣitatve codanātaḥ tasya tat tatra 

32)

aśuddham iti cet codanāntare'pi [śivodite | kriyāyāṃ pravartakaṃ vacanaṃ 
codaneti |] tulyaṃ codanāntaram asat tadbādhitatvāt [vedavāhyastu yaḥ 
kaścidāgamo vañcanaiva sā | ityanena bādhitatvam |] iti cet na 
śivacodanāyā eva bādhakatvaṃ yuktisiddhaṃ 
sarvajñānottarādyanantāgamasiddhaṃ ca iti vakṣyāmaḥ | tasmāt vaidikāt 
prabhṛti pārameśvarasiddhāntatantrakulocchuṣmādiśāstrokto'pi yo niyamo 
vidhiḥ vā niṣedho vā so'tra yāvadakiṃcitkara eva iti siddham | tathaiva ca uktaṃ 
śrīpūrvādau vitatya tantrālokāt anveṣyam |

yo niścayaḥ paśujanasya jaḍo'smi karma-
saṃpāśito'smi malino'smi parerito'smi |
ityetadanyadṛḍhaniścayalābhasiddhyā
sadyaḥ patirbhavati viśvavapuścidātmā ||

yathā yathā niścaya īdṛgāpyate
tathāvadheyaṃ parayoginā sadā |
na vastuyāthātmyavihīnayā dṛśā
viśaṅkitavyaṃ śiśudeśanāgaṇaiḥ 
[aparamārthajñopadeśairmūrkhopadeśairityarthaḥ |] ||

33)

jaha [iyamatra chāyā 
yathā yathā yasya yadā eva prasphurati adhyavasāyaḥ | 
tathā tathā tasya tadā eva tādṛśo bhavati prabhāvaḥ ||1 || 

ahaṃ malinaḥ ahaṃ paśuḥ 
ahaṃ vātha sakalabhāvapaṭalavyatirikta | 
iti dṛḍhaniścayanijaliptāhṛdaye 
sphurati nāma kathaṃ yasya paratattvam ||2||  

paraśivataraṇikiraṇa-
dṛḍhapātavikāsitahṛdayakamale | 
sarahasyasphuritanija- 
atisundaraparimalabodhakrame ||3||] jaha jassu jahiṃ
civa paphura-i ajjavasā-u |
taha taha tassu tahiṃ
civa tārisu ho-i pahā-u ||1||

hataṃ maliṇa-u hataṃ pasu
hataṃ ā aha sa-alabhāvapaḍalavattiritta-u |
i-a daḍhaniccha-a ṇi-a li-a hi-a-aha
phura-i ṇāma kaha jissa paratattva-u ||2||

parasivataraṇikiraṇa-
daḍhapātavikāsi-a hi-a-a kamala-e |
sarahassa phuri-a ṇi-a
a-isundaraparimalabohakarama-e ||3||

34)

hataṃ sivaṇāhu nihila ja-a-
tatta sunibbhara-otti virurī |
phura-i vimarisabhamari
papalā-a ṇi-a lacchi vibha-irī ||4||

(chāyā) ahaṃ śivanātho nikhilajana-
tattvasunirbhara iti virāvaṃ kurvan |
sphurati vimarśabhramaraḥ
prakāśanijalakṣyaṃ bibharti ||4||

iti śrīmadabhinavaguptācāryaviracite tantrasāre śāktopāyaprakāśanaṃ nāma 
caturthamāhnikam ||4||


atha pañcamamāhnikam |

athāṇavopāyaḥ |

tatra yadā vikalpaḥ svayameva saṃskāram ātmani upāyāntaranirapekṣatayaiva 
kartuṃ prabhavati tadā asau pāśavavyāpārāt [k: vyāpāratvāt iti pāṭhaḥ |
] pracyutaḥ śuddhavidyānugraheṇa parameśaśaktirūpatām āpanna 
upāyatayā avalambyamānaḥ śāktaṃ jñānam āvirbhāvayati | tadetacca 
[śāktopāyajñānam |] nirṇītam anantara eva āhnike | yadā tu 
upāyāntaram asau svasaṃskārārthaṃ vikalpo'pekṣate tadā 
buddhiprāṇadehaghaṭādikān parimitarūpān upāyatvena gṛhṇan aṇutvaṃ 
prāpta āṇavaṃ jñānam āvirbhāvayati tatra buddhiḥ dhyānātmikā prāṇaḥ 
sthūlaḥ sūkṣmaśca ādya uccāraṇātmā uccāraṇaṃ ca nāma pañca 
prāṇādyā vṛttayaḥ sūkṣmastu varṇaśabdavācyo vakṣyate dehaḥ 
saṃniveśaviśeṣātmā 

36)

karaṇaśabdavācyaḥ ghaṭādayo bāhyāḥ 
kumbhasthaṇḍilaliṅgapūjādyupāyatayā kīrtayiṣyamāṇāḥ | tatra dhyānaṃ 
tāvat iha ucitam upadekṣyāmaḥ yat etat svaprakāśaṃ sarvatattvāntarbhūtaṃ 
paraṃ tattvam uktaṃ tadeva nijahṛdayabodhe dhyātvā tatra 
pramātṛpramāṇaprameyarūpasya vahnyarkasomatritayasya saṃghaṭṭaṃ 
dhyāyet yāvat asau mahābhairavāgniḥ dhyānavātasamiddhākāraḥ saṃpadyate 
[yaduktam 

taddhyānāraṇisaṃkṣobhānmahābhairavahavyabhuk | 
hṛdayākhye mahākuṇḍe jājvalan sphītatāṃ vrajet || iti |] tasya 
prāktanaśaktijvālādvādaśakaparivṛtasya cakrātmanaḥ cakṣurādīnām 
anyatamasuṣiradvāreṇa niḥsṛtasya bāhye grāhyātmani viśrāntaṃ cintayet 
tena ca viśrāntena prathamaṃ tadbāhyaṃ somarūpatayā sṛṣṭikrameṇa 
prapūritaṃ tataḥ arkarūpatayā sthityā avabhāsitaṃ tato'pi 
saṃhāravahnirūpatayā vilāpitaṃ tataḥ anuttarātmatām āpāditaṃ dhyāyet | 
evaṃ taccakraṃ samastabāhyavastvabhedaparipūrṇaṃ saṃpadyate | tato 
vāsamāśeṣānapi 

37)

bhāvān tena cakreṇa itthaṃ [k: itthaṃ tattvāniti pāṭhaḥ |] kṛtān 
[anuttarātmarūpānityarthaḥ | yadi kasyacidbhāvasya vāsanā śiṣyate tarhi 
sāpi naśyatīti tātparyam |] dhyāyet | evam asya anavarataṃ dhyāyinaḥ 
[k: dhyānavātaprabodhite iti pāṭhāntaraṃ ca |] 
svasaṃvinmātraparamārthān sṛṣṭisthitisaṃhāraprabandhān [pramātā hi 
prathamamavabhāsyamānatayārthaṃ sṛjati tataḥ kaṃcit kālamanurajyan 
sthāpayati paścāt jñāto'yamartha iti vimṛśannupasaṃharati anantaramalaṃ 
grāsayuktyā pūrṇatāpādanena cidagnisādbhāvamāpādayati |] 
sṛṣṭyādisvātantryaparamārthatvaṃ ca svasaṃvido niścinvataḥ sadya eva 
bhairavībhāvaḥ | abhyāsāt tu sarvepsitasiddhyādayo'pi |

svaprakāśaṃ samastātmatattvaṃ mātrādikaṃ trayam |
antaḥkṛtya sthitaṃ dhyāyeddhṛdayānandadhāmani ||

taddvādaśamahāśaktiraśmicakreśvaraṃ vibhum |
vyomabhirniḥsaradbāhye [vyomabhiścakṣurādisuṣiraiḥ |] 
dhyāyetsṛṣṭyādibhāvakam ||

tadgrastasarvabāhyāntarbhāvamaṇḍalamātmani |
viśrāmyanbhāvayedyogī syādevaṃ svātmanaḥ prathā ||

iti saṃgrahaślokāḥ | iti dhyānam |

38)

atha uccāraḥ |

tatra prāṇam uccicārayiṣuḥ pūrvaṃ hṛdaya eva śūnye [aśūnyaṃ 
śūnyamityuktanītyā nirūpite śūnye |] viśrāmyati tato bāhye prāṇodayāt 
[prāk saṃvitprāṇe pariṇatā ityuktalakṣaṇāt |] tato'pi bāhyaṃ prati 
apānacandrāpūraṇena [apāna evāpyāyanakāritvāccandraḥ tena kṛtaṃ 
pūraṇaṃ nairākāṅkṣyam taddaśāyāṃ hi pramātṛgatāḥ prameyāṃśāḥ 
kroḍībhūya tiṣṭhanti |] sarvātmatāṃ paśyati tataḥ anyanirākāṅkṣo 
bhavati tataḥ samānodayāt saṃghaṭṭaviśrāntim 
[sarvārthānāmanyonyamelanarūpām |] anubhavati tata 
udānavahnyudaye mātṛmeyādikalanāgrasate [prāṇāpānādīnāṃ kalanā 
ṣaṭśatāni divārātrau sahasrāṇyekaviṃśatiḥ ityuktyā nirūpitasvarūpā |] | 
tadgrāsakavahnipraśame vyānodaye sarvāvacchedavandhyaḥ [vyāpakatayā 
sarvāvacchedavandhyatvam |] sphurati | evaṃ śūnyāt prabhṛti 
vyānāntaṃ yā etā viśrāntayaḥ tā eva nijānando nirānandaḥ parānando 
brahmānando mahānandaḥ cidānanda iti ṣaṭ ānandabhūmaya upadiṣṭāḥ 
[nijānando mātṛbhūmigaḥ nirānandaḥ pramātṛpadānniṣkrāntaḥ 
parānando bahirmukhatvāt pareṇa prameyeṇa kṛtaḥ brahmānando 
nīlasukhādisarvārthasvīkārādbṛṃhakatvena brahmarūpaḥ mahānandaḥ 
prāṇādikṣobhaparihāreṇa mahattvaviśiṣṭaḥ cidānandaḥ sarvamayatve'pi 
taduttīrṇatvāccidrūpaḥ | tathāhi śrītantrāloke 

nijānandaḥ pramātraṃśamātraniṣṭhānibandhanaḥ | 
śūnyatāmātraviśrānternirānandātmikā sthitiḥ || 

prameyapadaviśrānteḥ parānando'pyudetyalam | 
anantameyasaṃghaṭṭapūrṇe meye tu sarvataḥ || 

pramāṇāccarvaṇāyogānmahānanda iti sthitiḥ | 
samastameyaughakalākalanāgrāsakovidaḥ || 

yadā viśrāntimabhyeti nirupādhisunirbharām | 
tadā khalu cidānando yo jaḍānupabṛṃhitaḥ || 

na ca yatra sthitiḥ kāpi vibhaktā jaḍarūpiṇī | 
yatra ko'pi vyavachedo nāsti yadviśvataḥ sphurat || 

yadanāhṛtasaṃvittiparamāmṛtabṛṃhitam | 
tadeva jagadānandadhāmāsmākaṃ gururjagau || iti |] yāsām ekaḥ 
anusaṃdhātā 

39)

udayāstamayavihīnaḥ antarviśrāntiparamārtharūpo jagadānandaḥ [jagatā 
nijānandādirūpeṇa iti tṛtīyākarmadhārayeṇa yojyam |] tat etāsu 
uccārabhūmiṣu pratyekaṃ dvyādiśaḥ sarvaśo vā viśrāmya anyat 
taddehaprāṇādivyatiriktaṃ viśrāntitattvam āsādayati | tadeva 
sṛṣṭisaṃhārabījoccāraṇarahasyam anusaṃdadhat vikalpaṃ saṃskuryāt āsu ca 
viśrāntiṣu pratyekaṃ pañca avasthā bhavanti praveśatāratamyāt | 

40)

tatra prāgānandaḥ [prāgānandaḥ camatkāraviśeṣaḥ tathā ca 

atra bhāvanayā dehagatopāyaiḥ pare pathi | 
vivikṣoḥ pūrṇatāsparśāt prāgānandaḥ prajāyate || 

iti | udbhavaḥ adhastanadannāviśeṣāt paradhāmādhirohātmā niḥśarīratāyāṃ 
rūḍheḥ dehāhaṃbhāvābhāve dārḍhyāt kampaḥ taddārḍhyatyāgaḥ 
svabalasyāhantāvīryasyeti |] pūrṇatāṃśasparśāt tata udbhavaḥ kṣaṇaṃ 
niḥśarīratāyāṃ rūḍheḥ tataḥ kampaḥ svabalākrāntau 
dehatādātmyaśaithilyāt tato nidrā bahirmukhatvavilayāt 
[bāhyavṛttyuparamāt |] | ittham anātmani ātmabhāve līne svātmanaḥ 
sarvamayatvāt ātmani anātmabhāvo vilīyate iti ato ghūrṇiḥ 
[daśāvasthābhyudāso ghūrṇiḥ | tathā ca 

tataḥ satyapade rūḍho viśvātmatvena saṃvidam | 
saṃvidā ghūrṇate ghūrṇirmahāvyāptiryataḥ smṛtā || iti |] 
mahāvyāptyudayāt | tā etā jāgradādibhūmayaḥ turyātītāntāḥ | etāśca 
bhūmayaḥ trikoṇakandahṛttālūrdhvakuṇḍalinīcakrapraveśe bhavanti | evam 
uccāraviśrāntau [k: uccāryaviśrāntāviti pāṭhaḥ |] yat paraṃ 
spandanaṃ galitāśeṣavedyaṃ 

41)

yacca unmiṣadvedyaṃ yacca unmiṣitavedyaṃ tadeva liṅgatrayam iti vakṣyāmaḥ 
svāvasare | paraṃ cātra liṅgaṃ yoginīhṛdayam | tatra mukhyā spandanarūpatā 
saṃkocavikāsātmatayā yāmalarūpatodayena visargakalāviśrāntilābhāt [k: 
visargaviśrāntīti kalā padahīnaḥ pāṭhaḥ |] ityalam | aprakāśaḥ atra 
anupraveśaḥ |

pūrvaṃ svabodhe tadanu prameye
viśramya meyaṃ paripūrayeta |
pūrṇe'tra viśrāmyati mātṛmeya-
vibhāgamāśveva sa saṃharet ||

vyāptyātha viśrāmyati tā imāḥ syuḥ
śūnyena sākaṃ ṣaḍupāyabhūmyaḥ |
prāṇādayo vyānanapaścimāsta-
llīnaśca jāgratprabhṛti prapañcaḥ ||

abhyāsaniṣṭho'tra tu sṛṣṭisaṃhṛd-
vimarśadhāmanyacireṇa [k: visargadhāmeti pāṭhaḥ |] śehet |

iti āntaraślokāḥ | iti uccāraṇam |

42)

atha sūkṣmaprāṇātmā varṇaḥ [k: sūkṣmaprāṇātmavarṇā iti pāṭhaḥ |
] |

asmin eva uccāre sphuran avyaktānukṛtiprāyo dhvaniḥ varṇaḥ [yaduktam 

ukto ya eṣa uccārastatra yo'sau sphuran sthitaḥ | 
avyaktānukṛtiprāyo dhvanirvarṇaḥ sa kathyate || 

iti sarvavarṇāvibhāgasvabhāvatvādavyaktaḥ evaṃvidho varṇaḥ kvopalabhyate 
ityāśaṅkyāha tasyeti |] tasya sṛṣṭisaṃhārabīje mukhyaṃ rūpaṃ 
tadabhyāsāt parasaṃvittilābhaḥ tathāhi- kādau mānte sācke anacke vā 
antaruccārite [uccārite prāṇopāroheṇa smṛte buddhyupāroheṇa |] 
smṛte vā samaviśiṣṭaḥ saṃvitspandasparśaḥ samayānapekṣitvāt 
paripūrṇaḥ samayāpekṣiṇo'pi [uttamavṛddhādinā kalpita 
idamasyābhidheyamiti samayaḥ tadvanto ghaṭādayaḥ śabdāḥ tatra 
saṃvidyarthaṃ sākṣātkurvanti yathā manorathādiṣu kāntādiśabdāḥ 
kāmaśokādinā niviḍataraṃ bhāvyamānā asaṃnihitamapi khyādibhāvaṃ 
sākṣāt kurvanti |] śabdāḥ tadarthabhāvakā manorājyādivat 
anuttarasaṃvitsparśāt ekīkṛtahṛtkaṇṭhoṣṭho dvādaśāntadvayaṃ 
hṛdayaṃ ca ekīkuryāt iti varṇarahasyam | 
antaḥsphuradvimarśānantarasamudbhūtaṃ 

43)

sitapītādyāntaraṃ varṇam udbhāvyamānaṃ [g: tadbhāvyamānamiti 
pāṭhaḥ |] saṃvidam anubhāvayati iti kecit |

vācyaviraheṇa [vācyaviraheṇeti vyatiriktavācyābhāvāt |] saṃvit-
spandādindvarkagatinirodhābhyām 
[bahiḥprasṛtyantarmukhaviśrāntibhyām |] |
yasya tu samasaṃpraveśāt [kh: nijadhāmasaṃpraveśāt iti pāṭhaḥ |]
pūrṇā [pūrṇā iti ananyonmukhatvānnirākāṅkṣā |] 
cidbījapiṇḍavarṇavidhau ||

iti āntaraślokaḥ | iti varṇavidhiḥ | karaṇaṃ tu mudrāprakāśane vakṣyāmaḥ |

vikalpaḥ kasyāpi svayamanupayanpūrṇamayatā- [kasyāpi 
śaktipātavataḥ pūrṇamayatāmityatra karotīti śeṣaḥ upāsat śāktāt |]
mupāyātsaṃskāraṃ vrajati sa upāyo'tra bahudhā |
dhiyi prāṇe dehe tadanu bahirityāṇavatayā
sa nirṇīto naiṣāṃ paraphalavidhau kāpi hi bhidā [tathā coktaṃ mālinīvijaye 

uccārakaraṇadhyānavarṇasthānavikalpanaiḥ | 
yo bhavetsa samāveśaḥ samyagāṇava ucyate || 

iti | nanu copāyavaicitryādupeyavaicitryamapi syādeva kāraṇavaicitrye 
kāryavaicitryavaditi na paratattvalābha eva sarveṣāṃ sādhya ityāha naiṣāṃ 
paraphalavidhau iti yadi ca evaṃ kathaṃ tarhi upāyavaicitryam ? 
śaktipātavaicitryāt iti brūmaḥ yathā śaktipātavaicitryāt 
śāṃbhavaśāktāṇavānāṃ vaicitryaṃ tathā ihāpi ityarthaḥ |]

44)

suṇṇa-u ravisasi dahana
sa-u ussa-u ehu saviru |
uhi acchanta-u paramapa-u
pāva-i acire vīru ||

iti śrīmadabhinavaguptācāryaviracite tantrasāre āṇavaprakāśanaṃ nāma 
pañcamamāhnikam ||


atha ṣaṣṭhamāhnikam |

atha bāhyavidhiḥ |

sa eva sthānaprakalpanaśabdena [uccārakaraṇetyatra |; k: kamyate iti pāṭhaḥ 
|] uktaḥ tatra tridhā sthānaṃ prāṇavāyuḥ [prāṇa iti 
sāmānyaspandanātmani viśiṣṭe punarvācakarūpastrividha eva yaduktam | 

ṣaḍvidhādadhvanaḥ prācyaṃ yadetattritayaṃ punaḥ | 
eṣa eva sa kālādhvā prāṇe spaṣṭaṃ pratiṣṭhitaḥ || iti |] śarīraṃ bāhyaṃ 
ca tatra prāṇe tāvat vidhiḥ sarvaḥ [sarvaḥ ṣaḍvidhaḥ |] asau 
vakṣyamāṇaḥ adhvā prāṇasthaḥ [prāṇe sāmānyaspandātmani |] 
kalyate tasya kramākramakalanaiva [krameṇākrameṇa ca kalanā bhāvānāṃ 
paricchittiḥ saiva kālaḥ tatra krameṇa kāryakāraṇādau akrameṇa 
citrajñānādau | tathā coktam 

saṃvitsaiva punaḥ svātmagarbhīkṛtakramākramau | 
sphuṭayantī praroheṇa prāṇavṛttiḥ pratiṣṭhitā || iti |] kālaḥ sa [nanu 
bhāvāḥ saṃvillagnā evāvabhāsante tat kathaṃ tadanuṣaktasya bhāvavargasya 
kālayogaḥ syādityāha sa ca ityādi yadyevaṃ tarhi parameśvare'pi kālayogo 
bhavedityāśaṅkyāha tadbhāsanam ityādi |] ca parameśvara eva antarbhāti 

46)

tadbhāsanaṃ [kh: udbhāsanamiti pāṭhaḥ |] ca devasya kālī 
[svecchāvabhāsitasya pramātṛprameyādyātmano jagatastadrūpatayā 
kalane sāmarthyaṃ na punaḥ svātmani kaścit akramaḥ kramo veti nahi 
agnerdāhaśaktiyoge sphoṭādyāvirbhāvastadāha kālī nāma śaktiḥ iti |] 
nāma śaktiḥ bhedena [bhedena bahiḥprarūḍhatayetyarthaḥ |] tu 
tadābhāsanaṃ kramākramayoḥ prāṇavṛttiḥ | saṃvideva hi prameyebhyo 
vibhaktaṃ rūpaṃ gṛhṇāti [svātantryāditi śeṣaḥ |] ata eva ca 
avacchedayogāt vedyatāṃ yāntī nabhaḥ [yaduktam | 

saṃvinmātraṃ hi yacchuddhaṃ prakāśaparamārthakam | 
tanmeyamātmanaḥ projjhya viviktaṃ bhāsate nabhaḥ || 

iti na ca prāk prāṇe saṃvit pariṇatā ityuktirviruddhyet śūnyatāvabhāsane'pi na 
kaścidrūpāntaropagraha iti prāgityuktam |] tataḥ svātantryāt meye 
svīkārautsukyena [bahirmukhībhāvena |] nipatantī kriyāśaktipradhānā 
prāṇanārūpā [yaduktam 

sa eva svātmā meye'smin bhedite svīkriyotsukaḥ | 
patan samuccarattvena prāṇaspandormisaṃjñitaḥ || 

iti viśvottīrṇatvena viśvamayatvasyāvacchedaḥ viśvarahitatvena saṃvit 
śūnyarūpā punastādṛśī satī viśvasvīkāreṇa prāṇarūpatvamāpteti |] 
jīvasvabhāvā pañcamī rūpaiḥ dehaṃ yataḥ pūrayati [yaduktam 

sā prāṇavṛttiḥ prāṇādyai rūpaiḥ pañcabhirātmasāt | 
dehaṃ yat kurute saṃvitpūrṇastenaiṣa bhāsate || iti |; kh: prerayati iti 
pāṭhāntaropetaḥ pāṭhaḥ |]

47)

tato'sau cetana iva bhāti | tatra kriyāśaktau kālādhvā prācyabhāge uttare tu 
mūrtivaicitryarūpo deśādhvā tatra varṇamantrapadādhvanaḥ kālādhvani 
[kh: padādhvānaḥ kālādhvasthitiriti pāṭhaḥ |] sthitiḥ 
parasūkṣmasthūlarūpatvāt | deśādhvasthitistu tattvapurakalātmanā iti bhaviṣyati 
svāvasare | tatra yadyapi dehe sabāhyābhyantaram otaprotarūpaḥ prāṇaḥ tathāpi 
prasphuṭasaṃvedyaprayatnaḥ [prayatnaḥ prāṇaspandaḥ sa ca dvedhā 
saṃvedyo'saṃvedyaśca tayorapi sphuṭāsphuṭatayā dvaividhyam |] asau 
hṛdayātprabhṛti [idamatra tātparyam

hṛccakre tu samākhyātāḥ sādhakānāṃ hitāvahāḥ |
prāṇo vai carate tāsu ahorātravibhāgaśaḥ |
tathā te kathayiṣyāmi pravibhajya yathā sphuṭam |

iti saṃvedyaprayatno'sau ato yadyapi sarvatra dehe vartate nāsaṃvedyayatnaḥ na hi 
svāsaṃvedyayatne kiṃcitphalaṃ svecchayā hi caritaḥ prāṇastattatsiddhinimittam 
iti hṛdayātprabhṛtyeva vibhāgakalpanā |] iti tata eva ayaṃ nirūpaṇīyaḥ | 
tatra prabhuśaktiḥ [na ca atraitacchaṅkyaṃ ? 
sarvavyāpakatvādabhede'pi asya kathaṃ kvacit sphuṭatā kvacidasphuṭatā iti 
tatrāha prabhuśaktiriti | yaduktam 

prabhuśaktiḥ kvacinmukhyā yathāṅgamarudīraṇe | 
ātmaśaktiḥ kvacitkandasaṃkocaspandane yathā ||

prāṇaśaktiḥ kvaciddhārdaṃprāṇacāre yathā sphuṭam | 
dvayaṃ trayaṃ vā mukhyaṃ syādyogināmavadhāninām || 

avadhānādadṛṣṭāṃśādvalavattvādadheraṇāt | 
viparyayo'pi prāṇātmaśaktīnāṃ mukhyatāṃ prati || iti |]

48)

ātmaśaktiḥ [mitapramātṛśaktiḥ |] yatna iti tritayaṃ prāṇeraṇe 
hetuḥ guṇamukhyabhāvāt | tatra hṛdayāt dvādaśāntāntaṃ svāṅgulaiḥ 
sarvasya [sarvasya brahmādeḥ kīṭāntasya |] ṣaṭtriṃśadaṅgulaḥ 
prāṇacāraḥ nirgame praveśe ca svocitabalayatnadehatvāt sarvasya | tatra ghaṭikā 
tithiḥ māso varṣaṃ ca varṣasamūhātmā iti samastaḥ kālaḥ parisamāpyate | tatra 
sapañcāṃśe aṅgule caṣaka iti sthityā ghaṭikodayaḥ ghaṭikā hi ṣaṣṭyā 
caṣakaiḥ tasmāt dvāsaptatyaṅgulā bhavati |

atha tithyudayaḥ | sapādamaṅguladvayaṃ tuṭiḥ ucyate tāsu catasṛṣu praharaḥ 
tuṭyardhaṃ tuṭyardhaṃ tatra saṃdhyā evaṃ nirgame dinaṃ praveśe rātriḥ iti 
tithyudayaḥ [yaduktam 

saṃvedyarūpaśaśadharabhāgaḥ saṃvedakārkakaranikaraiḥ | 
yāvānyāvati pūrṇaḥ sā hi tithirmagrahaiḥ sphuṭībhavati || iti |]

49)

atha māsodayaḥ | tatra dinaṃ kṛṣṇapakṣaḥ [dine'pānacandrasva kṣayāt 
kṛṣṇapakṣatvam |] rātriḥ śuklaḥ tatra pūrvaṃ tuṭyardhaṃ antyaṃ ca 
tuṭyardhaṃ viśrāntiḥ akālakalitāḥ 
[hārdadvādaśāntayostudvyardhayorviśrāntirūpatvātkālakalanā nāstīti |
] madhyāstu pañcadaśa tuṭaya eva tithayaḥ tatra [tatra pratituṭau 
tithirūpāyām |] prakāśo viśrāntiśca iti eta eva dinaniśe [yaduktam 

saṃvitpratikṣaṇaṃ yasmātprakāśānandayoginī | 
tau kṣiptau yāvati tathā tāvatyeva dinakṣape || iti |] tatra 
vedyamayatāprakāśo [kh: vedyasamayateti pāṭhaḥ |] dinaṃ vedyasya 
vicārayitari layo rātiḥ te ca prakāśaviśrāntī cirāciravaicitryāt anantabhede 
tatsāmye tu viṣuvat [yaduktam 

kadācidvastuviśrāntisāmyenātmani carvaṇam | 
vedyavedakasāmyaṃ tatsā rātrindinatulyatā || iti | pramātṛṇāṃ 
vedyagrahaparatvādestāratamyāt saṃvidudayaḥ  kasyacitkṣaṇaḥ kasyacitkalpaḥ 
kasyacinnimeṣaśca syāt iti prakāśe cirāciravaicitryam | tathaiva viśrāntau ca 

vedye viśrāntiradhikā dinadairghyāya kalpate | 
tathaiva svātmaviśrāntivṛttiḥ syādrātrivistaraḥ || iti |]

50)

tatra kṛṣṇapakṣe prāṇārke apānacandra āpyāyikām ekāmekāṃ kalām 
arpayati yāvat pañcadaśyāṃ tuṭau dvādaśāntasamīpe 
kṣīṇapṛthagbhūtakalāprasaraḥ candramāḥ prāṇārka eva līyate | tadanantaraṃ 
yat tuṭyardhaṃ sa pakṣasaṃdhiḥ | tasya ca tuṭyardhasya prācyam ardham 
[prāṇīyamardham |] āmāvasyaṃ dvitīyaṃ [apānīyam |] 
prātipadaṃ | tatra prātipade tasmin bhāge sa āmāvasyo bhāgo yadā 
kāsaprayatnāvadhānādikṛtāt tithicchedāt viśati tadā tatra grahaṇam 
[tasyāstitheḥ kāsavaśāt dvādaśānte ucchedaḥ tataḥ 

śaktigarbhādadhaḥ sṛṣṭistasmādvṛṣṭiḥ prajāyate | 

iti nītyā niḥśvāsavaśādapānavāhasya cireṇa prasaraṇāttitheradhikībhāvena 
pūrṇatayā paurṇamāsyudayaḥ vṛddhivaśāt pūrṇimābhāgaḥ prātipade 
bhāge yadā viśati tadā candragrahaṇaṃ ketuḥ sūrye vidhau rāhuḥ iti nītyā 
somasahito rāhuḥ | yaduktam 

prāṇārkamānahaṭaghaṭṭitameyacandra-
vidrāvitāmṛtarasotsukitaḥ svamātā | 
svarbhānurāvṛṇuta eva raviṃ rasaṃ tu 
puṇye grahe'tra rasayettrayaghaṭṭanajñaḥ || 

iti | tathā 

ādityagrahaṇaṃ caiva loke tadupadiśyate | 
śaktirvai viśati prāṇe yā tuṭistu vidhīyate || 

amāvasyā tu sā jñeyā kṛṣṇapakṣe varānane | 
śaktermadhyordhvabhāge tu tuṭyardhaṃ yatprakīrtitam || 

pakṣasaṃdhistvasau jñeyo'māvasyārdhaṃ pratipadā | 
tithicchedena vai tatra sūryasya grahaṇaṃ bhavet || 

ravibimbāntare devi candrabimbaṃ tadā bhavet | 
tadantare bhavedrāhuramṛtārthī varānane || 

amṛtaṃ sravate candro rāhuśca grasate tu tat | 
pītvā tyajati tadbimbaṃ tadā muktaḥ sa ucyate || iti |]

51)

tatra ca vedyarūpasomasahabhūto māyāpramātṛrāhuḥ svabhāvatayā 
vilāpanāśaktaḥ kevalam ācchādanamātrasamarthaḥ sūryagataṃ cāndraṃ 
amṛtaṃ pibati iti | pramātṛpramāṇaprameyatritayāvibhāgakāritvāt sa 
puṇyaḥ kālaḥ pāralaukikaphalapradaḥ | tataḥ praviśati prāṇe cidarka ekaikayā 
kalayā apānacandram āpūrayati [pratipatsā tu vijñeyā candraścaikakalo 
bhavet | ityādikrameṇa candrapūraṇam |] yāvat pañcadaśī tuṭiḥ pūrṇimā 
tadanantaraṃ pakṣasaṃdhiḥ 

52)

grahaṇaṃ ca iti prāgvat etat tu aihikaphalapradam [aihikasṛṣṭiprādhānyāt |
] iti māsodayaḥ |

atha varṣodayaḥ | tatra kṛṣṇapakṣa eva uttarāyaṇaṃ ṣaṭsu ṣaṭsu aṅguleṣu 
saṃkrāntiḥ [prāṇārkasya |] makarāt mithunāntaṃ | tatra 
pratyaṅgulaṃ pañca tithayaḥ tatrāpi dinarātrivibhāgaḥ evaṃ praveśe 
dakṣiṇāyanaṃ [k: praveśo dakṣiṇāyanamiti pāṭhaḥ |] garbhatvam 
udbhavecchā udbubhūṣutā udbhaviṣyatvam udbhavārambhaḥ udbhavattā 
janmādivikāraṣaṭkaṃ ca iti kramāt makarādiṣu iti [prāṇārkasya |] | 
tathaiva upāsā atra [yaduktam  

ādhānamicchā saṃyoga ānando ghanatā sthitiḥ | 
janma sattā pariṇatirvṛddhirhrāsaḥ kṣayaḥ kramāt || 

māghānmāsātsamārabhya sthitayaḥ parikīrtitāḥ | 
sādhakānāṃ siddhividhau bhāvānāṃ cāpi saṃbhavaḥ || 

iti udbhavanātmakaiṣaṇīyasaṃyuktamicchāmātramudbhavecchā 
svātmanyucchalattvena avasthānamudbhavanam |] phalaṃ samucitaṃ karoti | 
atra ca dakṣādyāḥ pitāmahāntā rudrāḥ [atra māseṣu |] śaktayaśca 
dvādaśādhipataya [yaduktam 

dakṣaścaṇḍo haraścaṇḍī pramatho bhīmamanmathau | 
śakuniḥ sumatirnanda gopālaka pitāmahāḥ || 

iti saṃkrāntikramāt patayaḥ |] iti varṣodayaḥ |

53)

pratyaṅgulaṃ ṣaṣṭiḥ tithaya iti krameṇa saṃkrāntau varṣam ityanena krameṇa 
praveśanirgamayoḥ dvādaśābdodayaḥ pratyaṅgulaṃ tithīnāṃ śatatrayaṃ 
sapañcāṃśe'ṅgule [pratyaṅgulaṃ tithiśatatraye parikalpite sati 
aṅgulapañcamabhāge tithayaḥ ṣaṣṭirbhavanti anayā paripāṭyā sapañcāṃśe 
aṅgule varṣam |] varṣaṃ yatra prāk caṣakam uktam iti gaṇanayā 
saṃkrāntau pañca varṣāṇi iti anayā paripāṭyā ekasmin 
prāṇanirgamapraveśakāle ṣaṣṭyabdodayaḥ atra ekaviṃśatisahasrāṇi ṣaṭ 
śatāni iti tithīnāṃ saṃkhyā | tāvatī [antaryā ṣaṣṭyabdodaye tithisaṃkhyā 
tadvahirdinarātraṃ prāṇacārakalpanam |] eva ahorātre prāṇasaṃkhyā iti na 
ṣaṣṭyabdodayāt adhikaṃ parīkṣyate ānantyāt | tatra 
[bāhyasamayakalpanāyāṃ |] mānuṣaṃ varṣaṃ devānāṃ tithiḥ anena 
[pakṣamāsāyanavarṣādikalanākrameṇa |] krameṇa divyāni 
dvādaśavarṣasahasrāṇi caturyugam | catvāri trīṇi dve ekam iti kṛtāt prabhṛti 
tāvadbhiḥ 

54)

śataiḥ aṣṭau saṃdhyāḥ | caturyugānām ekasaptatyā manvantaram manvantaraiḥ 
caturdaśabhiḥ brāhmaṃ dinaṃ brahmadinānte kālāgnidagdhe lokatraye 
[bhūrbhuvaḥ svarlakṣaṇe |] lokatraye anyatra ca lokatraye 
[jalatattvavāsināṃ yadāyustadagnitattvasthānāṃ dinam iti krama 
ekaikavarṣaśatavṛddhyā |] dhūmaprasvāpite sarve janā 
vegavadagnipreritā janaloke pralayākalībhūya tiṣṭhanti | prabuddhāstu 
kūṣmāṇḍahāṭakeśādyā maholoke krīḍanti | tato niśāsamāptau brāhmī 
sṛṣṭiḥ | anena mānena varṣaśataṃ brahmāyuḥ | tat viṣṇoḥ dinaṃ tāvatī ca 
rātriḥ tasyāpi śatam āyuḥ | tat dinaṃ tadūrdhve rudralokaprabho rudrasya tāvatī 
rātriḥ prāgvat varṣaṃ tacchatamapi ca avadhiḥ | tatra rudrasya tadavasitau 
śivatvagatiḥ rudrasya uktādhikārāvadhiḥ brahmāṇḍadhārakāṇāṃ tat dinaṃ 
śatarudrāṇāṃ niśā tāvatī teṣāmapi ca śatamāyuḥ | śatarudrakṣaye 
brahmāṇḍavināśaḥ | evaṃ jalatattvāt avyaktāntam etadeva krameṇa rudrāṇām 
āyuḥ | pūrvasyāyuruttarasya [jalatattvavāsināṃ 
yadāyustadagnitattvasthānāṃ dinam iti krama ekaikavarṣaśatavṛddhyā |]

