####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00059
Uniform title: vyomavyāpistava
Main title: vyomavyāpistava with the commentary laghuṭīkā
Author : bhaṭṭarāmakaṇṭha
Commentator : vedajñāna
Manuscript : IFP transcript T0128 which itself is copied from a paper manuscript of vyomavyaapistavam belonging to tiruvavaduthurai adheenam. tiruvavaduthurai

Description: 



Notes: 
Data entered by the staff of Muktabodha under the supervision of Mark S. G. Dyczkowski.

Revision 0 February 13, 2009

Internet publisher : Muktabodha Indological Research Institute
Publication year : 
Publication city : 
Publication country : India
####################################################


vyomavyāpistavaḥ




 37) vyomavyāpistavam 

|| śrībhaṭṭāraka praṇītaṃ vyomavyāpistavam ||

|| śrīvedajñāna racita laghuṭippaṇīyutam ||

kapola syandi dānaugha lolākeli samākulam |
cirācalamudaṃ vande cirācalagajānanam || 1 ||

ādau darśitamāśumuktidatayā hastena cālambinā
viśvāsaṃtviha sābhayena gamitaṃ satyāvataṃ sāgninā ||
indraṃ bhaḍḍamarū svanena mahatā saṃghena taṃ yatpunasta-
tsauvarṇa sabhāpate khatunaśśrīmatpadāṃbhoruham || 2 ||

guruṇā rāmakaṇṭhena kṛtasya śiśu bodhinīm |
vyomavyāpistavasyaikāṃ laghuṭīkāṃ samārabhe || 3 ||

atra hi etatstotrapadāni viduṣāṃ sammativacanapradarśanamātreṇa spaṣṭā 
bhavanti | tādṛśa vacanāni sarvāṇi pratyāryādaśakaṃ ekayāhelayā 
p. 2) tattadghaṭakānteṣu bṛhaṭṭīkāyāṃ krameṇa sammatiṃ 
darśayiṣyāmaḥ |
idānīntu śiśu bodhāya anvayamātra pradarśana mātratayā 
diṅmātrameva tāni stotra padāni vyākhyāyante | tathā hi 
ihatāvadanavarata vighṛta śivāgama svarṇa dāma kaṇṭhaḥ rāmakaṇṭho 
nāma deśikaṃ puṃgavaḥ rurugīta nava nābhamaṇḍalavartiṣu 
madhyādīśānteṣu nava pada samāhārātmakeṣu navakamala pīṭheṣu 
sakalapāśa jāla hanana karaṇabhūtasya acintya mahimākārasya 
sāṣṭaṣaṣṭitriśata varṇātmaka vyomavyāpimantra rājasya 
avayavabhūtānāṃ ekāśīti saṃkhyakānāṃ padānāṃ pūjanāya 
pareṣāmapi tadupāsakānāṃ tādṛśa pūjā siddhaye paramaśiva 
vācakatva sphorakatayā pratipadaṃ ekaikayā āryayā vyomavyāpistava 
nāmakaṃ stuti bandhamāracayati oṃkāravācyamityādina 
navatisaṃkhyābhiḥ āryābhiḥ |

	atredaṃ boddhavyam | ruruvarṇitaṃ navanābhamekaṃ maṇḍalaṃ 
tanmadhye madhyakarṇikaṃ aṣṭadalayuktaṃ kamalaṃ ekapīṭhaṃ 
tatpūrvādīśānāntā sudikṣu tādṛśaṃ kamalaṃ ekamekaṃ evaṃ 
navakamalapīṭhāni bhavanti | tatra kamalapīṭhe karṇikādīśāna dalānteṣu 
navapadeṣu mantrarājasya oṃkārādīni nava padāni krameṇa 
pūjanīyānīti | tatpūjāyāṃ āryānavakasya krameṇa viniyogaḥ evaṃ 
pūrvādīśāntakamalapīṭheṣvapi pratipīṭhaṃ ekaikamāryādaśakaṃ 
viniyojyam | evaṃ navati saṃkhyānāṃ āryāṇāṃ upayogaḥ | 

evaṃ navanābhamaṇḍalasvarūpaṃ kalottarādau varṇitam | tadyathā -

athācāryābhiṣekārthaṃ navanābhaṃ vivartayet |
kāmyānāmapi sarveṣāṃ navanābhaṃ phalapradam || 4 ||

mataṃge -

anyadguhyatamaṃ vakṣye kramādaśraṃ samaṃ śubham |
vibhajya saptabhirbhāgairmadhye padmaṃ prakalpayet || 5 ||

dvātriṃśadaṅgulasamaṃ suvibhaktantu pūrvavat |
p. 4) bhāgamekaṃ parityajya dikṣvaṣṭasu yathākramam || 6 ||

madhyāṃbuja pramāṇāni padānyaṣṭau samālikhet |
caturdikṣudvayaṃ bhāgaṃ aṣṭadvāramathoditaiḥ || 7 ||

rajobhiḥ pūrayet samyagyathābhavati śobhanam |
ekāśītipadaṃ devaṃ nava parvoktidarśanāt || 8 ||

pūjayettantramantrajñaśśiva vaktokti vartmanā |
39) tatsvarūpaṃ kālottare spaṣṭamuktam | 
madhye tu kamalaṃ śuklaṃ pītantatpūrvagocare || 9 ||

āgneryāṃ raktavarṇantu nīlabjaṃ dakṣiṇesthitam |
naiṛtyāṃ pītavarṇantu śuklaṃ varuṇadiksthitam || 10 ||

ādhūmraṃ vāyukoṇe tu raktapītaṃ tathottare |
īśāne mauktikaprakhyaṃ śuklaṃ vā dik sthitaṃ nava || 11 ||

p. 5) padmarāgamathovāpi raktagauramathāpi vā |
vyomavyāpi śivasyaiva navādhvaravidhauhitam || 12 ||

navanābhaṃ samākhyātaṃ prāsādākhya śivasya tu |
madhyapadme śivaḥ pūjyaḥ lokeśāśca pareṣu ca || 13 ||

astrāṇi bāhya vīdhau tu bhaktyā saṃpūjayettataḥ |
nāsau liṃpati pāvena padmapatramivāṃbhasā || 14 ||

nitye naimittike kāmye kartavyaṃ bhuktimuktaye |

tathā trilocana śivācāryairapyuktam -

kṣetre saptapadīkṛte śaśipadaṃ vidhīssamantāptadaiḥ (vīthī-) 
dikṣvāṣṭasu ca paṃkajāni parito vīthīndubhāgena ca |
dvārāṇyaṣṭa kajāntara sthitapadairantasthito gātrakaṃ
padmaṃ syānnavanābhamaṇḍalamidaṃ śrīmanmataṃgoditam || 15 � ||

p. 6) 
	nanu sāṣṭaṣaṣṭi triśatākṣarādhika sahasrākṣara kayutākṣarādi 
mantreṣu vyomavyāpipadastuti bandhaḥ kimarthamācāryeṇa kṛtamiti 
cenmaivam | saptakoṭi mahāmantreṣvapi vyomavyāpi padamantresyaivamantra 
rājatayā āgameṣu mahāmahima varṇanāt | tathaiva kālottare mantrādhva 
paṭale mantra rājatvaṃ asyaiva varṇitam | tadyathā -

mantrādhvānamahaṃ vakṣye sāṃprataṃ śṛṇu ṣaṇmukha ||

saptakoṭi sahasrāṇi koṭilakṣaṃ tathaiva ca |
ayutāni ca ṣaṭtriṃśatsadyojātādvinirgatāḥ || 17 ||

viṃśatkoṭi sahasrāṇi koṭilakṣantathaiva ca |
niyutāni catuṣṣaṣṭiḥ vāmadevādviniṣkṛtāḥ || 18 ||

catvāriṃśatkakoṭistu sahasrāṇi tathaiva ca |
trikoṭi lakṣaṃ vai vatsa aghorācca vinirgatāḥ || 19 ||

p. 7) aśītikoṭi sāhasraṃ catasraṃ koṭi lakṣakam |
tatpuruṣādviniṣkrāntaṃ mantrabhedaṃ ṣaḍānana || 20 ||

kalpakoṭisahasrāṇi kalpakoṭiśatāni ca |
īśānasya mukhājjātaṃ anantaṃ mantrajālakam || 21 ||

īśānamukhaniṣkrāntaṃ mantrajātaṃ sudurlabham |
ekāśīti padaṃhyetattantrarājaṃtvanuttamam || 22 ||

triśataṃ piṣṭyadhikākṣaraṃ vyomavyāpīti saṃjñitam |
īśāna mūrdhni saṃjātaṃ vyomavyāpipadaṃ mahat || 23 ||

40) ekāśīti padammantraṃ sarvamantrottamottamam |
akṣarāṇāṃ śatatrayaṃ ṣaṣṭyadhikamanuttamam || 24 ||

arcane homakāle ca snānakāle japedguha |
pratiṣṭhā prokṣaṇekāle dīkṣākāle tu vai japet || 25 ||

p. 8) vasordhāre bhūmidāhe tathācodbhuta śāntike |
anāvṛṣṭau bhūmikaṃpe sarvotpātau tu vai japet || 26 ||

duḥsvapne durjana sparśe sakṛjjaptvāpramucyati |
īśānamantro vaivatsa vyomavyāpi vinirgataḥ || 27 ||

