####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00209
Uniform title: śivadharma
Manuscript : IFP/EFEO 860 copied from R2442 G.O.N.L., Madras

Description: 
IFP transcript 860  copied from ms no R2442 belonging to G.O.N.L. , madras.)
This zivadharma differs from the text of the same name in transcript no. 72. There the colophon reads: śrīśivadharmaśāstre nandiproktethe colophon of this version reads simply śrīśivadharmaśāstre


Notes: 
Data entered by the staff of Muktabodha under the supervision of Mark S.G. Dyczkowski.


Revision 0: April 5, 2010

Internet publisher : Muktabodha Indological Research InstituteWeb publisher Muktabodha
Publication year : 2010
Publication city : 
Publication country : United States
####################################################




śivadharmaḥ

oṃ mahāgaṇapataye namaḥ || hariḥ oṃ || avighnamastu | śrīgurubhyo namaḥ || 
oṃ namaḥ śivāya ||

sarvākāramaśeṣasya jagataḥ sarvadā śivam |
go brāhmaṇanṛpāṇāṃ ca śivaṃ bhavatu sarvadā ||

śivamādau śivaṃ madhye śivamante tathaiva ca |
sarveṣāṃ śivabhaktānāmanugānāṃ ca nāśśivam? ||

merupṛṣṭhe sukhāsīnamṛṣisaṃghaiḥ samāvṛtam |
lokānugrahakaṃ śāntaṃ sarvajñaṃ nandikeśvaram ||

teṣāṃ madhye samuthāya munirbrahmasutottamaḥ |
sanatkumāraḥ sutapāḥ pṛcchatismayayā vidhi ||

bhagavan sarvadharmajña śivadharmaparāyaṇa |
śrotukāmaḥ paraṃ dharmamime sarve samāgatam ||

agniṣṭomādayo dhamrā yajñāḥ bahuvittakṛtānvitāḥ |
nātyantaphalabhūyiṣṭhā bahvāyāsasamanvitāḥ ||

na śakyāste yataḥ kartumalpavittairdvijātibhiḥ |
sukhopāyamato brūhi sarvakāmārthasādhakam ||

hitāya sarvasatvānāṃ śivadharmaṃ sanātanam |
yena siddhāḥ surādaityā gandharvoragarākṣasāḥ ||

ṛṣayaḥ kinnarāyakṣāstathā kiṃ puruṣādayaḥ |
gaṇāśca vividhānyānye śivadharmaparāyaṇāḥ ||

yaṃ sampūjyanarāssarve tadbhaktāśśivadharmikāḥ |

śrīnandikeśvara uvāca

śrūyatāmabhidhāsyāmi sukhopāyaṃ mahāphalam |
paramaṃ sarvadharmāṇāṃ śivadharmaṃ sanātanam ||

śivena kathitaṃ pūrva pārvatyāṣṣaṇmukhasya ca |
gaṇānāṃ devamukhyānāmasmākaṃ ca viśeṣataḥ ||

ajñānārṇavamagnānāṃ sarveṣāṃ prāṇināyam |
śivadharmoḍupaḥ śrīmānuttārārthamudāhṛtaḥ ||

yairayaṃ śāntacetaskaiśśivabhaktaiśśivārthibhiḥ |
saṃ sevyate parodhamraste rudrā nātra saṃśayaḥ ||

grāme vā yadivāraṇye jale vāpi sthalo'pivā |
yatra vā dṛśyate liṅgaṃ sarvatīrthāni tatra vai ||

p. 2(5)

ekakālaṃ dvikālaṃ vā trikālaṃ nityameva vā |
ye smaranti virūpākṣaṃ te rudrā nātrasaṃśayaḥ ||

kīrtayiṣyanti ye rudrāssakṛdapyāśu te narāḥ |
sarvapāpaiḥ pramucyante sarvajanmakṛtairapi ||

ye'rcayanti sadārudraṃ na te prakṛtimānuṣāḥ |
rudralokātparibhraṣṭāste rudrā nātrasaṃśayaḥ ||

jātena dehinā yena nārcitobhagavāñchivaḥ |
sa ciraṃ saṃcaratyasmin saṃsāre duḥkhasāgare ||

tasya cittam mahācchidraṃ sambhogassvārthamūkatā |
yaḥ kṣaṇaṃ vā muhūrtaṃ vā śarvamekaṃ na cintayet ||

durlabhaṃ prāpyamānuṣyaṃ ye'rcayanti sadāśivam |
teṣāṃ hi saphalaṃ janma kṛtārthāste narottamāḥ ||

bhavabhaktiparāye tu bhavaṃ praṇatacetasā |
bhavasaṃsmaraṇodyuktāstena duḥkhasya bhāginaḥ ||

bhavanāni manojñāni vibhramā bharaṇāḥ striyaḥ |
dhanañcādṛṣṭaparyantaṃ śivapūjā vidheḥ phalam ||

ye vāñchanti mahābhogān rājyaṃ vā tridaśālaye |
te'rcayantu sadā kālaṃ harasya caraṇāmbujam ||

saubhāgyakāntimadrūpaṃ satvaṃ tyāgaprabhāvataḥ |
śauryaṃ ca jagatikhyātiṃ śivamarcayato bhavet ||

nārudraḥ saṃsmaredrudraṃ nārudro rudramarcayet |
nārudraḥ kīrtayedrudraṃ nārudro rudramāpnuyāt ||

śivadharmasya sāro'yaṃ śive bhaktiḥ suniścalā |
sā cāṣṭāṃgī śivenoktā kāryā nityaṃ prayatnataḥ ||

śrībhagavānuvāca

madbhaktajanavātsalyaṃ pūjāyāñcānumodanam |
svayamabhyarcanaṃ bhaktyā mamārthecāṃgaceṣṭitam ||

matkathāśravaṇe bhakti svaranetrāṃgavikriyā |
mamānusmaraṇaṃ nityaṃ yaśca māṃnopajīvati ||

bhaktiraṣṭavidhāpyeṣā yasmin mlecche'pi vartate |
saviprendro muniḥ śrīmān sayatissacapaṇḍitaḥ ||

na me priyaścaturvedī madbhaktāḥ khapaco'pi yaḥ |
tasmai deyaṃ tato grāhyaṃ sa ca pūjyo yathāhyaham ||

patraṃ puṣpaṃ phalaṃ toyaṃ yo me bhaktyā prayacchati |

p. 3(6)

tasyāhaṃ na praṇaśyāmi sa ca me na praṇaśyati ||

arcayetanaro nityaṃ yo māṃ samayamāsthitaḥ |
sa māṃ parvatadurgeṣu mārgamāṇo vinaśyati ||

yo māṃ sarvagataṃ paśyet sarvaṃ ca mayisaṃsthitam |
tasyāhaṃ nityamātmasthaḥ sa ca nityaṃ mayi sthitaḥ ||

sudurlabhā śive bhaktirdurlabhaṃ ca śivārcanam |
sudurlabhaṃ śive dānaṃ śivahomaśca durlabhaḥ ||

sudurlabhaṃ śivajñānaṃ tadabhyāso'ti durlabhaḥ |
sudurlabhataraṃ jñeyaṃ japadhyānaṃ śivātmakam ||

sudurlabhā tayoḥ prāptistadabhyāso'ti durlabhaḥ |
sudurlabhamidaṃ jñātvā śive bhaktiṃ samāśrayet ||

lābhasteṣāṃ manuṣyāṇāṃ ye śivaṃ śaranaṃ gatāḥ |
eṣā divā ca rātrau ca nityā śivagatāsmṛtiḥ ||

namaskārādisaṃyuktaṃ śiva ityakṣaradvayam |
jihvāgre vartate yasya saphalāṃ tasya jīvitam ||

ityeṣa vaḥ samāsena śivadharmo'khilaḥ kramāt |
nirdiṣṭaḥ prathamādhyāye śeṣasyaiva pravistaraḥ ||

ya imaṃ paṭhate nityaṃ śṛṇuyādvāpi bhaktitaḥ |
vimuktaḥ sarvapāpebhyaḥ śivaloke mahīyate ||

ḍākinyo vividhākārā rakṣāṃsi pretanāyakāḥ |
na tasya pīḍāṃ kurvanti tathā cānye'pi hiṃsakāḥ ||

śatravo nāśamāyānti sarvarogairna bādhyate |
sarvarogairna bādhyeta āpado na spṛśantitam ||

dhanamāyuryaśo vidyāṃ prabhāvamatulaṃ vrajet | (la)
śubhānyupacayaṃ yānti nityaṃ pūrṇaguṇānvitāḥ ||

iti śrīśivadharmaśāstre bhaktilakṣaṇaṃ nāma prathamodhyāyaḥ ||



dvitīyo'dyāyaḥ 

sanatkumāra uvāca 

liṅgārcanavidhiṃ pūrṇaṃ śrotumicchāmi tatvataḥ |
tvatprasādādviśeṣeṇa bhagavannandikeśvara ||

yatpuṇyaṃ sthāpite liṅge kṛte yacca śivālaye |
saṃmārjane ca yatpuṇyaṃ yatpuṇyamupalepane ||

p. 4(7)

nīrājjanauṣadhībījasnānamaṅgalavādane |
yatpuṇyamarcyadānena toyasnānena yadbhavet ||

pañcagavyapayasnāne dadhisnāne ca yatphalam |
ghṛtasnānena yatpuṇyaṃ ghṛtābhyaṃgena yadbhavet ||

madhusnānena yatpuṇyaṃ puṇyamikṣurasena ca |
udvartanāntarasnāne kuśapuṣpodakena ca ||

sauvarṇaratnatoyaiśca gandhacandanavāribhiḥ |
karpūrāgarutoyena śuddhatoyena yadbhavet ||

vilepanaiśca gandhādyairviliptena ca yadbhavet |
tālavṛntapradānena pradāne cāmarasya ca ||

muktāpuṣpārcanaiścaiva mālābhirliṅgapūraṇe |
puṣpamaṇṭapikāyāśca puṣpamālāvalambane ||

pūjābhaktiviśeṣaiśca vedyāmālāvalambane |
puṣpajātiviśeṣeṣu dhūpeṣvapi ca yatphalam |

grāmakheṭapurāṇāṃ ca deśadānena yatphalam |
tatpālanāpahāreṇa puṇyāpuṇyaṃ ca yadbhavet ||

yatīnāmannapānādimātropakaraṇāni ca |
datvā kiṃ labhate puṇyaṃ kṛtvā vā tatpratiśrayam ||

tatsaṃskāre tathā teṣāṃ pratyutthānābhivādane |
tatsaṃskāre tathā teṣāṃ pratyutyānābhivādane ||

yadapyanyadbhavet sūkṣmamajñānānnapracoditam |
tatsarvaṃ kathayāsmākaṃ bhaktānāmanukampayā ||

iti śrīśivadharmaśāstre dvitīyo'dhyāyaḥ ||



tṛtīyodhyāyaḥ 

nandikeśvara uvāca 

tvamatīvaśive bhaktaḥ padmayonisutottama |
tejate nikhilaṃ vakṣye śṛṇuṣvaikāgramānasaḥ ||

pūrvamekārṇave ghore naṣṭe sthāvarajaṃgame |
vivādaḥ sumahānāsīdbrahmaviṣṇvoḥ parasparam ||

ahaṃ kartāsmyahaṃ kartā na matto'nyo jagatprabhuḥ |
evamāhahariṃ brahmā brahmāṇaṃ ca haristathā ||

tayordarpāpahārārthaṃ prabodhārthaṃ ca devayoḥ |
madhye samabhavalliṃgamaiśvaraṃ taijasaṃ param ||

jvālāmālāvṛtaṃ divyaṃ maprameyamanaupamam |

p. 5(8) 

yojanāyutavistīrṇaṃ sthitaṃ tadvimale'mbhasi ||

jvālābhirmohitau tasya liṃgasya surasattamau |
tadā vismayamāpannau paśyantāvamarādhipau ||

gatāvūrdhvamadhastasya saṃpradhārya parasparam |
adhopalabdhaye viṣṇu ragādūrdhvaṃ pitāmahaḥ ||

adṛṣṭvā tamadhaścordhvaṃ tausametya parasparam |
kṛtāṃjalipuṭau bhūtvā liṅgaṃ tuṣṭāvatustadā ||

anāde devadeveśa vidyeśvara maheśvara |
sarvajña jñānavijñāna pradānaika namo'stu te ||

bahurūpamahārūpa sarvarūpottamottama |
paśupāśārṇavātīta varaprada namo'stu te ||

svabhāvanirmalā bhoga sarvavyāpin maheśvara |
yoga yogin mahāyogin yogeśvara namo'stu te ||

nirañjana nirādhāra svādhāra nirūpaplava |
prasannaparameśāya yogeśvara namo'stu te ||

jihvācāpalabhāvena mohitau naukvate stutau |
tatkṣantavyaḥ naupamyakaste stauti guṇārṇavam ||

liṅgotpattistavaṃ puṇyaṃ yaḥ śṛṇoti sadānaraḥ |
sarvapāpavinirmuktaḥ śivaloke mahīyate ||

liṅgamadhye paraṃ liṅgaṃ sthitaṃ prādeśasaṃmitam |
samādhistotrasampannau dṛṣṭavantau śivātmakam ||

naivatatkāñcanaṃ raupyaṃ tāmraṃ sphāṭikamauktikam |
lakṣamātraṃ sthitaṃ śāntaṃ kevalaṃ tacchivātmakam ||

tayostuṣṭo mahādevaḥ prādādvaramanuttamam |
kāraṇatvamanujñāpya tatraivāntaradhīyata ||

prāñjaliḥ praṇato viṣṇuḥ brahmāpi brahmatatparaḥ |
pūrvaṃ liṅgaṃ samabhyarcya tvattatkāryāṇi cakratuḥ ||

brahmā brahmākṣarairdivyairliṅgaṃ pūjayate sadā |
gandhapuṣpādibhirnityaṃ viṣṇuḥ pūjayate śivam ||

tataḥ prabhṛti brahmādyāḥ pratiṣṭhāpyasurāsurāḥ |
talliṅgānukṛtiṃ liṅgaṃ pūjayanṛṣayastadā ||

paraṃ garuḍaṃ śarīraṃ ca liṅgaṃ kṣetramanādivat |
yadādyamaiśvaraṃ tejastalliṅgaṃ pañcasaṃjñitam ||

p. 6(9)

kalpānte tasya liṅgasya dīyante sarvadevatāḥ |
dakṣiṇe līyate brahmā vāyataśca janārdanaḥ ||

hṛdaye caiva gāyatrī sarvavedottamottamā |
mūrdhnilīyanti vai vedāḥ saṣaḍaṅgapadakramāḥ ||

jaṭhare līyate sarvaṃ jagatsthāvarajaṅgamam |
utpādyate punastasmāt brahmādyaṃ sacarācaram ||

ākāśaṃ liṅgamityāhuḥ pṛthivī tasya pīṭhikā |
ālayaḥ sarvabhūtānāṃ layanālliṅgamucyate ||

liṅgamitthaṃ pratiṣṭhāpya sarvadevabhavodbhavam |
sthāpitaṃ tena sarvaṃ syāt pūjitañca na saṃśayaḥ ||

prāñjaliḥ prahito viṣṇu brahmāpi brahmatatparaḥ |
brahmā pūjayate nityaṃ liṅgaṃ śailamayaṃ śubham ||

tasya saṃpūjanāttena prāptaṃ brahmatvamuttamam |
śakro'pi devarājendro liṅgaṃ maṇimayaṃ śubham ||

nityamarcayate bhaktyā tena śakratvamāptavān |
liṅgaṃ hemamayaṃ kāntaṃ dhanado'rcayate sadā ||

tenāsau dhanado devo dhanadatvamāptavān |
viśvedevā mahātmāno raupyaliṅgaṃ manoharam ||

yajante vidhivadbhaktyā tena viśvatvamavāpnuvan |
vāyuḥ pūjayate nityaṃ liṅgaṃ pittalasaṃbhavam ||

vāyutvaṃ tenasaṃprāptamanaupamya guṇāvaham |
indranīlamayaṃ liṅgaṃ viṣṇurarcayate sadā ||

viṣṇutvaṃ prāptavāṃstenādbhutaikaṃ sanātanam |
vasavaḥ kā* taṃ liṅgaṃ pūjayanti vidhānataḥ ||

mahātmāno vasutvaṃ hi * * * * mahodayam |
aśvinaupārthivaṃ liṅgaṃ yajante tu vidhānataḥ ||

tena tāvapi nau devau divyadehagatāvubhau |
sphāṭikaṃ vṛddhimalliṅgaṃ varuṇorcayate sadā ||

varuṇatvaṃ hi saṃprāptaṃ tena ṛdhyā samanvitam |
liṅgamannamayaṃ puṇyamagniryajati bhāvitaḥ ||

agni tvaṃ prāptavāṃstena tejorūpasamanvitam |
tāmraṃ liṅgaṃ sadā kālaṃ bhaktyā devo divākaraḥ ||

p. 7(10)

arcyatena sadākālaṃ prāptaṃ sūryatvamuttamam |
muktāphalamayaṃ liṅgaṃ somaḥ pūjayate sadā ||

tena so'pi saṃprāptaḥ somatvaṃ satatojjvalam |
prakalakamayaṃ liṅgaṃ yajaṃte pannagottamāḥ ||

tena nāgāḥ subhogāḍhyāḥ prayāsyante paraṃ padam |
kṛṣṇāyasamayaṃ liṅgaṃ pūjayantyasurottamāḥ ||

rākṣasāśca mahātmānaḥ tenate'mitavikramāḥ |
trapusīsamayaṃ liṅgaṃ piśācāḥ pūjayanti te ||

tena ṛddhibalopetāḥ prayānti paramaṃ padam |
trailohikaṃ sadāliṅgaṃ yajante guhyakādayaḥ ||

tena bhogaphalopetāḥ prayāntīśvaramandiram |
vajralohamayaṃ liṅgaṃ yajante mātarassadā ||

mātṛtvaṃ prāpyatāḥ sarvāḥ prayānti paramaṃ padam |
evaṃ devāḥ sagandharvāḥ sayakṣoragarākṣasāḥ ||

pūjayanti sadākālamīśānaṃ suranāyakam |
tena pūjayate nityaṃ sarvaṃ liṅge pratiṣṭhitam ||

tasmāt sadārcayelliṅgaṃ yadīcche cchreya ātmanaḥ |
liṅgo devo mahādevaḥ sākṣādeva vyavasthitaḥ ||

anugrahāya lokānāṃ tasmālliṅgaṃ prapūjayet |
yo na pūjayate mohālliṅgaṃ tribhuvaneśvaram ||

na ca svargasya mokṣasya na ca rājyasya bhājanam |
yastu pūjayate nityaṃ liṅgaṃ tribhuvaneśvaram ||

sa svargamokṣarājyasya kṣipraṃ bhavati bhājanam |
tasmādekamanābhūtvā yāvajjīvaṃ pratijñayā ||

arcayanti mahādevamāpanno'pi sadābudhāḥ |
varaṃ prāṇaparityāgaḥ śiraso vā paricchade ||

natvai vā pūjyabhuñjīyāt bhagavantaṃ trilocanam |
evaṃ nirvahate yastu yāvajjīvaṃ śivārcanam ||

āyuṣyaṃ balamārogyaṃ sa rudro nātrasaṃśayaḥ |
na hi liṅgārcanādanyat puṇyamabhyadhikaṃ kvacit ||

iti vijñāya yatnena pūjanīyaḥ sadāśivaḥ |
yo liṅgadveṣṭisaṃmohāt sarvadevanamaskṛtam ||

naronarakagāmī syāt tasya saṃbhāṣaṇādapi |

p. 8(11)

liṅgamitthaṃ pratiṣṭhāpya sarvayatnairvidhānataḥ ||

yatpuṇyaphalamāpnoti tadekāgramanāḥ śṛṇu |
sarvayajñatapodāna tīrthavedeṣu yatphalam ||

tatphalaṃ koṭiguṇitaṃ sthāpyaliṅgaṃ labhennaraḥ |
yo liṅgaṃ sthāpayedekaṃ vidhipūrvaṃ sadakṣiṇam ||

sarvakāmoditaṃ puṇyaṃ koṭi koṭi guṇaṃ labhet |
mātṛtaḥ pitṛtaścaiva yasya codvahate striyaḥ ||

kulaikaviṃśamuttārya śivaloke mahīyate |
bhuktvā tu vipulān bhogān pralayesamupasthite ||

jñānayogaṃ samāsādya sa tatraiva vimucyate |
atha cedrājyamākāṃkṣejjāyate sa bhavāntare ||

saptadvīpasamudrāyāḥ kṣiteradhipatirbhavet |
yaḥ kṛtvā pārthivaṃ liṅgamarcayet sa vaidikam ||

ihaiva dhanavān chrīmānnante rudrañca jāyate |
sandhyāyāṃ yorcayelliṅgaṃ kṛtvā bimbena pārthivam ||

daśaikādaśikaṃ yāvat tasya puṇyaphalaṃ śṛṇu |
anenaiva tu dehena rudraḥ saṃcaratekṣitau ||

pāpahā sarvamartyānāṃ darśanasparśanādapi |
uddhṛtyadivisaṃsthāpya kulānāmekaviṃśatiḥ ||

sahāyaiḥ sahito nityaṃ modatedivirudravat |
yaḥ śrīvṛkṣamayaṃ liṅgaṃ sarvagandhopaśobhitam ||

kusumaiśca sugandhaiśca phalaiśca vividhaistathā |
bhakṣyabhojyānnapānaiśca ghṛtadīpasamāyutam |
tasya dakṣiṇapārśve tu vinyasedagaruṃ budhaḥ ||

dadyāt paścimabhāge tu śobhanāṃ tu manāśśīlām |
uttare candanaṃ dadyāt haritālaṃ tu pūrvataḥ ||

evaṃ vittānusāreṇa kṛtvā vibhavavistaram |
kṛṣṇapakṣe caturdaśyāṃ śivāya vinivedayet ||

sakṛdapyeva yaḥ kaścilliṅgaṃ kuryāddvijottamaḥ |
yatphalaṃ labhate tasya tanme nigadataḥ śṛṇu ||

sarvapāpavinirmuktaḥ sarvopadravavarjitaḥ |
niṣkalaḥ sarvagobhūtvā praviśecchivamavyayam ||

pāṃsunā krīḍamāno'pi liṅgaṃ kuryāttu yo naraḥ |

p. 9(12)

pratyānte labhate rājyamasapatnamakaṇṭakam |
sūkṣmeṇāpi prayogeṇāmeyaṃ puṇyasañcayam ||

śivamarcayato yasmāt tasmānnityaṃ samarcayet |
tasmātsarvaprayatnena śṛṇuyādbhāvitātmanaḥ ||

pāpakañcukamutsṛjya prāpnoti paramaṃ padam ||

iti śrīśivadharmaśāstre nandiprokte liṅgotpattirnāmatṛtīyodhyāyaḥ ||



atha caturtho'dhyāyaḥ

nandikeśvara uvāca

śivabhaktā mahotsāhāḥ śivārcanaparāyaṇāḥ |
sarvalakṣaṇasampannāḥ sarvārthān sādhayanti te ||

sarvadvandva sahādhīrāḥ nityamudyukta cetasaḥ |
paropakāra niratāḥ guruśuśrūṣaṇe ratāḥ ||

ārjavāmārdavāḥ svacchā anukūlāḥ priyaṃvadāḥ |
amānino buddhimantastyakta spardhāgataspṛhāḥ ||

śāntāḥ smitamukhāḥ bhadrā nityaṃ svāgatavādinaḥ |
alpavāco'lpavaktāraḥ śūrāstyāgaviśāradāḥ ||

śaucācāreṇa sampannā dayā dākṣiṇyagocarāḥ |
ḍambhamātsaryanirmuktāḥ yāthā tathyavibhāṣiṇaḥ ||

saṃvibhāgaparāḥ prājñāḥ aśaṭhāścāpyakutsitāḥ |
viṣayeṣvavanirlepāḥ padmapatramivāṃbhasaḥ ||

nadīnānāpimalinā na ca roṣavaśānagāḥ |
bhavanti bhāvitātmānaḥ susnigdhāḥ sādhusevitāḥ ||

na pāṇipādavākcakṣuḥ śrotraśīrṣodarairbudhāḥ |
cāpalāni na kurvanti sarvasaṃgavivarjitāḥ ||

rudrātmāno rudraparāḥ rudrāṃśā rudrabhāṣitāḥ |
ityācārasamāyuktā bhavantibhuvimānavāḥ ||

ekāntaṃ bhaktimāsthāya parāparavibhūtaye |
pūjanīyaḥ śivo nityaṃ guṇeṣveteṣu vartatā ||

sarveṣāmeva pātrārṇāmatipātraṃ maheśvaraḥ |
patanāt trāyate yasmāt datīvanarakārṇave ||

kiñcidvedamayaṃ pātraṃ kiñcitpātraṃ tapomayam |
āgamiṣyati yatpātraṃ tatpātraṃ tārayiṣyati ||

tasya pātrasya mahātmyāddānamaṇvāpi cākṣayam |
tasmāttasmai sadā deyamaprameyaphalārthibhaiḥ ||

śivedattaṃ hutaṃ japtaṃ pūjābali nivedanam |
ekāntātyantaphaladaṃ tadbhavennātra saṃśayaḥ ||

p. 10(13)

ekāntātyantaphaladaṃ tadbhavennātrasaṃśayaḥ |
bhaktyā vittānusāreṇa kuryātprāsādasañcayam ||

alpe mahati vā puṇyaṃ phalamāḍhyadaridrayoḥ ||


vittaśāṭhyena yatkuryāt phalamāḍhyo'pi yo naraḥ |
tattatphalamavāpnoti pralobhākrāntamānasaḥ ||

tasmāttribhāgaṃ vittasya jīvanāyaprakalpayet |
bhāgadvayaṃ ca dharmārthe anityaṃ jīvitaṃ yataḥ ||

bhaktyā pracoditaḥ kuryāt alpavitto'pi yo naraḥ |
mahāvibhavasāro'pi na kuryādbhaktivarjitaḥ ||

sarvasvamapi yo dadyāt śive bhaktivivarjitaḥ |
na tena dharmabhāgīsyāt bhaktirevātra kāraṇam ||

na tattapobhiratyugrairna ca sarvairsahāmakhaiḥ |
gacchechivapuraṃ divyaṃ muktvābhaktiṃ śivātmikām |
mṛdādīṣṭakaśailaṃ vā yaḥ kuryāttu śivālaye ||

trisaptakulasaṃyuktaḥ śivaloke mahīyate ||

mṛṇmayāt koṭiguṇitaṃ puṇyaṃ syāddārubhiḥ kṛtaiḥ |
koṭi koṭiguṇaṃ puṇyaṃ mṛtkāṣṭhādiṣṭakāmaye ||

dviguṇaṃ dviguṇaṃ puṇyaṃ śailaje syācchivālaye |
mṛcchailayoḥ samaṃ jñeyaṃ puṇyamāḍhyadaridrayoḥ ||

tatra tatra gataḥ kuryāḥ puṇyaṃ śaileṣṭakāmayam |
navaṃ purāṇarahitaṃ tasyāṃ kuryāchivālayam ||

aṣṭeṣṭakasamāyuktaṃ yaḥ karoti śivālayam |
vidhūtapāpasaṃghātaḥ so'pi gacchecchivālayam ||

krīḍamāno'pi yaḥ kuryāt bālabhāvācchivālayam |
rudraloke bhavet so'pi vimānaṃ sarvagāmikam ||

divyamālāparikṣiptaṃ divyagandharvaśobhitam |
ḍolāvikṣepasaṃyuktaṃ ghaṇṭācāmarabhūṣitam ||

muktādāmavitānena śobhitaṃ sūyasaprabham |
apsarogaṇasaṅkīrṇaṃ sarvakāmasukhapradam ||

tatroṣitvā mahābhogai varṣakoṭyayutaṃ sukhī |
kramādāgatyaloke'smin rājā bhavati dhārmikaḥ ||

paśyan pariharan jantūn mārjanyāmṛdusūkṣmayā |
śanaiḥ saṃmārjanaṃ kuryāccāndrāyaṇaphalaṃ labhet ||

p. 11(14) nāhāravaśajīrṇāyā vandhyāyāḥ kṣīravatsajam |
rogārtanavasūtāyā gobhyo gomayamāharet ||

svasaṃsthaṃ gomayaṃ gṛhya sthāne vā patitaṃ śubhe |
uparyuparisantyajya pratyagraṃ jantu varjitam ||

vastrapūtena toyena yaḥ kuryādupalepanam |
paśyan pariharan jantūn cāndrāyaṇaphalaṃ labhet ||

yaḥ kuryātsarvakāryāṇi vastra pūtena vāriṇā |
sa muniḥ samahāsādhuḥ sa yogī saśivaṃ vrajet ||

kṣaranti sarvadānāni yajñahomabalikriyāḥ |
na kṣaretamahādānamabhayaṃ sarvadehinām ||

nairantaryeṇa yaḥ kuryātpakṣaṃ saṃmājanārcanam |
yugakoṭiśataṃ sāgraṃ rudraloke mahīyate ||

tasyānte sa caturvedaḥ surūpaḥ priyadarśanaḥ |
āḍhyaḥ sarvagaṇopeto rājā bhavatidhārmikaḥ ||

samparkeṇāpi yaḥ kuryāt naraḥ karmaśivālaye |
so'pi dehatrayāt jñānaṃ prāpyaśāntimavāpnuyāt ||

rudradevanikāyeṣu kaścijjñānamavāpnuyāt |
kaścideva tu medinyāṃ labdhvā jñānaṃ vimucyate ||

tāvadbhramati saṃsāre duḥkhaśokapariplutaḥ |
na bhavanti śivebhaktā yāvat sarve'pi dehinaḥ ||

samāsaktaṃ yathā cittaṃ jantorviṣayagocare |
yadināmaśivo'pyevaṃ ko na mucyeta bandhanāt ||

yaḥ kuryāt kuṭṭimābhūmiṃ darpaṇodara sannibhām |
nānāvarṇavicitrāṃ vā vicitrakusumojjvalām ||

kvacitkalaśavinyastāṃ paṅkajādyupaśobhitām |
manobhiramyāṃ susnigdhāṃ śivayatanasaṃsadi ||

yāvaddhastā bhavedbhūmiḥ samantādupaśobhitā |
tāvadyugasahasrāṇi śivaloke mahīyate ||

sudhāpraliptaṃ yaḥ kuryāt sarvayatnaiḥ śivālayam |
tāvatpuṇyaṃ labhetso'pi yāvadāyatane kṛte ||

pratyabdaṃ yaḥ prakurvīta śaṃbhorāyatanaṃ budhaḥ |
dhavalaṃ kṣīrasudhayā yathāśobhaṃ ca varṇakaiḥ ||

yāvantyabdāni kurute dhavalaṃ tacchivālayam |

p. 12(15)

tāvadyugasahasrāṇi śivaloke mahīyate ||

kārayeccitraśāstrajñairyatnāccitraṃ śivālaye |
rudrāvatārakrīḍādiprayogairāgamoditaiḥ ||

tāvattadrūparūpāṇi surūpāṇi tu lekhayet |
tāvadyugasahasrāṇi rudraloke mahīyate |
khaṇḍasphuṭitasaṃskāraṃ yaḥ prakuryācchivālayam ||