55)

dinam iti | tataśca brahmā [buddhitattvasthaḥ |] rudrāśca 
abādyadhikāriṇaḥ avyakte tiṣṭhanti iti | śrīkaṇṭhanāthaśca 
[puṃtattvasthaḥ |] tadā saṃhartā | eṣo'vāntarapralayaḥ 
[avāntarapralayasya uktatvāt |] tatkṣaye sṛṣṭiḥ | tatra 
śāstrāntaramuktā [sāṃkhyavedāntādiśāstrabhāṣitamuktāḥ |] api 
sṛjyante | yattu śrīkaṇṭhanāthasya svam āyuḥ tat kañcukavāsināṃ 
rudrāṇāṃ dinaṃ tāvatī rajanī teṣāṃ yadāyuḥ tat gahaneśadinaṃ 
[gahaneśasya māyāgarbhādhikāriṇaḥ |] tāvatī eva kṣapā tasyāṃ ca 
samastameva māyāyāṃ vilīyate | punaḥ gahaneśaḥ sṛjati | evaṃ yaḥ 
avyaktakālaḥ taṃ daśabhiḥ parārdhaiḥ guṇayitvā māyādinaṃ kathayet tāvatī 
rātriḥ | sa eva pralayaḥ | māyākālaḥ parārdhaśatena guṇita aiśvaratattve 
[prāṇodaye kāraṇakramasya vakṣyamāṇatvāt īśvaratattvameva 
garbhīkṛtavidyātattvamuktam | yaḥ kriyāśaktipradhānaḥ prāṇanārūpa iti 
pūrvamuktaḥ |] dinam | atra prāṇo jagat sṛjati tāvatī rātriḥ yatra 
prāṇapraśamaḥ 

56)

prāṇe ca brahmabiladhāmni śānte'pi yā saṃvit tatrāpyasti kramaḥ | aiśvare 
kāle parārdhaśataguṇite yā saṃkhyā tat sādāśivaṃ dinaṃ tāvatī niśā sa eva 
mahāpralayaḥ [śuddhādhvano'pi saṃhārāt |] | sadāśivaḥ 
svakālaparikṣaye bindvardhacandranirodhikā ākramya nāde līyate nādaḥ 
śaktitattve tat vyāpinyāṃ sā ca anāśrite | śaktikālena parārdhakoṭiguṇitena 
anāśritadinaṃ | anāśritaḥ sāmanase pade yat tat sāmanasyaṃ sāmyaṃ 
[viśvasaṃhāre vṛtte sarvo'ṇuvargaḥ samanāyāmeva saṃbhūya āste 
anāśritāntasya viśvasyābhedena avasthānāt sāmyam |] tat brahma | asmāt 
sāmanasyāt akalyāt [kalayitumaśakyādityarthaḥ |] kālāt 
nimeṣonmeṣamātratayā proktāśeṣakālaprasarapravilayacakrabhramodayaḥ 
[proktāśeṣakālasya tuṭyādeḥ |] | ekaṃ daśa śataṃ sahasram ayutaṃ 
lakṣaṃ niyutaṃ koṭiḥ arbudaṃ vṛndaṃ kharvaṃ nikharvaṃ padmaṃ 
śaṅkuḥ samudraṃ antyaṃ madhyam parārdham iti krameṇa daśaguṇitāni 

57) 

aṣṭādaśa iti gaṇitavidhiḥ | evam asaṃkhyāḥ sṛṣṭipralayāḥ ekasmin 
mahāsṛṣṭirūpe prāṇe [prāk saṃvit prāṇe pariṇatā iti prāṇo 
mahāsṛṣṭirūpaḥ |] so'pi saṃvidi sā upādhau sa cinmātre cinmātrasyaiva 
ayaṃ spando yadayaṃ kālodayo nāma | tata eva svapnasaṃkalpādau vaicitryam 
asya [k: vaicitryasya na iti pāṭhāntaraṃ ca |] na virodhāvaham | evaṃ 
yathā prāṇe kālodayaḥ tathā apāne'pi hṛdayāt mūlapīṭhaparyantam | yathā ca 
hṛtkaṇṭhatālulalāṭarandhradvādaśānteṣu brahmaviṣṇurudreśa 
sadāśivānāśritākhyaṃ kāraṇaṣaṭkam tathaiva apāne'pi 
hṛtkandānandasaṃkocavikāsadvādaśanteṣu 
bālyayauvanavārdhakanidhanapunarbhavamuktyadhipataya ete |

atha samāne kālodayaḥ | samāno hārdīṣu daśasu [iḍāpiṅgalāsuṣumnā 
gāndhāri hastijihvā pupā yaśā alambusākuhūḥ śaṃkhinī ityevaṃ rūpāsu |
] daśasu nāḍīṣu saṃcaran samaste dehe sāmyena rasādīn vāhayati | tatra 
digaṣṭake saṃcaran 

58)

taddikpaticeṣṭām iva pramātuḥ anukārayati | ūrdhvādhastu saṃcaran tisṛṣu 
[iḍāpiṅgalāsuṣamnāsu |] nāḍīṣu gatāgataṃ karoti | tatra viṣuvaddine 
[meṣārkākhye |] bāhye prabhātakāle sapādāṃ 
[sārdhaśatacatuṣṭayaprāṇacārātmikām | ṣaṣṭicaṣakaparimāṇā 
ghaṭikācaṣakaṣaṣṭau praticaṣakaṃ ṣaṭprāṇacārakalanayā 
ṣaṣṭyadhikaśatatrayaṃ prāṇacārāḥ |] ghaṭikāṃ madhyamārge vahati | 
tato navaśatāni prāṇavikṣepāṇām iti gaṇanayā bahiḥ sārdhaghaṭikādvayaṃ 
vāme dakṣiṇe vāme dakṣiṇe vāme iti pañca [vṛṣādi kanyāntāḥ |] 
saṃkrāntayaḥ | tataḥ saṃkrāntipañcake vṛtte pādonāsu caturdaśasu 
ghaṭikāsu atikrāntāsu dakṣiṇaṃ śāradaṃ viṣuvanmadhyāhne nava 
prāṇaśatāni | tato'pi dakṣiṇe vāme dakṣiṇe vāme dakṣiṇe iti 
saṃkrāntipañcakaṃ [vṛścikādikam |] pratyekaṃ navaśatāni 
ityevaṃ rātrāvapi [pratyekaṃ sārdhaghaṭikādvayam | tatra 
sāyaṃsandhyāyāṃ meṣasaṃkrāntisaṃjñāyāṃ madhyanāḍyāṃ bāhyāṃ 
sapādāṃ ghaṭikāṃ samāno vahati dvitīyā sapādā ghaṭikā rātrimadhye 
praviṣṭā |] iti | evaṃ viṣuvaddivase tadrātrau ca dvādaśa dvādaśa 
saṃkrāntayaḥ | tato dinavṛddhikṣayeṣu saṃkrāntivṛddhikṣayaḥ |

59)

evam ekasmin [na tu prāṇāpānavat dvayarūpe |] samānamaruti 
varṣadvayaṃ śvāsapraśvāsayogābhāvāt | atrāpi [ekacāra eva |] 
dvādaśābdodayādi pūrvavat | udāne tu dvādaśāntāvadhiścāraḥ 
[hṛdayānmūrdhanyadvādaśāntaṃ tāvat |] spandamātrātmanaḥ 
kālasya | atrāpi [k: atrāpi ityādi vākyaṃ nāsti |] pūrvavat vidhiḥ | 
vyāne tu vyāpakatvāt akrame'pi sūkṣmocchalattāyogena kālodayaḥ |

atha varṇodayaḥ | tatra ardhaprahare [āntare prāṇīye ardhaprahare 
prativargaṃ sārdhacaturaṅgulodayaḥ | bāhye tu 
sārdhaśatatrayodaśaprāṇacārātmā vargodayaḥ |] ardhaprahare vargodayo 
viṣuvati samaḥ varṇasya varṇasya dve śate ṣoḍaśādhike prāṇānām bahiḥ 
ṣaṭtriṃśat caṣakāṇi iti udayaḥ ayam ayatnajo [svārasikaḥ |] 
varṇodayaḥ | yatnajastu mantrodayaḥ araghaṭṭaghaṭīyantravāhanavat 
ekānusaṃdhibalāt citraṃ mantrodayaṃ divāniśam anusaṃdadhat 
mantradevatayā saha tādātmyam eti | tatra sadodite prāṇacārasaṃkhyayaiva 
[ṣaṭśatādhikaikaviṃśatisahasrarūpayā |]

60)

udayasaṃkhyā [mantrasyeti śeṣaḥ |] vyākhyātā taddviguṇite [kh: 
tadviguṇite iti pāṭhaḥ |] tadardham ityādikrameṇa aṣṭottaraśate cakre 
dviśata udayaḥ iti krameṇa sthūlasūkṣme cārasvarūpe viśrāntasya prāṇacāre 
kṣīṇe kālagrāse vṛtte saṃpūrṇam ekamevedaṃ saṃvedanaṃ 
citraśaktinirbharaṃ bhāsate | kālabheda eva saṃvedanabhedakaḥ na vedyabhedaḥ 
[nanu kālajanito bhedo mā bhūt jñeyajanitastu syāt idaṃ nīlajñānam 
ityādikrameṇa ityāśaṃkyāha vedyabheda iti | śikharastheti śikharasthasya hi 
satyapi gṛhādivedyabhede eka eva nagarāvabhāsaḥ syāt | jñānasyeti tasmāt 
vedyasya kāla eva bhedakaḥ sa ca atisūkṣmakṣaṇātmā abhimataḥ yena 
jñānasya utpādānantaraṃ nirodho bhavet | nanu sūkṣmasya kṣaṇasya kiṃ 
lakṣaṇamucyate yāvat jñānaṃ tiṣṭhati sa kṣaṇaḥ iti na tu avedyo niraṃśaḥ 
kālalavakṣaṇa iti tasya hi nirvaktumaśakyatvāt |] śikharasthajñānavat 
jñānasya yāvān avasthitikālaḥ sa eva kṣaṇaḥ prāṇodaye [nanu jñānaṃ 
kiyatkālaṃ tiṣṭhati ityāha prāṇodaye ceti prāṇasya pūrvoktanītyā 
tuṭyādikramo'sti iti kathamuktaṃ prāṇodaye ekameva jñānamiti ? maivam 
ityāha avaśyamiti |] ca ekasmin ekameva jñānam avaśyaṃ caitat anyathā 
vikalpajñānam ekaṃ na kiṃcit syāt kramikaśabdārūṣitatvāt mātrāyā api 
kramikatvāt | yadāha 

61)

tasyādita udāttamardhahrasvam | (pā0 vyā0 1-2-32)

iti | tasmāt spandāntaraṃ yāvat na uditaṃ tāvat ekameva jñānaṃ | ata [ata 
iti anekadharmaparāmarśatve'pi ekatvalakṣaṇāt | yaduktam

tathā tathā parāmarśaśakticakreśvaro vibhuḥ |
sthūlaikāśītipadajaparāmarśairvibhāvyate ||

tata eva parāmarśo yāvatyeva samāpyate |
tāvattatpadamuktaṃ no suptiṅniyamayantritam ||iti |] eva 
ekāśītipadasmaraṇasamaye vividhadharmānupraveśamukhena eka eva asau 
parameśvaraviṣayo vikalpaḥ [vikalpaḥ śuddhavidyārūpaḥ |] 
kālagrāsena avikalpātmā eva saṃpadyate iti | evam akhilaṃ kālādhvānaṃ 
prāṇodaya eva paśyan sṛṣṭisaṃhārāṃśca vicitrān niḥsaṃkhyān tatraiva 
ākalayan ātmana eva pārameśvaryaṃ pratyabhijānan mukta eva bhavati iti |

saṃvidrūpasyātmanaḥ prāṇaśaktiṃ 
paśyanrūpaṃ tatragaṃ cātikālam |
sākaṃ sṛṣṭisthemasaṃhāracakrai-
rnityodyukto bhairavībhāvameti ||

62)

[atreyaṃ chāyā

sakalaprakāśarūpasaṃvedana-
spandataraṅgakalanā tasya prāṇaḥ |
prāṇābhyantare pariniṣṭhitaṃ
sakalaṃ kālaprasaraṃ parijñāya ||

yathollasati yathā vinivartate
pavanaśaktistathaiva maheśvaraḥ |
sṛṣṭipralayaṃ darśayitvā ca nimajjayati
sa ātmā nityacittattvasāgaraḥ ||]
sa-ala pra-āsa rū-u saṃve-aṇa
phandataraṅgakalaṇa tahu pāṇura |
pāṇabbhantarammi pariṇidva-u
sa-ala-u kālapasaru pari-āṇu ||

jaha ullasa-i jaha viṇṇirujja-i
pavanasatti taha ehu mahesaru |
siṭṭipala-aṃ dasa-i ja ṇimajja-i
so attā ṇa-u cittahasā-aru ||

iti śrīmadabhinavaguptācāryaviracite tantrasāre kālādhvaprakāśanaṃ nāma 
ṣaṣṭhamāhnikam ||6||


atha saptamamāhnikam |

atha deśādhvā |

tatra [prācyabhāge kālādhvā uttare tu deśādhvā iti kālādhvānamuktvā 
deśādhvānaṃ vaktumupakramate tatreti |] samasta eva ayaṃ 
mūrtivaicitryābhāsanaśaktijo [padārthasya svaṃ rūpaṃ mūrtiḥ |] 
deśādhvā saṃvidi viśrāntaḥ taddvāreṇa [saṃviddvāreṇa tatsṛṣṭe 
śūnyādāvadhvā sthitaḥ | yaduktam 

adhvā samasta evāyaṃ cinmātre saṃvyavasthitaḥ |
yattatra nahi viśrāntaṃ tantrabhaḥkusumāyate ||
iti |] śūnye buddhau prāṇe nāḍīcakrānucakreṣu bahiḥ śarīre 
yāvalliṅgasthaṇḍilapratimādau samasto'dhvā pariniṣṭhitaḥ taṃ samastam 
adhvānaṃ [yaduktam

pṛthivī kaṭhinatvena dravyatve'mbhaḥ prakīrtitam |
ityādi nītyā samasto'dhvā dehalīna iti |] dehe vilāpya dehaṃ ca prāṇe taṃ 
dhiyi tāṃ śūnye tatsaṃvedane nirbharaparipūrṇasaṃvit saṃpadyate 
ṣaḍtriṃśattattvasvarūpajñaḥ taduttīrṇāṃ saṃvidaṃ paramaśivarūpāṃ 
paśyan viśvamayīmapi saṃvedayeta aparathā vedyabhāgameva kaṃcit paratvena 
gṛhṇīyāt māyāgarbhādhikāriṇaṃ viṣṇubrahmādikaṃ vā tasmāt avaśyaṃ 
prakriyājñānapareṇa bhavitavyam | taduktaṃ 

na prakriyāparaṃ jñānam ���.. |

iti | tatra pṛthivītattvaṃ śatakoṭipravistīrṇaṃ brahmāṇḍagolakarūpam 
[brahmaṇaḥ saṃbandhi aṇḍaṃ vastupiṇḍo'ṇḍamucyate iti niruktasthityā 
vastūnāṃ tanvakṣādīnāṃ piṇḍaḥ samūho'ṇḍaṃ tadeva golakaṃ ca |

prathamaṃ kāñcanaṃ proktaṃ raukmaṃ caiva dvitīyakam |
tāmraṃ ca lohajaṃ caiva kramādeva vyavasthitam ||

ityevamādīnyaṇḍāni |] | tasya antaḥ kālāgnirnarakāḥ pātālāni pṛthivī 
svargo yāvadbrahmaloka iti | brahmāṇḍabāhye rudrāṇāṃ śataṃ | na ca 
brahmāṇḍānāṃ saṃkhyā vidyate | tato dharātattvāt daśaguṇaṃ jalatattvaṃ | 
tata uttarottaraṃ daśaguṇam ahaṃkārāntaṃ | tadyathā jalaṃ tejo vāyurnabhaḥ 
tanmātrapañcakākṣaikādaśagarbho'haṃkāraśceti | ahaṃkārāt śataguṇaṃ 
buddhitattvaṃ [yaduktaṃ

ākāśāvaraṇādūrdhvamahaṃkārādadhaḥ punaḥ |
tanmātrādimanontānāṃ purāṇi śivaśāsane || iti |] tataḥ sahasradhā 

65)

prakṛtitattvaṃ etāvatprakṛtyaṇḍam | tacca brahmāṇḍavat asaṃkhyam | 
prakṛtitattvāt puruṣatattvaṃ ca daśasahasradhā | puruṣāt niyatiḥ lakṣadhā | 
niyateruttarottaraṃ daśalakṣadhā kalātattvāntam | tadyathā niyatiḥ rāgaḥ 
aśuddhavidyā kālaḥ kalā ceti | kalātattvāt koṭidhā māyā etāvat māyāṇḍam | 
māyātattvāt śuddhavidyā daśakoṭiguṇitā | vidyātattvāt īśvaratattvaṃ 
śatakoṭidhā | īśvaratattvāt sādākhyaṃ sahasrakoṭidhā [k: 
sādāśivākhyaṃ sahasrakoṭidhā sādāśivākhyāditi pāṭhaḥ |] | 
sādākhyāt vṛndaguṇitaṃ śaktitattvam iti śaktyaṇḍam | sā saktirvyāpya yato 
viśvamadhvānam antarbahirāste tasmāt vyāpinī | evametāni uttarottaram 
āvaraṇatayā vartamānāni tattvāni uttaraṃ vyāpakaṃ pūrvaṃ vyāpyam iti 
sthityā vartante | yāvadaśeṣaśaktitatvānto'dhvā śivatattvena vyāptaḥ | 
śivatattvaṃ punaraprameyaṃ sarvādhvottīrṇaṃ sarvādhvavyāpakaṃ ca | 
etattattvāntarālavartīni yāni bhuvanāni tatpataya eva atra pṛthivyāṃ sthitā iti | 
teṣu āyataneṣu

66)

ye mriyante teṣāṃ tatra tatra gatiṃ te vitaranti | kramācca ūrdhvordhvaṃ 
prerayanti dīkṣākrameṇa | tadyathā 

kālāgniḥ kūṣmāṇo
narakeśo hāṭako'tha bhūtalapaḥ |
brahmā munilokeśo
rudraḥ pañcāṇḍamadhyagataḥ ||

adhare'nantaḥ prācyā 
kapālivahnyantanir-ṛtibālākhyāḥ |
laghunidhipatividyādhipa-
śambhūrdhvāntaṃ sa vīrabhadrapatiḥ ||

iti ṣoḍaśapurametat-
pārthivamaṇḍaṃ nivṛttikalā |
lakulīśabhārabhūti-
rdiṇḍyāṣāḍhī ca puṣkaranimeṣau ||

prabhāsasureśāviti
salile pratyātmakāṣṭakaṃ proktam |
bhairavakedāramahā-
kālā madhyāsrajalpākhyāḥ ||

śrīśailahariścandrā-
viti guhyāṣṭakamidaṃ mahasi |
bhīmendrāṭṭāḥ savimala-
kanakhalanākhalakurusthitigayākhyāḥ ||

67)

atiguhyāṣṭkametan-
maruti satanmātrake sākṣe |
sthāṇusuvarṇākhyau kila
bhadro gokarṇako mahālayakaḥ ||

avimuktarudrakoṭī-
vastrāpada ityadaḥ pavitraṃ khe |
sthūlasthūleśaśaṅku-
śrutikālāścātha maṇḍalabhṛt ||

mākoṭāṇḍadvitaya-
cchagalāṇḍāṣṭakaṃ tvahaṅkāre |
anye tvahaṅkārāntā-
stanmātrāṇīndriyāṇi cetyāhuḥ ||

dhiyi devayonayo'ṣṭau
prakṛtau yogāṣṭakaṃ kilākṛtaprabhṛti |
iti saptāṣṭakabhuvanā
pratiṣṭhitiḥ salilatastu mūlāntā ||

nari vāmādyā rudrā
ekādaśa vitkalāniyatiṣu syāt |
pratyekaṃ bhuvanadvaya-
matha kāle tantrayaṃ niśāyāṃ syuḥ ||

aṣṭāvaṣṭāviṃśati-
bhuvanā vidyā narānniśāntamiyam |

68)

[chāyā

parameśvaraśāsanasunirūpita-
suvimalasakalādhvānam |
dhiyi nabhasi śarīre prāṇe
saṃvidi nirīkṣya paśyati parameśam ||]
vidyāyāṃ pañca syu-
rvidyeśāṣṭakamathaiśvare [evaṃ sarveṣāṃ bhuvanānāṃ saṃkhyā 
aṣṭādaśottaraṃ śataṃ yaduktam |

evaṃ tu sarvatattveṣu śatamaṣṭādaśottaram |
bhuvanānāṃ parijñeyaṃ saṃkṣepānna tu vistarāt || iti |] tattve ||

sādākhye pañcakamiti
aṣṭādaśabhuvanikā śāntā |
adhvānamimaṃ sakalaṃ
dehe prāṇe'tha dhiyi mahānabhasi ||

saṃvidi ca paraṃ paśyan-
pūrṇatvādbhairavībhavati ||

paramesarasāsaṇasuṇiru-i-u
suṇivima-ala-addhāṇa-u |
jhahujjhatisarīripavaṇi
saṃve-a ṇi-apekkhanta-u pahura-i pari-uṇṇu ||

iti śrimadabhinavaguptācāryaviracite tantrasāre deśādhvaprakāśanaṃ nāma 
saptamamāhnikam ||7||


atha aṣṭamamāhnikam |

atha tattvādhvā nirūpyate |

yadidaṃ vibhavātmakaṃ [svātantryasphārātmakam |] 
bhuvanajātamuktaṃ garbhīkṛtānantavicitrabhoktṛbhogyaṃ tatra yadanugataṃ 
mahāprakāśarūpaṃ [nāprakāśaḥ prakāśate iti nyāyena 
svātantryasphāramayatvāt viśvasya prakāśānyathānupapattyā yat anuyāyi 
rūpaṃ bhāsate sa eva śiva iti |] tat mahāsāmānyakalpaṃ paramaśivarūpam 
| yattu katipayakatipayabhedānugataṃ rūpaṃ tattattvaṃ yathā pṛthivī 
[yaduktam |

tathāhi kālasadanādvīrabhadrapurāntagam |
dhṛtikāṭhinyagarimādyavabhāsāddharātmatā ||
iti | tena yathā sāsrādiyogāta daṇḍamuṇḍādau gotvavyapadeśastathā 
dhṛtyādyavabhāsāt kālāgnyādeḥ pṛthivītvavyapadeśaḥ |] nāma 
dhṛtikāṭhinyasthaulyādirūpā 
kālāgniprabhṛtivīrabhadrāntabhuvaneśādhiṣṭhitasamastabrahmāṇḍānugatā | 
tatra eṣāṃ tattvānāṃ kāryakāraṇabhāvo darśyate sa ca dvividhaḥ 
pāramārthikaḥ [pāramārthika ityasyāyaṃ bhāvaḥ laukikadṛṣṭyā 
sṛṣṭyādyāvirbhāve'pi svatantraprakāśasvarūpasphāramayatvādasya 
viśvasya sṛṣṭāvapi svarūpābhinnarūpayā sthityā svarūpaviśrāntyā ca 
saṃhṛtyā sthitatvāt na kiñcit svarūpātiriktatvamasya saṃjātamiti na kiñcit 
kālpanikatvamiti pāramārthikatvam |] sṛṣṭaśca [nanu yadyevaṃ tarhi 
viśvapratiṣṭhā iyaṃ niyamenāvabhāsamānā kathaṃ tiṣṭhatītyataḥ kālpanikaḥ 
kāryakāraṇabhāvo viśvapratiṣṭhāyai avaśyaṃ kalpanīya ityāha sṛṣṭa iti 
sṛṣṭo niyatyavasthāpitaḥ |] | tatra pāramārthika etāvān 
kāryakāraṇabhāvo yaduta kartṛsvabhāvasya svatantrasya bhagavata evaṃ 
vidhena śivādidharāntena vapuṣā svarūpabhinnena svarūpaviśrāntena ca 
prathanaṃ | kalpitastu kāryakāraṇabhāvaḥ parameśecchayā niyatiprāṇayā 
nirmitaḥ sa ca yāvati yadā niyatapaurvāparyāvabhāsanaṃ satyapi adhike 
[adhika iti tena daṇḍacakrādeḥ satyapi anvaye mṛdeva kāraṇaṃ tattu 
sahakārī iti svarūpānugama iti tena kṛttikārohiṇyudayādau kāryakāraṇasya 
satyapi paurvāparyāvabhāse nirāsaḥ nahi tatra rūpānvayaḥ |] 
svarūpānugatam etāvatyeva tena [teneti 
rūpānvayopakṛtapaurvāparyaniyamātmakakāryakāraṇatāyā yato'vabhāsanaṃ 
parameśecchayā na tu vāstavatayā |] yogīcchāto'pi aṅkuro bījādapi 
svapnādau ghaṭāderapīti | tatrāpi [nanu svapne ghaṭādaṅkura iti bhrāntiḥ 
? bhaivaṃ svapnaṃ prabodhaparyantaṃ tasyāvabhāsaḥ ata eva coktaṃ sa ca 
tāvatyeveti | yadyevaṃ svagṛhasahavartanam ityāha tathāpīti |] ca 
parameśvarasya kartṛtvānapāya iti akalpito'pi asau pāramārthikaḥ sthita eva | 
pāramārthike hi bhittisthānīye 

71)

sthite rūpe sarvam idam [kalpitakāryakāraṇabhāvagataṃ mṛddaṇḍādi |
] ullikhyamānaṃ ghaṭate na anyathā ata eva sāmagryā 
[samagrāṇāmekapramātṛviśrāntisatattvamekaṃ rūpaṃ sāmagrī na 
punarvyastāḥ samagrā daṇḍādayaḥ kāraṇam | yaduktam 

ārambhe bhava sarvatra karma vā karaṇādi vā |
viśvamastu svatantrastu kartā tatraikako bhavān ||

iti | tathānyatrāpi

deśakālapadārthānāṃ yadyadvastu yathā yathā |
tattadrūpeṇa yā bhāti tāṃ śraye saṃvidaṃ kalām || iti |] eva kāraṇatvaṃ 
yuktaṃ | sā hi samastabhāvasaṃdarbhamayī svatantrasaṃvedanamahimnā tathā 
niyatanijanijadeśakālabhāvarāśisvabhāvā pratyekaṃ 
vastusvarūpaniṣpattisamaye tathābhūtā tathābhūtāyā hi anyathābhāvo yathā 
yathā adhikībhavati tathā tathā kāryasyāpi vijātīyatvaṃ tāratamyena puṣyati 
ityevaṃ saṃvedanasvātantryasvabhāvaḥ parameśvara eva viśvabhāvaśarīro 
[dṛśyaṃ śarīram iti śivasūtroktanītyā viśvabhāvaśarīraḥ | nanu ca 
kathaṃ pratyakṣadṛṣṭamapi vaiparītyena pratītigocaratāmiyāt yataḥ 
kumbhakāraṇa ghaṭakaraṇe kartṛtvaṃ pratyakṣato dṛśyate nāpratyakṣasya 
śivasya kumbhakārasya pratyakṣato vyāpriyamāṇasya dṛṣṭatvādityata āha 
kumbhakārasaṃvida iti | uktaṃ ca tantrāloke | 

kumbhakārasya yā saṃviccakradaṇḍādiyojane |
śiva eva hi sā yasmātsaṃvidaḥ kā viśiṣṭatā ||

iti | nanu ca śarīreṇaiva kriyākartā kumbhakāro lakṣyate iti 
śiraḥpṛṣṭhakaṭicālananyāyena kumbhakārasaṃvida iti asamañjasam iti 
svātmani aparituṣyantaṃ prati punarapyāha kumbhakāraśarīrasya ityādi yathā 
bhāvarāśau na kasyacit kartṛtve vivādaḥ tathā śarīrasyāpi jaḍatvāt 
bhāvarāśisamatvam iti nahi anayorastitve ko'pi viśeṣaḥ ubhayorapi 
paratantratvāt ityalam |] ghaṭādernirmātā 
kumbhakārasaṃvidastato'nadhikatvāt 

72)

kumbhakāraśarīrasya ca bhāvarāśimadhye nikṣepāt kathaṃ 
kumbhakāraśarīrasya kartṛtvābhimānaḥ ? iti cet parameśvarakṛta 
[pratibhuva iva ādhamarṇyābhimānaḥ |] evāsau ghaṭādivat 
[kumbhakāraśarīrasya kartṛtābhimāno ghaṭasadṛśaḥ 
abhimānaghaṭayoḥ sādṛśyamityarthaḥ |] bhaviṣyati | tasmāt 
sāmagrīvādo'pi viśvaśarīrasya saṃvedanasyaiva [vyastapakṣastāvat dūrata 
eva sthitaḥ nahi vyastā mṛccakradaṇḍādayaḥ kadācidapi 
ghaṭanirmāṇasamarthāḥ samastāḥ punarekapramātṛviśrāntiṃ vinā na 
samarthā ityavivādaḥ |] kartṛtāyām upodbalakaḥ | merau [merau hi 
ityatra meruśabdena devairdurlabhatvaṃ bṛhattvamekatvaṃ ca | tathāvidho 
ghaṭo na bhavet ityatra tathāvidhaśabdena 
mānuṣyaistyājyatvamaṇutvamanekatvaṃ ca dhvanyate |

anantaśaktidhāritvānmeruṃ vai ghaṭanāyakam |
jñātvā saṃpāditaṃ kṣīṇā kiṃ śive kartṛtā tataḥ ||

ityanena merukaraṇamapi akiṃcitkauśalāvahaṃ śivasya ityādi anyatroktam 

khagolamadhyacārī yaḥ savitā viśvarūpadhṛt |
tasya sattāṃ svecchayaiva kurvatī kartṛtā śive || ityādi |] hi tatrasthe na 
bhavet tathāvidho 

73)

ghaṭaḥ | evaṃ kalpite'smin [k: evaṃ hi vikalpate iti pāṭhaḥ |] kāryatve 
śāstreṣu tattvānāṃ kāryakāraṇabhāvaṃ prati [kh: kāraṇabhāvatvaṃ 
prati iti pāṭhaḥ |] yat bahuprakāratvaṃ [ata eva 
tathābhānaparamārthatayā sthiteḥ |
kāryakāraṇabhāvo'sya loke śāstre ca kathyate ||

māyāto'vyaktakalayoriti rauravasaṃgrahe |
śrīpūrve tu kalātattvādavyaktamiti kathyate ||
ityādi bahuprakāratvam |] tadapi saṃgataṃ gomayāt kīṭāt yogīcchāto 
mantrādauṣadhāt vṛścikodayavat | tatra [evaṃ bahuprakāratāyāṃ kasya 
nyāyatvam bahuprakāratve hi sukaṭakakṣobhanyāyena alaṃ 
paravādanirākaraṇena iti mahān vyāmohaḥ saṃpannaḥ iti tannirākartumāha 
tatretyādinā | nijatantradṛśā pūrvaśāstradṛśā |] nijatantradṛśā 
taṃ kalpitaṃ darśayāmaḥ | tatra parameśvaraḥ pañcabhiḥ śaktibhiḥ nirbhara 
[nirbharaḥ paripūrṇaḥ | yaduktam 

śivaśaktisadāśivatāmīśvaravidyāmayīṃ ca tattvadaśām |
śaktīnāṃ pañcānāṃ vibhaktabhāvena bhāsayati || iti |] ityuktam sa 
svātantryāt śaktiṃ tāṃ tāṃ mukhyatayā [sarvatra hi pañcaśaktisaṃbhava 
iti mukhyatvamekasyāḥ aparāsāṃ gauṇatvaṃ na tu asaṃbhava eva |] 
prakaṭayan 

74)

pañcadhā [iha khalu cinmātrasvabhāvaḥ para eva śivaḥ pūrṇatvāt 
nirāśaṃso'pi svasvātantryamāhātmyāt bahirullilasiṣayā 
parānandacamatkāratāratamyena prathamamahamiti parāmarśarūpatayā 
śaktidaśāmadhiśayānaḥ prasphuret anantaramahamidamiti ca 
parāmarśadvayātmatāmavabhāsayet tatra ca śuddhacinmātrādhikaraṇa eva 
ahamityaṃśe yadā parameśvara idamaṃśamullāsayati tadā 
tasyonmīlitamātracitrakalpabhāvarāśiviṣayatvena asphuṭatvādicchāpradhānaṃ 
sadāśivatattvam ahamidamiti bhāvarāśau sphuṭībhūte tadadhikaraṇa eva 
idamaṃśe yadāhamaṃśaṃ niṣiñcati tadā 
jñānaśaktipradhānamīśvaratattvam idamahamiti 
prarūḍhabhedabhāvarāśigatedamaṃśasphuraṇe tu cinmātragatatvena 
ahamaṃśo yadā samullasati bhedādvaitavādināmiva īśvarasya yaḥ 
samadhṛtatulāpuṭanyāyena ahamidamiti parāmarśaḥ tatkriyāśaktipradhānaṃ 
vidyātattvamiti pañcadhā vibhāgaḥ |] tiṣṭhati | citprādhānye śivatattvam 
ānandaprādhānye śaktitattvam icchāprādhānye sadāśivatattvam icchāyā hi 
jñānakriyayoḥ sāmyarūpābhyupagamātmakatvāt jñānaśaktiprādhānye 
īśvaratattvam kriyāśaktiprādhānye vidyātattvam [iyatparyantaṃ 
śivādyavasthābhede'pi svasvarūpasya akhaṇḍanirāśaṃsasvabhāvatvāt na 
kaścidavasthābhedaḥ māyopari vartamānatvāt turyarūpatvāt iti 
svātantryalakṣaṇameva tattvapañcakam |] iti | atra ca tattveśvarāḥ 
śivaśaktisadāśiveśvarānantāḥ brahmeva nivṛttau [nivṛttau 
vakṣyamāṇāyāṃ nivṛttikalāyām | nanvanekatra 
ekarūpānugamastattvamityuktam tathā cātra kathamityāha eṣāmiti |] eṣāṃ 
sāmānyarūpāṇāṃ viśeṣā anugativiṣayāḥ pañca tadyathā śāmbhavāḥ 

75)

śāktāḥ mantramaheśvarāḥ mantreśvarāḥ mantrā iti śuddhodhvā | iyati 
sākṣāt śivaḥ kartā aśuddhaṃ [māyāprabhṛtikam |] 
punaradhvānamanantāparanāmāghoreśaḥ sṛjati īśvarecchāvaśena 
prakṣubdhabhogalolikānāmaṇūnāṃ [kṣobhasya lolikākhyasya sahakāritayā 
sphuṭam | 
tiṣṭāsā yogyataunmukhyamīśvarecchāvaśācca tat ||
iti kārmamalasya sahakāritāyāmunmukhataiva bhogalolikā |] 
bhogasiddhyartham | tatra [nanu
tatrāpi kārmamevaikaṃ mukhyaṃ saṃsārakāraṇam |
iti sarvatra kārmameva saṃsārakāraṇamuktam iha punaḥ keyaṃ lolikā ityata āha 
tatretyādi |] loliko'pūrṇammanyatārūpaḥ parispandaḥ 
akarmakamabhilāṣamātrameva [kriyārūpatvābhāvāt 
akarmakamicchāmātraṃ pratiniyataviṣayābhāvāt bhaviṣyadavacchedaḥ ata eva 
na malastattvāntaram | sākṣādavacchedādhāyakatvābhāvena nahi etat 
kiṃcidvastu api tu pūrṇasvarūpākhyātimātramityarthaḥ |] 
bhaviṣyadavacchedayogyateti na malaḥ puṃsastattvāntaram | rāgatattvaṃ tu 
karmāvacchinno'bhilāṣaḥ | karma [kiṃcinme bhūyāditi sāmānyarūpam |
] tu tatra karmamātraṃ buddhidharmastu rāgaḥ karmabhedacitra 
[bubhukṣā pipāsādiviśeṣarūpeṇa citra iti |] karmabhedacitra iti 
vibhāgo vakṣyate |