īśānamūrdhamantraistu makuṭādīṃśca pūjayet |

tatpuruṣavaktraja sahasrākṣaramantraja tatpuruṣamantrasya 
naivedyadhūpadīpādau upayogaḥ | aghoravaktraja ayutākṣara 
aghoramantrasya kaṭaka keyūrādau upayogaḥ | itthamīśānamukha jātatvāt 
vyomavyāpi padātmakatvāt mantrarājatvāt makuṭādi pūjopayogi īśāna 
mantrajanakatvācca aghoramukha janmavadbhyaḥ aṃgapūjopayogi mantra 
janakebhyaḥ sahasrākṣara ayutākṣara arbudākṣaramantrebhyassakāśāt 
sāṣṭaṣaṣṭi triśatākṣara vyomavyāpimantrasya sarvamantrottamottama 
varṇanāt 
p. 9) tatpadastutau rāmakaṇṭhācārya pravṛttiriti |
asya ca stavarājasya rauravānusāreṇa kṛtatvāt tatpāṭhāpekṣayāstava 
kartrā uttaratra aṣṭaṣaṣṭyadhika triśatākṣarātmakatvena mantrasya 
varṇitam | ataḥ kalottarādi pāṭhasiddha saṃkhyayā virodhaḥ | taduktaṃ 
raurave -

atha saṃkhyā śivasyoktā akṣarāṇāṃ śatatrayam || 28 ||

aṣṭaṣaṣṭyadhikaṃ śaṃbhorguhyamantraṃ vinirgatam |

mataṃge -

ekatraiva samastāni ekāśītipadāni  tu ||

aṣṭaṣaṣṭyadhikaṃ śaṃbhorvāmānāntu śatatrayam |

ityupodghātanirṇayaḥ ||

itthaṃ bhūtasya vyomavyāpimantrarājasya prathamapadastavaprakāraṃ 
prathamaṃ stauti oṃkāreti -

oṃkāravācyamādyaṃ śivamanavacchinna dṛkkriyopetam |
p. 10) pañca mahāpraṇava tanuṃ śreyodaṃnaumi sarvalokasya || 29 ||

ṭippaṇī - oṃkāravācyaṃ ādyaṃ śivaṃ naumi ityanvayaḥ |
anavacchinnābhyāṃ asaṃkucitābhyāṃ dṛkkriyābhyāṃ 
jñānakriyātmaka aiśvaryābhyāṃ upetaṃ yuktam | 
pañcamahāpraṇavāḥ pañcabrahmamantrāḥ tā eva tanuḥ yasya taṃ 
sarvalokasya nikhila jagataḥ śreyodaṃ bhuktimuktirūpasya śreyasaḥ 
puruṣārthasya sādhakaṃ śivaṃ ādyapadena (41) muktapadasya nirāsaḥ | 
asya śivasya oṃkāravācyatvaṃ prasiddhameva taṃ naumi stautītyarthaḥ | 
atra vācyabhūta śivastutyā vācakabhūtaṃ oṃkāra padameva stūyate 
vācya vācakayorabhedāt | evamuttaratra sarvatrāpi vācyastutyā vācaka 
padānāmeva stutikhagantavyā | dvitīya padastavamāha vyomavyāpakamiti -

vyomavyāpakamamitaṃ māyā pāśupāśanāśināthaṃ yat |
p. 11) vyāpnoti śaktibhiryastadvomavyāmavyāpine namastasmai || 2 ||

māyā paśupāśa rāśināthaṃ amitaṃ vyāpakaṃ yadvyoma tat yaḥ 
śaktibhiḥ vyāpnoti tasmai vyomavyāpine nama ityanvayaḥ | māyayā 
paśunā pāśarāśinā ca nāthaṃ sahitaṃ amitaṃ iyattārahitaṃ 
vyāpakaṃ vibhuyadvyoma ākāśaṃ bhūtapañcamaṃ dṛśyamāna 
sarvavastūnāmapi ākāśāntarhitatvāt asyapāvakatvaṃ sphaṭam | tat 
ākāśamapi yaḥ śivaḥ śaktibhiḥ vyāpnoti vyāpya tiṣṭhati tasmai 
tasyāpyākāśasya vyāpakāya tasmai vyomavyāpine namaḥ iti 
vyomavyāpnotīti vyutpatyā vyomavyāpi pada vācyāya namaḥ namaskāra 
ityarthaḥ ||

tṛtīyapadastavamāha tadvaditi -

tadvadvyāpakamamalaṃ vyomaparaṃ yasya niṣkalaṃ rūpam |
p. 12) sarvajñatādi tasmai namo'stu te vyomarūpāya || 3 ||

yasya paraṃ vyoma niṣkalaṃ sarvajñatādi rūpaṃ tadvat vyāpakaṃ 
amalaṃ tasmai vyomarūpāya namaḥ astu ityanvayaḥ | yasya śivasya vyoma 
paraṃ vyomnaḥ śakāśāt paraṃ bṛhat niṣkalaṃ kalārahitaṃ 
sarvajñatādi sarvakartṛtā nityatṛpti bodhādi svabhāvaṃ rūpaṃ vapuḥ | 
tadvat ākāśavyāpakaṃ vibhukamalaṃ nirmalaṃ tasmai śivāya 
vyomarūpāya vyomavat rūpaṃ yasya iti vyutpatyā vyomarūpa te tubhyaṃ 
namaḥ astvityarthaḥ ||

caturthapadastavamāha vyomeneti -

vyomenānyatsarvaṃ yadvadathastatvabhāvabhuvanāni |
paraparayacuttayākhyaṃ tatsarva vyāpinepi namaḥ || 4 ||

he parapara vyomena saha anyatsarvaṃ tvadadhaḥ yat tattva bhāvabhuvanāni  
śaktyākhyaṃ yattat sarvavyāpine namaḥ ityanvayaḥ |
p. 3) parapara parasmādapi paraḥ parātpara ityarthaḥ | śivasaṃbodhanametat 
vyomena akārānta vyoma śabdopyastīti anena naivā'vagamyate | sahārthe 
tṛtīyeyaṃ ākāśena saha anyatsarvaṃ itaradviśvaṃtvadathaḥ 
tvadvyāpyamityarthaḥ | yat yasmātkāraṇāt tatvabhāvabhuvanāni tatvāni 
ṣaṭtriṃśat bhāvāḥ pañcāśadbhuvanāni caturviṃśatyadhikādviśataṃ 
(42) etāni śaktyākhyaṃ tvacchaktirūpaṃ yatkāraṇāt tat tasmāt 
sarvavyāpine sarvaṃ vyāpnotīti vyutpatyā sarvavyāpi padavācyāya 
tubhyaṃ nama ityarthaḥ ||

pañcamapadastavamāha rāgāditi -

rāgādi doṣayogā'saṃbhavato anādikālasaṃsiddhāt |
yasya sadā śāntatvācchivatā tasmai namaśśivāyāpi || 5 ||

p. 14) 
	yasya rāgādi doṣa yogā saṃbhavataḥ anādi kāla saṃsiddhāt sadā 
śāntatvāt śivatā tasmai śivāya nama ityanvayaḥ | yasya śivasya rāgādi 
doṣa rahitaḥ anādikāla saṃsiddhāt bhāvapradhāno nirdeśaḥ siddhatvāt 
anāditvādevetyarthaḥ sadā śāntatvāt saumyatvācca śivatā śuddhatā 
tasmai śivāya namaḥ śivapadavācyāya namaḥ ityarthaḥ ||

ṣaṣṭhapadastavamāha antariti -

antaḥ pūrvākoṭiḥ prāthamyādatra janma kathitoyaḥ |
yasya kadācinnāsau śivasya tasmai namostvanantāya || 6 ||

	yasya śivasya yo'ntaḥ yo pūrvā koṭiḥ yo janmā kathitaḥ asau 
prāthamyāt kadācit na tasmai anantāya namaḥ astu ityanvayaḥ | antaḥ 
pradhvaṃsaḥ pūrvā koṭiḥ prāgabhāvaḥ janma kathitaḥ udbhavaḥ |
p. 15) ādimadhyānta varjita iti yāvat | kutaḥ prāthamyāt sarvakāryebhyaḥ 
pūrvavartitvādityarthaḥ | ādimadhyāntavataḥ tādṛśa pūrvavartitvaṃ 
nā'vagamyata iti bhāvaḥ | anantāya anantaśabdastu ādimadhyayorapi 
upalakṣukaḥ | na vidyate yasya iti vyutpatyā anantapadavācyāya nama 
ityarthaḥ ||

saptamapadastavamāha nātha-iti -

nāthassvāmīmitraṃ bandudyoktassanāstiyasyeva |
nityātsarvaiśvaryātkathitāttasmai namo stvanāthāya || 7 ||

svāmī mitraṃ banduśca nātha uktaḥ saḥ yasya nāstyeva nityātkathitāt 
sarvaisvaryāt hetoḥ tasmai anāthāya namostu ityanvayaḥ | śivasya 
śivāgama kathita sārvakālīna sarveśvaratvaguṇasatvāt asau 
svāmyādimānnabhavatītyarthaḥ | nāthāḥ svāmyādayaḥ yasya na 
vidyante iti vyutpatyā anāthapadavācyāya namo'stu ityarthaḥ ||

p. 16) aṣṭamapadastavamāha sṛṣṭyādīti -

sṛṣṭyādi kārya karaṇe nānyo yenāśrito hi sahakārī |
muktaśśivādimocyā namo'stu tasmaitvanāśritāyāpi || 8 ||

	yena sṛṣṭyādi kāryakaraṇe muktaḥ śivādimocyaḥ sahakārī anyo 
hi na āśritaḥ tasmai anāśritāya namaḥ astu ityanvayaḥ | yena śivena 
sṛṣṭyādi pañcakṛtyakaraṇe svānyaḥ kvacinmuktaḥ puruṣo vā sahakārī 
nā'śritaḥ tasmai anāśritapada vācyāya nama ityarthaḥ || 

