####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00078
Uniform title: śataratnasaṃgraha
Author : umāpatiśivācārya

Description: 
Transcribed from theTantrik Texts Series volume  22 of John Woodroffe.


Notes: 
Transcribed by the staff of Muktabodha under the supervision of Mark S. G. Dyczkowski.

Revision 0: November 30, 2005

Publisher : Luzac and Co.
Publication year : 1944
Publication city : Calcutta
Publication country : India
####################################################



śrīḥ

śrī-umāpatiśivācāryakṛta


śataratnasaṃgraham


vande kundendudhavala-dantabhinnāntarāyakam |
dānadhārāpatadbhṛṅga-saṃgītaṃ kuñjarānanam ||
śrīmadabhrasabhāmadhye nityamānandatāṇḍavam |
kurvāṇamumayā devyā sevyamānaṃ śivaṃ bhaje ||

kālāditattva-pariṇāmadhurīṇamāyā-vikṣobhaka-sphuradanantaniyogadhuryaḥ |
śuddhādhvajanmapaṭubinduvijṛmbhakāri-pāśān vimocayatu naḥ 
parameśvaro'yam ||

cidambare kḷptamaṭhaḥ śivaśrīrumāpatirnāma śivāgamajñaḥ |
svayambhuniśvāsamataṅgadevyāmataṃ mṛgendraṃ kiraṇaṃ parākhyam ||

śrīdevīkālottaraviśvasāraṃ 
jñānottaraṃ vīkṣya daśāpi caikam |
sārāṇi sūtrāṇi śataṃ gṛhītvā
cakāra bandhaṃ śataratnarūpam ||

karṇabhūṣaṇayogyānāmāgamajñānaśālinām |
amīṣāṃ śataratnānāmullekhaḥ kriyate mayā ||

eṣāṃ ca sūtrāṇāṃ ratnatvaṃ rājanādbhukti-mukti-rāgotpādakatvāt 
iṣṭavidhānācca | yathā ratnatraye-

rājanāt sarvatattveṣu rāgādebhyo'dhikārayoḥ |
ratnānīṣṭavidhānācca bindvādyāḥ śivaśāsane || iti ||


ratnatraye tvevamuktam:-

rājanāt sarvatattveṣu rāgādevyo'dhikārayoḥ |
īśvarāṇāṃ śivānāñca dhāraṇīyatayā dhiyā || 4
puṃsāmapratighodāramarīcinicayena ca |
ratnānīṣṭavidhānācca bindvādyāḥ śivaśāsane ||-ratnatrayam || 5



iha jagati kalikālāveśāt āgamārthe lupte pāṣaṇḍamatābhivṛddhau 
satyāṃ guruśiṣyakrame ca saṅkīṇeṃ svaśiṣyān anugrahītukāmaḥ 
paramakāruṇikomāpatiśivācāryastāvadakhilāgamajñānakāṇḍasārabhūtaṃ 
saṃsārapāśasandānitānāṃ paśūnāṃ paśutvanivṛtti-śivatvābhivyakti-hetu-
jñāna-dīkṣāsvarūpa-vivecaka-siddhāntanirṇayaṃ sūtraratnaśataṃ 
saṃjagrāha | tasya saṃgrahasya sadyo-jyotiḥ pāda-rāmakaṇṭha-
nārāyaṇakaṇṭhāghoraśivādivyākhyānusāreṇa 
asmadgurusampradāyānusāreṇa ca vyākhyā kriyate | sā ca vyākhyā kā ?
padacchedaḥ padārthoktirvigraho vākyayojanā |
ākṣepoktisamādhānaṃ vyākhyānaṃ pañcalakṣaṇam || iti |

tatra prathamaṃ granthādāvabhīṣṭadevatā-namaskārasya vastu-nirdeśasya ca 
vaktavyatayā'yaṃ saṃgrahakārastādarthyena svāyambhuvasūtraṃ prathamaṃ 
gṛhṇāti-

śivaṃ praṇamya paramaṃ nidhaneśamataḥ param |
jñāna-dīkṣe pravakṣyāmi te śṛṇudhvaṃ samāhitāḥ || 1

atra śivaśabdena savārthajñānakarttṛtvalakṣaṇo vighnanināśaheturaśivāpahaḥ 
paśūnāṃ ca śivapradaḥ aprameyatvādirūpaḥ śāntyatītaḥ parameśvaraḥ 
pratipādyate | yathā tatraiva -

aprameyamanirdeśyamanaupamyamanāmayam |
sūkṣmaṃ sarvagataṃ nityaṃ dhruvamavyayamīśvaram ||
aprameyamanantatvādanirdeśyamalakṣyataḥ |
anaupamyamasādṛśyād vimalatvādanāmayam ||
sūkṣmaṃ cānupalabhyatvād vyāpakatvācca sarvagam |
nityaṃ kāraṇaśūnyatvādacalatvācca tad dhruvam ||
oṃkārātmatayā bhāti śāntyatītaḥ paraḥ śivaḥ | iti |

ratnāni yathā loke rājante mahārghatayā prakāśante | samīpavarttināñca 
rāgamutpādayanti | puruṣaiścāvayavairdhāryante | dauptimantīṣṭavidhāyīni 
ca bhavanti | tathā bindvādayaḥ padārthāḥ sarveṣu śaktyādiṣu tattveṣu 
upādānatayā'dhiṣṭhātṛtvena ca prakāśante īśvarāṇāmanantādīnāṃ 
śivānāṃ ca sadāśivādipadasthānāmātmanāmebhyo hetubhūtebhyo 
yathāsvamadhikārayoranugrāhyānugrāhakatvarūpayoḥ sadā rāgo bhavati | 
puruṣāṇāṃ  caite dhiyā dhyeyatayā dhāryante | apratihata-vilakṣaṇatejaso 
bhuktimuktyākhyābhauṣṭapradāyinaśca bhavanti | tasmādete'pi śivaśāstre 
ratnāni procyanta dūtyadhyāhāraḥ | apratihatavilakṣaṇatejastvayā 
caiṣāmatiśayaṃ darśitam |-ratnatrayollekhinī pṛ0 3



muktātmanāmapyetallakṣaṇa-lakṣitatvāt teṣāmapi namaskāryatvaṃ syāt, 
tanmā bhūditi tasya viśeṣaṇatayā paramapadamuktam | paramaḥ anādisiddha 
ityarthaḥ | muktātmanāṃ tu tatprasādalabdha-śivatvayogitayā tato vaiṣamyam | 
taduktamācāryaiḥ -

muktātmāno'pi śivāḥ kintvete tatprasādato muktāḥ |
so'nādimukta eko vijñeya----------iti | [tattvaprakāśaḥ - 6]

tādṛśaṃ śivaṃ namaskṛtya | ataḥ paraṃ śivaprasāda-vidhūta-
bandhanamāvirbhūtasarvārthajñānakriyaṃ sarvānugrāhakaṃ svaguruṃ 
nidhaneśa-nāmānaṃ tantrāvatārakaṃ  rudraṃ ca praṇamyeti sambandhaḥ | 
taduktaṃ kāmike-

nidhaneśāt svayaṃbhūtaṃ trikoṭyardhena sammitam |
nidhaneśāt svayambhūtaṃ śrutavān nalinodbhavaḥ || iti | (1/59)

atra svayambhūtaśabdena svāyambhūva āgama ucyate | jñānadīkṣe 
pravakṣyāmīti | jñānaṃ ca dīkṣā ca jñānadīkṣe iti dvandvasamāsaḥ | 
pravakṣyāmi prakarṣeṇa vakṣyāmīti pratijñāvacanamidam | anayā 
jñānapratijñayā patyādipadārthānāmapi tajjñeyānāmarthāt 
pratijñāsiddhiḥ | dvandvanirdeśaśca dvayorapi prādhānyajñāpanārthaḥ | 
kasyacij jñānaṃ pradhānaṃ, kasyacid dīkṣeti dīkṣāvyākhyā | tayoḥ 
karturācāryasya jñānaṃ pradhānam, mumukṣostu dīkṣeti | jñānadīkṣayoḥ 
patipadārthe'ntarbhāveṇa tantrārthasāratayā pravakṣyāmīti pratijñā kṛtā | 
tataḥ svayaṃ śivaśaktinipātācchivadīkṣayā saṃskṛtān 
jñānārthino'dhikārayogyān bālakhilyān ṣaṣṭisāhasrasaṃkhyākān ṛṣīn 
samādhāyāvasthāpayati-te śṛṇudhvaṃ samāhitā iti | te prakṛte jñānadīkṣe 
samāhitamanaso bhūtvā śṛṇudhvamityarthaḥ | anena prathamasūtrasaṃgraheṇa 
saṃgrahakāreṇa'pyanena devagurunamaskriyā -pratijñā-
svaśiṣyasāvadhānāvasthāpanāni kṛtānīti bodhyam | adhyāpakasya 
bodhyabodhakalakṣaṇaḥ parādikaḥ pañcavidhaḥ sambandhaḥ | tatra śiva-sadā-
śivayoḥ sambandhaḥ paraḥ, sadāśiva-nidhaneśayormahān, nidhaneśa-
svayambhuvordivyaḥ, svayambhu-bālakhilyānāṃ divyādivyaḥ, bālakhilya-
manuṣyāṇāmadivya iti pañcavidhaḥ sambandhaḥ parādiko boddhavyaḥ | 
tathoktam-

paro mahāṃstathā divyo divyādivyastathaiva ca |
adivyaśceti pañcaite sambandhāḥ parikīrtitāḥ ||

asya saṃgrahasya tu jñānādirviṣayaḥ | tajjñānaṃ phalam | jñāna-dīkṣayorasya 
ca pratipādya-pratipādakabhāvaḥ sambandhaḥ | 

 

dīkṣitāstvadhikāriṇa iti viṣaya-prayojana-sambandhādhikāriṇo jñeyāḥ || 1 ||

athātma pratijñātayorjñānadīkṣayoḥ pratipādya-pratipādakabhāva-sambandha-
prayojana-nirdeśaka-tayā rauravasvāyambhuvasyādimaṃ sūtraṃ saṃgṛhṇāti -

athā''tma-malamāyākhya-karmabandha-vimuktaye |
vyaktaye ca śivatvasya śivāj jñānaṃ pravartate || 2

	atha cicchaktisaṃnirodha-kartradhikārakṣayābhimukhabhāvādanantaram | 
ātmamalamāyākhyakarmabandhavimuktaye-ātmanāmaṇūnāṃ malarūpo 
māyārūpaḥ karmarūpo yastrividho?bandhastadvimocanāya | śivatvasya vyaktaye 
ca śivabhāvaprakāśanāya ca | śivāt paramaśivāt jñānaṃ pravarttate utpadyat 
ityarthaḥ | idañca mūlasūtraṃ, tantrārtha-nirūpakatvādatha-
śabdādyalaṅkṛtatvācca | tathā mṛgendre-

yatra bījamivārūḍho mahātantrārthapādapaḥ |
ābhāti mūlasūtraṃ tadatha śabdādyalaṅkṛtam || iti ?

atrātmano vyāpakasya śivatvasannirodhako malaḥ | tena pratibaddhaśivatvo'sau 
nopāyaṃ binā jñeyaṃ kṛtyaṃ vā jñātuṃ karttu vā śaknoti | tasya hi 
bhogopāyāpekṣasya māyākhyo bandhaḥ kalādikaḥ pratipādyate | māyā 
jagadyoniḥ | tadākhyo bandho yaḥ sa tathākhyāyate | bhogasādhanopetasya 
bhogābhipretasya bhogyaṃ karma dharmādharmasamākhyātamiti | ayamātmano 
malādikastrividho bandhaḥ | yato hi anena yuktasya na sarvatra yugapat śivatvaṃ 
prakāśate | tasyātmanosmāt trividhād bandhād vimuktaye śivatvavyaktaye ca 
śivādnujidhṛkṣorjñānaṃ pravarttate | paśubhyaḥ pāśebhyaśca yaj jñānaṃ 
pravarttate, tat paśurūpavyañjakatvāt pāśarūpatvācca pratyuta pāśānāṃ 
draḍhimānaṃ janayati |

? tattvaprakāśādiṣu grantheṣu 'arthapañcakaṃ pāśa' dūtyādinā mala-
karma-sthūlasūkṣmamāyā-pāśānugrāhakaśivaśaktīnāṃ 
pañcānāmarthānāṃ bandhatvamabhihitam, atra tu traividhyamiti kathaṃ na 
virodha iti nāśaṅkanīyam | malakarmamāyākhyātāṃ * *?nāṃ jaḍānāṃ 
svakāryakaraṇāsāṃmarthyāt tadanugrāhakatayā svīkṛtāyāḥ 
parameśvaraśakteḥ gauṇapāśatvāt sthūlasūkṣmabhedabhinnāyā māyāyā 
ekatvavivakṣayā ca bandhatraividhyopapakteḥ |

? mudritabhāge mṛgendre śloko'yaṃ nopalabhyate |

 

śivastu paśupāśavilakṣaṇaḥ pāśapratipakṣabhūtaḥ sakalasāmarthyopacitaḥ, 
tasmādyaj jñānaṃ pravarttate, tat pāśānāṃ nivṛttaye paryāptaṃ dṛḍhaṃ ca | 
samānajātīyasya pratibaddhaśaktikasya samānajātīyamevāpratibaddhaśaktikaṃ 
śaktivyañjakam | śivaścātmanaḥ samānajātīyaḥ tasya 
pratibaddhaśivatvasyāpratibaddhaśivatvo'sau śivatvavyaktaye sat jñānaṃ 
pravarttayatīti yuktam | atra ca jñānapadena śivaśaktivācakena avabodharūpaṃ 
dīkṣārūpaṃ ca dvividhamapi saṃgṛhītam |

	nanu dīkṣāyāṃ kathaṃ jñānarūpatvamiti cet ? ucyate | yathā 
saviturgabhastirarthaprakāśako dāhamapi kurvan prakāśarūpatāṃ na jahāti 
ubhayarūpo'pi prakāśa ityucyate | tatrāpi jñānarūpatāṃ na jahāti | 
tenobhayarūpaṃ jñānamityuktaṃ |

	mala-māyākhya-karmabandhayuktatvam anugrāhyalakṣaṇam | etad vyastaṃ 
samastaṃ ? ca vivakṣitam | keṣāñcinmalayuktānāmanugrahaḥ | 
keṣāñcinmalakarmayutānām | keṣāñcinmalamāyākhyayutānām | 
keṣāñcinmalamāyākarmayutānāmanugrahaḥ | kuta etad vyastaṃ samastaṃ ca 
vivakṣitamiti | yataḥ akalānāmapi śodhyatvaṃ bodhyatvaṃ ca vakṣyati | te ca 
akalā dvirūpā vijñānākalāḥ pralayākalāśca | teṣāmubhayeṣāmapi 
māyākhyastāvannāsti | vijñānākalāḥ kṣīṇakarmāṇaḥ | teṣāmapi ye 
niradhikāreṇānugraheṇānugṛhītāste śivatulyā bhavanti | ye 
sādhikāreṇā'nugṛhītāste māyātītā vidyāvidyeśvarā bhavanti | 
malamāyākhyayuktānāmapi anugrahaḥ sambhaviṣyati | kutaścidupāyāt kṣīṇe 
karmaṇi māyākhyo bandhaḥ svakāraṇe pralayaṃ yāti | tasya ca 
pralayābhimukhyakāla eva kadācit parameśvaraśakteranugrahaḥ, 
pravṛttikālasyāniyatatvāt; ātmano'pi 
cicchaktisaṃnirodhakartradhikārakṣayābhimukhyakālasya niyatatvāt tadanugraho 
bhavatyeva | asmadādīnāṃ māyādimaṇḍalasthānāṃ ca 
vidyāvidyeśvarāṇāṃ ca malamāyākhyakarmabandhaprahāṇamanugrahaḥ, 
yatasteṣāmapi māyādimaṇḍalasthānāṃ vidyāvidyeśvarāṇāṃ 
kalādiyuktānāṃ bhogabhujāṃ satāmanugrahaḥ | idaṃ tarhi śivājjñānaṃ 
pravarttata iti anugrahopāyalakṣaṇamavyāpakaṃ, icchāmātreṇāpi 
keṣāṃcidanugraha iṣyate | sā cecchā jñāne avyāpteti cet ? na | icchāpi 
śivaśaktireva | sā ca dānakṣapaṇalakṣaṇatvāt dīkṣāntaḥ patatīti 
bodharūpatvātyāgācca jñānamityanena vyāpyata eveti |

? vyastaṃ samastamiti | tathācīktaṃ tattvaprakāśe -

paśavastrividhā jñeyā vijñānapralayākalāḥ sakalāḥ |
malayuktastavādyo malakarmayuto dvitīyaśca || 1 | 8
malamāyākarmayutaḥ sakala.......| iti |



 	nanvevaṃ jñānasyaiva nivṛtti-tattvābhivyaktihetutayā kriyādi-
yogacaryāṇāmānarthakyaṃ prāptamiti ced | vāḍham | tathāpi caryā-kriyā-
yogānāṃ vidyātattvādikrameṇa śiva-sālokya-sāmīpya-sārūpya-
sampādanadvārā śivasāyujyadāyakajñānahetutvena vaiyarthādyabhāvāt | 
yathā devī-kālottare-

jñānotpattinimittaṃ tu kriyācaryāḥ prakīrttitāḥ |
tathāca suprabhede-yogābhyāsaṃ tataḥ kṛtvā jñānaṃ tatra tadābhyaset |
tadā'jñānāndhakāraṃ ca jñānadīpena nāśayet ||

śivajñānabodhasaṃgrahe-

athacaryā-kriyā-pādaṃ yogapādaṃ tathaiva ca |
jñānapādaṃ kramāccaiva śivena paribhāṣitam ||
etaccaturvidhaṃ mārgaṃ sālokyādi-phalapradam |

suprabhede-

sālokyaṃ caiva sāmīpyaṃ sārūpyaṃ sāyujyakaṃ tathā |

atra caryādi-catuṣṭaye'pi dīkṣāyāḥ adhikārasampādakatayā sāmye'pi 
jñānaphalasāyujyarūpordhvagatisampādakatayā jñānena 
samaprādhānyamuktam | tathā vakṣyati saṃgrahakāraḥ -

yasmāt pravitatād bandhāt parasaṃsthānirodhakāt |
dīkṣaiva mocayatyūrdhvaṃ śaivaṃ dhāma nayatyapi || iti |

atra ca dīkṣābhedaḥ kriyākaraṇamaṇḍane pradarśitaḥ -

nirvī(rvi)śeṣakṛtā tūṣādhikaraṇācāryasthitenā'munā
sādhārā tu caturvidhā saha binā bījādhikārakramāt |
dvedhādyā śivalokadhamabhajanāt tatrādimā bhautikī 
naiṣṭhikyapyaparā tu jāticaritā tyāgāt kṛtā saṃskriyā ||

nirbījā dvividhā nṛṇāmamṛtadā sadyaścireṇāpi yā 
nityādyāśrayavajanāt tu sadadhikārādhikārojjhitā |
sādhāreti caturvidhā punariyaṃ jñānakriyābhyāṃ dvidhā
jñānī jñānavatāṃ kriyā tvaviduṣāṃ yā cakṣuṣīpūrvikā || iti || 2

atha jñānapadopāttadīkṣārūpād vyatiriktajñānasya dvaividhyaṃ 
devyāmatasūtreṇa saṃgṛhṇāti -

jñānaṃ dvividhamākhyātaṃ paraṃ caivāparaṃ smṛtam |
paraṃ caivāvabodhākhyamaparaṃ śāstramuttamam || 3 ||



 	tatra parāparabhedena jñānaṃ dvividham | paramavabodharūpam | aparaṃ 
kāmikādi-tantrarūpamityarthaḥ | tathā sātvatasaṃhitāyām |

jñānaṃ śivaṃ paraṃ bodhamaparaṃ tantrasaṃjñitam | iti |

avabodharūpaṃ jñānaṃ ca śivasya śaktireva | sā ca dvividhā samavāyavarttinī 
parigrahavarttinī ceti | tatra samavāyavarttinyapi dvividhā bodharūpā kriyārūpā 
ceti |  tatra bodharūpā sarvārthaparicchettrī | kriyārūpāpi dvividhā | 
anugrahaparūpā  tirobhāvarūpā ceti | tathā coktam -

anugraha-tirobhāvau dvau dharmau hi sadāśive | iti |

atra parāvabodharūpaṃ 
jñānamaparajñānarūpaśabdārūḍhamevārtheṣu pravarttate | nanvidaṃ 
jñānaṃ dīkṣāyāḥ phalam, ataḥ kathaṃ 
jñānadīkṣayonugrahopāyatāsāmyamuktam ? satyam | kintu jñānamācāryaṃ 
sādhyaṃ sādhanaṃ ca jñāpayati | sa ca tasmād 
viditasādhyasādhano'nugrāhyāṇāṃ sādhyasiddhaye sādhanaṃ prayoktuṃ 
śaknoti | sarvatra ca muktivādino muktisiddhaye jñānameva pratijānīte | na 
cānuṣṭhānaṃ viṃnāsau bhavitumarhati | yatrāpi ca jñānādeveti, tatrāpi ca 
sādhanānuṣṭhānamavaśyambhāvīti | tasmād jñānadīkṣayorubhayorapi 
samānatayā'nugrahopāyatvaṃ pūrvasūtroktamupapannam || 3 ||

athāvabodharūpasya parajñānasya darśanātmatāprāptikramaṃ 
mṛgendrasūtreṇadarśayati -

sṛṣṭikāle maheśānaḥ puruṣārtha-prasiddhaye |
vidhatte vimalaṃ jñānaṃ pañcasroto'bhilakṣitam || 4 ||

sṛṣṭikāle sargārambhe maheśānaḥ parameśvaraḥ puruṣārthaprasiddhaye 
puruṣārthasya parāparamuktibhuktyātmanaḥ saṃprāptyartham | vimalamiti | 
avabodhātmano nādarūpatvena prathamaṃ prasṛtatvādgṛhītopādhibhedam | 
pañcasrotobhilakṣitaṃ pañca  ca tāni srotāṃsi pañcasrotāṃsi ūrdhva-pūrva-
dakṣiṇottara-paścimānanāni abhitaḥ samantāt lakṣitaṃ prasṛtatvena lakṣitam | 
sadāśivarūpeṇa kāmikādibhinnadarśanātmatāṃ prāptamiti yāvat | tādṛśaṃ 
jñānaṃ śāstrarūpaṃ vidhatte nirmimīte | niṣkalācchivāt avabodharūpaṃ 
jñānameva prathamaṃ nādarūpatvena prasṛtam | paścāt sadāśivarūpāt 
tantrākāratāṃ prāptamityarthaḥ | taduktaṃ pauṣkare - 

adṛṣṭavibhavācchāntācchivāt paramakāraṇāt |
nādarūpaṃ viniṣkrāntaṃ śāstram ...... || iti ||

 

tatraiva-

sadāśivo'pi bhagavān nādarūpatayāgatam |
ṣaṭpadārthamayaṃ jñānamanekacchanda eva tat ||

nanu niṣkalaśivasya vāgindriyādirahitasya kathaṃ nādotpādakatvamiti cet ? na | 
indriyādi-rahitasyāpi ayaskāntasya lohākarṣaṇasāmarthyavacchivasyāpi 
tatsamarthyopapatteḥ |

taduktaṃ parākhye-

sannidhānena yasyā'smin sarvakāryasya sambhavaḥ |
akṣahīne'pi samarthyaṃ dṛṣṭaṃtatkarṣaṇātmani ||
sāmarthyaṃ tadvadīśasya sarvakṛtye nisargajam | iti |

pauṣkare ca -

vāgīndriyānapekṣasya śaktiḥ sarvatra niḥsṛtā |
atyantavimalatvena tayā vakti kimadbhutam | iti |

tathā kiraṇe -

niṣkalaḥ kinna kalyo'sau yadvākalyaḥ kathaṃ jagat |
yathā'tra kurute śaktyā tathā śāstraṃ na kiṃ prabhuḥ || iti |

atra śāstraśabdanirvacanam -

śuddhātmanāṃ hitaṃ śāstraṃ trāyate yad bhavārṇavāt |
tacchāsanaparitrāṇācchāstramityabhidhīyate ||

	tatra laukika-vaidikādhyātmikātimārgika-māntrikabhedena sadāśivasya 
pratimukhaṃ  pañcavidhabhinnāni pañcaviṃśatisrotāṃsi bhavanti | 
teṣvevāntargataṃ sakalaṃ vāṅmayaṃ śāstrajālam | tathā kāmike-

laukikaṃ vaidikaṃ caiva tathādhyātmikameva ca |
atimārgaṃ ca mantrākhyaṃ tantrabhedamanekadhā ||
sadyovāma-mahāghora-puruṣeśānamūrttayaḥ |
pratyekaṃ pañcavaktrāḥ syustairuktaṃ laukikādikam ||
pañcaviṃśatibhedena srotobhedaḥ prakīrttitaḥ |
eṣvevāntargataṃ vastu vāṅmayaṃ vastuvācakam ||

tathā somasiddhānte -

pañcadhā laukikaṃ tantraṃ tathā tantraṃ ca vaidikam |

 

tantramādhyātmikaṃ tadvadatimārgaṃ tathaiva ca ||
tathaiva mantratantrākhyaṃ teṣu yad bahudheritam | iti |

	etallaukikādisvarūpaṃ sarvātmaśambhukṛta-siddhāntadīpikāyāṃ 
prapañcitamiha grantha-gaurava-bhayānna likhitam | tatraivā'vadhāryatām | tatra 
māntrikaṃ pañcavidhamapi krameṇa ūrdhvapūrva-kubera-varuṇa-yāmya-
sambandhāt muktipradasiddhānta-sarvaviṣaharaṇagāruḍa-sarvavaśīkaraṇa-vāma-
bhūtagrahanivārakabhūtatantra-śatrukṣayakarabhairava-saṃjñakam | tathā 
kāmike-

tathaiva mantratantrākhyaṃ sadāśivamukhodbhavam |
siddhāntaṃ gāruḍaṃ vāmaṃ bhūtatantrañca bhairavam ||
ūrdhva-pūrva-kuberā-pya-yāmya vaktrād yathākramam |

etāni siddhāntādīni kāmike yathā-

sāmānyañca viśeṣañca śaivaṃ vaiśiṣṭikaṃ vacaḥ |

atra ca śāstrarūpajñāne vedādijñānamaparam | siddhāntajñānaṃ param | 
siddhāntajñāne'pi śivajñānaṃ param | rudrajñānamaparam | śivajñānamapi 
pravaktṛkramādādyajanakakramācca parāparatvamādadhyāt | evaṃ 
rudrajñānamapi | tathā upabhedānāmapi parāparatvamiti parāparabhedā 
bodhyāḥ | evaṃ śabdarūpajñānavat avabodharūpajñānasyāpi 
śuddhamārgā'śuddhamārga-śiva-sadāśiva-paśu-māyā-
prakāśakatvādibhiḥ parāparabhedā mantavyāḥ | tathā 
dīkṣārūpajñānasyāpi naiṣṭhika-bhautika-nirbīja-sabīja-śivadharmi-
lokadharmyādibhiḥ parāparabhedā ūhanīyāḥ | uktaṃ svāyambhuve-

tadekamapyanekatvaṃ śivavaktrāmbujodbhavam |
parāpareṇa bhedena gacchatyarthapratiśrayāt ||

tathā kāmike-

ādāvabhūd dvidhā jñānamadhikārivibhedataḥ |
parāpareṇa bhedena patipaśvarthadarśakam ||
śivaprakāśakaṃ jñānaṃ śivajñānaṃ paraṃ smṛtam |
vedādyaparavijñānaṃ paśupāśārthadarśakam ||
yathā vilakṣaṇaṃ cakṣuḥ kṣapāyāṃ śvabiḍālayoḥ |
tathā vilakṣaṇaṃ jñānamevametat parāparam | iti |

	siddhāntajñānaṃ kāmikādīni praṇavādyaṃśuparyantāni praṇītāni 
yāni tāni śivabhedābhidheyāni śivādhikaraṇajñānaṃ śivabheda ityucyate | 
vijayādīnyaṣṭādaśasaṃkhyātāni tantrāṇyanādirudrādirudrāṇāṃ 
yānyabhihitāni tāni rudrabhedābhidheyāni rudrādhikaraṇajñānaṃ rudrabheda 
iti | 



ata eva rudrātmabhinnamaṣṭādaśasaṃkhyakamiti śivarudrātmakaṃ 
tantramaṣṭāviṃśatisaṃkhyakam |

svāyambhuve-

cintāmaṇirivātrā'sau sthitaḥ sarvasya kāraṇam |
ekameva śivajñānaṃ vibhinnaṃ daśadhā punaḥ ||
tathāṣṭādaśadhābhinnaṃ bhedāntaravisarpitam |

śrotṛbhedo mukuṭatantre varṇitaḥ -

śrotāraḥ śivabhedānāṃ pāramparyāstrayastrayaḥ |
dvau dvau tu rudrabhedānāṃ ṣaṣṭiruktā ṣaḍuttarā ||

tadbhedaḥ kiraṇe prapañcitaḥ -

sṛṣṭyanantarameveśaḥ śivān sṛṣṭvā daśātmajān |
jñānamevaṃ vibhajyaikaṃ teṣāṃ tatsaṃkhyayā'vadat ||
kāmikaṃ praṇavākhyasya sudhākhyasya tu yogajam |
dīptākhyasyāpi cintyaṃ tu kāraṇākhyasya kāraṇam ||
ajitaṃ suśivākhyasya īśasyāpi sudīptakam |
sūkṣmaṃ tu sūkṣmasaṃjñasya kālasyāpi sahasrakam ||
suprabhedaṃ gaṇeśasya hyaṃśusaṃjñasya cāṃśumān |
evaṃ prāthamikaṃ proktaṃ punaranyo gurukramaḥ || 
praṇavāt trikalaḥ prāptaḥ kāmikaṃ trikalāddharaḥ |
sudhākhyād yogajaṃ tantraṃ bhasmasaṃjñastataḥ prabhuḥ ||
dīptādrudrāt tu cintyaṃ ca gopatiśca tato'mbikā |
kāraṇaṃ kāraṇāccharvastataḥ prāptaḥ prajāpatiḥ ||
ajitaṃ suśivāt prāpta umeśo'pyacyutastataḥ |
īśād dīptaṃ trimūrttistu tataḥ prāpto hutāśanaḥ ||
sūkṣmaṃ sūkṣmād bhavaḥ prāptastasmāt prāptaḥ prabhañjanaḥ |
kālasaṃjñāt sahasrākhyaṃ bhīmo dharmastataḥ khagaḥ ||
gaṇeśāt suprabhedākhyaṃ tvavighneśastataḥ śaśī |
aṃśumaccāṃśujñāt tu prāpto hyagrastato raviḥ ||



evamete śivāḥ khyātāḥ śivabhedā daśādyake |
daśāṣṭasaṃkhyayā'pyanyo rudrabhedaḥ paro mataḥ ||
daśāṣṭasaṃkhyayā rudrān pūrvamutpādya buddhimān |
śivastatsaṃkhyayaiveha punastān bodhayat khagaḥ ||
rudrasyā'nādisaṃjñasya vijayaṃ tantramuttamam |
pārameśaṃ mahātantraṃ śrīrūpasya prabhāṣitam ||
niśvāsaṃ yad daśārṇasya prodgītaṃ nāma śūlinaḥ |
mukhabimbaṃ praśāntasya bindoḥ siddhamato matam ||
śivaniṣṭhasya santānaṃ siṃhaṃ saumasya coditam |
candrahāsamanantasya bhadraṃ sarvātmato matam ||
nidhanasya svayambhūtaṃ virajaṃ tejasaḥ smṛtam |
kauravyaṃ brahmaṇeśasya śivākhyasya ca mākuṭam ||
kiraṇaṃ devapituḥ khyātaṃ lalitaṃ cālayasya tu |
āgneyaṃ yacca tad vyomnaḥ śivasyāpi punaḥ param |
ete  jātāḥ sahajñāne śivadehāt punaḥ śṛṇu ||
prāptaścānādisaṃjñāt tu vijayaṃ parameśvaraḥ |
śrīrūpāt pārameśaṃ tu prāpto'smāduśanā muniḥ ||
daśākṣarācca niśvāsaṃ saṃprāptā śailasambhavā |
prodgītaṃ rudrasaṃjñāt tu kacākhyo munisattamaḥ ||
praśānto mukhabimbantu dadhīcirnāma yo muniḥ |
bindusaṃjñācca yat siddhaṃ prāptaścaṇḍeśvaro gaṇaḥ ||
śivaniṣṭhācca santānaṃ saṃprāpto haṃsavāhanaḥ |
nārasiṃhaṃ tu yat saumyān nṛsiṃhaḥ prāptavān mahān ||
anantāccandrahāsaṃ tu prāpto devapurohitaḥ |
bhadraṃ sarvātmadevāt tu vīrabhadro mahāgaṇaḥ ||
svāyambhuvaṃ tu nidhanāt saṃprāptaḥ padmasambhavaḥ |
virajaṃ tejasaḥ prāptaḥ prajārakṣaṇatatparaḥ ||
kauravyaṃ brahmaṇeśāt tu samprāpto nandikeśvaraḥ |
 īśānāt mukuṭaṃ prāpto mahādevo dhvajāśrayaḥ ||
kiraṇaṃ devapitṛtaḥ prāptaḥ saṃvartako muniḥ |
ālayāllalitaṃ prāpto rudro bhairavarūpavān ||
āgneyaṃ vyomasaṃjñāt tu samprāpto hutabhuk punaḥ |
tantrabhedo mayā proktaścātra saṃkṣiptalakṣaṇaḥ ||
yeṣu bhedeṣu yo bheda upabhedaḥ sa ucyate |
bhedo'yamupacāreṇa kalpitaḥ sa yatastataḥ ||
phalabhedo na kalpyo'tra jñānabhedaḥ prakalpyate |

idaṃ jñānaṃ krameṇa sadāśivānanta-śrīkaṇṭhamunigaṇa-paramparayā 
bhūmau pravarttate |

tathā-
anuṣṭupchandasā pūrvaṃ nibaddhaṃ bahukoṭibhiḥ |
sadāśevena devena tato'nantena dhīmatā || ?

pauṣkare-
tenoktaṃ parameśena śrīkaṇṭhāya mahātmane |
śrīkaṇṭhādṛṣayo labdhāstebhyo labdhāḥ sumānavāḥ ||

etanmahātantraṃ catuṣpādātmakaṃ bhavati | tathā mṛgendre-

tripadārthaṃ ? catuṣpādaṃ mahātantraṃ jagatpatiḥ || iti || 4 ||

anyaśabdarūpasya jñānasyonmukhe virasatve'pi pariṇāmasukhatayā 
bheṣajavat tasya grāhyatvamiti pratipādayituṃ parākhyasūtreṇa tasya 
bheṣajatvanirūpaṇaṃ karoti-

jñānametacchivakṣmotthaṃ saṃgṛhāṇātmabheṣajam |
pariṇāmasukhaṃ svādu viśeṣaguṇadarśakam || 5 ||

