####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00114
Uniform title: tejobindūpaniṣat
Main title: yoga upaniṣads with the commentary of śrī upaniṣad brahmayogin
Secondary title: tejobindu upaniṣat
Commentator : brahmayogin
Alternate name : śrī upaniṣad brahmayogin
Editor : śāstrī mahādeva

Description: 



Notes: 
Transcribed by the staff of Muktabodha under the supervision of Mark S. G. Dyczkowski.

Revision 0: January 28, 2007


Publisher : Adyar library and research centre
Publication year : 1920
Publication city : Madras
Publication country : India
####################################################


tejobindūpaniṣat

saha nāvavatu- iti śāntiḥ

prathamo'dhyāyaḥ

nirviśeṣatejobindusvarūpam

tejobinduparaṃ dhyānaṃ viśvātmahṛdi saṃsthitam |
aṇuvaṃ śāṃbhavaṃ śāntaṃ sthūlasūkṣmaparaṃ ca yat || 1 ||

duḥkhāḍhyaṃ ca durārādhyaṃ duṣprekṣyaṃ muktamavyayam |
durlabhaṃ tatsvayaṃ dhyānaṃ munīnāṃ ca manīṣiṇām || 2 ||

vivaraṇam

yatrācinmātrakalanā yātyapahnavamañjasā |
taccinmātramakhaṇḍaikarasaṃ brahma bhavāmyaham ||

	iha khalu kṛṣṇayajurvedapravibhakteyaṃ tejobindūpaniṣat svātiriktakhaṇḍācinmātrāpahnavasiddhākhaṇḍānandacinmātrarūpā-vasthānalakṣaṇavikalebara kaivalyārthabodhinī vijṛmbhate | asyā upodghātādikaṃ kaṭhavallyādisamam | asyā brahmamātrānubhavaprakāśikāyāḥ tejobindūpaniṣadaḥ svalpagranthato vivaraṇamārabhyate |

p. 46) vakṣyamāṇaśivaskanda ṛbhunidāghapraśnaprativacanākhyāyikā tu vidyāstutyarthā | atrādau tāvat prathamādhyāye praśnaprativacanakalanāṃ vinā śrutiḥ svayameva yathoktādhikāribhyaḥ pañcadaśāṅgayogasādhanasiddhaṃ nirviśeṣabrahmatattvamupadiśati- tejobindviti | ye svātmayāthātmyamananecchavo munayaḥ teṣāṃ munīnāṃ nirviśeṣabrahmadhyāne yeṣāṃ manīṣā vidyate teṣāṃ manīṣiṇāṃ ca svātiriktāvidyāpadatatkāryadhvāntāpahnavasiddhaṃ niṣpratiyogikasvamātratejobindusvarūpaṃ tatparaṃ tadviṣayakaṃ dhyānaṃ vakṣyāmīti śeṣaḥ | dhyeyaṃ kīdṛśam ? ityata āha- viśveti | svājñaiḥ svātirekeṇāstīti viśvasanīyaṃ viśvaṃ svāvidyāpadatatkāryajātameva yasyātmā śarīraṃ so'yaṃ viśvātmā virāṭ, tasya hṛtkamale tadvṛttisahasrāvabhasakatayā sthitam | nirādhāram avidyāpadaṃ kathaṃ tiṣṭhet ityata āha- aṇ.viti | aṇu avidyāpadasarvasvam ādikūrmādirūpeṇa antaryāmirūpeṇa sarvādhiṣṭhānarūpeṇa vā vahatīti aṇuvam | svāpekṣayā asya paricchinnatvāt aṇutvam | śam asmāt bhavatīti śaṃbhuḥ pratyak, tadviṣayakasukhasya tadadhīnatvāt | tadyāthātmyaṃ nirviśeṣaṃ brahma śāṃbhavam | vastutaḥ viśvavirāḍādikalanāśāntam | svājñadṛṣṭyā sthūlasūkṣmādiprapañcakalanāprasaktau yattadāropāpavādādhikaraṇaṃ tat sthūlasūkṣmādiprapañcāt paraṃ vilakṣaṇamityarthaḥ | ca śabdāt turyabhāgādapi vailakṣaṇyaṃ dyotyate || 1 || tasya svājñadṛṣṭigrahaṇārādhanāśakyatayā duḥkhāḍhyaṃ durārādhyaṃ duṣprekṣyaṃ ca | svajñadṛṣṭyā tatsarvakalanāmuktam, ata  eva avyayaṃ vyayahetusvātiriktabhramāsaṃbhavāt | śrutyācāryaprasādaṃ vinā tatsvarūpaṃ tadviṣayakadhyānaṃ vā svayaṃ svato durlabhaṃ, śrutyācāryaprasādataḥ tadavagantuṃ sulabhamevetyarthaḥ || 2 ||

nirviśeṣabrahmāvagatisādhanāni

yatāhāro jitakrodho jitasaṅgo jitendriyaḥ |
nirdvandvo nirahaṃkāro nirāśīraparigrahaḥ || 3 ||

p. 47) agamyāgamakartāro gamyāgamanamānasāḥ |
mukhe trīṇi ca vindanti tridhāmā haṃsa ucyate || 4 ||

paraṃ guhyatamaṃ viddhi hyastatandrī nirāśrayaḥ |
somarūpakalā sūkṣmā viṣṇostat paramaṃ padam || 5 ||

	uttamādhikāriṇāṃ tadavagatiḥ bhavatyeva | mandamadhyamānāṃ tadavagatiḥ kathamityatra sādhanānyupadiśati- yateti | he svājñaloka, yadi tvaṃ madupadeśaprabhavasvajñānataḥ svapadaṃ prāptumihase tadā maduktasādhanasaṃpanno bhūtvā viṣṇostat paramaṃ padaṃ yāsyasītyanvayaḥ |

āhārasya ca bhāgau dvau tṛtīyamudakasya ca |
vāyoḥ saṃcaraṇārthāya caturthamavaśeṣayet ||

iti yenāhāro yato niyataḥ sa tvamādau yatāhāro bhava, āhāraśuddhau tattvaśuddhiḥ ityādi śruteḥ | kāmālābhajaḥ krodho yena jitaḥ sa tvaṃ jitakrodho bhava | svavikalpitendriyendriyārtheṣu saṅgo yena jitaḥ sa tvaṃ jitasaṅgo jitendriyavargo bhava | śītoṣṇādidvandvo yasmānnirgataḥ sa tvaṃ nirdvandvo bhava | śarīratraye ahaṃkāro yasmānnirgataḥ sa tvaṃ nirahaṃkāro bhava | svātiriktaviṣaya bhogānaśitumicchā āśīḥ yasmānnirgatā sa tvaṃ nirāśīḥ bhava | prāṇamātradhāraṇānukūlaparigrahetaraparigraho yenāgṛhītaḥ sa tvam aparigraho bhava || 3 || svajñaikadeśino yatpadaṃ vindanti tatpadamādāvupāssvetyāha- āgamyeti | kevalasvājña[jñā]gamye svāvidyāpadāropādhikaraṇe viśvavirāḍotrādau tadbhāvābhāvitadhiyā agamanaṃ kurvantīti agamyāgamakartāraḥ, svājñadṛṣṭigamye svāvidyāpadatatkārye yeṣāṃ mānasaṃ gamanaṃ na bhajati te hi gamyāgamanamānasāḥ

p. 48) śabalabrahmaśaraṇāḥ svajñaikadeśinaḥ | netrasthaṃ jāgaritaṃ vidyāt dakṣiṇākṣimukhe viśvaḥ iti śrutisiddhe mukhe jāgrajjāgradādau vyaṣṭisamaṣṭitadubhayaikyādhikaraṇatayā viśvaviśvādivirāḍvirāḍādyotrotrādibhedena trīṇi trīṇi rūpāṇi, caśabdāt tattatturyarūpāṇyapi, svābhedena vindanti jānanti | evaṃ trīṇi dhāmāni yasya so'yaṃ tridhāmā haṃsa ucyate | svajñānataḥ svabhajatsvātmānaṃ hantīti haṃsaḥ parameśvara ityarthaḥ || 4 || tametaṃ haṃsaṃ so'hamityupāsya tatprasādato hi astā tandrī jāmitā yasya saḥ tvam astatandrī san svātmetarāśrayābhāvāt nirāśrayo bhūtvā yanmayocyate tatsarvāpavādādhikaraṇatayā jāgrajjāgradādikalanāyāḥ param anadhikāriṇe avaktavyatvāt guhyataṃ brahma adhiṣṭheyasāpekṣādhiṣṭhānatāpāye niṣpratiyogikasvamātramiti viddhi jānīhi | kiṃ tadityata āha- someti | umayā svavidyayā sahitamunisamyagjñānaviditā kalā cinmātrarūpiṇī somarūpakalā nirviśeṣatayā sūkṣmā, saiva, svājñadṛṣṭivikalpitavyāpyaprasaktau, vyāpakabhāvamāpannasya viṣṇoḥ samyagjñadṛṣṭyā vyāpyavyāpakatāpahnavasiddhaṃ yat tat paramaṃ niṣpratiyogikaniratiśayaṃ tanmātratayā padyata iti padaṃ svamātramavaśiṣyata ityarthaḥ || 5 ||

paravastuna eva saviśeṣatvādibhāvāḥ

trivaktraṃ triguṇaṃ sthānaṃ tridhātuṃ rūpavarjitam |
niścalaṃ nirvikalpaṃ ca nirākāraṃ nirāśrayam || 6 ||

upādhirahitaṃ sthānaṃ vāṅmano'tītagocaram |
svabhāvaṃ bhāvasaṃgrāhyamasaṃghātaṃ padācyutam || 7 ||

p. 49) anānānandanātītaṃ duṣprekṣyaṃ muktamavyayam |
cintyamevaṃvinirmuktaṃ śāśvataṃ dhruvamacyutam || 8 ||

tadbrahmaṇastadadhyātmaṃ tadviṣṇostatparāyaṇam |
acintyaṃ cinmayātmānaṃ yadvyoma paramaṃ sthitam || 9 ||

aśūnyaṃ śūnyabhāvaṃ tu śūnyātītaṃ hṛdi sthitam |
na dhyānaṃ ca na ca dhyātā na dhyeyo dhyeya eva ca || 10 ||

sarvaṃ ca na paraṃ śūnyaṃ na paraṃ na parātparam |
acintyamaprabuddhaṃ ca na satyaṃ na paraṃ viduḥ || 11 ||

munīnāṃ saṃprayuktaṃ ca na devā na paraṃ viduḥ |
lobhaṃ mohaṃ bhayaṃ darpaṃ kāmaṃ krodhaṃ ca kilbiṣam || 12 ||

śītoṣṇo kṣutpipāse ca saṃkalpakavikalpakam |
na brahmakuladarpaṃ ca na muktigranthisaṃcayam || 13 ||

na bhayaṃ na sukhaṃ duḥkhaṃ tathā mānāvamānayoḥ |
etadbhāvavinirmuktaṃ tadbrahma brahma tatparam || 14 ||

	tadeva svājñādidṛṣṭyā saviśeṣatāṃ tatpratiyogikanirviśeṣatāṃ, paramārthadṛṣṭyā niṣpratiyogikanirvikalpatāṃ ca bhajatīva bhātītyāha- trivaktramiti | viśvataijasaprājñabhedena trivaktraṃ, virāṭsūtrādibhedena triguṇaṃ, sthānaṃ muktaprāpyatvāt, otranujñātranujñābhedena brahmaviṣṇvīśabhedena vā tridhātuṃ, vastuta uktatrivaktrādisvarūpavivarjitaṃ, calavikalpākṛtyāśrayavairalyāt

p. 50) niścalaṃ nirvikalpaṃ ca nirākāraṃ nirāśrayam || 6 || upādhirahitaṃ nirupādhikatvāt | sthānam uktārtham | vāṅmano'tītaturyatayā gocaram | svayameva bhavatīti svabhāvam | bhāvarūpeṇaiva samyaggrāhyaṃ sanmātratvāt | asaṃghātaṃ karaṇagrāmabāhyatvāt | svasvabhāvādacyutam || 7 || nānānandano jīvaḥ sa na bhavatīti anānānandanaḥ sākṣī tadbhāvādapyatītam | duṣprekṣyaṃ muktamavyayam iti padatrayaṃ vyākhyātam | sadā avyayatayā cintyam | cintitasya saviśeṣaprasaktau evaṃvinirmuktam, kenāpyacintyatvāt | aśāśvataviśvābhāvāt śāśvatam | adhruvamāyāpāyāt dhruvam | sarvaprakāreṇāpi cyutyabhāvāt acyutam || 8 || yadevaṃbhūtaṃ tadbrahmaṇaḥ svarūpam | tat pratyagrūpeṇa sarvātmānaṃ virājamadhikṛtya bhavatīti adhyātmam | tadeva viṣṇoḥ svarūpamapi | tadeva tatparāyaṇaṃ muktaprāpyanārāyaṇatvāt | nirviśeṣātmanā acintyam | antaḥkaraṇābhāvāt | cinmayātmānam iti, vibhaktiliṅgacyatyayaḥ chāndasaḥ, cinmayātmakam | yadvyoma cidākāśatvāt | paramaṃ vyākhyātam | sthitaṃ sattāmātratvāt || 9 || ata eva aśūnyam | pūrṇatvāt svātiriktaśūnyabhāvam | tuśabdo'vadhāraṇārthaḥ | śūnyabhāvamāpannasvātiriktādapyatītaṃ niṣpratiyogikatvāt | pratyagādirūpeṇa hṛdi sthitam | tasya pratyaktve tripuṭī syādityata āha- neti | svātirekeṇa na dhyānaṃ ca na ca dhyātā na dhyeyaḥ | svāvaśeṣatayā dhyeya eva ca || 10 || svātirekeṇa yadi sarvaṃ prasaktaṃ tadā na ca sarvam asti | yadi syāt tadā svasmāt paraṃ śūnyam | ata eva na param asti | sāpekṣaparāt param api svayaṃ na bhavati | svātirekeṇa cintituṃ boddhuṃ draṣṭum aśakyatayā munayaḥ acintyamaprabuddhaṃ ca na satyaṃ na paraṃ viduḥ || 11 || yatparam atiriktaṃ neti nunīnām- tṛtīyārthe ṣaṣṭhī- munibhiḥ yat saṃprayuktam avadhṛtaṃ tatra devāḥ sūkṣmabuddhyo'pi tataḥ param astīti na viduḥ | lobhamityādau liṅgavyatyayo draṣṭavyaḥ | na hi tatra lobhamohādyantaḥkaraṇavṛttayaḥ śītoṣṇādidvandvaṃ kṣutpipāsādiṣaḍūrmayaḥ saṃkalpavikalpādimānasavṛttayaḥ brahmādikulaprasūto'smīti darpaśca bandhamokṣādigranthisaṃcayaśca mānāvamānavṛttayo vā vidyante | yat etat sarvabhāvavinirmuktaṃ

p. 51) svātiriktasāmānyāpahnavasiddhaṃ tat brahma | brahma tatparaṃ svamātramavaśiṣyata ityarthaḥ || 12- 14 ||

parabrahmāvagatisādhanaṃ pañcadaśāṅgayogaḥ

yamo hi niyamastyāgo maunaṃ deśaśca kālataḥ |
āsanaṃ mūlabandhaśca dehasāgyaṃ ca dṛksthitiḥ || 15 ||

prāṇasaṃyamanaṃ caiva pratyāhāraśca dhāraṇā |
ātmadhyānaṃ samādhiśca proktānyaṅgāni vai kramāt || 16 ||

	yadyevaṃ brahma niṣpratiyogikaṃ tadā tadavagatyupāyavairalyamāśaṅkya yadi te tadavagatīcchā vidyate tadā tadavagatisādhanatayā pañcadaśāṅgayoga ucyate- yamohīti | itthaṃ pañcadaśayogāṅgāni sūtritāni || 15-16 ||

pañcadaśāṅgānāṃ lakṣaṇāni

sarvaṃ brahmeti vai jñānādindriyagrāmasaṃyamaḥ |
yamo'yamiti saṃprokto'bhyasanīyo muhurmuhuḥ || 17 ||

sajātīyapravāhaśca vijātīyatiraskṛtiḥ |
niyamo hi parānando niyamāt kriyate budhaiḥ || 18 ||

tyāgaḥ prapañcarūpasya saccidātmāvalokanat |
tyāgo hi mahatāṃ pūjyaḥ sadyo mokṣapradāyakaḥ || 19 ||

yasmādvāco nivartante aprāpya manasā saha |
yanmaunaṃ yogibhirgamyaṃ tadbhavet sarvadā jaḍaiḥ || 20 ||

p. 52) vāco yasmānnivartante tadvaktuṃ kena śakyate |
prapañco yadi vaktavyaḥ so'pi śabdavivarjitaḥ || 21 ||

iti vā tadbhavenmaunaṃ sarvaṃ sahajasaṃjñitam |
girā maunaṃ tu bālānāmayuktaṃ brahmavādinām || 22 ||