943) navamapada stavamāha adhruvamiti -

adhruvametatprāyo vastu pumarthapradaṃ dhruvastena |
śaṃbhuḥ kathito yotra tu tasmai namo dhruvāyāstu || 9 ||

pumarthapradaṃ etadvastu prāyaḥ adhruvaṃ tena yaḥ śaṃbhuḥ nityaḥ 
dhruvaḥ kathitaḥ tasmai dhruvāya namaḥ astu ityanvayaḥ |
p. 17) puruṣārthapradaṃ etatparidṛśyamānaṃ kāminyādikaṃ vastu 
prāyaḥ niścayataḥ adhruvaṃ naśvarameva tena kāraṇena yaḥ śaṃbhuḥ 
sukhakaraḥ śivatākaraḥ nityaḥ nāśarahitaḥ śivāgama kathitaḥ tasmai 
dhruvapadavācyāya nama ityarthaḥ ||

atha navānāṃ padānāṃ pūjāprakāramāha padanavakamiti -

padanavakannavanābhe pañcatriṃśārṇametadatha pūjyam |
madhyastha pīṭhamadhya prāgādīśānta digdala niviṣṭam || 10 ||

pañcatriṃśārṇapadanavakaṃ etat navanābhe pūjyaṃ ityanvayaḥ | 
madhyakamalapīṭha navapadeṣu karṇikādīśānta daleṣu oṃkārādi 
navapadāni pūjyānītyarthaḥ ||

atha pūrvapīṭhapadanavakastuvamāha yo'sāvityādinā daśabhiḥ 
āryābhiḥ |
p. 18) tatra prathama padastavamāha yo'sāviti -

yo'sau sadāptaśāstro hitādi śāstāhyanāmayatvena |
bhavati narāṇāṃ dayayā parāya tasmai tu śāśvatāya namaḥ || 11 ||

sadāpta śāstraḥ yaḥ asau anāmayatvena dayayā narāṇāṃ hitādi śāstā 
bhavati tasmai parāya śaśvatāya nama ityanvayaḥ | sārvakālaṃ śāstreṣu 
vyāptaḥ yathārtha vādītyarthaḥ | āmayo rāgādiḥ tadrahitatvena hitādi 
ityādi śabdena ahitaṃ gṛhyate | hitā'hitopadeṣṭā ityarthaḥ | śasta 
anuśiṣṭau iti dhātorvyutpatyā śāśvata padavācyāya nama ityarthaḥ ||

dvitīya pada stavamāha yoga-iti -

yogassadāśiva vapu śaktistasthaḥ karoti sarvaṃ yat |
tena yasya pīṭhaṃ tasmai taptīṭha saṃsthitāya namaḥ || 12 ||

p. 19) sadāśiva vapuḥ śaktiḥ yogaḥ tatsthaḥ sarvaṃ karoti iti yat tat asya 
pīṭhaṃ tatpīṭha saṃsthitāya tasmai namaḥ ityanvayaḥ | sadāśivasya 
śarīrabhūtā śaktiḥ yogaśakti vācyā bhavati tatra sthitvā śivaḥ sarvaṃ 
kṛtyaṃ karotīti taccharīraṃ pīṭhamityucyate | tena yogarūpe pīṭhe sthitaḥ 
iti vyutpatyā yogapīṭha saṃsthita śabda vācyāya nama ityarthaḥ ||

tṛtīya padastavamāha nityamiti -

nityaṃ sadaiva yogaḥ proktaṃ vapurasti yasya no nāśaḥ |
śaktīnāmapi tasmai te nityaṃ yogine'pi namaḥ || 13 ||

yasya proktaṃ vapuḥ yogaḥ nityaṃ sadaiva asti yasya śaktīnāṃ nonāśaḥ 
(44) nityaṃ yogine tasmai nama ityanvayaḥ | nityaṃ yogaḥ śaktirasya astīti 
vyutpatyā nityaṃ yogipada vācyāya nama ityarthaḥ || 

p. 20) caturthapadastavamāha dhyānamiti -

dhyānañcittecchā tanmātreṇā'haraṇameva bhāvānām |
iti tatraptyai yasya dhyāna hārāya tubhyamapi namaḥ || 14 ||

yasya dhyānaṃ cittecchā tanmātreṇaiva yasya bhāvānāṃ āharaṇaṃ iti 
yasya tattṛptyai tasmai dhyāna hārāya tubhyaṃ nama ityanvayaḥ | 
cittecchāḥ saṃkalpabhāvāḥ sarvakāryāṇi āharaṇaṃ saṃpādanaṃ 
tṛptiḥ paramānandaḥ dhyānenaiva paramānando yasyeti vyutpatyā 
dhyānahārāya padavācyāya nama ityarthaḥ ||

pañcamapadastavamāha mantreti -

mantrapadānāmmadhyātphalārthibhiryassmaryate padenaiva |
sarvakriyāsu pūrvaṃ yattasmaitvonnamaśśivāyeti || 15 ||

mantrapadānāṃ madhyāt onnamaśśivāyeti padenaiva sarvakriyāsu 
p. 21) pūrvaṃ phalārthibhiḥ yaḥ smaryate tasmai nama ityanvayaḥ |
karmārambha kāleṣu puruṣaiḥ phalasidhyarthaṃ pūrvaṃ onnamaśśivāya 
pada smaryamāṇāya nama ityarthaḥ | smārya śivastutyā smāraka 
stutiravagantavyā ||

ṣaṣṭhapadastavamāha kṛtvā'pīti -

kṛtvāpi sarvabhāvānsanāyakāṃ stava bhuvanānyaḥ |
teṣāṃ prabhutvayuktassarva prabhave namostu tubhyamapi || 16 ||

tatva pūrvabhuvanān sa nāyakān sarvabhāvānapi kṛtvā yaḥ teṣāṃ 
prabhutvayuktaḥ tasmai sarvaprabhave tubhyaṃ namo'stu ityanvayaḥ | 
tatvabhuvanādhipayuktasya svakṛtaprapañcasya prabhutayā 
sarvaprabhuśabdavācyāya nama ityarthaḥ ||

saptama padastavamāha proktairiti -

p. 22) proktairguṇairabhinnaḥ kalito yo tena śivapadenātra |
saguṇassaśaktimūrtirmāntrastasmai namostvatha śivāya || 17 ||

proktaiḥ guṇaiḥ abhinnaḥ saguṇaḥ saśaktimūrtiḥ māntraḥ yaḥ 
śivapadena kalitaḥ tasmai śivāya namo'stvityanvayaḥ | suguṇasya 
nirguṇasya śaktivigrahasya mantra vigrahasya vā sarvasya śiva svarūpasya 
vācaka pada śivapadavācyāya nama ityarthaḥ ||

aṣṭamapadastavamāha īṣṭe iti -

īṣṭe savyasyeśona tu dharmeṇa so'taṃ īśānaḥ |
mūrdhanyādau yasya tu namostvaśeśānamūrdhnete || 18 ||

īśaḥ yena tu dharmeṇa sarvasya īṣṭe ataḥ īśānaḥ saḥ yasya mūrdhani 
(45) ādau tasmai īśānamūrdhne te namostu ityanvayaḥ | īśvarasya 
sarveśvara hetvīśāna dharmo mūrdhni yasya iti vyatpatyā 
īśānapadavācyāya nama ityarthaḥ ||

p. 23) navamapadastavamāha tasminniti -

tasminśaive jñāne paramātpuruṣa eva vācyeta |
vaktramiva yasya śaktirnamostu tatpuruṣa vaktrāya || 19 ||

tasmin śaive jñāne parama eva tatpuruṣo vācyeta tadrūpāśaktiḥ yasya 
vaktramiva tasmai tatpuruṣavaktrāya namostu ityanvayaḥ | tacchabdena 
śaivajñānavivakṣāyāṃ puruṣaśabdena paramavivakṣāyāṃ tatpuruṣa 
śabdaśaktidharmo vaktraṃ yasyeti vyutpatyā tatpuruṣavaktrapadavācyāya 
nama ityarthaḥ ||

atha śāśvatādi tatpuruṣānta nava padānāṃ eṣāṃ pūjāprakāramāha 
etaditi -

etattatpuruṣāntaṃ padanavakaṃ pūrva pīṭha padaniviṣṭam |
aṣṭācatvāriṃśatsaṃkhyairvarṇairūpetamatha pūjyam || 20 ||

p. 24) pūrvapīṭha padaniviṣṭaṃ aṣṭācatvāriṃśatsaṃkhyaiḥ varṇaiḥ 
upetaṃ tatpuruṣāntaṃ etatpadanavakaṃ pūjyamityanvayaḥ | 
pūrvakamalapīṭha navapadeṣu karṇikādīśāntadaleṣu śāśvatādīni 
pūjanīyānītyarthaḥ ||

atha āgneyapīṭha padanavakastutimāha doṣetyādibhiḥ daśabhiḥ 
āryābhiḥ | tatra prathamapada stavamāha doṣa iti -

doṣahīnamaghoraṃ doṣakṣayakṛccayacca bhaktānām |
hṛdayantatsadbhāvo namo'stu tasmaitvaghorahṛdayāya || 21 ||

doṣavihīnaṃ bhaktānāṃ doṣakṣayakṛcca aghoraṃ yasya tatsadbhāvo 
hṛdayaṃ tasmai aghora hṛdayāya namostu ityanvayaḥ | sva doṣarahitaṃ 
bhaktānāṃ doṣanāśakaḥ aghoramantraḥ yasya sadbhāvarūpahṛdayamiti 
vyutpatyā aghorahṛdayapadavācyāya nama ityarthaḥ ||

vāmo vilakṣaṇo yaḥ krīḍāvāndeva eṣa guhyopi |
p. 25) prasavānumatastasmai namo'stute vāmadeva guhyāya || 22 ||

yaḥ eṣaḥ vāmaḥ vilakṣaṇaḥ ya eṣa devaḥ krīḍāvān yaḥ eṣaḥ guhyaḥ 
prasavānumataḥ tasmai vāmadeva guhyāya namo'stu ityanvayaḥ | 
krīḍārthaka dividhātoḥ niṣpanno devaśabdaḥ vāmaścāsau devaśca 
guhyaśceti vyatpatyā vāmadeva guhyapadavācyāya nama ityarthaḥ ||

tṛtīyapada stavamāha sadya iti -

sadyo jhaṭityajātā hata janmādyā nṛttamūrtayoyasmāt |
muktābhavanti tasmai te sadyojāta mūrtaye namaḥ || 23 ||