ārāmāvasayābhyāṃ ca labhate maulikaṃ phalam |
nāstirudrasamo devo nāsti rudrasamoguruḥ ||

nāstirudrasamaṃ jñānaṃ nāstirudrasamaṃ tapaḥ |
nirdhūtamalapaṃkāya svabhāvāmalamūrtaye ||

sitabhasmāṃgadehāya deveśāya namostu te |
nīlakaṇṭhāya śarvāyā jāyā vyaktamūrtaye ||

bahurūpāya kāntāya śāśvatāya namostu te |
parāya parameśāya saptāṃgāyamahātmane ||

atītaguṇasaṃghāya viśveśāya namostu te |
mahābhogīndrahārāya piṅgalocanacārave ||

vicitra caritāḍhyāya anantāya namostu te |
sarvapraṇatadehāya svayamapraṇatātmane |

pūjyānāmapi pūjyāya namastryakṣāya śūline ||

brahmendraviṣṇuvandyāyotpattisthiti hetave |
bhuktimukti pradānāya saṃskṛtāya namostu te ||

vāmāya vāmarūpāya vāmācārāya bhāmine |
vāmakāntāya vāmāyeśānāya namo'stu te ||

ya idaṃ kīrtayetpuṇyaṃ prāsādādhyāyamuttamam |
sarvadoṣavinirmukto gāṇāpatyamavāpnuyāt ||

iti śrīśivadharmaśāstre prāsādādhyāyaścaturthaḥ ||



atha pañcamaḥ

nandikeśvara uvāca 

liṅgamūrtermaheśasya śivasya parameṣṭhinaḥ |
snānakāle prakuvīta jayaśabdādimaṅgalam ||

triśūlaśaṃkhavajrābja śrīvatsasvastikādibhiḥ |
haimaraupyādipātrasyaiḥ kalpitairgomayādibhiḥ ||

nānāvarṇakasaṃyuktairakṣataistilataṇḍulaiḥ |

p. 13(16)

siddhārthairdadhisaṃmiśrairyathā śobhaṃ prakalpayet ||

dūrvāpadmapradīpādyaiścūtāśvatyādipallavaiḥ |
oṣadhībhiśca medhyābhiḥ sarvabījairyavāṃkuraiḥ ||

aṣṭamyādiṣu sarveṣu divaseṣūtsaveṣu ca ||

parvakāleṣu puṇyeṣu puṣyapaurṇimaparvaṇi |
śaṃkhabheryādinirghoṣairmahadbhirgeyasaṃyutaiḥ ||

kuryānnīrājanaṃ liṅgaiḥ śivamuddiśyamaṅgalaiḥ |
yāvatparvāṇi kurute bhaktyānīrājanaṃ śive ||

tāvadvarṣasahasrāṇi rudraloke mahīyate |
snānakāle trisaṃdhyaṃ ca yaḥ kuryādgeyavāditam ||

nṛttaṃ vā mukhavādyaṃ vā tasya puṇyaphalaṃ śṛṇu |
yāvantyahānikurute geyaṃ nṛttādi vā śatam ||

tāvadyugasahasrāṇi rudraloke mahīyate |
kapilā pañcagavyena kuśavāriyutena tu ||

snāpayenmantrapūtena brahmasnānaṃ hi tat smṛtam |
ekāhamapi yo liṅge brahmasnānaṃ samarcayet (samācaret) ||

sa vidhūyāśupāpāni rudraloke mahīyate |
kapilāpañcagavyena vidhināsakṛdā caret ||

snānaṃ śataguṇaṃ jñeyamitarasmānnasaṃśayaḥ |
devāgnikāryamuddiśya dehaśuddhiṃ ca śāśvatīm |
kapilāmāharettasmān munidevādivabditām ||

kapilāṃ yaḥ pibecchūdraḥ śivakāryārthanirmitām |
sapacyeta mahāghore suciraṃ narakārṇave ||

varṣakoṭisahasrāṇi yatpāpaṃ samupārjitam |
kalpakoṭisahasraṃ tu yatpāpaṃ samupārjitam ||

ghṛtasnānena tatsarvaṃ dahatyāgnirivendhanam |
kṛṣṇāṣṭamyāṃ ghṛtasnānaṃ kṛtvā liṅge sakṛnnaraḥ ||

kulaikaviṃśamuddhṛtya śivaloke mahīyate |
ayutaṃ yogavāṃ dadyāt dīgdhrīṇāṃ vedapārage ||

vastrādihemayuktānāṃ kṣīrasnānasya tatphalam |
sakṛdāḍhakena payasā yo liṅgaṃ snāpayennaraḥ ||

rājatena vimānena somalokaṃ sagacchati |
snāpya dadhnā sakṛlliṅgaṃ viṣṇuloke mahīyate ||

madhunā snāpayitvā tu candraloke mahīyate |

p. 14(10) 

snāpayettilatailena hastayantrodbhavena ca |

śvetapītakapiṣṭairvā vāyuloke mahīyate |
snānamikṣurasenāpi yo liṅgaṃ sakṛdācaret ||

labhedvaidyādharaṃ lokaṃ sarvakāmasamanvitam |
phalodakena yo liṅgaṃ sakṛtsnāpayate naraḥ ||

utsṛjya pāpakalilāṃ pitṛloke mahīyate |
sitenabhasmanāsnāpya sakṛlliṅgaṃ pramodate ||

candrāṃśunirmalaḥ śrīmān śivavatsomamaṇḍale |
vastrapūtena toyena liṅgaṃ snāpayate sakṛt ||

sa sarvakāmatṛptātmā vāruṇaṃ lokamāpnuyāt |
kuśodakena yo liṅgaṃ bhaktyāsnāpayate sakṛt ||

kāñcanena vimānena brahmalokaṃ sagacchati |
gandhacandanatoyena snāpayetsakṛdīśvaram ||

gandharvalokamāpnoti gandharvaiśca sapūjyate |
puṣpodakena sāvitraṃ kauberahemavāriṇā ||

ratnodakena cāpyaindraṃ lokaṃ prāpya samodate |
pāṭalotpalapadmāni karavīrāṇisarvadā ||

snānakāleṃbuyojyāni kṣīrāṇi suratrīṇi ca |
eṣāmekatarasnānaṃ triḥkṛtvā bhaktitaḥ śive ||

vidhūyapāpakalilaṃ śivaloke mahīyate |
karpūrāgarutoyena yo liṅgaṃ snāpayetsakṛt ||

sarvapāpavinirmuktaḥ śivaloke mahīyate |
mantrāṣṭaśatajaptena vimalenāṃbhasā śivam ||

snāpayitvā sakṛdbhaktyā śivaloke mahiyate |
kulaikaviṃśamuddhṛtya śivaloke mahīyate ||

pitṝnuddiśya yo liṅgaṃ snāpayecchītavāriṇā |
tṛptāḥ svargaṃ prayāsyanti pitaronarakādapi ||

liṅgaṃ śītāmbunā snāpya dhāroṣṇapayasā tataḥ |
snāpya paścād ghṛtenāpi ghṛtameva viśiṣyate ||

etat snānatrayaṃ kṛtvā pūjayitvā ca bhaktitaḥ |
aśvamedhasahasrasya phalamāpnoti mānavaḥ ||

mṛtkumbhāttāmrajaiḥ kumbhaiḥ snānaṃ śataguṇottaram |

p. 15(18)

raupye lakṣāntaraṃ puṇyaṃ hemekoṭyādhikaṃ phalam |
liṅgasya darśanaṃ puṇyaṃ darśanāt sparśanaṃ tathā ||

sparśanādarcanaṃ śreṣṭhaṃ ghṛtasnānamataḥparam |
ihāmutrakṛtaṃ pāpaṃ ghṛtasnānena dehinām ||

kṣapaye cchaṃkaro yasmāt tasmāt snānaṃ samācaret |
daśāparādhāṃstoyena kṣīreṇa tu śataṃ kṣamet ||

sahasraṃ kṣamate dadhnā ghṛtenāpyayutaṃ kṣamet |
nairantaryeṇa yo māsaṃ ghṛtasnānaṃ samācaret ||

ekaviṃśatkulopeto vasecchivapure sukhī |
snānaṃ phalaśataṃ jñeyamabhyaṅgaḥ pañcaviṃśatiḥ ||

phalānānte sahasraṃ tu mahāsnānaṃ prakīrtitam |
ghṛtasnāna ghṛtābhyaṃge kuryālliṅgaṃ virūpaṇam ||

yavagodhūmajaiścūrṇaiḥ kṣālayedgandhayojitaiḥ |
sukhoṣṇenāmbhasā cāpi snāpayedantarāntare ||

gharṣayedvilvapatraiśca tadvatpīṭhaṃ ca śodhayet |
daśadhenu sahasrāṇi yaddatvā labhate phalam ||

tatphalaṃ labhate sarvaṃ liṅgasyodvartane kṛte |
arghyaṃ puṣpaphalopetaṃ yaḥ śivāya nivedayet ||

daśavarṣasahasrāṇi śivaloke mahīyate |
āpaḥ kṣīraṃ kuśāgrāṇi ghṛtaṃ dadhisataṇḍulam ||

tilāḥ siddhārthakāścaivamarghyamaṣṭāṅgamucyate |
gandhodakena saṃmiśraṃ mudakārghyācchatottaram ||

pañcagavyasamāyuktamarghyaṃ śataguṇaṃ bhavet |
yo'rghyamaṣṭāṃgamāpūrya liṅgamūrdhniniveśayet ||

daśavarṣasahasrāṇi rudraloke samodate |
yavataṇḍulasavrīhimāṣairakṣatamādiśet ||

ghṛtaṃ vinākṣataṃ grāhyamiti kecidvyavasthitāḥ |
dāraveṇārghyapātreṇa datvārghyaṃ yatphalaṃ bhavet ||

tasmād daśaguṇaṃ puṇyaṃ mṛtpātreṇa prakīrtitam |
tāmrapātrārghyadānena puṇyaṃ śataguṇottaram ||

palāśapadmapatrābhyāṃ tāmrapātrasamaṃ bhavet |
raupyapātreṇa vijñeyamarghyaṃ lakṣaguṇottaram ||

suvarṇapātravinyastamarghyaṃ koṭiguṇottaram |

p. 16(19)

evaṃ snānārghyanaivedyaṃ balipūjādiṣu kramāt |
pātrāntaraviśeṣeṇa tatphalaṃ cottarottaram ||

raupyapātrapradānena tasmācchataguṇaṃ śive |
phala(śata)koṭisuvarṇasya yo dadyādvedapārage ||

śivāya raupyaṃ yo dadyāt tasya puṇyaṃ tato'dhikam |
hemapātrāṇi yo bhaktyā śivāya vinivedayet ||

na śakyaṃ tasya tadbhaktuṃ puṇyānantyaṃ viśeṣataḥ |
tulyaṃ śive phalaṃ proktaṃ dānādāḍhyadaridrayoḥ ||

tayorapyadhikaṃ tasya yaḥ śive bhāvanādhikaḥ |
vibhavesati yo mohāt na kuryādvidhivistaram ||

naiva tatphalamāpnoti pralobhākrāntamānasaḥ |
tasmāt patraiḥ phalaipuṣpaistoyādyaiścaiva yatkṛtam ||

tadanantaphalaṃ jñeyaṃ bhaktirevātrakāraṇam |
liṅgasyā lepanaṃ kṛtvā divyagandhaiḥ sugandhibhiḥ ||

varṣakoṭiśataṃ divyaṃ raudraloke mahīyate |
gandhānulepanāt puṇyaṃ dviguṇaṃ candanasya tu ||

candanāccāgarujñeyaṃ puṇyamaṣṭaguṇottaram |
kṛṣṇāgarorviśeṣeṇa dviguṇaṃ phalamiṣyate ||

tasmācchataguṇaṃ puṇyaṃ kuṃkumasya vidhīyate |
candanāgarukarpūrairaślakṣaṇapiṣṭaiḥ sakuṅkumaiḥ ||

liṅgaṃ paryāptamālipya kalpakoṭiṃ vaseddivi |
saṃvījyatālavṛntena liṅgaṃ gandhaiḥ pralepitam ||

daśavarṣasahasrāṇi vāyuloke mahīyate |
bhaktyānivedyarudrāya tālavṛntaṃ suśobhanam ||

daśavarṣasahasrāṇi rudraloke mahīyate |
māyūravyajanaṃ datvā śivāyātīvaśobhanam |

varṣakoṭiśataṃ puṇyaṃ rudraloke mahīyate |
śivāyacāmaraṃ datvā maṇḍīmaṇḍavibhūṣitam ||

hemarūpyādidaṇḍaṃ vā tasya puṇyaphalaṃ śṛṇu |
cāmarāsaktahastāgra divyastrīparivāritaḥ ||

mahābhogavimānasthaściraṃ śivapure vaset |
ityarcanā pracāreṇānantaṃ puṇyasañcayam ||

sanatkumāraḥ 

pu'paiḥ katividhaiḥ pūjā kartavyā kathayasva me |

p. 17(20)

śrīnandikeśvara uvāca

puṣpairāraṇyasaṃbhūtaiḥ patrairvā girisaṃbhavaiḥ ||

aparyuṣitaniśchidraiḥ prokṣitairjantuvarjitaiḥ |
ātmārāmodbhavaiścāpi puṣpaiḥ saṃpūjayecchivam ||

puṣpajātiviśeṣeṇa bhavetpuṇyaṃ viśeṣataḥ |
tapaśśīlaguṇopete pātre vedasya pārage ||

daśadatvā suvarṇāni yatphalaṃ kusumeṣṭa tat |
arkapuṣpepicaikasmin śivāya vinivedite ||

daśa datvā suvarṇāni yatphalaṃ tadavāpnuyāt |
evaṃ puṣpaviśeṣeṇa phalaṃ tadadhikaṃ bhavet ||

evaṃ puṣpāntare jñeyaṃ phalaṃ syāt tannibodhata |
arkapuṣpasahasrebhyaḥ karavīraṃ viśiṣyate |

bilvapatrasahasrebhyaḥ padmamekaṃ viśiṣyate |
padmapuṣpasahasrebhyo bakapuṣpaṃ viśiṣyate ||

bakapuṣpasahasrebhyo hyekaṃ dhuttūrakaṃ varam |
dhattūrakasahasrebhyo bṛhatpuṣpaṃ viśiṣyate ||

bṛhatpuṣpasahasrebhyo droṇapuṣpaṃ viśiṣyate |
droṇapuṣpasahasrebhyo hyapāmārgaṃ viśiṣyate ||

apāmārgasahasrebhyaḥ kuśapuṣpaṃ viśiṣyate |
kuśapuṣpasahasrebhyaḥ śamīpuṣpaṃ viśiṣyate ||

śamīpuṣpasahasrebhyo śrīmannīlotpalaṃ varam |
sarveṣāmeva puṣpāṇāṃ pravaraṃ nīlamutpalam ||

nīlotpalasahasreṇa yo mālāṃ saṃprayacchati |
śivāya vidhivadbhaktyā tasya puṇyaphalaṃ śṛṇu ||

kalpakoṭisahasrāṇi kalpakoṭiśatāni ca |
vasecchivapure śrīmān śivatulyaparākramaḥ |

śeṣāṇāṃ puṣpajātīnāṃ yatphalaṃ parikīrtitam |
tatphalasyānurūpeṇa śivaloke mahīyate ||

śamīpuṣpaṃ bṛhatyāśca kusumaṃ tulyamucyate |
karavīrasamājñeyā jātīvijayapāṭalā ||

śvetamandārakusumaṃ karañjendratarudbhavam |
vaibhītakānipuṣpāṇi tatpatrāṇi ca varjayet ||

durgandhānyugragandhīni kusumāni vivarjayet |

p. 18(21)

gandhavantyapavitrāṇi yāni kānyapi varjayet ||

gandhahīnamapigrāhyaṃ pavitraṃ yatkuśādikam |
sātvikaṃ taddhikusumaṃ pavitraṃ nāmatatsamam ||

kanakādīni śastāni rātrau deyāniśaṅkare |
divāśeṣāṇi puṣpāṇi divātrāntumallikā ||

praharantiṣu te jāti karavīramaharniśam |
keśakīṭopabaddhāni śīrṇaparyuṣitāni ca ||

svayaṃ paṭhitapuṣpāṇi tyajedupahatāni ca |
mukulairnārcayeddevaṃ pakvānnaṃ na nivedayet ||

phalaṃ kvacitaviddhaṃ ca yatnāt pakvaṃ parityajet |
alābhena tu puṣpāṇāṃ patrāṇyāpi nivedayet ||

patrāṇāmapyalābhena phalānyapi nivedayet |
palānāmapyalābhena tṛṇagulmoṣadhīrapi ||

oṣadhīnāmapyalābhena bhaktyābhavatipūjitaḥ |
pratyekamuktapuṣpeṣu daśasauvarṇikaṃ phalam ||

sraṅnibaddheṣu teṣveva dviguṇaṃ phalamucyate |
sugandhairmuktapuṣpaiśca yo liṅgaṃ saṃprapūjayet ||

mālābhirvāpi sughanaisso'nantaṃ phalamāpnuyāt |
bilvapatrairakhaṇḍairyaḥ sakṛlliṅgaṃ prapūjayet ||

sarvapāpavinirmuktaḥ śivaloke mahīyate |
dhurttūrakaiśca yo liṅgaṃ sakṛtpūjayate naraḥ ||

sa golakṣapradānasya (śivaṃ prāpya) phalaṃ prāpya śivaṃ vrajet |
bṛhatī kusumairbhaktyā yo liṅgaṃ sakṛdarcayet ||

gavāmayutadānasya phalaṃ prāpya śivaṃ vrajet |
mallikotpalapadmāni jātīpunnāgacampakāḥ ||

aśokaśvetamandāra karṇikārabakāni ca |
karavīrārkamandāraśamītagarukesarāḥ ||

kuśāpāmārgakumudakadambadroṇajā api |
saugandhikāsanānāṃgabinduśaivalikārjunāḥ ||

tulasī kuravakolanāgavañjulasaṃbhavāḥ |
nandyāvartāśca śamyāka tilakaṃ navamālikā ||

tarupunnāgadantī ca mālatī kuṭajādayaḥ |
puṣpairetairyathā labdhairyonaraḥ pūjayecchivam ||

sa yat phalamavāpnoti tadekāgramanāḥ śṛṇu |

p. 19(22)

sūryakoṭipratīkāśairvimānaissārvagāmikaiḥ |
puṣpamālāparikṣiptairgītavāditranāditaiḥ ||

tantrīmadhuravādyaiśca svacchandagamanālasaiḥ |
rudrakoṭyāsamākīrṇairdevadānavadurlabhaiḥ ||

dodhūyamānaścāmaraistu stūpamānaḥ surāsuraiḥ |
gacchecchivapuraṃ divyaṃ yatra vā rucitaṃ bhavet ||

etairvā pīhakusumaiḥ jalasthalaruhaiḥ śivam |
saṃpūjyaprokṣitairbhaktyā śivaloke mahīyate ||

śivasyopariyaḥ kuryāt sughanaṃ puṣpamaṇṭapam |
śobhitaṃ puṣpamālābhirāpīṭhāntaṃ pralambibhiḥ ||

atyuccakairmahāyānairdivyagandhopaśobhitaiḥ |
sarvoparicaraḥ śrīmān nāste śivapure sukhī ||

anekākāravinyastaṃ kusumairgūhakaṃ śive |
yaḥ kuryātparvakāleṣu vicitrakusumojjvalam ||

sapuṣpakavimānānāṃ sahasraparivāritaḥ |
divyastrisukhasaṃbhoga krīḍāratisamanvitaḥ ||

akṣayaṃ modate kālamatiraskṛtaśāsanaḥ |
śivādisarvalokeṣu yatreṣṭaṃ yāti tatra saḥ ||

pūjādibhaktivinyāsa racanādiṣu sarvataḥ |
phalametatsamāsena jñeyaṃ vittānusārataḥ ||

mālābhirveṣṭayedvediṃ liṅgaṃ sampūjyayatnataḥ |
liṅgaṃ vedirbhaveddevī liṅgaṃ sākṣānmaheśvaraḥ ||

tayoḥ saṃpūjanātsyātāṃ devī devaśca pūjitau |
svayamutpādyapuṣpāṇi yaḥ śivaṃ pūjayet svayam ||

tāni sākṣāt sugṛhṇāti tadbhaktyā satataṃ śivaḥ |
tāvadvarṣasahasrāṇi rudraloke mahīyate ||

yaḥ prakuryācchivārāmamāmravilvādiśobhitam |
jātīvijayarājākaṃ karavīrābjarkakubjakaiḥ ||

punnāganāgavakulairaśokotpalacampakaiḥ |
kadalīhemapuṣpādyaiḥ tasya puṇyaphalaṃ śṛṇu ||

yāvattatpatrakusumaṃ nījasūtīphalāni ca |
tāvat varṣasahasrāṇi rudraloke mahīyate ||

lākṣā prāṇyaṃganirmuktaṃ dhūpaṃ dadyāt sakṛt sakṛt || śive ||

p. 20(23)

caturvedi gṛhe janma prāpnoti satataṃ sukhī |
kṛṣṇāgaruṃ sakarpūraṃ dhūpaṃ dadyāt sakṛcchive ||

nairantaryeṇa māsārdhaṃ tasya puṇyaphalaṃ śṛṇu |
kalpakoṭisahasrāṇi kalpakoṭiśatāni ca ||

bhuṅkte śivapurebhogān tasyānte sa mahīpatiḥ |
gugguluṃ ghṛtasaṃyuktaṃ sākṣād gṛhṇāti śaṅkaraḥ ||

māsārdhamāsadānena śivaloke mahīyate |
kṛṣṇapakṣe caturdaśyāṃ yaḥ sājyaṃ gugguluṃ dahet |

aparādhasahasraikamihāmutrakṛte śivaḥ |
kṣamateśaṃkaro yasmāt tasmāddeyaṃ śive sadā ||

devadāruṃ nameruṃ ca sarjaṃ śrīvāsakṛndrataḥ |
śrīphalaṃ cājyasaṃmiśraṃ datvāpnoti parāṃ śriyam ||

ebhyassugandhadhūpaṃ tu ṣaḍsahasraguṇottaram |
agarurdaśasāhasraṃ dviguṇaṃ cāsitāgaruḥ ||

gugguluḥ daśasāhasraṃ saghṛto dviguṇaṃ bhavet |
prayacchedgugguluṃ nityamājyayuktaṃ viśeṣataḥ ||

dvesahasre phalānāntu mahiṣākṣasya gugguloḥ |
dagdhvābdamājyasaṃmiśraṃ śivatulyaḥ prajāyate ||

nameruṃ ghṛtasaṃyuktaṃ dagdhvā bilvamathāpivā |
agniṣṭomasya yajñasya phalaṃ prāpnoti mānavaḥ ||

śodhayet pāpasaṃyuktaṃ puruṣaṃ tu na saṃśayaḥ |
kṛṣṇāgarurdahet pāpaṃ tuṣāgnirivakāñcanam ||

yo'ntaḥ śivapuraṃ sarvaṃ susugandhaiḥ pralepayet |
kavāṭadvārakuḍyāditiryagūrdhvaṃ savaidikam ||

vāsayetpuṣpamālābhiḥ dhūpaiścāpisugandhibhiḥ |
yaḥ kuryātsakṛdapyevaṃ puṇyaṃ tadavadhāraya ||

sarvakāmasusaṃpūrṇairmahāyānairanekaśaḥ |
āpūrayan diśaḥ sarvāḥ āyojanasugandhibhiḥ ||

kalpakoṭiśataṃ divyaṃ śivaloke mahīyate |
tasyānte dharmaśeṣeṇa trailokyādhipatirbhavet ||

ṛtāvṛtau tu yaḥ kuryāt devagandhaiḥ śivālayam |
sa samastakulopetaḥ śivaloke mahīyate ||

trivṛcchuklaṃ supītaṃ vā paṭṭasūtrādinirmitam |
datvopavītaṃ rudrāya bhavedvedāntago naraḥ ||

p. 21(24)

vāsāṃsi suvicitrāṇi sāravanti mṛdūni ca |
dhūpitāni śive dadyāt dvidvaikāni navāni ca ||

yāvattadvastratantūnāṃ parimāṇaṃ vidhīyate |
tāvadvarṣasahasrāṇi rudraloke mahīyate ||

truṭimātraṃ tu yo dadyāt ddhemaṃ liṅgasya mūrdhani |
indrasyārdhāsanī tāvat yāvadindrāścaturdaśa ||

evamevānusāreṇa phalaṃ jñeyaṃ samāsataḥ |
sarveṣāṃ hemapātrāṇāṃ makuṭānāṃ ca sarvaśaḥ ||

yo'rkaparṇapuṭaṃ madhuparkasya mantritam |
nivedayīta śarvāya so'śvamedhaphalaṃ labhet ||

śālītaṇḍūlakaprasthaṃ kuryādannaṃ susaṃskṛtam |
śivāya taccaruṃ dadyāccaturdaśyāṃ viśeṣataḥ ||

hāridraṃ kṛsaraṃ śuklaṃ pāyasaṃ yācakaṃ tathā |
gulakhaṇḍājyasaṃmiśramevamādyaṃ nivedayet ||

yāvantastaṇḍulāstasminnaivedyaparisaṃkhyayā |
tāvadvarṣasahasrāṇi śivaloke mahīyate ||

gulakhaṇḍakṛtānāṃ ca bhakṣāṇāṃ vinivedane |
ghṛtena pālitaṃ tasmādannānāṃ taccaturguṇam ||

mārjitāpānakādyānāṃ bhakṣyārthaṃ phalamiṣyate |
tadardhaṃ salilasyāpi vāsitasya nivedane ||

mātuluṅgaphalādyāni supakvāni nivedayet |
śivāyatatphalaṃ tasya yadbhakṣāṇāṃ nivedane ||

ghṛtadīpapradānena śivāyaśatayojanam |
yāmyaṃ tamolaṃghayitvā vimānaṃ sūryasannibham ||

pañcasaugandhikopetaṃ tāmbūlaṃ yo nivedayet |
śivāya gurave caiva tasya puṇyaphalaṃ śṛṇu ||

sugandha tejāstejasvī sarvāvayavaśobhitaḥ |
varṣakoṭiśataṃ divyaṃ śivaloke mahīyate ||

yaḥ kuryātkārtikemāsi śobhanāṃ dīpamālikām |
ghṛtena ca caturdaśyāmamāvāsyāṃ viśeṣataḥ ||

sūryāyutapratīkāśatejasā bhāsayeddiśaḥ (yandiśaḥ) |
tejorāśirvimānasthaḥ kulamuddhṛtya sarvataḥ |

yāvatpradīpasaṃkhyānāṃ ghṛtenāpūryavodhitaḥ |

p. 22(25)

tāvadyugasahasrāṇi rudraloke mahīyate |
dīpavṛkṣān samudvodhya śivasyā yatane śubhān ||

pūrvasmāddviguṇaṃ puṇyaṃ labhate nātra saṃśayaḥ |
sthānadīpaṃ samudbodhya lohagucchaṃ śivālaye ||

datvā kāryāsayuktaṃ tu śivaloke mahīyate |
śirasā dhārayeddīpaṃ sarvarātraṃ śivāgrataḥ ||

lalāṭevāyahastābhyāmudyuktaśca tathorasi |
sūryāyutapratīkāśairvimānairūpaśobhitaiḥ ||

kalpāyutaśataṃ divyaṃ śivaloke mahīyate |
śivasya purato dadyāddarpaṇaṃ cārunirmitam |

paryantaśobhitaṃ kṛtvā śvetamālyaiśca candanaiḥ |
candrāṃśunirmalaḥ śrīmān subhagaḥ kāmarūpadhṛk ||

kalpāyutasahasrāṇi śivaloke mahīyate |
kṛtvā pradakṣiṇaṃ bhaktyā śivasyā yatanaṃ naraḥ ||

aśvamedhasahasrasya sukhena labhate phalam |
namaskāraḥ smṛto yajña sarvayajñottamaḥ śive ||

namaskṛtvā mahādevamaśvamedhaphalaṃ labhet |
praṇamya daṇḍavadbhūmau namaskāreṇa yo'rpayet ||

sa yāṃ gatimavāpnoti natāṃ kratu śatairapi |
sarvayajñopavāseṣu sarvavedeṣu yatphalam ||

stuti japyopahāreṇa śive tatphalamāpnuyāt |
śvetaṃ mahādhvanaṃ dadyāt kṛtvā vai pañcaraṃgikam ||

kiṅkiṇīravakopetaṃ mayūrachatra śobhitam |
saśatena vimānānāṃ sarvadevoparisthitaḥ ||

manvantarasahasraikaṃ modate divirudravat |
dhvajamālākulaṃ kuryādyaḥ prasādaṃ śivālaye ||

mahādhvajāṣṭakaṃ vāpi digvidikṣunivedayet |
savimānasahasreṇa divyadhvajasuśobhinā |

kalpāyutaśataṃ sāgraṃ modate divirudravat |
śaraccandrāṃśu vimalaṃ muktājālopaśobhitam ||

maṇidaṇḍamayaṃ cchatraṃ dadyādvā kāñcanādinā |
sacchatreṇa vicitreṇa dhāryamāṇena śobhibhiḥ ||

vimānaiḥ śatasaṃbhogaiściraṃ śivapure sukhī |
yadinyedrājyamākāṃkṣet sa dehī kālaparyayāt ||

p. 23(26)

bhuṅktesamudraparyantāmekacchatrāṃ vasundharām |
yaḥ śṛṃkhalā samāyuktāṃ mahāghaṇṭāṃ mahāsvanām ||

kāṃsyalohamayīṃ vāpi nibadhnīyācchivālaye |
ghaṇṭākarṇagaṇaḥ śrīmān śivasyātīvavallabhaḥ ||