	ātmabheṣajametaj jñānaṃ saṃgṛhāṇa | gṛhyatāmityarthaḥ | auṣadhasya 
sarvasya bhūmyudbhavatvāt asya jñānarūpauṣadhasyāpi utpattibhūmiṃ 
darśayati-śivakṣmotthamiti | śiva eva kṣmā bhūmiḥ, tadutthaṃ 
tadutpannamityarthaḥ |

? mātaṅgapārameśvare tvevamuktam-

anuṣṭupchandasā pūrvaṃ nibaddhaṃ koṭisaṃkhyayā |
sadāśivena devena tato'nantena dhīmatā ||
-mātaṅgapārameśvaram | 1/31

? tripadārthamiti | pati-paśu-pāśarūpa-padārthatrayapratipādakam, 
padārthāntarāṇāmatraivā'ntarbhāvāt | catuṣpādamiti | kriyā-caryā-yoga-
vidyāpādairvibhaktamityarthaḥ |



punaḥ kīdṛśam ? pariṇāmasukham | pariṇāmaḥ udarkaḥ ? uttarakālasukhakaram | 
svādu amṛtasamānatvāt | viśeṣaguṇadarśakaṃ 
sarvajñatvādiguṇānāmabhivyañjakam | auṣadhapakṣe viśeṣaguṇasya 
svāsthyasyadarśakam | anena viśeṣaṇatrayeṇā'pi jñānasyā'sya 
agrāhyatāśaṅkā nirastā | loke udarkasukhakarāṇāmamṛtarūpāṇāṃ 
viśeṣaguṇasaṃpādakānāṃ padārthānāṃ sarvairapi grāhyatvāditi | 
ātmabheṣajamityasyā'bhiprāyaḥ - yathā cakṣuṣaḥ prakāśanaśaktiḥ 
vartamānā paśutvamalaruddhā gururūpeṇa paramaśivavaidyena 
paramakṛpālunā tadbheṣajajñānaprayogeṇa paśutvanirasanadvārā 
punarabhivyajyata iti | taduktaṃ śivadharmottare-

vyādhīnāṃ bheṣajaṃ yadvat pratipakṣaḥ svabhāvataḥ | 
tadvat saṃsāradoṣāṇāṃ pratipakṣaḥ śivaḥ smṛtaḥ || 
auṣadhasya ca sāmarthyād yathā doṣaṃ visarjayet |
tathātmajñānabhaiṣajyād doṣaṃ ca vinivartate ||
tasmāt sa paṇḍitaḥ śāntastapasvī vijitendriyaḥ |
śivajñānasya sambandhād bhāvamālocya mucyate || 5 ||

	iyatā prabandhena jñānasya vaktavyatāṃ pratijñāya tasya 
prayojanamupavarṇya taddvaividhyamabhidhāya tasya bahutantrabhedākāritāṃ 
prasādhya sarvairavaśyagrāhyatvaṃ ca samarthitam | idānīmanena śivajñānena 
pratipādyānāṃ pati-paśu-pāśarūpāṇāṃ trayāṇāmapi padārthānāṃ 
sadbhāvāvedakatayā anumānaṃ pramāṇayituṃ 
prathamamanumānasvarūpacatuṣṭayaṃ mataṅgasūtreṇa gṛhṇāti-

dharmeṇa sādhyate dharmī kvacit kāryeṇa kāraṇam |
kāraṇena kvacit kāryaṃ kvacidāmnāyadarśanāt || 6 ||

	atra prathamapādena sāmānyamiti anubhayātmakamiti 
labdhasaṃjñādvayamanumānamuktam | dharmeṇa gandhādirūpeṇa 
adhiṣṭheyapadārthena dharmī pṛthivyādirūpaḥ ādhārarūpaḥ padārthaḥ 
sādhyate jñāyate | kāryakāraṇarūpavyatirekeṇa 
dharmadharmisvabhāvamātrapratibandhamūlatvādidamanubhayātmakaṃ 
sāmānyamityucyate | tathā yogapāde-

śeṣavat pūrvavaccānyat sāmānyamaparaṃ smṛtam |

? udarkaḥ phalamuttaramityamaraḥ |



	etenā'numānena kvacit patipadārthaprakaraṇe śaktirūpadharmeṇa 
śaktipatirdharmīsādhyate | yathā vā paśupadārthaprakaraṇādau 
jñānakriyālakṣaṇena dharmeṇa paśupadārthalakṣaṇo dharmī sādhyate | yathā 
gandhādeḥ kastūrikādiḥ | tathā dvitīyapādena kāryaliṅgamiti viśeṣavaditi ca 
labdhasaṃjñādvayamanumānamuktam | kvacit kāryeṇa kāraṇaṃ tadvat 
padārthaprakaraṇe pṛthivyādirūpa-kāryeṇa tanmātrādi-māyāntaṃ kāraṇaṃ 
sādhyate | yathā madagandhādibhirmattagajānumānam | tathā-

yogapāde-

sthūlāvṛttaśakṛtpuñjabhūpṛṣṭhaṃ madagandhi ca |
stambhaśayyādibhiścihnairatrāsīnmattavāraṇaḥ || 
atīto hyanumānena sādhyaḥ śeṣavatā budhaiḥ | iti |

tṛtīyapādena kāraṇaliṅgamiti pūrvavaditi ca 
labdhasaṃjñādvayamanumānamuktam | kvacid bhogapadārthaprakaraṇe 
sukṛtaduṣkṛtānuṣṭhānena āgamasiddhakāraṇabhāvena kāryam 
āmuṣmikabhogapadārthaḥ sukhātmako duḥkharūpo vā'numīyate | 
upeyapadārthānuṣṭhānena siddhimuktilakṣaṇaṃ ca phalamanumīyate | yathā 
viśiṣṭaghanādibhiḥ kāraṇairvaṣṭyādikāryamanumīyate | yathā'traiva 
yogapāde-

kṛṣṇāñjananibhairuccaiḥ sāgopairniviḍairghanaiḥ |
nirvighnairvipulaiḥ snigdhaistaḍinnirghoṣasaṅkulaiḥ ||
pravṛṭsamayasamprāptairdṛṣṭairvṛṣṭiḥ pramīyate |
evaṃ pūrvavatā sādhyamanumānena vṛṭ sadā || iti |

caturthena pādena āgamānumānamuktam | kvacit=yatra tu trividhasyāpi 
kāryakāraṇadharmasvarūpapratibandhasyā'pagamaḥ, tatra viṣaye | āmnāyasya 
darśanāt āgamasiddhenānumānena sādhyate yathā mantramantreśvarādīnāṃ 
baindavaśarīrādirityanumīyate |

	nanu dharmaḥ śauklayādiranekatra vartamāno niyatadharmiṇaṃ 
vyabhicaratīti kathaṃ tato viśiṣṭadharmisiddhiḥ | tathā kāryamapi 
vahneścakramūrdhāderdhūmādi dṛśyate | kāraṇamapi dhanādi kāyaṃ 
vṛṣṭyādikaṃ kadācit karoti kadācinnetyanaikāntikatvāt kathaṃ tābhyāṃ 
kāraṇa-kārye sādhayituṃ śakyete iti |

	atrocyate | na dharmamātrasyā'sya hetutvamiṣyate | apitu 
avyabhicāraviśiṣṭadharmiṇaḥ kasyacideva viśiṣṭadharmasya, tathāsvabhāvatvena 
niścayāt | na tu tasya vyabhicāraḥ sambhavati | 



yasya vyabhicāraḥ pāṇḍutvāderna tasya hetutvam | tasya cābhyāsato 
niyatadharmigata-viśeṣagrahaṇena vyabhicārābhāvāddhetutvameva | taduktam -

na suṣṭhu vivecito dharmiṇaṃ vyabhicaratīti |

tathā kāraṇamapi meghādi | yadvaśyaṃ kāryajanakasvabhāvaṃ na tad 
brahmaṇāpi pratibaddhuṃ śakyam | yat tu ajanakasvabhāvaṃ na tadindreṇāpi 
janakaṃ śakyaṃ kartumiti na suṣṭuṃ vivecitaṃ kāraṇaṃ kāryaṃ vyabhicaratīti 
taduktam -

yadabhāvi na tad bhāvi yadbhāvi na tadanyathā |
iti cintāviṣaghno'yamagadaḥ kinna pīyate || iti |

evaṃ vakṣyamāṇa-patyādipadārthanirūpaṇopodghātatayā ṣaṭsūtrāṇi 
gṛhītāni | yathā -

cintāṃ prakṛtisiddhyarthāmupodghātaṃ pracakṣate || 6 ||

iti upodghātaprakaraṇam |

evaṃ padārthasiddhaye anumānacatuṣṭayaṃ pramāṇatayopanyasya prathamaṃ 
tāvat patipadārtho viśeṣavatā'numānena sādhayituṃ viśvasārottaraṃ 
gṛhṇāti -

acetanasya māyādeḥ pravarttakatayā patiḥ |
siddhaḥ sarvārthavit karttā vyāpakaḥ satatoditaḥ || 7 ||

sarvārthavit sarvajñaḥ | kartā sarvakartā | vyāpakaḥ sarvavyāpī | satatoditaḥ 
nityamuktaḥ patiḥ acetanasya jaḍasya | māyādeḥ māyā-mahāmāyāpramukhasya 
jagataḥ pravṛttijanakatayā siddhaḥ parijñātaḥ | etadutkaṃ bhavati-
māyāderacetanasya pravṛttiḥ cetanādhiṣṭhānapūrvikā, acetanapravṛttitvāt, 
rathādipravṛttivaditi pravṛttirūpa-kāryaliṅgānumānena tatkāraṇatayā 
patisiddhiriti | evaṃ kṣityādikaṃ sakartṛkaṃ kāryatvāt 
ghaṭavadityādyanumānena niruddhajñānakriyāśaktikapaśuvilakṣaṇatayā 
sarvajñapatisiddhirūhanīyā vāyavīye -

asti kaścidparyanta-ramaṇīya guṇāśrayaḥ |
patirviśvasya nirmātā paśupāśavilakṣaṇaḥ || iti |



pauṣkare -
 
acetanaṃ jagad viprāścetanapreraṇaṃ vinā | 
pravṛttau vā nivṛtau vā na svatantraṃ rathādivat ||
yo'tra pravartakaḥ śaktaḥ sa patiḥ paripaṭhyate | (1 pa0)
vivādādhyāsitaṃ viśvaṃ viśvavit-kartṛpūrvakam |
kāryatvādāvayoḥ siddhaṃ kāryaṃ kumbhādikaṃ yathā || (1 pa0) iti |

mataṅge -

evaṃ hi paratantratvāj jagato'syā'khilasya tu |
pravṛttirdṛśyate yasmāt tasmāt kartā maheśvaraḥ || iti |

	patiḥ śivabhaṭṭārakaḥ | kathamavasīyate? pātīti patirityanena śabdena 
kāraṇamātramevā'vagamyate | sa viśiṣṭa eveti || 7 ||

evaṃ lakṣaṇa-pramāṇābhyāṃ  vastusiddhiriti nyāyena pramāṇasiddhasya 
paterasādhāraṇadhamarūpaṃ lakṣaṇaṃ parākhyasūtreṇāha -

dṛkkriyātmakamaiśvaryaṃ yasya tad dātrapūrvakam |
īśvaraḥ so'tra mantavyaḥ śaktidvayayutaḥ prabhuḥ || 8 ||

	yasya dṛkkriyātmakaṃ jñānakriyāsvarūpam aiśvaryam īśvaratvaṃ 
dātrapūrvakaṃ pūrvaṃ na vidyate dātā yasya tad dātrapūrvakaṃ, pūrvaṃ 
kenāpi na dattaṃ, svābhāvikamityarthaḥ | sa śaktidvayayutaḥ jñānakriyā-
śaktiyuktaḥ | jñānaśakteḥ prayojanaṃ jagadviṣayajñānam, kriyāśaktistu 
jagatkāraṇam | taduktaṃ ratnatraye -

jñānaśaktyā vijānāti kriyayā kurute jagat |

iti | prabhuḥ svatantraḥ anīśvaraḥ īśvaraḥ atra asmin śāstre mantavyaḥ 
jñātavyaḥ |

	atra svabhāvanirmaladṛkkriyālakṣaṇaśaktimattvaṃ patilakṣaṇamityuktaṃ 
bhavati | tatra śaktimattvamityukte male ativyāptiḥ, tadartha - dṛkkriyālakṣaṇeti | 
etāvatyukte baddhātmanyativyāptiḥ, tadartha - nirmaleti | tāvatyukte 
prasādamukte'tivyāptiḥ, tadarthaṃ - svabhāveti | teṣāṃ śaktinairmalyasya 
śivaprasādādhīnatayā svābhāvikatvābhāvāt | taduktaṃ parākhye -

cidrūpamātmano rūpaṃ dṛkkriyāguṇalakṣitam |
jñānarūpasthitasyāpi svarūpaṃ dṛkkriyātmakam ||



 vakṣyati ca -
 
kartṛśaktiraṇornityā vibhvīceśvaraśaktivat |
tamaśchannatayā'rtheṣu nābhāti niranugrahā ||

pauṣkare -

jñāna-kriye śive prokte sarvārthe nirmale pare | iti ca || 8 ||

nanu lakṣaṇa-pramāṇābhyāṃ sarvajñatvena sarvakartṛtvena ca patiḥ 
sādhitaḥ | tatra kartṛtvaṃ mūrttimantareṇā'nupapannamityāśaṅkya tasya 
mūrttirapi svaśaktireveti pratipādayituṃ sārdhadvayamataṅgasūtraṃ (3/1-3) 
gṛhṇāti -

atha patyuradhiṣṭhānaṃ svaśakti-kiraṇātmakam |
tasyāṃ divi sudīptātmā niṣkampo'calamūrttimān || 9 ||

	atha śabdaḥ paṭalādau maṅgalārthaḥ | patyuḥ parameśvarasya 
patipadārthatvena saṃgṛhītasya adhiṣṭhānam  adhikyena 
sarvakāryavyāptyā'dhiṣṭhīyate yattadadhiṣṭhānaṃ viśiṣṭasthānameva, 
procyata ityanuṣaṅgaḥ | tacca tasya vidyāvidyeśvarādīnāmiva na vyatiriktam, api 
tu svaśaktikiraṇātmakaṃ svaśaktireva jñānakriyātmikā kiraṇāstadātmakaṃ 
tatsvarūpam | savitṛruciriva dāhaprakāśādikartṛtvāt tadātmikāḥ śaktaya eva 
tatrādhiṣṭheyatvenopacaryante iti | ye tāvat tatrāpi vidyātmakaṃ baindavaṃ vā 
bhuvanaṃ 'bindurūpaḥ śivo dhyeya' ityādanyārthaśrutijanitabhrāntyā kalpayanti, 
anena te pratikṣiptāḥ | yathā cāsyāṃ divi savitā dāhakaprakāśakasvabhāva 
eva, tathā tasyāṃ śaktikiraṇātmikāyāṃ parasyāṃ divi krīḍāsthāne 
suddiptātmā suṣṭhu dīptaḥ sarvaviṣayajñānaiśvaryadīptibhirātmā svabhāvo 
yasya saḥ tatsvarūpa eva patirityarthaḥ | natu manaḥsaṃyogānnaiyāyikādi-
siddheśvarasyeva buddhisaṃyogāt pātañjalasiddhasyeva vā tasya saṃjñānaṃ 
dīptiḥ ? | kiñca niṣkampaḥ nirgataḥ kampaḥ pariṇāmo yasmāt sa niṣkampaḥ | 
bindusadāśivātmabhedena vā mantramantreśvarabhedena vā 
māyādipṛthivyantabhedena vā pariṇāminī prakṛtirupādānam, anyathā 
mṛdādivadacaitanyaprasaṅgādityarthaḥ | tataśca yaiḥ 
kaulādiśāstravāsanāvāsitaiḥ vivarta-pariṇāmapakṣayoranyatarābhyupagame 
patyuradvaitavādaḥ samāropyate | anena te pratikṣepyāḥ anyaistu 
pāñcarātrādibhiḥ -

aśarīro hyadhiṣṭhātā nātmā muktātmavad bhavet |

ityetaddoṣabhayāt patiḥ śarīrayukta evābhyupagataḥ | tadvyāvartanāyāha - 
acala-mūrtimāniti | 

? pracalitanyāyādi-nibandheṣu matamidaṃ naiva samupalabhyate | teṣu sarvatra 
īśvarasya nityajñānābhyupagamāt |



 acalā mūrtiryasya sa acalamūrtimān | dvidhā hi ātmanāṃ mūrttiḥ calā acalā 
ceti | tatra calā tu tattvabhauvanaśarīrātmikā, acalā tu jñānakriyā-svabhāvā | 
ayaṃ ca patiracalamūrttimān | natu bhauvana-śarīrayukta ityarthaḥ |

kāṣṭhā saiva parā sūkṣmā sarvadikkā'mṛtātmikā |
pradhvastāvaraṇā śāntā vastumātrā'tilālasā || 10
ādyantoparatā sādhvī mūrttitvenopacaryate |

asyārthaḥ - saivā'calamūrttilakṣaṇā śaktiḥ parā prakṛṣṭā kāṣṭhā niṣṭhā 
sarvotkṛṣṭetyarthaḥ | 
etenā'smadādibhyaścalamūrttimadbhyo'tiśayito'calamūrtimānadhiṣṭhāteti 
darśitam | tathāca parameśvarādadhiko mokṣa iti ye vadanti te nirastāḥ | nahi 
sarvajñatva-sarvakartṛtva-prāpteranyaḥ prakarṣastasyāpi 
prakṛṣṭatarāvasthetyādi-taratamādi-pratyaya-pratipādya-
mokṣabhedāvasthiteranavasthaiva muktau bhavet | natu parameśvarādādhikyameva | 
kalpita-vyapadeśamātrabhedasya na kvacidapyapasṛtiḥ | sūkṣmā 
paramāṇvāderapyatisūkṣmā | sarvadikkā sarvadiggatā | 
vakṣyamāṇatatttkāryavyāpterityarthaḥ | atra sūkṣmapadena sthūlamūrttiyukta-
hiraṇyagarbharūpa-vikāreśvara-vādino nirastāḥ | sarvadikketi padena 
avyāpakaśarīra-prakṛtijanya-
pradyumnādīśvaratvasthāpakapāñcarātravādo'pi nirastaḥ | amṛtātmikā 
amṛto maraṇarahitaḥ ātmā svabhāvo yasyāḥ sā amṛtātmikā | anena 
mīmāṃsakasiddha-puruṣeśvaravādo'pi nirastaḥ | tasya puruṣasya 
mūrtermṛtisvabhāvatvāditi | tasya sukṛtādyarjanamātrasāmarthye'pi tanukiraṇa-
bhuvananirmāṇādau sāmarthyādṛṣṭeranīśvaratvameveti bhāvaḥ | 
pradhvastāvaraṇā-pradhvastaṃ  vinivṛttamāvaraṇaṃ samastabandhanaṃ yasyāḥ 
sā pradhvastāvaraṇā | etena sadāśivasyā'pyanugraha-tirobhāvarūpa-
pāśasaṃsargapratipādanena paśutvaṃ vadantaḥ prakṣiptāḥ | sadāśivasya 
pāśasaṃbandhe jagatkarttṛtvānupapatteḥ | na cānugraha-tirobhāvayośca 
pāśatvam | vimatau na pāśabhūtau tatkṛtyaviśeṣātmakatvāt sṛṣṭyādivat 
ityanumānena pāśatvanirākaraṇāt | ata eva na tasya paśutvamiti | śāntā 
rāgadveṣarahitā | anena bhagavataḥ sarveśvaratve'pi ārādhana-
tadabhāvābhyāmiṣṭāniṣṭaphalapradatvena 
nṛpatyāderivarāgadveṣābhyupagamavādo nirastaḥ | tadārādhanasya coditatve sati 
śreyaḥsādhanatvena jyotiṣṭomāderiva viśiṣṭeṣṭaphalapradatvāt 
nṛpatyādisādharmyābhāvāditi | ata evā'tilālasā | lālasā tṛṣṇātirekaḥ, 
sā'tīva vidyate yasyāḥ sā'tilālasā | 



 rāga-dveṣābhāve'pi piteva putrādīn yogyatānusāreṇa sarvaṃ jagat 
pātītyarthaḥ | vastumātrā | patilakṣaṇavastumātrā, tasyāstu layabhogādiko 
bhedo nātra vivakṣitaḥ | nanvasau vidyeśvara-mukta-śivasambandhi-
pravāhanityeśvaravādivadaṅgīkriyatāmityata āha-ādyanto-parateti | 
ādyantaśūnyetyarthaḥ | vidyeśvarāṇāṃ tvādyantayuktā mūrttiḥ | 
muktaśivānāṃ tvādiyuktā | ubhayatrāpyādyanta-rahitatvamasiddhamityarthaḥ | 
na ca pravāhanityeśvarapakṣo'pi sambhavati | īśvarabhāvasya 
svarūpavyaktilābhātmakatvena vināśāsambhavāt | tatsambhave hi bhavet 
pravāhanityeśvarapakṣaḥ |

yadyevaṃ muktaśivānāmapi patisamatvena īśvarāṇāṃ 
bahutvāccātulyamatitvena sarvakāryānirvāha iti cet | na | sarvajñatvād 
yathārthadarśanapravṛttatvena teṣāmatulyamatitvāsiddheḥ, 
rāgadveṣātulyajñānādiyuktānāmeva nṝṇāṃ doṣadarśanāt |

yadyevaṃ prāptaprāpaṇīyatvena prayojanābhāvādasyā mūrtterna 
nisarga-nirmāṇapravṛttirupapadyate | 'prayojanamanuddiśya na mando'pi pravarttata' 
iti nyāyādityata āha-sādhvīti | sādhvī karuṇāyuktā svaprayojanābhāve'pi 
karuṇāvantaḥ parārtha pravartamānā dṛśyanta iti nātra prayojanābhāvadoṣaḥ |

nanu patyuḥ sudīptātma-svabhāvatvenoktatvāt kathaṃ sā tasya mūrtiḥ ? 
vyatiriktā hi mūrtiḥ sarvatra kathyata ityata āha-mūrttitvenopacaryata iti | 
mūrttitvena śarīratvenopacaryate | natu mukhyatayā pati-vyatiriktā sā 
mūrttirityarthaḥ | proktaṃ ca śrīmatpauṣkare -

jñāna-kriye śive prokte sarvārthe nirmale pare | iti |

saivetyavadhāraṇapradhānādatra ca mantramantreśvarāṇāṃ muktātmanāṃ vā 
dīkṣayābindu-sadāśivatvayojitānāmapi mūrttirupacaryata iti vyāvartate | tataśca 
teṣāṃ mukhyaiva śuddhamāyopādānā mūrttirityuktaṃ bhavati | taduktaṃ 
ratnatraye -

bindūpādānajatve(nye)na eṣāṃ baindavamucyate |
vidyāśca vidyādhīśāśca nādākhyamabhidevatāḥ ||
layabhogādhikāreṇa tanubhogendriyāṇi ca | ? | iti |

	tathā kiraṇe - śuddha-yonimayaṃ tasya vapuruktamakalmaṣa(rmaja)m | iti |

	atra vidyāvidyeśvarādīnāṃ vāstavaśarīrayogatve asarvajñatvaprasaṅga 
ityādyanumānā-vaskarāṇāmanaikāntikatvādibhirnirāsaḥ sādhanīyaḥ | 
tannirasanaprakārastu rāmakaṇṭhaviracitāyāṃ mataṅgavṛtau vistāreṇa 
pratipāditaḥ | 

? mudrite ratnatraye'yamaṃśo na dṛśyate |



tatraiva draṣṭavyaḥ | iha tu granthagauravabhayānnalikhyate | ata eva 
sadāśivādyākāra-kalpanamapyasya dhyānārthameva | pauṣkare -

sādhakasya tu lakṣyārthaṃ tasya rūpamidaṃ smṛtam |

tattvaprakāśe'pi -

cidacidanugrahaheto rūpāṇyetāni sa prabhuḥ kṛtvā |

kurute citāmanugrahamanādimalaruddhaśaktīnām || (2/14) iti || 10 ||

	nanu jñānakriyā-lakṣaṇā śaktiḥ patyuravyatirekādaupacārikī 
mūrttirastu | tathāpi kṛtyānāṃ karaṇe mukhyamūrttivyatirekeṇa kathaṃ hetutā ? 
ityāśaṅkya tasya tādṛśaṃ vapurapi tattatkṛtyādhikāri-śarīrameva natu 
pāramārthikamiti mṛgendrasūtramudāharati -

vapuṣo'vidyamānatvād yad yat kṛtyaṃ karoti saḥ |
tatra tatrā'sya tatkarttṛvapuṣā'nu kṛtaṃ vapuḥ || 11 ||

	sa patiḥ vapuṣo hastapādādiśarīrasya avidyamānatvādasambhavāt yad yat 
kṛtyaṃ sṛṣṭyādi karoti | tatra tasmin kṛtye asya patyuḥ vapuḥ śarīraṃ 
tatkartṛvapuṣā tattatkṛtyādhikāriśarīreṇa anu sadṛśatayā kṛtaṃ kalpitam | 
adhikāri-śarīrameva tattatkṛtyeṣu mukhyaṃ śarīramityarthaḥ | athavā 
tatkarttavapuṣā tatkartṝṇāṃ pañcakṛtyopayogināṃ vapuṣā 
pañcabrahmarūpeṇa śāktena śarīreṇa kalpitamityarthaḥ | taduktaṃ 
śrīmanmṛgendre eva -

tadvapuḥ pañcabhirmantraiḥ pañcakṛtyopayogibhiḥ |
īśatatpuruṣāghora-vāmājairmastakādikam || (vi0 3/8) iti | ?

	vastutastu parmārthasvabhāvena mūrttitve bhagavataḥsvaśaktimahimnaiva 
ghaṭate | tathāpi aśarīrasya ca kāryaniṣpattyadarśanāt yad yat kiñcit kāryaṃ 
vidhatte, tatra tatra tatkarttṝśarīramasya vapuḥ prasādādau prasannarūpaṃ 
krodhādau sakrodhamāpyāyanādāvāpyāyitarūpa-
mityarthibhiścintanīyamityarthaḥ | yathoktaṃ sarvasrotaḥsaṃgrahasāre -

yena yena hi rūpeṇa sādhakaḥ saṃsmaret sadā |
tasya tanmayatāṃ yāti cintāmaṇiriveśvaraḥ || iti |

	vapuṣā na kṛtaṃ vapuriti pāṭhe ayamarthaḥ - sa patiryad yat kṛtyaṃ karoti, 
tatra sthale tat kṛtyaṃ patyuḥ karttṛvapuṣā bhavatīti śeṣaḥ |

? yathākramam anugraha-tirībhāvādāna rakṣaṇītpattilakṣaṇe 
kṛtyapañcake'vaśyamupayogo yeṣāṃ tairīśānādibhiḥ pañcabhirmantraistat 
mūrdhādivapuḥ 'devasyocyate' dūtyadhyāhāraḥ | bhaktānugrahāya 
tattadākāragrahaṇasya āgameṣupadiṣṭatvāt | tathācoktaṃ śrīmatpauskare-
sādhakasya tu lakṣyārthaṃ tasya rūpamidaṃ smṛtam | iti (rāmakaṇṭhavṛttiḥ)



karotīti karttṛ, tadrūpaṃ vapuḥ kriyāśaktisvarūpaṃ śarīraṃ, tena sarvamapi 
kṛtyaṃ ghaṭata ityarthaḥ | kṛtaṃ vapurna, kattṛrūpa-kriyāśakti vyatirekeṇa 
kṛtamutpāditamanyad vapurnāstīti bhāvaḥ | atra hetuḥ-' 
vapuṣo'vidyamānatvādi'ti | kāraṇatrayābhāvena śaktivyatiriktasya 
kāryaśarīrasyā'smādādivacchivasyā'sambhavādityarthaḥ |

	ayamabhiprāyaḥ -patyuḥ śarīrābhyupagame tasya śuddhasya 
bhautikadehāyogād baindavadehaṃ vaktavyam | tasya bindurūpādānaṃ 
vaktavyam | taccātra na sambhavati tathāhi -sarvatra kṣubdhabindorevopādānatvam 
| tatkṣobhaḥ svato vā? śivato vā ? nādyaḥ | ātmāśrayadoṣāpatteḥ | dvitīye 
śivasya tatkṣobhakriyāyāṃ vapurasti tadvapuṣaḥsādhakabindukṣobhārthaṃ 
punarvapurantarakalpanāyāmanavasthāpatteḥ | yadi tatrā'calamūrttimātreṇaiva 
bindukṣobhaḥ, tarhi tasya sṛṣṭyādi-kriyāsu kiṃ śarīrāntarakalpanayā | evameva 
śarīrādhīna-sahakāriṇoradṛṣṭa-nimitta-kāraṇayornirāsaḥ | tasmācchivasya 
kāraṇatrayābhāvena kṛtaśarīrābhāve'pi svadehaspandādāvātmanaḥ 
kartṛtvavat sṛṣṭyādi-kriyākarttṛtvopapattiriti | taduktaṃ śrīmat pauṣkare -

adehasyāpi karttṛtvaṃ svadehapreraṇe yathā | (1/34) iti || 11 ||

	nanu jagat-sṛṣṭi-sthityādirūpāḥ patyuḥ kriyā nā'karaṇikā kriyātvāt 
chittikriyāvat, atastasyāpi karaṇena bhavitavyamityāśaṅkya tatkaraṇaṃ 
mṛgendrasūtreṇa darśayati-

karaṇaṃ ca na śaktyanyacchaktirnācetanā citaḥ |
viṣayāniyamādekaṃ bodhe kṛtye ca tattathā || 12 || (vi0 3/4) (12)

	śivasya śaktyanyat śakteranyat itarad vastu karaṇaṃ na bhavati | atra 
niṣedhamukhena vidhirucyate | śaktireva karaṇaṃ, tathaiva 
tattatkriyāniṣpādanādityarthaḥ | citaḥ-cidrūpasya | sambandhe ṣaṣṭhī | 
citsambandhinī sā śaktiśca acetanasvarūpā na bhavati, citsvabhāvāyāḥ 
śakteracidrūpatvāyogādityarthaḥ | yasmāt jñeyānāṃ karaṇīyānāṃ 
cānantyaṃ, tasmāccāsya karaṇairanantairbhavitavyam | aparimitaviṣayaṃ ca 
parameśvarasya jñānaṃ kṛtyaṃ ca | taduktaṃ tatraiva -

tadekaṃ viṣayānantyād bhedānantyaṃ prapadyate |
karttṛtvaṃ tadabhinnatvāt tadvadevopacārataḥ || (5/17) iti |

tasmād viṣayasya karaṇīyasya ca aniyatatvāt 
anavacchinnatvāddhetorekamapi tat śaktirūpaṃ karaṇaṃ bodhe kṛtye ca 
jñānaviṣaye kāryaviṣaye ca tathā aniyatam anavacchinnam anantamevetyarthaḥ | 



tathā siddhāntasārāvalyām -

śaktiścittanurīśvarasya karaṇaṃ jñeyeṣu kāryeṣu tad
bhedaiḥ sopahitā prayāti guṇato bhedaṃ kriyājñānataḥ |
nityaṃ tat sakalānyakarttṛnihitā vartmanyaśuddhe site 
kṛtyaṃ saiva karoti patyanugatā vāmādiśaktyātmikā || iti || 12 ||

	atha jñānakriyārūpa-śakteḥ īśvarasya mūrttitvenoktavāt kathaṃ tasya 
kāraṇatvamityākāṅkṣāyāmicchāśaktereva karaṇatvam, amūrttitve'pi 
karttṛtvamaviruddhamiti pratipādayituṃ kiraṇasūtraṃ gṛhṇāti -

yathā kālo hyamūrtto'pi dṛśyate phalasādhakaḥ |
evaṃ śivo hyamūrtto'pi kurute kāryamicchayā || 13 || (2)

	yathā loke kālaḥ kṣaṇa-muhūrttādikaḥ ṣaḍṛturūpaḥ phalaṃ kāryaṃ 
tasya sādhakaḥ, amūrtto'pi aśarīro'pi kālaḥ svasvocitapuṣpaphalādīnāṃ 
pratikṣaṇaṃ dravyaparipākasya bālyayauvanādeśca sādhakaḥ kartā dṛśyate 
prakhyāyate | evamamūrtto'pi śivaḥ kārya kṣityādikaṃ jagat kurute hi | anena 
śivasya śarīrābhāve'pi karttṛtvābhāvaḥ parihṛtaḥ | tasya karaṇasvarūpamāha 
- icchayā | icchāśaktyā kuruta ityarthaḥ | tathāca yogina iva śivasya sarvāsu 
kriyāsu icchaiva karaṇamityabhiprāyaḥ | taduktamatraiva -

icchaiva karaṇaṃ tasya yathā tad yogināṃ matā | iti |

	nacendriyādi-karaṇābhāve karttṛtvāsiddhirityapi vācyam | 
akṣahīnasyāpyayaskāntasya lohākarṣaṇakarttṛtvavat tadupapatteḥ | yathā 
śrīmatkiraṇe -

śalyākṛṣṭikaro dṛṣṭo hyakṣahīno'pi karṣakaḥ | iti |

śrīpauṣkare ca -

anādirūpo bhagavānicchayā'syāvatārakaḥ | iti || 13 ||

	itthaṃ svaśaktyātmaka-śarīrakaraṇasya vāstava-śarīrakaraṇa-rahitasya 
kartuḥ patipadārthasya tryaividhyaṃ mṛgendrasūtreṇāha-