ādāvante ca madhye ca jano yasminna vidyate |
yenedaṃ satataṃ vyāptaṃ sa deśo vijanaḥ smṛtaḥ || 23 ||

kalpanā sarvabhūtānāṃ brahmādīnāṃ nimeṣataḥ |
kālaśabdena nirdiṣṭaṃ hyakhaṇḍānandamadvayam || 24 ||

sukhenaiva bhavedyasminnajasraṃ brahmacintanam |
āsanaṃ tadvījānīyādanyat sukhavināśanam || 25 ||

siddhaye sarvabhūtādi viśvādhiṣṭhānamadvayam |
tasmin siddhiṃ gatāḥ siddhāstatsiddhāsanamucyate || 26 ||

yanmūlaṃ sarvalokānāṃ yanmūlaṃ cittabandhanam |
mūlabandhaḥ sadā sevyo yogyo'sau rājayoginām || 27 ||

aṅgānāṃ samatāṃ vidyāt same brahmaṇi līyate |
no cennaiva samānatvamṛjutvaṃ śuṣkavṛkṣavat || 28 ||

dṛṣṭiṃ jñānamayīṃ kṛtvā paśyedbrahmamayaṃ jagat |
sā dṛṣṭiḥ paramodārā na nāsāgrāvalokinī || 29 ||

p. 53) draṣṭṛdarśanadṛśyānāṃ virāmo yatra vā bhavet |
dṛṣṭistatraiva kartavyā na nāsāgrāvalokinī || 30 ||

cittādisarvabhāveṣu brahmatvenaiva bhāvanāt |
nirodhaḥ sarvavṛttīnāṃ prāṇāyāmaḥ sa ucyate || 31 ||

niṣedhanaṃ prapañcasya recakākhyaḥ samīritaḥ |
brahmaivāsmīti yā vṛttiḥ pūrako vāyurucyate || 32 ||

tatastadvṛttinaiścalyaṃ kumbhakaṃ prāṇasaṃyamaḥ |
ayaṃ cāpi prabuddhānāmajñānāṃ ghrāṇapīḍanam || 33 ||

viṣayeṣvātmatāṃ dṛṣṭvā manasaścittarañjakam |
pratyāhāraḥ sa vijñeyo'bhyasanīyo muhurmuhuḥ || 34 ||

yatra yatra mano yāti brahmaṇastatra darśanāt |
manasā dhāraṇaṃ caiva dhāraṇā sā parā matā || 35 ||

brahmaivāsmīti sadratyā nirālambatayā sthitiḥ |
dhyānaśabdena vikhyātaḥ paramānandadāyakaḥ || 36 ||

nirvikāratayā vṛttyā brahmākāratayā punaḥ |
vṛttivismaraṇaṃ samyak samādhirabhidhīyate || 37 ||

	sūtrībhūtapañcadaśāṅgāni yathākramaṃ śrutireva vyācaṣṭe | tatra yamaśabdārthamāha- sarvamiti | karaṇagrāme brahmabhāva eva yama ityarthaḥ || 17 || niyamaśabdārthamāha- sahajātīyeti |

p. 54) akhaṇḍacinmātrādivṛttiḥ sajātīyā, ghaṭapaṭādivṛttiḥ vijātīyā || 18 || tyāgaśabdaṃ vyākaroti- tyāga iti | saccidānandadṛṣṭiḥ anṛtādiprapañcaṃ grasatītyarthaḥ || 19 || maunaśabdārthaṃ prakaṭayati- yasmāditi | pakṣāntaram- vāca iti | prathamapakṣe jaḍaiḥ vāgādikaraṇaiḥ svasvavyāpṛtyuparamaṇaṃ maunamityuktam | dvitīyapakṣe tu svātiriktayoḥ niṣpratiyogikabhāvābhāvarūpatayā nirvaktumaśakyatvāt | prathamaparyāyagaditamaunaṃ tu bālānāṃ na hi brahmavidāmasti || 20-22 || deśaśabdārthaṃ vyākaroti- ādāviti | tādṛśadeśo brahmaivetyarthaḥ || 23 || kalāśabdārthamāha- kalpaneti | yadajñānanimeṣavikalpitaṃ nikhilaṃ tadadhikaraṇaṃ brahma kālaśabdavācyam || 24 || āsanaśabdārthaṃ viśadīkaroti- sukheneti | dhyānānukūlaṃ sukhāsanaṃ siddhasiddhidaṃ brahma siddhāsanaṃ, nahyuktalakṣaṇamityarthaḥ || 25-26 || mūlabandhasvarūpaṃ vyaktīkaroti- yaditi | sarvakāraṇaṃ brahmaiva mūlabandhaḥ, natvākuñcanādiḥ | ayaṃ rājayogināṃ yogyo na haṭhayogināmityarthaḥ || 27 || dehasāmyaśabdārthamāha- aṅgānāmiti | sthūlādidehānāṃ samabrahmaṇi vilayabhāvaḥ samatā na hi stambhavat ṛjutetyarthaḥ || 28 || dṛṣṭisvarūpamāha- dṛṣṭimiti | svājñadṛṣṭiḥ svātiriktaṃ jagat paśyati | sarvādhikaraṇadṛṣṭiḥ svajñaḥ paramārthadṛṣṭiḥ brahmamātravit | tena dṛśyāditripuṭyapahnavasiddhe brahmaṇi svamātradṛṣṭiḥ kāryetyarthaḥ || 29-30 || recakapūrakakumbhakasahitavidvatprāṇāyāmasvarūpamācaṣṭe- cittādīti | sarvaṃ brahmeti bhāvanaṃ prāṇāyāmaḥ | svātiriktaṃ jagat netyanusaṃdhānaṃ recakavṛttiḥ | tadevāsmīti pūrakavṛttiḥ | tadvṛttisthairyaṃ kumbhakavṛttiḥ | svajñānāmevam | svājñānāṃ ghrāṇapīḍanameva phalamityarthaḥ || 31-33 || pratyāhārasvarūpamāha- viṣayeṣviti | viṣayasāmānyabrahmadṛṣṭiḥ pratyāhāraḥ || 34 || dhāraṇāsvarūpamāha- yatreti | manaḥpracārādhikaraṇaṃ brahmetyarthaḥ || 35 || dhyānalakṣaṇamāha- brahmeti | nirālambabrahmabhāvanaṃ dhyānam || 36 || samādhisvarūpamāha- nirvikareti | akhaṇḍākāravṛttiḥ savikalpaḥ, tadvṛttyasmaraṇaṃ nirvikalpasamādhirityarthaḥ || 37 ||

p. 55) 				yogābhyāsena brahmabhavanam

imaṃ cākṛtimānandaṃ tāvat sādhu samabhyaset |
lakṣye yāvat kṣaṇāt puṃsaḥ pratyaktvaṃ saṃbhavet svayam || 38 ||

tataḥ sādhananirmuktaḥ siddho bhavati yogirāṭ |
tatsvarūpaṃ bhavet tasyā viṣayo manaso girām || 39 ||

	mumukṣuḥ imameva pañcadaśāvayavayogaṃ yāvadbrahmamātratayā sthitiḥ tāvadabhyaset, tato brahmaiva bhavatītyāha- imamiti || 38-39 ||

samādhivighnaśamanam

samādhau kriyamāṇe tu vighnānyāyānti vai balāt |
anusaṃdhānarāhityamālasyaṃ bhogalālasam || 40 ||

layastamaśca vikṣepastejaḥ svedaśca śūnyatā |
evaṃ hi vighnabāhulyaṃ tyājyaṃ brahmaviśāradaiḥ || 41 ||

bhāvavṛttyā hi bhāvatvaṃ śūnyavṛttyā hi śūnyatā |
brahmavṛttyā hi pūrṇatvaṃ tayā pūrṇatvamabhyaset || 42 ||

	anusaṃdhānarāhityādisamādhivighne sati kathaṃ nirvikalpakasamādhirudeti ityāśaṅkya tadvighnaśāntitaḥ pūrṇākhaṇḍasamādhirudetītyāha- samādhāviti | samādhyabhyāsayuktasya kadācitkaprasaktānanusaṃdhānādiśūnyavṛttyantavighnasamūhe prātisvikena yugapadvā abhyudite anusaṃdhānādyupāyataḥ tadvighnasamūhaṃ nirmūlya atha brahmaivāhamasmi ityakhaṇḍākāravṛttyā svapūrṇabhāvamabhyasedityarthaḥ || 40-42 ||

p. 56) 			samādhinā śuddhabrahmapadaprāptiḥ

ye hi vṛttiṃ vihāyaināṃ brahmākhyāṃ pāvanīṃ parām |
vṛthaiva te tu jīvanti paśubhiśca samā narāḥ || 43 ||

ye tu vṛttiṃ vijānanti jñātvā vai vardhayanti ye |
te vai satpuruṣā dhanyā vandyāste bhuvanatraye || 44 ||

yeṣāṃ vṛttiḥ samā vṛddhā paripakvā ca sā punaḥ |
te vai sadbrahmatāṃ prāptā netare śabdavādinaḥ || 45 ||

kuśalā brahmavārtāyāṃ vṛttihīnāḥ surāgiṇaḥ |
te'pyajñānatayā nūnaṃ punarāyānti yānti ca || 46 ||

nimiṣārdhaṃ na tiṣṭhanti vṛttiṃ jñānamayīṃ vinā |
yathā tiṣṭhanti brahmādyāḥ sanakādyāḥ śukādayaḥ || 47 ||

kāraṇaṃ yasya vai kāryaṃ kāraṇa tasya jāyate |
kāraṇaṃ tattvato naśyet kāryābhāve vicārataḥ || 48 ||

atha śuddhaṃ bhavedvastu yadvai vācāmagocaram |
udeti śuddhacittānāṃ vṛttijñānamataḥ param || 49 ||

bhāvitaṃ tīvrayogena yadvastu niścayātmakam |
dṛśyaṃ hyadṛśyatāṃ nītvā brahmākāreṇa cintayet || 50 ||

vidvān nityaṃ sukhe tiṣṭheddhiyā cidrasapūrṇayā || 51 ||
iti ||

p. 57) brahmākāravṛttiviralān dūṣayati- ye hīti || 43 || akhaṇḍākāravṛttimanta eva brahmapadaṃ yānti, tadviparītāḥ saṃsāraṃ bhajanti | yata evam ataḥ śrīśukasanakādivat brahmapadecchubhiḥ samādhireva abhyasanīya ityāha- ye tviti || 44 - 47 || akhaṇḍākāravṛtteḥ abhyāsajanyatvāt kāraṇam abhyāsaḥ, karyam akhaṇḍākāravṛttiḥ, tasyāḥ kṛtakatvenādhruvatvāt tayā dhruvabrahmāpattiḥ kathamityāśaṅkya yāvadevaṃ vicāro nodeti tāvadevamabhyasya tataḥ kāryaṃ cet kāraṇaṃ kiṃcit kāryābhāve na kāraṇam iti sāpekṣaśrutiyuktitaḥ kāryakāraṇakalanām apahnavaṃ kṛtvā atha tadapahnavasiddhaṃ śuddhacaitanyaṃ svāvaśeṣatayā vijṛmbhate ityāha- kāraṇamiti | yasya evaṃvādinaḥ abhyāsākhyaṃ kāraṇameva kāryaṃ bhavati tasya kāraṇameva jāyate | kāryasya kṛtakatvoktyā kāryābhāve kāryaṃ cediti sāpekṣaśrutiyuktitaḥ kāraṇameva naśyet | abhyāsā-khaṇḍākāravṛttyupalakṣitasvāvidyāpadatatkāryatadāropādhikaraṇayoḥ  apahnavatāṃ gatayoḥ kāryakāraṇakalanāviralaṃ brahma svamātramavaśiṣyata iti bhāvaḥ || 48 || tataḥ kim ityata āha- atheti | atha kāryakāraṇatvavibhramanirasanānantaraṃ yadvai vācāmagocaraṃ karaṇagrāmāsaṃbhavaprabodhasiddhaṃ tadeva vastu yat svājñadaśāyāṃ aśuddhanānārūpeṇa bhātaṃ svajñadaśāyāṃ svaprakṛtimavalambyeva śuddhaṃ bhavet | vastutastu svājñādidṛṣtimohe satyasati viśuddhaṃ vastu svamātramavaśiṣyate | yadi brahma svamātraṃ tadavagatiḥ kathamityatra satkarmānuṣṭhānato viśuddhacittānāṃ tataḥ paraṃ vedāntaśravaṇādisaṃjātākhaṇḍākāravṛttijñānamudeti || 49 || tajjñānaṃ tīvrayogena akhaṇḍanirvikalpasamādhinā tattvajñāne bhāvitaṃ sat yadvastu niścayātmakaṃ tadeva bhavati | yasmādevaṃ tasmāt vidvān- svājñadaśāyāṃ svāvidyāpadatatkāryajātaṃ dṛśyaṃ bhavati- samyagjñānabalāt tat adṛśyatām abhāvarūpatāṃ nītvā brahmākāreṇa cintayet || 50 || evaṃ dhiyā cidrasapūrṇayā dṛśyaṃ brahmākāreṇa cintitvā sukhe nityānande brahmaṇi svāvaśeṣatayā tiṣṭhet || 51 || iti śabdaḥ adhyāyaparisamāptyarthaḥ ||

iti prathamo'dhyāyaḥ

dvitīyo'dhyāyaḥ

sarvasya akhaṇḍaikarasatvam

	atha ha kumāraḥ śivaṃ papracchākhaṇḍaikarasacinmātrasvarūpa-manubrūhīti | sa hovāca paramaśivaḥ |

akhaṇḍaikarasaṃ dṛśyamakhaṇḍaikarasaṃ jagat |
akhaṇḍaikarasaṃ bhāvamakhaṇḍaikarasaḥ svayam || 1 ||

akhaṇḍaikaraso mantraḥ akhaṇḍaikarasā kriyā |
akhaṇḍaikarasaṃ jñānamakhaṇḍaikarasaṃ jalam || 2 ||

akhaṇḍaikarasā bhūmirakhaṇḍaikarasaṃ viyat |
akhaṇḍaikarasaṃ śāstramakhaṇḍaikarasā trayī || 3 ||

akhaṇḍaikarasaṃ brahma cākhaṇḍaikarasaṃ vṛtam |
akhaṇḍaikaraso jīvaḥ akhaṇḍaikaraso hyajaḥ || 4 ||

akhaṇḍaikaraso brahmā akhaṇḍaikaraso hariḥ |
akhaṇḍaikaraso rudra akhaṇḍaikaraso'smyaham || 5 ||

akhaṇḍaikaraso hyātmā akhaṇḍaikaraso guruḥ |
akhaṇḍaikarasaṃ lakṣyamakhaṇḍaikarasaṃ mahaḥ || 6 ||

akhaṇḍaikaraso deha akhaṇḍaikarasaṃ manaḥ |
akhaṇḍaikarasaṃ cittamakhaṇḍaikarasaṃ sukham || 7 ||

p. 59) akhaṇḍaikarasā vidyā akhaṇḍaikaraso'vyayaḥ |
akhaṇḍaikarasaṃ nityamakhaṇḍaikarasaṃ param || 8 ||

akhaṇḍaikarasaṃ kiṃcidakhaṇḍaikarasaṃ varam |
akhaṇḍaikarasādanyannāsti nāsti ṣaḍānana || 9 ||

akhaṇḍaikarasānnāsti akhaṇḍaikarasānna hi |
akhaṇḍaikarasāt kiṃcidakhaṇḍaikarasādaham || 10 ||

akhaṇḍaikarasaṃ sthūlaṃ sūkṣma cākhaṇḍarūpakam |
akhaṇḍaikarasaṃ vedyamakhaṇḍaikaraso bhavān || 11 ||

akhaṇḍaikarasaṃ guhyamakhaṇḍaikarasādikam |
akhaṇḍaikaraso jñātā akhaṇḍaikarasā sthitiḥ || 12 ||

akhaṇḍaikarasā mātā akhaṇḍaikarasaḥ pitā |
akhaṇḍaikaraso bhrātā akhaṇḍaikarasaḥ patiḥ || 13 ||

akhaṇḍaikarasaṃ sūtramakhaṇḍaikaraso virāṭ |
akhaṇḍaikarasaṃ gātramakhaṇḍaikarasaṃ śiraḥ || 14 ||

akhaṇḍaikarasaṃ cāntarakhaṇḍaikarasaṃ bahiḥ |
akhaṇḍaikarasaṃ pūrṇamakhaṇḍaikarasāmṛtam || 15 ||

akhaṇḍaikarasaṃ gotramakhaḍaikarasaṃ gṛham |
akhaṇḍaikarasaṃ gopyamakhaṇḍaikarasaḥ śaśī || 16 ||

p. 60) akhaṇḍaikarasāstārā akhaṇḍaikaraso raviḥ |
akhaṇḍaikarasaṃ kṣetramakhaṇḍaikarasā kṣamā || 17 ||

akhaṇḍaikarasaḥ śāntaḥ akhaṇḍaikaraso guṇaḥ |
akhaṇḍaikarasaḥ sākṣī akhaṇḍaikarasaḥ suhṛt || 18 ||

akhaṇḍaikaraso bandhurakhaṇḍaikarasaḥ sakhā |
akhaṇḍaikaraso rājā akhaṇḍaikarasaṃ puram || 19 ||

akhaṇḍaikarasaṃ rājyamakhaṇḍaikarasāḥ prajāḥ |
akhaṇḍaikarasaṃ tāramakhaṇḍaikaraso japaḥ || 20 ||

akhaṇḍaikarasaṃ dhyānamakhaṇḍaikarasaṃ padam |
akhaṇḍaikarasaṃ grāhyamakhaṇḍaikarasaṃ mahat || 21 ||

akhaṇḍaikarasaṃ jyotirakhaṇḍaikarasaṃ dhanam |
akhaṇḍaikarasaṃ bhojyamakhaṇḍaikarasaṃ haviḥ || 22 ||

akhaṇḍaikaraso homaḥ akhaṇḍaikaraso jayaḥ |
akhaṇḍaikarasaḥ svargaḥ akhaṇḍaikarasaḥ svayam || 23 ||

	svājñavikalpitasvāvidyāpadatatkārye yadyat dṛśyate yadyat śrūyate yadyat smartaye tattat khaṇḍam acinmātraṃ lakṣyate | tadatirekeṇa kim akhaṇḍaikarasaṃ kiṃ vā cinmātraṃ vidyate iti tadiyattābubhutsuḥ kumāraḥ skandaḥ jānannapi lokānugrahārthaṃ akhaṇḍaikarasacinmātramanubrūhīti sarvajñaṃ śivaṃ papraccha | yaḥ tenaivaṃ pṛṣṭaḥ paramaśivaḥ  sa hovācetyāha- atheti | kiṃ tat ? akhaṇḍaikarasaṃ dṛśyamityādi || 1-23 ||

sarvasya cinmātratvabhāvanā

akhaṇḍaikarasaṃ sarvaṃ cinmātramiti bhāvayet |
cinmātrameva cinmātramakhaṇḍaikarasaṃ rasam || 24 ||

p. 61) bhavavarjitacinmātraṃ sarvaṃ cinmātrameva hi |
idaṃ ca sarvaṃ cinmātramayaṃ cinmātrameva hi || 25 ||