śivatulyabalobhūtvā śivalokevasecciram |
bherīmṛdaṃgapaṭahatimilāmaravādikam ||

vaṃśakāṃsyādivāditraṃ yaḥ śivāya nivedayet |
savimānairmahābhogairvaṃśavīṇādibhiḥ svanaiḥ ||

yugāyutaśataṃ sāgraṃ śivaloke mahīyate |
strīsaṃgīta(ka)dānena sanādena viśeṣataḥ ||

yatheṣṭamaiśvare loke modate kālamakṣayam |
mahaṃ mahāsvanaṃ datvā śaṃkhayugmaṃ śivālaye ||

yugakoṭimahābhogaiḥ śivaloke mahīyate |
vimānaṃ sitapadmābhaṃ madhye karakabhūṣitam ||

vicitramekavarṇaṃ vā navavastrādiśobhitam |
lambakaiḥsūtradāmaiśca ghaṇṭācāmarabhūṣitam ||

śivasyopari yo dadyāt purato vāpi kalpayet |
rudravat sarvalokeṣu yugakoṭiṃ sa modate ||

śivasyopari yo dadyāt sarvaratnopaśobhitam |
kiṃkiṇīravakopetaṃ candrakaiścopaśobhitam ||

maṇṭapaṃ mauktikaṃ śrīmattasya puṇyaphalaṃ śṛṇu |
koṭikoṭivimānāntaṃ sarvakāmasamṛddhibhiḥ ||

ābhūtasaṃplavaṃ yāvat tāvacchivapure vaset |
śarvasyā yatanaṃ kuryāt vavastrapūjopaśobhitam ||

dukūlapaṭṭadevāṃgairvastrairvā varṇakānvitaiḥ |
vastrādipaṭṭatantūnāṃ parisaṃkhyā tu yāvatī ||

tāvadyugasahasrāṇi śivaloke mahīyate |
śivaṃ stutvā jagatsarvaṃ vṛṣṭidvāreṇa dhāryate ||

yatsaṃdhāya jagatpuṇyamagnikāryeṇa tadbhavet |
yaḥ kuryādiṣṭakāgāraṃ rudrāgneratiśobhanam ||

sakṛttatrāgnikāryeṇa śivasāyujyamāpnuyāt |
śivāgnikāryaṃ yaḥ kuryāt kuryādāyuṣyamātmanaḥ ||

mucyate pṛthubhiḥ pāpaiḥ sitena śivabhasmanā |
kṛtvā śivālayasyānte daśamaṇḍalikāni tu ||

sarvopahārasaṃyuktaṃ teṣāṃ nityaṃ baliṃ haret |

p. 24(27)

puṣpadhūpajalopetaṃ tāmrapātraṃ prakalpayet |
rudramātṛgaṇādīnāṃ dikpatīnāṃ ca sarvataḥ ||

yaḥ kuryāt sakṛdapyevaṃ daśadikṣu balikriyām |
daśavarṣasahasrāṇi śivaloke mahīyate ||

raudraṃ sandhyābaliṃ kṛtvā nityaṃ parvasu vā niśi |
kalpāyutaśataṃ sāgraṃ śivaloke mahīyate |
dadhibhaktamayaṃ liṅgaṃ hemapātrādiṣu sthitam |
puṣpadhūpārcitaṃ kṛtvā vitānopariśobhitam ||

śirasādhārayan pātraṃ śanairgacchan pradakṣiṇam |
śivāyatanaparyantaṃ śaṃkhabheryādibhiḥ svanaiḥ ||

darpaṇadhvajamālādirgeyanṛttādiśobhitaiḥ |
chatracāmaradhūpādyairyaṣṭidīpādibhistathā ||

taccheṣadadhibhaktena liṅgasya purataḥ sthitaḥ |
puṣpākṣatavimiśreṇa sarvadikṣubaliṃ haret ||

etena mātaro rudrāśśivomāṣaṇmukhādayaḥ |
śāntiṃ juṣanti suprītā raudreṇa balinā sadā ||

śivamālyāpanayanaṃ pūjānte tu pramārjanam |
ekaikamekaṃ tulyaṃ syāccāndrāyaṇaphalena tu ||

śivamaṇḍalakaṃ kṛtvā hastamātraṃ śivāgrataḥ |
avakīryākṣataiḥ puṣpaiḥ patrairvāpyathakevalaiḥ ||

surūpaḥ subhagaḥ śrīmān tejasvī vedavitsukhī |
caturvedi gṛhe janma sakṛtkṛtvā labhennaraḥ ||

evaṃ svastikapadmādyairbhūmiśobhāṃ śivālaye |
kṛtvā varṇakapiṣṭādyaistasmācchataguṇaṃ bhavet ||

śivayajñopakaraṇaṃ datvālpaṃ yadi vā bahu |
evaṃ vittānusāreṇa śivaloke mahīyate ||

śivamuddiśya yaddattaṃ sarvakāraṇakāraṇam |
tadanantaphalaṃ dāturbhavatīti kimadbhutam ||

yadyadiṣṭaṃ viśiṣṭaṃ ca nyāyena ca yadāgatam |
tacchivāya nivedyaṃ syād bhaktyānanyaphalārthibhiḥ ||

karmaśāṭhyena yaḥ kuryānmūlyenāpi śivālaye |
so'pyaśāṭhyodivaṃ yāti karmaṇāpāpavarjitaḥ ||

kūpārāmānnapānādyaiḥ śivāyatanakarmaṇi |
upayuktāni bhūtāni khananotpāṭanādiṣu ||

akāmato'pi sarvāṇi syāvarāṇi carāṇi ca |

p. 25(28)

divaṃ yānti na sandehaḥ prasādāt parameṣṭhinaḥ ||

liṅgārdhaśataṃ sāgraṃ śivakṣetraṃ samantataḥ |
dehināṃ tatra pañcatvaṃ śivasāyujyakāraṇam ||

manujaiḥ sthāpite liṅge kṣetramānamidaṃ smṛtam |
svayaṃ bhūte sahasraṃ syādārṣe ca syāttadardhakam ||

pāpācāro'pi yastasmin nivaseta śivāśrame |
sayāti paramaṃ sthānaṃ tasmācchivapuraṃ smṛtam ||

tasmādāvasayaṃ kuryācchivakṣetrasamīpataḥ |
śivaliṅgasamīpasthaṃ yattoyaṃ purataśśubham ||

śivagaṅgeti tajjñeyaṃ tasmin snātvā śivaṃ vrajet |
yaḥ kuryāddīrghikāṃvāpi kūpaṃ vāpi śivāśrame ||

trisaptakulasaṃyuktaṃ śivaloke mahīyate |
śivādanyatparityajya śivaikāhitamānasaḥ ||

śivapūjāvidhiṃ kuryādyadīcchecchreya ātmanaḥ |
tvaritaṃ jīvitaṃ yāti tvaritaṃ yāti yauvanam ||

tvaritaṃ vyādhirabhyeti tasmāt pūjyaḥ sadāśivaḥ |
yāvannābhyeti maraṇaṃ yāvannākramate jarā |
yāvannendriyavaikalyaṃ tāvatpūjayaśaṅkaram ||

na śivārcanatulyo'nyo dharmo'stibhuvanatraye |
iti vijñāya yatvena pūjanīyaḥ sadāśivaḥ |
ye bhaktā devadeveśaṃ śivaṃ śāntamajaṃ prabhum ||

pūjayanti sadābhaktyā taccittāstapasi sthitāḥ |
iha loke sukhaṃ prāpya te yānti paramāṃ gatim ||

saṃpūjya paśubhartāraṃ prahṛṣṭenāntarātmanā |
kṛtāñjalipuṭo bhūtvedaṃ stotramudāharet ||

śivaṃ śivakaraṃ śāntaṃ śivātmānaṃ śivottamam |
śivamārgapraṇetāraṃ praṇato'smi sadāśivam ||

śāśvataṃ śobhanaṃ śuddhaṃ śāsakaṃ doṣa śoṣakam |
viśvaṃ viśveśvareśānaṃ śaṅkaraṃ praṇamāmyaham ||

sarvapāpaharaṃ nāthaṃ sarvarogaharaṃ varam |
sarvaduḥkhaharaṃ nityaṃ namāmyārtiharavaram ||

asthānasthānasaṃsthānaṃ sthitasthitivibhāvanam |
sthiramātrasthayogasthaṃ sthāṇvīśaṃ praṇamāmyaham ||

īśānaparamaṃ devamīśānaṃ mantranāyakam |
īśānaṃ sarvabhūtānāmīśānaṃ praṇamāmyaham |

p. 26(29)

sarvārthasampadādhāro gaṇādhyakṣo varapradaḥ |
rudrasya tanayo devo nāyako'tha vināyakaḥ ||

karotu śāntikaṃkṣemaṃ karmasiddhiñca me sadā |
indranīlanibhastryakṣo dīptaśūlāyudhodyataḥ ||

raktāmbaradharaśśrīmān kṛṣṇāṅgonāgabhūṣaṇaḥ |
akṣamālā śirograstaḥ svayaṃ viṣṇuriva sthitaḥ ||

pāpāpanodamatulamalakṣmīmalanāśanam |
karotu me mahākālaḥ śāntiṃ prītena cetasā ||

śaṃkhakundenduvarṇābhaḥ kaṇṭhe maratakaprabhaḥ |
 
caturmukhāścaturbāhustriṇetrassarvatojjvalaḥ |
karotu me mahāśāntiṃ prītaḥ prītena cetasā ||

kṣiteḥ patirvṛṣodevassarvadharmottamottamaḥ |
īśaṃ vahatipṛṣṭhena tasmāddharmo jagatpatiḥ ||

vṛṣovṛṣadharaśśrīmān karotu mama śāntikam | 
sarvajñaḥ sarvasadṛśaḥ sarvagaḥśśarvajaḥ prabhuḥ ||

śamanaḥ śatrusainyānāṃ śāstāśāntiṃ karotu me |
karotu me mahāśāntiṃ prītaḥ prītena cetasā ||

pītavastraparīdhānā kanyārūpāsvalaṃkṛtā |
gaṇamātāmbikā tryakṣā śāntā gaurī sureśvarī ||

sarvasiddhikarā devī prasādaparamā varā |
śāntiṃ karotu me mātā siddhiṃ cāśuprayacchati(tu) ||

snigdhaśyāmena varṇena mahāmahiṣamardinī |
dhanuścakrapraharaṇā khaḍgapaṭṭasadhāriṇī ||

ātarjanodyatakarā sarvopadravanāśinī |
sarvamaṅgalamātā me śivamāśuprayacchatu ||

nirmāṃsena śarīreṇa snāsvasthisunibandhanaḥ |
atisūkṣmotivikrāntastryakṣobhiḥ kiriṭirvaraḥ ||

rudrātmano rudravīryo rudraikagatamānasaḥ |
sovimeśāntabhāvena śivamāvahatudhruvam ||

pracaṇḍagaṇasainyeśo mahāṭaṃkākṣadhārakaḥ |
akṣamālārpitakarastryakṣaścaṇḍeśvaro mahān ||

pracaṇḍapāpaharaṇo brahmahatyādiśodhakaḥ |
karotu me mahāyogī kalyāṇānāṃ paramparām ||

padmāsano hemanibhaścaturvadanapaṅkajaḥ |
kamaṇḍaludharaḥ śrīmān devagandharvapūjitaḥ ||

śivadhyānaikaparamaśśivārcanaratassadā | 
brahmaśabdena divyena brahmāśāntiṃ karotu me ||

tārkṣyāsanaścaturbāhuḥ śaṅkhacakragadādharaḥ |

p. 28(30) 

śyāmaḥ pītāmbaradharo vanamālāvibhūṣitaḥ |
yajñadevottamo devo mādhavo madhusūdanaḥ ||

kṛṣṇanīlāñjanākāraśśivayorasilakṣaṇaḥ |
śivaprasādasampannaśśivadhyānaparāyaṇaḥ ||

śivārcanarato nityaṃ viṣṇuśśāntiṃ karotu me |
padmarāgaprabhā devī caturvadanapaṅkajā ||

akṣamālārpitakarā kamaṇḍaludharā śubhā |
brahmāṇī saumyavadanā śivapūjāparāyaṇā ||

śāntiṃ karotu me prītā brahmaśabdena sarvadā |
(himaśailannibhā devī caturvadanapaṅkajā |
akṣamālārpitakarākamaṇḍaludharāśubhā ||

brahāṇī saumyavadanā śivapūjāparāyaṇā |
śāntiṃ karotu me prītā brahmaśabdena sarvadā||)

himaśailanibhā devī mahāvṛṣabhavāhinī |
triśūlahastā varadā nāgābharaṇabhūṣitā ||

rudrabhaktā mahādevī rudrārcanaratā sadā |
caturbhujā caturvaktrā triṇetrā pāpahāriṇī ||

ārtiṃ haratu me prītā mahādevī maheśvarī |
mayūravāhinī devī sindūrāruṇavigrahā ||

śaktihastā mahāvīryā sarvālaṅkārabhūṣitā |
rudrabhaktā mahāpuṇyā rudrārcanaratā sadā ||

kaumārī varadā devī śāntimāśukarotu me |
śaṃkhacakragadāhastā śyāmā pītāmbarāśubhā ||

caturbhujā tārkṣyagatā vaiṣṇavī surapūjitā |
śivārcanaratā nityaṃ rudraikagata mānasā ||

śāntiṃ karotu me nityaṃ sarvāsuravimardinī |
varāhathoṇā vikaṭā varāhavaravāhinī ||

śyāmāvadātavipulā śaṅkhacakragadādharā |
tarjayantī sadāvighnā narcayantī sadāśivam ||

vārāhī varadā devī kṣemārogyaṃ dadātu me |
airāvata gajārūḍhā vajrahastā mahābalā ||

netrāṇāṃ tu sahasreṇa bhūṣitā kanakaprabhā |
siddhagandharvanamitā varālaṃkārabhūṣitā ||

aindrī devī sadākālaṃ śāntimāśu karotu me ||

p. 28(31) 

śyāmaḥ pītāmbaradharo vanamālāvibhūṣitaḥ |
yajñadevottamo devo mādhavo madhusūdanaḥ ||

kṛṣṇanīlāñjanākāraśśivayoralilakṣaṇaḥ |
śivaprasādasampannaśśivadhyānaparāyaṇaḥ ||

śivārcanarato nityaṃ viṣṇuśśāntiṃ karotu me |
padmarāgaprabhā devī caturvadanapaṅkajā |
akṣamālārpitakarā kamaṇḍaludharā śubhā ||

brahmāṇī saumyavadanā śivapūjā parāyaṇā |
śāntiṃ karotu me prītā brahamaśabdena sarvadā ||

himaśailannibhā devī caturvadanapaṅkajā |
akṣamālārpitakarā kamaṇḍaludharā śubhā ||

brahmāṇi saumyavadanā śivapūjāparāyaṇā |
śāntiṃ karotu me prītā brhamaśabdena sarvadā ||)

himaśailanibhā devī mahāvṛṣabhavāhinī |
triśūlahastāvaradā nāgābharaṇabhūṣitā ||

rudrabhaktā mahādevī rudrārcanaratā sadā |
caturbhujā caturvaktrā triṇetrā pāpahāriṇī ||

ārtiharatu me prītā mahādevī maheśvarī |
mayūravāhinī devī sindūrāruṇavigrahā ||

śaktihastā mahāvīryā sarvālaṅkārabhūṣitā |
rudrabhaktā mahāpuṇyā rudrārcanaratā sadā |
kaumārī varadā devī śantimāśukarotu me ||

śaṃkhacakragadāhastā śyāmā pītāmbarā śubhā |
caturbhujā tārkṣyagatā vaiṣṇavī surapūjitā ||

śivārcanaratā nityaṃ rudraikagatamānasā |
śāntiṃ karotu me nityaṃ sarvāsuravimardinī ||

varāhathoṇā vikaṭā varāhavaravāhinī |
śyāmāvadātavipulā śaṅkhacakragadādharā ||

tarjayantī sadā vighnānarcayantī sadā śivam |
vārāhī varadā devī kṣemārogyaṃ dadātu me |
airāvata gajārūḍhā vajrahastā mahābalā ||

netrāṇāṃ tu sahasreṇa bhūṣitā kanakaprabhā |
siddhagandharvanamitā varālaṃkārabhūṣitā |
aindrī devī sadākālaṃ śāntimāśukarotu me ||

p. 29(32) 

ūrdhvakeśotkaṭākṣāmā nirmāṃsāsnāyubandhanā |
karālavadanāghorā khaḍgapaṭṭasadhāriṇī ||

kapālamālinī devī krūrā khaṭvāṃgadhāriṇī |
āraktapiṅganayanā gajacarmāvakuṇṭhitā ||

nānā nāgopavītāaṃgī pretasthānanivāsinī |
śivārūpeṇaghoreṇa śivārāvabhayaṅkarī ||

cāmuṇḍī caṇḍarūpeṇa mahārakṣāṃ karotu me |
ākāśamātaro devyastathālokaikamātaraḥ ||

bhūtānāṃ mātarassarvāstadanyā devamātaraḥ |
sarvamātṛgaṇā devyassāyudhāvyagrapāṇayaḥ ||

jagadvyāpyāvatiṣṭhanti balikāmā mahodayā |
rudrabhaktā mahādevīryā rudrārcana parāyaṇāḥ ||

śāntiṃ kurvantu me nityaṃ mātarassurapūjitāḥ |
ye rudrā raudrakarmāṇī raudrasthāna nivāsinaḥ ||

sa saumyāścaiva ye kecit saumyasthānanivāsinaḥ |
mātaro raudrarūpāśca gaṇānāmadhipāśca ye |
vighnabhūtāstathācānye daśadikṣusamāśritāḥ ||

sarvesuprītamanasaḥ pratigṛhṇantu madbalim |
siddhijuṣantu me nityaṃ bhayebhyaḥ pātumāṃ sadā ||

aindryāṃ diśi gaṇāye tu vajrahastā mahābalāḥ |
suśvetākṣāḥ śvetānnibhāstathā vai śvetalohitāḥ ||

divyantarikṣabhaumāśca pātālatalavāsinaḥ |
rudrārcanaparāḥ kṣemaṃ śāntiṃ kurvantu me sadā ||

āgneyāṃ ye gaṇāssarve sruvahastā niṣaṅgiṇaḥ |
suraktākṣāraktanibhāstathā vai raktalohitāḥ ||

divyantarikṣabhaumāśca pātālatalavāsinaḥ |
rudrapraṇāmaparamāḥ śāntiṃ kurvantu me sadā |
yāmyāṃ diśigaṇā ye tu satataṃ daṇḍapāṇayaḥ ||

sukṛṣṇākṣāḥ kṛṣṇa nibhāstathā vai kṛṣṇalohitaḥ |
divyantarikṣabhaumāśca pātālatalavāsinaḥ ||

te rudrārcitacetaskāḥ śivaṃ kurvantu me sadā |
nair-ṛtyāṃ tu gaṇā ye tu rākṣasāḥ khaḍgapāṇayaḥ ||

sunīlākṣānīlanibhāstathā vai nīlalohitāḥ |
divyantarikṣabhaumāśca pātālatalavāsinaḥ ||

p. 30(33)

parameśārcanaratā rakṣāṃ kurvantu me sadā |
aparasyāṃ gaṇā ye tu satataṃ pāśapāṇayaḥ ||

suśyāmākṣāśśyāmanibhāstathā vaiśyāmalohitāḥ |
divyantarikṣabhaumāśca pātālatalavāsinaḥ ||

śivabhaktiparāssarve kṣemaṃ kurvantu me sadā |
vāyavyāṃ tu gaṇā ye tu satataṃ dhvajapāṇayaḥ ||

sudhūmrākṣā dhūmranibhāstathā vai dhūmralohitāḥ |
divyantarikṣabhaumāśca pātālatalavāsinaḥ ||

śivabhaktā mahātmānaḥ kurvantu mama śāntikam |
uttarasyāṃ gaṇā ye tu satataṃ nidhipāṇayaḥ ||

supītākṣāḥ pītanibhāstathā vai pītalohitāḥ |
divyantarikṣabhaumāśca pātālatalavāsinaḥ ||

śivabhaktiramāssarve kṣemaṃ kurvantu me sadā |
aiśānyāṃ tu gaṇā ye tu satataṃ śūlapāṇayaḥ ||

susūkṣmākṣāḥ sūkṣmanibhāstathā vai sūkṣmalohitāḥ |
divyantarikṣabhaumāśca pātālatalavāsinaḥ ||

aiśānaṃ praṇatā devaṃ śāntiṃ kurvantu me sadā |
adhobhāge gaṇā ye tu satataṃ cakrapāṇayaḥ ||

supītākṣāḥ pītanibhāstathā vai pītalohitāḥ |
divyantarikṣabhaumāśca pātālatalavāsinaḥ ||

śivabhaktiparāḥ kuryuralakṣmīmalanāśanam |
ūrdhvabhāge gaṇā ye tu satataṃ padmapāṇayaḥ ||

supadmākṣāḥ padmanibhāstathā vai padmalohitāḥ |
divyantarikṣabhaumāśca pātālatalavāsinaḥ ||

śivapūjāsamudyuktā aśubhaṃ nāśayantu me |
ete gaṇā mahātmāno mahābalaparākramāḥ ||

śivaṃ sampūjya yatnena balimeṣāṃ vinikṣipet |
tataḥ prītā mahātmānaḥ śāntimāyurbalaṃ śriyam ||

prayacchantyāśumartyānāṃ bhaktānāṃ tu viśeṣataḥ |
amarāvatī tu nagarī pūrvabhāge vyavasthitā ||

vidyādharagaṇākīrṇā siddhagandharvasevitā |
ratnaprākāraracitā mahāratnopaśobhitā ||

tatra devapatiḥ śrīmān vajrahasto mahābalaḥ |
netrāṇāṃ tu sahasreṇa śobhanena virājitā ||

p. 31(34)

airāvatagajārūḍho hemavarṇo mahādyutiḥ |
devendraḥ satataṃ hṛṣṭaḥ parameśārcane rataḥ ||

śivadhyānaikaparamaḥ śivabhaktiparāyaṇaḥ |
śivabhaktaistathānyaiśca devairivasahānugaiḥ ||

śivapraṇāmaparamaḥ karotu mama śāntikam |
āgneyyāṃ diśibhāge tu purī tejovatī śubhā ||

nānāvarṇagaṇākīrṇā ratnajvālāsamujjvalā |
tatra jvālāparītāṃgo dīptāṃgārasamadyutiḥ |
bhūtikṛddehināṃ devo jvalanaḥ pāpanāśanaḥ ||

śivapūjāparodyuktaḥ śivasmaraṇabhāvitaḥ |
śāntiṃ karotu me devastathā pāpaparikṣayam ||

vaivasvatī nāmapurī dakṣiṇena vyavasthitā |
surāsuraśatānīka pitṛrakṣoragālayā ||

tatrendranīlasaṃkāśo raktāntāyatalocanaḥ |
mahāmahiṣamārūḍhaḥ kṛṣṇasragvastrabhūṣaṇaḥ ||

śrīmānyamo mahātejāḥ śivapūjāparāyaṇaḥ |
śivapūjāsamāsaktaḥ kṣemārogyaṃ dadātu me ||

nair-ṛtyāṃ tu diśobhāge purīkṛṣṇavatī śubhā |
mahārakṣogaṇākīrṇā piśācapretasaṃkulā ||

tatrajīmūtasaṃkāśo raktasragvastrabhūṣaṇaḥ ||

khaḍgapāṇirmahātejāḥ karālavadanojjvalaḥ |
rakṣendronir-ṛtirnityaṃ śivapūjāparāyaṇaḥ ||

karotu me mahāśāntiṃ śivabhaktisamudyataḥ |
paścime tu diśobhāge purī śuddhavatī śubhā |
nānānāgagaṇākīrṇā nānākiṃnarasevitā |
tatra mauktikasaṃkāśaḥ paripiṅgalalocanaḥ ||

śuklavastraparīdhānaḥ pāśahasto mahābalaḥ |
varuṇaḥ parayābhaktyā śivaikāhitamānasaḥ |
rogaśokārtisantāpaṃ nirnāśayatu me sadā ||

vāyavyadigvibhāge tu purī gandhavatī śubhā |
ṛṇisiddhagaṇairjuṣṭā hemaprākārato raṇā ||

tatra tāmreṇa dehena kṛṣṇapiṃgalalocanaḥ |
paravyāptāntarādhīno dhvajayaṣṭyā yudhodyataḥ ||

pavanaḥ paramodevaḥ parameśvarabhāvitaḥ |
kṣemārogyaṃ balaṃ śāntiṃ karotu vijayaṃ tathā (mama) ||

mahodayā nāmapurī uttareṇa mahojjvalā |

p. 32(35)

aneka yakṣasaṃkīrṇā nānāratnopaśobhitā |
tatra devo gadā hastaścitrasragvastra bhūṣaṇaḥ |
hrasvabāhurmahātejāḥ paripiṅgalalocanaḥ ||

kubero varadaśśrīmān harapādārcane rataḥ |
śāntiṃ karotu me prītaḥ śāntaśśāntena tejasā ||

yaśīvatī nāma purī aiśānīṃ diśamāśritā |
nānāgaṇasamākīrṇā nānāratnakṛtālayā ||

tejaḥ prākāraparyantā niraupamya guṇānvitā |
tatra mauktikasaṃkāśaḥ śaśāṅkakṛtaśekharaḥ ||

triṇetraśśāntarūpātmā akṣamālā dharo haraḥ |
īśānaḥ paramodevaḥ sarvadevottamottamaḥ ||

so'pi sarvātmabhāvena śāntimāśukarotu me |
bhūrloke ca bhuvarloke svargalokevasanti ye ||

devādivyapradāyuktāḥ śāntiṃ kurvantu me sadā |
maharloke janarloke tapoloke ca ye sthitāḥ ||

te'pi pramuditā devāḥ śāntiṃ kurvantu me sadā |
satyaloke ca ye devāḥ suprabhojjvalavigrahāḥ ||

śivabhaktāssumanasaḥ śāntiṃ kurvantu me sadā |
tapoloke ca ye devāḥ bhāsayanto diśo daśa ||

śivaikāhitacetaskāḥ śamayantu mahābhayam |
janaloke ca ye devāḥ dhautacāmīkaraprabhāḥ ||

īśvaraṃ praṇatā nityaṃ śāntiṃ kurvantu me sadā |
maharloke ca ye devā vimānojvalasaṃsthitā ||

bhavapraṇāmaparamāḥ bhayaṃ nirnāśayantu me |
svarlokasyāśca ye devā dīptimanto mahābalāḥ ||

śaṅkaraṃ praṇatā nityaṃ kurvantu vijayaṃ mama |
bhuvarloke ca ye devā bhāsamanto diśodaśa ||

śivaikāhitacetaskāḥ śamayantu mahābhayam |
girikandardurgeṣu bhūrloke nivasanti ye ||

rudrārcanaparādevā rakṣāṃ kurvantu me sadā |
śaraccandrāṃśu gaureṇa dehenāmala cetasā |
sarasvatī śive bhaktā sarvān kāmān dadātu me ||

cārucāmīkaracchāyā sarojakarapallavā |
śivabhaktyādhiyāṃ devī śrīrvibhūtiṃ dadātu me ||

vāruṇā mukhacandreṇa vicitrakanakojjvalā |
sadā devī śivebhaktā sarvān kāmān dadātu me ||

p. 33(36)

hāreṇa suvicitreṇa bhāsvatkanakamekhalā ||

aparājitārudrabhaktā karotu vijayaṃ mama |
sindhūrāruṇavarṇaśca raktāyatavilocanaḥ ||

sahasrakiraṇaḥ śrīmān saptasaptikavāhanaḥ |
gabhastimālī bhagavān śivabhaktyārcane rataḥ ||

karotu me mahāśāntiṃ grahapīḍānivāraṇam |
jagadāpyāyanakaro hyamṛtādhāraśitalā ||

somaḥ saumye na bhāvena grahapīḍāṃ vyapohatu |
padmarāgeṇa dehena devaḥ piṃgalalocanaḥ ||

aṅgārakastusatataṃ rudrapūjāparāyaṇaḥ |
rudrasadbhāvasampanno rudradhyānaikamānasaḥ ||

grahapīḍābhayaṃ sarvaṃ nirnāśayatu me sadā |
kuṃkumacchavinā śrīmān dehena parimaṇḍalaḥ ||

śivabhakto budho'pyevaṃ grahapīḍāṃ vyapohatu |
taptacāmīkaracchāyaḥ sarvajñānakṛtālayaḥ |
bṛhaspatiḥ sadākālamīśānārcanatatparaḥ |
so'pi me śāntacittena parameṇasamāhitaḥ ||

grahapīḍāṃ vinirjitya karotu vijayaṃ mama |
himakundenduvarṇābhaḥ suradaityendrapūjitaḥ |
śukraḥ śivārcane nityaṃ grahapīḍāṃ vyapohatu |
bhinnāñjananibhacchāyaḥ saṃraktanayanadyutiḥ ||

śanaiścarāśśivebhakto grahapīḍāṃ vyapohatu |
nīlajīmūtasaṃkāśaḥ saiṃhikeyo mahābalaḥ ||