śaktodyuktapravṛttaśca kartā trividha iṣyate |
śakteḥ pravṛttibhedena bhedastasyopacārataḥ || 14 || (6)



 	atra kartā patiḥ śaktodyuktapravṛttaḥ śaktaśca udyuktaśca pravṛttaśca 
śaktodyuktapravṛttaḥ | dvandvaikavadbhāvaḥ | 
napuṃsakaliṅgābhāvaśchāndasaḥ | samānādhikaraṇastatpuruṣo vā | śakta iti 
udyukta iti pravṛtta iti ca trividhastriprakāra iṣyate | tasya ptyurbhedaḥ 
śaktādibhedaḥ śakteḥ cicchakteḥ pravṛttibhedena vyāpārabhedena 
audāsinyodyogapravṛttirūpavyāpārairityarthaḥ | upacārata iti | bhavatīti śeṣaḥ |

	tathācāyamarthaḥ - atra yacchaktatvaṃ kāryaṃ prati yogyatvam asau 
niṣkalāvasthā, tadvān śānta ityucyate | yad udyuktatvaṃ sakalaniṣkalāvasthā 
sadāśiva kathyate | pravṛttakriyatvaṃ tu sthūlatvāt īśvara iti | 
kṛtyaviṣayo'yamavathābhedaḥ, tenopacārat etat tattvatrayaṃ bhinnamityucyate; na 
paramārthatvāditi | tathā kiraṇe-

proktaḥ sa niṣkalaḥ sthūlastathā sakalaniṣkalaḥ |
īśaḥ sadāśivaḥ śānta iti nāmnā sthitistviha ||
icchānugrahakarttṛtvāllayabhogādhikāravān |
trividhaḥ kṛtyabhedena kathito nāmabhedataḥ || iti |

mataṅge -

śāntyatītaṃ paraṃ tattvamavināśyavyayā(śivā)tmakam |
yononmīlitasadbhāvāḥ (sāmarthyāt) paśavaḥ śivatāṃ gatāḥ ||
sadāśivasya deha(va)sya layastattve'tiniṣkale |
caturmūrttimayaṃ śubhraṃ yat tat sakalaniṣkalam ||
tasmin bhogaḥ samuddiṣṭaḥ patyurviśvasya sarvadā | (3 | 32 | 1)
athā'dhikāriṇaḥ patyuḥ krīḍataḥ paramaṃ padam |
svatantrasyāpi vaktavyaṃ svabhāvo'sya yataḥ purā | (4 | 1)
tathā śivaikarūpaṃ ca syānnaṭe bahurūpavat || iti ||

pauṣkare -

layabhogādhikārāṇāṃ na bhedo vāstavaḥ śive |
kintu bindoraṇūnāṃ ca vāstavā eva te matāḥ || iti ||

	tatra kāryopasaṃhāra-kāryodyoga-kāryasampattirūpā'vasthā laya-
bhogādhikārātmā | bindurapi trividhaḥ | tadyathā | vāstavabindubhedā 
layabhogādhikāra -tattvādhikaraṇavaśena | śivasyāpi layabhogādhikāreṇa 
tryaividhyam | niṣkalādirūpeṇa tryaividhyam | parameśvaraśiva-sadāśivāhvayena 
ca tryaividhyam | aupacārikaṃ sarvam | śaktodyuktapravṛttaścetyanena cakāreṇa 
saṃgṛhītam |



	nanu śiva-sadāśivayostarhi bhedo yadi śivānnādābhivyaktaṃ 
sadāśivena cet padādiniyamena sthāpitam | tadā anayostattvayorbhedaḥ syād, 
bhede śāstravirodhaḥ |

ekameva hi tat tattvaṃ paramaṃ śuddhamavyayam |
īśaḥ sadāśivaḥ śāntaḥ paryāyāstasya saṃsthitāḥ ||

	ityucyate | satyam-ekameva tat tattvaṃ kintu kṛtyabhedād bhedavyapadeśo 
maṇivaditi | yathā maṇidravyamupadhānavaśādanekapratyayabhāg bhavati | evaṃ 
śivatattvaṃ layādhikārabhogadātṛtvāt nānāvyapadeśabhāg bhavatīti sakala-
niṣkalatvādibhedena bhedaścātmavaditi | yathā ātmā śarīra-yogāt sakalaḥ, 
pralayāvasthāyāmakalaḥ, kuktyavasthāyāṃ para ityucyate | śivo'pyevaṃ sakala-
niṣkalabhedād bhinna ityupacaryate || 14 ||

	evambhūtasya kartturīśvarasya prapañcaṃ prati nimittatvamupādānatvaṃ 
cāsti | abhinnanimittopādānatvāṅgīkārāditi kecid vadanti | tān nirākarttuṃ 
sarvasyā'pi kāryasya pṛthaktayā kāraṇatraya-sadbhāvaṃ parākhyasūtreṇa 
darśayati-

nimittamīśvarākhyaṃ tad yad dṛṣṭaṃ sahakāraṇam |
upādānaṃ ca yat sūkṣmaṃ sarvakāryeṣu saṃhitam || 15 || 

	īśvarākhyaṃ jñāna-kriyā-śaktirūpaiśvaryeṇa īśvara ityākhyā yasya 
tadīśvarākhyaṃ yannimittaṃ nimittakāraṇam, yacca dṛṣṭaṃ daṇḍa-cakrādi 
sahakāraṇaṃ sahakārikāraṇaṃ, yacca sūkṣmaṃ mṛdādi upādānakāraṇaṃ, 
tat tritayamapi sarvakāryeṣu saṃhitaṃ sambaddham | tathāca kāraṇatrayaṃ 
'sarvakāryeṣu saṃhitami'tyetaduttaravacanena sarvakāryasya pṛthaktayā 
kāraṇatrayavyāpti-pratipādanena prapañcasyā'pi kāryasya pṛthak 
kāraṇatrayāvaśyakatayā abhinnanimittopādānatvaṃ nirastam |

	nanu ūrṇanābhi-jantorlūtātantuṃ prati nimittatvamupādānatvaṃ ca 
dṛṣṭamiti cet | na | tatrāpi tadāsyagata-lālāyā eva tatra upādānatvāt | kiñca 
īśvarasyopādānatve tasya pariṇāmitvamacidrūpatvaṃ ca prasajyet | 
tadupādeyasya sarvasya prapañcasyā'pi cidrūpatvāpattiśca | ata eva 
tatsamavāyiśakterapi nopādānatvam | cidvivarttatvāṅgīkāre jagadasatyatāpattiḥ 
| na ceṣṭāpattiḥ | sarvapramāṇa-siddhasya jagato'pahnotumaśakyatvāt | taduktaṃ 
pauṣkare -

nāsti śaktirupādānaṃ cidrūpatvād yathā śivaḥ |
pariṇāmo'citaḥ proktaścetanasya na yujyate || 



cito vivartta evoktastathātve kāryaśūnyatā |
sarvapramāṇa-saṃsiddhaṃ cidvivarttaḥ kathaṃ jagat || (2 | 4-5) iti

atra ca prapañcasya īśvaro nimitta-kāraṇam | śaktayaḥ sahakāri-kāraṇam | 
bindurupādāna-kāraṇam | yathā'traiva (pauṣkare 8 | 17) -
 
nimittamīśvarasteṣāmupādānaṃ sa bindurāṭ |

anyatra-

tapane dīdhitiścandre candrikauṣṇyamivā'nale |
samavetā śive śaktiḥ kāraṇaṃ sahakāraṇam ||
svaśaktiśceśvaro māyā mṛccakraka-kulālavat |

	tatrāpi śuddhe'dhvani śivasya nimittatvaṃ,  bindorupādānatvam | 
aśuddhe'dhvani tu ananteśasya nimittatvaṃ māyāyā upādānatvaṃ veditavyam | 
tathā ca kiraṇe -

śuddhe'dhavani śivaḥ karttā prokto'nanto'site prabhuḥ |

	śuddhe'dhvanīti śuddhāśuddhayorbindu-māyayoḥ śuddhāśuddha-
kāryavyatyāsa-kāraṇatvamucitam uktam | śrīpauṣkare (2 | 6) -

māyāpi nātropādānaṃ mohakatvāt svatejasā |

	atra śuddhe'dhvanītyarthaḥ | naca - māyā-kāla-karmādīnāmeva 
jagannimittatvaṃ, neśvarasyeti vācyam | teṣāmacetanānāṃ cetanapreraṇaṃ vinā 
kāryakārakatvānupapattyā tatpreraka-cetanāvaśyambhāve sati asmadādīnāṃ 
niruddhadṛkkriyatayā tatprerakatvābhāvena sarvajñasya sarvakartturīśvarasyaiva 
tatsambhavena sakalaprapañcaṃ prati tasyaiva nimittakāraṇatvaucityāt | 

	nimittamīśvarākhyaṃ yadadṛṣṭaṃ sahakāraṇamiti pāṭhe - 
adṛṣṭaśabdavācya-karmaṇaḥ sahakārikāraṇatvamuktam | 
yathā'traivāraṇeyapaṭale (pauṣkare 8 | 18 ) -

nimittamiśvarasteṣāmupādānaṃ sa bindurāṭ |
nṛkarma sahakāri syāt kāryametat trihetukam ||

tasmāt prapañcakāryasya nimittādi-kāraṇatrayarūpatvamīśvarāditrayasyeti 
sarvairabhyupeyamiti || 15 

	atha ' na kadācidanīdṛśaṃ jagadi'ti nyāyena prapañcanityatvavādinaṃ 
nirākarttuṃ prapañcasya kāryatvaṃ parākhyasūtrāntareṇa sādhayati -

mūrttāḥ sāvayavā ye'rthā nānārūpa-paricchadāḥ |



sthūlāvayava-śiṣṭatvād buddhimaddhetupūrvakāḥ ||
ato'sti buddhimān kaścidīśvaraḥ samavasthitaḥ || 16 ||

	mūrttāḥ ākṛtimantaḥ | sāvayavāḥ avayava-sahitāḥ | nānārūpa-
paricchadāḥ nānā bahuvidhaiḥ rūpaiḥ saṃsthāna-viśeṣaiḥ paricchadaḥ 
āvaraṇaṃ yeṣāṃ te nānārūpa-parichadāḥ | evambhūtā ye arthāḥ 
pṛthivyādayaḥ ete pakṣatvenopāttāḥ | mūrttādīni pakṣaviśeṣaṇāni 
kāryatvasādhane pratyekaṃ  hetutvasūcakatayā upāttāni | na tu bādhādi-
nivārakāṇi | tasya pratijñāmāha-buddhimaddhetupūrvakāḥ | buddhiryasyāsti sa 
buddhimān | sa cāsau hetuśca so'yaṃ buddhimaddhetuḥ 
pūrvaḥpūrvāvadhiryeṣāṃ te tathāvidhāḥ | upādānādi-
gocarāparokṣajñānavat-karttṛkā ityarthaḥ | hetupūrvakatva-sādhanamātreṇa 
kāryatvasiddhāvapi karttṛviśeṣasiddhi-vivakṣayā buddhimatpadaṃ prayuktam | 
tatra hetumāha - sthūlāvayava-śiṣṭatvāditi | 
sthūlairasmadādibāhyendriyagrāhyairavayavaiḥ śiṣṭatvāt sambaddhatvāt | atra 
cāvayavānāmapratyakṣatayā avayavayuktatvahetorasiddhiparihārasūcakatayaiva 
sthūlapadamupāttaṃ, natu vyabhicāravārakatayā | atra 
ghaṭādivadityudāharaṇamadhyāharttavyam | nigamanamāha-ataḥ 
sāvayavatvādeva buddhimān samavasthitaḥ pramāṇasiddhaḥ kaścidīśvaraḥ 
karttāsti | pṛthivyādīnāmiti śeṣaḥ | tathā vāyavīye-

pradhāna-paramāṇvādi yāvat kiñcidacetanam |
na tat karttṛ svayaṃ dṛṣṭaṃ buddhimat kāraṇaṃ binā ||
jagacca karttṛsāpekṣaṃ kāryaṃ sāvayavaṃ yataḥ |
tasmāt kāryasya karttṛtvaṃ patyurna paśu-pāśayoḥ ||

	anena ca sakarttṛkatva-sādhanena pṛthivyādīnāṃ kāryatvaṃ siddham, 
ataḥ kāryatvasādhanasya sulabhatve'pi sakarttṛkatva-sādhanadvāreṇa 
tatsādhanamīśvarasiddhi-nāntarīyakatayā nirīśvaravādanirākaraṇārthamiti | 
idañca pañcarūpopapannatvādanvayavyatirekyanumānam | taduktaṃ 
śrīmatpauṣkare (7 | 40) -

pakṣadharmaḥ sapakṣe sad vyāvṛttaśca vipakṣataḥ |
abodho'satpratipakṣo vyatirekānvayātmakaḥ || iti || 16 ||

	idānīmīśvarakṛtyasyaiva iyattayā paricchedaṃ sādhana-prayojanavatvaṃ  
ca mṛgendrasūtreṇāha -

jagajjanma-sthiti-dhvaṃsa-tirobhāva-vimuktayaḥ |
kṛtyaṃ sakāraka-phalaṃ jñeyamasyaitadeva hi || 17 || (2 | 3 )

	janma ca sthitiśca dhvaṃsaśca tirobhāvaśca vimuktiśceti dvandvaḥ | jagato 
janmetyādi ṣaṣṭhītatpuruṣaḥ |



ete jagajjanmādayaḥ pañca | etat pañcavidham asyaiva parameśvarasyaiva sambadhi 
kṛtyam | sakārakaphalaṃ kārakaiḥ śaktyādibhiḥ phalena bhuktimuktyātmanā ca 
sahitaṃ jñeyam avaboddhavyam |

	atra jagacchabdena janmavaj-jantucakramucyate | tasya janma śivasyaikaṃ 
kṛtyam | sākṣācchivasṛṣṭiḥ śuddhādhvaviṣaye bindvātmakādupādānāt 
śuddhatattva-bhuvanādyutpādana pūrvaṃ tadbhuvana-vāsināṃ 
vidyāvidyeśvarāṇāṃ ca baindavaśarīra-yojanānnādādikrameṇa 
śabdotpādanam | anantādidvārakasṛṣṭiḥ aśuddhādhvaviṣaye 
māyākhyādupādānāt aśuddhatattvabhuvanādyutpādanapūrvaṃ bhogopayogi-
parikarasahitasya paunaḥpunyena tattadvividhayoniṣu udbhāvanaṃ ca janmaśabdena 
gṛhītam | tatraivoktam |

tatrādau kevalāṇūnāṃ yogyānāṃ kurute'ṣṭakam |
vāmādi-śaktibhiryuktaṃ saptakoṭiparicchadam ||
teṣāmanantaḥ sūkṣmaśca tathā caiva śivottamaḥ |
ekanetraikarudrau ca trimūrttiścāmitadyutiḥ ||
śrīkaṇṭhaśca śikhaṇḍī ca rājarājeśvareśvarāḥ |-mṛgendre 2 | 3-4

	atra rājāno lokeśā-indrādayasteṣāṃ rājānaḥ śatarudrāḥ, 
tadīśvarāṇāṃ maṇḍaliprabhṛtīnāmapyete īśvarāḥ prabhavaḥ, 
vidyāmaheśvarā iti yāvat | ete ca sarve śivapreryā na svatantrāḥ | tathā -

īṣadaprāptayogitvānniyojyāḥ parameṣṭhinaḥ ||
sarvajñatvādiyoge'pi niyojyatvaṃ malāṃśataḥ |
parasparaṃ viśiṣyante mantrāścaivamadhaḥ sthitāḥ ||
te ca mantreśvaravyakta-śivaśaktipracoditāḥ |
kurvantyanugrahaṃ puṃsāṃ yadā yeṣāṃ sa yujyate ||-mṛgendre 2 | 4-6

	te ca mantrāḥ parāparamantreśvaravyaktayā śivaśaktyā vyapāritāḥ 
yogyatānurūpeṇa kadācit keṣāñcidanugrahaṃ kurvanti | natu yogyatānapekṣam |

prayoktṛ-dehasāpekṣaṃ tadardhamakhile'dhvani |
kṛtvādhikāraṃ sthityante śivaṃ viśati seśvaram ||



vinādhikaraṇenānyat pradhānavikṛteradhaḥ |
kṛtvā'dhikāramīśeṣṭamapaiti sādhvarāṃhṛtau ||
tato'nantādyabhivyaktaḥ patīnāṃ granthitattvataḥ |
kalādyārabdhadehānāṃ karotyaṣṭādaśaṃ śatam ||
tānapyāviśya bhagavān sāñjanān bhuvanādhipān |
yebhyaḥ sarvamidaṃ yeṣāṃ śaktiḥ karmanibandhanā ||
praṇetṝn paśuśāstrāṇāṃ paśūṃstadanuvartakān |
svasādhyakārakopetān kāladhāmāvadhisthitān || iti |-mṛ0 4 | 4-11

	sthitiḥ tadicchāniruddhasya svadṛṣṭasya sarvalokasya puruṣārthasiddhaye 
vyāpāraprasiddhaye niyojanaṃ sthāpanaṃ dvitīyaṃ kṛtyam | yathā tatraiva -

sthitau sakārakānetān samākramya svatejasā |
yunakti svārthasiddhyarthaṃ bhūtairanabhilakṣitaḥ || iti || mṛ0 4-12

	dhvaṃsaḥ sthityante śuddhāśuddhādhva-bhogasādhana-tanukaraṇa-
bhuvanādīnāṃ bindumāyātmaka-kāraṇe saśaktyātmanāṃ 
vilayanadvārā'ntarnihitāṇusaṃghakādhiṣṭhānena 
bhavādhvabhramaṇaśrāntānāṃ saṃsāriṇāṃ viśramāyā'vasthāpanaṃ 
tṛtīyakṛtyam | yathā tatreva -

bhogasādhanamākṣipya kṛtvā kāraṇasaṃśrayam |
tacca sātmakamā(śritya)kramya viśramāyā'vatiṣṭhate ||
bhavināṃ bhavakhinnānāṃ sarvabhūtahito yataḥ |-mṛ0 4 | 13-14

	ayameva ca dhvaṃsaḥ pralaya ityuktaḥ | sa ca trividhaḥ adhama-
madhyamottamabhedena | brahmaṇo 
dināntasvāpekālāgnirudrordhvāvalokanavahninā bhūrbhuvaḥ svarlokānāṃ 
trayāṇāṃ layo'dhamaḥ pralayaḥ | śrīkaṇṭhasya dināntasvāpe bhūtatattvādi-
guṇatattvānta-layo madhyamaḥ pralayaḥ | kālāgni-bhuvanādi-nādānta-layaḥ 
uttamaḥ pralayaḥ | etat sarvaṃ mataṅge vistareṇa pradarśitam | 
granthavistarabhayānneha pratanyate | asmin mahāpralaye  māyā-puruṣa-śiva-
vyatirekeṇa sarveṣāmupasaṃhāra eva | tathā'cintyaviśve -

mahārtha saṃhārakāle māyā''tmānaśca sarvaśaḥ |
śivaścā'śuddhamāyābhistiṣṭhantyanyaśca līyate ||
ātmanā mupabhogārthamete tiṣṭhanti sarvataḥ || iti |



tathācācāryaiḥ-

māyā puruṣaḥ śiva ityetat tritayaṃ mahārthasaṃhāre |
avaśiṣyate punastat pravarttate pūrvavat sṛṣṭau || iti |-tattvapra0 69

	tirobhāvaḥ pāśānugraheṇa paśūnāṃ yathānurūpād 
bhogādapracyutiścaturthaṃ kṛtyam | ayameva saṃrakṣaṇākhyatayā anyatroktaḥ | 
yadāhuḥ śrīvārttikakāraḥ -

svasaṃskārocitād bhogādapracyāvaḥ śarīriṇām |
proktaṃ saṃrakṣaṇaṃ nāma nyāyena paripālitam ||

	vimuktiśca anudhyānamanugrahaḥ pāśa-tirodhānenā'ṇūnāṃ 
parāparamokṣadānam | tatrā'paramokṣaḥ ṣaḍvidhaḥ | parastvekavidhaḥ | tathā 
mataṅge -

mokṣaḥ saptaprakāro'yaṃ vibhāgenopavarṇitaḥ |
ebhyo hyekaḥ paraḥ sūkṣmaḥ kāryakāraṇagocaraḥ ||
atītaḥ paripūrṇaśca svatantraḥ sarvatomukhaḥ |
eko nirīśvaraḥ svasthaḥ ṣaḍanye seśvarā matāḥ ||
saṃruddhaśaktayaścānye sthūlabhedāḥ prakīrttitāḥ | iti |

	idamanugraharūpaṃ kṛtyaṃ śivaḥ sṛṣṭikāle saṃhārakāle'pi karoti | 
taduktamatraiva-

yān vimocayati svāpe śivāḥ sadyo bhavanti te |
saṃhṛtau vā samudbhūtāvaṇavaḥ patayo'thavā ||
rudramantrapatīśānapadabhājo bhavanti te |
sthitau yānanuhṛhṇāti gurumāsthāya cidvataḥ ||-mṛgendre vi0 5 | 2-3

	svāyambhuve kṛtyasya prayojanamuktam -

evamākhyamidaṃ kṛtyaṃ kiṃkāraṇamudāhṛtam |
paśūnāṃ dehasaṃyogo bhogamokṣāya kathyate ||
tathāpi saha cetyāhuranādimalamocakaḥ | iti |

	atra evakāreṇa śivasyaiva etat pañcakṛtyaṃ vidyāvidyeśvarādīnāṃ 
tatpreraṇayeti darśayati | tathā śrīmadraurave -

adhikāraṃ prakurvanti śivecchā-vidhicoditāḥ | iti |

	etacca kṛtyaṃ na māyādibhiḥ karmabhirvā nirvarttayituṃ śakyam, 
acetanatvāt | nāpi puruṣeṇa, tasya malaniruddha-śaktikatvāt | sakārakamityanena 
sādhanāpekṣā ca śivasya darśitāḥ | 



anyathā nirhetuko mokṣaḥ syāt | anyānapekṣaṇāt sarvasyaiva myāt,  kasyāpi vā 
na syāt | yathāhuḥ -
 
nityaṃ sattvamasattvaṃ vā hetoranyānapekṣaṇāt |
apekṣāto hi bhāvānāṃ kādācitkatvasambhavaḥ || iti || 16 ||

	parameśvarasya svāpe vikriyādiśaktayastattatkāryaniṣpādanodyuktaṃ 
bhavantīti mṛgendra sūtrāntareṇāha -

svāpe'pyāste bodhayan bodhayogyān 
rodhyān rundhan pācayan karmikarma |
māyāśaktīrvyaktiyogyāḥ prakurvan 
paśyan sarvaṃ yad yathāvastujātam ||

	svāpe jāgradavasthāyāmiva svāpāvasthāyāmapi bodhayogyān 
malaparipākatāratamyādyapekṣayā prabodhanārhān bodhayan teṣāṃ bodhanaṃ 
kurvan rodhyān rodhanārhān rodhaśaktyā nirundhan | karmiṇāṃ karmavatāṃ 
karma śarīrendriyajātyāyurbhogakāraṇamiti | sūkṣmarūpaṃ karma pācayan 
phaladānonmukhamāpādayan | tathā vakṣyati -

tathā bījaṃ śarīrādeḥ pācayatyāniveśanāt |-mṛgendre vi0 5 | 11

iti bhāvaḥ | uktamatraiva -

na yogyatāṅgamabhajat sadyaḥ syādauṣadhādivat | iti |-mṛgendre vi 5 | 11

	pākayogyamapi tat svayamātmanātmānaṃ na pācayitumīśam | sarvasya hi 
pariṇāmino vastunaḥ kṣīrāderayaṃ sādhāraṇo dharmaḥ yat kimapyapekṣya 
pariṇāmitvaṃ nānyatheti | tasmāt pariṇāmitvāt karmaṇo'pi anyāpekṣaḥ pāka 
iti | tathā -

pākārhamapi tat paktuṃ neśatyātmānamātmanā |
dharma-sāmānya evāyaṃ sarvasya pariṇāminaḥ ||-mṛgendre vi0 5 | 12

iti | māyāśaktīḥ śuddhāśuddhamāyayoḥ śaktīḥ tattatkāryajanakaśaktīḥ 
vyaktiyogyāḥ prasavābhimukhīḥ prakurvan prakarṣeṇa kurvan | atrāpi pariṇāmi-
karmikarmavanmāyāśaktīnāmapi svata eva prasavābhimukhyāpādanaṃ na 
ghaṭata iti bhāvaḥ | sarvaṃ cidcit-tattvabhāvabhūtabhuvanātmakaṃ vastujātaṃ 
vastusamūhaṃ yat yathāsthitaṃ tat tathā paśyan avalokayan bhūtvā āste | śiva 
iti śeṣaḥ | yathāvat paśyan ityanena śivasyāsmadādivadayathāvat-
sthitavastubhāsonirastaḥ bodhayan rundhan pācayan prakurvannityanena śivasya 
sarvakarttṛtvaṃ, paśyannityanena sarvajñatvaṃ ca darśitam |



sarvaviṣayajñānaṃ vinā sarvakarttṛtvānupapatteḥ | yo hi yadyatkriyāsiddhiṃ 
tadaṅgāni tatphalāni ca jānāti tasyaiva 
vicitratattatkārakopayogābhisandhānavatastattat-kartṛtvaṃ ghaṭate, kuvindāderiva 
paṭādikṛtau | ato yastu tatrā'jñaḥ, sa tatkāryakaraṇāya nālam | bāliśa iva 
nyāyavidyādyupanyāse iti | taduktamatraiva (mṛgendre 5/13)-

sarvajñaḥ sarvakarttṛtvāt sādhanāṅgaphalaiḥ saha |
yo yaj jānāti kurute sa ta deveti susthitam || iti |

	āsta ityanena mahāpralaye śivasya sadbhāvaśca bodhayogyānityādinā ca 
puruṣasadbhāvaśca māyāśaktīrityanena bindumāyātmanoḥ sadbhāvaśca 
pradarśitaḥ | pralayakāle'pi śivasya pañcakṛtyāni darśitāni | tad yathā 
pauṣkare-
pralaye'pyanugṛhṇāti sṛjatyavati hanti ca |
tirodadhāti bhagavān na kālāpekṣayā sadā || iti |

	evamacetana ityādi-trayodaśaślokaiḥ patilakṣaṇa-pramāṇa-
dhiṣṭhānamūrti-kāraṇadehādyana-pekṣakartṛtvaupādhika-
sahakāryupādānāpekṣa-sarvajñatva-pañcakṛtyāni pratipāditāni | evaṃ-
prakāreṇa patisvarūpavedanayaiva saṃsāramuktā bhavanti | natu pāśarūpatayā 
īśvaravedinām taduktaṃ mṛgendre (5|18)-

sattā-svarūpa-karaṇārtha-vidheya-dṛgbhirleśoditābhiriti ye vidurīsatattvam | 

te mocayanti bhavinobhavapaṅkamagnān no vistareṇa puruṣāḥ paśupāśarūpam || 
? iti ||
	atrā'pyacetanasya māyāderityanena īśvarasya sattā sādhitā | atha 
patyuradhiṣṭhānamityanena tatsvarūpaṃ varṇitam | karaṇaṃ cetyanena karaṇaṃ 
kathitam | svāpe'pyāsta ityanena tasyārthaḥ prayojanaṃ bhuktimuktirūpaṃ 
varṇitam | jagajjanmasthitidhvaṃsetyanena pañcakṛtyarūpa-vidheyamuktam | 
paśyan sarvaṃ yad yathā vastujātamityanena dṛkpadavācya-tattvajñāna-
svarūpamuktaṃ veditavyam | brahmaṇo jīvaikyaṃ sārvātmyaṃ ca vadanto 
vedāntinaḥ

? acetanasya māyāderityādinā paśyan sarvaṃ yad yathāvastujāta mityantena 
granthenoktābhiḥ sattā-svarūpakaraṇārtha-vidheyadṛgbhirīśvaratattvaṃ ye 
viduste eva saṃsāramuktāḥ puruṣāḥ saṃsārapaṅkamagnān saṃsāriṇaḥ 
puruṣān mocayanti | ye tu ātmaivedaṃ sarvaṃ puruṣa evedaṃ sarvamiti 
paśupāśarūpamīśvaraṃ manvante, na te saṃsāramuktā bhavantītyarthaḥ |

 

paśupāśarūpeśvaravādinaḥ | kālakarmeśvaravādinaḥ 
pāśarūpatāmīśvarasya bruvate || 17 

	itthaṃ patilakṣaṇamuktvā'nte cidvilakṣaṇatayā paśusvarūpaṃ 
parākhyasūtreṇa pratipādayati-

dehānyo'naśvaro vyāpīvibhinnaḥ samalo'jaḍaḥ |
svakarmaphala-bhuk kartā kiñcijjñaḥ seśvaraḥ paśuḥ || 18 ||

	ātmā dehānyaḥ śarīra-vyaktiriktaḥ | anena cārvākasya nirāsaḥ | itthaṃ 
hi cārvākā vadanti-kṛśo'haṃ sthūlo'hamiti śarīra evā'haṃpratyayasya 
dṛṣṭerna tadvyatirikta ātmā upalakṣyate | atha-parārthāścakṣurādayaḥ, 
saṃghātatvāt śayanādyaṅgavadityādinā karaṇānāṃ 
karttṛprayojyatvādityanena vānumānenātmā prasādhyate | naitad yuktam | 
tasyātmā palāpinaścārvākān pratyasiddheḥ | na hyeṣāṃ pratyakṣādanyat 
kiñcit pramāṇam | siddhāvapi anumeyasyātmano devadattādivat paratvaṃ 
prasajyeta | yat kila svayaṃ prakāśate, sa evātmā | tatprakāśyastu para iti 
viviktatayātmaparabhāvasya prakāśamānasyaiva saṅkaro'navasthā ca syāt | 
taduktam-

ātmā yadi bhavenmeyastasya mātā bhavet paraḥ |
para ātmā tadānīṃ syāt sa paro yastu mīyate ||

tathā-

prakāśate saṃvidekā tadanyat tu prakāśyate |
prakāśyaṃ ca bhavet karma tacca kartrā vinā katham || iti |

	tasmānnā'numāne dehavyatirikta ātmā upalakṣyate | naca dehasya 
caitanyābhāvena kathamātmatvamiti vācyam | kiṇvādi-dravyavikāre 
madaśaktyutpattivat caturbhūtavikāre dehe'pi sambidudbhavāt |

	apica yasminnupacite yasyopacayaḥ, yadapacaye vā apacayaḥ, tat tadātmakam 
| yathā vahnyupacayāpacayāvanugacchadauṣṇyam | tathā yauvana-sthāvira-
bhojana-tadabhāvahetukau ca dehasambandhināvupacayāvanukurvad vijñānaṃ 
dehātmakameva | ato deha eva cetana ātmeti | tadayuktam | tathāhi-dehaścetanaḥ 
kadācinna bhavati, bhogyatvāt vikāritvācca | ye ye kecana vikāriṇaḥ pariṇāmiṇo 
bhogyāśca, te te hyacetanā dṛṣṭāḥ | yathā paṭādayaḥ | sa 
deho'pyevaṃvidhastasmānna cetanaḥ |

	nanu aṅganādibhirbhogyatvamanaikāntikam | bhogyatve'pi 
tatrā'caitanyābhāvāt | nā'nai-

 

kāntikam | tadīyasyadehasyaiva bhogyatvāt | yadyevaṃ nirjīvasya dehasya kathaṃ 
no-pabhogaḥ ? bhavatyeva tadavasthocita upabhogaḥ kravyādādeḥ, na punaḥ 
kāntādeḥ | kāminyādyavasthāyā anyāvasthāntarāpattervikāritvena 
vībhatsarasahetutvāt | taduktiratraiva

kvaitat tad vaktramatra kva tadadharamadhu kvā''yatākṣyāḥ kaṭākṣāḥ | ? 
ityādi ||

evaṃ gajāśvādāvapi jñeyam | tasmāt sthitametad vikāritvād 
bhogyatvācca dehasyā'caitanyam, acetanatvācca pārārthyamiti | na cātmano 
dehānyatve kṛśo'hamityādipratyayabādhaḥ | tasya 'deha' iti bhedagrāhi-pratyayena 
bādhāt | na cātmano'numeyatve paratvaṃ syāditi vācyam | tasya svasaṃvedana-
siddhasyā''tmanaḥ vipratipannaṃ prati pratipādanārthamevā'numānaprayogāt | 
na cānumāna-prāmāṇya-nirāsastena śakyaḥ karttum | tadanumāna-prāmāṇya-
nirāsaka-yukterevā'numānatayā svavyāghātāpatteḥ | naca caitanyasya 
dehānuvidhāyitvaṃ, śavaśarīre vyabhicārāt | tasmādanubhava-
smaraṇayorekāṃdhikaraṇyāt cetano dehānya evātmeti |

	atra ca dehānyatva-vacanena tatsambandhināmindriyādīnām ātmatvaṃ 
nirastam | tathāhi-bahirgṛhītārtha-dhāraka-manaḥ-prerita-vāgindriyajanya-
śabdaprapañcasya vyavaharttṛpuruṣāśaya-prakaṭakatayā darpaṇa-sthānīyatvena 
acetanānāmindriyāṇāṃ karaṇatvameva samucitam |

	tathā ca mataṅge -

vāgindriyeṇa spaṣṭena manasānta[pū]ritena tu |
yaḥ prapañco'numānākhyaḥ sāmānyo vyavaharttṛṣu ||
tenā'numīyate hyātmā dṛk-darpaṇa-nidarśanāt |-6-16/17

apica - 

yo yaḥ saṃhataḥ, sa bhoktrarthaḥ, yathā śayanādi | saṃhataścāyaṃ 
cakṣurādīndriyavargaḥ 
atastasyāpi bhoktrā bhavitavyamiti indriyaṃ-vyatirikta-bhokttṛsiddhiḥ |

anaśvaraḥ nityaḥ | tasya hi saugatādivat  kṣaṇikatve vināśitve 
vā'bhyupagamyamāne karmānuṣṭhāna-phalabhogādikaṃ pūrvānubhūta-
smaraṇādikaṃ ca nopapadyate | tathā'traiva-

kṣaṇabhaṅge sthite jñāne na ca karmārjanaṃ bhavet |
na tatkarmaphalaṃ bhogyaṃ jñānanāśe niranvaye ||

śihṇanakṛte śāntiśatake caivaṃ dṛśyate-kvaitad-vatkāravindaṃ kva 
tadadharamadhu kvā''yatāste kaṭākṣāḥ, kvālāpāḥ komalāste kvaca 
madanadhanurbhaṅgurī bhruvilāsaḥ |-śā0 27 |

 

sthiratvaṃ tadgatigamyaṃ smṛtirnā'nubhavādṛte |
smartā'nubhavitā sthairyāt tena jñātā sthiro bhuvi || iti ||

vyāpīvyāpakaḥ | kṣapaṇakavat tasyā'vyāpakatve kāśmīrakasya dakṣiṇāpathe 
paridṛśyamānabhoga iva deśāntaraphalabhogo nopapadyeta, tasyā mūrtte 
rākaśasyevācetanena karmaṇā vā deśāntara-nayanāsambhavāt; śarīra-
parimitatve saṃkoca-vikāśa-dharmitve vā pariṇāmitvācetanatvādi-
doṣaprasaṅgācca | tathā tatraiva-

deśāntaraphalāyat syāt avimukto'pi yogatiḥ (?) |
mūrtatve na phalaṃ bhogyaṃ yato mūrtirvinaśvarā ||
amūrtā niyate vyāpe kenacit karmaṇā'thavā (?) |
atainaṃ yat tat kathaṃ nayate paṭu (?)
tat phalaṃ bhinnadeśasthaṃ vibhutvāt tanuyogajam | iti |

	vibhinnaḥ anekaḥ | natu vedāntavādināmiva ekaḥ, tasya paramārthata 
ekatve bandha-mokṣa-sādhaka-vidyā'vidyā vibhāgena dvaitāpatteḥ, ekamuktau 
sarvabhavoccheda-prasaṅgāt bhogasāmyādidoṣaprasaṅgācca tathā tatraiva-

cidrūpatvāt tadekatvaṃ tadbhedo bhinnabhogataḥ |
sa ca tasya svakarmotthaḥ sā'vidyā bandhalakṣaṇā ||
tacchedikā bhaved vidyā dvayamasti yadā tava |
vidyāvidyā-vibhāgenāgato dvaitaparigrahaḥ ||
sthitāyāṃ sarvato muktau bhavocchedaḥ prasajyate |
nacā'sti sa bhavocchedastena te bahavo matāḥ ||