ātmabhāvaṃ ca cinmātramakhaṇḍaikarasaṃ viduḥ |
sarvalokaṃ ca cinmātraṃ tvattā mattā ca cinmayam || 26 ||

ākāśo bhūrjalaṃ vāyuragnirbrahmā hariḥ śivaḥ |
yatkiṃcidyanna kiṃcicca sarvaṃ cinmātrameva hi || 27 ||

akhaṇḍaikarasaṃ sarvaṃ yadyaccinmātrameva hi |
bhūtaṃ bhavyaṃ bhaviṣyacca sarvaṃ cinmātrameva hi || 28 ||

dravyaṃ kālaṃ ca cinmātraṃ jñānaṃ jñeyaṃ cideva hi |
jñātā cinmātrarūpaśca sarvaṃ cinmayameva hi || 29 ||

saṃbhāṣaṇaṃ ca cinmātraṃ yadyaccinmātrameva hi |
asacca sacca cinmātramādyantaṃ cinmayaṃ sadā || 30 ||

ādirantaśca cinmātraṃ guruśiṣyādi cinmayam |
dṛgdṛśyaṃ yadi cinmātramasti ceccinmayaṃ sadā || 31 ||

sarvāścaryaṃ ca cinmātraṃ dehaścinmātrameva hi |
liṅgaṃ ca kāraṇaṃ caiva cinmātrānna hi vidyate || 32 ||

ahaṃ tvaṃ caiva cinmātraṃ mūrtāmūrtādi cinmayam |
puṇyaṃ pāpaṃ ca cinmātraṃ jīvaścinmātravigrahaḥ || 33 ||

cinmātrānnāsti saṃkalpaścinmātrānnāsti vedanam |
cinmātrānnāsti mantrādi cinmātrānnāsti devatā || 34 ||

p. 62) cinmātrānnāsti dikpālaścinmātrādvyāvahārikam |
cinmātrāt paramaṃ brahma cinmātrānnāsti ko'pi hi || 35 ||

cinmātrānnāsti māyā ca cinmātrānnāsti pūjanam |
cinmātrānnāsti mantavyaṃ cinmātrānnāsti satyakam || 36 ||

cinmātrānnāsti kośādi cinmātrānnāsti vai vasu |
cinmātrānnāsti maunaṃ ca cinmātrānnāstyamaunakam || 37 ||

cinmātrānnāsti vairāgyaṃ sarvaṃ cinmātrāmeva hi |
yacca yāvacca cinmātraṃ yacca yāvacca dṛśyate || 38 ||

yacca yāvacca dūrasthaṃ sarvaṃ cinmātrameva hi |
yacca yāvacca bhūtādi yacca yāvacca lakṣyate || 39 ||

yacca yāvacca vedāntāḥ sarvaṃ cinmātrameva hi |
cinmātrānnāsti gamanaṃ cinmātrānnāsti mokṣakam || 40 ||

cinmātrānnāsti lakṣyaṃ ca sarvaṃ cinmātrameva hi |
akhaṇḍaikarasaṃ brahma cinmātrānna hi vidyate || 41 ||

śāstre mayi tvayīśe ca hyakhaṇḍaikaraso bhavān |

	svātiriktakhaṇḍāvidyāpadatatkāryarasajātāpahnavasiddhaṃ brahma svājñādidṛṣṭimohe satyasati niṣpratiyogikākhaṇḍaikarasacinmātratayā sadā avaśiṣyata ityatra na hi saṃśayo'sti | tadeva svājñadṛṣṭeḥ acidrūpadṛśyajagadbhāvādikhaṇḍarūpeṇa svādhyastavaidharmyaṃ satyaṃ vibhāti | tathaivaṃ svājñasamarpitavaidharmyaṃ kevalaśāstrajanyajñānino vyāvahārikaṃ pratibhāti, vijñānināṃ tu prātibhāsikaṃ, samyagjñānināṃ

p. 63) śūnyaṃ, tattvajñānāṃ tu svājñasamarpitadṛśyajagadbhāvādikhaṇḍavaidharmyajātaṃ niṣpratiyogikākhaṇḍaikarasacinmātrameva vibhāti | svājñādidṛṣṭidṛṣṭavaidharmyajātaṃ svājñādidṛṣṭereva, na hi tadvastusparśī bhavitumarhati, vastuno niṣpratiyogikasvamātratvādityatra paśyatehāpi sanmātram- asadanyat brahmamātramasanna hi,

siddhānto'dhyātmaśāstrāṇāṃ sarvāpahnava eva hi |
nāvidyāstīha no māyā śāntaṃ brahmedamaklamam || ityādi |
akṣarārpitavaidharmyaṃ satyaṃ bhātyajñasaṃtateḥ |
jñavijñasamyagjñatattvajñairvaidharmyaṃ yathākramam ||
jñeyaṃ bhavet dṛśyamithyāśūnyacinmātrabhedataḥ |
tattaddṛṣṭiviparyāsaḥ tattaddṛṣṭerna cātmanaḥ ||

ityādi śruteḥ, paramākṣarokteśca | akhaṇḍaikarasacinmātrāt na kiṃcidastīti phalito'rthaḥ | akhaṇḍaikarasaṃ bhāvam ityādyasminnadhyāye vakṣyamāṇādhyāyeṣu ca kālabhedam ityādi ca liṅgavyatyayaḥ chāndasaḥ | śiṣṭaṃ spaṣṭam || 24- 41 ||

vidyāphalam

ityekarūpakatayā yo vā jānātyahaṃ tviti || 42 ||
sakṛjjñānena muktiḥ syāt samyagjñāne svayaṃ guruḥ || 43 ||

iti |

	vidyāphalamupasaṃharati- itīti | akhaṇḍaikarasaṃ dṛśyam ityārabhya akhaṇḍaikarasaṃ brahma cinmātrānna hi vidyate | śāstre mayīśe tvayi ca yo'khaṇḍaikarasaḥ paramātmā vidyate sa eva bhavān netaraḥ ityantam ekarūpakatayā yaḥ ko'pi vā akhaṇḍaikarasacinmātramahameveti jānāti so'yamevaṃ vidvān samyagjñāne- tṛtīyārthe saptamī- samyagjñānena guruḥ brahmavidvarīyān

p. 64) variṣṭho vā bhūtvā avatiṣṭhate | punastasyaiva sakṛdvibhātaniṣpratiyogikabrahmamātrajñānena vikalebaramuktiḥ syāt | itiśabdaḥ adhyāyaparisamāptyarthaḥ || 42-43 ||

iti dvitīyo'dhyāyaḥ

tṛtīyo'dhyāyaḥ

ātmanaḥ saccidānandabrahmatvānubhavaḥ

	kumāraḥ pitaramātmānubhavamanubrūhīti papraccha | sa hovāca bhagavān paramaśivaḥ |

paraṃbrahmasvarūpo'haṃ paramānandamasmyaham |
kevalaṃ jñānarūpo'haṃ kevalaṃ paramo'smyaham || 1 ||

kevalaṃ śāntarūpo'haṃ kevalaṃ cinmayo'smyaham |
kevalaṃ nityarūpo'haṃ kevalaṃ śāśvato'smyaham || 2 ||

kevalaṃ sattvarūpo'hamahaṃ tyaktvāhamasmyaham |
sarvahīnasvarūpo'haṃ cidākāśamayo'smyaham || 3 ||

kevalaṃ turyarūpo'smi turyātīyo'smi kevalaḥ |
sadā caitanyarūpo'smi cidānandamayo'smyaham || 4 ||

kevalākārarūpo'smi śuddharūpo'smyaham sadā |
kevalaṃ jñānarūpo'smi kevalaṃ priyamasmyaham || 5 ||

p. 65) nirvikalpasvarūpo'smi nirīho'smi nirāmayaḥ |
sadāsaṅgasvarūpo'smi nirvikāro'hamavyayaḥ || 6 ||

sadaikarasarūpo'smi sadā cinmātravigrahaḥ |
aparicchinnarūpo'smi hyanantānandarūpavān || 7 ||

satparānandarūpo'smi citparānandamasmyaham |
antarāntararūpo'hamavāṅmanasagocaraḥ || 8 ||

atmānandasvarūpo'haṃ satyānando'smyahaṃ sadā |
ātmārāmasvarūpo'smi hyahamātmā sadāśivaḥ || 9 ||

ātmaprakāśarūpo'smi hyātmajyotīraso'smyaham |
ādimadhyāntahīno'smi hyākāśasadṛśo'smyaham || 10 ||

nityaśuddhacidānandasattāmātro'hamavyayaḥ |
nityabuddhaviśuddhaikasaccidānandamasmyaham || 11 ||

nityaśeṣasvarūpo'smi sarvātīto'smyahaṃ sadā |
rūpātītasvarūpo'smi paramākāśavigrahaḥ || 12 ||

bhūmānandasvarūpo'smi bhāṣāhīno'smyahaṃ sadā |
sarvādhiṣṭhānarūpo'smi sarvadā cidghano'smyaham || 13 ||

dehabhāvavihīno'smi cintāhīno'smi sarvadā |
cittavṛttivihīno'haṃ cidātmaikaraso'smyaham || 14 ||

sarvadṛśyavihīno'haṃ dṛgrūpo'smyahameva hi |
sarvadā pūrṇarūpo'smi nityatṛpto'smyahaṃ sadā || 15 ||

p. 66) ahaṃ brahmaiva sarvaṃ syādahaṃ caitanyameva hi |
ahamevāhamevāsmi bhūmākārasvarūpavān || 16 ||

ahameva mahānātmā hyahameva parātparaḥ |
ahamanyavadābhāmi hyahameva śarīravat || 17 ||

ahaṃ śiṣyavadābhāmi hyahaṃ lokatrayāśrayaḥ |
ahaṃ kālatrayātītaḥ ahaṃ vedairupāsitaḥ || 18 ||

ahaṃ śāstreṇa nirṇītaḥ ahaṃ citte vyavasthitaḥ |
mattyaktaṃ nāsti kiṃcidvā mattyaktaṃ pṛthivī tu vā || 19 ||

māyātiriktaṃ yadyadvā tattannāstīti niścinu |
ahaṃ brahmāsmi siddho'smi nityaśuddho'smyahaṃ sadā || 20 ||

nirguṇaḥ kevalātmāsmi nirākāro'smyahaṃ sadā |
kevalaṃ brahmamātro'smi hyajaro'smyamaro'smyaham || 21 ||

svayameva svayaṃ bhāmi svayameva sadātmakaḥ |
svayamevātmani svasthaḥ svayameva parā gatiḥ || 22 ||

svayameva svayaṃ bhuṅkte svayameva svayaṃ rame |
svayameva svayaṃjyotiḥ svayameva svayaṃmahaḥ || 23 ||

svasyātmani svayaṃ raṃsye svātmanyeva vilokaye |
svātmanyeva sukhāsīnaḥ svātmamātrāvaśeṣakaḥ || 24 ||

svacaitanye svayaṃ sthāsye svātmarājye sukhe rame |
svātmasiṃhāsane sthitvā svātmano'nyanna cintaye || 25 ||

p. 67) cidrūpamātraṃ brahmaiva saccidānandamadvayam |
ānandaghana evāhamahaṃ brahmāsmi kevalam || 26 ||

sarvadā sarvaśūnyo'haṃ sarvātmānandavāhanam |
nitya nandasvarūpo'hamātmākāśo'smi sarvadā || 27 ||

ahameva hṛdākāśe cidādityasvarūpavān |
ātmanātmani tṛpto'smi hyarūpo'smyahamavyayaḥ || 28 ||

ekasaṃkhyāvimukto'smi nityamuktasvarūpavān |
ākāśādapi sūkṣmo'hamādyantābhāvavāhanam || 29 ||

sarvaprakāśarūpo'smi parāvarasukho'smyaham |
sattāmātrasvarūpo'haṃ śuddhamokṣasvarūpavān || 30 ||

satyānandasvarūpo'haṃ jñānānandaghano'smyaham |
vijñānamātrarūpo'haṃ saccidānandalakṣaṇaḥ || 31 ||

brahmamātramidaṃ sarvaṃ brahmaṇo'nyatra kiṃcana |
tadevāhaṃ sadānandaṃ brahmaivāhaṃ sanātanam || 32 ||

tvamityetattadityetanmatto'nyannāsti kiṃcana |
ciccaitanyasvarūpo'hamahameva paraḥ śivaḥ || 33 ||

atibhāvasvarūpo'hamahameva sukhātmakaḥ |
sākṣyavastuvihīnatvāt sākṣitvaṃ nāsti me sadā || 34 ||

kevalaṃ brahmamātratvādahamātmā sanātanaḥ |
ahamevādiśeṣo'hamahaṃśeṣo'hameva hi || 35 ||

p. 68) nāmarūpavimukto'hamahamānandavigrahaḥ |
indriyābhāvarūpo'haṃ sarvabhāvasvarūpakaḥ || 36 ||

bandhamuktivihīno'haṃ śāśvatānandavigrahaḥ |
ādicaitanyarūpo'hamakhaṇḍaikaraso'smyaham || 37 ||

vāṅmano'gocaraścāhaṃ sarvatra sukhavāhanam |
sarvatra pūrṇarūpo'haṃ bhūmānandamayo'smyaham || 38 ||

sarvatra tṛptirūpo'haṃ parāmṛtaraso'smyaham |
ekamevādvitīyaṃ sadbrahmaivāhaṃ na saṃśayaḥ || 39 ||

sarvaśūnyasvarūpo'haṃ sakalāgamagocaraḥ |
mukto'haṃ mukṣarūpo'haṃ nirvāṇasukharūpavān || 40 ||

satyavijñānamātro'haṃ sanmātrānandavānaham |
turīyātītarūpo'haṃ nirvikalpasvarūpavān || 41 ||

sarvadā hyajarūpo'haṃ nīrāgo'smi nirañjanaḥ |
ahaṃ śuddho'smi buddho'smi nityo'smi prabhurasmyaham || 42 ||

oṃkārārthasvarūpo'smi niṣkalaṅkamayo'smyaham |

	evaṃ svapitṛmukhataḥ kumāraḥ akhaṇḍaikarasacinmātreyattāṃ śrutvā tatra svānubhavaṃ pṛcchatītyāha- kumāra iti | tatpraśnamaṅgīkṛtya akhaṇḍaikarasacinmātrānubhavaṃ svājñavikalpitāt sarvasmāt paraṃ vilakṣaṇaṃ yat samyak bṛṃhayati vijṛmbhate tat paraṃ brahma tatsvarūpo'ham | paramānandamiti liṅgavyatyayaḥ,

p. 69) paramānando'smyahamityarthaḥ | kiṃca- kevalamityādi | pratyakprakāśatvāt jñānarūpaḥ | sarvotkṛṣṭatvāt paramaḥ || 1 || krūrasvātiriktābhāvāt śāntaḥ | anityāpāyāt nityaḥ | niraṃtanatvāt śāśvataḥ || 2 || īśvaratvāt sattvarūpaḥ | parāksāpekṣapratyagahaṃbhāvaṃ tyaktvā śiṣṭāhaṃbhāvo'smi | sarvaṃ brahmetyatra sarvāpahnavasiddhabrahmamātramasmi | cidākāśamayaḥ cidākāśasvarūpaḥ || 3 || turyaḥ pratyak | tadatītaḥ paraḥ | aśeṣaviśeṣābhāvāt kevalaḥ || 4-5 || vikalpāsahatvāt nirvikalpaḥ | antaḥkaraṇābhāvāt nirīhaḥ | bhavarogahānāt nirāmayaḥ | upādhisattve'pi asaṅgaḥ | vikārābhāvāt nirvikāraḥ | svataḥ parato vā vyayābhāvāt avyayaḥ || 6 || aparicchinnaḥ trividhaparicchedābhāvāt | anantānandaḥ aparimitānandarūpatvāt || 7 || saccitparānandarūpaḥ saccitparānandarūpatvāt | sarvāntaraḥ pratyak tasmādapyantaraḥ paraḥ pratyagabhinnabrahmarūpatvāt | vāṅmānasādikaraṇagrāmāgocaraḥ || 8 || satyātmānandarūpaḥ | pratyagādirūpeṇa sarvātmasu ramata iti ātmārāmaḥ || 9 || svotpattisthitilayābhāvāt ādimadhyāntahīnaḥ | niravayavatvāt ākāśasadṛśaḥ || 10 || sattāsāmānyatvāt sattāmātraḥ || 11 || sarvāvaśeṣarūpatvāt nityaśeṣaḥ || 12 || aparicchinnānandatvāt bhūmānandaḥ | vāgādikaraṇābhāvāt bhāṣāhīnaḥ || 13-14 || ddaśyāsaṃbhavato dṛṅmātraḥ || 15-16 || svājñadṛṣṭeḥ ahamanyavat guruśiṣyavat bhāto'smi | vedaśāstraiḥ upāsyo nirṇīto'smi || 17-18 || śiṣṭaṃ spaṣṭam | mayā avyāptaṃ mdatiriktaṃ vā nāstīti jānīhītyāha- mattyaktamiti || 19 || kiṃca- ahamiti || 20 || kevalaṃ brahmamātro'smi niṣpratiyogikatvāt || 21 || yataḥ svayamevedaṃ sarvam ataḥ svasmādanyat na cintaye ityāha- svayameveti || 22 || bhuṅkte ityatra puruṣavyatyayaḥ, bhuñje ityarthaḥ || 23-25 || yaccidrūpamātraṃ tadevāhamasmītyāha- ciditi || 26 || sarvaśūnyo'haṃ sarvadā sarvāsaṃbhavāt || 27 ||

p. 70) ahameva cidādityasvarūpavān sarvaprāṇihṛdgatakāmādivṛttisahasrabhāsakacitsūryatvāt || 28 || ekasaṃkhyāvimuktaḥ asaṃkhyeyatvāt | ādyantābhāvavān saṃbhūtipralayābhāvāt || 29 || parāvarasukhaḥ pratyagabhinnabrahmānandatvāt | śuddhamokṣasvarūpavān svasya svātiriktabhramamokṣasiddhatvāt || 30-31 || yataḥ anyat na vidyate tadevāhamityāha- brahmamātramiti || 32 || tvaṃtadityādiśabdavācyaṃ madatiriktaṃ nāstītyāha- tvamiti || 33 || atibhāvasvarūpaḥ sarvabhāvātītatvāt | sākṣitvaṃ- sākṣyasāpekṣasākṣitāyāḥ saviśeṣatvāt tadviralo'smītyarthaḥ || 34 || ādiśeṣaḥ dharaṇīdharatvāt | ahaṃśeṣa iti svamātratvamavaśiṣṭatvāt || 35-38 || ekamevādvitīyaṃ sajātīyavijātīyasvagatabhedavairalyāt || 39 || sakalāgamagocaraḥ vedāntavedyatvāt | svāvidyādvayato muktaḥ | nirvāṇasukharūpavān videhakaivalyānandatvāt || 40-41 || buddhaḥ viśuddhabodharūpatvāt || 42 || oṃkārārthasvarūpaḥ turyaturyatvāt ||