76)

so'yaṃ [nanu svatantro bodha eva paramārtha iti siddhāntaḥ tadatiriktaḥ kuto 
malo nāma vastutāmiyādityāśaṅkyāha so'yamiti |] malaḥ parameśvarasya 
svātmapracchādanecchātaḥ nānyat kiṃcit vastvapi ca tat 
[pracchādanātmarūpatvāt |] parameśvarecchātmanaiva dharāderapi 
[paraprakāśāvyatiriktatve'pi yathā dharādirūpatvaṃ tathā malo'pītyarthaḥ |; 
kh: parameśvarecchātmana eva dharāderiti pāṭhaḥ |] vastutvāt | sa ca 
[nanu

sa punaḥ śāṃbhavecchātaḥ śivābhedaṃ parāmṛśan |
kramānmantreśatāvedyarūpo yāti śivātmatām ||
ityuktatvāt kathaṃ vijñānakevalasyāpi malo'stītyāśaṅkyāha sa ceti |] 
malo [g: malasteṣāṃ vidyamāna iti pāṭhaḥ |] vijñānakevale 
vidyamāno dhvaṃsonmukha iti na svakāryaṃ karma āpyāyayati | 
pralayakevalasya tu jṛmbhamāṇa eva āsta iti malopodbalitaṃ [kh: iti teṣāṃ 
malodbalitamiti; g: iti teṣāṃ vijñānakevale iti ca pāṭhaḥ |] karma 
saṃsāravaicitryabhoge nimittam iti tadbhogavāsanānuviddhānāmaṇūnāṃ 
bhogasiddhaye śrīmān aghoreśaḥ sṛjati iti yuktamuktaṃ malasya [k: 
yuktam uktamalasyeti pāṭhaḥ |] ca prakṣobha īśvarecchābalādeva [tena 
vastusāmarthyapakṣanirāsaḥ | etadevopodbalayati jaḍetyādi | yaduktaṃ

na jaḍaścidadhiṣṭhānaṃ vinā kvāpi kṣamo yataḥ | iti |]

77)

jaḍasya svataḥ kutracidapi asāmarthyāt | aṇurnāma [nanu ca alamatra 
parādvayakathanena yato vyatiriktāneva aṇūnpratimalamīśvaro niyuñjyāt 
ityākṣepamāśaṅkyāha aṇurityādi tena cidrūpatvānmaheśvara eva 
prakāśātmā aṇurnāma acidrūpataiva svasvātantryāt gṛhītamalarūpatā | 
yathoktam |

śiva eva gṛhītapaśubhāvaḥ | iti |] kila cidacidrūpāvabhāsa eva tasya 
cidrūpamaiśvaryameva acidrūpataiva malaḥ tasya ca sṛjataḥ 
parameśvarecchāmayaṃ tata eva ca nityaṃ 
[māśabdavācyādvināśarūpānniṣedhādyātā iti 
māyāśabdārthānugamāt |] srakṣyamāṇavastugatasya [k: 
iṣyamāṇavastugatasyārthasya jaḍatayeti pāṭhaḥ |] rūpasya 
jaḍatayābhāsayiṣyamāṇatvāt [tataśca mīyate heyatayā paricchidyate 
yogibhiriti |] jaḍaṃ sakalakāryavyāpanādirūpatvācca vyāpakaṃ 
[sarvatra mātīti sūkṣmatvādvyāpakam |] māyākhyaṃ tattvam 
upādānakāraṇaṃ tadavabhāsakāriṇī ca parameśvarasya 
[nikhilajagadullāsanakrīḍāśālinaḥ parameśvarasya bhedāvabhāsane 
svātantryaṃ tataśca apūrṇatāprathanena mīnāti hinasti iti māyāśaktirucyate |
] māyā

78)

nāma śaktistato'nyaiva [nanu ca yadi nāma 
māyāśaktirdevasyāvyabhicāriṇītyupagatam tatkathamasau bhedanirūpaṇaṃ 
tattvabhāvamiyāt atrocyate yathā pārameśvarya eva śaktayaḥ kalādyā api 
tattvavyapadeśabhājastathā māyāpi tathā coktam |

niruddhaśakteryā kiṃcitkartṛtodbalanātmikā |
nāthasya śaktiḥ sādhastātpuṃsaḥ kṣeptrī kalocyate ||
yathā ca māyā devasya śaktirabhyeti bhedinam |
tattvabhāvaṃ tathānyo'pi kalādistattvavistaraḥ || iti |] | evaṃ 
kalāditattvānāṃ dharāntānāmapi dvairūpyaṃ nirūpyam | atra ca dvairūpye 
pramāṇamapi āhurabhinavaguptaguravaḥ | yat saṃkalpe bhāti tatpṛthagbhūtaṃ 
bahirapi asti sphuṭena vapuṣā ghaṭa [tenāyamatra prayogaḥ tanmātrādi 
tattvajātaṃ bahirasti saṃkalpādau pṛthgbhānāt yat saṃkalpādau 
pṛthagbhavati tadbahirasti yathā ghaṭādiḥ yatra bahirasti tatra pṛthagbhāti 
yathā paramātmā pṛthagbhāti ca tanmātrādi tattvajātaṃ tasmādbahirasti 
paramātmanaśca sakṛdvibhāto'yamātmā ityādau pṛthagavabhāsaḥ sthito'pi 
vidyududdyotanavat na prarohamupagacchet | svātantryāmuktamātmānam 
ityādinyāyena mūlabhūtānavacchinnāhaṃvimarśamayatvasya 
tirobhāvābhāvāt |] iva | tathā ca māyākalādikhapuṣpāderapi 
[khapuṣpāderapi kāladivyātrasāpekṣaṃ nāstitvam iti eṣaiva vartanī ato 
naiva vicāraḥ |] eṣaiva vartanī iti kevalānvayī hetuḥ | anena ca 
māyākalāprakṛtibuddhyādiviṣayaṃ sākṣātkārarūpaṃ jñānaṃ ye bhajante 
te'pi siddhāḥ 

79)

siddhā [māyādīnāṃ śaktirūpatvenāpi nirūpaṇāt |] eva [k: 
siddhā iti padaṃ sakṛdeva |] | evaṃ sthite māyātattvāt viśvaprasavaḥ 
[māyāyā hi sarvātmasu sāmānyatayā sthitatvāt |] | sa ca yadyapi 
akramameva [pāramārthikakāryakāraṇabhāvena |] tathāpi uktadṛśā 
[kālpanikena kāryakāraṇabhāvena |] kramo'vabhāsate iti | so'pi ucyate 
tatra pratyātma kalādivargo bhinnaḥ tatkāryasya kartṛtvopodbalanādeḥ 
pratyātmabhedena upalambhāt [kiṃcitkartṛtvajñatvādestatkāryajātasya 
pratyātmabhinnatayānubhavāt | kaścit kiṃcitkṛtvā vetti kaścidanyatkṛtvā 
jānāti iti pratyātmabhedopalambhaḥ |] sa tu vargaḥ [vargaḥ 
kalādivargaḥ |] kadācit ekībhavet [naṭamallaprekṣādau |] api 
īśvarecchayā sāmājikātmanāmiva tatra sarvo'yaṃ kalādivargaḥ śuddhaḥ 
[tatra kalāyāḥ śuddhatvaṃ parameśvārārcanadhyānādiviṣayam rāgo 
bhagavadviṣayamabhiṣvaṅgaṃ saṃprasūyate vidyāpi tadviṣayaṃ vivekam 
kālaśca tadupadeśādiviṣayameva kalanaṃ niyatiśca tadārādhanādāveva 
niyamanam |] yaḥ parameśvaraviṣayatayā 
tatsvarūpalābhānuguṇanijakāryakārī [k: kāryānukārī iti pāṭhaḥ |] 
saṃsārapratidvandvitvāt | sa ca parameśvaraśaktipātavaśāt tathā bhavati 

80)

iti vakṣyāmastatprakāśane | aśuddhastu tadviparītaḥ | tatra māyātaḥ kalā jātā 
yā suptasthānīyam aṇuṃ kiṃcitkartṛtvena yunakti [māyā hi 
cinmayācchivādbhedaṃ vidadhatī aṇoḥ suṣuptatāmivāpādayati iti 
adṛkkriyatve vidyākalayorupayogaḥ |] sā ca ucchūnatve saṃsārabījasya 
māyāṇvorubhayoḥ [nanu kalādipuṃyogo māyākāryamiti kathaṃ 
niścinumaḥ kalāyā māyaiva upādānaṃ nāṇurityāśaṅkyāha māyāṇvoriti | 
tathā coktam |

kalā māyāṇusaṃyogajāpyeṣā nirvikārakam |
nāṇuṃ kuryādupādānaṃ kintu māyāṃ vikāriṇīm || iti |] saṃyogāt 
utpannāpi māyāṃ vikaroti na avikāryamaṇum iti māyākāryatvam [tathā 
coktam |

malaścāvārako māyā bhāvopādānakāraṇam |
karma syātsahakāryeva sukhaduḥkhodbhavaṃ prati ||

iti | upādānakāraṇaṃ hi svarūpavikāramāsādya kāryānugāmitvena vartate 
yathā ghaṭādau mṛt naivamaṇuḥ tasya cidekarūpatvena nityatvāt ataśca 
ubhayasaṃyogajatve'pi asyā māyaiva upādānakāraṇam iti |] asyāḥ | evam 
anyonyaśleṣāt alakṣaṇīyāntaratvaṃ puṃskalayoḥ | māyāgarbhādhikāriṇastu 
[ananteśasya |] kasyacidīśvarasya prasādāt sarvakarmakṣaye 
māyāpuruṣaviveko bhavati yena māyordhve vijñānākala āste na jātucit 
māyādhaḥ kalāpuṃviveko vā yena 

81)

kalordhve [yena māyādho na saṃsaret |] tiṣṭhati | prakṛtipuruṣaviveko 
vā yena pradhānādho na saṃsaret | malapuruṣaviveke [yadyevaṃ 
tanmāyordhvaṃ kadā gacchati ityāha malapuruṣeti |] tu śivasamānatvaṃ | 
puruṣapūrṇatādṛṣṭau [malasaṃskārapraśame 
svātantryākhyavimarśadārḍhye sati |] tu śivatvameveti | evaṃ 
kalātattvameva kiṃcitkartṛtvadāyi [kh: kartṛtvābhidhāyi iti pāṭhaḥ |
] na ca kartṛtvam ajñasya iti | kiṃcijjñatvadāyinyaśuddhavidyā kalāto 
jātā sā [nanu sāṃkhyairanabhihitasya kartṛtvasya upapādakaṃ 
kalātattvaṃ ceducyate yuktametat taiḥ punarbuddhyādidvāreṇa uktasya 
jñatvasyābhidhāyi vidyātattvaṃ kimartham ityāha seti |] ca vidyā buddhiṃ 
paśyati tadgatāṃśca sukhādīn vivekena gṛhṇāti | 
buddherguṇasaṃkīrṇākārāyā [yadyapi sāṃkhyāḥ varaṇātmanā tamasā 
samāvṛtamapi rajasā śanaiḥ tadapasāraṇāt kvacideva pravartitaṃ sat 
aviśeṣeṇa prakāśātmakamapi sattvaṃ krameṇa sukhādi prakāśayediti 
triguṇāpi buddhiḥ krameṇa sukhādyātmano viṣayasya vivekena pradarśikā iti 
kathayanti tathāpi buddhiḥ sukhādyātmakaṃ viṣayaṃ darpaṇavadeva darśayet 
na vivekena guṇasaṃkīrṇatvāt ityata āha buddherguṇasaṃkīrṇākārāyā ityādi |
] vivekena grahītumasāmarthyāt | tasmāt buddhipratibimbito bhāvo vidyayā 
vivicyate | kiṃcitkartṛtvaṃ 

82)

kiṃcidbhāgasiddhaye kvacideva [nanu kiñcijjñatvenaiva 
kiñcitkartṛtvamapi ākṣiptamiti kimarthaṃ kiñcitkartṛtvamityatra punaḥ 
kiñcicchabdanirdeśa ityata āha kvacideveti |] kartṛtvam ityatra arthe 
paryavasyati kvacideva ca ityatra bhāge rāgatattvasya vyāpāraḥ | na [nanu 
avairāgyalakṣaṇo buddhidharmo'tra sāṅkhyairnimittamuktamiti 
kimanenāpūrveṇa rāgatattvenetyāha na cetyādi |] ca avairāgyakṛtaṃ tat 
avairāgyasyāpi araktidarśanāt | vairāgye dharmādāvapi raktirdṛśyate | 
tṛptasya ca annādau avairāgyābhāve'pi antaḥstharāgānapāyāt | tena vinā 
punaravairāgyānutpattiprasaṅgāt [tena rāgatattvasyaivāyaṃ mahimā yat 
buddhāvavairāgyādīnāṃ sarveṣāmeva dharmāṇāṃ bahiṣparyantatayā 
viśeṣeṇollāsa iti |] | kālaśca kāryaṃ kalayaṃstadavacchinnaṃ 
[akaravaṃ karomi kariṣyāmi iti pratītyanyathānupapattyā |] 
kartṛtvamapi kalayati tulye kvacittve asminneva kartṛtvam ityatrārthe 
niyatervyāpāraḥ | kāryakāraṇabhāve'pi asyā eva vyāpāraḥ tena kalāta eva 
etaccatuṣkaṃ jātam idameva [idamevetyādina māyā kalā kāla vidyā rāga 
niyatīnāṃ krameṇa nirdeśaḥ |] kiṃcidadhunā jānan abhiṣvaktaḥ karomi 
ityevaṃrūpā

83)

saṃvid dehapuryaṣṭakādigatā paśurityucyate | tadidaṃ māyādiṣaṭkaṃ 
[māyādikaṃ hi taṇḍulakalpe ātmani tudhavatsaṃlagnaṃ sthitam |] 
kañcukaṣaṭkam ucyate | saṃvido māyayā apahastitatvena kalādīnām 
uparipātināṃ kañcukavat avasthānāt | evaṃ kiṃcitkartṛtvaṃ yat 
māyākāryaṃ tatra kiṃcittvaviśiṣṭaṃ yat kartṛtvaṃ viśeṣyaṃ tatra 
vyāpriyamāṇā kalā vidyādiprasavahetuḥ iti nirūpitam | idānīṃ viśeṣaṇabhāgo 
yaḥ kiṃcidityukto [kalāyāstāvat kiñcidrūpatāviśiṣṭaṃ kartṛtvaṃ 
lakṣaṇaṃ tatra viśeṣyabhāge viśeṣyāṃśarūpaṃ yatkartṛtvaṃ tat 
bhoktṛrūpaṃ tathā kartṛtvasya svayamanavacchinnatve'pi yat 
kiñcidviṣayatvāt kiñcidrūpatvaṃ viśeṣaṇāṃśarūpaṃ tadvedyapakṣa eva 
sthitam tataśca tadaṃśaprayojakīkāreṇa ullasitaṃ sat 
bhāvivedyaviśeṣāpekṣayā vedyasāmānyātmakaṃ bhogyarūpaṃ pradhānam iti 
|] jñeyaḥ kāryaśca taṃ yāvat sā kalā svātmanaḥ pṛthak kurute 
[vahī rūpatayā vyaktatāṃ nayati |] tāvat eṣa eva 
sukhaduḥkhamohātmakabhogyaviśeṣānusyūtasya sāmānyamātrasya 
[viśeṣasya sāmānyapūrvakatvāt sāmyātmakasyāvibhāgarūpasya 
pradhānatattvasyetyarthaḥ |] tadguṇasāmyāparanāmnaḥ prakṛtitattvasya 
sargaḥ iti bhoktṛbhogyayugalasya samameva [yaduktam 

samameva hi bhogyaṃ ca bhoktāraṃ ca prasūyate |
kalā bhedābhisandhānādaviyuktaṃ parasparam ||

iti | vastuto hi anayoḥ 

bhoktaiva bhogyabhāvena sadā sarvatra saṃsthitaḥ |

ityādyukteradvayapāramārthikatayā abhede'pi māyīyaṃ bhedamabhisaṃdhāya 
parasparasāpekṣālakṣaṇamaviyuktatvaṃ darśitamiti |] kalātattvāyattā 
sṛṣṭiḥ |

84)

atra caiṣāṃ vāstavena pathā kramavandhyaiva [parasparasāpekṣatvāt 
kramasyeti bhāvaḥ |] sṛṣṭirityuktaṃ kramāvabhāso'pi cāstītyapi 
[ekaḥ kramaḥ sa ca vicitra iti apiśabdārthaḥ śatru-ṛddhimakṣyāyena 
| ekaḥ śatruḥ sa eva ṛddhimāniti śatru-ṛddhimakṣyāyaḥ |] 
uktameva | kramaśca vidyārāgādīnāṃ vicitro'pi dṛṣṭaḥ kaścidrajyan vetti 
ko'pi vidan rajyate ityādi | tena bhinnakramanirūpaṇamapi rauravādiṣu śāstreṣu 
aviruddhaṃ mantavyaṃ tadeva tu bhogyasāmānyaṃ prakṣobhagataṃ guṇatattvam 
| yatra [nanu sattvarajastamasāṃ sāmyāvasthā prakṛtiriti sāṃkhyoktanītiḥ 
tatkathamuktaṃ prakṛtigataṃ sukhādi bhogyamityāśaṅkyāha yatreti |] 
sukhaṃ bhogyarūpaprakāśaḥ sattvam duḥkhaṃ 
prakāśāprakāśāndolanātmakam ata eva kriyārūpaṃ rajaḥ mohaḥ 
prakāśābhāvarūpastamaḥ | tritayamapi 

85)

etat bhogyarūpam | evaṃ [nanu sāṃkhyoktanītyā kṣubdhameva pradhānaṃ 
kāryavargasya kāraṇamastu tat kimarthamuktaṃ kalpanādāyi 
guṇatattvamityāśaṅkyāha evamiti | yaduktam

na vaiṣamyamanāpannaṃ kāraṇaṃ kāryasūtaye | iti |] kṣubdhāt pradhānāt 
kartavyāntarodayaḥ [k: kartṛvyāpārāntarodaya iti pāṭhaḥ |] na 
akṣubdhāditi | kṣobhaḥ avaśyameva antarāle abhyupagantavya iti siddhaṃ 
sāṃkhyāparidṛṣṭaṃ pṛthagbhūtaṃ guṇatattvaṃ [yaduktam

naitatkāraṇatārūpaparāmarśāvarodhi yat |
kṣobhāntaraṃ tataḥ kāryaṃ bījocchūnāṅkurādivat ||

iti | tena guṇānāmapi tattvarūpatvamabhyupagantavyamiti bhāvaḥ |] | sa 
[nanu asyā jaḍatvāt kathaṃ kāryajananāya aunmukhyaṃ jāyate tataśca 
kṣubdhatvamapi na syāt ityāha sa ca kṣobha ityādinā | ayamatra bhāvaḥ 
sāṃkhyamate hi puṃso nirvikāratvāt bandhamokṣadaśayoraviśeṣa eveti 
baddhavanmuktamapi prati prakṛtiḥ kimiva na mahadādi vikārajātaṃ janayituṃ 
pravartate pravṛttyātmanaḥ svabhāvasyānapetatvāt | na cāsyā 
dṛṣṭāhamanena iti na punaretadarthaṃ pravarte ityanusaṃdhānamasti 
ācaitanyāt tasmāt anirmokṣa eveti | asmanmate hi svatantreśakartṛkaḥ kṣobhaḥ 
ato na kaścit doṣa iti |] ca kṣobhaḥ prakṛtestattveśādhiṣṭhānādeva 
anyathā niyataṃ puruṣaṃ prati iti na siddhyet | tato guṇatattvāt buddhitattvaṃ 
yatra puṃprakāśo viṣayaśca pratibimbam [dvividho hi viṣayapratibimbaḥ 
akṣadvāreṇa pratyakṣādau ataddvāreṇa utprekṣādau | 
puṃprakāśapratibimbādhāratvācca jāḍye'pi viṣayaprakāśo buddheriti |]

86)

arpayataḥ | buddhitattvāt ahaṅkāro [ahaṃkārasya cāsādharaṇaṃ 
kāryamihāpayogitvāllikhyate ahaṃkāra eva saṃrambhātmikayā vṛttyā 
prāṇādīnāṃ preraṇaṃ karoti yena karmabhogānuvedhanaṃ tāvat jīvati sa eva ca 
tadavasāne teṣāmapreraṇaṃ karoti yena mriyate | yathoktamanyatra 

ahaṃkṛtā pañcavidho vāyuḥ saṃrambharūpayā |
prerito jīvanāya syādanyathā maraṇaṃ punaḥ || iti |] yena buddhipratibimbite 
vedyasaṃparke kaluṣe puṃprakāśe anātmani ātmābhimānaḥ śuktau 
rajatābhimānavat | ata eva kāra ityanena kṛtakatvam asya uktaṃ sāṃkhyasya tu 
tat na yujyate sa hi na ātmano'haṃvimarśamayatām icchati vayaṃ tu 
kartṛtvamapi tasya icchāmaḥ | tacca śuddhaṃ vimarśa eva apratiyogi 
[evaṃ cāsyā ahaṃkṛtaḥ śuddhacitsvātantryamayāt 
svātmamātraviśrāntisatattvāt svarasoditādahambhāvāt iyānviśeṣaḥ yadiyaṃ 
jaḍāyāmanātmarūpāyāṃ buddhāvabhiniviṣṭeti |] 
svātmacamatkārarūpo'hamiti | eṣo'sya ahaṃkārasya karaṇaskandhaḥ 
[indriyarūpatetyarthaḥ |] | prakṛtiskandhastu 
[kāraṇarūpatetyarthaḥ |] tasyaiva trividhaḥ sattvādibhedāt |

87)

tatra sāttviko [sāttvikaḥ sattvapradhāno yato guṇībhūtatayā rajastamasorapi 
sadbhāva ityarthaḥ |] yasmāt manaśca buddhindriyapañcakaṃ ca tatra 
manasi janye sarvatanmātrajananasāmarthyayuktaḥ sa janakaḥ | śrotre tu 
śabdajananasāmarthyaviśiṣṭa [anyonyamithunāḥ sarve sarve sarvatra 
gāminaḥ |

ityuktyā anyonyamithunavṛttitvātsattvapradhāne'pyahaṅkāre 
tamaḥpradhānādahaṅkārāttanmātrāṇāmutpādaḥ 
sarvaviśiṣṭādahaṅkārānmanasaḥ tenedamāpatati yadahaṅkṛtaḥ 
sarvatanmātrakaraṇatvaṃ tena manasaḥ śabdādīnāṃ grāhyagrāhakabhāvo 
bhavet tatrāntaḥkaraṇatrayasya viśeṣaguṇā icchāsaṃrambhabodhākhyā 
ityanyatra nirūpitāḥ |] iti yāvat ghrāṇe gandhajananayogyatāyukta iti 
bhautikamapi [grāhyagrāhakabhāvaniyamānyathānupapattyā 
bhautikatvamindriyāṇāmiti tarkamataṃ tathā ca pārthivatvāt ghrāṇaṃ 
gandhasyaiva grāhakaṃ na rasāderiti tasyāyuktatāṃ darśayati 
bhautikatvamityādinā |] na yuktam ahaṃ śṛṇomi ityādyanugamācca 
sphuṭam āhaṅkārikatvam karaṇatvena [śrotrādīnāmāhaṃkārikatayā 
karaṇatvaṃ ghaṭate nānyathā kutaḥ ? ityāha karaṇetyādi | anyatheti 
kartraśādeva preraṇe kriyāviṣayatvāditi cet na anavasthā patet āhaṃkārikatve 
sati kartraśasparśatvaṃ yuktamahaṃparāmarśānuvedhādahaṃkṛtaḥ |; k: 
kāraṇatve ceti pāthaḥ |] ca avaśyaṃ kartraṃśasparśitvam anyathā 
karaṇāntarayojanāyām

88)

anavasthādyāpātāt | kartraṃśaśca ahaṅkāra eva tena mukhye karaṇe 
[yaduktam |

vidyāṃ vinā hi nānyeṣāṃ karaṇānāṃ nijā sthitiḥ |
kalāṃ vinā na tasyāśca kartṛtve jñātṛtā yataḥ ||

kalāvidye tataḥ puṃsāṃ mukhyaṃ tatkaraṇaṃ viduḥ | iti |] dve puṃsaḥ 
jñāne vidyā kriyāyāṃ kalā andhasya paṅgośca 
ahantārūpajñānakriyānapagamāt [apagame tu bāhyamarthaṃ prati 
pravṛttirna syāt | taduktam

ata eva vihīne'smin buddhikarmendriyaiḥ kvacit |
andhe paṅgau rūpagatiprakāśo na na bhāsate || iti |; k: paṅgoḥ śāntā 
jñānarūpakriyā iti pāṭhaḥ |] udriktatanmātrabhāgaviśiṣṭāt tu 
sāttvikādeva ahaṃkārāt karmendriya pañcakam ahaṃ gacchāmi iti 
ahaṅkāraviśiṣṭaḥ kāryakaraṇakṣamaḥ pādendriyaṃ tasya 
mukhyādhiṣṭhānaṃ bāhyam anyatrāpi tadastyeva iti rugṇasyāpi na 
gativicchedaḥ [hastādau gamanakriyādarśanāditi bhāvaḥ |] | na ca 
kartavyasāṃkaryamuktādeva hetoḥ kriyā karaṇakāryā mukhyaṃ ca 
gamanādīnāṃ kriyātvaṃ na rūpādyupalambhasya tasya kāṇādatantre guṇatvāt 
tasmāt avaśyābhyupeyaḥ karmendriyavargaḥ | sa ca pañcakaḥ 
anusandhestāvattvāt |

89)

tathāhi bahistāvattyāgāya vā anusandhiḥ ādānāya vā dvayāya vā 
ubhayarahitatvena svarūpaviśrāntaye [yatra hi idaṃ heyamidamupādeyamiti 
kṣobhaḥ praśāmyati |] vā tatra krameṇa pāyuḥ pāṇi pāda upastha iti | 
antaḥ prāṇāśrayakarmānusandhestu vāgindriyam tena indriyādhiṣṭhāne 
[nanu ca pāṇinā viharaṇaṃ pādenādānamityanyonyavṛttisāṃkaryaṃ 
kutastyamityata āha tena ityādi | nahi pāṇirviharaṇaṃ pādo vā ādānaṃ karoti 
api tu ekasminnevādhiṣṭhāne pādaḥ pāṇiśca viharaṇamādānaṃ ca kurute 
sarvaśarīravyāpakatvādeva sahavṛttyopalambha iti na kaścit doṣaḥ | taduktam |

etatkartavyacakraṃ tadasāṃkaryeṇa kurvate |
akṣāṇi sahavṛttyā tu buddhyante saṃkaraṃ jaḍāḥ || iti |] haste yat 
gamanaṃ tadapi pādendriyasyaiva karma iti mantavyam tena karmānantyamapi na 
indriyānantyam āvahet iyati rājasasya upaśleṣakatvam ityāhuḥ | anye tu 
rājasānmana ityāhuḥ | anye tu sāttvikāt mano rājasācca indriyāṇi iti | 
bhoktraṃśācchādakāt [bhogyāṃśasyodbhūtatayā prādhānyāt |] tu 
tamaḥpradhānāhaṃkārāt tanmātrāṇi vedyaikarūpāṇi pañca | 
śabdaviśeṣāṇāṃ hi kṣobhātmanāṃ yadekam 

90)

akṣobhātmakaṃ prāgbhāvi [yathoktam |

viśeṣāṇāṃ yato'vaśyaṃ daśā prāgaviśeṣiṇī |

iti | tena naitanmantavyaṃ kimebhiraparokṣairaviśeṣairviśeṣā eva pratyakṣā 
abhyupagamyantāmiti |] sāmānyam aviśeṣātmakaṃ tat śabdatanmātraṃ | 
evaṃ gandhānte'pi vācyaṃ | tatra śabdatanmātrāt kṣubhitāt [kṣubhitāt 
kāryajananonmukhādityarthaḥ |] avakāśadānavyāpāraṃ 
[avakāśadānavyāpāratvānnabhaso'nuguṇaṃ kāraṇaṃ śabda ityarthaḥ |
] nabhaḥ śabdasya vācyādhyāsāvakāśasahatvāt [tena yathā śabdaḥ 
svātmani vācyasyādhyāsasahatvādavakāśaṃ dadāti tathā tatkāryamākāśo'pi 
sarvasyeti |] | śabdatanmātraṃ kṣubhitaṃ vāyuḥ śabdastu asya nabhasā 
virahābhāvāt | rūpaṃ kṣubhitaṃ tejaḥ pūrvaguṇau tu pūrvavat | rasaḥ kṣubhita 
āpaḥ pūrve trayaḥ pūrvavat | gandhaḥ kṣubhito dharā pūrve catvāraḥ pūrvavat | 
anye śabdasparśābhyāṃ vāyuḥ ityādikrameṇa pañcabhyo dharaṇī iti 
manyante | guṇasamudāyamātraṃ ca pṛthivī nānyo guṇī kaścit [yaduktam 
|

nāgṛhītaistu gandhādyairjātucijjāyate matiḥ |
dharitryā hi jalādīnāmagrahe'pi prajāyate |
gandhādibhyastato nānyā jalādibhyaḥ pṛthak ca bhūḥ || iti |] | asmiṃśca 
tattvakalāpe 

91)

ūrdhvordhvaguṇaṃ vyāpakaṃ nikṛṣṭaguṇaṃ tu vyāpyaṃ | sa eva guṇasya 
utkarṣo yat tena vinā guṇāntaraṃ na upapadyate tena pṛthivītattvaṃ 
[yathoktaṃ śrītantrāloke |

ataḥ śivatvātprabhṛti prakāśatā-
svarūpamādāya nijātmani dhruvam |
samastatattvāvalidharmasaṃcayai-
rvibhāti bhūrvyāptṛtayā sthitairalam ||

evaṃ jalāderapi śaktitattva-
paryantadhāmno vapurasti tādṛk |
kiṃ tūttaraṃ śaktitayaiva tattva
pūrvaṃ tu taddharmatayeti bhedaḥ ||

iti etacca parāttriṃśikāvivaraṇe samyaṅnirṇītam |] śivatattvāt prabhṛti 
jalatattvena vyāptam evaṃ jalaṃ tejasā ityādi yāvacchaktitattvam ||

bhūtāni tanmātragaṇendriyāṇi
mūlaṃ pumānkañcukayuksuśuddham |
vidyādiśaktyantamiyānsvasaṃvit-
sindhostaraṅgaprasaraprakāraḥ ||

a-alatattapari-uṇṇa-u
sa-alatatta-uttiṇṇa-u |
pari-āṇaha-attāṇṇa-u
paramasiveṇa samāṇa-u ||

iti śrīmadabhinavaguptācāryaviracite tantrasāre tattvasvarūpaprakāśanaṃ 
nāmāṣṭamamāhnikam ||8||


atha navamamāhnikam |

atha tattvānāṃ bhedo nirūpyate |

sa ca saptadhā ṣaḍardhaśāstra eva paraṃ parameśena [nanu trikamate 
naraśaktiśivātmakaṃ viśvamuktaṃ tat kathaṃ siddhāntadarśanocitaḥ 
pramātṛbheda ukta ityāśaṅkyāha parameśenetyādi | yaduktam

śaktimacchaktibhedena dharādyaṃ mūlapaścimam |
bhidyate pañcadaśadhā svarūpeṇa sahānarāt ||

kalāntaṃ bhedayugdhīnaṃ rudravatpralayākalaḥ |
tadvanmāyāpi navadhā jñakalā saptadhā punaḥ ||

mantrāstadīśāḥ pañcānye mantreśapatayastridhā |
śivo na bhidyate svaikaprakāśaghanacinmayaḥ || iti |] uktaḥ | tatra śivāḥ 
mantramaheśāḥ mantreśāḥ mantrāḥ vijñānākalāḥ pralayākalāḥ sakalā iti 
sapta [ayaṃ bhāvaḥ paramārthato hi 
paraparāparāparātmakaśivaśaktinarātmakameva viśvaṃ | yatpunaḥ 
śaktimatāṃ śaktīnāṃ ca saptavidhatvamuktaṃ tadavāntaraprakāraprāyamiti |
] śaktimantaḥ | eṣāṃ saptaiva śaktayaḥ [śaktayaḥ icchādyā 
ityarthaḥ tadbhedāt śaktiśaktimadbhedādityarthaḥ |] tadbhedāt 
pṛthivyādipradhānatattvāntaṃ caturdaśabhirbhedaiḥ pratyekaṃ svaṃ rūpaṃ 
pañcadaśaṃ | tatra svaṃ rūpaṃ 

93)

prameyatāyogyaṃ [prameyatāyogyaṃ jaḍātmakamityarthaḥ 
svātmaniṣṭhaṃ śaktiśaktimadbhirasaṃspṛṣṭaṃ taduparaktatve hi 
tadrūpatvameva gaṇyate ityarthaḥ | tathā ca

parāṃśo mātṛrūpa'tra pramāṇāṃśaḥ parāparaḥ |
meyo'paraḥ śaktimāṃśca śaktiḥ svaṃ rūpamityadaḥ || ityādyanyatroktam |
] svātmaniṣṭham aparābhaṭṭārikānugrahāt pramātṛṣu udriktaśaktiṣu 
yat viśrāntibhājanaṃ tat tasyaiva śāktaṃ rūpaṃ śrīmatparāparānugrahāt | 
tacca saptavidhaṃ śaktīnāṃ tāvattvāt | śaktimadrūpapradhāne tu 
pramātṛvarge yat viśrāntaṃ tacchaktimacchivarūpaṃ 
śrīmatparābhaṭṭārikānugrahāt tadapi saptavidhaṃ pramātṝṇāṃ 
śivātprabhṛti sakalāntānāṃ tāvatām uktatvāt | tatra śaktibhedādeva 
pramātṝṇāṃ bhedaḥ sa ca sphuṭīkaraṇārthaṃ sakalādikrameṇa bhaṇyate 
tatra sakalasya vidyākale [tattadvyāpārabhedāt hi vicitrāḥ śaktayaḥ syuriti 
sāmānyato vidyākala eva śaktitvena gaṇite iti |] śaktiḥ tadviśeṣarūpatvāt 
buddhikarmākṣaśaktīnāṃ pralayākalasya tu te eva nirviṣayatvāt asphuṭe 
[prasuptabhujagākāratvāditi bhāvaḥ | na caitanmantavyaṃ yadi 
pralayākalasya te api na sphuṭe tataḥ sakalordhvavartitvaṃ kathamiti yata ete 
malādhikyāvirbhāvakāraṇatvādadhaḥpatanakāraṇa eveti sakala eva sarvādhaḥ |
] | vijñānākalasya te eva 

94)

vigalatkalpe tatsaṃskārasacivā prabuddhyamānā śuddhavidyā mantrasya | 
tatsaṃskārahīnā saiva prabuddhā mantreśasya | saiva icchāśaktirūpatāṃ 
svātantryasvabhāvāṃ jighṛkṣantī mantramaheśvarasya | icchātmikā 
sphuṭasvātantryātmikā śivasya iti śaktibhedāḥ 
[jñānakarmendriyāvāntarabhedātmanā śaktīnāṃ saṃbhavaḥ vastutastu 
eka evāsau dharmaḥ samavāyākhyaḥ | yaduktam 

eka evāsya dharmo'sau sarvākṣepeṇa vartate |
tena svātantryaśaktyaiva yuktaṃ tatrāñjaso vidhiḥ || iti |] sapta mukhyāḥ | 
taduparāgakṛtaśca śaktimatsu pramātṛṣu bhedaḥ karaṇabhedasya 
kartṛbhedaparyavasānāt śaktereva ca avyatiriktāyāḥ karaṇīkartuṃ śakyatvāt 
na anyasya anavasthādyāpatteḥ [yaduktam |

tasmāt svātantryayogena kartā svaṃ bhedayan vapuḥ |
karmāṃśasparśinaṃ svāṃśaṃ karaṇīkurute svayam ||

iti karturvibhinnaṃ cet karaṇamiṣyate tat karaṇameva kuto bhavet api tu 
preraṇakriyāviṣayatvāt karmaivetyarthaḥ | na ca akaraṇikā kriyā bhavediti 
karaṇāntaramanvepyaṃ tacca bhinnatvātpreryameveti 
tatrānyatkaraṇamityanavasthā |] | vastutaḥ punareka eva 
citsvātantryānandaviśrāntaḥ pramātā tatra pṛthivī svarūpamātraviśrāntā 
yadā vedyate tadā svarūpam asyāḥ 