yasmātsadyaḥ jhaṭiti, ajātā hatajanmādyāḥ nṛttamūrtayaḥ muktāḥ 
bhavanti tasmai sadyojāta mūrtaye nama ityanvayaḥ | (46) sadya ityasya 
vyākhyā jhaṭiti, ajātā ityasyavyākhyā hatajanmādyā iti | 
mūrtipadavyākhyā nṛmūrtaya iti | tathā ca sadyaḥ ajātā mūrtayo 
yasmāditi vyutpatyā sadyojātamūrtipadavācyāya nama ityarthaḥ ||

p. 26) caturthapadastavamāha omiti -

omityatra purastādvāstavamaikyaṃ hi lakṣayati vācye |
sakala śivoyamabhinno yo niṣkalato'pyatho || 24 ||

atra omiti purastāt vācye vāstavaṃ ai ---- namastubhyam || kyaṃ lakṣayati hi 
yo'yaṃ sakala śivaḥ saniṣkalataḥ abhinnaḥ ityanuṣaṃgaḥ | athā'pi oṃ 
tubhyaṃ nama ityanvayaḥ | atra asmin śivaśāsane omiti padaṃ purastāt 
prathamaṃ aikyaṃ lakṣayatīti vācya vācakayorubhayorapi omityevakārayo 
yasmāt tasmāt sakala niṣkalayorabhinna eva oṃ ityākāro yasmāt athāpi 
tasmādapi ityarthaḥ | hetu dvayenāpi saṃbodhanametat he oṃkāra rūpa 
ityarthaḥ tubhyannama ityarthaḥ ||

p. 27) pañcamapada stavamāha guhyā iti -

guhyāḥ parairadṛṣṭerarthāgopyāśca paśuṣumāyādyāḥ |
tebhyo guhyebhyo'pyati guhyāya namo'stu rahasi labhyāya || 25 ||

paśuṣumāyādyāḥ arthāśca paraiḥ adṛṣṭaiḥ guhyāḥ gopyāḥ | tebhye 
guhyebhyo'pi ati guhyāya rahasi labhyāya namostu ityanvayaḥ | guhyapada 
vyākhyā gopyā iti parairadarśanaḥ gopyatvahetuḥ | atiguhyapadavyākhyā 
rahasi labhyāya iti dhyanai agamyāya ityarthaḥ | tathāca guhyebhyo'pi 
atiguhya iti pañcamī samāsena guhyātiguhyapadavācyāya nama ityarthaḥ ||

ṣaṣṭhapada stavamāha eketi -

eka nṛmūrtinimittaṃ yo māyāṃ sarvathā'pi vihantyapi tu |
anyeṣāṃ bhavasidhyai tadgoptāyo namostu goptrepi || 26 ||

p. 28) yaḥ eka nṛmūrtinimittaṃ māyāṃ sarvathā no vihanti | api tu 
anyeṣāṃ bhavasidhyai tadgoptā tasmai goptre namaḥ astvityanvayaḥ | 
bhavaḥ saṃsāraṃ ekasya muktāvapi, anyasaṃsārāya māyāyāḥ gopteti 
kalpanayā goptṛ padavācyāya nama ityarthaḥ ||

saptama padastavamāha muktimiti -

muktiṃ kurvanpuṃsaḥ tatsaṃsārasya kārya karaṇādeḥ |
nidhanaṃ karoti yo'sau tasmai nidhanāya tubhyamapi namaḥ || 27 ||

(47) puṃsaḥ muktiṃ kurvan kārya karaṇādeḥ tatsaṃsārasya yo'sau 
nidhanaṃ karoti tasmai nidhanāya tubhyaṃ nama ityanvayaḥ | mohārthaṃ 
saṃsārarūpa kārya karaṇādi nidhanatvāt nidhanakara eva nidhana 
kalpanayā nidhana śabda vācyāya nama ityarthaḥ || 

aṣṭamapadastavamāha sarveti -

p. 29) sarvā vidyāmantrāḥ koṭyassaptādhipāstvanantādyāḥ |
yasmādbhavanti tasmai tu sarva vidyādhipāya namaḥ || 28 ||

saptakoṭyaḥ mantrāḥ sarvāḥ vidyāḥ anantādyāḥ adhipāḥ 
yasmādbhavanti tasmai sarva vidyādhipāya nama ityanvayaḥ | sarvavidyāḥ 
adhipāśca yasmāditi vyutpatyā sarvavidyādhipa pada vācyāya nama 
ityarthaḥ || 

navamapada stavamāha jyotiriti -

jyotissakalaṃ yatprāk puṃsāṃ rūpayati tattu muktoyaḥ |
sarvārtha citkriyābhyāṃ jyotīrūpāya tubhyamapi namaḥ || 29 ||

puṃsāṃ prāk yat sakalaṃ jyātiḥ tanmuktau tu sarvārtha citkriyābhyāṃ 
yaḥ rūpayati tasmai jyotīrūpāya tubhyaṃ nama ityanvayaḥ | jyotiḥ 
rūpayati vyaṃjayati iti vyutpatyā jyotirūpapadavācyāya tubhyaṃ nama 
ityarthaḥ ||

p. 30) atheṣāṃ navapadānāṃ pūjāvidhimāha padanavakamiti -

padanavakametadāhuḥ kramatasvāgneya pīṭhaniviṣṭam |
aṣṭācatvāriṃśadvarṇayutaṃ pūrvavattu saṃpūjyam || 30 ||

āgneya pīṭha niviṣṭaṃ aṣṭācatvāriṃśadvarṇayutaṃ etatpadanavakaṃ 
kramataḥ pūrvavatpūjyaṃ ityanvayaḥ | atra pīṭhe aghorahṛdayādīni 
navāni padāni pūjanīyānītyarthaḥ ||

athaprathamapadastavamāha prameśā iti -

parameśā vidyeśāḥ pūrvoddiṣṭāḥ parastu teṣāṃ yaḥ |
sva samatva kṛtestasmai te parameśvara parāya namaḥ || 31 ||

pūrvoddiṣṭāḥ vidyeśāḥ sva samatvakṛteḥ parameśāḥ teṣāṃ tu yaḥ 
paraḥ tasmai parameśvara parāya te nama ityanvayaḥ | 
parameśvarebhyo'nantādībhyaḥ para iti vyutpatyā parameśvara 
parapadavācyāya namaḥ ityarthaḥ ||

p. 31) dvitīyapadastavamāha paśuvaditi -

paśuvannoyasyāsti dveṣādiyutā tu cetanā bauddhī |
muktaśśivavaccetanā nāsīdacetanā cetana namaste || 32 ||

he acetanācetana yasya paśuvat dveṣādiyutā bauddhī cetanā tu no asti 
mukta śivavacca cetanā nāsīt tasmai te nama ityanvayaḥ | paśu cetanā yasya 
navidyate saḥ acetanaḥ | (48) mukta cetanā yasya navidyate sopyacetanaḥ iti 
vyutpatyā acetanācetana padavācyāya nama ityarthaḥ ||

tṛtīyapada stavamāha niṣkaleti -

niṣkala vatsakalākhyā tanmūrttivyoma yasya rūpeṇa |
vyāptyādi naiva niyatā vyomāstu te namastasmai || 33 ||

he vyomavyoma yasya tava sakalākhyā mūrttiḥ niṣkalavat vyāptādinā 
rūpeṇaiva vyomaniyatā niścayārthaḥ dviruttayā tasmai te nama ityanvayaḥ 
| 
p. 32) vyoma śabdasya nitya napuṃsakatvāt mūrti śabdena strīliṃgena 
sāmānādhikaraṇyaṃ nā'nupapannam | vyomedaṃ vyomedamiti 
dvirūktyā vyomavyomapadavācyāya nama ityarthaḥ ||

caturthapadastavamāha tadvaditi -

tadvaccayasya mūrtissakalārthavyāpikaiva nāvyāptiḥ |
prāṅmuktavattu tasmai vyāpinyāpinnamo'stu tubhyamapi ||

yasya ca mūrtistadvat sakalārtha vyāpikaiva muktavat prāgavyāptiḥ na 
tasmai tubhyaṃ he vyāpinyāpin namo'stu tadvat vyomavat ityarthaḥ | atra 
vyāpikaiva nāvyāptiriti niyamāt vyāptinyāpinpadavācyāya nama 
ityarthaḥ ||

pañcamapadastavamāha varṇeti -

p. 33) varṇaracane hi rūpaṃ paśumūrtau tadrasādisahitañca |
mūrtau na vidyate yasya tu tasmaitvarūpya rūpinnamaḥ || 35 ||

paśumūrtau varṇa racanehi rūpaṃ tadrasādi sahitaṃ ca yasya te mūrtau tat 
na vidyate tasmai te nama ityanvayaḥ | varṇaḥ brāhmaṇatvādiḥ racanā 
avayava vinyāsa viśeṣaḥ rasādiḥ madhura gandhādiḥ varṇātmakañca 
rūpaṃ racanātmakañca rūpaṃ ubhayaṃ nāsti | kalpanayā arūpyarūpi 
padavācyāya nama ityarthaḥ |

ṣaṣṭhapada stavamāha prathameti -

prathamā ca prathamāna dvitīyādi yutaiva mūrtiryat |
mūrtiryasyā preryā prathama prathamāstu te namastasmai || 36 ||

he prathama prathama sarvamūrti prathamā ca prathamānā bhūtvā 
dvitīyādi yutaiva iti yat tasmāddhetoḥ sā prathama 
prathamānetyadhyāhāraḥ yasya tavamūrtiḥ prathamā apreryā satī 
prathamāna dvitīyādi sahitā tasmai te namostvityanvayaḥ prathama 
dvitīyāvasthā bhedaḥ śiva mūrtirnityatvāt nāvasthā bheda iti bhāvaḥ ||

p. 34) saptamapadastavamāha sarveti -

sarvajñataiva tejastanmūrtau yasya rūpamathanānyat |
pūrvaniṣedhāttasmai tejastejo namo'stu tubhyamapi || 37 ||