ātmāni sarvapravibhaktarūpābhāvānubhavaḥ

cidākārasvarūpo'smi nāhamasmi na so'smyaham || 43 ||

na hi kiṃcitsvarūpo'smi nirvyāpārasvarūpavān |
niraṃśo'smi nirābhāso na mano nendriyo'smyaham || 44 ||

na buddhirna vikalpo'haṃ na dehāditrayo'smyaham |
na jāgratsvapnarūpo'haṃ na suṣuptisvarūpavān || 45 ||

na tāpatrayarūpo'haṃ neṣaṇātrayavānaham |
śravaṇaṃ nāsti me siddhermananaṃ ca cidātmani || 46 ||

sajātīyaṃ na me kiṃcidvijātīyaṃ na me kvacit |
svagataṃ ca na me kiṃcinna me bhedatrayaṃ kvacit || 47 ||

p. 71) ahaṃśabdabodhyaṃ sthūladehādipratyagantaṃ, tacchabdabodhyaṃ virāḍādituryāntaṃ, tadubhayavilakṣaṇatvāt nāhamasmi na so'smyaham || 43 || svārirekeṇa kiṃcitsvarūpaḥ | akhaṇḍārthatvāt niraṃśaḥ | dehatrayavilakṣaṇatvāt na mana ityādi || 44-45 || svasya svataḥsiddhatvena na hi śravaṇādisādhanākāṅkṣā astītyāha- śravaṇamityādi | caśabdo nididhyāsanasamuccayārthaḥ || 46 || na hi sajātīyādibhedatrayamastītyāha- sajātīyamiti || 47 ||

svetarasya sarvasya asattvānubhavaḥ

asatyaṃ hi manorūpamasatyaṃ buddhirūpakam |
ahaṃkāramasaddhīti nityo'haṃ śāśvato hyajaḥ || 48 ||

dehatrayamasadviddhi kālatrayamasat sadā |
guṇatrayamasadviddhi hyahaṃ satyātmakaḥ śuciḥ || 49 ||

śrutaṃ sarvasadviddhi vedaṃ sarvamasat sadā |
śāstraṃ sarvamasadviddhi hyahaṃ satyaṃ cidātmakaḥ || 50 ||

mūrtitrayamasadviddhi sarvabhūtamasat sadā |
satvatattvamasadviddhi hyahaṃ bhūmā sadāśivaḥ || 51 ||

guruśiṣyamasadviddhi gurormantramasat tataḥ |
yad dṛśyaṃ tadasadviddhi na māṃ viddhi tathāvidham || 52 ||

yaccintyaṃ tadasadviddhi yannyāyyaṃ tadasat sadā |
yaddhitaṃ tadasadviddhi na māṃ viddhi tathāvidham || 53 ||

sarvān prāṇīnasadviddhi sarvān bhogānasattviti |
dṛṣṭaṃ śrutamasadviddhi otaṃ protamasanmayam || 54 ||

p. 72) kāryākāryamasadviddhi naṣṭaṃ prāptamasanmayam |
duḥkhāduḥkhamasadviddhi sarvāsarvamasanmayam || 55 ||

pūrṇāpūrṇamasadviddhi dharmādharmamasanmayam |
lābhālābhāvasadviddhi jayājayamasanmayam || 56 ||

śabdaṃ sarvamasadviddhi sparśaṃ sarvamasat sadā |
rūpaṃ sarvamasadviddhi rasaṃ sarvamasanmayam || 57 ||

gandhaṃ sarvamasadviddhi sarvājñānamasanmayam |
asadeva sadā sarvamasadeva bhavodbhavam || 58 ||

asadeva guṇaṃ sarvaṃ sanmātramahameva hi |

	svātiriktasāmānyaṃ śaśaviṣāṇavadatyantābhāvarūpatayā asadeva | ahaṃ tu tadapahnavasiddhaniṣpratiyogikabrahmamātrabhāvarūpo'smītyāha- asatyaṃ hīti || 48-58 ||

ahaṃbrahmāsmītyātmamantrābhyāsaḥ

svātmamantraṃ sadā paśyet svātmamantraṃ sadābhyaset || 59 ||

ahaṃ brahmāsmi mantro'yaṃ dṛśyapāpaṃ vināśayet |
ahaṃ brahmāsmi mantro'yamanyamantraṃ vināśayet || 60 ||

ahaṃ brahmāsmi mantro'yaṃ dehadoṣaṃ vināśayet |
ahaṃ brahmāsmi mantro'yaṃ janmapāpaṃ vināśayet || 61 ||

ahaṃ brahmāsmi mantro'yaṃ mṛtyupāśaṃ vināśayet |
ahaṃ brahmāsmi mantro'yaṃ dvaitaduḥkhaṃ vināśayet || 62 ||

p. 73) ahaṃ brahmāsmi mantro'yaṃ bhedabuddhiṃ vināśayet |
ahaṃ brahmāsmi mantro'yaṃ cintāduḥkhaṃ vināśayet || 63 ||

ahaṃ brahmāsmi mantro'yaṃ buddhivyādhiṃ vināśayet |
ahaṃ brahmāsmi mantro'yaṃ cittabandhaṃ vināśayet || 64 ||

ahaṃ brahmāsmi mantro'yaṃ sarvavyādhīn vināśayet |
ahaṃ brahmāsmi mantro'yaṃ sarvaśokaṃ vināśayet || 65 ||

ahaṃ brahmāsmi mantro'yaṃ kramādīn nāśayet kṣaṇāt |
ahaṃ brahmāsmi mantro'yaṃ krodhavṛttiṃ vināśayet || 66 ||

ahaṃ brahmāsmi mantro'yaṃ cittavṛttiṃ vināśayet |
ahaṃ brahmāsmi mantro'yaṃ saṃkalpādīn vināśayet || 67 ||

ahaṃ brahmāsmi mantro'yaṃ koṭidoṣaṃ vināśayet |
ahaṃ brahmāsmi mantro'yaṃ sarvatantraṃ vināśayet || 68 ||

ahaṃ brahmāsmi mantro'yamātmājñānaṃ vināśayet |
ahaṃ brahmāsmi mantro'yamātmaloka jayapradaḥ || 69 ||

ahaṃ brahmāsmi mantro'yamapratarkyasukha pradaḥ |
ahaṃ brahmāsmi mantro'yamajaḍatvaṃ prayacchati || 70 ||

ahaṃ brahmāsmi mantro'yamanātmāsuramardanaḥ |
ahaṃ brahmāsmi vajre'yamanātmākhyagirīn haret || 71 ||

ahaṃ brahmāsmi cakro'yamanātmatvāsurān haret |
ahaṃ brahmāsmi mantro'yaṃ sarvāṃstānmokṣayiṣyati || 72 ||

p. 74) ahaṃ brahmāsmi mantro'yaṃ jñānānandaṃ prayacchati |
saptakoṭimahāmantraṃ janmakoṭiśatapradam || 73 ||

sarvamantrān samutsṛjya etanmantraṃ samabhyaset |
sadyo mokṣamavāpnoti nāsti saṃdehamaṇvapi || 74 ||

iti ||

	svātmamantrābhyāsasya brahmāptyantarāyanirasanadvārā niṣpratiyogikabrahmamātrapadaprāpakatvāt yata evam ataḥ bandhamokṣabhramamumukṣuḥ imameva ahaṃ brahmāsmīti mantraṃ sadā abhyasedityāha- svātmamantramiti | spaṣṭo'yamarthaḥ || 59-74 || itiśabdaḥ adhyāyaparisamāptyarthaḥ ||

iti tṛtīyo'dhyāyaḥ || 3 ||

caturtho'dhyāyaḥ

jīvanmuktiḥ- pratyagabhinnabrahmabhāvāpattiḥ

	kumāraḥ parameśvaraṃ papraccha jīvanmuktavidehamuktayoḥ sthitimanubrūhīti | sa hovāca paraḥ śivaḥ |

cidātmāhaṃ parātmāhaṃ nirguṇo'haṃ parātparaḥ |
ātmamātreṇa yastiṣṭhet sa jīvanmukta ucyate || 1 ||

dehatrayātirikto'haṃ śuddhacaitanyamasmyaham |
brahmāhamiti yasyāntaḥ sa jīvanmukta ucyate || 2 ||

p. 75) ānandaghanarūpo'smi parānandaghano'smyaham |
yasya dehādikaṃ nāsti yasya brahmeti niścayaḥ |
paramānandapūrṇo yaḥ sa jīvanmukta ucyate || 3 ||

yasya kiṃcidahaṃ nāsti cinmātreṇāvatiṣṭhate |
caitanyamātro yasyāntaścinmātraikasvarūpavān || 4 ||

sarvatra pūrṇarūpātmā sarvatrātmāvaśeṣakaḥ |
ānandarativyaktaḥ paripūrṇaścidātmakaḥ || 5 ||

śuddhacaitanyarūpātmā sarvasaṅgavivarjitaḥ |
nityānandaḥ prasannātmā hyanyacintāvivarjitaḥ || 6 ||

kiṃcidastitvahīno yaḥ sa jīvanmukta ucyate |
na me cittaṃ na me buddhirnāhaṃkāro na cendriyam || 7 ||

na me dehaḥ kadācidvā na me prāṇādayaḥ kvacit |
na me māyā na me kāmo na me krodhaḥ paro'smyaham || 8 ||

na me kiṃcididaṃ vāpi na me kiṃcit kvacijjagat |
na me doṣo na me liṅgaṃ na me cakṣurna me manaḥ || 9 ||

na me śrotraṃ na me nāsā na me jihvā na me karaḥ |
na me jāgranna me svapnaṃ na me kāraṇamaṇvapi || 10 ||

na me turīyamiti yaḥ sa jīvanmukta ucyate |
idaṃ sarvaṃ na me kiṃcidayaṃ sarvaṃ na me kvacit || 11 ||

p. 76) na me kālo na me deśo na me vastu na me matiḥ |
na me snānaṃ na me saṃdhyā na me daivaṃ na me sthalam || 12 ||

na me tīrthaṃ na me sevā na me jñānaṃ na me padam |
na me bandhaṃ na me janma na me vākyaṃ na me raviḥ || 13 ||

na me puṇyaṃ na me pāpaṃ na me kāryaṃ na me śubham |
na me jīva iti svātmā na me kiṃcijjāttrayam || 14 ||

na me mokṣo na me dvaitaṃ na me vedo na me vidhiḥ |
na me'ntikaṃ na me dūraṃ na me bodho na me rahaḥ || 15 ||

na me gururna me śiṣyo na me hīno na cādhikaḥ |
na me brahmā na me viṣṇurna me rudro na candramāḥ || 16 ||

na me pṛthvī na me toyaṃ na me vāyurna me viyat |
na me vahirna me gotraṃ na me lakṣyaṃ na me bhavaḥ || 17 ||

na me dhyātā na me dhyeyaṃ na me dhyānaṃ na me manuḥ |
na me śītaṃ na me coṣṇaṃ na me tṛṣṇā na me kṣudhā || 18 ||

na me mitraṃ na me śatrurna me moho na me jayaḥ |
na me pūrvaṃ na me paścānna me cordhvaṃ na me diśaḥ || 19 ||

na me vaktavyamalpaṃ vā na me śrotavyamaṇvapi |
ne me mantavyamīṣadvā na me dhyātavyamaṇvapi || 20 ||

na me bhoktavyamīṣadvā na me smartavyamaṇvapi |
na me bhogo na me rāgo na me yāgo na me layaḥ || 21 ||

p. 77) na me maurkhyaṃ na me śāntaṃ na me bandhaṃ na me priyam |
na me modaḥ pramodo vā na me sthūlaṃ na me kṛśam || 22 ||

na me dīrghaṃ na me hrasvaṃ na me vṛddhirna me kṣayam |
adhyāropāpavādau vā na me caikaṃ na me bahu || 23 ||

na me āndhyaṃ na me māndyaṃ na me paṭṭidamaṇvapi |
na me māṃsaṃ na me raktaṃ na me medo na me hyasṛk || 24 ||

na me majjā na me'sthirvā na me tvagdhātusaptakam |
na me śuklaṃ na me raktaṃ na me nīlaṃ na me pṛthak || 25 ||

na me tāpo na me lobho mukhyaṃ gauṇaṃ na me kvacit |
na me bhrāntirna me sthairyaṃ na me guhyaṃ na me kulam || 26 ||

na me tyājyaṃ na me grāhyaṃ na me hāsyaṃ na me nayaḥ |
na me vrataṃ na me glānirna me śoṣyaṃ na me sukham || 27 ||

na me jñātā na me jñānaṃ na me jñeyaṃ na me svayam |
na me tubhyaṃ na me mahyaṃ na me tvaṃ ca na me tvaham || 28 ||

na me jarā na me bālyaṃ na me yauvanamaṇvapi |
ahaṃ brahmāsmyahaṃ brahmāsmyahaṃ brahmeti niścayaḥ || 29 ||

cidahaṃ cidahaṃ ceti sa jīvanmukta ucyate |
brahmaivāhaṃ cidevāhaṃ paro vāhaṃ na saṃśayaḥ || 30 ||

svayameva svayaṃ haṃsaḥ svayameva svayaṃ sthitaḥ |
svayameva svayaṃ paśyet svātmarājye sukhe vaset || 31 ||

p. 78) svātmānandaṃ svayaṃ bhokṣyet sa jīvanmukta ucyate |
svayamevaikavīro'gre svayameva prabhuḥ smṛtaḥ |
svasvarūpe svayaṃ svapsye sa jīvanmukta ucyate || 32 ||

	kumāraḥ svapituḥ parameśvarasya mukhyataḥ akhaṇḍaikarasacinmātrajñānaṃ tadanubhavaṃ ca yathāvadavagamya tadāntarālikamukhyaphalarūpajīvanmuktividehamuktisvarūpamavagantu śivaṃ pṛcchatītyāha- kumāra iti | tadaṅgīkṛtya krameṇa jīvanmuktavidehamuktalakṣaṇaṃ sa hovāca | tatra jīvanmuktalakṣaṇamucyate- cidātmeti | parāgbhāvagrāsapratyagbhāvasthitiḥ jīvanmuktiḥ pratyagabhinnabrahmabhāvāpattirveti vakṣyamāṇajīvanmuktiparyāyasamudāyārthaḥ || 1-4 || ānandātmanyeva ratiḥ yasya so'yaṃ ānandaratiḥ || 5 || anyacintāvivarjitaḥ svānyasya mṛgyatvāt || 6-9 || dehatrayavailakṣaṇyavadavasthācatuṣṭayavailakṣaṇyamāha- na me jāgraditi || 10-14 || ne me vidhiḥ na niṣedho'pītyarthaḥ || 15-31 || svayameva prabhuḥ īśvaratvāt | cidātmāhaṃ parātmāham ityetāvatā granthena brahmavidādicaturbhedabhinnajīvanmuktalakṣaṇamabhihitam | prāyaśaḥ iyaṃ tejobindūpaniṣat vidhyādividehamuktyantamahāvākyaratnāvalīprabhālocane prasaktānuprasaktyā vyākhyātā neha punaḥ padaśo vyākhyāyate granthavistarabhayāditi || 32 ||

videhamuktiḥ- niṣpratiyogikasvamātrabrahmamātrāvasthānam

brahmabhūtaḥ praśāntātmā brahmānandamayaḥ sukhī |
svaccharūpo mahāmaunī vaidehī mukta eva saḥ || 33 ||

sarvātmā samarūpātmā śuddhātmā tvahamutthitaḥ |
ekavarjita ekātmā sarvātmā svātmamātrakaḥ || 34 ||

p. 79) ajātmā cāmṛtātmāhaṃ svayamātmāhamavyayaḥ |
lakṣyātmā lalitātmāhaṃ tūṣṇīmātmasvabhāvavān || 35 ||