95)

kevalaṃ bhāti caitracakṣurdṛṣṭaṃ [caitracakṣurdṛṣṭaṃ paśyāmītyatra 
prathāyāṃ kiṃ nīlamātraṃ prathate kimuta caitravedyatāviśiṣṭaṃ nīlamiti | 
tatrādye nīlaṃ vedmi caitravedyaṃ nīlaṃ vedmi ityanayoḥ pratītyoraviśeṣaḥ 
syāt na caivamanubhavavirodhāt dvitīye tu caitravedyatā nīlasya kiṃ svagatā 
viśeṣaṇam uta pramātṛgatā | na tāvat pramātṛgatā 
vyadhikaraṇayorbhinnakakṣyatvena viśeṣaṇaviśeṣyabhāvāyogāt svagatatve tu 
siddhaṃ vedyatā bhāvasya nijam vapuriti |] caitraviditaṃ jānāmīti tatra 
sakalaśaktikṛtaṃ sakalaśaktimadrūpakṛtaṃ svarūpāntaraṃ bhātyeva evaṃ 
śivāntamapi vācyaṃ śivaśaktiniṣṭhaṃ śivasvabhāvaviśrāntaṃ ca viśvaṃ 
jānāmi iti pratyayasya vilakṣaṇasya bhāvāt | nanu bhāvasya cet vedyatā svaṃ 
vapuḥ tatsarvānprati vedyatvaṃ vedyatvamapi vedyam ityanavasthāṃ [nanu 
jñānaṃ nāma kriyā sā ca phalānumeyā phalaṃ ca prakaṭatākhyaṃ 
viṣayadharmaḥ saiva ca vedyateti kaumārilamatamāśaṅkya pratikṣipati | ayaṃ 
bhāvaḥ bhāvasya yathā nīlatvādayo dharmāḥ sarvānprati aviśiṣṭāḥ tathā 
vedyatvākhyo dharmaḥ syādityatyantādyabhāvaḥ prasajyet sarve ca sarvajñāḥ 
syuriti | atha ca yo'yaṃ vedyatvadharma uktaḥ sa kiṃ vedyo'vedyo vā avedyaścet 
saṃvidasparśatvāt nāsti vedyo yadi bhavet tadanavasthā syāt yena 
kasyacidapyarthasya vedyatā na ghaṭeteti mūrcchitaprāyaṃ viśvaṃ paryavasyet |
] tayā ca jagato'ndhasuptatvaṃ suprakāśameva tayā ca vedyatvāvedyatve 
viruddhadharmayoga [nanu bhāve tā tvau bhāvaḥ sattā sā ca dvidhā 
svarūpasattā samavāyinī ca tathā ca svarūpavedyatā tathā svaprakāśaṃ ca 
tasmāt svarūpasyaiva vedyatvaṃ vedakatvaṃ ca viruddhadharmādhyāsaḥ |] 
iti 

96)

doṣaḥ ? atra ucyate na tat svaṃ vapuḥ svarūpasya pṛthaguktatvāt kiṃ tarhi 
tat pramātṛśaktau pramātari ca yat viśrāntibhājanaṃ yat rūpaṃ tat khalu tat 
tat svaprakāśameva [nanu yadi nāma prakāśaviśrāntisatattvaiva vedyatā 
tatkatamasyā bhāvadharmatvam ? iti cet satyaṃ yathā svātantryāt śivena 
bhedo'vabhāsyate tathaiva vedyatādharma iti | yaduktaṃ

yathā ca śivanāthena svātantryādbhāsyate bhidā |
nīlādivattathaivāyaṃ vedyatādharma ucyate || iti |] tat prakāśate na tu 
kiṃcidapi prati iti sarvajñatvam anavasthāviruddhadharmayogaśca iti 
dūrāpāstam [svayaṃ prakāśate na tu prakāśyata iti viruddhadharmayogaḥ 
svaprakāśameva tat prakāśate na tu kaṃcidapi pratīti asmatpakṣe 
svaprakāśātmā śiva evāstīti sarvārthasyaivābhāvāt anyaṃ prati cakāstīti 
vacanaṃ virudhyate iti sarvajñatvasyāpi nirāsaḥ svayameva prakāśate na tu 
svāpekṣayā karmabhāvamapi labhate ato na vedyatā bhinnā bhavitumarhatīti 
anavasthānirāsaḥ |] | anantapramātṛsaṃvedyamapi ekameva [na tu 
bhinnaṃ bhinnamiti bhāvaḥ |] tat tasya rūpaṃ 
[śaktiśaktimadrūpakṛtamiti |] tāvati teṣāmekābhāsarūpatvāt iti na 
pramātrantarasaṃvedanānumānavighnaḥ kaścit tacca tasya rūpaṃ satyam 
arthakriyākāritvāt tathaiva 

97)

paradṛśyamānāṃ [k: paridṛśyamānāmiti pāṭhaḥ |] kāntāṃ 
dṛṣṭvā tasyai samīrṣyati [anyadṛśyatvaṃ kāntāgato dharmaścenna 
tadā patyurīrṣyā kasmāt syāditi bhāvaḥ |] śivasvabhāvaṃ 
viśrāntikumbhaṃ paśyan samāviśati samastānantapramātṛviśrāntaṃ vastu 
paśyan pūrṇībhavati nartakīprekṣaṇavat [mallanaṭaprekṣādau iyadeva 
pūrṇaṃ rūpaṃ yat vigalitavedyāntaratayā tatraivānanyākāṅkṣatayā 
vimarśanam |] tasyaiva nīlasya tadrūpaṃ pramātari yat viśrāntaṃ tathaiva 
svaprakāśasya vimarśyodayāt iti pañcadaśātmakatvaṃ pṛthivyāḥ 
prabhṛti pradhānatattvaparyantam | tāvatyudriktarāgādikañcukasya sakalasya 
pramātṛtvāt [yadyapi sakale dehādyātmano vedyasyaiva prādhānyaṃ 
tathāpi jñānakriyottejakakalāvidyādikañcukodrekādastyeva pramātṛtvamiti 
bhāvaḥ |] sakalasyāpi [nanu vedyāṃśaprādhānyāt dharādivat 
sakalasyāpi pāñcadaśyameva nyāyyamiti tatkathamuktaṃ pradhānatattvāntamiti 
tadāśaṅkyāha sakalasyāpīti | tantrāloke ca 

pāñcadaśyaṃ dharādyantarniviṣṭe sakale'pi ca |
sakalāntaramastyeva prameye'trāpi mātṛ hi || iti |] evaṃ pāñcadaśyaṃ 
tasyāpi tāvadvedyatvāt | vitatya caitat nirṇītaṃ tantrāloke |

98)

puṃsaḥ prabhṛti [taduktaṃ śrītantrāloke

yadā tu meyatā puṃsaḥ kalāntasya prakalpyate |
tadudbhūtaḥ kañcukāṃśo meyo nāsya pramātṛtā |
ataḥ sakalasaṃjñasya pramātṛtvaṃ na vidyate || iti |] kalātattvāntaṃ 
trayodaśadhā sakalasya tatra pramātṛtāyogena tacchaktiśaktimadātmano 
bhedadvayasya pratyastamayāt tathā ca sakalasya svarūpatvameva kevalaṃ 
pralayākalasya svarūpatve pañcānāṃ pramātṛtve ekādaśa bhedāḥ | 
vijñānākalasya svarūpatve caturṇāṃ pramātṛtve nava bhedāḥ | mantrasya 
svarūpatve trayāṇāṃ pramātṛtve sapta | mantreśasya svarūpatve dvayoḥ 
pramātṛtve pañca | mantramaheśasya svarūpatve bhagavata ekasyaiva 
pramātṛtve śaktiśaktimadbhedāt trayaḥ | śivasya tu 
prakāśaikacitsvātantryanirbharasya na ko'pi bhedaḥ paripūrṇatvāt | evam ayaṃ 
tattvabheda eva parameśvarānuttaranayaikākhye nirūpitaḥ 
bhuvanabhedavaicitryaṃ [taduktam

tata eva vicitro'yaṃ bhuvanādividhiḥ smṛtaḥ |

iti | tatha

evaṃ bhuvanamālāpi bhinnā bhedairimaiḥ sphuṭam | iti |]

99)

karoti narakasvargarudrabhuvanānāṃ pārthivatve [yathoktam

pārthivatve'pi no sāmyaṃ rudravaiṣṇavalokayoḥ |
kā kathānyatra tu bhavedbhoge vāpi svarūpake ||

iti anyatreti pārthivādyātmani bhuvanādāvityarthaḥ |] samāne'pi dūratarasya 
svabhāvabhedasya uktatvāt | atra ca parasparaṃ bhedakalanayā 
avāntarabhedajñānakutūhalī [yathā hi avāntarabhedajñānaṃ sarvasya 
sarvātmakatvāt sakale'pi tattvato layākalādiśaktisaṃbhavo'styeva tasmāt 
samānāmeva sakalādipramātṛśaktīnāṃ saptabhireva guṇane 
ekonapañcāśadrūpasaṃbhavaḥ saṃbhava evātra pramāṇaṃ tena 
tathālakṣaṇe'pi na doṣa iti mantavyam | yathoktaṃ tantrāloke

sa svasphuṭo'stu bhedāṃśaṃ dātuṃ tāvatprabhūbhavet |

iti | evaṃ śaktimadbhedo'pi aṅgīkartavyaḥ eṣāmapyanyonyaṃ bhedane 
ekottaracaturviṃśatiśataprakārā bhavanti tathānyathāpi vaicitryaṃ sāmānyasya 
viśeṣānyathābhāvitvāt cakṣurādiśaktīnāmantrodbhavatirobhāvābhyāṃ 
bhedānantyaṃ sphuṭameva na caitanmantavyam alamatra vedyabhedena 
yataścakṣurādiśaktīnāmevādirbhāvatirobhāvāviti ? āveśa nimajjana 
vikāsa vighūrṇanātmā astyeva viśeṣaḥ āveśastanmayībhāvaḥ 
nimajjanamāsaṅgātmā tadantaḥ praveśaḥ vikāsastadaunmukhyena prasaraṇam 
vighūrṇanaṃ tadaunmukhyenocchalanātmakaṃ spandanam anudbhūtaśaktikasya 
hi dṛṣṭamapyadrṣṭamiva udriktaśakteḥ punarāsajya viṣayaṃ paśyataḥ 
paraścamatkārātiśayo bhavediti cārthakriyākṛta eva bheda ityarthaḥ |] 
tantrālokameva avadhārayet | evam ekaikaghaṭādyanusāreṇāpi 
pṛthivyādīnāṃ tattvānāṃ 

100)

bhedo nirūpitaḥ [evamekaghaṭākhyadaśāyām anekadaśāvati tattve punaḥ 
kiyanto bhedā iti ko nāma vaktuṃ śaknuyādityāśayaḥ | uktaṃ cānyatra 

evametaddharādīnāṃ tattvānāṃ yāvatī daśā |
kācidasti ghaṭākhyāpi tatra saṃdarśitā bhidā ||

atrāpi vedyatā nāma tādātmyaṃ vedakaiḥ saha |
tataḥ sakalavedyo'sau ghaṭaḥ sakala eva hi ||

yāvacchivaikavedyo'sau śiva evāvabhāsate |
tāvadekaśarīro'sau bodho bhātyeva yāvatā ||

iti | tathaiva

yāvanna vedakā ete tāvadvedyāḥ kathaṃ priye |

ityuktanītyā etadbodhyam | kiñcidbhedasahiṣṇurabhedastādātmyam |] | 
adhunā samastaṃ pṛthivītattvaṃ pramātṛprameyarūpam uddiśya nirūpyate 
yo dharātattvābhedena [tatra pramātṛsaptakaṃ tāvaddarśayati yo 
dharātattvābhedena ityādinā | nanu śivo nāma nikhilatattvabṛṃhaṇāt 
brahmetyucyate tatkathaṃ naiyatyena vyavatiṣṭhate ityāśaṅkyāha yathetyādi |
] prakāśaḥ sa śivaḥ | yathā śrutiḥ pṛthivyevedaṃ brahma iti | 
dharātattvasiddhipradān prerayati sa dharāmantramaheśvaraḥ preryo 
dharāmantreśaḥ tasyaivābhimānikavigrahatātmako vācako mantraḥ 
sāṃkhyādipāśavavidyottīrṇaśivavidyākrameṇa 
abhyastapārthivayogo'prāptadhruvapadaḥ [bhāvanāniṣpattimaprāpya antarā 
vilayādaprāptadhruvapada ityarthaḥ |] dharāvijñānākalaḥ | 
pāśavavidyākrameṇa abhyastapārthivayogaḥ kalpānte maraṇe vā dharā-

101)

pralayakevalaḥ [dharāyāḥ pralayaḥ na tu jalādeḥ adharatattvanāśe hi 
ūrdhvatattvāveśāt yoginaḥ tathā ca dṛṣṭāntayati sauṣupte hi ityādinā 
jalatattvāviṣṭasya hi svapnasṛṣṭirjaladhitaraṇādimayī asti | niyatapūrvabhāvi 
sauṣuptaṃ svapnasya kāraṇam |] | sauṣupte hi tattvāveśavaśādeva citrasya 
svapna udayaḥ syāt gṛhītadharābhimānastu dharāsakalaḥ | atrāpi 
śaktyudrekanyagbhāvābhyāṃ [śaktisaptakaṃ ca 
stambhasrṣṭyādivyāpāramayaṃ yathānyatra

asyaiva saptakasya svasvavyāpāraprakalpane |
prakṣobho yastadevoktaṃ śaktīnāṃ saptakaṃ sphuṭam ||

iti | atra viśeṣo yathā 

tatraiva dharaṇīnāmni bhinnābhāsini yā pṛthak |
stambhādikāvalokyeta śivaśaktirasau bhuvi ||

atraiva sṛṣṭivilayasthityanugrahasaṃhṛtīḥ |
sakalādiśivānteyaṃ vidhatte vividhasthitiḥ ||

seha mantramaheśānaśaktistattvādhikāriṇī |
tattattvamantravṛndeṣu haṭhādeva hi pudgalān |
yā prerayati māheśī śaktiḥ sā bodhabhūmigā ||

yayā budhyeta bhūtattvasadbhāvaṃ pītalādikam |
trāyate tadvipakṣācca mantraśaktirasau matā ||

tattattvabhogābhoge yā samyagaunmukhyadāyinī |
tāvanmātramalāvasthā śaktirvaijñānakevalī ||

prabuddhasphāratattattvatattatkarmābhimukhyataḥ |
tadbhogonmukhatā śaktiḥ pralayākalagāminī ||

māyākarmamalavyaktisamāveśe tu yā sthitiḥ |
bāhyāntarendriyakṛtā nānāvasthānuyāyinī |
bhogasādhanaśaktiḥ sā sakalāṇusamāśrayā || iti |]

102)

caturdaśatvam iti pramātṛtāpannasya dharātattvasya bhedāḥ svarūpaṃ tu 
śuddhaṃ prameyam [vedyatāyāḥ prādhānyāt narātmakamityarthaḥ | 
yathoktam

yattu grahītṛtārūpasaṃvitsparśavivarjitam |
śuddhaṃ jaḍaṃ tatsvarūpamitthaṃ viśvaṃ trikātmakam || iti |] iti evam 
aparatrāpi [jalādāvityarthaḥ |] | atha ekasmin pramātari 
prāṇapratiṣṭhitatayā [sarva evāyamadhvā prāṇasya ityuktayuktyā 
pramātuḥ prāṇe pratiṣṭhā |] bhedanirūpaṇam [bhedaḥ 
pāñcadaśyādiḥ |] iha nīlaṃ gṛhṇataḥ prāṇaḥ tuṭiṣoḍaśakātmā 
[sapādāṅguladvayaṃ tuṭiḥ prāṇacārasya iti bodhyam |] 
vedyāveśaparyantam udeti tatra ādyā tuṭiravibhāgaikarūpā dvitīyā 
grāhakollāsarūpā antyā tu grāhyābhinnā tanmayī [tanmayī grāhyamayī |
] upāntyā tu sphuṭībhūtagrāhakarūpā madhye tu yat tuṭidvādaśakaṃ 
tanmadhyāt ādyaṃ ṣaṭkaṃ nirvikalpasvabhāvaṃ vikalpācchādakaṃ ṣaṭtvaṃ 
ca asya svarūpeṇa ekā tuṭiḥ ācchādanīye ca vikalpe pañcarūpatvam unmimiṣā 
unmiṣattā sā ca iyaṃ sphuṭakriyārūpatvāt tuṭidvayātmikā spandanasya 
ekakṣaṇarūpatvābhāvāt 

103)

unmiṣitatā svakāryakartṛtvaṃ ca ityevamācchādanīyavikalpapāñcavidhyāt 
svarūpācca ṣaṭ kṣaṇā nirvikalpakāḥ tato'pi nirvikalpasya dhvaṃsamānatā 
dhvaṃso vikalpasya unmimiṣā unmiṣattā tuṭidvayātmikā unmiṣitatā ca iti ṣaṭ 
tuṭayaḥ | svakāryakartṛtā tu grāhakarūpatā iti uktaṃ na sā bhūyo gaṇyate 
ityevaṃ [nīlaśabdopalakṣitā pṛthivī prāṇagā vyākhyāteti iti 
śabdārthaḥ |] vivekadhanā gurūpadeśānuśīlinaḥ sarvatra [sarvatra 
pradhānatattvaparyantamityarthaḥ |] pāñcadaśyaṃ pravibhāgena viviñcate 
| vikalpanyūnatve [trāyodaśyādāvityarthaḥ | vikalpasya 
svarūpanyūnatāpakṣe nikṣepāt tuṭernyūnatā pramātṛtvenāsyāśaithilyaṃ na 
tu svarūpavipralopa eva ṣaṭtriṃśadaṅgulātmani prāṇacāre 
tāvattuṭisaṃkhyākatvasyānapahāneḥ |] tu tuṭinyūnatā 
sukhādisaṃvittāviva [nyūnatāyāṃ phalaṃ kimityāha sukhetyādi yathoktam

yathā hi ciraduḥkhārtaḥ paścādāttasukhasthitiḥ |
vismaratyeva tadduḥkhaṃ sukhaviśrāntivartmanā ||

tathā gatavikalpe'pi rūḍhāḥ saṃvedane janāḥ |
vikalpaviśrāntibalāttāṃ sattāṃ nābhimanvate || iti |] yāvat avikalpataiva | 
lokāstu vikalpaviśrāntyā tām ahantāmayīm 
ahantācchāditedaṃbhāvavikalpaprasarāṃ 

104)

nirvikalpāṃ vimarśabhuvam aprakāśitāmiva manyante duḥkhāvasthāṃ 
sukhaviśrāntā iva vikalpanirhrāsena tu sā prakāśata eva iti iyam asau 
saṃbandhe grāhyagrāhakayoḥ sāvadhānatā [grāhyagrāhakayoryata udayo 
yatra vā viśrāntistatrāvahitatvaṃ yena sarvepsitaphalasaṃpattiḥ | yathoktam

grāhyagrāhakasaṃvittiḥ sāmānyā sarvadehinām |
yogināṃ tu viśeṣo'yaṃ saṃbandhe sāvadhānatā || iti |] iti 
abhinavaguptaguravaḥ | evaṃ ca pāñcadaśye sthite yāvat sphuṭedantātmano 
bhedasya nyūnatā tāvat dvayaṃ dvayaṃ hrasati yāvat dvituṭikaḥ śivāveśaḥ 
[antyopāntyātmatuṭidvayasya svarūpapakṣe nikṣepāt |] tatra ādyā 
tuṭiḥ sarvataḥ pūrṇā dvitīyā sarvajñānakaraṇāviṣṭābhyasyamānā 
sarvajñatvasarvakartṛtvāya kalpate na tu ādyā [sarvasāmyāditi bhāvaḥ |
] | yadāha śrīkallaṭaḥ tuṭipāta [tuṭipāte 
sarvajñatvasarvakartṛtvalābha iti hi sūtram ādyāyāstuṭeḥ pāto'pacayo hrāso 
dvitīyā tuṭiriti yāvat |] iti atra pātaśabdaṃ saiva bhagavatī śrīmatkālī 
mātṛsadbhāvo bhairavaḥ 

105)

pratibhā ityalaṃ rahasyārahasyanena [rahasyasya arahasyanena 
prakaṭīkaraṇenetyarthaḥ |] | evaṃ mapramaheśatuṭeḥ [evaṃ 
dvitīyasyāṃ tuṭau sarvajñatvādisiddhiruktā tadvattṛtīyādiṣu syānna 
vetyāśaṅkyāha evaṃ mantramaheśa ityādi taduktam

tāsu saṃdadhataścittamavadhānaikalakṣaṇam |
tattatsiddhisamāveśaḥ svayamevopajāyate || iti |] prabhṛti tattadabhyāsāt 
tattatsiddhiḥ [tāstāḥ siddhayaśca śrīpūrvaśāstrādau 
dhāraṇāpaṭalādyuktā dehagurutvādayaḥ |] | athātraiva 
[pāñcadaśyādikramātmatayā nirdiṣṭe tattvādyadhvani |] 
jāgradādyavasthā nirūpyante tatra vedyasya [svarūpatvena nirdiṣṭasya |] 
tadviṣayāyāśca saṃvido [tattatpramātṛtvenoktāyāḥ |] yat vaicitryam 
anyonyāpekṣaṃ sat sā avasthā na vedyasya kevalasya na cāpi kevalāyāḥ 
saṃvido na cāpi pṛthak pṛthak dve | tatra yadādhiṣṭheyatayā bahīrūpatayā 
bhānaṃ tadā jāgradavasthā meye mātari māne ca | yadā tu tatraiva 
adhiṣṭhānarūpatayā [pramāṇātmatayetyarthaḥ |] bhānaṃ saṃkalpaḥ 
tadā svapnāvasthā | yadā tu 

106)

tatraiva adhiṣṭhātṛrūpatayā [pramātraikātmyenetyarthaḥ |] 
bījātmatayaiva [saṃbhāvyamānabhāvikāryasaṃbandhāt viśvasya bījaṃ 
kāraṇaṃ tadātmatayetyarthaḥ |] bhānaṃ tadā suṣuptāvasthā | imā 
[nanu meyaṃ mātā mānamadhiṣṭheyamityuktaṃ tatkathaṃ mātā san 
meyatāṃ gacchedityāha imā eva iti |] eva tisraḥ 
prameyapramāṇapramātravasthāḥ pratyekaṃ jāgradādibhedāt caturvidhā uktāḥ 
| yadā tu tasminneva pramātṛviśrāntigate pramātuḥ pūrṇataunmukhyāt 
taddvāreṇa pūrṇatonmukhatayā bhānaṃ tadā turyāvasthā sā [nanu 
meyāditrayasādhyā pramāṇaphalarūpā mitiḥ ato meyādayo'syā jīvitamiti cet 
maivamityāha sā ca ityādinā |] ca rūpaṃ dṛśāhamityevaṃ vidham 
aṃśatrayam uttīrya paśyāmīti anupāyikā 
[anupayujyamānānupapadyamānopāyetyarthaḥ |] pramātṛtā 
svātantryasārā naikaṭyamadhyatvadūratvaiḥ 
pramātṛpramāṇaprameyatābhiṣekaṃ dadatī tadavasthātrayānugrāhakatvāt 
tribhedā | etadeva avasthācatuṣṭayaṃ piṇḍasthapada- [piṇḍe śarīre 
tiṣṭhatīti piṇḍasthaṃ sarvādhvanaḥ padaṃ sthānaṃ prāṇaḥ atha ca padyate 
jñāyate'neneti padam saṃkalpaḥ tatra prāṇasaṃkalpayostiṣṭhatīti padastham 
rūpayati tattadarthajātaṃ svātmasātkāreṇa rūpavat karotīti rūpaṃ pramātā 
tadaikātmyaṃ rūpastham rūpaṃ mitamapi pramātāramatikrāntatvāt 
rūpātītamucyate |]

107)

stharūpastharūpātītaśabdairyogino vyavaharanti prasaṃkhyānadhanāstu 
sarvatobhadraṃ vyāptiḥ mahāvyāptiḥ pracaya [viśvasya karāmakakavat 
pracitatayā darśanāt pracayaḥ |] iti śabdaiḥ | anvarthaṃ cātra darśitaṃ 
tantrāloke ślokavārtike ca | yacca sarvāntarbhūtaṃ pūrṇarūpaṃ tat turyātītaṃ 
sarvātītaṃ mahāpracayaṃ ca nirūpayanti | kiṃ ca yasya yadyadā rūpaṃ sphuṭaṃ 
sthiram anubandhi tat jāgrat tasyaiva tadviparyayaḥ svapnaḥ yaḥ layākalasya 
bhogaḥ sarvāvedanaṃ suṣuptaṃ yo vijñānākalasya bhogaḥ 
bhogyābhinnīkaraṇaṃ turyaṃ mantrādīnāṃ sa bhogaḥ bhāvānāṃ 
śivābhedasturyātītaṃ sarvātītam | tatra svarūpasakalau 1 pralayākalaḥ 2 
vijñānākalaḥ 3 mantratadīśatanmaheśavargaḥ 4 śivaḥ 5 iti pañcadaśabhede 
pañca avasthāḥ | svarūpaṃ pralayākala ityādikrameṇa trayodaśabhede 
svarūpaṃ vijñānākalaśaktiḥ vijñānākala ityekādaśabhede svarūpaṃ 
mantrāḥ tadīśāḥ maheśāḥ śivaḥ iti navabhede svarūpaṃ mantreśāḥ 
maheśaḥ śaktiḥ śiva iti saptabhede svarūpaṃ maheśaśaktiḥ maheśaḥ 
śaktiḥ 

108)

śiva iti pañcabhede svarūpaṃ kriyāśaktiḥ jñānaśaktiḥ icchāśaktiḥ śiva 
iti tribhede abhinne'pi śivatattve kriyājñānechānandacidrūpakḷptyā 
prasaṃkhyānayogadhanāḥ pañcapadatvam āhuḥ ||

bhūmyādau tattvajāle na hi bhavati vapustādṛśaṃ yatpramātuḥ 
saṃvidviśrāntivandhyaṃ sphurati sa bahudhā mātṛbhāvo'sya yasmāt |
tenāsminvedyajāle kramagatakalanāṃ nirvikalpāmahantā-
svātantryāmarśasārāṃ bhuvamadhivasata prāpnuta svātmasattām ||

pahiṇa ubhāharabhāvakalapuṇu-abbhantari eha
saccivapasama ipuṇuja-ala ibbhihiniddakaleha |
saṃve-aṇa pa-arūḍha i-ubhāvakalā-usamaggu
bhari-addasussuhupuṇubhari-u ||1||

turi-āṇantaralaggu
ghaḍubohiṇahaṃ-ujo-asi-eha |
vitatta samatthapuraṇakameṇa
kameṇalihālamisāṇamipañcāvatu ||2||

iti śrīmadabhinavaguptācāryaviracite tantrasāre tattvabhedaprakāśanaṃ nāma 
navamamāhnikam ||9||


atha daśamamāhnikam |

uktastāvat tattvādhvā | kalādyadhvā tu nirūpyate tatra yathā bhuvaneṣu anugāmi 
kiṃcidrūpaṃ tattvam ityuktam tathā tattveṣu vargaśo yat anugāmi rūpaṃ tat 
kalā [tathāhi-

kecidāhu punarvāsau śaktirantaḥ susūkṣmikā |
tattvānāṃ sā kaletyuktā dharaṇyā dhārikā yathā ||

atra pakṣadvaye vastu na bhinnaṃ bhāsate yataḥ |
anugāmi na sāmānyamiṣṭaṃ naiyāyikādivat ||

ityādyanyatroktam | dharaṇyā yathā dhārikā śaktiranugatāsti tathā parāṃ 
kāṣṭhāṃ prāptāt bahirmukhatvāt nivartakatvena kalayitrī nivṛttikalā 
pratiṣṭhānena kalayitrī pratiṣṭhākhyā śaktiḥ evamanyāsāmapi kalanā | tathā 
coktam 

nivṛttiḥ pṛthivītattve pratiṣṭhāvyaktagocare |
vidyā niśānte śāntā ca śaktyante'ṇḍamidaṃ catuḥ |
śāntātītā pare tattve kalātītaṃ paraṃ padam || iti |] 
ekarūpakalanāsahiṣṇutvāt | tadyathā pṛthivyāṃ nivṛttiḥ nivartate 
yatastattvasarga iti | jalādipradhānānte varge pratiṣṭhā 
kāraṇatayāpyāyanapūraṇakāritvāt | pumādimāyānte vidyā vedyatirobhāve 
saṃvidādhikyāt | śuddhavidyādiśaktyante śāntākañcukatara�ngopaśamāt | 
etadeva aṇḍacatuṣṭayaṃpārthiva prākṛta māyīya śāktābhidham | 
pṛthivyādiśaktīnām atra avasthānena śaktitattve yāvat parasparśo vidyate 
sparśasya ca sapratighatvamiti tāvati yuktam aṇḍatvam [taduktam 

aṇḍaṃ ca nāma bhuvanavibhāgasthitikāraṇam |
prāhurāvaraṇaṃ tacca śaktyantaṃ yāvadasti hi || iti |] | śivatattve 
śāntātītā tasyopadeśabhāvanārcādau kalyamānatvāt | svatantraṃ tu paraṃ 
tatvaṃ tatrāpi yat aprameyaṃ tatkalātītam [samagrakalanojjhitatvāditi 
bhāvaḥ |] | evaṃ pañcaiva kalāḥ ṣaṭtriṃśattatvāni | tathāhi prameyatvaṃ 
dvidhā sthūlasūkṣmatvena iti daśa | karaṇatvaṃ dvidhā śuddhaṃ 
kartṛtāsparśi ca iti daśa | karaṇatopasarjanakartṛbhāvasphuṭatvāt pañca 
śuddhakartṛbhāvāt pañca vigalitavibhāgatayā vikāsonmukhatve pañca 
sarvāvacchedaśūnyaṃ śivatattvaṃ ṣaḍtriṃśam [taduktamanyatra |

yadvedyaṃ kiṃcidābhāti tatkṣaye yatprakāśate |
tattattvamiti nirṇītaṃ ṣaṭtriṃśaṃ hṛdi bhāsate ||

cidānandasvatantraikarūpaṃ taditideśane |
saptatriṃśaṃ samābhāti tatrākā�nkṣā ca nāparā ||

taccapi kḷptavedyatvaṃ yatra bhāti sa cinmayaḥ |
aṣṭātriṃśattamaḥ so'pi bhāvanāyopadiśyate |
yadi nāma tataḥ saptatriṃśa eva punarbhavet || iti |] | tadyadā upadiśyate 

111)

bhāvyate vā yat tatpratiṣṭhāpadam tat saptatriṃśam tasminnapi bhāvyamāne 
aṣṭātriṃśam na ca anavasthā tasya bhāvyamānasya 
anavacchinnasvātantryayogino [k: anavacchinnaṃ svātantryaṃ yogina iti 
pāṭhaḥ |] vedyīkaraṇe saptatriṃśa eva paryavasānāt ṣaṭtriṃśaṃ tu 
sarvatattvottīrṇatayā saṃbhāvyāvacchedam iti pañcakalāvidhiḥ | 
vijñānākalaparyantam ātmakalā īśāntaṃ vidyākalā śiṣṭaṃ śivakalā iti 
tritattvavidhiḥ | evaṃ navatattvādyapi [tathā ca nava tattvāni anyatra kathitāni 
yathā

prakṛtiḥ puruṣañcaiva niyatiḥ kāla eva ca |
māyā vidyā tatheśaśca sadāśivaśivau tathā ||
iti | ādiśabdādaṣṭādaśatvam |] ūhayet iti | meyāṃśagāmī 
sthūlasūkṣmapararūpatvāt trividho bhuvanatattvakalātmādhvabhedaḥ 
mātṛviśrāntyā tathaiva trividhaḥ 

112)

tatra pramāṇatāyāṃ [uktaṃ cānyatrāpi

yatpramāṇātmakaṃ rūpamadhvano mātṛbhāgagam |
padaṃ hyavagamātmatvasamāveśāttaducyate ||

tadeva ca padaṃ mantraḥ prakṣobhātpracyutaṃ yadā |
guptabhāṣī yato mātā tūṣṇībhūto vyavasthitaḥ || iti |] padādhvā 
pramāṇasyaiva kṣobhatara�ngaśāmyattāyāṃ mantrādhvā tatpraśame 
pūrṇapramātṛtāyāṃ varṇādhvā sa eva ca asau tāvati viśrāntyā 
labdhasvarūpo bhavati iti ekasyaiva ṣaḍvidhatvaṃ yuktam |

padamantravarṇamekaṃ [padamantravarṇamiti samāhāraḥ ekamiti 
kṣakārarūpam puraṣoḍaśakamiti kālāgnyādivīrabhadrāntam |]
puraṣoḍaśakaṃ dhareti ca nivṛttiḥ |
tattvārṇamagninayanaṃ [agnyastryaḥ nayane dve tena avādīni avyaktāntāni 
tattvāni hādi�nāntā varṇāśca trayoviṃśatiḥ rasāḥ ṣaṭ śarāḥ pañca evaṃ 
ṣaṭpañcāśatpurāṇi astrāṇi śarāḥ pañca tena dve caturakṣare trīṇi 
pañcākṣarāṇi iti pañca padāni mantrāśca anyeti āpyāyinyaparaparyāyā 
pratiṣṭhā |]
rasaśarapuramastramantrapadamanyā ||1||

munitattvārṇaṃ [munayaḥ sapta tena pumādimāyāntāni tattvāni 
mādighāntāśca varṇāḥ dviketi tena pañcākṣaramekam dvyakṣaraṃ dvitīyaṃ 
ceti padamantrau ca vasavo'ṣṭau akṣiṇī dve tenāṣṭāviṃśatibhuvanāni 
aparakaleti bodhinyaparaparyāyā vidyā |] dvikapada-
mantraṃ vasvakṣibhuvanamaparakalā |

113)

agnyarṇatattvamekaka- [agnayastrayaḥ tena gakhakā varṇāḥ 
śuddhavidyeśvarasadāśivāśca tattvāni ekaketi tena tryakṣaraṃ padaṃ 
mantraśca sainyabhuvanāni akṣauhiṇyo'ṣṭādaśa turyeti utpūyinyaparaparyāyā 
śāntā | ṣoḍaśeti visargādyakārāntāḥ svaraṣoḍaśakātmakameva ekaṃ padaṃ 
mantraśca tattvamiti śivākhyaṃ ṣaṭtriṃśaṃ tacca saśaktitve'pi 
prādhānyādekaṃ śaktirhi na śaktimato bhinnā bhavitumarhati iti bhāvaḥ | 
śāntyatītāyāṃ tu bhuvanāni na saṃbhavantīti nātra tannirdeśaḥ | 
evamaṣṭādaśottaraṃ śataṃ bhuvanāni ṣaṭtriṃśattattvāni pañca kalāḥ daśa 
padāni tāvanta eva mantrāḥ pañcāśadvarṇāśca iti ṣoḍhādhvā iti 
piṇḍārthaḥ |]
padamantraṃ sainyabhuvanamiti turyā ||2||

ṣoḍaśa varṇāḥ padamantra-
tattvamekaṃ ca śāntyatīteyam |
abhinavaguptenāryā-
trayamuktaṃ saṃgrahāya śiṣyebhyaḥ ||3||

bhuvanajālasa-ala-u
parisarasaha-avasīsa-itattāhaṃsakū-u |
tattabbhā-ukalaṇā
ivimarisahasīsa-ipañcakalāhaṃsarū-u ||

pañcakalāma-u-ehu
mahesarukuṇa-ivi-ujjha-i |
iccha-isuhama-u
bharihabibodhatara�ngamahāsaru ||

114)

socci-abhāsa-i
bhavataruvisara-u |
sa-ala-u-addhajālu
ni-agha-aṇiparimarimehaharo ||

ce-aṇubhari-abhari-u
appahamaṇisacci-apāṇimaṇu |
māṇasapāṇapavaṇa
dhīsāmasupūritajajikhaṇu ||
taṃjighaḍā-i nihalu
parabha-iravaṇāhahuho-itaṇu |
mattidāṇu-āvāhaṇu
pra-aṇusaṇṇihāṇu-i-u ahiṇa-a-uḍu ||
sabbiha-addhakalaṇa
nirbbāhārā-etilaḍeci-a-eha-itattva ||

iti śrīmadabhinavaguptācāryaviracite tantrasāre kalādyadhvaprakāśanaṃ nāma 
daśamamāhnikam ||10||


atha ekādaśamāhnikam |

tatra yāvat [yāvat idam itikathanasyāyamabhiprāyaḥ śaktipātavaicitryāt 
kāraṇabheda eva nakāryabhedaḥ | yathoktam 

saṃvidi phalabhedo'tra na prakalpyo manīṣibhiḥ |

iti sarveṣāmāṇavādīnāmanuttarapadāvāptireva phalamityabhiprāyaḥ |] 
idam uktam tat sākṣāt kasyacit apavargāptaye 
[svaprakāśasvarūpānuśīlanahetoḥ |] yathoktasaṃgrahanītyā bhavati 
kasyacit vakṣyamāṇadīkṣāyām upayogagamanāt [k, kh: 
tadapagamajñānodayāditi pāṭhaḥ |] iti dīkṣādikaṃ vaktavyam | tatra kaḥ 
adhikārī iti nirūpaṇārthaṃ śaktipāto vicāryate | tatra kecit āhuḥ jñānābhāvāt 
ajñānamūlaḥ saṃsāraḥ tadapagame jñānodayāt [yathoktaṃ gītāsu

jñānāptiḥ sarvakarmāṇi bhasmasātkurute'rjuna |

iti | tatra karmabhogo'pi dvidhā krameṇākrameṇa ceti tatra krameṇa bhoge 
karmāntaraprasa�ngo durnivāra iti kadācidapi nāsya kṣayaḥ syāt akrameṇa 
punareṣāṃ bhoga eva na syāt | evaṃ hi karmaṇāṃ kramaphaladānātmā 
svabhāva eva tyakto bhavet na caitat ityubhayathāpi nātaḥ kṣayaḥ karmaṇāṃ 
siddhyet ataśca jñānodayāt ityauktam |] śaktipāta iti teṣāṃ samyak 
jñānodaya eva 