(49) yasya tanmūrtau sarvajñatā teja eva rūpaṃ athānyanna kutaḥ 
pūrvaniṣedhāt tasmai tubhyaṃ he tejastejaḥ namo'stvityanvayaḥ | 
arūpītyatra rūpaniṣedhaḥ pūrva niṣedhaḥ teja eva rūpamiti niyamāt 
dvirūttayā tejastejaḥ pada vācyāya nama ityarthaḥ ||

aṣṭama padastavamāha jyotiriti -

jyotistu sarvakṛtyaṃ rūpadāhādi kartṛ lakṣaṇayā |
tadapi ca mūrtau yasya jyātirjyotirnamostu tasmai te || 38 ||

p. 35) dāhādi kartṛlakṣaṇayā sarva kṛtyantu jyotīrūpaṃ tadapi yasya 
mūrtau tasmai te namo'stvityanvayaḥ | atra jyotistviti śabdasya evakārārtha 
tayā niyamasphuraṇāt dvirūktyā jyotirjotiḥ padavācyāya nama ityarthaḥ ||

navamapadastavamāha taditi -

taccārkasomaśikhimaṇi tejorūpaṃ na kiñcana hi bhāvyam |
sadaiva tava vimalaṃ yasya tu tasmaitvarūpate'stu namaḥ || 39 ||

arka soma śikhimaṇi tejorūpaṃ kiñcana sadā bhāvyaṃ nahi yasya tava 
vimalaṃ rūpaṃ sadaiva bhāvyaṃ taddhetoḥ he arūpa tasmai te 
namo'stvityanvayaḥ | śikhī vahniḥ vīryāditejasāṃ rūpaṃ 
sadānabhāsate malinastvasambhavāt śivatejastu malinatvā'saṃbhavāt 
bhāsate | tasmāt malina rūpa rahitatayā arūpa pada vācyāya nama 
ityarthaḥ ||

p. 36) atheṣāṃ navānāṃ padānāṃ pūjāprakāramāha rurugīteti -

rurugītā rūpāntyaṃ dakṣiṇapīṭhasthametadatha pūjyam |
padanavakaṃ pañcādhikacatvāriṃśatpramāṇavarṇayutam || 40 ||

rurugītā rūpāntyaṃ dakṣiṇapīṭhasthaṃ pañcādhika 
catvāriṃśadvarṇayutaṃ etatpada navakaṃ atha pūjyamityanvayaḥ | 
asminpīṭhe parameśvara parādīni nava padāni pūjanīyānītyarthaḥ ||

naiṛta pīṭha padastavamāha agnerityādinā navabhirāryābhiḥ |

tatra prathama padastvamāha -

agneraindhanaṭhevadyutakālānala lakṣaṇādidañcānyat |
sakala mala dahana heturjyotiryasya tu namostvanagne te ||

aindhana vaidyuta kālānala lakṣaṇāt agneḥ anyat sakalamala dahana hetuḥ 
jyotiḥ yasya tu bhavati tasmai te he anagne namo'stvityanvayaḥ | 
svajyoti rūpāt anyo'gni navidyate yasyeti vyutpatyā anagnipada vācyāya 
nama ityarthaḥ ||

dvitīyapadastavamāha taditi -

tajjyotiṣassadhūmādrāgadveṣādi citprakaṃpayujaḥ |
pudgalakādapyanyajjyotiryasyatvadhūmate'stu namaḥ || 42 ||

(50) yasya jyotiḥ sadhūmāt tajjyotiṣaḥ rāgadveṣādi citprakaṃpayujaḥ 
pudgalakādapi jyotiṣaḥ anyat tasmai te he adhūma te namo'stu ityanvayaḥ | 
na vidyate jyotiḥ yasyeti vyutpatyā adhūmapadavācyāya nama ityarthaḥ | 
tṛtīyapadastavamāha tadvaditi -

tadvacca bhasmayuktāttadasārajyotiṣo nṛkartṛkatvāt |
sarvārthamanyaduktaṃ jyotiryasya tu namostvabhasma tava || 43 ||

yasya tava anyat uktaṃ sarvārthaṃ jyotiḥ tadvat bhasmayuktāt tadasāra 
nṛkartṛkatvāt jyotiṣo anyat tasmai te he abhasma namo'stvityanvayaḥ | 
p. 38) na vidyate jyotiḥ bhasma yasyetivyutpatyā abhasmapadavācyāya nama 
ityarthaḥ ||

caturthapadastavamāha taditi -

tajjyotirūpāsau mūrtissaiṣā svabhāvato vimalā |
sakalaśreyo heturyasyānādi namo'stvanādete || 44 ||

yasya asau mūrtiḥ tajjyotirūpā svabhāvato vimalā saiṣā 
sakalaśreyohetuḥ anādiḥ tasmai te he anade namo'stvityanvayaḥ | 
śivamūrtesnāditvāt śivasyāpi anāditvāt anādipadavācyāya nama 
ityarthaḥ ||

pañcamapadastavamāha nāpuruṣa iti -

nāpuruṣatritayaṃ haraharikamalodbhavaṃ hi poṣayati |
nā nā nā tvaktokta striyātmā yo namastasmai || 45 ||

p. 39) nāpuruṣa tritayaṃ harahari kamalodbhavaṃ poṣayati hi tataḥ atra 
śāsane yaḥ tritayātmāsan nā nā nā uktaḥ tasmai nama ityanvayaḥ | 
haraharibrahmaṇāṃ nṝṇāṃ trayāṇāṃ vācakatayā nā nā nā 
padavācyāya nama ityarthaḥ ||

ṣaṣṭhapadastavamāha saṃhāreti -

saṃhāresvatritayaṃ kaṃpayati yena tena guṇavṛtyā |
dhūkāratraya vācyo yotra tu tasmai namo'stu tubhyamapi || 46 ||

sva tritayaṃ saṃhāre vartate yena kāraṇena tena hetunā dhūkaṃpana 
ityarthamavalaṃbhya kaṃpayatīti guṇavṛtyā yaḥ dhūkāratrayavācyaḥ 
tasmai tubhyaṃ namo'stvityanvayaḥ | pralayeṣu kaṃpana saṃbhavāt 
kaṃpana śabdasya saṃhāra lakṣakatve sati susādhya pralayatraya vācaka 
dhū dhū dhū pada vācyāya nama ityarthaḥ ||

saptama padastavamāha stutiriti -

p. 40) stutirūpamasatyamarthaṃ manujātannaitaditi ya āliṅgya |
oṃbhūriti satyārthai mantrapadairucyate namostvoṃbhūḥ || 47 ||

etat manujātaṃ lokapaṭhyamāna mantrajālaṃ stutirūpaṃ asatyārthaṃ 
(51) neti oṃbhūḥ ityāliṅgya vācyaḥ yaḥ śivaḥ satyārthaiḥ mantrapadaiḥ 
ucyate tasmai tubhyaṃ oṃbhūḥ namo'stvityanvayaḥ | ayaṃ bhāvaḥ oṃ 
śabdena śiva ucyate bhūḥ lokaḥ oṃ bhūrityanena lokeśayorabhedaḥ 
sphurati tataśca vedāntibhiḥ lokānāmasatya varṇanāt 
tatpratipādakamantrāṇāṃ asatyārtha śaṃkānirastā | lokasya satyabhūta 
śivābheda varṇanayā satvasaṃbhavāt | ata eva satyārthā eva sarve 
mantrāḥ iti pratīti phalaka oṃbhūḥpada vācyāya nama ityarthaḥ ||

aṣṭamapadastavamāha omiti -

omiti ceśassabhuvo bhuvanasametasya tatvabhāvādeḥ |
p. 41) sakalopi yo'tra kathitastvoṃbhuva iti namo'stu tasmai ca || 48 ||

omiti asmin śāsane omiti yaḥ īśaḥ kathitaḥ sa eva bhuvana sametasya tatva 
bhāvādeḥ sakalo'pibhuvaḥ sa eva kathitaḥ oṃbhuva iti kathitaḥ tasmai 
namoṃ'stvityanvayaḥ | īśa bhuvarlokā'bheda bodhaka oṃbhuvaḥ 
padavācyāya nama ityarthaḥ ||

navama padastvamāha omiti -

paramā prīti svariti paramasukhātmikaiva yasyoktam |
rūpaṃ mukhyaṃ kṛtakaṃ hmoṃ svaritītthaṃ namo'stu tasmai te || 49 ||

omiti paramā prītiḥ svariti paramasukhātmikaiva itthaṃ kṛtakaṃ rūpaṃ 
parama prītiḥ parama sukhākāraṃ rūpaṃ yasya oṃ svaḥ ityuktaṃ tasmai 
te namo'stvityanvayaḥ | parama premāspada paramānandabodhaka oṃ svaḥ 
pada vācyāya nama ityarthaḥ ||

p. 42) eṣāṃ padānāṃ pūjāprakāramāha padanavakamiti -

padanavakametaditthaṃ rurugītaṃ sarvadaiva navanābhe |
naiṛta pīṭhe pūjyaṃ yuktaṃ varṇaistu paṃcaviṃśatyā || 50 ||

itthaṃ rurugītaṃ pañcaviṃśatyā varṇaistu yuktaṃ etatpadanavakaṃ 
navanābhe naiṛtapīṭhe sarvadaiva pūjyamityanvayaḥ | naiṛtapīṭhe anagne 
ityādi navapadāni pūjyānītyarthaḥ |

paścimapīṭha padanavakastavamāha śambhurityādibhiḥ 
navabhirāryābhiḥ | tatra prathamapadastavamāha śambhuriti -