ānandātmā priyo hyātmā mokṣātmā bandhavarjitaḥ |
brahmaivāhaṃ cidevāhamevaṃ vāpi na cintyate || 36 ||

cinmātreṇaiva yastiṣṭhedvaidehī mukta eva saḥ || 37 ||

niścayaṃ ca parityajya ahaṃ brahmeti niścayam |
ānandabharitasvānto vaidehī mukta eva saḥ || 38 ||

sarvamastīti nāstīti niścayaṃ tyajya tiṣṭhati |
ahaṃ brahmāsmi nāsmīti saccidānandamātrakaḥ || 39 ||

kiṃcit kvacit kadācicca ātmānaṃ na spṛśatyasau |
tūṣṇīmevaṃ sthitastūṣṇīṃ tūṣṇīṃ satyaṃ na kiṃcana || 40 ||

paramātmā guṇātītaḥ sarvātmā bhūtabhāvanaḥ |
kālabhedaṃ vastubhedaṃ deśabhedaṃ svabhedakam || 41 ||

kiṃcidbhedaṃ na tasyāsti kiṃcidvāpi na vidyate |
ahaṃ tvaṃ tadidaṃ so'yaṃ kālātmā kālahīnakaḥ || 42 ||

śūnyātmā sūkṣmarūpātmā viśvātmā viśvahīnakaḥ |
devātmā devahīnātmā meyātmā meyavarjitaḥ || 43 ||

sarvatra jaḍahīnātmā sarveṣāmantarātmakaḥ |
sarvasaṃkalpahīnātmā cinmātro'smīti sarvadā || 44 ||

p. 80) kevalaḥ paramātmāhaṃ kevalo jñānavigrahaḥ |
sattāmātrasvarūpātmā nānyat kiṃcijjagadbhayam || 45 ||

jīveśvareti vāk kveti vedaśāstrādyahaṃ tviti |
idaṃ caitanyameveti ahaṃ caitanyamityapi || 46 ||

iti niścayaśūnyo yo vaidehī mukta eva saḥ |
caitanyamātrasaṃsiddhasvātmārāmaḥ sukhāsanaḥ || 47 ||

aparicchinnarūpātmā aṇusthūlādivarjitaḥ |
turyaturyaḥ parānando vaidehī mukta eva saḥ || 48 ||

nāmarūpavihīnātmā parasaṃvitsukhātmakaḥ |
turīyātītarūpātmā śubhāśubhavivarjitaḥ || 49 ||

yogātmā yogayuktātmā bandhamuktivivarjitaḥ |
guṇāguṇavihīnātmā deśakālādivarjitaḥ || 50 ||

sākṣyasākṣitvahīnātmā kiṃcitkiṃcinna kiṃcana |
yasya prapañcamānaṃ na brahmākāramapīha na || 51 ||

svasvarūpe svayaṃjyotiḥ svasvarūpe svayaṃratiḥ |
vācāmagocarānando vāṅmano'gocaraḥ svayam || 52 ||

atītātītabhāvo yo vaidehī mukta eva saḥ |
cittavṛtteratīto yaścittavṛttyavabhāsakaḥ || 53 ||

sarvavṛttivihīnātmā vaidehī mukta eva saḥ |
tasmin kāle videhīti dehasmaraṇavarjitaḥ || 54 ||

p. 81) īṣanmātraṃ smṛtaṃ cedyastadā sarvasamanvitaḥ |
parairadṛṣṭabāhyātmā paramānandacidghanaḥ || 55 ||

parairadṛṣṭabāhyātmā sarvavedāntagocaraḥ |
brahmāmṛtarasāsvādo brahmāmṛtarasāyanaḥ || 56 ||

brahmāmṛtarasāsakto brahmāmṛtarasaḥ svayam |
brahmāmṛtarase magno brahmānandaśivārcanaḥ || 57 ||

brahmāmṛtarase tṛpto brahmānandānubhāvakaḥ |
brahmānandaśivānando brahmānandarasaprabhaḥ || 58 ||

brahmānandaparaṃ jyotirbrahmānandanirantaraḥ |
brahmānandarasānnādo brahmānandakuṭumbakaḥ || 59 ||

brahmānandarasārūḍho brahmānandaikacidghanaḥ |
brahmānandasodvāho brahmānandasaṃbharaḥ || 60 ||

brahmānandajanairyukto brahmānandātmani sthitaḥ |
ātmarūpamidaṃ sarvamātmano'nyatra kiṃcana || 61 ||

sarvamātmāhamātmāsmi paramātmā parātmakaḥ |
nityānandasvarūpātmā vaidehī mukta eva saḥ || 62 ||

pūrṇarūpo mahānātmā prītātmā śāśvatātmakaḥ |
sarvāntaryāmirūpātmā nirmalātmā nirātmakaḥ || 63 ||

nirvikārasvarūpātmā śuddhātmā śāntarūpakaḥ |
śāntāśāntasvarūpātmā naikātmatvavivarjitaḥ || 64 ||

p. 82) jīvātmaparamātmeti cintāsarvasvavarjitaḥ |
muktāmuktasvarūpātmā muktāmuktavivarjitaḥ || 65 ||

bandhamokṣasvarūpātmā bandhamokṣavivarjitaḥ |
dvaitādvaitasvarūpātmā dvaitādvaitavivarjitaḥ || 66 ||

sarvāsarvasvarūpātmā sarvāsarvavivarjitaḥ |
modapramodarūpātmā modādivinivarjitaḥ || 67 ||

sarvasaṃkalpahīnātmā vaidehī mukta eva saḥ |
niṣkalātmā nirmalātmā buddhātmā puruṣātmakaḥ || 68 ||

ānandādivihīnātmā amṛtātmāmṛtātmakaḥ |
kālatrayasvarūpātmā kālatrayavivarjitaḥ || 69 ||

akhilātmā hyameyātmā mānātmā mānavarjitaḥ |
nityapratyakṣarūpātmā nityapratyakṣanirṇitaḥ || 70 ||

anyahīnasvabhāvātmā anyahīnasvayaṃprabhaḥ |
vidyāvidyādimeyātmā vidyāvidyādivarjitaḥ || 71 ||

nityānityavihīnātmā ihāmutravivarjitaḥ |
śamādiṣaṭkaśūnyātmā mumukṣutvādivarjitaḥ || 72 ||

sthūladehavihīnātmā sūkṣmadehavivarjitaḥ |
kāraṇādivihīnātmā turīyādivivarjitaḥ || 73 ||

p. 83) annakośavihīnātmā prāṇakośavivarjitaḥ |
manaḥkośavihīnātmā vijñānādivivarjitaḥ || 74 ||

ānandakośahīnātmā pañcakośavivarjitaḥ |
nirvikalpasvarūpātmā savikalpavivarjitaḥ || 75 ||

dṛśyānuviddhahīnātmā śabdaviddhavivarjitaḥ |
sadā samādhiśūnyātmā ādimadhyāntavarjitaḥ || 76 ||

prajñānavāvayahīnātmā ahaṃbrahmāsmivarjitaḥ |
tattvamasyādihīnātmā ayamātmetyabhāvakaḥ || 77 ||

oṃkāravācyahīnātmā sarvavācyavivarjitaḥ |
avasthātrayahīnātmā akṣarātmā cidātmakaḥ || 78 ||

ātmajñeyādihīnātmā yatkiṃcididamātmakaḥ |
bhānābhānavihīnātmā vaidehī mukta eva saḥ || 79 ||

	svātiriktāvidyāpadatatkāryajātakalanāpahnavasiddhaṃ brahma niṣpratiyogikasvamātramiti tanmātrāvasthānaṃ videhamuktalakṣaṇam | tadiha prapañcyate- brahmabhūta ityādinā | brahmabhūtaḥ brahmamātratayā avasthitatvāt | praśāntātmā praśāntadehatrayābhimatitvāt | brahmānandamayaḥ ānandasvarūpaḥ niṣpratiyogikabhūmānandamātra ityarthaḥ | svaccharūpaḥ pūrṇabodhasvarūpatvāt | mahāmaunī svamātratayā tūṣṇīmavasthitatvāt | dehatrayopalakṣitasvāvidyāpadatatkāryajāte ātmātmīyābhimatimūlabhūtā vigatāśca te dehāśca videhāḥ, videhā eva vaidehāḥ, te asya santīti vaidehī | tadrūpeṇa vyapadiṣṭasya baddhatvaṃ syādityata āha- mukta iti | svātiriktaṃ yatra muktam apahnavatāṃ gataṃ so'yaṃ vaidehī mukta evetyatra-

p. 84) yasmin vyaṣṭisamaṣṭyākhyasthūladehādivāsanā |
virūpavilayaṃ yāti sa videho mahāmuniḥ ||
sarvāpahnavasaṃsiddhabrahmamātraṃ sa eva hi |
akalpavidvariṣṭho'yamiti sarvatra gīyate ||

iti smṛtiḥ mānam | evameva videhamuktiśrutayo boddhavyāḥ || 33 || kiṃca- sarvātmeti | svātmamātrakaḥ niṣpratiyogikaikarūpatvāt || 34 || lakṣyātmā svāvaśeṣatayā lakṣitatvāt | lalitātmā kevalanirviśeṣatvāt | tūṣṇīmātmasvabhāvavān mahāmaunaphalarūpatvāt || 35 || na cintyate tathāvidhacintāyā api vidyāvṛttitvena apahnotavyatvāt || 36 || svātiriktamastīti, caśabdāt nāstīti, niścayaṃ ceti || 37-39 || yatra svājñajātaṃ saṃsarati tatra jñānī vijñānī vā saṅgodāsīnatayā pratyagabhinnabrahmagocarākhaṇḍākāravṛttiparavaśo bhūtvā evaṃ tūṣṇīmāste | yadyevam akhaṇḍākāravṛttimapi asahamāno yogī samyagjñānī nirvikalpakasamādhiparavaśo bhūtvā kvacitkālaṃ tūṣṇīṃ sthito bhavati | tūṣṇīṃ satyaṃ na kiṃcana ityatra- sarūpavilayasiddhanirvikalpasamādhitaḥ kādācitkavyutthānamapyasaha-mānaḥ tattvajñānī suṣumnānāḍyantargatakaivalyanāḍikojjvalaccidā-kāśe svāntarbahirbhāvitasvāvidyādvayatatkāryavikalpajātāpahnava-siddhaniṣpratiyogikanirvikalpabrahmamātratayā tūṣṇīṃsvabhāvenāvaśiṣyate iti yat tadeva satyaṃ sanmātrāvasthānalakṣaṇavidehakaivalyaṃ tatra na kiṃcana svātiriktamasti nāstīti vibhramo'sti brahmavyatiriktaṃ na kiṃcidasti madvyatiriktamaṇumātraṃ na vidyate sanmātramasadanyat ityādi śruteḥ || 40-41 || bheda iti vaktavye bhedamiti vibhaktivyatyayaḥ || 42-45 || jīveśvarāviti vaktavye jīveśvareti saṃbuddhiḥ, vedaśāstrāṇīti vaktavye vedaśāstrā iti liṅgavyatyayaḥ || 46-47 || turyaturyaḥ avikalpāvikalparūpatvāt || 48-49 ||

p. 85) guṇāguṇavihīnātmā triguṇavattatsāpekṣanirguṇasyāpi saviśeṣatvāt | mithaḥ sāpekṣasaguṇanirguṇatāviralaniṣpratiyogikanirguṇātmāyamityarthaḥ || 50 || sākṣyasākṣinirūpitasaviśeṣajātaṃ kiṃcit kiṃcidapi na kiṃcana || 51-60 || videhamukteḥ purā yadyadannādikam āsvāditaṃ yadyadudvāhādikuṭumbabharaṇaśivapūjādi kṛtaṃ tattat sarvam idānīṃ brahmānanda eva bhavati, videhamuktasya svātiriktakalanātatpravṛttinivṛttivyāpṛtyapahnavasiddhatvāt | videhamuktātirekeṇa na kiṃcidastītyāha- ātmarūpamiti || 61-62 || nirātmakaḥ īśvarasākṣicinmātratvāt || 63-66 || sarvāsarvavivarjitaḥ sāpekṣabandhamokṣadvaitādvaitādeḥ saviśeṣatvāt niṣpratiyogikādvaitātmāyamityarthaḥ || 67-69 || nityapratyakṣanirṇitaḥ svājñādibhiḥ svasvadṛṣṭyanurodhena nirṇīta ityarthaḥ || 70-73 || caturmahāvākyavācyalakṣyatā syādityata āha- prajñāneti || 77-81 ||

svātmaniṣṭhāvidhiḥ

ātmānameva vīkṣasva ātmānaṃ bodhaya svakam |
svamātmānaṃ svayaṃ bhuṅkṣva svastho bhava ṣaḍānana || 80 ||

svamātmani svayaṃ tṛptaḥ svamātmānaṃ svayaṃ cara |
ātmānameva modasva vaidehī muktiko bhava || 81 ||

ityupaniṣat ||

ityupaniṣacchabdaḥ kumāraśivākhyāyikāsamāptyarthaḥ || 82 ||

iti caturtho'dhyāyaḥ || 4 ||

pañcamo'dhyāyaḥ

svātmayāthātmyam

	nidāgho nāma vai muniḥ papraccha ṛbhuṃ bhagavantamātmānātmavivekamanubrūhīti | sa hovāca bhagavān ṛbhuḥ |

sarvavāco'badhirbrahma sarvacintāvadhirguruḥ |
sarvakāraṇakāryātmā kāryakāraṇavarjitaḥ || 1 ||

sarvasaṃkalparahitaḥ sarvanādamayaḥ śivaḥ |
sarvavarjitacinmātraḥ sarvānandamayaḥ paraḥ || 2 ||

sarvatejaḥprakāśātmā nādānandamayātmakaḥ |
sarvānubhavanirmuktaḥ sarvadhyānavivarjitaḥ || 3 ||

sarvanādakalātīta eṣa ātmāhamavyayaḥ |
ātmānātmavivekādibhedābhedavivarjitaḥ || 4 ||

śāntāśāntādihīnātmā nādāntarjyotirūpakaḥ |
mahāvākyārthato dūro brahmāsmītyatidūrataḥ || 5 ||

tacchabdavarjyastvaṃśabdahīno vākyārthavarjitaḥ |
kṣarākṣaravihīno yo nādāntarjyotireva saḥ || 6 ||

akhaṇḍaikaraso vāhamānando'smīti varjitaḥ |
sarvātītasvabhāvātmā nādāntarjyotireva saḥ || 7 ||

p. 87) ātmeti śabdahīno ya ātmaśabdārthavarjitaḥ |
saccidānandahīno ya eṣaivātmā sanātanaḥ || 8 ||

sa nirdeṣṭumaśakyo yo vedavākyairagamyagaḥ |
yasya kiṃcidbahirnāsti kiṃcidantaḥ kiyanna ca || 9 ||

yasya liṅgaṃ prapañcaṃ vā brahmaivātmā na saṃśayaḥ |
nāsti yasya śarīraṃ vā jīvo vā bhūtabhautikaḥ || 10 ||

nāmarūpādikaṃ nāsti bhojyaṃ vā bhogabhuk ca vā |
sadvāsadvā sthitirvāpi yasya nāsti kṣarākṣaram || 11 ||

guṇaṃ vā viguṇaṃ vāpi sa ma ātmā na saṃśayaḥ |
yasya vācyaṃ vācakaṃ vā śrāvaṇaṃ mananaṃ ca vā || 12 ||

guruśiṣyādibhedaṃ vā devalokāḥ surāsurāḥ |
yatra dharmamadharmaṃ vā śuddhaṃ vāśuddhamaṇvapi || 13 ||

yatra kālamakālaṃ vā niścayaḥ saṃśayo na hi |
yatra mantramamantraṃ vā vidyāvidye na vidyate || 14 ||

draṣṭṛdarśanadṛśyaṃ vā īṣanmātraṃ kalātmakam |

	kumāreṇa sākam ṛbhurnāma brahmamānasaputraḥ so'pi śivamukhataḥ akhaṇḍaikarasacinmātrajñānatadanubhavatadāntarālika-mukhyaphalātmakajīvanmuktividehamuktyoḥ iyattāmavagamya kṛtakṛtyapadaṃ gataḥ khalu | taṃ kadācit nidāgho nāma muniḥ samastavedaśāstrapurāṇetihāsādiṣu ātmānātmānau sta iti śrūyate tayoḥ iyattājijñāsayā pṛṣṭavānityāha śrutiḥ- nidāgha iti | tatpraśnamaṅgīkṛtya

p. 88) sa hovāca | kiṃ tat ityatra sarvavāca iti | sarvavāco'vadhiḥ aśabdatvāt | sarvacintāvadhiḥ pratīcaścintādivṛttigrāsatvāt | svājñādidṛṣṭyā sarvakāraṇakāryātmā || 1 || sarvanādamayaḥ nādatajjavedaśāstrasiddhāntārthatvāt | svājñasamarpitasarvavarjitacinmātraḥ || 2 ||  svānubhūtidhyānādiviṣayasya saviśeṣatā syādityata āha- sarveti || 3-4 || tattvaṃpadavākyārtha ātmetyata āha- mahāvākyeti || 5 || kṣarākṣaravihīnaḥ kṣarākṣarakalanāviralaparamākṣaratvāt || 6-8 || paramātmano vyāviddhanānāpadavākyārthatvena mahāvākyātmasaccidānandaśabdatadvācyārthavarjitatvāt sa nirdeṣṭumiti | karmakāṇḍagocaravedavākyaiḥ sākṣādagamyatāṃ gacchatīti agamyagaḥ || 9-14 ||

anātmanaḥ sarvasya mithyātvam

anātmeti prasaṅgo vā anātmeti mano'pi vā || 15 ||

anātmeti jagadvāpi nāstyanātmeti niścinu |
sarvasaṃkalpaśūnyatvāt sarvakāryavivarjanāt || 16 ||

kevalaṃ brahmamātratvāt nāstyanātmeti niścinu |
dehatrayavihīnatvāt kālatrayavivarjanāt || 17 ||

jīvatrayaguṇābhāvāt tāpatrayavivarjanāt |
lokatrayavihīnatvāt sarvamātmeti śāsanāt || 18 ||

cittābhāvāccintanīyaṃ dehābhāvājjarā na ca |
pādābhāvād gatirnāsti hastābhāvāt kriyā na ca || 19 ||

mṛtyurnāsti janābhāvād buddhyabhāvāt sukhādikam |
dharmo nāsti śucirnāsti satyaṃ nāsti bhayaṃ na ca || 20 ||

p. 89) akṣaroccāraṇaṃ nāsti guruśiṣyādi nāstyapi |
ekābhāve dvitīyaṃ na na dvitīye na caikatā || 21 ||

satyatvamasti cet kiṃcidasattvaṃ na ca saṃbhavet |
asatyatvaṃ yadi bhavet satyatvaṃ na ghaṭiṣyati || 22 ||