śivapūjāparorāhurgrahapīḍāṃ vyapohatu |
bhinnāñjananibhaḥ śrīmānulkāhasto mahābalaḥ ||

dhūmrajvālākulo dīptaḥ śivārcanaratassadā |
ketuḥ suśāntacittena grahapīḍāṃ vyapohatu ||

dhūmravarṇaḥ sadākrūro mṛtyuputro mahābalaḥ |
śivārcanarataḥ ketuḥ grahapīḍāṃ vyapohatu ||

ete grahā mahātmānaśśivārcanaparāyaṇāḥ |
śāntiṃ kurvantu me hṛṣṭāssadākālaṃ hitaiṣiṇaḥ ||

kṛttikā paramādevī rohiṇī rucirānanā |
śrīmanmṛgaśirobhadrā ārdrā ca paramojjvalā ||

punarvasustathā puṣyā āśleṣā tu mahābalā |
nakṣatramātarohyetā prabhāmālāvadāstitāḥ ||

p. 34(37)

mahādevārcanaratā mahādevānubhāvitāḥ |
pūrvabhāge sthitā hyetāśśāntiṃ kurvantu me sadā ||

makhā sarvaguṇopetā pūrvaphalgunyanūpamā 
uttarā phalgunīśreṣṭhā hastacitre tathottame ||

svātī viśākhā varadā * * dakṣiṇasaṃsthitāḥ |
arcayanti sadākālaṃ devaṃ triṇayanaṃ param ||

mamāpi śāntikaṃ hyetāḥ kurvantu śivacoditāḥ |
anūrādhā tathā jyeṣṭhā mūlā ṛddhibalānvitāḥ ||

pūrvāṣāḍhā mahāvīryā āṣāḍhā cottarā śubhā |
abhijinnāmanakṣatraṃ śravaṇaḥ paramojvalaḥ ||

etāḥ paścimato dīptāḥ rājante cārumūrtayaḥ |
īśānaṃ pūjayantyetāḥ sārvakālaṃ subhāvitāḥ |
śāntikarme prayacchantu vibhūtiṃ ca samāhitāḥ ||

dhaniṣṭhāśatabhiṣā caiva pūrvābhadrapadā tathā |
uttarābhadrarevatyā vaśvinī ca mahardhikā ||

bharaṇī ca mahāvīryā nityamuttarataḥ sthitāḥ |
śivārcane sadodyuktāḥ śivadhyānaika tatparāḥ ||

śāntiṃ kurvantu me nityaṃ sadākālaṃ śubhodayāḥ |
meṣo mṛgādhipaḥ siṃho dhanurdīptimatāṃvaraḥ ||

pūrveṇa bhāsayantyete śiva yogaparāyaṇāḥ |
śubhāḥ kurvantu te nityaṃ harapādārcane ratāḥ ||

kanyā ca vṛṣabho devo makaraśca mahardhikāḥ |
ete dakṣiṇabhāge tu pūjayanti sadā śivam |

bhaktyā paramayā nityaṃ śāntiṃ kurvantu me sadā |
mithunaṃ tu tulākumbhaḥ paścimena vyavasthitāḥ |

śivapādārcanaratāḥ kṣemaṃ kurvantu me sadā |
karkaṭo vṛścikomīnaḥ ete uttarataḥ sthitāḥ ||

yajantye te sadā kālaṃ rudraṃ bhuvananāyakam |
śāntiṃ kurvantu me nityaṃ rudrajñānavidhāyinaḥ ||

ṛṣayaḥ saptavikhyātāḥ dhruvāntāḥ paramojjvalāḥ |
śivaprasādasampannāśśāntiṃ kurvantu me sadā ||

kaśyapo gālavo gārgyo viśvāmitro mahāmuniḥ |
manurdakṣo vasiṣṭho'tha mataṃgaḥ pulahaḥ kratuḥ ||

nārado bhṛgurātre yo bharadvājoṃgirā muniḥ |

p. 35(38)

vālmīkiḥ kauśikaḥ kaṇvaḥ śākalyo'tha punarvasuḥ ||

dūrvāsāśṛśyaśṛṅgaśca tṛṇabindurvimaṇḍakaḥ |
daṇḍī ca pippalādaśca yājñavalkyo'tha gautamaḥ ||

mārkaṇḍeyo jāmadagnyaḥ pulastyassaumariḥ śubhaḥ | 
agastyo jaiminirvyāso marīcirjahureva ca |
śālaṅkāyana ityādyā ṛṣayo'tha tapasvinaḥ ||

śivadhyānārcanaratāḥ śāntiṃ kurvantu me sadā |
ṛṣipatnyo mahābhāgā ṛṣikanyā kumārakāḥ ||

śivārcanaratā nityaṃ śāntiṃ kurvantu me sadā |
siddhāssmṛddhatapaso gandharvāpsarasāṃ gaṇāḥ ||

vidyādharā mahātmāno garuḍaśca mahardhikaḥ |
maheśvaraparāhyete maheśvaraparārcanāḥ ||

siddhimāśuprayacchantu āśīrvādaparāyaṇāḥ |
namucirdaityarājendraśśaṅkukarṇo mahābalaḥ ||

mahānādo'thavikhyāto daityaḥ paramavīryavān |
hāṭakeśvaradevasya nityaṃ pūjāparāyaṇaḥ ||

balaṃ vīryaṃ ca me kṣipraṃ prayacchantu mahardhikāḥ |
mahājaṃbhohyagrīvaḥ prahlādo daityarāṭ prabhuḥ |
tārako'gnimukho daityaḥ kālanemirbalistathā ||

ete daityā mahātmānaśśivasadbhāvabhāvitāḥ |
puṣṭiṃ tathā balaṃ vīryaṃ prayacchantu surārayaḥ ||

virocano hiraṇyākṣaḥ suparvā ca pulomakaḥ |
mucukundaḥ sukundaśca daityo raivatakastathā ||

bhāvena parameṇāpi yajanti paramaṃ śivam |
satataṃ ca śubhātmānaḥ puṣṭiṃ kurvantu me sadā ||

daityapatnyo mahābhāgā daityānāṃ kanyakāḥ śubhāḥ |
kumārā ye ca daityānāṃ śāntiṃ kurvantu te'pi me ||

ārakte na śarīreṇa raktāntā yatalocanaḥ |
ananto nāgarājendraḥ śivapūjārcanerataḥ ||

mahāpāpaviṣaṃ hatvā śāntimāśu karotu me |
suśvetena śarīreṇa suśvetamaṇiśekharaḥ |
cārubhogakṛtāṭopa haracāruvibhūṣaṇaḥ ||

vāsukirnāmanāgendraśśivapūjā paromahān |
sarvanāgaviṣaṃ hatvā kṣemārogyaṃ dadātu me ||

p. p. 36(39)

atipītena dehena visphuradbhogasampadā |
tejasā cātidīptena nṛtasvastikalāñchanaḥ ||

nāgarāṭ takṣakaḥ śrīmān nāgakoṭyāsamāvṛtaḥ |
karotu me mahāśāntiṃ sarvadoṣaviṣāpahām ||

atikṛṣṇena dehena sphuradvikaṭamastakaḥ |
kaṇṭharekhā trayopeto ghoradaṃṣṭrā yudhodyataḥ ||

kārkoṭako mahānāgo viṣadarpabalānvitaḥ |
viṣaśastrāgnisantāpaṃ hatvā śāntiṃ karotu me ||

padmavarṇena dehena cārupadmāyatekṣaṇaḥ |
padmabindukṛtābhāso grīvāyāṃ śubhalakṣaṇaḥ ||

khyātaḥ padmo mahānāgo harapādārcane rataḥ |
karotu me mahāśāntiṃ mahāpāpaviṣakṣayam ||

puṇḍarīka nibhe naiva dehenāmitatejasā |
śaṃkhaśūlābjaruciraiḥ bhūṣitau mūrdhni sarvadā ||

mahāpadmo mahānāgo nityaṃ paśupataurataḥ |
vinirjityaviṣaṃghoraṃ śāntimāśu karotu me ||

śyāmo dehena hāreṇa śrīmān kamalalocanaḥ |
viṣadarpabalonmatto grīvāyāmekarekhayā ||

śaṃkhapālaśriyādīptāśśivapādābjapūjakaḥ |
mahāviṣaṃ mahāghoraṃ hatvāśāntiṃ karotu me ||

atigaureṇa dehena candrārdhakṛtamastakaḥ |
dīptabhogakṛtā ṭopaḥ śubhalakṣaṇalakṣitaḥ ||

gulikonāgarājendro nityaṃ haraparāyaṇaḥ |
apahṛtyaviṣaṃghoraṃ karotu mama śāntikam ||

antarikṣe ca ye nāgā ye nāgāḥ svargasaṃsthitāḥ |
girikandaradurgeṣu ye nāgā divisaṃsthitāḥ |

pātāle ye sthitā nāgāḥ sarve'pyatrasamāhitāḥ |
harapādārcane yuktāḥ śāntiṃ kurvantu me sadā ||

nāginyo nāgakanyāśca tathā nāgakumārakāḥ |
śivabhaktāḥ sumanasaḥ śāntiṃ kurvantu me sadā ||

ya idaṃ nāgasaṃsthānaṃ kīrtayecchṛṇuyādapi |
taṃ ca nāganahiṃsanti viṣaṃ nākramate sadā ||

cintitaṃ labhate nityaṃ tathā pāpakṣayo bhavet |
siddhiṃ cāpi prayacchanti sarvavighnavivarjitām ||

p. 37(40)

surabhī devī goloke vasatī śubhalakṣaṇā |
satataṃ kṣīradhārāḍhyā brahmarṣigaṇapūjitā ||

gogaṇairgovṛṣairnityaṃ prahṛṣṭā parivāritā |
śivabhaktāsadāśāntā śāntimāśukarotu me ||

ete ca gogaṇāḥ sarve govṛṣāśca mahaujasaḥ |
śivabhaktā mahātmānaḥ śāntiṃ kurvantu me sadā ||

gaṅgāpuṇyapradā devi yamunānarmadā nadī |
gomatī tāpikāpeṇṇā varuṇādevikāvarā ||

sarvabhūtapatiṃ devaṃ parameśaṃ maheśvaram |
pūjayanti mahānadyaḥ śivasadbhāva bhāvitāḥ ||

śāntiṃ kurvantu me nityaṃ tathā pāpaparikṣayam |
siddhiṃ cāśuprayacchantu sarvavighnavivarjitam ||

candrabhāgā mahāpuṇyā nadīgodāvarī śubhā |
sarayū gaṇḍakī śreṣṭhā kauśikī ca sarasvatī ||

etā nadyo mahābhāgā śivapādārcane ratāḥ |
śāntiṃ kurvantu me nityaṃ śivadhyānaikamānasāḥ ||

nairañjanā nāma nadī śoṇaścāpi mahānadaḥ |
mandākinī ca paramā tathā sannihitāḥ śubhāḥ ||

etāścānyāścavaivahnyo bhuvi divyantarikṣagāḥ |
rudrārcanaparā(nityaṃ)nadyaḥ kurvantu mama śāntikam ||

guhyāni yāni tīrthāni āsamudrasarāṃsi ca |
kurvantu śāntikaṃ tāni śrīkaṇṭhādhiṣṭhitāni tu ||

mahāvaiśravaṇo yakṣo yakṣarājomahardhikaḥ |
yakṣakoṭiparīvāro yakṣasaṃkhyeyasaṃyutaḥ ||

mahāvibhavasampanno harapādārcanerataḥ |
haradhyānaikaparamo harapādānatottamaḥ ||

śāntiṃ karotu me prītaḥ padmapatrāyatekṣaṇaḥ |
māṇibhadramahāyakṣo maṇiratnavibhūṣitaḥ ||

manohareṇa hāreṇa kaṇṭhalagnena rājatā |
śivagānarato nityaṃ śivapādābjapūjakaḥ ||

śāntiṃ karotu me nityaṃ sarvadoṣanivāraṇaḥ |
yakṣiṇī yakṣakanyābhiḥ parivāritavigrahaḥ ||

rudrārcanaparobhaktaḥ karotu mama śāntikam |
suvīrastu mahāyakṣo maṇikuṇḍalabhūṣitaḥ ||

p. 38(41)

lalāṭe hemapaṭṭena kāñcanena virājatā |
bahuyakṣasamākīrṇo yakṣairnamitavigrahaḥ ||

śivapūjāparonityaṃ karotu mama śāntikam |
cāṇḍiko nāma yakṣendraḥ karṇikā kaṭakojjvalaḥ ||

makuṭena vicitreṇa keyūrābhyāṃ vibhūṣitaḥ |
yakṣakanyāsamāyukto yakṣasaṃkhyeyasaṃyutaḥ ||

harārcanaparaḥ śrīmān karotu mama śāntikam |
śrīmān vibhaṇḍako yakṣo nānāratnavibhūṣitaḥ ||

cārukuṇḍalayugmena karṇau nityaṃ virājataḥ |
yakṣeśvaro yakṣapatiryakṣasenāpatirvibhuḥ ||

harapādarataḥ śrīmān karotu mama śāntikam |
dhṛtarāṣṭro mahāyakṣo yakṣarakṣo'dhipaḥ prabhuḥ ||

divyapaṭṭāṃśukacchanno maṇikāñcanabhūṣitaḥ |
śivabhaktaḥ śivadhyānaśśivapūjāparāyaṇaḥ ||

śivaprasādasampannaḥ karotu mama śāntikam ||

pūrṇabhadro mahāyakṣaḥ sarvālaṃkārabhūṣitaḥ ||

ratnasampannapaṭṭena haimenāpi virājatā |
yakṣakoṭisahasraistu parivāritavigrahaḥ ||

rudrapraṇāmaparamo rudrabhaktiparaḥ sadā |
rudrārcanasamudyuktaḥ karotu mama śāntikam ||

virūpākṣastu yakṣendraḥ śvetavāsā mahādyutiḥ |
cārukāñcanamālābhiḥ kiṅkiṇīravakānvitaḥ |
vibhūṣitaḥ sadākālaṃ varadānaikatatparaḥ |
rudrapūjā parobhaktaḥ karotu mama śāntikam ||

antarikṣagatā yakṣā ye yakṣāḥ svargasaṃsthitāḥ |
girikandaradurgeṣu ye yakṣā bhuvi vāsinaḥ ||

pātālavāsino yakṣā nānārūpodyatāyudhāḥ |
śivabhaktāḥ sumanasaḥ śivapūjāsamutsukāḥ ||

śāntiṃ kurvantu me hṛṣṭāḥ śāntāśśāntiparāyaṇāḥ |
yakṣiṇyo vividhākārāstathā yakṣakumārikāḥ ||

yakṣakanyā mahābhāgāḥ śivārcanaparāyaṇāḥ |
śāntiṃ svastyayanaṃ kṣemaṃ balaṃ kalyāṇamadbhutam (muttamam) |
siddhiṃ cāśuprayacchantu nityamevasamāhitāḥ ||

parvatāḥ sarvatassarve parvatyaśca mahardhikāḥ ||

p. 39(42)

śivabhaktāḥ sadākālaṃ kṣemaṃ kurvantu me sadā |
samudrāḥ sarvatassarve ye cānye sāgaraḥ bhuvi ||

rudrārcanaratānityaṃ kurvantu mama śāntikam |
rākṣasāḥ sarvatassarve rākṣasāghorarūpiṇaḥ ||

rākṣasā ye mahāvīryā rākṣasā ye mahābalāḥ |
svargasthā rākṣasā ye tu antarikṣe ca rākṣasāḥ ||

pātāla rākṣasā ye tu nityaṃ rudrārcane ratāḥ |
śāntiṃ kurvantu me nityaṃ satataṃ śivabhāvitāḥ ||

bhairavaṃ yasya rūpantu pretabhasmāvakuṇṭhitam |
tejasā tasya devasya śāntiṃ kurvantu me sadā ||

nityamujvalaveṣeṇa yoginyo'tha mahābalāḥ |
anekarūpadhāriṇyo ḍākinyaśca mahardhikāḥ ||

rudrapraṇāmaparamā rudrarūpārcaneratāḥ |
rudraikāhitacetaskāḥ kurvantu mama śāntikam ||

antarikṣe gatāyāśca ḍākinyaḥ svargasaṃsthitāḥ |
pātālabhūtaleyāśca giridurgeṣu saṃsthitāḥ ||

tṛtīyaṃ locanaṃ yasya triśūlaṃ bhasmabhāsuram | 
tejasā tasya devasya śāntiṃ kurvantu me sadā ||

sarve bhūtā mahārūpāssarve bhūtā mahojjvalāḥ |
sarve bhūtāḥ sthitāḥ saumyāḥ sarve bhūtāmanojavāḥ ||

antarikṣe ca ye bhūtā ye bhūtādivisaṃsthitāḥ |
pātālabhūtale bhūtā bhūtābhūtividāyinaḥ ||

khaṭvāṃgaṃ yasya vimalaṃ triśūlaṃ karapallave |
tejasā tasya devasya śāntiṃ kurvantu me sadā ||

śūrāḥ pretagaṇāḥ sarve ye pretāḥ sarvato mukhāḥ |
ati dīptāśca ye pretāḥ ye pretā rudhirānanāḥ ||

antarikṣe ca ye pretāḥ ye pretāssvarga vāsinaḥ |
pātālo bhūtale pretāḥ ye pretāḥ kāmarūpiṇaḥ ||

śmaśānanilayaṃ yasya ṛṣabho yasya vāhanam |
tejasā tasya devasya śāntiṃ kurvantu me sadā ||

ye piśācā mahāvīryā ṛddhimanto'mitaprabhāḥ |
nānārūpadharāḥ sarve ca guṇavattarāḥ ||

antarikṣe piśācā ye svarge ye ca piśācakāḥ |
bhūtale ye piśācāśca bahurūpā manojavāḥ ||

p. 40(43)

candrārdhaṃ mastake yasya yasya bhasmavibhūṣaṇam |
tejasā tasya devasya śāntiṃ kurvantu me sadā ||

apasmāragrahāssarve sarve cāvijvaragrahāḥ |
garbhabālagrahā ye tu nānārogagrahāśca ye ||

antarikṣe grahā ye tu svarge ye ca grahottamāḥ |
bhūpātāle gṛhe ye tu ye grahāḥ sarvatodiśam ||

kaṇṭhaṃ yasya mahānīlaṃ bhūṣaṇaṃ yasya pannagam 
tejasā tasya devasya śāntiṃ kurvantu me sadā ||

iti devādayaḥ sarve śivajñānavidhāyinaḥ |
kurvantu śāntiṃ jagataḥ śivabhakteṣu sarvadā ||

jayātmayogasaṃsthāya jaya saṃśuddhabuddhaye |
jayadānaika śūrāya jayeśāya namo'stu te ||

jayottamāya devāya jaya kalyāṇakāriṇe |
jayaprakaṭadehāya jayajapyāya te namaḥ ||

jayalakṣmī vidhānāya jayakānti vidhāyine |
yaja vākyavidhuṣṭāyā jināya namo namaḥ ||

jaya triśūlahastāya jayakhaṭvāṅgadhāriṇe |
jaya nirjitarūpāya jaya rūpāya te namaḥ ||

jaya kāntārdhadehāya jaya candrārdhadhāriṇe |
jaya devādidevāya mahādevāya te namaḥ ||

jaya tribhuvaneśāya jaya vikhyātakīrtaye |
jaya vīrāya śarvāya jaya kīrte namo'stu te ||

jaya nirmaladehāya? jaya sarvārthakāriṇe |
jaya manmathanāśāya śānāya namostu te ||

ityevaṃ śāntikādhyāyaṃ yaḥ paṭhecchṛṇuyādapi |
vidhūyasarvapāpāni śivaloke mahīyate ||

kanyārthī labhate kanyāṃ jayārthī labhate jayam |
arthakāmolabhedarthaṃ putrakāmo labhet sutam ||

vidyārthī labhate vidyāṃ yogārthī yogamāpnuyāt |
garbhiṇī labhate putraṃ kanyā vindati satpatim ||

yo yaṃ prārthayate kāmaṃ mānavaḥ śravaṇādiha |
tatsarvaṃ śīghramāpnoti devānāṃ ca priyo bhavet ||

śrutvā dhyāyamidaṃ puṇyaṃ saṃgrāmaṃ praviśennṛpaḥ |
sa vijityāpitāñchatrūn kalyāṇaiḥ paripūryate ||

akṣayaṃ modate kālamatiraskṛtaśāsanaḥ |
vyādhibhirnābhibhūyeta putrapautrapratiṣṭhitaḥ ||

śāntyadhyāyamidaṃ puṇyaṃ yaduddiśyapaṭhennaraḥ |

p. 41(44)

tasya rogānabādhante vātapittādisaṃbhavāḥ ||

nākāle maraṇaṃ tasya sarvaiścāpi na daśyate |
viṣaṃ nākramate dehe na jaḍāndhatvamūkatā ||

nopasargabhayaṃ tasya na cotpātabhayaṃ bhavet |
nābhicārakṛto doṣaḥ vilipyeta kadācana ||

sarvakāmasamṛddhātmā yaḥ paṭhecca dine dine |
nityamūrjitasatvaḥ syādajñāpyasya nivedanam ||

vareṇyaṃ sarvatīrthānāṃ gaṃgādīnāṃ samantataḥ (viśeṣataḥ) |
tatpuṇyaṃ koṭiguṇitaṃ prāpnoti śravaṇādiha ||

daśānāṃ rājasūyānāmagniṣṭomaśatasya ca |
śravaṇāt phalamāpnoti koṭi koṭi guṇottaram ||

avadhyaḥ sarvadevānāmanyeṣāñca viśeṣataḥ |
jīvedvarṣaśataṃ sāgraṃ sarvavyādhivivarjitaḥ ||

goghnaścaiva kṛtaghnaśca brahmahā gurutalpagaḥ |
śaraṇāgataghātī ca mitra visramyaghātakaḥ ||

kaṣṭapāpasamācāraḥ pitṛhā mātṛhā tathā |
śravaṇādasya pāpena mucyate sarvapātakaiḥ ||

śāntyadhyāyamidaṃ puṇyaṃ na deyaṃ kasyacit |
dātavyaṃ śivabhaktebhyaḥ śivena kathitaṃ purā ||

sarvakāmasamṛddhyarthaṃ ye paṭhanti dine dine |
tebhyaḥ puṇyamidaṃ deyamātmanaḥ śivamicchatā ||

iti śivadharmaśāstre ṣaḍakṣara śivārcana japovāsaphalaprakaraṇena 
sahaśāntyadhyāyaṣṣaṭkaḥ ||



atha saptamaḥ

nandikeśvara uvāca 

ye smaranti sadākālamīśānaṃ pūjayanti ye |
rudralokāt paribhraṣṭā vijñeyāstegaṇeśvarāḥ ||

agnihotraṃ ca vedāśca yajñāśca bahudakṣiṇāḥ |
śivaliṅgācanasyai te koṭyaṃśenāpi nārhataḥ ||

sadā yajati soyajñaissadā dānaṃ prayacchati |
sadā sa vāyubhakṣaḥ syāt sadā yo vārcayecchivam ||

yaḥ śivaṃ pūjayennityaṃ praṇamedvāpi bhaktitaḥ |
tasya yogañca mokṣañca śivaḥ prītaḥ prayacchati ||

yaḥ kuryādarcanaṃ māsamekāhāro jitendriyaḥ |
sa yatphalamavāpnoti na tat sarvairmahāmakhaiḥ ||

paurṇamāsyāmamāvāsyā caturdaśyaṣṭamī tathā (ṣu ca) |
snāpayitvāmbhasāliṅgaṃ sarvayajñaphalaṃ labhet ||

p. 42(45)

kṛṣṇapakṣe trayodaśyāmupoṣya parameśvare |
prātarmadhyāhnayoḥ pūjāṃ caturdaśyāṃ samācaret ||

pañcagavyaṃ sapītvādau havirbhuñjītavāgyataḥ |
daśānāmaśvamedhānāṃ phalaṃ prāpnoti mānavaḥ ||

pauṣyakṛṣṇāṣṭamī yoge pūjayitvā ca śaṅkaram |
prāpnoti paramaṃ sthānaṃ yatra devo maheśvaraḥ ||

brahmacārī śucirbhūtvā trisandhyaṃ yo'rcayecchivam |
sasaptakulamuddhṛtya śivaloke mahīyate ||

dānopavāsaniyamaiḥ pūjā jāgarabhojanaiḥ |
mahāsnānādividhinā śivaṃ parvasupūjayet ||

yatparvayāvataḥ kālāt bhavattatrārcyaśaṅkaram |
tāvatkālārcanātpuṇyaṃ yattatparvārcanāllabhet ||

tasmāt parvasu yatnena yathāvibhavavistaraiḥ |
pūjanīyaḥ śivo nityaṃ mahāpuṇyajigīṣayā |
nairantaryeṇaṣaṇmāsaṃ vidhinā pūjyaśaṅkaram ||

puṇyaṃ tadeva sakalaṃ labhate viṣuvārcanāt |
evameva tu vijñeyaṃ grahaṇe cottarāyaṇe ||

dinācchidreṣu saṃkrāntau ṣaḍaśīti mukheṣu ca |
māsaiścaturbhiryatpuṇyaṃ vidhinā pūjya śaṅkaram ||

kārtikyāṃ tallabhetpuṇyaṃ paurṇamāsyāṃ śivārcanāt |
puṇyamevañca phālgunyāmāṣāḍhyāmevameva tu ||

cāturmāsyārcanaṃ hyetat mahāpuṇyaphalapradam |
māghe māse samudyuktaḥ trisandhyaṃ yo'rcayecchivam ||

labhetṣāṇmāsikaṃ puṇyaṃ māghe naiva na saṃśayaḥ |
yathā māghe tathāṣāḍhe māse caiva tu kārtike ||

triṣu puṇyaṃ samaṃ jñeyaṃ māse hyeteṣu yatkṛtam |
cāturmāsya kṛtaṃ puṇyaṃ puṣyamāsārcanāllabhet ||

caitraphālgunayoḥ puṇyaṃ dvimāsa janitaṃ bhavet |
caturdaśyāmamāvāsyāṃ paurṇamāsyāṃ ca pākṣikam ||

puṇyamaṣṭaguṇaṃ jñeyamaṣṭamyāṃ yorcayecchivam |
yaḥ pradadyādgavāṃ lakṣaṃ dogdhrīṇāṃ vedapārage ||

ekāhaṃ yo'rcayelliṅgaṃ tasya puṇyaṃ tato'dhikam |
māse māse tu yo śnīyāt yāvajjīvaṃ sakṛnnaraḥ ||

yaścārcayet sakṛlliṅgaṃ samametannasaṃśayaḥ |
etena kramayogena phalaṃ viddhi dine dine ||

jñeyaṃ saṃvatsarasyāpi yāvadyatkālamarcayet |

p. 43(46)

yaḥ punassaṃgamutsṛjya śivamabdaṃ prapūjayet ||

nairantaryācchataguṇaṃ tatpuṇyaṃ tatpravardhate |
pañcāśadguṇitaṃ puṇamabdārdhaṃ yo'rcayecchivam ||

ṛtāvṛtau tadardhaṃ syān māse māse tadardhakam |
māsārdhamapi yo liṅgaṃ nairantaryeṇa pūjayet ||

puruṣottamaḥ savijñeyo nairantaryaṃ hi duṣkaram |
prātarutthāya yo liṅgaṃ bhaktyāsaṃpūjayecchivam ||

kapilānāṃ śataṃ datvā yatpuṇyaṃ tadavāpnuyāt |
madhyaṃ dinakare prāpte yo liṅgaṃ pratipūjayet ||

saṃpūrṇāṃ pṛthivīṃ datvā yatpuṇyaṃ tadavāpnuyāt |
vāruṇī māśrite sūrye yaḥ śivaṃ samyagarcayet ||

gavāṃ śatasahasrasya dattasya phalamāpnuyāt |
yo liṅgamardharātre tu śuciḥ snātvā prapūjayet ||

agniṣṭomaśatasyāsau dharmato labhate phalam |
evaṃ parvasu velāṣu svavelāsvapi śaṅkaram ||

saṃpūjayennaro bhaktyā sarvānkāmānavāpnuyāt |
śivaliṅgaṃ mahāpuṇyaṃ sarvadevanamaskṛtam ||

yaḥ spṛśedapi vā nityaṃ na sa pāpaiḥ pralipyate |
na tadbhūyaḥ prapaśyanti yonisaṅkara saṃkaṭam ||

kramānmokṣaṃ gamiṣyanti ye narā liṅgamāśritāḥ |
kāñcanaṃ merumātraṃ ca sarvāṃ datvā vasuṃdharām ||

sāgarānannapūrṇāṃśca talliṅgārcayatuḥ phalam |
merumandaramātro'pi rāśiḥ pāpasya karmaṇām || 

īśvaraṃ vaidyamāsādya naśyate duṣṭarogavat |
śivārcanarato nityaṃ mahāpātakasaṃbhavaiḥ ||

doṣaiḥ kṛtairnalipyeta padmapatramivāmbhasā |
chitvā bhitvā ca bhūtāni hatvā sarvamidaṃ jagat ||

yajedekaṃ virūpākṣaṃ na sa pāpaiḥ pralipyate |
sarvāvasthā gato vāpi prayānti paramāṃ gatim (yuktāṃ vā 
sarvapātakaiḥ) ||

(śivamiṣṭvā naraḥ so'pi) saritsamudratīreṣu vaneṣu pavaneṣu ca |
giriśṛṃgeṣu tuṅgeṣu (gahvaro pavaneṣu ca) tīrthāyatanasaṃśraye ||