śrīmatpauṣkare - 

yadyabhinnaṃ tu sarveṣāṃ bhoktumicchaikadā bhavet |
bhoktumicchāyadaikasya gantumicchā parasya ca ||
tadaivatasmāccaitanyaṃ bhinnarūpamiti smṛtam |

	samalaḥ malena sahitaḥ | malaśabdena jñānāvārakaṃ karmabhinnaṃ 
rāgakāraṇamajñānamucyate | tathā tatraiva-

tena tatkarmaṇo bhinnamajñānaṃ rāgakāraṇam |

 

prāvṛṇoti tadajñānamamūrttaṃ viṣaśaktivat ||
tenā'śuddhaḥ paśurasāvanupātiguṇāśrayaḥ |

	ajaḍaḥ jaḍo na bhavatītyajaḍaḥ, jñānakriyā-svabhāva ityarthaḥ | 
caitanyābhāve karttuḥ pravṛttyayogāt | tathā pauṣkare (6/186)-

pravartamāno dehādiścetanādhiṣṭhitaḥ sadā |
svataḥ pravṛttiśūnyatvāj jaḍatvena pa(gha)ṭādivat ||
yastu pravarttakaḥ so'yamātmeti paripaṭhyate |

tathā tatraiva - 

sarvakārye yataḥ kartturbhāvamālocya vastugam |
pravṛttirdṛśyate yasmāt sa bhāvaḥ sattvavācakaḥ ||
tena tatprāk citerbhāvaḥ karmavat kiṃ na manyase | iti |

	svakarmaphalabhuk | svasya karma svakarma dharmādharmātmakaṃ, tasya 
phalaṃ bhuṅkta iti svakarmaphalabhuk | yugapat sevā-kṛṣyādi-pravṛttayordvayoḥ 
puruṣayorekasya phalasiddheritarasyādarśanācca | 

tathā - 

sevāpravṛttayordvayoḥ samānaguṇaśīlayoḥ |
ekasya phalasampattistena tat-kāraṇapadam ||
adṛṣṭaṃ sūkṣmahetutvād gamyate kāryayogataḥ |
kāraṇaṃ karmasaṃjñaṃ tad dharmādharmātmakaṃ sthitam ||

pauṣkare (3/40)-

ubhayoḥ kṛṣisāmye'pi kaścid dhānyāni gacchati |
na kiñcidaparastasya karma kāraṇakaṃ dvijāḥ || iti 

kartā pūrvoktasya karmaṇaḥ sampādayitā, acetanasya śarīrādeḥ 
karttṛtvāyogāt karmaṇaḥ karaṇasāpekṣatve'pi kuṭharādivadapraśasyatayā 
puruṣasyaiva prādhānyācca | tathā tatraiva-

tatkartttā puruṣaḥ prokto na śarīrasya karttṛtā |
acetanaṃ yatastasmāt karttṛtvamamṛte tataḥ ||
karttṛtvaṃ karaṇe saddhi tathāpyasya pradhānatā |
vṛkṣacchede yathā loko  na kuṭhāraṃ praśaṃsati ||
sa karttā kāraṇaistena prādhānyāt puruṣaḥ smṛtaḥ | iti |
	
kiñcijjñaḥ kiñcidalpaṃ jānātīti kiñcijjñaḥ | etat kiñcijjñatvaṃ 
vibhuḥ san ityādinā uttaratra granthakāra eva vakṣyati | seśvaraḥ īśvareṇa 
prerakeṇa sahitaḥ |

 

na sāṃkhyānāmiva svatantra ityarthaḥ | karmaṇā dehetyādinā uttaratra vakṣyati | 
paśuḥ paśutvamalayuktaḥ, muktasya paśutvāsambhavāt | tathā pauṣkare (4/1)-

paśuḥ paśutvasaṃyogānna muktaḥ paśurucyate |

	ayaṃ ca paśuḥ vijñānakala-pralayākala-sakala-bhedena trividhaḥ | te ca 
krameṇaika-dvi-tri-malā bhavanti |

yasmāt svadṛkkriyāśāli-kalāhīnopyanīśvaraḥ |
vyāpakaścinmayaḥ sūkṣmaḥ śivavat saṃvyavasthitaḥ || iti | (-pauṣkare 4/2)

kiñcijjñatvaṃ ca uttaratra sūtrakāreṇa pradarśitam || 18 ||
itthaṃ paśulakṣaṇamukvā tad-vilakṣaṇeṣu pañcasu pāśeṣu 
pṛthagbhūtamāṇavaṃ malaṃ svāyambhuvasūtreṇa nirūpayati-

athā'nādimalaḥ puṃsāṃ paśutvaṃ parikīrttitam |
tuṣa-kambukavad jñeyaṃ māyāvāpāṅkurasya tat || 19 ||

atha paśu-lakṣaṇānantaraṃ malādayo vyākriyanta iti śeṣaḥ | 
anādiścāsau malaścānādimalaḥ, malinīkaroti dṛkkriyātmakaṃ tejaḥ 
pracchādayatīti malaḥ | malaśabda ācchādakaparyāyaḥ kṛt-pratyayāntaḥ | na 
vidyate ādiryasya saḥ anādiḥ | atra pācaka-viśeṣaṇībhūta-śobhanapadavad 
āchādakājñānaviśeṣaṇānādipadena 
ācchādanakriyāsambandhasyā'nāditvapratipādana-dvārā tatsambandhino 
malasyāpyanāditvamuktam | ayaṃ malaḥ pusāṃ puruṣāṇāṃ paśutvamiti 
kīrttitam | tatra malasvarūpe dṛṣṭāntamāha-tuṣakambukavadityādi | tat 
malarūpaṃ paṅkam | māyāvāpāṅkurasya āvāpaścāṅkuraśca 
āvāpāṅkuraḥ, dvandvaikavadbhāvaḥ | māyāyā āvāpāṅkuraṃ 
māyāvāpāṅkuraṃ tasya, tuṣa-kambukavat tuṣa-kambukamiva jñeyam | yathā hi 
tuṣa-kambukaḥ śālitaṇḍulānāmāvāpasya ucchūnatāyāḥ 
prasavābhimukhabhāvasya aṅkuropatternimittam | evaṃ māyāyā 
śivecchāvaśādāvāpasya prasavābhimukhabhāvasya kalādikāryādeśca 
tannimittamiti | etaduktaṃ bhavati-yasyedamasti, taṃ prati māyā prasavābhimukhī 
bhavati kalādīṃścotpādayatīti |

	nanu ātmani tuṣakambukasthānīyo malo varttate | māyāyāṃ ca 
kalādyaṅkurajanmeti bhinnādhikaraṇatvāt kathamekādhikaraṇo dṛṣṭānta iti cet | 
satyam | nāyaṃ sarvathā dṛṣṭāntaḥ, kintu nimittanimittībhāvamātra ityadoṣaḥ |



atra tuṣa-kambukadṛṣṭāntena śāstrāntarokta-
tāmrakālikādṛṣṭānto'pyupalakṣaṇīya iti | taduktaṃ śrīmanmataṅge 
(puṃpradhāneśvarasādhanapaṭale 80)-

tāmrakālikavad yogāt sahajaḥ parikīrtitaḥ | iti |

	atrāpi yathā tāmrasya kālikā rasaśaktyā nivarttate | tathā malaḥ 
śivaśaktyā nirvarttata ityetāvati dṛṣṭāntatvam | natu sarvathā 
sādharmyāditibodhyam | asya ca paryāya-nāmāni mṛgendre darśitāni | yathā-

paśutva-paśunīhāra-mṛtyu-mūrcchā-malāñjanaiḥ |
avidyāvṛtirugglāni pāpamūlakṣayādibhiḥ ||-mṛ0 1/7/7

suprabhede ca - 

malo'jñānaṃ tamo'jñatvaṃ tiraskārakarastathā |
patiḥ paśuravidyeti malaparyāyavacakaḥ || iti || 19 ||

	atra puṃsāmiti bahuvacana-nirdeśād mala ityekavacananirdeśācca 
malasyaikasyaiva bahupuruṣa-kriyāvāraka-śaktivaicitryamastīti dhvanitamarthaṃ 
mṛgendrasūtreṇa (1/7/8) mukhato darśayati-

tadekaṃ sarvabhūtānāmanādi niviḍaṃ mahat |
pratyātmastha-svakālāntā-pāyiśaktisamūhavat || 20 ||

	tad āvaraṇaṃ sarvabhūtānāṃ caturdaśavidhānāmapi 
prāṇanāmekameva | kasmādityatra viśeṣaṇadvāreṇa hetumāha-anādīti | anādi 
na māyīyabandhanavadāgantukam | ata evaikam | anekatve hi tasyā'cetanatvāt 
kāraṇāntara-pūrvakatvenā'nāditvānupapatīḥ | naca kāraṇāntara-
pūrvakatve'pi kalādinā pāramparyeṇa bandhakatvāt anāditvaṃ bhavatīti 
vācyam | tasya pravāhānāditvānaṅgīkārāt | tadaṅgīkāre tu puṃsāṃ 
malābhāvā vasthāvasyakatayā tadānīṃ śivasyeva 
punarbandhābhāvaprasaṅgāt | tasmānna karmavat pravāhānāditvaṃ malasya | 
kintu kāraṇābhāvādevā'nāditvaṃ māyāvat |

	niviḍaṃ ghanam, abhedyamityarthaḥ | vyāpakānāmātma-
nāmāvārakatvāt mahat | nanu malasyaikatve ekamuktau sarvamuktiprasaṅga ityatra 
āha-pratyātmastha-svakālānnāpāyi śaktisamūhavaditi | pratyātmasthāḥ prati 
puruṣaṃ varttamānāḥ svakālāntā

 

pāyinyaḥ svasvapariṇāma-kālāpasāriṇyaḥ yā śaktayastāsāṃ samūhaḥ 
so'syāstīti tadvat | tathoktaṃ tattvatraya nirṇaye-

malaśaktayo vibhinnāḥ pratyātmaṃ caiva tadguṇāvarikāḥ | iti |

	evañca sati malasyaikatve'pi tadīyāvāraka-śaktīnāmānantyāt 
tadāvāryāṇāmapi bhedād naikamuktau sarvamuktiprasaṅgaḥ |

	anena sutreṇa malasyaikatvādi-pratipādakena tatsvarūpa-lakṣaṇamuktam | 
tatra pramāṇaṃ tu mohādilakṣaṇa-kāryaliṅgaṃ śeṣavadanumānaṃ 
draṣṭavyam | tad yathā-mohādikaṃ kāryaṃ sakāraṇakaṃ kāryatvād ghaṭavat | 
atra ca māyādīnāṃ prakāśakatayā mohakāraṇatvāsiddheḥ pariśeṣāt 
mohakāraṇatayā malasya siddhiḥ | tathā kiraṇe-

prakāśo vyaktiśabdena malaśabdena cāvṛtiḥ |
vyaktiryā'ṇomalaḥ proktaḥ sphuṭaṃ dīpāndhakāravat | iti

mataṅge ca - 

tasmād dvayaṃ malo māyā sadā dipāndhakāravat |
dvayoḥ svabhāvabhedaśca tvayā''khyātamidaṃ mune || iti |

	mohādīni malakāryāṇi saptavidhāni bhavanti | tad yathā tatraiva 
(mātaṅgapārameśvare (6/103)-

moho madaśca rāgaśca viṣādaḥ śopa eva ca |
vaicittyaṃ caiva harṣākhyaḥ saptaite sahajā malāḥ ||

	eteṣāṃ svarūpaṃ mataṅgādau draṣṭavyam || 20 ||
	
nacaitā malasya śaktayaḥ svātantryeṇa rundhanti apasaranti vā, kintu 
parameśvara-rodhaśaktyadhīnāḥ | sā'pi rodhaśaktirupacārāt pāśa iti 
[mṛgendra]sūtradvayena [7/11] pratipādayati |

tāsāṃ māheśvarī śaktiḥ sarvānugrāhikā śivā |
dharmānuvarttanādeva pāśa ityupacaryate || 21 ||

	māheśvarī śaivīśaktiḥ tāsāṃ malaśaktīnāṃ dharmānuvarttanāt 
dharmasya dṛkkriyā-sannirodhakatva-lakṣaṇasya anuvartanāt anusaraṇādeya | 
hetupañcamīyam | pāśatayā pāśatvena upacaryate | 



nacātra mukhyaṃ pāśatvaṃ | tatra hetutayā rodhaśaktiṃ viśinaṣṭi-
sarvānugrāhikā śiveti | sā sarvānugrāhikā sakala-jagadanugraha-svabhāvā 
śivā tacchreyaḥ prasādhikā yataḥ, tato na mukhyatvamityarthaḥ || 21 ||

	nanvasyā rodhaśakteḥ rodhanaikasvabhāvāyāḥ 
kathamanugrahakāritvamityāśaṅkyāha-

pariṇāmayatyetāśca rodhāntaṃ kārkacittviṣā |
yadonmīlanamādhatte tadānugrāhikocyate || 22 || (mṛ0 7/12)

	etāśca sarvabhūtagatāḥ malasambandhinī āvaraṇaśaktiḥ rodhāntaṃ 
tadadhikāra-kālaṃ yāvat tāvat pariṇāmayati pariṇāmena yojayati | 
pariṇāmaśabdāt prātipadikāddhātvarthe iti ṇici kṛte pariṇāmayatīti rūpam | 
atra ṇauhrasvābhāva śchāndasaḥ | sā patiśaktiḥ kārka cittviṣā | ka evārka 
kārkaḥ cittviṣā cidrūpa-tviṣā tayā kārkacittviṣā | ka śabdena mūrdhā 
sadānugrahaikavyāpāra īśāna uktaḥ, īśāno mūrddheti mantraliṅgāt | sa eva 
sakalajagadanugrahe nityodyuktatvāt arkeṇādityenopamitaḥ | tataḥ pravṛttayā 
paraśreyaḥ-prakāśikayā cittviṣā jñānabhāsā hetubhūtayā yadā yasminkāle 
unmīlanam anunmīlita-svarūpāṇāmaṇuvargāṇām  āśayavikāśanamādhatte 
karoti, tadā tasmin kāle anugrāhikā anugrahakarī ucyate bhaṇyate | yadyapi 
rodhaśaktermalaparipākāntameva nirodhānaikasvabhāvatvaṃ, tathāpi 
tadanantaramaṇuvargāṇāmāśayavikāsanahetutvādanugrāhakatvamityarthaḥ | 
tathā ca iyameva etiśaktiryāvanmalaparipākamacidrūpāṇi mala-karma-
māyātatkāryāṇyanugṛhṇāti, cidrūpatāmātmanastirodadhāti | 
pākānantaramātmano'nugṛhṇāti | pāśaṃ tirodadhātīti cidacitāṃ 
sarveṣāmanugrahakāritvāt sarvānugraha-kāriketyapi siddham | tad yathā-

śivasya śaktiḥ sarveṣāṃ sadā'nugrahakāriṇī |
pāśadharma-nirodhena pāśānāṃ pāśahetunā ||
nivṛttiyogyatāṃ teṣāṃ karotīti yatastataḥ |
pāśadharmanirodhācca vidhatte paśvanugraham ||
tādātmikena rodhena rodhiketyupacaryate iti || 22 ||

 

evaṃ mala-tirodhānaśaktirūpa-pāśadvayamabhidhāya avaśiṣṭa-pāśeṣu 
māyopari mahāmāye tyuktatvāt māyāderabhyarhitaṃ mahāmāyārūpaṃ 
viśvasārottarasūtreṇa darśayati 

vāgīśvarī ca śuddhādhva-mūlopādānakāraṇam |
nopādānaṃ vinā kāryaṃ kadācidupalabhyate || 23 ||

	śuddhasyā'dhvano mūlabhūtamupādānakāraṇam | caśabdo 
vadhāraṇārthaḥ | saiva vāgīśvarī mahāmāyā | taduktaṃ śrīmatpauṣkare-

parā vāgīśvarī vidyā māyā'vidyā'parā smṛtā | iti |

mahāmāyāyā nādādīni bahūni paryāyanāmāni | tathā 
nādakārikāyām-

siddhonādaḥ parasumaṅgalā (?) mālinī mahāmāyā |
samanānāhata binduradhoṣā vāg brahmakuṇḍalinītattvam (?) ||
vidyākhyaṃ cetyuktastaistaiḥ śabdaistadāgameṣvitthamiti |

	anena mahāmāyāyā śuddhādhvopādānatvarūpaṃ lakṣaṇaṃ 
pradarśitaṃ | tena ca kāryaliṅgakamanumānaṃ tatsadbhāva-sādhakaṃ 
pramāṇamākṣiptam | tathāhi-śuddhadhvā'yaṃ sopādānaḥ kāryatvāt 
ghaṭavat | nacātra samavetaśakterevopādānatvena siddhiritvati vācyam | tasyā 
upādānakāraṇatve'cetanatvāpattyā cetanaśiva-samavāyāyogāt | yathā 
śrūyate pauṣkare (2/11)-

śive karttari tādātmyān neyaṃ kuṇḍalinī sthitā |
pādānatvato hetoḥ kulāle mṛttikā yathā || iti |

	atra māyāprakṛtyormohakatvena prabuddhapuruṣa-kāyakaraṇarūpa-
śuddhādhva-kāraṇatvāyogena pariśeṣāt tadanukāri-kāraṇatayā 
mahāmāyāsiddhiḥ | tathā pauṣkare (2/6-7/10)-

māyāpi nātropādānaṃ mohakatvāt svatejasā |
yataḥ prabuddhapuṃskāyakaraṇānāṃ na kāraṇam ||
śuddhādhvavarttinaḥ sarve prabuddhāḥ śivatejasā |
tasmācchuddhādhvanaścā (sta)sya svānukāryeva kāraṇam ||
iṣyatāṃ kuṇḍalinyākhyaṃ śuddhametad dvijottamāḥ | iti 

 

nanu kāryasya sopādānatvamasiddham | pradhvaṃse 
vyabhicārādityāśaṅkyāha-upādāna mityādi | upādānaṃ upādānakāraṇaṃ 
vinā antareṇa kāryaṃ kadācidapi nopalabhyate na dṛśyate | 
kāryatvahetorbhāvatva-viśeṣaṇadānena vyabhicāraḥ pariharaṇīya iti bhāvaḥ | 
asmādapi śuddhādhvavāsināṃ paramokṣaṃ prati bandhakatvāt pāśatvameva | 
yathā śrīmatpauṣkare (2/2-3)

kiñca rudrāṇavo yena badhyante yatra vā sthitāḥ |
vimucyante yato vā'yaṃ sa binduriti gamyatām || 23 ||

atha [svatantratantrīya-] sūtrāntareṇa tasya sakalajagadutpattihetubhūtaṃ 
śuddhādhvakāryaṃ darśayati-

yā'tha kuṇḍalinī śaktirmāyākarmānusāriṇī |
nādabindvādikaṃ kāryaṃ tasyā iti jagat sthitiḥ || 24 ||

	atrā'tha-śabdaḥ śivasamavāya-śaktyapekṣaḥ, samavāyiśakteḥ śivasya 
ca māyordhvatva-pratipādanāt | tathā sarvajñānottare śrūyate-

niṣkalā paramā śaktiracintyā sarvatomukhī |
saṃsūkṣmānirmalā nityānandā varvāṇadāyinī ||
yā vijṛmbhati tattveṣu ....caiva hi (?) |
tayā dhṛtaṃ jagat sarvamekayā'nekarūpayā ||
asyā ūrdhvaṃ nirālambaṃ nirādhāraṃ nirāmayam |
acintyaṃ vyāpakaṃ śāntaṃ sṛṣṭi-saṃhāra-varjitam || iti |

	evaṃ samavāyiśakteradho vartamānā māyākarmānusāriṇī māyā ca 
karma ca māyākarmaṇī, māyākarmaṇo'nusāraḥ māyākarmānusāraḥ, 
so'syā'stīti māyākarmānusāriṇī | nivṛttyādi-kalārūpeṇa māyākārya-
pṛthivyādi-tattvādhārabhūtā tadvarttināṃ karmānuguṇa vākśaktirūpā 
cetyarthaḥ | yadvā māyākṣobhakānantadeva-śarīrotpādakatvena tasyā 
māyānukūlatvam | karmajanya-bhāvapratyayānuvedhaśabdotpādakatvāt 
karmānukūlatvam | kuṇḍalinī kuṇḍalinyākhyā yā śaktiḥ śivasya 
parigrahaśaktiḥ | taduktaṃ ratnatraye (166)-

mantrayonirmahāmāyā yā parigrahavarttinī | iti |

yathā sarvajñānottaravṛttau-atra kuṇḍalinī-śabdavācyā tu 
bhujaṅgakuṭilākāreṇa nādātmanā svakāryeṇa pratipuruṣaṃ 
bhedenā'vasthitā, natu svarūpeṇa pratipuruṣa mavasthitetyartha iti |

 

śrīmattrayodaśaśaktikāyām-bhujaṅgakuṭilākāreti | tasyāḥ mahāmāyāyāḥ 
kāryabhūtaṃ nādabindvādikaṃ nādaśca binduśca nādabindū, tau ādiryasya 
tannādabindvādikaṃ jagatprapañcaḥ śuddhādhvā, iti itthaṃ sthitiḥ siddhāntaḥ 
| atra cādiśabdena nādākhyeśvara-tattvānāṃ nādādipañcatattvavarti-
bhuvanatanukaraṇādīnāṃ kāmikādīnāṃ tantrāṇāṃ ca grahaṇam | 
athavādiśabdena śuddhetarāṇyapi tattvāni gṛhyante, kuṇḍalinyāḥ sākṣāt 
paramparayā ca sakalaprapañcakāraṇatvāt | yathā cāhuḥ kālottare-

pañcatriṃśatitattvaṃ hi śivatattvād vinirgatam |
tatra sthitiśca vṛddhiśca tatraiva ca layo bhavet ||

	atra śivena samavāyiśaktyā kṣubdhāyā mahāmāyāyāḥ 
sakāśānnādābhidhānaṃ tattvaṃ prathamamutpadyate | iyameva 
śivādhārakatayā śivatattvamityapi vadanti | tataḥ sakāśād bindusaṃjñakaṃ 
tattvamutpadyate | idañca tattvaṃ śaktyādhārakatayā śaktitattvam | tataḥ 
śaktitattvāt sadākhyaṃ tattvam | tataḥ sadākhyādīśākhyaṃ tattvam | 
īśākhyād vidyākhyaṃ tattvamiti krameṇa śuddhāni pañcatattvāni jāyante | 
tatra vidyātattve vidyātattvādhipatiśca, bhṛguṇyādayaḥ sapta vidyārājñyaśca, 
tadadhīnāḥ saptakoṭimahāmantrāśca, vācakaśabdā 
vyomavyāpyakṣarādayaśca, vaikharyādayaśca kāmikādyaṣṭāviṃśati-
tantrāṇi ca varttante | yathā mṛgendre (13/156)-

bhṛguṇī brahmavetālī sthāṇumatyambikā parā |
rūpiṇī nandinī jvālā sapta saptārvudeśvarāḥ || 19 ||

śrīmataṅge - 

prādhānyena sthitā hyetā vidyā mantrāśca suvrata |
ekāśītipadā devī yā sā śaktiḥ śivātmikā ||
śā[ntau]ntād vinirgatā pūrvaṃ sthānaṃ tasyāstadātmakam |
laye ca śivatattvākhyaṃ vyaktau bindvā[tmakaṃ] hvayaṃ param ||
bho[gaḥ]ge sadāśivasthā[ne]naṃ īśvarā[khye]khyaṃ ca śāsa[naṃ]ne |
vidyātattve'dhikāraḥ syād yonirjñeyā sadaiva hi ||
ta[a]syāmeva sthitā mantrā vidyāśca vividhā mune !  |
iyaṃ tāvanmahāśaktiḥ śivasya paramātmanaḥ || iti || (mā0 7/30-34)

 

atra layabhogādhikārapradasya śivasya ātmanāṃ 
bhauvanaśarīrapradasyāpi vyomavyāpyakṣarasamūhasyā'bhivyaktisthāna-
śarīratayā layabhogādhikāra-sambandha uktaḥ | natu svābhāvikaḥ, 
sādhikaraṇanāśākārakorakośāvaśānāyānāmakṣarāṇāmivā'cetanatvena 
tadayogāt (?) tasmādasyā vidyātattve evā'kṣarayonau mukhyaḥ sambandha iti | 
īśvaratattve'nantādayo'ṣṭau vidyeśāḥ, tadadhiṣṭhātryastvaṣṭau 
vāmādiśaktayaḥ, tadvilāsinyaḥ śaktayo'ṣṭau bhānumatyādayaḥ, 
ucchuṣmādayaśca pañca rudrāḥ siddhāntaśāstraiḥ prapūjitāḥ 
nandyādyaṣṭau gaṇeśvarāḥ, indrādayo lokapālāsteṣāmāyudhāni ca 
śivāsanabhūtā dharmādayo'ṣṭau ca sthitāḥ | tadāha mṛgendre (13/158)-

ucchuṣmāḥ śāmbarāścaṇḍā mahāvīryāḥ padadruhaḥ |
rudrā gaṇāḥ sadikpālāḥ śāstrāṇi patayastataḥ || iti |

śrīmataṅge - 

vidyā bhānumatī nāma bhāsurapratimā tu sā |
tato'nyāpi mahābhāgā raudrī rudreṇa karmaṇā ||
viśvā ca kālī kāpālī vidyā'nyāpi mahodayā |
sukhodayā'nyā vikhyātā tathā vajrīti kīrtitā ||
aṣṭāvetā yaśasvinyo vidyeśānāṃ mahātmanām |
kriḍanārthaṃ vilāsinyaḥ paśūnāṃ pāśamocikāḥ || iti (mā0 7/19-22)

sadāśivatattve tu tadadhikārāvasthaḥ sadāśivaḥ, praṇavādyā daśa 
aṇavaḥ, sadāśivaśca pañca brahma, ṣaḍaṅgāni ca, 
akṣarabindusthūladhvanirūpo nādaśca varttate | taduktaṃ svacchande-

oṃkāreśaḥ śivo dīptaḥ kāraṇeśo daśeśakāḥ |
suśivaścaiva kālaśca sūkṣmarūpoṃ'śutejasaḥ || iti |

śrīmataṅge (vidyātattvapaṭale 25)-

brahmāṇyaṅgāni yāni syustāni sādākhya gocare |
nādo binduḥ sakalaḥ sādākhyaṃ tattvamāśritau kathitau |

etat sadāśiva-tattvaṃ prāptāḥ  sarve'pi tatsamā bhavanti | yathā mataṅge 
(4/55)-

merupṛṣṭhaṃ yathā prāptāstṛṇaloṣṭādayo bhṛśam |
pāpnuvanti suvarṇatvaṃ tadvat sādāśive pade || iti |

 

bindutattve tu bhuvanarūponivṛttimadādisaṃjñaḥ sadyojātādi-saṃjñaḥ 
sakalaniṣkalākhyaḥ śivaścākṣarabinduhetusvarūpa-sūkṣmanādaśca varttate | 
mṛgendre (13/161)

bindau nivṛttyādikaleśvarāḥ | iti |

	tattvaprakāśavṛttau-sūkṣmanādasya śaktitattvāntarbhāvatvena 
coktatvāditi vākyena sūkṣmanādasya bindutattvāvasthānaṃ prakaṭitam | 
sarvātma śambhukṛtasiddhāntadīpikāyāmayamarthaḥ | 

	nādatattve tu dhvanipatirindhikā vā dīpikā vā recikā vā 
nivṛttyādibhuvanapatisaṃjñaḥ śivo varttate | cicchaktau śaktimad-variṣṭhaḥ 
parameśvaraḥ sakalajagatparamakāraṇaṃ kuṇḍalinī ca vāgīśāṃ patayaśca | 
tadurdhvaṃ kevalaḥ paraḥ śiva iti | taduktaṃ mṛgendre (13/162)

nāde dhvanipatiḥ śaktau sarvaśaktimatāṃ varaḥ |
yonirviśvasya vāgīśāḥ patayaḥ parataḥ śivaḥ || iti |

śrīmatsvatantre-

tatra kuṇḍalinī śaktirmāyā karmānusāriṇī |
bhuvanādhipatīnāṃ ca hetustadvāsināṃ priye ! ||
tadatītaṃ varārohe paraṃ tattvaṃ nirāmayam | iti |

suprabhede ca-

tadūrdhvaṃ bindutattvaṃ tu tadūrdhve nāda eva tu |
tadūrdhvaṃ śaktitattvaṃ hi tattvaṃ tattve tadūrdhvataḥ (?) |
atordhve śivatattvaṃ syāt sarvatattvoparisthitam ||
śivādyavaniparyantaṃ vyāpakaṃ tena tejasā |

	idaṃ nādatattvameva paramakāraṇaṃ nityam | tadeva mahāmāyeti 
kecidācāryā vadanti | teṣāṃ pakṣe catvāryeva kāryāṇi śuddhatattvāni | 
yathā-

śuddhāni pañcatattvānyādyanteṣu smaranti śivatattvam |
śakti-sadāśivatattve īśvara-vidyākhyatattve ca ||

	asya vyākhyā-teṣu madhyācchivatattvaṃ bindvātmakamādyaṃ 
pradhānamupādānaṃ smaranti pūrvācāryāḥ, paramopādānatvenaiva cāsya 
māyāvannityatvaṃ siddham | ataścānyāni catvāri tattvāni tatkāryāṇīti bhāva 
iti | śrīmatpauṣkare tu-nādābhidhānaṃ śivatattvamapi kāryameva, kintu tatra 
śaktitattvāntarbhāveṇa catvāryeva kāryāṇi śuddhānītyuktam | tad yathā-

vṛttistattvātmikā cāsya caturthī saṃvyavasthitā |

 

śivatattvaṃ sadeśākhyamīśaṃ vidyāhvayaṃ tathā ||
śuddhānyetāni tattvāni rudrāṇūnāṃ mahātmanām | iti |

sarvajñānottare tu-śaktyabhidhānaṃ bindutattvameva paramakāraṇamityuktam |

tadyathā-

atordhvaṃ baindavaṃ tattvaṃ vimalaṃ sarvato mukham |
paramaṃ sarvatattvānāmanantajyotirūpakam || 24 ||

atha sūtrāntareṇa catasro'pi vāgvṛttayo mahāmāyākāryāṇīti 
śabdasṛṣṭimuddiśati-

tasyāścatasro vāgrūpā vṛttayo vaikharyādayaḥ |
vaikharī madhyamā cānyā paśyantī sūkṣmasaṃjñitā || 25 ||

	vāgūpā vaikharyādayaścatasraḥ tasyā mahāmāyāyā vṛttayaḥ 
kāryāṇi | catasṝṇāmapi krameṇa nāmānyāha-vaikharītyādi | ekā 
vṛttirnāmnā vaikharītyucyate | anyā vṛttirnāmnā madhyamā | aparā nāmnā 
paśyantī | aparā sūkṣmasaṃjñitā | etāsāṃ svarūpamuttaratra saṃgrahakāraḥ 
svayameva vakṣyati | anena śabdasṛṣṭirapi bindūpādānetyuktā bhavati | 
atrā'yaṃ sṛṣṭikramaḥ-śivecchayā prathamaṃ kṣubdhāyā mahāmāyāyāḥ 
sakāśānnāda utpadyate | nādād binduḥ | bindorakṣaram | akṣarānmātṛketi | 
tathā parākhye-

binduḥ kṣubdhastadicchātaḥ śabdarāśirabhūt tadā | iti |

mṛgendre-

śakternādo bhaved bindurakṣaraṃ mātṛkā tataḥ  | iti |
ākāśavāyuprabhavaḥ śarīrāt samuccaran vaktramupaiti nādaḥ |
sthānāntareṣu pravibhajyamāno varṇatvamāgacchati yaḥ sa śabdaḥ || iti |

svāyambhuve-

navaparvaśatārthātma-yonirbījātmakaḥ paraḥ |
akārādi-visargāntaṃ bījaṃ tat ṣoḍaśākṣaram ||
śeṣā yoniścatustriṃśadavyayā hyakṣarātmikā |
sā śaktirdevadevasya tayā vyāptamidaṃ jagat || iti |

	āsāṃ catasṝṇāmapi vṛttīnāmāśrayabhūtā nivṛttyādayaḥ, kalāḥ 
pañca ca bindoreva kāryāṇi | tathoktaṃ ratnatraye (85)-

saiṣā caturvidhā vṛttirnivṛttyādi kalāśrayāt |
pañcadhā bhidyate bhūyaḥ kalāstā binduvṛttayaḥ || iti |

 

mūlatantre'pi-pūrvoktabindumadhyasthāḥ kalāḥ pañca samudbhavāḥ | 
iti | 

iyaṃ mahāmāyā śabda-vastūbhayātmikā bhavati; sūkṣmādīnāṃ 
śabdānāṃ varṇapadamantrātmakānāñca vastūnāṃ cotpādanāt | tathā 
pauṣkare-

śabdavastūbhayātmānau bindurnānyatarātmakaḥ | iti |
mantrādhvā ca padādhvā ca varṇādhvā ceti śabdataḥ |
bhuvanādhvā ca tattvādhvā kalādhvā cārthataḥ kramāt | iti ||

	atra śabdabrahmavādinaḥ ātmana eva nādādikrameṇā'vasthānamiti 
vadanti | tadayuktam | avikāriṇastasya nādādyākāreṇa pariṇāmānupapatteḥ | 
nāpi tacchakteḥ, tasyā api pariṇāmāyogāt | dvayorapi vikāritvā bhyupagame 
acetanatvaprasaṅgāt | tasmāt śabdopādānatvaṃ bindorevābhyupagantavyamiti | 
tathā nādakārikāsu (16)-

avikāryatrātmoktastacchaktiścāpyato na yogyau tau |
bahudhā sthātuṃ yadvā caitanyavinākṛtau vikāritvāt | iti || 25 ||

evaṃ śuddha-māyālakṣaṇaṃ pāśaṃ nirūpya svāyambhuva-
sūtreṇā'śuddhamāyālakṣaṇaṃ nirūpayati-

māyātattvaṃ jagadbījamavināśyaśivātmakam |
vimvekamakalaṃ sūkṣmamanādyavyayamīśvaram ||

	mātyasyāṃ pralaye sarvajagat, mayati annāt jagaditi vā māyā | tathā 
pauṣkare-

mayatyasmād jagat sarvaṃ tena māyā samīritā | iti |

	māyārūpaṃ tattvaṃ māyātattvam | idameva tattvaṃ granthyādi 
nāmabhirbahubhirgīyate | jagadbījam jagataḥ sarvasya 
kalāderbījamupādānakāraṇam | anena viśeṣaṇena-jagadidaṃ sopādānam 
utpattidharmakatvāt yathā paṭādiriti māyāsiddhiruktā | yathā mṛgendre (9/3)-

karttā'numīyate yena jagaddharmeṇa hetunā |
tenopādānamapyasti na paṭastantubhirvinā || iti ||

	avināśi nityam | jagat-saṃhāre yadyupādāna-kāraṇasya māyākhyasyāpi 
vināśaḥ syāt, tat punaḥ sargādau kasmādupādānāj jagadutpadyeta | ato nāsyā 
anityatvam | 

	athocyeta-sargādau upādānamapi devaḥ srakṣyatīti | naitad yuktam | evaṃ 
sati tatkāryasyeva asyāpyupādānaṃ vinā'nutpatterupādānāntaraṃ kalpyam | 
tasyāpyanyaditya-