116)

kiṃkṛta [ṣaṭṣoḍaśapadārthapariśīlanādyaṃ hi tannimittamuktaṃ tatra 
katarattadekanimittamiti |] iti vācyam karmajanyatve karmaphalavat 
bhogatvaprasa�nge [ko nāmānayorviśeṣa iti bhāvaḥ |] bhogini ca 
śaktipātābhyupagatau atiprasa�ngaḥ īśvarecchānimittatve [nanu 
karmaphalatvāviśeṣa'pi tatheśvarecchāvaśāt jñānameva 
karmāntaradāhakaṃ na svargapaśvādikarma ityāśa�nkyāha īśvarecchā ityādi 
|] tu jñānodayasya anyonyāśrayatā [jñānodaye sati 
īśvarecchānimittatvamanumīyate īśvarecchānumāne ca jñānodaya iti 
anyonyāśrayaṇāt dvayorevāsiddhatā bhavedityarthaḥ |] vaiyarthyaṃ ca 
īśvare rāgādiprasa�ngaḥ viruddhayoḥ karmaṇoḥ samabalayoḥ 
anyonyapratibandhe karmasāmyaṃ [iha hi bhogakramamahimnā bahuṣu 
karmasu kṣīṇeṣu kutracit aniyate kāle yatparipakve'pi 
samānasāmarthyavirodhatvādviruddhe karmaṇī phalaṃ prati ruddhe tiṣṭhataḥ 
svakīyaṃ svakīyaṃ niyataṃ bhogaṃ vidhātumudāsāte tadanantarabhāvīni ca 
karmāṇi aparipakvatvāt bhogāyanonmukhībhavanti tadīdṛśaṃ 
viruddhakarmadvayavirodhalakṣaṇaṃ karmaṇāṃ sāmyamucyate iti |] tataḥ 
śaktipāta iti cet na kramikatve virodhāyogāt [karmaṇāṃ ca kramikatvameva 
nyāyyaṃ parasparaparihṛtasvarūpatayā yugapadavasthānāyogāt ataśca 
krameṇaiva svamapi phalaṃ dadātīti caiṣāṃ kā nāma phalaṃ prati 
anyonyasyaroddhṛtā kasmiṃścidapi kālakṣaṇe yugapatpravṛttyayogāt |] 
virodhe'pi anyasya aviruddhasya 

117)

karmaṇo bhogadānaprasa�ngāt aviruddhakarmāpravṛttau [k: 
karmāpravṛtti iti pāṭhaḥ |] tadaiva dehapātaprasa�ngāt jātyāyuṣpradaṃ 
karma na pratibadhyate bhogapradameva tu pratibadhyate iti cet kutaḥ 
tatkarmasadbhāve yadi śaktiḥ patet tarhi sā bhogapradāt kiṃ vibhiyāt | atha 
malaparipāke [svaprakāśasvarūpe nitye vastuni yadajñānaṃ tadeva malaṃ 
saṃsārā�nkurakāraṇamityatrāvivādaḥ | tatra kheṭapālagururitthaṃ tasya 
paripākamāha malanirodhāt śaktipātaḥ raudrī śaktirhi nirodhikā yadā 
nirodhakākhyāt svavyāpārāt nivartate tadāyaṃ sphuṭajñānakriyāsamāveśāt 
śivaśaktipātabhāgbhavediti |] śaktipātaḥ so'pi kiṃsvarūpaḥ 
[atrākṣepaṃ karoti kiṃsvarūpa ityādinā malasya nāśastāvat na saṃbhavati 
malo hi eka itītarātmanāmapi naśyediti sarvamuktiprasa�ngaḥ atha na nāśaḥ api 
tu pākaḥ svaśaktipratibaddhatā sāpi viṣāgnivat sarvān prati aviśiṣṭā iti sa eva 
prasa�ngaḥ atha ceducyate sahetuketi tatra vaktavyaṃ karma vā heturīśvarecchā 
vā tatra karma na tādṛśaṃ tasya bhogaikahetutvāt nāpīśvarecchā sā hi kiṃ 
svatantrā uta paratantrā paratantrā tāvat kasya paratantrā iti svatantrā cet tasya 
vītarāgadveṣatvāt sarvān prati aviśeṣāpatteḥ ahetukā iti cet prāgeva nāśaḥ 
syāditi sthitirevāsya na syāt iti |] ? kiṃ ca tasya nimittam ? iti etena 
vairāgyaṃ dharmaviśeṣo [g: dharmaviveśa iti satsevā āpatprāptiriti ca 
pāṭhaḥ |] vivekaḥ satsevā satprāptiḥ devapūjā 

118)

ityādihetuḥ pratyukta iti bhedavādināṃ sarvam asamañjasam | 
svatantraparameśādvayavāde tu upapadyate etat yathāhi parameśvaraḥ 
[yathoktamanyatra 

yathā hi parameśvaro nijarasena svaṃ chādayan
parādvayamayaṃ vapuḥ paśuritīryate laukikaiḥ |
tathaiva punarapyasau vimalacitsvarūpaṃ paraṃ
prakāśamatirodadhacchiva itīryate yogibhiḥ ||] svarūpācchādanakrīḍayā 
paśuḥ pudgalo'ṇuḥ saṃpannaḥ na ca tasya deśakālasvarūpabhedavirodhaḥ 
tadvat svarūpasthaganavinivṛttyā svarūpapratyāpattiṃ jhaṭiti [jhaṭiti 
anupāyādikrameṇa |] vā krameṇa [krameṇa vakṣyamāṇadīkṣādinā |
] vā samāśrayan śaktipātapātram aṇuḥ ucyate svātantryamātrasāraśca 
asau paramaśivaḥ śakteḥ pātayitā iti nirapekṣa [na tu 
karmayogādyapekṣaka iti bhāvaḥ |] eva śaktipāto yaḥ svarūpaprathāphalaḥ 
yastu bhogotsukasya sa karmāpekṣaḥ lokottararūpabhogotsukasya [k: 
lokottararūpo'nuttarabhogeti; kh: lokottararūpo bhogeti pāṭhaḥ |] tu sa eva 
śaktipātaḥ 
parameśvarecchāpreritamāyāgarbhādhikārīyarudraviṣṇubrahmādidvāreṇa 
mantrādirūpatvaṃ

119)

māyāpuṃvivekaṃ puṃskalāvivekaṃ puṃprakṛtivivekaṃ 
puṃbuddhivivekamanyacca phalaṃ prasnuvānaḥ tadadharatattvabhogaṃ 
pratibadhnāti bhogamokṣobhayotsukasya bhoge karmāpekṣo mokṣe tu 
tannirapekṣaḥ iti sāpekṣanirapekṣaḥ | na ca vācyaṃ kasmāt kasmiṃścideva 
puṃsi śaktipāta iti sa eva parameśvaraḥ tathā bhāti iti satattve ko'sau pumān 
nāma yaduddeśena viṣayakṛtā codanā iyam | sa cāyaṃ śaktipāto navadhā 
[atra śaktipāto navadhā iti yaduktaṃ taddṛḍhīkaraṇārthaṃ 
mālinīvijayoktaṃ tanyate 

evamasyātmanaḥ kāle kasmiṃścidyogyatāvaśāt |
śaktiḥ saṃbadhyate śaivī śāntā muktiphalapradā ||

tatsaṃbandhāttataḥ kaścittatksaṇādapavṛjyate |
ajñānenasahaikatvaṃ kasyacidvinivartate ||

rudraśaktisamāviṣṭaḥ sa yiyāsuḥ śivecchayā |
bhuktimuktiprasiddhyarthaṃ nīyate sadguruṃ prati ||

tamārādhya tatastuṣṭāddīkṣāmārādhya śā�nkarīm |
tatkṣaṇādvopabhogādvā dehapāte śivaṃ vrajet ||

yogadīkṣāṃ samāsādya jñātvā yogaṃ samabhyaset |
yogasiddhimavāpnoti tadante śāśvataṃ padam ||

atraivāsyalaghupañcikākāraḥ kasyaciccāpūrṇākhyātirūpeṇājñānena saha 
ekatvaṃ tanmayatvaṃ vinivartate tadapahastanena svātmasākṣātkāralakṣaṇaṃ 
pūrṇaṃ jñānamudeti yataḥ sa madhyatīvrayā rudraśaktyā samāviṣṭaḥ 
saṃlakṣyate tattallakṣaṇodayāt tadvakṣyati dvitīyapaṭale

sati tasmiṃśca cihnāni tasyaitāni vilakṣayet |
tatraitatprathamaṃ cihnaṃ rudre bhaktiḥ suniścalā ||

dvitīyaṃ mantrasiddhiḥ syātsadyaḥ pratyayakārikā |
sarvasattvavaśitvaṃ ca tṛtīyaṃ tasya lakṣaṇam ||

prārabdhakāryaniṣpattiścihnamāhuścaturthakam |
kavitvaṃ pañcamaṃ jñeyaṃ sāla�nkāramanoharam ||

sarvaśāstrārthavettṛtvamakasmāccāsya jāyate |

iti | ata eva cātra gurvādyanapekṣaṇāt anyatra 
svasaṃvittidevībhirdīkṣitasāṃsiddhika iti upadiṣṭaḥ | evaṃ cāsya 
svayaṃpravṛtterapi akalpite jñāne kimevamevaitat na vā iti 
saṃvādamapekṣamāṇasya yadā guruṃ prati yiyāsā bhavati tadā sā 
pārameśvaryāṃ śaktyā vakṣyamāṇalakṣaṇaṃ sadguruṃ prati nīyate yena 
tatprāptimātrādevāsya tathā dārḍhyotpādāt jñānaṃ paraṃ pūrṇatāṃ yāyāt 
yadvaśāt pareṣāmanāyāsameva tato bhuktimukti syātām ata evāsyākalpitatve'pi 
śrītantrāloke sahabhittikatvamuktam anyathā tu nirbhittikatvam asyaiva 
pādatrayasyāvṛttyā ca sa kaścit mandatīvrarūpatayā śivaśaktyā 
proditasvavimarśo bhuktimuktiprasiddhyarthaṃ sadguruṃ prati jigamiṣuḥ san 
gatau satyāṃ tāṃ prāpya tena tena ārādhanaprakāreṇa prasannāt tasmāt 
pārameśvaraṃ kaṃcana dīkṣāprakāramāsādya tatsamanantarameva sati dehe 
śivaṃ vrajet pūrṇajñānakriyottejanena 
tadekarūpasvātmasākṣātkāramāsādayet yena pūrvoktasamastalakṣaṇāpattau 
jīvanmuktaḥ syāt | yadvā bhuktabhogatayā āsannamaraṇastatkṣaṇādeva ca 
dehapāte śivaṃ vrajet |

dṛṣṭvā śiṣyaṃ jarāgrastaṃ vyādhibhiḥ paripīḍitam |
utkramayya tatastvenaṃ pare tattve niyojayet ||

iti nītyā sadyo nirvāṇadīkṣādvāreṇa pare tattve yojitaḥ syādityarthaḥ | ata eva 
vāśabdau vikalpadyotakau tīvramadhyamayā śaktyā saṃbaddhastu pūrvavat 
dīkṣāmāsādyāpi anātmarūpe buddhyādau ātmābhimānasya tādavasthyāt 
ātmani dārḍhyena śivaikarūpatāṃ na vettīti kiñcitkālamidaṃ 
śarīrārambhakaṃ karmopabhujya āhitaśeṣavṛttirdehapāte śivaṃ vrajet 
tadāsya tadaikātmyābhivyaktiḥ syāditi sa ityādeḥ sakalasyaiva vākyasya 
tatkṣaṇādvā iti apāsya punarāvṛttyā ayamarthaḥ | yathā yogo hi 
bhogaikasādhanam iti bubhukṣūṇāṃ tatpradhānaiva dīkṣā nyāyyā iti uktaṃ 
yogadīkṣāmiti ata eva pūrvaṃ dīkṣāyāṃ jñānasya prādhānyaṃ 
tadvimocakameva kriyā punarubhayānuyāyinīti nāsyāḥ pṛthagupādānam tena 
madhyamadhyarūpayā śaktyā saṃbaddhaḥ śivarūpatālābhautsukye'pi 
bubhukṣutvādeva dhiyā kvacana yathābhīṣṭe tattve guruṇā yojitaḥ tata eva 
śrutacintādimukhena yogaṃ jñātvā tattaddhāraṇādikrameṇasamabhyaset yena 
tatsiddhimāhātmyāt anenaiva dehena tatra tatra tattvabhogān bhuktvā tadavasāne 
śāśvataṃ padamavāpnoti ityanenaiva saṃbandhaḥ | madhyamadhyaśaktipāte 
iyān viśeṣo yat dehānte yogasiddhimavāpnotīti | taduktaṃ śrītantrāloke 

madhyamande śaktipāte śivalābhotsuko'pi san |
bubhukṣuryatra yuktastadbhuktvā dehakṣaye śivaḥ ||

mandamadhye tu tatraia tattvenāpi niyojitaḥ |
dehānte tadvaraṃ bhogaṃ bhuktvā paścācchivaṃ vrajet ||

iti | evamidaṃ bhedadvayaṃ śivadharmisādhakaviṣayam ādyastu putrakaviṣaya iti 
vibhāgaḥ | asyaiva ślokasya dvitīyapādavarjamāvṛttyā lokadharmiṇaḥ 
sādhakasya dehānte tatra tatrābhīṣṭe tattvādau yogena yojanayā bhogarūpāyāḥ 
siddhereva tīvramadhyamandarūpatayā prāptirbhavatīti śakterapi 
evaṃprakāratvamuktaṃ syāt | taduktaṃ śrītantrāloka eva 

tīvramande madhyamande mandamande bubhukṣutā |
kramānmukhyātimātreṇa vidhinetyantataḥ śivam ||

iti | etacca tadviveka evāsmābhiḥ sarvaṃ vivecitaṃ kintu iyat tatra nyūnaṃ vartate 
yadantyasyāsya ślokasya na pāṭha iti sa cāsmābhirupapanno'pi na kalpitaḥ 
prāyaḥ kvacan pustakāntareṣu adṛṣṭatvāt 
durjanaprāyādyatanamūrkhajanasaṃtrāsācca arthagatyā tu 
granthakṛdupajñatayā vyākhyāta eva paramiti alaṃ bahunā |] tīvra 
madhya mandasya utkarṣa mādhyasthya nikarṣaiḥ punastraividhyāt tatra 
utkṛṣṭatīvrāt tadaiva dehapāte parameśatā madhyatīvrāt 
śāstrācāryānapekṣiṇaḥ svapratyayasya prātibhajñānodayaḥ yadudaye 
bāhyasaṃskāraṃ vinaiva bhogāpavargapradaḥ prātibho gururityucyate tasya hi 

121)

na samayyādikalpanā kācit atrāpi tāratamyasadbhāvaḥ [k: tāratamyasya 
sadbhāva iti pāṭhaḥ |] icchāvaicitryāt iti satyapi prātibhatve 
śāstrādyapekṣā saṃvādāya syādapi iti nirbhittisabhittyādibahubhedatvam 
ācāryasya prātibhasyāgameṣu uktam sarvathā pratibhāṃśo [kh: 
prātibhāṃśa iti pāṭhaḥ |] balīyān 

122)

tatsaṃnidhau anyeṣām anadhikārāt | bhedadarśana iva anādiśivasaṃnidhau 
muktaśivānāṃ sṛṣṭilayādikṛtyeṣu mandatīvrāt śaktipātāt sadguruviṣayā 
yiyāsā bhavati asadguruviṣayāyāṃ tu tirobhāva eva asadgurutastu 
sadgurugamanaṃ śaktipātādeva | sadgurustu 
samastaitacchāstratattvajñānapūrṇaḥ sākṣāt bhagavadbhairavabhaṭṭāraka eva 
yogino'pi svabhyastajñānatayaiva mocakatve tatra yogyatvasya 
saubhāgyalāvaṇyādimattvasyevānupayogāt [k: yogitvasyeti 
lāvaṇyādisattvasevāmupayogītyādi ca pāṭhaḥ |] |

123)

asadgurustu anyaḥ sarva eva | evaṃ yiyāsuḥ guroḥ jñānalakṣaṇāṃ dīkṣāṃ 
prāpnoti yayā sadya eva mukto bhavati jīvannapi atra avalokanāt kathanāt 
śāstrasaṃbodhanāt caryādarśanāt carudānāt ityādayo bhedāḥ | abhyāsavato 
vā tadānīṃ sadya eva prāṇaviyojikāṃ dīkṣāṃ labhate sā tu maraṇakṣaṇa eva 
kāryā iti vakṣyāma iti | tīvrastridhā utkṛṣṭamadhyāt śaktipātāt 
kṛtadīkṣāko'pi svātmanaḥ śivatāyāṃ na tathā dṛḍhapratipattiḥ bhavati 
pratipattiparipākakrameṇa tu dehānte śiva eva madhyamadhyāt tu śivatotsuko'pi 
bhogaprepsuḥ bhavati iti tathaiva dīkṣāyāṃ jñānabhājanam sa ca 
yogābhyāsalabdham anenaiva dehena bhogaṃ bhuktvā dehānte śiva eva | 
nikṛṣṭamadhyāttu dehāntareṇa bhogaṃ bhuktvā śivatvam eti iti | madhyastu 
tridhā bhogotsukatā yadā pradhānabhūtā tadā mandatvaṃ 
pārameśvaramantrayogādeśca yato mokṣaparyantatvam ataḥ śaktipātarūpatā | 
tatrāpi tāratamyāt traividhyam ityeṣa mukhyaḥ [trividhaḥ |] śaktipātaḥ 
| vaiṣṇavādīnāṃ tu rājānugrahavat na mokṣāntatā iti na iha vivecanam | 
śivaśaktyadhiṣṭhānaṃ tu sarvatra iti uktam sā [sā śivaśaktirityarthaḥ |
] paraṃ jyeṣṭhā na bhavati api tu ghorā ghoratarā vā sa eṣa śaktipāto 
vicitro'pi tāratamyavaicitryāt [tāratamyavaicitryāt avāntarātiśayenetyarthaḥ 
|] bhidyate kaścit vaiṣṇavādisthaḥ samayyādikrameṇa srotaḥ [srotaḥ 
pañcake tantraviśeṣe ityarthaḥ |] pañcake ca prāptaparipākaḥ 
sarvottirṇabhagavatṣaḍardhaśāstraparamādhikāritām eti anyastu 
ulla�nghanakrameṇa anantabhedena ko'pi akramam iti ata eva 
adharādharaśāsanasthā guravo'pi iha maṇḍalamātradarśane'pi anadhikāriṇaḥ 
ūrdhvaśāsanasthastu guruḥ adharādharaśāsanaṃ pratyuta prāṇayati pūrṇatvāt 
iti sarvādhikārī | sa ca 

125)

daiśiko guruḥ ācāryo dīkṣakaḥ cumbakaḥ sa cāyaṃ pūrṇajñāna eva 
sarvottamaḥ tena vinā dīkṣādyasaṃpatteḥ | yogī tu phalotsukasya yukto yadi 
upāyopadeśena avyavahitameva phalaṃ dātuṃ śaktaḥ upāyopadeśena tu 
jñāne eva yukto mokṣe'pi abhyupāyāt jñānapūrṇatākā�nkṣī ca bahūnapi 
gurūn [yaduktam

āmodārthī yathā bhṛ�ngaḥ puṣpāt puṣpāntaraṃ vrajet |
vijñānārthī tathā śiṣyo gurorgurvantaraṃ vrajet || iti |] kuryāt | 
uttamottamādijñānabhedāpekṣayā teṣu tu varteta saṃpūrṇajñānagurutyāge tu 
prāyaścittameva | nanu so'pi abruvan viparītaṃ vā bruvan kiṃ na tyājyaḥ naiva iti 
brūmaḥ tasya hi pūrṇajñānatvāt eva rāgādyabhāva iti avacanādikaṃ 
śiṣyagatenaiva [kh: śiṣyagataṃ naiveti pāṭhaḥ |] kenacit 
ayogyatvānāśvastatvādinā nimittena syāt iti tadupāsane yatanīyaṃ śiṣyeṇa na 
tattyāge | evam anugrahanimittaṃ śaktipāto nirapekṣa eva-

126)

karmādiniyatyapekṣaṇāt [k: niyatyanapekṣaṇāditi pāṭhaḥ |] | 
tirobhāva iti tirobhāvo hi karmādyapekṣagāḍhaduḥkhamohabhāgitvaphalaḥ 
[yathoktaṃ tantrāloke

niyatyaiva yadā caiva svarūpācchādanakramāt |
bhu�nkte duḥkhavimohādi tadā karmaphalakramaḥ ||

tyaktvā tu niyamaṃ kāmaṃ duḥkhamohaparitatām |
vibhāsayiṣurāste'yaṃ tirodhāne'napakṣakaḥ || iti |; k: karmādyanapekṣeti pāṭhaḥ 
|] yathāhi prakāśasvātantryāt prabuddho'pi mūḍhavat ceṣṭate hṛdayena 
ca mūḍhaceṣṭāṃ nindati tathā mūḍho'pi prabuddhaceṣṭāṃ 
mantrārādhanādikāṃ kuryāt nindecca [tathā ca śrīvidyādhipatiḥ 

ye yauṣmāke śāsanamārge kṛtadīkṣāḥ
saṃgacchante mohavaśādvipratipattim |
nūnaṃ teṣāṃ nāsti bhavadbhānuniyogaḥ 
saṃkocaḥ kiṃ sūryakaraistāmarasānām ||

jñātajñeyā dhātṛpadasthā api mantre
ye tvanmārgātkāpathagāste'pi na samyak |
prāyasteṣāṃ lai�ngikabuddhyādisamuttho
mithyābodhaḥ sarpavasādīpajakalpaḥ || iti |] yathā ca asya mūḍhaceṣṭā 
kriyamāṇāpi prabuddhasya dhvaṃsam eti tathā asya prabuddhaceṣṭā sā tu 
nindyamānā niṣiddhācaraṇarūpatvāt 

127)

svayaṃ ca tayaiva [k: tathaiva iti pāṭhaḥ |] viśa�nkamānatvāt enaṃ 
duḥkhamohapa�nke nimajjayati na tu utpannaśaktipātasya tirobhāvo'sti atrāpi ca 
karmādyapekṣā [yathoktam |

na cāsya karmamahimā tādṛgyenetthamāsta saḥ |
kiṃ hi tatkarma kasmādvā pūrveṇātra samo vidhiḥ ||

tasmātsā parameśecchā yayāyaṃ mohitastathā |
anantakālasaṃvedyaduḥkhapātratvamīhate ||

tatrāpi cecchāvaicitryādihāmutrobhayātmakaḥ | iti |] pūrvavat niṣedhyā 
tatrāpi ca icchāvaicitryāt etaddehamātropabhogyaduḥkhaphalatvaṃ vā 
dīkṣāsamayacaryāgurudevāgnyādau sevānindanobhayaprasaktānāmiva prāk 
śivaśāsanasthānāṃ tattyāgināmiva | tatrāpi icchāvaicitryāt tirobhūto'pi 
svayaṃ vā śaktipātena yujyate mṛto vā bandhugurvādikṛpāmukhena 
[kh: kṛpāmūleneti pāṭhaḥ |] ityevaṃ pañcakṛtyabhāgitvaṃ 
[yathoktaṃ śrīsomānandapādaiḥ 

kutsite'kutsitasya syātkathamunmukhateti cet |
rūpaprasārarasato garhitatvamayuktimat ||

pañcaprakārakṛtyoktiśivatvānnijakarmaṇe |
pravṛttasya nimittānāmapareṣāṃ kva mārgaṇam || iti |]

128)

svātmani anusaṃdadhat parameśvara eva iti na khaṇḍitamātmānaṃ paśyet |

yathā nirargalasvātmasvātantryātparameśvaraḥ |
ācchādayennijaṃ dhāma tathā vivṛṇuyādapi ||
aprabuddhe'pi vā dhāmni svasminbuddhavadācaret |
bhūyo buddhyeta vā so'yaṃ śaktipāto'napekṣakaḥ ||

jaha ni-arjha-u
mahesaru acchavi saṃviravitanha |
ṣuṇusa atti vipara
pasaru accha ivimala sarū-i ||

iti śrīmadabhinavaguptācāryaviracite tantrasāre śaktipātaprakāśanaṃ nāma 
ekādaśamāhnikam ||11||


atha dvādaśamāhnikam |

dīkṣādikaṃ vaktavyam iti uktam ato dīkṣāsvarūpanirūpaṇārthaṃ prāk 
kartavyaṃ snānam upadiśyate | snānaṃ ca śuddhatā ucyate śuddhatā ca 
parameśvarasvarūpasamāveśaḥ | kāluṣyāpagamo hi śuddhiḥ [sāmānyena 
kathanametat |] kāluṣyaṃ ca tadekarūpe'pi 
atatsvabhāvarūpāntarasaṃvalanābhimānaḥ | tadiha [viśeṣamāha 
tadihetyādinā |] svatantrānandacinmātrasāre svātmani viśvatrāpi vā 
tadanyarūpasaṃvalanābhimānaḥ [tadanyarūpeti 
asvatantrāprakāśarūpetyarthaḥ |] aśuddhiḥ sā ca 
mahābhairavasamāveśena vyapohyate so'pi kasyacit jhaṭiti bhavet kasyāpi 
upāyāntaramukhaprekṣī | tatrāpi [tatrāpi ca upāyamukhaprekṣitve ityarthaḥ |
] ca ekadvitryādibhedena samastavyastatayā kvacit kasyacit kadācit ca tathā 
āśvāsopalabhdeḥ vicitro bhedaḥ | sa ca aṣṭadhā kṣitijalapava-

130)

nahutāśanākāśasomasūryātmarūpāsu aṣṭāsu [yathoktaṃ tantrāloke

etā hyanugrahātmāno mūrtayo'ṣṭau śivātmikāḥ |
svarūpaśivarūpābhyāṃ dhyānāttattatphalapradāḥ || iti |] mūrtiṣu 
mantranyāsamahimnā parameśvararūpatayā bhāvitāsu tādātmyena ca dehe 
parameśvarasamāviṣṭe śarīrādivibhāgavṛtteḥ [k: 
śarīrāvibhāgavṛtteriti pāṭhaḥ |] caitanyasyāpi 
parameśvarasamāveśaprāptiḥ kasyāpi tu snānavastrādituṣṭijanakatvāt 
parameśopāyatāmetīti uktaṃ ca śrīmadānandādau [yathoktaṃ tantrāloke

śrīmadānandaśāstre ca nāśuddhiḥ syādvipaścitaḥ |
kiṃ tu snānaṃ savastratvaṃ tuṣṭisaṃjananaṃ bhavet || iti |] dhṛtiḥ 
āpyāyo vīryaṃ maladāho vyāptiḥ sṛṣṭisāmarthyaṃ sthitisāmarthyam 
abhedaśca ityetāni teṣu mukhyaphalāni teṣu teṣu [teṣu teṣu 
pṛthivyādiṣvityarthaḥ | upāhitasya anusaṃdhānena sthāpitasyetyarthaḥ |] 
upāhitasya mantrasya tattadrūpadhāritvāt | vīroddeśena tu viśeṣaḥ tadyathā 
raṇareṇuḥ vīrāmbhaḥ mahāmarut vīrabhasma śmaśānanabhaḥ tadupahitau 

131)

candrārkau ātmā nirvikalpakaḥ | punarapi bāhyābhyantaratayā [tatra 
bāhyasnānakramaḥ yatheṣṭamantraṃ hṛdaye smaran gorajo'ntaḥ padatrayaṃ 
gacchet iti pārthivam 1 tathaiva pañcāṅgamantritairmūrdhādipādāntaṃ 
prakṣālya sāṅgamūlaṃ japannimajjet 2 astreṇābhyutthitaṃ bhasma japtvā 
kakkahṛdguhyapade dadyāt tato bhasmamuṣṭiṃ sāṅgamūlajaptāṃ mūrdhni 
kṣipet 3 hlādini vāyau mantravāk gatāgataṃ kṛtvā vāyavyaṃ snānamācaret 4 
tathā nirmale gagane'pi ekāgnīkṛtadṛṣṭirmantraṃ smaret ityākāśīyam 5 
evaṃ somārkatejasi śivabhāvanaṃ snānamucyate tathā 

ātmaiva parameśāno nirācāramahāhṛdaḥ |
viśvaṃ nimajjya tatraiva tiṣṭhanśuddhaśca śodhakaḥ ||

ityātmasnānamaṣṭamam |] dvitvam bahirupāsyamantratādātmyena 
tanmayīkṛte tatra tatra nimajjanam ityuktam | viśeṣastu ānandadravyaṃ 
vīrādhāragataṃ nirīkṣaṇena śivamayīkṛtya tatraiva mantracakrapūjanam tataḥ 
tenaiva dehaprāṇobhayāśritadevatācakratarpaṇam iti mukhyaṃ snānam | 
ābhyantaraṃ yathā tattaddharādirūpadhāraṇayā tatra tatra pārthivādau cakre 
tanmayībhāvaḥ |

parabhairavasaṃmajjana-
māhuḥ snānaṃ yathā tu tadbhavati |
tadapi bāhyaṃ snānaṃ
na mukhyamupacārataḥ kiṃ tu ||

132)

paramānandanimajjaṇu
i-uparamatthiṇa hnāṇu |
tahiṃ āvidṛtaratti
diṇu jāṇa-i para appāṇu ||

iti śrīmadācāryābhinavaguptaviracite śrītantrasāre snānaprakāśanaṃ nāma 
dvādaśamāhnikam ||12||


atha trayodaśamāhnikam |

atha prasannahṛdayo yāgasthānaṃ yāyāt tacca yatraiva hṛdayaṃ 
prasādayuktaṃ parameśvarasamāveśayogyaṃ bhavati tadeva na tu asya 
anyallakṣaṇam uktāvapi dhyeyatādātmyameva kāraṇam tadapi 
bhāvaprasādādeva iti nānyat sthāpanam | pīṭhaparvatāgram 
[pīṭhaparvatāgraṃ pradyumnapīṭhādi |] ityādistu śāstre sthānoddeśa 
etatpara eva boddhavyaḥ teṣu teṣu pīṭhādisthāneṣu parameśaniyatyā 
parameśvarāviṣṭānāṃ śaktīnāṃ dehagrahaṇāt āryadeśā [āryāvartaḥ 
puṇyabhūmirmadhyaṃ vindhyahimāgayoriti kośaḥ |] iva dhārmikāṇāṃ 
mlecchadeśā iva adhārmikāṇām parvatāgrādeścaikāntatvena 
vikṣepaparihārāt aikāgryapadatvam [taduktam |

tasmātsiddhyai vimuktyai vā pūjājapasamādhiṣu |
tatsthānaṃ yatra viśrāntisundaraṃ hṛdayaṃ bhavet || iti |; k: 
aikāgryapradatvamiti pāṭhaḥ |] iti | tatra yāgagṛhāgre bahireva 

134)

sāmānyanyāsaṃ kuryāt karayoḥ pūrvaṃ [g: pūrṇamiti pāṭhaḥ |] tato 
dehe | hrīṃ na pha hrīṃ hrīṃ ā kṣa hrīṃ [k: a-kṣeti pāthaḥ |] 
ityābhyāṃ śaktiśaktimadvācakābhyāṃ mālinīśabdarāśimantrābhyām 
[śabdarāśiḥ mātṛkā tantra mātṛkānyāso yathā |

lalāṭavaktre dṛkkarṇanāsāgaṇḍaradauṣṭhage |
dvaye dvaye śikhājihve visargāntāstu ṣoḍaśa ||

dakṣānyayoḥ skandhavāhvoḥ karāṅgulinakhe kakṣau |
vargau ṭatau krmātkaṭyāmūrvādiṣu niyojayet ||

pavargaṃ pārśvayoḥ pṛṣṭhe jaṭhare hṛdyatho nava |
ityeṣa mātṛkānyāsaḥ .................||

iti | mālinīnyāsastu parātriṃśikātrivaraṇe nirdiṣṭaḥ | tatra mātṛkā 
yālāṅganādiprasiddhā | mālinī yathā na ṛ ṝ ḷ ḹ tha ca? dha īṃ ṇ 
u ū ya ka kha ga gha ṅa i a va bha ya ḍa ḍha ṭha jha ña ja ra ṭa pa cha la ā sa 
aḥ ha pa kṣa ma śa aṃ ta e ai o au da pha iti |] ekenaiva ādau śaktiḥ tataḥ 
śaktimāniti muktau pādāgrācchiro'ntam bhuktau tu sarvo viparyayaḥ | mālinī hi 
bhagavatī mukhyaṃ śāktaṃ rūpaṃ bījayonisaṃghaṭṭena samastakāmadugham 
[yathoktaṃ tantrāloke

anyonyabījayonīnāṃ kṣobhādvaisargikodayāt |
kāṃ kāṃ siddhiṃ na vitaretkiṃ vā nyūnaṃ na pūrayet ||
yonibījārṇasāṃkaryaṃ bahudhā yadyapi sthitam |
tathāpi nādiphānto'yaṃ kramo mukhyaḥ prakīrtitaḥ || iti |] |

135)

anyarthaṃ? caitannāma rudraśaktimālābhiryuktā phaleṣu puṣpitā 
saṃsāraśiśirasaṃhāranādabhramarī [k: saṃsāraśiśirasaṃsāranādeti 
pāṭhaḥ |] siddhimokṣadhāriṇī dānādānaśaktiyuktā iti ra la 
yorekatvasmṛteḥ | ata eva hi bhraṣṭavidhirapi mantra [k: yatreti pāṭhaḥ |
] etannyāsāt pūrṇo bhavati sāñjano'pi [sāñajanaḥ māyāmalasahita 
ityarthaḥ |] gāruḍavaiṣṇavādirnirañjanatām etya mokṣaprado bhavati | 
dehanyāsānantaram arghapātre ayameva nyāsaḥ | iha hi kriyākārakāṇāṃ 
[tallakṣaṇaṃ yathā |

yāvatsiddhamasiddhaṃ vā sādhyatvenābhidhīyate |
āśritakramarūpatvātsā kriyetyabhidhīyate ||

tathā |

guṇabhūtairavayavaiḥ samūhaḥ kramajanmanām |
buddhyā prakalpitābhedaḥ kriyeti vyapadiśyate ||

iti | tathā kārakāṇi

kartā karmātha karaṇaṃ saṃpradānaṃ tathaiva ca |
apādānaṃ tathādhāraḥ kārakāṇi ṣaḍeva hi || iti |] 
parameśvarābhedapratipattidārḍhyasiddhaye pūjākriyā udāharaṇīkṛtā 
[udāharaṇīkṛteti |

yathā hi vāhaḥ kaṭakabhramasvātantryamāgataḥ |
aśvaḥ saṃgrāmarūḍho'pi tāṃ śikṣāṃ nātivartate ||

tathārcanakriyābhyāsaśivībhāvitakārakaḥ |
gacchaṃstiṣṭhannapi dvaitaṃ kārakāṇāṃ vyapojjhati ||

tathaivābhyāsaniṣṭhasyākramādviśvamidaṃ haṭhāt |
saṃpūrṇaśivatākṣobhanarīnṛttamiva sphurat ||

iti | uktaṃ cotpalabhaṭṭapādaiḥ

aho sādhutamaḥ ko'pi śivapūjāmahotsavaḥ |
ṣaṭtriṃśato'pi tattvānāṃ kṣobho yatrollasatyalam || iti |]

136)

tatra ca sarvakārakāṇām itthaṃ parameśvarībhāvaḥ tatra yaṣṭrādhārasya 
sthānaśuddhyāpādānakaraṇayorarghapātraśuddhinyāsābhyām 
yaṣṭurdehanyāsāt yājyasya sthaṇḍilādinyāsāt | evaṃ kriyākrameṇāpi 
parameśvarīkṛtasamastakārakaḥ tayaiva dṛśā sarvakriyāḥ paśyan vināpi 
pramukhajñānayogābhyāṃ parameśvara eva bhavati | evam arghapātre nyasya 
puṣpadhūpādyaiḥ pūjayitvā tadvipruḍbhiḥ yāgasāraṃ puṣpādi ca prokṣayet 
[yathoktam |

arghapātrāmbuvipruḍbhiḥ spṛṣṭaṃ sarvaṃ hi śudhyati |
śivārkakarasaṃsparśātkānyā śuddhirbhaviṣyati || iti |] | tataḥ 
prabhāmaṇḍale [prabhāmaṇḍaleti triśūlārkavṛṣamātṛkṣetrapānvrajet 
tatrārcane kramaḥ |

tāro nāma caturthyantaṃ namaścetyarcane manuḥ |
ekoccāreṇa vā bāhyaparivāreti śabditaḥ || iti |] bhumau khe vā oṃ 
bāhyaparivārāya