(puṣkariṇyāṃ taṭākeṣu) yatra vā ramate buddhistatraiva śivamarcayet |
sarvayajñeṣu yatpuṇyaṃ tallabhennātra saṃśayaḥ ||

yaḥ punaḥ sthānasaṃkalpamutsṛjya śivamarcayet |
so'śvamedhaphalaṃ sarvaṃ labhate nātra saṃśayaḥ ||

p. 44(47)

sośvamedhaphalaṃ sarvaṃ labhatenātra saṃśayaḥ |
ayaṃ vināpi mantreṇa puṇyarāśiḥ prakīrtitaḥ ||

syādayaṃ mantrasaṃyuktaṃ puṇyaṃ śataguṇādhikam ||
tasmānmantreṇa śarvāya snānagandhaphalādikam ||

kṣitigoratnavastrādi homādyaṃ ca nivedayet |
jñeyo namaḥ śivāyeti mantraḥ sārvārcya sādhakaḥ ||

sarvamantrādhikaścāyaṃmoṃkārādyaṣṣaḍakṣaraḥ |
śivenāntarbahiryasmādmāptaṃ sarvaṃ carācaram ||

jagadekaṃ ca kurute tasmādomiti saṃsmṛtaḥ |
ayamardhaścatasṛbhiḥ mātrābhiḥ parigīyate ||

brahmāhariśca rudraśca mātrāsti(sre)sya kīrtitāḥ |
dakṣiṇāṃgodbhavo brahmā harirvāmāṅgasaṃbhavaḥ ||

hṛdayānnīlarudraśca brahmaviṣṇuprabodhakaḥ |
jagatsṛṣṭikaro brahmā viṣṇurlokavimohakaḥ ||

jagatsṛṣṭikaro brahmāviṣṇurlokavimohakaḥ |
anugrahaparonityannīlarudraḥ śivātmakaḥ ||

tribhiretairjagadvyāptaṃ kāraṇairātmakarmabhiḥ |
tisromātrāḥ śivasyaitāḥ sarvalokaprapūjitāḥ ||

etā eva trayolokāstrayo vedāgnayastāyaḥ |
trayoguṇāstrivargaśca yaccānyajjagatisthitam ||

ardhamātrā parorudraḥ śivaḥ kāraṇakāraṇam |
tasmādetatsamutpannaṃ jagataḥ kāraṇatrayam ||

sarvajñaḥ kāraṇaḥ śuddho namaskāra mahāmakhaḥ |
namaskārātmayajñena tasmāt saṃpūjaye cchivam ||

ajñānamaśivatvaṃ syāt sarvaduḥkhālayaṃ yataḥ |
svabhāvāttadavāptaṃ hi tasmādrudraḥ paraḥ śivaḥ ||

namaḥ śivāya śāntāya kāraṇa traya hetave |
nivedayāmi cātmānaṃ matvaikamanasā punaḥ ||

uktvoṃ namaḥ śivāyeti mucyate sarvapātakaiḥ |
yasmāttasmāttadāmantramoṃkārādyamanusmaran ||

sarvadā sarvakāryeṣu kṣutaniṣṭhivanādiṣu |
yātyoṃ namaḥ śivāyeti śivamuktvā śivaṃ padam ||

yaḥ svapan pratibudhyaṃśca prayāṇānte ca sa smaran |
sadoṃ namaḥ śivāyeti sa gacchet paramāṃgatim ||

śāṭhyenāpi namaskāraḥ prayuktaḥ śūlapāṇaye |
saṃsārasthūlabaṃdhānāṃ mudveṣṭana karo bhavet ||

p. 45(48)

apavitraḥ pavitro vā sarvāvasthāṃ gato'pi vā |
yaḥ smareddevamīśānaṃ na sa pāpaiḥ pralipyate ||

smaraṇādevarudrasya pāpasaṃghāta pañjaram |
śatadhā bhedamāyāti girirvajrahato yathā ||

sarveṣāṃ śivabhaktānāmaroṣārtha prasiddhaye |
mantra māha śivaḥ sāramaśeṣārthanibandhanam ||

sadbījaṃ sarvavidyānāmādyaṃ brahma parātparam |
sarvārthasādhakaṃ mantraṃ śivasūtraṃ ṣaḍakṣaram ||

bhāṣyamasyaiva sūtrasya sarvajñānāni śambhunā |
paścāt parāparāṇīha pravyaktaṃ gaditāni tu ||

tasmādanenamantreṇa prakurvīta śivārcanam |
sandhyāyāṃ ca japedenaṃ sarvapāpaviśuddhaye ||

gṛhācchataguṇaṃ puṇyaṃ sandhyāyāṃ ca jalāśaye |
śivadakṣiṇamūrtau tu tatpuṇyamayutādhikam ||

tasmācchivālaye sandhyāmācarecchāntamānasaḥ |
śivamantreṇasatataṃ sarvakāmaprasiddhaye ||

yastusarvatrasaṃpūjya saviśeṣaṃ savistaram |
aśvamedhāyutaṃ puṇyaṃ labhate nātrasaṃśayaḥ ||

saritsamudratīreṣu vaneṣū pavaneṣu ca |
yastamarcayate bhaktyā tasya puṇyaṃ tatodhikam ||

jitendriyaśśāntamanāśśivamantreṇa yo'rcayet |
na tasya śakyate puṇyaṃ vaktuṃ varṣaśatairapi ||

gatā vacchakyate vaktuṃ yasmin deśe vasedayam ||

so'pi deśo bhavetpūtaḥ kiṃ punastasya bāndhavāḥ |
yebhyo yamannamaśnāti yestasya paricārakāḥ ||

te'pīha tatsamāyasmāt tairvinānaśivārcanam ||

na tatra deśe durbhikṣaṃ na camariḥ pravartate |
nākāle mriyate rājā pūjyate yatra śaṅkaraḥ ||

yaḥ śivaṃ pūjayennityaṃ mantyajo'pi jitendriyaḥ |
evaṃ bhāvasamāyuktasso'pi gacchet parāṃgatim ||

nopanīta sahasrebhyo brahmacārī viśiṣyate |
brahmacārīsahasrebhyo vedādhyāyī viśiṣyate ||

vedādhyāyi sahasrebhyo hyagnihotrī viśiṣyate |
agnihotrisahasrebhyo yajñayājī viśiṣyate ||

yajñayājisahasrebhyo satrayājī viśiṣyate |
satra yājisahasrebhyaḥ sarvavidyāntapāragaḥ ||

p. 46(49)

sarvavidyāntavidbhaśca śivabhakto viśiṣyate |
tasmādevaṃ śivaṃ bhaktyābhyarcayecchāntamānasaḥ ||

śivabhakto jitakrodhaḥ śivajñānaparāyaṇaḥ |
maitraḥ kāruṇikoyastu saprāpnoti sadāśivam ||

puṇyaprāyeṣu maitryaiva muditā puṇyaśāliṣu |
apuṇyavatsu copekṣā sarveṣāṃ ca vadecchivam ||

ityevaṃ pañcadhā cittaṃ bhāvayitvā yajecchivam |
saṃpūjyapaśubhartāraṃ prahṛṣṭenāntarātmanā ||

dhyānaṃ kuryādyayoddiṣṭaṃ sarvapāpanikṛntanam |
iṣṭvā tu parayābhaktyā bhagavantaṃ trilocanam ||

kṛtāñjalipuṭo bhūtvā stotrametajjapennaraḥ |
namaste jñānarūpāya sarvajñānaika hetave ||

jñānavijñānatatvāya nityaṃ jñānatamāya te |
sūkṣmāya sūkṣmarūpāya sūkṣmajñānaika hetave ||

sūkṣmāṇāmapi sūkṣmāya namaḥ sūkṣmatamāyate |
divyāya divyadivyāya divyaranayaikahetave |
divyānāmapi divyāya namo divyatamāya te ||

parāya parameśāya paramārthaika hetave |
parāparavimuktāya namaḥ paratamāya te ||

pūjyāya pūjya pūjyāya sarvapūjyaika hetave |
pūjyānāmapi pūjyāya namaḥ pūjyatamāyate ||

nityāya nityarūpāya nityasaṃbhoga hetave |

nityānāmapi nityāya namo nityatamāyate ||

dīptāya dīptadīptāya sarvadīptyeka hetave |
diptānāmapi dīptāya namodīptatamādyate |
sārāya sārabhūtāya sarvasāraika hetave ||

sārāṇāmapi sārāya namaḥ sāratamāyate |
śaktāya śaktirūpāya sarvaśaktyaika hetave ||

śaktānāmapi śaktāya namaḥ śaktatamāyate |
śuddhāya śuddharūpāya sarvaśuddhyaika hetave ||

śuddhānāmapi śuddhāya namaḥ śuddhatamāyate |
kālāya kālarūpāya sarvakālaika hetave ||

kālānāmapi kālāya namaḥ kālatamāyate |
sarvamantraśarīrāya sarvamantraikahetave ||

mantrāṇāmapi mantrāya namo mantratamāyate |
vyomapramāṇarūpāye śānāya namo namaḥ ||

vyomapramāṇa yogāya puruṣāya namo namaḥ |
vyoma pramāṇabhāsāyā ghorāya namo namaḥ ||

p. 47(50)

vyomapramāṇavāmāya vāmeśāya namostu te |
vyomapramāṇabhogāya bhogeśāya namostu te ||

vyomapramāṇamokṣāya mokṣeśāya namo'stute ||

vyomapramāṇaviśvāya viśveśāya namostu te ||

ekakāya dvikāyāya bahukāyāya te namaḥ |
kāyāsaṃkhyeya yuktāya tryambakāya namo namaḥ ||

ekavaktadvivaktrāya bahuvaktrāya te namaḥ |
vaktrāsaṃkhyeyayuktāya parameśāya te namaḥ ||

ekajihvadvijihvāya bahujihvāya te namaḥ |
jihvāsaṃkhyeya yuktāyatriṇetrāya namo namaḥ |
vyomapramāṇasatyāyā jitāya namo namaḥ ||

vyomapramāṇakāmāya kāmeśāya namo namaḥ |
vyomapramāṇadivyāya divyeśāya namo namaḥ ||

vyomapramāṇakālāya kāleśāya namo namaḥ |
vyomapramāṇadharmāya dharmeśāya namo namaḥ ||

ekadaṃṣṭradvidaṃṣṭrāya bahudaṃṣṭrāya te namaḥ |
daṃṣṭrāsaṃkhyeya yuktāya tryambakāya namo namaḥ ||

eka kaṇṭha dvikaṇṭhāya bahukaṇṭhāya te namaḥ |
kaṇṭhāsaṃkhyeya yuktāya nīlakaṇṭhāya te namaḥ ||

eka hasta dvihastāya bahuhastāya te namaḥ |
hastāsaṃkhyeyayuktāya nityaṃ rudrāya te namaḥ ||

ekanetradvinetrāya bahunetrāya te namaḥ |
netrāsaṃkhyeya yuktāye śānāya namo'stu te ||

namaste'stu mahādeva namaste'stu maheśvara |
namastestu mahāyogin namastestu mahābala ||

namastestu maheśāya namaste'stu mahottama |
namaste'stu mahārūpa namaste'stu sadāśiva ||

namaste'stu mahāśuddha namaste'stu sadojjvala |
namastestu mahādeva namaste'stu sadā bhava ||

namaste bhagavan śānta namaste bhagavan dhruva |
namaste bhagavaddīpta namaste bhagavan hara ||

ajitāya namastubhyaṃ bhasmāṃgāya namostu te |
sarvātmane namastubhyaṃ viśveśāya namostu te ||

sarvajñāya namastubhyaṃ sarvāṃbhāya namostu te |
anantāya namastubhyamanāthāya namo namaḥ(stu te) ||

p. 48(51)

avyaktāya namastubhyaṃ śāśvatāya namostu te |
saṃpūjyāya namastubhyaṃ varadāya namostu te ||

iti stave na yaḥ kaścit saṃstunoti maheśvaram |
sa vihāyāśu pāpāni rudraloke mahīyate ||

bhogārthī labhate bhāgān rājyārthī rājyamāpnuyāt |
kanyārthī labhate kanyāṃ yogārthī yogamāpnuyāt ||

mucyate vyādhibhī rogī duḥkhī duḥkhāt pramucyate |
bandhanānmucyate baddho yaśorthī kīrtimāpnuyāt ||

yān yān cintayate kāmāṃstāṃstān prāpnoti bhāvitaḥ |
śaivaṃ padamavāpnoti nityaṃ paṭhati yo naraḥ ||

iti śrīśivadharmaśāstre dānadharmodhyāyaḥ saptamaḥ ||



athāṣṭamaḥ

śrīnandikeśvara uvāca

pṛthivyāṃ yānitīrthāni puṇyānyāyatanāni ca |
līyante tāni liṅge tu tasmālliṅgaṃ samarcayet ||

sa snātassarvatīrtheṣu sa sarvoparisaṃsthitaḥ |
yaḥ pūjayenmahāpuṇyaṃ liṅgaṃ sarvārthasiddhidam ||

śatena sthāpitaṃ liṅgaṃ sahasreṇa na cālayet |
duḥsthitaṃ susthitaṃ vāpi śivaliṅgaṃ na cālayet ||

ghṛtābhiṣekaṃ yaḥ kuryāt ahorātraṃ śivasya tu |
sūkṣmadvāreṇa kumbhena puṣyamāse samudyataḥ ||

gītanṛttopacāreṇa śaṃkhavāditra nisvanaiḥ |
kuryājjāgaraṇaṃ cātra pradīpādyupaśobhitam ||

samastapāpanirmuktaḥ samastakulasaṃyutaḥ |
samastakāmasaṃpūrṇaḥ samastaguṇasaṃyutaḥ ||

jvaladbhissamahāyānairasaṃkhyeyairanuttamaiḥ |
yuktaḥ śivapure nityaṃ modate śivavat sukhī ||

grahaṇe viṣuve caiva puṇyeṣu divaseṣu ca |
ghṛtābhiṣekaṃ yaḥ kuryānmahāpuṇyamavāpnuyāt ||

ghṛtābhiṣekaṃ yaḥ paśyedāsamāpte rūpoṣitaḥ |
vidhūyasarvapāpāni śivalokaṃ sagacchati ||

ekaḥ pūjayate bhaktyā bhaktyā cānyaḥ prapaśyati |
tulyamevaphalaṃ tābhyāṃ bhaktirevātrakāraṇam ||

yaḥ kuryātparvakāleṣu mahāyātrāpravartanam |
śivasya rathayātrāṃ vā nagarāntaḥ pradakṣiṇam ||

mahācitradhvajaiśchatraiḥ kiṃkiṇīkhanānvitaiḥ |
vitānadhvajamālābhiḥ ghaṇṭācāmaradarpaṇaiḥ ||

p. 49(52)

śaṃkhabheryāditumulaiḥ gītanāṭyādisaṃkulaiḥ |
lekhyairdārumayairyantrairmātṛrakṣogaṇādibhiḥ ||

udagāgneyayantraiśca bahvāścaryairanekaśaḥ |
strīḍolāyantracakraiśca mahācakrāṣṭalambanaiḥ ||

udadhyāpānakhātādyai mahāsatrasamāyutam |
mahājanapadākīrṇaṃ yathāvibhavavistaram ||

sarvadānaprapuṇyāni sarvayajñaphalāni ca |
atyugratapasāṃ puṇyaṃ sarvatīrthaphalāni ca ||

labdhvānakharaḥ śrīmān śivayātrā pravartanāt |
śivaloke mahābhogaiḥ śivavanmodateciram ||

tasyānte devarājatvaṃ suciraṃ kālamāpnuyāt |
jambūdvīpādhipaḥ śrīmān tasyānte sa mahīpatiḥ |

āliṅgavediparyantaṃ yo dadyād ghṛtakambalam |
ghṛtadhārāphalaṃ tasya māghe paurṇe tu parvaṇi ||

manvantaraśataṃ sāgraṃ śivaloke mahīyate |
samyak prokṣaṇakaṃ kṛtvā śivalokamavāpnuyāt |
surūpaḥ subhagaśśrīmān paribhraṣṭo'tra jāyate ||

rūpaṃ piṣṭamayaṃ kṛtvā triṇetraṃ ratnabhūṣitam |
śrutvopavītasaṃyuktamekapādaṃ viśeṣataḥ |
danteṣu mauktikaṃ tasya pravālamadharoṣṭhayoḥ ||

dadyādvajraṃ ca netrābhyāṃ vaiḍūryaṃ vāpyasaṃbhave ||

hemaṃ raupyaṃ ca hastābhyāṃ tāmraṃ pāde prakalpayet |
aṇḍajaiḥ phenajairvastrairvicitraiḥ pariveṣṭayet ||

sugandhaiścitravarṇaiśca puṣpairapi vibhūṣayet |
vividhaiḥ bhakṣyabhojyādyaiḥ baliṃ tatropakalpayet ||

bhojayecchivabhaktāṃśca viprān bhaktyā ca tarpayet |
prīyatāṃ me śivo nityamuktvā cotthāpayed dvijān ||

tairevasāndraṃ viprendraistadrūpantu śivālaye |
nītvā samarcayedvedyāṃ śivaliṅgasamīpataḥ ||

sarvayajñaphalaṃ prāpya sarvadānaphalāni ca |
surūpo rūpadānena śivaloke mahīyate ||

bhojanaṃ ghṛtasaṃpūrṇaṃ madhunopariśobhitam |
dadyāt kṛṣṇatilānāṃ ca prasthamekaṃ ca māgadham ||

dviguṇaṃ taṇḍulānāñca pṛthakprasthantu dāpayet |
gandhaiḥ puṣpaistathā dhūpaiḥ navavastraiśca veṣṭayet ||

sarvabhakṣānnapānaiśca baliṃ caiva nivedayet |

p. 50(53)

arcayitvā vidhānena paurṇamāsyāṃ viśeṣataḥ |
yugāyutasahasrāṇi śivalokemahīyate ||

puṇyakṣayādihāgatya samṛddhe jāyate kule |
medhāvī subhagaḥ śrīmān vedavedāṃgapāragaḥ |
tāmrapātraṃ payaḥ pūrṇaṃ kṛtvā cāntaḥsthakāñcanam ||

pracchādyoparipadmena gandhapuṣpārcitaṃ mahat |
śivabhaktaṃ dvijaṃ samyak bhojayitvā vidhānataḥ ||

prācyāṃ samudgate some pratīcyāṃ ca ravaugate |
paurṇamāsyāṃ savaiśākhyāṃ gṛhyapātraṃ śivāgrataḥ ||

prīyatāṃ me mahādevaḥ somamūrtirjagatpatiḥ |
tasmaiviprāyatatpātraṃ marpayedbhaktitaśśanaiḥ ||

etatsomavrataṃ nāma kṛtvā rudrāntikaṃ vrajet |
rudralokātparibhraṣṭo bhavejjātismaronaraḥ |
pūrvābhyāsena te naiva punaḥ śivapuraṃ vrajet ||

āṣāḍhe paurṇamāsyāṃ tu śivaṃ saṃpūjya yatnataḥ(bhaktitaḥ) |
upavītīsitādadyāt śivabhaktāṃśca bhojayet ||

punareva ca kārtikyāṃ pūjyaśaṃbhuṃ kṣamāpayet |
yatīnāṃ dakṣiṇāṃ dadyāt sūtravastrādiśobhitām ||

yaḥ kuryāt sakṛdapyevaṃ cāturmāsya pavitrakam |
kalpakoṭiśataṃsāgraṃ śivaloke mahīyate ||

puṇyakṣayātparibhraṣṭaścaturvedī prajāyate |
icchayā vā bhavedrājā guṇavīryasamanvitaḥ ||

bhūmidānasya yatpuṇyaṃ kanyādānasya yatphalam |
mukhavādyena tatpuṇyamubhayaṃ labhate naraḥ ||

tadeva puṇyagītasya nṛttasya ca viśeṣataḥ |
tadeva jayaśabdasya hastatālasvane tathā ||

yogāṃ payasvinīṃ dadyāt taruṇīṃ vṛṣasaṃyutām |
śivāya tena dattaṃ syāt jagatsarvaṃ carācaram ||

vṛṣabhaṃ paripūrṇāṃgamudārañca śaśiprabham |
gomatīṃ dhūrvahaṃ vāpi yatheṣṭaṃ vinivedayet ||

yāvanti deharomāṇi tatprasūti kuleṣu ca |
tāvanmṛgasahasrāṇi śivaloke mahīyate ||

snānāgnikāryamuddiśya surūpāṃ supayasvinīm |
kulīnāṃ kapilāṃ datvā dattaṃ bhavati gośatam ||

bhayakāntāra durgebhyaḥ kapilātrātimātṛvat |
yatnena kapilāṃ tasmāt śivāya vinivedayet ||

p. 51(54)

śivasnānādikāryārthamutpannaṃ kapilāghṛtam |
tasmāttatraivasaṃyojya kapilāśubhamicchatā ||

kapilāṃ yaḥ pibecchūdraḥ śivasaṃskāravarjitaḥ |
saprayāti mahāghoraṃ narakaṃ yātanākulam |
hutaśeṣaṃ pibedvipraḥ svargāsyādanyathā paśuḥ ||

gāñca labhyanamaskṛtya yaḥ kuryāttāṃ pradakṣiṇam |
pradakṣiṇī kṛtā tena saptadvīpāvasundharā ||

gavāṃ huṃkāraśabdena darśanasparśanena ca |
pāpaṃ praṇaśyate yasmāt paśyet spṛśeta ca tām ||

kutasteṣāṃ hi pāpāni yeṣāṃ gṛhamalaṅkṛtam ||

satataṃ bālavatsābhirgobhiḥ śrīribhirivasvayam |
yāni tīrthāni medinyāmāsamudrāt samantataḥ ||

gavāṃ śṛṅgodakasnānāt kalāṃ nārhati ṣoḍaśīm |
gavāmasthinalaṃgheta * * mṛtaṃ na varjayet ||

yāvat pibati tadgandhaṃ tāvat puṇyaiḥ prapūryate |
gavāṃ kaṇḍūyanāddhūpāt go pradāna phalaṃ labhet ||

tulyaṃ go śatadānena bhayarogādipālanam |
tṛṇodakādi saṃyuktaṃ yaḥ pradadyādgavādikam ||

sa gomedhasamaṃ puṇyaṃ labhate nātra saṃśayaḥ |
bahunātra kimuktena gāvaḥ pālyāḥ prayatnataḥ ||

gāvo dainyāt sadārakṣyāḥ poṣyāgrāhyāśca sarvadā |
ye tāḍayanti te pāpāḥ sarvalokasyamātaraḥ ||

krośayanti ca saṃmohāt tairākṛṣṭamidaṃ jagat |
tāḍayedyadi vā martyo yaścākrośennarādhamaḥ ||

narakāgnau sa pacyeta goniśvāsasamīrite |
sapalāśena dagdhena tanunāśaṃ nivartayet ||

gacchāṃ veti ca tāṃ brūyāt mā mātaritivārayet |
halotsargaṃ ca yaḥ kuryāt pakṣayorubhayorapi ||

dvādaśyāṃ pañcadaśyāṃ ca caturdaśyaṣṭamīṣu ca |
tasya gāvo vṛṣāviṣṇa śivomāḥ sarvadevatāḥ ||

śāntiṃ juṣanti suprītāḥ svargamāyurbalaṃ śriyam |
dāsyanti ca sadā nityaṃ kalyāṇaṃ bhadrameva ca ||

evaṃ yo vartate goṣu tāḍanākrośavarjitaḥ |
mahatīṃ śriyamāpnoti rudralokaṃ sa gacchati ||

go brāhmaṇārthamudyuktaḥ prāṇairyadi viyujyate |

p. 52(55)

prāpnoti paramaṃ sthānaṃ yatra devo maheśvaraḥ ||

brāhmaṇāṃścaiva gāvaśca kulamekaṃ dvidhākṛtam |
ekatramantrāstiṣṭhanti havirekatra tiṣṭhati |
gobhiryajñāḥ pravartante goṣu devāḥ pratiṣṭhitāḥ ||

gobhirvedāssamuttīrṇāḥ saṣaḍaṃgapadakramāḥ |
śṛṃgamūle gavāṃ nityaṃ brahmāviṣṇuśca saṃsthitau |

śṛṃgāgre sarvatīrthāni sthāvarāṇi carāṇi ca |
śiromadhye mahādevaḥ sarvadevapatiḥ sthitaḥ ||

lalāṭāgre sthitā devī nāsāvaṃśeṣu ṣaṇmukhaḥ |
kambalāśvataraunāgau nāsāpuṭasamāśritau ||

karṇayoraśvinau devau cakṣuṣī rāśibhāskarau |
danteṣu vāyavaḥ sarve jihvāyāṃ varuṇaḥ sthitaḥ ||

sarasvatī ca huṃkāre yamayakṣau tu gaṇḍayoḥ |
sandhyādvayaṃ tathoṣṭhābhyāṃ grīvāmindraḥ samāśritaḥ ||

ṛkṣāṇi kakudidyauśca sādhyaścorasrisaṃsthitaḥ |
catuṣpāt sakalo dharmaḥ svayaṃ jaṃghāsusaṃsthitaḥ ||

rudraikādaśakaṃ pṛṣṭhe vasavaḥ sandhiṣu sthitāḥ |
khuramadhyeṣu gandharvāḥ khurāgreṣu ca pannagāḥ ||

khurāṇāṃ paścimāgreṣu gaṇohyapsasāṃ sthitaḥ |
rudraikādaśakaṃ pṛṣṭhe vasavaḥ sandhiṣu sthitāḥ ||

śroṇītaṭasthāḥ pitaro mātaro yonimāśritāḥ |
ādityāraśmayo vālāḥ piṇḍībhūtā vyavasthitāḥ ||

udāne pṛthivī sarvā sa śailavanakānanā |
sākṣād gaṃgā ca gomūtre gomaye yamunā sthitā |
aṣṭāviṃśaddeva koṭyo romakūpeṣu saṃsthitāḥ ||

catvāraḥ sāgarāḥ pūrṇāḥ gavāṃ ye ca payodharāḥ |
etadvaḥ  kathitaṃ sarvaṃ yathā goṣupratiṣṭhitam ||

goṣudattaṃ hutaṃ bhuktaṃ goṣu sarvaṃ carācaram |
tasmād gāvo na hiṃsyāḥ syuḥ pālanīyāstu sarvadā |
gāvaḥ stutyāśca vandyāśca gāvo māṃ pāntu nityaśaḥ ||

brahmaṇā brahmaśabdena stūyate praṇavena yaḥ |
sa śivaḥ śāśvato nityaṃ goṣumāriṃ vyapohati(tu) ||

yorcyate satataṃ bhaktyā viṣṇunā prabhaviṣṇunā |
sa śivaḥ śāśvato devo goṣumārīṃ vyapohatu ||

lambodareṇa devena gajavaktreṇa yorcitaḥ |

p. 53(56)

sa śivaḥ śāsvato devo goṣumāriṃ vyapohatu ||

sarvarogahareṇāpi raviṇā yaḥ prapūjyate |
sa śivaḥ śāśvato devo goṣumārīṃ vyapohatu ||

śrīmān yo rucirāṃgeṇa ghaṇṭākarṇagaṇena yaḥ |
nityaṃ praṇamyate bhaktyā hṛṣṭe nānanyacetasā ||

sa śivaḥ śāśvato devo goṣumārīṃ vyapohatu |
ityupadravasaṃyuktāṃ goṣumārīṃ vyapohatu ||

nityaṃ rudrabalopeto rudraśakti samanvitaḥ |
ghaṇṭākarṇagaṇo devo goṣumāriṃ vyapohatu ||

ghaṇṭākarṇagaṇodevaśśivajñānavidhāyakaḥ |
śivatejonubhāvena goṣumārīṃ vyapohatu ||

śivāya devadevāya mahādevāya bhāmine |
rudrāya sthāṇave nityaṃ harāyogrāya te namaḥ ||

parameśāya siddhāya sarvasiddhipradāyine |
tryambakāya maheśāyātiśāntāya te namaḥ ||

abhimantryasadātoyametairmantrairyathākramam |
prokṣayīta gavāṃ dehaṃ tataśśāntirbhaviṣyati ||

imāṃ yaḥ paṭhate goṣu rogārtāsu viśeṣataḥ |
go sāvitrīṃ mahāpuṇyāṃ tataḥ śāntirbhaviṣyati ||

yaḥ samutthāya satataṃ go sāvitrīmimāṃ paṭhet |
gavāṃ cotsargakāle tu prasthāne vā samāgame |
āyuṣmān balavāñchrīmān gomānarthapatirbhavet ||

dohānte ca śivasthānaṃ sa gacchennātrasaṃśayaḥ |
prabhūtatoyaṃṣu bṛhattṛṇeṣusapuṃgavānnityamarogavatsāḥ |
carantu gāvaḥ sukhitā vaneṣukṣīraṃ prayacchantu sukhaṃ svapantu ||

yo laṃkṛtyaśivāyāśca muttamāṃ vinivedayet |
sośvamedhasya yajñasya phalamaṣṭaguṇaṃ labhet ||

suvinītāṃ striyaṃ vāpi puruṣaṃ vā nivedayet |
naramedhasya yajñasya phalaṃ ṣaḍguṇamāpnuyāt ||

nivedayī tayo bhaktyā bhadrannāgamalaṃkṛtam |
śivāyaparve divase tasya puṇyaphalaṃ śṛṇu ||

mattairairāvataprakhyaiḥ gajairyuktaiḥ suśobhanaiḥ |
krīḍate sa mahāyānaiḥ śatasaṃkhyairanekadhā ||

kalpakoṭisahasrāṇi kalpakoṭya yutāni ca |
rudraloke tataścānte bhavedindraḥ surādhipaḥ ||

p. 54(57)

bhavedindrasamaḥ śrīmān rūpavīryabalānvitaḥ |
yaḥ śivāyajalopetāṃ sarvasasya prarohiṇīm |
mahīṃ mahīpatirdadyāt tasya puṇyaphalaṃ śṛṇu ||

yāvaddaṇḍā bhavedbhūmirmīyamānāsamantataḥ |
tāvatsakalpasaṃkhyānaṃ rudraloke mahīyate ||

evaṃ sarvatravijñeyaṃ phalaṃ daṇḍa pramāṇataḥ |
grāma kheṭapurakṣetra viṣayādi nivedayet ||

sarvasasyaphalopetaṃ sarvabādhāvivarjitam |
grāmaṃ śivāya yo dadyāt tasya puṇyaphalaṃ śṛṇu ||

sarvatīrtheṣu yat puṇyaṃ sarvayajñeṣu yatphalam |
sarvadāneṣu yatpuṇyaṃ grāmadānena tadbhavet ||

sūryakoṭipratīkāśairdivyastrīkoṭisaṃyutai ||

yugakoṭiśatānīkaiḥ sarvakāmasamanvitaiḥ ||

vimānaigrāmadānena trisaptakulasaṃyutaḥ |
yatheṣṭamaiśvare loke krīḍate kālamakṣayam |
puṇyaṃ nagaradānasya grāmadānācchatādhikam |
deśadānena cānantyaṃ na śakyaṃ tatprakīrtitum ||

ratnānnapānagośvadriṃ sarvaṃ bhūmau prajāyate |
tasmāt tu bhūmidānena sarvadānaphalaṃ labhet |
yonyadattāṃ svadattāṃ vā hared bhūmiṃ tu mānavaḥ |
prapacyate'kṣayaṃ kālaṃ narakeṣu krameṇa saḥ ||

sarvantu bhūmihāreṇa hṛtameva na saṃśayaḥ |
bhūmihartā bhavettasmānarakeṣvāmahīkṣayāt ||

devasvāniharantīha narānarakanirbhayāḥ |
brahmasvāni ca ye mohāt pacyante narakeṣu te ||

deva brahmasva puṣṭāni vāhanāni mahīpateḥ |
yuddhakāle nārīṣyante saikatāḥ setavo yathā ||

bhūmiprado vaset svarge yāvatkālaṃ ca saṃkhyayā |
tasmācchataguṇaṃ kālaṃ taddhṛtvā narake vaset ||

viṃśatyaṣṭau ca yāḥ koṭyo narakāṇāṃ sudāruṇāḥ |
krameṇa teṣu pacyante deva brahmasva hāriṇaḥ ||

kālānteṣu samuttīrṇā vṛkṣakīṭādiyoniṣu |
bhramanti suciraṃ kālaṃ kṣutpipāsādipīḍitāḥ ||

evaṃ bhramanti suciraṃ īśvarāyopajīvitāḥ |

p. 55(58)

kenacicchivabhaktena śivārcāyatanādiṣu |
tato vidhūtapātmānastenarāśśivatejasā ||

divaṃ prayānti saṃtyajya śarīraṃ yātanātmakam ||

iti śrīśivadharmaśāstre śivapradānaphalo'ṣṭamaḥ ||



atha navamaḥ ||

śrīnandikeśvara uvāca

ataḥ paramidaṃ puṇyaṃ vakṣyāmi munisattama |
puṇyātiśayasaṃyuktaṃ sarvadevairanuṣṭhitam ||