 

navasthā syāt | vyaktyupasaṃhāreṇa śaktirūpatayā'vasthāne na kaścid doṣaḥ 
tadidamuktaṃ-

yadyanityamidaṃ kāryaṃ kasmādutpadyate punaḥ | iti |-mṛgendre (9/5)

	aśivātmakam aśuddhaṃ, śivātmakaṃ cetanaṃ na bhavatītyaśivātmakam 
| acetanamiti yāvat | acetanasyaiva tatkāryasya kalāderupalambhāt | acetana-
tatkāryopalambhe'pi tatkāraṇasya cetanatvābhyupagame kāraṇāniyamalakṣaṇaḥ 
sakalānumānocchedaḥ sarvavyavahāra-lopo'pi doṣaḥ syāt | taduktaṃ (mṛgendre 
9/4)-

tadacetanameva syāt kāryasyā'cittvadarśanāt |
prāptaḥ sarvaharo doṣaḥ kāraṇāniyamo'nyathā || iti |

	vibhu vyāpi | puruṣasya bhogāya tiryagūrdhvādho madhyasthita-srotobhiḥ 
sarvatomukhatayā sarvakāryotpādakatvāt | taduktam-

	avyāpi cet kutastat syāt sarveṣāṃ sarvatomukham iti |-(mṛgendre 9/5)

evaṃ pakṣatuṇḍādibhedānāmapi bhogādhiṣṭhānatvavat kalādi-
kāryabhedānāmapi bhogādhiṣṭhānatayā bhedarahitam | bhinnatve anekatve 
satyacetanasya ghaṭapaṭādivadutpattimattvaprasaṅgāt | idaṃ tu notpattimat na 
kāraṇajanyam, paramakāraṇatvāt | nahi paramakāraṇāni bahūni bhavanti | yathā 
mṛgendre (9/7-)

yadanekamacit tat tu dṛṣṭamutpattidharmakam |
na tadutpattimat tasmādekamabhyupagamyatām || iti |

	nanu jagadutpattau paraparikalpita-paramāṇvādivadupādānakāraṇa-
bahulatvamastu ; bahubhyo'pi tantubhyaḥ paṭasyaikasyotpattidṛṣṭeḥ, tadvad jagat 
sarvamanekasmāt kāraṇādutapadyatām kiṃ granthyātmaka paramakāraṇa-
kalpanayeti cet | na | yadanekatantvātmakaṃ kāraṇaṃ paṭasyoktaṃ, tadanekamapi 
ekasmād dukūla-kārpāsādi-dravyādupannatvādekam | yathā ca ekasmād 
dukūla-kārpāsādi-dravyād anekākāra-paṭādyutpattiḥ ; evaṃ paramakāraṇāt 
sarga-sthiti-layādhārāt sargādau māyātattvāj jagadutpattiriti na kaścid doṣaḥ | 
tadūktam-

paṭastantugaṇād dṛṣṭaḥ sarvamekamanekataḥ |
tadapyanekamekasmādeva bījāt prajāyate || iti |-mṛgendre (9/7) |

evamanekatve satyacetanānāmanityatvaprasaṅgena 
paramakāraṇatvabhaṅgamajānānāṃ paramāṇugaṇakāraṇatvavādināṃ 
vaiśeṣikādīnāṃ dravyādiṣaṭpadārtha-ṣoḍaśapadārthānyatarajñānasya 
niḥśreyasa hetutāvarṇanena prakaṭitaprabodhataikṣṇyānāmapi upekṣaṇīya 
[tva]m | taduktam (mṛgendre)-



bhūtāvadhi jagad yeṣāṃ kāraṇaṃ paramāṇavaḥ |
teṣāṃ pūrvoditāddhetorjñātaiva jñānasūkṣmatā iti |

	akalaṃ kalārahitam | kalā nāma hāvṛtavādyuktāḥ (?) 
purādisanniveśānekarudrabhogyatvādayo viśeṣāḥ, tadrahitam | nātra kvacit 
purāṇi nityāni dṛśyante | nāpi tat sanniveśāḥ | nāpi bhogyatvam |

	nanu tatra viśeṣābhāve maṇḍaleśānāmavasthānapratipādikāyāṃ 
māyāyāṃ maṇḍaleśānāḥ kramato'ṣṭau vyavasthitā iti śruteranupapattiriti cet 
| na | māyāyāḥ śaktirūpatvena bhuvanāsambhavena tatra sthityanupapatteḥ 
tatsamānadeśakalāmastakasthitānāmupacāreṇa tatrāvasthānaśrutyupapatteḥ | 
taduktaṃ śrīmanmṛgendre (13/3)-

māyāyāmapi paṭhyante gahaneśādayo'dhipāḥ |
tattvaśuddhiśca dīkṣāyāṃ sarvaṃ tatkṛtimastake || iti |

	māyāgarbhādhikārye tadīśvaratvaṃ, na tu 
pañcāṣṭakādivanniyatabhuvaneśvaratvamityetad 
jñāpayitumatropacārābhidhānamiti bhāvaḥ |

	sūkṣmam | na sthūlam | avyakta buddhyādivat sthūlaṃ na bhavatītyarthaḥ | 
sūkṣmatāratamyaviśrāntabhūbhitvādapi idameva sūkṣmam | tathā | pauṣkare-

tanmātrāṇi pṛthivyādeḥ sūkṣmāṇyebhyastvahaṅkṛtiḥ |
tasyāḥ sūkṣmatarā buddhistasyāḥ prakṛtireva ca ||
tasyāḥ kalādivargaśca māyā sūkṣmatarā tataḥ |
yatra saukṣmyaparākāṣṭhā sā māyetyabhidhīyate || iti |

	asyāḥ sūkṣmatvamantargūḍhapaṭasya kaṭāderivābhipretam | natu 
sarvathā vikārarāhityam | yathā mṛgendre (9/21)-

yathā kaṭādigūḍhasya paṭādestadvyudāsataḥ 
nāsataḥ kriyate vyaktiḥ kalādergranthistathā || iti |

	anādi paramakāraṇatvāt yaccānādi, na tat sarvātmanā pariṇamate | kintu 
śaktyātmanāvasthitāyāstasyā ekadeśato māyātmakādupadyate 
vyaktimāsādayati |

 

yeṣāṃ sarvātmanā jagadbījaṃ pariṇamate, teṣāṃ tadanityamiti anādi-padena 
ekadeśapariṇāma-siddhiḥ | evaṃ sati asmin siddhānte kāryatvaṃ na paṭakuṭīvat 
vṛttitayā, paṭadaśāyāṃ kuṭīkṛtyasyā'nupapatteḥ | nāpi sāṃkhyavad dadhi-
kṣīranyāyena pariṇāmatayā, tathātve kṣīranāśavat sarvātmanā upādāna-
nāśaprasaṅgāt | ata eva na bauddhavad bījāntarāṅkuranyāyaḥ, tatrāpi 
sarvātmanā bījanāśāt | nāpi māyāvādivat śuktirajata-nyāyena vivarttatayā, 
kāryasyā'satyatvaprasaṅgāt | tasmādasmin mate ghṛtakīṭa-nyāyena ekadeśa-
pariṇāmatayaiva kāryatvaṃ siddham | taduktam-

bindu-māyā-pradhānānāṃ vikṛtirghṛta kīṭavat | iti |

siddhāntadīpikāyām-

śivecchāpreritā nandanātha-vikṣobhitā punaḥ |
ghṛtakīṭanayādekadeśena pariṇāmatā ||
śaktyātmaka-kalādīni prayānti sthūlarūpatām |
nā'sato vidyate bhāvo nā'bhāvo vidyate sataḥ || iti |

	atra tanukaraṇādīni kāryāṇi saṃhṛtau bindvādyupādāneṣu 
śaktyātmanā'vasthāya sṛṣṭau bandhātmaka-prayojanāya punarvyaktātmakāni 
bhavanti | tathā mṛgendre (9/13)-

tadādhārāṇi kāryāṇi śaktirūpāṇi saṃhṛtau |
vikṛtau vyaktirūpāṇi vyāpriyante'rthasiddhaye || iti |

	avyayaṃ na tasyāḥ vikāraśaktayo vyayaṃ vināśaṃ gacchantīti avyayam, 
śaktivyayarahitamityarthaḥ | avyayapadena asatkāryavādibhyo'syātra viśeṣaḥ 
sūcitaḥ | teṣāṃ hi viśiṣṭa-kāryotpādana-sambhavādityuktaṃ mokṣakārikāsu | 
itthaṃ sarvavikārāṇāmupādānatayā''pūrakatvena īśvaravat 
puruṣārthasādhakatvādīśvaratvamiti || 26 ||
	asya māyātattvasya ekatve'pi anekākāra-kāryotpādakatvaṃ 
sahakārisāpekṣatvaṃ ca mṛgendrasūtreṇa (9/2) pratipādayati-

tadekamaśivaṃ bījaṃ jagataścitraśaktimat |
sahakāryadhikārānta-saṃrodhi vyāpyanaśvaram || 27 ||

	tat māyātattvam ekam | aśivam aśuddhaṃ mohakatvāt | jagato bījam | 
citraśaktimat citrā vicitrāḥ śaktayo yasya tat tathoktam | tathācā'sya ekatve'pi 
tacchaktīnāmanekatvād vicitrakārya-janakatvamaviruddhamityarthaḥ |



kiṃca sahakāryadhikārānta-saṃrodhi ? | tācchīlye ṇinipratyayaḥ | anena karma 
sahakārītyuktam, karmābhāve granthitattvasyā'pravṛtteḥ | vyāpi anaśvaram | 
padadvayametat pūrvameva vyākhyātam | atra ekatvādi-viśeṣaṇānāṃ 
punarupādānaṃ pratipādayituṃ (?) vicitraśaktimat-
sahakāryadhikārāntasaṃrodhi-rūpa-viśeṣaṇadvaya-sahavarttitayaiveti na 
paunaruktyam | asya māyātattvasya rūpamācāryairapyuktam-

māyākhyaṃ citraśaktyā parigatamakalaṃ kṛṣṇavartmaikabījaṃ 
nityaṃ karmāntarodhi svakṛtinivasanaṃ tatkṛtivyāpakaṃ ca |
kāryācittvaprakāśya ----- daśivakaraṃ (?) mohakaṃ svāpakāle 
sattvātmā ca sa evaṃ paramapi ca sitaṃ kāraṇaṃ bodhakaṃ tat || iti || 27 ||

atha kiraṇasūtrārdhena śuddhāśuddhayorupādānayormāyayor-
adhiṣṭhāturnimittakāraṇasya bhedaṃ darśayati-

śuddhe'dhvani śivaḥ kartā prokto'nanto'site prabhuḥ || 28 ||

	śivaḥ śuddhaḥ parameśvaraḥ śuddhe aśuddhirahite adhvani 
vidyātattvabhuvanādyātmake mantre mantreśādyātmake ca kartā nimittaṃ 
proktaḥ uditaḥ | tatkṛtaṃ tattvabhuvanādikaṃ ca samasta mityarthaḥ | anantaḥ 
anantādiko vargaḥ asite aśuddhamāyātmake prabhuḥ sṛṣṭyādikartā prokta 
ityanuṣaṅgaḥ | atrā'nantādīnāmīśvarapreraṇayaiva kartṛtvamabhimatam | 
taduktamatraiva-

īśvaro'dhasta-vidyānāṃ patīn sa prerayatyaṇūn |
tena preritamātrāste kurvantyadhastanaṃ jagat || iti ||

	tathā kailāsasaṃhitāyāṃ-

māyā-vikṣobhako'nanto maheśvara-samanvayāt | iti |

yadyevaṃ śivasya sarvakartṛtvaṃ na ghaṭata iti cet | na | antaraṅgāmātya-
purohitādiprakṛtivargaṃ svayameva kurvato nṛpaterbahirātmakalpā 'mātyādi-
preraṇena sarvakartṛtvavat anantādīn svayameva kurvatastat-preraṇayā ca bahiḥ 
karttuḥ śivasya sarvakartṛtvāvirodhāt | taduktamatraiva-

? sahakāriṇāṃ karmaṇāmadhikārāntaṃ yāvat saṃruṇaddhi aṇūn 
badhnāti tacchīlamiti sahakāryadhikārāntasaṃrodhi, karmaṇāmabhāve 
māyātattvasyāpravṛtterityarthaḥ |

 

yathā bhūmaṇḍaleśena niyuktaḥ sarvataḥ prabhuḥ |
tathā'sau kurute sarva tacchakti-pratibodhitaḥ || iti |

	atra śivapreritasyā'nantasya kalādi-pradhānaparyanta-tattvānāmeva 
karttṛtvam | anantapreritasya śrīkaṇṭhasyaiva guṇādi-kṣityanta-tattvānāṃ 
karttṛtvam | bhautikasṛṣṭestu śrīkaṇṭhapreritasya brahmaṇaḥ kartṛtvamiti vivekaḥ | 
tad yathā pauṣkare-

kṣobhako'tra mahātejāḥ śrīkaṇṭho'nantavikramaḥ || (pau0 6/30)
pravṛddhaḥ parameśāna ! śaktisamparka-mātrataḥ || (pau0 6/31)
guṇādi-kṣitiparyanta-tattvajātaṃ yato bhavet || iti (pau0 6/18)

śrīmataṅge-

sthitaye sarvabhūtānāṃ śarīrāṇyasṛjat purā |
sthūlāni tadviśiṣṭāni sṛṣṭavān bhūtanāyakaḥ || iti | (mā0 19/2-4)

tathā svāyambhuve-

tatho(yo)dvalitasāmarthyāḥ sarvasya prabhaviṣṇavaḥ |
ananteśādi-vidyeśā babhūvuḥ kāraṇecchayā ||
tebhyo'mitabalāścānye tebhyaścānye niyoginaḥ (?) |
bhavanti vimalātmānaḥ sitāsitaphalapradāḥ ||
tebhyo'pi sāñjanāścānye patīcchānuvidhāyinaḥ |
yebhyo nikhilamutpannaṃ jagat sthāvarajaṅgamam || iti || 28 ||

evamanantakṣobhyasya māyātattvasya kāryāṇyaśuddha-svarūpāṇi 
mṛgendrasūtreṇa (10/1) darśayati-

granthijanya-kalā-kāla vidyā-rāga-nṛmātaraḥ |
guṇa-dhī-garva-cittākṣa-mātrābhūtānyanukramāt || 29 ||

yathāyogyakramād grantheḥ māyāyāḥ anantakṣubdhāyāḥ janyāni 
sākṣāt paramparayā ca kāryāṇi | śrīmataṅge (kalātattvapaṭale 2)-

kṣobhito'nantanāthena granthirmāyātmako yadā |
tadā svena vikāreṇa tano(karo)ti vipulaṃ jagat ||

atrā'yamutpattikramaḥ-māyātattvāt prathamataḥ 
kalāśabdasyā'rthabhūtayoḥ kalā-niyati-nāmnostattvayoḥ kālatattvasya ca 
nṛśabdenoktasya ca puṃsaḥ puṃpratyayahetostattvaviśeṣasya caturṇāṃ 
tattvānāṃ sākṣādabhivyaktiḥ | kalātattvāt tu vidyā-rāgatattvayormātṛ 
śabdārthabhūtasya pradhānatattvasya trayāṇāṃ tattvānāmabhivyaktiḥ |



śrīkaṇṭha-kṣobhitāt pradhāna-tattvād guṇaśabdārthānāṃ 
sattvarajastamasāmabhivyaktiḥ | tebhyo dhī-śabdārthasya buddhi-
tattvasyā'bhivyaktiḥ | buddhitattvācca garvaśabdavācyasya taijasa-
vaikārikabhūtādirūpeṇa trividhasyā'haṅkāra-tattvasyā'bhivyaktiḥ | 
taijasādahaṅkārāt cittaśabdavācyasya manasaśca akṣaraśabda-vācyānāṃ 
jñānendriyāṇāṃ ca samudbhavaḥ | vaikārikādahaṅkārāt 
karmendriyāṇāmutpattiḥ | bhūtādiśabdavācyādahaṅkārāt 
mātrāśabdoddiṣṭānāṃ tanmātrāṇāṃ tattvānāmudbhavaḥ | tanmātrebhyaḥ 
sakāśād bhūtānāṃ pañcatattvānāmutpattiḥ | amādanukramāt 
etānyekatriṃśattattvāni ananteśādibhirgranthitattvataḥ sākṣāt paramparayā ca 
abhivyaktānīti | atra saṃmatayo bahulatvānna likhitāḥ | 
asyā'śuddhasyā'dhvanaḥ paraśakti-nāda-bindu-sadāśiva-vidyā-rūpaḥ 
pañcaskandhaḥ śuddho vyāpakatvena saṃsthitaḥ | tatra paramakāraṇaṃ 
mahāmāyārūpaḥ sūkṣmo nādaḥ kalāṃ vyāpnoti | indhikādi-pañcakalopetaḥ 
sthūlo nādaḥ kāla-niyati-vidyā-rāga-puruṣa-rūpāṇi tattvāni vyāpnoti | 
nivṛttyādikalā-catuṣṭaya-sahito binduścatugranthirūpa-pradhāna-guṇa-
buddhyahaṅkāratattvāni-vyāpnoti | etadantargatamahaṅkāratattvaṃ manasā saha 
jñānendriya-karmendriyātmakaṃ karaṇadaśakaṃ vyāpnoti | tadbindvantargataṃ 
buddhitattvaṃ dharmādharmādibhāvāṃstadupādānāni pratyayāṃśca 
vyāpnoti | sadāśivanāthaḥ pṛthivyādi-tanmātrapañcakādhiṣṭhātṛ-
sadyojātādi-pañcamantratanurbhūtvā tanmātrapañcakaṃ vyāpnoti | 
mantreśāstu sūkṣma dehārambhaka-bhūtaviśeṣān vyāpnuvanti | mantrāstu 
sthūlapṛthivyādīni vyāpnuvanti | tathāca vidyāvidyaśvaro-bhayātmako 
vidyāskandha ekaḥ | sadāśivaskandho dvitīyaḥ | binduskandhastṛtīyaḥ | 
nādaskandhaścaturthaḥ | kāraṇaskandhaḥ pañcama iti pañcaskandhaḥ 
śuddhāddhā iti mantavyamiti | tathā mṛgendre ( 13/196-197-198-195 )-

nādaḥ sūkṣmaḥ kalākāla-rāgayugme sapūruṣe |
sthūlaḥ pañcakalo nādaḥ pañcatattvāśrayo mune ! ||
pradhānādi-caturgranthi-nidhirbinduśvatuṣkalaḥ |
garve manomukhā devā buddhau bhāvādayaḥ sthitāḥ ||




pañcamantratanurdevaḥ sthitastanmātrapañcake |
sūkṣmabhūteṣu mantreśā mantrāḥ sthūleṣu saṃsthitāḥ ||
vidyā pañcāṇudehaśca bindurnādo'tha kāraṇam |
pañcaskandhaḥ paro māgaḥ || iti 

asya ca prerakakāṇḍatvena bhogya(ka)bhojaka-kāṇḍayorvyāptiryujyate | 
acintye-

caturviṃśatisaṃkhyātamaśuddhaṃ bhogyakāṇḍakam |
tato hi miśratattvaṃ ca bhoktṛkāṇḍaṃ tu saptakam ||
prerakaṃ śuddhatattvaṃ ca svatantraṃ tacchivasya tu |

	prerakakāṇḍaṃ śuddham ; nādādipañcatattvena 
vaikharyādiprerakatvācca tadbhuvanavāsināṃ sarvajñatva-
sarvakartṛtvoddhalanahetutvāccidrūpatayā cidrūpakāritayā ca (kha) | atra 
preritaprakāraḥ sūkṣmā vṛttirnādaḥ, paśyantī vṛttirbinduḥ, madhyamā 
vṛttirakṣaraṃ, vaikharī vṛttirmātṛkā ityucyate | sā ca vaikharī dvidhā-
svaśrotragrāhyā, paraśrotragrāhyā ceti | etā vṛttayaḥ krameṇa 
śivādipañcatattvasambandhinyaḥ | āsāṃ sthānāni krameṇa vasti-nābhi-hṛd-
grīvāsyāni pañca | taduktaṃ siddhāntarahasyasāre-

vidyādi-pañcatattvānāṃ vāgindriyasahāyatā |
vaikharyādivibhedaśca bhogakāle nṝṇāṃ bhavet ||
nādaḥ sūkṣmo bhaved binduḥ paśyantī madhyamā'kṣaram |
mātṛkā vaikharī jñeyā nādādyāstu śivādayaḥ ||
kaṇṭhoṣṭhyamīśvarītattve vidyāyāṃ vaikharī sthitā |
sukṣmādayo vasti-nābhi-hṛd-grīvāsyeṣu saṃsthitāḥ ||
vaikharyanyaśrotragatā kaṇṭhoṣṭhyaṃ svaśrutiṃ gatā |
savikalpā madhyamā syāt paśyantī nirvikalpayuk ||
āsāṃ sūkṣmā kāraṇaṃ syād brahmaghoṣaṃ taducyate |

	bhoktṛkāṇḍaṃ śuddhāśuddham | tadvāsināṃ puṃmalāvṛtānāṃ 
kiñcijjñatvādyupodvalana-hetutvāt śuddham | cidrūpakāritayā aśuddhaṃ 
bhogyakāṇḍakam |

tato hi miśratattvaṃ ca bhoktṛkāṇḍaṃ tu saptakam |
prerakaṃ śuddhatattvaṃ ca svatantraṃ tu śivasya tu ||



tathā-bhoktā bhogyaṃ bhojayitā mantavyaṃ trividhaṃ tvidam | iti |

	atra prerakakāṇḍaṃ śuddham; nādādipañcakena 
vakharyādiprerakatvācca, tadbhuvanavāsināṃ sarvajñatvāt sarvakarttṛtvād 
duḥkhādi-rahitatvācca | bhoktṛkāṇḍaṃ śuddhāśuddham ; tadvāsināṃ kiñcit-
sarvajñatvena śuddhatvaṃ, duḥkhādi-yogenā'śuddhatvaṃ ca | 
bhogyakāṇḍamaśuddham | tadvāsināṃ sadā kiñcijjñatvād duḥkhādi-
yuktatvācca | tad yathā-

aśuddhaṃ tu catuviṃśacchuddhāśuddhaṃ ca saptadhā |
nityaśuddhaṃ ca pañcaite ṣaṭtriṃśat tattvarūpakam || iti || 29 ||

	evaṃ māyā-pāśa-lakṣaṇānantaraṃ karmarūpaṃ prañcamaṃ pāśaṃ 
viśvasārottara-sūtreṇa nirūpayati-

dharmādharmātmakaṃ karma tacca trividhamarthataḥ |
jātyāyurbhogadaṃ yena nāmiśraṃ pacyate kvacit || 30 ||

	karma dharmādharmātmakaṃ dharmaścādharmaśca dharmādharmau, tau 
ātmā svarūpaṃ yasya tad dharmādharmātmakam | tacca karma arthataḥ phalataḥ 
trividhaṃ triprakāram | tadevāha-jātyāyurbhogadamiti | jātirdevatvādiḥ | āyuḥ 
śatavarṣeṣvapi jīvanādi | bhogaḥ sukhaduḥkhānubhavaḥ | tāni dadātīti 
jātyāyurbhogadam | yena hetunā tato hetoḥ jātipradamāyuḥ pradaṃ 
bhogapradamiti trividhaṃ phaladamityarthaḥ | tathā yogapātañjalasūtra-

	sati mūle tad-vipāko jātyāyurbhogā iti | ete jātyādayo'pyuttamādi-
krameṇa trividhā bhavanti | tathā śrīmataṅge (dharmādharmanirṇayapaṭale 6-8)-

jātibhedād rūpabhedācchaurya vijñānabhedataḥ |
saubhāgyabhedataścāpi daurbhāgyena ca lakṣyate ||
evaṃ madhyottamād bhogāt kaniṣṭhāccaiva bhedataḥ |
nyūnaṃ nyūnatamāni syuḥ śreṣṭhaṃ śreṣṭhatamāni ca ||
paśūnāmupasarpanti vibhāgāṃsteṣvathocyate || iti |

	tacca trividhamapi karma amiśraṃ parasparasambandha-rahitaṃ kvacidapi 
sthale na pacyate na pakvaṃ kriyate | phaladānaṃ pāka-śabdārthaḥ | 
jātyāyurbhoga-pradatvena taddeśavarttināmapi



vicitrāṇāṃ vinaśvarāṇāṃ pratyātmaniyatānāṃ bhavāntarabhāvināṃ ca 
tattajjātidehendriyārthānāṃ ca kāraṇatayā dṛk-guṇa-karmasiddhiruktā ; 
kāraṇāsaṃbhavināṃ guṇānāṃ kāryeṣvanupalabdheḥ | yathā mṛgendre ( 8/2)-

tasya pradeśavarttitvād vaicitryāt kṣaṇikatvataḥ |
pratipuṃniyatatvācca santatatvācca tadguṇam || iti |

jātivaicitryaṃ tāvat prasiddham | indriyavaicitryam-yathā parāvṛtta-
jihvāvattvaṃ gajādīnām, cakṣuḥśravatvaṃ bhujaṅgānām, 
anālokālokitvamulūkānām | puruṣāṇāṃ ca keṣāñcit vipuladṛśāmapi 
adarśanam, andhaprāyāṇāmapi sūkṣmārthadarśitvamiti | viṣayavaicitryaṃ tu 
yathā-jaladharanipatita-jalakaṇopajīvitvaṃ cātakānāṃ mayūrāṇāṃ ca | 
avakarāhāratvaṃ kukkuṭādīnām | avakaraḥ saṃkaraḥ, saṃkaro'vakarastathā 
ityamaraḥ | kamalakiñjala rasāsvādanaṃ madhukara-sārasānāmityādyahanīyam 
|| 30 ||

	atha mṛgendra sūtreṇa (8/3-4) sārdhaślokadvayena karmaṇo'pi 
viśeṣānāha-

karma vyāpārajanyatvādadṛṣṭaṃ sūkṣmabhāvataḥ |
janakaṃ dhārakaṃ bhogyamadhyātmādi-trisādhanam || 31 ||

	vyāpāra-janyatvāt vyāpāreṇa yat janyaṃ tat vyāpārajanyaṃ tasya 
bhāvaḥ tattvaṃ, tasmādvetoḥ, karma kriyata iti karma sūkṣmabhāvataḥ 
sūkṣmasya bhāvaḥ tasmāt saukṣmyādadṛṣṭaṃ dṛṣṭaṃ na bhavatītyadṛṣṭam, 
atīndriyamityarthaḥ | tathā mataṅge (vidyātattvapaṭale 61/62)-

loke'pi supratītaṃ syād dvividhaṃ karma karmiṇām |
kriyāvasānikaṃ dṛṣṭamadṛṣṭaṃ tatra saṃkṣaye || iti |

janakaṃ nimittatayā dehendriyabhuvanādeḥ, yataḥ karmaphalopabhogāyaiva 
tattat-tanukaraṇādiyogotpādaḥ | dhārakaṃ ca tasyaiva pratiniyatakālasya 
dātṛtvena | -bhogyaṃ ca tatphaladvāreṇa | kiṃca-adhyātmādi-trisādhanam | 
adhyātmādīni trīṇi sādhanāni yasya tat tathā | 
tatrā'dhyātmaśabdenā'ntaḥkaraṇa-sannikarṣeṇa ātmānamadhikṛtya yad 
varttate tanmatirityucyate | ādigrahaṇāt vāk-kāyakriye ca gṛhyete | evaṃ ca mano 
vāk kāyakriyā 



ca sādhanaṃ yasya tad  yathākramam iṣṭadevatānudhyāna-namaskāra-
stotrapāṭha-yajanādirūpaṃ dharmātmakaṃ karma | parasvaharaṇecchā-
tatpravāda-tadupaghātādayo yathāsaṃkhyaṃ mano vāk kāya-kriyā sādhanaṃ 
yasya tat adharmātmakaṃ karma | yathā'cintye-

jāyate puṇyapāpau tau manovāk-kāyakarmabhiḥ |
tanmanaḥ-karma cetyāhuḥ puṃsaścittā parādhataḥ ||
satyajñānopadeśaśca priyamapriyamanyataḥ |
anityamajñānaratametad vākkarma cocyate |
dānāhiṃsāparaścaiva hiṃsācaryā-surāvaśaḥ ||
viṣaye sakti-ratyādi kāyikaṃ samudāhṛtam | iti |

	yadvā-adhyātma-bhūta-daivāni trīṇi hetutayā adhikṛtya 
adhyātmamadhibhūtamadhidaivataṃ ca yat sukha-duḥkhamutpadyate tasya 
trividhasyāpi sādhanam | karmavaśāddhi cetaḥ-prasādādyudvegādi vā 
ādhyātmikaṃ sukhaduḥkhamutpadyata iti | ādhibhautikaṃ ca aṅganāsambhoga 
gaja-siṃhādyamibhavarūpam | ādhidaivikaṃ ca abhimatānabhimata-
varṣātapādikṛtam | tathā suprabhede-

adhyātmamadhibhūtaṃ ca ādhidaivikameva ca |
trividhaṃ duḥkhamāpnoti teṣāmādhyātmikaṃ śṛṇu ||
adhyātmikaṃ dvidhā proktaṃ śarīraṃ mānasaṃ tathā |
gulmo'rśamatisāraṃ ca jvaraśūlādyanekadhā ||
nara-mṛga-piśācaiśca go-yakṣa-cora-rākṣasaiḥ |
proktaṃ śarīrajaṃ duḥkhaṃ mānasaṃ śṛṇu suvrata ! ||
śokāsūyāvamānerṣyā-mātsaryādibhireva ca |
evaṃ mānasamākhyātamādhibhautikamucyate ||
śītoṣṇavātavarṣaiśca vidyudaśanimārutaiḥ |
etairbhūtaistu yad duḥkhamādhidaivikamucyate ||
garbhajanmajarā'jñānamṛtyunarakajaṃ tathā |
proktaṃ duḥkha-trayaṃ hyevameṣu sthāneṣu bhujyate || iti || 31 ||

 	

tat satyānṛtayonitvād dharmādharmasvarūpakam |
svāpe vipākamabhyeti tat sṛṣṭāvupayujyate || 32 ||
māyāyāṃ vartate cānte nābhuktaṃ kṣayameti ca || 33 ||

	tat karma satyānṛta-yonitvāt satyaṃ ca anṛtaṃ satyānṛte, te yoniḥ 
prakṛtiryayostayorbhāvastattvaṃ tasmād dharmādharmasvarūpakam | satya-prakṛti 
karma dharmarūpam, asatya-prakṛti karma adharmarūpamityarthaḥ | tādṛśaṃ 
karmasvāpe sarvabhūta-saṃhārakāle vipākaṃ pariṇatim abhitaḥ samantāt eti 
prāpnoti | tat tādṛśaṃ karma tadvipākā nuguṇaṃ pakvaṃ karma sṛṣṭau 
sṛṣṭikāle upayujyate upayogameti | sṛṣṭisamanantaramevā'sya yathāyogyaṃ 
kalādi-kṣityantaṃ bhogaḥ pravarttata ityarthaḥ | taduktamatraiva-

	iti māyādikālānta-pravartakamanādimad | (mṛ0 8/6)

ante saṃhārakāle ca māyāyāṃ māyātattve varttate | dahejanmajanakaṃ 
(? 14) manovākkāyarūpeṇa sthūlakarmetyucyate | anena karma-traividhyamuktam | 
tathā siddhāntasārāvalyāṃ-
	
vāgdhīkāyātmasādhyaṃ phalajananakaraṃ karma dharmādibhogyam |
svāpe cāyāti pākaṃ sthitimati-sahitaṃ bhogadaṃ syāt kalāntam | iti ||

śivadharme-

adharmabhedā vijñeyāścittavṛtti-prabhedataḥ |
sthūlāḥ sūkṣmāḥ susukṣmāśca koṭibhedairanekadhā || iti |

abhuktaṃ bhuktaṃ na bhavatītyabhuktaṃ karma kṣayaṃ vināśaṃ naiti | 
pauṣkare'pyevamuktam-

nābhuktaṃ kṣīyate karma kalpakoṭiśatairapi | iti |

cakārād dīkṣājñānādau nāśake'sati |

prāyaścitte'thavā bhoge yugapada vā krameṇa vā |

vinaśvaraṃ ca vijñeyam || iti |

	evaṃ krameṇoktāni mala-tirodhānaśakti-mahāmāyā-māyā-karmāṇi 
pañcāpi puruṣabandhakatayā asmin śāstre pāśapañcakatvena prasiddhāni | 
yathā śrūyate-

malaḥ karma mahāmāyā-māyotthamakhilaṃ jagat |
tirodhānakarī śaktiḥ pāśatvenā'rthapañcakam || iti || 32-33 ||



itthaṃ caturdaśaślokaiḥ pāśānāṃ svarūpamuktvā tadadhīnaṃ 
paśoravasthātraya-svarūpaṃ svāyambhuva-sūtreṇa darśayati-

athātmā'vimalo baddhaḥ punarmuktaśca dīkṣayā |
vijñeyaḥ sa tridhāvasthaḥ kevalaḥ sakalo'malaḥ || 34 ||

	atrātmaśabdena ata sātatyagamane iti dhātuniṣpannena jīvātmā ucyate | sa 
ātmā kevala iti sakala iti vimala iti ca tryavasthaḥ avasthātraya-yuktaḥ | avimalaḥ 
vimalo na bhavatītyarthaḥ, atyanta-malina ityarthaḥ | ayaṃ tu kevalāvasthaḥ | 
baddhaḥ karmānuraktaḥ kalādibandhena baddhaḥ | ayaṃ tu sakalāvasthaḥ | 
punaśca dīkṣayā dīkṣākhyena sādhanena muktaḥ kalādibandhānmuktaḥ | ayaṃ 
ca amalaḥ śuddhāvastha iti vijñeyaḥ boddhavyaḥ | tathā suprabhede-

tryavasthaḥ puruṣaḥ proktaḥ śuddhaḥ sakalaḥ kevalaḥ |
śuddhāvasthānamātmānaṃ śivarūpamiti smṛtam || iti || 34 ||

	pūrvatra kevalaḥ sakalo'mala ityuktam | tatra kevalasya 
prathamamuddiṣṭatvāt tadanusāreṇa prathamaṃ kevalasya svarūpaṃ 
sūtrāntareṇa darśayati-

acetano vibhurnityo guṇahīno'kriyo'prabhuḥ |
vyāghātabhāgaśaktaśca śodhyo bodhyo'kalaḥ paśuḥ || 35 ||

atra acetanaḥ cetanārahitaḥ, acetanatvaṃ kevalasya prakṛti-caitanyaṃ 
jñānakriyārūpamātmano nāstīti | atra tu jñānamātraṃ vivakṣitam, uttaratra 
kriyāniṣedhāt | taccaitanyaṃ malena sanniruddhatvāt parārtheṣu na pravarttata 
ityacetana ityarthaḥ | na punarayaṃ loṣṭavad acetanaḥ, bhogāvasthāyāṃ tasya 
caitanyābhivyaktiśruteḥ, sata evā'bhivyakterasato'bhivyaktyasambhavāt | 
caitanyamatra bhogyārthā (?-11) vabhāsātmakamevā'bhivyajyate ; natu 
svabhāvātmakamapi, tasya maloparodhāsaṃbhavāt | nityavyāpaka-svayaṃjyotiḥ-
svarūpatvāt | etacca prapañcitaṃ tattvasaṃgrahavṛhaṭṭīkāyām |

	yadyevaṃ viṣaya-prakāśāt pūrvamapi kasmānna prakāśate ? ka 
evamāha ? kintu paraprakāśa-svabhāvātmakatvāt asati paraprakāśe 
suṣuptyavasthāyāmivā'kiñcitkarasvarūpamātraniṣṭhatvena 
vyavaharttumaśakyamasatkalpameva | sarvajñatvādyabhivyaktau tu saṃprāpta-
citkriyā-prasaraṃ sarvārtha-dyotanāt prakāśata eva |