śubhaṃ yadyaśubhaṃ viddhi aśubhācchubhamiṣyate |
bhayaṃ yadyabhayaṃ viddhi hyabhayādbhayamāpatet || 23 ||

bandhatvamasti cenmokṣo bandhābhāve kva mokṣatā |
maraṇaṃ yadi cejjanma janmābhāve mṛtirna ca || 24 ||

tvamityapi bhaveccāhaṃ tvaṃ no cedahameva na |
idaṃ yadi tadevāsti tadabhāvādidaṃ na ca || 25 ||

astīti cennāsti tadā nāsti cedasti kiṃcana |
kāryaṃ cet kāraṇaṃ kiṃcit kāryābhāve na kāraṇam || 26 ||

dvaitaṃ yadi tadādvaitaṃ dvaitābhāve'dvayaṃ na ca |
dṛśyaṃ yadi dṛgapyasti dṛśyābhāve dṛgeva na || 27 ||

antaryadi bahiḥ satyamantābhāve bahirna ca |
pūrṇatvamasti cet kiṃcidapūrṇatvaṃ prasajyate || 28 ||

tasmādetat kvacinnāsti tvaṃ cāhaṃ vā ime idam |
nāsti dṛṣṭāntikaṃ satye nāsti dārṣṭāntikaṃ hyaje || 29 ||

p. 90) paraṃ brahmāhamasmīti smaraṇasya mano na hi |
brahmamātraṃ jagadidaṃ brahmamātraṃ tvamapyaham || 30 ||

cinmātraṃ kevalaṃ cāhaṃ nāstyanātmeti niścinu |
idaṃ prapañcaṃ nāstyeva notpannaṃ no sthitaṃ kvacit || 31 ||

cittaṃ prapañcamityāhurnāsti nāstyeva sarvadā |
na prapañcaṃ na cittādi nāhaṃkāro na jīvakaḥ || 32 ||

māyākāryādikaṃ nāsti māyā nāsti bhayaṃ na hi |
kartā nāsti kriyā nāsti śravaṇaṃ mananaṃ na hi || 33 ||

samādhidvitayaṃ nāsti mātṛmānādi nāsti hi |
ajñānaṃ cāpi nāstyeva hyavivekaṃ kadācana || 34 ||

anubandhacatuṣkaṃ na saṃbandhatrayameva na |
na gaṅgā na gayā seturna bhūtaṃ nānyadasti hi || 35 ||

na bhūmirna jalaṃ nāgnirna vāyurna ca khaṃ kvacit |
na devā na ca dikpālā na vedā na guruḥ kvacit || 36 ||

na dūraṃ nāntikaṃ nālaṃ na madhyaṃ na kvacit sthitam |
nādvaitaṃ dvaitasatyaṃ vā hyasatyaṃ vā idaṃ na ca || 37 ||

bandhamokṣādikaṃ nāsti sadvāsadvā sukhādi vā |
jātirnāsti gatirnāsti varṇo nāsti ca laukikam || 38 ||

sarvaṃ brahmeti nāstyeva brahmetyapi ca nāsti hi |
cidityeveti nāstyeva cidahaṃbhāṣaṇaṃ na hi || 39 ||

p. 91) ahaṃ brahmāsmi nāstyeva nityaśuddho'smi na kvacit |
vācā yaducyate kiṃcinmanasā manute kvacit || 40 ||

buddhyā niścinute nāsti cittena jñāyate na hi |
yogiyogādikaṃ nāsti sadā sarvaṃ sadā na ca || 41 ||

ahorātrādikaṃ nāsti snānadhyānādikaṃ na hi |
bhrāntirabhrānti nāstyeva nāstyanātmeti niścinu || 42 ||

vedaṃ śāstraṃ purāṇaṃ ca kāryaṃ kāraṇamīśvaraḥ |
loko bhūtaṃ janastvaikyaṃ sarvaṃ mithyā na saṃśayaḥ || 43 ||

bandho mokṣaḥ sukhaṃ duḥkhaṃ dhyānaṃ cittaṃ surāsurāḥ |
gauṇaṃ mukhyaṃ paraṃ cānyat sarvaṃ mithyā na saṃśayaḥ || 44 ||

vācā vadati yat kiṃcit saṃkalpaiḥ kalpyate ca yat |
manasā cintyate yadyat sarvaṃ mithyā na saṃśayaḥ || 45 ||

buddhyā niścīyate yadyaccitte niścīyate kvacit |
śāstraiḥ prapañcyate yadyannetreṇaiva nirīkṣyate || 46 ||

śrotrābhyāṃ śrūyate yadyadanyat sadbhāvameva ca |
netraṃ śrotraṃ gātrameva mithyeti ca suniścitam || 47 ||

idamityeva nirdiṣṭamayamityeva kalpyate |
tvamahaṃ tadidaṃ so'hamanyat sadbhāvameva ca || 48 ||

p. 92) yadyat saṃbhāvyate loke sarvasaṃkalpasaṃbhramaḥ |
sarvādhyāsaṃ sarvagopyaṃ sarvabhogaprabhedakam || 49 ||

sarvadoṣaprabhedāśca nāstyanātmeti niścinu |
madīyaṃ ca tvadīyaṃ ca mameti ca taveti ca || 50 ||

mahyaṃ tubhyaṃ mayetyādi tat sarvaṃ vitathaṃ bhavet |
rakṣako viṣṇurityādi brahmā sṛṣṭestu kāraṇam || 51 ||

saṃhāre rudra ityevaṃ sarvaṃ mithyeti niścinu |
snānaṃ japastapo homaḥ svādhyāyo devapūjanam || 52 ||

mantraṃ tantraṃ ca satsaṅgo guṇadoṣavijṛmbhaṇam |
antaḥkaraṇasadbhāvaḥ avidyāyāśca saṃbhavaḥ || 53 ||

anekakoṭibrahmāṇḍaṃ sarvaṃ mithyeti niścinu |
sarvadeśikavākyoktiryena kenāpi niścitam || 54 ||

dṛśyate jagati yadyadyadyajjagati vīkṣyate |
vartate jagati yadyat sarvaṃ mithyeti niścinu || 55 ||

yena kenākṣareṇoktaṃ yena kena vinirṇitam |
yena kenāpi gaditaṃ yena kenāpi moditam || 56 ||

yena kenāpi yaddattaṃ yena kenāpi yat kṛtam |
yatra yatra śubhaṃ karma yatra yatra ca duṣkṛtam || 57 ||

yadyat karoṣi satyena sarvaṃ mithyeti niścinu |

p. 93) nidāghena ātmānātmayāthātmyamanubrūhīti yat pṛṣṭaṃ tatra svātiriktāvidyāpadatatkāryajātāpahnavasiddho'yamātmetyātmayā-thātmyamabhihitam | athānātmayāthātmyamucyate- anātmeti | anātmā asti nāstīti vārtāpi na vidyate | avidyārūpeṇa avidyābhāve'pi tatkāryamanorūpeṇa jāgradrūpeṇa vā avidyā syādityata āha- anātmeti || 15 || manaḥkāryajagadvāpi na vidyate | yasmādevaṃ tasmāt kāryakāraṇātmanā yena kenāpi vā he nidāgha nāstyanātmeti niścinu niścayavān bhava, nāvidyāstīha no māyā iti, avidyāmānaivāvidyā vastutattvavicāriṇām iti,

nātmabhāvena nānedaṃ na svenāpi kathaṃcana |
na pṛthaṅ nāpṛthak kiṃciditi tattvavido viduḥ ||

iti śrutismṛtigauḍapādācāryokteḥ | jaganmano'nātmāsaṃbhave hetutrayamācaṣṭe- sarveti | sarvasaṃkalpaśūnyatvāt saṃkalpādivṛttisahasrajuṣṭamānasābhāvāt | sarvakāryavivarjanāt manaḥkāryajagadabhāvāt || 16 || brahmamātrasya niṣpratiyogikatvena manastatkāryahetvanātmāpahnavasiddhatvāt nāstyanātmeti niścinu | itaśca anātmāsaṃbhave hetūnupanyasyati- deheti || 17-20 || yadyat sāpekṣaṃ tattat saviśeṣaṃ anātmatvāt | yadyat anātmā na bhavati tattat saviśeṣamapi na bhavati yathā nirviśeṣaṃ brahmeti śrutiyuktitaḥ svavikalpitānātmāpahnavasiddhātmamātrasiddhaye sāpekṣaśrutivākyānyupanyasyati- ekābhāva iti || 21-27 || antābhāve, visargalopaḥ, antarabhāve || 28-30 || kathaṃ punaḥ anātmā nātītyucyate saṃbhūtisthitipralayavadanātmaprapañcadarśanādityata āha- idamiti || ayaṃ prapañcaḥ iti vaktavye idaṃ prapañca iti liṅgavyatyayaḥ || 31-36 || nālaṃ [na ālaṃ] dūrāntikayoḥ antarālamityarthaḥ | mithaḥ sāpekṣatayā nādvaitam || 37-41 || bhrāntiḥ atasmin tadbhāvaḥ, abhrāntiḥ tasmin tadbhāvaḥ, bhrāntyādigatabhāvasya tūlāntaḥkaraṇāvidyākāryatvena kāraṇatulyatvāt abhrānti nāstītyatra visargalopa iti kecit | tatpakṣe- bhrāntirabhrānti

p. 94) nāstyeva iti pāṭhaḥ || 42 || svājñadṛṣṭyā yadyat vikalpitaṃ svajñastu tattat mithyeti manyate ityāha- vedamityādinā | vedam iti vibhaktivyatyayaḥ || 43-57 ||

ahaṃvastunaḥ paramātmatvam

tvameva paramātmāsi tvameva paramo guruḥ || 58 ||

tvamevākāśarūpo'si sākṣihīno'si sarvadā |
tvameva sarvabhāvo'si tvaṃ brahmāsi na saṃśayaḥ || 59 ||

kālahīno'si kālo'si sadā brahmāsi cidghanaḥ |
sarvataḥ svasvarūpo'si caitanyaghanavānasi || 60 ||

satyo'si siddho'si sanātano'si mukto'si mokṣo'si mudāmṛto'si |
devo'si śānto'si nirāmayo'si brahmāsi pūrṇo'si parātparo'si || 61 ||

samo'si saccāsi sanātano'si satyādivākyaiḥ pratibodhito'si |
sarvāṅgahīno'si sadā sthito'si brahmendrarudrādivibhāvito'si || 62 ||

sarvaprapañcabhramavarjito'si sarveṣu bhūteṣu ca bhāsito'si |
sarvatra saṃkalpavivarjito'si sarvāgamāntārthavibhāvito'si || 63 ||

sarvatra saṃtoṣasukhāsano'si sarvatra gatyādivivarjito'si |
sarvatra lakṣyādivivarjito'si dhyāto'si viṣṇvādisurairajasram || 64 ||

p. 95) cidākārasvarūpo'si cinmātro'si niraṅkuśaḥ |
ātmanyeva sthito'si tvaṃ sarvaśūnyo'si nirguṇaḥ || 65 ||

ānando'si paro'si tvameka evādvitīyakaḥ |
cidghanānandarūpo'si paripūrṇasvarūpakaḥ || 66 ||

sadasi tvamasi jño'si so'si jānāsi vīkṣasi |
saccidānandarūpo'si vāsudevo'si vai prabhuḥ || 67 ||

amṛto'si vibhuścāsi cañcalo hyacalo hyasi |
sarvo'si sarvahīno'si śāntāśāntavivarjitaḥ || 68 ||

sattāmātraprakāśo'si sattāsāmānyako hyasi |
nityasiddhisvarūpo'si sarvasiddhivivarjitaḥ || 69 ||

īṣanmātraviśūnyo'si aṇumātravivarjitaḥ |
astitvavarjito'si tvaṃ nāstitvādivivarjitaḥ || 70 ||

lakṣyalakṣaṇahīno'si nirvikāro nirāmayaḥ |
sarvanādāntaro'si tvaṃ kalākāṣṭhāvivarjitaḥ || 71 ||

brahmaviṣṇvīśahīno'si svasvarūpaṃ prapaśyasi |
svasvarūpāvaśeṣo'si svānandābdhau nimajjasi || 72 ||

svātmarājye svamevāsi svayaṃbhāvavivarjitaḥ |
śiṣṭapūrṇasvarūpo'si svasmāt kiṃcinna paśyasi || 73 ||

p. 96) svasvarūpānna calasi svasvarūpeṇa jṛmbhasi |
svasvarūpādananyo'si hyahamevāsi niścinu || 74 ||

	vedaṃ śāstram ityārabhya etāvatā granthena sarvaṃ mithyetyavadhṛtaṃ; kimahaṃ mithyāntaḥpātī ityāśaṅkamānamālakṣya mithyādhāro nirādhāro vā paramātmā tvamasītyāha- tvameveti | bhagavadātmanā brahmavidyācāryatvāt || 58-74 ||

avidyātatkāryaprapañcasya niṣpratiyogikābhāvarūpatvam

idaṃ prapañcaṃ yat kiṃcidyadyajjagati vidyate |
dṛśyarūpaṃ ca dṛgrūpaṃ sarvaṃ śaśaviṣāṇavat || 75 ||

bhūmirāpo'nalo vāyuḥ khaṃ mano buddhireva ca |
ahaṃkāraśca tejaśca lokaṃ bhuvanamaṇḍalam || 76 ||

nāśaṃ janma ca satyaṃ ca puṇyapāpajayādikam |
rāgaḥ kāmaḥ krodhalobhau dhyānaṃ dhyeyaṃ guṇaṃ param || 77 ||

guruśiṣyopadeśādirādirantaṃ śamaṃ śubham |
bhūtaṃ bhavyaṃ vartamānaṃ lakṣyaṃ lakṣaṇamadvayam || 78 ||

śamo vicāraḥ saṃtoṣo bhoktṛbhojyādirūpakam |
yamādyaṣṭāṅgayogaṃ ca gamanāgamanātmakam || 79 ||