(varuṇādityasomāgni maruddhanadanāradaiḥ |)

viṣṇunā brahmaṇādevyā skandendrābhyāṃ yamena ca |
varuṇādityasomāgni maruddhanadanāradaiḥ ||

dharmaśrīśukranakṣatra vilopītaṃ śanaiścaraiḥ |
viśvāmitra vasiṣṭhātribṛhaspati budhādibhiḥ ||

śvetāgastyadadhīcādyaissarvaiśca munipuṅgavaiḥ |
bhṛṅgimātṛmahākāla caṇḍeśvaragaṇādhipaiḥ ||

vṛṣavāsuki kārkoṭa gulakānantatakṣakaiḥ |
padmaśaṅkhamahāpadmairanyaiścāpi mahoragaiḥ ||

siddhairyakṣaiḥ kiṃ puruṣairvasubhiśca mahātmabhiḥ |
apsaro daityagandharva rakṣobhūtagaṇairapi ||

śivāgatiryathā prāptā sarvagatyatiśāyinī |
mayā ceśaprasādena tathā śṛṇu vidhiṃ param ||

sitacandanatoyena snāpyaliṅgaṃ pralīpya ca |
śvetairvikasitaiḥ padmaiḥ saṃpūjya praṇipatya ca ||

paṅkajairvimalaiḥ saumyai vicchidre puṣpite site |
madhyekesarajālasya sthāpyaliṅgaṃ kanīyasam |
aṅguṣṭhamātraṃ vidhivat sarvagandhamayaṃ śubham ||

sthāpya dakṣiṇamūrtau tu bilvapatraistadarcayet |
agaruṃ dakṣiṇe pārśve paścime tu manaḥ śilām |
uttare candanaṃ dadyāt haritālaṃ ca pūrvataḥ ||

kusumaiśca sugandhaiśca vicitraiścāpi pūjayet |
dhūpaṃ kṛṣṇāgaruṃ datvā saghṛtaṃ vāpi guggulum ||

vāsāṃsi ca susūkṣmāṇi vikeśāni nivedayet |
pāyasaṃ ghṛtasaṃyuktaṃ ghṛtadhīpāṃśca dāpayet ||

sarvaṃ nivedyamantreṇa tato gacchet pradakṣiṇam |
praṇamya mūrdhnā deveśa mutyāyānte kṣamāpayet |
sarvopahārasaṃyuktaṃ taccaliṃgaṃ nivedayet ||

śivāya śivamantreṇa dakṣiṇāmūrtimāśritaḥ ||

p. 56(59)

anena vidhinādevāḥ sarve devatvamāgatāḥ |
devī devatvamāpannā guhaḥ skandatvamāgataḥ ||

brahmā brahmatvamāpanno harirviṣṇutvamāgataḥ |
evaṃ yo'rcayate nityaṃ liṃgaṃ sarvagandhamayaṃ sakṛt ||

sarvapāpavinirmuktaḥ śivaloke mahīyate ||

etadvratottamaṃ guhyaṃ śivaliṅgamahāvratam ||

bhaktasya te samākhyātaṃ na deyaṃ yasya kasyacit |
ciraparyuṣitaṃ mālyaṃ śivasyo(syā)panayettu yaḥ || 

go sahasra pradānasya phalaṃ tasya na saṃśayaḥ ||

iti śrīśivadharmaśāstre liṅgamahāvrataṃ nāma navamodhyāyaḥ ||



daśamodhyāyaḥ 

nandikeśvara uvāca

caturdaśyāṃ tathāṣṭamyāṃ pakṣayoḥ śuklakṛṣṇayoḥ |
yo'bdamekaṃ na bhuñjīta śivārcanarataḥ śuciḥ ||

yat puṇyamakṣayaṃ proktaṃ satataṃ rātrayājinām |
satyādiṣu ca yatpuṇyaṃ yatpuṇyamṛtugāminām |
agnihetre tu yat puṇyaṃ yat puṇyaṃ yajñayājinām ||

tatpuṇyaṃ sakalaṃ tasya śivalokaṃ ca gacchati |
pṛthivīṃ bhājanaṃ kṛtvā bhuktvā parvasu yatnataḥ ||

ahorātreṇa caikena trirātraphalamaśnute |
dvepañcamyau tu māsasya dve ca partipadau naraḥ ||

sopavāsaḥ sugandhaśca śayīta priyayā saha |
śete niścala cittaśca rati prīti vivarjitaḥ ||

śivānu smṛtiśīlaśca tasya puṇyaphalaṃ śṛṇu |
divyavarṣasahasraṃ tu divya varṣaśataṃ tathā ||

tapastaptaṃ mahattena bhavedevamasaṃśayaḥ ||

śivabhakti suprītātmā yadyapi syāt sapāpakṛt |
śivaloke vasennityaṃ śivavatsaṃvṛtogaṇaiḥ ||

kṛṣṇāṣṭamyāṃ tu naktena yā ca kṛṣṇācaturdaśī |
iha bhogamavāpnoti paratra ca śivāṃ gatim ||

yo'bdamekaṃ prakurvīta naktaṃ parvasu parvasu |
brahmacārī jitakrodhaśśivārcājapatatparaḥ ||

saṃvatsarānte viprendrān śivabhaktān samādhinā |
bhojayitvā tato brūyāt prīyatāṃ bhagavāñchivaḥ ||

bhojayedyastu vidvāṃsaṃ kapālavratadhāriṇam |
bhojitāstena deveśa brahmaviṣṇumaheśvarāḥ ||

kapālapūrṇamaśanaṃ bhaikṣaṃ yo yasya gṛhṇate |
kulaṃ tasyoddharatyeva daśapūrvān daśāvarān ||

p. 57(60)

pādārghyācamanīyāni gandhapuṣpaiḥ samantataḥ |
arcayedvratinaṃ dṛṣṭvā paścādbhaikṣeṇa tarpayet ||

pūjitaistaiśśivaḥ sākṣāt pūjito nātra saṃśayaḥ |
avamatairavamataḥ syāt svayaṃ vai parameśvaraḥ ||

śra(śu)ddhayā parayāyuktā kapāle yatprayacchati |
tat tasya phalate dānaṃ vrajecchatasahasradhā ||

evaṃ vidhisamāyuktaḥ śivalokaṃ sa gacchati |
na ca mānuṣyakaṃ lokamadhruvaṃ prāpnuyānnaraḥ ||

upavāsāt paraṃ bhaikṣaṃ bhaikṣātparamayācitam |
ayācitāt paraṃ naktaṃ tasmānnaktena vartayet ||

daivairbhaktantu pūrvāhṇe madhyāhṇe munibhistathā |
aparāhṇe tu pitṛbhiḥ sandhyāyāṃ guhyakādibhiḥ ||

sarvavelāmatikramya naktamuttama bhojanam |
vāmācāro mahādevo naktenoddharate nṛṇām ||

haviṣyaṃ bhojanaṃ snānaṃ satyamāhāralaṃghanam |
agnikāryamadhaśśayyānnaktabhojīsamācaret ||

kṛṣṇāṣṭamyāṃ prayatnena kṛtvā naktaṃ vidhānataḥ |
mārgaśīrṣasya māsasya śaṅkaraṃ hyevamarcayet ||

pitvā śaktyā tu gomūtramanāhāro niśisvapet |
atirātrasya yajñasya phalamaṣṭaguṇaṃ labhet ||

māghe māheśvaraṃ nāma kṛṣṇāṣṭamyāṃ prapūjayet |
niśipītvā ca gokṣīraṃ gomedhāṣṭakamāpnuyāt ||

evaṃ pauṣye ca saṃpūjya śambhunāmānamīśvaram |
kṛṣṇāṣṭamyāṃ ghṛtaṃ prāśya vājapeyāṣṭakaṃ labhet ||

niśi pītvā ca gokṣīraṃ gomedhāṣṭakamāpnuyāt |
phālgune ca mahādevaṃ saṃpūjya prāśayettilān ||

rājasūyasya yajñasya phalamaṣṭaguṇaṃ labhet |
caitre ca sthāṇu nāmānaṃ kṛṣṇāṣṭamyāṃ prapūjayet ||

yavāṃśca bharjitān prāśya so'śvamedhāṣṭakaṃ labhet |
vaiśākhe śivanāmānamiṣṭvā rātrau kuśodakam |
pītvā puruṣamedhasya phalamaṣṭaguṇaṃ labhet ||

jyeṣṭhe paśupatiṃ pūjya gavāṃ śṛṅgodakaṃ pibet |
gavāṃ lakṣapradānasya yatphalaṃ tadavāpnuyāt ||

āṣāḍhe cogranāmānamiṣṭvā prāśya ca gomayam |
sautrāmaṇestu yajñasya phalamaṣṭaguṇaṃ labhet |
śrāvaṇe śarvanāmānamiṣṭvārkanniśi bhakṣayet ||

p. 58(61)

varṣakoṭiśataṃ divyaṃ rudraloke mahīyate |
māse bhādrapade'ṣṭamyāmīśvaraṃ nāma pūjayet ||

gandhapuṣpaistu rātrau tu pītvā vai taṇḍulodakam |
pauṇḍarīkasya yajñasya phalamaṣṭaguṇaṃ labhet ||

kārtike rudranāmānaṃ saṃpūjya prāśayeddadhi |
agniṣṭomasya yajñasya phalamaṣṭaguṇaṃ labhet ||

varṣānte bhojayedviprān śivabhaktiparāyaṇān |
pāyase ghṛtasaṃyuktaṃ madhunāsupariplutam ||

śaktyā hiraṇyaṃ vāsāṃsi bhaktyātebhyo nivedayet |
nivedayīta rudrāya gāṃ ca kṛṣṇāṃ payasvinīm ||

varṣamekaṃ caredevaṃ nairantaryeṇa yo naraḥ |
kṛṣṇāṣṭamīvrataṃ nāma tasya puṇyaphalaṃ śṛṇu |
sarvapāpavinirmuktaḥ sarvaiśvarya samanvitaḥ ||

vasecchivapure nityaṃ nehayāti kadācana |
puṇyeṣvevaṃ hi sarveṣu viṣuvagrahaṇādiṣu ||

dānopavāsahomādya bhakṣayaṃ jāyate kṛtam |
pratimāsaṃ pravakṣyāmi siva vratamanuttamam ||

dharmārthakāmamokṣārthaṃ naranāryādi dehinām |
puṣyamāse tu saṃprāpte yaḥ kuryānnaktabhojanam |
jitendriyaḥ satyavādī śāligodhūmagorasaiḥ ||

parvayoraṣṭamīṃ tasmādupavāsena yāpayet |
trisandhyamarcayedīśamagnikāryañca bhaktitaḥ ||

bhūmiśayyā ca māsānte paurṇamāsyāṃ ghṛtādibhiḥ |
kṛtvāsnānaṃ mahāpūjāṃ śivamantraiḥ prakalpayet ||

naivedyaṃ yāvakaprasthaṃ kṣīraṃ siddhaṃ nivedayet |
bhojayecca dvijānaṣṭau śivabhaktān sadakṣiṇam ||

dadyācchivāyamithunaṃ kapilāṃ vā nivedayet |
alaṅkṛtāṃ surūpāñca tasya puṇyaphalaṃ śṛṇu ||

sūryakoṭipratīkāśairvimānaissārvakā(gā)mikaiḥ |
rudrakanyāsamākīrṇairmahāvṛṣabhasaṃyutaiḥ ||

saṅgīta nṛttavādyaiścāpsarogaṇaśobhitaiḥ(bhiḥ) |
dodhūyamānaścamaraiḥ stūyamānaḥ surāsuraiḥ ||

triṇetraḥ śūlapāṇiśca śivaiśvaryasamanvitaḥ |
yā yā cchivapuraṃ divyaṃ yatrāste śaṅkaraḥ svayam ||

yāvattadromasaṃkhyānaṃ tatprasūtikuleṣu ca |
tāvadyugasahasrāṇi sukhī śivapure vaset ||

p. 59(62)

ekaviṃśatkulaiḥ sārdhaṃ bhogān bhuktvāyathepsitān |
jñānayogaṃ samāsādya tatraiva savimucyate ||

yogādduḥkhāntamāpnoti jñānādyogaḥ pravartate |
śivadharmādbhavejjñānaṃ śivadharmaḥ śivārcanāt ||

ityeṣa vaḥ samākhyātaḥ saṃsārārṇavavartinām |
śivamokṣakramopāyaḥ śivārcananiṣeviṇām ||

māghamāse tu saṃprāpte yaḥ kuryānnaktabhojanam |
kṛsaraṃ ghṛtasaṃyuktaṃ bhuñjānassaṃyatendriyaḥ ||

sopavāsaścaturdaśyāṃ bhavedubhayapakṣayoḥ |
śivāyapaurṇamāsyāṃ tu pradeyaṃ ghṛtakambalam ||

kṛṣṇaṃ gomithunaṃ cātra surūpaṃ vinivedayet |
śeṣaṃ kṛtvā yatheddiṣṭaṃ pūrvoktaṃ labhate phalam ||

indranīlapratīkāśairvimānaiśśikhisaṃyutaiḥ |
gatvā śivapuraṃ ramyaṃ bhuktvā bhogān yathepsitān ||

sāṃprāpte phālgune māse yaḥ kuryānnaktabhojanam |
śyāmākakṣīranīvārairjitakrodho jitendriyaḥ ||

caturdaśyāmathāṣṭamyāmupavāsarato bhavet |
paurṇamāsyāṃ mahāsnānaṃ pañcagavyaghṛtādibhiḥ ||

valmīkāgrādi mṛdbhiśca gomūtrairgomayādibhiḥ |
tvagbhiśca kṣīravṛkṣāṇāṃ dhātugandhādibhirbhavet |
dadyād gomithunaṃ bhaktyā tāmrābhaṃ parameṣṭhine ||

śeṣamanyadyathoddiṣṭaṃ kṛtvāpnoti mahatphalam ||

padmarāgapratīkāśairvimānairmārgasaṃyutaiḥ |
gatvā śivapuraṃ ramyaṃ pūrvoktān labhate guṇān ||

caitramāse śubhe prāpte yaḥ kuryānnaktabhojanam |
pauṣṭikaṃ payasāyuktaṃ bhuñjānaḥ saṃyatendriyaḥ ||

dadyādgomithunaṃ cātra pāṭalaṃ samalaṅkṛtam |
śivāya tat surūpañca śeṣaṃ pūrvavadācaret ||

prāṇānte ca paraṃ sthānaṃ prayāti śivavadvaśī |
svacchamauktikasaṃkāśairindranīlopaśobhitaiḥ ||

jīvaṃ jīvakasaṃyuktairvimānaiḥ sumanoramaiḥ |
vaiśākhamāse saṃprāpte yaḥ kuryānnaktabhojanam ||

śālyannaṃ payasāyuktaṃ bhuñjānaḥ saṃyatendriyaḥ |
goṣṭhaśāyī śivadhyāyī niśāyāmevavastrayuk ||

niyamaṃ ca yathoddiṣṭaṃ sāmānyaṃ sarvamācaret |
indranīlapratīkāśai vimānaissārvakāmikaiḥ ||

p. 60(63)

gatvā śivapuraṃ divyaṃ modate kālamakṣayam |
vaiśākhe paurṇamāṣyāṃ tu kuryāt snānaṃ ghṛtādibhiḥ ||

śivālayaṃ kṛtaṃ dadyāt śvetaṃ gomithunaṃ śubham |
haṃsa kundendu saṅkāśairvimānaissamalaṅkṛtam ||

suśvetavṛṣabhāsaktaiḥ prayāti śivamandiram |
sarvātiśayayuktābhiḥ strībhissaṃparivāritaḥ ||

nīlotpalasugandhābhiḥ krīḍate kālamakṣayam |
jyeṣṭhamāse tu saṃprāpte yaḥ kuryānnaktabhojanam ||

śālyannaṃ payasādhautamajākṣīreṇasaṃyutam |
nirāśanaṃ niśārdhaṃ syād divāgāṃ samanu vrajet ||

hitakārī gavāṃ nityamahaṅkāravivarjitaḥ |
paurṇamāṣyāṃ ca pūrvoktaṃ kuryātsnānādikaṃ vidhim ||

deyaṃ go mithunaṃ cātra dhūmravarṇamalaṅkṛtam |
nīlotpaladalaprakhyairmahāyānairanaupamaiḥ ||

mahāsiṃhanibaddhaiśca krīḍate kālamakṣayam |
āṣāḍhe māsisaṃprāpte yaḥ kuryānnaktabhojanam ||

gulakhaṇḍājyasaṃmiśraṃ saktumadyātsagorasaiḥ |
dadyād gomithunaṃ gauraṃ śivāyālaṅkṛtaṃ śubham ||

sāmānyaṃ ca vidhiṃ sarvaṃ prakuryāt prākpracoditam |
śuddhasphaṭikasaṃkāśairyānaissārasavāhanaiḥ ||

aṇimādiguṇairyuktaḥ śivavadvicaredayam |
saṃprāpte śrāvaṇemāsi yaḥ kuryānnaktabhojanam ||

kṣīraṣaṣṭikabhaktena sarvabhūtahiterataḥ |
śvetāgrapādapauṇḍrañca dadyād gomithunaṃ śive ||

sāmānyamakhilaṃ kuryāt vidhānaṃ yatprakīrtitam |
suvicitrairmahāyānairvicitraiśca niyojitaiḥ ||

gatvā śivapuraṃ divyaṃ pūrvoktāllaṁbhate guṇān |
prāptebhādrapade māsi yaḥ kuryānnaktabhojanam ||

hutaśeṣahavirbhojī vṛkṣamūlāśrito divā |
rātrau cāyatane suptvā sarvabhūtānukampakaḥ ||

nīlaskandhaṃ vṛṣaṃgāñca śivāya vinivedayet |
divākarakaraprakhyairvajravaiḍūryaśobhitaiḥ ||

cakravākasamāyuktairvimānaissarvakāmikaiḥ |
gatvā śivapuraṃ divyamarāsuravanditam ||

krīḍate sa mahātejā bhogairyāvadābhūtasaṃplavam |
śrīmadāśvayujemāsi yaḥ kuryānnaktabhojanam ||

p. 61(64)

ghṛtāśanaṃ prayuñjānaḥ prasannātmājitendriyaḥ |
vṛṣabhaṃ nīlakaṇṭhābhamurodeśe samunnatam ||

vimucyadadyādrūdrāya gāmekāṃ samalaṅkṛtām |
vidhiśeṣamaśeṣeṇa pūrvoktañca samācaret ||

prayāṇānte śivasthānaṃ prayāti śivavadvaśī |
svacchamauktikasaṅkāśairvimānaissārvakāmikaiḥ ||

jīvaṃ jīvakasaṃyuktairindranīlopaśobhitaiḥ |
gatvā śivapuraṃ śaivaṃ pūrvoktāllaṁbhate guṇān ||

śuśubhe kārtikemāsi yaḥ kuryānnaktabhojanam |
kṣīrādannaṃ prabhuñjānaḥ satyavādī jitendriyaḥ ||

dadyādgomithunaṃ cāpi kapilājvalanaprabham |
pūrvoktaṃ ca vidhiṃ kuryācchivatulyaguṇo bhavet ||

kalpānalaśikhā prakhyairmahāyānairmanoramaiḥ |
mahāsiṃhakṛtāṭopaiśśivavaccaṣṭate vaśī |

mārgaśīrṣe śubhemāse yaḥ kuryānnaktabhojanam |
yavānnaṃ payasāyuktaṃ bhuñjānassaṃyatendriyaḥ ||

dadyād go mithunaṃ divyaṃ pāṇḍaraṃ samalaṅkṛtam |
śivāya sarvaṃ pūrvoktaṃ vidhānaṃ samupācaret ||

śvetapadmasamairyānaiḥ śvetāśvavarasaṃyutaiḥ |
gatvā śivapuraṃ divyaṃ śivatulyabalo bhavet ||

ahiṃsāsatyamasteyaṃ brahmacaryaṃ kṣamāśamaḥ |
triḥsnānañcāgnihotraṃ ca bhūśayyā naktabhojanam ||

pakṣayorūpavāsena caturdaśyaṣṭamīṃ vaset |
ityevamādi niyamā nācarecca śivaṃ prati |
śivabhaktā ca yā nārī dhruvaṃ sā puruṣo bhavet ||

strītvamapyuttamaṃ sā cet kāṃkṣate śṛṇu tadvratam |
umāmaheśvaraṃ nāma sadā prīti vivardhanam ||

aviyogakaraṃ śāntaṃ dharmakāmārthasādhanam |
paurṇamāsyāmamāvasyāṃ caturdaśyaṣṭamīṣu ca ||

naktamabdaṃ prakurvīta haviṣyaṃ brahamacāriṇī ||

umāmaheśvaraprakhyaṃ haimaṃ kṛtvā suśobhanam |
rājataṃ vāthavarṣānte snāpayitvā ghṛtādibhiḥ ||

gandhamālyairalaṃkṛtya vastrayugmaiḥ suśobhanaiḥ |
bhakṣyairbhojyairaśeṣaiśca vitānadhvajacāmaraiḥ ||

bhojayecchivabhaktāṃśca dīnānāthāṃśca bhojayet (tarpayet) |
svaśaktyādakṣiṇāṃ datvā śivamantekṣamāpayet ||

p. 62(65)

tāmrakāṃsyādipātraṃ vā sitavastrāvakuṇṭhitam |
kṛtvācāyatanaṃ madhye pratimāmupakalpayet ||

śirasā dhāryatatpātraṃ vitānacchatraśobhitam |
dhvajaśaṃkhādivibhavaiḥ śivasyāyatanaṃ nayet ||

liṅgamūrtermaheśasya vratametannivedayet |
tadvedyāṃ sthāpayetpātraṃ rūpaśobhā samanvitam ||

tataḥ pradakṣiṇī kṛtya praṇipatyakṣamāpayet |
samāpyaivaṃ vrataṃ puṇyaṃ śṛṇuyāvatphalaṃ labhet ||

dvādaśādityasaṅkāśairvimānaissarvakāmikaiḥ |
yatheṣṭamaiśvare loke rudraiḥ sārdhaṃ pramodate ||

kalpakoṭisahasrāṇi kalpakoṭi śatāni ca |
sā tasyānte mahābhogairviṣṇuloke mahīyate ||

tataḥ karmāvaśeṣeṇa sarvakāmasamanvitā |
brahmalokaṃ samāsādya paramaṃsukhamāpnuyāt ||

brahmalokātparibhraṣṭā śrīrivapratipūjitā |
prājāpatyamavāpnoti lokaṃ lokanamaskṛtā ||

bhogāṃstanasukhaṃ bhuktvā somaloke vaset sukham |
somādaindraṃ punarlokamāsādyaindraṃ patiṃ labhet ||

indralokāccagāndharvaṃ sālokyaṃ prāpyamodate |
gandharvarājapatinā sārdhaṃ bhogairanekadhā ||

mahāratnaprabhairdīptairūpaśobhitamadbhutam |
yakṣalokaṃ ca saṃprāpya yathākāmaṃ pramodate ||

yakṣalokaparibhraṣṭā krīḍate merumūrdhani |
sthānāni lokapālānāṃ kramādāgatyamodate ||

ālokālokaparyante sarvasmin kṣitimaṇḍale |
yatra kvacit sukhaṃ divyaṃ tadaśeṣamavāpnuyāt ||

evaṃ sā sarvalokeṣu bhogān bhuktvā yathepsitān |
kramādāgatyaloke'smin rājānaṃ patimāpnuyāt ||

yuvānaṃ rūpasaṃpannamaśeṣapṛthivīpatim |
dharmakāmārthamokṣajñamitthamāsādyamodate ||

tataḥ sā dharmaśeṣeṇa bhavatīśvarabhāvitā |
svakarmavāsanāyogāt punaḥ prārabhate śubham ||

śubhācca punarapyevaṃ yātyāyati sahasraśaḥ |
yāvannāpnotinirvedaṃ tāvadbhramati karmaṇā ||

yāvadvivekovairāgyaṃ vairāgyājjñānasaṃbhavaḥ |
jñānāt pravartate yogo yogād duḥkhāntamāpnuyāt ||

p. 63(66)

yāṣṭamyāṃ ca caturdaśyāṃ niyatā brahmacāriṇī |
varṣamekaṃ na bhuñjīyāt mahābhogajihīrṣayā ||

varṣānte pratimāṃ kṛtvā pūrvavadvidhimācaret |
snānādyattadvrataṃ prāptā pūrvoktān labhate guṇān ||

jāmbūnadamayairyānaiścaturdvārairalaṅkṛtaiḥ |
gatvā śivapuraṃ divyamakṣayaṃ bhogamāpnuyāt ||

śivādisarvalokeṣu bhogān bhuktvā yathesitān |
kramādāgatyaloke'sminrājānaṃ patimāpnuyāt ||

yātāmupavasedabdaṃ kṛṣṇāmekāṃ patimāpnuyāt ||

yātāmupavasedabdaṃ kṛṣṇāmekāṃ caturdaśīm |
varṣānte pratimāṃ kṛtvā śālipiṣṭamayīṃ śubhām ||

pītānulepanairmālyaiḥ pītavastraiśca pūjayet |
pūrvoktamakhilaṃ kṛtvā śivāya vinivedayet |
saptabhūmairmahāyānaistaptacāmīkaraprabhaiḥ |
yugakoṭiśataṃ sāgraṃ śivaloke mahīyate ||