 

yadyevaṃ svaprakāśātmanastatsvarūpasyā'nāvaraṇāt kimasya 
pratibaddhamarthaviṣayaṃ jñānaṃ, bahalāndhakāra-netrasyaiva puṃsa iti cet ? 
satyam | tadapyarthasya jñānaṃ tasya svarūpameva; tasya cāvṛtatvānna doṣa iti |

	vibhurvyāpakaḥ | yatra yatra vyañjakaṃ kārya-karaṇādi, tatra tatrā'sya 
caitanyābhivyakteḥ vyāpakatvam | nityaḥ utpatti-rahitaḥ | 
avasthāviśiṣṭasyā'nityatve'pi svakāraṇotpannatva-
rūpasyā'nityatvasyā'bhāvādasya nityatvam | guṇahīnaḥ 
bhogasiddharthamasyāṅgāniguṇāḥ kalādayaḥ, tairhīno guṇahīnaḥ | akriyaḥ 
kriyārahitaḥ | karaṇa-vyāpāraḥ kriyā, neyamātmanaḥ sambhavati | tasyā anā 
(tadā)tmakatvena jaḍavastudharmatvāt, atastat-kriyāyāṃ śaktatvaṃ 
kartṛtvamasya niruddha-kriyāśaktitvāt nāstītyakriyaḥ | aprabhuḥ prabhutvaṃ 
sakalakārakavaśitvamaiśvaryam, tadasya malaniruddhatvānnāstītyaprabhuḥ | 
nacā'kriyatvenā'sya paunaruktyam ; tatra (ka) svatantrakartṛtvasya niṣedhaḥ, atra 
(kha) hetukartṛtvasya niṣedha iti bheda-sambhavāt | vyāghātabhāk śivaśakti-
tiraskāro vyāghātaḥ tirobhāvaḥ, taṃ bhajata iti vyāghātabhāk | aśaktaḥ 
svayaṃ malaniruddhatvāt indriyamartheṣu pravarttayituṃ na śaknotītyaśaktaḥ | 
śodhyaḥ etasyāmapyavasthāyāṃ śivena malataḥ śodhyaḥ | bodhyaḥ malena 
mukulīkṛta-śaktijālaḥ san vikasita-śaktijālaḥ kāryaḥ | ka evaṃ vyākhyāyata 
ityatrāha-akalaḥ | kalādinā'paribhūtatvādakalaḥ | paśuḥ paśutvayogāt 
pāśavattvācca paśuḥ |
	nanu vyāghātabhāktva-śodhyatvādayo viruddhāḥ kathamekasminnātmani 
saṃbhavatīti cet | na | bhāvitvāt śodhyatvādīnā mapyavirodhāt | atra 
vibhutvādikaṃ kevalāvasthā-varṇane na vivakṣitam, vibhutva-
nityatvayormuktasyāpi sambhavāt | śodhyatva-bodhyatvayoḥ sakalāvasthasyāpi 
sambhavācca | tasmādatra viśeṣaṇatayā vibhutvādikamuktam | suprabhede ca-
kevalāvasthāsvarūpame (ga)vamuktam | tad yathā |

amūrttaḥ sa paśurnityo nirguṇo niṣkiyo'prabhuḥ |
māyodaragato vyāpī bhogopāyeṣvaśaktitaḥ ||
sa kevalastviti proktaḥ svāpavān malabandhanāt || 35 ||

malādhīnamidam avasthāntaram ātmano vācyam, tacca na sambhavati | 
malasya śaśaviṣāṇaprāyatvādityāśaṅkya sūtrāntarāt sādhayati-



yadyaśuddhirna puṃso'sti saktirbhogeṣu kiṃ-kṛtā |
śuddhe puṃsi na tadbhogo jāghaṭīti vipaścitaḥ || 36 ||

	puṃsaḥ puruṣasya aśuddhiḥ malaḥ yadi nāsti tadā aśuddhyā vinā 
śuddhasya puṃso'pi viṣayeṣu anityāśuci-duḥkha svabhāvakeṣu bhogeṣu yā 
saktiḥ sā kiṃ-kṛtā kena kāraṇena kṛtā ? nahi śuddhasya 
nirañjanasyā'śuddheṣu saktirbhavati | aśuddhivādināpi rāgābhyupa-gamāt 
rāgeṇaiva saktirastu kimaśuddhyeti cet ? satyam | rāgasyā'śuddhi-sahitasyaiva 
sukhaduḥkhādi-bhogāsakti-kāryajanakatvāt, sāmagryā eva kāryajanakatvāt | 
rāgamātrasya sāmagrītvābhāvāt | tarhi bhogābhyāsa eva saktiheturastu, 
kimaśuddhyeti | taduktam-

na jātu kāmaḥ kāmānāmupabhogena śāmyati |
haviṣā kṛṣṇavartmeva bhūya evā'bhivarddhate | iti | (manusaṃhitā 2/94)

	ata āha-śuddhe puṃsīti | puṃsi puruṣe śuddhe sati tadbhoga evaṃ na 
saṃjāghaṭīti yuktyā na yujyate, kimu tadabhyāsaḥ | kasmācca saktiriti | 
vipaścitaḥ vidvāṃsa iti ṛṣīṇāṃ sambodhanametat | ayaṃ bhāvaḥ-bhogo hi 
saṃjñānarūpā cicchaktivyaktirindriyajanyā ca (?-12) śuddhagocaroparaktatvāt 
aśuddhāyā asyāḥ (?-13) śuddhatvābhivyakteḥ (?-14) śuddhenaiva sambandho 
vaktavyaḥ | nahi śuddhasya nirañjanasya śaktivyaktiraśuddhā dṛṣṭā, 
śivenaikāntikatvāt | tasmād bhogāsakti-kāraṇatayā aśuddhabhogaghaṭakatayā 
cānādyaśuddhe-rāvaśyakatvāt tadadhīnamavasthānirūpaṇāmātmano 
nānupapannamiti || 36 ||

	nanu ātmanaścaitanyameva nāsti, yannirodhādasya 
avasthābhedasiddhirityāśaṅkya taccaitanya-mātmanyastīti mṛgendrasūtradvayena 
(2/5) sādhayati-

caitanyaṃ dṛkkriyārūpaṃ tadasyātmani sarvadā |
sarvataśca yato muktau śrūyate sarvatomukham || 37 ||
sadapyabhāsamānatvāt tannirūddhaṃ pratīyate |
vaśyo'nāvṛtavīryasya srota evā'vimokṣaṇāt || 38 ||



vinā sambhavatītyāha vidyā-darśita-gocaraḥ |
rāgeṇa rañjitasyā'pi buddhyādikaraṇairyutaḥ ? || 39 ||

	vidyayā darśitaḥ phalabhūto gocaro yasya sa vidyādarśita-gocaraḥ, 
paramparā-gocara iti yāvat | atra sākṣādavyavadhānāt puruṣasya 
śabdādyanurañjitāḥ sukhaduḥkha-moharūpā phalabhūtāḥ sākṣād-gocarāḥ, 
pāramparyeṇa gocarāḥ śabdādayaḥ | anenātmano viṣayāvabhāsakatvāṃśe 
vidyāyā upakāro darśitaḥ | mṛgendre (10/10)-

tena prakāśarūpeṇa jñānaśakti-prarocinā |
sarvakāraka-niṣpādyamavaiti viṣayaṃ param || iti |

	nanu evamupalabdha-gocaro'pi na rāgaṃ vinā tadupādānāya pravarttata iti 
| ata āha-rāgeṇa rañjitasyā'pīti | rāgeṇa rāgatattvena rañjitaḥ, 
duḥkhamohātmakamapi (ka) bhogyaṃ sukhatvena prapadyata ityarthaḥ | sakti-
janakatvaṃ ca rāgatattvasyaiva saṃbhavati | vītarāgasyā'timalīmase viṣaye 
bhogānupapatteḥ | taduktaṃ tattvasaṃgrahe-

	yajjanitābhiṣvaṅge bhogyāya narikriyā sa rāgo'tra | iti | 

anenātmana saktimattvāṃśe rāgatattvasyopakāro darśitaḥ | evamanena 
tattvatrayeṇa janita-pravṛttiḥ pumān punarbuddhyādibhiḥ karaṇairbhogyaṃ 
niṣpādayatītyāha-buddhyādi-karaṇairyuta iti | buddhyādibhiḥ karaṇairyutaḥ 
sahitaśca | bhavatīti śeṣaḥ | ayamarthaḥ-pradhānasya guṇānāṃ 
cā''pūrakatvena buddhyādyupakārakatvam | tanmātrāṇāṃ bhūtānāṃ 
cādhiṣṭhānatvena kālaniyatyośca pravṛttiṃ prati prayojakatvam | kālo hi 
pravṛttameva puruṣaṃ tryuṭyādibhiḥ kalayati | niyatirapi pravṛttameva puruṣaṃ 
yatra karmaphalaṃ tatra rāgaṃ janayaṃstanniyamayatīti | taduktaṃ tattvasaṃgrahe 
(4)-

avibhutvāt karaṇāni tu kāryamadhiṣṭhāya ceṣṭante | iti || 37-39 ||

evamarjita-bhogyasyā''tmano bhogasthānaṃ sūtrāntareṇā''ha-

māyādyavani-paryante tattvabhūtātma-vartmani || 19 ||

? pūrvoktamṛgendra-sūtradvayasya vyākhyā mātṛkāyāṃ nopalabhyate | 
asya ca sūtrasya pādadvayaṃ naiva dṛśyate | parantu vyākhyā-
darśanenā'numīyate'va pādadvayaṃ lipikara-pramādāt patitamiti | atī'tra 
cihnita-pādadvayaṃ sūtratvena niveśitam |



bhuṅkte tatra sthitān bhogān bhogaikarasikaḥ pumān || 40 ||

	māyādikaṃ ca tat āvani-paryantaṃ  ca māyādyavaniparyantaṃ tasmin | 
vartmano viśeṣaṇamidam | māyā ādiryasyeti atadguṇasaṃjñāno bahuvrīhiḥ | 
tathāca kalādikasyaiva grahaṇam | na tu māyāyāḥ ; tatra bhuvanābhāvena 
bhogāsambhavāt | tattva-bhūtātma-vartmani tattvānāṃ bhūtānām ātmanāṃ 
ca vartma tattvabhūta pañcakaṃ tasmin |

	atra tattvaśabdena tattvasya bhuvanāni lakṣaṇayā ucyante | kaloccalita-
caitanya ityatraiva tattvavartmanaḥ proktatvād bhūtaśabdena sthūlaguṇa-yogato 
gauṇyā vṛttyā'tra kalādi-kṣityantāni bhuvanajāni bhogasādhanāni bhauvana-
sthūlaśarīrāṇyucyante | ātmaśabdena ātmanaḥ sākṣādupakārakatvād 
gaṅgāyāṃ ghoṣa itivad atyantasannikarṣalakṣaṇayā bhāvapratyaya-santāna 
ucyate | bhāvā aṣṭau dharmādayaḥ | pratyayāstu catvāraḥ siddhyādayaḥ | 
bhuvana-bhauvana-dehabhāva-pratyayātmake trividhe'pi vartmanītyarthaḥ | 
bhāvapratyayārtha uktaḥ-

bhāvayanti yato liṅgaṃ tena bhāvāḥ prakīrtitāḥ |
pratyāyayanti kṣetrajñaṃ tena te pratyayāḥ smṛtāḥ || iti |

	tatra trividhe'pi vartmani sthitaḥ bhogyabhoktṛtvena sthito bhūtvāpyasmin 
pumān puruṣaḥ bhogān bhuṅkte prāpnotītyarthaḥ | ata evā'yamīśvareṇa balād 
bhoge niyuktaḥ san anichannapi kadācit paśubhogaṃ bhuṅkte | tathā-

yena yatra ca bhoktavyaṃ kṛtaṃ karma śubhāśubham |
sa tatra rajjvā baddhvaiva balād daivena niyate || iti |

	api cāsya bhogecchāviraha eva nāstītyāha-bhogaikarasika iti | bhogeṣvekeṣu 
rasastanniṣṭho'bhilāṣo yasya sa tathā | malimasamapi bhogaṃ bhuñjāno na 
virajyati, na ca tṛpyatītyarthaḥ | anena ca rāgasya bhogakāle'pi vyāpāro'stīti 
sūcayati | vidyāyāśca karaṇatvād bhoga-niṣpattau vyāpāro labdha eva, karttuḥ 
karaṇaṃ vinā karmaṇi vyāpārāyogāt | vidyā-vyatiriktasya viṣaye 
vyāpārāyogāditi | etat trividha-vartmanyapi bhoktṛtvaṃ mataṅge 
(puṃpradhāneśvarasādhanapaṭale 104)'pyuktam-



tadudvalitavīryeṇa bhuṅkte prakṛtijān guṇān || iti |

tattvasaṃgrahe'pi-

paryaṭati karmavaśato bhuvanaja-deheṣvayaṃ ca sarveṣu | iti || 40 ||

atha ko (ka) bhogaḥ kutaśca vā bhoga iti praśnadvayasyottaraṃ sūtrāntareṇāha-

bhogo'sya vedanā puṃsaḥ sukhaduḥkhādilakṣaṇaḥ |
tāṃ samarthitacaitanyaḥ pumānabhyeti karmataḥ || 41 ||

	asya puṃsaḥ puruṣasya bhogaḥ bhogo nāma vedanā saṃvittiranubhavaḥ | sa 
ca bhogaḥ sukhaduḥkhādi-lakṣaṇaḥ | ādiśabdena moho gṛhītaḥ | sukhādayo 
lakṣaṇāni yasya sa sukha-duḥkhādi-lakṣaṇaḥ, 
sukhaduḥkhādibhirviṣayairuparaktatvāt | sukha-vedanā duḥkha-vedanā moha-
vedanā ceti triprakāro bhoga ityarthaḥ | bhogasvarūpa-praśnasyottaramuktvā 
nimittapraśnasyottaramāha-tāmiti | tāṃ triprakārāmapi bhogarūpāṃ vedanāṃ 
samarthita-caitanyaḥ kalābhivyakta-caitanyaḥ pumān ātmā karmataḥ karmavaśād 
abhyeti prāpnoti, sukha-duḥkhamohabhāvena vipakvaṃ karmaiva puruṣavedanāyā 
ālambanaṃ bhavatītyarthaḥ || 41 ||

	śarīrādīnāmapi bhāvābhāvau karma-nimittakau, śarīrādi vinā 
karmaṇo bhogasādhanatvānupapattereva tadākṣepakatayā tatra tasya hetutvau 
cityāditi sūtrāntareṇāha-

karmataśca śarīrāṇi viṣayāḥ karaṇāni ca |
bhogasaṃsiddhaye bhokturbhavanti na bhavanti ca || 42 ||

	śarīrāṇi sthūlarūpāṇi, viṣayāḥ śabdādayaḥ, karaṇāni buddhyādīni-
etāni ca sarvāṇi bhoktuḥ bhuñjānasya puruṣasya bhogasaṃsiddhaye 
bhogasādhanāya karmataḥ karmanimittāt bhavanti ca utpadyante ca tat-karmābhāve 
na bhavanti ca na jāyante ca | atra cakāreṇa sarvathā yat kiñcid-bhogasya nimittaṃ 
vastu tat sarvaṃ karma iti sūcitam | atrodāharaṇam-sukhabhoga-nimittam 
ahikaṇṭakādyabhāvaḥ | duḥkhabhoga-nimittaṃ putrānnādyabhāvaḥ | duḥkha-
moha-bhoga nimittaṃ srakcandanādyabhāvaḥ | duḥkhabhoga-nimittaṃ 
ahikaṇṭakādibhāvaḥ | sukhabhoganimittaṃ putrādyannādi-bhāvaḥ | sukhamoha-
bhoganimittaṃ srakcandanādibhāva iti | atra karmaṇāṃ yathā śarīrādi-
janakatvaṃ tathā



śarīrādīnāmapi karmajanakatvāt (ka) bījāṅkurasantānasyeva karma-śarīra-
santānasyāpi pravāhānāditvamavaseyam | taduktaṃ sarvajñānottare-

karmaṇā tu śarīrāṇi bhāvāt karmodayo bhavet |
pūrvopārjita-karmaṇāṃ bhāvaḥ saṃyogakārakaḥ || iti |

anyatra-

nityadvandva-samāyuktamanyonyaṃ vaṭa-bījavat | iti || 42 ||

evaṃ baddhātmanaḥ (kha) paśudarśanamātrayuktāṃ śivādidarśana-rahitāṃ 
paramāvasthāṃ sūtrāntareṇāha-

evaṃ māyāñjanastho'ṇurnijadoṣa-tiraskṛtaḥ |
yāti tanmayatāṃ teṣu māyābhogeṣu rañjitaḥ || 43 ||

	evam uktakrameṇa kalayā pravarttitaḥ vidyayā vivecya 
buddhyādibhirupaskṛtyetyarthaḥ | māyāñjanasthaḥ māyāñjanapadena 
māyāyāṃ yāni tattvāni, tāni parigṛhyante | tāni ca kalādīni (ga) 
ātmasaṃsargād viśuddha-sphaṭika-prakhyamapyaṇuṃ japākusumādyupādhivat 
svanirbhāsaṃ kurvanti buddhyā ātmānamañjayantītyañjanānyucyante, teṣu 
tiṣṭhati atiramaṇīya-buddhyā ca varttata iti māyāñjanasthaḥ, tādṛśaḥ aṇuḥ 
ātmā nijadoṣa-tiraskṛtaḥ nijena sahajena doṣeṇa malena tiraskṛtaḥ | adho niyamitaḥ 
nordhvaṃ śivādikaṃ paśyatītyarthaḥ | tādṛśaḥ san rañjitaḥ 
tairmāyātmakairbhogakriyā-viṣayai rañjitaḥ san teṣu māyābhogeṣu 
tanmayatāṃ yāti | tadavyatiriktaṃ tadabhinnamātmānaṃ manyate, 
tadanugraheṇā'nugṛhītaṃ tadupaghātena copahatamātmānaṃ manyata ityarthaḥ 
|| 43 ||

	evaṃ sakalāvasthasya bandhātmanaḥ ucitārthakāni nāmāni 
sūtrāntareṇāha-

saṃsārī viṣayī bhoktā kṣetrī kṣetrajña eva ca |
śarīrī ceti bandhātmā sakalaḥ socyate budhaiḥ || 44 ||

	bandhātmā sakalaḥ bandha ātmā svarūpaṃ yasya sa bandhātmā | 
kalādibhiḥ saha varttata iti sakalaḥ | tādṛśaḥ sakala eva ātmaiva saṃsārī 
śarīrādyādāna-hānena saṃsaratīti saṃsārī | viṣayī viṣayo'sya bhogyatvena 
vidyata iti viṣayī | bhoktā bhogaṃ bhuṅkte iti bhoktā | kṣetrī kṣetramasya 
svaśakti-vyaktikara-madhikaraṇamastīti kṣetrī | kṣetrajñaḥ kṣetraṃ pāśajālaṃ 
bhogyatvenopasthitaṃ jānātīti kṣetrajñaḥ | śarīramasya bhogāyatanatvena 
vidyata iti śarīrī iti ca budhairucyate |



tattannimittāśrayeṇa śāstra-vyavahārādeva tāḥ saṃjñā ityarthaḥ | suprabhede 
tu-

trimalairbadhyate cātmā sakalaḥ parivāritaḥ (ka) |
sakalaśceti baddhātmā saṃsārī viṣayī tathā ||
kṣetrī kṣetrajño bhoktā ca paśurjñānī tathaiva ca |
bhogī caiva śarīrī ca ātmaparyāya-vācakaḥ || iti || 44 ||

	itthaṃ sakalāvasthamātmānaṃ nirūpya śuddhāvasthaṃ nirūpayituṃ 
tadupādānabhūtaṃ prathamaṃ śaktipātaṃ mṛgendrasūtra-sārdva-dvayena (5/1) 
darśayati-

tamaḥ-śaktyadhikārasya nivṛttestat-paricyutau |
vyanakti dṛk-kriyānantyaṃ jagadbandhuraṇoḥ śivaḥ || 45 ||

	tamaḥśaktyadhiārasya tamaśca śaktiśca tamaḥ-śaktī, 
tayoradhikārastamaḥśaktyadhikārastasya tamaso malasya śakteḥ bhagavat-
sambandhinyāstirodhānaśakteśca yo'dhikāraḥ nyagbhāvana-vyāpṛtatvaṃ 
tasyetyarthaḥ | nivṛtteḥ nivṛttirvirāmaḥ tasmāddhetoḥ tat-paricyutau 
tasyāstirodhānād darśana-śakteḥ paricyutiḥ kaivalyābhimukhībhāvaḥ, tasyāṃ 
satyāṃ jagad-bandhuḥ jagato bandhuḥ jagaduddharaṇa-pravaṇaḥ śivaḥ 
parameśvaraḥ aṇorātmanaḥ dṛkkriyānantyaṃ dṛk ca kriyā ca dṛk-kriye dṛk-
kriyayorānantyaṃ paripūrṇatvaṃ vyanaktiprakaṭīkaroti | satyorevā'nantayordṛk-
kriyayormalāvacchinnatvāt āvṛtānantyayormalaparipākena āvaraṇāpagamād 
abhivyaktiḥ kriyate, natvapūrvatayā utpāda ityarthaḥ | anena karmanāśe 
malaparipāke ca sati bhagavato'nugrāhikā śaktiḥ paśuṣu patatītyuktaṃ bhavati | 
taduktaṃ pauṣkare-

karmanāśān malasyāpi vipāke sahakāriṇī |
patatyunmīlanī śaktistadānugraha-rūpiṇī || iti || (pau0 vi0 4/37)

śaktipātasya durjñeyatayā tasya jñāpakāni darśayati (mṛ0 5/4)-

yeṣāṃ śarīriṇāṃ śaktiḥ patatyavinivṛttaye |
teṣāṃ talliṅgamautsukyaṃ muktau dveṣo bhava-sthitau || 46 ||
bhaktiśca śiva-bhakteṣu śraddhā tacchāsake vidhau || 47 ||

śarīriṇāṃ śarīramasyā'stīti śarīrī teṣāṃ śarīriṇāṃ śaktiḥ 
pārameśvarī śaktiḥ avinivṛttaye punarnāvirbhāvaḥ avinivṛttiḥ avinivṛttaye 
apunarāvirbhāvāya patati (ka) |



atrā'śarīriṇāṃ tāvad gurubhiḥ śaktipātasya durlakṣyatvāt 
śarīriṇāmityuktam | teṣāṃ śarīriṇāṃ muktau mokṣe autsukyaṃ utkaṇṭhā, 
bhava-sthitau bhave saṃsāre sthitirvarttanaṃ tasyāṃ dveṣaḥ vairāgyaṃ, śiva-
bhakteṣu śivabhakti-pareṣu bhaktiśca, tacchāsake saḥ śivaḥ śāsako yasya tasmin 
tacchāsake vidhau śāstre śivāgameṣvityarthaḥ | tatra śrāddhā ca taliṅgaṃ 
śaktipātasya liṅgaṃ cihnam | ebhirliṅgairmanda-dhiyo'pi śarīriṇāṃ 
śaktipātamanuminvantīti bhāvaḥ | śrīmatsvāyambhuve-

kṣīṇe tasmin dhiyā sā syāt paraṃ niḥśreyasaṃ prati || iti ||

etacchaktipātasya prayojanaṃ mataṅgasūtra-(4/45-49) catuṣṭayenāha-

tannipātācca tasyetthamajñasyāpyabhilāṣiṇaḥ |
buddhirutpadyate'kasmād vivekenātmavarttinā || 48 ||

	ittham evaṃ prakāreṇa ajñasya anātmanyātmābhimāna-yuktasya 
abhilāṣiṇaḥ abhilāṣa icchā yasya tādṛśasyāpi tasya sakalātmanastannipātāt 
tasyāḥ śakteḥ nipātāt nipātanāddhetoḥ ātmavarttinā ātma-viṣayeṇa vivekena 
anityāśuci-duḥkhānātmabhūtāyāḥ prakṛteranyo'haṃ cetanātmakaḥ puruṣaḥ 
svato'vabhāsamānaḥ parameśvarādhīna ityevaṃvidhena vivekenetyarthaḥ | tena 
yukteti śeṣaḥ | buddhirmatiḥ akasmād akāraṇād utpadyate jāyate | tatra 
śaktipāta-vyatirekeṇa hetvantaraṃ nāstītyarthaḥ ||

	itthaṃ vivekānantaram utpadyamānaṃ kāryamāha-

vivekino viraktasya jijñāsā copajāyate |
jijñāsopeta-caitanyaṃ paśuṃ saṃsāra-sāgarāt || 49 ||
jighṛkṣayā yunaktyenaṃ yuktaṃ prerayati prabhuḥ || 50 ||

	vivekinaḥ pūrvokta-viveka-buddhi-yuktasya viraktasya saṃsāra-
vairāgyavataśca jijñāsā jñātumicchā jijñāsā pradhānātmaka-
saṃsāranivṛtti-heturīśvara-puruṣa-viṣaya-jñānecchetyarthaḥ | sā upajāyate | 
jijñāsopeta-caitanyaṃ jijñāsayā upetaṃ sahitaṃ caitanyaṃ yasya taṃ



paśum ātmānaṃ saṃsāra-sāgarāt saṃsāra eva sāgaraḥ samudrastasmāt 
jighṛkṣayā gṛhītum uddharttum icchayā yunakti yojayati | bhagavāniti śeṣaḥ | 
punaḥ kiṃ karotītyata āha-enaṃ yuktaṃ prerayati prabhuriti | yuktam enaṃ paśuṃ 
prabhuḥ parameśvaraḥ prerayati ācāryaṃ prati prerayatītyarthaḥ ||

	ācārya-śiṣyayorubhayorapi sambandha-sampādaka īśvara evetyāha-

preraṇe prerakaḥ śrīmān dvayorapi sa mantrarāṭ |
anugrāhyasya vinaye tathā'nugrāhakasya ca || 51 ||
kāruṇye tvanayoryasmāt tayoryogaḥ sudurlabhaḥ || 52 ||
-mā0 pā0 vi0 4/48-49

	śrīmān sarvajñatvādyaiśvarya-yuktaḥ mantrāṇāṃ rāṭ mantranāyakaḥ 
sa prabhuḥ preraṇe prerakakarma-viṣaye dvayorapi śiṣyācāryayorubhayorapi 
prerakaḥ | tayoḥ preraṇāṃśe viśeṣāmāha-anvityādi | anayoḥ 
śiṣyācāryayormadhye anugrāhyasya anugraha-yogyasya vinaye viśiṣṭo nayo 
vinayaḥ guru-śuśrūṣātmakaḥ tasmin, preraka ityanuṣaṅgaḥ | tathaiva 
anugrāhakasya anugrahakartturācāryasya ca kāruṇye karuṇaiva kāruṇyaṃ, 
cāturvarṇyāditvāt ṣyanpratyayaḥ tasmin | tu-śabdādanugrahecchāyāmapi 
preraka ityanuṣaṅgaḥ | tathā ca prerakaḥ śiva eva anugrāhyānugrāhakayoḥ 
sambandhaṃ karotītyarthaḥ | tatra hetumāha-yasmāditi | yasmād kāraṇāt tayoḥ 
śiṣyācāryayoryogaḥ sambandhaḥ sudurlabhaḥ īśvaraṃ vinā sudurghaṭaḥ, 
tasmāt īśvara eva sambandha-janaka ityarthaḥ | tathā pauṣkare-

vairāgyaṃ jāyate kṣipraṃ saṃsārād duḥkha-sāgarāt |
didṛkṣā jāyate śambhoḥ pāda-paṅkajayorapi ||
kadā drakṣyāmi deveśaṃ mokṣye'haṃ bandhataḥ kadā |
ko vā darśayitā śambhoriti saṃjāyate matiḥ ||
evaṃ saṃsārato bhītamanugṛhṇāti ceśvaraḥ || iti | (vi0 pā0 4pa0 39/41)

nanu śakteḥ kathaṃ nipātaḥ ? tasyā vyāpakatvāt, vyāpakasya 
vastunaścyuti-lakṣaṇa-nipātāyogāt ; agneruṣṇatvavat śiva-
samavāyinyāstasyāḥ śivāt cyutyayogācca | kiñca nitya-vyāpaka-śakteḥ 
sarvathā sarvakālaṃ paśvātmasu sthitatvād yugapanmukti-prasaṅgaḥ | naca sā 
śaktiḥ kasmiṃścid viśiṣṭa-kāla evā'nugraha-kāriṇīti vācyam | tarhi 
kālasyaiva mokṣakarttṛtvāpatteḥ, śivena prayojanābhāva-prasaṃgāt | ataḥ 
kathaṃ śaktipāta iti cet ? maivam |



dvidhā śabda pravṛttirgauṇī mukhyeti | atra pātaśabda-pravṛttirgauṇī | yathā loke 
asya dṛṣṭirasyāṃ kāminyāṃ patitā ityukte na sā puruṣād vicyutā kāminyāṃ 
patitā dṛśyate, kintu dṛśya-darśaka-sambandhamātreṇa sambandhād dṛṣṭiḥ 
patitā ityupacaryate | tadvadiha asmin puṃsyapi anugrāhyānugrāhakatva-lakṣaṇa-
sambandhena sambandhāt śaktiḥ patitā ityupacāreṇa uktā, na mukhyata ityadoṣaḥ 
| ayamevā'rthaḥ śaṅkottaratayā kiraṇāgame spaṣṭaṃ pratipāditaḥ | tad yathā-

garuḍa uvāca-

śaktipātād bhaved dīkṣā nipāto na vibhutvataḥ |
śivasya sarvasthitā paśoḥ (?) ||
sthitatvāt sarvadā śakterbhavocchittirna kiṃ bhavet (ka) |
kālo vā (kha) sacivaḥ prokto yadi kālaḥ śivena kim ||

īśvara uvāca-

upacāreṇa śabdānāṃ (ga) pravṛttiriti dṛśyate |
yathā pumān vibhurnityo vinaṣṭaḥ śivatāṃ gataḥ ||
evaṃ śakti-nipāto'pi procyate copacārataḥ (gha) |

siddhānte'pi-

yathā'rkasya prabhāḥ sadyo meghajālena vāritāḥ |
tadvad jñānātmikā śaktiḥ pāśajālaiḥ samāvṛtā ||
pakva-pāśeṣu suvyaktā patitetyupacaryate (ṅa) | iti |

śaktisaṃvidānaṃ naramadri-pātabhītavat saṃsārād bhītaḥ śiṣyo 
deśikaṃ gacchati | kiraṇe-

nipāta-bhayato yadvad vastunaḥ sahasā bhavet |
tasmādanyatra yātyeva tathātmā deśikaṃ prati || ityādi ||

	evaṃ śaktipātamuktvā tadanantara-bhāvinyā dīkṣayā prāptaṃ 
śuddhāvasthā-svarūpalābhaṃ svāyambhuvasūtreṇāha-

sa deśikamanuprāpya dīkṣā-vicchinna-bandhanaḥ |
prayāti śiva-sāyujyaṃ nirmalo nirupaplavaḥ || 53 ||

	sa niḥśreyasa-prāptikāmaḥ (ca) śaktipātavān puruṣaḥ diśikaṃ 
śivecchayā'dhigatameva gurum anuprāpya adhigamya dīkṣā-vicchinna-bandhanaḥ 
dīkṣayā vichinnāni bandhanāni yasya sa dīkṣā-vicchinna-bandhanaḥ, 
gurordīkṣāmāsādya dīkṣitasya tri-malabandhanāni vichinnānītyarthaḥ | tathā 
varuṇapaddhatyāṃ-



kriyayā vā'tha śaktyā vā dīkṣā sā sarvato matā |
dīkṣayā mucyate(???) dehī trividhād bhavabandhanāt || iti |

	evambhūtaḥ san | ata eva nirmalo mala-rahitastathāvidho bhūtvā 
śivasāyujyaṃ mokṣaṃ śiva-tulyatvaṃ tat prayāti prāpnoti | tathā cintya-viśve-

dīkṣayitvā vidhānena ṣaṭtriṃśat-tattvakopari |
niṣkale nirmale tattve yojayatyeva niścayaḥ || iti |

	atra nirmala ityanena śuddhāvasthāyā akevalāvasthāto bhedo darśitaḥ | 
nirupaplava ityanena bandhāvasthāto viśeṣa iti |

	itthambhūtadīkṣāyā eva mokṣahetutvaṃ, natu jñānādīnāmiti 
sarvajñānottarasūtraṃ darśayati-

tattvairebhirnibaddhātmā sarvadharmaiśca saṃyutaḥ |
nā'nena śakyate moktuṃ varjya dīkṣāṃ śivātmikām || 54 ||

ebhiḥ tattvaiḥ kalādibhiḥ ? sarvadharmaiḥ sarvaiśca 
tattattattvadharmairbhuvanādibhiśca saṃyutaḥ sahitaḥ nibaddhātmā anādi-malena 
pravāha-rūpeṇa karmaṇā ca nitarāṃ baddho nibaddhaḥ sa cāsau ātmā ca 
nibaddhātmā sambaddha ātmā śivātmikāṃ śiva-svarūpāṃ dīkṣāṃ deśika-
vyāpārarūpāṃ varjya varjayitvā anena jñānādinopāyena moktuṃ mocayituṃ 
na śakyate | tathā-

jñānādibhirna mokṣo'sti tasmād dīkṣaiva mocanī |
sarvasyā'nugrahakaraḥ śivo devaḥ svabhāvataḥ ||
dīkṣayā cātra muktiḥ syāt sarveṣāṃ prāṇināmiha |
tasmāt tu śiva-sāmarthyān muktiḥ sarvatra sidhyati ||

tathā niśvāse-

snānena nirmalo mantra-japāt siddhirna saṃśayaḥ |
pūjāyāṃ sannidhānaṃ (ka) na homo naiva phalapradaḥ ||
dhyānena sarvagaṃ devaṃ yogairyogitvamāpnuyāt |
vratena kāya-śuddhiḥ syād dīkṣayā muktiriṣyate || iti |

tathā purāṇe saurasaṃhitāyām-

		kṛtvā tu naiṣṭhikoṃ dīkṣāṃ vimuktā nivasanti ye |



teṣāṃ tat paramaṃ jñānaṃ dadyādante paraṃ padam || iti |

skānde bhṛguśāpe ca-

nātrāśrama-kṛtaḥ kaścidutkarṣo vidyate nṛṇām |
parāṃ dīkṣāṃ vinā śaivīṃ bandhatraya-vimocanīm |
tasmānmuktirdīkṣayaiva nāśramairnānya-karmabhiḥ ||

tathā jñānatilake-	

na dānai rna tapo-yajñai rniyamai rna vrataiḥ śubhaiḥ |
na snāna-tīrtha-saṃghātairlabhyate paramaṃ padam ||
nānekaiḥ tapasāṃ vrātairlabhyate puṇyasañcayaiḥ |
badhnanti sarvathātmānaṃ kośakāraṃ kṛmiryathā |

ayaṃ malapāka-vaśāt śaktipāta-krameṇa dīkṣayā mokṣaṃ yāti, natu 
jñānādibhirūpāyaiḥ ; teṣāṃ dīkṣāṅgatvena śravaṇāt, yogādeḥ śiva-
viṣayasya dīkṣayā vinā'nupapatteḥ, malasya ca dravyatvena cakṣuḥpaṭalādivat 
jñānamātreṇa nivṛttyabhāvāt, cakṣurvaidya vyāpāreṇeva dīkṣākhyeneśvara-
vyāpāreṇaiva nivṛttisiddheśca | uktaṃ śrīmatpauṣkare-

dīkṣaiva mocayet pāśān śivatvaṃ ca dadātyaṇoḥ | (pau0 jñā0 174) 