ādimadhyāntaraṅgaṃ ca grāhyaṃ tyājyaṃ hariḥ śivaḥ |
indriyāṇi manaścaiva avasthātritayaṃ tathā || 80 ||

p. 97) caturviṃśatitattvaṃ ca sādhanānāṃ catuṣṭayam |
sajātīyaṃ vijātīyaṃ lokā bhūrādayaḥ kramāt || 81 ||

sarvavarṇāśramācāraṃ mantratantrādisaṃgraham |
vidyāvidyādirūpaṃ ca sarvavedaṃ jaḍājaḍam || 82 ||

bandhamokṣavibhāgaṃ ca jñānavijñānarūpakam |
bodhābodhasvarūpa vā dvaitādvaitādibhāṣaṇam || 83 ||

sarvavedāntasiddhāntaṃ sarvaśāstrārthanirṇayam |
anekajīvasadbhāvamekajīvādvinirṇayam || 84 ||

yadyaddhyāyati cittena yadyat saṃkalpyate kvacit |
buddhyā niścīyate yadyadguruṇā saṃśṛṇoti yat || 85 ||

yadyadvācā vyākaroti yadyadācāryabhāṣaṇam |
yadyat svarendriyairbhāvyaṃ yadyanmīmāṃsyate pṛthak || 86 ||

yadyannyāyena nirṇītaṃ mahadbhirvedapāragaiḥ |
śivo kṣa[ha]rati lokān vai viṣṇuḥ pāti jagattrayam || 87 ||

brahmā sṛjati lokān vai evamādikriyādikam |
yadyadasti purāṇeṣu yadyadvedeṣu nirṇayam || 88 ||

sarvopaniṣadāṃ bhāvaṃ sarvaṃ śaśaviṣāṇavat |

	he svāmin bhavadanugrahamahimnā śiṣṭapūrṇasvarūpo'smītyatra na hi saṃśayo'sti | purā anubhūtasvāntarbāhyavijṛmbhitadṛgdṛśyakalanānvitavyaṣṭisamaṣṭivibhāgeddhasvāvidyāpadatatkāryaprapañcasya

p. 98) kā gatiḥ ityākāṅkṣāyāṃ svājñadṛṣṭyā satyatvena svajñadṛṣṭyā mithyātvena anubhūto'pi paramārthadṛṣṭyā śaśaviṣāṇavat niṣpratiyogikābhāvarūpa evetyāha- idamiti || 75 || svātiriktāpahnavaḥ uktaḥ | punarapahnotavyaviṣayābhāvāt | uttaragranthārambhaḥ kimartham ityākāṅkṣāyāṃ, satyamapahnavaviṣayo na vidyate tasya śaśaviṣāṇavat avastutvāt | tathāpi idaṃ prapañcam ityādi sarvaṃ śaśaviṣāṇavat ityantaśrutivṛttyarthatayā uttaragranthārambho yujyate ityāha- bhūmirityādi || 76-83 || tūlāntaḥkaraṇāvidyāyā yadanekatvaṃ tadanekajīvasadbhāvaprayojakam, ādiśabdena ekatvānekatvahetvavidyādvayasya vyāvahārikādidṛṣṭyā mithyātvam || 84-88 || paramārthadṛṣṭyā brahmātiriktasya śaśaviṣāṇavat avastutvaṃ yujyata evetyarthaḥ ||

saṃkalpādirūpaṃ mana eva sarvānarthahetuḥ

deho'hamiti saṃkalpaṃ tadantaḥkaraṇaṃ smṛtam || 89 ||

deho'hamiti saṃkalpo mahatsaṃsāra ucyate |
deho'hamiti saṃkalpaṃ tadbandhamiti cocyate || 90 ||

deho'hamiti saṃkalpaṃ tadduḥkhamiti cocyate |
deho'hamiti yajjñānaṃ tadeva narakaṃ smṛtam || 91 ||

deho'hamiti saṃkalpaṃ jagat sarvamitīryate |
deho'hamiti saṃkalpo hṛdayagranthirīritaḥ || 92 ||

deho'hamiti yajjñānaṃ tadevājñānamucyate |
deho'hamiti yajjñānaṃ tadasadbhāvameva ca || 93 ||

p. 99) deho'hamiti yā buddhiḥ sā cāvidyeti bhaṇyate |
deho'hamiti yajjñānaṃ tadeva dvaitamucyate || 94 ||

deho'hamiti saṃkalpaḥ satyajīvaḥ sa eva hi |
deho'hamiti yajjñānaṃ paricchinnamitīritam || 95 ||

deho'hamiti saṃkalpo mahāpāpamiti sphuṭam |
deho'hamiti yā buddhistṛṣṇā doṣāmayaḥ kila |
yatkiṃcidapi saṃkalpaṃ tāpatrayamitīritam || 96 ||

kāmaṃ krodhaṃ bandhanaṃ sarvaduḥkhaṃ viśvaṃ doṣaṃ kālanānāsvarūpam |
yatkiṃcedaṃ sarvasaṃkalpajālaṃ tatkiṃcedaṃ mānasaṃ somya viddhi || 97 ||

mana eva jagat sarvaṃ mana eva mahāripuḥ |
mana eva hi saṃsāro mana eva jagattrayam || 98 ||

mana eva mahadduḥkhaṃ mana eva jarādikam |
mana eva hi kālaṃ ca mana eva malaṃ tathā || 99 ||

mana eva hi saṃkalpo mana eva hi jīvakaḥ |
mana eva hi cittaṃ ca mano'haṃkāra eva ca || 100 ||

mana eva mahabandhaṃ mano'ntaḥkaraṇaṃ ca tat |
mana eva hi bhūmiśca mana eva hi toyakam || 101 ||

mana eva hi tejaśca mana eva marunmahān |
mana eva hi cākāśaṃ mana eva hi śabdakam || 102 ||

p. 100) sparśaṃ rūpaṃ rasaṃ gandhaṃ kośāḥ pañca manobhavāḥ |
jāgratsvapnasuṣuptyādi manomayamitīritam || 103 ||

dikpālā vasavo rudrā ādityāśca manomayāḥ |
dṛśyaṃ jaḍaṃ dvandvajātamajñānaṃ mānasaṃ smṛtam || 104 ||

saṃkalpameva yatkiṃcit tattannāstīti niścinu |
nāsti nāsti jagat sarvaṃ guruśiṣyādikaṃ na hi || 105 ||

ityupaniṣat ||

svājñadṛṣṭiprasaktasvātiriktānarthanidānaṃ kim ityāśaṅkya sarvānarthahetuḥ saṃkalpa evetyāha- deha iti | saṃkalpamityādi vibhaktivyatyayaḥ || 89-96 || saṃkalpamūlaṃ kimityatra kāmam ityādi || 97-104 || svāvidyāpadatatkāryajātaṃ mana evetyarthaḥ | ityupaniṣacchabdaḥ adhyāyaparisamāptyarthaḥ || 105 ||

iti pañcamo'dhyāyaḥ || 5 ||

ṣaṣṭho'dhyāyaḥ

sarvasya saccidānandatvam

ṛbhuḥ-

sarvaṃ saccinmayaṃ viddhi sarvaṃ saccinmayaṃ tatam |
saccidānandamadvaitaṃ saccidānandamavyayam || 1 ||

saccidānandamātraṃ hi saccidānandamanyakam |
saccidānandarūpo'haṃ saccidānandameva kham || 2 ||

saccidānandameva tvaṃ saccidānandako'smyaham |

p. 101) yadyat svājñadṛṣṭivikalpitaṃ nāmarūpavikalpajālaṃ tattat svajñadṛṣṭyā saccidānandamayam | paramārthadṛṣṭyā brahmamātrātiriktaprasaktireva nāsti | yadi svājñādidṛṣṭyā asti nāstīti prasaktaṃ tadā tat asadeva | svātiriktāsadapahnavasiddhaṃ niṣpratiyogikabrahmamātramavaśiṣyate ityetatprapañcanāya ṣaṣṭhādhyāya ārabhyate- ṛbhuriti || 1-2 ||

sarvasya brahmatvam

na manobuddhyahaṃkāracittasaṃghātakā amī || 3 ||

na tvaṃ nāhaṃ na cānyaṃ vā sarvaṃ brahmaiva kevalam |
na vākyaṃ na padaṃ vedaṃ nākṣaraṃ na jaḍaṃ kvacit || 4 ||

na madhyaṃ nādi nāntaṃ vā na satyaṃ na nibandhanam |
na duḥkhaṃ na sukhaṃ bhāvaṃ na mayā prakṛtistathā || 5 ||

na dehaṃ na mukhaṃ ghrāṇaṃ na jihvā na ca tālunī |
na dantoṣṭhau lalāṭaṃ ca niśvāsocchvāsā eva ca || 6 ||

na svedamasthi māṃsaṃ ca na raktaṃ na ca mūtrakam |
na dūraṃ nāntikaṃ nāṅgaṃ nodaraṃ na kirīṭakam || 7 ||

na hastapādacalanaṃ na śāstraṃ na ca śāsanam |
na vettā vedanaṃ vedyaṃ na jāgratsvapnasuptayaḥ || 8 ||

turyātītaṃ na me kiṃcit sarvaṃ saccinmayaṃ tatam |
nādhyātmikaṃ nādhibhūtaṃ nādhidaivaṃ na māyikam || 9 ||

na viśvastaijasaḥ prājño virāṭsūtrātmakeśvarāḥ |
na gamāgamaceṣṭā ca na naṣṭaṃ na prayojanam || 10 ||

p. 102) tyājyaṃ grāhyaṃ na dūṣyaṃ vā hyamedhyāmedhyakaṃ tathā |
na pīnaṃ na kṛśaṃ kledaṃ na kālaṃ deśabhāṣaṇam || 11 ||

na sarvaṃ na bhayaṃ dvaitaṃ na vṛkṣatṛṇaparvatāḥ |
na dhyānaṃ yogasaṃsiddhirna brahmakṣatravaiśyakam || 12 ||

na pakṣī na mṛgo nāṅgī na lobho moha eva ca |
na mado na ca mātsaryaṃ kāmakrodhādayastathā || 13 ||

na strīśūdraviḍālādi bhakṣyabhojyādikaṃ ca yat |
na prauḍhahīnau nāstikyaṃ na vārtāvasaro'sti hi || 14 ||

na laukiko na loko vā na vyāpāro na mūḍhatā |
na bhoktā bhojanaṃ bhojyaṃ na mātṛmānameyakam || 15 ||

na śatrumitraputrādirna mātā na pitā svasā |
na janma na mṛtirbṛddhirna deho'hamiti bhramaḥ || 16 ||

na śūnyaṃ nāpi cāśūnyaṃ nāntaḥkaraṇasaṃsṛtiḥ |
na rātrirna divā naktaṃ na brahmā na hariḥ śivaḥ || 17 ||

na vārapakṣamāsādi vatsaraṃ na ca cañcalam |
na brahmaloko vaikuṇṭhaṃ na kailāso na cānyakaḥ || 18 ||

na svargaṃ na ca devendro nāgniloko na cāgnikaḥ |
na yamo yamaloko vā na lokā lokapālakāḥ || 19 ||

na bhūrbhuvaḥsvastrailokyaṃ na pātālaṃ na bhūtalam |
nāvidyā na ca vidyā ca na māyā prakṛtirjaḍā || 20 ||

p. 103) na sthiraṃ kṣaṇikaṃ nāśaṃ na gatirna ca dhāvanam |
na dhyātavyaṃ na me snānaṃ na mantro na japaḥ kvacit || 21 ||

na padārthaṃ na pūjārhaṃ nābhiṣekaṃ na cārcanam |
na puṣpaṃ na phalaṃ patraṃ gandhapuṣpādi dhūpakam || 22 ||

na stotraṃ na namaskāro na pradakṣiṇamaṇvapi |
na prārthanā pṛthagbhāvo na havirnāgnivandanam || 23 ||

na homo na ca karmāṇi na durvākyaṃ subhāṣaṇam |
na gāyatrī na vā saṃdhirna manasyaṃ na duḥsthitiḥ || 24 ||

na durāśā na duṣṭātmā na caṇḍālo na paulkasaḥ |
na duḥsahaṃ durālāpaṃ na kirāto na kaitavam || 25 ||

na pakṣapātaṃ pakṣaṃ vā na vibhūṣaṇataskarau |
na ca ḍambho ḍāmbhiko vā na hīno nādhiko naraḥ || 26 ||

naikaṃ dvayaṃ trayaṃ turyaṃ na mahattvaṃ na cālpatā |
na pūrṇaṃ na paricchinnaṃ na kāśī na brataṃ tapaḥ || 27 ||

na gotraṃ na kulaṃ sūtraṃ na vibhutvaṃ na śūnyatā |
na strī na yoṣinno vṛddhā na kanyā na vitantutā || 28 ||

na sūtakaṃ na jātaṃ vā nāntarmukhasuvibhramaḥ |
na mahāvākyamaikyaṃ vā nāṇimādivibhūtayaḥ || 29 ||

sarvaṃ caitanyamātratvāt sarvadoṣaḥ sadā na hi |
sarvaṃ sanmātrarūpatvāt saccidānandamātrakam || 30 ||

p. 104) brahmaiva sarvaṃ nānyo'sti tadahaṃ tadahaṃ tathā |
tadevāhaṃ tadevāhaṃ brahmaivāhaṃ sanātanam || 31 ||

brahmaivāhaṃ na saṃsārī brahmaivāhaṃ na me manaḥ |
brahmaivāhaṃ na me buddhirbrahmaivāhaṃ na cendriyam || 32 ||

brahmaivāhaṃ na deho'haṃ brahmaivāhaṃ na gocaraḥ |
brahmaivāhaṃ na jīvo'haṃ brahmaivāhaṃ na bhedabhūḥ || 33 ||

brahmaivāhaṃ jaḍo nāhamahaṃ brahma na me mṛtiḥ |
brahmaivāhaṃ na ca prāṇo brahmaivāhaṃ parātparaḥ || 34 ||

idam brahma paraṃ brahma satyaṃ brahma prabhurhi saḥ |
kālo brahma kalā brahma sukhaṃ brahma svayaṃprabham || 35 ||

ekaṃ brahma dvayaṃ brahma moho brahma śamādikam |
doṣo brahma guṇo brahma damaḥ śāntaṃ vibhuḥ prabhuḥ || 36 ||

loko brahma gururbrahma śiṣyo brahma sadāśivaḥ |
pūrvaṃ brahma paraṃ brahma śuddhaṃ brahma śubhāśubham || 37 ||

jīva eva sadā brahma saccidānandamasmyaham |
sarvaṃ brahmamayaṃ proktaṃ sarvaṃ brahmamayaṃ jagat || 38 ||

svayaṃ brahma na saṃdehaḥ svasmādanyanna kiṃcana |
sarvamātmaiva śuddhātmā sarvaṃ cinmātramadvayam || 39 ||

nityanirmalarūpātmā hyātmano'nyanna kiṃcana |

	saccidānandabrahmātirekeṇa na mana ityādi || 3-29 || na manobuddhyahaṃkāra ityārabhya aṇimādivibhūtayaḥ ityantaṃ yadyat

p. 105) svājñadṛṣṭyāropitaṃ svajñadṛṣṭyā brahmātiriktaṃ netyapoditaṃ ca tattat sarvamityādi || 30-39 ||

brahmaṇaḥ niṣpratiyogikasvamātratvam

aṇumātralasadrūpamaṇumātramidaṃ jagat || 40 ||

aṇumātraṃ śarīraṃ vā hyaṇumātramasatyakam |
aṇumātramacintyaṃ vā cintyaṃ vā hyaṇumātrakam || 41 ||

brahmaiva sarvaṃ cinmātraṃ brahmamātraṃ jagattrayam |
ānandaṃ paramānandamanyat kiṃcinna kiṃcana || 42 ||

caitanyamātramoṃkāraṃ brahmaiva sakalaṃ svayam |
ahameva jagat sarvamahameva paraṃ padam || 43 ||

ahameva guṇātītaḥ ahameva parātparaḥ |
ahameva paraṃ brahma ahameva gurorguruḥ || 44 ||

ahamevākhilādhāra ahameva sukhātsukham |
ātmano'nyajjagannāsti ātmano'nyat sukhaṃ na ca || 45 ||

ātmano'nyā gatirnāsti sarvamātmamayaṃ jagat |
ātmano'nyannahi kvāpi ātmano'nyat tṛṇaṃ na hi || 46 ||

ātmano'nyat tuṣaṃ nāsti sarvamātmayaṃ jagat |
brahmamātramidaṃ sarvaṃ brahmamātramasanna hi || 47 ||

brahmamātraṃ śrutaṃ sarvaṃ svayaṃ brahmaiva kevalam |
brahmamātraṃ vṛtaṃ sarvaṃ brahmamātraṃ rasaṃ sukham || 48 ||

p. 106) brahmamātraṃ cidākāśaṃ saccidānandamadvayam |
brahmaṇo'nyatarannāsti brahmaṇo'nyajjaganna ca || 49 ||

brahmaṇo'nyadahaṃ nāsti brahmaṇo'nyat phalaṃ na hi |
brahmaṇo'nyattṛṇaṃ nāsti brahmaṇo'nyat padaṃ na hi || 50 ||

brahmaṇo'nyadgururnāsti brahmaṇo'nyadasadvapuḥ |
brahmaṇo'nyanna cāhaṃtā tvattedante na hi kvacit || 51 ||

svayaṃ brahmātmakaṃ viddhi svasmādanyanna kiṃcana |
yatkiṃcid dṛśyate loke yatkiṃcidbhāṣyate janaiḥ || 52 ||

yatkiṃcid bhujyate kvāpi tat sarvamasadeva hi |
kartṛbhedaṃ kriyābhedaṃ guṇabhedaṃ rasādikam || 53 ||

liṅgabhedamidaṃ sarvamasadeva sadā sukham |
kālabhedaṃ deśabhedaṃ vastubhedaṃ jayājayam || 54 ||

yadyadbhedaṃ ca tat sarvamasadeva hi kevalam |
asadantaḥkaraṇakamasadevendriyādikam || 55 ||

asat prāṇādikaṃ sarvaṃ saṃghātamasadātmakam |
asatyaṃ pañcakośākhyamasatyaṃ pañca devatāḥ || 56 ||

asatyaṃ saḍvikārādi asatyamarivargakam |
asatyaṃ ṣaḍṛtuścaiva asatyaṃ ṣaḍrasastathā || 57 ||

saccidānandamātro'hamanutpannamidaṃ jagat |
ātmaivāhaṃ paraṃ satyaṃ nānyāḥ saṃsāradṛṣṭayaḥ || 58 ||

p. 107) satyamānandarūpo'haṃ cidghanānandavigrahaḥ |
ahameva parānandaḥ ahameva parātparaḥ || 59 ||

jñānākāramidaṃ sarvaṃ jñānānando'hamadvayaḥ |
sarvaprakāśarūpo'haṃ sarvābhāvasvarūpakaḥ || 60 ||

ahameva sadā bhāmītyevaṃrūpaṃ kuto'pyasat |
tvamityevaṃ paraṃ brahma cinmayānandarūpavān || 61 ||

cidākāraṃ cidākāśaṃ cideva paramaṃ sukham |
ātmaivāhamasannāhaṃ kūṭastho'haṃ guruḥ paraḥ || 62 ||

saccidānandamātro'hamanutpannamidaṃ jagat |
kālaṃ nāsti jagannāsti māyāprakṛtireva na || 63 ||

ahameva hariḥ sākṣādahameva sadāśivaḥ |
śuddhacaitanyabhāvo'haṃ śuddhasattvānubhāvanaḥ || 64 ||

advayānandamātro'haṃ cidghanaikaraso'smyaham |
sarvaṃ brahmaiva satataṃ sarvaṃ brahmaiva kevalam || 65 ||

sarvaṃ brahmaiva satataṃ sarvaṃ brahmaiva cetanam |
sarvāntaryāmirūpo'haṃ sarvasākṣitvalakṣaṇaḥ || 66 ||

paramātmā paraṃ jyotiḥ paraṃ dhāma parā gatiḥ |
sarvavedāntasāro'haṃ sarvaśāstrasuniścitaḥ || 67 ||

yogānandasvarūpo'haṃ mukhyānandamahodayaḥ |
sarvajñānaprakāśo'smi mukhyavijñānavigrahaḥ || 68 ||

p. 108) turyāturyaprakāśo'smi turyāturyādivarjitaḥ |
cidakṣaro'haṃ satyo'haṃ vāsudevo'jaro'maraḥ || 69 ||

ahaṃ brahma cidākāśaṃ nityaṃ brahma nirañjanam |
śuddhaṃ buddhaṃ sadāmuktamanāmakamarūpakam || 70 ||

saccidānandarūpo'hamanutpannamidaṃ jagat |
satyāsatyaṃ jagannāsti saṃkalpakalanādikam || 71 ||

nityānandamayaṃ brahma kevalaṃ sarvadā svayam |
anantamavyayaṃ śāntamekarūpamanāmayam || 72 ||

	svājñadṛṣṭivikalpitabrahmātiriktajagataḥ paricchinnatāṃ tadadhiṣṭhānabrahmaṇaḥ trividhaparicchedaśūnyatāṃ vastuto brahmātiriktasāmānyasya apahnavatāṃ brahmaṇo niṣpratiyogikasvamātratāṃ cāha- aṇumātreti || 40-46 || jagat svājña-vikalpitāsatprapañcāpahnavasiddhaniṣpratiyogikabrahmamātramityāha- brahmamātramidamiti || 47 || uktārthameva prapañcayati- brahmamātraṃ śrutam ityādinā || 48-71 || kevalaṃ brahma kīdṛśam ityata āha- anantamiti || 72 ||

svātiriktaprapañcasyāsattvam

matto'nyadasti cenmithyā yathā marumarīcikā |
vandhyākumāravacane bhītiścedasti kiṃcana || 73 ||