śambhuranidhano gīto māyācakra pravāhataḥ kintu |
kūṭastha tayā yosau namo'stu tepyanidhanā nidhanatasmai || 51 ||

yo'sau śaṃbhuḥ māyācakrapravāhataḥ māyā ca kṛsya prapañcasya 
anāditayā pravāhāt hetoḥ tatkartā anidhanaḥ nidhanaṃ nāśaḥ tadrahitaḥ 
anāśaḥ karturabhāve pravāhānupapatteḥ |
p. 43) kiñca kūṭasthatayā ca anidhanaḥ kūṭasthasyā'vikāritva 
lakṣaṇatvāt nāśarahitaḥ (52) tasmai te he anidhanā'nidhana 
namo'stvityanvayaḥ | ubhayathāpi nāśarahitatvāt 
anidhanānidhanapadavācyāya nama ityarthaḥ ||

dvitīyapadastavamāha nidhaneti -

nidhanodbhavādi yasmād bhavati śivād vīrabhadramukhyānām |
māyāgarbheśānānnidhanodbhavate namo'stu tasmai ca || 52 ||

yasmāt śivāt vīrabhadramukhyānāṃ māyāgarbheśānāṃ 
nidhanodbhavādi bhavati saṃhāra sṛṣṭyādi bhavantītyarthaḥ tasmai te he 
nidhanodbhava namo'stu ityanvayaḥ | vīrabhadrādīnāṃ 
nidhanodbhavakartṛtvāt nidhanodbhavapadavācyāya nama ityarthaḥ ||

tṛtīyapadastavamāha aśiva iti -

p. 44) aśivo śivapadatvācchivona yo bhavati karmarūpaṃ yat |
guruvatkevalamaśubhaṃ vyanaktiyastena namo'stu śiva tasmai || 53 ||

yaḥ śivaḥ na bhavati saḥ aśivaḥ aśiva pradatvāt kevalaṃ aśubhaṃ 
vyanakti tadvavatirekeṇa tu yaḥ aśivaḥ na saḥ śivaḥ śiva pradatvāt 
śaktirūpaṃ kevalaṃ śubhaṃ vyanaktīti yat tatkāraṇāt he śiva tasmai 
namo'stvityanvayaḥ | aśiva haratayā śiva pradatayā ca śiva padavācyāya 
nama ityarthaḥ ||

caturthapadastavamāha sarvasyeti -

sarvasya sarvadā tatsarvaṃ sarvatra karmahetuphalam |
janayan sarvaḥ kathitaḥ yo'tu tasmai namo'sarvāpi || 54 ||

sarvasya sarvajanasya sarvadā sarvakālaṃ sarvatra sarvadeśe sarvaṃ 
sakalaṃ karmahetu karmakāraṇakaṃ karmajamityarthaḥ | phalaṃ janayan yat 
tatkāraṇāt atra śivaśāsane yaḥ sarvaḥ kathitaḥ he sarva tasmai nama 
ityanvayaḥ |
p. 45) sarvaphalapradatayā sarvapadavācyāya nama ityarthaḥ ||

pañcamapadastavamāha parama iti -

paramaścāsāvātmā kāraṇamuktastu kāraṇānāṃ yaḥ |
cidacidvibhedabhājāṃ sarveṣānte namo'stu paramātman || 55 ||

yo'sau paramaścāsau ātmā ca cidacidvibhedabhājāṃ kāraṇānāṃ 
kāraṇaṃ uktaḥ tasmai te he paramātman namostvityanvayaḥ | 
utkṛṣṭātmavācaka paramātmapada vācyāya nama ityarthaḥ ||

ṣaṣṭhapadastavamāha pūjyānāmiti -

pūjyānāmapi pūjyo vidyeśānāmananta mukhyānām |
muktyai maheśvaratvādyastu tasmai maheśvara namaste || 56 ||

yastu maheśvaratvāt pūjyānāṃ anantamukhyānāṃ vidyeśānāmapi 
muktyai mokṣa phalāya pūjyaḥ tasmai te he maheśvara nama ityanvayaḥ | 
mahatāmanantādīnāmapi īśvara iti vyutpatyā maheśvara pada vācyāya 
nama ityarthaḥ ||

saptamapadastavamāha mukta iti -

muktaśśivebhyopi mahān devaśśāntatvato hi yassākṣāt |
tepyarcitāyadarcā tasya tu tasmai namo mahādeva || 57 ||

(53) yaśśivaḥ sākṣāt parānapekṣayā śāntatvataḥ rāgadveṣa 
rāgadveṣarahitatvataḥ svatassiddha rāgādi rāhityavatvādityarthaḥ muktaḥ 
śivebhyo'pi mahān devaḥ te'pi muktāḥ śivā'pītyarthaḥ 
yadarcāyacchivaviṣayā arcā yeṣāṃ te tathoktāssantaḥ tasya arcitā 
bhavanti | he mahādeva tasmai te nasmo'stvityanvayaḥ | mahān cā'sau 
devaśceti vyatpatyā mahādeva padavācyāya nama ityarthaḥ |

p. 47) aṣṭamapadastavamāha paśviti? -

paśudrakṣūttāḥ prāntaiḥ paśupāśāstvīśvarassvatantretaḥ |
sadbhāvena yaduktaḥ sadbhāveśvara namo'stu tasmai te || 58 ||

paśupāśāḥ paśudrakṣu paśudarśaneṣu paśu śāstreṣvityarthaḥ prāntai 
pradeśyaiḥ uktāḥ ye īśvarastu svatantre śivaśāstre sadbhāvena 
samyaktvena uktaḥ tasmai tubhyaṃ he sadbhāveśvara nama ityanvayaḥ | 
śivaśāstre sadbhāvena uktaḥ īśvaraḥ sadbhāveśvara iti 
madhyamapadalopi samāsena sadbhāveśvara padavācyāya nama ityarthaḥ ||

navamapadastavamāha sarveti -

sarvārtha kṛnmahattattejassādāśivaṃ vapuryasya |
prāguktamapradhṛṣyaṃ sadaiva tasmai namo mahātejaḥ || 59 ||

sarvārthakṛt sādāśivaṃ vapuḥ sadaivāpradhṛṣyaṃ prāguktaṃ mahat 
tejaḥ yasya tasmai te he mahātejaḥ tubhyaṃ nama ityanvayaḥ |
p. 48) mahat tejaḥ yasya saḥ mahātejā iti vyutpatyā mahāteja śabda 
vācyāya nama ityarthaḥ ||

atheṣāṃ navānāṃ padānāṃ pūjāprakāramāha paścimeti -

paścimapīṭhe pūjyaṃ padanavakañcetadukta paripāṭyā |
saptatriṃśatsaṃkhyairyuktaṃ varṇaissadaivanavanābhe || 60 ||

saptatriṃśadvarṇaiḥ yuktaṃ etatpadanavakaṃ ukta paripāṭyā navanābhe 
paścimapīṭhe sadaiva pūjyamityanvayaḥ | paścima pīṭhe anidhanānidhana 
padādīni navapadāni pūjanīyānītyarthaḥ ||

vāyavyapīṭhapadanavakastutimāha yegā iti navabhirāryābhiḥ | tatra 
prathamapadastavamāha yogā iti -

yogā vimuktadehāḥ proktāssādāśivāśśivasteṣām |
p. 49) adhipaḥ pitṛvajjanako yo yogādhipa namo'stu tasmai te || 61 ||

muktadehāḥ sadāśivāḥ sadāśiva eva sadāśivāḥ paśu sadāśivā 
ityarthaḥ | svarthe'ṇ pratyayaḥ paśu sadāśivānāṃ vijñāna 
kalarūpāṇāṃ sakalabandhavimuktatayā vimukta dehatvamityarthaḥ yogāḥ 
iti proktāḥ yaśśivaḥ teṣāṃ adhipāḥ pitṛvajjanakaḥ adhipaḥ samarthaḥ | 
tasmai te he yogādhipa namo'stvityanvayaḥ | yogānāmadhipaḥ yogādhipa 
iti vyutpatyā yogādhipa padavācyāya nama ityarthaḥ ||

dvitīyapadastavamāha gurubhiriti -

gurubhirmaṇḍalaveṣo dīkṣāyāmarthyate bhiyādinān |
(54) bhaktānvā sacchiṣyāṃstu muñca muñceti yo namastasmai || 62 ||

maṇḍalaveṣoyaḥ śiṣyapaḥ gurubhiḥ dīkṣāyāṃ bhiyā sasmārabhayena 
dīnān bhaktān sacchiṣyān muñcamuñca iti kathyate prārthyate |
p. 50) tasmai te namostvityanvayaḥ | saṃsāramokṣa pratipādaka 
muñcamuñcapadasaṃbodhyāya nama ityarthaḥ ||

tṛtīyapadastavamāha madhnātīti -

madhnātītaḥ pāśādīn dīkṣābhiryogurūnadhiṣṭhāya |
pakvamalānāṃ puṃsāṃ prathama prathamāstu te namastasmai || 63 ||

itaḥ prārthanānantaraṃ gurūnadhiṣṭhāya pakvamalānāṃ puṃsāṃ 
dīkṣābhiḥ yaḥ madhnāti tasmai te he prathama prathama 
namo'stvityanvayaḥ | niyamena pāśamathanāt dvirūktyā prathama 
prathama padavācyāya nama ityarthaḥ ||

caturthapadastavamāha puṃsa iti -

puṃso bandhanabhayataśśaraṇaṃ prāptānvṛṇoti gurusaṃsthaḥ |
dīkṣābhyupagamato yastu śarvaśarvā'stute namastasmai || 64 ||

bandhanabhayataḥ śaraṇaṃ prāptavān puṃsaḥ gurusaṃstho bhūtvā 
dīkṣābhyupagamena yastu vṛṇoti tasmai te he 
śarvaśarvanamo'stvityanvayaḥ | 
p. 51) śaraśabdaḥ śaraṇadyotakaḥ | vaśabdo varaṇadyotakaḥ | niyamataḥ 
śaraṇaprāptapuruṣavaraṇakadyotakatayā dvirūktyā 
śarvaśarvapadadyotyāya nama ityarthaḥ ||

pañcamapadastavamāha aṇviti -

aṇuśaktipātamādau gurvādyabhigamanato bhavatipuṃsām |
śivaśaktibhāvakatayā yaste bhava bhava namo'stu tasmai ca || 65 ||

yeṣāmityadhyāhāraḥ | yeṣāṃ puṃsāṃ gurvādyabhigamanato ādau 
aṇuśaktipātaṃ bhavati | aṇuśabdo bhāvapradhānaḥ aṇutvaśakteḥ 
āṇavamalaśakteḥ pātaḥ kṣayaḥ liṅgavyatyāsaḥ cintyaḥ teṣāṃ 
puṃsāṃ yaḥ śivaśaktibhāvakatayā śivatvavyañjakatayā bhavati tasmai 
te he bhavabhava namo'stvityanvayaḥ | 
āṇavakṣayabhavanaśivatvavyaktibhavanahetutayā bhavabhavapadavācyāya 
nama ityarthaḥ ||