ṣaṭsahasrikāyāmapi-

dīkṣaiva mokṣadā puṃsāṃ cidabhivyakti-kāriṇī || iti ||

dīkṣā-vyāpāreṇā'bhivyajyamānā-(ka)tmacaitanya-svarūpaṃ 
mṛgendra-(10/3) sūtreṇāha-

karttṛśaktiraṇornityā vibhvī ceśvara-śaktivat |
tama-śchannatayā'rtheṣu nābhāti niranugrahā || 55 ||

aṇorātmanaḥ karttṛśaktiḥ jñāna-kriyātmikā śaktiḥ īśvaraḥ-śaktivat 
īśvarasya śaktistadvat nityā ādyanta-rahitā vibhvī vyāpikā ca | yadyevaṃ 
nityatvād vibhutvācca sarvadā māna-prasaṃgaḥ |

tathā-

vyañjikā yatra yatrā'sya śarīraṃ tatra tatra tu |
bhogārthaṃ (kha) syād guṇavyaktirvyāpitvaṃ tena gamyate || iti ||

ata āha-artheṣu viṣayeṣu karaṇīya svarūpeṣu tamaśchannatayā 
tamasā'nādimalena channatayā āvṛtatvāt niranugrahā anugraho vyañjakaḥ 
tadrahitā satī nābhāti na bhāsate |



taduktaṃ ratnatraye (252)-

galite sarvathā bandhe vimukte cāṇave male |
sarvārtha-dyotikā śaktiḥ śivasyeva vijṛmbhate || iti ||

	ātma-śaktervibhutve'pi tad-bhānasya vyañjakādhīnatvāt sarvajñatāpi 
nāstīti parākhyasūtreṇa darśayati-

vibhuḥ san jñāna-rūpo'pi pradeśe vetti yena tat |
kiñcijjñastena saḥ prokto vyavadhānānidarśanāt || 56 ||

	jñāna-rūpaḥ jñānameva rūpaṃ svarūpaṃ yasya saḥ jñāna-rūpaḥ 
vibhuḥ vyāpakaḥ san api pradeśe kalādi-vyañjaka-pradeśe yena kāraṇena tad 
jñeyaṃ vetti jānāti, tena kāraṇena saḥ ātmā kiñcijjñaḥ kiñcij jānātīti 
kiñcij-jñaḥ proktaḥ pratipāditaḥ | tatra hetumāha-vyavadhānānidarśanāt | 
vyavadhāne vyañjaka-rahita-sthale anidarśanāt nidarśanābhāvāt, 
jñānābhāvādityarthaḥ ||

	yadyātmano vyañjaka-vaśāt kiñcijjñatvaṃ, tarhi dīkṣārūpa-vyañjake 
satyapi sarvajñatvamātmano na syāt ; vyañjakatvāviśeṣādityāśaṅkāṃ 
dṛṣṭāntapūrvaṃ vyañjaka-tāratamya-pratipādakena sūtrāntareṇa nirasyati-

svalpe'pi vyañjake svalpaṃ mahanmahati tat sthitam |
yādṛk tādṛk bhavet tasya pradīpastimire yathā || 57 ||

	tat mala-ruddhaṃ caitanyaṃ svalpe vyañjake svalpe sati svalpaṃ 
svayamabhivyajyate | mahati vyañjake mahati sati mahat abhivyajyate | tatra 
dṛṣṭāntamāha-yathā timire andhakāre pradīpaḥ artha-vyañjaka-pradīpaḥ yādṛk 
svalpa vyañjako (ka) vā mahāvyañjako (kha) vā bhavet | tathā tasya caitanyasya 
vyañjakamityadhyāhāraḥ | tādṛk tathāvidham alpaṃ vā mahad vā sthitaṃ 
vyañjakatayā sthitamiti | tathāca kalādi-rūpādalpād vyañjakād dīkṣā-
rūpasya mahāvyañjakatvam | tathāca nātmanaḥ sarvajñatvānupapattirityarthaḥ |



ātmanaścetanatvaṃ ca svaśakti-yogāta acetanatvaṃ ca tadabhāvādityetat 
niśvāsakārikāsūtreṇa dṛṣṭāntamukhena darśayati-

sa cetanaḥ smṛto jīvo yadā śaktyā tu yujyate |
anyathā niṣkalo hyātmā viṣa-suptyeva lakṣyate || 58 ||

	jīva ātmā yadā tu yasmin kāle śaktyā abhivyaktayā sva-śaktyā yujyate 
sambadhyate, tadā sa jīvaścetanaḥ caitanya-yuktaḥ iti smṛtaḥ | āgamajñairiti 
śeṣaḥ | anyathā hi abhivyaktaśaktyabhāve ātmā jīvaḥ niṣkalaḥ kalā caitanyaṃ 
tadrahito niṣkalaḥ acetana iti | tatra dṛṣṭāntamāha-viṣa-suptyeva viṣeṇa suptiḥ 
mūrcchā tayeva tayā yukta iva lakṣyate dṛśyate | yathā viṣa-
mūrcchāvasthāyām ātmanaścaitanyābhivyaktyabhāvādeva acetanatvaṃ, natu 
caitanya-rāhityāt ; tathā'syāpi caitanya-vyaktya-bhāvādevā'cetanatvaṃ, na tu 
sarvathā loṣṭavat caitanyābhāvādityarthaḥ ||

	athā'tītāvasthasyātmano jñānaśaktyā prabodhanaṃ dṛṣṭānta-mukhena 
kiraṇasūtreṇa nirasyati-

gururyathā'grataḥ śiṣyān suptān daṇḍena bodhayet |
śivo'pi moha-nidrāyāṃ suptāṃcchaktyā prabodhayet || 59 ||

yathā guruḥ ācāryaḥ | atra guru-śabdārthaḥ-

gu-śabdastvandhakāraśca ru-śabdastannirodhakaḥ |
andhakāra-nirodhitvād (ka) gururityabhidhīyate ||

	agrataḥ purataḥ suptān nidrā-paravaśān śiṣyān śāsanārhān daṇḍena 
vetrādinā karaṇena bodhayet prabodhayet | agresthitatvāviśeṣe'pi śāsanārhān 
malaparipāka-yogyatvena gururdaṇḍena bodhayati, na tvaśiṣyānityarthaḥ | tathā 
śivo'pi parameśvaro'pi mohanidrāyāṃ mohaḥ malaḥ tasya nidrā kāryaṃ 
pratyasāmarthyaṃ paripāka-viśeṣaḥ, tasyāṃ satyāmapi suptān 
tannivṛttyupāya-saṃvid-rahitān paśūn śaktyā karaṇabhūtayā jyeṣṭhā-
śaktyā bodhayediti ||



ātmaśakterabhivyakti-prakāraṃ dṛṣṭāntamukhena sūtrāntareṇa pratipādayati-

yathā bheṣajasāmarthyā daśaktāṃnāṃ balaṃ param |
tena tacchakti-yogena sāmarthyamamitaṃ bhavet || 60 ||

	aśaktānāṃ vyādhinā sāmarthya-hīnānāṃ bheṣaja-sāmarthyād 
bheṣajasya auṣadhasya sāmarthyād vīryād yathā yena prakāreṇa 
paramutkṛṣṭaṃ balaṃ prāgvidyamānarūpaṃ sāmarthyaṃ, bhavediti śeṣaḥ | 
tathā tena tacchakti-yogena tasya śivasya śaktiḥ raudrī anugrāhaka-śaktiḥ tasyā 
yogena samparkeṇa mitaṃ na bhavatyamitaṃ deśakāla-pariccheda-śūnyaṃ 
sāmarthyaṃ prāksiddharūpaṃ jñānakriyātmakaṃ sāmarthyaṃ bhavet 
abhivyaktaṃ bhavediti || 60 ||

	parākhya-sārdha sūtreṇa na kevalamasyātmano mokṣa eva 
śivaśaktyapekṣā kintu dehabhoga-yogayorapītyāha-

śivatvād yujyate mokṣe paśutvād yujyate tanau |
bhogeṣvapi ca sāmarthyāt karmaṇo munisattama ! || 61 ||
īśvarādhiṣṭhitātmā'sāvasvatantro yatastu saḥ || 62 ||

	yataḥ yasmāt kāraṇāt asvatantraḥ iṣṭaprāptya-niṣṭa-parihārayoḥ 
svātantryarahitaḥ, tataḥ tasmāt kāraṇāt īśvarādhiṣṭhitātmā īśvareṇa 
parameśvareṇa adhiṣṭhitaḥ ātmā svarūpaṃ jñānakriyātmakaṃ yasya asau 
ātmā śivatvāt śivatvaṃ paśutva-nivṛttiḥ malaparipākaḥ tasmānnimittāt 
mokṣe yujyate sambadhyate | paśutvāt paśutvaṃ malaparipākābhāvaḥ tasmāt 
tanau dehe yujyate | karmaṇāṃ sāmarthyād bhogeṣvapi sukhaduḥkhātmakeṣvapi 
yujyate | munisattameti śrotuḥ saṃbodhanam || 61-62 ||

	athātmano bhoga-mokṣayoḥ paraspara-bhinna-kāraṇamapekṣitamiti 
mṛgendrasūtreṇa (7/5) pratipādayati-

nitya-vyāpaka-cicchakti-nidhirapyartha-siddhaye |
pāśavaṃ śāṃbhavaṃ vāpi balamanveṣṭi nānyathā � || 63 ||

	nitya-vyāpaka-cicchakti-nidhiḥ nityā ca vyāpikā ceyaṃ cicchaktiḥ nitya-
vyāpaka-cicchaktiḥ tasyāḥ nidhiḥ āspadamapi artha-siddhaye arthau bhoga-mokṣau 
tayoḥ siddhaye

� mudrite mṛgendre tu atrāyaṃ pāṭhaḥ nānviṣyatyandhathā balam | -mṛ0 7\5



bhavāvasthāyāṃ bhoga-lakṣaṇasyā'rthasya niṣpattaye pāśavaṃ paśoridaṃ 
pāśavaṃ paśu-sambandhi balaṃ sāmarthyaṃ paśūcitaṃ kalādyuttejanam 
anveṣṭi apekṣate | mukti-nimittaṃ ca śāmbhavaṃ śambhu-sambandhi 
dīkṣārūpaṃ balam anveṣṭītyanuṣaṅgaḥ | bhoga-mokṣāvasthā-dvaye'pi 
ayamātmā pāśavaṃ vā pārameśvaraṃ vā svasāmarthyottejanamapekṣata 
ityarthaḥ | anyathā balottejanābhāve na arthasiddhirityadhyāhāraḥ | bhoga mokṣau 
na sidhyata iti || 63 ||

	atha bhogamokṣāpekṣaṇīyasya jñānasya svarūpaṃ kālottarasūtreṇa 
darśayati-

viśvasyā'nekarūpasya jñānamekaṃ śivātmakam |
vyāpakaṃ vimalaṃ śāntaṃ bhukti-muktīti yena tat || 64 ||

	aneka-rūpasya caturdaśa-(caturvidha)bhūtarūpasya viśvasya jagataḥ yena 
jñānena bhuktimuktī bhuktirmuktiśca | bhavata iti śeṣaḥ | tat śivātmakaṃ 
śivasya rūpaṃ jñānaṃ parajñānam ekam advitīyaṃ vyāpakaṃ sarvagataṃ 
vimalaṃ śāntaṃ rāgadveṣa-rahitamiti || 64 ||

	tasyā eva jñānaśakteḥ śiva-samavāyitvaṃ cātma-śiva-yojakatvaṃ ca 
niśvāsa-sārdha-sūtreṇa darśayati-

ekaiva vastutaḥ śaivī yā śaktirnimalā parā |
avinābhāvinī śambhoḥ śuceruṣṇamiva prabhoḥ || 65 ||
tayā''tmaśivayoḥ sandhiḥ śivabodha-parāparā || 66 ||

	nirmalā mala-rahitā parā utkṛṣṭā śaivī śiva-sambandhinī yā śaktiḥ, sā 
vastutaḥ paramārthataḥ ekā bheda-rahitaiva | niśvāsottare-

eka eva śivaḥ śaktistathākāryāṇi bhedataḥ |
tasmācchivātmikā śaktirbhoga-mokṣau śivecchayā || iti |

punaḥ kīdṛśī ? ata āha-śuceḥ agneḥ uṣṇam uṣṇatvamiva prabhoḥ 
prabhavana-śīlasya śambhoḥ śaṃ bhavatyasmāditi śambhuḥ tasya 
parameśvarasya avinābhāvinī avinābhāvaḥ samavāyaḥ 
so'syā'stītyavinābhāvinī samavāyinī | tathā pauṣkare (vi0 1/8)-

śivasya samavetā yā śaktirjñānātmikā'malā |
saiva jñānamiti proktaṃ śāstraṃ tadanumāpakam || iti |



punaḥ kīdṛśī ? ata āha-śivabodha-parāparā | śivasya bodhaḥ 
śivajñānaṃ tadviṣaye parā ca aparā ca, parāparabhinnetyarthaḥ | tathāca 
ādāvevoktaṃ-jñānaṃ dvividhamākhyātamiti | evaṃ-vidhayā tayā jñāna-
śaktyā ātma-śivayoḥ ātmā ca śivaśca ātma-śivau, tayoḥ sandhiḥ sandhānam 
anugrāhyānugrāhakatva-lakṣaṇa-sambandho bhavediti śeṣaḥ || 65-66 ||

	idaṃ śāmbhavaṃ jñānam adhyakṣādi-vilakṣaṇam, aparokṣeṇa 
prakāśaṃ, sarvārtha-viṣayaṃ ceti mṛgendra-sūtreṇa (5/16) darśayati-

nādhyakṣaṃ nāpi tallaiṅgaṃ na śābdamapi śāṃkaram |
jñānamābhāti vimalaṃ sarvadā sarvavastuṣu || 67 ||

	tat śāṅkaraṃ śaṅkara-sambandhi jñānam adhyakṣaṃ na pratyakṣaṃ na 
bhavati | akṣa-savyapekṣaṃ hi jñānaṃ pratyakṣaṃ | na 
ceśvarasyā'kṣavyāpāro'sti, ato na pratyakṣam | na laiṅgaṃ liṅga-janyam 
ānumānikamapi na bhavati, tasya pratyakṣādhīna-vṛttitvāt | na śābdamapi 
śabdajanyaṃ jñānamapi na bhavati, tasyā'tyanta-parokṣārtha-viṣayatvāt | naca 
kiñcid bhagavataḥ parokṣam | ataḥ vimalam anādyāvaraṇa-śūnyaṃ sarvadā 
sarvasmin kāle sarvavastuṣu samasta-viṣayeṣu ābhāti prakāśate |

	nanu pañcavaktrastripañcadṛk ityādinā śrūyata evāgameṣvapi īśvarasya 
śarīrendriya-yogaḥ | tatsadbhāve'pi kasmānna tatsavyapekṣe īśvarasya jñāna-
kriye iti cet | na | īśvarasya jñāna-kriyopayogi-śarīrendriya-yogābhāvāt, 
svabhāvata eva sarvārtha-dṛk kriyā-śaktimattvāt icchāmātreṇaiva sarga-
sthityādi-karaṇakṣamattvāt | bhaktānugrahāya tanugrahaṇam, anyathā nirākāre 
dhyāna-pūjayorayogāt | uktaṃ hi pauṣkare-

sādhakasyaṃ tu lakṣyā(rakṣā)rthaṃ tasya rūpamidaṃ smṛtam |
sarvataḥ pāṇipādaṃ tat sarvato'kṣiśiromukham || iti |

	atra tu vimala mityāvaraṇa-rāhitya-pratipādanena śivajñānaṃ na 
vyañjakāpekṣaṃ, nāpi saṃsāri-jñānamiva saṃśaya-viparyayānadhyavasāya 
yuktamityuktaṃ bhavati | yāni kila jñānāni malaśaktyā āvṛtāni bhoga-
niṣpādanāya vyañjakaṃ kalādi apekṣante, tāni tu



vyañjakasya kalādeḥ svalpa-prakāśa-kāraṇāt tathāvidha-vyañjana-bhāñji 
jñeyaviṣaye (ka) vyāghātavantyapi bhavanti | na caiśvaraṃ jñānamevaṃvidham, 
anādyāvaraṇa-śūnyatvāt |

	uktaṃ kiraṇe-anādimala-muktatvāt sarvajño'sau tataḥ śivaḥ |

mṛgendre (5/14-15) ca-taccā'syāvṛti-śūnyatvānna vyañjakamapekṣate |

tanna sāṃśayikaṃ tasmād viparītaṃ na jātucit ||
yāni vyañjakamīkṣante vṛtatvānmalaśaktibhiḥ |
vyañjakasyā'nurodhena tāni syurvyāhatānyapi || iti || 67 ||

	idānīṃ trividhaṃ bandhamanūdya tasya ca bandhatvam asyā'ṇośca tad-
vimuktaye śivatva-vyaktaye ca śivāt pravṛttamupāyaṃ svāyambhuvasūtreṇāha-

asmāt pravitatād bandhāt parasaṃsthā-nirodhakāt |
dīkṣaiva mocayatyurdhvaṃ śaivaṃ dhāma nayatyapi || 68 ||

	parasaṃsthā-nirodhakāt parasaṃsthā kaivalyaṃ tasyā nirodhakāt 
vighātakāt pravitatāt prakarṣeṇa vitatāt vistṛtāt mala-karma-māyārūpeṇa 
trividhādityarthaḥ | taduktaṃ tatraiva-

māyeya-māṇavaṃ kama caitāvadaṇubandhanam |
etaccoktaṃ mayā sarvaṃ saṃsārātmaka-kāṇḍajam || 13 ||

	asmād bandhāt amuṃ dīkṣaiva mocayati | atra dīkṣaivetyavadhāraṇaṃ 
matāntarokta-bodhādi-nivṛtyartham | tathāhi-ye tāvat paśumata-proktā 
bodhādyupāyāste pāśavyañjakatvāt pāśa-rūpatvācca na puruṣārtha-
sādhakā bhavanti | yathā tatraiva-

pāśa-jñānānna muktiḥ syāt paśu-jñānāt tathaiva ca |
sarvataśca yato muktiḥ patijñānena gamyate || iti |

pāśa-jñānādi-svarūpaṃ cintye pratipāditam-

śāstrajālāni nādāntaṃ pāśajñānaṃ varānane |
paśujñānamiti proktaṃ hyahaṃ brahmābhimānataḥ ||
śivavastuparaṃ tasmānmantrātīto nirañjanaḥ |
sarvajñaḥ sarvagaḥ śāntaḥ sarvātmā sarvatomukhaḥ || iti |



ye asmin śāstre proktā vijñāna-yogādayaste dīkṣāṅgatvāt 
tatsiddhyarthaṃ pratipādyanta ityetāvatā'vadhāritam | tathā śrīmatparākhye-

jñānādīnāmupāyānāṃ dīkṣā kāraṇamiṣyate |
caturṇāmaṅgatā proktā tatsvarūpa-vibhāgataḥ ||

kāraṇaṃ prayojanamityarthaḥ |

yāvanna tadgato bhāvastāvat syānna kriyā-kramaḥ |
ataḥ kriyāpi tasyāṅgaṃ pūjā-homādi-lakṣaṇā |
bhasmacaryā vratādyāpi caryā'ṅgatvamupāgatā (ka) ||
pratyāhārādi-yogo'pi dhāraṇā-dhyāna-saṃyutaḥ |
nirdagdhe prākṛte dehe kṛte sati tato bhavet ||
kriyābhogaḥ śive bhāvaḥ śivabhāvopabṛṃhitaḥ |
tasya tena tadaṅgatvād dīkṣā sā tvaṅginī bhavet ||

	eṣā dīkṣā ūrdhvaṃ sarvotkarṣeṇa varttamānamabhivyanaktītyarthaḥ | 
śaivaṃ śivasambandhi dhāma prabhāvaḥ | dhāma � deśe śubhe sthāne janma-
prabhāvayorapīti viśvaḥ | śivatulyaṃ śivasamānatā-rūpamiti yāvat | tadapi 
nayati prāpayaṃtīti | atra bubhukṣuścet śaivaṃ padaṃ, mumukṣuścet 
paśvatītaṃ śiva-sāyujyaṃ ca dehānte prāpnotītyarthaḥ | atra bandhatattvastha-
nivṛttyādi-bhuvanacatuṣṭayaṃ yoga-balena prāptā dīkṣayā niyojitā vā krameṇa 
mūrti-kevali-yoga-kevali-jñānakevali-śaktikevalino bhavanti | tathā mataṅge-

yoga-vīrya-balopetā dīkṣayā vā niyojitāḥ |
sadāśiva-samāḥ sarve nacaikaṃ kāraṇeśvarāḥ ||
na śivatvamanuprāptāsteṣāṃ karmocyate'dhunā |
sāmīpāḥ śānti-nilayā jñāna-kevalino matāḥ ||
sālokyāścaiva vidyāyāṃ ye'pyadhaḥ paripiṇḍitāḥ ? |
yogakevalinaste'pi tantre'smin paribhāṣitāḥ ||
sānnidhyāt tu pratiṣṭhāyāṃ śaktikevalino matāḥ |
kāmyāścaiva nivṛttisthā mūrttikevalinaḥ smṛtāḥ ||



tad yathā-

nādākhye caiva ye tattve saṃsthitāḥ paramāṇavaḥ |
mūrttikevalinaste'pi śeṣā rudrāḥ prakīrtitāḥ |

sarvajñānottare kevala-śabdasya artha uktaḥ | tad yathā-

kalānāṃ nilayo yasmāt tenā'sau kevalaḥ smṛtaḥ | iti |

atra ṣaṭsahasrikāyāṃ viśeṣaḥ pradarśitaḥ-

saparyā putrakāścaiva sādhakācāryakāstathā (?) |
sarveṣāṃ yojanā kāryā śaktitattve tu putraka ! ||
māyātattve tuṃ samadhi vidyātattve tu putraka ! (?) |
īśvare sādhako bhoge ācāryaḥ sakale sthitaḥ ||
evaṃ jñātvā prayatnena laya-bhogau prakalpayet |
ajñātvā laya-bhogau  tu yo dīkṣāṃ kurute guruḥ ||
ācāryaḥ saha śiṣyaistu narake raurave pacet |
deśikastu prayatnāt tu jñātvā dīkṣāṃ samācaret || iti |

tataḥ paramaniṣkalaṃ śivatattvameva param ? |

muktisthānaṃ bhavedekaṃ vimalaṃ sarvatomukham ||
acalaṃ vyāpakaṃ śāntaṃ liṅgāśrama-vivarjitam | iti |
ebhyaḥ eka paraḥ sūkṣma-kāryakāraṇagocaraḥ |
atītaḥ paripūrṇaśca svatantraḥ sarvatomukhaḥ |
eko nirīśvaraḥ svasthaḥ ṣaḍanye seścarā matāḥ || 68 ||

atha mataṅgasūtradvayena dīkṣāśabdārthaṃ nirūpayati-

anayoḥ śāsane siddhā dīkṣā kṣapaṇa-dānayoḥ |

kṣapaṇaṃ ca dānaṃ ca kṣapaṇa-dāne tayoḥ | kṣapaṇa-śabdena 
paśutvasya nāśanam | dānaśabdena śivatvasya dānaṃ cocyate | anayorarthayoḥ 
siddhā utpannā śāsane'smin śaivaśāstre dīkṣā dīkṣetyucyate | paśūnāṃ 
paśutva-kṣayakarī śivatva-dāyikā śivaśaktireva dīkṣetyarthaḥ | tathā-

dīyate jñānasadbhāvaḥ kṣīyate ca malatrayam |
dīyate kṣīyate ceti dīkṣāśabdo dvidhocyate || iti ||



nanu śivasya svaśakti-dānena śakti-dāridryamāpadyeta | tatra (mātaṅga-
pārameśvare vidyā pāde 4/59-60) āha-

dānaṃ nāma svasattaiva yā sā jñāna-kriyātmikā || 69 ||
sā śaktistasya saṃsparśād vyaktībhūtā sunirmalā |
patyurdānaṃ tadevoktaṃ na svayaṃ vyajyate paśoḥ || 70 ||

	jñānakriyātmikā jñāna-kriyā-svarūpā yā svasya sattā svasattā 
sāmarthyaṃ sadrūpakaṃ saiva dānaṃ deyavastviti nāma prasiddham | tathāca 
ātmano vidyamānāyāḥ sattāyā eva deyatvāt svaśakti-vyayābhāvena na śakti-
dāridrayaṃ śivasyeti bhāvaḥ | tarhi dānaśabdārthānupapattirityata-āha-sā 
śaktirityādi | sā svasattā-rūpā śaktiḥ tasya parameśvarasya saṃsparśāt 
anugrāhaka-śaktyā sparśanāt sunirmalā arkakiraṇa-yogāt pakkaṃ padmamiva 
tathā ca tatraiva-

yathārka-raśmisaṃsparśāt padmaṃ pakvaṃ bhavet tathā |

	vyaktībhūtā | tat abhivyañjanameva patyuḥ parameśvarasya 
dānamityuktam | sakalā varaṇa-nivṛttyā svasattāyā sarvajñatvādi-rūpāyā 
evā'bhivyaktiḥ | puṃsāṃ parameśvarāt śivatvasya abhivyaktiḥ (ka) 
dānamupacārāducyate, na mukhyata ityarthaḥ | nanu nartte prayojanādiṣṭaṃ 
mukhyaśabdārtha-laṅghanamiti | tatrāha-netyādi | paśoḥ svasattā svayaṃ 
svātmanā na vyajyate vyaktā na bhavati | ayaṃ bhāvaḥ-nahi sattā sārthā 
sarvadātmanā svayameva vyajyate, āvṛtatvāt kālikāvṛta-tāmravat; na tu puruṣo 
jñānāt tannivarttakaḥ siddhaḥ, apitu sātiśayaḥ ; cakṣurvaidya iveti | ihāpi 
īśvara eva mokṣakarttā natu svayameva puruṣa iti | tathā pauṣkare (vi0 1/94)-

na mokṣaṃ yāti puruṣaḥ svasāmarthyāt kadācana |
muktvā prasādaṃ devasya śivasyā'śivahāriṇaḥ || iti || 69-70 ||

śiva-dīkṣayā śuddhāvasthasyātmano darśana-prakāraṃ 
devyāmatasūtreṇa darśayati-

aśarīraṃ yadātmānaṃ paśyati jñānacakṣuṣā |
tadā bhavati śāntātmā sarvato vigataspṛhaḥ || 71 ||

yadā yasmin kāle jñāna-cakṣuṣā jñānam unmīlanaśaktyabhivyakta-
caitanyameva cakṣurnetraṃ tena |



aśarīraṃ śarīrādanyaṃ śarīretaraṃ sthūlasūkṣma-dehānyam ātmānaṃ 
paraprakāśa saṃvinmātrarūpa-svaprakāśaṃ paśyati aparokṣīkaroti | tadā 
tasmin kāle sarvataḥ pṛthivyādiśivānta-ṣaṭtriṃśat-tattvarūpa-samasta-
heyapadārthebhyaḥ vigataspṛhaḥ vigatā nivṛtā spṛhā icchā yasya saḥ tādṛśaḥ 
san śāntātmā śāntaḥ adhomukhatvādi-kāluṣya-rahita ātmā tādṛśo bhavatīti 
| rāgadveṣādirahita ityarthaḥ || 71 ||

ātmaikya-prasannasya darśanāntara-muktavat punarāvṛttirnāstīti śrīnmataṅga-
sūtreṇāha-

dīkṣānalapluṣṭamalasya jantoḥ svākyaṃ balaṃ vyaktimupaiti yogāt |
śaktyā vibhoścumbitahṛtpradeśo nānyena puṃso vinivṛttimeti || 72 ||

	dīkṣānala-pluṣṭamalasya dīkṣaiva analaḥ dīkṣānalaḥ dīkṣārūpeṇa 
vahninā pluṣṭa dagdhaḥ ātyantika-nivṛttiṃ prāpito malaścaitanyāvarako yasya sa 
dīkṣānala pluṣṭamalaḥ tādṛśasya jantoḥ ātmanaḥ svākyaṃ svakīyaṃ balaṃ 
dṛkkriyārūpa-sāmarthyaṃ yogāt śivaśakti samparkāt | taduktaṃ mataṅge (4/5)-

yogo'sya śaktayaḥ svākyā visphuranti samantataḥ | iti |

vyaktiṃ punarvyaktyantara-śūnyābhivyaktim upaiti, vibhoḥ parameśvarasya 
anugrāhikayā śaktyā puṃsaḥ puruṣasya cumbita-hṛtpradeśaḥ sparśito 
hṛtpradeśaḥ muktacaitanyaṃ anyena bandhaviśeṣeṇa punarvyaktiṃ 
punarāgamanaṃ na eti na gacchati | yathā rasaviddhaṃ tāmraṃ hematvamāpadya 
punastāmratāṃ na yāti, tadvat ayamātmāpi śivatva-māpadya bhūyaḥ 
paśutvaṃ na prāpnotītyarthaḥ | taduktaṃ svacchande-

rasavahni-samāyogāt tāmraṃ kālikayā yutam |
viśodhitaṃ tu tattvajñairhematvaṃ pratipadyate ||
na bhūyastāmratāṃ yāti tathātmā tu kathañcana |
guruṇā tantraviduṣā yasmād vai nirmalaḥ kṛtaḥ |
na bhūyo malatāṃ yāti śivatvaṃ yāti nirmalaḥ ||

	darśanāntareṣu muktānāṃ punarāvṛttirastyeva tattat-prāpyasya 
tattvātītatvābhāvāt taduktaṃ vātulottare-



ta(ci ?)nmayo(ka)'ntarbahiścaiva ṣaṭtriṃśat-tattvamuktiyuk |
yathārthataḥ sa devo hi tattvātītaḥ paraḥ śivaḥ ||

tathā mṛgendre ca-yat kaivalyaṃ puṃprakṛtyorvivekād yo vā sarvaṃ brahma 
mattvā virāmaḥ |

yā vā kāścin muktayaḥ pāśajanyā 
stāstāḥ sarvā bhedamāyānti sṛṣṭau ||-mṛ0 2/28

śaive siddhe bhāti mūrddhnītareṣāṃ muktaḥ sṛṣṭau puṃvaro'bhyeti nādhaḥ |

viśvānarthān svena viṣṭabhya dhāmnā
sarveśānānīritāḥ sarvadāste || iti |-mṛ0 2/29 || 72 ||

	iha śāstre punarāvṛtti-rahita-muktirūpaṃ nirūpya tatkramopasaṃhāra-
pūrvakaṃ muktātmanaḥ kāraṇapūrvakāpunarbhavaṃ svāyambhuvasūtreṇa 
nirūpayati | athavā muktikramopa-saṃhārapūrvakaṃ muktasyā'punarbhavaṃ 
kāraṇapūrvaṃ svāyambhuvasūtreṇa darśayati-

anena krama-yogena parāṃ kevalatāṃ gataḥ |
anādyaśuddhi-śūnyatvāt prāpnoti na bhavāntaram || 73 ||

	anena kramayogena krameṇa yogaḥ tena pūrvaṃ śivasya śaktyā saha 
yogaḥ | tato malakṣaraṇena phalena saha yogaḥ | tato niḥśreyasādikamiṣadhā 
yogaḥ | tato diśikena yogaḥ | punardīkṣayā yogaḥ | tato bandhavicchedena phalena 
yoga iti | evaṃ vidhena kramayogena parām utkṛṣṭāṃ kevalatām ekākitāṃ 
śivasāyujya-lakṣaṇāṃ, pūrvaṃ kevalāvasthitaḥ, kevalatā hi ekākitā, nāsau 
parā yatastasyāmapyavasthāyām ātmano dvitīyo malo'sti | śivasāyujya-
lakṣaṇā tu parā kevalatā | yatastasyāṃ na kiñcidapi dvitīyamasti | tāṃ gataḥ 
prāptaḥ san anādyaśuddhi-śūnyatvāt anādyaśuddhirāṇavamalaḥ 
tacchūnyatvāt | tadrahitatvād bhavāntaraṃ janmāntaraṃ na prāpnoti | nahi 
kāraṇaṃ vinā kāryamutpadyate, satyapi karmaṇi punarbhavabījamaśuddhiḥ 
tacchunyatvāt kuto bhavāntara-prāptirityarthaḥ |

	māyīya-malasyādimataḥ pralaye'pi nāśe'pi punarbhavāntara-hetutvaṃ 
dṛṣṭamiti tanniṣedhāya anādigrahaṇaṃ kṛtamiti | raurave-



yathā pradīpta-jvalane tularāśiḥ samarpitaḥ |
dagdho nirvāti sa tatra na bhūyaḥ sthūlatāṃ vrajet ||
evaṃ vai maṇḍalaṃ prāpya dīkṣāmantra-samudbhavam |
na punarjanmatāṃ yāti dīkṣito manujottamaḥ || 73 ||

	idānīmabhivyaktātma-svarūpasya puṃsaḥ jñānaparyāptyavasthā 
niśvāsakārikā-sūtreṇa darśayati-

yasya jāgre pralīyante sarve bhāvāḥ suṣuptavat |
paryāptaṃ tasya vijñānaṃ tripadaṃ tena laṅghitam || 74 ||

	yasya puruṣasya sarve samastā (ka) bhāvāḥ cittavṛttayaḥ suṣuptavat 
suṣuptaṃ suṣuptiḥ bhāve ktapratyayaḥ suṣuptyavasthāyāmiva jāgre 
jāgradavasthāyāṃ pralīyante prakarṣeṇa layaṃ gacchanti, tasya puruṣasya 
vijñānaṃ vikalpajñānaṃ paryāptaṃ samāptaṃ nirvikalpaka-
jñānamudetītyarthaḥ (kha) | tena nirvikalpajñānayuktena puṃsā 
tripadamadhikāra-bhoga-layākhyaṃ padatrayamapi laṅghittamatikrāntamiti | tathā 
sarvajñānottare-

yastu jāgradavasthāyāṃ niyamya sakalendriyān |
turyāvasthā-guṇopetastāṃ vinā bhāvayet punaḥ ||
sa jīvanmukta ityukto dehānte mukta ucyate | iti |

tathā-

na hṛṣyatyupakāreṇa nāpakāreṇa tapyati |
yaḥ samaḥ sarvabhūteṣu jīvanmuktaḥ sa kathyate || 74 ||

	atha sūtrāntareṇā'sau śuddhātmā śivasamarthitayā svaśaktyātmakayā 
dṛṣṭyā śivaṃ dhyāyati paśyatītyāha-