śaśaśṛṅgeṇa nāgendro mṛtaścejjagadasti tat |
mṛgatṛṣṇājalaṃ pītvā tṛptaścedastvidaṃ jagat || 74 ||

naraśṛṅgeṇa naṣṭaścet kaścidastvidameva hi |
gandharvanagare satye jagadbhavati sarvadā || 75 ||

p. 109) gagane nīlimāsatye jagat satyaṃ bhaviṣyati |
śuktikārajataṃ satyaṃ bhūṣaṇaṃ cejjagadbhavet || 76 ||

rajjusarpeṇa daṣṭaścennaro bhavatu saṃsṛtiḥ |
jātarūpeṇa bāṇena jvālāgnau nāśite jagat || 77 ||

vindhyāṭavyāṃ pāyasānnamasti cejjagadudbhavaḥ |
rambhāstambhena kāṣṭhena pāke siddhe jagadbhavet || 78 ||

sadyaḥkumārikārūpaiḥ pāke siddhe jagadbhavet |
citrasthadīpaistamaso nāśaścedastvidaṃ jagat || 79 ||

māsāt pūrvaṃ mṛto martyo hyāgataścejjagadbhavet |
takraṃ kṣīrasvarūpaṃ cet kvacinnityaṃ jagadbhavet || 80 ||

gostanādudbhavaṃ kṣīraṃ punarāropaṇe jagat |
bhūrajo'bdhau samutpanne jagadbhavatu sarvadā || 81 ||

kūrmaromṇā gaje baddhe jagadastu tadotkaṭe |
nālasthatantunā meruścālitaścejjagadbhavet || 82 ||

taraṅgamālayā sindhurbaddhaścedastvidaṃ jagat |
agneradhaścejjvalanaṃ jagadbhavatu sarvadā || 83 ||

jvālāvahniḥ śītalaścedastirūpamidaṃ jagat |
jvālāgnimaṇḍale padmavṛddhiścejjagadastvidam || 84 ||

p. 110) mahacchailendranīlaṃ vā saṃbhaveccedidaṃ jagat |
merurāgatya padmākṣe sthitaścetastvidaṃ jagat || 85 ||

nigiriścedbhṛṅgasūnurmeruścalavadastvidam |
maśakena hate siṃhe jagat satyaṃ tadāstu te || 86 ||

aṇukoṭaravistīrṇe trailokyaṃ cejjagadbhavet |
tṛṇānalaśca nityaścet kṣaṇikaṃ yajjagadbhavet || 87 ||

svapnadṛṣṭaṃ ca yadvastu jāgare cejjagadbhavaḥ |
nadīvego niścalaścet kenāpīdaṃ bhavejjagat || 88 ||

kṣudhitasyāgnibhojyaścennimiṣaṃ kalpitaṃ bhavet |
jātyandhai ratnaviṣayaḥ sujñātaścejjagat sadā || 89 ||

napuṃsakakumārasya strīsukhaṃ cedbhavejjagat |
nirmitaḥ śaśaśṛṅgeṇa rathaścejjagadasti tat || 90 ||

sadyojātā tu yā kanyā bhogayogyā bhavejjagat |
vandhyā garbhāptatatsaukhyaṃ jñātā cedastvidaṃ jagat || 91 ||

kāko vā haṃsavadgacchejjagadbhavatu niścalam |
mahākharo vā siṃhena yudhyate cejjagatsthitiḥ || 92 ||

mahākharo gajagatiṃ gataścejjagadastu tat |
saṃpūrṇacandrasūryaścejjagadbhātu svayaṃ jaḍam || 93 ||

p. 111) candrasūryādikau tyaktvā rāhuśced dṛśyate jagat |
bhṛṣṭabījasamutpannavṛddhiścejjagadastu sat || 94 ||

daridro dhanikānāṃ ca sukhaṃ bhuṅkte tadā jagat |
śunāṃ vīryeṇa siṃhastu jito yadi jagattadā || 95 ||

jñānino hṛdayaṃ mūḍhairjñātaṃ cet kalpanaṃ tadā |
śvānena sāgare pīte niḥśeṣeṇa mano bhavet || 96 ||

śuddhākāśo manuṣyeṣu patitaścettadā jagat |
bhūmau vā patitaṃ vyoma vyomapuṣpaṃ sugandhakam || 97 ||

śuddhākāśe vane jāte calite tu sadā jagat |
kevale darpaṇe nāsti pratibimbaṃ tadā jagat || 98 ||

ajakukṣau jagannāsti hyātmakukṣau jaganna hi |
sarvathā bhedakalanaṃ dvaitādvaitaṃ na vidyate || 99 ||

māyākāryamidaṃ bhedamasti cedbrahmabhāvanam |
deho'hamiti duḥkhaṃ cedbrahmāhamiti niścayaḥ || 100 ||

hṛdayagranthirastitve chedane brahmacakrakam |
saṃśaye samanuprāpte brahmaniścayamāpnuyāt || 101 ||

anātmarūpacoraścedātmaratnasya rakṣaṇam |
nityānandamayaṃ brahma kevalaṃ sarvadā svayam || 102 ||

	paricchittivyayakalanānekatvaprasaktau anantamityādyanekaviśeṣaṇaviśiṣṭaṃ na vastutaḥ tadasti | yadi madatirekeṇa anantamityādiviśeṣaṇamastīti bhrāntiḥ

p. 112) tadā tadasadevetyāha- matta iti | kathaṃ punaḥ svātiriktaprapañcasya atyantāsattvaṃ, ghaṭo'sti paṭo'sti ityādyanekadhā pratīyamānatvāt, ityāśaṅkāyāṃ astyastīti pratīteḥ sanmātratvena niṣpratiyogikabrahmamātratvāt tatra svātiriktaprapañcāsaṃbhave bandhyākumāravacane bhītiścedastvidaṃ jagat ityādyanekadṛṣṭāntena viśvasattvaṃ viḍambayan viśvāsattvaṃ prakaṭayati- vandhyetyādinā || 73-78 || astvidaṃ jagat paramārthadṛṣṭyetyarthaḥ || 79-85 || paryantaparvato nigiriḥ || 86-88 || agnibhojyaḥ, visargalopaḥ || 89-90 || sadyaḥkumārikā, sadyojātā tu yā kanyā, ityatra punaruktiḥ syāditi cet na; śabdabhedavat arthabhedasaṃbhavāt | tat kathamityatra sadyaḥkumārikārūpaiḥ vaidyaśāstrakhyātauṣadhiviśeṣaiḥ indhanaiḥ pāke siddhe ityuktyā pākasādhanendhanaviśeṣo dyotyate, kumārikāyā jalapūritatvena nityaklinnatvāt, tasyā gāḍhāgnimadhyapātitatve'pyagniśāntikaratvāt na punarvacaḥ, tayā pākāsaṃbhavāt || 91-98 || yadevamapahnotavyaṃ vyaṣṭyādikalanāviśiṣṭaṃ jagat tatra samaṣṭijagadajakukṣau vyaṣṭijagajjīvakukṣau vartate, nahyabhāvapadamarhatītyāśaṅkya kālatraye'pi na vidyata ityāha- ajeti | svājñasvajñadṛṣṭivibhātadvaitādvaitavṛtterapi paramārthadṛṣṭyāsaṃbhavāt svamātre svātiriktakalanā nāstyevetyarthaḥ || 99 || tathāpi brahmānusaṃdhānamajasraṃ kartavyamityata āha- māyeti | bhedaḥ svājñadṛṣṭyā asti cet svajñadṛṣṭyā idaṃ jagat na bhavati kiṃ tu brahmaivedamiti brahmabhāvanaṃ kartavyaṃ, na hi paramārthadṛṣṭeḥ tadubhayamastītyarthaḥ | tathā deho'hamiti || 100-101 || vastutaḥ nityānandamayaṃ brahma kevalaṃ niṣpratiyogikabrahmamātramityarthaḥ || 102 ||

ahaṃ brahmeti bhāvanāvidhiḥ

evamādisudṛṣṭāntaiḥ sādhitaṃ brahmamātrakam |
brahmaiva sarvabhavanaṃ bhuvanaṃ nāma saṃtyaja || 103 ||

p. 113) ahaṃ brahmeti niścitya ahaṃbhāvaṃ parityajya |
sarvameva layaṃ yāti suptahastasthapuṣpavat || 104 ||

na deho na ca karmāṇi sarvaṃ brahmaiva kevalam |
na bhūtaṃ na ca kāryaṃ ca na cāvasthācatuṣṭayam || 105 ||

lakṣaṇātrayavijñānaṃ sarvaṃ brahmaiva kevalam |
sarvavyāpāramutsṛjya hyahaṃ brahmeti bhāvaya || 106 ||

ahaṃ brahma na saṃdeho hyahaṃ brahma cidātmakam |
saccidānandamātro'hamiti niścitya tattyaja || 107 ||

evamādi iti | asyāmupaniṣadi-

cinmātrameva cinmātramakhaṇḍaikarasaṃ rasam |
sarvavarjitacinmātraṃ brahmamātramasanna hi ||

ityādiśrutyā yo'rtho'bhihitaḥ svātiriktasarvāpahnavasiddhaṃ svamātramiti tametamarthaṃ durvijñeyaṃ manyamānā śrutiḥ svājñānaṃ yathāyathā svātiriktāpahnavasiddhabrahmamātrajñānamudeti tathātathā bhūyobhūyaḥ prasaṅgamāpādyāpādya svaprakaṭitasiddhāntārthameva ādau tejobinduparam ityārabhya pañcadaśāṅgajñānayogasahitamavāntaravākyena akhaṇḍaśuddhacaitanyayāthātmyaṃ pratipādya, svājñadṛṣṭyā dṛśyajaḍajagadgatabhāvādisvargāntakhaṇḍatāprasaktau kumāraśivasaṃvādarūpeṇa akhaṇḍaikarasaṃ dṛśyam ityādi akhaṇḍaikarasaṃ sarvam ityantena akhaṇḍaikarasaḥ svayam iti prakaṭayitvā, atha punaridamayamityādiśabdavācyabhāvānāmacinmātratvaprasaktau yatkiṃcidyanna kiṃcicca sarvaṃ cinmātrameva hi ityādinā niṣpratiyogikacinmātrasvarūpamabhidhāya, brahmadvayaprasaktau akhaṇḍaikarasaṃ brahma cinmātrānna hi bhidyate ityakhaṇḍaikarasacinmātrayorekārthaparyavasānatvamuktvā, atha paraṃ brahmasvarūpo'ham ityārabhya svātiriktaprapañcāsattvaprakaṭanapūrvakaṃ svānubhavaṃ prakāśayitvā, ahaṃ brahmāsmītimantramāhātmyapraśaṃsāpūrvakaṃ mumukṣukoṭigrāhyatāṃ pratipādya, tadāntarālikamukhyaphalaprakaṭanavyājena cidātmāhaṃ parātmāham ityupakramya

p. 114) svasvarūpe svayaṃ svapsye sa jīvanmukta ucyate ityantena nirviśeṣajñānāntarālikaphalajīvanmuktim, brahmabhūtaḥ prāśāntātmā ityupakramya svātmānameva modasva vaidehī muktigo bhava ityantena brahmamātrajñānamukhyaphalaṃ tanmātrāvasthānalakṣaṇavidehamuktiṃ ca prakaṭayitvā, punarākhyāyikāntaramavalambya sarvavāco'vadhirbrahma ityādinā svātmayāthātmyam, anātmeti prasaṅgo vā ityādinā anātmayāthātmyaṃ ca pratipādya ātmānātmetyuktyā tayorekatvānekatvaprasaktasaveśeṣatāṃ ekābhāve dvitīyaṃ na ityādisāpekṣaśrutiyuktibhiḥ śithilayitvā, kvacit kvacit svātiriktayoḥ ātmānātmanoḥ śabdabhedena arthabhedena ca svamātrasya niṣpratiyogikabhāvarūpatvaṃ svātiriktasāmānyasya idaṃ prapañcaṃ nāstyeva ityādinā vandhyākumāravacane bhītiścet ityādisvātiriktajagadatyantāsaṃbhavadṛṣṭāntena ca śaśaviṣāṇavat atyantābhāvarūpatāṃ ca vibhaktiliṅgapuruṣavyatyayamapyanādareṇa vismṛtyeva mahatā vegena yata iyaṃ śrutiḥ jāmitāmantareṇa pravṛttā ato'smin vedāntaśāstrasamudāye na hi punaruktiśaṅkā seddhuṃ pārayati | svājñādimātrabhāvamāpannāyāḥ śruteḥ svasaṃtānasvātiriktamasti nāstīti vibhramāpahnavasiddhaniṣpratiyogikabrahmamātrāvaśeṣalakṣaṇa-vikalebarakaivalyasāmrājyapaṭṭābhiṣecanakarmavyagratvāt sadbhiratra na ko'pi doṣaḥ smartavyaḥ | prakṛte tu yadyajño'si tadā ādau brahmaiva sarvabhavanaṃ sarvādhikaraṇaṃ vicintaya | tataḥ svādhiṣṭheyanirūpitamadhiṣṭhānabhramamapi bhuvanaṃ saṃtyaja || 103 || sarvam ahaṃ brahmeti niścitya tatratyāhaṃbhāvaṃ parityajya | yadyevamudyogavānasi tadā yadyat svavikalpitaṃ tattat sarvameva || 104 || tadānīṃ na deha ityādi || 105 || jahadādi lakṣaṇā | ādau sarvavyāpāram || 106 || tanniścayamapi saṃtyaja, tadvṛtterapi svātiriktatayā tyājyatvāt | tathā coktam-

tasmin kāle videhotidehasmaraṇavarjitaḥ |
īṣanmātraṃ smṛtaṃ cedyastadā sarvasamanvitaḥ ||

iti || 107 ||

p. 115) 			śāstrasaṃpradāyavidhiḥ

śāṃkarīyaṃ mahāśāstraṃ na deyaṃ yasya kasyacit |
nāstikāya kṛtaghnāya durvṛttāya durātmane || 108 ||

gurubhaktivuśuddhāntaḥkaraṇāya mahātmane |
samyak parīkṣya dātavyaṃ māsaṃ ṣāṇmāsavatsaram || 109 ||

sarvopaniṣadabhyāsaṃ dūratastyajya sādaram |
tejobindūpaniṣadamabhyaset sarvadā mudā || 110 ||

sakṛdabhyāsamātreṇa brahmaiva bhavati svayam |
brahmaiva bhavati svayamityupaniṣat || 111 ||

	śāstrasaṃpradāyārthaṃ prakaṭayan upasaṃharati- śāṃkarīyamiti | kasya vā na deyaṃ kasya vā deyaṃ ityata āha- nāstīti || 108-110 || evaṃ gurumukhāt labdhavidyo mumukṣuḥ sarvopaniṣadabhyāsaṃ [tyajet] | sarvaṃ parityajya etadabhyāsena kimityata āha- sakṛditi | sakṛcchravaṇapaṭhanamātrato vidvān sarvāpahnavasiddhaniṣpratiyogikabrahmamātramavaśiṣyata ityarthaḥ | ityupaniṣacchabdaḥ tejobindūpaniṣatsamāptyarthaḥ || 111 ||

iti ṣaṣṭho'dhyāyaḥ || 6 ||

śrīvāsudevendraśiṣyopaniṣadbrahmayoginā |
likhitaṃ syādvivaraṇaṃ tejobindoḥ sphuṭaṃ laghu ||
tejobindūpaniṣado vyākhyānagranthavistaraḥ |
catuṣpañcāśadadhikaśatānāṃ saptakaṃ smṛtaḥ ||

itīśādyaṣṭottaraśatopaniṣacchāstravivaraṇe saptatriṃśatsaṃkhyāpūrakaṃ tejobindūpaniṣadvivaraṇaṃ saṃpūrṇam



###########   END OF FILE  #######