137)

nama iti pūjayet | tato dvārasthāne [dvārasthāna ityatra vistārakramo yathā 
dvārordhve lakṣmīgaṇeśapūjanaṃ tayordakṣe diṇḍinaṃ vāme mahodaraṃ 
madhye vāgīśvarīṃ svadakṣe nandinaṃ vāme kālaṃ madhye trimārgagāṃ 
tathaiva svadakṣe dvāḥsthaśākhayoḥ kālindīcchāgamevān 
dehalyadho'nanteśamādhāraśaktīśca dvāramadhye sarasvatyā sahāsraṃ 
pūjayet sarve ca padmādhāragatāḥ kalpanīyāḥ mantraśca pūrvavadeva | 
saṃkṣepakrameṇa dvāradevatācakrāya nama iti bodhyam |] oṃ 
dvāradevatācakrāya nama iti pūjayet | agupte tu bahiḥsthāne sati praviśya 
maṇḍalasthaṇḍilāgra eva bāhyaparivāradvāradevatācakrapūjāṃ 
[yathoktaṃ tantrāloke |

rahasyapūjāṃ cetkuryāttadbāhyaparivārakam |
dvāḥsthāṃśca pūjayedantardevāgre kalpanākramāt || iti |] pūrvoktaṃ ca 
nyāsādi kuryāt na bahiḥ | tato'pi phaṭ phaṭ phaṭ iti astrajaptapuṣpaṃ prakṣipya 
vighnānapasāritān dhyātvā antaḥ praviśya parameśvarakiraṇeddhayā 
dṛṣṭyā abhito yāgagṛhaṃ paśyet [tathā astramantreṇa digbandhanaṃ 
kavacena tadācchādanaṃ ca kuryāt ityavāntaro bhedaḥ |] | tatra 
mumukṣuruttarābhimukhastiṣṭhet 

138)

yathā bhagavadaghoratejasā jhaṭityeva pluṣṭapāśo bhavet | tatra [iha

yadyapyasti na diṅnāma kācitpūrvāparādikā |
pratyayo hi na tasyāḥ syādekasyā anupāhiteḥ ||

upādhiḥ pūrvatādiṣṭa iti cettatkṛtaṃ diśā |
upādhimātraṃ tu tathā vaicitryāya kathaṃ bhavet || 

ityāśaṅkāṃ garbhīkṛtyāha tatretyādi |] parameśvarasvātantyameva 
mūrtyābhāsanayā [mūrtyābhāsanā ca 

mūrtivaicitryato deśakramamābhāsayatyasau |
iti pratyabhijñādiṣṭanītyā |] diktattvam avabhāsayati | tatra citprakāśa eva 
madhyaṃ tata itarapravibhāgapravṛtteḥ prakāśasvīkāryamūrdhvam 
atathābhūtam [atathābhūtaṃ prakāśenāsvīkṛtamityarthaḥ |] adhaḥ 
prakāśanasaṃmukhīnaṃ pūrvam itarat aparam [aparaṃ paścimamityarthaḥ 
|] saṃmukhībhūtaprakāśatvāt anantaraṃ tatprakāśadhārārohasthānaṃ 
dakṣiṇam ānukūlyāt tatsaṃmukhaṃ tu avabhāsyatvāt uttaram iti dikcatuṣkam | 
tatra madhye bhagavān ūrdhve'sya aiśānaṃ vaktram adhaḥ pātālavaktram 
pūrvādidikcatuṣke śrītatpuruṣāghorasadyovāmākhyam dikcatuṣkamadhye 
anyāścatasraḥ 

139)

ityevaṃ saṃvinmahimaiva mūrtikṛtaṃ digbhedaṃ bhāsayati iti dik na 
tatvāntaram | yathā yathā ca svacchāyā [yathoktam trikahṛdaye |

svapadā svaśiraścchāyāṃ yadvallaṅkitumīhate |
pādoddeśe śiro na syāttatheyaṃ vaindavī kalā || iti |] laṅghayitum iṣṭā 
satī puraḥ puro bhavati tathā parameśvaramadhyatāmeti [g: parameśvaro'pi 
madhyatāmiti pāṭhaḥ |] sarvādhiṣṭhātṛtaiva mādhyasthyam ityuktam | 
evaṃ yathā bhagavān digvibhāgakārī [yathoktam tantrāloke |

digvibhāgastu tajjo'sti vadanānāṃ catuṣṭavāt |
pañcamātyayujitve tau parityaktanijātmakau || iti |] tathā sūryo'pi sa hi 
pārameśvaryeva jñānaśaktirityuktaṃ tatra [tatra tatra 
parātriṃśikādāvityarthaḥ |] tatra tatra pūrvaṃ vyakteḥ pūrvā yatraiva ca 
tathā tatraiva evaṃ svātmādhīnāpi svasaṃmukhīnasya deśasya purastāttvāt | 
evaṃ svātmasūryaparameśatritayaikībhāvanayā dikcarcā iti 
abhinavaguptaguravaḥ | evaṃ 

140)

sthite uttarābhimukham [uttarābhimukhamiti | tathā coktaṃ

tanmadhyasthitanāthasya grahītuṃ dakṣiṇaṃ mahaḥ |
udaṅmukhāḥ syuḥ pāścātyaṃ grahītuṃ pūrvatomukhāḥ || iti |] upaviśya 
dehapuryaṣṭakādau [puryaṣṭakaśarīraśuddhiryayā 
hṛtpadmasthitamātmāna sūkṣmaṃ khadyotanibhaṃ sphurattarakākāraṃ 
hṛtkaṇṭhatālubhrūmadhyabrahmarandhrabhedena ūrdhvarecakakrameṇa 
dvādaśānte viniyojya mano'haṅkārabuddhīḥ paratattve vilāyya śūnyaṃ 
śarīraṃ dhyāyet iti |] ahaṃbhāvatyāgena dehatāṃ dahet [yathoktaṃ 
vijñānabhairave 

kālāgninā kālapadādutthitena svakaṃ puram |
pluṣṭaṃ vicintayedante śāntābhāsaḥ prajāyate || iti |] saṃnidhāvapi 
paradehavat adehatvāt tato nistaraṅgadhruvadhāmarūḍhasya [k: 
nistaraṅgakramadhāma iti pāṭhaḥ |] dṛṣṭisvābhāvyāt yā kila ādyā 
spandakalā saiva mūrtiḥ tadupari yathopadiṣṭayājyadevatācakranyāsaḥ 
prādhānyena ca iha śaktayo yājyāḥ tadāsanatvāt bhagavannavātmādīnāṃ 
[navātmatvaṃ tu

prakṛtiḥ puruṣaścaiva niyatiḥ kāla eva ca |
māyā vidyā tatheśaśa sadāśivaśivau tathā ||

iti nirdiṣṭamasti śaktereva pūjyatvādityatra ayaṃ bhāvaḥ sarvathā hi 
vimarśanameva ca pūjeti śivasyāpi svaprakāśatāpattyai tadapekṣeti |; k: 
bhagavati iti pāṭhaḥ |]

141)

śaktereva ca pūjyatvāt iti guravaḥ | tatra ca pañca avasthā jāgradādyāḥ ṣaṣṭhī 
ca anuttarā nāma svabhāvadaśā anusaṃdheyā iti ṣoḍhā nyāso bhavati | tatra 
kāraṇānāṃ brahmaviṣṇurudreśasadāśivaśaktirūpāṇāṃ pratyekam 
adhiṣṭhānāt ṣaṭtriṃśattattvakalāpasya laukikatattvottīrṇasya 
bhairavabhaṭṭārakābhedavṛtte nyāse pūrṇatvāt bhairavībhāvaḥ tena etat 
anavakāśam | yadāhuḥ ataraṅgarūḍhau labdhāyāṃ punaḥ kiṃ 
tattvasṛṣṭrinyāsādinā iti | tāvat hi tadataraṅgaṃ bhairavavapuḥ yat svātmani 
avabhāsitasṛṣṭisaṃhārāvaicitryakoṭi | evam anyonyamelakayogena 
parameśvarībhūtaṃ prāṇadehabuddhyādi bhāvayitvā bahirantaḥ 
puṣpadhūpatarpaṇādyairyathāsaṃbhavaṃ pūjayet | tatra śarīre prāṇe dhiyi ca 
tadanusāreṇa śūlābjanyāsaṃ kuryāt tadyathā ādhāraśaktimūle 
[ādhāraśaktiśūle nānyantaścaturaṅgule ityarthaḥ |] mūlaṃ kanda 
āmulasārakaṃ lambikānte kalātattvānto daṇḍaḥ māyātmako granthiḥ 
catuṣkikātmā śuddhavidyāpadmaṃ tatraiva sadāśivabhaṭṭārakaḥ sa eva 
mahāpretaḥ prakarṣeṇa līnatvāt 

142)

bodhāt prādhānyena vedyātmakadehakṣayāt nādāmarśātmakatvācca [g: 
nādāmarśatvāditi pāṭhaḥ |] iti | tannābhyutthitaṃ 
tanmūrdharandhratrayanirgataṃ 
nādāntarvartiśaktivyāpinīsamanārūpamarātrayaṃ [k: rūpaparātrayamiti 
pāṭhaḥ |] dviṣaṭkāntaṃ tadupari śuddhapadmatrayam aunmanasam etasmin 
viśvamaye bhede āsanīkṛte adhiṣṭhātṛtayā vyāpakabhāvena [g: 
vyāpakābhāveneti pāṭhaḥ |] ādheyabhūtāṃ yathābhimatāṃ devatāṃ 
kalpayitvā yat tatraiva samasvabhāvanirbharātmani [k, g: 
samastabhāvanirbhareti pāthaḥ |] viśvabhāvārpaṇaṃ tadeva pūjanaṃ 
yadeva tanmayībhavanaṃ taddhyānaṃ yat 
tathāvidhāntaḥparāmarśasadbhāvanādāndolanaṃ sa japaḥ yat 
tathāvidhaparāmarśakramaprabuddhamahātejasā tathābalādeva 
viśvātmīkaraṇaṃ sa homaḥ tadevaṃ kṛtvā parivāraṃ tata eva 
vahnirāśervisphuliṅgavat [g: sphuran iti pāṭhaḥ |] dhyātvā tathaiva 
pūjayet |

dvādaśāntamidaṃ prāgraṃ triśūlaṃ mūlataḥ smaran |
devīcakrāgragaṃ tyaktakramaḥ khacaratāṃ vrajet ||

143)

mūlādhārāddviṣaṭkāntavyomāgrāpūraṇātmikā |
khecarīyaṃ svasaṃcārasthitibhyāṃ svāmṛtāśanāt ||

evam antaryāgamātrādeva vastutaḥ kṛtakṛtyatā | satyataḥ tadāviṣṭasya 
tathāpi bahirapi kāryo yāgo'vacchedahānaya eva yo'pi tathā samāveśabhāk na 
bhavati tasya mukhyo bahiryāgaḥ tadabhyāsāt samāveśalābho yatastasyāpi tu 
paśutātirodhānāyāntaryāgaḥ tadarūḍhāvapi tatsaṃkalpabalasya 
śuddhipradatvāt | atha yadā dīkṣāṃ cikīrṣet tadhādhivāsanārthaṃ 
bhūmiparigrahaṃ gaṇeśārcanaṃ kumbhakalaśayoḥ pūjāṃ sthaṇḍilārcanaṃ 
havanaṃ [k: havanaṃ iti padaṃ nāsti |] ca kuryāt | nityanaimittikayostu 
sthaṇḍilādyarcanahavane eva | tatra adhivāsanaṃ śiṣyasya 
saṃskṛtayogyatādhānam amblīkaraṇamiva dantānāṃ [k: dantānāṃ 
kartavyeti pāṭhaḥ |] devasya kartavyonmukhatvagrāhaṇam gurostadvahaṇam 
| upakaraṇadravyāṇāṃ yāgagṛhāntarvartitayā parameśatejobṛṃhaṇena 
pūjopakaraṇayogyatārpaṇamiti | tatra sarvopakaraṇapūrṇaṃ yāgagṛhaṃ 
vidhāya 

144)

bhagavatīṃ mālinīṃ mātṛkāṃ vā smṛtvā tadvarṇatejaḥpuñjabharitaṃ 
gṛhītaṃ bhāvayan puṣpāñjaliṃ kṣipet | tata uktāstrajaptāni yathāsaṃbhavaṃ 
siddhārthadhānyākṣatalājādīni tejorūpāṇi vikīrya aiśānyāṃ diśi krameṇa 
saṃghaṭṭayet iti bhūparigrahaḥ | tataḥ śuddhavidyāntamāsanaṃ dattvā 
gaṇapateḥ pūjā tataḥ kumbham ānandadravyapūritam alaṃkṛtaṃ pūjayet tato 
yājyamanu pūgaṃ nyasya tatra mukhyaṃ mantraṃ sarvādhiṣṭhātṛtayā 
vidhipūrvakatvena smaran aṣṭottaraśatamantritaṃ tena taṃ kumbhaṃ kuryāt | 
dvitīyakalaśe vighnaśamanāya astraṃ yajet | tataḥ svasvadikṣu lokapālān 
sāstrān pūjayet | tataḥ śiṣyasya prāk dīkṣitasya haste astrakalaśaṃ dadyāt | 
svayaṃ ca guruḥ kumbham ādadīta | tataḥ śiṣyaṃ gṛhaparyanteṣu 
vighnaśamanāya dhārāṃ pātayantaṃ sakumbho'nugacchet imaṃ mantraṃ 
paṭhan 

bho bhoḥ śakra tvayā svasyāṃ diśi vighnapraśāntaye [k: 
vighnopaśāntaye iti pāṭhaḥ |] |
sāvadhānena karmāntaṃ bhavitavyaṃ śivājñayā ||

145)

tryakṣare nāmni bho ityekameva [matrasya cchandobhaṅgaprasaṅgāt |
] | tata aiśānyāṃ diśi kumbhaṃ sthāpayet | vikiropari astrakalaśam 
[anyonyaviparyayeṇa kalaśe sthāpya ityarthaḥ | ayaṃ bhāvaḥ vighnaśāntau 
satyāṃ śivaśaktyostādātmyameva samāveśavalena saṃpannam |] | tata 
ubhayapūjanam | tataḥ sthaṇḍilamadhye parameśapūjanam | tataḥ agnikuṇḍaṃ 
parameśvaraśaktirūpatayā bhāvayitvā tatra agniṃ prajvālya 
hṛdayāntarbodhāgninā saha ekīkṛtya [k: ekīkṛtya parāmarśeti 
pāṭhaḥ |] mantraparāmarśasāhityena jvalantaṃ śivāgniṃ bhāvayitvā tatra 
nyasya abhyarcya mantrān tarpayet ājyena tilaiśca | arghapātreṇa ca 
prokṣaṇameva tilājyādīnāṃ saṃskāraḥ | sruksruvayośca 
parameśābhedadṛṣṭireva hi saṃskāraḥ | tato yathāśakti hutvā sruksruvau 
ūrdhvādhomukhatayā śaktiśivarūpau parasparonmukhau vidhāya 
samapādotthito 
dvādaśāntagaganoditaśivapūrṇacandraniḥsṛtapatatparāmṛtadhārā##-
vauṣaḍantaṃ mantram uccārayan 

146)

ca ājyakṣayāntaṃ tiṣṭhet iti pūrṇāhutiḥ [yathoktaṃ tantrāloke |

ya ūrdhve kila saṃbodhaḥ kuṇḍe sa pratibimbitaḥ |
vahniḥ prāṇaḥ sruksruvau ca snehaḥ saṃkalpacidrasaḥ ||

itthaṃ jñātvāditaḥ kuṇḍasruksruvājyamanūnbhṛśam |
dvādaśāntavibodhāgnau ruṅkā? pūrṇāhutiṃ kṣipet || iti |] 
mantracakrasaṃtarpaṇī | tataścaruṃ prokṣitamānīya 
sthaṇḍilakalaśakumbhavahniṣu bhāgaṃ bhāgaṃ nivedya ekabhāgam avaśeṣya 
śiṣyāya bhāgaṃ dadyāt | tato dantakāṣṭham | tatpāto'gniyamanir##-
astreṇa kārya iti pāṭhaḥ |] | tato vikṣepaparihāreṇa 
bhāvimantradarśanayogyatāyai baddhanetraṃ śiṣyaṃ praveśya jānusthitaṃ 
taṃ kṛtvā puṣpāñjaliṃ kṣepayet | tataḥ sahasā apāsitanetrabandho'sau 
śaktipātānugṛhītakaraṇatvāt saṃnihitamantraṃ tatsthānaṃ sākṣātkāreṇa 
paśyan tanmayo bhavati anugṛhītakaraṇānāṃ mantrasaṃnidhiḥ pratyakṣaḥ 
yatastrasyatām iva bhūtānām | tataḥ svadakṣiṇahaste dīpyatayā 

147)

devatācakraṃ [devatācakraṃ sarvādhvapūrṇaṃ | pūjayitvā vāmapāṇineti 
śeṣaḥ |] pūjayitvā taṃ hastaṃ mūrdhahṛnnābhiṣu śiṣyasya pāśān 
[k: śiṣyapāśāniti pāṭhaḥ |] dahantaṃ nikṣipet 
[śivahastavidhireṣaḥ yathoktaṃ tantrāloke |

śivahastavidhiṃ kṛtvā tena saṃpluṣṭapāśakam |
śiṣyaṃ vidhāya viśrāntiparyantaṃ dhyānayogataḥ ||

tataḥ kumbhe'strakalaśe vahnau svātmani taṃ śiśum |
praṇāmaṃ kārayetpaścādbhūtamātṛbaliṃ kṣipet || iti |] | tato vāme 
somyatayā pūjayitvā śuddhatattvāpyāyinaṃ tataḥ praṇāmaṃ kuryāt | tato 
bhūtadevatādigbaliṃ madyamāṃsajalādipūrṇaṃ [k: māṃsādipūrṇamiti 
pāṭhaḥ |] bahirdadyāt ācāmet | tataḥ svayaṃ carubhojanaṃ kṛtvā 
śiṣyātmanā saha aikyamāpannaḥ prabuddhavṛttiḥ tiṣṭhet | svapan api 
prabhāte śiṣyaḥ cet aśubhaṃ svapnaṃ [itthaṃ hi svapnādhyāye 
svapnaśubhāśubhaparyālocanam

devāgnigurutatpūjākaraṇopaskarādikam |
hṛdyā strī madyapānaṃ cāpyāmamāṃsasya bhakṣaṇam ||

raktapānaṃ śiraśchedaraktaviṇmūtralepanam |
parvatāśvagajaprāyahṛdyayugyādhirohaṇam ||

yatprītyai syādapi prāyastattacchubhamudāhṛtam |
taṃ khyāpayettuṣṭivṛddhyai hlādo hi paramaṃ phalam ||

iti etacca śaṅkamānaviṣayam | anyasya tu na kiñcit śubhamaśubhaṃ vā | 
yathoktaṃ 

yeṣāṃ tu śaṅkāvilayasteṣāṃ svapnavaśotthitam |
śubhāśubhaṃ na kiñcit syāt ............... ||

iti | tatrāpi sphuṭo viśeṣaḥ

sphuṭaṃ paśyati sattvātmā rājaso liṅgamātrataḥ |
na kiñcittāmasastasya sukhaduḥkhācchubhāśubham || iti |] vadet tat 

148)

asmai na vyākuryāt śaṅkātaṅkau hi tathāsya syātām kevalam astreṇa 
tanniṣkṛtiṃ kuryāt | tatastathaiva parameśvaraṃ pūjayitvā tadagre śiṣyasya 
prāṇakrameṇa praviśya hṛtkaṇṭhatālulalāṭarandhradvādaśānteṣu ṣaṭsu 
kāraṇaṣaṭkasparśaṃ kurvan pratyekamaṣṭau saṃskārān cintayan kaṃcitkālaṃ 
śiṣyaprāṇaṃ tatraiva viśramayya punaravarohet | 
ityevāpāditāṣṭācatvāriṃśatsaṃskāroparikṛtarudrāṃśāpattiḥ 
[aṣṭācatvāriṃśatsaṃskārāstu yathā garbhādhānaṃ puṃsavanaṃ 
sīmantonnayanaṃ jātakarma nāmakarma niṣkramaṇam annaprāśanaṃ 
cūḍākaraṇam vratabandhaḥ | asminneva mekhalābandhavrataṃ 
dantakāṣṭhavratam ajinavratam tryāyuṣavrataṃ saṃdhyāvrataṃ 
vahnyupāsāvrataṃ bhikṣāvratam iti sapta vratāni antarbhavanti | etānyeva 
tantraśāstre bhauteśādyabhidhābhidheyāni | tathā aiṣṭikaṃ pārvikaṃ 
bhautikaṃ saumikaṃ godānam udvāhaḥ | aṣṭakāḥ pārvaṇī śrāddhaṃ 
śrāvaṇī āgrāyaṇī caitrī āśvayujī | āgneyam agnihotraṃ dārśaṃ 
paurṇamāsaṃ cāturmāsyaṃ paśubandhaḥ sautrāmaṇiḥ agniṣṭomaḥ 
atyagniṣṭomaḥ ukthyaḥ ṣoḍaśikā vājapeyaḥ atirātraḥ āptoryāmaḥ | 
hiraṇyapādaḥ (asyaivāvāntarabhedāḥ guhyahiraṇyadhṛt hiraṇyameḍhraḥ 
hiraṇyanābhiḥ hiraṇyagarbhaḥ hiraṇyaśrotraḥ hiraṇyatvak hiraṇyākṣaḥ 
hiraṇyajihvaḥ hiraṇyaśṛṅga iti navacitrayajñābhidhāḥ |) aśvamedhaḥ 
vānaprasthaṃ pārivrājyaṃ dayā kṣāntiḥ anasūyā śaucam anāyāsaḥ 
maṅgasyam akārpaṇyam aspṛhā iti |
ta-ime śāstrāntareṣu kramaśaḥ samuddiṣṭāḥ saṃkhyātāśca | tathā ca 
śrīsvacchande 

brāhmaṇasyādhikārāṣṭācatvāriṃśatameva ca |
garbhaḥ puṃsavanaṃ caiva sīmanto jātakarma ca ||

nāma niṣkramaṇaṃ caiva annaprāśanacūḍakam |
anenaiva varārohe śoḍhyāstvaṣṭau prakīrtitāḥ ||

etairnirvartitairdevi tato'sau jāyate dvijaḥ |
navamo vratabandhastu sa cāṅgī parikīrtitaḥ ||

aṅgāni saṃpravakṣyāmi yathāvadanupūrvaśaḥ |
mekhalā dantakāṣṭhaṃ ca ajinaṃ tryāyudhaṃ tathā ||

saṃdhyāṃ vahnerupāsāṃ ca bhikṣāṃ vai saptamaṃ viduḥ |
niyantṛṇi ca dṛṣṭāni dīkṣākāle varānane ||

niyantṛṇi prathamāśramāvasthiterlopo mā bhūdityavaśyānuṣṭheyāni iti 
vaidikakalpānusṛtyā | tāntrikānusāreṇa tu 

bhauteśaṃ pāśupatyaṃ ca gāṇaṃ gāṇeśvaraṃ tathā |
unmattakāsidhāraṃ ca ghṛteśaṃ saptamaṃ viduḥ ||

saptaitāni tu dṛṣṭāni vratāni brahmacāriṇām ||

dṛṣṭāni pārameśvare śāstre tantre ityarthaḥ | ityevamuddiṣṭāni |

caryāvratāni bodhyāni aṅgatve kīrtitāni tu |
ebhistu sahitaṃ hyekaṃ navamaṃ vratabandhanam ||

tasyāntarbhūtamevaitatkathitaṃ vratasaptakam |
caturdaśa vratānyevaṃ hotavyāni varānane ||

iti | tathā 

vedavratāni catvāri hotavyāni na saṃśayaḥ |

tānyāha

aiṣṭikaṃ pārvikaṃ caiva bhautikaṃ saumikaṃ tathā |

iṣṭi parva bhūtasomayajñapratipādakavaidikagranthapāṭhena kālakāryāṇi 
vratāni aiṣṭikādiśabdaiḥ pārameśvareṣu śāstreṣūktāni | yajñasūtre tu

traividyaṃ ca cāturhotraṃ godānaṃ snānamityapi |
vedavratāni catvāri ............................... ||

ityevamuktāni iha tu godānaṃ pṛthageva bhaviṣyati | 
tadetāvatparyantametānsaṃskārān

trayodaśa vijānīyāt ..................... |

ebhiranuṣṭhitaiścāyaṃ vedeṣvadhikṛta ityāha

.................... nato vai vedabhājanam ||

kiṃ ca

tato bhavati godānaṃ taccaturdaśakaṃ priye |

vedādhyayanānte upādhyāyāya gomithunadānenopalakṣitamātmanaḥ 
keśādivapanaṃ godānam |

atha gurubhirgārhasthyāyānujñātaḥ
snāta udvāhayedbhāryāṃ jñānasiddhaḥ kumārikām |

vedādhyayanena labdhaśuddhiḥ snāta ucyate adhyayanānte hi 
snānamanenaivāśayenāmnātam ata evāyaṃ vedārthādhigamātmanā jñānena 
siddhaḥ saṃpūrṇaḥ | atha vā brahmacaryādeva pravrajet iti coditatvāt 
śīghrameva prāvrajyamicchan

kṛtvā darbhamayīṃ bhāryāṃ tayā saha yajetkratūn ||

gṛhasthāśramacoditanityanaimittikarūpamitthamudvāhātmakasaṃskāra##-

tajjñeyaṃ pañcadaśamaṃ...........................|

anenaiva

pitṛdevamanuṣyāṇāṃ bhūtānāṃ tarpaṇaṃ tathā |
brahmaṇo'dhyayanaṃ ceti mahāyajñāstu pañca vai ||

iti yajñasūtrapratipāditā nityayajñāḥ saṃgṛhītāḥ | yataśca 

pañcasūnā gṛhasthasya cullīpeṣiṇyupaskarāḥ |
khaṇḍanī codakumbhastu badhyate yāstu vāhayan ||

tāsāṃ krameṇa sarvāsāṃ niṣkṛtyarthaṃ mahātmabhiḥ |
pañca kḷptā mahāyajñāḥ pratyahaṃ gṛhamedhinām ||

tatra ca 

adhyayanaṃ brahmayajñaḥ pitṛyajñastu tarpaṇam |
homo daivo balirbhauto nṛyajño'tithipūjanam ||

iti | evamudvāhasattve ete nityayajñāḥ saṃgṛhītāḥ ityāśayaḥ 
naimittikānāha

.................................. tataḥ prākamakhāḥ kramāt |
naimittikāṃśca tānāhuḥ pravakṣyāmyanupūrvaśaḥ ||

aṣṭakāḥ pārvaṇī śrāddhaṃ śrāvaṇyāgrāyaṇī tathā |
caitrī cāśvayujī ceti sapta pākamakhāḥ kramāt ||

pauṣādikṛṣṇapakṣagatāḥ śākamāṃsāpūpaśākaiḥ pitṛṇāṃ 
saṃtarpaṇīyatvāttannāmikāḥ śākādyā aṣṭakāḥ pārvaṇī 
sitāsitapakṣādyadine tatrasyo yāgastathoktaḥ śrāddham 
pitrādimṛtāhapāraṇīyo vidhiḥ śrāvaṇyāṃ vidheya upākarmādividhiḥ 
śrāvaṇī āgrāyaṇī navānnayāgaḥ caitrī tatpūrṇimāyāṃ manvādisattayā 
vidheyaḥ pitṛśrāddhādikalpaḥ āśvayujī āśvayujyāṃ vidheyaṃ 
vrīhyāgrayaṇādyāvaśyakahavirdānādikarma | iti nirdiṣṭapākagṛhyasaptakam 
| tadevaṃ

etaiḥ saha vijānīyāddvāviṃśatparisaṃkhyayā |

etaiḥ saptabhiḥ saha pūrvoktānpañcadaśa saṃskārān | atha

āgneyaṃ cāgnihotraṃ ca dārśaṃ caiva tataḥ param |
paurṇamāsī tathā jñeyā cāturmāsyaṃ tathaiva ca ||

paśubandhaḥ smauddiṣṭaḥ sautrāmaṇirataḥ param |
haviryajñāḥ samādiṣṭāḥ saptaite pāvatāḥ priye ||

āgneyamaraṇikrameṇāgnyānayanam agnihotraṃ sāyaṃ prātaśca homaḥ 
dārśaḥ viparītalakṣaṇayā dṛśyamānacandrāśrayāmāyāsyo yāgaḥ 
paurṇamāsī sarvāsu pūrṇimāsu vidheyaḥ sāmānyayāgaḥ cāturmāsyaṃ 
phālgunācaitrādvā prabhṛti māsacatuṣṭayānte paurṇamāsyāṃ vidheyo 
viśiṣṭo yāgaḥ paśubandhaḥ yāgaviśeṣaḥ yatra paśormāsavasādi hūyate 
sautrāmaṇiḥ sutrāmadevatākaḥ surāyāgaḥ | etānapi saṃkalayati 

ebhiḥ saha vijānīyātsaṃskāraikonatriṃśakam |

atha 

agniṣṭomātyagniṣṭomau ukthyaḥ ṣoḍaśikā tathā |
vājapeyo'tirātrastu āptoryāmastathaiva ca ||

iti | ta eta yāgaviśeṣāḥ

somasaṃsthāḥ samākhyātāḥ ...................... |

gṛhakaraṇakasomapānayuktā yajñarūpāḥ kriyāḥ somasaṃsthāḥ | 
etāvadantānetānsaṃskārāt

...............ṣaṭtriṃśatparisaṃkhyayā |

proktamantrāhutikrameṇa kuryāditi śeṣaḥ | atha

hiraṇyapādaḥ pathamastathā guhyahiraṇyadhṛt |
hiraṇyameḍhro hiraṇyanābhirhiraṇyagarbha eva ca ||

hiraṇyaśrotro hiraṇyatvagdhiraṇyākṣastathaiva ca |
hiraṇyajihvastacchṛṅgo daśa yajñāḥ prakīrtitāḥ ||

garbhaḥ - hṛdayam ete pakṣādyāvayavāḥ agnicityāviśeṣāḥ yeṣāṃ 
pādādisthāneṣu hiraṇyaṃ dīyate tattatpakṣādyākṛtibhedāt |

śatena tu dhṛtaṃ cātra ekaikaṃ tu vijāyate |

etatsaṃpattyarthaṃ home viśeṣamāha

ete sarve sahasreṇa śuddhyante .................. |

sa eva sahasrahomasaṃpādyo hiraṇyapādādiścitrayajñaḥ |

.............................. saptatriṃśakaḥ ||

kiṃ ca

aśvamedhaṃ tataḥ paścājjuhuyāttu yathākramam |

brāhmaṇasyāpi karmavaśātprāptasārvabhaumabhūpatitvasyāyamaśvamedhaḥ 
kārya eva | evaṃ vivāhātprabhṛti etāvadantaiḥ 

evaṃ kṛtaistu taiḥ sarvaistataścaiva gṛhī bhavet |

gṛhī dvitīyāśramasthaḥ |

aṣṭātriṃśattamaṃ taṃ tu .........................

aśvamedhyākhyaṃ karma jānīyādityarthaḥ |

.................. vānaprasthaṃ tato bhavet |
pārivrājyaṃ tato'ntyeṣṭimevaṃ brāhmaṇyamāpnuyāt ||

vānaprasthaṃ pārivrājyaṃ cāśramadvayarūpaṃ saṃskāradvayam 
antyeṣṭirvihitānanuṣṭhānasaṃbhāvyamānaprāyaścittaśuddhyarthaṃ 
gārhasthyāvasthitasya kāryā na tu vānaprasthasyāśritapārivrājyasya vā 
tenāsau pṛthaṅga gaṇyate evamiti pārameśvaramantrahomakrame pāśave tu 
vidhau satyapi bījāhārādidoṣasadbhāvānna samyagbrāhmaṇyaṃ bhavati idaṃ tu 
pārivrājyalakṣaṇaṃ catvāriṃśattamasaṃskārametaiḥ saha vijānate pūrvoktaiḥ 
saha gaṇitamiti yāvat |

ata ātmaguṇānaṣṭau kathayāmi samāsataḥ |
dayā sarveṣu bhūteṣu kṣāntiścāpyanasūyatā ||

śaicaṃ caivamanāyāso maṅgalyaṃ cāpyataḥ param |
akārpaṇyaṃ cāspṛhā cetyaṣṭāvātmaguṇāḥ smṛtāḥ ||

dayā parānukampā kṣāntiḥ apakāriṣu śaktatve'pyapratikriyā anasūyatā 
paraguṇasahatvam śaucaṃ cittavākccharīraśuddhiḥ anāyāsaḥ 
akleśāvahakarmakāritvam maṅgalyaṃ maṅgaladravyāṇāṃ 
darśanasparśanacintanāni akārpaṇyaṃ yathāśakti dātṛtvam aspṛhā 
yathālabdhena saṃtoṣaḥ ityete ātmaguṇāḥ 
ātmasaṃnikṛṣṭāntaḥkaraṇabhūtavāgāderguṇāḥ na svātmanastasya 
cidrūpatvāt iti | itthameva

catvāriṃśadathāṣṭau ca saṃskārāḥ samudāhṛtāḥ ||
iti |]

149)

samayībhavati | tataḥ asmai pūjyaṃ mantraṃ puṣpādyaiḥ saha arpayet | tataḥ 
samayān asmai nirūpayet | gurau sarvātmanā bhaktiḥ tathā śāstre deve 
tatpratidvandvini parāṅmukhatā guruvat guruputrādeḥ 
vidyāsaṃbandhakṛtasya tatpūrvadīkṣitādeḥ 

150)

saṃdarśanam yaunasaṃbandhasya tadarādhanārtham na tu svata iti mantavyam | 
striyo vandhyāyāstajjugupsāhetuṃ na kuryāt | devatānāma gurunāma tathā 
mantraṃ pūjākālāt ṛte na uccārayet | gurūpabhuktaṃ śayyādi na bhuñjīta | 
yat kiṃcit

151)

laukikaṃ krīḍādi tat gurusaṃnidhau na kuryāt | tadvyatirekeṇa na anyatra 
utkarṣabuddhiṃ kuryāt | sarvatra śrāddhādau gurumeva pūjayet | sarveṣu ca 
naimittikeṣu śākinītyādiśabdān na vadet | parvadināni pūjayet | 
vaiṣṇavādyairadhodṛṣṭibhiḥ saha

152)

saṃgatiṃ na kuryāt | etacchāsanasthān pūrvajātibuddhyā na paśyet | guruvarge 
gṛhāgate yathāśakti yāgaṃ kuryāt | adhomārgasthitaṃ kaṃcit vaiṣṇavādyaṃ 
tacchāstrakutūhalāt gurūkṛtyāpi tyajet | tadāpi na utkarṣabuddhyā paśyet | 
liṅgibhiḥ 

153)

saha samācāramelanaṃ na kuryāt tān kevalaṃ yathāśakti pūjayet | 
śaṅkāstyajet | cakre sthitaścaramāgryādivibhāgaṃ janmakṛtaṃ na 
saṃkalpayet | śarīrāt ṛte na anyat āyatanatīrthādikaṃ bahumānena paśyet | 
mantrahṛdayam anavarataṃ 

154)

smaret ityevaṃ śiṣyaḥ śrutvā praṇamya abhyupagamya guruṃ 
dhanadāraśarīraparyantayā dakṣiṇayā