śivādisarvalokeṣu bhogān bhuktvā yathepsitān |
kramādāgatya loke'smin yatheṣṭaṃ patimāpnuyāt ||

yāmāvāsyāṃ nirāhārā bhavedabdaṃ suyāntrita |
śūlaṃ piṣṭamayaṃ kṛtvā varṣānte vinivedayet |
śivāya rājataṃ padmaṃ suvarṇakṛtakarṇikam |
bhaktyā vinyasya tanmūrdhni śeṣaṃ pūrvavadācaret ||

kāmato'pi kṛtaṃ pāpaṃ brūṇahatyādiyatkṛtam |
tatsarvaṃ śūladānena bhindyānnārī na saṃśayaḥ ||

mahāpadmavimānena naranārī samākulam (samanvitā) |
yugakoṭiśataṃ sāgraṃ śivaloke mahīyate |
śivalokādi lokeṣu bhuktvā bhogān yathepsitān ||

imaṃ loke kramāt prāpya rājānaṃ patimāpnuyāt |
paurṇamāsyāmupavasedabdamekaṃ dṛḍhavratā |
varṣānte sarvagandhāḍhyāṃ pratimāṃ vinivedayet ||

suvicitrairmahāyānairdivyagandhamayaiḥ śubhaiḥ |
yugakoṭiśataṃ sāgraṃ śivaloke mahīyate |
yatheṣṭamaiśvare loke bhuktvābhogānaśeṣataḥ ||

kramādāgatyaloke'smin rājānaṃ patimāpnuyāt |
yā kārtikaṃ śubhaṃ māsaṃ mekabhuktena yāpayet ||

kṣamāhiṃsādi niyamaiḥ saṃyuktābrahmacāriṇī |
gulājyamiśraṃ piṇyākaṃ māsānte vinivedayet ||

p. 64(67)

aṣṭamyāṃ ca caturdaśyāṃmupavāsaratā bhavet ||

indranīlapratīkāśairvimānaissārvakāmikaiḥ |
varṣāyutaśataṃ sāgraṃ śivaloke mahīyate |
yathāvatsarvalokeṣu bhogānāsādya sarvataḥ |
kramādāgatyalokeṣmin yatheṣṭaṃ pratimāpnuyāt ||

ityevaṃ sarvamāseṣu vidhistulyaḥ prakīrtitaḥ |
ekabhuktopavāsasya phalaṃ ca sadṛśaṃ viduḥ ||

kṣamāsatyaṃ dayādānaṃ śaucamindriyanigrahaḥ |
śivapūjāgnihavanaṃ santoṣāsteya bhāvanam ||

sarvavrateṣvayaṃ dharmaḥ sāmānyāddaśadhā smṛtaḥ |
viśeṣamapi vakṣyāmi pratimāsaṃ vrataṃ prati ||

mārgaśīrṣe śubhemāse vṛṣabhaṃ piṣṭanirmitam |
gandhamālyairalaṅkṛtya śivāya vinivedayet ||

vṛṣayuktairmahāyānairvarabhogasamanvitaiḥ |
varṣāyutaśataṃ sāgraṃ śivaloke mahīyate ||

sarvadevanikāyeṣu saṃprāpyavipulaṃ sukham |
kramādāgatyaloke'smin rājānaṃ patimāpnuyāt ||

pauṣyamāse pinākaṃ tu gandhamālyairalaṃkṛtam |
tāmrakāṃsyādipātre vā kṛtvā dadyāt pinākine ||

mahāpuṣpakayānena divyagandhapravāhinā |
varṣāyutaśataṃ sāgraṃ rudraloke mahīyate |
bhuktvā tu vipulān bhogān aśeṣapurasaṃbhavān |
saṃprāpyaivaṃ kramāllokān yatheṣṭaṃ patimāpnuyāt ||

māgherathaṃ cāśvayuktaṃ gandhamālyānuśobhitam |
piṣṭaliṅgasamāyuktaṃ kṛtvā yatanamānayet ||

mahārathopamairyānaiḥ śvetāśvavarasaṃyutaiḥ |
varṣāyutaśataṃ sāgraṃ śivalokemahīyate ||

sarvāmaranikāyeṣu prāpyabhogān yathepsitān |
kramādāgatya loke'min yatheṣṭaṃ patimāpnuyāt ||

phālgune pratimāṃ paiṣṭīṃ kṛtvā nṛtasamanvitām |
gandhamālyairalaṃkṛtya sthāpayedīśvarālaye ||

yānairapratimairdivyairgeyanāṭyasamanvitaiḥ |
kulairvarṣāyutaṃ sāgraṃ śivaloke mahīyate ||

sarvāmaranikāyeṣu prāpyabhogāt sudurlabhān |
saṃprāpte'smin kramālloke yatheṣṭaṃ patimāpnuyāt ||

caitre bhavaṃ kumāraṃ ca kṛtvā paiṣṭamalaṃkṛtam |
sthāpyapātryāṃ yathoktāyāṃ mānayecchivamandiram ||

p. 65(68)

śaradindupratīkāśairvimānaiḥ sārvakāmikaiḥ |
varṣāyutaśataṃ sāgraṃ śivaloke mahīyate ||
karmakṣayādihāgatya putrapautrasamanvitā |
abhīṣṭaṃ patimāpnoti labhedbhogān sudurlabhān ||

taṇḍulāḍhakapiṣṭena kṛtvākailāsaparvatam |
īśvaromāsamāyuktaṃ sarvadhātuvibhūṣitam ||

kandarairnicitaṃ(cchīdrai)citrairlavaṇaprastasaṃyutam |
sarvaratnasamāyuktaṃ sthāpayedīśvarālaye ||

kailāsavratamityevaṃ vaiśākhe yā samācaret |
kailāsakalpaissādhāraiśśivaloke mahīyate ||

śivādisarvalokeṣu bhuktvābhogānaśeṣataḥ |
kramādāgatyaloke'smin nagendremodate ciram ||

liṅgaṃ piṣṭamayaṃ kṛtvā jyeṣṭhamāse savaidikam |
bhaktyā saṃpūjyagandhādyairvastrayugmena veṣṭayet ||

upaśobhāviśeṣaiśca tatra jāgaramācaret |
pratipātre pratipādyairnītvā cāyatanenyaset ||

śuddhasphaṭikasaṅkāśairvimānaissārvakāmikaiḥ |
varṣakoṭyāyutaṃ divyaṃ rudraloke mahīyate ||

bhuktvā bhogān yathākāmamaśeṣapurasaṃbhavān |
kramādāgatyaloke'smin rājānaṃ patimāpnuyāt |
gṛhaṃ piṣṭamayaṃ kṛtvā cāṣāḍhe saptabhūmikam ||

sarvabījarasaiścāpi saṃpūrṇaṃ śubhalakṣaṇam |
gṛhopakaraṇairyuktaṃ musalolūkhavādibhiḥ ||

sarvaratnādibhiścānyairdāsī śayyādyalaṃkṛtaiḥ |
etaiḥ piṣṭamayaiḥ sarvaiḥ pradīpādyupaśobhitaiḥ |
sarvabhakṣyasamāyuktaṃ gandhamālyairalaṃkṛtam ||

kṛṣṇaraktasitaiḥ pītairdhvajavastropaśobhitam |
caturvidhena caruṇā saṃyuktaṃ sarvapaistathā ||

āṣāḍhe paurṇamāsyāṃ tu gṛhaṃ sthāpya śivāgrataḥ |
sarvopakaraṇopetaṃ praṇipatyanyavedayet ||

saptabhaumairmahāyānaiḥ sarvabhogapariplutaiḥ |
varṣakoṭiśataṃ sāgraṃ śivaloke mahīyate ||

bhuktvā tu vipulān bhogān sarvalokeṣvanuttamān |
prāpnoti sarvabhogāḍhyaṃ saptabhaumaṃ gṛhaṃ bhuvi ||

sarvadhātu samākīrṇaṃ vicitradhvajaśobhitam |
nivedayīta śarvāya śrāvaṇe tilaparvatam ||

p. 66(69)

svacchendranīlasaṅkāśairyānairapratimaiḥ śubhaiḥ |
varṣakoṭiśataṃ divyaṃ rudralokemahīyate ||

saṃprāpyavividhān bhogān manasaśca yathepsitān |
kramāllokamimaṃ prāpya rājānaṃ patimāpnuyāt ||

kṛtvā bhādrapade māse śobhanaṃ śāliparvatam |
suvarṇavastrasaṃyuktaṃ śivāyavinivedayet ||

sacitrairmahāyānaissarvabhogasamanvitaiḥ |
varṣakoṭiśataṃ sāgraṃ rudralokemahīyate ||

saṃprāpyavividhān bhogānanekapurasaṃbhavān |
kramādāgatyaloke'smin rājānaṃ patimāpnuyāt ||

kṛtvā cāśvayuje māsi vipulaṃ dhānyaparvatam |
suvarṇaṃ vastrasaṃyuktaṃ śivāya vinivedayet ||

suvicitrairmahāyānairvarabhogasamanvitaiḥ |
varṣakoṭisahasrāṇi rudraloke mahīyate ||

rudralokādilokeṣu bhuktvābhogānyathepsayā |
saṃprāptāsmin kramāllokān rājānaṃ patimāpnuyāt ||

dhanadhānyādisaṃyuktaṃ sarvabījarasānvitam |(dibhiḥ)

sarvadhātu samāyuktaṃ sarvaratnopaśobhitam |
śṛṅgaiścaturbhissaṃyuktaṃ vitānacchatraśobhitam ||

gandhamālyaiśca dhūpaiśca pradīpaiścopaśobhitam |
vividhairgītavṛttaiśca śaṃkhavīṇādibhiḥ svanaiḥ ||

brahmaghoṣaistathā puṇyairmaṅgalaiśca viśeṣataḥ |
mahādhvajāṣṭabhiryuktaṃ nānākusumamaṇḍitam ||

nagendraṃ merunāmānaṃ trailokyādhāramuttamam |
tasya mūrdhniśivaṃ kuryāt sarvadevasamāyutam ||

daityagandharvasiddhaiśca surabhūtagaṇaistathā |
vidyādharāpsaronāgaiḥ ṛṣibhiśca viśeṣataḥ ||

śālipiṣṭamayaṃ sarvaṃ rūpaṃ kuryādvicakṣaṇaḥ |
devasya dakṣiṇe haste śūlaṃ tridaśapūjitam ||

evaṃ sarveṣu deveṣu kuryādastrāṇyathākramāt ||

śivasya mahatīṃ pūjāṃ kuryāccarusamanvitam |
pūjayet sarvadevāṃśca daśadikṣubaliṃ haret ||

dvijāṃśca bhojayetsarvān śivabhaktān sadakṣiṇam |
dīkṣitān vratinaścānyānamugamyatu sādhakān ||

ācāryānumate sādhvī namenmerumupasthitam |
sarvārambhasamāyuktaṃ yathāvibhavavistaram(kalpitam) ||

nivedayīta rudrāya kārtikenagamuttamam |
yā kuryāt sakṛdapyevaṃ tasyāḥ puṇyaphalaṃ śṛṇu ||

p. 67(70)

sarvāgameṣu yatpuṇyaṃ kathitaṃ munibhiḥ puraḥ |
tatpuṇyaṃ koṭiguṇītaṃ māpnuyāt sā na saṃśayaḥ ||

mahāratnaprabhairyānaissarvakāmasamanvitaiḥ |
nṛttagītādivādyaiścāpsarogaṇasevitaiḥ(śobhitaiḥ) ||

sūryakoṭisamaprakhyairvimānairmerusannibhaiḥ |
naranārīsamākīrṇairdivyagandhavahaiḥ śubhaiḥ ||

devadānavagandharvaiḥ stūyamānā gaṇādhipaiḥ |
svacchandā sarvagābhūtvā prayātīśvaramandiram ||

kalpakoṭiśataṃ divyaṃ modate sā mahātapāḥ |
evaṃ sarveṣu lokeṣu bhogān bhuktvā yathepsitān ||

puṇyakṣayādihāgatya mahīpāla priyā bhavet |
surūpā subhagā nityaṃ bhavedīśvarabhāvitā ||

yadyatkāryaṃ samuddiśya naranārīnapuṃsakāḥ |
pūjayanti śivaṃ bhaktyā tattadevāśu jāyate ||

mṛṇmayaṃ dārujaṃ śailaṃ paiṣṭikaṃ vā sukalimatam |
kṛtvā gṛhaṃ mahaṃ vāpi yathā vibhavasaṃbhavam ||

sarvopakaraṇopetaṃ sarvadhānyaiḥ prapūritam |
śivāyetthaṃ gṛhaṃ datvā sarvakāmānavāpnuyāt ||

uktvaikabhaktaṃ hemante māsamekaṃ suyantritā |
māsānte ca rathaṃ kṛtvā citravastropaśobhitam ||

śvetaiścaturbhissaṃyuktaṃ vṛṣabhaissamalaṃkṛtam |
śobhitaṃ dhvajayūpādyaiḥ chatracāmaradarpaṇaiḥ |
taṇḍulāḍhakapiṣṭhena kṛtvā liṅgaṃ sa vaidikam ||

vinyasya rathamadhye tu pūjayet kṛtalakṣaṇam |
tadrātrau rathamārgeṇa śaṃkhabheryādibhiḥ svanaiḥ ||

bhrāmayitvā śanaiḥ paścācchivāyatanamāpnuyāt (na yet) |
tatra jāgarapūjābhiḥ pradīpādyupaśobhitaiḥ |
prokṣaṇīya pradānaiśca kṣapayetaśanaiḥ kṣamām(ṇa) ||

prabhāte snāpanaṃ kṛtvā tadbhaktānāṃ ca bhojanam |
dīnānāthāndhakebhyaśca yathāśaktyā ca dakṣiṇām ||

rathaśobhāsamāyuktāṃ śivāya vinivedayet |
bhuktvā ca bāndhavaiḥ sārdhaṃ praṇamyeśaṃ gṛhaṃ vrajet |
sarvavratānāṃ paramaṃmasmin dharmasamāpyate |
vrataṃ śivarathaṃ nāma sarvakāmārthasādhakam ||

sarvavrateṣu yatpuṇyaṃ sarvayajñeṣu yatphalam |
sarvaṃ śivarathe naiva sā puṇyaphalabhāgbhavet ||

sūryāyutapratīkāśairvimānaiḥ sārvakāmikaiḥ |
trisaptakulajaiḥ sārdhaṃ śivaloke mahīyate ||

p. 68(71)

bhuktvā ca vipulān bhogān sarvalokeṣvanukramāt |
kalpakoṭyayutaṃ sāgraṃ kalpānte sa mahīpatim ||

yuvānaṃ rūpasampannaṃ bhartāraṃ bhogasaṃyutam |
labhate kuśalaṃ nityaṃ rājānaṃ ratilālasam |
pañcatūlī samāyuktāṃ mṛdnīṃkhaṭvāṃsuśobhanām |
sarvopakaraṇopetāṃ śivaśayyāṃ prakalpayet |
śivaṃ devī yutaṃ kṛtvā paiṣṭamasyāṃ nivedayet ||

śivajñānārthatatvajñamācāryaṃ vinayānvitam |
saṃpūjyagandhapuṣpādyairvastrālaṃkāracāmaraiḥ |
bhakṣyabhojyairaśeṣaiśca tataḥ śayyāṃ nivedayet ||

tatrorṇātūlatantūnāṃ parisaṃkhyā tu yāvatī |
tāvadvarṣasahasrāṇi śivaloke mahīyate ||

śivādisarvalokeṣu bhuktvā bhogānaśeṣataḥ |
kramādāgatyaloke'smin siṃhāsanapatirbhavet ||

daśagāvassavṛṣabhā vṛṣabhaikādaśī smṛtā |
śivāya vinivedyaitāmavadhārayatatphalam ||

tatraikādaśatulyātmā balabhogādibhirgaṇaiḥ |
śivādisarvalokeṣu yatheṣṭaṃ modate sukhī ||

kalpakoṭisahasrāṇi kalpakoṭiśatāni ca |
bhuktvā tu vipulān bhogān aśeṣa purasaṃbhavān ||

tadante jñānamāsādya prasādāt parameṣṭhinaḥ |
vimucyamohakalilaṃ svātmanyevā nu(va)tiṣṭhati(te) ||

vṛṣabhaṃ gośataṃ dadyāt śivāyātīvaśobhanam |
trisaptakulajaissārdhaṃ śṛṇuyāt phalamāpnuyāt ||

sūryakoṭisamaprakhyaiḥ sarvakāmasamanvitaiḥ |
mahāyānairasaṃkhyātaiḥramarāsurapūjitaiḥ ||

śatarudrabalaścaiva vīrabhadra ivāparaḥ |
gatvāśivapuraṃ divyamaśeṣādhipatirbhavet |
bhuktvā tu vipulān bhogān pralaye sarvadehinām |
dehakañcukamutsṛjya sa kaivalyamavāpnuyāt ||

sarvajñaḥ sarvaparamaḥ śuddhaḥ svātmanyava sthitaḥ |
sarvagaḥ paripūrṇaśca śivavatpatiravyayaḥ ||

yo dadyādubhayamukhīṃ śivāya suśobhanām |
saptadvīpāṃ kṣitiṃ datvā yatphalaṃ tadavāpnuyāt ||

pādadvayaṃ śirordhaṃ ca yathāvatsasyanirgatam |
tathā gauḥ pṛthivī jñeyā taddātāsyānmahīpatiḥ ||

iti śrīśivadharmaśāstre upavāsavidhisamayamukhī 
dānavidhirdaśamodhyāyaḥ ||



ekādaśo'dhyāyaḥ 

nandikeśvara uvāca 

sarveṣāmevavarṇānāṃ śivāśramaniṣeviṇām |
śivadharmaḥ śivenokto dharmakāmārthamuktaye ||

brāhmaṇaḥ kṣatriyo vaiśyaḥ strīśūdro vā śivāśramī |
vānaprastho gṛhastho vā yaccānyo vā śivāśramī ||

svāśramāduttare kuryāt puṣpārāmaṃ suśobhanam |
anyāgārasamāyuktamaiśānyāmīśvarālayam ||

pradeśā saṃbhave kuryādyatrasyāt saṃbhavo bhuvi |
śivāddakṣiṇataḥ kuryāt tadbhaktābhyāgatālayam ||

trisandhyamarcayedīśamagnikāryaṃ ca bhaktitaḥ |
dvisaṃkhyamekakālaṃ vā pūjayedbhaktitaḥ śivam ||

asaṃpūjya śivaṃ mohāt na bhuñjītakadācana |
eṣa dharmaḥ parojñeyaśśeṣo bhavati mānavaḥ |
kāryātipātasaṃrodha vyādhividraviṇādiṣu ||

manasā pūjayedbhaktyā vācikairvā japādibhiḥ |
śivāgramāśritaiḥ pūjā kartavyā yatnataḥ sadā ||

manasā pūjayedyogī puṣpairvāraṇyasaṃbhavaiḥ |
śivārthaṃ puṣpahiṃsā yā na bhavetsatu hiṃsakaḥ ||

śivārcāgni paro nityaṃ tadbhakto tithi pūjakaḥ |
parvamaithunavarjī syāt śrīmān śivagṛhāśramī ||

devāgnyatithibhaikṣārthāṃ pacennaivātmakāraṇāt |
ātmārcayaḥ pacenmohāt narakārthaṃ sa jīvati |
devārthaṃ pacanaṃ yeṣāṃ santānārthaṃ ca maithunam |
svargārthaṃ jīvitaṃ teṣāṃ narakārthaṃ viparyaye ||

vittāt tṛtīyabhāgena prakurvīta śivārcanam |
prakurvīta tadardhe na yato nityaṃ hi jīvitam ||

nyāyo pārjitavittaḥ syādanyāyān parivarjayet |
anyāye nārcitairdravyaiḥ narakārthaṃ sa jīvati |
yaḥ śivabrahmacārī syāt sa śivārcāgni tatparaḥ ||

bhavejjitendriyaḥ śānto naiṣṭhiko bhautiko'pi vā |
sarvasaṅgavinirmuktaḥ kandamūlaphalāśanaḥ |
śivavaikhānaso jñeyaḥ śivārcāgniparo vane ||

nirgataḥ sarvasaṃgebhyaḥ śivadhyānarataḥ sadā |
jñeyaḥ śivayatiścaiva bhasmaniṣṭho jitendriyaḥ ||

rudrākṣagaṇahastaḥ syāt jaṭāṃ caikāñcamastake |
liṅgaṃ śivāśramasthānāṃ bhasmanaiva tripuṇḍrakam ||

haste mūghnyupavīte vā rudrākṣaṃ dhārayet tu yaḥ |
sordhvagaḥ sarvabhūtānāṃ rudralokantu gacchati ||

p. 70(73)

rudrabhaktaiḥ śirasyekā dhāryā rudrajaṭā sadā |
dhvaṃsinī duṣṭasatvānāṃ rudratvaṃ ca tathāpnuyāt ||

sitena bhasmanā kuryāt trisandhyaṃ yastripuṇḍrakam |
sarvapāpavinirmuktaḥ śivenasahamodate |
rudrāgneryadvalaṃ vīryaṃ tadbhasmaparikīrtitam ||

dhvaṃsanaṃ sarvaduṣṭānāṃ sarvapāpaviśodhanam |
yogīsarvāṃgikasnānamāpādatalamastakam ||

trisandhyamācarennityamāśuyogamavāpnuyāt |
yaḥ snānamācarennityamāgneyaṃ saṃyatendriyaḥ ||

kulaikaviṃśamuttārya sa gacchetparamāṃ gatim |
bhasmasnānaṃ jalasnānamasaṃkhyeyaguṇādhikam ||

tasmādvāruṇamutsṛjya snānamāgneyamācaret |
sarvatīrtheṣu yatpuṇyaṃ sarvayajñeṣu yatphalam |
tatphalaṃ labhate sarvaṃ bhasmasnānaṃ samācaret ||

mahāpātakayukto vā yukto vā sarvapātakaiḥ |
bhasmanāparamaṃ snānaṃ pavitraṃ naiva vidyate ||

uktaivaṃ munidevebhyaḥ snāto devaḥ śivaḥ svayam |
tayā prabhṛti brahmādyāḥ munayaśca śivārthinaḥ ||

sarvaṃ sarvaṃ suyatnena bhasmasnānaṃ pracakrire |
tasmādetacchivasnānamāgneyaṃ yaḥ samācaret ||

anenaiva śarīreṇa sa rudro nātra saṃśayaḥ |
duśśīlaḥ śīlayukto vā yo vā ko vā phalārthibhiḥ ||

bhūtiśāsanasaṃyuktaḥ sapūjyorājaputravat |
guṇavatpātra pūjāyānasyācchāsanapūjanam ||

śāsanaṃ pūjayettasmādavicāraṃ śivajñayā |
śivājñā pūjanāt sākṣācchivo bhavati pūjitaḥ ||

avikalpamatistasmāt pūjayecchivaśāsanam |
chadmanāpi hi yo dhatte bhūtiśāsanamaiśvaram |
so'pi yāṃ gati māpnoti na tāṃ kratu śatairapi ||

ācamyatoyavidhinā nirlepaḥ śivabhasmanā |
gandhalepaviśuddhārthaṃ nityamadbhirupaspṛśet ||

gandhalepavihīno hi pi bhāvaduṣṭena śudhyati | ṣṭo
bhāvaśuddhyā bhavecchuddhiḥ śuddhabhāvastato bhavet |
snānaṃ vāruṇamāgneyaṃ divyaṃ vāyavyamānase ||

pañcasnānāni viprāṇāṃ vihitāni viśuddhaye |
vāruṇaṃ vāruṇasnānamāgneyaṃ bhasmanā bhavet ||

p. 71(74)

vṛṣṭyā sātapayā divyaṃ vāyavyam rajasā gavām |
mānasaṃ dhyānamantrādi vihitaṃ viśvayoninā ||

udakumbhasahasreṇa mṛdbhārāṇāṃ śatena ca ||

āmṛtyo ācaran śaucaṃ bhāvaduṣṭo na śuddhyati ||

bhāvapūtaṃ bhavecchau caṃ vastrapūtaṃ jalaṃ pibet ||

dṛṣṭipūtaṃ nyaset pādaṃ satyapūtaṃ vaco vadet |
jalākalāpadhārī syāt pakṣādāvapanaṃ bhavet ||

yathaiva puṇyaṃ dīkṣāyāṃ tatpuṇyaṃ pavane bhavet |
jaṭīmuṇḍīśikhīvāpi bhikṣāśī vigataspṛhaḥ ||

maunī bhūtānukampī ca yatiśśāntimatirbhavet(ścaret) |
mādhūkaraṃ caredbhaikṣamekānnaṃ parivarjayet |
upavāsasamaṃ bhaik'mekānnaṃ gṛhīṇāṃ smṛtam ||

yaḥ sarvasaṅganirmuktaḥ śūdraśśivaparāyaṇaḥ |
so'pīhavapanaṃ kṛtvā yogīndrānucaro bhavet ||

vasedāyatane nityaṃ sa gaṇaḥ śivadhārmikaḥ |
puṣpārāmaikakarmātmā puṣpapālakriyāparaḥ ||

trisnānapūjāsaṃyuktaḥ kaupīnācchādakaḥ sadā |
yogināṃ bhaktiyogena yogasthānamavāpnuyāt |
śivadhyānaparāśśāntāśśivabhaktiparāyaṇāḥ ||

bhāvapūtāśśivasyaite śivāśramasamāśritāḥ |
mahāvratāṣṭakaṃ dhāryamīśenoktaṃ śivārthinām ||

sarvavratānāṃ paramamasmin dharmassamāpyate |
śivebhaktissadākṣāntirahiṃsā sarvadāśamaḥ ||

santoṣassatyamasteyaṃ brahmacaryaṃ tathāṣṭamam |
yathāsaṃbhavapūjābhi karmaṇāmanasāgirā ||

śivebhaktiḥ sadākāryā tadvacca śivayogiṣu |
svadehānnirviśeṣeṇa śivabhaktāṃśca pālayet ||

bhayadāridryaduḥkhebhyaḥ (rogebhyaḥ) teṣāṃ kuryāt priyāṇi ca |
śivasya paripūrṇasya kiṃ nāmakriyate naraiḥ |
yatkṛte śivabhaktānāṃ tacchivasya kṛtaṃ bhavet ||

sudūramapi gantavyaṃ yatra māheśvaro janaḥ |
te ca prayatnādārādhyāsteṣāṃ sannihito haraḥ ||

maheśvarasya yo bhaktaḥ śivārcanarataḥ sadā |
ājñāṃ kṛtvā yathānyāyamaśvamedhaphalaṃ labhet |
nityaṃ śivakathāsakto nityaṃ śivaparāyaṇaḥ ||

arcayitvā yathānyāyaṃ gāṇāpatyamavāpnuyāt ||

p. 72(75)

śivāśramagataṃ bhaktyā śivabhaktaṃ prapūjayet ||

svāgatāsanapādyārghyairmadhuparkādi bhojanaiḥ |
yaḥ svāgataṃ namaskāraṃ kuryādvāpyabhivādanam ||

daśavarṣasahasrāṇi so'gniloke mahīyate |
prāptāya śivabhaktāya yo dadyāt svayamāsanam ||

viṃśadvarṣasahasrāṇi purandarapure vaset |
śivabhaktāya śāntāya pādau prakṣālyabhaktitaḥ ||

ghṛtābhyaṃgaṃ tato datvā viṣṇuloke mahīyate (loke vasennaraḥ) |
prāptāya śivabhaktāya pādyācamanapūrvakam |
yo'rghyaṃ nivedayedbhaktyā sūryalokaṃ sa gacchati ||

śivabhaktadvijaṃ prāptaṃ madhuparkādyupakramāt |
bhojayitvā yathānyāyaṃ śivaloke mahīyate ||

śrāntaṃ saṃvāhanaṃ kṛtvā somaloke mahīyate |
pratiśrayapradānena haimaṃ svarge gṛhaṃ bhavet (labhet) ||

jalaṃ suśītalaṃ datvā sarvakāmānavāpnuyāt |
labheddīpapradānena jñānacakṣuratīndriyam ||

mṛduśayyāpradānena siṃhāsanapatirbhavet |
yo dadyādambhasā snānaṃ vāruṇaṃ lokamāpnuyāt ||

svedabinduparītāṃgamadhvagaṃ śramakarśitam |
saṃvījyatālavṛntena vāyuloke mahīyate ||

kṣutpipāsā turaṃ śrāntaṃ malīnaṃ caiva rogiṇam |
pālayitvā yathāśaktyā sarvapāpaiḥ pramucyate ||

rogārtasya śivaṃ kṛtvā bheṣajādyaiḥ prayatnataḥ |
yugakoṭiśataṃ sāgraṃ śivaloke mahīyate ||

suduḥkhārṇavanirmagnaṃ hāhābhūtamacetanam ||

samuddhṛtya yathā śaktyā sarvakāmānavāpnuyāt |
patitābhiśastasaṃkīrṇa śvacaṇḍālādipakṣiṇām |
kāruṇyātsarvabhūtānāṃ deyamannaṃ svaśaktitaḥ ||

atyalpamapikāruṇyāddattaṃ bhavati cākṣayam |
tasmāttu sarvabhūtebhyaḥ karuṇādānamuttamam ||

abhāve tṛṇabhūmyambu pātrendhanaphalādikam (vā) |
datvāgatanarāṇāṃ ca svargaṃ yo'nipriyeṇa vā ||

na hī dṛksvargasopānaṃ yathā loke priyaṃ vacaḥ |
ihāmutrasukhaṃ teṣāṃ vāgyeṣāṃ madhurā sadā |
amṛtasyandinīṃ vācaṃ candanasparśaśītalām ||

dharmāvirodhinīmuktvā sukhamakṣayamāpnuyāt |

p. 73(76)

alaṃ dānena viprendra yajanādhyayanena vā |
idaṃ te svargasopānamamalaṃ yatpriyaṃ vacaḥ ||

pratyutthānābhigamanamanuvrajyaṃ priyaṃ vacaḥ |
pūrvābhi bhāṣiṇaṃ dṛṣṭvā pratyekaṃ svargahetavaḥ ||

saṃpṛcchedāgataṃ bhaktyā svāgataṃ vinayena tu |
gamanepyasya vaktavyaṃ panthānaḥ santute śivāḥ ||

śivaṃ bhavatu te nityamaśeṣārthaprasādhakam |
āśīrvādamidaṃ vācyaṃ sarvakāryeṣu sarvadā ||

namaskārādivādeṣu svastimaṅgalavācane |
śivaṃ bhavatu te nityaṃ prabrūyāt sarvakarmasu ||

evamādi śivācāramanutiṣṭhan śivāśramī |
aśeṣapāpanirmuktaḥ śivaloke mahīyate ||

śivabhakteṣu yā bhaktiḥ kriyate hi sadānaraiḥ |
śive bhavati sā nityaṃ bhaktirbhaktairanuṣṭitā ||

ākruṣṭastāḍito vāpi yo nākrośennatāḍayet |
vāgādyavikṛtasvasthaḥ kṣāntirevābhidhīyate ||

sarveṣāmevatīrthānāṃ tīrthaṃ jñānasya pāragaḥ |
jñānātīrthātparaṃ tīrthaṃ yatpūrṇaṃ kṣāntivāriṇā ||

jñanaṃ yogaṃ tapojapyaṃ yajñadānādisatkriyām ||

krodhanasya vṛthāyasmāt tasmāt krodhaṃ vivarjayet ||

marmāsthi prāṇahṛdayaṃ nirdahedapriyaṃ vacaḥ |
navācyamapriyaṃ tasmācchivabhakte viśeṣataḥ ||

kṣamādānaṃ kṣamāsatyaṃ kṣamāhiṃsā kṣamāśrutam |
kṣamāsvargaśca mokṣaśca kṣamayetajjagaddhṛtam ||

saśūrassātviko vidvān sa tapasvī jitendriyaḥ |
ye nāśukṣānti bāṇena krodhaśatrurvidāritaḥ ||

nirmalaiḥ kṣāntisalilairlokamāsādyaśītalaiḥ |
iha saukhyamavāpnoti paratra ca śivāṃ gatim ||