p. 52) ṣaṣṭhapadastavamāha pūrvamiti -

pūrvaṃ pramathitapāśābhavanti ye dīkṣayā bhavāsteṣām |
śivatā tadūrdhvabhavanaṃ bhavati yatastadbhavodbhava namastasmai || 66 ||

dīkṣayā pūrvaṃ pramathita pāśāḥ ye bhavanti te bhavāḥ teṣāṃ 
bhavānāṃ tadūrdhvabhavanaṃ tasyaiva vivaraṇatayā yatobhavati tasmai te 
tatkāraṇāt he bhavodbhava nama ityanvayaḥ | bhavānāṃ udbhavanaṃ 
yasmāditi vyutpatyā bhavodbhava pada vācyāya nama ityarthaḥ ||

saptamapadastavamāha jātīti -

jātiniyamenaitān muktisukhaṃ pūrṇatāndadātyapi tu |
sarvebhyobhūtebhyassukhapradoyo namo'stu tasmai te || 67 ||

yaḥ jātiniyamena brāhmaṇatvādijāti niyamena etanmuktisukhaṃ karoti tat 
p. 53) prasiddhaṃ muktisukhaṃ pūrṇatāṃ muktisukhasya paripūrṇaṃ tu 
aṇoḥ dadāti apitu sarvebhyo bhūtebhyaḥ sukhaprada tasmai te 
namo'stvityanvayaḥ | sarvabhūtānāṃ sukhaṃ pradātīti 
sarvabhūtasukhaprada vācyāya nama ityarthaḥ ||

aṣṭamapadastavamāha sarvatreti -

sarvatra sannidhānaṃ karoti yo nottarāyaṇādi vaśaḥ |
muktyarthandīkṣādau sarvasānnidhyakara namo'stu || 68 ||

yastu dīkṣādau muktyarthaṃ sarvatra sarvadeśe sānnidhyaṃ karoti 
uttarāyaṇādikālavaśo na bhavati tasmai te sarvasānnidhyakara 
namo'stvityanvayaḥ | sarvadeśe sarvakāle ca sānnidhyakaraḥ 
sarvasānnidhyakara iti vyutpatyā sarvasānnidhyakarapadavācyāya nama 
ityarthaḥ ||

navamapadastavamāha vidyeti -

p. 54) vidyeśa preraṇayā brahmādīnāntu sāṃjanānāṃ yaḥ |
sṛṣṭyādi kṛtparasmin namo'stu te brahmaviṣṇurudrapara || 69 ||

vidyeśapreraṇayā sāñjanānāṃ sāṇavānāṃ brahmādīnāṃ 
brahmaviṣṇurudrāṇāñca sṛṣṭikṛt yaḥ tvaṃ paraḥ tasmai te he 
brahmaviṣṇurudrapara namo'stvityanvayaḥ | yaḥ brahmādibhyaḥ paratayā 
brahmaviṣṇurudraparapadavācyāya nama ityarthaḥ ||

eṣāṃ navapadānāṃ pūjāprakāramāha vāyavyamiti -

vāyavyapīṭha etatpadanavakaṃ pūrvavattu saṃpūjyam |
ekonaiḥ pañcāśatsaṃkhyairvarṇairūpetamathaparamam || 70 ||

atha paścimapīṭhapūjānantaraṃ ekonapañcāśadvarṇayutaṃ paraṃ 
etatpadanavakaṃ pūrvavatpūjyamityanvayaḥ | vāyavya kamalapīṭhe 
yogādhipādīni nava padāni pūjanīyānītyarthaḥ || 

p. 55) saumyapīṭhapadanavakastutimāha paśvityādibhiḥ navabhirāryābhiḥ 
|

tatra prathamapadastavamāha -

paśudṛṣṭyadṛṣṭitoyohyanarcitaḥ paśubhireva natvanyaiḥ |
śreyo hetuśśaivairanarcitā'narcitatvatha namaste || 71 ||

śreyo hetuḥ yo hi paśudṛṣṭyadṛṣṭitaḥ paśudṛṣṭīnāmadarśanataḥ 
paśubhireva anarcitaḥ natvanyaiśśaivairanarcitaḥ tasmai te he anarcitānarcita 
namostvityanvayaḥ paśubhireveti niyamādviruktayā anarcitānacita 
padavācyāya nama ityarthaḥ ||

dvitīyapadastavamāha tadvaditi -

tadvacca na stutoyaḥ paśubhirapaśubhistu tastu mantrapadaiḥ |
svaviracitairvāstotrairasaṃstutā'saṃstutāpi ca namaste ||

tadvacca anarcitavacca paśubhiḥ yaḥ na stutaḥ apaśubhiḥ stutimantraiḥ 
padairvā svaviracitaiḥ stotrapadairvāstutaḥ tasmaiḥ te he 
asaṃstutā'saṃstuta nama ityanvayaḥ | 
p. 56) asaṃstutāsaṃstutapadavācyāya nama ityarthaḥ ||

tṛtīyapadastavamāha pūrveti -

pūrvasthita pūrvasthita sarvatrāvāhanādi yasyoktam |
sannidhiviśeṣacintyaṃ phalāya nityaṃ namo'stu tasmai te || 73 ||

he pūrvasthita pūrvasthita sannidhiviśeṣacintyaṃ āvāhanādi (56) sarvatra 
yasya tava phalāya uktaṃ tasmai te nityaṃ namo'stvityanvayaḥ | sarvadeśa 
sarvakālavartamānasya śivasya āvāhanaṃ sannidhi viśeṣāya bhavatīti | 
tathā ca niyamena dviruktyā pūrvasthita pūrvasthitapadavācyāya nama 
ityarthaḥ ||

caturthapadastavamāha sākṣāditi -

p. 57) sākṣātpaśyati sarvaṃ sarvajñatvāttunā'numānādeḥ |
sākṣavyapekṣapātātsākṣinnamostu tasmai ca || 74 ||

yastu sarvajñatvāt sarvaṃ sākṣāt pratyakṣaṃ paśyati 
sākṣavyapekṣapātāt akṣasya pratyakṣasya vyapekṣāt apekṣatayā sahitaṃ 
sākṣavyapekṣaḥ pātoyasya tat tathoktānumānādeḥ na paśyati tasmai te he 
sākṣin sākṣin tubhyaṃ namo'stvityanvayaḥ | paśyati paśyatīti dviruktyā 
sākṣinpada vācyāya nama ityarthaḥ ||

pañcamapadastavamāha sadya iti -

sadyomuktau sādhanamatulandīkṣākhyameva yastvaritam |
racayannamostumuktasturuturvitthaṃ namo'stu tasmai te || 75 ||

sadyomuktau atulaṃ dīkṣākhyameva sādhanaṃ racayan yastvaṃ bhakteḥ iti 
śeṣaḥ namasturuturu itthamuttaḥ tasmai te namo'stvityanvayaḥ |

p. 58) dīkṣākhyameveti niyamādviruktyā avyayapratirūpaka 
śaighrapratipādaka turuturupadabodhyāya nama ityarthaḥ ||

ṣaṣṭhapadastavamāha pratīti -

pratibhuvanamarkavadyonipatanmāyāndhakārataḥ puṃsaḥ |
harati pataṃgaca dīkṣā saṃyojanena namastasmai || 76 ||

arkavat pratibhuvanam nipatan yaḥ puṃsaḥ māyāndhakārataḥ 
sārvavibhaktikasta siliti vacanāt māyārūpaṃ andhakāraṃ 
dīkṣāsaṃyojanena harati ca tasmai te he pataṃga pataṃga 
namo'stvityanvayaḥ | harati ca iti cakārasya evakārārthatayā 
niyamasphuraṇāt patan gamayati tamaḥ utsārayatīti kalpanayā dviruktyā 
pataṃga pataṃga padavācyāya nama ityarthaḥ ||

saptamapadastavamāha piṃgala iti -

p. 59) piṅgovahniḥstadvadyaḥ pāśāndahati sarvathā kāṃścit |
kāṃścitva sarvathā'pi ca namo'stu te piṃgapiṃgatasmai ca || 77 ||

piṃgaḥ vahniḥ piṃgapadavācyo vahniḥ tadvat vahnivat yaḥ śivaḥ 
kāṃścit pāśān sarvathā dahati | kāṃścitvasarvathāpi ca dahati | malasya 
īṣatpākādhika pākābhyāṃ sarvāsarvadāhakatvaṃ upapadyate tadvaditi 
bhāvaḥ he piṃgapiṃga namo'stvityanvayaḥ | 
sarvāsarvadāhadvayavarṇaṇena dviruktyā vahnivācaka 
piṃgapigapadalakṣyāya nama ityarthaḥ ||

aṣṭamapadastavamāha taditi -

tatsaktyanugrahātsvātmani baddhādya gocare puṃsām |
janayatyamitejñepi jñānajñānāstute namastasmai || 78 ||