155)

paritoṣya pūrvadīkṣitāṃśca dīnānāthādikān tarpayet | bhāvividhinā ca 
mūrticakraṃ tarpayet | itthaṃ samayībhavati | mantrābhyāse nityapūjāyāṃ 
śravaṇe'dhyayane adhikāri naimittike tu sarvatra gurumeva abhyarthayeta iti 
sāmayiko vidhiḥ |

adhvānamālocya samastamantaḥ
pūrṇaṃ svamātmānamathāvalokya |
paśyedanugrāhadhiyā dviṣaṭka-
paryantamevaṃ samayī śiśuḥ syāt ||

sa-alabhā apari uṇṇa-u parabhara-u attāṇu
jā-ivi aggaṇi saṇṇa-u jo-abhimī sattāṇu |
ehasa samayadikkha parabha-irava jalaṇi hi majjaṇiṇa 
itthati lajjahavana bahuparibhavaho-i-uvā-ujiṇa ||


iti śrīmadabhinavaguptācāryaviracite tantrasāre samayidīkṣāprakāśanaṃ nāma 
trayodaśamāhnikam ||13||


atha caturdaśamāhnikam |

atha putrakadīkṣāvidhiḥ [putra iva putrakaḥ pratikṛtau arthe kaḥ |] | sa 
ca vistīrṇaḥ tantrālokāt avadhāryaḥ | saṃkṣiptastu ucyate | samayyantaṃ vidhiṃ 
kṛtvā tṛtīye'hni triśūlābje [pūjanaṃ tu bahiḥ kalpanayā 
samayidīkṣāyāṃ hi antaryāgārthameva triśūlāstramaṇḍalanirūpaṇam iha tu 
bahiḥ kalpanayeti viśeṣaḥ |] maṇḍale sāmudāyikaṃ yāgaṃ pūjayet tatra 
bāhyaparivāraṃ dvāradevatācakraṃ ca bahiḥ pūjayet tato maṇḍalapūrvabhāge 
aiśakoṇāt ārabhya āgneyāntaṃ paṅktikrameṇa gaṇapatiṃ guruṃ 
paramaguruṃ parameṣṭhinaṃ pūrvācāryān yoginīcakraṃ vāgīśvarīṃ 
kṣetrapālaṃ ca pūjayet | tata ājñāṃ samucitām ādāya śūlamūlāt prabhṛti 
sitakamalāntaṃ samastam adhvānaṃ nyasya arcayet tato madhyame triśūle 
madhyārāyāṃ bhagavatī śrīparābhaṭṭārikā bhairavanāthena saha 
vāmārāyāṃ tathaiva śrīmadaparā dakṣiṇārāyāṃ śrīparāparāḥ dakṣiṇe 
triśūle madhye śrīparāparā vāme triśūle madhye śrīmadaparā

157)

dve tu yathāsvam | evaṃ sarvasthānādhiṣṭhātṛtve bhagavatyāḥ sarvaṃ 
pūrṇaṃ tadadhiṣṭhānāt bhavati iti | tato madhyaśūlamadhyārāyāṃ samastaṃ 
devatācakraṃ lokapālāstraparyantam abhinnatayaiva pūjayet tadadhiṣṭhānāt 
sarvatra pūjitam | tataḥ kumbhe kalaśe maṇḍale agnau svātmani ca 
abhedabhāvanayā pañcādhikaraṇam [pañcādhikaraṇaṃ tu yathā

hrasvākāraviriñcajāgaradharitryādyā hi ye pañcakāḥ 
śaktyādyāśca tathaiva śaṅkaranuteḥ pūrṇāvamarśātmanaḥ |
ye prāptapraṇavābhidhāḥ kuśalava ...... śo'pi viśvaprathā-
staṃ pañcapraṇavaṃ smarāmi satataṃ svacchandadhāmāptaye ||

hrasvaṃ dīrghaṃ plutaṃ sūkṣmamatisūkṣmaṃ paraṃ śivam |
praṇavaṃ pañcadhā jñātvā bhittvā mokṣo na saṃśayaḥ ||] anusandhiṃ 
kuryāt tataḥ parameśvarādvayarasabṛṃhitena puṣpādinā viśeṣapūjāṃ 
kuryāt | kiṃ bahunā tarpaṇanaivedyaparipūrṇaṃ vittaśāṭhyavirahito 
yāgasthānaṃ kuryāt | asati vitte tu mahāmaṇḍalayāgo na kartavya eva | 
paśūṃśca jīvato nivedayet | te'pi hi evam anugṛhītā bhavanti iti kāruṇikatayā 
paśuvidhau na vicikitset | tato'gnau parameśvaraṃ tilājyādibhiḥ saṃtarpya 
tadagre'nyaṃ 

158)

paśuṃ vapāhomārthaṃ kuryāt devatācakraṃ tadvapayā tarpayet 
punarmaṇḍalaṃ pūjayet tataḥ parameśvaraṃ vijñapya 
sarvābhinnasamastaṣaḍadhvaparipūrṇam [k: sarvābhimānasamasteti 
pāṭhaḥ |] ātmānaṃ bhāvayitvā śiṣyaṃ puro'vasthitaṃ kuryāt | 
parokṣadīkṣāyāṃ jīvanmṛtarūpāyām agre taṃ dhyāyet tadīyāṃ vā 
pratikṛtiṃ darbhagomayādimayīm agre sthāpayet | tathāvidhaṃ śiṣyam 
arghapātravipruṭnokṣitaṃ puṣpādibhiśca pūjitaṃ kṛtvā samastamadhvānaṃ 
taddehe nyaset | tata itthaṃ vicārayet bhogecchoḥ śubhaṃ na śodhayet | 
mumukṣostu śubhāśubham ubhayamapi | nirbījāyāṃ tu samayapāśān api 
śodhayet sā ca āsannamaraṇasya atyantamūrkhasyāpi kartavyā iti 
parameśvarājñā tasyāpi tu gurudevatāgnibhaktiniṣṭhatvamātrāt siddhiḥ | atra 
ca sarvatra vāsanāgrahaṇameva bhedakam mantrāṇāṃ vāsanānuguṇyena 
tattatkāryakāritvāt | evaṃ vāsanābhedamanusaṃdhāya 
mukhyamantraparāmarśaviśeṣeṇa samastamadhvānaṃ svadehagataṃ 
śivādvayabhāvanayā 

159)

evaṃ krameṇa pādāṅguṣṭhāt prabhṛti dvādaśāntaparyantaṃ 
svātmadehasvātmacaitanyābhinnīkṛtadehacaitanyasya śiṣyasya āsādya tatraiva 
anantānandasarasi svātantryaiśvaryasāre 
samastecchājñānakriyāśaktinirbharasamastadevatācakreśvaresamastā##-
śiṣyātmanā saha ekībhūto viśrāntimāsādayet ityevaṃ parameśvarābhinno'sau 
bhavati | tato yadi bhogecchuḥ syāt tato yatraiva [k: tatastatreti pāṭhaḥ |] 
tattve bhogecchā asya bhavati tatraiva samastavyastatayā [samasteti 
aṇḍakalpanayā avāntarabhedakalpanayā ca |; g: samastamiti padaṃ nāsti |] 
yojayet | tadanantaraṃ śeṣavṛttaye parameśvarasvabhāvāt jhaṭiti prasṛtaṃ 
śuddhatattvamayaṃ deham asmai cintayet [yena śeṣavṛttirasya siddhyati |
] ityeṣā samastapāśaviyojikā dīkṣā | tataḥ śiṣyo guruṃ dakṣiṇābhiḥ 
pūrvavat pūjayet | tato'gnau śiṣyasya vidhiṃ kuryāt 

160)

śrīparāmantraḥ [etannirṇayaśca suspaṣṭaḥ parātriṃśikāvivaraṇe 
draṣṭavyaḥ |] amukasyāmukaṃ tattvaṃ śodhayāmi iti svāhāntaṃ 
pratitattvaṃ tisra āhutayaḥ ante pūrṇā vauṣaḍantā | evaṃ 
śivāntatattvaśuddhiḥ tato yojanikoktakrameṇa pūrṇāhutiḥ | bhogecchoḥ 
bhogasthāne yojanikārthamaparā śuddhatattvasṛṣṭyarthamanyā | tato guroḥ 
dakṣiṇābhiḥ pūjanam ityeṣā putrakadīṣā | yatra vartamānamekaṃ varjayitvā 
bhūtaṃ bhaviṣyacca karma śudhyati ||

antaḥ samastādhvamayīṃ svasattāṃ
bahiśca saṃdhāya vibhedaśūnyaḥ |
śiṣyasya dhīprāṇatanūrnijāsu
tāsvekatāṃ saṃgamayetprabuddhaḥ ||

śiṣyaikabhāvaṃ jhaṭiti prapadya
tasminmahānandavibodhapūrṇe |
yāvatsa viśrāmyati tāvadeva
śivātmabhāvaṃ paśurabhyupaiti ||

161)

je sahu ekībhā-ulaye
viṇu accha-i ehu vivoha samudda |
so paśu bha-iravu ho ilaye viṇu
antarnāvaji-u asa asamuhu ||

iti śrīmadabhinavaguptācāryaviracite tantrasāre putrakadīkṣāprakāśanaṃ nāma 
caturdaśamāhnikam ||14||


atha pañcadaśamāhnikam |

yadā punarāsannamaraṇasya [yathoktaṃ tantrāloke |

dṛṣṭvā śiṣyaṃ jarāgrataṃ vyādhinā paripīḍitam |
utkramayya tatastvenaṃ paratattve niyojayet || iti |] svyam vā bandhumukhena 
śaktipāta upajāyate tadā asmai sadyaḥ samutkramaṇadīkṣāṃ kuryāt | 
samastamadhvānaṃ śiṣye nyasya taṃ ca krameṇa śodhayitvā bhagavatīṃ 
kālarātrīm [mantraṃ kṣurikāṃ ca kālānalasamatviṣam |; k: kālarātrimasya 
marmeti pāṭhaḥ |] marmakartanīṃ nyasya tayā kramātkramaṃ 
marmapāśān vibhidya [marmapāśān vibhidyeti tatra 
tannikaṭanirgacchattviṣā āgneyīṃ dhāraṇāṃ bhāvayitvā 
sarvamarmapratāpanaṃ tena bhāvayet tato'pi vāyunā aṅguṣṭhāt 
mastakaparyantaṃ dehamāpūritaṃ bhāvayet tato'pi tamaṅguṣṭhāt 
ūrdhvaparyantaṃ samutkṛṣya kālarātryā kṛntet iti |] brahmarandhravarti 
śiṣyacaitanyaṃ kuryāt | tataḥ pūrvoktakrameṇa yojanikārthaṃ pūrṇāhutiṃ 
dadyāt yathā pūrṇāhutyante jīvo niṣkrāntaḥ paramaśivābhinno [na tasya 
kaścit śrāddhādibhirupayoga iti bhāvaḥ |] bhavati |

163)

bubhukṣostu dvitīyā pūrṇāhutiḥ bhogasthāne yojanāya tatkāle 
[utkramaṇāvasare |] ca tasya jīvalayaḥ nātra śeṣavartanam 
brahmavidyāṃ [brahmavidyāmiti sakalāṃ niṣkalombhitām | atrāyamūhaḥ 
yogina eveyaṃ sadyaḥsamutkramaṇadīkṣā kāryā na hi anabhyastaprāṇacāraḥ 
kathamapi enāṃ kartuṃ śaknuyāt ityato brahmavidyāṃ vā paṭhedityuktyā 
anabhyāsino'nayā paṭhitayā enāṃ dīkṣāṃ kuryāt | atra hetumāha sā hi ityādi | 
antarbhāvitaṇyarthatayā pāṭhayedityapi bodhyam |] vā karṇe paṭhet sā hi 
parāmarśasvabhāvā [k: svabhāvā satī aprabuddhapaśucaitanyamiti 
pāṭhaḥ |] sadyaḥ prabuddhapaśucaitanye prabuddhavimarśaṃ karoti | 
samayyāderapi [yathoktam tantrāloke 

samayī putrako vāpi paṭhedvidyāmimāṃ tathā |
tatpāṭhāttu samayyutthāṃ rudrāṃśāpattimaśnute || iti |] ca 
etatpāṭhe'dhikāraḥ | sapratyayāṃ nirbījāṃ tu yadi dīkṣāṃ mūḍhāya 
āyātaśaktipātāya ca darśayet tadā hi śivahastadānakāle ayaṃ vidhiḥ 
trikoṇamāgneyaṃ jvālākarālaṃ rephavisphuliṅgaṃ 
bahirvātyācakradhmāyamānaṃ maṇḍalaṃ dakṣiṇahaste cintayitvā tatraiva haste 
bījaṃ kiṃcit [kiṃcit pūgādikam |] nikṣipya 

164)

ūrdhvādhorephavibodhitaphaṭkāraparamparābhiḥ [yathoktaṃ tantrāloke

vahnidīpitaphaṭkāraghoraṇīdāhapīḍitam |
bījaṃ nirbījatāmeti svasūtikaraṇākṣamam ||

taptaṃ na tatprarohāya tenaiva pratyayena tu |
malamāyākhyakarmāṇi mantradhyānakriyābalāt ||

dagdhāni na svakāryāya nirbījapratyayaṃ tvimam |
sa śrīmān suprasanno me śambhunātho nyarūpayat || iti |] asya tāṃ 
jananaśaktiṃ dahet evaṃ kurvan taṃ hastaṃ śiṣyasya mūrdhani kṣipet iti 
dvayorapi eṣā dīkṣā nirbījā svakāryakaraṇasāmarthyavidhvaṃśinī bhavati 
sthāvarāṇāmapi dīkṣyatvena uktatvāt vāyupurāntarvyavasthitaṃ 
dodhūyamānaṃ śiṣyaṃ laghūbhūtaṃ [atrāyaṃ bhāvastantrāloke 
nirdiṣṭaḥ

deho hi pārthivo mukhyastadā mukhyatvamujjhati |
bhāvilāghavamantreṇa yojayetparame pade || iti |] cintayet yena tulayā laghuḥ 
dṛśyate iti |

marmakartanavidhau laghubhāve
bījabhāvavilaye yadi mantraḥ |

165)

tattathocitapathena niyukta-
stattadāśu kurute parameśaḥ ||

jaṃ anu andhi visesaṃ
ghetūṇa jaḍanti mantamuccara-i |
icchāsattippāṇo
taṃ taṃ manto kare-i phuḍam ||

iti śrīmadabhinavaguptācāryaviracite tantrasāre sapratyayadīkṣāprakāśanaṃ 
nāma pañcadaśamāhnikam ||15||


atha ṣoḍaśamāhnikam |

atha parokṣasya dīkṣā dvividhaśca saḥ mṛto jīvaṃśca | tatra kṛtaguruseva 
eva mṛta udvāsito vā abhicārādihato ḍimbāhato mṛtyukṣaṇoditatathāruciḥ 
mukhāntarāyātaśaktipāto vā tathā dīkṣya ityājñā [parameśasyeti 
śeṣaḥ |] | atra ca mṛtadīkṣāyām adhivāsādi na upayujyate | maṇḍale 
mantraviśeṣasaṃnidhaye yatra bahulā kriyā uttamamupakaraṇaṃ [uttamaṃ 
lakṣaṇānvitamityarthaḥ |] puṣpādi sthānaṃ pīṭhādi maṇḍalaṃ 
[yatastat anāhūte'pi mantramaṇḍale samayitvaprasādhanam |] 
triśūlābjādi ākṛtiḥ dhyeyaviśeṣaḥ mantraḥ svayaṃ dīptaśca 
dhyānaparasya yoginaḥ tadekabhaktisamāveśaśālino jñāninaśca saṃbandhaḥ 
ityete saṃnidhānahetavo yathottaram uktāḥ | samuditatve tu kā kathā syāt iti 
parameśvareṇa uktam | tato devaṃ pūjayitvā tadākṛtiṃ kuśādimayīm 

167)

agre sthāpayitvā gurvāsāditajñānopadeśakrameṇa tāṃ paśyet sa ca

mūlādhārādudetya prasṛtasuvitatānantanāḍyadhvadaṇḍaṃ
vīryeṇākramya nāsāgaganaparigataṃ vikṣipanvyāptumīṣṭe |
yāvaddhūmābhirāmapracitataraśikhājālakenādhvacakraṃ
saṃcchādyābhiṣṭajīvānayanamiti mahāñjālanāmā prayogaḥ ||

etenācchādanīyaṃ vrajati paravaśaṃ saṃmukhīnatvamādau
paścādānīyate cetsakalamatha [k: sakalamapi iti pāṭhaḥ |] 
tato'pyadhvamadhyādyatheṣṭam |
ākṛṣṭāvuddhṛtau vā mṛtajanaviṣaye karṣaṇīye'tha jīve 
yogaḥ śrīśaṃbhunāthāgamaparigamito jālanāmā mayoktaḥ 
[dṛṣṭāntapūrvakaṃ tantrāloke nirṇītametat

ciravighaṭite senāyugme yathā milite puna-
rhayagajarathaṃ svāṃ svāṃ jātiṃ rasādabhidhāvati |
karaṇapavanairnāḍīcakraistathaiva samāgatai-
rnijanijarasādekībhāvyaṃ svajālavaśīkṛtaiḥ || iti |] ||

bahirapi itthaṃ kathaṃ na bhavati ākarṣaṇādau vinābhyāsāt ? iti cet 
rāgadveṣādiyogavaśena tatpravṛttau aiśvaryāveśāyogāt | tato 
niyatiniyantritatvāt abhyāsādyapekṣā syādeva | iha 

168)

tu anugrahātmakaparameśvaratāveśāt tathābhāvaḥ | parameśvara eva hi 
guruśarīrādhiṣṭhānadvāreṇa anugrāhyān anugṛhṇāti | sa ca acintyamahimā 
iti uktaprāyam | evaṃ jālaprayogākṛṣṭo jīvo dārbhaṃ jātīphalādi vā śarīraṃ 
samāviṣṭo bhavati na ca spandate manaḥprāṇādisāmatryabhāvāt 
tadanudhyānabalāt tu spandate'pi tādṛśe'pi tasmin pūrvavat 
prokṣaṇādisaṃskāraḥ pūrṇāhutiyojanikāntaḥ | atra paraṃ [viśeṣa 
iyānatretyarthaḥ |] pūrṇāhutyā tasya dārbhādyākārasya paratejasi layaḥ 
kartavyaḥ | evam uddhṛto'sau pūrṇāhutyaiva apavṛjyate [apavṛjyate 
mukto bhavatītyarthaḥ |] yadi svarnarakapretatiryakṣu sthitaḥ | manuṣyastu 
tadaiva jñānaṃ yogaṃ dīkṣāṃ vivekaṃ vā labhate adhikāriśarīratvāt iti 
mṛtoddharaṇam | jīvato'pi parokṣasya utpanne śaktipāte'yameva kramaḥ 
dārbhākṛtikalpanajīvākṛṣṭivarjam | dhyānamātropasthāpitasyaiva asya 
saṃskāraḥ | dīkṣā ca bhogamokṣobhayadāyinī svavāsanābalīyastvāt 

169)

bhogavāsanāvicchedasya [tatrāyaṃ vidhiḥ parokṣadīkṣaṇe māyottīrṇe 
bhogāya yajediti |] ca asaṃbhāvyamānatvāt bahubhiḥ dīkṣāyām 
ūrdhvaśāsanasaṃskāro balavān anyastu tatsaṃskārāya syāt | parokṣasyāpi 
dīkṣitasya tathaiva jñānādyāvirbhāvaḥ iti |

parameśvaratāveśadārḍhyātsvātantryabhāgguruḥ |
parokṣamabhisaṃdhāya dīkṣiteti kimadbhutam ||

paramma sivatamma attaṇa-
ppaḍi-aṃsacchandabhāna |
paramatthaṃ jo āvisattā'sa-
dikkha-i parokkha ivaṃ pisissagaṇaṃ ||

iti śrīmadabhinavaguptācāryaviracite tantrasāre parokṣadīkṣāprakāśanaṃ 
nāma ṣoḍaśamāhnikam ||16||


atha saptadaśamāhnikam |

atha liṅgoddhāraḥ ||

vaiṣṇavādidakṣiṇatantrānteṣu [uktaṃ ca tantrāloke 

atha vaiṣṇavabauddhāditantrāntādharavartinām |
yadā śivārkaraśmyodhairvikāsi hṛdayāmbujam ||

liṅgoddhṛtistadā pūrvaṃ dīkṣākarma tataḥ param |
prāgliṅgāntarasaṃstho'pi dīkṣātaḥ śivatāṃ vrajet ||

tatropavāsya taṃ cānyadine sādhāramantrataḥ |
sthaṇḍile pūjayitveśaṃ śrāvayet svavartanīm ||

eṣa prāgabhavalliṅgī coditastvadhunā tvayā |
prasannena tadetasmai kuru samyaganugraham ||

svaliṅgatyāgaśaṅkotthaṃ prāyaścittamapāsya bhoḥ |
acirāttanmayībhūya bhogaṃ mokṣaṃ prapadyatām ||

evamastvityayājñāṃ ca gṛhītvā vratamasya tat |
apāsyāmbhasi nikṣipya snapayedanurūpataḥ ||

snātaṃ saṃprokṣayedarghapātrāmbhobhiranantaram |
pañcagavyaṃ dantakāṣṭhaṃ tatastasmai samarpayet || iti |] śāsaneṣu ye 
sthitāḥ tadgṛhītavratā vā ye ca uttamaśāsanasthā api 
anadhikṛtādharaśāsanagurūpasevinaḥ te yadā śaktipātena pārameśvareṇa 
unmukhīkriyante tadā teṣāmayaṃ vidhiḥ tatra enaṃ kṛtopavāsam anyadine 

171)

sādhāraṇamantrapūjitasya tadīyāṃ ceṣṭāṃ śrāvitasya bhagavato'gre 
praveśayet tatrāsya vrataṃ gṛhītvā ambhasi kṣipet tato'sau snāyāt tataḥ 
prokṣya carudantakāṣṭhābhyāṃ saṃskṛtya baddhanetraṃ praveśya 
sādhāraṇena mantreṇa parameśvarapūjāṃ kārayet | tataḥ sādhāraṇamantreṇa 
śivīkṛte agnau vrataśuddhiṃ kuryāt tanmantrasaṃpuṭaṃ nāma kṛtvā 
prāyaścittaṃ śodhayāmi iti svāhāntaṃ śataṃ juhuyāt | tato'pi pūrṇāhutiḥ 
vauṣaḍantena | tato vrateśvaram āhūya pūjayitvā tasya śivājñayā 
akiñcitkaraḥ tvamasya bhava iti śrāvaṇāṃ kṛtvā taṃ tarpayitvā visṛjya 
agniṃ visṛjet iti liṅgoddhāraḥ | tato'sya adhivāsādi prāgvat | dīkṣā 
yatheccham |

adharastho'pi gāḍheśaśaktipreritamānasaḥ |
saṃskṛtya dīkṣyo yaśca prāṅnirato'sadgurāvabhūt [kh: nirataḥ 
sadgurāvabhūditi pāṭhaḥ |] ||

172)

pasava-aṇuhaṃ jottamasāsaṇula
iviṇupaṇuparamesapasā-iṇa |
pattha-i sadgurubohapasāhaṇu
so dikkha-i liṅgoddhāriṇa ||

iti śrīmadācāryābhinavaguptaviracite śrītantrasāre liṅgoddharaṇaṃ nāma 
saptadaśamāhnikam ||17||


athāṣṭādasamāhnikam |

athābhiṣekaḥ |

svabhyastajñāninaṃ sādhakatve gurutve vā abhiṣiñcet yataḥ 
sarvalakṣaṇahīno'pi jñānavāneva sādhakatve anugrahakaraṇe ca adhikṛtaḥ na 
anyaḥ abhiṣikto'pi | svādhikārasamarpaṇe guruḥ dīkṣādi [k: guhadīkṣādīti 
pāṭhaḥ |] akurvan api na pratyavaiti pūrvaṃ tu pratyavāyena 
adhikārabandhena vidyeśapadadāyinā bandha eva asya dīkṣādyakaraṇam [k: 
dīkṣādikaraṇamiti pāṭhaḥ |] so'bhiṣikto mantradevatātādātmyasiddhaye 
ṣāṇmāsikaṃ pratyahaṃ japahomaviśeṣapūjācaraṇena vidyāvrataṃ kuryāt 
tadanantaraṃ labdhatanmayībhāvo dīkṣādau adhikṛtaḥ tatra na ayogyān dīkṣeta 
na ca yogyaṃ pariharet dīkṣitamapi jñānadāne parīkṣeta 
chadmagṛhītajñānamapi jñātvā upekṣeta atra ca abhiṣekavibhavena 
devapūjādikam |

174)

svabhyastajñānatayā
svārthaparārthādhikāratāṃ vahataḥ |
sādhakagurutāyoga-
statra hi kāryastadabhiṣekaḥ ||

jo pari uṇṇa satthasaṃ aṇu
tassa aṇuggahametu pavitti |
kāmaṇā-i jo puṇuso sāha
uta-i upā aruhura-i ṇahu citti ||

iti śrīmadabhinavaguptācāryaviracite tantrasāre abhiṣekaprakāśanaṃ nāma 
aṣṭādaśamāhnikam ||18||


athaikonaviṃśamāhnikam |

atha adharaśāsanasthānāṃ gurvantānāmapi maraṇasamanantaraṃ 
mṛtoddhāroditaśaktipātayogādeva antyasaṃskārākhyāṃ [g: 
anyasaṃskāreti pāṭhaḥ |] dīkṣāṃ kuryāt ūrdhvaśāsanasthānāmapi 
luptasamayānām [luptasamayānāṃ naṣṭācārāṇāmityarthaḥ |] 
akṛtaprāyaścittānām iti parameśvarājñā | tatra yo mṛtoddhāre vidhiḥ 
uktaḥ sa sarva eva śarīre kartavyaḥ pūrṇāhutyā śavaśarīradāhaḥ 
mūḍhānāṃ tu pratītirūḍhaye sapratyayāmantyeṣṭiṃ [sapratyayāmiti tathā 
coktam

pratyayena vinā mokṣo na śraddheyo vimohitaiḥ |
tadarthametaduditaṃ na tu mokṣopayogyataḥ || ityādinā |; k: antyeṣṭikriyāṃ 
jñānabalāditi pāṭhaḥ |] kriyājñānayogabalāt kuryāt tatra śavaśarīre 
[k: tataḥ śaveti pāṭhaḥ |] saṃhārakrameṇa [caraṇāt 
mūrdhaparyantamityarthaḥ |] mantrān nyasya jālakrameṇa ākṛṣya 
rodhanavedhanaghaṭṭanādi [tatra rodhanaṃ bindunā vedhanaṃ śaktibījena 
ghaṭṭanaṃ triśūlena ādinā tāḍanaṃ tacca visargeṇeti |]

176)

kuryāt prāṇasaṃcārakrameṇa hṛdi kaṇṭhe lalāṭe ca ityevaṃ śavaśarīraṃ 
kampate | tataḥ paramaśive yojanikāṃ kṛtvā tat dahet pūrṇāhutyā antyeṣṭyā 
śuddhānām anyeṣāmapi [anyeṣām aśuddhānāmityarthaḥ |] vā 
śrāddhadīkṣāṃ tryahaṃ turye dine māsi māsi saṃvatsare saṃvatsare kuryāt | 
tatra homānta vidhiṃ kṛtvā naivedyamekahaste kṛtvā tadīyāṃ vīryarūpāṃ 
śaktiṃ bhogyākārāṃ paśugatabhogyaśaktitādātmyapratipannāṃ dhyātvā 
parameśvare bhoktari arpayet ityevaṃ bhogyabhāve nivṛtte patireva bhavati 
antyeṣṭimṛtoddharaṇaśrāddhadīkṣāṇām anyatamenāpi yadyapi kṛtārthatā 
tathāpi bubhukṣoḥ kriyābhuyastvaṃ phalabhūyastvāya iti sarvamācaret | 
mumukṣorapi tanmayībhāvasiddhaye ayam jīvataḥ pratyaham 
anuṣṭhānābhyāsavat | tattvajñāninastu na ko'pyayam antyeṣṭyādiśrāddhānto 
vidhiḥ upayogī tanmaraṇaṃ tadvidyāsaṃtānināṃ parvadinaṃ 
saṃvidaṃśapūraṇāt tāvataḥ saṃtānasya ekasaṃvinmātraparamārthatvāt jīvato 
jñānalābhasaṃtānadivasavat |

177)

sarvatra ca atra śrāddhādividhau mūrtiyāgaḥ pradhānam iti śrīsiddhāmatam 
tadvidhiśca vakṣyate naimittikaprakāśane |

anugrahaparaḥ śivo vaśitayānugṛhṇāti yaṃ
sa eva parameśvarībhavati nāma kiṃ vādbhutam |
upāyaparikalpanā nanu tadīśanāmātrakaṃ
vidanniti na śaṅkate parimite'pyupāye budhaḥ ||

ehu sarīru sa-alu aha bhavasaru
icchāmittaṇajeṇa vicitti u |
sości-a sokkhadeyi paramesaru
i-ajānanta urūḍhipavitti u ||

iti śrīmadabhinavaguptācāryaviracite tantrasāre śrāddhadīkṣāprakāśanaṃ 
nāma ekonaviṃśamāhnikam ||19||


atha viṃśamāhnikam |

atha śeṣavartanārthaṃ prakaraṇāntaram |

tatra yā dīkṣā saṃskārasiddhyai jñānayogyān prati yā ca tadaśaktān prati 
mokṣadīkṣā savījā tasyāṃ kṛtāyām ājīvaṃ śeṣavartanaṃ 
[śeṣavartanaṃ coktaṃ yathā

athocyate śeṣavṛttirjīvatāmupayoginī |
dīkṣā bahuprakāreyaṃ śrāddhāntā yā prakīrtitā ||

sā saṃskriyāyai mokṣāya bhogāyāpi dvayāya vā |
tatra saṃskārasiddhyai yā dīkṣā sākṣānna mocanī ||

anusaṃdhivaśādyā ca sākṣānmoktrī sabījikā |
tayobhayyā dīkṣitā ye teṣāmājīvavartanam ||
vaktavyaṃ putrakādīnāṃ tanmayatvaprasiddhaye || iti |] guruḥ upadiśet | tatra 
nityaṃ namittikaṃ kāmyam iti trividhaṃ śeṣavartanam antyaṃ ca sādhakasyaiva 
tat na iha niścetavyam | tatra niyatabhavaṃ nityaṃ tanmayībhāva eva naimittikaṃ 
tadupayogi sandhyopāsanaṃ pratyahamanuṣṭhānaṃ parvadinaṃ pavitrakam 
ityādi | tadapi nityaṃ svakālanaiyatyāt iti kecit | naimittikaṃ tu 
tacchāsanasthānāmapi 

179)

aniyatam tadyathā gurutadvargāgamanaṃ tatparvadinaṃ jñānalābhadinam 
ityādikam iti kecit | tatra niyatapūjā sandhyopāsā gurupūjā parvapūjā pavitrakam 
iti avaśyaṃbhāvi | naimittikam jñānalābhaḥ śāstralābho 
gurutadvargagṛhāgamanaṃ tadīyajanmasaṃskāraprāyaṇadināni [g: 
prayāṇadināni iti ca pāṭhāntaram |] laukikotsavaḥ śāstravyākhyā 
ādimadhyāntā devatādarśanaṃ [k: vyākhyādisaṃdhyāntadevateti pāṭhaḥ 
|] melakaḥ svapnājñā samayaniṣkṛtilābhaḥ ityetat naimittikaṃ 
viśeṣārcanakāraṇam | tatra kṛtadīkṣākasya śiṣyasya pradhānaṃ mantraṃ 
savīryakaṃ saṃvittisphuraṇasāram alikhitaṃ vaktrāgamenaiva arpayet tataḥ 
tanmayībhāvasiddhyarthaṃ sa śiṣyaḥ saṃdhyāsu tanmayībhāvābhyāsaṃ 
kuryāt taddvāreṇa sarvakālaṃ tathāvidhasaṃskāralābhasiddhyarthaṃ pratyahaṃ 
ca parameśvaraṃ ca sthaṇḍile vā liṅge vā abhyarcayet | tatra hṛdye sthaṇḍile 
vimalamakuravaddhyāte svameva rūpaṃ yājyadevatācakrābhinnaṃ 
mūrtibimbitamiva dṛṣṭvā

180)

hṛdyapuṣpagandhāsavatarpaṇanaivedyadhūpadīpopahārastutigītavādya##-

āvāhite mantragaṇe puṣpāsavaniveditaiḥ |
dhūpaiśca tarpaṇaṃ kāryaṃ śraddhābhaktibalocitam ||

dīptānāṃ śaktinādādimantrāṇāmāsavaiḥ palaiḥ |
raktaiḥ prāktarpaṇaṃ paścātpuṣpadhūpādivistaraḥ ||

āgatasya tu mantrasya na kuryāt tarpaṇaṃ yadi |
haratyardhaśarīraṃ sa ityuktaṃ kila śambhunā || iti |] pūjayet japet stuvīta 
tanmayībhāvamaśaṅkitaṃ labdhum | ādarśe hi svamukham aviratam 
avalokayataḥ tatsvarūpaniścitiḥ acireṇaiva bhavet na cātra kaścit kramaḥ 
pradhānam ṛte tanmayībhāvāt | paramantratanmayībhāvāviṣṭasya [g: 
paratantreti pāṭhaḥ |] nivṛttapaśuvāsanākalaṅkasya 
bhaktirasānuvedhavidrutasamastapāśajālasya yat adhivasati hṛdayaṃ tadeva 
paramamupādeyam iti asmadguravaḥ |

adhiśayya pāramārthikaḥ -
bhāvaprasaraṃ prakāśamullasati [g: prasaramullasati iti pāṭhaḥ |] yā |

181)

paramāmṛtadṛktvaṃ [k: dṛktāmiti pāṭhaḥ |]
tayārcayante rahasyavidaḥ ||

kṛtvādhāradharāṃ camatkṛtirasaprokṣākṣaṇakṣālitā-
māttairmānasataḥ svabhāvakusumaiḥ svāmodasaṃdohibhiḥ |
ānandāmṛtanirbharasvahṛdayānarghārghapātrakramāt 
tvāṃ devyāṃ saha dehadevasadane devārcaye'harniśam ||

iti ślokadvayoktamartham antarbhāvayan devatācakraṃ bhāvayet | tato 
mudrāpradarśanaṃ [manasā yogena vacasā mantrayogena vapuṣā 
saṃniveśataśceti mudrāpradarśanaṃ bodhyam |] japaḥ tannivedanam | 
bodhyaikātmyena visarjanam | mukhyaṃ naivedyaṃ svayam aśnīyāt sarvaṃ vā 
jale kṣipet jalajā [mīnanāthāvatāriṇā śaṃbhunā te pūrvameva dīkṣitā 
ityāgamavidaḥ |] hi prāṇinaḥ pūrvadīkṣitāḥ carubhojanadvāreṇa iti 
āgamavidaḥ | mārjāramūṣakaśvādibhakṣaṇe tu śaṅkā janitā nirayāya iti 
jñānī api lokānugrahecchayā na tādṛk kuryāt lokaṃ vā parityajya āsita iti 
sthaṇḍilayāgaḥ | atha liṅge tatra na [k: na iti padaṃ nāsti |] 
rahasyamantraiḥ [rahasyamantrairiti yathoktam 

eteṣāmūrdhvaśāstroktamantrāṇāṃ na pratiṣṭhitam |
bahiṣkuryādyato hyete rahasyatyena siddhidāḥ ||

svavīryānandamāhātmyapraveśavaśaśālinīm |
ye siddhiṃ dadate teṣāṃ bāhyatvaṃ rūpavicyutiḥ || iti |]

182)

liṅgaṃ pratiṣṭhāpayet viśeṣāt vyaktam iti pūrvapratiṣṭhiteṣu 
āvāhanavisarjanakrameṇa pūjāṃ kuryāt ādhāratayā | tatra gurudehaṃ 
svadehaṃ śaktidehaṃ [g: śaktidehamiti nāsti |] rahasyaśāstrapustakaṃ 
vīrapātraṃ akṣasūtraṃ prāharaṇaṃ [g: rahaḥśāstreti praṇaharaṇamiti ca 
pāṭhaḥ |] bāṇīyaṃ mauktikaṃ sauvarṇaṃ 
puṣpagandhadravyādihṛdyavastukṛtaṃ makuraṃ vā liṅgam arcayet 
[arcayediti atrāyāṃ viśeṣaḥ

na tu pāṣāṇajaṃ liṅgaṃ śilpyutthaṃ parikalpayet |
dhātūtthaṃ tu suvarṇotthavarjamanyadvivarjayet ||

na cātra liṅgamānādi kvacidapyupayujyate |
udāravīryairmantrairyadbhāsitaṃ phaladaṃ hi tat | iti |] | tatra ca 
ādhārabalādeva adhikādhikamantrasiddhiḥ bhavati iti pūrvaṃ pūrvaṃ 
pradhānam ādhāraguṇānuvidhāyitvāt ca mantrāṇāṃ tatra tatra sādhye 
tattatpradhānam iti śāstraguravaḥ | sarvatra parameśvarābhedābhimāna eva 
paramaḥ saṃskāraḥ |