ātmavatsarvabhūtānāṃ yo hitāya śivāya ca |
sarvathā vartate nityamahiṃseyamudāhṛtā ||

sarvaśāstrāṇi vedāśca yajjñātvā labhate phalam |
(yā) na hiṃsanti bhūtāni tasya puṇyaṃ tato'dhikam ||

trailokyamakhilaṃ dadyādapi yo ratnapūritam |
carettapāṃsi sarvāṇi sa tat tulyamahiṃsayā ||

ahiṃsākhyaḥ parodharmaḥ śaktānāṃ parikīrtitaḥ |
aśaktānāmayaṃ dharmo dānayajñādi pūrvakam ||

p. 74(77)

nāntaḥ paraṃ prapaśyāmaḥ kvacidapyāgamevayam |
puṃsāmabhayadānāt tu dānamadbhutadarśanam ||

sarvabhūtāmayaṃ datvā yaścarecchāntamānasaḥ |
ihaiva sarvabhūtebhyo bhayaṃ tasya na vidyate ||

yo na hiṃsanti bhūtānti sthāvarāṇi carāṇi ca |
sarvaduḥkhavinirmuktaḥ parāṃśāntimavāpnuyāt ||

vācāramanti pāpaiśca hyatikrūrānarādhipāḥ (dhamāḥ) |
ābhūtasaṃplavaṃ yāvat pacyate narakeṣu te ||

svadeśe yo nṛpaḥ kuryāt praṇighātanivāraṇam |
sa nṛpaḥ saha dehena nandate vibhavaiściram ||

dehānte ca mahābhogaiḥ samastakulasaṃyutaḥ |
kalpakoṭiśataṃ sāgraṃ śivaloke mahīyate ||

svātmārthaṃ vā parārthaṃ vā samastendriyasaṃyutaḥ |
nākārye saṃpravarteta tadāhuśśamalakṣaṇam ||

yaḥ praśāntendriyagrāmassadā candrāṃśunirmalam |
saṃprāpnoti śivasthānaṃ śāntaśśāntena cetasā ||

yathākālopapannebhyo nyāyavṛttyā gamena ca |
utpannārthena yastoṣassasantoṣaḥ prakīrtitaḥ ||

atītānāgatārtheṣu vartamāneṣu sarvadā |
nā saktirna smṛtirvāpi santoṣo'yaṃ paraiḥ smṛtaḥ |
tena sarvamakhairiṣṭaṃ tenāvāptaṃ ca tatpadam |
yena tṛṣṇāgra(gṛ)haṃ tyaktvā santoṣassamyagāśritaḥ ||

santoṣaiśvaryayuktānāṃ yatsukhaṃ śāntacetasām |
devāsuramanuṣyāṇāṃ kutaḥ svapne'pi tatsukham ||

svānubhūtaṃ svadṛṣṭaṃ ca yaḥ pṛṣṭo'rthaṃ na gūhate |
yathābhūtārthakathanamityetat satyalakṣaṇam |

parapīḍāvinirmuktaṃ yāvat syād vacanaṃ śivam ||

aśvamedhāyutaṃ puṇyaṃ satyaṃ ca tulayādhṛtam |
aśvamedhāyutātsatyamadhikaṃ darśitaṃ guṇaiḥ ||

satye pratiṣṭhitaṃ jñānaṃ dharmaṃ satye pratiṣṭhitam |
satye pratiṣṭhitaṃ śaucaṃ satye mokṣaṃ pratiṣṭhitam ||

satye pratiṣṭhitaṃ śauca satye mokṣaḥ pratiṣṭhitam ||

svāminārakṣyamāṇānāmutsṛṣṭānāṃ ca saṃbhramāt |
parasvānādānametadetadasteyalakṣaṇam ||

alobhena parasveṣu yo manāmapi vartate |
karmaṇā manasā vācā sa tṛptaḥ śivatāṃ vrajet ||

p. 75(78)

maithunasyā samācārastadacittamajalpitam ||

lakṣaṇaṃ brahmacaryasya samastendriyasaṃyamaḥ |
brahmacarye sthitaṃ satyaṃ brahmacarye sthitaṃ tapaḥ ||

brahmacarye sthitaṃ jñānaṃ brahmacarye sthitaṃ kṣamā |
ye sthitā brahmacaryeṇa te nityaṃ saṃsthitāśśive ||

ekarātrasthitasyāpi yā gatirbrahmacāriṇaḥ |
gṛhasthena na sā śakyā prāptuṃ yajñaśatairapi ||

yassaṃbhave samutsṛjya cetasāste nirākulam |
ahoyati varaḥ śrīmānupayātimahattapaḥ |
parvamaithunavarjīyaḥ paradāravivarjitaḥ ||

brahmacārīsamaḥ so'pi jñeyaśśivahṛtāśramī |
śivāgnyatithigurvarthaṃ kurvan karmāṇi sarvataḥ ||

ahiṃsakassavijñeya etadapyāśramatrayam |
samāpyagurukāryāyopayukte sadānaraḥ ||

tasya sidhyanti kāryāṇi manasā cintitāni ca |
eṣadharmadrumaḥ śrīmān naṣṭaśākhāśśivodbhavaḥ ||

na śakyo vistarādnaktumupaśākhā prabhedataḥ |
ye paṭhanti śive bhaktā ācārādhyāyamuttamam ||

trisaptakulajaissārdha śivalokaṃ vrajanti te |
iti śivadharmaśāstre ekādaśodhyāyaḥ ||




atha dvādaśodhyāyaḥ 

nandikeśvara uvāca

atha saṃkṣepato vakṣye śivabhaktānukampayā |
ādyaṃ śākhopaśākhārthaṃ śivabhaktisamudbhavam ||

kvacidgacchan yathā paśyan na śivaliṅgamapūjitam |
tadā saṃpūjya yo gacchet sa rudro nātrasaṃśayaḥ |
snānaṃ naivedyavastrādyamādadīta priyāṇyapi ||

vyaktaṃ tacchivamuddiśya tadādānena yatphalam ||

dṛṣṭvā yatanamāsādya namaskṛtya śivaṃ vrajet |
catuṣpatha nadī śailaṃ śivayoginameva ca ||

avatīrya namaskṛtya dṛṣṭvā liṅgaṃ yatavrataḥ |
hastiyānāsanāśvebhyaśśivayogī tapasvinām ||

mṛgāṃścoṣṭravayo matsyamāṃsaṃ laśunagṛgatanam? |
avakaṭyārtavīyāni kutsitāṃśca vivarjayet ||

sarvadānogratapasāmaśvamedhāyutasya ca |
phalaṃ prāpnotyayatnena matsyamāṃsavivarjanāt ||

sarvadoṣāśrayaṃ madyaṃ na pibecchivabhaktitaḥ |
kvamadyaṃ kva śivebhaktiḥ kvamāṃsaṃ kva śivārcanam ||

p. 76(79)

sarvatīrtheṣu yatpuṇyaṃ sarvayajñeṣu yatphalam |
tatsarvaṃ labhate puṇyaṃ yo madyaṃ parivarjayet ||

garbhādi sarvasaṃskāraiśśmaśānāntairna bhojanam |
rajasvalābhiḥ saṃspṛṣṭaṃ śivabhakto vivarjayet ||

na go brāhmaṇa bhasmāgni liṅgacchāyāṃ padā spṛśet |
na laṅghayīta nirmālyamatsu tiṣṭhennanagnataḥ ||

vārayecchivanirmālyaṃ bhaktyā lobhānnabhakṣayet |
bhakṣaṇānnirayaṃ gaccettadvilaṅghya ca mūḍhadhīḥ ||

na tasya snānapūjādyaṃ pratigṛhṇāti śaṅkaraḥ |
naiva naivedyanirmālyaṃ malabhak pūjayecchivam ||

bhūpradeśaṃ yathā kaścit svadehamalabhūṣitam |
nāśrayīta tathā rudro naraṃ nirmālyabhūṣitam ||

tasmānna saṃspṛśelliṅgaṃ naro nirmālyadūṣitaḥ |
asaṃspṛśyo bhavet so'pi yo yasyāṅgamalaṃ graset ||

yatra naivedya nirmālya saṅkīrṇakalaśādibhiḥ |
snānādi kriyate bhaktyā na tad gṛhṇāti śaṅkaraḥ ||

mūrtayoyāśśivasyāṣṭau tāsu nindāṃ vivarjayet |
gurau ca śivabhakteṣu nṛpasādhu tapasviṣu ||

aṣṭamyādiṣu sarveṣu pakṣayo ramayorapi |
śvaśrukarmāñjanābhyaṅga maithunādivivarjayet ||

kuryādviśeṣataḥ pūjāṃ naktaṃ cātra samāśrayet |
strīśūdramatsyamāṃsādīn yatnāt parvasuvarjayet ||

trikālamekakālaṃ vā nityasnānaṃ samācaret |
śaucaṃ ca mṛjjalaiḥ kuryādgandhalepāpanuttaye |

yo'śnīyādannamaśnātaḥ pāpamadyāt sa kevalam |
tasmāt snātvā prabhuñjīta bhasmanā salilena vā ||

prātaḥ snātvāmbhasā gacchedbhasmanā vā śivaṃ padam |
trisandhyamācaredyastu śivagni gurutatparaḥ ||

pāvakamutsṛjyatrisaptakulamuddharet |?
kuryātpraticaturmāsaṃ mahāpūjāpravartanam ||

bhojanaṃ śivabhaktānāṃ śaktyādānaṃ ca kalpayet |
trisaptakulasaṃyuktaḥ samastaiśvaryasaṃyutaḥ |
vasecchivapure nityaṃ cāturmāsya pravartanāt ||

deve sarvotsave śrāddhe puṇyeṣu divaseṣu ca |
śivaṃ sampūjya naivedyaiḥ bhojayecchivayoginam ||

ṛṣayaḥ pitaraḥ sarvāśca śivamāśritya saṃsthitāḥ |
prīte śive tu te sarve suprītāḥ syurna saṃśayaḥ ||

jñānavairāgyasaṃchannaṃ bhasmaniṣṭhaṃ jitendriyam |
bhojayecchāntamanasaṃ śrāddheṣu śivayoginam ||

p. 77(80)

yadīśvarādi tatvānāṃ parijñānaṃ vivekataḥ ||

bhavet sādharmya vaidharmyāt tasya jñānasya lakṣaṇam |
nāniṣṭaṃ dveṣṭi saṃprāptaṃ na ceṣṭamabhinandati |
prītitāpaviṣādānāṃ vairāgyādati vartate ||

na dharmaniṣṭhā pratiṣṭhasya divasenāpi yatphalam ||

nāta(śca)kyaṃ gṛhasthena prāptuṃ yugaśatairapi |
vaśyendriyaḥ prasannātmā yo na dveṣṭi na kāṅkṣati ||

śabdādiviṣayān bhogān sa vijñeyo jitendriyaḥ |
jñānavairāgyasampannaḥ śivaśśāntena cetasam ||

yuktaṣṣaḍaṅgayogena śivayogī sakīrtitaḥ |
śivadharmādbhavejjñānaṃ jñānādvairāgyasaṃbhavaḥ ||

jñānavairāgyayuktasya śivayogaḥ pravartate |
śivayogācca sarvajñaḥ paripūrṇassunirvṛtaḥ ||

sarveṣāmeva bhūtānāṃ traivarṇāḥ puruṣāvarāḥ |
puruṣebhyo dvijaśreṣṭhāḥ dvijebhyo granthapāragāḥ ||

granthavidbhiśca vijñeyāstebhyassūkṣmārthacintakāḥ |
arthavidbhiśca nānārthaṃ pratiyu(bu)ddho viśiṣyate ||

nānārthavidbhyaḥ koṭibhyo viśiṣṭaḥ yoginaḥ smṛtāḥ |
yogiśakoṭikoṭibhyo viśiṣṭaḥ śivayogirāṭ |
yogajñā yogasiddhāśca pitaro yogasaṃbhavāḥ ||

bhukte prīṇanti te tasmād viśiṣṭaśśivayogibhiḥ |
sarvayajñatapodānaiḥ kṛtairdattaiśca yatphalam |
tatphalaṃ labhate sarvaṃ sampūjya śivayoginam ||

pañcāgnirdravya kālātmā dakṣiṇāhavitṛtvijaḥ |
ṛgyajuḥ sāmasaṃyogādvedayajñaḥ prakīrtitaḥ ||

brahmacarya japomaunaṃ kṣāntirāhāralāghavam |
ityetattapasorūpaṃ sughoraṃ pañcalakṣaṇam ||

yadyadiṣṭaṃ viśiṣṭaṃ ca nyāyaprāptaṃ ca yadbhavet |
tattadguṇavate deyamityetaddānalakṣaṇam ||

nivartanasahasrāḍhyāṃ sarvasasyaprarohiṇīm |
dadyādbhūmi jalopetāṃ bhūmidānaṃ taducyate ||

ekacchatrāṃ mahīṃ kṛtvā dvijebhyaḥ pratipādayet |
saṃpūrṇāyāṃ dvijaḥ kaścit mahīdānaṃ taducyate ||

kanyāmalaṅkṛtāṃ dadyādyajvine guṇasaṃvṛtām |
dvijāya vedaviduṣe kanyādānaṃ taducyate ||

sarvadoṣavinirmuktāṃ taruṇīṃ supayasvinīm |
yogāmalaṃ kṛtāṃ dadyāt tadgodānamudāhṛtam ||

madhyamottamavastrāṇi yo dadyādahatāni va ||
etat samāsato jñeyaṃ vastradānasya lakṣaṇam ||

p. 78(81)

brahmacārī samādhisthaḥ śāntaḥ śīlaparāyaṇaḥ |
ahorātre(nna)bhuñjīta upavāsasya lakṣaṇam ||

catvāriṃśatsamāyuktaṃ piṇḍānāṃ hi śatadvayam |
māsenādyādyathā kāmamiti cāndrāyaṇaṃ vratam || smṛtam ||

ṛṣibhiḥ sarvaśāstrajñaistaponiṣṭhairjitendriyaiḥ |
devaiśca sevitaṃ toyaṃ kṣitestīrthaṃ taducyate ||

rudrāvatārasthānāni puṇyakṣetrāṇi nirdiśet |
mṛtānāṃ teṣu rudratvaṃ śivakṣetreṣu dehinām ||

dānānyāvasathaṃ kūpamudyātaṃ devatālayam |
tīrtheṣvetāni yaḥ kuryāt so'kṣayaṃ phalamāpnuyāt ||

kṣāntiḥ spṛhā dayā satyaṃ dānaṃ śīlaṃ tapaḥ śrutam |
etadaṣṭāṅgamuddiṣṭaṃ paraṃ pātrasya lakṣaṇam |

yajñopavāsadānāni tapastīrthaphalāni ca |
saṃpūrṇaṃ labhate bhaktaṃ sampūjyaśivayoginam ||

śivebhaktiḥ kṣamāsatyamaśeṣendriyasaṃyamaḥ |
sarvabhūteṣu maitrī ca śivadharmasya lakṣaṇam ||

śivayogī śivajñānī śivadharmarataśca yaḥ |
ityetattrividhaṃ jñeyaṃ śivapātrasya lakṣaṇam ||

śivamuddiśya dātavyamanapekṣya guṇāntaram |
vittamīśvarabhaktasya śivadānasya lakṣaṇam ||

śivabhaktaṃ dvijaśreṣṭhaṃ yaḥ śrāddhādiṣu bhojayet |
kulānāṃ śatamuddhṛtya śivaloke mahīyate |
bahunātra kimuktena śivabhaktantu bhojayet ||

śivabhaktena yadbhuktaṃ sākṣādbhuktaṃ śivena tat |
dvijānāṃ vedaviduṣāṃ koṭiṃ saṃbhojya yatphalam ||

yataye vītarāgāya bhikṣādānena tatsamam ||

tasmācchraddhā viśeṣeṇa puṇyeṣu divaseṣu ca |
śivamuddiśya viprendrān śivabhaktāṃstu bhojayet ||

asaṃyataḥ saṃyato vā sarvāvasthāṃ gato'pi vā |
yo vā ko vā śive bhaktaḥ śivavatpātramuttamam ||

saṃparkādarthalobhādvā yo hi rudraṃ prapūjayet |
so'pi yāṃ gatimāpnoti na tāṃ yajñaśatairapi |
tasmānnatmyāśca pūjyaśca rakṣaṇīyaśca sarvadā ||

nāmamātraprasakto'pi kṣaṇārthamapi yaḥ śive ||

samunissamahāsādhuḥ sa yogī sa śivaṃ vrajet |
gra(gṛ)heśrāddhasya yatpuṇyamaraṇye tacchatādhikam ||

p. 79(82)

tannadīṣvayutaṃ jñeyamanantaṃ syācchivālaye |
nivedya yataye samyagāsanaṃ mṛduvetrajam ||

dārudantamayaṃ vāpi siṃhāsanapatirbhavet |
kaupīnācchādanaṃ vāsā nivedya śivayogine ||

yugakoṭisahasrāṇi śivaloke mahīyate |
aurṇaṃ prāvaraṇaṃ datvā vistīrṇaṃ śivayogine ||

romṇiromṇisuvarṇasya dattasya phalamaśnute |
mṛgavyāghrādikaṃ carma tilapiṣṭamamarditam ||

mṛduraktakaṣāyeṇa yo dadyācchivayogine |
yāvat tadromasaṃkhyānāṃ mṛgavyāghādi carmaṇi ||

tāvad varṣasahasrāṇi śivaloke mahīyate |
jalasthalapavitrāṇi yo dadyācchivayogine ||

trāṇārthaṃ sūkṣmajantūnāmabdalakṣaṃ vaseddivi |
triviṣṭabdhasamāyuktaṃ yaḥ pradadyāt kamaṇḍalum ||

mahātapāṃsi yat kṛtvā puṇyaṃ tat sakalaṃ bhavet | labhet |
mṛduvāsaśca suślaṣṇaṃ prāṇi doṣavivarjitam ||

nivedya śivayogibhyaḥ sarvayajñaphalaṃ labhet |
mṛdbhasmādhārapātrāṇi vaṃśālābu kṛtāni ca ||

nivedya śivayogibhyassarvatīrthaphalaṃ labhet |
dattayāpanamuddiśya nivedyaśivayogine ||

divyastrī bhogasaṃyuktaṃ divyaramyaṃ puraṃ labhet |
yogapaṭṭopavītāni nivedya śivayogine ||

vastrayugmasahasrasya dattasya phalamāpnuyāt |
mṛdvaṃśālābudārvādyaṃ sukṛtaṃ bhaikṣabhojanam ||

nivedya śivayogibhyaḥ sadāsatraphalaṃ labhet |
śivabhaktāya yo dadyādupānāt kāṣṭhapāduke ||

sa carāśvasahasrasya dattasya phalamāpnuyāt |
kalmāṣadaṇḍaṃ yo dadyādannaṃ vā śivayogine ||

balāvaṣṭambhasaṃyuktaṃ sasyādaṇḍāgranāyakaḥ |
tālavṛntātapatraṃ vā yo dadyācchivayogine ||

ekacchatraṃ sa bhuñjīta maṇḍalaṃ śatayojanam ||

vātāśrayaviśeṣeṣu daṇḍeṣu śivayogine |
bhavet kṣitipatiśśrīmān kulādhāro guṇānvitaḥ |
śivajñānābhi yuktāya yo dadyāt pustakaṃ mahat ||

yugakoṭiśataṃ divyaṃ śivaloke mahīyate |
bhavedihāgataḥ śrīmān sukhāḍhyo vedapāragaḥ ||

p. 80(83)

sarvajñānārthavaktrā ca bṛhaspati samo bhavet |
śivayogī śivajñānī śivadharmarataśca yaḥ ||

śivaṃ saṃprāpya tulyātmā sarvatulyabalo bhavet |
yaḥ kuryātkārayedvāpi vapanaṃ śivayoginām ||

varṣalakṣaṃ mahābhoge śivaloke mahīyate ||

rudro rudrākṣadānena bhavatīti kimadbhutam ||

tanmālayā sadāhaste rudraśca kramate kṣitau |
rudrākṣaṇi svayaṃ rudro ye rudrānu carāssadā ||

rudrākṣadhāraṇāt tasmādiha rudraḥ paratra ca |
iti rudrākṣarudrāṇāṃ dhatte mālāṃ sadākare ||

śatārdhārdhapramāṇena rurudro nātrasaṃśayaḥ |
japaṃśca rudramantrāṇāṃ koṭikoṭi guṇo bhavet ||

mūrdhnihasto pavīte vā kṛtvā rudrākṣamālikām |
yasya bhuñjītatadbhuktaṃ svayaṃ rudrairnasaṃśayaḥ ||

rudrākṣadhāraṇāt tasmān nityameva praśasyate |
parasyānugrahārthāya brāhmaṇasya viśeṣataḥ ||

yatimātropakaraṇaṃ datvālpamatibhaktitaḥ |
varṣalakṣaṃ mahāyānaiśśivaloke mahīyate ||

kuryādāvasathaṃ saukhyaṃ guptaṃ ca śivayoginām |
śivālaye tu te yāvat tāvat puṇyaṃ viśeṣataḥ ||

yathā śivastathā yogī yathā yogī tathā śivaḥ |
tena yogīndrapātreṣu dānamaṇvapi cākṣayam ||

yadyadyadopayujyeta taddeyaṃ tasya yatnataḥ |
upayogapradhānābhyāṃ śreyastenobhayorapi ||

vyākhyāne śivadharmasya kṛtvā maṇḍapa(la)muttamam |
śobhitaṃ patrapuṣpādyairnyaset tatrāsanaṃ guroḥ ||

śobhitaṃ vastrapuṣpādyaiśśivadharmāsanaṃ mahat |
puratastadguroḥ sthāpya pūjayedubhayaṃ tataḥ ||

śivadharmapravaktāramācāryaṃ vācakaṃ tathā |
pūjayecchivadharmaṃ ca tulyameva dvayaṃ yataḥ ||

ya evaṃ nyāyato vakti śivadharmaṃ śṛṇoti ca |
āyurvidyāṃ yaśaḥ saukhyaṃ sa labdhvānte śivaṃ vrajet ||

ityeṣa vaḥ samākhyātaśśivadharmaḥ sanātanaḥ |
sarveṣāṃ śivabhaktānāṃ śivadharmaṃ śṛṇoti ca |
sarveṣāṃ śivabhaktānāmayaṃ vācyo viśeṣataḥ || vijānataḥ ||

śivāśrameṣu yo bhaktyā śivadharmaṃ prakīrtayet |
śṛṇuyādvāpaṭhet tasya śāstroktamakhilaṃ phalam ||

śrutvaitadakhilaṃ dharmamākhyātaṃ brahmasūnunā |
candrātreya sa gotrāya śivabhaktāya sāravit ||

p. 81(84)

sārātsāraṃ samuddhṛtya candrātreyena dhīmatā |
uktaṃ dvādaśamadhyāyaṃ dharmaśāstraṃ śivātmakam ||

yāvadyasyopadeśena śivadharmaṃ samācaret |
tāvattasyāpi tat puṇyamupadeṣṭurnasaṃśayaḥ ||

upadeśaṃ vinā tasmāddharmo jñātuṃ na śakyate |
na ca kartumavijñānāt tasmāt tulyaṃ tayoḥ phalam |
upadeṣṭānumantā ca kartākārayitā ca yaḥ |
kṛtānupālakaścaiva pañcatulyaphalāḥ smṛtāḥ ||

karturatyadhikaṃ puṇyaṃ tatkṛtaṃ yo'nupālayet |
yasmādāyatanaṃ kṣipraṃ nāśaṃ gacchedapālitam ||

bhūmiratnāśca nāgānāṃ go hiraṇyādi vāsasām |
bhavet pūrvaṃ hi dattānāṃ dānācchreyonupālanam ||

dāturabhyadikaṃ puṇyaṃ taddattaṃ yo nu pālayet |
apālitaṃ tu tadyasmāt tadahassaṃpraṇaśyati ||

tasmādupadiśeddharmaṃ svayaṃ caiva samācaret |
kārayedanumanyeta kṛtamanyaiśca pālayet ||

iti pañcaprakāro'yaṃ śivadharmaḥ prakīrtitaḥ |
bhadrācalaṃ rudrakoṭi ravimuktaṃ mahālayam |
go karṇaṃ bhadrakarṇaṃ ca suvarṇākṣo'yadīptimān |
sthānaṃ śivasya vikhyātaṃ triṣulokeṣu viśrutam ||

sthānāṣṭakamidaṃ jñeyaṃ rudrakṣemamahodayam |
bhadrā calādi sthānāni rudrasāyujyakāraṇam ||

bhāgalaṇḍanduraṇḍañca mākoṭaṃ maṇḍaleśvaraḥ |
kārañjaraṃ dāruvanaṃ śaṃkukarṇaṃ sthaleśvaram ||

pavitrāṣṭakamityetanmahāpuṇyapravardhanam |
mṛtāḥ prayānti tatraiva śivasya paramaṃ padam ||

gayā caiva kurukṣetraṃ babhruṃ kanakalaṃ tathā |
vimaleśvaroṭṭahāsaṃ ca mahendraṃ bhīmamaṣṭamam(kam) ||

etadguhyāṣṭakaṃ nāma sarvapātakanāśanam |(pāpavimocanam) |
gatvā tu puruṣaḥ śrīmān gatvā tu śivamandiram |
śrīparvate hariścandra jalpamātrodikeśvaraḥ ||

madhyamā ca mahākālaṃ kedāraṃ bhairavaṃ tahā |
etadguhyādhikaṃ guhyamaṣṭakaṃ parikīrtitam ||

santārya tu pitṝn sarvān śivaṃ śāntapadaṃ vrajet |
amareśvaraṃ prabhāsaṃ ca naimiśaṃ puṣkaraṃ tathā |
pāṣaṇḍaṃ daṇḍimuṇḍi ca bhārabhūtiṃ bhavāntikam ||

p. 82(85)

lakuṭīśvaro'ti vikhyātastathā pratyātmiko mahān |
pratyātmikāṣṭakamidaṃ kṣetraṃ rudrasya kāmikam ||

tatra yāti mṛtāḥ sarve rudrasya paramaṃ padam |
puṇyāṣṭakamidaṃ jñeyaṃ śivakṣetrasya lakṣaṇam |
dānānyāvasathaṃ kūpamudyānaṃ devatālayam ||

tīrtheṣveteṣu yaḥ kuryāt so'kṣayaṃ phalamāpnuyāt |
kṣāntiḥ spṛhādayāsatyaṃ dānaṃ śīlaṃ tapaḥ śrutam ||

etadaṣṭāṃgamuddiṣṭaṃ paraṃ pātrasya lakṣaṇam |
iti pañcaprakāro'yaṃ śivadharmaḥ prakīrtitaḥ |
kapālamālinaṃ devaṃ mahākālaṃ namostu te ||

candrārdhamastakaṃ nityaṃ carmavāsaḥ sadā priyam |
gajadharmadharaṃ nityaṃ caṇḍeśvara namostu te ||

triśūlapāṇe deveśa triṇetratridaśeśvara |
trimūrte ca mahātmānaṃ tripurānta namostu te |
sarveśvaraṃ sarvagataṃ sarvajaṃ(jñaṃ) sarvato mukham |
sarvatrāvasthitaṃ nityaṃ sarvavyāpin namostu te ||

sthūlasūkṣmavibhāgena vyāptaṃ yena carācaram |
anantānādimavyaktaṃ vyaktāvyakta namo'stu te ||

anantaṃ śāśvataṃ nityaṃ viśvaṃ dhruvamumāpatim |
śrīkaṇṭhaṃ sarvakaṇṭhaṃ ca nīlakaṇṭha namo'stu te ||

vidyāmayī yasya vidyā vidyātītaṃ ca yatsthitim |
sakalaṃ niṣkalaṃ caiva kalāhīna namostu te ||

yo gādhipo yogagamyo yogātmā yogasaṃbhavaḥ |
mahāyogaparaṃ nityaṃ yogeśvara namostu te ||

sarvatejo mayaṃ tejastejasāmapi taijasaḥ |
tejonidhiśca tejātmā tejo'tīta namostu te ||

omityekākṣaraṃ yastu prakhyātaṃ bhuvanatraye |
tasyāpyarthaparo nityaṃ sadāśiva namostu te ||

ardhamātrāt parārdhaṃ tu tasyārdhasya parātparam |
parāt paravaraṃ śāntaṃ śāntātīta namostu te ||

vālārkaśatabhāgasya śatadhākalpitasya ca |
anaupamyamanāmañca śivaśānta namo'stu te ||

(agrāhyamindriyairvāpi sarvavastuvivarjitam ||)
anantā nādimavyaktaṃ dehasthaṃ deha varjitam |
hṛdisthaṃ sarvabhūteṣu vyomasthañca namo'stu te |
agrāhyamindriyairvāpi sarvavastu vivarjitam |

p. 83(86)

sa tejo gūḍhamātmānaṃ guhyānāṃ guhyagocaram ||

guhāvāsa sadānityaṃ guhānāṃ gūḍhagocara |
guhāvāsa sadānityaṃ gūḍhārthaṃ ca namostu te ||

mahādevaṃ mahātmānaṃ mahāmāyā parāvaram |
mahājñānaṃ parātītaṃ jñānagamya namostu te ||

ekākṣaraścaturbhedaścaturmātrairalaṃkṛtam |
catuṣkalaṃ kalātītaṃ viśvātītaṃ namostu te |
īśānaṃ īśvaro brahmā sadāśiva namostu te ||

dharmāśca kāmamokṣāya sarvabhūtānukampayā |
sarvastaratu durgāṇi sarvobhadrāṇi paśya tu ||

sarvassugatimāpno tu sarvasya bhavataḥ śivam |
sarvassugatimāpnotu sarvasya bhavatāṃ śivam |

iti śrīśivadharmaśāstre nandiproktāyāṃ saṃhitāyāṃ śivavidyā 
śākhopaśākhā samuddeśo nāma dvādaśodhyāyaḥ ||

śivadharmassamāptaḥ ||

oṃ śivāyagurave namaḥ | śivamastu | śrīśivāya namaḥ ||



###########   END OF FILE  #######