(57) yaḥ śaktyanugrahāt hetoḥ baddhādyagocare amite aprameyejñe sva 
prakāśe svātmani viṣaya saptamīyaṃ puṃsāṃ anugraha yukta puṃsāṃ 
tat jñānaṃ janayati api evakārārthaḥ tasmai te he jñānajñāna 
namo'stvityanvayaḥ | atrāpi niyamāt jñānajñānapadavācyāya nama 
ityarthaḥ ||

navamapadastavamāha vikṣobhya iti -

vikṣobhya nādaśaktiṃ racayatibindukrameṇa yaśśabdān |
puṃvaktreṇaprathamaṃ namo'stu te śabda śabda tasmai ca || 79 ||

nādaśaktiṃ kuṇḍalinī rūpāṃ vikṣobhya bindukrameṇa nāda bindvādi 
krameṇa ityarthaḥ | yaḥ śabdān sūkṣmā paśyantī madhyamā vaikharī 
rūpān pumarthaṃ puruṣasya prayojanāya puṃvaktreṇa puruṣa vaktreṇa 
racayati | tasmai te he śabdaśabda namo'stvityanvayaḥ | śabdotpādakatayā 
śabdaśabdapadavācyāya nama ityarthaḥ ||

eṣāṃ navapadānāṃ pūjāvidhānamāha etaditi -

p. 61) etaduttarapīṭhe padanavakaṃ yadrūktapāṭhena |
aṣṭācatvāriṃśatsaṃkhyairvarṇairūpetamatha pūjyam || 80 ||

rurūktapāṭhena aṣṭācatvāriṃśatsaṃkhyaiḥ varṇaiḥ upetaṃ yat 
padanavakaṃ tattu uttarapīṭhe pūjyamityarthaḥ | atra anarcitānarcitādīni 
nava padāni krameṇa pūjyānītyarthaḥ ||

īśānapīṭha padanavakastutimāha kurvannityādibhirdarśabhirāryābhiḥ |

tatra prthamapadastavamāha kurvanniti -

kurvannupādhiniṣṭhaṃ sarvaṃ yo nopalabhyate paśubhiḥ |
atisūkṣmatvānnityaṃ namo'stu te sūkṣma sūkṣma tasmai ca || 81 ||

upādhiniṣṭhaṃ sarvaṃ kurvan antaryāmitayeti bhāvaḥ | yaḥ paśubhiḥ 
no'palabhyate tatra hetuḥ ati sūkṣmatvāt nityaṃ tasmai te he sūkṣma 
sūkṣma namo'stvityanvayaḥ | niyamāt dviruktyā atisaukṣmya vācaka 
sūkṣma sūkṣmapadavācyāya nama ityarthaḥ ||

p. 62) dvitīyapadastavamāha mantreti -

mantrārthatayā niyataḥ kathito yo'nena śiva padenā'tra |
proktaissadaivadharmairyuttasmai namo'stu śiva śiva te || 82 ||

proktaiḥ dharmaiḥ sadā upayuktaḥ yaḥ mantrārtha tayā śivapadena atra 
śivaśāsane niyataḥ kathitaḥ tasmai te he śiva śiva namo'stvityanvayaḥ |
niyamāt dviruktyā śiva śiva padavācyāya nama ityarthaḥ ||

tṛtīyapadastavamāha ānantya iti -

ānantyataḥ phalānāṃ vistārānnoktamapi tu saṃkṣepāt |
sarvandadātyabhīṣṭaṃ parāparaṃ yo namo'stu sarvadate || 83 ||

phalānāṃ ānantyataḥ vistārāt noktaṃ api tu saṃkṣepāt uktaṃ 
parāparaṃ sarvaṃ abhīṣṭaṃ yo dadāti tasmai te he sarvadā 
namo'stvityanvayaḥ |

p. 63) sarvaṃ dadātīti sarvadapadavācyāya nama ityarthaḥ ||

caturthapadastavamāha iṣveti -

(58) iṣvetthamarthanīyaḥ praṇavasto yaḥ tribhirnamaskāraiḥ |
bandha trayatastryātmaka kāryadhvaṃ sāyate namastasmai || 84 ||

iṣvā iti yajanaṃ kṛtvā ante bandhatrayataḥ āṇavādi samutpannasya 
tryātmaka kāryasya dhvaṃsāya yaḥ praṇavasthaḥ tribhiḥ namaskāraiḥ 
ardhanīyaḥ tasmai nama ityanvayaḥ | bandhatrayamocanāya prayukta oṃ 
namo namo namaḥ pada smāryāya nama ityarthaḥ ||

pañcamapadastavamāha mantrārtha iti -

mantrārtha yo dvayorapyupasaṃhāraḥ padaiśśivāyeti |
yadadhiṣṭhāna mantropi śivastasmai śivāya te stu namaḥ ||

śivāyeti pade mantrārthayordvayorapyupasaṃhāreṇa tvaṃ 
yadadhiṣṭhānamantropi śivaḥ yadadhiṣṭhānāt sadā śreyānityarthaḥ |
p. 64)  tasmai te śivāya namo'stvityanvayaḥ | mantrārthasphoraka śivāya 
padabodhyāya nama ityarthaḥ |

ṣaṣṭhapadastavamāha kāryeti -

kāryatve nivṛttāvapi pade ye nojanvanti kāraṇatvaṃ yat |
ājñāṃ vinā tadardhaṃ praṇave yo'ntyaṃ punarnamastasmai  || 86 ||

kāryatve nivṛttāvapi kāraṇatvaṃ ājñāṃvinā nojanyantīti 
yattadunārthaṃ punaḥ praṇave svarūpe ye na yojyante tasmai 
namo'stvityanvayaḥ | yojana viṣaya praṇavākāratayā oṃ pada vācyāya 
nama ityarthaḥ ||

saptamapadastavamāha taditi -

taccāpikāraṇatvaṃ teṣāṃ trividhaṃ tribhirnamaskāraiḥ |
bandha trayādhikārāt namā'stu te hanti yo namastasmai || 87 ||

teṣāṃ patīnāṃ trividhamapi tatkāraṇatvañca bandhatrayādhikārāṃśca 
tṛbhiḥ namaskāraiḥ namaskṛto yo hanti tasmai te namo'stvityanvayaḥ |
p. 65) adhikāra trayamocaka prayukta namo namo namaḥ padavācyāya 
namaḥ ityarthaḥ ||

aṣṭamapadastavamāha tadanviti -

tadanu śivatvavyaktistadvṛddhivardhate dvayaṃ yasmāt |
dvābhyānnamaskṛtibhyāṃ śivastasmai dvirnamo'stu tasmai te || 88 ||

tadanu bandha trayanivṛtyanantaraṃ śivatvavyaktirbhavati tacchivatvaṃ 
dvābhyāṃ namaskṛtibhyāṃ yasmāt śivāt nimittāt buddhyā dvayaṃ 
vardhate tadviguṇaṃ śivatvaṃ bhavatīti yāvat śivatvaṃ prāpyapunaḥ 
paśutvaṃ na bhavatītyarthaḥ ||

navamapadastavamāha prānta iti -

prānta praṇavaśivo yo'bhidhyātaḥ prārthita phalaṃ tvetat |
avinaśvaraṃ śivatvaṃ dadāti puṃso namo'stu tasmai te || 89  ||

p. 66) yaḥ prāntapraṇavaśivaḥ mantrānta praṇavākāra śiva ityarthaḥ | 
abhidhyātaḥ prārthitassan puṃsaḥ avinaśvaraṃ śivatvaṃ etatphalantu 
dadāti tasmai praṇavāya te namo'stvityanvayaḥ | phalasvarūpa oṃ pada 
vācyāya nama ityarthaḥ ||

atheṣāṃ navapadānāṃ pūjāprakāraṃ varṇasaṃkhyāñca āha īśa iti 
-

īśānakoṇapīṭhe padanavakaṃ tvetadeva pūjyam |
tryadhikatriṃśatsaṃkhyairvarṇaivyaktaṃ rurūkta pāṭhena  || 80 ||

rurūkta pāṭhena paṭhita tryadhika triṃśadvarṇayutaṃ etatpadanavakaṃ 
īśānapīṭha koṇe saṃpūjyaṃ ityanvayaḥ | asminpīṭhe 
sūkṣmasūkṣmapadāni nava padāni pūjyānītyarthaḥ ||

evaṃ vyomavyāpimantra rājasya ekāśīti padastavaṃ vidhāyastavakartrā 
svanāmaprakaṭayan stavasyāpi kheṭapāla 
kṛtamantrarājavyākhyānārthānusāritāñca 
aṣṭaṣaṣṭyadhikavarṇaśatatrayākāra mantrasya svaśreyaḥ pradatvaṃ 
prārthayate |
p. 67) itthaṃ varṇaśatatrayaṃ saha punaḥ ṣaṣṭyāṣṭasaṃyuktayā 
mantro raurava bhāṣya vārtika girā śrīkheṭapālena yat |
vyākhyātorthadiśā tayāstutimimāṃ tāṃ rāmakaṇṭhena yat 
kṛtvā nāma śubhānvitaṃ bhavatunaḥ śreyaḥ pradaṃ sarvadā || 91 ||

rauravabhāṣyavārtika kṛtā śrīkheṭapāla nāmnā vyākhyātaḥ mantraḥ 
aṣṭasaṃyuktyā ṣaṣṭyā punassahavarṇaśatatrayaṃ tayā arthadiśā itthaṃ 
tāmimāṃstutiṃ kṛtvā nātha śubhā kvipiceti śubhidhātoḥ kvippratyaye 
sati nāthavaccobhate iti vyutpatyā nāthavaccobhamānena rāmakaṇṭhena yat 
añcitaṃ pūjitaṃ sarvadā śreyaḥ pradaṃ bhavatviti anvayaḥ |

p. 68) itthaṃ uktaprakāreṇa navakamala pīṭheṣu uktastutikrameṇa 
vyomavyāpi padamantra pūjāvatāṃ sarvaśreyaḥ prāptiḥ karatalasthā 
bhavatītibhāvaḥ | itthametatstotra pradarśitānāṃ ekāśīti 
padanirvacanānāṃ sammatavacanāni tu kālottare spaṣṭamuktāni | 
granthavistārabhītyā nātralikhitam | etatsvarūpa pradarśaka vacanāni 
bṛhaṭṭīkāyāṃ darśitaṃ tatra avadhāryatām |

śrīmadabhrasabheśasya diśyāgneyyāṃ sadāvasan |
devajñāna riṣīdreti (ṛṣīndreti) viśṛtobhuvanatraye || 

tannāmadhāriṇā caiva iyaṃ vyākhyā samīritā |
iti vyomavyāpistavaṃ laghuṭīkāsahitaṃ samāptam || 

śrīgurubhyo namaḥ ||

śubhaṃ bhavatu ||


###########   END OF FILE  #######