183)

atha parvavidhiḥ |

tatra sāmānyaṃ sāmānyasāmānyaṃ sāmānyaviśeṣo viśeṣasāmānyaṃ 
viśeṣo viśeṣaviśeṣaśca iti ṣoḍhā parva pūraṇāt vidheḥ | tatra māsi māsi 
prathamaṃ pañcamaṃ dinaṃ sāmānyam 
caturthāṣṭamanavamacaturdaśapañcadaśāni dvayorapi pakṣayoḥ 
sāmānyasāmānyam anayorubhayorapi rāśyoḥ 
vakṣyamāṇatattattithyucitagrahanakṣatrayoge sāmānyaviśeṣaḥ mārgaśīrṣasya 
prathamarātribhāgaḥ kṛṣṇanavamyām pauṣasya tu rātrimadhyaṃ 
kṛṣṇanavamyām māghasya rātrimadhyaṃ śuklapañcadaśyām phālgunasya 
dinamadhyaṃ śukladvādaśyām caitrasya śuklatrayodaśyām vaiśākhasya 
kṛṣṇāṣṭamyām jyaiṣṭhasya kṛṣṇanavamyām āṣāḍasya prathama dine 
śrāvaṇasya divasapūrvabhāgaḥ kṛṣṇaikādaśyām bhādrapadasya 
dinamdhyaṃ śuklaṣaṣṭhyām āśvayujasya śuklanavamīdinam kārtikasya 
prathamo rātribhāgaḥ śuklanavamyām iti viśeṣaparva | citrācandrau 
maghājīvau tiṣyacandrau pūrvaphālgunībudhau śravaṇabadhau śatabhiṣakandau 
malādityau

184)

rohiṇīśukrau viśākhābṛhaspatī śravaṇacandrau iti | yadi 
mārgaśīrṣādikrameṇa yathāsaṃkhyaṃ bhavati āśvayujaṃ varjayitvā tadā 
viśeṣaviśeṣaḥ | anyaviśeṣaścet anyaparvaṇi tadā tat anuparva ityāhuḥ | 
bhagrahayoge ca na velā pradhānaṃ tithereva viśeṣalābhāt 
anuyāgakālānuvṛttistu parvadine mukhyā anuyāgaprādhānyāt 
parvayāgānām [k: sarvayāgānāmiti pāṭhaḥ |] anuyāgo mūrtiyāgaḥ 
[mūrtiyāgo hi samāmnāto'sti pañcadhā yathā tantrāloke

kevalo yāmalo miśraścakrayugvīrasaṃkaraḥ |
kevalaḥ kevalaireva gurubhirmiśritaḥ punaḥ ||

sādhakādyaiḥ saptnīkairyāmalaḥ sa dvidhā punaḥ |
patnīyogātkrayānītaveśyāsaṃyogato'tha vā ||

cakriṇyādyāśca vakṣyante śaktiyogādyathocitāḥ |
tatsaṃyogāccakrayukto yāgaḥ sarvaphalapradaḥ ||

sarvaistu sahito yāgo vīrasaṃkara ucyate | iti |] cakrayāgaḥ iti paryāyāḥ | 
tatra guruḥ tadvargyaḥ sasantānaḥ tattvavit kanyā antyā veśyā aruṇā [k: 
taruṇeti pāṭhaḥ |] tattvavedinī vā iti cakrayāge mukhyapūjyāḥ viśeṣāt 
sāmastyena | tatra madhye 

185)

guruḥ tadāvaraṇakrameṇa gurvādisamayyantaṃ vīraḥ śaktiḥ iti krameṇa 
ityevaṃ cakrasthityā vā paṅktisthityā vā āsīta tato gandhadhūpapuṣpādibhiḥ 
krameṇa pūjayet tataḥ pātraṃ sadāśivarūpaṃ dhyātvā śaktyamṛtadhyātena 
āsavena pūrayitvā tatra bhoktrīṃ śaktiṃ śivatayā pūjayitvā tayaiva 
devatācakratarpaṇaṃ kṛtvā naraśaktiśivātmakatritayamelakaṃ dhyātvā 
āvaraṇāvataraṇakrameṇa mokṣabhogaprādhānyaṃ bahirantaśca tarpaṇaṃ 
kuryāt punaḥ pratisaṃcaraṇakrameṇa [yathoktam

pratisaṃcārayogena punarantaḥ praveśanam |
yāvadgurvantikaṃ taddviḥ pūrṇaṃ bhramaṇamucyate || iti |] evaṃ pūrṇaṃ 
bhramaṇaṃ cakraṃ puṣṇāti | tatra ādhāre [ādhāre iti yathoktam

ādhārayuktaṃ nādhārarahitaṃ tarpaṇaṃ bhavet |
ādhāreṇa vinā bhraṃśo na ca tuṣyanti raśmayaḥ || iti |] viśvamayaṃ 
pātraṃ sthāpayitvā devatācakraṃ tarpayitvā svātmānaṃ vanditena tena tarpayet 
pātrābhāve bhadraṃ vellitaśuktiḥ vā dakṣahastena pātrākāraṃ bhadraṃ 

186)

dvābhyāmuparigatadakṣiṇābhyāṃ niḥsandhīkṛtābhyāṃ vellitaśuktiḥ 
patadbhiḥ bindubhiḥ vetālaguhyakāḥ saṃtuṣyanti dhārayā bhairavaḥ atra 
praveśo na kasyacit deyaḥ pramādāt praviṣṭasya vicāraṃ na kuryāt kṛtvā 
punardviguṇaṃ cakrayāgaṃ kuryāt tato'vadaṃśān bhojanādīn ca agre 
yatheṣṭaṃ vikīryet guptagṛhe vā saṃketābhidhānavarjaṃ devatāśabdena 
sarvān yojayet iti vīrasaṃkarayāgaḥ | tato'nte dakṣiṇātāmbūlavastrādibhiḥ 
tarpayet iti pradhānatamo'yaṃ mūrtiyāgaḥ | adṛṣṭamaṇḍalo'pi mūrtiyāgena 
parvadināni pūjayan varṣādeva putrakoktaṃ phalameti vinā 
sandhyānuṣṭhānādibhiḥ iti vṛddhānāṃ bhogināṃ strīṇāṃ vidhirayam 
śaktipāte sati upadeṣṭavyo guruṇā |

atha pavitrakavidhiḥ | sa ca śrīratnamālātriśiromataśrīsiddhāmatādau 
vidhipūrvakaḥ pārameśvarājñāpūrakaśca [ājñāpūraketi yathoktaṃ 
tantrāloke

kṣīrābdhimathanodbhūtaviṣanidrāvimūrcchitaḥ |
nāgarājaḥ svabhavane meghakāle sma nāvasat ||

kevalaṃ tu pavitreṇa vāyubhakṣaḥ samāśatam |
divyaṃ daśaguṇaṃ nāthaṃ bhairavaṃ paryapūjayat ||

vyajijñapacca taṃ tuṣṭaṃ nātha veśmanyahaṃ nije |
pātāle nāsituṃ śaktaḥ so'pyenaṃ parameśvaraḥ ||

nāgaṃ nijajaṭājūṭapīṭhagaṃ paryakalpayat |
tataḥ samastadevaughairdhārito'sau svamūrdhani ||

tasmānmaheśiturmūrdhni devatānāṃ ca sarvaśaḥ |
ātmanaśca pavitraṃ taṃ kuryādyāgapuraḥsaram ||

daśakoṭyo na pūjānāṃ pavitrārohaṇe samāḥ |
vṛthā dīkṣā vṛthā jñānaṃ gurvārādhanameva ca ||
vinā pavitrādyenaitaddharennāthaḥ śivājñayā || iti |] uktaṃ caitat 
śrītantrāloke 

187)

vinā pavitrakeṇa sarvaṃ niṣphalam |

iti | tatra āṣāḍhaśuklāt kulapūrṇimādināntaṃ kāryaṃ pavitrakam tatra 
kārtikakṛṣṇapañcadaśī kulacakraṃ nityācakraṃ pūrayati iti 
śrīnityātantravidaḥ | māghaśuklapañcadaśī iti śrībhairavakulormividaḥ | 
dakṣiṇāyanāntapañcadaśī iti śrītantrasadbhāvavidaḥ | tatra vibhavena devaṃ 
pūjayitvā āhutyā tarpayitvā pavitrakaṃ dadyāt sauvarṇamuktāratnaviracitāt 
prabhṛti paṭasūtrakārpāsakuśagarbhāntamapi kuryāt | tacca [k: tataśceti 
pāṭhaḥ |] tattvasaṃkhyagranthikaṃ 

188)

padakalābhuvanavarṇamantrasaṃkhyagranthi ca jānvantamekaṃ 
nābhyantamaparaṃ kaṇṭhāntamanyat śirasi anyat iti catvāri pavitrakāṇi devāya 
gurave ca samastādhvaparipūrṇatadrūpabhāvanena dadyāt śeṣebhya ekam iti | 
tato mahotsavaḥ kāryaḥ cāturmāsyaṃ saptadinaṃ tridinaṃ ca iti 
mukhyānvāpatkalpāḥ sati vibhave māsi māsi pavitrakam atha vā caturṣu māseṣu 
atha vā sakṛt tadakaraṇe prāyaścittaṃ japet jñānī api saṃbhavadvitto'pi 
akaraṇe pratyavaiti lobhopahitajñānākaraṇe jñānanindāpatteḥ |

yadā prāpyāpi vijñānaṃ dūṣitaṃ parameśaśāsanaṃ 
tadā prāyaścitti |

iti vacanāt |

ityeṣa pavitrakavidhiḥ |

jñānalābhādau laukikotsavānte'pi sarvatra saṃvidullāsādhikyaṃ 
devatācakrasaṃnidhiḥ viśeṣato bhavati iti tathāvidhādhikyaparyālocanayā 
tathāvidhameva viśeṣamanuyāgādau kuryāt |

189)

atha vyākhyāvidhiḥ |

sarvaśāstrasaṃpūrṇaṃ guruṃ vyākhyārtham abhyarthayeta so'pi svaśiṣyāya 
paraśiṣyāyāpi vā samucitasaṃskārocitaṃ śāstraṃ vyācakṣīta 
adharaśāsanasthāyāpi karuṇāvaśāt 
īśvarecchāvaicitryodbhāvitaśaktipātasaṃbhāvanābhāvitahṛdayo vyācakṣīta 
marmopadeśavarjam | tatra nimnāsanasthitebhyaḥ tatparebhyo 
niyamitavāṅmanaḥkāyebhyo vyākhyā kriyamāṇā phalavatī bhavati prathamaṃ 
gandhādiliptāyāṃ bhuvi ullikhya saṃkalpya vā padmādhāraṃ caturaśraṃ 
padmatrayaṃ padmamadhye vāgīśīṃ vāmadakṣiṇayoḥ gaṇapatigurū ca pūjayet 
ādhārapadme [k: adharapadme iti pāṭhaḥ |] vyākhyeyakalpadevatām | 
tataḥ sāmānyārghapātrayogena cakraṃ tarpayet tato vyācakṣīta 
sūtravākyapaṭalagrantham pūrvāparāviruddhaṃ kurvan 
tantrāvṛttiprasaṅgasamuccayavikalpādiśāstranyāyaucityena 
[dehalīdīpanyāyena yugapadupakārakaṃ tantram bhojanapātranyāyena 
pṛthagupakārakam āvṛttiḥ aniṣṭāpādanaṃ prasaṅgaḥ 
anekakriyākārakasaṃbandhaḥ samuccayaḥ śabdajñānānupātī vastuśūnyo 
vikalpaḥ |] 

190)

pūrvaṃ pakṣaṃ samyak ghaṭayitvā samyak ca dūṣayan sādhyaṃ sādhayan 
[k: madhyaṃ sādhayan iti pāṭhaḥ |] tātparyavṛttiṃ pradarśayan 
paṭalāntaṃ vyācakṣīta nādhikam tatrāpi vastvante vastvante tarpaṇaṃ pūjanam 
iti vidyāpīṭhaṃ visarjya upalipya agādhe tat kṣepayet |

iti vyākhyāvidhiḥ |

atha samayaniṣkṛtiḥ |

yadyapi tattvajñānaniṣṭhasya prāyaścittādi na kiṃcit tathāpi caryāmātrādeva 
[k: madhyaṃ sādhayan iti pāṭhaḥ |] mokṣabhāginaḥ tān anugrahītum 
ācāravartanīṃ darśayet | atattvajñānī tu caryaikāyattabhogamokṣaḥ 
samayollaṅghane kṛte prāyaścittam akurvan varṣaśataṃ kravyādo bhavatīti 
iti prāyaścittavidhiḥ vaktavyaḥ tatra strīvadhe prāyaścittaṃ nāsti anyatra tu 
balābalaṃ jñātvā akhaṇḍāṃ bhagavatīṃ mālinīṃ ekavārāt prabhṛti 
trilakṣāntam āvartayet 

191)

yāvat śaṅkāvicyutiḥ bhavati tadante viśeṣapūjā tatrāpi cakrayāgaḥ sa hi 
sarvatra śeṣabhūtaḥ |

iti samayaniṣkṛtividhiḥ |

atha gurupūjāvidhiḥ |

sarvayāgānteṣu upasaṃhṛte yāge aparedyuḥ gurupūjāṃ kuryāt pūrvaṃ hi sa 
vidhyaṅgatayā toṣito na tu prādhānyena iti tāṃ prādhānyena akurvan 
adhikārabandhena baddho bhavati iti tāṃ sarvathā caret | tatra svāstikaṃ 
maṇḍalaṃ kṛtvā tatra sauvarṇaṃ pīṭhaṃ dattvā tatra samastamadhvānaṃ 
pūjayitvā tatpīṭhaṃ tena adhiṣṭhāpya tasmai pūjāṃ kṛtvā tarpaṇaṃ 
bhojanaṃ dakṣiṇām ātmānam iti nivedya naivedyocchiṣṭaṃ [g: nivedya 
ucchiṣṭamiti pāṭhaḥ |] prārthya vanditvā svayaṃ prāśya cakrapūjāṃ 
[k: cakre pūjāmiti pāṭhaḥ |] kuryāt |

iti gurupūjāvidhiḥ |

192)

nityaṃ naimittikaṃ karma kurvañśāstravivarjitaḥ |
vināpi jñānayogābhyāṃ caryāmātreṇa mucyate ||

sivaṇāhu sacchandu
tattvakoppavi-appa iccha |
cari āmitti ṇajiṇajaṇa
huki-a bhavaro-a ci-iccha ||


iti śrīmadabhinavaguptācāryaviracie tantrasāre śeṣavartanaprakāśanaṃ nāma 
viṃśamāhnikam ||20||


athaikaviṃśamāhnikam |

evaṃ samastaṃ nityaṃ naimittikaṃ karma nirūpitam | adhunā asyaiva āgamasya 
prāmāṇyam ucyate | tatra saṃvinmātramaye viśvasmin saṃvidi ca 
vimarśātmikāyāṃ vimarśasya ca śabdanātmakatāyāṃ siddhāyāṃ 
sakalajaganniṣṭhavastunaḥ tadgatasya ca karmaphalasaṃbandhavaicitryasya yat 
vimarśanaṃ tadeva śāstram iti parameśvarasvabhāvābhinna eva samastaḥ 
śāstrasaṃdarbho vastuta ekaphalaprāpakaḥ ekādhikāryuddeśenaiva tatra tu 
parameśvaraniyatiśaktimahimnaiva bhāge bhāge rūḍhiḥ lokānām iti | kecit 
māyocitabhedaparāmarśātmani vedāgamādiśāstre rūḍhāḥ anye tathāvidha 
eva mokṣābhimānena sāṃkhyavaiṣṇavaśāstrādau pare tu 
viviktaśivasvabhāvāmarśanasāre śaivasiddhāntādau anye 
sarvamayaparameśvaratāmarśanasāre mataṅgādiśāstre [k: 
matādiśāstre iti pāṭhaḥ |] kecit tu viralaviralāḥ 

194)

samastāvacchedabandhyasvātantryānandaparamārthasaṃvinmayaparameśvara##
-##svarūpāmarśanātmani śrītrikaśāstrakrame 
[samastordhvavartitrikaśāstraprarūḍhyarthaṃ pūrvapūrvopajīvanaṃ 
yathordhvasthityarthaṃ sopānakalpanetyarthaḥ | tyāgastadākramaṇapūrvaṃ 
laṅghanamanākramaṇameva |] kecit tu pūrvapūrvatyāgakrameṇa 
laṅganena vā ityevam ekaphalasiddhiḥ ekasmādeva āgamāt | bhedavāde'pi 
[bhedavāde'pi naiyāyikamate |] samastāgamānām ekeśvarakāryatve'pi 
prāmāṇyaṃ tāvat avasthitam prāmāṇyanibandhanasya ekadeśasaṃvādasya 
avigītatāyā anidantāpravṛtteśca tulyatvāt [g: pravṛtteḥ svatulyasvāditi 
ca pāṭhaḥ |] parasparabādho viṣayabhedāt akiṃcitkaraḥ | 
brahmahananatanniṣeḍhavat saṃskārabhedaḥ saṃskārātiśayaḥ 
[saṃskārātiśaya iti yaduktam

dharmārthakāmamokṣeṣu pūrṇāpūrṇādibhedataḥ |
vicitreṣu phaleṣveka upāyaḥ śāṃbhavāgamaḥ ||

tasminviṣayavaiviktyādvicitraphaladātari |
citropāyopadeśo'pi na virodhāvaho bhavet || iti |] tadabhāve kvacit 
anadhikṛtatvam iti samānam āśramabhedavat [yathoktaṃ tantrāloke

yathaikatrāpi vedādau tattadāśramagāminaḥ |
saṃskārāntaramatrāpi tathā liṅgoddhṛtādike ||

yathā ca tatra pūrvasminnāśrame nottarāśramāt |
phalameti tathā pañcarātrādau na śivātmatām || iti |] phalotkarṣācca 
utkarṣaḥ tatraiva 

195)

upaniṣadbhāgavat bhinnakartṛkatve'pi sarvasarvajñakṛtatvamatra 
[yathoktaṃ tantrāloke

tena sarvajñapūrvatvamāgneṇaiṣā prasiddhyati |
bahusarvajñatvapūrvatve na mānaṃ cāsti kiñcana ||

bhogāpavargataddhetuprasiddhiśataśobhitaḥ |
tadvimarśasvabhavosau bhairavaḥ parameśvaraḥ ||

tataścāṃśāṃśikāyogātsā prasiddhiḥ parasparam |
śāstraṃ vāśritya vitatā lokānsaṃvyavahārayet ||

tathaivāśaiśavātsarve vyavahāradharājuṣaḥ |
santaḥ samupajīvanti śaivamevādyamāgamam || iti |] saṃbhāvyate 
taduktatadatiriktayuktārthayogāt nityatve'pi āgamānāṃ prasiddhiḥ 
[tasmāttasmāt karturiti śeṣaḥ |] tāvat avaśyopagamyā 
anvayavyatirekādhyakṣādīnāṃ [adhyakṣādīnāṃ pratyakṣādīnāmityarthaḥ 
|] tatprāmāṇyasya tanmūlatvāt [tanmūlatvāt 
prasiddhimūlatvādityarthaḥ |] satyaṃ rajataṃ paśyāmi iti hi 
sauvarṇikādiparaprasiddhyaiva [prāmāṇyamiti śeṣaḥ |]

196)

prasiddhireva āgamaḥ sā kācit [caturdhā hi śāstrāṇāṃ phalapravṛttiḥ 
ye catvāraḥ puruṣārthā iti tatra viṣayavibhāgamāha kācit ityādinā |] 
dṛṣṭaphalā bubhukṣito bhuṅkte iti bālasya prasiddhita eva tatra tatra 
pravṛttiḥ nānvayavyatirekābhyāṃ tadā tayoḥ ābhāvāt yauvanāvasthāyāṃ 
tadbhāvo'pi [tadbhāvaḥ anvayavyatirekabhāva ityarthaḥ |] akiṃcitkaraḥ 
prasiddhiṃ tu mūlīkṛtya so'stu [prasiddhimūlīkaraṇaṃ vinā kiñcidapi 
kāryaṃ na siddhyati iti astu ityabhyupagamenoktam |] kasmaicit kāryāya kācit 
adṛṣṭavaidehya [pūrvakāṇḍasyadvaividhyaṃ 
dṛṣṭādṛṣṭabhedenoktaṃ tatrānvīkṣikyādinā dṛṣṭaphalatvaṃ 
karmamīmāṃsāprabhṛti upaniṣadbhāgaparyantam adṛṣṭetyādi 
kaivalyaphaladā ityantam uttarakāṇḍasyāpi 
dīkṣāsvaprakāśasvatantraprabodhajñānābhyāṃ dvaividhyamiti darśayati 
kācit ityādinā |] prakṛtilayapuruṣakaivalyaphaladā kācit 
śivasamānatvaphaladā kācit aikyaparyavasāyinī sā [sā dṛṣṭādṛṣṭāpi 
ityarthaḥ |] ca pratyekam anekavidhā ityevaṃ bahutaraprasiddhipūrṇe jagati 
yo yādṛśo bhaviṣyan [phalena saṃbhatsyamāna ityarthaḥ |] sa 
tādṛśīmeva prasiddhiṃ balādeva hṛdayaparyavasāyinīm

197)

abhimanyate iti riktasya [riktasya jantorjātasya kāryākārye ajānataḥ |
vilabdhā tata kenāmī siddhāntaviṣayā grahāḥ ||
ityanvayavyatirekavādapakṣaḥ |] jantoḥ atiriktā vācoyuktiḥ tāsāṃ 
kāṃcana prasiddhiṃ pramāṇīkurvatā abhyupagantavyameva āgamaprāmāṇyam 
iti sa āgama āśrayaṇīyo yatra utkṛṣṭaṃ phalam ityalamanyena |

saṃvitprakāśaparamārthatayā yathaiva
bhātyāmṛśatyapi tatheti vivecayantaḥ |
santaḥ samastamayacitpratibhāvimarśa-
sāraṃ samāśrayata śāstramanuttarātma ||

jissa daḍhapasiddhighaḍi-e
vavahāre so-i asmi ṇīsaṃko |
taha hohi jahuttiṇa
pasiddhirūḍhi-e paramasivo ||

nijadṛḍhaprasiddhighaṭite
vyavahāre loka asti niḥśaṅkaḥ |
tadā bhavati janottīrṇa-
prasiddhirūḍhaḥ paramaśivaḥ ||

iti śrīmadabhinavaguptācāryaviracite tantrasāre āgamaprāmāṇyaprakāśanaṃ 
nāma ekaviṃśamāhnikam ||21||


atha dvāviṃśamāhnikam |

atha samastā iyam upāsā samunmiṣattādṛśadṛḍhavāsanārūḍhān 
adhikāriṇaḥ prati śrīmatkaulikaprakriyayā nirūpyate tatra uktaṃ 
yogasaṃcārādau

ānandaṃ brahma taddehe tridhauṣṭyāntyavyavasthitam 
[triddhādyantavyavasthitam 
iti anyatra pāṭhaḥ | tridhā ityasya
upakāri dvayaṃ tatra phalamanyattadātmakam |
ityevamarthena ca vyākhyānamasti |] |
abrahmacāriṇastasyatyāgādānandavarjitāḥ ||
ānandakṛtrimāhāravarjaṃ cakrasya yājakāḥ |
dvaye'pi narake ghore tasmādenāṃ sthitiṃ bhajet ||

tadanayā sthityā kulayāgaḥ saca ṣoḍhā bāhye śaktau svadehe yāmale prāṇe 
saṃvidi ca iti | tatra ca uttara uttara utkṛṣṭaḥ pūrvaḥ pūrvastadrucyartham | 
siddhikāmasya dvitīyaturyapañcamāḥ sarvathā nirvartyāḥ ṣaṣṭhastu 
mumukṣoḥ mukhyaḥ tasyāpi dvitīyādyā naimittike yathāsaṃbhavam anuṣṭheyā 
eva vidhipūraṇārthaṃ ca | tatra bāhyaṃ sthaṇḍilam ānandapūrṇaṃ vīrapātraṃ 
aruṇaḥ paṭaḥ pūrvoktamapi 

199)

vā liṅgādi | tatra snānādikartavyānapekṣayaiva pūrṇānandaviśrāntyaiva 
labdhaśuddhiḥ prathamaṃ prāṇasaṃviddehaikībhāvaṃ bhāvayitvā saṃvidaśca 
paramaśivarūpatvāt saptaviṃśativāraṃ mantram uccāryamūrdha vaktra 
hṛdguhya mūrtiṣu anulomavilomābhyāṃ viśvādhvaparipūrṇatā parameśvare 
aparatve parāparatve paratve'pi ca | tathāhi māyā puṃprakṛti guṇa 
dhīprabhṛti dharāntaṃ saptaviṃśatitattvāni kalādīnāṃ tatraiva antarbhāvāt 
vidyāśaktāvapi parāparatve bahmapañcakasya 
sadyastvājātatvabhavodbhavatvādīnāṃ dharmāṇāṃ saptaviṃśatirūpatvameva 
uktaṃ śrīmallakuleśādipādaiḥ | paratve'pi pañcaśaktiḥ hi parameśvaraḥ 
pratiśakti ca pañcarūpatā evaṃ pañcaviṃśatiḥ śaktayaḥ tāśca anyonyam 
anudbhinnavibhāgā ityekā śaktiḥ sā cānudbhinnavibhāgā ityevaṃ 
saptaviṃśatirūpayā vyāptyā saṃvidagneḥ śikhāṃ buddhiprāṇarūpāṃ 
sakṛduccāramātreṇaiva baddhāṃ kuryāt yena paramaśiva eva pratibaddhā 
tadvyatiriktaṃ na kiṃcidabhidhāvati 
tathāvidhabuddhyādhiṣṭhitakaraṇacakrānuvedhena purovartino 

200)

yāgadravyagṛhadigādhārādīnapi tanmayībhūtān kuryāt tato'rghapātramapi 
śikhābandhavyāptyaiva pūrayet pūjayecca tadvipruḍbhiḥ sthaṇḍilānyapi 
tadrasena vāmānāmāṅguṣṭhayogāt dehacakreṣu mantracakraṃ pūjayet tarpayet 
ca tataḥ prāṇāntaḥ tataḥ sthaṇḍile triśūlātmakaṃ śaktitrayāntamāsanaṃ 
kalpayet māyāntaṃ hi sārṇe aukāre ca śaktitrayāntamāsanaṃ kalpayet 
māyāntaṃ hi sārṇe aukāre ca śaktitrayāntaṃ tadupari yājyā vimarśarūpā 
śaktiḥ ityevaṃ sakṛduccāreṇaiva ādhārādheyanyāsaṃ kṛtvā tatraiva 
ādheyabhūtāyāmapi saṃvidi viśvaṃ paśyet tadapi ca saṃvinmayam ityevaṃ 
viśvasya saṃvidā tena ca tasyāḥ saṃpuṭībhāvo bhavati saṃvida uditaṃ tatraiva 
paryavasitaṃ yato viśvaṃ vedyācca saṃvit udeti tatraiva ca viśrāmyati iti 
etāvattvaṃ saṃvittattvaṃ saṃpuṭībhāvadvayāt labhyate [ityetāvattattvaṃ 
saṃvittattvamiti saṃgataḥ pāṭhaḥ pratibhāti |] | taduktam 

sṛṣṭiṃ tu saṃpuṭīkṛtya ..................... |

iti | tato gandhadhūpāsavakusumādīn ātmaprahvībhāvāntān 

201)

arpayitvā svaviśrāntyā japtvā upasaṃhṛtya jale nikṣipet |

iti bāhyayāgaḥ |

atha śaktau tatra anyonyaṃ śaktitālāsāvīrāṇām ubhayeṣām ubhayātmakatvena 
prollāsaprārambhasṛṣṭyantaśivaśaktiprabodhe parasparaṃ vyāpārāt 
parameśaniyatyā ca śuddharūpatayā tatra prādhānyam etena ca 
viśiṣṭacakrasyāpi śaktitvaṃ vyākhyātam tatra śikhābandhavyāptyaiva 
[k: śikhāvyāptyeti pāṭhaḥ |] pūjanaṃ śaktitrayāntamāsanaṃ [g: 
vimarśaśaktiriti ca pāṭhāntaram |] koṇatraye madhye visargaśaktiḥ iti tu 
vyāptau viśeṣaḥ | evaṃ svadehe tatraiva cakre tato brahmarandhrādyanucakreṣu | 
atha yāmale 

śakterlakṣaṇametat
tadvadabhedastato'napekṣya vayaḥ |
jātyādīṃścāsaṅgāt
loketarayugalajaṃ hi tādātmyam ||

kāryahetusahotthatvāttraidhaṃ sākṣādathānyathā |
kḷptāvato mitho'bhyarcyā tarpyānandāntikatvataḥ ||

202)

cakramarcettadaucityādanucakraṃ tathānugam |
bahiḥ puṣpādināntaśca gandhabhuktyāsavādibhiḥ ||

evamānandasandohitattacceṣṭocchalatsthitiḥ [g: ucchalarddhibhiḥ iti 
śodhitaḥ pāṭhaḥ |] |
anucakragaṇaścakratādātmyādabhilīyate ||

nijanijabhogābhoga-
pravikāsamayasvarūpaparimarśe |
kramaśo'nucakradevyaḥ
saṃviccakraṃ hi madhyamaṃ yānti ||

anucakradevatātmaka-
marīcigaṇapūraṇādhigatavīryam |
tacchaktitadvadātmaka-
manyonyasamunmukhaṃ bhavati ||

tadyugalamūrdhvadhāma-
praveśasaspandajātasaṃkṣobham |
kṣubhnātyanucakrāṇyapi
tāni tadā tanmayāni na pṛthaktu ||

itthaṃ yāmalametad
galitabhidāsaṃkathaṃ yadaiva tadā 
kramatāratamyayogāt
saiva hi saṃvidvisargasaṃghaṭṭaḥ ||

taddhruvadhāmānuttara-
mubhayātmakajagadudāramānandam |

203)

no śāntaṃ nāpyuditaṃ
śāntoditasūtikāraṇaṃ [g: pūtikāraṇamiti pāṭhaḥ |] paraṃ kaulam ||

anavacchinnapadepsu-
stāṃ saṃvidamātmasātkuryāt |
śāntoditātmakadvaya-
matha yugapadudeti śaktiśaktimatoḥ ||

svātmānyonyāveśāt
śāntānyatve dvayordvayātmatvāt |
śaktistu tadvaduditāṃ
sṛṣṭiṃ puṣṇāti no tadvān ||

tasyāṃ cāryaṃ [k: tasyāṃ caryāmiti pāṭhaḥ |] kulamatha
tayā nṛṣu proktayogasaṃghaṭṭāt |
atha sṛṣṭe dvitaye'smin
śāntoditadhāmni ye'nusaṃdadhate ||

prācyāṃ visargasattā-
manavacchidite pade rūḍhāḥ |
uditaṃ ca mitho vaktrāt
mukhyādvaktre pragṛhyate ca bahiḥ ||

tṛptaṃ devīcakraṃ
siddhijñānāpavargadaṃ bhavati |
śāntābhyāse śāntaṃ
śivameti yadatra devatācakram ||

204)

śūnyaṃ nirānandamayaṃ
nirvṛtinijadhāmato'rghaṃ [k: nirvṛttirdhāmata iti; g: 
dhāmato'rdhamityatra dhāmato'yaṃ ca iti pāṭhāntaropetaśca pāṭhaḥ |] ca |
raṇaraṇakarasānnijarasa-
bharitabahirbhāvacarvaṇarasena ||

āntarapūrṇasamucchala-
danucakraṃ yāti cakramatha tadapi |
ucchalati prāgvaditi
trividho'nvartho visargo'yam ||

etadvisargadhāmani
parimarśanatastridhaiva manuvīryam |
tattatsaṃvidgarbhe
mantrastattatphalaṃ sūte ||

koṇatrayāntarāśrita-
nityoditamaṅgalacchade kamale |
nityāviyutaṃ nālaṃ
ṣoḍaśadalakamalasanmūlam ||

madhyasthanālagumphita-
sarojayugaghaṭṭanakramādagnau |
madhyasthapūrṇaśaśadhara-
sundaradinakarakaraughasaṃghaṭṭāt ||

tridalāruṇavīryakalā-
saṅgānmadhye'ṅkurasṛṣṭiḥ |

205)

iti śaśadharavāsarapati-
citragusaṃghaṭṭamudrayā jhaṭiti ||
sṛṣṭyādikramamantaḥ-
kurvaṃsturye sthitiṃ labhate |
etatkhecaramudrā-
veśe'nyonyaṃ svaśaktiśaktimatoḥ ||

pānopabhogalīlā-
hāsādiṣu yo bhavedvimarśamayaḥ |
avyaktadhvanirāva-
sphoṭaśrutinādanādānteḥ ||

avyucchinnānāhata-
paramārthairmantravīryaṃ tat |
gamanāgamaviśrāntiṣu
karṇe nayane dvilakṣmasaṃparke ||

tatsaṃmīlanayoge
dehāntākhye ca yāmale cakre |
kucamadhyahṛdayadeśā-
doṣṭhānte kaṇṭhagaṃ yadavyaktam ||

taccakradvayamadhyaga-
mākarṇya kṣobhavigamasamaye yat |
nirvānti tatra caivaṃ
yo'ṣṭavidho nādabhairavaḥ paramaḥ ||

jyotirdhvaniśca yasmāt
sā māntrī vyāptirucyate paramā |

206)

evaṃ karmaṇi karmaṇi
viduṣaḥ syājjīvato muktiḥ |
tajjñaḥ śāstre muktaḥ 
parakulavijñānabhājanaṃ garbhaḥ ||

śūnyāśūnyālayaṃ [g: śūnyālaye iti pāṭhaḥ |] 
kuryādekadaṇḍe'nalānilau |
śūlaṃ samarasīkṛtya [k: śūnyaṃ samaraseti pāṭhaḥ |] rase rasamiva 
sthitam ||

tyaktāśaṅko nirācāro nāhamasmīti bhāvayan |
dehasthā devatāḥ paśyan hlādodvegādi ciddhane ||

karṇākṣimukhanāsādicakrasthaṃ devatāgaṇam |
grahītāraṃ sadā paśyan khecaryā sidhyati dhruvam ||

śvabhre sudūre jhaṭiti svadehaṃ 
saṃpātayanvāsamasāhasena |
ākuñcya hastadvitayaṃ prapaśyan
mudrāmimāṃ vyomacarīṃ bhajeta ||

ityeṣa yāmalayāgaḥ | uktavyāptike prāṇe viśvamaye proktasaṃvidvyāptyā 
tarpaṇānnagandhadhūpādisamarpaṇena upodbalanaṃ prāṇayāgaḥ | 
viśrāntirūḍhistu saṃvidyāgaḥ prāgeva nirūpitaḥ | evam etebhyo 
yāgebhyo'nyatamaṃ kṛtvā yadi tathāvidhanirvicikitsatāpavitritahṛdayaḥ 
śiṣyo bhavati tadā tasmai tadyāgadarśanapūrvakaṃ 
tilājyāhutipūrvakanirapekṣameva 

207)

pūrvoktavyāptyā anusaṃdhānakrameṇa avalokanayā dīkṣāṃ kuryāt 
parokṣadīkṣādike naimittikānte tu pūrva eva vidhiḥ kevalam 
etadyāgapradhānatayā iti | guruśarīre saptamaḥ kulayāgaḥ sarvottamaḥ so'pi 
prāgyāgasāhityena [k: prāṇayāgeti pāṭhaḥ |] sakṛdeva kṛtaḥ 
sarvaṃ pūrayati iti śivam ||

bāhori sattidehiṇi adeha
ijāmali pāṇabuddhigurubodha-i
jo aṇusaṃvidi sandhi aroha
iso para ikkula laddhaṇi soha-i ||

iti śrīmadabhinavaguptācāryaviracite tantrasāre kulayāgaprakāśanaṃ nāma 
dvāviṃśamāhnikam ||22||

itthaṃ ṣaḍardhakramasaṃpradāyaṃ
sapratyayāpratyayabhinnamāpya |
śrīśaṃbhunāthātkaruṇārasena
svayaṃ prasannādanapekṣavṛttyā ||

kāśmīriko'bhinavaguptapadābhidhānaḥ
śrītantrasāramakarodṛjunā krameṇa |

208)

yattena sarvajana eṣa śivaṃ prayātu
lokottaraprasaraśāṃbhavatantrasāram ||

kṛtistatrabhavacchrīmanmahāmāheśvarācāryavaryaśrīmadabhinava##-

sadvidyānāṃ saṃśraye granthavidvad-
vyūhe hrāsaṃ kālavṛttyopayāte |
tattatsaddharmoddidhīrṣaikatāna-
satprekṣaujaḥśālinā karmavṛttyai ||1||

śrīmatkaśmīrādhirājena mukhyai-
rdharmodyuktairmantribhiḥ svairvivecya |
pratyaṣṭhāpi jñānavijñānagarbha-
granthoddhṛtyai mukhyakāryālayo yaḥ ||2||

tatrājīvaṃ nirviśadbhirmukunda-
rāmādhyakṣatvāśritaiḥ sadbhireṣaḥ |
pūrtyā śuddhyā vyākhyayā saṃskṛtaḥ stāt 
pūrṇo granthaḥ śreyase sajjanānām ||3||
 (tilakam)

śrīsvātmasaṃvidabhinnarūpaśivārpaṇaṃ bhūyat |

samāptaṃ cedaṃ tantrasārākhyaṃ śāstram |




###########   END OF FILE  #######