śivārka-śakti-dīdhityā samarthīkṛta-ciddṛśā |
śivaṃ śaktyādibhiḥ sārddhaṃ paśyatyātmā gatāvṛtiḥ || 75 ||

	gatā āvṛtiḥ āvidyāvaraṇaṃ yasya sa ātmā śivārka-śakti-dīdhityā  
śiva evā'rkaḥ tasya śakti-dīdhitiḥ śaktiravidyātamo-nivarttikā saṃvicchaktiḥ , 
saiva dīdhitiḥ kiraṇaḥ tayā samarthīkṛta-ciddṛśā samarthīkṛtā śivadarśane 
samarthatayā kṛtā yā cit saiva dṛk netraṃ tayā, karaṇe tṛtīyā |



śaktyādibhiḥ śaktiḥ icchādyaneka-śakti samaṣṭi-rūpiṇī śivasamavāyi śaktiḥ 
ādiryeṣāṃ taiḥ sārdhaṃ saha śivaṃ parameśvaraṃ paśyati | aparokṣīkaroti | 
tathā (tattvasaṃgrahe-29 )-

        paśyati śivaṃ svaśaktyā dhyāyati cāsau śivo(veddha)tthayā dṛṣṭyā | iti |

	ādi śabdena śivaśaktyā'dhiṣṭhīyamāna cidacidrūpasamūha-tattat-
kṛtyapañcaka-tatsādhya-bhoga-mokṣādayo gṛhyante | ata eva pātañjalādyuktavad 
buddhyādi-viṣayatvaṃ śivasya na sambhavati, tasya pāśāgocaratvāt | taduktaṃ 
tattvasaṃgrahe ?-

antaḥkaraṇavṛttiryā bodhākhyā sā maheśvaram |
na prakāśayituṃ śaktā pāśatvānnigalādivat ||

	tatra śivasya cidabhinna-svarūpasya ghaṭādivat karmatayā na dṛśyatvaṃ 
draṣṭṭa-draṣṭavyayo-rātma-śivayo rviśuddhacit-svarūpatvena vyāpakatvena 
tathādarśanāsaṃbhavāt | mokṣakārikā-vṛttāvapyevamuktam || 75 ||

	atha sūtrāntareṇa śivāparokṣa-jñānānantaraṃ sādhanībhūta-
parokṣajñāna-hetubhūtaṃ kāmikādi-śivajñānamanapekṣaṇīyamityetat 
sadṛṣṭāntamāha-

ulkāhasto yathā kaścid dravyamālokya tāṃ tyajet |
jñānena jñeyamālokya paścājjñānaṃ parityajet || 76 ||

	ulkā prajvālitāgra-kāṣṭhaviśeṣaḥ | ulkā syān nigata-jvālā ityamaraḥ | 
sa haste yasya saḥ kaścit puruṣaḥ yathā dravyaṃ svāpekṣita-padārthamālokya 
dṛṣṭvā tāmulkāṃ tyajet | tathā jñānena jñāyate'neneti jñānaṃ kāmikādi-
śivajñānaṃ tena jñeyaṃ svaparaprakāśa-sambidrūpaṃ paraśivarūpaṃ 
jñeyamālokya aparokṣīkṛtya paścāt anantaraṃ jñānaṃ 
parokṣajñānasādhanaṃ śāstraṃ parityajet | sambhāvanāyāṃ liṅ || 76 ||

	atha niśvāsasūtradvayena jñeyasvarūpa-nimagnatāvasthāmāha-

yadā manaḥ pare tattve labdhalakṣyaṃ nilīyate |
tadā hyaśeṣa-vijñānaṃ vināśamupagacchati || 77 ||

? mudrite tattvasaṃgrahe śloko'yaṃ nopalabhyate, naiva sambhāvyate ca | 
parantu mokṣakārikāyāṃ ṣaḍadhikaśata-saṃkhyakatvena 
śloko'yamupalabhyate |



yadā yasmin kāle manaḥ labdhalakṣyaṃ labdhaṃ punaḥ punaścintanena 
sphuṭīkṛtaṃ lakṣyam anādyupādhi-rahita-paraśiva-tattvaṃ yasya tat tādṛśaṃ 
sat pare sarvatattvātīte tattve layātīta ityarthaḥ | tathā niśvāse-

layātītaḥ paro devo nirūpākhyo nirāmayaḥ |
jñātvaivamucyate jñānī bhuñjāno viṣayānapi || iti ||

	tasmin nilīyate layaṃ gachati | tadā tasmin kāle aśeṣa-vijñānam aśeṣaṃ 
samastaṃ vijñānaṃ vikalpajñānaṃ vināśaṃ layam upagacchati prāpnoti | atra 
manaḥ-śabdena caturvidhamanomadhye svalīnāvasthaṃ mana ucyate | tathā 
niśvāse-

saṃsṛṣṭaśca svalīnaśca vikṣipto gatirāgatiḥ |
manaścaturvidhaṃ proktaṃ tasya bhedamimaṃ śṛṇu ||
na mano nāpi mantavyo na mantā ca vibhāvyate |
svalīno viṣayairmukta ekībhūtaḥ suṣuptivat ||
viṣayān gṛhyamāṇo'pi jñeyatvamadhigachati |
na ca tai ryujyate jñāne (ka) saṃśliṣṭaḥ sa tu ucyate ||
ajñānād gachati jñānaṃ jñānādajñānameva ca |
calate yasya daurvalyāt tasyā'sau gatirāgatiḥ ||
jñānena śliṣyate yasmādindriyārtha-parāyaṇaḥ |
trikālamākulo nityaṃ sa tu vikṣipta ucyate ||
svalīnaścottamastatra guṇātīto nirāmayaḥ |
madhyamaḥ sa tu vijñeyaḥ saṃśliṣṭaḥ sāttvikaḥ smṛtaḥ ||
adhamaścapalaḥ kṣudro rājaso gatirāgatiḥ |
tāmasaḥ sa tu vikṣiptaścaturtho hyadhamādhamaḥ ||
guṇātmakaḥ samuddiṣṭo malaprāyaśca dehinām |
nirguṇaṃ tvadhikatvena yatra līno bhaviṣyati ||
manasaśca svalīnasya yat sukhaṃ hyātma-sākṣikam |
yogāvasthā parā hyeṣā prāhuryogavido janāḥ ||
etadviṣayo niśvāsakārikāyāṃ prapañcitaḥ, tatrāvadhāryatām || 77 ||



anena śivasāyujyaṃ prāpnotīti sūtrāntareṇa kathayati-

anākhye tu nirālambe agrāhye mānavarjite |
nastattve yojito mukta iti śāstrasya niścayaḥ || 78 ||

	anākhye ākhyāḥ śaktodyuktādi-nāmāni tadrahite nirālambe nāda-bindu-
vyomamantrādyādhāra-rahite agrāhye buddhyādikaraṇai-raśakya-grahaṇe | 
nirālambe agrāhye iti prakṛtibhāvañchāndasaḥ | mānavarjitaṃ 
saṃśliṣṭādirahite guṇatrayānātmake nistatve sarvatattvātīte paratattve yojitaḥ | 
atra yogārtho yujidhātu rgṛhyate, na tu yuji samādhāviti samādhyarthaḥ | tathāca 
prasiddhaṃ sājujyamātmalābharūpaṃ prāpita ityarthaḥ | yathā suprabhede-

śivaṃ saṃyojitaṃ rūpaṃ sāyujyamiti kathyate |

evambhūtasāyujyaṃ prāptaḥ mukta iti śāstrasya śivāgamasya niścayaḥ 
siddhāntaḥ |

atra sāyujya-śabdena śiva-sādṛśyamucyate | natu tādātmyādi-
sambandhaḥ | taduktaṃ cintye-

anyathā bahumuktyuktiḥ śāstre caiva varānane |
śivatvasulabhā muktiridānīṃ kathyate mayā || iti |

tathoktamabhiryuktairapi-

nātmacchedo'pavargo na ca paśu-śivayoraikyamatrā'pavargo
nāvidyā-grāsa-hānirnaca guṇavilayo nāpi pāṣāṇamuktiḥ |
yadbodhānandarūpaṃ trimalavigamane vyaktamātmasvarūpaṃ
tat sāyujyena vācyaṃ śivasadṛśavibhoścaiṣa (ka) tantrāpavargaḥ ||

devīkālottare-

nidrāyā bodhayeccitaṃ vikṣiptaṃ śamayet punaḥ |
pakṣadvaya-parityāge saṃprāpte naiva cālayet ||
nirāśrayaṃ sadā cittaṃ sarvālambana-varjitam |
mano'vasthā-vinirmuktaṃ vijñānaṃ muktilakṣaṇam || iti || 78 ||

idānīmātmalābharūpaṃ prāptasyā'sya avasthānaṃ svāyambhuvasūtreṇa 
darśayati-

bhavodbhava-padātīto niṣkampārcciriva sthitaḥ |
muktau vyakta-śivatvo'sau kṛtakṛtyo yatastataḥ || 79 ||

[yataḥ yasmāt kāraṇāt asau kṛtakṛtyaḥ śivasāyujyaṃ prāptastataḥ] tasmāt 
kāraṇād bhavodbhava-padātītaḥ san bhavaḥ saṃsāraḥ tasmin udbhavapadāni 
janma-



sthānāni yadvā bhavapadaṃ bhavatīti bhavo'haṃ-padaṃ sakala-pralayākala-
vijñānākalānāṃ padam, udbhavapadaṃ tasmādūrdhvaṃ bhavatīti 
udbhavapadam anantādipadaṃ tadatītaḥ atikramya varttamānaḥ san 
niṣkampārcciriva niṣkampaḥ kamparahita arcciriva jvāleva sthitaḥ | athavā 
aparamokṣasya ṣaṭ padāni santi bhavodbhavapadaṃ śāntyatītaṃ śāntitattvaṃ 
nādākhyamaiśaṃ vidyākhyamiti | tatra sarvottaraṃ ṣaṣṭhaṃ bhavodbhavapadam 
atikramya varttamāno yaḥ, saḥ pradīpārcciriva tiṣṭhatītyarthaḥ | taduktaṃ 
śivatattva-vilāse-

bhavodbhavapadaṃ tvekaṃ śāntyātīta mataḥ param |
śāntitattvaṃ ca nādākhyamaiśaṃ vidyākhyameva ca ||
udāhṛtāni muktānāṃ padānyevaṃ krameṇa ṣaṭ |

etat sarvaṃ sadyojyotiṣṭīkāyāṃ (ka) prapañcitam, tatrā'vadhāryatām || 79 ||

	atha devīkālottarasūtreṇa kṛtakṛtyasya nityādi-kṛtyāntaraṃ nāstīti 
nirūpayati-

nātra pūjā namaskāro na japo dhyānameva ca |
kevalaṃ jñeyamityuktaṃ veditavyaṃ na kiñcana || 80 ||

	atra jīvanmukta-daśāyāṃ pūjā arcanā na, namaskāraḥ satkāraśca na, 
japo'pi na, dhyānaṃ (ka) cintanaṃ na | ataḥ kimasti nitya-naimittikādi, ata āha-
kevalaṃ jñeyamiti uktam | jñeyamiti jñeyabhāvamātrāvasthā neti sūcitam | 
veditavyaṃ jñātavyaṃ kiṃcana kimapi na nāstīti | tathā na bāhyeṣu karmasu 
prītiṃ badhnātītyarthaḥ | tathā-

niyamo'pi na tasyā'sti nopavāso vidhīyate |
pravṛttiśca nivṛttiśca brahmacarya-vratāni ca ||

tatraivācāraprakaraṇe-

na dhyānaṃ na japaḥ pūjā na homo naiva sādhanam |
agnikāryādhikāraśca naitasyā'sti maheśvara ! || iti || 80 ||

evaṃ jīvanmukto vāsanāvaśena viṣayajñānayukto'pi śivaśaktyā 
svarūpa-jñānaniṣṭha eva bhavatīti niśvāsakārikāsūtreṇāha-

yathā vāyuḥ suśīghro'pi muktvākāśaṃ na gacchati |
jñeye nikṣiptacittastu viṣayastho na muñcati || 81 ||



vāyuḥ suśīghraḥ atyantaśīghra-gamano'pi yathā ākāśaṃ paripūrṇaṃ 
vyoma muktvā visṛjya na gacchati na sañcarati | tathā jñeye śive nikṣiptacittaḥ 
nikṣiptam avasthāpitaṃ cittaṃ caitanyaṃ yasya saḥ tādṛśastu pumān 
viṣayasthaḥ viṣaye tiṣṭhatīti viṣayasthaḥ tādṛśo'pi na muñcati jñeyaṃ na 
tyajati | tatraiva-

bhuṅkte tu viṣayān sarvānasau lepyasyālepakaḥ |
yasya sarvagato bhāvo śaṃbhāvastho nirantaraḥ || iti |

	ayaṃ sākṣātkṛta-śivasvarūpatayā tajjñānātmakam amṛtaṃ 
sarvadā'nubhavatītyarthaḥ | tathā sarvajñānottare-

śivajñānāmṛtaṃ pītvā vicarasvaṃ yathāsukham || iti || 81 ||

atha sūtrāntareṇa asyādhva-darśitatvameva svabhāva iti dṛṣṭāntapūrvamāha ?-

indriyārthe yathā cittaṃ nityaṃ gachati dehinām |
tathā caivendriyātīte tasya nairākṛte pade || 82 ||

	dehināṃ śarīriṇāṃ cittaṃ manaḥ indriyārthe indriyaviṣaye yathā 
nityaṃ śaśvat gachati pravarttate, tathā tasya jīvanmuktasya cicchaktiśca 
indriyātīte indriyāgocare nairākṛte pade sthāna eva gachati | ayaṃ bhāvaḥ-
puruṣasya cittam indriyārthe viṣaye yathā nirāvādhaṃ pratikṣaṇaṃ varttate, 
manaso niścalatvaṃ tu sarvajñeyābhyāse na bhavati (ka) tadvad 
jīvanmuktacittamapi atīndriye nirmale kevale sadā prāpnotītyarthaḥ || 82 ||

kṣīrakṣayād yathā vatsaḥ stanānmāturnivarttate |
rāgakṣayāt tathā puṃsāṃ manaḥ śīghraṃ nivarttate || 83 ||

	mātuḥ stanyaṃ yāvat tāvat vatsastat-stanyaṃ svīkaroti tatkṣaye sati yathā 
nivarttate, tadvanmano'pi nivartata iti | tathā tatraiva-

? atra dṛṣṭāntapūrvamāhetyanantaraṃ-indriyārtha ityādi-na bhavatyantaḥ 
pāṭhastataḥ mātuḥ stanya mityādi kiṃ kariṣyatyantaḥ pāṭhastataḥ 
kṣīrakṣayādityādi-nairākṛte pade ityantaḥ pāṭhastato dehināṃ 
virāgīṇamiti pāṭho dṛśyate | ṭīkānurodhena prakṛtopayogitvena cātra 
parivarttanaṃ kṛtamiti mantavyam |



kāyānubandha-calane nāsau calati niścalaḥ |
yasya jñeyamidaṃ sarvaṃ manastasya suniścalam ||
evaṃ yo nirjito dhīraiḥ sa tvā kiṃ kariṣyati || 83 ||

tādṛk-padāvasthitasya puruṣasya kāla-mahimānau nirūpayati | athavā 
sūtrāntareṇā (tīta) sarvādhvasthānasthānasya kālaṃ ca mahimānaṃ ca 
darśayati-

godohamiṣupātaṃ vā nayanonmīlanamātrakam |
sakṛt parapade yukto na punarbhavamāpnuyāt || 84 ||

godohaḥ gauryāvatā kālena duhyate, so'yaṃ kālo godohaḥ tanmātraṃ 
vā ; nayanonmīlanamātrakaṃ nayanasya cakṣuṣaḥ unmīlana-kālamātrakaṃ vā | 
kālādhvanoratyanta saṃyoge dvitīyeti dvitīyā vibhaktirbhavati | sakṛt kadācit 
parapade sarvādhvātīte nirupādhike śivapade yuktaḥ yojitaḥ kṛta-samādhikaḥ 
punarbhavaṃ punarjanma nāpnuyāt na prayāyādīti || 84 ||

atha sūtrāntareṇa tasya śivatvasadṛśa-svakīya-śivatvāvāptireva prāptiḥ 
| na cādvaitavādavat tadaikyam, indrādi-prāptivat taddeśa-gamanaṃ veti 
pratipādayati-

paśubhāvād yadātītya patibhāvena tiṣṭhati |
tat tasya gamanaṃ nāma sarvage gamanaṃ kutaḥ |

	yadā yasmin kāle paśubhāvāt paśutvāt atītya atikramya patibhāvena 
śivabhāvena tiṣṭhati varttate | tadā tasya muktasya tatpatitvena vartanaṃ gamanaṃ 
nāma prasiddham | taduktaṃ svāyambhuve-

dagdha-saṃsāra-bījasya yā puṃsaḥ paścimārthataḥ |
sā gatistasya vijñeyā na deśāntara-saṃsthitiḥ ||
pūrvāvasthāntaravyaktau satyāṃ loke gataṃ yathā |
procyate paṭavarṇādi vastu tadvat pumānapi || iti |

	atra gamana-śabdasya mukhyārtho na ghaṭata ityāha-sarvage vyāpake 
vastuni gamanaṃ kutaḥ ? ātma-śivayorubhayorapi vyāpakatvāt anayoḥ prāpya-
prāptabhāvo na ghaṭata ityarthaḥ | ayaṃ bhāvaḥ-ātmanaḥ śivatvaprāptiḥ 
śivena saṃyogo vā tādātmyaṃ vā || 85 ||



atha svāyambhuvasūtreṇa bhoktṛtvādikamapi (ka) tasya nāstītyāha (kha)-

śivadhāmārpitasyā'sya bhogabhokturna jātucit |
bhoktṛtvamadhikāritvaṃ patikṛtyānukāritā || 86 ||

	śivadhāmārpitasya śivasya dhāma tatsamatvam arpitam abhivyañjitam 
asyeti śivadhāmārpitaḥ tādṛśasya bhogabhoktuḥ asya puruṣasya jātucit 
kadācidapi na bhoktṛtvaṃ bhogakriyā-kartṛtvaṃ yat sakalasya dṛṣṭaṃ tad nāsti | 
adhikāritvaṃ māyāgarbhādhikāritvaṃ yat pralayākalasya dṛṣṭaṃ, tadapi nāsti, 
patikṛtyānukāritā patikṛtyāt anu paścāt kāritvam anukāritā | idaṃ kurviti 
patyuricchāmātra-pravṛtte sati ye pravarttante, te patikṛtyānukāriṇaḥ teṣāṃ 
bhāvaḥ patikṛtyānukāritā, patīchā-praṇihita-vyavahāritvamiti yāvat | sā'pi 
sakala-pralayākala-vijñānakaleṣu triṣvapi dṛṣṭā patikṛtyānukāritā tasya nāsti | 
tasya svatantratvena parapreryatvaṃ nāstītyarthaḥ | evaṃ sarvajñānottare-

śivavacchāśvataḥ śuddhaḥ sṛṣṭidharma-vivarjitaḥ ||
satyaṃ satyaṃ punaḥ satyaṃ trisatyaṃ samayaḥ kṛtaḥ |
ataḥ parataraṃ nāsti vijñeyaṃ kutracid guha ! || 86 ||

	atha kiraṇasūtreṇa tadavasthāyāmapi malasyāvasthānamānumānikaṃ 
sadṛṣṭāntamāha-

viṣasambandhinī śaktiryathā mantrairnirudhyate |
tadā na tadviṣaṃ kṣīṇamevaṃ puṃso malakṣayaḥ || 87 ||

viṣasambandhinī viṣasya sambandhinī yā śaktiḥ mohamaraṇādi-
kāryajanikā śaktiḥ, sā yathā mantraiḥ gāruḍādibhirmantrairnirudhyate (ka) 
nirodhaṃ tatkārya-pravṛttivighātaṃ nīyate | tadviṣaṃ ca tadā tasmin kāle na 
kṣīṇaṃ varṇākṛtyādi-svarūpa-nirodharūpaṃ kṣayaṃ na prāptam, evaṃ etena 
prakāreṇa puṃsaḥ dīkṣayā śuddhasyātmanaḥ malakṣayaḥ svasahabhāvino 
malasya kṣayaḥ tadā kārakatva-śakteḥ kārya-pravṛtti-vighāta eva kṣayaḥ | na 
svarūpato malasya kṣaya ityarthaḥ |

	atredaṃ vicāryate-dīkṣādibhirupāyai kiṃ malasya viśleṣaḥ kriyate ? atha 
vināśaḥ ? atha tirobhāvo vā ? nādyaḥ | tayormalātmanoḥ 
sambandhasyā'nāditvena viśleṣāyogāt | api ca prāpti-pūrvako vibhāgaḥ | naca 
prāptirmalātmanorasti, dvayorapi vibhutvena tadayogāt |



nahi yad vyāpakaṃ vastu tad vivicyamānaṃ dṛṣṭam, vibhāgo'pi vā 
jāyamāno'nyatarādi-karmanimittād bhavati | karma copajāyamānaṃ parimita-
parimāṇa-sambandhavati dravye bhavati | vibhudravye tadabhāvānna tayorviśleṣa 
iti |

	atha vināśaḥ ? so'pyanupapannaḥ, sahajasya malasya (ka) prakṣaye 
ātmano'pi taddharmiṇo vināśa-prasaṃgāt | dharmadharmiṇorananyatvāt | apica 
sakala-pudgala-balāvarodhako malo'yamabhyupagamyate | yadyasyocchedaḥ syāt, 
tadā'sya sakala-pudgala-sādhāraṇatvādekasya (kha) puruṣasyā'nugrahe 
savaprāṇibrāto vimalaḥ syāt | tasmād vināśo'pi na yujyate |

	atha tirobhāvaḥ ? so'pi na yujyate | yasyā'rthasya tirobhāvo bhavati, 
tasyā'vaśyaṃ punarāvirbhāvo'pi kālāntare'bhyupagantavyaḥ, anyathā'sau 
tirohita ityeva na śakyate vaktum | tataḥ ko doṣa iti cet ? atyantamuktaḥ saṃsārīti ca 
vyavahārasiddhi-prasaṃgāt | tasmāt tirobhāvo'pi na yujyate | nacānyā gatirasti | 
tasmāt aneka-doṣāpatteḥ kathamasya malasyā'pāyabhāva iti |
	
	atrocyate-satyam, asmin śāstre dīkṣādibhirupāyairvyāpakasya malasya 
vibhāgo vā vināśo vā tirobhāvo vā nābhyupagamyate | api tu yathā 
agneruṣṇasparśasya dāhikā-śaktirmantreṇa nirudhyate | tathā malasyāpi 
vyāpārikā śaktirupāyairnirudhyate | yathā ca loke stambhitaśaktiragniḥ stambhito 
nigadyate | tadvat mala-śaktiviyogāt sa malo viyukta iti upacāreṇā'bhidhīyate | 
taduktamatraiva-vibhurapi yathāgnirdāhakārye sakalapudgala-sādhāraṇastathāpi 
tacchaktayo'nantā ityuktam | tathāca yasya puruṣasya prasanno guruḥ 
tasyāgnerdāhikāṃ śaktiṃ sanniruddhya himaśītalamagniṃ-karoti | itareṣāṃ ca 
sa vahnirapratibandhatvād dāhalakṣaṇaṃ kāryaṃ karotyeva | tathā malo'pi, yasya 
tacchaktiḥ pratibaddhā (ga) tasya saṃsāraṃ na pratanoti; anyeṣāṃ bhavo 
bhavatyeva pratibandhābhāvāt | tasmānnāyaṃ doṣaḥ |

	yadanyat sahaja (gha)malakṣaye ātmano vināśaḥ syāditi dūṣaṇamuktam | 
tadapi na | dharma-vināśe'pi dharmiṇo vināśābhāvāt | kutraitad dṛṣṭamiti cet ? 
ucyate | yathā tāmra-sahabhāvinī kālikā amlasaṃsparśāt kṣayamupayāti, na 
tāmraṃ kṣīyate ; kintu avasthitasya tasyaiva guṇāntaraṃ prādurbhavati | 
sthitasyaiva dharmāntaraṃ bhavati |



natu vinaṣṭasya | tasmāt tāmrakālikā-kṣayavad asyāpi puṃso malakṣaya 
ityatrāpi nānupapattiḥ | uktamatraiva-

sahajā kālikā tāmre tatkṣaye na ca tatkṣayaḥ |
jāyate tadvadasya syāt puruṣasya malakṣayaḥ || iti || 87 ||

sahajamalakṣayamuktvā karmakṣayaṃ sūtrāntareṇa darśayati-

anekabhavikaṃ karma dagdhaṃ (ka) bījamivā'ṇubhiḥ |
bhaviṣyadapi saṃruddhaṃ yenedaṃ taddhi bhogataḥ || 88 ||

	anekeṣu bhaveṣu janmasu arjitaṃ sañcitamanekabhavikaṃ tat saṃcitaṃ 
karma (kha) aṇubhirmantrairbījamiva dagdhaṃ, yathā vahnidagdhaṃ bījamupahata-
sāmarthyaṃ sat aṅkuradānāya na bhavati | yathā suprabhede-

agnidagdhāni bījāni na prarohanti bhūtale | iti |

	tathā mantropahata-śaktikaṃ karma phaladānāya na bhavatītyarthaḥ | 
bhaviṣyat āgāmi karmā'pi saṃruddhaṃ samyak mantraśaktyā ruddhaṃ 
pratibaddham | nanu tasyā'nutpannatvāt kathaṃ pratibandha iti | naitat satyam | 
anutpāda evā'sya pratibandhaḥ | yat tasyotpādakaṃ sahakāri karmāntaraṃ, tad 
dagdhabījamivetyuktam (ga) | ataḥ pratibaddhatvādāgāmi-karmaṇo'nutpāda 
ityarthaḥ | yena karmaṇā punaḥ idaṃ śarīraṃ niṣpāditamiti śeṣaḥ | tat 
prārabdha-karma bhogataḥ upabhogādevoparamamupayāti, nānyathā | suprabhede-

śarīrārabdha-karmāṇi bhujyante svayameva tu | iti |

tathā prārabdhakarma-vyatirikta-karmaṇāmeva dīkṣayā nirodhaḥ ityarthaḥ 
| etacca prārabdhaṃ trividham-icchāprārabdham anicchāprarabdhaṃ 
parecchāprārabdhamiti | tathā-

icchā'nicchā parecchā ca prārabdhaṃ trividhaṃ smṛtam |
apathyasevinaścaurā rāja-dāra-ratā api |
jānanta eva svānartha micchantyārabdhakarmataḥ | (pañcadaśī 7-152/153) 

idamicchāprārabdham |

svabhāvajena kaunteya ! nibaddhaḥ svena karmaṇā |

	kartuṃ necchasi yanmohāt kariṣyasyavaśo'pi tat || (bhavadgītā-18/60) 

idamanicchāprārabdham |



nānicchanto na cecchantaḥ paradākṣiṇya-saṃyutāḥ |
sukhaduḥkhe bhajantyetat parecchāpūrvakarma hi || (pañcadaśī-7/162)

idaṃ parecchāprārabdham || 88 ||

	nanu aśeṣapāśa-vināśikā dīkṣā abhyupagatā, tayā ca 
svasattābhivyaktau jātāyāṃ tasminneva kāle śarīrasya pātaḥ prāpnotiḥ | 
taduktamatraiva-

aśeṣapāśa-viśleṣo yadi devasya dīkṣayā |
jātāyāmartha kathaṃ syād vapuṣaḥ sthitiḥ ||

	ityāśaṅkya tāṃ sūtrāntareṇa nirasyati-

jātāyāṃ ghaṭaniṣpattau yathā cakraṃ bhramatyapi |
pūrvasaṃskāra-saṃsiddhaṃ tathā vapuridaṃ smṛtam || 89 ||

	ghaṭasya niṣpattirabhivyaktiḥ, tasyāṃ jātāyām utpannāyāmapi yathā 
cakraṃ bhramati bhramaṇaṃ bhajate | tathā idaṃ dṛśyamānaṃ vapuḥ ātmanaḥ 
śarīraṃ pūrvasaṃskāra-saṃsiddhaṃ pūrvasaṃskāreṇa 
dharmādharmalakṣaṇa-kāraṇajanya-saṃskāra-viśeṣeṇa saṃsiddhaṃ dhṛtaṃ sat 
sthitaṃ tiṣṭhati |

	ayamarthaḥ-ghaṭaphalābhivyaktaye tāvat kumbhakāraścakraṃ bhrāmayet, 
ghaṭa-niṣpattau jātāyāmapi pūrvavad yathā taccakraṃ bhramatyeva | 
pūrvasaṃskārānubiddhamidaṃ śarīram arthaniṣpattau 
jātāyāmātmavadavatiṣṭhate |

	nanu vegāt tatra cakre bhramaṇakriyā bhavati, tacca niṣpanne'pi phale 
yujyate | evaṃ śarīre punarna kiṃcidanyanimittaṃ vidyate | yena tasyā'vasthānaṃ 
syāditi | maivam | aśeṣa-karma-prakṣayo'tra mayā nā'bhyupagamyate | yathā 
avasthita-vegākhya-saṃskārād bhramaṇaṃ kāryaṃ ca bhavati | tathā 
dharmādharma-lakṣaṇāt kāraṇāt sādhāraṇa-lakṣaṇa-saṃskāraviśeṣo bhavati 
| tasmāt saṃskāra-viśeṣādidaṃ śarīramavatiṣṭhata iti | yathā suprabhede-

hiṅg-tyakte tu tatpātre gandha statra na naśyati |
kulālacakraṃ karmānte yathā bhramati vai tathā || iti || 89 ||

	atha devyā matasūtreṇa jīvanmuktasya dehāvasānasthitiṃ darśayati-

bhagne ghaṭe yathā dīpaḥ sarvataḥ saṃprakāśate |
dehapāte tathā cātmā bhāti sarvatra sarvadā || 90 ||



yathā dīpaḥ bhagne ghaṭe sati bhinne sati sarvataḥ sarvāsu dikṣu 
saṃprakāśate samyak prakāśate, saṃkocaṃ vihāya sarvatra svataḥ-prakāśo 
bhavatītyarthaḥ | tathā ātmā muktātmā ca dehapāte dehānte dehasya caitanya-
saṃkocaka-śarīrasya nāśe sati sarvatra sarvadeśe sarvadā sarvakāle bhāti 
prakāśate | deśataśca kālataśca aparicchinna-prakāśo bhavatītyarthaḥ | yathā 
suprabhede-

ghaṭagupto yathā dīpo ghaṭanāśe tu dīpyate |
ghaṭāgupto yathā bhānurmuktau cāpi tathā bhavet ||
svabhāvajñānato muktiḥ sa jīvanmukta eva hi |
dehanāśe parā vyāptirghaṭanāśe tu dīpavat || iti || 90 ||

	itthaṃ pati-paśu-pāśa-svarūpa-nirūpaṇa-dvāreṇa ātmanaḥ 
kevalaśuddhāvasthātrayaṃ pratipādya (ka) asya 
jñānaśāstrasyā'dhikāryanadhikāri-vivekaṃ niśvāsakārikayā (kha) 
pradarśayati-

prakaṭayasvedaṃ jñānaṃ madbhaktānāṃ varānane ! |
rakṣaṇīyaṃ prayatnena taskarebhyo ghanaṃ yathā || 91 ||

iti umāpatiśivācārya-saṃgṛhītaśataratnasaṃgrahaḥ samāptaḥ

	he varānane ! devīsaṃbodhanametat | idaṃ jñānaṃ jñāyante 
patyādayo'neneti jñānaṃ śāstram | tathā ca vāyavye-

jñānaṃ vastu paricchedo vastu ca trividhaṃ smṛtam | iti |

	madbhaktānāṃ madbhajanavatāṃ prakaṭayasva prakāśaya | dayā śānti-
yuktānāṃ devāgni-guru-bhaktānām asmin jñāna-śāstre adhikāra ityarthaḥ | 
tathāca tantre (ga)-

deyaṃ śāntāya dāntāya śivabhakti-ratāya ca |
śivavanmanyate yastu ācāryaṃ tattvapāragam ||
śivād gurutarā bhaktiryasya nityaṃ gurau sadā |
tasya deyamidaṃ jñānamanyathā na kadācana ||



kālottare-

yasya deve parā bhakti ryathā deve tathā gurau |
nānyaśāstre yadāsaktirjñānaṃ tasminnu dāpayet ||

tathā sarvajñānottare-

guru-devāgni-bhaktāya nityaṃ bhaktiyutāya ca |
pradātavyamidaṃ śāstraṃ netarebhyaḥ pradāpayet || iti |

	asya jñānasyā'nadhikārilakṣaṇamāha-rakṣaṇīyamityādi | yathā-loke 
janāḥ taskarebhyaḥ corebhyaḥ sakaśāt ghanaṃ nikṣepādīn prayatnena prayāsena 
pālayanti, tathā jñānasādhanaṃ corebhyaḥ abhaktādibhyaḥ sakāśāditi | 
prayāsena gopanīyamityarthaḥ | tathāca tantre-

idaṃ devi ! na dātavyaṃ jñānasadbhāvamuttamam |
duvirdagdhe śaṭhe krūre anyāya-pathavarttine iti ||

	sarvajñānottare-

etatte śivasadbhāvaṃ śivavaktrād vinirgatam |
guhyād guhyatamaṃ guhyamūhanīyaṃ prayatnataḥ ||
nāśiṣyāya pradātavyaṃ nāputrāya kadācana || 91 ||

iti umāpatiśivācārya-saṃgṛhīta-śataratnollekhanī samāptā |

|| oṃ ||

|| vināyakāya namaḥ ||

|| cidambareśvaraśiva-kāmasundarībhyāṃ namaḥ ||


###########   END OF FILE  #######